The Old Testament of the Holy Bible

Genesis 1

Thil siam chanchin

1 A tîrin Pathianin lei leh vân a siam a. 2 Tin, lei hi a chhia a, a ruak ngawt a ni a; tui thûk tak chung chu a thim mup a. Pathian Thlarau chuan tui chungte chu a awp reng a. 3 Tin, Pathianin, “Êng lo awm rawh se,” a ti a; tichuan, êng a lo awm ta mai a. 4 Tin, Pathianin êng chu a en a, ṭha a ti hle a; tichuan, Pathianin êng leh thim chu a ṭhen ta a. 5 Tin, Pathianin êng chu “chhûn” a vuah a, thim chu “zân” a vuah a. Tichuan, tlai lam a awm a, zîng lam a awm bawk a, a ni khatna chu. 6 Tin, Pathianin, “Tui leh tui kârah chuan boruak zau tak awm sela, chu chuan tui leh tuite chu ṭhen rawh se,” a ti a. 7 Tichuan, Pathianin boruak zau tak chu a siam a, boruak zau tak hnuaia tui awmte leh boruak zau tak chunga tui awmte chu a ṭhen ta a; chutiang chu a lo ni ta a. 8 Tin, Pathianin boruak zau tak chu “vân” a vuah a. Tichuan, tlai lam a awm a, zîng lam a awm bawk a, a ni hnihna chu. 9 Tin, Pathianin, “Vân hnuaia tuite chu hmun khatah awm khâwm sela, khawmual chu lang rawh se,” a ti a; tichuan, chutiang chu a lo ni ta a. 10 Tin, Pathianin khawmual chu “lei” a vuah a; tui awm khâwmte chu “tuifinriatte” a vuah a. Tin, Pathianin chu chu a en a, ṭha a ti hle a. 11 Tin, Pathianin, “Leiin hnim te, thlai chi nei te, thei kûng, leia anmahni chi awm dân tûr anga rah, a rah chhûnga a chi awmte chu chhuah rawh se,” a ti a; tichuan, chutiang chu a lo ni ta a. 12 Tichuan, lei chuan hnim te, thlai anmahni chi awm dân tûr anga chi nei te, thing anmahni chi awm dân tûr anga rah, a rah chhûnga a chi awmte chu a chhuah ta a. Tin, Pathianin a en a, ṭha a ti hle a. 13 Tichuan, tlai lam a awm a, zîng lam a awm bawk a, a ni thumna chu. 14 Tin, Pathianin, “Chhûn leh zân ṭhenna tûrin vân boruak zau takah chuan êntute awm sela, chûngte chu chhinchhiahna te, hun bi te, ni te, kum te hriatna tûr ni rawh se; 15 lei chung ên tûrin vân boruak zau takah chuan êntuahte awm bawk rawh se,” a ti a; tichuan, chutiang chu a lo ni ta a. 16 Tichuan, Pathianin êntu ropui zâwk chu chhûn rorêl tûrin, êntu ropui lo zâwk chu zân rorêl tûrin a siam a; arsite pawh khi a siam bawk a. 17 Tin, Pathianin chûngte chu lei chung ên tûr leh, 18 chhûn chungah leh zân chunga rorêl tûr leh, êng leh thim ṭhen tûrin vân boruak zau takah khian a dah ta a. Tichuan, Pathianin chu chu a en a, ṭha a ti hle a. 19 Tichuan, tlai lam a awm a, zîng lam a awm bawk a, a ni lina chu. 20 Tin, Pathianin, “Tuite chuan thil siam che thei, nunna neite tam tak chhuah ṭheuh sela, savate pawh vân boruak zau tak, zâwl duaiah, lei chungah chuan thlâwk rawh se,” a ti a. 21 Tichuan, Pathianin tuifinriat lian pui puite chu a siam a, thil nung che thei tinrêng, tuiin a chhuah ṭheuhte chu, anmahni chi awm dân tûr ang ṭheuhvin a siam bawk a, sava thla nei tinrêng pawh anmahni chi awm dân tûr ang ṭheuhvin a siam bawk a. Tin, Pathianin chu chu a en a, ṭha a ti hle a. 22 Tin, Pathianin, “Chi tam tak thlahin lo pung ula, tuifinriat tuite tikhat rawh u, savate pawh leiah pung rawh se,” tiin mal a sâwm a. 23 Tichuan, tlai lam a awm a, zîng lam a awm bawk a, a ni ngana chu. 24 Tin, Pathianin, “Lei chuan thil nung anmahni chi awm dân tûr ang ṭheuhvin ran te, rannung te, ramsa te anmahni chi awm dân tûr ang ṭheuhvin chhuah rawh se,” a ti a; tichuan, chutiang chu a lo ni ta a. 25 Tichuan, Pathianin ramsa anmahni chi awm dân tûr ang ṭheuhvin, rante anmahni chi awm dân tûr ang ṭheuhvin, leia bawkvâka kal zawng zawngte anmahni chi awm dân tûr ang ṭheuhvin a siam a. Tin, Pathianin chu chu a en a, ṭha a ti hle a. 26 Tin, Pathianin, “Kan anpuiin, keimahni ang takin mihring siam ila; anni chu tuifinriata sangha chungah te, rannung leia bawkvâka kal zawng zawng chungah te thu i neihtîr ang u,” a ti a. 27 Tichuan, Pathianin ama anpuiin mihring a siam a, Pathian anpui ngeiin a ni a siam ni; mipaah leh hmeichhiaah a siam a ni. 28 Tin, Pathianin anmahni mal a sâwm a; Pathian vêkin an hnênah, “Chi tam tak thlaha lo pungin, leilung hi luah khat ula, in thu thuin awmtîr rawh u; tuifinriata sangha chungah te, chunglêng sava chungah te, thil nung leia bawkvâka kal zawng zawng chungah te thu nei bawk rawh u,” a ti a. 29 Tin, Pathian vêkin, “Ngai teh u, lei chung zawng zawnga thlai chi nei awm tinrêng leh thing tinrêng, thing chi nei rah awmnate chu ka pe che u a ni; in chaw atân a ni ang. 30 Tin, leia sa tinrêng hnênah te, chunglêng sava tinrêng hnênah te, leia bawkvâka kal, nunna nei tinrêng hnênah te an chaw atân hnim hring tinrêng ka pe a ni,” a ti a; tichuan, chutiang chu a lo ni ta a. 31 Tin, Pathianin a thil siam tinrêng chu a en a, ngai teh, ṭha a ti êm êm a. Tichuan, tlai lam a awm a, zîng lam a awm bawk a, a ni rukna chu.

Genesis 2

1 Tichuan, lei leh vân chu an chunga awmho zawng zawngte nên chuan siam zawh a ni ta a. 2 Tin, Pathianin ni sarih niah chuan a thil siam chu a ti zo va, ni sarih niah chuan a thil siam zawng zawng chu a chawlhsan ta a. 3 Tichuan, Pathianin ni sarih ni chu mal a sâwm a, a serh ta a; chumi niah chuan Pathianin a thil siam zawng zawng, thu ngawta a siam leh kuta a siamte chu a chawlhsan tâk avângin.

Eden huan

4 Lei leh vân siam dân chu hetiang hi a ni, LALPA Pathianin lei leh vân a siam ni khân, 5 leia hnim rêng rêng hi leiah a la awm lo va, leia thlai rêng rêng pawh hi a la ṭo hek lo. LALPA Pathianin lei chungah ruah a la sûrtîr si lo va, lei lettu tûrin mihring lah an la awm hek lo; 6 amaherawhchu, lei aṭangin chhûm a lo chhuak a, lei chung zawng zawng chu a tihnâwng ṭhîn a ni. 7 Tin, LALPA Pathianin leia vaivutin mihring a siam a, a hnârah chuan nunna thaw chu a thaw lût a; tichuan, mihring chu mi nung a lo ni ta a. 8 Tin, LALPA Pathianin chhak lamah, Eden-ah chuan huan a siam a, a mihring siam chu chutah chuan a awmtîr ta a. 9 Tin, lei aṭangin LALPA Pathianin thing mit la tak leh ei mi tinrêng a ṭotîr a. Nunna thing pawh huan lai takah chuan a ṭotîr a, a chhia leh a ṭha hriatna thing pawh. 10 Tin, Eden aṭangin huan tihnâwng tûrin lui a luang chhuak a; chuta ṭang chuan a pêng darh a, pêng li a lo ni ta a. 11 A pakhatna hming chu Pison a ni a; chu chu Havila ram zawng zawng hualtu chu a ni a, chutah chuan rangkachak a awm. 12 Chumi rama rangkachak chu ṭha tak a ni. Chutah chuan bedolak leh berul lung pawh a awm. 13 Tin, lui pahnihna hming chu Gihon a ni a; chumi chu Kus ram zawng zawng hualtu chu a ni. 14 Tin, lui pathumna hming chu Hiddekel a ni a; chu chu Assuria ram chhak lama luang chu a ni. Tin, lui palina chu Euphrates a ni. 15 Tin, LALPA Pathian chuan mihring chu a hruai a, Eden huanah chuan a enkawl leh a vêng tûrin a dah ta a. 16 Tin, LALPA Pathian chuan mihring hnênah chuan, “Huana thing tinrêng rahte hi i duh duhin i ei thei e; 17 a chhia leh a ṭha hriatna thing rah erawh hi chu i ei tûr a ni lo, i ei chuan i ei ni la lain i thi ngei tûr a ni,” tiin thu a pe a. 18 Tin, LALPA Pathian chuan, “Mihring amah chauhva awm hi a ṭha lo ve; amah ṭanpuitu tûr a kawppui âwm mi ka siamsak teh ang,” a ti a. 19 Tin, LALPA Pathian chuan leiin ramsa tinrêng leh chunglêng sava tinrêng chu a siam a, an hmingah eng nge a vuah dâwn tih hriat nân Adama hnênah a hruai hlawm a; tin, thil nung tinrêngte chu Adaman an hminga a lo vuah apiang chu an hming a lo ni hlen ta a. 20 Tichuan, Adama chuan ran zawng zawng te, chunglêng sava te, ramsa tinrêng te chu hming a vuah ṭheuh va; nimahsela, Adama tân chuan ṭanpuitu tûr a kawppui âwm mi a awm lo va. 21 Tichuan, LALPA Pathian chuan Adama chu tui takin a muthilhtîr a; tichuan, a muhîl ta a; tin, a nâkruh pakhat a la a, chu chu tisain a awh phuitîr ta a. 22 Tin, LALPA Pathian chuan Adama laka a lâk nâkruh chu hmeichhiaah a siam a, Adama hnênah a hruai ta a. 23 Tin, Adama chuan, “Hei zet chu ka ruh ang ruh neia, ka tisa ang tisa nei ngei chu a ni; mipa laka lâk chhuah a nih avângin ‘hmeichhia’ tih tûr a ni ang,” a ti a. 24 Chuvângin, mipain a nu leh a pa a kalsan ang a, a nupui a vuan ang; tichuan, tisa pumkhat an lo ni tawh ang. 25 Tin, Adama leh a nupui chu an pahnihin saruakin an awm a, an zak lêm lo va.

Genesis 3

Mihring thu awih lohna

1 Tin, LALPA Pathianin ramsa a siam zawng zawngah chuan rûl a fing vervêk ber a. Tichuan, ani chuan hmeichhe hnênah chuan, “Pathianin, ‘Huana thing rah rêng rêng hi in ei tûr a ni lo,’ a ti elo maw?” a ti a. 2 Tin, hmeichhia chuan rûl hnênah chuan, “Ti lo ve, huana thing rahte hi kan ei thei asin; 3 huan lai taka thing awm rah erawh chu Pathianin, ‘In ei tûr a ni lo, tawh pawh in tawk tûr a ni lo; chuti lo chuan, in thi ang,’ a ti a ni,” a ti a. 4 Tin, rûl chuan hmeichhe hnênah chuan, “Thi teh suh e; 5 in ei ni apang chuan in mit a lo vâr ang a, a chhia leh a ṭha hriain Pathian ang in lo ni dâwn tih Pathianin a hre reng a nih chu,” a ti a. 6 Tichuan, hmeichhia chuan thing rah chu ei mi a ni tih leh, mit la tak a ni tih leh, mi tifing tûrin thing rah îtawm tak a ni tih a hriat chuan, a rah ṭhenkhat chu a lo va, a ei ta a; tin, a pasal a pe ve a, ani pawhin a ei ve ta a. 7 Tichuan, an pahnih chuan an mit a lo vâr a, saruak an nih an lo inhre ta a; tichuan, theipui hnah an ṭhui khâwm a, pawnfên an insiam chawp a. 8 Tin, LALPA Pathian chu huana tlai ni nêma a lêng thâwm chu an lo hria a; tichuan, Adama leh a nupui chuan huana thing zîngah chuan LALPA Pathian chu an lo bihrûksan ta a. 9 Tin, LALPA Pathian chuan Adama chu a ko va, a hnênah, “Khawiah nge i awm?” a ti a. 10 Tin, ani chuan, “Huana i thâwm ka hria a, saruaka awm ka nih avângin ka hlau ta a; tichuan, ka biru ta a ni,” a ti a. 11 Tin, ani chuan, “Saruak i nih tuin nge hrilh che? Thing rah ei loh tûr ka tih tlat che kha i ei ta a ni maw?” a ti a. 12 Tin, Adama chuan, “Mi awmpui tûra i hmeichhe mi pêk ngei khân thing rah chu mi pe a, ka ei ta a ni,” a ti a. 13 Tin, LALPA Pathian chuan hmeichhe hnênah chuan, “I thiltih hi engtizia nge ni le?” a ti a. Tin, hmeichhia chuan, “Rûlin mi tihder a, ka ei ta a ni,” a ti a.

Pathian hremna

14 Tin, LALPA Pathian chuan rûl hnênah chuan, “Hetiang hi i tih avângin ran zawng zawng leh ramsa tinrêng zingah chuan ânchhe dawngin i awm bîk ang a; bawkkhupin i kal tawh ang a, i dam chhûng zawngin vaivut i ei bawk tûr a ni. 15 Tin, nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang; chu mi chuan i lu a la tithitling ang a, nangin a keartui i la tithitling ang,” a ti a. 16 Hmeichhe hnênah chuan, “I hrehawmna leh i nau paina chu nasa takin ka tipung ang a; hrehawm takin fa i hring thîn ang a; nimahsela, i duh zâwng chu i pasal lam a ni ang a, ani chuan i chungah thu a nei fo vang,” a ti a. 17 Tin, Adama hnênah chuan, “I nupui thu i zawma, thing pakhat, ‘A rah i ei tûr a ni lo,’ tia thu ka pêk che kha, a rah i ei avângin lei hi nangmah avângin ânchhe dawngin a awm ta a ni; i dam chhûng zawngin rim taka thawkin a rah chu i ei tawh ang. 18 Hlîng leh buarte pawh a chhuaksak ang che; tin, leia thlai chu i ei tawh ang. 19 Tin, leia i kîr leh hma loh chuan i hmaia thlantui luang zawih zawihin chaw i ei tawh ang, lei aṭanga lâk chhuah i ni si a; vaivut i ni a, vaivutah i kîr leh tûr a ni,” a ti a. 20 Tin, Adama chuan a nupui chu mi nung zawng zawng nu a nih avângin a hmingah Evi a vuah a. 21 Tin, LALPA Pathian chuan Adama tân leh a nupui tân chuan savun kawrfualte a siamsak a, a haktîr ta a.

Huan ata Adama leh Evi hnawh chhuah

22 Tin, LALPA Pathian chuan, “Ngai teh u, mihring chu a chhia leh a ṭha hriain keimahni ang a lo ni ta; tûnah chuan a kuta banin, nunna thing rah chu lova eiin, kumkhuain a nung dah ang e,” a ti a; 23 chuvângin, LALPA Pathian chuan amah a lâk chhuahna lei chu let tûrin Eden huan ata chu a tîr chhuak ta a. 24 Chutichuan, mihring chu a hnawt chhuak ta a; tin, nunna thing kawng chu vêng tûrin, Eden huan chhak lampangah chuan cherub-te leh mei khandaih vir tawn zawk zawk chu a awmtîr ta bawk a.

Genesis 4

Kaina leh Abela

1 Tin, Adama chuan a nupui Evi chu a pâwl a; tichuan, a rai a, Kaina a hring a, “LALPA ṭanpuiin mipa ka lo nei ta,” a ti a. 2 Tin, a nau Abela a rawn hring leh a. Tin, Abela chu berâm vêngtuah a awm a, Kaina erawh chu lei lettuah a awm. 3 Tin, a nakinah chuan heti hi a ni a, Kaina chuan LALPA hnêna hlan atân lova mi a rawn la a. 4 Tin, Abela pawh chuan a berâm rual zînga piang hmasa berte leh a thau chu a rawn la bawk a. Tin, LALPA chuan Abela leh a thilhlan chu a lâwm a; 5 Kaina leh a thilhlan erawh chu a lâwm ve lo va. Tichuan, Kaina chu a thinur êm êm a, a hmêl chu a lo dur ta khup a. 6 Tichuan, LALPA chuan Kaina hnênah chuan, “Engati nge i thin a ur? Engati nge i hmêl a lo dur tâk? 7 Thil i tih ṭhat chuan lawm i hlawh dâwn lo vem ni? I tih ṭhat loh erawh chuan sual chu kawngka bulah a bawk reng a ni; a duh zâwng chu nangma hnên lam a ni ang a, a chungah thu i nei tûr a ni,” a ti a. 8 Kaina chuan a nau Abela hnênah, “Lovah i feh ang,” a ti a. Tin, heti hi a ni a, lova an awm laiin Kaina chuan a nau Abela chu a bei a, a that ta mai a. 9 Tichuan, LALPA chuan Kaina hnênah chuan, “I nau Abela kha khawiah nge a awm tâk?” a ti a. Tin, ani chuan, “Ka hre lo. Ka nau vêngtu ka ni em ni?” a ti a. 10 Tin, ani chuan, “Eng nge i tih tâk ni? I nau thisen aw chuan lei aṭangin mi au asin. 11 Chuvângin, lei, i kut ata i nau thisen dawng tûra a kâ lo ângtu ata hi ânchhe dawng i ni ta. 12 Lei i leh pawhin a ṭhatna chu a pe phal tawh lo vang che. Leiah hian tlân bo leh vâkvai i lo ni tawh ang,” a ti a. 13 Tin, Kaina chuan LALPA hnênah, “I mi hremna hi a nasa êm a, ka tuar zo lo vang. 14 Ngai teh, nangin vawiinah hian lei chung ata mi hnawt chhuak ta si a, i mit hmuh phâk lohva thuhrûkin ka awm dâwn ta a; leiah hian tlân bo leh vâkvai ka lo ni dâwn ta si a; tichuan, heti hi a ni ang a, tu pawh mi hmu apiangin mi that mai ang,” a ti a. 15 Tin, LALPA chuan a hnênah, “Chuti a nih chuan, tu pawh Kaina that apiang chu a leh sarihin a chungah phuba lâk a ni ang,” a ti a. Tichuan, miin amah an hmuha an thah loh nân LALPAN Kaina chu a chhinchhiah ta a. 16 Tichuan, Kaina chu LALPA hnên ata chu a chhuak a, Eden chhak lama Nod ramah chuan a awm ta a.

Kaina thlahte

17 Tin, Kaina chuan a nupui a pâwl a; tichuan, a rai a, Enoka a hring a. Tin, khua a siam a, a khaw hmingah chuan a fapa hming chawiin Enok a ti a. 18 Tin, Enoka chuan fapa Irada a nei a, Irada chuan fapa Mehujaela a nei a, Mehujaela chuan fapa Methusaela a nei a, Methusaela chuan fapa Lameka a nei a. 19 Tin, Lameka chuan nupui pahnih a nei a: pakhat hming chu Adai a ni a, pakhat hming chu Zillai a ni. 20 Tin, Adai chuan Jabala a hring a; ani chu puan ina awm ran vulhtuho thlahtu a ni. 21 A nau hming chu Jubala a ni a; ani chu ṭingṭang leh phênglâwng tumtuho zawng zawng thlahtu a ni. 22 Tin, Zillai pawh chuan Tubal-kaina, dâr leh thîr hriamhrei tinrêng chhertu a hring a. Tin, Tubal-kaina farnu chu Naami a ni. 23 Tin, Lameka chuan a nupuite hnênah chuan: “Adai leh Zillai-te u, ka aw hria ula; Lameka nupuite u, ka thusawi hi ngaithla rawh u. Mi tihhliam avângin mi ka that a, Mi vuak thitlin avângin tlangvâl ka that a ni. 24 Kaina phuba mah a leh sariha an lâk dâwn chuan, Lameka phuba chu a leh sawmsarih leh pasarihin an la ngei ngei ang,” a ti a.

Setha leh Enosa

25 Tin, Adama chuan a nupui chu a pâwl leh a; tichuan, ani chuan fapa a hring leh a, a hmingah chuan Setha a sa a: “Pathianin Abela aiah chi thlah dang mi ruatsak ta; Kaina chuan amah a that ta si a,” a ti a. 26 Tin, Setha chuan, amah ngei pawh chuan fapa a nei ta a; a hmingah chuan Enosa a sa a. Chumi lai chuan miten LALPA hming chu an lo lam ṭan ta a.

Genesis 5

Adama thlahte

1 Hei hi Adama thlahte chuanna lehkhabu chu a ni. Pathianin thu ngawta mihring a siam ni khân Pathian anpuiin amah chu a siam a. 2 Thu ngawtin mipa leh hmeichhiaah anmahni chu a siam a ni; thu ngawta siama an awm ni khân mal a sâwm a, an hmingah chuan “mihring” a vuah a. 3 Tin, Adama chuan kum za leh kum sawmthum a nihin amah ang tak, ama anpui ngei fapa a nei a; a hmingah chuan Setha a sa a. 4 Tin, Setha a neih hnu chuan Adama chu kum zariat a la dam a; fanu leh fapate a nei leh hlawm a. 5 Tichuan, Adama dam chhûng zawng zawng chu kum zakua leh kum sawmthum a ni a; tin, a thi ta a. 6 Tin, Setha chuan kum za leh kum nga a nihin fapa Enosa a nei a. 7 Tin, Enosa a neih hnu chuan Setha chu kum zariat leh kum sarih a la dam a, fanu leh fapate a nei leh hlawm a. 8 Tichuan, Setha dam chhûng zawng zawng chu kum zakua leh kum sâwm leh kum hnih a ni a; tin, a thi ta a. 9 Tin, Enosa chuan kum sawmkua a nihin fapa Kenana a nei a. 10 Tin, Kenana a neih hnu chuan Enosa chu kum zariat leh kum sâwm leh kum nga a la dam a, fanu leh fapate a nei leh hlawm a. 11 Tichuan, Enosa dam chhûng zawng zawng chu kum zakua leh kum nga a ni a; tin, a thi ta a. 12 Tin, Kenana chuan kum sawmsarih a nihin fapa Mahalalela a nei a. 13 Tin, Mahalalela a neih hnu chuan Kenana chu kum zariat leh kum sawmli a la dam a, fanu leh fapate a nei leh hlawm a. 14 Tichuan, Kenana dam chhûng zawng zawng chu kum zakua leh kum sawm a ni a; tin, a thi ta a. 15 Tin, Mahalalela chuan kum sawmruk leh kum nga a nihin fapa Jareda a nei a. 16 Tin, Jareda a neih hnu chuan Mahalalela chu kum zariat leh kum sawmthum a la dam a, fanu leh fapate a nei leh hlawm a. 17 Tichuan, Mahalalela dam chhûng zawng zawng chu kum zariat leh kum sawmkua leh kum nga a ni a; tin, a thi ta a. 18 Tin, Jareda chuan kum za leh kum sawmruk leh kum hnih a nihin fapa Enoka a nei a. 19 Tin, Enoka a neih hnu chuan Jareda chu kum zariat a la dam a, fanu leh fapate a nei leh hlawm a. 20 Tichuan, Jareda dam chhûng zawng zawng chu kum zakua leh kum sawmruk leh kum hnih a ni a; tin, a thi ta a. 21 Tin, Enoka chuan kum sawmruk leh kum nga a nihin fapa Methusela a nei a. 22 Tin, Methusela a neih hnu chuan, Enoka chu kum zathum chhûng zawng Pathian nên an lêng dûn ṭhîn a, fanu leh fapate a nei leh hlawm a. 23 Tichuan, Enoka dam chhûng zawng zawng chu kum zathum leh kum sawmruk leh kum nga a ni a. 24 Tin, Enoka chu Pathian nên an lêng dûn ṭhîn a; tin, a awm ta lo va, Pathianin a la bo ta a ni. 25 Tin, Methusela chuan kum za leh kum sawmriat leh kum sarih a nihin fapa Lameka a nei a. 26 Tin, Lameka a neih hnu chuan Methusela chu kum zasarih leh kum sawmriat leh kum hnih a la dam a, fanu leh fapate a nei leh hlawm a. 27 Tichuan, Methusela dam chhûng zawng zawng chu kum zakua leh kum sawmruk leh kum kua a ni a; tin, a thi ta a. 28 Tin, Lameka chuan kum za leh kum sawmriat leh kum hnih a nihin fapa a nei a. 29 Tin, “He mi ngei hian LALPA ânchhe lawh lei avânga kan hnathawhna leh kuta kan thawh rimnaah hian min thlamuan tawh ang,” tiin a hmingah Nova a sa a. 30 Tin, Nova a neih hnu chuan Lameka chu kum zanga leh kum sawmkua leh kum nga a la dam a, fanu leh fapate a nei leh hlawm a. 31 Tin, Lameka dam chhûng zawng zawng chu kum zasarih leh kum sawmsarih leh kum sarih a ni a; tin, a thi ta a. 32 Tin, Nova chu kum zanga mi a ni a; Nova chuan fapa Sema te, Hama te, Japhetha te a nei a.

Genesis 6

Mihring zînga sualna pung

1 Tin, heti hi a ni a, lei chungah mihring an lo puna fanute an lo neih hlawm chuan, 2 Pathian fapate chuan mihring fanute chu hmêlṭha takin an hmu a; tichuan, an duh zâwng apiang chu nupuiah an nei ta ṭhîn a. 3 Tichuan, LALPA chuan, “Ka Thlarau chuan mihring chu kumkhuain a bei reng lo vang, anni chu tisa an ni si a; nimahsela, kum za leh kum sawmhnih chu an la dam ang,” a ti a. 4 Chûng lai chuan mi lianho chu leiah hian an awm a; chumi hnuah pawh Pathian fapaten mihring fanute chu an pâwl a, an laka fate an neih ṭhin lai khân an awm bawk a. Chûngte chu hmasânga mi chak, mi hmingthangte kha an ni. 5 Tin, LALPA chuan leiah hian mihring sualzia chu nasa tak a ni tih leh, an rilru suangtuahzia rêng rêng chu sual hlîr a ni fo mai tih a lo hria a. 6 Tichuan, leiah hian mihring a lo siam tâk avângin LALPA chu a inchhîr a, rilru nat nân a hman phah ta a. 7 Tichuan, LALPA chuan, “Ka mihring siam hi lei chung ata ka tiboral teh mai ang; mihring te, sa te, rannung te, chunglêng sava te nên lam hian; ka siam tâk avângin ka inchhîr a ni,” a ti a. 8 Nova erawh chuan LALPA mit a tlung a.

Nova chanchin

9 Hêng hi Nova thlahte chu an ni. Nova chu mi fel tak a ni a, a dam rualpuite zîngah chuan sawisêl bo a ni. Nova chu Pathian nên an lêng dûn ṭhîn a. 10 Tin, Nova chuan fapa pathum: Sema te, Hama te, Japhetha te a nei a. 11 Tin, lei hi Pathian mit hmuhin a chhe zo tawh a, lei hi inpâwngnêknain a khat zo ta bawk a. 12 Tin, Pathianin lei hi a en a, tin, ngai teh, a chhe zo tawh a; tisa zawng zawngin leiah hian an awm dân an tichhe zo tawh si a. 13 Tin, Pathianin Nova hnênah, “Tisa zawng zawng tâwpna chu ka hmaah a lo thleng ta a ni, anmahni avângin lei hi inpâwngnêknain a khat zo ta si a; tichuan, ngai teh, a lei chawpin ka tiboral dâwn e. 14 I tân fâr thingin lawng siam rawh; lawngah chuan pindante i siam tûr a ni a, a chhûng lam leh a pâwn lam chu fâr hnai i hnawih vek bawk tûr a ni. 15 Tin, hei hi i siam dân tûr chu a ni: lawng dung lam chu tawng zathum ni sela, a vâng lam chu tawng sawmnga ni sela, a sân lam chu tawng sawmthum ni rawh se. 16 Lawngah chuan tukverh i siam tûr a ni a, a chung lam tawng khat chinah chuan i zo tûr a ni; tin, lawng kawngka chu a pangah i siam tûr a ni a. Chhâwng hnuaihnung leh chhâwng hnihna leh chhâwng thumna neiin i siam tûr a ni. 17 Tin, ngai teh, keimah ngeiin tisa zawng zawng, nunna thaw pai rêng rêng chu vân hnuai ata tiboral tûrin leiah hian tui ka tilêt dâwn a ni; leia thil tinrêng awm hi an thi vek ang. 18 Amaherawhchu, ka thuthlun chu i chungah ka tinghet zâwk ang a; lawngah chuan i lût tûr a ni: nang i lût tûr a ni a, i fapate leh i nupui leh i fapate nupuite pawh i hnênah an lût ve tûr a ni. 19 Tin, tisa zawng zawnga thil nung tinrêng zînga mi, chi tin pahnih zêlin i hnênah tihnun ve tûrin lawngah chuan i hruai lût tûr a ni; a nu leh pa zêl an ni tûr a ni. 20 Savate anmahni chi awm dân ang ṭheuhvin, rante anmahni chi awm dân ang ṭheuhvin, leia rannung tinrêng anmahni chi awm dân ang ṭheuhvin, chi tin pahnih zêlin, i tihnun tûrin i hnênah an lo kal tûr a ni. 21 Tin, chaw in ei mi zawng zawng la la, i hnênah dah khâwm rawh; tichuan, nang leh anni tân chaw a ni ang,” a ti a. 22 Chutiang chuan Novan a ti a; Pathianin a hnêna thu a pêk zawng zawng ang ngei chuan a ti ta a.

Genesis 7

Tuilian sâng

1 Tin, LALPAN Nova hnênah chuan, “Nang leh i chhûngte zawng zawng chu lawngah lût rawh u; nang zawng tûnlai ṭhangthar zîngah hian ka mit hmuhin mi fel tak i nih hi ka hria che a ni. 2 Sa thiang tinrêng zînga mi, a pa leh a kawppui nu nên ṭheuh tuak sarih zêlin; sa thiang lo zînga mi, a pa leh a kawppui nu nên ṭheuh tuak khat zêlin; 3 chunglêng sava zînga mi pawh, a nu leh a pa ṭheuh tuak sarih zêlin, lei chung zawng zawngah chi thlah tûra tihnun tûrin i hnênah i hruai tûr a ni. 4 Ni sarih a la bâk a, chumi hnuah chuan lei chungah hian ni sawmli leh zan sawmli chhûng zawng ruah ka sûrtîr ang a, ka thil nung siam tinrêng hi lei chung ata ka tiboral ang,” a ti a. 5 Tichuan, Nova chuan LALPAN a hnêna thu a pêk zawng zawng ang zel chuan a ti ta a. 6 Tin, leia tui a lêt lai chuan Nova chu kum zaruk mi a ni a. 7 Tin, tui a lêt dâwn avângin Nova chu lawngah chuan a lût a, a fapate leh a nupui leh a fapate nupuite pawh a hnênah an lût ve a. 8-9 Pathianin Nova thu a pêk ang khân sa thiang zînga mi pawh, sa thiang lo zînga mi pawh, sava zînga mi pawh, leia bawkvâka kal tinrêng zînga mi pawh, a nu leh a pa ṭheuh, a tuak zêlin Nova hnênah lawngah chuan an lût ta a. 10 Tin, ni sarih hnuah chuan leiah hian tui chu a lo lêt ta a. 11 Nova chu kum zaruk a nih kum, a thla hnihna ni sâwm leh ni sarih niah, chumi ni ngei chuan tui thûk zau tak hna zawng zawngte chu a lo sah ta vek a, vân tukverhte pawh a lo inhawng ta bawk a. 12 Tin, ni sawmli leh zan sawmli chhûng zawng leiah hian ruahpuivânâwn a sûr ta a. 13 Chumi ni ngei chuan Nova te, Nova fapa Sema te, Hama te, Japhetha te, Nova nupui leh a fapate nupui pathumte chu lawngah chuan an lût ta a. 14 Anniho bâkah sa tinrêng anmahni chi awm dân ang ṭheuhvin, ran zawng zawng anmahni chi awm dân ang ṭheuhvin, rannung leia bawkvâka kal tinrêng anmahni chi awm dân ang ṭheuhvin, sava tinrêng anmahni chi awm dân ang ṭheuhvin sava tinrêng, thla nei tinrêng chu an lût bawk a. 15 Tichuan, tisa zawng zawng nunna thaw pai rêng rêngte chu, a tuak zêlin Nova hnênah lawngah chuan an lût ta a. 16 Tin, a lûtte chu Pathianin a hnêna thu a pêk angin tisa zawng zawng zînga mi a nu leh a pa zêlin an lût a; tin, LALPAN ani chu a khâr khum ta a. 17 Tin, tui chu leiah hian ni sawmli chhûng zawng a lêt a; tui chu a lo awm ta pûng a, lawng chu a chîm lâng a, lei chung lamah a sêp kâng ta a. 18 Tin, tui chu a lo awm ta pûng pûng a, lei chungah hian a lo pung ta chiam a, lawng chu tui chungah chuan a lâng zêl a. 19 Tin, lei chungah hian tui chu nasa takin a lo pung a; vân hnuaia tlâng sâng zawng zawngte chu a pil zo ta vek a. 20 Tawng sâwm leh tawng nga zeta sângin a lo awm ta pûng a; tlângte chu a pil ta daih a. 21 Tichuan, tisa, lei chunga che thei zawng zawng: sava te, ran te, sa te, rannung lei chunga bawkvâka kal tinrêng te, mihring zawng zawngte chu an thi zo ta vek a. 22 An hnâra nunna thlarau thaw awmna zawng zawng, khawmuala awm apiangte chu an thi zo ta vek a. 23 Tichuan, lei chunga thil nung awm tinrêng: mihring te, ran te, rannung te, chunglêng savate chu tihboralin an awm a; lei ata tihboralin an awm ta. Nova leh lawnga a hnêna awmte chauh chu zuahin an awm ta a. 24 Tin, tui chu ni za leh ni sawmnga chhûng zawng chuan leiah hian a awm ta pûng mai a.

Genesis 8

Tuilian a kâm

1 Tin, Pathianin Nova leh lawnga a hnêna thil nung tinrêng leh ramsa zawng zawng awmte chu a hre reng a; tin, Pathianin lei chung lamah hian thli a tlehtîr a; tichuan, tui chu a lo kâm ṭan ta a. 2 Tui thûk tak hnate leh vân tukverhte pawh chu a lo inkhâr a, vân aṭanga ruah lo sûr chu tihbânin a awm ta bawk a. 3 Tichuan, tui chu lei chung ata a kâm ta deuh deuh va. Tichuan, ni za leh ni sawmnga a ral hnu chuan tui chu a lo tlêm ta deuh va; 4 tichuan, lawng chu thla sarihna ni sâwm leh ni sarih niah chuan Ararat tlângah a innghat ta a. 5 Tin, tui chu thla sâwmna thlengin a tlêm ta deuh deuh zêl a; tin, thla sâwmna ni khat niah chuan tlâng chhîpte chu a lo lang ta a. 6 Tin, ni sawmli hnuah chuan heti hi a ni a, Nova chuan lawng tukverh a siam kha a hawng ta a. 7 Tin, choâk pakhat a thlawh chhuahtîr a; chu chu a chhuak a, lei ata tui chu a kang zawh hma loh chuan a thlâwk vêl a thlâwk vêl a. 8 Tin, lei chungah tui a tlêm tawh nge tawh lo tih hriat nân ṭhuro a thlawh chhuahtîr leh a; 9 nimahsela, ṭhuro chuan fûkna rêng rêng a hmu lo va, a hnênah lawngah a kîr leh ta a, tui chu lei chung zawng zawngah chuan a la awm si a. Tichuan, a kut a han zen chhuak a, a man a, lawng chhûngah chuan a hnênah a la lût leh ta a. 10 Tin, ni sarih dang a nghâk leh rih a, ṭhuro chu lawng aṭangin a thlawh chhuahtîr leh a. 11 ṭhuro chu tlai lamah chuan a hnênah a lo lût leh a; tin, ngai teh, a hmuiah chuan olive hnah tihthlawn hlim a rawn pu a; chutichuan, Nova chuan leiah tui a tlêm ta tih a hre ta a. 12 Tin, ni sarih dang a nghâk leh pek a, ṭhuro chu a thlawh chhuahtîr leh a; tin, a hnênah a lo kîr leh ta lo va. 13 Tin, heti hi a ni a, a kum zaruk leh kum khatnaah, a thla khatna ni khat niah chuan tui chu lei ata a kang zo ta a; tichuan, Nova chuan lawng khuhna chu a hlîm a, a en a; tin, ngai teh, lei chung chu a lo hil ta tlung a. 14 Tin, a thla hnihna ni sawmhnih leh ni sarih niah chuan lei chu a lo ro zo ta a. 15 Tin, Pathianin Nova hnênah chuan, 16 “Lawng ata chhuak rawh, nang leh i nupui leh i fapate leh i fapate nupuite pawh i hnênah chhuak ve rawh se. 17 Tisa zawng zawng zînga mi thil nung tinrêng i awmpuite kha, sava te, ran te, rannung lei chunga bawkvâka kal tinrêngte nên khân i hnênah hruai chhuak rawh, leiah hian no nei ṭeuhvin, chi tam tak thlaha an lo punna tûrin,” tiin a sawi a. 18 Tichuan, Nova chu a chhuak a, a fapate leh a nupui leh a fapate nupuite pawh a hnênah an chhuak ve a. 19 Sa tinrêng te, rannung tinrêng te, sava tinrêng te, lei chunga che thei apiangte chu anmahni chi awm dân ang ṭheuhvin lawng ata chu an chhuak a.

Novan Pathian tân inthawina a hlân

20 Tin, Nova chuan LALPA tân maichâm a siam a; tin, sa thiang tinrêng zînga mi leh sava thiang tinrêng zînga mi a la a, maichâmah chuan hâlral thilhlante a hlân ta a. 21 Tin, LALPAN rimtui chu a hria a; tin, LALPA chuan a rilruin, “Lei chu mihring avângin ânchhia ka lawh leh tawh lo vang, mihring rilru ngaihtuahnate chu an naupan têt ata a sual si a; tûna ka hrem ang hian thil nung tinrêng ka hrem leh tawh hek lo vang. 22 Lei awm chhûng zawng buh tuh leh buh lâk te, khaw vâwt leh khaw lum te, nipui leh thlasik te, chhûn leh zân te chu a bo lo vang,” a ti a.

Genesis 9

Nova hnêna Pathian thuthlung

1 Tin, Pathianin Nova leh a fapate chu mal a sâwm a, an hnênah, “Chi tam tak thlaha lo pungin, lei hi luah khat rawh u. 2 Nangmahni ṭihna leh hlauhna leia sa tinrêng leh chunglêng sava tinrêngin an nei ang; chûngte leh leia bawkvâka kal zawng zawng leh tuifinriat sangha zawng zawngte chu, in kuta pêk an ni vek tawh. 3 Thil nung che thei tinrêngte chu in tân ei tûr an ni ang a; thlai hring ka pêk che u ang khân engkim ka pe vek a che u. 4 Amaherawhchu, sa a nunna (a thisen) chawpin in ei tûr a ni lo. 5 Tin, in thisen, in nunnate thisen phuba chu ka la ngei ngei ang; sa tinrêng lakah ka la ang, mihring lakah pawh. Mi tin an unaute lakah chuan, mihring nunna phuba chu ka la ṭheuh vang. 6 Tu pawh mihring thisen chhuahtu chu, mihring vêkin ama thisen chu an chhuah ve tûr a ni; Pathian anpuiin mihring a siam si a. 7 Tin, nangni chu chi tam tak thlahin lo pung rawh u; leiah hian fa tam tak hring ula, a chungah hian lo pung rawh u,” a ti a. 8 Tin, Pathianin Nova hnênah leh a hnêna awm a fapate hnênah chuan, 9 “Tin, ngai teh u, keimah ngeiin in hnênah leh in hnua in thlahte hnênah pawh ka thuthlung chu ka tinghet a ni; 10 in hnêna thil nung tinrêng awm, in awmpui sava te, ran te, ramsa tinrêngte hnênah pawh; lawng aṭanga lo chhuak zawng zawng, leia sa tinrêng hnênah lam chuan. 11 Tin, in hnênah ka thuthlung chu ka tinghet ang: tisa zawng zawng tuilêta tihboralin an awm leh tawh lo vang a; lei tichhe tûrin tui a lêt leh tawh hek lo vang,” tiin a sawi a. 12 Tin, Pathian vêkin, “Hei hi kei leh nangni leh in hnêna thil nung tinrêng awmte kâra chhuan, tâwp nei lova awm zêlte tân ka thuthlung chhinchhiahna chu a ni. 13 Chhûmah ka chhimbâl ka zâmtîr a, chu chu kei leh lei kâra thuthlung chhinchhiahna tûr a ni ang. 14 Tin, heti hi a ni ang a, lei chunga chhûm ka zâmtîrin chhimbâl chu chhûmah chuan a lang ang a, 15 kei leh nangni leh tisa zawng zawng zînga mi, thil nung tinrêngte kâra ka thuthlung awm hi ka hre reng ang; tichuan, tui chu tisa zawng zawng tiboral tûrin a lêt leh tawh lo vang. 16 Tin, chhimbâl chu chhûmah a zâm ṭhin ang; tichuan, Pathian leh lei chunga tisa awm zawng zawng zînga mi, thil nung tinrêngte kâra kumkhaw thuthlung awm chu, ka hriat reng theihna tûrin ka en ṭhîn ang,” a ti a. 17 Tin, Pathian vêkin Nova hnênah chuan, “Chu chu kei leh lei chunga tisa awm zawng zawng kâra ka thuthlung tihngheh chhinchhiahna a ni,” a ti leh a.

Nova leh a fate

18 Tin, Nova fapa lawng aṭanga chhuakte chu Sema te, Hama te, Japhetha te an ni. Hama chu Kanaana pa a ni. 19 Chu mite pathum chu Nova fapate an ni a, chu mite laka chhuakte chuan lei zawng zawng hi an dâp zo ta a ni. 20 Tin, Nova chu lo neituah a awm ṭan a, grêp hrui huan a siam a. 21 Uain chu a in a, a rui a; tichuan, a puan inah chuan a mu sual ta a. 22 Tin, Hama, Kanaana pa chuan a pa mu sual chu a hmu a, pâwna a unaute pahnih chu a hrilh a. 23 Tichuan, Sema leh Japhetha chuan puan an la a, kokia inzâwnin hnungtawlhin an kal a, an pa mu sual chu an khuh ta a. An hmai chu lehlam hawiin a awm a, an pa mu sual chu an hmu lo va. 24 Tin, Nova chu a uain rui chu a lo harh a, a fapa naupang berin a chunga a tih zia chu a lo hre ta a. 25 Tichuan, “Kanaana chu ânchhe dawngin awm rawh se; A unaute chhiahhlawhte chhiahhlawh a ni ang,” a ti a. 26 “LALPA, Sema Pathian chu fakin awm rawh se; Kanaana chu a chhiahhlawhah awm rawh se. 27 Pathianin Japhetha chu tilian sela, Sema puan inahte awm rawh se; Tin, Kanaana chu a chhiahhlawhah awm rawh se,” a ti bawk a. 28 Tin, Nova chu tuilêt hnu chuan kum zathum leh kum sawmnga a dam a. 29 Tichuan, Nova dam chhûng zawng zawng chu kum zakua leh kum sawmnga a ni a; tin, a thi ta a.

Genesis 10

Nova thlahte

1 Tin, hêng hi Nova fapa Sema te, Hama te, Japhetha teho thlahte an ni: tuilêt hnuah chuan fapate an nei hlawm a. 2 Japhetha fapate chu Gomera te, Magoga te, Madaia te, Javana te, Tubala te, Meseka te, Tirasa te an ni a. 3 Tin, Gomera fapate chu Askenaza te, Riphatha te, Togarma te an ni a. 4 Tin, Javana fapate chu Elisa te, Tarsisa te, Kittima te, Dodanima te an ni a. 5 Chûngho aṭang chuan a ni, Jentailte thliarkârahte chuan anmahni ram rama an darh tâk ni, anmahni ṭawng ang zêl leh anmahni hnam ang zêlin anmahni chi zîngahte chuan. 6 Tin, Hama fapate chu Kusa te, Mizraima te, Puta te, Kanaana te an ni a. 7 Tin, Kusa fapate chu Seba te, Havila te, Sabta te, Raama te, Sabteka te an ni a; tin, Raama fapate chu Seba leh Dedana an ni a. 8 Tin, Kusa chuan fapa Nimroda a nei a; ani chu leia mi chak tak a lo ni ṭan ta a. 9 LALPA hmaah chuan sa pêl mi chak tak a ni a; chuvângin a ni, “LALPA hmaa sa pêl chak tak Nimroda ang a ni,” an tih ṭhin ni. 10 Tin, a lal ṭanna chu Sinar rama Babel khua te, Erek khua te, Akkad khua te, Kalne khua te a ni a. 11 Chumi ram aṭang chuan a chhuak a, Assuria ramah a lût a, Ninevi khua te, Rehoboth-ir khua te, Kala khua te, 12 Ninevi leh Kala inkâra Resen khua te a siam a (chumi Resen khua chu khaw ropui tak a ni). 13 Tin, Mizraima chuan Lud-ho te, Anam-ho te, Lehab-ho te, Naphtu-ho te, 14 Pathrus-ho te, Kasluh-ho (Philistin-ho chhuahna) te, Kaptor-ho te chu a thlah a. 15 Tin, Kanaana chuan a fa tîrah Sidona a nei a, Hetha pawh a nei bawk a; 16 Jebus-ho te. Amor-ho te, Girgas-ho te leh, 17 Hiv-ho te, Ark-ho te, Sin-ho te leh, 18 Arvad-ho te, Zemar-ho te, Hamath-ho te a thlah a. Chumi hnuah chuan Kanaan-ho hnamte chu an darh zau ta a. 19 Tin, Kanaan-ho ramri chu Sidon khua aṭangin Gerar pan zâwngin, Gaza khaw thlengin; Sodom leh Gomorra leh Adma leh Zeboiim pan zâwngin, Lasa khaw thlengin a ni. 20 Chûnghote chu Hama thlahte chu an ni, anmahni hnamte ang zêl leh anmahni ṭawngte ang zêlin, anmahni ram ramahte leh anmahni chi zîngahte chuan. 21 Tin, Sema, Ebera fa zawng zawngte thlahtu, Japhetha u pawh chuan fate a nei a. 22 Sema fapate chu Elama te, Assura te, Arpaksada te, Luda te, Arama te an ni a. 23 Tin, Arama fapate chu Uza te, Hula te, Gethera te, Masa te an ni a. 24 Tin, Arpaksada chuan fapa Sela a nei a; tin, Sela chuan fapa Ebera a nei a. 25 Tin, Ebera chuan fapa pahnih a nei a: pakhat hming chu Pelega a ni a, a dam lai chuan lei hi ṭhenin a awm a; a nau hming chu Joktana a ni a. 26 Tin, Joktana chuan fapa Almodada te, Selepha te, Hazarmavetha te, Jera te leh, 27 Hadorama te, Uzala te, Dikla te leh, 28 Obala te, Abimaela te, Seba te leh, 29 Ophira te, Havila te, Jobaba te a nei a. Chûng zawng zawng chu Joktana fapate an ni. 30 Tin, an awmna chu Mesa a ṭangin khawchhak tlâng Sephar lam pan zâwngin a ni. 31 Chûnghote chu Sema thlahte chu an ni, anmahni hnamte ang zêl leh anmahni ṭawngte ang zêlin, anmahni ram ramahte, anmahni chite ang zêl chuan. 32 Chûnghote chu Nova thlahho hnamte an ni a, an thlahte ang zêlin, an chite zîngah chuan; tuilêt hnuah chûngho aṭang chuan a ni, leiah hian chi tin an darh tâk ni.

Genesis 11

Babel in sâng

1 Tin, leia mi zawng zawng chu ṭawng hmun khat leh thusawi dân hmun khat an ni vek a. 2 Tin, heti hi a ni a, khawchhak lama an insawn zêl lai chuan Sinar ramah phaizâwl an hmu a; chutah chuan awmhmun an khuar ta a. 3 Tin, “Hawh u, leirawhchan siam ila, ṭha takin i rawh ang u,” an ti hlawm a. Tichuan, lung aiah leirawhchan an hmang a, a châr nân alkatra. 4 Tin, “Hawh u, khawpui siam ila, in sâng a chhîpina vân tawng tûrin sa bawk ila, kan hming i tithang ang u; chuti lo chuan, lei chung zawng zawngah hian tihdarhin kan awm dah ang e,” an ti a. 5 Tin, LALPA chu mihring faten khawpui leh in sâng an siam vêl chu en tûrin a zuk chhuk a. 6 Tin, LALPA chuan, “Ngai teh u, mite hi pumkhat an ni a, an zain ṭawng hmun khat an nei si a, hei thil an ti ṭan a nih hi; tûnah zawng an thiltih tum rêng rêngte pawh khap rual a ni tawh lo vang. 7 Hawh u, i zuk kal ang u khai, ṭawng an inhriat tawn theih loh nân khutah khuan an ṭawng i zuk tihhransak ang u,” a ti a. 8 Chutichuan, LALPAN anniho chu chuta ṭang chuan lei zawng zawngah chuan a tidarh a; tichuan, an khaw siam chu an bânsan ta a. 9 Chuvângin, a hming chu Babel an ti a, LALPAN chutah chuan leia mi zawng zawng ṭawng chu a tihhran tâk avângin; chuta ṭang chuan LALPAN anniho chu lei chung zawng zawngah chuan a tidarh ta bawk a.

Sema thlahte

10 Hêng hi Sema thlahte chu an ni: Sema chu kum za mi a ni a, tuilêt hnu kum hnihah chuan fapa Arpaksada a nei a. 11 Arpaksada a neih hnu chuan Sema chu kum zanga a la dam a, fanu leh fapate a nei leh hlawm a. 12 Arpaksada chuan kum sawmthum leh kum nga a nihin fapa Sela a nei a. 13 Sela a neih hnu chuan Arpaksada chu kum zali leh kum thum a la dam a, fanu leh fapate a nei leh hlawm a. 14 Sela chuan kum sawmthum a nihin fapa Ebera a nei a. 15 Ebera a neih hnu chuan Sela chu kum zali leh kum thum a la dam a, fanu leh fapate a nei leh hlawm a. 16 Ebera chuan kum sawmthum leh kum li a nihin fapa Pelega a nei a. 17 Pelega a neih hnu chuan Ebera chu kum zali leh kum sawmthum a la dam a, fanu leh fapate a nei leh hlawm a. 18 Pelega chuan kum sawmthum a nihin fapa Reuva a nei a. 19 Reuva a neih hnu chuan Pelega chu kum zahnih leh kum kua a la dam a, fanu leh fapate a nei leh hlawm a. 20 Reuva chuan kum sawmthum leh kum hnih a nihin fapa Seruga a nei a. 21 Seruga a neih hnu chuan Reuva chu kum zahnih leh kum sarih a la dam a, fanu leh fapate a nei leh hlawm a. 22 Seruga chuan kum sawmthum a nihin fapa Nahora a nei a. 23 Nahora a neih hnu chuan Seruga chu kum zahnih a la dam a, fanu leh fapate a nei leh hlawm a. 24 Nahora chuan kum sawmhnih leh kum kua a nihin fapa Tera a nei a. 25 Tera a neih hnu chuan Nahora chu kum za leh sâwm leh kum kua a la dam a, fanu leh fapate a nei leh hlawm a. 26 Tera chuan kum sawmsarih a nihin fapa Abrama te, Nahora te, Harana te a nei a.

Tera thlahte

27 Hêng hi Tera thlahte chu an ni: Tera chuan fapa Abrama te, Nahora te, Harana te a nei a. Tin, Harana chuan fapa Lota a nei a. 28 Tin, Harana chu a pianna rama Kaldai-ho khua Ur-ah, a pa Tera hmaah chuan a thi a. 29 Tin, Abrama leh Nahora chuan nupui an nei a: Abrama nupui hming chu Saraii a ni a; Nahora nupui hming chu Harana fanu Milkai a ni a, Harana chu Milkai pa leh Iskai pa a ni. 30 Tin, Saraii chu a ching a; fa rêng a nei lo va. 31 Tin, Tera chuan a fapa Abrama te, a fapaa fapa (Harana fapa) Lota te, a mo, a fapa Abrama nupui Saraii te a hruai a; tin, Kanaan-a kal tûrin Kaldai-ho khua Ur aṭang chuan an chhuak ho ta a; tin, Haran khua an thleng a, chutah chuan awmhmun an khuar ta a. 32 Tin, Tera dam chhûng chu kum zahnih leh kum nga a ni a; tin, Tera chu Haran khuaah chuan a thi ta a.

Genesis 12

Pathianin Abrama a ko

1 Tin, LALPAN Abrama hnênah chuan, “I khaw lam ata leh i laichînteho zîng ata leh i pa in ata chhuak la, ram ka la entîr tûr che lamah kal rawh. 2 Tichuan, chi ropui takah ka siam ang chia; mal pawh ka sâwm ang chia, i hming ka tiropui bawk ang; tin, nang malsâwmna ni ang che. 3 Tin, malsâwmsaktu apiang che chu mal ka sâwm ang a, ânchhe lawhtu che chu ânchhia ka lawh ang; nangmahah chuan leia hnam tin an la thawveng ang,” a ti a. 4 Chutichuan, Abrama chu LALPAN a hnêna a sawi angin a kal ta a, Lota chu a hnênah a kal ve a. Tin, Abrama chu Haran khua ata a chhuah lai chuan kum sawmsarih leh kum nga mi a ni a. 5 Tin, Abraman a nupui Saraii leh, a nau fapa Lota leh an sum deh chhuah zawng zawng leh, Haran khuaa an mi neih tâkte chu a hruai a, Kanaan rama kal tûrin an chhuak a. Tin, Kanaan ram chu an thleng ta a. 6 Abrama chu chumi ramah chuan Sekem hmun thlengin, More sasua thleng chuan a kal zêl a. Chûng lai chuan Kanaan-hote chu chumi ramah chuan an awm a. 7 Tin, LALPA chu Abrama hnênah a inlâr a, “He ram hi i thlahte hnênah ka la pe ang,” a ti a. Tichuan, chutah chuan a hnêna inlâr LALPA tân chuan maichâm a siam a. 8 Tin, chuta ṭang chuan Bethel chhak lama tlângah chuan a insawn a, chutah chuan a puan in a zâr a, a thlang lamah chuan Bethel chu a awm a, a chhak lamah Ai khua a awm a; chutah chuan LALPA tân maichâm a siam leh a, LALPA hming chu a lam a. 9 Tin, Abrama chu chhim ram lam pan cheuvin a insawn ta zêl a.

Aigupta ramah Abrama a kal

10 Tin, chumi ramah chuan ṭâm a lo tla a; tin, chumi ramah chuan ṭâm chu a nasat êm avângin, Abrama chu Aigupta rama awm rih tûrin a chhuk ta a. 11 Tin, heti hi a ni a, Aigupta rama an luh dâwn lai chuan a nupui Saraii hnênah chuan, “Ngai teh, hmeichhe hmêlṭha tak i ni tih ka hria. 12 Tichuan, hetiang hi a ni ang, Aigupta-hovin an hmuh hunah che chuan, ‘Hei hi a nupui a nih hi,’ an ti ang a; tin, kei chu min that mai ang, nang erawh chu an zuah ang che. 13 I zâra ṭha taka ka awm theih nân leh nangmah avânga ka nun theih nân, ‘A farnu ka ni,’ khawngaih takin ti zêl ang che,” a ti a.

Abraman Hebron a pan

14 Tin, heti hi a ni a, Abrama chu Aigupta rama a luh chuan, Aigupta-ho chuan hmeichhia chu an hmu a, a hmêl chu ṭha an ti êm êm a. 15 Pharaoa mi liante pawhin an hmu a, Pharaoa inah an hruai lût ta a. 16 Tin, ani chuan Saraii avângin Abrama chu ṭha takin a ti a; tichuan, berâm te, bâwngpa te, sabengtungpa te, bawihpa te, bawihnu te, sabengtungnu te, sanghâwngsei te a neih phah ta a. 17 Tin, LALPA chuan Abrama nupui Saraii avângin, Pharaoa leh a chhûngte chu sawisak namênin a sawisa ta lo va. 18 Tichuan, Pharaoa chuan Abrama chu a ko va, “Ka chunga i thiltih hi engtizia nge ni le? I nupui a ni tih engati nge mi hrilh loh? 19 ‘Ka farnu a ni,’ engati nge i tih? Chumi avâng chuan alâwm ka nupuia ka lo neih tâk hial ni. Aw le, tûnah en rawh i nupui hi, hruai la, kal daih rawh,” a ti a. 20 Tin, Pharaoa chuan a chungchâng thu-ah chuan mi hnênah thu a pe a; tichuan, amah an han thlah ta a, a nupui nên, a neih zawng zawng nên.

Genesis 13

1 Tin, Abrama chu Aigupta ram aṭang chuan a chhuak a, chhim ramah chuan a chho ta a, a hnênah chuan a nupui te, a neih zawng zawng te, Lota te an chho ve a. 2 Tin, Abrama chu ran te, tangkarua te, rangkachak tein a hausa êm êm a. 3 Tin, chhim ram aṭang chuan Bethel thleng zakin a kal zêl a, Bethel leh Ai khaw inkâra a tîra a puan in awmnaah khân, 4 a tîra a maichâm siamna ngeiah khân; tin, chutah chuan Abrama chuan LALPA hming a lam a. 5 Tin, Lota, Abrama hnêna kal ve pawh khân bêram rual te, bâwng rual te, puan in te a nei ve a. 6 Tin, an awm dunna tûrin ramin a daih ta lo va, an thil neih chu a nasa êm si a; chutichuan, an awm dûn thei ta hlawl lo va. 7 Tichuan, Abrama ran pute leh Lota ran pute kârah chuan inhnialna a lo chhuak ta a. Chumi lai chuan Kanaan-hote leh Periz-hote chu chumi ramah chuan an awm a. 8 Tichuan, Abraman Lota hnênah, “Khawngaih takin, nang leh keia kârah, i ran pute leh ka ran pute kârah pawh inhnialna awm suh se; unau kan ni si a. 9 Ram chu a pum puiin a awm duai lo vem ni? Khawngaih takin ka hnên ata hi intihrang mai rawh. Nang vei lama i kal chuan kei ding lamah ka kal ang a; a nih loh leh, nang ding lama i kal chuan kei vei lamah ka kal ang e,” a ti a. 10 Tichuan, Lota chu a dâk a, Zoar khaw lam pan zâwng chuan Jordan phaizâwl zawng zawng chu LALPA huan ang, Aigupta ram anga ram tina tui tam tak awm chukna a ni tih a hria a, LALPAN Sodom leh Gomorra khua a tihchhiat hma kha a ni si a. 11 Chutichuan, Lota chuan Jordan phaizâwl zawng zawng chu a thlang ta a; tin, Lota chu chhak lamah chuan a insawn a. Tichuan, an inṭhen ta a. 12 Abrama chu Kanaan ramah chuan a awm a, Lota chu phaizâwl khuaahte chuan a awm a, a puan in chu Sodom khaw thlengin a sawn zêl a. 13 Tin, Sodom mite chu LALPA mit hmuhin nasa taka suaksual leh mi sual an ni a. 14 Tin, a hnên ata Lota a awm hran hnu chuan LALPAN Abrama hnênah, “Dâk la, i awmna aṭang khân hmâr lam te, chhim lam te, chhak lam te, thlang lam te en rawh; 15 i ram hmuh zawng zawng hi kumkhua atân nang leh i thlahte ka pe dâwn che u a ni. 16 Tin, i thlahte chu leia vaivut ang maiin ka la siam ang; chutichuan, miin leia vaivut hi an chhiar sên chuan, i thlahte pawh chhiar sên an ni ang. 17 Tho la, ram hi a dung leh a vâng fang chhuak rawh; ka pe dâwn che a ni,” a ti a. 18 Tichuan, Abrama chuan a puan in chu a sawn a, Hebron-a awm Mamre sasaw kiangahte chuan awmhmun a va khuar a, chutah chuan LALPA tân maichâm a siam a.

Genesis 14

Abraman Lota a chhanchhuak

1 Tin, Sinar khaw lal Amraphela te, Ellasar khaw lal Arioka te, Elam khaw lal Kedorlaomera te, Goiim khaw lal Tidala te dam lai chuan heti hi a ni a, 2 anni chuan Sodom khaw lal Bera chu an rûn a, Gomorra khaw lal Birsa te, Adma khaw lal Sinaba te, Zeboiim khaw lal Semebera te, Bela khaw lal te chu an rûn bawk a (Bela khua chu Zoar khua a ni a). 3 Chûngho zawng zawng chu Siddim ruamah chuan an ṭang tlâng a (chumi ruam chu Tuifinriat Al a ni a). 4 Kum sâwm leh kum hnih chhûng Kedorlaomera hnuaiah an awm a, a kum sâwm leh kum thumnaah erawh chuan an hel ta a. 5 Tichuan, a kum sâwm leh kum linaah chuan Kedorlaomera leh a hnêna lal awmte chu an lo kal a, Asteroth-karnaim khuaah Rephaim-hote an that a, Ham khuaah Zuzim-hote an that a, Kiriathaim khuaah Emim-hote an that a, 6 an awmna Seir tlângah, El-paran thlengin Hor-hote an that a (El-paran chu thlalêr depa awm a ni). 7 Tin, an kîr leh a, En-mispat an thleng a (chu chu Kadesh a ni a). Amalek-ho rama mi zawng zawng leh Amor-ho, Hazazon-tamar khuaa awmte pawh chu an that leh a. 8 Tichuan, Sodom khaw lal te, Gomorra khaw lal te, Adma khaw lal te, Zeboiim khaw lal te, Bela khaw lal te chu an chhuak a (Bela khua chu Zoar khua a ni a); tin, Siddim ruamah chuan anniho chu bei tûrin an ṭang tlat a; 9 Elam khaw lal Kedorlaomera te, Goiim khaw lal Tidala te, Sinar khaw lal Amraphela te, Ellasar khaw lal Arioka te chu bei tûrin; lal paliin lal panga an bei a. 10 Tin, Siddim ruam chu alkatra khurin a khat a; tin, Sodom leh Gomorra khaw lalte chu an tlânchhia a, chutah chuan an tla a, a tla bângte chu tlângah chuan an tlân bo ta a. 11 Tichuan, Sodom leh Gomorra mite sum zawng zawng leh an ei tûr zawng zawng chu an la a, an haw ta a. 12 Lota, Abrama unauva fapa, Sodom khuaa awm chu, a sumte nên an la bawk a, an kal ta a. 13 Tin, mi pakhat tlân chhuak chu a lo kal a, Hebrai mi Abrama chu a hrilh a; ani chu Amor mi Mamre-a sasaw kiangahte chuan a awm a. Mamre-a chu Eskola unau leh Anera unau a ni a; chûng mite chu Abrama te nêna ṭang za an ni a. 14 Tin, Abraman a fa chu salah an hruai tih a hriat veleh, a ina piang, ama mi, zir thiam sa tawh, zathum leh sâwm leh pariat a hruai chhuak a, Dan khaw thlengin a ûm ta a. 15 Tin, zânah chuan anmahni bei tûrin amah leh a bawihte chu an insem darh a, anniho chu an that a, Hoba khaw thlengin an ûm a (Hoba chu Damaska khaw hmâr lamah a awm a). 16 Tin, sum zawng zawng chu a rawn la kîr leh vek a, a fa Lota leh a sumte chu a rawn la leh vek bawk a, hmeichhiate pawh a rawn hruai leh a, mi dang zawng zawngte nên.

Melkisedekan Abrama mal a sâwm

17 Tin, Kedorlaomera leh a hnêna lal awmte thata a hâwn hnuah chuan, Sodom lal chu Save ruamah chuan Abrama hmuakin a chhuak a (Save ruam chu Lal ruam a ni a). 18 Tin, Salem khaw lal Melkisedeka chuan chhang leh uain a rawn la a; ani chu Pathian Chungnungbera puithiam a ni a. 19 Tin, ani chuan Abrama chu mal a sâwm a, “Lei leh vân neitu Pathian Chungnungbera chuan Abrama malsâwm rawh se. 20 I hmêlmate i kuta petu, Pathian Chungnungbera chu fakin awm bawk rawh se,” a ti a. Tin, Abrama chuan ani chu engkim sâwma pakhat a pe a. 21 Tin, Sodom khaw lal chuan Abrama hnênah, “Mihringte hi mi pe la, sumte hi chu nangman nei rawh,” a ti a. 22-23 Tin, Abrama chuan Sodom khaw lal hnênah chuan, “La zai khat tê pawh, pheikhawk chilhna pakhat tê pawh, i neih rêng rêng chu ka la lo vang, tiin lei leh vân neitu, LALPA, Pathian Chungnungbera lamah chuan ka kut ka phar tawh a ni; chuti lo chuan, ‘Abrama chu keima tihhausak alâwm,’ i ti dah ang e: 24 tlangvâlho ei ral leh ka mi kalpuite chanvo chauh lo chu ka la lo vang; Anera te, Eskola te, Mamre-a te chuan an chanvo chu la rawh se,” a ti a.

Genesis 15

Abrama hnêna Pathian thuthlung

1 Chûng thil hnuah chuan, “Abram, hlau suh, kei hi i phaw leh i lâwmman nasa tak mai ka ni asin,” tiin, LALPA thu chu Abrama hnênah mumang angin a lo thleng a. 2 Tin, Abrama chuan, “Aw LALPA PATHIAN, eng nge mi pêk ang, fa nei lovin ka awm hlen dâwn a, ka ro khâwmtu tûr chu Damaska khuaa mi Eliezera hi a ni si a?” a ti a. 3 Tin, Abrama vêkin, “Ngai teh, chi rêng rêng mi thlahtîr si lo va; en teh, ka ina piang hi ka ro luahtu tûr a ni,” a ti a. 4 Tin, ngai teh, “Kha mi kha i ro luahtu tûr a ni lo vang; nangma rîla lo la rah tûr ngei chu i ro luahtu tûr a ni zâwk ang,” tiin LALPA thu chu a hnênah a lo thleng a. 5 Tin, ani chu pâwnah a hruai chhuak a, “Vân lam khi en la, arsite khi i chhiar theih chuan chhiar teh khai,” a ti a. Tin, amah vêkin a hnênah, “I thlahte chu khiti zât khi an la ni ang,” a ti a. 6 Tin, ani chuan LALPA chu a ring a; tichuan, ani chuan chu chu a felnaah a ruat ta a. 7 Tin, a hnênah, “He ram hi luah tûra pe tûr chea Kaldai-ho khua Ur ata hruai chhuaktu che LALPA kha ka ni,” a ti a. 8 Tin, ani chuan, “Aw LALPA PATHIAN, ka luah ang tih engtin nge ka hriat ang?” a ti a. 9 Tin, ani chuan a hnênah, “Bâwngla kum thum mi leh kêlpui kum thum mi leh berâmpa kum thum mi leh ṭhuro leh pârvano mi rawn lâk rawh,” a ti a. 10 Tichuan, chûng zawng zawng chu a rawn lâksak a, a lai takah a phel ṭheuh va, a phel pakhat chu a phel lehlam zâwnah chuan a dah ṭheuh zêl a; savate erawh chu a phel ve lo va. 11 Tin, sava sa hel ei mite chu saruangahte chuan an zuk fu ṭhîn a, Abrama chuan a lo hnawt kiang zêl a. 12 Tin, ni tlâk dâwn suar suar lai chuan Abrama chu a lo muhîl ta dêr mai a; tin, ngai teh, thim nasa tak, thil râpthlâk zet hian amah a rawn khuh a. 13 Tin, Pathian chuan Abrama hnênah, “I thlahte chu anmahni ram lovah chuan mikhualin an la awm ang a, an rawng an la bâwlsak ang tih chiang takin hre rawh khai; tin, kum zali an tirethei ang a. 14 Tin, an rawng an bâwlsakate chi pawh chu ka la ngaihtuah ang a; tin, chumi hnuah chuan sum tam tak neiin an lo la chhuak ang. 15 Nang erawh chu i thlahtute hnênah thlamuang takin i kal ang a; i lua kêlsam ṭo vekin an phûm ang che. 16 Tin, chhuan linaah chuan hetah hian an lo kal leh ang; Amor-ho sualnate hi a la kim rih si lo,” a ti a. 17 Tin, heti hi a ni a, ni a tlâka khua a lo thim chuan, ngai teh, rawh tuina mei khu mup mup leh chûng sa phel kârah chuan, meichher alh hluah hluah kal kal a lo awm a. 18 Chumi ni chuan LALPA chuan, “He ram hi, Aigupta lui aṭanga lui lian pui (Euphrates lui) thlengin i thlahte ka pe tawh: 19 Ken-ho te, Keniz-ho te, Kadmon-ho te, 20 Hit-ho te, Periz-ho te, Rephaim-ho te, 21 Amor-ho te, Kanaan-ho te, Girgas-ho te, Jebus-ho te nên hian ka pe bawk a,” tiin Abrama hnênah chuan thu a thlung ta a.

Genesis 16

Hagari leh Ismaela

1 Tin, Abrama nupui Saraii chuan fa rêng rêng a hrinsak lo va; tin, Saraii chuan Aigupta mi bawihnu pakhat a nei a, chu mi hming chu Hagari a ni a. 2 Tin, Saraii chuan Abrama hnênah, “Ngai teh khai, LALPAN fa mi neihtîr phal loh hi; khawngaih takin ka bawihnu hi pâwl rawh; ama lakah chuan fate ka nei mahna,” a ti a. Tichuan, Abrama chuan Saraii thu chu a zâwm ta a. 3 Tichuan, Abrama nupui Saraii chuan, Abrama chu Kanaan rama kum sâwm a awm hnu chuan, a bawihnu Aigupta mi Hagari chu a hruai a, a pasal Abrama hnênah chuan a nupuia awm tûrin a pe a. 4 Tin, Hagari chu a lo pâwl a; tin, ani chu a rai ta a. Tin, a rai tih a inhriat veleh a pi chu a hmusit ta mai a. 5 Tichuan, Saraii chuan Abrama hnênah, “Ka thil tuar hi nangin a mawh phur rawh! Ka bawihnu chu i pawm atân ka pe chia; tin, a rai tih a inhriat veleh mi hmusit ta mai a. LALPA chuan nang leh keia thu hi ngaihtuah rawh se,” a ti a: 6 Abrama erawh chuan Saraii hnênah, “Ngai teh, i bawihnu chu i kuta awm alâwm; i remtih ang apiang chu a chungah ti ta che,” a ti a. Tichuan, Saraii chuan a tirethei ta hle a; chuvângin, a tlân bosan ta a. 7 Tin, LALPA vântirhkoh chuan thlalêrah tuikhur kiangah, Sur panna kawnga tuikhur kiangah chuan a lo hmu a. 8 Tin, a hnênah, “Hagar, Saraii bawihnu, khawi aṭangin nge i lo kala, khawiah nge i kal dâwn?” a ti a. Tin, ani chuan, “Ka pi Saraii hnên ata ka tlân bo a ni,” a ti a. 9 Tin, LALPA vântirhkoh chuan a hnênah, “I pi hnênah kîr leh la, a thu thuin awm rawh,” a ti a. 10 Tin, LALPA vântirhkoh vêk chuan a hnênah, “I thlahte chu chhiar sên loh khawp hiala tamin ka la tipung ang,” a ti leh a. 11 Tin, LALPA vântirhkoh vêk chuan a hnênah, “Ngai teh, nau i pai ta a, fapa i hring ang a; LALPA chuan i hrehawmzia hi a hriat tâk avâng hian a hmingah chuan Ismaela i sa tûr a ni. 12 Ani chu mihring zînga ramsabengtung ang a ni ang; ani chuan mi tin a do vang a, mi tinin ani pawh an do bawk ang; a unau zawng zawng depah a awm bawk ang,” a ti leh pek a. 13 Tin, Hagari chuan amah betu LALPA hming chu, “Nang hi hmutheitu Pathian i ni,” tiin a vuah a, “Hetah ngei hian mi hmutu chu ka en zui zêl em ni aw?” a ti a ni. 14 Chumi avâng chuan tuichhunchhuah chu “Beer-lahai-roi” vuah a ni ta a; ngai teh, Kadesh leh Bered khaw inkârah a awm. 15 Tin, Hagari chuan Abrama chu fapa a hrinsak a; tin, Abrama chuan a fapa Hagari hrin chu a hmingah Ismaela a sa ta a. 16 Tin, Hagarin Abrama tân Ismaela a hrin lai chuan Abrama chu kum sawmriat leh kum ruk mi a ni a.

Genesis 17

Thuthlung chhinchhiah nân serh tan tûr

1 Tin, Abrama chu kum sawmkua leh kum kaw mi a nihin, LALPA chu Abrama hnênah chuan a rawn inlâr a, a hnênah, “Kei, Pathian Engkimtitheia ka ni; ka hmaah awm la, ṭha famkimin awm rawh. 2 Tichuan, nangmah nêna kan inkârah thu ka thlung ang a, nasa takin ka tipung ang che,” a ti a. 3 Tin, Abrama chu a bawkkhup ta a; tin, Pathianin ani chu a bia a, 4 “Ngai teh, kei zawngin ka thuthlung chu i hnênah a ni ka thlun ni; tichuan, chi hrang hrang tam tak thlahtu i ni tawh ang. 5 I hming pawh Abrama a ni tawh lo vang a, i hming hi Abrahama a ni tawh zâwk ang; chi hrang hrang tam tak thlahtu tûra ka siam tâk che hi. 6 Tin, nasa takin chi ka thlahtîr ang chia, nangmahah chuan chi tih tham zet zette ka siam ang a, nangmah aṭang chuan lalte an lo chhuak bawk ang. 7 Tin, kei leh nang leh i hnua i thlahte, an thlah chhâwng zêlte thleng pawhin ka thuthlung hi, i tân leh i hnua i thlahte tâna an Pathian ni tûrin, kumkhaw thuthlung atân ka tinghet ang. 8 Tin, i hnênah leh i hnua i thlahte hnênah chuan i mikhualna ram, Kanaan ram zawng zawng hi kumkhaw ro atân ka pe dâwn che u a ni; tin, kei hi an Pathian ka ni ang,” a ti a. 9 Tin, Pathian vêkin Abrahama hnênah chuan, “Tin, nang zawngin ka thuthlung hi i zâwm tûr a ni; nangin i zâwm tûr a ni a, i hnua i thlahte, an thlah chhâwng zêlte thleng pawhin an zâwm ve tûr a ni. 10 Hei hi kei leh nang leh i hnua i thlahte kâra ka thuthlung i zawm tûr chu a ni; in zînga mipa tawh phawt chu serh tan tûr a ni. 11 Tichuan, in serh vun tisaah chuan serh tanin in awm tûr a ni; chu chu nangmah nêna kan inkâra thuthlung chhinchhiahna a ni ang. 12 Tichuan, in zînga ni riat mi chu, in thlah chhâwng zêlte thleng pawhin, i thlah ni kher lo pawh, i ina piang emaw, mikhual tu laka mi pawh tangka suma i lei emaw pawh ni sela, mipa tawh phawt chu serh tan tûr a ni. 13 I ina piang leh i tangka suma i lei pawh serh tan ngei tûr a ni; tichuan, ka thuthlung chu kumkhaw thuthlung atân in tisaah a awm tawh ang. 14 Tin, mipa serh tan loh, a serh vun tisaa serh tana awm lo chu, chu mi ngei chu a chipui zîng ata tihboral a ni ang; ani chuan ka thuthlung chu a bawhchhia a ni,” a ti leh a. 15 Tin, Pathian vêkin Abrahama hnênah, “I nupui Saraii pawh, a hmingah Saraii i ti tawh lo vang a, a hming chu Sari a ni tawh zâwk ang. 16 Tin, ani chu mal ka sâwm ang a, chu lo pawh chu ama lakah chuan fapa ka pe ang che; a ni, amah chu mal ka sâwm ang a, chi hrang hrang thlahtunu a ni tawh ang; hnam hrang hrang lalte ama lakah chuan an lo la chhuak ang,” a ti leh pek a. 17 Chutichuan, Abrahama chu a bawkkhup a, a nui a, a rilruin, “Kum za mi hian fa a nei dâwn em ni ang? Sari, kum sawmkaw mi chuan fa a hring dâwn em ni ang?” a ti a. 18 Tin, Abrahama vêk chuan Pathian hnênah, “Ismaela hi i hmaah awm thei sela aw!” a ti a. 19 Tin, Pathianin, “Ni lo ve, i nupui Sarin fapa a hrinsak zâwk ang che, a hmingah chuan Isaaka i sa tûr a ni; tin, ka thuthlung chu ama hnua a thlahte tân, kumkhaw thuthlung atân a hnênah chuan ka tinghet ang. 20 Ismaela chung thu pawh hi ka ngaihthlâksak che a ni; ngai teh, amah chu mal ka sâwm tawh a, chi tam tak ka thlahtîr ang a, nasa takin ka tipung bawk ang; ani chuan lal sâwm leh pahnih a hring ang a, amah chu chi ropui takah ka la siam ang. 21 Ka thuthlung erawh chu Isaaka, Sarin nakkum hetih hun taka a hrinsak tûr che hnênah chuan a ni ka tihngheh zâwk dâwn ni,” a ti a. 22 Tichuan, a hnêna a thusawi chu a bâng a; tin, Pathian chuan Abrahama chu a chhohsan ta a. 23 Tin, Abrahama chuan a fapa Ismaela leh, a ina piang zawng zawngte leh a tangka suma a lei zawng zawng, Abrahama chhûngte zînga mi mipa tawh phawt chu a hruai a, Pathianin a hnêna a sawi tawh angin, chumi ni ngei chuan an serh vun tisa chu a tansak ta a. 24 Tin, Abrahama chu a serh vun tisaa a serh an tan lai chuan kum sawmkua leh kum kaw mi a ni a. 25 Tin, a fapa Ismaela chu a serh vun tisaa a serh an tan lai chuan kum sâwm leh kum thum mi a ni a. 26 Chumi ni ngei chuan Abrahama leh a fapa Ismaela chu serh tan an lo ni ta a. 27 A chhûngte zînga mipa zawng zawng, a ina piangte leh mikhual laka tangka suma a leite pawh, ama rual chuan serh tan an lo ni ta vek a.

Genesis 18

Abrahama hnêna fapa pêk tiam

1 Abrahama chu chhûn ni lum lai taka puan in kawngka bula a ṭhut laiin, LALPA chu Mamre sasaw kiangahte chuan a hnênah a rawn inlâr a; 2 tin, a han dâk a, a en a; tin, ngai teh, a zâwn lawkah chuan mi pathum an lo ding reng a; tin, a hmuh veleh puan in kawngka ata chu anmahni lâwm tûrin a va tlân a, lei siin chibai a bûk a, 3 “Ka pu, mi khawngaih theih chuan, khawngaih takin i chhiahhlawh hi mi kal pêl lul suh ang che u; 4 tui tlêm tal rawn la sela, in kete sil ula, thing hnuaiah hian châwl teh rih u. 5 Chhang tlêm tal ka va la ang a, in thinlung tiharh ang che u; chumi hnuah chuan in kal zêl dâwn nia; chumi avânga in chhiahhlawh hnêna lo kal hi in ni châwk ang a,” a ti a. Tin, anni chuan, “I sawi ang chuan va ti rawh,” an ti a. 6 Tichuan, Abrahama chu puan in chhûngah Sari hnênah chuan a lût thuai a, “Rang takin chhangphut dip tak tehkhâwng thum siam la, hmet la, chhangpêrahte siam rawh,” a ti a. 7 Tin, Abrahama chu bâwng rual lamah a va tlân a, bâwngno nalh ṭha zet hi a rawn la a, chhiahhlawh hnênah a pe a; tin, ani chuan a lo siam thuai thuai a. 8 Tin, hnutetui khal te, hnutetui te, bâwngnosa siamte chu a la a, an hmaah a va hlui ta a; tin, thing hnuaiah chuan an kiangah a ding reng a, anni chuan an ei ta a. 9 Tin, anni chuan a hnênah, “I nupui Sari khawiah nge a awm?” an ti a. Tin, ani chuan, “Saw puan inah sâwn,” a ti a. 10 Tin, ani chuan, “Hun hi a lo thlen leh tikah chuan i hnênah ka lo kal leh ngei ngei ang a; tin, ngai teh, i nupui Sari chuan fapa a nei ang,” a ti a. Tin, a hnunga puan in kawngka bul aṭang chuan Sarin a lo hria a. 11 Abrahama leh Sari chu upa tak, tar tawh tak an ni a; hmeichhe dân pângngai chu Sari chungah chuan a reh daih tawh a. 12 Tichuan, Sarin, “Tar ka nih tawh hnu hian lâwmna ka nei ang maw, ka lalpa lah a upa tawh bawk si a?” tiin a rilruin a nui a. 13 Tin, LALPA chuan Abrahama hnênah, “Engati nge Sarin, ‘Kei tar hian fa ka hring êm ang maw?’ tia a nuih? 14 LALPA tân thil rêng rêng a harsa lutuk em ni? Hun ruatah, hun a lo thlen tikah chuan i hnênah ka lo kal leh ang a; tin, Sari chuan fapa a nei ang,” a ti a. 15 Chutichuan, Sari chuan. “Ka nui lo,” tiin a pha a; a hlau si a. Tin, ani chuan, “Awih loh loh tûr; i nuih ngei kha le,” a ti a.

Abrahaman Sodom khaw tân a dîl

16 Tin, mite chu chuta ta chu an tho va, Sodom khaw lam chu an en a; tin, Abrahama chu anmahni thlah tûrin an hnênah a kal ve a. 17 Tin, LALPA chuan, “Ka thiltih tûr hi Abrahama lakah hian ka zêp ang em aw? 18 Abrahama hi chi ropui leh thiltithei tak a lo la ni ngei dâwn a, amahah chuan khawvêla chi tin an la thawveng dâwn si a. 19 LALPA kawng an zawh theih nân a hnua a fate leh a chhûngte, thil fel taka ti tûr leh rorêl anga ti tûra thu a pêk theihna tûrin ani chu ka ruat tawh si a; chutichuan, a chungchâng thu a sawia chu LALPAN Abrahama chunga a thlentîr theihna tûrin,” a ti a. 20 Tichuan, LALPA chuan, “Sodom leh Gomorra khaw au thâwm chu a nasain, an sual nasa êm êm ngei mai; 21 tûnah ka zuk kal ang a, an au thâwm ka hnêna lo thleng ang ngei hian an ti nge ti lo ka en ang a; an tih loh chuan ka hre mai ang,” a ti a. 22 Tin, mite chu chuta ta chu an hawi a, Sodom khaw lam chu an pan ta a; Abrahama erawh chu LALPA hmaah chuan a la ding reng a. 23 Tin, Abrahama chuan a va hnaih a, “Mi felte chu mi sualte zîngah i tiboral ve dâwn em ni? 24 Khaw chhûngah chuan mi fel sawmnga tal an awm mahna; a chhûnga mi fel sawmnga awmte avâng chuan khua chu zuah phah lovin i tiboral dâwn em ni? 25 Nang êm chuan chutiang chuan mi felte chu mi sualte anga an awm vena tûra, mi felte chu mi sualte zînga tihhlum ve mai te chu i ti âwm êm si lo va; nang êm chuan i ti âwm êm si lo! Lei chung zawng zawng Rorêltu chuan fel takin a ti dâwn lâwm ni?” a ti a. 26 Tin, LALPA chuan, “Sodom khaw chhûngah chuan mi fel sawmnga pawh ka hmuh chuan, anmahni avâng chuan khaw pum pui chu ka zuah mai ang,” a ti a. 27 Tin, Abrahama chuan, “Ngai teh, kei vaivut leh meivâp mai hian LALPA chu ka be pawp ta sa che: 28 mi fel chu pangain sawmnga an tling lo a ni mahna; pangaa an tlin loh avângin khaw pum pui chu i tiboral dâwn em ni?” a ti a, a chhâng a. Tin, ani chuan, “Chutah chuan sawmli leh panga pawh ka hmuh chuan ka tiboral lo vang,” a ti a. 29 Tin, ani chuan amah chu a be leh zêl a, “Chutah chuan sawmli chauh i hmu a ni mahna,” a ti a. Tin, ani chuan, “Sawmli avâng pawh chuan ka tiboral lo mai ang,” a ti a. 30 Tin, ani chuan, “Aw, LALPA chu thinur suh ang che, ka han sawi leh teh ang: chutah chuan sawmthum chauh i hmu a ni mahna,” a ti a. Tin, ani chuan, “Chutah chuan sawmthum pawh ka hmuh chuan ka tiboral lo mai ang,” a ti a. 31 Tin, ani chuan, “Ngai teh, LALPA chu ka be pawp ta sa che: chutah chuan sawmhnih chauh i hmu a ni mahna,” a ti a. Tin, ani chuan, “Sawmhnih avâng pawh chuan ka tiboral lo vang,” a ti a. 32 Tin, ani chuan, “Aw, LALPA chu thinur suh ang che, vawi khat chauh chuan ka han sawi leh teh ang: chutah chuan sâwm chauh i hmu a ni mahna,” a ti a. Tin, ani chuan, “Sâwm avâng pawh chuan ka tiboral lo vang,” a ti a. 33 Tichuan, LALPA chu Abrahama nêna an inbiak zawh veleh chuan a kal ta a; tin, Abrahama chu ama awmna lamah a kîr leh ta a.

Genesis 19

Sodom khaw sualzia

1 Tin, vântirhkoh pahnih chuan tlai lamah Sodom khua an zuk thleng a; Lota chu Sodom khaw kulh kawngkhârah chuan a lo ṭhu a; tin, Lotan anmahni a lo hmu a, lâwm tûrin a ding ta a; tin, a hmaia lei siin chibai a bûk a; 2 tin, “Ngai teh u, ka pute u, khawngaih takin in chhiahhlawh inah hian lût rih ula, riak ula, in kete sil rawh u; tichuan, zîng takah in tho vang a, in kal leh dâwn nia,” a ti a. Nimahsela, anni chuan, “Ni lo ve, khawlaiah kan riak zâwk ang,” an ti a. 3 Nimahsela, ani chuan a thlêm chiam a; tichuan, a hnênah an kal a, a inah chuan an lût ta a; tin, ani chuan chawhmeh a siam a, chhang dawidim telh loh a kang a; tin, an ei ta a. 4 Nimahsela, an mut hmain khuaa mi, Sodom khuaa mite ngei chuan, vêng tina mi zawng zawngin, a pui a pangin, in chu an hual vêl hlawm a; 5 tin, Lota chu an ko va, a hnênah, “Zânina i hnêna mi lo lûtte kha khaw nge an awm? Anmahni kan pâwl theih nân kan hnênah rawn hruai chhuak rawh,” an ti a. 6 Tin, Lota chu kawngka bulah chuan an hnênah a va chhuak a, kawng a khâr leh a. 7 Tin, “Ka unaute u, khawngaih takin chuti êm chuan sual ma ta che u. 8 Ngai teh u, mipa la pâwl ngai loh fanu pahnih ka nei a ni; mi khawngaih ula, anni chu in hnênah ka rawn hruai chhuak ang e, ṭha in tih ang apiangin an chungah ti nâng che u; hêng mite chungah erawh hi chuan eng mah ti lul suh ang che u, chumi avâng chuan asin ka in chhûngah hian an lo luh ni,” a ti a. 9 Tin, anni chuan, “Kiang mai rawh,” an ti a. Tin, anmahni vêk chuan, “He mi hrep hi heta awm tûr hian a lo pêm lût a, rorêltuah awm a tum vei a; tûnah zawng anni chunga tih ai mahin i chungah kan ti ṭha lo lehzual ang,” an ti a. Tin, Lota chu an bawh chiam a, kawngkhâr chu tihchhiat tumin an rawn hnaih a. 10 Nimahsela, mite chuan an kut an zen chhuak a, Lota chu an hnênah in chhûngah chuan an hnûk lût a, kawng an khâr ta tlat a. 11 Tin, kawngka bula mite chu a lian a têin an mit an tihdelsak a; chutichuan, kawngkhâr chu an zawng hmu zo ta lo va.

Lotan Sodom khua a chhuahsan

12 Tin, mite chuan Lota hnênah, “Hêng mite lo hi hetah hian chhûngte dang i nei em? I mâkpa leh i fapate leh i fanute leh khaw chhûnga i neih apiangte chu khua ata hi hruai chhuak rawh. 13 LALPA hmaah chuan an au thâwm chu a lo nasat tâk avângin he khua hi kan tiboral dâwn a ni; tiboral tûrin LALPA chuan min tîr bawk si a,” an ti a. 14 Tichuan, Lota chu a kal chhuak a, a fanute neitu, a mâkpate hnênah chuan a va sawi a, “Tho ula, hemi khua ata hi chhuak rawh u; LALPAN khua hi a tiboral dâwn a ni,” a ti a. Nimahsela, a mâkpate ngaih chuan fiamthu sawi ang lek a ni a. 15 Tin, khawfîng a chah veleh chuan vântirhkohte chuan, “Tho la, i nupui leh heta i fanu pahnih awmte hi hruai rawh; chuti lo chuan, he khaw hremnaah hian in boral ve dah ang e,” tiin Lota chu an tur ta sek a. 16 Nimahsela, a la muang hle si a; tichuan, LALPAN amah a khawngaih avângin, mite chuan a kutah leh a nupui kutah leh a fanute pahnih kutah chuan an chelh a; tichuan, an hruai chhuak a, khaw pâwnah chuan an dah ta a. 17 Tin, heti hi a ni a, pâwna an hruai chhuah hnu chuan, “I nunna tûrin tlân chhuak rawh! I hnung lam hawi suh la, phaizâwlah rêng rêng hian ding hek suh; tlângah sâwn tlân rawh; chuti lo chuan, i boral dah ang e,” a ti a. 18 Nimahsela, Lota chuan an hnênah, “Ka pu, chûng ang chu ni suh se! 19 Ngai teh, i chhiahhlawh hian i mit a tlung a, nangin i zahngaihna chu i tilian a, chu zahngaihna chu ka nun humhimin ka chungah i lantîr a ni; tlângah saw zawng ka tlân thei lo vang, thil ṭha lo tak hian mi rawn nangin ka thi dah ang e. 20 Ngai teh, saw khua saw tlân nân a hnai ber a, khaw tê tak tê a ni bawk si a; aw, chutah chuan (khaw tê tak tê a ni lâwm ni?) mi tlântîr zâwk rawh; tichuan, ka nung dâwn nia,” a ti a. 21 Tin, ani chuan a hnênah, “Ngai teh, chu thil kawngah pawh chuan ka zâwm che a ni, khua i sawi chu ka tiboral lo mai ang e. 22 Hmanhmawh la, chutah chuan tlân rawh; chumi i thlen hma loh chuan eng mah ka ti thei dâwn si lo va,” a ti a. Chuvângin, chu khaw hmingah chuan Zoar an vuah ta a.

Sodom leh Gomorra khaw kan chhiat thu

23 Lota chuan Zoar khua chu a thlen chuan lei chungah chuan ni a lo chhuak tawh a. 24 Tin, LALPA chuan Sodom leh Gomorra khaw chungah chuan, vâna LALPA hnên aṭang chuan kât leh mei a sûrtîr a; 25 tichuan, chûng khuate leh phaizâwl zawng zawng leh, khuaa mi zawng zawng leh leia thil ṭote chu a tiboral ta vek a. 26 A nupui erawh chu Lota hnung aṭang chuan a lehhawi a, chi khâwn dingah a lo chang ta a. 27 Tin, Abrahama chu zîng takah LALPA hmaa a dinna hmunah khân a han chho va; 28 tin, Sodom leh Gomorra khaw lam leh phaizâwl ram zawng zawng lam chu a thlîr a, a en reng a; tin, ngai teh, chumi rama meikhu chu rawh tuina meikhu ang maiin a khu chho ngut ngut a. 29 Tin, heti hi a ni a, Pathianin phaizâwl khuate chu a tihboral laia Lota awmna khuate chu a tihboral lai chuan, Pathianin Abrahama chu a hre reng a, Lota chu boralna zîng ata chu a tîr chhuak a.

Moab-ho leh Ammon-ho lo chhuahna bul

30 Tin, Lota chu Zoar khua ata chu a chho va, tlângah chuan a awm a, a fanute pahnih chu a hnênah an awm bawk a; Zoar khuaah a awm ngam si lo va. Tin, amah leh a fanute pahnih chu pûkah an chêng a. 31 Tin, a upa zâwk chuan a naupang zâwk hnênah chuan, “Kan pa hi a upa tawh a, khawvêl zawng zawng dân anga min pâwl tûrin, lei chungah hian mipa pakhat mah an awm tawh si lo va. 32 Hawh, kan pa hi uain i intîr ang khai; tichuan, kan pa chithlah mang lova kan siam theih nân a hnênah kan mu dâwn nia,” a ti a. 33 Tichuan, chumi zân chuan an pa chu uain an intîr ta a. Tin, a upa zâwk chu a lût a, a pa hnênah chuan a va mu a; tin, ani chuan a lo mut lai chu a hre lo va, a thawh leh lai pawh chu a hre hek lo. 34 Tin, heti hi a ni a, a tûkah chuan a upa zâwk chuan a naupang zâwk hnênah chuan, “Ngai teh, nizânah khân ka pa hnênah ka mu a, zâninah pawh hian uain i intîr leh ang khai; tin, nang lût la, kan pa chithlah mang lova kan siam theih nân a hnênah va mu ve rawh,” a ti a. 35 Tichuan, chumi zân pawh chuan an pa chu uain an intîr leh a; tin, a naupang zâwk chu a tho va, a hnênah a va mu ta a; tin, ani chuan a lo mut lai chu a hre lo va, a thawh leh lai pawh chu a hre hek lo. 36 Chutiang chuan Lota fanute pahnih chuan an pa lakah chuan nau an lo pai ta ve ve a. 37 Tin, a upa zâwk chuan fapa a hring a, a hmingah chuan Moaba a sa a; chu mi chu tûnlaia Moab-ho thlahtu hi a ni a. 38 Tin, a naupang zâwk pawh chuan fapa a hring ve a, a hmingah chuan Ben-ammia a sa a; chu mi chu tûnlaia Amona thlahte thlahtu hi a ni.

Genesis 20

Abrahama leh Abimeleka

1 Tin, Abrahama chu chuta ṭang chuan chhim ram lam panin a insawn a, Kadesh khua leh Sur kârah chuan awmhmun a khuar a; Gerar khuaah chuan a awm ta rih bawk a. 2 Tin, Abrahaman a nupui Sari chu, “Ka farnu a ni,” a ti a; tichuan, Gerar lal Abimeleka chuan mi a tîr a, Sari chu a va hruaitîr ta a. 3 Nimahsela, Pathian chu zânah a mumangah Abimeleka hnênah a lo kal a, a hnênah, “Ngai teh, i hmeichhe hruai avâng hian mitthi mai i ni ta; mi nupui a ni si a,” a ti a. 4 Abimeleka erawh chuan a la pâwl rih lo va; tichuan, “LALPA, mi fel takte pawh i tihlum dâwn em ni? 5 Amah ngei pawhin ka hnênah, ‘Ka farnu a ni,’ a ti lâwm ni? Tin, ani ngei pawhin, ‘Ka nuṭa a ni,’ a ti bawk si a; thinlung ṭha tak pu leh kut thianghlim tak nei chungin hei hi ka ti a ni,” a ti a. 6 Tin, Pathianin a mumangah chuan, “Ni, hei hi thinlung ṭha tak pu chungin i ti a ni tih ka hria e. Tichuan, kei pawhin ka chunga thil i tihsual tûr chu ka khap che a ni; chuvângin a ni, amah i khawih ka phal loh ni. 7 Chutichuan, tûnah mi nupui kha pe kîr leh rawh; ani chu zâwlnei a ni si a, a ṭawngṭaisak ang chia, i dam dâwn nia. I pêk kîr leh loh zawngin i thi ngei dâwn tih hre rawh, nang leh i neih zawng zawng nên,” a ti a. 8 Tichuan, Abimeleka chu zîng takah a tho va, a chhiahhlawh zawng zawng a ko va, an beng hriatah chûng thu zawng zawng chu a hrilh a; tin, mite chuan an hlau ta êm êm a. 9 Chutichuan, Abimeleka chuan Abrahama a ko va, a hnênah, “Kan chunga i thiltih hi engtizia nge ni le? Eng kawngah nge i chungah thil ka tihsuala, kei leh ka khua leh tuite chungah hian thil sual nasa tak i rawn thlen hi le? Thil tih âwm loh tak ka chungah i tih tâk hi,” a ti a. 10 Tin, Abimeleka vêk chuan Abrahama hnênah, “Eng nge i hmuha, hetiang thil hi i tih le?” a ti leh a. 11 Tin, Abrahama chuan, “He khuaah hian Pathian ṭihna a awm hauh lo ngei ang a, ka nupui vâng hian mi tihlum mai ang tih ka rin vâng a ni. 12 Chu achhapah ka farnu a ni rêng bawk si a, ka pa fanu a ni a, ka nu fanu erawh chu a ni lo; tin, ka nupuiah a lo awm ta a ni. 13 Tin, heti hi a ni a, Pathianin ka pa in ata mi vahvaihtîr lai khân, a hnênah, ‘Hei hi i khawngaihna ka chunga i lantîr tûr chu a ni: kan thlenna hmun apiangah, “Ka nuṭa a ni,” ti zêl ang che,’ ka ti rêng a ni,” a ti a. 14 Tin, Abimeleka chuan berâmte leh bâwngpate leh bawihpate leh bawihnute a hruai a, Abrahama chu a pe a, a nupui Sari pawh chu a pe kîr leh ta a. 15 Tin, Abimeleka chuan, “En teh, ka ram chu a awm duai alâwm, i duhna apiangah hian awm rawh,” a ti a. 16 Tin, Sari hnênah chuan, “En teh, i nuṭa hi tangka sângkhat ka pe ta a; ngai teh, i hnêna awm zawng zawngte lakah chuan i tân mit khuhna tûr a nih hi; i chung thu rêng rêngah hian i fel leh tawh vek a ni,” a ti a. 17 Tichuan, Abrahama chuan Pathian hnênah a ṭawngṭaisak a; tin, Pathianin Abimeleka leh a nupui leh a bâwihnute chu a tidam leh a; tichuan, fate an hring leh ta a. 18 Abrahama nupui Sari avâng chuan, LALPA chuan Abimeleka chhûngte zawng zawng chu a tiching ta tlat hlawm si a.

Genesis 21

Isaaka pian thu

1 Tin, LALPA chuan a sawi tawh angin Sari chu a zuk kan a, LALPA chuan a sawi tawh angin Sari chungah a tihsak ta bawk a. 2 Tichuan, Sari chu a rai a, Pathianin a hnêna a sawi hun ruat takah chuan Abrahama chu a tar hnuin fapa a hrinsak ta a. 3 Tin, Abrahaman a fapa neih, Sarin a hrinsaka chu a hmingah Isaaka a sa a. 4 Tin, Pathianin thu a pêk ang khân Abrahaman a fapa Isaaka chu ni riat a tlinin a serh a tansak a. 5 Tin, Abrahama chu a fapa Isaaka a neih lai chuan kum za mi a ni a. 6 Tin, Sari chuan, “Pathianin mi tinui ta; mi tin a hria apiangin mi nuihpui ang,” a ti a. 7 Tin, amah vêkin, “ ‘Sarin nautête a la pawm ang,’ tih tuin nge Abrahama hnênah sawi ngaihna hria ang? A tar hnu hian fapa ka hrinsak tâk hi,” a ti a. 8 Tin, nautê chu a lo ṭhang lian a, a hnute hnêk an bântîr ta a; tin, Isaaka chu a hnute hnêk an bântîr ni chuan Abrahaman ruai ropui tak a ṭheh a.

Hagari leh Ismaela hnawh chhuah thu

9 Tin, Aigupta mi Hagari fapa, Abrahama tâna a hrina chuan a nuihsan lai Sarin a hmu a. 10 Chumi avâng chuan Abrahama hnênah chuan, “He bawihnu leh a fapa hi hnawt chhuak rawh; he bawihnu fapa hi ka fapa Isaaka ro luahpuitu tûr a ni thei lo vang,” a ti a. 11 Tin, chu thu chu a fapa avângin Abrahama ngaih chuan thil ṭha lo tak a ni. 12 Nimahsela, Pathianin Abrahama hnênah chuan, “Naupang chungchâng thu leh i bawihnu chungchâng thu leh bawih chungchang thu hi i ngaihin thil ṭha lo tak ni suh se; Sarin i hnêna thu a sawi zawng zawng chu zâwm rawh; Isaaka-ah hian i thlahte an la ti dâwn si a. 13 Tin, bawihnu fapaah pawh hian, i thlah a nih avângin chi tihtham zet ka la siam ang,” a ti a. 14 Tichuan, Abrahama chu zîng takah a tho va, chhang leh tuithâwl tuia khat a la a, Hagari a pe a, a kokiah a chhuansak a, naupang pawh chu a kaltîr ta a; tichuan, a kal a, Beer-seba thlalêrah chuan a vâk a vâk ta a. 15 Tin, tuithâwla tui chu a lo awm ta lo va; tichuan, naupang chu hnimbuk pakhat hnuaiah a dah ta mai a. 16 Tin, “Naupang thi tûr chu ka en ngam lo ve,” a tih avângin a kal a, hla fe, thal kah phâk tâwk angah hian a hma zâwnah chuan a va ṭhu ta chawt a. Tichuan, a hma zâwnah chuan a ṭhu a, ring takin a ṭap ta a. 17 Tin, Pathianin naupang aw chu a hria a; tin, Pathian vântirhkohvin vân aṭangin Hagari chu a zuk au va, a hnênah, “Hagar, eng i ti nge ni le? Hlau suh; a awmnaa naupang aw kha Pathianin a hria asin. 18 Tho la, naupang kha kai tho la, i kutin chelh rawh, amah chu chi ropui takah ka siam dâwn asin,” a ti a. 19 Tin, Pathianin a mit a tihvârsak a, tuichhunchhuah a hmu ta a; tichuan, a va kal a, tuithâwlah chuan tui chu a thun khat a, naupang chu a intîr ta a. 20 Tin, Pathian chu naupang hnênah chuan a awm ṭhîn a, a lo ṭhang lian zêl a, thlalêrah a awm ṭhîn a, thal kah thiam mi a lo ni ta a. 21 Paran thlalêrah chuan a awm a; tin, a nu chuan Aigupta ram ata nupui a neihsak a.

Abrahama leh Abimeleka inbiak remna thu

22 Tin, heti hi a ni a, chumi lai vêl chuan Abimeleka leh a sipai pâwl hotu Phikola chuan Abrahama hnênah, “I thiltih apiangah Pathian i hnênah a awm zêl ṭhîn a; 23 chutichuan, tûnah hetah hian Pathian hming chhâlin, kei leh ka fapa leh ka fapaa fapa pawh tihder lovin, ka lo khawngaih tâk che ang khân, kei leh i awmna ram hi khawngaih ve thung zâwk tûrin ka hnênah chhia chham rawh khai!” tiin a sawi a. 24 Tin, Abrahama chuan, “Ka chham ang chu,” a ti a. 25 Tin, Abimeleka chhiahhlawhten tuichhunchhuah an chhuhsak avâng chuan Abrahaman Abimeleka chu a zilh a. 26 Tin, Abimeleka chuan, “Chumi thil titu chu tu nge ni, ka hre hauh lo mai; nang lahin mi hrilh si lo va, vawiinah chauh lo chuan ka la hre ve hauh lo mai,” a ti a. 27 Tichuan, Abrahama chuan berâmte leh bâwngpate a hruai a, Abimeleka hnênah a pe a; tin, an pahnih chuan thu an thlung ta a. 28 Tin, Abrahaman a berâm rual zînga mi berâmno a nu pasarih a dah hrang a. 29 Tichuan, Abimeleka chuan Abrahama hnênah, “Berâmno a nu pasarih a hranga i dah hi engtizia nge ni?” a ti a. 30 Tin, ani chuan, “He tuichhunchhuah hi keimahin ka laih a ni tih mi hriatpuina tûrin, hêng berâmno a nu pasarih hi ka kut ata i la tûr a ni,” a ti a. 31 Chumi avâng chuan chumi hmun chu Beer-seba a vuah a; chutah chuan an pahniha chhia an chham dun avângin. 32 Chutichuan, Beer-seba-ah chuan thu an thlung ta a; tin, Abimeleka chu a tho va, a sipai pâwl hotu Phikola nên Philistin-ho ramah chuan an hâwng leh ta a. 33 Tin, Abrahama chuan Beer-seba-ah chuan fâr thing a phun a, chutah chuan LALPA, Chatuana Pathian hming chu a lam a. 34 Tichuan, Abrahama chu Philistin-ho ramah chuan rei tak a awm a.

Genesis 22

Pathianin Abrahama hnênah Isaaka hlân tûrin a phût

1 Tin, heti hi a ni a, chûng thil hnuah chuan Pathianin Abrahama chu a fiah a, a hnênah, “Abraham,” a ti a; tin, ani chuan, “Heta hi ka awm,” a ti a. 2 Tin, ani chuan, “I fapa, i fapa neih chhun, i hmangaih tak, Isaaka ngei kha hruai la, Moria ramah chuan kal la, chutah chuan ka hrilh tûr che tlâng pakhatah chuan hâlral thilhlanah hlân rawh,” a ti a. 3 Tin, Abrahama chu zing takah a tho va, a sabengtung a siam a, a hnênah a chhiahhlawh tlangvâl pahnih a hruai a, a fapa Isaaka nên; tin, hâlral thilhlan atân thing a ek a, a tho va, Pathianin a hrilhna hmun lamah chuan a kal ta a. 4 Tin, ni thum niah chuan Abrahama chu a han dâk a, a hmun chu hla takah a han hmu a. 5 Tichuan, Abrahaman a chhiahhlawh tlangvâlte hnênah chuan, “Hetah sabengtung nên hian lo awm rawh u, kei leh naupang hi sawtah sâwn kan va kal ang a; tin, Pathian kan va bia ang a, in hnênah kan lo kîr leh ang,” a ti a. 6 Tin, Abrahama chuan hâlral thilhlanna thing chu a la a, a fapa Isaaka chu a puttîr a; ani chuan mei leh chemtê a keng a; tichuan, an pahnihin an kal dûn ta a. 7 Tin, Isaaka chuan a pa Abrahama chu a bia a, “Ka pa,” a ti a; tin, ani chuan, “Ka fapa, heta hi ka awm,” a ti a. Tin, ani chuan, “En teh, mei leh thing chu a awm a; nimahsela, hâlral thilhlan tûr berâmno chu khawiah nge a awm?” a ti a. 8 Tin, Abrahama chuan, “Ka fapa, Pathianin ama tâna hâlral thilhlan tûr berâmno chu a ngaihtuah chawp mai ang chu,” a ti a; chutichuan, an pahnih chuan an kal dûn ta zêl a. 9 Tin, Pathianin a hrilh hmun chu an va thleng ta a; tin, Abrahama chuan chutah chuan maichâm a siam a, thing chu a chhep khâwm a, a fapa Isaaka chu a phuar a, maichâma thing chungah chuan a muttîr a. 10 Tin, Abrahama chuan a kutin a ban a, a fapa tihhlum nân chemtê chu a la a. 11 Tin, LALPA vântirhkoh chuan vân aṭangin amah chu a zuk au va, “Abraham, Abraham,” a zuk ti a; tin, ani chuan, “Heta hi ka awm,” a ti a. 12 Tin, ani chuan, “Naupang chungah khân i kut thlâk suh la, amah kha eng mah tih hek suh; i fapa, i neih chhun tak pawh mi pêk i ui loh avângin Pathian i ṭih tih tûnah ka hre ta a ni,” a ti a. 13 Tin, Abrahama chu a han dâk a, a en a; tin, ngai teh, a hnung lamah chuan berâmpa, a ki thing hnawka lo tâng tlat a awm a; tichuan, Abrahama chuan berâmpa chu a va man a, chumi chu a fapa aiah hâlral thilhlanah chuan a hlân ta zâwk a. 14 Tichuan, Abrahaman chumi hmun hmingah chuan Jehova-jire a vuah a; vawiin thlenga, “LALPA tlângah ngaihtuah a ni ang chu,” an tih ṭhin ang hian. 15 Tin, LALPA vântirhkoh chuan a vawi hnihnaah vân aṭangin Abrahama chu a zuk au leh a, 16 “He thil hi i tih tâk avâng leh i fapa, i neih chhun tak pawh i ui loh avângin mal ka sâwm ngei ngei ang chia, 17 vâna arsi zât leh tuifinriat kama ṭiauvaivut zâtin i thlahte chu ka la tipung ngei ngei ang tih leh, i thlahte chuan an dote kulh kawngkhâr chu an la neihsak ang tih leh, 18 ka thu i awih tâk avângin i thlahah chuan khawvêla chi tin an la thawveng ang tih, mahni leh mahni inchhâlin chhia ka chham ta, LALPAN a ti,” a zuk ti a. 19 Chutichuan, Abrahama chu a chhiahhlawh tlangvâlte hnênah chuan a kîr leh a; tin, an tho va, Beer-seba-ah chuan an kal za ta hlawm a; tin, Abrahama chu Beer-seba-ah chuan a awm ta reng a.

Nahora thlahte

20 Tin, heti hi a ni a, chûng thil hnuah chuan miin Abrahama hnênah chuan, “Ngai teh, Milkai pawh khân i nau Nahora chu fate a hrinsak ta asin,” tiin an hrilh a. 21 A fa tîr chu Uza a ni a, a nau chu Buza a ni a, Kemuela, Arama pa nên, 22 Keseda te, Hazova te, Pildasa te, Jidlapha te, Bethuela te pawh an ni a. 23 Tin, Bethuela chuan fanu Rebeki a nei a; chûng pariatte chu Milkai chuan Abrahama nau Nahora chu a hrinsak a ni. 24 A hmei, a hming Reumai pawhin Teba te, Gahama te, Tahasa te, Maaka te a hring bawk a.

Genesis 23

Sari a thi a, Abrahaman thlân tûr ram a lei

1 Tin, Sari dam chhûng chu kum za leh kum sawmhnih leh kum sarih a ni a; chûng chu Sari dam chhûng kum chu a ni. 2 Tin, Sari chu Kanaan rama Kiriath-arba khuaah chuan a thi a (chu chu Hebron khua a ni). Tin, Abrahama chu Sari sûn tûr leh ṭah tûrin a lo kal a. 3 Tin, mitthi ruang hma ata chu a tho va, Hetha thlahte hnênah chuan, 4 “In zîngah mikhual leh pêm mai ka ni a; ka mitthi ruang hi ka hmuh lohva ka phûm theihna tûrin in zîngah hian phûmna hmun ro mi pe rawh u,” tiin a sawi a. 5 Tin, Hetha thlahte chuan Abrahama chu an chhâng a, a hnênah, 6 “Ka pu, min ngaithla teh, nang chu kan zîngah hian lal ropui tak i ni a; kan thlânahte hian i duhna berah chuan i mitthi chu phûm ta che; i mitthi i phûmna tûrin kan zînga tu mahin kan thlân pêk che kan ui lo vang,” an ti a. 7 Tichuan, Abrahama chu a tho va, chumi rama mi Hetha thlahte chu chibai a bûk a. 8-9 Tin, “Ka mitthi chu ka hmuh lohva ka phûm rem in tih chuan mi ngaithla ula, Makpela pûk, a lo mawnga awm, a neih kha mi pe tûrin Zohara fapa Ephrona hnênah mi ngensak teh u. In zîngah phûmna hmun ro atâna a man tâwk ang zêlin mi pe rawh se,” tiin a bia a. 10 Tin, Ephrona chu Hetha thlahte zîngah chuan a ṭhu ve reng a; tichuan, Hit mi Ephrona chuan Hetha thlahte hriatah, a khaw kulh kawngkaa lût apiangte hriat ngeiah chuan, 11 “Ni lo ve, ka pu, mi ngaithla teh; lo chu ka pe chia, a chhûnga pûk awm pawh chu ka pe bawk a che; ka chipuiho fate mit hmuhah hian ka pe a che; i mitthi chu phûm mai rawh,” tiin Abrahama chu a chhâng a. 12 Tin, Abrahama chu chumi rama mite hmaah chuan a kûn a, chibai a bûk a. 13 Tin, chumi rama mite hriatah chuan Ephrona hnênah, “Rem i tih phawt chuan khawngaih takin mi ngaithla teh; lo man chu ka pe zâwk ang che; ka hnên ata hi la la, chutah chuan ka mitthi chu ka phûm dawn nia,” tiin a sawi a. 14 Tin, Ephrona chuan Abrahama chu a chhâng a, a hnênah, 15 “Ka pu, mi ngaithla teh; lei hmun, tangka sekel zali hu mai te chu nang leh keia tân sawi tham em ni ang? I mitthi chu phûm mai rawh,” a ti a. 16 Tichuan, Abrahama chuan Ephrona thu chu a zâwm ta a; tin, Abrahaman Hetha thlahte hriatah Ephronan tangka a sawi zât, tangka sekel zali, sumdâwnghovin an hman ṭhin chu a bûk a, Ephrona chu a pe ta a. 17 Chutichuan, Ephrona lo, Mamre zâwna Makpela rama awm chu, a lo nên, a chhûnga pûk awm nên, lova thing awm zawng zawngte nên, a lo ri vêl zawng zawnga thing awmte nên chuan, 18 Hetha thlahte mit hmuhah, a khaw kulh kawngkaa lût apiangte mit hmuhah chuan, ro atân Abrahama hnênah pêk nghehin a awm ta a. 19 Chumi hnuah chuan Abrahaman a nupui Sari chu Kanaan rama Mamre zâwna (chu chu Hebron khua a ni a) Makpela lova pûkah chuan a phûm ta a. 20 Tichuan, lo leh a chhûnga pûk awm chu, phûmna hmun ro atân Abrahama chu Hetha thlahten an pe nghet ta a.

Genesis 24

Isaaka tân nupui an zawng

1 Tin, Abrahama chu a lo upa a, a lo tar ta hle a; tin, LALPA chuan Abrahama chu thil engkimah mal a sâwm tawh a. 2 Tin, Abrahama chuan a chhiahhlawh, a chhûngte zînga upa ber, a neih zawng zawng chunga thuneitu hnênah chuan, “Khawngaih takin i kut kha ka malpui hnuaiah rawlh rawh; 3 tichuan, LALPA, vân Pathian leh lei Pathian chu chhâlin, ka awmna Kanaan-ho nula zînga mi hi ka fapa nupuia neihsak lo tûrin chhia ka chhamtîr dâwn che a ni; 4 kan ram lamah, ka laichînte hnêna kalin ka fapa Isaaka hi nupui i neihsak zâwk tûr a ni,” a ti a. 5 Tin, chhiahhlawh chuan a hnênah, “Hmeichhia chuan hemi ram lamah hian mi zui duh kher lo thei a; i fapa hi i lo chhuahna ram lamah chuan ka hruai kîr leh dâwn em ni ang?” a ti a. 6 Tin, Abrahama chuan a hnênah, “Ka fapa hi chutah chuan hruai kîr leh lo tûrin fîmkhur rawh. 7 LALPA, vân Pathian, ka pa in ata leh ka pianna ram ata mi hruai chhuaktu leh, mi betu leh, ‘He ram hi i thlahte ka la pe ang,’ tia ka hnêna chhechhamtu chuan, amah ngeiin a vântirhkoh chu i hmaah a kaltîr ang a, chuta ṭang chuan ka fapa hi nupui i rawn neihsak dâwn nia. 8 Tin, hmeichhia chuan a zui duh loh che chuan, ka hnêna i chhechham kawngah hian i thiang mai ang; eng pawh ni rawh se, ka fapa hi chutah chuan i hruai kîr leh tûr a ni lo,” a ti a. 9 Tichuan, chhiahhlawh chuan a kut chu a pu Abrahama malpui hnuaiah chuan a rawlh a, chumi thu-ah chuan a hnênah chhia a chham ta a. 10 Tin, chhiahhlawh chuan a pu sanghâwngsei zînga mi sanghâwngsei sâwm a hruai a, a pu thil ṭha tinrêng kengin a chhuak ta a; tichuan, a tho va, Mesopotamia rama Nahora te khuaah chuan a kal a. 11 Tin, tlai lama hmeichheho tui chawi tûra an chhuah hun lai tak chuan, dai kianga tuichhunchhuah kiangah chuan a sanghâwngseite chu a ṭhingṭhittîr a. 12 Tin, “Aw LALPA, ka pu Abrahama Pathian, khawngaih takin vawiinah hian mi hlawhtlintîr la, ka pu Abrahama chungah chuan khawngaihna lantîr ang che. 13 En teh, tuikhur kiangah ka ding a, khuaa mite fanuho pawh tui chawi tûra an lo kal hi; 14 tichuan, heti hian ni rawh se, nula tu hnênah pawh, ‘Khawngaih takin ka in tûrin i tui bêl kha han tihniam teh khai,’ ka tiha, ‘In rawh, i sanghâwngseite pawh hi in tûr ka pe ang e,’ titu apiang, chu mi ngei chu i chhiahhlawh Isaaka tâna i mi ruat chu ni rawh se; tin, chumiah chuan ka pu chungah khawngaihna i lantîr tih ka hre dâwn nia,” a ti a. 15 Tin, heti hi a ni a, a sawi zawh hma chuan, ngai teh, Abrahama nau Nahora nupui Milkai fapa Bethuela fanu Rebeki chu, a kokia tui bêl puin a lo chhuak a. 16 Chu nula chu a hmêl a ṭha êm êm a, nula thianghlim a ni a; mipa rêng rêngin an la pâwl ngai hauh lo. Tin, tuikhurah chuan a chhuk a, a tui bêl chu a tikhat a, a chho leh a. 17 Tin, chhiahhlawh chu a tâwk tûrin a tlân a, “Khawngaih takin i tui bêla tui kha tlêm tê mi intîr teh khai,” a ti a. 18 Tin, ani chuan, “In ta che, ka pu,” a ti a; tin, rang takin a tui bêl chu a kutah a chawi thla a, a intîr ta a. 19 Tin, a intîr hnuin, “I sanghâwngseite tân pawh an in kham hma loh chuan ka chawi zêl ang e,” a ti a. 20 Tin, rang takin a tui bêl chu a ran thlêngah chuan a ruak a, tui chawi tûrin tuichhunchhuah lamah chuan a tlân leh a, a sanghâwngseite zawng zawng tân chuan a chawi ta zêl a. 21 Tin, chhiahhlawh chuan ani chu a en reng a; LALPAN a va zinna chu a hlawhtlintîr leh tîr loh hriat nân a ngawi reng mai a. 22 Tin, heti hi a ni a, sanghâwngseite chuan an in kham veleh, chhiahhlawh chuan rangkachak hnârvuah duli bûk leh a kut atân banbun pahnih rangkachak tangka sâwm bûk a phawrh a; 23 tin, a hnênah, “Tu fanu nge i nih? Khawngaih takin mi hrilh teh. I pa inah kan riahna tûr hmun a awm ang em?” a ti a. 24 Tin, ani chuan a hnênah, “Bethuela, Milkai fapa, Nahora tân a hrinsaka fanu ka ni,” a ti a. 25 Tin, amah vêkin a hnênah, “Buhpâwl leh ran chaw kan ngah ve ve a, riahna hmun pawh kan nei,” a ti bawk a. 26 Tichuan, chhiahhlawh chuan a lu a kûn a, LALPA chu chibai a bûk a, 27 “Ka pu chunga a khawngaihna leh a rinawmna bâng chuang lo LALPA, ka pu Abrahama Pathian chu fakin awm rawh se; kei pawh hi LALPA chuan ka pu unaute in lamah mi hruai a lo nih hi,” a ti a. 28 Tin, nula chu a tlân a, chûng thu chu a nu chhûngte a va hrilh a. 29 Rebeki chuan nuṭa a nei a, a hming chu Labana a ni a; tichuan, Labana chu a chhuak a, tuikhur lamah mi hnênah chuan a tlân ta a. 30 Heti hi a ni a, hnârvuah leh a farnu kuta banbunte chu a hmu a, “Mi chuan chutin khatin mi ti a,” tia a farnu Rebeki thusawite chu a hriat veleh chuan, mi hnênah chuan a kal ta a; tin, ngai teh, ani chu tuikhura sanghâwngseite kiangah chuan a lo ding reng a. 31 Tin, Labana chuan, “Nang LALPA malsâwm dawngtu, lo kal la, ka inah lût rawh. Engah nge pâwna i din reng? In leh sanghâwngseite tân hmun ka buatsaih tawh asin,” a ti a. 32 Tin, mi chu inah chuan a lût a; tin, Labana chuan sanghâwngsei thuamhnaw chu a phelh a; tin, sanghâwngseite tân buhpâwl leh ran chaw a pe a, a ke leh a ṭhiante ke sil nân tui a pe bawk a. 33 Tin, Abrahama chhiahhlawh hmaah chuan ei tûr an hlui a; nimahsela, ani chuan, “Ka rawn kal chhan thu ka sawi hma loh chuan ka ei lo vang,” a ti a. Tin, ani chuan, “Sawi ta che,” a ti a. 34 Tin, ani chuan, “Abrahama chhiahhlawh ka ni. 35 Tin, LALPA chuan ka pu chu nasa takin mal a sâwm a, mi lian tak a lo ni ta a; LALPA chuan a hnênah berâm rual te, bâwng rual te, tangkarua te, rangkachak te, bawihpa te, bawihnu te, sanghâwngsei te, sabengtung te a pe bawk a. 36 Ka pu nupui Sarin a tar hnuin ka pu tân fapa a hring a; ama hnênah chuan a neih zawng zawng a pe vek a. 37 Tin, ka pu chuan, ‘Ka awmna rama Kanaan-ho nula zînga mi hi ka fapa nupuiah i neihsak tûr a ni lo; 38 ka pa in lamah, ka laichînte hnêna kalin ka fapa tân nupui i neihsak zâwk tûr a ni,’ tiin chhia mi chhamtîr a. 39 Tin, keiin ka pu hnênah chuan, ‘Hmeichhia chuan mi zui duh kher lo thei a,’ ka ti a. 40 Tin, ani chuan ka hnênah, ‘LALPA, a hmaa ka awm ṭhinna chuan a vântirhkoh chu i hnênah a tîr ang a, i kalna tûrah chuan a hlawhtlintîr ang che; tichuan, ka fapa tân ka laichînte leh ka pa chhûngte zînga mi nupuiah i neihsak dâwn nia; 41 ka laichînte hnên ngei i thlen hunah chuan ka hnêna i chhechham lakah hian i thiang ang; nula chu an pêk loh che chuan ka hnêna i chhechham lakah hian i thiang ang,’ a ti a. 42 “Tichuan, vawiinah hian tuikhur chu ka lo thleng a, ‘Aw LALPA, ka pu Abrahama Pathian, rem i tih chuan ka kalnaah hian mi hlawhtlintîr ang che. 43 En teh, tuikhur kiangah ka din hi; tin, heti hi ni rawh se, nula tui chawi tûra lo chhuak tu hnênah pawh, “Khawngaih takin in atân i tui bêla tui kha tlêm tê mi pe teh,” ka tiha, 44 anin ka hnênah, “In rawh, i sanghâwngseite tân pawh hian ka chawi ang e,” titu apiang, chu mi ngei chu ka pu fapa tâna LALPA hmeichhe ruat chu ni rawh se,’ ka ti a. 45 Tin, ka rilrua ka sawi zawh hma chuan ngai teh, Rebeki hi a tui bêl puin a lo chhuak a; tin, tuikhurah chuan a chhuk a, tui a zuk chawi a; tin, a hnênah, ‘Khawngaih takin tui mi intîr teh khai,’ ka ti a. 46 Tin, ani hian rang takin a koki ata chu a tui bêl a chawi thla a, ‘In rawh, i sanghâwngseite pawh hi in tûr ka pe ang e,’ a ti a; chutichuan, ka in a, sanghâwngseite pawh a intîr bawk a. 47 Tin, keiin, ‘Tu fanu nge i nih?’ tiin ka zâwt a. Tin, ani hian, ‘Bethuela, Nahora fapa, Milkain a hrinsaka fanu,’ a ti a; tin, hnârvuah chu a hnârah ka vuah a, bânbunte chu a bânah ka buntîr bawk a. 48 Tin, ka lu ka kûn a, LALPA chu chibai ka bûk a, LALPA, ka pu Abrahama Pathian, ka pu nauva fanu hi a fapa tân nupuia neihsak tûra kawng dik taka mi hruaitu chu ka fak ta a. 49 Tichuan, tûnah ka pu chu in khawngaiha, a chunga rinawm taka in tih dâwn chuan mi hrilh rawh u; chutichuan, ding lam emaw, vei lam emaw ka hawi thei ang,” a ti a. 50 Tin, Labana leh Bethuela chuan an chhâng a, “He thil hi LALPA hnên aṭanga chhuak a nih hi; a chhia a ṭha pawh i hnênah kan sawi thei lo ve. 51 En teh, Rebeki chu i hmaa hi a awm alâwm; hruai la, kal ta che, LALPAN a sawi tawh angin i pu fapaa nupuiah awm rawh se,” an ti a. 52 Tin, heti hi a ni a, Abrahama chhiahhlawh chuan an thu chu a hriat velah lei siin LALPA chibai a bûk ta a. 53 Tin, Abrahama chhiahhlawh chuan tangkaraw incheinate leh rangkachak incheinate leh silhfênte a la chhuak a, Rebeki chu a pe a; a nuṭa leh a nu pawh chu thil hlu takte a pe bawk a. 54 Tin, amah leh a ṭhiante chuan an eiin an in a, an riak ta a; tin, zîngah an tho va, “Ka pu hnênah mi kaltîr tawh rawh u,” a ti a. 55 Tin, a nuṭa leh a nu chuan “Chêmtei hi ni rei lo tê, ni sâwm lek tal kan hnênah awm rih rawh se; chumi hnuah chuan a kal dâwn nia,” an ti a. 56 Tin, ani chuan an hnênah, “Mi tikhawtlai suh u khai, LALPA chuan ka kalnaah hian mi hlawhtlintîr ta si a; ka pu hnêna ka hâwn theihna tûrin mi kaltîr zâwk teh u khai,” a ti a. 57 Tin, anni chuan, “Chêmtei chu kan ko vang a, ama kâ ngei kan bia ang,” an ti a. 58 Tichuan, Rebeki chu an ko va, a hnênah, “He mi hnênah hian i kal duh ang em?” an ti a. Tin, ani chuan, “Duh ang chu,” a ti a. 59 Tichuan, an farnu Rebeki leh a awmtu leh Abrahama chhiahhlawh leh a hote chu an kaltîr a. 60 Tin, Rebeki chu mal an sâwm a, a hnênah, “Kan farnu, nang chu sîng hlîra sâng tam tak nu lo ni la, i thlahte chuan anmahni hawtute kulh kawngkhâr chu neihsak rawh se,” an ti a. 61 Tichuan, Rebeki chu a tho va, a bawihnute nên, sanghâwngsei chungahte chuan an chuang a, mi chu an zui ta a; tichuan, Abrahama chhiahhlawh chuan Rebeki chu a hruai a, a kal ta a. 62 Tin, Isaaka chu Beer-lahai-roi lam aṭang chuan a lo kal a, Chhim rama awm a ni si a. 63 Tin, Isaaka chu tlai lamah phûlah inngaihtuah tûrin a va lêng chhuak a; tin, a han dâk a, a en a; tin, ngai teh, sanghâwngseite an lo kal a. 64 Tin, Rebeki chu a han dâk a, Isaaka a hmuh veleh chuan sanghâwngsei ata a chhuk ta a. 65 Tin, Abrahama chhiahhlawh hnênah chuan, “Phûla min hmuak tûra lo kal saw tu nge ni?” a ti a. Tin, chhiahhlawh chuan, “Ka pu a nih saw,” a ti a; tichuan, a inkhuhna puan a la a, a inkhuh ta a. 66 Tin, chhiahhlawh chuan a thiltih zawng zawng chu Isaaka a hrilh a. 67 Tin, Isaaka chuan Rebeki chu a nu Sari puan inah chuan a hruai lût a; tin, Rebeki chu a nei a, a nupui a lo ni ta a; tin, amah chu a hmangaih hle a; tichuan, Isaaka chu a nu thih hnuah pawh chuan a lo thlamuang thei ta a.

Genesis 25

Nupui dang laka Abrahama fate

1 Tin, Abrahama chuan nupui dang a nei a, a hming chu Keturi a ni a. 2 Tin, ani chuan Zimrana te, Joksana te, Medana te, Midiana te, Isbaka te, Suaha te a hrinsak a. 3 Tin, Joksana chuan fapa Seba leh Dedana a nei a. Tin, Dedana fapate chu Assurima te, Letusima te, Leummima te an ni a. 4 Tin, Midiana fapate chu Epha te, Ephera te, Hanoka te, Abida te, Elda te an ni. Chûng zawng zawng chu Keturi fate an ni a. 5 Tin, Abrahama chuan a neih zawng zawng chu Isaaka a pe a. 6 A hmeiho fapate erawh chu Abrahama chuan lâwmmante a pe a; tin, amah a la dam lai ngei chuan a fapa Isaaka hnên ata chu khawchhak lamah, khawchhak ramah chuan a kal botîr ta hlawm a.

Abrahama thih thu

7 Tin, Abrahama dam chhûng chu kum za leh kum sawmsarih leh kum nga a ni a. 8 Tin, Abrahama chuan a thlarau a thlah a, lua kêlsam ṭo vek, putar tak, tar kûna damin a thi a, a chipuite hnênah chuan hruaiin a awm ve ta a. 9 Tin, a fapa Isaaka leh Ismaela chuan Hit mi Zohara fapa Ephrona lova Mamre zâwna Makpela pûkah chuan an phûm ta a; 10 chu lo chu Abrahaman Hetha thlahte laka a lei a ni; chutah chuan Abrahama chu an phûm a, a nupui Sari nên khân. 11 Tin, heti hi a ni a, Abrahama thih hnuah chuan Pathianin a fapa Isaaka chu mal a sâwm a; tin, Isaaka chu Beer-lahai-roi kiangah chuan a awm a.

Ismaela thlahte

12 Tin, hêng hi Abrahama fapa Ismaela, Sari bawihnu, Aigupta mi, Hagarin Abrahama a hrinsaka thlahte chu an ni. 13 Hêng hi an hming ṭheuh leh an thlahte ang zêlin Ismaela fapate hming chu a ni: Ismaela fa upa ber chu Nebaiotha a ni a; a naute chu Kedara leh Adbeela leh Mibsama leh, 14 Misma leh Duma leh Masa an ni a; 15 Hadada leh Tema, Jetura, Naphisa leh Kedema an ni bawk a. 16 Chûng chu Ismaela fapate an ni a; chûng chu an khua ang zêl leh an riahbûk ang zêlin an hming ziak a ni a; an chi ang zêl chuan lal sâwm leh pahnih an ni a. 17 Tin, Ismaela dam chhûng kum chu hei hi a ni, kum za leh kum sawmthum leh kum sarih hi. Tin, a thlarau a thlah a, a thi a, a chipuite hnênah chuan hruaiin a awm ve ta a. 18 Tin, a fapate chu Havila ram aṭangin Assuria ram pan zâwngin Aigupta ram zâwn, Sur thlengin an awm a; an unau zawng zawng depah chuan an awm a.

Esauva leh Jakoba pian thu

19 Tin, hêng hi Abrahama fapa Isaaka thlahte chu an ni: Abrahama chuan fapa Isaaka a nei a; 20 Isaakan Paddan-aram rama Suria mi Bethuela fanu, Suria mi, Labana farnu Rebeki chu a nupuia a neih lai chuan kum sawmli mi a ni a. 21 Tin, a nupui chu a chin avângin Isaaka chuan LALPA hnênah a ngensak chiam a; tin, LALPAN a dîlna chu a ngaihthlâksak a; tichuan, a nupui Rebeki chu a rai ta a. 22 Tin, a nau paite chu a kawchhûngah chuan an insual a; tin, ani chuan, “Hetiang a nih si chuan eng vângin nge ka dam reng le?” a ti a. Tichuan, LALPA zâwt tûrin a kal ta a. 23 Tin, LALPA chuan a hnênah, “I chhûlah chuan chi hnih an awm a, I pum chhûng aṭang ngei chuan hnam hnih an inṭhen ang; Hnam pakhat chu hnam pakhat ai chuan a chak zâwk ang a; Tin, a upa zâwk chuan a naupang zâwk rawng chu a bâwl ang,” a ti a. 24 Tin, a nau hrin a hun chuan ngai teh, a chhûlah chuan phîr an lo awm a. 25 Tin, a hmasa zâwk chu a sena sen tur, puan hmul anga hmul thupin a lo chhuak a; tichuan, a hmingah chuan Esauva an sa a. 26 Chumi zawhah chuan a nau chu a lo chhuak leh a, a kutin Esauva keartui chu a chelh reng a; tichuan, ani hmingah chuan Jakoba an sa a; tin, Rebekin anmahni chu a hrin lai chuan, Isaaka chu kum sawmruk mi a ni a. 27 Tin, naupangte chu an lo ṭhang lian a; tin, Esauva chu sa pêl thiam tak, mi ramvachal a ni a; Jakoba erawh chu mi ni chuah, puan in lamtea awm mi a ni. 28 Tin, Isaaka chuan a sakhi sa a ei ṭhin avângin Esauva chu a ngaina a; Rebeki erawh chuan Jakoba chu a ngaina zâwk a.

Esauvan fa u a nihna a hralh

29 Tin, Jakoba chuan englo a chhûm kawi a; tin, Esauva chu ram lam aṭangin a lo hâwng a, a chau hle a; 30 tin, Esauvan Jakoba hnênah chuan, “Khawngaih takin i englo sen chhum kawi ngei kha mi eitîr teh khai; ka chau êm mai,” a ti a. Chu vâng chuan a ni, a hming chu Edoma an tih ni. 31 Tin, Jakoba chuan, “I fa tîr nihna mi leitîr zet la le,” a ti a. 32 Tin, Esauva chuan, “Ngai teh, ka thi lek lek a ni si a; fa tîr nihna mai hi ka tân eng nge sâwt ang?” a ti a. 33 Tin, Jakoba chuan, “Ka hnênah chhia chham zet rawh le,” a ti a; tin, a hnênah chhia a chham a; tichuan, a fa tîr nihna chu Jakoba hnênah a hralh ta mai a. 34 Tin, Jakoba chuan Esauva chu chhang leh dailuah chhum kawi a pe a; tichuan, a eiin a in a, a tho va, a kal ta a; chutiang chuan Esauva chuan a fa tîr nihna chu a ngainêp a ni.

Genesis 26

Gerar ramah Isaaka a khawsa

1 Tin, chumi ramah chuan Abrahama dam laia ṭâm lo tla hmasa zâwk tih loh kha, ṭâm a lo tla leh a. Tichuan, Isaaka chu Philistin-ho lal Abimeleka hnênah Gerar khuaah a zuk kal a. 2 Tin, LALPA chu a hnênah a rawn inlâr a, “Aigupta ramah chuan zuk kal suh; ram ka hrilh tûrah che chuan awm rawh; 3 he ramah hian awm rih la; tichuan, i hnênah ka awm ang a, mal ka sâwm dâwn che nia; hêng ram zawng zawng hi nangmah leh i thlahte pein, i pa Abrahama hnêna chhia ka chham kha ka tinghet dâwn a ni; 4 tin, vâna arsi zâtin i thlahte chu ka la tipung ang a, hêng ram zawng zawng hi i thlahte ka la pe bawk ang; tin, i thlahah chuan khawvêla chi tin an la thawveng ang. 5 Abrahama chuan ka thu a awih a, ka thuhrilhte, ka thupêkte, ka thuruatte, ka dânte pawh a zawm avâng khân,” a ti a. 6 Tichuan, Isaaka chuan Gerar khuaah chuan awmhmun a khuar ta a; 7 tin, chumi khuaa mite chuan a nupui chanchin an zâwt a; tin, ani chuan, “Ka farnu a ni,” a ti a; a hmêl a ṭhat avângin, “He khuaa mite hian Rebeki vângin mi that dah ang e,” tiin, “Ka nupui a ni,” a ti ngam lo a ni. 8 Tin, heti hi a ni a, chutah chuan rei tak a awm hnuin, Philistin-ho lal Abimeleka chuan tukverh aṭangin a han thlîr a; tin, ngai teh, Isaakan a nupui Rebeki a chhaih lai a han hmu a. 9 Tichuan, Abimelekan Isaaka chu a ko va, “Ngai teh, i nupui a nih ngei hi le; engati nge, ‘Ka farnu a ni,’ i tih mai le?” a ti a. Tin, Isaaka chuan a hnênah, “ ‘Amah vângin ka thi dah ang e,’ ka tih vâng a ni,” a ti a. 10 Tin, Abimeleka chuan, “Kan chunga i thiltih hi engtizia nge ni le? Mite zînga mi tu pawh hian i nupui hi an lo mutpui mai thei asin; tichuan, kan chungah hian thiam lohna i rawn thlentîr a ni dâwn asin,” a ti a. 11 Tin, Abimeleka vêk chuan, “Tu pawh he mi hi emaw, a nupui hi emaw khawih apiang chu tihhlum ngei ngei tûr a ni,” tiin mi zawng zawng chu thu a pe a. 12 Tin, Isaaka chuan chumi ramah chuan buh a chîng ve a, chumi kum chuan a leh za a hmu a; LALPAN mal a sâwm bawk a. 13 Tichuan, ani chu a lo ropui ta hle a, nasa taka mi ropui lo ni khawpin a lo lian ta tulh tulh a; 14 berâm rualte leh bâwng rualte a nei a, chhiahhlawh tam tak a nei bawk a; tichuan, Philistin-ho chuan an îtsîk ta a. 15 Tin, a pa Abrahama dam laia a pa chhiahhlawhten tuichhunchhuah an laih zawng zawng chu Philistin-hoten an hnawh a, leiin an lo tikhat vek mai a. 16 Tin, Abimeleka chuan Isaaka hnênah, “Kan hnên ata kal bo daih rawh, kan aiin i chak zâwk si a,” a ti a. 17 Tichuan, Isaaka chu chuta ta chu a chhuak a, Gerar ruamah chuan a puan in a zâr a, chutah chuan awmhmun a khuar ta a. 18 Tin, Isaaka chuan a pa Abrahama dam laia an tuichhunchhuah laihte chu a lai leh a; Abrahama thih hnu khân Philistin-ho chuan an lo hnawh khat vek tawh si a; tin, a pain a hming a lo vuah ang zêl khân a hming a vuah hlawm a. 19 Tin, Isaaka chhiahhlawhten ruamah chuan an lai a, chutah chuan tuichhunchhuah hna nei an hmu ta hlauh va. 20 Tichuan, Gerar khuaa ranpute chu, “Tui hi kan ta a ni,” tiin Isaaka ranpute nên chuan an inhnial a; tichuan, amah nên an inhnial avângin tuichhunchhuah hmingah chuan “Esek” a vuah ta a. 21 Tin, tuichhunchhuah dang an lai leh a, chumi pawh chu chuh tumin an inhnial leh a; tichuan, a hmingah chuan “Sitna” a vuah leh a. 22 Tin, chuta ta chu a insawn a, tuichhunchhuah dang a lai leh a; chu chu chuh tumin an inhnial ta lo va; tichuan, “Tûnah zawng LALPAN hmun zau tak mi siamsak ta a, he ramah hian chi tam tak kan thlah tawh ang,” tiin, a hmingah chuan “Rehoboth” a vuah ta a. 23 Tin, chuta ṭang chuan Beer-seba-ah a han chho va. 24 Chumi zân ngei chuan LALPA chu a hnênah a rawn inlâr a, “Kei hi i pa Abrahama Pathian chu ka ni; hlau suh, i hnênah ka awm alâwm, mal ka sâwm ang chia, ka chhiahhlawh Abrahama avângin i thlahte chu ka la tipung dâwn asin,” a ti a. 25 Tichuan, chutah chuan maichâm a siam a, LALPA hming chu a lam a, chutah chuan a puan in a zâr bawk a; tin, Isaaka chhiahhlawhte chuan chutah chuan tuichhunchhuah an lai leh a.

Isaaka leh Abimeleka inremna

26 Tin, Gerar khua aṭangin Abimeleka chu a ṭhian Ahuzzatha nên, a sipai pâwl hotu Phikola nên a hnênah an kal a, 27 Tin, Isaaka chuan an hnênah, “Mi hua a, in hnên ata mi kal botîr si a, eng vângin nge ka hnêna in lo kal le?” a ti a. 28-29 Tin, anni chuan, “LALPA chu i hnênah a awm tih chiang takin kan hria a; tichuan, ‘I pawi kan khawih ngai loh ang leh, thil ṭha chauh lo chu i chungah eng mah rêng rêng kan tih lohva, tlang taka kan kal botîr ta che ang khân, keini pawh kan chhiatna tûr rêng rêng i tih lohna tûrin kan kârah, keini leh nangma kâr ngeiah hian, chhechhamna lo awm tawh sela, i hnênah thu min thluntîr rawh,’ kan ti; tûnah chuan nang zawng LALPA malsâwm dawngtu i nih tawh hi,” an ti a. 30 Tin, ani chuan an tân ruai a ṭheh a; tichuan, an eiin an in ta a. 31 Tin, zîng lamah chuan zîng takah an tho va, chhia an chham tawn a; tin, Isaakan anni chu a kaltîr a; tichuan, a hnên aṭang chuan tlang takin an chhuak ta a. 32 Tin, heti hi a ni a, chumi ni vêk chuan Isaaka chhiahhlawhte chu an lo kal a, an tuichhunchhuah laih chanchin an rawn hrilh a, a hnênah, “Tui kan hmu ta,” an ti a. 33 Tichuan, chu tuichhunchhuah chu “Siba” a vuah a; chuvângin, chumi khaw hming chu tûn thlengin “Beer-seba” a la ni a.

Esauvan nupuiah hnam dang a nei

34 Tin, Esauva chuan kum sawmli mi a nihin, Hit mi Beeria fanu Judithi leh, Hit mi Elona fanu Basemathi nupuiah a nei a; 35 chûngte chu Isaaka leh Rebeki thinlung tiretheitute an ni a.

Genesis 27

Isaakan Jakoba mal a sâwm

1 Tin, heti hi a ni a, Isaaka chu a lo tar a, khaw hmu thei lo khawpa a mit a lo thim hnu chuan a fapa upa zâwk Esauva chu a ko va, a hnênah, “Ka fapa,” a ti a; tin, ani chuan a hnênah, “Heta hi ka awm,” a ti a. 2 Tin, ani chuan, “Ngai teh, ka tar tawh êm a, ka thih ni tûr ka hre si lo va. 3 Chutichuan, tûnah hian khawngaih takin i hriamhrei, i thal bâwm leh i thal ngul kha keng la, va ramchhuak la, sakhi mi va kahsak rawh; 4 tin, ka thih hmaa mal ka sâwmsakna tûr chein, ka duh zâwng takin chawhmeh tui takah mi siamsak la, ka ei tûrin ka hnênah rawn la rawh,” a ti a. 5 Tin, Isaakan a fapa Esauva a biak lai chu Rebeki chuan a lo hria a. Tin, Esauva chu sakhi kâpa rawn hâwn tûrin ramah chuan a kal ta a. 6 Tin, Rebeki chuan a fapa Jakoba hnênah, “Ngai teh, i pa chuan i u Esauva hnênah, 7 ‘Sakhi mi rawn lâk la, ka eia, ka thih hmain LALPA hmaah mal ka sâwmsakna tûr chein, chawhmeh tui takah mi siam rawh,’ tia a sawi ka hria. 8 Chutichuan, ka fapa, tûnah hian thu ka pêk che ang zêlin ka thu zâwm ang che. 9 Ran rual zîngah va kal la, chuta ta chu kêlno pahnih ṭha tak mi va lâk rawh; tichuan, chumi chu a duh zâwng takin i pa tân chawhmeh tui takah ka lo siam ang e; 10 tin, a thih hmaa mal a sâwmsakna tûr chein, a ei tûrin i pa hnênah i va kalpui tûr a ni,” tiin a sawi a. 11 Tin, Jakoba chuan a nu Rebeki hnênah, “Ngai teh, ka u Esauva chu mi hmul tak a ni a, kei zawng mi mâm tak ka ni si a. 12 Ka pa chuan mi lo dap vêl mai thei a; tichuan, ama ngaihin bumtu ang ka lo ni ang a, malsâwm ahnêkin ânchhia indawntîr mai ka ni ang asin,” a ti a. 13 Tin, a nu chuan a hnênah, “Ka fapa, i ânchhe dawn tûr chu ka chungah awm rawh se; ka thu zâwm la, mi va lâk mai rawh,” a ti a. 14 Tin, a kal a, a va la a, a nu hnênah a rawn kalpui a; tichuan, a nu chuan a pa duh zâwng takin chawhmeh tui takah a siam a. 15 Tin, Rebeki chuan a fapa upa zâwk Esauva silhfên ṭha tak, ina a hnêna awm chu a la a, a fapa naupang zâwk Jakoba chu a thuam a; 16 tin, kêlno vunte pawh chu a kutah leh a nghâwng mâm laiah chuan a bel bawk a; 17 tin, chawhmeh tui tak leh chhang a siamte chu a fapa Jakoba kutah a pe a. 18 Tin, ani chu a pa hnênah a kal a, “Ka pa,” a ti a; tin, ani chuan, “Heta hi ka awm; ka fapa, tu zâwk nge i nih?” a ti a. 19 Tin, Jakoba chuan a pa hnênah, “I fapa upa zâwk Esauva ka ni; mi tirh ang khân ka ti zo ta a, khawngaih takin tho la, mal mi sâwmsakna tûrin ṭhu la, ka sakhi sa hi ei rawh le,” a ti a. 20 Tin, Isaaka chuan a fapa hnênah, “Ka fapa, engtizia nge i va rawn hmu hma teh thut ve le?” a ti a. Tin, ani chuan, “LALPA i Pathian chuan mi hlawhtlintîr vâng a ni,” a ti a. 21 Tin, Isaaka chuan Jakoba hnênah, “Ka fapa, khawngaih takin lo hnai teh khai, ka lo dap vêl teh ang che, ka fapa Esauva i ni meuh na emaw,” a ti a. 22 Tin, Jakoba chuan a pa Isaaka chu a va hnaih a; tin, ani chuan a lo dap vêl a, “A aw chu Jakoba aw a ni si a, a kutte erawh chu Esauva kut a ni si,” a ti a. 23 Tichuan, a u Esauva kut anga a kut a hmul avângin amah chu a hre lo va; chutichuan, mal a sâwm ta a. 24 Tin, “Ka fapa Esauva ngei i ni maw?” a ti a. Tin, ani chuan, “Ni e,” a ti a. 25 Tin, ani chuan, “Mi han lâk hnaih rawh; tichuan, mal ka sâwmsakna tûr chein ka fapa sakhi sa chu ka lo ei ang e,” a ti a. Tin, a rawn la hnai a, a ei ta a; uain pawh a lâksak a, a in bawk a. 26 Tin, a pa Isaaka chuan a hnênah, “Ka fapa, lo hnai la, mi fâwp rawh,” a ti a. 27 Tin, a va hnaih a, a fâwp a; tin, ani chuan a silhfên rim chu a hria a, mal a sâwm a, “Ngai teh, ka fapa rim hi LALPA malsâwm ram rim ang a ni. 28 Tichuan, Pathianin vân daifîm leh Lei ṭhatna leh, Buh tam tak leh uain tam tak pe che rawh se. 29 Hnam hrang hrangten i rawng bâwl sela, Chi hrang hrangten chibai bûk che rawh se. I unaute chungah lalah awm langin, I nu faten chibai bûk che rawh se. Anchhe lawhtu apiang che chu ânchhe lawhin awm sela, Malsâwmtu apiang che chu malsâwmin awm rawh se,” a ti a.

Esauvan Isaaka malsâwmna a dîl

30 Tin, heti hi a ni a, Isaakan Jakoba mal a sâwm zawh veleh Jakoba chu a pa Isaaka hnên ata a chhuak hman chauh va, a u Esauva chu a sa pêl a lo hâwng a. 31 Tin, ani pawh chuan chawhmeh tui takah a siam a, a pa hnênah a rawn la ve a; tin, a pa hnênah chuan, “Ka pa, tho la, mal mi sâwmsakna tûrin i fapaa sakhi sa hi ei rawh le,” a ti a. 32 Tin, a pa Isaaka chuan a hnênah, “Tu nge i nih?” a ti a. Tin, ani chuan, “I fapa, i fapa upa zâwk, Esauva ka ni,” a ti a. 33 Tichuan, Isaaka chu nasa takin a khûr chiam a, “Sakhi kâpa ka hnêna a sa rawn laa, i lo thlen hmaa ka ei zawh veka, mal ka sâwm tâka kha tu nge ni le? A ni, amah chu malsâwmin a awm tawh tho tho vang,” a ti a. 34 Esauva chuan a pa thusawi chu a hriatin nasa tak leh lungchhe takin a ṭap ta rawih a, a pa hnênah chuan, “Aw ka pa, kei hi, kei pawh hi mal mi sâwm ve lul rawh,” a ti a. 35 Tin, ani chuan, “I nau chuan mi rawn bum a, i malsâwmna chu a lâksak ta che a ni,” a ti a. 36 Tin, ani chuan, “A hmingah Jakoba an vuah dik hle lo vem ni? Hei vawi hnih mi lan tâk hi; ka fa tîr nihna chu mi lâksak a; tin, ngai teh, tûnah hian ka malsâwmna mi lâksak leh tâk hi,” a ti a. Tin, amah vêkin, “Malsâwmna mi la zuahsak lâwm ni?” a ti a. 37 Tin, Isaaka chuan a chhâng a, Esauva hnênah, “Ngai teh, amah chu i lalah ka siam a, a unau zawng zawngte pawh a chhiahhlawh atân ka pe vek a; buh leh uainin ka châwm ta bawk a; ka fapa, nanga tân eng nge ka tih ang le?” a ti a. 38 Tin, Esauva chuan a pa hnênah, “Ka pa, malsâwmna pakhat chauh em ni i neih? Aw ka pa, kei hi, kei pawh hi mal mi sâwm ve lul rawh,” a ti a. Tin, Esauva chu ring takin a ṭap ta a. 39 Tin, a pa Isaaka chuan a chhâng a, a hnênah, “Ngai teh, i awmna tûr chu lei ṭhatna hlatah leh, Chung lam ata vân daifîm hlatah a ni a awm dâwn ni; 40 I khandaihin a ni i nun dâwn ni, I nau rawng pawh i bâwl dâwn a ni; Tin, heti hi a ni ang a, i tâl chhuah hunah chuan A nghâwngkawl chu i nghâwng ata i thing thla tawh ang,” a ti a. 41 Tin, a pain mal a sâwm avâng chuan Esauva chuan Jakoba chu a haw ta a; tin, Esauva chuan a rilruin, “Ka pa sûn ni tûr chu a hnai tawh a, chumi hunah chuan ka nau Jakoba chu ka that mai ang,” a ti a. 42 Tin, a fapa upa zâwk Esauva thusawi chu Rebeki an hrilh a; tichuan, mi a tîr a, a fapa naupang zâwk Jakoba chu a ko va, a hnênah, “Ngai teh, i u Esauva chuan i chungchâng thu-ah, nangmah tihhlum tumin a inhnêm a ni. 43 Chutichuan, ka fapa, tûnah ka thu hi awih rawh: tho la, Haran khuaa ka nuṭa Labana hnênah tlân bo rawh. 44 I u thinrimna hi a reh hma loh chuan a hnênah ni eng emaw zât va awm rih rawh; 45 i u thinurna hi i chunga a reha, a chunga i thiltih hi a theihnghilh hunah chuan mi ka tîr ang a, chuta ta chu ka rawn hruai chhuahtîr ang che; eng atân nge ni khatah in pahnihin ka chân ang che u?” a ti a.

Isaakan Labana hnênah Jakoba a tîr

46 Tin, Rebeki chuan Isaaka hnênah, “Hetha fanute avâng hian nun hi ka ning êm mai; Jakoba hian hemi ram nula, hêng ang Hetha fanuteho zînga mi hi nupuia a neih leh ve lek phei chuan, ka tân nun hi eng nge sâwt ang?” a ti a.

Genesis 28

1 Tichuan, Isaaka chuan Jakoba chu a ko va, mal a sâwm a, thu a pe bawk a, a hnênah, “Kanaan ram nulaho zînga mi hi nupuiah i nei tûr a ni lo. 2 Tho la, Paddan-aram rama i nu pa Bethuela inah kal la, chuta mi chu i nu nuṭa Labana fanute zînga mi nupuiah va nei rawh. 3 Tin, Pathian Engkimtitheia chuan malsâwm chein, hnam hrang hrang tam tak i lo nih theih nân chi tam tak thlahtîr chein, tipung che rawh se; 4 i mikhualna ram, Pathianin Abrahama a pêk hi, i luah nân Abrahama malsâwmna chu dawntîr bawk che rawh se, nang leh i thlahte pawh,” a ti a. 5 Tichuan, Isaaka chuan Jakoba chu a kal botîr a; tin, Paddan-aram rama Jakoba leh Esauva nu Rebeki nuṭa Suria mi Bethuela fapa, Labana hnênah chuan a kal ta a.

Esauvan nupui dang a nei

6 Esauva chuan Isaakan Jakoba chu mal a sâwm a, nupui nei tûrin Paddan-aram ramah a kal botîr tih leh, mal a sâwm laia, “Kanaan ram nulaho zînga mi hi nupuiah i nei tûr a ni lo,” tiin thu a pe tih leh, 7 Jakoban a nu leh a pa thu awihin Paddan-aram ramah a kal ta tih a hria a; 8 tichuan, Esauva chuan Kanaan ram nulate chuan a pa Isaaka lung an tiawi lo tih a hre ta a; 9 tichuan, Esauva chu Ismaela hnênah a va kal a, Abrahama fapa Ismaela fanu Mahalathi, Nebaiotha farnu chu, a nupui atân a nupui neih sate bâkah a va neih belhchhah leh a.

Bethel-ah Jakoban mumang a nei

10 Tin, Jakoba chu Beer-seba aṭangin a chhuak a, Haran khaw lam a pan ta a. 11 Tin, khawi lai hmun emaw a han thleng hlauh va, ni a tlâk tawh avângin chutah chuan a riak ta a; tin, chumi hmuna lung pakhat chu a la a, a lukhamah a dah a, chumi hmunah chuan muhîl tûrin a mu ta a. 12 Tin, mumang a nei a; ngai teh, lei chungah hian leilâwn a lo indawh a, a chhîp chuan vân a thleng a; tin, ngai teh, a chungah chuan Pathian vântirhkohte an chhovin an chhuk a. 13 Tin, ngai teh, a chhîpah chuan LALPA a ding a, “Kei hi LALPA, i pu Abrahama Pathian leh Isaaka Pathian chu ka ni; i mutna lei kha nang leh i thlahte ka la pe ang che u. 14 Tin, i thlahte chu leia vaivut zâtin an awm ang a, thlang lamah te, chhak lamah te, hmâr lamah te, chhim lamah te i darh zau vang a; tin, nangmahah leh i thlahah chuan khawvêla hnam tin an la thawveng ang. 15 Tin, ngai teh, i hnênah ka awm a, i kalna apiangah ka vêng zêl ang chia, he ramah hian ka hruai kîr leh ang che; i hnêna ka sawi hi ka tih hma loh chuan ka thlahthlam dâwn lo che a ni,” a ti a. 16 Tin, Jakoba chu a muhîl a han harh a, “He hmunah hian LALPA chu a awm ngei mai, ka lo hre si lo va,” a ti a. 17 Tichuan, a hlau va, “He hmun hi a va hlauhawm êm! Hei hi hmun dang a nih loh hi, Pathian in a lo nih hi le, hei hi vân kawngka a lo nih hi!” a ti a. 18 Tin, Jakoba chu zîng takah a tho va, lung a lukhama a dah chu a la a, lungphun atân a phun a, a chhîpah chuan sahriak a leih a. 19 Tin, chumi hmun hmingah chuan Bethel a vuah a; a khaw hming erawh chu a tîrah chuan Luz a ni. 20-21 Tin, Jakoba chuan, “Ka pa ina thlamuang taka ka hâwn lehna tûrin Pathian ka hnêna a awma, he ka kalna kawngah hian mi vêna, ei tûr chhang leh sin tûr silhfên mi pêk dâwn chuan, LALPA chu ka Pathian a ni ang a, 22 he lung, lungphun atâna ka phun pawh hi Pathian in a ni ang; tin, i mi pêk tûr zawng zawngah chuan sâwma pakhat ka pe ngei ngei ang che,” tiin thu a tiam ta a.

Genesis 29

Jakoban Labana in a thleng

1 Chumi hnuah chuan Jakoba chu a kal ta zêl a, khawchhak fate ram chu a thleng ta a. 2 Tin, a han en a, ngai teh, phûlah hian tuichhunchhuah a lo awm a; a kiangah chuan berâm rual thum hi an bawk reng a; chumi tuichhunchhuah ata chu berâm rualte chu tui an intîr ṭhîn a ni. Tuichhunchhuah kawngkaa lung awm chu a lian hle a. 3 Tin, chutah chuan berâm rual zawng zawng an kal khâwm ṭhîn a; tin, tuichhunchhuah kawngka ata lung chu an lum sawn a, berâmte chu tui an intîr a, lung chu tuichhunchhuah kawngkaa a awmna pângngaiah chuan an dah leh ṭhîn a. 4 Tin, Jakoba chuan an hnênah, “Ka unaute u, khawi lama mi nge in nih?” a ti a. Tin, anni chuan, “Haran khuaa mi kan ni,” an ti a. 5 Tin, ani chuan an hnênah, “Nahora fapa Labana in hria em?” a ti a. Tin, anni chuan, “Hria e,” an ti a. 6 Tin, ani chuan an hnênah, “A dam lai em ni?” a ti a. Tin, anni chuan, “Dam lai rih e; en teh, a fanu Rakili pawh berâm hruaia a lo kal saw,” an ti a. 7 Tichuan, ani chuan, “Ngai teh u, ni a la sâng hle a; ran hruai khâwm pawh a la hun hek lo. Berâmte hi tui intîr ula, va thlah rawh u khai,” a ti a. 8 Tin, anni chuan, “Kan thei lo vang, berâm rual zawng zawng an kal khâwm a, tuichhunchhuah kawngka ata lung hi an lum sawn hma loh chuan; chumi hnuah chuan berâmte chu tui kan intîr ṭhîn a ni,” an ti a. 9 Tin, anmahni a la biak lai chuan, Rakili chu a pa berâmte hruaiin a lo thleng ta a; ani chuan a vêng ṭhîn a ni. 10 Tin, heti hi a ni a, Jakoba chuan a nu nuṭa Labana fanu Rakili leh, a nu nuṭa Labana berâm rual chu a hmuh chuan Jakoba chuan a va hnaih a, tuichhunchhuah kawngka ata lung chu a lum sawn a, a nu nuṭa berâmte chu tui a intîr ta a. 11 Tin, Jakoba chuan Rakili chu a fâwp a, ring takin a ṭap ta a. 12 Tin, Jakoba chuan a pa tupa a nih leh Rebeki fapa a ni tih Rakili chu a hrilh a; tichuan, Rakili chu a tlân a, a pa a va hrilh ta a. 13 Tin, heti hi a ni a, Labana chuan a farnua fapa Jakoba chanchin chu a hriat veleh a hmuak tûrin a tlân a, a pawm a, a fâwp a, a inah a hruai ta a. Tin, Jakoba chuan chûng thu zawng zawng chu Labana chu a hrilh a. 14 Labana chuan a hnênah, “Ka ruh leh ka tisa ngei i nih chu le,” a ti a. Tin, a hnênah thla khat a awm ta a.

Rakili leh Leaii tân Labana hnênah Jakoba a inhlawhfa

15 Tin, Labana chuan Jakoba hnênah, “Ka tupa i nih avângin a thlâwnin ka rawng i bâwl tûr em ni? Eng nge i hlawh ang? Mi hrilh teh khai,” a ti a. 16 Tin, Labana chuan fanu pahnih a nei a: a upa zâwk hming chu Leaii a ni a, a naupang zâwk hming chu Rakili a ni. 17 Tin, Leaii mit chu a pâwl a; Rakili erawh chu mi tituai ṭha tak a ni a, a hmêl pawh a ṭha hle a. 18 Tin, Jakoba chuan Rakili chu a hmangaih a; tichuan, “I fanu naupang zâwk Rakili nei tûrin kum sarih i rawng ka bâwlsak ang che,” a ti a. 19 Tin, Labana chuan, “Ani chu mi dang ka pêk ai chuan ka pêk che a ṭha zâwk ang chu; ka hnênah awm reng mai rawh,” a ti a. 20 Tichuan, Jakoba chuan Rakili nei tûr chuan kum sarih chu rawng a bâwl ta a; nimahsela, a hmangaih hle avângin ni rei lo tê ang chauhvin a hria a. 21 Tin, Jakoba chuan Labana hnênah. “Ka pâwl theihna tûrin ka nupui chu mi pe rawh le, ka hun a kim tawh si a,” a ti a. 22 Tichuan, Labana chuan chumi khuaa mi zawng zawng chu a khâwm vek a, ruai a ṭheh a. 23 Tin, heti hi a ni a, thimhlimah chuan a fanu Leaii chu a hruai a, Jakoba hnênah a hruai lût a; tin, ani chu a lo pâwl a. 24 Tin, Labana chuan a bawihnu Zilpaii chu a fanu Leaii hnênah a bawihnu atân a pe a. 25 Tin, heti hi a ni a, zîng a lo nih chuan, ngai teh, Leaii a lo ni si a; tichuan, Jakoba chuan Labana hnênah, “Ka chunga i thiltih hi engtizia nge ni le? Rakili nei tûrin i rawng ka bâwl lo vem ni? Eng vângin nge mi bum mai le?” a ti a. 26 Tin, Labana chuan, “Kan ramah hian chutianga fa u hmaa a naupang zâwk kaltîr chu dân a ni lo asin. 27 Hemia ni sarih hi tlingtla rih la; tichuan, kum sarih dang ka rawng i bâwl leh tûr aiah chuan mi dang pawh chu kan pe ang che,” a ti a. 28 Tichuan, Jakoba chuan chutiang chuan a ti a, a ni sarih chu a tlingtla a; tichuan, a fanu Rakili chu nupuiah a pe ta a. 29 Tin, Labana chuan a bawihnu Bilhaii chu a fanu Rakili hnênah a bawihnu atân a pe a. 30 Tin, Rakili chu a pâwl bawk a, Leaii ai chuan Rakili chu a hmangaih zâwk bawk a, Labana rawng chu kum sarih dang a bâwl leh ta a.

Jakoba fate

31 Tin, LALPA chuan Leaii chu huatin a awm tih a hria a; tichuan, a chhûl a hawnsak a; Rakili erawh chu a ching a. 32 Tin, Leaii chu a rai a, fapa a hring a, a hmingah chuan Reubena a sa a; “LALPA chuan ka hrehawmzia a hmuh avâng a nih hi; tûnah zawng ka pasalin mi hmangaih tawh ang,” a ti a. 33 Tin, a rai leh a, fapa a hring leh a; “LALPA chuan huatin ka awm tih a hriat avângin hei pawh hi mi pe a nih hi,” a ti a; tichuan, a hmingah chuan Simeona a sa a. 34 Tin, a rai leh a, fapa a hring leh a; “Tûnah zet chuan fapa pathum ka hrinsak tâk avângin ka pasalin mi zâwm tawh ang,” a ti a; chuvângin, a hmingah chuan Levia an sa a. 35 Tin, a rai leh a, fapa a hring leh a; “Tûn ṭumah hi chuan LALPA ka fak ang,” a ti a; chuvângin, a hmingah chuan Juda a sa a; tin, fa a hring leh ta rih lo va.

Genesis 30

1 Tin, Rakili chuan Jakoba chu fa rêng rêng a hrinsak lo tih a inhriat chuan, a laizâwnnu chu a îtsîk ta a; tin, Jakoba hnênah chuan, “Fate mi pe rawh; chuti lo chuan, ka thi ang,” a ti a. 2 Tin, Rakili chungah chuan Jakoba thin chu a lo ur ta thut a; tichuan, “I rîla rah phal lotu Pathian aiawhtu ka ni em ni?” a ti a. 3 Tin, ani chuan, “En teh, ka bawihnu Bilhaii saw, amah saw pâwl rawh; chutichuan, kei pawhin ama lakah fate ka neih ve theih nân, ka mal chungah hian fa a hring dâwn nia,” a ti a. 4 Tichuan, a bawihnu Bilhaii chu a nupui atân a pe a; tin, Jakoba chuan ani chu a lo pâwl a. 5 Tin, Bilhaii chu a rai a, Jakoba chu fapa a hrinsak ta a. 6 Tin, Rakili chuan, “Pathianin mi ngaihtuah a, ka aw a hre bawk a, fapa mi pe a nih hi,” a ti a; chuvângin, a hmingah chuan Dana a sa a. 7 Tin, Rakili bawihnu Bilhaii chu a rai leh a, Jakoba chu fapa dang a hrinsak leh a. 8 Tin, Rakili chuan, “Pathian buanin ka laizâwnnu ka buan a, ka hneh ta,” a ti a; tichuan, a hmingah chuan Naphtalia sa a. 9 Tin, Leaii chuan fa dang a hring leh ta rih lo fo tih a inhriatin, a bawihnu Zilpaii chu a hruai a, a nupui atân Jakoba a pe a. 10 Tichuan, Leaii bawihnu Zilpaii chuan Jakoba chu fapa a hrinsak a. 11 Tin, Leaii chuan, “A va vânneihthlâk êm!” a ti a; tichuan, a hmingah chuan Gada a sa a. 12 Tin, Leaii bawihnu Zilpaii chuan Jakoba chu fapa dang a hrinsak leh a, 13 Tin, Leaii chuan, “Ka va nihlawh êm! Hmeichheho chuan nihlawh mi ti ngawt dâwn a nih hi,” a ti a; tichuan, a hmingah chuan Asera a sa a. 14 Tin, buh lâk laiin Reubena chuan phûlah zâwlaidi a va hmu a, a nu Leaii hnênah a rawn la a. Chutichuan, Rakili chuan Leaii hnênah, “Khawngaih takin i fapa zâwlaidi ṭhenkhat kha mi lo pe teh,” a ti a. 15 Tin, ani chuan a hnênah, “Ka pasal mi chhuhsak hi thil duai em ni? Ka fapaa zâwlaidi pawh hi mi chhuhsak i tum lehzêl maw?” a ti a. Tin, Rakili chuan, “A nih loh leh, i fapaa zâwlaidi aiah hian zâninah a mutpui ang che,” a ti a. 16 Tin, tlai lamah chuan Jakoba chu phûl aṭang chuan a lo hâwng a; tin, Leaii chu a hmuak tûrin a chhuak a, “Mi pâwl tûr a ni; ka fapaa zâwlaidiin ka hawh tawh tlat si chia,” a ti a. Tichuan, chumi zân chuan a mutpui ta a. 17 Tin, Pathianin Leaii ṭawngṭaina chu a ngaithla a; tichuan, a rai a, Jakoba chu fapa pangana a hrinsak leh a. 18 Tin, Leaii chuan, “Ka bawihnu chu ka pasal hnêna ka pêk avângin Pathianin ka hlawh mi pe ta a nih hi,” a ti a; tichuan, a hmingah chuan Isakara a sa a. 19 Tin, Leaii chu a rai leh a, Jakoba chu fapa parukna a hrinsak leh a. 20 Tin, Leaii chuan, “Pathianin thuam ṭha tak mi neihtîr a; tûnah zawng ka pasal chu, fapa paruk ka hrinsak tâk avângin ka hnênah a chêng tawh ang,” a ti a; tichuan, a hmingah chuan Zebuluna a sa a. 21 Tin, chumi hnuah chuan fanu a hring leh a, a hmingah chuan Dinaii a sa a. 22 Tin, Pathianin Rakili chu a hre reng a; tichuan, Pathianin a ṭawngṭaina a ngaithla a, a chhûl a hawnsak ta a. 23 Tichuan, a rai a, fapa a hring ta a; tin, “Pathianin ka hmingchhia a chhilh ta,” a ti a; 24 tin, “LALPA chuan fapa dang mi pêk belhchhah leh rawh se,” tiin a hmingah chuan Josefa a sa a.

Jakoba leh Labana an indâwr

25 Tin, heti hi a ni a, Rakili chuan Josefa chu a hrin hnuin, Jakoban Labana hnênah, “Keima awmna pângngaiah, kan ram lama ka hâwnna tûrin mi kaltîr tawh rawh khai. 26 I rawng ka bâwl chhan ka nupuite leh ka fate hi mi pe la, mi kaltîr rawh; i rawng ka bâwlsak zia che chu i hre si a,” a ti a. 27 Tin, Labana chuan a hnênah, “Mi khawngaih theih chuan la awm ta rih che, LALPA chuan nangma zâran mal mi sâwm tih aienin ka hria asin,” a ti a. 28 Tin, amah vêk chuan, “I hlawh tûr ruat la, mi hrilh teh; tichuan, ka pe dâwn che nia,” a ti a. 29 Tin, ani chuan a hnênah, “Engtin nge i rawng ka bâwla, engtin nge i ran chu ka hnênah an awm i hria alâwm. 30 Ka lo kal hma zawngin tlêm tê chauh i nei a, tûnah zawng tam taka an lo chan tâk hi; ka pênna lam apiangah LALPA chuan mal a sâwm zêl che a ni; amaherawhchu, eng tikah nge keima chhûngkaw tân ka thawh chhuah ve ang?” a ti a. 31 Tin, ani chuan, “Eng nge ka pêk ang che?” a ti a. Tin, Jakoban, “Eng mah mi pe tûr a ni lo; he thil hi mi tihsak chuan i ran rual chu ka thlahin ka vêng leh ang e. 32 Vawiinah hian i ran rual chu ka va en chhuak vek ang a, berâm zînga a hângin a kah chik nuk leh a hângin a kah phoh phoh leh a hâng apiang leh, kêl zînga a vârin a kah chik nuk leh a vârin a kah phoh phohte chu chuta ta chu ka hruai hrang zêl ang; tin, tûn achina chutianga lo piang apiangte chu ka hlawh tûr ni ang hmiang. 33 Chutichuan, tûn achinah, i mit hmuha awm ka hlawh kawng thu-ah i lo kal hun chuan, ka felna hian mi chhânsak mai ang; kêl zînga a vârin a kah chik nuk loh leh a vârin a kah phoh phoh loh leh, berâm zînga a hâng lo ka hnêna i hmuh apiang chu ka rûkah i ruat mai tûr a ni,” a ti a. 34 Tin, Labana chuan, “Ngai teh, i sawi ang tak chu ni ang hmiang,” a ti a. 35 Tichuan, chumi ni tak chuan kêlpa, a vâra ze tan leh a vârin a kah phoh phoh zawng zawng leh, kêlnu, a vârin a kah chik nuk leh a vârin a kah phoh phoh zawng zawng, a vâr tel apiang chu, berâm zînga a hâng zawng zawngte nên chuan a hruai hrang a, a fapate kutah a pe a; 36 tin, amah leh Jakoba kârah chuan ni thum kalah a awmtîr a; tin, Jakoba chuan Labana ran rual dang zawng zawng chu a thlah leh ta a. 37 Tin, Jakoba chuan hriang leh vaiumkhal leh thingse tiang hring a la a, a pil a khawk vâr thliah a, tiangahte chuan a vâr chu a tilang a. 38 Tin, a tiang pil khawhte chu ran rualten an rawn in ṭhinna tui inna thlêngah te, tui luannaah te chuan, ran rualte hma zâwn zêlah a dah ta a; tin, tui in tûra an lo kal lai chuan an lo rai ṭan ṭhîn a. 39 Tichuan, ran rualte chu tiang zâwnahte chuan an rai ṭan a, a ze tan te, a ze chik nuk te, a ze phoh phoh te an rawn hring ṭhîn a. 40 Tin, Jakoba chuan berâmnote chu a dah hrang a; tin, ran rualte chu Labana ran rual zînga a ze tan leh a hâng zawng zawng lam chu a hawitîr ṭhîn a; ama ran rualte chu a dah hrang ṭhîn a; Labana ran zîngah chuan a dah lo va. 41 Tin, heti hi a ni a, ran chak deuhte chu an rai ṭan apiangin tiang zînga an rai ṭan theihna tûrin, Jakoba chuan tui luannaah, ran mit hmuhah chuan tiangte chu a dah ṭhîn a. 42 Amaherawhchu, ran chu an ṭan a ṭhat loh chuan a dah ṭhîn lo; chutichuan, a no ṭanṭha lo deuhte chu Labana ta a ni zêl a, a chak deuhte chu Jakoba ta a ni zêl a. 43 Tichuan, Jakoba chu nasa takin a lo pung a, ran rual, rual lian tak tak te, bawihnu te, bawihpa te, sanghâwngsei te, sabengtung te a lo nei ta a.

Genesis 31

Labana hnên ata Jakoba a tlânchhia

1 Tin, ani chuan Labana fapaten, “Jakoban kan pa ta zawng zawng chu a lâksak vek a, kan pa taa mi a ni, hêng ropuina zawng zawng hi a hmuh ni,” an tih thute a lo hre ta a. 2 Tichuan, Jakoban Labana hmêl a en a; tin, ngai teh, tûn hma lam angin a chungah a ṭha ta lo tih a hria a. 3 Tin, LALPA chuan Jakoba hnênah, “I thlahtute ramah leh i laichînte hnênah haw leh tawh rawh; i hnênah ka awm zêl dâwn nia,” a ti a. 4 Tichuan, Jakoba chuan mi a tîr a, phûla a ran rual awmna lamah chuan Rakili leh Leaii chu a ko va; 5 tin, an hnênah, “In pa hmêl ka hmuhin, tûn hma lam angin ka chungah a ṭha ta lo tih ka hria a; nimahsela, ka pa Pathian chu ka hnênah a awm reng a ni. 6 Nangni pawhin in pa rawng hi ka theihtâwpin ka bâwl tih in hria a. 7 Nimahsela, in pa chuan mi bum a, ka hlawh hi vawi sâwm lai mi tihdanglamsak tawh a; nimahsela, Pathianin ka pawi a khawih a phal lo a ni. 8 ‘A ze chik nukte chu i hlawh a ni ang,’ a tih leh, ran zawng zawng chuan a ze chik nukte an hring ṭhîn a; tin, ‘A ze tante chu i hlawh a ni ang,’ a tih leh, ran zawng zawng chuan a ze tante an hring ṭhîn. 9 Chutiangin Pathianin in pa rante chu a lâksak a, keimah mi pe ta a nih hi. 10 Tin, heti hi a ni a, rante chu an rai ṭan lai chuan, ka mumangah chuan ka han dâk a; tin, ngai teh, a pa, ran bawhtute chu, a ze tan te, a ze chik nuk te, a ze zeng zung te an ni tih ka hmu a ni. 11 Tin, ka mumangah chuan Pathian vântirhkohvin, ‘Jakob,’ mi lo ti a; tin, keiin, ‘Heta hi ka awm,’ ka ti a. 12 Tin, ani chuan, ‘Han dâk la, en rawh, a pa, ran bawhtu zawng zawng saw, a ze tan te, a ze chik nuk te, a ze zeng zung te an nih saw; Labanan i chunga a thiltih zawng zawng hi ka hmu asin. 13 Kei hi, lungphuna sahriak i hnawihna, ka hnêna thu i tiamna Bethel, kha Bethel Pathian kha ka ni; tûnah tho la, he ram ata hi chhuak la, i pianna ramah chuan haw leh tawh rawh,’ a ti a,” a ti a. 14 Tin, Rakili leh Leaii chuan an chhâng a, a hnênah. “Kan pa inah chuan kan tân chanvo leh ro khâwm tûr rêng a la awm cheu em ni? 15 Ani chuan mikhual ang lekah min ngai tawh a ni lâwm ni? Min hralh a, kan man pawh a ei zo vek tawh si a. 16 Pathianin kan pa laka sum a lâksak zawng zawng chu keimahni leh kan fate ta a nih hi; chutichuan, Pathianin i hnêna a sawi apiang chu ti rawh khai,” an ti a. 17 Tichuan, Jakoba chu a tho va, a fapate leh a nupuite chu sanghâwngsei chungahte a chuantîr a. 18 Tin, Kanaan rama a pa Isaaka hnêna kal tûrin a ran zawng zawng leh, a sum khâwl khâwm zawng zawng, a ran hmuhte, Paddan-aram rama a khâwl khâwmte chu a kalpui ta vek a. 19 Tin, Labana chu a berâm hmul mêt tûrin a kal daih a; tin, Rakili chuan a pa milemte a rûksak a. 20 Tin, Jakoba chu Suria mi Labana hriat loh hlânin a kal ru ta daih a, a tlân bo tûr chu a hrilh lo va. 21 Chutichuan, a neih zawng zawng nên chuan a tlân bo ta a; tin, a tho va, Luipui chu a kân a, Gilead tlâng lam chu hmachhawnin a pan zêl a.

Labanan Jakoba a ûm

22 Tin, a ni thum niah chuan Jakoba a tlân bo tih Labana chu an hrilh a. 23 Tichuan, a unaute a hruai a, ni sarih kal a ûm a; Gilead tlângah chuan a ûmpha ta a. 24 Tin, Suria mi Labana hnênah chuan zâna a mumangah Pathian a lo kal a, a hnênah, “Jakoba hnênah a chhia a ṭha enga mah sawi lo tûrin fîmkhur rawh,” a ti a. 25 Tin, Labana chuan Jakoba chu a ûmpha ta a. Tin, Jakoba chuan a puan in chu tlângah a lo zâr tawh a; tin, Labana pawhin a unaute nên chuan Gilead tlângah an zâr ve ta a. 26 Tin, Labana chuan Jakoba hnênah, “I thiltih hi engtizia nge ni le, ka hriat loh hlâna i kal rûk daiha, chemsen bawihte ang maia ka fanute i hruai bo hi? 27 Eng vângin nge a rûka i tlân bova, mi kal rûksana, hlimna te nên, hla te nên, khuangtê te nên, ṭingṭang te nên ka thlahna tûr chein mi hrilh lohva, 28 ka tute leh ka fanute ka fawh i phal loh ni? Atthlâk takin a ni thil i tih ni. 29 Tichhe thei che ka ni asin; nimahsela, i pa Pathian chuan nizânah khân, ‘Jakoba hnênah a chhia a ṭha a enga mah sawi lo tûrin fimkhur rawh,’ tiin mi bia a ni. 30 Tin, i pa in i ngaih tawh êm êm avângin kal châk hle mah la, eng vângin nge ka pathiante mi rûksak ni?” a ti a. 31 Tin, Jakoba chuan a chhâng a, Labana hnênah, “Ka hlauh vâng a ni; i fanute hi mi lâk luihsak dah ang e, ka ti a ni. 32 Tu pawh i pathiante lo kawltu apiang chu an nung lo vang; kan unaute mit hmuhah hian i ta ka hnêna awm chu en chiang la, la ta che,” a ti a. Rakilin a lo ru tih Jakoban a hre si lo va. 33 Tin, Labana chu Jakoba puan inah te, Leaii puan inah te, bawihnu pahnih puan inah te a lût zêl a; nimahsela, a hmu lo va. Tin, Leaii puan in ata chu a chhuak a, Rakili puan inah chuan a lût leh a. 34 Tin, Rakili chuan milemte chu a lo la a, sanghâwngsei thuamhnaw zîngah a lo dah a, a lo ṭhut hnan diam a. Tin, Labana chuan a puan in chhûng zawng zawng chu a dap vêl vek a; nimahsela, a hmu lo va. 35 Tin, ani chuan a pa hnênah, “I hmaa ka thawh peih loh avâng hian, ka lalpa, thinur suh ang che; hmeichhe awm dân pângngai chu ka chunga a awm lai tak a ni si a,” a ti a. Tichuan, a zawng a zawng a; nimahsela, milemte chu a hmu zo ta lo va. 36 Tin, Jakoba chu a thinur ta a, Labana chu a hau va; Jakoba chuan Labana hnênah, “Eng nge ka bawhchhiata, eng nge ka sualna, mi rawn ûm vak mai ni? 37 Ka bungrua zawng zawng i dap vêl pawhin, i in chhûng bungrua rêng rêng eng nge i hmuh ni? Keini pahnih hi min ngaihtuah theihna tûrin ka unaute leh i unaute hmaah hian dah rawh. 38 Hei kum sawmhnih zet i hnênah ka awm ta a; i berâmpuite leh i kelpuite chuan an note an hring sual ngai lo va, i berâm rual zînga a pate pawh ka ei ngai si lo va. 39 Ramsa sehte pawh i hnênah ka rawn thlen ngai lo va; keiin a bo ai chu ka tuar zâwk ṭhîn a; chhûna rûk emaw, zâna rûk emaw ka rulh i phût ṭhîn. 40 Hetiangin ka awm ṭhîn; chhûna ni sa leh zâna khaw vâwtin mi tihrehawm êm êm ṭhîn a; mut pawh ka hmu ngai ṭhîn lo va. 41 Chûng kum sawmhnih chhûng zawng chu i inah ka awm a; i fanute pahnih hlawh tûrin kum sâwm leh kum li i rawng ka bâwl a, i rante hlawh tûrin kum rûk ka bâwl leh a; ka hlawh lah chu vawi sâwm lai i tidanglam si a. 42 Ka pa Pathian, Abrahama Pathian, Isaaka ṭiha chu ka hnênah awm lo phei sela chu, tûnah pawh hian ruak ngawta mi hâwntîr ngei ngei tûr i nih hi. Pathianin ka hrehawmzia leh ka thawh rimzia chu a hmu a, nizânah chuan a zilh che a nih chu,” a ti a. 43 Tin, Labana chuan a chhâng a, Jakoba hnênah. “Fanute hi keima fanu an ni a, naupangte hi keima naupang an ni a, rante hi keima ran an ni a, i hmuh zawng zawng hi keima ta vek an ni; vawiinah hian hêng ka fanute chungah leh, an fa hrinte chungah hian eng nge ka tih theih ang? 44 Hawh teh, kei leh nang hian thu i thlung teh ang; chu chu kei leh nanga kârah hriatna ni rawh se,” a ti a. 45 Tichuan, Jakoba chuan lung a la a, lungphun atân a phun a. 46 Tin, Jakoban a unaute hnênah, “Lung la khâwm rawh u,” a ti a; tin, lung an la a, an tiang khâwm a; tin, lung tian khâwm kiangah chuan chaw an ei a. 47 Tin, Labana chuan chu lung tian khâwm chu Jegar-sahadutha a vuah a; Jakoba erawh chuan Galeed a vuah a. 48 Tin, Labana chuan, “He lung tian khâwm hi vawiinah hian kei leh nanga kârah hriatna a nih hi,” a ti a. Chuvângin, a hmingah chuan Galeed vuah a ni ta a; 49 Mizpa vuah a ni bawk a, Labanan, “Inṭhena kan awm hunin LALPA chuan min vêng tawn rawh se. 50 Ka fanute hi i tihretheiha, ka fanute lo hi nupui dangte i neih chuan, tu mah kan hnênah an awm lo na a, en teh, Pathian chu kei leh nanga kârah hretu a ni,” a ti si a. 51 Tin, Labana vêkin Jakoba hnênah, “He lung tian khâwm hi en la, keimah leh nangma inkâra he lung ka phun pawh hi en teh. 52 Pawi inkhawihsak tûrin kei hi he lung tian khâwm hi pêlin i hnên lamah ka lo kal lo vang, tih leh, nang pawh he lung tian khâwm leh he lungphun hi pêlin ka hnên lamah i lo kal lo vang tih, he lung tian khâwm hi hriatna ni sela, he lungphun pawh hi hriatna ni bawk rawh se. 53 Abrahama Pathian, Nahora Pathian, an pa Pathian chuan kan kâra thu ngaihtuah rawh se,” a ti leh a. Tin, Jakoba chuan a pa Isaaka ṭiha chu chhâlin chhia a chham ta a. 54 Tin, Jakoban tlângah chuan inthawina a hlân a, a unaute chu chhang ei tûrin a ko va; tichuan, chhang an ei a, tlângah chuan an riak ta hlawm a. 55 Tin, zîng takah Labana chu a tho va, a tute leh a fanute chu a fâwp a, mal a sâwm a; tin, Labana chu a kal a, ama awmna lamah a haw leh ta a.

Genesis 32

Esauva tâwk tûrin Jakoba a inpuahchah

1 Tin, Jakoba chu a kal ta zêl a; tin, Pathian vântirhkohten an lo tâwk a. 2 Tin, Jakoban anni chu a hmuh chuan, “Hêng hi Pathian pâwlho an ni,” a ti a; tichuan, chumi hmun hmingah chuan Mahanaim a vuah a. 3 Tin, Jakoba chuan Seir rama Edom phûl lamah, a u Esauva hnênah chuan a hmaah zualkote a kaltîr a. 4 An hnênah, “Ka lalpa Esauva hnênah chuan heti hian in sawi tûr a ni, ‘I chhiahhlawh Jakoban heti hian a ti a ni: “Labana hnênah chuan ka mikhual a, tûn thlengin ka awm ta reng a; 5 bâwngpa te, sabengtung leh berâm te, bawihpa leh bawihnu te ka nei hlawm a; tichuan, i mit ka tlun theih nân ka lalpa hrilh tûrin mi ka rawn tîr a ni,” a ti,’” tiin anni chu thu a pe a. 6 Tin, zualkote chu Jakoba hnênah an lo kîr leh a, “I u Esauva hnên kan va thleng a; tin, mi zali rawn hruaiin hmuak tûr chein a lo kal nghe nghe asin,” tiin an sawi a. 7 Chutichuan, Jakoba chuan a hlau êm êm a, a mangang ta a; tichuan, a hnêna mi awm te, berâm rual te, bâwng rual te, sanghâwngsei te chu pâwl hnihah a siam a; 8 “Esauva chu pâwl pakhat hnênah a lo kala a thah chuan, pâwl pakhat la awm chu an tlân bo thei ang,” a ti a. 9 Tin, Jakoba vêk chuan, “Aw, ka pu Abrahama Pathian, ka pa Isaaka Pathian, aw LALPA, ‘I ram lamah leh i laichînte hnênah haw leh tawh rawh; tichuan, ka ti ṭha ang che,’ mi titu, 10 i chhiahhlawh chunga khawngaihna zawng zawng i lantîr zîngahte hian, a tenau ber pawh hmu tlâk ka ni lo ve; he Jordan lui hi ka tiang nên chauh ka kân a; tûnah zawng pâwl hnih zet ka lo nih tâk hi. 11 Khawngaih takin ka u kut ata, Esauva kut ata ngei chu mi chhanhim ang che; nunau chawpa mi rawn thah ka hlau si a. 12 Nangin, ‘Ka ti ṭha ngei ngei ang chia, i thlahte chu tuifinriata ṭiauvaivut chhiar sên loh khawp hiala a tam angin ka siam ang e,’ i ti a,” a ti a. 13-15 Tin, chumi zân chuan chutah chuan a riak ta a; tin, a neih zînga mi, kêlpui zahnih leh kêlpa sawmhnih, berâmpui zahnih leh berâmpa sawmhnih, sanghâwngsei sâwr lai sawmthum an note nên, bâwngpui sawmli leh bâwngpa sâwm, sabengtungpui sawmhnih leh sabengtungno sâwm chu a u Esauva tân lâwmmanah a la hrang a. 16 Tin, chûngte chu pâwl tin a hrang ṭheuhvin, a chhiahhlawhte kutah a kawltîr a; tin, a chhiahhlawhte hnênah chuan, “Ka hmaah kal kai ula, pâwl tin hi kâr neihtîr zêl rawh u,” a ti a. 17 Tin, a hma hruaitu hnênah chuan, “Ka u Esauva chuan a tawh chia, ‘Tu mi nge i nih? Khawiah nge i kal dâwn? I hmaa awmte hi tu ta nge?’ tia a zawh hun che chuan, 18 ‘I chhiahhlawh Jakoba ta an ni; ka pu Esau, i tân lâwmmanah a thawn che a nih hi; ngai teh, amah pawh kan hnungah sâwn a awm,’ ti ang che,” tiin thu a pe a. 19 Tin, a dawttu leh, a dawt lehtu leh, ran rual khalhtu dang zawng zawng hnênah pawh, “Esauva in hmuh hun chuan chutiang bawk chuan in sawi tûr a ni; 20 tin, ‘Ngai teh, i chhiahhlawh Jakoba chu kan hnungah sâwn a awm,’ ti bawk ang che u,” tiin thu a pe ṭheuh va. “Lâwmman ka hmaa kal hianin a thin ka tidam ang a, chumi hnuah chuan a hmêl ka hmu ang; tichuan, mi lo lâwm mahna,” a ti a ni. 21 Chutichuan, lâwmman chu a hmaah chuan a kal kai ta a; ani erawh chu, chumi zân chuan a pâwl zîngah chuan a riak ta a.

Peniel hmunah Jakoban mi a buan

22 Tin, zânah chuan a tho va, a nupuite pahnih leh, a bawihnute pahnih leh, a fa sâwm leh pakhatte chu a hruai a, Jabok lui kaiah chuan a kai ta a. 23 Tichuan, anni chu a hruai a, lui chu a kaitîr a, a neih zawng zawng pawh a kaitîr bawk a. 24 Tin, Jakoba chu amah chauhvin a awm ta a; tin, mi pakhatin ani chu khawfîngchah thlengin a buan a buan a. 25 Tin, a hneh lo tih a inhriatin a malpui ruh chuktuahah chuan a khawihsak a; tichuan, a buan lai chuan Jakoba malpui ruh chuktuah chu a lo pelhsawlh ta a. 26 Tin, ani chuan, “Mi thlah rawh, khawfîng pawh a chah dâwn tawh hi,” a ti a. Tin, ani chuan, “Mal mi sâwm loh chuan ka thlah lo vang che,” a ti a. 27 Tin, ani chuan a hnênah, “I hming eng nge ni?” a ti a. Tin, ani chuan, “Jakoba,” a ti a. 28 Tin, ani chuan, “I hming chu Jakoba an ti tawh lo vang a, Israela an ti zâwk tawh ang; Pathian leh mihring i bei a, i hneh tawh si a,” a ti a. 29 Tin, Jakoba chuan ani chu a zâwt a. “Khawngaih takin i hming mi hrilh rawh,” a ti a. Tin, ani chuan, “Eng vângin nge ni ka hming mi zawh?” a ti a. Tin, chutah chuan mal a sâwm ta a. 30 Tin, Jakoba chuan chumi hmun hmingah chuan Peniel a vuah ta a: “Pathian chu a hmaihma ngeiah ka hmu a, ka nunna hi zuah a ni si,” a ti a ni. 31 Tin, Penuel a pelh lai chuan ni a lo chhuak a, amah chu a rawn chhun a, a malpui avâng chuan a lo bai ta a. 32 Chuvângin, tûn thlengin Israela thlahte chuan malpui ruh chuktuaha khêl tha awm hi an ei ngai lo; Jakoba malpui ruh chuktuah chu a khêl ṭha lai taka a khawih avângin.

Genesis 33

Jakoban Esauva a tâwk ta

1 Tin, Jakoba chu a han dâk a; tin, ngai teh, Esauva chu a hnêna mi zalite nên an lo kal a. Tichuan, a fate chu Leaii hnênah te, Rakili hnênah te, bawihnu pahnih hnênah te a sem thliah a. 2 Tin, bawihnute leh an fate chu a hmatâwng berah a dah a, Leaii leh a fate chu a dawtah a dah a, Rakili leh Josefa chu a hnung berah a dah a. 3 Tin, amah chu an hmaah chuan a kal a, a u bul a thlen hma chuan vawi sarih lei siin chibai a bûk a. 4 Tin, Esauva chu amah lâwm tûrin a tlân a, a pawm a, a ir a chuktuah a, a fâwp a; tin, an ṭap dûn ta a. 5 Tin, Esauva chu a han dâk a, hmeichhiate leh naupangte chu a hmu a; tichuan, “I rawn hruaite saw tute nge ni?” a ti a. Tin, ani chuan, “Pathianin khawngaih taka i chhiahhlawh a pêk naupangte an nih saw,” a ti a. 6 Chutichuan, bawihnute chu anmahni leh an fate nên chuan an lo kal hnai a, an kûn a, chibai an bûk a. 7 Tin, Leaii pawh a fate nên chuan an lo kal hnai a, an kûn a, chibai an bûk ve a; tin, chumi hnuah chuan Josefa leh Rakili chu an lo kal hnai a, an kûn a, chibai an rawn bûk bawk a. 8 Tin, Esauva chuan, “Ran rual ka tawh zozaite kha engtizia nge ni?” a ti a. Tin, ani chuan, “Ka lalpa, i mit ka tlun theih nân ka ti a ni,” a ti a. 9 Tin, Esauva chuan, “Kei pawhin ka ngah e, ka nau; i neih zawng zawng chu i ta ni rawh se,” a ti a. 10 Tin, Jakoba chuan, “Ni lo ve, i mit ka tlun chuan, khawngaih takin ka lâwmman pêk che kha mi pawmsak rawh; Pathian hmêl hmu angin i hmêl ka hmu a, ka chungah i lâwm si a. 11 Pathianin mi khawngaih avâng leh, ka ngah avâng hian khawngaih takin ka thil rawn pêk che kha pawm rawh,” a ti a. Tichuan, a thlêm a thlêm a, a pawm ta a. 12 Tin, Esauva chuan, “Hawh, i kal ang, hma ka hruaisak ang che,” a ti a. 13 Tin, ani chuan a hnênah, “Naupangte hi an la têt leh, berâm rual leh bâwng rual ka hnêna awmte hi no hruai an nih, ka lalpa, i hria e; ni khat chauh pawh an khalh chak lutuk chuan ran rual zawng zawng hi an thi mai ang. 14 Ka lalpa, khawngaih takin i chhiahhlawh hmaah hian kal la; kei chuan Seir tlângah, ka lalpa, i hnên ka thlen hma loh chuan, ka hmaa ran kal hi an kal theih tâwk ang zêl leh, naupangte kal theih tâwk ang zêlin, zawimuangin ka rawn chhawm zêl ang e,” a ti a. 15 Tin, Esauva chuan, “Ka hnêna awm mi ṭhenkhatte hi ka hnutchhiah tal ang che chu,” a ti a. Tin, ani chuan, “Engah kher maw? Ka lalpa mit mi tluntîr mai rawh,” a ti a. 16 Chutichuan, Esauva chu chumi ni vêk chuan Seir tlâng lam panin a kîr leh ta a. 17 Tin, Jakoba chu Sukkoth hmunah chuan a kal a, ama tân in a sa a, a rante tân bûkte a sa bawk a; chuvângin, chumi hmun hming chu Sukkoth an ti ta a. 18 Tin, Jakoba chu Paddan-aram ram ata a lo kal chu thlamuang takin Sekem khua, Kanaan rama awm chu a thleng a, daikiangah chuan a puan in chu a zâr ta a. 19 Tin, a puan in zârna hmun chu, Sekema pa Hamora fate hnên aṭangin tangka zain a lei a. 20 Chutah chuan maichâm a siam a, a hmingah chuan El-Elohe-Israel a vuah a.

Genesis 34

Jakoba fanu Dinaii Sekeman a sual lui

1 Tin, Leaii fanu Dinaii, Jakoba a hrinsak chu chumi ram nulate hmu tûrin a va lêng chhuak a. 2 Tin, Hiv mi Hamora, chumi ram lal fapa Sekema chuan ani chu a lo hmu a; tin, a man a, a mutpui a, a tlâwm ta a. 3 Tin, a rilru chu Jakoba fanu Dinaii chungah chuan a awm tlat a, chu nula chu a hmangaih a, ani chu ṭawngkam ṭha takin a bia a. 4 Tin, Sekema chuan a pa Hamora chu a bia a, “He nula hi nupuiah mi neihsak rawh,” a ti a. 5 Tin, Jakoba chuan a fanu Dinaii chu Sekeman a tibawrhbâng tih a lo hria a; a fapate chu phûlah a ran zîngah an awm a; tichuan, an lo hâwn hma loh chuan Jakoba chu a ngawi reng a. 6 Tin, Sekema pa Hamora chu Jakoba be tûrin a hnênah a kal a. 7 Tin, Jakoba fapate chuan an hriat veleh phûl aṭang chuan an lo hâwng ta a; tin, Jakoba fanu mutpuiin Israel-ho zînga thil sual âtthlâk tak, thil tih hauh loh tûr chu a tih tâk avângin an lungngai a, an thinur ta êm êm a. 8 Tin, Hamora chuan anmahni a bia a, “Ka fapa Sekema rilru chu in fanu chungah a awm tlat a; khawngaih takin nupuiah neihtîr ta che u. 9 Tichuan, i innei tawn ang u; in fanute min neihtîr ula, kan fanute pawh nei bawk rawh u. 10 Tichuan, kan hnênah in awm ang a, ram pawh hi a awm duai fo vang; hêngah hian awmin sumdâwng ula, hêngah hian lo intimuk rawh u,” a ti a. 11 Tin, Sekema chuan nula pa leh a nuṭate hnênah, “Mi khawngaih rawh u, ka hnêna in sawi apiang ka pe zêl ang che u. 12 Man leh thilpêk chu eng zât pawh ngên ula, in tih ang zêlin ka pe ang che u; eng pawh ni sela, nula chu nupuiah mi neihtîr phawt mai rawh u,” a ti a. 13 Tin, Jakoba fapate chuan an farnu Dinaii chu a tihbawrhbân avângin, Sekema leh a pa Hamora chu ngamthlêmnain an chhâng a, an sawi ve a, 14 an hnênah, “He thil - serh tan lo mi, kan farnu pêk hi - kan ti thei lo vang; chu chu kan tân hmingchhiatna tûr a ni si a. 15 Hetianga in tiam chauh hian in thu ang chu kan remti ang: in zînga mipa tawh phawt chu serh tanin keimahni angin awm ula; 16 chutichuan, kan fanute kan neihtîr ang che u a, keini pawhin in fanute kan nei bawk ang a; tin, in hnênah kan awm ang a, chi khat kan lo ni dâwn nia. 17 Nimahsela, serh tan kawnga kan thu in zawm dâwn loh chuan kan fanu chu kan hruai ang a, kan kal mai ang,” an ti a. 18 Tin, an thu chuan Hamora leh Hamora fapa Sekema chu a tilâwm a. 19 Tichuan, tlangvâl chuan Jakoba fanu chu a duh hle avângin, chu thil chu rei rial lovin a ti ta mai a; ani chu a pa chhûngte zawng zawng zînga mite zah ber a ni a. 20 Tin, Hamora leh a fapa Sekema chuan an khaw kulh kawngkhâr chu an thleng a, an khuate chu an bia a, 21 “Saw mite saw min rem takin an awm a; chuvângin, he ramah hian awmin, hêngah hian sumdâwng rawh se; ngai teh u, an tân pawh ram hi a zau tâwk si a; an fanute saw nupuiahte nei ila, kan fanute pawh i neihtîr bawk ang u. 22 Nimahsela, chi khat kan lo nihna tûra kan hnêna awm chu hetianga kan tiam chauh hian, saw mite sâwn min remtihpui dâwn a ni: serhtan an nih angin kan zînga mipa tawh phawt chu serhtan lo ni ve ila. 23 An ran te, an sum te, an sa zawng zawng te kan ta a ni vek dâwn lâwm ni? An thu hi i remtihpui mai ang u; tichuan, kan hnênah an awm dâwn nia,” an ti a. 24 Tin, Hamora leh a fapa Sekema thu chu a khaw kulh kawngkhâra chhuak zawng zawngte chuan an zâwm a; a khaw kulh kawngkhâra chhuak zawng zawng, mipa tawh phawt chuan serh an tantîr ta vek a. 25 Tin, heti hi a ni a, a ni thum niah, an nat lai tak chuan Jakoba fapate zînga mi pahnih, Dinaii nuṭa Simeona leh Levia chuan, an khandaih keng ve vein, a rûkin khua chu an bei a, mipa zawng zawng chu an that zo phiar a. 26 Tichuan, Hamora leh a fapa Sekema chu khandaih hriamin an that a, Sekema in ata Dinaii chu an hruai a, an chhuak ta a. 27 Jakoba fapateho chuan an mi thahte chu an va nangchîng a, an farnu chu an tihbawrhbân avângin khua chu an rawk ta a. 28 An berâm rualte, an bâwng rualte, an sabengtungte, an khuaa thil awmte, an lova thil awmte chu an lâksak a; 29 an sum zawng zawng leh an fanau tê tête leh an nupuite zawng zawng, in chhûnga awm apiang chu an man a, an rawk bawk a. 30 Tin, Jakoban Simeona leh Levia hnênah chuan, “Nangnin he rama awmte zînga Kanaan-ho leh Periz-hote zîngah hian, huat mi phurhtîrin mi timangang hle a ni; kei tlêm tê ka nih avâng hian mi bei tûrin an inpun khâwm ang a, mi that mai ang; tichuan, tihboralin ka awm ang, kei leh ka chhûngte nên hian,” a ti a. 31 Tin, anni chuan, “Kan farnu hi nawhchizuar tih angin a ti tûr em ni ang?” an ti a.

Genesis 35

Bethel-ah Pathianin Jakoba mal a sâwm

1 Tin, Pathianin Jakoba hnênah chuan, “Tho la, Bethel-ah chho la, chutah chuan awm rawh; tin, i u Esauva hnên ata i tlân bo laia i hnêna inlâr Pathian tân khân chutah chuan maichâm siam rawh,” a ti a. 2 Tichuan, Jakoban a chhûngte leh a hnêna awm zawng zawngte hnênah chuan, “In zînga mi dang pathian awmte chu dah bo daih ula, intithianghlimin in silhfênte thlâk rawh u; 3 tho ila, Bethel-ah i chho vang u; tichuan, ka mangan laia mi chhânga, ka kalnaa ka hnêna awm zêl Pathian tân khân maichâm ka siam dâwn nia,” a ti a. 4 Tichuan, mi dang pathian, an kuta awm zawng zawng leh an benga bengbeh an beh zawng zawng chu Jakoba an pe a; tin, Jakoba chuan Sekem khaw kianga sasaw hnuaiah chuan a thukru ta a. 5 Tin, an kal a; an vêl khuate chuan an lo hlau nasa ta êm a, Jakoba fapate chu an ûm ta lo va. 6 Chutichuan, Jakoba chuan Kanaan rama Luz khua chu a thleng a, amah leh a hnêna awm zawng zawngte nên (Luz chu Bethel a ni a). 7 Tin, chutah chuan maichâm a siam a, a u hnên ata a tlân bo lai khân chutah chuan Pathian a hnêna a inlâr avângin, a hmun chu El-Bethel a ti ta a. 8 Tin, Rebeki awmtu Debori chu a thi a, Bethel hnuaia sasaw hnuaiah chuan an phûm a; sasaw hming chu Allon-bakuth an ti ta a. 9 Tin, Jakoba chu Paddan-aram ram aṭanga a hâwnin Pathian a hnênah a inlâr leh a, mal a sâwm a. 10 Pathian chuan a hnênah, “I hming hi Jakoba a ni a; i hming chu Jakoba an ti tawh lo vang, i hming chu Israela a ni zâwk ang,” a ti a; tichuan, a hmingah chuan Israela a ti ta a. 11 Tin, Pathian vêkin a hnênah, “Kei Pathian Engkimtitheia ka ni; chi tam tak thlahin lo pung rawh; chi tihtham zet leh chi hrang hrang tam tak pawh i lakah an lo la awm ang a, i ṭhâlbê aṭangin lalte pawh an lo la chhuak bawk ang; 12 tin, Abrahama leh Isaaka ram ka pêk hi ka pe ang che, i awm loh hnua i thlahte pawh ram hi ka pe zêl ang,” a ti a. 13 Tin, Pathianin amah a biakna hmun aṭang chuan Jakoba chu a chhohsan ta a. 14 Tin, a biakna hmunah chuan Jakoban englo a phun a (lung a ni a phun ni); a chungah chuan thilhlan, in mi a leih a, a chungah sahriak a leih bawk a. 15 Tin, Jakoba chuan Pathianin amah a biakna hmun hmingah chuan Bethel a vuah a.

Rakili thih thu

16 Tin, Bethel aṭang chuan an kal a; tin, Ephrath khaw thlenna tûr chu hla fe a la ni a; tin, Rakili chuan nau a vei a, na takin a vei ta a. 17 Tin, heti hi a ni a, na taka a vei laiin nau chhar mi chuan, “Hlau suh; fapa dang i nei dâwn a nih hi,” a ti a. 18 Tin, heti hi a ni a, a thlarau a chhuah dâwn laiin (a thi ta si a) a hmingah chuan Ben-onia a sa a; a pa erawh chuan Benjamina a sa a. 19 Tichuan, Rakili chu a thi a, Ephrath kawngah chuan an phûm a (Ephrath khua chu Bethlehem khua a ni). 20 Tin, a thlân chungah chuan Jakoban lung a phun a; chu chu tûn thlengin Rakili thlân Lungphun a la ni. 21 Tin, Israela chu a kal zêl a, Migdal Eder piahah chuan a puan in a zâr ta a.

Jakoba fate

22 Tin, heti hi a ni a, Israela chu chumi ramah chuan a awm laiin, Reubena chuan a pa hmei Bilhaii chu a va mutpui a; tin, Israela chuan chu chu a hre ta a. Tin, Jakoba fapate chu sâwm leh pahnih an ni a: 23 Leaii fapate chu Reubena (Jakoba fa tîr) te, Simeona te, Levia te, Juda te, Isakara te, Zebuluna te an ni a; 24 Rakili fapate chu Josefa leh Benjamina an ni a; 25 tin, Rakili bawihnu Bilhaii fapate chu Dana leh Naphtalia an ni a; 26 tin, Leaii bawihnu Zilpaii fapate chu Gada leh Asera an ni a. Chûng chu Jakoba fapa, Paddan-aram rama a neihte kha an ni.

Isaaka thih thu

27 Tin, Jakoba chuan Kiriath-arba khuaa Abrahama leh Isaaka awmna Mamre-a a pa Isaaka hnên chu a thleng ta a (Kiriath-arba khua chu Hebron a ni). 28 Tin, Isaaka dam chhûng chu kum za leh kum sawmriat a ni a. 29 Tin, Isaaka chuan a thlarau a thlah a, upa tak, tarkûna damin a thi a, a chipuite hnênah hruaiin a awm ve ta a; tin, a fapa Esauva leh Jakoba chuan an phûm ta a.

Genesis 36

Esauva thlahte

1 Tin, hêng hi Esauva thlahte chu an ni (Esauva chu Edoma a ni). 2 Esauva chuan a nupuite chu Kanaan rama nula zînga mi a ni a neih ni: Hit mi Elona fanu Adai leh, Hiv mi Zibeona tunu, Ana fanu Oholibami-te chu an ni; 3 Ismaela fanu, Nebaiotha farnu Basemathi nên chuan. 4 Tin, Adai chuan Esauva chu Eliphaza a hrinsak a; Basemathi chuan Reuela a hring a; 5 Oholibami chuan Jeusa leh Jalama leh Kora a hring a; chûng chu Esauva fapa, Kanaan rama a neihte an ni. 6 Tin, Esauva chuan a nupuite leh, a fapate leh, a fanute leh a ina mi zawng zawng leh a rante leh a sa zawng zawng leh, a sum zawng zawng, Kanaan rama a hmuhte chu a chhawm a, a nau Jakoba hnên ata chu ram dangah a kal ta daih a. 7 An thil neihte chu a nasa lutuk a, an awm dûn thei lo a ni; an rante avângin an mikhualna ram chuan a daih ta si lo va. 8 Tichuan, Esauva chu Seir tlângah chuan a awm ta a; Esauva chu Edoma a ni a. 9 Tin, hêng hi Seir tlânga Edom-ho thlahtu Esauva thlahte chu an ni. 10 Hêng hi Esauva fapateho hming chu a ni: Eliphaza, Esauva nupui Adai fapa leh Reuela, Esauva nupui Basemathi fa hi. 11 Tin, Eliphaza fapate chu Temana te, Omara te, Zephova te, Gatama te, Kenaza te an ni. 12 Tin, Timni chu Esauva fapa Eliphaza hmei a ni a; ani chuan Eliphaza chu Amaleka a hrinsak a. Chûng chu Esauva nupui Adai fapate chu an ni. 13 Tin, hêng hi Reuela fapate chu an ni: Nahatha leh Zera te, Sama leh Miza te hi. Chûng chu Esauva nupui Basemathi fapate chu an ni. 14 Tin, hêng hi Zibeona tunu, Ana fanu Esauva nupui Oholibami fapate chu an ni: ani chuan Esauva chu Jeusa leh Jalama leh Kora chu a hrinsak a. 15 Hêng hi Esauva fapate zînga a hotute chu an ni: Esauva fa tîr Eliphaza fapate chu: hotu Temana te, hotu Omara te, hotu Zephova te, hotu Kenaza te, 16 hotu Kora te, hotu Gatama te, hotu Amaleka te hi; chûng chu Edom rama Eliphaza laka chhuak hotute chu an ni; chûng chu Adai fapate chu an ni. 17 Tin, hêng hi Esauva fapa Reuela thlahte chu an ni: hotu Nahatha te, hotu Zera te, hotu Sama te, hotu Miza te hi; chûng chu Edom rama Reuela laka chhuak hotute chu an ni; chûng chu Esauva nupui Basemathi fapate chu an ni. 18 Tin, hêng hi Esauva nupui Oholibami fapate chu an ni: hotu Jeusa te, hotu Jalama te, hotu Kora te hi; chûng hotute chu Ana fanu, Esauva nupui Oholibami hrinte chu an ni. 19 Chûng chu Esauva fapate chu an ni, chûng chu an zînga hotute chu an ni; Esauva chu Edoma a ni.

Seira thlahte

20 Hêng hi Hor mi Seira fapa, chu rama awmte chu an ni: Lotana te, Sobala te, Zibeona te, Ana te, 21 Disona te, Ezera te, Disana te hi; chûng chu Edom rama Seira fa Hor-ho laka chhuak hotute chu an ni. 22 Tin, Lotana fate chu Horia leh Hemama an ni; Lotana farnu chu Timni a ni. 23 Tin, hêng hi Sobala fate chu an ni: Alvana te, Manatha te, Ebala te, Sephova te, Onama te hi. 24 Tin, hêng hi Zibeona fate chu an ni: Aia leh Ana hi; he Ana hi a ni, a pa Zibeona sabengtungte a thlah laia thlalêra tuilum khurte hmuchhuaktu kha ni. 25 Tin, hêng hi Ana fate chu an ni: Disona leh Ana fanu Oholibami hi. 26 Tin, hêng hi Disona fate chu an ni: Hemdana te, Esbana te, Ithrana te, Kerana te hi. 27 Hêng hi Ezera fate chu an ni: Bilhana te, Zaavana te, Akana te hi. 28 Hêng hi Disana fate chu an ni: Uza leh Arana hi. 29 Hêng hi Hor-ho laka chhuak hotute chu an ni: hotu Lotana te, hotu Sobala te, hotu Zibeona te, hotu Ana te, 30 hotu Disona te, hotu Ezera te, hotu Disana te hi; chûng chu Seir rama an hotu dang anga Hor-ho laka chhuak hotute chu an ni.

Edom ram lalte

31 Hêng hi lal rêng rêngin Israela thlahte chunga ro an rêl hmaa, Edom rama rorêltu lalte chu an ni: 32 Beora fapa Bela chuan Edom ramah ro a rêl a; a khawpui hming chu Dinhaba a ni. 33 Tin, Bela chu a thi a, Bozra khuaa mi Zera fapa Jobaba chuan a aiawhin ro a rêl ta a. 34 Tin, Jobaba chu a thi a, Teman-ho rama mi Husama chuan a aiawhin ro a rêl ta a. 35 Tin, Husama chu a thi a, Bedada fapa Hadada, Moab phûla Midian-ho thattu khân a aiawhin ro a rêl ta a; a khawpui hming chu Avith a ni. 36 Tin, Hadada chu a thi a, Masreka mi Samla chuan a aiawhin ro a rêl ta a. 37 Tin, Samla chu a thi a, Luipui kama Rehoboth khuaa mi Saula chuan a aiawhin ro a rêl ta a. 38 Tin, Saula chu a thi a, Akbora fapa Baal-hanana chuan a aiawhin ro a rêl ta a. 39 Tin, Akbora fapa Baal-hanana chu a thi a, Hadara chuan a aiawhin ro a rêl ta a; a khawpui hming chu Pau a ni; a nupui hming chu Mehetabeli a ni a, ani chu Mezahaba fa Matredi fanu chu a ni. 40 Tin, hêng hi an chhûngkua ang zêl leh, an hmun ang zêl leh, an hming ang zêlin Esauva thlah hotute hming chu a ni: hotu Timna te, hotu Alva te, hotu Jethetha te, 41 hotu Oholibama te, hotu Ela te, hotu Pinona te, 42 hotu Kenaza te, hotu Temana te, hotu Mibzara te, 43 hotu Magdiela leh hotu Irama-te hi; chûng chu an ram neihah chuan an awmna ang zêlin Edoma thlah hotute chu an ni; chu Esauva chu Edom-ho thlahtu chu a ni.

Genesis 37

Josefa leh a unaute

1 Tin, Jakoba chu a pa mikhualna ram, Kanaan ramah chuan a awm ta a, 2 Hêng hi Jakoba thlahte chanchin a ni. Josefa chu kum sawm leh kum sarih mi a nihin, a ute nên ran rual an thlah a; ani chu naupang a la ni a, a pa nupuite Bilhaii leh Zilpaii fapate hnênah a awm a; tin, Josefa chuan an sual thuthang chu an pa hnênah a thlen a. 3 Tin, Israela chuan Josefa chu a tar lam fa a nih avângin a fate zawng zawng ai chuan a hmangaih zâwk a; tichuan, kawrfual ze hrang hranga zia a siamsak a. 4 Tin, an pa chuan ani chu a ute zawng zawng aiin a hmangaih zâwk tih a ute chuan an lo hre ta a; tichuan, ani chu an haw ta hle a, ṭawngkam ṭha rêng rêng a chungah an rawlh thei ta lo va. 5 Tin, Josefa chuan mumang a nei a, a ute hnênah chuan a hrilh a; tichuan, ani chu an haw lehzual ta a. 6 Tin, ani chuan an hnênah, “Khawngaih takin ka mumang hi lo ngaithla teh u: 7 ngai teh u, lovah hian buhphalte kan lo têl a; tin, ngai teh u, ka buhphal chu a lo tho va, a ding ta luah a; tin, ngai teh u, in buhphalte chuan an rawn hual vêl a, ka buhphal chu chibai an bûk hlawm a,” a ti a. 8 Tin, a ute chuan a hnênah, “Nang tehchai hian kan chungah ro i rêl tehlul ang maw? Nang tehchai hian kan chungah thu i nei tehlul ang maw?” an ti a. Tichuan, a mumang avâng leh a thusawi avâng chuan amah chu an haw lehzual sauh va. 9 Tin, mumang dang a nei leh a, a ute chu a hrilh leh a, “Ngai teh u, mumang ka nei leh ta a; ngai teh u, ni te, thla te, arsi sâwm leh pakhatte khian chibai mi lo bûk zuk nia maw le,” a ti a. 10 Tin, a pa chu a hrilh a, a uteho pawh; tichuan, a pa chuan a zilh a, a hnênah, “Mumang i neih hi eng mumang nge maw ni? Kei leh i nu leh i ute hian lei siin chibai kan rawn bûk tehlul dâwn che maw?” a ti a. 11 Tin, a uten ani chu an îtsîk a; a pa erawh chuan a thusawi chu a rilruin a vawng reng a.

Josefa an hralh a, Aigupta ram a thleng

12 Tin, a ute chu Sekem-ah chuan an pa ran rual chu thlahin an kal a. 13 Tin, Israela chuan Josefa hnênah, “I uten Sekem-ah alâwm maw ran rual chu an thlah? Lo kal teh, an hnênah ka tîr ang che,” a ti a. Tin, ani chuan a hnênah, “Mi tîr ta che,” a ti a. 14 Tin, ani chuan a hnênah. “Va kal ta la, i ute chu an dam emaw, ran rualte pawh an dam emaw va chian ta la, chanchin mi rawn hrilh leh ang che,” a ti a. Chutichuan, Hebron ruam ata chu a tîr chhuak a; tin, ani chuan Sekem chu a va thleng a. 15 Tin, mi tuin emaw amah chu a hmu a, ngai teh, phûlah chuan a vâk a vâk a; tichuan, mi chuan, “Eng nge i zawn le?” tiin a zâwt a. 16 Tin, ani chuan, “Ka ute ka zawng a ni; khawngaih takin ran rual an thlahna chu mi hrilh teh khai,” a ti a. 17 Tin, mi chuan, “Heta ṭangin an chhuah tâk kha, ‘Dothan-ah i kal ang u,’ an tih chu ka hria,” a ti a, Tin, Josefa chuan a ute chu a ûm a. Dothan-ah chuan a va hmu a. 18 Tin, anni chuan hla tak aṭangin an lo hmu a; tichuan, an kiang hnai a thlen hmain amah thah thu an phiar ta a. 19-20 Tin, “En teh u, mang neia chu a lo kal saw. Hawh u, that ila, khuarkhurum pakhatah i thlâk ang u khai; tin, ‘Sakawlhin a seh ta,’ kan ti dâwn nia; tichuan, a mangte chu engtin nge a awm kan la hre mai ang,” an ti hlawm a. 21 Tin, Reubena chuan chu chu a lo hria a, an kut ata a chhanchhuak a; “A thah êm chu i that suh ang u,” a ti a. 22 Tin, Reubena vêk chuan a pa hnêna a hruai lehna tûrin, an kut ata chu a chhanchhuah theih nân an hnênah chuan, “Thisen chu chhuah suh u; thlalêra khuarkhurumah hian thlâk ula, kut zawng a chungah thlâk suh u,” a ti a. 23 Tin, heti hi a ni a, Josefa chuan a ute hnên a va thlen chuan, Josefa chu a kawrfual, a kawrfual ze hrang hranga zia a hâk chu an lo hlihsak a; 24 tin, an hruai a, khuarkhurumah chuan an thlâk ta a; khuarkhurum chu a ruak, tui awm tawh lo a ni a. 25 Tin, chaw ei tûrin an han ṭhu hlawm a; tin, an han dâk a, an en a; tin, ngai teh, Ismael khualzinho, Gilead ram aṭanga an sanghâwngseia englo rimtui leh thinghnai damdawi leh murra phura, Aigupta rama zuk kal tûrte an lo kal a. 26 Tin, Juda chuan a unaute hnênah, “Kan nau kan thaha, a thisen chhuak kan zêp chuan eng nge hnemhnânna awm ang? 27 Hawh u, a chunga kut thlâk lovin, Ismael-ho hnênah sâwn i hralh zâwk ang u; amah hi kan nau, kan tisa ngei a ni si a,” a ti a. Tin, a unaute chuan a thu chu an zâwm ta a. 28 Tin, Midian-ho sumdâwngte an lo kal a; tichuan, Josefa chu khuarkhurum ata chu an kai chhuak a, Ismael-hote hnênah chuan, Josefa chu tangka sawmhnihin an hralh ta a, Tin, Josefa chu Aigupta ramah an hruai ta a. 29 Tin, Reubena chu khuarkhurumah a lo kal leh a; tin, ngai teh, Josefa chu khuarkhurumah chuan a lo awm ta lo va; tichuan, a silhfênte a pawt thlêr ta a. 30 Tin, a naute hnênah a kal leh a, “Taitea kha a awm ta lo, kei hi khawiah nge ka kal tâk ang le aw?” a ti a. 31 Tin, Josefa kawrfual chu an la a, kêlpa an talh a, a thi-ah chuan kawrfual chu an hnim a; 32 tin, kawrfual ze hrang hranga zia chu an thawn a, an pa hnênah chuan an rawn la a; tin, “Hei hi kan hmu ngawt a, i fapaa kawrfual a ni nge ni lo en teh,” an ti a. 33 Tin, ani chuan a lo hre mai a, “Ka fapaa kawrfual a nih hi! Sakawlhin a seh ta zuk nia le; Josefa chu matheilovin pawh sawm vekin a awm a ni ngei ang,” a ti a. 34 Tichuan, Jakoba chuan a silhfênte a pawt thlêr a, saiip puan a fêng a, ni rei tak a fapa chu a sûn a. 35 Tin, a fapate zawng zawng leh a fanute zawng zawng chu amah thlamuan tûrin an tho va; nimahsela, ani chuan thlamuan a duh lo va; “Lusûn chungin thlânah ka fapa hnênah chuan ka liam dâwn e,” a ti a. Tichuan, a pa chu amah ngaiin a ṭap ṭhîn a. 36 Tin, Midian-ho chuan Josefa chu Aigupta ramah an luhpui a, Pharaoa hnuaia hotu pakhat, vêngtu pâwl hotu, Potiphara hnênah chuan an hralh a.

Genesis 38

Juda leh Tamari

1 Chumi lai chuan heti hi a ni a, Juda chu a unaute hnên ata a chhuk a, Adulam mi pakhat a hming Hira chu a zuk bêl ta a. 2 Tin, Juda chuan chutah chuan Kanaan mi pakhat a hming Sua fanu a hmu a; tin, ani chu a nei a, a pâwl ta a. 3 Tichuan, a rai a, fapa a hring a; tin, Judan a hmingah chuan Era a sa a. 4 Tin, a rai leh a, fapa a hring leh a; tin, a nuin a hmingah chuan Onana a sa a. 5 Tin, fapa a hring leh pek a, a hmingah chuan Sela a sa a; chu mi chu a hrin lai chuan Juda chu Kezib khuaah a awm a. 6 Tin, Juda chuan a fa tîr Era chu nupui a neihsak a, a hming chu Tamari a ni a. 7 Tin, Juda fa tîr Era chu LALPA mit hmuhin mi sual a ni a; tichuan, LALPAN ani chu a tihlum ta a. 8 Tin, Juda chuan Onana hnênah, “I u nupui chu pâwl la, pasalte unau tih tûr chu tihsak la, i u tân chuan chi thlahsak rawh,” a ti a. 9 Tin, Onana chuan chi thlah tûr chu ama thlah a ni dâwn lo tih a hria a; tichuan, heti hi a ni a, a u nupui a pâwl apiangin, a u tân chi a thlahsak lohna tûrin leiah chuan a titla ṭhîn a. 10 Tin, a thiltih dân chu LALPA mit hmuhah chuan sual tak a ni a; tichuan, ani pawh chu a tihlum ta a. 11 Tin, Juda chuan a monu Tamari hnênah chuan, “Ka fapa Sela hi a puitlin hma loh chuan i pa in lamah pasal nei lovin lo awm rih ang che,” a ti a. “Chuti lo chuan, ani pawh hi a ute angin a thi dah ang e,” a ti a ni. Tichuan, Tamari chu a pa in lamah chuan a va awm ta a. 12 Tin, a nakinah chuan Sua fanu Juda nupui chu a thi a; tin, Juda chuan a ngaih a lo reh a, Timna khuaah a berâm hmul mêttute hnên lamah chuan, amah leh a ṭhian Adulam mi Hira chu an chho ta a. 13 Tin, miin Tamari chu, “I pu chu a berâm hmul mêt tûrin Timna khuaah a chho dâwn,” tiin an hrilh a. 14 Tichuan, ani chuan a pasal sûnna silhfênte chu a hlîp a, inkhuhna puanin a inkhuh a, a intuam tlat a, Timna khaw kawnga Enaim kulh kawngkaah chuan a lo ṭhu a; Sela chu a puitling tawh si a, a pa chuan a nupuiah a neihsak lo zo a ni tih a hria a ni. 15 Tin, Juda chuan ani chu a hmuh chuan nawhchizuarah a ruat a; a hmai a inkhuh tlat si a. 16 Tichuan, kawng sira hmeichhe lam chu a va pan a, “Hawh, khawngaih takin i mu dûn ang,” a ti a; a mo kha a ni tih a hre si lo va. Tin, ani chuan, “Mi mutpui chuan eng nge mi pêk ang?” a ti a. 17 Tin, ani chuan, “Ran rual zinga mi kêlno ka thawn ang che,” a ti a. Tin, ani chuan, “Chu chu i rawn thawn hmaa lo hrên tûr eng emaw tal mi pe ang em?” a ti a. 18 Tin, ani chuan, “Hrên tûr eng nge ka pêk ang che?” a ti a. Tin, ani chuan, “I hming nemna leh i hrui, i tiang ken nên khân,” a ti a. Tichuan, a pe a, a mutpui ta a; tin, a lakah chuan fa a pai ta a. 19 Tin, a tho va, a inkhuhna puan chu a hlîp a, a hmeithaina silhfênte chu a inbel leh ta a. 20 Tin, Juda chuan a thil hrên chu chu hmeichhe kut ata la tûrin a ṭhianpa, Adulam mi kutah chuan kêlno chu a thawn a; nimahsela, ani chuan amah chu a va hmu zo si lo va. 21 Chutichuan, hmeichhe awmna hmuna mite hnênah chuan, “Kawng sîra Enaim-a nawhchizuar awm kha khawiah nge a awm tâk?” tiin a zâwt a. Tin, anni chuan, “Nawhchizuar rêng hetah an awm lo ve,” an ti a. 22 Tin, Juda hnênah chuan a kîr leh a, “Amah chu ka hmu zo lo, a hmuna mite pawhin, ‘Nawhchizuar rêng rêng hetah an awm lo,’ an ti bawk a,” a ti a. 23 Tin, Juda chuan, “Nei hlen mai rawh se; chuti lo chuan, kan mualpho dah ang e; ngai teh, he kêlno hi ka thawn a, amah i hmu zo si lo va,” a ti a. 24 Tin, thla thum emaw lai chinah chuan miin Juda chu, “I monu Tamari chuan tlangvâl a ngai a; chu lo pawh chu, ngai teh, sâwn a pai nghe nghe asin,” tiin an hrilh a. Tin, Juda chuan, “Hruai chhuak ula, hâl hlumin awm rawh se,” a ti a. 25 Tin, an hruai chhuah chuan Tamari chuan, “Hêng thil neitupa lakah hian a ni, nau ka pai ni,” tiin a pu hnênah chuan mi a tîr ta a; amah vêkin, “Khawngaih takin hêng hming nemna te, hrui te, tiang te hi tu ta nge ni, en chiang teh khai,” a ti bawk a. 26 Tin, Juda chuan chûng thil chu a ta a ni tih a lo hria a, “Ani chu ka aiin a fel zâwk a ni; ka fapa Sela ka neihtîr ta si lo va,” a ti a. Tin, Juda chuan ani chu a pâwl leh ta hauh lo va. 27 Tin, nau a vei lai chuan heti hi a ni a, ngai teh, a chhûlah chuan phîr an lo awm a. 28 Tin, heti hi a ni a, nau a vei chuan pakhat chuan a kut a rawn zen chhuak a; tichuan, nau chhar mi chuan, “Hei hi a chhuak hmasa zâwk a nih hi,” tiin a chelh a, a kutah chuan la sen a buntîr a. 29 Tin, heti hi a ni a, a kut chu a lâk luh leh lai chuan, ngai teh, a unau chu a lo chhuak ta a; tichuan, nau chhar mi chuan, “Engati nge chhuahna i insiam ni?” a ti a; chuvângin, a hmingah chuan Pereza an sa a. 30 Tin, chumi hnuah chuan a unau, a kuta la sen bun kha a lo chhuak leh a; a hmingah chuan Zera an sa a.

Genesis 39

Josefa leh Potiphara nupui

1 Tin, Josefa chu Aigupta ramah an hruai chhuk a; tin, Pharaoa hnuaia hotu pakhat, vêngtu pâwl hotu, Aigupta mi, Potiphara chuan chuta rawn hruai chhuktu Ismael-hote kut ata chu a lei ta a. 2 Tin, LALPA chu Josefa hnênah a awm a; tichuan, ani chu mi vânnei tak a ni a; tin, a pu Aigupta mi inah chuan a awm a. 3 Tin, a pu chuan LALPA chu a hnênah a awm a, a thiltih apiang LALPAN a kutah a hlawhtlintîr tih a lo hre ta a. 4 Tichuan, Josefa chuan a pu mit a tlung a, a rawng a bâwl ṭhîn a; tin, ani chuan a chhûngte chungah chuan hotuah a siam a, a neih zawng zawng a kutah a dah ta vek a. 5 Tin, heti hi a ni a, inah chuan hotuah a siam a, a neih zawng zawng chunga hotua a siam achinah chuan, Josefa avângin LALPA chuan Aigupta mi chhûngte chu mal a sâwm ta a; in lam leh ram lama a neih zawng zawng chu LALPAN mal a sâwm ṭhîn a. 6 Tichuan, a neih zawng zawng chu Josefa kutah a dah tlat a, a hnêna thil awm rêng rêng chu a hriatpui hauh lo va, ama chaw ei chauh lo chu a hre lo. Tin, Josefa chu mi tlâwntlai ṭha tak a ni a, a hmêl pawh a ṭha hle a. 7 Tin, chûng hnuah chuan heti hi a ni a, a pu nupui chuan Josefa chu a ngaihmelh a; tin, “Mi mutpui rawh,” a ti a. 8 Ani erawh chuan a duh lo va, a pu nupui hnênah chuan, “Ngai teh, ka pu chuan he inah hian ka hnênah eng eng nge awm a hre si lo va, a neih zawng zawng ka kutah hian a dah vek a; 9 he inah hian ka aia lian zâwk tu mah an awm lo va; a nupui i nih avângin nangmah chauh lo chu ka lakah eng mah ui a nei hek lo; chutichuan, engtin nge he sual lian tak hi tiin Pathian chunga thil ka tihsual theih ang?” a ti a. 10 Tin, heti hi a ni a, ni tin maiin Josefa chu be ṭhîn mah sela, amah mutpui lam thu emaw, ama hnêna awm lam thu emaw a pawm duh lo va. 11 Tin, chumi lai vêl chuan heti hi a ni a, a hna chu thawk tûrin in chhûngah a va lût a; tin, chutah chuan an in awm rêng rêng tu mah an awm lo va. 12 Tichuan, ani chuan, “Mi mutpui rawh,” tiin a silhfênah a lo man a; tin, ani chuan a silhfên chu a kutah chuan a tlânsan a, a chhuak ta daih a. 13 Tin, heti hi a ni a, a silhfên chu a kuta hnutchhiahin a tlân chhuak ta tih a hriat veleh, 14 a in awmte chu a ko va, an hnênah, “En teh u, mi timualpho tûrin Hebrai mi pakhat kan hnêna a hruai luh tâk hi! Mi mutpui tumin ka hnênah hian a lo lût a; tichuan, aw ring takin ka au ta a. 15 Tin, heti hi a ni a, aw chhuahin ring takin ka au tih a hriat veleh, ka kiangah a silhfên hi a tlânsan a, a chhuak ta daih a ni,” a ti a. 16 Tin, Josefa pu a lo hâwn hma loh chuan a silhfên chu a kiangah a lo dah reng a. 17 Tin, a hnênah hetiang thu hi a lo sawi a, “Hebrai chhiahhlawh kan hnêna i rawn hruai kha, mi tihmualpho tumin ka hnênah a lo lût a; 18 tin, heti hi a ni a, aw chhuaha ka au veleh ka kiangah a silhfên hi hnutchhiahin a tlân chhuak ta a ni,” a ti a. 19 Tin, heti hi a ni a, Josefa pu chuan a nupuiin a hnêna, “I chhiahhlawh hian heti hian mi ti,” tia a thusawi a han hriat chuan a thin a lo ur ta thut a. 20 Tichuan, Josefa pu chuan ani chu a hruai a, tân in, lal mi tâng phuara an awmnaah chuan a khung ta a; tichuan, chuta tân inah chuan a awm ta a. 21 Nimahsela, LALPA chu Josefa hnênah a awm zêl a, a chungah ngil a nei a, tân in vêngtu pawh a khawngaihtîr a. 22 Tichuan, tân in vêngtu chuan tân ina tângho awm zawng zawng chu Josefa kutah a kawltîr ta vek a; tichuan, chuta an tih apiang chu Josefa chu a titu a ni zêl ṭhîn a. 23 LALPA chu Josefa hnênah a awm a, a thiltih apiang chu LALPA chuan a hlawhtlintîr ṭhin avângin, tân in vêngtu chuan a kuta thil awm rêng rêng chu a en duh ta lo va.

Genesis 40

Josefan lung in tâng vete mumang a hrilhfiah

1 Tin, chûng thil hnuah chuan heti hi a ni a, Aigupta lal uain petu leh a chhang siamtute chuan an pu Aigupta lal chu an tivui a. 2 Tichuan, Pharaoa chu a chhiahhlawh hotu pahnih chungah, a uain pe hotu ber chungah leh a chhang siam hotu ber chungah chuan a thinur ta a. 3 Tichuan, vêngtu pâwl hotu inah, tân in, Josefa phuara a awmnaah chuan a tântîr ta a. 4 Tin, vêngtu pâwl hotu chuan Josefa chu anmahni a enkawltîr a; tichuan, ani chuan an rawng a bâwl ta a; tin, ni eng zât emaw lai an tâng rih a. 5 Tin, tân ina phuara awm, Aigupta lal uain petu leh chhang siamtu chuan, an pahnihin zan khatah mumang awmze hrang ve ve an nei a. 6 Tin, a tûk zîngah chuan Josefa chu an hnênah a va lût a, anni chu a va hmu a; tin, ngai teh, an lo lungngai hle a. 7 Tichuan, ani chuan, “Engtizia nge vawiin chu lungngai hmêl in va pu ve?” tiin Pharaoa chhiahhlawh hotu, a pu ina tâng vete chu a zâwt a. 8 Tin, anni chuan a hnênah “Mumang kan nei a, min hrilhfiah thei tu mah an awm si lo a ni,” an ti a. Tin, Josefa chuan an hnênah “Mumang hrilhfiahnate chu Pathian ta a ni lo vem ni? Khawngaih takin mi han hrilh teh u,” a ti a. 9 Tichuan, uain pe hotu ber chuan a mumang chu Josefa a hrilh a, a hnênah, “Ka mumangah chuan ngai teh, ka hmaah hian grêp hrui a lo awm a; 10 grêp hruiah chuan pêng pathum a awm bawk a; tin, chawr chhuak angin a lo awm a, a pârte a lo chhuak a; a pâr bâwrte chuan grêp hminte a rawn chhuah ta a. 11 Tin, Pharaoa no chu ka kutah hian a lo awm a; tichuan, grêp rahte chu ka lo va, Pharaoa novah chuan ka sâwr a, no chu Pharaoa kutah ka lo pe a,” a ti a. 12 Tin, Josefa chuan a hnênah, “Hei hi a hrilhfiahna a ni: pêng pathum chu ni thum a ni. 13 Tûn achin ni thumah Pharaoan i lu a chawi kâng ang a, i hnathawh chu a thawhtîr leh ang che; tichuan, a uain petu i nih laia i pêk dân pângngai ang khân Pharaoa no chu a kutah i pe leh dâwn a nih chu. 14 Amaherawhchu, i chan ṭhat leh hunah chuan mi han hre reng la, khawngaih takin ka chungah khawngaihna rawn lantîr ang che; Pharaoa hnênah ka chanchin han sawi la, he in ata hi mi hruai chhuak ang che. 15 Hebrai-ho ram ata miin a rûka an rûk bo ka ni a; he ramah pawh hian rip chhûnga mi khungna khawp eng mah ka tisual hek lo,” a ti a. 16 Chhang siamtu chuan hrilhfiahna chu a ṭha tih a hriatin Josefa hnênah chuan, “Kei pawh mumang ka nei a; ngai teh, chhang vâr, fawng pathumin ka lo chhîpchhuan a. 17 Tin, fawng chungnung berah chuan Pharaoa chaw, chhang siamtu siam, chi tinrêng hi a lo awm a; tin, chûng chu savaten ka fawng chhîpchhuan ata chu an lo ei noh noh va,” a ti a. 18 Tin, Josefa chuan a chhâng a, “Hei hi a hrilhfiahna a ni: fawng pathum chu ni thum a ni. 19 Tûn achin ni thumah chuan Pharaoan i taksa ata i lu a chawi kâng ang a, thing lêrah a khai ang che; tichuan, savaten i sa chu an ei noh noh dâwn a nih chu,” a ti a. 20 Tin, heti hi a ni a, a ni thum ni, Pharaoa pian champhaphâk niah chuan, ani chuan a chhiahhlawh zawng zawngte tân ruai a ṭheh a; tin, a chhiahhlawhte zinga mi uain pe hotu ber lu leh chhang siam hotu ber lu chu a chawi kâng ta a. 21 Josefan anmahni a hrilhfiah ang takin, uain pe hotu ber chu uain petuah a ṭantîr leh a; tichuan, no chu Pharaoa kutah chuan a pe leh ta a; 22 chhang siam hotu ber erawh chu a khai hlum ta a. 23 Nimahsela, uain pe hotu ber chuan Josefa chu a hre reng ta awzâwng lo va; a theihnghilh ta mai a.

Genesis 41

Josefan Pharaoa mumang a hrilhfiah

1 Tin, kum hnih zet hnuah chuan heti hi a ni a, Pharaoa chuan mumang a nei a; tin, ngai teh, lui kamah hian a lo ding a. 2 Tin, ngai teh, bâwngpui pasarih nalh tak tak, thau tak tak hi tui aṭang chuan an lo chhuak chho va, phairuang zîngah hian an lo tla a. 3 Tin, ngai teh, bâwngpui dang pasarih pawr tak tak, chêr tak tak hi tui aṭang vêk chuan an hnuah an lo chhuak chho leh a, bâwngpui dangte kiangah lui kamah chuan an lo ding hlawm a. 4 Tin, bâwngpui pawr tak tak, chêr tak tak chuan bâwngpui nalh tak tak, thau tak tak chu an ei zo ta mai a. Chutichuan, Pharaoa chu a ṭhangharh ta a. 5 Tin, a han muhîl leh a, mumang a nei leh a; tin, ngai teh, buh kûng khatah hian vui sarih lian tak tak, ṭha tak tak hi an lo chhuak a. 6 Tin, ngai teh, chumi hnuah chuan vui sarih sîn tê tê, khawchhak thli chhêm ro rim rem hi an lo chhuak leh a. 7 Tin, vui sîn tê tête chuan vui sarih lian tak tak, ṭha tak takte chu an lem zo ta mai a. Tin, Pharaoa chu a han ṭhangharh a; tin, ngai teh, mumang a lo ni a. 8 Tin, a tûk zingah chuan heti hi a ni a, a rilru chu a lo mangang ta hle a; tichuan, mi a tîr a, Aigupta rama mitlâk dawithiam zawng zawng leh mi fing zawng zawng chu a ko va; tin, Pharaoa chuan a mumang chu a lo hrilh hlawm a; nimahsela, Pharaoa hrilhfiah thei tu mah an awm si lo va. 9 Chumi lai chuan uain pe hotu ber chuan Pharaoa hnênah, “Vawiinah hian ka tihsual ka hre chhuak ta. 10 Pharaoa a chhiahhlawhte chungah a thinur a; tichuan, vêngtu pâwl hotu inah chuan kei leh chhang siam hotu ber chu min tântîr a. 11 Tin, kei leh ani chuan zan khatah mumang kan nei a, mumang awmze hrang ve ve a ni kan neih ni. 12 Tin, chutah chuan kan hnênah vêngtu pâwl hotu chhiahhlawh, Hebrai mi, tlangvâl pakhat a awm a; tin, ani chu kan hrilh a, ani chuan kan mumangte chu min hrilhfiah ta a; kan mumang ang zia zêlin a ni min hrilhfiah ve ve ni. 13 Tin, heti hi a ni a, min hrilhfiah ang takin a lo awm ta ngei a ni; kei chu ka hnathawh hi mi thawhtîr leh a, chhang siamtu chu khai hlum a ni ta a,” a ti a. 14 Chutichuan, Pharaoa chuan Josefa chu a kohtîr ta nghâl a; tichuan, hmanhmawh takin rip ata chu an hruai chhuak ta a; tin, ani chu a inmêt fai a, a silhfên chu a thlâk a, Pharaoa hnênah chuan a va lût a. 15 Tin, Pharaoa chuan Josefa hnênah, “Mumang ka nei a, a hrilhfiah thei tu mah an awm lo va; nangin mumang hi a thu i hriat chuan i hrilhfiah thei tih i chanchin hi mi sawi ka lo hria a,” a ti a. 16 Tin, Josefa chuan Pharaoa chu a chhâng a, “Chu chu keimaha awm a ni lo ve; Pathianin Pharaoa chu thlamuanthlâk takin a chhâng zawk ang,” a ti a. 17 Tin, Pharaoa chuan Josefa hnênah, “Ka mumangah chuan, ngai teh, lui kamah hian ka lo ding a; 18 tin, ngai teh, bâwngpui pasarih thau tak tak, nalh tak tak hi tui aṭang chuan an lo chhuak chho va, phairuang zîngah hian an lo tla a. 19 Tin, bâwngpui dang pasarih berh tak tak, pawr êm êm, chêr tak tak, chutiang rêng rênga chhia Aigupta ram zawng zawng pawha ka la hmuh ngai loh hi, an hnuah an lo chhuak chho leh a. 20 Tin, bâwngpui chêr tak tak, pawr tak takte chuan bâwngpui pasarih thau tak tak lo chhuak hmasate chu an ei zo ta mai a. 21 Tin, an ei zawh hnu pawh chuan an ei tih an hriat chuang loh; a tîr ang bawk khân an la pawr ta reng a. Chutichuan, ka ṭhangharh ta a. 22 Tin, ka mumang dang lehah chuan, ngai teh, buh kûng khatah hian vui sarih lian tak tak, ṭha tak tak hi a lo chhuak a. 23 Tin, ngai teh, chumi hnuah chuan vui sarih vuai sil sel, sîn tê tê, khawchhak thli chhêm ro rim remte hi an lo chhuak leh a. 24 Tin, vui sîn tê tête chuan vui sarih ṭha tak takte chu an lem zo ta maiin ka hmu a. Tin, mitlâk dawithiamhote chu ka hrilh a; nimahsela, mi hrilhfiah thei tu mah an awm si lo va,” tiin a sawi a. 25 Tin, Josefa chuan Pharaoa hnênah, “Pharaoa mumang hi hmun khat a ni; Pathianin a thiltih tûr chu Pharaoa a hriattîr a nih chu. 26 Bâwng pasarih ṭha tak takte chu kum sarih an ni a, vui sarih ṭha tak takte chu kum sarih an ni bawk a; mumang chu hmun khat a ni. 27 Tin, an hnua bâwng pasarih chêr tak tak, pawr tak tak lo chhuak chhote chu kum sarih an ni a, vui sarih a sî hlîr, khawchhak thli chhêm ro rim remte nên chuan; chûng chu ṭâm kum, kum sarih tûr a ni. 28 Chu chu a ni Pharaoa hnêna ka sawi kha; Pathianin a thiltih tûr chu Pharaoa a hriattîr a nih hi. 29 Ngai teh, Aigupta ram chhûng zawng zawngah hian hausak tawntaw kum, kum sarih a lo thleng dâwn; 30 chumi hnuah chuan ṭâm kum, kum sarih a lo awm leh ang; tichuan, hausakna zawng zawng kha Aigupta ramah hian theihnghilh vek a ni tawh ang; ṭâm chuan ram hi a ei chhe zo vang. 31 Hausakna kha, a zuitu ṭâm avâng chuan he ramah hian an hre tawh lo vang; a nasa hle dâwn si a. 32 Tin, mumang Pharaoa vawi hnih a neih nawntîrna chu hemi avâng hian a ni, thiltih tûr chu Pathianin a tihngheha, Pathian vêkin a thlentîr lawk dâwn avângin. 33 Chutichuan, tûnah hian Pharaoa chuan mi pakhat bengvâr tak, fing tak mai zawng chhuak sela, Aigupta ram chungah hian hotuah awmtîr rawh se. 34 Pharaoan chu chu ti sela; tin, ram chungah hian hotute ruat sela, hausak kum, kum sarih chhûng chuan Aigupta ram buh hi hmun ngaa ṭhena hmun khat zêl khâwm rawh se. 35 Tichuan, anni chuan chûng kum ṭhat kum lo thleng tûra buh zawng zawng chu lâwr khâwmin, Pharaoa hnuaia awm tûrin khuaahte la ei atân buh chhûng khâwm sela, vawng tlat rawh se. 36 Tichuan, ṭâm avânga ram hi a boral loh nân buh chu ṭâm kum, kum sarih Aigupta rama lo thleng tûr atân chuan he ram atân hian inrin lâwkna tûr a ni ang,” a ti a.

Josefa chu Aigupta ram hotuah a ṭang

37 Tin, chu thu chu Pharaoa leh a chhiahhlawhte zawng zawng chuan ṭha an tih zâwng tak a ni a. 38 Tin, Pharaoa chuan a chhiahhlawhte hnênah, “Hetiang, Pathian thlarau awmna mi hi kan hmu zo dâwn em ni?” a ti a. 39 Tin, Pharaoa vêk chuan Josefa hnênah, “Pathianin chûng zawng zawng chu a hriattîr che avângin, nang anga bengvâr leh fing rêng rêng hi an awm lo ve. 40 Nang hi ka chhûngte chungah hotuah i awm ang a, ka khua leh tui zawng zawng hi i thu ang zêlin an awm ang; lalṭhutphaha ṭhut thu-ah chauh hian i aiin ka lal ang,” a ti a. 41 Pharaoa vêk chuan Josefa hnênah, “Ngai teh, Aigupta ram zawng zawng chungah hian hotuah ka siam a che,” a ti a. 42 Tin, Pharaoan a kut ata a hming nemna zungbun chu a phawi a, Josefa kutah a buntîr a, puan zai sîna siam silhfênte a bel a, a nghâwngah rangkachak ṭhi a awrhtîr a. 43 Tin, a tawlailîr neih pahnihnaah chuan a chuantîr a; a hmaah chuan, “Ṭhingṭhi ru,” tiin an au zêl a; tichuan, Aigupta ram zawng zawng chungah chuan hotuah a siam ta a. 44 Tin, Pharaoa chuan Josefa hnênah, “Kei Pharaoa ka ni, nangma thu lo chuan Aigupta ram chhûng zawng zawngah hian tu mân an kut emaw, an ke emaw an lek lo vang,” a ti a. 45 Tin, Pharaoan Josefa hmingah chuan Zaphenath-panea a vuah a; On khaw puithiam Potiphara fanu Asenathi nupuiah a neihtîr bawk a. Tin, Josefa chu a chhuak a, Aigupta ram chu a fang ta a. 46 Tin, Josefa chu Aigupta ram lal Pharaoa hmaa a din lai chuan kum sawmthum mi a ni a. Tin, Josefa chu Pharaoa hnên ata a chhuak a, Aigupta ram zawng zawng chu a fang chhuak ta a. 47 Tin, kum ṭhat kum, kum sarih chhûng chuan lei chuan hlâwk takin buh a chhuah ṭhîn a. 48 Tin, Aigupta rama kum ṭhat kum, kum sarih lo thlenga buh zawng zawng chu a lâwr khâwm a, buh chu khuaahte chuan a chhûng khâwm ta a; khaw tinah a vêl lova buh ṭheuh chu a chhûng khâwm zêl a. 49 Tichuan, Josefa chuan buh chu tam tak, tuifinriata ṭiauvut zât laiin a chhûng khâwm rui a; a chhiar pawh chu a bâng ta hial a, chhiar sên rual a ni ta si lo va. 50 Tin, ṭâm lo thlen hma chuan Josefa chuan fapa pahnih a nei a, chu mite chu On khaw puithiam Potiphara fanu Asenathi chuan a hrinsak a ni. 51 Tin, Josefan a fa tîr hmingah chuan Manasea a sa a; “Pathianin ka thawh rimna zawng zawng leh ka pa chhûngte zawng zawng chu mi theihnghilhtîr ta si a,” a ti a. 52 Tin, a fa pahnihna hmingah chuan Ephraima a sa a, “Pathianin ka hrehawm tuarna ramah hian chi mi thlahtîr ta si a,” a ti a. 53 Tin, kum ṭhat kum, kum sarih, Aigupta rama lo thleng chu a lo vei ta a; 54 tin, ṭâm kum, kum sarih tûr chu Josefa sawi ang takin a lo thleng ṭan ve ta a. Ram tinah ṭâm a lo tla ta a; Aigupta ram chhûng zawng zawngah erawh chuan ei tûr a awm a. 55 Tin, Aigupta rama mi zawng zawng chu an ṭâm veleh Pharaoa hnênah ei tûr dîlin an au va; tin, Pharaoa chuan Aigupta mi zawng zawng hnênah chuan, “Josefa hnênah kal ula; a hrilh apiang che u chu ti rawh u,” a ti a. 56 Tin, ṭâm chu lei chung zawng zawngah chuan a lo tla ta a; tichuan, Josefa chuan chhûn khâwmna in zawng zawng chu a hawng a, Aigupta mite hnênah chuan a hralh a; Aigupta ramah chuan ṭâm chu a tla nasa hle si a. 57 Tin, lei chung zawng zawngah ṭâm chu a tlâk nasat avângin, ram tina mite chu buh lei tûrin Aigupta ramah Josefa hnênah chuan an kal ṭhin a.

Genesis 42

Buh lei tûrin Aigupta ramah Josefa unaute an kal

1 Tin, Jakoba chuan Aigupta ramah buh a awm tih a lo hre ta a; tichuan, Jakoba chuan a fapate hnênah, “Engati nge in inen mai mai ni?” a ti a. 2 Tin, amah vêk chuanin, “Ngai teh u, Aigupta ramah buh a awm tih ka lo hre ta; thi lova kan nun chhuah theihna tûrin chutah chuan zuk kal ula, chuta ta chu kan tân zuk lei rawh u khai,” a ti a. 3 Tichuan, Josefa uteho sâwm chu Aigupta ram ata buh lei tûrin an zuk kal ta a. 4 Josefa nau Benjamina erawh chu a ute hnênah chuan Jakoban a kaltîr ve lo va; “Tawhsual a zuk tâwk hlauh dah ang e,” a ti a ni. 5 Tichuan, Israela fapate chu mi kalho zîngah chuan buh lei tûrin an kal ve a; Kanaan ramah pawh ṭâm a tla ve si a. 6 Tin, Josefa chu Aigupta ram chungah chuan hotu a ni a, amah chu chumi rama mi zawng zawng hnênah a hralhtu a ni; tichuan, Josefa uteho chu an lo kal a, lei siin amah chibai an bûk hlawm a. 7 Tin, Josefa chuan a uteho chu a lo hmu a, anni chu a lo la hre hlawm a; nimahsela, an lakah chuan chi dang angin a insiam a, ram takin a bia a; tin, an hnênah, “Khawi aṭanga lo kal nge in nih?” a ti a. Tin, anni chuan, “Buh lei tûrin Kanaan ram aṭanga lo kal kan ni,” an ti a. 8 Tin, Josefa chuan a uteho chu a lo la hria a, anni erawh chuan ani chu an hre si lo. 9 Tin, Josefa chuan anmahni chungchâng thu mumanga a hmuhte kha a hre chhuak a, an hnênah, “Enthlatute in nih hi! Ram ruahzia en tûrin in lo kal a nih hi le!” a ti a. 10 Tin, anni chuan a hnênah, “Ka pu, ni suh e, i chhiahhlawhte hi buh lei tûra lo kal kan ni asin. 11 Mi pakhat fa vek kan ni; mi dik tak kan ni a, i chhiahhlawhte hi enthlatute kan ni awzâwng lo ve,” an ti a. 12 Tin, ani chuan an hnênah, “Ka awih lo, ram ruahzia en tûra lo kal in nih hi maw,” a ti a. 13 Tin, anni chuan, “Keini i chhiahhlawhte hi unau sâwm leh pahnih, Kanaan rama awm mi pakhat fa kan ni; tin, ngai teh, kan tlum ber chu tûnah chuan kan pa hnênah a awm a, pakhat chu a awm ta lo a ni,” an ti a. 14 Tin, Josefa chuan an hnênah, “ ‘Enthlatute in ni’ ka tih che u kha, in nih ngei hi! 15 Heti hian fiahin in awm ang: in tlum ber chu heta a lo kal loh chuan, Pharaoa nunna chhâlin, heta ta hi in chhuak lo vang ka ti che u a ni. 16 Nangmahniah thutak a awm nge awm lo in thu fiah nân in zînga pakhat tîr ula, in nau chu rawn hruai rawh se, nangni erawh chu phuarin in lo awm rih ang; chuti lo chuan, Pharaoa nunna chhâlin, ‘Enthlatute in ni ngei mai!’ ka ti dâwn che u a ni,” a ti a. 17 Tin, an za chuan ni thum a tântîr hlawm a. 18 Tin, a ni thum niah chuan Josefa chuan an hnênah, “Heti hian ti ula in nung ang, Pathian ka ṭih si a: 19 mi dik tak in nih chuan in unau zîngah hian pakhat phuarin awm rawh se; nangni erawh chu kal ta ula, in chhûngteho ṭâm tân chuan buh phur rawh u. 20 Tin, in tlum ber chu ka hnênah rawn hruai ang che u; chutichuan, in thu chu a fiah ang a, in thi dâwn lo nia,” a ti a. Tichuan, chutiang chuan an ti ta a. 21 Tin, anni chuan, “Kan nau chunga kan thiltih kha kan thiam lo tak tak a nih hi, khawngaih tûra min ngen ṭâwk ṭâwk laia a thinlung manganzia hmu reng chunga kan ngaihthlâksak duh loh kha; chuvângin, he manganna hian min tlâkbuak a nih hi,” an inti a. 22 Tin, Reubena chuan, “ ‘Naupang chungah thil tisual suh u,’ tiin in hnênah ka sawi lo vem ni? In ngaithla duh lo a nih kha; chuvângin, ngai teh u, a thisen phuba chu an la a nih hi,” tiin anni chu a chhâng a. 23 An kârah ṭawng letlingtu a awm avângin Josefan an thusawi chu a hria tih an hre lo. 24 Tin, ani chuan a lehhawisan a, a va ṭap ta a; tin, an hnênah a kîr leh a, anni chu a bia a, an zing ata Simeona chu a hruai hrang a, an mit hmuhah chuan a phuar ta a.

Josefa unaute Kanaan ramah an haw

25 Tin, Josefa chuan an bâwmte chu buha tikhat tûr leh an tangkate chu an ipa dah leh ṭheuh tûr leh, kalkawng atân ei tûr pe tûrin thu a pe a; tichuan, chutiang chuan an tihsak ta a. 26 Tin, an buh chu an sabengtungte chu an phurhtîr a, chuta ta chu an chhuak ta a. 27 Tin, an zînga mi pakhatin, riahbûkah a sabengtung chaw pe tûra a ip a han hawn chuan a tangka chu a hmu ta mai a; ngai teh, a ip rawng bulah chuan a lo awm ta a. 28 Tichuan, a unaute hnênah chuan, “Ka tangka kha an lo dah leh a nih hi maw le; ngai teh u, ka ipa hi a lo awm reng mai,” a ti a; tin, an thin a ṭhâwng zawk a, “Pathianin hetia min tih hi engtizia nge ni aw?” tiin khûr chungin an inen ta hlawm a. 29 Tin, Kanaan rama an pa Jakoba hnên chu an lo thleng a, an chunga thil thleng zawng zawng chu an hrilh a; 30 “Chumi ram hotu chuan ram takin min bia a, ram enthlatuah min puh a. 31 Tin, keini chuan a hnênah, ‘Mi dik tak kan ni; enthlatu kan ni awzâwng lo ve. 32 Unau sâwm leh pahnih kan ni a, pa pakhat fapate kan ni vek a; pakhat chu a awm ta lo va, kan tlum ber chu tûnah hian Kanaan ramah kan pa hnênah a awm a ni,’ kan ti a. 33 Tin, chu mi, an ram hotu chuan kan hnênah, ‘Heti hian mi dik tak in ni tih ka la hria ang: in unau pakhat ka hnênah hnutchhiah ula, in chhûngteho ṭâm tân chuan buh phur ula, kal tawh rawh u. 34 Tin, in tlum ber chu ka hnênah rawn hruai ang che u; tichuan, enthlatu in ni lo va, mi dik tak in ni zâwk tih ka hria ang; chutichuan, in unaupa hi ka pe leh ang che u a, he ramah hian in sumdâwng dâwn nia,’ min ti a,” an ti a. 35 Tin, heti hi a ni a, an ipte chu an bun ruah laiin, ngai teh, an tangka fûn ṭheuh chu an ipah chuan a lo awm ta ṭheuh va! Tin, anniho leh an pa chuan an tangka fûnte chu an hmuh chuan an hlau hle a. 36 Tin, an pa Jakoba chuan an hnênah, “Nangni hian ka fate mi chântîr a nih hi; Josefa a awm tawh lo va, Simeona pawh a awm tawh hek lo, Benjamina lam pawh hruai bo in tum lehzêl a; chûng thil zawng zawng chuan mi tlâkbuak a nih hi,” a ti a. 37 Tin, Reubena chuan a pa hnênah, “I hnêna ka rawn hruai leh loh chuan ka fapate pahnih hi that mai ang che; ani chu ka kutah mi kawltîr la, i hnênah ka rawn hruai leh mai ang,” tiin a sawi a. 38 Nimahsela, ani chuan, “Ka fapa hi in hnênah a chhuk ve lo vang; a u a thi tawh a, amah chauh hi a ni tawh si a; in kalna kawnglakahte tawhsual a zuk tawh chuan ka lu ṭuak hi lungngaihnain thlânah in liamtîr dâwn a ni,” a ti a.

Genesis 43

Josefa unaute Benjamina hruaiin Aigupta ramah an kal

1 Tin, chumi ramah chuan ṭâm a tla nasa hle a. 2 Tin, heti hi a ni a, Aigupta ram ata buh an phurh chhoh kha an ei zawh chuan an pa chuan an hnênah, “Kal leh tawh ula, buh tlêm tal kan tân zuk lei leh rawh u,” a ti a. 3 Tichuan, Juda chuan a hnênah, “Chu mi chuan, ‘In nau chu in hnêna a rawn tel loh chuan ka hmêl in hmu tawh lo vang,’ tiin min phût tlat a ni. 4 Kan nau hi kan hnênah i tirh chuan buh kan zuk leisak ang che. 5 I tirh loh erawh chuan kan zuk kal lo vang; chu mi chuan kan hnênah, ‘In nau chu in hnêna a rawn tel loh chuan ka hmêl in hmu lo vang,’ a ti miau si a,” tiin a sawi a, 6 Tin, Israela chuan, “Eng vângin nge nau dang in la neih thute lam in hrilh khera, ka tâna ṭha lo tak in tih ni?” a ti a. 7 Tin, anni chuan, “Chu mi chuan, ‘In pa chu a la dam em? Unau dang in la nei em?’ tiin kan chanchin leh kan laichînte chanchin min zâwt tlat si a; tichuan, chûng a thu min zawh ang zêl chu kan hrilh a ni: ‘In nau chu rawn hruai chhuk rawh u,’ a ti ang tih tu nge hre kher ang i?” an ti a. 8 Tin, Juda chuan a pa Israela hnênah, “Taitea chu ka hnênah kaltîr rawh; tichuan, kan tho vang a, kan kal mai ang e; keini leh nang leh kan fanau tê tête pawh hi thi lova kan nun theihna tûrin. 9 A chungchâng thu-ah hian keiman a mawh ka phur zêl ang; keima kutah ngei amah dah ang che. Ani chu i hnênah ka rawn hruai leh lohva, i hmaah hian ka dintîr leh loh chuan a mawh chu kumkhuain ka phur nâng e. 10 Awm rei suh ila chuan tûnah hian a vawi hnihna pawh kan lo thleng leh tawh ngei ngei ang,” a ti a. 11 Tin, an pa Israela chuan an hnênah, “Chutiang a nih si chuan heti hian ti rawh u: in bâwmahte khân he rama thil ṭha ṭha ṭhenkhat - thinghnai damdawi te, khawizu te, englo rimtui te, murra te, theipilsak te, vaiumkhal te tlêm ṭheuhvin chu mi tân chuan lâwmmanah sin thlâk rawh u. 12 Tin, tangka a leh hnih keng ula, in ip rawng bula tangka a pêk kîr che u pawh kha keng leh rawh u; a tihpalh a ni mahna. 13 In nau pawh chu hruai ula, tho ula, chu mi hnênah chuan kal leh rawh u. 14 Tichuan, in unau pakhat leh Benjamina hi a chhuahsakna tûr che uin, Pathian Engkimtitheia chuan chu mi chu khawngaihtîr che u rawh se. Tin, ka fate chu chân a nih leh ka chân mai a ni ang chu,” a ti a. 15 Tichuan, anni chuan lâwmman chu an keng a, tangka chu a leh hnih an keng bawk a, Benjamina pawh an hruai a; tin, an tho va, Aigupta ramah an zuk kal a, Josefa hmaah chuan an ding leh ta a. 16 Tin, Josefa chuan Benjamina an hnêna awm chu a hmuh veleh, a in enkawltu hnênah chuan, “Saw mite saw in chhûngah hruai lût la, sa talh la, buatsaih rawh; saw mite sâwn chhûnah ka hnênah chaw an ei dâwn a ni,” a ti a. 17 Tichuan, ani chuan Josefa thupêk angin a ti a; Josefa inah chuan a hruai lût a. 18 Tin, Josefa inah hruai luha an awm avângin an hlau va, “Kal hmasak ṭuma kan ipa tangka min pêk kîrte avâng khân a nih hi min hruai luh ni; kan chungah remchâng zawnga min beiin, keimahni leh kan sabengtungte nên hian bawih atân min man a tum a nih hi,” an ti a. 19 Tin, Josefa in enkawltu kiangah chuan an va kal a, kawngka bulah chuan an bia a, 20 “Aw ka pu, kan lo kal hmasak ṭum khân buh lei tûr ngawta lo chhuk kan ni a; 21 tin, heti hi a ni a, riahbûk kan thlen chuan kan ipte chu kan han hawng a; tin, ngai teh, kan tangka ṭheuh chu kan ip rawng bulah a lo awm ta ṭheuh va, kan tangka chu a bûk ngai thênin a lo awm a; tichuan, kan rawn keng leh a ni. 22 Tin, buh leina tûrin tangka dang pawh kan rawn keng a; kan tangka chu tuin nge kan ipah dah kan hre si lo,” an ti a. 23 Tin, ani chuan, “Thlamuang takin awm ula, hlau suh u; in Pathian, in pa Pathian chuan in ipahte chuan ro a pe che u a nih chu; in tangka kha ka hmu si a,” a ti a. Tin, Simeona chu an hnênah a rawn hruai chhuahsak ta a. 24 Tin, anni chu Josefa in chhûngah a hruai lût a, tui a pe a, an ke an sil ta a; an sabengtungte pawh chu chaw a pe bawk a. 25 Tin, an lâwmman ken chu Josefa chawfâka a lo kal hmain an lo buatsaih lâwk a; chutah chuan chaw an ei dâwn tih an hre si a. 26 Tin, Josefa chu ina a lo hâwn veleh, an kuta lâwmman awm chu in chhûngah a hnênah an keng lût a, lei siin chibai an bûk hlawm a. 27 Tin, ani chuan an chanchin a zâwt a, “In pa, a chanchin in sawi putar kha, a dam lai a ni em? Nungdamin a la awm em?” a ti a. 28 Tin, anni chuan, “Kan pa, i chhiahhlawh chu a dam lai a ni a, nungdamin a la awm e,” an ti a. Tin, an lu an kûn a, chibai an bûk leh a. 29 Tin, ani chu a dâk a, a nau Benjamina, a nu fapa chu a hmu a, “Kha kha in tlum ber, a chanchin mi hrilha kha em ni?” a ti a. Tin, amah vêkin, “Ka fapa, Pathianin khawngaih che rawh se,” a ti a. 30 Tin, Josefa chuan a nau a hmuh chuan a lung a chhiat tâk êm avângin, hmanhmawh takin ṭahna hmun a zawng ta thuai a, a pindan chhûngah a lût a, chutah chuan a ṭap chhuak ta a. 31 Tin, a hmai a phih a, a va chhuak leh a, a insûm hrâm hrâm a, “Chaw ei siam rawh u,” a ti a. 32 Tichuan, ama tân a hrangin, anniho tân a hrangin, Aigupta mi a eipuiteho tân a hrangin an siam ta a (Aigupta-hovin Hebrai-ho chu an eipui thei si lo; chutiang tih chu Aigupta-ho tân chuan a thiang lo a ni). 33 Tichuan, upa ber chu fa tîr nihna angin, naupang ber chu a tlum ber nihna angin Josefa hmaah chuan an ṭhu zêl a; chutichuan, mak an ti hlawm ṭheuh va. 34 Tin, Josefa chuan a hnêna mi chanvote chu an hnênah a hlan chhâwntîr a, Benjamina chanvo phei chu an chanvo zawng zawng ai chuan a leh ngain a tam bîk a ni. Tin, uain te an in a, a hovin an hlim ta hle a.

Genesis 44

Josefa no a bo

1 Tin, ani chuan a in enkawltu hnênah chuan, “Kha mite ip kha an phurh theih tâwkin buhin tikhat la, an tangka ṭheuh chu an ip rawng bulah dah ṭheuh rawh. 2 Tin, ka no, tangkaraw no kha, an naupang ber ip rawng bulah dah rawh, a buh man tangka nên khân,” tiin thu a pe a. Tichuan, ani chuan Josefa thusawi ang chuan a ti ta a. 3 Tin, khua a vâr veleh anni chu an sabengtungte nên chuan an kaltîr ta a. 4 Tin, khua ata an kal chhuak chu an la thlen hlat hmain Josefa chuan a in enkawltu hnênah, “Tho la, mite kha va ûm rawh; tin, i ûm phâk veleh an hnênah, ‘Engtizia nge thil ṭha thil ṭha lova in rulh ni? 5 Kha kha ka pu uain inna leh aienna ngei a ni lo vem ni? Hetiang in tih hi in tisual a ni,’ ti rawh,” a ti a. 6 Tin, a ûm phâk a, chûng thu chu an hnênah a sawi a. 7 Tin, anni chuan a hnênah, “Ka pu, engtizia nge ni hetiang thu i sawi? I chhiahhlawhte hian chutiang thil kan tih loh tûrzia mai chu. 8 Ngai teh, kan ip rawng bula tangka kan hmuhte pawh kha Kanaan ram aṭangin i hnênah kan rawn ken leh kha. Engtin nge i pu ina mi tangkarua emaw, rangkachak emaw kan rûk theih ang le? 9 I chhiahhlawhte zîngah hian tu pawh i hmuhna apiang chu thi rawh se, keini pawh kan pu bawihah kan awm mai ang e,” an ti a. 10 Tin, ani chuan, “Aw le, in thu ang zêl chuan ni ang hmiang; amaherawhchu, tu pawh ka hmuhna apiang chu ka bawihah a awm ang a, nangni erawh chu sawisêl bovin in awm ang,” a ti a. 11 Chu veleh chuan hmanhmawh takin mahni ip chu leiah an la thla ṭheuh va, mahni ip chu an hawng ṭheuh bawk a. 12 Tin, ani chuan an upa berah a ṭan a, an naupang ber thlengin a zawng a; tichuan, no chu Benjamina ipah chuan a hmu ta a. 13 Chu veleh chuan an silhfênte chu an pawt thlêr a, mahni sabengtung chu an phurhtîr leh ṭheuh va, khuaah chuan an kîr leh ta a. 14 Tin, Juda leh a unaute chuan Josefa in chu an va thleng a, ani chu chutah chuan a lo la awm cheu va; tin, a hmaah chuan an bawkkhup ta hlawm a. 15 Tin, Josefa chuan an hnênah, “Eng thil nge ni in tih tâk ni? Keimah ang mi hian ai an en thiam ngei ang tih in hre lo vem ni?” a ti a. 16 Tin, Juda chuan, “Ka pu, i hnênah eng nge kan sawi tâk ang? Eng nge kan hrilh ang? Engtin nge kan insawi ven tâk ang le? Pathianin i chhiahhlawhte sualna chu a hmuchhuak ta a nih hi; ngai teh, ka pu, i bawihte kan nih tâk hi, keimahni leh a kuta no an hmuhna pawh hi,” a ti a. 17 Tin, ani chuan, “Chutiang chuan ka tih loh tûrzia mai chu; a kuta no an hmuhna chauh hi ka bawihah a awm ang. Nangni erawh zawng thlamuang takin in pa hnênah han kal rawh u,” a ti a.

Benjamina tân Judan a dîl

18 Chu veleh Juda chuan Josefa chu a va hnaih a, “Aw ka pu, khawngaih takin, ka pu, i chhiahhlawh hi i beng hriatah thu kam khat mi sawitîr la, i thinur chu i chhiahhlawh chungah hian alhtîr suh ang che; nang zawng Pharaoa ang mai i ni si a. 19 Ka pu, nangin, ‘Pa emaw, unau emaw in nei em?’ tiin i chhiahhlawhte hi min zâwt a. 20 Tin, ka pu, keinin i hnênah hian, ‘Pa putar tak leh a tar lam fa, naupang tê kan nei a; chu mi u chu a thi a, a nu hrinah chuan amah chauh chu a la awm a, a pa chuan amah chu a hmangaih hle mai,’ kan ti a. 21 Tin, nangin i chhiahhlawhte hnênah hian, ‘Amah chu ka mita ka hmuh theih nân ka hnênah rawn hruai thla rawh u,’ i ti a. 22 Tin, ka pu, keinin i hnênah, ‘Taitea chuan a pa a kalsan thei lo vang; a pa a kalsan zawngin a pa chu a thi mai dâwn si a,’ kan ti a. 23 Tin, nangin i chhiahhlawhte hnênah hian, ‘In tlum ber chu in hnêna a lo chhuk ve loh chuan ka hmêl in hmu leh tawh lo vang,’ i ti a. 24 Tin, heti hi a ni a, i chhiahhlawh ka pa hnên kan han thlen chuan, ka pu, i thu chu kan hrilh a. 25 Tin, kan pa chuan, ‘Kal leh tawh ula, buh tlêm tal kan tân zuk lei leh rawh u,’ a ti a. 26 Tin, keinin, ‘Kan zuk kal thei tawh lo vang; kan tlum ber hi kan hnêna a tel ve erawh chuan kan zuk kal mai ang; kan tlum ber hi kan hnêna a tel loh chuan chu mi hmêl chu kan hmu thei dâwn lo a ni,’ kan ti a. 27 Tin, i chhiahhlawh ka pa chuan kan hnênah, ‘Ka nupui chuan fapa pahnih mi hrinsak tih in hria e; 28 tin, a pakhat chu ka hnên ata a kal chhuak a, pawh sawm vekin a awm a ni ngei ang, ka ti a; chumi achinah chuan amah chu ka hmu ta lo vang vang a; 29 tichuan, he mi pawh hi ka hnên ata in hruai bova, tawhsual a zuk tawh chuan ka lu ṭuak hi lungngaihnain thlânah in liamtîr dâwn a ni,’ a ti a. 30 Chutichuan, Taitea hi kan hnêna tel lova i chhiahhlawh ka pa hnên ka han thlen chuan, a nunna chu Taitea nunna nên a inzawm tlat avângin, 31 heti hi a ni ang a, Taitea hi a tel ve lo tih a hriat veleh a thi mai ang; tichuan, i chhiahhlawhte hian i chhiahhlawh kan pa lu ṭuak chu lungngaihnain thlânah kan liamtîr dâwn a nih hi. 32 I chhiahhlawh hian, ‘I hnêna ka rawn hruai leh loh chuan a mawh chu kumkhuain ka pa lakah ka phur ang,’ tiin, ka pa lakah chuan Taitea chungchâng thu-ah hian a mawhphurtuah ka insiam tawh si a. 33 Chutichuan, khawngaih takin i chhiahhlawh hi Taitea aiah, ka pu, i bawihah mi awmtîr la, Taitea hi a ute hnênah chhohtîr ang che. 34 Taitea ka hnêna tel lovin ka pa hnênah engtin nge ka chhoh theih ang? Ka pa chunga chhiatna thleng tûr chu ka hmu ang asin,” a ti a.

Genesis 45

A unaute hnênah Josefa a inpuang

1 Tin, Josefa chu a kianga ding zawng zawngte hmaah chuan a insûm zo ta lo va, “Mi zawng zawng hi ka hnên ata kal chhuahtîr vek rawh u!” tiin a au va. Tichuan, Josefa a unaute hnênah a inhriattîr chhûng zawng a kiangah tu mah an ding lo va. 2 Tin, a ṭap ta rawih a; tichuan, Aigupta-hovin an hria a, Pharaoa chhûngte pawhin an hre bawk a. 3 Tin, Josefa chuan a unaute hnênah, “Josefa kha ka ni; ka pa chu a la dam maw?” a ti a. Nimahsela, a unaute chuan an chhâng thei lo va, a hmaah chuan mangang takin an awm ta a ni. 4 Tin, Josefa vêkin a unaute hnênah, “Khawngaih takin mi rawn hnaih teh u,” a ti a. Tichuan, an va hnaih a. Tin, ani chuan, “In unaupa Josefa, Aigupta rama luhpui tûra in hralha kha ka ni. 5 Nimahsela, heta kal tûra mi hralh avâng hian lungngai suh ula, mahni inhaw duh hek suh u; mite nunna chhandam tûrin Pathianin in hmaah mi lo tîr hmasa a nih hi. 6 He kum hnih chhûng hian he ramah hian ṭâm a lo tla ta a; kum nga a la bâk a, chumi chhûng zawng lei leh hi a awm lo vang a, buh lâk pawh a awm hek lo vang. 7 Tichuan, leiah hian chithlahte zuahsak tûr che u leh, chhandamna ropui takin nungdama ka awmtîrna tûr che uin Pathianin in hmaah hian mi lo tîr hmasa a ni. 8 Chutichuan, heta mi kaltîrtu hi nangni in ni lo va, Pathian a ni zâwk e; ani chuan Pharaoa paah leh, a chhûngte zawng zawng hotuah leh Aigupta ram zawng zawng rorêltuah mi siam ta a. 9 Rang takin ka pa hnênah han kal ula, a hnênah, ‘I fapa Josefa chuan heti hian a ti a: “Pathianin Aigupta ram zawng zawng hotuah mi siam ta; ka hnênah lo chhuk rawh, rei rawn rial suh. 10 Tichuan, Gosen ramah i awm ang a, ka kiang ngeiah hian i awm dâwn nia, nang leh i fate leh i tute nên, i berâm rualte leh i bâwng rualte leh i neih zawng zawng nên. 11 Chutah chuan keiman ka châwm ang che, ṭâm tûr kum nga a la awm si a; chuti lo chuan, i lo rethei dah ang e, nang leh i chhûngte leh i neih zawng zawngte nên khân,”’ han ti ang che u. 12 Tin, ngai teh u, nangmahni mit ngei leh ka nau Benjamina mit ngeiin keima kâ ngeiin a sawi lai in hmu reng a ni. 13 Tin, Aigupta rama ka ropuina zawng zawng thu leh in thil hmuh zawng zawng thu hi ka pa in hrilh ang a; ka pa chu rang takin hetah in rawn hruai thla tûr a ni,” a ti a. 14 Tin, a ir leh a nau Benjamina ir chuktuahin a ṭap ta a; Benjamina pawh a ir chuktuahin a ṭap ta bawk a. 15 Tin, a unaute zawng zawng chu a fâwp a, a ṭah khum ta ṭheuh va; chumi hnuah chuan a unaute chuan thukhawchâng an sawipui ta a. 16 Tin, “Josefa unaute an lo kal,” tih thuthang chu Pharaoa inah chuan an lo hre ta a; chu chuan Pharaoa leh a chhiahhlawhte chu a tilâwm hle a. 17 Tin, Pharaoa chuan Josefa hnênah, “I unaute hnênah, ‘Heti hian ti rawh u: in sate chu buh phurhtîr ula, chhuak ula, Kanaan ramah kal rawh u. 18 Tin, in pa leh in chhûngte chu hruai ula, ka hnênah hian lo kal rawh u; tichuan, Aigupta rama thil ṭhate hi ka pe ang che u a, he rama thil awm ṭha berte hi in ei dâwn nia,’ ti rawh. 19 Thu ka pe a che, ‘Heti hian ti rawh u: in fanau tê tête tân leh in nupuite tân Aigupta ram aṭang hian tawlailîrte la ula, in pa hruaiin lo kal rawh u. 20 In bungrua pawh ngaihtuah duh suh u, Aigupta ram zawng zawnga thil ṭha apiang hi in ta a ni si a,’ tiin hrilh rawh,” a ti a. 21 Tichuan, Israela fate chuan chutiang chuan an ti a; tin, Josefa chuan Pharaoa thupêk ang chuan tawlailîrte an hnênah a pe a, kalkawng atân ei tûr a pe bawk a. 22 An zaa hnênah silhfên inthlâknate a pe ṭheuh va; Benjamina hnênah phei chuan tangka zathum leh silhfên inthlâkna panga a pe a. 23 Tin, a pa hnênah chuan hetiang hi a thawn a: sabengtung sâwm, Aigupta rama thil ṭha phur leh sabengtungnu sâwm, kalkawnga a pa tân buh leh chhang leh ei tûr phur a thawn a. 24 Chutichuan, a unaute chu a tîr chhuak a, an kal ta a; tin, ani chuan an hnênah, “Kalkawngah inhau lo tûrin fimkhur rawh u,” a ti a. 25 Tin, Aigupta ram ata chu an han chho va, Kanaan rama an pa Jakoba hnên chu an han thleng a. 26 Tin, a hnênah, “Josefa kha a lo la dam a, Aigupta ram zawng zawng rorêltu a ni,” tiin an hrilh a. Tin, a thin a mit sulh a, an thu chu a awih si lo. 27 Tin, an hnêna Josefa thusawi zawng zawng chu an hrilh a; tin, a chuanna tûr tawlailîr, Josefan a thawnte chu a han hmuh chuan, an pa Jakoba thinlung chu a harh ta huai a; 28 tin, Israela chuan, “A tâwk ta e; ka fapa Josefa chu nungdamin a lo la awm a nih tak hi; ka thih hmain amah ka zuk hmu ang,” a ti ta a.

Genesis 46

Jakoba te chhûngkua Aigupta ramah an kal

1 Tin, Israela chu a neih zawng zawng nên a chhuak a, Beer-seba chu a thleng a, a pa Isaaka Pathian hnênah chuan inthawinate a hlân a. 2 Tin, Pathianin zâna a mumangahte chuan Israela chu a bia a, “Jakob, Jakob!” a ti a. Tin, ani chuan, “Heta hi ka awm,” a ti a. 3 Tin, ani chuan, “Kei Pathian, i pa Pathian chu ka ni; Aigupta rama zuk kal chu hlau suh, chutah chuan chi ropui takah ka siam dâwn che a ni. 4 Aigupta ramah chuan i hnênah ka zuk kal ve ang a, ka hruai chho leh ngei ngei bawk ang che; tin, Josefa chuan i thih hunah i mit a siamsak dâwn che nia,” a ti a. 5 Tichuan, Jakoba chu Beer-seba aṭang chuan a chhuak a; Israela fapate chuan an pa Jakoba leh an fanau tê tête leh an nupuite chu a chuan nâna Pharaoa tawlailîr thawnahte khân an chuantîr a. 6 Tichuan, Jakoba leh a thlahte zawng zawng chuan Kanaan rama an dehchhuah an rante leh an bungruate chu an chhawm a, Aigupta ram chu an thleng ta a; 7 a fapate, a tupate, a fanute, a tunute, a thlahte zawng zawng chu Aigupta ramah chuan a luhpui ta hlawm a. 8 Tin, hêng hi Israela thlah Aigupta rama lût, Jakoba leh a fapate hming chu a ni: Reubena, Jakoba fa tîr chu. 9 Tin, Reubena fapate chu Hanoka te, Palua te, Hezrona te, Karmia te an ni a. 10 Tin, Simeona fapate chu Jemuela te, Jamina te, Ohada te, Jakina te, Zohara te, Kanaan hmeichhe laka a fapa Saula te an ni a. 11 Tin, Levia fapate chu Gersona te, Kohatha te, Meraria te an ni a. 12 Tin, Juda fapate chu Era te, Onana te, Sela te, Pereza te, Zera te an ni a; Era leh Onana erawh chu Kanaan ramah chuan an thi ta a ni. Pereza fapate chu Hezrona leh Hamula an ni a. 13 Tin, Isakara fapate chu Tola te, Puva te, Ioba te, Simrona te an ni a. 14 Tin, Zebuluna fapate chu Sereda te, Elona te, Jahleela te an ni a. 15 Chûngho zawng zawng chu Leaii fapa, a fanu Dinaii nên, Paddan-aram rama Jakoba a hrinsakate chu an ni a; a fapate leh a fanute zawng zawng chu sawmthum leh pathum an ni a. 16 Tin, Gada fapate chu Ziphiona te, Hagia te, Sunia te, Ezbona te, Eria te, Arodia te, Arelia te an ni a. 17 Tin, Asera fapate chu Imna te, Isva te, Isvia te, Beria te an ni, an farnu Seri nên; tin, Beria fapate chu Hebera leh Malkiela an ni a. 18 Chûngho chu Zilpaii, Labanan a fanu Leaii hnêna a pêka fapate chu an ni, chûngho chu Jakoba a hrinsak a, mi sâwm leh parukte chu. 19 Tin, Jakoba nupui Rakili fapate chu Josefa leh Benjamina an ni a. 20 Tin, Josefa chuan Aigupta ramah fapa Manasea leh Ephraima a nei a, chu mite chu On khaw puithiam Potiphara fanu Asenathi chuan amah a hrinsak a ni. 21 Tin, Benjamina fapate chu Bela te, Bekera te, Asbela te, Gera te, Naamana te, Ehia te, Rosa te, Mupima te, Hupima te, Arda te an ni a. 22 Chûngho chu Rakili fapa, Jakoba a hrinsakte chu an ni; an za chuan sâwm leh pali an ni. 23 Tin, Dana fapa chu Husima a ni a. 24 Tin, Naphtalia fapate chu Jazeela te, Gunia te, Jezera te, Silema te an ni a. 25 Chûngho chu Bilhaii, Labanan a fanu Rakili hnêna a pêka fapate chu an ni, chûngho chu Jakoba a hrinsak a; an za chuan pasarih an ni. 26 Jakoba fapate nupuiho chhiar lovin, Jakoba hnêna Aigupta rama lût ve, a ṭhâlbea chhuak zawng zawngte chu an za chuan sawmruk leh paruk an ni a; 27 tin, Josefan Aigupta rama fapa a neihte chu pahnih an ni. Jakoba chhûngte zawng zawng Aigupta rama lûtte chu sawmsarih an ni.

Aigupta ramah Jakoba leh a chhûngte an awm

28 Tin, Jakoba chuan Gosen ram lam kawng lo kawhhmuh tûrin Juda chu Josefa hnênah a kal hmasaktîr a; tichuan, Gosen ramah chuan an lût ta a. 29 Tin, Josefa chuan a tawlailîr chu a buatsaih a, Gosen ramah chuan a pa Israela hmuak tûrin a han kal ta a; tin, a hnênah a inhriattîr a, a ir a chuktuah a, rei fe a ir chuktuahin a ṭap a. 30 Tin, Israela chuan Josefa hnênah, “Nungdama i lo la awma, i hmêl ka hmuh leh tâk avâng hian tûnah chuan duh leh thi tawh rawh i,” a ti a. 31 Tin, Josefa chuan a unaute leh a pa chhûngte hnênah, “Ka han kal ang a, Pharaoa ka hrilh ang a, a hnênah, ‘Ka unaute leh ka pa chhûngte, Kanaan rama awmte kha, ka hnênah an lo thleng ta; 32 anni chu ran vulhtute an nih avângin berâm vêngtute an ni a; an berâm rualte leh an bâwng rualte leh an neih zawng zawng an rawn chhawm vek a ni,’ tiin ka han sawi ang. 33 Tin, heti hi a ni ang a, Pharaoan a koh che ua, ‘Eng hna nge in thawh ṭhin?’ a tih hunah chuan, 34 nangnin, ‘I chhiahhlawhte hi kan thlahtute chenin, kan naupan têt ata tûn thlengin ran vulhtute kan ni,’ ti ang che u; chutichuan, Gosen ramah in awm thei dâwn nia,” a ti a. Berâm vêngtute rêng rêng chu Aigupta mite ten zâwng tak an ni si a.

Genesis 47

Jakoba te chhûng Gosen hmunah an awm

1 Tichuan, Josefa chuan Pharaoa chu a han hrilh a, a hnênah, “Ka pa te, ka unau te, an berâm rual te, an bâwng rual te, an neih zawng zawngte nên Kanaan ram ata an lo thleng thla ta a; tin, ngai teh, Gosen ramah an awm,” a ti a. 2 Tin, a unaute zînga mi, mi panga a hruai a, Pharaoa chu a hriattîr a. 3 Tin, Pharaoa chuan a unaute hnênah, “Eng hna nge in thawh ṭhin?” a ti a. Tin, anni chuan Pharaoa hnênah, “I chhiahhlawhte hi kan thlahtute chenin, berâm vêngtute kan ni,” an ti a. 4 Tin, anni vêk chuan Pharaoa hnênah, “He rama awm rih tûr hian kan lo kal a ni, kan ramah i chhiahhlawhteho berâm rualte tân ei tûr a awm ta si lo; ṭâm hi Kanaan ramah a tla nasa hle si a; chutichuan, khawngaih takin i chhiahhlawhte hi Gosen ramah min awmtîr ang che,” an ti a. 5 Tin, Pharaoa chuan Josefa a bia a, “I pa leh i unaute chu i hnênah an lo kal ta a. 6 Aigupta ram chu a awm duai alâwm; i pa leh i unaute chu ram ṭha lai apiangah hian awmhmun khuartîr ta che; Gosen ramah awmhmun khuar rawh se. Tin, an zîngah mi thiltithei tak hriat i neih phei chuan ka ran chunga hotuahte siam ang che,” a ti a. 7 Tin, Josefa chuan a pa Jakoba chu a hruai lût a, Pharaoa hmaah chuan a dintîr a; tichuan, Jakoba chuan Pharaoa chu mal a sâwm ta a. 8 Tin, Pharaoa chuan Jakoba hnênah, “Kum eng zât nge i nih tawh?” a ti a. 9 Tin, Jakoba chuan Pharaoa hnênah, “Ka khualzin kum chin chu kum za leh kum sawmthum a ni a; ka dam chhûng kumte hi a tlêmin a hrehawm a ni, mi thlahtute an khualzin laia an dam chhûng kum pawh a zât ve hek lo,” a ti a. 10 Tin, Jakoba chuan Pharaoa chu mal a sâwm leh a, Pharaoa hnên ata chu a chhuak ta a. 11 Tichuan, Josefa chuan a pa leh a unaute chu awmhmun a khuartîr a, Pharaoa thupêk angin Aigupta rama ram ṭha ber laiah, Rameses ramah chuan ro atân ram a pe ta a. 12 Tin, Josefa chuan a pa leh a unaute leh a pa chhûngte zawng zawng chu an chhûngkua ang zêlin ei tûr a pe a, a châwm ta a.

Ṭâm a nasa

13 Tin, chumi ram zawng zawngah chuan ei tûr rêng rêng a awm ta lo va; ṭâm a tla nasa êm êm si a; chutichuan, ṭâm avâng chuan Aigupta ram leh Kanaan ram chu a chau ta a. 14 Tin, Josefa chuan an buh leina manah, Aigupta ram leh Kanaan rama tangka awm zawng zawng chu a khâwm ta vek a; tin, Josefa chuan chu tangka chu Pharaoa inah chuan a la ta a. 15 Tin, Aigupta ram leh Kanaan rama tangka zawng zawng an deh ral zawh chuan, Aigupta mi zawng zawng chu Josefa hnênah an lo kal a, “Ei tûr min pe rawh khai; i hmaah hian kan thi mai dâwn em ni ang le? Tangka lah a awm tawh si lo,” an ti a. 16 Tin, Josefa chuan, “In rante rawn pe mai rawh u; tangka a awm tawh loh chuan in ran manah ei tûr ka pe ang che u,” a ti a. 17 Tichuan, an rante chu Josefa hnênah an hruai a; tin, Josefa chuan chûng sakawr manah te, berâm rual manah te, bâwng rual manah te, sabengtung manah te chuan ei tûr a pe zêl a; chumi kum chuan an ran zawng zawng manah ei tûr a pe a, a châwm ta hlawm a. 18 Tin, chumi kum a veia, kum lo thar lehah chuan a hnênah an lo kal leh a, a hnênah, “Kan tangka zawng zawng kan deh ral tawhzia leh, ka pu, kan ran rualte i ta a nih tawhziate hi, ka pu, i lakah hian kan zêp lo vang; ka pu, i mit hmuhah hian kan taksa leh kan ramte chauh lo chu eng mah a awm tawh hauh lo mai. 19 I hmaah hian keini leh kan ram hi kan boral mai dâwn em ni ang le? Keimahni hi kan ram chawpin ei tûrin min lei rawh; tichuan, keini leh kan ram hi Pharaoa chhiahhlawhte kan ni mai ang e; tin, thi lova nungdama kan awm theihna tûr leh, ram hi a ṭiau lohna tûrin buh chi min pe ang che,” an ti a. 20 Tichuan, Josefa chuan Pharaoa tân Aigupta ram zawng zawng chu a lei ta a; ṭâm chu an chunga a thlen nasat êm avângin Aigupta mite chuan an lo chu an hralh ṭheuh si a; tichuan, ram chu Pharaoa ta a ni ta vek a. 21 Mihringte chu Aigupta ramri lehlam tâwp aṭanga a lehlam tâwp thlengin, khuaahte chuan a insawntîr ta hlawm a. 22 Puithiamho ram chauh a lei lo va; puithiamhote chuan Pharaoa lakah chanvo an nei a, Pharaoan an chanvo a pêk chu an ei ṭhîn a ni; chuvângin, an ram chu an hralh ve lo va. 23 Chumi hnuah chuan, Josefan mite hnênah chuan, “Ngai teh u, vawiinah hian nangniho hi in ram chawpin Pharaoa tân ka lei ta che u a; hei, heta hi in tân buh chi a awm hi, leiah chîng ang che u. 24 Tin, buh lâk hunah te chuan heti hi a ni ang a, Pharaoa tân hmun ngaa ṭhena hmun khat zêl in pe ang a, a hmun li chu nangmahni ta a ni ang, chu chu lova chîn lehah te, nangmahni leh in chhûngte eiah te, in fanau tê tête eiah te a ni ang,” a ti a. 25 Tin, anni chuan, “Nangin kan nun hi i chhanhim tawh a; ka puin min khawngaih sela, Pharaoa chhiahhlawhte kan ni mai ang,” an ti a. 26 Tichuan, Josefa chuan Pharaoan hmun ngaa hmun khat a hmuh zêl tûr thu hi, Aigupta ram tân tûn thlengin dânah a siam ta; puithiamho ram chauh chu a ni, Pharaoa ta ni lo chu.

Jakoba thu hnuhnûng

27 Tin, Israel-ho chuan Aigupta rama Gosen ramah chuan awmhmun an khuar ta a; chutah chuan an intimuk a, chi tam tak an thlah a, nasa takin an pung ta a. 28 Tin, Jakoba chu Aigupta ramah chuan kum sâwm leh kum sarih a awm a; chutichuan, Jakoba dam chhûng chu kum za leh kum sawmli leh kum sarih a ni ta a. 29 Tin, Israela thih hun tûr chu a lo hnai ta a; tichuan, a fapa Josefa chu a ko va, a hnênah, “I mit ka tlun chuan khawngaih takin i kut kha ka malpui hnuaiah rawlh la, mi khawngaihin ka chungah tihtakzetin ti ang che; khawngaih takin Aigupta ramah hian mi phûm lul suh ang che; 30 mi thlahtute hnêna ka muthilh hunah chuan nangin Aigupta ram ata hi mi zâwn chhuakin, anmahni phûmna hmunah chuan mi phûm zâwk tûr a ni,” a ti a. Tin, ani chuan, “I sawi ang hian ka rawn ti ang e,” a ti a. 31 Tin, ani chuan, “Ka hnênah chhia chham rawh le,” a ti a; tichuan, a hnênah chhia a chham ta a. Tin, Israela chu khum lu siin a kûn ta a.

Genesis 48

Jakoban Ephraima leh Manasea mal a sâwm

1 Tin, chûng hnuah chuan heti hi a ni a, Josefa hnênah, “Ngai teh, i pa a damlo ve,” an ti a. Tichuan, a fapate pahnih Manasea leh Ephraima chu a hnênah a hruai ve a. 2 Tin, Jakoba hnênah “Ngai teh, i fapa Josefa i hnênah a lo kal e,” tiin an hrilh a; tichuan, Israela chu a intiharh a, khumah chuan a ṭhu ta a. 3 Tin, Jakoba chuan Josefa hnênah, “Pathian Engkimtitheia chu Kanaan rama Luz khuaah chuan ka hnênah a inlâr a, mal mi sâwm a, 4 ka hnênah, ‘Chi tam tak ka thlahtîr ang chia, ka tipung bawk ang chia, chi hrang hrang awm khâwmah ka siam ang che; tin, he ram hi i hnua i thlahte hnênah chuan kumkhaw ro atân ka pe ang,’ mi ti a. 5 Tin, i fapate pahnih, Aigupta rama i hnêna ka lo kal hmaa Aigupta rama i neihte hi ka ta an ni; Ephraima leh Manasea hi, Reubena leh Simeona ang bawkin ka ta an ni ang. 6 Tin, he mite hnua fa i neihte chu i ta an ni ang, an ro chanah chuan an ute hming chu an ṭâwm mai ang. 7 Tin, keia thu zawng, Paddan-aram aṭanga ka lo kal lai khân Rakili chu Kanaan ramah, kawnglakah, Ephrath khua chu a la hlat fe laiin ka bulah a thi a; chuta Ephrath khaw kawngah chuan ka phûm ta a (chu chu Bethlehem khua a ni),” a ti a. 8 Tin, Israela chuan Josefa fapate chu a en a, “Heng hi tute nge ni?” a ti a. 9 Tin, Josefa chuan a pa hnênah, “Hêng hi ka fapa, Pathianin heta mi pêkate chu an ni,” a ti a. Tin, ani chuan, “Khawngaih takin ka hnênah hian han hruai hnai rawh; tichuan, anmahni mal ka lo sâwm ang e,” a ti a. 10 Israela mit chu a upat avângin a fiah lo va, a hmu thei lo a ni. Tin, anni chu a han hruai hnai a; tin, ani chuan a lo fâwp a, a lo pawm a. 11 Tin, Israela chuan Josefa hnênah, “I hmêl hmuh hi ka beisei tawh lo va; nimahsela, ngai teh, Pathianin i thlahte hmêl lam pawh mi hmuhtîr ta a nih hi,” a ti a. 12 Tin, Josefa chuan anni chu a pa kapkâr ata chu a kai chhuak a, a hmaia lei siin chibai a bûk a. 13 Tin, Josefa chuan an pahnih chuan a kai a, Ephraima chu a kut ding lamin Israela kut vei lampangah a kai a, Manasea chu a kut vei lamin Israela kut ding lampangah a kai a, a rawn hruai hnai a. 14 Tin, Israela chuan a ban kawkalh lui a, a kut ding lam chuan a ban a, Ephraima, a naupang zâwk chhîpah a nghat a; Manasea chu fa tîr a ni si a. 15 Tin, Josefa chu mal a sâwm a, “Mi thlahtu Abrahama leh Isaaka, a hmaa an awm ṭhinna Pathian, vawiin thlenga ka dam chhûng zawng zawnga mi châwmtu Pathian, 16 sual zawng zawng laka mi tlantu vântirhkoh chuan naupangte hi malsâwm rawh se; tin, ka hming leh mi thlahtu Abrahama leh Isaaka hming chu anmahni hmingah pu rawh se; tin, khawvêl lailiah mipui tam tak ni tûrin lo pung rawh se,” a ti a. 17 Tin, Josefa chu, a pain a kut ding lam Ephraima chhîpa a nghat chu a hmuhin a lungni ta lo va; tichuan, a pa kut chu Ephraima chhîp ata Manasea chhîpa sawn tûrin a chawi kâng a. 18 Tin, Josefa chuan a pa hnênah, “Ka pa, hetiang tûr a ni lo, hei hi asin fa tîr chu ni; i kut ding lam hi a chhîpah nghat zâwk rawh,” a ti a. 19 Nimahsela, a pa chuan a duh lo va, “Ka hria e, ka fapa, ka hria e; ani pawh hnama sawi thamin a awm bawk ang a, ani pawh a ropui bawk ang; amaherawhchu, a nau hi a aiin a ropui zâwk ang a, a thlahte pawh chi hrang hrang tam tak an lo la ni ang,” a ti a. 20 Tichuan, Jakoban, “Israel-ho chuan, ‘Ephraima leh Manasea angin Pathianin awmtîr che rawh se,’ tiin mangmahni hming lamin mal an sâwm ṭhin ang,” tiin, chumi ni chuan anni chu mal a sâwm a; tichuan, Ephraima chu Manasea hmaah a awmtîr ta a. 21 Tin, Israela vêk chuan Josefa hnênah, “Ngai teh, ka thi dâwn ta e; nimahsela, Pathian chu in hnênah a awm ang a, in thlahtute ramah chuan a hruai leh ang che u. 22 Chumi lo pawh chu, i unaute chanvo aiin chan khatin ka pe chuang a che, ka khandaih leh ka thalngula Amor-ho kut ata ka lâksaka kha,” a ti a.

Genesis 49

Jakoba thurochhiah

1 Tichuan, Jakoba chuan a fapate chu a ko va, heti hian a sawi a: “Ni hnuhnûngahte in chunga thil la thleng tûr chu ka hrilh theihna tûr che uin rawn inkhâwm rawh u. 2 Nangni Jakoba fapate u, rawn inkhâwm ula, ngaithla rawh u; In pa Israela thu hi ngaithla rawh u. 3 Reuben, nang hi ka fa tîr, ka thiltihtheihna, ka chakna rah hmasa ber i ni; Sân berna leh thuneih berna chu i ta a ni. 4 Nimahsela, tui anga nghet lo i ni, chungnun berna chu i nei lo vang; I pa khumpui i kai avângin; Chumi lai chuan chu chu i tibawlhhlawh a, ka mutnaa a kai kha. 5 Simeona leh Levia hi unau an ni a; An khandaihte chu thisen chhuahna hriamhrei a ni. 6 Aw, ka thlarau, nang zawng an inrâwnnaah chuan inrawlh ve suh; Ka ropuina, nang zawng an inkhâwmnaah chuan tel ve suh; An thinurin mi an that a, An tihmawhin bâwngpa tha an chhat a. 7 An thinurna chuan ânchhia dawng rawh se, kawlh tak a ni si a; An thinrimna pawh chuan ânchhia dawng rawh se, nun chhe tak a ni si a! Jakob-hovah chuan anni chu ka tiṭhen ang a, Israel-hovah chuan ka tidarh bawk ang. 8 Juda, nang zawng i unauten an fak ang che; I kut chu i dote nghâwngah i nghat ang a; I pa fapate chu i hmaah an kûn ang. 9 Juda hi sakeibakneino a ni; Ka fapa, i sa seh chu i chhohsan ta a. A kûn a, sakeibakneipa angin a bawk a, Sakeibakneinu ang bawk siin; tuin nge titho ngam ang? 10 Lal tiang chu Juda lakah a bo lo vang a, Rorêltu tiang chu a ke kâr ata a bo hek lo vang, Silova lo kal hma loh chuan; Hnam tinin ama thu an awih ang. 11 A sakawrno chu grêp hruiah a thlung a, A sabengtungno chu grêp hrui ṭha miah a thlung bawk a. A silhfênte chu uainah a su a, A puan chu grêp thisenah a su bawk a. 12 A mitte chu uain aiin a duk ang a, A hate chu hnutetui aia tihvârin a awm bawk ang. 13 Zebuluna hian tuifinriat kamah awmhmun a khuar ang: Lawng chawlhna vaukam a ni ang a, A ramri chu Zidon-ah a ni ang. 14 Isakara hi sabengtung chak tak, berâm huang kâra bawk a ni; 15 Chawlh chu ṭhain a hria a, Ram chu nuamin a hre bawk a; Tichuan, englo pu tûrin a koki chu a tihniam a, Hnathawka rawih luihin chhiahhlawhah a lo awm ta a. 16 Dana hian a mite chu, Israel hnam zînga hnam pakhat ni vein, ro a rêlsak ang. 17 Dana hi lamliana rûl, Kalkawnga rûlrial, A chunga chuang zangthala tla dêr khawpa Sakawr kea chu ṭhîntu hi a ni ang. 18 Aw LALPA, i chhandamna chu ka nghâk reng e. 19 Gada hi râlin an bei ang a; Nimahsela, ani chuan an keartui lamah a bei zâwk ang, 20 Asera hi a ei a ṭha ang a, Lal ei mi tui tak takte a tichhuak ang. 21 Naphtalia hi zukpui chhuah a ni; Thu ṭha takte a sawi ṭhîn. 22 Josefa hi pêng rah duh tak a ni, Tuikhur kianga pêng rah duh tak chu; A pêng lehchhâwngte chuan lung bang a zâm khuh a. 23 Thal kâpho chuan ani chu nasa takin an tirethei a, An kâp a, an tiduhdah a. 24 Nimahsela, ani thalngul chu khauh takin a awm reng a, A kut thate chu Jakoba Mi Chaka kuta - (Chuta ṭang chuan Berâm Vêngtu, Israela Lungpui chu a lo awm a), 25 I pa Pathian, nangmah ṭanpui tûra Engkimtitheia, Chung lam vân malsâwmnate, Hnuai lama bawk reng tui thûk tak malsâwmnate, Hnutê leh chhûl malsâwmnatea Nangmah malsâwmtu tûr ngeia Tihchakin a awm a. 26 I pa malsâwmnate hian, Mi thlahtute malsâwmnate chu Chatuan tlâng tâwp rêt thlengin a khûm ta zâwk a ni. Chûngte chu Josefa lu-ah a awm ang a, A unaute hnên ata tihhrana awma chhîpah chuan a awm ang. 27 Benjamina hi chinghne koham a ni; Zîngah chuan a sa seh chu a ei ang a, Tlai lamah chuan a râllâk chu a sem ang,” a ti a. 28 Chûng zawng zawng chu Israel hnam sâwm leh hnam hnihte chu an ni a, chu thu pawh chu anmahni malsâwma an hnêna an pa thusawi chu a ni; an malsâwm dawn tûr tâwk ang zêlin mal a sâwm ṭheuh va.

Jakoba a thi a, an phûm

29-30 Tin, anni chu thuro a chhiah a, an hnênah, “Ka chipuite hnênah hruaiin ka awm ve dâwn ta a; Hit mi Ephrona lova pûk, Kanaan rama Mamre zâwna Makpela lova pûk, Abrahaman phûmna hmun ro atân, Hit mi Ephrona laka a lo chawpa a leiah khân mi thlahtute hnênah mi phûm ve ang che u: 31 chutah chuan Abrahama leh a nupui Sari chu an phûm a; chutah chuan Isaaka leh a nupui Rebeki chu an phûm a; chutah bawk chuan Leaii ka phûm a. 32 Lo leh a chhûnga pûk awm chu Hetha thlahte laka lei a ni,” a ti a. 33 Tin, Jakoba chuan a fapate hnêna thuro a chhiah zawh chuan, a kete chu khumah a hlâng kai a, a thlarau a thlah a, a chipuite hnênah chuan hruaiin a awm ve ta a.

Genesis 50

1 Tin, Josefa chuan a pa hmai a si a, a ṭah a, a fâwp a fâwp a. 2 Tin, Josefa chuan a chhiahhlawh damdawi thiamhote chu a pa ruang ṭawih thei lova siam tûrin thu a pe a; tichuan, damdawi thiamhote chuan Israela ruang chu ṭawih thei lovin an siam ta a. 3 A ruang siam chhûng chuan ni sawmli a awh a, ṭawih thei lova siamna chuan ni chuti zât chu a awh ṭhîn rêng a ni; tin, ni sawmsarih chhûng zawng Aigupta-ho chuan amah chu an ṭah a. 4 Tin, amah an ṭah nite chu a ral hnu chuan Josefan Pharaoa chhûngte chu a bia a, “I mit ka tlun chuan, khawngaih takin Pharaoa beng hriatah chuan, 5 ‘Ka pan, “Ngai teh, ka thi dâwn ta e; Kanaan rama thlân ka laih saah, chutah ngei chuan mi rawn phûm ang che,” tiin chhia mi chhamtîr a. Chutichuan, khawngaih takin ka pa hi mi han phûmtîr ang che; tin, ka lo kal leh mai ang, a ti e,’ tiin sawi rawh u,” a ti a. 6 Tichuan, Pharaoa chuan, “Chhia a chhamtîr che ang chuan i pa chu han phûm ta che,” a ti a. 7 Tichuan, Josefa chu a pa phûm tûrin a han kal ta a; tin, Pharaoa chhiahhlawh zawng zawng, a chhûngte zînga upate leh Aigupta ram upa zawng zawng leh, 8 Josefa chhûngte zawng zawng leh a unaute leh a pa chhûngte chu a hnênah an han kal ve a. An fanau tê tête leh, an berâm rualte leh an bâwng rualte chauh chu Gosen ramah chuan an hnutchhiah a. 9 Tin, an hnênah tawlailîrte, sakawr chung chuang mite an han kal ve a; tichuan, pâwl lian tak mai an ni. 10 Tin, Jordan lui râla Atada hruihzâwl chu an thleng a, chutah chuan nasa takin an ṭah chiam a: ni sarih a pa sûnna a siam a. 11 Tin, chumi rama mi Kanaan-hote chuan Atada hruihzâwla an mitthi sûn chu an hmuh chuan, “Hei, Aigupta-ho mitthi sûnna nasa tak a nih hi,” an ti a; chuvângin, chumi hmun hmingah chuan Abel-mizraim an vuah ta a, chu chu Jordan lui râla awm a ni. 12 Tin, a fapate chuan a thupêk ang zêlin an tihsak a. 13 A fapate chuan Kanaan ramah an zâwn lût a, Abrahaman phûmna hmun ro atân, Hit mi Ephrona laka a lo chawpa a lei, Mamre zâwna Makpela lova pûkah chuan an phûm ta a ni. 14 Tin, Josefa chu a pa a phûm zawh chuan, amah leh a unaute leh a pa phûm tûra a hnêna han kal vete zawng zawng nên chuan, Aigupta ramah an haw leh ta a.

Josefan a unaute a ṭawng thlamuan

15 Tin, Josefa unaute chuan an pa thi chu an ngaihtuahin, “Josefan min hua ang a, a chunga thil kan tihsual zawng zawng phuba kha kan chungah hian a la la kim seuh mai ang e aw,” an ti a. 16 Tichuan, Josefa hrilh tûrin thu an chah a, “I pa chuan a thih hma khân, 17 ‘Heti hian Josefa hnênah, “Khawngaih takin i unaute bawhchhiatna leh an sualna chu ngaidam ang che, i chungah thil zawng an tisual na a,” tiin in sawi tûr a ni,’ a ti a, thu min pe a; tichuan, khawngaih takin i pa Pathian chhiahhlawhte bawhchhiatna chu ngaidam ang che,” an ti a. Tin, a hnêna an han sawi chuan Josefa chu a ṭap ta a. 18 Tin, a unaute pawh chu an va kal ve a, a hmaah chuan an bawkkhup ta hlawm a; tin, “Ngai teh, i chhiahhlawhte kan nih hi,” an ti a. 19 Tin, Josefa chuan an hnênah, “Hlau suh u; Pathian aiawh em ka nih? 20 Nangni zawngin ka chungah thil sual tih in rilrûk a; nimahsela, Pathian chuan vawiin ang hian mi tam tak nungdama chhanhimna tûra thil ṭhaa chantîr a rilrûk zâwk a lo ni si a. 21 Chutichuan, hlau suh u; nangmahni leh in fanau tê tête nên ka châwm zêl ang che u,” a ti a. Chutichuan, a thlamuan a, ṭawngkam ṭha takin a be hlawm a.

Josefa thih thu

22 Tin, Josefa chu amah leh a pa chhûngte nên, Aigupta ramah chuan an awm a; Josefa chu kum za leh kum sâwm a dam a. 23 Josefa chuan Ephraima fa, a tute khûp thum a hmu a. Manasea fapa Makira fate pawh Josefa mal chungah an piang a. 24 Tin, Josefan a unaute hnênah, “Ka thi dâwn ta e; nimahsela, Pathianin a rawn kan ngei ngei ang che u a, he ram ata hi a rawn hruai chhuakin, Abrahama te, Isaaka te, Jakoba te hnênah chhechhama pêk a tiam ramah a hruai chho vang che u,” a ti a. 25 Tin, Josefa chuan Israela thlahte chu chhia a chhamtîr a, “Pathianin a rawn kan ngei ngei ang che u a, ka ruhte hi heta ta in zâwn chho tûr a ni,” a ti a. 26 Chutichuan, Josefa chu kum za leh kum sâwm mi a nihin a thi a; tin, a ruang chu ṭawih thei lovin an siam a, Aigupta ramah kuangah an dah ta a.

Exodus 1

Aigupta miten Israel mite an tiduhdah

1 Hêng hi Israela fapa Aigupta rama lûtte hming chu a ni; mi tin mahni chhûngte ṭheuh nên Jakoba hnênah chuan an kal a: 2 Reubena te, Simeona te, Levia leh Juda te; 3 Isakara te, Jebuluna leh Benjamina te; 4 Dana te, Naphtalia te, Gada leh Asera te. 5 Tin, Jakoba ṭhâlbea chhuak zawng zawngte chu mi sawmsarih an ni; Josefa zawng Aigupta ramah chuan lo awm tawh sa rêng a ni a. 6 Tin, Josefa leh a unaute zawng zawng leh chûng chhuanho zawng zawngte chu an thi ta vek a. 7 Tin, Israela thlahte chuan chi tam tak an thlah a, nasa takin an lo pung a, an lo tam ta êm êm mai a, an lo chak ta telh telh a; tin, chu ramah chuan an lo khat ta mup mai a. 8 Tin, Aigupta ramah chuan Josefa hre lo, lal thar a lo awm ta a. 9 Tichuan, a mite hnênah, “Ngai teh u, Israela thlahte hi kan aiin an tamin an chak tâk zâwk hi le; 10 hawh u, anmahni hi tihhnathiamin i ti ang u; chuti lo chuan, an lo pung zêl ang a, nakinah indonate a lo awm hian, kan hmêlmate lamah an pakai ve hlauh ang a, min bei ang a, he ram aṭang hian an tlân chhuak hlauh dah ang e,” a ti a. 11 Chutichuan, an phurrita tirethei tûrin an chungah hnathawk vêngtute an ruat ta a. Tichuan, Pharaoa tân bungraw dah khâwmna tûr Pithom leh Rameses khuate an siam a. 12 Nimahsela, anmahni chu an tihretheih nasat poh leh an pung nasa deuh deuh va, an darh zau ta deuh deuh va. Tin, Israela thlahte avâng chuan Aigupta-ho chu an lungngai ta a. 13 Tin, Aigupta mite chuan Israela thlahte chu rim takin an thawhtîr a. 14 Hnathawh hautak tak, lung chârna leh leirawhchante siamtîr leh lovah hna tinrêngte hrehawm taka thawhtîrin an chhawr vak vak a; an thawhna zawng zawngah chuan rim takin an chhawr zêl a. 15 Tin, Aigupta lal chuan Hebrai nau chhar mite chu a bia a, chu mite chu pakhata hming Siphraii a ni a; tin, pakhata hming chu Puaii a ni a: 16 an hnênah chuan, “Hebrai hmeichhiate nau hrinna hmuna nau in chhar hunin, mipa fa a nih chuan tihlum zêl ang che u; hmeichhia a nih erawh chuan zuah tûr a ni,” a ti a. 17 Nimahsela, nau chhar mite chuan Pathian an ṭih a; tichuan, Aigupta lal thupêk ang chuan an ti duh lo va, mipa fate chu an humhim ta zêl zâwk a. 18 Tin, Aigupta lal chuan nau chhar mite chu a kohtîr a, an hnênah chuan, “Engati nge hetianga thil in tiha, mipa fate chu in humhim zêl le?” a ti a. 19 Tin, nau chhar mite chuan Pharaoa hnênah, “Hebrai hmeichhiate hi Aigupta hmeichhiate ang an nih ve loh vâng a ni; anniho hi zawngin an sam êm bik a; tichuan, nau chhartu lo thlen hma hian an lo hring tawh ṭhîn a ni,” an ti a. 20 Chutichuan, Pathianin nau chhar mite chu a tiṭha ta hle a; tichuan, mite chu an lo tam ta hle a, an lo chak ta telh telh a. 21 Tin, heti hi a ni a, nau chhar miten Pathian an ṭih avângin chhûngkua neiin a siam ta a. 22 Tin, Pharaoan, “Mipa lo piang apiang chu luiah in paih ang a; tin, hmeichhia apiang chu in humhim zêl tûr a ni,” tiin, a mite zawng zawng chu thu a pe a.

Exodus 2

Mosia pian thu

1 Tin, mi pakhat, Levia chhûngte zînga mi a va chhuak a, Levia fanu nupuiah a va nei a. 2 Tin, hmeichhia chu a rai a, fapa a hring a; tin, ani chuan nautê chu hmêlṭha a ti êm a, thla thum a thukru a. 3 Tin, a lo thukru reng thei ta lo va, a tân luang lawng a la a, chu chu chirh leh alkatrain a châr a, nautê chu chutah chuan a muttîr a; tichuan, lui kama phairuang zîngah chuan a dah ta a. 4 Tin, a chungah eng tak la thleng ang maw tia hriat tumin a farnu chu hla feah a ding a. 5 Tin, Pharaoa fanu chu luia inbual tûrin a zu kal a; tin, a bawihnute chu lui kamah chuan an kal ve a; tin, phairuang zînga bâwm a han hmuh chuan a bawihnu a va lâktîr a. 6 Tin, a han hawn chuan nautê chu a hmu ta a; tin, ngai teh, nausên chu a ṭap ta a. Tin, a khawngaih ta êm êm a, “Hei Hebrai fa a nih hi le,” a ti a. 7 Tichuan, a farnu chuan Pharaoa fanu hnênah chuan, “He naute awmsaktu tûr che Hebrai hmeichhia nau awmtu ka kohsak ang che chu?” a ti a. 8 Tin, Pharaoa fanu chuan a hnênah, “Kal rawh,” a ti a. Tin, nula chu a kal a, chu nausên nu chu a va ko ta a. 9 Tin, Pharaoa fanu chuan a hnênah, “He nautê hi kalpui ta la, mi awmsak ang che; tichuan, i hlawh ka pe ang che,” a ti a. Chutichuan, hmeichhia chuan nautê chu a la a, a pawm ta a. 10 Tin, nautê chu a lo ṭhang lian a, Pharaoa fanu hnênah a hruai a; tichuan, a fapaah a awm ta a. Tin, “Tui ata ka lâk chhuah avângin,” a ti a, a hmingah chuan Mosia a sa a.

Midian ramah Mosia a tlânchhia

11 Tin, heti hi a ni a, chûng laia Mosia a lo puitlin chuan, a unaute a va kan a, an phurritte chu a va hmu a. Tin, Aigupta mi pakhat hian a unau pakhat Hebrai mi hi a vaw lai a han hmu a. 12 Tin, Mosia chu a hawi vêl ruai a; tin, tu mah an awm lo tih a hriat veleh Aigupta mi chu a vaw hlum a, leiah a phûm ta a. 13 Tin, a tûkah a va chhuak leh a, ngai teh, Hebrai mi pahnih an lo insual a; tin, a thiam lo zâwka hnênah chuan, “Engati nge i ṭhian i vuak le?” a ti a. 14 Tin, ani chuan, “Kan chungah hotuah leh rorêltuah tuin nge siam che? Aigupta mi i tihhlum ang khân mi tihhlum i tum elo?” a ti a. Tin, Mosia chuan a hlau ta a, “An hre ta ngei zuk nia le,” a ti a. 15 Tichuan, Pharaoan chu chu a lo hriat veleh Mosia chu thah a tum ta a. Nimahsela, Mosia chu Pharaoa hnên ata a tlân bo va, Midian ramah a awm ta a; tin, tuichhunchhuah sîrah hian a ṭhu a. 16 Tin, Midian rama puithiam chuan fanu pasarih a nei a. Tin, anni chuan tui an rawn chawi a, an pa berâm rual in tûrin tui inna thlêngte chu an tikhat a. 17 Tin, berâm vêngtute an lo kal a, an rawn hnawt darh a; nimahsela, Mosia chu a tho va, anmahni chu a rawn ṭanpui a, an berâm rual chu tui a intîr ta a. 18 Tin, an pa Reuela hnên an va thlenin ani chuan, “Engtizia nge vawiin chu in va lo haw hma ve le?” a ti a. 19 Tin, anni chuan, “Aigupta mi pakhatin berâm vêngtute lak ata min chhanhim a ni; tin, chu chang ni lovin, tui te min thâlsak a, berâm rual chu tui a intîr a ni,” an ti a. 20 Tin, ani chuan a fanute hnênah chuan, “Chu, khawiah nge a awm le? Engtizia nge in rawn hâwnsan mai ni le? Va ko ta che u, chaw te rawn ei ang hmiang,” a ti a. 21 Tin, Mosia chuan chu mi hnêna awm chu rem a ti a; tin, a fanu Zipori chu Mosia a pe a. 22 Tin, Zipori chuan fapa a hring a; tin, Mosian a hmingah Gersoma a sa a; “Mi rama pêm ka nih avângin,” a ti a ni. 23 Tin, heti hi a ni a, ni rei fe chinah chuan Aigupta lal chu a thi ta a. Tin, Israela thlahte chu an hnathawh hautak avâng chuan an rûm a; tin, an au va; tichuan, an hnathawh hautak avânga an au thâwm chuan Pathian hnên a han thleng ta a. 24 Tin, Pathianin an rûm chu a hria a; tin, Pathianin Abrahama te, Isaaka te leh Jakoba te hnêna a thuthlun kha a hre reng a. 25 Tin, Pathian chuan Israela thlahte chu a thlîr reng a; tichuan, Pathian chuan anmahni chu a zuk ngaihsak reng bawk a.

Exodus 3

Pathianin Mosia a ko

1 Tin, Mosia chuan a pu Jethroa, Midian ram puithiam berâm rual a vêng a; tin, berâm rual chu thlalêr thlang lampangah chuan a khalh a; tin, Pathian tlâng, Horeb chu a va thleng a, 2 Tin, hnim bukah LALPA vântirhkoh hi meialhin a hnênah a rawn inlâr a. Tin, a han en a, ngai teh, hnim buk chu meiin a kâng a, a hnim buka erawh chu a kâng ral si lo. 3 Tin, Mosia chuan, “Ka va pêng teh rêng ang, engtizia nge ni hnim buk saw a kan ral loh, he thil mak tak hi ka va en teh ang e,” a ti a. 4 Tin, LALPA chuan en tûra a va pêng chu a hmuhin, Pathianin hnim buk aṭang chuan a han ko va, “Mosi, Mosi,” a han ti a. Tin, ani chuan, “Heta hi ka awm,” a ti a. 5 Tin, Pathian chuan, “Rawn hnaih suh khai. I kephah ata i pheikhawkte kha phelh rawh, i dinna hmun kha lei thianghlim a ni e,” a ti a. 6 Tin, “Kei hi i pa Pathian, Abrahama Pathian, Isaaka Pathian, Jakoba Pathian chu ka nih hi,” a ti leh a. Tin, Mosia chuan a hmai a khuh ta a; Pathian a en ngam si lo va. 7 Tin, LALPA chuan, “Aigupta rama ka mi awmte chu an hrehawmzia ka hmu reng asin, anmahni vêngtute avânga an au thâwmte chu ka lo hria a, an lungngaihnate chu ka hre reng si a. 8 Tichuan, Aigupta-ho lak ata chhanhim tûr leh chumi ram ata chu hruai chhuaka, Kanaan-hote, Hit-hote, Amor-hote, Periz-hote, Hiv-hote, Jebus-hote awmna ram ṭha tak leh zau tak, hnutetui leh khawizu luanna rama hruai lût tûrin ka lo chhuak ta a ni. 9 Tin, ngai teh, Israela thlahte au thâwm chu ka hnên a lo thleng e; chu chang a ni lo va, Aigupta-hovin anmahni an hnehchhiahziate chu ka hmu reng a ni. 10 Chuvângin, hawh teh, ka mi Israela thlahte chu Aigupta ram ata hruai chhuak tûrin Pharaoa hnênah ka tîr ang che,” a ti a. 11 Tin, Mosia chuan Pathian hnênah, “Kei Pharaoa hnêna kala, Israela thlahte Aigupta ram ata zuk hruai chhuaktu atân chuan tu nge maw ka nih le?” a ti a. 12 Tin, ani chuan, “I hnênah ka awm dâwn alâwm; tichuan, keima tirh ngei i ni tih hei hi i tân chhinchhiahna a ni ang: Aigupta ram ata mite chu i rawn hruai chhuah hunah chuan, he tlâng ngeiah hian Pathian rawng in la bâwl ang,” a ti a. 13 Tin, Mosian Pathian hnênah, “Ngai teh, Israela thlahte hnênah chuan zuk kalin an hnênah, ‘In thlahtute Pathianin in hnênah hian mi rawn tîr a ni e,’ zuk ti ila; tin, anni chuan ka hnênah, ‘Tu nge ni a hming chu?’ lo ti ang sela, an hnênah chuan engtin nge ka sawi ang?” a ti a. 14 Tin, Pathianin Mosia hnênah chuan, “Nangin Israela thlahte hnênah chuan, ‘AWMA chuan in hnênah mi rawn tîr a ni e,’ i ti tûr a ni,” a ti a. 15 Tin, Pathian vêkin Mosia hnênah chuan, “Nangin Israela thlahte hnênah chuan, ‘LALPA, in thlahtute Pathian, Abrahama Pathian, Isaaka Pathian leh Jakoba Pathian chuan in hnênah hian mi rawn tîr a ni e. Hei hi kumkhuaa ka hming chu a ni a; tin, hei hi chhuan zawng zawng thlenga mi hriat rengna chu a ni,’ ti ang che. 16 Kal langin, Israel upaho ko khâwm ang che; tichuan, an hnênah, ‘LALPA, in thlahtute Pathian, Abrahama Pathian, Isaaka Pathian leh Jakoba Pathian chuan ka rawn kan ta ngei che u a, Aigupta rama in chunga an tih zia te hi ka hmu ta ngei mai; 17 Aigupta rama tihhrehawmna lak ata chu ka hruai chhuak ang che u a, Kanaan-hote, Hit-hote, Amor-hote, Periz-hote, Hiv-hote, Jesus-hote ram, hnutetui leh khawizu luanna ramah chuan ka hruai lût ang che u ka tih tawh kha, tiin ka hnênah a rawn inlâr ta a ni,’ ti ang che. 18 Chutichuan, i thu an lo ngaithla ang; tin, nang leh Israel upaho chu Aigupta lal hnênah in kal ang a; tin, a hnênah, ‘LALPA, Hebraite Pathianin min rawn tlawh ta mai a; chuvângin, thlalêr ni thum kalah LALPA kan Pathian hnêna kan va inthawi theihna tûrin khawngaih takin min kaltîr ang che,’ ti ang che u. 19 Tin, Aigupta lal zawngin kut chak tak ngawt lo chuan a chhuahtîr hlei lo vang che u tih ka hria e. 20 Tin, ka kut ka phar ang a; tin, Aigupta-ho chu an zînga thil mak tak ka la tih tûr zawng zawngte chuan ka la hrem ang a; tin, chumi hnuah zawng a chhuahtîr tawh ang che u. 21 Tin, hêng mite hi Aigupta-ho ka khawngaihtîr ang a; tin, heti hi a ni ang a, in kal hunah chuan ruakin in kal lo vang a, 22 hmeichhe tinin an vêngte leh an ina chêngte chu tangkaraw incheinate leh, rangkachak incheinate leh, silhfênte an la dîl zâwk ang a; tichuan, in fapate leh in fanute chu in la bel ang; tin, Aigupta mite chu in rawk a ni ang,” a ti a.

Exodus 4

Pathianin Mosia thil mak tih theihna a pe

1 Tin, Mosia chuan, “Ngai teh, mi ring duhin ka thu an pawm lo vang; ‘LALPA chu i hnênah a inlâr ngût lo vang e,’ an ti mai âwm si a,” tiin a chhâng a. 2 Tin, LALPA chuan a hnênah, “I kuta mi kha eng nge ni?” a ti a. Ani chuan, “Tiang,” a ti a. 3 Tin, ani chuan, “Leiah khân han paih teh,” a ti a. Tin, leiah chuan a han paih a, rûlah a lo chang ta a; tin, Mosia chuan a tlânsan ta a. 4 Tin, LALPA chuan Mosia hnênah, “I kut khân han ban la, a meiah han la teh (Tin, a kut chuan a han ban a, a han la a, a kutah chuan tiangah a lo chang leh ta a), 5 LALPA, an thlahtute Pathian, Abrahama Pathian, Isaaka Pathian leh Jakoba Pathian chu i hnênah a rawn inlâr ngei a ni tih an rin theihna tûrin,” a ti a. 6 Tin, LALPA chuan a hnênah, “I kut khân i âwm zuk zen teh,” a ti leh a. Tin, a âwm chu a zuk zen a; tin, a han phawrh chhuah leh chuan, ngai teh, a kut chu vûr anga vârin a lo phâr ta a. 7 Tin, ani chuan, “I kut khân i âwm zuk zen leh teh (Tin, a âwm chu a zuk zen leh a; a âwm ata a han phawrh chhuah chuan, ngai teh, a tisa dang ang bawk chuan a lo awm leh ta a). 8 Tin, heti hi a ni ang a, an rin duh loh chea, chhinchhiahna hmasa zâwk chu an pawm duh loh chuan, chhinchhiahna hnuhnûng zâwk tal chu an ring ang. 9 Tin, heti hi a ni ang a, chûng chhinchhiahna pahnih ngei pawh an rin lohva, i thusawi pawh chu an pawm loh chhuan, lui tui i zuk thâl ang a, lei chârah i bun ang a; tin, lui ata tui i zuk thâl chu lei chârah chuan thisenah a lo chang dâwn nia,” a ti a. 10 Tin, Mosia chuan LALPA hnênah, “Aw LALPA, kei zawng tûn hma lamahte leh i chhiahhlawh hnêna thu i rawn sawi hnuah pawh hian, mi ṭawnghmang thiam ka ni ve ngai lo a ni; mi ṭawng ban leh mi ṭawng mawh ka ni si a,” a ti a. 11 Tin, LALPA chuan a hnênah, “Mihring kâ hi tu siam nge ni a, ṭawngtheilo te, bengngawng te, mitvâr te, mitdel te pawh hi tu tih nge ni? Kei LALPA hian a ni lo vem ni? 12 Chuvângin, kal mai rawh, i kâ chu keiman ka awmpui zêl ang a, i sawi tûr chu ka hrilh zêl ang che,” a ti a. 13 “Ni lo ve, LALPA, mi dang tîr zâwk ta mai che,” a ti a. 14 Tichuan, LALPA chu Mosia chungah a thinur ta a, a hnênah, “I unaupa Arona, Levia chi chu a awm lâwm ni? Ani zawngin ṭawnghmang a thiam tih ka hria a ni. Ngai teh, nangmah hmuak tûrin a lo kal nghe nghe asin. Tin, a hmuh che zawngin a thinlung chu a lâwm hle mai ang. 15 Chutichuan, nangin amah chu bia langin, thute chu fah vek ang che; tichuan, i kâ leh a kâ chu keiman ka awmpui zêl ang a, in tih tûr chu ka hrilh zêl ang che u. 16 Tin, ani chu mipui hnêna i thu sawi chhâwngtu a ni ang; tin, heti hi a ni ang a, i tân kâ a ni ang a, nang chu a tân Pathian ang i ni ang. 17 Tin, nangin he tiang hi i keng ang a, chu chuan thil makte chu i ti ang,” a ti a.

Aigupta ramah Mosia a kîr leh

18 Tin, Mosia chu a kal a, a pu Jethroa hnênah a kîr leh ta a; tin, a hnênah, “Aigupta rama ka unau awmte chu an la dam emaw, an hnênah khawngaih takin ka va hâwng rih ang e,” a ti a. Tin, Jethroa chuan Mosia hnênah, “Thlamuang takin kal ta che le,” a ti a. 19 Tin, LALPA chuan Midian ramah Mosia hnênah chuan, “Kal la, Aigupta ramah chuan va kîr leh tawh rawh le; nangmah tihhlum tumtute kha an thi vek tawh e,” a ti a. 20 Tin, Mosia chuan a nupui leh a fapate chu a hruai a, sabengtung chungah a chuantîr a; tin, Aigupta ramah chuan a kîr leh ta a. Tin, Mosian Pathian tiang chu a keng a. 21 Tin, LALPA chuan Mosia hnênah, “Aigupta ram i thlen hun chuan, i kuta thil mak zawng zawng ka kentîr che hi Pharaoa hmaah chuan ti ngei ngei ang che; nimahsela, a thinlung ka tikhauh vang a; tichuan, mite chu a chhuahtîr phal lo vang. 22 Tin, nangin Pharaoa hnênah chuan, ‘LALPAN, “Israela hi ka fapa, ka fa tîr a ni e. 23 Tichuan, ka fapa chuan ka rawng a bâwl theih nân chhuahtîr rawh khai, ka ti a; tin, i chhuahtîr phal lo vei a, i fapa, i fa tîr chu ka tihlum ang,” a ti e,’ ti ang che,” a ti a. 24 Tin, heti hi a ni a, kalkawnga riahhmunah chuan LALPAN Mosia chu a zuk tlawh a, tihhlum a tum ta a. 25 Tin, Zipori chuan meilung a la a, a fapaa serh vun chu a tan a, Mosia ke a tawhtîr a; tichuan, “Ka tân pasal thisen chhuah hmang i lo nih hi le,” a ti a. 26 Chutichuan, “Serh tan avângin pasal thisen chhuah hmang i lo nih hi,” a ti a. 27 Tin, LALPAN Arona hnênah, “Mosia hmuak tûrin thlalêrah va kal rawh,” a ti a. Tin, a kal ta a, Pathian tlângah chuan a va hmu a, a fâwp a. 28 Tin, Mosia chuan LALPAN a tirh thu zawng zawng leh thil mak a tihtîr tûr zawng zawng chu Arona a hrilh vek a. 29 Tin, Mosia leh Arona chuan Israela thlahte upaho zawng zawng chu an ko khâwm vek a. 30 Tin, LALPAN Mosia hnêna a sawi zawng zawng kha Arona chuan a sawi chhâwng leh vek a; tin, mipuite hmuhah chuan thil makte chu a ti a. 31 Tin, mite chuan an awih ta a; tin, LALPAN Israela thlahte chu a zuk kan a, an hrehawmziate a zuk hmu ta a ni tih an hriatin an lu an kûn a, chibai an bûk ta a.

Exodus 5

Aigupta lal hmaah Mosia leh Arona an ding

1 Tin, chumi hnuah chuan Mosia leh Arona chu an va kal a, Pharaoa hnênah, “LALPA, Israel-hote Pathianin heti hian a ti, ‘Ka mite hi thlalêrah ka hnênah kût tûrin rawn kaltîr rawh,’ tiin,” an ti a. 2 Tin, Pharaoa chuan, “Tu nge maw ni LALPA, a thu ka han zawma, Israel-hote ka han chhuahtîrna tûr chu ni le? LALPA chu ka hre lo ve; Israel-hote lah ka chhuahtîr hek lo vang,” a ti a. 3 Tin, anni chuan, “Hebraite Pathianin min rawn tlawh ta mai a. Thlalêr ni thum kalah LALPA kan Pathian hnêna kan va inthawi theihna tûrin, khawngaih takin kan va kal ang e; chuti lo chuan, kan chungah hian hri emaw, khandaih emaw a rawn lêntîr mai dah ang e,” an ti a. 4 Tin, Aigupta lal chuan an hnênah, “Engtizia nge nangni Mosia leh Arona hi, mipuite hnathawk lai in dâwngdahtîr ni? In hna chu va thawk reng reng tawh u,” a ti a. 5 Tin, Pharaoa chuan, “Ngai teh u, hemi rama mite hi in lo tam ta hle mai a; tin, nangnin an phurrit phur chu in chawlhtîr mai a,” a ti a. 6 Tin, chumi ni ngei chuan Pharaoan hnathawk vêngtute leh an hotute hnênah chuan, 7 “Tûn achinah zawng tûn hma ang khân mite hi leirawhchana siam tûr buhpâwl in pe tûr a ni tawh lo ve, anmahni ngeiin buhpâwl chu thiar khâwm rawh se. 8 Tin, leirawhchan tûn hmaa an siam zât bawk kha anmahni lakah chuan in phût tûr a ni a; in tihtlêmsak hlek tûr a ni lo ve. An thatchhia a nih hi; chu vâng chuan alâwm, ‘Kan Pathian hnênah kan va inthawi ang e,’ an tih ni. 9 Mite hi hnathawh hautak lehzual tuk rawh u khai, chûng chu thawk sela, dâwt thu mai maite hi ngaisâng suh se,” tiin thu a pe a. 10 Tin, hnathawk vêngtute leh an hotute chu an kal chhuak a, mite hnênah chuan, “Pharaoan, ‘Buhpâwl zawng ka pe dâwn tawh lo a che u,’ a ti a ni. 11 Nangmahniin buhpâwl chu in hmuh theih ang ang va thiar khâwm rawh u; in hnathawh hi an tihtlêmsak chuang dâwn hlek lo che u a nia,” an ti a. 12 Chutichuan, mite chu Aigupta ram chhûng zawng zawngah chuan, buhpâwl aiah buh bul zawng khâwmin an vâk darh chum chum a. 13 Tin, hnathawk vêngtute chuan, “Tûn hmaa buhpâwl awm lai ang bawk khân, in hnathawh, in ni tin hnathawhte hi thawk zo thuai thuai rawh u,” tiin an tur hmanhmawh chhên ṭhîn a. 14 Tin, Pharaoa hnathawk vêngtute chuan Israela thlahte zînga hotu atâna an ruatte chu an vua a, “Engati nge niminah te leh vawiinah te pawh tûn hma ang bawka leirawhchan siam hi in la zawh loh ni?” tiin an chhâl a. 15 Tichuan, Israela thlahte hotute chu Pharaoa hnênah an va kal a, “I chhiahhlawhte hian engati nge heti taka min tih le? 16 I chhiahhlawhte hi buhpâwl rêng rêng min pe ta lo va, anni chuan, ‘Leirawhchan siam rawh u,’ min ti mai si a. Tin, ngai teh, i chhiahhlawhte hi min vua a; nimahsela, nangma mite ngei thiam loh a ni zâwk a ni,” tiin an mangan thu an va sawi a. 17 Nimahsela, ani chuan, “In thatchhia a ni, in thatchhia a ni! Chu vâng chuan a ni, ‘LALPA hnênah kan va inthawi ang e,’ in tih ni? 18 Chuvângin, kal ula, va thawk rawh u; buhpâwl zawng kan pêk dâwn loh che u hi; amaherawhchu, leirawhchan an tuk zât che u chu in siam rêng rêng tûr a ni,” a ti a. 19 Tin, “In ni tin hnathawh, in leirawhchan siam hi in titlêm chuang hlei lo vang e,” an tih veleh chuan Israela thlahte hotute chuan an chan a chhe êm êm a ni tih an lo inhre ta a. 20 Tin, Pharaoa hnên aṭanga an lo chhuak chuan Mosia leh Arona, kawnga lo ding chu an rawn hmu a; 21 tin, an hnênah, “LALPAN en che u sela, rorêlsak che u rawh se; keimahni min thahna tûra an kuta khandaih kentîrin, Pharaoa mit hmuhah leh a chhiahhlawhteho lakah hian huat min phurhtîr tâk avâng hian,” an ti a.

Pathian hnênah Mosia a vui

22 Tichuan, Mosia chuan LALPA lam a hawi a, “LALPA, engtizia nge he mite hi ṭha lo taka i tih le? Eng vângin nge mi tirh ni? 23 Pharaoa hnêna i hminga thusawi tûra ka kal achinah he mite hi ṭha lo takin a ti a; nang lah chuan i mite hi i la chhanchhuak hauh si lo va,” a ti a.

Exodus 6

1 Tin, LALPA chuan Mosia hnênah, “Tûnah zawng Pharaoa chunga ka tih dân tûr chu i hmu tawh ang. Kut chak tak avâng chuan anmahni a chhuahtîr ang a; tin, kut chak tak avâng chuan a ram ata chu anmahni a hnawt chhuak ang,” a ti a.

Pathianin Mosia a bia

2 Tichuan, Pathianin Mosia a bia a, hnênah, “Kei JEHOVA ka ni. 3 Abrahama hnênah te, Isaaka hnênah te leh Jakoba hnênah te khân Pathian Engkimtheia-in ka lo inlâr ta a, ka hming JEHOVA-in erawh chuan an hnênah ka la inhriattîr lo va. 4 Tin, anmahni hnênah chuan, Kanaan ram, an mikhualna ram, rei lo tê an lo awm tawhna kha pêk tumin ka thinlung chu ka lo tinghet ta bawk a. 5 Tin, Israela thlahte, Aigupta-hoten an bawihate rûm kha ka lo hre bawk a; tichuan, ka thuthlung chu ka hre reng a ni. 6 Chuvângin, Israela thlahte hnênah chuan, ‘Kei JEHOVA ka ni a, Aigupta-hote phurrit lak ata hi ka hruai chhuak ang che u a, an bawiha in awm hi ka chhuahtîr ang che u; tin, nasa taka ngaihtuah che uin bân phar meuhvin ka tlan ang che u. 7 Tin, ka mi atân ka nei ang che u a; tin, kei in tân Pathian ka ni ang a; tichuan, kei hi Jehova, in Pathian, Aigupta-ho phurrit lak ata hruai chhuaktu che u ka ni tih in hria ang. 8 Abrahama te, Isaaka te leh Jakoba te hnêna ka bân meuhva pêk ka tumna ramah khân ka hruai lût ang che u a; tichuan, in ro chanah ka pe ang che u: kei JEHOVA ka nih hi,’ tiin hrilh ang che,” a ti a. 9 Tin, Mosian Israela thlahte hnênah chuan chûng thu chu a va sawi a; nimahsela, rilru nguina avâng leh nasa taka tihretheihna avâng chuan Mosia thu chu an ngaithla duh lo va. 10 Tin, LALPA chuan Mosia hnênah, 11 “Va kal la, Aigupta lal Pharaoa hnênah Israela thlahte hi a ram ata chhuahtîr tûrin va sawi rawh,” tiin a sawi a. 12 Tin, Mosia chuan LALPA hmaah, “Ngai teh, Israela thlahten ka thusawi an ngaithla duh si lo va; kei mi ṭawng mawh thusawi tehlul hi Pharaoan engtin nge a ngaihthlâk ang ni?” tiin a sawi a. 13 Tin, LALPA chuan Mosia leh Arona chu a bia a, “Aigupta ram ata Israel-te hruai chhuak tûrin thu ka pe tawh che u a ni tih Israel-te leh Aigupta lal chu hrilh rawh u,” a ti a.

Mosia leh Aronan Israel mi hotute hming an ziak

14 Tin, hêng hi an pate hnam bulpui berte chu an ni: Israela fa tîr Reubena fapate chu Hanoka te, Palua te, Hezrona te, Karmia te an ni a; hêngte hi Reubena hnamte chu an ni. 15 Tin, Simeona fapate chu Jemuela te, Jamina te, Ohada te, Jakina te, Zohara te, Kanaan hmeichhe laka a fapa Saula te an ni: hêngte hi Simeona hnamte chu an ni. 16 Tin, hêngte hi an thlahte ang zêlin Levia fapate hming chu a ni: Gersona te, Kohatha te, Meraria te an ni a; tin, Levia dam chhûng kum chu kum za leh kum sawmthum leh kum sarih a ni. 17 Tin, an hnam ang zêlin Gersona fapate chu Libnia leh Simeia te hi an ni. 18 Tin, Kohatha fapate chu Amrama te, Izara te, Hebrona te, Uziela te an ni a; tin, Kohatha dam chhûng kum chu kum za leh kum sawmthum leh kum thum a ni. 19 Tin, Meraria fapate chu Mahlia leh Musia an ni. Hêngte hi an thlahte ang zêla Levia hnamte chu an ni. 20 Tin, Amrama chuan a pa farnu Jokebedi chu nupuiah a nei a; tin, Arona leh Mosia a hrinsak a: tin, Amrama dam chhûng kum chu kum za leh kum sawmthum leh kum sarih a ni. 21 Tin, Izara fapate chu Kora te, Nephega te, Zikria te an ni. 22 Tin, Uziela fapate chu Misaela te, Elzaphana te, Sithria te an ni. 23 Tin, Arona chuan Aminadaba fanu, Nasona farnu Elisebi chu nupuiah a nei a; tin, Nadaba te, Abihua te, Eleazara te, Ithamara te a hrinsak a. 24 Tin, Kora fapate chu Asira te, Elkana te, Abiasapha te an ni. Hêngte hi Kora-ho hnamte chu an ni. 25 Tin, Arona fapa Eleazara chuan Putiela fanute zînga mi pakhat chu nupuiah a nei a; tin, Phinehasa a hrinsak a. Tin, hêngte hi an hnam ang zêla Levia thlah bulpui berte chu an ni. 26 Chu mi Arona leh Mosia-te chu an ni LALPAN, “Aigupta ram ata Israela thlahte hi an pâwlho ang zêlin hruai chhuak rawh u,” tia a hrilh ni. 27 Chu mite chu an ni Aigupta lal Pharaoa va biaa, Israela thlahte chu Aigupta ram ata chhuahtîr tûra va betute chu. Chu mite chu Mosia leh Arona chu an ni.

Mosia leh Arona hnêna LALPA thupêk

28 Tin, heti hi a ni a, Aigupta rama LALPAN Mosia a biak ni chuan, 29 LALPA chuan, “Kei hi LALPA chu ka ni. Aigupta ram lal Pharaoa hnênah chuan i hnêna ka sawi zawng zawng hi sawi rawh,” tiin Mosia chu a bia a. 30 Tin, Mosia chuan LALPA hmaah, “Ngai teh, kei mi ṭawng mawh ka ni si a; tichuan, keia thusawi tehlul hi Pharaoan engtin nge a ngaihthlâk ang ni?” a ti a.

Exodus 7

Arona tiang

1 Tin, LALPA chuan Mosia hnênah, “Ngai teh, Pharaoa tân Pathian angah ka siam tawh che alâwm; tin, i unau Arona chu i zâwlnei a ni ang. 2 Thu ka pêk apiang che chu i sawi chhuak zêl ang a; tin, i unau Aronan Pharaoa a ram ata Israela thlahte chhuahtîr tûrin a hrilh ang. 3 Tin, Pharaoa thinlung chu ka tikhauh ang a; tin, ka chhinchhiahna leh ka thil makte chu Aigupta ramah hian ka tipung ang. 4 Nimahsela, Pharaoan in thu a pawm duh lo vang; tin, Aigupta ram chhûngah hian ka kut ka nghat ang a, anmahni chu nasa taka ngaihtuahin ka mi Israela thlahte, ka pâwlhote hi Aigupta ram ata chu ka hruai chhuak ang. 5 Tin, Aigupta mite chuan, Aigupta ram chunga ka kut ka han phara, an zîng ata Israela thlahte ka hruai chhuah hunah zet chuan kei hi LALPA chu ka ni tih an la hria ang,” a ti a. 6 Tin, Mosia leh Arona chuan chutiang chuan an ti a; LALPAN anmahni thu a pêk ang ngei chuan an ti ta a. 7 Tin, Pharaoa an va biak lai khân Mosia chu kum sawmriat mi a ni a; tin, Arona chu kum sawmriat leh kum thum a ni. 8-9 Tin, LALPAN Mosia leh Arona hnênah, “Pharaoan, ‘Thil mak han ti teh u,’ a lo tih che u chuan nangin Arona hnênah, ‘I tiang kha la la, Pharaoa hmaah paih ang che; tichuan, rûlah a lo chang dâwn nia,’ ti ang che,” tiin a sawi a. 10 Tin, Mosia leh Arona chu Pharaoa hnênah an va lût a; tin, LALPA thupêk ang chuan an han ti a. Tin, Arona chuan a tiang chu Pharaoa leh a chhiahhlawhte hmaah chuan a han paih a; tin, rûlah a chang ta a. 11 Chutichuan, Pharaoa pawh chuan mi fingte leh dawithiamte chu a ko ve a: tin, anni, Aigupta rama mitlâk dawithiamte pawh chuan chutiang bawk chuan an dawina chuan an han ti ve a. 12 An tiang chu an han paih ṭheuh va, rûlah a chang ṭheuh va; amaherawhchu, Arona tiang chuan an tiangte chu a lem zo ta vek a. 13 Tin, Pharaoa thinlung chu tihkhauhvin a awm a; tichuan, an thu chu a ngaithla duh ta lo va, LALPAN a lo sawi tawh ang khân.

Aigupta ram hremna - Thisen

14 Tin, LALPA chuan Mosia hnênah, “Pharaoa thinlung hi tihluhlulin a lo awm ta a, mite chu a chhuahtîr phal lo va. 15 Pharaoa hnênah chuan zîngah va kal ang che; ngai teh, tuiah a kal ṭhîn a, tin, amah hmuh tumin lui kamah ding ang che; tin, i tiang rûla chang kha keng ang che. 16 Tin, a hnênah, ‘LALPA, Hebraite Pathianin, “Ka mite hian thlalêrah ka rawng an bâwl theihna tûrin rawn kaltîr rawh,” tiin i hnênah mi a tîr a ni e; tin, ngai teh, tûn thlengin i la ngaithla duh lo va. 17 Chuvângin, LALPAN, “Hemiah hian kei LALPA chu ka ni tih i hria ang. Ngai teh, hemi ka tiang ken hian luia tuite hi ka han vua ang a; tichuan, thisenah a lo chang mai ang. 18 Tin, luia sanghate chu an thi ang a, lui chu a uih hluah hluah ang; tichuan, Aigupta miten luia tui chu an in lo vang,” a ti e,’ ti ang che,” a ti a. 19 Tin, LALPAN Mosia hnênah, “Arona hnênah, ‘I tiang keng la, Aigupta ram tui chungah te, an lui chungah te, an luite chungah te, an dîl chungah te, tui tlin khâwmna zawng zawng chungah te chuan thisena a lo chan vekna tûrin phar rawh; tichuan, Aigupta ram chhûng zawng zawngah, thingkuangahte leh lungkuangahte chuan thisen a awm vek mai ang,’ ti ang che,” a ti a. 20 Tin, Mosia leh Arona chuan LALPA thupêk ang chuan an han ti a; tin, tiang chu a han lek a, Pharaoa mit hmuhah leh a chhiahhlawhte mit hmuhah chuan luia tui chu a han vua a; tichuan, luia tui zawng zawng chu thisenah a chang ta vek a. 21 Tin, luia sanghate chu an thi ta vek a, lui chu a uih ta hluah hluah a; tichuan, Aigupta mite chuan luia tui chu an in thei ta lo va. Tin, thisen chu Aigupta ram chhûng zawng zawngah chuan a awm ta vek a. 22 Tin, Aigupta rama mitlâk dawithiamte pawh chuan an dawi hmangin chutiang bawk chuan an han ti ve a; tin, Pharaoa thinlung chu tihkhauhvin a awm a; tichuan, an thu chu a ngaithla duh ta lo va, LALPAN a sawi tawh ang khân. 23 Tin, Pharaoa chu a in lamah chuan a hâwng ta a, chûng pawh chu a thinlungah a lungkham chuang hauh lo mai a. 24 Tin, Aigupta mi zawng zawng chuan tui in atân lui kam vêlte chu an lai chiam a; lui tui chu an in thei si lo va. 25 Tin, LALPAN lui a vuak achin chu ni sarih zet a tling a ni.

Exodus 8

Chungu

1 Tin, LALPAN Mosia chu a bia a, a hnênah, “Pharaoa hnênah va lût la, a hnênah, ‘LALPAN, “Ka mite hian ka rawng an bâwl theih nân chhuahtîr rawh. 2 I chhuahtîr phal loh zawngin, ngai teh, i ram chin zawng zawng hi chunguin ka hrem ang. 3 Tin, lui chu chunguin a khat mur mur ang a, chungute chu i inah hian an lo lût chho vang a, i mutna pindanah te, i khumah te, i chhiahhlawhte in chhûngah te, i mite zîngah te, i thukah te, i chhang hmehna thlêng chhûngah te an awm noh noh vang. 4 Tichuan, chungute chu nangmah leh i mite leh i chhiahhlawhte chungah chuan an vâk noh noh mai ang,” a ti e,’ ti ang che,” a ti a. 5 Tin, LALPAN Mosia hnênah, “Arona hnênah, ‘I tiang kha i kutin lui chungah te, luite chungah te leh tui tlinna chungah te lek langin, Aigupta ramah hian chungu rawn lêntîr chiam ang che,’ ti rawh,” a ti a. 6 Tin, Arona chuan Aigupta ram lui chungahte chuan a kut a han phar a; tichuan, chungu chu an lo chhuak a, Aigupta ram khahin a khat zo ta a. 7 Tin, mitlâk dawithiamte pawh chuan an dawi hmangin chutiang bawk chuan an han ti ve a, Aigupta ramah chuan chungute chu an han tichhuak ve a. 8 Chutichuan, Pharaoa chuan Mosia leh Arona chu a kohtîr a, an hnênah, “Ka hnên aṭang leh ka mite hnên aṭanga chungu hi la bo tûrin LALPA hnênah ngên teh u; tichuan, LALPA hnêna an inthawi theihna tûrin mite hi ka chhuahtîr ang e,” a ti a. 9 Tin, Mosia chuan Pharaoa hnênah, “I hnên aṭang leh i in aṭanga chungute chu tihborala a awma, luiah chauh a awmna tûrin, nangmah leh i chhiahhlawhte leh i mite tân chuan eng tik atân nge ka ngen ang?” a ti a. 10 Tin, ani chuan, “Naktûk atân le,” a ti a. Tin, ani chuan, “I thu ang chuan ni ang hmiang; tichuan, LALPA kan Pathian ang rêng rêng hi tu mah an awm lo tih i hria ang. 11 Tin, chungute chuan nangmah leh i inte leh i chhiahhlawhte leh i mite chu an chhuahsan vek ang che u a; luiah chauh an awm tawh ang,” a ti a. 12 Tin, Mosia leh Arona chu Pharaoa hnên ata an chhuak ta a; tin, Mosia chuan Pharaoa chunga chungu a rawn lêntîr chungchâng thu-ah chuan LALPA hnênah a ngên a. 13 Tin, LALPA chuan Mosia thu ang chuan a ti a; tin, in chhûnga mite, in hung chhûng kawtlaia mite leh lova mi chungute chu an thi fai ta vek a. 14 Tin, an chhar khâwm a, an dah vûm thûr mai a; tichuan, a ram uihin a lo uih ta a. 15 Nimahsela, Pharaoa chuan engthâwlna a lo awm ta tih a hriat veleh a thinlung a tikhauh va; tichuan, an thu chu a ngaithla duh ta lo va, LALPAN a lo sawi tawh ang khân.

Thosi

16 Tin, LALPAN Mosia hnênah, “Arona hnênah, ‘I tiang kha lek la, leia vaivut hi vaw rawh, Aigupta ram zawng zawnga vaivut hi thosia a lo chan theih nân,’ ti ang che,” a ti a. 17 Tin, chutiang chuan an han ti a. Arona chuan a tiang chu a kutin a han lek a, leia vaivut chu a han vua a; tin, mihring chungah leh sa chungah chuan thosi a lo awm ta mur mur a; Aigupta ram chhûng zawng zawnga leia vaivut zawng zawng chu thosiah a chang zo ta vek a. 18 Tin, mitlâk dawithiamte chuan an dawi hmangin thosi tihchhuah an han tum ve a; nimahsela, an thei lo. Tin, mihring chungah leh sa chungah chuan thosi chu a awm ta mur mur a. 19 Chutichuan, mitlâk dawithiamte chuan Pharaoa hnênah, “Hei hi Pathian kutzungtang a nih hi,” an ti a; tichuan, Pharaoa thinlung chu tihkhauhvin a awm a, an thu chu a ngaithla duh lo va, LALPAN a lo sawi ang khân.

Tho

20 Tin, LALPAN Mosia hnênah, “Zîng takah tho la, Pharaoa hmaah va ding ang che; ngai teh, tuiah a lo kal ṭhîn a. Tin, a hnênah, ‘LALPAN, “Ka mite hian ka rawng an bâwl theih nân chhuahtîr rawh. 21 Chuti lo zawng, ka mite i chhuahtîr phal loh zawngin, ngai teh, i chungah leh i chhiahhlawhte chungah leh, i mite chungah leh i in chhûngahte chuan tho tam tak ka rawn tîr chiam ang a; tichuan, Aigupta mite inte leh an chênna lei zawng zawngte pawh chu tho hlîrin a khat ang. 22 Tin, chumi ni chuan ka mite awmna Gosen ram chu ka tihrang ang, chutah chuan tho rêng rêng a awm ve loh nân; tichuan, lei chungah hian kei hi LALPA chu ka ni tih in lo hre thei ang. 23 Tin, ka mite leh i mite chu ka thliar ang a; naktûkah he chhinchhiahna hi a lo awm ang,” a ti e,’ ti ang che,” a ti a. 24 Tin, LALPAN chutiang chuan a ti a; tichuan, Pharaoa inah leh a chhiahhlawhte inah leh, Aigupta ram zawng zawngah chuan tho tam pui mai chu an lût ta chiam a; tho tam tak chuan ram chu a tichhe chiam a. 25 Tin, Pharaoa chuan Mosia leh Arona a kohtîr a, an hnênah, “Kal ta ula, he ramah hian in Pathian hnênah chuan va inthawi mai tawh u,” a ti a. 26 Tin, Mosia chuan, “Chutiang tih chu a fel hlei nêm, Aigupta miten thiang lo an tihte chuan LALPA kan Pathian hnênah kan inthawi dâwn zuk nia! Ngai teh, Aigupta mite mit hmuhah hian thiang lo an tihte chuan kan inthawi dâwn em ni ang? Lungin min dêng mai dâwn lâwm ni? 27 Thlalêr ni thum kalah chuan kan va kal ang a, LALPA kan Pathianin tih tûra min pêk ang angin a hnênah kan va inthawi ang e,” a ti a. 28 Tin, Pharaoa chuan, “Thlalêra LALPA in Pathian hnêna in inthawi theihna tûrin ka kaltîr ang che u; amaherawhchu, in kal hla vak tûr a ni lo ve. Mi ngensak ang che,” a ti a. 29 Tin, Mosia chuan, “Ngai teh, i hnên aṭang chuan ka chhuak dâwn a ni a, naktûkah hian Pharaoa leh a chhiahhlawhte leh a mite chu tho tam pui hian a chhuahsan theihna tûrin LALPA hnênah ka ngên ang e; amaherawhchu, mite LALPA hnêna an inthawi chu Pharaoa hian phal lovin, tihder leh tawh lul suh se,” a ti a. 30 Tin, Mosia chu Pharaoa hnên ata a chhuak a; tichuan, LALPA hnênah a ngên ta a. 31 Tin, LALPAN Mosia thu ang chuan a ti a; tichuan, Pharaoa hnên ata leh a chhiahhlawhte hnên ata leh a mite hnên ata tho tam pui chu a tikiang ta a, pakhat mah a awm ta lo va. 32 Tin, Pharaoa chuan chumi ṭum pawh chuan a thinlung a tikhauh leh a; tichuan, mite chu a chhuahtîr phal ta lo va.

Exodus 9

Ran hri lêng

1 Chutichuan, LALPAN Mosia hnênah, “Pharaoa hnênah va lût la, ‘LALPA, Hebraite Pathianin, “Ka mite hian ka rawng an bâwl theih nân chhuahtîr rawh. 2 I chhuahtîr phal lohva, i la hrên reng zawngin, 3 ngai teh, phûla i rante chungah chuan LALPA kut a awm dâwn a ni, sakawr chungah te, sabengtung chungah te, sanghâwngsei chungah te, bâwng rual chungah te, berâm rual chungah te chuan hri nasa tak mai a lo lêng ang. 4 Tin, LALPAN Israel-ho ran leh Aigupta mite ran chu a tihrang ang a; tichuan, Israela thlahte ta chu pakhat mah a thi lo vang,” a ti e,’ tiin hrilh rawh,” a ti a. 5 Tin, LALPA chuan, “Naktûkah LALPAN he ramah hian chutiang chu a ti dâwn e,” tiin hun a ruat ta a. 6 Tin, LALPA chuan a tûkah chutiang chuan a ti ta a, Aigupta mite ran zawng zawng chu a thi ta vek a; nimahsela, Israela thlahte ran chu pakhat mah a thi ve lo va. 7 Tin, Pharaoa chuan mi a tîr a; ngai teh, Israel mite ran chu pakhat mah a lo thi ve lo va. Nimahsela, Pharaoa thinlung chu tihluhlulin a awm a, mite chu a chhuahtîr phal ta lo va.

Khawihli

8 Tin, LALPAN Mosia leh Arona hnênah, “Rawhtuina meia mi vut va ṭhûm ula, Pharaoa mit hmuhah Mosian vân lamah theh chiam rawh se. 9 Tin, Aigupta ram zawng zawng chungah hian vut dip takah a lo chang ang a; tin, chu chuan Aigupta ram chhung zawng zawnga mi leh sa chu khawihli a veitîr ṭheuh ang a, a durh leu chiam ang,” a ti a. 10 Tin, rawh tuina meia vut chu an la a, Pharaoa hmaah chuan an va ding a; tin, Mosia chuan vân lamah a han theh chiam a; tichuan, mi tin leh sa tinin khawihli durh leu an lo vei ta vek a. 11 Tin, khawihli avâng chuan mitlâk dawithiamte chuan Mosia chu an chelh ta lo va; mitlâk dawithiamte leh Aigupta mi zawng zawngte chuan khawihli chu an vei vek si a. 12 Tin, LALPAN Pharaoa thinlung chu a tikhauh va; tichuan, an thu chu a ngaithla duh ta lo va, LALPAN Mosia hnêna a sawi tawh ang khân.

Rial

13 Tin, LALPAN Mosia hnênah, “Zîng takah tho la, Pharaoa hmaah va ding la; tin, a hnênah, ‘LALPA, Hebraite Pathianin, “Ka miten ka rawng an bâwl theih nân chhuahtîr rawh. 14 Tûn ṭumah zawng i chungah leh i chhiahhlawhte chungah leh, i mite chungah hian ka hri zawng zawngte hi ka lêntîr dâwn e; tichuan, khawvêl zawng zawngah hian keimah ang rêng rêng hi tu mah an awm lo tih i hria ang. 15 Chuti ni suh sela, ka kut ka thawh ang a, nang leh i mite hi hriin ka hrem ang a, khawvêl ata hi ka tiboral daih tawh tûr che a ni. 16 Nimahsela, hemi avâng ngawt hian ka tungding chia, ka thiltihtheihna entîr tûr che leh khawvêl zawng zawnga ka hming a lo than theih nân. 17 Ka mite lakah hian i la induh cheuvin, i la chhuahtîr lo vang maw? 18 Ngai teh, naktûk hetih hunah hian rial tam pui, Aigupta ram a lo awm tirh ata, tûn thleng pawha la tla ngai lo chu ka tlâktîr ang. 19 Chutichuan, phûla i rante leh i neih apiangte chu khungtîr thuai rawh khai; mi tin leh sa tin phûla awm, ina khung loh tawh phawt chu, rialin a dêng ang a, an thi ang,” a ti e,’ ti rawh,” a ti a. 20 Pharaoa chhiahhlawhte zînga LALPA thu pawisa apiang chuan, an chhiahhlawhte leh an rante chu in chhûngah an tlân luhtîr a; 21 LALPA thu ngaisâng lo apiang chuan, an chhiahhlawhte leh an rante chu phûlah chuan an awmtîr mai a. 22 Tin, LALPA chuan Mosia hnênah, “Vân lamah i kut han lek rawh, Aigupta ram zawng zawngah hian mihring chungah te, sa chungah te, Aigupta ram chhûnga lova thlai tinrêng chungah te chuan rial a lo tlâk nân,” a ti a. 23 Tin, Mosia chuan a tiang chu vân lamah a han lek a; tin, LALPA chuan khawpui ri leh rial a zuk tîr a, leiah chuan meite a lo tla a; tichuan, LALPAN Aigupta ram chungah chuan rial a tlâktîr ta chiam a. 24 Chutichuan, rial, mei leh riala inpawlh, nasa êm êm mai, Aigupta ram zawng zawngah chuan, Aigupta hnam lo awm achin chutiang rêng rêng la awm ngai lo chu a lo awm ta a. 25 Tin, rial chuan Aigupta ram zawng zawnga phûla awm zawng zawng, mihringte leh sate chu a dêng a; tin, rial chuan lova thlai tinrêngte chu a dêng a, phûla thing tinrêngte chu a titliak vek a. 26 Gosen ram, Israela thlahte awmnaah chauh chuan rial a tla ve lo va. 27 Tin, Pharaoa chuan Mosia leh Arona chu a kohtîr a, an hnênah, “Tûn ṭum zawng thil ka tisual ta a ni e. LALPA chu mi fel a ni a, kei leh ka mite hi kan sual a ni e. 28 LALPA hnênah ngên rawh u, hêng khawpui ri dur durte leh rialte hi a tâwk tawh e; tichuan, ka chhuahtîr ang che u a, in awm tawh lo vang e,” a ti a. 29 Tin, Mosian a hnênah, “Khua ata hi ka chhuah veleh LALPA lamah ka kut ka phar ang a, khawpui rite chu a reh ang a, rial pawh a awm tawh hek lo vang; tichuan, lei hi LALPA ta a ni tih i hria ang. 30 Nimahsela, nang leh i chhiahhlawhteho hi zawngin, LALPA Pathian hi in la ṭih chuang lo tih ka hria a ni,” a ti a. 31 Tin, la leh barli chu a dêng chhia a; barli chu a vuih lai mêk a ni a, la chu a rah lai mêk a ni. 32 Nimahsela, buh leh vai buhtun chu a dêng chhe lo, a la ṭo rih loh avângin. 33 Tin, Mosia chu Pharaoa hnên aṭangin khua ata chu a chhuak a, LALPA lamah a kut a phar a; tichuan, khawpui rite leh rial tla chu a lo bâng ta a, lei chungah chuan ruah pawh chu a baw tlâwrh tlâwrh ta lo va. 34 Tin, Pharaoa chu ruah leh rial leh khawpui rite chu a bâng ta tih a hriat veleh a sual leh ta sauh va, amah leh a chhiahhlawhte nên an thinlung an tikhauh ta a. 35 Tin, Pharaoa thinlung chu tihkhauhvin a awm a; tichuan, Israela thlahte chu a chhuahtîr phal ta lo va, LALPAN Mosia hmanga a lo sawi tawh ang khân.

Exodus 10

Khau puang

1 Tin, LALPAN Mosia hnênah, “Pharaoa hnênah va lût rawh; a thinlung leh a chhiahhlawhte thinlung chu ka tihkhauhsak tawh e, hêng ka chhinchhiahnate hi an zîngah ka entîr theihna tûrin; 2 tin, nang pawhin i fa leh i fa fate benga Aigupta ram chunga thil ka tih zia leh, an zînga ka chhinchhiahnate ka tih zia hi i hrilh theihna tûrin; kei hi LALPA chu ka ni tih in hriat theih nân,” a ti a. 3 Tin, Mosia leh Arona chu Pharaoa hnênah an va lût a, a hnênah, “LALPA, Hebraite Pathianin, ‘Ka hmaah eng chen nge inngaitlâwm duh lova awm i tum ni? Ka mite hian ka rawng an bâwl theih nân chhuahtîr rawh. 4 Ka mite hi i chhuahtîr phal loh zawngin, ngai teh, naktûkah i ram chhûngah hian khaukhuapte ka rawn lêntîr ang a; 5 tin, lei chung hi an dâp vek ang a, tu mahin lei rêng rêng hi an hmu thei lo vang; tin, rialin a tihchhiat bâk, in hnêna la awmate hi an ei ang a, phûla in thing ṭo apiangte chu an ei vek ang. 6 Tin, i inte leh i chhiahhlawhte zawng zawng inte leh, Aigupta mi zawng zawng inte chu a khat vek ang; i thlahtute leh i thlahtute thlahtute pawhin, khawvêla an lo awm achin tûn thleng pawhin, chutiang chu an la hmu ngai lo a ni,’ a ti e,” an ti a. Tin, a lehhawi a, Pharaoa hnên ata chu a chhuak ta a. 7 Tin, Pharaoa chhiahhlawhte chuan a hnênah, “He mi hi kan tân eng chen nge maw thanga a awm dâwn le? Hêngho hian LALPA an Pathian rawng an bâwl theih nân kaltîr ta mai che maw le. Aigupta ram hi tihchhiat a nih tawh hi i la hre lo vem ni?” an ti a. 8 Tin, Mosia leh Arona chu Pharaoa hnênah an hruai leh a; tin, an hnênah, “Kal ula, LALPA in Pathian rawng chu va bâwl tawh u. Amaherawhchu, tute nge ni kal tûr chu?” a ti a. 9 Tin, Mosian, “A pui a pangin kan kal ang; kan fapate leh kan fanute nên, kan berâm rualte leh kan bâwng rualte nên kan kal ang; LALPA hnênah kan kût ngei tûr a ni si a,” a ti a. 10 Tin, ani chuan an hnênah, “LALPA chu in hnênah awm ang hmiang! In fanau tê tête nên chuan ka kaltîr mawlh ang che u le; inngaihtuah rawh u khai, thil sual tih in tum a nih hi le. 11 Hnai lo ve! Nangni mipaho erawh chu kal ula, LALPA rawng chu bâwl rawh u; chu chu alâwm in duh,” a ti a. Tin, Pharaoa hnên ata chu an hnawt chhuak ta a. 12 Tin, LALPAN Mosia hnênah, “Aigupta ram chungah hian khaukhuapte rawn lêntîr tûrin i kut phar rawh, Aigupta ramah hian an lo chhohva, he rama thlai tinrêng, rial den chhiat bâk zawng zawngte nên lam pawha an ei theihna tûrin,” a ti a. 13 Tin, Mosian Aigupta ram chungah chuan a tiang chu a han lek a, LALPAN chumi ni, nilêng leh zankhuain chumi ramah chuan khawchhak thli a rawn tlehtîr a; tin, a tûkah chuan khawchhak thli chuan khaukhuap a rawn lên a. 14 Tin, khaukhuapte chu Aigupta ram zawng zawng chungah chuan an lêng a, Aigupta ram chhûng zawng zawngah chuan an fu a. An tam êm êm mai a; tûn hmain khaukhuap chutiang rêng rêng a la awm ngai lo va, tûn hnuah pawh chutiang rêng rêng chu a awm leh tawh lo vang. 15 Lei chung zawng zawng hi an dâp vek mai si a; tichuan, ram chu a thimin a thim mup mai a ni; tin, rial den chhiat bâk, chumi rama thlai tinrêng leh theirah zawng zawngte chu an ei vek a. Tichuan, Aigupta ram chhûng zawng zawngah chuan lovah thil hring rêng rêng, thing pawh, thlai pawh a awm ta hauh lo mai a. 16 Tin, Pharaoa chuan Mosia leh Arona chu hmanhmawh takin a kohtîr a, an hnênah, “LALPA in Pathian chungah leh nangmahni chungah thil ka lo tisual ta e. 17 Chutichuan, ka sual hi tûn ṭumah chauh hian ngaidam ang che, ka ngên a che, he thihna hi mi lâk bosak phawt mai tûrin LALPA in Pathian hnênah ngên ang che,” a ti a. 18 Tin, Pharaoa hnên ata chu a kal chhuak a, LALPA hnênah chuan a ngên ta a. 19 Tin, LALPA chuan khawthlang thli na tak mai a rawn tlehtîr a, chu chuan khaukhuapte chu a lên a, Tuifinriat Senah a lên thla ta vek a; Aigupta ram chhûng zawng zawngah chuan khaukhuap pakhat mah a awm ta lo va. 20 Nimahsela, LALPAN Pharaoa thinlung chu a tikhauh va; tichuan, Israela thlahte chu a chhuahtîr phal ta lo va.

Khaw thim

21 Tin, LALPAN Mosia hnênah, “Vân lamah i kut han lek rawh, Aigupta ram chungah hian a lo thim khupa, ai mit thlawn ang maia a lo thimna tûrin,” a ti a. 22 Tin, Mosia chuan a kut chu vân lamah a han lek a, Aigupta ram chhûng zawng zawng chu ni thum chhûng zet a thim ta mup a. 23 Tu mah rêng rêng an inhmu thei ta lo va, tu mah mahni hmun ata ni thum chhûng zet chu an tawlh sawn thei lo bawk a. Israela thlahte zawng zawng awmna erawh chu a êng vek a. 24 Tin, Pharaoan Mosia a kohtîr a, a hnênah, “Kal ta ula, LALPA rawng chu va bâwl tawh u; in beram rualte leh in bâwng rualte erawh chu awm sela; in fanau tê tête pawh in hnênah kal ve rawh se,” a ti a. 25 Tin, Mosian, “LALPA kan Pathian hnêna kan inthawi theihna tûrin inthawina tûrte leh hâlral thilhlan tûrte chu nangin kan kutah min pe tel ve bawk tûr a ni. 26 Kan rante chu kan hnênah an kal ve bawk tûr a ni; ran rêng rêng chu pakhat mah kan hnutchhiah lo vang. Chûng zînga mi chu LALPA kan Pathian rawngbâwl nân kan hman ngei ngei tûr a ni si a; chumi hmun kan va thlen hma loh chuan engin nge LALPA rawng kan bâwl ang tih kan la inhre lo a ni,” a ti a. 27 Nimahsela, LALPAN Pharaoa thinlung chu a tikhauh va, a chhuahtîr phal ta lo va. 28 Tin, Pharaoan a hnênah, “Ka hnên ata hi chhuak daih la, fimkhur rawh khai, ka hmêl rêng rêng rawn hmu tawh hlek suh; ka hmêl i hmuh ni la la chuan i thi ngei tûr a ni,” a ti a. 29 Tin, Mosia chuan, “I sawi dik zet mai; i hmêl zawng hmuh ni ka nei leh tawh lo vang e,” a ti a.

Exodus 11

Fa tîr thih tûr thu Mosian a puang

1 Tin, LALPAN Mosia hnênah chuan, “Pharaoa chungah leh Aigupta ram chungah hian vawi khat chu hri ka han lêntîr leh ang e; chumi hnuah zawng a chhuahtîr tawh ang che u. A chhuahtîr vêk vêk che u zawngin heta ta hi a hnawt chhuak daih mai ang che u. 2 Chutichuan, mipuite beng hriatah thu va sawi rawh, mipa leh hmeichhe tinin an vêngte chu tangkaraw incheina leh rangkachak incheinate dîl rawh se,” a ti a. 3 Tin, LALPAN mite chu Aigupta mite a khawngaihtîr ta a. Chu chang a ni lo va, Mosia chu Aigupta ramah chuan, Pharaoa chhiahhlawhteho ngaihah leh mipuite ngaihah mi ropui tak a ni a. 4 Tin, Mosia chuan, “LALPAN heti hian a ti, ‘Zanlai vêlah chuan Aigupta ram chhûngah hian ka lo kal tlang ang a; 5 tichuan, Aigupta rama fa tîr zawng zawng, lalṭhutphaha thu Pharaoa fa tîr aṭanga buh râwt sawmna bula awm bawihnu fa tîr lam pawhin an thi ang, ran piang hmasa ber zawng zawngte nên. 6 Tin, Aigupta ram chhûng zawng zawngah chuan ṭahna nasa tak a awm ang a, chutianga nasa rêng rêng a la awm ngai lo va, chutiang rêng rêng chu a awm leh tawh hek lo vang. 7 Nimahsela, Israela thlahteho zawng mihring leh sa lamah rêng rêng ui pawhin a lei a phût lo vang; LALPA chuan Aigupta mite leh Israel mite hi a thliar ngei a ni tih in hria ang. 8 Tin, hêng i chhiahhlawh zawng zawngte hi ka hnênah an lo chhuak ang a, “Chhuak rawh, i hnung zuitute zawng zawng nên hian,” tiin ka hmaah an kûn ang; tin, chumi hnuah chuan ka chhuah ang,’ tiin,” a ti a. Tin, Pharaoa hnên ata chu thinrim zet maiin a chhuak ta a. 9 Tin, LALPAN Mosia hnênah chuan, “Pharaoan in thu a pawm lo vang; ka thil makte Aigupta ramah hian tihpuna a awm theih nân,” a ti a. 10 Tin, Mosia leh Arona chuan Pharaoa hmaah chuan chûng thil mak zawng zawng chu an ti a; tin, LALPAN Pharaoa thinlung chu a tikhauh va, Israela thlahte chu a ram ata a chhuahtîr phal lo va.

Exodus 12

Kalhlên kût

1 Tin, LALPAN Mosia leh Arona chu Aigupta ramah chuan a bia a, 2 “Tûn thla hi in tân thla chhiar ṭanna a ni ang a; in tân kum khat chhûnga thla chhiar ṭanna a ni ang. 3 Israel-ho pung khâwm zawng zawngte hnênah hian, ‘Tûn thla ni sâwm ni takah hian mi tinin an chhûngkaw khawsak ang zêlin an chhûngkaw tân berâmno pakhat la ṭheuh sela. 4 Tin, an chhûngkua chu berâmno talhna tham ni lo khawpa tlêm lutuk an nih chuan, a ṭhenawm nên an chhûngkaw mihring zir zêlin berâmno pakhat inṭâwm sela; mi tin ei tâwk tûr ang zêl ngaihruatin berâmno chu in ruat tûr a ni. 5 In berâmno chu a pa, kum khat hnuai lam, hmêlhem lo a ni tûr a ni a, berâm zînga mi emaw, kêl zînga mi emaw a ni tûr a ni. 6 Tin, chumi thla ni sâwm leh ni li ni thlengin in dah tûr a ni a; tichuan, Israel-ho pung khâwm zawng zawng chuan tlai lamah an talh tûr a ni. 7 Tin, a thisen chu an la ang a, an eina tûr in kawngka biang pahnihah leh kawngka lu chungah an tât tûr a ni. 8 Tin, chumi zân chuan a sa chu rawh sela, chhang dawidim telh loh nên ei rawh se; hnim khâ nên an ei tûr a ni. 9 Tin, a helin ei suh sela, tui pawhin chhûm hauh suh sela, a rawhin rawh zâwk rawh se, a lu leh a ke chawpin, a kawchhûng nên. 10 Tin, a tûk atân chuan eng mah in dah tûr a ni lo va; a tûk thlenga bâng la awm chu meiah in rawh ral tûr a ni. 11 Tin, hetiang hian in ei tûr a ni: in puan vengin, pheikhawk bunin, tiang kengin. Tin, hmanhmawh takin in ei tûr a ni; LALPA kal hlên a ni dâwn si a. 12 Chumi zân chuan Aigupta ram chhûng chu ka fang dâwn si a, Aigupta rama fa tîr zawng zawng, mi leh sa chu ka tihlum ang a; Aigupta rama pathian zawng zawng chu an ro ka rêlsak ang: LALPA ka nih hi. 13 Tin, thisen chu in tân in awmna in chhinchhiahna a ni ang a; tin, thisen chu ka hmuh chuan ka kal hlên ang che u a; tichuan, Aigupta ram ka hrem hunah chuan nangmahni tiboraltu tûr in chungah hri rêng rêng a lo lêng lo vang. 14 Tin, hemi ni hi in tân hriat rengna ni a ni ang a; LALPA tân kût niah in ruat tûr a ni. In thlahte thlengin kumkhaw thuruat atâna awm reng tûrin kût niah in hmang tûr a ni.

Chhang dawidim telh loh kût

15 “ ‘Ni sarih chhûng chu chhang dawidim telh loh in ei tûr a ni a; ni khat ni aṭang rêng chuan in in chhûng ata dawidim chu in thian fai vek tûr a ni. Tu pawh ni khat ni aṭanga a ni sarih ni thlenga chhang dawidim telh ei apiang chu, chu mi chu Israel-ho zîng ata tihboral a ni ang. 16 Tin, ni khat niah inkoh khâwmna thianghlim in nei ang a, a ni sarih niah inkoh khâwmna thianghlim a awm leh ang; mi tinin an mamawh ei tûr buatsaih tih loh chu, chumi chhûng chuan hna rêng rêng thawh hlek tûr a ni lo, ei tûr buatsaih chauh tih thian a ni ang. 17 Tin, chhang dawidim telh loh kût ni chu in serh tûr a ni, chumi ni ngei chuan Aigupta ram ata in mipuihote chu ka hruai chhuak si che u a; chuvângin, in thlahte thlengin kumkhaw thuruat atâna awm reng tûrin chumi ni chu in serh tûr a ni. 18 Thla khatna, chumi thla ni sâwm leh ni li ni, tlai lamah chuan chhang dawidim telh loh chu in ei ang a, chumi thla ni sawmhnih leh ni khat ni tlai thlengin. 19 Ni sarih chhûng chu in in chhûngah rêng rêng dawidim a awm tûr a ni lo va; tu pawh dawidim telh ei apiang chu, chu mi chu hnam dang pawh, in rama piang pawh ni sela, Israel-ho pung khâwm zîng ata hi tihboral tûr a ni ang. 20 Dawidim telh rêng rêng chu in ei tûr a ni lo va; in chênna hmun apiangah chuan chhang dawidim telh loh in ei tûr a ni,’ tiin sawi ang che,” tiin.

Kalhlên kût hmasa ber

21 Tin, Mosian Israel upaho zawng zawng chu a koh khâwmtîr a, an hnênah, “Chhûngkaw tinin berâmnotête chu va la chhuak ta ula, kalhlênna tûr talh rawh u. 22 Tin, husop kau in la ang a, maihûna thisenah chuan in zu hnim ang a, kawngka lu chungah leh kawngka biang pahnihah chuan maihûna thisen chu tât ang che u. Tin, khawvâr hma loh chuan tu mah mahni in ata in chhuak tûr a ni lo ve. 23 LALPA chu Aigupta mite tihlum tûrin a lo kal tlang dâwn si a; tichuan, kawngka lu chung leh kawngka biang pahniha thisen kai a hmuh chuan, LALPA chuan kawngka chu a kal hlên ang a, in in chhûngah chuan nangmahni tihlum tûrin tiboraltu chu a rawn luhtîr lo vang. 24 Tin, hetiang hian nangmah leh i fate tâna kumkhuaa thuruat awm reng tûrin in rawn ti ṭhîn tûr a ni. 25 Tin, heti hi a ni ang a, LALPAN pêk a lo tiam tawh anga a pêk che u ram chu in thlen hunin, he rawngbâwlna hi in zâwm tûr a ni. 26 Tin, heti hi a ni ang a, in faten in hnêna, ‘He rawngbâwlna awmzia hi eng nge ni ngai le?’ an rawn tih chuan, 27 nangnin, ‘Hei hi LALPA kalhlên inthawina a nih hi, ani chuan Aigupta mite a tihhlum lai khân kan inte chu a rawn zuah a, Aigupta rama Israela thlahte in chu a rawn kal hlên a ni,’ in la ti dâwn nia,” a ti a. Tin, mipuite chuan an lû an kûn a, chibai an bûk ta a. 28 Tin, Israela thlahte chu an kal a, chutiang chuan an ti a; LALPAN Mosia leh Arona thu a pêk ang chuan an ti ta a.

Fa tîr thih thu

29 Tin, heti hi a ni a, zanlaiah chuan LALPA chuan Aigupta rama fa tîr zawng zawng - lalṭhutphaha ṭhu Pharaoa fa tîr aṭanga rip chhûnga tâng fa tîr lamin - a zuk tihlum ta vek a, ran piang hmasa ber zawng zawngte nên. 30 Tin, Pharaoa chu amah leh a chhiahhlawh zawng zawngte leh, Aigupta mi zawng zawngte nên zânah chuan an tho ta a; tin, Aigupta ramah chuan ṭahna nasa tak a awm a; mitthi awm lohna in rêng rêng pakhat mah a awm si lo va. 31 Tin, Mosia leh Arona chu a zân a zânin a kohtîr a, “Tho ula, ka miteho zîng ata hi chhuak rawh u, nangmahni leh Israela thlahteho nên hian; tin, kal ula, in sawi ang khân LALPA rawng chu va bâwl tawh u. 32 In sawi ang khân in berâm rualte leh in sebâwng rualte pawh chu kalpui rawh u; kal tawh u; tin, kei pawh mal mi sâwm ve bawk rawh u,” a ti a. 33 Tin, Aigupta mite chuan chumi ram ata chu hmanhmawh taka tîr chhuak tûrin mite chu an tur ta chhên a; “Kan thi vek a ni ta mai,” an ti a. 34 Tin, mite chuan an chhang hmehte chu dawidim an telh hmain an la a, an chhang hmehna thlêngte chu an puanin an tuam a, an kokiah an bât ta mai a. 35 Tin, Israela thlahte chuan Mosia thu ang chuan an ti a; tin, Aigupta mite chu tangkaraw incheinate leh rangkachak incheinate leh, puante an dîl a. 36 Tin, LALPA chuan mite chu Aigupta mite a khawngaihtîr a; chutichuan, an dil apiang an neihtîr zêl a. Tichuan, Aigupta mite chu an rawk ta a.

Israel miten Aigupta an chhuahsan

37 Tin, Israela thlahte chu Rameses khua ata an chhuak a, Sukkoth hmun thlengin an kal ta a, naupangte tiam lovin, mipa puitling hlîr nuai ruk lai kein an kal a. 38 Tin, an hnênah chuan mipui inpawlhsawp tam tak an kal ve bawk a; tin, ran rual tam tak, berâm leh bâwngte an chhawm bawk a. 39 Tin, Aigupta ram ata an ken chhuah chhang hmeh hmangin chhang, dawidim telh lohte chu an ur a; Aigupta ram ata chu hnawh chhuaha an awm avâng leh, an awm rei theih tâk lohva, ei tûr takngial pawh an inbuatsaih hman tâk loh avânga dawidim telh loh a ni si a. 40 Tichuan, Israela thlahte Aigupta rama an awm chhûng chu kum zali leh kum sawmthum a ni. 41 Tin, heti hi a ni a, kum zali leh kum sawmthum a lo ral chuan, chumi ni ngei chuan heti hi a ni a, LALPA mipuiho zawng zawngte chu Aigupta ram ata an chhuak ta a. 42 Chumi zân chuan Aigupta ram ata anmahni a hruai chhuah avângin, LALPA tâna zân serh tak ni tûr a ni a. Israela thlahte zawng zawngin, chhuan zawng zawng thlengin, chu zân chu LALPA zân atân serh hle tûr a ni.

Kalhlên kût hman ṭhin dân tûr

43 Tin, LALPAN Mosia leh Arona hnênah, “Hei hi kalhlên thuruat dân tûr a ni ang: hnam dang chuan an ei ve tûr a ni lo va; 44 amaherawhchu, miin a chhiahhlawh, tangkaa a lei tawhate chu a serh i tansak tawh phawt chuan a ei ve thei ang. 45 Hnam dang leh chhiahhlawh rawihte erawh chuan an ei tûr a ni lo ve. 46 In khatah ei tûr a ni; pâwn lamah a sa rêng rêng ken chhuah tûr a ni lo va, a ruh rêng rêng pawh in titliak tûr a ni lo ve. 47 Israel-ho zawng zawngin an zâwm tûr a ni. 48 Tin, hnam dang in hnêna awm hian LALPA kalhlên hi tih ve a duh chuan, mipa zawng zawngte serh tan ni sela, tichuan rawn ti ve rawh se; ani chu chumi rama piang anga ngaih a ni ang. Amaherawhchu, serh tan loh mi chuan a ei hauh tûr a ni lo. 49 Chumi rama piang leh, hnam dang in zînga awmte tân hian dân angkhat a awm tûr a ni,” a ti a. 50 Israela thlahte zawng zawng chuan chutiang chuan an ti a, LALPAN Mosia leh Arona thu a pêk ang ngei chuan an ti ta a. 51 Tin, heti hi a ni a, chumi ni ngei chuan, LALPAN Israela thlahte chu Aigupta ram ata mipuiho chu a hruai chhuak ta a ni.

Exodus 13

Pathian tân fa tîr hlan tûr

1 Tin, LALPAN Mosia a bia a, 2 “Israela thlahte zînga fa tîr zawng zawng, chhûl keu hmasa ber apiang, mihring pawh, sa pawh ka tân serhah in ruat tûr a ni; ka ta a ni e,” tiin.

Chhang dawidim telh loh kût

3 Tin, Mosian mipuite hnênah chuan, “Vawiin, Aigupta ram ata bawih ata in chhuah ni hi hre reng ang che u; kut chak takin LALPAN hemi hmun ata hi a hruai chhuah che u hi; chhang dawidim telh rêng rêng chu ei tûr a ni lo ve. 4 Abib thla, vawiin ni hian in chhuak a ni. 5 Tin, heti hi a ni ang a, LALPAN Kanaan-hote, Hit-hote, Amor-hote, Hiv-hote, Jebus-hote ram, khawizu leh hnutetui luanna ram, in thlahtute chhechhama pêk a tiamah khân a hruai thlen hunah che u chuan, hemi thla hian he rawngbâwlna hi in zâwm tûr a ni. 6 Ni sarih chhûng chu chhang dawidim telh loh in ei tûr a ni a; tin, a ni sarih ni chu LALPA tân kût ni a ni ang. 7 Ni sarih chhûng chuan chhang dawidim telh rêng rêng chu a awmin awm hlek suh se; in awmna hmunah rêng rêng dawidim pawh a awmin awm hlek bawk suh se. 8 Chumi niah chuan in fate hnênah, ‘Aigupta ram ata kan lo chhuah lai khân LALPAN thil min lo tihsak vâng a ni e,’ tiin in hrilh tûr a ni e. 9 LALPA dân chu in kaa a awm reng theih nân, in kutah in tân chhinchhiahna leh in mit inkârah hriat rengna tûr a ni ang; kut chak takin LALPAN Aigupta ram ata a hruai chhuah che u hi. 10 Chutichuan, he thuruat hi kum tin a hun takah in zâwm ṭhîn tûr a ni.

Fa tîr

11 “Tin, heti hi a ni ang a, LALPAN in hnênah leh in thlahtute hnêna chhechhama pêk a tiam tawh che u anga Kanaan-hote rama a hruai thlen che ua, a pêk hun che u chuan, 12 chhûl keu hmasa ber apiang leh in ran piang thla hmasa ber apiang chu LALPA tân in dah hrang zêl tûr a ni; a pate chu LALPA ta tûr a ni ang. 13 Sabengtung piang hmasa ber apiang chu berâmnovin in tlan tûr a ni ang; in tlan duh loh erawh chuan a nghâwng chu in titliak tûr a ni; tin, in fate zînga mipa piang hmasa ber apiang chu in tlan tûr a ni. 14 Tin, heti hi a ni ang a, nakin lamah te in faten, ‘Hei engtizia nge ni le?’ tia an la rawn zawh hun che u chuan nangnin an hnênah, ‘Kut chak takin LALPAN Aigupta ram ata bawiha kan awm kha min hruai chhuak a. 15 Tin, heti hi a ni a, Pharaoan kan chhuah thu a tihkhirh êm avângin, LALPAN Aigupta rama fa tîr zawng zawng, mihring fa tîr apiang leh ran piang hmasa ber apiang chu a tihlum vek a. Chuvângin, a pa, chhûl keu hmasa ber apiang hian LALPA hnênah kan inthawi a nih hi; amaherawhchu, kan fapate zînga fa tîr zawng zawngte chu kan tlan a ni,’ ti ang che u. 16 Tin, in kutah in tân chhinchhiahna a ni ang, in mit leh mit inkâra chal hrênnate nên; kut chak takin LALPAN Aigupta ram ata min hruai chhuak ta si a,” a ti a. 17 Tin, heti hi a ni a, Pharaoan mite chu a chhuahtîr phal veleh chuan, Pathianin Philistia-ho ram lamah chuan, a hnai zâwk nain a hruai lo va; Pathianin, “Indonate an hmuhin an inchhîr ang a. Aigupta ramah an kîr leh hlauh dah ang e,” a ti si a. 18 Amaherawhchu, Pathianin mite chu Tuifinriat Sen lam panin thlalêr lamah a hruai kikawi ta zâwk a; tin, Israela thlahte chu Aigupta ram ata chu inrâlring rengin an chhuak ta a. 19 Tin, Mosian Josefa ruhte chu a chhawm a; Israela thlahte kha, “Pathianin a la rawn kan ngei ngei ang che u a; tin, ka ruhte hi heta ta hi in zâwn chho tûr a ni,” tiin chhia a lo chhamtîr tlat tawh si a. 20 Tin, Sukkoth hmun ata chu an chhuak a, thlalêr tawntirh Etham hmunah an riak a. 21 Tin, LALPAN chhûn laiah chuan chhûm dingin an hma a hruai a, zânah chuan anmahni ên tûrin meialh dingin an hma a hruai a; chhûn leh zân an kal theih zêlna tûrin. 22 Chhûna chhûm ding leh zâna meialh ding chuan mipui chu a kalsan ngai hauh lo a ni.

Exodus 14

Tuipui Sen kân thu

1 Tin, LALPAN Mosia a bia a, 2 “Israela thlahte hnênah hian thu sawi rawh khai, kîr leh sela, Migdol hmun leh tuipui inkâr Pi-hahiroth hmun bul, Baal-Zephon hmun bulah chuan riak rawh se; chumi dep tuipui kamah chuan riak rawh u. 3 Tichuan, Pharaoan Israela thlahte chungchâng thu-ah, ‘Ram lakah an mangang ta zet mai le, thlalêrah an tâng ta,’ a ti ang a. 4 Tin, keiin Pharaoa thinlung chu ka tikhauh ang a; tichuan, anmahni chu a ûm ang a; tin, keiin Pharaoa lakah leh a sipaiho zawng zawng lakah chuan chawimawina chu ka hlawh ang; tichuan, Aigupta miten kei hi LALPA chu ka ni tih an hria ang,” tiin. Tin, chutiang chuan an ti a. 5 Tin, mite chu an tlân bo zo ta tih Aigupta lal chu an hrilh a; tin, Pharaoa thinlung leh a chhiahhlawhte thinlung chu a inlamlêt leh ta a; tichuan, “Israel mite kan rawngbâwl lai kan chhuahtîr ta ngawt mai hi, engtiziaa hetianga ti ta nge maw kan nih chu le?” an ti ta a. 6 Tin, an tawlailîr an buatsaih a, a mite chu a hnênah a hruai a. 7 Tin, tawlailîr zaruk ṭha ṭhiau leh Aigupta rama tawlailîr zawng zawng, an zaa chunga hotute nên a hruai ta a. 8 Tin, LALPAN Aigupta ram lal Pharaoa thinlung chu a tikhauh va, Israela thlahte chu a ûm ta a; Israela thlahte lah chu induh takin an chhuak a ni si a. 9 Tin, Aigupta mite chuan sakawr zawng zawng leh Pharaoa tawlailîrte leh, a sakawr chung chuang mite leh a sipaihote nên chuan an ûm a; tin, Pi-hahiroth hmun bul, Baal-Zephon hmun depa tuipui kama an riak chu an va ûmpha ta a. 10 Tin, Pharaoan a va pan hnaih chuan Israela thlahte chu an han dâk a; tin, ngai teh, Aigupta mite chuan an lam chu an rawn pan phei a. Tichuan, an hlau ta êm êm mai a, Israela thlahte chuan LALPA chu an au ta a. 11 Tin, Mosia hnênah, “Aigupta ramah khân thlân a awm loh avângin em ni thlalêrah hian thi tûra min hruai chhuah ni? Eng vângin nge ni hetianga min ti tûra Aigupta ram ata min hruai chhuah ni? 12 Aigupta ramah pawh khân, ‘Aigupta mite rawngbâwl hian kan awm mai ang e,’ tiin i hnênah khân kan sawi rêng lo vem ni? Thlalêra thih tlaw ngawt mai te ai chuan Aigupta mite rawng kha lo bâwl ta ila a ṭha zâwk tûr,” an ti a. 13 Tin, Mosian mipuite hnênah chuan, “Hlau suh u. Awm hle hle mai ula, LALPA chhandamna, vawiina a thawhsak tûr che u hi en ngawt mai rawh u. Vawiina Aigupta mi in hmuhte hi kumkhuain in hmu leh dâwn tawh lo ve. 14 LALPAN a dosak ang che u a, nangni chu in awm hle hle mai ang,” a ti a. 15 Tin, LALPAN Mosia hnênah chuan, “Eng vângin nge maw mi auh le? Israela thlahte hi kal zêl tûrin hrilh ta che. 16 Tin, nang pawhin i tiang kha han la la, tuipui chungah khân lek la, tui chu lo inṭhen rawh se. Tichuan, tuipui chhûng lei chârah Israela thlahte chu an kal ang. 17 Tin, keiin Aigupta mite thinlung chu ka tikhauh ang a; tichuan, an ûm zêl ang. Tin, Pharaoa lakah leh, a sipaiteho zawng zawng lakah leh, a tawlailîrte lakah leh a sakawr chung chuang mite lakah chuan chawimawina chu ka hlawh ang. 18 Tin, Pharaoa lakah leh, a tawlailîrte lakah leh a sakawr chung chuang mite laka chawimawina ka hlawh hunah chuan, Aigupta miten kei hi LALPA chu ka ni tih an hria ang,” a ti a. 19 Tin, Pathian vântirhkoh, Israel mite hma hruai ṭhîn kha an hnung lamah a insawn ta a; tin, chhûm ding kha an hma lam ata a insawn a, an hnung lamah a ding ta a. 20 Tin, Aigupta mite leh Israel mite inkârah a lo tla ta a; tichuan, lehlam tan chhûm leh zân thim a ni a, lehlam tan zân chu a tiêng thung a; chutichuan, zankhuain a tu lam mah mah an inpan lo va. 21 Tichuan, Mosia chuan tuipui chungah a kut a han phar a; tin, LALPAN zankhuain khawchhak thli na takin a rawn tlehtîr a, tuipui chu a nem kîrtîr a, tuipui chu lei chârah a chantîr a; tin, tuite chu a lo inṭhen ta a. 22 Tin, Israela thlahte chu tuipui chhûng lei chârah chuan an kal ta a; tin, tuite chu an ding lampangah leh an vei lampangah chuan an tân bang a lo ni ta mai a. 23 Tin, Aigupta mite chuan an ûm a, Pharaoa sakawr zawng zawngte leh a tawlailîrte leh a sakawr chung chuang mite chuan tuipui chhûngah chuan an ûm lût ta a. 24 Tin, heti hi a ni a, khawfingchah veleh LALPAN Aigupta mite chu meialh ding leh chhûm dingah chuan a zuk timangang ta a. 25 An tawlailîr kete chu a thlawnsak a, an khalh chak thei ta lo va; chutichuan, Aigupta mite chuan, “Israel-hote hi i tlânsan ang u; LALPAN an lama ṭangin he mite hi Aigupta mite a dopui a nih hi,” an ti ta a. 26 Tin, LALPAN Mosia hnênah, “Aigupta mite, an tawlailîrte, an sakawr chung chuang mite chu tuiin a rawn chîm leh theihna tûrin, i kut kha tuipui chungah han phar rawh khai,” a ti a. 27 Tin, Mosian tuipui chungah chuan a kut chu a han phar a; tin, khua a vâr veleh tuipui chu a luan pângngaiin a luang leh ta a, Aigupta mite chu an tlân kîr leh lai takin. Tichuan, LALPAN Aigupta mite chu tuipui chhûngah chuan a paih thla ta a. 28 Tin, tuite chu a luang leh ta a; tichuan, tawlailîrte leh sakawr chung chuang mite, tuipuia ûm lûttu, Pharaoa sipaiho zawng zawngte lam chuan tuiin a chîm pil ta vek a; pakhat mah chhuak rêng rêng an awm hauh lo mai a. 29 Israela thlahte erawh chu tuipui chhûng lei chârah chuan an kal vek a; tin, tuite chu an ding lampangah leh an vei lampangah chuan an tân bang a lo ni ta mai a. 30 Chutiang chuan a ni, LALPAN Israel-hote chu chumi ni chuan Aigupta mite kut ata a chhanchhuah ni; tin, Israel-hote chuan Aigupta mi thite chu tuipui kamah chuan an hmu a. 31 Tin, Israel-hote chuan LALPAN Aigupta mite chunga thil ropui tak a tih chu an hmu a; tin, mipuite chuan LALPA chu an ṭih a, LALPA leh a chhiahhlawh Mosia chu an ring ta a.

Exodus 15

Mosia hla

1 Chutichuan, Mosia leh Israela thlahte chuan LALPA chawimawiin he hla hi an sa a, an sawi dual dual a: “LALPA chawimawiin hla ka sa ang, ropui takin a hneh tâk hi! Sakawr leh a chunga chuang chu tuipuiah a paih thla ta a! 2 LALPA chu ka chakna leh ka hla a ni, Ani chu ka chhandamna a lo ni ta bawk a; Ka Pathian a ni a, amah chu ka fak ang; Ka pa Pathian a ni a, amah chu ka chawimawi ang. 3 LALPA chu indo mi a ni; A hming pawh LALPA a ni. 4 Pharaoa tawlailîrte leh a sipaihote chu tuipuiah a paih thla ta a; Tin, a sipai hotu thlante pawh Tuifinriat Senah an tla hlum zo ta. 5 Tui thûk takin a chîm zo ta; Lung angin tui thûk takah an pil ta. 6 I kut ding lam chu, aw LALPA, thiltihtheihnain a ropui a, I kut ding lam chuan, aw LALPA, hmêlma chu a tisawm ta dep a. 7 I ropuina nasa tak chuan nangmah dotute chu i tiboral vek a; I thinrim i rawn hrithla a, buhpâwl ang maiin an kâng ral zo ta a. 8 I hnâra thawin tuite chu a lo intiang a, Tuite chu englo dah khâwm thûr angin a ding luah a; Tuifinriat chhûng daiha tui thûk takte chu a lo khal zo ta a. 9 Hmêlma chuan, ‘Ka ûm ang a, ka ûmphâk ngei ang, râllâk sum chu ka sem ang; Anmahniah chuan ka châk daih ka hmu tawh ang. Ka khandaih ka phawi ang a, ka kutin anmahni chu ka tiboral ang,’ a ti a. 10 I thli chu i han tlehtîr ta mai a, tuifinriatin a chîm pil ta vek a; Tui thûk takahte chuan suan angin an pil ta vang vang a. 11 Aw LALPA, pathiante zîngah hian nang ang hi tu nge awm le? Thianghlimna lama ropui leh, Fak tlâk nihna lama zahawm leh, thil makte ti ṭhîn hi nang ang tu nge awm le? 12 Nangin i kut ding lam i han phar a, Leiin anmahni chu a lem zo ta a. 13 Nangin i khawngaihnain mipui i tlante kha i hruai a; I chênna thianghlimah chuan i chaknain i hruai ta a. 14 Mi tinrêngin an hria a, an khûr thlu zo va, Philistia rama chêngte chu thlaphânnain a man ta. 15 Tichuan, Edom rama hotute chuan mak an ti hle a; Moab mi chakte chu khurhnain a rawn man a; Kanaan rama awm zawng zawngte chu an tui zo ta. 16 ṭihna leh hlauhnain a tlâkbuak a; I bân chaknain lung ang maiin a tingawi hle hle a, Aw LALPA, i mite an kai vek hma loh chuan, Mi i leite an kai vek hma loh chuan. 17 Nangin anmahni chu i hruai lût ang a, i ro luah tlângah chuan i phun ang, Aw LALPA, nangin i awmna tûra hmun i buatsaihah chuan, Aw LALPA, hmun thianghlim i kut ngeiin a lo dinnaah chuan. 18 LALPA chuan chatuanin ro a rêl tawh ang,” tiin.

Miriami hla

19 Pharaoa sakawrte chu a tawlailîrte chawpin a sakawr chung chuang mite nên chuan tuipuiah an lût thla a, LALPAN tuifinriat tuite chuan a vûr ta a; Israela thlahte erawh chu tuipui chhûng lei chârah chuan an kal vek a. 20 Tin, zâwlnei Miriami, Arona farnuin khuangtê a keng a; tin, hmeichhia zawng zawngin khuangtê kenga lâmin an zui chhuak ve ta hlawm a. 21 Tin, Miriami chuan, “LALPA chawimawiin hla sa rawh u, ropui takin a hneh tâk hi! Sakawr leh a chunga chuang chawpin tuipuiah a paih thla ta a,” tiin hlain a hruai a.

Tui khâ

22 Tichuan, Mosian Israel-hote chu Tuifinriat Sen ata a hruai chhuak a, Sur thlalêr lam panin an chhuak ta a; tin, thlalêrah chuan ni thum zet an kal a, tui an hmu zo ta lo va. 23 Tin, Mara hmun an va thleng a, Mara hmuna tuite chu a lo khâk avâng chuan an in thei lo va; chu vâng chuan a hmingah Mara vuah a ni. 24 Tichuan, mipuite chu, “Eng nge ni kan in dâwn le?” tiin Mosia chungah an phunnawi ta a. 25 Tin, ani chuan LALPA chu a au va; tin, LALPA chuan thing pakhat hi a han kawhhmuh a, chu chu tuiah chuan a zuk paih lût a; tichuan, tui chu a lo tui ta a. Chutah chuan thuruat leh rorêlna a siamsak a; chutah chuan anmahni fiahna a siam a, 26 “LALPA i Pathian aw hi ngun taka i ngaihthlâka, a mit hmuha ṭha a tih zâwngte i tiha, a thupêkte i ngaihsâna, a thuruat zawng zawngte i pawm chuan, Aigupta mite chunga hri ka lêntîr tâk angte kha i chungah rêng rêng ka lêntîr ve lo vang. Kei LALPA a tidamtu che ka nih hi,” a ti a. 27 Tin, Elim hmun an va thleng a, chutah chuan tuihna nei sâwm leh pahnih leh tûm thing sawmsarih a awm a; tin, chuta tui kamahte chuan an riak ta a.

Exodus 16

Manna leh vahmîm

1 Tin, Elim hmun ata chu an chhuak a, tin, Israela thlahte pung khâwmho zawng zawng chuan Aigupta ram ata an chhuah achin thla hnihna, ni sâwm leh ni nga niin Elim hmun leh Sinai tlâng inkâra Sin thlalêr an va thleng a. 2 Tin, thlalêrah chuan Israela thlahte pung khâwmho zawng zawng chu Mosia chungah leh Arona chungah an lo phunnawi ta a. 3 Tin, Israela thlahte chuan an hnênah, “Aigupta rama sa bêl bula kan ṭhut lai te leh chhang khamkhawp kan ei lai te khân LALPA kutah lo thi ta zâwk mai ila aw! Mipui pung khâwmho zawng zawngte hi thlalêrah hian rilṭâma tihhlum tûrin min hruai chhuak a nih hi le,” an ti a. 4 Chutichuan, LALPAN Mosia hnênah, “Ngai rawh, vân aṭangin in tân chhang ka rawn sûrtîr ang e; tichuan, mipuiten ni tin ni khat atâna chanvo tâwk chauh zêl chu va chhar ṭhîn rawh se, ka dân an zâwm nge zâwm lo ka fiah theih nân. 5 Tin, heti hi a ni ang a, a ni ruk ni chuan an va chhara chu an buatsaih ang a; tin, ni tina an chhar leh hnih zêl a ni ang,” a ti a. 6 Tin, Mosia leh Aronan Israela thlahte zawng zawng hnênah chuan, “Tlai lamah chuan LALPA chu Aigupta ram ata hruai chhuaktu ngei che u a ni tih in hre dâwn e. 7 Tin, zîngah pawh LALPA ropuina chu in hmu dâwn e; LALPA chunga in phunnawina kha a lo hriat tâk hi. Keinite chu eng nge kan niha, kan chunga in phunnawi mai ni?” an ti a. 8 Tin, Mosian, “Chûng chu in la hria ang, LALPAN tlai lama sa ei tûr a pêk che ua, zîng lama chhang kham khawp a pêk hunah che u chuan; LALPA chuan a chunga in phunnawina kha a hre reng si a. Keinite chu eng nge kan nih ni? Kan chunga phunnawi in ni hlei nêm, LALPA chunga phunnawi asin in nih ni,” a ti a. 9 Tin, Mosian Arona hnênah, “Israela thlah pung khâwm zawng zawng hnênah hian, ‘LALPA kiang hnaiah lo kal rawh u, in phunnawinate kha a lo hriat tâk hi,’ ti ang che,” a ti a. 10 Tin, heti hi a ni a, Israela thlah pung khâwm zawng zawng hnêna Aronan thu a sawi lai tak chuan, thlalêr lam chu an han thlîr a; ngai teh, LALPA ropuina chu chhûmah a lo lang ta a. 11 Tin, LALPAN Mosia a bia a, 12 “Israela thlahte phunnawinate kha ka lo hria a. An hnênah, ‘Tlai lamah chuan sa in ei ang a, a tûkah chuan chhang kham khawp zetin in ei tawh ang. Tichuan, kei hi LALPA in Pathian chu ka ni tih in hria ang, a ti e,’ ti ang che,” tiin. 13 Tin, heti hi a ni a, tlai lamah chuan vahmîm an lo thlâwk chho chiam a, an riahhmun chu a dâp ta dul a; tin, a tûkah chuan an riahhmun vêlah chuan dai a lo tla dup a. 14 Tin, dai tla chu a han hul veleh chuan, ngai teh, thlalêr lei chungah chuan thil pêr tê tê, vûr thal tiat lek lek tê hi a lo awm tuar mai a. 15 Chu chu Israela thlahten an han hmuh chuan, “Eng nge maw ni chu le?” an ti hlawm a; eng nge ni tih an hre si lo va. Tin, Mosian an hnênah, “LALPAN chhang in ei atâna a pêk che u a nih hi. 16 Hei hi a ni LALPAN, ‘Mi tinin mahni kham khawp ṭheuh chhar ulangin, mi pakhat tân omer khat zêl, in chhûngkaw mihring awm zât ang zêlin in chhar tûr a ni; mi tinin in puan in chhûnga awmte tân chuan in chhar tûr a ni,’ tia thu a pêk chu ni,” a ti a. 17 Tin, Israela thlahte chuan chutiang chuan an ti a, ṭhenkhatin an chhar tam a, ṭhenkhatin an chhar tlêm a. 18 Tin, omer-in an han teh a, a chhar tamin a chuangin a nei lo va, a chhar tlêmin a tlachham hek lo; mi tinin mahni kham tâwk an chhar ṭheuh va. 19 Tin, Mosian an hnênah, “Tu mahin a tûk lam atân chuan khêk suh ang che u,” a ti a. 20 Nimahsela, Mosia thu chu an pawm duh lo va. ṭhenkhat chuan a tûk lam atân an khêk a; tichuan, a lo lung a, a lo rimchhe ta a. Chuvângin, Mosia chu an chungah a thinrim ta hle a. 21 Chutichuan, tûk tin mi tinin mahni kham khawp lek zêlin an chhar ṭhîn a; ni a lo tlângsân veleh a tui ral vek ṭhîn a. 22 Tin, heti hi a ni a, a ni ruk ni chuan chhang chu a leh hnih, mi pakhat tân omer hnih zêl an chhar a. Tin, chûng pung khâwmho rorêltu zawng zawngte chuan Mosia an va hrilh a. 23 Tin, ani chuan an hnênah, “Chu chu alâwm LALPAN, ‘Naktûk hi chawlh dêr ni, LALPA tâna Chawlhni thianghlim a ni e,’ a tih chu. Chuvângin, a âwma âwm in duh leh âwm ulangin, a chhuma chhum in duh leh chhûm rawh u; chumi bâng chu a tûk lam atân in dah dâwn nia,” a ti a. 24 Tin, Mosia hrilh ang chuan a tûk lam atân an dah hrang ta a; chu chu a rimchhe lo va, a lung hek lo. 25 Tichuan, Mosian, “Vawiin chuan hei hi ei rawh u, vawiin hi LALPA tân Chawlhni a nih hi; vawiinah zawng leia tla in hmu lo vang. 26 Ni ruk chhûng chuan in va chhar ṭhîn ang a; a ni sarih ni erawh chu Chawlhni a ni a, chhar tûr rêng rêng a awm lo vang,” a ti a. 27 Tin, heti hi a ni a, a ni sarih ni chuan mi ṭhenkhat chu chhar tûrin an va chhuak a, chhar tûr rêng rêng an hmu zo ta lo va. 28 Tichuan, LALPAN Mosia hnênah, “Ka thupêkte leh ka dânte hi eng chen nge maw pawm duh loh in tum ni aw! 29 LALPAN Chawlhni a pêk che u hi hre ta che u maw le! Chuvângin, ni ruk niin ni hnih tla tâwk tûr chhang a pe che u a nih hi. Mi tin mahni hmun ṭheuhvah awm hle hle mai rawh u; ni sarih ni chuan tu mah an awmna hmun ata chhuak hauh suh se,” a ti a. 30 Chutichuan, mite chu ni sarih ni chuan an châwl ta a. 31 Tin, Israela chhûngte chuan chumi hmingah chuan Manna an vuah a. Koriander mu ang maia vâr ser a ni a; han ei chuan chhangpêr, khawizu nêna siam ang a ni. 32 Tin, Mosian, “Hei hi alâwm LALPAN, ‘Hei hi in thlahte thlengin omer khat vawng ṭha rawh u; Aigupta ram ata ka hruai chhuah lai che ua, thlalêra ka châwm ṭhinna che u chhang chu an rawn hmuh theih nân,’ tia thu a pêk chu,” a ti a. 33 Chutichuan, Mosian Arona hnênah, “Bêl va la langin, manna hi omer khat khung rawh, in thlahte thlenga vawn reng tûrin LALPA hmaah dah ang che,” a ti a. 34 LALPAN Mosia thu a pêk ang chuan Arona chuan vawn reng tûrin Thuhriattîrna hmaah chuan a dah a. 35 Israela thlahte chuan mihring chênna ram an thlen hma loh chuan, kum sawmli chhûng chu manna an ei ṭhîn. 36 Omer khat hi epha hmun sâwma ṭhena hmun khat hu a ni.

Exodus 17

Lungpui ata tui

1 Tin, Israela thlahte pung khâwmho zawng zawng chu Sin thlalêr ata an chhuak leh a, LALPA thupêk angin riah bi nei thliah thliaha riakin, Rephidim-ah an inkhuar a; amaherawhchu, chutah chuan mipuite in tûr tui a awm ta lo va. 2 Chuvângin, mipuite chuan Mosia chu an bei ta a, “Tui in tûr min pe rawh,” an ti a. Tin, Mosian an hnênah, “Engati nge mi beih mai? Eng vângin nge LALPA in fiah ni?” a ti a. 3 Chutah chuan mipuite chu tuihâlin an awm a ni a; tichuan, mipuite chu Mosia chungah an phunnawi a, “Eng vângin nge kan fanaute leh kan rante nên hian tuihâla tihhlum tûrin Aigupta ata min hruai chhuah ni?” an ti a. 4 Tin, Mosian, “Hêng mipuihote hi engtin nge ka tih ang? Lunga mi den hlum hial pawh an duh âwm hi,” tiin LALPA chu a au va. 5 Tin, LALPAN Mosia hnênah, “Mipuiho hma lamah kal langin, Israela thlahte upaho ṭhenkhat hruai ve ang che; tin, i tiang, hmâna lui i vuakna kha keng langin, kal rawh. 6 Ngai teh, Horeb-a lungpui chungah sâwn i hmaah ka lo ding ang a; tin, lungpui chu i han vua ang a; tichuan, mipuite in tûr tui chu a lo luang chhuak mai ang,” a ti a. Tin, Mosian Israela thlahte upaho mit hmuhah chuan chutiang chuan a han ti a. 7 Chumi hmun hmingah chuan Masa leh Meriba a vuah a; Israela thlahten an beih avâng leh, “Kan zîngah hian LALPA chu a awm nge maw awm lo le?” tia LALPA chu an fiah avângin.

Amalek-hote nêna inbeih

8 Tin, Rephidim hmunah chuan Amalek-hovin Israel-ho chu an rawn bei ta a. 9 Chutichuan, Mosian Josua hnênah, “Kan zînga mi hi thlang chhuak la, Amalek-ho hi va bei rawh u khai. Naktûkah tlâng chhîpah khian Pathian tiang kengin ka lo ding ang e,” a ti a. 10 Tichuan, Mosian a hnêna a sawi ang chuan Josua chuan a ti a, Amalek-ho chu a va bei ta a. Tin, Mosia leh Arona leh Hura chu tlâng chhîpah an han lâwn a. 11 Tin, heti hi a ni a, Mosian a bân a phar veleh Israel-hote chuan an hneh ṭhîn a; a bân a lâk thlâk veleh Amalek-hote chu an chak ṭhîn a. 12 Nimahsela, Mosia bânte chu a lo kham ta a; tichuan, lung an la a, a bulah chuan an dah a, chutah chuan a ṭhu ta a. Tin, Arona leh Hura chuan a kut chu an dâwmsak ta a, pakhatin lehlam a dâwm a, pakhatin a lehlam a dâwm a; chutichuan, ni tlâk thlengin a kutte chu a awm ngaiin a awm ta tlat a. 13 Tin, Josua chuan Amaleka leh a hote chu khandaih hriamin a tudawl ta a. 14 Tin, LALPAN Mosia hnênah, “Hemi thu hi hriat reng atân lehkhabuah ziak la, Josua hriatah sawi chhuak ṭhîn ang che; vân hnuaiah hian Amalek-ho hi an awm tih pawh hriat loh khawpin ka tichimit hlauh dâwn e,” a ti a. 15 Tin, Mosian maichâm a siam a, a hmingah chuan Jehova-nisi a vuah a; 16 “LALPAN chhia a chham ta: LALPAN chhuan awm chhûng zawng zawng chuan Amalek-ho chu a do vang,” a ti a.

Exodus 18

Jethroan Mosia a tlawh

1 Tin, Jethroa, Midian rama puithiam, Mosia puzawn chuan Pathianin Mosia leh a mi Israel-hote thil a tihsakzia zawng zawngte leh, LALPAN Israel-hote chu Aigupta ram ata a hruai chhuah ziate chu a lo hria a. 2-3 Tin, Mosia puzawn Jethroa chuan Mosia nupui Zipori, Mosian a hâwntîr kha, a fapate pahnih nên a hruai a; chu mi pakhat hming chu Gersoma a ni a, “Mi rama awm ka nih avângin,” a ti a; 4 tin, pakhata hming chu Eliezera a ni, “Ka pa Pathian chu mi ṭanpuitu a ni a, Pharaoa khandaih lak ata chu mi chhanhim tâk avângin,” a ti a; 5 tin, Mosia puzawn Jethroa chu Mosia fapate leh a nupui nên, Mosia hnênah thlalêra a riahna Pathian tlângah chuan an va kal a. 6 Tin, ani chuan Mosia hnênah, “Kei i puzawn Jethroa hi i nupui nên, i fa pahnih nên kan lo kal e,” a ti a. 7 Tin, Mosia chu a puzawn hmuak tûrin a va chhuak a, chibai a va bûk a. Chanchin te an inzâwt a; tichuan, puan inah an lût ta a. 8 Tin, LALPAN Israel-ho avânga Pharaoa leh Aigupta-hote chunga a tih zia zawng zawngte leh, kawnglaka hrehawm an tuarzia zawng zawngte leh, LALPAN anmahni a chhanhimzia te chu Mosia chuan a puzawn chu a hrilh a. 9 Tin, LALPAN Israel-hote chu Aigupta-ho lak ata a chhanhima, anmahni thil a lo tihsak tâkzia leh, an chunga a ṭhatna zawng zawng avângte chuan Jethroa chu a lâwm êm êm mai a. 10 Tin, Jethroa chuan, “LALPA, Aigupta-ho lak ata leh Pharaoa lak ata chhanhimtu che u chu fakin awm rawh se; ani chuan Aigupta-ho thuhnuaia awm mipuite chu a chhanhim tâk hi. 11 Tûnah chuan LALPA chu pathian dang zawng zawngte ai chuan a ropui zâwk tih ka hre ta; a ni, Israel-te laka chapo takte chungah chuan a lo lang a ni,” a ti a. 12 Tin, Mosia puzawn Jethroa chuan hâlral thilhlan leh Pathian tâna inthawina tûrte a va la a; tin, Arona leh Israel upaho zawng zawngte chu Mosia puzawn hnênah chuan Pathian hmaah chhang ei tûrin an kal a.

Rorêl tûr mi ruat

13 Tin, heti hi a ni a, a tûkah chuan Mosia chu mipuite ro rêl tûrin a ṭhu a; tin, mipuite chu zîng ata tlai thlengin Mosia kiang vêlah chuan an ding reng a. 14 Tin, Mosia puzawnin chutia mipuite tâna thil a tih zawng zawng chu a han hmuh chuan, “Mipuite hi thil eng nge maw i tihsak chu le? Engtizia nge nangmah chauh hi i ṭhut renga, zîng ata tawh tlai thlenga mipui zawng zawngte hi i kiang vêla an din reng?” a ti a. 15 Tin, Mosian a puzawn hnênah, “Mipuite hi Pathian râwn tûrin ka hnênah an lo kal a ni ber e. 16 Thu eng emaw an neih chuan ka hnênah hian an lo kal ṭhîn a; tichuan, keiin a ṭhenawmpa nêna an thu chu ka lo rêlsak a; tin, Pathian remruat leh a dânte chu ka lo hriattîr ṭhîn a ni,” a ti a. 17 Tin, Mosia puzawn chuan a hnênah, “I thiltih dân chu a ṭha lo a ni. 18 Nang leh hêng i hnêna mipui awmte hi in intichau zo ngei ang maw le. He hna hi i tân a hautak lutuk a ni; nangmah chauhva han tlin chi a ni hlei nêm. 19 Ka thu hi ngaithla teh khai; rem ka han ruatpui ang chia, i hnênah Pathian awm rawh se: nang hi Pathian hmaah mipui aiawhin awm langin, an thubuaite chu Pathian hnênah thlen ang che. 20 Tin, thuruatte leh dân chu i zirtîr ang a, an awm dân tûr leh an tih dân tûrte chu i kawhhmuh zêl tûr a ni. 21 Chu bâkah, mipui zîng ata mi hman tlâk deuh deuh, Pathian ṭih mite, mi dik takte, hlâwkna dik lo tak haw mite thlang chhuak langin; chutiang mite chu sâng pâwl chunga hotuah te, za pâwl chunga hotuah te, sawmnga pâwl chunga hotuah te, sâwm pâwl chunga hotuah te i ruat dâwn nia. 22 Chûngte chuan eng lai pawhin mite ro rêlsak rawh se. Tin, heti hi a ni ang, thu lian deuh apiang chu i hnênah an rawn thlen ṭhîn ang a, thu tê tham erawh chu anmahniin rêl rawh se. Chutichuan, i tân a lo awlsam zâwk ang a, anni chuan an chhâwk zâng hle dâwn che nia. 23 Chutianga i tiha, Pathian pawhin thu a pêk che chuan i tlin thei ang a; tichuan, hêng mipuiho zawng zawngte pawh hi lungawi takin mahni awmna lamah an ṭîn thei dâwn nia,” a ti a. 24 Chutichuan, Mosia chuan a puzawn thusawi chu a pawm a, a sawi ang zawng zawng chuan a ti ta a. 25 Tin, Mosia chuan Israel-ho zawng zawng zing ata chu mi hman tlâk deuh deuh a thlang chhuak a, mipui chunga hotuah a siam a, sâng pâwl chunga hotuah te, za pâwl chunga hotuah te, sawmnga pâwl chunga hotuah, te sâwm pâwl chunga hotuah te a ruat ta a. 26 Chûngte chuan eng lai pawhin mite ro an rêlsak ṭhîn a; thu lian deuh apiang chu Mosia hnênah an thlen ṭhîn a, thu tê tham erawh chu anmahnihovin an rêl ṭhîn. 27 Tichuan, Mosia chuan a puzawn chu a kaltîr a, a awmna ram lamah chuan a haw leh ta a.

Exodus 19

Israel-ten Sinai tlâng an thleng

1 Israela thlahte Aigupta ram ata an chhuah achin a thla thumna, chumi ni tak chuan Sinai thlalêr an thleng a. 2 Rephidim hmun ata an chhuaha, Sinai thlalêr an va thlen chuan thlalêrah chuan an riak a; chutah chuan Israel-hote chu tlâng bulah chuan an riak a. 3 Tin, Mosia chu Pathian hnênah a han chho va; tichuan, LALPA chuan tlâng aṭangin a bia a, a hnênah, “Jakoba chhûngte hnênah hetiang hian ti la, Israela thlahte hnênah pawh: 4 ‘Aigupta-hote chunga ka tih ziate leh, mupui thlaa ka put che ua, ka hnêna ka hruai thlen zia che u hi in hmu a. 5 Chuvângin, ka thu in awih takzeta, ka thuthlung hi in pawm chuan khawvêl hnam zawng zawng zîngah hian ka tân ro thlan bîk in ni ang; khawvêl pum pui hi ka ta a ni si a. 6 Tichuan, ka tân puithiam chi, hnam thianghlim in ni ang,’ tiin hrilh ang che. Hêng thu hi Israela thlahte hnêna i sawi tûr chu a ni,” a ti a. 7 Tin, Mosian mipui zînga upahote chu a ko khâwm a, LALPA thupêk zawng zawngte chu a hrilh vek a. 8 Tin, mipuiho zawng zawng chuan, “LALPA sawi zawng zawngte chu kan ti zêl ang e,” tiin a rualin an chhâng dual dual a. Tichuan, Mosian mipuite thusawi chu LALPA a hrilh lehchhâwng a. 9 Tin, LALPA chuan Mosia hnênah, “Ngai teh, ka biak lai tak che mipuiin an hriat ve theiha, kumkhuaa i thu chu an awih theihna tûrin chhûm chhah mupah i hnênah ka lo kal dâwn e,” a ti a. Tichuan, Mosian mipuite thusawi chu LALPA a hrilh lehchhâwng a. 10 Tin, LALPAN Mosia hnênah, “Mipuiho hnênah va kal la, vawiin leh naktûk hian anmahni chu tithianghlim ang che, an puante su fai sela. 11 A ni thum ni atân inpuahchah rawh se. A ni thum ni chuan mipuiho zawng zawng mit hmuhah Sinai tlângah chuan LALPA a lo chhuk dâwn e. 12 An hnênah, ‘Fîmkhur ula, tlângah khian han lâwn hauh suh ula, tlâng hmâwr pawh han dek hlek suh ang che u. Tu pawh tlâng han dek apiang chu tihhlum ngei ngei tûr an ni ang. 13 Kut rêng rêngin deh tûr a ni lo va, lunga den hlum ngei ngei tûr a ni, a nih loh leh, kah tlang tûr a ni ang; sa pawh, mihring pawh an nung lo vang,’ tiin hrilh la. Tawtawrâwt a rîk ruai ruai hunah chuan tlângah khian an lâwn chho tûr a ni, tiin mipuiho tân ri khamsak ang che,” a ti a. 14 Chutichuan, Mosia chu tlâng ata mipuiho zîngah chuan a chhuk a, mipuite chu a tithianghlim a; tin, an puante an su fai a. 15 Tin, mipuihote hnênah chuan, “A ni thum ni atân chuan inpuahchah rawh u; hmeichhe kiangah rêng rêng kal suh u,” a ti a. 16 Tin, heti hi a ni a, a ni thum ni zîngah chuan khawpuite a lo ri a, kâwlte a lo phe a, tlâng chhîpah chuan chhûm a lo zîng chhah mup a, tawtawrâwt ring êm êm maiin a lo ri a; tichuan, mipui riahhmuna awmho zawng zawng chu an khûr a. 17 Tichuan, Mosian mipuiho chu Pathian be tûrin riahhmun ata chu a hruai chhuak hlawm a; tlâng bulah chuan an ding a. 18 Tin, Sinai tlângah chuan LALPA chu meia a lo chhuk avângin a khu phui ta mup a. Chu meikhu chu rawh tuina meikhu ang maiin a khu chho ngut ngut a; tichuan, tlâng pum pui chu a nghîng dur dur a. 19 Tin, tawtawrâwt ri chu a ring telh telh a, Mosia chuan thu a han sawi a, Pathian awin a lo chhâng a. 20 Tichuan, LALPA chu Sinai tlâng, tlâng chhîpah chuan a lo chhuk a. LALPA chuan Mosia chu tlâng chhîpah a ko chho va; tichuan, Mosia chu a han chho va. 21 Tin, LALPA chuan Mosia hnênah, “Zuk chhuk langin, mipuite khu zuk zilh rawh; chuti lo zawng, LALPA hmêl hmuh tumin an lo lût tlang mai ang e, mi tam tak an boral mai tûr a nia. 22 Tin, puithiamho, LALPA kianga lo kal vete pawh chu intithianghlim ve rawh se; chuti lo zawng, an chungah LALPA chu a ṭuan mai ang,” a ti a. 23 Tin, Mosian LALPA hnênah, “Mipuiho hi Sinai tlângah hian an lo chho thei hlei nêm; nangin, ‘Tlâng vêlah hian ri khamsak la, tithianghlim ang che,’ tiin thu min pe alâwm,” a ti a. 24 Tin, LALPAN a hnênah, “Kal la, zuk chhuk tawh; tin, Arona nên lo chho leh ang che u. Amaherawhchu, puithiamho leh mipuiho chu LALPA hnêna lo kal tumin lo lût tlang mai suh se; chuti lo zawng, an chungah a ṭuan mai tûr a nia,” a ti a. 25 Chutichuan, Mosia chu mipuite hnênah chuan a zuk kal a, chûng thu chu a zuk hrilh a.

Exodus 20

Thu sâwm pêk

1 Pathianin hêng thu zawng zawng hi a hrilh a, 2 “Kei, LALPA i Pathian, Aigupta ram ata, bawih ata hruai chhuaktu che u ka ni. 3 “Keimah lo chu pathian dang rêng rêng i nei tûr a ni lo. 4 “Milem siam chawp leh thil a anpui rêng rêng, chung lam vâna mi emaw, hnuai lam leia mi emaw, lei hnuai lama tuia mi emaw, i tân i siam tûr a ni lo; 5 chûng chu chibai i bûk tûr a ni lo va, an rawng i bâwl tûr a ni hek lo. Kei, LALPA i Pathian hi, Pathian thîkthuchhia, pate khawlohna avânga fate hrem ṭhîn, mi hawtute chu chhuan thumna leh chhuan lina thlenga hrem ṭhîn leh, 6 mi hmangaiha ka thupêkte pawmtu sâng tam takte chunga khawngaihna lantîr ṭhîn ka nih hi. 7 “LALPA i Pathian hming chu i lam mai mai tûr a ni lo; LALPA chuan a hming lam mai mai chu thiam loh chantîr lohvin a chhuah dâwn si lo va. 8 “Chawlhni hi thianghlim taka serh tûr a ni tih hre reng rawh. 9 Ni ruk chhûngin i thawk tûr a ni a, i hna zawng zawng chu i thawk tûr a ni; 10 a ni sarih ni erawh chu LALPA i Pathian tân Chawlhni a ni e. Chumi ni chuan hna rêng rêng i thawk tûr a ni lo: nang pawhin, i fapa pawhin, i fanu pawhin, i bawihpa pawhin, i bawihnu pawhin, i ran pawhin, i ina hnam dang pawhin. 11 Ni ruk chhûngin LALPAN lei leh vân te, tuifinriat leh a chhûnga awm zawng zawngte chu a siam a; tin, a ni sarih ni chuan a châwl ta si a. Chuvângin, LALPAN Chawlhni chu mal a sâwm a, a tithianghlim ta a ni. 12 “I nu leh i pa chawimawi rawh; tichuan, LALPA i Pathianin ram a pêkah che hian i dam rei dâwn nia. 13 “Tual i that tûr a ni lo. 14 “I uire tûr a ni lo. 15 “I ru tûr a ni lo. 16 “I vêngte chungah hretu derah i insiam tûr a ni lo. 17 “I vêngte chhûngte chu i awt tûr a ni lo va, i vêngte nupui chu i awt tûr a ni lo, a bawihpa emaw, a bawihnu emaw, a bâwngpa emaw, a sabengtung emaw, i vêngte ta rêng rêng chu eng mah i awt tûr a ni lo,” tiin.

Mipui an thlabâr

18 Tin, mipui zawng zawngte chuan khawpui ri te, kâwlphe te, tawtawrâwt ri te, tlâng khu te chu an hmu a; tin, mipuiin an han hmuh chuan an khûr a, hla takah an ding ta a. 19 Tichuan, Mosia hnênah, “Nangmân kan hnênah hian thu sawi zâwk teh khai, kan lo ngaithla ang e; amaherawhchu, Pathian zawngin kan hnênah thu sawi tawh teh suh se; chuti lo zawng, kan thi mai dah ang e,” an ti a. 20 Tin, Mosia chuan mipuite hnênah chuan, “Hlau suh u; Pathianin a rawn fiah che u a nih hi, in mit hmuhah ṭihbaiawma a awmna hi in sual lohna tûrin a ni e,” a ti a. 21 Tin, mipuite chu hla takah an la ding reng a, Mosia chuan Pathian awmna thim chhah mup kiang chu a va pan a.

Maichâm siam dân tûr

22 Chutichuan, LALPAN Mosia hnênah, “Israela thlahte hnênah hetiang hian va sawi rawh: ‘Nangmahni ngeiin hei vân aṭanga ka rawn biakzia che u in hre tawh a. 23 Pathian dang rêng rêng chu ka kiangah chuan in rawn nei tûr a ni lo; tangkaraw pathiante emaw, rangkachak pathiante emaw in tân in siam tûr a ni lo. 24 Ka tân lei maichâm i siam tûr a ni a, chutah chuan i berâmte leh i sebâwngte chu i hâlral thilhlanahte leh i remna inthawi nânte i hlân ṭhîn tûr a ni. Hmun tinah ka hming ka hriattîrna apiangah chuan i hnênah ka lo kal ṭhîn ang a, mal ka rawn sâwm ṭhîn ang che. 25 Tin, lung maichâm mi siamsak dâwn chuan lung chherin i siam tûr a ni lo ve; i hriamhrei chu i hman hlauh zawngin i tibawlhhlawh a ni dâwn si a. 26 Ka maichâm lâwn chhohna rahkaahte chuan lâwn pawh i lâwn chho tûr a ni lo ve, saruaka i awm a lan lohna tûrin,’ tiin.

Exodus 21

Bawih neih dân tûr

1 “Tichuan, hêngte hi a ni an hnêna rorêl dân tûr i hriattîr tûrte chu: 2 “Hebrai mi, chhiahhlawhah lo lei ang la, kum ruk rawng a bâwl ang a; tin, a kum sarih kum chuan intlan lo pawhin a chhuak mai thei ang. 3 Amah ngawta lo lût a nih chuan amah ngawtin a chhuak leh mai ang; nupui nei a nih chuan a nupui pawh chu a chhuak tel ve bawk ang. 4 A puin nupui lo neihsak sela; tin, fanu emaw, fapa emaw lo hrinsak sela; a nupui leh a fate chu a pu ta an ni ang a, ani erawh chu amah ngawtin a chhuak tûr a ni. 5 Amaherawhchu, bawih chuan, ‘Ka pu te, ka nupui te, ka fa te hi ka hmangaih êm mai a; ka chhuak duh lo ve,’ a tih tlat chuan, 6 a puin Pathian hnênah hruai sela, kawngkâah emaw, kawngka biangah emaw hruai sela, a puin a beng chu thir zumin vit sela; tichuan, kumkhuain a rawng a bâwl tawh ang. 7 “Miin a fanu chu bawihnu atân hralh sela, chhiahhlawh mipate ang chuan a chhuak ve lo vang. 8 A pu chuan a nupui atân lo hual sela, ani chuan a pu chu lo tilâwm leh thei ta si lo sela, a intlantîr leh tûr a ni, a lo bum avâng chuan hnam dangte hnêna zawrh leh theihna a nei hlek lo vang. 9 Tin, a fapa tâna nupuia hualsak duh a nih chuan, fanute en ang bawkin a en tûr a ni. 10 Nupui dang lo nei leh mah sela, a ei tûr sa te, a silhfên te, a nupui a nihna te kha a tihlêm chuansak tûr a ni lo ve. 11 Chu thil kawng thum chu a tih loh chuan tangka pe lovin a chhuak mai thei ang.

Invuak hlum chungchâng rêl dân tûr

12 “Tu pawhin mi lo vua sela, chu mi chu thi ta sela, tihhlum ve ngei ngei tûr a ni. 13 Tin, miin tum rêng vâng ni lova, Pathian chaltawhtîr a nih erawh chuan, a tlân luhna tûr hmun ka ruatsak ang che. 14 Amaherawhchu, miin tum lui rêngin a ṭhenawm chu fin vervêkin thah tum sela, thi tûrin ka maichâm ata chu hruai ang che. 15 “Tu pawh a nu emaw, a pa emaw vua apiang chu tihhlum ngei tûr a ni. 16 “Tu pawh mihring rua zuar emaw, a la kawl lai ngei emaw an hmuh chuan, chu mi chu tihhlum ngei tûr a ni. 17 “Tu pawh a nu emaw, a pa emaw ânchhia lawh apiang chu tihhlum ngei tûr a ni. 18 “Tin, mi lo inhnial sela, pakhat chuan lungtumin chhu sela emaw, a kuttumin chûm sela emaw, thih chu thi lo sela, amaherawhchu khumbetin tlûk phah sela, 19 lo tho leh theiin tiang hawlin lo kal leh thei sela, a kut thlâktua chu chhuah tûr a ni. A hun sên hu kha erawh chu a rûl ang a, a dam feltîr viah tûr a ni. 20 “Tin, miin a chhiahhlawh emaw, a bawihnu emaw tiangin vua sela, a kutah chuan lo thi ta sela, amah chu hrem ngei tûr a ni. 21 Amaherawhchu, ni khat emaw, ni hnih emaw dam sela, hrem tûr a ni lo vang; a chhiahhlawh chu a sum leh pai a ni si a. 22 “Tin, mi lo insual ta sela, hmeichhe nau pai vaw palh ang sela, a nau pai chu lo tla sela, chhiatna dang erawh chu awm lo sela, chu hmeichhe pasalin a ngen zât chu chawitîr ngei tûr a ni a; rorêltute ruat ang zât chu a pe tûr a ni. 23 Amaherawhchu, chhiatna dang lo awm sela chuan nun aia nun, 24 mit aia mit, hâ aia hâ, kut aia kut, ke aia ke, 25 tihkan aia tihkan, hliam aia hliam, vuak aia vuak i tuartîr tûr a ni. 26 “Tin, miin a chhiahhlawh mit emaw, a bawihnu mit emaw vuain, lo tichhe ta sela, a mit avâng chuan a chhuahtîr tûr a ni. 27 Tin, a bawihpa hâ emaw, a bawihnu hâ emaw lo vuak balsak sela, a hâ avâng chuan a chhuahtîr tûr a ni.

Ran pawi khawih a neitu mawhphurhna

28 “Tin, sebâwngpain mipa emaw, hmeichhia emaw lo si hlum ta sela, chu sebâwngpa chu lunga den hlum ngei tûr a ni a, a sa chu ei tûr a ni lo; sebâwngpa neitua erawh chu hrem loh tûr a ni. 29 Amaherawhchu, sebâwngpa chuan tûn hma pawhin mi sîk lo hmang ṭhîn sela, a neitu chu lo hriattîr tawh bawk sela; nimahsela, khung duh chuang lovin, mipa emaw, hmeichhia emaw lo si hlum ta sela, chu sebâwngpa chu lunga den hlum tûr a ni a, a neitu pawh chu tihhlum bawk tûr a ni. 30 A tlana tlan tûrin lo tuk zâwk sela erawh chuan, a nunna aiah chuan an tuk zât apiang chu tlan nân pêk tûr a ni. 31 Mi fapa emaw, mi fanu emaw pawh lo si hlum ni sela, hetiang dân bawk hian rêl tûr a ni. 32 Sebâwngpain bawihpa emaw, bawihnu emaw lo si hlum ta sela, an pu chu tangka sekel sawmthum a pe ang a; tin, sebâwngpa chu lunga den hlum tûr a ni ang. 33 “Tin, miin khuarkhurum chhîn lo hawng sela emaw, miin khuarkhurum lo siam sela emaw, lo chhîn lo sela, sebâwngpa emaw, sabengtung emaw lo tla ta sela, 34 chu khuarkhurum neitu chuan a rûl tûr a ni; ani chuan chûng ran neitu chu tangka a pe ang a, anin ran thi chu a ruang a hlâwm thung ang. 35 “Tin, mi pakhat sebâwngpain mi sebâwngpa lo si hlum sela, sebâwngpa dam zâwk chu an zuar ang a, a man chu an insem ang; tin, a thia pawh chu an insem ang. 36 Sebâwngpa chuan tûn hma pawhin mi sîk lo hmang ṭhîn sela, a neitu chuan khung duh si lo sela, sebâwngpa aiah chuan sebâwngpa vêk chu a pe ngei ngei tûr a ni a; tin, ran thi ruang chu a hlâwm ang.

Exodus 22

Thubuai chi hrang hrang chungchânga dân

1 “Tin, miin sebâwngpa emaw, berâm emaw ru sela; tin, lo talhin emaw, lo zuar emaw ta sela, sebâwngpa pakhat aiah chuan sebâwngpa panga a chawi ang a, berâm pakhat aiah chuan berâm pali a chawi ang. 2 Rûkru, mi ina lût chu lo manin lo vaw hlum ta sela, a vaw hlumtu chu a thisen chhuah ve tûr a ni lo ve. 3 Niin a rawn chhuah hnan hman erawh chuan a thisen chhuah ve tûr a ni ang (Rûkru chuan kim takin a pe kîr leh tûr a ni; pêk tûr a neih loh erawh chuan rûk a rûk avângin amah chu an zuar tûr a ni). 4 Rûkruin a thil rûk - sebâwngpa emaw, sabengtung emaw, berâm emaw - a nungin lo la nei reng sela, a leh hnih a chawi tûr a ni. 5 “Miin mi lovah emaw, mi grêp huanah emaw a ran thlahin an huan thlai ei zawhtîr ta sela, ama lo ṭha ber emaw, ama grêp huan ṭha ber emawin a rûl leh tûr a ni. 6 “Mei chhuahin hlîng ṭawmte emaw lo manin, buhphalte emaw, buh ding lai emaw, lo emaw lo kâng ta vek sela, mei chhuahtu ngeia chuan a rûl ngei tûr a ni. 7 “Miin a tangka emaw, a bungrua emaw a ṭhenawm vawntîr sela; tin, chumi in ata chu miin lo ru ta sela, rûkru chu an man chuan a leh hnih a chawi tûr a ni. 8 Rûkru chu an man si loh chuan, chumi in neitupa chu Pathian kiangah va kal sela, a ṭhenawmpa bungrua chu aman a lo lâk a nih leh nih loh va fiah rawh se, 9 Bawhchhiatna tawh phawt chu sebâwngpa thu-ah emaw, sabengtung thu-ah emaw, berâm thu-ah emaw, silhfên thu-ah emaw, thil eng pawh bo chungchâng thu-ah rêng rêng - miin, ‘Hei chu ka ta a ni,’ lo ti ta sela, an pahniha thubuai chu Pathian hnênah thlen tûr a ni; Pathianin thiam loh a chantîr zâwk apiang chuan a ṭhenawmpa lakah chuan a leh hnih a chawi ang. 10 “Miin sabengtung emaw, sebâwngpa emaw, berâm emaw, ran eng pawh a ṭhenawmpa lo enkawltîr sela; tin, lo thiin emaw, lo silin emaw, suamin emaw lo awm sela, tu mân hmu si suh sela, 11 ani chuan a ṭhenawmpa ran chu a khawih leh khawih loh thu-ah, an pahniha kârah chuan LALPA hming chhâlin chhia a chham tûr a ni; tichuan, a neitu chuan chu chu a lo pawm ang a, ani chuan a rûl lo vang. 12 Amaherawhchu, rûksak ngei a nih chuan a neitu chu a rûl tûr a ni. 13 Sain seh sela, a them chu hriattîr nân rawn keng rawh se; chumi sa seh ai chu a rûl tûr a ni lo. 14 “Miin a ṭhenawmpa ran lo hawhsak sela, lo silin emaw, lo thi emaw ta sela, tin, a neitupa chu awm lo sela, a rûl ngei tûr a ni. 15 A neitupa chu a awm ve reng erawh chuan a rûl tûr a ni lo. Man chawia hawh a nih erawh chuan an inhawh dân athu thu a ni ang.

Nun mawi leh inthawi chungchâng

16 “Miin nula, nupuia la hual loh chu lo thlêmin lo mutpui sela, a man pein a nupui atân a nei ngei tûr a ni. 17 A pain a neihtîr phal lul loh chuan nula man zah sum chu a pe rêng rêng tûr a ni. 18 “Dawithiamnu rêng rêng i zuah tûr a ni lo. 19 “Tu pawh ran mutpui apiang chu tihhlum ngei tûr a ni. 20 “Tu pawh LALPA hnênah chauh tih loh, pathian dang rêng rêng hnêna inthawi chu tihboral hlauh tûr a ni. 21 Hnam dang i sawisa tûr a ni lo va, i hnehchhiah tûr a ni hek lo; nangni pawh Aigupta ramah khân hnam dang in nih kha. 22 “Hmeithai emaw, fahrah emaw in tirethei tûr a ni lo. 23 Anmahni chu in tihretheih vaiha, mi rawn auh phawt chuan, an mi auhna aw chu ka lo ngaithla ngei ang a; 24 tichuan, ka thinur chu a ling phut mai ang a, khandaihin ka rawn tihlum ang che u; tin, in nupuite chu hmeithai an ni ang a, in fate pawh fahrahin an awm mai ang. 25 “Ka miteho zînga mi in hnêna awm, retheite tangka i pûktîr chuan i leibatu angah i ngai tûr a ni lo va; a lakah a pung i phût tûr a ni hek lo. 26 I ṭhenawm silhfên chu lo hrênsak ta ang la, ni tlâk hmain i pe leh tûr a ni. 27 Inthuam nâna a neih chhun a ni a, a taksa tihlum nâna a puan a ni si a. Eng sinin nge a mut ang? Tin, heti hi a ni ang a, mi rawn auh chuan ka lo ngaithla ngei ang; kei zawng mi khawngaih thei tak ka ni si a. 28 “Pathian chu i hau tûr a ni lo va, i mite zînga rorêltute chu ânchhia i lawh tûr a ni hek lo. 29 I thlai thar hmasa ber leh i uain tui tla hmasa ber chu i hlân var tûr a ni. I fapa upa ber chu mi pe tûr a ni. 30 Chutiang bawkin i sebâwngpate leh i berâmte pawh chu i ti tûr a ni. Ni sarih chu a pui hnênah a awm ang a; a ni riat ni chuan mi pe tûr a ni. 31 Tin, ka tân mi thianghlim in ni tûr a ni. Rama sa seh rêng rêngte chu in ei tûr a ni lo va; ui hnênah in theh mai tûr a ni.

Exodus 23

Hleih nei lova dik taka rorêl

1 “Thuthang dik lo chu i sawi chhâwng mai mai tûr a ni lo. Hretu fel lo tak nihna tûrin mi suaksual zîngah chuan i kut chu rawlh ve suh. 2 Thil sual tih tumin mipui chu i zui tûr a ni lo va; thubuaiah pawh a tam lam, a dik lo zâwk lamah chuan i ṭang ve mai tûr a ni hek lo. 3 Mi rethei pawh a thubuaiah i ṭan bîk tûr a ni hek lo. 4 “I hmêlma sebâwngpa emaw, a sabengtung emaw bo i hmuh chuan, a hnênah i khalh hâwnsak leh ngei tûr a ni. 5 Nangmah hawtu che sabengtung a phurin a delh beh reng i hmuhin, puih duhna rêng nei lo mah la, i pui ngei tûr a ni. 6 “I mi rethei chu a thubuaiah dik lo takin i rêlsak tûr a ni lo. 7 Thu dik lovah zawng inthiarfihlîm daih rawh; tin, pawi sawi lo leh mi felte chu tihlum suh. Mi suaksualte chu thiam ka chantîr dâwn si lo va. 8 Tin, thamna rêng rêng i la tûr a ni lo; thamna chuan khaw hmu lai mitte hi a tihdelsak ṭhîn a, mi fel thu chu a tihkhawlohsak ṭhîn. 9 Hnam dang i hnehchhiah tûr a ni lo; nangni pawh Aigupta ramah khân hnam dang in lo nih tawh avângin hnam dang rilru put dân chu in hre si a.

Kum sarihna leh ni sarihna

10 “Kum ruk chhûng chu i lovah buh tuh tûr a ni a, chuta a hâwng apiang chu khung zêl tûr a ni; 11 a kum sarih kum erawh chuan awmtîr la, dah tui rawh; tichuan, i mi retheiten an ei ve thei ang a; tin, an lâk bâng awm apiang chu ramsaten an ei ve dâwn nia. Chutiang bawkin i grêp huan leh i olive huan pawh i ti tûr a ni. 12 Ni ruk chhûngin i hna i thawk tûr a ni a, a ni sarih ni chuan i châwl tûr a ni a; tichuan, i bâwngpa emaw, i sabengtung emaw an lo châwl thei ang a, i bawihnu fapate leh i hnam dangte pawh an lo hahdam ve thei dâwn nia. 13 Tichuan, in hnêna ka sawi zawng zawng hi ngaihven ula, pathian dangte hming rêng rêng chu lam suh u, in kâ aṭangin chhuah pawh chhuak suh se.

Kûtpui pathum

14 “Kum khatah vawi thum ka tân kût i nei tûr a ni. 15 Chhang dawidim telh loh kût i nei tûr a ni. Thu ka lo pêk tâk che ang khân, ni sarih chhûng chu chhang dawidim telh loh, Abib thlaa hun ruatah khân i ei tûr a ni (Khami thlaah a nih kha Aigupta ram ata i lo chhuah); tichuan, ka hmaah tu mah hi kut ruakin in lo lang tûr a ni lo; 16 tin, lova i tuh, i thawh rim rah hmasa ber, buhseng kût chu i nei tûr a ni; tin, kum ral veleh lovah i thawh rim rahte i khung vek hnuin pâwl kût i nei tûr a ni. 17 Kum khatah vawi thum i mipate zawng zawng chu LALPA Pathian hmaah an rawn inlan ṭhîn tûr a ni. 18 “Ka tân inthawina sa thisen chu chhang dawidim telh nên chuan i rawn hlân tûr a ni lo; ka tân kûtna sathau chu zankhuain, a tûk thlengin awmtîr reng tûr a ni hek lo. 19 I lova thlai thar hmasa ber chu LALPA i Pathian inah i rawn dah tûr a ni. Kêlnosa a pui hnutetuiin i chhûm tûr a ni lo.

Pathian thutiam leh a thuchah

20 “Ngai teh, kawnga vêng zêl tûr che leh, hmun ka buatsaihah chuan hruai lût tûr chein i hmaah vântirhkoh ka rawn tîr dâwn e. 21 Ama zai ngai zêl ulangin, a thusawi pawm thîn ang che u; a chungah hel suh u, in bawhchhiatnate chu a ngaidam duh dâwn si lo va; amahah chuan ka hming a awm a nia. 22 Amaherawhchu, a thusawi i pawmsak takmeuhva, ka sawi apiang i tih zêl chuan i hmêlmate hmêlma chu ka ni ve ang a, i dote dova chu ka ni ve ang. 23 Ka vântirhkoh chuan i hma a hruai zêl ang a, Amor-hote, Hit-hote, Periz-hote, Kanaan-hote, Hiv-hote, Jebus-hote awmnaah chuan a hruai ang che; anni chu ka tiboral daih dâwn e. 24 An pathiante chu chibai i bûk tûr a ni lo va, an rawng i bâwl tûr a ni hek lo an thiltih angte chu i ti ve tûr a ni hek lo; i tichimit vek tûr a ni a, an lungphunte chu i tikeh sawm vek zâwk tûr a ni. 25 Tin, LALPA in Pathian rawng chu in bâwl tûr a ni; tichuan, i chhang leh i tui chu mal a sâwm ang a; tin, in zîng ata hri hi ka tikiang daih dâwn nia. 26 I ram chhûngah hian nauchhiat leh ching rêng an awm lo vang a; i dam chhûng nite chu ka tihtlingtlâksak ang che. 27 “I hmaah chuan ka ṭihbaina ka tîr ang a, i kalna tûr rama mite zawng zawng chu ka timangang ang a; tichuan, i hmêlmate zawng zawng chu i hmaah ka tlânchhiattîr ang. 28 Tin, i hmaah khawinghal ka tîr ang a, chu chuan Hiv-hote, Kanaan-hote, Hit-hote chu i hmaah a ûm zêl ang. 29 Kum khat chhûng mai chuan ka hnawh chhuahsak lo vang che; chuti lo zawng, ram chu a lo ṭiau mai ang a, ramsate chu i tân a lo tam lutuk dah ang e. 30 I lo puna ram chu i luah khah hma chuan, zawi zawiin ka hnawh chhuahsak hret hret zâwk ang che. 31 I ramri chu Tuifinriat Sen aṭanga Philistia-ho tuipui thlengin, thlalêr aṭanga Lui thlengin ka khamsak ang che. Chumi rama awmte chu in kutah ka pe dâwn si a; tichuan, anmahni chu i hnawt chhuak tûr a ni. 32 An hnênah thu i thlung tûr a ni lo va, an pathiante hnênah pawh i thlung tûr a ni hek lo. 33 I ram chhûngah an awm tûr a ni lo; chuti lo zawng, ka chungah hian an sualtîr dah ang che. An pathiante rawng i bâwl vaih zawngin i tân thang a ni ngei dâwn a ni,” a ti a.

Exodus 24

Thuthlung nemngheh a ni

1 Tin, ani chuan Mosia hnênah, “Nang nên, Arona nên, Nadaba nên, Abihua nên, Israel upa sawmsarih nên LALPA hnênah lo chho ula, ralkhat aṭangin chibai rawn bûk ang che u. 2 Mosia chu amah chauhvin LALPA hnênah lo kal sela, anniho erawh chu lo kal hnai suh se; mipuite pawh a hnênah chuan lo chho suh se,” a ti a. 3 Tichuan, Mosia chu a zuk kal a, LALPA thu zawng zawng leh rorêl dân tûr zawng zawng chu mipui hnênah a zuk sawi a; tin, mi zawng zawng chuan, “LALPA sawi zawng zawng chu kan ti ang e,” tiin a rualin an chhâng dual dual a. 4 Tin, Mosia chuan LALPA thu zawng zawng chu a ziak vek a. Tin, a tûk zîng takah a tho va, tlâng bulah chuan maichâm a siam a; tin, lungphun sâwm leh pahnih, Israel hnam sâwm leh hnam hnih zâtin a phun bawk a. 5 Tin, Israela thlahte zînga tlangvâlte chu a tîr a, chu mite chuan LALPA tân hâlrala thilhlante an hlân a, remna inthawiin sebâwngpatein an inthawi bawk a. 6 Tin, Mosia chuan chûng thisen zâtve chu a la a, maihûnahte a dah a; tin, thisen zâtve dang chu maichâmah a theh a. 7 Tin, thuthlunna bu chu a la a, mipuite hriatah chuan a chhiar a. Anni chuan, “LALPAN a sawi zawng zawng chu kan ti zêl ang,” an ti a. 8 Chutichuan, Mosian thisen chu a la a, mipuite chu a theh a, “Hei hi LALPAN hêng thu zawng zawng chungchâng thua in hnêna thu a lo thlun tawh, thuthlunna thisen a nih hi,” a ti a. 9 Chutichuan, Mosia leh Arona leh Nadaba leh Abihua leh Israel upa sawmsarihte chu an han chho va, 10 Israela Pathian chu an han hmu a. Tin, a kephah hnuai chu sapphir lungrem ang mai, a thianzia chu vân thiang vek ang mai hi a ni a. 11 Tin, Israela thlahte zînga mi lianhote chungah chuan a kut a thlâk lo; tichuan, Pathian chu an hmu a, an eiin an in hlawm a.

Sinai tlângah Mosia a lâwn

12 Chutichuan, LALPA chuan Mosia hnênah, “Tlângah hian ka hnênah lo chho la, lo awm rawh; tichuan, mipuite i zirtîr atâna lungphêka dân leh thupêk ka ziak chu ka lo pe ang che,” a ti a. 13 Tin, Mosia leh a rawngbâwltu Josua chu an tho va; tin, Mosia chu Pathian tlângah chuan a han kal a. 14 Tin, ani chuan upate hnênah chuan, “In hnêna kan lo kal hma chuan hetah hian min lo nghâk reng ang che u. Ngai teh u, Arona leh Hura in hnêna an awm hi. Tu pawhin thubuai eng emaw in neih chuan an hnênah hian in lo kal ṭhîn dâwn nia,” a ti a. 15 Chutichuan, Mosia chu tlângah chuan a han chho va, chhûmin tlâng chu a chîm ta mup a. 16 Tin, LALPA ropuina chu Sinai tlângah chuan a awm ta reng a, chhûm chuan ni ruk chhûng chu a chîm a. Tin, a ni sarih ni chuan chhûm aṭangin Mosia chu a han ko va. 17 Tin, Israela thlahte mit hmuhah chuan LALPA ropuina lan dân chu, tlâng chhîpa thil kan ral hmang mei ang mai a ni a. 18 Tin, Mosia chu chhûm zîngah chuan a va lût a, tlângah chuan a han lâwn a. Tin, Mosia chu tlângah chuan ni sawmli leh zan sawmli a han awm a.

Exodus 25

Biakbûk atâna thilhlan

1 Tin, LALPAN Mosia chu a bia a, 2 “Israela thlahte hnênah thu va sawi la, ka hnênah thil rawn hlân rawh se. An thinlunga châk taka pe apiangte pêk chu ka tâna thilhlanah in la tûr a ni. 3 Hêngte hi a ni an hnên aṭanga hlan tûra in lâk tûrte chu: rangkachak te, tangkarua te, dâr te, 4 la dumpâwl te, la senduk te, la senlâr te, la zai sîn te, kêl hmul te; 5 tin, berâmpa vun chhum sen te, savun ṭha chi vun te, thingri thing te; 6 khâwnvâr atân hriak te, hriak thih mi atân leh hâl tûr rimtui tak atân englo rimtui te; 7 puithiam kawr leh kawr âwma zeh tûrin onukion-te leh lunghlute nên. 8 Tin, hmun thianghlim mi siamsak rawh se, an zînga ka chên ve theih nân. 9 Biakbûk lem leh a chhûnga bungrua tûr zawng zawng lem ka entîr ang chiah che hian in siam tûr a ni.

Thuthlung bâwm

10 “Tin, thingri thingin bâwm siam sela; a dung lam chu tawng hnih leh a chanve ni sela, a vâng lam chu tawng khat leh a chanve ni rawh se. 11 Tin, rangkachak hlîr hlak tîin i luan tûr a ni a, a chhûng leh a pâwn i luan tûr a ni a; tin, rangkachakin a tlâng i kâwm tûr a ni. 12 Chumi atân chuan rangkachak khâng pali i chhûng tûr a ni a, a ke paliah chuan vuah vek tûr a ni; chumi khâng pahnih chu a lehlamah vuah tûr a ni a, khâng pahnih chu a lehlamah vuah bawk tûr a ni. 13 Tin, thingri thingin zâwnfungte i siam tûr a ni a, rangkachak tîin luan tûr a ni. 14 Tin, bâwm chu zâwn theih tûrin a panga khângah chuan zâwnfungte chu i rawlh tûr a ni. 15 Chu bâwma khângah chuan zâwnfungte chu a invuah reng tûr a ni; phawi chhuah hlek tûr a ni lo ve. 16 Tin, bâwm chhûngah chuan thuhriattîrna ka la pêk tûr che chu i dah tûr a ni. 17 “Tin, rangkachak hlîr hlakin zahngaihna ṭhutphah i siam tûr a ni; a dung lam chu tawng hnih leh a chanve ni sela, a vâng lam chu tawng khat leh a chanve ni rawh se. 18 Tin, cherub pahnih rangkachakin i siam tûr a ni; zahngaihna ṭhutphah hmâwr ve vea mi chu a chherin i chher tûr a ni. 19 A hmâwr lehlamah cherub pakhat siam la, a hmâwr lehlamah cherub pakhat siam bawk ang che; zahngaihna ṭhutphah nêna inbelhbawm khâwm vekin a hmâwr ve vea cherub pahnih chu in siam tûr a ni. 20 Tin, cherub-te chu inhmatawna zahngaihna ṭhutphah chu an thlaa hliapin, an thlate chu an zâr duai tûr a ni; zahngaihna ṭhutphah lam chu cherub-te chuan an hawi ve ve tûr a ni. 21 Tin, bâwm chungah zahngaihna ṭhutphah chu i dah tûr a ni a; tin, bâwm chhûngah chuan thuhriattîrna ka la pêk tûr che chu i dah tûr a ni. 22 Chutah chuan i hnênah ka lo kal ang a; tin, thuhriattîrna bâwm chunga cherub pahnih inkâr, zahngaihna ṭhutphah chung lam aṭangin, Israel mite thu ka pêk tûr apiang chungchâng thu-ah chuan ka rawn be ṭhîn ang che.

Chhangdah dawhkân

23 “Tin, thingri thingin dawhkân i siam tûr a ni; a dung lam chu tawng hnih ni sela, a vâng lam chu tawng khat ni sela, a sân lam chu tawng khat leh a chanve ni rawh se. 24 Tin, chu chu rangkachak hlîr hlak tîin luan tûr a ni a; tin, rangkachakin a tlâng i kâwm tûr a ni. 25 Tin, kutphah bawka hlaiin a kâwm i siam tûr a ni a; tin, a kâwm chu rangkachakin a tlâng i kâwm leh tûr a ni. 26 Tin, chumi atân chuan rangkachak khâng pali i siam tûr a ni a; tin, chumi khâng chu dawhkân ke pali kil ṭheuhvah chuan vuah tûr a ni. 27 Dawhkân chu zâwna, a zâwnfung chu rawlh theih tûrin khângte chu a kâwm sia vuah tûr a ni. 28 Tin, dawhkân chu a zâwn theih nân zâwnfungte chu thingri thingin i siam tûr a ni a; tin, rangkachak tîin luan tûr a ni. 29 Tin, chumi atân chuan thlêng te, no te, uain thâwl te, a bun chhuahna tûr berhbute i siam tûr a ni. Chûng chu rangkachak hlîr hlakin i siam tûr a ni. 30 Tin, dawhkânah chuan ka hmaah chhangdah i hlui fo tûr a ni.

Khâwnvâr dahna

31 “Tin, khâwnvâr dahna rangkachak hlîr hlakin i siam tûr a ni; chumi khâwnvâr dahna chu a ngul bul leh a ngul chu chher tûr a ni; a note, a parfungte, a pârte nên chuan inzawm vek tûr a ni. 32 Tin, a sîrahte chuan pêng paruk lo pêng chhuak sela: khâwnvâr dahna ngul sîr lehlamah chuan pêng pathum awm sela, khâwnvâr dahna ngul sîr lehlamah chuan pêng pathum awm bawk rawh se. 33 A lehlam pang pêngah chuan vaiumkhal kuhmûm ang no pathum, a pârfung leh a pâr i siam tûr a ni; tin, a lehlam pang pêngah pawh vaiumkhal kuhmûm ang no pathum, pârfung leh a pâr i siam tûr a ni; chutiang chuan khâwnvâr dahna pêng paruk atân i siam tûr a ni. 34 Tin, khâwnvâr dahna ngulah chuan no pali, vaiumkhal kuhmûm anga siam, a pârfung leh a pârte a awm tûr a ni. 35 Tin, chumi inzawm vek pêng pahnih hnuaiah chuan pârfung awm sela; tin, chumi inzawm vek pêng pahnih hnuaiah chuan pârfung awm sela; tin, chumi inzawm vek pêng pahnih hnuaiah chuan pârfung awm sela; khâwnvâr dahna ngula pêng parukah chuan a awm vek tûr a ni. 36 Chûng a pârfungte leh a pêngte chuan a zawm vek tûr a ni a; a pum chuan rangkachak hlîr hlaka chher tûr a ni. 37 Tin, chumi atân chuan khâwnvâr pasarih i siam tûr a ni; tichuan, khâwnvârte chu an dah ang a, a hma zâwnte chu a ên theih nân. 38 Tin, chumi atâna hman tûr chaichehte leh meivâp dahnate chu rangkachak hlîr hlak a ni tûr a ni. 39 Chumi khâwnvâr dahna leh a hmanrua tûr zawng zawng siam nân chuan rangkachak hlîr hlak talent khat i hmang tûr a ni. 40 Tichuan, tlânga a lem ka entîr ang chiah che khân engkim i siam tûr a ni tih hre reng rawh khai.

Exodus 26

Pathian chênna biakbûk

1 “Tin, biakbûk, puanzâr sâwm neiin i siam bawk tûr a ni; la zai sîn tak kawp, dumpâwl te, senduk te, senlâr te hmangin cherub lemte thiam taka siam chuantîrin i siam tûr a ni. 2 Puanzâr chu a sei lam tawng sawmhnih leh tawng riat ṭheuh a ni ang a, puanzâr chu a hlai lam tawng li ṭheuh a ni ang. Puanzâr zawng zawng chu inchen vek tûr a ni. 3 Puanzâr pangate chu inzawm tûr a ni a; tin, puanzâr panga vêkte pawh chu inzawm bawk tûr a ni. 4 Tin, puanzâr zawm khat hmawrtawng ber tlângah chuan a beng a dumpâwlin i siam tûr a ni a; chutiang bawkin puanzâr zawm lehlam hmawrtawng ber tlângah chuan i siam bawk tûr a ni. 5 Puanzâr pakhatah chuan beng sawmnga i siam tûr a ni a; tin, zawm khat puanzâr tlângah pawh chuan beng sawmnga i siam bawk tûr a ni a; chûng bengte chu a inep thliah tûr a ni. 6 Tin, rangkachak chilh behna sawmnga i siam tûr a ni a, a chilh behnate chuan puanzârte chu i chilh bet tûr a ni a; tichuan, biakbûk chu pindan pakhat a lo ni tûr a ni. 7 “Tin, biakbûk chung khuh nân kêl hmul puanzârte i siam tûr a ni. Puanzâr sâwm leh pakhat i siam tûr a ni. 8 Puanzâr chu a sei lam tawng sawmthum ṭheuh a ni tûr a ni a; tin, puanzâr chu a hlai lam tawng li ṭheuh a ni tûr a ni: puanzâr te chu inchen vek tûr a ni. 9 Tin, puanzâr pangate chu i ṭhui zawm vek tûr a ni a; tin, puanzâr paruk pawh chu ṭhui zawm vek tûr a ni a, puan in hma lama puanzâr a parukna chuan a khuh tûr a ni. 10 Tin, puanzâr zawm khat tlângah chuan beng sawmnga i siam tûr a ni a; tin, puanzâr zawm lehlam tlângah pawh chuan beng sawmnga siam bawk tûr a ni a. 11 Tin, dâr chilh behna sawmnga i siam tûr a ni a; tin, chumi chilh behna chu puan tlânga a bengah chuan vuah tûr a ni a, puan in chu chilh zawm vek tûr a ni; pindan pakhat a lo nih theih nân. 12 Puan in puanzâr uai thla la chuang, a zatve la chuang chu biakbûk kawmchârah a uai thla tûr a ni. 13 Tin, puan in puanzâr a dung lam hmâwr tuak ve vea tawng khat ve ve la chuanga chu biakbûk bang lehlam lehlam khuh nân a uai thla tûr a ni. 14 Tin, berâmpa vun chhum senin puan in chung khuhnate, savun ṭha chiin a chunga khuh lehnate i siam tûr a ni. 15 “Tin, biakbûk ban rem khâwm tûrte chu ngîl taka dingin thingri thingin i siam tûr a ni. 16 Tin, ban rem khâwm sei lam chu tawng sâwm ni sela; tin, a vâng lam chu tawng khat leh a chanve ni ṭheuh rawh se. 17 Ban rem khâwm tinah chuan ke pahnih inzawmin a awm tûr a ni. Chutiang chuan biakbuk ban rem khâwm chhim chhawng chhim lampang atân chuan, ban rem khâwm sawmhnih i siam tûr a ni. 18 Tin, biakbûk atân ban rem khâwm chhim chhawng chhim lampang atân chuan, ban rem khâwm sawmhnih i siam tûr a ni. 19 Tin, chumi ban rem khâwm sawmhnih nghahchhan atân chuan tangkaraw tlang ker kuak sawmli i siam tûr a ni: a ke pahnih atân ban rem khâwm pakhat nghahchhan ker kuak pahnih leh, a ke pahnih atân ban rem khâwm dang pakhat nghahchhan ker kuak pahnih i siam tûr a ni. 20 Tin, biakbuk sîr lehlam hmâr chhawng lam atân chuan ban rem khâwm sawmhnih i siam tûr a ni; 21 chûng atân chuan tangkaraw tlang sawmli ker kuak nên, ban rem khâwm pakhat atân nghahchhan ker kuak pahnih leh, ban rem khâwm dang pakhat atân nghahchhan ker kuak pahnih i siam bawk tûr a ni. 22 Tin, biakbûk kawmchâr khawthlang chhawng lam atân chuan ban rem khâwm paruk i siam tûr a ni. 23 Tin, biakbûk kawmchâr kil ve ve atân chuan ban rem khâwm pahnih i siam tûr a ni. 24 Tin, a hnuai lamah chuan thlawp tûr a ni a, chutiang bawkin a chhîp lam khâng hmasa ber thlengin tih vek tûr a ni. Chutiang chuan a pahnih chuan tih ve ve tûr a ni. Chûng chu a kil pahnih atân a ni tûr a ni. 25 Tin, ban rem khâwm pariat, a nghahchhan tûr tangkaraw tlang ker kuak sâwm leh paruk nên a awm tûr a ni; ban rem khâwm pakhat atân nghahchhan ker kuak pahnih; tin, ban rem khâwm dang atân pawh chuan nghahchhan ker kuak pahnih zêl. 26 “Tin, thingri thingin bangrel, biakbûk bang lehlam ban rem khâwm atân panga, biakbûk bang lehlam ban rem khâwm atân panga; 27 tin, biakbûk kawmchâr khawthlang chhawng lam ban rem khâwm atân pawh panga i siam tûr a ni. 28 Tin, bangrel laita, ban rem khâwm lai taka mi chuan ban rem khâwm hmâwrtawng ber aṭangin a lehlam hmâwrtawng ber thlengin a thil tlang tûr a ni. 29 Tin, ban rem khâwmte chu rangkachak tîin i luan tûr a ni a, bangrelte thil nân rangkachak khângte i siam tûr a ni; tin, chûng bangrelte chu rangkachak tîin i luan bawk tûr a ni. 30 Chutichuan, tlânga ka entîr dân ang chiah che khân biakbûk chu i sa tûr a ni. 31 “Tin, puanzâr tûr lazai sîn tak kawp te, a dumpâwl te, a senduk te, a senlârte hmangin cherub lemte mi thiam tak siam chuantîrin i siam tûr a ni. 32 Chu chu thingri ban pali rangkachak tîa luanah chuan i zâr tûr a ni, a bânna chu rangkachaka siam tûr a ni; tin, tangkaraw tlang ker kuak palia inphun tûr a ni. 33 Tin, chumi puanzâr chu puanzâr chilh behnate hnuai lamah chuan i zâr tûr a ni a, chumi puanzâr chhûng lamah chuan thuthlunna bâwm chu i dah lût tûr a ni; tichuan, puanzâr chuan hmun thianghlim leh hmun thianghlim ber chu a daidansak dâwn che u nia. 34 Tin, zahngaihna ṭhutphah chu hmun thianghlim berah thuthlunna bâwm chungah chuan i dah tûr a ni. 35 Tin, puanzâr pâwn lamah chuan dawhkân i hûng tûr a ni a; tin, biakbûk chhim chhawng lam dawhkân epah chuan khâwnvâr dahna i hûng tûr a ni; tichuan, dawhkân chu hmâr lampangah chuan i dah tûr a ni. 36 “Tin, puan in kawngkaa zâr tûr lazai sîn tak kawp te, a dumpâwl te, a senduk te, a senlârte hmangin, puan zeh mawi thiam taka zeh nên i siam tûr a ni. 37 Tin, puanzâr zârna tûr chuan thingri ban panga i siam tûr a ni a, chûng chu rangkachak tîin i luan tûr a ni; a bânnate chu rangkachaka siam tûr a ni: chûng hûnna atân chuan dâr tlang ker kuak panga i chhûng tûr a ni.

Exodus 27

Maichâm

1 “Tin, thingri thing maichâm, a dung lam tawng nga, a vâng lam tawng ngain i siam tûr a ni; chu maichâm chu kil li a ni tûr a ni a, a sân lam chu tawng thum a ni tûr a ni. 2 Tin, a kil li chhîpahte chuan a kîte i siam tûr a ni a; maichâm nên chûng a kîte chu a inzawm vek tûr a ni. Dâr tîin i luan vek tûr a ni. 3 Tin, meivâp ruh chhuahna bêlte, vut lawhnate, maihûnte, sa thurna thîrkawmte, mei lâknate i siam tûr a ni; chûng hmanrua zawng zawng chu dârin i siam tûr a ni. 4 Tin, maichâm atân chuan dâr lên i siam tûr a ni; tin, chumi lên chung, a kil liahte chuan dâr khâng pali i siam tûr a ni. 5 Tin, chu chu maichâm dawhzâwl hnuai lam vêl chuan i dah tûr a ni, chu lên chuan maichâm chanve chu a han thlen theih nân. 6 Tin, maichâm atân zâwnfung, thingri thing zâwnfungte i siam tûr a ni a, chûng chu dâr tîin i luan tûr a ni. 7 Tin, chûng zâwnfungte chu chung khângahte chuan thun luh tûr a ni a; tichuan, zâwnfungte chu a zâwnna tûrin maichâm sîr pahnihah chuan a awm ve ve tûr a ni. 8 Maichâm chu thingphela hungin a kawrawngin i siam tûr a ni; tlânga ka entîr ang chiah che khân siam tûr a ni.

Pathian chênna biakbûk hungna

9 “Tin, biakbûk hung chhûng kawtlai i siam tûr a ni. Chhim chhawng chhim lampangah chuan a sîr lehlam atân a hung chhûng kawtlaia puanzâr tûrte, lazai sîn tak kawpa siam tawng zaa sei a awm tûr a ni. 10 Chumi atân chuan ban sawmhnih leh dâr tlang ker kuak sawmhnih a awm tûr a ni. Bana a bânnate leh a zârfungte chu tangkarua a ni tûr a ni. 11 Tin, chutiang bawkin, hmâr chhawng lampang dung lam puanzâr zâr tûrte chu tawng zaa sei a ni tûr a ni a, chumi atân chuan ban sawmhnih leh dâr tlang ker kuak sawmhnih a awm tûr a ni; bana a bânnate leh a zârfungte chu tangkarua a ni tûr a ni. 12 Tin, a khawthlang lampang hung chhûng kawtlai vâng lam puanzâr tûrte chu tawng sawmngaa sei a ni tûr a ni, a ban sâwm leh a nghahchhan ker kuak sâwm nên. 13 Tin, khawchhak lam chhawng, chhak lampang a hung chhûng kawtlai vâng lam chu tawng sawmngaa sei a ni tûr a ni. 14 Kawngka sîr lehlama puanzâr zâr tûrte chu tawng sâwm leh tawng ngaa sei a ni tûr a ni: a ban pathum leh a nghahchhan kerkuak pathum a awm tûr a ni. 15 Tin, kawngka sîr lehlama puanzâr zâr tûrte chu tawng sâwm leh tawng ngaa sei a ni tûr a ni a, a ban pathum leh a nghahchhan ker kuak pathum a awm tûr a ni. 16 Tin, a hung chhûng kawtlai kawngkaa zâr tûr tawng sawmhniha sei, lazai sîn tak kawp te, a dumpâwl te, a senduk te, a senlârte hmangin, puan zeh mawi thiam tak zeh nên a awm tûr a ni. A ban pali leh a nghahchhan ker kuak pali a awm tûr a ni. 17 A hung chhûng kawtlai ban zawng zawngte chu tangkaruaa zem chhuah vek tûr a ni a; a bânnate chu tangkarua a ni tûr a ni a, nghahchhan ker kuakte chu dâr a ni tûr a ni. 18 A hung chhûng kawtlai dung lam chu tawng za ni sela, a vâng lam chu tawng sawmnga ni sela; tin, a sân lam chu tawng nga ni sela, lazai sîn tak kawpa hung ni sela; tin, a nghahchhan ker kuakte chu dâr tlang ni rawh se. 19 Biakbûk sakna zawng zawnga a hmanrua zawng zawng leh, a kilhbehna zawng zawng leh, a hung chhûng kawtlai kilhbehna zawng zawng chu dâr vek a ni tûr a ni.

Khâwnvâr enkawl dân tûr

20 “Tin, khâwnvâr chu eng lai pawha a alh theih nân olive hriak fîm taka sâwr, chhit atân i hnênah rawn la ṭhîn tûrin Israela thlahte chu thu i pe tûr a ni. 21 Inbiakna puan in chhûngah, thuhriattîr dahna bula puanzâr pâwn lamah chuan, Arona leh a fapaten LALPA hmaah chuan tlai aṭangin a tûk thlengin an buatsaih ṭhîn tûr a ni. Hei hi Israela thlahte tân kumkhuain, an thlahte thleng pawhin thuruat ngheh tlat a ni tûr a ni.

Exodus 28

Puithiamho incheina

1 “Tin, nangin i u Arona leh a fapate chu Israela thlahte zîng ata i hnênah hruai ang che, ani chuan puithiam rawngbâwl hna chu ka tân a thawh theih nân, Arona te, Arona fapa - Nadaba te, Abihua te, Eleazera te, Ithamara te nên chuan. 2 Tin, i u Arona tân silhfên thianghlim, tiropuitu atân leh timawitu atân i siam tûr a ni. 3 Tin, mi themthiamho, finna thlarauva ka tihkhah zawng zawngte chu bia la, puithiam rawngbâwl hna ka tân a thawh theihna tûrin Arona chu silhfênte siamsak rawh se. 4 Tin, hêngte hi a ni silhfên atâna an siam tûrte chu: âwmbel te, kawr te, kawrfual te, kawr zeh mawi te, lukhum leh kâwnghrênte nên. Tin, i u Arona leh a fapate chuan puithiam rawngbâwl hna ka tân an thawh theih nân, silhfên thianghlim an siamsak tûr a ni. 5 Tin, rangkachak te, la dumpâwl te, senduk te, senlâr te, lazai sîn tak kawpte nên an la tûr a ni. 6 “Tin, puithiam kawr chu rangkachak te, la dumpâwl te, senduk te, senlâr te, lazai sîn tak kawpte hmangin, mi themthiam takin a buatsaih angin an siam tûr a ni. 7 Tin, chumi kawr hmâwr hma lam leh hnung lama ṭhui belhbawm, dârbak pahnih neihtîr tûr a ni; a inzawm tlat theihna tûrin. 8 Tin, kawr chunga kâwnghrên tûr themthiam taka tah, chumi kawr chi bawk tluan khat vek hman tûr a ni; chu chu rangkachak nên, la dumpâwl nên, senduk nên, senlâr nên, lazai sîn tak kawp nêna tah tûr a ni. 9 Tin, onukion lung pahnih i la tûr a ni a, chutah chuan Israela thlahte hming i chuantîr tûr a ni: 10 lung pakhatah chuan an hming paruk, lung dang pakhatah chuan a la awmate paruk; hming chu an pian dân indawtin i chuantîr tûr a ni. 11 Hming nemnaa chuang ang, lunga ziak thiam miin a ziak ṭhin ang hian, Israela thlahte hming ang zêlin lung pahnihah chuan i ziak tûr a ni. Rangkachaka phûm tûrin i siam tûr a ni. 12 Tin, chumi lung pahnih chu Israela thlahte hriat rengna lung atân, puithiam kawr dârbakah chuan i bel tûr a ni. Tichuan, Arona chuan hriat rengna tûrin, LALPA hmaah an hmingte chu a koki khing hnihah chuan a bât ang. 13 “Tin, rangkachak zaite i phiar tûr a ni a, 14 rangkachak hlîr hlak khaidiat pahnih nên, hruihrual anga herhin i siam tûr a ni; tin, chumi khaidiat herhte chu phiarah chuan i zawm tûr a ni.

Puithiam âwmbel

15 “Tin, rorêlna âwmbel, mi thiam tak siam ang i siam tûr a ni. Puithiam kawr siam ang khân i siam tûr a ni a: rangkachak te, la dumpâwl te, a senduk te, a senlâr te, lazai sîn tak kawpte hmangin i siam tûr a ni. 16 Kil li neia siama thuah tûr a ni: a dung lam khâp khat, a vâng lam pawh khâp khat bawk a ni tûr a ni. 17 Tin, chutah chuan lunghlu, lunghlu tlar li i zep tûr a ni: tlar khatna chu sardion te, topazion te, smaragdos te; 18 tin, tlar hnihna chu anthrax te, sappheiros te, sordonuks te; 19 tin, tlar thumna chu huakinthos te, akates te, amethustos te; 20 tin, tlar lina chu berullos te, onukion te, jaspis te a ni tûr a ni. Rangkachakah chuan phûm ṭhêt tûr a ni. 21 Tin, lungte chu Israela thlahte hming ang zêlin, sâwm leh pahnih chu an hming ang zêlin a ni tûr a ni; hming nemnaa chuang ang, hnam tin an hming ang zêlin, hnam sâwm leh hnam hnihte tân chuan a ni tûr a ni. 22 Tin, âwmbel chungah chuan hruihrual ang khaidiatte, rangkachak hlîr hlak herh i siam tûr a ni a. 23 Tin, âwmbel chungah chuan rangkachak khâng pahnih i siam tûr a ni a; tin, chumi khâng pahnih chu âwmbel tlâng hmâwr ve veah chuan i vuah tûr a ni. 24 Tin, rangkachak khaidiat herh pahnih chu, âwmbel tlâng hmâwr ve vea khâng pahnihah chuan i thlung tûr a ni. 25 Tin, khaidiat herh hmâwr lehlam pahnihte chu rangkachak zai phiar pahnihah chuan i zawm tûr a ni a, chu chu puithiam kawr hma lama dârbakah chuan i thlung tûr a ni. 26 Tin, rangkachak khâng pahnih i siam tûr a ni a, chûng chu âwmbel kil pahnih, puithiam kawr dep chhûng lampangah chuan i vuah tûr a ni. 27 Tin, rangkachak khâng pahnih i siam tûr a ni a, chûng chu a hma lama puithiam kawr dârbakna pahnih hnuai lampang, a inzawmna lai vêl, puithiam kawr hrênna themthiam taka tah chung lamah chuan i vuah tûr a ni. 28 Tin, puithiam kawra khângahte chuan âwmbela khângte chu hrui dumpâwlin an chilh zawm tûr a ni, themthiam taka tah puithiam kawr hrênna chung lama a awm theih nân leh, âwmbel chu puithiam kawr nên a inhran loh nân. 29 “Tin, Arona chuan hmun thianghlima a kal hunah LALPA hmaah a hriat reng theihna tûrin, a thinlung zâwn taka rorêlna âwmbelah chuan Israela thlahte hming chu a pu zêl tûr a ni. 30 Tin, rorêlna âwmbelah chuan Urim leh Thumim i dah tûr a ni a; chu chu Arona chuan LALPA hmaa a kal hunah chuan a thinlung zâwnah chuan a dah zêl tûr a ni. Tin, Arona chuan Israela thlahte rorêlna chu LALPA hmaa a kal hunah a thinlung zâwnah chuan a pu zêl tûr a ni.

Puithiam incheina tûr thil dang

31 “Tin, puithiam kawrfual, a dumpâwl hlîr hlak i siam tûr a ni. 32 Tin, a lai takah lu thawn nân tihâwng tûr a ni a; chumi âwng chu a thlêr chhiat theih mai lohna tûrin, kawrbân bûl angin a tlâng vêl chu cheh tûr a ni. 33 Tin, a fêmahte chuan pawmgranet lem - a dumpâwl te, a senduk te, a senlâr tein - a fêm vêlin i siam tûr a ni a; tin, chumi inkârahte chuan rangkachak tengeng a vêlin i siam tûr a ni. 34 Kawrfual fêm vêlahte chuan rangkachak tengeng pakhat leh pawmgranet pakhat zêl i siam tûr a ni. 35 Tin, Arona chu rawng a bâwl laiin chutiang chuan a inthuam tûr a ni; tichuan, hmun thianghlima LALPA hmaa a luh leh a chhuah hunah a ri chu hriat theih a ni tûr a ni; chutichuan, a thi lo vang. 36 “Tin, rangkachak hlîr hlak phêk i siam tûr a ni a, a pangah chuan hming nemnaa chuang ang, ‘LALPA PUAL’ tih i chuantîr tûr a ni. 37 Chu chu hrui dumpâwlah chuan i bel tûr a ni a, puithiam lukhumah chuan bel tûr a ni; puithiam lukhum hma lamah a awm tûr a ni. 38 Chu chu Arona chalah a awm tûr a ni a, Israela thlahten an thilpêk thianghlim atâna an hlan tûr thil serha sualna awmte chu Arona chuan a phur zêl tûr a ni; chu chu LALPA hmaa chhân tlâka a awm theih nân a chalah a awm chawt tûr a ni. 39 Tin, kawr chu puan zai sîn tak, zeh mawiin i tah tûr a ni; tin, puan zai sîn takin puithiam lukhum i siam tûr a ni. 40 Tin, Arona fapate chu kawr i siamsak tûr a ni a; tin, kawnghrênte, diarte i siamsak bawk tûr a ni, tiropuitu leh timawitu atân. 41 Chûng chuan i u Arona leh a fapate chu i thuam tûr a ni; tin, ka tân puithiam hna thawka rawng an bâwl theihna tûrin, anmahni chu hriak thihin, tihrangin, i tithianghlim tûr a ni. 42 Tin, an taksa saruak khuh nan puan zai sîn kekawr i siamsak tûr a ni; kâwng aṭanga malpui thleng ni sela. 43 Chu chu Arona leh a fapaten inbiakna puan ina an luh hun leh, hmun thianghlima rawngbâwl tûra maichâm bula an kal hunin an ha zêl tûr a ni; chuti lo chuan, suala ngaihin an thi dah ang e. Chu chu amah leh a hnua a thlahte thleng pawha kumkhuaa thuruat ngheh a ni ang.

Exodus 29

Arona leh a fate puithiama nemngheh dân tûr

1 “Tin, puithiam hna thawka ka rawng an bâwl theihna tûra anmahni tihthianghlim nân, an chungah hetiang hian i ti tûr a ni: bâwngpatuai pakhat leh berâmpa sawisêl bo pahnih nên, 2 chhang dawidim telh loh nên, chhangpêr dawidim telh loh hriaka chawhpawlh nên, chhangpêr pan dawidim telh loh hriaka chulh nên i rawn la tûr a ni; chhangphut dip tak chiin i siam tûr a ni. 3 Chûng chu fawng pakhata dahin, fawng chawpin bâwngpa leh berâmpa pahnih nên chuan i rawn keng tûr a ni. 4 Tin, Arona leh a fapate chu inbiakna puan in kawngka bulah chuan rawn hruaiin, tuiin i lo sil tûr a ni. 5 Tin, silhfênte chu rawn lain, Arona chu kawr nên, puithiam kawrfual nên, puithiam kawr nên, âwmbel nên hâktîrin, puithiam kawr hrênna themthiam taka tah chuan i hrêng tûr a ni. 6 Tin, puithiam lukhum chu khumtîrin, lukhum chungah chuan lukhum thianghlim chu i khumtîr tûr a ni. 7 Tichuan, hriak thih mi rawn lain, a lûah leihin i thih tûr a ni. 8 “Tin, a fapate chu rawn hruaiin kawr i hâktîr tûr a ni. 9 Tin, Arona leh a fapate chu kâwnghrêna hrêngin, diar i khimtîr tûr a ni. Puithiam nihna chu kumkhua atâna ruat ngheh tlatin an chang tawh ang. Chutiang chuan Arona leh a fapate chu i tithianghlim tûr a ni. 10 Tin, inbiakna puan in bulah bâwngpa i rawn la tûr a ni: Arona leh a fapate chuan bâwngpa lu chungah chuan an kut lo nghat rawh se. 11 Tichuan, inbiakna puan in kawngka bulah, LALPA hmaah chuan bâwngpa chu i lo talh tûr a ni. 12 Tin, bâwngpa thisen chu lo lain, maichâm kîte chu i kutzungṭangin i hnawih tûr a ni; tin, maichâm bulah chuan thisen chu i leihbaw vek tûr a ni. 13 Tin, a kawchhûng thau zawng zawng nên, a thin tuamtu râng nên lain maichâmah chuan i hâl tûr a ni. 14 Bâwngpasa leh a vun leh a êk erawh chu daipâwn lamah i hâl tûr a ni; chu chu sual tâna hlan a ni. 15 Berâmpa pakhat i rawn la bawk tûr a ni; tin, Arona leh a fapaten chu berâmpa lu chungah chuan an kut lo nghat rawh se. 16 Tin, berâmpa chu lo talhin, a thisen chu lain, maichâm chung chu a vêlin i theh tûr a ni. 17 Tin, berâmpa chu i chan tûr a ni a; tin, a kawchhûng leh a kete chu silin, a sahrangte nên, a lû nên i dah tûr a ni. 18 Tin, berâmpa chu a pumin maichâmah chuan i hâl tûr a ni. Chu chu LALPA tâna hâlral thilhlan a ni a; LALPA tâna meia hlan rimtui chu a ni e. 19 “Tin, berâmpa pakhat i rawn kai leh tûr a ni; Arona leh a fapaten chu berâmpa lu chungah chuan an kut lo nghat rawh se. 20 Tichuan, berâmpa chu lo talhin, a thisen chu lain, Arona beng ding lam tlângah te, a fapate beng ding lam tlângah te, an kut ding lam zungpuiah te, an ke ding lam zungpuiah te i tât tûr a ni a; tin, maichâm chung vêlah chuan thisen chu i theh tûr a ni. 21 Tin, maichâm chunga thisen leh, hriak thih mi chu rawn lain, Arona leh a silhfênahte leh, a hnêna tel ve a fapate leh a fapate silhfênahte chuan i theh tûr a ni; tichuan, amah leh a silhfênte leh, a hnêna tel ve a fapate leh a fapate silhfênte chu tihthianghlim an lo ni tawh ang. 22 “Berâmpa thau nên, a mei thau tak nên, a kawchhûng thau nên, a thin tuamtu râng nên, a kal pahnih leh a bawhtu thau nên, a bawp ding lam nên i la bawk tûr a ni; chu chu tihhranna berâmpa chu a ni si a; 23 tin, fawnga chhang dawidim telh loh LALPA tâna chhiah mi chu chhangpêr pakhat nên, chhangpêr hriaka chawhpawlh pakhat nên, chhangpêr pan pakhat nên i telh tûr a ni; 24 tin, chûng chu Arona kut leh a fapate kutah chuan i dah vek tûr a ni a, LALPA hmaa thên thilhlan atân i thên tûr a ni. 25 Tin, an kut ata chu lâksakin, LALPA tâna rimtui atân maichâmah hâlral thilhlan chungah chuan i hâl tûr a ni. Chu chu LALPA tâna meia thilhlan a ni. 26 Tin, Arona tihhranna berâmpa irâwm chu lain, LALPA hmaa thên thilhlan atân i thên tûr a ni; chu chu i chanvo tûr ni rawh se. 27 Tin, Arona leh a fapate puala tihhranna berâmpa irâwm, thên thilhlan leh chawikân thilhlan, a bawp thên tawh leh chawikân tawh chu i tithianghlim tûr a ni. 28 Chu chu Israela thlahte laka kumkhuaa Arona leh a fapate chanvo tûra ruat a ni ang. Chu chu chawikân thilhlan a ni si a; remna thilhlana an inthawinate zînga Israela thlahten an chawikân thilhlan tûr chu a ni ang, LALPA tâna an chawikân thilhlan ngei chu. 29 “Tin, Arona silhfên tihthianghlimte chu a hnuah a fapaten an la rochung zêl ang, chûngte chuan an inthuama, hriak thih leh tihthianghlim an nih theih nân. 30 A fapa, a aiawha puithiam hna thawk tûra ruata chu, hmun thianghlima rawngbâwl tûra inbiakna puan ina a luh hunah, ni sarih chhûng chu inthuamin a awm tûr a ni. 31 Tin, tihhranna berâmpa chu rawn lain, a sa chu hmun thianghlimah i chhûm tûr a ni. 32 Tichuan, Arona leh a fapate chuan berâmpasa leh fawnga chhangpêrte chu inbiakna puan in kawngka bulah ei rawh se. 33 Tin, chûng inremna thil, anmahni tihhran nân leh tihthianghlim nâna hlante chu an ei tûr a ni; amaherawhchu, thil thianghlim a nih avângin mi dang zawngin an ei ve tûr a ni lo. 34 Tin, chumi tihhranna sa emaw, chhang emaw chu a tûk thlenga a bâng a la awm chuan, a bâng chu meiin i hâl ral tûr a ni. Chu chu thil thianghlim a nih avângin ei tûr a ni lo ve. 35 Tichuan, thu ka pêk zawng zawng che ang hian Arona leh a fapate chungah chuan i ti tûr a ni. Ni sarih anmahni i tihrang tûr a ni. 36 Tin, ni tin sual hlan inthawina sebâwngpa, inremna tûrin i hlân tûr a ni. Tichuan, inremna i siam hunin maichâm chu i tifai dâwn nia; tin, a tithianghlim tûrin hriak i hnawih tûr a ni. 37 Maichâm atân inremna ni sarih siamin i tithianghlim tûr a ni a; tichuan, maichâm chu thil thianghlim tak a lo ni ang. Maichâm dek apiang chu a lo thianghlim zêl ang.

Ni tin thilhlan

38 “Chutichuan, maichâm chunga i hlan tûr chu hei hi a ni: ni tin kum khat tling berâmno pahnih zêl. 39 Berâmno pakhat chu zîng lamah i hlân tûr a ni a, berâmno pakhat chu tlai lamah i hlân tûr a ni. 40 Bêramno pakhat hlannaah chuan chhangphut dip tak, epha hmun sâwma ṭhena hmun khat, hriak sâwr hin hmun lia ṭhena hmun khat nêna chawhpawlh i telh tûr a ni a; in tûr thilhlan atân uain hin hmun lia ṭhena hmun khat nên. 41 Tin, berâmno pakhat chu tlai lamah i hlân tûr a ni a, chu chu zîng lama ei tûr thilhlan dân ang leh in tûr thilhlan dân angin rimtui, LALPA tâna meia thilhlan atân i hlân tûr a ni. 42 Chu chu in thlahte thlenga inbiakna puan in kawngka bula LALPA hmaa hâlral thilhlan fo tûr a ni ang a, chutah chuan a be tûr chein ka lo kal ṭhîn ang. 43 Israela thlahte pawh chutah chuan ka rawn be ṭhîn ang a; tichuan, Puan in chu ka ropuinaa tihthianghlim a ni ang. 44 Tin, inbiakna puan in leh maichâm chu ka tithianghlim ang. Arona pawh a fapate nên ka tâna puithiam hna thawka ka rawng an bâwl theihna tûrin ka tithianghlim bawk ang. 45 Tichuan, Israela thlahte zîngah chuan ka chêng ang a, an Pathian ka ni ang. 46 Chutichuan, anmahniho zînga ka chên theihna tûra Aigupta ram ata hruai chhuaktu LALPA an Pathian chu ka ni tih an hria ang. Kei hi LALPA an Pathian ka nih hi.

Exodus 30

Rimtui hâlna maichâm

1 “Tin, rimtui hâlna tûr maichâm i siam tûr a ni; thingri thingin i siam tûr a ni. 2 A dung lam tawng khat, a vâng lam tawng khat a ni tûr a ni a, kil li neia siam tûr a ni; tin, a sân lam chu tawng hnih ni sela. A kîte chu maichâm nên chuan inzawm vek tûr a ni. 3 Tin, a chung te, a pang vêl te leh a kîte chu rangkachak hlîr hlak tîin i luan tûr a ni; tin, a kotlâng vêlah chuan rangkachak i dah tûr a ni. 4 Tin, a kotlâng hnuai lamah, a sîr tuakah chuan rangkachak khâng pahnih i siam tûr a ni. A sîr pahnihah chuan i siam tûr a ni a, chûng chu a zâwnfung rawlhna tûr a ni ang. 5 Tin, thingri thinga zâwnfungte siamin rangkachak tîin i luan tûr a ni. 6 Tin, chu chu thuhriattîrna chunga ka rawn biak ṭhinna tûr che zahngaihna ṭhutphah hmaah, thuhriattîrna bâwm kianga puanzâr bulah i dah tûr a ni. 7 Tin, Aronan chutah chuan englo rimtui tak hâl tûr rimtui a hâl tûr a ni a; tûk tin khâwnvârte a tihfai hun apiangin a hâl ṭhîn tûr a ni. 8 Tin, Aronan tlai lamah khâwnvârte a chhit hun chuan rimtui chu a hâl ṭhîn tûr a ni; chu chu in thlahte thlenga LALPA hmaa rimtui a ni reng ang. 9 Chutah chuan rimtui dang emaw, hâlral thilhlan emaw, ei tûr thilhlan emaw in hlân tûr a ni lo va; tin, chutah chuan in tûr thilhlan pawh in leih tûr a ni lo. 10 Tin, Aronan kum khatah vawi khat ki chungahte chuan inremna a siam tûr a ni; inremna tûra sual thawina thisen chuan kum tin vawi khat in thlahte thlengin inremna chu a siam ṭhîn tûr a ni. Chu chu LALPA tân thianghlim tak a ni,” tiin.

Pathian chênna biakbûk tân chhiah

11-12 Tin, LALPAN Mosia hnênah, “Israela thlahte awm zât i chhiar hun chuan, a awm zât i chhiar ang zêlin mi tinin an nunna tlanna chu LALPA an pe zêl tûr a ni, anmahni i chhiar huna an zînga hri a lên loh nân. 13 Hei hi an pêk tûr chu a ni: chhiar tawhte zînga tel tûra kal apiangte chuan, hmun thianghlima sekel an pêk ṭhin ang sekel chanve an pe tûr a ni (sekel chu gera sawmhnih a ni). LALPA puala thilhlan atân sekel chanve. 14 Chhiar tawhte zînga tel tûra kal apiang, kum sawmhnih achin chung lam zawng chuan LALPA puala thilhlan chu an pe tûr a ni. 15 In nunna tlanna tûra LALPA puala thil in hlan chuan sekel chanve aia tam chu mi hausain a pe tûr a ni lo va, mi rethei pawhin chumi aia tlêm chu a pe tûr a ni lo. 16 Tin, Israela thlahte tlanna man tangka chu lo lain, inbiakna puan ina rawngbâwl nân i lo ruat tûr a ni; in nunna tlan nâna LALPA hmaa Israela thlahte tâna i hriat rengna a lo nih theihna tûrin,” tiin a sawi a.

Dâr maihûn

17-18 Tin, LALPAN Mosia hnênah, “Insilna tûr dâr maihûn, a hûnchhan dâr nên i siam bawk tûr a ni. Chu chu inbiakna puan in leh maichâm inkârah i hûng tûr a ni a, chutah chuan tui i dah tûr a ni. 19 Tin, Arona leh a fapaten chutah chuan an kete an sil ṭhîn tûr a ni. 20 Inbiakna puan in chhûnga an luh hunin emaw, LALPA tâna meia thilhlan hâl tûra maichâm bula rawngbâwl tûra an lo kal hunin emaw, tui chuan an insil tûr a ni; chuti lo chuan, an thi mai ang. 21 Chutichuan, an thih loh nân an kut leh an kete chu an sil ṭhîn tûr a ni. Chu chu an tân kumkhua atâna thuruat a ni ang - amah leh a thlahte leh an thlahte thleng tân pawh,” tiin a sawi a.

Hriak thih tûr

22-23 LALPA vêkin Mosia hnênah, “Rimtui tui ber chi zînga mi - murra tui sekel zanga leh, thakthîng rimtui, chumi zâtve sekel zahnih leh sawmnga zet - leh fu rimtui sekel zahnih leh sawmnga leh, 24 thakthîng chi dang sekel zanga, hmun thianghlima sekel an pêk ṭhin ang, olive hriak hin khat nên rawn lain, 25 rimtui siamtu siam angin hriak thih chu hriak thianghlim atân i siam tûr a ni. Chu chu hriak thih chi hriak thianghlim a ni ang. 26 Tin, inbiakna puan in te, thuhriattîrna bâwm te, 27 dawhkân leh a bungbêl zawng zawngte, khâwnvâr dahna leh a hmanruate, rimtui hâlna maichâm te, 28 hâlral thilhlan maichâm leh a hmanrua zawng zawngte, maihûn leh a hûnchhante nên, chu chuan i hnawih vek tûr a ni. 29 Tin, thianghlim tak an lo nih theih nân i tithianghlim tûr a ni; chûng dek apiangte chu an lo thianghlim zêl ang. 30 Tin, ka tân puithiam hna thawka ka rawng an bâwl theih nân Arona leh a fapate chu hriak thihin i tithianghlim tûr a ni. 31 Tin, Israela thlahte hnênah, ‘He hriak hi in thlahte thlenga ka hriak thianghlim thih mi chu a ni ang. 32 Mihring taksaah chuan leih tûr a ni lo va; hemi siam dân anga siam, a ang tak hian in siam tûr a ni hek lo. Hei hi zawng a thianghlim a; tichuan, in tân thianghlim a ni tûr a ni. 33 Tu pawhin a anpui siam sela emaw, mi dang tân tu pawhin lo hmang sela emaw, chu mi chu a chipuite zîng ata tihboral a ni ang,’ tiin sawi ang che,” tiin a sawi leh a.

Rimtui hâl tûr

34 Tin, LALPAN Mosia hnênah, “Rimtui tui tak - stakte te, onuka te, galbanum te - la ang che, rimtui tui tak beraw fîm tak nên; bûk inzât vekin. 35 Chu chu rimtui siamtu siam angin chia al, fîm leh thianghlim takin rimtui i siam tûr a ni. 36 A ṭhente chu râwt dip dep tûr a ni a, ka rawn biak ṭhinna tûr che inbiakna puan in chhûnga thuhriattîrna bulah chuan i dah tûr a ni. Chu chu in tân thil thianghlim tak a ni ang. 37 Tin, chumi rimtui i siam tûr, a siam dân tûr anga siam chu zawng nangmahni tân in siam tûr a ni lo ve, LALPA tâna thil thianghlimah i ngai tûr a ni. 38 Tu pawhin hnim atân ngawta chutiang a siam chuan chu mi chu a chipuite zîng ata tihboral a ni ang,” a ti a.

Exodus 31

Pathian chênna biakbûk sa tûr mi themthiam

1-2 Tin, LALPAN Mosia hnênah, “Ngai teh, Juda hnama mi Hura fapa Uria, chu mi fapa Bezalela chu ka thlang tawh a. 3-5 Tin, ani chu finna te, hriat thiamna te, hriatna te, kawng tinrênga themthiamna te, thiltih tûr fing taka suangtuah thiamna te, zeh tûra lunghlute phel thiamna te, thing zai mawi dân thiamna te, kawng tinrênga themthiamna te nei tûrin Pathian Thlarauvin ka tikhat tawh e. 6 Tin, ngai teh, a hnêna thawk ve tûrin Dan hnama mi Ahisamaka fapa Oholiaba chu keimahin ka ruat leh e; thil siam tûra thu ka pêk zawng zawng che: 7 inbiakna puan in te, thuhriattîrna bâwm te, chumi chunga zahngaihna ṭhutphah te, puan in chhûnga bungrua zawng zawng te; 8 tin, dawhkân leh a hmanrua te, rangkachak hlîr hlaka siam khâwnvâr dahna, a hmanrua zawng zawngte nên, rimtui hâlna maichâm te; 9 tin, hâlrala thilhlanna maichâm, a bungbêl zawng zawngte nên, maihûn leh a hûnchhan te; 10 tin, silhfên mawi tak taka tah te, puithiam rawng an bâwl huna hâk tûr puithiam Arona silhfên thianghlim leh a fapate silhfên te; 11 tin, hriak thih mi te, hmun thianghlim atâna rimtui tui takte hi an siam theihna tûrin mi themthiamho zawng zawngte finna ka pe e. Tih tûra thu ka pêk zawng zawng che ang kha an ti tûr a ni,” tiin a sawi a.

Sabbath - chawlh tûr

12-13 Tin, LALPAN Mosia hnênah, “Israela thlahte hnênah chuan, ‘Ka Chawlhnite hi in serh ngei ngei tûr a ni, in thlahte thlenga keimah leh nangmahni inkâra chhinchhiahna a ni si a; kei hi LALPA, nangmahni tithianghlimtu che u ka ni tih in hriat theih nân. 14 Chuvângin, Chawlhni hi in serh tûr a ni, chu chu in tân ni thianghlim a ni si a. Tu pawh tibawlhhlawh apiang chu tihhlum ngei ngei tûr a ni; tu pawh chumi nia hna eng pawh thawk chu, chu mi chu a chipuite zîng ata tihboral tûr a ni. 15 Ni ruk chhûng hna thawh nân hman tûr a ni a; a ni sarih ni erawh chu chawlh dêrna Chawlhni, LALPA tâna ni thianghlim a ni. Tu pawh Chawlhnia hna thawk apiang chu tihhlum ngei ngei tûr a ni. 16 Chutichuan, Israela thlahte hian Chawlhni chu an thlahte thlenga kumkhuaa thuthlun nân, chu Chawlhni chu an serh tûr a ni. 17 Keimah leh Israela thlahte inkârah hian kumkhuaa thuthlun chhinchhiahna a ni; ni ruk chhûngin LALPAN lei leh vânte a siam a; tin, a ni sarih ni chuan a châwl a, a intihahdam ta a ni si a,’ ti bawk ang che,” tiin a sawi a. 18 Tichuan, Sinai tlânga amah a biak zawh chuan thuhriattîrna lungphêk pahnih, lungphêk, Pathian kutzungṭanga ziak chu Mosia a pe ta a.

Exodus 32

Rangkachak bâwngno lem

1 Tin, mipuite chuan Mosia chu tlâng ata lo chhuk thla har ta êmin an hria a, mipuite chu Arona hnênah an kal khâwm a, a hnênah chuan, “Khai, kan hma hruai tûrin pathiante min siamsak rawh; he Mosia, Aigupta ram ata min hruai chhuaktu lah hi a chanchin kan hre ta si lo va,” an ti a. 2 Tichuan, Aronan an hnênah, “In nupuite, in fapate leh in fanute beh lai, rangkachak bengbehte kha han thlawn ula, ka hnênah han la rawh u,” a ti a. 3 Chutichuan, mipuiho zawng zawng chuan rangkachak bengbeh an beh laite chu an thlawn vek a, Arona hnênah chuan an rawn la a. 4 Tin, ani chuan an kut ata chu a lo la a, thîr zumin a han din a, bâwngno lemah a chhûng ta a. Tin, anni chuan, “Aw Israel-te u, hêngte hi Aigupta ram ata rawn hruai chhuaktu che u in pathiante an nih hi!” an ti a. 5 Tin, chu chu Aronan a han hmuhin, a hmaah chuan maichâm a siam ta a. Tin, Arona chu a tlângau va, “Naktûk hian LALPA tân kût awm rawh se,” a ti a. 6 Tichuan, a tûk zîng takah an tho va, hâlrala thilhlante an hlân a, remna thilhlante an rawn la a; tichuan, mipui chu ei leh in tûrin an ṭhu khâwm a, infiam tûrin an tho leh a. 7 Tin, LALPAN Mosia chu a bia a, “Zu chhuk tawh khai, i mite Aigupta ram ata i rawn hruai chhuahte khu an intichhe zo ta vek mai. 8 Ka thupêkte chu an hawisan hma zet mai. Bâwngno lem an insiam a, an bia a, a hnênah chuan an inthawi a, ‘Aw Israel-te u, hêngte hi Aigupta ram ata rawn hruai chhuaktu che u in pathiante an nih hi!’ an ti e,” a ti a. 9 Tin, LALPAN Mosia hnênah, “He miteho hi ka enthla reng a, ngai teh, hnam luhlul tak an lo nih hi! 10 Tichuan, lo ngawi rawh, anmahni kâng ral zo vek khawpin an chungah ka thinur chu ling hle teh se. Tin, nang hi chi ropui takah ka siam ang che,” a ti a. 11 Tin, Mosian LALPA a Pathian hnênah, “LALPA, thiltihtheihna nasa tak leh kut chak taka i mi, Aigupta ram ata i rawn hruai chhuahte chungah hian engah nge i thinurna chu a lin hle le? 12 Aigupta miten engah tehlul nge, ‘An tâna ṭha lo tûr tlângahte thah tûr leh, lei chung ata kâng ral vek tûrin a hruai chhuak a lo nih hi,’ an la rawn tih ang le? I thinur nasa tak hi han tireh la, i mite chunga he thil ṭha lo tih i tum hi han lamlêt leh ang che. 13 I chhiahhlawh Abrahama te, Isaaka te, Israela te hnêna, ‘Vâna arsi zâtin i thlahte chu ka la tipung ang a, he ram ka lo sawi tawh zawng zawng hi i thlahte ka la pe bawk ang a; tichuan, kumkhuain an luah hlen tawh ang,’ tia nangmah ngei inchhâla chhia i lo chham tawhnate kha hre reng ang che,” tiin a ngên chiam a. 14 Tichuan, LALPAN, “Ka mite chungah thil ṭha lo ka ti ang,” a tih chu a lamlêt ta a. 15 Tin, Mosia chu tlâng ata thuhriattîrna lungphêk pahnih kengin a lêt thla leh ta a; lungphêk a lehlam lehlam panga ziak chuan ve venate chu; a lehlam lehlam ve veahte chuan ziak a ni. 16 Tin, lungphêkte chu Pathian kutchhuak a ni a; tin, a ziakte pawh chu Pathian ziak ngei, lungphêkte chunga ziak a ni. 17 Tin, Josuan mipui au thâwm a han hriat chuan Mosia hnênah, “Riahhmun lamah indo thâwm ri a awm ka ti!” a ti a. 18 Tin, ani chuan, “Hnehtu au thâwm a nih loh chu, hnehate au thâwm pawh a ni hek lo; hla sa thâwm a ni ka hriat zâwk ni,” a ti a. 19 Tin, heti hi a ni a, riahhmun kiang a va thlen chuan, sebâwngno lem leh lâm chu a hmu ta a. Tichuan, Mosia thinrim chu a ling ta phut mai a, a lungphêk kente chu a paih ta ṭhuai a, tlâng hnuaiah chuan a paih keh ta a. 20 Tin, sebâwngno lem an siam chu a la a, meiah a rawh a, a râwt dip derh a, tuiah a phul chiam a, Israela thlahte chu a intîr ta a. 21 Tin, Mosian Arona hnênah chuan, “Hênghote hian i chungah eng nge maw an tiha, hetiang thil sual nasa tak mai an chunga i thlentîr le?” a ti a. 22 Tin, Arona chuan, “Ka pu thinrim hi ling teh thut mai suh se a! Hêng mipuiho hi sual lam âwn tlat mi an ni tih i hria alâwm. 23 Ka hnênah, ‘Kan hma hruai tûrin pathiante min siamsak rawh; he Mosia, Aigupta ram ata min hruai chhuaktu lah hi a chanchin kan hre ta si lo va,’ an rawn ti a. 24 Tin, keiin an hnênah, ‘Tu pawh rangkachak nei apiangin rawn thlawn rawh se,’ ka ti a. Chutichuan, min rawn pe a, keiin meiah ka lo paih lût a; tichuan, he sebâwngno lem hi a lo chhuak ta mai alâwm maw le,” a ti a. 25 Tin, mipuite chu an duh duhin an tâl tih Mosian a hria a (Arona chuan an hmêlmate laka hmuhsitawma awm khawpin an duh duhin a lo tâltîr ta si a); 26 tichuan, Mosia chu riahhmun luhna kawngkaah a ding a, “Tu pawh LALPA lama ṭang apiang chu ka hnênah lo kal rawh se,” a ti a. Tichuan, Levia fate zawng zawng chu a hnênah an va kal khâwm a. 27 Tin, an hnênah, “LALPA, Israel-te Pathianin, ‘Mi tinin in khandaih pai ula, riahhmun chhûngah hian a luhna kawngka aṭanga kawngka lehlam thlengin vâk vêl ula, mi tinin in unaupa pawh, mi tinin in ṭhianpa pawh, mi tinin in ṭhenawmpa pawh that zêl rawh u,’ a ti a ni,” a ti a. 28 Tin, Levia fate chuan Mosia thu ang chuan an ti a. Tin, chumi ni chuan mi sângthum an thi a. 29 Tin, Mosian, “Vawiinah hian LALPA hnênah intihrang rawh u, a ni, mi tinin mahni fapa te, mahni unaupa te an lo do ta si a; tichuan, vawiinah hian malsâwmnain a rawn vûr thei dâwn che u nia,” a ti a. 30 Tin, heti hi a ni a, a tûkah chuan Mosian mipuite hnênah chuan, “Thil sual nasa tak mai in lo ti ta a. Chutichuan, LALPA hnênah ka han chho vang e; in sualnaah hian inremna ka siam thei mahna,” a ti a. 31 Tichuan, Mosia chu LALPA hnênah a han kal leh a, “Aw, hênghote hian thil sual nasa tak mai an lo ti ta a, rangkachak pathiante chu an lo insiam ta. 32 Amaherawhchu, an sual i ngaidam thei ang emaw chu? I theih loh zawngin, i lehkhabua i lo ziak tawh ata kha mi thai bo tûrin ka ngên a che,” a ti a. 33 Tin, LALPAN Mosia hnênah, “Tu pawh ka chunga thil tisual apiang chu ka lehkhabu ata ka thai bo vang. 34 Tichuan, kal la, kalna tûr ka hrilh tawh che hmunah khân mipuihote hi va hruai phawt rawh. Ngai teh, ka vântirhkohvin i hma a hruai zêl ang. Amaherawhchu, ka rawn hrem hunah chuan an sualna ngeiah chuan ka rawn hrem dâwn a ni,” a ti a. 35 Tin, Arona din sebâwngno lem chu an siam avângin LALPAN mipuite chu a hrem ta a.

Exodus 33

Pathianin Sinai tlâng chhuahsan thu a pe

1 Tichuan, LALPAN Mosia chu a bia a, “Chhuak ula, Abrahama te, Isaaka te, Jakoba te hnêna, ‘I thlahte hnênah ka la pe ang,’ tia chhia ka lo chham tâk ramah chuan, nang leh Aigupta ram aṭanga i rawn hruai chhuahte nên hian heta ta hi han chho tawh u, 2-3 hnutetui leh khawizu luanna ramah chuan. Tin, in hmaah vântirhkoh ka rawn tîr ang a; tichuan, Kanaan-ho te, Amor-ho te, Hit-ho te, Periz-ho te, Hiv-ho te, Jebus-ho te chu ka hnawt chhuak ang. Kei zawng in zîngah ka han chho ve dâwn lo ve, hnam luhlul tak in lo ni si a; kawnglakah ka tiboral hlauh dah ang che u,” a ti a. 4 Tin, mipuite chu chu thu lâwmawm lo tak an hriat chuan an ṭap hlawm a, tu mah rêng rêng an inchei duh ta lo va. 5 Tin, LALPAN Mosia hnênah, “Israela thlahte hnênah, ‘Hnam luhlul tak in ni e. In zîngah rei lo tê pawh ka han tel ve zawngin ka tiboral ngei ang che u. Chuvângin, in incheinate kha hlîp vek rawh u; tichuan, ka tih dân tûr che u ka hre thei ang, a ti,’ ti ang che,” a ti a. 6 Tin, Israela thlahte chuan an incheinate chu Horeb tlâng aṭang chuan an hlîp thla hlen ta a.

LALPA chênna biakbûk

7 Tin, Mosian puan in kha a chhawm zêl a, riahhmun pâwn lam hla deuh takah a zâr ṭhîn a; chu chu inbiakna puan in a ti a. Tin, heti hi a ni a, tu pawh LALPA zawng duh apiang chu riahhmun pâwn lama inbiakna puan inah chuan an va kal ṭhîn a. 8 Tin, heti hi a ni a, Mosia chu puan in pana a chhuah hunin mipui zawng zawng chu an tho vek a, mi tin mahni puan in kawngkaah an ding ṭheuh va, Mosia puan ina a luh thlengin an thlîr reng ṭhîn. 9 Tin, heti hi a ni a, Mosia chu puan ina a luh veleh chhûm ding chu a lo chhuk a, puan in kawngkaah chuan a lo ding ṭhîn a; tin, LALPAN Mosia chu a rawn be ṭhîn. 10 Tin, mipui zawng zawngin chhûm ding chu puan in kawngkaa ding an hmu a; tichuan, mipui zawng zawng chu an tho va, mahni puan in kawngka ṭheuhvah chuan chibai an lo bûk ṭhîn a. 11 Tin, miin a ṭhian a bia ang mai hian LALPAN Mosia chu inhmatawnin a be ṭhîn a. Tin, riahhmun lamah chuan a lo kîr leh ṭhîn a; a rawngbâwltu Josua, Nuna fapa, tlangvâl erawh chu puan in chhûng ata chu a lo chhuak leh ve ṭhîn lo.

LALPAN a mite hnêna awm zêl a tiam

12 Tin, Mosian LALPA hnênah chuan, “Ngai teh, nangin ka hnênah, ‘He mite hi han hruai chho rawh,’ i ti a ni a; tu nge ni ka hnêna i rawn tirh ve dâwn mi la hrilh si lo. Nang lah chuan, ‘I hmingah ka hre chiang che alâwm; tin, ka mittlungin i awm tih ka hre bawk alâwm,’ i ti a. 13 Chuvângin, i mit ka tlun si chuan, nangmah ka hriat chian theih nân che leh i mittlunga ka awm theih nân, tûnah hian i kawngte hi khawngaih takin mi hriattîr ang che. Tin, he hnam hi i mite ngei an ni tih ngaihtuah ang che,” a ti a. 14 Tin, ani chuan, “In zingah ka tel ve zêl ang a; tichuan, ka chawlhtîr ang che u,” a ti a. 15 Tin, ani chuan a hnênah, “Kan zînga i tel ve zêl si loh chuan heta ta hi min hruai chhuak ma ta che. 16 Kei leh i mite hi i mittlungin kan awm a ni tih hi engtin nge hriatna a awm theih tâk ang? Lei chunga mihring zawng zawngte hi kei leh i mite nên kan inthliar hranna tûr chuan, nang kan hnêna i kal ṭhin hi a ni lo vem ni?” a ti a. 17 Tin, LALPAN Mosia hnênah, “Chu pawh chu i sawi ang chuan ka ti ang e; ka mit i tlung si a, i hmingah ka hre chiang bawk si chia,” a ti a. 18 Tin, ani chuan, “I ropuina chu khawngaih takin mi han entîr teh,” a ti a. 19 Tin, ani chuan, “Ka ṭhatna zawng zawng chu i hmaah ka lantîr ang a, LALPA hming chu i hmaah ka puang zêl ang. Ka khawngaih apiang chu ka khawngaih ang a, zah ka ngaihna chung apiangah chuan zah ka ngai ang,” a ti a. 20 Tin, ani chuan, “Ka hmêl zawng i hmu thei lo vang; mi hmua nung reng thei tu mah rêng rêng an awm si lo va,” a ti a. 21 Tin, LALPAN, “En teh, ka kianga hi hmun pakhat a awm hi, lungpui chungah hian i ding ang a. 22 Tin, heti hi a ni ang a, ka ropuinain a rawn kal pelh chhûng che chuan, lungpui khi chhûngah hian ka dah ang chia, ka kal pelh hma loh che chuan ka kutin ka khuh ang chia. 23 Tin, ka kut chu ka han la leh ang a; tichuan, ka hnung lam chu i hmu ang; ka hmêl erawh chu hmuh tûr a ni lo ve,” a ti a.

Exodus 34

Thupêk ziakna lungphêk siam nawn

1 Tin, LALPAN Mosia hnênah, “Lungphêk pahnih hmâna mi ang kha chher leh rawh; tin, lungphêkah chuan hmâna i tihkeh tâk lungphêka thu chuang ang kha ka ziak leh ang e. 2 Naktûk zîngah inpeih tum ang che; tin, zîngah chuan Sinai tlângah lo chho la, tlâng chhîpah ka hmaan lo ding ang che. 3 I hnênah tu mah lo kal ve suh se, tlângah rêng rêng chuan tu mah a lanin lo lang hauh suh se; berâm rualte leh bâwng rualte pawh tlâng pangah chuan tla hlek bawk suh se,” a ti a. 4 Chutichuan, lungphêk pahnih hmâna mi ang kha a chher a. Tin, Mosia chu zîng takah a tho va, LALPAN thu a pêk angin Sinai tlângah chuan a han lâwn a; tin, lungphêk pahnih a keng a. 5 Tin, LALPA chu chhûmah chuan a lo chhuk a; tin, a kiangah a va ding a, LALPA hming chu a lam ta a. 6 Tin, LALPA chuan a hma lamah chuan a kal pêl a, “LALPA chu, LALPA chu, Pathian lainatnaa khat, mi khawngaih thei tak, thinnel tak, ngilneihna leh thutak ngah, 7 mi sâng tam tak chunga khawngaihna lantîr ṭhîn, khawlohna te, bawhchhiatna te, suahsualnate ngaidam ṭhîn; thiam lova ruatte chhuah mai ngai lo; pate khawlohna avânga fate, fate fa lehte, chhuan thumna leh chhuan lina thleng pawha hrem ṭhîn chu,” tiin a puang ta a. 8 Tichuan, Mosia chu a kaikûn thuai a, chibai a bûk ta a. 9 Tin, ani chuan, “Tûnah hian i mittlung ka nih chuan, aw LALPA, LALPA chu kan hnênah khawngaih takin kal ve ang hmiang, hnam luhlul tak an ni na a; tichuan, kan khawlohna leh kan sualna ngaidam la, i ro chan atân min nei ang che,” a ti a.

Thuthlung nemngheh thar a ni

10 Tin, ani chuan, “Ngai teh, thu ka thlung e. Khawvêl zawng zawng leh tu hnam zîngah mah la tih ngai loh, i mite zawng zawng mit hmuhah hian thil mak ka ti dâwn e; tichuan, i vêla awmho zawng zawngte hian LALPA thiltih chu an hmu ang. I tâna ka thiltih tûr hi râpthlâk tak a ni dâwn si a. 11 Vawiina ka thupêk tûr che hi pawm rawh. Ngai teh, i hmaah chuan Amor-ho te, Kanaan-ho te, Hit-ho te, Periz-ho te, Hiv-ho te, Jebus-ho te ka hnawt chhuak dâwn e. 12 Fîmkhur rawh; chuti lo chuan, i kalna tûr rama chêngte hnênah thu i thlung ang a, in zîngah hian thang a lo ni dah ang e. 13 Amaherawhchu, an maichâmte chu in tichim vek tûr a ni a, an lungphunte chu tikeh sawm vekin, an Aseri-te chu in kit vek tûr a ni; 14 pathian dang rêng rêng chu i be tûr a ni si lo va; LALPA chu a hming rêng pawh Thîkthuchhiaa a ni a, Pathian thîkthuchhia a ni si a; 15 chuti lo chuan, chumi rama mite hnênah chuan thu i thlung ang a, an pathiante lakah an uirê ang a, an pathiante hnênah an inthawi ang a, an rawn sâwm chein an inthawina chu i ei dah ang e; 16 tin, i fapate tân an fanute i nei ang a, an fanute chu an pathiante lakah an uirê ang a, i fapate pawh an pathiante lakah an uirêtîr dah ang e. 17 Milem chhûn pathiante chu i siam tûr a ni lo. 18 “Chhang dawidim telh loh kût i nei tûr a ni. Thu ka lo pêk tâk che ang khân, ni sarih chhûng chu chhang dawidim telh loh, Abib thla hun ruatah khân i ei tûr a ni; Abib thla khân Aigupta ram ata chu i lo chhuak a ni si a. 19 Chhûl keu hmasa ber apiang chu ka ta a ni; tin, i ran pa zawng zawng, sebâwngpa leh berâmpa piang thla hmasa berte pawh. 20 Tin, sabengtung piang thla hmasa ber chu berâmnovin i tlan tûr a ni. Tin, i tlan duh loh leh a ring chu i ulh tliak tûr a ni. I fapa piang hmasa zawng zawng chu i tlan tûr a ni. Tichuan, ka hmaah tu mah hi kut ruakin in lo lang tûr a ni lo. 21 Ni ruk chhûngin hna i thawk tûr a ni a, a ni sarih ni erawh chuan i châwl tûr a ni; lei leh lai leh buh seng lai pawhin i châwl tûr a ni. 22 Chawlhkâr kût, buh thar tirh kût chu, kum a lo ral a, buh khung vek hnua pâwl kût nên i nei tûr a ni. 23 I mipa zawng zawngte chu kum khatah vawi thum, LALPA PATHIAN, Israel-te Pathian hmaah chuan an rawn inlan ṭhîn tûr a ni. 24 I hmaah hnam tin ka hnawt chhuakin, i ramrite chu ka zauh dâwn si a; kum khatah vawi thum LALPA i Pathian hmaa inlan tûra i han kal hunah chuan tu mahin i ram hi an rawn ît hek lo vang. 25 “Ka tân inthawina sa thisen chu chhang dawidim telh nên chuan i rawn hlân tûr a ni lo, kalhlên kût inthawina pawh chu a tûk thlengin awmtîr tûr a ni hek lo. 26 I lova thlai thar hmasa ber chu LALPA i Pathian inah i rawn dah tûr a ni. Kêlnosa, a pui hnutetuiin i chhûm tûr a ni lo,” a ti a. 27 Tin, LALPAN Mosia hnênah, “Hêng thute hi ziak rawh khai, hêng ang thute hian a nia i hnênah leh Israel-te hnêna thu ka thlun ni,” a ti a. 28 Tin, chutah chuan LALPA hnênah ni sawmli leh zan sawmli a awm a; chaw rêng rêng a ei lo va, tui pawh a in hek lo. Tin, lungphêkahte chuan thuthlunna thu, thu sâwm pêkte chu a ziak ta a.

Sinai tlâng aṭangin Mosia a chhuk

29 Tin, heti hi a ni a, Mosia chu thuhriattîrna lungphêk pahnih chu a kuta kengin Sinai tlâng ata chu a chhuk a, tlâng ata a chhuk chuan, Mosia chuan chutia an inbiakna avâng chuan a hmai vun chu a lo êng ta tih a hre hauh lo va. 30 Tin, Arona leh Israela thlah zawng zawngten Mosia an han hmuh chuan, ngai teh, a hmai vun chu a lo êng a, an rawn hnaih ngam lo va. 31 Tin, Mosian anmahniho chu a han au va; tin, Arona leh pung khâwmho rorêltu zawng zawngte chu a hnênah an lo kîr leh a; tin, Mosian anniho chu a lo bia a. 32 Chumi hnuah chuan Israela thlahte zawng zawng chuan an rawn hnaih a; tichuan, Sinai tlânga LALPA nêna an inbiakna zawng zawngte chu thu pein a lo hrilh chhâwng a. 33 Tin, Mosian anmahni chu a biak zawh chuan a hmai chu hmaikhuhnain a khuh ta a. 34 Amaherawhchu, Mosia LALPA be tûra a hmaa a luh hun apiang chuan, a lo chhuah leh hma loh chuan hmaikhuhna chu a hlîp ṭhîn a; tin, a lo chhuak leh ṭhîn a, a thupêkte chu Israela thlahte a hrilh chhâwng ṭhîn a. 35 Tin, Israela thlahte chuan Mosia hmai chu an han en a, Mosia hmai vun chu a lo êng ṭhîn a; tin, Mosia chu Pathian be tûra a luh leh hma chuan hmaikhuhna chuan a hmai a khuh leh ṭhîn a.

Exodus 35

Sabbath chungchânga dân

1 Tin, Mosian Israela thlah pung khâwmho zawng zawngte chu a ko khâwm a, an hnênah, “Hêng hi a nih hi LALPAN in tih tûra thu a pêk che u chu: 2 Ni ruk chhûng hna thawh nân hman tûr a ni a, a ni sarih ni erawh chu in tân ni thianghlim, LALPA tâna chawlh dêrna Chawlhni a ni tûr a ni: tu pawh chumi nia hna thawk apiang chu tihhlum tûr a ni ang. 3 Chawlhni chuan in chênna hmun rêng rêngahte chuan mei in chhêm tûr a ni lo,” a ti a.

Biakbûk tâna thilpêk

4 Tin, Mosian Israela thlahte pung khâwmho zawng zawng hnênah chuan, “Hei hi a nih hi LALPAN thu a pêk che u chu: 5 ‘In zîng ata LALPA tâna thilhlan tûr rawn la rawh u. Tu pawhin a thinlunga pêk châk apiang chuan LALPA tân hlan tûr chu rawn la rawh se: rangkachak te, tangkarua te, dâr te, 6 la dumpâwl te, senduk te, senlâr te, lazai sîn te, kêl hmul te nên; 7 tin, berâmpa vun chhum sen te, savun ṭha mi te, thingri thingte nên; 8 tin, khâwnvâr atân hriak te, hriak thih mi atân leh hâl tûr rimtui tak atân englo rimtui nên; 9 tin, puithiam kawr leh kawr âwma zeh tûrin onukion lungte leh lunghlute nên.

LALPA chênna biakbûk tâna hman tûr thilte

10 “ ‘Tin, in zînga mi themthiam apiang chu lo kal sela, LALPAN siam tûra thu a pêk apiang chu siam rawh se: 11 biakbûk te, a puan in te, a khuhna te, a chilh behna te, a ban rem khâwm te, a bangrel te, a ban te, a nghahchhan ker kuakte nên; 12 bâwm leh a zâwnfung te, zahngaihna ṭhutphah te, a daidanna tûr puanzâr nên; 13 dawhkân leh a zâwnfung te leh a hmanrua zawng zawng te, chhangdah te nên; 14 tin, êng atân khâwnvâr dahna te leh a hmanrua zawng zawng te, a khâwnvâr te, chhit ên atân hriak te nên; 15 tin, rimtui hâlna maichâm leh a zâwnfung te, hriak thih mi te, hâl tûr rimtui tak te, biakbûk kawngkaa zâr tûr kawngka puanzâr te nên; 16 hâlrala thilhlanna maichâm, a dâr lên leh a zâwnfungte leh a hmanrua zawng zawng te, maihûn leh a hûnchhan te nên; 17 biakbûk hung chhûng kawtlaia puanzâr te, a ban te, a ban nghahchhan ker kuak te leh a hung chhûng kawngkaa puanzâr te nên; 18 biakbûk kilh behna te, a hung chhûng kawtlai kilh behna te, a hrui te nên; 19 hmun thianghlima rawngbâwlna tûra silhfên mawi taka tah te, puithiam hna an thawh huna hâk tûr puithiam Arona silhfên thianghlim leh a fapate silhfênte,’ tiin,” a ti a.

Mipuiten an thilpêk an rawn la khâwm

20 Tichuan, Israela thlah pung khâwmho zawng zawngte chu Mosia hnên ata an ṭîn ta vek a. 21 Tin, mi tin thinlung taka phûr sârh apiang leh rilru taka phal apiang chu an lo kal a, inbiakna puan ina hman tûr leh, rawngbâwlna lam atâna thil hman ṭûl apiang leh, silhfên thianghlim tûr chu LALPA tân an rawn thawh hlawm a. 22 A hmei a pain pêk châk apiangte chu an lo kal a, banbun te, bengbeh te, hming nemna zungbun te, ṭhi te, rangkachak incheina tinrêngte an rawn la a; mi tin rangkachak hlan tûr nei apiangin LALPA tân an hlân ṭheuh va. 23 Tin, mi tin la dumpâwl te, senduk te, senlâr te, lazai sîn te, kêl hmul te, berâmpa vun chhum sen te, savun ṭha mi te nei apiangin an rawn keng hlawm a. 24 Mi tin tangkarua leh dârte thawh apiangin LALPA tâna thilhlan tûr an rawn keng a. Tin, mi tin thingri thing, hmanraw tinrêng atâna hman tlâk nei apiangin an rawn la a. 25 Tin, hmeichhe themthiamho zawng zawngte chuan la an kai a, chûng an la kaih dumpâwl te, senduk te, senlâr te, lazai sîn te chu an rawn keng hlawm a. 26 Tin, hmeichhe themthiam phûr sârhho zawng zawngte pawhin kêl hmul an kai a. 27 Tin, puithiam kawr leh kawr âwma zeh tûrin rorêltuten onukion lungte leh lunghlute an rawn keng a; 28 tin, chhit ên atân te, hriak thih mi atân te, hâl tûr rimtui tak atân hriak leh rimtuite pawh. 29 Israela thlahte chuan LALPA hnênah duh thua thilhlan an rawn hlân a; mi tin, a hmei a pa, LALPAN Mosia kuta thil siam tûra thu a pêk zawng zawngte siamna tûra thinlunga châk taka kengtute chuan.

LALPA chênna bûk siam tûr mi themthiam

30 Tin, Mosian Israela thlahte hnênah chuan, “Ngai teh u, LALPAN Juda hnama mi Hura fapa Uria, chu mi fapa Bezalela chu a thlang tawh e. 31 Chu mi chu finna te, hriat thiamna te, hriatna te, kawng tinrênga themthiamna te nei tûrin Pathian Thlarauvin a tikhat tawh a, 32 thiltih tûr fing taka suangtuah thiamna te, rangkachak leh tangkarua leh dâr chher thiamna te, 33 lunghlute zeh tûra phel thiamna te, thing zai mawi dân thiamna te, kawng tinrênga themthiamna te nei tûrin. 34 Tin, amah nên, Dan hnama mi Ahisamaka fapa Oholiaba nên mite zirtîr theihna finna a pe ve ve a. 35 Anni chu kawng tinrênga themthiamna te, englo ziak thiamna te, themthiamna te, la dumpâwl te, senduk te, senlâr te, lazai sîn te zeh mawi thiamna te, puan tah thiamna te, hnathawh tinrêng thiamna te, thiltih tûr fing taka suangtuah thiamna te nei tûrin thinlung finnain a tikhat tawh e.

Exodus 36

1 “Tin, Bezalela leh Oholiaba leh mi themthiam tu pawh, LALPAN thu a pêk ang zêla hmun thianghlima rawngbâwlna hna tinrêng thawk thei tûra finna leh hriat thiamna a pêk apiangte chuan an bei tûr a ni,” a ti a.

Mipuiten thilpêk an rawn la ṭeuh

2 Tin, Mosian Bezalela leh Oholiaba leh mi themthiamho, LALPAN an thinlunga finna a pêka, chumi hna bei peih tûra thinlung taka phûr sârh apiang chu a ko va. 3 Tin, Israela thlahten hmun thianghlima rawngbâwl nâna thil siam tûra an rawn thawh zawng zawng chu Mosia hnên aṭangin an la zêl a. Tin, tûk tin duh thua thilhlante chu a hnênah an rawn hlân zêl bawk a. 4 Tin, mi themthiamho zawng zawng, hmun thianghlim atâna hna tinrêng thawkte chuan an hnathawh lai chu an tlânsan ṭheuh va, 5 Mosia hnênah, “LALPAN siam tûra thu a pêk siam nân mite chuan a chuang a liamin thil an rawn la e,” tiin an thlen a. 6 Tin, Mosia chuan thu a pe a, “Hmun thianghlim atâna thil pêk tûr chu a hmei a pa, tu mahin rawn buatsaih tawh suh se,” tiin an riahhmunah chuan an tlângautîr ta a. Chutichuan, mite chuan an rawn lâk phal a ni ta lo va. 7 An neih sa chu siam ṭûl apiang siamna tûr chuan a tâwk hle mai a, a tam lutuk mah a ni.

LALPA chênna biakbûk sak thu

8 Tin, an zînga mi themthiam hnathawkho zawng zawngte chuan biakbûk chu puanzâr sâwm neiin an siam a; chûng puanzârte chu lazai sîn tak kawp te, dumpâwl te, senduk te, senlâr te hmangin cherub lemte mi thiam tak siam chuantîrin a siam a. 9 Puanzâr chu a sei lam tawng sawmhnih leh tawng riat ṭheuh a ni a, puanzâr chu a hlai lam tawng li ṭheuh a ni; puanzâr zawng zawng chu a inchen vek a. 10 Tin, puanzâr pangate chu a zawm vek a, puanzâr panga dangte pawh chu a zawm bawk a. 11 Tin, puanzâr zawm khat hmâwrtawng ber tlângah chuan a beng a dumpâwlin a siam a; chutiang bawkin puanzâr zawm lehlam hmâwrtawng ber tlângah chuan a siam bawk a. 12 Puanzâr pakhatah chuan beng sawmnga a siam a, puanzâr zawm khat tlângah pawh chuan beng sawmnga a siam bawk a; chûng bengte chu a inep thliah a. 13 Tin, rangkachak chilh behna sawmnga a siam a, a chilh behnate chuan puanzârte chu a chilh bet a; tichuan, biakbûk chu pindan pakhat a lo ni ta a. 14 Tin, biakbûk chung khuh nân kêl hmul puanzârte a siam a; puanzâr sâwm leh pakhat a siam a. 15 Puanzâr chu a sei lam tawng sawmthum ṭheuh a ni a, puanzâr chu a hlai lam tawng li ṭheuh a ni; puanzâr sâwm leh pakhatte chu a inchen vek a. 16 Puanzâr pangate chu a ṭhui zawm vek a, puanzâr paruk pawh chu a ṭhui zawm vek a. 17 Tin, puanzâr zawm khat hmâwrtawng ber tlângah chuan beng sawmnga a siam a, puanzâr zawm lehlam tlângah chuan beng sawmnga a siam bawk a. 18 Tin, puan in chu pindan pakhat a lo nih theih nân a chilh zawmna tûrin dâr chilh behna sawmnga a siam a. 19 Tin, berâmpa vun chhum senin puan in chung khuhna te, savun ṭha miin a chunga khuh lehna te a siam a. 20 Tin, biakbûk ban rem khâwm tûrte chu ngîl taka dingin thingri thingin a siam a. 21 Ban rem khâwm sei lam chu tawng sâwm a ni a, a vâng lam chu tawng khat leh a chanve ṭheuh a ni. 22 Ban rem khâwm tinah chuan ke pahnih inzawmin a awm a. Chutiang chuan biakbûk ban rem khâwm zawng zawng chu a siam a. 23 Tin, biakbûk atân chuan ban rem khâwmte a siam a, chhim chhawng chhim lampang atân chuan ban rem khâwm sawmhnih a siam a. 24 Tin, chumi ban rem khâwm sawmhnih nghahchhan atân chuan tangkaraw tlang ker kuak sawmli a siam a: a ke pahnih atân ban rem khâwm pakhat nghahchhan ker kuak pahnih leh, a ke pahnih atân ban rem khâwm dang pakhat nghahchhan ker kuak pahnih a siam a. 25 Tin, biakbûk sîr lehlam hmâr chhawng lam atân chuan ban rem khâwm sawmhnih a siam a, 26 tangkaraw tlang ker kuak sawmli nên: ban rem khâwm pakhat atân nghahchhan ker kuak pahnih a siam a. 27 Tin, biakbûk kawmchâr khawthlang chhawng lam atân chuan ban rem khâwm paruk a siam a, 28 Tin, biakbûk kawmchâr kil ve ve atân chuan ban rem khâwm pahnih a siam a. 29 Tin, a hnuai lamah chuan thlawp a ni a, chutiang bawkin a chhîp lam khâng hmasa ber thlengin thlawp a ni. A kil pahnihah chuan chutiang chuan a ti ve ve a. 30 Tin, ban rem khâwm pariat, a nghahchhan tûr tangkaraw tlang ker kuak sâwm leh paruk nên a awm a, ban rem khâwm tin innghah nân ker kuak pahnih zêl a awm a ni. 31 Tin, thingri thingin bangrel: biakbûk bang lehlam ban rem khâwm atân panga, 32 biakbûk bang lehlam ban rem khâwm atân panga, biakbûk kawmchâr khawthlang chhawng lam ban rem khâwm atân pawh panga a siam a. 33 Tin, bangrel laita, ban rem khâwm lai taka mi chu ban rem khâwm hmâwrtawng ber aṭangin, a lehlam hmâwrtawng ber thlenga thil tlang tûrin a siam a. 34 Ban rem khâwmte chu rangkachak tîin a luan a, bangrelte thil nân rangkachak khângte a siam a; tin, chûng bangrelte chu rangkachak tîin a luan a. 35 Tin, puanzâr tûr chu lazai sîn tak kawp te, a dumpâwl te, a senduk te, a senlâr te hmangin cherub lemte mi thiam tak siam chuantîrin a siam a. 36 Tin, chumi atân chuan thingri ban pali a siam a, chûng chu rangkachak tîin a luan a, a bânnate chu rangkachak a ni; tin, chûng nghahchhan atân chuan tangkaraw tlang ker kuak pali a chhûng a. 37 Tin, puan in kawngkaa zâr tûr lazai sîn tak kawp te, a dumpâwl te, a senduk te, a senlârte hmangin, puan zeh mawi thiam tak zeh nên a siam a; 38 tin, chumi zârna tûr ban panga, a bânnate nên a siam a. Tin, ban lubâwkte leh a zârfungte chu rangkachak tîin a luan a; mahse, chûng nghahchhan ker kuak pangate chu dâr a ni a.

Exodus 37

Thuthlung bâwm siam thu

1 Tin, Bezalela chuan thingri thingin bâwm chu a siam a; a dung lam chu tawng hnih leh a chanve a ni a, a vâng lam chu tawng khat leh a chanve a ni a, a sân lam chu tawng khat leh a chanve a ni. 2 A chhûng leh a pâwn chu rangkachak hlîr hlak tîin a luan a, rangkachakin a tlâng a kâwm a. 3 Tin, chumi a ke palia vuah atân chuan rangkachak khâng pali a chhûng a: khâng pahnih chu a lehlam atân a ni a, khâng pahnih chu a lehlam atân a ni. 4 Tin, thingri thingin zâwnfungte a siam a, chûng chu rangkachak tîin a luan a. 5 Tin, bâwm chu zâwn theih tûrin a panga khângah chuan zâwnfungte chu a rawlh a. 6 Tin, rangkachak hlîr hlakin zahngaihna ṭhutphah a siam a; a dung lam chu tawng hnih leh a chanve a ni a, a vâng lam chu tawng khat leh a chanve a ni. 7 Tin, cherub pahnih rangkachakin a siam a; zahngaihna ṭhutphah hmâwr ve vea mi chu a chherin a chher a: 8 a hmâwr lehlamah cherub pakhat, a hmâwr lehlamah cherub pakhat. Zahngaihna ṭhutphah nêna inbelhbawm hlâwm vekin a hmâwr ve vea cherub-te chu a siam a. 9 Tin, cherub-te chuan zahngaihna ṭhutphah chu an thlaa hliapin an thlate chu an zâr duai a. Inhmatawnin, zahngaihna ṭhutphah lam chu cherub-te chuan an hawi ve ve a.

Chhanghlan dahna dawhkân

10 Tin, thingri thingin dâwhkân chu a siam a; a dung lam chu tawng hnih a ni a, a vâng lam chu tawng khat a ni a, a sân lam chu tawng khat leh a chanve a ni. 11 Tin, chu chu rangkachak hlîr hlak tîin a luan a, rangkachakin a tlâng a kâwm a. 12 Tin, kutphah bawka hlaiin a kâwm a siam a, chu chu rangkachakin a tlâng a kâwm leh a. 13 Tin, chumi atân chuan rangkachak khâng pali a chhûng a, chumi khâng chu dawhkân ke pali kil ṭheuhvah chuan a vuah a. 14 Dawhkân chu zâwna, a zâwnfung chu rawlh theih tûrin khângte chu a kâwm siin a vuah a. 15 Tin, dawhkân chu zâwn nân zâwnfungte chu thingri thingin a siam a, rangkachak tîin a luan a. 16 Tin, dawhkâna bungbêl - thlêng te, no te, a bun chhuahna tûr berhbu te, uain thâwlte chu - rangkachak hlîr hlakin a siam a.

Khâwnvâr dahna siam thu

17 Khâwnvâr dahna chu rangkachak hlîr hlakin a siam a; chumi khâwnvâr dahna chu a ngul bul leh a ngul chu a chherin a chher a; a no te, a pârfung te, a pârte chu a inzawm vek a. 18 A sîrahte chuan pêng paruk a lo pêng chhuak a: khâwnvâr dahna ngul sîr lehlamah chuan pêng pathum a awm a, khâwnvâr dahna ngul sîr lehlamah chuan pêng pathum a awm bawk a. 19 A lehlam pang pêngah chuan vaiumkhal kuhmûm ang no pathum, a pârfung leh a pâr a siam a; tin, a lehlam pang pêngah pawh vaiumkhal kuhmûm ang no pathum, a pârfung leh a pâr a siam a; chutiang chuan khâwnvâr dahna pêng paruk atân a siam a. 20 Tin, khâwnvâr dahna ngulah chuan no pali, vaiumkhal kuhmûm anga siam, a pârfung leh a pârte a awm a. 21 Chumi inzawm vek pêng pahnih hnuaiah chuan pârfung hmasa ber a awm a, chumi inzawm vek pêng pahnih hnuaiah chuan pârfung dang a awm a, chumi inzawm vek pêng pahnih hnuaiah chuan pârfung dang a awm leh bawk a; khâwnvâr dahna ngula pêng parukah chuan a awm vek a ni. 22 Chûng a pârfungte leh a pêngte chuan a zawm vek a; a pum chuan rangkachak hlîr hlaka chher a ni. 23 Tin, chumi atân chuan khâwnvâr pasarih nên, chaichehte nên, meivâp dahnate nên rangkachak hlîr hlakin a siam a. 24 Chumi khâwnvâr dahna leh a hmanrua tûr zawng zawng siam nân chuan rangkachak hlîr hlak talent khat a hmang a.

Rimtui hâlna tûr maichâm

25 Tin, rimtui hâl nân thingri thingin maichâm a siam a. A dung lam chu tawng khat a ni a, a vâng lam chu tawng khat a ni a, kil li a ni; tin, a sân lam chu tawng hnih a ni. A kîte nên chuan a inzawm vek a ni. 26 Tin, a chungte, a pang vêlte leh a kîte chu rangkachak hlîr hlak tîin a luan a; tin, rangkachakin a tlâng a kâwm a. 27 Tin, a kotlâng hnuai lamah, a sîr tuakah chuan rangkachak khâng pahnih a siam a; chûng chu a zâwnfung rawlhna tûr a ni. 28 Tin, thingri thing zâwnfungte a siam a, rangkachak tîin a luan a.

Hriak siam thu

29 Hriak thih chi, hriak thianghlim leh englo rimtui tak hâl tûr rimtui fîm tak, rimtui siamtu siam angin a siam bawk a.

Exodus 38

Thuthlung bâwm siam thu

1 Tin, Bezalela chuan thingri thingin bâwm chu a siam a; a dung lam chu tawng hnih leh a chanve a ni a, a vâng lam chu tawng khat leh a chanve a ni a, a sân lam chu tawng khat leh a chanve a ni. 2 A chhûng leh a pâwn chu rangkachak hlîr hlak tîin a luan a, rangkachakin a tlâng a kâwm a. 3 Tin, chumi a ke palia vuah atân chuan rangkachak khâng pali a chhûng a: khâng pahnih chu a lehlam atân a ni a, khâng pahnih chu a lehlam atân a ni. 4 Tin, thingri thingin zâwnfungte a siam a, chûng chu rangkachak tîin a luan a. 5 Tin, bâwm chu zâwn theih tûrin a panga khângah chuan zâwnfungte chu a rawlh a. 6 Tin, rangkachak hlîr hlakin zahngaihna ṭhutphah a siam a; a dung lam chu tawng hnih leh a chanve a ni a, a vâng lam chu tawng khat leh a chanve a ni. 7 Tin, cherub pahnih rangkachakin a siam a; zahngaihna ṭhutphah hmâwr ve vea mi chu a chherin a chher a: 8 a hmâwr lehlamah cherub pakhat, a hmâwr lehlamah cherub pakhat. Zahngaihna ṭhutphah nêna inbelhbawm hlâwm vekin a hmâwr ve vea cherub-te chu a siam a. 9 Tin, cherub-te chuan zahngaihna ṭhutphah chu an thlaa hliapin an thlate chu an zâr duai a. Inhmatawnin, zahngaihna ṭhutphah lam chu cherub-te chuan an hawi ve ve a.

Chhanghlan dahna dawhkân

10 Tin, thingri thingin dâwhkân chu a siam a; a dung lam chu tawng hnih a ni a, a vâng lam chu tawng khat a ni a, a sân lam chu tawng khat leh a chanve a ni. 11 Tin, chu chu rangkachak hlîr hlak tîin a luan a, rangkachakin a tlâng a kâwm a. 12 Tin, kutphah bawka hlaiin a kâwm a siam a, chu chu rangkachakin a tlâng a kâwm leh a. 13 Tin, chumi atân chuan rangkachak khâng pali a chhûng a, chumi khâng chu dawhkân ke pali kil ṭheuhvah chuan a vuah a. 14 Dawhkân chu zâwna, a zâwnfung chu rawlh theih tûrin khângte chu a kâwm siin a vuah a. 15 Tin, dawhkân chu zâwn nân zâwnfungte chu thingri thingin a siam a, rangkachak tîin a luan a. 16 Tin, dawhkâna bungbêl - thlêng te, no te, a bun chhuahna tûr berhbu te, uain thâwlte chu - rangkachak hlîr hlakin a siam a.

Khâwnvâr dahna siam thu

17 Khâwnvâr dahna chu rangkachak hlîr hlakin a siam a; chumi khâwnvâr dahna chu a ngul bul leh a ngul chu a chherin a chher a; a no te, a pârfung te, a pârte chu a inzawm vek a. 18 A sîrahte chuan pêng paruk a lo pêng chhuak a: khâwnvâr dahna ngul sîr lehlamah chuan pêng pathum a awm a, khâwnvâr dahna ngul sîr lehlamah chuan pêng pathum a awm bawk a. 19 A lehlam pang pêngah chuan vaiumkhal kuhmûm ang no pathum, a pârfung leh a pâr a siam a; tin, a lehlam pang pêngah pawh vaiumkhal kuhmûm ang no pathum, a pârfung leh a pâr a siam a; chutiang chuan khâwnvâr dahna pêng paruk atân a siam a. 20 Tin, khâwnvâr dahna ngulah chuan no pali, vaiumkhal kuhmûm anga siam, a pârfung leh a pârte a awm a. 21 Chumi inzawm vek pêng pahnih hnuaiah chuan pârfung hmasa ber a awm a, chumi inzawm vek pêng pahnih hnuaiah chuan pârfung dang a awm a, chumi inzawm vek pêng pahnih hnuaiah chuan pârfung dang a awm leh bawk a; khâwnvâr dahna ngula pêng parukah chuan a awm vek a ni. 22 Chûng a pârfungte leh a pêngte chuan a zawm vek a; a pum chuan rangkachak hlîr hlaka chher a ni. 23 Tin, chumi atân chuan khâwnvâr pasarih nên, chaichehte nên, meivâp dahnate nên rangkachak hlîr hlakin a siam a. 24 Chumi khâwnvâr dahna leh a hmanrua tûr zawng zawng siam nân chuan rangkachak hlîr hlak talent khat a hmang a.

Rimtui hâlna tûr maichâm

25 Tin, rimtui hâl nân thingri thingin maichâm a siam a. A dung lam chu tawng khat a ni a, a vâng lam chu tawng khat a ni a, kil li a ni; tin, a sân lam chu tawng hnih a ni. A kîte nên chuan a inzawm vek a ni. 26 Tin, a chungte, a pang vêlte leh a kîte chu rangkachak hlîr hlak tîin a luan a; tin, rangkachakin a tlâng a kâwm a. 27 Tin, a kotlâng hnuai lamah, a sîr tuakah chuan rangkachak khâng pahnih a siam a; chûng chu a zâwnfung rawlhna tûr a ni. 28 Tin, thingri thing zâwnfungte a siam a, rangkachak tîin a luan a.

Hriak siam thu

29 Hriak thih chi, hriak thianghlim leh englo rimtui tak hâl tûr rimtui fîm tak, rimtui siamtu siam angin a siam bawk a.

Exodus 39

Puithiam inthuamna tûr tah thu

1 Tin, la dumpâwl te, a senduk te, a senlâr te hmangin hmun thianghlima rawngbâwlna tûra silhfên mawi takte an siam a; Arona tân silhfên thianghlimte an siam bawk a, LALPAN Mosia thu a pêk ang khân. 2 Rangkachak zai te, la dumpâwl te, a senduk te, a senlâr te, la zai sîn tak kawpte hmangin puithiam kawr chu a siam a. 3 Rangkachak chu pan takin an chhu pêr a, la dumpâwl te, a senduk te, a senlâr te, la zai sîn tak tea mi themthiam takin a zeh tûrin an zai thlûr seng a. 4 A dârbak ṭhui belhbawmin an siam a; a hmâwr ve vea ṭhui belhbawm a ni. 5 Tin, chumi kawr chunga kâwnghrên tûr themthiam taka tah chu, chumi kawr chi bawk tluan khat vek a ni a: rangkachak zai te, la dumpâwl te, a senduk te, a senlâr te, la zai sîn tak kawptea tah a ni, LALPAN Mosia thu a pêk ang khân. 6 Tin, Israela thlahte hming ang zêlin, nemnaa ziak ang chuanna rangkachak zai phiara phûm onukion lungahte chuan an ziak a. 7 Tin, Israela thlahte hriat rengna lung atân puithiam kawr dârbakah chuan a bel a, LALPAN Mosia thu a pêk ang khân.

Puithiam âwmbel siam thu

8 Tin, âwmbel chu puithiam kawr siam ang bawk mi thiam tak siam angin rangkachak zai te, la dumpâwl te, a senduk te, a senlâr te, la zai sîn tak kawpte hmangin a siam a. 9 Chu chu kil li nei a ni a, âwmbel chu an thuah a; a dung lam chu khâp a ni a, a vâng lam pawh khâp bawk a ni a, thuah a ni. 10 Tin, chutah chuan lunghlute tlar liin an zep a: tlar khatna chu saridon te, topazio te, smaragdon te a ni a; 11 tlar hnihna chu anthrax te, sappheiros te, sardonukion te a ni a; 12 tlar thumna chu huakinthos te, akates te, amethustos te a ni a; 13 tlar lina chu krusolithos te, berullion te, onukion te a ni a: rangkachak zai phiara phûm fel ṭhêt a ni. 14 Tin, lung chu sâwm leh pahnih, Israela thlahte hming ang zêlin a ni a: hming nemnaa chuang ang, hnam tin an hming ang zêlin, hnam sâwm leh hnam hnihte tân chuan a ni. 15 Tin, âwmbel chungah chuan hruihrual ang khaidiatte, rangkachak hlîr hlak herh an siam a. 16 Rangkachak zai phiar pahnih leh rangkachak khâng pahnih an siam bawk a; tichuan, âwmbel tlâng hmâwr ve veah chuan khângte chu an vuah a. 17 Tin, rangkachak khaidiat herh pahnih chu âwmbel tlâng hmâwr ve vea khâng pahnihah chuan an thlung a. 18 Tin, khaidiat herh hmâwr lehlam pahnihte chu rangkachak zai phiar pahnihah chuan an zawm a, chu chu puithiam kawr hma lama dârbakah chuan an thlung a. 19 Tin, rangkachak khâng pahnih an siam a, chûng chu âwmbel kil pahnih, puithiam kawr dep chhûng lampangah chuan an vuah a. 20 Rangkachak khâng pahnih dang an siam leh a, chûng chu a hma lama puithiam kawr dârbakna pahnih hnuai lampang, a inzawmna lai vêl, puithiam kawr hrênna themthiam taka tah chung lamah chuan an vuah a. 21 Tin, puithiam kawra khângahte chuan âwmbela khângte chu hrui dumpâwlin an chilh zawm a, themthiam taka tah puithiam kawr hrênna chung lama a awm theih nân leh, âwmbel chu puithiam kawr nên a inhran loh nân, LALPAN Mosia thu a pêk ang khân.

Puithiam inthuamna tûr dang siam thu

22 Puithiam kawrfual, a dumpâwl hlîr hlaka tah a siam a; 23 tin, kawrfual lai tak chu kawr bân bûl angin a tiâwng a, a âwng chu a thlêr chhiat theih mai lohna tûrin a tlâng vêl chu a chep a. 24 Kawrfual fêmahte chuan pawmgranet lem - a dumpâwl te, a senduk te, a senlâr te, la zai kawptein an siam a. 25 Tin, rangkachak hlîr hlak tengengte an siam a, chûng tengeng chu kawrfual fêmah a vêlin pawmgranet inkârahte chuan an dah a, pawmgranet inkâr zêlah an dah a ni: 26 tengeng pakhat leh pawmgranet pakhat zêl kawrfual fêmah a vêlin rawngbâwlna tûra inthuam nân an dah a, LALPAN Mosia thu a pêk ang khân. 27 Tin, Arona leh a fapate tân chuan la zai sîn taka tah kawrte an siam a, 28 la zai sîn taka siam puithiam lukhum te, la zai sîn taka siam diar ṭha tak te, la zai sîn tak kawpa siam la zai sîn kekawr te, 29 la zai sîn tak kawp te, a dumpâwl te, a senduk te, a senlârte hmanga puan zehmawi thiam taka zeh kawnghrên te nên, LALPAN Mosia thu a pêk ang khân. 30 Tin, lukhum thianghlim atâna rangkachak phêk chu rangkachak hlîr hlakin an siam a, a pangah chuan hming nemna a chuang ang, “LALPA PUAL” tih an chuantîr a. 31 Tin, puithiam lukhum chung lama bel tûrin hrui dumpâwlin an thlung a, LALPAN Mosia thu a pêk ang khân.

An siam zo

32 Chutichuan, inbiakna puan in biakbûk hna zawng zawng chu an zo ta a. Tichuan, LALPAN ti tûra Mosia thu a pêk ang chiah zêlin Israela thlahte chuan an ti a. 33 Tin, Mosia hnênah biakbûk an rawn kalpui a, puan in te, a hmanrua zawng zawng te: a chilh behna te, a ban rem khâwm te, a bangrel te, a ban te, a nghahchhan ker kuak te nên; 34 berâmpa vun chhum sena siam a khuhna te, savun ṭha mia siam a khuhna te, a daidanna tûr puanzâr te nên; 35 thuhriattîrna bâwm leh a zâwnfung te, zahngaihna ṭhutphah nên; 36 dawhkân te, a hmanrua zawng zawng te, chhangdah te nên; 37 rangkachak hlîr hlaka siam khâwnvâr dahna te, a khâwnvâr, khâwnvâr dah tûr te, a hmanrua zawng zawng leh chhit ên atân a hriak nên; 38 rangkachak maichâm te, hriak thih mi te, hâl tûr rimtui tak te, puan in kawngkaa zâr tûr puanzâr te nên; 39 dâr maichâm te, a dâr lên te, a zâwnfung te, a hmanrua zawng zawng te, maihûn leh a hûnchhan te nên; 40 biakbûk hung chhûng kawtlaia puanzâr te, a ban te, a ban nghahchhan ker kuak te, a hung chhûng kawngkaa puanzâr te, a hrui te, a kilh behna te, inbiakna puan in biakbûk chhûnga a hmanraw thil zawng zawng nên; 41 hmun thianghlima rawngbâwlna tûra silhfên mawi taka tah te, puithiam Arona leh a fapaten puithiam hna an thawh huna an hâk tûr silhfên thianghlimte nên. 42 LALPAN ti tûra Mosia thu a pêk ang zawng zawng chu Israela thlahte chuan an ti vek a. 43 Tin, Mosian chûng hnathawh zawng zawng chu a han en a, ngai teh, an lo zo vek tawh a; LALPA thupêk ang takin an zo vek a ni. Tichuan, Mosian anni chu mal a sâwm a.

Exodus 40

LALPA chênna bûk tundin thu leh hlan thu

1 Tin, LALPAN Mosia hnênah, 2 “A thla khatna ni khat niah chuan inbiakna puan in biakbûk chu i din tûr a ni. 3 A chhûngah chuan thuhriattîrna bâwm i dah tûr a ni a, bâwm chu puanzârin i daidang tûr a ni. 4 Dawhkân kha la lûtin, a chunga thil awmte chu i dah fel tûr a ni; khâwnvâr dahna kha la lûtin, a khâwnvârte chu i dah tûr a ni. 5 Rimtui hâlna rangkachak maichâm kha thuhriattîrna bâwm hmaa dahin, biakbûk kawngka puanzâr kha i zâr tûr a ni. 6 Tin, hâlrala thilhlanna maichâm kha inbiakna puan in biakbûk kawngka bulah i hûng tûr a ni. 7 Tin, inbiakna puan in leh maichâm inkârah chuan maihûn hûngin, chutah chuan tui i dah tûr a ni. 8 Tin, biakbûk vêl chuan a hung chhûng kawtlai siamin, a hung chhûng kawtlai kawngka puanzâr chu i zâr tûr a ni. 9 “Tin, hriak thih mi lain, biakbûk leh a chhûnga awm zawng zawngte chu hnawihin, i tithianghlim tûr a ni, a bungbêl zawng zawngte nên; tichuan, a lo thianghlim ang. 10 Tin, hâlrala thilhlanna maichâm leh a hmanrua zawng zawngte chu hriak hnawihin, maichâm chu i tithianghlim tûr a ni; tichuan, maichâm chu thianghlim tak a lo ni ang. 11 Tin, maihûn leh a hûnchhan chu hriak hnawihin i tithianghlim tûr a ni. 12 “Tin, Arona leh a fapate chu inbiakna puan in kawngka bula rawn hruaiin tuiin i sil tûr a ni. 13 Arona chu silhfên thianghlimte chu i sintîr tûr a ni; tichuan, puithiam hna thawka ka tân rawng a bâwl theihna tûra hriak thihin, i tithianghlim tûr a ni. 14 Tin, a fapate pawh rawn hruaiin kawr i haktîr tûr a ni. 15 Puithiam hna thawka ka tân rawng an bâwl theihna tûrin, an pa hriak i thih ang khân anmahni chu hriak i thih tûr a ni; hriak thiha an awm hi, an thlahte thleng pawha kumkhuaa puithiam tûra ruat an ni reng tawh ang tih, an tân chhinchhiahna a ni ang,” tiin a sawi a. 16 Chutiang chuan Mosian a ti a; LALPAN tih tûra a pêk ang zawng zawng chuan a ti vek a. 17 Tin, heti hi a ni a, a kum hnihna thla tîr ber, chumi thla ni khat ni tak chuan biakbûk chu an din ta a. 18 Tin, Mosia chuan biakbûk chu a han din a, a nghahchhan ker kuakte a han rem a, a ban rem khâwmte chu a han din a, a bangrelte chu a han rawlh a, a bante chu a han tung a. 19 Tin, biakbûk chungah chuan puan in a zâr a, chumi puan in chung chu a khuhnain a khuh leh a, LALPAN Mosia thu a pêk ang khân. 20 Thuhriattîrna chu a la a, bâwm chhûngah a dah a, bâwmah chuan a zâwnfungte a rawlh a, bâwm chungah chuan zahngaihna ṭhutphah a dah a. 21 Tin, bâwm chu biakbûk chhûngah chuan a dah a, a daidanna puanzâr chu a zâr a, thuhriattîrna bâwm chu a daidang ta a, LALPAN Mosia thu a pêk ang khân. 22 Dawhkân chu inbiakna puan in chhûng, biakbûk hmar lampang, puanzâr pâwn lamah chuan a hûng a; 23 dawhkânah chuan LALPA hmaah chhang chu a dah fel diam a, LALPAN Mosia thu a pêk ang khân. 24 Khâwnvâr dahna chu inbiakna puan in chhûng biakbûk chhim lampang dawhkân epah chuan a dah a; 25 tin, khâwnvârte chu LALPA hmaah chuan a dah a, LALPAN Mosia thu a pêk ang khân. 26 Rangkachak maichâm chu inbiakna puan in chhûng puanzâr hmaah chuan a dah a; 27 tin, a chungah chuan englo rimtui tak hâl tûr rimtui a hâl a; LALPAN Mosia thu a pêk ang khân. 28 Biakbûk kawngka puanzâr a zâr a. 29 Tin, inbiakna puan in biakbûk kawngka bulah chuan hâlrala thilhlanna maichâm a hûng a, a chungah chuan hâlral thilhlan leh ei tûr thilhlan a hlân a, LALPAN Mosia thu a pêk ang khân. 30 Tin, maihûn chu inbiakna puan in leh maichâm inkârah chuan a hûng a, insilna tûrin tui a chhûng a; 31 tin, Mosia leh Arona leh a fapate chuan chutah chuan an kut leh an kete an sil a. 32 Inbiakna puan ina an luh dâwn leh maichâm bula an kal dâwnin an insil a ni, LALPAN Mosia thu a pêk ang khân. 33 Tin, biakbûk leh maichâm vêl chuan hung chhûng kawtlai chu a siam a, a hung chhûng kawtlai kawngka puanzâr chu a zâr a. Chutichuan, Mosia chuan hna chu a zo ta a.

LALPA chênna bûk chunga chhûm

34 Tichuan, inbiakna puan in chu chhûmin a rawn tuam ta mup a, biakbûk chu LALPA ropuinain a lo khat ta a. 35 Tin, chutia chhûm a lo zîn tâk mupa, LALPA ropuinaa biakbûk chu a lo khah tâk avângin, Mosia chu inbiakna puan in chhûngah chuan a lût thei ta lo va. 36 Tin, chhûm chuan biakbûk chu a kian chhohsan veleh Israela thlahte chu an insawn zêl a, an kalna tûr lama a kal chhûng zawng chuan. 37 Chhûm chuan a kian chhohsan loh erawh chuan a kian chhohsan hma loh zawng insawn lovin an awm reng ṭhîn. 38 Chhûnah chuan LALPA chhûm chu biakbûk chungah a zîng a, chutah chuan zânah mei a lo awm ṭhîn a, Israel-ho zawng zawng chuan an kalna tûr lama an kal chhûng zawng chuan chu chu an hmu zêl ṭhîn a ni.

Leviticus 1

Pumhâl thilhlan

1 LALPAN Mosia a ko va, inbiakna puan in aṭangin a bia a, 2 “Israela thlahte chu bia la, an hnênah, ‘In zînga tu pawhin LALPA hnêna thilhlan in hlanin, ran, bâwng rual zînga mi emaw, berâm leh kêl zînga mi emaw in hlân tûr a ni. 3 “ ‘A thilhlan chu bâwng rual zînga mi, hâlral thilhlan a nih chuan a pa, sawisêl bo a hlân tûr a ni; a thilhlan chu LALPA hmaa pawm a nih theih nân inbiakna puan in kawngka bulah a hlân tûr a ni. 4 Tin, hâlral thilhlan lu chungah chuan a kut a nghat ang a; tichuan, a tân inremna siamna tûrin pawmsak a ni ang. 5 Tin, LALPA hmaah bâwngpa a talh ang a; tin, Arona fapa puithiamten thisen chu an hlân ang a, inbiakna puan in kawngka bula maichâm chu thisen chuan an theh vêl tûr a ni. 6 Tin, hâlral thilhlan chu a lip ang a, a chan tûr a ni. 7 Tin, puithiam Arona fapate chuan maichâmah chuan mei an dah ang a, mei chungah chuan thing an chhep khâwm ang. 8 Tin, Arona fapa puithiamte chuan sa hrang te, a lu te, a thau te chu maichâma mei chunga thingah chuan an dah fel ang a; 9 a kawchhûngte leh a kete erawh chu tuiin a sil ang. Puithiam chuan LALPA tâna rimtui tak, meia hlan hâlral thilhlan atân a pum chuan maichâmah a hâl tûr a ni. 10 “ ‘A thilhlan chu hâlral thilhlan atâna ran rual zînga mi, berâm emaw, kêl emaw a nih chuan, a pa, sawisêl bo a hlân tûr a ni. 11 Maichâm sîr, hmâr lampangah LALPA hmaah a talh ang a; tin, Arona fapa puithiamte chuan maichâm chu a thisen chuan an theh vêl tûr a ni. 12 Tin, a chan ang a, a lu nên, a thau nên; tin, puithiamin maichâm chunga mei chunga thingah chuan a dah fel ang; 13 a kawchhûngte leh a kete erawh chu tuiin a sil ang. Tin, a pumin puithiamin a hlân ang a, maichâmah a hâl tûr a ni; LALPA tâna rimtui tak, meia hlan hâlral thilhlan a ni. 14 “ ‘Tin, LALPA tâna a thilhlan chu sava lam hâlral thilhlan a nih chuan, a thilhlanah ṭhuro emaw, pârvano emaw a hlân tûr a ni. 15 Puithiamin maichâmah a rawn keng ang a, a lu a ṭhuai bung ang a, maichâmah a hâl ang; tin, a thisen chu maichâm pangah chuan an far kangtîr ang a. 16 Tin, a chawkchaweng chu a hmul nên maichâm kiang, chhak lampanga meivâp dahna hmunah chuan a paih ang a. 17 Tin, a thlate chu a ṭhuai thlawn ang a, a tak erawh chu phel lovin; tin, puithiamin maichâmah, mei chunga thingah chuan a hâl tûr a ni. Chu chu LALPA tâna rimtui tak, meia hlan hâlral thilhlan a ni.

Leviticus 2

Buhbâl thilhlan

1 “ ‘Tu pawhin thilhlan, chhangphut thilhlan LALPA hnêna a hlan hunin, a thilhlan chu chhangput dip tak a ni tûr a ni. Hriak a leih ang a, a chungah beraw a dah bawk ang a; 2 tin, Arona fapa puithiamte hnênah a kalpui ang a, anin a vei khatin chuta chhangphut dip tak chu, a hriak nên a beraw zawng zawng nên chuan a la chhuak ang a; tin, puithiam chuan maichâm chungah chuan hriat rengna, LALPA tâna rimtui tak, meia thilhlan atân a hâl ang. 3 Chhangphut thilhlan lâk bângte chu Arona leh a fapate ta tûr a ni ang. Chu chu LALPA tâna meia thilhlantea thil thianghlim tak pakhat a ni. 4 “ ‘Tin, chhangphut thilhlan, a urnaa ur thilhlan i hlan chuan chhangphut dip tak, hriaka hmeh dawidim telh loh chhang emaw, hriaka chulh dawidim telh loh chhangpêr pan emaw a ni tûr a ni. 5 Tin, i thilhlan chu thlênga ur chhangphut thilhlan a nih chuan dawidim telh loh, hriaka hmeh, chhangphut dip tak a ni tûr a ni. 6 I phel ang a, hriakin i leih tûr a ni; chu chu chhangphut thilhlan a ni e. 7 Tin, i thilhlan chu kanbêla kan, chhangphut thihlan a nih chuan chhangput dip tak leh hriaka siam a ni tûr a ni. 8 Tin, chûng thila siam chhangphut thilhlan chu LALPA hnênah i rawn la ang a; chu chu puithiam hnêna hlan a ni ang a, anin maichâmah a rawn kalpui tûr a ni. 9 Tin, puithiamin chhangphut thilhlan ata hriat rengna chu a la chhuak ang a, maichâmah chuan a hâl ang; chu chu LALPA tâna rimtui tak, meia thilhlan a ni. 10 Tin, chhangphut thilhlan lâk bângte chu Arona leh a fapate pual tûr a ni ang; chu chu LALPA tâna meia thilhlantea thil thianghlim ber a ni. 11 Chhangphut thilhlan rêng rêng, LALPA hnêna in hlan tûr chu dawidim tela siam tûr a ni lo; LALPA tâna meia thilhlanah chuan dawidim emaw, khawizu emaw rêng rêng in hâl tûr a ni lo. 12 Siam hmasak ber thilhlan ang zawngin LALPA hnênah in hlân ang a; nimahsela, rimtui atâna maichâmah chuan dah tûr a ni lo. 13 I chhangphut thilhlan zawng zawng chu Pathian thuthlung entîrna chi i al tûr a ni; i thilhlan zawng zawng chu chi i al zêl tûr a ni; i thilhlan zawng zawngah chuan chi i hlân tel tûr a ni. 14 “ ‘Rah hmasa ber chhangphut thilhlan LALPA hnêna i hlan chuan buh thar hmasa bera mi, chhangphut thilhlan atân chhangpêr i hlân tûr a ni. 15 Tin, hriak i leih ang a, a chungah beraw i dah tûr a ni; chu chu chhangphut thilhlan a ni. 16 Tin, puithiamin chhangpêr leh hriak ṭhen chu hriat reng nân beraw zawng zawng nên chuan a hâl tûr a ni; chu chu LALPA tâna meia thilhlan a ni.

Leviticus 3

Remna thilhlan inthawina

1 “ ‘A thilhlan chu remna thilhlan inthawi a niha, bâwng rual zînga mi a hlan chuan, a nu emaw, a pa emaw pawh ni sela, LALPA hmaah sawisêl bo a hlân tûr a ni. 2 A thilhlan lu chungah chuan a kut a nghat ang a, inbiakna puan in kawngka bulah a talh ang a; tin, Arona fapa puithiamte chuan maichâm chu thisen chuan an theh vêl tûr a ni. 3 Tin, remna thilhlan inthawinaa mi LALPA tâna meia thilhlan a hlân ang a; a kawchhûng thau leh a rîlbawh zawng zawng leh, 4 a kal pahnih leh, a bawhtu thau a nêma mi leh a thin tuamtu râng, a kalte chawpin a phawrh tûr a ni. 5 Tin, Arona fapaten maichâmah, meia thil awm chunga hâlral thilhlan chungah chuan an hâl tûr a ni; chu chu LALPA tâna rimtui tak, meia thilhlan a ni. 6 “ ‘Tin, remna thilhlan inthawinaa LALPA tâna a thilhlan chu berâm rual zînga mi a nih chuan a nu pawh ni sela, a pa pawh ni sela, sawisêl bo a hlân tûr a ni. 7 A thilhlana berâmno a hlan chuan LALPA hmaah a hlân ang a. 8 A thilhlan lu chungah chuan a kut a nghat ang a, inbiakna puan in kawtah a talh ang a; tin, Arona fapaten maichâm chu thisen chuan an theh vêl tûr a ni. 9 Tichuan, remna thilhlan inthawinaa mi, LALPA tâna meia thilhlan a hlân ang; a thau te, a mei thau tak a tluanin, a kâwngruh thlengin a la vek ang a; a kawchhûng thau te, a rîlbawh zawng zawng te, 10 a kal pahnih leh a bawhtu thau a nêma mi leh a thin tuamtu râng, a kalte chawpin a phawrh tûr a ni. 11 Tin, puithiamin chu chu maichâmah a hâl tûr a ni; chu chu LALPA tâna meia thilhlan ei tûr chhiah a ni. 12 “ ‘A thilhlan chu kêl a nih chuan LALPA hmaah a hlân ang a. 13 A lu chungah a kut a nghat ang a, inbiakna puan in kawtah a talh ang a; tin, Arona fapaten maichâm chu thisen chuan an theh vêl tûr a ni. 14 Tin, chumia a thilhlan chu a hlân ang a, LALPA tâna meia thilhlan chu; a kawchhûng thau leh a rîlbawh zawng zawng leh, 15 a kal pahnih leh a bawhtu thau a nêma mi leh, a thin tuamtu râng, a kalte chawpin a phawrh tûr a ni. 16 Tin, chûng chu puithiamin maichâmah a hâl tûr a ni a, rimtui atâna meia thilhlan ei tûr chhiah a ni. A thau zawng zawng chu LALPA pual a ni. 17 Thau emaw, thisen emaw ei loh tûr tih hi in thlahte zêl tân pawh in awmna apiangah zawm tûra thupêk ding reng a ni ang,’ ti rawh,” tiin.

Leviticus 4

Tih palh sual tâna thilhlan

1 Tin, LALPA chuan Mosia a bia a, 2 “Israela thlahte chu bia la, ‘LALPAN thil tih loh tûra thu a pêkte, a enga pawh hi miin hriat loh vângin lo ti palh sela, a titu chu 3 hriak thih puithiam ni sela, mipui thiam loh chantîr thei thil a tihsual chuan, a thil tihsual tâk sual thawi nân LALPA hnênah bâwngtuai sawisêl bo, sual thawinaah hlân rawh se. 4 Bâwng chu inbiakna puan in kawngka bulah LALPA hmaah a rawn kai ang a, bâwng lu chungah a kut a nghat ang a, LALPA hmaah bâwng chu a talh tûr a ni. 5 Tin, hriak thih puithiam chuan bâwng thisen eng emaw zât chu a la ang a, inbiakna puan inah chuan a rawn keng ang. 6 Puithiam chuan thisenah chuan a kutzungṭang a chiah ang a, a ṭhen chu LALPA hmaah, hmun thianghlim puanzâr bulah chuan vawi sarih a theh tûr a ni. 7 Tin, puithiam chuan LALPA hmaah, inbiakna puan ina rimtui hâlna maichâm kîahte chuan thisen chu tlêm a tât ang; tin, bâwng thisen la awm zawng zawng chu, inbiakna puan in kawngka kianga hâlral thilhlan maichâm bulah chuan a chhûng chhuak tûr a ni. 8-10 Tin, sual thawina bâwng thau zawng zawng chu a la vek ang a; remna thilhlan inthawina bâwngpaa mi lâk angin, a kawchhûng thau leh a rîlbawh zawng zawng leh a kal pahnih leh a bawhtu thau a nêma mi leh a thin tuamtu râng, a kalte chawpin a phawrh ang a; tin, puithiamin hâlral thilhlan maichâmah a hâl tûr a ni. 11 Tin, bâwng vun te, a sa zawng zawng te, a lu nên, a kete nên, a kawchhûng te, a êk te, 12 a bâwng pum chu dai pâwn lam hmun faiah, vut paihnaah a kalpui ang a, thing chungah a hâl ang; vut paihnaah chuan hâl tûr a ni. 13 “ ‘Israel chu a hnam puma an lo suala, hre lova LALPA thupêk eng pawh an lo bawhchhiat palh chuan, 14 chu thil tihsual chu hriat chhuah a nih veleh mipuiin sual thawi nân bâwngtuai an hlân ang a, inbiakna puan in kawtah an rawn kai tûr a ni. 15 Tin, mipuiho upate chuan LALPA hmaah bâwng lu chungah chuan an kut an nghat ang a; tin, bâwng chu LALPA hmaah talh tûr a ni. 16 Tin, hriak thih puithiam chuan inbiakna puan inah bâwng thisen eng emaw zât chu a rawn keng ang a; 17 tin, puithiamin thisenah chuan a kutzungṭang a chiah ang a, puanzâr bulah LALPA hmaah vawi sarih a theh tûr a ni. 18 Tin, thisen chu inbiakna puan ina LALPA hmaa maichâm kîah chuan tlêm a tât ang a; thisen la awm zawng zawng chu inbiakna puan in kawngka kianga, hâlral thilhlan maichâm bulah chuan a chhûng chhuak tûr a ni. 19 Tin, a thau zawng zawng chu a la vek ang a, maichâmah a hâl tûr a ni. 20 Chutiang chuan bâwng chu a ti ang a; sual thawina bâwng a tih ang chiahin hei pawh hi a ti tûr a ni. Tin, puithiamin inremna a siamsak ang a, ngaihdam an ni ang. 21 Tin, bâwng chu daipâwn lamah a kalpui ang a, bâwng hmasa a hâl angin a hâl tûr a ni. Chu chu mipuite tâna sual thawina a ni. 22 “ ‘Rorêltuin thil a tihsuala, LALPA a Pathianin tih loh tûra thu a pêk zawng zawng a enga pawh a tih palha thiam loh a chana, 23 a thil sual tih chu hriattîr a nih chuan a thilhlanah kêl, a pa, sawisêl bo a rawn kai ang. 24 Kêl lu chungah chuan a kut a nghat ang a, LALPA hmaa hâlral thilhlan an talh ṭhinnaah chuan a talh tûr a ni. Chu chu sual thawina a ni. 25 Tin, puithiamin sual thawina thisen chu a kutzungṭangin tlêm a pir ang a, hâlral thilhlan maichâm kîahte chuan a tât ang a, hâlral thilhlan maichâm bulah a thisen chu a chhûng chhuak tûr a ni. 26 Tin, a thau zawng zawng chu remna thilhlan inthawina thau a hâl angin maichâmah a hâl tûr a ni. Tichuan, a sual chungchâng thu-ah chuan puithiamin inremna a siamsak ang a, ngaihdam a ni ang. 27 “ ‘Tin, vântlâng zînga mi a tua pawhin LALPAN tih loh tûra thu a pêkte a enga pawh tisual palhin, thiam loh lo chang ta sela, 28 a thil sual tih chu hriattîr a nih chuan a thilhlanah kêl, a nu, sawisêl bo, a thil tihsual tâk sual thawi nân a rawn kai tûr a ni. 29 Sual thawina lu chungah chuan a kut a nghat ang a, hâlral thilhlanna hmunah chuan sual thawina chu a talh tûr a ni. 30 Tin, puithiamin thisen chu a kutzungṭangin tlêm a pir ang a, hâlral thilhlan maicham kîahte chuan a tât ang a, a thisen la awm zawng zawng chu maichâm bulah chuan a chhûng chhuak tûr a ni. 31 Tin, a thau zawng zawng chu remna thilhlan inthawina thau an lâk angin a la vek ang a; tin, puithiamin LALPA tâna rimtuiah maichâmah a hâl tûr a ni. Tichuan, puithiamin inremna a siamsak ang a, ngaihdam a ni ang. 32 “ ‘Tin, sual thawi nâna a thilhlana berâmno a rawn ken chuan, a nu, sawisêl bo a rawn keng tûr a ni. 33 Sual thawina lu chungah chuan a kut a nghat ang a, hâlral thilhlan an talhnaah chuan sual thawi nân a talh tûr a ni. 34 Tin, puithiamin sual thawina thisen chu a kutzungṭangin tlêm a pir ang a, hâlral thilhlan maichâm kîahte chuan a tât ang a, a thisen la awm zawng zawng chu maichâm bulah chuan a chhûng chhuak ang. 35 A thau zawng zawng chu berâmno thau, remna thilhlan inthawinaa mi lâk angin a la vek ang a, puithiamin LALPA tâna meia thilhlan angin maichâmah a hâl tûr a ni. Tichuan, puithiamin a thil tihsual tâk chungchâng thu-ah inremna a siamsak ang a, ngaihdam a ni ang.

Leviticus 5

Sual tâna thilhlan tûr

1 “ ‘Tu pawh a thil hmuh emaw, a thil hriat emawa hretu a niha, rorêlna hmaa puang tûra tih a nih hnu pawha a sawi duh lohva, thil a tihsual chuan a khawlohna mawh chu a phur ang. 2 Tin, tu pawhin thil thianghlim lo rêng rêng, ramsa thianghlim lo ruang emaw, ran thianghlim lo ruang emaw, a vaha vâk chi rannung thianghlim lo ruang emaw, hre lo pawha a khawiha, a lo thianghlim loh chuan thiam loh a chang ang. 3 Tin, mihring pawh a thianghlim lohna eng ang pawh ni sela, a thianghlim lohna chu hre lo pawha a khawih chuan, a hriat chhuah hun chuan thiam loh a chang ang. 4 Tin, tu pawhin thil ṭha lo emaw, thil ṭha emaw ti tûra a kaa hre lo pawha chhia a chham zung zung chuan, eng pawh ni sela, a chhechham chhuah zung zung mai chu a hriat chhuah hunah chuan thiam loh a chang ang. 5 Tin, heti hi a ni ang a, hêng thil pakhatah pawh hian thiam loh a chan hun chuan a sualna chu a puang ang a; 6 sual thawi nân berâm rual zînga mi a nu, berâmno emaw, kêl emaw a thil tihsual tâk man atân LALPA hnêna hlan tûrin, a bawhchhiat thawina chu a rawn keng ang. Tichuan, puithiamin a sualna chungchâng thu-ah chuan inremna a siamsak ang. 7 “ ‘A neihin berâmno a tlin loh chuan, LALPA hnêna hlan tûrin a sual man atân chuan a bawhchhiat thawinaah ṭhuro pahnih emaw, pârvano pahnih emaw a rawn keng tûr a ni: pakhat chu sual thawi nân, pakhat chu hâlral thilhlan atân. 8 Puithiam hnênah a rawn keng ang a, ani chuan sual thawina tûr chu a hlân hmasa ang a, phel lovin a lu chu a nghâwngah a ṭhuai bung ang. 9 Tichuan, sual thawina thisen chu maichâm pangah chuan tlêm a theh ang a; tin, thisen la awm zawng chu maicham bulah chuan far kangtîr tûr a ni. Chu chu sual thawina a ni. 10 Tin, a pakhata chu dân angin hâlral thilhlanah a hlân ang a. Tichuan, puithiamin a thil tihsual tâk chungchâng thu-ah inremna a siamsak ang a, ngaihdam a ni ang. 11 “ ‘Amaherawhchu, a neihin ṭhuro pahnih emaw, pârvano pahnih emaw pawh a tlin loh chuan, a sual man atâna thilhlanah sual thawi nân chhangphut dip tak, epha hmun sâwma ṭhena hmun khat a rawn keng ang. Hriak a leih tûr a ni lo va, a chungah beraw a dah tûr a ni hek lo, sual thawina a nih avângin. 12 Puithiam hnênah a rawn keng ang a, puithiamin hriat rengna atân a vei khatin a la ang a, maichâm chungah LALPA tâna meia thilhlan angin a hâl tûr a ni. Chu chu sual thawina a ni. 13 Tin, chûng thil zînga a enga pawh a tihsual tâk chungchâng thu-ah chuan, puithiamin inremna a siamsak ang a, ngaihdam a ni ang. A la awm zawng chu chhangphut thilhlan ang bawkin puithiam chanpual tûr a ni ang,’ ti rawh,” tiin.

Bawhchhiat thawina

14 Tin, LALPAN Mosia a bia a, 15 “Tu pawhin thil a tihsuala, LALPA thil thianghlimte chunga a sual palh chuan a bawhchhiat thawina, berâm rual zînga mi berâmpa sawisêl bo, hmun thianghlim sekel ang, tangka sekel eng emaw zât hua i ngaih, bawhchhiat thawinaah LALPA tân a rawn kai tûr a ni. 16 Tin, thil thianghlim chunga a lo tih dik loh tâkna chu a rûl ang a, a hmun ngaa ṭhena hmun khat a belh ang a, puithiam a pe tûr a ni. Tichuan, puithiam chuan bawhchhiat thawina berâmpa chuan inremna a siamsak ang a, ngaihdam a ni ang. 17 Tu pawhin thil a tihsuala, tih loh tûra LALPAN thu a pêkte a enga pawh a tih chuan, hre lo mah sela thiam loh a chang rêng rêng ang a, a khawlohna mawh chu a phur ang. 18 Tin, berâm rual zînga mi berâmpa sawisêl bo, i ngaiha âwm tâwk, bawhchhiat thawinaah puithiam hnênah a rawn kai tûr a ni. Tichuan, puithiam chuan hre lova a tihsual palh chungchâng thu-ah chuan inremna a siamsak ang a, ngaihdam a ni ang. 19 Chu chu bawhchhiat thawina a ni; LALPA hmaa thiam loh chang a ni ngei a ni,” tiin.

Leviticus 6

1 Tin, LALPA chuan Mosia a bia a, 2 “Tu pawhin thil tisualin, LALPA thu bawhchhe ta sela, sum kawltîr thu emaw, hlêp thu emaw, rûkrûk thu emawa a ṭhenawmte tihderin a ṭhenawmte bum ta sela, 3 a nih loh leh, thil bote chharin, tihderin dâwtin chhia chham ta sela, hêng thil zawng zawng a enga pawh hi a tihsual chuan, 4 heti hi a ni ang a, a sual ngeia, thiam loh a chan chuan a thil rûk te, buma a thil lâk te, a hnêna sum kawltîr te, thil bo a chhar te, 5 dâwta chhia a chhamna thil eng pawh chu a rûl leh tûr a ni. A kim chiahin a rûl leh vek ang a, a hmun ngaa ṭhena hmun khat chu a chuangin a belh ang a, thiam loh a chan ni chuan a neitu chu a pe tûr a ni. 6 A bawhchhiat thawina berâm rual zînga mi, i ngaiha âwm tâwk, berâmpa sawisêl bo, bawhchhiat thawinaah LALPA tân puithiam hnênah a rawn kai tûr a ni. 7 Tichuan, puithiamin LALPA hmaah inremna a siamsak ang a, ngaihdam a ni ang, thiam loh channa tûra thil a tih apiang chungchângahte chuan,” tiin.

Maichâm mei mit lo tûr

8 Tin, LALPAN Mosia a bia a, 9 “Arona leh a fapate hnênah, ‘Hei hi hâlral thilhlan dân tûr chu a ni: hâlral thilhlan chu maichâm chunga a hâlnaah chuan zankhuain a tûk thlengin a awm ang a; tin, maichâma mei chu a nung reng tûr a ni. 10 Tin, puithiam chuan a puan zai sîn silhfên a inbel ang a, a tisa khuh nân a puan zai sîn kekawr a ha ang a; tin, maichâma hâlral thilhlan kâng vâpte chu a la ang a, maichâm sîrah a dah tûr a ni. 11 Tin, a silhfên chu a hlîp ang a, silhfên dang a inbel ang a, a vâpte chu daipâwn lam hmun faiah a kalpui tûr a ni. 12 Tin, maichâm chunga mei chu tihnun reng a ni ang a, a mit tûr a ni lo. Tin, puithiam chuan tûk tin thing a tuah ang a, hâlral thilhlan chu a dah fel ang a; chutah chuan remna thilhlante thau chu a hâl tûr a ni. 13 Maichâmah mei a nung reng ang a; a mit tûr a ni lo.

Buhbâl thilhlan

14 “ ‘Tin, hei hi chhangphut thilhlan dân tûr chu a ni: Arona fapate chuan maichâm bulah, LALPA hmaah an hlân tûr a ni. 15 Tin, anin a vei khatin chhangphut thilhlana mi, chhangphut dip tak leh a hriak leh chhangphut thilhlan chunga beraw zawng zawng chu a la chhuak ang a, chu chu LALPA tâna rimtui tak, hriat rengna atân maichâmah a hâl tûr a ni. 16 Tin, lâk bângte chu Arona leh a fapaten an ei tûr a ni; chu chu hmun thianghlimah dawidim tel lovin an ei ang a; inbiakna puan in kawtlaiah an ei tûr a ni. 17 Dawidim telin ur tûr a ni lo. Meia ka thilhlana an chanvo atân ka pêk a ni; chu chu sual thawina leh bawhchhiat thawina anga thil thianghlim tak a ni. 18 Arona thlah mipa zawng zawngin an ei tûr a ni. Chu chu LALPA tâna hâlral thilhlan chungchâng thu-ah in thlahte zêl chena kumkhaw dân a ni ang. Tu pawh chumi khawih apiangte chu tihhran an ni ang,’ tiin thu pe rawh,” tiin. 19 Tin, LALPA chuan Mosia a bia a, 20 “Hriak thiha a awm nia Arona leh a fapaten LALPA hnêna an hlan tûr thilhlan chu hei hi a ni: chhangphut thilhlana hlan ṭhin tûr, chhangphut dip tak epha hmun sâwma ṭhena hmun khat, zîngah a chanve, tlaiah a chanve. 21 Urna thlêngah hriak pawlha siam tûr a ni. A inchiahchhuah hunah i rawn la lût ang a, a phel tê têin chhangphut thilhlan chu LALPA tâna rimtuiah i hlân tûr a ni. 22 A fapate zînga mi a thlâktu, hriak thih puithiam chuan a hlân ang a; kumkhaw dân tûr angin LALPA tân hâl ral vek tûr a ni. 23 Puithiam chhangphut thilhlan apiang chu hâl ral vek tûr a ni a, ei hauh loh tûr a ni,” tiin.

Sual thawina thilhlan

24 Tin, LALPA chuan Mosia a bia a, 25 “Arona leh a fapate hnênah, ‘Hei hi sual thawi dân tûr chu a ni: hâlral thilhlan talh ṭhinnaah sual thawina pawh chu LALPA hmaah talh tûr a ni. Chu chu thil thianghlim tak a ni. 26 Sual thawina hlântu puithiam chuan a ei ang a; inbiakna puan in kawtlaiah, hmun thianghlimah ei tûr a ni. 27 Tu pawh chumi sa khawih apiangte chu tihhran an ni ang; tin, a thisen chu eng puanah pawh theh per ni sela, a kaina apiang chu hmun thianghlimah i su tûr a ni. 28 A chhumna hlum bêl chu tihkeh tûr a ni a; dâr bêla chhum a nih erawh chuan nawh faia tleuh fai tûr a ni. 29 Puithiam chhûngkuaa mipa tawh phawt chuan chumi chu an ei thei ang. Chu chu thil thianghlim tak a ni. 30 Sual thawina, a thisen hmun thianghlima inremna siamna tûra inbiakna puan ina rawn lâk chu ei tûr a ni lo; hâl tûr a ni.

Leviticus 7

Bawhchhiat thawina

1 “ ‘Tin, hei hi bawhchhiat thawi dân tûr chu a ni, thil thianghlim tak a ni: 2 hâlral thilhlan an talh ṭhinnaah bawhchhiat thawina pawh chu an talh tûr a ni; tin, a thisen chuan maichâm chu a theh vêl tûr a ni. 3 Tin, a thau zawng zawng chu a hlân tûr a ni: a mei thau tak te, a kawchhûng thau te, 4 a kal pahnih leh a bawhtu thau, a nêma mi leh a thin tuamtu râng, a kalte chawpin a phawrh ang a; 5 tin, puithiam chuan LALPA tâna meia thilhlanah maichâm chungah a hâl tûr a ni. Chu chu bawhchhiat thawina a ni. 6 Puithiam chhûngkuaa mipa tawh phawt chuan chumi chu an ei thei ang; hmun thianghlima ei tûr a ni. Chu chu thil thianghlim tak a ni. 7 Bawhchhiat thawina chu sual thawina ang bawk a ni a, dân khat a ni: chumia inremna siamtu puithiam chuan chu chu a nei tûr a ni. 8 Puithiam, mi tu pawh hâlral thilhlana a hlansaktu puithiam ngei chuan, hâlral thilhlana a hlan vun chu a pumbil tûr a ni. 9 Tin, a urnaa ur chhangphut thilhlan apiang te, kan bêla kan leh thlênga ur zawng zawng chu a hlântu puithiam pual tûr a ni. 10 Chhangphut thilhlan zawng zawng chu hriaka hmeh pawh, a ro pawh, a dang ang bawkin Arona fapate zawng zawngin an insem tlâng tûr a ni.

Inremna thilhlan

11 “ ‘Tin, hei hi miin LALPA hnêna a hlan tûr, remna thilhlan inthawi dân tûr chu a ni. 12 Lâwm thu sawi nâna a hlan chuan, lâwm thu sawi inthawinaah chuan hriaka hmeh dawidim telh loh chhang leh, hriaka chulh dawidim telh loh chhangpêr pante leh, chhangphut dip tak hriaka ngun taka hmeh a hlân tel tûr a ni. 13 Lâwm thu sawi nâna a remna thilhlan inthawinaah chuan, chhang dawidim telh a hlân tel tûr a ni. 14 Tin, chumi ata chu thilhlan tina mi LALPA tâna thên thilhlan atân pakhat ṭheuh a hlân ang a; remna thilhlan thisena thehtu puithiam pual tûr a ni. 15 Tin, lâwm thu sawi nâna a remna thilhlan inthawina sa chu thilhlan a hlan ni la lain ei zawh tûr a ni a; a tûk thlengin eng mah a khêk tûr a ni lo. 16 “ ‘Amaherawhchu, a thilhlan inthawina chu thutiam emaw, mahni duhthua thilhlan emaw a nih chuan, a inthawina a hlan ni la la chuan ei tûr a ni a; tin, ei bâng chu a tûkah ei tûr a ni. 17 Amaherawhchu, inthawina sa a ni thum ni thlenga la awm cheu chu hâl tûr a ni. 18 A remna thilhlan inthawina sa chu ni thum ni thlenga an ei chuan, pawmsak a ni lo vang a, a hlântu pawh chu hlâna ngaih a ni hek lo vang; thil tenawm a ni ang a, tu pawh a ei apiangin an khawlohna mawh chu an phur ang. 19 Tin, sa, thil thianghlim lo rêng rêng nêna intawk chu ei tûr a ni lo va, hâl tûr a ni. Tin, sa chu a thianghlim apiang chuan an ei ang. 20 Remna thilhlan inthawina sa, LALPA chanpual, thianghlim lo chunga eitu erawh chu, chu mi chu a chipuite zîng ata tuithlârin a awm tûr a ni. 21 Tin, tu pawhin thil tenawm, thianghlim lo rêng rêng, mi thianghlim lo emaw, ran thianghlim lo emaw, thil thianghlim lo rêng rêng a khawiha, remna thilhlan inthawina sa, LALPA chanpual a ei chuan, chu mi chu a chipuite zîng ata tuithlârin a awm tûr a ni,’ tiin hrilh rawh,” tiin. 22 Tin, LALPA chuan Mosia a bia a, 23 “Israela thlahte hnênah, ‘Sebâwng emaw, berâm emaw, kêl emaw thau in ei tûr a ni lo. 24 Amaha thi thau leh sa seh thau chu thil dang engah pawh hman theih a ni ang a; ei erawh chu in ei hauh tûr a ni lo. 25 Tu pawh, LALPA tâna miin meia thilhlan an hlan sathau ei chu a chipuite zîng ata tuithlârin a awm tûr a ni. 26 In awmna tawh phawtah chuan thisen rêng rêng, sava emaw, ramsa emaw thisen in ei tûr a ni lo. 27 Tu pawh ni sela, thisen ei rêng rêng chu, chu mi chu a chipuite zîng ata tuithlârin a awm tûr a ni,’ tiin hrilh rawh,” tiin. 28 Tin, LALPA chuan Mosia a bia a, 29 “Israela thlahte hnênah, ‘LALPA hnêna a remna thilhlan inthawina hlân apiang chuan, LALPA tâna a thilhlan chu a remna thilhlan inthawina ata a rawn hlân tûr a ni. 30 LALPA tâna meia thilhlan chu ama kut ngeiin a rawn keng ang a; a thau chu a ir chawpin a rawn la tûr a ni, a ir chu LALPA hmaa thên thilhlana thên a nih theih nân. 31 Tin, puithiamin maichâmah a thau chu a hâl ang a; a ir erawh chu Arona leh a fapate pual tûr a ni. 32 A bawp ding lam chu inremna thilhlan inthawina ata thên thilhlanah puithiam in pe tûr a ni. 33 Arona fapate zînga remna thilhlan thisen leh thau hlântu apiang chuan, a chanvo atân a bawp ding lam a nei tûr a ni. 34 A ir leh a bawp an thên ṭhin chu Israela thlahte an remna thilhlan inthawinate ata chu ka tîl hrang a, Israel thlahte kumkhaw tih dân tûr atân puithiam Arona leh a fapate ka pe a ni,’ tiin hrilh rawh,” tiin. 35-36 Hei hi a ni, anmahni hriak a thih nia Israela thlahten an pêk tûra LALPAN thu a pêk, puithiam hna thawka LALPA rawngbâwl tûra a hlan ni achina LALPA tâna meia thilhlan ata Arona chanvo leh a fapate chanvo tûr chu. Hei hi kumkhuaa an thlahte zêl thlenga an tih dân tûr a ni. 37-38 Hei hi Sinai thlalêra Israela thlahten thilhlan LALPA hnêna hlân tûra thu a pêk nia, Sinai tlânga LALPAN Mosia thu a pêk hâlral thilhlan te, chhangphut thilhlan te, sual thawina te, tihhranna te, remna thilhlan inthawina dân te chu a ni.

Leviticus 8

Arona leh a fate puithiama nemngheh thu

1 Tin, LALPAN Mosia a bia a, 2 “Arona chu a fapate nên hruai la, silhfên te, hriak thih mi te, sual thawina bâwngpa te, berâmpa pahnih te, chhang dawidim telh loh bâwm khat nên chuan keng bawk la; 3 tin, mi zawng zawng chu inbiakna puan in kawngka vêlah awm khâwmtîr rawh,” tiin. 4 Tin, Mosia chuan LALPAN thu a pêk ang chuan a ti a; mi zawng zawng chu inbiakna puan in kawngka vêlah chuan an awm khâwm a. 5 Tin, Mosian pung khâwmho hnênah chuan, “Hei hi a ni, LALPAN tih tûra thu a pêk chu,” a ti a. 6 Tin, Mosian Arona leh a fapate chu a rawn hruai a, a bual a. 7 Tichuan, kawr chu a hâktîr a, kâwng hrênna chuan a hrêng a, kawrfual chu a hâktîr a, puithiam kawr chu a bel a; puithiam kawr hrênna thiam taka tah chuan a hrêng a, chu chuan a hrêng bet a. 8 Tin, âwmbel chu a bel a; tin, âwmbelah chuan Urim leh Thumim a dah a. 9 Diar chu a khimtîr a; tin, diar pang hma lamah chuan rangkachak phêk, tihhran chhinchhiahna thianghlim chu a bel a, LALPAN Mosia thu a pêk ang khân. 10 Tin, Mosia chuan hriak thih mi chu a la a, biakbûk leh a chhûnga thil awm zawng zawngte chu a thih a, a tithianghlim hlawm a. 11 Chu bawk chuan maichâm chu vawi sarih a theh a, maichâm leh a bungbêl zawng zawng te, maihûn leh a hûnchhante chu tihthianghlim tûrin a thih a. 12 Tin, a tihthianghlimna tûrin hriak thih mi chu Arona lûah a leih a, a thih a. 13 Tin, Mosian Arona fapate chu a rawn hruai a, kawr a haktîr a, kâwng hrênnain a hrêng a, diar a khimtîr a, LALPAN Mosia thu a pêk ang khân. 14 Tin, sual thawina bâwngpa chu a rawn kai a, Arona leh a fapate chuan sual thawina bâwngpa lu chungah chuan an kut an nghat a. 15 Tin, Mosia chuan a talh a; thisen chu a la a, chu chu inremna maichâm tâna siam nân a kutzungṭangin maichâm kîahte chuan a vêlin a tât a, maichâm chu a thian a, maichâm bulah thisen chu a leih a, a tithianghlim a. 16 Tin, a rîlbawh zawng zawng te, a thin tuamtu râng te, a kal pahnih leh a thaute a la a, maichâmah Mosian a hâl a. 17 Bâwngpa erawh chu a vun nên, a sa nên, a êk nên, daipâwnah a hâl a, LALPAN Mosia thu a pêk ang khân. 18 Tin, hâlral thilhlan berâmpa chu a han hlân a, Arona leh a fapate chuan berâmpa lu chungah chuan an kut an nghat a. 19 Tin, Mosia chuan a talh a; tin, maichâm chu thisen chuan a theh vêl a. 20 Tin, berâmpa chu a chan a, a lu leh sa hrangte leh a thaute chu a hâl a. 21 Tin, a kawchhûng leh a kete chu a sil a; berâmpa chu maichâmah a vaiin a hâl vek a; LALPA tâna meia thilhlan a ni a, LALPAN Mosia thu a pêk ang khân. 22 Tin, berâmpa dang, tihhranna berâmpa chu a han hlân leh a; Arona leh a fapate chuan berâmpa lu chungah chuan an kut an nghat a. 23 Tin, Mosia chuan a talh a, thisen chu a la a, Arona beng ding lam hmâwrah te, a kut ding lam zungpuiah te, a ke ding lam zungpuiah te a hnawih a. 24 Tin, Mosia chuan Arona fapate chu a hruai a, an beng ding lam hmâwrah te, an kut ding lam zungpuiah te, an ke ding lam zungpuiah te a hnawih a; tin, maichâm chu thisen chuan a theh vêl a. 25 Tin, a thau te, a mei thau tak te leh a rîlbawh zawng zawng te, a thin tuamtu râng te, a kal pahnih leh a thaute leh a bawp ding lam a la a; 26 LALPA hmaa chhang dawidim telh loh bâwm ata chu chhang dawidim telh loh pakhat leh, hriaka hmeh chhangpêr pakhat leh chhangpêr pan pakhat a la a, sa thau chungah leh a bawp ding lam chungah chuan a dah a; 27 tin, a vai chuan Arona kutphah chungah leh a fapate kutphah chungah chuan a dah a, LALPA hmaa thên thilhlanah a thên a. 28 Tin, Mosian an kut ata chu a la a, halrâl thilhlan chungah maichâmah a hâl a; chu chu rimtui atâna tihhranna a ni; LALPA tâna meia thilhlan a ni. 29 Tin, Mosian a ir chu a la a, LALPA hmaa thên thilhlanah a thên a; chu chu tihhranna berâmpaa Mosia chanvo a ni, LALPAN Mosia thu a pêk ang khân. 30 Tin, Mosian hriak thih mi ata leh maichâma thisena mi a la a, chu chuan Arona leh a silhfên a theh a, a fapate leh a fapate silhfênte pawh; Arona leh a silhfên chu a tithianghlim a, a fapate leh a fapate silhfênte pawh. 31 Tin, Mosian Arona leh a fapate hnênah chuan, “Inbiakna puan in kawngka bulah sa chu chhûm ula, ‘Arona leh a fapaten an ei tûr a ni,’ tia thu ka pêk ang khân, chutah chuan tihhranna bâwma chhang nên ei rawh u. 32 Tin, sa leh chhang ei bângte chu in hâl tûr a ni. 33 In intihhranna ni a kim hma loh chuan inbiakna puan in kawngka chu chhuahsan lovin ni sarih in awm tûr a ni; ni sarih a tihrang dâwn si che u a. 34 Tûna tih ang hian inremna siamsak tûr che uin LALPAN tih tûr thu a pe a ni. 35 Inbiakna puan in kawngka bulah chuan ni sarih, chhûn leh zân in awm reng ang a, in thih loh nân LALPA thupêk chu in zâwm tûr a ni; chutianga thupêk chu ka ni,” a ti a. 36 Tichuan, LALPAN Mosia hmanga tih tûra thu a pêk zawng zawng chu Arona leh a fapate chuan an ti a.

Leviticus 9

Aronan inthawina a hlân

1 Tin, heti hi a ni a, a ni riat ni chuan Mosian Arona leh a fapate leh Israel upahote chu a ko va. 2 Tin, Arona hnênah chuan, “Sual thawi nân bâwngno a pa leh hâlral thilhlanah berâmpa, sawisêl bo ve ve kai la, LALPA hmaah hlân rawh. 3 Tin, Israela thlahte hnênah chuan, ‘Sual thawi nân kêlpa, hâlral thilhlanah bâwngno leh berâmno kum khat mi ve ve sawisêl bo ṭhiau 4 leh, bâwngpa leh berâmpa LALPA hmaa remna thilhlana hlanah rawn kai ula, hriaka hmeh chhangphut thilhlan nên; vawiinah hian in hnênah LALPA a lo lang dâwn e,’ tiin hrilh rawh,” a ti a. 5 Tin, Mosian thu a pêk ang chuan inbiakna puan in kawtah an rawn kai a; tin, mi zawng zawng chuan an va hnaih a, LALPA hmaah chuan an va ding a. 6 Tin, Mosia chuan, “Hei hi a ni in tih tûra LALPAN thu a pêk che u kha; tichuan, LALPA ropuina chu in zîngah a lo lang ang,” a ti a. 7 Tin, Mosian Arona hnênah, “Maichâm chu rawn hnaih la, i sual thawina te, i hâlral thilhlan te hlân la, nangma tân leh mipuite tân inremna siam rawh. Mipuite thilhlan chu hlân la, an tân inremna siam rawh, LALPA thupêk angin,” a ti a. 8 Tin, Arona chuan maichâm chu a va hnaih a, ama puala sual thawina bâwngno chu a talh a. 9 Tin, Arona fapate chuan thisen chu a hnênah an hlân a, thisenah chuan a kutzungṭang a chiah a, maichâm kiahte chuan a tât a, thisen chu maichâm bulah a leih a. 10 Sual thawina thau te, a kal te, a thin tuamtu râng te erawh chu maichâm chungah a hâl a, LALPAN Mosia thu a pêk ang khân. 11 Tin, a sa leh a vun chu daipâwnah a hâl a. 12 Tin, hâlral thilhlan chu a talh a; Arona fapate chuan thisen chu an pe a, anin maichâm chu a theh vêl a. 13 Hâlral thilhlan sa hrang chu a mal malin a lu nên an pe a, ani chuan maichâmah a lo hâl a. 14 Tin, a kawchhûng te, a kete a sil a, maichâmah hâlral thilhlan chungah chuan a hâl a, 15 Tin, mipuite thilhlan chu a hlân a, mipuite sual thawina kêl chu a kai a, a talh a, a hmaa mi ang bawk khân sual thawinaah a hlân a. 16 Tin, hâlral thilhlan chu a hlân a, a dân ang zêlin a hlân a ni. 17 Tin, chhangphut thilhlan chu a hlân a, chuta mi chu a vei khatin a la a, zîng lam hâlral thilhlan tih loh pawh chu maichâmah chuan a hâl bawk a. 18 Mipuite puala remna thilhlan inthawina bâwngpa leh berâmpa chu a talh bawk a; tin, Arona fapaten a thisen chu an pe a, maichâm chu a theh vêl a; 19 tin, bâwngpa thau leh berâmpa thau te, a mei thau tak te, a rîlbawh te, a kal te, a thin tuamtu rângte an pe bawk a; 20 a thau chu a ir chungah te chuan an dah a; tin, ani chuan a thau chu maichâmah chuan a hâl a. 21 Tin, a ir leh a bawp ding lam chu Arona chuan LALPA hmaah thên thilhlanah a thên a, Mosia thupêk ang khân. 22 Tin, Arona chuan mipui lamah chuan a bân a phar a, mal a sâwm hlawm a; tin, sual thawina leh hâlral thilhlan leh remna thilhlan a hlân zo chu a lo chhuk a. 23 Tin, Mosia leh Arona chu inbiakna puan inah an va lût a; tin, an lo chhuak leh a, mipuite chu mal an sâwm a. Tin, LALPA ropuina chu mi zawng zawng chungah chuan a lo lang a. 24 Tin, LALPA hma aṭang chuan mei a lo chhuak a, hâlral thilhlan leh thaute chu maichâmah chuan a kâng ral ta a. Tin, chu chu mipui zawng zawngin an hmuh chuan an au dur dur a, an bawkkhup ta ṭhuap a.

Leviticus 10

Nadaba leh Abihua thil sual tih

1 Tin, Arona fapa, Nadaba leh Abihua-te chuan an mei lâkna chu an la ve ve a, chutah chuan meiling an dah a, rimtui an phul a, LALPA hmaah a thupêk lohvin mei hman loh chi an hlân a. 2 Chutichuan, LALPA hma aṭangin mei a lo chhuak a, anni chu a kâng hlum a, LALPA hmaah chuan an thi ta a. 3 Chutichuan, Mosian Arona hnênah, “ ‘Mi rawn hnaihtuahte chuan thianghlimin ka lang ang a; mipui zawng zawng hmaah chuan chawimawiin ka awm ang,’ tia LALPAN a sawi kha hei hi a nih hi,” a ti a. Tin, Arona chu a ngawi reng a. 4 Tichuan, Mosia chuan Arona pami Uziela fapa, Misaela leh Elzaphana-te chu a ko va, an hnênah, “Lo hnai ula, in unaute hi hmun thianghlim ata daipâwnah zâwn chhuak rawh u,” a ti a. 5 Chutichuan, an lo hnai a, an puithiam kawr ha chungin daipâwnah an zâwn chhuak a, Mosia sawi ang chuan. 6 Tin, Mosian Arona hnênah leh a fapa Eleazara leh Ithamara-te hnênah chuan, “In sam thlah suh ula, in puante pawt thlêr hek suh u; chuti lo chuan, in thi ang a, mi zawng zawng chungah LALPA a thinur ang; in unau, Israel chhûngkaw pum puiin mei, LALPA hâl chu sûn zâwk rawh se. 7 Tin, inbiakna puan in kawngka ata chu in chhuak tûr a ni lo; chuti lo chuan, in thi ang, LALPA hriak, thih mi chu in chungah a awm si a,” a ti a. Tichuan, Mosia thu ang chuan an ti ta a.

Puithiamho thil hlan dân tûr

8 Tin, LALPAN Arona chu a bia a, 9 “Nang emaw, i fapate emaw pawhin inbiakna puan in chhûnga in kal laiin uain leh zu rêng rêng in suh u; chuti lo chuan, in thi ang. Chu chu in thlahte zêl thlenga kumkhaw dân tûr a ni ang a; 10 chu chu a thianghlim leh a thianghlim lo leh, a thiang leh a thiang lo in thlei theihna tûr leh, 11 LALPAN Mosia hmanga an hnêna a sawi, thupêk zawng zawngte chu Israela thlahte in zirtîr theih nân a ni ang,” tiin. 12 Tin, Mosian Arona hnênah leh a fapa la dam Eleazara leh Ithamara-te hnênah chuan, “LALPA tâna meia thilhlana mi, chhangphut thilhlan lâk bângte chu la ula, maichâm bulah dawidim tel lovin ei rawh u; thil thianghlim a ni si a. 13 LALPA tâna meia thilhlana i pual leh i fapate pual a nih avângin hmun thianghlimah in ei tûr a ni; chutianga thu pêk chu ka ni e. 14 A ir thên leh a bawp ding lam thên chu hmun faiah in ei tûr a ni, nang leh i fapate leh i fanuteho nên; Israela thlahte remna thilhlan inthawinaa i pual leh i fapate puala ruat a ni si a. 15 Bawp thên leh ir thên chu LALPA hmaa thên thilhlana thên tûrin, meia thilhlan thau nên an rawn keng tûr a ni a. Chu chu nang leh i fapate nên, kumkhuaa in pual tûr a ni ang, LALPA thupêk ang khân,” a ti a. 16 Tin, Mosia chuan sual thawina kêl chu ngun takin a zawng a; tin, ngai teh, an lo hâl tawh reng a. Tichuan, Arona fapa la dam, Eleazara leh Ithamara-te chungah chuan a thinur a, 17 “Engati nge sual thawina chu hmun thianghlimah in ei loh? Thil thianghlim, mipuiho khawlohna phur tûra LALPA hmaa remna siamsakna tûra a pêk che u a ni si a. 18 Ngai teh u, a thisen chu hmun thianghlimah in la lût hlei nêm; thu ka pêk ang khân hmun thianghlimah chuan in ei ngei ngei tûr a ni asin,” tiin. 19 Tin, Arona chuan Mosia hnênah, “Ngai teh, vawiinah hian LALPA hmaah an sual thawina leh an hâlral thilhlan chu an hlân a ni a; hetiang thil hi ka chungah a lo awm ta mai si a! Vawiinah hian sual thawina chu lo ei ta ila, LALPA ngaiha thil tih âwm a lo ni dâwn maw?” a ti a. 20 Tin, Mosian chu chu a hriatin a lungawi ta a.

Leviticus 11

Sa ei thiangte

1 Tin, LALPAN Mosia leh Arona a bia a, 2 “Israela thlahte chu bia ula, ‘Lei chunga sa zawng zawng zînga nungcha in ei tûrte chu hêng hi a ni: 3 sa zînga a tin kâka, tin kâk chhuak, chaw ṭhial nawn chi tawh phawt chu in ei thei ang a. 4 Amaherawhchu, chaw ṭhial nawn chi emaw, tin kâk chhuak emaw zînga mi hêngte hi chu in ei tûr a ni lo: sanghâwngsei, chaw chu ṭhial nawn mah sela, a tin a kâk loh avângin, in tân a bawlhhlawh a ni; 5 tin, sazupui, chaw chu a ṭhial nawn na a, a tin a kâk loh avângin, in tân a bawlhhlawh a ni; 6 tin, zupui, chaw chu a ṭhial nawn na a, a tin a kâk loh avângin, in tân a bawlhhlawh a ni; 7 tin, vawk, a tin chu a kâk a, a kâk chhuak na a, chaw a ṭhial nawn loh avângin, in tân a bawlhhlawh a ni. 8 An sa in ei tûr a ni lo va, an ruang pawh in khawih tûr a ni lo; in tân a bawlhhlawh a ni. 9 “ ‘Tuia chêng zawng zawngah hêngte hi in ei thei ang: tuifinriat leh lui leh tuia awm, pângparh leh phuhlip nei tawh phawt chu in ei thei ang. 10 Tuia chêng zawng zawngte leh tuia nungcha awm zawng zawng zînga tuifinriata mi te, luia mi te, pângparh leh phuhlip nei lo apiangte chu in tâna thil tenawm a ni. 11 In tân thil tenawm a ni ang; an sa in ei tûr a ni lo va, an ruangte chu thil tenawmah in neih tûr a ni. 12 Tuia mi, pângparh leh phuhlip nei lo tawh phawt chu in tân thil tenawm a ni. 13 “ ‘Tin, sava zînga mi chu hêng hi thil tenawma in neih tûr a ni; ei loh tûr a ni a, thil tenawm an ni: mupui te, lungdûp te, muârla te, 14 mutê te, ngawihûp chi rêng rêng te, 15 choâk chi rêng rêng te, 16 sava sâng te, vabak te, tuifinriat sava te, mu chi rêng rêng te, 17 hrângkir te, luidung mû te, chingpirinu te, 18 chhimbuk sialki nei te, tuivalawng te, mulukawlh te, 19 kânghlai te, dîl sava chi rêng rêng te, chhuangtuar leh bâkte. 20 “ ‘Thla nei, ke palia kal chi zawng zawng chu in tân thil tenawm a ni. 21 Amaherawhchu, thla nei, ke palia kal chi pawh lei chunga perh nâna an keṭang chung lama bawp nei zawng zawng zînga mi hêngte hi in ei thei ang. 22 Hêngte pawh hi in ei thei ang: khaukhuap chi rêng rêng te, khauêkṭhingṭial chi rêng rêng te, perhpâwng chi rêng rêng leh khau chi rêng rêngte. 23 Amaherawhchu, thla nei, ke pali nei, a kala kal chi zawng zawng chu in tân thil tenawm a ni vek ang. 24 “ ‘Tin, hêng avângte hian bawlhhlawh in lo kai ang; tu pawh, hêng sa ruang khawih apiang chu tlai lam thlengin an bawlhhlawh ang a; 25 tin, tu pawh hêng ruang latu apiangte hian an puante an su tûr a ni a, tlai lam thlengin an bawlhhlawh ang: 26 ran a tin kâka, tin kâk chhuak lo, chaw pawh ṭhial nawn lo chi zawng zawng chu in tân thil bawlhhlawh a ni a; tu pawh chûng khawih apiang chu an bawlhhlawh ang. 27 Tin, fuliafa zawng zawng zînga ke bâwra kal apiangte chu in tân thil bawlhhlawh a ni a; an ruang khawih apiang chu tlai lam thlengin an bawlhhlawh ang. 28 Tin, an ruang latu apiang chuan an puante an su tûr a ni a, tlai lam thlengin an bawlhhlawh ang. In tân thil bawlhhlawh a ni. 29 “ ‘Tin, leia a bawha bawkvâk chi zînga in tâna thil bawlhhlawh chu hêngte hi a ni: bui te, chaichîm te, tangkeu chi rêng rêng te, 30 chawkê te, tangkâwng te, laitel te, kâwlchawr te, laikîng te. 31 Hêng hi a bawha bawkvâk chi zawng zawng zînga in tâna thil bawlhhlawhte chu an ni. Tu pawhin hêng thi hnute hi an khawih chuan tlai lam thlengin an bawlhhlawh ang. 32 Tin, an thiha eng pawh an delh chu a bawlhhlawh zêl ang; hmanrua hman tawh phawt chu thing bungbêl emaw, puan emaw, savun emaw, saiip emaw pawh ni sela, tuiah chiah tûr a ni. Tin, tlai lam thlengin a bawlhhlawh ang; chumi zawhah chuan a thianghlim tawh ang. 33 Hlum bêl, a enga pawh a tlâkna apiang chu in tikeh zêl tûr a ni; a chhûnga awm zawng zawng chu a bawlhhlawh a ni: 34 chumi bêla ei mi awm zawng zawng pawh, chumia awm tuia chiah tawh rêng rêng chu thil bawlhhlawh a ni ang; tin, in mi, in theih chi zawng zawng pawh, chumi bêla mi rêng rêng chu thil bawlhhlawh a ni ang. 35 Tin, thil eng pawh an ruang a eng lai pawhin a delh tawh phawt chu thil bawlhhlawh a ni zêl ang; chhang urna emaw, ur lumna bêl emaw pawh tihkeh vek tûr a ni; a bawlhhlawh tawh a, in tân thil bawlhhlawh a ni ang. 36 Amaherawhchu, tuikhur emaw, tuizêm, tui tling khâwm emaw chu a bawlhhlawh lo vang a, an ruang khawih apiang erawh chu a bawlhhlawh ang. 37 Tin, chi, chîn tûr rêng rêng chu an ruang a eng lai pawhin lo delh ta ang sela, a bawlhhlawh lo va. 38 Amaherawhchu, chi, tuia chiah hnu chu an ruang a eng lai pawhin delh sela, in tân thil bawlhhlawh a ni. 39 “ ‘Ran in ei theih chi rêng rêng eng pawh thi sela, a ruang khawih apiang chu tlai lam thlengin a bawlhhlawh ang. 40 A sa ei apiang chuan a puante a su tûr a ni a, tlai lam thlengin a bawlhhlawh ang. A ruang latu pawhin a puante a su tûr a ni a, tlai lam thlengin a bawlhhlawh ang. 41 “ ‘Tin, rannung lei chunga a bawha bawkvâk chi zawng zawng chu thil tenawm an ni a; ei tûr an ni lo. 42 A tlenga tleng chi leh ke palia kal chi emaw, ke tam tak nei chi emaw, lei chunga a bawha bawkvâk chi rêng rêng chu in ei tûr a ni lo, thil tenawm an ni si a. 43 A bawha bawkvâk chi rêng rêngin in intitenawm tûr a ni lo va; in bawlhhlawh phahna tûrin, chûng chuan in intibawlhhlawh tûr a ni lo. 44 Kei hi LALPA in Pathian ka ni si a; chuvângin, intithianghlim ula, thianghlimin awm rawh u; kei ka thianghlim si a. Lei chunga chêng, a vaha vâk, a eng ang chi mahin intibawlhhlawh suh u. 45 In Pathian ni tûra Aigupta ram ata hruai chhuak chhotu che u LALPA chu ka ni si a. Kei ka thianghlim si a; chuvângin, nangni pawh in thianghlim tûr a ni. 46 “ ‘Hei hi sa leh savate leh nungcha, tuia chêng chi tinrêng leh, leia a bawha bawkvâk chi tinrêngte chungchâng thua dân tûr chu a ni, 47 thianghlim leh thianghlim lo thleina tûr leh, nungcha ei theih mi leh nungcha ei theih loh mi thleina tûrin,’ ti rawh u,” tiin.

Leviticus 12

Nau neih zawha hmeichhe then dân tûr

1 Tin, LALPAN Mosia a bia a, 2 “Israela thlahte hnênah, ‘Hmeichhiain nau a paia, fapa a hrin chuan ni sarih a bawlhhlawh ang a; hmeichhe dân pângngai hun laia a bawlhhlawh angin a bawlhhlawh ang. 3 Tin, a ni riat niin naute serh hmâwr vun tan tûr a ni. 4 Thisen avânga inthianin ni sawmthum leh ni thum a la awm cheu tûr a ni; a inthen ni a kim hma loh chuan thil thianghlim rêng rêng a khawih tûr a ni lo va, hmun thianghlimah pawh a lût tûr a ni hek lo. 5 Hmeichhia a hrin erawh chuan, hmeichhe dân pângngai hun laia a bawlhhlawh angin chawlhkâr hnih a bawlhhlawh ang; tin, thisen avânga inthianin ni sawmruk leh ni ruk a la awm cheu tûr a ni. 6 “ ‘Tin, fapa emaw, fanu emaw avânga a inthenna ni a kim veleh, hâlral thilhlanah berâmno kum khat mi leh sual thawi nân pârvano emaw, ṭhuro emaw inbiakna puan in kawngka bulah puithiam hnênah a rawn keng tûr a ni. 7 Tin, anin LALPA hmaah a hlân ang a, inremna a siamsak ang a; tichuan, a thisen chhuahna ata tihthianghlim a ni ang. Hei hi mipa emaw, hmeichhia emaw hringtu tâna dân a ni. 8 Tin, a neihin berâmno a tlin loh chuan ṭhuro tuak khat emaw, pârvano tuak khat emaw a keng tûr a ni: pakhat chu hâlral thilhlanah, pakhat chu sual thawi nân. Chutiang chuan puithiamin inremna a siamsak ang a; tichuan, a thianghlim tawh ang,’ tiin sawi rawh,” tiin.

Leviticus 13

Vuna natna chi hrang hrang tih dân tûr

1 Tin, LALPAN Mosia leh Arona a bia a, 2 “Mi a tisa vun a vûn emaw, a khir emaw, a bawl emaw, a vuna phâr hri ni âwma a lan chuan puithiam Arona hnênah emaw, a fapa, puithiamte zînga tu ber emaw hnênah hruai tûr a ni. 3 Tin, puithiam chuan tisa vuna hri chu a lo en ang a; tin, a hri awmna laia hmul chu a lo vâra, a hri chu a tisa vun aia thûka a lan chuan phâr hri a ni a. Tin, puithiam chuan amah chu a lo en ang a, mi bawlhhlawh a nih a puang tûr a ni. 4 A tisa vuna bawlte chu a lo vâra, vun aia thûka a lan lohva, a hmul chu a vâr loh chuan hri veitu chu puithiamin ni sarih a khung hrang ang. 5 Tin, puithiam chuan ni sarih ni chuan amah chu a en ang a; tin, ngai teh, a hri chu a ngai renga a hmuha, a hri chu a ṭai darh loh chuan puithiam chuan ni sarih vêk a khung hrang leh ang. 6 Tichuan, puithiam chuan ni sarih ni chuan a en leh ang a; tin, ngai teh, hri chu a lo thîma, hri chu a vuna a ṭai darh loh chuan puithiam chuan a thianghlim tih a puang tûr a ni; khir mai a ni a, a puante a su ang a, a lo thianghlim ang. 7 Amaherawhchu, a thianna tûra puithiam a inentîr hnua a khir chu a vuna a ṭai darh zau chuan, puithiam a inentîr leh tûr a ni. 8 Tin, puithiam chuan a lo en ang a; tin, ngai teh, a khir chu a vuna a ṭai darh chuan puithiam chuan a bawlhhlawh tih a puang ang. Phâr a ni. 9 “Phâr hri miin a vawn chuan puithiam hnênah hruai tûr a ni. 10 Tin, puithiamin a lo en ang a; tin, ngai teh, vuna a vâra a lo vûn chhuaha, a hmul a tihvâra, a vûng chu a lâwn chuan, 11 phâr benvawn a tisaah a awm a ni a. Puithiamin a bawlhhlawh tih a puang ang a, khung hran tûr a ni lo, bawlhhlawh a ni si a. 12 Tin, a phâr chu vuna a ṭai darh zauva, a hri veitu chu a vun, a lû aṭanga a ke lêr thlenga puithiam hriat theih chin phârin a bawm chuan, 13 puithiam chuan a en ang a; tin, ngai teh, phârin a tisa zawng zawng a bawm chhuah tawh chuan hri veitu chu a thiang tih a puang tûr a ni. A vâr zo tawh a, a thianghlim tawh a ni. 14 Amaherawhchu, a tisa a lo lâwn chuan a lo bawlhhlawh ang. 15 Puithiam chuan a tisa lâwng chu a lo en ang a, a bawlhhlawh tih a puang tûr a ni; tisa lâwng chu a bawlhhlawh a ni. Phâr a ni. 16 Amaherawhchu, tisa lâwng chu a lo danglam leha, a lo vâr leh chuan puithiam hnênah a kal ang a. 17 Tin, puithiamin a lo en ang a; tin, ngai teh, a hri chu a lo vâr chuan puithiam chuan hri veitu chu a bawlhhlawh lo tih a puang tûr a ni. A thianghlim tawh a ni. 18 “Tin, tisa vun a lo khawihlia, a lo dama, 19 a khawihlina hmuna a lo vâr pâwn emaw, vâr sen deuhva a lo bawl emaw chuan puithiam entîr tûr a ni. 20 Tin, puithiam chuan a lo en ang a; tin, ngai teh, vun aia thûka a lana, a hmul chu a lo vâr chuan puithiamin a bawlhhlawh tih a puang tûr a ni. Phâr hri a ni a, khawihliah a lo piang chhuak a ni. 21 Amaherawhchu, puithiamin a lo ena, hmul vâr a awm lohva, vun aia a thûk lohva, a thîm deuh chauh a nih chuan, puithiamin ni sarih a khung hrang ang a; 22 tin, vuna a ṭai darh chuan puithiamin a bawlhhlawh tih a puang tûr a ni. Hri a ni. 23 Amaherawhchu, a bawl vâr chu a awmna ngaia a awma, a ṭai darh loh chuan khawihli ser mai a ni a; puithiamin a thianghlim tih a puang tûr a ni. 24 “Tin, tisa vun a kana, a kâng lâwng chu vâr sen deuh emaw, a vâr emawa a lo bawl chhuah chuan, 25 puithiamin a lo en ang a; tin, ngai teh, a bawl lai taka hmul chu a vâra, vun aia thûka a lan chuan phâr a ni a, kângah chuan a lo piang chhuak a ni. Tichuan, puithiamin a bawlhhlawh tih a puang tûr a ni. Phâr hri a ni. 26 Amaherawhchu, puithiamin a lo ena, tin, ngai teh, a lo bawla, a hmul vâr a awm lohva, vun aia thûk lova thîm deuh chauh a nih chuan puithiamin ni sarih a khung hrang ang. 27 Tin, puithiamin ni sarih niah amah chu a en ang a, vuna a ṭai darh zau chuan puithiamin a bawlhhlawh tih a puang tûr a ni. Phâr hri a ni. 28 Tin, a bawl chu a awmna ngaia a awm renga, vuna a ṭai darh lohva, thîm deuh chauh a nih chuan mei kan pâwn mai a ni a, puithiamin a thianghlim tih a puang tûr a ni; kâng ser mai a ni si a. 29 “Tin, hmeichhia emaw, mipa emawin a luah emaw, a khabe hmul laiah emaw hri a vei chuan, 30 puithiamin hri chu a lo en ang a; tin, ngai teh, vun aia thûka a lana, hmul eng sîn tak a awm chuan puithiamin a bawlhhlawh tih a puang tûr a ni; pupangliah a ni a, lû leh khabe hmul phâr a ni. 31 Tin, puithiamin pupangliah hri chu a ena, vun aia thûk lova a lana, a hmul dum a awm loh chuan puithiamin pupangliah hri veitu chu ni sarih a khung hrang ang. 32 Tin, ni sarih niah puithiamin hri chu a en ang a; tin, ngai teh, pupangliah chu a ṭai darh lohva, hmul eng a awm lohva, pupangliah chu vun aia thûka a lan loh chuan, 33 meh tûr a ni a, pupangliah lai erawh chu a mêt tûr a ni lo. Tin, puithiamin pupangliaha chu ni sarih dang a khung hrang leh ang a. 34 Tin, ni sarih ni chuan puithiamin pupangliah chu a en leh ang a; tin, ngai teh, pupangliah chu a vuna a darh lohva, vun aia thûka a lan loh chuan puithiamin a thianghlim tih a puang tûr a ni; tin, a puante a su ang a, a lo thianghlim tawh ang. 35 Amaherawhchu, pupangliah chu a inthen fai hnua vuna a ṭai darh zau chuan, 36 puithiamin amah chu a lo en ang a; tin, ngai teh, pupangliah chu vuna a ṭai darh chuan, puithiam tân chuan hmul eng chu zawn a ngai kher lo vang; a bawlhhlawh a ni. 37 Amaherawhchu, pupangliah chu a ngai renga a hmuha, hmul dum a ṭo chuan pupangliah chu a dam a ni a, a thianghlim a ni; puithiamin a thianghlim tih a puang tûr a ni. 38 “Tin, hmeichhia emaw, mipa emaw, an tisa vunah bawl, bawl vâr tak a awm chuan, 39 puithiamin a en ang a; tin, ngai teh, an tisa vuna bawl chu a vâr thîm deuh chauh a nih chuan bawl mai a ni a, vuna lo piang a ni a; a thianghlim a ni. 40 “Mi a sam a tlâk kawlh chuan lukawlh a ni a; nimahsela, a thianghlim a ni. 41 A chhîp sam a tlâk kawlh chuan chalkawlh a ni a; nimahsela, a thianghlim a ni. 42 Amaherawhchu, lukawlhah emaw, chalkawlhah emaw, hri sen deuhva vâr a awm chuan, a lukawlh emaw, a chalkawlh emawa lo piang phâr a ni. 43 Tichuan, puithiamin a lo en ang a; tin, ngai teh, a lukawlh emaw, a chalkawlh emawa hri lo pâwng chhuak chu a sen vâr hiara, tisa vuna phâr anga a lan chuan, 44 mi phâr a ni a, a bawlhhlawh a ni. Puithiamin a bawlhhlawh tih a puang ngei ngei tûr a ni; a phârna chu a lu-ah a ni. 45 “Phâr hri vei chu a puante pawh thlêr a ni ang a, a sam te a thlah ang a, a hmui chung lam a tuam ang a, ‘Ka bawlhhlawh e! Ka bawlhhlawh e!’ tiin a au tûr a ni. 46 Phârin a bawm chhûng chu bawlhhlawh a ni ang a; a bawlhhlawh a, amahin a awm hrang tûr a ni; a awmna tûr chu daipâwn a ni.

Hri inkai theih

47-48 “Silhfên pawh, sahmul silhfên emaw, la zai sîn silhfên emaw pawh, tah emaw, phiar emaw pawh, la zai sîn emaw, sahmul emaw pawh, savun emaw, eng pawh savuna siamah emaw phâr hri a awma, 49 chu hri chu silhfênah emaw, savunah emaw, tahah emaw, phiarah emaw, eng pawh savuna siamah emaw a hring deuh emaw, a sen deuh emawa a lo lan chhuah chuan, phâr hri a ni a, puithiam entîr tûr a ni. 50 Tin, puithiamin hri chu a lo en ang a, hri kaina chu ni sarih a khung hrang ang. 51 Tin, ni sarih niah hri chu a en ang a, hri chu silhfên, tahah emaw, phiarah emaw, eng atân pawha an hman savunahte emaw a ṭai chuan hri chu phâr nghet tak chi a ni a; a bawlhhlawh a ni. 52 Silhfên chu, tah emaw, phiar emaw, sahmul emaw, la zai sîn emaw, savuna siam chi rêng rêng emaw, phâr awmna tawh phawt chu a hâl tûr a ni, phâr nghet tak chi a ni si a; hâl ngei tûr a ni. 53 Tin, puithiamin a lo ena, silhfên, tah emaw, phiar emaw, savuna siam chi rêng rêng pawha hri chu a ṭai loh chuan, 54 hri awmna chu puithiamin sûk thu a pe ang a, ni sarih dang a khung hrang leh ang. 55 Tin, hri awmna sûk hnu chuan puithiamin a en leh ang a; tin, ngai teh, hri lan dân chu a danglam loh chuan hri chu ṭai lo mah sela, a thianghlim chuang lo va, i hâl tûr a ni; a nghet chi a ni, a chhûng lam emaw, a pâwn lam emawa kawlh pawh ni rawh se. 56 Tin, puithiamin a lo ena, sûk hnua thîm deuh chauh a nih chuan silhfên ata emaw, savun ata emaw, tah ata emaw, phiar ata emaw chu a pawt thla ang. 57 Tin, hri chu silhfên tahah emaw, phiarah emaw, savuna siamahte emaw a la lan cheu chuan, a lo chhuak leh a ni a; hri awmna chu i hâl tûr a ni. 58 Tin, silhfên chu tah emaw, phiar emaw, eng pawh savuna siam chi rêng rêng emaw i sûka, hriin a kiansan chuan sûk leh tûr a ni a; tichuan, a lo thianghlim tawh ang. 59 Hei hi silhfên, sahmul emaw, la zai sîn emaw, tah emaw, phiar emaw, savuna siam chi rêng rêngte emawa phâr hri awm, a thianghlim leh a thianghlim loh puan dân tûr chu a ni,” tiin.

Leviticus 14

Vun na dam then dân tûr

1 Tin, LALPA chuan Mosia a bia a, 2 “Hei hi phâr inthen nia a tih dân tûr a ni ang: puithiam hnênah hruai tûr a ni a; 3 tin, puithiam chu daipâwnah a kal chhuak ang a; tin, puithiam chuan a en ang a; tin, ngai teh, phâr chu a phârna hri a dam chuan, 4 puithiam chuan a inthian tûra chu sava nung thiang pahnih leh, sidar thing leh la zai sen leh husop kensak tûrin thu a pe ang. 5 Tin, puithiam chuan sava pakhat chu hlum bêlah lui tui chungah talh tûrin thu a pe ang a. 6 Sava nung chu sidar thing te, la zai sen te, husop te nên chuan a keng ang a, lui tui chunga sava talh thisenah chuan a hnim vek ang. 7 Tin, phârna laka inthian tûra chu vawi sarih a theh ang a, a thianghlim tih a puang ang a; tin, sava nung chu ramah a chhuah ang. 8 Tin, a inthian tûra chuan a puante a su ang a, a inmêt kâwng vek ang a, a inbual tûr a ni; tichuan, a lo thianghlim ang. Chumi zawhah chuan riahhmunah a kal ang a; amaherawhchu, a puan in pâwn lamah ni sarih a awm tûr a ni. 9 “Tin, heti hi a ni ang a, a ni sarih ni chuan a sam zawng zawng leh a khabe hmul leh a mit ko hmulte a mêt kâwng ang a, a hmul zawng zawng a mêt kâwng ang; tin, a puante a su ang a, a inbual tûr a ni; tichuan, a lo thianghlim tawh ang. 10 Tin, ni riat ni chuan berâmno a pa pahnih sawisêl bo leh berâmno a nu pakhat sawisêl bo, kum khat mi leh chhangphut thilhlan atân chhangphut dip tak, epha hmun sâwma ṭhena hmun thum hriaka hmeh leh hriak log khat a keng tûr a ni. 11 Tin, a thiantu puithiam chuan inthian tûra leh chûng thil chu, inbiakna puan in kawngka bulah LALPA hmaah a dah ang a. 12 Tin, puithiam chuan berâmno pakhat chu hriak log khat nên chuan a la ang a, bawhchhiat thawi nân a hlân ang a, LALPA hmaa thên thilhlan atân thên tûr a ni. 13 “Tin, sual thawina leh hâlral thilhlan an talh ṭhinna hmun, hmun thianghlimah chuan berâmno a pa chu a talh tûr a ni; sual thawina chu puithiam pual a ni ang bawkin, bawhchhiat thawina pawh chu puithiam pual a ni si a; thil thianghlim tak a ni e. 14 Puithiam chuan bawhchhiat thawina thisen chu a la ang a, inthian tûra beng ding lam hmâwrah te, a kut ding lam zungpuiah te, a ke ding lam zungpuiah te a hnawih ang. 15 Tin, hriak log khata mi chu puithiam chuan a la ang a, ama vei lam kutphahah a chhûng ang a; 16 puithiam chuan a kut vei lama hriakah chuan a zungṭang ding lam a hnim ang a, hriak chuan LALPA hmaah a kutzungṭangin vawi sarih a theh ang. 17 Tin, a kuta hriak la awm zawng chuan inthian tûra beng ding lam hmâwr te, a kut ding lam zungpui te, a ke ding lam zungpuitea bawhchhiat thawina thisen chungah te chuan a hnawih ang. 18 Puithiam chuan a kuta hriak la awm zawng chuan inthian tûra lu a hnawih ang a; tin, puithiam chuan LALPA hmaah inremna a siamsak tûr a ni. 19 Tin, puithiam chuan sual thawina chu a hlân ang a, a thianghlim lohna avânga inthian tûra chu inremna a siamsak ang a; tin, chumi zawhah chuan hâlral thilhlan chu a talh ang. 20 Tin, puithiam chuan hâlral thilhlan leh chhangphut thilhlan chu maichâmah chuan a hlân ang a, puithiam chuan inremna a siamsak ang a; tichuan, a lo thianghlim tawh ang. 21 “Tin, mi rethei a niha, chutiang chu a tlin loh chuan, berâmno a pa pakhat bawhchhiat thawina, inremna siamsak nâna thên tûr leh, chhangphut thilhlan atân chhangphut dip tak epha hmun sâwma ṭhena hmun khat, hriaka chawhpawlh, hriak log khat nên a keng ang a; 22 tin, ṭhuro tuak khat emaw, pârvano tuak khat emaw, a neih theih zâwk zâwk apiang; pakhat chu sual thawina, pakhat chu hâlral thilhlanah a ni ang. 23 Ni riat niah a inthen nân puithiam hnênah, inbiakna puan in kawngka bulah LALPA hmaah a rawn keng tûr a ni. 24 “Tichuan, puithiamin bawhchhiat thawina berâmno leh hriak log khat chu a la ang a; tin, thên thilhlanah LALPA hmaah puithiam chuan a thên ang. 25 Tin, bawhchhiat thawina berâmno chu a talh ang a; puithiam chuan bawhchhiat thawina thisen chu a la ang a, inthian tûra beng ding lam hmâwrah te, a kut ding lam zungpuiah te, a ke ding lam zungpuiah te a hnawih ang. 26 Tin, puithiam chuan hriak chu ama kutphah vei lamah a bun ang a; 27 tin, puithiam chuan a kut vei lama hriak ṭhenkhat chu a kut ding lamin LALPA hmaah vawi sarih a theh ang. 28 Tin, puithiam chuan a kuta hriak chuan inthian tûra beng ding lam hmâwr te, a kut ding lam zungpui te, a ke ding lam zungpuitea bawhchhiat thawina thisen chung takahte chuan a hnawih ang. 29 Puithiam kuta hriak la awm zawngte chuan, LALPA hmaa inremna siamsak tûrin, inthian tûra lu chu a thih tûr a ni. 30 Tin, ṭhuro emaw, pârvano emaw, a neih theih zâwk zâwk apianga pakhat chu a hlân ang a; 31 a neih theih zâwk zâwk apiang, sual thawi nân pakhat, hâlral thilhlanah pakhat, chhangphut thilhlan nên. Chutiang chuan puithiam chuan inthian tûra chu LALPA hmaah inremna a siamsak ang. 32 Hei hi phâr hri vei, inthenna dân ang tlin lote tâna dân a ni,” tiin.

In chhûnga phâr hri

33 Tin, LALPAN Mosia leh Arona a bia a, 34 “Luah tûra ka pêk che u Kanaan ram in luh huna, in luah tûr ram khawii inah pawh phâr hri ka dah chuan, 35 chumi in neitu chuan, ‘He inah hian hri ni âwm tak awm âwmin ka hria,’ tiin puithiam a hrilh tûr a ni. 36 Tin, puithiam chu hri en tûra a luh hma chuan, in chhûnga thil awm zawng zawng chu bawlhhlawha a chan loh nân, in chu tihruah tûrin puithiam chuan thu a pe ang a; chumi zawh chuan puithiam chu in en tûr chuan a lût ang. 37 Tin, hri chu a en ang a; tin, ngai teh, hri chuan a hring lam deuh emaw, a sen lam deuh emawa bang a ei khuar tawha, bang aia phaia a lan chuan, 38 puithiam chu in ata kawngkaah a chhuak ang a, in chu ni sarih a khâr ang. 39 Tin, ni sarih niah puithiam chuan a va en leh ang a; tin, ngai teh, hri chu banga a lo ṭai chuan, 40 hri awmna lung chu lâk chhuaha, daipâwnah hmun bawlhhlawha paih tûrin puithiam chuan thu a pe ang. 41 Tin, in chhûng lam chu a ziah vêltîr ang a; tin, lung chârna an ziah khawh chu daipâwnah hmun bawlhhlawhah an chhûng ang. 42 Tin, lung dang an la ang a, chûng lung hmunahte chuan an dah ang; tin, lung chârna dang an la ang a, in chu a bel ang. 43 “Tin, lung a lâk chhuaha, in chu a ziaha, a bel zawh hnua hri chu ina a lo chhuah leh chuan, 44 puithiam chu a va lût ang a, a va en leh ang; tin, ngai teh, hri chu ina a lo ṭai chuan chu ina phâr chu a nghet chi a ni a; in chu a bawlhhlawh a ni. 45 In chu a ṭhiat ang a, a lung te, a thing te, a lung chârna zawng zawngte pawh; tin, daipâwnah hmun bawlhhlawhah a thiar chhuak ang. 46 Tu pawh chu in khâr chhûnga lût rêng rêng chu tlai lam thlengin an bawlhhlawh bawk ang. 47 Tin, tu pawh chumi ina mu apiangte chuan an puante an su ang a; tin, tu pawh chu ina chaw ei apiangte chuan an puante an su tûr a ni. 48 Tin, puithiam chu a luha, a han en vêla, in chu bel ṭhat a nih hnua hri chu a ṭai loh chuan, in chu a thianghlim tih puithiamin a puang ang, hri chu a kian tawh avângin. 49 “In thenna tûr chuan sava pahnih leh sidar thing leh la zai sen leh husop a keng ang. 50 Sava pakhat chu hlum bêlah lui tui chungah a talh ang a; 51 tin, sidar thing leh husop leh la zai sen leh sava nung chu a la ang a, sava talh tâk thisenah leh lui tuiah chuan a hnim ang a, in chu vawi sarih a theh ang. 52 Tin, in chu sava thisen te, lui tui te, sava nung te, sidar thing te, husop te, la zai sente chuan a thian ang. 53 Sava nung erawh kha chu khua aṭangin ramah a thlawh chhuahtîr tûr a ni. Chutiang chuan in tân chuan inremna a siam ang a; tichuan, a lo thianghlim tawh ang. 54 “Hei hi phâr hri chi tinrêng leh pupangliah chungchânga dân chu a ni; 55 puana phâr awm leh ina mite, 56 pâwng te, khir te, bawl chungchângahte pawh, 57 a thianghlim loh lai leh a thianghlim lai kawhhmuhna tûrin hei hi phâr chungchânga dân chu a ni,” tiin.

Leviticus 15

Taksa aṭanga thil bawlhhlawh chhuak

1 Tin, LALPA chuan Mosia leh Arona a bia a, 2 “Israela thlahte chu bia ula, an hnênah, ‘Mipa tu pawh a tisaah thil a puh chuan a thil pût avâng chuan a bawlhhlawh a ni. 3 A thil puh chhûng zawng chu a bawlhhlawh a ni: a tisaah chuan a pût reng emaw, a pût chu dan emaw pawh ni sela, a bawlhhlawh tho a ni. 4 Thil pûta mutna khum tawh phawt chu a bawlhhlawh ang a, a ṭhutna tawh phawt chu a bawlhhlawh bawk ang. 5 Tin, tu pawh a khum khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang. 6 Thil pûta ṭhutnaa ṭhu apiangte chuan an puante an su ang a, an inbual tûr a ni a, tlai lam thlengin an bawlhhlawh ang. 7 Tu pawh thil pûta tisa chu khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang. 8 “ ‘Thil pûta chuan mi bawlhhlawh lo chil a chhâk chuan, a puante a su ang a, a inbual tûr a ni a, tlai lam thlengin a bawlhhlawh ang. 9 Chuanna eng pawh thil pûta chuanna chu a bawlhhlawh ang. 10 Tu pawh a innghahna hnu thil khawih apiangte chu tlai lam thlengin an bawlhhlawh ang. Chûng thil chawi sawntu apiangte chuan an puante an su ang a, an inbual tûr a ni; tlai lam thlengin an bawlhhlawh ang. 11 Tin, tu pawh, thil pûta chuan a kut tleuh lova a khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang. 12 Thil pûta hlumbêl khawih hnu chu tihkeh tûr a ni; tin, thing bungbêl zawng zawng chu tleuh fai vek tûr a ni. 13 Tin, thil pûta chu, a thil pût tihthianghlim a nih chuan a inthen nân ni sarih a intuk ang a, a puante a su ang a, lui tuiah a inbual ang a; tichuan, a lo thianghlim tawh ang. 14 A ni riat ni chuan ṭhuro tuak khat emaw, pârvano tuak khat emaw kengin LALPA hmaah inbiakna puan in kawngka bulah a kal ang a, puithiam a pe tûr a ni. 15 Puithiam chuan sual thawi nân pakhat, hâlral thilhlanah pakhat a hlân tûr a ni; chutiang chuan puithiam chuan a thil pût thu-ah LALPA hmaah inremna a siamsak ang. 16 “ ‘Tu pawh inpâwlna chi amah aṭanga a chhuah chuan a pumin a inbual vek tûr a ni a, tlai lam thlengin a bawlhhlawh ang. 17 Tin, silhfên te, savun te, inpâwlna chi awmna tawh phawt chu, sûk faia sil fai vek tûr a ni a, tlai lam thlengin a bawlhhlawh ang. 18 Tin, hmeichhia a mutpui pawhin an pahnihin an inbual ve ve tûr a ni a; tin, tlai lam thlengin an bawlhhlawh ang. 19 “ ‘Hmeichhiain thil pût a neiha, a taksa aṭanga thil pût chu thi a nih chuan, ni sarih chhûng chu a bawlhhlawh ang; tin, tu pawh amah khawih apiang chu tlai lam thlengin an bawlhhlawh ang. 20 A bawlhhlawh chhûnga a mutna tawh phawt chu a bawlhhlawh ang a, a ṭhutna tawh phawt pawh a bawlhhlawh bawk ang. 21 Tu pawh a khum khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang. 22 Tu pawh a ṭhutna khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang. 23 Khuma thil awm emaw, a ṭhutnaa thil awm emaw khawih apiangte chu tlai lam thlengin an bawlhhlawh ang. 24 Tu pawhin an mutpuia, a bawlhhlawhna chu an kai chuan ni sarih an bawlhhlawh ang a; an mutna khum apiang chu a bawlhhlawh ang. 25 “ ‘Hmeichhia a bawlhhlawh hun pângngai ni lova ni rei fe a thi a puh emaw, a bawlhhlawh dân pângngai aia rei a thi a puh emaw chuan, a bawlhhlawhna dân pângngai chhûnga a awm ṭhin angin, thi pûta a bawlhhlawh chhûng zawng chuan a awm bawk tûr a ni; a bawlhhlawh a ni. 26 A thi puh chhûng zawnga a mutna khum tawh phawt chu, a bawlhhlawh dân pângngai hun laia a khum ang a ni ang a; a ṭhutna apiang chu a bawlhhlawh dân pângngai hun laia a bawlhhlawh angin a bawlhhlawh ang. 27 Tu pawh chûng thil khawih apiang chu an bawlhhlawh ang a, an puante an su ang a, an inbual tûr a ni a, tlai lam thlengin an bawlhhlawh ang. 28 Amaherawhchu, a thi pût chu tihthianghlim a nih chuan ni sarih a intuk ang a, chumi hnuah chuan a lo thianghlim tawh ang. 29 Tin, a ni riat niah ṭhuro tuak khat emaw, pârvano tuak khat emaw a keng ang a, inbiakna puan in kawngka bulah puithiam a pe tûr a ni. 30 Tin, puithiamin sual thawi nân pakhat, hâlral thilhlanah pakhat a hlân tûr a ni. Chutiang chuan puithiam chuan thi pûta a bawlhhlawhna thu-ah LALPA hmaah inremna a siamsak ang. 31 “ ‘Hetiang hian Israela thlahte chu an bawlhhlawhna ata chu in tihrang tûr a ni, an zînga ka biakbûk an tihbawrhbân châng pawha an bawlhhlawhna avânga an thih loh nân. 32 “ ‘Hei hi thil pûtate leh bawlhhlawh phaha inpâwlna chi chhuakate tâna dân chu a ni; 33 an bawlhhlawhna avânga peihsam lo te, a hmei a pa, thil pûtho te, hmeichhia, an bawlhhlawh laia mutpuitute tân pawh,’ ” tiin.

Leviticus 16

Inremna ni

1 Arona fapate pahnihin LALPA an va hnaiha an thih phah hnu chuan, LALPAN Mosia a bia a; 2 LALPAN Mosia hnênah, “I unau Arona bia la, puanzâr chhûng hmun thianghlimah, bâwm chunga zahngaihna ṭhutphah hmaah chuan eng lai mahin lo lût hauh suh se, a thi dah ang e; zahngaihna ṭhutphah chungah, chhûmah ka rawn inlâr dâwn a ni. 3 Hetiang hian Arona chu hmun thianghlimah a kal tûr a ni: sual thawi nân bâwngtuai, hâlral thilhlanah berâmpa nên. 4 Puan zai sîn kawr thianghlim chu a ha ang a, a tisa khuh nân puan zai sîn kekawr chu a ha ang a, puan zai sîn kâwnghrênin a inhrêng ang a, puan zai sîn diar a khim tûr a ni. Hêng hi silhfên thianghlim a ni a; a inbual tê tê ang a, a inbel tûr a ni. 5 Tin, Israela thlahte mipuiho ta kêlpa pahnih sual thawi nân leh, hâlral thilhlanah berâmpa pakhat a keng ang a. 6 Arona chuan ama puala sual thawina bâwngpa chu a hlân ang a, amah leh a chhûngte tân inremna a siam ang. 7 Kêl pahnih chu a kai ang a, inbiakna puan in kawngka bulah LALPA hmaah a dah ang a. 8 Tin, Arona chuan kêl pahnih chungchângah chuan ṭhum a vâwr ang a: pakhat chu LALPA pual a ni ang a, pakhat chu Azazela pual a ni ang. 9 Tin, Arona chuan LALPA puala tlu kêl chu a la ang a, sual thawi nân a hlân ang a. 10 Azazela puala tlu kêl erawh chu inremna siamna tûra Azazela tân thlalêra chhuah tûrin, LALPA hmaah a nungin a dah ang. 11 “Arona chuan ama puala sual thawina bâwngpa chu a la ang a, amah leh a chhûngte tân inremna a siam ang a, ama puala sual thawina bâwngpa chu a talh ang. 12 LALPA hmaa maichâm ata mei lâkna meilinga khat a la ang a, rimtui tui tak râwt dip dep ṭhûm khat nên puanzâr chhûng lamah a luhpui ang a; 13 rimtui khu chuan thuhriattîrna chunga zahngaihna ṭhutphah chu a bawhna tûrin, LALPA hmaa meiah rimtui chu a phul ang, thihna a tawh loh nân. 14 Bâwngpa thisen eng emaw zât chu a la ang a, a kutzungṭangin zahngaihna ṭhutphah chhak lampang chu a theh ang a, a kutzungṭangin zahngaihna ṭhutphah bul chu thisen chuan vawi sarih a theh tûr a ni. 15 “Tin, mipui pual sual thawina kêl chu a talh ang a, a thisen chu puanzâr chhûng lamah a luhpui ang a, a thisen chu bâwngpa thisen a tih ang khân a ti ang a, zahngaihna ṭhutphah leh zahngaihna ṭhutphah bul chu a theh ang. 16 Israela thlahte bawlhhlawhnate avâng leh an bawhchhiatnate, an sualna zawng zawngte avângin hmun thianghlim pualah inremna a siam ang a; chutiang bawk chuan an bawlhhlawhnate zînga awm, inbiakna puan in pualah pawh a siam bawk tûr a ni. 17 Hmun thianghlima inremna siam tûra a luh lai chuan, amah leh a chhûngte leh Israel mipuiho puala inremna a siam zawha a lo chhuah leh hma loh chuan, tu mah rêng rêng inbiakna puan in chhûngah chuan an awm tûr a ni lo. 18 LALPA hmaa maichâm lamah chuan a chhuak ang a, chumi pual chuan inremna a siam ang a, bâwngpa thisen leh kêl thisen eng emaw zât chu a la ang a, maichâm kîahte chuan a vêlin a tât ang. 19 Tin, a kutzungṭangin vawi sarih a theh ang a, a thian ang a, Israela thlahte bawlhhlawhnate lak ata chu a tithianghlim ang.

Sual phur kêl

20 “Tin, hmun thianghlim leh inbiakna puan in leh maichâm puala inremna a siam zawh chuan kêl nung chu a hlân ang a. 21 Arona chuan kêl nung lu chungah chuan a kut khinghnih a nghat ang a, a chungah chuan Israela thlahte khawlohna zawng zawng te, an bawhchhiatna zawng zawng te, an sualna zawng zawngte chenin a chham ang a, chûngte chu kêl lu chungah chuan a nghat ang a, mi pakhat an ruat diama khân thlalêr lamah a hruai bo daih ang. 22 Tin, kêl chuan an khawlohna zawng zawng chu chên loh leiah a phur ang a, kêl chu thlalêrah chuan a chhuah tûr a ni. 23 “Tin, Arona chu inbiakna puan inah chuan a lût ang a, hmun thianghlim a luh laia puan zai sîn silhfên a inbel chu a hlîp ang a, chutah chuan a hnutchhiah ang. 24 Tin, hmun thianghlimah a inbual ang a, a silhfên a inbel ang a, a lo chhuak ang a, ama puala hâlral thilhlan leh mipui puala hâlral thilhlan chu a hlân ang a, amah leh mipui tân inremna a siam ang. 25 Tin, sual thawina thau chu maichâmah a hâl ang. 26 Tin, Azazela pual kêl chhuahtu apiang chuan an puan an su ang a, an inbual ang a, chumi zawhah chuan an awmhmun lamah an haw leh tûr a ni. 27 Sual thawina bâwngpa leh sual thawina kêl thisen inremna a siam nâna hmun thianghlima an luhpui chu, daipâwn lama kalpui tûr a ni ang a; a vun te, a sa te, a êk te chu an hâl tûr a ni. 28 A hâltu chuan a puan a su ang a, a inbual ang a, chumi zawhah chuan an awmhmun lamah a haw leh tûr a ni.

Inremna ni hman dân tûr

29 “Hei hi in kumkhaw dân tûr a ni ang a: thla sarihna, chumi thla ni sâwm ni chuan in rilrute in tihrehawm ang a, in rama mi rêng emaw, ram dang mi in zînga khawsa emawin hna eng mah an thawk tûr a ni lo: 30 hemi ni hian nangmahni tihthianghlim nân in tân inremna siam a ni dâwn a ni; tichuan, LALPA hmaah in sualna zawng zawng lak ata in thianghlim ang. 31 In tân chawlh hle hle ni a ni a, in rilrute in tihrehawm ang a; kumkhaw dân tûr a ni. 32 Tin, puithiam, a pa aia puithiam ni tûra hriak thih tûr leh tihhran tûra chuan inremna a siam ang a; puan zai sîn silhfên, silhfên thianghlim chu a inbel ang a; 33 hmun thianghlim pualah inremna a siam ang a, inbiakna puan in leh maichâm pualah inremna a siam bawk ang a; tin, puithiamte leh mipuiho tân inremna a siam leh bawk ang. 34 An sualna zawng zawngte avânga kum tin vawi khat, Israela thlahte tân inremna siam hi in kumkhaw dân tûr a ni,” a ti a. Tichuan, LALPAN Mosia thu a pêk ang chuan a ti a.

Leviticus 17

Thisen chhuah

1 Tin, LALPA chuan Mosia a bia a, 2 “Arona leh a fapate leh Israela thlahte zawng zawng bia la, an hnênah, ‘Hei hi LALPA thupêk chu a ni: 3 “Israel chhûngkaw zînga mi rêng rêng, bâwngpa emaw, berâmno emaw, kêl emawte riahhmun emaw, daipâwn emawa talha, 4 LALPA biakbûk hmaa LALPA tâna thilhlana inbiakna puan in kawngka bula rawn la lo apiang, chu mi chu thisen chhuaha ngaih a ni ang; thisen chhuah ngei a ni a, chu mi chu a chipuite zîng ata tuithlârin a awm tûr a ni; 5 chu chu Israela thlahten an inthawinate, tâmlaka an inthawinate chu an rawn lâka, LALPA tân ngeia inbiakna puan in kawngka bulah, puithiam hnênah an rawn lâka, LALPA tâna remna thilhlan inthawinaa an inthawi theih nân a ni. 6 Tin, puithiamin inbiakna puan in kawngka bula maichâm chu thisen chuan a theh ang a, a thau chu LALPA tâna rimtui takah a hâl tûr a ni. 7 An uire ṭhinna kêlpa hnênah chuan an inthawi tawh tûr a ni lo, tih hi. Hei hi an thlahte zêl chena an kumkhaw dân tûr a ni,” ’ tiin. 8 “Tin, an hnênah, ‘Israel chhûngkaw zînga mi rêng rêng emaw, ram dang mi an zînga khawsaten emaw hâlral thilhlan emaw, inthawina emaw hlâna, 9 LALPA hnêna inthawi tûra inbiakna puan in kawngka bula rawn la lo an awm chuan, chu mi chu a chipuite zîng ata tuithlârin a awm tûr a ni. 10 “ ‘Tin, tu pawh Israel chhûngkaw zînga mi emaw, ram dang mi an zînga khawsa emaw, eng thisen pawh ei apiang chu, chu thisen eitu chungah chuan ka hmai ka thuar ang a, a chipuite zîng ata tuithlârin ka awmtîr ang. 11 Tisa nunna chu thisenah chuan a awm si a; in nunna atâna inremna siamna tûra maichâm chunga ka pêk che u a ni; nunna atâna inremna siamna chu thisen ngei chu a ni si a.’ 12 Chu vâng chuan Israela thlahte hnênah, ‘Tu mahin thisen in ei tûr a ni lo va, ram dang mi in zînga khawsate pawhin thisen an ei tûr a ni hek lo,’ ka ti a ni. 13 “Tin, Israela thlahte zînga mi emaw, ram dang mi an zînga khawsain emaw ram vâka, sa emaw, sava emaw, ei theih chi a rawn hawn chuan a thisen chu a tichhuak ang a, vaivutin a vûr tûr a ni. 14 Tisa zawng zawng nunna thu-ah chuan a thisen leh a nunna chu angkhat chiah a ni; chuvângin, Israela thlahte hnênah chuan, ‘Eng sa thisen mah in ei tûr a ni lo, tisa zawng zawng nunna chu a thisen chu a ni si a; tu pawh a ei apiang chu tuithlârin a awm tûr a ni.’ 15 Tin, amaha thi emaw, sa seh emaw ei apiang chu, chumi rama mi rêng emaw, ram dang mi emaw pawh ni sela, an puan an su ang a, an inbual tûr a ni a, tlai lam thlengin an bawlhhlawh ang a; chumi hnuah chuan an thianghlim tawh ang. 16 An sûk lohva, an inbual loh phei chuan, an khawlohna mawh chu an phur ang, ka ti a, ti rawh,” tiin.

Leviticus 18

Mutpui loh tûrte

1 Tin, LALPA chuan Mosia a bia a, 2 “Israela thlahte chu bia la, an hnênah, ‘Kei hi LALPA in Pathian chu ka ni. 3 In awm tawhna Aigupta ram mite tih ang kha ti suh ula, ka hruai luhna tûr che u Kanaan ram mite tih ang pawh ti suh ang che u; an dân pawh zâwm bawk hek suh u. 4 Ka rorêlte chu in pawm ang a, ka dânte chu zawhin in zâwm tûr a ni: kei hi LALPA in Pathian chu ka ni. 5 Chuvângin, ka dân leh ka rorêlte chu in zâwm tûr a ni; chu chu miin a tih chuan a nun phah ang: kei hi LALPA chu ka ni. 6 “ ‘Tu mân in chhûng bulte rêng rêng chu an saruakna hlîm tûrin in pan tûr a ni lo: kei hi LALPA chu ka ni. 7 I pa saruakna emaw, i nu saruakna emaw chu i hlîm tûr a ni lo. I nu a ni a, a saruakna i hlîm tûr a ni lo. 8 I pa nupui saruakna i hlîm tûr a ni lo; i pa saruakna a ni. 9 I farnu, i pa fanu emaw, i nu fanu emaw, i pianpui emaw, i pianpui loh emawte saruakna pawh i hlîm tûr a ni lo. 10 I fapaa fanu emaw, i fanua fanu emaw saruakna, an saruakna chu i hlîm tûr a ni lo. An saruakna chu nangma saruakna a ni si a. 11 I pa nupuia fanu, i pa hrin saruakna chu - i farnu a ni a - a saruakna i hlîm tûr a ni lo. 12 I pa farnu saruakna chu i hlîm tûr a ni lo; i pa chhûng bul a ni. 13 I nu laizâwn saruakna chu i hlîm tûr a ni lo; i nu chhûng bul a ni si a. 14 I pa unau saruakna chu i hlîm tûr a ni lo va. A nupui chu i pan tûr a ni lo, i nu a ni. 15 I monu saruakna chu i hlîm tûr a ni lo, i fapaa nupui a ni a, a saruakna i hlîm tûr a ni lo. 16 I unaupa nupui saruakna chu i hlîm tûr a ni lo, i unaupa saruakna a ni. 17 Nufa faa saruakna chu i hlîm tûr a ni lo. A saruakna hlîm tûrin a fapaa fanu emaw, a fanua fanu emaw i nei tûr a ni lo; i chhûng bulte an ni a. Suahsualna nasa tak a ni. 18 I nupuia laizâwn chu a saruakna hlîm tûrin i nupui la dam chhûng chuan i nei kawp tûr a ni lo. 19 “ ‘Tin, hmeichhia a bawlhhlawh dân pangngaia a bawlhhlawh chhûng chuan, a saruakna hlîm tûrin i pan tûr a ni lo. 20 A laka intibawlhhlawh tûrin i vêng pa nupui i mutpui tûr a ni lo. 21 Moleka puala meia tihluh tûrin i rîla rahte rêng rêng i pe tûr a ni lo va, i Pathian hming i tichhe tûr a ni hek lo. Kei hi LALPA chu ka ni. 22 Hmeichhia angin mipa i pâwl tûr a ni lo; thil tenawm a ni. 23 Intihbawlhhlawhna tûrin ran rêng rêng i pâwl tûr a ni lo va, hmeichhia rêng rêng inpâwltîr tûrin ran hmaah a ding tûr a ni hek lo; suahsualna chungchuang a ni. 24 “ ‘Hêng thil, a enga mahah hian intibawlhhlawh suh u; hêng thil zawng zawngah hian in hmaa ka hnawh chhuah tâk hnamte chu an lo bawlhhlawh tawh a; 25 ram pawh chu a bawlhhlawh tawh a ni; chuvângin, chuta a khawlohna chu ka hrem a, ram chuan a chhûnga awmte chu a luak chhuak ta vek a. 26 Chuvângin, nangni chuan ka dân te, ka rorêlte in zâwm tûr a ni a, hêng thil tenawm hi a enga mah in ti tûr a ni lo, in rama mi rêng emaw, ram dang mi in zînga khawsate pawhin 27 (hêng thil tenawm zawng zawng hi in hmaa he rama awmte khân an lo ti tawh a, ram pawh chu a bawlhhlawh tawh a ni); 28 in hmaa awm hnam a law chhuak ang bawka in tihbawlhhlawha ram chuan a luak chhuah ve lohna tûr che uin. 29 Tu pawh hêng thil tenawm hi a enga pawh titu apiang chu an chipuite zîng ata tuithlârin an awm ang. 30 Chuvângin, hêng thil tenawm in hmaa an chîn ang hi in chîn ve loh nân leh, chûngah chuan in intihbawlhhlawh loh nân ka thupêk hi in zâwm tûr a ni: kei hi LALPA in Pathian chu ka ni,’ ti rawh,” tiin.

Leviticus 19

Thiang leh thiang lo

1 Tin, LALPA chuan Mosia a bia a, 2 “Israela thlah, mipuiho zawng zawng chu bia la, an hnênah, ‘In thianghlim tûr a ni; kei, LALPA in Pathian hi ka thianghlim si a. 3 Mi tinin in nu leh in pa in ṭih tûr a ni a; tin, ka Chawlhnite in serh tûr a ni: kei hi LALPA in Pathian chu ka ni. 4 Milem lamah thle suh ula, milem chhûn pathiante insiam hek suh u: kei hi LALPA in Pathian chu ka ni. 5 Tin, LALPA tâna remna thilhlana in inthawi hunin pawm tlâk ni tûrin in hlân tûr a ni. 6 In hlan ni tak leh a tûka ei tûr a ni a; ni thum ni thlenga awm a awm chuan hâl tûr a ni. 7 Ni thum nia ei a nih vaih chuan thil tenawm a ni a, pawmsak a ni lo vang. 8 A ei apiang chuan, LALPA thil thianghlim a tihbawrhbân avângin, a khawlohna mawh a phur ang a; chu mi chu a chipuite zîng ata tuithlârin a awm zâwk ang. 9 “ ‘Tin, in lova buh in seng hunin in vau fêmte thlengin in seng vek tûr a ni lo va, a ṭo pawh in zawng tûr a ni lo. 10 Tin, in grêp huana a ṭo in zawng tûr a ni lo va, in grêp huana a rah tla pawh in chhar khâwm tûr a ni lo va, mi rethei leh ram dang mi in zuahsak tûr a ni: kei hi LALPA in Pathian chu ka ni. 11 Rûk in ru tûr a ni lo va, a derin thil in ti tûr a ni lo va, dâwt in inhrilh tûr a ni hek lo. 12 Pathian hming tihliauvin ka hming chhâlin dâwtin chhia in chham tûr a ni lo: kei hi LALPA chu ka ni. 13 I ṭhenawmte i bum tûr a ni lo va, i ruksak tûr a ni hek lo. Inhlawhfa hlawh chu zankhua khuain, a tûk thlengin i kawl tûr a ni hek lo. 14 Bengngawng chu ânchhia i lawh tûr a ni lo va, mitdel hmaah tlûkna i dah tûr a ni hek lo; amaherawhchu, i Pathian chu i ṭih tûr a ni: kei hi LALPA chu ka ni. 15 Rorêlnaah chuan fel lo takin in rêl tûr a ni lo; mi rethei i thlei tûr a ni lo va, mi thiltithei i zah chuang tûr a ni lo; fel takin i ṭhenawm ro i rêlsak tûr a ni. 16 I chipuite zîngah mite rêlin i vâk vêl ruai tûr a ni lo va, i ṭhenawm thisen thu-ah a ni lo zâwngin i ṭang tûr a ni hek lo: kei hi LALPA chu ka ni. 17 “ ‘I rilruin i unau i haw tûr a ni lo. I ṭhenawm chu i zilhhau ngei tûr a ni, a sualnaa i hul nân. 18 Phuba i la tûr a ni lo va, i chipui thlahte huatna i pai tûr a ni hek lo; nangmah i inhmangaih angin i ṭhenawm i hmangaih tûr a ni zâwk. Kei hi LALPA chu ka ni. 19 Ka thupêkte chu in pawm tûr a ni. I ran chu chi hrang hrang thlahtîr suh. I lovah thlai chi hnih chîng suh la, thil chi hrang pahnih tah pawlh puan i sin tûr a ni hek lo. 20 “ ‘Tu pawh bawihnu, pasal hualtu nei, la tlan loh, la chhuahtîr loh hmeichhia nêna mu dûn apiangte chu hrem an ni ang; tihhlum tûr zawng an ni lo vang, ani chu la chhuah loh a nih avângin. 21 Inbiakna puan in kawngka bulah LALPA hnêna a bawhchhiat thawina, bawhchhiat thawina berâmpa chu a rawn kai tûr a ni. 22 Tin, a thil tihsual tâk, a sualnaah LALPA hmaah bawhchhiat thawina berâmpa chuan puithiamin inremna a siamsak ang; tichuan, a thil tihsual tâk, a sualnaah chuan ngaihdam a ni ang. 23 “ ‘Tin, ram chu in va luaha, ei atân thei kûng chi tinrêng in phun hun chuan a rah chu thiang lovah in ngai tûr a ni. In tân kum thum thiang lova ngaih tûr a ni a; ei hauh loh tûr a ni. 24 Amaherawhchu, a kum li kum chuan a rah zawng zawng chu LALPA fak nân a puala tihhran tûr a ni. 25 Tin, a kum nga kum chuan in tân a pun zêl theih nân a rah chu in ei tûr a ni: kei hi LALPA in Pathian chu ka ni. 26 A thisen chawpin eng mah in ei tûr a ni lo va, dawi te in hmangin aien te in chîng tûr a ni hek lo. 27 I bekbawr aṭangin a vêlin i lû i mêt tûr a ni lo va, i khabe hmul sîr tuak i tan tûr a ni hek lo. 28 Mitthi avângin in taksa in zai tûr a ni lo va, in inṭial tûr a ni hek lo: kei hi LALPA chu ka ni. 29 “ ‘Nawhchizuara siam tûrin i fanu tibawrhbâng suh; ram chu uirena ramah a lo chang ang a, suahsualnain a lo khat dah ang e. 30 Ka Chawlhnite chu in serh tûr a ni a, ka hmun thianghlim chu in zah tûr a ni: kei hi LALPA chu ka ni. 31 Ramhuai aienthiam zâwlte chu pan suh ula, dawithiamte pawh in bawlhhlawh phahna tûrin zawng chhuak suh u: kei hi LALPA in Pathian chu ka ni. 32 Lûa kêlsam ṭote hmaah chuan i ding zêl ṭhîn tûr a ni a, tar hmêl chu i zah tûr a ni a, i Pathian chu i ṭih tûr a ni; kei hi LALPA chu ka ni. 33 Tin, ram dang mi, in rama khawsa ve an awm chuan in tichhe tûr a ni lo. 34 Ram dang mi in zînga khawsate chu in tân in rama mi rêng ang an ni tûr a ni a, nangmah i inhmangaih angin i hmangaih tûr a ni; nangni pawh Aigupta ramah khân ram dang mi in nih kha: kei hi LALPA in Pathian ka nih hi. 35 Rorêl thu-ah te, tehna hmawlhah te, khînah te, tehnaah te fel lo takin in ti tûr a ni lo. 36 Bûkna dik tak, khîn dik tak, epha dik tak, hin dik tak in nei tûr a ni: kei hi LALPA in Pathian, Aigupta ram ata hruai chhuaktu che u kha ka ni. 37 Tin, ka thupêk zawng zawngte leh ka rorêl zawng zawngte chu in pawm ang a, in zâwm tûr a ni: kei hi LALPA chu ka ni,’ ti rawh,” tiin.

Leviticus 20

Thu awih lo hremna

1 Tin, LALPAN Mosia a bia a, 2 “Israela thlahte hnênah chuan, ‘Israela thlahte zînga mi emaw, Israel rama khawsa ram dang mi emaw, an rîla rah Moleka pe apiangte chu tihhlum ngei tûr a ni a; hemi rama mite hian lungin an dêng tûr a ni. 3 Tin, kei pawhin, ka hmun thianghlim tibawlhhlawh tûr leh, ka hming thianghlim tibawrhbâng tûra a rîla rah Moleka a pêk avângin, chu mi chungah chuan ka hmai ka thuar ang a, a chipuite zîng ata ka tiboral ang. 4 Tin, hemi rama mite hian a rîla rah Moleka a pêk an hai dera an tihhlum loh chuan, 5 amah leh a chhûngte chungah chuan ka hmai ka thuar ang a, Moleka laka uire tûra mi uiresan apiangte nên an chipuite zîng ata ka tiboral ang. 6 Tin, an laka uire tûra ramhuai aienthiam zâwlte leh dawithiamte pantu chungah chuan ka hmai ka thuar ang a, a chipuite zîng ata ka tiboral ang. 7 Intithianghlim ula, thianghlimin awm rawh u: kei hi LALPA in Pathian chu ka ni si a. 8 Ka thupêkte chu in pawmin in zâwm tûr a ni; kei hi LALPA, a tithianghlimtu che u ka ni. 9 “ ‘A nu emaw, a pa emaw ânchhe lawh apiang chu tihhlum ngei tûr a ni. A nu emaw, a pa emaw ânchhe lawh a ni a, a chungah a thisen mawh chu a awm tûr a ni. 10 Mi nupui uiretu, a ṭhenawm nupui uiretu chu, a uirepa leh a uirenu chu tihhlum ngei tûr a ni. 11 Tin, pate nupui mutpui chu, a pa saruakna hlîm a ni a; tihhlum ve ve ngei tûr an ni a, an thisen mawh chu an chungah a awm tûr a ni. 12 Miin a monu a mutpui chuan tihhlum ve ve ngei tûr an ni ang; suahsualna chungchuang ti an ni a, an thisen mawh chu an chungah a awm tûr a ni. 13 Miin hmeichhia a mutpui anga mipa a mutpui chuan thil tenawm tak an ti ve ve a ni a, tihhlum ngei tûr an ni; an thisen mawh chu an chungah a awm tûr a ni. 14 Miin nufa faa nupuia a neih chuan suahsualna nasa tak a ni a, in zînga suahsualna a awm loh nân amah leh anni pahnih pawh hâl hlum tûr an ni. 15 Miin ran a mutpui chuan tihhlum ngei tûr a ni a, ran pawh chu in tihlum tûr a ni. 16 Tin, hmeichhiain ran a va hnaiha, a inpâwltîr chuan hmeichhia chu i tihlum tûr a ni, ran pawh chu. Tihhlum ngei tûr an ni a; an thisen mawh chu an chungah a awm tûr a ni. 17 “ ‘Miin a farnu, a pa fanu emaw, a nu fanu emaw a neiha, a saruakna a hmuha, ani pawhin a saruakna a hmuh chuan thil zahthlâk tak a ni a, an chipuite thlahho mit hmuhah tihboral tûr an ni; a farnu saruakna hlîm a ni a, a khawlohna mawh a phur ang. 18 Tin, miin hmeichhia a fel loh laia a mutpuia, a saruakna a hlîm chuan a thi chhuahna hlîm a ni a; an chipuite zîng ata tihboral ve ve tûr an ni. 19 Chutichuan, i nu laizâwn emaw, i pa farnu emaw saruakna i hlîm tûr a ni lo; a laichîn hnai saruaka siam a ni a; an khawlohna mawh an phur ang. 20 Miin a pami nupui a mutpui chuan a pami saruakna hlîm a ni a; an sual mawh an phur ang a, fanau lovin an thi ang. 21 Miin a unaupa nupui a neih chuan thil bawlhhlawh a ni a; a unaupa saruakna hlîm a ni a; fanau lovin an awm ang. 22 “ ‘Chutichuan, ka thupêk zawng zawng te, ka rorêl zawng zawngte in pawm ang a, in zâwm tûr a ni; tichuan, awm tûra ka hruaina che u ram chuan a luak chhuak dâwn lo che u nia. 23 In hmaa ka hnawh chhuah tâk hnam dânte chu in zawh tûr a ni lo; hêng thil zawng zawng hi an ti ṭhîn a, chu vâng chuan ka ten a ni. 24 Amaherawhchu, nangni hnênah chuan, “An ram, hnutetui leh khawizu luanna ram chu in luah ang a, in luah atân ka pe ang che u,” ka lo ti tawh a ni. Kei hi LALPA in Pathian, hnam dangte laka tihrangtu che u hi ka ni. 25 Chuvângin, sa thiang leh thiang lo leh sava thiang leh thiang lo in thlei hrang ang a; sa emaw, sava emaw, leia a bawha bawkvâk chi rêng rêng emaw, in tâna thiang lova ka thlei hrante chuan in nunna in titenawm tûr a ni lo. 26 Ka tâna mi thianghlim in ni tûr a ni; kei LALPA hi ka thianghlim si a; ka ta in nihna tûrin hnam dangte lakah ka tihrang che u a ni. 27 “ ‘Mipa pawh hmeichhia pawh, ramhuai aienthiam zâwl emaw, dawithiam emaw chu tihhlum ngei tûr a ni; lungin an dêng tûr a ni; an thisen mawh chu an chungah a awm tûr a ni,’ ti leh bawk rawh,” tiin.

Leviticus 21

Puithiamho invawn thianghlimna

1 Tin, LALPAN Mosia hnênah, “Arona fapa, puithiamte chu bia la, an hnênah, ‘An chipuite zînga mitthi avângin tu mah an intibawlhhlawh tûr a ni lo; 2 an chhûng bul - an nu te, an pa te, an fapa te, an fanu te, an unau te, 3 an farnu, an la awmpui, nula, pasal la nei lo te avâng chuan an intibawlhhlawh thei ang. 4 An chipuite zînga a puipa ber an nih avângin an intibawlhhlawhin an intibawrhbâng tûr a ni lo. 5 “ ‘An lu an mêt kawlh tûr a ni lo va, an khabe hmul sîr tuak an tan tûr a ni bawk lo va, an taksa an zai tûr a ni hek lo. 6 An Pathian tân mi thianghlim an ni tûr a ni a, an Pathian hming an tihliau tûr a ni lo; LALPA tâna meia thilhlan te, an Pathian tâna ei tûr chhiahte an hlân ṭhîn a ni a; chuvângin, an thianghlim tûr a ni. 7 Hmeichhia, nawhchizuar emaw, hminghliau emaw, a pasal mâk hnu emaw an nei tûr a ni lo; an Pathian tân mi thianghlim an ni si a. 8 Chuvângin, i tithianghlim tûr a ni; i Pathian tâna ei tûr chhiah chu an hlân ṭhîn si a. I tân mi thianghlim an ni tûr a ni; kei LALPA, a tithianghlimtu che u hi ka thianghlim si a. 9 Puithiam tu pawh a fanu nawhchizuara a intihbawrhbân chuan a pa tibawrhbâng a ni a, hâl tûr a ni. 10 “ ‘A unaute zînga puithiam lalber, a lû hriak thih mia thih tawh, silhfên bel tûra tihhran tawh chuan a sam a thlah tûr a ni lo va, a puante a pawt thlêr tûr a ni lo va; 11 mitthi ruang awmnaah a lût tûr a ni lo va, a nu emaw, a pa emaw avângin a intibawrhbâng tûr a ni hek lo; 12 hmun thianghlim ata chu a chhuak tûr a ni lo va, a Pathian hmun thianghlim a tibawrhbâng tûr a ni bawk hek lo; a Pathian hriak thih mia tihhranna chu a chungah a awm si a: kei hi LALPA chu ka ni. 13 Nupuiah chuan nula thianghlim a nei tûr a ni. 14 Hmeithai emaw, mâk hnu emaw, hmeichhe hminghliau emaw, nawhchizuar emaw chu a nei tûr a ni lo va; ama chipui, nula thianghlim nupuiah a nei tûr a ni. 15 Tin, a chipuite zîngah a thlahte chu a tibawrhbâng tûr a ni lo. Kei hi LALPA, a tithianghlimtu chu ka ni si a,’ ti rawh,” a ti a. 16 Tin, LALPAN Mosia a bia a, 17 “Arona hnênah, ‘An chhuante zêl thlenga i thlahte zînga chiangkuan lohna nei apiang chuan, a Pathian ei tûr chhiah hlân tûrin rawn hnaih suh se. 18 Tu pawh chiangkuan lohna nei apiang chuan an rawn hnaih hauh tûr a ni lo: mitdel te, kebai te, hnârpêr te, fuke sei lutuk apiang te, 19 ke tliak te, kut tliak te, 20 êlkun te, mi tawngchham te, mit chiangkuang lo te, mi buar te, mi phuhlip te, tilmu keh te chuan. 21 Puithiam Arona thlah chiangkuan lohna nei rêng rêng chuan LALPA tâna meia thilhlan hlân tûrin an rawn hnaih tûr a ni lo. Chiangkuan lohna nei an ni a; an Pathian ei tûr chhiah hlân tûrin an rawn hnaih hauh tûr a ni lo. 22 An Pathian ei tûr chhiah, a thianghlim leh a thianghlim ber pawh chu an ei thei ve ve ang. 23 Amaherawhchu, chiangkuan lohna nei an nih avângin puanzâr chhûngah emaw, maichâm kiang hnaiah emaw zawng an kal thei lo vang, ka hmun thianghlimte an tibawrhbâng dah ang e. Kei hi LALPA, anmahni tithianghlimtu chu ka ni si a,’ ti rawh,” tiin. 24 Chutiang chuan Mosia chuan Arona leh a fapate leh Israela thlahte zawng zawng hnênah a sawi a.

Leviticus 22

Thilhlan thianghlim

1 Tin, LALPAN Mosia a bia a, 2 “Arona leh a fapate hnênah sawi la, Israela thlahte thil thianghlim, ka tâna an hlan lakahte chuan inthiarfihlîm rawh se, ka hming an tihliau dah ang e. Kei hi LALPA chu ka ni a. 3 An hnênah, ‘In chhuante zêl thlenga in thlahte zawng zawng zînga mi, tu pawh bawlhhlawh chunga Israela thlahten LALPA tâna an hlan thil thianghlim rawn hnaih apiang chu, ka lak ata tuithlârin a awm tûr a ni. Kei hi LALPA chu ka ni. 4 “ ‘Arona thlah tu pawh phâr emaw, thil pût emaw chuan, a thianghlim hma loh chuan thilhlan thianghlimte zinga mi chu a ei tûr a ni lo. Tin, tu pawh, mitthi tihbawlhhlawh emaw, chi chhuaka emaw khawih apiang te, 5 tu pawh amah tibawlhhlawh thei, a bawha bawkvâk rêng rêng emaw, bawlhhlawh kai theih nei mi emaw khawih apiangte; 6 chutiang khawihtu chu tlai lam thlengin a bawlhhlawh ang a; tin, a inbual loh chuan thilhlan thianghlimte zînga mi chu a ei tûr a ni lo. 7 Tin, ni a tlâk chuan a thianghlim tawh ang; chumi hnuah chuan thilhlan thianghlimte zînga mi chu a ei thei tawh ang, a ei tûr a nih avângin. 8 Intibawlhhlawh tûrin amaha thi emaw, sa seh emaw a ei tûr a ni lo. Kei hi LALPA chu ka ni. 9 Chuvângin, ka thupêk chu a pawm tûr a ni; chuti lo zawng, an tihbawrhbân chuan a sual mawh an phur ang a, an thih phah ang. Kei hi LALPA, anmahni tithianghlimtu ka ni si a. 10 “ ‘Ram dang miin thilhlan thianghlim chu an ei tûr a ni lo; puithiam hnêna khawsa emaw, inhlawhfa emaw chuan thilhlan thianghlim chu an ei tûr a ni lo. 11 Amaherawhchu, puithiamin tu emaw ama suma a lei chuan, chu mi chuan a ei thei ang; tin, a ina piangte chuan a ei tûr chu an ei ve ang. 12 Puithiam fanuin ram dang mi a neih chuan thên thilhlan, thilhlan thianghlimte zînga mi chu a ei tûr a ni lo. 13 Amaherawhchu, puithiam fanu chu fa nei lovin hmeithaiin emaw, mâkin emaw a awma, a pa in lama a kîr leh chuan a nulât lai ang bawk khân a pa ei tûr chu a ei ve leh ang; nimahsela, ram dang mi chuan an ei tûr a ni lo. 14 Miin hre lova thilhlan thianghlim chu a ei chuan a hmun ngaa ṭhena hmun khat chu a dah belh ang a, thilhlan thianghlim chu puithiam a pe tûr a ni. 15-16 An thilhlan thianghlimte ei chuan thiam lohna thlensaktu, khawlohna mawh chu inphurhtîr tûrin Israela thlahte thilhlan thianghlim, LALPA hnêna an hlante chu an tibawrhbâng tûr a ni lo. Kei hi LALPA, anmahni tithianghlimtu chu ka ni si a,’ ti rawh,” tiin. 17 Tin, LALPAN Mosia a bia a, 18 “Arona leh a fapate leh Israela thlahte zawng zawng bia la, an hnênah, ‘Israel chhûngkaw zînga mi emaw, Israel-te zînga awm, ram dang mi emaw, tu pawh an thilhlan, hâlral thilhlana LALPA hnêna an hlan, an thutiamna emaw, mahni duh thua thilhlan emaw hlân apiangte chuan, 19 chhân tlâk in nih theihna tûrin bâwng emaw, berâm emaw, kêl emaw, a pa sawisêl bo in hlân tûr a ni. 20 Sawisêl kai rêng rêng chu in hlân tûr a ni lo; pawmsak tlâk che u a ni dâwn si lo va. 21 Tu pawh thutiam tikimchang tûrin emaw, mahni duh thua thilhlanah emaw remna thilhlan inthawina, a ran rual zînga mi emaw, a berâm rual zînga mi emaw LALPA hnêna hlân apiang chuan, pawm tlâk a nih theih nân sawisêl bo a hlân tûr a ni a; sawisêl kaina rêng rêng a awm tûr a ni lo. 22 A mitdel te, a ruh tliak te, a silawng te, pân nei te, a tangseh te, a phâr te chu LALPA hnênah in hlân tûr a ni lo va, meia thilhlanah LALPA hnênah maichâmah in hlân tûr a ni hek lo. 23 Mahni duh thua thilhlanah chuan bâwngpa emaw, berâmno emaw fuke sei lua emaw, tawi lua emaw pawh in hlân thei ang a; thutiam nân erawh chuan pawmsak a ni lo vang. 24 A tilmu chhut duk emaw, chhut perh emaw, chhut keh emaw, lâk emaw chu LALPA hnênah in hlân tûr a ni lo va, in ramah hian chutiang chu inthawi nân in hmang tûr a ni hek lo. 25 Ram dang mi aṭanga lain chûng zînga mi rêng rêng chu in Pathian ei tûr chhiahah in hlân tûr a ni lo, chûnga chhiatna leh sawisêl kaina a awm avâng chuan; pawmsak theih che u a ni lo vang,’ ti rawh,” tiin. 26 Tin, LALPAN Mosia a bia a, 27 “Bâwngpa emaw, berâm emaw, kêl emaw, a lo pianin a pui hnênah ni sarih a awm tûr a ni; ni riat ni aṭanga chumi hnu lamah chuan LALPA tâna meia thilhlanah pawm theih a ni ang. 28 Bâwngpui emaw, berâmpui emaw, a no nên ni khatah in talh tûr a ni lo. 29 Tin, lâwm thu sawi inthawia LALPA hnêna in inthawi hunin, chhân tlâk in nih theihna tûrin in inthawi tûr a ni. 30 Chumi ni chuan ei zawh tûr a ni a; a tûk thlengin eng mah in khêk tûr a ni lo. Kei hi LALPA chu ka ni. 31 Chuvângin, ka thupêkte hi in pawmin in zâwm tûr a ni. Kei hi LALPA chu ka ni. 32 Tin, ka hming thianghlim hi in tihliau tûr a ni lo va, Israela thlahte zîngah chawimawiin ka awm tûr a ni. Kei hi nangmahni chawimawitu, 33 in Pathian ni tûra Aigupta ram ata hruai chhuaktu che u ka ni. Kei hi LALPA chu ka ni,” tiin.

Leviticus 23

Sakhaw hman kûtte

1 Tin, LALPAN Mosia a bia a, 2 “Israela thlahte bia la, an hnênah, ‘LALPA kût hunbi, inkhâwmpui thianghlima in siam tûr ka kût hunbi chu hêngte hi a ni. 3 Ni ruk hna thawh tûr a ni a, ni sarih ni erawh chu urhsûn taka lâk chawlhna, inkhâwmpui thianghlim a ni. Eng hna mah in thawk tûr a ni lo; in awmna apiangah LALPA tâna Chawlhni a ni. 4 “ ‘LALPA kût hunbi, inkhâwmpui thianghlim, a hun tak zêla in siam tûr chu hêngte hi a ni.

Kalhlên kût leh chhang dawidim telh loh kût

5 “ ‘Thla khatna, ni sâwm leh ni li ni tlai lam chu LALPA kalhlên kût a ni. 6 Tin, chumi thla vêk ni sâwm leh ni nga ni chu LALPA tâna chhang dawidim telh loh kût a ni; ni sarih chhûng chu chhang dawidim telh loh in ei tûr a ni. 7 A ni khat ni chuan inkhâwmpui thianghlim in nei ang a, hna rêng rêng in thawk tûr a ni lo. 8 Ni sarih chhûng chuan meia thilhlan LALPA hnênah in hlân tûr a ni. A ni sarih ni chu inkhâwmpui thianghlim a ni a; hna rêng rêng in thawk tûr a ni lo,’ ti rawh,” tiin. 9 Tin, LALPAN Mosia a bia a, 10 “Israela thlahte bia la, an hnênah, ‘Ram ka pêk che u in va thlena, chuta buhte in sem hun chuan, in buh thar hmasate phal khat chu puithiam hnênah in rawn keng tûr a ni. 11 Pawmsak theih che u a nih nân, anin buhphal chu LALPA hmaah a lo thên ang a; Chawlhni tûk tûk lehah puithiam chuan a thên tûr a ni. 12 Tin, buhphal in thên ni chuan berâmno a pa, sawisêl bo kum khat mi hâlral thilhlanah LALPA hnênah in hlân tûr a ni. 13 Tin, chuta chhangphut thilhlan chu, chhangphut dip mi epha hmun sâwma ṭhena hmun hnih hriaka hmeh LALPA tâna rimtui tak, meia thilhlan a ni tûr a ni; tin, chuta in tûr thilhlan chu uain hin hmun lia ṭhena hmun khat a ni tûr a ni. 14 In Pathian tâna thilhlan chu in hlan hma chuan, chumi hma rêng rêng chuan a chhangin emaw, a kanin emaw, a vuiin emaw in ei tûr a ni lo; hei hi in awmna apiangah in thlahte zêl thlenga kumkhaw dân tûr a ni.

Pâwl kût

15 “ ‘Chawlhni tûk tûk leh, thên thilhlan buhphal in rawn ken ni aṭangin in chhiar ang a, Chawlhni vawi sarih a tling tûr a ni. 16 Chawlhni vawi sarihna tûk aṭang chuan ni sawmnga in chhiar ang a, LALPA hnênah chhangphut thar thilhlan in hlân tûr a ni. 17 In awmna hmun aṭangin epha hmun sâwma ṭhena hmun hniha siam, chhang hlâwm thên tûr pahnih, chhangphut dip mi, dawidim nêna âwm, LALPA tâna siam hmasak ber hlan tûr in rawn keng tûr a ni. 18 Tin, chhang hlan rual chuan berâmno pasarih sawisêl bo kum khat mi leh, bâwngtuai leh berâmpa pahnih in hlân tûr a ni. Chûngte chu an chhangphut thilhlan leh an in tûr thilhlante nên chuan, LALPA tâna hâlral thilhlan, LALPA tâna rimtui tak, meia thilhlan a ni ang. 19 Tin, sual thawi nân kêlpa pakhat leh, remna thilhlan inthawinaah berâmno a pa pahnih kum khat mi in hlân tûr a ni. 20 Puithiamin siam hmasak ber chhang chu berâmno pahnih nên chuan, LALPA hmaa thên thilhlanah a thên ang a; puithiam pual, LALPA tâna thianghlim a ni ang. 21 Tin, chumi ni vêk chu in ruat ang a, in tân inkhâwmpui thianghlim a ni ang a, hna rêng rêng in thawk tûr a ni lo. Hei hi in awmna apiangah in thlahte zêl thlenga kumkhaw dân tûr a ni. 22 “ ‘In lova buh in seng hunin in vau fêmte thlengin in seng vek tûr a ni lo va, a ṭo pawh in zawng tûr a ni lo. Mi rethei leh ram dang mi in zuahsak tûr a ni. Kei hi LALPA in Pathian chu ka ni,’ ti rawh,” tiin.

Kum thar kût

23 Tin, LALPA chuan Mosia a bia a, 24 “Israela thlahte bia la, an hnênah, ‘Thla sarihna, chumi thla ni khat ni chu in tân urhsûn taka lâk chawlhna, tawtawrâwt tuma hriat rengna, inkhâwmpui thianghlim a ni ang a. 25 Hna rêng rêng in thawk tûr a ni lo va; LALPA tâna meia thilhlan in hlân tûr a ni,’ ti rawh,” tiin.

Inremna ni

26 Tin, LALPA chuan Mosia a bia a, 27 “Thla sarihna ni sâwm ni erawh hi chu inremna ni a ni a. In tân inkhâwmpui thianghlim a ni ang a; in rilrute in tihrehawm ang a, LALPA tâna meia thilhlan in hlân tûr a ni. 28 Chumi ni chuan eng hna mah in thawk tûr a ni lo, LALPA in Pathian hmaa remna siamsak tûr che ua in remna ni a ni si a. 29 Tu pawh ni sela, chumi nia an rilru tihrehawm lote chu an chipuite zîng ata tuithlârin an awm ang. 30 Tu pawh ni sela, chumi nia hna eng pawh thawk apiang, chu mite chu an chipuite zîng ata ka tiboral ang. 31 Eng hna mah in thawk tûr a ni lo. Hei hi in awmna apiangah in thlahte zêl thlenga kumkhaw dân tûr a ni. 32 In tân Chawlhni urhsûn taka lâk chawlhna a ni ang a, in rilrute in tihrehawm tûr a ni; chumi thla ni kua ni tlai lam, chumi tlai aṭanga tlai lam leh thleng chu Chawlhniah in hmang tûr a ni,” tiin.

Bâwkte kût

33 Tin, LALPAN Mosia a bia a, 34 “Israela thlahte bia la, an hnênah, ‘Thla sarihna, ni sâwm leh ni nga ni hi LALPA tâna ni sarih awm bâwkte kût a ni a. 35 A ni khatna chu inkhâwmpui thianghlim a ni ang. Hna rêng rêng in thawk tûr a ni lo. 36 Ni sarih chhûng chuan meia thilhlan LALPA hnênah in hlân ang a, a ni riat ni chu in tân inkhâwmpui thianghlim a ni ang a, meia thilhlan LALPA hnênah in hlân tûr a ni. Inkhâwmpui ṭiakna ropui tak a ni a; hna rêng rêng in thawk tûr a ni lo. 37-38 Hêngte hi a ni, LALPA kût hunbi, LALPA Chawlhni te, in thilpêk te, in thutiam zawng zawng te, mahni duh thua thilhlan, LALPA hnêna in hlan ṭhinte tiam lova, LALPA tâna meia thilhlan te, hâlral thilhlan te, chhangphut thilhlan te, inthawina te, in tûr thilhlante a ni bîk ṭheuhva hlan tûra inkhâwmpui thianghlima in siam tûrte chu. 39 “ ‘Tin, thla sarihna ni sâwm leh ni nga nia in lova thil hâwngte in seng zawh chuan LALPA kût chu ni sarih in awhtîr ang a; a ni khatna ni chu chawlh dêrna a ni ang a, a ni riat ni pawh chu chawlh dêrna a ni bawk ang. 40 A ni khat ni chuan thingkûng mawi tak tak rah te, tûm kau te, thing buk tak zâr te, luia tuipuisuthlah te in keng ang a, LALPA in Pathian hmaah ni sarih in hlim ang. 41 He kût hi LALPA tân kum tin ni sarih in awhtîr tûr a ni. Hei hi in thlahte zêl thlenga kumkhaw dân tûr a ni a; thla sarihnaah in nei ṭhîn ang. 42 Chhâwlbûkah ni sarih in awm ang a. Israel rama mi rêngte chu chhâwlbûkah in awm vek ang a; 43 tichuan, in thlahte chuan Israela thlahte chu, Aigupta ram ata ka hruai chhuah lai khân chhâwlbûkah ka awmtîr tih an hre thei ang. Kei hi LALPA in Pathian chu ka ni,’ ti rawh,” tiin. 44 Tichuan, Mosian LALPA kût hunbi siamte chu Israela thlahte hnênah a puang ta a.

Leviticus 24

Khâwnvâr enkawl dân tûr

1 Pathianin Mosia a bia a, 2 “Israela thlahte chu olive hriak fîm tak, chhit tûra sâwr, khâwnvâr tihalh reng nân i hnêna rawn la tûrin thu pe rawh. 3 Inbiakna puan ina thuhriattîrna puanzâr pâwn lamah chuan, tlai lam aṭanga zîng lam thleng atân LALPA hmaah Aronan dah fel rawh se; hei hi in thlahte zêl thlenga kumkhaw dân tûr a ni. 4 LALPA hmaah khâwnvâr dahna thianghlim tak chungah chuan khâwnvârte chu dah fel ṭhîn rawh se.

Pathian hnêna chhang hlan

5 “Tin, chhangphut dip mi la la, chu chu chhang sâwm leh pahnihah i âwm tûr a ni; chhang pakhatah chuan epha hmun sâwma ṭhena hmun hnih hman tûr a ni. 6 LALPA hmaah rangkachak hlang dawhkân chungah tlar hnihin, tlar khata paruk ve vein i tiang tûr a ni. 7 Chhang chungah, a tlar hnihah chuan beraw fîm tak i dah tûr a ni, hriat rengna, LALPA tâna meia thilhlan ang a nih theih nân. 8 Chawlhni apiangin LALPA hmaah a dah fel ṭhîn tûr a ni; kumkhaw thuthlunna, Israela thlahte tân a ni. 9 Tin, Arona leh a fapate pual a ni ang a, hmun thianghlimah an ei tûr a ni; kumkhaw dâna LALPA tâna meia thilhlante zînga mi, a tâna thil thianghlim tak a ni,” tiin.

Rorêl dik leh a âwm tâwka hremna

10 Israel hmeichhe fapa, a pa Aigupta mi, mi pakhat chu Israela thlahte zîngah a va kal a; chu Israel hmeichhe fapa leh Israel mi, mi pakhat chu riahhmunah an insual a. 11 Israel hmeichhe fapa chuan ânchhe lawhin Pathian hming a sawichhia a; tichuan, Mosia hnênah an rawn hruai a. A nu hming chu Selomithi a ni a, Dan chi Dibria fanu a ni. 12 LALPA kâ aṭanga thuchhuak nghah nân tân inah an khung a. 13 Tin, LALPAN Mosia a bia a, 14 “Anchhe lawhtu chu daipâwnah hruai ula; a hretu zawng zawng chuan a luah an kut nghat sela, mi zawng zawng chuan lungin dêng rawh se. 15 Tin, Israela thlahte chu bia la, an hnênah, ‘Tu pawh a Pathian ânchhia lawh apiang chuan a sual mawh a phur ang a. 16 Tin, LALPA hming sawichhia apiang chu tihhlum ngei tûr a ni. Mi zawng zawngin lungin an dêng ngei ngei tûr a ni; LALPA hming an sawichhiat chuan ram dang mi pawh, he rama mi rêng pawh tihhlum tûr a ni. 17 Thi khawpa mi chunga kut thlâk apiang chu tihhlum ngei tûr a ni. 18 Thi khawpa ran chunga kut thlâk apiang chuan a rûl tûr a ni: nun aiah nun. 19 Tin, miin a ṭhenawm a tihhmêlhem chuan a tih ang tak chuan a chungah tih ve tûr a ni: 20 ruh tliak aiah ruh tliak, mit aiah mit, ha aiah ha; mi a tihhmêlhem angin a chungah pawh tih ve tûr a ni. 21 Ran tihlum apiang chuan a rûl tûr a ni a; mi tihlum apiang chu tihhlum ve tûr a ni. 22 Ram dang mite tân leh he rama mi rêngte tân dân hmun khat in nei tûr a ni. Kei hi LALPA in Pathian ka nih hi,’ i ti tûr a ni,” tiin. 23 Tichuan, Mosia chuan Israela thlahte chu a bia a, ânchhe lawhtu chu daipâwnah an hruai chhuak a, lungin an dêng a. Israela thlahte chuan LALPAN Mosia thu a pêk ang chuan an ti ta a.

Leviticus 25

Kum sarihna

1 Tin, LALPAN Sinai tlângah Mosia a bia a, 2 “Israela thlahte bia la, an hnênah, ‘Ram ka pêk che u in va thlen hun chuan, ram chu LALPA hmingin a châwl tûr a ni. 3 I lovah kum ruk chhûng chu thil i chîng ang a, i grêp huan chu kum ruk chhûng i sât no vang a, a hâwngte i seng ang a; 4 a kum sarih kum erawh chu ram chawlh dêrna, LALPA hminga chawlhna a ni ang a; i lovah buhbâl i chîng tûr a ni lo va, i grêp huan i sât no tûr a ni hek lo. 5 I buhhli chu i seng tûr a ni lo va, i enkawl loh grêp chu i lo tûr a ni lo; ram chawlh dêrna kum a ni tûr a ni. 6 Ram chawlh kuma mi chu in ei chawp atân a ni ang: i tân te, i chhiahhlawh leh i chhiahhlawhnu tân te, i hlawhfa tân te, i hnêna khawsa ram dang mi tân te, 7 i bâwng rual tân te, i rama ran tân te. Chuta a hâwng zawng zawng chu ei chawp atân a ni ang.

Inpêk lêt leh kum - Jubili

8 “ ‘Tin, chawlh kum, kum sarih chu i chhiar ang a, kum sarih hmun sarih a ni ang a; chawlh kum, kum sarih chhûng chu kum sawmli leh kum kua a ni ang. 9 Chumi hnu thla sarihna, ni sâwm ni chuan tawtawrâwt ring tak chu i ham vêltîr ang a; inremna niah chuan in ram zawng zawngah tawtawrâwt in ham vêltîr tûr a ni. 10 Tin, kum sawmngana chu in lâwm ang a, ram chhûng zawng zawngah, chuta awm zawng zawng hnênah zalênna thu in puang tûr a ni. In tân Jubili a ni ang a; mi tinin mahni ta ngai in ta leh ang a, mi tin mahni in chhûngkhûr ṭheuhvah in awm leh ang. 11 Chumi kum sawmngana chu in tân Jubili a ni ang a; eng mah in chîng lo vang a, a hli pawh in la lo vang a, grêp enkawl loh rah pawh in lo tûr a ni hek lo. 12 Jubili a ni si a; in tân a thianghlim tûr a ni; chu in lova thil hâwng chu in ei tûr a ni. 13 He Jubili kumah hian mi tinin mahni ta ngai in ta leh ṭheuh tûr a ni. 14 I ṭhenawm hnênah eng emaw i hralha, i ṭhenawm laka eng emaw i lei pawhin in inbum tûr a ni lo. 15 Jubili hnua kum zât ang zêlin i ṭhenawm thil i lei ang a, buhbâl hâwn kum tam azirin i hnênah a hralh tûr a ni. 16 A kum tam dân azir zêlin a man chu i tipung ang a, a kum tlêm dân azir zêlin a man chu i tikiam ang; buhbâl hâwn kum tam dân azirin i laka hralh a ni e. 17 In inbum tûr a ni lo va, i Pathian chu i ṭih tûr a ni. Kei hi LALPA in Pathian chu ka ni si a.

Kum sarihna kuma ei tûr kum ruknaah a haw ang

18 “ ‘Chuvângin, ka thuruatte chu i zâwmin ka rorêlte chu i pawmin i ṭih tûr a ni; tichuan, chu ramah chuan thlamuang takin in khawsa dâwn nia. 19 Ram chuan a rah a chhuah ang a, hnianghnârin in chên ang a, thlamuang takin in va khawsa dâwn nia. 20 A nih leh, “A kum sarih kum chuan eng nge kan ei ang le? Ngai teh, eng mah kan chîng dâwn si lo va, kan thil hâwngte kan seng bawk dâwn si lo va,” in ti a nih chuan, 21 a kum ruk kum chuan ka malsâwmna in chungah ka thlentîr ang a, kum thum chhûng atân chuan rah a chhuah ang. 22 Tin, a kum riat kum chuan in chîng ang a, thil hâwng in vawn, a hluite chu in ei ang a, a kum kaw kum thlengin; a lo thar leh thleng chuan in vawn, a hluite chu in ei tûr a ni.

Ram leh in pêk kîr leh tûr

23 “ ‘Kumkhua atân ram chu hralh hlen tûr a ni lo, ram chu ka ta a ni si a; mikhual, ka hnêna khawsa mai in ni si a. 24 In ram luah zawng zawng chu a neitu hmasain a tlan lêt thei tûr a ni. 25 I unau chu lo retheiin, a ram ṭhenkhat lo hralh sela, a laichîn bul berin a unauvin a lo hralh chu a rawn tlan tûr a ni. 26 Tin, miin tlansaktu tûr a neih lohva, a lo neihnuna, tlanna khawp a neih chuan, 27 a hralh chin kum chu chhût sela, a hralhna pa chu a têl chuanna chu pe kîr rawh se; tichuan, a ram chu a luah leh ang. 28 A tâna a tlan lêt leh theih loh erawh chuan, a hralh tâka chu Jubili kum thlengin a leitu kutah chuan awm rawh se; tin, Jubili kum chuan a chhuak leh ang a, ani chuan a ram chu a luah leh ang. 29 “ ‘Tin, miin kulh nei khuaa in a hralh chuan, a hralh achin kum khat zên zâwn chhûng chuan a tlan leh thei ang; kum khat pumhlûm chhûng chuan tlan leh theihna a nei ang. 30 Kum khat chhûnga a tlan theih loh chuan, kulh nei khuaa in chu kumkhuain, a thlahte zêl thleng pawhin a leitu ta a ni tlat tûr a ni a. Jubili-ah pawh a chhuak chuang lo vang. 31 Kulh nei lo khuaa inte erawh chu thingtlâng ram anga ngaih a ni ang a. Tlan theih a ni ang a, Jubili-ah a chhuak ang. 32 Amaherawhchu, Levi-hote khua, an chanpuala khuaa inte chu Levi-hote chuan eng lai pawhin an tlan thei ang. 33 Tin, Levi-ho zînga miin a tlan loh chuan hralh tawh in leh a chanpual khua chu Jubili-ah a chhuak ang; Levi-hote khuaa inte chu Israela thlahte zînga an chanpual a ni si a. 34 An khaw dai vêla lote erawh chu hralh theih a ni lo vang, an kumkhaw chanpual a ni si a.

Rethei hnêna hawhtîr thu

35 “ ‘I unau a lo retheiha, a rawn belh che chuan i lo chhawmdâwl tûr a ni; mikhual, i hnêna khawsa angin i awmpui tûr a ni. 36 A lakah tangka emaw, thil emaw, a pung la suh; Pathian ṭih zâwk rawh, i unau chu i hnêna a khawsak theih nân. 37 A pung ûmin i sum i pûktîr tûr a ni lo va, pung ûmin i ei tûrte pûktîr hek suh. 38 Kei hi LALPA in Pathian, Kanaan ram pe tûr che u leh in Pathian ni tûra Aigupta ram ata hruai chhuaktu che u ka ni.

Bawih chhuah tûr

39 “ ‘Tin, i bula chêng i unau a lo retheiha, i hnêna a rawn tlûk luh chuan bawih angin i chhawr tûr a ni lo. 40 Inhlawhfa ang leh i hnêna khawsa ve angin i hnênah a awm tûr a ni a, Jubili kum thlengin i rawng a bâwl ang. 41 Chumi zawhah chuan i hnên ata a chhuak ang a, amah leh a fate nên anmahni chhûngkaw ngaiah an lût leh ang. An pi leh pute in leh lo chu an luah leh tûr a ni. 42 Aigupta ram ata ka hruai chhuah, ka chhiahhlawhte an ni si a; bawih hralha hralh tûr an ni lo. 43 Rura takin a lakah i awm tûr a ni lo va, i Pathian chu i tih tûr a ni zâwk. 44 Bawihnu leh bawihpaa i neih tûrte chu in vêl hnamte zînga mi, bawihnu leh bawihpa atân chuan in lei tûr a ni. 45 Tin, in zînga khawsa ram dang mi leh in rama piang an chhûngte zînga mite pawh in lei thei bawk ang; chûng chu in mi in sa an ni ang. 46 Tin, in hnua in fate rochun atân an mi an saa an neih atân in siam ang a; chûng zînga mite chu kumkhuaa in bawih atân in nei ang. Amaherawhchu, in unau Israela thlahte lakah chuan rura takin in awm tûr a ni lo. 47 “ ‘Ram dang mi emaw, i hnêna khawsa tu emaw a lo neihnuna, a kianga i unaupa a lo retheiha, i hnêna ram dang mi hnênah emaw, i hnêna khawsa hnênah emaw, ram dang mite thlah chhûng hnênah emaw a tlûk luh chuan, 48 a tlûk luh hnu pawhin tlan leh theih a ni ang. A unaute zînga miin an tlan thei ang a: 49 a pamiin emaw, a pami fapain emaw a tlan thei ang a; a chite zinga a laichîn hnaiin a tlan thei bawk ang. Tin, amah pawh a lo neihnun leh chuan a intlan thei ang. 50 A tlûk luhna pa nên a tlûk luh aṭanga Jubili kum leh tûr chhût dun sela: a tlûk luh man chu a kum azirin a ni ang a; tin, hlawhfaa rawih chhût ang zêla chhûtsak a ni ang. 51 Kum tam tak a la bâk chuan a tlanna man chu a belh chhûng hu tâwk man a pe kîr leh tûr a ni. 52 Jubili kum thlenna tûr kum rei lo tê chauh a la awm a nih chuan chhût dûn sela; a awm kum tam zia azirin a tlanna man a pe kîr tûr a ni. 53 Kum khat bi zêla rawih inhlawhfa angin a bêl tûr a ni a, i mit hmuhah rura takin a ti tûr a ni lo. 54 Chûng ang zâwnga tlan a nih loh pawhin, Jubili kum chuan a chhuak ang - amah­ leh a fate nên. 55 Israela thlahte chu keima chhiahhlawhte an ni si a; Aigupta ram ata ka hruai chhuah, ka chhiahhlawhte an ni: kei hi LALPA in Pathian chu ka ni.

Leviticus 26

Thupêk awih vânga malsâwmna

1 “ ‘Milem in insiam tûr a ni lo va, milem siam chawp emaw, lung phun emaw in din tûr a ni lo va, chibai bûk atân in ramah hian milem chuanna lung in phun tûr a ni hek lo: kei hi LALPA in Pathian chu ka ni si a. 2 Ka Chawlhnite chu in serh ang a, ka hmun thianghlim chu in zah tûr a ni: kei hi LALPA chu ka ni. 3 “ ‘Ka thuruatte chu in zawma, ka thupêkte in pawma, in zawm chuan, 4 ruahtuite chu a hun têah ka tlâktîr ang a, lei chuan thil a hâwntîr ang a, rama thingte chuan rah an chhuah ang a. 5 In hruiha buh chuan grêp lawh hun a man phâk ang a, in lawh chuan thil chîn hun a man phâk ang a; in chhang chu hnianghnârin in chên ang a, in ramah hian thlamuang takin in khawsa ang. 6 He ram hi râlmuang takin ka awmtîr ang a, in mu hle hle ang a, tu mân an tihlau lo vang che u; ramsa sualte chu he ram ata hi ka hnawt ṭiau vang a, khandaihin in ram a fang tlang hek lo vang. 7 In hmêlmate chu in ûm ang a, in hmaah khandaiha thahin an awm ang. 8 Mi pangain za in ûm ang a, zain sîng in ûm ang a; in hmêlmate chu in hmaah khandaiha thahin an awm ang. 9 Tin, ka duhsak ang che u a, chi tam tak ka thlahtîr ang che u a, ka tipung ang che u; tin, in lakah ka thuthlung ka tinghet ang. 10 Rei tak in vawn a hluite chu in ei ang a, a thar dah nân a hluite chu in la chhuak ang. 11 In zîngah ka biakbûk chu ka awmtîr ang a, ka nunna chuan a hnuchhawn lo vang che u. 12 In zîngah ka chêng ang a, in Pathian ka ni ang a, nangni pawh ka mite in ni ang. 13 Kei hi LALPA in Pathian, an bawih in nih lohna tûra Aigupta ram ata hruai chhuaktu che u chu ka ni a; in nghâwngkawlte chu ka titliak a, ding charin ka kaltîr tâk che u hi.

Thupêk awih loh hremna tûr

14 “ ‘Amaherawhchu, ka thu in pawm lohva, hêng thupêk zawng zawngte hi in zawm lohva, 15 ka thuruatte in duh lohva, in nunnain ka rorêlte a huata, ka thupêk zawng zawngte zâwm lova ka thuthlung in bawhchhiat chuan, 16 kei pawhin in chungah hei hi ka ti ang: in chungah thil hlauhawm tak, in nunna tihmuih telh telh leh in mit tichau telh telh ngawrna leh sikserhte ka lêntîr ang. Tin, in thlai chite chu in chîng thlâwn mai mai a ni ang, in hmêlmate chuan an ei zêl dâwn a ni. 17 In chungah chuan ka hmai ka thuar ang a, in hmêlmate hmaah in tlâwm ang; nangmahni hawtuten in chungah ro an rêl ang a, tu ma ûm lohvin in tlân ang. 18 Tin, chuti chung pawha ka thu in la pawm loh cheu chuan, in sualte avângin vawi sarih ka la hrem leh ang che u. 19 In chakna chhuan tawlawl chu ka chhu chhia ang a, in vân chu thîr angah ka siam ang a, in lei chu dâr angah. 20 Tin, in tha in sêng thlâwn mai mai a ni ang; in ram chuan thil a hâwntîr lo vang a, rama thingte chuan rah an chhuah hek lo vang. 21 Mi kalhzâwnga in awma, ka thu in pawm loh chuan in sualnate azirin, a leh sarihin in chungah hremna ka thlentîr ang. 22 “ ‘Tin, in zîngah ramsate ka rawn kaltîr ang a, chu chuan in fate a lâksak ang che u a, in rante a sehsak ang che u a, a tikiam tial tial ang che u a, in kawngte a lo ṭhing ṭhuap ang. 23 Chuti chung pawha ka thununna in pawm chuan lohva, mi kalhzâwnga in la awm cheu chuan, 24 kei pawh nangmahni kalhzâwngin ka awm ang a, keimah ngeiin in sual avângin vawi sarih ka hrem ang che u. 25 In chungah khandaih ka lên ang a, chu chuan thuthlung phuba a la ang. Mahni khaw chhûng ṭheuhvah in tawm khâwm ang a, in zîngah hri ka lêntîr ang; tin, hmêlmate kuta pêk in ni ang. 26 In rin pui ber chhang ka tihchahsak che u hunah chuan, hmeichhe sâwmin a âwmna pakhatah an âwm ang a, in chhang chu bûk chiah zêlin an pe leh ang che u; in ei ang a, in kham chuang lo vang. 27 “ ‘Chuti chung pawha ka thu in pawm chuan lohva, mi kalh zâwnga in la awm cheu chuan, 28 thinrim takin nangmahni kalhzâwngin ka awm ang a; in sual avângin vawi sarih ka hrem bawk ang che u. 29 In fapate sa in ei ang a, in fanute sa in ei bawk ang. 30 Tin, in hmunsângte ka tichim ang a, in ni lemte ka titlu ang a, in ruangte chu in milemte ruang chungah ka paih ang; tin, ka nunna chuan a haw dâwn che u a ni. 31 In khawpuite chu ka tiṭiau vang a, in hmun thianghlimte chu ka tiram ang a, in rimtuite chu ka hnîm lo vang. 32 In ram chu ka tiṭiau vang a, in hmêlma chuta awmte chuan mak an ti ang. 33 Tin, hnam dangte zîngah ka tidarh ang che u a, a ûm tûr che uin khandaih chu ka phawi ang; tichuan, in ram chu a ṭiau vang a, in khuate chu a ram ang. 34 “ ‘Tin, ram chuan a ṭiau chhûng zawng leh, in hmêlmate rama in awm chhûng chuan a Chawlhniahte chuan a hlim ang; chutih hnuah chuan ram chu a châwl ang a, a Chawlhniahte chuan a hlim ang. 35 A ṭiau chhûng zawng chuan a châwl ang; in awm laia in Chawlhnia châwl ve ṭhîn lote kha. 36 Tin, in zînga mi la awm chhunte chu, an hmêlmate ramah an thinlungah chauhna ka awmtîr ang; tin, hnahthel lêng riin a ûm ang a, khandaih laka tlânchhia angin an tlânchhia ang a, tu ma ûm hleih lohvin an tlu ang. 37 Tu ma ûm hleih lohvin khandaiha ûm ang maiin an inpal thlu rem rum ang; in hmêlmate lo dang tûrin chakna rêng rêng in nei lo vang. 38 Hnam dangte zîngah in boral ang a, in hmêlmate ram chuan a ei zo vang che u. 39 Tin, in zînga mi la awm chhunte chu in hmêlmate ramah an khawlohna avângin an hmuih telh telh ang; an pi leh pute chuan an khawlohnate an hmuih phah angin, anni pawhin an hmuih phah ve bawk ang. 40 “ ‘Ka chunga an sualna avâng leh an khawlohna leh, an pi leh pute khawlohna leh mi kalh zâwnga an awm avânga, 41 kei pawh anmahni kalh zâwnga ka awma, an hmêlmate rama ka awmtîrte chu an phat lohva, an thinlung tan loh chu a intihhnuaia, an khawlohna avânga hremna chu an pawm chuan, 42 Jakoba hnêna ka thuthlung chu ka hre reng ang a, Isaaka leh Abrahama hnêna ka thuthlungte pawh ka hre reng ang a; tin, ram pawh chu ka hre reng bawk ang. 43 Ram pawh chu an kiansan ang a, anmahni awm lova a ṭiau chhûng chuan a chawlh niahte chuan a hlim ang; ka rorêlnate an duh loh avâng leh an nunnain ka thuruatte a huat ṭhin avângin, an khawlohna hremna chu an pawm tûr a ni. 44 Chuti chung pawh chuan an hmêlmate rama an awm chu, anmahni tiboral dêr tûrin an laka ka thuthlung bawhchhiain ka paihthla lo vang a, ka haw hek lo vang. Kei hi LALPA an Pathian chu ka ni si a. 45 An Pathian ka nih theihna tûra hnam tinte mit hmuha Aigupta ram ata ka hruai chhuah, an thlahtute thuthlung chu anmahni avâng hian ka hre reng zâwk ang. Kei hi LALPA chu ka ni,’ ti rawh,” tiin. 46 Hêng hi Sinai tlânga Mosia hmanga amah leh Israela thlahte kâra LALPAN a siam thupêk te, rorêl te leh dân te chu a ni.

Leviticus 27

LALPA hnêna thilpêk chungchâng

1 Tin, LALPAN Mosia a bia a, 2 “Israela thlahte bia la, an hnênah, ‘Miin eng emaw pawimawh bîk chungchângah thu a tiam chuan, a mihring hu tâwk i ruat ang chu LALPA pual a ni ang a, 3 mipa a nih chuan i ruat dân tûr chu kum sawmhnih aṭanga kum sawmruk mi chu hmun thianghlim sekel ang, tangkaraw sekel sawmnga hu a ni ang; 4 hmeichhia a nih chuan i ruat dân tûr chu sekel sawmthum a ni ang. 5 Tin, kum nga aṭanga kum sawmhnih mi a nih chuan, i ruat dân tûr chu mipa chu sekel sawmhnih, hmeichhia chu sekel sâwm a ni ang. 6 Tin, thla khat aṭanga kum nga mi a nih chuan, i ruat dân tûr chu mipa chu tangkaraw sekel nga, hmeichhia chu tangkaraw sekel thum a ni ang. 7 Tin, kum sawmruk aṭanga a chung lam a nih chuan, i ruat dân tûr chu mipa chu sekel sâwm leh panga, hmeichhia chu sekel sâwm a ni ang. 8 Amaherawhchu, i ruat aia a lo retheih chuan puithiam hnênah hruai tûr a ni ang a, puithiamin a lo ruat ang; thutiamtu theih tâwk ang ang puithiamin a lo ruat ang. 9 “ ‘Tin, thilhlan, LALPA hnêna an hlan tûr chu ran a nih chuan, tu pawhin LALPA tâna chutiang an pêk rêng rêng chu thil thianghlim a ni tûr a ni. 10 A tidanglam tûr a ni lo va, a ṭhain a chhia, a chhiain a ṭha thlâkthleng tûr a ni hek lo; ran, ran vêka a thleng luih chuan a pahnihin a thlengna nên chuan a thianghlim tûr a ni. 11 Tin, ran thianghlim lo, LALPA hnêna hlan ngai loh mi a nih chuan, ran chu puithiam hmaah a dah tûr a ni; 12 tin, puithiam chuan a ṭhat dân azirin a man tâwk a lo ruat ang a; nang puithiamin i ruat tâwk ang apiang chu a ni zêl ang. 13 Amaherawhchu, a tlan leh tak tak dâwn chuan i ruat zât hmun ngaa ṭhena hmun khat a belh tûr a ni. 14 “ ‘Tin, miin a in chu LALPA pual atâna a hlan dâwn chuan a ṭhat leh ṭhat loh azirin puithiamin a ruat tûr a ni; puithiam ruat ang ang chu a ni ang. 15 Tin, a hlântu chuan a in chu a tlan leh dâwn chuan, a man tûra i ruat zât hmun ngaa ṭhena hmun khat a belh tûr a ni; tichuan, a ta a ni leh ang. 16 “ ‘Tin, miin a rama lo, a ṭhen LALPA pual atâna a hlan dâwn chuan i ruat dân tûr chu a chi tuh azir zêlin a ni ang. Barli homer khat hmun chu tangkaraw sekel sawmnga man a ni ang. 17 A lo chu Jubili kum aṭanga hlan a nih chuan i ruat ang chu a ni reng ang a. 18 Jubili kum hnua hlan a nih erawh chuan, puithiamin a man chu Jubili thlen lehna tûr kum azir zêlin a ruatsak ang a, i ruat dân aṭanga a kiam tâwk siam a ni ang. 19 A hlântuin a tlan leh dâwn tak tak chuan, a man i ruat zât hmun ngaa ṭhena hmun khat a belh ang a, a ta a ni leh chiah ang. 20 Lo chu a tlan duh lo emaw, mi dang hnênah a hralh emaw a nih chuan tlan leh theih a ni tawh lo vang; 21 Jubili kuma a chhuah leh hun chuan lo chu LALPA tâna thianghlim, a puala lo hluihlâwn ang a ni ang a, puithiam ta tûr a ni ang. 22 A rama mi ni lo, lo a lei LALPA hnêna a hlan chuan, 23 Jubili kum thlengin i ruat dân angin puithiamin a man chu a ruatsak ang a, i ruat ang chuan LALPA tâna thil thianghlimah chumi ni chuan a pe tûr a ni. 24 Tin, Jubili kum chuan a leina pa, a ram neitu pângngai chuan a nei leh ang. 25 I ruat dân zawng zawng chu hmun thianghlim sekel ang zêl a ni tûr a ni; sekel khat chu gera sawmhnih a ni ang. 26 “ ‘Amaherawhchu, ran zînga piang hmasa ber, a pian hmasak ber avânga LALPA pual atâna ruat tawh phawt chu tu mân an hlân tûr a ni lo; sebâwngpa pawh, berâm pawh ni sela, LALPA pual a ni. 27 Tin, ran thianghlim lo a nih chuan i ruat dân angin a tlan tûr a ni ang a, a hmun ngaa ṭhena hmun khat a belh tûr a ni; tin, tlan a nih loh chuan i ruat dân angin hralh tûr a ni ang. 28 “ ‘Amaherawhchu, miin a thil neihte zînga mi, LALPA puala a hlan tawh phawt chu, mihring emaw, ran emaw, a rama lo emaw pawh ni se, hralh tûr a ni lo va, tlan tûr a ni hek lo; chutianga thil hlan tawh zawng zawng chu LALPA tâna thianghlim tak a ni. 29 Mihring pawh ni se, chutianga hlan tawh phawt chu tlan tûr a ni lo; tihhlum ngei ngei tûr a ni. 30 “ ‘Ram chhûnga mi, sâwma pakhat zawng zawng, lova thil hâwngte pawh, thei rahte pawh LALPA pual a ni a; LALPA tâna thianghlim a ni. 31 Miin a sâwma pakhat zînga mi a eng pawh a tlan dâwn chuan a hmun ngaa ṭhena hmun khat a belh tûr a ni. 32 Ran leh berâm rual zînga sâwma pakhat, tiang hnuaia lût a sâwmna zêl chu LALPA tâna thianghlim a ni ang. 33 A chhiat leh ṭhat a fiah tûr a ni lo va, a thlâkthleng tûr a ni hek lo; a thleng luih chuan a pahnihin a thlengna nên chuan thil thianghlim a ni ang a, tlan leh theih a ni lo vang,’ ti rawh,” tiin. 34 Hêng hi Sinai tlânga Israela thlahte tâna LALPAN Mosia a pêk, thupêkte chu a ni.

Numbers 1

Israel-te zînga chhiarpui hmasa

1 Aigupta ram ata an lo chhuah kum hnih kum, thla hnihna, ni khat niah Sinai thlalêrah inbiakna puan inah LALPAN Mosia a bia a, 2 “Israela thlahte pung khâwm zawng zawngte chu, a chi chiin, a chhûngkua kuain, an hming indawt dân ang zêlin mipa zawng zawng chhiar vek rawh; 3 kum sawmhnih achin chung lam Israel-te zînga mi râlkai chin zawng zawng chu, nang leh Aronan a pâwl pâwlin in chhiar vek tûr a ni. 4 Tin, i hnênah hnam tin zînga mi pakhat, chi hrang hrang ata chhûngkaw puipa zêl an awm tûr a ni. 5 Tin, hêng hi i hnêna awm tûr hmingte chu a ni: Reuben hnama mi Sedeura fapa Elizura; 6 Simeon hnama mi Zurisadaia fapa Selumiela; 7 Juda hnama mi Aminadaba fapa Nasona; 8 Isakar hnama mi Zuara fapa Nethanela; 9 Zebulun hnama mi Helona fapa Eliaba; 10 Josefa thlah, Ephraim hnama mi Amihuda fapa Elisama; Manase hnama mi Pedazura fapa Gamaliela; 11 Benjamin hnama mi Gideonia fapa Abidana; 12 Dan hnama mi Amisadaia fapa Ahiezera; 13 Aser hnama mi Okrana fapa Pagiela. 14 Gad hnama mi Deuela fapa Eliasapha; 15 Naphtali hnama mi Enana fapa Ahira. 16 Hêngho hi mipuite zing ata thlan, an pi leh pute hnama puipa, Israel chhûngkaw puipate an ni,” tiin. 17 Chutichuan, Mosia leh Arona chuan chûng an hming lamhote chu an hruai a; 18 mipui zawng zawngte chu thla hnihna, ni khat niah an ko khâwm vek a; a chi chiin, a chhûngkua kuain, an hming indawt dân ang zêlin, kum sawmhnih achin chung lam zawng chu an thlahtute hming an târ lang a. 19 LALPAN Mosia thu a pêk angin Sinai thlalêrah chuan a chhiar ta a. 20 Israela fapa upa ber Reubena thlah chhuante chu a chi chiin, a chhûngkua kuain, an hming indawt dân ang zêlin, mipa kum sawmhnih achin chung lam, 21 Reubena thlah râlkai chin zawng zawngte chu 46,500 an ni. 22 Simeona thlah chhuante chu a chi chiin, a chhûngkua kuain, an hming indawt dân ang zêlin, mipa kum sawmhnih achin chung lam, 23 Simeona thlah râlkai chin zawng zawngte chu 59,300 an ni a. 24 Gada thlah chhuante chu a chi chiin, a chhûngkua kuain, an hming indawt dân ang zêlin, kum sawmhnih achin chung lam, 25 Gada thlah râlkai chin zawng zawngte chu 45,650 an ni. 26 Juda thlah chhuante chu a chi chiin, a chhûngkua kuain, an hming indawt dân ang zêlin, kum sawmhnih achin chung lam, 27 Juda thlah râlkai chin zawng zawngte chu 74,600 an ni. 28 Isakara thlah chhuante chu a chi chiin, a chhûngkua kuain, an hming indawt dân ang zêlin, kum sawmhnih achin chung lam, 29 Isakara thlah râlkai chin zawng zawngte chu 54,400 an ni. 30 Zebuluna thlah chhuante chu a chi chiin, a chhûngkua kuain, an hming indawt dân ang zêlin, kum sawmhnih achin chung lam, 31 Zebuluna thlah râlkai chin zawng zawngte chu 57,400 an ni. 32 Josefa thlah zînga mi Ephraima thlah chhuante chu a chi chiin, a chhûngkua kuain, an hming tam dân ang zêlin, kum sawmhnih achin chung lam, 33 Ephraima thlah râlkai chin zawng zawngte chu 40,500 an ni. 34 Manasea thlah chhuante chu a chi chiin, a chhûngkua kuain, an hming tam dân ang zêlin, kum sawmhnih achin chung lam, 35 Manasea thlah râlkai chin zawng zawngte chu 32,200 an ni. 36 Benjamina thlah chhuante chu a chi chiin, a chhûngkua kuain, an hming tam dân ang zêlin, kum sawmhnih achin chung lam, 37 Benjamina thlah râlkai chin zawng zawngte chu 35,400 an ni. 38 Dana thlah chhuante chu a chi chiin, a chhûngkua kuain, an hming tam dân ang zêlin, kum sawmhnih achin chung lam, 39 Dana thlah râlkai chin zawng zawngte chu 62,700 an ni. 40 Asera thlah chhuante chu a chi chiin, a chhûngkua kuain, an hming tam dân ang zêlin, kum sawmhnih achin chung lam, 41 Asera thlah râlkai chin zawng zawngte chu 41,500 an ni. 42 Naphtalia thlah chhuante chu a chi chiin, a chhûngkua kuain, an hming tam dân ang zêlin, kum sawmhnih achin chung lam, 43 Naphtalia thlah râlkai chin zawng zawngte chu 53,400 an ni. 44 Chûngte chu an ni, Mosia leh Aronan Israel puipa sâwm leh pahnih, chhûngkaw puipate nêna an chhiarte chu. 45 Chutichuan, Israela thlah a chhûngkua kuaa kum sawmhnih achin chung lam râlkai chin zawng zawng, Israel rama mi chu an chhiar a: 46 an chhiar zawng zawngte chu 6,03,550 an ni. 47 Levi mite thlahtute zawng an chhiar ve lo. 48 LALPAN Mosia hnênah, 49 “Levi chi zawng i chhiar ve tûr a ni lo va, Israel mite zîngah i chhiar tel tûr a ni hek lo; 50 Levi-hote chu Pathian chênna in enkawltu leh, a bungrua zawng zawng leh, chumia thil awm zawng zawng enkawltuah i ruat zawk tûr a ni: biakbûk leh a bungrua zawng zawng an zâwn ṭhîn ang a; an enkawl ang a, biakbûk chu a vêlah an awmchilh ṭhîn ang. 51 Tin, biakbûk chu in sawn dâwn apiangin Levi-ho chuan an ṭhiat ang a; tin, biakbûk zâr dâwn apiangin Levi-hovin an zâr ṭhîn ang. Hnam dang rawn inrawlh apiang chu tihhlum tûr an ni ang. 52 Tin, Israela thlahte chuan mahni hmun ṭheuhvah, a pâwl pâwlin an tam dân azir zêlin an puan inte an zâr ang a. 53 Levi-ho erawh chuan Israela thlahte pung khâwmho chunga thinurna a awm loh nân Pathian chênna in vêlah an zâr tûr a ni; Levi-ho chuan hriattîrna biakbûk chu an enkawl tûr a ni,” tiin a lo sawi tawh si a. 54 Chutiang chuan Israela thlahte chuan an ti a; LALPAN Mosia thu a pêk ang zawng zawng chuan an ti ta a.

Numbers 2

Riahhmuna chi hrang hrang awmna tûr ruat

1 Tin, LALPAN Mosia leh Arona a bia a, 2 “Israela thlahte chuan an chhûngkaw chhinchhiahnate târ ṭheuhvin an pâwl tih dân angin an puan in an zâr tûr a ni; inbiakna puan in ân ṭheuhvin a vêlin an zâr tûr a ni. 3 Ni lo chhuahna khawchhak lampanga an chhûngkaw chhinchhiahna târin, puan in zâr tûrte chu Juda pâwlho an ni ang a; tin, Juda thlahte puipa tûr chu Aminadaba fapa Nasona a ni ang.” 4 A pâwlte tam lam chu 74,600 an ni. 5 “Tin, a dawta puan in zârtu tûrte chu Isakar chi an ni tûr a ni a, Isakara thlahte puipa tûr chu Zuara fapa Nethanela a ni ang.” 6 A pâwlte tam lam chu 54,400 an ni. 7 “Tin, Zebulun chite: Zebuluna thlahte puipa tûr chu Helona fapa Eliaba a ni ang.” 8 A pâwlte tam lam chu 57,400 an ni. 9 “An pâwl tam dân azir zêla Juda-ho an chhiarte chu 1,86,400 an ni. Anniho hian hma an hruai zêl tûr a ni. 10 “An chhûngkaw chhinchhiahna târin a chhim lampangah Reuben-ho chu an awm ang a; Reubena thlah puipa tûr chu Sedeura fapa Elizura a ni ang.” 11 A pâwlte tam lam chu 46,500 an ni. 12 “Tin, a dawta zâr tûr chu Simeon chi an ni ang: Simeona thlahte puipa tûr chu Zurisadaia fapa Selumiela a ni ang.” 13 A pâwlte tam lam chu 59,300 an ni. 14 “Tin, Gad chite: Gada thlahte puipa tûr chu Reuela fapa Eliasapha a ni ang.” 15 A pâwlte tam lam chu 45,650 an ni. 16 “Reuben-ho tam lam chu 1,51,450 an ni. Anni hi an dawta chhuak tûr an ni. 17 “Chutichuan, inbiakna puan in chu a chhuak ang a, Levi-ho chu a laiah an awm ang a, an awmna azir zêlin a pâwl pâwlin an kal ṭheuh tûr a ni. 18 “An chhûngkaw chhinchhiahna târin a thlang lampangah chuan Ephraim-ho an awm ang a: Ephraima thlahte puipa tûr chu Amihuda fapa Elisama a ni ang.” 19 A pâwlte tam lam chu 40,500 an ni. 20 “Tin, a dawtah chuan Manase chi an ni ang: Manasea thlahte puipa tûr chu Pedazura fapa Gamaliela a ni ang.” 21 A pâwl tam lam chu 32,200 an ni. 22 “Tin, a dawt lehah Benjamin chite: Benjamina thlahte puipa tûr chu Gideonia fapa Abidana a ni ang.” 23 A pâwlte tam lam chu 35,400 an ni. 24 “Tin, Ephraim-hote tam lam chu 1,08,100 an ni. Tin, a dawttu dawt lehtuah an chhuak tûr a ni. 25 “An chhûngkaw chhinchhiahna târin Dan-ho chu a hmâr lampangah an awm ang: Dana thlahte puipa tûr chu Amisadaia fapa Ahiezera a ni ang.” 26 A pâwlte tam lam chu 62,700 an ni. 27 “Tin, a dawta puan in zâr tûr chu Aser chi an ni ang: Asera thlahte puipa tûr chu Okrana fapa Pagiela a ni ang.” 28 A pâwlte tam lam chu 41,500 an ni. 29 “Tin, a dawt lehah Naphtali chite: Naphtalia thlahte puipa tûr chu Enana fapa Ahira a ni ang.” 30 A pâwlte tam lam chu 53,400 an ni. 31 “Dan-ho tam lam chu 1,57,600 an ni. Tin, anniho hian a pâwl pâwla chhuakin hnu an dâl zêl tûr a ni,” tiin. 32 Hêng hi Israela thlahte chhûngkaw tina mi an chhiarte chu, an tam lam 6,03,550 an ni. 33 Levi-ho erawh chu Israela thlahte zînga chhiar an ni ve lo, LALPAN Mosia thu a pêk ang khân. 34 Chutiang chuan Israela thlahte chuan an ti a; LALPAN Mosia thu a pêk ang zêlin a pâwl pâwlin puan in an zâr a; tin, chutiang bawkin a chi chiin, a chhûngkua kua zêlin an chhuak ṭhîn a.

Numbers 3

Arona fate

1 Hênghote hi, Sinai tlânga LALPAN Mosia a biak laia Arona leh Mosia chhuana mite an ni. 2 Tin, Arona fapate hming chu a upa ber Nadaba te, Abihua te, Eleazara te, Ithamara te an ni. 3 Hêng hi puithiam atâna hriak thih, puithiam hna thawk tûra a tihhran Arona fapate hming chu a ni. 4 Tin, Nadaba leh Abihua chu, Sinai thlalêra mei thiang lo LALPA hmaa an hlan lai khân LALPA hmaah an thi a; fa an nei lo. Eleazara leh Ithamara chuan an pa Arona dam laiin puithiam hna hi an thawk a.

Levia chiten puithiamho rawng an bâwlsak tûr a ni

5 Tin, LALPAN Mosia a bia a, 6 “Levi chite chu puithiam Arona hnênah hruai la, a rawng an bâwl theih nân a hnênah awmtîr rawh. 7 Tin, anni chuan biakbûka rawngbâwl hna thawkin, inbiakna puan in bulah amah leh pung khâwm zawng zawng pualah rawng an bâwl ang. 8 Tin, bungrua zawng zawng an vawng ang a, Israela thlahte puala biakbûk rawngbâwl hna an thawk ang. 9 Tin, Levi-hote chu Arona leh a fapate hnênah i hlân ang a; Israela thlahte pualah a hnêna hlan an ni. 10 Arona leh a fapate chu i ruat ang a, an puithiam nihna chu an chang reng ang; hnam dang rawn inrawlhte chu tihhlum an ni ang,” tiin.

Levia thlahte chhiarpui

11 Tin, LALPAN Mosia a bia a, 12 “Ngai teh, Levi-hote hi Israela thlahte zîng ata Israel thlahte fa tîr chhûl keu hmasa ber aiah keimah ngeiin ka lâk an ni a. Levi-ho chu ka ta an ni ang, 13 fa tîr zawng zawng chu ka ta an ni si a. Aigupta rama fa tîr zawng zawng ka tihhlum ni khân Israel-te zînga fa tîr zawng zawng, a mihring a ranin ka pual atân ka hauh a ni. Ka ta an ni ang: kei hi LALPA chu ka ni,” tiin. 14 Tin, LALPAN Sinai thlalêrah Mosia a bia a, 15 “Levia thlahte chu a chhûngkua kua leh a thlah thlahin chhiar la: mipa tawh phawt chu thla khat achin chung lam chu i chhiar tûr a ni,” tiin. 16 Tichuan, Mosia chuan a tih tûra thupêk angin LALPA thu ang chuan a chhiar hlawm a. 17 Levia fapate hming chu Gersona te, Kohatha te, Meraria te an ni. 18 Tin, an thlahtu Gersona fapate hming chu Libnia leh Simeia an ni. 19 An thlahtu Kohatha fapate chu Amrama te, Izara te, Hebrona te, Uziela te an ni. 20 An thlahtu Meraria fapate chu Mahlia leh Musia an ni. Hêng hi an chhûngkua ang zêla Levi-ho thlahte chu an ni. 21 Gersona chu Libni-ho leh Simei-ho thlahtu a ni; hêng hi Gerson-ho thlahte an ni. 22 Mipa zawng zawng thla khat achin chung lam an chhiarte chu 7,500 zet an tling a. 23 Gerson-ho thlahte chuan an puan in chu biakbûk thlang lampangah an zâr tûr a ni. 24 Tin, Gerson-ho chhûngkaw puipa chu Laela fapa Eliasapha a ni ang. 25 Gersona faten inbiakna puan ina an enkawl tûr chu biakbûk leh Puan In a ni ang, a chung te, inbiakna puan in kawngkhâr puanzâr te, 26 a kawtlai zâr te, biakbûk bula a kawtlai kawngkhâr puanzâr te, maichâm vêla mi te, chuta hman tûr hrui zawng zawngte nên. 27 Tin, Kohatha chu Amram-ho te, Izhar-ho te, Hebron-ho te, Uziel-ho te thlahtu a ni; hêngho hi Kohatha thlahte an ni. 28 Mipa zawng zawng thla khat achin chung lam an chhiar dân ang chuan 8,300 an ni, hmun thianghlim enkawltu tûr chu. 29 Kohatha fapate thlahte chuan biakbûk chhim lampangah an puan in an zâr tûr a ni. 30 Kohath-ho thlahte chhûngkaw puipa tûr chu Uziela fapa Elizaphana a ni ang. 31 An enkawl tûr chu bâwm te, dawhkân te, sathaukhâwnvâr dahna te, maichâm te, hmun thianghlima rawngbâwlna bungbêl zawng zawng te, puanzâr te, chuta rawngbâwlna thil zawng zawngte a ni ang. 32 Tin, puithiam Arona fapa Eleazara chu Levi-ho puipate puipa a ni ang a, hmun thianghlim enkawltute chu a ho vang. 33 Meraria chu Mali-ho leh Musi-ho thlahtu a ni. Hêng hi Meraria thlahte an ni. 34 Mipa zawng zawng thla khat achin chung lam an chhiar dân ang chuan 6,200 an ni. 35 Meraria thlah chhûngkaw puipa chu Abihaila fapa Zuriela a ni a. Biakbûk hmâr lampangah an puan in an zâr tûr a ni. 36 Meraria fapate enkawl tûra ruat chu biakbûk ban rem khâwm te, a bangrel te, a ban te, a nghahchhan ker kuak te, a hmanrua zawng zawng te, rawngbâwlna hmanrua zawng zawngte an ni a; 37 a kawt hung vêlna ban te, a nghahchhan ker kuak te, a kilhbehna leh a hruite nên. 38 Biakbûk chhak lampang inbiakna puan in bul, ni chhuahna lama puan in zârtu tûr chu Mosia leh Arona leh a fapate an ni ang a, hmun thianghlimah Israela thlahte pualah a ṭûl apiang an thawk ang; hnam dang rawn inrawlh apiang chu tihhlum tûr an ni ang. 39 LALPA thupêka Levi-ho a thlah thlaha mipa zawng zawng thla khat achin chung lam Mosia leh Aronan an chhiar zawng zawng chu 22,000 an ni.

Levia mite chu fa tîr aiah Pathian ta

40 Tin, LALPAN Mosia hnênah, “Israela thlahte zînga fa tîr, mipa, thla khat achin chung lam zawng zawng chhiar la, ka ta an ni, a zât hre rawh. 41 Tin, Levi-hote chu (LALPA chu ka ni a) Israela thlahte zînga fa tîr zawng zawng aiah ka hauh a ni; tin, Levi-ho rante chu Israela thlahte ran zawng zawnga piang hmasa ber aiah,” a ti a. 42 Tin, Mosia chuan LALPAN thu a pêk angin Israela thlahte zinga fa tîr zawng zawng chu a chhiar a. 43 An hming indawt ang zêla thla khat achin chung lam fa tîr mipa zawng zawng an chhiarte chu 22,273 an ni. 44 Tin, LALPAN Mosia a bia a, 45 “Israela thlahte zînga fa tîr zawng zawng aiah Levi-ho chu ka ta an ni ang; kei hi LALPA chu ka ni. 46 Tin, Levi-hote aia an tamna Israela thlahte fa tîr 273 tlanna tûrin, 47 mi pakhat tân sekel 5 ṭheuh i la tûr a ni; hmun thianghlima sekel hman tûr a ni (sekel chu gera 20 a ni). 48 A chuangho tlanna sum chu Arona leh a fapate i pe tûr a ni,” tiin. 49 Tin, Mosia chuan Levi-hovin an tlan bâka an tlanna sum chu a la a; 50 Israela thlahte fa tîr lak aṭangin sum chu a la a; hmun thianghlim sekel angin 1,365 a la a. 51 LALPAN Mosia thu a pêk, LALPA thu angin Mosia chuan tlanna sum chu Arona leh a fapate a pe a.

Numbers 4

Levia chi zînga Kohatha thlahte hna

1 Tin, LALPAN Mosia leh Arona a bia a, 2 “Levia fate zînga Kohatha thlahte, a thlah thlahin, a chhûngkua kuain, 3 kum sawmthum achin chung lam, kum sawmnga thlengin rawngbâwlna hna, inbiakna puan ina thawk tûr zawng zawng zât chu chhiar vek rawh u. 4 Inbiakna puan in hmun thianghlim bera Kohatha fapate hnathawh tûr chu hei hi a ni: 5 awmhmun an sawn dâwn apiangin Arona chu a fapate nên an lût ang a, hmun thianghlim puanzâr an hlîp thla ang a, chu chuan thuthlung bâwm an khuh ang a; 6 chu chu savun ṭha miin an khuh ang a, chu chu puan dumpâwlin an khuh ang a, a zâwnfung an vuah tûr a ni. 7 Tin, entîrna chhang dawhkân chungah puan dumpâwl an phah ang a, chutah chuan thlêng te, fian te, berhbu te leh note a bun chhuahna tûr an dah tûr a ni; tin, chatlak lova chhang dah chu chutah chuan a awm tûr a ni. 8 Chu chu puan senin an khuh ang a; a khuhna savun ṭha miin an khuh ang a, a zâwnfung an vuah tûr a ni. 9 Tin, a êntu khâwnvâr dahna leh chumi atâna an hman tûr a khâwnvâr te, a chaicheh te, a vâp dahna te, hriak bûr zawng zawngte puan dumpâwlin an khuh tûr a ni. 10 Chumi leh a hmanrua zawng zawng chu a khuhna savun ṭha mia khuhin a zâwnnaah an dah tûr a ni. 11 “Tin, rangkachak maichâm chu puan dumpâwlin an khuh ang a, a khuhna savun ṭha miin an khuh leh ang a, a zâwnfung an vuah tûr a ni; 12 hmun thianghlima an hmanrua, rawngbâwlna bungbêl zawng zawng chu an la vek ang a, puan dumpâwlin an fûn ang a, a khuhna savun ṭha miin an khuh ang a, a zâwnnaah an dah tûr a ni. 13 Tin, maichâma meivâp chu an lâwk fai ang a, a chungah puan dumpâwl an phah ang a, 14 tin, a chungah chuan an rawngbâwl vêlna bungbêl zawng zawng mei lâkna te, sa thurna thîr kawm te, vut lawhna te, maihûn te, maichâm bungbêl zawng zawngte an dah ang a; tin, a khuhna savun ṭha miin an khuh ang a, a zâwnfung an vuah tûr a ni. 15 “Tin, Arona leh a fapaten hmun thianghlim leh hmun thianghlim bungrua zawng zawng an khuh zawha, awmhmun sawn dâwn apiangin, Kohatha fapate chu a zâwn tûrin an lo thawk ṭhîn ang a; nimahsela, thil thianghlimte chu an khawih tûr a ni lo, an khawih zawngin an thi ang. Chûng chu inbiakna puan ina Kohatha fapate chanpual tûr a ni. 16 Tin, puithiam Arona fapa Eleazara thawh tûr chu, chhit tûr hriak te, rimtui te, chatlak lova chhangphut thilhlan te, hriak thih mi te, biakbûk, chuta thil awm zawng zawng te, hmun thianghlim leh a bungruate ngaihtuah vêl a ni,” tiin. 17 Tin, LALPAN Mosia leh Arona a bia a, 18 “Kohatha thlah chhûngkua chu Levi-ho zîng ata bo mai lova, thil thianghlimte khawih lova thi lova an awm theih nân hetiang hian ti rawh u: 19 Arona leh a fapate chu lût sela, an thawh tûr leh an chanpual tûr ṭheuh ruatsak rawh se; 20 amaherawhchu, thil thianghlim en tûrin rei lo tê pawh lût suh se, an luh chuan an thi ang,” tiin.

Levia chi zînga Gersona thlahte hna

21 Tin, LALPAN Mosia a bia a, 22 “Gersona fapate pawh an chhûngkua kuain, a thlah thlahin chhiar vek rawh; 23 kum sawmthum achin chung lam kum sawmnga mi thlengin, rawngbâwlna hna inbiakna puan ina thawk tûr zawng zawng zât chu chhiar vek rawh. 24 Gersona thlahho chanpual chu rawngbâwl lam leh phurh lam a ni: 25 biakbûk puanzâr te, inbiakna puan in te, a khuhna te, a chung khuhna savun ṭha mi te, inbiakna puan in kawngkhâr puanzâr te, 26 kawt hung puanzâr te, kawt hung kawngkhâr puanzâr te, biakbûk leh maichâm bula mi, a hrui te, an hmanrua zawng zawngte an phur ang a, tih ṭûl apiang an ti tûr a ni. 27 Gersona thlahte chuan Arona leh a fate kawhhmuh ang zêlin hna an thawk ang a, an tih tûr tê tê chena ruatsak tûrin thu i neihtîr ang. 28 Chûng chu inbiakna puan ina Gersona thlahte thawh chu a ni. An tih tûr chu puithiam Arona fapa Ithamara ruat tûr a ni.

Levia chi zînga Meraria thlahte hna

29 “Meraria fapate chu a thlah thlahin, a chhûngkua kuain i chhiar tûr a ni; 30 kum sawmthum achin chung lam kum sawmnga mi thlengin inbiakna puan ina thawk tûr zât i chhiar vek tûr a ni. 31 Inbiakna puan ina an hnathawh, an chanpual tûr chu hei hi a ni - biakbûk ban rem khâwm te, a bangrel te, a ban te, a nghahchhan ker kuak te, 32 a kawt hung vêlna ban te, a nghahchhan ker kuak te, a kilhbehna te, a hrui te, a hmanrua zawng zawng leh a hmanraw dang zawng zawng phurh te; a hming lam zêl ṭheuhvin an chanpual tûr i ruatsak tûr a ni. 33 Chûng chu an ni, puithiam Arona fapa Ithamara hova inbiakna puan ina Meraria fapate thlahtehovin, an tih tûr tê tê chena an rawngbâwl dân tûr chu,” tiin.

Levia chite chhiarpui

34 Tichuan, Mosia leh Arona leh pung khâwmho zînga puipate chuan Kohath-ho fapate chu a thlah thlahin, a chhûngkua kuain, 35 inbiakna puan ina thawk tûr zât chu kum sawmthum achin chung lam kum sawmnga mi thlengin an chhiar a. 36 Chûngho a thlah thlaha an chhiar chu 2,750 an ni. 37 Chûng chu an ni, inbiakna puan ina rawngbâwl ṭhîn Kohath-ho thlah an chhiar, Mosia hmanga LALPA thupêk anga Mosia leh Aronan an chhiarte chu. 38-39 Tin, Gersona fapate, inbiakna puan ina thawk tûra rawngbâwl zât tûr chu a thlah thlahin, a chhûngkua kuain kum sawmthum achin chung lam kum sawmnga mi thlenga chhiar an ni a; 40 chûng a thlah thlaha, a chhûngkua kuaa an chhiarte chu 2,630 an ni. 41 Chûng chu an ni, Gersona fapate thlahho inbiakna puan ina rawngbâwlho zawng zawng, LALPA thupêk anga Mosia leh Aronan an chhiarte chu. 42-43 Tin, Meraria fapate, inbiakna puan ina thawk tûra rawngbâwl zât tûr chu, a thlah thlahin, a chhûngkua kuain, kum sawmthum achin chung lam kum sawmnga mi thlenga chhiar an ni a; 44 chûng a thlah thlaha, a chhûngkua kuaa an chhiarte chu 3,200 an ni. 45 Chûng chu an ni, Meraria fapate thlahho an chhiar, Mosia hmanga LALPA thupêk anga Mosia leh Aronan an chhiarte chu. 46-47 Levi-ho, rawngbâwl tûr leh inbiakna puan ina phurh mi phurtu tûr zât a thlah thlahin, a chhûngkua kuain, kum sawmthum achin chung lam kum sawmnga mi thlengin, Mosia leh Arona leh Israel-ho puipate chuan an chhiar a; 48 chûng an chhiarte chu 8,580 an ni. 49 Mosia hmanga LALPA thupêk angin mi tin an thawh tûr leh an chanpual tûr zir zêlin chhiar an ni a; chutiang tak chuan LALPAN Mosia thu a pêk anga chhiar an ni.

Numbers 5

Mi bawlhhlawhte riahhmun pâwnah

1 Tin, LALPAN Mosia a bia a, 2 “Israela thlahte chu an riahhmun ata phâr zawng zawng leh, thi pût zawng zawng leh, mitthi avânga bawlhhlawh apiangte chu tichhuak vek tûrin thu pe rawh. 3 A hmei a pain i tichhuakin daipâwnah i dah tûr a ni; a lai taka ka awmna ṭhin an riahhmun chu an tibawlhhlawh dah ang e,” tiin. 4 Tichuan, Israela thlahte chuan chutiang chuan an ti a, daipâwnah an dah chhuak a; LALPAN Mosia hnêna a sawi angin Israela thlahte chuan an ti a.

Thil tihsual rulh leh tûr

5 Tin, LALPAN Mosia a bia a. 6 “Israela thlahte hnênah sawi la, ‘Mipa emaw, hmeichhia emawin LALPA chungah thil eng pawh lo tisualin thiam loh chang sela, 7 an tihsualnaah chuan thupha an chawi tûr a ni. A tihsual man chu kim takin rulh tûr a ni a; tin, a hmun ngaa ṭhena hmun khat a tihsualna pa chu a pek belh tûr a ni. 8 Amaherawhchu, sual man têltuin laichîn a neih loh chuan, sual man LALPA hnêna hlana chu puithiam pual tûr a ni ang a; inremna berâmpa tiam lovin inremna a siam tûr a ni ang. 9 Tin, Israela thlahte thil thianghlim thên thilhlan zawng zawng, hlansak tûra an pêk puithiam hnêna an hlan apiang a hlântu puithiamin a nei ang. 10 An thil serh chu anmahnin an nei ang, puithiam hnêna an pêk chu puithiamin a nei tûr a ni,’ tiin,” a ti a.

Pasal thîkthuchhia nupui chungchâng rêl dân tûr

11 Tin, LALPAN Mosia a bia a, 12 “Israela thlahte hnênah sawi la, an hnênah, ‘Tu nupui pawh uirêin, 13 miin mutpui sela, a pasal chuan hre lovin, chesual ngei si inpuang bawk si lo, kut man ni bawk si lo sela, 14 a pasal chuan thîkthu avângin ringhlel tlat ta sela emaw, nupui chesual lo pawh a rinhlelh tlat si chuan, 15 chutiang thu-ah chuan, chu mi chuan a tâna thilhlan barli chhangphut epha hmun sâwma ṭhena hmun khat kengin, a nupui chu puithiam hnênah a hruai tûr a ni; hriak a leih tûr a ni lo va, thil rimtui a telh tûr a ni hek lo; thîk thawina chhangphut thilhlan, hriat rengna thilhlan khawlohna hriat chhuahna a ni si a. 16 “ ‘Tin, puithiam chuan a rawn hruai ang a, LALPA hmaah a dintîr ang a; 17 tin, puithiam chuan hlumbêlin tui thianghlim a la ang a, biakbûk chhuata vaivut a la ang a, tuiah chuan a phul ang a. 18 Tin, puithiam chuan hmeichhia chu LALPA hmaah a dintîr ang a, a sam a thlahtîr ang a, hriat rengna chhangphut thilhlan, thîk thawina thilhlan chu a kentîr ang a; puithiam chuan ânchhe thlentîrtu tui khâ chu a keng ang. 19 Tin, puithiam chuan hmeichhia chu chhia a chhamtîr ang a, hmeichhe hnênah chuan, “I pasal ni lo mi dang tu mahin an mutpui loh chia, bawlhhlawhna lama i kal pên loh chuan ânchhe thlentîrtu he tui khâ ata hi i lo fihlîm ang a; 20 amaherawhchu, khaw dang hawia i bawlhhlawha, i pasal ni lo mi tuin emaw a mutpui che chuan i fihlîm lo vang,” a ti tûr a ni. 21 Tin, puithiam chuan hmeichhia chu a vau vang a, chhia a chhamtîr ang a, hmeichhe hnênah puithiam chuan, “LALPAN i malpui a tihbala, i pum a tihvûn chuan, LALPAN i chipuite ânchhe dawntîrtuah siam che rawh se; 22 tin, ânchhe thlentîrtu he tui hi i rîlah a lût ang a, i pum a tivûng ang a, i malpui a tirâwp ang,” a ti ang a; tin, hmeichhia chuan, “Amen, Amen,” a ti ang a. 23 “ ‘Tin, puithiam chuan chûng ânchhe thute chu lehkhabuah a ziak ang a, tui khâah chuan a chiah tûr a ni. 24 Tin, hmeichhia chu ânchhe thlentîrtu tui khâ chu a intîr tûr a ni a; tichuan, ânchhe thlentîrtu tui chu a kawchhûngah a lût ang a, a lo khâ ang. 25 Tin, puithiam chuan thîk thilhlan chhangphut, hmeichhe kut ata chu a la ang a, LALPA hmaah chhangphut thilhlan chu a thên ang a, maichâmah a kalpui ang a; 26 puithiam chuan chhangphut thilhlan hriat chhuahtîrtu chu vei khatin a la ang a, maichâmah chuan a hâl ang a, chumi zawhah chuan tui chu hmeichhia a intîr tûr a ni. 27 Tin, tui a han intîr chuan heti hi a ni ang a; a lo bawlhhlawha, a pasal chunga thil a tisual a lo nih chuan ânchhe thlentîrtu tui chu a kawchhûngah a lût ang a, a lo khâ ang a, a pum a lo vûng ang a, a malpui a lo râwp ang a; tichuan, hmeichhia chu a chipuite ânchhe dawntîrtu a lo ni ang. 28 Amaherawhchu, hmeichhia chu a bawlhhlawh lohva, a thianghlim chuan a fihlîm ang a, nau pai thei zêl a ni ang. 29 Hei hi, nupui, khaw dang hawia a pasal ni lo mi dang nêna intibawlhhlawh emaw, 30 mipain thîkna rilru a lo puta, a nupui a thîk emawa rêl dân chu a ni a; tichuan, LALPA hmaah a hruai ang a, puithiam chuan hêng dân zawng zawng ang hian a chungah a ti tûr a ni. 31 Chutichuan, mipa chu khawlohnaah chuan a fihlîm ang a, hmeichhia chuan a sualna mawh a phur ang,’ ti rawh,” tiin.

Numbers 6

Nazarit thutiam chungchâng

1 Tin, LALPAN Mosia a bia a, 2 “Israela thlahte hnênah sawi la, an hnênah, ‘Mipa emaw, hmeichhia emaw pawhin eng emaw thutiam bik, LALPA tâna inpêkna Nazarit thutiam a tiam lai chuan, 3 uain leh zu a nghei tûr a ni; uain thûr pawh, zu thûr pawh a in tûr a ni lo va, grêp tui pawh a inin grêp rah a tharlâm pawh, pho vuai pawh a ei tûr a ni hek lo. 4 A intihhran chhûng zawng chuan grêp hruia mi a mu pawh, a pil pawh a ei tûr a ni lo. 5 Intihhranna thu a tiam chhûng zawng chuan a lu pawh meh hauh loh tûr a ni; LALPA tâna a intihhran chhûng ni a kim hma loh chuan tihhran a ni ang a, a sam a zuah tûr a ni. 6 LALPA tâna a intihhran chhûng zawng chuan mitthi ruang a hnaih tûr a ni lo. 7 A pa te, a nu te, a unaupa te, a farnu te emaw thih thu-ah pawh a intibawlhhlawh tûr a ni lo, Pathian tâna a intihhranna chuan a phuar avângin. 8 A intihhran chhûng zawng chuan LALPA pual a ni. 9 “ ‘A kiangah mi lo thi ta thutin a intihhranna lu chu lo tibawlhhlawh ta ang sela, a inthen ni, a ni sarih niah a lu a mêt tûr a ni. 10 Tin, ni riat niah inbiakna puan in kawngkaa puithiam hnênah ṭhuro tuak khat emaw, pârvano tuak khat emaw a rawn keng tûr a ni; 11 tin, puithiam chuan pakhat chu sual thawi nân a hlân ang a, pakhat chu hâlral thilhlanah, mitthi avânga a tisualnaah inremna a siamsak ang a; tin, chumi ni vêk chuan a lû chu a tithianghlim tûr a ni. 12 Tin, thiam loh thawi nân berâmno a pa kum khat mi rawn kengin, a intihhranna nite chu LALPA hnênah a tiṭha leh ang; a intihhranna chu tihbawlhhlawh a nih tâk avângin a hmaa mi kha engmahlo a ni ta si a. 13 “ ‘Tin, hei hi Nazarit mi, an intihhran ni bi a kim huna tih dân tûr chu a ni: inbiakna puan in kawngkaah hruai tûr a ni ang a; 14 tin, LALPA tâna thilhlanah berâmpa kum khat mi sawisêl bo hâlral thilhlanah pakhat, sual thawi nân berâmno a nu kum khat mi sawisêl bo pakhat, remna thilhlan atân berâmpa sawisêl bo pakhat, 15 dawidim telh loh chhang leh chhangphut dip tak, hriaka hmeh siam chhang hlâwm leh, hriaka chulh chhangpêr pan bâwm khat, an chhangphut thilhlan tûr leh in tûr thilhlan tûrte nên an hlân tûr a ni. 16 Tin, puithiamin chûng chu LALPA hmaah a hlân ang a, a sual thawina leh a hâlral thilhlan chu a hlân ang; 17 tin, berâmpa chu bâwma chhang dawidim telh lohte nên chuan, remna inthawi thilhlan atânte LALPA hnênah a hlân ang a; puithiam chuan chhangphut thilhlan leh in tûr thilhlan pawh chu a hlân tel bawk ang. 18 Nazarit mi chuan inbiakna puan in kawngkaah a intihhranna lu chu a mêt ang a, intihhranna sam chu a la ang a, remna inthawi thilhlan hnuaia meiah chuan a rawh tûr a ni. 19 “ ‘Tin, puithiam chuan berâmpa dâr chhum hmin leh, bâwma dawidim telh loh chhang pakhat leh, dawidim telh loh chhangpêr pan pakhat a la ang a, Nazarit chuan a intihhranna lu a meh zawhin a kentîr ang a; 20 tin, puithiam chuan thên thilhlanah LALPA hmaah a thên tûr a ni; hei hi puithiam pual a ni ang, thên irâwm leh thên bawp nên. Chumi zawhah chuan Nazarit chuan uain a in thei tawh ang. 21 Hei hi a ni, Nazarit thutiam dân leh LALPA hmaa an thilhlan dân chu, ama duh thua a hlan tiam lovin; a intihhranna thutiam azir zêlin a ti tûr a ni,’ ti rawh,” tiin.

Puithiamten mipui mal an sâwma chham tûr

22 Tin, LALPAN Mosia a bia a, 23 “Arona leh a fapate hnênah, ‘Hetiang hian Israela thlahte mal in sâwm tûr a ni; an hnênah: 24 “LALPAN malsâwm che uin vêng zêl che u rawh se; 25 LALPAN a hmêl in chungah êntîr sela, khawngaih zêl che u rawh se, 26 LALPAN in lam lo hawi sela, thlamuanna pe che u rawh se,” tiin sawi rawh u,’ tiin sawi rawh. 27 “Chutianga ti chuan Israela thlahahte ka hming chuantîr a ni ang a; tin, keiin anni chu mal ka sâwm ang,” tiin.

Numbers 7

Chi hrang hrang hruaituten biakbûk tân thilpêk an rawn keng

1 Chutichuan, Mosian biakbûk chu a din zawha, hriak a thiha, a tihthianghlima, a bungrua zawng zawng leh a maichâm leh a bungbêl zawng zawng hriak a thiha, a tihthianghlim ni chuan heti hi a ni a, 2 Israel-ho puipa, an chhûngkaw puipate chuan thilhlan an hlân a, chûngho chu an hnam puipate, an chhiarhote chunga awm an ni a: 3 an thilhlante chu, tawlailîr chung nei paruk leh bâwngpa sâwm leh pahnih, puipa pahnihin tawlailîr pakhat zêl, pakhatin bâwngpa pakhat zêl LALPA hmaah an rawn la a, biakbûk bulah chuan an rawn hlân a. 4 Tin, LALPAN Mosia a bia a, 5 “Biakbûk hna atân a ṭangkai dâwn a, lo la hlawm rawh khai; Levi-ho, an hna zir ang zêlin i pe ṭheuh dâwn nia,” tiin. 6 Tichuan, Mosian tawlailîrte leh bâwngpate chu a la a, Levi-hote chu a pe a. 7 Tawlailîr pahnih leh bâwngpa pali chu Gersona fapate chu an hna azir zêlin a pe a. 8 Tin, tawlailîr pali leh bâwngpa pariat chu puithiam Arona fapa Ithamara ho, Meraria fapate chu an hna azir zêlin a pe a. 9 Kohatha fapate erawh chu a pe ve lo; hmun thianghlim hna chu an pual a ni a, a zâwna zâwn ṭhîn an ni. 10 Puipahote chuan hriak thih ni chuan maichâm hlan nâna an thilhlante chu maichâm bulah an hlân a. 11 Tin, LALPAN Mosia hnênah, “Puipa tinin maichâm hlan nâna an thilpêk chu a indawt zêlin ni tin an hlân tûr a ni,” a ti a. 12 Ni khat nia a thilhlan hlântu tûr chu Juda chi Aminadaba fapa Nasona a ni a. 13 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 14 sekel sâwm tluka rit rimtuia khat rangkachak fian pakhat; 15 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 16 sual thawi nân kêlpa pakhat; 17 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga. Hêng hi Aminadaba fapa Nasona thilhlante chu a ni. 18 Ni hnih ni chuan Isakar-ho puipa Zuara fapa Nethanela chuan a hlân a. 19 A thilhlan atân chuan tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 20 sekel sâwm tluka rit rimtuia khat rangkachak fian pakhat; 21 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 22 sual thawi nân kêlpa pakhat; 23 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a hlân a. Hêng hi Zuara fapa Nethanela thilhlante chu a ni. 24 Ni thum ni chuan Zebuluna thlahte puipa Helona fapa Eliaba chuan a hlân a. 25 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 26 sekel sâwm tluka rit rimtuia khat rangkachak fian pakhat; 27 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 28 sual thawi nân kêlpa pakhat; 29 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Helona fapa Eliaba thilhlante chu a ni. 30 Ni li ni chuan Reubena thlahte puipa Sedeura fapa Elizura chuan a hlân a. 31 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atâna hriak chawhpawlh chhangphut dip taka khat ve ve; 32 sekel sâwm tluka rit rimtuia khat rangkachak fian pakhat; 33 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 34 sual thawi nân kêlpa pakhat; 35 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Sedeura fapa Elizura thilhlante chu a ni. 36 Ni nga ni chuan Simeona thlah Zurisadaia fapa Selumiela chuan a hlân a. 37 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 38 sekel sâwm tluka rit rimtuia khat rangkachak fian pakhat; 39 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 40 sual thawi nân kêlpa pakhat; 41 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Zurisadaia fapa Selumiela thilhlante chu a ni. 42 Ni ruk ni chuan Gada thlahte puipa Deuela fapa Eliasapha chuan a hlân a. 43 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 44 sekel sâwm tluka rit rimtuia khat rangkachak fian pakhat; 45 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 46 sual thawi nân kêlpa pakhat; 47 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Deuela fapa Eliasapha thilhlante chu a ni. 48 Ni sarih ni chuan Ephraima thlahte puipa Amihuda fapa Elisama chuan a hlân a. 49 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, hâlral thilhlan atân hriaka chawhpawlh chhangphut dip taka khat ve ve; 50 sekel sâwm tluka rit rimtuia khat rangkachak fian pakhat; 51 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 52 sual thawi nân kêlpa pakhat; 53 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Amihuda fapa Elisama thilhlante chu a ni. 54 Ni riat ni chuan Manasea thlahte puipa Pedazura fapa Gamaliela chuan a hlân a. 55 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat; chhangphut thilhlan atâna hriak chawhpawlh chhangphut dip taka khat ve ve; 56 sekel sâwm tluka rit rimtuia khat rangkachak fian pakhat; 57 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat, 58 sual thawi nân kêlpa pakhat; 59 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Pedazura fapa Gamaliela thilhlante chu a ni. 60 Ni kua ni chuan Benjamina thlah Gideonia fapa Abidana chuan a hlân a. 61 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 62 sekel sâwm tluka rit rimtuia khat rangkachak fian pakhat, 63 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 64 sual thawi nân kêlpa pakhat; 65 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Gideonia fapa Abidana thilhlante chu a ni. 66 Ni sâwm ni chuan Dana thlahte puipa Amisadaia fapa Ahiezera chuan a hlân a. 67 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 68 sekel sâwm tluka rit rimtuia khat rangkachak fian pakhat; 69 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 70 sual thawi nân kêlpa pakhat; 71 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Amisadaia fapa Ahiezera thilhlante chu a ni. 72 Ni sâwm leh ni khat ni chuan Asera thlahte puipa Okrana fapa Pagiela chuan a hlân a. 73 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 74 sekel sâwm tluka rit rimtuia khat rangkachak fian pakhat; 75 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 76 sual thawi nân kêlpa pakhat; 77 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Okrana fapa Pagiela thilhlante chu a ni. 78 Ni sâwm leh ni hnih ni chuan Naphthalia thlahte puipa Enana fapa Ahira chuan a hlân a. 79 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atan hriak chawhpawlh chhangphut dip taka khat ve ve; 80 sekel sâwm tluka rit rimtuia khat rangkachak fian pakhat; 81 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 82 sual thawi nân kelpa pakhat; 83 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Enana fapa Ahira thilhlante chu a ni. 84 Tichuan, maichâm hriak thih nia Israel puipaho thilhlante chu tangkaraw thlêng sâwm leh pahnih, tangkaraw berhbu sâwm leh pahnih, rangkachak fian sâwm leh pahnih a ni a; 85 tangkaraw thlêng chu sekel za leh sawmthum tluka rit ṭheuh a ni a, berhbu chu sawmsarih ṭheuh a ni. Tangkaraw bungbêl zawng zawng chu hmun thianghlima sekel sînghnih leh zali tluka rit a ni. 86 Rimtuia khat rangkachak fian sâwm leh pahnih chu hmun thianghlima sekel sâwm tluka rit ṭheuh a ni; rangkachak fian zawng zawng chu sekel za leh sawmhnih tluka rit a ni. 87 Hâlral thilhlan atâna bâwngpa zawng zawng chu sâwm leh pahnih a ni a, berâmpa sâwm leh pahnih, berâmno a pa kum khat mi sâwm leh pahnih, an chhangphut thilhlante nên; tin, sual thawi nân kêlpa sâwm leh pahnih; 88 tin, remna inthawi thilhlan atâna bâwng chu bâwngpa sawmhnih leh pali a ni a, berâmpa chu sawmruk, kêlpa chu sawmruk, berâmno a pa kum khat mi chu sawmruk a ni. Hei hi hriak thih hnua maichâm hlan nâna thilpêkte chu a ni. 89 Chutichuan, inbiakna puan ina amah be tûra Mosia a luh chuan, thuthlung bâwm chunga zahngaihna ṭhutphah chung lama cherub pahnihte inkâr aṭang chuan, amah rawn biain aw chu a hria a; tin, a be ta a.

Numbers 8

Khâwnvâr dah dân tûr

1 Tin, LALPAN Mosia a bia a, 2 “Arona bia la, a hnênah, ‘Khâwnvârte i hâlin khâwnvâr pasarih chuan sathaukhâwnvâr dahna hma lam a ên tûr a ni,’ ti rawh,” tiin. 3 Tin, Arona chuan chutiang chuan a ti a; LALPAN Mosia thu a pêk ang chuan khâwnvâr dahna hma lamah chuan khâwnvâr chu a chhi a. 4 Hemi khâwnvâr dahna siam dân hmang chu rangkachak a chhera chher a ni; a bul ngul leh a pâr chenin chher a ni: LALPAN a lem Mosia a entîr ang chiahin khâwnvâr dahna chu a siam a.

Levia chite then leh serh hran

5 Tin, LALPAN Mosia a bia a, 6 “Levi-hote chu Israela thlahte zîng ata tihrang la, tithianghlim rawh. 7 Anmahni tithianghlim tûrin hetiang hian i ti tûr a ni: an chungah tlen faina tui thlawr la, an taksa zawng zawng mehtîr la, an puante sûktîr la, intihthianghlimtîr rawh. 8 Tin, bâwngpatuai pakhat leh chhangphut thilhlan, hriaka pawlh chhangphut dip tak nên lâktîr la; tin, sual thawi nân bâwngpatuai pakhat dang i kai bawk tûr a ni. 9 Tin, Levi-hote chu inbiakna puan in bulah chuan hruai la, Israela thlahte mipui zawng zawng chu pun khâwmtîr vek rawh; 10 tin, Levi-hote chu LALPA hnênah i hlân ang a; Israela thlahte chuan Levi-hote chungah an kut an nghat ang a; 11 tichuan, Arona chuan Levi-hote chu, LALPA rawng an bâwl theih nân Israela thlahte hmingin thên thilhlanah LALPA hnênah a hlân ang a. 12 Tin, Levi-hote chuan bâwngpa lû-ahte chuan an kut an nghat ang a; tin, Levi-hote tâna inremna siam nân, pakhat chu sual thawi nân, pakhat chu hâlral thilhlanah LALPA hnênah i hlân tûr a ni. 13 “Tin, Levi-hote chu Arona leh a fapate hmaah chuan i awmtîr ang a, LALPA tâna thên thilhlanah i hlân tûr a ni. 14 Chutiang chuan Israela thlahte zîng ata Levi-hote chu i tihrang ang a; tichuan, Levi-hote chu ka ta an ni ang. 15 Tin, chumi zawhah chuan Levi-hote chu inbiakna puan ina rawngbâwl tûrin an lût ang a; tin, nangin anni chu i tithianghlim ang a, thên thilhlanah i hlân tûr a ni. 16 Israela thlahte zîng ata ka puala ruat an ni si a; chhûl keu zawng zawng Israela thlahte fa tîr zawng zawng aiah ka pualah ka nei tawh a ni. 17 Israela thlahte zînga fa tîr zawng zawng chu ka ta an ni rêng a; mihring nên, rante nên; Aigupta rama fa tîr zawng zawng ka tihhlum lai khân ka puala ka ruat tawh a ni. 18 Tichuan, Israela thlahte zînga fa tîr zawng zawng aiah Levi-hote hi ka nei tawh a ni. 19 Tichuan, Israela thlahte aia inbiakna puan ina rawngbâwl tûr leh, Israela thlahten hmun thianghlim an rawn hnaih pawha Israela thlahte zînga hri a lên lohna tûra remna siam tûrin, Israela thlahte zîng ata Levi-hote hi Arona leh a fapate ka pe a ni,” tiin. 20 Chutiang chuan Mosia te, Arona te, Israela thlahte pung khâwmho zawng zawng chuan Levi-hote chungah chuan an ti a. Levi-ho chungchâng thua LALPAN Mosia thu a pêk ang zawng zawng chuan an chungah Israela thlahte chuan an ti a. 21 Tichuan, Levi-hote chu sual lakah an inthian fai a, an puante an su a; tin, Aronan LALPA hmaah thên thilhlanah a hlân a; tin, anmahni tihthianghlim nân Aronan inremna a siamsak a. 22 Tin, chumi zawhah Levi-hote chu Arona leh a fapate hnuaia an rawngbâwl hna thawk tûr chuan inbiakna puan in chhûngah an lût a; Levi-hote chungchâng thua LALPAN Mosia thu a pêk angin an chungah an ti ta a. 23 Tin, LALPAN Mosia a bia a, 24 “Levi-hote chanpual chu hêng hi a ni: kum sawmhnih leh kum nga chin chung lam chuan inbiakna puan ina rawngbâwl hna an bei ang a; 25 kum sawmnga mite chuan rawngbâwl hna chu an chawlhsan ang a, rawng an bâwl tawh lo vang. 26 Amaherawhchu, inbiakna puan in enkawl thu-ah chuan an unaute an puibâwm zêl ang a, rawng erawh chu an bâwl tawh lo vang. Hetiang hian Levi-hote chu an hnathawh i rêlsak tûr a ni,” tiin.

Numbers 9

Kalhlên kût hman vawi hnihna

1 Tin, LALPAN Aigupta ram ata an lo chhuah achin kum hnihna, thla khatnaah Sinai thlalêran Mosia a bia a, 2 “Israela thlahte chuan kalhlên kût chu a hunbi zêlah nei rawh se. 3 A hunbiah, hemi thla ni sâwm leh ni li tlai lamah in nei tûr a ni. Chumia tih tûra ruat ang zawng zawng leh a dân ang zawng zawng chuan in nei tûr a ni,” tiin. 4 Tichuan, Mosian Israela thlahte chu kalhlên kût nei tûr chuan a hrilh a. 5 Chutichuan, Sinai thlalêrah chuan thla khatna, ni sâwm leh ni li ni tlai lamah kalhlên kût chu an hmang ta a; LALPAN Mosia thu a pêk ang zawng zawng chuan Israela thlahte chuan an ti a. 6 Tin, tute emaw mitthi ruang avânga thianghlim lo an awm a, chumi ni chuan kalhlên kûtah an tel ve thei lo va; tichuan, chumi ni chuan Mosia leh Arona hmaah chuan an kal a. 7 Chungho chuan a hnênah, “Mitthi ruang avângin kan thianghlim lo a ni a; eng vângin nge Israela thlahte zînga a hunbia LALPA hnêna thilhlan kan hlan ve min khap?” an ti a. 8 Tin, Mosian an hnênah, “Lo ngawi rih teh u, in chungchâng thu-ah LALPAN engtin nge thu a pêk dâwn ka han hre rih phawt ang e,” a ti a. 9 Tin, LALPAN Mosia a bia a, 10 “Israela thlahte hnênah, ‘In zînga mi pawh, in thlahte zînga mi pawh, mitthi ruang avânga thianghlim lo emaw, lo thang bo emaw an awm hlauh chuan LALPA tâna kalhlên kût chu an nei ve rêng rêng tûr a ni. 11 Thla hnihna, ni sâwm leh ni li ni tlai lamah an nei tûr a ni. Chhang, dawidim telh loh hnimhnah khâ nên an ei tûr a ni. 12 A tûk atân chuan a enga mah an dah tûr a ni lo va, a ruh an titliak tûr a ni hek lo. Kalhlên kûta tih tûr ruat ang zawng zawng chu an ti tûr a ni. 13 Amaherawhchu, thianghlim si, thang bona nei si lova kalhlên kûta tel lo ringawt chu, a chipuite zîng ata chu mi chu tuithlâr a ni ang; a hunbia LALPA hnêna thilhlan chu a hlan loh avângin chu mi chuan a sual mawh a phur ang. 14 Tin, hnam dang mi in hnêna awmin LALPA tâna kalhlên kûta tel ve an duh chuan, kalhlên kûta tih tûr ruat leh a dân angin an ti tûr a ni; he rama mi rêng rêng leh hnam dang mite tân dân angkhat in nei tûr a ni,’ tiin sawi rawh,” tiin.

Chhûm ding êng

15 Chutichuan, biakbûk din ni chuan Pathian chênna in chu chhûmin a tuam mup a; tin, tlai lamah chuan biakbûk chungah chuan mei alh ang mai hi a tûk zîng thlengin a awm a. 16 Chutiang chuan a awm reng a: chhûm chuan a tuam reng a, zânah chuan mei angin a lang a. 17 Chhûmin puan in chu a kiansan apiangin Israela thlahte chuan kal zai an rêl ṭhîn a; tin, chhûm a dinna hmun apiangah chuan Israela thlahte chuan awmhmun an khuar ṭhîn a. 18 LALPA thupêkin Israela thlahte chu an kal zêl a, LALPA thupêk bawkin awmhmun an khuar ṭhîn a; biakbûk chunga chhûm chu a awm chhûng zawng awmhmun an khuar reng a. 19 Tin, biakbûk chunga chhûm chu rei tak a awm chuan, Israela thlahte chuan LALPA thu chu an zâwm a, an kal lo va. 20 Tin, a châng chuan chhûm chu biakbûk chungah chuan ni rei lo tê chauh a awm ṭhîn a; tichuan, LALPA thupêk angin awmhmun an khuar a, LALPA thupêk angin an kal ṭhîn. 21 Tin, a châng chuan chhûm chu tlai lam aṭanga zîng thlengin a awm a: zînga chhûm chu a invawrh sân chuan an kal ṭhîn a; chhûnah emaw, zânah emaw, chhûm chu a invawrh sân apiangin an kal mai ṭhîn a ni. 22 Biakbûk chungah chhûm chu ni hnih emaw, thla khat emaw, kum khat emaw pawh a awma, chuta a awm reng chuan Israela thlahte chuan awmhmun an khuar reng a, an kal ṭhîn lo va; a invawrh sân erawh chuan an kal ṭhîn. 23 LALPA thupêkin awmhmun an khuar ṭhîn a, LALPA thupêkin an kal ṭhîn; Mosia hmanga LALPA thupêkin LALPA thu chu an zâwm a ni.

Numbers 10

Tangkaruaa siam tawtawrâwt

1 Tin, LALPAN Mosia a bia a, 2 “Tangkaraw tawtawrâwt pahnih siam la; a chhera chherin siam rawh: mipuiho koh khâwm nân leh chhuahtîr nân i hmang tûr a ni. 3 Chu chu an ham kawp chuan mipui zawng zawng chu i hnênah inbiakna puan in kawngka bulah an rawn inkhâwm vek tûr a ni. 4 Tin, pakhat chauh an ham chuan, Israel mipuite hotu puipate chauh i hnênah an lo kal khâwm tûr a ni ang a. 5 Tin, râlkhêl hama in ham chuan chhak lampanga awmhote an chhuak tûr a ni ang. 6 Tin, râlkhêl hama in ham leh chuan chhim lampanga awmhote an chhuak tûr a ni; an chhuahna tûrin râlkhêl hamin an hâm tûr a ni. 7 Amaherawhchu, mipuite lo kal khâwmna tûr chuan in hâm phawt ang a, râlkhêl ham erawh chuan hâm lovin. 8 Arona fapa puithiamhote chuan tawtawrâwt chu an hâm tûr a ni; chu chu in tân in thlahte thlenga kumkhaw dân tûr a ni ang. 9 In rama hmêlma hnuaichhiahtu che u do tûra in kal hunin, râlkhêl hamin tawtawrâwtte chu in hâm tûr a ni; tichuan, LALPA in Pathian hmaah chuan hriat reng in ni ang a, in hmêlmate lakah chuan chhanhim in ni ang. 10 In hlimna niah te, in kût hunbi neiah te, in thla tharah te chuan in hâlral thilhlanah leh in remna thilhlan inthawinaahte chuan tawtawrâwt in hâm tûr a ni; tichuan, in Pathian hmaa in tâna hriat rengna a ni dâwn nia: kei hi LALPA in Pathian ka nih hi,” tiin.

Israel-ten hmun an sawn

11 Tin, kum hnihna, chumi thla ni sawmhnih ni chuan heti hi a ni a, chhûm chu Pathian chênna in chung ata chu a lo invawrh sâng ta a. 12 Tichuan, Israela thlahte chu an kal dân bi ang chuan Sinai thlalêr ata chu an chhuak a; tin, Paran thlalêrah chuan chhûm chu a ding ta a. 13 Mosia hmanga LALPA thupêk angin an chhuak ta phawt a. 14 A hmasa berin Juda pâwlho an chhungkaw chhinchhiahna kengin an chhuak a; a hotu chu Aminadaba fapa Nasona a ni a. 15 Isakar-ho hotu chu Zuara fapa Nethanela a ni a. 16 Zebulun-ho hotu chu Helona fapa Eliaba a ni a. 17 Tin, biakbûk chu an ṭhiat a, Gersona fapate leh Meraria fapa, biakbuk zâwntute chu an chhuak a. 18 Tin, Reuben-ho chu an chhûngkaw chhinchhiahna kengin an chhuak a; a hotu chu Sedeura fapa Elizura a ni a. 19 Simeon-ho hotu chu Zurisadaia fapa Selumiela a ni a. 20 Gad-ho hotu chu Deuela fapa Eliasapha a ni. 21 Tin, Kohath-hote chuan thil thianghlim chu an zâwn a, an chhuak a; tin, a dangte chuan an thlen veleh biakbûk chu an lo din diam a. 22 Ephraim-ho chu an chhungkaw chhinchhiahna kengin an chhuak a; a hotu chu Amihuda fapa Elisama a ni.

Mipui an kal chhuak

23 Manase-ho hotu chu Pedazura fapa Gamaliela a ni a. 24 Benjamin-ho hotu chu Gideonia fapa Abidana a ni a. 25 Tin, a hnuhnûng berah Dan-ho chu an chhûngkaw chhinchhiahna kengin an chhuak a; a hotu chu Amisadaia fapa Ahiezera a ni a. 26 Aser-ho hotu chu Okrana fapa Pagiela a ni a. 27 Naphtali-ho hotu chu Enana fapa Ahira a ni a. 28 Chutiang chu a ni Israela thlahte an chhûngkaw chhinchhiahna kenga an kal dân chu; chutiang tak chuan an chhuak ta a. 29 Tin, Mosia puzawn, Midian mi Reuela fapa Hobaba hnênah Mosian, “ ‘Ka pe ang che u,’ LALPAN a tih hmunah chuan kan kal dâwn a ni a; kan hnênah lo kal ve la, ṭha takin i chungah kan ti ang; LALPA chuan Israela thlahte chungchâng thu chu ṭha takin a sawi tawh si a,” a ti a. 30 Ani chuan a hnênah, “Ka lo kal lo mai ang e, keimahni ramah ka laichînte hnênah ka kal zâwk ang e,” a ti a. 31 Tin, ani chuan, “Min kalsan lul suh khai, thlalêrah chuan awmhmun kan khuarna tûr i hre zâwk si a, kan tân mit i lo ni dâwn a ni. 32 Tin, heti hi a ni ang a, kan hnêna i kal ve chuan, a ni, heti hi a ni ang a, LALPAN thil ṭha min tihsak ang zêlin kan tihsak ve zêl ang che,” a ti a. 33 Chutichuan, LALPA tlâng aṭanga ni thum kalah chuan an kal a; tin, LALPA thuthlung bâwm chu an tâna innghahna hmun remchâng zawngin, ni thum an kal chhûng hian an hma a hruai a. 34 An bûk ata an chhuahin LALPA chhûm chu an chungah a awm zêl a. 35 Tin, heti hi a ni a, bâwm chu a chhuah dâwn apiangin Mosian, “Aw LALPA, lo thawk la, i hmêlmate chu tidarh la, a hawtu che chu i hmaah tlânchhe rawh se,” a ti ṭhîn a. 36 Tin, a innghah apiangin, “Aw LALPA, Israel mipuiho hnênah hian lo kîr leh rawh,” a ti ṭhîn a.

Numbers 11

Tabera hmun an thleng

1 Tin, mipuite chuan LALPA beng hriatah phunnawi hmangte angin thil ṭha lo tak an sawi ṭhîn a; chu chu LALPAN a lo hriatin a thin a alh ta a; tichuan, LALPA mei chu an zîngah chuan a lo thawk a, an riahhmun pâwn lam chu a lo kâng ta dur dur mai a. 2 Chutichuan, mipuite chuan Mosia an au va; tin, Mosia chu LALPA hnênah a ṭawngṭai a, mei chu a rêm ta a. 3 Chumi hmun hming chu Tabera an ti a, LALPA mei chu an zînga a lo thawh avâng chuan.

Mosian hruaitu mi sawmsarih a thlang

4 Tin, an zînga hnam dang nêna inneih pawlhhote chuan tisa châkna an lo nei ta a; Israela thlahte pawh an ṭap leh a, “Tu nge sa ei tûr min pe dâwn? 5 Duh duha Aigupta rama sangha kan ei ṭhinte chu kan hre reng a, fanghma te, hmazil te, purûn hel ei mi te, rûn bâl te, purûn vâr mite pawh; 6 nimahsela, tûnah chuan kan thlîng a ro zo ta, eng mah rêng rêng beisei tûr a awm lo, manna mai lo hi chu,” an ti a. 7 Manna chu koriander mu ang, a lan dânah chuan tuikeplung ang hi a ni. 8 Mite chuan an chhar khâwm a, râwtsawmnaah an râwt sawm a, sumah te an dêng a, bêlah an chhûm a, chhangah te an siam a; han ei chuan hriaka kan chhang ang a ni a. 9 Riahhmuna zâna dai a tlâkin manna chu a tla tel ve a. 10 Tin, mipuite chu an chhûngkua kuain an puan in kawngka ṭheuhvah an ṭap tih Mosian a lo hria a; tin, LALPA thin chu nasa takin a alh ta a. Tin, Mosia pawh a lungni lo va; 11 tichuan LALPA hnênah, “Eng vângin nge i chhiahhlawh hi mi tihhrehawm? Engtizia nge i mit ka tlun lohva, hêng mipui zawng zawng phurrit hi ka chunga i nghah? 12 Hêng mipui zawng zawng hi ka hrin em an nih? An pi leh pute chhechhama pêk i tiam rama hruai lût tûrin, ‘Nau pawmtuin hnute hne lai a pawm angin i ângchhûngah pawm rawh,’ i mi tih atân em ni ka hruai chhuah hlawm? 13 Hêng mipui zawng zawng pêk tûr hi khawi ata nge sa ka neih ang? ‘Kan ei atân sa mi pe rawh,’ tia ṭapin mi bei si a. 14 Hêng mipui zawng zawng hi mahni ngawt chuan ka phur zo lo, ka tân a rit lutuk a ni. 15 Hetianga mi tih dâwn chuan mi khawngaih la, mi tihlum daih law law mai la, mi tirethei tawh suh khai,” a ti a. 16 Tin, LALPAN Mosia hnênah, “Israel-te upa, mipuite upa leh an hotu nia i hriat mi sawmsarihte kha ka hnênah han hruai khâwm la, inbiakna puan inah nangmah nêna ding ho tûrin han hruai rawh. 17 Tichuan, ka lo chhuk ang a, chutah chuan ka rawn bia ang che: tin, nangmaha thlarau chu an chungah ka dah ang a; nangmah chauhva phur lovin mipuite phurrit chu an phurhpui ang che. 18 Tin, nangin mipui hnênah, ‘Naktûk atân hian intithianghlim vek ula; tichuan, sa chu in ei mawlh ang, “Sa ei tûr tuin nge min pe dâwn? Aigupta rama kan nawm nên khân,” tiin LALPA beng hriatah in ṭap a; chuvângin, LALPAN sa a pe ang che u a, in ei mawlh ang. 19 Ni khat emaw, ni hnih emaw, ni nga emaw, ni sâwm emaw, ni sawmhnih emaw mai pawh ni lovin, 20 thla khat pumhlûm, ngei hlui khawp leh luak chhuak hlui khawpin in ei ang; in zînga awm LALPA chu duh lova, “Engati nge Aigupta ram ata kan chhuah ni?” tia a hmaah in ṭah avângin,’ ti ang che,” a ti a. 21 Tin, Mosian, “Ka awmpui mipuiho kea kal thei ṭhiau pawh 6,00,000 an ni a, ‘Thla khat pumhlûm ei tûr sa ka pe ang,’ i ti a. 22 Berâm rual leh ran rual pawh talhsak ila, an khawpkham dâwn em ni? Tuifinriata sangha zawng zawng pawh mansak vek ila, an khawpkham dâwn em ni?” a ti a. 23 Tin, LALPAN Mosia hnênah, “LALPA kut chu a tawi ta em ni? I chungah ka thu angin a thlen leh thlen loh i hre mai ang,” a ti a. 24 Tichuan, Mosia chu a chhuak a, LALPA thu chu mipuite chu a hrilh a; tin, mipuihote upa sawmsarihte chu a ko khâwm a, Puan In vêlah chuan a dintîr a. 25 Chutichuan, LALPA chu chhûmah chuan a lo chhuk a, a rawn bia a, amaha Thlarau chu upa sawmsarihte chungah chuan a dah a; tin, heti hi a ni a, Thlarau chu an chunga a han awm veleh chuan thu an sawi ta dual dual a; nimahsela, chutiang chuan an ti an ti leh tawh lo. 26 Amaherawhchu, bûkah chuan mi pahnih an la awm ta a: pakhata hming chu Eldada a ni a, pakhat leha hming chu Medada a ni. Thlarau chu an chungah a awm a. Chhiarte zînga tel chu an ni a, inbiakna puan inah erawh chuan an kal ve lo; bûkah chuan thu an sawi bual bual a. 27 Tichuan, tlangvâl pakhat a va tlân a, Mosia a va hrilh a, “Eldada leh Medadan bûkah thu an sawi bual bual mai,” a ti a. 28 Tin, Nuna fapa Josua, a tleirâwl tirh aṭanga Mosia rawngbâwltu chuan a chhâng a, “Ka pu Mosi, khap rawh khai,” a ti a. 29 Tin, Mosian a hnênah, “Keimah avânga ngaimawh em i nih? LALPA mi zawng zawngte chu zâwlnei ni vek sela, LALPAN an chungah a thlarau chu dah ṭheuh sela tih nâk alaiin.” a ti a. 30 Tichuan, Mosia chu bûkah chuan a lût leh a, amah leh Israel-ho upate nên.

LALPAN vahmîm a tîr

31 Tin, LALPA hnên aṭang chuan thli a lo tleh a, tuifinriat lam ata vahmîm a rawn lên a, bûk lehlam pang ni khat kal, a lehlam pang ni khat kal ve ve awhin bûk vêl chuan tawng hnih laia sângin a tlâktîr a. 32 Tin, mipuite chuan chumi ni nilêng leh zankhua leh, a tûk nilêng chuan vahmîm chu an va chhar khâwm a, a chhar tlêm ber pawhin homer sâwm a chhar a; bûk vêlah chuan mahni tân an pho ṭheuh va. 33 Tin, chumi sa chu an ei lai, an la ei zawh hmain, mipuite chungah LALPA thin chu a alh ta a, mipuite chu hripui nasa takin LALPAN a hrem ta a. 34 Chumi hmun hmingah chuan Kibroth-hat-tava an ti a; chutah chuan tisa châkna neitute chu an phûm avângin. 35 Tin, Kibroth-hat-tava aṭang chuan mipuite chu Hazeroth-ah an kal a; Hazeroth-ah chuan an awm ta a.

Numbers 12

Miriami hrem a ni

1 Tin, Miriami leh Arona chuan Mosian Kus hmeichhia nupuia a neih avangin an sawichhia a: Kus hmeichhia chu a nei ngei si a. 2 Anni chuan, “Mosia hnênah chauh hian em ni LALPAN thu a sawi bîk? Keini hnênah pawh hian a sawi ve lo vem ni?” an ti a. Chu chu LALPAN a lo hria a. 3 Mosia chu lei chunga mihring zawng zawnga zaidam lâwtlak a ni a. 4 Tin, Mosia leh Arona leh Miriami hnênah LALPAN, “In pathumin lo chhuak ula, inbiakna puan inah lo kal rawh u,” a ti ta thut mai a. Tichuan, an pathum chuan an va kal a. 5 Tin, LALPA chu chhûm dingah a lo chhuk a, puan in kawngkaah a lo ding a, Arona leh Miriami chu a ko va; tin, an pahnih chuan an lo chhuak a. 6 Tin, ani chuan, “Ka thu hi ngaithla rawh u: in zîngah hian zâwlnei in awm chuan a hnênah kei LALPA hi inlârnain ka inhriattîr ang a, mang lamah ka bia ang. 7 Ka chhiahhlawh Mosia hi zawng chutiang a ni lo; ka chhûngkaw thu zawng zawngah chuan a rinawm a ni. 8 Ani nên zawng ṭawngkain, thurûk awm lovin tlang takin kan inbia a; LALPA hmêl pawh a hmu ang; chuvângin, ka chhiahhlawh Mosia hi engtiziaa sawichhe ngam nge in nih?” a lo ti a. 9 Tichuan, LALPA chu an chungah a thinur ta êm êm a, a kal leh ta a. 10 Tin, puan in chunga chhûm chu a kiang ta a; tin ngai teh, Miriami chu vûr ang maia varin a lo phâr ta a; Arona chuan Miriami chu a han en a, ngai teh, phâr a lo ni ta reng mai a. 11 Chutichuan, Aronan Mosia hnênah, “Aw ka pu, kan chungah sual nghat lul suh ang che, âtthlâk takin kan lo ti a, kan lo sual ta a ni e. 12 Mi, a nu chhûl ata a lo chhuah tirh aṭanga thi sa deuhthaw angin awm lul suh se,” a ti a. 13 Tichuan, Mosian, “Aw Pathian, tidam leh teh khai,” tiin LALPA chu a au va. 14 Tin, LALPAN Mosia hnênah, “A pain a hmaia chil a chhâk ngawt pawhin ni sarih chu a zak dâwn lâwm ni? Daipâwnah ni sarih bibo sela, chumi zawhah hruai luh leh ni rawh se,” a ti a. 15 Chutichuan, Miriami chu dai pâwnah ni sarih a bibo va; Miriami an hruai luh leh hma chuan mipuite chu an tawl sawn lo va. 16 Chumi zawhah chuan mipuite chu Hazeroth ata an chhuak a, Paran thlalêrah awmhmun an khuar a.

Numbers 13

Ram enthlatute

1 Tin, LALPAN Mosia a bia a, 2 “Israela thlahte ka pêk, Kanaan ram va enthla tûrin mite tîr rawh khai: an hnam chhûngkaw tina mi, an puipa zînga mi pakhat ṭheuh zêl i tîr tûr a ni,” a ti a. 3 Tin, Mosia chuan Paran thlalêr aṭang chuan LALPA thupêk angin a kaltîr ta hlawm a, an za chuan Israela thlahte zînga puipa ṭhiau an ni. 4 Hêng hi an hming a ni: Reuben hnam zînga mi Zakura fapa Samua; 5 Simeon hnam zînga mi Horia fapa Saphata; 6 Juda hnam zînga mi Jephunea fapa Kaleba; 7 Isakar hnam zînga mi Josefa fapa Igala; 8 Ephraim hnam zînga mi Nuna fapa Hosea; 9 Benjamin hnam zînga mi Raphua fapa Paltia; 10 Zebulun hnam zînga mi Sodia fapa Gadiela; 11 Josef hnam (Manase hnam an tih) zînga mi Susia fapa Gadia; 12 Dan hnam zînga mi Gemalia fapa Amiela; 13 Aser hnam zînga mi Mikaela fapa Sethura; 14 Napthali hnam zînga mi Vopsia fapa Nabia; 15 Gad hnam zînga mi Makia fapa Geuela. 16 Hêng hi ram enthla tûra Mosian a tirhate hming chu a ni. Nuna fapa Hosea chu Mosian Josua a ti a. 17 Tichuan, Mosian Kanaan ram enthla tûrin anniho chu a tîr a, an hnênah, “Chhim lam kawngah kal phawt ula, tlângahte lâwn chho ula, 18 ram chu eng ang nge tih te, chûnga chêng mipuite chu an chak nge chak lo tih te, an tlêm leh an tam te, 19 an awmna ram chu a ṭha nge ṭha lo tih te, an awmna khuate chu eng ang nge ni, puan in mai nge kulh nei in tih te, 20 tin, ram chu a chênghnâwng nge hnâwng lo, a ngaw nge ngaw lo tihte va thlithlai ula. Tin, huai takin awm ula, chumi ram theirahte chu rawn hâwn ang che u,” a ti a. Grêp rah hmasa rah hun lai tak a ni a. 21 Chutichuan, an chhuak chho ta a, ram chu Zin thlalêr aṭanga Hamath luhna Rehob thlengin an enthla vek a. 22 Chhim lamah an chho phawt a, Hebron an va thleng a, chutah chuan Anaka thlah Ahiman-ho te, Sesai-ho te, Talmai-ho te an awm a (Hebron chu Aigupta rama Zoan din hma kum sariha din tawh a ni). 23 Tin, Eskol ruam an va thleng a, chuta grêp rah bâwr khat, a ṭang chawpin an sât chhum a; tiangin mi pahnihin an zâwn a. Pawmgranet leh theipuite pawh an hâwn bawk a. 24 Chumi hmun chu Eskol ruam an ti a, Israela thlahten chuta ta grêp bâwr chu an sah thlâk avângin. 25 Tin, an ram va enthla chu ni sawmli an thang a, an lo haw leh ta a. 26 Chutichuan, Paran thlalêra Kadesh-ah chuan Mosia leh Arona leh Israel mipui zawng zawng hnên chu an lo thleng a, an hnênah leh mipui zawng zawng hnênah chuan thu an rawn thlen a, chumi ram theite chu an entîr a. 27 Tin, a hnênah, “I mi tirhna ramah chuan kan kal a, hnutetui leh khawizu luanna a lo ni ngei mai; hei hi a rama thei a ni. 28 Amaherawhchu, a rama mi awmte chu mi chak pui pui an ni a, khuate pawh kulh nei, ropui tak tak a ni; tin, Anaka thlahte pawh kan hmu bawk a. 29 Amalek-ho chu chhim lam ramah an awm a; Hit-ho te, Jebus-ho te, Amor-ho te chu tlângahte an awm a; tin, Kanaan-hote chu tuifinriat kam leh Jordan lui dungah an awm,” tiin an hrilh a. 30 Tichuan, Mosia hmaah Kaleban mipui chu a tingawi ṭhuap a, “I han thawk thuai ang u khai, i han la ang u, kan ngam ngei ngei ang,” a ti a. 31 Nimahsela, a kalpuite chuan, “Kan han hneh thei hlawm lo vang â, kan aiin an chak si a,” an ti a. 32 Tichuan, Israela thlahte hnênah an ram han enthlâk chu, “Kan ram han enthlâk chu a chhûnga chêngte ei zawh hmang a ni; tin, a awmte kan hmuh chu mi âwmkhauh pui pui an ni a. 33 Tin, chutah chuan Anaka thlahte, mi lianho, âwmkhauh pui pui kan hmu a; khau ang lekin kan inhmu a, anni pawhin khau ang lekin min hmu a ni,” tiin, a ṭha lo lamin an sawi a.

Numbers 14

Mipui an phunnawi

1 Chutichuan, pung khâwmho zawng zawng chu aw chhuah meuhvin an ṭap a; chumi zân chuan mipuite chu an ṭap an ṭap a. 2 Israela thlahte zawng zawng chu Mosia chungah leh Arona chungah an phunnawi a: pung khâwmho zawng zawng chuan an hnênah, “Aigupta ramah khân Pathianin min tihlum ta thên sela aw! A nih loh leh thlalêrah hian min tihlum thên mai sela aw! 3 Engati nge khandaiha thi mai tûra Pathianin he ramah hian min hruai le aw! Kan nupui fanaute chu man tûr mai an ni dâwn si a. Aigupta rama kîr leh hi kan tân a ṭha zâwk dâwn lâwm ni âw?” an ti a. 4 Tichuan, an inbe hlawm a, “Hotu i siam ang u khai, Aigupta ramah i kîr leh ang u,” an ti a. 5 Chutichuan, Mosia leh Arona chu Israela thlah mipui pung khâwmho zawng zawng hmaah chuan an bawkkhup a. 6 Tin, Nuna fapa Josua leh Jephunea fapa Kaleba, ram va enthlatute zînga tel vete chuan an puan an pawt thlêr a; 7 Israela thlah pung khâwmho zawng zawng hnênah chuan, “Enthla tûra kan va fan chhuah ram chu ram ṭha tak a ni a. 8 Kan chunga LALPA a lâwm chuan chu ramah chuan min hruai ang a, min pe ang; hnutetui leh khawizu luanna ram chu. 9 LALPA chungah hel lo phawt mai ula, chumi rama mite chu hlau bawk hek suh u, kan chaw tûr an ni mai a; an inhumhimna chu engmahlo a ni a, LALPA chu kan hnênah a awm alâwm. Anni chu hlau suh u,” tiin an sawi a. 10 Nimahsela, pung khâwmho zawng zawng chuan lunga den an rawt a. Chutichuan, LALPA ropuina chu inbiakna puan inah Israela thlahte zawng zawng hmaah a lo lang a.

Mipui tân Mosia a ṭawngṭai

11 Tichuan, LALPAN Mosia hnênah, “Hêng mipuite hian eng chen nge mi ngaihnêp ang a, an zînga chhinchhiahna ka tih ṭhin chung pawhin eng chen nge mi rin loh dâwn? 12 Hriin ka hrem ang a, ka timang ang a, nangmahah hian an aia ropui leh thiltithei zâwk hnam ka din teh zâwk ang,” a ti a. 13 Tin, Mosian LALPA hnênah, “Aigupta miten an hre reu reu vang e; hêng mipuite hi an zîng ata i thiltihtheihnaa i hruai chhuah an ni si a; 14 hemi rama mite hi an hrilh ang a; hêng mipuite zîngah hian i awm tih an hre tawh a; hmaichhan meuhvin an hmu tawh si chia, i chhûm chu an chungah a awm ṭhîn a; tin, chhûnah chhûm ding, zânah meiin an hma i hruai ṭhîn si a. 15 Hêng mipuite hi i tihhlum phiar chuan i hmingthan hretu chuan, 16 ‘LALPA chuan hêng mipuite hi chhechhama a tiam ramah chuan a hruai theih loh avângin thlalêrah a tihlum a ni,’ tiin an sawi dah ang e. 17-18 ‘LALPA chu thinnel tak, ngilneihna ngah, khawlohna te, bawhchhiatna te ngaidam ṭhîn; thiam lova ruatte chhuah mai ngai lo; pate khawlohna avânga fate, fate fa lehte, chhuan thumna leh chhuan lina thleng pawha hrem ṭhîn a ni,’ tia i lo sawi tawh ang khân i thiltihtheihna chu hlen teh hrâm khai. 19 I ngilneihna a nasat ang ngei leh Aigupta ram ata tûn thlenga i ngaidam ang hian, mipuite khawlohna hi ngaidam teh khai,” a ti a. 20 Tin, LALPA chuan, “I thu ang chuan ka ngaidam e; 21 amaherawhchu, ka nunna leh LALPA ropuina tihkhah leilung chhâlin ka sawi e, 22 Aigupta ram leh thlalêra ka ropuina leh ka thil mak tihte hmua, chuti chung pawha vawi sâwm zet mi la fiaha, ka thu la pawm lo mi zawng zawngte hian, 23 an thlahtute hnêna chhechhama ka tiam ram chu an hmu tawp lo vang a; an zînga mi ngainêptu rêng rêngte pawhin an hmu bawk hek lo vang; 24 ka chhiahhlawh Kaleba erawh hi chuan rilru dang a puta, mi zui takzet avângin, ani hi chu a va kalna ramah chuan ka hruai ang a, a thlahte chuan an luah ang. 25 Khai le, Amalek-ho leh Kanaan-ho chu ruamah chuan an awm a; naktûkah lêt ula, Tuifinriat Sen kawng lam thlalêrah lût rawh u,” a ti a.

Pathianin phunnawiho a hrem

26 Tin, LALPAN Mosia leh Arona a bia a, 27 “Hêng mi suaksual pung khâwmho, ka chunga phunnawi ṭhîn hi eng chen nge ka dawh ang? Israela thlahte phunnawina, ka chunga an phunnawinate chu ka hria e. 28 An hnênah, ‘Ka nunna chhâlin ka sawi e, ka beng hriat ngeia in sawi ang takin in chungah ka ti ang: 29 in ruangte chu he thlalêrah hian a awm ang a; in zînga mi chhiar tawh sa zawng zawng, kum sawmhnih achin chung lam mi ka chunga phunnawiho zawng zawngte chu, 30 bân phar meuhva, “Ka awmtîr ang che u,” ka tih ramah chuan Jephunea fapa Kaleba leh Nuna fapa Josua chauh lo chu in lût tawp lo vang. 31 Amaherawhchu, “Man tûr mai an ni ang,” in tih in fanaute hi chu ka hruai lût ang a, in duh loh ram chu an hria ang. 32 Nangni erawh chu in ruang he thlalêrah hian a awm ang. 33 In fate chu thlalêrah kum sawmli an tei an tei ang a, thlalêra in ruangte a riral hma loh chuan in nawhchizawrhna chu an tuar ang. 34 Ram in va enthlâk ni zât, ni sawmli chu, ni khat aiah kum khat zêl, kum sawmli chhûng zet in bawhchhiatna in tuar phah ang a; tichuan, ka tum dân ka tihdanglam hi in hria ang. 35 Kei LALPA hian mi suaksual pung khâwm, mi dodâla pung khâwmho chungah hei hi ka ti ngei ang ka lo ti tawh a: hemi thlalêrah hian an boral ang a, chutah chuan an thi ang, LALPAN a ti,’ ti rawh u,” tiin. 36-37 Tin, ram enthla tûra Mosia tirh lo kîr leh, ram chanchin a ṭha lo zâwnga rawn sawia, a chunga pung khâwmho phunnawitîrtu, ram a ṭha lo zâwnga rawn sawitute chu LALPA hmaah hriin an thi a. 38 Ram enthla tûra kalte zînga Nuna fapa Josua leh Jephunea fapa Kaleba erawh chu an thi ve lo va.

An luah tûr ram beih hmasak ber ṭum

39 Tichuan, Mosian chûng thute chu Israela thlahte zawng zawng chu a hrilh a, mipuite chu an lungngai ta hle mai a. 40 Chutichuan, zîng takah an tho va, tlâng chhîpah an han chho va, “Ngai teh, hei kan lo kal e, LALPAN min tiamna hmunah chuan kan kal ang e, kan lo sual ta a ni e,” an ti a. 41 Tin, Mosian, “Hmuingîlna a ni lo vang tih hre reng chungin engah nge LALPA thupêk in bawhchhiat teh rêng? 42 In zîngah LALPA a awm si lo va, hmêlmate lo tihhlum mai tûrin chho suh u. 43 In hmaah khian Amalek-ho leh Kanaan-ho an awm a ni, khandaiha tihhlum in ni mai ang; LALPA chu in hawisan tâk avângin in hnênah LALPA chu a awm lo vang,” a ti a. 44 Nimahsela, tlang chhîpah chuan kal an tum ṭâlh a. Amaherawhchu, LALPA thuthlung bâwm leh Mosia chu bûk ata an chhuak ve lo. 45 Chutichuan, chumi tlânga awm Amalek-ho leh Kanaan-ho chu an lo chhuk a, an bei a, Horma thlengin an vaw thlu rum mai a.

Numbers 15

Inthawi dân tûr

1 Tin, LALPAN Mosia a bia a, 2 “Israela thlahte bia la, an hnênah, ‘In awmna tûr ram ka pêk che u in thlen huna, 3 LALPA hnêna meia thilhlan, hâlral thilhlan emaw, thutiam hlen tûra inthawina emaw, mahni duh thua thilhlan emaw, in kût hunbiah emaw, ran rual zinga mi emaw, berâm rual zînga mi emawa LALPA tâna rimtui siam tûr emawa in hlan hun chuan, 4 LALPA hnêna a thilhlan hlântu apiangin chhangphut thilhlan, chhangphut dip mi epha hmun lia ṭhena hmun khat, hriak hin hmun lia ṭhena hmun khata hmeh a hlân tûr a ni; 5 tin, in tûr thilhlanah uain hin hmun lia ṭhena hmun khat hâlral thilhlan emaw, inthawina emawa hlannaah berâmno hming kimin in buatsaih tûr a ni. 6 Tin, berâmpaah chuan chhangphut thilhlan, chhangphut dip mi epha hmun sâwma ṭhena hmun hnih, hriak hin hmun thuma ṭhena hmun khata hmeh in buatsaih tûr a ni; 7 tin, in tûr thilhlanah chuan LALPA tâna rimtuiah uain hin hmun thuma ṭhena hmun khat in hlân tûr a ni. 8 Hâlral thilhlanah emaw, thutiam hlen tûra inthawinaah emaw, LALPA hnêna remna thilhlanah emawa bâwngpa in buatsaih hun chuan, 9 bâwngpa hlan rual chuan chhangphut thilhlan chhangphut dip mi epha hmun sâwma ṭhena hmun thum hriak hin chanvea hmeh in hlân tûr a ni. 10 Tin, in tûr thilhlanah uain hin chanve, LALPA tâna rimtui meia thilhlan in hlân tûr a ni. 11 “ ‘Chutiang chuan bâwngpa te, berâmpa te, berâmno a pa te, kêlno te an hming kimin tih tûr a ni. 12 An tam dân azir zêlin in buatsaih ang a, an tam dân ang zêl chuan in hlân tûr a ni. 13 Chumi rama piang zawng zawng chuan hetiang zêl hian, LALPA tâna rimtui meia thilhlan an hlan hunin an ti tûr a ni. 14 Tin, hnam dang mi in hnêna khawsa ṭhîn emaw, tu pawh in hnêna khawsa zêl ṭhîn tûrte emaw, LALPA tâna rimtui meia thilhlan hlân duh apiang chuan in tih ang takin an ti ve tûr a ni. 15 In thlahte thleng atân mipuite leh hnam dang in hnêna awmte tân pawh, dân angkhat chauh a awm tûr a ni; LALPA hmaah hnam dangte chu nangmahni ang chiah an ni ang. 16 In tân leh in hnêna hnam dang awmte tân dân hmun khat leh tih dân hmun khat chauh a awm ang,’ ti rawh,” tiin. 17 Tin, LALPAN Mosia a bia a, 18 “Israela thlahte bia la, an hnênah, ‘Heti hi a ni ang a, ka hruaina tûr che u ram in va thlena, 19 chumi ram chhang in ei hun chuan LALPA hnênah thên thilhlan in hlân tûr a ni. 20 In chhang hmeh hmasak ber zînga mi hlâwm khat chu thên thilhlanah in hlân tûr a ni; hruiha mi thên thilhlanah in thên angin in thên tûr a ni. 21 In thlahte thlengin in chhang hmeh hmasak ber chu LALPA hnêna thên thilhlan atân in hlân zêl tûr a ni. 22-23 “ ‘Tin, hêng thupêk zawng zawng, LALPAN Mosia hnêna a sawi, LALPAN thu a pêk tirh aṭanga in thlahte thleng atâna Mosia hmanga thu a pêk zawng zawng che u hi, in pawm lohva, in bawhchhiat chuan, 24 hetiang hi a ni ang a, pung khâwmhovin hre lova tihpalh a nih chuan, pung khâwmho zawng zawng chuan hâlral thilhlan LALPA tâna rimtuiah bâwngtuai pakhat an hlân ang a, a dân pangngai angin chhangphut thilhlan leh in tûr thilhlan nên, sual thawi nân kêlpa pakhat an hlân tel bawk tûr a ni. 25 Tin, puithiamin Israela thlah pung khâwm zawng zawng tân remna a siam ang a, ngaihdam an ni ang, tihpalh a nih avâng leh an thilhlan, LALPA tâna meia thilhlan leh an tihsual aiah sual thawina an hlân tak avângin; 26 Israela thlah pung khâwm zawng zawngte chu ngaihdam an ni ang a, an zînga hnam dang awmte pawh; mipui zawng zawngin an tihpalh a nih avângin. 27 “ ‘Tin, miin hre lovin thil a tihsual chuan sual thawi nân kêlnu pakhat kum khat mi a hlân tûr a ni. 28 Hre lova LALPA hmaa tisualtu tân chuan puithiamin remna a siam tûr a ni; tichuan, ngaihdam a ni ang. 29 Hre lova tisualtu tân, Israela thlah, chu rama piangte tân leh hnam dang mi an zînga awmte tân pawh dân angkhat in nei tûr a ni. 30 Amaherawhchu, hre reng sia tilui chu, chu rama piang emaw, hnam dang emaw pawh ni sela, LALPA sawichhia a ni a; chu mi chu a chipuite zîng ata tuithlâr tûr a ni. 31 LALPA thu chu a hmuhsita, a thupêk chu a bawhchhiat avângin chu mi chu tuithlâr hlauh tûr a ni a, a khawlohna mawh chu a phur ang,’ ti rawh,” tiin.

Chawlhni bawhchhia

32 Israela thlahte thlalêra an awm lai chuan mi pakhat, Chawlhnia thing fawm hi an hmu a. 33 A thing fawm hmutute chuan Mosia leh Arona leh mipuiho hnênah chuan an hruai a. 34 Engtia tih tûr nge tih la puan loh a nih avângin tân inah an khung a. 35 Tin, LALPAN Mosia hnênah, “Chu mi chu tihhlum ngei ngei tûr a ni, daipâwnah mipui zawng zawng chuan lungin an dêng tûr a ni,” a ti a. 36 Tichuan, LALPAN Mosia thu a pêk ang chuan mipui zawng zawng chuan daipâwnah an hruai a, lungin an dêng hlum ta a.

Puan fêm siam dân tûr

37 Tin, LALPAN Mosia a bia a, 38 “Israela thlahte hnênah an thlahte thlenga an puan hmâwrah a fêm siam tûr leh, a hmâwr tin fêmah a dumpâwl dah tûrin ti rawh: 39-40 chumi fêm chu in en ṭhina, LALPA thupêk zawng zawng in hriat renga in zawm nân leh, nawhchizuara in awm ṭhin anga in thinlung duh zâwng leh, in mit la zâwng ûma in awm loh nân leh, ka thupêk zawng zawngte chu in hriat renga, in zawma, in Pathian tâna in thianghlim theih nân a ni. 41 In Pathian ni tûra Aigupta ram ata hruai chhuaktu che u LALPA in Pathian ka ni. Kei hi LALPA in Pathian chu ka ni,” tiin.

Numbers 16

Kora te, Dathana te leh Abirama te helna

1 Levia fapa Kohatha, chu mi fapa Izara, chu mi fapa Kora chu Eliaba fapate, Dathana leh Abirama leh Peletha fapa Ona, Reubena thlahte nên chuan mite an hruai a; 2 Israela thlahte, mi lâr deuh deuh mipui zînga hotu, rorêltua thlante zînga mi zahnih leh sawmngate nên, Mosia hmaah an va thawk a. 3 Mosia leh Arona phiarin an pung khâwm a, an hnênah, “In induh êm mai, mipuite chu an thianghlim ṭheuh si a, LALPA pawh an zîngah a awm si a. Eng vângin nge LALPA mipui pung khâwmho chunga in indah chungnun bîk?” an ti a. 4 Chu chu Mosian a han hriat chuan a bawkkhup a; 5 tin, Kora leh a pâwlte zawng zawng hnênah chuan, “Naktuk zîngah LALPAN a tate leh a thianghlimte chu tilangin amah va hnaih tûrin a ti ang a, a thlante ngei chu amah va hnaih tûrin a ti ang. 6 Nang, Kora leh i pâwlte zawng zawng chuan heti hian ti rawh u: naktûkah mei lâknate keng ula, 7 chutah chuan mei dah ula, LALPA hmaah rimtui phul rawh u; tin, LALPAN a thlan apiang chu a thianghlim ang. Levia fapate u, in induh êm mai,” tiin a sawi a. 8 Tin, Mosian Kora hnênah, “Nangni Levia fapate u, ngaithla rawh u, 9-10 LALPA biakbûka rawngbâwla, mipuite hmaa an rawngbâwla ding tûra Israel-te Pathianin amah hnaih tûra Israel mipuite zîng ata a tihhran che u leh, Levia fapa in unaute zawng zawng nêna amah hnaih tûra a awmtîr che u hi, thil tê thamah in ngai a ni maw, puithiam nihna in la zawn cheu? 11 Chu vâng chuan nang leh i pâwlte zawng zawng LALPA dodâlin in pung khâwm a ni. Tin, Arona hian eng nge maw a tiha, a chungah hian in phunnawi?” a ti a. 12 Tin, Mosia chuan Eliaba fapa Dathana leh Abirama a kohtîr a; anni chuan, “Kan lo chho lo vang; 13 thlalêra mi tihlum tûrin hnutetui leh khawizu luanna ram ata min hruai chhuak hi thil tê tham em ni? Kan chungah i intilal lehnghâl si. 14 Hnutetui leh khawizu luanna ramah min hruai lût lo va, lo leh grêp huan ro tûr min pe bawk hek lo. Hêngho mitte hi chawl i phulsak dâwn em ni? Kan lo chho lo tawp ang,” an ti a. 15 Tichuan, Mosia chu a thin a rim ta hle mai a, LALPA hnênah, “An thilhlan chu pawm suh. An sabengtung pakhat mah ka la lo va, tu mah ka tina hek lo,” a ti a. 16 Tin, Mosian Kora hnênah chuan, “Naktûkah nang leh i mi pung khâwmho, nang nên, anni nên, Arona nên LALPA hmaah lo awm rawh u. 17 An mei lâkna keng ṭheuh sela, rimtui phul sela, LALPA hmaah mei lâkna ṭheuh, mei lâkna 250 chu rawn keng rawh se; nang leh Arona pawhin in mei lâkna keng ve ve rawh u,” a ti a. 18 Tichuan, mi tinin an mei lâkna chu an keng a, mei an dah a, rimtui an phul a, Mosia leh Arona-te nên inbiakna puan in kawngkaah chuan an va ding a. 19 Tin, Kora chuan mipui zawng zawng chu anmahni dodâlin, inbiakna puan in kawngkaah chuan a awm khâwmtîr a; tin, mipui zawng zawng chungah chuan LALPA ropuina a lo lang a. 20 Chutichuan, LALPAN Mosia leh Arona chu a bia a, 21 “Hêng mipui zîng ata hi inthiarfihlîm rawh u, ka rawn tihboral thut theih nân,” tiin. 22 Tichuan, anni chu an bawkkhup a “Aw Pathian, nunna zawng zawng hnâr i ni, mi pakhat sual avângin mipui zawng zawng chungah i thinur dâwn em ni?” an ti a. 23 Tin, LALPAN Mosia a bia a, 24 “Mipuite hnênah chuan, ‘Kora te, Dathana te, Abirama te hi bûk ata kiansan vek rawh u,’ tiin sawi rawh,” a ti a. 25 Tichuan, Mosia chu a tho va, Dathana leh Abirama-te hnênah chuan a va kal a, Israel-ho upate chuan an zui a. 26 Tin, pung khâwmho hnênah chuan, “Hêng mi sualho puan in a ṭangte hian chhuak rawh u khai; an eng mah hi khawih suh u; chuti lo chuan, an sualna zawng zawngah hian in tel ve dah ang e,” tiin a sawi a. 27 Chutichuan, Kora te, Dathana te, Abirama te bûk ata chu an chhuak ta sung sung mai a; tin, Dathana leh Abirama chu an puan in ata an lo chhuak a, an puan in kawngkaah chuan an nupui te, an fapa te, an fanau tê tête nên an ding a. 28 Tin, Mosian, “Keima rilru puakchhuaka tih a ni lo va, hêng thil ti tûr hian LALPAN mi tîr a ni tih hemiah hian in hria ang. 29 Hêng mite hi mi zawng zawng thih dân ang mai bawka an thiha, mi zawng zawng hrem ang bawka hrem an nih chuan Pathianin mi tîr lo a ni ang. 30 Amaherawhchu, LALPAN thil thar a siama, leiin a kâ a âna, anmahni leh an ta zawng zawng a lema, Seol-ah a nunga an luh erawh chuan hêng mite hian LALPA an lo ngainêp a ni tih in hria ang,” a ti a. 31 Tin, heti hi a ni a, chûng thu zawng zawng chu a sawi zawh chuan, an hnuai lei chu a lo khi chat ta phuk mai a; 32 tichuan, lei chuan a kâ a âng a, an chhûngkuain Kora mite zawng zawng, an bungrua zawng zawng nên a lem ta vek hlawm a. 33 Chutichuan, anmahni leh an ta zawng zawng chu Seol-ah chuan a nung chungin an pil ta vek a, lei chuan a kâ a chîp hnan a, pung khâwm zîng ata chu an boral ta a. 34 Tichuan, an vêla Israel mi zawng zawngte chu an au thâwmah chuan an tlân darh a, “Leiin min lem ve dah reu reu vang e,” an ti a. 35 Tin, LALPA aṭangin mei a lo chhuak a, rimtui hlântu mi zahnih leh sawmngate chu a rawn kâng hlum ta a.

Mei lâkna maichâm khuh nân an chher

36 Tin, LALPAN Mosia a bia a, 37 “Nangin mei chu tidarh la, puithiam Arona fapa Eleazara chu mei ata mei lâkna chu la chhuak tûrin hrilh rawh, thil thianghlim a ni si a. 38 Anmahni nunna chunga sualho mei lâknate pawh chu la la, maichâm khuhna thlêngah chher ni rawh se. LALPA hmaa hlan a ni a; chuvângin, a thianghlim a ni; chu chu Israela thlahte tâna chhinchhiahna a ni ang,” tiin. 39-40 Tin, puithiam Eleazara chuan kângho dâr mei lâknate chu a la a, Israela thlahte tâna hriat rengna te, Arona thlah ni lo hnam dang rêng rêng, LALPA hmaa rimtui hâl tûra an kal hnaih loh nân te, Kora leh a pâwlte anga an awm loh nân te, Mosia hmanga a hnêna LALPAN a sawi ang chuan maichâm khuh nân an chher ta a.

Aronan mipuite a chhan

41 Nimahsela, a tûkah chuan, “LALPA mite in tihlum a ni,” tiin Israela thlah mipui zawng zawng chu Mosia leh Arona chungah an phunnawi a. 42 Tin, heti hi a ni a, Mosia leh Arona chunga mipui an pun khâwm lai chuan inbiakna puan in lam chu an hawi a; tin, ngai teh, chhûmin a rawn khuh a, LALPA ropuina a lo lang a. 43 Tin, Mosia leh Arona chu inbiakna puan in kawtah chuan an kal a. 44 Tin, LALPAN Mosia a bia a, 45 “Hêng mipui zîng ata hi inthiarfihlîm rawh u, ka rawn tihboral thut theih nân,” tiin. Tin, anni chu an bawkkhup a. 46 Tin, Mosian Arona hnênah, “I mei lâkna keng la, maichâm ata mei dah la, rimtui phul la, mipui hnênah kalpui thuai la, an tân remna siam rawh; LALPA hnên ata thinurna a lo chhuak a ni. Hri a lêng ṭan mêk a ni,” a ti a. 47 Tin, Arona chuan Mosia sawi ang chuan a keng a, pungho zîngah chuan a tlân lût a; tin, ngai teh, hri chu mipui zîngah chuan a lo lêng ṭan tawh a. Tin, rimtui chu a phul a, mipui tân chuan remna a siam a. 48 Mitthi leh mi nung inkârah a ding a, hri chu a kiang ta a. 49 Tichuan, Kora chungchâng thua thite tiam lovin, hri-a thi zawng zawng chu sîngkhat leh sângli leh zasarih an ni. 50 Tin, Arona chu inbiakna puan in kawngkaa Mosia hnênah chuan a lêt leh a; tichuan, hri chu a kiang ta a.

Numbers 17

Arona tiang

1 Tin, LALPAN Mosia a bia a, 2 “Israela thlahte bia la, an chhûngkaw tin pualah tiang pakhat ṭheuh zêl, an chhûngkaw zir zêla an puipate zawng zawng zât, tiang sâwm leh pahnih la la; tin, an tiangah chuan an hming ṭheuh ziak rawh. 3 Tin, Levia tiangah chuan Arona hming ziak ang che: an chhûngkaw tin atân tiang pakhat zêl a ni tûr a ni. 4 Tin, kan inbiakna, inbiakna puan in thuhriattîrna hmaah chuan i dah tûr a ni. 5 Tin, heti hi a ni ang a, ka mi thlan tûra tiang chu a chawr ang a; tichuan, Israela thlahte phunnawina, i chunga an phunnawina hi ka tireh dâwn a ni,” tiin. 6 Chutichuan, Mosia chuan Israela thlahte chu a bia a, an puipate zawng zawng chuan an chhûngkaw tin pualah, puipa tinin tiang pakhat zêl, tiang sâwm leh pahnih an pe a: Arona tiang pawh chu an tiang zîngah chuan a tel ve a. 7 Tichuan, Mosian thuhriattîrna puan inah LALPA hmaah tiangte chu a dah a. 8 Tin, a tûkah chuan Mosia chu thuhriattîrna puan inah chuan a va kal a; tin, ngai teh, Levi chhûngkaw puala Arona tiang chu a lo chawr a, a kuhmûm a, a pâr a, vaiumkhal a lo rah a. 9 Tin, Mosia chuan LALPA hma ata tiang zawng zawng chu Israel-hote hnênah a la chhuak a; an lo en a, anmahni tiang ṭheuh chu an la a. 10 Tin, LALPAN Mosia hnênah, “Helhmang fate an ni tih hriattîr ṭhîn nân Arona tiang chu thuhriattîrna bulah dah leh rawh; tichuan, ka chunga an helna hi i tihrehsak thei dâwn nia, an thih loh nân,” a ti a. 11 Chutiang chuan Mosia chuan a ti a; LALPAN thu a pêk ang chuan a ti a. 12 Tin, Israela thlahte chuan Mosia hnênah, “Ngai teh, kan boral a ni alâwm, kan chhe zo ta, kan chhe zo vek alâwm. 13 LALPA biakbûk rawn hnaih apiangte chu an thi zêl a; kan boral vêk dâwn em ni ang?” an ti a.

Numbers 18

Puithiamte leh Levia chite hna

1 Tin, LALPAN Arona hnênah, “Nang leh i fapate leh in chhûngkua hian hmun thianghlim bawhchhiatna mawh chu in phur ang a, puithiamho bawhchhiatna mawh erawh chu nangmah ngei leh i fate chauhvin an phur ang. 2 Tin, Levia chi, i pa chi, i unauten an zawm ve chia, rawng an bâwl theih nân i kiang hnaiah awmtîr la; amaherawhchu, nang leh i fapate chu thuhriattîrna puan in bulah in awm tûr a ni. 3 I hna an puibâwm ang chia, puan in lam hna zawng zawng an chang ang a; amaherawhchu, hmun thianghlim bungbêl leh maichâm chu rawn hnaih suh se, an thih loh nân, anni emaw, nang emaw pawh. 4 Anni chuan an kawp ang chia, puan in lam hna zawng zawngah inbiakna puan in hna chu an chang ang a; hnam dang chuan an rawn hnaih tûr che u a ni lo. 5 Tin, nangin hmun thianghlim hna leh maichâm hna chu i chang ang, Israela thlahte chunga thinurna a awm tawh loh nân. 6 Tin, ngai teh, kei hian i unau Levi-hote chu Israela thlahte zîng ata ka thlang chhuak a, inbiakna puan in rawngbâwl tûra LALPA hnêna pêk, i tâna thilpêk an ni ang. 7 Tin, nang leh i fapate hian maichâm leh puanzâr chhûng lam thu-ah in puithiam hna chu in thawk ang; tin, nangin rawng i bâwl ang. Puithiam hna hi in rawngbâwl hna atân ka pe che u a; hnam dang rawn inrawlh ve apiang erawh chu tihhlum an ni ang,” a ti a.

Puithiamho chanvo tûr

8 Tin, LALPAN Arona a bia a, “Ngai teh, kei hian ka tâna thên thilhlan, Israela fate thilhlan zawng zawngte lain nang leh i fapaten kumkhuaa in chanpual atân ka pe che u a. 9 Meia hâl bâng thil thianghlimte chu i ta a ni ang a: an thilhlan tinrêng - an chhangphut thilhlan te, an sual thawina thilhlan te, an thiam loh thawina thilhlan ka hnêna an hlan tûrte lamin nang leh i fapate pual a ni ang. 10 Thil thianghlim eiin chumi chu in ei ang a, mipa zawngin an ei ang a; i pual a ni ang. 11 Hêng hi i pual a ni ang: chhangphut thilhlana an thilpêk, Israela thlahte thên thilhlan zawng zawngte lamin; nang leh i fapate leh i fanute nên in kumkhaw chanpualah ka pe che u a ni. I ina mi thianghlim zawng zawngin an ei thei ang. 12 Hriak ṭha ber te, grêp ṭha ber te, buh ṭha ber te, rah hmasa ber LALPA tâna an pêkte chu ka pe a che. 13 An lova rah hmin hmasa ber LALPA tâna an rawn lâk chu i ta a ni ang a; i ina mi thianghlim zawng zawngin an ei thei ang. 14 Israel-ho thilhlan zawng zawng chu i ta a ni ang. 15 LALPA tâna an pêk, chhûl keu hmasa ber apiang chu, mihring pawh, ran pawh i ta a ni ang a; amaherawhchu, fa tîr chu i tlan ngei tûr a ni ang a, ran thianghlim lo no piang thla hmasa ber pawh chu i tlan tûr a ni. 16 Thla khat a nihin tlan tûrte chu tlanna man i ruat dân angin, hmun thianghlima hman sekel ngain i tlan tûr a ni (sekel chu gera sawmhnih a ni). 17 Amaherawhchu, bâwngpa piang thla hmasa ber te, berâm piang thla hmasa ber te, kêl piang thla hmasa berte chu i tlan tûr a ni lo; an thianghlim a ni. An thisen chu maichâmah i theh ang a, LALPA tâna rimtuiah an thaute chu meia thilhlanah i hâl tûr a ni. 18 An sa chu i ta a ni ang, thên thilhlan irâwm leh a bawp ding lam i ta a ni ang hian. 19 Thil thianghlima thên thilhlan, Israela thlahten LALPA tâna an hlante chu in kumkhaw chanpual atân ka pe che u a ni; LALPA hmaa nang leh i fapate leh i fanute nêna chatuan chi thuthlung a ni ang.” a ti a. 20 Tin, LALPAN Arona hnênah, “An ramah chuan rochan in nei lo vang a, an zîngah chanvo in nei ve hek lo vang; Israela thlahte zînga i chanvo leh i rochan chu keimah hi ka ni.

Levia chite chanvo tûr

21 “Tin, Levia thlahte chu ngai teh, rawngbâwl hnaa an rawngbâwl hna, puan in rawngbâwl hnaa an rawngbâwl manah Israel rama sâwma pakhat zawng zawng hi ka pe a ni. 22 Tûn achinah chuan Israela thlahte chuan inbiakna puan in chu an rawn hnaih tûr a ni lo; sual mawh phurin an thi dah ang e. 23 Levi-ho hi erawh chuan inbiakna puan in rawngbâwl hna an thawk ang a, a mawh engkim an phur ang; hei hi i thlahte chen atâna dân a ni ang a, Israela thlahte zingah rochan an nei lo vang. 24 Israela thlahten sâwma pakhat LALPA tâna thên thilhlanah an hlan chu Levi-ho rochan atân ka pe a ni; chu vâng chuan an hnênah, ‘Israela thlahte zîngah rochan an nei lo vang,’ ka lo ti tawh rêng a ni,” a ti a.

Levia chite sâwma pakhat pêk dân tûr

25 Tin, LALPAN Mosia a bia a, 26 “Chûng thu lovah pawh chuan, Levi-ho chu bia la, an hnênah, ‘In rochan atâna Israela thlahte sâwma pakhat ka pêk che u an lak ata in dawn hun chuan, chumi sâwma pakhat ata sâwma pakhat chu LALPA hnênah thên thilhlanah in hlân tûr a ni. 27 Tichuan, in thên thilhlan chu hruia buh leh uain haw hmasa bera ngaih a ni ang. 28 Chutiang chuan Israela thlahte laka sâwma pakhat in dawn zawng zawnga mi chu, LALPA tâna thên thilhlanah in hlân ve zêl bawk tûr a ni a; tin, chumi LALPA thên thilhlan chu puithiam Arona in pe tûr a ni. 29 In thil dawn zawng zawnga mi chu a ṭha ber, a thianghlim ber zêl LALPA thên thilhlanah in hlân tûr a ni. 30 Chuvângin, an hnênah, chumia ṭha ber in thên hun chuan Levi-ho hruiha hâwng leh uain hâwng anga ngaih a ni ang. 31 Khawiah pawh in ei thei ang, nangni leh in chhûngte pawhin; inbiakna puan ina in rawngbâwl man a ni si a. 32 A ṭha ber in thên chuan a sual mawh in phur lo vang a, Israela thlahte thil thianghlim chu in tibawrhbâng lo vang a, in thi dâwn lo nia,’ ti rawh,” tiin.

Numbers 19

Bâwng sen vâp

1 Tin, LALPAN Mosia leh Arona a bia a, 2 “Hei hi LALPA thupêk dân chu a ni, ‘Israela thlahte chu bâwngla sen hmêlhem lo, sawisêl bo, nghâwngkawl la bel hauh loh rawn kai tûrin hrilh rawh. 3 Puithiam Eleazara i pe ang a; tin, anin daipâwnah a hruai chhuak ang a, a hmaah tuin emaw a tihlum tûr a ni; 4 tin, puithiam Eleazara chuan a kutzungṭangin a thisen chu a la ang a, inbiakna puan in hma lamah a thisen chu vawi sarih a theh ang. 5 Tin, tuin emaw bâwngla chu a mit hmuhah a hâl ang a; a vun te, a sa te, a thisen te, a êk te nên a hâl ang. 6 Tin, puithiamin sidar thing leh husop leh lazai sen a la ang a, bâwngla an hâlah chuan a paih lût tûr a ni. 7 Tin, puithiam chuan a silhfênte a su ang a, a inbual ang a, chumi zawhah chuan riahhmunah a kal ang a; tlai lam thlengin puithiam chu a thianghlim lo vang. 8 Tin, a hâltu chuan a silhfênte a su ang a, a inbual ang a, tlai lam thlengin a thianghlim lo vang. 9 Tin, mi bawrhbâng lovin bâwngla vâp chu a la khâwm ang a, daipâwn hmun faiah a dah ang a, Israela thlah mipuite tâna inthenna tuiah hman tûr a ni; chu chu sual thawina a ni. 10 Tin, bâwngla vâp tikhâwmtu chuan a silhfênte a su ang a, tlai lam thlengin a thianghlim lo vang. Hei hi Israela thlahte tân leh hnam dang an hnêna awmte tân kumkhaw dân tûr a ni.

Ruang khawih

11 “ ‘Tu ruang pawh a dektu apiang chu ni sarih an thianghlim lo vang. 12 Chu mi chu ni thum niah leh ni sarih niah a inthian ang a; tichuan, a lo thianghlim ang. Amaherawhchu, ni thum niah leh ni sarih niah a inthen loh chuan a thianghlim lo vang. 13 Tu pawhin tu ruang pawh a deha, a inthen loh chuan LALPA biakbûk a tibawlhhlawh a ni. Chu mi chu Israel mite zîng ata tuithlâr tûr a ni. Inthenna tui chu a chungah theh loh a nih avângin a thianghlim lo vang; a thianghlim lohna chu a chhûngah a la awm a ni. 14 Mi, puan ina a thih chuan hei hi a tih dân tûr chu a ni: puan ina lût apiang leh puan in chhûnga awm apiangte chu ni sarih an thianghlim lo vang a; 15 tin, bungbêl inhawng, a chhinnaa chhin loh apiang chu a bawlhhlawh a ni. 16 Tin, tu pawhin tâmlakah khandaiha thah emaw, awmlaia thi ruang emaw, mihring ruh emaw, thlân emaw a deh chuan ni sarih a thianghlim lo vang. 17 “ ‘Tin, a thianghlim lote pualah sual thawina vâp chu an la ang a, bêlah tuikhur tui nên an chhûng ang. 18 Tin, mi thiangin husop a la ang a, tuiah chuan a hnim ang a, puan in te, bungbêl zawng zawng te, chuta mi awm zawng zawng te, ruh emaw, thah ruang emaw, mitthi ruang emaw, thlân emaw khawihtute chu a theh ang. 19 Mi thiangin ni thum ni leh ni sarih niah mi thianghlim lo chu a theh ang a; ni sarih niah a tithianghlim ang a; a silhfênte a su ang a, a inbual ang a, tlai lamah chuan a lo thianghlim tawh ang. 20 Mi thianghlim lo inthian lo erawh chuan LALPA hmun thianghlim a tihbawlhhlawh avângin, chu mi chu pung khâwmho zîng ata tuithlâr tûr a ni. Inthenna tui chuan theh loh a ni a; a thianghlim lo a ni. 21 Hei hi an tân kumkhaw dân tûr a ni: inthenna tuia theh apiang chuan an silhfênte an su ang a; tin, inthenna tui khawih apiang chu tlai lam thlengin an thianghlim lo vang. 22 Tin, mi thianghlim lovin a khawih apiang chu a thianghlim lo zêl ang a; tin, chu mi khawihtu apiangte chu tlai lam thlengin an thianghlim lo vang,’ ” tiin.

Numbers 20

Kadesh hmuna thil thleng

1 Tin, Israela thlah, pung khâwmho zawng zawngte chu thla khatnaah chuan Zin thlalêrah an lût a, mipuite chuan Kadesh-ah awmhmun an khuar a; chutah chuan Miriami chu a thi a, chutah chuan an phûm a. 2 Tin, pung khâwmho chuan tui an nei ta lo va; Mosia leh Arona chungchâng thu-ah an inpun khâwm chiam a. 3 Tin, mipui chuan, “LALPA hmaa kan unaute an thih lai khân Pathianin min lo tihlum ve ta thên zâwk sela aw! 4 Engati nge LALPA mipuihote hi thi tûra thlalêrah hian i hruai luh ni, keimahni leh kan rante nên? 5 Eng vângin nge he ram ṭha lo taka min hruai lût tûrin Aigupta ram ata min tihchhuah ni? Buhbâl te, theipui te, grêp kûng te, pawmgranet te awm lohna hmun a ni a, tui in tûr rêng rêng lah a awm hek lo,” tiin Mosia chu an bei vak a. 6 Tin, Mosia leh Arona chu mipui zîng ata chu inbiakna puan in kawngkaah an kal a, an bawkkhup a; tin, LALPA ropuina an hnênah a lo lang a. 7 Tichuan, LALPAN Mosia chu a bia a, 8 “Tiang la la; pung khâwmhote chu awm khâwmtîr la, nang leh i unau Arona nên. An mit hmuhah lungpui chu a tui tichhuak tûrin hrilh la, lungpui ata chu tui i lâk chhuahsak ang a; tichuan, pung khâwmho leh an rante chu i intîr dâwn nia,” tiin. 9 Chutichuan, Mosia chuan LALPA hma ata tiang chu a thupêk ang chuan a la a. 10 Mosia leh Arona chuan pung khâwmho chu lungpui bulah chuan an awm khâwmtîr a, an hnênah, “Helhmanghote u, ngai teh u, he lungpui ata hi tui kan lâk chhuahsak dâwn che u em ni?” an ti a. 11 Tin, Mosia chuan a bân a phar a, lungpui chu a tiang chuan vawi hnih a han vua a; tichuan, tui a lo chhuak ta dur dur mai a, pung khâwmhote leh an rante chuan an in ta a. 12 Tin, LALPAN Mosia leh Arona hnênah chuan, “Mi rin lohva, Israela thlahte mit hmuha mi chawimawi loh avângin, hêng pung khâwmho hi ka pêk ramah chuan in hruai lo vang,” a ti a. 13 Hei hi Meriba tuite chu a ni; Israela thlahte chuan LALPA chu an bei vak a, chutah chuan chawimawia a awm tâk avângin.

Edom lalin a ram pal tlang a phal lo

14 Tin, Mosian Kadesh aṭangin Edom lal hnênah mi a tîr a, “I unaupa Israela chuan heti hian a ti, ‘Kan chunga tuarna lo thleng zawng zawng hi i hria a; 15 kan pi leh pute Aigupta rama an chhuka, rei tak Aigupta rama kan awm te, Aigupta miten keini leh kan pi leh pute ṭha lo taka min tih ziate kha. 16 Tichuan, LALPA kan au va, kan aw chu a lo hria a, vântirhkoh a rawn tîr a, Aigupta ram ata min hruai chhuak a; tin, ngai teh, i ram dep ber khua Kadesh-ah kan awm e. 17 Khawngaih takin i ram hi kan kal tlang teh ang. Lo emaw, grêp huanah emaw kan kal lo vang a, tuichhunchhuah tuite kan in hek lo vang; Lal Lamlianah kan kal zêl ang a, i ram kan pelh hma loh chuan ding lamah emaw, vei lamah emaw kan pêng lo vang,’ ” a ti a. 18 Tin, Edoma chuan a hnênah, “Mi pal tlang tûr a ni lo, mi pal chuan a bei tûr chein khandaih nên ka lo thawk ang,” a ti a. 19 Chutichuan, Israela thlahte chuan a hnênah, “Lamlianah kan kal chho vang a; tin, keimahni leh kan ranin i tui kan in chuan a man chu kan pe ang che; thil dang eng mah ti lovin a kalin kan kal tlang mai ang e,” an ti a. 20 Tin, ani chuan, “Kal lo vang,” a ti a. Tichuan, Edoma chu mipui tam tak nên, mi chak takte nên anmahni bei tûrin a lo thawk ta a. 21 Edoma chuan Israel mite chu a rama kal a phal ta lo va; tichuan, Israel mite chuan an kîrsan leh ta a.

Arona thih thu

22 Tichuan, Kadesh aṭangin an chhuak a; Israela thlah, mipuiho zawng zawng chuan Hor tlâng an va thleng a. 23 Tin, LALPAN Mosia leh Arona chu, Edom ram dep Hor tlângah chuan a bia a, 24 “Arona chu a chipuite hnênah hruai a ni ang; Meriba tuiahte khân ka thu dodâla in hel avâng khân Israela thlahte ka pêk ramah chuan a lût dâwn lo a ni. 25 Arona leh a fapa Eleazara chu Hor tlângah rawn hruai chho rawh; 26 Arona chu a silhfênte hlihsak la, a fapa Eleazara bel rawh; Arona chu a chipuite hnênah hruai a ni ang a, chutah chuan a thi ang,” tiin. 27 Tin, Mosia chuan LALPA thupêk ang chuan a ti a, mipui zawng zawng mit hmuhah Hor tlângah chuan an chho va. 28 Tichuan, Mosia chuan Arona chu a silhfênte a hlihsak a, a fapa Eleazara a bel a; tin, Arona chu tlâng chhîpah chuan a thi ta a. Tichuan, Mosia leh Eleazara chu tlâng ata chu an chhuk a. 29 Tin, mipui zawng zawng chuan Arona a thi tih an hriat chuan, Israel-ho zawng zawng chuan ni sawmthum an sûn a.

Numbers 21

Kanaan mite an hneh

1 Tin, Kanaan mi, Arad lal Chhim lama awmin Israel mite Atharim kawngah an lo kal tih sawi thâwm a hria a; tichuan, Israel mite chu a bei a, salahte a man nual a. 2 Tin, Israel mite chuan LALPA hnênah thu an tiam a, “Hêng mite hi kan kuta min pêk chuan an khuate hi kan tiboral hlauh ang e,” an ti a. 3 Tichuan, LALPAN Israel mite thu chu a pawm a, Kanaan mite chu a pe a, anmahni leh an khuate chu an tiboral hlauh va; a hmun hmingah chuan Horma an vuah a.

Dâr rûl khai

4 Tin, Hor tlâng aṭang chuan Tuifinriat Sen lamah Edom ram kal hualin an kal a; kawng a kual avângin mipuite rilru chu a lungni lo hle mai a. 5 Mipuite chuan Pathian leh Mosia kalhin, “Thlalêra thi tûrin engati nge Aigupta ata min hruai chhuah? Chhang awm hlei lo, tui pawh awm hlei lo; he chhang tenawm pawh hi kan nunnain a ten tawh a ni,” an ti a. 6 Chutichuan, LALPAN mipui zîngah chuan rûl chuk na mite a tîr a, mite a chu a, Israel mite tam tak an thi a. 7 Tin, mite chu Mosia hnênah an kal a. “LALPA leh nangmah kalhin kan lo ṭawng ta hi kan lo sual ta a ni e, kan zînga rûlte hi tibo tûrin LALPA hnênah ṭawngṭai rawh khai,” an ti a; tichuan, mite chu Mosia chuan a ṭawngṭaisak a. 8 Tin, LALPAN Mosia hnênah, “Rûl chuk na mi, a lem siam la, banah khai rawh; tin, heti hi a ni ang a, rûl chuk apiangin chu chu an en chuan an dam ang,” a ti a. 9 Chutichuan, Mosian dâr rûl a siam a, banah a khai a; tin, heti hi a ni a, rûl chuk apiangin dâr rûl chu an enin an dam zêl a.

Hor tlâng aṭangin Moab phaiah an kal

10 Tin, Israela thlahte chu an kal ta zêl a, Oboth-ah awmhmun an khuar a. 11 Tin, Oboth aṭang chuan an kal leh a, ni chhuahna lam Moab thlalêr bul Iye-abarim-ah awmhmun an khuar a. 12 Chuta ṭang chuan an kal leh a, Zered ruamah awmhmun an khuar a. 13 Chuta ṭang chuan an kal leh a, Amor-ho ramri aṭanga lo filawr thlalêra Arnon lehlam pangah awmhmun an khuar a; Arnon chu Moab ramri, Moab leh Amor-ho inkâra awm a ni a. 14 Chuvângin, LALPA Indonate Buah chuan “Supha-a Vaheb, Arnon ruamte, 15 Ar awmna lama thle Moab rama innghat Ruam awihtlân pangpêrte chu,” tia sawi a ni. 16 Chuta ṭang chuan Beer-ah an kal leh a; chu chu LALPAN Mosia hnêna, “Mipuite chu ko khâwm la, tui ka pe ang e,” a tihna tuichhunchhuah chu a ni. 17 Tin, he hla hi Israel-ten an sa a: “Aw tuikhur, lo chik chhuak la, zaiin chawi la, 18 Lalten an laih tuikhur chu. An lal tiang leh an talhtuma Mipuite mi lianho laih chu.” Tin, thlalêr aṭang chuan Matana-ah an kal leh a; 19 tin, Matana aṭangin Nahaliel-ah, Nahaliel aṭang chuan Bamoth-ah, 20 Bamoth aṭang chuan Moab lova ruam leh thlalêr zuk chhuk en Pisga chhîpah.

Lal Sihona leh Oga an titlâwm

21-22 Tin, Israel mite chuan Amor-ho lal Sihona hnênah, “I ramah hian min kal tlangtîr rawh khai. Lovah emaw, grêp huanah emaw kan pêng lo vang a; tuichhunchhuah tuite chu kan in lo vang. I ram kan pelh hma loh chuan Lal Lamlianah kan kal zêl ang e,” tiin mi an tîr a. 23 Nimahsela, Sihona chuan Israel mite chu a rama kal tlang a phal lo va. Tichuan, Sihona chuan a mite zawng zawng chu a khâwm vek a, Israel mite bei tûrin thlalêrah chuan an thawk chhuak ta zâwk a, Jahaz a va thleng a; tin, Israel mite chu a bei a. 24 Tin, Israel mite chuan khandaihin an bei a, a ram chu Arnon aṭanga Jabok thlengin, Amona thlahte thleng hialin an neihsak a; Amona thlahte ram chu kulha hung tlat a ni. 25 Tin, Israel mite chuan chûng khua zawng zawngte chu an la a; tichuan, Israel mite chu Amor-ho khua zawng zawngahte chuan an awm a, Hesbon leh a khawper zawng zawngahte pawh chuan. 26 Hesbon khua chu Amor-ho lal Sihona khua a ni a, ani chu chumi hmaa Moab lal lo beia a kut ata a ram zawng zawng, Arnon thlenga lâksaktu a ni. 27 Chuvângin, hlaa phuahtute chuan, “Hesbon-ah lo kal ula, Sihona khawpui chu din leh tihngheh ni se; 28 Hesbon aṭangin mei a chhuak a, Sihona khawpui aṭangin meialh; Moab-a Ar a kâng zo va, Arnon hmun sâng lalhote chu. 29 I chung a pik e, Moab! In boral ta, aw Kemos mi! A fapate chu tlân bo atân, A fanute salah a pe, Amor-ho lal Sihona hnênah. 30 Kan han kâp a, Hesbon a boral, Dibon thlengin, Nopha thlengin kan tiṭiau, Chu chuan Medeba a thleng,” an ti. 31 Chutiang chuan a ni, Amor-ho ramah Israel mite chu an awm. 32 Tin, Mosian Jazer va thlîthlai tûrin mi a tîr a, chuta khuate chu an la a, Amor-ho awmte chu an hnawt chhuak a. 33 Tin, an lêt a, Basan kawng lamah an chho va. Tin, Basan lal Oga chu anmahni bei tûrin, amah leh a mite zawng zawng, Edrei-a lo bei tûrin a thawk chhuak a. 34 Tin, LALPAN Mosia hnênah, “Amah chu hlau suh; amah pawh, a mite zawng zawng pawh, a ram pawh i kutah ka pe tawh a ni; Hesbon-a awm Amor-ho lal Sihona chunga i tih angin i ti tûr a ni,” a ti a. 35 Chutichuan, amah pawh, a fapate pawh, zuah rêng rêng nei lovin a mite zawng zawng nên an that a; a ram chu an luahsak ta a.

Numbers 22

Moab lalin Balaama a sâwm

1 Tin, Israela thlahte chu an kal zêl a, Jeriko zâwn Jordan râla Moab phaiahte awmhmun an khuar a. 2 Tin, Zipori fapa Balaka chuan Israel miten Amor-ho an tih dân zawng zawng chu a hria a. 3 Tin, Moab-hote chuan mite chu an hlau hle mai a, an tam si a; Israela thlahte avâng chuan Moab-hote chu an mangang a. 4 Tichuan, Moab-hote chuan Midian-ho upate hnênah, “Hêng mipuite hian bâwngin hlobet an pet zo angin kan vêla mi zawng zawng an pet zo dâwn e,” an ti a. Chumi lai chuan Zipori fapa Balaka chu Moab lal a ni a. 5-6 Tin, ani chuan, “Ngai teh, hnam pakhat, Aigupta ram aṭanga lo chhuakho an lo awm a; ngai teh, leilung an dâp a, min depah an awm a! Khawngaih takin lo kal la, hêng mite hi ânchhia min va lawhsak teh khai, keia tân chuan an chak lutuk a ni. Kan that theiin, kan ngam theiin, kan ram ata hi kan hnawt chhuak thei mial mahna; mal i sâwm apiangte chu malsâwmin an awm a, ânchhia i lawh apiangte chu ânchhe dawngin an awm ṭhîn tih ka hre si a,” tia ko tûrin a thlahte awmna ram Lui kama Pethor-ah Beora fapa Balaama hnênah mi a tîr a. 7 Tichuan, Moab upate leh Midian upate chu aien man tûr kengin an chhuak ta a, Balaama hnên chu an va thleng a, Balaka thuchah chu an hrilh a. 8 Tin, ani chuan an hnênah, “Zânin chu hetah riak ula, LALPAN min hrilh ang angin in hnênah thu ka rawn thlen ang che u,” a ti a. Tichuan, Moab mi liante chu Balaama hnênah chuan an riak ta a. 9 Tin, Balaama hnênah chuan Pathian a lo kal a, “I hnêna mite hi tute nge ni?” a ti a. 10-11 Tin, Balaama chuan Pathian hnênah, “Zipori fapa Moab lal Balaka chuan ka hnênah, ‘Ngai teh, Aigupta ram aṭanga lo kal hnam chuan leilung an dâp a. Lo kal la, ânchhia mi va lawhsak rawh, ka do theiin ka hnawt chhuak thei mial mahna,’ tiin mi a rawn tîr a ni,” a ti a. 12 Tin, Pathianin Balaama hnênah chuan, “An hnênah i kal tûr a ni lo. Chung mite chu ânchhia i lawh tûr a ni lo, mal ka sâwmte an ni e,” a ti a. 13 Tichuan, Balaama chu zîngah a tho va, Balaka mi liante hnênah chuan, “In ramah haw leh tawh u; LALPAN in hnêna kal tûra chhuah a phal lo a ni,” a ti a. 14 Chutichuan, Moab mi liante chu an tho va, Balaka hnênah an kal a, “Balaama chuan kan hnêna lo kal a duh lo,” a ti a. 15 Tin, Balaka chuan mi lian tam lehzual, an aia ropui zâwk a tîr leh a. 16 Tin, Balaama hnên an va thleng a, a hnênah, “Zipori fapa Balaka chuan heti hian a ti a ni, ‘Ka hnêna i lo kal hi eng mahin dâl teh suh se; 17 mi ropui takah ka siam ang chia, ka hnêna i sawi apiang chu ka ti zêl ang. Chuvângin, lo kal hrâm la, hêng mite hi ânchhia mi va lawhsak teh hrâm khai,’ a ti,” an ti a. 18 Tin, Balaama chuan Balaka mite chu a chhâng a, an hnênah, “Balaka hian a in chu tangka leh rangkachaka khatin mi pe dâwn mah sela, eng khaw tê mah LALPA ka Pathian thu bawhpêlin ka ti thei lo. 19 Chuvângin, LALPAN ka hnênah engtin nge a sawi leh dâwn teh rêng, zânin pawh hetah riak teh phawt u khai,” a ti a. 20 Tin, zânah chuan Balaama hnênah Pathian chu a lo kal a, a hnênah, “Heng mite hi nangmah kova lo kal an nih chuan, tho la, an hnênah kal rawh; amaherawhchu, i hnêna ka sawi chauh hi i ti tûr a ni,” a ti a. 21 Tichuan, Balaama chu zîngah a tho va, a sabengtung a thuam a, Moab mi liante hnênah chuan a kal ta a.

Balaama leh a sabengtung

22 Tin, a kal avâng chuan Pathian thin chu a lo alh ta a; tin, LALPA vântirhkoh chu a lo dang tûrin kawngah a lo ding a. A sabengtung chunga chuang a ni a, a chhiahhlawhte pahnih a hnênah chuan an awm ve a. 23 Tin, sabengtung chuan LALPA vântirhkoh, khandaih kenga kawnga ding chu a hmu a; tichuan, sabengtung chu kawng ata chu a pêng a, ram lakah a kal a. Tin, Balaama chuan sabengtung chu kawnga lêttîr tumin a vua a. 24 Tin, LALPA vântirhkoh chu grêp huan pal leh pal inkâr khuarah a ding a. 25 Tin, sabengtung chuan LALPA vântirhkoh chu a hmu a, pal chu a va nghêng a, Balaama ke chu palah chuan a nghêng bet a; tichuan, a vaw leh a. 26 Tin, LALPA vântirhkoh chu piah leh deuhvah a kal a, hmun chêp lai tak, ding lam emaw, vei lam emaw pawha pênna awm lohna lai takah a ding a. 27 Tin, sabengtung chuan LALPA vântirhkoh chu a hmu a, Balaama chu a bawhpui ta a; tichuan, Balaama thin chu a lo alh ta a, a tiangin sabengtung chu a vua a. 28 Chutichuan, LALPAN sabengtung chu a ṭawngtîr a, Balaama hnênah chuan, “Eng ka tih che nge, hetia vawi thum zet mi vuak tâk?” a ti a. 29 Tin, Balaaman sabengtung hnênah chuan, “Mi tihnawmnah avângin a ni. Khandaih phei chu lo keng ila, ka tihlum tawh hial ang che chu,” a ti a. 30 Tin, sabengtung chuan Balaama hnênah, “Tûn thlenga i chuan fona i sabengtung ka ni lâwm ni? Hetiang hian ka ti ngai che em ni?” a ti a. Ani chuan, “Ti ngai lo ve,” a ti a. 31 Tin, LALPAN Balaama mit chu a tihvârsak a; tichuan, LALPA vântirhkoh, khandaih kenga kawnga ding chu a hmu ta a; a kûn a, hmaia lei siin a bawkkhup a. 32 Tin, LALPA vântirhkoh chuan a hnênah, “Engati nge hetia vawi thum tlawng i sabengtung i vuak? Ngai teh, ka hmaah hian i kal lohna tûra i kal avângin lo dang tûr chein ka lo chhuak a ni. 33 Sabengtung chuan mi hmu a, ka hmaah vawi thum a pêng a nih kha; pêng lo phei sela chu ani chu tihlum si lovin ka tihlum hial ang che chu,” a ti a. 34 Tin, Balaama chuan LALPA vântirhkoh hnênah, “Ka lo sual ta a ni; mi dang tûrin kawngah i ding tih ka hre si lo va. Chuvângin, i lâwm loh chuan ka kîr leh mai ang e,” a ti a. 35 Tin, LALPA vântirhkoh chuan Balaama hnênah, “Heng mite hnênah hian kal la; amaherawhchu, i hnêna ka thusawi chauh i sawi tûr a ni,” a ti a. Chutichuan, Balaama chu Balaka mi liante hnênah chuan a kal ta a.

Moab lal Balakan Balaama a lo lâwm

36 Tin, Balakan Balaama a lo kal tih a hriat chuan, Arnon lama an ramri chin Moab khawpui thlengin a va hmuak a. 37 Tin, Balaka chuan Balaama hnênah, “Ṭhahnemngai taka ko tûr chein mi ka rawn tîr a ni lâwm ni? Engati nge ka hnênah i lo kal duh loh? Mi ropui takah ka siam thei lo che em ni?” a ti a. 38 Tin, Balaama chuan Balaka hnênah, “Ngai teh, hei ka lo kal ta a; eng pawh mai sawi theihna rêng rêng ka nei em ni? Pathianin ka kâa thu a dah chauh ka sawi dâwn a ni,” a ti a. 39 Tichuan, Balaama chu Balaka hnênah chuan a kal ta a, Kiriath-huzoth an va thleng a. 40 Tin, Balaka chu bâwng leh berâmin a inthawi a, Balaama leh a hnêna mi lian awmte chu a pe a. 41 Tin, heti hi a ni a, a tûk zîngah Balaka chuan Balaama chu a hruai a, Baala hmun sângahte chuan a chhohpui a, chuta ṭang chuan mipui awmna chin zawng zawng a hmu phâk a.

Numbers 23

Balaama hrilh lâwkna hmasa

1 Tin, Balaama chuan Balaka hnênah, “Hetah hian maichâm pasarih min siam la, bâwngpa pasarih leh berâmpa pasarih min buatsaihsak rawh khai,” a ti a. 2 Balaka chuan Balaama sawi ang chuan a ti a; tin, Balaka leh Balaama chuan maichâm tinah chuan bâwngpa pakhat leh berâmpa pakhat an hlân a. 3 Tin, Balaama chuan Balaka hnênah, “I hâlral thilhlan bulah hian lo ding reng la, kei chu ka han kal hrang ang a; LALPA chu mi be tûrin a lo kal mai pawh a ni thei a, mi hrilh apiang chu ka hrilh ang che,” a ti a. Tichuan, tlâng kawlh vel vulah a han kal a. 4 Tin, Pathianin Balaama chu a lo tâwk a; tin, Balaama chuan a hnênah, “Maichâm pasarih chu ka siam tawh a; tin, maichâm tinah chuan bâwngpa pakhat leh berâmpa pakhat ka hlân ṭheuh va,” a lo ti a. 5 Tin, LALPAN Balaama kâah chuan thu a dah a, “Balaka hnênah chuan kîr leh ta la, va sawi chhâwng rawh,” a ti a. 6 Tichuan, a hnên lamah chuan a lêt leh ta a; tin, ngai teh, a hâlral thilhlan bulah chuan a lo ding reng a, amah leh Moab mi lian zawng zawngte nên. 7 Tin, ani chuan thu chu a sawi ta a. “Aram ata Balakan min hruai a, Chhak lam tlânga Moab lal chuan, ‘Lo kal la, Jakob-ho ânchhia min lawhsak rawh, Lo kal la, Israel-ho min demsak rawh,’ 8 Engtin nge Pathian ânchhe lawh loh ka lawh ang? Engtin nge Pathian dem loh ka dem ang? 9 Lungpui chung aṭangtein anni chu ka hmu si a, Tlâng aṭangtein anni chu ka hmu a, Ngai teh, hnam hrang daih an ni, Hnam dang zînga telh loh tûr an ni. 10 Jakob-ho vaivut chu tu nge chhiar thei ang a, Israel-ho hmun lia ṭhena hmun khat chu tu nge chhiar thei ang? Mi fel thih angin thi ve ila, Ka tâwpna chu a tâwpna ang ni se!” a ti a. 11 Tin, Balaka chuan Balaama hnênah, “I mi tih dân hi engtizia nge ni? Ka hmêlmate ânchhe lawh tûrin ka hruai chia, hei, mal i sâwm ta hlauh zâwk si!” a ti a. 12 Ani chuan a chhâng a, “LALPAN ka kâa a dah chu ka sawi ngei tûr a ni lâwm ni?” a ti a.

Balaama hrilh lâwk vawi hnihna

13 Tin, Balaka chuan a hnênah, “Hmun dangah i kal leh teh ang, chuta ṭang chuan i hmu thei hlawm ang a; an awmna chin zawng zawng i hmu ang a, an za erawh chuan i hmu vek kher lo vang; chuta ṭang chuan ânchhia min lawhsak ang che,” a ti a. 14 Tichuan, Zophim-ho awmna Pisga chhîpah a hruai chho va, maichâm pasarih a siam a, maichâm tinah chuan bâwngpa pakhat leh berâmpa pakhat a hlân a. 15 Tin, Balaka hnênah chuan, “Sawlaia LALPA ka va biak hlânin i hâlral thilhlan bulah hian lo ding reng rawh,” a ti a. 16 Tin, LALPAN Balaama chu a lo tâwk a, a kâah chuan thu a dah a, “Balaka hnênah kîr leh ta la, a hnênah va sawi chhâwng rawh,” a ti a. 17 Tin, a hnênah chuan a va kal a, ngai teh, a hâlral thilhlan bulah chuan a lo ding reng a, Moab mi liante pawh a hnênah chuan an awm ve a. Tin, Balaka chuan a hnênah, “LALPAN eng nge a lo sawi?” a ti a. 18 Tichuan, ani chuan thu chu a sawi ta a: “Tho la, Balak, ngaithla rawh; Zipori fapa, ka thu ngai rawh. 19 Pathian chu dâwt hmang mihring a ni lo va, Inlamlêt hmang hringfa a ni hek lo. A sawi tawh chu a ti lo vang em ni? A lo sawi tawh chu a tipuitling lo vang em ni? 20 Ngai teh, malsâwm tûrin thu ka hmu, Mal a sâwm tawh a, ka tidanglam thei lo. 21 Jakob-ho khawlohna rêng a hmu lo va, Israel-hovah chhiatna rêng ka hmu hek lo. LALPA an Pathian chuan a awmpui a, An lal atân an hmang a ni. 22 Aigupta aṭangin Pathianin a hruai chhuak hlawm, Sele tha ang mai an pu a, 23 Jakob-ho chungah dawi âtna a awm lo. Israel-ho chungah dawi vaihna a awm hek lo. Jakob-ho leh Israel-ho hnênah Pathian thiltih chu tihlan zêl a ni. 24 Ngai teh, mipuite chu sakeibakneipui angin an tho va, Sakeibaknei angin an zuang tho va, An sa seh an ei hma chuan an mu lâwng, An seh thisen an in hma chuan,” a ti a. 25 Tin, Balaka chuan Balaama hnênah, “Anchhia lawh hek suh la, malsâwm hek suh,” a ti a. 26 Nimahsela, Balaama chuan a chhâng a, Balaka hnênah, “ ‘LALPAN a sawi zawng zawng chu ka ti ngei tûr a ni,’ tiin ka hrilh che a ni lâwm ni?” a ti a.

Balaama hrilh lâwk vawi thumna

27 Tin, Balaka chuan Balaama hnênah, “Hawh teh, hmun dangah ka hruai teh ang che; chuta ṭang chuan ânchhia min lawhsak Pathianin a remti mial dah law maw,” a ti a. 28 Tichuan, Balaka chuan Balaama chu thlalêr zuk chhuk en Peor chhîpah a hruai chho va. 29 Tin, Balaaman Balaka hnênah chuan, “Hetah hian maichâm pasarih min siamsak la, bâwngpa pasarih leh berâmpa pasarih min buatsaihsak rawh,” a ti a. 30 Tin, Balaka chuan Balaama sawi ang chuan a ti a, maichâm tinah chuan bâwngpa pakhat leh berâmpa pakhat a hlân a.

Numbers 24

1 Chutichuan, Israel-ho malsâwmsak chu LALPA duh zâwng a ni tih Balaaman a hriatin, ni danga a tih ang khân dawi âtna lam ti tûra kal lovin thlalêr lam a pan ta zâwk a. 2 Tin, Balaama chu a vanvadâk a, Israel mite chu an hnam dân zir zêla awm a hmu a; tin, Pathian thlarau a chungah a lo thleng a. 3 Tin, thu chu a sawi ta a: “Beora fapa Balaama, Mit vâra, 4 Pathian thute hriaa, Engkimtitheia inlârna hmua, Tlu bawkkhupa mit lo vâr ta chuan, 5 ‘Aw Jakob-ho, in puan inte chu a va ṭha êm! Aw Israel-ho, in biakbûkte chu! 6 Ruam angin a pharh duai a, Lui kama huan ang, LALPA phun sasua ang, Lui kama sidar thingte ang an ni. 7 Ruahtui tam tak a dawng ang a, Tui tamna hmunah thlai chîte a chîng ang. A lal chu Agaga aiin a ropui ang a; A ram chu chawimawiin a awm ang. 8 Aigupta ata Pathianin a hruai chhuak a, Sele tha ang mai an pu a, An hmêlma, hnam dangte chu an ei zo vang a, An thalin an kâp tlang ang. 9 An kûn a, sakeibaknei angin an bawk a, Sakeibakneipui ang maiin; tu nge titho ngam ang? Malsâwmtu apiang che u chu malsâwmin awm sela, Anchhe lawhtu apiang che u chu ânchhe lawhin awm rawh se,’ a ti,” a ti a. 10 Tichuan, Balaama chungah chuan Balaka thin chu a alh a; Balaka chuan Balaama hnênah, “Ka hmêlmate ânchhe lawh tûrin ka ko chia, hei, vawi thum zet mal i sâwm ta a. 11 Chuvângin, i awmnaah kal bo daih rawh; ropui taka chawisân che ka rilrûk a ni a; nimahsela, ngai teh, LALPAN chawisân che a dâl ta a nih hi,” a ti a. 12-13 Tin, Balaama chuan Balaka hnênah, “Balaka hian a in chu tangkarua leh rangkachaka khatin min pe dâwn mah sela, a ṭha lam emaw, a chhe lam emaw, keima rilru puakchhuak chuan LALPA thu piah lam chu eng mah ka ti thei lo; ‘LALPAN a sawi apiang chu ka sawi ang,’ tiin i mi tirhte hnênah pawh ka sawi rêng a ni lâwm ni?

Balaama hrilh lâwkna hnuhnûng ber

14 “Ngai teh, ka mite hnênah ka kal tawh ang a, hawh teh, hêng mite hian tûn hnua i mite chunga an tih dân tûr ka hrilh teh ang che,” a ti a. 15 Tin, ani chuan thu chu a sawi ta a: “Beora fapa Balaama, Mit vâra, 16 Pathian thute hriaa, Chungnungbera hriatna hriaa, Engkimtitheia inlârna hmua, Tlu bawkkhupa mit lo vâr ta chuan, 17 Nakin hnua a awm dân tûr ka hmu a, Tûn mai piah lam ka hmuhsak a: ‘Jakoba aṭangin lal tiang a lo chhuak ang a, Israela aṭangin arsi a lo chhuak ang a, Moab ram tluanin a chhun tlang ang a, Setha thlahte a titlâwm ang. 18 A hmêlma ṭhîn Edom leh Seir-te chu a chang ang, Israel-te chan a ṭhat chhûng zawng. 19 Jakoba aṭangin tu emaw a lal ang a, Khuaa la awm chhunte chu a tiboral ang,’ a ti,” a ti a. 20 Tin, Amalek lam a hawi a, thu chu a sawi a, “Amalek chu hnam bul ber a ni na a, A lêr lam chu boralna a ni,” a ti a. 21 Tin, Ken lam a hawi a, thu chu a sawi a, “I awmna hmun chu a nghet a, I bu chu lungpuia chheh a ni. 22 Mahse, Kain chu a ṭiau vang a, Assur-hovin sala an hruai bo che thlengin,” a ti. 23 Tin, thu chu a sawi leh a, “Pathianin hetianga a tihin tu nge nung thei ang le? 24 Mahse, Kittim ram aṭangin lawngte a lo thleng ang a, Assur an tihrehawm ang a, Eber an tihrehawm ang a, Ani pawh a boral ang,” a ti a. 25 Tichuan, Balaama chu a tho va, a khaw lamah a haw ta a; Balaka pawh chu a haw ve ta a.

Numbers 25

Peor hmun an thleng

1 Tichuan, Israel-ho chu Sitim-ah an awm a; tin, Moab-ho fanute chu an pâwl ta hlawm a. 2 An pathiante hnêna an inthawinaahte chuan an sâwm a; tichuan, an ei a, an pathiante chu chibai an bûk ve a. 3 Tin, Israel-ho chuan Peor hmuna Baala chu an pawm ve ta a; tichuan, Israel-ho chungah LALPA thin chu a alh ta a. 4 Chutichuan, LALPAN Mosia hnênah, “Mipuite hotu zawng zawng chu hruai la, LALPA thinurna ṭihbaiawm tak mai chu Israel-ho chung ata a kian theih nân, chhûn êngah LALPA hmaah khai hlum rawh,” a ti a. 5 Tin, Mosian Israel-ho rorêltute hnênah chuan, “Peor hmuna Baala pawm apiangte chu tihlum vek rawh u,” a ti a. 6 Tin, ngai teh, Israela thlahte zinga mi pakhatin inbiakna puan in kawngkaa an ṭah lai takin, Mosia mit hmuhah leh Israel-ho pung khâwmte mit hmuhah, Midian hmeichhe pakhat a chhûngte hnênah a rawn hruai a. 7 Tin, puithiam Arona fa Eleazara fapa Phinehasan a han hmuh chuan pung khâwmho zîng ata chu a tho va, fei a chuh a; 8 tin, Israel mi chu puan in chhûngah chuan a ûm lût a, Israel mi nên an pahnih chuan a chhun tlang a, hmeichhia chu a pumah. Chutichuan, Israela thlahte chunga hremna chu a reh ta a. 9 Chumi hremnaa thite chu sînghnih leh sângli an ni. 10 Tin, LALPAN Mosia a bia a, 11 “Puithiam Arona fa Eleazara fapa Phinehasa hian ka thîk anga an zînga a thîkna chuan ka thinurna chu Israela thlahte lak ata a tikiang ta a; tichuan, ka thîkna chuan Israela thlahte chu ka tiboral lo vang a. 12 Chuvângin, ‘Ngai teh, ka inremna thuthlung chu a chungah ka thlung ang a; 13 tin, amah leh a hnua a thlahte tân kumkhaw puithiam nihna thuthlung a ni ang a; a Pathian tân a thîka, Israela thlahte tân inremna a siam avângin,’ ti rawh,” tiin. 14 Israel mi an thah, Midian hmeichhia nêna an thah tâka hming chu Zimria, Simeon-ho zînga an chhûngkaw puipa Salua fapa a ni a. 15 Tin, Midian hmeichhia an thah tâka hming chu Kozbi, Zura fanu a ni; ani chu Midian-ho chhûngkaw zînga an hotu a ni. 16 Tin, LALPAN Mosia a bia a, 17 “Midian-ho chu bei ula, titlâwm rawh u; 18 Peor hmunah an bum che u a, hrem tâk Midian-ho mi lian fanu, Kozbi an thah tâk chungchâng thu-ah in chungah thil dik lo tak an tih avâng hian,” tiin.

Numbers 26

Chhiarpui vawi hnihna

1 Tin, hremna a reh hnuah chuan heti hi a ni a, LALPAN Mosia leh puithiam Arona fapa Eleazara chu a bia a, 2 “Israela thlahte pung khâwmho zawng zawng chu, kum sawmhnih achin chung lam, a chi chiin Israel rama râlkai chin zawng zawng chhiar vek rawh u,” tiin. 3 Tichuan, Mosia leh puithiam Eleazara chuan Jeriko zâwn, Jordan kam, Moab phaiah anniho chu an bia a, 4 “Mipuite chu kum sawmhnih achin chung lam chhiar rawh u,” tiin, LALPAN Mosia leh Aigupta ram aṭanga lo chhuak Israela thlahte hnêna thu a pêk ang khân. 5 Israela fa tîr chu Reubena a ni a. Reubena fapate: Hanok-ho chhûngkaw zînga mi Hanoka; Palu-ho chhûngkaw zînga mi Palua; 6 Hezron-ho chhûngkaw zînga mi Hezrona; Karmi-ho chhûngkaw puipa Karmia. 7 Hêngho hi Reuben-ho chhûngkua an ni: chhiar tling zawng zawngte chu 43,730 an ni. 8 Palua thlah, Eliaba. 9 Tin, Eliaba thlahte: Nemuela, Dathana, Abirama an ni. Hêng Dathana te leh Abirama te hi an ni, LALPA an beih laia Mosia leh Arona beitu Kora pâwla tel pung khâwmho thlahte chu; 10 tin, chumi pâwl an thih lai chuan leiin a kâ a âng a, Kora te nên chuan a lem tlâng a, meiin mi zahnih leh sawmnga a lem ṭum khân; tichuan, chhinchhiahna an lo ni ta a. 11 Amaherawhchu, Kora fapate chu an thi lo. 12 A chhûngkua kuain Simeona thlahte: Nemuela thlahte Nemuel-ho, Jamina thlahte Jamin-ho; Jakina thlahte Jakin-ho; 13 Zera thlahte Zera-ho; Saula thlahte Saul-ho an ni. 14 Hêngho hi Simeona thlahte chu an ni a, 22,200 an ni. 15 A chhûngkua kuain Gada fapate: Zephona thlahte Zephon-ho; Hagia thlahte Hagi-ho; Sunia thlahte Suni-ho; 16 Oznia thlahte Ozni-ho; Eria thlahte Eri-ho; 17 Aroda thlahte Arod-ho; Arelia thlahte Areli-ho. 18 Hêngho hi an chhiar dân anga Gada fapate thlahte chu an ni a, 40,500 an ni. 19 Tin, Juda fapate, Era leh Onana: Era leh Onana chu Kanaan ramah an thi a. 20 Tin, Juda thlahte chhûngkaw kal dân chu hetiang hi a ni: Sela thlahte Sela-ho; Pereza thlahte Perez-ho; Zera thlahte Zera-ho an ni. 21 Tin, Pereza thlahte chu: Hezrona thlahte Hezron-ho; Hamula thlahte Hamul-ho an ni. 22 Hêngho hi an chhiar dân anga Juda fapate thlahte chu an ni a, 76,500 an ni. 23 A chhûngkua kuain Isakara thlahte: Tola thlahte Tola-ho; Pua thlahte Pu-ho; 24 Jasuba thlahte Jasub-ho; Simrona thlahte Simron-ho an ni. 25 Hêng hi an chhiar dân anga Isakara fapate thlahte an ni a, 64,300 an ni. 26 A chhûngkua kuain Zebuluna thlahte: Sereda thlahte Sered-ho; Elona thlahte Elon-ho; Jahleela thlahte Jaleel-ho an ni. 27 Hêng hi an chhiar dân anga Zebulun-ho thlahte chu an ni a, 60,500 an ni. 28 A chhûngkua kuain Josefa thlahte: Manasea leh Ephraima. 29 Manasea thlahte: Makira thlahte Makir-ho; tin, Makiran Gileada a hring a; Gileada thlahte Gilead-ho an ni. 30 Hêng hi Gileada thlahte an ni: Iezera thlahte Iezer-ho; Heleka thlahte Helek-ho; 31 Asriela thlahte Asriel-ho; Sekema thlahte Sekem-ho; 32 Semida thlahte Semida-ho; Hephera thlahte Hepher-ho an ni. 33 Tin, Hephera fapa Zelophehada chuan fapate nei lovin fanute a nei a: Zelophehada fanute hming chu Malai te, Novai te, Hoglai te, Milkai te, Tirzai te an ni. 34 Hêngte hi Manasea thlahte an ni. An chhiar zawngte chu 52,700 an ni. 35 Hêng hi a chhûngkua kuain Ephraima thlahte an ni: Suthela thlahte Suthel-ho; Bekera thlahte Beker-ho; Tahana thlahte Tahan-ho an ni. 36 Tin, hêng hi Suthela thlahte an ni: Erana thlahte Eran-ho an ni. 37 Hêng hi an chhiar dân anga Ephraima thlahte chhûngkua an ni a, 32,500 an ni. Hêng hi an chhûngkaw indawt dân ang zêla Josefa thlahte an ni. 38 A chhûngkua kuain Benjamina thlahte: Bela thlahte Bela-ho; Asbela thlahte Asbel-ho; Ahirama thlahte Ahiram-ho; 39 Suphama thlahte Supham-ho; Huphama thlahte Hupham-ho an ni. 40 Tin, Bela thlahte chu Arda leh Naamana an ni: Arda thlahte Ard-ho; Naamana thlahte Naaman-ho an ni. 41 Hêng hi an chhûngkaw indawt dân ang zêla Benjamina thlahte an ni; tin, an chhiar zawngte chu 45,600 an ni. 42 Hêng hi a chhûngkua kuain Dana thlahte an ni: Suhama thlahte Suham-ho an ni. Hêng hi an chhûngkaw indawt dân ang zêla Dana thlahte an ni. 43 Suham-ho thlahte zawng zawng an chhiar dân ang chuan 64,400 an ni. 44 Hêng hi a chhûngkua kuain Asera thlahte: Imna thlahte Imna-ho; Isvia thlahte Isvi-ho; Beria thlahte Beria-ho an ni. 45 Beria thlahte: Hebera thlahte Heber-ho; Malkiela thlahte Malkiel-ho an ni. 46 Asera fanu hming chu Seri a ni. 47 Hêng hi Asera fapate thlahte an chhiar zawngte chu an ni a, 53,400 an ni. 48 A chhûngkua kuain Naphtalia thlahte: Jazeela thlahte Jazeel-ho; Gunia thlahte Guni-ho; 49 Jezera thlahte Jezer-ho; Silema thlahte Silem-ho an ni. 50 Heng hi an chhûngkaw indawt dân ang zêla Naphtalia thlahte an ni; an chhiar zawngte chu 45,400 an ni. 51 Hêng hi Israela thlah an chhiar zawngte chu an ni a, 6,01,730 an ni. 52 Tin, LALPAN Mosia a bia a, 53 “Hêngho hi an tam lam ang zêlin ram hi semsak tûr a ni. 54 A tam deuhte chu ram i pe tam ang a, a tlêm deuhte chu ram i pe tlêm ang a; chhiar dân ang chuan ram pêk ṭheuh tûr a ni. 55 Amaherawhchu, ṭhumvâwrin ram chu sem tûr a ni; an pute hnam hming indawt dân ang zêlin ram chu an chang ang. 56 Ṭhumvâwr ang zêlin ram chu a tam leh a tlêmte hnênah sem a ni ang,” a ti a. 57 Tin, hêng hi Levi-ho chhûngkua kuaa chhiarte chu an ni: Gersona thlahte Gerson-ho; Kohatha thlahte Kohath-ho; Meraria thlahte Merari-ho an ni. 58 Hêngho hi Levia thlahte an ni: Libna thlahte, Hebrona thlahte, Mahlia thlahte, Musia thlahte, Kora thlahte an ni. Tin, Kohatha chuan Amrama a hring a. 59 Tin, Amrama nupui hming chu Jokebedi, Levia fanu, Aigupta rama Levia laka piang a ni a; tin, ani chuan Amrama lakah Arona leh Mosia leh an farnu Miriami a hring a. 60 Tin, Arona chuan Nadaba te, Abihua te, Eleazera te, Ithamara te a hring a. 61 Tin, Nadaba leh Abihua chu LALPA hmaa hman loh tûr chi mei an hman lai khân an thi a. 62 Tin, chhiar zawng zawng mipa thla khat achin chung lam zawng zawngte chu 23,000 an ni. Israel mite zîngah ram sem chang ve tûr an nih loh avângin Israel mite zîngah chhiar an ni lo va. 63 Hêngte hi a ni Jeriko zâwn, Jordan kam, Moab phaia Israela thlahte chhiartu Mosia leh puithiam Eleazaran an chhiarte chu. 64 Sinai thlalêra Israel mite Mosia leh puithiam Aronan an chhiarte kha pakhat mah awm an awm tawh lo. 65 LALPAN, “Thlalêrah an thi ngei ngei tûr a ni,” a lo ti tawh si a. Jephunea fapa Kaleba leh Nuna fapa Josua lo chu tu mah dam an awm tawh lo.

Numbers 27

Zelophehada fanute chungchâng

1 Tin, Josefa fapa Manasea thlah, Manasea fa Makira, chu mi fa Gileada, chu mi fa Hephera fapa Zelophehada fanute chu an lo kal a; a fanute hming chu: Malai te, Novai te, Hoglai te, Milkai te, Tirzai te a ni. 2 Tin, inbiakna puan in kawngkaah Mosia leh puithiam Eleazara leh mi lianho leh pung khâwmho zawng zawng hmaah chuan an va ding a, 3 “Thlalêrah khân kan pa a thi a, LALPA bei tûra pung khâwm pâwl, Kora pâwlah khân a tel ve lo ve; nimahsela, ama sual avângin a thi a, fapa a nei lo va. 4 Fapa a neih loh avâng maiin engah nge kan pa hming chu a thlahte zîng ata a bo vang? Kan pa unaute zîngah chanvo min pe ve rawh u,” an ti a. 5 Tin, Mosian an thu chu LALPA hmaah a thlen a. 6 Tin, LALPA chuan Mosia a bia a, 7 “Zelophehada fanute chuan an tidik a ni; an pa unaute zîngah chanvo i siam ngei tûr a ni a, an pa chanvo chu i pe tûr a ni. 8 Tin, Israela thlahte hnênah, ‘Mi, fapa nei lova a thih chuan a ro chu a fanute in pe tûr a ni. 9 Tin, fanu a neih loh chuan a ro chu a unaute in pe tûr a ni. 10 Tin, unaute a neih loh chuan a ro chu a pa unaute in pe tûr a ni. 11 Tin, a pain unaute a neih loh chuan a ro chu a laichîn in pe ang a, anin a khâwm ang. Tin, LALPAN Mosia thu a pêk angin Israela thlahte tân dân thupêk nghet a ni ang,’ tiin sawi rawh,” tiin.

Mosia aiawh tûrin Josua thlan a ni

12 Tin, LALPAN Mosia hnênah, “Abarim tlângah khian han chho la, Israela thlahte ka pêk tûr ram han thlîr rawh. 13 Tin, i han hmuh zawh chuan i unaupa Arona chu a chipuite hnênah hruai a ni ang bawkin nang pawh hruai i ni tawh ang. 14 Zin thlalêra pung khâwmho an phunnawi laia an mit hmuhah tuiah khân, mi chawimawi tûra ka thupêk che kalha i hel avâng khân,” a ti a (Chûng chu Zin thlalêra Kadesh-a Meriba tuite chu a ni). 15 Tin, Mosian LALPA a bia a, 16-17 “LALPA, nunna zawng zawng hnâr Pathian chuan, LALPA mi pung khâwmte chu vêngtu nei lo berâm anga an awm loh nân pung khâwm chunga hotu, an hma hruaia, anmahni hruai chhuaka hruai lûttu tûr ruat rawh se,” tiin. 18 Tin, LALPAN Mosia hnênah, “Nuna fapa, mi rilru nei tak Josua chu hruai la, a chungah i kut nghat la, 19 puithiam Eleazara leh pung khâwmho hmaah dintîr la, an mit hmuhah thuneihna pe rawh. 20 Tin, Israela thlah pung khâwmho zawng zawngin a thu an awih theih nân thuneihna hlân rawh. 21 Tichuan, ani chu puithiam Eleazara hmaah a ding ang a, anin LALPA hmaah Urim hmangin thu a la ang a; a thuin an chhuak ang a, a thuin an lût ang, amah leh Israela thlah zawng zawngte, pung khâwmho zawng zawngte nên,” a ti a. 22 Tin, Mosia chuan LALPA thupêk ang chuan a ti a. Josua chu a hruai a, Eleazara leh pung khâwmho zawng zawng hmaah chuan a dintîr a. 23 Tin, a chungah a kut a nghat a, Mosia hmanga LALPAN a sawi ang khân thuneihna a pe ta a.

Numbers 28

Hlan reng tûr thilhlan

1 Tin, LALPAN Mosia a bia a, 2 “Israela thlahte chu thu pe la, an hnênah, ‘Ka chaw, ka tâna rimtui meia thilhlan, ka hnênah thilhlan chu a hun tak zêl ṭheuhvah in hlan tûr a ni,’ ti la. 3 Tin, an hnênah, ‘Hei hi meia thilhlan LALPA hnêna in hlan tûr chu a ni: berâmno a pa, kum khat mi, sawisêl bo, ni tin pahnih, hâlral thilhlan hlan reng atân. 4 Berâmno pakhat chu zîngah in hlân ang a, pakhat chu tlai lamah in hlân ang a, 5 chhangphut thilhlan atân chhangphut dip mi epha hmun sâwma ṭhena hmun khat, hriak sâwr hin hmun lia ṭhena hmun khata chawhpawlh nên. 6 LALPA tâna meia thilhlan, rimtui atâna Sinai tlânga ruat hâlral thilhlan hlan reng tûra kha a ni. 7 Tin, berâmno pakhat hlannaa in tûr thilhlan chu, hin hmun lia ṭhena hmun khat a ni tûr a ni; LALPA tâna uain, in tûr thilhlan chu hmun thianghlimah i bun chhuak tûr a ni. 8 Tin, berâmno pakhat chu tlai lamah i hlân tûr a ni; zîng lama chhangphut thilhlan ang leh chumia in tûr thilhlan ang bawk chu, LALPA tâna rimtui atân meia thilhlan chu i hlân tûr a ni.

Sabbath nia hlan tûr

9 “ ‘Tin, Chawlhniah berâmno, a pa kum khat mi sawisêl bo pahnih leh, chhangphut thilhlan atân chhangphut dip mi, epha hmun sâwma ṭhena hmun hnih hriaka chawhpawlh leh, chumia in tûr thilhlan nên i hlân tûr a ni; 10 hei hi Chawlhni apianga hâlral thilhlan reng leh, chumia in tûr thilhlan tiam lova hâlral thilhlan hlan tûr chu a ni.

Thla thara hlan tûr

11 “ ‘Tin, in thla thar apiangah LALPA tân hâlral thilhlan in hlân tûr a ni: bâwngpatuai pahnih leh berâmpa pakhat leh berâmno a pa kum khat mi sawisêl bo pasarih; 12 tin, bâwngpa tinah chhangphut thilhlan atân chhangphut dip mi, hriaka chawhpawlh epha hmun sâwma ṭhena hmun thum; tin, berâm pakhatah chhangphut thilhlanah chhangphut dip mi hriaka chawhpawlh hmun sâwma ṭhena hmun hnih; 13 tin, berâmno tinah chhangphut thilhlanah chhangphut dip mi, hriaka chawhpawlh hmun sâwma ṭhena hmun khat; hei hi hâlral thilhlan rimtui LALPA tân meia thilhlan a ni. 14 Tin, an in tûr thilhlan chu bâwngpa pakhatah uain hin chanve a ni ang a, berâmpa pakhatah hin hmun thuma ṭhena hmun khat, berâmno pakhatah hin hmun lia ṭhena hmun khat; hei hi kum tluana thla tin hâlral thilhlan a ni. 15 Tin, LALPA hnêna sual thawi nân kêlpa pakhat in hlân tûr a ni; hâlral thilhlan hlan reng leh chumia in tûr thilhlan tiam lovin.

Chhang dawidim telh loh kûta hlan tûr

16 “ ‘Tin, thla khatna, ni sâwm leh ni li ni chu LALPA kalhlên kût a ni. 17 Tin, chumi thla ni sâwm leh ni nga ni chu ruai ni a ni ang; ni sarih chu chhang dawidim telh loh ei tûr a ni ang. 18 Ni khat ni chuan inkhâwmpui thianghlim a awm ang a; eng hna mah in thawk tûr a ni lo. 19 Meia thilhlan hâlral thilhlan erawh chu LALPA hnênah in hlân tûr a ni: bâwngpatuai pahnih leh berâmpa pakhat leh berâmno a pa kum khat mi pasarih; in ngaiha sawisêl bo a ni tûr a ni. 20 Chhangphut dip mi, hriaka chawhpawlh, an chhangphut thilhlan nên: bâwngpa pakhatah hmun sâwma ṭhena hmun thum, berâmpa pakhatah hmun sâwma ṭhena hmun hnih; 21 berâmno pasarih chu beramno pakhatah hmun sâwma ṭhena hmun khat a ni tûr a ni; 22 tin, in tâna inremna siamna tûrin sual thawi nân kêlpa pakhat. 23 Hêng hi zînga thilhlan, hâlral thilhlan hlan reng tiam lovin in hlân tûr a ni. 24 Hetiang hian LALPA tâna rimtui, meia thilhlan ei tûr chu ni tin, ni sarih in hlân tûr a ni; hâlral thilhlan hlan reng leh chumia in tûr thilhlan tiam lovin. 25 Tin, a ni sarih ni chuan inkhâwmpui thianghlim in nei ang a, eng hna mah in thawk tûr a ni lo.

Pâwl kûta thil hlan tûr

26 “ ‘Tin, in chawlhkâr kût, in buh thar tirh kût LALPA tâna thil thar chhangphut thilhlan in hlan ni pawhin, inkhâwmpui thianghlim in nei ang a; eng hna mah in thawk tûr a ni lo. 27 LALPA tâna rimtui hâlral thilhlan erawh chu in hlân tûr a ni: bâwngpatuai pahnih, berâmpa pakhat, berâmno a pa kum khat mi pasarih; 28 an chhangphut thilhlan, chhangphut dip mi hriaka chawhpawlh nên: bâwngpa pakhatah hmun sâwma ṭhena hmun thum, berâmpa pakhatah hmun sâwma ṭhena hmun hnih, 29 berâmno pasarih, berâmno pakhat ṭheuhvah hmun sâwma ṭhena hmun khat; 30 in tana inremna siam nân kêlpa pakhat nên (in ngaiha sawisêl bo a ni tûr a ni). 31 Hâlral thilhlan hlan reng leh, chumia chhangphut thilhlan leh in tûr thilhlan tiam lovin in hlân tûr a ni.

Numbers 29

Kum thar ni kûta hlan tûr

1 “ ‘Tin, thla sarihna, a ni khat ni chuan inkhâwmpui thianghlim in nei ang a; eng hna mah in thawk tûr a ni lo. In tân tawtawrâwt ham ni a ni tûr a ni. 2 LALPA tâna rimtuiah hâlral thilhlan in hlân ang a; bâwngpatuai pakhat, berâmpa pakhat, berâmno a pa kum khat mi sawisêl bo pasarih. 3 An chhangphut thilhlan, chhangphut dip mi hriaka chawhpawlh, bâwngpa pakhatah hmun sâwma ṭhena hmun thum, berâmpa pakhatah hmun sâwma ṭhena hmun hnih, 4 berâmno pasarih, pakhat ṭheuhvah hmun sâwma ṭhena hmun khat; 5 in tâna inremna siam nân sual thawina kêlpa pakhat nên; 6 thla thar hâlral thilhlan leh chumia chhangphut thilhlan te, hâlral thilhlan hlan reng leh chumia chhangphut thilhlan te, in tûr thilhlan te, an tih dân pângngai LALPA tâna rimtuia meia thilhlante tiam lovin.

Inremna nia thil hlan tûr

7 “ ‘Tin, he thla sarihna, ni sâwm ni hian inkhâwmpui thianghlim in nei ang a. Chaw in nghei tûr a ni a, eng hna mah in thawk tûr a ni lo. 8 LALPA tâna rimtuiah hâlral thilhlan erawh chu in hlân tûr a ni: bâwngpa pakhat, berâmpa pakhat, berâmno a pa kum khat mi pasarih; 9 in ngaiha sawisêl bo a ni tûr a ni. An chhangphut thilhlan, chhangphut dip mi hriaka chawhpawlh, bâwngpa pakhatah hmun sâwma ṭhena hmun thum, berâmpa pakhatah hmun sâwma ṭhena hmun hnih, 10 berâmno pasarih, berâmno pakhat ṭheuhvah hmun sâwma ṭhena hmun khat; 11 sual thawi nân kêlpa pakhat nên; inremna tûra sual thawina te, hâlral thilhlan hlan reng te, chumia chhangphut leh an in tûr thilhlante tiam lovin.

Bâwkte kûta hlan tûr

12 “ ‘Tin, thla sarihna, ni sâwm leh ni nga niah inkhâwmpui thianghlim in nei ang a; eng hna mah in thawk lo vang a, LALPA tân ni sarih in kût tûr a ni. 13 Tin, LALPA tâna rimtuiah meia thilhlan, hâlral thilhlan in hlân tûr a ni: bâwngpatuai sâwm leh pathum, berâmpa pahnih, berâmno a pa kum khat mi sâwm leh pali; sawisêl bo ṭheuh a ni tûr a ni. 14 An chhangphut thilhlan, chhangphut dip mi hriaka chawhpawlh, bâwngpa sâwm leh pathum, bâwngpa pakhatah hmun sâwma ṭhena hmun thum, berâmpa pahnih, berâmpa pakhatah hmun sâwma ṭhena hmun hnih, 15 berâmno sâwm leh pali, berâmno pakhatah hmun sâwma ṭhena hmun khat; 16 sual thawi nân kêlpa pakhat nên; hâlral thilhlan hlan reng, chumia chhangphut thilhlan te, in tûr thilhlante tiam lovin. 17 “ ‘Tin, a ni hnih niah bâwngpatuai sâwm leh pahnih, berâmpa pahnih, berâmno a pa kum khat mi, sawisêl bo, sâwm leh pali in hlân tûr a ni; 18 an chhangphut thilhlan leh in tûr thilhlan a dân ang takin an tam dân ang zêlin bâwngpa tân te, berâmpa tân te, berâmno tân te, 19 sual thawi nân kêlpa pakhat nên; hâlral thilhlan hlan reng te, chumia chhangphut thilhlan te, in tûr thilhlante tiam lovin. 20 “ ‘Tin, a ni thum ni chuan bâwngpa sâwm leh pakhat, berâmpa pahnih, berâmno a pa kum khat mi sawisêl bo sâwm leh pali; 21 an chhangphut thilhlan leh in tûr thilhlan a dân ang takin an tam dân ang zêlin bâwngpa tân te, berâmpa tân te, berâmno tân te, 22 sual thawi nân kêlpa pakhat nên; hâlral thilhlan hlan reng leh chumia in tûr thilhlan tiam lovin. 23 “ ‘Tin, a ni li ni chuan bâwngpa sâwm, berâmpa pahnih, berâmno a pa kum khat mi sawisêl bo sâwm leh pali; 24 an chhangphut thilhlan leh in tûr thilhlan, a dân ang takin an tam dân ang zêlin bâwngpa tân te, berâmpa tân te, berâmno tân te, 25 sual thawi nân kêlpa pakhat nên; hâlral thilhlan hlan reng te, chumia chhangphut thilhlan leh in tûr thilhlante tiam lovin. 26 “ ‘Tin, a ni nga ni chuan bâwngpa pakua, berâmpa pahnih, berâmno a pa kum khat mi sawisêl bo sâwm leh pali; 27 an chhangphut thilhlan leh in tûr thilhlan, a dân ang takin an tam dân ang zêlin bâwngpa tân te, berâmpa tân te, berâmno tân te, 28 sual thawi nân kêlpa pakhat nên; hâlral thilhlan hlan reng te, chumia chhangphut thilhlan leh chumia in tûr thilhlante tiam lovin. 29 “ ‘Tin, a ni ruk ni chuan bâwngpa pariat, berâmpa pahnih, berâmno a pa kum khat mi sawisêl bo sâwm leh pali; 30 an chhangphut thilhlan leh in tûr thilhlan, a dân ang takin an tam dân ang zêlin bâwngpa tân te, berâmpa tân te, berâmno tân te, 31 sual thawi nân kêlpa pakhat nên; hâlral thilhlan hlan reng te, chumia chhangphut thilhlan leh chumia in tûr thilhlante tiam lovin. 32 “ ‘Tin, a ni sarih ni chuan bâwngpa pasarih, berâmpa pahnih, berâmno a pa kum khat mi sawisêl bo sâwm leh pali; 33 an chhangphut thilhlan leh in tûr thilhlan, a dân ang takin an tam dân ang zêlin bâwngpa tân te, berâmpa tân te, berâmno tân te, 34 sual thawi nân kêlpa pakhat nên; hâlral thilhlan hlan reng te, chumia chhangphut thilhlan leh chumia in tûr thilhlante tiam lovin. 35 “ ‘Tin, a ni riat ni chuan inkhâwmpui ropui tak in nei ang a, eng hna mah in thawk tûr a ni lo. 36 LALPA tâna rimtuiah meia thilhlan hâlral thilhlan erawh chu in hlân tûr a ni: bâwngpa pakhat, berâmpa pakhat, berâmno a pa kum khat mi sawisêl bo pasarih; 37 an chhangphut thilhlan leh an in tûr thilhlan, bâwngpa tân te, berâmpa tân te, berâmno tân te, a dân ang takin an tam dân ang zêlin, 38 sual thawi nân kêlpa pakhat nên; hâlral thilhlan hlan reng leh chumia chhangphut thilhlan leh chumia in tûr thilhlan tiam lovin. 39 “ ‘In thutiam te, in duhthua thilhlan te, in hâlral thilhlan te, in chhangphut thilhlan te, in in tûr thilhlan te, in remna thilhlante tiam lovin hêng hi in hunbi nei kût niin LALPA hnênah in hlân tûr a ni,’ ti rawh,” tiin. 40 Tin, LALPAN Mosia thu a pêk zawng zawng chu Israela thlahte chu Mosia chuan a hrilh a.

Numbers 30

Thu intiamkam chungchâng thu

1 Tin, Mosian Israela thlahte hnamho puipate chu a bia a, “Hei hi a ni, LALPAN thu a pêk chu: 2 miin LALPA hnêna thu a tiam emaw, chhechhama mahni intiamkamna emaw a neih chuan a hlen ngei tûr a ni; a thu ang zawng zawng chu a ti vek tûr a ni. 3 Pate ina awm lai nula pawhin LALPA hnêna thu a tiam emaw, chhechhama intiamkamna emaw a neih chuan, 4 a pain a thutiam emaw, a intiamkamna emaw chu a hriata, a ngawihsan mai chuan a thutiam emaw, a intiamkamna emaw chu a ti ngei tûr a ni. 5 A pain a hriat nî ngeia a phal loh erawh chuan a thutiam emaw, a intiamkamna emaw ata chu a fihlîm ang a, a pain a phal loh avângin LALPAN ani chu a ngaidam ang. 6 “Ngaihtuah thui mang lova thutiam emaw, intiamkamna emaw nei laiin pasal a neiha, 7 a pasalin a hriat nîa a ngawihsan mai chuan a thutiam emaw, a intiamkamna emaw chu a hlen ngei tûr a ni. 8 Amaherawhchu, a pasalin a hriat nîa a phal loh chuan ngaihtuah thui lova thu a lo intiamkamna emaw ata chu a fihlîm ang; tin, LALPAN a ngaidam ang. 9 Hmeithaite, mâkchhiat tâwkte erawh chuan an thutiam emaw, an intiamkamna emaw chu an hlen ngei tûr a ni. 10 Pasalte ina awm laia thutiam emaw, intiamkamna emaw chu, 11 a pasalin a hriat pawha a ngawihsana, a hnial loh chuan a thu intiamkamna chu a hlen tûr a ni. 12 Amaherawhchu, a pasalin a hriat nîa a ṭhiat emaw, a tihbosak emaw chuan a thutiam leh a intiamkamna chu sût a ni tawh ang. 13 Thutiam emaw, intiamkamna emaw rêng rêng a pasalin a remtihpuiin a ṭhiatsak thei bawk a ni. 14 Amaherawhchu, a pasalin a hriata a ngawihsan mai chuan, a thutiam ang leh a intiamkamna ang ngei chuan a ti tûr a ni; a hriat nî aṭanga a ngawihsan avângin a nemnghehpui tihna a ni. 15 A hriat veleh a ṭhiata, a tihbosak erawh chuan a mawh chu aman a phur tûr a ni,” tiin. 16 Hêng hi, mipa leh a nupui kâr leh, pa leh a fanu nulât laia a pa ina la awm reng an kâra dân tûra LALPAN Mosia thu a pêkte chu a ni.

Numbers 31

Midian-ho hrem nân indona

1 Tin, LALPAN Mosia a bia a, 2 “Midian-ho chungah Israela thlahte phuba la rawh. Chumi zawhah chuan i chipuite hnênah hruai i ni tawh ang,” tiin. 3 Tichuan, Mosia chuan mipuite chu a bia a, “Midian-ho chunga LALPA phuba lâkna hlen tûra Midian-ho beia indo tûrin in zînga mi inrâlthuam rawh se. 4 Israel hnam zawng zawng zînga hnam tina mi sângkhat zêl indonaah in kaltîr tûr a ni,” tiin. 5 Chutichuan, Israel-ho sâng tam tak zîng ata, hnam tin aṭangin 1,000 ṭheuh, indonaa kal tûrin sipai 12,000 an theh chhuak a. 6 Tichuan, Mosian chi tin zînga mi 1,000 ṭheuh leh puithiam Eleazara fapa Phinehasa, hmun thianghlima bungbêlte, thupêk vêl nâna tawtawrâwtte kengin indonaah a kaltîr a. 7 Tin, LALPAN Mosia thu a pêk angin Midian-ho an do va; mipa zawng zawng an that a. 8 An mi thahte zîngah chuan Midian-ho lalte pawh an tel a; Midian-ho lal panga - Evia te, Rekema te, Zura te, Hura te, Reba te chu; Beora fapa Balaama pawh khandaihin an that a. 9 Tin, Israela thlahte chuan Midian-ho nunaute salah an hruai a; tin, an ran zawng zawng te, an berâm rual zawng zawng te, an bungrua zawng zawngte chu râllâk sum atân an la a. 10 An awmna khua zawng zawng te, an riahhmun zawng zawngte an hâl vek a. 11 Tin, mihring leh ran, sal leh râllâk sum zawng zawng an kalpui vek a. 12 Tin, sal te, man te, râllâk sumte chu Mosia leh puithiam Eleazara leh Israela thlah pung khâwmho hnênah, Jeriko zâwn Jordan kam Moab phaia an riahhmunah chuan an rawn thlen a.

Râl bei lo haw leh thu

13 Tin, Mosia leh puithiam Eleazara leh pung khâwmho puipa zawng zawngte chuan daiah an lo va hmuak a. 14 Tin, Mosia chu sipai hotu, sâng chunga hotute leh za chunga hotu te, indona aṭanga lo hawte chungah chuan a thinur a. 15 Tichuan, Mosian an hnênah, “Hmeichhia chu damin in la zuah vek maw? 16 Ngai teh u, Balaama remruat chuan Peor chungchâng thu-ah, Israela thlahte chu LALPA chunga bawhchhiatna tithlengtute chu hêng hi an ni, LALPA mi pung khâwmho zîngah chuan hri a lo lên tâk kha. 17 Chuvângin, naupang zînga mipa zawng zawng chu that ula, hmeichhia mi pâwl tawh zawng zawng that bawk rawh u. 18 Hmeichhe naupang, mi pâwl loh zawng zawng erawh chu in tân zuah rawh u. 19 Tin, daiah ni sarih riak ula; tu pawh mi that leh mitthi khawih apiangte chu ni thum ni leh ni sarih niah inthian rawh u, nangmahni leh in salte pawh. 20 Tin, thuamhnaw rêng rêng leh savuna thil siam zawng zawng te, kêl hmula thil siam zawng zawng te, thinga thil siam zawng zawng thu-ah chuan in inthian tûr a ni,” a ti a. 21 Tin, puithiam Eleazara chuan indonaa kal indo mite hnênah chuan, “Hei hi LALPAN Mosia thu a pêk dân thuruat chu a ni: 22 eng pawh ni sela, rangkachak te, tangkarua te, dâr te, thîr te, rângva te, suan te, 23 eng pawh meia hâla chhe thei lo apiangte chu meiah in thawlh tlang ang a; tichuan, a lo thianghlim ang; eng pawh ni sela, tlen faina tuiin tihthianghlim tûr a ni. Amaherawhchu, meia hâl tuar thei lo apiang chu tuiah in thawlh tlang tûr a ni. 24 Tin, a ni sarih niah in puan in su ang a, in lo thianghlim ang a, chumi zawhah chuan riahhmunah in lo lût dâwn nia,” a ti a.

Râllâk sum sem dân

25 Tin, LALPAN Mosia a bia a, 26 “Nang nên, puithiam Eleazara nên, pung khâwmho chhûngkaw puipate nên râllâk suma an lâk mihring leh rante chu chhiar vek ula; 27 tin, râllâk sum chu hmun hnihah ṭhen ula, indonaa kal indo mite tân leh punghote tân; 28 tin, indonaa kalho chan aṭang chuan mihring te, bâwng te, sabengtung te, berâm te, thil nung zawng zawng zanga zêlah pakhat, LALPA hnênah chhiah pêk tûr tihhransak rawh. 29 Chûng chu la ula, LALPA tâna thên thilhlanah puithiam Eleazara pe rawh u. 30 Tin, a chanve Israela thlahte pual chu sawmnga ata pakhat tîl hrang zêl la, mihring aṭang te, bâwng aṭang te, sabengtung aṭang te, berâm rual aṭang te, ran rual aṭangtein; tin, chûng chu LALPA biakbûk enkawltu Levi-hote pe rawh,” a ti a. 31 Tichuan, LALPAN Mosia thu a pêk ang chuan Mosia leh puithiam Eleazara chuan an ti a. 32 Sipaiten an man râllâk sum tiam lovin an lâk chu berâm 6,75,000, 33 bâwng 72,000, 34 sabengtung 61,000, 35 mihring chu hmeichhia, mipa la pâwl ngai loh 32,000 an ni a. 36 Tin, a chanve, indonaa kalte chanvo chu, berâm 3,37,500 a ni a; 37 tin, LALPA chhiah berâm chu 675 . 38 Tin, bâwng chu 36,000 a ni a, chumia LALPA chhiah chu 72 a ni a. 39 Tin, sabengtung chu 30,500 a ni a, chumia LALPA chhiah chu 61 a ni. 40 Tin, mihring chu 16,000 an ni a, chumia LALPA chhiah chu mi 32 an ni. 41 Tin, LALPAN Mosia thu a pêk angin chhiah, LALPA thên thilhlan chu Mosian puithiam Eleazara a pe a. 42 Tin, Mosian râl kâp mite an chanvo a pêk zawha Israel-ho chanvo chu, 43 berâm 3,37,500, 44 bâwng 36,000, 45 sabengtung 30,500, mihring 16,000, 46-47 Israel-hovin an chan aṭang chuan Mosia chuan mihring leh ran sawmnga zêlah pakhat a la a, LALPA thupêk angin LALPA biakbûk enkawltu Levi-ho a pe a. 48 Tin, sipaite chunga hotu te, za chunga hotu te chuan Mosia an va hnaih a, 49 Mosia hnênah, “I chhiahhlawhte hian kan kuta awm indo mite chu kan chhiar a, tu mah kim lo kan awm lo va. 50 Tin, kan nunna atân LALPA hmaa inremna siamna tûrin LALPA tâna thilhlan miin an neihzâwng, rangkachaka siam cheimawi thuam - kebun te, bânbun te, hming nemna zungbun te, bengbeh te, ṭhî te kan rawn la e,” an ti a. 51 Tin, Mosia leh puithiam Eleazara chuan rangkachaka siam an thuam zawng zawng chu an lo la a. 52 Sâng chunga hotu leh za chunga hotute rangkachak, LALPA hnêna thên thilhlana an hlan zawng zawng chu sekel 16,750 a ni. 53 (Râl kâp mite chuan râllâk sum chu mahni tân ṭheuhva la an ni a.) 54 Tin, Mosia leh puithiam Eleazara chuan sâng chunga hotu leh za chunga hotute rangkachak chu an la a, Israela thlahte hriat rengna atân inbiakna puan inah LALPA hmaah an rawn la a.

Numbers 32

Jordan lui khawchhak lama chêng tate

1 Reubena leh Gada thlahte chuan ran an ngah hle mai a; tin, Jazer ram leh Gilead ram an hmuh chuan a hmun chu ran tâna hmun ṭha tak niin an hria a; 2 tichuan, Gada thlahte leh Reubena thlahte chuan Mosia leh puithiam Eleazara leh pung khâwmho puipate chu an va bia a, 3-4 “Israel pung khâwmho hmaa LALPAN a tihtlâwm ram Atarot te, Dibon te, Jazer te, Nimra te, Hesbon te, Eleale te, Sebam te, Nebo te, Beon te chu ran tâna ṭha tak ram a ni a; tin, i chhiahhlawhte hian ran kan nei a. 5 Rem i tih zâwng a nih chuan he ram hi kan luah atân min pe la, Jordan lui min hruai kai lo mai rawh khai,” an ti a. 6 Tin, Mosia chuan Gada thlahte leh Reubena thlahte hnênah chuan, “In unaute chu indonaah an kal ang a, nangni chu hetah hian in lo awm mai ang maw? 7 Engati nge LALPAN a pêk rama lût lo tûra Israela thlahte rilru in tihzâm dâwn? 8 Kadesh-barnea aṭanga ram va thlithlai tûra ka tirh khân hetiang bawk hian in pute chuan an ti a. 9 Eskol ruam an han thlen chhoh khân ram chu an han hmu a, LALPAN ram a pêkah chuan an luh lohna tûrin Israel thlahte rilru an tihzâmsak a. 10 Tichuan, chumi ni chuan LALPA chu a thinur ta êm êm a, 11 ‘Aigupta ram ata lo chhuak, kum sawmhnih achin chung lam mi rêng rêng chuan Abrahama te, Isaaka te, Jakoba te hnêna chhechhama ka pêk ram chu tu mân an hmu lo vang, min zui tak tak loh avângin; 12 Keniz mi Jephunea fapa Kaleba leh Nuna fapa Josua-te chauh lo chuan; anni chuan LALPA chu an zui tak tak avângin,’ tiin chhia a chham a. 13 Tin, Israel-hote chungah LALPA thin chu a alh a, LALPA mit hmuha thil ṭha lo titu chhuan zawng zawng an boral vek hma loh chuan, thlalêrah kum sawmli a vah a vahtîr a. 14 Tin, ngai teh u, Israel-te chunga LALPA thinurna ṭihbaiawm tak belhchhahin, nangni chhuan sual hian in pute ai in awh ta a. 15 LALPA zui lova in awm miau chuan anniho hi thlalêrah a awmtîr leh mai dâwn a ni a. Hêng mi zawng zawngte hi in tiboral mai ang asin,” a ti a. 16 Tin, an va hnaih a, a hnênah, “Hetah hian kan ran tân berâm huangte leh kan fanaute tân khuate kan siam ang a; 17 keini erawh chu an hmun tûr kan thlen hma loh chuan, Israela thlahte hmaa kal zêl tûrin kan inrâlthuam diam ang e; hemi rama mite avâng hian kan fanaute chu kulh nei khuaahte an awm ang a. 18 Israela thlah mi tinin an hmun luah tûr an luah ṭheuh hma loh chuan kan in lamah kan haw lo vang. 19 Kan luah tûr chu he lam râl Jordan chhak lam a nih avângin Jordan râl lehlam leh a piah lam chu kan luahpui dâwn lo nia,” an ti a. 20 Tin, Mosian an hnênah, “Chutianga in tiha, indonaa LALPA hmaa kal tûra in inrâlthuama, 21-22 a hma ata a hmêlmate a hnawh chhuaha, LALPA hmaa ram chu hneh a nih hma lohva in zînga inrâlthuam zawng zawngten LALPA hmaah Jordan in kai vek chuan, nakinah in haw ang a, LALPA chungah leh Israel-te chungah in thiam lo lo dâwn nia; tichuan, he ram hi LALPA hmaa in luah tûr a lo ni ang a. 23 Amaherawhchu, chutianga in tih loh chuan, ngai teh u, LALPA chungah in sual a ni ang a, in sual chuan a hmuchhuak ngei ngei ang che u tih hre rawh u. 24 In fanaute tân khuate siam ula, in berâmte tân pawh huangte siam ula, in sawi ang chuan ti rawh u,” a ti a. 25 Tin, Gada thlahte leh Reubena thlahte chuan Mosia hnênah, “I chhiahhlawhte hian kan pu thupêk ang chuan kan ti ang e. 26 Kan nupui fanau te, kan berâm rual te, kan ran rual zawng zawngte chu Gilead ram khuaahte hian an lo awm ang a; 27 amaherawhchu, i chhiahhlawh, indo tûra inrâlthuam zawng zawngte chuan kan pu sawi ang chuan LALPA hmaah kan va kai ang e,” tiin an sawi a. 28 Chutichuan, Mosia chuan an chungchâng thu-ah chuan puithiam Eleazara te, Nuna fapa Josua te, Israel hnam chhûngkaw puipate chu thu a pe a. 29 Tin, Mosia chuan an hnênah, “Gada thlahte, Reubena thlahte, indo tûra inrâlthuam zawng zawngte hian LALPA hmaa Jordan lui an kaipui che ua, ram chu in hmin chuan Gilead ram chu an luah atân in pe tûr a ni. 30 Amaherawhchu, inrâlthuama an kaipui loh che u chuan Kanaan ramah in zîngah an tel ve mai ang,” a ti a. 31 Tin, Gada thlahte leh Reubena thlahte chuan, “I chhiahhlawhte hnêna LALPAN a sawi ang chuan kan ti ang. 32 Inrâlthuamin LALPA hmaah Kanaan ramah kaiin kan lût ang a; tichuan, kan ram luah tûr chu Jordan lui piah lamah a la ni reng ang,” tiin an chhâng a. 33 Tin, Mosia chuan, Gada thlahte leh Reubena thlahte leh Josefa fapa Manasea thlah hnam chanvete chu Amor lal Sihona ram te, Basan lal Oga ram, chûng ramte chu a khaw awm zawng zawng nên, a vêl ram khuate nên lam a pe a. 34 Tin, Gada thlahte chuan Dibon te, Atarot te, Aroer te, 35 Atrot-sophan te, Jazer te, Jogbeha te, 36 Beth-nimra te, Beth-haran te an din a, khawpui kulh nei te, berâm huang te nên. 37 Tin, Reubena thlahte chuan Hesbon te, Eleale te, Kiriathaim te, 38 Nebo te, Baal-meon te (a hmingte hi tihdanglam tâk a ni), Sibma te an din a; an khaw siamte chu hming dang an vuah a. 39 Tin, Manasea fapa Makira thlahte chu Gilead ramah an kal a, an la a, Amor-ho chuta awmte chu an chhuhsak a. 40 Tin, Mosian Gilead ram chu Manasea fapa Makira chu a pe a, chutah chuan a awm a. 41 Tin, Manasea fapa Jaira chuan chûnga khuate chu a va la a, Havoth-jair a vuah a. 42 Tin, Noba chuan Kenath a va la a, a khawperte nên, ama hming chawiin Noba a vuah a.

Numbers 33

Aigupta ram aṭanga Moab ram thlenga hmun tlawhte

1 Mosia leh Arona kaihhruaia Aigupta ram ata Israel-te a pâwl pâwla an chhuaha, an kal zêl dân chu hetiang hian a ni. 2 LALPA thupêka an kal chhuaha, an kal zêlnate chu Mosian a ziak a; an kal chhuaha an kalnate chu hêngahte hian a ni: 3 Israel-te chu kalhlên kût zawh aṭanga thla khatna ni sâwm leh ni nga niah Rameses aṭangin an chhuak a; kalhlên kût tûk chuan Aigupta mite mit hmuhah, 4 an fa tîr zawng zawng LALPAN a tihhlumsak an phûm laiin, Israela thlahte chu muk takin an chhuak a. LALPAN an pathiante pawh a hrem a. 5 Tichuan, Israela thlahte chu Rameses aṭangin an chhuak a, Sukkoth-ah awmhmun an khuar a. 6 Tin, Sukkoth aṭangin an chhuak a, thlalêr tawntirha Etham-ah awmhmun an khuar a. 7 Tin, Etham aṭang chuan an chhuak a, Baal-zephon bula Pi-hahirot lamah an tawlh kîr leh a, Migdol bulah awmhmun an khuar a. 8 Tin, Hahirot bul ata chu an chhuak a, tuifinriat an kal tlang a, thlalêrah an lût a; tin, Etham thlalêrah ni thum an kal a, Mara-ah awmhmun an khuar a. 9 Tin, Mara aṭang chuan an chhuak a, Elim an thleng a; Elim-ah chuan tuihna sâwm leh pahnih leh tûm kûng sawmsarih a awm a; chutah chuan awmhmun an khuar a. 10 Tin, Elim aṭang chuan an chhuak a, Tuifinriat Sen bulah awmhmun an khuar a. 11 Tin, Tuifinriat Sen aṭang chuan an chhuak a, Sin thlalêrah awmhmun an khuar a. 12 Sin thlalêr aṭang chuan an chhuak a, Dopka-ah awmhmun an khuar a. 13 Tin, Dopka aṭang chuan an chhuak a, Alus-ah awmhmun an khuar a. 14 Alus aṭang chuan an chhuak a, Rephidim-ah awmhmun an khuar a, chutah chuan mipuite tui in tûr a awm lo va. 15 Tin, Rephidim aṭang chuan an chhuak a, Sinai thlalêrah awmhmun an khuar a. 16 Sinai thlalêr aṭang chuan an chhuak a, Kibroth-hat-tava-ah awmhmun an khuar a. 17 Tin, Kibroth-hat-tava aṭang chuan an chhuak a, Hazeroth-ah awmhmun an khuar a. 18 Hazeroth aṭang chuan an chhuak a, Rithma-ah awmhmun an khuar a. 19 Tin, Rithma aṭang chuan an chhuak a, Rimon-perez-ah awmhmun an khuar a. 20 Rimon-perez aṭang chuan an chhuak a, Libna-ah awmhmun an khuar a, 21 Libna aṭang chuan an chhuak a, Risa-ah awmhmun an khuar a. 22 Tin, Risa aṭang chuan an chhuak a, Kehelatha-ah awmhmun an khuar a. 23 Tin, Kehelatha aṭang chuan an chhuak a, Sepher tlângah awmhmun an khuar a. 24 Tin, Sepher tlâng aṭang chuan an chhuak a, Harada-ah awmhmun an khuar a. 25 Tin, Harada aṭang chuan an chhuak a, Makheloth-ah awmhmun an khuar a. 26 Tin, Makheloth aṭang chuan an chhuak a, Tahath-ah awmhmun an khuar a. 27 Tin, Tahath aṭang chuan an chhuak a, Tera-ah awmhmun an khuar a. 28 Tin, Tera aṭang chuan an chhuak a, Mithka-ah awmhmun an khuar a. 29 Tin, Mitka aṭang chuan an chhuak a, Hasmona-ah awmhmun an khuar a. 30 Hasmona aṭang chuan an chhuak a, Moseroth-ah awmhmun an khuar a. 31 Tin, Moseroth aṭang chuan an chhuak a, Bene-jaakan-ah awmhmun an khuar a. 32 Tin, Bene-jaakan aṭang chuan an chhuak a, Hor-hagidgad-ah awmhmun an khuar a. 33 Tin, Hor-hagidgad aṭang chuan an chhuak a, Jotbatha-ah awmhmun an khuar a. 34 Tin, Jotbatha aṭang chuan an chhuak a, Abrona-ah awmhmun an khuar a. 35 Tin, Abrona aṭang chuan an chhuak a, Ezion-geber-ah awmhmun an khuar a. 36 Tin, Ezion-geber aṭang chuan an chhuak a, Zin thlalêrah awmhmun an khuar a (chu chu Kadesh an ti bawk). 37 Tin, Kadesh aṭang chuan an chhuak a, Edom ram dep Hor tlângah awmhmun an khuar a. 38 Tin, puithiam Arona chu LALPA thupêkin Hor tlângah chuan a han chho va, Israela thlahte Aigupta ram ata an lo chhuah kum sawmli kum, thla ngana, ni khat niin chutah chuan a thi a. 39 Tichuan, Arona chu Hor tlânga a thih chuan kum za leh sawmhnih leh pathum a ni. 40 Tin, Kanaan mi, Kanaan rama Chhima awm Arad lal chuan Israela thlahte lo kal chu a lo hria a. 41 Tin, Hor tlâng aṭang chuan an chhuak a, Zalmon-ah awmhmun an khuar a. 42 Tin, Zalmon aṭang chuan an chhuak a, Punon-ah awmhmun an khuar a. 43 Tin, Punon aṭang chuan an chhuak a, Oboth-ah awmhmun an khuar a. 44 Oboth aṭang chuan an chhuak a, Moab ram dep Iye-abarim-ah awmhmun an khuar a. 45 Tin, Iyim aṭang chuan an chhuak a, Dibon-gad-ah awmhmun an khuar a. 46 Tin, Dibon-gad aṭang chuan an chhuak a, Almon-diblathaim-ah awmhmun an khuar a. 47 Tin, Almon-diblathaim aṭang chuan an chhuak a, Nebo bula Abarim tlângahte chuan awmhmun an khuar a. 48 Tin, Abarim tlâng aṭangte chuan an chhuak a, Jeriko zâwn, Jordan kam Moab phaiah awmhmun an khuar a. 49 Jordan kam Beth-jesimoth aṭanga Abel-sitim thlengin Moab phaiah awmhmun an khuar a.

Jordan kai hnua an tih dân tûr

50 Tin, Jeriko zâwn, Jordan kam Moab phaiah chuan LALPAN Mosia a bia a, 51 “Israela thlahte chu bia la, an hnênah, ‘Jordan lui in kâna, Kanaan ram in luh hun chuan, 52 chumi rama awm zawng zawngte chu in hnawt chhuak vek ang a, an lung milem zawng zawngte chu in tichhe vek ang a, an milem chhûnte in tichhe vek ang a, an hmun sângte pawh in ṭhiat vek tûr a ni; 53 tin, ram chu in luah ang a, chutah chuan in awm ang; in luah atân ram chu ka pe tawh che u a ni. 54 Tin, a chi zir ang zêlin ṭhumvâwrin ram chu in luah ang a; a rual deuhte chu ram zau deuh in pe ang a, a rual lo deuhte chu ram zîm deuh in pe ang; ṭhumvâwra a tlûkna apiang chu an pual a ni ang a. In pi leh pute chi kal dân ang zêlin in luah tûr a ni. 55 Amaherawhchu, chumi rama awmte chu in hnawh chhuah loh chuan, in awmtîrte chu in mit tân chhuntu leh in pang tânte hlîng ang an ni ang a, in awmna ramah chuan an timangang ang che u. 56 Tin, heti hi a ni ang a, an chunga tih ka rilrûk ang chu in chungah ka ti ang,’ ti rawh,” tiin.

Numbers 34

Ramri

1 Tin, LALPAN Mosia a bia a, 2 “Israela thlahte chu thu pe la, an hnênah, ‘Kanaan ram in thlen hun chuan (Kanaan ram, a ramri zir ang zêla in luah tûr ram chu) 3 chhim lama in luah tûr chin chu Zin thlalêr aṭanga Edom ram hrûl zêl a ni ang a, chhim lam ramri chu Tuifinriat Al tâwp aṭanga chhak lampang a ni ang; 4 tin, in ramri chu Akrabim chhohna chhim lampangah a kawi ang a, Zin-ah a kal tlang ang a; tin, a lo chhuahna chu Kadesh-barnea chhim lamah a ni ang; tin, Hazar-adar-ah a kal ang a, Azmon-ah a kal zêl ang; 5 tin, ramri chu Azmon aṭangin Aigupta lui thlengin a kawi ang a, a chhuahna chu tuifinriatah a ni ang. 6 Tin, thlang lampangah chuan tuifinriat zau chu a ramri atân i chang ang a; hei hi thlang lama in ramri a ni ang. 7 Tin, hei hi hmâr lama in ramri a ni ang: tuifinriat zau aṭangin Hor tlâng huamin i siam ang a; 8 Hor tlâng aṭanga Hamath luhna thlengin i siam ang a, ramri chhuahna chu Zedad-ah a ni ang a; 9 tin, ramri chu Ziphron-ah a kal zêl ang a; tin, a chhuahna chu Hazar-enan-ah a ni ang; hei hi hmâr lama in ramri a ni ang. 10 Tin, chhak lama in ramri chu Hazar-enan aṭangin Sepham thlengin i siam ang a; 11 tin, ramri chu Sepham aṭangin Ribla thlengin Ain chhak lampangah a chhuk ang a; tichuan, ramri chu a chhuk zêl ang a, Kinereth tuifinriat chhak lampang a chhun ang a; 12 tin, ramri chu Jordan-ah a chhuk ang a; tin, a chhuahna chu Tuifinriat Al-ah a ni ang. Hei hi a chhehvêla ramri kal dân ang hian in ram a ni ang,’ ti rawh,” tiin. 13 Tichuan, Mosia chuan Israela thlahte chu thu a pe a, “Hei hi LALPAN hnam kua leh a chanvete pêk tûra thu a pêk, ṭhumvâwra in luah tûr ram chu a ni. 14 Reubena thlahte hnamin an chhûngkaw zir zêl leh, Gada thlahte hnamin an chhûngkaw zir zêl leh, Manase hnam zâtve pawhin an ram luah tûr chu an chang ta si a. 15 Hnam hnih leh hnam zâtvete chuan an ram luah tûr chu, ni chhuahna lam Jeriko zâwn Jordan râl chhak lamah an chang tawh a,” tiin. 16 Tin, LALPAN Mosia a bia a, 17 “Luah tûra ram ṭhensawmpuitute hming chu hêngte hi a ni: puithiam Eleazara leh Nuna fapa Josua-te hi.

Ram semtu tûr hming

18 “Tin, ram luah tûr ṭhentu atân hnam tin zînga puipa pakhat ṭheuh in thlang tûr a ni,” tiin. 19 Chûng mite hming chu hêng hi a ni: Juda hnama mi Jephunea fapa Kaleba; 20 Simeona thlahte hnama mi Amihuda fapa Semuela; 21 Benjamin hnam mi Kislona fapa Elidada; 22 Dana thlahte hnam zînga puipa Joglia fapa Bukia; 23 Josefa thlahte zînga mi, Manasea thlahte puipa Ephoda fapa Haniela; 24 Ephraima thlahte hnam zînga puipa Siptana fapa Kemuela; 25 Zebuluna thlahte hnam zînga puipa Parnaka fapa Elizaphana; 26 Isakara thlahte hnam zînga puipa Azana fapa Paltiela, 27 Asera thlahte hnam zînga puipa Selomia fapa Ahihuda; 28 Naphtalia thlahte zînga puipa Amihuda fapa Pedahela. 29 Hêngho hi Kanaan rama Israela thlah ram luah tûr sem tûra LALPAN thu a pêkate chu an ni.

Numbers 35

Levia chite awmna tûr khua

1 Tin, Jeriko zâwn Jordan kam, Moab phaiah chuan LALPAN Mosia a bia a, 2 “Israela thlahte chu thu pe la, an ramahte chuan Levi-ho awmna tûr khuate siamsak rawh se; tin, ran tlatna tûrin khaw dai kiang vêlte Levi-ho in pe tûr a ni. 3 Khuate chu an awmna tûr a ni ang a, a vêlte chu an bâwng leh an ran, an vulh zawng zawng tân a ni ang. 4 Tin, dai kiang Levi-ho in pêk tûr chu khaw kulh aṭanga tawng sângkhata thui a ni tûr a ni. 5 Tin, kulh pawn lam aṭangin in teh ang a, chhak lampangah tawng sânghnih, chhim lampangah tawng sânghnih, thlang lampangah tawng sânghnih, hmâr lampangah tawng sânghnih, khua a lai taka awmin. Hei hi an dai kiang pual a ni ang. 6 Tin, Levi-ho in pêk tûr khuate chu tualthatte tlân nân tualtlânna khaw paruk a ni ang a; chûng lo chu khaw sawmli leh khaw hnih in pe bawk tûr a ni. 7 Levi-ho in pêk tûr khua zawng zawng chu khaw sawmli leh khaw riat a ni ang; dai kiang nên in pe tûr a ni. 8 Israela thlahte luah khua in pêk dân tûr chu: a tam deuh aṭangin in pe tam ang a, a tlêm deuh aṭangin in pe tlêm ang a, mi tinin an luah ram tam dân azirin an khua chu Levi-ho an pe tûr a ni,” tiin.

Humhimna khuate

9 Tin, LALPAN Mosia a bia a, 10 “Israela thlahte bia la, an hnênah, ‘Jordan lui in kaia Kanaan ram in luh hun chuan, 11 tualtlânna tûr khua in ruat tûr a ni, tualthat palhtu tlân nân. 12 Chûng khuate chu phuba latu laka in tualtlânna a ni ang; pung khâwm hmaa rorêlsak tûra a din hmaa tualthattu chu a thih loh nân. 13 Tichuan, in tân tualtlânna tûr in ruatte chu khaw paruk a ni ang. 14 Jordan râlah khaw thum in ruat ang a, Kanaan ramah khaw thum in ruat ang a, tualtlânna khuate a ni ang. 15 Israela thlahte leh hnam dang leh an hnêna chêngte tân he khaw paruk hi tualtlânna a ni ang; chutah chuan tu pawh mi that palh apiang an tlân dâwn nia. 16 Amaherawhchu, thîr hmanga mi a beiha, a thih chuan tualthat a ni a; tualthat chu tihhlum ngei tûr a ni. 17 Tin, thi khawpa lunga mi a chhuta, a thih chuan tualthat a ni a; tualthat chu tihhlum ngei tûr a ni. 18 Tin, thi khawpa mi thinga a vuaka, a thih chuan tualthat a ni a; tualthat chu tihhlum ngei tûr a ni. 19 Thisen phuba latu chuan tualthattu chu a that nghâl mai ang; a hmuh hun hunah a tihlum tûr a ni. 20 Tin, mi a huat vânga a nam vak emaw, lo châng rua a vawm emawa a thihin emaw, 21 intaina avânga a chum hlum emaw chuan, a tihlumtu chu tihhlum ngei tûr a ni. Tualthat a ni. Thisen phuba latu chuan a hmuh hun hunah a tihlum tûr a ni. 22-23 “ ‘Amaherawhchu, intai vâng ni lêm lova nam thut emaw, châng ni kher lova mi an awm tih pawh hre lova, a hmêlma pawh ni lova, a pawi khawih pawh tum ni chuang lova lung emawa a dena, mi lo thi ta a nih chuan, 24 pung khâwmhovin hêng rorêlna dân ang hian a tihlumtu leh thisen phuba latu ro chu an rêlsak tûr a ni. 25 Tin, pung khâwmho chuan tualthattu chu thisen phuba latu lak ata chu an hum ang a, pung khâwmho chuan a tlânna, a tualtlânna khuaah chuan an awmtîr leh ang a, hriak thianghlima thih puithiam lal ṭang lai thih hma chu chutah chuan a awm tûr a ni. 26 Amaherawhchu, eng lai pawhin tualthattu chu a tlânna, a tualtlânna khaw ramri pawn lama a kala, 27 thisen phuba latuin a tualtlânna khaw pâwna a hmuha, thisen phuba latuin a thah chuan, thisenah chuan thiam loh a chang lo vang, 28 puithiam lal a thih hma loh chu a tualtlânna khuaa awm reng tûr a nih avângin. Puithiam a thih hnu erawh chuan tualthattu chu a awmna ramah chuan a haw leh tûr a ni. 29 Hêng thil hi in thlahte thlenga in awmna apianga in rorêl dân tûr a ni ang. 30 “ ‘Tu pawhin mi a thah chuan tualthattu chu hretute kâ aṭanga thuchhuakin tihhlum tûr a ni; amaherawhchu, hretu pakhat chu mi tihhlumna tûr chuan a tâwk lo. 31 Tin, tualthattu chu in tlan tûr a ni lo; thihna khawpa thiam loh chang a ni a, tihhlum ngei tûr a ni zâwk. 32 Tin, tualtlânna khuaa tlân chu, chutih laia puithiam lal thih hma chuan a awmna khaw hluia kîr leh tûra tlan phal a ni lo vang. 33 Chutichuan, in awmna ram chu in tibawlhhlawh lo vang a; thisen chuan ram chu a tibawlhhlawh a, thisen chhuahna ram tihbawlhhlawh sil nân a chhuahtu thisen ngawt lo chu hman theih a ni si lo. 34 In awmna ram, ka awmna hi in tibawlhhlawh tûr a ni lo, kei LALPA hi, Israela thlahte zîngah ka awm si a,’ ti rawh,” tiin.

Numbers 36

Ro khâwm hmeichhiaten mahni hnam mi chauh an nei thei ang

1 Tin, Josefa chhûngte zînga mi, Manasea fa Makira fapa Gileada thlahte chhûngkaw puipate zînga mite chuan an rawn hnaih a, Mosia leh hotu, Israela thlah puipate hmaah chuan thu an sawi a, 2 “LALPA chuan kan pu hi Israela thlahte chu, ṭhumvâwra an luah tûr ram pe tûrin thu a pe a; tin, LALPAN kan pu chu kan unaupa Zelophehada luah tûr chu a fanute pe tûrin thu a pe a. 3 Tin, anni chuan Israela thlahte zînga mi, hnam dang tu fate pawh nei sela, kan pi leh pute ram an luah chu lâksaka, an va telnate hnam ramah belh tûr a ni ang a; chutiang chuan kan ram chanpual ata chu theh chhuah a lo ni ang a. 4 Tin, Israela thlahte Jubili a lo thlen hun chuan, an ram chu an va telna tûrte apiang hnam ramah belh a ni ang a; chutichuan, kan pi leh pute hnam ram ata chu an ram lâk hêk a lo ni dâwn a,” an ti a. 5 Tin, Mosia chuan LALPA thu angin Israela thlahte chu thu a pe a, “Josefa fapate hnam hian an sawi dik a ni. 6 Zelophehada fanute chungchâng thua LALPAN thu a pêk chu heti hian a ni, ‘ṭha an tih apiang nei sela; amaherawhchu, an pate hnampui zînga mi ngei an nei tûr a ni,’ tiin. 7 Chutichuan, Israela thlahte ram chu hnam dang dang hnênah sawn sawn a ni lo vang. Israela thlahte chuan an pi leh pute hnam ram chu an chang reng tûr a ni. 8 Tin, Israela thlahte zînga ro luahtu tûr fanu apiang chu, Israela thlahten an pi leh pute ram an luah ṭheuh zêl theih nân, a pa hnampui zînga mi ngei nupui a ni tûr a ni. 9 Chutichuan, ram chu hnam dang dang hnênah sawn sawn a ni dâwn lo nia. Israela thlahte chuan anmahni ram ṭheuh chu an chang reng tûr a ni si a,” tiin. 10 Tin, LALPAN Mosia thu a pêk ang chiahin Zelophehada fanute chuan an ti a. 11 Zelophehada fanu Malai te, Tirzai te, Hoglai te, Milkai te, Novai te chuan an pa unauva fapate an nei a ni. 12 Josefa fa Manasea fapate an nei a, an ram chu an pa hnamah chuan a awm reng a ni. 13 Hêng hi LALPAN Mosia hmanga Jeriko zâwn Jordan râla Moab phaia Israela thlahte a pêk, thupêkte leh rorêl dânte chu a ni.

Deuteronomy 1

Thuhmahruai

1 Hêng thu hi Jordan chhak lam thlalêr, Paran leh Tophel leh Laban leh Hazeroth leh Dizahab inkâra Suph va dep, Araba-a Mosian Israel mi zawng zawng hnêna a sawi chu a ni. 2 Horeb tlâng aṭangin Kadesh-barnea chu Seir tlâng lam kawngah ni sâwm leh ni khat kal a ni. 3 Tin, kum sawmli kum, thla sâwm leh thla khatna, chumi thla ni khat nî chuan heti hi a ni a, LALPAN anmahni hrilh tûra thu a pêk ang zawng zawng chu Israela thlahte hnênah Mosian a sawi a; 4 Hesbon-a awm Amor-ho lal Sihona leh Edrei leh Astaroth-a awm Basan lal Oga a thah hnuin, 5 Jordan chhak lam Moab ramah he dân hi Mosian a puang ṭan ta a, 6 “LALPA kan Pathian chuan Horeb tlângah min bia a, ‘He tlângah hian in awm rei tâwk tawh e. 7 Insuan tawh ula, kal chhuak ula, Amor-ho tlâng ramah leh a chhehvêl zawng zawng, Araba-ah te, tlâng ramah te, phai ramah te, Chhim ramah te, Kanaan-hote awmna tuifinriat kamah te leh Lebanon-ah te, luipui, Euphrates lui thlengin kal rawh u. 8 Ngai teh u, ram chu ka pe tawh diam a che u; in pu Abrahama te, Isaaka te, Jakoba te leh an hnua an thlah leh zêlte hnêna chhechhama LALPAN a pêk ram chu va luah rawh u,’ tiin.

Mosian rorêltu tûrte a ruat

9 “Tin, chumi lai chuan in hnênah, ‘Keimah ngawt chuan ka zo lo che u a; 10 LALPA in Pathian chuan a tipung che u a, ngai teh u, tûnah hian in tam lam chu vâna arsi zât zet a lo ni ta a. 11 LALPA, in pi leh pute Pathian chuan tûn aia a lêt sângin tipung che u sela, a tiam che u angin malsâwm che u rawh se. 12 Engtin nge keimah chauhvin in buaina te, in phurrit te, in innghirnghona te chu ka phurh zawh ang? 13 In hnam zînga mi, mi fing, hmang hre mi, chinchâng hre mite inthlang chhuak ula, in chunga hotuah ka siam ang e,’ tiin ka bia che u a. 14 Tin, nangnin, ‘I thil sawi chu kan tân a ṭha hle mai,’ tiin mi chhâng a. 15 Chutichuan, in hnam hotute chu ka pawm a, in hnam zînga mi, mi fing, chinchâng hre mite in chunga hotuah ka siam a, sâng chunga hotu te, za chunga hotu te, sawmnga chunga hotu te, sâwm chunga hotu te, puipate pawh. 16 “Tin, chumi lai chuan in rorêltute chu, ‘In unaute kâra thu chu ngaihthlâksak ula, unau leh unau kârah leh ram dang mi, a awmpui nêna an kârah fel takin rêl rawh u. 17 Rorêlnaah thlei bîk in nei tûr a ni lo; mi tê leh mi lian inang rengin in ngaihthlâksak tûr a ni; tu mah in hlau tûr a ni lo; rorêlna chu Pathian ta a ni si a: in tâna thu khirh lutuk chu ka hnênah in rawn thlen thîn ang a; tin, chu chu ka lo ngaithla ṭhîn ang,’ tiin thu ka pe a. 18 Tin, chumi lai chuan thil in tih dân tûr zawng zawngah thu ka pe che u a.

Kadesh-barnea khua aṭangin enthlatute an tîr

19 “Tin, LALPAN thu min pêk angin Horeb tlâng aṭang chuan kan chhuak a, Amor-ho tlâng ram kawnga thlalêr zau tak leh râpthlâk tak in hmuh kha kan kal tlang vek a, Kadesh-barnea khua kan va thleng a. 20 Tin, in hnênah, ‘LALPA kan Pathianin min pêk Amor-ho tlâng ram chu in lo thleng ta a. 21 Ngai teh u, LALPA in Pathianin ram chu a pe tawh diam che u a ni; chho ula, LALPA in pi leh pute Pathianin a lo sawi tawh ang khân han luah rawh u; hlau suh ula, zâm hek suh u,’ ka ti a. 22 Tin, ka hnênah in lo kal vek a, ‘A ram te va thlîthlaia, kan chhohna tûr lam kawng leh kan va kalna tûr khaw chanchin te min rawn hrilh leh tûrin, kan hmaah mi va tîr ila,’ in ti a. 23 Chu chuan mi tilâwm hle mai a; tichuan, in zînga mi, mi sâwm leh pahnih, hnam khata pakhat zêl ka thlang a; 24 tichuan, an chhuak ta a, tlângah chuan an lâwn chho va, Eskol ruam an han thleng a, an en thlîthlai vek a. 25 Chu rama theite chu an lo va, min rawn hawn a, chanchin min rawn thlen a, ‘LALPA kan Pathianin ram min pêk chu ṭha tak a ni,’ an ti a. 26 “Nimahsela, in chho duh lo va, LALPA in Pathian thupêk chu in helsan a; 27 in puan inahte in phunnawi a, ‘LALPA chuan min huat avângin min tiboral tûra Amor-hote kuta pêk tûrin Aigupta ram ata min hruai chhuak a ni. 28 Khawiah chuan nge kan han chhoh vang? Kan unaute chuan, “Mihring chu kan aiin an lian a, an sâng zâwk bawk a; khuate chu a lian hle a, vân tawngin kulh a nei; tin, Anak-ho thlahte pawh kan hmu bawk a,” tiin kan thinlung an titui a,’ in ti a. 29 Tin, keiin in hnênah, ‘Anmahni chu ṭih suh ula, hlau bawk hek suh u. 30 LALPA in Pathian, in hmahruaitu chuan in mit hmuha Aigupta rama a tihsak tâk che u zawng zawng ang khân, a beihpui ang che u a, 31 thlalêrah pawh miin a fa a pua angin, LALPA in Pathian chuan hemi hmun in thlen thleng hian, kawng tluanin a puak zia che u in hmuh kha,’ ka ti a. 32-33 Nimahsela, chuti chung pawhin in puan in zârna tûr zawnsak tûr leh in kalkawng kawhhmuh tûra zâna meia, chhûna chhûma in hma hruaitu LALPA in Pathian chu in ring lo va.

Israel-te LALPAN a hrem

34 “Tin, LALPAN in thusawi chu a lo hria a, a thinrim a, 35 ‘He chhuan sual taka mi hi chuan pakhat tê mahin, in pi leh pute pêk tûra chhia ka chham ram ṭha tak chu an hmu lo vang a, 36 Jephunea fapa Kaleba chauh lo chuan; ani zawngin a hmu ang; a va rah ram chu amah leh a fate ka pe ang, ani chuan LALPA chu a pawm tlat avangin,’ tiin chhia a chham a. 37 Nangmahni avângin ka chungah pawh LALPA chu a thinur a, ‘Nang pawh hi chutah chuan i lût lo vang. 38 I rawngbâwltu Nuna fapa Josua hi chu a lût ang; ani hi fuih rawh, Israel-hote chu a luahtîr dâwn a ni. 39 In fanau tê tê, “Râllâkin an la mai ang,” in tih leh, tûna a chhia a ṭha la hre lo in fate hi an lût ang a, anni chu ka pe ang a, an luah ang. 40 Nangni erawh chu insuan ula, Tuifinriat Sen lamah thlalêrah kal rawh u,’ tiin. 41 “Tin, nangnin, ‘LALPA chungah kan lo sual ta a ni, kan han chho vang a, LALPA kan Pathianin thu min pêk zawng zawng angin kan han bei ang e,’ tiin mi chhâng a. Tichuan, indona thuamhnaw in inbel ṭheuh va, tlânga han chhoh chu thil namênah in ngai a. 42 Tin, LALPAN ka hnênah, ‘Chho suh u, han bei bawk hek suh u; in zîngah ka awm si lo, in hmêlmate chuan an lo tihlum dah ang che u, an hnênah ti rawh,’ mi ti a. 43 Chu chu ka hrilh che u a, in pawm lo va, LALPA thupêk chu in helsan ta zâwk a, tlângah chuan in han chho lui ta a. 44 Tin, chu tlânga awm Amor-ho chuan an lo bei che u a, khuai mi ûm angin an lo ûm che u a, Seir aṭangin Horma thlengin an that zêl che u a. 45 Tin, in lo kîr leh a, LALPA hmaah in ṭap a; nimahsela, LALPA chuan in aw chu a ngaithla duh lo va, a beng pawh a rawn chhi duh lo va. 46 Chutichuan, chuta in awm chhûng chu han ngaihtuahin Kadesh-ah chuan rei tak in awm a ni.

Deuteronomy 2

Thlalêrah an vâk an vâk

1 “Tin, kan insuan a, LALPAN ka hnêna a sawi angin Tuifinriat Sen lamah thlalêrah kan lût ta a; Seir tlâng chu rei tak kan vêl a. 2 Tin, LALPA chuan mi bia a, 3 ‘He tlâng hi in vêl rei tâwk tawh e; hmâr lam panin insuan tawh rawh u. 4 Mipuite chu Seir tlânga awm, Esauva thlah in unaute ramah in kal tlang dâwn a ni; anni chuan an lo hlau vang che u a; chuvângin, fîmkhur hle ula; 5 bei suh ang che u; an ram chu a khawii lai mah, kephaha rah khawp lek pawh ka pe dâwn hauh lo a che u; Seir tlâng chu a pualah Esauva ka pe tawh a ni. 6 An chaw te chu in eiah sumin in lei ang a; tin, an tuite chu in inah sumin in lei bawk tûr a ni. 7 LALPA in Pathian chuan in thawh apiangah te mal a sâwm ṭhîn che u a, he thlalêr zau tak hi in kal tlang dân te chu a hre si a; hêng kum sawmli chhûng zawng hian LALPA chu in hnênah a awm a, eng mah in tlâkchham loh kha, tiin thu pe rawh,’ tiin. 8 Chutichuan, Elath leh Ezion-geber aṭangin Araba kawnga kalin Seir tlânga awm Esauva thlah kan unaute ram kan pal tlang a. “Tin, kan insuan a, Moab thlalêr lamah kan kal a. 9 Tin, LALPA ka hnênah, ‘Moab-ho chu tibuai suh ula, râl beihin bei suh u; an ram chu in pualah ka pe dâwn lo a che u, Lota thlahte pualah Ar chu ka pe tawh a ni.’ ” 10 (Tûn hma lam chuan Anak-ho angin mi lian leh tam leh mi sâng pui pui Em-ho an awm thîn a; 11 chûngho pawh chu Anak-ho ang bawka Repha-ho tih an ni a; nimahsela, Moab-ho chuan Em-ho an ti ṭhîn a ni. 12 Tûn hma lam chuan Seir tlângah hian Hor-ho pawh an awm bawk ṭhîn a; nimahsela, Esauva thlahte hian an luahsak a; an that a, a hmunah chuan an awm ta a, Israel-hovin LALPAN an puala a pêk ram an tih ang khân.) 13 “ ‘Chutichuan, tho ula, Zered lui chu kân rawh u khai,’ a ti a. Tichuan, Zered lui chu kan kân ta a. 14 Kadesh-barnea aṭangin kan chhuak leh a, Zered lui kan kân a, LALPAN an hnêna chhia a chham anga, mipui zînga chumi chhuana râl kâp mi zawng zawng an mang vek inkâr chu, kum sawmthum leh kum riat a ni. 15 Mipui zîng ata an boral dêr hma loh chuan anmahni tiboral tûrin LALPA kutin a tai reng bawk a. 16 “Chutianga mipui zîng ata râl kâp mi zawng zawng an borala, an lo thih zawh hnu chuan heti hi a ni a, 17 LALPAN min bia a, 18 ‘Vawiinah hian Moab ram, Ar chu i kal tlang tûr a ni a; 19 tin, Amona thlahte ep i va thlen hnaih pawhin tibuai suh la, bei hek suh; Amon-ho ram chu i pualah ka pe dâwn lo che, Lota thlahte pualah ka pe tawh a ni. 20 (Chu pawh chu Repha-ho rama ngaih a ni bawk; chutah chuan tûn hma lamin Repha-ho an awm ṭhîn a. Nimahsela, Amon-ho chuan Zamzum-ho an ti ṭhîn a, 21 Anak-ho anga mi lian leh tam leh mi sâng pui pui an ni a; nimahsela, LALPAN a tihboralsak a, an luah ve ta thung a, an hmunah chuan an awm ta a; 22 Seir tlânga awm Esauva thlahte chu Hor-ho a tihboralsak laia a tih ang khân; tichuan, an luah ve ta thung a, an hmunah chuan tûn thleng hian an la awm ta a ni. 23 Tin, Gaza thlenga khaw tê têa awm Av-ho chu Kaptor aṭanga lo chhuak Kaptor-hovin an tiboral a, an hmunah chuan an awm ta a.) 24 Tho ula, kal chhuak ula, Arnon ruam kân rawh u; ngai teh u, Amor mi Hesbon lal Sihona leh a ram chu ka pe tawh che u a ni. Luah phawt ula, râl beihin bei rawh u. 25 Vawiinah hian, vân hnuai chhîna hnam tin chungah chuan nangmah ṭihna leh hlauhna ka awm ṭantîr ang a, i chanchin an lo hria ang a, an khûr ang a, nangmah avângin na tak tuarin an awm ang,’ tiin.

Israel-ten Lal Sihona an hneh

26 “Tin, Kedemoth thlalêr aṭangin Hesbon lal Sihona hnênah rem thu kengin mi ka tîr a, 27 ‘I ramah hian mi kal tlangtîr rawh khai; lamlianah zêl ka kal ang a, ding lamah emaw, vei lamah emaw pawh ka pêng lo vang e. 28-29 Ka eiah chaw a leiin sumin mi leitîr ang a, ka inah tui pawh sumin mi leitîr bawk ang a; Jordan ka kâna LALPA kan Pathianin min pêk ram ka luh hma loh chuan, Seir-a awm Esauva thlahte leh Ar-a awm Moab-hote mi tih ang khân mi kal tlangtîr ringawt mai rawh khai,’ tiin. 30 Nimahsela, Hesbon lal Sihona chuan a ramah min kal tlangtîr phal lo va; LALPA in Pathian chuan in kuta a pêk theihna tûr che uin a rilru a tikhauh va, a tiluhlul a ni, in hriat tâk ang hian. 31 Tin, LALPAN ka hnênah, ‘Ngai teh, Sihona leh a ram chu ka pe dâwn ta che a ni, a ram chu nei tûrin luah phawt mai rawh,’ mi ti a. 32 Tichuan, Sihona leh a mite zawng zawng chu Jahaz-a min bei tûrin an lo thawk a. 33 Tin, LALPA kan Pathian chuan min pe a; tichuan, amah leh a fapate leh a mite zawng zawng chu kan that a. 34 Tin, chumi ṭum chuan a khua zawng zawng chu kan la a, chûng khuaa mihring zawng zawng chu, hmeichhia leh an fanau tê tête nên lam kan tiboral vek a, zuah rêng rêng kan nei lo va; 35 kan lâk khuaa râllaka kan lâk thil leh rante chauh kan pualah kan la a ni. 36 Arnon ruam fêma Aroer aṭanga Gilead thlengin, kan tân sâng lutuk khua a awm hauh lo mai a, LALPA kan Pathianin min pe vek a ni. 37 Amona thlahte ram chauh in hnaih lo a ni, Jabok lui lehlam kam zawng zawng leh tlâng rama khuate leh, LALPA kan Pathianin min khapna apiangte nên.

Deuteronomy 3

Israel-ten Lal Oga an hneh

1 “Chutichuan, kan insuan a, Basan kawngah kan chho va; Basan lal Oga leh a mite zawng zawng chu Edrei-a min bei tûrin an lo thawk a. 2 Tin, LALPAN ka hnênah, ‘Amah chu hlau suh, amah leh a mite zawng zawng leh a ram chu i kutah ka pe tawh diam a ni; Hesbon-a awm Amor-ho lal Sihona chunga i tih ang khân a chungah i ti dâwn nia,’ a ti a. 3 “Chutichuan, LALPA kan Pathian chuan Basan lal Oga pawh a mite zawng zawng nên kan kutah a pe a; tichuan, pakhat tê mah zuahsak lovin kan that vek a. 4 Chumi ṭum chuan a khua zawng zawng khaw sawmruk, Basan-a Oga ram, Argob ram zawng zawng chu kan la vek a; kan lâksak loh khaw pakhat tê mah a awm lo. 5 Hêng khua zawng zawng hi kulh sâng tak tak, kawngkhâr leh kalhna nei vek a ni a, kulh nei lo khaw tam tak tiam lo pawhin. 6 Hesbon lal Sihona chunga kan tih ang khân kan tiboral vek a, khuaa mihring zawng zawng chu kan tiboral vek a, hmeichhia leh an fanau tê tête nên lam. 7 Amaherawhchu, ran zawng zawng leh khuaa râllâka kan lâk thilte chu kan pualah kan la a. 8 Chumi ṭum chuan Jordan râla awm Amor-ho lal pahnih kut ata chu, Arnon ruam aṭanga Hermon tlâng thlenga ram chu kan la a; 9 (chu Hermon chu Zidon-ho chuan Sirion an ti a, Amor-ho chuan Senir an ti a ni;) 10 phai ram khua zawng zawng leh Gilead ram zawng zawng leh Basan ram zawng zawng nên, Basan rama Oga ram khua, Saleka leh Edrei thlengin. 11 (Basan lal Oga chauh a ni, Repha-ho zînga la awm chhun chu; ngai teh, a khum chu thîr a ni; Amona thlahte khua Raba-ah chuan a la awm reng a ni lâwm ni? Mihring tawnga tehin a dung lam tawng kua, a vâng lam tawng li a ni.)

Jordan lui khawchhak lama khawsa ta hnamte

12 “Chumi ṭum chuan chumi ram chu kan luah a; Arnon ruam kianga Aroer aṭangin Gilead tlâng ram zâtve thlengin, chuta khaw awmte nên Reuben-ho leh Gad-ho ka pe a; 13 tin, Gilead ram la awm zawng leh Oga ram Basan zawng zawng chu Manase hnam zâtvete ka pe a; Argob ram zawng zawng leh Basan ram zawng zawng chu. (Hei hi Rephaim-ho ram an ti bawk ṭhîn a. 14 Manasea fapa Jaira chuan Argob ram zawng zawng, Gesur-ho leh Maakath-ho ram thlengin a la a, chûng chu, Basan chu, ama hming chawiin Havoth-jaira a ti a, tûn thlengin a la ti reng.) 15 Tin, Gilead chu Makira ka pe a. 16 Tin, Reuben-ho leh Gad-ho chu Gilead aṭanga Arnon ruam, ruam lai tak thlengin an ram chin atân ka pe a, Amona thlahho ramri, Jabok lui thlengin; 17 tin, Araba leh Jordan pawh ramri atân Kinereth aṭanga Pisga chhak lam pangpêr hnuaia Tuifinriat Al, Araba tuifinriat thlengin. 18 “Tin, chumi lai chuan, ‘LALPA in Pathianin he ram hi in pualah a pe che u a ni, Israela thlah, in unaute hmaah in mi huaisen zawng zawng chu inrâlthuamin han kal ve rawh se. 19-20 Amaherawhchu, nangmahni anga in unaute chu LALPAN râlmuanga a siam hma leh LALPA in Pathianin Jordan râla ram a pêk chu an luah ve hma loh chuan, in nupuite leh in fanau tê tête leh in rante chu (ran in ngah tih ka hria a) in khua ka pêk tâk che uah hian lo awm sela; tichuan, in pual ṭheuh tûra ka pêk che uah hian in lo haw leh ṭheuh dâwn nia,’ tiin thu ka pe che u a. 21 Tin, chumi lai bawk chuan Josua chu, ‘LALPA in Pathianin chûng lal pahnihte chunga thil a tih zawng zawng chu i mitin a hmu vek a; chutiang tak bawk chuan in luhna tûr ram zawng zawng chungah LALPAN a ti ang. 22 Anmahni chu hlau suh ang che u; a beihpuitu che u chu LALPA in Pathian a ni si a,’ tiin thu ka pe a.

Kanaan ramah Mosia a luh ve phal a ni lo

23-24 “Tin, chumi lai vêk chuan, ‘Aw LALPA PATHIAN, i chhiahhlawh hnênah hian i ropuizia leh i kut chak tak chu i lantîr ta phawt chu a ni a; vânah emaw, leiah emaw hian i thiltih ang leh i thiltih ropui tak ang ti thei Pathian hi tu nge awm? 25 Mi kaitîr la, Jordan râla ram ṭha tak, chu tlâng mawi tak leh Lebanon chu mi hmuhtîr teh khai,’ tiin, LALPA chu ka ngên chiam a. 26 Nimahsela, nangmahni avângin ka chungah LALPA chu a thinur hle a, ka thu chu a pawm lo va; tichuan, LALPA chuan, ‘Tâwk tawh rawh se, he thu-ah hian mi be leh tawh suh; 27 Pisga tlâng chhipah han chuang la, thlang lamah te, hmâr lamah te, chhim lamah te, chhak lamah te i mit han lên la, han thlîr rawh; Jordan hi i kân dâwn lo a ni. 28 Amaherawhchu, Josua hi thu pe la, fuih ṭha la, tichak rawh; hêng mipuite hi a hruai kai dâwn a, i han hmuh tûr ram chu a luahtîr dâwn a ni,’ mi ti a. 29 Chutichuan, Beth-peor ep ruamah chuan kan awm ta a nih kha.

Deuteronomy 4

Thu awih tûrin Mosian Israel-te a fuih

1 “Khai le, aw Israel mite u, LALPA, in pi leh pute Pathianin ram a pêk che u chu nungdama in luah theihna tûra in pawm tûra ka zirtîr ṭhin che u dânte leh rorêlte chu ngaithla rawh u. 2 LALPA in Pathian thupêk ka pêk che u hi in pawm theihna tûrin, thu ka pêk che u hi in belhchhah tûr a ni lo va, in tikiam tûr a ni hek lo. 3 Baal-peor avânga LALPA thiltih chu in mitin a hmu a; Baal-peor betu zawng zawngte chu LALPA in Pathianin in zîng ata a tiboral a. 4 LALPA in Pathian vuantu apiangte erawh chu tûn thleng hian nungdamin in la awm ṭheuh va. 5 Ngai teh u, in va luah tûr ramah pawh in zawm zêl tûrin, LALPA ka Pathianin thu mi pêk ang takin dânte leh rorêlte chu ka zirtîr che u a. 6 Chutichuan, pawm ula, zâwm rawh u; chu tak chu, hêng dân zawng zawngte hi hriaa, ‘He hnam ropui tak hi mi fing tak leh thil hre mi tak an ni ngei mai,’ titu hnamte mit hmuhah chuan in finna leh thil hre mi in nihna a ni ang. 7 “Kan koh apianga LALPA kan Pathianin min hnaih anga anmahni hnaih ṭhîn Pathian nei hnam ropui tu nge awm ve? 8 Heti taka fel, dânte leh rorêlte, tûna in hmaa ka zam zawng zawng ang dân nei hi hnam ropui dang tu nge awm ve? 9 Eng pawh ni sela, fîmkhur ula, ngun takin invawng phawt mai rawh u; chuti lo chuan, in mitin a thil hmuhte chu in theihnghilh ang a, in dam chhûngin in thinlung ata a bo dah ang e. In fate leh in tute zirtîr rawh u; 10 tin, Horeb tlânga LALPA in Pathian hmaa in dina, LALPAN ka hnêna, ‘Mipuite chu min koh khâwmsak rawh, leilunga an awm chhûng zawnga mi ṭih dân an zîr theih nân leh an fate zirtîr tûrin ka thute ka lo hriattîr ang e,’ mi tih ni pawh kha in theihnghilh dah ang e. 11 Tichuan, in lo hnai a, tlâng bulah chuan in lo ding a, vânlaizâwl tawngin tlâng chu thim te, chhûm te, thim chhah mup te awmtîrin a kâng ta a. 12 Tin, LALPA chuan mei aṭang chuan a rawn bia che u a. A thusawi chu in hria a; nimahsela, riruang eng mah in hmu lo va, aw chauh in hria a ni. 13 A thuthlung zawm tûra thu a pêk che u, thu sâwm pêk chu in hnênah a puang a, lungphêk pahnihah a ziak a. 14 Tin, chumi lai chuan luah tûra in va kaina rama in zawm tûrin dânte leh rorêlte zirtîr tûrin LALPAN thu mi pe a.

Milem be lo tûra fîmkhur tûr

15-19 “Chuvângin, fîmkhur hle rawh u; milemte insiam chawpin, a pa ang emaw, a nu ang emaw, leia ran ang emaw, boruaka thlâwk ṭhîn, sava thla nei ang emaw, leia a vaha vâk mi ang emaw, lei hnuai tuia sangha zînga mi ang emawte siamin in intichhe dah rual ang e; Horeb tlânga mei aṭanga LALPAN a rawn biak ni che u khân riruang eng mah in hmu si lo va; a nih loh leh vân lam in han hawia, ni te, thla te, arsi te, vâna mi zawng zawngte rêng pawh in han hmuhin, LALPA in Pathianin vân hnuai chhîna mi zawng zawng a ruatsakte chuan a hîp ang che u a, in bia ang a, an rawng te in bâwl mai dah rual ang e. 20 LALPA chuan a mite, a ro ni tûrin thîr rawh tuina ata, Aigupta ram ata chu a hruai chhuak zâwk che u a ni, tûna in nih ang hi. 21 Chuti chang pawh ni lovin, nangmahni avângin LALPA chu ka chungah a thinur a, Jordan lui chu ka kân lohva, in luah atâna ram ṭha tak LALPA in Pathianin a pêk che uah chuan ka luh loh nân chhia a chham bawk a. 22 Kei chu he rama thi tûr ka ni a, Jordan lui chu ka kai dâwn lo a ni; nangni erawh chu in kai ang a, chu ram ṭha tak chu in luah ang. 23 Fîmkhur hle rawh u, LALPA in Pathian thuthlung, in laka a thlun chu in theihnghilh ang a, LALPA in Pathianin eng anpui maha siam a phal loh milemte in insiam chawp dah rual ang e. 24 LALPA in Pathian chu kan ral hmang mei, thîkthuchhe tak Pathian a ni si a. 25 “Tu leh fate in han neiha, chu rama rei fe in awm hnua, in intihkhawlohva, eng emaw anpuitea milem siam chawp maite in dina, a thin tiur tûra LALPA in Pathian mit hmuha thil ṭha lo in tih vaih chuan, 26 Jordan kâna in va luah tûr ram ata chu in boral thuai mai ang tih, in chungchâng thu-ah min hriatpuitu atân tûnah hian lei leh vân ka sâwm a ni; in chêng rei lo vang a, in boral vek mai ang. 27 LALPA chuan hnam tin zîngah a tidarh ang che u, hnamte zîngah chuan tlêm tê chauhvin in awm ang. 28 Chutah chuan, pathian, thing leh lunga mihring siam, hmu thei hlei lo, hre thei hlei lo, ei thei hlei lo, rim pawh hre thei hlei lote in bia ang a. 29 Nimahsela, chutah pawh chuan LALPA in Pathian chu in zawna, in thinlung zawng zawng leh in rilru zawng zawnga in zawn chuan in hmu leh ang. 30 Hrehawma in awma, in chunga chûng thil zawng zawng chu a lo thlen hunah, a tâwp a tâwpah chuan LALPA in Pathian lam in lo hawi leh ang a, a thu chu in pawm tawh ang a; 31 LALPA in Pathian chu zahngai thei tak Pathian a ni si a; a thlahthlam lo vang che u a, a tiboral lo vang che u a, in pi leh pute hnêna chhechhama a thuthlun chu a theihnghilh hek lo vang. 32 “In awm hma, tûn hma lam te chu han chhût ula, leilunga Pathianin mihring a siam achin vân hnuai chhînah, hetianga thil ropui hi a awm ngaiin, hriat a ni ngai emaw chu? 33 Mei aṭanga thu rawn sawi in hriata in la nun cheu sina pathian aw miin an hre ngaiin, 34 hnam dang zing ata fiahna te, chhinchhiahna te, thil mak te, indona te, kut chak tak te, bân phar te, thil râpthlâk tea LALPA in Pathianin in mit hmuha Aigupta rama a tih zawng zawng anga hnam hruai chhuak ngam pathian an awm ngai emaw chu? 35 LALPA chu Pathian a ni tih in hriat theih nân in hnêna tihlan a ni a; amah lo chu a dang rêng an awm lo. 36 A zirtîr nân che u vân aṭangin a aw a rawn hriattîr che u a, lei chungah hian a meipui chu a hmuhtîr che u a; mei aṭanga a thu chu in lo hria a. 37-38 In pi leh pute a hmangaih avângin an hnua an thlahte chu a thlang che u a, amah telin, a thiltihtheihna ropui takin hnam dang in aia ropui leh thiltithei zâwk a hnawh chhuahsak che u a, an ram chu luah tûra luhtîr che uin Aigupta ram ata chu a hruai chhuak che u a, tûna in nih ang hi. 39 Chuvângin, tûnah hian in thinlungah vawng ula, chung lam vânah leh hnuai lam leiah hian LALPA chu Pathian a ni tih hre rawh u; a dang rêng an awm lo. 40 Kumkhua atâna LALPA in Pathianin a pêk che u ramah chuan, nangmahni leh in thlahte tâna ṭha tûr leh in chên rei theih nân, a dânte leh a thupêkte, tûna ka pêk che u hi in zâwm tûr a ni,” tih hi.

Jordan lui khawchhak lama humhimna khuate

41-42 Chutichuan, Mosia chuan tualthattu, a ṭhenawm khawvêng, tûn hma pawha a huat lêm loh that palhtu tualtlânna, Jordan râl ni chhuahna lampangah khaw pathum a ruat a; chûng khua, a engah pawh a tlân chuan a him ang a: 43 chûng chu Reuben-ho pualah thlalêra tlâng zâwla Bezer te, Gad-ho pualah Gilead-a Ramoth te, Manase-ho pualah Basan-a Golan te a ni a.

Mosian Pathian hnên ata dân a dawng

44 Tin, hei hi Mosian Israela thlahte dân a pêk chu a ni; 45-46 hêng hi, Aigupta ram ata an lo chhuah laia Israela thlahte hnêna Mosian Jordan râla, Mosia leh Israela thlahten Aigupta rama an lo chhuah laia an thah, Hesbon-a awm Amon-ho lal Sihona rama Beth-peor zâwn ruama a sawi hriattîrna te, dân te, rorêl te chu a ni; 47 a ram leh Basan lal Oga ram, Jordan râl ni chhuahna lama Amor-ho lal pahnihte ram chu an luah a; 48 Arnon ruam fêma Aroer aṭanga Sion tlâng (Hermon an ti bawk) thleng leh 49 Jordan râl chhak lampang Araba zawng zawng, Pisga pangpêr hnuaia Araba tuifinriat thlengin.

Deuteronomy 5

Thu sâwm pêk

1 Tin, Mosian Israel-ho zawng zawng chu a ko khâwm a, an hnênah, “Aw Israel mite u, in zira in pawm tûra dân te, rorêl te in beng hriata vawiina ka sawi hi ngaithla rawh u. 2 LALPA kan Pathianin Horeb-ah chuan kan hnênah thu a thlung a. 3 LALPA chuan he thu hi kan pi leh pute hnênah khân a thlung lo va, keiniho, tûn thlênga mi nungdama la awm zawng zawngte hnênah ngei hian a ni, a thlun zâwk ni. 4 LALPA chuan tlângah mei aṭangin inhmatawnin a bia che u a 5 (chumi lai chuan LALPA thu kawhhmuh tûr che uin LALPA nêna in inkârah ka ding a; mei avâng chuan in hlau si a, tlângah chuan in han chho lo va): 6 “ ‘Kei hi LALPA i Pathian, Aigupta ram ata, bâwih ata hruai chhuaktu che ka ni. 7 “ ‘Keimah lo chu pathian dang rêng rêng i nei tûr a ni lo. 8 “ ‘Milem siam chawp, chung lam vâna mi emaw, hnuai lam leia mi emaw, lei hnuai lama tuia mi emaw, a eng anpui mah i insiam tûr a ni lo; 9 chung chu chibai i bûk tûr a ni lo va, an rawng i bâwl tûr a ni hek lo. Kei LALPA i Pathian hi Pathian thîkthuchhia, pate khawlohna avânga fate hrem ṭhîn, mi hawtute chu chhuan thumna leh chhuan lîna thlenga hrem thîn leh, 10 mi hmangaiha ka thupêkte pawmtu sâng tam takte chunga khawngaihna lantîr ṭhîn ka nih hi. 11 “ ‘LALPA i Pathian hming chu i lam mai mai tûr a ni lo. LALPA chuan a hming lam mai maitu chu thiam loh chantîr lohvin a chhuah dâwn si lo va. 12 “ ‘LALPA i Pathianin thu a pêk che angin Chawlhni chu thianghlim reng tûrin serh rawh. 13 Ni ruk chhûngin i thawk ang a, i hna zawng zawng chu i thawk tûr a ni; 14 a ni sarih nî erawh chu LALPA i Pathian tân Chawlhni a ni e; chumi nî chuan hna rêng rêng i thawk tûr a ni lo, nang pawhin, i fapa pawhin, i fanu pawhin, i bâwihpa pawhin, i bâwihnu pawhin, i bâwngpa pawhin, i sabengtung pawhin, i ran a enga pawhin, i ina ram dang mite pawhin; nangmah ang bawka i bâwihpa te, i bâwihnu te pawh an chawlh theih nân. 15 Nang pawh Aigupta ramah khân bâwih i ni tawh a, LALPA i Pathianin chuta ta chu kut chak tak leh bân phara a hruai chhuah che i ni tih hre reng rawh; chu vâng chuan a ni, LALPA i Pathianin Chawlhni serh tûr thu a pêk che ni. 16 “ ‘LALPA i Pathianin thu a pêk che angin i nu leh i pa chawimawi rawh; tichuan, LALPAN ram a pêkah che hian i hmuingîl ang a, i dam rei dâwn nia. 17 “ ‘Tual i that tûr a ni lo. 18 “ ‘I uire tûr a ni lo. 19 “ ‘I ru tûr a ni lo. 20 “ ‘I vêngte chungah hretu derah i insiam tûr a ni lo. 21 “ ‘I vêngte nupui i awt tûr a ni lo va, i vêngte in emaw, a lo emaw, a bâwihpa emaw, a bâwihnu emaw, a bâwngpa emaw, a sabengtung emaw, i vêngte thil a enga mah i awt tûr a ni lo,’ tiin.” 22 “Hêng thute hi tlângah mei te, chhûm te, thim chhah mup aṭangtein LALPAN aw ring takin in zavaia pung khâwmho hnênah a sawi a, a belhchhah leh chuang lo va. Chûng chu lungphêk pahnihah a ziak a, mi pe a.

Mipuiin an hlau

23 “Tin, tlâng chu a kan laia, thim aṭanga aw chu in han hriat chuan heti hi a ni a, min rawn hnaih a, in hnam puipa zawng zawng leh in upate chuan; 24 tin, ‘Ngai teh, LALPA kan Pathian chuan kan hnênah a ropuizia leh a lenzia a lantîr a, mei aṭanga a aw chu ka hria a; Pathianin mihring a biak pawha thihna a nih chuan lohna chu vawiinah kan lo hre ta a. 25 Chuvângin, engah nge kan thih ang? Hemi mei nasa tak hian min kâng ral mai ang asin; LALPA kan Pathian aw chu kan hriat leh chuan ka thi mai ang. 26 Mei aṭanga Pathian nung aw kan hriat anga hre vea dam si, tisa pu zawng zawng zîngah tu nge awm? 27 Nangin va hnaih la, LALPA kan Pathianin a sawi tûr zawng zawng chu va ngaithla teh khai; tin, LALPA kan Pathianin i hnêna a sawi zawng zawng chu nangin kan hnênah i sawi ang a; tichuan, kan lo ngaithla ang a, kan zâwm dâwn nia,’ in ti a. 28 “Tin, mi biak laia in thusawi chu LALPAN a lo hria a; tichuan, LALPAN ka hnênah, ‘Hêng mipuiten i hnêna thu an sawi chu ka lo hria a; an thusawi zawng zawng chu a ṭha hle mai. 29 Chutiang rilru chu pu ṭhîn sela aw, mi ṭih ang a, ka thupêkte chu an zâwm fo vang a, anmahni leh an fate pawh kumkhuain an hmuingîl hle tûr. 30 An hnênah, “In puan inahte va haw rawh u,” ti rawh. 31 Nang erawh chu ka kiangah ding la, luah tûra ram ka pêkah an pawm tûra i zirtîr tûr thupêk zawng zawng te, dân te, rorêl te chu ka hrilh ang che,’ a ti a. 32 Chuvângin, LALPA in Pathianin thu a pêk che u anga ti tûrin fîmkhur rawh u; ding lamah emaw, vei lamah emaw in pêng tûr a ni lo. 33 In va luah tûr ramah in awma, in hmuingîlna tûr leh in chên rei theih nân LALPA in Pathianin thu a pêk che u kawng in zawh tluan chhuak tûr a ni.

Deuteronomy 6

Thupêk ropui

1-2 “Tin, luah tûra in va kaina rama in zawm tûr leh nangni leh in fapate leh in tupaten LALPA in Pathian chu in ṭiha, in dam chhûng zawnga a dân zawng zawng leh a thupêk ka pêk che u hi in zawmna tûr leh, in lo chên rei theihna tûra LALPA in Pathianin nangmahni zirtîr tûra thu min pêk, thupêk te, dân te, rorêl te chu hêngte hi a ni. 3 Chuvângin, aw Israel mite u, in hmuingîla, LALPA in pi leh pute Pathianin a ṭawngtiam che u angin, hnutetui leh khawizu luanna rama nasa taka in lo pun theih nân ngaithla ula, zâwm tûrin fîmkhur rawh u. 4 “Aw Israel mite u, ngaithla teh u, LALPA kan Pathian chauh chu LALPA a ni a; 5 LALPA in Pathian chu in thinlung zawng zawngin, in rilru zawng zawngin, in chakna zawng zawngin in hmangaih tûr a ni. 6 Tin, hêng thu, vawiina ka pêk che u hi in thinlungah a châm reng ang a; 7 in fate ṭhahnemngai takin in zirtîr ang a, in ina in ṭhut lai te, kawnga in kal lai te, in mut lai te, in thawh hun tein in sawi ṭhîn tûr a ni. 8 Tin, chhinchhiahna atân in bânah in zem ang a, in mit leh mit inkâra chal hrênna atân a awm bawk tûr a ni. 9 Tin, in in kawngka biangah te, in kawngkhârah te in ziak tûr a ni.

Thupêk awih loh hlauhawmzia

10-11 “Tin, heti hi a ni ang a, LALPA in Pathianin in pu, Abrahama te, Isaaka te, Jakoba te hnêna chhechhama a pêk che u ram, in din ni hauh lo, khaw ropui leh mawi tak tak te; in tihkhah ni hauh lo, thil ṭha tinrênga khat in te; in chhun ni hauh lo, tuikhur chhun sa te; in chîn ni hauh lo, grêp huan leh olive thingte awmnaa a hruai luh che ua, in eia, in tlai hle hun chuan, 12 fîmkhur hle ang che u; chuti lo chuan, Aigupta ram ata, bâwih ata hruai chhuaktu che u LALPA in Pathian chu in theihnghilh mai dah ang e. 13 LALPA in Pathian chu in ṭih ang a, ama rawng chu in bâwl ang a, a hming chhâlin chhia in chham tûr a ni. 14 Pathian dang, in vêla mite pathiante chu in be tûr a ni lo, 15 in zînga awm LALPA in Pathian chu Pathian thîkthuchhia a ni; LALPA in Pathian thin chu in chungah a thawk ang a, leilung ata hi a tiboral mai dah ang che u. 16 “Masa-a in fiah ang khân LALPA in Pathian chu in fiah tûr a ni lo. 17 LALPA in Pathianin a pêk che u - thupêk te, a thuhriattîr te, a dân te hi fîmkhur takin in zâwm tûr a ni. 18-19 In hmuingîlna tûr leh LALPAN a sawi tawh anga in hmêlma zawng zawng hnawt chhuak tûra, LALPAN in pi leh pute hnêna chhia a lo chham tawh ram ṭha tak chu in va luah theih nân, LALPA mit hmuha dik leh ṭha chu in ti tûr a ni. 20 “Tin, in faten, ‘LALPA kan Pathianin thu a pêk che u thuhriattîr te, dân te, rorêl te hi engtizia nge ni le?’ tia nakin lama an la rawn zawh hun che u chuan, 21 nangnin in fate hnênah, ‘Aigupta ramah Pharaoa bâwih kan ni a, LALPAN Aigupta ram ata chu kut chak takin min hruai chhuak a; 22 tin, LALPAN kan mit hmuhah Aigupta ram chungah te, Pharaoa chungah te, a chhûngte zawng zawng chungah te, chhinchhiahna leh thil mak nasa tak leh manganthlâk takte a entîr a; 23 keini erawh chu min pêk tûra kan pi leh pute hnêna chhia a lo chham ram chu min pêk theih nân chuta ta chu min hruai chhuak a. 24 Tichuan, hêng dân zawng zawng hi zâwm tûr leh kan ṭhat rengna tûra LALPA kan Pathian chu ṭih tûrin LALPA chuan thu min pe a, vawiin anga nungdama min zuah reng theih nân. 25 A thu min pêk anga LALPA hmaa a thupêk zawng zawng zâwm tûra kan fîmkhur chuan kan tân damna a ni dâwn a ni,’ in ti tûr a ni.

Deuteronomy 7

LALPA pual hnam

1 “LALPA in Pathianin in va luah tûr rama a hruai luh che ua, in hmaa hnam tam tak - Hit-ho te, Girgas-ho te, Amor-ho te, Kanaan-ho te, Periz-ho te, Hiv-ho te, Jebus-ho te, in aia ropui leh thiltithei zâwk hnam sarihte a hnawh chhuah hun leh, 2 LALPA in Pathianin a pêk hun che ua, in thah hunah chuan, in tiboral vek tûr a ni; anmahni nên thu in thlung tûr a ni lo va, in khawngaih tûr a ni hek lo; 3 nupui pasalah in nei tûr a ni hek lo, in fanute chu an fapate in neihtîr tûr a ni lo va, an fanute chu in fapate in neihtîr tûr a ni hek lo. 4 In fapate, mi zui lai hi pathian dangte biakna lamah an hruai kawi mai ang a; tin, LALPA thin pawh chu in chungah a thawk ang a, a tiboral thuai mai ang che u. 5 An chungah hetiang hian in ti zâwk tûr a ni: an maichâmte in tichim ang a, an lungphunte in tikeh sawm ang a, an Aseri-te in kit ang a, an milem siam chawpte in hâl vek tûr a ni. 6 LALPA in Pathian tân hnam thianghlim in ni si a; leilunga hnam ahluana a pual bîk ni tûra LALPA in Pathianin a thlan che u in ni a. 7 “Hnam dang aia in tam avângin LALPAN in chungah a hmangaihna a fûktîr a, a thlang che u a ni lo va; hnam zawng zawnga hnam tlêm ber in ni asin; 8 LALPAN a hmangaih che u avâng leh in pi leh pute hnêna chhia a lo chham chu hlen a duh avâng zâwkin asin, LALPAN Aigupta lal Pharaoa kut ata kut chak takin bâwih ata a tlan chhuah che u ni. 9 Chuvângin, LALPA in Pathian chu Pathian a ni tih hre rawh u; Pathian rinawm, amah hmangaiha a thu zâwmtu chunga chhuan sâng thlenga thuthlung leh khawngaihna nghat renga, 10 amah hawtute tiboral tûra anmahni chung la laa thungrûl ṭhîn a ni; amah hawtute chu a rial rei lo vang a, anmahni chung la laah a thungrûl ang. 11 Chuvângin, thupêk te, dân te, rorêl te zawm tûra vawiina thu ka pêk che u hi in zâwm tûr a ni.

Thuawih vânga malsâwmna dawn tûr

12 “Tin, heti hi a ni ang a, hêng rorêlte hi in ngaihthlâka, in zawma, in tih avângin LALPA in Pathianin in pi leh pute hnêna chhia a lo chham, thuthlung leh khawngaihna chu in chungah a nghat ang a; 13 a hmangaih ang che u a, mal a sâwm ang che u a, a tipung ang che u; pêk tûra in pi leh pute hnêna chhia a chham ramah chuan in rîla rah leh in lei rah pawh mal a sâwm ang, in buh te, in uain te, in hriak te, in bâwngno leh in berâmnote pawh. 14 Hnam zawng zawnga malsâwmna dawng nasa ber in ni ang a; in zîngah a hmei a pa ching rêng rêng an awm lo vang, in ran zîngah pawh. 15 Tin, LALPAN hri zawng zawng a tihkiansak vek ang che u a, in hriat tawh hnu Aigupta ram hrite chu in chungah a lêntîr lo vang a, a hawtute che u zawng zawng chungah a lêntîr zâwk ang. 16 LALPA in Pathianin a pêk tûr che u hnam zawng zawng in tiboral vek tûr a ni; in khawngaih tûr a ni lo va, an pathian rawng pawh in bâwl tûr a ni lo; in tân thang a ni dâwn si a. 17 “In rilrua, ‘Hêng hnamte hi kan aiin an tam si a, engtin nge kan luhchhuah theih ang?’ ti in nih chuan, 18 anni chu hlau suh ula; LALPA in Pathianin Pharaoa leh Aigupta mi zawng zawng chunga a thiltihte kha hre rawh u, 19 fiahna nasa tak in mit ngeia in hmuh te, chhinchhiahna te, thil mak te, kut chak tak te, bân phar tea LALPA in Pathianin a hruai chhuahna che u kha; khatiang khân LALPA in Pathianin in mi hlauhte chungah chuan a ti zêl ang. 20 LALPA in Pathian chuan an zîngah khawinghal a tîr leh nghâl ang, a la dam, in laka birute chu an boral vek thlengin. 21 Anni chu in hlau tûr a ni lo; LALPA in Pathian chu in zîngah a awm si a, Pathian ropui tak, ṭihbaiawm tak mai chu. 22 LALPA in Pathian chuan chûng hnamte chu zawi zawiin a hnawh chhuahsak hret hret ang che u a; in tiboral nghâl mai tûr a ni lo va; chuti lo chuan, ramsate in pawi khawih khawpin an lo pung mai ang. 23 An boral hma loh chu LALPA in Pathianin a pe ang che u a, buai namênlovin a tibuai ang. 24 An lalte chu in kutah a pe ang a, an hming chu vân hnuai ata hi in thai bo daih tûr a ni; in tihboral dêr thlengin a chelh tûr che u tu mah rêng rêng an awm lo vang. 25 An pathian lem siam chawpte chu in hâl tûr a ni; chumia tangkarua emaw, rangkachak emaw chu in ît tûr a ni lo va, in tân in la tûr a ni hek lo; chuti lo chuan, in âwk dah ang e; LALPA in Pathian ngaihin thil tenawm a ni si a; 26 in in chhûnga thil tenawm la lûtin, chu thil ang chuan ânchhe dawngah i insiam tûr a ni lo; ten namênlova tenin in haw hle tûr a ni, ânchhe dawng thil a ni si a.

Deuteronomy 8

Ram ṭha tak neih tûr

1 “Nungdama in awma, in lo pun zêla, pêk tûr che ua in pi leh pute hnêna LALPAN chhia a chham ram chu in va luah theih nân, thupêk vawiina ka pêk che u hi zâwm tûrin in fîmkhur tûr a ni. 2 Tin, a thupêkte chu in zâwm dâwn nge dâwn lo, in rilru hriat nân fiah tûr leh tihrehawm tûr che u a, thlalêra kum sawmli a hruaina zawng zawng che u kawng chu hre reng rawh u. 3 Mihring hi chhang chauhvin an nung lo va, LALPA kâa thu tin chhuakin an nung zâwk a ni tih a hriattîr theih nân che u, a tihrehawm che u a, in ṭâm te a phal a, in hriat ngai loh, in pi leh pute pawhin an hriat ngai bîk loh manna chuan a châwm che u a. 4 Hêng kum sawmli chhûng hian in silhfênte chu in sin chul lo va, in kete pawh a vûng lo va. 5 Tin, miin a fa a thunun ṭhîn angin, LALPA in Pathian chuan a thunun ṭhîn che u a ni tih hi in rilruin hre reng rawh u. 6 Tin, a kawng zawh tûr leh amah chu ṭih tûrin LALPA in Pathian thupêkte chu in zâwm tûr a ni. 7 LALPA in Pathian chuan ruam leh tlâng aṭanga lo chhuak lui tui te, tuikhur leh tui thûk tak awmna ram, 8 buh te, barli te, grêp te, theipui te, pawmgranet te awmna ram, hriak nei olive leh khawizu awmna ram, 9 chham lova chhang in ei ṭhinna tûr ram, eng mah in tlâkchham lohna tûr, a lungte chu thîr, a tlângte chu dâr laih chhuah theihna ram ṭha takah chuan a hruai lût dâwn si che u a. 10 In eia, in tlai hle hun chuan, ram ṭha tak a pêk che u avâng chuan LALPA in Pathian chu in fak ang.

LALPA theihnghilh lo tûra fîmkhur tûr

11 “A thupêk te, a rorêl te, a dân te, vawiina ka pêk che u hi zâwm lovin LALPA in Pathian chu in theihnghilh dah rual ang e, fîmkhur rawh u; 12 chuti lo chuan, in eia, in tlaia, in ṭha takte in saka, in luah hun leh, 13 in ran rual te, in berâm rual te a lo puna, in tangkarua te, in rangkachak te a lo puna, in thil neih zawng zawngte a lo pun hun chuan, 14 in rilrute a lo chapo vang a, bâwih ata Aigupta ram aṭanga hruai chhuaktu che u LALPA in Pathian chu in theihnghilh mai ang. 15 Ani chuan thlalêr zau tak leh râpthlâk tak, rûl chuk na mite leh khawmualkaikuangte awmna, tui awm lohna, ram rovah a hruai tlang che u a; meilung lungpui aṭangin tui a tihchhuahsak che u a, 16 in pi leh pute hriat ngai loh manna chuan a châwm che u a, tûn hnu lam thua in ṭhat theih nân a tihrehawm che u a, a fiah theihna tûr che uin. 17 Tin, ‘Hêng kan sum leh paite hi keimahni chakna leh kan kutkawih a ni,’ in ti rilru dah ang e, fîmkhur bawk rawh u. 18 Tûna a ngheh anga in pi leh pute hnêna chhechhama thuthlun chu a tihnghehna tûrin, LALPA in Pathian chu hre reng rawh u, sum leh pai deh chhuah theihna petu che u chu amah chu a ni zâwk asin. 19 Tin, heti hi a ni ang a, LALPA in Pathian chu in theihnghilha, pathian dangte in zuia, an rawngte in bâwla, in biak vaih chuan in boral ngei ngei ang tih vawiinah hian ka hriattîr a che u. 20 In hmaa hnam dangte a tihboral angin nangni pawh in boral ang, LALPA in Pathian aw chu ngaithla duh lo in nih dâwn avângin.

Deuteronomy 9

Mipui thuawih lo

1-2 “Aw Israel mite u, ngaithla teh u, ‘Anak-ho chu tuin nge chelh ang i?’ an tih ṭhin, in aia ropui leh thiltithei zâwk hnam, khawpui vân tawnga kulh nei leh ropui tak, mi lian tak, sâng pui pui, in hriat tawh sa Anaka thlahte ram chu va luah tûrin tûnah chuan Jordan lui chu in kân dâwn ta a. 3 Chuvângin, LALPA in Pathian chu kan ral hmang mei anga in hmaa kal ṭhîna chu a ni tih tûnah hian hre rawh u; ani chuan anni chu a tiboral ang a, a tihtlâwmsak ang che u a; tichuan, LALPAN in hnêna a sawi tawh ang khân, anni chu in hnawt chhuak ang a, in tiboral thuai mai ang. 4 “LALPA in Pathianin a hnawh chhuahsak hnu che u chuan, ‘Kan felna avângin he ram hi luah tûrin LALPAN min hruai lût a ni,’ in rilruin ti hauh suh u; hêng hnamte hi an sual avâng zâwkin a ni, LALPAN a hnawh chhuahsak dâwn che u ni. 5 In fel avâng emaw, in rilru dik avâng emawin an ram chu in luah dâwn lo va, hêng hnam sual avâng leh LALPAN in pu Abrahama te, Isaaka te, Jakoba te hnêna a chhechham thu tinghet tûrin, LALPA in Pathianin anni chu a hnawh chhuahsak che u a ni zâwk e. 6 Chuvângin, he ram ṭha tak hi in fel avânga luah tûrin LALPAN a pe che u a ni lo tih hre rawh u; hnam luhlul tak in ni si a. 7 “Thlalêra LALPA thin in tihur ṭhinzia te kha hre reng ula, theihnghilh suh u; Aigupta ram ata in chhuah nî aṭanga hemi hmun in lo thlen thleng hian LALPA chunga hel hmang in ni a. 8 Horeb-ah pawh khân LALPA thin tiura, tiboral hial tûr che uin LALPA a thinrim a. 9 Lungphêk, in hnêna LALPAN thuthlunna lungphêk, la tûra tlânga ka han chhoh lai khân ni sawmli leh zan sawmli tlângah chuan ka han awm a; chhang pawh ka ei lo va, tui pawh ka in hek lo. 10 Tin, LALPA chuan lungphêk pahnih, Pathian kutzunga ziak chu mi pe a; chumiah chuan in pun khâwm nîa tlâng chunga mei aṭanga LALPAN in hnêna thu a sawi zawng zawng kha a chuang a. 11 Tin, ni sawmli leh zan sawmli hnuah chuan heti hi a ni a, lungphêk pahnih, thuthlunna lungphêk chu mi pe a. 12 Tin, LALPA chuan ka hnênah, ‘Tho la, heta ta hi chhuk thuai rawh; Aigupta ram ata i hruai chhuah, i mite chu an intihchhiat zawh tâk khu; zawh tûra thu ka pêk kawng ata chu an pêng ta pang mai a, milem chhûn chawp an insiam tâk mai khu,’ a ti a. 13 Tin, LALPA chuan, ‘He mite hi ka en ka enin, ngai teh, hnam luhlul tak an ni; 14 anmahni tiboral tûr leh vân hnuai ata an hming thai bo tûrin ka tih tihin ka han ti teh ang: tin, nang hi anmahni aia hnam thiltithei leh ropui zâwkah ka siam teh ang che,’ tiin min be bawk a. 15 “Chutichuan, tlâng ata chu ka lêt thla a, tlâng chu a kâng ta a; thuthlunna lungphêk pahnih chu ka kut khinghnihin ka keng a. 16 Tin, ka han thlîr a, ngai teh u, LALPA in Pathian chungah in lo sual ta a; bâwngno lem chhûn chawp in insiam a, LALPAN thu a pêk che u kawng ata chu in pêng ta pang mai a. 17 Tin, lungphêk pahnih chu ka chawi a, ka kut khinghnih ata chu ka paih a, in mit hmuhah ka tikeh a. 18 Tin, hmâna ka tih ang khân ni sawmli leh zan sawmli LALPA hmaah ka bawkkhup a; a thin tiur tûra LALPA mit hmuha in thil tihsual tâk, in sualna zawng zawng avângin chhang pawh ka ei lo va, tui pawh ka in hek lo. 19 Nangmahni tiboral tûra LALPA thinurna, a thinrimna leh lungnihlohna nasa tak chu ka hlau si a. Nimahsela, chumi ṭum pawh chuan LALPAN ka thu chu mi ngaihthlâksak a. 20 Tin, LALPA chu Arona tiboral duh hial khawpin a thinur a; nimahsela, Arona pawh ka ṭawngṭaisak nghâl bawk a. 21 In sualna avânga in siam bâwngno lem chu ka la a, ka hâl a, ka chhu sawm a, vaivut angin ka râwt dip derh a; tin, a dip chu tlâng aṭanga lui lo luangah chuan ka paih a. 22 “Tin, Tabera-ah te, Masa-ah te, Kibroth-hat-tava-ah te pawh LALPA chu in tithinur a. 23 Tin, LALPAN, ‘Ram ka pêk che u chu han luah rawh u,’ tia Kadesh-barnea aṭanga a tirh lai che u khân LALPA in Pathian thupêk chu in helsan a, amah chu in ring lo va, a aw chu in ngaithla bawk hek lo. 24 Ka hriat tirh che u ata LALPA chunga hel hmang mi in ni reng a. 25 Chutichuan, LALPAN, ‘Ka tiboral dâwn,’ a tih che u avâng khân LALPA hmaah ka bawkkhup a, ni sawmli leh zan sawmli ka bawhkhuh kha. 26 Tin, LALPA hnênah chuan ka ṭawngṭai a, ‘Aw LALPA PATHIAN, ropuinaa i tlan, kut chak taka Aigupta ram ata i tlan chhuah, i mite leh i rochante chu tiboral suh ang che. 27 I chhiahhlawh Abrahama te, Isaaka te, Jakoba te chu hre reng la, he miteho hi an luhlulzia te, an suahsualzia te, an sualzia teah en suh ang che; 28 chuti lo chuan, i mi hruai chhuahna rama mite chuan, LALPAN a ram tiamah chuan a hruai theih loh avâng leh a huat avângin, thlalêra thah tûrin a hruai chhuak a ni, an ti dah ang e. 29 I thiltihtheihna ropui tak leh i bân phara i hruai chhuah, i mite leh i rochante an ni miau si a,’ ka ti a.

Deuteronomy 10

Mosian thupêk a dawng leh

1 “Chumi lai chuan LALPAN ka hnênah, ‘Lungphêk pahnih, hmâna mi ang kha chher leh la, tlângah ka hnênah lo kal la, thingin bâwm siam rawh. 2 Tin, hmâna lungphêk i tihkeh tâktea thu chuang kha lungphêkahte chuan ka ziak ang a, bâwmah chuan i dah dâwn nia,’ a ti a. 3 Tichuan, thingri thingin bâwm ka siam a, hmâna mi ang lungphêk pahnih ka chher a, lungphêk pahnih chu kengin tlângah chuan ka chho va. 4 Tin, lungphêkahte chuan a hmasaa ziak ang, in pun khâwm nîa tlânga mei aṭanga LALPAN in hnêna a sawi thu sâwm pêk chu a ziak a, LALPA chuan mi pe a. 5 Tin, tlâng ata chu ka lêt thla a, lungphêk chu ka bâwm siamah chuan ka dah a; LALPAN thu mi pêk angin chutah chuan a awm ta reng a. 6 (“Tin, Israela thlahte chu Beeroth Bene-jaakan aṭangin Mosera-ah an kal a; chutah chuan Arona chu a thi a, tah chuan an phûm a; tin, a fapa Eleazaran a aiawhin puithiam hna a thawk a. 7 Chuta ṭang chuan Gudgoda-ah an kal a; tin, Gudgoda aṭang chuan tui tamna ram Jotbatha-ah an kal a. 8 “Chumi lai chuan tûn thlenga LALPA thuthlung bâwm zâwna, LALPA hmaa a rawng bâwla, a hminga malsâwmsaktu ni tûrin Levi chi chu a tihrang a. 9 Chuvângin, Levia chuan a unaute zîngah chanvo pawh, rochan pawh a nei lo va; LALPA in Pathianin a hnêna a sawi angin LALPA chu a rochan a ni.) 10 “Tin, a hma ang bawk khân tlângah chuan ni sawmli leh zan sawmli ka awm a; tin, chumi ṭum pawh chuan LALPAN ka thu chu a ngaithla a, LALPA chuan a tiboral duh ta lo che u a nih kha. 11 Tin, LALPAN ka hnênah, ‘Tho la, mipuite hma hruai rawh; anmahni pêk tûra an pi leh pute hnêna chhechhama ka tiam ram chu an luah tûr a ni,’ a ti a.

Pathian thil phût

12 “Khai le, Israel mite u, in laka LALPA in Pathianin a phût chu eng mah dang a ni lo va, in ṭhatna tûra LALPA in Pathian ṭiha, a kawng zawng zawng chu zawha, amah hmangaiha, in thinlung zawng zawng leh in rilru zawng zawnga LALPA in Pathian rawng bâwla, 13 LALPA thupêkte, a dânte zawm tûra tûna thu ka pêk che u pawm hi a ni. 14 Ngai teh u, vân te, vânte vân leh leilung leh a chhûnga awm zawng zawng hi LALPA in Pathian ta vek a ni a. 15 Nimahsela, in pi leh pute hmangaih chu a lâwm zâwng a ni a, hnam dang zawng zawng aiin nangniho hi a hnam thlan in la ni ta cheu va. 16 Chuvângin, in thinlung hmâwr vun tan ula, tihmawh tawh suh u. 17 LALPA in Pathian chu pathiante Pathian, hotute Hotu, Pathian ropui tak, chak tak, ṭihbaiawm tak, tu mah duhsak bîk nei lova, thamna pawh la ngai lo a ni si a. 18 Pa nei lote leh hmeithaite chu fel takin ro a rêlsak ṭhîn a, ram dang mite chu ei tûr leh silhfênte pein a hmangaih ṭhîn a. 19 Chuvângin, ram dang mite chu hmangaih ve rawh u; nangni pawh Aigupta ramah khân ram dang mi in nih kha. 20 LALPA in Pathian chu in ṭih ang a, ama rawng chu in bâwl ang a; tin, amah chu in vuan tlat ang a, a hming chhâlin chhia in chham tûr a ni. 21 Amah chu in fak tûra chu a ni, hêng in mita in hmuh tâk thil ropui tak leh râpthlâk takte tihsaktu che u in Pathian a ni. 22 In pi leh pute chu Aigupta ramah sawmsarih an chhuk a; tûnah chuan tam lama vâna arsi zâtin LALPA in Pathianin a titam ta che u a ni.

Deuteronomy 11

LALPA ropuizia

1 “Chuvângin, LALPA in Pathian chu in hmangaihin a thurochhiah te, a dân te, a rorêl te, a thupêk te in zâwm fo tûr a ni. 2 Tûnah hian hre rawh u khai; LALPA in Pathian thununna te, a ropuizia te, a bân chakzia te, a bân pharzia te, 3 a chhinchhiahna te, a thiltih, Aigupta ram chhûnga Aigupta lal Pharaoa chung leh a ram chhûng zawng zawnga a tih te, 4 Aigupta sipaiho leh an sakawr leh an tawlailîr chunga a thiltih te; an ûm lai che ua, Tuifinriat Sen tuia a vûrtîr zia te, tûn thlenga LALPAN a tihboral zia te; 5 hemi hmun in thlen hma loh zawnga thlalêra in chunga a thiltih dân te; 6 Reubena fa Eliaba fapa Dathana leh Abirama-te chunga a tih dân te; leiin a kâ a âna Israel mite zawng zawng zînga anmahni leh an chhûngte leh an puan inte leh, an ran hruai zawng zawng a lem vek dân te hre lo in thlahte hnêna sawi ka ni lo va; 7 in mit ngeia LALPAN thil ropui tak a tih zawng zawng hmutute hnênah a ni zâwk e.

Ram tiam nawm tûrzia

8-9 “Chuvângin, in lo chaka, luah tûra in va pan ram chu in luah theih nân leh hnutetui leh khawizu luanna ram, in pi leh pute leh an thlahte pêk tûra LALPAN chhia a chham ramah chuan in chên rei theih nân tûna thu ka pêk che u, thupêk zawng zawngte hi in zâwm tûr a ni. 10 In va luah tûr ram chu, in lo chhuahna Aigupta ram, thlai huana chi in tuha, in kea tui in leih ṭhinna ang a ni lo va; 11 in va luah tûr ram chu tlângte leh ruam, vân ruahtui dawng ram a ni zâwk a. 12 LALPA in Pathian zawn chhuah ram a ni a; LALPA in Pathian mit chu kum thar aṭanga a tâwp thlengin a fu reng ṭhîn. 13 “Tin, heti hi a ni ang a, LALPA in Pathian chu hmangaih tûr leh, in thinlung zawng zawng leh in rilru zawng zawnga a rawng bâwl tûra ka thupêk, tûna ka pêk che u hi ṭhahnemngai taka in zawm chuan, 14 in ram ruahtui chu a hun takah, ruahtui tla hmasa leh ruahtui tla hnuhnûng chu ka pe ang che u a; tichuan, in buh te, in uain te, in hriak te in seng lût thei ang. 15 In rante tân pawh in ramah hlobet te ka awmtîr bawk ang a, nangni pawhin in ei ang a, in tlai ang. 16 Fimkhur rawh u khai; chuti lo chuan, in thinlung chu bumin a awm ang a; in pêng ang a, pathian dang rawng te in bâwl ang a, in be mai dah ang e; 17 chuti a nih chuan LALPA thin in chungah a lo thawk ang a, vân chu a khâr ang a, ruah a sûr lo vang a, lei chuan a rah a chhuah lo vang a; tichuan, LALPA pêk che u, ram ṭha tak ata hi in boral thuai mai ang. 18 “Chuvângin, hêng ka thute hi in thinlung leh in rilruah khung ula, chhinchhiahna atân in bân in zem ang a; tin, in mit leh mit inkâra chal hrênna atân a awm bawk tûr a ni. 19 Chûng chu in fate in zirtîr ang a, in ina in ṭhut lai te, kawnga in kal lai te, in mut lai te, in thawh hun tein in sawi ṭhîn tûr a ni. 20 Tin, in kawngka biangah te, in kawngkhârah te in ziak tûr a ni; 21 tichuan, in pi leh pute pêk tûra chhia a chham ramah chuan in dam chhûng nî leh, in fate dam chhûng nî chu lei chunga vân nî ang khian a tisei ang. 22 LALPA in Pathian chu hmangaih tûr leh a kawng zawng zawng zawh tûr leh, amah vuan tlat tûra ṭhahnemngai taka hêng thu ka pêk che u thupêk zawng zawng hi in zawm phawt zawngin, 23 LALPA chuan hêng hnam zawng zawng hi a hnawh chhuahsak ang che u a, in aia ropui zâwk leh thiltithei zâwk hnamte ram chu in luah ang. 24 In kephaha in rah apiang chu in ta a ni ang a, thlalêr aṭang leh Lebanon tlâng aṭangin lui, Euphrates lui aṭang chuan thlang lam tuifinriat thlengin in ram a ni ang. 25 Tu mah rêng rêngin an chelh lo vang che u; LALPA in Pathianin in hnêna a sawi tawh ang khân, in va rah tûr ram zawng zawngah chuan nangmahni ṭihna leh hlauhna a awmtîr ang. 26 “Ngai teh u, vawiinah hian in hmaah malsâwmna leh ânchhia ka dah a: 27 LALPA in Pathian thupêkte, tûna ka pêk che u hi in zawm chuan, malsâwmna; 28 LALPA in Pathian thupêkte chu in zawm lohva, in hriat ngai loh pathian dangte be tûra ka thupêk che u in pênsan erawh chuan, ânchhia. 29 “Tin, heti hi a ni ang a, in va luah tûr rama LALPA in Pathianin a hruai luh che u hnuah chuan, malsâwmna chu Gerizim tlângah in dah ang a, ânchhia chu Ebal tlângah. 30 Ni tlâkna piah, Araba-a awm Kanaan-ho ram, Gilgal zâwn More sasaw sîr, Jordan râla mi a ni lâwm ni? 31 LALPA in Pathianin a pêk che u ram va luah tûr chuan Jordan chu in kân tûr a ni a, in luah ang a, chutah chuan in awm ang. 32 Tin, tûna in hmaa ka dah, dân leh rorêl zawng zawng chu zâwm tûrin in fîmkhur tûr a ni.

Deuteronomy 12

Pathian biakna tûr hmun pakhat

1 “LALPA, in pi leh pute Pathianin a pêk che u ram in luaha, leilunga in awm chhûnga fîmkhur taka in zawm tûr dân te leh rorêl dânte chu hêngte hi a ni. 2 In va luah tûr ram hnamten tlâng lian te, tlâng tê te, thing hring tin hnuaitea an pathiante rawng an bâwlna hmun zawng zawng chu in tichhe vek tûr a ni; 3 an maichâmte in tichim ang a, an lungphunte in tisawm vek ang a, an Aseri-te in hâl tûr a ni; an pathian lem siam chawpte chu in kihsak ang a, chuta an hming chu in thai bo tûr a ni. 4 Chutiang chuan LALPA in Pathian chungah in ti tûr a ni lo. 5 LALPA in Pathianin hnam zawng zawng zînga a hming awmna tûr hmun, a la ruat tûr chu in zawng zâwk ang a, chutah chuan in kal tûr a ni. 6 Chutah chuan in hâlral thilhlan te, inthawina te, in sâwma pakhat te, in kût thên thilhlan te, in thutiam te, in duh thua thilhlan te, in ran rual leh in berâm rual zînga piang hmasa berte in rawn la tûr a ni; 7 tin, chutah chuan LALPA in Pathian hmaah in ei ang a, in kutkawih LALPA in Pathianin mal a sâwmna che uah chuan hlim takin in awm tûr a ni, in chhûngkuain. 8 “Mi tinin mahni ṭha tih zâwng ang maia tûna kan tih ang hian in ti tûr a ni lo. 9 LALPA in Pathianin a pêk che u ram leh chawlhna chu in la thleng rih si lo va. 10 Jordan lui in kaia, LALPA in Pathianin a luahtîr tûr che ua in awma, him taka in awm theihna tûra in vêla hmêlma zawng zawng laka a chawlhtîr hunah che u erawh chuan heti hi a ni ang a, 11 LALPA in Pathianin a hming awmtîrna tûr a ruat hmuna rawn lâk tûra ka tih zawng zawng chu chutah chuan in rawn la tûr a ni, in hâlral thilhlan te, in inthawina te, in sâwma pakhat te, in kût thên thilhlan te, LALPA hnêna in tiam ṭha ṭhate chu; 12 tin, LALPA in Pathian hmaah chuan hlim takin in awm ang, nangmahni leh in fapate, in fanute nên, in bâwihpate, in bâwihnute nên, in ina awm, Levi-hote nên, anni chuan in zîngah chanvo leh ram nei ve si hek lo. 13 Hmun in hmuhna apiangah in hâlral thilhlante hlân mai lo tûrin fîmkhur rawh u khai; 14 in hnamte zînga LALPAN a la ruat tûr hmunah chuan in hâlral thilhlante chu in hlân zâwk ang a, chutah chuan thu ka pêk zawng zawng che u chu in ti tûr a ni. 15 Amaherawhchu, LALPA in Pathianin malsâwmna a dawntîr che u ang zêlin, in nunnain a châk ang ang chu in in ṭheuhvah in talh ang a, a sa in ei thei ang; thianghlim lote leh thianghlimte pawhin sangai te, sakhi te ang hi chu an ei thei ang. 16 A thisen erawh chu in ei tûr a ni lo; tui angin leiah in leihbaw tûr a ni. 17 “In inah chuan sâwma pakhat, in buh te, in uain te, in hriak te leh in ran rual leh berâm rual zînga piang hmasa ber te, in thutiama mi te, in duh thua thilhlan te, in kût thên thilhlan te chu in ei thei lo vang a; 18 LALPA in Pathianin hmun a la ruat tûrah, LALPA in Pathian hmaah in ei zâwk tûr a ni, nangmahni leh in fapate leh in fanute, in bâwihpate, in bâwihnute, in khuaa awm Levi-hote nên; LALPA in Pathian hmaah in kutkawih apiangah hlim takin in awm tûr a ni, 19 In rama in awm chhûng zawng Levi-ho chu thlauthla lo tûrin fîmkhur rawh u. 20 “LALPA in Pathianin a tiam che u anga in ram a tihzauva, in nunnain sa ei a châk avânga, ‘Sa ka ei ang,’ in tih hunah chuan, in nunnain a châk zâwng apiang sa chu in ei thei ang. 21 LALPA in Pathianin a hming awmna tûr chu in hlat luattuk chuan, thu ka pêk che u ang khân LALPAN a pêk che u in ran rual leh in berâm rual zînga mi in talh ang a, in nunnain a châk ang zâwng chu in inah in ei tûr a ni. 22 Sangai sa te, sakhi sa te in ei ang maiin in ei ang a, thianghlim lote leh thianghlimte pawhin angkhat rengin in ei ang. 23 Thisen erawh chu ei lo tûrin fîmkhur rawh u; thisen chu nunna a ni si a; nunna chawpin sa chu in ei tûr a ni lo. 24 In ei hauh lo tûr a ni; tui angin leiah in leihbaw mai tûr a ni. 25 In ei tûr a ni lo; tichuan, LALPA mit hmuha thil dik in tih hian nangmahni leh in hnua in fate tân a la ṭha dâwn nia. 26 In thil thianghlimte leh in thutiama mite chauh keng ula, LALPAN hmun a la ruat tûrah chuan kal ang che u. 27 Tin, LALPA in Pathian maichâmah in hâlral thilhlan chu, a sa leh a thisen in hlân ang a; in inthawina thisente chu LALPA in Pathian maichâmah chuan in chhûng chhuak ang a, a sa chu in ei ang. 28 Hêng thu ka pêk zawng zawng che u hi ngun takin ngaichâng rawh u; tichuan, LALPA in Pathian mit hmuha thil ṭha leh thil dik in tih hian in tân leh in hnua in fate tân kumkhuain a la ṭha dâwn nia.

Milem biak loh tûr

29 “LALPA in Pathianin in va hneh tûr hnamte a tihbosak che ua, an ram in luaha, in khawsak hnuah chuan, 30 tihborala an awmna angah khân in awh ve lohna tûrin fîmkhur ula, ‘Hêng hnamte hian engtin nge an pathian rawng an bâwl? An tih angin keini pawhin i ti ve ang u,’ tiin, an pathiante chungchâng thu te zâwt vêl suh u. 31 Chutiang chuan LALPA in Pathian chungah in ti tûr a ni lo; an pathian chungah chuan LALPA ngaiha thil tenawm tinrêng, a huat tak maite chu an ti ṭhîn a; an fapate, an fanute ngei pawh an pathiante tân an hâl ṭhîn a ni. 32 “Tih tûra thu ka pêk che u apiang chu in ti tûr a ni; in belhchhah tûr a ni lo va, in tikiam tûr a ni hek lo.

Deuteronomy 13

1 “In zîngah zâwlnei emaw, mang neitu emaw an lo awma, chhinchhiahna emaw, thil mak emaw an entîr che ua, 2 chhinchhiahna emaw, thil mak emaw an entîr che u a lo thlena, in hriat ngai loh, ‘Pathian dang i zui ang u khai, an rawng i bâwl ang u,’ in hnêna an tih chuan, 3 chu zâwlnei emaw, mang neitu emaw thute chu in pawm tûr a ni lo; LALPA in Pathian chuan in thinlung zawng zawng leh in nunna zawng zawngin, LALPA in Pathian chu in hmangaih nge hmangaih lo tih hriat nân a fiah che u a ni e. 4 LALPA in Pathian chu in zui ang a, amah chu in ṭih ang a, a thupêkte chu in zâwm ang a, a thusawite chu in pawm ang a, a rawng te in bâwl ang a, amah chu in vuan tlat tûr a ni. 5 Tin, chu zâwlnei emaw, mang neitu emaw chu tihhlum tûr a ni. Aigupta ram ata hruai chhuaka, bâwih ata tlantu che u, LALPA in Pathianin zawh tûr thu a pêk che u kawng ata chu tipêng tûr che ua, LALPA in Pathian chunga helna thu a sawi avângin. Chutiang chuan in zînga thil ṭha lo chu in tibo tûr a ni. 6 “I unaupa emaw, i fapa emaw, i nupui pawm lai emaw, i ṭhian bul emaw pawhin in thlahtute la biak ngai loh pathian dangte be tûrin an thlêm thei che u a, 7 in bul hnaia chêngte pathian emaw, ram hla taka chêngte pathian emaw be tûrin an râwn thei che u a. 8 Mahse, chutiang mi chuan an thlêm thlu tûr che u a ni lo, an thurâwn chu ngaithla suh ang che u. In thupin in zuah tûr a ni hek lo. 9 In tihlum ngei ngei tûr a ni zâwk a; a tihlum tûrin kut i thlâk hmasa ang a, chumi hnuah mipui zawng zawngin. 10 Lungin in dêng hlum tûr a ni, Aigupta ram aṭanga bâwih ata hruai chhuaktu che u LALPA in Pathian hnên ata tihpênna che u a zawn avângin. 11 Tichuan, Israel mi zawng zawngin an hria ang a, an hlau vang a, in zîngah chutiang suahsual rêng rêng chu an chîng tawh lo vang. 12 “LALPA in Pathianin in awmna tûra a pêk che u in khaw pakhatah chuan, 13 in zîng ata mi dukdaklo ṭhenkhat lo chhuaka, chumi khawpuia mite chu in hriat ngai loh pathian dangte be tûrin an hruai bo tih thu sawi in hriat chuan, 14 zâwt vêl ula, zawng chhuak ula, ṭhahnemngai takin zâwt rawh u; tin, ngai teh u, thu dik a lo niha, chutiang thil tenawm in zîngah tih a ni tih hriat chian a nih chuan, 15 khandaihin chumi khuaa awmte chu in tihlum ngei ngei tûr a ni a; a chhûnga awm zawng zawng, ran rualte nên khandaihin in tiboral vek tûr a ni. 16 Tin, râllâk sum zawng zawng chu khawlaiah in la khâwm ang a; tin, khua leh râllâk sum zawng zawng chu LALPA in Pathian hnênah pumhâl thilhlanah in hâl ang a, lei pâwng mai a ni kumkhua ang a, din a ni leh tawh lo vang. 17-18 Râllâk sum chu a enga mah in khawih tûr a ni lo; LALPA chuan a thinurna nasa tak chu a lamlêt ang a, zahngaihna a hmuhtîr ang che u a, a khawngaih ang che u a, LALPA in Pathian mit hmuha thil ṭha ti tûra thupêk zawng zawng, tûna ka pêk che u hi, in zawm phawt chuan a tipung dâwn che u nia, in pi pute hnêna chhia a lo chham tawh ang khân.

Deuteronomy 14

Mitthi sûn dân dik lo

1 “LALPA in Pathian fate in ni a; mitthi avângin in inzai tûr a ni lo va, in mit hmul in mêt kâwng tûr a ni hek lo. 2 LALPA in Pathian tân hnam thianghlim in ni si a, leilunga hnam zawng zawng zînga a pual bîk ni tûra LALPAN a thlan che u in ni a.

Sa thiang leh thiang lo

3 “Thil tenawm rêng rêng in ei tûr a ni lo. 4 Hêng sate hi a ni in ei theih tûr chu: bâwngpa te, berâm te, kêl te, 5 sakhi te, sangai te, sakhipa te, sathâr te, ramkêl te, ramlâwi te, ramberâm te hi. 6 Tin, sa tinrêng, tin kâka tin kâk chhuak, chaw ṭhial nawn chi tawh phawt zînga mi chu in ei thei ang. 7 Amaherawhchu, hêng chaw pawh ṭhial nawn si, an tin pawh kâk site hi chu in ei tûr a ni lo: sanghâwngsei te, zupui te, sazupui te hi; chaw chu an ṭhial nawn na a, an tin a kâk loh avângin in tân a bawlhhlawh a ni. 8 Tin, vawk hi a tin chu a kâk na a, chaw a ṭhial nawn loh avângin in tân a bawlhhlawh a ni; a sa in ei tûr a ni lo va, a ruang pawh in khawih tûr a ni lo. 9 “Tuia chêng zawng zawngah hêngte hi in ei thei ang: pângparh leh phuhlip nei tawh phawt chu in ei thei ang a, 10 pângparh leh phuhlip nei lo apiang chu in ei thei lo vang, in tân a bawlhhlawh a ni. 11 “Sava thianghlim zawng zawng chu in ei thei ang a. 12 Hêngte erawh hi chu in ei tûr a ni lo: mupui te, lungdûp te, muarla te, 13 mulukawlh tê te, ngawihûp te, mute chi rêng rêng te; 14 choâk chi rêng rêng te, 15 sava sâng te, vabak te, tuifinriat sava te, mu chi rêng rêng te, 16 hrângkir te, chhimbuk te, chingpirinu te, chhimbuksialki te, 17 tuivalawng te, mulukawlh te, lui dung mû te, 18 kânghlai te, dîl sava chi rêng rêng te, chhuangtuar leh bâkte. 19 Thla nei, kea kal chi zawng zawng chu in tân thil bawlhhlawh a ni a, in ei tûr a ni lo. 20 Sava thianghlim zawng zawng chu in ei thei ang. 21 “Amaha thi chu eng mah in ei tûr a ni lo; in awmpui ram dang mite ei atân in pe thei ang a, hnam dang mite hnênah in hralh thei bawk ang; nangni zawng LALPA in Pathian tâna hnam thianghlim in ni si a. Kêlnotê chu a pui hnutêin in chhûm tûr a ni lo.

Sâwma pakhat pêk tûr

22 “Kum tin in lova thlai haw zawng zawng sâwma pakhat in tîl hrang ngei ngei tûr a ni. 23 LALPA in Pathian ṭih nachâng in lo hriat fo theih nân sâwma pakhat, in buh te, in uain te, in hriak te leh in bâwng rual leh in berâm rual zînga piang hmasa berte chu LALPA in Pathian hmaah, a hming awmna tûra a la ruat tûrah chuan in ei tûr a ni. 24 LALPA in Pathianin mal a sâwm hun che ua, LALPA in Pathianin a hming awmna tûr a la ruat tûr chu, a hlat lutuk avânga in tân kawng a thui luattuka in ken theih loh chuan, 25 pawisaah in chantîr ang a, pawisa chu in keng ang a, LALPA in Pathian hmun ruatah chuan in kal tûr a ni; 26 tin, pawisa chu in rilrua in duh ber, bâwngpa emaw, berâm emaw, uain emaw, zupui emaw, in rilrua in châk zâwng ang apiang atân in hmang ang a; chutah chuan LALPA in Pathian hmaah in ei ang a, hlim takin in awm tûr a ni, nangni leh in chhûngte nên; 27 Levi-ho in awmnaa awmte chu thlauthla hauh suh ang che u; in zîngah chanvo pawh, rochan pawh an nei ve si lo va. 28 “Kum thum a vei kum apiangin, chumi kuma in thil hâwng zawng zawnga sâwma pakhat chu in la khâwm vek ang a, in awmnaah in dah tûr a ni; 29 tin, in awmnaa awm Levi-ho pawh, in zînga chanvo, rochan pawh nei ve lote leh ram dang mite leh pa nei lote leh hmeithaite chuan an ei ang a, an lo khawsa ve thei ang; tichuan, LALPA in Pathianin in kutkawih zawng zawngah chuan mal a sâwm dâwn che u nia.

Deuteronomy 15

Kum sarihna

1 “Tin, kum sarih a vei kum apiangin ngaihdamna in siam tûr a ni. 2 Ngaihdam dân chu hetiang hi a ni: leiba neitu apiangin an ṭhenawmte an lo pûktîr chu an ngaidam tûr a ni; a ṭhenawm pawh, a unau pawh a ṭhîng lui tûr a ni lo, LALPA ngaihdamna chu puan a nih tawh avângin. 3 Hnam dang mi chu in ṭhîng lui thei ang a; amaherawhchu, in ta eng pawh in unaute lo hman chu in ngaidam tûr a ni. 4-5 Hêng thupêk, tûna ka thupêk zawng zawng che u hi, pawm tûra LALPA in Pathian aw chu ṭhahnemngai taka in zawm phawt chuan, mi rethei rêng rêng in awm hauh lo vang a (LALPA in Pathianin luah tûra a pêk che u ramah chuan, LALPAN mal a sâwm ngei ngei dâwn che u a ni); 6 LALPA in Pathian chuan a tiam che u angin mal a sâwm ang che u a, hnam tam tak in pûktîr ang a, nangni erawh chuan in pûk lo vang; hnam tam tak chungah ro in rêl ang a, in chungah erawh chuan ro an rêl ve lo vang. 7 “LALPAN ram a pêk che u in awmnaah in unaute zîngah rethei an awm chuan, in unau retheite lakah chuan in rilru tikhauh suh ula, kawm hek suh u, 8 an lakah chuan in thilphal ngei ngei tûr a ni a, an tlâkchhamnaa an mamawh phuhrûkna khawp in pûktîr tûr a ni. 9 ‘Ngaihdam kum, kum sarihna chu a lo thleng dâwn ta,’ tiin, in unau retheite chu hmu mawha eng mah pe duh lovin, in thinlungah dik lo taka ngaihtuahna awm lo tûrin fîmkhur rawh u; chuti lo chuan, ani chuan i chungchâng thu-ah LALPA a au vang a, in tân sual a lo ni dah ang e. 10 In pe ngei ngei tûr a ni a; tin, in pêk hunah pawh in thinlung a hnûr hauh lo tûr a ni; chutiang thil avâng chuan a ni, LALPA in Pathianin in thiltih zawng zawngah leh, in kutkawih zawng zawngah mal a sâwm dâwn che u ni. 11 Chu ramah chuan mi retheite awm loh lai a awm dâwn si lo va; chuvângin, ‘In rama in unaute chungah te, tlachhamte chungah te, in mi retheite chungah te in thilphal ngei ngei tûr a ni,’ tiin thu ka pe che u a ni.

Israel mi bâwih en dân tûr

12 “In unau, Hebrai pa emaw, Hebrai nu emaw, in hnêna an hralha, kum ruk in rawng an bâwl chuan, kum sarih kum chuan in chhuahtîr tûr a ni. 13 Tin, in chhuahtîr hun chuan kutbêngin in chhuahtîr tûr a ni lo; 14 in berâm ruala mi te, in hruiha mi te, in uain sâwr khura mi te ui lo takin in pe tûr a ni; LALPA in Pathianin mal a sâwm dân che u ang zêlin in pe tûr a ni. 15 Aigupta ramah khân bâwih in ni tawh a, LALPA in Pathianin a tlan che u tih kha in hre reng tûr a ni; chu vâng chuan a ni, tûnah hian hêng thu hi ka pêk che u ni. 16 Tin, heti hi a ni ang a, nangmahni leh in chhûngkua an ngainat avâng leh in intihthiam avânga in hnêna, ‘Ka chhuahsan lo vang che u,’ an tih tlat chuan, 17 thîr zum in la ang a, kawngkhâr chhanah an beng in vit ang a; tichuan, kumkhuain in bâwih an ni ang. Tin, in bâwihnu pawh chutiang bawk chuan in ti tûr a ni. 18 Chhuahtîr chu thil harah in ngai tûr a ni lo. Inhlawhfa thawh leh hnih thawkin kum ruk in rawng an bâwlsak tawh si che u a; tin, LALPA in Pathianin in thiltih apiangah mal a sâwm zêl ang che u.

Ran piang hmasa ber LALPA ta

19 “In ran rual te, in berâm rualte zînga a pa, piang hmasa ber apiangte chu LALPA in Pathian pualah in pe tûr a ni; in bâwngpa piang hmasa ber chu hnathawkah in chhawr tûr a ni lo va, in berâm rualte zînga piang hmasa ber hmul chu in mêt tûr a ni lo. 20 LALPA in Pathian hmaah kum tinin LALPAN hmun a la ruat tûrah chuan in ei tûr a ni, nangni leh in chhûngte nên. 21 Sawisêl kaina nei, a ke bai emaw, a mit del emaw, sawisêl kaina nei tawh phawt chu LALPA in Pathian hnêna inthawi nân in hmang tûr a ni lo. 22 Nangmahni awmhmunah in ei tûr a ni; thianghlim lote leh thianghlimte pawhin hêng sangai te, sakhi te ang hi chu in ei thei ang. 23 A thisen erawh chu in ei hauh lo tûr a ni; tui angin leiah in leihbaw mai tûr a ni.

Deuteronomy 16

Kalhlên kût

1 “Abib thla chu thla serhah nei ula, LALPA in Pathian tâna kalhlên kût nân hmang rawh u: Abib thla hian a ni, LALPA in Pathian chuan Aigupta ram ata zânah a hruai chhuah che u ni. 2 LALPAN a hming awmna a la ruat tûrah chuan, LALPA in Pathian hnênah in berâm rual zînga mi leh ran rual zînga miin, kalhlên kûtah in inthawi tûr a ni. 3 Chhang dawidim telh nên in ei tûr a ni lo; in dam chhûng zawnga Aigupta ram ata in chhuah nî chu in hriat reng theih nân ni sarih chhang dawidim telh loh, hrehawmna chhang nên in ei tûr a ni, Aigupta ram aṭang chuan hmanhmawh taka chhuak in nih kha. 4 In ram chhûngah ni sarih chhûng chu dawidim rêng rêng a awm tûr a ni lo va; tin, ni khat nî tlai lama in inthawina sa chu zankhuain a tûk zîng thlengin eng mah a awm tûr a ni lo. 5 LALPA in Pathianin a pêk che u in awmna khawiah mah kalhlên kût inthawiin in inthawi thei lo vang a; 6 LALPA in Pathianin a hming awmna a la ruat tûrah chauh chuan a ni ang; chutah chuan Aigupta ram ata in lo chhuah hun ang tlai lamah, ni tlâkah kalhlên kût inthawiin in inthawi tûr a ni a. 7 Tin, in rawh ang a, LALPAN hmun a la ruat tûrah chuan in ei ang a; tin, zîngah in haw leh ang a, in puan inah in kal tûr a ni. 8 Ni ruk chhûng chu chhang dawidim telh loh in ei tûr a ni; tin, a ni sarih nî chu LALPA in Pathian tân inkhâwmpui thianghlim a ni ang a, hna in thawk tûr a ni lo.

Pâwl kût

9 “Chawlhkâr sarih in chhût ang a; in buh seng ṭan nî aṭangin chawlhkâr sarih chu in chhût tûr a ni. 10 “LALPA in Pathianin mal a sâwm che u ang zêlin, in deh chhuah zînga mi mahni duh thua thilhlan chu hlânin, LALPA in Pathian tan chawlhkâr kût in nei tûr a ni; 11 tin, LALPA in Pathianin a hming awmna a la ruat tûrah chuan nangni nên, in fapa te, in fanu te, in bâwihpa te, in bâwihnu te, in awmnaa awm Levi-ho te, in zînga awm ram dang mi te, pa nei lo te, hmeithaite nên LALPA in Pathian hmaah hlim takin in awm ang a. 12 Tin, Aigupta ramah khân bâwih in ni tih in hre reng tûr a ni a; tin, hêng dânte hi fîmkhur takin in zâwm tûr a ni.

Bâwkte kût

13 “In hrui ata leh in uain sâwr khur ata in chhêk khâwm zawhah, ni sarih chhûng bâwkte kût in nei tûr a ni; 14 in kûtah chuan nangni nên, in fapa te, in fanu te, in bâwihpa te, in bâwihnu te, in awmnaa awm Levi-ho te, ram dang mi te, pa nei lo te, hmeithaite nên hlim takin in awm tûr a ni. 15 LALPAN hmun a la ruat tûrah chuan LALPA in Pathian tân ni sarih in kût tûr a ni; LALPA in Pathianin in thil haw zawng zawngah leh in kutkawih zawng zawngahte mal a sâwm ang che u a, lâwm tak hlîrin in awm dâwn nia. 16 Kum tin in mipa zawng zawngte chu vawi thum LALPA hmaah, hmun a la ruat tûrah chuan an inlan tûr a ni: chhang dawidim telh loh kûtah te, chawlhkâr kûtah te, bâwkte kûtah te; tin, LALPA hmaah tu mah kutruakin in inlan tûr a ni lo va, 17 LALPA in Pathianin malsâwmna a dawntîr che u ang zêlin mi tinin an theih ang tâwk an pe tûr a ni.

Dik taka thu rem dân tûr

18 “LALPA in Pathianin a pêk che u in kulh kawngka zawng zawngah, in hnam ang zêlin, rorêltute leh hotute in insiam ṭheuh vang a, mipuite ro fel takin an rêlsak tûr a ni. 19 Dik lo takin ro in rêl tûr a ni lo; tu mah duhsak bîk in nei tûr a ni lo; thilpêk in la tûr a ni hek lo; thilpêk chuan mi fingte mit a tihdelsak a, mi felte thu a tihkhawlohsak si ṭhîn a. 20 LALPA in Pathianin a pêk che u ram chu nungdama in luah theih nân a fel chauhva chu in zâwm tûr a ni. 21 “LALPA in Pathian maichâm in la siam tûr sîrah chuan thing eng chi mahin Aseri in din tûr a ni lo. 22 LALPA in Pathianin a huat zâwng lung pawh in phun tûr a ni hek lo.

Deuteronomy 17

1 “Bawngpa emaw, berâm emaw, sawisêl kai leh ṭhat lohna nei rêng rêng chuan LALPA in Pathian hnênah in inthawi tûr a ni lo; chu chu LALPA in Pathian tân thil tenawm a ni si a. 2-3 “In zîngah LALPA in Pathianin a pêk che u in awmna khawiah pawh mipa emaw, hmeichhia emaw pawh, thuthlung bawhchhiaa pathian dang rawng va bâwla, ka thupêk loh, nî emaw, thla emaw, vâna mi rêng rêng biaa, LALPA in Pathian mit hmuha thil ṭha lo ti an awma, 4 an hrilh chia, nangin i lo hriata, ṭhahnemngai taka in zawha, tin, ngai teh, a lo dika, thu a chian chiaha chutiang thil tenawm Israel-te zînga tih a lo nih chuan, 5 chu thil sual titu, mipa emaw, hmeichhia emaw chu in kulh kawngkhâr pâwnah, mipa emaw, hmeichhia emaw ngei chu in hruai chhuak ang a, lungin in dêng hlum tûr a ni. 6 Hretu pahnih emaw, pathum emaw kâ aṭangin thi tûra chu tihhlum tûr a ni a, hretu pakhat kâ aṭang chuan tihhlum tûr a ni lo. 7 Tihhlumna tûrah chuan hretute chuan kut an thlâk hmasa ang a, chumi hnuah mipui zawng zawngin. Chutiang chuan in zîng ata chu thil ṭha lo chu in tibo tûr a ni. 8 “Thisen inchhuah thu-ah te, sum leh pai thu-ah te, invuak thu-ah te, in awmnaa inkhinna thu rêng rêngtea in tâna rêl harsa lutuk a lo awm chuan, LALPA in Pathianin hmun a la ruat tûrah chuan in kal ang a, 9 chumi huna puithiam Levi-hote leh rorêltute hnênah chuan in kal ang a, in râwn ang a; tin, annin thu tihthlûk dân an lo kawhhmuh dâwn che u nia; 10 tichuan, nangnin LALPAN hmun a la ruat tûr aṭanga thu tihthlûk dân an lo kawhhmuh che u ang chuan in ti ang a, an zirtîr che u ang zêlin fîmkhur takin in ti dâwn nia. 11 Thu tihthlûk dân an lo zirtîr che u leh rorêl dân an lo hrilh che u ang zêl chuan in ti ang a; thu tihthlûk dân an lo kawhhmuh che u chu ding lamah emaw, vei lamah emaw in pênsan tûr a ni lo. 12 LALPA in Pathian hmaa rawngbâwla ṭang ṭhîn puithiam leh rorêltu thu pawm lova, tilui apiang, chu mi chu tihhlum tûr a ni. Israel zîng ata, chu thil ṭha lo chu in tibo tûr a ni. 13 Tichuan, mi zawng zawngin an hria ang a, an hlau vang a, an tilui leh tawh lo vang.

Lal neih dân tûr

14 “LALPA in Pathianin ram a pêk che u in va thlena, in va luaha, in va awma, ‘Kan vêla hnam zawng zawngte ang bawkin lal i nei ang u,’ in tih hunah chuan, 15 LALPA in Pathianin a thlana ngei chu lalah in nei tûr a ni a; in unau zînga mi pakhat in lalah in siam tûr a ni; hnam dang mi, in unau ni lo chu nangmahni awptu atân in siam tûr a ni lo. 16 Amaherawhchu, sakawr a ngah tûr a ni lo vang a, sakawr a ngah theih nân Aigupta rama mite nên chuan inthurual tûr a ni bawk hek lo; LALPA chuan, ‘Tûn achinah chuan chumi lamah chuan in lêt leh tawh tûr a ni lo,’ in hnênah a ti tawh tlat si a. 17 A rilru a vah bo loh nân nupui pawh a ngah tûr a ni lo va, tangkarua leh rangkachak pawh a ngah tûr a ni hek lo. 18 Tin, heti hi a ni ang a, a ram lalṭhutthlênga a ṭhut hun chuan puithiam Levi-hote kawl ṭhin dân hi lehkhabuah a ziak chhâwntîr ang a; 19 a kawl ang a, a dam chhûng zawng a chhiar ṭhîn tûr a ni, hêng dân leh hêng thuruat zawng zawng hi pawma, zâwma, ti tûra LALPA a Pathian ṭih dân a zir theiha, 20 a rilru a unaute chungah a dah lohva, ding lamah emaw, vei lamah emaw thupêk chu a pênsan lohna tûr leh, Israel-te zînga amah leh a thlahte a ramah hian an dam rei phah nân a chhiar ṭhîn tûr a ni.

Deuteronomy 18

Puithiamho chanpual

1 “Puithiam Levi-ho, Levi hnam zawng zawng chuan Israel-te zîngah chanvo leh rochan an nei tûr a ni lo va; LALPA hnêna meia thilhlan leh a puala mi an ei tûr a ni. 2 An unaute zîngah rochan chu an nei tûr a ni lo; an rochan chu an hnêna a sawi angin LALPA a ni si a. 3 Inthawina hlântu mipuite laka puithiam pual tûr chu hêng hi a ni ang: bâwngpa pawh, berâm pawh, a dâr leh a bekbawr khinghnih leh a pumpui puithiam an pe tûr a ni. 4 In buhbâl te, in uain te, in hriak haw hmasa te, in berâm hmul meh hmasak ber te in pe bawk tûr a ni. 5 LALPA in Pathianin LALPA hminga rawngbâwla awm kumkhua tûrin, in hnam zawng zawng zîng ata a thlan an ni si a, anmahni leh an fapate nên. 6 “Tin, Levi mi tu pawh a awmna Israel ram, in awmna a khawii pawh chhuahsana, a rilrua châk taka LALPAN a la ruat tûr hmunah a lo kal chuan, 7 chuta LALPA hmaa awm ṭhîn Levi-ho, a unaute ang bawkin LALPA a Pathian hmingin rawng a bâwl tûr a ni. 8 An puithiam man tiam lovin, mi dang pual ang ei tûr chu an chang ve tho vang.

Hnam dangte anga fate hlan loh tûr

9 “LALPA in Pathianin a pêk che u ram in va thlen hun chuan, chûng hnamte thil tenawm tih ang chu in chîng ve tûr a ni lo. 10 A fapa emaw, a fanu emaw meia kal tlangtîr te, aien chîng te, ṭhumvâwr chîng te emaw, mitlâkdawi hmang emaw te, dawithiam te, 11 dawi ât te, ramhuaizâwl rawih te, dawithiam te, mitthi biak chîng mite in zîngah an awm tûr a ni lo. 12 Hêng thil ti mi apiangte hi LALPA ngaihin mi tenawm an ni si a; tin, hêng thil tenawm avâng hian a ni, LALPA in Pathianin a hnawh chhuahsak che u ni. 13 LALPA in Pathian hmaah in ṭha famkim tûr a ni.

Pathianin zâwlnei a rawn tîr ang

14 “Chûng in va luah tûr rama hnamte chuan ṭhumvâwr leh aien chîngte an pawm ṭhîn a; nangni zawng LALPA in Pathianin chutiang tih chu a phal lo a ni. 15 LALPA in Pathianin keimah ang hi in unaute zînga mi zâwlnei a siamsak ang che u. A thu chu in ngai tûr a ni, 16 ‘LALPA kan Pathian aw chu min hriattîr tawh suh la, he mei nasa tak hi min hmuhtîr leh tawh suh la, kan thi dah ang e,’ tia Horeb tlânga pun khâwm nîa LALPA in Pathian in duh dân ang khân. 17 Tin, LALPA chuan ka hnênah, ‘An thusawi chu an sawi ṭha hle a. 18 An unaute zînga nangmah ang zâwlnei ka siamsak a; a kâah ka thute ka dah ang a, a hnêna thu ka pêk apiang chu an hnênah a sawi ang a. 19 Tin, heti hi a ni ang a, ka hminga ka thu a sawi pawm lo apiang chu ka ngaihtuah ang. 20 Ka hminga sawi tûr ka pêk loh sawi luitu zâwlnei emaw, pathian dangte hminga thusawitu zâwlnei emaw, chu zâwlnei chu tihhlum tûr a ni,’ a ti a. 21 Tin, in thinlunga, ‘Engtin nge thu chu LALPA sawi a ni lo tih kan hriat ang?’ in tih chuan, 22 zâwlneiin LALPA hminga thu a sawia, a thil sawi chu a thlen lohva, a hlawhtlin loh chuan, chu chu a ni LALPA sawi lohva chu; zâwlnei chuan uangthuang takin an sawi mai mai a ni, amah chu in hlau tûr a ni lo.

Deuteronomy 19

Humhimna tûr khuate

1 “LALPA in Pathianin an ram a pêk che u hnam LALPAN a tihbova, in luaha, an khuaah te, an inah te in awm hunah chuan, 2 LALPA in Pathianin luah tûra a pêk che u, in ramah chuan in tân khaw pathum in ruat tûr a ni. 3 Tualthat apiang an tlân luhna tûrin, LALPAN a luahtîr tûr che u ram chu hmun thumah in ṭhen ang a, in ramrite in siam ang a, kawngte in buatsaih tûr a ni. 4 “Tin, tualthat chuta tlân lûta him theite chu hêngte hi an ni: mi a ṭhenawm khawvêng tûn hma lama huatna pawh nei lêm lova that palh apiangte, 5 mi a ṭhenawm khawvêng nên thing kit tûra ram kala, thing kit tûra a hrei han chêka, hreifang thlawnin ṭhenawm khawvêng chu vawm hlum ta ang te hi, chumi zînga khaw pakhatah chuan a tlân ang a, a him ang a, 6 thisen phuba latu chuan a thinur lin laia tualthattu chu a ûma, kawng a thui avânga ûmphâkin a va vaw hlum hlauh dah ang e; tûn hma lama huatna te lo nei lêm lo a nih avângin thi âwm a ni si lo. 7 Chuvângin, ‘Khaw pathum in tân in ruat tûr a ni,’ tiin thu ka pe che u a ni. 8-9 Tin, LALPA in Pathianin in pi leh pute hnêna chhia a lo chham anga in pi leh pute pêk a lo tiam ram chu a pêk che ua, LALPA in Pathian chu hmangaih tûr leh a kawng zawh fo tûra a thupêk zawng zawng, tûna thu ka pêk che u hi in pawma, in ram chu a tihzau chuan hemi khaw pathum tiam lovin in tân khaw pathum dang in belhchhah leh ang, 10 LALPAN luah tûra a pêk che u in ram chhûngah chuan pawi khawih lo thisen chhuah a awm lohva, in chunga thisen a awm loh nân. 11 “Amaherawhchu, miin a ṭhenawm khawvêng a huata, a châna, a beiha, thi khawp hiala a vuaka, chumi khaw zînga pakhata a tlân chuan, 12 an khaw upaten mi tîr sela, chuta ta chu va hruai sela, tihhlum tûrin thisen phuba latu kutah hlân rawh se. 13 In khawngaih tûr a ni lo va, in tâna ṭha tûrin Israel ram ata pawi khawih lo thisen chhuahna chu in tibo tûr a ni.

Hmânlai ramri

14 “LALPA in Pathianin luah tûra a pêk che u ram, in luah tûr rama a hmaa an lo phun tawh in ṭhenawm ramri chu in sawn tûr a ni lo.

Thuhretu chungchâng

15 “Mi a khawlohna emaw, a sualna rêng rêng emaw hretu pakhat chu a tâwk lo vang; hretu pahnih kâ emaw, hretu pathum kâ emawa thuin tihngheh tûr a ni. 16 Hretu fel lo takin mi thil tidik lova a puh chuan, 17 an inkhinnaah an pahnihin LALPA hmaah chumi huna puithiamte leh rorêltute hmaah chuan an ding tûr a ni; 18 tin, rorêltute chuan ngun takin an dap ang a; tin, ngai teh, thuhretu chu hretu der a niha, a unau chu dâwta puh a nih chuan, 19 a unau chunga tih a lo tum ang chuan a chungah in ti tûr a ni; chutiang chuan in zînga thil ṭha lo chu in tibo tûr a ni. 20 A la awmhote chuan an hria ang a, an hlau vang a, tûn hnuah chutiang thil ṭha lo rêng rêng chu in zîngah an ti tawh dâwn lo nia. 21 In khawngaih tûr a ni lo va: nun aiah nun, mit aiah mit, ha aiah ha, kut aiah kut, ke aiah ke a ni ang.

Deuteronomy 20

Indo chungchânga tih dân tûr

1 “In hmêlmate do tûra in chhuaha, sakawr te, tawlailîr te, mipuite in aia tam in hmuhin, anmahni chu in hlau tûr a ni lo; Aigupta ram ata hruai chhuaktu che u LALPA in Pathian chu in hnênah a awm si a. 2 Tin, in indo dâwn hnaih chuan puithiam chuan mipuite chu va pan sela, bia sela, 3 an hnênah, ‘Aw Israel-te u, hre rawh u khai, tûnah chuan in hmêlmate in do dâwn ta a ni a, zâm suh ula, ṭih suh ula, khûr hek suh u, anni chu hlau hek suh u; 4 nangmahni chhandam tûra in hmêlmate beihsak tûr che ua in hnêna awm zêl chu LALPA in Pathian a ni si a,’ ti rawh se. 5 “Tin, hotute chuan mipuite hnênah, ‘In thar saa la hlân lo in awm em? A inah haw leh rawh se, indonaah a va thi hlauh ang a, mi dangin an hlân dah ang e. 6 Tin, grêp huan siama, a rah la chhawr lo in awm em? A in lamah haw leh rawh se, indonaah a thi hlauh vang a, mi dangin an chhawr dah ang e. 7 Tin, nupui huala la nei lo in awm em? A in lamah haw leh rawh se, indonaah a thi hlauh vang a, mi dangin an nei dah ang e,’ tiin sawi rawh se. 8 Tin, hotute chuan mipuite hnênah, ‘Hlau leh zâm in awm em? A in lamah haw rawh se, a unaute thinlung chu a thinlung angin a tuiral ve dah ang e,’ lo ti zêl rawh se. 9 Tin, heti hi a ni ang a, hotuten mipuite hnêna thu an sawi zawh chuan mipuite hmahruaitu tûr sipai hotute an ruat tûr a ni. 10 “Bei tûra khua in va hnaih hun chuan remna thu han sawi phawt ula. 11 Tin, heti hi a ni ang a, an lo rem che ua, an lo inpêk chuan heti hi a ni ang a, chuta mi awm zawng zawng chu hnathawka in rawih tûr an ni ang a, in rawng an bâwl ang. 12 Tin, an lo rem duh loh che ua, an lo do dâwn che u chuan in hual ang a; 13 tin, LALPA in Pathianin in kuta a pêk hun che u chuan, chuta mipa zawng zawng chu khandaihin in tihlum vek tûr a ni. 14 Hmeichhia leh an fanau tê tête, rante leh khuaa thil awm rêng rêngte erawh chu chuta râllâk thil zawng zawng nên lam in pualah in la tûr a ni; tin, LALPA in Pathianin a pêk che u in hmêlmate laka râllâk thil chu in chên tûr a ni. 15 Hêng hnamho khuate ni lo, in awmna aṭanga khaw hla zawng zawng chu chutiang chuan in ti zêl tûr a ni. 16 LALPA in Pathianin luah tûra a pêk che u hêng hnam khuate erawh hi chu, LALPA in Pathianin thu a pêk che u angin, nung tawh phawt chu eng mah in zuah tûr a ni lo va, 17 Hit mi te, Amor mi te, Kanaan mi te, Periz mi te, Hiv mi te, Jebus mi te chu in tiboral vek tûr a ni; 18 an pathiante chunga an tih ṭhin thil tenawm zawng zawng chu an zirtîr lohna tûr che uin; chuti lo chuan, LALPA in Pathian chungah thil in tisual dah ang e. 19 “Lâk tuma in beiha, khua chu rei tak in hual pawhin chûnga thingte chu hreipuiin in kit tûr a ni lo; in ei atân a ni a, in kit tûr a ni lo. Thing chu mihring em an niha in hual ni? 20 A rah ei loh mi thing a ni tih in hriatte erawh zawng in tichhiain in kit ang a, dotu che u khua chu a chhiat hma loh chuan kulhin in hung hnan tûr a ni.

Deuteronomy 21

Tualthat man chhuah theih loh chungchâng

1 “LALPA in Pathianin luah tûra a pêk che u ramah hian tâmlakah mi, tihhlumin lo awm ang sela, a tihlumtu hriat ni si lo sela, 2 in upate leh in rorêltute an lo kal ang a, an tihhlumna vêl khua aṭang chuan an teh ang a; 3 tin, heti hi a ni ang a, a ruang aṭanga khaw hnai ber, chumi khaw upate chuan bâwng rual zînga bâwnglâ, la chhawr loh, nghâwngkawl la bel loh an kai ang a; 4 tin, chu khaw upate chuan bâwnglâ chu tui luanna, lei la leh loh leh eng mah la chîn lohna ruamah an kai chhuk ang a, ruamah chuan bâwngla ring chu an tan ang a; 5 tin, Levia fapa puithiamten an rawn pan ang a, anni chu LALPA in Pathianin a rawngbâwltu leh LALPA hminga malsâwmtu atân a ruatte an ni si a; thubuai leh invuak thu chu an rêl ang ang a ni ang; 6 tin, ruang hnaih ber khaw upate zawng zawng chuan ruama bâwngla ring an tan chungah chuan an kut an sil ang a; 7 ‘Kan kutin he thisen hi a chhuah lo va, kan mitin a hmu bawk hek lo. 8 Aw LALPA, i tlan chhuah i mi Israel-hote hi ngaidam la, i mi Israel-hote zîngah hian pawi khawih lo thisen chhuahna hi a awm phal suh ang che,’ an ti ang a, an ṭang tûr a ni. Tichuan, thisen thu-ah chuan ngaihdam an ni ang. 9 Chutiang chuan LALPA mit hmuha thil ṭha tiin pawi khawih lo thisen chhuahna chu in tikiang tûr a ni.

Indonaa hmeichhia an man tih dân tûr

10 “In hmêlmate rûn tûra in kal chhuaha, LALPA in Pathianin in kuta a pêk che ua, sala in hruaia, 11 sal zînga hmeichhe hmêlṭha tak, in mi duh zâwng tak, nupui atâna in mi duh zâwng tak in hmuh chuan, 12 in inah in hruai hâwng ang a, an lû an mêt ang a, an tin an zai ang a; 13 an sal kawr chu an hlîp ang a, in inah an awm ang a, thla khat zet an nu leh an pa an sûn ang a, chumi hnuah chuan in pâwl ang a, an pasal in ni ang a, in nupui an ni ang. 14 Tin, in lung a dum loh chuan an duh duhnaah an kal in phal tûr a ni, sum leh paiah in hralh hauh tûr a ni lo va, sal bâwlin in bâwl tûr a ni lo, in tihminghliau tawh si a.

Fa hmasa ro pêk dân tûr

15 “Miin nupui pahnih nei ang sela, pakhat chu duhin pakhat chu hua sela, a duha leh a huata chuan fa hrinsak ve ve sela; tin, fapa upa ber chu a huata fa ni sela, 16 a ro neih chu a fapate a khâwmtîr hunah chuan a duh taka fapa chu a fapa upa, a huata fa aia uah a siam tûr a ni lo. 17 Amaherawhchu, a huata fa, a fa upa ber chu a neih zawng zawnga chan hnih huiah a siam tûr a ni; a chakna bul a ni a, fa tîr nihna chu a pual a ni.

Fa thu awih lo tih dân tûr

18 “Miin fapa luhlul tak, hel hmang tak nei ang sela, a nu leh a pa thu âwih lovin, an thununna pawm duh lo sela, 19 a nu leh a pa chuan an kai ang a, an khaw upate hnênah an khaw kulh kawngka bulah an hruai tûr a ni. 20 Tin, an khaw upate hnênah chuan, ‘He kan fapa hi luhlul tak leh hel hmang tak a ni a, kan thu pawh a âwih duh lo va; inkhawhral hmang leh ruih hmang mi a ni,’ an ti tûr a ni. 21 Tichuan, khuaa mi zawng zawng chuan lungin an dêng hlum tûr a ni; chutiang chuan in zîng ata, chu thil ṭha lo chu in tibo tûr a ni; tin, Israel mi zawng zawngin an hria ang a, an hlau vang.

Thinga khai ruang phûm ngei tûr leh dân chi hrang hrang

22 “Tin, miin thihna khawp sual a tiha, tihhlum a niha thinglêra in khai chuan, 23 a ruang chu thingah chuan zankhuain a awm tûr a ni lo va, chumi nî la la chuan in phûm tûr a ni; thinga khai apiang chu Pathian ânchhe dawng a ni si a; LALPA in Pathianin luah tûra a pêk che u in ram chu in tihbawlhhlawh loh nân.

Deuteronomy 22

1 “In unaute bâwngpa emaw, an berâm emaw bo chu in hmuhin in ngawihsan mai tûr a ni lo va, in unaute inah in hruai hawsak leh ngei tûr a ni. 2 Tin, in unaute chu in kiang hnaia awm an nih lohva, a neitu chu in hriat loh emaw a nih chuan, in in lamah in hruai haw ang a, in hnênah a awm reng ang a, in unauvin a rawn zawn hun hunah in lo pe leh tûr a ni. 3 An sabengtung pawh chutiang bawk chuan in ti tûr a ni a, chutiang bawk chuan an silhfênte pawh in ti tûr a ni a, chutiang bawk chuan in unau thil hloh in chhar tawh phawt chu in ti tûr a ni a, in ngawih bopui tûr a ni lo. 4 “In unaute sabengtung emaw, an bâwngpa emaw, kawnga tlu in hmuhin in ngawihsan mai tûr a ni lo va, in tun thawhpui ngei tûr a ni. 5 “Hmeichhiain mipa thuamhnaw an inbel tûr a ni lo va, mipain hmeichhe silhfên an inbel tûr a ni hek lo; tu pawh chutiang ti apiang chu LALPA in Pathian ngaihin mi tenawm an ni. 6 “Kalkawnga thingah emaw, leiah emaw sava bu, a puiin a no emaw, a tui emaw awm a awp lai in hmuh chuan a no chu a pui chawpin in la tûr a ni lo va, 7 a pui chu chhuah ngei ngei tûr a ni a, a no erawh chu in la thei ang; chutichuan, in tân a ṭha ang a, in dam rei dâwn nia. 8 “In thar in sak chuan, chuta mi an tlâka in in chu thisen chhuahna in a nih loh nân, in in chung in hung tûr a ni. 9 Tin, in grêp huanah thil chi hnih in chîng tûr a ni lo; chuti lo chuan, in chi tuh leh in grêp huana thil hâwng zawng zawng chu LALPA pual a ni mai ang. 10 “Bâwngpa leh sabengtung lei in leh duntîr tûr a ni lo. 11 Sahmul leh la tah pawlh in inbel tûr a ni lo. 12 “In intuamna puan chu a tlâng paliah fêm in neihtîr tûr a ni.

Mipat hmeichhiat chungchânga thianghlimna

13 “Miin nupui a neiha, a pâwla, a huat leh sia, 14 ‘He hmeichhia hi ka nei a, ka han pâwl a, nula thianghlim a nihna ka hmu lo va,’ tia mualpho taka a siama, a hming a tihchhiat chuan, 15 nula nu leh pa chuan kulh kawngkaah chumi khaw upate hnênah nula thianghlim a nihna chu an rawn tilang tûr a ni a; 16 tin, nula pa chuan upate hnênah, ‘He mi hi ka fanu ka neihtîr a, a haw leh si a; 17 tin, ngai teh u, “I fanu hi nula thianghlim a nihna ka hmu lo ve,” tiin mualpho takin a siam a; mahse, hêngte hi ka fanu nula thianghlim a nihna chu a ni alâwm,’ a ti ang a. Tichuan, chumi khaw upate hmaah chuan puan an phah ang a. 18 Tin, chu khaw upate chuan chu mi chu an hrem ang a; 19 Israel nula thianghlim a tihhmingchhiat avângin tangkarua sekel za an chawitîr ang a, nula pa chu an pe tûr a ni. Ani chu a nupui a ni ang a, a dam chhûngin a ṭhen thei lo vang. 20 Amaherawhchu, chumi thu chu a lo dika, nula chu nula thianghlim a nihna a lan loh chuan, 21 nula chu a pa kawngkaah an hruai chhuak ang a, a awmna khuaa mite chuan lungin an dêng hlum ang, a pa ina nawhchizuara Israel-te zînga thil sual âtthlâk tak a tih avângin. Chutiang chuan in zîng ata, chu thil ṭha lo chu in tibo tûr a ni. 22 “Miin pasal nei a mutpui an hmuh chuan an pahnih chuan an thi tûr a ni, a mutpuitu mipa leh hmeichhia chu; chutiang chuan Israel zîng ata, chu thil ṭha lo chu in tibo tûr a ni. 23 “Nula thianghlim, mi nupui hual, miin khuaah a hmuha, a mutpui chuan, 24 an pahnihin khaw kulh kawngkaah in hruai chhuak ang a, lungin in dêng hlum tûr a ni; hmeichhia chu khuaa awm sia, a au loh avângin; tin, mipa chu a ṭhenawm nupui a tihhminghliau avângin; chutiang chuan in zîng ata, chu thil ṭha lo chu in tibo tûr a ni. 25 “Amaherawhchu, miin ramhnuaiah nula, mi hual a hmuha, a tihluiha a mutpui chuan, a mutpuitu mipa chauh chu tihhlum tûr a ni a, 26 a nula chu eng mah in tih tûr a ni lo, nula chungah chuan thihna khawp sual a awm lo; hetiang hi chu, mi a ṭhenawm beia that ang a ni a; 27 ramah a va tawng fuh a, mi hual nula chu a au va, chhantu an awm si lo va. 28 “Miin nula thianghlim, hual loh a hmuha, a mana, a mutpui an hmuh chuan, 29 a mutpuitu mipa chuan nula pa chu tangkarua sekel sawmnga a pe tûr a ni a; tin, ani chu a nupui a ni ang, a tihhminghliau tawh avângin; a dam chhûngin a ṭhen thei lo vang. 30 “Tu mân mahni pate nupui mutpuiin an pate an timualpho tûr a ni lo.

Deuteronomy 23

LALPA mite zînga tel lo tûrte

1 “Mi, a tilmu keh leh a zahmawh tan chu LALPA mite pung khâwm zîngah an tel tûr a ni lo. 2 Sâwn chu LALPA mite pung khâwm zîngah an tel tûr a ni lo; chhuan sâwmna thlengin a thlahte chu LALPA mite pung khâwm zîngah an tel tûr a ni lo. 3 “Amon mite leh Moab mite chu LALPA mite pung khâwm zîngah an tel tûr a ni lo. Chhuan sâwmna thlengin an zînga mi chu LALPA mite pung khâwm zîngah an tel hauh lo tûr a ni; 4 Aigupta ram aṭanga in lo chhuah laia chhang leh tuia an lo hmuah loh che u avâng leh, ânchhe lawh tûr che ua Mesopotamia rama Pethor khuaa Beora fapa Balaama an rawih avâng khân. 5 Nimahsela, LALPA in Pathian chuan Balaama thu chu a pawm duh lo va, LALPA in Pathian chuan a hmangaih che u avângin, LALPA in Pathian chuan ânchhia chu in tân malsâwmnaah a chantîr ta zâwk a. 6 In dam chhûng zawng anmahni nêna inremna leh an hmuingîlna eng tikah mah in ngaihtuahpui tûr a ni lo. 7 “Edom mite chu in lungten tûr a ni lo, in unaute an ni si a; Aigupta mite chu in lungten tûr a ni lo, an ramah chuan in va mikhual tawh avângin. 8 An thlahte chu chhuan thumna aṭangin LALPA mite pung khâwm zîngah chuan an tel tûr a ni.

Râl beihnaa riahhmun vawn fai

9 “In hmêlmate beia in va riahna hmunah chuan thil ṭha lo tinrêng lakah in inthiarfihlîm tûr a ni. 10 In zîngah tu pawh zâna amaha thil chhuak avânga bawlhhlawh an awm chuan, riahhmun ata a chhuak ang a, riahhmunah chuan a lût leh tûr a ni lo va; 11 amaherawhchu, khua a lo tlai lamin a inbual ang a; tin, ni tlâkah riahhmunah a lût leh tûr a ni. 12 Tin, riahhmun pâwn lamah hmun in ruat ang a, chutah chuan in kal ṭhîn tûr a ni; 13 tin, in hmanraw zîngah chuan suahdûr in nei ang a; tin, heti hi a ni ang a, chu chuan in va ṭhutna tûr chu in lai khuar ang a, in zunram thiar chu in vûr leh tûr a ni; 14 LALPA in Pathian chu in riahhmunah nangmahni chhanhim tûr leh, in hmêlmate hlân tûr che uin a lo tel zêl si ṭhîn a; chuvângin, in riahhmun chu a thianghlim tûr a ni; chuti lo chuan, in zînga thil bawlhhlawh a hmu ang a, a kal bosan dah ang che u.

Dân zawm tûr chi hrang hrang

15 “Chhiahhlawh, in hnêna a pu rawn tlân chhuahsan chu a pu hnênah in pe lêt leh tûr a ni lo. 16 In awmnaa a duh ber a thlan apiangah chuan in zîngah a awm ve mai tûr a ni; in hnehchhiah tûr a ni lo. 17 “Israela fanute zîngah nawhchizuar an awm tûr a ni lo va, Israela fapate zîngah mipa inzuar an awm tûr a ni hek lo. 18 Nawhchizawrh man emaw, uicho man emaw, thutiam nân LALPA in Pathian inah in keng tûr a ni lo; a eng ve ve pawh chu LALPA in Pathian ngaihin thil tenawm a ni. 19 “A pung ûmin in unaute in pûktîr tûr a ni lo; tangka lama pung emaw, ei tûr lama pung emaw, eng pawh a pung ûma pûktîr rêng rêng chu. 20 Ram dang mite chu a pung ûmin in pûktîr thei ang; nimahsela, in unaute chu a pung ûmin in pûktîr tûr a ni lo; chutichuan, in va luah tûr rama in kutkawih zawng zawngah LALPA in Pathianin mal a sâwm dâwn che u nia. 21 “LALPA in Pathian hnêna thu in tiamin, rei rial lovin pêk nghâl tûr a ni; LALPA in Pathian chuan a phût dâwn ngei si che u a, in tân sual a lo ni mai ang. 22 Thutiam kawnga in insûm chuan in tân sual a ni lo vang. 23 In kâa chhuak tawh chu in ti ngei tûr a ni; duh thua thilhlan in kaa in tiam, LALPA in Pathian hnêna in tiam ang zêlin. 24 “In ṭhenawm grêp huana in kalin, in duhtâwkin in ei thei a; amaherawhchu, in êmah in khung tûr a ni lo. 25 In ṭhenawm buh ding lai hmuna in kalin, a vui chu in thliak thei a; amaherawhchu, in ṭhenawm buh ding laiah chuan favah in ruai tûr a ni lo.

Deuteronomy 24

Inmâk leh inneih leh

1 “Miin nupui a neiha, a chunga thil mawi lo eng emaw a hriat avânga a mit a tlun loh chuan heti hi a ni ang a, inmâkna lehkha a ziaksak ang a, a pe ang a, a in ata a chhuahtîr tûr a ni. 2 Tin, a in ata a chhuah hnu chuan mi dang a va nei thei ang. 3 Tin, a pasal hnuhnûng zâwk chuan a huata, inmâkna lehkha a ziaksaka, a pêka, a in ata a chhuahtîr emaw, a pasal hnuhnûng zâwk, nupuia neitu chu a thi emaw a nih chuan, 4 a pasal hmasa, amah kaltîrtu khân, tibawlhhlawh tawh a ni a, a nei leh thei lo vang; LALPA ngaihin tenawm a ni, LALPAN luah tûra a pêk che u ramah chuan sual in luhtîr tûr a ni lo.

Dân chi hrang hrang

5 “Mi, nupui nei hlim chu sipaiah a kal tûr a ni lo va, eng hna thawkah mah phût tûr a ni lo; a in lamah kum khat chu a duh ang angin a awm ang a, a nupui nên hlim takin an awm tûr a ni. 6 Buh râwt sawmna emaw, a chung lam lung emaw tu mah in hrênsak tûr a ni lo, mi nunna hrênsak in ni dâwn si a. 7 “Tu pawh, Israela thlah, a unaute zînga mi rua, sal deha dek emaw, zuar emaw hriat chhuah an nih chuan, chu rûkrupa chu tihhlum tûr a ni; chutiang chuan in zîng ata, chu thil ṭha lo chu in tibo tûr a ni. 8 “Phâr hri chungchâng thu-ah chuan, ngun taka dap chhuaka, puithiam, Levi-hote zirtîr dân ang zêla ti tûrin fîmkhur rawh u; anmahni thu ka pêk angin fîmkhur takin in ti tûr a ni. 9 Aigupta ram ata in lo chhuahna kawnga LALPA in Pathianin Miriami chunga a tih dân kha hre reng rawh u. 10 “Eng pawh in ṭhenawm in pûktîrin, a hrêng la tûrin a inah in lût tûr a ni lo. 11 Pâwnah in ding ang a, in pûktîra chuan hrêng chu pâwnah a rawn lâksak tûr che u a ni. 12 Mi rethei a nih chuan a hrêng chu in mutpui tûr a ni lo; 13 a silhfênah chuan a muta, a fak theih nân che u a hrêng chu ni tlâkah in pe kîr leh ngei tûr a ni; tichuan, LALPA in Pathian ngaihin in tân thil fel a ni ang. 14 “In mi rawih, mi rethei leh tlachhamte chu in unau emaw, in ram, in awmnaa awm ram dang mi emaw pawh ni sela, in hnehchhiah tûr a ni lo; 15 a thawh ni chuan a hlawh chu in pe tûr a ni a, niin a tlâk hnan tûr a ni lo; mi rethei a ni a, chutah chuan a rilru a dah ṭhîn a ni; chuti lo chuan, in chungchâng thu-ah LALPA a au vang a, in tân sual a lo ni dah ang e. 16 “Fate avângin pate tihhlum tûr a ni lo va, pate avângin fate tihhlum tûr a ni hek lo; mi tin mahni sual avâng ṭheuhva tihhlum tûr an ni. 17 “Ram dang mite leh pa nei lote ro chu dik lo takin in rêlsak tûr a ni lo va, hmeithai puan chu hrêngah in lâksak tûr a ni hek lo; 18 nangni pawh Aigupta ramah khân bawih in ni tawh a, LALPA in Pathianin chuta ta chu a tlan che u a ni tih in hre reng tûr a ni; chu vâng chuan a ni hêng thil hi ti tûra thu ka pêk che u ni. 19 “In lova buh in senga, buhphal in khâwm hmaih chuan in la leh tûr a ni lo, ram dang mi te, pa nei lo te, hmeithaite ta tûr a ni; tichuan, LALPA in Pathian chuan in kutkawih zawng zawngah mal a sâwm dâwn che u nia. 20 In olive thing in vuakin a zârte chu in vaw nawn tûr a ni lo; ram dang mi te, pa nei lo te, hmeithaite ta tûr a ni. 21 In grêp, huana mi in lawhin a ṭo in zawng tûr a ni lo; ram dang mi te, pa nei lo te, hmeithaite ta tûr a ni. 22 Tin, Aigupta ramah khân bawih in ni tawh tih in hre reng tûr a ni; chu vâng chuan a ni, hêng thil hi ti tûra thu ka pêk che u ni.

Deuteronomy 25

1 “Mi an inkhin chuan, rorêlnaah an kal ang a, rorêltuten an lo rêlsak ang a, mi fel chu thiam an chantîr ang a, mi sual chu thiam loh an chantîr tûr a ni; 2 tin, heti hi a ni ang a, mi sual chu vuak âwm a nih chuan, rorêltu chuan a muttîr ang a, a hmaah a vuaktîr tûr a ni, a sual dân azirin vuak zat tûr chu thliah a ni ang. 3 Vawi sawmli thlenga vuak theih a ni ang a, chu aia chuangliam chu ni lovin; hei aia chuanga a vuak chuan in unaupa chu in mualpho lu dah ang e. 4 “Sebâwngpain buh a chîl laiin a hmui in phuar tûr a ni lo.

Unaupa thi tâna tih tûr

5 “Unauza awm ho sela, fapa nei lovin an zînga mi chu thi sela, a thia nupui chuan pâwn lama mi, mi dang a nei tûr a ni lo; a pasal unau chuan a rochung ang a, nupuiah a nei ang a, pasal unau tih tûr chu a chungah a ti tûr a ni. 6 Tin, heti hi a ni ang a, a fa tîr hrinsak chuan Israel zînga a hming a bo loh nân a unau thi taa hming chu a pu tûr a ni. 7 Tin, ani chuan a unaupa nupui chu neih a duh loh chuan, a unaupa nupui chu kulh kawngkaa upate hnênah a han chho vang a, ‘Ka pasala unaupain Israel zîngah a unau hming awmtîr zêl a duh lo va, pasal unaupa tih tûr chu ka chungah a ti duh lo,’ a han ti tûr a ni. 8 Chutichuan, an khaw upate chuan ani chu an ko vang a, an bia ang a; tin, ani chuan, ‘Ka nei duh lo a ni,’ tia a ṭan tlat chuan, 9 a unaupa nupui chuan upate hmaah a han pan ang a, a pheikhawk a hlihsak ang a, a hmaiah chil a chhâk ang a, ‘A unaupa chhûngkaw din duh lotu chungah chuan heti anga tih ni zêl rawh se,’ a ti ang a, a chhâng tûr a ni. 10 Tichuan, ‘Chhûngkaw pheikhawk hlihsaka’ tiin Israel-te zîngah chuan a hming puttîr tûr a ni ang.

Dân dang dang

11 “Mi insual sela, a pakhat zâwka nupui chuan a sualpui lak ata a pasal chhanchhuak tûrin a zahmawhah pawhsak sela, 12 a kut chu in tansak tûr a ni a, in khawngaih tûr a ni lo. 13 “In ipah chuan khîn chi dang dang, a rit leh a zâng in nei tûr a ni lo. 14 In inah tehna chi dang dang, a lian leh a tê in kawl tûr a ni lo. 15 Khîn dik tak leh fel tak in nei tûr a ni. Tehna dik tak leh fel tak in nei tûr a ni si; tichuan, LALPAN ram a pêk che uah hian in dam rei dâwn nia. 16 Chutiang thil titu, fel lo taka titu zawng zawng chu LALPA in Pathian ngaihin tenawm an ni.

Amalek mite tihhlum tûr thupêk

17 “Aigupta ram ata in lo chhuahna kawnga Amalek-ho lo tih dân che u kha hre reng rawh u; 18 Pathian pawh hlau lovin in chauh lai leh in ngui laia kawnga an lo tawh che ua, in zînga hnufual mi chhiaṭhaho a hnufualte zawng an lo beih dân te kha. 19 Chuvângin, heti hi a ni ang a, LALPA in Pathianin luah tûra ram a pêk hun che ua, in vêla in hmêlmate zawng zawng laka LALPA in Pathianin râlmuanna a pêk hun che u chuan, vân hnuai chhîna Amalek-ho hriat rengna chu in tibo hlauh tûr a ni; in theihnghilh hauh tûr a ni lo.

Deuteronomy 26

Buh seng huna thilhlan

1 “Tin, heti hi a ni ang a, LALPA in Pathianin rochun leh luah tûra ram a pêk che u in va luha, in va awm hun chuan, 2 LALPA in Pathianin a pêk che u in ram leilung rah haw hmasa ber ṭheuhte chu in rawn la ang a; bâwmah in dah ang a, LALPA in Pathianin a hming awmtîrna tûra a la ruat tûrah chuan in kal tûr a ni. 3 Tin, chumi huna puithiam hnênah chuan in kal ang a, a hnênah, ‘Min pêk tûra kan pi leh pute hnêna chhia a lo chham ramah kan lo kal ta tih, vawiinah hian LALPA in Pathian hnênah kan tilang a ni,’ in ti ang a. 4 “Tin, puithiam chuan in kut ata bâwm chu a la ang a, LALPA in Pathian maichâm bulah a hûng ang. 5 Tin, nangnin LALPA in Pathian hmaah chuan, ‘Kan pu chu Suria mi, mi vâkvai a ni a, Aigupta ramah a zuk chhuk a, a zuk chêng a, tlêm tê an ni a; tin, chutah chuan hnam ropui tak, thiltithei tak, tam tak an lo ni ta a; 6 tin, Aigupta mite chuan min tinawmnah a, min tirethei a, hna hautak tak min thawhtîr a; 7 tichuan, LALPA kan pi leh pute Pathian chu kan au va, LALPA chuan kan aw chu a lo hria a, kan retheihzia te, kan rimzia te, hnehchhiah kan nihziate chu a hria a; 8 tin, LALPA chuan Aigupta ram ata chu kut chak tak te, bân phar te, thil hlauhawm tak te, chhinchhiahna te, thil maktein min hruai chhuak a, 9 he hmunah hian min hruai lût a, he ram, hnutetui leh khawizu luanna ram hi min pe a. 10 Tin, ngai teh, aw LALPA, nangin min pêk leilung rah hmasa ber ṭheuhte kan rawn la e,’ in va ti tûr a ni. Tin, LALPA in Pathian hmaah chuan in hûng ang a, LALPA in Pathian hmaah chibai bûkin in kûn ang a; 11 tin, LALPA in Pathianin in chhûngkua te, nangni te, Levi mi te, in zînga ram dang mite thil ṭha a pêk zawng zawng che uah chuan hlim takin in awm tûr a ni. 12 “Tin, kum thum kum, sâwma pakhat pêk kuma in thil hâwng zawng zawng sâwma pakhat in pêk zawh chuan, Levi mi te, ram dang mi te, pa nei lo te, hmeithaiten in awmnaah chuan an eia, an lo khawsak ve theihna tûrin in pe tûr a ni; 13 tin, LALPA in Pathian hmaah, ‘I thu min pêk, i thupêk zawng zawng angin kan in ata thil thianghlimte chu kan dah chhuak a, Levi mi te, ram dang mi te, pa nei lo te, hmeithaite kan pe tawh a; i thupêk chu a enga mah kan bawhchhe lo va, kan theihnghilh hek lo va; 14 kan lusûn laiin chuta mi chu kan ei lo va, kan bawlhhlawh laiin kan thehthang hek lo va, mitthi pualah kan pe hek lo; LALPA kan Pathian aw chu kan ngaichâng a, i thu min pêk zawng zawng ang chuan kan ti a ni. 15 I awmna thianghlim vân aṭang chuan rawn en la, hnutetui leh khawizu luanna ram, kan pi leh pute pêk tûra chhia i lo chham tawh ang khân i mi Israel-te leh i leilung min pêk hi malsâwm ang che,’ in ti tûr a ni.

LALPA pual mite

16 “Vawiinah hian LALPA in Pathian chuan hêng dân leh rorêlte hi zâwm tûrin thu a pe che u a ni; chuvângin, in thinlung zawng zawng leh in rilru zawng zawngin in pawmin in zâwm tûr a ni. 17 Vawiinah hian LALPA chu a kawngte zawha, a dânte, a thupêkte leh a rorêlte zâwma a awte ngaihchân tumin in Pathianah in thlang ta a; 18 tin, vawiinah hian a tiam che u ang khân, a thupêk zawng zawng in zawma, ama pual bîk ni tûr leh, 19 a lo sawi tawh anga LALPA in Pathian tân mi thianghlim in nih theihna tûr leh, hnam a siam zawng zawng zînga fak te, hmingṭhat te, chawimawi te hlawh tûrin LALPAN a thlang che u a ni,” a ti a.

Deuteronomy 27

Lung phêka Pathian dân ziak

1 Tin, Mosia leh Israel upate chuan mipuite chu, “Thupêk zawng zawng vawiina ka pêk che u hi pawm rawh u. 2 LALPA in Pathianin ram a pêk che ua kal tûra Jordan in kân ni chuan heti hi a ni ang a, lung lian tak tak in phun ang a, lung chârna in hnawih tûr a ni. 3 In kai hnuin a chungah chuan he dân thu zawng zawng hi in ziak tûr a ni; tichuan, LALPA, in pi leh pute Pathianin a lo tiam che u ang khân hnutetui leh khawizu luanna ram, LALPA in Pathianin a pêk che u ramah chuan in kal thei ang. 4 Tin, Jordan lui in kân zawh chuan heti hi a ni ang a, vawiina thu ka pêk che u ang hian Ebal tlângah lungte chu in phun ang a, lung chârna in hnawih tûr a ni. 5 Tin, chutah chuan LALPA in Pathian tân maichâm, lung maichâm in siam tûr a ni a, thîr hmanrua in hmang tûr a ni lo. 6 LALPA in Pathian maichâm chu lung chher lohvin in siam tûr a ni a; chumiah chuan LALPA in Pathian tân hâlral thilhlante in hlân ang a; 7 remna thilhlantein in inthawi ang a, chutah chuan in ei ang a, LALPA in Pathian hmaah chuan hlim takin in awm tûr a ni. 8 Tin, lung chungahte chuan he dân thu zawng zawng hi fiah takin in ziak tûr a ni,” tiin thu an pe a. 9 Tin, Mosia leh puithiam Levi-hote chuan Israel mi zawng zawng chu an bia a, “Aw Israel mite u, ngun takin ngaithla rawh u; vawiinah hian LALPA in Pathian mite in lo ni ta a. 10 Chuvângin, LALPA in Pathian thu chu in awih tûr a ni a, vawiina thu ka pêk che u, a thupêkte leh a dânte chu in zâwm tûr a ni,” tiin.

Thu awih lo tân ânchhia

11 Tin, chumi nî vêk chuan Mosian mipuite chu thu a pe a, 12 “Jordan lui râl in kai hnu chuan mipuite malsâwm tûrin Gerizim tlângah hêngho hi an ding tûr a ni: Simeon hnam te, Levi hnam te, Juda hnam te, Isakar hnam te, Josef hnam te, Benjamin hnamte hi; 13 tin, ânchhe lawh tûrin hêngho hi Ebal tlângah an ding tûr a ni: Reuben hnam te, Gad hnam te, Aser hnam te, Zebulun hnam te, Dan hnam te, Napthali hnamte hi. 14 Tin, Levi-hote chuan an han sawi ṭan ang a, Israel mi zawng zawng hnênah chuan aw ring takin: 15 “ ‘Themthiamte kutchhuak LALPA tâna tenawm milem din chawp emaw, chhûn chawp emaw vawng ru apiang chu ânchhe dawngin awm rawh se,’ an ti ang a. Tin, mipui zawng zawng chuan, ‘Amen!’ an lo ti ang a, an lo chhâwn tûr a ni. 16 “ ‘A nu emaw, a pa emaw zah lo apiang chu ânchhe dawngin awm rawh se,’ an ti ang a. Tin, mipui zawng zawng chuan, ‘Amen!’ an lo ti tûr a ni. 17 “ ‘A ṭhenawm ramri sawntu chu ânchhe dawngin awm rawh se,’ an ti ang a. Tin, mipui zawng zawng chuan, ‘Amen!’ an lo ti tûr a ni. 18 “ ‘Kawng ata mitdel kawng lova kaltîrtu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni. 19 “ ‘Ram dang mi te, pa nei lo te, hmeithaite ro dik lo taka rêlsaktu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni. 20 “ ‘A pa nupui mutpuitu chu ânchhe dawngin awm rawh se, a pa timualpho a nih avângin,’ an ti ang a. Mipui zawng zawng chuan, ‘Amen!’ an lo ti tûr a ni. 21 “ ‘Ran eng pawh pâwltu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni. 22 “ ‘A farnu, a pa fanu emaw, a nu fanu emaw mutpuitu chu ânchhe dawngin awm rawh se,’ an ti ang a. Mipui zawng zawng chuan ‘Amen!’ an lo ti tûr a ni. 23 “ ‘A pizawn mutpuitu chu ânchhe dawngin awm rawh se,’ an ti ang a. Mipui zawng zawng chuan ‘Amen!’ an lo ti tûr a ni. 24 “ ‘A ṭhenawm that rutu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni. 25 “ ‘Pawi khawih lo thah nâna thamna latu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni. 26 “ ‘He dân thu pawm nghehpui lotu chu ânchhe dawngin awm rawh se,’ an ti ang a. Mipui zawng zawngin, ‘Amen!’ an lo ti tûr a ni.

Deuteronomy 28

Thu awih nihlawhna

1 “Tin, heti hi a lo la ni ang a, LALPA in Pathian awkâ chu ngun taka in ngaihthlâka, vawiina thu ka pêk che u thupêk zawng zawng fîmkhur taka in zawm chuan, LALPA in Pathian chuan khawvêl hnam zawng zawnga chungnung berah a siam ang che u; 2 tin, LALPA in Pathian thu in pawm phawt chuan hêng malsâwmna zawng zawng hi in chungah a lo awm ang a, a zui zêl ang che u. 3 In lam leh ram lamahte chuan malsâwmin in awm ang a. 4 In rîla rah te, in lei rah te, in ran rual pung, in bâwngpui leh in berâm rual pungte chu malsâwmin a awm ang. 5 In bâwm leh in chhang hmehna thlêngte malsâwmin a awm ang a. 6 In chhuakvâk te chu malsâwmin in awm ang a, in lo hâwng te pawh malsâwmin in awm ang. 7 In hmêlma, nangmahni beitute chu LALPAN a tihtlâwmsak ang che u a; a bei tûr che uin kawng khatah an lo lût ang a, kawng sarihah an tlânchhia ang. 8 LALPAN in buh in chungah te, in kutkawih zawng zawng chungahte malsâwmna thu a pe ang a; LALPA in Pathianin ram a pêk che uah chuan mal a sâwm ang che u. 9 “In hnêna chhia a lo chham tawh angin, LALPA chuan ama tâna hnam thianghlimah a tinghet ang che u, LALPA in Pathian thupêkte in zawma, a kawngte in zawh phawt chuan. 10 Tichuan, khawvêl hnam tinin LALPA ta in nih an hria ang a, an hlau vang che u. 11 Tin, nangmahni pêk tûra in pi leh pute LALPAN a lo tiam ramah chuan in rîla rahah te, in ran rualah te, in lei rahahte LALPAN nasa takin a tipung ang che u. 12 LALPA chuan a hun taka in ram châwm tûr ruahtui pe tûr che u leh, in kutkawih zawng zawng malsâwm tûrin vân, a ro bâwm ṭha chu, a hawnsak ang che u a; tichuan, hnam tam tak in pûktîr ang a, nangni erawh chuan in pûk lo vang. 13 Tin, LALPAN mei ni lovin lu-ah a siam ang che u a, a hnuaihnung ni lovin a chungnung zêl in ni ang; LALPA in Pathian thupêk awiha, tûna ka pêk che u hi fîmkhur taka pawma, vawiina thu ka pêk che u, 14 a thute hi a enga mah, ding lam emaw, vei lam emawa pathian dangte zui leh rawngbâwl tûra in pênsan loh phawt chuan.

Thu awih loh rah tûr

15 “Amaherawhchu, heti hi a lo la ni ang a, LALPA in Pathian awkâ chu ngun taka in ngaihthlâk lohva, vawiina thu ka pêk che u thupêk zawng zawng hi fîmkhur taka in zawm loh chuan, hêng ânchhia zawng zawng hi in chungah a lo awm ang a, a nangchîng ang che u. 16 In lam leh ram lamahte chuan ânchhia in dawng ang. 17 In bâwm leh in chhang hmehna thlêngte chu ânchhe dawngin a awm ang. 18 In rîla rah te, in lei rah te, in bâwngpui leh in berâm rual pungte chu ânchhe dawngin an awm ang. 19 In vâk chhuak te chu ânchhe dawngin in awm ang a, in lo hâwng te pawh ânchhe dawngin in awm ang. 20 LALPAN in chungah, in kutkawih zawng zawngah ânchhia te, buaina te, zilhhaunate a rawn tîr ang a, in tlâwm ang a, in boral thuai ang; in thil tihsualte avânga mi hnuchhawn avângin. 21 Luah tûra in luhna ram ata chu a tihboral hma loh che u chuan LALPAN hri a vawntîr tlat ang che u. 22 LALPAN ngawrna te, khawsik te, vûnna te, sat huam huamna te, khandaih te, rona te, ṭawihnatein a hrem ang che u a, in boral hma loh chuan a ûm zêl ang che u. 23 In chung lama in vân chu dâr a ni ang a, in hnuai lama lei chu thîr a ni ang. 24 In ram ruah chu vaivut leh vaivut khu-ah LALPAN a chantîr ang a; in boral hma loh chu vân aṭangin in chungah a lo tla ang. 25 “LALPAN in hmêlmate lakah a titlâwm ang che u a; anmahni bei tûrin kawng khatah in chhuak ang a, kawng sarihah in tlânchhia ang a; khawvêl hnam tin zîngah kil tin kil tangah in vâk in vâk ang. 26 In ruang chu chunglêng sava zawng zawng leh ramsa zawng zawng chaw a ni ang a, a hnawt botu an awm hauh lo vang. 27 Tihdam theih loh Aigupta khawihli te, ngâwtna te, vûnna te, uithaktein LALPAN a hrem ang che u. 28 Âtna te, mitdelna te, zâmnatein LALPAN a hrem ang che u a; 29 mitdelin thimthama a dap a dap angin chhûn ênah pawh in dap in dap ang a, in khawsak thu-ah chuan in hmuingîl lo vang; tin, hnehchhiah atân leh râllâk atân ngawt in ni châmchî ang a, chhanchhuak tûr che u tu mah an awm lo vang. 30 Nupui in hual ang a, mi dangin an mutpui ang; in in sa ang a, in luah lo vang; grêp huan in siam ang a, a rah chu in chhawr lo vang. 31 In mit hmuhah in bâwngpate chu thah a ni ang a, a sa chu in ei lo vang; in sabengtungte chu an lâk luihsak ang che u a, an pe leh lo vang che u; in berâmte chu in hmêlmate pêk a ni ang; chhantu che u tu mah in nei lo vang. 32 In fanute, in fapate chu hnam dangte pêk an ni ang a, nilêngin anmahni ngaiin in thlîr reng ṭhîn ang a; in thlîrna lamah in mitte a chau vang a, eng mah tih theih in nei si lo vang. 33 In lei rahte leh in thawh rim rahte chu in hriat loh hnamin an ei zo vang a, hnehchhiah atân leh nêksâwr atân ngawt in ni châmchî ang; 34 chutichuan, chûng thil chu in hmuhin in ât phah ang. 35 LALPAN in khûpah te, in keah te, tihdam theih loh khawihli na chi a veitîr ang che u, in kephah aṭanga in chhîp thlengin. 36 “Nangmahni leh in lal chawpin in pi leh pute chena in hriat ngai loh hnam hnênah LALPA chuan a hruai ang che u a; chutah chuan pathian dang, thing leh lung rawng te in bâwl ang. 37 Tichuan, LALPAN a la hruai bona tûr che u hnam zawng zawng zîngah chuan mak tih leh hau bûr leh a chhe lama tehkhinna in lo la ni ang. 38 Lovah buh chi tam tak in feh chhuahpui ang a; tlêm tê chauh in seng ang, khauvin a ei zo vek dâwn a ni. 39 Grêp huan in siam ang a, in enkawl ang a; nimahsela, a uain chu in in lo vang a, grêp chu in lo hek lo vang, changpâtin a ei zo dâwn a ni. 40 In ram zawng zawngah olive thing in chîng ang a; nimahsela, a hriak chu in thih lo vang, in olive rahte chu a hlamtla zo vang. 41 Fanu fapa in hring ang a; nimahsela, in ta an ni lo vang, salah an la hruai dâwn a ni. 42 In thei kûng zawng zawng leh in lei rah chu khau chan a ni ang. 43 “Ram dang mi, in zînga awmte chuan an sân khalh telh telh ang che u a, nangni chu in hnuai telh telh ang. 44 An pûktîr ang che u a, nangni chuan in pûktîr ve lo vang. Anni chu lu an ni ang a, nangni chu mei in ni ang. 45 Hêng ânchhia zawng zawng hi in chungah a lo awm ang a, a ûm ang che u a, a nangchîng ang che u, a tihboral zawh thleng che uin; a thupêkte leh a dân a pêk che u zâwm tûra LALPA in Pathian awkâ chu in ngaihthlâk loh avângin. 46 In chungah leh in thlahte chungah kumkhuaa chhinchhiahna leh mak tih atân a la awm ang. 47 Thil engkima in lo muk pawha LALPA in Pathian chu rilru lâwm tak leh hlim taka a rawng in bâwl loh avângin, 48 nangmahni bei tûra LALPAN a la rawn tirh tûr in hmêlmate rawng chu rilṭâm chung te, tuihâl chung te, saruak chung te, thil engkim tlachham chungtein in bâwl ang a; an tihboral hma loh che u chuan in nghâwngah thîr nghâwngkawl an bât ang. 49 Hla tak aṭangin kâwlkil ata nangmahni bei tûr hnam, LALPAN mupui bir angin a rawn tîr ang; an ṭawng in hriat loh hnam; 50 upate pawh pawisa lo leh ṭhalaite pawh duhsak chuang lo hnam kawlhsen tak chu. 51 Tin, in ran rual pung te, in lei rah te, in boral hma loh zawng an ei ang a, buh te, uain te, hriak te, in bâwng pung te, in berâm rual note an zuahsak lo vang che u, in boralna an thlensak thleng che uin. 52 In ram zawng zawnga in rin pui, in kulh sângte a chim thlengin in kulh kawngka zawng zawngah an hual ang che u a, LALPA in Pathianin a pêk che u in ram zawng zawnga in kulh kawngka zawng zawngah an hual ang che u. 53 “In hmêlmaten an dan chêpna che u avângin an hualna che u leh an dan chêpnaah che u chuan in rîla rah, LALPAN a pêk che u in fanute leh in fapate sa in ei ang. 54 In zînga mi nun tluang, mi tlang takte pawhin an unaupa te, an nupui duh tak te, an la awmpui an fanaute takngial pawh an hmu mawh ang a; 55 eng mah an neih tawh loh avângin an fate sa an ei tûr chu a tuate mah an pe lo vang; an hualna che u leh an dan chêpna che u avangin. 56 In zînga hmeichhe awm no leh chhiaṭhate, an chhiaṭhat leh an awm no avânga lei pawh rap duh lote chuan an pasal duh tak te, an fanu te, an fapa te, 57 an pawm lai fa sên leh an fa la piang tûrte pawh an hmu mawh ang a; engkim an tlâkchham tawh avângin a rûkin an ei ang; an hualna che u leh an dan chêpna che u, in hmêlmaten in kulh kawngkaa an dan chêpna che u avângin. 58 “LALPA IN PATHIANA tih hming ropui tak leh hlauhawm tak hi, in hlauh theihna tûra he lehkhabua chuang thu zawng zawng hi fîmkhur taka in zawm loh chuan, 59 LALPAN nangmahni leh in thlahte chungah hri mak tak, hripui lêng reng, natna hrehawm tak lêng reng chi a lêntîr ang. 60 In hlauh hle ṭhin Aigupta ram hrite kha in chungah a lêntîr leh ang a, a vuan tlat ang che u. 61 He dân lehkhabua chuang lo, natna leh hri tinrêng pawh in boral hma loh chu LALPAN in chungah a lêntîr ang. 62 Vâna arsi zât ni ṭhînte kha tlêm tê chauh in lo ni tawh ang, LALPA in Pathian awkâ chu in zawm loh avângin. 63 Tin, heti hi a ni ang a, a tiṭha tûr che u leh a tipung tûr che ua LALPA chu a lâwm ang khân, a tiboral tûr che u leh a tichhe tûr che uin LALPA chu a lâwm ang a, in va luah tûr in luhna ram ata chu sawn bo in ni ang. 64 “Tin, LALPA chuan kâwlkil aṭanga kâwlkil lehlam thlengin chi tin zîngah a tidarh ang che u a, chutah chuan thing leh lung - in pi leh pute chena in hriat ngai loh pathian dangte rawng in bâwl ang. 65 Chûng hnam zîngah chuan hahdamna rêng rêng in hmu lo vang a, in ke tân chawlhna rêng rêng a awm lo vang a; chutah chuan LALPAN khurhna rilru te, mit chauhna te, nguina rilrute a pe zâwk ang che u. 66 In nunna chu hlauthâwng rêng rêngin a awm ang a, chhûn leh zân hlau rengin in awm ang a, in nunnain ngaihngam taka awm a nei lo vang. 67 Zîng lamah chuan, ‘Tlai ni tawh sela aw!’ in ti ang a, tlai lamah chuan, ‘Zîng ni tawh sela aw!’ in ti ang; thil hlauhawm in thinlungin a hlauh tûr avâng leh in mita in thil hmuh tûr avâng chuan, 68 ‘In hmu leh tawh lo vang,’ in hnêna ka tih kawngah chuan lawngin Aigupta ramah LALPAN a hruai leh ang che u; tin, chutah chuan in hmêlmate bawihpa atân te, bawihnu atân te in inzuar ang a, tu mân an duh dâwn lo che u a ni,” tiin.

Deuteronomy 29

Moab rama Israel-te hnêna LALPA thuthlung

1 Horeb tlânga an hnêna thu a thlun tiam lova, LALPAN Moab rama Israela thlahte hnêna Mosia thu a thluntîr, a thuthlung thute chu hêng hi a ni. 2 Tichuan, Mosian Israel mi zawng zawng chu a ko va, an hnênah, “Aigupta rama Pharaoa chungah te, a mite zawng zawng chungah te, a ram zawng zawng chungah te in mit hmuh ngeia LALPAN thil a tih zawng zawng kha in hmu a; 3 fiahna nasa tak te, chhinchhiahna te, thil mak te in mit ngeia in hmuh kha. 4 Nimahsela, LALPAN vawiin thleng hian hriat thiamna thinlung te, hmuh theihna mit te, hriat theihna beng te a la pe lo che u a ni. 5 Thlalêrah kum sawmli ka hruai ta che u a; in silhfênte chu in sin chul lo va, in pheikhawkte chu in bun chul lo bawk a. 6 Kei hi LALPA in Pathian ka ni tih in hriat theih nân chhang in ei lo va, uain pawh, zupui pawh in in lo va. 7 Tin, he hmun in lo thlen hian, Hesbon lal Sihona leh Basan lal Oga chu min do tûrin an lo thawk a, anni chu kan lo hneh a; 8 tin, an ram chu kan la a, Reuben-ho te, Gad-ho te, Manase hnam zâtvete luah atân kan pe a. 9 Chutichuan, in thiltih zawng zawnga in hmuingil zêl theih nân he thuthlung thute hi pawm ula, zâwm rawh u. 10 “Tûnah hian in zain - in hnam puipa te, 11 in upa te, in hotu te leh Israel mi dang zawng zawng, in fanau tê tê te, in nupui te, in awmpui ram dang mi, in thing kittu leh in tui chawitute chenin LALPA hmaah in ding a ni. 12 LALPA in Pathianin in pawm tûra thuthlung a siamah hian vawiinah in lût dâwn ta a; 13 in thlahtu Abrahama te, Isaaka te, Jakoba te hnênah leh in hnêna a lo tiam tawh anga in Pathian a nih theih nân, ama mi atân a tinghet che u a ni. 14 He chhechham leh thuthlung thu hi in hnênah chauh thlung ka ni lo va, 15 vawiina LALPA kan Pathian hmaa dingte leh tûna kan hnêna awm ve lote hnênah pawh hian a ni 16 (Aigupta rama kan awm dân te, hnam dangte tâwn tlanga in kal tlang dânte in hria a; 17 an zînga an thil tenawmte leh an milem, thing leh lung te, tangkarua leh rangkachakte in hmu bawk a). 18 “Chuti lo chuan, in zînga mipa emaw, hmeichhia emaw, chhûngkua emaw, hnam emaw, chûng hnam pathiante be tûr chuan an thinlungin tûnah hian LALPA kan Pathian chu hawisanin, in zîngah thil khâ leh sai chawr chhuahna bul te in lo awm dah ang e; 19 tin, chuti a nih zawngin he chhechham thu hi hre reng sia, luhlul taka duh ang anga a awm pawha a tân eng mah pawi lo tûr anga mahni inthlamuan chawp chu, 20 chutiang mi chu LALPAN a ngaidam dâwn hauh lo va, LALPA thinurna leh a thîkna chuan chu mi chu a ur ang a, he lehkhabua ânchhe chuang zawng zawng hi a chungah a awm ang a, LALPAN vân hnuai ata a hming chu a thai bo zâwk ang. 21 He dân bua chuang ânchhe thuthlung zawng zawng ang hian, Israel hnam zawng zawng zîng ata tihrangin thil ṭha lo lamah LALPAN a teltîr ang. 22 “Tin, ṭhangthar lo la awm tûr, in hnua in fate lo la awm tûr leh, ram dang mi hla tak aṭanga lo kal tûrte chuan, chumi rama hri leh LALPAN natna a veitîrte, 23 a ram pum pui chu kât leh chi leh kâng hlum, eng mah chîn lohna, eng mah chawr lohna, hlobette pawh chawr lohna, Sodom leh Gomorra leh Adma leh Zeboiim tihchhiat, LALPAN thinur leh thinrima a tihchhiat anga chhia a nih an hmuh hun chuan, 24 hnam tinin, ‘Eng vângin nge he ram hi hetianga LALPAN a tih? He thinur ling nasa tak hi engtizia nge ni?’ an ti ang. 25 Chutichuan, miin, ‘Aigupta ram ata a hruai chhuah laia a thuthlun, LALPA an pi leh pute Pathian thuthlung chu an hawisana, 26 pathian dang, an hriat ngai loh pathiante, anin a ruatsak ni lote rawng an bâwla, an biak vâng a ni. 27 Chu vâng chuan he lehkhabua chuang ânchhia zawng zawng thlentîr tûrin he ram chungah hian LALPA thin a thawk a ni. 28 Tin, thinrim leh thinur leh thinrim tak maiin an ram ata a pawt chhuak vek a, ram dangah a theh lût a ni, tûna an awm dân ang hian,’ an ti ang. 29 Thil inthupte chu LALPA kan Pathian ta a ni a; thil tihlante erawh chu, he a dân thu zawng zawng hi kan zawm theih nân keini leh kan thlahte ta kumkhua tûr a ni.

Deuteronomy 30

Nunna chu thlang rawh u

1 “Tin, LALPAN a hnawh darhna che u hnam dang zînga in awm laia, in chungah hêng tûna malsâwmna leh ânchhia in hnêna ka sawi hi a lo thlenin, duh thlan tûr in neih hi hre reng ang che u. 2 LALPA in Pathian lam in hawi leha, tûna thu ka pêk che u ang hian, nangni leh in fate nên, in thinlung zawng zawng leh in rilru zawng zawnga a awkâ in zawm hunah chuan, 3 LALPA in Pathianin in sal nihna a tibo vang a, a khawngaih ang che u a, LALPA in Pathianin hnam tin zînga a tihdarhna che u ata a hruai khâwm leh ang che u. 4 In zînga mi, vân tawp thlenga hnawh chhuah an awm chuan, LALPA in Pathianin chuta ta chu a hruai khâwm ang che u a, chuta ta chu a hruai chhuak ang che u; 5 tin, LALPA in Pathianin in pi leh puten an luah ramah khân a hruai lût leh ang che u a, in luah ang a; ani chuan a tihmuingîl ang che u a, in pi leh pute khûmin a tipung ang che u. 6 Tin, in nun theihna tûra LALPA in Pathian chu in thinlung zawng zawng leh, in rilru zawng zawnga in hmangaih theihna tûrin, LALPA in Pathianin in thinlung leh in thlahte thinlung serh a tansak ang che u. 7 Tin, LALPA in Pathianin hêng ânchhia zawng zawng hi a tiduhdahtu che u, in hmêlmate leh a hawtu che u chungah a awmtîr ang. 8 Tin, in lo hawi leh ang a, LALPA awkâ hi in pawm ang a, vawiina thu ka pêk che u, a thupêk zawng zawngte hi in zâwm ang. 9 “Tin, LALPA in Pathian chuan in kutkawih zawng zawngah te, in rîla rahah te, in bâwng rual pungah te, in lei rahahte nasa takin a tipung ang che u a, in pi leh pute chunga a lâwm ang khân in chungah LALPA a lâwm leh ang; 10 he dân bua chuang a thupêkte, a dânte zâwm tûra LALPA awkâ in zawma, in thinlung zawng zawng leh in rilru zawng zawnga LALPA in Pathian lam in hawi phawt chuan. 11 “He thupêk, tûna ka pêk che u hi in tân a har lutuk lo va, a hlat lo bawk che u a ni. 12 “ ‘Kan hriata kan zawm theihna tûrin tu nge vânah min kalsak ang a, min han lâksak ang?’ tih tûrin vâna mi a ni lo va. 13 ‘Kan hriata kan zawm theihna tûrin tuifinriat râlah tu nge min kalsak ang a, min rawn lâksak ang?’ tih tûrin tuifinriat râla mi a ni hek lo. 14 In zawm theih nân thu chuan a hnaih hle che u a, in kâah leh in thinlungah a awm a ni. 15 “Tûnah hian in hmaah nunna leh ṭhatna, thihna leh thil ṭha lo ka dah a; 16 LALPA in Pathian hmangaih tûr te, a kawng zawh tûr te, a thupêk te, a dân te, a rorêlte pawm tûra tûna thu ka pêk che u hi in zawm chuan nungdamin in awm ang a, in lo pung ang a, in va luah tûr ramah chuan LALPA in Pathianin mal a sâwm dâwn che u a ni. 17 Amaherawhchu, in thinlungin khaw dang a hawia, in ngaihthlâk lohva, hruai bova in awma, pathian dangte in biaka, a rawng te in bâwl chuan, 18 in boral ngei ngei ang tih tûnah hian ka hrilh che u a ni; Jordan lui kâna, luah tûra in va luhna ramah chuan in dam rei lo vang. 19 In hmaah nunna leh thihna, malsâwmna leh ânchhia ka dah tih tûnah hian in chungchâng thua hretu atân lei leh vân ka ko a ni; chutichuan, nunna chu thlang rawh u, in nun theih nân, nangni leh in thlahte nên; 20 LALPA in Pathian hmangaiha, a awkâ awiha, amah vuan tlatin; amah chu in nunna, in dam reina a ni si a; tichuan, in pu Abrahama te, Isaaka te, Jakoba te chhechhama pêk a tiam ramah chuan in awm dâwn a ni,” a ti a.

Deuteronomy 31

Josuan Mosia ai a awh

1 Tin, Mosian Israel mi zawng zawng hnênah hêng thu hi a va sawi a. 2 An hnênah, “Tûnah chuan kum za leh sawmhnih ka lo ni ta a; ka chhuakvâk thei tawh lo va; tin, LALPAN, ‘He Jordan lui hi i kân lo vang,’ mi ti a. 3 LALPA in Pathian chuan in hma a hruai ang a; hêng hnamte hi a tihbosak ang che u a, an ram chu in luah ang; tin, LALPAN a lo sawi tawh angin Josuan in hma a hruai ang. 4 Tin, LALPAN Amor-ho lalte, Sihona leh Oga leh an ram chunga a tih ang khân an chungah a ti ang; anni chu a tiboral a nih kha. 5 LALPAN anni chu a hlân ang che u a, thu ka pêk che u thupêk ang zawng zawng khân an chungah in ti tûr a ni. 6 Chhel tak leh huai takin awm ula, ṭih suh ula, anni chu hlau hek suh u; in hnêna kala chu LALPA in Pathian a ni si a; a tithlâwn lo vang che u a, kal pawh a kalsan tawp lo vang che u,” a ti a. 7 Tin, Mosian Josua chu a ko va, Israel mite zawng zawng mit hmuhah a hnênah, “Chak tak leh huai takin awm rawh, hêng mite hnênah hian an pi leh pute LALPAN chhechhama pêk a lo tiam tawh ramah chuan i kal tûr a ni a, anniho hi i luahtîr tûr a ni. 8 Tin, i hmahruaitu chu LALPA a ni ang a, i hnênah a awm zêl ang a, a tithlâwn lo vang chia, kal pawh a kalsan tawp lo vang che; hlau suh la, zâm hek suh,” a ti a.

Kum sarih danah dân hi chhiar tûr

9 Tin, Mosia chuan chu dân chu a ziak a, LALPA thuthlung bâwm zâwntu Levia fapa puithiamte leh Israel upateho zawng zawng chu a pe a. 10 Tichuan, Mosian, “Kum sarih kum, ngaihdam kum apianga bâwkte kûtah, 11 hmun a la ruat tûra Israel mi zawng zawng LALPA in Pathian hmaa an rawn inlan hunah, he dân hi Israel mi zawng zawng hriatah in chhiar tûr a ni.

LALPAN Mosia thil a hrilh hnuhnûngte

12 “Mipuiho a hmei a pa, in fanau tê tê te, in awmpui ram dang mi te, anni chuan an ngaihthlâka, an zira, LALPA in Pathian chu an ṭiha, he dân thu zawng zawng hi fîmkhur taka an zawm theih nân leh, 13 an fate, la hre ve lote pawhin an hriata, Jordan lui kâna in va luah tûr rama in awm chhûng zawng zawnga LALPA in Pathian ṭih an zir theih nân ko khâwm rawh u,” tiin thu a pe a. 14 Tin, LALPAN Mosia hnênah, “Ngai teh, i thih hun a lo hnai ta a; Josua chu ko la, inbiakna puan inah chuan va inlan rawh u, thu ka pe dâwn e,” a ti a. Tin, Mosia leh Josua chu an kal a, inbiakna puan inah chuan an va inlan a. 15 Tin, LALPA chu Puan Inah chuan chhûmdingin a inlâr a; tin, chhûmding chu Puan In kawngka lu chungah chuan a ding a. 16 Tin, LALPAN Mosia hnênah, “Ngai teh, i pi leh pute hnênah i muhîl dâwn ta a, hêng mite hi an tho vang a, an va awmna tûrte zînga ram dang pathiante lakah chuan an uirê ang a, mi hawisan ang a, ka thuthlung an hnêna ka thlun chu an bawhchhia ang. 17 Chutichuan, chumi hun chuan an chungah ka thin a thawk ang a, ka hawisan ang a, ka bîkbosan ang a, an ral ang a, thil ṭha lo leh manganna tam tak an chungah a thleng ang a; chutichuan, chumi ni chuan, ‘Kan Pathian kan zînga a awm loh avângin hêng thil ṭha lo hi kan chungah a lo thleng a ni lâwm ni?’ an ti ang a. 18 Pathian dangte lam hawia thil ṭha lo an la tih tûr zawng zawng avâng chuan, an lakah chumi hun chuan ka inthup ngei ngei dâwn a ni. 19 “Chuvângin, hetiang hla hi in tân phuah la, Israela thlahte zirtîr rawh; Israela thlahte chungchâng thu-ah he hla hi mi hriatpuitu a nih theih nân vawntîr rawh. 20 An pi leh pute hnêna chhechhama ka tiam, hnutetui leh khawizua luang ramah chuan ka hruaia, ei leh bâra an awma, an tlaia, an lo thau hun meuh chuan pathian dangte lam an hawi ang a, an rawng te an bâwl ang a, mi hmusit ang a, ka thuthlungte an bawhchhe dâwn a ni. 21 Tin, heti hi a ni ang a, thil ṭha lo leh manganna tam tak an chunga a lo thlen hunin, he hla hi a hriat chhuahtîrtu a ni ang; an thlahte kâ aṭangin theihnghilh theih a ni dâwn si lo va; tûnah ka chhechham rama ka hruai hma rêng pawhin an suangtuah vêl dân chu ka hre sa tawh reng a ni,” a ti a. 22 Chutichuan, Mosian chu hla chu chumi ni la la chuan a phuah a, Israela thlahte a zirtîr a. 23 Tin, Nuna fapa Josua chu a fuih a, “Chhel tak leh huai takin awm rawh khai; Israela thlahte chu an hnêna chhechhama ka tiam ramah chuan i hruai lût dâwn a ni; tin, i hnênah ka awm zêl ang,” a ti a. 24 Tin, heti hi a ni a, Mosian he dân thute hi lehkhabua a ziak zawha peih diam a nih hnuin, 25 thuthlung bâwm zâwntu Levi-hote chu Mosian, 26 “He dân bu hi la ula, in chungchâng thua hretu atân LALPA in Pathian thuthlung bâwm sîrah dah rawh u. 27 Hel in chînzia leh in luhlulziate ka hria a ni; ngai teh u, tûna ka la dampui lai che u mahin LALPA chungah in hel ṭhîn a; ka thih hnu lek phei chuan eng ti takin nasa ang maw! 28 An beng hriata hêng thu hi ka sawia, an chungchâng thua hretua lei leh vân ka koh theih nân in hnam puipa zawng zawngte, in hotute mi koh khâwmsak rawh u. 29 Ka thih hnu chuan nasa takin in intichhia ang a, ka thupêk che u kawng ata hi in pêng ang tih ka hre reng a ni; tin, a tâwpah phei chuan thil ṭha lovin a tlâkbuak ang che u; in kut thiltiha tithinur tûra LALPA mit hmuha thil ṭha lo in tih dâwn avângin,” tiin thu a pe a. 30 Tichuan, Mosian Israel pung khâwmho zawng zawng beng hriatah chuan he hla thu hi a tâwp thlengin a sawi vek a:

Deuteronomy 32

Mosia hla

1 “Beng lo chhi ru, vânte u, ka hril dâwn e; Ka ṭawngkam chhuak leilungin ngai se: 2 Ruahtui angin ka thu chu a sûr ang, Dai angin ka thusawi chu a far ang; Hlobet no dep chunga ruah ang leh, Hnim hnah chunga ruah angin. 3 LALPA hming chu ka puang dâwn e: Ropuina kan Pathian pe ru. 4 “Lungpuia chu, a thiltih a fel famkim; A awm dân zawng zawng chu dân a ni a, Pathian rinawm, khawlohna nei lo, Fel leh ṭha a ni. 5 ṭha lo takin a chungah an ti a, a fate an ni lo, an sawisêl kaina a ni: Chhuan bengtlalo leh tihmawh an ni. 6 Aw, mi â leh fing lote u, Chutin maw, LALPA chu in thungrulh dâwn? A hringtu che, i pa a ni lâwm ni? A siam chia, a din nghet che a ni lâwm ni? 7 “Hmasâng nite chu hre reng la, Chhuan tam tak kumte chu ngaihtuah teh. I pa zâwt la, a kawhhmuh ang che; I upate pawh, an hrilh ang che. 8 Chungnungberan hnamte ram a pêk laia, Mihring fate a ṭhen lai khân Hnamte ramri a kham a, Israela thlahte zâtin. 9 LALPA chanvo chu a mite an ni a; Jakob-ho chu a rochan an ni. 10 “Thlalêr ramah a chhar a, Thlalêr ruak rûm vung vungah; A vêla awm chilhin a enkawl a, A mitnautê angin a vawng. 11 Mupuiin a bua no a chawk thova, A no chunga thla a zâpa, A thlate a zâra, a laa, A thlaa a chawi ṭhîn angin, 12 LALPA chauhvin a hruai ṭhîn a, Ram dang pathian ni lovin. 13 Lei hmun sângah te a chuantîr a. Lova thil hâwng a eitîr ṭhîn a; Lungpui ata khawizu a dâwttîr ṭhîn a. Lung chang ata hriak nên. 14 Bâwnghnute khal, berâm hnutê, Berâmno thaute nên; Basan ram berâmpa leh kêlte, Buh kal thaute nên; Grêp thisen, uain i in a. 15 “Mahse, Jesurun-ho an lo thau va, an inchhek a; I lo thau va, i lo chum a, i lo maih ta! A siamtu Pathian a hawisan ta a, A chhandamna Lungpui chu a ngainêp. 16 Ram dang pathiantein a thîkthu a chawk tho va, Thil tenawmin a chawk thinrim. 17 Pathian ni lo, ramhuaite hnênah an inthawi a, An hriat ngai loh pathiante hnênah, Pathian tharte tlaikhawhnua lo awm, In pi, in pute hlauh ngai loh hnênan. 18 A hringtu che Lungpui i ngaisâng lo, A siamtu che Pathian i theihnghilh bawk. 19 “Chu chu LALPAN a hmu a, a hua, A fanu leh fapate tihthinur vângin. 20 ‘Ka bîkbosan ang a, Engtin nge an awm dâwn teh rêng,’ a ti; Chhuan bengtlalo an ni, Rin kai lo fanaute. 21 Pathian ni lo thilin ka thîkthu an chawk tho va; An thil lawilovin mi tithinur a. Chia sawi lohtein ka thîktîr ang a. Hnam âtein ka tithinrim ang. 22 Ka thinur a alh a, Seol mawng kil lam a kâng, Leilung, a thil hâwng chawpin a kâng zo, Tlâng nghahchhante a kâng. 23 “An chungah chhiatna ka tiang khâwm ang a, An chungah thal ka thlah ang. 24 Rilṭâmin an râwp ang a, meipui leh chhiatna namênlovin a kâng ral ang, An chungah ramsa hâte ka tîr ang a, Vaivuta tleng mite tûr nên. 25 Pâwn lamah khandaihin an thi ang a, Chhûng lamah thlabârin, Nula tlangvâl, hnute hne lai, Lua kêlsam ṭote nên lam. 26-27 An hmêlmate chuan ngai sualin, ‘Kan kut chu chawisânin a awm ta, Hêng zawng zawng hi LALPA tih a ni tawp lo,’ hmêlma thinrim chuan an ti ang tih hlauthâwng lo ila chuan, ‘Ka tidarh vek ang a, Mihring zînga anmahni hriat rengna ka tibo teh daih ang,’ ka ti mai tûr. 28 “Finna nei lo hnam an ni a, Anmahniah hriat thiamna a awm lo. 29 Aw, fing sela chuan hêng hi an hre thiam ang a, An tûn hnu lam thu an ngaihtuah tûr. 30 Engtin nge pakhatin sâng a ûm ang a, Pahnihin sîng an tlânchhiattîr ang, An Lungpuiin a hralha, LALPAN a hlan a nih si loh chuan? 31 An lungpui chu kan Lungpui ang a ni si lo, Kan hmêlmate ngei ngaih dân pawhin. 32 A grêp hrui chu Sodom grêp hrui, Gomorra rama mi a ni; A grêpte chu mît grêp a ni, A bâwrte chu a khâ. 33 An uain te chu dragon tûr leh Rûlrial tûr ṭha tak a ni. 34 “Chu chu ka khâwl khâwm, Ka ro bâwma châr chiah a ni lâwm ni? 35 Phuba lâk leh thungrulh chu keima tih tûr a ni; An rahbi a la tleu ngei dâwn e; An chhiatna ni chu a lo hnai ta, An chunga thil lo thleng tûrte chu a lo thleng thuai ang. 36 LALPA chuan a mite ro a rêl dâwn a, A chhiahhlawhte pawh a tihsak ang, A thiltihtheihna bova, Khuahkhirh leh khirh loh tu mah rêng awm lova a hmuh hun chuan. 37 Khawiah nge an pathian, An rin lungpui, 38 An inthawina thau eitu, An in tûr thilhlan uain intute chu? Lo thovin rawn pui che u sela, Nangmahni humtu ni rawh se. 39 “Kei, keimah ngei ka nih hi hria ula, Pathian dang an awm lo ve; Ka tihlum ṭhîn a, ka tinung bawk ṭhîn; Ka hliam ṭhîn a, ka tidam bawk ṭhîn; Ka kut ata mi chhuhsak thei rêng rêng an awm lo. 40 Vân lamah ka kut ka phar a, Ka nunna chhâlin ka sawi e, 41 Ka khandaih tlê ka tah hriama, Ka kutin rorêlna a vawn chuan, Ka hmêlmate chungah phuba ka la ang a, Mi hawtute chu ka thungrûl ang. 42 Ka thalte chu thisenin ka tirui ang a, Ka khandaihin tisa a lem ang; Thahte leh salte thisen nên Hmêlma hotute lu aṭangin, ka ti, a ti ang. 43 “Aw, nangni hnam tinte u, a mite nên lâwm rawh u; A chhiahhlawhte thisen phuba chu a la dâwn a ni; Amah dotute chungah phuba a la dâwn, A ram leh a mite tân inremna famkim a siam ang.”

Mosia thuchah hnuhnûng

44 Tin, mipuite beng hriatah chûng hla thu zawng zawng chu Mosian a va sawi a, amah nên, Nuna fapa Hosea nên. 45 Tin, Mosian chûng thu zawng zawng chu Israel mi zawng zawng hnêna a sawi zawh chuan, 46 an hnênah, “Tûna in hnêna ka thu hriattîr che uah hian in thinlung nghat tlat ula, hêng dân thu zawng zawng hi fîmkhur taka zâwm tûrin in fate thu pe rawh u. 47 In tân thil engmahlo mai mai a ni lo va, in nunna a ni si; tin, hêng thil ti hian luah tûra Jordan in va kân ramah chuan in dam rei dâwn a ni,” a ti a. 48 Tin, chumi ni vêk chuan LALPAN Mosia a bia a, 49 “Moab rama Jeriko zâwna Abarim tlângdunga Nebo tlângah chuan han chho la, Israela thlahte luah tûra ka pêk Kanaan ram chu han thlîr rawh; 50 tichuan, i unaupa Arona Hor tlânga a thia, a chite hnêna hruai a ni ta ang bawk khân i lâwn chhohna tlângah chuan i thi ang a, i chite hnêna hruai i ni ang; 51 Zin thlalêra Kadesh-a Meriba tuia Israela thlahte zînga ka chunga in sual avâng leh, Israela thlahte zînga mi chawimawi loh avâng khân. 52 Ram chu i han hmu ang a; nimahsela, Israela thlahte ka pêk ramah chuan i lût lo vang,” tiin.

Deuteronomy 33

Israel hnamte Mosian mal a sâwm

1 He malsâwmna hian a ni, Pathian mi Mosian a thih hmaa Israela thlahte mal a sâwm ni: 2 “Sinai aṭangin LALPA chu a lo kal a, Seir aṭangin an hnênah a thawk a, Paran tlâng aṭangin a êng chhuak a, Mi thianghlim sângsâwm zîng aṭangin a lo kal; A kut ding lamah chuan an tân dân alh thei a awm a. 3 A ni, chi tinte chu a hmangaih a, A mi thianghlim zawng zawng chu i kutah an awm a, I ke bulah an ṭhu a; I thu chu an pawm ṭheuh vang. 4 Mosia chuan dân min pe a, Jakob-ho mipui tân ro luah tûr. 5 Jesurun-ah a lal a, Mipuiho puipate an pung khâwm a, Israel chi zawng zawng a huhovin. 6 “Reubena chu dam reng sela, thi lovin, A mite erawh chu tlêm thung rawh se,” a ti a. 7 Tin, hei hi Juda-ho mal a sâwmna a ni: “LALPA, Juda aw chu ngaithla la, A mite hnênah hruai lût rawh; A kutin a tân a chuh a, A hmêlmate beihpuitu i ni ang,” tih hi. 8 Tin, Levi-ho chungthuah chuan: “I Thumim leh i Urim chu i mi thianghlim hnênah a awm, Masa-a i fiaha, Meriba tuiahte i beih kha; 9 ‘Ka nu leh ka pa ka hre lo,’ titu khân, A unaute a hre lo, Ama fate ngei pawh a hre hek lo; I thu chu an pawm a, I thuthlung an zâwm a ni. 10 Jakob-ho chu i rorêlte an zirtîr ang a, Israel-hote, i dân. I hmaah rimtui an dah ang, I maichâmah pumhâl thilhlan. 11 Malsâwm rawh, LALPA, a sum a pai, A kutkawihte lo pawm la; A beitute kâwng chu vua la, A hawtute kâwng nên, an chêt leh tawh loh nân,” a ti a. 12 Tin, Benjamin-ho chungthuah chuan: “LALPA duh taka chu a kiangah himin a awm ang, Nilêngin a awp ang a, A paw ṭhîn ang,” a ti a. 13 Tin, Josef-ho chungthuah chuan: “A ram chu LALPA malsâwmin awm rawh se, Vân thil hlu, daitein, Tui thûk tak hnuai lama tuitein, 14 Ni rah chhuah thil hlutein, Thlaten thil hlu a chhuahtein, 15 Hmasâng tlângtea thil duhawm bertein, Chatuan tlânga thil hlutein, 16 Leilung leh a chunga thil hlutein, Hnimbuka awma duhsaknain; Malsâwmna chu Josef-ho lu chungah lo awm rawh se, A unaute hnên ata tihhrana chhîpah chuan. 17 A ropuina chu a bâwngpa piang hmasa ropuina ang a ni a, A kî chu selechal kî ang a ni; Chûng chuan hnam tin a si ang, kâwlkil thlengin; Ephraim-ho sângsâwmte an ni a, Manase-ho sângte an ni,” a ti a. 18 Tin, Zebulun-ho chungthuah chuan: “Lâwm rawh, Zebulun, i chhuahvahnaah te, Tin, Isakar, i puan inahte. 19 Tlângah chi tin an ko vang a, Tah chuan felna inthawinate an hlân ang; Tuifinriat mukna an tlân dâwn si, ṭiauva ro inphûmte nên,” a ti a. 20 Gad-ho chungthuah chuan: “Gad-ho tizautu chu fakin awm rawh se. Sakeibakneipui angin a châng a, Bân a ham thlêr a, a ni, chhîp zawl te pawh. 21 A ṭha lai ber a tân a thlang a. Rorêltu chanvo chu vohvin a awm si a. Puipahote hnênah a kal a, LALPA rorêlna fel a zui a; Israel-te hnêna a rorêlnate chu,” a ti a. 22 Dan-ho chungthuah chuan: “Dana chu sakeibakneino a ni, Basan aṭanga lo zuang chhuak chu,” a ti a. 23 Naphtali-ho chungthuah chuan: “Aw, Naphtali, duhsaknaa lungawi, LALPA malsâwmnaa tlai, Chhim leh thlang luah rawh,” a ti a. 24 Aser-ho chungthuah chuan: “Asera chu fanauva malsâwmin awm sela, A unaute zîngah tlatlum sela; Hriakah a ke chiah rawh se. 25 I kalhnate chu thîr leh dâr a ni ang, I dam chhûng ni angin i chakna pawh a awm ang,” a ti a. 26 “Pathian ang tu mah rêng an awm lo, aw Jesurun, A pui tûr chea vâna chuang, Ropui taka vâna chuang chu. 27 Chatuan Pathian chu i awmna a ni a, Hnuai lamah chuan chatuan bân a awm, Hmêlmate chu a vai kiansak chia, ‘Tiboral rawh,’ a ti. 28 Tin, Israela chu râlmuang takin a awm a, Jakoba tuichhunchhuah a pumbil; Buh leh uain ramah chuan, A ni, a vânten daifîm an fartîr. 29 I nihlawh e, aw Israel, Nang ang rêng tu nge awm, LALPA chhandam mite? Nangmah puitu phaw, I ropuina khandaih a ni. I hmêlmate i hnênah an intulût ang a, An hmun sângte i chîl ang,” a ti a.

Deuteronomy 34

Mosia thih thu

1 Tin, Mosia chu Moab phai aṭangin Jeriko zâwna Nebo tlâng, Pisga tlâng chhipah chuan a han chho va. Tin, LALPAN Gilead ram zawng zawng, Dan thlengin a entîr a; 2 Naphtali leh Ephraim ram zawng zawng, Manase leh Judai ram zawng zawng, a thlang lam tuifinriat thleng, 3 Chhim ram leh tûm khawpui Jeriko phai ruam, Zoar thlengin, 4 Tin, LALPAN a hnênah, “He ram hi a ni, Abrahama te, Isaaka te, Jakoba te hnêna, ‘I thlahte ka la pe ang,’ tia chhechhama ka lo tiam kha; a hmuh zawng ka hmuhtîr phawt chia; nimahsela, chutah chuan i kal lo vang,” a ti a. 5 Chutichuan, LALPA chhiahhlawh Mosia chu LALPA thu angin Moab ramah chuan a thi ta a. 6 Tin, Beth-peor zâwna Moab rama ruamah a phûm a; nimahsela, a thlân chu tûn thlengin tu mahin an hre lo. 7 Mosia chu a thih chuan kum za leh kum sawmhnih mi a ni; a mit a thim lo va, a tha pawh a ṭhum chuang lo. 8 Tin, Israela thlahte chuan Mosia chu Moab phaiah ni sawmthum an ṭah a; chutichuan, Mosia sûna ṭah nite chu a lo tâwp ta a. 9 Tin, Nuna fapa Josua chu finna thlarauvin a khat a, Mosia chuan a chungah a kut a nghah avângin; tin, Israela thlahte chuan a thu an zâwm a, LALPAN Mosia thu a pêk ang chuan an ti a. 10 Tin, chuta chin chu Israel-te zîngah, Mosia anga LALPAN hmaichhan meuhva a biak zâwlnei rêng rêng an awm ta lo va, 11 chhinchhiahnate zawng zawng leh thil mak zawng zawng, Pharaoa leh a chhiahhlawh zawng zawng hnên leh Aigupta ram zawng zawnga entîra, 12 kut chak tak leh hlauhawm tak taktea Israel mi zawng zawng mit hmuha Mosian a tih ang ti vete.

Josua 1

Kanaan ram la tûrin Pathianin Josua thu a pe

1 Tin, heti hi a ni a, LALPA chhiahhlawh Mosia thih hnu chuan Mosia rawngbâwltu Nuna fapa Josua hnênah LALPAN, 2 “Ka chhiahhlawh Mosia chu a thi ta a; chutichuan, tho la, nang leh hêng mipuiho zawng zawng nên hian Jordan lui hi kân ula, anmahni, Israela thlahte ka pêk ramah chuan kal rawh u. 3 Mosia hnêna ka sawi tawh ang khân in kephaha in rah apiang chu ka pe vek a che u. 4 Thlalêr aṭang leh he Lebanon tlâng aṭanga lui lian pui Euphrates lui thlenga Hit-ho ram zawng zawng, ni tlâkna lam tuifinriat zau tak thlengin in ramri a ni ang. 5 I dam chhûng zawng tu mah rêng rêngin an chelh lo vang che; Mosia hnêna ka awm ang khân i hnênah pawh ka awm ve dâwn e. Ka tithlâwn lo vang chia, kal pawh ka kalsan tawp lo vang che. 6 Chak tak leh huai takin awm rawh; an thlahtute chhechhama pêk ka lo tiam tâk ram kha hêngho hi i luahtîr dâwn si a. 7 Ka chhiahhlawh Mosian dân zawng zawng zawm tûra thu a pêk che kha zâwm tlat tûrin chak tak leh huai takin awm phawt mai rawh; i kalna apianga i lo hmuingîl zêl theihna tûrin i ding lamah emaw, i vei lamah emaw pênsan hauh suh ang che. 8 He dân bu hian i kâ chu chhuahsan hlek suh se; chumi thuziak zawng zawng chu i zawm tlat theih nân chhûn leh zân i ngaihtuah zâwk tûr a ni; tichuan, i kawngte chu i lo titluang zel ang a, i lo hmuingîl zêl dâwn nia. 9 Thu ka pe che a ni lâwm ni? Chak tak leh huai takin awm rawh; hlau suh la, zâm hek suh; LALPA i Pathian chu i kalna apiangan i hnênah a awm zêl dâwn alâwm,” tiin a sawi a.

Josuan mi dangte thu a pe

10-11 Chutichuan, Josuan mipui hotute hnênah chuan, “Riahhmun va fang ulangin, mipuite hnênah, ‘Ei tûrte buatsaih rawh u khai, ni thum chhûngin LALPA in Pathianin ram luah tûr a pêk che u hi luah tûrin Jordan lui hi in kân dâwn a ni e,’ tiin thu pe ang che u,” tiin thu a pe a. 12 Tin, Reuben-hote, Gad-hote leh Manase hnam zâtvete hnênah chuan Josuan, 13 “LALPA in Pathianin chawlhna a pe che u a, he ram hi a la pe dâwn che u tia LALPA chhiahhlawh Mosian thu a pêk che u hi hre reng ang che u. 14 In nupuite, in fanau tê tête leh in ran rualte hi chu Jordan lui râla Mosian ram a lo pêkah che u chuan an awm ang a; nangni mi chak huaisenho zawng erawh chu inrâlthuamin in lo kai hmasa ang a, in unaute in lo ṭanpui ang a, 15 LALPAN in unaute chu nangmahni ang bawka chawlhna a pêka, LALPA in Pathianin ram a pêk chu anni pawhin an luah ve hma loh chuan. Tichuan, LALPA chhiahhlawh Mosian Jordan lui râl, ni chhuahna lam ram in puala a lo pêk che u lamah chuan in lêt leh ang a, in la luah dâwn nia,” tiin a sawi a. 16 Tin, anni chuan, “Tih tûra i thu min pêk zawng zawng chu kan ti zêl ang e; tin, i mi tirhna apiangah pawh kan kal zêl ang. 17 Kawng engkima Mosia thu kan zâwm zêl ṭhîn ang khân, i thu pawh kan zâwm zêl ang e; LALPA i Pathian chu Mosia hnêna a awm ṭhîn ang khân i hnênah hian awm ve phawt mai rawh se. 18 Tu pawh i thupêk chunga hela, thu i pêk apiang zâwm duh lo chu tihhlum tûr an ni ang. Chak tak leh huai takin awm phawt mai rawh,” tiin Josua chu an chhâng a.

Josua 2

Josuan Jeriko khua enthla tûr mi a tîr

1 Tin, Nuna fapa Josua chuan, “A ram leh Jeriko khuate chu va en vêl teh u,” tiin mi pahnih, Sitim hmun aṭangin a rûk tein enthlatu atân a tîr a. Tin, an va kal a, nawhchizuar pakhat, a hming Rahabi inah an va lût a, chutah chuan an thleng ta a. 2 Tin, miin, “Ngai teh, zâninah hian ram en thlîthlai tûrin Israela thlahte an lo kal e,” tiin Jeriko khaw lal chu an hrilh a. 3 Tin, Jeriko khaw lal chuan, “I ina lo thleng mikhualte kha han hruai rawh, ram pum pui en thlîthlai tûra lo kal an ni e,” tia hrilh tûrin Rahabi hnênah mi a tîr a. 4 Tichuan, hmeichhia chuan mi pahnihte chu a hruai a, a thukru a; tin, an hnênah, “Ni, mite chu ka hnênah chuan an lo kal ngei mai a; nimahsela, khawi aṭanga lo kal nge an nih zawng ka hre lo. 5 Tin, heti hi a ni a, khaw thim, kulh kawngka khâr hun dâwn lai vêl khân chu mite chu an chhuak leh ta a. Khawi lamah nge an kal tâk pawh ka hre lo; ûm thuai ula, in la ûmpha ang e,” a ti a. 6 Nimahsela, in chungah a hruai chho va, in chungah a ziza kûng tian khâwm zîngah a thukru a ni a. 7 Tin, mite chuan Jordan lui lamah, kai thlengin an ûm ta a; tin, a ûmtute chu an chhuah veleh kulh kawngka chu an khâr ta a. 8 Tin, an mut hmain in chungah an hnênah chuan a han kal a, 9 chu mite hnênah chuan, “He ram hi LALPAN a pe tawh che u a. 10 Aigupta ram ata in lo chhuah khân LALPAN Tuifinriat Sen kha a tihkangsak che u a, Jordan lui râla Amor-ho lal pahnih, Sihona leh Oga-te in tihboral tâk hlauh dân te kan lo hria a. 11 Chu chu kan lo hriat veleh kan hlau va; mi tinin an hlau che u a, an zâm zo ta, nangmahni avang hian zâm lo rêng an awm lo, LALPA in Pathian chu chung lam vânah leh hnuai lam leiah Pathian a ni si a. 12 Chutichuan, hei in chungah hian ka khawngaihzia che u ka lo lantîr ta a ni a, nangni pawhin ka pa chhûngte chungah in khawngaihna chu rawn lantîr ve ula, 13 ka nu leh ka pa te, ka nuṭate, ka laizâwnte leh an neih apiangte chu zuah ula, thihna lak ata kan nunna hi min chhanhimsak tûrin, LALPA hming chhâlin khawngaih takin ka hnênah chhia chham ula, chhinchhiahna takmeuh mi siamsak rawh u khai,” a ti a. 14 Tin, mite chuan a hnênah, “Kan thiltih hi i sawi chhuah dâwn loh chuan in thih ai kan thi ang; tichuan, heti hi a ni ang a, LALPAN ram hi min pêk hunah kan khawngaih chein, i chungah rinawm takin kan ti ang e,” an ti a. 15 Chutichuan, tukverhah hruizênin a thlâk thla ta a, a in chu khawpui kulh tlânga awm a ni si a; kulh chungah chuan a awm a ni. 16 Tin, an hnênah chuan, “Tlâng lam panin kal tawh u khai; chuti lo chuan, a ûmtute che u khân an hmu hlauh dah ang che u. Chutah chuan ni thum va biru ang che u, a rawn ûmtu che u an kîr leh hma loh chuan. Chumi zawhah erawh chuan in kal leh dâwn nia,” a ti a. 17 Tin, mite chuan a hnênah, “I chhe min chhamtîr ngawt hi zawngin thiam loh min chantîr dâwn mai hauh lo a nia. 18 Ngai teh, he rama kan lo luh hian he la sen hi i mi thlâkna tukverhah hian lo ṭâwn bet ang che; tin, in chhûngah i hnênah i pa te, i nu te, i nuṭate leh i pa chhûngte zawng zawng chu hruai lût vek ang che. 19 Tin, heti hi a ni ang a, tu pawh i in kawngka aṭanga khawlaia chhuak apiang chu ama lu chungah a thisen chu a awm ang a, keini zawng thiam loh changin kan awm lo vang. Tin, tu pawh in chhûnga i hnêna awm apiangte chu an chunga kut an thlâk chuan, kan lu chungah thisen chu a awm ang. 20 Amaherawhchu, kan thiltih hi i sawi chhuah chuan chhia min chhamtîrnaah hian thiam loh changin kan awm lo vang,” an ti a. 21 Ani chuan, “In thu ang zêl chuan ni ang hmiang,” a ti a. Tichuan, anni chu a kaltîr ta a, an kal ta a. Tin, tukverhah chuan la sen chu a ṭâwn bet a. 22 Tichuan, an kal ta a, tlâng chu an va thleng a, chutah chuan ni thum, a ûmtute chu an kîr leh hma loh chu an va awm a. A ûmtute chuan kawng tluanin an zawng a; nimahsela, an hmu zo lo va. 23 Chutichuan, mi pahnihte chu an kîr leh a, tlâng ata chu an chhuk a, an kân a, Nuna fapa Josua hnên chu an va thleng a; an chunga thil thleng zawng zawng chu an hrilh a. 24 Tin, Josua hnênah chuan, “LALPAN a ram pum pui chu kan kutah a lo pe takmeuh mai; chu chang a ni lo va, chumi rama chêng zawng zawng chu kan hmaah an tui zêl mai a ni,” an ti a.

Josua 3

Israel-ten Jordan lui an kân

1 Tin, Josua chu zîng takah a tho va, Israela thlahte zawng zawng nên chuan Sitim hmun ata chu an insuan a, Jordan lui an va thleng a, an kai hmain chutah chuan an riak a. 2 Tin, heti hi a ni a, ni thum chinah hotute chuan riahhmun chu an va fang vêl a, 3 “LALPA in Pathian thuthlung bâwm leh puithiamho Levi chiten an zâwn lai in hmuh hunah chuan, in awmna hmun ata hi insuan ula, zui ang che u. 4 Amaherawhchu, nangmahni nêna a inkâr chu teha tawng sânghnih emaw a ni tûr a ni. Hnaih suh ang che u; tichuan, in kalna tûr kawng chu in hre thei dâwn nia; tûn hmain hemi kawng hi zawng in la zawh ngai si lo va,” tiin mipuite chu thu a pe a. 5 Tichuan, Josuan mipuite hnênah, “Intithianghlim rawh u, naktûkah LALPAN in zîngah thil mak takte a ti dâwn e,” a ti a. 6 Tin, Josuan puithiamte hnênah chuan, “Thuthlung bâwm hi zâwn ula, mipuite hmaah kai ang che u,” tiin a sawi a. Chutichuan, thuthlung bâwm chu an zâwn a, mipuite hma chu an hruai ta a. 7 Tin, LALPAN Josua hnênah, “Mosia hnêna ka awm ang khân i hnênah pawh ka awm dâwn e tih an hriat theih nân, vawiinah hian Israel-ho zawng zawng mit hmuhah ka chawimawi ṭan dâwn a che. 8 Tin, thuthlung bâwm zâwntu puithiamhote chu, ‘Jordan lui in thlen chuan tui chu dai ula, vaukam bulah ding reng rawh u,’ tiin thu pe ang che,” a ti a. 9 Tin, Josuan Israela thlahte hnênah chuan, “Lo kal ula, LALPA in Pathian thu hi rawn ngaithla teh u khai,” a ti a. 10 Tin, Josua chuan, “Hemiah hian Pathian nung chu in zîngah a awm a, in hmaah hian Kanaan-hote, Hit-hote, Hiv-hote, Periz-hote, Girgas-hote, Amor-hote, Jebus-hote hi a hnawt chhuak ngei ngei dâwn a ni tih in hria ang. 11 Ngai teh u, leilung pum pui LALPA thuthlung bâwm chuan in hmaah Jordan lui a kân e. 12 Chutichuan, Israel hnamte zînga mi hi sâwm leh pahnih, hnam tin aiawh mi pakhat zêl thlang chhuak ang che u. 13 Tin, heti hi a ni ang a, LALPA, leilung pum pui LALPA bâwm zâwntu puithiamte kephah chu Jordan tuia a innghah veleh chuan, Jordan tui, chhak lam aṭanga tui lo luangte chu a chat hlauh ang a; tichuan, a lo inhlâwm ding luah mai ang,” a ti a. 14 Tin, heti hi a ni a, mipuite chu Jordan lui kai tûra an puan in ata an chhuah chuan, thuthlung bâwm zâwntu puithiamhote chu mipuite hmaah chuan an kal a; 15 bâwm zâwntute chu Jordan lui an va thlena, bâwm zâwntu puithiamte ke chuan vaukam tui a han rah veleh (buh seng chhûng zawng hi chuan Jordan lui hi a kuang zawng zawngah a liam reng ṭhîn a), 16 chhak lam aṭanga tui lo luang thla lai chu a ding ta a, hla feah Zarethan ram bula Adam khuaah chuan a inhlâwm ding ta luah a. Tin, Araba tuifinriat, Tuifinriat Al lama luang chhuk lai chu a chat ta hlauh va; tichuan, mipuite chu Jeriko khaw zâwn takah chuan an kai ta a. 17 Tin, LALPA thuthlung bâwm zâwntu puithiamte chu Jordan lui laiah, lei chârah an ding reng mai a; tin, mipuiho zawng zawng chuan Jordan lui an kai fai vek thlengin, Israel-ho zawng zawng chu lei chârah an kal kai ta vek a.

Josua 4

Hriat rengna lung an phun

1 Tin, heti hi a ni a, a hnam pum pui chuan Jordan lui an kai fai vek hnuin LALPAN Josua hnênah chuan, 2 “Mipuite zînga mi hi mi sâwm leh pahnih, hnam tina mi pakhat zêl thlang chhuak langin, 3 an hnênah, ‘Jordan lui lai, puithiamhote dinna lai taka mi saw lung sâwm leh pahnih la ula, pu phei ula, riahhmun, zânina in riahna tûrah dah ang che u,’ tiin thu pe ang che,” tiin a sawi a. 4 Chutichuan, Josua chuan Israela thlahte zînga mi sâwm leh pahnih, hnam tina mi a thlan chhuahte chu a ko va; 5 tin, Josua chuan an hnênah, “LALPA in Pathian bâwm hmaah khân Jordan lui laiah kai ula, Israela thlahte a hnam zât zêlin, mi tinin lung pakhat ṭheuh pu ang che u. 6 Tichuan, hêng hi in zîngah chhinchhiahna a la ni dâwn nia, nakinah in faten, ‘Hêng lungte hi eng in tihna nge ni le?’ tia an la rawn zawh hunah chuan, 7 nangnin an hnênah, ‘LALPA thuthlung bâwm hmaah Jordan tuite a lo chah tâk vâng a ni; Jordan a kân laiin, Jordan tuite chu a lo chat ta a ni. Tichuan, hêng lungte hi Israela thlahten kumkhuaa an hriat rengna tûr a nih hi,’ in la ti dâwn nia,” a ti a. 8 Tin, Israela thlahte chuan Josuan thu a pêk ang chuan an ti a, Israela thlahte a hnam zât zêlin, Jordan lui laia mi lung sâwm leh pahnih an la a; tin, an riahna hmunah an pu phei a, chutah chuan an dah a. 9 Tin, thuthlung bâwm zâwntu puithiamho dinna lai tak, Jordan lui laiah chuan Josuan lung sâwm leh pahnih a phun a; chûng chu tûn thlengin a la awm reng a ni. 10 Mosian Josua thu a lo pêk tâk zawng zawng anga LALPAN mipuite hnêna ti tûra Josua thu a pêk chu an tih zawh vek hma loh chuan, bâwm zâwntu puithiamte chu Jordan lui laiah chuan an ding reng mai a; tichuan, mipuite chu an intihmanhmawh a, an kai ta a. 11 Tin, heti hi a ni a, mipui zawng zawng chu an kai fai vek hnu chuan, LALPA bâwm leh puithiamte chu mipuite mit hmuhah chuan an kai ve ta a. 12 Tin, Reubena thlahte, Gada thlahte leh, Manase hnam zâtvete chu, Mosian an hnêna a lo sawi tawh ang khân, Israela thlahte hmaah chuan inrâlthuamin an kai a. 13 Râlthuama inthuam diam mi sîngli lai indo tûrin Jeriko phaiahte chuan LALPA hmaah an kai a ni. 14 Chumi ni chuan LALPAN Josua chu Israel-ho zawng zawng mit hmuhah a chawimawi a; Mosia an ṭih ang bawk khân a dam chhûng zawng chuan an ṭih ta a. 15-16 Tin, LALPAN Josua hnênah chuan, “Puithiamho, thuhriattîrna bâwm zâwntute kha Jordan lui ata lo chhuah thu pe rawh,” tiin a sawi a. 17 Chutichuan, Josuan puithiamhote chu, “Jordan lui ata kha lo chhuak tawh rawh u,” tiin thu a pe a. 18 Tin, heti hi a ni a, puithiamho, LALPA thuthlung bâwm zâwntute chu Jordan lui lai ata an lo chhuaha, puithiam kete chuan khawmual a rah veleh, Jordan tuite chu a luan pângngaiin a lo luang leh a, a hma ang bawk khân a kuang zawng zawngah chuan a luang liam leh ta dûl dûl a. 19 Tin, mipuite chu thla khatna, ni sâwm niah Jordan lui ata chu an chhuak a, Jeriko chhak lampang, Gilgal-ah awmhmun an khuar ta a. 20 Tin, chûng lung sâwm leh pahnih, Jordan lui ata an put chhuah chu Josuan Gilgal-ah chuan a phun a. 21 Tin, Israela thlahte hnênah chuan, “Nakin hnua in thlahten an pate, ‘Hêng lungte hi eng tihna nge ni le?’ tia an la rawn zawh hunah chuan, 22 ‘Israel-hote chuan Jordan lui hi lei chârah an kal kai a ni,’ tiin in thlahte chu in la hriattîr dâwn zuk nia. 23 LALPA in Pathianin hmânah Tuifinriat Sen chu kan kai hma lohva kan hmaa a lo tikang chat ta ang khân, LALPA in Pathianin Jordan tuite hi in kai hma loh chuan in hmaah a tikang chat ta a nih hi; 24 leilunga hnam tinrêngin LALPA kut hi a lo chak a ni tih an hriat theiha, LALPA in Pathian chu kumkhuaa an ṭih theih nân,” tiin a sawi a.

Josua 5

1 Tin, heti hi a ni a, Jordan lui piah thlang lama awm Amor-ho lal zawng zawng leh, tuifinriat kama awm Kanaan ram lal zawng zawng chuan, an kai hma loh chuan LALPAN Jordan tuite chu Israela thlahte hmaah chuan a tikang chat tih an lo hriatin, Israela thlahte avâng chuan an thinlungte chu a lo tui zo va, zâm lo rêng rêng an awm hek lo.

Gilgal hmuna serh tan thu

2 Chutih lai chuan LALPAN Josua hnênah, “Meilung chemtê siam langin, Israela thlahte hi an serh tan a ṭum hnihna tansak leh rawh,” a ti a. 3 Tin, Josuan meilung chemtête chu a siam a, Israela thlahte chu vun hmâwr tlângah an serh a tansak a. 4 Josuan an serh a tan chhan chu hei hi a ni: Aigupta ram ata chhuakho zawng zawng, mipa râl kâp mi zawng zawngte kha Aigupta ram ata an chhuah hnu khân, kawnglakah thlalêrah an thi zo ta a ni. 5 Aigupta ram ata chhuakho zawng zawng kha chu serh tan sa vek an ni a; amaherawhchu, Aigupta ram ata an chhuaha thlalêra kawnglaka piang zawng zawng kha chu serh tan an ni ve lo. 6 LALPA aw an ngaihthlâk duh loh avânga mipuiho zawng zawng, Aigupta ram ata lo chhuak, râl kâp mite chena, tihborala an awm vek thlengin, Israela thlahte chu thlalêrah kum sawmli zet an vâk an vâk a; LALPAN chhechhama a lo tiam tawh ang ngeiin, an thlahtute hnêna a lo tiam tawh hnutetui leh khawizua luang ram chu an hmuh ve a phal ta lo a ni. 7 Tichuan, an thlahte, anmahni aia a dinate chu Josuan an serh a tansak a, kawnglakah khân an serh tan a nih loh avângin serh tan loh an la ni reng si a. 8 Tin, heti hi a ni a, mipuiho zawng zawng serh an tan zawh chuan, an dam hma loh zawng an riahhmun, mahni awmna ṭheuhvah chuan an awm a. 9 Tin, LALPAN Josua hnênah, “Vawiinah hian Aigupta-ho hmuhsitna che u hi nangmahni ata chu ka lum bo ta e,” a ti a. Chutichuan, chumi hmun chu tûn thlengin Gilgal an lo ti ta a ni. 10 Tin, Israela thlahte chuan Gilgal-ah awmhmun an khuar a; tin, Jeriko phaiahte chuan chumi thla ni sâwm leh ni li ni tlaiah chuan kalhlên kûtin an kût a. 11 Tin, kalhlên kût zawh tûk ni la la chuan chumi rama buh, chhang dawidim telh loh leh chhangpêr kan an ei a. 12 Tin, chumi rama buh an ei tûk aṭang chuan manna kha a tla ta lo va; Israela thlahte chuan manna chu an dawng leh ta ngai bawk hek lo; chumi kum chuan Kanaan rama buh leh bâl chu an ei ta zâwk a ni.

Josua leh khandaih keng mi pakhat

13 Tin, heti hi a ni a, Josua chu Jeriko khaw bula a awm lai chuan a dâk a, a han en a; tin, ngai teh, a hma zâwn lawkah chuan mi pakhat, a khandaih phawi sa kengin a lo ding reng a. Tin, Josua chuan a han pan a, a hnênah chuan, “Kan lama ṭang nge i nih kan hmêlmate lama ṭang?” a ti a. 14 Tin, ani chuan, “Ni lo ve, LALPA sipaihote hotua lo kal ka ni zâwk e,” a ti a. Tichuan, Josua chu leiah a bawkkhup a, chibai a bûk a, a hnênah, “Ka LALPAN a chhiahhlawh hnênah hian eng nge sawi tûr a neih le?” a ti a. 15 Tin, LALPA sipaihote hotu chuan Josua hnênah, “I kephah ata i pheikhawk kha phelh rawh; i dinna hmun kha a thianghlim a ni e,” a ti a. Tichuan, Josua chuan a phelh ta a.

Josua 6

Jeriko hneh thu

1 (Jeriko khua chu Israel-te an luh theih loh nân an khâr tlat a; tu mah an chhuak lo va, tu mah an lût hek lo.) 2 Tin, LALPAN Josua hnênah, “En teh, Jeriko leh an lal leh mi chak huaisente hi i kutah ka pe tawh e. 3 Tin, râl kâp mi zawng zawng hian khawpui hi vêlin vawi khat chu in han vêl chhuak phawt ang a. Chutiang chuan ni ruk in ti tûr a ni. 4 Tin, puithiam pasarihin bâwm hma lamah berâmpa ki tawtawrâwt pasarih an keng ang a; tin, a ni sarih ni chuan khawpui chu vawi sarih in vêl chhuak ang a; tin, puithiamten tawtawrâwtte chu an hâm ang. 5 Tin, heti hi a ni ang a, berâmpa ki an ham rîk ruai ruai huna tawtawrâwt ri in hriat chuan, mipui zawng zawng chu ring takin au dur dur rawh se; tichuan, khawpui kulh chu a chim rup ang a, mipui chu mahni hma zâwn ṭheuhvah chuan an chho vang,” a ti a. 6 Tin, Nuna fapa Josua chuan puithiamhote chu a ko va, an hnênah, “Thuthlung bâwm hi zâwn ula, puithiam pasarihin LALPA bâwm hma lamah chuan berâmpa ki tawtawrâwt pasarih keng rawh se,” a ti a. 7 Tin, ani chuan mipuihote hnênah chuan, “Kal zêl ula, khawpui chu vêl chhuak rawh u; tin, inrâlthuamho kha LALPA bâwm hma lamah chuan kal zêl rawh se,” a ti a. 8 Tin, chutiang chu a lo ni ta a, Josuan mipuihote hnêna thu a sawi zawh chuan LALPA hmaa berâmpa ki tawtawrâwt pasarih keng puithiam pasarihte chu an kal zêl a, tawtawrâwt chu an hâm a; tin, LALPA thuthlung bâwm chuan a zui a. 9 Tin, inrâlthuamho chu tawtawrâwt hâm puithiamte hmaah chuan an kal a; tin, hnudâltute chuan bâwm chu an chhawm a, puithiamho chuan kal pahin tawtawrâwt an hâm zêl a. 10 Tin, Josuan mipuite chu, “Au suh ula, in aw pawh hriat ni suh sela, au tûra thu ka pêk ni che u a thlen hma loh chuan in kâ aṭangin thu rêng rêng chhuak hek suh se. Chumi hunah chuan au vang che u,” tiin thu a pe a. 11 Chutichuan, LALPA bâwm chu khawpui vawi khat vêlin a han vêl chhuahtîr a; tin, riahhmunah chuan an kal a, riahhmunah chuan an riak leh ta a. 12 Tin, Josua chu zîng takah a tho va, puithiamte chuan LALPA bâwm chu an zâwn a. 13 Tin, LALPA bâwm hmaa berâmpa ki tawtawrâwt pasarih keng puithiam pasarihte kha an kal zêl a, tawtawrâwt an hâm a. Tin, inrâlthuamte chu an hmaah an kal a; tin, hnudâltute chuan LALPA bâwm an chhawm a, puithiamte chuan an kal pahin tawtawrâwt an hâm zêl a. 14 Tin, a ni hnih ni chuan khawpui chu vawi khat an han vêl chhuak leh a, riahhmunah chuan an kîr leh a. Chutiang chuan ni ruk an ti a. 15 Tin, heti hi a ni a, a ni sarih ni chuan zîng tak, vârṭianah an tho va, an tih dân pângngaiin vawi sarih an vêl chhuak a. Chumi ni chauh chuan khawpui chu vawi sarih an vêl chhuak a. 16 Tin, heti hi a ni a, a vawi sarihnaa puithiamhoten tawtawrâwt an han ham chuan Josuan mipuiho hnênah, “Au rawh u khai, LALPAN khawpui hi a pe tawh che u asin. 17 Khawpui hi a chhûnga thil awm zawng zawng chawp hian LALPA tâna hluihlâwn vek tûr a ni. Rahabi, nawhchizuar chauh, amah leh in chhûnga a hnêna awm zawng zawng erawh chu, kan mi tirhte kha a lo thuhrûk avângin zuah tûr a ni. 18 Nangni chu, chu thil hluihlâwn lakah chuan inthiarfihlîm hlauh rawh u; chuti lo chuan, in hluihlâwn tawh hnu chuan thil hluihlâwn chu in la dah ang e. Israel-ho riahhmun hi thil hluihlâwnah in siam mai ang a, manganna in thlen dah ang e. 19 Tangkarua te, rangkachak te, dâr leh thîr bungbêlte erawh chu LALPA pual a ni vek a; LALPA sum ina dah tûr a ni ang,” a ti a. 20 Chutichuan, mipuite chu an au va, puithiamten tawtawrâwt an hâm a. Tin, heti hi a ni a, mipuiten tawtawrâwt ri an han hriat veleh chuan mipuiho chu an au ta dur dur a, kulh chu a chim ta rup a; tichuan, mipuite chu mahni hma zâwn ṭheuhvah chuan an chho va, khawpuiah chuan an lût a, khawpui chu an la ta a. 21 Tin, khawpui chhûnga mi zawng zawng, a hmei a pa, a pui a pangin, bâwngpa te, berâm te, sabengtungte nên khandaihin an tihlum fai vek a. 22 Tin, Josuan mi pahnih, ram va enthlatute hnênah khân, “Nawhchizuar inah sâwn va lût ula, a hnêna chhia in lo chham tawh ang khân chu hmeichhia chu a neih zawng zawng nên va hruai chhuak rawh u,” a ti a. 23 Tin, enthlatu tlangvâlte chu an va lût a, Rahabi nên, a nu nên, a nuṭate nên, a neih zawng zawng nên chuan an va hruai chhuak a, a laichîn unaute zawng zawng pawh an va hruai chhuak a; Israel-ho riahhmun pâwn lamah an awmtîr ta a. 24 Tin, khawpui chu a chhûnga thil awm zawng zawng nên meiin an hâl vek a. Tangkarua te, rangkachak te, dâr leh thîr bungbêlte chauh chu LALPA sum inah an dah a. 25 Amaherawhchu, Rahabi, nawhchizuar leh a neih zawng zawng leh a pa chhûngte chu Josuan a zuah vek a. Tichuan, Israel-hote zîngah chuan tûn thlengin a la tel ta reng a ni; Josuan Jeriko khua enthla tûra a mi tirhte kha a lo thuhrûk avângin. 26 Tin, chumi lai chuan Josuan, “He Jeriko khawpui hi rawn din apiang chu LALPA hmaah ânchhe dawngin awm rawh se; a fa tîr chânin a lungphûm chu a phûm ang a, a fa tlum ber chânin a kulh kawngkâte chu a din ang,” tiin anni chu a vau va. 27 Chutichuan, LALPA chu Josua hnênah a awm a; tin, a ram pum puiah chuan a hming a lo thang ta a.

Josua 7

Akana sualna

1 Amaherawhchu, Israela thlahte chuan thil hluihlâwnah chuan thil an lo tisual ta a, Juda hnama mi Zera fa Zabdia, chu mi fapa Karmia, chu mi fapa Akana chuan thil hluihlâwn a lo la a; tichuan, Israela thlahte chungah chuan LALPA thin a lo rim ta a. 2 Tin, Josuan Jeriko khua aṭangin Bethel chhak lam Beth-aven dep Ai khuaah chuan mi a tîr a, an hnênah, “Han kal ta ula, ram han enthla teh u,” tiin a sawi a. Tin, mite chu an han kal a, Ai khua chu an han enthla a. 3 Tin, Josua hnênah an kîr leh a, a hnênah, “Mi zawng zawng chu han kal kher suh se; mi sânghnih emaw, sângthum emaw vêl han kal sela, Ai khua bei rawh se. Mi zawng zawng han tihhah kher tûr a ni lo ve, tlêm te chauh an ni si a,” an ti a. 4 Chutichuan, mipui zînga mi, mi sângthum emaw chutah chuan an han kal a; tin, Ai-ho hmaah chuan an tlânchhe ta a. 5 Tin, Ai-hote chuan mi sawmthum leh paruk emaw lai an lo that a, kulh kawngka bul aṭangin Sebarim thleng hialin an rawn ûm a, an liam thlâknaah chuan an that hlawm a; tin, mite thinlung chu a tui zo va, tui ang mai an lo ni ta a. 6 Tin, Josua chuan a puante a pawt thlêr a, LALPA bâwm hmaah amah leh Israel-ho upate chu an hmaia lei siin tlai thlengin an bawkkhup a; tin, an luah vaivut an phul a. 7 Tin, Josua chuan, “E khai aw, eng atân nge aw LALPA PATHIAN, keini mipuiho hi tihboral tûra Amor-ho kuta pêk atân Jordan lui hi min hruai kai tehlul ni? Jordan lui râlah khân lungawi taka awm hle hle tâk zâwk tûr aw! 8 Aw LALPA, hetia hmêlmate ûma Israel-ho an tlânchhe ta mai hi engtin nge ka tih tâk ang le? 9 Kanaan-hote leh hênglai rama chêng zawng zawng hian an hria ang a, min rawn hual ang a, lei ata hi kan hming an tiboral daih dâwn a nih hi. I hming ropui tak hi engtin nge i tih tâk ang le?” a ti a. 10 Tin, LALPA chuan Josua hnênah, “Tho rawh, engati nge khatia i bawhkhuh reng ni? 11 Israel-ho hian thil an tisual a ni e; a ni, ka thuthlung pawm tûra thu ka pêk kha an bawhchhia a nih hi; a ni, thil hluihlâwna mi pawh kha an la bawk a ni; an ru bawk a, an zêp ru bawk a, an bungraw zîngah ngei an thukru a ni. 12 Chu vâng chuan alâwm, Israela thlahten an hmêlmate an ngam theih loh, hluihlâwn thil an lo nih tâk avângin alâwm hmêlmate ûma an tlânchhiat ni; thil hluihlâwn chu in zîng ata in tihboral phawt loh zawngin in hnênah hian ka awm dâwn tawh lo a ni. 13 Tho la, mipuiho hi tithianghlim phawt mai rawh; tin, an hnênah, ‘Naktûk atân intithianghlim rawh u khai; LALPA, Israel-te Pathianin, “Aw Israel-te u, in zîngah hian hluihlâwn thil a awm a ni e; in zîng ata hluihlâwn thil hi in lâk bo hma loh zawng in hmêlmate in hneh thei lo vang. 14 Chutichuan, zîngah a chi chia rawn inlantîr tûr in ni. Tin, heti hi a ni ang a, LALPAN chu mi chi a lo mana chu a hnam hnamin in rawn inlan leh tûr a ni; tin, LALPAN chu mi hnam a lo mana chu a chhûng chhûngin in rawn inlan leh tûr a ni; tin, LALPAN chu mi chhûng a lo mana chu a mal malin in rawn inlan leh tûr a ni. 15 Tin, heti hi a ni ang a, tu pawh hluihlâwn thil lo la apiang chu amah leh a neih zawng zawng meiin hâl vek tûr a ni ang; LALPA thuthlung a bawhchhiat avâng leh, Israel-hote zînga thil sual âtthlâk tak a tih avângin,” a ti a ni,’ ti ang che,” a ti a. 16 Chutichuan, Josua chu zîng takah a tho va, Israel-hote chu a chi chiin a rawn inlantîr a; tin, Juda chite chu man an lo ni ta a. 17 Tin, Juda hnamte chu a rawn inlantîr leh a, Zer hnamte chu a lo man a; tin, Zer-ho chhûngte chu a mal malin a rawn inlantîr leh a, Zabdia chu man a lo ni a. 18 Tin, a chhûngteho chu a mal malin a rawn inlantîr leh a; tichuan, Juda chia mi Zera fapa Zabdia, chu mi fapa Karmia, chu mi fapa Akana chu man a lo ni ta a. 19 Tin, Josuan Akana hnênah chuan, “Ka fapa, LALPA, Israel-te Pathian chu fak rawh aw, a hnênah chuan inpuang rawh khai, i thiltih chu mi han hrilh teh; ka lakah chuan zêp suh khai,” a ti a. 20 Tin, Akana chuan Josua chu a chhâng a, a hnênah, “LALPA, Israel-te Pathian chungah chuan thil ka lo tisual ta ngei mai, hetiang hian a ni ka lo tih tâk ni: 21 râllâk zînga mi Babulon ram puan ṭha tak leh, tangkarua sekel zahnih leh rangkachak tlang sekel sawmnga bûk ka hmu a, ka awt ta êm a, ka la ta mai a ni. Tin, ngai teh, ka puan in chhûngah leiah thuhrûk a ni a, tangkarua chu chumi hnuaiah chuan a awm,” a ti a. 22 Chutichuan, Josua chuan mite a tîr a, puan in chhûngah chuan an va tlân a; tin, ngai teh, a puan inah chuan thuhrûk a lo ni ngei a, a hnuaiah chuan tangkarua chu a awm. 23 Tichuan, puan in chhûng ata chu an la a, Josua leh Israela thlahteho zawng zawng hnênah chuan an rawn la a; tin, anni chuan LALPA hmaah an dah a. 24 Tin, Josua leh Israel-ho zawng zawng chuan Zera fapa Akana chu tangkarua te, puan te, rangkachak tlang te, a fapa te, a fanu te, a bâwngpa te, a sabengtung te, a berâm te, a puan in te leh a neih zawng zawng nên chuan an hruai a, Akor ruamah an chhohpui a. 25 Tin, Josuan, “Engati nge min tihmangan le? LALPAN vawiinah hian nang pawh a timangang ve dâwn che a nih hi,” a ti a. Tichuan, Israel-ho zawng zawng chuan ani chu lungin an dêng a; tin, anni chu meiin an hâl a, lungin an dêng a. 26 Tin, a chungah chuan lung an tiang vûm thûr a, tûn thleng hian a la awm; tin, LALPAN a thinrimna nasa tak chu a lamlêt ta a. Chutichuan, chumi hmun hmingah chuan tûn thleng hian Akor ruam an la ti reng a.

Josua 8

Ai khua tihchhiat thu

1 Tin, LALPAN Josua hnênah, “Hlau suh la, zâm hek suh; râl kâp mi zawng zawng i hnênah hruai langin, tho la, Ai khuaah han kal rawh. Ngai teh, Ai khaw lal leh, a mite leh a khua leh a ram chu i kutah ka pe tawh e. 2 Jeriko leh an lal chunga i tih ang khân Ai khua leh an lal chungah pawh i ti dâwn nia. Râllâk leh rante chauh chu nangmahni pualah nei ang che u. Khawpui châng ru tûr a hnung lamah dah ang che,” a ti a. 3 Chutichuan, Josua leh râl kâp mi zawng zawng chu Ai khaw lama han kal tûr chuan an thawk ta a; tin, Josuan mi chak huaisen sîngthum a thlang chhuak a, zânah a kaltîr a. 4 An hnênah, “Ngai teh u, khawpui hnung lamah khawpui bei tûrin châng ru ang che u. Khawpui aṭanga hla takah chuan kal suh ula, inpeih rengin awm ngawt mai rawh u. 5 Tin, kei leh ka hnêna awmho zawng zawng chuan khawpui chu kan rawn hnaih ang a; tin, heti hi a ni ang a, a hma ang bawka min rawn bei tûra an lo chhuah veleh, an hmaah kan tlânchhia ang a. 6 Tichuan, min ûm tûrin an lo chhuak ang a, khua ata thui fe kan thlêm chhuah thlengin; anni chuan, ‘A hma ang bawk khân kan hmaah an tlânchhe leh ta le,’ an ti dâwn nia; tichuan, an hmaah kan tlânchhia ang. 7 Tichuan, chân rûkna ata in lo chhuak ang a, khawpui chu in la dâwn nia, LALPA in Pathianin in kutah a pe dâwn e. 8 Tin, heti hi a ni ang a, khawpui chu in lâk veleh khawpui chu hâl ang che u. LALPA thu ang zêlin in ti tûr a ni. Ngai teh u, thu ka pêk tawh che u hi,” tiin thu a pe a. 9 Tin, Josua chuan a kaltîr ta a; tichuan, chân rûkna hmunah chuan an kal a, Ai khaw thlang lamah, Bethel leh Ai khaw inkârah chuan an awm a; Josua erawh chu chumi zân chuan mipuite zîngah a riak a. 10 Tin, Josua chu zîng takah a tho va, mipuite chu a kai khâwm a; tin, amah leh Israel-ho upate chu mipuiho hmaah chuan Ai khaw lamah an han kal ta a. 11 Tin, mipuiho zawng zawng, a hnêna râl kâp mi awmte chu an han kal a, an han hnaih a, khawpui bulah chuan an han kal a, Ai khaw hmâr lampangah an han riak a. Ai khua nêna an inkârah chuan ruam a awm. 12 Tin, mi sângnga lai a hruai a, khawpui thlang lampang, Bethel leh Ai khaw inkârah chuan a chân rûktîr a. 13 Chutichuan, mipui, khawpui hmâr lampanga sipaihote ṭanhmun leh khawpui thlang lampanga a chângrutute ṭanhmun chu an han ruat fel a; tin, Josua chu chumi zân chuan ruam lai takah a kal a. 14 Tin, heti hi a ni a, Ai khaw lalin chu chu a lo hmuh veleh hmanhmawh takin zîng takah a tho va, chumi khuaa mite chu amah leh a hote zawng zawng nên, a hmun ruat Araba zâwnah chuan Israel-hote chu bei tûrin an chhuak ta a; nimahsela, khaw hnung lamah chuan amah bei tûrin an châng ru tih a hre lo va. 15 Tin, Josua leh Israel-ho zawng zawng chu dawl ta ni âwm takin an awm a, thlalêr lam kawngah an tlân chiam a. 16 Tin, khawpuia awm zawng zawng chu anmahni ûm tûrin an inko khâwm a. Tichuan, Josua chu an ûm a, khawpui ata chu thui fe thlêm chhuahin an awm ta a. 17 Tin, Ai khuaah leh Bethel khuaah chuan Israel-hote ûm lo chu pakhat mah an awm ta lo va. Khawpui chu khâr lohvin an chhuahsan ta mai a, Israel-hote chu an ûm ta a. 18 Tin, LALPAN Josua hnênah, “I fei ken kha Ai khaw lam hawiin lek rawh; i kutah ka pe dâwn a nia,” a ti a. Tichuan, Josua chuan a fei ken chu khawpui lam hawiin a han lek ta a. 19 Tin, châng rutute kha an awmna ata chu an lo chhuak thuai a; a kut a han phar veleh an tlân a, khawpuiah chuan an lût a, an la ta a; tin, khua chu an hâl ta thuai a. 20 Tin, Ai-hote chuan an hnung lam chu an han thlîr chuan, ngai teh, khawpui chu vân lama khu chho ngut ngutin an hmu ta a, khawii lam mah maha tlân theihna rêng rêng an nei ta lo mai a; tichuan, thlalêra tlânte khân a ûmtute chu an rawn do lêt ta thung a. 21 Tin, Josua leh Israel-ho zawng zawng chu, châng rututen khawpui an lâka, khawpui khu chu a chho ngut ngut an han hmuh chuan an lêt leh a, Ai-hote chu an that ta a. 22 Tin, mi dangte chu a bei tûrin khaw chhûng ata an lo chhuak a; chutichuan, Israel-hote chuan an kârcheh ta a, a ṭhen a lehlamah an awm a, a ṭhen a lehlamah. Tichuan, an that a, pakhat mah zuah leh chhuah rêng rêng an nei lo va. 23 Tin, Ai khaw lal chu a nungin an man a, Josua hnênah an hruai a. 24 Tin, heti hi a ni a, Israel-hote chuan Ai khuaa mi, phûla awm zawng zawng chu thlalêr rama an va ûmna hmuna an thah zawha, an zaa khandaiha an thah chimih vek hnu chuan, Israel-ho zawng zawng chu Ai khaw lamah an kîr leh a, khandaihin an han bei a. 25 Tin, chumi nia thi zawng zawng chu a hmei a pain sîngkhat leh sânghnih an ni, Ai khuaa mi zawng zawng chu. 26 Josuan a fei lekna kut chu Ai-ho zawng zawng a tihboral dêr hma loh chuan a la thla si lo va. 27 LALPAN Josua thu a pêka, tih tûr a tih ang ngei khân chu khawpuia rante leh râllâkte chauh chu Israel-hote chuan anmahni pualah an nei a. 28 Chutichuan, Josuan Ai khua chu a hâl a, kumkhua atân leipâwngah a siam a, tûn thleng hian tihṭiau a lo ni ta. 29 Tin, Ai khaw lal chu tlai thlengin thinglêrah a khai a. Tin, ni tlâk dâwnin Josuan thu a pe a; tichuan, a ruang chu thinglêr ata an la thla a, khawpui kulh kawngka luhnaah an paih a, a chungah lung an tiang vûm thûr a, tûn thlengin a la awm.

Ebal tlângah dân an chhiar chhuak

30-31 Tin, Mosia dân lehkhabua ziak tawh angin, LALPA chhiahhlawh Mosian Israela thlahte thu a lo pêk tawh ang khân, Josuan Ebal tlângah LALPA, Israel-te Pathian tân maichâm, lung chher loh, tu mahin thîra an la chher ngai hek loh maichâm a siam a. Chutah chuan LALPA tân hâlral thilhlante an hlân a, remna inthawiin an inthawi a. 32 Tin, chutah chuan Israela thlahte hma ngeiah Mosian dân a ziak kha lungahte chuan a ziak chhâwng a. 33 Tin, Israel-ho zawng zawng, an upate leh hotute, an rorêltute nên, Levi chi puithiamho, LALPA thuthlung bâwm zâwntute hmaah, bâwm lehlampangah chuan hnam dang pawh, chumi rama piang pawh an ding za vek a; a zâtve chu Gerizim tlâng pangah an awm a, a zâtve chu Ebal tlâng pangah an awm a; LALPA chhiahhlawh Mosian Israel-hote chu mal an sâwmsak phawt tûr a ni tih thu a pêk tawh ang khân. 34 Tin, chumi zawhah chuan dân thu zawng zawng, malsâwmna thu leh ânchhe dawn thu chu a chhiar a, dân lehkhabua chuang zawng zawng ang kha. 35 Mosia thupêk zawng zawng chu Israel-ho pung khâwm zawng zawng leh, hmeichhiate leh naupang tê tête leh, an zînga hnam dang chêng vete hriatah chuan Josuan chhiar loh rêng rêng a nei lo.

Josua 9

Gibeon miten Josua an bum

1 Tin, heti hi a ni a, Jordan râla lalho zawng zawng - tlânga mi te, phaia mi te, tuifinriat zau tak kam tluana Lebanon thlenga awm zawng zawng - Hit-hote, Amor-hote, Kanaan mite, Periz-hote, Hiv-hote, Jebus-hoten an lo hriat chuan, 2 Josua leh Israel-ho chu thu khat vuaa beih rawn tumin an pung khâwm chiam a. 3 Nimahsela, Gibeon khuaa awmte chuan Josuan Jeriko khua leh Ai khua a tih dân an lo hriat chuan, 4 fin vervêkin an che ve ta thung a, palai angin an insiam a, ip hlui tak tak an sabengtung an phurhtîr a, uain peng hlui tak, a chhe thawm tawhte nên; 5 pheikhawk hlui tak tak bel ṭup hi an bun a, puan hlui tak an inbel a; an ei tûra an rawn ken chhangte chu ro hul, hmuar un a ni a. 6 Josua hnênah Gilgal-a an riahhmunah chuan an va kal a, a hnênah leh Israel-hote hnênah chuan, “Ram hla tak aṭanga lo kal kan ni a; chutichuan, kan hnênah hian thu thlung rawh u,” an ti a. 7 Tin, Israel-hote chuan Hiv-hote hnênah chuan, “Kan zînga chêng ve hi in lo ni reng ang e; engtin nge in hnênah thu kan thlun theih ang?” an ti a. 8 Tin, anni chuan Josua hnênah, “I chhiahhlawhte kan nih hi,” an ti a. Tin, Josua chuan an hnênah, “Tute nge maw in nih le? Khawi lam aṭanga lo kal nge in nih?” a ti a. 9 Tin, anni chuan a hnênah, “LALPA i Pathian hming avângin i chhiahhlawhte hi ram hla tak aṭanga lo kal kan ni e; a hmingthanzia te, Aigupta rama a thiltih zawng zawng te, 10 Jordan lui râla Amor-ho lalte pahnih - Hesbon ram lal Sihona te, Basan ram lal Astaroth khuaa awm Oga te chunga a thiltih zawng zawngte kha kan lo hre si a. 11 Tin, kan upate leh kan rama chêngho zawng zawngten kan hnênah, ‘Kalkawng atân ei tûrte keng ula, anmahni va be rawh u; tin, an hnênah, “In chhiahhlawh kan nih hi; kan hnênah thu thlung ang che u,” ti ang che u,’ tiin an sawi a. 12 Hêng kan ei atâna kan chhangte hi in hnêna lo kal tûra kan lo chhuah niin kan in aṭanga a luma kan rawn ken a ni a; nimahsela, tûnah zawng en teh mah u, a ro hul tawh a, a hmuar un tawh hi. 13 Tin, hêng uain peng kan thunnate pawh hi a thar a ni a, en teh mah u, a pawh vek tawh hi; tin, hêng kan puante leh kan pheikhawkte pawh hi kan lo kalna a thui khawp a, a hlui vek tawh hi,” an ti a. 14 Tin, Israel-hote chuan an ei tûr han ken chu an la a; LALPA kamchâng rêng an ngai lo va. 15 Tichuan, Josua chuan anmahni nên inremna a siam a, anmahni chu zuah tûrin an hnênah thu a thlung ta a; tin, pung khâwmho mi liante pawh chuan an hnênah chhia an chham a. 16 Tin, heti hi a ni a, an hnênah thu an thlun achin ni thum hnuah chuan, an khaw ṭhenawm, anmahni zînga lo awm ve reng an ni tih an hre chhuak ta a. 17 Tin, Israela thlahte chu an kal zêl a, a ni thum niah khawpuite chu an va thleng a. An khawpuite chu Gibeon te, Kephira te, Beeroth te, Kiriath-jearim te a ni. 18 Pungkhâwmho mi liante chuan LALPA, Israel-te Pathian chhâla an hnêna chhia an lo chham tawh avângin, Israela thlahte chuan an khawih lo. Tichuan, pung khâwmho zawng zawngte chu mi lianho chungah chuan an phunnawi ta a. 19 Nimahsela, mi lianho zawng zawngte chuan pung khâwmho zawng zawngte hnênah chuan, “LALPA, Israel-te Pathian chhâlin an hnênah chhia kan lo chham tawh si a; chuvângin, anmahni chu kan dek thiang lo a ni. 20 Hetiang hian an chungah ti ila, i zuah mai ang u; chuti lo zawng, an hnênah chhia kan lo chham tawh si avângin kan chungah hian thinurna a lo thleng mai ang asin,” an ti a. 21 Tin, mi lianho vêk chuan an hnênah, “Zuahin awm rawh se,” an ti a. Chutichuan, pung khâwmho zawng zawng thing fawmtuah leh tui chawituah an lo awm ta a, mi lianhoten an hrilh ang chuan. 22 Tichuan, Josuan anmahni chu a kohtîr a, an hnênah, “Engati nge, ‘Ram hla tak aṭanga lo kal kan ni e,’ tia min bum mai le? Kan zînga chêng ve in lo ni reng mai si a. 23 Chuvângin, ânchhedawng in lo nih tâk hi. Eng lai pawhin in zînga mi ṭhenkhat hi bawih an ni reng ang a, ka Pathian in atâna thing fawmtuah leh tui chawituah an awm fo vang,” tiin a sawi a. 24 Josua chu an chhâng a, “LALPA in Pathian chuan he ram hi a chhiahhlawh Mosia chu a pe a, a chhûnga chêngte zawng zawng tihlum vek tûrin thu a pe ngei tih kan ring a; tichuan, hma in rawn sâwn zêl dân kan hriatin min thah kan hlau va, hetiang hian kan rawn ti ta mai a ni. 25 Tûnah hian ngai teh, i kuta awm kan ni a; i ngaiha ṭha leh dika i hriat ang ang chuan kan chungah hian ti zêl mai ang che,” an ti a. 26 Chutichuan, an chungah chutiang chuan a ti ta a, Israela thlahte lak ata chu a chhanchhuak a, anmahni chu an that ta lo va. 27 Tin, Josuan chumi ni chuan a ruatna apiangah, pung khâwmhote leh LALPA maichâm atân thing fawmtuah leh tui chawituah a ruat a, tûn thleng hian.

Josua 10

Amor mite an tlâwm

1 Tin, heti hi a ni a, Jerusalem khaw lal Adoni-zedekan Josuan Ai khua a la a, a tichhe dêr a, Jeriko khua leh an lal a tihchhiat angin Ai khua leh an lal pawh a tichhe dêr a, Gibeon khuaa mite chuan Israel-hote nên inremna an siam a, an zîngah an chêng ve ta tih a lo hriat chuan, 2 a hlau ta hle mai a; Gibeon khua chu khaw lian tak, lal khawpui ang a ni si a, Ai khua aiin a ropui zâwk a, a mihring zawng zawngte pawh chu mi chak tak an ni si a. 3 Chutichuan, Jerusalem lal Adoni-zedeka chuan Hebron khaw lal Hohama te, Jarmuth khaw lal Pirama te, Lakis khaw lal Japhia te, Eglon khaw lal Debira teho chu, 4 “Lo kal ula, min rawn pui rawh u khai, Gibeon i va bei teh ang u; Josua leh Israela thlahte nên inremna an siam ta si a,” tiin a chah khâwm a. 5 Chutichuan, Amor-ho lalte panga - Jerusalem khaw lal te, Hebron khaw lal te, Jarmuth khaw lal te, Lakis khaw lal te, Eglon khaw lal te chu an pung khâwm a, an sipaiteho zawng zawng nên an han chho va, Gibeon khaw epah an awm ta mup a, an bei ta a. 6 Tin, Gibeon-hote chuan an riahhmun Gilgal-ah, Josua hnênah mi an tîr a, “I chhiahhlawhte hi ngaihthah suh ang che; rang takin kan hnênah lo chho la, min rawn chhandam la, min rawn ṭanpui rawh; tlâng rama chêngho Amor lalte min bei tûrin an pung khâwm chiam e,” tiin. 7 Chutichuan, Josua leh a hnêna râl kâp mi zawng zawngte leh mi chak huaisenho zawng zawngte chu Gilgal aṭang chuan an han chho va. 8 Tin, LALPAN Josua hnênah, “Anni chu hlau suh khai, i kutah ka pe vek tawh e; an zînga mi tu mah chelh tûr rêng rêng che an awm dâwn lo ve,” a ti a. 9 Chutichuan, Josua chuan a bei ta thut a, zankhuain Gilgal aṭanga lo han kal tawh a ni a. 10 Tin, LALPAN Israel-hote hmaah chuan anmahni chu a tibuai ta nuaih mai a, Gibeon khuaah chuan tam tak a that a, Beth-horon chhohna lam kawngah a ûm a, Azeka leh Makkeda khaw thlengin a that zêl a. 11 Tin, heti hi a ni a, Israel-ho hmaa an tlânchhiata, Beth-horon aṭanga liam thlâkna hmuna an awm lai chuan, LALPAN vân aṭangin rial lian pui puiin Azeka khaw thlengin a zuk dentîr chiam a, an thi a. Israela thlahten khandaiha an sah hlum ai mahin rial den hlum chu an tam zâwk a ni. 12 Chutichuan, LALPAN Amor-hote chu Israela thlahte a pêk ni chuan Josuan LALPA hnênah thu a sawi a; Israel-hote mit hmuhah, “Nia, Gibeon khaw chungah ding reng rawh; Nang pawh Thlaa, Aijalon ruamah hian awm reng rawh,” a ti a. 13 Tichuan, mite chuan an hmêlmate chunga phuba an lâk hma loh chuan ni chu a ding ta reng a, thla pawh chu a awm ta reng a. He thu hi Jasara buah ziak a ni lo vem ni? Tichuan, ni chu vânlaizâwlah a awm ta reng a, ni khat pumhlûm lai tlâk zai rêng rêng a rêl lo. 14 LALPAN chutianga mihring aw a ngaihthlâk ni ang chuan a hmain ni rêng rêng a awm ngai lo va, a hnuah pawh a awm ngai hek lo; LALPAN Israel-hote chu a dopui a ni si a. 15 Tin, Josua leh Israel-ho zawng zawngte chu an riahhmun Gilgal-ah an kîr leh ta vek a.

Josuan Amor lal panga a man

16 Tin, chûng lal pangate chu an tlân bo va, Makkeda pûkah an biru a. 17 Tin, “Lal pangate chu an hmu ta, Makkeda pûkah an biru a ni,” tiin Josua an hrilh a. 18 Tichuan, Josuan, “Pûk kawngkaah chuan lung lian pui pui lum ula, a vêngtute pawh lo awmtîr rawh u. 19 Nangni erawh chu awm suh u; in hmêlmate chu ûm ta zêl ula, hnudâltute kha that ula; an khuaah rêng rêng luhtîr suh u, LALPA in Pathianin in kutah anmahni chu a pe tawh si a,” a ti a. 20 Tin, heti hi a ni a, Josua leh Israela thlahten an chimih hma lohva an thah chiam zawha, a awm chhunate chu kulhpui nei khuaahte an tlân luh hnu chuan, 21 mi zawng zawng chu Josua hnên lamah Makkeda-ah chuan râlmuang takin an lo haw leh ta a. Tu mahin Israela thlahte lamah rêng rêng an lei an phût lo. 22 Chutichuan, Josuan, “Pûk kawngka kha han hawng tawh ula, lal pangate kha pûk ata ka hnênah han hruai rawh u,” a ti a. 23 Tin, chutiang chuan an ti a, chûng lal panga - Jerusalem khaw lal te, Hebron khaw lal te, Jarmuth khaw lal te, Lakis khaw lal te, Eglon khaw lal te chu pûk ata a hnênah an rawn hruai a. 24 Tin, heti hi a ni a, chûng lalte chu Josua hnêna an rawn hruai chuan, Josuan Israel-ho zawng zawng chu a ko khâwm a, a hnêna kal ve râl kâp mite zînga puipa deuh deuhte hnênah chuan, “Lo kal hnai ula, hêng lalho ring hi han rap teh u,” a ti a. Tichuan, an lo kal hnai a, an ring chu an rawn rap ta a. 25 Tin, Josuan an hnênah, “Hlau suh ula, zâm hek suh u; chak tak leh huai takin awm rawh u, in hmêlma in do zawng zawng chungah LALPAN hetiang hian a ti zêl dâwn a ni e,” a ti a. 26 Tin, chumi zawhah chuan Josuan a bei a, a tihlum a, thing panga lêrah a khai a; tichuan, tlai thlengin thinglêrah chuan an inkhai a. 27 Tin, heti hi a ni a, ni tlâk dâwnin Josuan thu a pe a, thinglêr ata chu an la thla a, an bihrûkna pûkah khân an paih lût a, pûk kawngka chu lung lian pui puiin an chhîn a, tûn thleng pawh hian a la awm reng.

Josuan Amor-ho ram dang pawh a la zêl

28 Tin, Josuan chumi ni chuan Makkeda khua chu a la a, an lal chawpin khandaihin a bei a. Chu khuaa awm zawng zawngte nên chuan a tihlum fai vek a, pakhat mah zuah rêng rêng a nei lo. Tichuan, Jeriko khaw lal chunga a tih ang bawk khân Makkeda khaw lal chungah pawh a ti a. 29 Tin, Josua chuan Israel-ho zawng zawngte nên Makkeda khua aṭangin Libna khua chu an bei a. 30 Tichuan, LALPAN chu khua chu an lal chawpin Israel-te kutah a pe leh bawk a; tin, chu khua chu beiin a chhûnga awm zawng zawngte chu khandaihin a tihlum vek a. A chhûnga mi pakhat mah zuah rêng rêng a nei lo; tichuan, Jeriko khaw lal chunga a tih ang bawk khân chumi khaw lal chungah pawh chuan a ti a. 31 Tin, Josua chu Israel-ho zawng zawngte nên Libna khua aṭangin Lakis khaw lamah an kal a, ṭanhmun an khuar a, an bei ta a. 32 Tichuan, LALPAN Lakis khua chu Israel-te kutah a pe a, a ni hnih niah a la a, chu khua chu beiin a chhûnga awm zawng zawngte chu khandaihin a tihlum vek a, Libna khaw chunga a tih ang bawk khân. 33 Chutichuan, Gezer khaw lal Horama chu Lakis khua pui tûrin a han kal a; tin, Josua chuan amah leh a hote nên pakhat mah zuah hlek lovin a lo that phiar a. 34 Tin, Josua chu Israel-ho zawng zawngte nên Lakis khua aṭangin Eglon khaw lamah an kal a, ṭanhmun an khuar a, an bei ta a. 35 Chumi ni chuan an la a; tin, chumi ni vêk chuan chu khua chu beiin a chhûnga awm zawng zawngte chu a tihlum fai vek a, Lakis khaw chunga a tih ang bawk khân. 36 Tin, Josua chu Israel-ho zawng zawngte nên Eglon khua aṭangin Hebron khaw lamah an han kal a; an bei ta a. 37 Tichuan, an la a, chu khua leh an lal leh, a khawper zawng zawngte chu khandaiha beiin a tihlum vek a, Eglon khaw chunga a tih ang bawk khân pakhat mah zuah rêng rêng a nei lo va; a khua lama chhu chhe vekin a chhûnga awm zawng zawngte chu a tihlum fai vek a. 38 Tin, Josua leh Israel-ho zawng zawngte chu Debir khaw lamah an lêt leh a; an bei ta a. 39 Tichuan, chu khua leh an lal leh, a khawper zawng zawngte chu a la a; khandaihin an bei a, a chhûnga awm zawng zawngte chu a tihlum fai vek a. Pakhat mah zuah rêng rêng a nei lo; Hebron khaw chunga a tih ang khân Debir khua leh an lal chungah pawh a ti a, Libna khua leh an lal chunga a tih ang bawk khân. 40 Chutichuan, Josuan a ram pumin - tlâng ram te, Chhim ram te, phai ram te, awih pangpêr ram te chhu chhe vekin an lal zawng zawngte chu a tihlum vek a; pakhat mah zuah rêng rêng a nei lo; LALPA, Israel-te Pathian thupêk angin nung tawh phawt chu a tichimit ta vek zâwk a. 41 Tin, Josua chuan Kadesh-barnea aṭanga Gaza thlengin, Gosen ram zawng zawng nên Gibeon thlengin a chhu chhe vek a. 42 Chûng lalho zawng zawngte leh an ramte chu LALPA, Israel-te Pathianin Israel-hote chu a dopui avângin, Josua chuan ṭum khata a man vek an ni. 43 Tin, Josua leh Israel-ho zawng zawngte chu an riahhmun Gilgal-ah an kîr leh ta vek a.

Josua 11

Jabina leh a ṭanrualpuite Josuan a hneh

1 Tin, heti hi a ni a, Hazor khaw lal Jabinan chu chu a lo hriat chuan, Madon khaw lal Jobaba te, Simron khaw lal te, Aksaph khaw lal te, 2 hmâr lam tlâng ram lal te, Kineroth chhim lama Araba lal te, phai ram lal te, thlang lampanga Dor khaw zosâng lal te, 3 chhak lam leh thlang lama awm Kanaan mi te, tlâng lama awm Amor-ho te, Hit-ho te, Periz-ho te, Jebus-ho te, Mizpa ram Hermon tlâng hnuaia awm Hiv-ho hnênah te mi a tîr a. 4 Tin, an sipaihote zawng zawng nên mi tam tak, an tam lam chu tuifinriat kama ṭiauvaivut zât zet, sakawr leh tawlailîr tam tak nên an thawk ta chiam a. 5 Chûng lalho zawng zawngte chu an intâwk khâwm a, Israel-hote chu beih tumin Merom tuiahte chuan an riak khâwm a. 6 Tin, LALPAN Josua hnênah, “Anni chu hlau suh, naktûk hetih hun hian anniho chu tihhlum sa vekin Israel-te ka rawn pe mai dâwn e. An sakawr thate i chhahsak ang a, an tawlailîrte chu i hâlsak dâwn nia,” a ti a. 7 Chutichuan, Josua leh râl kâp mi zawng zawngte chu Merom tuiahte chuan an va thawk ta thut a, an bawh ta a. 8 Tin, LALPAN anmahni chu Israel-te kutah a pe a, an bei a, Zidon ropui thleng te, Misrephoth-maim hmun thleng te, chhak lampanga Mizpa ruam thleng tein an ûm a; pakhat mah zuah rêng nei lovin an that vek a. 9 Tin, LALPAN a tirh angin Josua chuan an chungah a ti a: an sakawr thate a chhahsak a, an tawlailîrte chu a hâlsak a. 10 Tin, chutih lai chuan Josua chu a lêt leh a, Hazor khua chu a la a, an lal chu khandaihin a that a; tûn hma chuan Hazor khua chu chûnglai vêl ram zawng zawng zînga khawpui ber a ni. 11 Tin, chu khuaa awm zawng zawngte chu khandaihin an that vek a, an tichimit vek a. Nung tawh phawt chu pakhat mah an zuah lo. Tichuan, Hazor khua chu a hâl ta a. 12 Tin, chûng lalho khawpui zawng zawngte leh an lal zawng zawngte chu Josuan a man vek a, khandaiha beiin a that a, a tichimit vek a; LALPA chhiahhlawh Mosian thu a pêk ang khân. 13 Mualpâwnga khawpui lo din sa tawhte erawh kha chu, Hazor khua ngawt lo chu Israel-hote chuan pakhat mah an hâl lo; chu khua erawh chu Josuan a hâl a ni. 14 Tin, chûng khawpuia an râllâk zawng zawngte leh rante chu Israela thlahte chuan anmahni pualah an nei a; mihring erawh chu an tihboral vek hma loh zawng khandaihin an that zêl a, nung tawh phawt chu zuah an nei lo. 15 LALPAN a chhiahhlawh Mosia thu a pêk ang bawkin Mosia pawhin Josua chu thu a pe ve a, chutiang chuan Josuan a ti zêl a. LALPAN Mosia thu a pêk zawng zawng chu tih loh rêng a nei lo.

Josua ram lâkte

16 Chutichuan, Josuan chûng ram zawng zawng - tlâng ram te, Chhim ram zawng zawng te, Gosen ram zawng zawng te, phai ram te, Araba te, Israel-ho tlâng ram te, an phai ramte nên a la vek a, 17 Seir tlâng han sutu Halak tlâng aṭanga Hermon tlâng hnuaia Lebanon ruama Baal-gad thlengin. An lal zawng zawngte chu a man a, a that a, a tihlum a. 18 Josuan chûng lalho zawng zawng chu rei tak a do a ni. 19 Gibeon khuaa awm Hiv-hote tih chauh loh chu Israel-hote nêna remna siam khua rêng rêng an awm lo. Dova an lâk vek a ni. 20 LALPAN Mosia thu a pêk anga a tihchimih veka, duhsakna nei hlek lova a tihboral theihna tûra an thinlung tihkhauhsaka, Israel-hote dotîr ṭhîntu chu LALPA chu a ni si a. 21 Tin, chûnglai chuan Josua chu a kal a, tlang ram aṭang te, Hebron khua aṭang te, Debir khua aṭang te, Anab khua aṭang te, Judai tlâng ram zawng zawng aṭang te, Israel tlâng ram zawng zawng aṭangtein Anak-ho chu a tichimit vek a; Josua chuan an khawpuite chawpin a tiboral vek a. 22 Israela thlahte ramah chuan Anak-ho chu pakhat mah awm an awm tawh lo; Gaza khuaah te, Gath khuaah te, Asdod khuaah te erawh chuan awm chu an la awm. 23 Chutichuan, LALPAN Mosia hnêna a sawi zawng zawng ang khân, Josua chuan ram pum pui chu a la ta a; tin, Josua chuan Israel-hote chu an hnam inṭhen dân ang zêlin an rochan atân a pe hlawm a. Tichuan, ram chu râlmuangin a awm ta a.

Josua 12

Mosian a lo hneh tawh lalte

1 Hêngte hi a ni chûng ram lal, Israela thlahten an tihborala, an ram Jordan lui râl, ni chhuahna lam ram, Arnon ruam aṭanga Hermon tlâng thleng te, chhak lampanga Araba zawng zawng nêna an neihsak lalte chu: 2 Amor-ho lal Sihona, Hesbon-a awm chuan Arnon ruam sîra awm Aroer khua aṭangin ro a rêl a ni a; tin, ruam lai taka khawpui te, Amona thlahte ramri Jabok lui thlengin Gilead ram zâtve chungah chuan a rêl bawk a; 3 tin, chhak lamah chuan Araba-ah Kineroth dîl thlengin a ni a; tin, chhak lamah vêk Beth-jesimoth kalna kawng lamah Araba tuifinriat, Tuifinriat Al thlengin a ni a; tin, chhim lamah chuan Pisga awih pangpêr hnuai thlengin a ni a. 4 Astaroth leh Edrei khuaa awm Rephaim hnam la awm chhunte zingah chuan Basan lal Oga a lal a; 5 ani chuan Hermon tlângah te, Saleka khuaah te leh Basan ram zawng zawngah Gesur-ho leh Makat-ho ramri thleng leh Hesbon lal Sihona ramri chin Gilead ram zâtve thlengin ro a rêl a. 6 LALPA chhiahhlawh Mosia leh Israela thlahte chuan chûnghote chu an that a; tin, LALPA chhiahhlawh Mosia chuan Reuben chite, Gad chite, Manase hnam zâtvete chu an rochanah a sem a.

Josuan lal a hnehte

7 Tin, hêng ram lalho hi a ni Josua leh Israela thlahten Jordan lui râl thlang lampanga an thahte chu, Lebanon ruam Baal-gad aṭanga Seir tlâng han sutu Halak tlâng thlengin; tin, Josua chuan Israel hnamte an inṭhen dân ang zêlin chu ram chu an rochan atân a pe hlawm a; 8 tlâng ramah te, phai ramah te, Araba-ah te, tlâng pangpêr ramah te, chûng chu Hit mi te, Amor mi te, Kanaan mi te, Periz mi te, Hiv mi te, Jebus mite ram kha a ni. 9 Jeriko khaw lal, pakhat; Bethel khaw depa Ai khaw lal, pakhat; 10 Jerusalem khaw lal, pakhat; Hebron khaw lal, pakhat; 11 Jarmuth khaw lal, pakhat; Lakis khaw lal, pakhat; 12 Eglon khaw lal, pakhat; Gezer khaw lal, pakhat; 13 Debir khaw lal, pakhat; Geder khaw lal, pakhat; 14 Horma khaw lal, pakhat; Arad khaw lal, pakhat; 15 Libna khaw lal, pakhat; Adulam khaw lal, pakhat; 16 Makkeda khaw lal, pakhat; Bethel khaw lal, pakhat; 17 Tapua khaw lal, pakhat; Hepher khaw lal, pakhat; 18 Aphek khaw lal, pakhat; Lasaron khaw lal, pakhat; 19 Madon khaw lal, pakhat; Hazor khaw lal, pakhat; 20 Simron-meron khaw lal, pakhat; Aksaph khaw lal, pakhat; 21 Taanak khaw lal, pakhat; Megido khaw lal, pakhat; 22 Kedes khaw lal, pakhat; Karmel tlânga Jokneam khaw lal, pakhat; 23 Dor khaw zosânga Dor khaw lal, pakhat; Gilgal-a Goiim hnamho lal, pakhat; 24 Tirza khaw lal, pakhat; lal zawng zawng chu sawmthum leh pakhat an ni.

Josua 13

Ram lâk tûr hmabâk la awmte

1 Tin, Josua chu a lo upa a, a lo tar ta hle mai a; tin, LALPA chuan a hnênah, “I lo upain i lo tar ta hle a, ram lah chu lâk tûr a la tam mai si a. 2 Hêng ramte hi a ni la lâk loh chu: Philistia ram zawng zawng leh Gesur-ho ram zawng zawng, 3 Aigupta ram bula awm Sihor aṭanga hmâr lampanga Ekron ramri thlengin (chu chu Kanaan mite rama ngaih a ni); Philistia-ho lal panga - Gaza mite, Asdod mite, Askelon mite, Git mite leh Ekron mite chu; chhim lama Avim ram pawh; 4 Kanaan mite ram zawng zawng leh Zidon mite rama Meara, Amor-ho ramri Aphek khaw thlengin; 5 Gebal mite ram leh ni chhuahna lam Lebanon ram zawng zawng, Hermon tlâng hnuai Baal-gad aṭanga Hamath khaw luhna thlengin; 6 Lebanon aṭanga Misrephoth-maim hmun thlengin, tlâng rama chêng zawng zawng, Zidon mi zawng zawngte chu - anni chu Israela thlahte hmaah hian ka hnawt chhuak ang a; thu ka pêk che ang khân Israel-hote rochanah siamsak phawt mai ang che. 7 Chutichuan, he ram hi hnam kuate leh Manase hnam zâtvete rochanah semsak ang che,” a ti a.

Jordan lui khawchhak lam ram insem dân

8 Amah nên Reuben chite leh Gad-hote chuan, Jordan chhak lampangah khân an chanpual tûr Mosian a pêk chu an lo dawng tawh a, LALPA chhiahhlawh Mosia ngeiin a lo pêk tawh ang khân: 9 Arnon ruam sîra awm Aroer khua aṭang leh ruam lai taka khawpui leh, Medeba phai ram zawng zawng, Dibon thlengin; 10 Amor-ho lal Sihona, Hesbon khuaa lala ṭhua khawpui zawng zawng, Amona thlahte ramri thlengin; 11 Gilead ram leh, Gesur-ho leh Maakath-ho ramri chin leh Hermon tlâng zawng zawng leh Basan ram zawng zawng, Saleka khaw thlengin; 12 Astaroth leh Edrei khuaa lala ṭhu Basan ram lal Oga ram zawng zawng nên (chûng chu Rephaim hnam la awm chhunte an ni); chûngho chu Mosian a bei a, a lo hnawt chhuak tawh a ni. 13 Amaherawhchu, Gesur-hote leh Maakath-hote chu Israela thlahte chuan an hnawt chhuak lo; Gesur-ho leh Maakath-ho zawng tûn thleng hian Israel-hote zîngah an la chêng ta reng zâwk a ni. 14 Levi hnamte chauh a ni rochan tûr a pêk ve loh ni; a hnêna a lo sawi tawh ang khân, LALPA, Israel-te Pathian tâna meia thilhlante chu an rochan a ni zâwk si a.

Reuben-ho ram chan tûr

15 Tin, Reubena thlahte hnam chu an chhûngkaw zir zêlin Mosian ram a lo pe tawh a. 16 Tin, an ramri chu Arnon ruam sîra awm Aroer khua aṭanga ruam lai taka khawpui leh Medeba phai ram zawng zawng; 17 Hesbon leh chumi phai rama khawpui zawng zawng: Dibon te, Bamoth-baal te, Bethbaal-meon te; 18 Jahaz khua te, Kedemoth te, Mephaath te; 19 Kiriathaim te, Sibma te, ruam tlânga Zereth-sahar te; 20 Beth-peor te, Pisga âwih pangpêr te, Beth-jesimoth te; 21 phai ram khawpui zawng zawng te, Hesbona rorêl, Amor-ho lal Sihona mi lianho, Midian-hote lala awm Evia te, Rekema te, Zura te, Hura te, Reba te, an awmna ram chawpa Mosian a lo tihboral tâkte nên khân a ni. 22 Beora fapa Balaama, aienthiam pawh Israela thlahten mi dang an thahte zîngah chuan khandaihin an that tel a. 23 Tin, Reubena thlahte ram chin chu Jordan leh a kam zawng chu a ni. Hêng ram leh khawpuite leh khuate hi a ni, Reubena thlahte tâna an chhûngkaw zir zêla rochana an ruat chu.

Gad-ho ram chan tûr

24 Tin, Mosian Gad chi, Gada thlahte chu an chhûngkaw zir zêlin ram a pe a. 25 Tin, an ramri chu Jazer khua leh Gilead ram khawpui zawng zawng leh Amona thlahte ram zâtve, Raba khaw depa awm Aroer thlengin; 26 Hesbon aṭanga Ramath-mizpe leh Betonim thlengin; Mahanaim aṭanga Debir ramri thlengin; 27 tin, ruamah chuan Beth-haram te, Beth-nimra te, Sukkoth te, Zaphon te, Hezbon lal Sihona ram dang te, Jordan leh a kam te, Jordan râl chhak lampanga Kinereth dîl tâwp rak thlengin a ni. 28 Hêngte hi a ni Gada thlahte tâna an chhûngkaw zir zêla an rochana ruat chu, a khawpuite leh khuate chu.

Khawchhak lam Manase-ho chan tûr ram

29 Mosian Manase hnam zâtvete chu ram a pe a; Manase chi zâtvete tân a ni an chhûngkaw zir zêla a pêk ni. 30 An ramri chu Mahanaim aṭangin Basan ram zawng zawng, Basan ram lal Oga ram zawng zawng leh Basan rama Jair khawpui zawng zawngte nên, chu chu khaw sawmruk a ni; 31 Gilead ram zâtve leh Basan ram lal Oga rama Astaroth te, Edrei khuate nên; chûng chu Manasea fa Makira thlah, Makira thlah zâtvete tân, an chhûngkaw zir zêla ruat a ni. 32 Hêng Moab phai, Jeriko zâwn, Jordan râl, chhak lampang te hi a ni Mosian an rochan tûra a lo sem chu. 33 Levi chite erawh chu Mosian rochan tûr a pe ve lo; an hnêna a lo sawi tawh ang khân, LALPA, Israel-te Pathian chu an rochan a ni zâwk.

Josua 14

Jordan khawthlang lam ram sem dân

1 Hêngte hi a ni Israela thlahten Kanaan rama an lâk, puithiam Eleazara te, Nuna fapa Josua te, Israela thlahte hnam chhûngkaw puipaten an rochan atâna an lo sem tâkte chu, 2 hnam kuate leh hnam zâtvete chanpual atâna LALPAN Mosia hmanga thu a lo pêk tâk ang khân. 3 Mosia chuan hnam hnih leh hnam zâtvete kha Jordan râlah khân an rochan tûr a lo pe ta si a; Levi chite erawh chu an zîngah rochan tûr a pe ve lo. 4 Josefa thlahte chu hnam hnih an ni - Manase leh Ephraim chu. Levi chiteho chu chumi ramah chuan chanpual an pe lo, an awmna tûr khawpuite leh a daivêl ran tlatna tûr hmun leh an in lo khuarna ngawt lo chu. 5 LALPAN Mosia thu a pêk ang khân Israela thlahte chuan an ti a, ram chu an sem a.

Hebron chu Kaleba hnêna pêk a ni

6 Chutichuan, Juda thlahte chu Gilgal khuaah Josua hnênah an va kal a. Keniz mi Jephunea fapa Kaleba chuan a hnênah, “Kadesh-barnea hmuna Pathian mi Mosia hnêna LALPAN ka chungchâng leh i chungchâng thua a sawi kha i hria a. 7 LALPA chhiahhlawh Mosian Kadesh-barnea hmun aṭanga ram va enthla tûra mi tirh lai khân kum sawmli mi ka ni tawh a; tin, ka rilrua awm ang chiah chu a hnênah ka thlen leh a. 8 Amaherawhchu, ka unau ka hnêna kal vete khân mipuite thinlung an tihtuisak a; kei erawh chuan LALPA ka Pathian chu ka pawm tlat a. 9 Tichuan, Mosian chumi ni chuan, ‘LALPA ka Pathian hi i pawm tlat avângin, i kein a lo rah tâk ram chu kumkhuain nangmah leh i thlahte rochan tûr a ni ngei ngei ang,’ tiin chhia a chham a. 10 Tichuan, ngai teh, LALPAN Mosia hnêna chûng thu chu a sawi achin Israel-hote thlalêra an vah chhûng zawngte khân, LALPAN a sawi tawh angin kum sawmli leh kum nga zet chu mi damtîr a; tichuan, ngai teh, tûnah hian kum sawmriat leh kum nga ka lo ni ta a. 11 Chuti chung pawhin tûn thleng pawh hian Mosia mi tirh lai ang mai bawk khân ka la chak reng a, hmâna indo leh chhuahvah nân thahrui ka nei ang bawk khân tûnah pawh hian ka la nei reng asin. 12 Chutichuan, he tlâng, LALPAN khami nia a lo sawi tawh kha mi pe ta che; khatia Anak-hote an awma, an khawpuite pawh a ropuiin, kulha hung khup a ni tih khami ni khân i hriat kha. LALPA chuan mi awmpuiin, anmahni chu ka hnawt chhuak thei mahna, LALPAN a lo sawi tawh ang khân,” a ti a. 13 Chutichuan, Josua chuan mal a sâwm a; tin, Jephunea fapa Kaleba chu a rochan atân Hebron khua chu a pe ta a. 14 Tichuan, Hebron khua chu tûn thleng hian Keniz mi, Jephunea fapa Kaleba rochan a lo ni ta a ni; LALPA, Israel-te Pathian chu a pawm tlat avângin. 15 Tin, Hebron khaw hming chu a hma chuan Kiriath-arba a ni; Arba chu Anak-ho zînga mi lian ber a ni. Tichuan, ram chu râlmuangin a awm ta rih a.

Josua 15

Juda-ho ram chan tûr

1 Tin, Juda thlahte hnam an chhûngkaw zir zêla an chanpuala ruat chu Edom ramri chin chhim lampang, Zin thlalêr thleng hialin, chhim tâwp thleng rakin a ni. 2 Tin, chhim lampanga an ramri chin chu Tuifinriat Al tâwp rak, chhim chhawng litengsâwl aṭangin a ni; 3 tin, Akrabim chhohna chhim lam panin a kal zêl a, Zin a va thleng a; tin, Kadesh-barnea chhim lamah a chho va, Hezron a va thleng a; tin, Adar-ah a chho va, Karka a kualkhung a. 4 Azmon-ah a kal zêl a, Aigupta luiah a chhuak a; tichuan, tuifinriat chu ramri tâwp chin chu a ni. Chu chu chhim lampanga in ramri chin tûr chu a ni ang. 5 Chhak lampang ramri chu tui Tuifinriat Al, Jordan chhuah tak chu a ni. Tin, Hmâr lampang ramri chu tuifinriat litengsâwl, Jordan chhuah aṭangin a ni a. 6 Ramri chu Beth-hogla-ah a chho va. Beth-araba hmârah a kal zêl a; tin, ramri chu Reubena fapa Bohana lungah a chho zêl a. 7 Tin, ramri chu Akor ruam aṭangin Debir-ah a chho zêl a, lui chhim lama awm Adumim-a chhohna depa Gilgal lam panin hmâr lamah a kal zêl a. Ramri chu En-semes tuiahte chuan a kal zêl a, En-rogel-ah a chhuak a ni. 8 Tin, ramri chu Hinoma fapa ruamah Jebus-ho ram sîr chhim lam (chu chu Jerusalem a ni) thlengin a chho va; tin, ramri chu Hinom thlang lampang ruam bula awm tlâng chhîpah a chho va, chu chu Rephaim hmâr lampang ruam tâwp rak a ni. 9 Tin, ramri chu tlâng chhîp aṭangin Nephtoa lui tuite thlengin an kaltîr a, Ephron tlânga khawpuiahte a kal zêl a; tin, ramri chu Baala-ah (chu chu Kiriath-jearim a ni) an kaltîr a. 10 Tin, ramri chu Baala aṭangin thlang lampangah Seir tlâng thlengin a insawh kual thla leh a, hmâr lampangah Jearim (chu chu Kesalon a ni) tlâng hrûlah a kal zêl a, Beth-semes-ah a chhuk a, Timna lamah a kal zêl a. 11 Tin, ramri chu hmâr lampang Ekron hrûlah a kal chhuak a; tin, ramri chu Sikron-ah an kaltîr a; tin, Baala tlângah a kal zêl a, Jabneel-ah a chhuak a; tichuan, ramri chu tuifinriatah a va tâwp a ni. 12 Tin, thlang lampang ramri chu tuifinriat zau tak leh a kam chin zawng chu a ni. Chûng ramri chin zawng chu a ni, Juda thlahte tâna an chhûngkaw zir zêla ruat chu.

Kaleban Hebron leh Debir a hneh

13 Tin, Jephunea fapa Kaleba chu LALPAN Josua thu a pêk angin, Juda thlahte zîngah chuan chanpual a siamsak ve a, chu chu Kiriath-arba a ni a, Arba chu Anaka pa a ni (chu chu Hebron an ti bawk). 14 Tin, Kaleba chuan chu khua ata chu Anaka fapate pathum - Sesaia te, Ahimana te, Talmaia te, Anaka fate chu a hnawt chhuak a. 15 Tin, chuta ṭang chuan Debir khuaa mite a han rûn a; a hma chuan Debir khaw hming chu Kiriath-sepher a ni. 16 Tin, Kaleban, “Tu pawh Kiriath-sepher han beia, han la thei apiang chu ka fanu Aksi nupuiah ka neihtîr ang,” a ti a. 17 Tin, Kaleba unau Kenaza fapa Othnielan a han la a; tichuan, a fanu Aksi chu nupuiah a neihtîr ta a. 18 Tin, a pasal hnên a va thlen chuan a pa ram dîl tûrin a lo fuih a. Tin, sabengtung ata a chhuk a, Kaleba chuan a hnênah, “Eng nge i duh le?” a lo ti a. 19 Ani chuan, “Eng emaw dîl che ka duh a ni; chhim lam ram ro takah mi awmtîr ta si a, tuikhur mi pe tel bawk tûrin ka ngên a che,” a ti a. Tichuan, tuikhur chhakta leh thlangta chu a pe ta a.

Juda khuate

20 Chûng chu a ni Juda thlahte hnam an chhûngkaw zir zêla an rochan chu. 21 Tin, chhima Edom ramri va deptu Juda thlahte hnam khawpui hmâwrtawngte chu Kabzeel te, Eder te, Jagur te, 22 Kina te, Dimona te, Adada te, 23 Kedes te, Hazor te, Ithnan te, 24 Ziph te, Telem te, Bealoth te, 25 Hazor-hadatta te, Kerioth-hezron (chu chu Hazor a ni) te, 26 Amam te, Sema te, Molada te, 27 Hazar-gadda te, Heshmon te, Beth-pelet te, 28 Hazar-sual te, Beer-sheba te, Biz-iothia te, 29 Baala te, Iim te, Ezem te, 30 Eltolad te, Kesil te, Horma te, 31 Ziglag te, Madmana te, Sansanna te, 32 Lebaoth te, Shilhim te, Ain te, Rimon te a ni: khawpui zawng zawngte chu a khawperte nên khaw sawmhnih leh khaw kua a ni. 33 Tin, phai ram lamah chuan Eshtaol te, Zora te, Ashna te, 34 Zanoa te, En-ganim te, Tapua te, Enam te, 35 Jarmuth te, Adulam te, Soko te, Azeka te, 36 Shaaraim te, Adithaim te, Gedera te, Gederothaim te: khawpuite chu a khawperte nên khaw sâwm leh khaw li a ni. 37 Zenan te, Hadasha te, Migdal-gad te, 38 Dilean te, Mizpe te, Joktheel te, 39 Lakis te, Boz-kath te, Eglon te, 40 Kabbon te, Lahmas te, Kithlis te, 41 Gederoth te, Beth-dagon te, Naama te, Makkeda te: khawpuite chu a khawperte nên khaw sâwm leh khaw ruk a ni. 42 Libna te, Ether te, Ashan te, 43 Iphta te, Ashna te, Nezib te, 44 Keila te, Akzib te, Maresa te: khawpuite chu a khawperte nên khaw kua a ni. 45 Ekron leh a chhehvêl khuate leh a khawperte chu: 46 Ekron aṭanga tuifinriat thleng hialin Asdod hrûla awm zawng zawng a khawperte nên. 47 Asdod leh a chhehvêl khuate leh a khawperte chu, Gaza leh a chhehvêl khuate leh a khawperte chu - Aigupta lui leh tuifinriat zau leh a kam chin thlengin. 48 Tin, tlâng ram lamah chuan Samir te, Jatir te, Soko te, 49 Danna te, Kiriath-sanna (chu chu Debir a ni) te, 50 Anab te, Eshtemo te, Anim te, 51 Gosen te, Holon te, Gilo te: khawpuite chu a khawperte nên khaw sâwm leh khaw khat a ni. 52 Arab te, Duma te, Eshan te, 53 Janim te, Beth-tappua te, Apheka te, 54 Humta te, Kiriath-arba (chu chu Hebron a ni) te, Zior te: khawpuite chu a khawperte nên khaw kua a ni. 55 Maon te, Karmel te, Ziph te, Juta te, 56 Jezreel te, Jokdeam te, Zanoa te, 57 Kain te, Gibea te, Timna te: khawpuite chu khawperte nên khaw sâwm a ni. 58 Halhul te, Beth-zur te, Gedor te, 59 Maarath te, Beth-anoth te, Eltekon te: khawpuite chu a khawperte nên khaw ruk a ni. 60 Kiriath-baal te (chu chu Kiriath-jearim a ni), Raba te: khawpuite chu a khawperte nên khaw hnih a ni. 61 Thlalêr lamah chuan Beth-araba te, Middin te, Sekaka te, 62 Nibshan te, Chi Khawpui te, En-gedi te: khawpuite chu a khawperte nên khaw ruk a ni. 63 Jerusalem khuaa mi Jebus-ho erawh chu Juda thlahten an hnawt chhuak thei lo va; chutichuan, Jebus-hote chu Juda thlahte nên tûn thleng hian Jerusalem-ah an la chêng za ta reng a ni.

Josua 16

Ephraim leh khawthlang Manase-ho chan tûr ram

1 Josefa thlahte chanpual chu, Jeriko zâwn Jordan aṭangin thlalêr kiang, chhak lampanga Jeriko tuiahte chuan a chhuak a, Jeriko aṭang chuan tlâng ramah Bethel thlengin a chho zêl a; 2 tin, Bethel aṭangin Luz-ah a chhuak a, Ark-ho ramria Ataroth thlengin a kal zêl a; 3 tin, thlang lampangah Japhlet-ho ramri Beth-horon thlangta zâwk ramri, Gezer thlengin a chhuk zêl a, chu chu tuifinriatah a chhuak a. 4 Tichuan, Josefa thlahte Manase leh Ephraim chite chuan chanpualah an nei ta a.

Ephraim-ho chan tûr

5 An chhûngkaw zir zêla Ephraima thlahte ramri chu hetiang hi a ni: chhak lampanga an chanpual ramri chu Ataroth-adar a ni a, Beth-horon chhakta thlengin. 6 Tin, ramri chu Mikmethath hmârah thlang lampangah a chhuak a; tin, ramri chu chhak lampangah Taanath-silo thlengin a lêt leh a, Janoa chhak lamah a kal zêl a. 7 Tin, Janoa aṭang chuan Ataroth-ah te, Naara-ah te a chhuk zêl a, Jeriko a thleng a, Jordan-ah a chhuak a. 8 Tapua aṭangin ramri chu thlang lampangah Kana luitê thlengin a kal a, chu chu tuifinriatah a chhuak a. Chûng chu a ni Ephraima thlahte hnam an chhûngkaw zir zêla an chanpual chu. 9 Manasea thlahte chanpual zînga Ephraima thlahte tâna khawpui ruat hransakte nên, a khawpui zawng zawngte leh a khawperte pawh. 10 Tin, Gezer-a awm Kanaan-hote chu an hnawt chhuak lo va; Kanaan mite chu Ephraim-hote zîngah tûn thleng hian an la awm a, hnathawka rawih atân chhiahhlawhah an awm ta zâwk a ni.

Josua 17

Khawthlang Manase-ho chan tûr

1 Tin, Manasea thlahte chanpual chu hêng hi a ni, ani chu Josefa fa tîr kha a ni a: Gileada pa, Manasea fa tîr Makira erawh chu indo mi a nih avângin Gilead leh Basan ram chu a nei a. 2 Tin, chanpual chu Manasea thlahte dang zawng zawng tân an chhûngkaw zir zêlin a ni: Abiezera thlahte tân te, Heleka thlahte tân te, Asriela thlahte tân te, Sekema thlahte tân te, Hephera thlahte tân te, Semida thlahte tân te; chûngte chu an chhûngkaw zir zêla Josefa fapa Manasea thlah mipate chu an ni. 3 Manasea fa Makira, chu mi fa Gileada, chu mi fa Hephera, chu mi fa Zelophehada erawh chuan fapa nei lovin fanu hlîr a nei a ni. Chûng a fanu hmingte chu Malai te, Novai te, Hoglai te, Milkai te, Tirzai te an ni. 4 Tin, puithiam Eleazara hmaah leh Nuna fapa Josua hmaah leh mi lianhote hmaah an va kal a, “Kan unaute zîngah hian chanpual min pe ve tûrin LALPAN Mosia kha thu a pe a ni,” tiin an sawi a. Chutichuan, LALPA thupêk angin an pa unaute zîngah chuan chanpual a pe ve ta a. 5 Jordan râla mi Gilead leh Basan ram tiam lovin, Manasea chanpualah hmun sâwm a tlu a, 6 Manasea fanute chuan a fapate zîngah chanpual an neih ve avâng a ni; tin, Gilead ram chu Manasea fapa dangte chuan an chang a. 7 Tin, Manasea ramri chu Sekem chhak lama awm Aser aṭanga Mikmethath thlengin a ni; tin, ramri chu ding lampangah En-tapua mite awmna thlengin a kal a. 8 Tapua ram chu Manasea ta a ni a, Manasea ramri depa Tapua erawh chu Ephraima thlahte ta a ni. 9 Tin, ramri chu Kana luitêah, luitê chhim lampangah chuan a chhuk thla a. Chûng khawpuite chu Manasea khawpuite zînga mi, Ephraima ta a ni. Manasea ramri chu luite hmâr lampangah a ni a; tin, tuifinriatah a chhuak a. 10 Chhim lampang chu Ephraima ta a ni a, hmâr lampang chu Manasea ta a ni a, tuifinriat chu a ramri a ni. Hmâr lamah chuan Aser thlengin a va ni a, chhak lamah chuan Isakar thlengin a han ni a. 11 Isakar leh Aser ramah chuan Manasean Beth-san leh a chhehvêl khuate, Ibleam leh a chhehvel khuate, Dor-a awmte leh a chhehvêl khuate, Endor-a awmte leh a chhehvêl khuate, Taanak-a awmte leh a chhehvêl khuate, Megiddo-a awmte leh a chhehvêl khuate, zo khawsâng pathumte chu a nei a. 12 Nimahsela, Manasea thlahte chuan chûng khawpuia awmte chu an hnawt chhuak thei lo va; Kanaan mite chu chûng ramah chuan an awm lui tlat mai a. 13 Tin, heti hi a ni a, Israela thlahte chu an lo chak tâk tial tial chinah chuan, Kanaan-hote chu hnathawka rawih atân an awmtîr a, an hnawt chhuak fai vek ta lo.

Ephraim leh khawthlang Manase-hovin ram an dîl belh

14 Tin, Josefa thlahten Josua hnênah, “Engtizia nge maw ni rochun tûr chanpual hmun khat chan khat chauh min pêk bîk ni le, kan tam tehlul nên, LALPA lahin tûn thlengin mal min sâwm nasa hle mai si nên?” tiin an sawi a. 15 Tin, Josuan an hnênah, “In tam ahnu, Periz-hote leh Rephaim-ho ramngawte khi in awm nân han ṭhiat ta che u; Ephraim tlâng ram hi in tân a chêp luattuk si chuan,” a ti a. 16 Tin, Josefa thlahte chuan, “Tlâng ram hi kan tân a tâwk lo a ni; phai rama Kanaan-ho chêng zawng zawng, Beth-san leh a khawpuia awmte leh Jezreel ruama awmte hian thîrtawlailîr an nei ṭheuh bîk a,” an ti a. 17 Tin, Josuan Josefa chhûngte, Ephraima leh Manasea thlahte hnênah chuan, “In tam hle a, chak pawh in chak bawk a; chutichuan, chan khat chauh zawng in nei lo vang chu; 18 tlâng ram khi in tân ni ang hmiang. Ramngaw mah ni sela, in ṭhiat ang a, a ram chin zawng chu in ta a ni dâwn nia; Kanaan-hote chuan thîrtawlailîrte neiin, chak hle mah sela, in la hnawt chhuak dâwn a ni,” tiin a sawi a.

Josua 18

Ram la bâng sem dân

1 Tin, Israela thlah mipuiho zawng zawng chu Silo khuaah an inkhâwm chiam a, chutah chuan inbiakna puan in an zâr a. Ram chu an thuhnuaiah a lo awm ta a. 2 Tin, Israela thlahte zîngah chuan an chanpual la sem ve loh hnam sarih an la awm a. 3 Tichuan, Josuan Israela thlahte hnênah chuan, “LALPA in thlahtute Pathianin a lo pêk tawh che u ram hi eng chen nge luah lova in la muan dâwn le? 4 Hnam hrang ṭheuhva mi, mi pathum zêl inthlang chhuak ula, anni chu ka lo tîr ang a; anni chu an thawk ang a, ram chu an va fang ang a, an chanpual tâwk tûr ang ṭheuh zêlin an va ziak ang a; tin, ka hnênah an lo kîr leh ang. 5 Tin, hmun sarihah an ṭhen phawt ang a. Juda-ho chu chhim lamah an chanpualah an awm ang a; tin, Josefa chhûngte chu hmâr lamah an chanpualah an awm ang. 6 Ram chu hmun sarihah va ṭhen ula, chumi ziak chu mi rawn pe ang che u; tichuan, hetah hian LALPA kan Pathian hmaah ṭhum ka lo vâwrsak ang che u. 7 Levi-ho hi zawngin in zîngah hian chanvo an nei ve lo va, LALPA puithiam hna hi an chanpual a ni si a. Tin, Gad-ho te, Reuben-ho te leh Manase hnam zâtvete kha zawngin Jordan râl chhak lamah khân, an chanpual chu LALPA chhiahhlawh Mosian a lo pêk kha an lo chang tawh a,” a ti a. 8 Tichuan, chung mite chu an thawk chhuak ta a; tin, ram chanchin va ziak chhuak tûrte chu Josuan, “Ram chu va fang ta ula, rawn ziak chhuak ula, ka hnênah rawn thlen leh ula, hetah Silo khuaah hian LALPA hmaah ṭhum ka lo vâwrsak ang che u,” tiin thu a pe a. 9 Tin, mite chu an kal a, ram chu an va fang a, hmun sarihah an ṭhen a, lehkhabuah a khuain an ziak chhuak a; riahhmun Silo-ah chuan Josua hnênah an kal leh a. 10 Tin, Josuan Silo-ah chuan LALPA hmaah ṭhum a lo vâwrsak a, chutah chuan Josuan Israela thlahte chu an inṭhen dân ang zêl chuan ram chu a sem ta a.

Benjamin-ho chan tûr

11 Tin, ṭhumvâwr chu Benjamina thlahte hnam an chhûngkaw zir zêlin an chungah a tlu ta a; tin, an ramri chin chu Juda thlahte leh Josefa thlahte inkâr a ni. 12 Hmâr lampanga an ramri chin chu Jordan aṭangin a ni; ramri chu Jeriko sîrah hmâr lampangah a chho zêl a; tin, thlang lampangan tlâng ramah a chho zêl a; ramri tâwpna chu Beth-aven thlalêrah a ni. 13 Ramri chu chuta ṭang chuan Luz lamah, Luz (chu chu Bethel a ni) sîrah, chhim lampangah a kal zêl a; tin, ramri chu Beth-horon thlangta chhim lampanga tlâng hrûlah, Ataroth-adar-ah a chhuk a. 14 Tin, ramri chu a kal zêl a, Beth-horon chhim lampanga tlâng bul aṭang chuan thlang lama chhim lampangah a kual phei a; chu chu Kiriath-baal (chu chu Kiriath-jearim a ni), Juda thlahte khawpuiah a tâwp a. Chu chu thlang lampang ram chu a ni. 15 Tin, chhim lampanga ram chu Kiriath-jearim tâwp aṭangin a ni; tin, ramri chu thlang lamah a chhuak a, Nephtoa lui tuiahte chuan a kal zêl a. 16 Tin, ramri chu Rephaim hmâr lampang ruama Hinoma fapa ruam bula tlâng hmâwrah chuan a chhuk a, Jebus-ho sîrah, chhim lampangah Hinom ruamah a chhuk a, En-rogel-ah a chhuk a. 17 Tin, hmâr lam zâwngin a kal a, En-semes-ah a kal a, Adumim chhohna dep Geliloth-ah a kal a; tin, Reubena fapa Bohana lungah a chhuk a. 18 Tin, Araba sîr hmâr lampangah a kal zêl a, Araba-ah a chhuk a. 19 Tin, ramri chu Beth-hogla sîr, hmâr lampangah a kal zêl a; tin, ramri tâwpna chu Jordan chhim tâwp, Tuifinriat Al hmâr litengsâwlah a ni. Chu chu chhim lam ramri a ni. Jordan chu chhak lampanga ramri chin a ni. 20 Chu chu a ni, Benjamina thlahte an chhûngkaw zîr zêla an chanpual ramin a hual chhûng chu. 21 Tichuan, Benjamina thlahte an chhûngkaw zir ang zêla an khawpuite chu Jeriko te, Beth-hogla te, Emek-keziz te, 22 Beth-araba te, Zemaraim te, Bethel te, 23 Avim te, Para te, Ophra te, 24 Kephar-amoni te, Ophni te, Geba te: khawpui sâwm leh pahnih a khawperte nên; 25 Gibeon te, Rama te, Beeroth te, 26 Mizpe te, Kephira te, Moza te, 27 Rekem te, Irpeel te, Tarala te, 28 Zela te, Eleph te, Jebus te (chu chu Jerusalem a ni), Gibeath te, Kiriath te a ni: khawpui sâwm leh pali, a khawperte nên. Chu chu a ni, Benjamina thlahte an chhûngkaw zir zêla an chanpuala ruat chu.

Josua 19

Simeon-ho chan tûr

1 Tin, ṭhumvâwr vawi hnihna chu Simeona chungah, Simeona thlahte hnam chungah an chhûngkaw zir zêlin a tlu leh ta a. An chanpual chu Juda thlahte chanpual zîngah a tel ve a ni. 2 An chanpuala tlute chu Beer-seba (Seba emaw) te, Molada te, 3 Hazar-sual te, Bala te, 4 Eltolad te, Bethul te, Horma te, 5 Ziglag te, Beth-markaboth te, Hazar-susa te, 6 Beth-lebaoth te, Saruhen te: khawpui sâwm leh pathum a khawperte nên; 7 Ain te, Rimon te, Ether te, Ashan te: khawpui pali a khawperte nên; 8 chûng khawpui vêla khawper zawng zawng Baalath-beer, Chhim Rama thlengin. Chûng chu a ni, Simeona thlahte hnam an chhûngkaw zir zêla an chanpuala ruat chu. 9 Simeona thlahte chanpual chu Juda thlahte chan zînga mi a ni, Juda thlahte chanpual chu an tân a zau lutuk si a. Chuvângin, Simeona thlahte chanpual chu an chan zîngah a tel ve a ni.

Zebulun-ho chan tûr

10 Tin, ṭhumvâwr vawi thumna chu Zebuluna thlahte chungah an chhûngkaw zîr zêlin a tlu leh ta a; tin, an chanpual ramri chu Sarid thlengin a ni. 11 An ramri chu thlang lampangah Marala thleng rakin a kal zêl a, Dabeseth an va thleng a, Jokneam bula luitê a va thleng a. 12 Tin, Sarid aṭangin chhak lampang ni chhuahna lamah Kisloth-tabor ramri thlengin a kawi chho va, Daberath-ah a chhuak a, Japhia-ah a chho leh a. 13 Tin, chuta ṭang chuan chhak lampangah Gath-hepher leh Eth-kazin-ah a kal zêl a, Nea lam panin Rimon-ah a chhuak a. 14 Tin, ramri chu hmâr lamah Hannathon-ah a kual phei leh a; tin, a chhuahna chu Iphta-el ruamah a ni. 15 Katath te, Nahalal te, Simron te, Idala te, Bethlehem te: khawpui sâwm leh pahnih a khawperte nên. 16 Chûng chu a ni, Zebuluna thlahte an chhûngkaw zir zêla an chanpuala ruat chu; khawpuite leh a khawperte chu.

Isakar-ho chan tûr

17 Tin, ṭhumvâwr vawi lina chu Isakara chungah, Isakara thlahte chungah an chhûngkaw zir zêlin a tlu leh ta a. 18 Tin, an ramri chin chu Jezreel te, Kesuloth te, Sunem te, 19 Hapharaim te, Sion te, Anaharath te, 20 Rabith te, Kision te, Ebez te, 21 Remeth te, En-ganim te, En-hada te, Beth-pazez te thlengin a ni. 22 Tin, ramri chuan Tabor te, Sahazuma te, Beth-semes te a va thleng a; tichuan, an ramri chhuahna chu Jordan-ah a ni: khawpui sâwm leh paruk a khawperte nên. 23 Chûng chu a ni, Isakara thlahte hnam chhûngkaw zir zêla an chanpuala ruat chu; khawpuite leh a khawperte chu.

Aser-ho chan tûr

24 Tin, ṭhumvâwr vawi ngana chu Asera thlahte hnam chungah an chhûngkaw zir zêlin a tlu leh ta a. 25 Tin, an ramri chin chu Helkath te, Hali te, Beten te, Aksaph te, 26 Alamelek te, Amad te, Misal te a ni; thlang lampangah Karmel leh Sihor-libnath a zuk thleng a. 27 Ni chhuahna lampangah Beth-dagon-ah a kual chho va; tin, Zebulun leh hmâr lampangah Iphta-el ruamah Beth-emek leh Neiel a va thleng a; tin, vei lampangah Kabul te, 28 Ebron te, Rehob te, Hamon te, Kana te, Zidon ropui thleng rakin a kal zêl a. 29 Tin, ramri chu Rama-ah leh Tura khawpui kulh neiah a kual phei a; tin, ramri chu Hosa-ah a kual phei zêl a, a chhuahna chu Akzib ram tuifinriatah a ni. 30 Uma te, Aphek te, Rehob te: khaw sawmhnih leh pahnih a khawperte nên. 31 Chûng chu a ni, Asera thlahte hnam an chhûngkaw zir zêl an chanpual chu; chûng khawpuite leh a khawperte chu.

Naphtali-ho chan tûra ruat

32 Tin, ṭhumvâwr vawi rukna chu Naphtalia thlahte chungah an chhûngkaw zîr zêl bawkin, Naphtalia thlahte chungah a tlu leh ta a. 33 Tin, an ramri chin chu Heleph aṭang te, Zaananim-a sasua aṭang te, Adami-nekeb leh Jabneel aṭangtea Lakum thleng a ni; a chhuahna chu Jordan-ah a ni. 34 Ramri chu thlang lampangah Aznoth-tabor-ah a chhuk a, chuta ṭangin Hukok-ah a kal a; tin, chhim lamah Zebulun a va thleng a, thlang lamah Aser a thleng a, ni chhuahna lamah Judai rama Jordan a han thleng a. 35 Tin, khawpui kulh neite chu Zidim te, Zer te, Hamath te, Rakath te, Kinereth te, 36 Adama te, Rama te, Hazor te, 37 Kedes te, Edrei te, En-hazor te, 38 Iron te, Migdal-el te, Horem te, Beth-anath te, Beth-semes te a ni: khawpui sâwm leh pakua a khawperte nên. 39 Chûng chu a ni, Naphtalia thlahte hnam an chhûngkaw zir ang zêla an chanpual chu, khawpuite leh a khawperte nên.

Dan-ho chan tûr

40 Tin, ṭhumvâwr vawi sarihna chu Dana thlahte hnam chungah an chhûngkaw zir zêlin a tlu ta a. 41 Tin, an chanpual ramri chu Zora te, Estaol te, Ir-semesh te, 42 Saalabin te, Aijalon te, Ithla te, 43 Elon te, Timna te, Ekron te, 44 Elteke te, Gibethon te, Baalath te, 45 Jehud te, Bene-berak te, Gath-rimon te, 46 Me-jarkon te, Rakon, Jopa dep ramte nên a ni. 47 Tin, Dana thlahte ramri chuan chûng chu a va pêl a ni; Dana thlahte chuan Lesem an han bei a, an la a; khandaihin an tiboral a, an nei ta a, chutah chuan an awm ta nghâl a ni a. An pu Dana hming chawiin Lesem chu Dan an ti ta a ni. 48 Chu chu a ni, Dana thlahte hnam an chhûngkaw zir zêla an chanpual chu; chûng khawpuite leh a khawperte nên.

Ram sem an zo ta

49 Chutichuan, an chanpual atâna ramri siam ang zêlin ram chu an sem zo ta a; tichuan, Israela thlahten Nuna fapa Josua chu an zîngah chanpual an siamsak ve a. 50 LALPA thupêk angin Ephraim tlâng rama a khawpui dîl Timnath-sera khua ngei chu an pe a; tin, khawpui chu a siam a, chutah chuan a awm ta a. 51 Chûngte chu a ni, puithiam Eleazara te, Nuna fapa Josua te leh Israela thlahte hnam chhûngkaw puipaten Silo-a LALPA hmaah inbiakna puan in kawngkaa ṭhumvâwra an rochan atâna an sem tâkte chu. Chutichuan, ram ṭhen chu an zo ta a ni.

Josua 20

Humhimna khuate

1 Tin, LALPAN Josua chu a bia a, 2 “Israela thlahte hnênah hian, ‘Inhumhimna khuate siam rawh u khai, Mosia hmanga in hnêna ka sawi tawh kha: 3 tu pawh hre lova mi lo that palhtu chu, chutah chuan a tlân lût thei dâwn nia; tichuan, thisen phuba latu lakah chuan in tân inhumhimna a ni ang. 4 Chûng khawpuite zînga a engah emaw chuan a tlân ang a, khawpui kulh kawngka luhnaah a va ding ang a, chumi khaw upaho beng hriatah a chanchin chu a va thlen ang a; tin, anni chuan khaw chhûngah an hnênah an hruai lût ang a, an zînga a chên ve theihna tûrin awmna tûr chu an ruatsak ang. 5 Tin, thisen phuba latuin a rawn ûm chuan, a thattu chu a kutah an lo pe tûr a ni lo; a ṭhenawm chu hre lovin a that a ni a, tûn hmain huatna a nei si lo va. 6 Mipui hmaa rorêlsak tûra a din hma leh, chûnglaia puithiam lala awma chu a thih hma loh chuan chumi khuaah chuan a awm reng tûr a ni; tin, chumi hunah chuan mi thattu chu ama khaw chhûng ngei, a tlan chhuahsan khua, ama in chhûngah ngei chuan a lût leh tûr a ni,’ tiin sawi ang che,” tiin. 7 Tichuan, Naphtali tlâng rama Galili-a Kadesh khua te, Ephraim tlâng rama Sekem khua te, Judai tlâng rama Kiriath-arba khua (chu chu Hebron a ni) te chu an ruat ta a. 8 Tin, chhak lamah Jordan râlah Jeriko-ah chuan Reuben hnam rama thlalêr phaizâwla Bezer khua te, Gad hnam rama Gilead rama Ramoth khua te, Manase hnam rama Basan rama Golan khua te an ruat a. 9 Chûng khuate chu a ni, Israela thlahte zawng zawng leh an zînga hnam dang awmte tâna ruat chu: tu pawh mi that palhtu chu chutah chuan a tlân luha, mipuite hmaa a din zet hma loh chuan thisen phuba latu kuta a thih lohna tûrin.

Josua 21

Levi chite awmna tûr khuate

1 Tichuan, Levi chi chhûngkaw puipate chu puithiam Eleazara hnênah leh Nuna fapa Josua hnênah leh Israela thlahte hnam chhûngkaw puipate hnênah te chuan an va kal a; 2 Kanaan rama Silo khuaah chuan, “LALPAN Mosia hmangin kan awmna tûr khawpuite, kan ran tlatna tûr a daivêlte nên min pe tûrin thu a lo pe tawh asin,” tiin an sawi a. 3 Chutichuan, Israela thlahte chuan LALPA thupêk angin an chanpual ata chûng khawpuite chu a daivêlte nên Levi chite an pe a. 4 Tin, ṭhumvâwr chu Kohath mite hnam chungah a tlu ta a; tichuan, puithiam Arona thlah Levi chia mite chuan Juda hnam chanpuala mi te, Simeon hnam chanpuala mi te, Benjamin hnam chanpuala mi te khawpui sâwm leh pathum ṭhumvâwrin an chang ve a ni. 5 Tin, Kohatha thlah dangte chuan Ephraim hnam thlahte chanpuala mi te, Dan hnam chanpuala mi te, Manase hnam zâtvete chanpuala mi te khawpui sâwm ṭhumvâwrin an chang ve a ni. 6 Tin, Gersona thlahte chuan Isakar hnam thlahte chanpuala mi te, Aser hnam chanpuala mi te, Naphtali hnam chanpuala mi te, Basan rama Manase hnam zâtvete chanpuala mi te, khawpui sâwm leh pathum ṭhumvâwrin an chang ve a. 7 Meraria thlahte chuan an chhûngkaw zir zêlin Reuben hnam chanpuala mi te, Gad hnam chanpuala mi te, Zebulun hnam chanpuala mite khawpui sâwm leh pahnih an chang ve a. 8 Tin, Israela thlahte chuan LALPAN Mosia hmanga thu a pêk ang khân, Levi mite chu khawpuite leh a daivêlte chu ṭhumvâwrin an pe a. 9 Tin, Juda thlahte hnam chanpuala mi te, Simeona thlahte hnam chanpuala mi te chu an pe a, hêng khawpui a hming lamte hi: 10 chûng chu Levia thlah, Kohath-ho hnam te, Arona thlahteho ta tûr a ni; ṭhumvâwr chu an chungah a tlu hmasa ber rêng a. 11 Tin, Judai tlâng rama Kiriath-arba khua chu a daivêlte nên an pe a, chu Arba chu Anaka pa a ni a (chu chu Hebron a ni). 12 Khawpui chhehvêlte leh a khawperte erawh chu Jephunea fapa Kaleba chanpual atân an pe a. 13 Tin, puithiam Arona thlahte chu Hebron, mi thattute inhumhimna khawpui chu a daivêlte nên, Libna khua a daivêlte nên, 14 Jatir khua a daivêlte nên, Estemoa khua a daivêlte nên, 15 Holon khua a daivêlte nên, Debir khua a daivêlte nên, 16 Ain khua a daivêlte nên, Juta khua a daivêlte nên, Beth-semes khua a daivêlte nên: chûng hnam hnihte chanpuala mi khawpui pakuate chu an pe a. 17 Tin, Benjamin hnam chanpuala mi chu Gibeon khua a daivêlte nên, Geba khua a daivêlte nên, 18 Anathoth khua a daivêlte nên, Almon khua a daivêlte nên: khawpui pali an pe bawk a. 19 Arona thlah, puithiamho khawpui zawng zawng chu khawpui sâwm leh pathum a ni, a daivêlte nên. 20 Tin, Kohatha thlahte chhûngkua, Levi-ho, Kohatha thlah dangte pawh chuan an chanpual khawpuite chu Ephraim hnam chanpuala mi a ni an neih ni. 21 Tin, mi thattute inhumhimna khawpui Ephraim tlâng rama Sekem chu a daivêlte nên, Gezer khua a daivêlte nên, 22 Kibzaim khua a daivêlte nên, Beth-horon khua a daivêlte nên: khawpui pali an pe a. 23 Tin, Dan hnam chanpuala mi Elteke khua a daivêlte nên, Gibethon khua a daivêlte nên, 24 Aijalon khua a daivêlte nên, Gath-rimon khua a daivêlte nên: khawpui pali. 25 Tin, Manase hnam zâtvete chanpuala mi Taanak khua a daivêlte nên, Gath-rimon khua a daivêlte nên: khawpui pahnih. 26 Kohatha thlah dangte hnam khawpui zawng zawng chu khaw sâwm a ni, a daivêlte nên. 27 Tin, Gersona thlahteho, Levi hnamte chu Manase hnam zâtvete chanpuala mi, mi thattute inhumhimna khawpui, Basan rama Golan chu a daivêlte nên, Be-estara khua a daivêlte nên: khawpui pahnih an pe a. 28 Tin, Isakar hnam chanpuala mi Kision khua a daivêlte nên, Daberath khua a daivêlte nên, 29 Jarmuth khua a daivêlte nên, En-ganim khua a daivêlte nên: khawpui pali. 30 Tin, Aser hnam chanpuala mi Misal khua a daivêlte nên, Abdon khua a daivêlte nên, 31 Helkath khua a daivêlte nên, Rehob khua a daivêlte nên: khawpui pali. 32 Tin, Naphtali hnam chanpuala mi, mi thattute inhumhimna khawpui, Galili rama Kadesh chu a daivêlte nên, Hamoth-dor khua a daivêlte nên, Kartan khua a daivêlte nên: khawpui pathum. 33 Gerson-ho an chhûngkaw zir zêla an chanpual khawpui zawng zawng chu khawpui sâwm leh pathum a ni, a daivêlte nên. 34 Tin, Meraria thlahteho chhûngkua, Levi-ho dangte chu Zebulun hnam chanpuala mi Jokneam khua a daivêlte nên, Karta khua a daivêlte nên, 35 Dimna khua a daivêlte nên, Nahalal khua a daivêlte nên: khawpui pali. 36 Tin, Reuben hnam chanpuala mi Bezer khua a daivêlte nên, Jahaz khua a daivêlte nên, 37 Kedemoth khua a daivêlte nên, Mephaath khua a daivêlte nên: khawpui pali. 38 Tin, Gad hnam chanpuala mi, mi thattute inhumhimna khawpui, Gilead rama Ramoth a daivêlte nên, Mahanaim khua a daivêlte nên, 39 Hesbon khua a daivêlte nên, Jazer khua a daivêlte nên: a vaiin khawpui pali. 40 Chûng zawng zawng chu Levi-ho chhûngkaw dang, Meraria thlahteho an chhûngkaw zir zêla an khawpuite chu a ni; tichuan, an chanpual chu khawpui sâwm leh pahnih a ni. 41 Israela thlahteho chanpuala mi Levi-ho khawpui zawng zawng chu khawpui sawmli leh pariat a ni, a daivêlte nên. 42 Chûng khawpuite chuan daivêl a nei ṭheuh a ni; chûng khawpui zawng zawng chu chutiang vek chu a ni.

Israel-ten ram chu an luah ta

43 Chutichuan, LALPAN an thlahtute chhechhama pêk a lo tiam tâk ram zawng zawng chu Israel-te chu a pe a; tichuan, ram chu an luah a, awmhmun an khuar ta a. 44 Tin, LALPAN an thlahtute hnêna chhechhama a lo tiam tawh ang ngei khân hmun tinah muanna a pe a. An hmêlma zawng zawngte chu tu mah an hmaa ṭang thei rêng rêng an awm lo; LALPAN an hmêlma zawng zawngte chu an kutah a pe vek a. 45 LALPAN Israela chhûngte hnêna a ṭha lam thu a lo sawi zawng zawng kha thlâwn rêng rêng a awm lo va, a lo thleng vek a ni.

Josua 22

Jordan chhaka ram neite Josuan a hawtîr

1 Chutichuan, Josuan Reuben-hote, Gad-hote, Manase hnam zâtvete chu a ko va, 2 an hnênah, “LALPA chhiahhlawh Mosian thu a pêk apiang che u in pawm zêl a, thu ka pêk apiang che u pawh in pawm zêl a. 3 Hei leh chen hi vawiin thlengin in unauteho chu in thlahthlam lo va, LALPA in Pathianin tih tûra thu a pêk che u in zâwm ṭhîn a. 4 Tichuan, LALPA in Pathianin an hnêna a lo sawi tawh ang khân in unaute hi muanna a lo pêk tâk hi; chuvângin, LALPA chhiahhlawh Mosian Jordan râla in chanpual atâna ram a lo pêk tâk che uah khân, in puan in lamah te chuan haw leh tawh u. 5 LALPA chhiahhlawh Mosian LALPA in Pathian chu hmangaiha, a kawng zawng zawng chu zawha, a thupêkte chu pawma, amah chu vuan tlata, in thinlung zawng zawng leh in thlarau zawng zawnga a rawngbâwl tlat tûra thu a lo pêk che u kha, chu thupêk leh dânte chu fîmkhur takin vawn ṭhat tum phawt mai ang che u,” a ti a. 6 Chutichuan, Josuan anmahni chu mal a sâwm a, a kaltîr ta a; tichuan, an puan in lamahte an haw ta a. 7 Tin, Manase hnam zâtvete kha Mosian Basan ramah chanpual a pe a; a zâtve dangte kha erawh chu Josuan thlang lampang Jordan râlah an unaute zîngan chanpual a pe zâwk a. Tin, Josuan an in lama a hâwtîr dâwn lai khân mal a sâwm a, 8 an hnênah, “In puan in lamahte chuan hausa takin haw ta ula, ran tam tak nên, tangkarua te nên, rangkachak te nên, dâr te nên, thîr te nên, silhfên tam tak te nên. In hmêlmate laka in râllâkte kha in unaute nên insem tlâng rawh u,” tiin a sawi a. 9 Tin, Reubena thlahte leh Gada thlahte leh Manase hnam zâtvete chu an kîr leh a, Kanaan ram Silo khua ata chu Israela thlahte hnên aṭang chuan Gilead ram, LALPAN Mosia hmanga thu a lo pêk tâk ang khân, an chanpual rênga lo ruat tawh rama kal tûrin an chhuak ta a.

Jordan lui kama maichâm

10 Tin, Kanaan rama Jordan bial an va thlen chuan Reubena thlahte leh, Gada thlahte leh, Manase hnam zâtvete chuan Jordan lui kamah chuan maichâm lian pui, langsâr tak an siam ta a. 11 Tin, Israela thlahte chuan, “Ngai teh u, Reubena thlahte leh Gada thlahte leh, Manase hnam zâtvete khân Kanaan ram bul tak, Jordan bial, Israela thlahte ram lampangah maichâm an siam e,” tia mi sawi an hria a. 12 Tin, chu chu Israela thlahte chuan an lo hriatin, Israela thlah mipuiho zawng zawng chu anmahni han do tumin Silo khuaah an inkhâwm ta chiam a. 13 Tin, Israela thlahte chuan Gilead rama Reubena thlahte leh, Gada thlahte leh, Manase hnam zâtvete hnênah chuan puithiam Eleazara fapa Phinehasa an tîr a, 14 a hnênah mi lian sâwm, Israel-ho hnam zînga chhûngkaw puipa ber pakhat zêl nên; chûngte chu Israel-ho hnam zinga an chhûngkaw puipa bêr zêlte an ni. 15 Tin, Reubena thlahte leh, Gada thlahte leh, Manase hnam zâtvete hnênah Gilead ramah chuan an kal ta a, an hnênah, 16 “LALPA mipuiho zawng zawngin, ‘Israel-te Pathian chungah eng nge maw in tihsual le, LALPA chungah vawiinah hian hel tuma maichâm siamin vawiinah hian LALPA chu in hawisan le? 17 Peor hmuna bawhchhiatna te kha kan tân tê luaah ngaih theih em ni? Tûn thleng pawh hian khâng kan sualte kha kan la intlêng fai zo lo a ni a, LALPA mipuiho zîngah khân hri kha a lêng nachungin, 18 vawiinah hian LALPA chu hawisan in tum chu le? Tichuan, vawiina LALPA chunga in lo hel ta mai hi, naktûkah zawng Israel mipuiho zawng zawng chungah a thinrim ngei dâwn mai. 19 Amaherawhchu, in ram luah hi a bawlhhlawh chuan, LALPA ram chhûng, LALPA biakbûk awmna hmunah lo kal ve mai ula, kan zîngah chêng ve ta mai che u; amaherawhchu, LALPA kan Pathian maichâm tih loh maichâm dang siam zâwngin LALPA chungah hel suh ula, kan chungah pawh hian hel ma ta che u. 20 Zera fapa Akana khân hluihlâwn thilah khân thil a tisual a, Israel mipuiho zawng zawng chungah khân thinurna a tla a ni lâwm ni kha? Kha mi kha ama bawhchhiatnaah amah ngawtin a boral bîk loh kha,’ an ti asin,” tiin an sawi a. 21 Chutichuan, Reubena thlahte leh, Gada thlahte leh, Manase hnam zâtvete chuan Israel-ho hnam puipate chu an chhâng a, an hnênah, 22-23 “LALPA, pathiante Pathian, LALPA, pathiante Pathian chuan a hria a, Israel-ho pawhin an hria ang; kan maichâm siam hi LALPA hawisan tuma, hel tumna emaw, thil tihsual tumna emawa siam kan nih chuan (vawiinah pawh hian min zuah lo mai rawh), hâlral thilhlan nân emaw, ei tûr thilhlan nân emaw, remna thilhlan nân emaw a nih chuan, amah LALPA ngeiin rawn ngaihtuah ang hmiang. 24 Nakin hnuah hian in thlahten kan thlahte hnênah hian, ‘Nangnin LALPA, Israel-te Pathian hi enga in hman phâk vena nge maw awm ni? 25 Nangni Reubena thlahte leh Gada thlahte u, LALPAN keini leh nangni tân Jordan hi ramri china a siam asin ni. LALPAah hian chanpual in nei ve hlei nêm,’ an la rawn ti hlauh dah ang e, tia fîmkhur avânga tih chhan nei taka ti kan ni asin. In thlahtehovin kan thlahte chu LALPA ṭih nachâng hre lovin an la siam mai thei asin. 26 Chuvângin, ‘Hawh u, maichâm i siam teh ang u, hâlral thilhlan nân leh inthawi nân erawh chu ni lovin; 27 keini leh, nangni leh, kan hnua kan thlahteho kârah hriatna a ni ang a; tichuan, kan hâlral thilhlante leh kan inthawinate leh, kan remna thilhlante hian LALPA rawng kan bâwl theih nân leh, an thlahte pawhin nakinah kan thlahte hnênah chuan, LALPAah chanpual in nei ve lo ve, an la tih loh nân,’ kan ti a ni. 28 Chuvângin, ‘Heti hi a ni ang a, nakin hnuah te kan hnênah emaw, kan thlahte hnênah emaw chutianga an la rawn tih huna keinin, “En ta che u, kan thlahtuten LALPA maichâm awm dân an siam hi, hâlral thilhlanna tûr leh inthawina tûr a ni lo ve; keini leh nangni kârah hriatna a ni zâwk e,” kan la tih atân,’ kan ti asin. 29 LALPA chungah chuan helin, vawiinah hian LALPA hawisana, LALPA kan Pathian maichâm, a biakbûk bula maichâm ngawt lo hi hâlral thilhlan nân emaw, ei tûr thilhlan nân emaw, inthawi nân emawa maichâm siam kan nih lohzia mai chu,” an ti a. 30 Tin, puithiam Phinehasa leh a hnêna awm mipuiho mi lian, Israel-ho hnam puipate chu, Reubena thlahte leh Gada thlahte leh Manasea thlahte thusawi an hriat chuan a tilâwm ta hle a. 31 Tin, puithiam Eleazara fapa Phinehasa chuan Reubena thlahte leh Gada thlahte leh Manasea thlahte hnênah chuan, “LALPA chungah thil in tihsual loh avângin, tûnah zawng LALPA chu kan zîngah a awm ngei a ni tih kan hre ta alâwm. Tichuan, Israela thlahte hi LALPA kut ata in chhanchhuak ta a nih hi,” a ti a. 32 Chutichuan, puithiam Eleazara fapa Phinehasa leh mi lianho chu Reubena thlahte leh Gada thlahte hnên aṭang chuan, Gilead ram ata chu Kanaan ram lamah Israela thlahte hnên lamah chuan an haw leh ta a, thu chu an va thlen leh a. 33 Tin, chûng thu chuan Israela thlahte chu a tilâwm hle a, Israela thlahte chuan Pathian chu an fak ta a; Reubena thlahte leh Gada thlahte chu han dova, an awmna ram han tihchhiatsak thu te chu an sawi leh ta lo va. 34 Reubena thlahte leh Gada thlahte chuan chu maichâm chu Ed an ti a, “LALPA chu Pathian a lo ni ngei mai tih kan kârah hian hriatna a nih hi,” an ti a ni.

Josua 23

Josua thlahna thuchah

1 Tin, heti hi a ni a, kum eng emaw zât a lo vei hnua, LALPAN Israel-hote chu an kiang vêla hmêlma zawng zawngte laka muanna a pêk hnu chuan, Josua pawh chu a lo upain a lo tar ta hle a. 2 Tichuan, Josuan Israel-ho zawng zawngte, an upate leh an puipate, an rorêltute leh an hotute chu a kohtîr a, an hnênah, “Kei zawng ka lo upain ka lo tar ta. 3 LALPA in Pathianin nangmahni avânga hêng hnam zawng zawngte chunga a tih dân hi in hmu a; LALPA in Pathianin, amah ngeiin a ni dosak che u ni. 4 Ngai teh u, hêng hnam a la awmate hi hêng hnam ka tihbo tâkho zawng zawng ramte nên hian, Jordan aṭanga ni tlâkna lam Tuifinriat Zau thleng rakin in chite rochanah ka ruatsak a che u. 5 Tin, LALPA in Pathianin in hmaah hian a hnawt chhuak ang a, in hmuh phâk lohvah a hnawt bo vek ang a; tichuan, LALPA in Pathianin in hnêna a sawi tawh ang khân an ram chu in nei dâwn nia. 6 Chuvângin, Mosia dân lehkhabua ziak zawng zawngte hi ding lamah emaw, vei lamah emaw in pênsan hauh loh nân huai takin pawm ula, ti rawh u; 7 hêng hnam in zînga la awmate nên hian inchiahpiah lova, an pathiante hming pawh lam lova, an hming chhâla chhia chham lova, an rawng pawh bâwl lova, kûna chibai in bûk hek loh nân, vawiin thlenga in la tih cheu ṭhin ang hian, 8 LALPA in Pathian chu vuan tlat zawk ṭhîn ang che u. 9 LALPAN in hmaah chi ropui tak leh chak takte chu a hnawh chhuah tâk vek hi; nangni hmaah zawng vawiin thlengin tu mah ṭang thei rêng rêng an awm loh hi. 10 In zînga mi pakhatin mi sângkhat a ûm ang; in hnêna a lo sawi tawh angin, LALPA in Pathian hian a ni, dosak ṭhîn che u ni. 11 Chutichuan, LALPA in Pathian chu hmangaih tûrin fîmkhur ṭha hle rawh u. 12 Chuti lo chuan, in hawisan hlauhva, hêng hnam, la awmho in zînga la chêng rengte hi in kûngkaiha, anmahni nêna nupui pasala in inneiha, anmahni chu in pâwla, anni pawhin an pâwl vaih che u zawngin, 13 LALPA in Pathianin hêng hnamte hi in mit hmuhah chuan a hnawh chhuahsak dâwn tawh tawp lo che u a. LALPA in Pathianin ram ṭha tak a pêk che u ata hi in boral vek hma loh chuan, anmahni chu in tân thang leh fal leh, in nâk atâna vuakna tiang leh, in mit atâna hlîng an lo ni zâwk ang tih chiang takin hre rawh u. 14 “Tin, ngai teh u, tûnah hian leilung zawng zawng dân angin ka kal ve dâwn ta a ni. LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo tih chu in thinlung zawng zawng leh in rilru zawng zawngin in hria e; in chungah a lo thleng ta vek a, pakhat mah thlâwn a awm lo ve. 15 Tin, heti hi a ni ang a, LALPA in Pathianin thil ṭha in hnêna a sawi zawng zawngte kha in chunga a lo thleng ta vek ang bawk hian, LALPA in Pathianin he ram ṭha tak a pêk che u ata hi a tihboral vek hma loh che u chuan, LALPAN thil ṭha lote in chungah a la rawn thlentîr ve ang. 16 LALPA in Pathian thuthlung, pawm tûra a pêk che u hi in bawhchhiata, pathian dangte rawng in bâwla, kûna chibai in bûk chuan, LALPA thinurna chu in chungah a ling ang a, ram ṭha tak a pêk che u ata hi in boral thuai mai ang,” a ti a.

Josua 24

1 Tin, Josuan Israel hnam zawng zawngte chu Sekem-ah a ko khâwm a, Israel-ho upate, an puipate, an rorêltute, an hotute a kohtîr a; tin, Pathian hmaah an rawn inlan hlawm a. 2 Tin, Josuan mi zawng zawng hnênah chuan, “LALPA, Israel-te Pathianin heti hian a ti a ni: ‘In thlahtute kha hmânlaiin Lui piah lamah khân an awm ṭhîn a, Abrahama pa leh Nahora pa Tera meuh pawh kha; anni chuan pathian dangte rawng an bâwl ṭhîn a. 3 Tin, in thlahtu Abrahama kha Lui râl ata ka hruai chhuak a, Kanaan ram chhûng zawng zawngah khân ka hruai a, a thlahte chu ka tipung a, Isaaka kha ka pe a. 4 Tin, Isaaka chu Jakoba leh Esauva ka pe a. Tin, Esauva chu a chanpual atân Seir tlâng ka pe a; tin, Jakoba leh a fate kha Aigupta-ah an zuk chhuk a. 5 Tin, Mosia leh Arona ka tîr a, Aigupta ram chu an zîngah thil mak tiin ka hrem a; tin, chumi zawhah chuan ka hruai chhuak che u a. 6 Tin, in thlahtute chu Aigupta ram ata ka hruai chhuak a, tuipui in va thleng a; tichuan, Aigupta mite chuan in thlahtute chu tawlailîrte leh sakawr chung chuang mite nên Tuifinriat Sen thlengin an ûm a. 7 “ ‘Tin, anni chuan LALPA an han au va; Aigupta mite nêna in inkâr chu a rawn tithim ta mup a, tuipui a rawn tuamtîr a, a chîm pil ta a. Tichuan, Aigupta rama ka thiltih kha in mit ngeiin a hmu a. Tin, thlalêrah khân rei tak in awm a. 8 Tin, Jordan lui râla awm Amor-ho ramah chuan ka hruai che u a, an lo do che u a; mahse, in kutah ka pe a, an ram chu in luah ta a, anni chu ka tihboralsak ta che u a. 9 Tin, Moab lal, Zipora fapa Balaka kha a lo thawk a, Israel-hote a lo do va; tin, Beora fapa Balaama kha anchhia lawh tûr che uin a kohtîr a. 10 Nimahsela, Balaama thu kha ka lo ngaithla duh lo va; chuvângin, mal a sawm ta zâwk che u a. Tichuan, a kut ata chu ka chhanchhuak ta che u a ni. 11 Tin, Jordan lui in kai a, Jeriko khua in han thleng a; tin, Jeriko khuaa miten an lo do che u a - Amor-ho te, Periz-ho te, Kanaan-ho te, Hit-ho te, Girgas-ho te, Hiv-ho te, Jebus-ho te nên khân; tichuan, anni chu in kutah ka pe ta a. 12 In hmaah khawinghal ka tîr a, chu chuan in hmaah anmahni chu a ûm a, Amor-ho lalte pahnih pawh kha; in khandaihin emaw, in thalngulin emaw a ni lo. 13 Tin, in thawh chhuah hauh loh ram leh nangmahni siam hauh loh khawpuite ka pe che u a, chûngah chuan in awm a; in phun loh grêp huan leh olive huana mite chu in ei a,’ tiin. 14 “Chuvângin, LALPA chu ṭih ula, tihtakzet leh dik takin a rawng chu bâwl ula, in thlahtuten Lui râl leh Aigupta rama a rawng an bâwl ṭhin pathiante kha paih vek ula; LALPA rawng bâwl ang che u. 15 Tin, LALPA rawng bâwl hi ṭha lo âwm anga in hriat chuan, vawiinah hian tu rawng nge in bâwl dâwn thlang mai rawh u: in thlahtuten Lui râla a rawng an bâwl ṭhin pathiante kha nge, in luah ram Amor-hote pathiante kha? Kei leh ka chhûngte erawh hi zawngin LALPA rawng a ni kan bâwl dâwn ni,” a ti a. 16 Tin, mipuite chuan, “LALPA Pathian chu kalsanin pathian dangte rawng chu kan bâwl loh tûrzia mai chu; 17 amah LALPA kan Pathian ngei chu alâwm kan thlahtute nêna Aigupta ram bawih ata min hruai chhuaka, kan mit hmuha chhinchhiahna ropui tak takte tia, kan kalna apiang leh, mipui zawng zawng kan tâwn tlangna pawha min vêng him zêltu chu. 18 Tichuan, LALPAN kan hma ngeiah hnam tin, chûng rama awm Amor-hote ngei pawh chu a hnawt chhuak vek a; chuvângin, keini pawhin LALPA rawng a ni kan bâwl dâwn ni, amah chu kan Pathian a ni si a,” an ti a, an chhâng a. 19 Tin, Josuan mipuite hnênah chuan, “LALPA rawng chu in bâwl thei lo vang, ani zawng Pathian thianghlim a ni si a. Pathian thîkthuchhia a ni a; in bawhchhiatnate leh in sualnate chu a ngaidam lo vang. 20 LALPA chu in kalsana, hnam dang pathiante rawng in bâwl zawngin, in chunga a ṭha chung hian, in chungah thil ṭha lovin a ṭuan ve ang a, a tiboral mai tûr che u a nia,” a ti a. 21 Tin, mipuite chuan Josua hnênah, “Ni lo ve; LALPA rawng kan bâwl tlat zâwk dâwn a ni!” an ti a. 22 Tin, Josuan mipuite hnênah, “A râwng bâwl tumin LALPA chu in thlang ta ngei mai tih thuhretute chu nangmahni ngei hi in ni ta e,” a ti a. Tin, anni chuan, “Thuhretute chu kan ni ta alâwm,” an ti a. 23 Tin, amah vêk chuan, “Chuti a nih chuan in zînga hnam dang pathian awmte chu dah bo daih ula, in thinlungte chu LALPA, Israel-te Pathian lamah chuan thlêktîr rawh u,” a ti a. 24 Tin, mipuite chuan Josua hnênah, “LALPA kan Pathian rawng chu kan bâwl ang a, a thu kan zâwm zêl ang,” an ti a. 25 Chutichuan, Josuan chumi ni chuan mipuite hnênah thu a thlung a, Sekem khuaah chuan dân leh rorêlna a ruatsak a. 26 Tichuan, Josuan chûng thu chu Pathian dân buah a ziak a; tin, lung lian pui a la a, LALPA hmun thianghlim bula sasaw hnuaiah a phun a. 27 Tin, Josuan mipuiho zawng zawng hnênah chuan, “Ngai teh u, he lung hi kan thuhretu ni rawh se, LALPAN kan hnêna thu a sawi zawng zawng chu a hriat tâk vek hi. Chuvângin, in thuhretu a ni dâwn a ni; chuti lo zawng, in Pathian hi in phatsan mai dah ang e,” a ti a. 28 Chutichuan, Josuan mipuite chu anmahni chanpual ram ṭheuhvah a hawtîr ta a.

Josua leh Eleazara an thi

29 Tin, heti hi a ni a, chûng thil hnuah chuan Nuna fapa Josua, LALPA chhiahhlawh chu kum za leh kum sâwm miin a thi a. 30 Tin, Gaas tlâng hmâr lampang, Ephraim tlâng rama ama chanpual ramri chhûng Timnath-sera-ah chuan an phûm ta a. 31 Tin, Josua dam chhûng leh, upaho Josua khûma dam te, LALPAN Israel-hote tâna thil a tih zawng zawng hretute dam chhûng chuan Israel-hote chuan LALPA rawng an bâwl ṭhîn a. 32 Tin, Israela thlahten Aigupta ram ata Josefa ruh an chhawm chhoh kha Sekem khuaa hmun, Sekema pa Hamora fate laka Jakoban tangka zaa a leiah khân an phûm a; tichuan, chûng chu Josefa thlahte pualah a lo awm ta a. 33 Tin, Arona fapa Eleazara chu a thi a; tin, Ephraim tlâng rama a puala an pêk, a fapa Phinehasa tlângah chuan an phûm ta a.

Roreltute 1

Juda leh Simeon-hovin Adoni-bezeka an man

1 Tin, Josua thih hnu chuan heti hi a ni a, Israela thlahte chuan, “Kanaan-hote chu dova kan tâna bei tûrin tu nge han kal hmasa phawt ang le?” tiin, LALPA chu an râwn a. 2 Tin, LALPA chuan, “Juda han kal rawh se. Ngai teh u, a kutah ram chu ka pe tawh e,” a ti a. 3 Tin, Judan a unau Simeona hnênah, “Kanaan-hote bei tûrin ka ram chanpualah hian lo chho ve rawh; kei pawh i ram chanpualah ka lo kal ve dâwn nia,” a ti a. Chutichuan, Simeona chu a hnênah a kal ve ta a. 4 Tin, Juda chu a han kal a; tichuan, Kanaan-hote leh Periz-hote chu LALPAN an kutah a pe ta a; tin, Bezek khuaah mi sîngkhat an that a. 5 Tin, Bezek khuaah chuan Adoni-bezeka an han hmu a; tin, an bei a, Kanaan-hote leh Periz-hote chu an that chiam a. 6 Adoni-bezeka erawh chu a tlân a; tichuan, an ûm a, an man a, a kutzungpuite leh kezungpuite an tansak a. 7 Tin, Adoni-bezeka chuan, “Lal sawmsarih kutzungpui leh kezungpui tan chhumte chuan ka dawhkân hnuaia buh mal an chhar ṭhîn a; ka tih ang chiahin Pathianin mi thungrûl ve ta a nih hi le,” a ti a. Tin, Jerusalem khuaah an hruai a, chutah chuan a thi ta a. Juda-hovin Jerusalem leh Hebron an la 8 Tin, Juda thlahte chuan Jerusalem khua an han do va, an la a, khandaihin an bei a, khawpui chu an hâl a. 9 Tin, chumi hnuah chuan Juda thlahte chu Kanaan-ho, tlâng rama awm te, Chhim lama awm te, phaia awm te chu do tûrin an zuk kal a. 10 Tin, Juda chuan Kanaan-ho Hebron khuaa awmte chu a va bei a (a hma chuan Hebron khaw hming chu Kiriath-arba a ni). Tichuan, Sesaia te, Ahimana te, Talmaia te an that a.

Othnielan Debir khua a la

11 Tin, chuta ṭang chuan Debir khuaa awmte chu a bei a (A hma chuan Debir khaw hming chu Kiriath-sepher a ni). 12 Tin, Kaleban, “Tu pawh Kiriath-sepher khua chu beia, la apiang chu ka fanu Aksi nupuiah ka neihtîr ang,” a ti a. 13 Tin, Kaleba nau Kenaza fapa Othnielan a la a; tichuan, a fanu Aksi chu nupuiah a neihtîr ta a. 14 Tin, a pasal hnên a va thlen chuan a pa ram dîl tûrin a lo fuih a. Tin, sabengtung ata a chhuk a; Kaleba chuan a hnênah, “Eng nge i duh le?” a lo ti a. 15 Ani chuan, “Eng emaw dîl che ka duh a ni. Chhim lam ram ro takah mi awmtîr ta si a, tuikhur mi pe tel bawk tûrin ka ngên a che,” a ti a. Tichuan, Kaleba chuan tuikhur chhakta leh thlangta chu a pe ta a.

Juda leh Benjamin-ho an chak zêl

16 Tin, Mosia puzawn Ken-ho thlahte chu Arad chhim lama Judai thlalêrah chuan Juda thlahte nên tûm khawpui ata chu an han chho va; an zîngah chuan an han chêng ve ta a. 17 Tin, Juda chu a unau Simeona nên an thawk a, Zephath khuaa awm Kanaan-ho chu an that a, an tichimit vek a. Chu khawpui hming chu Horma an ti. 18 Tin, Juda chuan Gaza khua a ram chin nên, Askelon khua a ram chin nên, Ekron khua a ram chin nên a la bawk a. 19 Tin, LALPA chu Juda hnênah a awm a; tichuan, tlâng rama chêngte chu a hnawt bo vek a; ruama chênghote erawh chu thîr tawlailîrte an neih avângin a hnawt chhuak thei lo a ni. 20 Tin, Mosian a lo sawi tawh angin Hebron khua chu Kaleba an pe a. Chuta mi Anaka fapate pathum chu a hnawt chhuak a. 21 Tin, Benjamina thlahte chuan Jebus-ho, Jerusalem khuaa awmte chu an hnawt chhuak lo; Jebus-hote chu Benjamina thlahte nên tûn thleng hian Jerusalem-ah an la chêng za ta reng a ni.

Ephraim leh Manase-hovin Bethel an la

22 Tin, Josefa chhûngte pawh chu Bethel khaw bei tûrin an thawk ve bawk a; tin, an hnênah LALPA a awm a. 23 Tin, Josefa chhûngte chuan Bethel khuaah chuan enthlatute an tîr a (A hma chuan chu khaw hming chu Luz a ni). 24 Tin, enthlatute chuan mi pakhat, khaw chhûng ata lo chhuak hi an han hmu a, a hnênah, “Khawngaih takin khawpui chhûng luhna min entîr teh khai; tichuan, ṭha takin kan ti dâwn che nia,” an ti a. 25 Tin, khawpui chhûng luhna chu a entîr a; tichuan, khandaihin chu khua chu an bei a; chu mi leh a chhûngte zawng zawng erawh chu an zuah a. 26 Tin, chu mi chu Hit-ho ramah a lût a, khua a siam a, chumi khaw hmingah chuan Luz a vuah a, tûn thlengin chumi hming chu a la pu a ni.

Israel-hovin an hnawh chhuah lohte

27 Tin, Manasea chuan Beth-san khua leh a khawpera awm te, Taanak khua leh a khawpera awm te, Dor khua leh a khawpera awm te, Ibleam khua leh a khawpera awm te, Megido khua leh a khawpera awmte chu a hnawt chhuak lo; chu ramah chuan Kanaan-hote erawh chu an awm ta reng a. 28 Tin, heti hi a ni a, Israela thlahte chu an lo chak tâk tial tial chinah chuan Kanaan-hote chu hnathawka rawih atân an awmtîr a, an hnawt chhuak fai vek ta lo. 29 Tin, Ephraima chuan Gezer khuaa Kanaan-ho awmte chu a hnawt chhuak lo; Kanaan-ho chu Gezer khuaah chuan an zîngah an chêng ve ta zâwk a ni. 30 Zebuluna chuan Kitron khuaa awmte leh Nahalol khuaa awmte chu a hnawt chhuak lo; Kanaan-ho chu an zîngah an chêng ve a, hnathawka rawih atân an awm ta zâwk a ni. 31 Asera chuan Ako khuaa awm te, Zidon khuaa awm te, Ahlab khuaa awm te, Akzib khuaa awm te, Helba khuaa awm te, Aphik khuaa awm te, Rehob khuaa awmte chu a hnawt chhuak lo. 32 Asera thlahte chu chumi rama awm Kanaan-hote zîngah chuan an chêng ve ta zâwk a ni; anni chuan an hnawt chhuak lo a ni. 33 Naphtalia chuan Beth-semes khuaa awm te, Beth-anath khuaa awmte chu a hnawt chhuak lo; chumi rama awm Kanaan-hote zîngah chuan a chêng ve ta zâwk a ni. Amaherawhchu, Beth-semes khuaa awmte leh Beth-anath khuaa awmte chu an hnathawka rawih atân an awm ta a ni. 34 Tin, Amor-ho chuan Dana thlahte chu tlâng ramah an hnawt chho va, ruama an chhuk an phal si lo va; 35 Amor-ho erawh chu Heres tlângah te, Aijalon khuaah te, Saalbim khuaah te an awm ta reng a; nimahsela, Josefa chhûngte kut chu a chak a, an hnathawka rawih atân an lo awm ta a ni. 36 Tin, Amor-ho ram chin chu Akrabim chhohna leh Sela aṭangin a chho ta zêl a ni.

Roreltute 2

Bokim khuaah LALPA vântirhkoh

1 Tin, LALPA vântirhkoh Gilgal khua aṭangin Bokim khuaah a han chho va. Tin, ani chuan, “Aigupta ram ata kha ka chhuahtîr che u a, in thlahtute hnêna chhechhama ka lo tiam tâk ramah khân ka hruai lût che u a, ‘In hnêna thu ka thlun kha ka bawhchhe tawp lo vang. 2 Tichuan, hêng rama awmhote nên hian thu thlung suh ula; an maichâmte tihchimsak ang che u,’ ka ti a. Nimahsela, ka thupêk in pawm lo va. Eng vângin nge hetianga in tih? 3 Chuvângin, ‘Anni chu ka hnawh chhuahsak tawh lo vang che u, in nâkahte hlîng ang an ni zâwk ang a; tin, an pathiante chu in tân thang an ni ang,’ ka ti bawk a nih kha,” a ti a. 4 Tin, heti hi a ni a, LALPA vântirhkohvin Israela thlahte zawng zawng hnênah chûng thu chu a han sawi chuan, mipuiho chu râwl chhuah meuhvin an ṭap ta hlawm a. 5 Tin, chumi hmun hmingah chuan Bokim an vuah a; tin, chutah chuan LALPA hnênah an inthawi ta a.

Josua thih thu

6 Josuan mipuite a ṭîn darhtîr hnu chuan, Israela thlahte chu mi tin mahni chanpual ṭheuh ram chu luah tûrin an kal ta a. 7 Josua dam chhûng leh upaho Josua khûma damte, LALPAN Israel-te tâna thil ropui tak a tih zawng zawng hmu ṭhîntute dam chhûng chuan mipuiten LALPA rawng an bâwl ṭhîn a. 8 Tichuan, Nuna fapa Josua, LALPA chhiahhlawh chu kum za leh kum sâwm miin a thi a. 9 Tin, Gaas tlâng hmâr lampang, Ephraim tlâng rama ama chanpual ramri chhûng, Timnath-heres khuaah chuan an phûm ta a. 10 Tin, chûng chhuan zawng zawngte pawh chu an thlahtute hnên lamah an kal khâwm zo ta a, chu mite hnuah chuan LALPA leh Israel-te tâna a thiltihte pawh hre lo chhuan dang an lo awm ta a.

Israel-ten LALPA biak an bâng

11 Tin, Israela thlahte chuan LALPA mit hmuhin thil sual an lo ti a, Baal-hote rawng an bâwl ta a. 12 LALPA, an thlahtute Pathian, Aigupta ram ata hruai chhuaktu kha an hawisan a; pathian dang, an kiang vêla awmho pathiante zînga mi chu an zui a, chibai an bûk ta a; tichuan, LALPA chu an tithinur ta a. 13 Tin, LALPA chu an hawisan a, Baala leh Astarothi rawng an bâwl ta a. 14 Chutichuan, LALPA thin chu Israel-te chungah chuan a ur ta a, anmahni rawk ṭhîntute kutah chuan a pe ta hlawm a, an hmêlma, an kiang vêla awmte hnênah chuan a hralh a; tichuan, an hmêlmate chu an chelh ta lo va. 15 Khawiah pawh kal sela, LALPA kut chu an chungah a chhe lamin a tla zêl a, LALPAN a lo sawi tawh ang leh, LALPAN an hnêna chhechhama a lo sawi tawh ang khân. Tichuan, mangan namênin an mangang ta lo va. 16 Tin, LALPAN rorêltute a siamsak a, chûngte chuan anmahni rawktute kut ata chu an rawn chhanchhuak ta a. 17 Chuti chung pawhin an rorêltute thu chu an pawm lo va, pathian dangte lakah chuan an uirê a, chibai an lo bûk ta zâwk a. An thlahtuten LALPA thupêkte pawma an zawh ṭhin kawng chu an pênsan ta thuai mai a. 18 Tin, LALPAN rorêltute a siamsak chuan, LALPA chu rorêltu hnênah chuan a awm a, rorêltu dam chhûng chuan an hmêlmate kut ata chu a chhanchhuak zêl a; anmahni hnehchhiah leh timangangtute avângin an rûm a; chuvângin, LALPA chu a inchhîr ta a. 19 Nimahsela, heti hi a ni a, rorêltu chu a thih veleh an hnungtawlh leh ta a; pathian dangte rawng bâwla, chibai bûk thu-ah an thlahtute ai mahin an lo che chhe lehzual ta a. An thiltih ṭhinte leh an luhlulte pawh an bâng hek lo. 20 Tin, LALPA thin chu Israel-te chungah chuan a ur ta a; tichuan, “He hnam hian an thlahtute thu ka pêk, ka thuthlun chu an bawhchhia a, ka thu an pawm ta si lo va; 21 chuvângin, kei pawhin tûn achinah zawng, Josua thih hmaa hnawh chhuah bâk hnamte hi ka hnawh chhuahsak tawh lo vang. 22 An thlahtute zawh ang khân LALPA dân an zawh dâwn nge dâwn lo tih Israel-hote fiah nân anmahni chu ka hmang ang,” a ti a. 23 Chutichuan, LALPAN chûng hnamte chu hnawt chhuak nghâl ta lovin a awmtîr ta a; Josua kutah pawh a pe ta hek lo.

Roreltute 3

Rama hnam dang la awmte

1 Hêng hnamte hi a ni LALPAN Israel-te Kanaan rama râl la bei ve ngai hauh lo fiahna tûra a awmtîrte chu, 2 chûng Israela thlah chhuanho, tûn hmaa eng mah la hre hauh lote chuan an lo hriat nân leh râl beih dân zirtîr tûr atân chauh awmtîr an ni; 3 chûngte chu Philistia-ho lal panga te, Kanaan mi zawng zawng te, Zidon-hote, Lebanon tlânga awm Hiv-hote an ni, Baal-hermon tlâng aṭanga Hamath khaw luhna thlengin. 4 LALPAN Mosia hmanga an thlahtute thu a lo pêkte kha, an pawm dâwn leh dâwn loh hriat nân chûngho chu Israel-te fiahna tûr an ni. 5 Tin, Israela thlahte chu Kanaan-hote, Hit-hote, Amor-hote, Periz-hote, Hiv-hote, Jebus-hote zîngah chuan an awm a. 6 Tin, an fanute chu nupuiah an nei a, an fanute chu an fapate an neihtîr thung a; an pathiante rawng an bâwl a.

Othniela

7 Tin, Israela thlahte chuan LALPA mit hmuhin thil sual an lo ti ta a, LALPA an Pathian chu an theihnghilh a, Baal-ho leh Astarothi rawng an bâwl ta a. 8 Chutichuan, LALPA thin chu Israel-te chungah chuan a ur ta a, Mesopotamia ram lal Kusan-risathaima hnênah a hralh ta a; tichuan, Israela thlahte chu Kusan-risathaima thuhnuaiah kum riat an awm a. 9 Tin, Israela thlahte chuan LALPA an auh veleh LALPAN Israela thlahte chu chhandamtu a siamsak a, chu mi chuan a chhandam ta a, chu chu Kaleba nau Kenaza fapa Othniela a ni. 10 LALPA thlarau chu a chungah a lo thleng a; tichuan, Israel-te ro a rêlsak ta a. Râl bei tûrin a va thawk a; tin, LALPAN Mesopotamia ram lal Kusan-risathaima chu a pe a; Kusan-risathaima chu a hneh ta a. 11 Tin, ram chu kum sawmli râlmuangin a awm a. Tin, Kenaza fapa Othniela chu a thi ta a.

Ehuda

12 Tin, Israela thlahte chuan LALPA mit hmuhin thil sual an lo ti leh ta a. Chutichuan, LALPA mit hmuha thil an lo tihsual avângin LALPAN Moab lal Eglona chu Israel-te laka chakin a siam a. 13 Tin, ani chuan Amona thlahte leh Amalek-hote a pun khâwm a, Israel-hote chu a va bei a, tûm khawpui chu a luah ta a. 14 Tichuan, Israela thlahte chu Moab lal Eglona thuhnuaiah kum sâwm leh kum riat an awm a. 15 Nimahsela, Israela thlahte chuan LALPA an han auh veleh LALPAN Gera fapa Ehuda, Benjamin mi, veikhawr, chhandamtu a siamsak a. Amah chu Israela thlahte chuan Moab lal Eglona pêk tûrin lâwmman an kentîr a. 16 Tin, Ehuda chuan khandaih hriam tawn, tawng chena seiin a chher a; chu chu a malpui ding lam puan hnuaiah a taivawn a. 17 Tin, Moab lal Eglona chu lâwmman chu a han pe a; Eglona chu mi thau tak a ni a. 18 Tin, Ehudan lâwmman a han pêk zawh veleh chuan lâwmman kengtute chu a kaltîr leh ta a. 19 Ani erawh chu Gilgal khaw kianga lung chherna hmun aṭangin a lêt leh a, “I e lalpa, thurûk hrilh tûr che ka nei e,” a ti a. Tin, ani chuan, “Ngawi ṭhiap rawh u,” a ti a. Tichuan, a bula dingho zawng zawngte chuan an chhuahsan ta vek a. 20 Tin, Ehuda chu a hnênah a va kal a; ani chu a thlan daihna pindanah amah chauhvin a lo ṭhu a. Tin, Ehuda chuan, “Pathianin i hnêna sawi tûr thu mi chah e,” a ti a. Tichuan, lal chu a ṭhutphah ata chu a tho va. 21 Tin, Ehuda chuan a kut vei lamin a malpui ding lama khandaih chu a han phawi a, a pumah a chiu ta vak mai a. 22 A fawng pawh chu a lût pil hmawk a, a hnungah a tlang a ni; tin, a khandaih chu thauvin a hnawh tlat avangin a phawi lo. 23 Chutichuan, Ehuda chu hulhliapah a chhuak a, pindan kawngkhârte chuan a khârkhung a, a kalh ta tlat a. 24 Tin, chutia a chhuah tâk hnu chuan chhiahhlawhte chu an lo kal a; tin, an han hmuh chuan ngai teh, pindan kawngkate chu a lo inkalh tlat mai a, “A thlan daihna pindanah a inthiarfihlîm rih a ni ang chu maw,” an ti a. 25 Tin, hrilhhai khawpa an nghah reng hnu pawhin pindan kawngkate chu a hawng ta hauh lo mai a. Chutichuan, chabi an la a, an han hawng a. Ngai teh, an lalpa chu chhuatah chuan thiin a lo lum dêr mai a. 26 Tin, Ehuda lah chu khatia an nghah reng chhûng khân a lo tlân bo tawh a. Lung chherna hmun kha a pêl a, 27 Seira-ah a tlân a. Tin, heti hi a ni a, chumi hmun a thlen chuan Ephraim tlâng ramah chuan tawtawrâwt a hâm a; tin, Israela thlahte chu tlâng ram ata a hnênah an chhuk a, ani chuan an hma a hruai ta a. 28 Tin, ani chuan an hnênah, “Mi zui rawh u khai, LALPAN in hmêlma Moab-hote hi a pe tawh che u a ni,” a ti a. Tichuan, an zui thla a, Moab ram dep Jordan lui kaite chu an chhuhsak a, tu mah an kaitîr lo. 29 Chumi ṭum chuan Moab-ho sângkhat lai, mi âwmkhauh ṭhiau leh mi chak huaisen ṭha ṭhiau an that a; pakhat mah tlân chhuak an awm lo. 30 Chutichuan, chumi ni chuan Moab-hote chu Israel-hote lakah an tlâwm ta a; tin, ram chu kum sawmriat chhûng râlmuangin a awm a.

Samgara

31 Tin, a hnuah chuan Anatha fapa Samgara a lo lang ve a, chu mi chuan Philistia-ho mi zaruk chu sebâwng chhunna tiangin a chhun hlum a; amah bawk chuan Israel-hote chu a chhandam a ni.

Roreltute 4

Debori leh Baraka

1 Ehuda thih hnu chuan Israela thlahten LALPA mit hmuhin thil sual an lo ti leh ta a. 2 Tichuan, Hazor khaw ṭhuttu, Kanaan ram lal Jabina hnênah chuan LALPAN a hralh ta a. Chu mi sipai hotu ber chu Sisera a ni a, Jentailte ram Haroseth khuaa awm a ni. 3 Tin, Israela thlahte chuan LALPA an au va; Jabina chuan thîr tawlailîr zakua lai a nei a; tin, kum sawmhnih chhûng zet Israela thlahte chu nasa takin a lo hnehchhiah tawh a ni. 4 Tin, chûng lai chuan zâwlnei Debori, Lapidotha nupuiin Israel-te ro a rêl a. 5 Ephraim tlâng rama Rama leh Bethel khaw inkara Debori tûm thing hnuaiah a awm ṭhîn a; tin, Israela thlahte chu a hnênah an ro rêltîr tûrin an kal ṭhîn. 6 Tin, Kedes-naphtali ram ata Abinoama fapa Baraka chu a chah a, a hnênah, “LALPA, Israel-te Pathianin, ‘Tabor tlângah han kal langin, Naphtalia thlahte leh Zebuluna thlahte mi sîngkhat hruai rawh. 7 Tichuan, Kison luiah Jabina sipai hotu Sisera chu a tawlailîrte leh a hote nên ka rawn tîr ang a; tin, ani chu ka pe che,’ tiin thu a pe a ni lâwm ni?” a ti a. 8 Tin, Barakan a hnênah, “Mi kalpui la; tichuan, ka kal ang e; mi kalpui dâwn loh erawh chuan ka kal lo vang,” a ti a. 9 Tin, ani chuan, “Ka kalpui mawlh ang che; amaherawhchu, i kalnaah chuan hmingṭhat i hlawh dâwn lo a nih chu; LALPAN Sisera chu hmeichhe hnênah a hralh dâwn a ni e,” a ti a. Tin, Debori chu a tho va, Baraka hnênah Kedes khaw lamah chuan a kal ve ta a. 10 Tin, Baraka chuan Zebulun-ho leh Naphtali-ho chu Kedes-ah a chah khâwm a; mi sîngkhat amah nên an han kal a, Debori pawh a hnênah chuan a han kal ve a. 11 Tin, Ken mi Hebera chu Ken mi Mosia puzawn Hobaba thlahte zîng ata a lo awm hrang a, Kedes kianga Zaananim rama sasaw thing hmun daiah a puan in a va zâr a. 12 Tin, Abinoama fapa Baraka chu Tabor tlângah a chho tih Sisera an hrilh a. 13 Tichuan, Sisera chuan a tawlailîr zawng zawng, thîr tawlailîr zakua leh a hote chu Jentailte ram Haroseth khua ata, Kison luiah a khâwm chiam a. 14 Chutichuan, Debori chuan Baraka hnênah, “Khai le, vawiin hi LALPAN Sisera a pêk ni che a ni e. I hma hruaitu chu LALPA a ni lâwm ni?” a ti a. Tichuan, Baraka chu Tabor tlâng ata a chhuk a, mi sîngkhatin an zui thla a. 15 Tin, LALPAN Sisera leh a tawlailîr zawng zawng leh, a sipaiho zawng zawngte chu khandaihin Baraka hmaah chuan a tibuai ta nuaih hlawm a; tin, Sisera chu a tawlailîr ata a chhuk a, kein a tlân bo ta daih a. 16 Baraka erawh chuan tawlailîrte leh sipaiho chu Jentail ram Haroseth thleng chuan a ûm ta a; tichuan, Sisera sipaiho zawng zawngte chu khandaihin an that vek a; pakhat mah dam an awm lo. 17 Sisera erawh chu Ken mi Hebera nupui Jaeli puan inah kein a tlân lût a; Hazor lal Jabina leh Ken mi Hebera chhûngte chu inrem reng an ni a. 18 Tin, Jaeli chu Sisera hmuak tûrin a lo chhuak a, a hnênah, “Ka pu, lo lût rawh, ka hnênah lo lût rawh; hlau suh,” a ti a. Tichuan, puan in chhûngah chuan a hnênah a lût ta a; tin, ani chuan puanin a khuh a. 19 Tin, a hnênah, “Khawngaih takin tui tlêm te mi han pe teh khai, ka tui a hâl êm mai e,” a ti a. Tin, bâwnghnute ûm a han hawng a, a intîr a, a khuh leh ta a. 20 Tin, a hnênah, “Puan in kawngkaah khân ding la; tichuan, ‘Hetah hian mi an awm em?’ tia an rawn zawh che chuan, ‘Awm lo,’ lo ti zêl ang che,” a ti a. 21 Chutichuan, Hebera nupui Jaeli chuan puan in khenkilhna a la a, tuboh a keng a, zawi tein a phei a, khenkilhna chuan a bekbawrah a khêng a, a khêng tlang a, leiah a bûr ta ngur mai a; a chauvin a mut a tui hle mai si a. Tichuan, a thi ta a. 22 Tin, ngai teh, Barakan Sisera a rawn ûm chu va hmuah tumin Jaeli chu a va chhuak a, a hnênah, “Lo kal teh khai, i mi zawna chu ka lo entîr teh ang che,” a ti a. Tichuan, a hnênah a va kal a; tin, ngai teh, Sisera chu a lo thi reng mai a, puan in khenkilhna chu a bekbawrah a lo bûr ngur mai a. 23 Chutichuan, Pathianin chumi ni chuan Israela thlahte hmaah Kanaan ram lal Jabina chu a titlâwm ta a. 24 Tichuan, Israela thlahte chu Kanaan ram lal Jabina lakah an lo chak ta deuh deuh va, Kanaan ram lal Jabina chu chhe dêr khawpin an lo siam ta a.

Roreltute 5

Debori leh Baraka hla

1 Chutichuan, Debori leh Abinoama fapa Baraka chuan chumi ni chuan: 2 “Hotute chuan Israel zîngah zai an zâp a. Mipuite chu châk takin an lo inpêk tâk hi, LALPA chu fak rawh u. 3 “Aw, nangni lalte u, lo ngaithla ula; Aw, nangni hotute u, beng lo chhi rawh u; Keimah ngeiin LALPA chawimawiin hla ka sa ang a, LALPA, Israel-te Pathian fakin hla ka sa ang. 4 “LALPA, Seir ram ata i lo kal chhuaha, Edom phûl ata i lo kal chhuah khân, Lei chu a nghîng dur dur a, vânte pawh a lo far a, A ni, chhûmte chuan ruah a sûrtîr a. 5 Tlângte chu LALPA hmaah a lo khûr a, Sinai tlâng lam pawh saw - LALPA, Israel-te Pathian hmaah chuan. 6 “Anatha fapa Samgara dam lai te leh, Jaeli dam laite khân lamliante chu a ṭhing ṭhup a. Zin veivâkte chu kawng mai maiahte an kal ṭhîn a. 7 Israel rama khuate chu luah lohvin a ram zo va, a ram zo va, Kei Debori hi ka chêta, Israel ram nu hi ka chêt hma loh kha chuan. 8 Pathian tharte an vuan a; Tichuan, kulh kawngkhâr bulahte khân indona a lo awm a; Israel rama sîngli zet zîngah Phâw leh fei kha awm rêng rêng a awm em ni? 9 Ka rilru chu Israel-hote rorêltu, Mipuite hnêna chak taka inpete lamah chuan a awm: LALPA chu fak rawh u. 10 “Nangni sabengtung vâr chunga chuangte u, Nangni puan phah chhah taka ṭhute u; Nangni mi mirte u, chûng thute chu puang rawh u. 11 Thal kâptute thâwm rêng rêng hriat phâk loh, Tui chawina hmunah chuan, LALPA thil fel tihte chu an sawi an sawi ang, Israel ram chunga a thil fel tihte ngei chu. “Chutichuan, LALPA mipuite chu kulh kawngkhâr lamahte chuan an zu chhuk a. 12 “Harh la, harh la, Debor; harh la, harh la, hla sa rawh. 13 “Tichuan, mi lian la awm chhunte leh mipuite chu an lo chhuk a; Mi chak tak mi beihpui tûrin LALPA chu a lo chhuk ta. 14 Amaleka zungzâmte chu Ephraim aṭangin an lo chhuk a; Benjamin, i mite zînga miten an rawn zui che, Makir aṭangin ram rorêltute an lo chhuk; Tin, Zebulun aṭangin ziaktu tiang kengtute chu an lo chhuk, 15 Isakar mi liante chu Debori hnênah an tel a; Isakara angin Baraka pawh Ruam lamah chuan amah nên an tlân chhuk chiam a. Reuben-ho tui luannaahte chuan An tum a urh hle mai. 16 Eng atân nge berâm huang kârahte i ṭhut reng, Berâm rual kohna phênglâwng ngaithla tûr maiin? Reuben-ho tui luannaahte chuan Ngun taka inngaihtuah chhuahna a awm. 17 Gilead-ho chu Jordan râlah an awm reng a; tin, Dan-ho chu engah nge lawngahte an awm reng? Aser-ho chu tuifinriat kamah an ṭhu hle hle a, an litengsâwlahte chuan an awm reng. 18 Zebulun-ho leh Napthali-ho hi Phûl hmun sânga thih huam reng mi an ni. 19 “Lalten an rawn bei a; Tichuan, Kanaan lalte chuan Megido tui kiang, Taanak khuaah an bei a; Sum lâk rêng an nei lo. 20 Vân aṭangin an rawn bei a; Arsiten an hmun aṭangin Sisera chu an rawn bei a. 21 Kison luiin anni chu a hnâwl vek a, Hmasâng lui, Kison lui chuan. Aw ka thlarau, chak takin kal zêl rawh. 22 Tichuan, sakawrte chu an per ta tlut tlut a, Sakawr chakte chu an zuan an zuan avângin. 23 ‘Meroz chu ânchhia lawh ru,’ LALPA vântirhkohvin a ti. ‘Chuta awmte chu nasa takin ânchhia lawh rawh u; LALPA ṭanpuiin, LALPAN mi chak tak a beihnaa ṭanpui tûra an lo kal loh vângin.’ 24 “Hmeichhia azawngah Jaeli, Ken mi Hebera nupui hi engthâwl ber a ni ang, Hmeichhia puan ina chêngho azawngah chuan engthâwl ber a ni ang. 25 Ani chuan tui a rawn dil a, hnutetui a lo pe a, Mi ṭha novin hnutetui khal a lo pe a. 26 Kilhna a keng a, A ding lamin hnathawk mi tuboh; Tin, tuboh chuan Sisera chu a khêng a, a luah a khêng tlang a; A ni, a bekbawrah chuan a khêng a, a khêng bûr ta ngur a. 27 A ke bulah a awp rawk a, a tlu a, a bawk ta dêr a; A ke bulah a awp rawk a, a tlu ta a; A awp rawkna hmunah chuan a thi ta dêr mai. 28 “Sisera nu chu tukverhah a han dâk a, Zâwngdaikalh âwngah a au va, ‘Engati nge a tawlailîr a lo thlen har? Engati nge a tawlailîr a muan?’ a ti. 29 A hmeichhe fingten an lo chhâng a, A ni, amah a inchhâng chawp leh a, 30 ‘An hmu zo ta lo vem ni? Râllâk an insem ta lo vem ni le? Mi tinin nula pahnih khat emaw ṭheuh; Sisera chan tûr chu râllâk puan ze hrang hrang, Râllâk puan zeh mawi, ze hrang hrang, Râllâl nghâwnga bah tûr puan a khing hniha zeh mawi, ze hrang hrang,’ tiin. 31 “Chutiang chuan aw LALPA, i hmêlmate zawng zawng chu boral vek sela! Amah hmangaihtute erawh chu chak taka kal, ni ang hi ni rawh se,” tiin hla an sa a. Tin, ram chu kum sawmli chhûng râlmuangin a awm a.

Roreltute 6

Gideona

1 Tin, Israela thlahte chuan LALPA mit hmuhin thil an lo tisual leh ta a; tichuan, LALPAN Midian-ho kutah kum sarih a awmtîr a. 2 Tin, Midian-hote chu Israel-hote lakah chuan an lo chak ta hle a. Midian-hote avâng chuan Israela thlahte chu tlângah te, pûkah te, kulhah te an biru a. 3 Tin, heti hi a ni a, Israel-hoten thil an han chîn te hian Midian-hote, Amalek-hote, khawchhak fateho chu an han chho va, 4 an han bei a, awmhmun an han khuar a, Gaza thlengin leia thil ṭote chu an tihchhiatsak a, Israel ramah ei tûr rêng rêng an zuah lo, berâm te, bâwng te, sabengtung te lamin. 5 An ran rualte leh an puan inte nên an thawk a, khau ang maiin tam tak an thawk si ṭhîn a; anmahni leh an sanghâwngseite chu chhiar sên pawh an ni lo; ram chu tichhe tûrin an kal ṭhîn a ni. 6 Chutichuan, Israel-hote chu Midian-ho avâng chuan an lo rethei ta hle mai a; tin, Israela thlahte chuan LALPA chu an au ta a. 7 Tin, heti hi a ni a, Midian-ho avânga Israela thlahten LALPA an han auh veleh chuan, 8 LALPAN Israela thlahte hnênah chuan zâwlnei a rawn tîr a, ani chuan an hnênah, “LALPA, Israel-te Pathianin heti hian a ti a ni, ‘Aigupta ram ata ka hruai chho che u a, bawih ata ka hruai chhuak che u a; 9 Aigupta-ho kut ata leh, hnehchhiahtu che u zawng zawng kut ata chu ka chhanchhuak che u a, in hma ata anmahni chu ka hnawt chhuak a, an ram chu ka pe che u a; 10 tin, keiin, “Kei hi LALPA in Pathian ka nih hi, hêng in awmna ram neitu Amor-ho pathiante hi in hlau hlek tûr a ni lo ve,” ka ti a; nimahsela, ka thusawi chu in pawm si lo,’ a ti e,” a ti a ni. 11 Tin, LALPA vântirhkoh a lo kal a, Ophra khuaa Abiezrit mi Joasa sasaw thing hnuaiah a ṭhu a; tin, a fapa Gideonan Midian-hote hmuh theih loh tûrin grêp sâwrna khurah buh a lo vua a. 12 Tin, LALPA vântirhkoh chu a hnênah a rawn inlâr a, a hnênah, “Nang mi chak huaisen, LALPA chu i hnênah a awm e,” a ti a. 13 Tin, Gideonan a hnênah, “Aw ka pu, LALPA kan hnêna a awm si chuan, engtizia nge hetianga kan chunga thil a lo thlen si? Min thlahtute khân, ‘LALPAN Aigupta ram ata chu min hruai chho a ni lâwm ni?’ tia a thiltih mak tak takte min hrilh ṭhinte kha khawiah nge a nih zawh tâk? Tûnah zawng LALPAN min thlauthla dêr tawh a, Midian-ho kutah min pe tawh alâwm,” a ti a. 14 Tin, LALPA chuan amah chu a en a, a hnênah, “He i chakna hian kal la, Israel-ho hi Midian-ho lak ata chhandam ang che. Ka tîr che a ni lâwm ni?” a ti a. 15 Tin, ani chuan a hnênah, “Aw LALPA, engtin nge Israel-hote hi ka han chhandam tehlul ang? Ngai teh, Manasea thlah zîngah hnam rethei ber kan ni a, kei lah hi ka pa chhûngte zînga tê ber ka ni si a,” a ti a. 16 Tin, LALPA chuan a hnênah, “I hnênah ka awm zêl dâwn alâwm; tichuan, Midian-ho chu pakhat ang maiin i hneh vek mai ang,” a ti a. 17 Tin, ani chuan a hnênah, “I mit tlung ka lo nih chuan, nangmah ngeiin mi bia a ni tih chhinchhiahna eng emaw mi entîr ta che. 18 I hmaa hlan tûr thilpêk ka va lâka, i hnêna ka lo kal leh hma loh chuan heta ta hi khawngaih takin lo kal bo hauh suh ang che,” a ti a. Tin, ani chuan, “I lo kal leh hma loh chu ka lo awm reng ang e,” a ti a. 19 Tin, Gideona chu a lût ta a, kêlno leh chhangphut epha khat, dawidim telh loh a buatsaih a. A sa chu fawngah a dah a, a tui chu bêlah a dah a; tin, sasaw thing hnuaiah a hnênah chuan a rawn keng a, a rawn hlân a. 20 Tin, Pathian vântirhkoh chuan a hnênah, “Sa leh chhang dawidim telh loh kha la langin, he lung chungah hian dah la, a tui kha bun chhuak rawh,” a ti a. 21 Chutiang chuan a han ti a. Chutichuan, LALPA vântirhkoh chuan a tiang ken hmâwr chuan sa leh chhang dawidim telh loh chu a han khawih a; tin, lung aṭang chuan mei a lo chhuak a, sa leh chhang dawidim telh loh chu a kâng ral ta vek a. Tin, LALPA vântirhkoh chu a hmuh theih lohvah a kal ta a. 22 Chutichuan, Gideona chuan LALPA vântirhkoh a ni tih a hre ta a. Tin, Gideonan, “E khai aw, aw LALPA PATHIAN! LALPA vântirhkoh chu a hmaichhan ngeiah ka hmuh tâk chu le,” a ti a. 23 Tin, LALPAN a hnênah, “Thlamuang takin awm la; hlau suh, i thi lo vang,” a ti a. 24 Chutichuan, Gideonan chutah chuan LALPA tân maichâm a siam a, Jehova-salom a vuah a. Tûn thlengin Abiezrit mite khua Ophra-ah a la awm reng a ni. 25 Tin, heti hi a ni a, chu zân vêkah chuan LALPAN a hnênah, “I pa bâwngpa, bâwngpa pahnihna kum sarih mi chu la langin, i pa neih Baala maichâm hi tichim la, a bula Aseri hi kit rawh; 26 tin, he kulh chungah hian kawngzâwng nei têin LALPA i Pathian tân maicham siam langin, bâwngpa pahnihna chu la la, Aseri i kih tûr thing hmangin hâlral thilhlan hlân rawh,” a ti a. 27 Chutichuan, Gideona chuan a chhiahhlawhte zînga mi sâwm a hruai a, LALPAN a hnêna a sawi ang chuan a ti ta a; tin, heti hi a ni a, a pa chhûngte leh khawpuia mite chu a hlauh avângin chhûnah a ti ngam lo va, zânah a ti a ni. 28 Tin, khawpuia mite chu zîng taka an han thawh chuan ngai teh, Baala maichâm chu tihchimin a lo awm a, a bula Aseri chu kih thlûkin a lo awm a, maichâm siam chunga bâwngpa pahnihna hlan chu a lo awm ta mai a. 29 “Hei tu tih nge maw ni chu le?” tiin an inbe hlawm a. Tin, an han inzawha, an han indap vêl hnu chuan, “Joasa fapa Gideona tih a lo ni reng alâwm maw le,” an ti ta a. 30 Tichuan, khawpuia mite chuan Joasa hnênah, “I fapa chu han hruai chhuak rawh, a thi ngei tûr a ni; Baala maichâm a tihchim avâng leh a bula Aseri a kih avângin,” an ti a. 31 Tin, Joasa chuan amah rawn khingtu zawng zawngte hnênah chuan, “Baala chu in ṭan dâwn a ni maw? Amah chu in hum dâwn a ni maw? Tu pawh amah ṭan apiang chu zîngah la la hian tihhlum tûr a ni! Pathian a nih chuan a maichâm tihchim avângin inṭan chawp ang hmiang,” a ti a. 32 Chutichuan, “A maichâm tihchim avângin Baalan amah khing rawh se,” tiin, chumi ni chuan Jerubaala a vuah ta a. 33 Tichuan, Midian-ho zawng zawngte leh, Amelek-hote leh, khawchhak fate chu an pung khâwm chiam a; lui an kân a, Jezreel ruamah an inkulh a. 34 Nimahsela, LALPA Thlarau chu Gideona chungah a lo thleng a; tin, tawtawrâwt a han hâm a, Abiezrit-ho chuan an pan khâwm ta chiam a. 35 Tin, Manase-ho zawng zawng zîngah mite a tlântîr a, chûngho pawh chuan an pan khâwm ta chiam a. Aser-ho hnênah te, Zebulun-ho hnênah te, Naphtali-ho hnênah te pawh mite a tlântîr a; anni pawh chuan an han fin ve ta a. 36 Tin, Gideonan Pathian hnênah, “I sawi anga keima kuta Israel-te hi i chhandam dâwn chuan, 37 ngai teh, hruih zâwlah berâm hmul ka dah ang a; berâm hmulah chauh chuan dai a lo awma, lei zawng zawng chu a lo ro vek chuan, i sawi angin keima kutin Israel-te hi i chhandam dâwn a ni tih ka hria ang,” a ti a. 38 Chutiang chu a lo ni ngei a. A tûk zîng taka a han thawha, berâm hmul chu a han hmeh sâwr chuan berâm hmula mi chu dai berhbu khat zet a han sâwr chhuak ta mai si a. 39 Tin, Gideonan Pathian hnênah, “Ka chungah thinrim suh ang che, vawi khat chauh ka han sawi leh teh ang: khawngaih takin, vawi khat tal berâm hmulin mi fiahtîr leh teh ang che; tûn ṭumah chuan berâm hmul chauh chu lo hul sela, lei chung zawng zawngah dai lo awm leh thung rawh se,” a ti a. 40 Tin, chutiang chuan Pathianin chumi zân chuan a rawn ti a. Berâm hmul chauh chu a lo hul a, lei chung zawng zawngah chuan dai a lo awm ta thung a.

Roreltute 7

Gideonan Midian-ho a hneh

1 Chutichuan, Jerubaala (chu mi chu Gideona a ni) leh a hnêna mipui awm zawng zawngte chu zîng takah an tho va, Harod lui bulah an inkulh a; tin, Midian-hote kulh chu an awmna hmâr lampang More tlâng bul ruamah a ni. 2 Tin, LALPAN Gideona hnênah, “I hnêna awmte kha Midian-hote an kuta ka pêk nân zawng an tam lutuk e; chuti lo zawng, Israel-hoten, ‘Keimahni kut ngeia inchhandam kan ni alâwm,’ tiin mi uan khum dah ang e. 3 Chuvângin, ngai teh, mipuihote beng hriatah, ‘Tu pawh hlau leh khûr apiang chu kîr leh sela, Gilead tlâng ata hi haw leh rawh se,’ tiin puang rawh,” a ti a. Tichuan, mipuite chu sînghnih leh sânghnih an kîr leh a; tin, sîngkhat an la awm a. 4 Tin, LALPAN Gideona hnênah, “Mite kha an la tam lutuk fo mai; luiah hruai thla la, chutah chuan keiman ka thliarsak ang che. Heti hi a ni ang a, ‘He mi hi chu i hnênah kal ve rawh se,’ ka tih apiang chu i hnênah kal sela; tin, ‘He mi hi chu i hnênah kal ve suh se,’ ka tih apiang chu kal suh se,” a ti a. 5 Chutichuan, mipuite chu luiah chuan a hruai thla a. Tin, LALPAN Gideona hnênah, “Ui anga an leia tui a liaha liak apiangte chu a hrangin dah zêl langin; chutiang bawkin kûna ṭhingṭhia tui dâwt apiangte pawh,” a ti a. 6 Tin, an kutphaha mi a liaha liakte chu mi zathum an ni a, mi dang zawng zawng chu kûna ṭhingṭhia tui dâwt vek an ni. 7 Tichuan, LALPAN Gideona hnênah, “Mi zathum, a liaha liakate kha hmangin ka chhandam dâwn che u a, Midian-hote hi i kutah ka pe dâwn a ni. Mipui zawng zawngte chu mahni hmun ṭheuhvah haw vek rawh se,” a ti a. 8 Chutichuan, mipuite chuan ei tûrte leh an tawtawrâwtte chu an keng a. Tin, Israel mi zawng zawngte chu an puan in lamah a hawtîr ta vek a, mi zathumte erawh chu a awmtîr a. Midian-ho kulh chu an hnuai ruamah chuan a ni. 9 Tin, heti hi a ni a, chumi zânah chuan LALPAN a hnênah, “Tho la, kulhah chuan zuk chhuk rawh khai; i kutah ka pe tawh e. 10 Amaherawhchu, zu chhuk i hlauh chuan, i chhiahhlawh Pura nên hian kulhah chuan zuk kal phawt ula; 11 tichuan, an thusawi i hria ang a; chumi hnuah zawng i kut chu tihchakin a awm ang a, kulhah chuan i kal ngam tawh ang,” a ti a. Chutichuan, a chhiahhlawh Pura nên chuan kulha râl vêngho tawntirh ber awmnaah chuan an zuk kal a. 12 Tin, Midian-hote leh Amalek-hote leh khawchhak fateho zawng zawng chu, ruamah chuan khau ang maiin tam tak an lo awm hmur mai a; an sanghâwngseite chu chhiar sên rual loh, an tam lam chu tuifinriat kama ṭiauvaivut zât zet a ni a. 13 Tin, Gideona a zuk thlen chuan, ngai teh, mi pakhat hian a ṭhianpa chu a mumang a lo hrilh a, a hnênah, “Ngai teh, mumang ka lo nei a; tin, ngai teh, barli chhang hlâwm hi Midian-ho kulhah hian a lo lum a, puan inah hian a lo lum lût a, a rawn tichim a, a tiletling tawp a, puan in chu a pêr ta thlawp mai a,” a ti a. 14 Tin, a ṭhianpa chuan a chhâng a, “Chu chu Israel mi, Joasa fapa Gideona ngûnhnâm a nih mai chu! Pathianin Midian-ho leh sipaiho zawng zawng chu a kutah a pe a nih chu,” a ti a. 15 Tin, chuti chu a ni a, Gideonan chu mumang leh a awmzia an inhrilhfiah chu a hriatin, Pathian a be ta a. Tichuan, Israel-hote kulh lamah chuan a kîr leh a, “Tho rawh u khai; LALPAN Midian sipaihote chu in kutah a pe tawh e,” a ti a. 16 Tichuan, mi zathumte chu pâwl thumah a siam a, an vai chuan tawtawrâwt leh bêl ruak, a chhûnga meichher dah sa a pe ṭheuh va. 17 Tin, ani chuan an hnênah, “Mi en ula, ka tih angin ti ve zêl ang che u; tin, ngai teh u, kulh tawntirh ber ka thlen veleh ka tih ang zêlin ti ve ang che u: 18 kei leh ka hnêna awm zawng zawngte hian tawtawrâwt kan han ham veleh, kulh vêla awm zawng zawngte pawhin tawtawrâwt in hâm vek bawk ang a, ‘LALPA tân leh Gideona tân,’ ti ṭheuh vang che u,” a ti a. 19 Chutichuan, Gideona leh a hnêna awm mi zate chuan zân vên laita, râlvêng an inthlâk hlimchhâwn lai takin kulh tawntirh an zuk thleng a; tin, tawtawrâwt chu an han hâm a, an bêl ken chu an tikeh sawm vek a. 20 Tin, a pâwl thum chuan tawtawrâwt chu an hâm a, an bêl chu an tikeh a, an vei lamin meichher an keng a, an ding lamin tawtawrâwt ham tûr an keng a; tin, “LALPA leh Gideona ngûnhnâm!” tiin an au dur dur a. 21 Tin, kulh vêlah chuan mi tin chu mahni dinna hmun ṭheuhvah an ding vek a; tichuan, sipaiho zawng zawng chu an tlân ta a; tin, an au chiam a, an tlânchhiattîr ta a. 22 Tin, tawtawrâwt zathum chu an hâm a; tin, LALPAN sipaiho zawng zawngte chu anmahni leh anmahni khandaihin a inbeihtîr ta chiam a; tichuan, sipaihote chu Zerera lampang Beth-sita thleng, Tabath kiang Abel-mehola ramri thlengin an tlânchhia a. 23 Tin, Israel-ho chu Naphtali aṭang te, Aser aṭang te, Manase zawng zawng aṭang te chuan an pung khâwm a, Midian-ho chu an ûm ta a. 24 Tin, Gideonan Ephraim tlâng ram zawng zawngah chuan, “Midian-ho hi rawn bei rawh u, Beth-bara thlengin luite chu lo lâk khalh ang che u, Jordan lui nên,” tiin mite a tlân vêltîr a. Chutichuan, Ephraim-ho zawng zawng chu an pung khâwm a, Beth-bara thlengin luite chu Jordan lui nên an lo lâk khalh vek a. 25 Tin, Midian lal pahnih Oreba leh Zeeba an man a. Oreba chu Oreb lungpuiah an that a, Zeeba chu Zeeb grêp sâwr khurah an that a. Midian-ho chu an ûm ta a; Oreba leh Zeeba lu chu Jordan lui râla Gideona hnênah an rawn la a.

Roreltute 8

Midian-ho tihtlâwm

1 Tin, Ephraim-hote chuan a hnênah, “Engtiziaa hetianga min ti nge i niha, Midian-ho i beihnaah chuan min sâwm ve loh?” an ti a, an hau nasa hle mai a. 2 Tin, ani chuan an hnênah, “Nangni aiin eng nge ka tihuchuak bîk le? Abiezer-ho grêp lawh ai hian Ephraim-ho grêp hmaih chhar hi a nasa zâwk lo vem ni? 3 Pathianin Midian-ho lal Oreba leh Zeeba chu in kutah a rawn pe ta a ni a. Tichuan, nangni ai hian keiin eng nge ka lo tihuchuak theih bîk ni?” a ti a. Chutichuan, chumi thu a han sawi chuan a chunga an thinrim chu a reh ta a. 4 Tin, Gideona leh a hnêna mi zathum awmte chuan Jordan lui chu an zuk thleng a, an kân a, chau chung chungin an ûm zêl a. 5 Tin, Sukkoth khuaa mite hnênah chuan, “Hêng ka hnungzuite hi khawngaih takin chhangpêr pe teh u khai; an chau tawh êm mai a, Midian-ho lal Zeba leh Zalmuna ka ûm a ni e,” a ti a. 6 Tin, Sukkoth khuaa mi lianhote chuan, “Zeba leh Zalmuna chu i kuta awm tawh ang renga chutia i sipaihote chhang kan han pêk mai tûr chu?” an ti a. 7 Tin, Gideona chuan, “Aw le, LALPAN Zeba leh Zalmuna chu ka kuta mi pêk hunah, thlalêr hlîng leh hnimhlîngneite chuan in taksa chu ka chhun thlêr diai duai mai ang maw le,” a ti a. 8 Tin, chuta ṭang chuan Penuel-ah a han kal a, an hnênah chutiang bawk chuan a sawi leh a: tin, Penuel khuaa mite chuan Sukkoth khuaa mite chhân ang bawkin an lo chhâng ve a. 9 Tin, Penuel khuaa mite hnênah chuan, “Remna thu hâwna ka lo kîr leh hunah he kulh hi ka rawn tichim ang maw le,” tiin a sawi bawk a. 10 Zeba leh Zalmuna chu Karkor-ah an awm a, an sipaihote khawchhak fate sipaiho thi bâng zawng zawng, sîngkhat leh sângnga laite nên; khandaih keng mi ṭhiau nuai khat leh sînghnih an thi si a. 11 Tin, Gideona chu Noba leh Jogbeha chhak lama puan ina chênghote kawngah a han chho va, sipaihote chu a han bei a; sipaihote chu râlmuang takin an lo awm si a. 12 Tin, Zeba leh Zalmuna chu an tlânchhe ta a; tin, ani chuan a ûm a; tichuan, Midian-ho lal pahnih Zeba leh Zalmuna chu a man a, sipaiho zawng zawngte chu a tibuai ta nuaih nuaih a. 13 Tin, Joasa fapa Gideona chu Heres chho aṭangin indona ata chu a kîr leh ta a. 14 Tin, Sukkoth khaw tlangvâl pakhat hi a man a, thu te a zâwt a; tichuan, Sukkoth khuaa mi lianhote leh upate hming chu a ziaksak vek a, sawmsarih leh pasarih an ni a. 15 Tin, Sukkoth khuaa mite hnênah chuan a han kal a, “Zeba leh Zalmuna hi en teh u le, he mite hi alâwm, ‘Zeba leh Zalmuna chu i kuta awm tawh reng anga chutia i mi chaute chhang kan han pêk mai tûr chu?’ tia mi tihel vei kha,” a ti a. 16 Tichuan, chumi khaw upate chu a man a, thlalêr hlîng leh hnimhlîngneite chuan Sukkoth mite chu a zirtîr a. 17 Tin, Penuel khaw kulh chu a tichim a, khuaa mite pawh chu a that a. 18 Tichuan, Zeba leh Zalmuna hnênah chuan, “Tabor tlânga in mi thahte kha mi eng ang nge an nih?” a ti a. Tin, anni chuan, “Nangmah ang bawk hi an ni; lal fa anna an nei ṭheuh mai,” an ti a. 19 Tin, ani chuan, “Ka unau, ka nu fapate ngei an ni asin. LALPA chu a nung ngei ang hian, anni chu lo zuah ta ni ula chu, ka that lo tûr che u,” a ti a. 20 Tin, a fapa upa ber Jethera hnênah chuan, “Khai le, nangin that rawh,” a ti a. Nimahsela, tlangvâl chuan a khandaih a phawi lo; tlangvâl mai a la nih avângin a hlau a ni. 21 Tichuan, Zeba leh Zalmuna chuan, “Nangmah kha lo thawk la, min rawn bei ta che; patling leh patling inbeih tûr alâwm,” an ti a. Tin, Gideona chu a tho va, Zeba leh Zalmuna chu a that ta a; tin, an sanghâwngsei nghâwnga nghâwngkawlte chu a la a. 22 Chutichuan, Israel mite chuan Gideona hnênah, “Nangin kan chungah ro rêl tawh ang che, nang leh i fapa leh, i fapaa fapate chen pawhin; nangin Midian-hote lakah hian min chhandam ta si a,” an ti a. 23 Tin, Gideonan an hnênah, “Kei zawngin in chungah hian ro ka rêl lo vang a, ka fapa lahin in chungah ro a rêl hek lo vang; LALPAN in chûngah ro a rêl zâwk ang,” a ti a. 24 Tin, Gideonan an hnênah, “Thil pakhat erawh chu dîl che u ka duh a ni, mi tinin in râllâk bengbeh chu mi pe ta ṭheuh che u,” a ti a (Ismael-ho an nih avângin rangkachak bengbeh an nei a ni). 25 Tin, anni chuan, “Kan pe mawlh ang che,” an ti a. Chutichuan, puan an phah a, mi tinin an râllâk bengbeh chu an theh chhuak ta ṭheuh va. 26 Tin, chûng rangkachak bengbeh a dîlte chu a rih lam rangkachak sekel sângkhat leh zasarih a ni; nghâwngkawlte, bengbehte, Midian lalte puan senduk tiam lovin, an sanghâwngseite khaidiat awrh pawh tel lovin. 27 Tin, Gideonan chûng chuan ephod a siam a, a awmna Ophra khuaah a dah a. Chutah chuan chumi lakah chuan Israel-ho zawng zawng chu an lo uire zo ta a. Tichuan, Gideona leh a chhûngte tân pawh thang a lo ni ta mai a. 28 Chutichuan, Midian-ho chu Israela thlahte hmaah chuan tihtlâwmin an lo awm ta a; tichuan, an chechâng ta lo va. Tin, Gideona dam chhûng chuan ram chu kum sawmli chhûng râlmuangin a awm a.

Gideona thih thu

29 Tin, Joasa fapa Jerubaala chu a in lamah a awm ta a. 30 Tin, Gideona chuan ama hrin ngei fapa sawmsarih a nei a, nupui tam tak nei a ni si a. 31 Tin, Sekem khuaa a hmeiin fapa a hrinsak bawk a, a hmingah Abimeleka a sa a. 32 Joasa fapa Gideona chu tar kûna damin a thi a; tichuan, Abiezrit mi Ophra khuaa a pa Joasa thlânah an phûm ta a. 33 Tin, heti hi a ni a, Gideona thih veleh chuan Israela thlahte chu an lo hnungtawlh leh ta a, Baal-te lakah an uirê a, Baal-berith chu an pathianah an lo siam ta a. 34 Tin, Israela thlahte chuan an vêla hmêlmate zawng zawng lak ata chhanchhuaktu LALPA an Pathian chu an hre ta lo va; 35 Jerubaala (Gideona chu), Israel-hote chunga theihtâwpa ṭhat chhuah ṭhîntu chhûngte chungah pawh chuan ṭhat an chhuah ve ta hek lo.

Roreltute 9

Abimeleka

1 Tin, Jerubaala fapa Abimeleka chu Sekem khuaah a nu nuṭate hnênah a kal a, a nu pate chhûngkua zawng zawngte nên a bia a, 2 “Sekem khuaa mi zawng zawngte beng hriatah thu sawi ula, ‘Jerubaala fa zawng zawng mi sawmsarihten in chunga ro an rêl nge ṭha zâwk in tih, pakhatin in chungah ro a rêl?’ ti teh u khai. Tin, kei pawh in thisen zawmpui ka ni tih hi hre reng bawk ang che u,” tiin a sawi a. 3 Tin, a nu nuṭate chuan Sekem khuaa mi zawng zawngte beng hriatah chuan chûng a thu zawng zawng chu an sawi a; tichuan, Abimeleka zui duhna rilru an lo pu ta a, “Ani chu kan unau a ni alâwm,” an ti ta si a. 4 Tin, Baal-berith in ata tangka sawmsarih an pe a, chu chuan Abimelekan mi ho tak tak leh mi tawrawt pui puite a ruai a, anni chuan amah chu an zui a. 5 Tin, Ophra khuaa a pa inah a va kal a, Jerubaala fapa, a unau sawmsarihte chu lung pakhat chungah a that hlawm a. Jerubaala fapa naupang ber Jothama erawh chu a damah a ṭang a; a lo biru hlauh a ni. 6 Tin, Sekem khuaa mi zawng zawng leh Beth-milo-a mi zawng zawng chu an pung khâwm a; tichuan, Abimeleka chu Sekem khuaa lungphun bul sasaw kiangah chuan lalah an siam ta a. 7 Tin, chu chu Jothama an hrilh chuan Gerizim tlâng chhîpah a han ding a, aw ring takin a au va, an hnênah, “Nangni Sekem khuaa mite u, ka thusawi hi ngaithla teh u; tichuan, Pathian pawhin in thu a lo ngaithla ve dâwn nia. 8 Vawi khat chu thing hi an lal atâna hriak thih tûrin an va chhuak a; olive thing hnênah hian, ‘Nang kan lalah awm ta che,’ an ti a. 9 Nimahsela, olive thing chuan an hnênah, ‘Pathian leh mihring chawimawi phah nâna an mi hmanna ber ka hriak hi chhuahsanin thing chungah lehlam lehlaman ka phe ka phe tehlul ang maw?’ a ti a. 10 Tin, thingte chuan theipui kûng hnênah hian, ‘Hawh teh, nang kan lalah awm ang che,’ an va ti a. 11 Nimahsela, theipui kûng chuan an hnênah, ‘Ka thlumna leh ka rah ṭha tak hi chhuahsanin, thing chungah lehlam lehlaman ka phe ka phe tehlul ang maw?’ a ti a. 12 Tin, thingte chuan grêp hrui hnênah, ‘Hawh teh, nang kan lalah awm ang che,’ an ti a. 13 Tin, grêp hrui chuan an hnênah, ‘Pathian leh mihring tilâwm ṭhîntu ka uain hi chhuahsanin, thing chungah lehlam lehlaman ka phe ka phe tehlul ang maw?’ a ti a. 14 Chutichuan, thing zawng zawng chuan hlîng hnênah, ‘Hawh teh, nang kan lalah awm ang che,’ an ti a. 15 Tin, hlîng chuan thing hnênah, ‘In lal atâna hriak mi thih takzet in nih chuan ka hlimah hian lo bi ta che u; in nih loh erawh chuan hlîngah chuan mei lo chhuakin Lebanon tlânga sidar thingte chu kâng zo vek rawh se,’ a ti a. 16 “Chutichuan, Abimeleka in lal atâna in lo siam ta hi tihtakzet leh fel taka ti in niha, Jerubaala leh a chhûngte chu ṭha taka in tiha, a phu ang zêla a chunga lo ti te in niha 17 (ka pa hian râl a lo dosak che u a, a lo thih phah ta hial a, Midian-ho kut ata chu a lo chhanchhuak ta che u a: 18 vawiinah hian ka pa chhûngte chungah chuan in lo hel a, a fapate sawmsarih zet lung pakhat chungah in lo tihlum a, in unaupa a nih avângin a bawihnu fapa Abimeleka hi Sekem khaw mite lalah in lo siam ta si a), 19 vawiinah hian Jerubaala leh a chhûngte chunga tih tak zet leh fel taka ti in nih phawt zawngin le, Abimeleka chungah hian lâwm rawh u; tin, ani pawh in chungah hian lâwm rawh se. 20 Chutiang a nih loh erawh chuan Abimeleka aṭang hian mei lo alh chhuak sela, Sekem khuaa mite leh Beth-milo mite chu kâng zo vek rawh se; tin, Sekem khuaa mite leh Beth-milo aṭangin mei lo alh chhuak sela, Abimeleka chu kâng zo vek rawh se,” a ti a. 21 Chutichuan, Jothama chu a tlân a, a tlân bo va, Beer-ah a tlân a, a unaupa Abimeleka a hlauh avângin chutah chuan a awm ta reng a. 22 Tin, Abimeleka chu Israel-ho chungah kum thum a lal a. 23 Tin, Pathianin Abimeleka leh Sekem khuaa mite kârah chuan rilru sual a awmtîr a; tichuan, Sekem khuaa mite chuan Abimeleka chungah vervêk takin an ti ta a; 24 chu chu Jerubaala fapa sawmsarihte chunga râwng taka an tih avânga an chunga phuba lâkna a lo thlen theihna tûr leh, anmahni thattu an unaupa Abimeleka chungah leh, a unaute that tûra a kut lo tichaktu Sekem-hote chunga an thisen a awm theihna tûrin a ni. 25 Tin, Sekem khuaa mite chuan tlâng chhîpahte amah châng rutute an dah a, chumi kawnga kal apiangte chu an lo suam ṭhîn a; chumi thu chu Abimeleka an hrilh a. 26 Tin, Ebeda fapa Gaala a unauteho nên an lo thawk a. Sekem khuaah an lût a; Sekem-hote chuan an lo ringhlel lo va. 27 Tin, lo lamah an va kal a, an grêp huana mi an lo va, an chîl a, an kût a, an pathian inah an lût a, an eiin an in a, Abimeleka chu ânchhia an lawh a. 28 Tin, Ebeda fapa Gaala chuan, “Tu nge ni Abimeleka chu? Sekema pawh hi tu nge maw a niha, keinin a rawng kan han bâwl tehlul tûr chu? Jerubaala fa a ni lâwm ni? Zebula hi a upa a ni lâwm ni? Sekema pa Hamora hote rawng i bâwl ang u hmiang! Engah nge ani rawng chu kan bâwl ang? 29 Hêngho hi ka thuin han awm teh sela chu aw! Abimeleka hi ka han titlâwm dêr mai tûr,” a ti a. Tin, Abimeleka hnênah, “I sipaite tipung la, lo thawk rawh khai,” a ti a. 30 Tin, chumi khaw rorêltu Zebula chuan Ebeda fapa Gaala thusawi chu a lo hriat chuan, a thin a ur ta thut a. 31 Tichuan, fin vervêkin Abimeleka hnênah chuan, “Ngai teh, Ebeda fapa Gaala leh a unauteho Sekem-ah an lo kal a; tin, ngai teh, i chunga helpui tumin khuaa mite an fuihpawrh e. 32 Chutichuan, i hote nên a zân a zânin lo thawk ula, phûlah lo châng rawh u. 33 Tichuan, heti hi a ni ang a, zîngah ni chhuah veleh, tho la, khua chu rawn bei mai ang che; tin, ngai teh, amah leh a hote chuan an rawn beih dâwn veleh che, remchâng i tih dân ang angin an chungah lo ti mai ang che,” tia hrilh tûrin mite a tlântîr a. 34 Chutichuan, Abimeleka leh a hote zawng zawng chu a zân a zân chuan an tho va, pâwl lia insiamin Sekem khua chu an hual ta a. 35 Tin, Ebeda fapa Gaala chu a va chhuak a, khawpui luhna kawngkaah chuan a va ding a; Abimeleka chu a hote nên chuan an chân rûkna hmun ata chu an lo thawk ta a. 36 Tin, Gaalan mipuite a han hmuh chuan Zebula hnênah, “Ngai teh, tlâng chhîp aṭangin mipuite an lo chhuk e,” a ti a. Tin, Zebula chuan a hnênah, “Tlâng hlim saw mihring angin i hmu mai a ni ang,” a ti a. 37 Tin, Gaala chuan, “En ta che maw le, ram lai taka saw mipui an lo chhuk, pâwl khat phei chu Meonenim sasaw thing kawngah an lo kal saw,” a ti leh a. 38 Tichuan, Zebula chuan a hnênah, “ ‘Tu nge maw Abimeleka, a rawng kan han bâwl tûra chu ni?’ tia i sawina ka kha khawiah nge ni ta? Hêngho hi i mi hmuhsitate ngei kha an ni lâwm ni? Va chhuak la, va bei mawlh rawh khai,” a ti a. 39 Tichuan, Gaala chuan Sekem-hote hma chu a va hruai a. Abimeleka chu a va bei ta a. 40 Tin, Abimeleka chuan a lo ûm a, a tlânchhe ta a, khawpui luhna kawngka thlengin mi tam tak hliamin an tlu phung mai a. 41 Tin, Abimeleka chu Aruma khuaah chuan a awm ta a; tichuan, Zebula chuan Gaala leh a unauteho chu Sekem khuaa awm thei lo tûrin a hnawt chhuak ta vek a. 42 Tin, heti hi a ni a, a tûkah chuan Sekem mipuite chu phûlah an va kal chhuak a; tin, Abimeleka an va hrilh a. 43 Tin, mipuite chu a hruai a, pâwl thumah a siam a, phûlah chuan an châng a. Tin, a han hawi a, ngai teh, mipuite chu khawpui ata an lo chhuak a; tichuan, anmahni chu a lo bei a, a lo that a. 44 Tin, Abimeleka leh a pâwlhote chuan an lo bawh a, khawpui luhna kawngkaah chuan an va ding a; tin, pâwl hnihte chuan phûla awmho zawng zawng chu an bawh chiam a, an that ta hlawm a. 45 Tin, Abimeleka chuan khawpui chu chumi ni chuan nilêngin a bei a; khawpui chu a la a, a chhûnga mite chu a that a; khawpui chu a chhu chhe vek a, chiin a theh ta a. 46 Tin, Sekem kulha awm zawng zawngte chuan chumi thu chu an lo hria a. El-berith kulhbîngah an lût ta vek a. 47 Tin, Sekem kulha mi zawng zawngte chu an awm khâwm vek tih Abimeleka an hrilh a. 48 Tin, Abimeleka leh a hnêna awmho zawng zawngte chu Zalmon tlângah an chho va. Tin, Abimeleka chuan hreipui a keng a, thingzâr a chêk thla a, a pu ta a; tin, a hote hnênah chuan, “Ka tih dân in hmu a, ka tih ang hian nangni pawhin ti ve thuai thuai rawh u,” a ti a. 49 Tin, mi zawng zawngin thingzâr chu an chêk thla ve ṭheuh va, Abimeleka chu an zui a, kulhbîng vêlah chuan an dah zêl a, kulhbîngah chuan an hâl khum ta a; chutichuan, Sekem kulha mi zawng zawngte pawh chu an thi a, mipa leh hmeichhia sângkhat lai an ni. 50 Tichuan, Abimeleka chu Thebez khuaah a kal a, Thebez khua chu a hâl a, a la a. 51 Amaherawhchu, chu khawpui chhûngah chuan kulhpui a awm a, chutah chuan mipa leh hmeichhia zawng zawng leh khawpui chhûnga mi zawng zawng chu an tlân lût a, an inkhâr khum tlat a, kulh chungah chuan an awm khâwm a. 52 Tin, Abimeleka chu kulh lamah chuan a han kal a, a han bei a, hâl tumin kulh kawngka bulah a kal a. 53 Tin, hmeichhia tuin emaw buh râwt sawmna chung lam lung hi Abimeleka luah a zuk thlâk a, a lu ruh a keh a. 54 Tichuan, a râlthuam kengtu tlangvâl chu a ko thuai a, a hnênah, “I khandaih kha phawi la, mi han that teh khai; tichuan, miten, ‘Hmeichhe thah a ni,’ mi tih loh nân,” a ti a. Tin, a tlangvâl chuan a vit tlang ta zawk a; tichuan, a thi ta a. 55 Tin, Israel-hote chuan Abimeleka chu a thi tih an hriat veleh mi tin mahni in lamah an haw ta ṭheuh va. 56 Abimelekan a unaute sawmsarih a thaha, a pa chunga a tih dân kawnga a suahsualna kha Pathianin chutiang chuan a lo thungrûl ta a ni. 57 Tin, Sekem khuaa mite suahsualna zawng zawng kha Pathianin a rawng thungrûl ve ta bawk a; tin, Jerubaala fapa Jothama ânchhia kha an chungah chuan a lo tla ta a ni.

Roreltute 10

Tola

1 Tin, Abimeleka hnuah chuan Israel-hote chhanchhuak tûrin Isakar mi Dodova fa Pua fapa Tola a lo chhuak a, Ephraim tlâng ram Samir khuaah a awm a. 2 Tin, kum sawmhnih leh kum thum Israel-te ro a rêl a; tin, a thi a, Samir khuaah an phûm a.

Jaira

3 Chumi hnuah chuan Gilead mi Jaira a lo chhuak a, kum sawmhnih leh kum hnih Israel-te ro a rêl a. 4 Tin, chu mi chuan fapa sawmthum, sabengtungno sawmthum chunga chuang ṭhîn mi a nei a; tin, Gilead ramah khaw sawmthum an nei a, chûng chu tûn thleng hian Havoth-jair an ti a. 5 Tin, Jaira chu a thi a, Kamon khuaah an phûm a.

Jephtha

6 Tin, Israela thlahte chuan LALPA mit hmuhin thil sual an lo ti leh ta a, Baala-te leh Astorethi-te, Suria-ho pathiante, Zidon-ho pathiante, Moab-ho pathiante, Amona thlah pathiante, Philistia-ho pathiante rawng an lo bâwl ta a; tichuan, LALPA chu an hawisan a, a rawng an bâwl ta lo va. 7 Chutichuan, LALPA chu Israel-te chungah chuan a thinrim ta hle mai a, Philistia-hote hnênah leh Amona thlahte hnênah a hralh ta a. 8 Tin, chumi kum chuan Israela thlahte chu an timangangin, an hnehchhiah êm êm mai a - Jordan râl Gilead rama Amor-ho rama Israela thlah awm zawng zawngte chu kum sâwm leh kum riat chhûng zet an hnehchhiah a. 9 Tin, Amona thlahte chu Juda-hote, Benjamin-hote leh Ephraima thlahte bei tûrin Jordan râl an kai a; chutichuan, Israel-hote chu mangan namênin an mangang ta lo va. 10 Tin, Israela thlahte chuan, “Kan Pathian chu kan lo hawisan tâk ngeia, Baala-te rawng chu kan lo bâwl tâk avângin i chungah thil kan lo tisual ta a ni,” tiin LALPA an au va. 11 Tin, LALPAN Israela thlahte hnênah, “Aigupta-ho lak ata te, Amor-ho lak ata te, Amona thlahte lak ata te, Philistia-ho lak ata te ka chhanchhuak che u a ni lo vem ni? 12 Zidon-hote, Amalek-hote, Maon-hote pawhin an hnehchhiah che u a; tin, mi au va; tichuan, an kut ata chu ka chhanchhuak che u a. 13 Nimahsela, nangnin mi hawisan a, pathian dangte rawng chu in bâwl ta zâwk a. Chuvângin, ka chhanchhuak tawh lo vang che u. 14 In thlan pathiante chu au ta che u; anni chuan in mangan hunah chuan chhanchhuak che u ang hmiang,” a ti a. 15 Tin, Israela thlahte chuan LALPA hnênah, “Thil kan lo tisual ta a ni! Nangin ṭha i tih ang angin kan chungah rawn ti langin; a chhan erawh chu vawiinah hian khawngaih takin min rawn chhanchhuak hrâm rawh khai,” an ti a. 16 Tichuan, an zînga hnam dang pathiante chu an dah bo vek a, LALPA rawng chu an bâwl ta a. Tin, Israel-hote manganna chu a tihtâwpsak ta a ni. 17 Tin, Amona thlahte chu an pung khâwm a, Gilead ramah chuan an va inkulh a. Tin, Israela thlahte chu an inkhâwm ve chiam a, Mizpe khuaah an inkulh a. 18 Tin, mipuiho, Gilead rama mi lianhote chu an inbia a, “Amona thlahte bei ṭan tûr hi tu nge awm le? Gilead rama awm zawng zawngte chunga hotuah a awm ang,” an ti a.

Roreltute 11

1 Tin, Gilead mi Jephtha chu mi chak huaisen a ni a, nawhchizuar fapa a ni; tin, Gileada chuan Jephtha chu a hring a. 2 Tin, Gileada chu a nupui chuan fapate a hrinsak bawk a; tin, a nupuia fapate chu an lo puitlin chuan Jephtha chu an hnawt chhuak a, a hnênah, “Nang zawngin kan pa in ro i luah thei lo vang, hmeichhe dang laka fa i ni si a,” an ti a. 3 Chutichuan, Jephtha chu a unauteho hnên ata chu a tlân bo va, Tob ramah a awm ta a; tin, Jephtha hnênah chuan mi ho tak takte an chêng khâwm a, an zui ṭhîn a. 4 Tin, heti hi a ni a, nakin deuhvah chuan Amona thlahte chuan Israel-hote chu an do ta a. 5 Tin, heti hi a ni a. Amona thlahte chuan Israel-hote chu an han do chuan, Gilead-ho upate chu Tob rama mi Jephtha hruai tûrin an kal chhuak ta a. 6 Jephtha hnênah chuan, “Amona thlahte kan beih theihna tûrin kan hotu berah lo awm ta che,” an ti a. 7 Tin, Jephtha chuan Gilead-ho upate hnênah, “Mi hua a, ka pa in ata chu mi hnawt chhuak a ni lâwm ni? Engati nge in mangan veleh ka hnêna in lo kal hi?” a ti a. 8 Tin, Gilead-ho upate chuan Jephtha hnênah, “Chu vâng tak chuan alâwm tûnah hian i lam kan lo hawi leh, Amona thlahte va bei tûra kan hnêna i kal theihna tûrin; tin, Gilead rama awm zawng zawngte chungah kan hotuah i awm ang,” an ti a. 9 Tin, Jephtha chuan Gilead-ho upate hnênah chuan, “Amona thlahte bei tûra mi hruai hâwn leha, tin, LALPAN anni chu mi pêk chuan in hotuah ka awm takmeuh ang maw?” a ti a. 10 Tin, Gilead-ho upate chuan Jephtha hnênah, “LALPA chu kan kârah hretu a ni ang; i thu ang angin kan ti ngei ngei ang,” an ti a. 11 Chutichuan, Jephtha chu Gilead-ho upate hnênah chuan a kal ta a, mite chuan hotu atân leh a puipa ber atân an lo siam ta a; tin, Jephtha chuan Mizpe khuaah LALPA hmaah thu engkim a sawi ta a. 12 Tin, Jephtha chuan Amona thlahte lal hnênah chuan, “Engtiziaa hetia ka ram rawn bei tûra ka hnêna lo kal mai nge maw i nih le?” tiin palai a tîr a. 13 Tin, Amona thlahte lal chuan, “Israel-ho Aigupta ram ata an lo chhuah lai khân ka ram an lâk vâng alâwm, Arnon aṭanga Jabok leh Jordan thlengin. Chuvângin, chûng ramte chu tlang takin mi rawn pe leh mai rawh,” tiin Jephtha palaite chu a lo chhâng a. 14 Tichuan, Jephtha chuan Amona thlahte lal hnênah palai a tîr leh a, 15 a hnênah, “Jephthan heti hian a ti e: ‘Israel-hoten Moab ram an lâksak lo va, Amona thlahte ram pawh an lâksak hek lo; 16 Aigupta ram ata an lo chhuahna Tuifinriat Sen thlenga thlalêr kha Israel-ten an kal tlanga, Kadesh kha an thlen khân, 17 Israel-hovin Edom lal hnênah, “Khawngaih takin i ram kan kal tlang ang e,” tiin palai an tîr a; nimahsela, Edom lal chuan a lo ngaithla duh lo va. Tin, chutiang bawkin Moab lal hnênah a tîr leh a; nimahsela, a lo remti lo va. Tichuan, Israel-hote chu Kadesh-ah an awm ta a. 18 Tichuan, thlalêr chu an kal tlang a, Edom ram leh Moab ram chu an kal hual a, Moab ram chhak lampangah an kal a. Arnon lehlam pangah awmhmun an khuar a; Moab ram chhûngah zawng an lût hauh lo a ni, Arnon chu Moab ramri chin a ni si a. 19 Tin, Israel-hovin Amor-ho lal Sihona, Hesbon lal hnênah palai an tîr a; Israel-ho chuan a hnênah, “Kan hmun lama kal nân khawngaih takin i ram kan kal tlang ang e,” an ti a. 20 Nimahsela, Sihona chuan Israel-ho chu a ram kal tlang atân chuan a ring zo lo va. Sihona chuan a mite zawng zawng chu a khâwm a, Jahaz khuaah a inkulh a, Israel-ho chu a bei ta a. 21 Tin, LALPA, Israel-te Pathianin Sihona leh a hote zawng zawng chu Israel-hote kutah a pe a, an that ta a. Chutichuan, Israel-hote chuan chumi ram Amor-hote awmna ram zawng zawng chu an nei ta vek a. 22 Tichuan, Amor-ho ramri chin zawng zawng Arnon aṭanga Jabok thleng rakin, thlalêr aṭanga Jordan thleng rakin an nei ta vek a ni. 23 Chutichuan, LALPA, Israel-te Pathianin a mi Israel-hote hmaah Amor-ho chu a chhuhsak a ni a, nangin i neihsak theih thu em ni? 24 I pathian Kemosan i puala a lo ruatsak che chu i nei dâwn a ni lâwm ni? Chutichuan, LALPA kan Pathianin kan hmaa a chhuhsakte chu kan nei ang. 25 Moab lal Zipora fapa Balaka aiin i chak zâwk em ni? Ani chuan Israel-hote kha a chawk buaiin, a do ngai em ni? 26 Israel-ho, Hesbon-ah leh a khawperah te, Aroer leh a khawperah te, Arnon ramri dep khawpui zawng zawngah te chuan kum zathum zet an awm lai khân, eng vânga la lova lo la awm reng nge i nih? 27 Chuvângin, i chungah hian thil eng mah ka tisual lo ve; nangmah zâwk hian mi beih i tum avângin ka chungah hian thil i tisual a ni e. LALPA, Rorêltu chuan tûnah hian Israela thlahte leh Amona thlahte kâra thu chu ngaihtuah rawh se,’ a ti,” tiin. 28 Nimahsela, Amona thlahte lal chuan Jephtha thuchah chu a lo ngaithla duh lo va. 29 Chutichuan, LALPA Thlarau chu Jephtha chungah a lo thleng a; tichuan, Gilead leh Manasea ram a kal tlang a, Gilead rama Mizpe aṭang chuan Amona thlahte hnênah chuan a kal zêl a. 30 Tin, Jephthan LALPA hnênah chhia a chham a, “Amona thlahte hi ka kuta mi pêk takmeuh chuan, 31 heti hi a ni ang a, Amona thlahteho hnên aṭanga râlmuanga ka hâwn leh hun chuan eng pawh ka kawngka aṭanga mi rawn hmuak hmasa ber apiang chu LALPA ta tûr a ni ang a, hâlral thilhlan atân ka hmang ngei ngei ang,” a ti a. 32 Chutichuan, Jephtha chu Amona thlahte bei tûr chuan a kal ta a; tin, LALPAN a kutah a pe ta a. 33 Tin, Aroer aṭanga Minith thlengin a bei zêl a, khaw sawmhnih zet; tin, Abel-keramim thlengin a that chiam a. Chutichuan, Amona thlahte chu Israela thlahte hmaah chuan an lo tlâwm ta a.

Jephtha fanu

34 Tin, Jephtha chuan a awmna Mizpe khuaa a in chu a thleng ta a; tin, ngai teh, a fanu chuan khuangtête nên lâmin a lo hmuak a; a fa neih chhun a ni a, amah lo chu fapa leh fanu dang rêng rêng a nei lo. 35 Tin, heti hi a ni a, amah a han hmuh veleh chuan a puante a pawt thlêr a, “E khai, ka fanu! Mi titlâwm ta hle mai a! Mi timangangtu zînga mi i ni ta! LALPA lamah ka kâ ka lo âng ta si a, chu chu zûk leh thei ka ni si lo,” a ti a. 36 Tin, ani chuan a hnênah, “Ka pa, LALPA lamah i kâ zu lo âng ta chia, i kâa i thuchhuak ang ngeiin ka chungah i ti tûr alâwm; LALPAN i hmêlma Amona thlahte chung ngeiah chuan i phuba zuk la ta si a,” a ti a. 37 Tin, a pa hnênah chuan, “Hetiang hian ka ti ang e: thla hnih chhûng chu keimahin ka han tâl hrang ang a, tlângahte ka han rawl ang a, ka nulâtna hi ka han sûn ang e, kei leh ka ṭhianteho nên hian,” a ti a. 38 Tin, ani chuan, “Kal ta che,” a ti a. Tichuan, thla hnih thang tûrin a tîr a; tin, a chhuak ta a, amah leh a ṭhianteho nên chuan; tin, tlângahte chuan a nulâtna chu a han sûn a. 39 Tin, heti hi a ni a, thla hnih hnuah chuan a pa hnênah a haw leh ta a, ani chuan chhia a lo chham tawh ang khân a chungah a ti ta a. Mipa tu mahin an pâwl lo. 40 Chutichuan, Israel-hote zîngah chuan Israela fanuten Gilead mi Jephtha fanu chu kum tin ni li sûn dânah an lo nei ta a.

Roreltute 12

Jephtha leh Ephraim-hote

1 Tin, Ephraim-hote chu an pung khâwm chiam a, hmâr lam panin an kal a; tin, Jephtha hnênah, “Engati nge Amona thlahte bei tûra i hnêna kal tûra min rawn sâwm ve loh ni? I inah kan hâl khung dâwn che a ni,” an ti a. 2 Tin, Jephtha chuan an hnênah, “Amona thlahteho hi ka mite nên theihtâwp chhuahin kan bei a ni a; ka chah lai che u khân an kut ata mi chhanchhuak si lo. 3 Tichuan, nangnin mi chhanchhuak duh lo tih ka hriat veleh thih dâwn miah lovin ka ṭang a, Amona thlahte bei tûrin ka va thawk a; tichuan, LALPAN anniho chu ka kutah mi pe ta a. Chuvângin, eng atan nge mi bei tûra vawiinah hian in lo thawh ni?” a ti a. 4 Chutichuan, Jephtha chuan Gilead mi zawng zawng chu a khâwm chiam a, Ephraim-ho chu a bei ta a. Tin, Gilead-hote chuan Ephraim-ho chu an that ta chiam a, “Nangni Ephraim hnam tlân bo Gilead-ho, Ephraim-ho zîngah leh Manase-ho zînga tel ve mai maiho,” an tih ṭhin avângin. 5 Tin, Gilead-hote chuan Ephraim-ho dep Jordan lui kaite chu an lo man a. Tin, heti hi a ni a, Ephraim-ho tlân bote chuan, “Ka lo kai ang e,” an tih apiangin Gilead-hote chuan an hnênah, “Ephr