The Old Testament of the Holy Bible
Thil siam chanchin
1 A tîrin Pathianin lei leh vân a siam a. 2 Tin, lei hi a chhia a, a ruak ngawt a ni a; tui thûk tak chung chu a thim mup a. Pathian Thlarau chuan tui chungte chu a awp reng a. 3 Tin, Pathianin, “Êng lo awm rawh se,” a ti a; tichuan, êng a lo awm ta mai a. 4 Tin, Pathianin êng chu a en a, ṭha a ti hle a; tichuan, Pathianin êng leh thim chu a ṭhen ta a. 5 Tin, Pathianin êng chu “chhûn” a vuah a, thim chu “zân” a vuah a. Tichuan, tlai lam a awm a, zîng lam a awm bawk a, a ni khatna chu. 6 Tin, Pathianin, “Tui leh tui kârah chuan boruak zau tak awm sela, chu chuan tui leh tuite chu ṭhen rawh se,” a ti a. 7 Tichuan, Pathianin boruak zau tak chu a siam a, boruak zau tak hnuaia tui awmte leh boruak zau tak chunga tui awmte chu a ṭhen ta a; chutiang chu a lo ni ta a. 8 Tin, Pathianin boruak zau tak chu “vân” a vuah a. Tichuan, tlai lam a awm a, zîng lam a awm bawk a, a ni hnihna chu. 9 Tin, Pathianin, “Vân hnuaia tuite chu hmun khatah awm khâwm sela, khawmual chu lang rawh se,” a ti a; tichuan, chutiang chu a lo ni ta a. 10 Tin, Pathianin khawmual chu “lei” a vuah a; tui awm khâwmte chu “tuifinriatte” a vuah a. Tin, Pathianin chu chu a en a, ṭha a ti hle a. 11 Tin, Pathianin, “Leiin hnim te, thlai chi nei te, thei kûng, leia anmahni chi awm dân tûr anga rah, a rah chhûnga a chi awmte chu chhuah rawh se,” a ti a; tichuan, chutiang chu a lo ni ta a. 12 Tichuan, lei chuan hnim te, thlai anmahni chi awm dân tûr anga chi nei te, thing anmahni chi awm dân tûr anga rah, a rah chhûnga a chi awmte chu a chhuah ta a. Tin, Pathianin a en a, ṭha a ti hle a. 13 Tichuan, tlai lam a awm a, zîng lam a awm bawk a, a ni thumna chu. 14 Tin, Pathianin, “Chhûn leh zân ṭhenna tûrin vân boruak zau takah chuan êntute awm sela, chûngte chu chhinchhiahna te, hun bi te, ni te, kum te hriatna tûr ni rawh se; 15 lei chung ên tûrin vân boruak zau takah chuan êntuahte awm bawk rawh se,” a ti a; tichuan, chutiang chu a lo ni ta a. 16 Tichuan, Pathianin êntu ropui zâwk chu chhûn rorêl tûrin, êntu ropui lo zâwk chu zân rorêl tûrin a siam a; arsite pawh khi a siam bawk a. 17 Tin, Pathianin chûngte chu lei chung ên tûr leh, 18 chhûn chungah leh zân chunga rorêl tûr leh, êng leh thim ṭhen tûrin vân boruak zau takah khian a dah ta a. Tichuan, Pathianin chu chu a en a, ṭha a ti hle a. 19 Tichuan, tlai lam a awm a, zîng lam a awm bawk a, a ni lina chu. 20 Tin, Pathianin, “Tuite chuan thil siam che thei, nunna neite tam tak chhuah ṭheuh sela, savate pawh vân boruak zau tak, zâwl duaiah, lei chungah chuan thlâwk rawh se,” a ti a. 21 Tichuan, Pathianin tuifinriat lian pui puite chu a siam a, thil nung che thei tinrêng, tuiin a chhuah ṭheuhte chu, anmahni chi awm dân tûr ang ṭheuhvin a siam bawk a, sava thla nei tinrêng pawh anmahni chi awm dân tûr ang ṭheuhvin a siam bawk a. Tin, Pathianin chu chu a en a, ṭha a ti hle a. 22 Tin, Pathianin, “Chi tam tak thlahin lo pung ula, tuifinriat tuite tikhat rawh u, savate pawh leiah pung rawh se,” tiin mal a sâwm a. 23 Tichuan, tlai lam a awm a, zîng lam a awm bawk a, a ni ngana chu. 24 Tin, Pathianin, “Lei chuan thil nung anmahni chi awm dân tûr ang ṭheuhvin ran te, rannung te, ramsa te anmahni chi awm dân tûr ang ṭheuhvin chhuah rawh se,” a ti a; tichuan, chutiang chu a lo ni ta a. 25 Tichuan, Pathianin ramsa anmahni chi awm dân tûr ang ṭheuhvin, rante anmahni chi awm dân tûr ang ṭheuhvin, leia bawkvâka kal zawng zawngte anmahni chi awm dân tûr ang ṭheuhvin a siam a. Tin, Pathianin chu chu a en a, ṭha a ti hle a. 26 Tin, Pathianin, “Kan anpuiin, keimahni ang takin mihring siam ila; anni chu tuifinriata sangha chungah te, rannung leia bawkvâka kal zawng zawng chungah te thu i neihtîr ang u,” a ti a. 27 Tichuan, Pathianin ama anpuiin mihring a siam a, Pathian anpui ngeiin a ni a siam ni; mipaah leh hmeichhiaah a siam a ni. 28 Tin, Pathianin anmahni mal a sâwm a; Pathian vêkin an hnênah, “Chi tam tak thlaha lo pungin, leilung hi luah khat ula, in thu thuin awmtîr rawh u; tuifinriata sangha chungah te, chunglêng sava chungah te, thil nung leia bawkvâka kal zawng zawng chungah te thu nei bawk rawh u,” a ti a. 29 Tin, Pathian vêkin, “Ngai teh u, lei chung zawng zawnga thlai chi nei awm tinrêng leh thing tinrêng, thing chi nei rah awmnate chu ka pe che u a ni; in chaw atân a ni ang. 30 Tin, leia sa tinrêng hnênah te, chunglêng sava tinrêng hnênah te, leia bawkvâka kal, nunna nei tinrêng hnênah te an chaw atân hnim hring tinrêng ka pe a ni,” a ti a; tichuan, chutiang chu a lo ni ta a. 31 Tin, Pathianin a thil siam tinrêng chu a en a, ngai teh, ṭha a ti êm êm a. Tichuan, tlai lam a awm a, zîng lam a awm bawk a, a ni rukna chu.
1 Tichuan, lei leh vân chu an chunga awmho zawng zawngte nên chuan siam zawh a ni ta a. 2 Tin, Pathianin ni sarih niah chuan a thil siam chu a ti zo va, ni sarih niah chuan a thil siam zawng zawng chu a chawlhsan ta a. 3 Tichuan, Pathianin ni sarih ni chu mal a sâwm a, a serh ta a; chumi niah chuan Pathianin a thil siam zawng zawng, thu ngawta a siam leh kuta a siamte chu a chawlhsan tâk avângin.
Eden huan
4 Lei leh vân siam dân chu hetiang hi a ni, LALPA Pathianin lei leh vân a siam ni khân, 5 leia hnim rêng rêng hi leiah a la awm lo va, leia thlai rêng rêng pawh hi a la ṭo hek lo. LALPA Pathianin lei chungah ruah a la sûrtîr si lo va, lei lettu tûrin mihring lah an la awm hek lo; 6 amaherawhchu, lei aṭangin chhûm a lo chhuak a, lei chung zawng zawng chu a tihnâwng ṭhîn a ni. 7 Tin, LALPA Pathianin leia vaivutin mihring a siam a, a hnârah chuan nunna thaw chu a thaw lût a; tichuan, mihring chu mi nung a lo ni ta a. 8 Tin, LALPA Pathianin chhak lamah, Eden-ah chuan huan a siam a, a mihring siam chu chutah chuan a awmtîr ta a. 9 Tin, lei aṭangin LALPA Pathianin thing mit la tak leh ei mi tinrêng a ṭotîr a. Nunna thing pawh huan lai takah chuan a ṭotîr a, a chhia leh a ṭha hriatna thing pawh. 10 Tin, Eden aṭangin huan tihnâwng tûrin lui a luang chhuak a; chuta ṭang chuan a pêng darh a, pêng li a lo ni ta a. 11 A pakhatna hming chu Pison a ni a; chu chu Havila ram zawng zawng hualtu chu a ni a, chutah chuan rangkachak a awm. 12 Chumi rama rangkachak chu ṭha tak a ni. Chutah chuan bedolak leh berul lung pawh a awm. 13 Tin, lui pahnihna hming chu Gihon a ni a; chumi chu Kus ram zawng zawng hualtu chu a ni. 14 Tin, lui pathumna hming chu Hiddekel a ni a; chu chu Assuria ram chhak lama luang chu a ni. Tin, lui palina chu Euphrates a ni. 15 Tin, LALPA Pathian chuan mihring chu a hruai a, Eden huanah chuan a enkawl leh a vêng tûrin a dah ta a. 16 Tin, LALPA Pathian chuan mihring hnênah chuan, “Huana thing tinrêng rahte hi i duh duhin i ei thei e; 17 a chhia leh a ṭha hriatna thing rah erawh hi chu i ei tûr a ni lo, i ei chuan i ei ni la lain i thi ngei tûr a ni,” tiin thu a pe a. 18 Tin, LALPA Pathian chuan, “Mihring amah chauhva awm hi a ṭha lo ve; amah ṭanpuitu tûr a kawppui âwm mi ka siamsak teh ang,” a ti a. 19 Tin, LALPA Pathian chuan leiin ramsa tinrêng leh chunglêng sava tinrêng chu a siam a, an hmingah eng nge a vuah dâwn tih hriat nân Adama hnênah a hruai hlawm a; tin, thil nung tinrêngte chu Adaman an hminga a lo vuah apiang chu an hming a lo ni hlen ta a. 20 Tichuan, Adama chuan ran zawng zawng te, chunglêng sava te, ramsa tinrêng te chu hming a vuah ṭheuh va; nimahsela, Adama tân chuan ṭanpuitu tûr a kawppui âwm mi a awm lo va. 21 Tichuan, LALPA Pathian chuan Adama chu tui takin a muthilhtîr a; tichuan, a muhîl ta a; tin, a nâkruh pakhat a la a, chu chu tisain a awh phuitîr ta a. 22 Tin, LALPA Pathian chuan Adama laka a lâk nâkruh chu hmeichhiaah a siam a, Adama hnênah a hruai ta a. 23 Tin, Adama chuan, “Hei zet chu ka ruh ang ruh neia, ka tisa ang tisa nei ngei chu a ni; mipa laka lâk chhuah a nih avângin ‘hmeichhia’ tih tûr a ni ang,” a ti a. 24 Chuvângin, mipain a nu leh a pa a kalsan ang a, a nupui a vuan ang; tichuan, tisa pumkhat an lo ni tawh ang. 25 Tin, Adama leh a nupui chu an pahnihin saruakin an awm a, an zak lêm lo va.
Mihring thu awih lohna
1 Tin, LALPA Pathianin ramsa a siam zawng zawngah chuan rûl a fing vervêk ber a. Tichuan, ani chuan hmeichhe hnênah chuan, “Pathianin, ‘Huana thing rah rêng rêng hi in ei tûr a ni lo,’ a ti elo maw?” a ti a. 2 Tin, hmeichhia chuan rûl hnênah chuan, “Ti lo ve, huana thing rahte hi kan ei thei asin; 3 huan lai taka thing awm rah erawh chu Pathianin, ‘In ei tûr a ni lo, tawh pawh in tawk tûr a ni lo; chuti lo chuan, in thi ang,’ a ti a ni,” a ti a. 4 Tin, rûl chuan hmeichhe hnênah chuan, “Thi teh suh e; 5 in ei ni apang chuan in mit a lo vâr ang a, a chhia leh a ṭha hriain Pathian ang in lo ni dâwn tih Pathianin a hre reng a nih chu,” a ti a. 6 Tichuan, hmeichhia chuan thing rah chu ei mi a ni tih leh, mit la tak a ni tih leh, mi tifing tûrin thing rah îtawm tak a ni tih a hriat chuan, a rah ṭhenkhat chu a lo va, a ei ta a; tin, a pasal a pe ve a, ani pawhin a ei ve ta a. 7 Tichuan, an pahnih chuan an mit a lo vâr a, saruak an nih an lo inhre ta a; tichuan, theipui hnah an ṭhui khâwm a, pawnfên an insiam chawp a. 8 Tin, LALPA Pathian chu huana tlai ni nêma a lêng thâwm chu an lo hria a; tichuan, Adama leh a nupui chuan huana thing zîngah chuan LALPA Pathian chu an lo bihrûksan ta a. 9 Tin, LALPA Pathian chuan Adama chu a ko va, a hnênah, “Khawiah nge i awm?” a ti a. 10 Tin, ani chuan, “Huana i thâwm ka hria a, saruaka awm ka nih avângin ka hlau ta a; tichuan, ka biru ta a ni,” a ti a. 11 Tin, ani chuan, “Saruak i nih tuin nge hrilh che? Thing rah ei loh tûr ka tih tlat che kha i ei ta a ni maw?” a ti a. 12 Tin, Adama chuan, “Mi awmpui tûra i hmeichhe mi pêk ngei khân thing rah chu mi pe a, ka ei ta a ni,” a ti a. 13 Tin, LALPA Pathian chuan hmeichhe hnênah chuan, “I thiltih hi engtizia nge ni le?” a ti a. Tin, hmeichhia chuan, “Rûlin mi tihder a, ka ei ta a ni,” a ti a.
Pathian hremna
14 Tin, LALPA Pathian chuan rûl hnênah chuan, “Hetiang hi i tih avângin ran zawng zawng leh ramsa tinrêng zingah chuan ânchhe dawngin i awm bîk ang a; bawkkhupin i kal tawh ang a, i dam chhûng zawngin vaivut i ei bawk tûr a ni. 15 Tin, nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang; chu mi chuan i lu a la tithitling ang a, nangin a keartui i la tithitling ang,” a ti a. 16 Hmeichhe hnênah chuan, “I hrehawmna leh i nau paina chu nasa takin ka tipung ang a; hrehawm takin fa i hring thîn ang a; nimahsela, i duh zâwng chu i pasal lam a ni ang a, ani chuan i chungah thu a nei fo vang,” a ti a. 17 Tin, Adama hnênah chuan, “I nupui thu i zawma, thing pakhat, ‘A rah i ei tûr a ni lo,’ tia thu ka pêk che kha, a rah i ei avângin lei hi nangmah avângin ânchhe dawngin a awm ta a ni; i dam chhûng zawngin rim taka thawkin a rah chu i ei tawh ang. 18 Hlîng leh buarte pawh a chhuaksak ang che; tin, leia thlai chu i ei tawh ang. 19 Tin, leia i kîr leh hma loh chuan i hmaia thlantui luang zawih zawihin chaw i ei tawh ang, lei aṭanga lâk chhuah i ni si a; vaivut i ni a, vaivutah i kîr leh tûr a ni,” a ti a. 20 Tin, Adama chuan a nupui chu mi nung zawng zawng nu a nih avângin a hmingah Evi a vuah a. 21 Tin, LALPA Pathian chuan Adama tân leh a nupui tân chuan savun kawrfualte a siamsak a, a haktîr ta a.
Huan ata Adama leh Evi hnawh chhuah
22 Tin, LALPA Pathian chuan, “Ngai teh u, mihring chu a chhia leh a ṭha hriain keimahni ang a lo ni ta; tûnah chuan a kuta banin, nunna thing rah chu lova eiin, kumkhuain a nung dah ang e,” a ti a; 23 chuvângin, LALPA Pathian chuan amah a lâk chhuahna lei chu let tûrin Eden huan ata chu a tîr chhuak ta a. 24 Chutichuan, mihring chu a hnawt chhuak ta a; tin, nunna thing kawng chu vêng tûrin, Eden huan chhak lampangah chuan cherub-te leh mei khandaih vir tawn zawk zawk chu a awmtîr ta bawk a.
Kaina leh Abela
1 Tin, Adama chuan a nupui Evi chu a pâwl a; tichuan, a rai a, Kaina a hring a, “LALPA ṭanpuiin mipa ka lo nei ta,” a ti a. 2 Tin, a nau Abela a rawn hring leh a. Tin, Abela chu berâm vêngtuah a awm a, Kaina erawh chu lei lettuah a awm. 3 Tin, a nakinah chuan heti hi a ni a, Kaina chuan LALPA hnêna hlan atân lova mi a rawn la a. 4 Tin, Abela pawh chuan a berâm rual zînga piang hmasa berte leh a thau chu a rawn la bawk a. Tin, LALPA chuan Abela leh a thilhlan chu a lâwm a; 5 Kaina leh a thilhlan erawh chu a lâwm ve lo va. Tichuan, Kaina chu a thinur êm êm a, a hmêl chu a lo dur ta khup a. 6 Tichuan, LALPA chuan Kaina hnênah chuan, “Engati nge i thin a ur? Engati nge i hmêl a lo dur tâk? 7 Thil i tih ṭhat chuan lawm i hlawh dâwn lo vem ni? I tih ṭhat loh erawh chuan sual chu kawngka bulah a bawk reng a ni; a duh zâwng chu nangma hnên lam a ni ang a, a chungah thu i nei tûr a ni,” a ti a. 8 Kaina chuan a nau Abela hnênah, “Lovah i feh ang,” a ti a. Tin, heti hi a ni a, lova an awm laiin Kaina chuan a nau Abela chu a bei a, a that ta mai a. 9 Tichuan, LALPA chuan Kaina hnênah chuan, “I nau Abela kha khawiah nge a awm tâk?” a ti a. Tin, ani chuan, “Ka hre lo. Ka nau vêngtu ka ni em ni?” a ti a. 10 Tin, ani chuan, “Eng nge i tih tâk ni? I nau thisen aw chuan lei aṭangin mi au asin. 11 Chuvângin, lei, i kut ata i nau thisen dawng tûra a kâ lo ângtu ata hi ânchhe dawng i ni ta. 12 Lei i leh pawhin a ṭhatna chu a pe phal tawh lo vang che. Leiah hian tlân bo leh vâkvai i lo ni tawh ang,” a ti a. 13 Tin, Kaina chuan LALPA hnênah, “I mi hremna hi a nasa êm a, ka tuar zo lo vang. 14 Ngai teh, nangin vawiinah hian lei chung ata mi hnawt chhuak ta si a, i mit hmuh phâk lohva thuhrûkin ka awm dâwn ta a; leiah hian tlân bo leh vâkvai ka lo ni dâwn ta si a; tichuan, heti hi a ni ang a, tu pawh mi hmu apiangin mi that mai ang,” a ti a. 15 Tin, LALPA chuan a hnênah, “Chuti a nih chuan, tu pawh Kaina that apiang chu a leh sarihin a chungah phuba lâk a ni ang,” a ti a. Tichuan, miin amah an hmuha an thah loh nân LALPAN Kaina chu a chhinchhiah ta a. 16 Tichuan, Kaina chu LALPA hnên ata chu a chhuak a, Eden chhak lama Nod ramah chuan a awm ta a.
Kaina thlahte
17 Tin, Kaina chuan a nupui a pâwl a; tichuan, a rai a, Enoka a hring a. Tin, khua a siam a, a khaw hmingah chuan a fapa hming chawiin Enok a ti a. 18 Tin, Enoka chuan fapa Irada a nei a, Irada chuan fapa Mehujaela a nei a, Mehujaela chuan fapa Methusaela a nei a, Methusaela chuan fapa Lameka a nei a. 19 Tin, Lameka chuan nupui pahnih a nei a: pakhat hming chu Adai a ni a, pakhat hming chu Zillai a ni. 20 Tin, Adai chuan Jabala a hring a; ani chu puan ina awm ran vulhtuho thlahtu a ni. 21 A nau hming chu Jubala a ni a; ani chu ṭingṭang leh phênglâwng tumtuho zawng zawng thlahtu a ni. 22 Tin, Zillai pawh chuan Tubal-kaina, dâr leh thîr hriamhrei tinrêng chhertu a hring a. Tin, Tubal-kaina farnu chu Naami a ni. 23 Tin, Lameka chuan a nupuite hnênah chuan: “Adai leh Zillai-te u, ka aw hria ula; Lameka nupuite u, ka thusawi hi ngaithla rawh u. Mi tihhliam avângin mi ka that a, Mi vuak thitlin avângin tlangvâl ka that a ni. 24 Kaina phuba mah a leh sariha an lâk dâwn chuan, Lameka phuba chu a leh sawmsarih leh pasarihin an la ngei ngei ang,” a ti a.
Setha leh Enosa
25 Tin, Adama chuan a nupui chu a pâwl leh a; tichuan, ani chuan fapa a hring leh a, a hmingah chuan Setha a sa a: “Pathianin Abela aiah chi thlah dang mi ruatsak ta; Kaina chuan amah a that ta si a,” a ti a. 26 Tin, Setha chuan, amah ngei pawh chuan fapa a nei ta a; a hmingah chuan Enosa a sa a. Chumi lai chuan miten LALPA hming chu an lo lam ṭan ta a.
Adama thlahte
1 Hei hi Adama thlahte chuanna lehkhabu chu a ni. Pathianin thu ngawta mihring a siam ni khân Pathian anpuiin amah chu a siam a. 2 Thu ngawtin mipa leh hmeichhiaah anmahni chu a siam a ni; thu ngawta siama an awm ni khân mal a sâwm a, an hmingah chuan “mihring” a vuah a. 3 Tin, Adama chuan kum za leh kum sawmthum a nihin amah ang tak, ama anpui ngei fapa a nei a; a hmingah chuan Setha a sa a. 4 Tin, Setha a neih hnu chuan Adama chu kum zariat a la dam a; fanu leh fapate a nei leh hlawm a. 5 Tichuan, Adama dam chhûng zawng zawng chu kum zakua leh kum sawmthum a ni a; tin, a thi ta a. 6 Tin, Setha chuan kum za leh kum nga a nihin fapa Enosa a nei a. 7 Tin, Enosa a neih hnu chuan Setha chu kum zariat leh kum sarih a la dam a, fanu leh fapate a nei leh hlawm a. 8 Tichuan, Setha dam chhûng zawng zawng chu kum zakua leh kum sâwm leh kum hnih a ni a; tin, a thi ta a. 9 Tin, Enosa chuan kum sawmkua a nihin fapa Kenana a nei a. 10 Tin, Kenana a neih hnu chuan Enosa chu kum zariat leh kum sâwm leh kum nga a la dam a, fanu leh fapate a nei leh hlawm a. 11 Tichuan, Enosa dam chhûng zawng zawng chu kum zakua leh kum nga a ni a; tin, a thi ta a. 12 Tin, Kenana chuan kum sawmsarih a nihin fapa Mahalalela a nei a. 13 Tin, Mahalalela a neih hnu chuan Kenana chu kum zariat leh kum sawmli a la dam a, fanu leh fapate a nei leh hlawm a. 14 Tichuan, Kenana dam chhûng zawng zawng chu kum zakua leh kum sawm a ni a; tin, a thi ta a. 15 Tin, Mahalalela chuan kum sawmruk leh kum nga a nihin fapa Jareda a nei a. 16 Tin, Jareda a neih hnu chuan Mahalalela chu kum zariat leh kum sawmthum a la dam a, fanu leh fapate a nei leh hlawm a. 17 Tichuan, Mahalalela dam chhûng zawng zawng chu kum zariat leh kum sawmkua leh kum nga a ni a; tin, a thi ta a. 18 Tin, Jareda chuan kum za leh kum sawmruk leh kum hnih a nihin fapa Enoka a nei a. 19 Tin, Enoka a neih hnu chuan Jareda chu kum zariat a la dam a, fanu leh fapate a nei leh hlawm a. 20 Tichuan, Jareda dam chhûng zawng zawng chu kum zakua leh kum sawmruk leh kum hnih a ni a; tin, a thi ta a. 21 Tin, Enoka chuan kum sawmruk leh kum nga a nihin fapa Methusela a nei a. 22 Tin, Methusela a neih hnu chuan, Enoka chu kum zathum chhûng zawng Pathian nên an lêng dûn ṭhîn a, fanu leh fapate a nei leh hlawm a. 23 Tichuan, Enoka dam chhûng zawng zawng chu kum zathum leh kum sawmruk leh kum nga a ni a. 24 Tin, Enoka chu Pathian nên an lêng dûn ṭhîn a; tin, a awm ta lo va, Pathianin a la bo ta a ni. 25 Tin, Methusela chuan kum za leh kum sawmriat leh kum sarih a nihin fapa Lameka a nei a. 26 Tin, Lameka a neih hnu chuan Methusela chu kum zasarih leh kum sawmriat leh kum hnih a la dam a, fanu leh fapate a nei leh hlawm a. 27 Tichuan, Methusela dam chhûng zawng zawng chu kum zakua leh kum sawmruk leh kum kua a ni a; tin, a thi ta a. 28 Tin, Lameka chuan kum za leh kum sawmriat leh kum hnih a nihin fapa a nei a. 29 Tin, “He mi ngei hian LALPA ânchhe lawh lei avânga kan hnathawhna leh kuta kan thawh rimnaah hian min thlamuan tawh ang,” tiin a hmingah Nova a sa a. 30 Tin, Nova a neih hnu chuan Lameka chu kum zanga leh kum sawmkua leh kum nga a la dam a, fanu leh fapate a nei leh hlawm a. 31 Tin, Lameka dam chhûng zawng zawng chu kum zasarih leh kum sawmsarih leh kum sarih a ni a; tin, a thi ta a. 32 Tin, Nova chu kum zanga mi a ni a; Nova chuan fapa Sema te, Hama te, Japhetha te a nei a.
Mihring zînga sualna pung
1 Tin, heti hi a ni a, lei chungah mihring an lo puna fanute an lo neih hlawm chuan, 2 Pathian fapate chuan mihring fanute chu hmêlṭha takin an hmu a; tichuan, an duh zâwng apiang chu nupuiah an nei ta ṭhîn a. 3 Tichuan, LALPA chuan, “Ka Thlarau chuan mihring chu kumkhuain a bei reng lo vang, anni chu tisa an ni si a; nimahsela, kum za leh kum sawmhnih chu an la dam ang,” a ti a. 4 Chûng lai chuan mi lianho chu leiah hian an awm a; chumi hnuah pawh Pathian fapaten mihring fanute chu an pâwl a, an laka fate an neih ṭhin lai khân an awm bawk a. Chûngte chu hmasânga mi chak, mi hmingthangte kha an ni. 5 Tin, LALPA chuan leiah hian mihring sualzia chu nasa tak a ni tih leh, an rilru suangtuahzia rêng rêng chu sual hlîr a ni fo mai tih a lo hria a. 6 Tichuan, leiah hian mihring a lo siam tâk avângin LALPA chu a inchhîr a, rilru nat nân a hman phah ta a. 7 Tichuan, LALPA chuan, “Ka mihring siam hi lei chung ata ka tiboral teh mai ang; mihring te, sa te, rannung te, chunglêng sava te nên lam hian; ka siam tâk avângin ka inchhîr a ni,” a ti a. 8 Nova erawh chuan LALPA mit a tlung a.
Nova chanchin
9 Hêng hi Nova thlahte chu an ni. Nova chu mi fel tak a ni a, a dam rualpuite zîngah chuan sawisêl bo a ni. Nova chu Pathian nên an lêng dûn ṭhîn a. 10 Tin, Nova chuan fapa pathum: Sema te, Hama te, Japhetha te a nei a. 11 Tin, lei hi Pathian mit hmuhin a chhe zo tawh a, lei hi inpâwngnêknain a khat zo ta bawk a. 12 Tin, Pathianin lei hi a en a, tin, ngai teh, a chhe zo tawh a; tisa zawng zawngin leiah hian an awm dân an tichhe zo tawh si a. 13 Tin, Pathianin Nova hnênah, “Tisa zawng zawng tâwpna chu ka hmaah a lo thleng ta a ni, anmahni avângin lei hi inpâwngnêknain a khat zo ta si a; tichuan, ngai teh, a lei chawpin ka tiboral dâwn e. 14 I tân fâr thingin lawng siam rawh; lawngah chuan pindante i siam tûr a ni a, a chhûng lam leh a pâwn lam chu fâr hnai i hnawih vek bawk tûr a ni. 15 Tin, hei hi i siam dân tûr chu a ni: lawng dung lam chu tawng zathum ni sela, a vâng lam chu tawng sawmnga ni sela, a sân lam chu tawng sawmthum ni rawh se. 16 Lawngah chuan tukverh i siam tûr a ni a, a chung lam tawng khat chinah chuan i zo tûr a ni; tin, lawng kawngka chu a pangah i siam tûr a ni a. Chhâwng hnuaihnung leh chhâwng hnihna leh chhâwng thumna neiin i siam tûr a ni. 17 Tin, ngai teh, keimah ngeiin tisa zawng zawng, nunna thaw pai rêng rêng chu vân hnuai ata tiboral tûrin leiah hian tui ka tilêt dâwn a ni; leia thil tinrêng awm hi an thi vek ang. 18 Amaherawhchu, ka thuthlun chu i chungah ka tinghet zâwk ang a; lawngah chuan i lût tûr a ni: nang i lût tûr a ni a, i fapate leh i nupui leh i fapate nupuite pawh i hnênah an lût ve tûr a ni. 19 Tin, tisa zawng zawnga thil nung tinrêng zînga mi, chi tin pahnih zêlin i hnênah tihnun ve tûrin lawngah chuan i hruai lût tûr a ni; a nu leh pa zêl an ni tûr a ni. 20 Savate anmahni chi awm dân ang ṭheuhvin, rante anmahni chi awm dân ang ṭheuhvin, leia rannung tinrêng anmahni chi awm dân ang ṭheuhvin, chi tin pahnih zêlin, i tihnun tûrin i hnênah an lo kal tûr a ni. 21 Tin, chaw in ei mi zawng zawng la la, i hnênah dah khâwm rawh; tichuan, nang leh anni tân chaw a ni ang,” a ti a. 22 Chutiang chuan Novan a ti a; Pathianin a hnêna thu a pêk zawng zawng ang ngei chuan a ti ta a.
Tuilian sâng
1 Tin, LALPAN Nova hnênah chuan, “Nang leh i chhûngte zawng zawng chu lawngah lût rawh u; nang zawng tûnlai ṭhangthar zîngah hian ka mit hmuhin mi fel tak i nih hi ka hria che a ni. 2 Sa thiang tinrêng zînga mi, a pa leh a kawppui nu nên ṭheuh tuak sarih zêlin; sa thiang lo zînga mi, a pa leh a kawppui nu nên ṭheuh tuak khat zêlin; 3 chunglêng sava zînga mi pawh, a nu leh a pa ṭheuh tuak sarih zêlin, lei chung zawng zawngah chi thlah tûra tihnun tûrin i hnênah i hruai tûr a ni. 4 Ni sarih a la bâk a, chumi hnuah chuan lei chungah hian ni sawmli leh zan sawmli chhûng zawng ruah ka sûrtîr ang a, ka thil nung siam tinrêng hi lei chung ata ka tiboral ang,” a ti a. 5 Tichuan, Nova chuan LALPAN a hnêna thu a pêk zawng zawng ang zel chuan a ti ta a. 6 Tin, leia tui a lêt lai chuan Nova chu kum zaruk mi a ni a. 7 Tin, tui a lêt dâwn avângin Nova chu lawngah chuan a lût a, a fapate leh a nupui leh a fapate nupuite pawh a hnênah an lût ve a. 8-9 Pathianin Nova thu a pêk ang khân sa thiang zînga mi pawh, sa thiang lo zînga mi pawh, sava zînga mi pawh, leia bawkvâka kal tinrêng zînga mi pawh, a nu leh a pa ṭheuh, a tuak zêlin Nova hnênah lawngah chuan an lût ta a. 10 Tin, ni sarih hnuah chuan leiah hian tui chu a lo lêt ta a. 11 Nova chu kum zaruk a nih kum, a thla hnihna ni sâwm leh ni sarih niah, chumi ni ngei chuan tui thûk zau tak hna zawng zawngte chu a lo sah ta vek a, vân tukverhte pawh a lo inhawng ta bawk a. 12 Tin, ni sawmli leh zan sawmli chhûng zawng leiah hian ruahpuivânâwn a sûr ta a. 13 Chumi ni ngei chuan Nova te, Nova fapa Sema te, Hama te, Japhetha te, Nova nupui leh a fapate nupui pathumte chu lawngah chuan an lût ta a. 14 Anniho bâkah sa tinrêng anmahni chi awm dân ang ṭheuhvin, ran zawng zawng anmahni chi awm dân ang ṭheuhvin, rannung leia bawkvâka kal tinrêng anmahni chi awm dân ang ṭheuhvin, sava tinrêng anmahni chi awm dân ang ṭheuhvin sava tinrêng, thla nei tinrêng chu an lût bawk a. 15 Tichuan, tisa zawng zawng nunna thaw pai rêng rêngte chu, a tuak zêlin Nova hnênah lawngah chuan an lût ta a. 16 Tin, a lûtte chu Pathianin a hnêna thu a pêk angin tisa zawng zawng zînga mi a nu leh a pa zêlin an lût a; tin, LALPAN ani chu a khâr khum ta a. 17 Tin, tui chu leiah hian ni sawmli chhûng zawng a lêt a; tui chu a lo awm ta pûng a, lawng chu a chîm lâng a, lei chung lamah a sêp kâng ta a. 18 Tin, tui chu a lo awm ta pûng pûng a, lei chungah hian a lo pung ta chiam a, lawng chu tui chungah chuan a lâng zêl a. 19 Tin, lei chungah hian tui chu nasa takin a lo pung a; vân hnuaia tlâng sâng zawng zawngte chu a pil zo ta vek a. 20 Tawng sâwm leh tawng nga zeta sângin a lo awm ta pûng a; tlângte chu a pil ta daih a. 21 Tichuan, tisa, lei chunga che thei zawng zawng: sava te, ran te, sa te, rannung lei chunga bawkvâka kal tinrêng te, mihring zawng zawngte chu an thi zo ta vek a. 22 An hnâra nunna thlarau thaw awmna zawng zawng, khawmuala awm apiangte chu an thi zo ta vek a. 23 Tichuan, lei chunga thil nung awm tinrêng: mihring te, ran te, rannung te, chunglêng savate chu tihboralin an awm a; lei ata tihboralin an awm ta. Nova leh lawnga a hnêna awmte chauh chu zuahin an awm ta a. 24 Tin, tui chu ni za leh ni sawmnga chhûng zawng chuan leiah hian a awm ta pûng mai a.
Tuilian a kâm
1 Tin, Pathianin Nova leh lawnga a hnêna thil nung tinrêng leh ramsa zawng zawng awmte chu a hre reng a; tin, Pathianin lei chung lamah hian thli a tlehtîr a; tichuan, tui chu a lo kâm ṭan ta a. 2 Tui thûk tak hnate leh vân tukverhte pawh chu a lo inkhâr a, vân aṭanga ruah lo sûr chu tihbânin a awm ta bawk a. 3 Tichuan, tui chu lei chung ata a kâm ta deuh deuh va. Tichuan, ni za leh ni sawmnga a ral hnu chuan tui chu a lo tlêm ta deuh va; 4 tichuan, lawng chu thla sarihna ni sâwm leh ni sarih niah chuan Ararat tlângah a innghat ta a. 5 Tin, tui chu thla sâwmna thlengin a tlêm ta deuh deuh zêl a; tin, thla sâwmna ni khat niah chuan tlâng chhîpte chu a lo lang ta a. 6 Tin, ni sawmli hnuah chuan heti hi a ni a, Nova chuan lawng tukverh a siam kha a hawng ta a. 7 Tin, choâk pakhat a thlawh chhuahtîr a; chu chu a chhuak a, lei ata tui chu a kang zawh hma loh chuan a thlâwk vêl a thlâwk vêl a. 8 Tin, lei chungah tui a tlêm tawh nge tawh lo tih hriat nân ṭhuro a thlawh chhuahtîr leh a; 9 nimahsela, ṭhuro chuan fûkna rêng rêng a hmu lo va, a hnênah lawngah a kîr leh ta a, tui chu lei chung zawng zawngah chuan a la awm si a. Tichuan, a kut a han zen chhuak a, a man a, lawng chhûngah chuan a hnênah a la lût leh ta a. 10 Tin, ni sarih dang a nghâk leh rih a, ṭhuro chu lawng aṭangin a thlawh chhuahtîr leh a. 11 ṭhuro chu tlai lamah chuan a hnênah a lo lût leh a; tin, ngai teh, a hmuiah chuan olive hnah tihthlawn hlim a rawn pu a; chutichuan, Nova chuan leiah tui a tlêm ta tih a hre ta a. 12 Tin, ni sarih dang a nghâk leh pek a, ṭhuro chu a thlawh chhuahtîr leh a; tin, a hnênah a lo kîr leh ta lo va. 13 Tin, heti hi a ni a, a kum zaruk leh kum khatnaah, a thla khatna ni khat niah chuan tui chu lei ata a kang zo ta a; tichuan, Nova chuan lawng khuhna chu a hlîm a, a en a; tin, ngai teh, lei chung chu a lo hil ta tlung a. 14 Tin, a thla hnihna ni sawmhnih leh ni sarih niah chuan lei chu a lo ro zo ta a. 15 Tin, Pathianin Nova hnênah chuan, 16 “Lawng ata chhuak rawh, nang leh i nupui leh i fapate leh i fapate nupuite pawh i hnênah chhuak ve rawh se. 17 Tisa zawng zawng zînga mi thil nung tinrêng i awmpuite kha, sava te, ran te, rannung lei chunga bawkvâka kal tinrêngte nên khân i hnênah hruai chhuak rawh, leiah hian no nei ṭeuhvin, chi tam tak thlaha an lo punna tûrin,” tiin a sawi a. 18 Tichuan, Nova chu a chhuak a, a fapate leh a nupui leh a fapate nupuite pawh a hnênah an chhuak ve a. 19 Sa tinrêng te, rannung tinrêng te, sava tinrêng te, lei chunga che thei apiangte chu anmahni chi awm dân ang ṭheuhvin lawng ata chu an chhuak a.
Novan Pathian tân inthawina a hlân
20 Tin, Nova chuan LALPA tân maichâm a siam a; tin, sa thiang tinrêng zînga mi leh sava thiang tinrêng zînga mi a la a, maichâmah chuan hâlral thilhlante a hlân ta a. 21 Tin, LALPAN rimtui chu a hria a; tin, LALPA chuan a rilruin, “Lei chu mihring avângin ânchhia ka lawh leh tawh lo vang, mihring rilru ngaihtuahnate chu an naupan têt ata a sual si a; tûna ka hrem ang hian thil nung tinrêng ka hrem leh tawh hek lo vang. 22 Lei awm chhûng zawng buh tuh leh buh lâk te, khaw vâwt leh khaw lum te, nipui leh thlasik te, chhûn leh zân te chu a bo lo vang,” a ti a.
Nova hnêna Pathian thuthlung
1 Tin, Pathianin Nova leh a fapate chu mal a sâwm a, an hnênah, “Chi tam tak thlaha lo pungin, lei hi luah khat rawh u. 2 Nangmahni ṭihna leh hlauhna leia sa tinrêng leh chunglêng sava tinrêngin an nei ang; chûngte leh leia bawkvâka kal zawng zawng leh tuifinriat sangha zawng zawngte chu, in kuta pêk an ni vek tawh. 3 Thil nung che thei tinrêngte chu in tân ei tûr an ni ang a; thlai hring ka pêk che u ang khân engkim ka pe vek a che u. 4 Amaherawhchu, sa a nunna (a thisen) chawpin in ei tûr a ni lo. 5 Tin, in thisen, in nunnate thisen phuba chu ka la ngei ngei ang; sa tinrêng lakah ka la ang, mihring lakah pawh. Mi tin an unaute lakah chuan, mihring nunna phuba chu ka la ṭheuh vang. 6 Tu pawh mihring thisen chhuahtu chu, mihring vêkin ama thisen chu an chhuah ve tûr a ni; Pathian anpuiin mihring a siam si a. 7 Tin, nangni chu chi tam tak thlahin lo pung rawh u; leiah hian fa tam tak hring ula, a chungah hian lo pung rawh u,” a ti a. 8 Tin, Pathianin Nova hnênah leh a hnêna awm a fapate hnênah chuan, 9 “Tin, ngai teh u, keimah ngeiin in hnênah leh in hnua in thlahte hnênah pawh ka thuthlung chu ka tinghet a ni; 10 in hnêna thil nung tinrêng awm, in awmpui sava te, ran te, ramsa tinrêngte hnênah pawh; lawng aṭanga lo chhuak zawng zawng, leia sa tinrêng hnênah lam chuan. 11 Tin, in hnênah ka thuthlung chu ka tinghet ang: tisa zawng zawng tuilêta tihboralin an awm leh tawh lo vang a; lei tichhe tûrin tui a lêt leh tawh hek lo vang,” tiin a sawi a. 12 Tin, Pathian vêkin, “Hei hi kei leh nangni leh in hnêna thil nung tinrêng awmte kâra chhuan, tâwp nei lova awm zêlte tân ka thuthlung chhinchhiahna chu a ni. 13 Chhûmah ka chhimbâl ka zâmtîr a, chu chu kei leh lei kâra thuthlung chhinchhiahna tûr a ni ang. 14 Tin, heti hi a ni ang a, lei chunga chhûm ka zâmtîrin chhimbâl chu chhûmah chuan a lang ang a, 15 kei leh nangni leh tisa zawng zawng zînga mi, thil nung tinrêngte kâra ka thuthlung awm hi ka hre reng ang; tichuan, tui chu tisa zawng zawng tiboral tûrin a lêt leh tawh lo vang. 16 Tin, chhimbâl chu chhûmah a zâm ṭhin ang; tichuan, Pathian leh lei chunga tisa awm zawng zawng zînga mi, thil nung tinrêngte kâra kumkhaw thuthlung awm chu, ka hriat reng theihna tûrin ka en ṭhîn ang,” a ti a. 17 Tin, Pathian vêkin Nova hnênah chuan, “Chu chu kei leh lei chunga tisa awm zawng zawng kâra ka thuthlung tihngheh chhinchhiahna a ni,” a ti leh a.
Nova leh a fate
18 Tin, Nova fapa lawng aṭanga chhuakte chu Sema te, Hama te, Japhetha te an ni. Hama chu Kanaana pa a ni. 19 Chu mite pathum chu Nova fapate an ni a, chu mite laka chhuakte chuan lei zawng zawng hi an dâp zo ta a ni. 20 Tin, Nova chu lo neituah a awm ṭan a, grêp hrui huan a siam a. 21 Uain chu a in a, a rui a; tichuan, a puan inah chuan a mu sual ta a. 22 Tin, Hama, Kanaana pa chuan a pa mu sual chu a hmu a, pâwna a unaute pahnih chu a hrilh a. 23 Tichuan, Sema leh Japhetha chuan puan an la a, kokia inzâwnin hnungtawlhin an kal a, an pa mu sual chu an khuh ta a. An hmai chu lehlam hawiin a awm a, an pa mu sual chu an hmu lo va. 24 Tin, Nova chu a uain rui chu a lo harh a, a fapa naupang berin a chunga a tih zia chu a lo hre ta a. 25 Tichuan, “Kanaana chu ânchhe dawngin awm rawh se; A unaute chhiahhlawhte chhiahhlawh a ni ang,” a ti a. 26 “LALPA, Sema Pathian chu fakin awm rawh se; Kanaana chu a chhiahhlawhah awm rawh se. 27 Pathianin Japhetha chu tilian sela, Sema puan inahte awm rawh se; Tin, Kanaana chu a chhiahhlawhah awm rawh se,” a ti bawk a. 28 Tin, Nova chu tuilêt hnu chuan kum zathum leh kum sawmnga a dam a. 29 Tichuan, Nova dam chhûng zawng zawng chu kum zakua leh kum sawmnga a ni a; tin, a thi ta a.
Nova thlahte
1 Tin, hêng hi Nova fapa Sema te, Hama te, Japhetha teho thlahte an ni: tuilêt hnuah chuan fapate an nei hlawm a. 2 Japhetha fapate chu Gomera te, Magoga te, Madaia te, Javana te, Tubala te, Meseka te, Tirasa te an ni a. 3 Tin, Gomera fapate chu Askenaza te, Riphatha te, Togarma te an ni a. 4 Tin, Javana fapate chu Elisa te, Tarsisa te, Kittima te, Dodanima te an ni a. 5 Chûngho aṭang chuan a ni, Jentailte thliarkârahte chuan anmahni ram rama an darh tâk ni, anmahni ṭawng ang zêl leh anmahni hnam ang zêlin anmahni chi zîngahte chuan. 6 Tin, Hama fapate chu Kusa te, Mizraima te, Puta te, Kanaana te an ni a. 7 Tin, Kusa fapate chu Seba te, Havila te, Sabta te, Raama te, Sabteka te an ni a; tin, Raama fapate chu Seba leh Dedana an ni a. 8 Tin, Kusa chuan fapa Nimroda a nei a; ani chu leia mi chak tak a lo ni ṭan ta a. 9 LALPA hmaah chuan sa pêl mi chak tak a ni a; chuvângin a ni, “LALPA hmaa sa pêl chak tak Nimroda ang a ni,” an tih ṭhin ni. 10 Tin, a lal ṭanna chu Sinar rama Babel khua te, Erek khua te, Akkad khua te, Kalne khua te a ni a. 11 Chumi ram aṭang chuan a chhuak a, Assuria ramah a lût a, Ninevi khua te, Rehoboth-ir khua te, Kala khua te, 12 Ninevi leh Kala inkâra Resen khua te a siam a (chumi Resen khua chu khaw ropui tak a ni). 13 Tin, Mizraima chuan Lud-ho te, Anam-ho te, Lehab-ho te, Naphtu-ho te, 14 Pathrus-ho te, Kasluh-ho (Philistin-ho chhuahna) te, Kaptor-ho te chu a thlah a. 15 Tin, Kanaana chuan a fa tîrah Sidona a nei a, Hetha pawh a nei bawk a; 16 Jebus-ho te. Amor-ho te, Girgas-ho te leh, 17 Hiv-ho te, Ark-ho te, Sin-ho te leh, 18 Arvad-ho te, Zemar-ho te, Hamath-ho te a thlah a. Chumi hnuah chuan Kanaan-ho hnamte chu an darh zau ta a. 19 Tin, Kanaan-ho ramri chu Sidon khua aṭangin Gerar pan zâwngin, Gaza khaw thlengin; Sodom leh Gomorra leh Adma leh Zeboiim pan zâwngin, Lasa khaw thlengin a ni. 20 Chûnghote chu Hama thlahte chu an ni, anmahni hnamte ang zêl leh anmahni ṭawngte ang zêlin, anmahni ram ramahte leh anmahni chi zîngahte chuan. 21 Tin, Sema, Ebera fa zawng zawngte thlahtu, Japhetha u pawh chuan fate a nei a. 22 Sema fapate chu Elama te, Assura te, Arpaksada te, Luda te, Arama te an ni a. 23 Tin, Arama fapate chu Uza te, Hula te, Gethera te, Masa te an ni a. 24 Tin, Arpaksada chuan fapa Sela a nei a; tin, Sela chuan fapa Ebera a nei a. 25 Tin, Ebera chuan fapa pahnih a nei a: pakhat hming chu Pelega a ni a, a dam lai chuan lei hi ṭhenin a awm a; a nau hming chu Joktana a ni a. 26 Tin, Joktana chuan fapa Almodada te, Selepha te, Hazarmavetha te, Jera te leh, 27 Hadorama te, Uzala te, Dikla te leh, 28 Obala te, Abimaela te, Seba te leh, 29 Ophira te, Havila te, Jobaba te a nei a. Chûng zawng zawng chu Joktana fapate an ni. 30 Tin, an awmna chu Mesa a ṭangin khawchhak tlâng Sephar lam pan zâwngin a ni. 31 Chûnghote chu Sema thlahte chu an ni, anmahni hnamte ang zêl leh anmahni ṭawngte ang zêlin, anmahni ram ramahte, anmahni chite ang zêl chuan. 32 Chûnghote chu Nova thlahho hnamte an ni a, an thlahte ang zêlin, an chite zîngah chuan; tuilêt hnuah chûngho aṭang chuan a ni, leiah hian chi tin an darh tâk ni.
Babel in sâng
1 Tin, leia mi zawng zawng chu ṭawng hmun khat leh thusawi dân hmun khat an ni vek a. 2 Tin, heti hi a ni a, khawchhak lama an insawn zêl lai chuan Sinar ramah phaizâwl an hmu a; chutah chuan awmhmun an khuar ta a. 3 Tin, “Hawh u, leirawhchan siam ila, ṭha takin i rawh ang u,” an ti hlawm a. Tichuan, lung aiah leirawhchan an hmang a, a châr nân alkatra. 4 Tin, “Hawh u, khawpui siam ila, in sâng a chhîpina vân tawng tûrin sa bawk ila, kan hming i tithang ang u; chuti lo chuan, lei chung zawng zawngah hian tihdarhin kan awm dah ang e,” an ti a. 5 Tin, LALPA chu mihring faten khawpui leh in sâng an siam vêl chu en tûrin a zuk chhuk a. 6 Tin, LALPA chuan, “Ngai teh u, mite hi pumkhat an ni a, an zain ṭawng hmun khat an nei si a, hei thil an ti ṭan a nih hi; tûnah zawng an thiltih tum rêng rêngte pawh khap rual a ni tawh lo vang. 7 Hawh u, i zuk kal ang u khai, ṭawng an inhriat tawn theih loh nân khutah khuan an ṭawng i zuk tihhransak ang u,” a ti a. 8 Chutichuan, LALPAN anniho chu chuta ṭang chuan lei zawng zawngah chuan a tidarh a; tichuan, an khaw siam chu an bânsan ta a. 9 Chuvângin, a hming chu Babel an ti a, LALPAN chutah chuan leia mi zawng zawng ṭawng chu a tihhran tâk avângin; chuta ṭang chuan LALPAN anniho chu lei chung zawng zawngah chuan a tidarh ta bawk a.
Sema thlahte
10 Hêng hi Sema thlahte chu an ni: Sema chu kum za mi a ni a, tuilêt hnu kum hnihah chuan fapa Arpaksada a nei a. 11 Arpaksada a neih hnu chuan Sema chu kum zanga a la dam a, fanu leh fapate a nei leh hlawm a. 12 Arpaksada chuan kum sawmthum leh kum nga a nihin fapa Sela a nei a. 13 Sela a neih hnu chuan Arpaksada chu kum zali leh kum thum a la dam a, fanu leh fapate a nei leh hlawm a. 14 Sela chuan kum sawmthum a nihin fapa Ebera a nei a. 15 Ebera a neih hnu chuan Sela chu kum zali leh kum thum a la dam a, fanu leh fapate a nei leh hlawm a. 16 Ebera chuan kum sawmthum leh kum li a nihin fapa Pelega a nei a. 17 Pelega a neih hnu chuan Ebera chu kum zali leh kum sawmthum a la dam a, fanu leh fapate a nei leh hlawm a. 18 Pelega chuan kum sawmthum a nihin fapa Reuva a nei a. 19 Reuva a neih hnu chuan Pelega chu kum zahnih leh kum kua a la dam a, fanu leh fapate a nei leh hlawm a. 20 Reuva chuan kum sawmthum leh kum hnih a nihin fapa Seruga a nei a. 21 Seruga a neih hnu chuan Reuva chu kum zahnih leh kum sarih a la dam a, fanu leh fapate a nei leh hlawm a. 22 Seruga chuan kum sawmthum a nihin fapa Nahora a nei a. 23 Nahora a neih hnu chuan Seruga chu kum zahnih a la dam a, fanu leh fapate a nei leh hlawm a. 24 Nahora chuan kum sawmhnih leh kum kua a nihin fapa Tera a nei a. 25 Tera a neih hnu chuan Nahora chu kum za leh sâwm leh kum kua a la dam a, fanu leh fapate a nei leh hlawm a. 26 Tera chuan kum sawmsarih a nihin fapa Abrama te, Nahora te, Harana te a nei a.
Tera thlahte
27 Hêng hi Tera thlahte chu an ni: Tera chuan fapa Abrama te, Nahora te, Harana te a nei a. Tin, Harana chuan fapa Lota a nei a. 28 Tin, Harana chu a pianna rama Kaldai-ho khua Ur-ah, a pa Tera hmaah chuan a thi a. 29 Tin, Abrama leh Nahora chuan nupui an nei a: Abrama nupui hming chu Saraii a ni a; Nahora nupui hming chu Harana fanu Milkai a ni a, Harana chu Milkai pa leh Iskai pa a ni. 30 Tin, Saraii chu a ching a; fa rêng a nei lo va. 31 Tin, Tera chuan a fapa Abrama te, a fapaa fapa (Harana fapa) Lota te, a mo, a fapa Abrama nupui Saraii te a hruai a; tin, Kanaan-a kal tûrin Kaldai-ho khua Ur aṭang chuan an chhuak ho ta a; tin, Haran khua an thleng a, chutah chuan awmhmun an khuar ta a. 32 Tin, Tera dam chhûng chu kum zahnih leh kum nga a ni a; tin, Tera chu Haran khuaah chuan a thi ta a.
Pathianin Abrama a ko
1 Tin, LALPAN Abrama hnênah chuan, “I khaw lam ata leh i laichînteho zîng ata leh i pa in ata chhuak la, ram ka la entîr tûr che lamah kal rawh. 2 Tichuan, chi ropui takah ka siam ang chia; mal pawh ka sâwm ang chia, i hming ka tiropui bawk ang; tin, nang malsâwmna ni ang che. 3 Tin, malsâwmsaktu apiang che chu mal ka sâwm ang a, ânchhe lawhtu che chu ânchhia ka lawh ang; nangmahah chuan leia hnam tin an la thawveng ang,” a ti a. 4 Chutichuan, Abrama chu LALPAN a hnêna a sawi angin a kal ta a, Lota chu a hnênah a kal ve a. Tin, Abrama chu Haran khua ata a chhuah lai chuan kum sawmsarih leh kum nga mi a ni a. 5 Tin, Abraman a nupui Saraii leh, a nau fapa Lota leh an sum deh chhuah zawng zawng leh, Haran khuaa an mi neih tâkte chu a hruai a, Kanaan rama kal tûrin an chhuak a. Tin, Kanaan ram chu an thleng ta a. 6 Abrama chu chumi ramah chuan Sekem hmun thlengin, More sasua thleng chuan a kal zêl a. Chûng lai chuan Kanaan-hote chu chumi ramah chuan an awm a. 7 Tin, LALPA chu Abrama hnênah a inlâr a, “He ram hi i thlahte hnênah ka la pe ang,” a ti a. Tichuan, chutah chuan a hnêna inlâr LALPA tân chuan maichâm a siam a. 8 Tin, chuta ṭang chuan Bethel chhak lama tlângah chuan a insawn a, chutah chuan a puan in a zâr a, a thlang lamah chuan Bethel chu a awm a, a chhak lamah Ai khua a awm a; chutah chuan LALPA tân maichâm a siam leh a, LALPA hming chu a lam a. 9 Tin, Abrama chu chhim ram lam pan cheuvin a insawn ta zêl a.
Aigupta ramah Abrama a kal
10 Tin, chumi ramah chuan ṭâm a lo tla a; tin, chumi ramah chuan ṭâm chu a nasat êm avângin, Abrama chu Aigupta rama awm rih tûrin a chhuk ta a. 11 Tin, heti hi a ni a, Aigupta rama an luh dâwn lai chuan a nupui Saraii hnênah chuan, “Ngai teh, hmeichhe hmêlṭha tak i ni tih ka hria. 12 Tichuan, hetiang hi a ni ang, Aigupta-hovin an hmuh hunah che chuan, ‘Hei hi a nupui a nih hi,’ an ti ang a; tin, kei chu min that mai ang, nang erawh chu an zuah ang che. 13 I zâra ṭha taka ka awm theih nân leh nangmah avânga ka nun theih nân, ‘A farnu ka ni,’ khawngaih takin ti zêl ang che,” a ti a.
Abraman Hebron a pan
14 Tin, heti hi a ni a, Abrama chu Aigupta rama a luh chuan, Aigupta-ho chuan hmeichhia chu an hmu a, a hmêl chu ṭha an ti êm êm a. 15 Pharaoa mi liante pawhin an hmu a, Pharaoa inah an hruai lût ta a. 16 Tin, ani chuan Saraii avângin Abrama chu ṭha takin a ti a; tichuan, berâm te, bâwngpa te, sabengtungpa te, bawihpa te, bawihnu te, sabengtungnu te, sanghâwngsei te a neih phah ta a. 17 Tin, LALPA chuan Abrama nupui Saraii avângin, Pharaoa leh a chhûngte chu sawisak namênin a sawisa ta lo va. 18 Tichuan, Pharaoa chuan Abrama chu a ko va, “Ka chunga i thiltih hi engtizia nge ni le? I nupui a ni tih engati nge mi hrilh loh? 19 ‘Ka farnu a ni,’ engati nge i tih? Chumi avâng chuan alâwm ka nupuia ka lo neih tâk hial ni. Aw le, tûnah en rawh i nupui hi, hruai la, kal daih rawh,” a ti a. 20 Tin, Pharaoa chuan a chungchâng thu-ah chuan mi hnênah thu a pe a; tichuan, amah an han thlah ta a, a nupui nên, a neih zawng zawng nên.
1 Tin, Abrama chu Aigupta ram aṭang chuan a chhuak a, chhim ramah chuan a chho ta a, a hnênah chuan a nupui te, a neih zawng zawng te, Lota te an chho ve a. 2 Tin, Abrama chu ran te, tangkarua te, rangkachak tein a hausa êm êm a. 3 Tin, chhim ram aṭang chuan Bethel thleng zakin a kal zêl a, Bethel leh Ai khaw inkâra a tîra a puan in awmnaah khân, 4 a tîra a maichâm siamna ngeiah khân; tin, chutah chuan Abrama chuan LALPA hming a lam a. 5 Tin, Lota, Abrama hnêna kal ve pawh khân bêram rual te, bâwng rual te, puan in te a nei ve a. 6 Tin, an awm dunna tûrin ramin a daih ta lo va, an thil neih chu a nasa êm si a; chutichuan, an awm dûn thei ta hlawl lo va. 7 Tichuan, Abrama ran pute leh Lota ran pute kârah chuan inhnialna a lo chhuak ta a. Chumi lai chuan Kanaan-hote leh Periz-hote chu chumi ramah chuan an awm a. 8 Tichuan, Abraman Lota hnênah, “Khawngaih takin, nang leh keia kârah, i ran pute leh ka ran pute kârah pawh inhnialna awm suh se; unau kan ni si a. 9 Ram chu a pum puiin a awm duai lo vem ni? Khawngaih takin ka hnên ata hi intihrang mai rawh. Nang vei lama i kal chuan kei ding lamah ka kal ang a; a nih loh leh, nang ding lama i kal chuan kei vei lamah ka kal ang e,” a ti a. 10 Tichuan, Lota chu a dâk a, Zoar khaw lam pan zâwng chuan Jordan phaizâwl zawng zawng chu LALPA huan ang, Aigupta ram anga ram tina tui tam tak awm chukna a ni tih a hria a, LALPAN Sodom leh Gomorra khua a tihchhiat hma kha a ni si a. 11 Chutichuan, Lota chuan Jordan phaizâwl zawng zawng chu a thlang ta a; tin, Lota chu chhak lamah chuan a insawn a. Tichuan, an inṭhen ta a. 12 Abrama chu Kanaan ramah chuan a awm a, Lota chu phaizâwl khuaahte chuan a awm a, a puan in chu Sodom khaw thlengin a sawn zêl a. 13 Tin, Sodom mite chu LALPA mit hmuhin nasa taka suaksual leh mi sual an ni a. 14 Tin, a hnên ata Lota a awm hran hnu chuan LALPAN Abrama hnênah, “Dâk la, i awmna aṭang khân hmâr lam te, chhim lam te, chhak lam te, thlang lam te en rawh; 15 i ram hmuh zawng zawng hi kumkhua atân nang leh i thlahte ka pe dâwn che u a ni. 16 Tin, i thlahte chu leia vaivut ang maiin ka la siam ang; chutichuan, miin leia vaivut hi an chhiar sên chuan, i thlahte pawh chhiar sên an ni ang. 17 Tho la, ram hi a dung leh a vâng fang chhuak rawh; ka pe dâwn che a ni,” a ti a. 18 Tichuan, Abrama chuan a puan in chu a sawn a, Hebron-a awm Mamre sasaw kiangahte chuan awmhmun a va khuar a, chutah chuan LALPA tân maichâm a siam a.
Abraman Lota a chhanchhuak
1 Tin, Sinar khaw lal Amraphela te, Ellasar khaw lal Arioka te, Elam khaw lal Kedorlaomera te, Goiim khaw lal Tidala te dam lai chuan heti hi a ni a, 2 anni chuan Sodom khaw lal Bera chu an rûn a, Gomorra khaw lal Birsa te, Adma khaw lal Sinaba te, Zeboiim khaw lal Semebera te, Bela khaw lal te chu an rûn bawk a (Bela khua chu Zoar khua a ni a). 3 Chûngho zawng zawng chu Siddim ruamah chuan an ṭang tlâng a (chumi ruam chu Tuifinriat Al a ni a). 4 Kum sâwm leh kum hnih chhûng Kedorlaomera hnuaiah an awm a, a kum sâwm leh kum thumnaah erawh chuan an hel ta a. 5 Tichuan, a kum sâwm leh kum linaah chuan Kedorlaomera leh a hnêna lal awmte chu an lo kal a, Asteroth-karnaim khuaah Rephaim-hote an that a, Ham khuaah Zuzim-hote an that a, Kiriathaim khuaah Emim-hote an that a, 6 an awmna Seir tlângah, El-paran thlengin Hor-hote an that a (El-paran chu thlalêr depa awm a ni). 7 Tin, an kîr leh a, En-mispat an thleng a (chu chu Kadesh a ni a). Amalek-ho rama mi zawng zawng leh Amor-ho, Hazazon-tamar khuaa awmte pawh chu an that leh a. 8 Tichuan, Sodom khaw lal te, Gomorra khaw lal te, Adma khaw lal te, Zeboiim khaw lal te, Bela khaw lal te chu an chhuak a (Bela khua chu Zoar khua a ni a); tin, Siddim ruamah chuan anniho chu bei tûrin an ṭang tlat a; 9 Elam khaw lal Kedorlaomera te, Goiim khaw lal Tidala te, Sinar khaw lal Amraphela te, Ellasar khaw lal Arioka te chu bei tûrin; lal paliin lal panga an bei a. 10 Tin, Siddim ruam chu alkatra khurin a khat a; tin, Sodom leh Gomorra khaw lalte chu an tlânchhia a, chutah chuan an tla a, a tla bângte chu tlângah chuan an tlân bo ta a. 11 Tichuan, Sodom leh Gomorra mite sum zawng zawng leh an ei tûr zawng zawng chu an la a, an haw ta a. 12 Lota, Abrama unauva fapa, Sodom khuaa awm chu, a sumte nên an la bawk a, an kal ta a. 13 Tin, mi pakhat tlân chhuak chu a lo kal a, Hebrai mi Abrama chu a hrilh a; ani chu Amor mi Mamre-a sasaw kiangahte chuan a awm a. Mamre-a chu Eskola unau leh Anera unau a ni a; chûng mite chu Abrama te nêna ṭang za an ni a. 14 Tin, Abraman a fa chu salah an hruai tih a hriat veleh, a ina piang, ama mi, zir thiam sa tawh, zathum leh sâwm leh pariat a hruai chhuak a, Dan khaw thlengin a ûm ta a. 15 Tin, zânah chuan anmahni bei tûrin amah leh a bawihte chu an insem darh a, anniho chu an that a, Hoba khaw thlengin an ûm a (Hoba chu Damaska khaw hmâr lamah a awm a). 16 Tin, sum zawng zawng chu a rawn la kîr leh vek a, a fa Lota leh a sumte chu a rawn la leh vek bawk a, hmeichhiate pawh a rawn hruai leh a, mi dang zawng zawngte nên.
Melkisedekan Abrama mal a sâwm
17 Tin, Kedorlaomera leh a hnêna lal awmte thata a hâwn hnuah chuan, Sodom lal chu Save ruamah chuan Abrama hmuakin a chhuak a (Save ruam chu Lal ruam a ni a). 18 Tin, Salem khaw lal Melkisedeka chuan chhang leh uain a rawn la a; ani chu Pathian Chungnungbera puithiam a ni a. 19 Tin, ani chuan Abrama chu mal a sâwm a, “Lei leh vân neitu Pathian Chungnungbera chuan Abrama malsâwm rawh se. 20 I hmêlmate i kuta petu, Pathian Chungnungbera chu fakin awm bawk rawh se,” a ti a. Tin, Abrama chuan ani chu engkim sâwma pakhat a pe a. 21 Tin, Sodom khaw lal chuan Abrama hnênah, “Mihringte hi mi pe la, sumte hi chu nangman nei rawh,” a ti a. 22-23 Tin, Abrama chuan Sodom khaw lal hnênah chuan, “La zai khat tê pawh, pheikhawk chilhna pakhat tê pawh, i neih rêng rêng chu ka la lo vang, tiin lei leh vân neitu, LALPA, Pathian Chungnungbera lamah chuan ka kut ka phar tawh a ni; chuti lo chuan, ‘Abrama chu keima tihhausak alâwm,’ i ti dah ang e: 24 tlangvâlho ei ral leh ka mi kalpuite chanvo chauh lo chu ka la lo vang; Anera te, Eskola te, Mamre-a te chuan an chanvo chu la rawh se,” a ti a.
Abrama hnêna Pathian thuthlung
1 Chûng thil hnuah chuan, “Abram, hlau suh, kei hi i phaw leh i lâwmman nasa tak mai ka ni asin,” tiin, LALPA thu chu Abrama hnênah mumang angin a lo thleng a. 2 Tin, Abrama chuan, “Aw LALPA PATHIAN, eng nge mi pêk ang, fa nei lovin ka awm hlen dâwn a, ka ro khâwmtu tûr chu Damaska khuaa mi Eliezera hi a ni si a?” a ti a. 3 Tin, Abrama vêkin, “Ngai teh, chi rêng rêng mi thlahtîr si lo va; en teh, ka ina piang hi ka ro luahtu tûr a ni,” a ti a. 4 Tin, ngai teh, “Kha mi kha i ro luahtu tûr a ni lo vang; nangma rîla lo la rah tûr ngei chu i ro luahtu tûr a ni zâwk ang,” tiin LALPA thu chu a hnênah a lo thleng a. 5 Tin, ani chu pâwnah a hruai chhuak a, “Vân lam khi en la, arsite khi i chhiar theih chuan chhiar teh khai,” a ti a. Tin, amah vêkin a hnênah, “I thlahte chu khiti zât khi an la ni ang,” a ti a. 6 Tin, ani chuan LALPA chu a ring a; tichuan, ani chuan chu chu a felnaah a ruat ta a. 7 Tin, a hnênah, “He ram hi luah tûra pe tûr chea Kaldai-ho khua Ur ata hruai chhuaktu che LALPA kha ka ni,” a ti a. 8 Tin, ani chuan, “Aw LALPA PATHIAN, ka luah ang tih engtin nge ka hriat ang?” a ti a. 9 Tin, ani chuan a hnênah, “Bâwngla kum thum mi leh kêlpui kum thum mi leh berâmpa kum thum mi leh ṭhuro leh pârvano mi rawn lâk rawh,” a ti a. 10 Tichuan, chûng zawng zawng chu a rawn lâksak a, a lai takah a phel ṭheuh va, a phel pakhat chu a phel lehlam zâwnah chuan a dah ṭheuh zêl a; savate erawh chu a phel ve lo va. 11 Tin, sava sa hel ei mite chu saruangahte chuan an zuk fu ṭhîn a, Abrama chuan a lo hnawt kiang zêl a. 12 Tin, ni tlâk dâwn suar suar lai chuan Abrama chu a lo muhîl ta dêr mai a; tin, ngai teh, thim nasa tak, thil râpthlâk zet hian amah a rawn khuh a. 13 Tin, Pathian chuan Abrama hnênah, “I thlahte chu anmahni ram lovah chuan mikhualin an la awm ang a, an rawng an la bâwlsak ang tih chiang takin hre rawh khai; tin, kum zali an tirethei ang a. 14 Tin, an rawng an bâwlsakate chi pawh chu ka la ngaihtuah ang a; tin, chumi hnuah chuan sum tam tak neiin an lo la chhuak ang. 15 Nang erawh chu i thlahtute hnênah thlamuang takin i kal ang a; i lua kêlsam ṭo vekin an phûm ang che. 16 Tin, chhuan linaah chuan hetah hian an lo kal leh ang; Amor-ho sualnate hi a la kim rih si lo,” a ti a. 17 Tin, heti hi a ni a, ni a tlâka khua a lo thim chuan, ngai teh, rawh tuina mei khu mup mup leh chûng sa phel kârah chuan, meichher alh hluah hluah kal kal a lo awm a. 18 Chumi ni chuan LALPA chuan, “He ram hi, Aigupta lui aṭanga lui lian pui (Euphrates lui) thlengin i thlahte ka pe tawh: 19 Ken-ho te, Keniz-ho te, Kadmon-ho te, 20 Hit-ho te, Periz-ho te, Rephaim-ho te, 21 Amor-ho te, Kanaan-ho te, Girgas-ho te, Jebus-ho te nên hian ka pe bawk a,” tiin Abrama hnênah chuan thu a thlung ta a.
Hagari leh Ismaela
1 Tin, Abrama nupui Saraii chuan fa rêng rêng a hrinsak lo va; tin, Saraii chuan Aigupta mi bawihnu pakhat a nei a, chu mi hming chu Hagari a ni a. 2 Tin, Saraii chuan Abrama hnênah, “Ngai teh khai, LALPAN fa mi neihtîr phal loh hi; khawngaih takin ka bawihnu hi pâwl rawh; ama lakah chuan fate ka nei mahna,” a ti a. Tichuan, Abrama chuan Saraii thu chu a zâwm ta a. 3 Tichuan, Abrama nupui Saraii chuan, Abrama chu Kanaan rama kum sâwm a awm hnu chuan, a bawihnu Aigupta mi Hagari chu a hruai a, a pasal Abrama hnênah chuan a nupuia awm tûrin a pe a. 4 Tin, Hagari chu a lo pâwl a; tin, ani chu a rai ta a. Tin, a rai tih a inhriat veleh a pi chu a hmusit ta mai a. 5 Tichuan, Saraii chuan Abrama hnênah, “Ka thil tuar hi nangin a mawh phur rawh! Ka bawihnu chu i pawm atân ka pe chia; tin, a rai tih a inhriat veleh mi hmusit ta mai a. LALPA chuan nang leh keia thu hi ngaihtuah rawh se,” a ti a: 6 Abrama erawh chuan Saraii hnênah, “Ngai teh, i bawihnu chu i kuta awm alâwm; i remtih ang apiang chu a chungah ti ta che,” a ti a. Tichuan, Saraii chuan a tirethei ta hle a; chuvângin, a tlân bosan ta a. 7 Tin, LALPA vântirhkoh chuan thlalêrah tuikhur kiangah, Sur panna kawnga tuikhur kiangah chuan a lo hmu a. 8 Tin, a hnênah, “Hagar, Saraii bawihnu, khawi aṭangin nge i lo kala, khawiah nge i kal dâwn?” a ti a. Tin, ani chuan, “Ka pi Saraii hnên ata ka tlân bo a ni,” a ti a. 9 Tin, LALPA vântirhkoh chuan a hnênah, “I pi hnênah kîr leh la, a thu thuin awm rawh,” a ti a. 10 Tin, LALPA vântirhkoh vêk chuan a hnênah, “I thlahte chu chhiar sên loh khawp hiala tamin ka la tipung ang,” a ti leh a. 11 Tin, LALPA vântirhkoh vêk chuan a hnênah, “Ngai teh, nau i pai ta a, fapa i hring ang a; LALPA chuan i hrehawmzia hi a hriat tâk avâng hian a hmingah chuan Ismaela i sa tûr a ni. 12 Ani chu mihring zînga ramsabengtung ang a ni ang; ani chuan mi tin a do vang a, mi tinin ani pawh an do bawk ang; a unau zawng zawng depah a awm bawk ang,” a ti leh pek a. 13 Tin, Hagari chuan amah betu LALPA hming chu, “Nang hi hmutheitu Pathian i ni,” tiin a vuah a, “Hetah ngei hian mi hmutu chu ka en zui zêl em ni aw?” a ti a ni. 14 Chumi avâng chuan tuichhunchhuah chu “Beer-lahai-roi” vuah a ni ta a; ngai teh, Kadesh leh Bered khaw inkârah a awm. 15 Tin, Hagari chuan Abrama chu fapa a hrinsak a; tin, Abrama chuan a fapa Hagari hrin chu a hmingah Ismaela a sa ta a. 16 Tin, Hagarin Abrama tân Ismaela a hrin lai chuan Abrama chu kum sawmriat leh kum ruk mi a ni a.
Thuthlung chhinchhiah nân serh tan tûr
1 Tin, Abrama chu kum sawmkua leh kum kaw mi a nihin, LALPA chu Abrama hnênah chuan a rawn inlâr a, a hnênah, “Kei, Pathian Engkimtitheia ka ni; ka hmaah awm la, ṭha famkimin awm rawh. 2 Tichuan, nangmah nêna kan inkârah thu ka thlung ang a, nasa takin ka tipung ang che,” a ti a. 3 Tin, Abrama chu a bawkkhup ta a; tin, Pathianin ani chu a bia a, 4 “Ngai teh, kei zawngin ka thuthlung chu i hnênah a ni ka thlun ni; tichuan, chi hrang hrang tam tak thlahtu i ni tawh ang. 5 I hming pawh Abrama a ni tawh lo vang a, i hming hi Abrahama a ni tawh zâwk ang; chi hrang hrang tam tak thlahtu tûra ka siam tâk che hi. 6 Tin, nasa takin chi ka thlahtîr ang chia, nangmahah chuan chi tih tham zet zette ka siam ang a, nangmah aṭang chuan lalte an lo chhuak bawk ang. 7 Tin, kei leh nang leh i hnua i thlahte, an thlah chhâwng zêlte thleng pawhin ka thuthlung hi, i tân leh i hnua i thlahte tâna an Pathian ni tûrin, kumkhaw thuthlung atân ka tinghet ang. 8 Tin, i hnênah leh i hnua i thlahte hnênah chuan i mikhualna ram, Kanaan ram zawng zawng hi kumkhaw ro atân ka pe dâwn che u a ni; tin, kei hi an Pathian ka ni ang,” a ti a. 9 Tin, Pathian vêkin Abrahama hnênah chuan, “Tin, nang zawngin ka thuthlung hi i zâwm tûr a ni; nangin i zâwm tûr a ni a, i hnua i thlahte, an thlah chhâwng zêlte thleng pawhin an zâwm ve tûr a ni. 10 Hei hi kei leh nang leh i hnua i thlahte kâra ka thuthlung i zawm tûr chu a ni; in zînga mipa tawh phawt chu serh tan tûr a ni. 11 Tichuan, in serh vun tisaah chuan serh tanin in awm tûr a ni; chu chu nangmah nêna kan inkâra thuthlung chhinchhiahna a ni ang. 12 Tichuan, in zînga ni riat mi chu, in thlah chhâwng zêlte thleng pawhin, i thlah ni kher lo pawh, i ina piang emaw, mikhual tu laka mi pawh tangka suma i lei emaw pawh ni sela, mipa tawh phawt chu serh tan tûr a ni. 13 I ina piang leh i tangka suma i lei pawh serh tan ngei tûr a ni; tichuan, ka thuthlung chu kumkhaw thuthlung atân in tisaah a awm tawh ang. 14 Tin, mipa serh tan loh, a serh vun tisaa serh tana awm lo chu, chu mi ngei chu a chipui zîng ata tihboral a ni ang; ani chuan ka thuthlung chu a bawhchhia a ni,” a ti leh a. 15 Tin, Pathian vêkin Abrahama hnênah, “I nupui Saraii pawh, a hmingah Saraii i ti tawh lo vang a, a hming chu Sari a ni tawh zâwk ang. 16 Tin, ani chu mal ka sâwm ang a, chu lo pawh chu ama lakah chuan fapa ka pe ang che; a ni, amah chu mal ka sâwm ang a, chi hrang hrang thlahtunu a ni tawh ang; hnam hrang hrang lalte ama lakah chuan an lo la chhuak ang,” a ti leh pek a. 17 Chutichuan, Abrahama chu a bawkkhup a, a nui a, a rilruin, “Kum za mi hian fa a nei dâwn em ni ang? Sari, kum sawmkaw mi chuan fa a hring dâwn em ni ang?” a ti a. 18 Tin, Abrahama vêk chuan Pathian hnênah, “Ismaela hi i hmaah awm thei sela aw!” a ti a. 19 Tin, Pathianin, “Ni lo ve, i nupui Sarin fapa a hrinsak zâwk ang che, a hmingah chuan Isaaka i sa tûr a ni; tin, ka thuthlung chu ama hnua a thlahte tân, kumkhaw thuthlung atân a hnênah chuan ka tinghet ang. 20 Ismaela chung thu pawh hi ka ngaihthlâksak che a ni; ngai teh, amah chu mal ka sâwm tawh a, chi tam tak ka thlahtîr ang a, nasa takin ka tipung bawk ang; ani chuan lal sâwm leh pahnih a hring ang a, amah chu chi ropui takah ka la siam ang. 21 Ka thuthlung erawh chu Isaaka, Sarin nakkum hetih hun taka a hrinsak tûr che hnênah chuan a ni ka tihngheh zâwk dâwn ni,” a ti a. 22 Tichuan, a hnêna a thusawi chu a bâng a; tin, Pathian chuan Abrahama chu a chhohsan ta a. 23 Tin, Abrahama chuan a fapa Ismaela leh, a ina piang zawng zawngte leh a tangka suma a lei zawng zawng, Abrahama chhûngte zînga mi mipa tawh phawt chu a hruai a, Pathianin a hnêna a sawi tawh angin, chumi ni ngei chuan an serh vun tisa chu a tansak ta a. 24 Tin, Abrahama chu a serh vun tisaa a serh an tan lai chuan kum sawmkua leh kum kaw mi a ni a. 25 Tin, a fapa Ismaela chu a serh vun tisaa a serh an tan lai chuan kum sâwm leh kum thum mi a ni a. 26 Chumi ni ngei chuan Abrahama leh a fapa Ismaela chu serh tan an lo ni ta a. 27 A chhûngte zînga mipa zawng zawng, a ina piangte leh mikhual laka tangka suma a leite pawh, ama rual chuan serh tan an lo ni ta vek a.
Abrahama hnêna fapa pêk tiam
1 Abrahama chu chhûn ni lum lai taka puan in kawngka bula a ṭhut laiin, LALPA chu Mamre sasaw kiangahte chuan a hnênah a rawn inlâr a; 2 tin, a han dâk a, a en a; tin, ngai teh, a zâwn lawkah chuan mi pathum an lo ding reng a; tin, a hmuh veleh puan in kawngka ata chu anmahni lâwm tûrin a va tlân a, lei siin chibai a bûk a, 3 “Ka pu, mi khawngaih theih chuan, khawngaih takin i chhiahhlawh hi mi kal pêl lul suh ang che u; 4 tui tlêm tal rawn la sela, in kete sil ula, thing hnuaiah hian châwl teh rih u. 5 Chhang tlêm tal ka va la ang a, in thinlung tiharh ang che u; chumi hnuah chuan in kal zêl dâwn nia; chumi avânga in chhiahhlawh hnêna lo kal hi in ni châwk ang a,” a ti a. Tin, anni chuan, “I sawi ang chuan va ti rawh,” an ti a. 6 Tichuan, Abrahama chu puan in chhûngah Sari hnênah chuan a lût thuai a, “Rang takin chhangphut dip tak tehkhâwng thum siam la, hmet la, chhangpêrahte siam rawh,” a ti a. 7 Tin, Abrahama chu bâwng rual lamah a va tlân a, bâwngno nalh ṭha zet hi a rawn la a, chhiahhlawh hnênah a pe a; tin, ani chuan a lo siam thuai thuai a. 8 Tin, hnutetui khal te, hnutetui te, bâwngnosa siamte chu a la a, an hmaah a va hlui ta a; tin, thing hnuaiah chuan an kiangah a ding reng a, anni chuan an ei ta a. 9 Tin, anni chuan a hnênah, “I nupui Sari khawiah nge a awm?” an ti a. Tin, ani chuan, “Saw puan inah sâwn,” a ti a. 10 Tin, ani chuan, “Hun hi a lo thlen leh tikah chuan i hnênah ka lo kal leh ngei ngei ang a; tin, ngai teh, i nupui Sari chuan fapa a nei ang,” a ti a. Tin, a hnunga puan in kawngka bul aṭang chuan Sarin a lo hria a. 11 Abrahama leh Sari chu upa tak, tar tawh tak an ni a; hmeichhe dân pângngai chu Sari chungah chuan a reh daih tawh a. 12 Tichuan, Sarin, “Tar ka nih tawh hnu hian lâwmna ka nei ang maw, ka lalpa lah a upa tawh bawk si a?” tiin a rilruin a nui a. 13 Tin, LALPA chuan Abrahama hnênah, “Engati nge Sarin, ‘Kei tar hian fa ka hring êm ang maw?’ tia a nuih? 14 LALPA tân thil rêng rêng a harsa lutuk em ni? Hun ruatah, hun a lo thlen tikah chuan i hnênah ka lo kal leh ang a; tin, Sari chuan fapa a nei ang,” a ti a. 15 Chutichuan, Sari chuan. “Ka nui lo,” tiin a pha a; a hlau si a. Tin, ani chuan, “Awih loh loh tûr; i nuih ngei kha le,” a ti a.
Abrahaman Sodom khaw tân a dîl
16 Tin, mite chu chuta ta chu an tho va, Sodom khaw lam chu an en a; tin, Abrahama chu anmahni thlah tûrin an hnênah a kal ve a. 17 Tin, LALPA chuan, “Ka thiltih tûr hi Abrahama lakah hian ka zêp ang em aw? 18 Abrahama hi chi ropui leh thiltithei tak a lo la ni ngei dâwn a, amahah chuan khawvêla chi tin an la thawveng dâwn si a. 19 LALPA kawng an zawh theih nân a hnua a fate leh a chhûngte, thil fel taka ti tûr leh rorêl anga ti tûra thu a pêk theihna tûrin ani chu ka ruat tawh si a; chutichuan, a chungchâng thu a sawia chu LALPAN Abrahama chunga a thlentîr theihna tûrin,” a ti a. 20 Tichuan, LALPA chuan, “Sodom leh Gomorra khaw au thâwm chu a nasain, an sual nasa êm êm ngei mai; 21 tûnah ka zuk kal ang a, an au thâwm ka hnêna lo thleng ang ngei hian an ti nge ti lo ka en ang a; an tih loh chuan ka hre mai ang,” a ti a. 22 Tin, mite chu chuta ta chu an hawi a, Sodom khaw lam chu an pan ta a; Abrahama erawh chu LALPA hmaah chuan a la ding reng a. 23 Tin, Abrahama chuan a va hnaih a, “Mi felte chu mi sualte zîngah i tiboral ve dâwn em ni? 24 Khaw chhûngah chuan mi fel sawmnga tal an awm mahna; a chhûnga mi fel sawmnga awmte avâng chuan khua chu zuah phah lovin i tiboral dâwn em ni? 25 Nang êm chuan chutiang chuan mi felte chu mi sualte anga an awm vena tûra, mi felte chu mi sualte zînga tihhlum ve mai te chu i ti âwm êm si lo va; nang êm chuan i ti âwm êm si lo! Lei chung zawng zawng Rorêltu chuan fel takin a ti dâwn lâwm ni?” a ti a. 26 Tin, LALPA chuan, “Sodom khaw chhûngah chuan mi fel sawmnga pawh ka hmuh chuan, anmahni avâng chuan khaw pum pui chu ka zuah mai ang,” a ti a. 27 Tin, Abrahama chuan, “Ngai teh, kei vaivut leh meivâp mai hian LALPA chu ka be pawp ta sa che: 28 mi fel chu pangain sawmnga an tling lo a ni mahna; pangaa an tlin loh avângin khaw pum pui chu i tiboral dâwn em ni?” a ti a, a chhâng a. Tin, ani chuan, “Chutah chuan sawmli leh panga pawh ka hmuh chuan ka tiboral lo vang,” a ti a. 29 Tin, ani chuan amah chu a be leh zêl a, “Chutah chuan sawmli chauh i hmu a ni mahna,” a ti a. Tin, ani chuan, “Sawmli avâng pawh chuan ka tiboral lo mai ang,” a ti a. 30 Tin, ani chuan, “Aw, LALPA chu thinur suh ang che, ka han sawi leh teh ang: chutah chuan sawmthum chauh i hmu a ni mahna,” a ti a. Tin, ani chuan, “Chutah chuan sawmthum pawh ka hmuh chuan ka tiboral lo mai ang,” a ti a. 31 Tin, ani chuan, “Ngai teh, LALPA chu ka be pawp ta sa che: chutah chuan sawmhnih chauh i hmu a ni mahna,” a ti a. Tin, ani chuan, “Sawmhnih avâng pawh chuan ka tiboral lo vang,” a ti a. 32 Tin, ani chuan, “Aw, LALPA chu thinur suh ang che, vawi khat chauh chuan ka han sawi leh teh ang: chutah chuan sâwm chauh i hmu a ni mahna,” a ti a. Tin, ani chuan, “Sâwm avâng pawh chuan ka tiboral lo vang,” a ti a. 33 Tichuan, LALPA chu Abrahama nêna an inbiak zawh veleh chuan a kal ta a; tin, Abrahama chu ama awmna lamah a kîr leh ta a.
Sodom khaw sualzia
1 Tin, vântirhkoh pahnih chuan tlai lamah Sodom khua an zuk thleng a; Lota chu Sodom khaw kulh kawngkhârah chuan a lo ṭhu a; tin, Lotan anmahni a lo hmu a, lâwm tûrin a ding ta a; tin, a hmaia lei siin chibai a bûk a; 2 tin, “Ngai teh u, ka pute u, khawngaih takin in chhiahhlawh inah hian lût rih ula, riak ula, in kete sil rawh u; tichuan, zîng takah in tho vang a, in kal leh dâwn nia,” a ti a. Nimahsela, anni chuan, “Ni lo ve, khawlaiah kan riak zâwk ang,” an ti a. 3 Nimahsela, ani chuan a thlêm chiam a; tichuan, a hnênah an kal a, a inah chuan an lût ta a; tin, ani chuan chawhmeh a siam a, chhang dawidim telh loh a kang a; tin, an ei ta a. 4 Nimahsela, an mut hmain khuaa mi, Sodom khuaa mite ngei chuan, vêng tina mi zawng zawngin, a pui a pangin, in chu an hual vêl hlawm a; 5 tin, Lota chu an ko va, a hnênah, “Zânina i hnêna mi lo lûtte kha khaw nge an awm? Anmahni kan pâwl theih nân kan hnênah rawn hruai chhuak rawh,” an ti a. 6 Tin, Lota chu kawngka bulah chuan an hnênah a va chhuak a, kawng a khâr leh a. 7 Tin, “Ka unaute u, khawngaih takin chuti êm chuan sual ma ta che u. 8 Ngai teh u, mipa la pâwl ngai loh fanu pahnih ka nei a ni; mi khawngaih ula, anni chu in hnênah ka rawn hruai chhuak ang e, ṭha in tih ang apiangin an chungah ti nâng che u; hêng mite chungah erawh hi chuan eng mah ti lul suh ang che u, chumi avâng chuan asin ka in chhûngah hian an lo luh ni,” a ti a. 9 Tin, anni chuan, “Kiang mai rawh,” an ti a. Tin, anmahni vêk chuan, “He mi hrep hi heta awm tûr hian a lo pêm lût a, rorêltuah awm a tum vei a; tûnah zawng anni chunga tih ai mahin i chungah kan ti ṭha lo lehzual ang,” an ti a. Tin, Lota chu an bawh chiam a, kawngkhâr chu tihchhiat tumin an rawn hnaih a. 10 Nimahsela, mite chuan an kut an zen chhuak a, Lota chu an hnênah in chhûngah chuan an hnûk lût a, kawng an khâr ta tlat a. 11 Tin, kawngka bula mite chu a lian a têin an mit an tihdelsak a; chutichuan, kawngkhâr chu an zawng hmu zo ta lo va.
Lotan Sodom khua a chhuahsan
12 Tin, mite chuan Lota hnênah, “Hêng mite lo hi hetah hian chhûngte dang i nei em? I mâkpa leh i fapate leh i fanute leh khaw chhûnga i neih apiangte chu khua ata hi hruai chhuak rawh. 13 LALPA hmaah chuan an au thâwm chu a lo nasat tâk avângin he khua hi kan tiboral dâwn a ni; tiboral tûrin LALPA chuan min tîr bawk si a,” an ti a. 14 Tichuan, Lota chu a kal chhuak a, a fanute neitu, a mâkpate hnênah chuan a va sawi a, “Tho ula, hemi khua ata hi chhuak rawh u; LALPAN khua hi a tiboral dâwn a ni,” a ti a. Nimahsela, a mâkpate ngaih chuan fiamthu sawi ang lek a ni a. 15 Tin, khawfîng a chah veleh chuan vântirhkohte chuan, “Tho la, i nupui leh heta i fanu pahnih awmte hi hruai rawh; chuti lo chuan, he khaw hremnaah hian in boral ve dah ang e,” tiin Lota chu an tur ta sek a. 16 Nimahsela, a la muang hle si a; tichuan, LALPAN amah a khawngaih avângin, mite chuan a kutah leh a nupui kutah leh a fanute pahnih kutah chuan an chelh a; tichuan, an hruai chhuak a, khaw pâwnah chuan an dah ta a. 17 Tin, heti hi a ni a, pâwna an hruai chhuah hnu chuan, “I nunna tûrin tlân chhuak rawh! I hnung lam hawi suh la, phaizâwlah rêng rêng hian ding hek suh; tlângah sâwn tlân rawh; chuti lo chuan, i boral dah ang e,” a ti a. 18 Nimahsela, Lota chuan an hnênah, “Ka pu, chûng ang chu ni suh se! 19 Ngai teh, i chhiahhlawh hian i mit a tlung a, nangin i zahngaihna chu i tilian a, chu zahngaihna chu ka nun humhimin ka chungah i lantîr a ni; tlângah saw zawng ka tlân thei lo vang, thil ṭha lo tak hian mi rawn nangin ka thi dah ang e. 20 Ngai teh, saw khua saw tlân nân a hnai ber a, khaw tê tak tê a ni bawk si a; aw, chutah chuan (khaw tê tak tê a ni lâwm ni?) mi tlântîr zâwk rawh; tichuan, ka nung dâwn nia,” a ti a. 21 Tin, ani chuan a hnênah, “Ngai teh, chu thil kawngah pawh chuan ka zâwm che a ni, khua i sawi chu ka tiboral lo mai ang e. 22 Hmanhmawh la, chutah chuan tlân rawh; chumi i thlen hma loh chuan eng mah ka ti thei dâwn si lo va,” a ti a. Chuvângin, chu khaw hmingah chuan Zoar an vuah ta a.
Sodom leh Gomorra khaw kan chhiat thu
23 Lota chuan Zoar khua chu a thlen chuan lei chungah chuan ni a lo chhuak tawh a. 24 Tin, LALPA chuan Sodom leh Gomorra khaw chungah chuan, vâna LALPA hnên aṭang chuan kât leh mei a sûrtîr a; 25 tichuan, chûng khuate leh phaizâwl zawng zawng leh, khuaa mi zawng zawng leh leia thil ṭote chu a tiboral ta vek a. 26 A nupui erawh chu Lota hnung aṭang chuan a lehhawi a, chi khâwn dingah a lo chang ta a. 27 Tin, Abrahama chu zîng takah LALPA hmaa a dinna hmunah khân a han chho va; 28 tin, Sodom leh Gomorra khaw lam leh phaizâwl ram zawng zawng lam chu a thlîr a, a en reng a; tin, ngai teh, chumi rama meikhu chu rawh tuina meikhu ang maiin a khu chho ngut ngut a. 29 Tin, heti hi a ni a, Pathianin phaizâwl khuate chu a tihboral laia Lota awmna khuate chu a tihboral lai chuan, Pathianin Abrahama chu a hre reng a, Lota chu boralna zîng ata chu a tîr chhuak a.
Moab-ho leh Ammon-ho lo chhuahna bul
30 Tin, Lota chu Zoar khua ata chu a chho va, tlângah chuan a awm a, a fanute pahnih chu a hnênah an awm bawk a; Zoar khuaah a awm ngam si lo va. Tin, amah leh a fanute pahnih chu pûkah an chêng a. 31 Tin, a upa zâwk chuan a naupang zâwk hnênah chuan, “Kan pa hi a upa tawh a, khawvêl zawng zawng dân anga min pâwl tûrin, lei chungah hian mipa pakhat mah an awm tawh si lo va. 32 Hawh, kan pa hi uain i intîr ang khai; tichuan, kan pa chithlah mang lova kan siam theih nân a hnênah kan mu dâwn nia,” a ti a. 33 Tichuan, chumi zân chuan an pa chu uain an intîr ta a. Tin, a upa zâwk chu a lût a, a pa hnênah chuan a va mu a; tin, ani chuan a lo mut lai chu a hre lo va, a thawh leh lai pawh chu a hre hek lo. 34 Tin, heti hi a ni a, a tûkah chuan a upa zâwk chuan a naupang zâwk hnênah chuan, “Ngai teh, nizânah khân ka pa hnênah ka mu a, zâninah pawh hian uain i intîr leh ang khai; tin, nang lût la, kan pa chithlah mang lova kan siam theih nân a hnênah va mu ve rawh,” a ti a. 35 Tichuan, chumi zân pawh chuan an pa chu uain an intîr leh a; tin, a naupang zâwk chu a tho va, a hnênah a va mu ta a; tin, ani chuan a lo mut lai chu a hre lo va, a thawh leh lai pawh chu a hre hek lo. 36 Chutiang chuan Lota fanute pahnih chuan an pa lakah chuan nau an lo pai ta ve ve a. 37 Tin, a upa zâwk chuan fapa a hring a, a hmingah chuan Moaba a sa a; chu mi chu tûnlaia Moab-ho thlahtu hi a ni a. 38 Tin, a naupang zâwk pawh chuan fapa a hring ve a, a hmingah chuan Ben-ammia a sa a; chu mi chu tûnlaia Amona thlahte thlahtu hi a ni.
Abrahama leh Abimeleka
1 Tin, Abrahama chu chuta ṭang chuan chhim ram lam panin a insawn a, Kadesh khua leh Sur kârah chuan awmhmun a khuar a; Gerar khuaah chuan a awm ta rih bawk a. 2 Tin, Abrahaman a nupui Sari chu, “Ka farnu a ni,” a ti a; tichuan, Gerar lal Abimeleka chuan mi a tîr a, Sari chu a va hruaitîr ta a. 3 Nimahsela, Pathian chu zânah a mumangah Abimeleka hnênah a lo kal a, a hnênah, “Ngai teh, i hmeichhe hruai avâng hian mitthi mai i ni ta; mi nupui a ni si a,” a ti a. 4 Abimeleka erawh chuan a la pâwl rih lo va; tichuan, “LALPA, mi fel takte pawh i tihlum dâwn em ni? 5 Amah ngei pawhin ka hnênah, ‘Ka farnu a ni,’ a ti lâwm ni? Tin, ani ngei pawhin, ‘Ka nuṭa a ni,’ a ti bawk si a; thinlung ṭha tak pu leh kut thianghlim tak nei chungin hei hi ka ti a ni,” a ti a. 6 Tin, Pathianin a mumangah chuan, “Ni, hei hi thinlung ṭha tak pu chungin i ti a ni tih ka hria e. Tichuan, kei pawhin ka chunga thil i tihsual tûr chu ka khap che a ni; chuvângin a ni, amah i khawih ka phal loh ni. 7 Chutichuan, tûnah mi nupui kha pe kîr leh rawh; ani chu zâwlnei a ni si a, a ṭawngṭaisak ang chia, i dam dâwn nia. I pêk kîr leh loh zawngin i thi ngei dâwn tih hre rawh, nang leh i neih zawng zawng nên,” a ti a. 8 Tichuan, Abimeleka chu zîng takah a tho va, a chhiahhlawh zawng zawng a ko va, an beng hriatah chûng thu zawng zawng chu a hrilh a; tin, mite chuan an hlau ta êm êm a. 9 Chutichuan, Abimeleka chuan Abrahama a ko va, a hnênah, “Kan chunga i thiltih hi engtizia nge ni le? Eng kawngah nge i chungah thil ka tihsuala, kei leh ka khua leh tuite chungah hian thil sual nasa tak i rawn thlen hi le? Thil tih âwm loh tak ka chungah i tih tâk hi,” a ti a. 10 Tin, Abimeleka vêk chuan Abrahama hnênah, “Eng nge i hmuha, hetiang thil hi i tih le?” a ti leh a. 11 Tin, Abrahama chuan, “He khuaah hian Pathian ṭihna a awm hauh lo ngei ang a, ka nupui vâng hian mi tihlum mai ang tih ka rin vâng a ni. 12 Chu achhapah ka farnu a ni rêng bawk si a, ka pa fanu a ni a, ka nu fanu erawh chu a ni lo; tin, ka nupuiah a lo awm ta a ni. 13 Tin, heti hi a ni a, Pathianin ka pa in ata mi vahvaihtîr lai khân, a hnênah, ‘Hei hi i khawngaihna ka chunga i lantîr tûr chu a ni: kan thlenna hmun apiangah, “Ka nuṭa a ni,” ti zêl ang che,’ ka ti rêng a ni,” a ti a. 14 Tin, Abimeleka chuan berâmte leh bâwngpate leh bawihpate leh bawihnute a hruai a, Abrahama chu a pe a, a nupui Sari pawh chu a pe kîr leh ta a. 15 Tin, Abimeleka chuan, “En teh, ka ram chu a awm duai alâwm, i duhna apiangah hian awm rawh,” a ti a. 16 Tin, Sari hnênah chuan, “En teh, i nuṭa hi tangka sângkhat ka pe ta a; ngai teh, i hnêna awm zawng zawngte lakah chuan i tân mit khuhna tûr a nih hi; i chung thu rêng rêngah hian i fel leh tawh vek a ni,” a ti a. 17 Tichuan, Abrahama chuan Pathian hnênah a ṭawngṭaisak a; tin, Pathianin Abimeleka leh a nupui leh a bâwihnute chu a tidam leh a; tichuan, fate an hring leh ta a. 18 Abrahama nupui Sari avâng chuan, LALPA chuan Abimeleka chhûngte zawng zawng chu a tiching ta tlat hlawm si a.
Isaaka pian thu
1 Tin, LALPA chuan a sawi tawh angin Sari chu a zuk kan a, LALPA chuan a sawi tawh angin Sari chungah a tihsak ta bawk a. 2 Tichuan, Sari chu a rai a, Pathianin a hnêna a sawi hun ruat takah chuan Abrahama chu a tar hnuin fapa a hrinsak ta a. 3 Tin, Abrahaman a fapa neih, Sarin a hrinsaka chu a hmingah Isaaka a sa a. 4 Tin, Pathianin thu a pêk ang khân Abrahaman a fapa Isaaka chu ni riat a tlinin a serh a tansak a. 5 Tin, Abrahama chu a fapa Isaaka a neih lai chuan kum za mi a ni a. 6 Tin, Sari chuan, “Pathianin mi tinui ta; mi tin a hria apiangin mi nuihpui ang,” a ti a. 7 Tin, amah vêkin, “ ‘Sarin nautête a la pawm ang,’ tih tuin nge Abrahama hnênah sawi ngaihna hria ang? A tar hnu hian fapa ka hrinsak tâk hi,” a ti a. 8 Tin, nautê chu a lo ṭhang lian a, a hnute hnêk an bântîr ta a; tin, Isaaka chu a hnute hnêk an bântîr ni chuan Abrahaman ruai ropui tak a ṭheh a.
Hagari leh Ismaela hnawh chhuah thu
9 Tin, Aigupta mi Hagari fapa, Abrahama tâna a hrina chuan a nuihsan lai Sarin a hmu a. 10 Chumi avâng chuan Abrahama hnênah chuan, “He bawihnu leh a fapa hi hnawt chhuak rawh; he bawihnu fapa hi ka fapa Isaaka ro luahpuitu tûr a ni thei lo vang,” a ti a. 11 Tin, chu thu chu a fapa avângin Abrahama ngaih chuan thil ṭha lo tak a ni. 12 Nimahsela, Pathianin Abrahama hnênah chuan, “Naupang chungchâng thu leh i bawihnu chungchâng thu leh bawih chungchang thu hi i ngaihin thil ṭha lo tak ni suh se; Sarin i hnêna thu a sawi zawng zawng chu zâwm rawh; Isaaka-ah hian i thlahte an la ti dâwn si a. 13 Tin, bawihnu fapaah pawh hian, i thlah a nih avângin chi tihtham zet ka la siam ang,” a ti a. 14 Tichuan, Abrahama chu zîng takah a tho va, chhang leh tuithâwl tuia khat a la a, Hagari a pe a, a kokiah a chhuansak a, naupang pawh chu a kaltîr ta a; tichuan, a kal a, Beer-seba thlalêrah chuan a vâk a vâk ta a. 15 Tin, tuithâwla tui chu a lo awm ta lo va; tichuan, naupang chu hnimbuk pakhat hnuaiah a dah ta mai a. 16 Tin, “Naupang thi tûr chu ka en ngam lo ve,” a tih avângin a kal a, hla fe, thal kah phâk tâwk angah hian a hma zâwnah chuan a va ṭhu ta chawt a. Tichuan, a hma zâwnah chuan a ṭhu a, ring takin a ṭap ta a. 17 Tin, Pathianin naupang aw chu a hria a; tin, Pathian vântirhkohvin vân aṭangin Hagari chu a zuk au va, a hnênah, “Hagar, eng i ti nge ni le? Hlau suh; a awmnaa naupang aw kha Pathianin a hria asin. 18 Tho la, naupang kha kai tho la, i kutin chelh rawh, amah chu chi ropui takah ka siam dâwn asin,” a ti a. 19 Tin, Pathianin a mit a tihvârsak a, tuichhunchhuah a hmu ta a; tichuan, a va kal a, tuithâwlah chuan tui chu a thun khat a, naupang chu a intîr ta a. 20 Tin, Pathian chu naupang hnênah chuan a awm ṭhîn a, a lo ṭhang lian zêl a, thlalêrah a awm ṭhîn a, thal kah thiam mi a lo ni ta a. 21 Paran thlalêrah chuan a awm a; tin, a nu chuan Aigupta ram ata nupui a neihsak a.
Abrahama leh Abimeleka inbiak remna thu
22 Tin, heti hi a ni a, chumi lai vêl chuan Abimeleka leh a sipai pâwl hotu Phikola chuan Abrahama hnênah, “I thiltih apiangah Pathian i hnênah a awm zêl ṭhîn a; 23 chutichuan, tûnah hetah hian Pathian hming chhâlin, kei leh ka fapa leh ka fapaa fapa pawh tihder lovin, ka lo khawngaih tâk che ang khân, kei leh i awmna ram hi khawngaih ve thung zâwk tûrin ka hnênah chhia chham rawh khai!” tiin a sawi a. 24 Tin, Abrahama chuan, “Ka chham ang chu,” a ti a. 25 Tin, Abimeleka chhiahhlawhten tuichhunchhuah an chhuhsak avâng chuan Abrahaman Abimeleka chu a zilh a. 26 Tin, Abimeleka chuan, “Chumi thil titu chu tu nge ni, ka hre hauh lo mai; nang lahin mi hrilh si lo va, vawiinah chauh lo chuan ka la hre ve hauh lo mai,” a ti a. 27 Tichuan, Abrahama chuan berâmte leh bâwngpate a hruai a, Abimeleka hnênah a pe a; tin, an pahnih chuan thu an thlung ta a. 28 Tin, Abrahaman a berâm rual zînga mi berâmno a nu pasarih a dah hrang a. 29 Tichuan, Abimeleka chuan Abrahama hnênah, “Berâmno a nu pasarih a hranga i dah hi engtizia nge ni?” a ti a. 30 Tin, ani chuan, “He tuichhunchhuah hi keimahin ka laih a ni tih mi hriatpuina tûrin, hêng berâmno a nu pasarih hi ka kut ata i la tûr a ni,” a ti a. 31 Chumi avâng chuan chumi hmun chu Beer-seba a vuah a; chutah chuan an pahniha chhia an chham dun avângin. 32 Chutichuan, Beer-seba-ah chuan thu an thlung ta a; tin, Abimeleka chu a tho va, a sipai pâwl hotu Phikola nên Philistin-ho ramah chuan an hâwng leh ta a. 33 Tin, Abrahama chuan Beer-seba-ah chuan fâr thing a phun a, chutah chuan LALPA, Chatuana Pathian hming chu a lam a. 34 Tichuan, Abrahama chu Philistin-ho ramah chuan rei tak a awm a.
Pathianin Abrahama hnênah Isaaka hlân tûrin a phût
1 Tin, heti hi a ni a, chûng thil hnuah chuan Pathianin Abrahama chu a fiah a, a hnênah, “Abraham,” a ti a; tin, ani chuan, “Heta hi ka awm,” a ti a. 2 Tin, ani chuan, “I fapa, i fapa neih chhun, i hmangaih tak, Isaaka ngei kha hruai la, Moria ramah chuan kal la, chutah chuan ka hrilh tûr che tlâng pakhatah chuan hâlral thilhlanah hlân rawh,” a ti a. 3 Tin, Abrahama chu zing takah a tho va, a sabengtung a siam a, a hnênah a chhiahhlawh tlangvâl pahnih a hruai a, a fapa Isaaka nên; tin, hâlral thilhlan atân thing a ek a, a tho va, Pathianin a hrilhna hmun lamah chuan a kal ta a. 4 Tin, ni thum niah chuan Abrahama chu a han dâk a, a hmun chu hla takah a han hmu a. 5 Tichuan, Abrahaman a chhiahhlawh tlangvâlte hnênah chuan, “Hetah sabengtung nên hian lo awm rawh u, kei leh naupang hi sawtah sâwn kan va kal ang a; tin, Pathian kan va bia ang a, in hnênah kan lo kîr leh ang,” a ti a. 6 Tin, Abrahama chuan hâlral thilhlanna thing chu a la a, a fapa Isaaka chu a puttîr a; ani chuan mei leh chemtê a keng a; tichuan, an pahnihin an kal dûn ta a. 7 Tin, Isaaka chuan a pa Abrahama chu a bia a, “Ka pa,” a ti a; tin, ani chuan, “Ka fapa, heta hi ka awm,” a ti a. Tin, ani chuan, “En teh, mei leh thing chu a awm a; nimahsela, hâlral thilhlan tûr berâmno chu khawiah nge a awm?” a ti a. 8 Tin, Abrahama chuan, “Ka fapa, Pathianin ama tâna hâlral thilhlan tûr berâmno chu a ngaihtuah chawp mai ang chu,” a ti a; chutichuan, an pahnih chuan an kal dûn ta zêl a. 9 Tin, Pathianin a hrilh hmun chu an va thleng ta a; tin, Abrahama chuan chutah chuan maichâm a siam a, thing chu a chhep khâwm a, a fapa Isaaka chu a phuar a, maichâma thing chungah chuan a muttîr a. 10 Tin, Abrahama chuan a kutin a ban a, a fapa tihhlum nân chemtê chu a la a. 11 Tin, LALPA vântirhkoh chuan vân aṭangin amah chu a zuk au va, “Abraham, Abraham,” a zuk ti a; tin, ani chuan, “Heta hi ka awm,” a ti a. 12 Tin, ani chuan, “Naupang chungah khân i kut thlâk suh la, amah kha eng mah tih hek suh; i fapa, i neih chhun tak pawh mi pêk i ui loh avângin Pathian i ṭih tih tûnah ka hre ta a ni,” a ti a. 13 Tin, Abrahama chu a han dâk a, a en a; tin, ngai teh, a hnung lamah chuan berâmpa, a ki thing hnawka lo tâng tlat a awm a; tichuan, Abrahama chuan berâmpa chu a va man a, chumi chu a fapa aiah hâlral thilhlanah chuan a hlân ta zâwk a. 14 Tichuan, Abrahaman chumi hmun hmingah chuan Jehova-jire a vuah a; vawiin thlenga, “LALPA tlângah ngaihtuah a ni ang chu,” an tih ṭhin ang hian. 15 Tin, LALPA vântirhkoh chuan a vawi hnihnaah vân aṭangin Abrahama chu a zuk au leh a, 16 “He thil hi i tih tâk avâng leh i fapa, i neih chhun tak pawh i ui loh avângin mal ka sâwm ngei ngei ang chia, 17 vâna arsi zât leh tuifinriat kama ṭiauvaivut zâtin i thlahte chu ka la tipung ngei ngei ang tih leh, i thlahte chuan an dote kulh kawngkhâr chu an la neihsak ang tih leh, 18 ka thu i awih tâk avângin i thlahah chuan khawvêla chi tin an la thawveng ang tih, mahni leh mahni inchhâlin chhia ka chham ta, LALPAN a ti,” a zuk ti a. 19 Chutichuan, Abrahama chu a chhiahhlawh tlangvâlte hnênah chuan a kîr leh a; tin, an tho va, Beer-seba-ah chuan an kal za ta hlawm a; tin, Abrahama chu Beer-seba-ah chuan a awm ta reng a.
Nahora thlahte
20 Tin, heti hi a ni a, chûng thil hnuah chuan miin Abrahama hnênah chuan, “Ngai teh, Milkai pawh khân i nau Nahora chu fate a hrinsak ta asin,” tiin an hrilh a. 21 A fa tîr chu Uza a ni a, a nau chu Buza a ni a, Kemuela, Arama pa nên, 22 Keseda te, Hazova te, Pildasa te, Jidlapha te, Bethuela te pawh an ni a. 23 Tin, Bethuela chuan fanu Rebeki a nei a; chûng pariatte chu Milkai chuan Abrahama nau Nahora chu a hrinsak a ni. 24 A hmei, a hming Reumai pawhin Teba te, Gahama te, Tahasa te, Maaka te a hring bawk a.
Sari a thi a, Abrahaman thlân tûr ram a lei
1 Tin, Sari dam chhûng chu kum za leh kum sawmhnih leh kum sarih a ni a; chûng chu Sari dam chhûng kum chu a ni. 2 Tin, Sari chu Kanaan rama Kiriath-arba khuaah chuan a thi a (chu chu Hebron khua a ni). Tin, Abrahama chu Sari sûn tûr leh ṭah tûrin a lo kal a. 3 Tin, mitthi ruang hma ata chu a tho va, Hetha thlahte hnênah chuan, 4 “In zîngah mikhual leh pêm mai ka ni a; ka mitthi ruang hi ka hmuh lohva ka phûm theihna tûrin in zîngah hian phûmna hmun ro mi pe rawh u,” tiin a sawi a. 5 Tin, Hetha thlahte chuan Abrahama chu an chhâng a, a hnênah, 6 “Ka pu, min ngaithla teh, nang chu kan zîngah hian lal ropui tak i ni a; kan thlânahte hian i duhna berah chuan i mitthi chu phûm ta che; i mitthi i phûmna tûrin kan zînga tu mahin kan thlân pêk che kan ui lo vang,” an ti a. 7 Tichuan, Abrahama chu a tho va, chumi rama mi Hetha thlahte chu chibai a bûk a. 8-9 Tin, “Ka mitthi chu ka hmuh lohva ka phûm rem in tih chuan mi ngaithla ula, Makpela pûk, a lo mawnga awm, a neih kha mi pe tûrin Zohara fapa Ephrona hnênah mi ngensak teh u. In zîngah phûmna hmun ro atâna a man tâwk ang zêlin mi pe rawh se,” tiin a bia a. 10 Tin, Ephrona chu Hetha thlahte zîngah chuan a ṭhu ve reng a; tichuan, Hit mi Ephrona chuan Hetha thlahte hriatah, a khaw kulh kawngkaa lût apiangte hriat ngeiah chuan, 11 “Ni lo ve, ka pu, mi ngaithla teh; lo chu ka pe chia, a chhûnga pûk awm pawh chu ka pe bawk a che; ka chipuiho fate mit hmuhah hian ka pe a che; i mitthi chu phûm mai rawh,” tiin Abrahama chu a chhâng a. 12 Tin, Abrahama chu chumi rama mite hmaah chuan a kûn a, chibai a bûk a. 13 Tin, chumi rama mite hriatah chuan Ephrona hnênah, “Rem i tih phawt chuan khawngaih takin mi ngaithla teh; lo man chu ka pe zâwk ang che; ka hnên ata hi la la, chutah chuan ka mitthi chu ka phûm dawn nia,” tiin a sawi a. 14 Tin, Ephrona chuan Abrahama chu a chhâng a, a hnênah, 15 “Ka pu, mi ngaithla teh; lei hmun, tangka sekel zali hu mai te chu nang leh keia tân sawi tham em ni ang? I mitthi chu phûm mai rawh,” a ti a. 16 Tichuan, Abrahama chuan Ephrona thu chu a zâwm ta a; tin, Abrahaman Hetha thlahte hriatah Ephronan tangka a sawi zât, tangka sekel zali, sumdâwnghovin an hman ṭhin chu a bûk a, Ephrona chu a pe ta a. 17 Chutichuan, Ephrona lo, Mamre zâwna Makpela rama awm chu, a lo nên, a chhûnga pûk awm nên, lova thing awm zawng zawngte nên, a lo ri vêl zawng zawnga thing awmte nên chuan, 18 Hetha thlahte mit hmuhah, a khaw kulh kawngkaa lût apiangte mit hmuhah chuan, ro atân Abrahama hnênah pêk nghehin a awm ta a. 19 Chumi hnuah chuan Abrahaman a nupui Sari chu Kanaan rama Mamre zâwna (chu chu Hebron khua a ni a) Makpela lova pûkah chuan a phûm ta a. 20 Tichuan, lo leh a chhûnga pûk awm chu, phûmna hmun ro atân Abrahama chu Hetha thlahten an pe nghet ta a.
Isaaka tân nupui an zawng
1 Tin, Abrahama chu a lo upa a, a lo tar ta hle a; tin, LALPA chuan Abrahama chu thil engkimah mal a sâwm tawh a. 2 Tin, Abrahama chuan a chhiahhlawh, a chhûngte zînga upa ber, a neih zawng zawng chunga thuneitu hnênah chuan, “Khawngaih takin i kut kha ka malpui hnuaiah rawlh rawh; 3 tichuan, LALPA, vân Pathian leh lei Pathian chu chhâlin, ka awmna Kanaan-ho nula zînga mi hi ka fapa nupuia neihsak lo tûrin chhia ka chhamtîr dâwn che a ni; 4 kan ram lamah, ka laichînte hnêna kalin ka fapa Isaaka hi nupui i neihsak zâwk tûr a ni,” a ti a. 5 Tin, chhiahhlawh chuan a hnênah, “Hmeichhia chuan hemi ram lamah hian mi zui duh kher lo thei a; i fapa hi i lo chhuahna ram lamah chuan ka hruai kîr leh dâwn em ni ang?” a ti a. 6 Tin, Abrahama chuan a hnênah, “Ka fapa hi chutah chuan hruai kîr leh lo tûrin fîmkhur rawh. 7 LALPA, vân Pathian, ka pa in ata leh ka pianna ram ata mi hruai chhuaktu leh, mi betu leh, ‘He ram hi i thlahte ka la pe ang,’ tia ka hnêna chhechhamtu chuan, amah ngeiin a vântirhkoh chu i hmaah a kaltîr ang a, chuta ṭang chuan ka fapa hi nupui i rawn neihsak dâwn nia. 8 Tin, hmeichhia chuan a zui duh loh che chuan, ka hnêna i chhechham kawngah hian i thiang mai ang; eng pawh ni rawh se, ka fapa hi chutah chuan i hruai kîr leh tûr a ni lo,” a ti a. 9 Tichuan, chhiahhlawh chuan a kut chu a pu Abrahama malpui hnuaiah chuan a rawlh a, chumi thu-ah chuan a hnênah chhia a chham ta a. 10 Tin, chhiahhlawh chuan a pu sanghâwngsei zînga mi sanghâwngsei sâwm a hruai a, a pu thil ṭha tinrêng kengin a chhuak ta a; tichuan, a tho va, Mesopotamia rama Nahora te khuaah chuan a kal a. 11 Tin, tlai lama hmeichheho tui chawi tûra an chhuah hun lai tak chuan, dai kianga tuichhunchhuah kiangah chuan a sanghâwngseite chu a ṭhingṭhittîr a. 12 Tin, “Aw LALPA, ka pu Abrahama Pathian, khawngaih takin vawiinah hian mi hlawhtlintîr la, ka pu Abrahama chungah chuan khawngaihna lantîr ang che. 13 En teh, tuikhur kiangah ka ding a, khuaa mite fanuho pawh tui chawi tûra an lo kal hi; 14 tichuan, heti hian ni rawh se, nula tu hnênah pawh, ‘Khawngaih takin ka in tûrin i tui bêl kha han tihniam teh khai,’ ka tiha, ‘In rawh, i sanghâwngseite pawh hi in tûr ka pe ang e,’ titu apiang, chu mi ngei chu i chhiahhlawh Isaaka tâna i mi ruat chu ni rawh se; tin, chumiah chuan ka pu chungah khawngaihna i lantîr tih ka hre dâwn nia,” a ti a. 15 Tin, heti hi a ni a, a sawi zawh hma chuan, ngai teh, Abrahama nau Nahora nupui Milkai fapa Bethuela fanu Rebeki chu, a kokia tui bêl puin a lo chhuak a. 16 Chu nula chu a hmêl a ṭha êm êm a, nula thianghlim a ni a; mipa rêng rêngin an la pâwl ngai hauh lo. Tin, tuikhurah chuan a chhuk a, a tui bêl chu a tikhat a, a chho leh a. 17 Tin, chhiahhlawh chu a tâwk tûrin a tlân a, “Khawngaih takin i tui bêla tui kha tlêm tê mi intîr teh khai,” a ti a. 18 Tin, ani chuan, “In ta che, ka pu,” a ti a; tin, rang takin a tui bêl chu a kutah a chawi thla a, a intîr ta a. 19 Tin, a intîr hnuin, “I sanghâwngseite tân pawh an in kham hma loh chuan ka chawi zêl ang e,” a ti a. 20 Tin, rang takin a tui bêl chu a ran thlêngah chuan a ruak a, tui chawi tûrin tuichhunchhuah lamah chuan a tlân leh a, a sanghâwngseite zawng zawng tân chuan a chawi ta zêl a. 21 Tin, chhiahhlawh chuan ani chu a en reng a; LALPAN a va zinna chu a hlawhtlintîr leh tîr loh hriat nân a ngawi reng mai a. 22 Tin, heti hi a ni a, sanghâwngseite chuan an in kham veleh, chhiahhlawh chuan rangkachak hnârvuah duli bûk leh a kut atân banbun pahnih rangkachak tangka sâwm bûk a phawrh a; 23 tin, a hnênah, “Tu fanu nge i nih? Khawngaih takin mi hrilh teh. I pa inah kan riahna tûr hmun a awm ang em?” a ti a. 24 Tin, ani chuan a hnênah, “Bethuela, Milkai fapa, Nahora tân a hrinsaka fanu ka ni,” a ti a. 25 Tin, amah vêkin a hnênah, “Buhpâwl leh ran chaw kan ngah ve ve a, riahna hmun pawh kan nei,” a ti bawk a. 26 Tichuan, chhiahhlawh chuan a lu a kûn a, LALPA chu chibai a bûk a, 27 “Ka pu chunga a khawngaihna leh a rinawmna bâng chuang lo LALPA, ka pu Abrahama Pathian chu fakin awm rawh se; kei pawh hi LALPA chuan ka pu unaute in lamah mi hruai a lo nih hi,” a ti a. 28 Tin, nula chu a tlân a, chûng thu chu a nu chhûngte a va hrilh a. 29 Rebeki chuan nuṭa a nei a, a hming chu Labana a ni a; tichuan, Labana chu a chhuak a, tuikhur lamah mi hnênah chuan a tlân ta a. 30 Heti hi a ni a, hnârvuah leh a farnu kuta banbunte chu a hmu a, “Mi chuan chutin khatin mi ti a,” tia a farnu Rebeki thusawite chu a hriat veleh chuan, mi hnênah chuan a kal ta a; tin, ngai teh, ani chu tuikhura sanghâwngseite kiangah chuan a lo ding reng a. 31 Tin, Labana chuan, “Nang LALPA malsâwm dawngtu, lo kal la, ka inah lût rawh. Engah nge pâwna i din reng? In leh sanghâwngseite tân hmun ka buatsaih tawh asin,” a ti a. 32 Tin, mi chu inah chuan a lût a; tin, Labana chuan sanghâwngsei thuamhnaw chu a phelh a; tin, sanghâwngseite tân buhpâwl leh ran chaw a pe a, a ke leh a ṭhiante ke sil nân tui a pe bawk a. 33 Tin, Abrahama chhiahhlawh hmaah chuan ei tûr an hlui a; nimahsela, ani chuan, “Ka rawn kal chhan thu ka sawi hma loh chuan ka ei lo vang,” a ti a. Tin, ani chuan, “Sawi ta che,” a ti a. 34 Tin, ani chuan, “Abrahama chhiahhlawh ka ni. 35 Tin, LALPA chuan ka pu chu nasa takin mal a sâwm a, mi lian tak a lo ni ta a; LALPA chuan a hnênah berâm rual te, bâwng rual te, tangkarua te, rangkachak te, bawihpa te, bawihnu te, sanghâwngsei te, sabengtung te a pe bawk a. 36 Ka pu nupui Sarin a tar hnuin ka pu tân fapa a hring a; ama hnênah chuan a neih zawng zawng a pe vek a. 37 Tin, ka pu chuan, ‘Ka awmna rama Kanaan-ho nula zînga mi hi ka fapa nupuiah i neihsak tûr a ni lo; 38 ka pa in lamah, ka laichînte hnêna kalin ka fapa tân nupui i neihsak zâwk tûr a ni,’ tiin chhia mi chhamtîr a. 39 Tin, keiin ka pu hnênah chuan, ‘Hmeichhia chuan mi zui duh kher lo thei a,’ ka ti a. 40 Tin, ani chuan ka hnênah, ‘LALPA, a hmaa ka awm ṭhinna chuan a vântirhkoh chu i hnênah a tîr ang a, i kalna tûrah chuan a hlawhtlintîr ang che; tichuan, ka fapa tân ka laichînte leh ka pa chhûngte zînga mi nupuiah i neihsak dâwn nia; 41 ka laichînte hnên ngei i thlen hunah chuan ka hnêna i chhechham lakah hian i thiang ang; nula chu an pêk loh che chuan ka hnêna i chhechham lakah hian i thiang ang,’ a ti a. 42 “Tichuan, vawiinah hian tuikhur chu ka lo thleng a, ‘Aw LALPA, ka pu Abrahama Pathian, rem i tih chuan ka kalnaah hian mi hlawhtlintîr ang che. 43 En teh, tuikhur kiangah ka din hi; tin, heti hi ni rawh se, nula tui chawi tûra lo chhuak tu hnênah pawh, “Khawngaih takin in atân i tui bêla tui kha tlêm tê mi pe teh,” ka tiha, 44 anin ka hnênah, “In rawh, i sanghâwngseite tân pawh hian ka chawi ang e,” titu apiang, chu mi ngei chu ka pu fapa tâna LALPA hmeichhe ruat chu ni rawh se,’ ka ti a. 45 Tin, ka rilrua ka sawi zawh hma chuan ngai teh, Rebeki hi a tui bêl puin a lo chhuak a; tin, tuikhurah chuan a chhuk a, tui a zuk chawi a; tin, a hnênah, ‘Khawngaih takin tui mi intîr teh khai,’ ka ti a. 46 Tin, ani hian rang takin a koki ata chu a tui bêl a chawi thla a, ‘In rawh, i sanghâwngseite pawh hi in tûr ka pe ang e,’ a ti a; chutichuan, ka in a, sanghâwngseite pawh a intîr bawk a. 47 Tin, keiin, ‘Tu fanu nge i nih?’ tiin ka zâwt a. Tin, ani hian, ‘Bethuela, Nahora fapa, Milkain a hrinsaka fanu,’ a ti a; tin, hnârvuah chu a hnârah ka vuah a, bânbunte chu a bânah ka buntîr bawk a. 48 Tin, ka lu ka kûn a, LALPA chu chibai ka bûk a, LALPA, ka pu Abrahama Pathian, ka pu nauva fanu hi a fapa tân nupuia neihsak tûra kawng dik taka mi hruaitu chu ka fak ta a. 49 Tichuan, tûnah ka pu chu in khawngaiha, a chunga rinawm taka in tih dâwn chuan mi hrilh rawh u; chutichuan, ding lam emaw, vei lam emaw ka hawi thei ang,” a ti a. 50 Tin, Labana leh Bethuela chuan an chhâng a, “He thil hi LALPA hnên aṭanga chhuak a nih hi; a chhia a ṭha pawh i hnênah kan sawi thei lo ve. 51 En teh, Rebeki chu i hmaa hi a awm alâwm; hruai la, kal ta che, LALPAN a sawi tawh angin i pu fapaa nupuiah awm rawh se,” an ti a. 52 Tin, heti hi a ni a, Abrahama chhiahhlawh chuan an thu chu a hriat velah lei siin LALPA chibai a bûk ta a. 53 Tin, Abrahama chhiahhlawh chuan tangkaraw incheinate leh rangkachak incheinate leh silhfênte a la chhuak a, Rebeki chu a pe a; a nuṭa leh a nu pawh chu thil hlu takte a pe bawk a. 54 Tin, amah leh a ṭhiante chuan an eiin an in a, an riak ta a; tin, zîngah an tho va, “Ka pu hnênah mi kaltîr tawh rawh u,” a ti a. 55 Tin, a nuṭa leh a nu chuan “Chêmtei hi ni rei lo tê, ni sâwm lek tal kan hnênah awm rih rawh se; chumi hnuah chuan a kal dâwn nia,” an ti a. 56 Tin, ani chuan an hnênah, “Mi tikhawtlai suh u khai, LALPA chuan ka kalnaah hian mi hlawhtlintîr ta si a; ka pu hnêna ka hâwn theihna tûrin mi kaltîr zâwk teh u khai,” a ti a. 57 Tin, anni chuan, “Chêmtei chu kan ko vang a, ama kâ ngei kan bia ang,” an ti a. 58 Tichuan, Rebeki chu an ko va, a hnênah, “He mi hnênah hian i kal duh ang em?” an ti a. Tin, ani chuan, “Duh ang chu,” a ti a. 59 Tichuan, an farnu Rebeki leh a awmtu leh Abrahama chhiahhlawh leh a hote chu an kaltîr a. 60 Tin, Rebeki chu mal an sâwm a, a hnênah, “Kan farnu, nang chu sîng hlîra sâng tam tak nu lo ni la, i thlahte chuan anmahni hawtute kulh kawngkhâr chu neihsak rawh se,” an ti a. 61 Tichuan, Rebeki chu a tho va, a bawihnute nên, sanghâwngsei chungahte chuan an chuang a, mi chu an zui ta a; tichuan, Abrahama chhiahhlawh chuan Rebeki chu a hruai a, a kal ta a. 62 Tin, Isaaka chu Beer-lahai-roi lam aṭang chuan a lo kal a, Chhim rama awm a ni si a. 63 Tin, Isaaka chu tlai lamah phûlah inngaihtuah tûrin a va lêng chhuak a; tin, a han dâk a, a en a; tin, ngai teh, sanghâwngseite an lo kal a. 64 Tin, Rebeki chu a han dâk a, Isaaka a hmuh veleh chuan sanghâwngsei ata a chhuk ta a. 65 Tin, Abrahama chhiahhlawh hnênah chuan, “Phûla min hmuak tûra lo kal saw tu nge ni?” a ti a. Tin, chhiahhlawh chuan, “Ka pu a nih saw,” a ti a; tichuan, a inkhuhna puan a la a, a inkhuh ta a. 66 Tin, chhiahhlawh chuan a thiltih zawng zawng chu Isaaka a hrilh a. 67 Tin, Isaaka chuan Rebeki chu a nu Sari puan inah chuan a hruai lût a; tin, Rebeki chu a nei a, a nupui a lo ni ta a; tin, amah chu a hmangaih hle a; tichuan, Isaaka chu a nu thih hnuah pawh chuan a lo thlamuang thei ta a.
Nupui dang laka Abrahama fate
1 Tin, Abrahama chuan nupui dang a nei a, a hming chu Keturi a ni a. 2 Tin, ani chuan Zimrana te, Joksana te, Medana te, Midiana te, Isbaka te, Suaha te a hrinsak a. 3 Tin, Joksana chuan fapa Seba leh Dedana a nei a. Tin, Dedana fapate chu Assurima te, Letusima te, Leummima te an ni a. 4 Tin, Midiana fapate chu Epha te, Ephera te, Hanoka te, Abida te, Elda te an ni. Chûng zawng zawng chu Keturi fate an ni a. 5 Tin, Abrahama chuan a neih zawng zawng chu Isaaka a pe a. 6 A hmeiho fapate erawh chu Abrahama chuan lâwmmante a pe a; tin, amah a la dam lai ngei chuan a fapa Isaaka hnên ata chu khawchhak lamah, khawchhak ramah chuan a kal botîr ta hlawm a.
Abrahama thih thu
7 Tin, Abrahama dam chhûng chu kum za leh kum sawmsarih leh kum nga a ni a. 8 Tin, Abrahama chuan a thlarau a thlah a, lua kêlsam ṭo vek, putar tak, tar kûna damin a thi a, a chipuite hnênah chuan hruaiin a awm ve ta a. 9 Tin, a fapa Isaaka leh Ismaela chuan Hit mi Zohara fapa Ephrona lova Mamre zâwna Makpela pûkah chuan an phûm ta a; 10 chu lo chu Abrahaman Hetha thlahte laka a lei a ni; chutah chuan Abrahama chu an phûm a, a nupui Sari nên khân. 11 Tin, heti hi a ni a, Abrahama thih hnuah chuan Pathianin a fapa Isaaka chu mal a sâwm a; tin, Isaaka chu Beer-lahai-roi kiangah chuan a awm a.
Ismaela thlahte
12 Tin, hêng hi Abrahama fapa Ismaela, Sari bawihnu, Aigupta mi, Hagarin Abrahama a hrinsaka thlahte chu an ni. 13 Hêng hi an hming ṭheuh leh an thlahte ang zêlin Ismaela fapate hming chu a ni: Ismaela fa upa ber chu Nebaiotha a ni a; a naute chu Kedara leh Adbeela leh Mibsama leh, 14 Misma leh Duma leh Masa an ni a; 15 Hadada leh Tema, Jetura, Naphisa leh Kedema an ni bawk a. 16 Chûng chu Ismaela fapate an ni a; chûng chu an khua ang zêl leh an riahbûk ang zêlin an hming ziak a ni a; an chi ang zêl chuan lal sâwm leh pahnih an ni a. 17 Tin, Ismaela dam chhûng kum chu hei hi a ni, kum za leh kum sawmthum leh kum sarih hi. Tin, a thlarau a thlah a, a thi a, a chipuite hnênah chuan hruaiin a awm ve ta a. 18 Tin, a fapate chu Havila ram aṭangin Assuria ram pan zâwngin Aigupta ram zâwn, Sur thlengin an awm a; an unau zawng zawng depah chuan an awm a.
Esauva leh Jakoba pian thu
19 Tin, hêng hi Abrahama fapa Isaaka thlahte chu an ni: Abrahama chuan fapa Isaaka a nei a; 20 Isaakan Paddan-aram rama Suria mi Bethuela fanu, Suria mi, Labana farnu Rebeki chu a nupuia a neih lai chuan kum sawmli mi a ni a. 21 Tin, a nupui chu a chin avângin Isaaka chuan LALPA hnênah a ngensak chiam a; tin, LALPAN a dîlna chu a ngaihthlâksak a; tichuan, a nupui Rebeki chu a rai ta a. 22 Tin, a nau paite chu a kawchhûngah chuan an insual a; tin, ani chuan, “Hetiang a nih si chuan eng vângin nge ka dam reng le?” a ti a. Tichuan, LALPA zâwt tûrin a kal ta a. 23 Tin, LALPA chuan a hnênah, “I chhûlah chuan chi hnih an awm a, I pum chhûng aṭang ngei chuan hnam hnih an inṭhen ang; Hnam pakhat chu hnam pakhat ai chuan a chak zâwk ang a; Tin, a upa zâwk chuan a naupang zâwk rawng chu a bâwl ang,” a ti a. 24 Tin, a nau hrin a hun chuan ngai teh, a chhûlah chuan phîr an lo awm a. 25 Tin, a hmasa zâwk chu a sena sen tur, puan hmul anga hmul thupin a lo chhuak a; tichuan, a hmingah chuan Esauva an sa a. 26 Chumi zawhah chuan a nau chu a lo chhuak leh a, a kutin Esauva keartui chu a chelh reng a; tichuan, ani hmingah chuan Jakoba an sa a; tin, Rebekin anmahni chu a hrin lai chuan, Isaaka chu kum sawmruk mi a ni a. 27 Tin, naupangte chu an lo ṭhang lian a; tin, Esauva chu sa pêl thiam tak, mi ramvachal a ni a; Jakoba erawh chu mi ni chuah, puan in lamtea awm mi a ni. 28 Tin, Isaaka chuan a sakhi sa a ei ṭhin avângin Esauva chu a ngaina a; Rebeki erawh chuan Jakoba chu a ngaina zâwk a.
Esauvan fa u a nihna a hralh
29 Tin, Jakoba chuan englo a chhûm kawi a; tin, Esauva chu ram lam aṭangin a lo hâwng a, a chau hle a; 30 tin, Esauvan Jakoba hnênah chuan, “Khawngaih takin i englo sen chhum kawi ngei kha mi eitîr teh khai; ka chau êm mai,” a ti a. Chu vâng chuan a ni, a hming chu Edoma an tih ni. 31 Tin, Jakoba chuan, “I fa tîr nihna mi leitîr zet la le,” a ti a. 32 Tin, Esauva chuan, “Ngai teh, ka thi lek lek a ni si a; fa tîr nihna mai hi ka tân eng nge sâwt ang?” a ti a. 33 Tin, Jakoba chuan, “Ka hnênah chhia chham zet rawh le,” a ti a; tin, a hnênah chhia a chham a; tichuan, a fa tîr nihna chu Jakoba hnênah a hralh ta mai a. 34 Tin, Jakoba chuan Esauva chu chhang leh dailuah chhum kawi a pe a; tichuan, a eiin a in a, a tho va, a kal ta a; chutiang chuan Esauva chuan a fa tîr nihna chu a ngainêp a ni.
Gerar ramah Isaaka a khawsa
1 Tin, chumi ramah chuan Abrahama dam laia ṭâm lo tla hmasa zâwk tih loh kha, ṭâm a lo tla leh a. Tichuan, Isaaka chu Philistin-ho lal Abimeleka hnênah Gerar khuaah a zuk kal a. 2 Tin, LALPA chu a hnênah a rawn inlâr a, “Aigupta ramah chuan zuk kal suh; ram ka hrilh tûrah che chuan awm rawh; 3 he ramah hian awm rih la; tichuan, i hnênah ka awm ang a, mal ka sâwm dâwn che nia; hêng ram zawng zawng hi nangmah leh i thlahte pein, i pa Abrahama hnêna chhia ka chham kha ka tinghet dâwn a ni; 4 tin, vâna arsi zâtin i thlahte chu ka la tipung ang a, hêng ram zawng zawng hi i thlahte ka la pe bawk ang; tin, i thlahah chuan khawvêla chi tin an la thawveng ang. 5 Abrahama chuan ka thu a awih a, ka thuhrilhte, ka thupêkte, ka thuruatte, ka dânte pawh a zawm avâng khân,” a ti a. 6 Tichuan, Isaaka chuan Gerar khuaah chuan awmhmun a khuar ta a; 7 tin, chumi khuaa mite chuan a nupui chanchin an zâwt a; tin, ani chuan, “Ka farnu a ni,” a ti a; a hmêl a ṭhat avângin, “He khuaa mite hian Rebeki vângin mi that dah ang e,” tiin, “Ka nupui a ni,” a ti ngam lo a ni. 8 Tin, heti hi a ni a, chutah chuan rei tak a awm hnuin, Philistin-ho lal Abimeleka chuan tukverh aṭangin a han thlîr a; tin, ngai teh, Isaakan a nupui Rebeki a chhaih lai a han hmu a. 9 Tichuan, Abimelekan Isaaka chu a ko va, “Ngai teh, i nupui a nih ngei hi le; engati nge, ‘Ka farnu a ni,’ i tih mai le?” a ti a. Tin, Isaaka chuan a hnênah, “ ‘Amah vângin ka thi dah ang e,’ ka tih vâng a ni,” a ti a. 10 Tin, Abimeleka chuan, “Kan chunga i thiltih hi engtizia nge ni le? Mite zînga mi tu pawh hian i nupui hi an lo mutpui mai thei asin; tichuan, kan chungah hian thiam lohna i rawn thlentîr a ni dâwn asin,” a ti a. 11 Tin, Abimeleka vêk chuan, “Tu pawh he mi hi emaw, a nupui hi emaw khawih apiang chu tihhlum ngei ngei tûr a ni,” tiin mi zawng zawng chu thu a pe a. 12 Tin, Isaaka chuan chumi ramah chuan buh a chîng ve a, chumi kum chuan a leh za a hmu a; LALPAN mal a sâwm bawk a. 13 Tichuan, ani chu a lo ropui ta hle a, nasa taka mi ropui lo ni khawpin a lo lian ta tulh tulh a; 14 berâm rualte leh bâwng rualte a nei a, chhiahhlawh tam tak a nei bawk a; tichuan, Philistin-ho chuan an îtsîk ta a. 15 Tin, a pa Abrahama dam laia a pa chhiahhlawhten tuichhunchhuah an laih zawng zawng chu Philistin-hoten an hnawh a, leiin an lo tikhat vek mai a. 16 Tin, Abimeleka chuan Isaaka hnênah, “Kan hnên ata kal bo daih rawh, kan aiin i chak zâwk si a,” a ti a. 17 Tichuan, Isaaka chu chuta ta chu a chhuak a, Gerar ruamah chuan a puan in a zâr a, chutah chuan awmhmun a khuar ta a. 18 Tin, Isaaka chuan a pa Abrahama dam laia an tuichhunchhuah laihte chu a lai leh a; Abrahama thih hnu khân Philistin-ho chuan an lo hnawh khat vek tawh si a; tin, a pain a hming a lo vuah ang zêl khân a hming a vuah hlawm a. 19 Tin, Isaaka chhiahhlawhten ruamah chuan an lai a, chutah chuan tuichhunchhuah hna nei an hmu ta hlauh va. 20 Tichuan, Gerar khuaa ranpute chu, “Tui hi kan ta a ni,” tiin Isaaka ranpute nên chuan an inhnial a; tichuan, amah nên an inhnial avângin tuichhunchhuah hmingah chuan “Esek” a vuah ta a. 21 Tin, tuichhunchhuah dang an lai leh a, chumi pawh chu chuh tumin an inhnial leh a; tichuan, a hmingah chuan “Sitna” a vuah leh a. 22 Tin, chuta ta chu a insawn a, tuichhunchhuah dang a lai leh a; chu chu chuh tumin an inhnial ta lo va; tichuan, “Tûnah zawng LALPAN hmun zau tak mi siamsak ta a, he ramah hian chi tam tak kan thlah tawh ang,” tiin, a hmingah chuan “Rehoboth” a vuah ta a. 23 Tin, chuta ṭang chuan Beer-seba-ah a han chho va. 24 Chumi zân ngei chuan LALPA chu a hnênah a rawn inlâr a, “Kei hi i pa Abrahama Pathian chu ka ni; hlau suh, i hnênah ka awm alâwm, mal ka sâwm ang chia, ka chhiahhlawh Abrahama avângin i thlahte chu ka la tipung dâwn asin,” a ti a. 25 Tichuan, chutah chuan maichâm a siam a, LALPA hming chu a lam a, chutah chuan a puan in a zâr bawk a; tin, Isaaka chhiahhlawhte chuan chutah chuan tuichhunchhuah an lai leh a.
Isaaka leh Abimeleka inremna
26 Tin, Gerar khua aṭangin Abimeleka chu a ṭhian Ahuzzatha nên, a sipai pâwl hotu Phikola nên a hnênah an kal a, 27 Tin, Isaaka chuan an hnênah, “Mi hua a, in hnên ata mi kal botîr si a, eng vângin nge ka hnêna in lo kal le?” a ti a. 28-29 Tin, anni chuan, “LALPA chu i hnênah a awm tih chiang takin kan hria a; tichuan, ‘I pawi kan khawih ngai loh ang leh, thil ṭha chauh lo chu i chungah eng mah rêng rêng kan tih lohva, tlang taka kan kal botîr ta che ang khân, keini pawh kan chhiatna tûr rêng rêng i tih lohna tûrin kan kârah, keini leh nangma kâr ngeiah hian, chhechhamna lo awm tawh sela, i hnênah thu min thluntîr rawh,’ kan ti; tûnah chuan nang zawng LALPA malsâwm dawngtu i nih tawh hi,” an ti a. 30 Tin, ani chuan an tân ruai a ṭheh a; tichuan, an eiin an in ta a. 31 Tin, zîng lamah chuan zîng takah an tho va, chhia an chham tawn a; tin, Isaakan anni chu a kaltîr a; tichuan, a hnên aṭang chuan tlang takin an chhuak ta a. 32 Tin, heti hi a ni a, chumi ni vêk chuan Isaaka chhiahhlawhte chu an lo kal a, an tuichhunchhuah laih chanchin an rawn hrilh a, a hnênah, “Tui kan hmu ta,” an ti a. 33 Tichuan, chu tuichhunchhuah chu “Siba” a vuah a; chuvângin, chumi khaw hming chu tûn thlengin “Beer-seba” a la ni a.
Esauvan nupuiah hnam dang a nei
34 Tin, Esauva chuan kum sawmli mi a nihin, Hit mi Beeria fanu Judithi leh, Hit mi Elona fanu Basemathi nupuiah a nei a; 35 chûngte chu Isaaka leh Rebeki thinlung tiretheitute an ni a.
Isaakan Jakoba mal a sâwm
1 Tin, heti hi a ni a, Isaaka chu a lo tar a, khaw hmu thei lo khawpa a mit a lo thim hnu chuan a fapa upa zâwk Esauva chu a ko va, a hnênah, “Ka fapa,” a ti a; tin, ani chuan a hnênah, “Heta hi ka awm,” a ti a. 2 Tin, ani chuan, “Ngai teh, ka tar tawh êm a, ka thih ni tûr ka hre si lo va. 3 Chutichuan, tûnah hian khawngaih takin i hriamhrei, i thal bâwm leh i thal ngul kha keng la, va ramchhuak la, sakhi mi va kahsak rawh; 4 tin, ka thih hmaa mal ka sâwmsakna tûr chein, ka duh zâwng takin chawhmeh tui takah mi siamsak la, ka ei tûrin ka hnênah rawn la rawh,” a ti a. 5 Tin, Isaakan a fapa Esauva a biak lai chu Rebeki chuan a lo hria a. Tin, Esauva chu sakhi kâpa rawn hâwn tûrin ramah chuan a kal ta a. 6 Tin, Rebeki chuan a fapa Jakoba hnênah, “Ngai teh, i pa chuan i u Esauva hnênah, 7 ‘Sakhi mi rawn lâk la, ka eia, ka thih hmain LALPA hmaah mal ka sâwmsakna tûr chein, chawhmeh tui takah mi siam rawh,’ tia a sawi ka hria. 8 Chutichuan, ka fapa, tûnah hian thu ka pêk che ang zêlin ka thu zâwm ang che. 9 Ran rual zîngah va kal la, chuta ta chu kêlno pahnih ṭha tak mi va lâk rawh; tichuan, chumi chu a duh zâwng takin i pa tân chawhmeh tui takah ka lo siam ang e; 10 tin, a thih hmaa mal a sâwmsakna tûr chein, a ei tûrin i pa hnênah i va kalpui tûr a ni,” tiin a sawi a. 11 Tin, Jakoba chuan a nu Rebeki hnênah, “Ngai teh, ka u Esauva chu mi hmul tak a ni a, kei zawng mi mâm tak ka ni si a. 12 Ka pa chuan mi lo dap vêl mai thei a; tichuan, ama ngaihin bumtu ang ka lo ni ang a, malsâwm ahnêkin ânchhia indawntîr mai ka ni ang asin,” a ti a. 13 Tin, a nu chuan a hnênah, “Ka fapa, i ânchhe dawn tûr chu ka chungah awm rawh se; ka thu zâwm la, mi va lâk mai rawh,” a ti a. 14 Tin, a kal a, a va la a, a nu hnênah a rawn kalpui a; tichuan, a nu chuan a pa duh zâwng takin chawhmeh tui takah a siam a. 15 Tin, Rebeki chuan a fapa upa zâwk Esauva silhfên ṭha tak, ina a hnêna awm chu a la a, a fapa naupang zâwk Jakoba chu a thuam a; 16 tin, kêlno vunte pawh chu a kutah leh a nghâwng mâm laiah chuan a bel bawk a; 17 tin, chawhmeh tui tak leh chhang a siamte chu a fapa Jakoba kutah a pe a. 18 Tin, ani chu a pa hnênah a kal a, “Ka pa,” a ti a; tin, ani chuan, “Heta hi ka awm; ka fapa, tu zâwk nge i nih?” a ti a. 19 Tin, Jakoba chuan a pa hnênah, “I fapa upa zâwk Esauva ka ni; mi tirh ang khân ka ti zo ta a, khawngaih takin tho la, mal mi sâwmsakna tûrin ṭhu la, ka sakhi sa hi ei rawh le,” a ti a. 20 Tin, Isaaka chuan a fapa hnênah, “Ka fapa, engtizia nge i va rawn hmu hma teh thut ve le?” a ti a. Tin, ani chuan, “LALPA i Pathian chuan mi hlawhtlintîr vâng a ni,” a ti a. 21 Tin, Isaaka chuan Jakoba hnênah, “Ka fapa, khawngaih takin lo hnai teh khai, ka lo dap vêl teh ang che, ka fapa Esauva i ni meuh na emaw,” a ti a. 22 Tin, Jakoba chuan a pa Isaaka chu a va hnaih a; tin, ani chuan a lo dap vêl a, “A aw chu Jakoba aw a ni si a, a kutte erawh chu Esauva kut a ni si,” a ti a. 23 Tichuan, a u Esauva kut anga a kut a hmul avângin amah chu a hre lo va; chutichuan, mal a sâwm ta a. 24 Tin, “Ka fapa Esauva ngei i ni maw?” a ti a. Tin, ani chuan, “Ni e,” a ti a. 25 Tin, ani chuan, “Mi han lâk hnaih rawh; tichuan, mal ka sâwmsakna tûr chein ka fapa sakhi sa chu ka lo ei ang e,” a ti a. Tin, a rawn la hnai a, a ei ta a; uain pawh a lâksak a, a in bawk a. 26 Tin, a pa Isaaka chuan a hnênah, “Ka fapa, lo hnai la, mi fâwp rawh,” a ti a. 27 Tin, a va hnaih a, a fâwp a; tin, ani chuan a silhfên rim chu a hria a, mal a sâwm a, “Ngai teh, ka fapa rim hi LALPA malsâwm ram rim ang a ni. 28 Tichuan, Pathianin vân daifîm leh Lei ṭhatna leh, Buh tam tak leh uain tam tak pe che rawh se. 29 Hnam hrang hrangten i rawng bâwl sela, Chi hrang hrangten chibai bûk che rawh se. I unaute chungah lalah awm langin, I nu faten chibai bûk che rawh se. Anchhe lawhtu apiang che chu ânchhe lawhin awm sela, Malsâwmtu apiang che chu malsâwmin awm rawh se,” a ti a.
Esauvan Isaaka malsâwmna a dîl
30 Tin, heti hi a ni a, Isaakan Jakoba mal a sâwm zawh veleh Jakoba chu a pa Isaaka hnên ata a chhuak hman chauh va, a u Esauva chu a sa pêl a lo hâwng a. 31 Tin, ani pawh chuan chawhmeh tui takah a siam a, a pa hnênah a rawn la ve a; tin, a pa hnênah chuan, “Ka pa, tho la, mal mi sâwmsakna tûrin i fapaa sakhi sa hi ei rawh le,” a ti a. 32 Tin, a pa Isaaka chuan a hnênah, “Tu nge i nih?” a ti a. Tin, ani chuan, “I fapa, i fapa upa zâwk, Esauva ka ni,” a ti a. 33 Tichuan, Isaaka chu nasa takin a khûr chiam a, “Sakhi kâpa ka hnêna a sa rawn laa, i lo thlen hmaa ka ei zawh veka, mal ka sâwm tâka kha tu nge ni le? A ni, amah chu malsâwmin a awm tawh tho tho vang,” a ti a. 34 Esauva chuan a pa thusawi chu a hriatin nasa tak leh lungchhe takin a ṭap ta rawih a, a pa hnênah chuan, “Aw ka pa, kei hi, kei pawh hi mal mi sâwm ve lul rawh,” a ti a. 35 Tin, ani chuan, “I nau chuan mi rawn bum a, i malsâwmna chu a lâksak ta che a ni,” a ti a. 36 Tin, ani chuan, “A hmingah Jakoba an vuah dik hle lo vem ni? Hei vawi hnih mi lan tâk hi; ka fa tîr nihna chu mi lâksak a; tin, ngai teh, tûnah hian ka malsâwmna mi lâksak leh tâk hi,” a ti a. Tin, amah vêkin, “Malsâwmna mi la zuahsak lâwm ni?” a ti a. 37 Tin, Isaaka chuan a chhâng a, Esauva hnênah, “Ngai teh, amah chu i lalah ka siam a, a unau zawng zawngte pawh a chhiahhlawh atân ka pe vek a; buh leh uainin ka châwm ta bawk a; ka fapa, nanga tân eng nge ka tih ang le?” a ti a. 38 Tin, Esauva chuan a pa hnênah, “Ka pa, malsâwmna pakhat chauh em ni i neih? Aw ka pa, kei hi, kei pawh hi mal mi sâwm ve lul rawh,” a ti a. Tin, Esauva chu ring takin a ṭap ta a. 39 Tin, a pa Isaaka chuan a chhâng a, a hnênah, “Ngai teh, i awmna tûr chu lei ṭhatna hlatah leh, Chung lam ata vân daifîm hlatah a ni a awm dâwn ni; 40 I khandaihin a ni i nun dâwn ni, I nau rawng pawh i bâwl dâwn a ni; Tin, heti hi a ni ang a, i tâl chhuah hunah chuan A nghâwngkawl chu i nghâwng ata i thing thla tawh ang,” a ti a. 41 Tin, a pain mal a sâwm avâng chuan Esauva chuan Jakoba chu a haw ta a; tin, Esauva chuan a rilruin, “Ka pa sûn ni tûr chu a hnai tawh a, chumi hunah chuan ka nau Jakoba chu ka that mai ang,” a ti a. 42 Tin, a fapa upa zâwk Esauva thusawi chu Rebeki an hrilh a; tichuan, mi a tîr a, a fapa naupang zâwk Jakoba chu a ko va, a hnênah, “Ngai teh, i u Esauva chuan i chungchâng thu-ah, nangmah tihhlum tumin a inhnêm a ni. 43 Chutichuan, ka fapa, tûnah ka thu hi awih rawh: tho la, Haran khuaa ka nuṭa Labana hnênah tlân bo rawh. 44 I u thinrimna hi a reh hma loh chuan a hnênah ni eng emaw zât va awm rih rawh; 45 i u thinurna hi i chunga a reha, a chunga i thiltih hi a theihnghilh hunah chuan mi ka tîr ang a, chuta ta chu ka rawn hruai chhuahtîr ang che; eng atân nge ni khatah in pahnihin ka chân ang che u?” a ti a.
Isaakan Labana hnênah Jakoba a tîr
46 Tin, Rebeki chuan Isaaka hnênah, “Hetha fanute avâng hian nun hi ka ning êm mai; Jakoba hian hemi ram nula, hêng ang Hetha fanuteho zînga mi hi nupuia a neih leh ve lek phei chuan, ka tân nun hi eng nge sâwt ang?” a ti a.
1 Tichuan, Isaaka chuan Jakoba chu a ko va, mal a sâwm a, thu a pe bawk a, a hnênah, “Kanaan ram nulaho zînga mi hi nupuiah i nei tûr a ni lo. 2 Tho la, Paddan-aram rama i nu pa Bethuela inah kal la, chuta mi chu i nu nuṭa Labana fanute zînga mi nupuiah va nei rawh. 3 Tin, Pathian Engkimtitheia chuan malsâwm chein, hnam hrang hrang tam tak i lo nih theih nân chi tam tak thlahtîr chein, tipung che rawh se; 4 i mikhualna ram, Pathianin Abrahama a pêk hi, i luah nân Abrahama malsâwmna chu dawntîr bawk che rawh se, nang leh i thlahte pawh,” a ti a. 5 Tichuan, Isaaka chuan Jakoba chu a kal botîr a; tin, Paddan-aram rama Jakoba leh Esauva nu Rebeki nuṭa Suria mi Bethuela fapa, Labana hnênah chuan a kal ta a.
Esauvan nupui dang a nei
6 Esauva chuan Isaakan Jakoba chu mal a sâwm a, nupui nei tûrin Paddan-aram ramah a kal botîr tih leh, mal a sâwm laia, “Kanaan ram nulaho zînga mi hi nupuiah i nei tûr a ni lo,” tiin thu a pe tih leh, 7 Jakoban a nu leh a pa thu awihin Paddan-aram ramah a kal ta tih a hria a; 8 tichuan, Esauva chuan Kanaan ram nulate chuan a pa Isaaka lung an tiawi lo tih a hre ta a; 9 tichuan, Esauva chu Ismaela hnênah a va kal a, Abrahama fapa Ismaela fanu Mahalathi, Nebaiotha farnu chu, a nupui atân a nupui neih sate bâkah a va neih belhchhah leh a.
Bethel-ah Jakoban mumang a nei
10 Tin, Jakoba chu Beer-seba aṭangin a chhuak a, Haran khaw lam a pan ta a. 11 Tin, khawi lai hmun emaw a han thleng hlauh va, ni a tlâk tawh avângin chutah chuan a riak ta a; tin, chumi hmuna lung pakhat chu a la a, a lukhamah a dah a, chumi hmunah chuan muhîl tûrin a mu ta a. 12 Tin, mumang a nei a; ngai teh, lei chungah hian leilâwn a lo indawh a, a chhîp chuan vân a thleng a; tin, ngai teh, a chungah chuan Pathian vântirhkohte an chhovin an chhuk a. 13 Tin, ngai teh, a chhîpah chuan LALPA a ding a, “Kei hi LALPA, i pu Abrahama Pathian leh Isaaka Pathian chu ka ni; i mutna lei kha nang leh i thlahte ka la pe ang che u. 14 Tin, i thlahte chu leia vaivut zâtin an awm ang a, thlang lamah te, chhak lamah te, hmâr lamah te, chhim lamah te i darh zau vang a; tin, nangmahah leh i thlahah chuan khawvêla hnam tin an la thawveng ang. 15 Tin, ngai teh, i hnênah ka awm a, i kalna apiangah ka vêng zêl ang chia, he ramah hian ka hruai kîr leh ang che; i hnêna ka sawi hi ka tih hma loh chuan ka thlahthlam dâwn lo che a ni,” a ti a. 16 Tin, Jakoba chu a muhîl a han harh a, “He hmunah hian LALPA chu a awm ngei mai, ka lo hre si lo va,” a ti a. 17 Tichuan, a hlau va, “He hmun hi a va hlauhawm êm! Hei hi hmun dang a nih loh hi, Pathian in a lo nih hi le, hei hi vân kawngka a lo nih hi!” a ti a. 18 Tin, Jakoba chu zîng takah a tho va, lung a lukhama a dah chu a la a, lungphun atân a phun a, a chhîpah chuan sahriak a leih a. 19 Tin, chumi hmun hmingah chuan Bethel a vuah a; a khaw hming erawh chu a tîrah chuan Luz a ni. 20-21 Tin, Jakoba chuan, “Ka pa ina thlamuang taka ka hâwn lehna tûrin Pathian ka hnêna a awma, he ka kalna kawngah hian mi vêna, ei tûr chhang leh sin tûr silhfên mi pêk dâwn chuan, LALPA chu ka Pathian a ni ang a, 22 he lung, lungphun atâna ka phun pawh hi Pathian in a ni ang; tin, i mi pêk tûr zawng zawngah chuan sâwma pakhat ka pe ngei ngei ang che,” tiin thu a tiam ta a.
Jakoban Labana in a thleng
1 Chumi hnuah chuan Jakoba chu a kal ta zêl a, khawchhak fate ram chu a thleng ta a. 2 Tin, a han en a, ngai teh, phûlah hian tuichhunchhuah a lo awm a; a kiangah chuan berâm rual thum hi an bawk reng a; chumi tuichhunchhuah ata chu berâm rualte chu tui an intîr ṭhîn a ni. Tuichhunchhuah kawngkaa lung awm chu a lian hle a. 3 Tin, chutah chuan berâm rual zawng zawng an kal khâwm ṭhîn a; tin, tuichhunchhuah kawngka ata lung chu an lum sawn a, berâmte chu tui an intîr a, lung chu tuichhunchhuah kawngkaa a awmna pângngaiah chuan an dah leh ṭhîn a. 4 Tin, Jakoba chuan an hnênah, “Ka unaute u, khawi lama mi nge in nih?” a ti a. Tin, anni chuan, “Haran khuaa mi kan ni,” an ti a. 5 Tin, ani chuan an hnênah, “Nahora fapa Labana in hria em?” a ti a. Tin, anni chuan, “Hria e,” an ti a. 6 Tin, ani chuan an hnênah, “A dam lai em ni?” a ti a. Tin, anni chuan, “Dam lai rih e; en teh, a fanu Rakili pawh berâm hruaia a lo kal saw,” an ti a. 7 Tichuan, ani chuan, “Ngai teh u, ni a la sâng hle a; ran hruai khâwm pawh a la hun hek lo. Berâmte hi tui intîr ula, va thlah rawh u khai,” a ti a. 8 Tin, anni chuan, “Kan thei lo vang, berâm rual zawng zawng an kal khâwm a, tuichhunchhuah kawngka ata lung hi an lum sawn hma loh chuan; chumi hnuah chuan berâmte chu tui kan intîr ṭhîn a ni,” an ti a. 9 Tin, anmahni a la biak lai chuan, Rakili chu a pa berâmte hruaiin a lo thleng ta a; ani chuan a vêng ṭhîn a ni. 10 Tin, heti hi a ni a, Jakoba chuan a nu nuṭa Labana fanu Rakili leh, a nu nuṭa Labana berâm rual chu a hmuh chuan Jakoba chuan a va hnaih a, tuichhunchhuah kawngka ata lung chu a lum sawn a, a nu nuṭa berâmte chu tui a intîr ta a. 11 Tin, Jakoba chuan Rakili chu a fâwp a, ring takin a ṭap ta a. 12 Tin, Jakoba chuan a pa tupa a nih leh Rebeki fapa a ni tih Rakili chu a hrilh a; tichuan, Rakili chu a tlân a, a pa a va hrilh ta a. 13 Tin, heti hi a ni a, Labana chuan a farnua fapa Jakoba chanchin chu a hriat veleh a hmuak tûrin a tlân a, a pawm a, a fâwp a, a inah a hruai ta a. Tin, Jakoba chuan chûng thu zawng zawng chu Labana chu a hrilh a. 14 Labana chuan a hnênah, “Ka ruh leh ka tisa ngei i nih chu le,” a ti a. Tin, a hnênah thla khat a awm ta a.
Rakili leh Leaii tân Labana hnênah Jakoba a inhlawhfa
15 Tin, Labana chuan Jakoba hnênah, “Ka tupa i nih avângin a thlâwnin ka rawng i bâwl tûr em ni? Eng nge i hlawh ang? Mi hrilh teh khai,” a ti a. 16 Tin, Labana chuan fanu pahnih a nei a: a upa zâwk hming chu Leaii a ni a, a naupang zâwk hming chu Rakili a ni. 17 Tin, Leaii mit chu a pâwl a; Rakili erawh chu mi tituai ṭha tak a ni a, a hmêl pawh a ṭha hle a. 18 Tin, Jakoba chuan Rakili chu a hmangaih a; tichuan, “I fanu naupang zâwk Rakili nei tûrin kum sarih i rawng ka bâwlsak ang che,” a ti a. 19 Tin, Labana chuan, “Ani chu mi dang ka pêk ai chuan ka pêk che a ṭha zâwk ang chu; ka hnênah awm reng mai rawh,” a ti a. 20 Tichuan, Jakoba chuan Rakili nei tûr chuan kum sarih chu rawng a bâwl ta a; nimahsela, a hmangaih hle avângin ni rei lo tê ang chauhvin a hria a. 21 Tin, Jakoba chuan Labana hnênah. “Ka pâwl theihna tûrin ka nupui chu mi pe rawh le, ka hun a kim tawh si a,” a ti a. 22 Tichuan, Labana chuan chumi khuaa mi zawng zawng chu a khâwm vek a, ruai a ṭheh a. 23 Tin, heti hi a ni a, thimhlimah chuan a fanu Leaii chu a hruai a, Jakoba hnênah a hruai lût a; tin, ani chu a lo pâwl a. 24 Tin, Labana chuan a bawihnu Zilpaii chu a fanu Leaii hnênah a bawihnu atân a pe a. 25 Tin, heti hi a ni a, zîng a lo nih chuan, ngai teh, Leaii a lo ni si a; tichuan, Jakoba chuan Labana hnênah, “Ka chunga i thiltih hi engtizia nge ni le? Rakili nei tûrin i rawng ka bâwl lo vem ni? Eng vângin nge mi bum mai le?” a ti a. 26 Tin, Labana chuan, “Kan ramah hian chutianga fa u hmaa a naupang zâwk kaltîr chu dân a ni lo asin. 27 Hemia ni sarih hi tlingtla rih la; tichuan, kum sarih dang ka rawng i bâwl leh tûr aiah chuan mi dang pawh chu kan pe ang che,” a ti a. 28 Tichuan, Jakoba chuan chutiang chuan a ti a, a ni sarih chu a tlingtla a; tichuan, a fanu Rakili chu nupuiah a pe ta a. 29 Tin, Labana chuan a bawihnu Bilhaii chu a fanu Rakili hnênah a bawihnu atân a pe a. 30 Tin, Rakili chu a pâwl bawk a, Leaii ai chuan Rakili chu a hmangaih zâwk bawk a, Labana rawng chu kum sarih dang a bâwl leh ta a.
Jakoba fate
31 Tin, LALPA chuan Leaii chu huatin a awm tih a hria a; tichuan, a chhûl a hawnsak a; Rakili erawh chu a ching a. 32 Tin, Leaii chu a rai a, fapa a hring a, a hmingah chuan Reubena a sa a; “LALPA chuan ka hrehawmzia a hmuh avâng a nih hi; tûnah zawng ka pasalin mi hmangaih tawh ang,” a ti a. 33 Tin, a rai leh a, fapa a hring leh a; “LALPA chuan huatin ka awm tih a hriat avângin hei pawh hi mi pe a nih hi,” a ti a; tichuan, a hmingah chuan Simeona a sa a. 34 Tin, a rai leh a, fapa a hring leh a; “Tûnah zet chuan fapa pathum ka hrinsak tâk avângin ka pasalin mi zâwm tawh ang,” a ti a; chuvângin, a hmingah chuan Levia an sa a. 35 Tin, a rai leh a, fapa a hring leh a; “Tûn ṭumah hi chuan LALPA ka fak ang,” a ti a; chuvângin, a hmingah chuan Juda a sa a; tin, fa a hring leh ta rih lo va.
1 Tin, Rakili chuan Jakoba chu fa rêng rêng a hrinsak lo tih a inhriat chuan, a laizâwnnu chu a îtsîk ta a; tin, Jakoba hnênah chuan, “Fate mi pe rawh; chuti lo chuan, ka thi ang,” a ti a. 2 Tin, Rakili chungah chuan Jakoba thin chu a lo ur ta thut a; tichuan, “I rîla rah phal lotu Pathian aiawhtu ka ni em ni?” a ti a. 3 Tin, ani chuan, “En teh, ka bawihnu Bilhaii saw, amah saw pâwl rawh; chutichuan, kei pawhin ama lakah fate ka neih ve theih nân, ka mal chungah hian fa a hring dâwn nia,” a ti a. 4 Tichuan, a bawihnu Bilhaii chu a nupui atân a pe a; tin, Jakoba chuan ani chu a lo pâwl a. 5 Tin, Bilhaii chu a rai a, Jakoba chu fapa a hrinsak ta a. 6 Tin, Rakili chuan, “Pathianin mi ngaihtuah a, ka aw a hre bawk a, fapa mi pe a nih hi,” a ti a; chuvângin, a hmingah chuan Dana a sa a. 7 Tin, Rakili bawihnu Bilhaii chu a rai leh a, Jakoba chu fapa dang a hrinsak leh a. 8 Tin, Rakili chuan, “Pathian buanin ka laizâwnnu ka buan a, ka hneh ta,” a ti a; tichuan, a hmingah chuan Naphtalia sa a. 9 Tin, Leaii chuan fa dang a hring leh ta rih lo fo tih a inhriatin, a bawihnu Zilpaii chu a hruai a, a nupui atân Jakoba a pe a. 10 Tichuan, Leaii bawihnu Zilpaii chuan Jakoba chu fapa a hrinsak a. 11 Tin, Leaii chuan, “A va vânneihthlâk êm!” a ti a; tichuan, a hmingah chuan Gada a sa a. 12 Tin, Leaii bawihnu Zilpaii chuan Jakoba chu fapa dang a hrinsak leh a, 13 Tin, Leaii chuan, “Ka va nihlawh êm! Hmeichheho chuan nihlawh mi ti ngawt dâwn a nih hi,” a ti a; tichuan, a hmingah chuan Asera a sa a. 14 Tin, buh lâk laiin Reubena chuan phûlah zâwlaidi a va hmu a, a nu Leaii hnênah a rawn la a. Chutichuan, Rakili chuan Leaii hnênah, “Khawngaih takin i fapa zâwlaidi ṭhenkhat kha mi lo pe teh,” a ti a. 15 Tin, ani chuan a hnênah, “Ka pasal mi chhuhsak hi thil duai em ni? Ka fapaa zâwlaidi pawh hi mi chhuhsak i tum lehzêl maw?” a ti a. Tin, Rakili chuan, “A nih loh leh, i fapaa zâwlaidi aiah hian zâninah a mutpui ang che,” a ti a. 16 Tin, tlai lamah chuan Jakoba chu phûl aṭang chuan a lo hâwng a; tin, Leaii chu a hmuak tûrin a chhuak a, “Mi pâwl tûr a ni; ka fapaa zâwlaidiin ka hawh tawh tlat si chia,” a ti a. Tichuan, chumi zân chuan a mutpui ta a. 17 Tin, Pathianin Leaii ṭawngṭaina chu a ngaithla a; tichuan, a rai a, Jakoba chu fapa pangana a hrinsak leh a. 18 Tin, Leaii chuan, “Ka bawihnu chu ka pasal hnêna ka pêk avângin Pathianin ka hlawh mi pe ta a nih hi,” a ti a; tichuan, a hmingah chuan Isakara a sa a. 19 Tin, Leaii chu a rai leh a, Jakoba chu fapa parukna a hrinsak leh a. 20 Tin, Leaii chuan, “Pathianin thuam ṭha tak mi neihtîr a; tûnah zawng ka pasal chu, fapa paruk ka hrinsak tâk avângin ka hnênah a chêng tawh ang,” a ti a; tichuan, a hmingah chuan Zebuluna a sa a. 21 Tin, chumi hnuah chuan fanu a hring leh a, a hmingah chuan Dinaii a sa a. 22 Tin, Pathianin Rakili chu a hre reng a; tichuan, Pathianin a ṭawngṭaina a ngaithla a, a chhûl a hawnsak ta a. 23 Tichuan, a rai a, fapa a hring ta a; tin, “Pathianin ka hmingchhia a chhilh ta,” a ti a; 24 tin, “LALPA chuan fapa dang mi pêk belhchhah leh rawh se,” tiin a hmingah chuan Josefa a sa a.
Jakoba leh Labana an indâwr
25 Tin, heti hi a ni a, Rakili chuan Josefa chu a hrin hnuin, Jakoban Labana hnênah, “Keima awmna pângngaiah, kan ram lama ka hâwnna tûrin mi kaltîr tawh rawh khai. 26 I rawng ka bâwl chhan ka nupuite leh ka fate hi mi pe la, mi kaltîr rawh; i rawng ka bâwlsak zia che chu i hre si a,” a ti a. 27 Tin, Labana chuan a hnênah, “Mi khawngaih theih chuan la awm ta rih che, LALPA chuan nangma zâran mal mi sâwm tih aienin ka hria asin,” a ti a. 28 Tin, amah vêk chuan, “I hlawh tûr ruat la, mi hrilh teh; tichuan, ka pe dâwn che nia,” a ti a. 29 Tin, ani chuan a hnênah, “Engtin nge i rawng ka bâwla, engtin nge i ran chu ka hnênah an awm i hria alâwm. 30 Ka lo kal hma zawngin tlêm tê chauh i nei a, tûnah zawng tam taka an lo chan tâk hi; ka pênna lam apiangah LALPA chuan mal a sâwm zêl che a ni; amaherawhchu, eng tikah nge keima chhûngkaw tân ka thawh chhuah ve ang?” a ti a. 31 Tin, ani chuan, “Eng nge ka pêk ang che?” a ti a. Tin, Jakoban, “Eng mah mi pe tûr a ni lo; he thil hi mi tihsak chuan i ran rual chu ka thlahin ka vêng leh ang e. 32 Vawiinah hian i ran rual chu ka va en chhuak vek ang a, berâm zînga a hângin a kah chik nuk leh a hângin a kah phoh phoh leh a hâng apiang leh, kêl zînga a vârin a kah chik nuk leh a vârin a kah phoh phohte chu chuta ta chu ka hruai hrang zêl ang; tin, tûn achina chutianga lo piang apiangte chu ka hlawh tûr ni ang hmiang. 33 Chutichuan, tûn achinah, i mit hmuha awm ka hlawh kawng thu-ah i lo kal hun chuan, ka felna hian mi chhânsak mai ang; kêl zînga a vârin a kah chik nuk loh leh a vârin a kah phoh phoh loh leh, berâm zînga a hâng lo ka hnêna i hmuh apiang chu ka rûkah i ruat mai tûr a ni,” a ti a. 34 Tin, Labana chuan, “Ngai teh, i sawi ang tak chu ni ang hmiang,” a ti a. 35 Tichuan, chumi ni tak chuan kêlpa, a vâra ze tan leh a vârin a kah phoh phoh zawng zawng leh, kêlnu, a vârin a kah chik nuk leh a vârin a kah phoh phoh zawng zawng, a vâr tel apiang chu, berâm zînga a hâng zawng zawngte nên chuan a hruai hrang a, a fapate kutah a pe a; 36 tin, amah leh Jakoba kârah chuan ni thum kalah a awmtîr a; tin, Jakoba chuan Labana ran rual dang zawng zawng chu a thlah leh ta a. 37 Tin, Jakoba chuan hriang leh vaiumkhal leh thingse tiang hring a la a, a pil a khawk vâr thliah a, tiangahte chuan a vâr chu a tilang a. 38 Tin, a tiang pil khawhte chu ran rualten an rawn in ṭhinna tui inna thlêngah te, tui luannaah te chuan, ran rualte hma zâwn zêlah a dah ta a; tin, tui in tûra an lo kal lai chuan an lo rai ṭan ṭhîn a. 39 Tichuan, ran rualte chu tiang zâwnahte chuan an rai ṭan a, a ze tan te, a ze chik nuk te, a ze phoh phoh te an rawn hring ṭhîn a. 40 Tin, Jakoba chuan berâmnote chu a dah hrang a; tin, ran rualte chu Labana ran rual zînga a ze tan leh a hâng zawng zawng lam chu a hawitîr ṭhîn a; ama ran rualte chu a dah hrang ṭhîn a; Labana ran zîngah chuan a dah lo va. 41 Tin, heti hi a ni a, ran chak deuhte chu an rai ṭan apiangin tiang zînga an rai ṭan theihna tûrin, Jakoba chuan tui luannaah, ran mit hmuhah chuan tiangte chu a dah ṭhîn a. 42 Amaherawhchu, ran chu an ṭan a ṭhat loh chuan a dah ṭhîn lo; chutichuan, a no ṭanṭha lo deuhte chu Labana ta a ni zêl a, a chak deuhte chu Jakoba ta a ni zêl a. 43 Tichuan, Jakoba chu nasa takin a lo pung a, ran rual, rual lian tak tak te, bawihnu te, bawihpa te, sanghâwngsei te, sabengtung te a lo nei ta a.
Labana hnên ata Jakoba a tlânchhia
1 Tin, ani chuan Labana fapaten, “Jakoban kan pa ta zawng zawng chu a lâksak vek a, kan pa taa mi a ni, hêng ropuina zawng zawng hi a hmuh ni,” an tih thute a lo hre ta a. 2 Tichuan, Jakoban Labana hmêl a en a; tin, ngai teh, tûn hma lam angin a chungah a ṭha ta lo tih a hria a. 3 Tin, LALPA chuan Jakoba hnênah, “I thlahtute ramah leh i laichînte hnênah haw leh tawh rawh; i hnênah ka awm zêl dâwn nia,” a ti a. 4 Tichuan, Jakoba chuan mi a tîr a, phûla a ran rual awmna lamah chuan Rakili leh Leaii chu a ko va; 5 tin, an hnênah, “In pa hmêl ka hmuhin, tûn hma lam angin ka chungah a ṭha ta lo tih ka hria a; nimahsela, ka pa Pathian chu ka hnênah a awm reng a ni. 6 Nangni pawhin in pa rawng hi ka theihtâwpin ka bâwl tih in hria a. 7 Nimahsela, in pa chuan mi bum a, ka hlawh hi vawi sâwm lai mi tihdanglamsak tawh a; nimahsela, Pathianin ka pawi a khawih a phal lo a ni. 8 ‘A ze chik nukte chu i hlawh a ni ang,’ a tih leh, ran zawng zawng chuan a ze chik nukte an hring ṭhîn a; tin, ‘A ze tante chu i hlawh a ni ang,’ a tih leh, ran zawng zawng chuan a ze tante an hring ṭhîn. 9 Chutiangin Pathianin in pa rante chu a lâksak a, keimah mi pe ta a nih hi. 10 Tin, heti hi a ni a, rante chu an rai ṭan lai chuan, ka mumangah chuan ka han dâk a; tin, ngai teh, a pa, ran bawhtute chu, a ze tan te, a ze chik nuk te, a ze zeng zung te an ni tih ka hmu a ni. 11 Tin, ka mumangah chuan Pathian vântirhkohvin, ‘Jakob,’ mi lo ti a; tin, keiin, ‘Heta hi ka awm,’ ka ti a. 12 Tin, ani chuan, ‘Han dâk la, en rawh, a pa, ran bawhtu zawng zawng saw, a ze tan te, a ze chik nuk te, a ze zeng zung te an nih saw; Labanan i chunga a thiltih zawng zawng hi ka hmu asin. 13 Kei hi, lungphuna sahriak i hnawihna, ka hnêna thu i tiamna Bethel, kha Bethel Pathian kha ka ni; tûnah tho la, he ram ata hi chhuak la, i pianna ramah chuan haw leh tawh rawh,’ a ti a,” a ti a. 14 Tin, Rakili leh Leaii chuan an chhâng a, a hnênah. “Kan pa inah chuan kan tân chanvo leh ro khâwm tûr rêng a la awm cheu em ni? 15 Ani chuan mikhual ang lekah min ngai tawh a ni lâwm ni? Min hralh a, kan man pawh a ei zo vek tawh si a. 16 Pathianin kan pa laka sum a lâksak zawng zawng chu keimahni leh kan fate ta a nih hi; chutichuan, Pathianin i hnêna a sawi apiang chu ti rawh khai,” an ti a. 17 Tichuan, Jakoba chu a tho va, a fapate leh a nupuite chu sanghâwngsei chungahte a chuantîr a. 18 Tin, Kanaan rama a pa Isaaka hnêna kal tûrin a ran zawng zawng leh, a sum khâwl khâwm zawng zawng, a ran hmuhte, Paddan-aram rama a khâwl khâwmte chu a kalpui ta vek a. 19 Tin, Labana chu a berâm hmul mêt tûrin a kal daih a; tin, Rakili chuan a pa milemte a rûksak a. 20 Tin, Jakoba chu Suria mi Labana hriat loh hlânin a kal ru ta daih a, a tlân bo tûr chu a hrilh lo va. 21 Chutichuan, a neih zawng zawng nên chuan a tlân bo ta a; tin, a tho va, Luipui chu a kân a, Gilead tlâng lam chu hmachhawnin a pan zêl a.
Labanan Jakoba a ûm
22 Tin, a ni thum niah chuan Jakoba a tlân bo tih Labana chu an hrilh a. 23 Tichuan, a unaute a hruai a, ni sarih kal a ûm a; Gilead tlângah chuan a ûmpha ta a. 24 Tin, Suria mi Labana hnênah chuan zâna a mumangah Pathian a lo kal a, a hnênah, “Jakoba hnênah a chhia a ṭha enga mah sawi lo tûrin fîmkhur rawh,” a ti a. 25 Tin, Labana chuan Jakoba chu a ûmpha ta a. Tin, Jakoba chuan a puan in chu tlângah a lo zâr tawh a; tin, Labana pawhin a unaute nên chuan Gilead tlângah an zâr ve ta a. 26 Tin, Labana chuan Jakoba hnênah, “I thiltih hi engtizia nge ni le, ka hriat loh hlâna i kal rûk daiha, chemsen bawihte ang maia ka fanute i hruai bo hi? 27 Eng vângin nge a rûka i tlân bova, mi kal rûksana, hlimna te nên, hla te nên, khuangtê te nên, ṭingṭang te nên ka thlahna tûr chein mi hrilh lohva, 28 ka tute leh ka fanute ka fawh i phal loh ni? Atthlâk takin a ni thil i tih ni. 29 Tichhe thei che ka ni asin; nimahsela, i pa Pathian chuan nizânah khân, ‘Jakoba hnênah a chhia a ṭha a enga mah sawi lo tûrin fimkhur rawh,’ tiin mi bia a ni. 30 Tin, i pa in i ngaih tawh êm êm avângin kal châk hle mah la, eng vângin nge ka pathiante mi rûksak ni?” a ti a. 31 Tin, Jakoba chuan a chhâng a, Labana hnênah, “Ka hlauh vâng a ni; i fanute hi mi lâk luihsak dah ang e, ka ti a ni. 32 Tu pawh i pathiante lo kawltu apiang chu an nung lo vang; kan unaute mit hmuhah hian i ta ka hnêna awm chu en chiang la, la ta che,” a ti a. Rakilin a lo ru tih Jakoban a hre si lo va. 33 Tin, Labana chu Jakoba puan inah te, Leaii puan inah te, bawihnu pahnih puan inah te a lût zêl a; nimahsela, a hmu lo va. Tin, Leaii puan in ata chu a chhuak a, Rakili puan inah chuan a lût leh a. 34 Tin, Rakili chuan milemte chu a lo la a, sanghâwngsei thuamhnaw zîngah a lo dah a, a lo ṭhut hnan diam a. Tin, Labana chuan a puan in chhûng zawng zawng chu a dap vêl vek a; nimahsela, a hmu lo va. 35 Tin, ani chuan a pa hnênah, “I hmaa ka thawh peih loh avâng hian, ka lalpa, thinur suh ang che; hmeichhe awm dân pângngai chu ka chunga a awm lai tak a ni si a,” a ti a. Tichuan, a zawng a zawng a; nimahsela, milemte chu a hmu zo ta lo va. 36 Tin, Jakoba chu a thinur ta a, Labana chu a hau va; Jakoba chuan Labana hnênah, “Eng nge ka bawhchhiata, eng nge ka sualna, mi rawn ûm vak mai ni? 37 Ka bungrua zawng zawng i dap vêl pawhin, i in chhûng bungrua rêng rêng eng nge i hmuh ni? Keini pahnih hi min ngaihtuah theihna tûrin ka unaute leh i unaute hmaah hian dah rawh. 38 Hei kum sawmhnih zet i hnênah ka awm ta a; i berâmpuite leh i kelpuite chuan an note an hring sual ngai lo va, i berâm rual zînga a pate pawh ka ei ngai si lo va. 39 Ramsa sehte pawh i hnênah ka rawn thlen ngai lo va; keiin a bo ai chu ka tuar zâwk ṭhîn a; chhûna rûk emaw, zâna rûk emaw ka rulh i phût ṭhîn. 40 Hetiangin ka awm ṭhîn; chhûna ni sa leh zâna khaw vâwtin mi tihrehawm êm êm ṭhîn a; mut pawh ka hmu ngai ṭhîn lo va. 41 Chûng kum sawmhnih chhûng zawng chu i inah ka awm a; i fanute pahnih hlawh tûrin kum sâwm leh kum li i rawng ka bâwl a, i rante hlawh tûrin kum rûk ka bâwl leh a; ka hlawh lah chu vawi sâwm lai i tidanglam si a. 42 Ka pa Pathian, Abrahama Pathian, Isaaka ṭiha chu ka hnênah awm lo phei sela chu, tûnah pawh hian ruak ngawta mi hâwntîr ngei ngei tûr i nih hi. Pathianin ka hrehawmzia leh ka thawh rimzia chu a hmu a, nizânah chuan a zilh che a nih chu,” a ti a. 43 Tin, Labana chuan a chhâng a, Jakoba hnênah. “Fanute hi keima fanu an ni a, naupangte hi keima naupang an ni a, rante hi keima ran an ni a, i hmuh zawng zawng hi keima ta vek an ni; vawiinah hian hêng ka fanute chungah leh, an fa hrinte chungah hian eng nge ka tih theih ang? 44 Hawh teh, kei leh nang hian thu i thlung teh ang; chu chu kei leh nanga kârah hriatna ni rawh se,” a ti a. 45 Tichuan, Jakoba chuan lung a la a, lungphun atân a phun a. 46 Tin, Jakoban a unaute hnênah, “Lung la khâwm rawh u,” a ti a; tin, lung an la a, an tiang khâwm a; tin, lung tian khâwm kiangah chuan chaw an ei a. 47 Tin, Labana chuan chu lung tian khâwm chu Jegar-sahadutha a vuah a; Jakoba erawh chuan Galeed a vuah a. 48 Tin, Labana chuan, “He lung tian khâwm hi vawiinah hian kei leh nanga kârah hriatna a nih hi,” a ti a. Chuvângin, a hmingah chuan Galeed vuah a ni ta a; 49 Mizpa vuah a ni bawk a, Labanan, “Inṭhena kan awm hunin LALPA chuan min vêng tawn rawh se. 50 Ka fanute hi i tihretheiha, ka fanute lo hi nupui dangte i neih chuan, tu mah kan hnênah an awm lo na a, en teh, Pathian chu kei leh nanga kârah hretu a ni,” a ti si a. 51 Tin, Labana vêkin Jakoba hnênah, “He lung tian khâwm hi en la, keimah leh nangma inkâra he lung ka phun pawh hi en teh. 52 Pawi inkhawihsak tûrin kei hi he lung tian khâwm hi pêlin i hnên lamah ka lo kal lo vang, tih leh, nang pawh he lung tian khâwm leh he lungphun hi pêlin ka hnên lamah i lo kal lo vang tih, he lung tian khâwm hi hriatna ni sela, he lungphun pawh hi hriatna ni bawk rawh se. 53 Abrahama Pathian, Nahora Pathian, an pa Pathian chuan kan kâra thu ngaihtuah rawh se,” a ti leh a. Tin, Jakoba chuan a pa Isaaka ṭiha chu chhâlin chhia a chham ta a. 54 Tin, Jakoban tlângah chuan inthawina a hlân a, a unaute chu chhang ei tûrin a ko va; tichuan, chhang an ei a, tlângah chuan an riak ta hlawm a. 55 Tin, zîng takah Labana chu a tho va, a tute leh a fanute chu a fâwp a, mal a sâwm a; tin, Labana chu a kal a, ama awmna lamah a haw leh ta a.
Esauva tâwk tûrin Jakoba a inpuahchah
1 Tin, Jakoba chu a kal ta zêl a; tin, Pathian vântirhkohten an lo tâwk a. 2 Tin, Jakoban anni chu a hmuh chuan, “Hêng hi Pathian pâwlho an ni,” a ti a; tichuan, chumi hmun hmingah chuan Mahanaim a vuah a. 3 Tin, Jakoba chuan Seir rama Edom phûl lamah, a u Esauva hnênah chuan a hmaah zualkote a kaltîr a. 4 An hnênah, “Ka lalpa Esauva hnênah chuan heti hian in sawi tûr a ni, ‘I chhiahhlawh Jakoban heti hian a ti a ni: “Labana hnênah chuan ka mikhual a, tûn thlengin ka awm ta reng a; 5 bâwngpa te, sabengtung leh berâm te, bawihpa leh bawihnu te ka nei hlawm a; tichuan, i mit ka tlun theih nân ka lalpa hrilh tûrin mi ka rawn tîr a ni,” a ti,’” tiin anni chu thu a pe a. 6 Tin, zualkote chu Jakoba hnênah an lo kîr leh a, “I u Esauva hnên kan va thleng a; tin, mi zali rawn hruaiin hmuak tûr chein a lo kal nghe nghe asin,” tiin an sawi a. 7 Chutichuan, Jakoba chuan a hlau êm êm a, a mangang ta a; tichuan, a hnêna mi awm te, berâm rual te, bâwng rual te, sanghâwngsei te chu pâwl hnihah a siam a; 8 “Esauva chu pâwl pakhat hnênah a lo kala a thah chuan, pâwl pakhat la awm chu an tlân bo thei ang,” a ti a. 9 Tin, Jakoba vêk chuan, “Aw, ka pu Abrahama Pathian, ka pa Isaaka Pathian, aw LALPA, ‘I ram lamah leh i laichînte hnênah haw leh tawh rawh; tichuan, ka ti ṭha ang che,’ mi titu, 10 i chhiahhlawh chunga khawngaihna zawng zawng i lantîr zîngahte hian, a tenau ber pawh hmu tlâk ka ni lo ve; he Jordan lui hi ka tiang nên chauh ka kân a; tûnah zawng pâwl hnih zet ka lo nih tâk hi. 11 Khawngaih takin ka u kut ata, Esauva kut ata ngei chu mi chhanhim ang che; nunau chawpa mi rawn thah ka hlau si a. 12 Nangin, ‘Ka ti ṭha ngei ngei ang chia, i thlahte chu tuifinriata ṭiauvaivut chhiar sên loh khawp hiala a tam angin ka siam ang e,’ i ti a,” a ti a. 13-15 Tin, chumi zân chuan chutah chuan a riak ta a; tin, a neih zînga mi, kêlpui zahnih leh kêlpa sawmhnih, berâmpui zahnih leh berâmpa sawmhnih, sanghâwngsei sâwr lai sawmthum an note nên, bâwngpui sawmli leh bâwngpa sâwm, sabengtungpui sawmhnih leh sabengtungno sâwm chu a u Esauva tân lâwmmanah a la hrang a. 16 Tin, chûngte chu pâwl tin a hrang ṭheuhvin, a chhiahhlawhte kutah a kawltîr a; tin, a chhiahhlawhte hnênah chuan, “Ka hmaah kal kai ula, pâwl tin hi kâr neihtîr zêl rawh u,” a ti a. 17 Tin, a hma hruaitu hnênah chuan, “Ka u Esauva chuan a tawh chia, ‘Tu mi nge i nih? Khawiah nge i kal dâwn? I hmaa awmte hi tu ta nge?’ tia a zawh hun che chuan, 18 ‘I chhiahhlawh Jakoba ta an ni; ka pu Esau, i tân lâwmmanah a thawn che a nih hi; ngai teh, amah pawh kan hnungah sâwn a awm,’ ti ang che,” tiin thu a pe a. 19 Tin, a dawttu leh, a dawt lehtu leh, ran rual khalhtu dang zawng zawng hnênah pawh, “Esauva in hmuh hun chuan chutiang bawk chuan in sawi tûr a ni; 20 tin, ‘Ngai teh, i chhiahhlawh Jakoba chu kan hnungah sâwn a awm,’ ti bawk ang che u,” tiin thu a pe ṭheuh va. “Lâwmman ka hmaa kal hianin a thin ka tidam ang a, chumi hnuah chuan a hmêl ka hmu ang; tichuan, mi lo lâwm mahna,” a ti a ni. 21 Chutichuan, lâwmman chu a hmaah chuan a kal kai ta a; ani erawh chu, chumi zân chuan a pâwl zîngah chuan a riak ta a.
Peniel hmunah Jakoban mi a buan
22 Tin, zânah chuan a tho va, a nupuite pahnih leh, a bawihnute pahnih leh, a fa sâwm leh pakhatte chu a hruai a, Jabok lui kaiah chuan a kai ta a. 23 Tichuan, anni chu a hruai a, lui chu a kaitîr a, a neih zawng zawng pawh a kaitîr bawk a. 24 Tin, Jakoba chu amah chauhvin a awm ta a; tin, mi pakhatin ani chu khawfîngchah thlengin a buan a buan a. 25 Tin, a hneh lo tih a inhriatin a malpui ruh chuktuahah chuan a khawihsak a; tichuan, a buan lai chuan Jakoba malpui ruh chuktuah chu a lo pelhsawlh ta a. 26 Tin, ani chuan, “Mi thlah rawh, khawfîng pawh a chah dâwn tawh hi,” a ti a. Tin, ani chuan, “Mal mi sâwm loh chuan ka thlah lo vang che,” a ti a. 27 Tin, ani chuan a hnênah, “I hming eng nge ni?” a ti a. Tin, ani chuan, “Jakoba,” a ti a. 28 Tin, ani chuan, “I hming chu Jakoba an ti tawh lo vang a, Israela an ti zâwk tawh ang; Pathian leh mihring i bei a, i hneh tawh si a,” a ti a. 29 Tin, Jakoba chuan ani chu a zâwt a. “Khawngaih takin i hming mi hrilh rawh,” a ti a. Tin, ani chuan, “Eng vângin nge ni ka hming mi zawh?” a ti a. Tin, chutah chuan mal a sâwm ta a. 30 Tin, Jakoba chuan chumi hmun hmingah chuan Peniel a vuah ta a: “Pathian chu a hmaihma ngeiah ka hmu a, ka nunna hi zuah a ni si,” a ti a ni. 31 Tin, Penuel a pelh lai chuan ni a lo chhuak a, amah chu a rawn chhun a, a malpui avâng chuan a lo bai ta a. 32 Chuvângin, tûn thlengin Israela thlahte chuan malpui ruh chuktuaha khêl tha awm hi an ei ngai lo; Jakoba malpui ruh chuktuah chu a khêl ṭha lai taka a khawih avângin.
Jakoban Esauva a tâwk ta
1 Tin, Jakoba chu a han dâk a; tin, ngai teh, Esauva chu a hnêna mi zalite nên an lo kal a. Tichuan, a fate chu Leaii hnênah te, Rakili hnênah te, bawihnu pahnih hnênah te a sem thliah a. 2 Tin, bawihnute leh an fate chu a hmatâwng berah a dah a, Leaii leh a fate chu a dawtah a dah a, Rakili leh Josefa chu a hnung berah a dah a. 3 Tin, amah chu an hmaah chuan a kal a, a u bul a thlen hma chuan vawi sarih lei siin chibai a bûk a. 4 Tin, Esauva chu amah lâwm tûrin a tlân a, a pawm a, a ir a chuktuah a, a fâwp a; tin, an ṭap dûn ta a. 5 Tin, Esauva chu a han dâk a, hmeichhiate leh naupangte chu a hmu a; tichuan, “I rawn hruaite saw tute nge ni?” a ti a. Tin, ani chuan, “Pathianin khawngaih taka i chhiahhlawh a pêk naupangte an nih saw,” a ti a. 6 Chutichuan, bawihnute chu anmahni leh an fate nên chuan an lo kal hnai a, an kûn a, chibai an bûk a. 7 Tin, Leaii pawh a fate nên chuan an lo kal hnai a, an kûn a, chibai an bûk ve a; tin, chumi hnuah chuan Josefa leh Rakili chu an lo kal hnai a, an kûn a, chibai an rawn bûk bawk a. 8 Tin, Esauva chuan, “Ran rual ka tawh zozaite kha engtizia nge ni?” a ti a. Tin, ani chuan, “Ka lalpa, i mit ka tlun theih nân ka ti a ni,” a ti a. 9 Tin, Esauva chuan, “Kei pawhin ka ngah e, ka nau; i neih zawng zawng chu i ta ni rawh se,” a ti a. 10 Tin, Jakoba chuan, “Ni lo ve, i mit ka tlun chuan, khawngaih takin ka lâwmman pêk che kha mi pawmsak rawh; Pathian hmêl hmu angin i hmêl ka hmu a, ka chungah i lâwm si a. 11 Pathianin mi khawngaih avâng leh, ka ngah avâng hian khawngaih takin ka thil rawn pêk che kha pawm rawh,” a ti a. Tichuan, a thlêm a thlêm a, a pawm ta a. 12 Tin, Esauva chuan, “Hawh, i kal ang, hma ka hruaisak ang che,” a ti a. 13 Tin, ani chuan a hnênah, “Naupangte hi an la têt leh, berâm rual leh bâwng rual ka hnêna awmte hi no hruai an nih, ka lalpa, i hria e; ni khat chauh pawh an khalh chak lutuk chuan ran rual zawng zawng hi an thi mai ang. 14 Ka lalpa, khawngaih takin i chhiahhlawh hmaah hian kal la; kei chuan Seir tlângah, ka lalpa, i hnên ka thlen hma loh chuan, ka hmaa ran kal hi an kal theih tâwk ang zêl leh, naupangte kal theih tâwk ang zêlin, zawimuangin ka rawn chhawm zêl ang e,” a ti a. 15 Tin, Esauva chuan, “Ka hnêna awm mi ṭhenkhatte hi ka hnutchhiah tal ang che chu,” a ti a. Tin, ani chuan, “Engah kher maw? Ka lalpa mit mi tluntîr mai rawh,” a ti a. 16 Chutichuan, Esauva chu chumi ni vêk chuan Seir tlâng lam panin a kîr leh ta a. 17 Tin, Jakoba chu Sukkoth hmunah chuan a kal a, ama tân in a sa a, a rante tân bûkte a sa bawk a; chuvângin, chumi hmun hming chu Sukkoth an ti ta a. 18 Tin, Jakoba chu Paddan-aram ram ata a lo kal chu thlamuang takin Sekem khua, Kanaan rama awm chu a thleng a, daikiangah chuan a puan in chu a zâr ta a. 19 Tin, a puan in zârna hmun chu, Sekema pa Hamora fate hnên aṭangin tangka zain a lei a. 20 Chutah chuan maichâm a siam a, a hmingah chuan El-Elohe-Israel a vuah a.
Jakoba fanu Dinaii Sekeman a sual lui
1 Tin, Leaii fanu Dinaii, Jakoba a hrinsak chu chumi ram nulate hmu tûrin a va lêng chhuak a. 2 Tin, Hiv mi Hamora, chumi ram lal fapa Sekema chuan ani chu a lo hmu a; tin, a man a, a mutpui a, a tlâwm ta a. 3 Tin, a rilru chu Jakoba fanu Dinaii chungah chuan a awm tlat a, chu nula chu a hmangaih a, ani chu ṭawngkam ṭha takin a bia a. 4 Tin, Sekema chuan a pa Hamora chu a bia a, “He nula hi nupuiah mi neihsak rawh,” a ti a. 5 Tin, Jakoba chuan a fanu Dinaii chu Sekeman a tibawrhbâng tih a lo hria a; a fapate chu phûlah a ran zîngah an awm a; tichuan, an lo hâwn hma loh chuan Jakoba chu a ngawi reng a. 6 Tin, Sekema pa Hamora chu Jakoba be tûrin a hnênah a kal a. 7 Tin, Jakoba fapate chuan an hriat veleh phûl aṭang chuan an lo hâwng ta a; tin, Jakoba fanu mutpuiin Israel-ho zînga thil sual âtthlâk tak, thil tih hauh loh tûr chu a tih tâk avângin an lungngai a, an thinur ta êm êm a. 8 Tin, Hamora chuan anmahni a bia a, “Ka fapa Sekema rilru chu in fanu chungah a awm tlat a; khawngaih takin nupuiah neihtîr ta che u. 9 Tichuan, i innei tawn ang u; in fanute min neihtîr ula, kan fanute pawh nei bawk rawh u. 10 Tichuan, kan hnênah in awm ang a, ram pawh hi a awm duai fo vang; hêngah hian awmin sumdâwng ula, hêngah hian lo intimuk rawh u,” a ti a. 11 Tin, Sekema chuan nula pa leh a nuṭate hnênah, “Mi khawngaih rawh u, ka hnêna in sawi apiang ka pe zêl ang che u. 12 Man leh thilpêk chu eng zât pawh ngên ula, in tih ang zêlin ka pe ang che u; eng pawh ni sela, nula chu nupuiah mi neihtîr phawt mai rawh u,” a ti a. 13 Tin, Jakoba fapate chuan an farnu Dinaii chu a tihbawrhbân avângin, Sekema leh a pa Hamora chu ngamthlêmnain an chhâng a, an sawi ve a, 14 an hnênah, “He thil - serh tan lo mi, kan farnu pêk hi - kan ti thei lo vang; chu chu kan tân hmingchhiatna tûr a ni si a. 15 Hetianga in tiam chauh hian in thu ang chu kan remti ang: in zînga mipa tawh phawt chu serh tanin keimahni angin awm ula; 16 chutichuan, kan fanute kan neihtîr ang che u a, keini pawhin in fanute kan nei bawk ang a; tin, in hnênah kan awm ang a, chi khat kan lo ni dâwn nia. 17 Nimahsela, serh tan kawnga kan thu in zawm dâwn loh chuan kan fanu chu kan hruai ang a, kan kal mai ang,” an ti a. 18 Tin, an thu chuan Hamora leh Hamora fapa Sekema chu a tilâwm a. 19 Tichuan, tlangvâl chuan Jakoba fanu chu a duh hle avângin, chu thil chu rei rial lovin a ti ta mai a; ani chu a pa chhûngte zawng zawng zînga mite zah ber a ni a. 20 Tin, Hamora leh a fapa Sekema chuan an khaw kulh kawngkhâr chu an thleng a, an khuate chu an bia a, 21 “Saw mite saw min rem takin an awm a; chuvângin, he ramah hian awmin, hêngah hian sumdâwng rawh se; ngai teh u, an tân pawh ram hi a zau tâwk si a; an fanute saw nupuiahte nei ila, kan fanute pawh i neihtîr bawk ang u. 22 Nimahsela, chi khat kan lo nihna tûra kan hnêna awm chu hetianga kan tiam chauh hian, saw mite sâwn min remtihpui dâwn a ni: serhtan an nih angin kan zînga mipa tawh phawt chu serhtan lo ni ve ila. 23 An ran te, an sum te, an sa zawng zawng te kan ta a ni vek dâwn lâwm ni? An thu hi i remtihpui mai ang u; tichuan, kan hnênah an awm dâwn nia,” an ti a. 24 Tin, Hamora leh a fapa Sekema thu chu a khaw kulh kawngkhâra chhuak zawng zawngte chuan an zâwm a; a khaw kulh kawngkhâra chhuak zawng zawng, mipa tawh phawt chuan serh an tantîr ta vek a. 25 Tin, heti hi a ni a, a ni thum niah, an nat lai tak chuan Jakoba fapate zînga mi pahnih, Dinaii nuṭa Simeona leh Levia chuan, an khandaih keng ve vein, a rûkin khua chu an bei a, mipa zawng zawng chu an that zo phiar a. 26 Tichuan, Hamora leh a fapa Sekema chu khandaih hriamin an that a, Sekema in ata Dinaii chu an hruai a, an chhuak ta a. 27 Jakoba fapateho chuan an mi thahte chu an va nangchîng a, an farnu chu an tihbawrhbân avângin khua chu an rawk ta a. 28 An berâm rualte, an bâwng rualte, an sabengtungte, an khuaa thil awmte, an lova thil awmte chu an lâksak a; 29 an sum zawng zawng leh an fanau tê tête leh an nupuite zawng zawng, in chhûnga awm apiang chu an man a, an rawk bawk a. 30 Tin, Jakoban Simeona leh Levia hnênah chuan, “Nangnin he rama awmte zînga Kanaan-ho leh Periz-hote zîngah hian, huat mi phurhtîrin mi timangang hle a ni; kei tlêm tê ka nih avâng hian mi bei tûrin an inpun khâwm ang a, mi that mai ang; tichuan, tihboralin ka awm ang, kei leh ka chhûngte nên hian,” a ti a. 31 Tin, anni chuan, “Kan farnu hi nawhchizuar tih angin a ti tûr em ni ang?” an ti a.
Bethel-ah Pathianin Jakoba mal a sâwm
1 Tin, Pathianin Jakoba hnênah chuan, “Tho la, Bethel-ah chho la, chutah chuan awm rawh; tin, i u Esauva hnên ata i tlân bo laia i hnêna inlâr Pathian tân khân chutah chuan maichâm siam rawh,” a ti a. 2 Tichuan, Jakoban a chhûngte leh a hnêna awm zawng zawngte hnênah chuan, “In zînga mi dang pathian awmte chu dah bo daih ula, intithianghlimin in silhfênte thlâk rawh u; 3 tho ila, Bethel-ah i chho vang u; tichuan, ka mangan laia mi chhânga, ka kalnaa ka hnêna awm zêl Pathian tân khân maichâm ka siam dâwn nia,” a ti a. 4 Tichuan, mi dang pathian, an kuta awm zawng zawng leh an benga bengbeh an beh zawng zawng chu Jakoba an pe a; tin, Jakoba chuan Sekem khaw kianga sasaw hnuaiah chuan a thukru ta a. 5 Tin, an kal a; an vêl khuate chuan an lo hlau nasa ta êm a, Jakoba fapate chu an ûm ta lo va. 6 Chutichuan, Jakoba chuan Kanaan rama Luz khua chu a thleng a, amah leh a hnêna awm zawng zawngte nên (Luz chu Bethel a ni a). 7 Tin, chutah chuan maichâm a siam a, a u hnên ata a tlân bo lai khân chutah chuan Pathian a hnêna a inlâr avângin, a hmun chu El-Bethel a ti ta a. 8 Tin, Rebeki awmtu Debori chu a thi a, Bethel hnuaia sasaw hnuaiah chuan an phûm a; sasaw hming chu Allon-bakuth an ti ta a. 9 Tin, Jakoba chu Paddan-aram ram aṭanga a hâwnin Pathian a hnênah a inlâr leh a, mal a sâwm a. 10 Pathian chuan a hnênah, “I hming hi Jakoba a ni a; i hming chu Jakoba an ti tawh lo vang, i hming chu Israela a ni zâwk ang,” a ti a; tichuan, a hmingah chuan Israela a ti ta a. 11 Tin, Pathian vêkin a hnênah, “Kei Pathian Engkimtitheia ka ni; chi tam tak thlahin lo pung rawh; chi tihtham zet leh chi hrang hrang tam tak pawh i lakah an lo la awm ang a, i ṭhâlbê aṭangin lalte pawh an lo la chhuak bawk ang; 12 tin, Abrahama leh Isaaka ram ka pêk hi ka pe ang che, i awm loh hnua i thlahte pawh ram hi ka pe zêl ang,” a ti a. 13 Tin, Pathianin amah a biakna hmun aṭang chuan Jakoba chu a chhohsan ta a. 14 Tin, a biakna hmunah chuan Jakoban englo a phun a (lung a ni a phun ni); a chungah chuan thilhlan, in mi a leih a, a chungah sahriak a leih bawk a. 15 Tin, Jakoba chuan Pathianin amah a biakna hmun hmingah chuan Bethel a vuah a.
Rakili thih thu
16 Tin, Bethel aṭang chuan an kal a; tin, Ephrath khaw thlenna tûr chu hla fe a la ni a; tin, Rakili chuan nau a vei a, na takin a vei ta a. 17 Tin, heti hi a ni a, na taka a vei laiin nau chhar mi chuan, “Hlau suh; fapa dang i nei dâwn a nih hi,” a ti a. 18 Tin, heti hi a ni a, a thlarau a chhuah dâwn laiin (a thi ta si a) a hmingah chuan Ben-onia a sa a; a pa erawh chuan Benjamina a sa a. 19 Tichuan, Rakili chu a thi a, Ephrath kawngah chuan an phûm a (Ephrath khua chu Bethlehem khua a ni). 20 Tin, a thlân chungah chuan Jakoban lung a phun a; chu chu tûn thlengin Rakili thlân Lungphun a la ni. 21 Tin, Israela chu a kal zêl a, Migdal Eder piahah chuan a puan in a zâr ta a.
Jakoba fate
22 Tin, heti hi a ni a, Israela chu chumi ramah chuan a awm laiin, Reubena chuan a pa hmei Bilhaii chu a va mutpui a; tin, Israela chuan chu chu a hre ta a. Tin, Jakoba fapate chu sâwm leh pahnih an ni a: 23 Leaii fapate chu Reubena (Jakoba fa tîr) te, Simeona te, Levia te, Juda te, Isakara te, Zebuluna te an ni a; 24 Rakili fapate chu Josefa leh Benjamina an ni a; 25 tin, Rakili bawihnu Bilhaii fapate chu Dana leh Naphtalia an ni a; 26 tin, Leaii bawihnu Zilpaii fapate chu Gada leh Asera an ni a. Chûng chu Jakoba fapa, Paddan-aram rama a neihte kha an ni.
Isaaka thih thu
27 Tin, Jakoba chuan Kiriath-arba khuaa Abrahama leh Isaaka awmna Mamre-a a pa Isaaka hnên chu a thleng ta a (Kiriath-arba khua chu Hebron a ni). 28 Tin, Isaaka dam chhûng chu kum za leh kum sawmriat a ni a. 29 Tin, Isaaka chuan a thlarau a thlah a, upa tak, tarkûna damin a thi a, a chipuite hnênah hruaiin a awm ve ta a; tin, a fapa Esauva leh Jakoba chuan an phûm ta a.
Esauva thlahte
1 Tin, hêng hi Esauva thlahte chu an ni (Esauva chu Edoma a ni). 2 Esauva chuan a nupuite chu Kanaan rama nula zînga mi a ni a neih ni: Hit mi Elona fanu Adai leh, Hiv mi Zibeona tunu, Ana fanu Oholibami-te chu an ni; 3 Ismaela fanu, Nebaiotha farnu Basemathi nên chuan. 4 Tin, Adai chuan Esauva chu Eliphaza a hrinsak a; Basemathi chuan Reuela a hring a; 5 Oholibami chuan Jeusa leh Jalama leh Kora a hring a; chûng chu Esauva fapa, Kanaan rama a neihte an ni. 6 Tin, Esauva chuan a nupuite leh, a fapate leh, a fanute leh a ina mi zawng zawng leh a rante leh a sa zawng zawng leh, a sum zawng zawng, Kanaan rama a hmuhte chu a chhawm a, a nau Jakoba hnên ata chu ram dangah a kal ta daih a. 7 An thil neihte chu a nasa lutuk a, an awm dûn thei lo a ni; an rante avângin an mikhualna ram chuan a daih ta si lo va. 8 Tichuan, Esauva chu Seir tlângah chuan a awm ta a; Esauva chu Edoma a ni a. 9 Tin, hêng hi Seir tlânga Edom-ho thlahtu Esauva thlahte chu an ni. 10 Hêng hi Esauva fapateho hming chu a ni: Eliphaza, Esauva nupui Adai fapa leh Reuela, Esauva nupui Basemathi fa hi. 11 Tin, Eliphaza fapate chu Temana te, Omara te, Zephova te, Gatama te, Kenaza te an ni. 12 Tin, Timni chu Esauva fapa Eliphaza hmei a ni a; ani chuan Eliphaza chu Amaleka a hrinsak a. Chûng chu Esauva nupui Adai fapate chu an ni. 13 Tin, hêng hi Reuela fapate chu an ni: Nahatha leh Zera te, Sama leh Miza te hi. Chûng chu Esauva nupui Basemathi fapate chu an ni. 14 Tin, hêng hi Zibeona tunu, Ana fanu Esauva nupui Oholibami fapate chu an ni: ani chuan Esauva chu Jeusa leh Jalama leh Kora chu a hrinsak a. 15 Hêng hi Esauva fapate zînga a hotute chu an ni: Esauva fa tîr Eliphaza fapate chu: hotu Temana te, hotu Omara te, hotu Zephova te, hotu Kenaza te, 16 hotu Kora te, hotu Gatama te, hotu Amaleka te hi; chûng chu Edom rama Eliphaza laka chhuak hotute chu an ni; chûng chu Adai fapate chu an ni. 17 Tin, hêng hi Esauva fapa Reuela thlahte chu an ni: hotu Nahatha te, hotu Zera te, hotu Sama te, hotu Miza te hi; chûng chu Edom rama Reuela laka chhuak hotute chu an ni; chûng chu Esauva nupui Basemathi fapate chu an ni. 18 Tin, hêng hi Esauva nupui Oholibami fapate chu an ni: hotu Jeusa te, hotu Jalama te, hotu Kora te hi; chûng hotute chu Ana fanu, Esauva nupui Oholibami hrinte chu an ni. 19 Chûng chu Esauva fapate chu an ni, chûng chu an zînga hotute chu an ni; Esauva chu Edoma a ni.
Seira thlahte
20 Hêng hi Hor mi Seira fapa, chu rama awmte chu an ni: Lotana te, Sobala te, Zibeona te, Ana te, 21 Disona te, Ezera te, Disana te hi; chûng chu Edom rama Seira fa Hor-ho laka chhuak hotute chu an ni. 22 Tin, Lotana fate chu Horia leh Hemama an ni; Lotana farnu chu Timni a ni. 23 Tin, hêng hi Sobala fate chu an ni: Alvana te, Manatha te, Ebala te, Sephova te, Onama te hi. 24 Tin, hêng hi Zibeona fate chu an ni: Aia leh Ana hi; he Ana hi a ni, a pa Zibeona sabengtungte a thlah laia thlalêra tuilum khurte hmuchhuaktu kha ni. 25 Tin, hêng hi Ana fate chu an ni: Disona leh Ana fanu Oholibami hi. 26 Tin, hêng hi Disona fate chu an ni: Hemdana te, Esbana te, Ithrana te, Kerana te hi. 27 Hêng hi Ezera fate chu an ni: Bilhana te, Zaavana te, Akana te hi. 28 Hêng hi Disana fate chu an ni: Uza leh Arana hi. 29 Hêng hi Hor-ho laka chhuak hotute chu an ni: hotu Lotana te, hotu Sobala te, hotu Zibeona te, hotu Ana te, 30 hotu Disona te, hotu Ezera te, hotu Disana te hi; chûng chu Seir rama an hotu dang anga Hor-ho laka chhuak hotute chu an ni.
Edom ram lalte
31 Hêng hi lal rêng rêngin Israela thlahte chunga ro an rêl hmaa, Edom rama rorêltu lalte chu an ni: 32 Beora fapa Bela chuan Edom ramah ro a rêl a; a khawpui hming chu Dinhaba a ni. 33 Tin, Bela chu a thi a, Bozra khuaa mi Zera fapa Jobaba chuan a aiawhin ro a rêl ta a. 34 Tin, Jobaba chu a thi a, Teman-ho rama mi Husama chuan a aiawhin ro a rêl ta a. 35 Tin, Husama chu a thi a, Bedada fapa Hadada, Moab phûla Midian-ho thattu khân a aiawhin ro a rêl ta a; a khawpui hming chu Avith a ni. 36 Tin, Hadada chu a thi a, Masreka mi Samla chuan a aiawhin ro a rêl ta a. 37 Tin, Samla chu a thi a, Luipui kama Rehoboth khuaa mi Saula chuan a aiawhin ro a rêl ta a. 38 Tin, Saula chu a thi a, Akbora fapa Baal-hanana chuan a aiawhin ro a rêl ta a. 39 Tin, Akbora fapa Baal-hanana chu a thi a, Hadara chuan a aiawhin ro a rêl ta a; a khawpui hming chu Pau a ni; a nupui hming chu Mehetabeli a ni a, ani chu Mezahaba fa Matredi fanu chu a ni. 40 Tin, hêng hi an chhûngkua ang zêl leh, an hmun ang zêl leh, an hming ang zêlin Esauva thlah hotute hming chu a ni: hotu Timna te, hotu Alva te, hotu Jethetha te, 41 hotu Oholibama te, hotu Ela te, hotu Pinona te, 42 hotu Kenaza te, hotu Temana te, hotu Mibzara te, 43 hotu Magdiela leh hotu Irama-te hi; chûng chu an ram neihah chuan an awmna ang zêlin Edoma thlah hotute chu an ni; chu Esauva chu Edom-ho thlahtu chu a ni.
Josefa leh a unaute
1 Tin, Jakoba chu a pa mikhualna ram, Kanaan ramah chuan a awm ta a, 2 Hêng hi Jakoba thlahte chanchin a ni. Josefa chu kum sawm leh kum sarih mi a nihin, a ute nên ran rual an thlah a; ani chu naupang a la ni a, a pa nupuite Bilhaii leh Zilpaii fapate hnênah a awm a; tin, Josefa chuan an sual thuthang chu an pa hnênah a thlen a. 3 Tin, Israela chuan Josefa chu a tar lam fa a nih avângin a fate zawng zawng ai chuan a hmangaih zâwk a; tichuan, kawrfual ze hrang hranga zia a siamsak a. 4 Tin, an pa chuan ani chu a ute zawng zawng aiin a hmangaih zâwk tih a ute chuan an lo hre ta a; tichuan, ani chu an haw ta hle a, ṭawngkam ṭha rêng rêng a chungah an rawlh thei ta lo va. 5 Tin, Josefa chuan mumang a nei a, a ute hnênah chuan a hrilh a; tichuan, ani chu an haw lehzual ta a. 6 Tin, ani chuan an hnênah, “Khawngaih takin ka mumang hi lo ngaithla teh u: 7 ngai teh u, lovah hian buhphalte kan lo têl a; tin, ngai teh u, ka buhphal chu a lo tho va, a ding ta luah a; tin, ngai teh u, in buhphalte chuan an rawn hual vêl a, ka buhphal chu chibai an bûk hlawm a,” a ti a. 8 Tin, a ute chuan a hnênah, “Nang tehchai hian kan chungah ro i rêl tehlul ang maw? Nang tehchai hian kan chungah thu i nei tehlul ang maw?” an ti a. Tichuan, a mumang avâng leh a thusawi avâng chuan amah chu an haw lehzual sauh va. 9 Tin, mumang dang a nei leh a, a ute chu a hrilh leh a, “Ngai teh u, mumang ka nei leh ta a; ngai teh u, ni te, thla te, arsi sâwm leh pakhatte khian chibai mi lo bûk zuk nia maw le,” a ti a. 10 Tin, a pa chu a hrilh a, a uteho pawh; tichuan, a pa chuan a zilh a, a hnênah, “Mumang i neih hi eng mumang nge maw ni? Kei leh i nu leh i ute hian lei siin chibai kan rawn bûk tehlul dâwn che maw?” a ti a. 11 Tin, a uten ani chu an îtsîk a; a pa erawh chuan a thusawi chu a rilruin a vawng reng a.
Josefa an hralh a, Aigupta ram a thleng
12 Tin, a ute chu Sekem-ah chuan an pa ran rual chu thlahin an kal a. 13 Tin, Israela chuan Josefa hnênah, “I uten Sekem-ah alâwm maw ran rual chu an thlah? Lo kal teh, an hnênah ka tîr ang che,” a ti a. Tin, ani chuan a hnênah, “Mi tîr ta che,” a ti a. 14 Tin, ani chuan a hnênah. “Va kal ta la, i ute chu an dam emaw, ran rualte pawh an dam emaw va chian ta la, chanchin mi rawn hrilh leh ang che,” a ti a. Chutichuan, Hebron ruam ata chu a tîr chhuak a; tin, ani chuan Sekem chu a va thleng a. 15 Tin, mi tuin emaw amah chu a hmu a, ngai teh, phûlah chuan a vâk a vâk a; tichuan, mi chuan, “Eng nge i zawn le?” tiin a zâwt a. 16 Tin, ani chuan, “Ka ute ka zawng a ni; khawngaih takin ran rual an thlahna chu mi hrilh teh khai,” a ti a. 17 Tin, mi chuan, “Heta ṭangin an chhuah tâk kha, ‘Dothan-ah i kal ang u,’ an tih chu ka hria,” a ti a, Tin, Josefa chuan a ute chu a ûm a. Dothan-ah chuan a va hmu a. 18 Tin, anni chuan hla tak aṭangin an lo hmu a; tichuan, an kiang hnai a thlen hmain amah thah thu an phiar ta a. 19-20 Tin, “En teh u, mang neia chu a lo kal saw. Hawh u, that ila, khuarkhurum pakhatah i thlâk ang u khai; tin, ‘Sakawlhin a seh ta,’ kan ti dâwn nia; tichuan, a mangte chu engtin nge a awm kan la hre mai ang,” an ti hlawm a. 21 Tin, Reubena chuan chu chu a lo hria a, an kut ata a chhanchhuak a; “A thah êm chu i that suh ang u,” a ti a. 22 Tin, Reubena vêk chuan a pa hnêna a hruai lehna tûrin, an kut ata chu a chhanchhuah theih nân an hnênah chuan, “Thisen chu chhuah suh u; thlalêra khuarkhurumah hian thlâk ula, kut zawng a chungah thlâk suh u,” a ti a. 23 Tin, heti hi a ni a, Josefa chuan a ute hnên a va thlen chuan, Josefa chu a kawrfual, a kawrfual ze hrang hranga zia a hâk chu an lo hlihsak a; 24 tin, an hruai a, khuarkhurumah chuan an thlâk ta a; khuarkhurum chu a ruak, tui awm tawh lo a ni a. 25 Tin, chaw ei tûrin an han ṭhu hlawm a; tin, an han dâk a, an en a; tin, ngai teh, Ismael khualzinho, Gilead ram aṭanga an sanghâwngseia englo rimtui leh thinghnai damdawi leh murra phura, Aigupta rama zuk kal tûrte an lo kal a. 26 Tin, Juda chuan a unaute hnênah, “Kan nau kan thaha, a thisen chhuak kan zêp chuan eng nge hnemhnânna awm ang? 27 Hawh u, a chunga kut thlâk lovin, Ismael-ho hnênah sâwn i hralh zâwk ang u; amah hi kan nau, kan tisa ngei a ni si a,” a ti a. Tin, a unaute chuan a thu chu an zâwm ta a. 28 Tin, Midian-ho sumdâwngte an lo kal a; tichuan, Josefa chu khuarkhurum ata chu an kai chhuak a, Ismael-hote hnênah chuan, Josefa chu tangka sawmhnihin an hralh ta a, Tin, Josefa chu Aigupta ramah an hruai ta a. 29 Tin, Reubena chu khuarkhurumah a lo kal leh a; tin, ngai teh, Josefa chu khuarkhurumah chuan a lo awm ta lo va; tichuan, a silhfênte a pawt thlêr ta a. 30 Tin, a naute hnênah a kal leh a, “Taitea kha a awm ta lo, kei hi khawiah nge ka kal tâk ang le aw?” a ti a. 31 Tin, Josefa kawrfual chu an la a, kêlpa an talh a, a thi-ah chuan kawrfual chu an hnim a; 32 tin, kawrfual ze hrang hranga zia chu an thawn a, an pa hnênah chuan an rawn la a; tin, “Hei hi kan hmu ngawt a, i fapaa kawrfual a ni nge ni lo en teh,” an ti a. 33 Tin, ani chuan a lo hre mai a, “Ka fapaa kawrfual a nih hi! Sakawlhin a seh ta zuk nia le; Josefa chu matheilovin pawh sawm vekin a awm a ni ngei ang,” a ti a. 34 Tichuan, Jakoba chuan a silhfênte a pawt thlêr a, saiip puan a fêng a, ni rei tak a fapa chu a sûn a. 35 Tin, a fapate zawng zawng leh a fanute zawng zawng chu amah thlamuan tûrin an tho va; nimahsela, ani chuan thlamuan a duh lo va; “Lusûn chungin thlânah ka fapa hnênah chuan ka liam dâwn e,” a ti a. Tichuan, a pa chu amah ngaiin a ṭap ṭhîn a. 36 Tin, Midian-ho chuan Josefa chu Aigupta ramah an luhpui a, Pharaoa hnuaia hotu pakhat, vêngtu pâwl hotu, Potiphara hnênah chuan an hralh a.
Juda leh Tamari
1 Chumi lai chuan heti hi a ni a, Juda chu a unaute hnên ata a chhuk a, Adulam mi pakhat a hming Hira chu a zuk bêl ta a. 2 Tin, Juda chuan chutah chuan Kanaan mi pakhat a hming Sua fanu a hmu a; tin, ani chu a nei a, a pâwl ta a. 3 Tichuan, a rai a, fapa a hring a; tin, Judan a hmingah chuan Era a sa a. 4 Tin, a rai leh a, fapa a hring leh a; tin, a nuin a hmingah chuan Onana a sa a. 5 Tin, fapa a hring leh pek a, a hmingah chuan Sela a sa a; chu mi chu a hrin lai chuan Juda chu Kezib khuaah a awm a. 6 Tin, Juda chuan a fa tîr Era chu nupui a neihsak a, a hming chu Tamari a ni a. 7 Tin, Juda fa tîr Era chu LALPA mit hmuhin mi sual a ni a; tichuan, LALPAN ani chu a tihlum ta a. 8 Tin, Juda chuan Onana hnênah, “I u nupui chu pâwl la, pasalte unau tih tûr chu tihsak la, i u tân chuan chi thlahsak rawh,” a ti a. 9 Tin, Onana chuan chi thlah tûr chu ama thlah a ni dâwn lo tih a hria a; tichuan, heti hi a ni a, a u nupui a pâwl apiangin, a u tân chi a thlahsak lohna tûrin leiah chuan a titla ṭhîn a. 10 Tin, a thiltih dân chu LALPA mit hmuhah chuan sual tak a ni a; tichuan, ani pawh chu a tihlum ta a. 11 Tin, Juda chuan a monu Tamari hnênah chuan, “Ka fapa Sela hi a puitlin hma loh chuan i pa in lamah pasal nei lovin lo awm rih ang che,” a ti a. “Chuti lo chuan, ani pawh hi a ute angin a thi dah ang e,” a ti a ni. Tichuan, Tamari chu a pa in lamah chuan a va awm ta a. 12 Tin, a nakinah chuan Sua fanu Juda nupui chu a thi a; tin, Juda chuan a ngaih a lo reh a, Timna khuaah a berâm hmul mêttute hnên lamah chuan, amah leh a ṭhian Adulam mi Hira chu an chho ta a. 13 Tin, miin Tamari chu, “I pu chu a berâm hmul mêt tûrin Timna khuaah a chho dâwn,” tiin an hrilh a. 14 Tichuan, ani chuan a pasal sûnna silhfênte chu a hlîp a, inkhuhna puanin a inkhuh a, a intuam tlat a, Timna khaw kawnga Enaim kulh kawngkaah chuan a lo ṭhu a; Sela chu a puitling tawh si a, a pa chuan a nupuiah a neihsak lo zo a ni tih a hria a ni. 15 Tin, Juda chuan ani chu a hmuh chuan nawhchizuarah a ruat a; a hmai a inkhuh tlat si a. 16 Tichuan, kawng sira hmeichhe lam chu a va pan a, “Hawh, khawngaih takin i mu dûn ang,” a ti a; a mo kha a ni tih a hre si lo va. Tin, ani chuan, “Mi mutpui chuan eng nge mi pêk ang?” a ti a. 17 Tin, ani chuan, “Ran rual zinga mi kêlno ka thawn ang che,” a ti a. Tin, ani chuan, “Chu chu i rawn thawn hmaa lo hrên tûr eng emaw tal mi pe ang em?” a ti a. 18 Tin, ani chuan, “Hrên tûr eng nge ka pêk ang che?” a ti a. Tin, ani chuan, “I hming nemna leh i hrui, i tiang ken nên khân,” a ti a. Tichuan, a pe a, a mutpui ta a; tin, a lakah chuan fa a pai ta a. 19 Tin, a tho va, a inkhuhna puan chu a hlîp a, a hmeithaina silhfênte chu a inbel leh ta a. 20 Tin, Juda chuan a thil hrên chu chu hmeichhe kut ata la tûrin a ṭhianpa, Adulam mi kutah chuan kêlno chu a thawn a; nimahsela, ani chuan amah chu a va hmu zo si lo va. 21 Chutichuan, hmeichhe awmna hmuna mite hnênah chuan, “Kawng sîra Enaim-a nawhchizuar awm kha khawiah nge a awm tâk?” tiin a zâwt a. Tin, anni chuan, “Nawhchizuar rêng hetah an awm lo ve,” an ti a. 22 Tin, Juda hnênah chuan a kîr leh a, “Amah chu ka hmu zo lo, a hmuna mite pawhin, ‘Nawhchizuar rêng rêng hetah an awm lo,’ an ti bawk a,” a ti a. 23 Tin, Juda chuan, “Nei hlen mai rawh se; chuti lo chuan, kan mualpho dah ang e; ngai teh, he kêlno hi ka thawn a, amah i hmu zo si lo va,” a ti a. 24 Tin, thla thum emaw lai chinah chuan miin Juda chu, “I monu Tamari chuan tlangvâl a ngai a; chu lo pawh chu, ngai teh, sâwn a pai nghe nghe asin,” tiin an hrilh a. Tin, Juda chuan, “Hruai chhuak ula, hâl hlumin awm rawh se,” a ti a. 25 Tin, an hruai chhuah chuan Tamari chuan, “Hêng thil neitupa lakah hian a ni, nau ka pai ni,” tiin a pu hnênah chuan mi a tîr ta a; amah vêkin, “Khawngaih takin hêng hming nemna te, hrui te, tiang te hi tu ta nge ni, en chiang teh khai,” a ti bawk a. 26 Tin, Juda chuan chûng thil chu a ta a ni tih a lo hria a, “Ani chu ka aiin a fel zâwk a ni; ka fapa Sela ka neihtîr ta si lo va,” a ti a. Tin, Juda chuan ani chu a pâwl leh ta hauh lo va. 27 Tin, nau a vei lai chuan heti hi a ni a, ngai teh, a chhûlah chuan phîr an lo awm a. 28 Tin, heti hi a ni a, nau a vei chuan pakhat chuan a kut a rawn zen chhuak a; tichuan, nau chhar mi chuan, “Hei hi a chhuak hmasa zâwk a nih hi,” tiin a chelh a, a kutah chuan la sen a buntîr a. 29 Tin, heti hi a ni a, a kut chu a lâk luh leh lai chuan, ngai teh, a unau chu a lo chhuak ta a; tichuan, nau chhar mi chuan, “Engati nge chhuahna i insiam ni?” a ti a; chuvângin, a hmingah chuan Pereza an sa a. 30 Tin, chumi hnuah chuan a unau, a kuta la sen bun kha a lo chhuak leh a; a hmingah chuan Zera an sa a.
Josefa leh Potiphara nupui
1 Tin, Josefa chu Aigupta ramah an hruai chhuk a; tin, Pharaoa hnuaia hotu pakhat, vêngtu pâwl hotu, Aigupta mi, Potiphara chuan chuta rawn hruai chhuktu Ismael-hote kut ata chu a lei ta a. 2 Tin, LALPA chu Josefa hnênah a awm a; tichuan, ani chu mi vânnei tak a ni a; tin, a pu Aigupta mi inah chuan a awm a. 3 Tin, a pu chuan LALPA chu a hnênah a awm a, a thiltih apiang LALPAN a kutah a hlawhtlintîr tih a lo hre ta a. 4 Tichuan, Josefa chuan a pu mit a tlung a, a rawng a bâwl ṭhîn a; tin, ani chuan a chhûngte chungah chuan hotuah a siam a, a neih zawng zawng a kutah a dah ta vek a. 5 Tin, heti hi a ni a, inah chuan hotuah a siam a, a neih zawng zawng chunga hotua a siam achinah chuan, Josefa avângin LALPA chuan Aigupta mi chhûngte chu mal a sâwm ta a; in lam leh ram lama a neih zawng zawng chu LALPAN mal a sâwm ṭhîn a. 6 Tichuan, a neih zawng zawng chu Josefa kutah a dah tlat a, a hnêna thil awm rêng rêng chu a hriatpui hauh lo va, ama chaw ei chauh lo chu a hre lo. Tin, Josefa chu mi tlâwntlai ṭha tak a ni a, a hmêl pawh a ṭha hle a. 7 Tin, chûng hnuah chuan heti hi a ni a, a pu nupui chuan Josefa chu a ngaihmelh a; tin, “Mi mutpui rawh,” a ti a. 8 Ani erawh chuan a duh lo va, a pu nupui hnênah chuan, “Ngai teh, ka pu chuan he inah hian ka hnênah eng eng nge awm a hre si lo va, a neih zawng zawng ka kutah hian a dah vek a; 9 he inah hian ka aia lian zâwk tu mah an awm lo va; a nupui i nih avângin nangmah chauh lo chu ka lakah eng mah ui a nei hek lo; chutichuan, engtin nge he sual lian tak hi tiin Pathian chunga thil ka tihsual theih ang?” a ti a. 10 Tin, heti hi a ni a, ni tin maiin Josefa chu be ṭhîn mah sela, amah mutpui lam thu emaw, ama hnêna awm lam thu emaw a pawm duh lo va. 11 Tin, chumi lai vêl chuan heti hi a ni a, a hna chu thawk tûrin in chhûngah a va lût a; tin, chutah chuan an in awm rêng rêng tu mah an awm lo va. 12 Tichuan, ani chuan, “Mi mutpui rawh,” tiin a silhfênah a lo man a; tin, ani chuan a silhfên chu a kutah chuan a tlânsan a, a chhuak ta daih a. 13 Tin, heti hi a ni a, a silhfên chu a kuta hnutchhiahin a tlân chhuak ta tih a hriat veleh, 14 a in awmte chu a ko va, an hnênah, “En teh u, mi timualpho tûrin Hebrai mi pakhat kan hnêna a hruai luh tâk hi! Mi mutpui tumin ka hnênah hian a lo lût a; tichuan, aw ring takin ka au ta a. 15 Tin, heti hi a ni a, aw chhuahin ring takin ka au tih a hriat veleh, ka kiangah a silhfên hi a tlânsan a, a chhuak ta daih a ni,” a ti a. 16 Tin, Josefa pu a lo hâwn hma loh chuan a silhfên chu a kiangah a lo dah reng a. 17 Tin, a hnênah hetiang thu hi a lo sawi a, “Hebrai chhiahhlawh kan hnêna i rawn hruai kha, mi tihmualpho tumin ka hnênah a lo lût a; 18 tin, heti hi a ni a, aw chhuaha ka au veleh ka kiangah a silhfên hi hnutchhiahin a tlân chhuak ta a ni,” a ti a. 19 Tin, heti hi a ni a, Josefa pu chuan a nupuiin a hnêna, “I chhiahhlawh hian heti hian mi ti,” tia a thusawi a han hriat chuan a thin a lo ur ta thut a. 20 Tichuan, Josefa pu chuan ani chu a hruai a, tân in, lal mi tâng phuara an awmnaah chuan a khung ta a; tichuan, chuta tân inah chuan a awm ta a. 21 Nimahsela, LALPA chu Josefa hnênah a awm zêl a, a chungah ngil a nei a, tân in vêngtu pawh a khawngaihtîr a. 22 Tichuan, tân in vêngtu chuan tân ina tângho awm zawng zawng chu Josefa kutah a kawltîr ta vek a; tichuan, chuta an tih apiang chu Josefa chu a titu a ni zêl ṭhîn a. 23 LALPA chu Josefa hnênah a awm a, a thiltih apiang chu LALPA chuan a hlawhtlintîr ṭhin avângin, tân in vêngtu chuan a kuta thil awm rêng rêng chu a en duh ta lo va.
Josefan lung in tâng vete mumang a hrilhfiah
1 Tin, chûng thil hnuah chuan heti hi a ni a, Aigupta lal uain petu leh a chhang siamtute chuan an pu Aigupta lal chu an tivui a. 2 Tichuan, Pharaoa chu a chhiahhlawh hotu pahnih chungah, a uain pe hotu ber chungah leh a chhang siam hotu ber chungah chuan a thinur ta a. 3 Tichuan, vêngtu pâwl hotu inah, tân in, Josefa phuara a awmnaah chuan a tântîr ta a. 4 Tin, vêngtu pâwl hotu chuan Josefa chu anmahni a enkawltîr a; tichuan, ani chuan an rawng a bâwl ta a; tin, ni eng zât emaw lai an tâng rih a. 5 Tin, tân ina phuara awm, Aigupta lal uain petu leh chhang siamtu chuan, an pahnihin zan khatah mumang awmze hrang ve ve an nei a. 6 Tin, a tûk zîngah chuan Josefa chu an hnênah a va lût a, anni chu a va hmu a; tin, ngai teh, an lo lungngai hle a. 7 Tichuan, ani chuan, “Engtizia nge vawiin chu lungngai hmêl in va pu ve?” tiin Pharaoa chhiahhlawh hotu, a pu ina tâng vete chu a zâwt a. 8 Tin, anni chuan a hnênah “Mumang kan nei a, min hrilhfiah thei tu mah an awm si lo a ni,” an ti a. Tin, Josefa chuan an hnênah “Mumang hrilhfiahnate chu Pathian ta a ni lo vem ni? Khawngaih takin mi han hrilh teh u,” a ti a. 9 Tichuan, uain pe hotu ber chuan a mumang chu Josefa a hrilh a, a hnênah, “Ka mumangah chuan ngai teh, ka hmaah hian grêp hrui a lo awm a; 10 grêp hruiah chuan pêng pathum a awm bawk a; tin, chawr chhuak angin a lo awm a, a pârte a lo chhuak a; a pâr bâwrte chuan grêp hminte a rawn chhuah ta a. 11 Tin, Pharaoa no chu ka kutah hian a lo awm a; tichuan, grêp rahte chu ka lo va, Pharaoa novah chuan ka sâwr a, no chu Pharaoa kutah ka lo pe a,” a ti a. 12 Tin, Josefa chuan a hnênah, “Hei hi a hrilhfiahna a ni: pêng pathum chu ni thum a ni. 13 Tûn achin ni thumah Pharaoan i lu a chawi kâng ang a, i hnathawh chu a thawhtîr leh ang che; tichuan, a uain petu i nih laia i pêk dân pângngai ang khân Pharaoa no chu a kutah i pe leh dâwn a nih chu. 14 Amaherawhchu, i chan ṭhat leh hunah chuan mi han hre reng la, khawngaih takin ka chungah khawngaihna rawn lantîr ang che; Pharaoa hnênah ka chanchin han sawi la, he in ata hi mi hruai chhuak ang che. 15 Hebrai-ho ram ata miin a rûka an rûk bo ka ni a; he ramah pawh hian rip chhûnga mi khungna khawp eng mah ka tisual hek lo,” a ti a. 16 Chhang siamtu chuan hrilhfiahna chu a ṭha tih a hriatin Josefa hnênah chuan, “Kei pawh mumang ka nei a; ngai teh, chhang vâr, fawng pathumin ka lo chhîpchhuan a. 17 Tin, fawng chungnung berah chuan Pharaoa chaw, chhang siamtu siam, chi tinrêng hi a lo awm a; tin, chûng chu savaten ka fawng chhîpchhuan ata chu an lo ei noh noh va,” a ti a. 18 Tin, Josefa chuan a chhâng a, “Hei hi a hrilhfiahna a ni: fawng pathum chu ni thum a ni. 19 Tûn achin ni thumah chuan Pharaoan i taksa ata i lu a chawi kâng ang a, thing lêrah a khai ang che; tichuan, savaten i sa chu an ei noh noh dâwn a nih chu,” a ti a. 20 Tin, heti hi a ni a, a ni thum ni, Pharaoa pian champhaphâk niah chuan, ani chuan a chhiahhlawh zawng zawngte tân ruai a ṭheh a; tin, a chhiahhlawhte zinga mi uain pe hotu ber lu leh chhang siam hotu ber lu chu a chawi kâng ta a. 21 Josefan anmahni a hrilhfiah ang takin, uain pe hotu ber chu uain petuah a ṭantîr leh a; tichuan, no chu Pharaoa kutah chuan a pe leh ta a; 22 chhang siam hotu ber erawh chu a khai hlum ta a. 23 Nimahsela, uain pe hotu ber chuan Josefa chu a hre reng ta awzâwng lo va; a theihnghilh ta mai a.
Josefan Pharaoa mumang a hrilhfiah
1 Tin, kum hnih zet hnuah chuan heti hi a ni a, Pharaoa chuan mumang a nei a; tin, ngai teh, lui kamah hian a lo ding a. 2 Tin, ngai teh, bâwngpui pasarih nalh tak tak, thau tak tak hi tui aṭang chuan an lo chhuak chho va, phairuang zîngah hian an lo tla a. 3 Tin, ngai teh, bâwngpui dang pasarih pawr tak tak, chêr tak tak hi tui aṭang vêk chuan an hnuah an lo chhuak chho leh a, bâwngpui dangte kiangah lui kamah chuan an lo ding hlawm a. 4 Tin, bâwngpui pawr tak tak, chêr tak tak chuan bâwngpui nalh tak tak, thau tak tak chu an ei zo ta mai a. Chutichuan, Pharaoa chu a ṭhangharh ta a. 5 Tin, a han muhîl leh a, mumang a nei leh a; tin, ngai teh, buh kûng khatah hian vui sarih lian tak tak, ṭha tak tak hi an lo chhuak a. 6 Tin, ngai teh, chumi hnuah chuan vui sarih sîn tê tê, khawchhak thli chhêm ro rim rem hi an lo chhuak leh a. 7 Tin, vui sîn tê tête chuan vui sarih lian tak tak, ṭha tak takte chu an lem zo ta mai a. Tin, Pharaoa chu a han ṭhangharh a; tin, ngai teh, mumang a lo ni a. 8 Tin, a tûk zingah chuan heti hi a ni a, a rilru chu a lo mangang ta hle a; tichuan, mi a tîr a, Aigupta rama mitlâk dawithiam zawng zawng leh mi fing zawng zawng chu a ko va; tin, Pharaoa chuan a mumang chu a lo hrilh hlawm a; nimahsela, Pharaoa hrilhfiah thei tu mah an awm si lo va. 9 Chumi lai chuan uain pe hotu ber chuan Pharaoa hnênah, “Vawiinah hian ka tihsual ka hre chhuak ta. 10 Pharaoa a chhiahhlawhte chungah a thinur a; tichuan, vêngtu pâwl hotu inah chuan kei leh chhang siam hotu ber chu min tântîr a. 11 Tin, kei leh ani chuan zan khatah mumang kan nei a, mumang awmze hrang ve ve a ni kan neih ni. 12 Tin, chutah chuan kan hnênah vêngtu pâwl hotu chhiahhlawh, Hebrai mi, tlangvâl pakhat a awm a; tin, ani chu kan hrilh a, ani chuan kan mumangte chu min hrilhfiah ta a; kan mumang ang zia zêlin a ni min hrilhfiah ve ve ni. 13 Tin, heti hi a ni a, min hrilhfiah ang takin a lo awm ta ngei a ni; kei chu ka hnathawh hi mi thawhtîr leh a, chhang siamtu chu khai hlum a ni ta a,” a ti a. 14 Chutichuan, Pharaoa chuan Josefa chu a kohtîr ta nghâl a; tichuan, hmanhmawh takin rip ata chu an hruai chhuak ta a; tin, ani chu a inmêt fai a, a silhfên chu a thlâk a, Pharaoa hnênah chuan a va lût a. 15 Tin, Pharaoa chuan Josefa hnênah, “Mumang ka nei a, a hrilhfiah thei tu mah an awm lo va; nangin mumang hi a thu i hriat chuan i hrilhfiah thei tih i chanchin hi mi sawi ka lo hria a,” a ti a. 16 Tin, Josefa chuan Pharaoa chu a chhâng a, “Chu chu keimaha awm a ni lo ve; Pathianin Pharaoa chu thlamuanthlâk takin a chhâng zawk ang,” a ti a. 17 Tin, Pharaoa chuan Josefa hnênah, “Ka mumangah chuan, ngai teh, lui kamah hian ka lo ding a; 18 tin, ngai teh, bâwngpui pasarih thau tak tak, nalh tak tak hi tui aṭang chuan an lo chhuak chho va, phairuang zîngah hian an lo tla a. 19 Tin, bâwngpui dang pasarih berh tak tak, pawr êm êm, chêr tak tak, chutiang rêng rênga chhia Aigupta ram zawng zawng pawha ka la hmuh ngai loh hi, an hnuah an lo chhuak chho leh a. 20 Tin, bâwngpui chêr tak tak, pawr tak takte chuan bâwngpui pasarih thau tak tak lo chhuak hmasate chu an ei zo ta mai a. 21 Tin, an ei zawh hnu pawh chuan an ei tih an hriat chuang loh; a tîr ang bawk khân an la pawr ta reng a. Chutichuan, ka ṭhangharh ta a. 22 Tin, ka mumang dang lehah chuan, ngai teh, buh kûng khatah hian vui sarih lian tak tak, ṭha tak tak hi a lo chhuak a. 23 Tin, ngai teh, chumi hnuah chuan vui sarih vuai sil sel, sîn tê tê, khawchhak thli chhêm ro rim remte hi an lo chhuak leh a. 24 Tin, vui sîn tê tête chuan vui sarih ṭha tak takte chu an lem zo ta maiin ka hmu a. Tin, mitlâk dawithiamhote chu ka hrilh a; nimahsela, mi hrilhfiah thei tu mah an awm si lo va,” tiin a sawi a. 25 Tin, Josefa chuan Pharaoa hnênah, “Pharaoa mumang hi hmun khat a ni; Pathianin a thiltih tûr chu Pharaoa a hriattîr a nih chu. 26 Bâwng pasarih ṭha tak takte chu kum sarih an ni a, vui sarih ṭha tak takte chu kum sarih an ni bawk a; mumang chu hmun khat a ni. 27 Tin, an hnua bâwng pasarih chêr tak tak, pawr tak tak lo chhuak chhote chu kum sarih an ni a, vui sarih a sî hlîr, khawchhak thli chhêm ro rim remte nên chuan; chûng chu ṭâm kum, kum sarih tûr a ni. 28 Chu chu a ni Pharaoa hnêna ka sawi kha; Pathianin a thiltih tûr chu Pharaoa a hriattîr a nih hi. 29 Ngai teh, Aigupta ram chhûng zawng zawngah hian hausak tawntaw kum, kum sarih a lo thleng dâwn; 30 chumi hnuah chuan ṭâm kum, kum sarih a lo awm leh ang; tichuan, hausakna zawng zawng kha Aigupta ramah hian theihnghilh vek a ni tawh ang; ṭâm chuan ram hi a ei chhe zo vang. 31 Hausakna kha, a zuitu ṭâm avâng chuan he ramah hian an hre tawh lo vang; a nasa hle dâwn si a. 32 Tin, mumang Pharaoa vawi hnih a neih nawntîrna chu hemi avâng hian a ni, thiltih tûr chu Pathianin a tihngheha, Pathian vêkin a thlentîr lawk dâwn avângin. 33 Chutichuan, tûnah hian Pharaoa chuan mi pakhat bengvâr tak, fing tak mai zawng chhuak sela, Aigupta ram chungah hian hotuah awmtîr rawh se. 34 Pharaoan chu chu ti sela; tin, ram chungah hian hotute ruat sela, hausak kum, kum sarih chhûng chuan Aigupta ram buh hi hmun ngaa ṭhena hmun khat zêl khâwm rawh se. 35 Tichuan, anni chuan chûng kum ṭhat kum lo thleng tûra buh zawng zawng chu lâwr khâwmin, Pharaoa hnuaia awm tûrin khuaahte la ei atân buh chhûng khâwm sela, vawng tlat rawh se. 36 Tichuan, ṭâm avânga ram hi a boral loh nân buh chu ṭâm kum, kum sarih Aigupta rama lo thleng tûr atân chuan he ram atân hian inrin lâwkna tûr a ni ang,” a ti a.
Josefa chu Aigupta ram hotuah a ṭang
37 Tin, chu thu chu Pharaoa leh a chhiahhlawhte zawng zawng chuan ṭha an tih zâwng tak a ni a. 38 Tin, Pharaoa chuan a chhiahhlawhte hnênah, “Hetiang, Pathian thlarau awmna mi hi kan hmu zo dâwn em ni?” a ti a. 39 Tin, Pharaoa vêk chuan Josefa hnênah, “Pathianin chûng zawng zawng chu a hriattîr che avângin, nang anga bengvâr leh fing rêng rêng hi an awm lo ve. 40 Nang hi ka chhûngte chungah hotuah i awm ang a, ka khua leh tui zawng zawng hi i thu ang zêlin an awm ang; lalṭhutphaha ṭhut thu-ah chauh hian i aiin ka lal ang,” a ti a. 41 Pharaoa vêk chuan Josefa hnênah, “Ngai teh, Aigupta ram zawng zawng chungah hian hotuah ka siam a che,” a ti a. 42 Tin, Pharaoan a kut ata a hming nemna zungbun chu a phawi a, Josefa kutah a buntîr a, puan zai sîna siam silhfênte a bel a, a nghâwngah rangkachak ṭhi a awrhtîr a. 43 Tin, a tawlailîr neih pahnihnaah chuan a chuantîr a; a hmaah chuan, “Ṭhingṭhi ru,” tiin an au zêl a; tichuan, Aigupta ram zawng zawng chungah chuan hotuah a siam ta a. 44 Tin, Pharaoa chuan Josefa hnênah, “Kei Pharaoa ka ni, nangma thu lo chuan Aigupta ram chhûng zawng zawngah hian tu mân an kut emaw, an ke emaw an lek lo vang,” a ti a. 45 Tin, Pharaoan Josefa hmingah chuan Zaphenath-panea a vuah a; On khaw puithiam Potiphara fanu Asenathi nupuiah a neihtîr bawk a. Tin, Josefa chu a chhuak a, Aigupta ram chu a fang ta a. 46 Tin, Josefa chu Aigupta ram lal Pharaoa hmaa a din lai chuan kum sawmthum mi a ni a. Tin, Josefa chu Pharaoa hnên ata a chhuak a, Aigupta ram zawng zawng chu a fang chhuak ta a. 47 Tin, kum ṭhat kum, kum sarih chhûng chuan lei chuan hlâwk takin buh a chhuah ṭhîn a. 48 Tin, Aigupta rama kum ṭhat kum, kum sarih lo thlenga buh zawng zawng chu a lâwr khâwm a, buh chu khuaahte chuan a chhûng khâwm ta a; khaw tinah a vêl lova buh ṭheuh chu a chhûng khâwm zêl a. 49 Tichuan, Josefa chuan buh chu tam tak, tuifinriata ṭiauvut zât laiin a chhûng khâwm rui a; a chhiar pawh chu a bâng ta hial a, chhiar sên rual a ni ta si lo va. 50 Tin, ṭâm lo thlen hma chuan Josefa chuan fapa pahnih a nei a, chu mite chu On khaw puithiam Potiphara fanu Asenathi chuan a hrinsak a ni. 51 Tin, Josefan a fa tîr hmingah chuan Manasea a sa a; “Pathianin ka thawh rimna zawng zawng leh ka pa chhûngte zawng zawng chu mi theihnghilhtîr ta si a,” a ti a. 52 Tin, a fa pahnihna hmingah chuan Ephraima a sa a, “Pathianin ka hrehawm tuarna ramah hian chi mi thlahtîr ta si a,” a ti a. 53 Tin, kum ṭhat kum, kum sarih, Aigupta rama lo thleng chu a lo vei ta a; 54 tin, ṭâm kum, kum sarih tûr chu Josefa sawi ang takin a lo thleng ṭan ve ta a. Ram tinah ṭâm a lo tla ta a; Aigupta ram chhûng zawng zawngah erawh chuan ei tûr a awm a. 55 Tin, Aigupta rama mi zawng zawng chu an ṭâm veleh Pharaoa hnênah ei tûr dîlin an au va; tin, Pharaoa chuan Aigupta mi zawng zawng hnênah chuan, “Josefa hnênah kal ula; a hrilh apiang che u chu ti rawh u,” a ti a. 56 Tin, ṭâm chu lei chung zawng zawngah chuan a lo tla ta a; tichuan, Josefa chuan chhûn khâwmna in zawng zawng chu a hawng a, Aigupta mite hnênah chuan a hralh a; Aigupta ramah chuan ṭâm chu a tla nasa hle si a. 57 Tin, lei chung zawng zawngah ṭâm chu a tlâk nasat avângin, ram tina mite chu buh lei tûrin Aigupta ramah Josefa hnênah chuan an kal ṭhin a.
Buh lei tûrin Aigupta ramah Josefa unaute an kal
1 Tin, Jakoba chuan Aigupta ramah buh a awm tih a lo hre ta a; tichuan, Jakoba chuan a fapate hnênah, “Engati nge in inen mai mai ni?” a ti a. 2 Tin, amah vêk chuanin, “Ngai teh u, Aigupta ramah buh a awm tih ka lo hre ta; thi lova kan nun chhuah theihna tûrin chutah chuan zuk kal ula, chuta ta chu kan tân zuk lei rawh u khai,” a ti a. 3 Tichuan, Josefa uteho sâwm chu Aigupta ram ata buh lei tûrin an zuk kal ta a. 4 Josefa nau Benjamina erawh chu a ute hnênah chuan Jakoban a kaltîr ve lo va; “Tawhsual a zuk tâwk hlauh dah ang e,” a ti a ni. 5 Tichuan, Israela fapate chu mi kalho zîngah chuan buh lei tûrin an kal ve a; Kanaan ramah pawh ṭâm a tla ve si a. 6 Tin, Josefa chu Aigupta ram chungah chuan hotu a ni a, amah chu chumi rama mi zawng zawng hnênah a hralhtu a ni; tichuan, Josefa uteho chu an lo kal a, lei siin amah chibai an bûk hlawm a. 7 Tin, Josefa chuan a uteho chu a lo hmu a, anni chu a lo la hre hlawm a; nimahsela, an lakah chuan chi dang angin a insiam a, ram takin a bia a; tin, an hnênah, “Khawi aṭanga lo kal nge in nih?” a ti a. Tin, anni chuan, “Buh lei tûrin Kanaan ram aṭanga lo kal kan ni,” an ti a. 8 Tin, Josefa chuan a uteho chu a lo la hria a, anni erawh chuan ani chu an hre si lo. 9 Tin, Josefa chuan anmahni chungchâng thu mumanga a hmuhte kha a hre chhuak a, an hnênah, “Enthlatute in nih hi! Ram ruahzia en tûrin in lo kal a nih hi le!” a ti a. 10 Tin, anni chuan a hnênah, “Ka pu, ni suh e, i chhiahhlawhte hi buh lei tûra lo kal kan ni asin. 11 Mi pakhat fa vek kan ni; mi dik tak kan ni a, i chhiahhlawhte hi enthlatute kan ni awzâwng lo ve,” an ti a. 12 Tin, ani chuan an hnênah, “Ka awih lo, ram ruahzia en tûra lo kal in nih hi maw,” a ti a. 13 Tin, anni chuan, “Keini i chhiahhlawhte hi unau sâwm leh pahnih, Kanaan rama awm mi pakhat fa kan ni; tin, ngai teh, kan tlum ber chu tûnah chuan kan pa hnênah a awm a, pakhat chu a awm ta lo a ni,” an ti a. 14 Tin, Josefa chuan an hnênah, “ ‘Enthlatute in ni’ ka tih che u kha, in nih ngei hi! 15 Heti hian fiahin in awm ang: in tlum ber chu heta a lo kal loh chuan, Pharaoa nunna chhâlin, heta ta hi in chhuak lo vang ka ti che u a ni. 16 Nangmahniah thutak a awm nge awm lo in thu fiah nân in zînga pakhat tîr ula, in nau chu rawn hruai rawh se, nangni erawh chu phuarin in lo awm rih ang; chuti lo chuan, Pharaoa nunna chhâlin, ‘Enthlatute in ni ngei mai!’ ka ti dâwn che u a ni,” a ti a. 17 Tin, an za chuan ni thum a tântîr hlawm a. 18 Tin, a ni thum niah chuan Josefa chuan an hnênah, “Heti hian ti ula in nung ang, Pathian ka ṭih si a: 19 mi dik tak in nih chuan in unau zîngah hian pakhat phuarin awm rawh se; nangni erawh chu kal ta ula, in chhûngteho ṭâm tân chuan buh phur rawh u. 20 Tin, in tlum ber chu ka hnênah rawn hruai ang che u; chutichuan, in thu chu a fiah ang a, in thi dâwn lo nia,” a ti a. Tichuan, chutiang chuan an ti ta a. 21 Tin, anni chuan, “Kan nau chunga kan thiltih kha kan thiam lo tak tak a nih hi, khawngaih tûra min ngen ṭâwk ṭâwk laia a thinlung manganzia hmu reng chunga kan ngaihthlâksak duh loh kha; chuvângin, he manganna hian min tlâkbuak a nih hi,” an inti a. 22 Tin, Reubena chuan, “ ‘Naupang chungah thil tisual suh u,’ tiin in hnênah ka sawi lo vem ni? In ngaithla duh lo a nih kha; chuvângin, ngai teh u, a thisen phuba chu an la a nih hi,” tiin anni chu a chhâng a. 23 An kârah ṭawng letlingtu a awm avângin Josefan an thusawi chu a hria tih an hre lo. 24 Tin, ani chuan a lehhawisan a, a va ṭap ta a; tin, an hnênah a kîr leh a, anni chu a bia a, an zing ata Simeona chu a hruai hrang a, an mit hmuhah chuan a phuar ta a.
Josefa unaute Kanaan ramah an haw
25 Tin, Josefa chuan an bâwmte chu buha tikhat tûr leh an tangkate chu an ipa dah leh ṭheuh tûr leh, kalkawng atân ei tûr pe tûrin thu a pe a; tichuan, chutiang chuan an tihsak ta a. 26 Tin, an buh chu an sabengtungte chu an phurhtîr a, chuta ta chu an chhuak ta a. 27 Tin, an zînga mi pakhatin, riahbûkah a sabengtung chaw pe tûra a ip a han hawn chuan a tangka chu a hmu ta mai a; ngai teh, a ip rawng bulah chuan a lo awm ta a. 28 Tichuan, a unaute hnênah chuan, “Ka tangka kha an lo dah leh a nih hi maw le; ngai teh u, ka ipa hi a lo awm reng mai,” a ti a; tin, an thin a ṭhâwng zawk a, “Pathianin hetia min tih hi engtizia nge ni aw?” tiin khûr chungin an inen ta hlawm a. 29 Tin, Kanaan rama an pa Jakoba hnên chu an lo thleng a, an chunga thil thleng zawng zawng chu an hrilh a; 30 “Chumi ram hotu chuan ram takin min bia a, ram enthlatuah min puh a. 31 Tin, keini chuan a hnênah, ‘Mi dik tak kan ni; enthlatu kan ni awzâwng lo ve. 32 Unau sâwm leh pahnih kan ni a, pa pakhat fapate kan ni vek a; pakhat chu a awm ta lo va, kan tlum ber chu tûnah hian Kanaan ramah kan pa hnênah a awm a ni,’ kan ti a. 33 Tin, chu mi, an ram hotu chuan kan hnênah, ‘Heti hian mi dik tak in ni tih ka la hria ang: in unau pakhat ka hnênah hnutchhiah ula, in chhûngteho ṭâm tân chuan buh phur ula, kal tawh rawh u. 34 Tin, in tlum ber chu ka hnênah rawn hruai ang che u; tichuan, enthlatu in ni lo va, mi dik tak in ni zâwk tih ka hria ang; chutichuan, in unaupa hi ka pe leh ang che u a, he ramah hian in sumdâwng dâwn nia,’ min ti a,” an ti a. 35 Tin, heti hi a ni a, an ipte chu an bun ruah laiin, ngai teh, an tangka fûn ṭheuh chu an ipah chuan a lo awm ta ṭheuh va! Tin, anniho leh an pa chuan an tangka fûnte chu an hmuh chuan an hlau hle a. 36 Tin, an pa Jakoba chuan an hnênah, “Nangni hian ka fate mi chântîr a nih hi; Josefa a awm tawh lo va, Simeona pawh a awm tawh hek lo, Benjamina lam pawh hruai bo in tum lehzêl a; chûng thil zawng zawng chuan mi tlâkbuak a nih hi,” a ti a. 37 Tin, Reubena chuan a pa hnênah, “I hnêna ka rawn hruai leh loh chuan ka fapate pahnih hi that mai ang che; ani chu ka kutah mi kawltîr la, i hnênah ka rawn hruai leh mai ang,” tiin a sawi a. 38 Nimahsela, ani chuan, “Ka fapa hi in hnênah a chhuk ve lo vang; a u a thi tawh a, amah chauh hi a ni tawh si a; in kalna kawnglakahte tawhsual a zuk tawh chuan ka lu ṭuak hi lungngaihnain thlânah in liamtîr dâwn a ni,” a ti a.
Josefa unaute Benjamina hruaiin Aigupta ramah an kal
1 Tin, chumi ramah chuan ṭâm a tla nasa hle a. 2 Tin, heti hi a ni a, Aigupta ram ata buh an phurh chhoh kha an ei zawh chuan an pa chuan an hnênah, “Kal leh tawh ula, buh tlêm tal kan tân zuk lei leh rawh u,” a ti a. 3 Tichuan, Juda chuan a hnênah, “Chu mi chuan, ‘In nau chu in hnêna a rawn tel loh chuan ka hmêl in hmu tawh lo vang,’ tiin min phût tlat a ni. 4 Kan nau hi kan hnênah i tirh chuan buh kan zuk leisak ang che. 5 I tirh loh erawh chuan kan zuk kal lo vang; chu mi chuan kan hnênah, ‘In nau chu in hnêna a rawn tel loh chuan ka hmêl in hmu lo vang,’ a ti miau si a,” tiin a sawi a, 6 Tin, Israela chuan, “Eng vângin nge nau dang in la neih thute lam in hrilh khera, ka tâna ṭha lo tak in tih ni?” a ti a. 7 Tin, anni chuan, “Chu mi chuan, ‘In pa chu a la dam em? Unau dang in la nei em?’ tiin kan chanchin leh kan laichînte chanchin min zâwt tlat si a; tichuan, chûng a thu min zawh ang zêl chu kan hrilh a ni: ‘In nau chu rawn hruai chhuk rawh u,’ a ti ang tih tu nge hre kher ang i?” an ti a. 8 Tin, Juda chuan a pa Israela hnênah, “Taitea chu ka hnênah kaltîr rawh; tichuan, kan tho vang a, kan kal mai ang e; keini leh nang leh kan fanau tê tête pawh hi thi lova kan nun theihna tûrin. 9 A chungchâng thu-ah hian keiman a mawh ka phur zêl ang; keima kutah ngei amah dah ang che. Ani chu i hnênah ka rawn hruai leh lohva, i hmaah hian ka dintîr leh loh chuan a mawh chu kumkhuain ka phur nâng e. 10 Awm rei suh ila chuan tûnah hian a vawi hnihna pawh kan lo thleng leh tawh ngei ngei ang,” a ti a. 11 Tin, an pa Israela chuan an hnênah, “Chutiang a nih si chuan heti hian ti rawh u: in bâwmahte khân he rama thil ṭha ṭha ṭhenkhat - thinghnai damdawi te, khawizu te, englo rimtui te, murra te, theipilsak te, vaiumkhal te tlêm ṭheuhvin chu mi tân chuan lâwmmanah sin thlâk rawh u. 12 Tin, tangka a leh hnih keng ula, in ip rawng bula tangka a pêk kîr che u pawh kha keng leh rawh u; a tihpalh a ni mahna. 13 In nau pawh chu hruai ula, tho ula, chu mi hnênah chuan kal leh rawh u. 14 Tichuan, in unau pakhat leh Benjamina hi a chhuahsakna tûr che uin, Pathian Engkimtitheia chuan chu mi chu khawngaihtîr che u rawh se. Tin, ka fate chu chân a nih leh ka chân mai a ni ang chu,” a ti a. 15 Tichuan, anni chuan lâwmman chu an keng a, tangka chu a leh hnih an keng bawk a, Benjamina pawh an hruai a; tin, an tho va, Aigupta ramah an zuk kal a, Josefa hmaah chuan an ding leh ta a. 16 Tin, Josefa chuan Benjamina an hnêna awm chu a hmuh veleh, a in enkawltu hnênah chuan, “Saw mite saw in chhûngah hruai lût la, sa talh la, buatsaih rawh; saw mite sâwn chhûnah ka hnênah chaw an ei dâwn a ni,” a ti a. 17 Tichuan, ani chuan Josefa thupêk angin a ti a; Josefa inah chuan a hruai lût a. 18 Tin, Josefa inah hruai luha an awm avângin an hlau va, “Kal hmasak ṭuma kan ipa tangka min pêk kîrte avâng khân a nih hi min hruai luh ni; kan chungah remchâng zawnga min beiin, keimahni leh kan sabengtungte nên hian bawih atân min man a tum a nih hi,” an ti a. 19 Tin, Josefa in enkawltu kiangah chuan an va kal a, kawngka bulah chuan an bia a, 20 “Aw ka pu, kan lo kal hmasak ṭum khân buh lei tûr ngawta lo chhuk kan ni a; 21 tin, heti hi a ni a, riahbûk kan thlen chuan kan ipte chu kan han hawng a; tin, ngai teh, kan tangka ṭheuh chu kan ip rawng bulah a lo awm ta ṭheuh va, kan tangka chu a bûk ngai thênin a lo awm a; tichuan, kan rawn keng leh a ni. 22 Tin, buh leina tûrin tangka dang pawh kan rawn keng a; kan tangka chu tuin nge kan ipah dah kan hre si lo,” an ti a. 23 Tin, ani chuan, “Thlamuang takin awm ula, hlau suh u; in Pathian, in pa Pathian chuan in ipahte chuan ro a pe che u a nih chu; in tangka kha ka hmu si a,” a ti a. Tin, Simeona chu an hnênah a rawn hruai chhuahsak ta a. 24 Tin, anni chu Josefa in chhûngah a hruai lût a, tui a pe a, an ke an sil ta a; an sabengtungte pawh chu chaw a pe bawk a. 25 Tin, an lâwmman ken chu Josefa chawfâka a lo kal hmain an lo buatsaih lâwk a; chutah chuan chaw an ei dâwn tih an hre si a. 26 Tin, Josefa chu ina a lo hâwn veleh, an kuta lâwmman awm chu in chhûngah a hnênah an keng lût a, lei siin chibai an bûk hlawm a. 27 Tin, ani chuan an chanchin a zâwt a, “In pa, a chanchin in sawi putar kha, a dam lai a ni em? Nungdamin a la awm em?” a ti a. 28 Tin, anni chuan, “Kan pa, i chhiahhlawh chu a dam lai a ni a, nungdamin a la awm e,” an ti a. Tin, an lu an kûn a, chibai an bûk leh a. 29 Tin, ani chu a dâk a, a nau Benjamina, a nu fapa chu a hmu a, “Kha kha in tlum ber, a chanchin mi hrilha kha em ni?” a ti a. Tin, amah vêkin, “Ka fapa, Pathianin khawngaih che rawh se,” a ti a. 30 Tin, Josefa chuan a nau a hmuh chuan a lung a chhiat tâk êm avângin, hmanhmawh takin ṭahna hmun a zawng ta thuai a, a pindan chhûngah a lût a, chutah chuan a ṭap chhuak ta a. 31 Tin, a hmai a phih a, a va chhuak leh a, a insûm hrâm hrâm a, “Chaw ei siam rawh u,” a ti a. 32 Tichuan, ama tân a hrangin, anniho tân a hrangin, Aigupta mi a eipuiteho tân a hrangin an siam ta a (Aigupta-hovin Hebrai-ho chu an eipui thei si lo; chutiang tih chu Aigupta-ho tân chuan a thiang lo a ni). 33 Tichuan, upa ber chu fa tîr nihna angin, naupang ber chu a tlum ber nihna angin Josefa hmaah chuan an ṭhu zêl a; chutichuan, mak an ti hlawm ṭheuh va. 34 Tin, Josefa chuan a hnêna mi chanvote chu an hnênah a hlan chhâwntîr a, Benjamina chanvo phei chu an chanvo zawng zawng ai chuan a leh ngain a tam bîk a ni. Tin, uain te an in a, a hovin an hlim ta hle a.
Josefa no a bo
1 Tin, ani chuan a in enkawltu hnênah chuan, “Kha mite ip kha an phurh theih tâwkin buhin tikhat la, an tangka ṭheuh chu an ip rawng bulah dah ṭheuh rawh. 2 Tin, ka no, tangkaraw no kha, an naupang ber ip rawng bulah dah rawh, a buh man tangka nên khân,” tiin thu a pe a. Tichuan, ani chuan Josefa thusawi ang chuan a ti ta a. 3 Tin, khua a vâr veleh anni chu an sabengtungte nên chuan an kaltîr ta a. 4 Tin, khua ata an kal chhuak chu an la thlen hlat hmain Josefa chuan a in enkawltu hnênah, “Tho la, mite kha va ûm rawh; tin, i ûm phâk veleh an hnênah, ‘Engtizia nge thil ṭha thil ṭha lova in rulh ni? 5 Kha kha ka pu uain inna leh aienna ngei a ni lo vem ni? Hetiang in tih hi in tisual a ni,’ ti rawh,” a ti a. 6 Tin, a ûm phâk a, chûng thu chu an hnênah a sawi a. 7 Tin, anni chuan a hnênah, “Ka pu, engtizia nge ni hetiang thu i sawi? I chhiahhlawhte hian chutiang thil kan tih loh tûrzia mai chu. 8 Ngai teh, kan ip rawng bula tangka kan hmuhte pawh kha Kanaan ram aṭangin i hnênah kan rawn ken leh kha. Engtin nge i pu ina mi tangkarua emaw, rangkachak emaw kan rûk theih ang le? 9 I chhiahhlawhte zîngah hian tu pawh i hmuhna apiang chu thi rawh se, keini pawh kan pu bawihah kan awm mai ang e,” an ti a. 10 Tin, ani chuan, “Aw le, in thu ang zêl chuan ni ang hmiang; amaherawhchu, tu pawh ka hmuhna apiang chu ka bawihah a awm ang a, nangni erawh chu sawisêl bovin in awm ang,” a ti a. 11 Chu veleh chuan hmanhmawh takin mahni ip chu leiah an la thla ṭheuh va, mahni ip chu an hawng ṭheuh bawk a. 12 Tin, ani chuan an upa berah a ṭan a, an naupang ber thlengin a zawng a; tichuan, no chu Benjamina ipah chuan a hmu ta a. 13 Chu veleh chuan an silhfênte chu an pawt thlêr a, mahni sabengtung chu an phurhtîr leh ṭheuh va, khuaah chuan an kîr leh ta a. 14 Tin, Juda leh a unaute chuan Josefa in chu an va thleng a, ani chu chutah chuan a lo la awm cheu va; tin, a hmaah chuan an bawkkhup ta hlawm a. 15 Tin, Josefa chuan an hnênah, “Eng thil nge ni in tih tâk ni? Keimah ang mi hian ai an en thiam ngei ang tih in hre lo vem ni?” a ti a. 16 Tin, Juda chuan, “Ka pu, i hnênah eng nge kan sawi tâk ang? Eng nge kan hrilh ang? Engtin nge kan insawi ven tâk ang le? Pathianin i chhiahhlawhte sualna chu a hmuchhuak ta a nih hi; ngai teh, ka pu, i bawihte kan nih tâk hi, keimahni leh a kuta no an hmuhna pawh hi,” a ti a. 17 Tin, ani chuan, “Chutiang chuan ka tih loh tûrzia mai chu; a kuta no an hmuhna chauh hi ka bawihah a awm ang. Nangni erawh zawng thlamuang takin in pa hnênah han kal rawh u,” a ti a.
Benjamina tân Judan a dîl
18 Chu veleh Juda chuan Josefa chu a va hnaih a, “Aw ka pu, khawngaih takin, ka pu, i chhiahhlawh hi i beng hriatah thu kam khat mi sawitîr la, i thinur chu i chhiahhlawh chungah hian alhtîr suh ang che; nang zawng Pharaoa ang mai i ni si a. 19 Ka pu, nangin, ‘Pa emaw, unau emaw in nei em?’ tiin i chhiahhlawhte hi min zâwt a. 20 Tin, ka pu, keinin i hnênah hian, ‘Pa putar tak leh a tar lam fa, naupang tê kan nei a; chu mi u chu a thi a, a nu hrinah chuan amah chauh chu a la awm a, a pa chuan amah chu a hmangaih hle mai,’ kan ti a. 21 Tin, nangin i chhiahhlawhte hnênah hian, ‘Amah chu ka mita ka hmuh theih nân ka hnênah rawn hruai thla rawh u,’ i ti a. 22 Tin, ka pu, keinin i hnênah, ‘Taitea chuan a pa a kalsan thei lo vang; a pa a kalsan zawngin a pa chu a thi mai dâwn si a,’ kan ti a. 23 Tin, nangin i chhiahhlawhte hnênah hian, ‘In tlum ber chu in hnêna a lo chhuk ve loh chuan ka hmêl in hmu leh tawh lo vang,’ i ti a. 24 Tin, heti hi a ni a, i chhiahhlawh ka pa hnên kan han thlen chuan, ka pu, i thu chu kan hrilh a. 25 Tin, kan pa chuan, ‘Kal leh tawh ula, buh tlêm tal kan tân zuk lei leh rawh u,’ a ti a. 26 Tin, keinin, ‘Kan zuk kal thei tawh lo vang; kan tlum ber hi kan hnêna a tel ve erawh chuan kan zuk kal mai ang; kan tlum ber hi kan hnêna a tel loh chuan chu mi hmêl chu kan hmu thei dâwn lo a ni,’ kan ti a. 27 Tin, i chhiahhlawh ka pa chuan kan hnênah, ‘Ka nupui chuan fapa pahnih mi hrinsak tih in hria e; 28 tin, a pakhat chu ka hnên ata a kal chhuak a, pawh sawm vekin a awm a ni ngei ang, ka ti a; chumi achinah chuan amah chu ka hmu ta lo vang vang a; 29 tichuan, he mi pawh hi ka hnên ata in hruai bova, tawhsual a zuk tawh chuan ka lu ṭuak hi lungngaihnain thlânah in liamtîr dâwn a ni,’ a ti a. 30 Chutichuan, Taitea hi kan hnêna tel lova i chhiahhlawh ka pa hnên ka han thlen chuan, a nunna chu Taitea nunna nên a inzawm tlat avângin, 31 heti hi a ni ang a, Taitea hi a tel ve lo tih a hriat veleh a thi mai ang; tichuan, i chhiahhlawhte hian i chhiahhlawh kan pa lu ṭuak chu lungngaihnain thlânah kan liamtîr dâwn a nih hi. 32 I chhiahhlawh hian, ‘I hnêna ka rawn hruai leh loh chuan a mawh chu kumkhuain ka pa lakah ka phur ang,’ tiin, ka pa lakah chuan Taitea chungchâng thu-ah hian a mawhphurtuah ka insiam tawh si a. 33 Chutichuan, khawngaih takin i chhiahhlawh hi Taitea aiah, ka pu, i bawihah mi awmtîr la, Taitea hi a ute hnênah chhohtîr ang che. 34 Taitea ka hnêna tel lovin ka pa hnênah engtin nge ka chhoh theih ang? Ka pa chunga chhiatna thleng tûr chu ka hmu ang asin,” a ti a.
A unaute hnênah Josefa a inpuang
1 Tin, Josefa chu a kianga ding zawng zawngte hmaah chuan a insûm zo ta lo va, “Mi zawng zawng hi ka hnên ata kal chhuahtîr vek rawh u!” tiin a au va. Tichuan, Josefa a unaute hnênah a inhriattîr chhûng zawng a kiangah tu mah an ding lo va. 2 Tin, a ṭap ta rawih a; tichuan, Aigupta-hovin an hria a, Pharaoa chhûngte pawhin an hre bawk a. 3 Tin, Josefa chuan a unaute hnênah, “Josefa kha ka ni; ka pa chu a la dam maw?” a ti a. Nimahsela, a unaute chuan an chhâng thei lo va, a hmaah chuan mangang takin an awm ta a ni. 4 Tin, Josefa vêkin a unaute hnênah, “Khawngaih takin mi rawn hnaih teh u,” a ti a. Tichuan, an va hnaih a. Tin, ani chuan, “In unaupa Josefa, Aigupta rama luhpui tûra in hralha kha ka ni. 5 Nimahsela, heta kal tûra mi hralh avâng hian lungngai suh ula, mahni inhaw duh hek suh u; mite nunna chhandam tûrin Pathianin in hmaah mi lo tîr hmasa a nih hi. 6 He kum hnih chhûng hian he ramah hian ṭâm a lo tla ta a; kum nga a la bâk a, chumi chhûng zawng lei leh hi a awm lo vang a, buh lâk pawh a awm hek lo vang. 7 Tichuan, leiah hian chithlahte zuahsak tûr che u leh, chhandamna ropui takin nungdama ka awmtîrna tûr che uin Pathianin in hmaah hian mi lo tîr hmasa a ni. 8 Chutichuan, heta mi kaltîrtu hi nangni in ni lo va, Pathian a ni zâwk e; ani chuan Pharaoa paah leh, a chhûngte zawng zawng hotuah leh Aigupta ram zawng zawng rorêltuah mi siam ta a. 9 Rang takin ka pa hnênah han kal ula, a hnênah, ‘I fapa Josefa chuan heti hian a ti a: “Pathianin Aigupta ram zawng zawng hotuah mi siam ta; ka hnênah lo chhuk rawh, rei rawn rial suh. 10 Tichuan, Gosen ramah i awm ang a, ka kiang ngeiah hian i awm dâwn nia, nang leh i fate leh i tute nên, i berâm rualte leh i bâwng rualte leh i neih zawng zawng nên. 11 Chutah chuan keiman ka châwm ang che, ṭâm tûr kum nga a la awm si a; chuti lo chuan, i lo rethei dah ang e, nang leh i chhûngte leh i neih zawng zawngte nên khân,”’ han ti ang che u. 12 Tin, ngai teh u, nangmahni mit ngei leh ka nau Benjamina mit ngeiin keima kâ ngeiin a sawi lai in hmu reng a ni. 13 Tin, Aigupta rama ka ropuina zawng zawng thu leh in thil hmuh zawng zawng thu hi ka pa in hrilh ang a; ka pa chu rang takin hetah in rawn hruai thla tûr a ni,” a ti a. 14 Tin, a ir leh a nau Benjamina ir chuktuahin a ṭap ta a; Benjamina pawh a ir chuktuahin a ṭap ta bawk a. 15 Tin, a unaute zawng zawng chu a fâwp a, a ṭah khum ta ṭheuh va; chumi hnuah chuan a unaute chuan thukhawchâng an sawipui ta a. 16 Tin, “Josefa unaute an lo kal,” tih thuthang chu Pharaoa inah chuan an lo hre ta a; chu chuan Pharaoa leh a chhiahhlawhte chu a tilâwm hle a. 17 Tin, Pharaoa chuan Josefa hnênah, “I unaute hnênah, ‘Heti hian ti rawh u: in sate chu buh phurhtîr ula, chhuak ula, Kanaan ramah kal rawh u. 18 Tin, in pa leh in chhûngte chu hruai ula, ka hnênah hian lo kal rawh u; tichuan, Aigupta rama thil ṭhate hi ka pe ang che u a, he rama thil awm ṭha berte hi in ei dâwn nia,’ ti rawh. 19 Thu ka pe a che, ‘Heti hian ti rawh u: in fanau tê tête tân leh in nupuite tân Aigupta ram aṭang hian tawlailîrte la ula, in pa hruaiin lo kal rawh u. 20 In bungrua pawh ngaihtuah duh suh u, Aigupta ram zawng zawnga thil ṭha apiang hi in ta a ni si a,’ tiin hrilh rawh,” a ti a. 21 Tichuan, Israela fate chuan chutiang chuan an ti a; tin, Josefa chuan Pharaoa thupêk ang chuan tawlailîrte an hnênah a pe a, kalkawng atân ei tûr a pe bawk a. 22 An zaa hnênah silhfên inthlâknate a pe ṭheuh va; Benjamina hnênah phei chuan tangka zathum leh silhfên inthlâkna panga a pe a. 23 Tin, a pa hnênah chuan hetiang hi a thawn a: sabengtung sâwm, Aigupta rama thil ṭha phur leh sabengtungnu sâwm, kalkawnga a pa tân buh leh chhang leh ei tûr phur a thawn a. 24 Chutichuan, a unaute chu a tîr chhuak a, an kal ta a; tin, ani chuan an hnênah, “Kalkawngah inhau lo tûrin fimkhur rawh u,” a ti a. 25 Tin, Aigupta ram ata chu an han chho va, Kanaan rama an pa Jakoba hnên chu an han thleng a. 26 Tin, a hnênah, “Josefa kha a lo la dam a, Aigupta ram zawng zawng rorêltu a ni,” tiin an hrilh a. Tin, a thin a mit sulh a, an thu chu a awih si lo. 27 Tin, an hnêna Josefa thusawi zawng zawng chu an hrilh a; tin, a chuanna tûr tawlailîr, Josefan a thawnte chu a han hmuh chuan, an pa Jakoba thinlung chu a harh ta huai a; 28 tin, Israela chuan, “A tâwk ta e; ka fapa Josefa chu nungdamin a lo la awm a nih tak hi; ka thih hmain amah ka zuk hmu ang,” a ti ta a.
Jakoba te chhûngkua Aigupta ramah an kal
1 Tin, Israela chu a neih zawng zawng nên a chhuak a, Beer-seba chu a thleng a, a pa Isaaka Pathian hnênah chuan inthawinate a hlân a. 2 Tin, Pathianin zâna a mumangahte chuan Israela chu a bia a, “Jakob, Jakob!” a ti a. Tin, ani chuan, “Heta hi ka awm,” a ti a. 3 Tin, ani chuan, “Kei Pathian, i pa Pathian chu ka ni; Aigupta rama zuk kal chu hlau suh, chutah chuan chi ropui takah ka siam dâwn che a ni. 4 Aigupta ramah chuan i hnênah ka zuk kal ve ang a, ka hruai chho leh ngei ngei bawk ang che; tin, Josefa chuan i thih hunah i mit a siamsak dâwn che nia,” a ti a. 5 Tichuan, Jakoba chu Beer-seba aṭang chuan a chhuak a; Israela fapate chuan an pa Jakoba leh an fanau tê tête leh an nupuite chu a chuan nâna Pharaoa tawlailîr thawnahte khân an chuantîr a. 6 Tichuan, Jakoba leh a thlahte zawng zawng chuan Kanaan rama an dehchhuah an rante leh an bungruate chu an chhawm a, Aigupta ram chu an thleng ta a; 7 a fapate, a tupate, a fanute, a tunute, a thlahte zawng zawng chu Aigupta ramah chuan a luhpui ta hlawm a. 8 Tin, hêng hi Israela thlah Aigupta rama lût, Jakoba leh a fapate hming chu a ni: Reubena, Jakoba fa tîr chu. 9 Tin, Reubena fapate chu Hanoka te, Palua te, Hezrona te, Karmia te an ni a. 10 Tin, Simeona fapate chu Jemuela te, Jamina te, Ohada te, Jakina te, Zohara te, Kanaan hmeichhe laka a fapa Saula te an ni a. 11 Tin, Levia fapate chu Gersona te, Kohatha te, Meraria te an ni a. 12 Tin, Juda fapate chu Era te, Onana te, Sela te, Pereza te, Zera te an ni a; Era leh Onana erawh chu Kanaan ramah chuan an thi ta a ni. Pereza fapate chu Hezrona leh Hamula an ni a. 13 Tin, Isakara fapate chu Tola te, Puva te, Ioba te, Simrona te an ni a. 14 Tin, Zebuluna fapate chu Sereda te, Elona te, Jahleela te an ni a. 15 Chûngho zawng zawng chu Leaii fapa, a fanu Dinaii nên, Paddan-aram rama Jakoba a hrinsakate chu an ni a; a fapate leh a fanute zawng zawng chu sawmthum leh pathum an ni a. 16 Tin, Gada fapate chu Ziphiona te, Hagia te, Sunia te, Ezbona te, Eria te, Arodia te, Arelia te an ni a. 17 Tin, Asera fapate chu Imna te, Isva te, Isvia te, Beria te an ni, an farnu Seri nên; tin, Beria fapate chu Hebera leh Malkiela an ni a. 18 Chûngho chu Zilpaii, Labanan a fanu Leaii hnêna a pêka fapate chu an ni, chûngho chu Jakoba a hrinsak a, mi sâwm leh parukte chu. 19 Tin, Jakoba nupui Rakili fapate chu Josefa leh Benjamina an ni a. 20 Tin, Josefa chuan Aigupta ramah fapa Manasea leh Ephraima a nei a, chu mite chu On khaw puithiam Potiphara fanu Asenathi chuan amah a hrinsak a ni. 21 Tin, Benjamina fapate chu Bela te, Bekera te, Asbela te, Gera te, Naamana te, Ehia te, Rosa te, Mupima te, Hupima te, Arda te an ni a. 22 Chûngho chu Rakili fapa, Jakoba a hrinsakte chu an ni; an za chuan sâwm leh pali an ni. 23 Tin, Dana fapa chu Husima a ni a. 24 Tin, Naphtalia fapate chu Jazeela te, Gunia te, Jezera te, Silema te an ni a. 25 Chûngho chu Bilhaii, Labanan a fanu Rakili hnêna a pêka fapate chu an ni, chûngho chu Jakoba a hrinsak a; an za chuan pasarih an ni. 26 Jakoba fapate nupuiho chhiar lovin, Jakoba hnêna Aigupta rama lût ve, a ṭhâlbea chhuak zawng zawngte chu an za chuan sawmruk leh paruk an ni a; 27 tin, Josefan Aigupta rama fapa a neihte chu pahnih an ni. Jakoba chhûngte zawng zawng Aigupta rama lûtte chu sawmsarih an ni.
Aigupta ramah Jakoba leh a chhûngte an awm
28 Tin, Jakoba chuan Gosen ram lam kawng lo kawhhmuh tûrin Juda chu Josefa hnênah a kal hmasaktîr a; tichuan, Gosen ramah chuan an lût ta a. 29 Tin, Josefa chuan a tawlailîr chu a buatsaih a, Gosen ramah chuan a pa Israela hmuak tûrin a han kal ta a; tin, a hnênah a inhriattîr a, a ir a chuktuah a, rei fe a ir chuktuahin a ṭap a. 30 Tin, Israela chuan Josefa hnênah, “Nungdama i lo la awma, i hmêl ka hmuh leh tâk avâng hian tûnah chuan duh leh thi tawh rawh i,” a ti a. 31 Tin, Josefa chuan a unaute leh a pa chhûngte hnênah, “Ka han kal ang a, Pharaoa ka hrilh ang a, a hnênah, ‘Ka unaute leh ka pa chhûngte, Kanaan rama awmte kha, ka hnênah an lo thleng ta; 32 anni chu ran vulhtute an nih avângin berâm vêngtute an ni a; an berâm rualte leh an bâwng rualte leh an neih zawng zawng an rawn chhawm vek a ni,’ tiin ka han sawi ang. 33 Tin, heti hi a ni ang a, Pharaoan a koh che ua, ‘Eng hna nge in thawh ṭhin?’ a tih hunah chuan, 34 nangnin, ‘I chhiahhlawhte hi kan thlahtute chenin, kan naupan têt ata tûn thlengin ran vulhtute kan ni,’ ti ang che u; chutichuan, Gosen ramah in awm thei dâwn nia,” a ti a. Berâm vêngtute rêng rêng chu Aigupta mite ten zâwng tak an ni si a.
Jakoba te chhûng Gosen hmunah an awm
1 Tichuan, Josefa chuan Pharaoa chu a han hrilh a, a hnênah, “Ka pa te, ka unau te, an berâm rual te, an bâwng rual te, an neih zawng zawngte nên Kanaan ram ata an lo thleng thla ta a; tin, ngai teh, Gosen ramah an awm,” a ti a. 2 Tin, a unaute zînga mi, mi panga a hruai a, Pharaoa chu a hriattîr a. 3 Tin, Pharaoa chuan a unaute hnênah, “Eng hna nge in thawh ṭhin?” a ti a. Tin, anni chuan Pharaoa hnênah, “I chhiahhlawhte hi kan thlahtute chenin, berâm vêngtute kan ni,” an ti a. 4 Tin, anni vêk chuan Pharaoa hnênah, “He rama awm rih tûr hian kan lo kal a ni, kan ramah i chhiahhlawhteho berâm rualte tân ei tûr a awm ta si lo; ṭâm hi Kanaan ramah a tla nasa hle si a; chutichuan, khawngaih takin i chhiahhlawhte hi Gosen ramah min awmtîr ang che,” an ti a. 5 Tin, Pharaoa chuan Josefa a bia a, “I pa leh i unaute chu i hnênah an lo kal ta a. 6 Aigupta ram chu a awm duai alâwm; i pa leh i unaute chu ram ṭha lai apiangah hian awmhmun khuartîr ta che; Gosen ramah awmhmun khuar rawh se. Tin, an zîngah mi thiltithei tak hriat i neih phei chuan ka ran chunga hotuahte siam ang che,” a ti a. 7 Tin, Josefa chuan a pa Jakoba chu a hruai lût a, Pharaoa hmaah chuan a dintîr a; tichuan, Jakoba chuan Pharaoa chu mal a sâwm ta a. 8 Tin, Pharaoa chuan Jakoba hnênah, “Kum eng zât nge i nih tawh?” a ti a. 9 Tin, Jakoba chuan Pharaoa hnênah, “Ka khualzin kum chin chu kum za leh kum sawmthum a ni a; ka dam chhûng kumte hi a tlêmin a hrehawm a ni, mi thlahtute an khualzin laia an dam chhûng kum pawh a zât ve hek lo,” a ti a. 10 Tin, Jakoba chuan Pharaoa chu mal a sâwm leh a, Pharaoa hnên ata chu a chhuak ta a. 11 Tichuan, Josefa chuan a pa leh a unaute chu awmhmun a khuartîr a, Pharaoa thupêk angin Aigupta rama ram ṭha ber laiah, Rameses ramah chuan ro atân ram a pe ta a. 12 Tin, Josefa chuan a pa leh a unaute leh a pa chhûngte zawng zawng chu an chhûngkua ang zêlin ei tûr a pe a, a châwm ta a.
Ṭâm a nasa
13 Tin, chumi ram zawng zawngah chuan ei tûr rêng rêng a awm ta lo va; ṭâm a tla nasa êm êm si a; chutichuan, ṭâm avâng chuan Aigupta ram leh Kanaan ram chu a chau ta a. 14 Tin, Josefa chuan an buh leina manah, Aigupta ram leh Kanaan rama tangka awm zawng zawng chu a khâwm ta vek a; tin, Josefa chuan chu tangka chu Pharaoa inah chuan a la ta a. 15 Tin, Aigupta ram leh Kanaan rama tangka zawng zawng an deh ral zawh chuan, Aigupta mi zawng zawng chu Josefa hnênah an lo kal a, “Ei tûr min pe rawh khai; i hmaah hian kan thi mai dâwn em ni ang le? Tangka lah a awm tawh si lo,” an ti a. 16 Tin, Josefa chuan, “In rante rawn pe mai rawh u; tangka a awm tawh loh chuan in ran manah ei tûr ka pe ang che u,” a ti a. 17 Tichuan, an rante chu Josefa hnênah an hruai a; tin, Josefa chuan chûng sakawr manah te, berâm rual manah te, bâwng rual manah te, sabengtung manah te chuan ei tûr a pe zêl a; chumi kum chuan an ran zawng zawng manah ei tûr a pe a, a châwm ta hlawm a. 18 Tin, chumi kum a veia, kum lo thar lehah chuan a hnênah an lo kal leh a, a hnênah, “Kan tangka zawng zawng kan deh ral tawhzia leh, ka pu, kan ran rualte i ta a nih tawhziate hi, ka pu, i lakah hian kan zêp lo vang; ka pu, i mit hmuhah hian kan taksa leh kan ramte chauh lo chu eng mah a awm tawh hauh lo mai. 19 I hmaah hian keini leh kan ram hi kan boral mai dâwn em ni ang le? Keimahni hi kan ram chawpin ei tûrin min lei rawh; tichuan, keini leh kan ram hi Pharaoa chhiahhlawhte kan ni mai ang e; tin, thi lova nungdama kan awm theihna tûr leh, ram hi a ṭiau lohna tûrin buh chi min pe ang che,” an ti a. 20 Tichuan, Josefa chuan Pharaoa tân Aigupta ram zawng zawng chu a lei ta a; ṭâm chu an chunga a thlen nasat êm avângin Aigupta mite chuan an lo chu an hralh ṭheuh si a; tichuan, ram chu Pharaoa ta a ni ta vek a. 21 Mihringte chu Aigupta ramri lehlam tâwp aṭanga a lehlam tâwp thlengin, khuaahte chuan a insawntîr ta hlawm a. 22 Puithiamho ram chauh a lei lo va; puithiamhote chuan Pharaoa lakah chanvo an nei a, Pharaoan an chanvo a pêk chu an ei ṭhîn a ni; chuvângin, an ram chu an hralh ve lo va. 23 Chumi hnuah chuan, Josefan mite hnênah chuan, “Ngai teh u, vawiinah hian nangniho hi in ram chawpin Pharaoa tân ka lei ta che u a; hei, heta hi in tân buh chi a awm hi, leiah chîng ang che u. 24 Tin, buh lâk hunah te chuan heti hi a ni ang a, Pharaoa tân hmun ngaa ṭhena hmun khat zêl in pe ang a, a hmun li chu nangmahni ta a ni ang, chu chu lova chîn lehah te, nangmahni leh in chhûngte eiah te, in fanau tê tête eiah te a ni ang,” a ti a. 25 Tin, anni chuan, “Nangin kan nun hi i chhanhim tawh a; ka puin min khawngaih sela, Pharaoa chhiahhlawhte kan ni mai ang,” an ti a. 26 Tichuan, Josefa chuan Pharaoan hmun ngaa hmun khat a hmuh zêl tûr thu hi, Aigupta ram tân tûn thlengin dânah a siam ta; puithiamho ram chauh chu a ni, Pharaoa ta ni lo chu.
Jakoba thu hnuhnûng
27 Tin, Israel-ho chuan Aigupta rama Gosen ramah chuan awmhmun an khuar ta a; chutah chuan an intimuk a, chi tam tak an thlah a, nasa takin an pung ta a. 28 Tin, Jakoba chu Aigupta ramah chuan kum sâwm leh kum sarih a awm a; chutichuan, Jakoba dam chhûng chu kum za leh kum sawmli leh kum sarih a ni ta a. 29 Tin, Israela thih hun tûr chu a lo hnai ta a; tichuan, a fapa Josefa chu a ko va, a hnênah, “I mit ka tlun chuan khawngaih takin i kut kha ka malpui hnuaiah rawlh la, mi khawngaihin ka chungah tihtakzetin ti ang che; khawngaih takin Aigupta ramah hian mi phûm lul suh ang che; 30 mi thlahtute hnêna ka muthilh hunah chuan nangin Aigupta ram ata hi mi zâwn chhuakin, anmahni phûmna hmunah chuan mi phûm zâwk tûr a ni,” a ti a. Tin, ani chuan, “I sawi ang hian ka rawn ti ang e,” a ti a. 31 Tin, ani chuan, “Ka hnênah chhia chham rawh le,” a ti a; tichuan, a hnênah chhia a chham ta a. Tin, Israela chu khum lu siin a kûn ta a.
Jakoban Ephraima leh Manasea mal a sâwm
1 Tin, chûng hnuah chuan heti hi a ni a, Josefa hnênah, “Ngai teh, i pa a damlo ve,” an ti a. Tichuan, a fapate pahnih Manasea leh Ephraima chu a hnênah a hruai ve a. 2 Tin, Jakoba hnênah “Ngai teh, i fapa Josefa i hnênah a lo kal e,” tiin an hrilh a; tichuan, Israela chu a intiharh a, khumah chuan a ṭhu ta a. 3 Tin, Jakoba chuan Josefa hnênah, “Pathian Engkimtitheia chu Kanaan rama Luz khuaah chuan ka hnênah a inlâr a, mal mi sâwm a, 4 ka hnênah, ‘Chi tam tak ka thlahtîr ang chia, ka tipung bawk ang chia, chi hrang hrang awm khâwmah ka siam ang che; tin, he ram hi i hnua i thlahte hnênah chuan kumkhaw ro atân ka pe ang,’ mi ti a. 5 Tin, i fapate pahnih, Aigupta rama i hnêna ka lo kal hmaa Aigupta rama i neihte hi ka ta an ni; Ephraima leh Manasea hi, Reubena leh Simeona ang bawkin ka ta an ni ang. 6 Tin, he mite hnua fa i neihte chu i ta an ni ang, an ro chanah chuan an ute hming chu an ṭâwm mai ang. 7 Tin, keia thu zawng, Paddan-aram aṭanga ka lo kal lai khân Rakili chu Kanaan ramah, kawnglakah, Ephrath khua chu a la hlat fe laiin ka bulah a thi a; chuta Ephrath khaw kawngah chuan ka phûm ta a (chu chu Bethlehem khua a ni),” a ti a. 8 Tin, Israela chuan Josefa fapate chu a en a, “Heng hi tute nge ni?” a ti a. 9 Tin, Josefa chuan a pa hnênah, “Hêng hi ka fapa, Pathianin heta mi pêkate chu an ni,” a ti a. Tin, ani chuan, “Khawngaih takin ka hnênah hian han hruai hnai rawh; tichuan, anmahni mal ka lo sâwm ang e,” a ti a. 10 Israela mit chu a upat avângin a fiah lo va, a hmu thei lo a ni. Tin, anni chu a han hruai hnai a; tin, ani chuan a lo fâwp a, a lo pawm a. 11 Tin, Israela chuan Josefa hnênah, “I hmêl hmuh hi ka beisei tawh lo va; nimahsela, ngai teh, Pathianin i thlahte hmêl lam pawh mi hmuhtîr ta a nih hi,” a ti a. 12 Tin, Josefa chuan anni chu a pa kapkâr ata chu a kai chhuak a, a hmaia lei siin chibai a bûk a. 13 Tin, Josefa chuan an pahnih chuan a kai a, Ephraima chu a kut ding lamin Israela kut vei lampangah a kai a, Manasea chu a kut vei lamin Israela kut ding lampangah a kai a, a rawn hruai hnai a. 14 Tin, Israela chuan a ban kawkalh lui a, a kut ding lam chuan a ban a, Ephraima, a naupang zâwk chhîpah a nghat a; Manasea chu fa tîr a ni si a. 15 Tin, Josefa chu mal a sâwm a, “Mi thlahtu Abrahama leh Isaaka, a hmaa an awm ṭhinna Pathian, vawiin thlenga ka dam chhûng zawng zawnga mi châwmtu Pathian, 16 sual zawng zawng laka mi tlantu vântirhkoh chuan naupangte hi malsâwm rawh se; tin, ka hming leh mi thlahtu Abrahama leh Isaaka hming chu anmahni hmingah pu rawh se; tin, khawvêl lailiah mipui tam tak ni tûrin lo pung rawh se,” a ti a. 17 Tin, Josefa chu, a pain a kut ding lam Ephraima chhîpa a nghat chu a hmuhin a lungni ta lo va; tichuan, a pa kut chu Ephraima chhîp ata Manasea chhîpa sawn tûrin a chawi kâng a. 18 Tin, Josefa chuan a pa hnênah, “Ka pa, hetiang tûr a ni lo, hei hi asin fa tîr chu ni; i kut ding lam hi a chhîpah nghat zâwk rawh,” a ti a. 19 Nimahsela, a pa chuan a duh lo va, “Ka hria e, ka fapa, ka hria e; ani pawh hnama sawi thamin a awm bawk ang a, ani pawh a ropui bawk ang; amaherawhchu, a nau hi a aiin a ropui zâwk ang a, a thlahte pawh chi hrang hrang tam tak an lo la ni ang,” a ti a. 20 Tichuan, Jakoban, “Israel-ho chuan, ‘Ephraima leh Manasea angin Pathianin awmtîr che rawh se,’ tiin mangmahni hming lamin mal an sâwm ṭhin ang,” tiin, chumi ni chuan anni chu mal a sâwm a; tichuan, Ephraima chu Manasea hmaah a awmtîr ta a. 21 Tin, Israela vêk chuan Josefa hnênah, “Ngai teh, ka thi dâwn ta e; nimahsela, Pathian chu in hnênah a awm ang a, in thlahtute ramah chuan a hruai leh ang che u. 22 Chumi lo pawh chu, i unaute chanvo aiin chan khatin ka pe chuang a che, ka khandaih leh ka thalngula Amor-ho kut ata ka lâksaka kha,” a ti a.
Jakoba thurochhiah
1 Tichuan, Jakoba chuan a fapate chu a ko va, heti hian a sawi a: “Ni hnuhnûngahte in chunga thil la thleng tûr chu ka hrilh theihna tûr che uin rawn inkhâwm rawh u. 2 Nangni Jakoba fapate u, rawn inkhâwm ula, ngaithla rawh u; In pa Israela thu hi ngaithla rawh u. 3 Reuben, nang hi ka fa tîr, ka thiltihtheihna, ka chakna rah hmasa ber i ni; Sân berna leh thuneih berna chu i ta a ni. 4 Nimahsela, tui anga nghet lo i ni, chungnun berna chu i nei lo vang; I pa khumpui i kai avângin; Chumi lai chuan chu chu i tibawlhhlawh a, ka mutnaa a kai kha. 5 Simeona leh Levia hi unau an ni a; An khandaihte chu thisen chhuahna hriamhrei a ni. 6 Aw, ka thlarau, nang zawng an inrâwnnaah chuan inrawlh ve suh; Ka ropuina, nang zawng an inkhâwmnaah chuan tel ve suh; An thinurin mi an that a, An tihmawhin bâwngpa tha an chhat a. 7 An thinurna chuan ânchhia dawng rawh se, kawlh tak a ni si a; An thinrimna pawh chuan ânchhia dawng rawh se, nun chhe tak a ni si a! Jakob-hovah chuan anni chu ka tiṭhen ang a, Israel-hovah chuan ka tidarh bawk ang. 8 Juda, nang zawng i unauten an fak ang che; I kut chu i dote nghâwngah i nghat ang a; I pa fapate chu i hmaah an kûn ang. 9 Juda hi sakeibakneino a ni; Ka fapa, i sa seh chu i chhohsan ta a. A kûn a, sakeibakneipa angin a bawk a, Sakeibakneinu ang bawk siin; tuin nge titho ngam ang? 10 Lal tiang chu Juda lakah a bo lo vang a, Rorêltu tiang chu a ke kâr ata a bo hek lo vang, Silova lo kal hma loh chuan; Hnam tinin ama thu an awih ang. 11 A sakawrno chu grêp hruiah a thlung a, A sabengtungno chu grêp hrui ṭha miah a thlung bawk a. A silhfênte chu uainah a su a, A puan chu grêp thisenah a su bawk a. 12 A mitte chu uain aiin a duk ang a, A hate chu hnutetui aia tihvârin a awm bawk ang. 13 Zebuluna hian tuifinriat kamah awmhmun a khuar ang: Lawng chawlhna vaukam a ni ang a, A ramri chu Zidon-ah a ni ang. 14 Isakara hi sabengtung chak tak, berâm huang kâra bawk a ni; 15 Chawlh chu ṭhain a hria a, Ram chu nuamin a hre bawk a; Tichuan, englo pu tûrin a koki chu a tihniam a, Hnathawka rawih luihin chhiahhlawhah a lo awm ta a. 16 Dana hian a mite chu, Israel hnam zînga hnam pakhat ni vein, ro a rêlsak ang. 17 Dana hi lamliana rûl, Kalkawnga rûlrial, A chunga chuang zangthala tla dêr khawpa Sakawr kea chu ṭhîntu hi a ni ang. 18 Aw LALPA, i chhandamna chu ka nghâk reng e. 19 Gada hi râlin an bei ang a; Nimahsela, ani chuan an keartui lamah a bei zâwk ang, 20 Asera hi a ei a ṭha ang a, Lal ei mi tui tak takte a tichhuak ang. 21 Naphtalia hi zukpui chhuah a ni; Thu ṭha takte a sawi ṭhîn. 22 Josefa hi pêng rah duh tak a ni, Tuikhur kianga pêng rah duh tak chu; A pêng lehchhâwngte chuan lung bang a zâm khuh a. 23 Thal kâpho chuan ani chu nasa takin an tirethei a, An kâp a, an tiduhdah a. 24 Nimahsela, ani thalngul chu khauh takin a awm reng a, A kut thate chu Jakoba Mi Chaka kuta - (Chuta ṭang chuan Berâm Vêngtu, Israela Lungpui chu a lo awm a), 25 I pa Pathian, nangmah ṭanpui tûra Engkimtitheia, Chung lam vân malsâwmnate, Hnuai lama bawk reng tui thûk tak malsâwmnate, Hnutê leh chhûl malsâwmnatea Nangmah malsâwmtu tûr ngeia Tihchakin a awm a. 26 I pa malsâwmnate hian, Mi thlahtute malsâwmnate chu Chatuan tlâng tâwp rêt thlengin a khûm ta zâwk a ni. Chûngte chu Josefa lu-ah a awm ang a, A unaute hnên ata tihhrana awma chhîpah chuan a awm ang. 27 Benjamina hi chinghne koham a ni; Zîngah chuan a sa seh chu a ei ang a, Tlai lamah chuan a râllâk chu a sem ang,” a ti a. 28 Chûng zawng zawng chu Israel hnam sâwm leh hnam hnihte chu an ni a, chu thu pawh chu anmahni malsâwma an hnêna an pa thusawi chu a ni; an malsâwm dawn tûr tâwk ang zêlin mal a sâwm ṭheuh va.
Jakoba a thi a, an phûm
29-30 Tin, anni chu thuro a chhiah a, an hnênah, “Ka chipuite hnênah hruaiin ka awm ve dâwn ta a; Hit mi Ephrona lova pûk, Kanaan rama Mamre zâwna Makpela lova pûk, Abrahaman phûmna hmun ro atân, Hit mi Ephrona laka a lo chawpa a leiah khân mi thlahtute hnênah mi phûm ve ang che u: 31 chutah chuan Abrahama leh a nupui Sari chu an phûm a; chutah chuan Isaaka leh a nupui Rebeki chu an phûm a; chutah bawk chuan Leaii ka phûm a. 32 Lo leh a chhûnga pûk awm chu Hetha thlahte laka lei a ni,” a ti a. 33 Tin, Jakoba chuan a fapate hnêna thuro a chhiah zawh chuan, a kete chu khumah a hlâng kai a, a thlarau a thlah a, a chipuite hnênah chuan hruaiin a awm ve ta a.
1 Tin, Josefa chuan a pa hmai a si a, a ṭah a, a fâwp a fâwp a. 2 Tin, Josefa chuan a chhiahhlawh damdawi thiamhote chu a pa ruang ṭawih thei lova siam tûrin thu a pe a; tichuan, damdawi thiamhote chuan Israela ruang chu ṭawih thei lovin an siam ta a. 3 A ruang siam chhûng chuan ni sawmli a awh a, ṭawih thei lova siamna chuan ni chuti zât chu a awh ṭhîn rêng a ni; tin, ni sawmsarih chhûng zawng Aigupta-ho chuan amah chu an ṭah a. 4 Tin, amah an ṭah nite chu a ral hnu chuan Josefan Pharaoa chhûngte chu a bia a, “I mit ka tlun chuan, khawngaih takin Pharaoa beng hriatah chuan, 5 ‘Ka pan, “Ngai teh, ka thi dâwn ta e; Kanaan rama thlân ka laih saah, chutah ngei chuan mi rawn phûm ang che,” tiin chhia mi chhamtîr a. Chutichuan, khawngaih takin ka pa hi mi han phûmtîr ang che; tin, ka lo kal leh mai ang, a ti e,’ tiin sawi rawh u,” a ti a. 6 Tichuan, Pharaoa chuan, “Chhia a chhamtîr che ang chuan i pa chu han phûm ta che,” a ti a. 7 Tichuan, Josefa chu a pa phûm tûrin a han kal ta a; tin, Pharaoa chhiahhlawh zawng zawng, a chhûngte zînga upate leh Aigupta ram upa zawng zawng leh, 8 Josefa chhûngte zawng zawng leh a unaute leh a pa chhûngte chu a hnênah an han kal ve a. An fanau tê tête leh, an berâm rualte leh an bâwng rualte chauh chu Gosen ramah chuan an hnutchhiah a. 9 Tin, an hnênah tawlailîrte, sakawr chung chuang mite an han kal ve a; tichuan, pâwl lian tak mai an ni. 10 Tin, Jordan lui râla Atada hruihzâwl chu an thleng a, chutah chuan nasa takin an ṭah chiam a: ni sarih a pa sûnna a siam a. 11 Tin, chumi rama mi Kanaan-hote chuan Atada hruihzâwla an mitthi sûn chu an hmuh chuan, “Hei, Aigupta-ho mitthi sûnna nasa tak a nih hi,” an ti a; chuvângin, chumi hmun hmingah chuan Abel-mizraim an vuah ta a, chu chu Jordan lui râla awm a ni. 12 Tin, a fapate chuan a thupêk ang zêlin an tihsak a. 13 A fapate chuan Kanaan ramah an zâwn lût a, Abrahaman phûmna hmun ro atân, Hit mi Ephrona laka a lo chawpa a lei, Mamre zâwna Makpela lova pûkah chuan an phûm ta a ni. 14 Tin, Josefa chu a pa a phûm zawh chuan, amah leh a unaute leh a pa phûm tûra a hnêna han kal vete zawng zawng nên chuan, Aigupta ramah an haw leh ta a.
Josefan a unaute a ṭawng thlamuan
15 Tin, Josefa unaute chuan an pa thi chu an ngaihtuahin, “Josefan min hua ang a, a chunga thil kan tihsual zawng zawng phuba kha kan chungah hian a la la kim seuh mai ang e aw,” an ti a. 16 Tichuan, Josefa hrilh tûrin thu an chah a, “I pa chuan a thih hma khân, 17 ‘Heti hian Josefa hnênah, “Khawngaih takin i unaute bawhchhiatna leh an sualna chu ngaidam ang che, i chungah thil zawng an tisual na a,” tiin in sawi tûr a ni,’ a ti a, thu min pe a; tichuan, khawngaih takin i pa Pathian chhiahhlawhte bawhchhiatna chu ngaidam ang che,” an ti a. Tin, a hnêna an han sawi chuan Josefa chu a ṭap ta a. 18 Tin, a unaute pawh chu an va kal ve a, a hmaah chuan an bawkkhup ta hlawm a; tin, “Ngai teh, i chhiahhlawhte kan nih hi,” an ti a. 19 Tin, Josefa chuan an hnênah, “Hlau suh u; Pathian aiawh em ka nih? 20 Nangni zawngin ka chungah thil sual tih in rilrûk a; nimahsela, Pathian chuan vawiin ang hian mi tam tak nungdama chhanhimna tûra thil ṭhaa chantîr a rilrûk zâwk a lo ni si a. 21 Chutichuan, hlau suh u; nangmahni leh in fanau tê tête nên ka châwm zêl ang che u,” a ti a. Chutichuan, a thlamuan a, ṭawngkam ṭha takin a be hlawm a.
Josefa thih thu
22 Tin, Josefa chu amah leh a pa chhûngte nên, Aigupta ramah chuan an awm a; Josefa chu kum za leh kum sâwm a dam a. 23 Josefa chuan Ephraima fa, a tute khûp thum a hmu a. Manasea fapa Makira fate pawh Josefa mal chungah an piang a. 24 Tin, Josefan a unaute hnênah, “Ka thi dâwn ta e; nimahsela, Pathianin a rawn kan ngei ngei ang che u a, he ram ata hi a rawn hruai chhuakin, Abrahama te, Isaaka te, Jakoba te hnênah chhechhama pêk a tiam ramah a hruai chho vang che u,” a ti a. 25 Tin, Josefa chuan Israela thlahte chu chhia a chhamtîr a, “Pathianin a rawn kan ngei ngei ang che u a, ka ruhte hi heta ta in zâwn chho tûr a ni,” a ti a. 26 Chutichuan, Josefa chu kum za leh kum sâwm mi a nihin a thi a; tin, a ruang chu ṭawih thei lovin an siam a, Aigupta ramah kuangah an dah ta a.
Aigupta miten Israel mite an tiduhdah
1 Hêng hi Israela fapa Aigupta rama lûtte hming chu a ni; mi tin mahni chhûngte ṭheuh nên Jakoba hnênah chuan an kal a: 2 Reubena te, Simeona te, Levia leh Juda te; 3 Isakara te, Jebuluna leh Benjamina te; 4 Dana te, Naphtalia te, Gada leh Asera te. 5 Tin, Jakoba ṭhâlbea chhuak zawng zawngte chu mi sawmsarih an ni; Josefa zawng Aigupta ramah chuan lo awm tawh sa rêng a ni a. 6 Tin, Josefa leh a unaute zawng zawng leh chûng chhuanho zawng zawngte chu an thi ta vek a. 7 Tin, Israela thlahte chuan chi tam tak an thlah a, nasa takin an lo pung a, an lo tam ta êm êm mai a, an lo chak ta telh telh a; tin, chu ramah chuan an lo khat ta mup mai a. 8 Tin, Aigupta ramah chuan Josefa hre lo, lal thar a lo awm ta a. 9 Tichuan, a mite hnênah, “Ngai teh u, Israela thlahte hi kan aiin an tamin an chak tâk zâwk hi le; 10 hawh u, anmahni hi tihhnathiamin i ti ang u; chuti lo chuan, an lo pung zêl ang a, nakinah indonate a lo awm hian, kan hmêlmate lamah an pakai ve hlauh ang a, min bei ang a, he ram aṭang hian an tlân chhuak hlauh dah ang e,” a ti a. 11 Chutichuan, an phurrita tirethei tûrin an chungah hnathawk vêngtute an ruat ta a. Tichuan, Pharaoa tân bungraw dah khâwmna tûr Pithom leh Rameses khuate an siam a. 12 Nimahsela, anmahni chu an tihretheih nasat poh leh an pung nasa deuh deuh va, an darh zau ta deuh deuh va. Tin, Israela thlahte avâng chuan Aigupta-ho chu an lungngai ta a. 13 Tin, Aigupta mite chuan Israela thlahte chu rim takin an thawhtîr a. 14 Hnathawh hautak tak, lung chârna leh leirawhchante siamtîr leh lovah hna tinrêngte hrehawm taka thawhtîrin an chhawr vak vak a; an thawhna zawng zawngah chuan rim takin an chhawr zêl a. 15 Tin, Aigupta lal chuan Hebrai nau chhar mite chu a bia a, chu mite chu pakhata hming Siphraii a ni a; tin, pakhata hming chu Puaii a ni a: 16 an hnênah chuan, “Hebrai hmeichhiate nau hrinna hmuna nau in chhar hunin, mipa fa a nih chuan tihlum zêl ang che u; hmeichhia a nih erawh chuan zuah tûr a ni,” a ti a. 17 Nimahsela, nau chhar mite chuan Pathian an ṭih a; tichuan, Aigupta lal thupêk ang chuan an ti duh lo va, mipa fate chu an humhim ta zêl zâwk a. 18 Tin, Aigupta lal chuan nau chhar mite chu a kohtîr a, an hnênah chuan, “Engati nge hetianga thil in tiha, mipa fate chu in humhim zêl le?” a ti a. 19 Tin, nau chhar mite chuan Pharaoa hnênah, “Hebrai hmeichhiate hi Aigupta hmeichhiate ang an nih ve loh vâng a ni; anniho hi zawngin an sam êm bik a; tichuan, nau chhartu lo thlen hma hian an lo hring tawh ṭhîn a ni,” an ti a. 20 Chutichuan, Pathianin nau chhar mite chu a tiṭha ta hle a; tichuan, mite chu an lo tam ta hle a, an lo chak ta telh telh a. 21 Tin, heti hi a ni a, nau chhar miten Pathian an ṭih avângin chhûngkua neiin a siam ta a. 22 Tin, Pharaoan, “Mipa lo piang apiang chu luiah in paih ang a; tin, hmeichhia apiang chu in humhim zêl tûr a ni,” tiin, a mite zawng zawng chu thu a pe a.
Mosia pian thu
1 Tin, mi pakhat, Levia chhûngte zînga mi a va chhuak a, Levia fanu nupuiah a va nei a. 2 Tin, hmeichhia chu a rai a, fapa a hring a; tin, ani chuan nautê chu hmêlṭha a ti êm a, thla thum a thukru a. 3 Tin, a lo thukru reng thei ta lo va, a tân luang lawng a la a, chu chu chirh leh alkatrain a châr a, nautê chu chutah chuan a muttîr a; tichuan, lui kama phairuang zîngah chuan a dah ta a. 4 Tin, a chungah eng tak la thleng ang maw tia hriat tumin a farnu chu hla feah a ding a. 5 Tin, Pharaoa fanu chu luia inbual tûrin a zu kal a; tin, a bawihnute chu lui kamah chuan an kal ve a; tin, phairuang zînga bâwm a han hmuh chuan a bawihnu a va lâktîr a. 6 Tin, a han hawn chuan nautê chu a hmu ta a; tin, ngai teh, nausên chu a ṭap ta a. Tin, a khawngaih ta êm êm a, “Hei Hebrai fa a nih hi le,” a ti a. 7 Tichuan, a farnu chuan Pharaoa fanu hnênah chuan, “He naute awmsaktu tûr che Hebrai hmeichhia nau awmtu ka kohsak ang che chu?” a ti a. 8 Tin, Pharaoa fanu chuan a hnênah, “Kal rawh,” a ti a. Tin, nula chu a kal a, chu nausên nu chu a va ko ta a. 9 Tin, Pharaoa fanu chuan a hnênah, “He nautê hi kalpui ta la, mi awmsak ang che; tichuan, i hlawh ka pe ang che,” a ti a. Chutichuan, hmeichhia chuan nautê chu a la a, a pawm ta a. 10 Tin, nautê chu a lo ṭhang lian a, Pharaoa fanu hnênah a hruai a; tichuan, a fapaah a awm ta a. Tin, “Tui ata ka lâk chhuah avângin,” a ti a, a hmingah chuan Mosia a sa a.
Midian ramah Mosia a tlânchhia
11 Tin, heti hi a ni a, chûng laia Mosia a lo puitlin chuan, a unaute a va kan a, an phurritte chu a va hmu a. Tin, Aigupta mi pakhat hian a unau pakhat Hebrai mi hi a vaw lai a han hmu a. 12 Tin, Mosia chu a hawi vêl ruai a; tin, tu mah an awm lo tih a hriat veleh Aigupta mi chu a vaw hlum a, leiah a phûm ta a. 13 Tin, a tûkah a va chhuak leh a, ngai teh, Hebrai mi pahnih an lo insual a; tin, a thiam lo zâwka hnênah chuan, “Engati nge i ṭhian i vuak le?” a ti a. 14 Tin, ani chuan, “Kan chungah hotuah leh rorêltuah tuin nge siam che? Aigupta mi i tihhlum ang khân mi tihhlum i tum elo?” a ti a. Tin, Mosia chuan a hlau ta a, “An hre ta ngei zuk nia le,” a ti a. 15 Tichuan, Pharaoan chu chu a lo hriat veleh Mosia chu thah a tum ta a. Nimahsela, Mosia chu Pharaoa hnên ata a tlân bo va, Midian ramah a awm ta a; tin, tuichhunchhuah sîrah hian a ṭhu a. 16 Tin, Midian rama puithiam chuan fanu pasarih a nei a. Tin, anni chuan tui an rawn chawi a, an pa berâm rual in tûrin tui inna thlêngte chu an tikhat a. 17 Tin, berâm vêngtute an lo kal a, an rawn hnawt darh a; nimahsela, Mosia chu a tho va, anmahni chu a rawn ṭanpui a, an berâm rual chu tui a intîr ta a. 18 Tin, an pa Reuela hnên an va thlenin ani chuan, “Engtizia nge vawiin chu in va lo haw hma ve le?” a ti a. 19 Tin, anni chuan, “Aigupta mi pakhatin berâm vêngtute lak ata min chhanhim a ni; tin, chu chang ni lovin, tui te min thâlsak a, berâm rual chu tui a intîr a ni,” an ti a. 20 Tin, ani chuan a fanute hnênah chuan, “Chu, khawiah nge a awm le? Engtizia nge in rawn hâwnsan mai ni le? Va ko ta che u, chaw te rawn ei ang hmiang,” a ti a. 21 Tin, Mosia chuan chu mi hnêna awm chu rem a ti a; tin, a fanu Zipori chu Mosia a pe a. 22 Tin, Zipori chuan fapa a hring a; tin, Mosian a hmingah Gersoma a sa a; “Mi rama pêm ka nih avângin,” a ti a ni. 23 Tin, heti hi a ni a, ni rei fe chinah chuan Aigupta lal chu a thi ta a. Tin, Israela thlahte chu an hnathawh hautak avâng chuan an rûm a; tin, an au va; tichuan, an hnathawh hautak avânga an au thâwm chuan Pathian hnên a han thleng ta a. 24 Tin, Pathianin an rûm chu a hria a; tin, Pathianin Abrahama te, Isaaka te leh Jakoba te hnêna a thuthlun kha a hre reng a. 25 Tin, Pathian chuan Israela thlahte chu a thlîr reng a; tichuan, Pathian chuan anmahni chu a zuk ngaihsak reng bawk a.
Pathianin Mosia a ko
1 Tin, Mosia chuan a pu Jethroa, Midian ram puithiam berâm rual a vêng a; tin, berâm rual chu thlalêr thlang lampangah chuan a khalh a; tin, Pathian tlâng, Horeb chu a va thleng a, 2 Tin, hnim bukah LALPA vântirhkoh hi meialhin a hnênah a rawn inlâr a. Tin, a han en a, ngai teh, hnim buk chu meiin a kâng a, a hnim buka erawh chu a kâng ral si lo. 3 Tin, Mosia chuan, “Ka va pêng teh rêng ang, engtizia nge ni hnim buk saw a kan ral loh, he thil mak tak hi ka va en teh ang e,” a ti a. 4 Tin, LALPA chuan en tûra a va pêng chu a hmuhin, Pathianin hnim buk aṭang chuan a han ko va, “Mosi, Mosi,” a han ti a. Tin, ani chuan, “Heta hi ka awm,” a ti a. 5 Tin, Pathian chuan, “Rawn hnaih suh khai. I kephah ata i pheikhawkte kha phelh rawh, i dinna hmun kha lei thianghlim a ni e,” a ti a. 6 Tin, “Kei hi i pa Pathian, Abrahama Pathian, Isaaka Pathian, Jakoba Pathian chu ka nih hi,” a ti leh a. Tin, Mosia chuan a hmai a khuh ta a; Pathian a en ngam si lo va. 7 Tin, LALPA chuan, “Aigupta rama ka mi awmte chu an hrehawmzia ka hmu reng asin, anmahni vêngtute avânga an au thâwmte chu ka lo hria a, an lungngaihnate chu ka hre reng si a. 8 Tichuan, Aigupta-ho lak ata chhanhim tûr leh chumi ram ata chu hruai chhuaka, Kanaan-hote, Hit-hote, Amor-hote, Periz-hote, Hiv-hote, Jebus-hote awmna ram ṭha tak leh zau tak, hnutetui leh khawizu luanna rama hruai lût tûrin ka lo chhuak ta a ni. 9 Tin, ngai teh, Israela thlahte au thâwm chu ka hnên a lo thleng e; chu chang a ni lo va, Aigupta-hovin anmahni an hnehchhiahziate chu ka hmu reng a ni. 10 Chuvângin, hawh teh, ka mi Israela thlahte chu Aigupta ram ata hruai chhuak tûrin Pharaoa hnênah ka tîr ang che,” a ti a. 11 Tin, Mosia chuan Pathian hnênah, “Kei Pharaoa hnêna kala, Israela thlahte Aigupta ram ata zuk hruai chhuaktu atân chuan tu nge maw ka nih le?” a ti a. 12 Tin, ani chuan, “I hnênah ka awm dâwn alâwm; tichuan, keima tirh ngei i ni tih hei hi i tân chhinchhiahna a ni ang: Aigupta ram ata mite chu i rawn hruai chhuah hunah chuan, he tlâng ngeiah hian Pathian rawng in la bâwl ang,” a ti a. 13 Tin, Mosian Pathian hnênah, “Ngai teh, Israela thlahte hnênah chuan zuk kalin an hnênah, ‘In thlahtute Pathianin in hnênah hian mi rawn tîr a ni e,’ zuk ti ila; tin, anni chuan ka hnênah, ‘Tu nge ni a hming chu?’ lo ti ang sela, an hnênah chuan engtin nge ka sawi ang?” a ti a. 14 Tin, Pathianin Mosia hnênah chuan, “Nangin Israela thlahte hnênah chuan, ‘AWMA chuan in hnênah mi rawn tîr a ni e,’ i ti tûr a ni,” a ti a. 15 Tin, Pathian vêkin Mosia hnênah chuan, “Nangin Israela thlahte hnênah chuan, ‘LALPA, in thlahtute Pathian, Abrahama Pathian, Isaaka Pathian leh Jakoba Pathian chuan in hnênah hian mi rawn tîr a ni e. Hei hi kumkhuaa ka hming chu a ni a; tin, hei hi chhuan zawng zawng thlenga mi hriat rengna chu a ni,’ ti ang che. 16 Kal langin, Israel upaho ko khâwm ang che; tichuan, an hnênah, ‘LALPA, in thlahtute Pathian, Abrahama Pathian, Isaaka Pathian leh Jakoba Pathian chuan ka rawn kan ta ngei che u a, Aigupta rama in chunga an tih zia te hi ka hmu ta ngei mai; 17 Aigupta rama tihhrehawmna lak ata chu ka hruai chhuak ang che u a, Kanaan-hote, Hit-hote, Amor-hote, Periz-hote, Hiv-hote, Jesus-hote ram, hnutetui leh khawizu luanna ramah chuan ka hruai lût ang che u ka tih tawh kha, tiin ka hnênah a rawn inlâr ta a ni,’ ti ang che. 18 Chutichuan, i thu an lo ngaithla ang; tin, nang leh Israel upaho chu Aigupta lal hnênah in kal ang a; tin, a hnênah, ‘LALPA, Hebraite Pathianin min rawn tlawh ta mai a; chuvângin, thlalêr ni thum kalah LALPA kan Pathian hnêna kan va inthawi theihna tûrin khawngaih takin min kaltîr ang che,’ ti ang che u. 19 Tin, Aigupta lal zawngin kut chak tak ngawt lo chuan a chhuahtîr hlei lo vang che u tih ka hria e. 20 Tin, ka kut ka phar ang a; tin, Aigupta-ho chu an zînga thil mak tak ka la tih tûr zawng zawngte chuan ka la hrem ang a; tin, chumi hnuah zawng a chhuahtîr tawh ang che u. 21 Tin, hêng mite hi Aigupta-ho ka khawngaihtîr ang a; tin, heti hi a ni ang a, in kal hunah chuan ruakin in kal lo vang a, 22 hmeichhe tinin an vêngte leh an ina chêngte chu tangkaraw incheinate leh, rangkachak incheinate leh, silhfênte an la dîl zâwk ang a; tichuan, in fapate leh in fanute chu in la bel ang; tin, Aigupta mite chu in rawk a ni ang,” a ti a.
Pathianin Mosia thil mak tih theihna a pe
1 Tin, Mosia chuan, “Ngai teh, mi ring duhin ka thu an pawm lo vang; ‘LALPA chu i hnênah a inlâr ngût lo vang e,’ an ti mai âwm si a,” tiin a chhâng a. 2 Tin, LALPA chuan a hnênah, “I kuta mi kha eng nge ni?” a ti a. Ani chuan, “Tiang,” a ti a. 3 Tin, ani chuan, “Leiah khân han paih teh,” a ti a. Tin, leiah chuan a han paih a, rûlah a lo chang ta a; tin, Mosia chuan a tlânsan ta a. 4 Tin, LALPA chuan Mosia hnênah, “I kut khân han ban la, a meiah han la teh (Tin, a kut chuan a han ban a, a han la a, a kutah chuan tiangah a lo chang leh ta a), 5 LALPA, an thlahtute Pathian, Abrahama Pathian, Isaaka Pathian leh Jakoba Pathian chu i hnênah a rawn inlâr ngei a ni tih an rin theihna tûrin,” a ti a. 6 Tin, LALPA chuan a hnênah, “I kut khân i âwm zuk zen teh,” a ti leh a. Tin, a âwm chu a zuk zen a; tin, a han phawrh chhuah leh chuan, ngai teh, a kut chu vûr anga vârin a lo phâr ta a. 7 Tin, ani chuan, “I kut khân i âwm zuk zen leh teh (Tin, a âwm chu a zuk zen leh a; a âwm ata a han phawrh chhuah chuan, ngai teh, a tisa dang ang bawk chuan a lo awm leh ta a). 8 Tin, heti hi a ni ang a, an rin duh loh chea, chhinchhiahna hmasa zâwk chu an pawm duh loh chuan, chhinchhiahna hnuhnûng zâwk tal chu an ring ang. 9 Tin, heti hi a ni ang a, chûng chhinchhiahna pahnih ngei pawh an rin lohva, i thusawi pawh chu an pawm loh chhuan, lui tui i zuk thâl ang a, lei chârah i bun ang a; tin, lui ata tui i zuk thâl chu lei chârah chuan thisenah a lo chang dâwn nia,” a ti a. 10 Tin, Mosia chuan LALPA hnênah, “Aw LALPA, kei zawng tûn hma lamahte leh i chhiahhlawh hnêna thu i rawn sawi hnuah pawh hian, mi ṭawnghmang thiam ka ni ve ngai lo a ni; mi ṭawng ban leh mi ṭawng mawh ka ni si a,” a ti a. 11 Tin, LALPA chuan a hnênah, “Mihring kâ hi tu siam nge ni a, ṭawngtheilo te, bengngawng te, mitvâr te, mitdel te pawh hi tu tih nge ni? Kei LALPA hian a ni lo vem ni? 12 Chuvângin, kal mai rawh, i kâ chu keiman ka awmpui zêl ang a, i sawi tûr chu ka hrilh zêl ang che,” a ti a. 13 “Ni lo ve, LALPA, mi dang tîr zâwk ta mai che,” a ti a. 14 Tichuan, LALPA chu Mosia chungah a thinur ta a, a hnênah, “I unaupa Arona, Levia chi chu a awm lâwm ni? Ani zawngin ṭawnghmang a thiam tih ka hria a ni. Ngai teh, nangmah hmuak tûrin a lo kal nghe nghe asin. Tin, a hmuh che zawngin a thinlung chu a lâwm hle mai ang. 15 Chutichuan, nangin amah chu bia langin, thute chu fah vek ang che; tichuan, i kâ leh a kâ chu keiman ka awmpui zêl ang a, in tih tûr chu ka hrilh zêl ang che u. 16 Tin, ani chu mipui hnêna i thu sawi chhâwngtu a ni ang; tin, heti hi a ni ang a, i tân kâ a ni ang a, nang chu a tân Pathian ang i ni ang. 17 Tin, nangin he tiang hi i keng ang a, chu chuan thil makte chu i ti ang,” a ti a.
Aigupta ramah Mosia a kîr leh
18 Tin, Mosia chu a kal a, a pu Jethroa hnênah a kîr leh ta a; tin, a hnênah, “Aigupta rama ka unau awmte chu an la dam emaw, an hnênah khawngaih takin ka va hâwng rih ang e,” a ti a. Tin, Jethroa chuan Mosia hnênah, “Thlamuang takin kal ta che le,” a ti a. 19 Tin, LALPA chuan Midian ramah Mosia hnênah chuan, “Kal la, Aigupta ramah chuan va kîr leh tawh rawh le; nangmah tihhlum tumtute kha an thi vek tawh e,” a ti a. 20 Tin, Mosia chuan a nupui leh a fapate chu a hruai a, sabengtung chungah a chuantîr a; tin, Aigupta ramah chuan a kîr leh ta a. Tin, Mosian Pathian tiang chu a keng a. 21 Tin, LALPA chuan Mosia hnênah, “Aigupta ram i thlen hun chuan, i kuta thil mak zawng zawng ka kentîr che hi Pharaoa hmaah chuan ti ngei ngei ang che; nimahsela, a thinlung ka tikhauh vang a; tichuan, mite chu a chhuahtîr phal lo vang. 22 Tin, nangin Pharaoa hnênah chuan, ‘LALPAN, “Israela hi ka fapa, ka fa tîr a ni e. 23 Tichuan, ka fapa chuan ka rawng a bâwl theih nân chhuahtîr rawh khai, ka ti a; tin, i chhuahtîr phal lo vei a, i fapa, i fa tîr chu ka tihlum ang,” a ti e,’ ti ang che,” a ti a. 24 Tin, heti hi a ni a, kalkawnga riahhmunah chuan LALPAN Mosia chu a zuk tlawh a, tihhlum a tum ta a. 25 Tin, Zipori chuan meilung a la a, a fapaa serh vun chu a tan a, Mosia ke a tawhtîr a; tichuan, “Ka tân pasal thisen chhuah hmang i lo nih hi le,” a ti a. 26 Chutichuan, “Serh tan avângin pasal thisen chhuah hmang i lo nih hi,” a ti a. 27 Tin, LALPAN Arona hnênah, “Mosia hmuak tûrin thlalêrah va kal rawh,” a ti a. Tin, a kal ta a, Pathian tlângah chuan a va hmu a, a fâwp a. 28 Tin, Mosia chuan LALPAN a tirh thu zawng zawng leh thil mak a tihtîr tûr zawng zawng chu Arona a hrilh vek a. 29 Tin, Mosia leh Arona chuan Israela thlahte upaho zawng zawng chu an ko khâwm vek a. 30 Tin, LALPAN Mosia hnêna a sawi zawng zawng kha Arona chuan a sawi chhâwng leh vek a; tin, mipuite hmuhah chuan thil makte chu a ti a. 31 Tin, mite chuan an awih ta a; tin, LALPAN Israela thlahte chu a zuk kan a, an hrehawmziate a zuk hmu ta a ni tih an hriatin an lu an kûn a, chibai an bûk ta a.
Aigupta lal hmaah Mosia leh Arona an ding
1 Tin, chumi hnuah chuan Mosia leh Arona chu an va kal a, Pharaoa hnênah, “LALPA, Israel-hote Pathianin heti hian a ti, ‘Ka mite hi thlalêrah ka hnênah kût tûrin rawn kaltîr rawh,’ tiin,” an ti a. 2 Tin, Pharaoa chuan, “Tu nge maw ni LALPA, a thu ka han zawma, Israel-hote ka han chhuahtîrna tûr chu ni le? LALPA chu ka hre lo ve; Israel-hote lah ka chhuahtîr hek lo vang,” a ti a. 3 Tin, anni chuan, “Hebraite Pathianin min rawn tlawh ta mai a. Thlalêr ni thum kalah LALPA kan Pathian hnêna kan va inthawi theihna tûrin, khawngaih takin kan va kal ang e; chuti lo chuan, kan chungah hian hri emaw, khandaih emaw a rawn lêntîr mai dah ang e,” an ti a. 4 Tin, Aigupta lal chuan an hnênah, “Engtizia nge nangni Mosia leh Arona hi, mipuite hnathawk lai in dâwngdahtîr ni? In hna chu va thawk reng reng tawh u,” a ti a. 5 Tin, Pharaoa chuan, “Ngai teh u, hemi rama mite hi in lo tam ta hle mai a; tin, nangnin an phurrit phur chu in chawlhtîr mai a,” a ti a. 6 Tin, chumi ni ngei chuan Pharaoan hnathawk vêngtute leh an hotute hnênah chuan, 7 “Tûn achinah zawng tûn hma ang khân mite hi leirawhchana siam tûr buhpâwl in pe tûr a ni tawh lo ve, anmahni ngeiin buhpâwl chu thiar khâwm rawh se. 8 Tin, leirawhchan tûn hmaa an siam zât bawk kha anmahni lakah chuan in phût tûr a ni a; in tihtlêmsak hlek tûr a ni lo ve. An thatchhia a nih hi; chu vâng chuan alâwm, ‘Kan Pathian hnênah kan va inthawi ang e,’ an tih ni. 9 Mite hi hnathawh hautak lehzual tuk rawh u khai, chûng chu thawk sela, dâwt thu mai maite hi ngaisâng suh se,” tiin thu a pe a. 10 Tin, hnathawk vêngtute leh an hotute chu an kal chhuak a, mite hnênah chuan, “Pharaoan, ‘Buhpâwl zawng ka pe dâwn tawh lo a che u,’ a ti a ni. 11 Nangmahniin buhpâwl chu in hmuh theih ang ang va thiar khâwm rawh u; in hnathawh hi an tihtlêmsak chuang dâwn hlek lo che u a nia,” an ti a. 12 Chutichuan, mite chu Aigupta ram chhûng zawng zawngah chuan, buhpâwl aiah buh bul zawng khâwmin an vâk darh chum chum a. 13 Tin, hnathawk vêngtute chuan, “Tûn hmaa buhpâwl awm lai ang bawk khân, in hnathawh, in ni tin hnathawhte hi thawk zo thuai thuai rawh u,” tiin an tur hmanhmawh chhên ṭhîn a. 14 Tin, Pharaoa hnathawk vêngtute chuan Israela thlahte zînga hotu atâna an ruatte chu an vua a, “Engati nge niminah te leh vawiinah te pawh tûn hma ang bawka leirawhchan siam hi in la zawh loh ni?” tiin an chhâl a. 15 Tichuan, Israela thlahte hotute chu Pharaoa hnênah an va kal a, “I chhiahhlawhte hian engati nge heti taka min tih le? 16 I chhiahhlawhte hi buhpâwl rêng rêng min pe ta lo va, anni chuan, ‘Leirawhchan siam rawh u,’ min ti mai si a. Tin, ngai teh, i chhiahhlawhte hi min vua a; nimahsela, nangma mite ngei thiam loh a ni zâwk a ni,” tiin an mangan thu an va sawi a. 17 Nimahsela, ani chuan, “In thatchhia a ni, in thatchhia a ni! Chu vâng chuan a ni, ‘LALPA hnênah kan va inthawi ang e,’ in tih ni? 18 Chuvângin, kal ula, va thawk rawh u; buhpâwl zawng kan pêk dâwn loh che u hi; amaherawhchu, leirawhchan an tuk zât che u chu in siam rêng rêng tûr a ni,” a ti a. 19 Tin, “In ni tin hnathawh, in leirawhchan siam hi in titlêm chuang hlei lo vang e,” an tih veleh chuan Israela thlahte hotute chuan an chan a chhe êm êm a ni tih an lo inhre ta a. 20 Tin, Pharaoa hnên aṭanga an lo chhuak chuan Mosia leh Arona, kawnga lo ding chu an rawn hmu a; 21 tin, an hnênah, “LALPAN en che u sela, rorêlsak che u rawh se; keimahni min thahna tûra an kuta khandaih kentîrin, Pharaoa mit hmuhah leh a chhiahhlawhteho lakah hian huat min phurhtîr tâk avâng hian,” an ti a.
Pathian hnênah Mosia a vui
22 Tichuan, Mosia chuan LALPA lam a hawi a, “LALPA, engtizia nge he mite hi ṭha lo taka i tih le? Eng vângin nge mi tirh ni? 23 Pharaoa hnêna i hminga thusawi tûra ka kal achinah he mite hi ṭha lo takin a ti a; nang lah chuan i mite hi i la chhanchhuak hauh si lo va,” a ti a.
1 Tin, LALPA chuan Mosia hnênah, “Tûnah zawng Pharaoa chunga ka tih dân tûr chu i hmu tawh ang. Kut chak tak avâng chuan anmahni a chhuahtîr ang a; tin, kut chak tak avâng chuan a ram ata chu anmahni a hnawt chhuak ang,” a ti a.
Pathianin Mosia a bia
2 Tichuan, Pathianin Mosia a bia a, hnênah, “Kei JEHOVA ka ni. 3 Abrahama hnênah te, Isaaka hnênah te leh Jakoba hnênah te khân Pathian Engkimtheia-in ka lo inlâr ta a, ka hming JEHOVA-in erawh chuan an hnênah ka la inhriattîr lo va. 4 Tin, anmahni hnênah chuan, Kanaan ram, an mikhualna ram, rei lo tê an lo awm tawhna kha pêk tumin ka thinlung chu ka lo tinghet ta bawk a. 5 Tin, Israela thlahte, Aigupta-hoten an bawihate rûm kha ka lo hre bawk a; tichuan, ka thuthlung chu ka hre reng a ni. 6 Chuvângin, Israela thlahte hnênah chuan, ‘Kei JEHOVA ka ni a, Aigupta-hote phurrit lak ata hi ka hruai chhuak ang che u a, an bawiha in awm hi ka chhuahtîr ang che u; tin, nasa taka ngaihtuah che uin bân phar meuhvin ka tlan ang che u. 7 Tin, ka mi atân ka nei ang che u a; tin, kei in tân Pathian ka ni ang a; tichuan, kei hi Jehova, in Pathian, Aigupta-ho phurrit lak ata hruai chhuaktu che u ka ni tih in hria ang. 8 Abrahama te, Isaaka te leh Jakoba te hnêna ka bân meuhva pêk ka tumna ramah khân ka hruai lût ang che u a; tichuan, in ro chanah ka pe ang che u: kei JEHOVA ka nih hi,’ tiin hrilh ang che,” a ti a. 9 Tin, Mosian Israela thlahte hnênah chuan chûng thu chu a va sawi a; nimahsela, rilru nguina avâng leh nasa taka tihretheihna avâng chuan Mosia thu chu an ngaithla duh lo va. 10 Tin, LALPA chuan Mosia hnênah, 11 “Va kal la, Aigupta lal Pharaoa hnênah Israela thlahte hi a ram ata chhuahtîr tûrin va sawi rawh,” tiin a sawi a. 12 Tin, Mosia chuan LALPA hmaah, “Ngai teh, Israela thlahten ka thusawi an ngaithla duh si lo va; kei mi ṭawng mawh thusawi tehlul hi Pharaoan engtin nge a ngaihthlâk ang ni?” tiin a sawi a. 13 Tin, LALPA chuan Mosia leh Arona chu a bia a, “Aigupta ram ata Israel-te hruai chhuak tûrin thu ka pe tawh che u a ni tih Israel-te leh Aigupta lal chu hrilh rawh u,” a ti a.
Mosia leh Aronan Israel mi hotute hming an ziak
14 Tin, hêng hi an pate hnam bulpui berte chu an ni: Israela fa tîr Reubena fapate chu Hanoka te, Palua te, Hezrona te, Karmia te an ni a; hêngte hi Reubena hnamte chu an ni. 15 Tin, Simeona fapate chu Jemuela te, Jamina te, Ohada te, Jakina te, Zohara te, Kanaan hmeichhe laka a fapa Saula te an ni: hêngte hi Simeona hnamte chu an ni. 16 Tin, hêngte hi an thlahte ang zêlin Levia fapate hming chu a ni: Gersona te, Kohatha te, Meraria te an ni a; tin, Levia dam chhûng kum chu kum za leh kum sawmthum leh kum sarih a ni. 17 Tin, an hnam ang zêlin Gersona fapate chu Libnia leh Simeia te hi an ni. 18 Tin, Kohatha fapate chu Amrama te, Izara te, Hebrona te, Uziela te an ni a; tin, Kohatha dam chhûng kum chu kum za leh kum sawmthum leh kum thum a ni. 19 Tin, Meraria fapate chu Mahlia leh Musia an ni. Hêngte hi an thlahte ang zêla Levia hnamte chu an ni. 20 Tin, Amrama chuan a pa farnu Jokebedi chu nupuiah a nei a; tin, Arona leh Mosia a hrinsak a: tin, Amrama dam chhûng kum chu kum za leh kum sawmthum leh kum sarih a ni. 21 Tin, Izara fapate chu Kora te, Nephega te, Zikria te an ni. 22 Tin, Uziela fapate chu Misaela te, Elzaphana te, Sithria te an ni. 23 Tin, Arona chuan Aminadaba fanu, Nasona farnu Elisebi chu nupuiah a nei a; tin, Nadaba te, Abihua te, Eleazara te, Ithamara te a hrinsak a. 24 Tin, Kora fapate chu Asira te, Elkana te, Abiasapha te an ni. Hêngte hi Kora-ho hnamte chu an ni. 25 Tin, Arona fapa Eleazara chuan Putiela fanute zînga mi pakhat chu nupuiah a nei a; tin, Phinehasa a hrinsak a. Tin, hêngte hi an hnam ang zêla Levia thlah bulpui berte chu an ni. 26 Chu mi Arona leh Mosia-te chu an ni LALPAN, “Aigupta ram ata Israela thlahte hi an pâwlho ang zêlin hruai chhuak rawh u,” tia a hrilh ni. 27 Chu mite chu an ni Aigupta lal Pharaoa va biaa, Israela thlahte chu Aigupta ram ata chhuahtîr tûra va betute chu. Chu mite chu Mosia leh Arona chu an ni.
Mosia leh Arona hnêna LALPA thupêk
28 Tin, heti hi a ni a, Aigupta rama LALPAN Mosia a biak ni chuan, 29 LALPA chuan, “Kei hi LALPA chu ka ni. Aigupta ram lal Pharaoa hnênah chuan i hnêna ka sawi zawng zawng hi sawi rawh,” tiin Mosia chu a bia a. 30 Tin, Mosia chuan LALPA hmaah, “Ngai teh, kei mi ṭawng mawh ka ni si a; tichuan, keia thusawi tehlul hi Pharaoan engtin nge a ngaihthlâk ang ni?” a ti a.
Arona tiang
1 Tin, LALPA chuan Mosia hnênah, “Ngai teh, Pharaoa tân Pathian angah ka siam tawh che alâwm; tin, i unau Arona chu i zâwlnei a ni ang. 2 Thu ka pêk apiang che chu i sawi chhuak zêl ang a; tin, i unau Aronan Pharaoa a ram ata Israela thlahte chhuahtîr tûrin a hrilh ang. 3 Tin, Pharaoa thinlung chu ka tikhauh ang a; tin, ka chhinchhiahna leh ka thil makte chu Aigupta ramah hian ka tipung ang. 4 Nimahsela, Pharaoan in thu a pawm duh lo vang; tin, Aigupta ram chhûngah hian ka kut ka nghat ang a, anmahni chu nasa taka ngaihtuahin ka mi Israela thlahte, ka pâwlhote hi Aigupta ram ata chu ka hruai chhuak ang. 5 Tin, Aigupta mite chuan, Aigupta ram chunga ka kut ka han phara, an zîng ata Israela thlahte ka hruai chhuah hunah zet chuan kei hi LALPA chu ka ni tih an la hria ang,” a ti a. 6 Tin, Mosia leh Arona chuan chutiang chuan an ti a; LALPAN anmahni thu a pêk ang ngei chuan an ti ta a. 7 Tin, Pharaoa an va biak lai khân Mosia chu kum sawmriat mi a ni a; tin, Arona chu kum sawmriat leh kum thum a ni. 8-9 Tin, LALPAN Mosia leh Arona hnênah, “Pharaoan, ‘Thil mak han ti teh u,’ a lo tih che u chuan nangin Arona hnênah, ‘I tiang kha la la, Pharaoa hmaah paih ang che; tichuan, rûlah a lo chang dâwn nia,’ ti ang che,” tiin a sawi a. 10 Tin, Mosia leh Arona chu Pharaoa hnênah an va lût a; tin, LALPA thupêk ang chuan an han ti a. Tin, Arona chuan a tiang chu Pharaoa leh a chhiahhlawhte hmaah chuan a han paih a; tin, rûlah a chang ta a. 11 Chutichuan, Pharaoa pawh chuan mi fingte leh dawithiamte chu a ko ve a: tin, anni, Aigupta rama mitlâk dawithiamte pawh chuan chutiang bawk chuan an dawina chuan an han ti ve a. 12 An tiang chu an han paih ṭheuh va, rûlah a chang ṭheuh va; amaherawhchu, Arona tiang chuan an tiangte chu a lem zo ta vek a. 13 Tin, Pharaoa thinlung chu tihkhauhvin a awm a; tichuan, an thu chu a ngaithla duh ta lo va, LALPAN a lo sawi tawh ang khân.
Aigupta ram hremna - Thisen
14 Tin, LALPA chuan Mosia hnênah, “Pharaoa thinlung hi tihluhlulin a lo awm ta a, mite chu a chhuahtîr phal lo va. 15 Pharaoa hnênah chuan zîngah va kal ang che; ngai teh, tuiah a kal ṭhîn a, tin, amah hmuh tumin lui kamah ding ang che; tin, i tiang rûla chang kha keng ang che. 16 Tin, a hnênah, ‘LALPA, Hebraite Pathianin, “Ka mite hian thlalêrah ka rawng an bâwl theihna tûrin rawn kaltîr rawh,” tiin i hnênah mi a tîr a ni e; tin, ngai teh, tûn thlengin i la ngaithla duh lo va. 17 Chuvângin, LALPAN, “Hemiah hian kei LALPA chu ka ni tih i hria ang. Ngai teh, hemi ka tiang ken hian luia tuite hi ka han vua ang a; tichuan, thisenah a lo chang mai ang. 18 Tin, luia sanghate chu an thi ang a, lui chu a uih hluah hluah ang; tichuan, Aigupta miten luia tui chu an in lo vang,” a ti e,’ ti ang che,” a ti a. 19 Tin, LALPAN Mosia hnênah, “Arona hnênah, ‘I tiang keng la, Aigupta ram tui chungah te, an lui chungah te, an luite chungah te, an dîl chungah te, tui tlin khâwmna zawng zawng chungah te chuan thisena a lo chan vekna tûrin phar rawh; tichuan, Aigupta ram chhûng zawng zawngah, thingkuangahte leh lungkuangahte chuan thisen a awm vek mai ang,’ ti ang che,” a ti a. 20 Tin, Mosia leh Arona chuan LALPA thupêk ang chuan an han ti a; tin, tiang chu a han lek a, Pharaoa mit hmuhah leh a chhiahhlawhte mit hmuhah chuan luia tui chu a han vua a; tichuan, luia tui zawng zawng chu thisenah a chang ta vek a. 21 Tin, luia sanghate chu an thi ta vek a, lui chu a uih ta hluah hluah a; tichuan, Aigupta mite chuan luia tui chu an in thei ta lo va. Tin, thisen chu Aigupta ram chhûng zawng zawngah chuan a awm ta vek a. 22 Tin, Aigupta rama mitlâk dawithiamte pawh chuan an dawi hmangin chutiang bawk chuan an han ti ve a; tin, Pharaoa thinlung chu tihkhauhvin a awm a; tichuan, an thu chu a ngaithla duh ta lo va, LALPAN a sawi tawh ang khân. 23 Tin, Pharaoa chu a in lamah chuan a hâwng ta a, chûng pawh chu a thinlungah a lungkham chuang hauh lo mai a. 24 Tin, Aigupta mi zawng zawng chuan tui in atân lui kam vêlte chu an lai chiam a; lui tui chu an in thei si lo va. 25 Tin, LALPAN lui a vuak achin chu ni sarih zet a tling a ni.
Chungu
1 Tin, LALPAN Mosia chu a bia a, a hnênah, “Pharaoa hnênah va lût la, a hnênah, ‘LALPAN, “Ka mite hian ka rawng an bâwl theih nân chhuahtîr rawh. 2 I chhuahtîr phal loh zawngin, ngai teh, i ram chin zawng zawng hi chunguin ka hrem ang. 3 Tin, lui chu chunguin a khat mur mur ang a, chungute chu i inah hian an lo lût chho vang a, i mutna pindanah te, i khumah te, i chhiahhlawhte in chhûngah te, i mite zîngah te, i thukah te, i chhang hmehna thlêng chhûngah te an awm noh noh vang. 4 Tichuan, chungute chu nangmah leh i mite leh i chhiahhlawhte chungah chuan an vâk noh noh mai ang,” a ti e,’ ti ang che,” a ti a. 5 Tin, LALPAN Mosia hnênah, “Arona hnênah, ‘I tiang kha i kutin lui chungah te, luite chungah te leh tui tlinna chungah te lek langin, Aigupta ramah hian chungu rawn lêntîr chiam ang che,’ ti rawh,” a ti a. 6 Tin, Arona chuan Aigupta ram lui chungahte chuan a kut a han phar a; tichuan, chungu chu an lo chhuak a, Aigupta ram khahin a khat zo ta a. 7 Tin, mitlâk dawithiamte pawh chuan an dawi hmangin chutiang bawk chuan an han ti ve a, Aigupta ramah chuan chungute chu an han tichhuak ve a. 8 Chutichuan, Pharaoa chuan Mosia leh Arona chu a kohtîr a, an hnênah, “Ka hnên aṭang leh ka mite hnên aṭanga chungu hi la bo tûrin LALPA hnênah ngên teh u; tichuan, LALPA hnêna an inthawi theihna tûrin mite hi ka chhuahtîr ang e,” a ti a. 9 Tin, Mosia chuan Pharaoa hnênah, “I hnên aṭang leh i in aṭanga chungute chu tihborala a awma, luiah chauh a awmna tûrin, nangmah leh i chhiahhlawhte leh i mite tân chuan eng tik atân nge ka ngen ang?” a ti a. 10 Tin, ani chuan, “Naktûk atân le,” a ti a. Tin, ani chuan, “I thu ang chuan ni ang hmiang; tichuan, LALPA kan Pathian ang rêng rêng hi tu mah an awm lo tih i hria ang. 11 Tin, chungute chuan nangmah leh i inte leh i chhiahhlawhte leh i mite chu an chhuahsan vek ang che u a; luiah chauh an awm tawh ang,” a ti a. 12 Tin, Mosia leh Arona chu Pharaoa hnên ata an chhuak ta a; tin, Mosia chuan Pharaoa chunga chungu a rawn lêntîr chungchâng thu-ah chuan LALPA hnênah a ngên a. 13 Tin, LALPA chuan Mosia thu ang chuan a ti a; tin, in chhûnga mite, in hung chhûng kawtlaia mite leh lova mi chungute chu an thi fai ta vek a. 14 Tin, an chhar khâwm a, an dah vûm thûr mai a; tichuan, a ram uihin a lo uih ta a. 15 Nimahsela, Pharaoa chuan engthâwlna a lo awm ta tih a hriat veleh a thinlung a tikhauh va; tichuan, an thu chu a ngaithla duh ta lo va, LALPAN a lo sawi tawh ang khân.
Thosi
16 Tin, LALPAN Mosia hnênah, “Arona hnênah, ‘I tiang kha lek la, leia vaivut hi vaw rawh, Aigupta ram zawng zawnga vaivut hi thosia a lo chan theih nân,’ ti ang che,” a ti a. 17 Tin, chutiang chuan an han ti a. Arona chuan a tiang chu a kutin a han lek a, leia vaivut chu a han vua a; tin, mihring chungah leh sa chungah chuan thosi a lo awm ta mur mur a; Aigupta ram chhûng zawng zawnga leia vaivut zawng zawng chu thosiah a chang zo ta vek a. 18 Tin, mitlâk dawithiamte chuan an dawi hmangin thosi tihchhuah an han tum ve a; nimahsela, an thei lo. Tin, mihring chungah leh sa chungah chuan thosi chu a awm ta mur mur a. 19 Chutichuan, mitlâk dawithiamte chuan Pharaoa hnênah, “Hei hi Pathian kutzungtang a nih hi,” an ti a; tichuan, Pharaoa thinlung chu tihkhauhvin a awm a, an thu chu a ngaithla duh lo va, LALPAN a lo sawi ang khân.
Tho
20 Tin, LALPAN Mosia hnênah, “Zîng takah tho la, Pharaoa hmaah va ding ang che; ngai teh, tuiah a lo kal ṭhîn a. Tin, a hnênah, ‘LALPAN, “Ka mite hian ka rawng an bâwl theih nân chhuahtîr rawh. 21 Chuti lo zawng, ka mite i chhuahtîr phal loh zawngin, ngai teh, i chungah leh i chhiahhlawhte chungah leh, i mite chungah leh i in chhûngahte chuan tho tam tak ka rawn tîr chiam ang a; tichuan, Aigupta mite inte leh an chênna lei zawng zawngte pawh chu tho hlîrin a khat ang. 22 Tin, chumi ni chuan ka mite awmna Gosen ram chu ka tihrang ang, chutah chuan tho rêng rêng a awm ve loh nân; tichuan, lei chungah hian kei hi LALPA chu ka ni tih in lo hre thei ang. 23 Tin, ka mite leh i mite chu ka thliar ang a; naktûkah he chhinchhiahna hi a lo awm ang,” a ti e,’ ti ang che,” a ti a. 24 Tin, LALPAN chutiang chuan a ti a; tichuan, Pharaoa inah leh a chhiahhlawhte inah leh, Aigupta ram zawng zawngah chuan tho tam pui mai chu an lût ta chiam a; tho tam tak chuan ram chu a tichhe chiam a. 25 Tin, Pharaoa chuan Mosia leh Arona a kohtîr a, an hnênah, “Kal ta ula, he ramah hian in Pathian hnênah chuan va inthawi mai tawh u,” a ti a. 26 Tin, Mosia chuan, “Chutiang tih chu a fel hlei nêm, Aigupta miten thiang lo an tihte chuan LALPA kan Pathian hnênah kan inthawi dâwn zuk nia! Ngai teh, Aigupta mite mit hmuhah hian thiang lo an tihte chuan kan inthawi dâwn em ni ang? Lungin min dêng mai dâwn lâwm ni? 27 Thlalêr ni thum kalah chuan kan va kal ang a, LALPA kan Pathianin tih tûra min pêk ang angin a hnênah kan va inthawi ang e,” a ti a. 28 Tin, Pharaoa chuan, “Thlalêra LALPA in Pathian hnêna in inthawi theihna tûrin ka kaltîr ang che u; amaherawhchu, in kal hla vak tûr a ni lo ve. Mi ngensak ang che,” a ti a. 29 Tin, Mosia chuan, “Ngai teh, i hnên aṭang chuan ka chhuak dâwn a ni a, naktûkah hian Pharaoa leh a chhiahhlawhte leh a mite chu tho tam pui hian a chhuahsan theihna tûrin LALPA hnênah ka ngên ang e; amaherawhchu, mite LALPA hnêna an inthawi chu Pharaoa hian phal lovin, tihder leh tawh lul suh se,” a ti a. 30 Tin, Mosia chu Pharaoa hnên ata a chhuak a; tichuan, LALPA hnênah a ngên ta a. 31 Tin, LALPAN Mosia thu ang chuan a ti a; tichuan, Pharaoa hnên ata leh a chhiahhlawhte hnên ata leh a mite hnên ata tho tam pui chu a tikiang ta a, pakhat mah a awm ta lo va. 32 Tin, Pharaoa chuan chumi ṭum pawh chuan a thinlung a tikhauh leh a; tichuan, mite chu a chhuahtîr phal ta lo va.
Ran hri lêng
1 Chutichuan, LALPAN Mosia hnênah, “Pharaoa hnênah va lût la, ‘LALPA, Hebraite Pathianin, “Ka mite hian ka rawng an bâwl theih nân chhuahtîr rawh. 2 I chhuahtîr phal lohva, i la hrên reng zawngin, 3 ngai teh, phûla i rante chungah chuan LALPA kut a awm dâwn a ni, sakawr chungah te, sabengtung chungah te, sanghâwngsei chungah te, bâwng rual chungah te, berâm rual chungah te chuan hri nasa tak mai a lo lêng ang. 4 Tin, LALPAN Israel-ho ran leh Aigupta mite ran chu a tihrang ang a; tichuan, Israela thlahte ta chu pakhat mah a thi lo vang,” a ti e,’ tiin hrilh rawh,” a ti a. 5 Tin, LALPA chuan, “Naktûkah LALPAN he ramah hian chutiang chu a ti dâwn e,” tiin hun a ruat ta a. 6 Tin, LALPA chuan a tûkah chutiang chuan a ti ta a, Aigupta mite ran zawng zawng chu a thi ta vek a; nimahsela, Israela thlahte ran chu pakhat mah a thi ve lo va. 7 Tin, Pharaoa chuan mi a tîr a; ngai teh, Israel mite ran chu pakhat mah a lo thi ve lo va. Nimahsela, Pharaoa thinlung chu tihluhlulin a awm a, mite chu a chhuahtîr phal ta lo va.
Khawihli
8 Tin, LALPAN Mosia leh Arona hnênah, “Rawhtuina meia mi vut va ṭhûm ula, Pharaoa mit hmuhah Mosian vân lamah theh chiam rawh se. 9 Tin, Aigupta ram zawng zawng chungah hian vut dip takah a lo chang ang a; tin, chu chuan Aigupta ram chhung zawng zawnga mi leh sa chu khawihli a veitîr ṭheuh ang a, a durh leu chiam ang,” a ti a. 10 Tin, rawh tuina meia vut chu an la a, Pharaoa hmaah chuan an va ding a; tin, Mosia chuan vân lamah a han theh chiam a; tichuan, mi tin leh sa tinin khawihli durh leu an lo vei ta vek a. 11 Tin, khawihli avâng chuan mitlâk dawithiamte chuan Mosia chu an chelh ta lo va; mitlâk dawithiamte leh Aigupta mi zawng zawngte chuan khawihli chu an vei vek si a. 12 Tin, LALPAN Pharaoa thinlung chu a tikhauh va; tichuan, an thu chu a ngaithla duh ta lo va, LALPAN Mosia hnêna a sawi tawh ang khân.
Rial
13 Tin, LALPAN Mosia hnênah, “Zîng takah tho la, Pharaoa hmaah va ding la; tin, a hnênah, ‘LALPA, Hebraite Pathianin, “Ka miten ka rawng an bâwl theih nân chhuahtîr rawh. 14 Tûn ṭumah zawng i chungah leh i chhiahhlawhte chungah leh, i mite chungah hian ka hri zawng zawngte hi ka lêntîr dâwn e; tichuan, khawvêl zawng zawngah hian keimah ang rêng rêng hi tu mah an awm lo tih i hria ang. 15 Chuti ni suh sela, ka kut ka thawh ang a, nang leh i mite hi hriin ka hrem ang a, khawvêl ata hi ka tiboral daih tawh tûr che a ni. 16 Nimahsela, hemi avâng ngawt hian ka tungding chia, ka thiltihtheihna entîr tûr che leh khawvêl zawng zawnga ka hming a lo than theih nân. 17 Ka mite lakah hian i la induh cheuvin, i la chhuahtîr lo vang maw? 18 Ngai teh, naktûk hetih hunah hian rial tam pui, Aigupta ram a lo awm tirh ata, tûn thleng pawha la tla ngai lo chu ka tlâktîr ang. 19 Chutichuan, phûla i rante leh i neih apiangte chu khungtîr thuai rawh khai; mi tin leh sa tin phûla awm, ina khung loh tawh phawt chu, rialin a dêng ang a, an thi ang,” a ti e,’ ti rawh,” a ti a. 20 Pharaoa chhiahhlawhte zînga LALPA thu pawisa apiang chuan, an chhiahhlawhte leh an rante chu in chhûngah an tlân luhtîr a; 21 LALPA thu ngaisâng lo apiang chuan, an chhiahhlawhte leh an rante chu phûlah chuan an awmtîr mai a. 22 Tin, LALPA chuan Mosia hnênah, “Vân lamah i kut han lek rawh, Aigupta ram zawng zawngah hian mihring chungah te, sa chungah te, Aigupta ram chhûnga lova thlai tinrêng chungah te chuan rial a lo tlâk nân,” a ti a. 23 Tin, Mosia chuan a tiang chu vân lamah a han lek a; tin, LALPA chuan khawpui ri leh rial a zuk tîr a, leiah chuan meite a lo tla a; tichuan, LALPAN Aigupta ram chungah chuan rial a tlâktîr ta chiam a. 24 Chutichuan, rial, mei leh riala inpawlh, nasa êm êm mai, Aigupta ram zawng zawngah chuan, Aigupta hnam lo awm achin chutiang rêng rêng la awm ngai lo chu a lo awm ta a. 25 Tin, rial chuan Aigupta ram zawng zawnga phûla awm zawng zawng, mihringte leh sate chu a dêng a; tin, rial chuan lova thlai tinrêngte chu a dêng a, phûla thing tinrêngte chu a titliak vek a. 26 Gosen ram, Israela thlahte awmnaah chauh chuan rial a tla ve lo va. 27 Tin, Pharaoa chuan Mosia leh Arona chu a kohtîr a, an hnênah, “Tûn ṭum zawng thil ka tisual ta a ni e. LALPA chu mi fel a ni a, kei leh ka mite hi kan sual a ni e. 28 LALPA hnênah ngên rawh u, hêng khawpui ri dur durte leh rialte hi a tâwk tawh e; tichuan, ka chhuahtîr ang che u a, in awm tawh lo vang e,” a ti a. 29 Tin, Mosian a hnênah, “Khua ata hi ka chhuah veleh LALPA lamah ka kut ka phar ang a, khawpui rite chu a reh ang a, rial pawh a awm tawh hek lo vang; tichuan, lei hi LALPA ta a ni tih i hria ang. 30 Nimahsela, nang leh i chhiahhlawhteho hi zawngin, LALPA Pathian hi in la ṭih chuang lo tih ka hria a ni,” a ti a. 31 Tin, la leh barli chu a dêng chhia a; barli chu a vuih lai mêk a ni a, la chu a rah lai mêk a ni. 32 Nimahsela, buh leh vai buhtun chu a dêng chhe lo, a la ṭo rih loh avângin. 33 Tin, Mosia chu Pharaoa hnên aṭangin khua ata chu a chhuak a, LALPA lamah a kut a phar a; tichuan, khawpui rite leh rial tla chu a lo bâng ta a, lei chungah chuan ruah pawh chu a baw tlâwrh tlâwrh ta lo va. 34 Tin, Pharaoa chu ruah leh rial leh khawpui rite chu a bâng ta tih a hriat veleh a sual leh ta sauh va, amah leh a chhiahhlawhte nên an thinlung an tikhauh ta a. 35 Tin, Pharaoa thinlung chu tihkhauhvin a awm a; tichuan, Israela thlahte chu a chhuahtîr phal ta lo va, LALPAN Mosia hmanga a lo sawi tawh ang khân.
Khau puang
1 Tin, LALPAN Mosia hnênah, “Pharaoa hnênah va lût rawh; a thinlung leh a chhiahhlawhte thinlung chu ka tihkhauhsak tawh e, hêng ka chhinchhiahnate hi an zîngah ka entîr theihna tûrin; 2 tin, nang pawhin i fa leh i fa fate benga Aigupta ram chunga thil ka tih zia leh, an zînga ka chhinchhiahnate ka tih zia hi i hrilh theihna tûrin; kei hi LALPA chu ka ni tih in hriat theih nân,” a ti a. 3 Tin, Mosia leh Arona chu Pharaoa hnênah an va lût a, a hnênah, “LALPA, Hebraite Pathianin, ‘Ka hmaah eng chen nge inngaitlâwm duh lova awm i tum ni? Ka mite hian ka rawng an bâwl theih nân chhuahtîr rawh. 4 Ka mite hi i chhuahtîr phal loh zawngin, ngai teh, naktûkah i ram chhûngah hian khaukhuapte ka rawn lêntîr ang a; 5 tin, lei chung hi an dâp vek ang a, tu mahin lei rêng rêng hi an hmu thei lo vang; tin, rialin a tihchhiat bâk, in hnêna la awmate hi an ei ang a, phûla in thing ṭo apiangte chu an ei vek ang. 6 Tin, i inte leh i chhiahhlawhte zawng zawng inte leh, Aigupta mi zawng zawng inte chu a khat vek ang; i thlahtute leh i thlahtute thlahtute pawhin, khawvêla an lo awm achin tûn thleng pawhin, chutiang chu an la hmu ngai lo a ni,’ a ti e,” an ti a. Tin, a lehhawi a, Pharaoa hnên ata chu a chhuak ta a. 7 Tin, Pharaoa chhiahhlawhte chuan a hnênah, “He mi hi kan tân eng chen nge maw thanga a awm dâwn le? Hêngho hian LALPA an Pathian rawng an bâwl theih nân kaltîr ta mai che maw le. Aigupta ram hi tihchhiat a nih tawh hi i la hre lo vem ni?” an ti a. 8 Tin, Mosia leh Arona chu Pharaoa hnênah an hruai leh a; tin, an hnênah, “Kal ula, LALPA in Pathian rawng chu va bâwl tawh u. Amaherawhchu, tute nge ni kal tûr chu?” a ti a. 9 Tin, Mosian, “A pui a pangin kan kal ang; kan fapate leh kan fanute nên, kan berâm rualte leh kan bâwng rualte nên kan kal ang; LALPA hnênah kan kût ngei tûr a ni si a,” a ti a. 10 Tin, ani chuan an hnênah, “LALPA chu in hnênah awm ang hmiang! In fanau tê tête nên chuan ka kaltîr mawlh ang che u le; inngaihtuah rawh u khai, thil sual tih in tum a nih hi le. 11 Hnai lo ve! Nangni mipaho erawh chu kal ula, LALPA rawng chu bâwl rawh u; chu chu alâwm in duh,” a ti a. Tin, Pharaoa hnên ata chu an hnawt chhuak ta a. 12 Tin, LALPAN Mosia hnênah, “Aigupta ram chungah hian khaukhuapte rawn lêntîr tûrin i kut phar rawh, Aigupta ramah hian an lo chhohva, he rama thlai tinrêng, rial den chhiat bâk zawng zawngte nên lam pawha an ei theihna tûrin,” a ti a. 13 Tin, Mosian Aigupta ram chungah chuan a tiang chu a han lek a, LALPAN chumi ni, nilêng leh zankhuain chumi ramah chuan khawchhak thli a rawn tlehtîr a; tin, a tûkah chuan khawchhak thli chuan khaukhuap a rawn lên a. 14 Tin, khaukhuapte chu Aigupta ram zawng zawng chungah chuan an lêng a, Aigupta ram chhûng zawng zawngah chuan an fu a. An tam êm êm mai a; tûn hmain khaukhuap chutiang rêng rêng a la awm ngai lo va, tûn hnuah pawh chutiang rêng rêng chu a awm leh tawh lo vang. 15 Lei chung zawng zawng hi an dâp vek mai si a; tichuan, ram chu a thimin a thim mup mai a ni; tin, rial den chhiat bâk, chumi rama thlai tinrêng leh theirah zawng zawngte chu an ei vek a. Tichuan, Aigupta ram chhûng zawng zawngah chuan lovah thil hring rêng rêng, thing pawh, thlai pawh a awm ta hauh lo mai a. 16 Tin, Pharaoa chuan Mosia leh Arona chu hmanhmawh takin a kohtîr a, an hnênah, “LALPA in Pathian chungah leh nangmahni chungah thil ka lo tisual ta e. 17 Chutichuan, ka sual hi tûn ṭumah chauh hian ngaidam ang che, ka ngên a che, he thihna hi mi lâk bosak phawt mai tûrin LALPA in Pathian hnênah ngên ang che,” a ti a. 18 Tin, Pharaoa hnên ata chu a kal chhuak a, LALPA hnênah chuan a ngên ta a. 19 Tin, LALPA chuan khawthlang thli na tak mai a rawn tlehtîr a, chu chuan khaukhuapte chu a lên a, Tuifinriat Senah a lên thla ta vek a; Aigupta ram chhûng zawng zawngah chuan khaukhuap pakhat mah a awm ta lo va. 20 Nimahsela, LALPAN Pharaoa thinlung chu a tikhauh va; tichuan, Israela thlahte chu a chhuahtîr phal ta lo va.
Khaw thim
21 Tin, LALPAN Mosia hnênah, “Vân lamah i kut han lek rawh, Aigupta ram chungah hian a lo thim khupa, ai mit thlawn ang maia a lo thimna tûrin,” a ti a. 22 Tin, Mosia chuan a kut chu vân lamah a han lek a, Aigupta ram chhûng zawng zawng chu ni thum chhûng zet a thim ta mup a. 23 Tu mah rêng rêng an inhmu thei ta lo va, tu mah mahni hmun ata ni thum chhûng zet chu an tawlh sawn thei lo bawk a. Israela thlahte zawng zawng awmna erawh chu a êng vek a. 24 Tin, Pharaoan Mosia a kohtîr a, a hnênah, “Kal ta ula, LALPA rawng chu va bâwl tawh u; in beram rualte leh in bâwng rualte erawh chu awm sela; in fanau tê tête pawh in hnênah kal ve rawh se,” a ti a. 25 Tin, Mosian, “LALPA kan Pathian hnêna kan inthawi theihna tûrin inthawina tûrte leh hâlral thilhlan tûrte chu nangin kan kutah min pe tel ve bawk tûr a ni. 26 Kan rante chu kan hnênah an kal ve bawk tûr a ni; ran rêng rêng chu pakhat mah kan hnutchhiah lo vang. Chûng zînga mi chu LALPA kan Pathian rawngbâwl nân kan hman ngei ngei tûr a ni si a; chumi hmun kan va thlen hma loh chuan engin nge LALPA rawng kan bâwl ang tih kan la inhre lo a ni,” a ti a. 27 Nimahsela, LALPAN Pharaoa thinlung chu a tikhauh va, a chhuahtîr phal ta lo va. 28 Tin, Pharaoan a hnênah, “Ka hnên ata hi chhuak daih la, fimkhur rawh khai, ka hmêl rêng rêng rawn hmu tawh hlek suh; ka hmêl i hmuh ni la la chuan i thi ngei tûr a ni,” a ti a. 29 Tin, Mosia chuan, “I sawi dik zet mai; i hmêl zawng hmuh ni ka nei leh tawh lo vang e,” a ti a.
Fa tîr thih tûr thu Mosian a puang
1 Tin, LALPAN Mosia hnênah chuan, “Pharaoa chungah leh Aigupta ram chungah hian vawi khat chu hri ka han lêntîr leh ang e; chumi hnuah zawng a chhuahtîr tawh ang che u. A chhuahtîr vêk vêk che u zawngin heta ta hi a hnawt chhuak daih mai ang che u. 2 Chutichuan, mipuite beng hriatah thu va sawi rawh, mipa leh hmeichhe tinin an vêngte chu tangkaraw incheina leh rangkachak incheinate dîl rawh se,” a ti a. 3 Tin, LALPAN mite chu Aigupta mite a khawngaihtîr ta a. Chu chang a ni lo va, Mosia chu Aigupta ramah chuan, Pharaoa chhiahhlawhteho ngaihah leh mipuite ngaihah mi ropui tak a ni a. 4 Tin, Mosia chuan, “LALPAN heti hian a ti, ‘Zanlai vêlah chuan Aigupta ram chhûngah hian ka lo kal tlang ang a; 5 tichuan, Aigupta rama fa tîr zawng zawng, lalṭhutphaha thu Pharaoa fa tîr aṭanga buh râwt sawmna bula awm bawihnu fa tîr lam pawhin an thi ang, ran piang hmasa ber zawng zawngte nên. 6 Tin, Aigupta ram chhûng zawng zawngah chuan ṭahna nasa tak a awm ang a, chutianga nasa rêng rêng a la awm ngai lo va, chutiang rêng rêng chu a awm leh tawh hek lo vang. 7 Nimahsela, Israela thlahteho zawng mihring leh sa lamah rêng rêng ui pawhin a lei a phût lo vang; LALPA chuan Aigupta mite leh Israel mite hi a thliar ngei a ni tih in hria ang. 8 Tin, hêng i chhiahhlawh zawng zawngte hi ka hnênah an lo chhuak ang a, “Chhuak rawh, i hnung zuitute zawng zawng nên hian,” tiin ka hmaah an kûn ang; tin, chumi hnuah chuan ka chhuah ang,’ tiin,” a ti a. Tin, Pharaoa hnên ata chu thinrim zet maiin a chhuak ta a. 9 Tin, LALPAN Mosia hnênah chuan, “Pharaoan in thu a pawm lo vang; ka thil makte Aigupta ramah hian tihpuna a awm theih nân,” a ti a. 10 Tin, Mosia leh Arona chuan Pharaoa hmaah chuan chûng thil mak zawng zawng chu an ti a; tin, LALPAN Pharaoa thinlung chu a tikhauh va, Israela thlahte chu a ram ata a chhuahtîr phal lo va.
Kalhlên kût
1 Tin, LALPAN Mosia leh Arona chu Aigupta ramah chuan a bia a, 2 “Tûn thla hi in tân thla chhiar ṭanna a ni ang a; in tân kum khat chhûnga thla chhiar ṭanna a ni ang. 3 Israel-ho pung khâwm zawng zawngte hnênah hian, ‘Tûn thla ni sâwm ni takah hian mi tinin an chhûngkaw khawsak ang zêlin an chhûngkaw tân berâmno pakhat la ṭheuh sela. 4 Tin, an chhûngkua chu berâmno talhna tham ni lo khawpa tlêm lutuk an nih chuan, a ṭhenawm nên an chhûngkaw mihring zir zêlin berâmno pakhat inṭâwm sela; mi tin ei tâwk tûr ang zêl ngaihruatin berâmno chu in ruat tûr a ni. 5 In berâmno chu a pa, kum khat hnuai lam, hmêlhem lo a ni tûr a ni a, berâm zînga mi emaw, kêl zînga mi emaw a ni tûr a ni. 6 Tin, chumi thla ni sâwm leh ni li ni thlengin in dah tûr a ni a; tichuan, Israel-ho pung khâwm zawng zawng chuan tlai lamah an talh tûr a ni. 7 Tin, a thisen chu an la ang a, an eina tûr in kawngka biang pahnihah leh kawngka lu chungah an tât tûr a ni. 8 Tin, chumi zân chuan a sa chu rawh sela, chhang dawidim telh loh nên ei rawh se; hnim khâ nên an ei tûr a ni. 9 Tin, a helin ei suh sela, tui pawhin chhûm hauh suh sela, a rawhin rawh zâwk rawh se, a lu leh a ke chawpin, a kawchhûng nên. 10 Tin, a tûk atân chuan eng mah in dah tûr a ni lo va; a tûk thlenga bâng la awm chu meiah in rawh ral tûr a ni. 11 Tin, hetiang hian in ei tûr a ni: in puan vengin, pheikhawk bunin, tiang kengin. Tin, hmanhmawh takin in ei tûr a ni; LALPA kal hlên a ni dâwn si a. 12 Chumi zân chuan Aigupta ram chhûng chu ka fang dâwn si a, Aigupta rama fa tîr zawng zawng, mi leh sa chu ka tihlum ang a; Aigupta rama pathian zawng zawng chu an ro ka rêlsak ang: LALPA ka nih hi. 13 Tin, thisen chu in tân in awmna in chhinchhiahna a ni ang a; tin, thisen chu ka hmuh chuan ka kal hlên ang che u a; tichuan, Aigupta ram ka hrem hunah chuan nangmahni tiboraltu tûr in chungah hri rêng rêng a lo lêng lo vang. 14 Tin, hemi ni hi in tân hriat rengna ni a ni ang a; LALPA tân kût niah in ruat tûr a ni. In thlahte thlengin kumkhaw thuruat atâna awm reng tûrin kût niah in hmang tûr a ni.
Chhang dawidim telh loh kût
15 “ ‘Ni sarih chhûng chu chhang dawidim telh loh in ei tûr a ni a; ni khat ni aṭang rêng chuan in in chhûng ata dawidim chu in thian fai vek tûr a ni. Tu pawh ni khat ni aṭanga a ni sarih ni thlenga chhang dawidim telh ei apiang chu, chu mi chu Israel-ho zîng ata tihboral a ni ang. 16 Tin, ni khat niah inkoh khâwmna thianghlim in nei ang a, a ni sarih niah inkoh khâwmna thianghlim a awm leh ang; mi tinin an mamawh ei tûr buatsaih tih loh chu, chumi chhûng chuan hna rêng rêng thawh hlek tûr a ni lo, ei tûr buatsaih chauh tih thian a ni ang. 17 Tin, chhang dawidim telh loh kût ni chu in serh tûr a ni, chumi ni ngei chuan Aigupta ram ata in mipuihote chu ka hruai chhuak si che u a; chuvângin, in thlahte thlengin kumkhaw thuruat atâna awm reng tûrin chumi ni chu in serh tûr a ni. 18 Thla khatna, chumi thla ni sâwm leh ni li ni, tlai lamah chuan chhang dawidim telh loh chu in ei ang a, chumi thla ni sawmhnih leh ni khat ni tlai thlengin. 19 Ni sarih chhûng chu in in chhûngah rêng rêng dawidim a awm tûr a ni lo va; tu pawh dawidim telh ei apiang chu, chu mi chu hnam dang pawh, in rama piang pawh ni sela, Israel-ho pung khâwm zîng ata hi tihboral tûr a ni ang. 20 Dawidim telh rêng rêng chu in ei tûr a ni lo va; in chênna hmun apiangah chuan chhang dawidim telh loh in ei tûr a ni,’ tiin sawi ang che,” tiin.
Kalhlên kût hmasa ber
21 Tin, Mosian Israel upaho zawng zawng chu a koh khâwmtîr a, an hnênah, “Chhûngkaw tinin berâmnotête chu va la chhuak ta ula, kalhlênna tûr talh rawh u. 22 Tin, husop kau in la ang a, maihûna thisenah chuan in zu hnim ang a, kawngka lu chungah leh kawngka biang pahnihah chuan maihûna thisen chu tât ang che u. Tin, khawvâr hma loh chuan tu mah mahni in ata in chhuak tûr a ni lo ve. 23 LALPA chu Aigupta mite tihlum tûrin a lo kal tlang dâwn si a; tichuan, kawngka lu chung leh kawngka biang pahniha thisen kai a hmuh chuan, LALPA chuan kawngka chu a kal hlên ang a, in in chhûngah chuan nangmahni tihlum tûrin tiboraltu chu a rawn luhtîr lo vang. 24 Tin, hetiang hian nangmah leh i fate tâna kumkhuaa thuruat awm reng tûrin in rawn ti ṭhîn tûr a ni. 25 Tin, heti hi a ni ang a, LALPAN pêk a lo tiam tawh anga a pêk che u ram chu in thlen hunin, he rawngbâwlna hi in zâwm tûr a ni. 26 Tin, heti hi a ni ang a, in faten in hnêna, ‘He rawngbâwlna awmzia hi eng nge ni ngai le?’ an rawn tih chuan, 27 nangnin, ‘Hei hi LALPA kalhlên inthawina a nih hi, ani chuan Aigupta mite a tihhlum lai khân kan inte chu a rawn zuah a, Aigupta rama Israela thlahte in chu a rawn kal hlên a ni,’ in la ti dâwn nia,” a ti a. Tin, mipuite chuan an lû an kûn a, chibai an bûk ta a. 28 Tin, Israela thlahte chu an kal a, chutiang chuan an ti a; LALPAN Mosia leh Arona thu a pêk ang chuan an ti ta a.
Fa tîr thih thu
29 Tin, heti hi a ni a, zanlaiah chuan LALPA chuan Aigupta rama fa tîr zawng zawng - lalṭhutphaha ṭhu Pharaoa fa tîr aṭanga rip chhûnga tâng fa tîr lamin - a zuk tihlum ta vek a, ran piang hmasa ber zawng zawngte nên. 30 Tin, Pharaoa chu amah leh a chhiahhlawh zawng zawngte leh, Aigupta mi zawng zawngte nên zânah chuan an tho ta a; tin, Aigupta ramah chuan ṭahna nasa tak a awm a; mitthi awm lohna in rêng rêng pakhat mah a awm si lo va. 31 Tin, Mosia leh Arona chu a zân a zânin a kohtîr a, “Tho ula, ka miteho zîng ata hi chhuak rawh u, nangmahni leh Israela thlahteho nên hian; tin, kal ula, in sawi ang khân LALPA rawng chu va bâwl tawh u. 32 In sawi ang khân in berâm rualte leh in sebâwng rualte pawh chu kalpui rawh u; kal tawh u; tin, kei pawh mal mi sâwm ve bawk rawh u,” a ti a. 33 Tin, Aigupta mite chuan chumi ram ata chu hmanhmawh taka tîr chhuak tûrin mite chu an tur ta chhên a; “Kan thi vek a ni ta mai,” an ti a. 34 Tin, mite chuan an chhang hmehte chu dawidim an telh hmain an la a, an chhang hmehna thlêngte chu an puanin an tuam a, an kokiah an bât ta mai a. 35 Tin, Israela thlahte chuan Mosia thu ang chuan an ti a; tin, Aigupta mite chu tangkaraw incheinate leh rangkachak incheinate leh, puante an dîl a. 36 Tin, LALPA chuan mite chu Aigupta mite a khawngaihtîr a; chutichuan, an dil apiang an neihtîr zêl a. Tichuan, Aigupta mite chu an rawk ta a.
Israel miten Aigupta an chhuahsan
37 Tin, Israela thlahte chu Rameses khua ata an chhuak a, Sukkoth hmun thlengin an kal ta a, naupangte tiam lovin, mipa puitling hlîr nuai ruk lai kein an kal a. 38 Tin, an hnênah chuan mipui inpawlhsawp tam tak an kal ve bawk a; tin, ran rual tam tak, berâm leh bâwngte an chhawm bawk a. 39 Tin, Aigupta ram ata an ken chhuah chhang hmeh hmangin chhang, dawidim telh lohte chu an ur a; Aigupta ram ata chu hnawh chhuaha an awm avâng leh, an awm rei theih tâk lohva, ei tûr takngial pawh an inbuatsaih hman tâk loh avânga dawidim telh loh a ni si a. 40 Tichuan, Israela thlahte Aigupta rama an awm chhûng chu kum zali leh kum sawmthum a ni. 41 Tin, heti hi a ni a, kum zali leh kum sawmthum a lo ral chuan, chumi ni ngei chuan heti hi a ni a, LALPA mipuiho zawng zawngte chu Aigupta ram ata an chhuak ta a. 42 Chumi zân chuan Aigupta ram ata anmahni a hruai chhuah avângin, LALPA tâna zân serh tak ni tûr a ni a. Israela thlahte zawng zawngin, chhuan zawng zawng thlengin, chu zân chu LALPA zân atân serh hle tûr a ni.
Kalhlên kût hman ṭhin dân tûr
43 Tin, LALPAN Mosia leh Arona hnênah, “Hei hi kalhlên thuruat dân tûr a ni ang: hnam dang chuan an ei ve tûr a ni lo va; 44 amaherawhchu, miin a chhiahhlawh, tangkaa a lei tawhate chu a serh i tansak tawh phawt chuan a ei ve thei ang. 45 Hnam dang leh chhiahhlawh rawihte erawh chuan an ei tûr a ni lo ve. 46 In khatah ei tûr a ni; pâwn lamah a sa rêng rêng ken chhuah tûr a ni lo va, a ruh rêng rêng pawh in titliak tûr a ni lo ve. 47 Israel-ho zawng zawngin an zâwm tûr a ni. 48 Tin, hnam dang in hnêna awm hian LALPA kalhlên hi tih ve a duh chuan, mipa zawng zawngte serh tan ni sela, tichuan rawn ti ve rawh se; ani chu chumi rama piang anga ngaih a ni ang. Amaherawhchu, serh tan loh mi chuan a ei hauh tûr a ni lo. 49 Chumi rama piang leh, hnam dang in zînga awmte tân hian dân angkhat a awm tûr a ni,” a ti a. 50 Israela thlahte zawng zawng chuan chutiang chuan an ti a, LALPAN Mosia leh Arona thu a pêk ang ngei chuan an ti ta a. 51 Tin, heti hi a ni a, chumi ni ngei chuan, LALPAN Israela thlahte chu Aigupta ram ata mipuiho chu a hruai chhuak ta a ni.
Pathian tân fa tîr hlan tûr
1 Tin, LALPAN Mosia a bia a, 2 “Israela thlahte zînga fa tîr zawng zawng, chhûl keu hmasa ber apiang, mihring pawh, sa pawh ka tân serhah in ruat tûr a ni; ka ta a ni e,” tiin.
Chhang dawidim telh loh kût
3 Tin, Mosian mipuite hnênah chuan, “Vawiin, Aigupta ram ata bawih ata in chhuah ni hi hre reng ang che u; kut chak takin LALPAN hemi hmun ata hi a hruai chhuah che u hi; chhang dawidim telh rêng rêng chu ei tûr a ni lo ve. 4 Abib thla, vawiin ni hian in chhuak a ni. 5 Tin, heti hi a ni ang a, LALPAN Kanaan-hote, Hit-hote, Amor-hote, Hiv-hote, Jebus-hote ram, khawizu leh hnutetui luanna ram, in thlahtute chhechhama pêk a tiamah khân a hruai thlen hunah che u chuan, hemi thla hian he rawngbâwlna hi in zâwm tûr a ni. 6 Ni sarih chhûng chu chhang dawidim telh loh in ei tûr a ni a; tin, a ni sarih ni chu LALPA tân kût ni a ni ang. 7 Ni sarih chhûng chuan chhang dawidim telh rêng rêng chu a awmin awm hlek suh se; in awmna hmunah rêng rêng dawidim pawh a awmin awm hlek bawk suh se. 8 Chumi niah chuan in fate hnênah, ‘Aigupta ram ata kan lo chhuah lai khân LALPAN thil min lo tihsak vâng a ni e,’ tiin in hrilh tûr a ni e. 9 LALPA dân chu in kaa a awm reng theih nân, in kutah in tân chhinchhiahna leh in mit inkârah hriat rengna tûr a ni ang; kut chak takin LALPAN Aigupta ram ata a hruai chhuah che u hi. 10 Chutichuan, he thuruat hi kum tin a hun takah in zâwm ṭhîn tûr a ni.
Fa tîr
11 “Tin, heti hi a ni ang a, LALPAN in hnênah leh in thlahtute hnêna chhechhama pêk a tiam tawh che u anga Kanaan-hote rama a hruai thlen che ua, a pêk hun che u chuan, 12 chhûl keu hmasa ber apiang leh in ran piang thla hmasa ber apiang chu LALPA tân in dah hrang zêl tûr a ni; a pate chu LALPA ta tûr a ni ang. 13 Sabengtung piang hmasa ber apiang chu berâmnovin in tlan tûr a ni ang; in tlan duh loh erawh chuan a nghâwng chu in titliak tûr a ni; tin, in fate zînga mipa piang hmasa ber apiang chu in tlan tûr a ni. 14 Tin, heti hi a ni ang a, nakin lamah te in faten, ‘Hei engtizia nge ni le?’ tia an la rawn zawh hun che u chuan nangnin an hnênah, ‘Kut chak takin LALPAN Aigupta ram ata bawiha kan awm kha min hruai chhuak a. 15 Tin, heti hi a ni a, Pharaoan kan chhuah thu a tihkhirh êm avângin, LALPAN Aigupta rama fa tîr zawng zawng, mihring fa tîr apiang leh ran piang hmasa ber apiang chu a tihlum vek a. Chuvângin, a pa, chhûl keu hmasa ber apiang hian LALPA hnênah kan inthawi a nih hi; amaherawhchu, kan fapate zînga fa tîr zawng zawngte chu kan tlan a ni,’ ti ang che u. 16 Tin, in kutah in tân chhinchhiahna a ni ang, in mit leh mit inkâra chal hrênnate nên; kut chak takin LALPAN Aigupta ram ata min hruai chhuak ta si a,” a ti a. 17 Tin, heti hi a ni a, Pharaoan mite chu a chhuahtîr phal veleh chuan, Pathianin Philistia-ho ram lamah chuan, a hnai zâwk nain a hruai lo va; Pathianin, “Indonate an hmuhin an inchhîr ang a. Aigupta ramah an kîr leh hlauh dah ang e,” a ti si a. 18 Amaherawhchu, Pathianin mite chu Tuifinriat Sen lam panin thlalêr lamah a hruai kikawi ta zâwk a; tin, Israela thlahte chu Aigupta ram ata chu inrâlring rengin an chhuak ta a. 19 Tin, Mosian Josefa ruhte chu a chhawm a; Israela thlahte kha, “Pathianin a la rawn kan ngei ngei ang che u a; tin, ka ruhte hi heta ta hi in zâwn chho tûr a ni,” tiin chhia a lo chhamtîr tlat tawh si a. 20 Tin, Sukkoth hmun ata chu an chhuak a, thlalêr tawntirh Etham hmunah an riak a. 21 Tin, LALPAN chhûn laiah chuan chhûm dingin an hma a hruai a, zânah chuan anmahni ên tûrin meialh dingin an hma a hruai a; chhûn leh zân an kal theih zêlna tûrin. 22 Chhûna chhûm ding leh zâna meialh ding chuan mipui chu a kalsan ngai hauh lo a ni.
Tuipui Sen kân thu
1 Tin, LALPAN Mosia a bia a, 2 “Israela thlahte hnênah hian thu sawi rawh khai, kîr leh sela, Migdol hmun leh tuipui inkâr Pi-hahiroth hmun bul, Baal-Zephon hmun bulah chuan riak rawh se; chumi dep tuipui kamah chuan riak rawh u. 3 Tichuan, Pharaoan Israela thlahte chungchâng thu-ah, ‘Ram lakah an mangang ta zet mai le, thlalêrah an tâng ta,’ a ti ang a. 4 Tin, keiin Pharaoa thinlung chu ka tikhauh ang a; tichuan, anmahni chu a ûm ang a; tin, keiin Pharaoa lakah leh a sipaiho zawng zawng lakah chuan chawimawina chu ka hlawh ang; tichuan, Aigupta miten kei hi LALPA chu ka ni tih an hria ang,” tiin. Tin, chutiang chuan an ti a. 5 Tin, mite chu an tlân bo zo ta tih Aigupta lal chu an hrilh a; tin, Pharaoa thinlung leh a chhiahhlawhte thinlung chu a inlamlêt leh ta a; tichuan, “Israel mite kan rawngbâwl lai kan chhuahtîr ta ngawt mai hi, engtiziaa hetianga ti ta nge maw kan nih chu le?” an ti ta a. 6 Tin, an tawlailîr an buatsaih a, a mite chu a hnênah a hruai a. 7 Tin, tawlailîr zaruk ṭha ṭhiau leh Aigupta rama tawlailîr zawng zawng, an zaa chunga hotute nên a hruai ta a. 8 Tin, LALPAN Aigupta ram lal Pharaoa thinlung chu a tikhauh va, Israela thlahte chu a ûm ta a; Israela thlahte lah chu induh takin an chhuak a ni si a. 9 Tin, Aigupta mite chuan sakawr zawng zawng leh Pharaoa tawlailîrte leh, a sakawr chung chuang mite leh a sipaihote nên chuan an ûm a; tin, Pi-hahiroth hmun bul, Baal-Zephon hmun depa tuipui kama an riak chu an va ûmpha ta a. 10 Tin, Pharaoan a va pan hnaih chuan Israela thlahte chu an han dâk a; tin, ngai teh, Aigupta mite chuan an lam chu an rawn pan phei a. Tichuan, an hlau ta êm êm mai a, Israela thlahte chuan LALPA chu an au ta a. 11 Tin, Mosia hnênah, “Aigupta ramah khân thlân a awm loh avângin em ni thlalêrah hian thi tûra min hruai chhuah ni? Eng vângin nge ni hetianga min ti tûra Aigupta ram ata min hruai chhuah ni? 12 Aigupta ramah pawh khân, ‘Aigupta mite rawngbâwl hian kan awm mai ang e,’ tiin i hnênah khân kan sawi rêng lo vem ni? Thlalêra thih tlaw ngawt mai te ai chuan Aigupta mite rawng kha lo bâwl ta ila a ṭha zâwk tûr,” an ti a. 13 Tin, Mosian mipuite hnênah chuan, “Hlau suh u. Awm hle hle mai ula, LALPA chhandamna, vawiina a thawhsak tûr che u hi en ngawt mai rawh u. Vawiina Aigupta mi in hmuhte hi kumkhuain in hmu leh dâwn tawh lo ve. 14 LALPAN a dosak ang che u a, nangni chu in awm hle hle mai ang,” a ti a. 15 Tin, LALPAN Mosia hnênah chuan, “Eng vângin nge maw mi auh le? Israela thlahte hi kal zêl tûrin hrilh ta che. 16 Tin, nang pawhin i tiang kha han la la, tuipui chungah khân lek la, tui chu lo inṭhen rawh se. Tichuan, tuipui chhûng lei chârah Israela thlahte chu an kal ang. 17 Tin, keiin Aigupta mite thinlung chu ka tikhauh ang a; tichuan, an ûm zêl ang. Tin, Pharaoa lakah leh, a sipaiteho zawng zawng lakah leh, a tawlailîrte lakah leh a sakawr chung chuang mite lakah chuan chawimawina chu ka hlawh ang. 18 Tin, Pharaoa lakah leh, a tawlailîrte lakah leh a sakawr chung chuang mite laka chawimawina ka hlawh hunah chuan, Aigupta miten kei hi LALPA chu ka ni tih an hria ang,” a ti a. 19 Tin, Pathian vântirhkoh, Israel mite hma hruai ṭhîn kha an hnung lamah a insawn ta a; tin, chhûm ding kha an hma lam ata a insawn a, an hnung lamah a ding ta a. 20 Tin, Aigupta mite leh Israel mite inkârah a lo tla ta a; tichuan, lehlam tan chhûm leh zân thim a ni a, lehlam tan zân chu a tiêng thung a; chutichuan, zankhuain a tu lam mah mah an inpan lo va. 21 Tichuan, Mosia chuan tuipui chungah a kut a han phar a; tin, LALPAN zankhuain khawchhak thli na takin a rawn tlehtîr a, tuipui chu a nem kîrtîr a, tuipui chu lei chârah a chantîr a; tin, tuite chu a lo inṭhen ta a. 22 Tin, Israela thlahte chu tuipui chhûng lei chârah chuan an kal ta a; tin, tuite chu an ding lampangah leh an vei lampangah chuan an tân bang a lo ni ta mai a. 23 Tin, Aigupta mite chuan an ûm a, Pharaoa sakawr zawng zawngte leh a tawlailîrte leh a sakawr chung chuang mite chuan tuipui chhûngah chuan an ûm lût ta a. 24 Tin, heti hi a ni a, khawfingchah veleh LALPAN Aigupta mite chu meialh ding leh chhûm dingah chuan a zuk timangang ta a. 25 An tawlailîr kete chu a thlawnsak a, an khalh chak thei ta lo va; chutichuan, Aigupta mite chuan, “Israel-hote hi i tlânsan ang u; LALPAN an lama ṭangin he mite hi Aigupta mite a dopui a nih hi,” an ti ta a. 26 Tin, LALPAN Mosia hnênah, “Aigupta mite, an tawlailîrte, an sakawr chung chuang mite chu tuiin a rawn chîm leh theihna tûrin, i kut kha tuipui chungah han phar rawh khai,” a ti a. 27 Tin, Mosian tuipui chungah chuan a kut chu a han phar a; tin, khua a vâr veleh tuipui chu a luan pângngaiin a luang leh ta a, Aigupta mite chu an tlân kîr leh lai takin. Tichuan, LALPAN Aigupta mite chu tuipui chhûngah chuan a paih thla ta a. 28 Tin, tuite chu a luang leh ta a; tichuan, tawlailîrte leh sakawr chung chuang mite, tuipuia ûm lûttu, Pharaoa sipaiho zawng zawngte lam chuan tuiin a chîm pil ta vek a; pakhat mah chhuak rêng rêng an awm hauh lo mai a. 29 Israela thlahte erawh chu tuipui chhûng lei chârah chuan an kal vek a; tin, tuite chu an ding lampangah leh an vei lampangah chuan an tân bang a lo ni ta mai a. 30 Chutiang chuan a ni, LALPAN Israel-hote chu chumi ni chuan Aigupta mite kut ata a chhanchhuah ni; tin, Israel-hote chuan Aigupta mi thite chu tuipui kamah chuan an hmu a. 31 Tin, Israel-hote chuan LALPAN Aigupta mite chunga thil ropui tak a tih chu an hmu a; tin, mipuite chuan LALPA chu an ṭih a, LALPA leh a chhiahhlawh Mosia chu an ring ta a.
Mosia hla
1 Chutichuan, Mosia leh Israela thlahte chuan LALPA chawimawiin he hla hi an sa a, an sawi dual dual a: “LALPA chawimawiin hla ka sa ang, ropui takin a hneh tâk hi! Sakawr leh a chunga chuang chu tuipuiah a paih thla ta a! 2 LALPA chu ka chakna leh ka hla a ni, Ani chu ka chhandamna a lo ni ta bawk a; Ka Pathian a ni a, amah chu ka fak ang; Ka pa Pathian a ni a, amah chu ka chawimawi ang. 3 LALPA chu indo mi a ni; A hming pawh LALPA a ni. 4 Pharaoa tawlailîrte leh a sipaihote chu tuipuiah a paih thla ta a; Tin, a sipai hotu thlante pawh Tuifinriat Senah an tla hlum zo ta. 5 Tui thûk takin a chîm zo ta; Lung angin tui thûk takah an pil ta. 6 I kut ding lam chu, aw LALPA, thiltihtheihnain a ropui a, I kut ding lam chuan, aw LALPA, hmêlma chu a tisawm ta dep a. 7 I ropuina nasa tak chuan nangmah dotute chu i tiboral vek a; I thinrim i rawn hrithla a, buhpâwl ang maiin an kâng ral zo ta a. 8 I hnâra thawin tuite chu a lo intiang a, Tuite chu englo dah khâwm thûr angin a ding luah a; Tuifinriat chhûng daiha tui thûk takte chu a lo khal zo ta a. 9 Hmêlma chuan, ‘Ka ûm ang a, ka ûmphâk ngei ang, râllâk sum chu ka sem ang; Anmahniah chuan ka châk daih ka hmu tawh ang. Ka khandaih ka phawi ang a, ka kutin anmahni chu ka tiboral ang,’ a ti a. 10 I thli chu i han tlehtîr ta mai a, tuifinriatin a chîm pil ta vek a; Tui thûk takahte chuan suan angin an pil ta vang vang a. 11 Aw LALPA, pathiante zîngah hian nang ang hi tu nge awm le? Thianghlimna lama ropui leh, Fak tlâk nihna lama zahawm leh, thil makte ti ṭhîn hi nang ang tu nge awm le? 12 Nangin i kut ding lam i han phar a, Leiin anmahni chu a lem zo ta a. 13 Nangin i khawngaihnain mipui i tlante kha i hruai a; I chênna thianghlimah chuan i chaknain i hruai ta a. 14 Mi tinrêngin an hria a, an khûr thlu zo va, Philistia rama chêngte chu thlaphânnain a man ta. 15 Tichuan, Edom rama hotute chuan mak an ti hle a; Moab mi chakte chu khurhnain a rawn man a; Kanaan rama awm zawng zawngte chu an tui zo ta. 16 ṭihna leh hlauhnain a tlâkbuak a; I bân chaknain lung ang maiin a tingawi hle hle a, Aw LALPA, i mite an kai vek hma loh chuan, Mi i leite an kai vek hma loh chuan. 17 Nangin anmahni chu i hruai lût ang a, i ro luah tlângah chuan i phun ang, Aw LALPA, nangin i awmna tûra hmun i buatsaihah chuan, Aw LALPA, hmun thianghlim i kut ngeiin a lo dinnaah chuan. 18 LALPA chuan chatuanin ro a rêl tawh ang,” tiin.
Miriami hla
19 Pharaoa sakawrte chu a tawlailîrte chawpin a sakawr chung chuang mite nên chuan tuipuiah an lût thla a, LALPAN tuifinriat tuite chuan a vûr ta a; Israela thlahte erawh chu tuipui chhûng lei chârah chuan an kal vek a. 20 Tin, zâwlnei Miriami, Arona farnuin khuangtê a keng a; tin, hmeichhia zawng zawngin khuangtê kenga lâmin an zui chhuak ve ta hlawm a. 21 Tin, Miriami chuan, “LALPA chawimawiin hla sa rawh u, ropui takin a hneh tâk hi! Sakawr leh a chunga chuang chawpin tuipuiah a paih thla ta a,” tiin hlain a hruai a.
Tui khâ
22 Tichuan, Mosian Israel-hote chu Tuifinriat Sen ata a hruai chhuak a, Sur thlalêr lam panin an chhuak ta a; tin, thlalêrah chuan ni thum zet an kal a, tui an hmu zo ta lo va. 23 Tin, Mara hmun an va thleng a, Mara hmuna tuite chu a lo khâk avâng chuan an in thei lo va; chu vâng chuan a hmingah Mara vuah a ni. 24 Tichuan, mipuite chu, “Eng nge ni kan in dâwn le?” tiin Mosia chungah an phunnawi ta a. 25 Tin, ani chuan LALPA chu a au va; tin, LALPA chuan thing pakhat hi a han kawhhmuh a, chu chu tuiah chuan a zuk paih lût a; tichuan, tui chu a lo tui ta a. Chutah chuan thuruat leh rorêlna a siamsak a; chutah chuan anmahni fiahna a siam a, 26 “LALPA i Pathian aw hi ngun taka i ngaihthlâka, a mit hmuha ṭha a tih zâwngte i tiha, a thupêkte i ngaihsâna, a thuruat zawng zawngte i pawm chuan, Aigupta mite chunga hri ka lêntîr tâk angte kha i chungah rêng rêng ka lêntîr ve lo vang. Kei LALPA a tidamtu che ka nih hi,” a ti a. 27 Tin, Elim hmun an va thleng a, chutah chuan tuihna nei sâwm leh pahnih leh tûm thing sawmsarih a awm a; tin, chuta tui kamahte chuan an riak ta a.
Manna leh vahmîm
1 Tin, Elim hmun ata chu an chhuak a, tin, Israela thlahte pung khâwmho zawng zawng chuan Aigupta ram ata an chhuah achin thla hnihna, ni sâwm leh ni nga niin Elim hmun leh Sinai tlâng inkâra Sin thlalêr an va thleng a. 2 Tin, thlalêrah chuan Israela thlahte pung khâwmho zawng zawng chu Mosia chungah leh Arona chungah an lo phunnawi ta a. 3 Tin, Israela thlahte chuan an hnênah, “Aigupta rama sa bêl bula kan ṭhut lai te leh chhang khamkhawp kan ei lai te khân LALPA kutah lo thi ta zâwk mai ila aw! Mipui pung khâwmho zawng zawngte hi thlalêrah hian rilṭâma tihhlum tûrin min hruai chhuak a nih hi le,” an ti a. 4 Chutichuan, LALPAN Mosia hnênah, “Ngai rawh, vân aṭangin in tân chhang ka rawn sûrtîr ang e; tichuan, mipuiten ni tin ni khat atâna chanvo tâwk chauh zêl chu va chhar ṭhîn rawh se, ka dân an zâwm nge zâwm lo ka fiah theih nân. 5 Tin, heti hi a ni ang a, a ni ruk ni chuan an va chhara chu an buatsaih ang a; tin, ni tina an chhar leh hnih zêl a ni ang,” a ti a. 6 Tin, Mosia leh Aronan Israela thlahte zawng zawng hnênah chuan, “Tlai lamah chuan LALPA chu Aigupta ram ata hruai chhuaktu ngei che u a ni tih in hre dâwn e. 7 Tin, zîngah pawh LALPA ropuina chu in hmu dâwn e; LALPA chunga in phunnawina kha a lo hriat tâk hi. Keinite chu eng nge kan niha, kan chunga in phunnawi mai ni?” an ti a. 8 Tin, Mosian, “Chûng chu in la hria ang, LALPAN tlai lama sa ei tûr a pêk che ua, zîng lama chhang kham khawp a pêk hunah che u chuan; LALPA chuan a chunga in phunnawina kha a hre reng si a. Keinite chu eng nge kan nih ni? Kan chunga phunnawi in ni hlei nêm, LALPA chunga phunnawi asin in nih ni,” a ti a. 9 Tin, Mosian Arona hnênah, “Israela thlah pung khâwm zawng zawng hnênah hian, ‘LALPA kiang hnaiah lo kal rawh u, in phunnawinate kha a lo hriat tâk hi,’ ti ang che,” a ti a. 10 Tin, heti hi a ni a, Israela thlah pung khâwm zawng zawng hnêna Aronan thu a sawi lai tak chuan, thlalêr lam chu an han thlîr a; ngai teh, LALPA ropuina chu chhûmah a lo lang ta a. 11 Tin, LALPAN Mosia a bia a, 12 “Israela thlahte phunnawinate kha ka lo hria a. An hnênah, ‘Tlai lamah chuan sa in ei ang a, a tûkah chuan chhang kham khawp zetin in ei tawh ang. Tichuan, kei hi LALPA in Pathian chu ka ni tih in hria ang, a ti e,’ ti ang che,” tiin. 13 Tin, heti hi a ni a, tlai lamah chuan vahmîm an lo thlâwk chho chiam a, an riahhmun chu a dâp ta dul a; tin, a tûkah chuan an riahhmun vêlah chuan dai a lo tla dup a. 14 Tin, dai tla chu a han hul veleh chuan, ngai teh, thlalêr lei chungah chuan thil pêr tê tê, vûr thal tiat lek lek tê hi a lo awm tuar mai a. 15 Chu chu Israela thlahten an han hmuh chuan, “Eng nge maw ni chu le?” an ti hlawm a; eng nge ni tih an hre si lo va. Tin, Mosian an hnênah, “LALPAN chhang in ei atâna a pêk che u a nih hi. 16 Hei hi a ni LALPAN, ‘Mi tinin mahni kham khawp ṭheuh chhar ulangin, mi pakhat tân omer khat zêl, in chhûngkaw mihring awm zât ang zêlin in chhar tûr a ni; mi tinin in puan in chhûnga awmte tân chuan in chhar tûr a ni,’ tia thu a pêk chu ni,” a ti a. 17 Tin, Israela thlahte chuan chutiang chuan an ti a, ṭhenkhatin an chhar tam a, ṭhenkhatin an chhar tlêm a. 18 Tin, omer-in an han teh a, a chhar tamin a chuangin a nei lo va, a chhar tlêmin a tlachham hek lo; mi tinin mahni kham tâwk an chhar ṭheuh va. 19 Tin, Mosian an hnênah, “Tu mahin a tûk lam atân chuan khêk suh ang che u,” a ti a. 20 Nimahsela, Mosia thu chu an pawm duh lo va. ṭhenkhat chuan a tûk lam atân an khêk a; tichuan, a lo lung a, a lo rimchhe ta a. Chuvângin, Mosia chu an chungah a thinrim ta hle a. 21 Chutichuan, tûk tin mi tinin mahni kham khawp lek zêlin an chhar ṭhîn a; ni a lo tlângsân veleh a tui ral vek ṭhîn a. 22 Tin, heti hi a ni a, a ni ruk ni chuan chhang chu a leh hnih, mi pakhat tân omer hnih zêl an chhar a. Tin, chûng pung khâwmho rorêltu zawng zawngte chuan Mosia an va hrilh a. 23 Tin, ani chuan an hnênah, “Chu chu alâwm LALPAN, ‘Naktûk hi chawlh dêr ni, LALPA tâna Chawlhni thianghlim a ni e,’ a tih chu. Chuvângin, a âwma âwm in duh leh âwm ulangin, a chhuma chhum in duh leh chhûm rawh u; chumi bâng chu a tûk lam atân in dah dâwn nia,” a ti a. 24 Tin, Mosia hrilh ang chuan a tûk lam atân an dah hrang ta a; chu chu a rimchhe lo va, a lung hek lo. 25 Tichuan, Mosian, “Vawiin chuan hei hi ei rawh u, vawiin hi LALPA tân Chawlhni a nih hi; vawiinah zawng leia tla in hmu lo vang. 26 Ni ruk chhûng chuan in va chhar ṭhîn ang a; a ni sarih ni erawh chu Chawlhni a ni a, chhar tûr rêng rêng a awm lo vang,” a ti a. 27 Tin, heti hi a ni a, a ni sarih ni chuan mi ṭhenkhat chu chhar tûrin an va chhuak a, chhar tûr rêng rêng an hmu zo ta lo va. 28 Tichuan, LALPAN Mosia hnênah, “Ka thupêkte leh ka dânte hi eng chen nge maw pawm duh loh in tum ni aw! 29 LALPAN Chawlhni a pêk che u hi hre ta che u maw le! Chuvângin, ni ruk niin ni hnih tla tâwk tûr chhang a pe che u a nih hi. Mi tin mahni hmun ṭheuhvah awm hle hle mai rawh u; ni sarih ni chuan tu mah an awmna hmun ata chhuak hauh suh se,” a ti a. 30 Chutichuan, mite chu ni sarih ni chuan an châwl ta a. 31 Tin, Israela chhûngte chuan chumi hmingah chuan Manna an vuah a. Koriander mu ang maia vâr ser a ni a; han ei chuan chhangpêr, khawizu nêna siam ang a ni. 32 Tin, Mosian, “Hei hi alâwm LALPAN, ‘Hei hi in thlahte thlengin omer khat vawng ṭha rawh u; Aigupta ram ata ka hruai chhuah lai che ua, thlalêra ka châwm ṭhinna che u chhang chu an rawn hmuh theih nân,’ tia thu a pêk chu,” a ti a. 33 Chutichuan, Mosian Arona hnênah, “Bêl va la langin, manna hi omer khat khung rawh, in thlahte thlenga vawn reng tûrin LALPA hmaah dah ang che,” a ti a. 34 LALPAN Mosia thu a pêk ang chuan Arona chuan vawn reng tûrin Thuhriattîrna hmaah chuan a dah a. 35 Israela thlahte chuan mihring chênna ram an thlen hma loh chuan, kum sawmli chhûng chu manna an ei ṭhîn. 36 Omer khat hi epha hmun sâwma ṭhena hmun khat hu a ni.
Lungpui ata tui
1 Tin, Israela thlahte pung khâwmho zawng zawng chu Sin thlalêr ata an chhuak leh a, LALPA thupêk angin riah bi nei thliah thliaha riakin, Rephidim-ah an inkhuar a; amaherawhchu, chutah chuan mipuite in tûr tui a awm ta lo va. 2 Chuvângin, mipuite chuan Mosia chu an bei ta a, “Tui in tûr min pe rawh,” an ti a. Tin, Mosian an hnênah, “Engati nge mi beih mai? Eng vângin nge LALPA in fiah ni?” a ti a. 3 Chutah chuan mipuite chu tuihâlin an awm a ni a; tichuan, mipuite chu Mosia chungah an phunnawi a, “Eng vângin nge kan fanaute leh kan rante nên hian tuihâla tihhlum tûrin Aigupta ata min hruai chhuah ni?” an ti a. 4 Tin, Mosian, “Hêng mipuihote hi engtin nge ka tih ang? Lunga mi den hlum hial pawh an duh âwm hi,” tiin LALPA chu a au va. 5 Tin, LALPAN Mosia hnênah, “Mipuiho hma lamah kal langin, Israela thlahte upaho ṭhenkhat hruai ve ang che; tin, i tiang, hmâna lui i vuakna kha keng langin, kal rawh. 6 Ngai teh, Horeb-a lungpui chungah sâwn i hmaah ka lo ding ang a; tin, lungpui chu i han vua ang a; tichuan, mipuite in tûr tui chu a lo luang chhuak mai ang,” a ti a. Tin, Mosian Israela thlahte upaho mit hmuhah chuan chutiang chuan a han ti a. 7 Chumi hmun hmingah chuan Masa leh Meriba a vuah a; Israela thlahten an beih avâng leh, “Kan zîngah hian LALPA chu a awm nge maw awm lo le?” tia LALPA chu an fiah avângin.
Amalek-hote nêna inbeih
8 Tin, Rephidim hmunah chuan Amalek-hovin Israel-ho chu an rawn bei ta a. 9 Chutichuan, Mosian Josua hnênah, “Kan zînga mi hi thlang chhuak la, Amalek-ho hi va bei rawh u khai. Naktûkah tlâng chhîpah khian Pathian tiang kengin ka lo ding ang e,” a ti a. 10 Tichuan, Mosian a hnêna a sawi ang chuan Josua chuan a ti a, Amalek-ho chu a va bei ta a. Tin, Mosia leh Arona leh Hura chu tlâng chhîpah an han lâwn a. 11 Tin, heti hi a ni a, Mosian a bân a phar veleh Israel-hote chuan an hneh ṭhîn a; a bân a lâk thlâk veleh Amalek-hote chu an chak ṭhîn a. 12 Nimahsela, Mosia bânte chu a lo kham ta a; tichuan, lung an la a, a bulah chuan an dah a, chutah chuan a ṭhu ta a. Tin, Arona leh Hura chuan a kut chu an dâwmsak ta a, pakhatin lehlam a dâwm a, pakhatin a lehlam a dâwm a; chutichuan, ni tlâk thlengin a kutte chu a awm ngaiin a awm ta tlat a. 13 Tin, Josua chuan Amaleka leh a hote chu khandaih hriamin a tudawl ta a. 14 Tin, LALPAN Mosia hnênah, “Hemi thu hi hriat reng atân lehkhabuah ziak la, Josua hriatah sawi chhuak ṭhîn ang che; vân hnuaiah hian Amalek-ho hi an awm tih pawh hriat loh khawpin ka tichimit hlauh dâwn e,” a ti a. 15 Tin, Mosian maichâm a siam a, a hmingah chuan Jehova-nisi a vuah a; 16 “LALPAN chhia a chham ta: LALPAN chhuan awm chhûng zawng zawng chuan Amalek-ho chu a do vang,” a ti a.
Jethroan Mosia a tlawh
1 Tin, Jethroa, Midian rama puithiam, Mosia puzawn chuan Pathianin Mosia leh a mi Israel-hote thil a tihsakzia zawng zawngte leh, LALPAN Israel-hote chu Aigupta ram ata a hruai chhuah ziate chu a lo hria a. 2-3 Tin, Mosia puzawn Jethroa chuan Mosia nupui Zipori, Mosian a hâwntîr kha, a fapate pahnih nên a hruai a; chu mi pakhat hming chu Gersoma a ni a, “Mi rama awm ka nih avângin,” a ti a; 4 tin, pakhata hming chu Eliezera a ni, “Ka pa Pathian chu mi ṭanpuitu a ni a, Pharaoa khandaih lak ata chu mi chhanhim tâk avângin,” a ti a; 5 tin, Mosia puzawn Jethroa chu Mosia fapate leh a nupui nên, Mosia hnênah thlalêra a riahna Pathian tlângah chuan an va kal a. 6 Tin, ani chuan Mosia hnênah, “Kei i puzawn Jethroa hi i nupui nên, i fa pahnih nên kan lo kal e,” a ti a. 7 Tin, Mosia chu a puzawn hmuak tûrin a va chhuak a, chibai a va bûk a. Chanchin te an inzâwt a; tichuan, puan inah an lût ta a. 8 Tin, LALPAN Israel-ho avânga Pharaoa leh Aigupta-hote chunga a tih zia zawng zawngte leh, kawnglaka hrehawm an tuarzia zawng zawngte leh, LALPAN anmahni a chhanhimzia te chu Mosia chuan a puzawn chu a hrilh a. 9 Tin, LALPAN Israel-hote chu Aigupta-ho lak ata a chhanhima, anmahni thil a lo tihsak tâkzia leh, an chunga a ṭhatna zawng zawng avângte chuan Jethroa chu a lâwm êm êm mai a. 10 Tin, Jethroa chuan, “LALPA, Aigupta-ho lak ata leh Pharaoa lak ata chhanhimtu che u chu fakin awm rawh se; ani chuan Aigupta-ho thuhnuaia awm mipuite chu a chhanhim tâk hi. 11 Tûnah chuan LALPA chu pathian dang zawng zawngte ai chuan a ropui zâwk tih ka hre ta; a ni, Israel-te laka chapo takte chungah chuan a lo lang a ni,” a ti a. 12 Tin, Mosia puzawn Jethroa chuan hâlral thilhlan leh Pathian tâna inthawina tûrte a va la a; tin, Arona leh Israel upaho zawng zawngte chu Mosia puzawn hnênah chuan Pathian hmaah chhang ei tûrin an kal a.
Rorêl tûr mi ruat
13 Tin, heti hi a ni a, a tûkah chuan Mosia chu mipuite ro rêl tûrin a ṭhu a; tin, mipuite chu zîng ata tlai thlengin Mosia kiang vêlah chuan an ding reng a. 14 Tin, Mosia puzawnin chutia mipuite tâna thil a tih zawng zawng chu a han hmuh chuan, “Mipuite hi thil eng nge maw i tihsak chu le? Engtizia nge nangmah chauh hi i ṭhut renga, zîng ata tawh tlai thlenga mipui zawng zawngte hi i kiang vêla an din reng?” a ti a. 15 Tin, Mosian a puzawn hnênah, “Mipuite hi Pathian râwn tûrin ka hnênah an lo kal a ni ber e. 16 Thu eng emaw an neih chuan ka hnênah hian an lo kal ṭhîn a; tichuan, keiin a ṭhenawmpa nêna an thu chu ka lo rêlsak a; tin, Pathian remruat leh a dânte chu ka lo hriattîr ṭhîn a ni,” a ti a. 17 Tin, Mosia puzawn chuan a hnênah, “I thiltih dân chu a ṭha lo a ni. 18 Nang leh hêng i hnêna mipui awmte hi in intichau zo ngei ang maw le. He hna hi i tân a hautak lutuk a ni; nangmah chauhva han tlin chi a ni hlei nêm. 19 Ka thu hi ngaithla teh khai; rem ka han ruatpui ang chia, i hnênah Pathian awm rawh se: nang hi Pathian hmaah mipui aiawhin awm langin, an thubuaite chu Pathian hnênah thlen ang che. 20 Tin, thuruatte leh dân chu i zirtîr ang a, an awm dân tûr leh an tih dân tûrte chu i kawhhmuh zêl tûr a ni. 21 Chu bâkah, mipui zîng ata mi hman tlâk deuh deuh, Pathian ṭih mite, mi dik takte, hlâwkna dik lo tak haw mite thlang chhuak langin; chutiang mite chu sâng pâwl chunga hotuah te, za pâwl chunga hotuah te, sawmnga pâwl chunga hotuah te, sâwm pâwl chunga hotuah te i ruat dâwn nia. 22 Chûngte chuan eng lai pawhin mite ro rêlsak rawh se. Tin, heti hi a ni ang, thu lian deuh apiang chu i hnênah an rawn thlen ṭhîn ang a, thu tê tham erawh chu anmahniin rêl rawh se. Chutichuan, i tân a lo awlsam zâwk ang a, anni chuan an chhâwk zâng hle dâwn che nia. 23 Chutianga i tiha, Pathian pawhin thu a pêk che chuan i tlin thei ang a; tichuan, hêng mipuiho zawng zawngte pawh hi lungawi takin mahni awmna lamah an ṭîn thei dâwn nia,” a ti a. 24 Chutichuan, Mosia chuan a puzawn thusawi chu a pawm a, a sawi ang zawng zawng chuan a ti ta a. 25 Tin, Mosia chuan Israel-ho zawng zawng zing ata chu mi hman tlâk deuh deuh a thlang chhuak a, mipui chunga hotuah a siam a, sâng pâwl chunga hotuah te, za pâwl chunga hotuah te, sawmnga pâwl chunga hotuah, te sâwm pâwl chunga hotuah te a ruat ta a. 26 Chûngte chuan eng lai pawhin mite ro an rêlsak ṭhîn a; thu lian deuh apiang chu Mosia hnênah an thlen ṭhîn a, thu tê tham erawh chu anmahnihovin an rêl ṭhîn. 27 Tichuan, Mosia chuan a puzawn chu a kaltîr a, a awmna ram lamah chuan a haw leh ta a.
Israel-ten Sinai tlâng an thleng
1 Israela thlahte Aigupta ram ata an chhuah achin a thla thumna, chumi ni tak chuan Sinai thlalêr an thleng a. 2 Rephidim hmun ata an chhuaha, Sinai thlalêr an va thlen chuan thlalêrah chuan an riak a; chutah chuan Israel-hote chu tlâng bulah chuan an riak a. 3 Tin, Mosia chu Pathian hnênah a han chho va; tichuan, LALPA chuan tlâng aṭangin a bia a, a hnênah, “Jakoba chhûngte hnênah hetiang hian ti la, Israela thlahte hnênah pawh: 4 ‘Aigupta-hote chunga ka tih ziate leh, mupui thlaa ka put che ua, ka hnêna ka hruai thlen zia che u hi in hmu a. 5 Chuvângin, ka thu in awih takzeta, ka thuthlung hi in pawm chuan khawvêl hnam zawng zawng zîngah hian ka tân ro thlan bîk in ni ang; khawvêl pum pui hi ka ta a ni si a. 6 Tichuan, ka tân puithiam chi, hnam thianghlim in ni ang,’ tiin hrilh ang che. Hêng thu hi Israela thlahte hnêna i sawi tûr chu a ni,” a ti a. 7 Tin, Mosian mipui zînga upahote chu a ko khâwm a, LALPA thupêk zawng zawngte chu a hrilh vek a. 8 Tin, mipuiho zawng zawng chuan, “LALPA sawi zawng zawngte chu kan ti zêl ang e,” tiin a rualin an chhâng dual dual a. Tichuan, Mosian mipuite thusawi chu LALPA a hrilh lehchhâwng a. 9 Tin, LALPA chuan Mosia hnênah, “Ngai teh, ka biak lai tak che mipuiin an hriat ve theiha, kumkhuaa i thu chu an awih theihna tûrin chhûm chhah mupah i hnênah ka lo kal dâwn e,” a ti a. Tichuan, Mosian mipuite thusawi chu LALPA a hrilh lehchhâwng a. 10 Tin, LALPAN Mosia hnênah, “Mipuiho hnênah va kal la, vawiin leh naktûk hian anmahni chu tithianghlim ang che, an puante su fai sela. 11 A ni thum ni atân inpuahchah rawh se. A ni thum ni chuan mipuiho zawng zawng mit hmuhah Sinai tlângah chuan LALPA a lo chhuk dâwn e. 12 An hnênah, ‘Fîmkhur ula, tlângah khian han lâwn hauh suh ula, tlâng hmâwr pawh han dek hlek suh ang che u. Tu pawh tlâng han dek apiang chu tihhlum ngei ngei tûr an ni ang. 13 Kut rêng rêngin deh tûr a ni lo va, lunga den hlum ngei ngei tûr a ni, a nih loh leh, kah tlang tûr a ni ang; sa pawh, mihring pawh an nung lo vang,’ tiin hrilh la. Tawtawrâwt a rîk ruai ruai hunah chuan tlângah khian an lâwn chho tûr a ni, tiin mipuiho tân ri khamsak ang che,” a ti a. 14 Chutichuan, Mosia chu tlâng ata mipuiho zîngah chuan a chhuk a, mipuite chu a tithianghlim a; tin, an puante an su fai a. 15 Tin, mipuihote hnênah chuan, “A ni thum ni atân chuan inpuahchah rawh u; hmeichhe kiangah rêng rêng kal suh u,” a ti a. 16 Tin, heti hi a ni a, a ni thum ni zîngah chuan khawpuite a lo ri a, kâwlte a lo phe a, tlâng chhîpah chuan chhûm a lo zîng chhah mup a, tawtawrâwt ring êm êm maiin a lo ri a; tichuan, mipui riahhmuna awmho zawng zawng chu an khûr a. 17 Tichuan, Mosian mipuiho chu Pathian be tûrin riahhmun ata chu a hruai chhuak hlawm a; tlâng bulah chuan an ding a. 18 Tin, Sinai tlângah chuan LALPA chu meia a lo chhuk avângin a khu phui ta mup a. Chu meikhu chu rawh tuina meikhu ang maiin a khu chho ngut ngut a; tichuan, tlâng pum pui chu a nghîng dur dur a. 19 Tin, tawtawrâwt ri chu a ring telh telh a, Mosia chuan thu a han sawi a, Pathian awin a lo chhâng a. 20 Tichuan, LALPA chu Sinai tlâng, tlâng chhîpah chuan a lo chhuk a. LALPA chuan Mosia chu tlâng chhîpah a ko chho va; tichuan, Mosia chu a han chho va. 21 Tin, LALPA chuan Mosia hnênah, “Zuk chhuk langin, mipuite khu zuk zilh rawh; chuti lo zawng, LALPA hmêl hmuh tumin an lo lût tlang mai ang e, mi tam tak an boral mai tûr a nia. 22 Tin, puithiamho, LALPA kianga lo kal vete pawh chu intithianghlim ve rawh se; chuti lo zawng, an chungah LALPA chu a ṭuan mai ang,” a ti a. 23 Tin, Mosian LALPA hnênah, “Mipuiho hi Sinai tlângah hian an lo chho thei hlei nêm; nangin, ‘Tlâng vêlah hian ri khamsak la, tithianghlim ang che,’ tiin thu min pe alâwm,” a ti a. 24 Tin, LALPAN a hnênah, “Kal la, zuk chhuk tawh; tin, Arona nên lo chho leh ang che u. Amaherawhchu, puithiamho leh mipuiho chu LALPA hnêna lo kal tumin lo lût tlang mai suh se; chuti lo zawng, an chungah a ṭuan mai tûr a nia,” a ti a. 25 Chutichuan, Mosia chu mipuite hnênah chuan a zuk kal a, chûng thu chu a zuk hrilh a.
Thu sâwm pêk
1 Pathianin hêng thu zawng zawng hi a hrilh a, 2 “Kei, LALPA i Pathian, Aigupta ram ata, bawih ata hruai chhuaktu che u ka ni. 3 “Keimah lo chu pathian dang rêng rêng i nei tûr a ni lo. 4 “Milem siam chawp leh thil a anpui rêng rêng, chung lam vâna mi emaw, hnuai lam leia mi emaw, lei hnuai lama tuia mi emaw, i tân i siam tûr a ni lo; 5 chûng chu chibai i bûk tûr a ni lo va, an rawng i bâwl tûr a ni hek lo. Kei, LALPA i Pathian hi, Pathian thîkthuchhia, pate khawlohna avânga fate hrem ṭhîn, mi hawtute chu chhuan thumna leh chhuan lina thlenga hrem ṭhîn leh, 6 mi hmangaiha ka thupêkte pawmtu sâng tam takte chunga khawngaihna lantîr ṭhîn ka nih hi. 7 “LALPA i Pathian hming chu i lam mai mai tûr a ni lo; LALPA chuan a hming lam mai mai chu thiam loh chantîr lohvin a chhuah dâwn si lo va. 8 “Chawlhni hi thianghlim taka serh tûr a ni tih hre reng rawh. 9 Ni ruk chhûngin i thawk tûr a ni a, i hna zawng zawng chu i thawk tûr a ni; 10 a ni sarih ni erawh chu LALPA i Pathian tân Chawlhni a ni e. Chumi ni chuan hna rêng rêng i thawk tûr a ni lo: nang pawhin, i fapa pawhin, i fanu pawhin, i bawihpa pawhin, i bawihnu pawhin, i ran pawhin, i ina hnam dang pawhin. 11 Ni ruk chhûngin LALPAN lei leh vân te, tuifinriat leh a chhûnga awm zawng zawngte chu a siam a; tin, a ni sarih ni chuan a châwl ta si a. Chuvângin, LALPAN Chawlhni chu mal a sâwm a, a tithianghlim ta a ni. 12 “I nu leh i pa chawimawi rawh; tichuan, LALPA i Pathianin ram a pêkah che hian i dam rei dâwn nia. 13 “Tual i that tûr a ni lo. 14 “I uire tûr a ni lo. 15 “I ru tûr a ni lo. 16 “I vêngte chungah hretu derah i insiam tûr a ni lo. 17 “I vêngte chhûngte chu i awt tûr a ni lo va, i vêngte nupui chu i awt tûr a ni lo, a bawihpa emaw, a bawihnu emaw, a bâwngpa emaw, a sabengtung emaw, i vêngte ta rêng rêng chu eng mah i awt tûr a ni lo,” tiin.
Mipui an thlabâr
18 Tin, mipui zawng zawngte chuan khawpui ri te, kâwlphe te, tawtawrâwt ri te, tlâng khu te chu an hmu a; tin, mipuiin an han hmuh chuan an khûr a, hla takah an ding ta a. 19 Tichuan, Mosia hnênah, “Nangmân kan hnênah hian thu sawi zâwk teh khai, kan lo ngaithla ang e; amaherawhchu, Pathian zawngin kan hnênah thu sawi tawh teh suh se; chuti lo zawng, kan thi mai dah ang e,” an ti a. 20 Tin, Mosia chuan mipuite hnênah chuan, “Hlau suh u; Pathianin a rawn fiah che u a nih hi, in mit hmuhah ṭihbaiawma a awmna hi in sual lohna tûrin a ni e,” a ti a. 21 Tin, mipuite chu hla takah an la ding reng a, Mosia chuan Pathian awmna thim chhah mup kiang chu a va pan a.
Maichâm siam dân tûr
22 Chutichuan, LALPAN Mosia hnênah, “Israela thlahte hnênah hetiang hian va sawi rawh: ‘Nangmahni ngeiin hei vân aṭanga ka rawn biakzia che u in hre tawh a. 23 Pathian dang rêng rêng chu ka kiangah chuan in rawn nei tûr a ni lo; tangkaraw pathiante emaw, rangkachak pathiante emaw in tân in siam tûr a ni lo. 24 Ka tân lei maichâm i siam tûr a ni a, chutah chuan i berâmte leh i sebâwngte chu i hâlral thilhlanahte leh i remna inthawi nânte i hlân ṭhîn tûr a ni. Hmun tinah ka hming ka hriattîrna apiangah chuan i hnênah ka lo kal ṭhîn ang a, mal ka rawn sâwm ṭhîn ang che. 25 Tin, lung maichâm mi siamsak dâwn chuan lung chherin i siam tûr a ni lo ve; i hriamhrei chu i hman hlauh zawngin i tibawlhhlawh a ni dâwn si a. 26 Ka maichâm lâwn chhohna rahkaahte chuan lâwn pawh i lâwn chho tûr a ni lo ve, saruaka i awm a lan lohna tûrin,’ tiin.
Bawih neih dân tûr
1 “Tichuan, hêngte hi a ni an hnêna rorêl dân tûr i hriattîr tûrte chu: 2 “Hebrai mi, chhiahhlawhah lo lei ang la, kum ruk rawng a bâwl ang a; tin, a kum sarih kum chuan intlan lo pawhin a chhuak mai thei ang. 3 Amah ngawta lo lût a nih chuan amah ngawtin a chhuak leh mai ang; nupui nei a nih chuan a nupui pawh chu a chhuak tel ve bawk ang. 4 A puin nupui lo neihsak sela; tin, fanu emaw, fapa emaw lo hrinsak sela; a nupui leh a fate chu a pu ta an ni ang a, ani erawh chu amah ngawtin a chhuak tûr a ni. 5 Amaherawhchu, bawih chuan, ‘Ka pu te, ka nupui te, ka fa te hi ka hmangaih êm mai a; ka chhuak duh lo ve,’ a tih tlat chuan, 6 a puin Pathian hnênah hruai sela, kawngkâah emaw, kawngka biangah emaw hruai sela, a puin a beng chu thir zumin vit sela; tichuan, kumkhuain a rawng a bâwl tawh ang. 7 “Miin a fanu chu bawihnu atân hralh sela, chhiahhlawh mipate ang chuan a chhuak ve lo vang. 8 A pu chuan a nupui atân lo hual sela, ani chuan a pu chu lo tilâwm leh thei ta si lo sela, a intlantîr leh tûr a ni, a lo bum avâng chuan hnam dangte hnêna zawrh leh theihna a nei hlek lo vang. 9 Tin, a fapa tâna nupuia hualsak duh a nih chuan, fanute en ang bawkin a en tûr a ni. 10 Nupui dang lo nei leh mah sela, a ei tûr sa te, a silhfên te, a nupui a nihna te kha a tihlêm chuansak tûr a ni lo ve. 11 Chu thil kawng thum chu a tih loh chuan tangka pe lovin a chhuak mai thei ang.
Invuak hlum chungchâng rêl dân tûr
12 “Tu pawhin mi lo vua sela, chu mi chu thi ta sela, tihhlum ve ngei ngei tûr a ni. 13 Tin, miin tum rêng vâng ni lova, Pathian chaltawhtîr a nih erawh chuan, a tlân luhna tûr hmun ka ruatsak ang che. 14 Amaherawhchu, miin tum lui rêngin a ṭhenawm chu fin vervêkin thah tum sela, thi tûrin ka maichâm ata chu hruai ang che. 15 “Tu pawh a nu emaw, a pa emaw vua apiang chu tihhlum ngei tûr a ni. 16 “Tu pawh mihring rua zuar emaw, a la kawl lai ngei emaw an hmuh chuan, chu mi chu tihhlum ngei tûr a ni. 17 “Tu pawh a nu emaw, a pa emaw ânchhia lawh apiang chu tihhlum ngei tûr a ni. 18 “Tin, mi lo inhnial sela, pakhat chuan lungtumin chhu sela emaw, a kuttumin chûm sela emaw, thih chu thi lo sela, amaherawhchu khumbetin tlûk phah sela, 19 lo tho leh theiin tiang hawlin lo kal leh thei sela, a kut thlâktua chu chhuah tûr a ni. A hun sên hu kha erawh chu a rûl ang a, a dam feltîr viah tûr a ni. 20 “Tin, miin a chhiahhlawh emaw, a bawihnu emaw tiangin vua sela, a kutah chuan lo thi ta sela, amah chu hrem ngei tûr a ni. 21 Amaherawhchu, ni khat emaw, ni hnih emaw dam sela, hrem tûr a ni lo vang; a chhiahhlawh chu a sum leh pai a ni si a. 22 “Tin, mi lo insual ta sela, hmeichhe nau pai vaw palh ang sela, a nau pai chu lo tla sela, chhiatna dang erawh chu awm lo sela, chu hmeichhe pasalin a ngen zât chu chawitîr ngei tûr a ni a; rorêltute ruat ang zât chu a pe tûr a ni. 23 Amaherawhchu, chhiatna dang lo awm sela chuan nun aia nun, 24 mit aia mit, hâ aia hâ, kut aia kut, ke aia ke, 25 tihkan aia tihkan, hliam aia hliam, vuak aia vuak i tuartîr tûr a ni. 26 “Tin, miin a chhiahhlawh mit emaw, a bawihnu mit emaw vuain, lo tichhe ta sela, a mit avâng chuan a chhuahtîr tûr a ni. 27 Tin, a bawihpa hâ emaw, a bawihnu hâ emaw lo vuak balsak sela, a hâ avâng chuan a chhuahtîr tûr a ni.
Ran pawi khawih a neitu mawhphurhna
28 “Tin, sebâwngpain mipa emaw, hmeichhia emaw lo si hlum ta sela, chu sebâwngpa chu lunga den hlum ngei tûr a ni a, a sa chu ei tûr a ni lo; sebâwngpa neitua erawh chu hrem loh tûr a ni. 29 Amaherawhchu, sebâwngpa chuan tûn hma pawhin mi sîk lo hmang ṭhîn sela, a neitu chu lo hriattîr tawh bawk sela; nimahsela, khung duh chuang lovin, mipa emaw, hmeichhia emaw lo si hlum ta sela, chu sebâwngpa chu lunga den hlum tûr a ni a, a neitu pawh chu tihhlum bawk tûr a ni. 30 A tlana tlan tûrin lo tuk zâwk sela erawh chuan, a nunna aiah chuan an tuk zât apiang chu tlan nân pêk tûr a ni. 31 Mi fapa emaw, mi fanu emaw pawh lo si hlum ni sela, hetiang dân bawk hian rêl tûr a ni. 32 Sebâwngpain bawihpa emaw, bawihnu emaw lo si hlum ta sela, an pu chu tangka sekel sawmthum a pe ang a; tin, sebâwngpa chu lunga den hlum tûr a ni ang. 33 “Tin, miin khuarkhurum chhîn lo hawng sela emaw, miin khuarkhurum lo siam sela emaw, lo chhîn lo sela, sebâwngpa emaw, sabengtung emaw lo tla ta sela, 34 chu khuarkhurum neitu chuan a rûl tûr a ni; ani chuan chûng ran neitu chu tangka a pe ang a, anin ran thi chu a ruang a hlâwm thung ang. 35 “Tin, mi pakhat sebâwngpain mi sebâwngpa lo si hlum sela, sebâwngpa dam zâwk chu an zuar ang a, a man chu an insem ang; tin, a thia pawh chu an insem ang. 36 Sebâwngpa chuan tûn hma pawhin mi sîk lo hmang ṭhîn sela, a neitu chuan khung duh si lo sela, sebâwngpa aiah chuan sebâwngpa vêk chu a pe ngei ngei tûr a ni a; tin, ran thi ruang chu a hlâwm ang.
Thubuai chi hrang hrang chungchânga dân
1 “Tin, miin sebâwngpa emaw, berâm emaw ru sela; tin, lo talhin emaw, lo zuar emaw ta sela, sebâwngpa pakhat aiah chuan sebâwngpa panga a chawi ang a, berâm pakhat aiah chuan berâm pali a chawi ang. 2 Rûkru, mi ina lût chu lo manin lo vaw hlum ta sela, a vaw hlumtu chu a thisen chhuah ve tûr a ni lo ve. 3 Niin a rawn chhuah hnan hman erawh chuan a thisen chhuah ve tûr a ni ang (Rûkru chuan kim takin a pe kîr leh tûr a ni; pêk tûr a neih loh erawh chuan rûk a rûk avângin amah chu an zuar tûr a ni). 4 Rûkruin a thil rûk - sebâwngpa emaw, sabengtung emaw, berâm emaw - a nungin lo la nei reng sela, a leh hnih a chawi tûr a ni. 5 “Miin mi lovah emaw, mi grêp huanah emaw a ran thlahin an huan thlai ei zawhtîr ta sela, ama lo ṭha ber emaw, ama grêp huan ṭha ber emawin a rûl leh tûr a ni. 6 “Mei chhuahin hlîng ṭawmte emaw lo manin, buhphalte emaw, buh ding lai emaw, lo emaw lo kâng ta vek sela, mei chhuahtu ngeia chuan a rûl ngei tûr a ni. 7 “Miin a tangka emaw, a bungrua emaw a ṭhenawm vawntîr sela; tin, chumi in ata chu miin lo ru ta sela, rûkru chu an man chuan a leh hnih a chawi tûr a ni. 8 Rûkru chu an man si loh chuan, chumi in neitupa chu Pathian kiangah va kal sela, a ṭhenawmpa bungrua chu aman a lo lâk a nih leh nih loh va fiah rawh se, 9 Bawhchhiatna tawh phawt chu sebâwngpa thu-ah emaw, sabengtung thu-ah emaw, berâm thu-ah emaw, silhfên thu-ah emaw, thil eng pawh bo chungchâng thu-ah rêng rêng - miin, ‘Hei chu ka ta a ni,’ lo ti ta sela, an pahniha thubuai chu Pathian hnênah thlen tûr a ni; Pathianin thiam loh a chantîr zâwk apiang chuan a ṭhenawmpa lakah chuan a leh hnih a chawi ang. 10 “Miin sabengtung emaw, sebâwngpa emaw, berâm emaw, ran eng pawh a ṭhenawmpa lo enkawltîr sela; tin, lo thiin emaw, lo silin emaw, suamin emaw lo awm sela, tu mân hmu si suh sela, 11 ani chuan a ṭhenawmpa ran chu a khawih leh khawih loh thu-ah, an pahniha kârah chuan LALPA hming chhâlin chhia a chham tûr a ni; tichuan, a neitu chuan chu chu a lo pawm ang a, ani chuan a rûl lo vang. 12 Amaherawhchu, rûksak ngei a nih chuan a neitu chu a rûl tûr a ni. 13 Sain seh sela, a them chu hriattîr nân rawn keng rawh se; chumi sa seh ai chu a rûl tûr a ni lo. 14 “Miin a ṭhenawmpa ran lo hawhsak sela, lo silin emaw, lo thi emaw ta sela, tin, a neitupa chu awm lo sela, a rûl ngei tûr a ni. 15 A neitupa chu a awm ve reng erawh chuan a rûl tûr a ni lo. Man chawia hawh a nih erawh chuan an inhawh dân athu thu a ni ang.
Nun mawi leh inthawi chungchâng
16 “Miin nula, nupuia la hual loh chu lo thlêmin lo mutpui sela, a man pein a nupui atân a nei ngei tûr a ni. 17 A pain a neihtîr phal lul loh chuan nula man zah sum chu a pe rêng rêng tûr a ni. 18 “Dawithiamnu rêng rêng i zuah tûr a ni lo. 19 “Tu pawh ran mutpui apiang chu tihhlum ngei tûr a ni. 20 “Tu pawh LALPA hnênah chauh tih loh, pathian dang rêng rêng hnêna inthawi chu tihboral hlauh tûr a ni. 21 Hnam dang i sawisa tûr a ni lo va, i hnehchhiah tûr a ni hek lo; nangni pawh Aigupta ramah khân hnam dang in nih kha. 22 “Hmeithai emaw, fahrah emaw in tirethei tûr a ni lo. 23 Anmahni chu in tihretheih vaiha, mi rawn auh phawt chuan, an mi auhna aw chu ka lo ngaithla ngei ang a; 24 tichuan, ka thinur chu a ling phut mai ang a, khandaihin ka rawn tihlum ang che u; tin, in nupuite chu hmeithai an ni ang a, in fate pawh fahrahin an awm mai ang. 25 “Ka miteho zînga mi in hnêna awm, retheite tangka i pûktîr chuan i leibatu angah i ngai tûr a ni lo va; a lakah a pung i phût tûr a ni hek lo. 26 I ṭhenawm silhfên chu lo hrênsak ta ang la, ni tlâk hmain i pe leh tûr a ni. 27 Inthuam nâna a neih chhun a ni a, a taksa tihlum nâna a puan a ni si a. Eng sinin nge a mut ang? Tin, heti hi a ni ang a, mi rawn auh chuan ka lo ngaithla ngei ang; kei zawng mi khawngaih thei tak ka ni si a. 28 “Pathian chu i hau tûr a ni lo va, i mite zînga rorêltute chu ânchhia i lawh tûr a ni hek lo. 29 I thlai thar hmasa ber leh i uain tui tla hmasa ber chu i hlân var tûr a ni. I fapa upa ber chu mi pe tûr a ni. 30 Chutiang bawkin i sebâwngpate leh i berâmte pawh chu i ti tûr a ni. Ni sarih chu a pui hnênah a awm ang a; a ni riat ni chuan mi pe tûr a ni. 31 Tin, ka tân mi thianghlim in ni tûr a ni. Rama sa seh rêng rêngte chu in ei tûr a ni lo va; ui hnênah in theh mai tûr a ni.
Hleih nei lova dik taka rorêl
1 “Thuthang dik lo chu i sawi chhâwng mai mai tûr a ni lo. Hretu fel lo tak nihna tûrin mi suaksual zîngah chuan i kut chu rawlh ve suh. 2 Thil sual tih tumin mipui chu i zui tûr a ni lo va; thubuaiah pawh a tam lam, a dik lo zâwk lamah chuan i ṭang ve mai tûr a ni hek lo. 3 Mi rethei pawh a thubuaiah i ṭan bîk tûr a ni hek lo. 4 “I hmêlma sebâwngpa emaw, a sabengtung emaw bo i hmuh chuan, a hnênah i khalh hâwnsak leh ngei tûr a ni. 5 Nangmah hawtu che sabengtung a phurin a delh beh reng i hmuhin, puih duhna rêng nei lo mah la, i pui ngei tûr a ni. 6 “I mi rethei chu a thubuaiah dik lo takin i rêlsak tûr a ni lo. 7 Thu dik lovah zawng inthiarfihlîm daih rawh; tin, pawi sawi lo leh mi felte chu tihlum suh. Mi suaksualte chu thiam ka chantîr dâwn si lo va. 8 Tin, thamna rêng rêng i la tûr a ni lo; thamna chuan khaw hmu lai mitte hi a tihdelsak ṭhîn a, mi fel thu chu a tihkhawlohsak ṭhîn. 9 Hnam dang i hnehchhiah tûr a ni lo; nangni pawh Aigupta ramah khân hnam dang in lo nih tawh avângin hnam dang rilru put dân chu in hre si a.
Kum sarihna leh ni sarihna
10 “Kum ruk chhûng chu i lovah buh tuh tûr a ni a, chuta a hâwng apiang chu khung zêl tûr a ni; 11 a kum sarih kum erawh chuan awmtîr la, dah tui rawh; tichuan, i mi retheiten an ei ve thei ang a; tin, an lâk bâng awm apiang chu ramsaten an ei ve dâwn nia. Chutiang bawkin i grêp huan leh i olive huan pawh i ti tûr a ni. 12 Ni ruk chhûngin i hna i thawk tûr a ni a, a ni sarih ni chuan i châwl tûr a ni a; tichuan, i bâwngpa emaw, i sabengtung emaw an lo châwl thei ang a, i bawihnu fapate leh i hnam dangte pawh an lo hahdam ve thei dâwn nia. 13 Tichuan, in hnêna ka sawi zawng zawng hi ngaihven ula, pathian dangte hming rêng rêng chu lam suh u, in kâ aṭangin chhuah pawh chhuak suh se.
Kûtpui pathum
14 “Kum khatah vawi thum ka tân kût i nei tûr a ni. 15 Chhang dawidim telh loh kût i nei tûr a ni. Thu ka lo pêk tâk che ang khân, ni sarih chhûng chu chhang dawidim telh loh, Abib thlaa hun ruatah khân i ei tûr a ni (Khami thlaah a nih kha Aigupta ram ata i lo chhuah); tichuan, ka hmaah tu mah hi kut ruakin in lo lang tûr a ni lo; 16 tin, lova i tuh, i thawh rim rah hmasa ber, buhseng kût chu i nei tûr a ni; tin, kum ral veleh lovah i thawh rim rahte i khung vek hnuin pâwl kût i nei tûr a ni. 17 Kum khatah vawi thum i mipate zawng zawng chu LALPA Pathian hmaah an rawn inlan ṭhîn tûr a ni. 18 “Ka tân inthawina sa thisen chu chhang dawidim telh nên chuan i rawn hlân tûr a ni lo; ka tân kûtna sathau chu zankhuain, a tûk thlengin awmtîr reng tûr a ni hek lo. 19 I lova thlai thar hmasa ber chu LALPA i Pathian inah i rawn dah tûr a ni. Kêlnosa a pui hnutetuiin i chhûm tûr a ni lo.
Pathian thutiam leh a thuchah
20 “Ngai teh, kawnga vêng zêl tûr che leh, hmun ka buatsaihah chuan hruai lût tûr chein i hmaah vântirhkoh ka rawn tîr dâwn e. 21 Ama zai ngai zêl ulangin, a thusawi pawm thîn ang che u; a chungah hel suh u, in bawhchhiatnate chu a ngaidam duh dâwn si lo va; amahah chuan ka hming a awm a nia. 22 Amaherawhchu, a thusawi i pawmsak takmeuhva, ka sawi apiang i tih zêl chuan i hmêlmate hmêlma chu ka ni ve ang a, i dote dova chu ka ni ve ang. 23 Ka vântirhkoh chuan i hma a hruai zêl ang a, Amor-hote, Hit-hote, Periz-hote, Kanaan-hote, Hiv-hote, Jebus-hote awmnaah chuan a hruai ang che; anni chu ka tiboral daih dâwn e. 24 An pathiante chu chibai i bûk tûr a ni lo va, an rawng i bâwl tûr a ni hek lo an thiltih angte chu i ti ve tûr a ni hek lo; i tichimit vek tûr a ni a, an lungphunte chu i tikeh sawm vek zâwk tûr a ni. 25 Tin, LALPA in Pathian rawng chu in bâwl tûr a ni; tichuan, i chhang leh i tui chu mal a sâwm ang a; tin, in zîng ata hri hi ka tikiang daih dâwn nia. 26 I ram chhûngah hian nauchhiat leh ching rêng an awm lo vang a; i dam chhûng nite chu ka tihtlingtlâksak ang che. 27 “I hmaah chuan ka ṭihbaina ka tîr ang a, i kalna tûr rama mite zawng zawng chu ka timangang ang a; tichuan, i hmêlmate zawng zawng chu i hmaah ka tlânchhiattîr ang. 28 Tin, i hmaah khawinghal ka tîr ang a, chu chuan Hiv-hote, Kanaan-hote, Hit-hote chu i hmaah a ûm zêl ang. 29 Kum khat chhûng mai chuan ka hnawh chhuahsak lo vang che; chuti lo zawng, ram chu a lo ṭiau mai ang a, ramsate chu i tân a lo tam lutuk dah ang e. 30 I lo puna ram chu i luah khah hma chuan, zawi zawiin ka hnawh chhuahsak hret hret zâwk ang che. 31 I ramri chu Tuifinriat Sen aṭanga Philistia-ho tuipui thlengin, thlalêr aṭanga Lui thlengin ka khamsak ang che. Chumi rama awmte chu in kutah ka pe dâwn si a; tichuan, anmahni chu i hnawt chhuak tûr a ni. 32 An hnênah thu i thlung tûr a ni lo va, an pathiante hnênah pawh i thlung tûr a ni hek lo. 33 I ram chhûngah an awm tûr a ni lo; chuti lo zawng, ka chungah hian an sualtîr dah ang che. An pathiante rawng i bâwl vaih zawngin i tân thang a ni ngei dâwn a ni,” a ti a.
Thuthlung nemngheh a ni
1 Tin, ani chuan Mosia hnênah, “Nang nên, Arona nên, Nadaba nên, Abihua nên, Israel upa sawmsarih nên LALPA hnênah lo chho ula, ralkhat aṭangin chibai rawn bûk ang che u. 2 Mosia chu amah chauhvin LALPA hnênah lo kal sela, anniho erawh chu lo kal hnai suh se; mipuite pawh a hnênah chuan lo chho suh se,” a ti a. 3 Tichuan, Mosia chu a zuk kal a, LALPA thu zawng zawng leh rorêl dân tûr zawng zawng chu mipui hnênah a zuk sawi a; tin, mi zawng zawng chuan, “LALPA sawi zawng zawng chu kan ti ang e,” tiin a rualin an chhâng dual dual a. 4 Tin, Mosia chuan LALPA thu zawng zawng chu a ziak vek a. Tin, a tûk zîng takah a tho va, tlâng bulah chuan maichâm a siam a; tin, lungphun sâwm leh pahnih, Israel hnam sâwm leh hnam hnih zâtin a phun bawk a. 5 Tin, Israela thlahte zînga tlangvâlte chu a tîr a, chu mite chuan LALPA tân hâlrala thilhlante an hlân a, remna inthawiin sebâwngpatein an inthawi bawk a. 6 Tin, Mosia chuan chûng thisen zâtve chu a la a, maihûnahte a dah a; tin, thisen zâtve dang chu maichâmah a theh a. 7 Tin, thuthlunna bu chu a la a, mipuite hriatah chuan a chhiar a. Anni chuan, “LALPAN a sawi zawng zawng chu kan ti zêl ang,” an ti a. 8 Chutichuan, Mosian thisen chu a la a, mipuite chu a theh a, “Hei hi LALPAN hêng thu zawng zawng chungchâng thua in hnêna thu a lo thlun tawh, thuthlunna thisen a nih hi,” a ti a. 9 Chutichuan, Mosia leh Arona leh Nadaba leh Abihua leh Israel upa sawmsarihte chu an han chho va, 10 Israela Pathian chu an han hmu a. Tin, a kephah hnuai chu sapphir lungrem ang mai, a thianzia chu vân thiang vek ang mai hi a ni a. 11 Tin, Israela thlahte zînga mi lianhote chungah chuan a kut a thlâk lo; tichuan, Pathian chu an hmu a, an eiin an in hlawm a.
Sinai tlângah Mosia a lâwn
12 Chutichuan, LALPA chuan Mosia hnênah, “Tlângah hian ka hnênah lo chho la, lo awm rawh; tichuan, mipuite i zirtîr atâna lungphêka dân leh thupêk ka ziak chu ka lo pe ang che,” a ti a. 13 Tin, Mosia leh a rawngbâwltu Josua chu an tho va; tin, Mosia chu Pathian tlângah chuan a han kal a. 14 Tin, ani chuan upate hnênah chuan, “In hnêna kan lo kal hma chuan hetah hian min lo nghâk reng ang che u. Ngai teh u, Arona leh Hura in hnêna an awm hi. Tu pawhin thubuai eng emaw in neih chuan an hnênah hian in lo kal ṭhîn dâwn nia,” a ti a. 15 Chutichuan, Mosia chu tlângah chuan a han chho va, chhûmin tlâng chu a chîm ta mup a. 16 Tin, LALPA ropuina chu Sinai tlângah chuan a awm ta reng a, chhûm chuan ni ruk chhûng chu a chîm a. Tin, a ni sarih ni chuan chhûm aṭangin Mosia chu a han ko va. 17 Tin, Israela thlahte mit hmuhah chuan LALPA ropuina lan dân chu, tlâng chhîpa thil kan ral hmang mei ang mai a ni a. 18 Tin, Mosia chu chhûm zîngah chuan a va lût a, tlângah chuan a han lâwn a. Tin, Mosia chu tlângah chuan ni sawmli leh zan sawmli a han awm a.
Biakbûk atâna thilhlan
1 Tin, LALPAN Mosia chu a bia a, 2 “Israela thlahte hnênah thu va sawi la, ka hnênah thil rawn hlân rawh se. An thinlunga châk taka pe apiangte pêk chu ka tâna thilhlanah in la tûr a ni. 3 Hêngte hi a ni an hnên aṭanga hlan tûra in lâk tûrte chu: rangkachak te, tangkarua te, dâr te, 4 la dumpâwl te, la senduk te, la senlâr te, la zai sîn te, kêl hmul te; 5 tin, berâmpa vun chhum sen te, savun ṭha chi vun te, thingri thing te; 6 khâwnvâr atân hriak te, hriak thih mi atân leh hâl tûr rimtui tak atân englo rimtui te; 7 puithiam kawr leh kawr âwma zeh tûrin onukion-te leh lunghlute nên. 8 Tin, hmun thianghlim mi siamsak rawh se, an zînga ka chên ve theih nân. 9 Biakbûk lem leh a chhûnga bungrua tûr zawng zawng lem ka entîr ang chiah che hian in siam tûr a ni.
Thuthlung bâwm
10 “Tin, thingri thingin bâwm siam sela; a dung lam chu tawng hnih leh a chanve ni sela, a vâng lam chu tawng khat leh a chanve ni rawh se. 11 Tin, rangkachak hlîr hlak tîin i luan tûr a ni a, a chhûng leh a pâwn i luan tûr a ni a; tin, rangkachakin a tlâng i kâwm tûr a ni. 12 Chumi atân chuan rangkachak khâng pali i chhûng tûr a ni a, a ke paliah chuan vuah vek tûr a ni; chumi khâng pahnih chu a lehlamah vuah tûr a ni a, khâng pahnih chu a lehlamah vuah bawk tûr a ni. 13 Tin, thingri thingin zâwnfungte i siam tûr a ni a, rangkachak tîin luan tûr a ni. 14 Tin, bâwm chu zâwn theih tûrin a panga khângah chuan zâwnfungte chu i rawlh tûr a ni. 15 Chu bâwma khângah chuan zâwnfungte chu a invuah reng tûr a ni; phawi chhuah hlek tûr a ni lo ve. 16 Tin, bâwm chhûngah chuan thuhriattîrna ka la pêk tûr che chu i dah tûr a ni. 17 “Tin, rangkachak hlîr hlakin zahngaihna ṭhutphah i siam tûr a ni; a dung lam chu tawng hnih leh a chanve ni sela, a vâng lam chu tawng khat leh a chanve ni rawh se. 18 Tin, cherub pahnih rangkachakin i siam tûr a ni; zahngaihna ṭhutphah hmâwr ve vea mi chu a chherin i chher tûr a ni. 19 A hmâwr lehlamah cherub pakhat siam la, a hmâwr lehlamah cherub pakhat siam bawk ang che; zahngaihna ṭhutphah nêna inbelhbawm khâwm vekin a hmâwr ve vea cherub pahnih chu in siam tûr a ni. 20 Tin, cherub-te chu inhmatawna zahngaihna ṭhutphah chu an thlaa hliapin, an thlate chu an zâr duai tûr a ni; zahngaihna ṭhutphah lam chu cherub-te chuan an hawi ve ve tûr a ni. 21 Tin, bâwm chungah zahngaihna ṭhutphah chu i dah tûr a ni a; tin, bâwm chhûngah chuan thuhriattîrna ka la pêk tûr che chu i dah tûr a ni. 22 Chutah chuan i hnênah ka lo kal ang a; tin, thuhriattîrna bâwm chunga cherub pahnih inkâr, zahngaihna ṭhutphah chung lam aṭangin, Israel mite thu ka pêk tûr apiang chungchâng thu-ah chuan ka rawn be ṭhîn ang che.
Chhangdah dawhkân
23 “Tin, thingri thingin dawhkân i siam tûr a ni; a dung lam chu tawng hnih ni sela, a vâng lam chu tawng khat ni sela, a sân lam chu tawng khat leh a chanve ni rawh se. 24 Tin, chu chu rangkachak hlîr hlak tîin luan tûr a ni a; tin, rangkachakin a tlâng i kâwm tûr a ni. 25 Tin, kutphah bawka hlaiin a kâwm i siam tûr a ni a; tin, a kâwm chu rangkachakin a tlâng i kâwm leh tûr a ni. 26 Tin, chumi atân chuan rangkachak khâng pali i siam tûr a ni a; tin, chumi khâng chu dawhkân ke pali kil ṭheuhvah chuan vuah tûr a ni. 27 Dawhkân chu zâwna, a zâwnfung chu rawlh theih tûrin khângte chu a kâwm sia vuah tûr a ni. 28 Tin, dawhkân chu a zâwn theih nân zâwnfungte chu thingri thingin i siam tûr a ni a; tin, rangkachak tîin luan tûr a ni. 29 Tin, chumi atân chuan thlêng te, no te, uain thâwl te, a bun chhuahna tûr berhbute i siam tûr a ni. Chûng chu rangkachak hlîr hlakin i siam tûr a ni. 30 Tin, dawhkânah chuan ka hmaah chhangdah i hlui fo tûr a ni.
Khâwnvâr dahna
31 “Tin, khâwnvâr dahna rangkachak hlîr hlakin i siam tûr a ni; chumi khâwnvâr dahna chu a ngul bul leh a ngul chu chher tûr a ni; a note, a parfungte, a pârte nên chuan inzawm vek tûr a ni. 32 Tin, a sîrahte chuan pêng paruk lo pêng chhuak sela: khâwnvâr dahna ngul sîr lehlamah chuan pêng pathum awm sela, khâwnvâr dahna ngul sîr lehlamah chuan pêng pathum awm bawk rawh se. 33 A lehlam pang pêngah chuan vaiumkhal kuhmûm ang no pathum, a pârfung leh a pâr i siam tûr a ni; tin, a lehlam pang pêngah pawh vaiumkhal kuhmûm ang no pathum, pârfung leh a pâr i siam tûr a ni; chutiang chuan khâwnvâr dahna pêng paruk atân i siam tûr a ni. 34 Tin, khâwnvâr dahna ngulah chuan no pali, vaiumkhal kuhmûm anga siam, a pârfung leh a pârte a awm tûr a ni. 35 Tin, chumi inzawm vek pêng pahnih hnuaiah chuan pârfung awm sela; tin, chumi inzawm vek pêng pahnih hnuaiah chuan pârfung awm sela; tin, chumi inzawm vek pêng pahnih hnuaiah chuan pârfung awm sela; khâwnvâr dahna ngula pêng parukah chuan a awm vek tûr a ni. 36 Chûng a pârfungte leh a pêngte chuan a zawm vek tûr a ni a; a pum chuan rangkachak hlîr hlaka chher tûr a ni. 37 Tin, chumi atân chuan khâwnvâr pasarih i siam tûr a ni; tichuan, khâwnvârte chu an dah ang a, a hma zâwnte chu a ên theih nân. 38 Tin, chumi atâna hman tûr chaichehte leh meivâp dahnate chu rangkachak hlîr hlak a ni tûr a ni. 39 Chumi khâwnvâr dahna leh a hmanrua tûr zawng zawng siam nân chuan rangkachak hlîr hlak talent khat i hmang tûr a ni. 40 Tichuan, tlânga a lem ka entîr ang chiah che khân engkim i siam tûr a ni tih hre reng rawh khai.
Pathian chênna biakbûk
1 “Tin, biakbûk, puanzâr sâwm neiin i siam bawk tûr a ni; la zai sîn tak kawp, dumpâwl te, senduk te, senlâr te hmangin cherub lemte thiam taka siam chuantîrin i siam tûr a ni. 2 Puanzâr chu a sei lam tawng sawmhnih leh tawng riat ṭheuh a ni ang a, puanzâr chu a hlai lam tawng li ṭheuh a ni ang. Puanzâr zawng zawng chu inchen vek tûr a ni. 3 Puanzâr pangate chu inzawm tûr a ni a; tin, puanzâr panga vêkte pawh chu inzawm bawk tûr a ni. 4 Tin, puanzâr zawm khat hmawrtawng ber tlângah chuan a beng a dumpâwlin i siam tûr a ni a; chutiang bawkin puanzâr zawm lehlam hmawrtawng ber tlângah chuan i siam bawk tûr a ni. 5 Puanzâr pakhatah chuan beng sawmnga i siam tûr a ni a; tin, zawm khat puanzâr tlângah pawh chuan beng sawmnga i siam bawk tûr a ni a; chûng bengte chu a inep thliah tûr a ni. 6 Tin, rangkachak chilh behna sawmnga i siam tûr a ni a, a chilh behnate chuan puanzârte chu i chilh bet tûr a ni a; tichuan, biakbûk chu pindan pakhat a lo ni tûr a ni. 7 “Tin, biakbûk chung khuh nân kêl hmul puanzârte i siam tûr a ni. Puanzâr sâwm leh pakhat i siam tûr a ni. 8 Puanzâr chu a sei lam tawng sawmthum ṭheuh a ni tûr a ni a; tin, puanzâr chu a hlai lam tawng li ṭheuh a ni tûr a ni: puanzâr te chu inchen vek tûr a ni. 9 Tin, puanzâr pangate chu i ṭhui zawm vek tûr a ni a; tin, puanzâr paruk pawh chu ṭhui zawm vek tûr a ni a, puan in hma lama puanzâr a parukna chuan a khuh tûr a ni. 10 Tin, puanzâr zawm khat tlângah chuan beng sawmnga i siam tûr a ni a; tin, puanzâr zawm lehlam tlângah pawh chuan beng sawmnga siam bawk tûr a ni a. 11 Tin, dâr chilh behna sawmnga i siam tûr a ni a; tin, chumi chilh behna chu puan tlânga a bengah chuan vuah tûr a ni a, puan in chu chilh zawm vek tûr a ni; pindan pakhat a lo nih theih nân. 12 Puan in puanzâr uai thla la chuang, a zatve la chuang chu biakbûk kawmchârah a uai thla tûr a ni. 13 Tin, puan in puanzâr a dung lam hmâwr tuak ve vea tawng khat ve ve la chuanga chu biakbûk bang lehlam lehlam khuh nân a uai thla tûr a ni. 14 Tin, berâmpa vun chhum senin puan in chung khuhnate, savun ṭha chiin a chunga khuh lehnate i siam tûr a ni. 15 “Tin, biakbûk ban rem khâwm tûrte chu ngîl taka dingin thingri thingin i siam tûr a ni. 16 Tin, ban rem khâwm sei lam chu tawng sâwm ni sela; tin, a vâng lam chu tawng khat leh a chanve ni ṭheuh rawh se. 17 Ban rem khâwm tinah chuan ke pahnih inzawmin a awm tûr a ni. Chutiang chuan biakbuk ban rem khâwm chhim chhawng chhim lampang atân chuan, ban rem khâwm sawmhnih i siam tûr a ni. 18 Tin, biakbûk atân ban rem khâwm chhim chhawng chhim lampang atân chuan, ban rem khâwm sawmhnih i siam tûr a ni. 19 Tin, chumi ban rem khâwm sawmhnih nghahchhan atân chuan tangkaraw tlang ker kuak sawmli i siam tûr a ni: a ke pahnih atân ban rem khâwm pakhat nghahchhan ker kuak pahnih leh, a ke pahnih atân ban rem khâwm dang pakhat nghahchhan ker kuak pahnih i siam tûr a ni. 20 Tin, biakbuk sîr lehlam hmâr chhawng lam atân chuan ban rem khâwm sawmhnih i siam tûr a ni; 21 chûng atân chuan tangkaraw tlang sawmli ker kuak nên, ban rem khâwm pakhat atân nghahchhan ker kuak pahnih leh, ban rem khâwm dang pakhat atân nghahchhan ker kuak pahnih i siam bawk tûr a ni. 22 Tin, biakbûk kawmchâr khawthlang chhawng lam atân chuan ban rem khâwm paruk i siam tûr a ni. 23 Tin, biakbûk kawmchâr kil ve ve atân chuan ban rem khâwm pahnih i siam tûr a ni. 24 Tin, a hnuai lamah chuan thlawp tûr a ni a, chutiang bawkin a chhîp lam khâng hmasa ber thlengin tih vek tûr a ni. Chutiang chuan a pahnih chuan tih ve ve tûr a ni. Chûng chu a kil pahnih atân a ni tûr a ni. 25 Tin, ban rem khâwm pariat, a nghahchhan tûr tangkaraw tlang ker kuak sâwm leh paruk nên a awm tûr a ni; ban rem khâwm pakhat atân nghahchhan ker kuak pahnih; tin, ban rem khâwm dang atân pawh chuan nghahchhan ker kuak pahnih zêl. 26 “Tin, thingri thingin bangrel, biakbûk bang lehlam ban rem khâwm atân panga, biakbûk bang lehlam ban rem khâwm atân panga; 27 tin, biakbûk kawmchâr khawthlang chhawng lam ban rem khâwm atân pawh panga i siam tûr a ni. 28 Tin, bangrel laita, ban rem khâwm lai taka mi chuan ban rem khâwm hmâwrtawng ber aṭangin a lehlam hmâwrtawng ber thlengin a thil tlang tûr a ni. 29 Tin, ban rem khâwmte chu rangkachak tîin i luan tûr a ni a, bangrelte thil nân rangkachak khângte i siam tûr a ni; tin, chûng bangrelte chu rangkachak tîin i luan bawk tûr a ni. 30 Chutichuan, tlânga ka entîr dân ang chiah che khân biakbûk chu i sa tûr a ni. 31 “Tin, puanzâr tûr lazai sîn tak kawp te, a dumpâwl te, a senduk te, a senlârte hmangin cherub lemte mi thiam tak siam chuantîrin i siam tûr a ni. 32 Chu chu thingri ban pali rangkachak tîa luanah chuan i zâr tûr a ni, a bânna chu rangkachaka siam tûr a ni; tin, tangkaraw tlang ker kuak palia inphun tûr a ni. 33 Tin, chumi puanzâr chu puanzâr chilh behnate hnuai lamah chuan i zâr tûr a ni a, chumi puanzâr chhûng lamah chuan thuthlunna bâwm chu i dah lût tûr a ni; tichuan, puanzâr chuan hmun thianghlim leh hmun thianghlim ber chu a daidansak dâwn che u nia. 34 Tin, zahngaihna ṭhutphah chu hmun thianghlim berah thuthlunna bâwm chungah chuan i dah tûr a ni. 35 Tin, puanzâr pâwn lamah chuan dawhkân i hûng tûr a ni a; tin, biakbûk chhim chhawng lam dawhkân epah chuan khâwnvâr dahna i hûng tûr a ni; tichuan, dawhkân chu hmâr lampangah chuan i dah tûr a ni. 36 “Tin, puan in kawngkaa zâr tûr lazai sîn tak kawp te, a dumpâwl te, a senduk te, a senlârte hmangin, puan zeh mawi thiam taka zeh nên i siam tûr a ni. 37 Tin, puanzâr zârna tûr chuan thingri ban panga i siam tûr a ni a, chûng chu rangkachak tîin i luan tûr a ni; a bânnate chu rangkachaka siam tûr a ni: chûng hûnna atân chuan dâr tlang ker kuak panga i chhûng tûr a ni.
Maichâm
1 “Tin, thingri thing maichâm, a dung lam tawng nga, a vâng lam tawng ngain i siam tûr a ni; chu maichâm chu kil li a ni tûr a ni a, a sân lam chu tawng thum a ni tûr a ni. 2 Tin, a kil li chhîpahte chuan a kîte i siam tûr a ni a; maichâm nên chûng a kîte chu a inzawm vek tûr a ni. Dâr tîin i luan vek tûr a ni. 3 Tin, meivâp ruh chhuahna bêlte, vut lawhnate, maihûnte, sa thurna thîrkawmte, mei lâknate i siam tûr a ni; chûng hmanrua zawng zawng chu dârin i siam tûr a ni. 4 Tin, maichâm atân chuan dâr lên i siam tûr a ni; tin, chumi lên chung, a kil liahte chuan dâr khâng pali i siam tûr a ni. 5 Tin, chu chu maichâm dawhzâwl hnuai lam vêl chuan i dah tûr a ni, chu lên chuan maichâm chanve chu a han thlen theih nân. 6 Tin, maichâm atân zâwnfung, thingri thing zâwnfungte i siam tûr a ni a, chûng chu dâr tîin i luan tûr a ni. 7 Tin, chûng zâwnfungte chu chung khângahte chuan thun luh tûr a ni a; tichuan, zâwnfungte chu a zâwnna tûrin maichâm sîr pahnihah chuan a awm ve ve tûr a ni. 8 Maichâm chu thingphela hungin a kawrawngin i siam tûr a ni; tlânga ka entîr ang chiah che khân siam tûr a ni.
Pathian chênna biakbûk hungna
9 “Tin, biakbûk hung chhûng kawtlai i siam tûr a ni. Chhim chhawng chhim lampangah chuan a sîr lehlam atân a hung chhûng kawtlaia puanzâr tûrte, lazai sîn tak kawpa siam tawng zaa sei a awm tûr a ni. 10 Chumi atân chuan ban sawmhnih leh dâr tlang ker kuak sawmhnih a awm tûr a ni. Bana a bânnate leh a zârfungte chu tangkarua a ni tûr a ni. 11 Tin, chutiang bawkin, hmâr chhawng lampang dung lam puanzâr zâr tûrte chu tawng zaa sei a ni tûr a ni a, chumi atân chuan ban sawmhnih leh dâr tlang ker kuak sawmhnih a awm tûr a ni; bana a bânnate leh a zârfungte chu tangkarua a ni tûr a ni. 12 Tin, a khawthlang lampang hung chhûng kawtlai vâng lam puanzâr tûrte chu tawng sawmngaa sei a ni tûr a ni, a ban sâwm leh a nghahchhan ker kuak sâwm nên. 13 Tin, khawchhak lam chhawng, chhak lampang a hung chhûng kawtlai vâng lam chu tawng sawmngaa sei a ni tûr a ni. 14 Kawngka sîr lehlama puanzâr zâr tûrte chu tawng sâwm leh tawng ngaa sei a ni tûr a ni: a ban pathum leh a nghahchhan kerkuak pathum a awm tûr a ni. 15 Tin, kawngka sîr lehlama puanzâr zâr tûrte chu tawng sâwm leh tawng ngaa sei a ni tûr a ni a, a ban pathum leh a nghahchhan ker kuak pathum a awm tûr a ni. 16 Tin, a hung chhûng kawtlai kawngkaa zâr tûr tawng sawmhniha sei, lazai sîn tak kawp te, a dumpâwl te, a senduk te, a senlârte hmangin, puan zeh mawi thiam tak zeh nên a awm tûr a ni. A ban pali leh a nghahchhan ker kuak pali a awm tûr a ni. 17 A hung chhûng kawtlai ban zawng zawngte chu tangkaruaa zem chhuah vek tûr a ni a; a bânnate chu tangkarua a ni tûr a ni a, nghahchhan ker kuakte chu dâr a ni tûr a ni. 18 A hung chhûng kawtlai dung lam chu tawng za ni sela, a vâng lam chu tawng sawmnga ni sela; tin, a sân lam chu tawng nga ni sela, lazai sîn tak kawpa hung ni sela; tin, a nghahchhan ker kuakte chu dâr tlang ni rawh se. 19 Biakbûk sakna zawng zawnga a hmanrua zawng zawng leh, a kilhbehna zawng zawng leh, a hung chhûng kawtlai kilhbehna zawng zawng chu dâr vek a ni tûr a ni.
Khâwnvâr enkawl dân tûr
20 “Tin, khâwnvâr chu eng lai pawha a alh theih nân olive hriak fîm taka sâwr, chhit atân i hnênah rawn la ṭhîn tûrin Israela thlahte chu thu i pe tûr a ni. 21 Inbiakna puan in chhûngah, thuhriattîr dahna bula puanzâr pâwn lamah chuan, Arona leh a fapaten LALPA hmaah chuan tlai aṭangin a tûk thlengin an buatsaih ṭhîn tûr a ni. Hei hi Israela thlahte tân kumkhuain, an thlahte thleng pawhin thuruat ngheh tlat a ni tûr a ni.
Puithiamho incheina
1 “Tin, nangin i u Arona leh a fapate chu Israela thlahte zîng ata i hnênah hruai ang che, ani chuan puithiam rawngbâwl hna chu ka tân a thawh theih nân, Arona te, Arona fapa - Nadaba te, Abihua te, Eleazera te, Ithamara te nên chuan. 2 Tin, i u Arona tân silhfên thianghlim, tiropuitu atân leh timawitu atân i siam tûr a ni. 3 Tin, mi themthiamho, finna thlarauva ka tihkhah zawng zawngte chu bia la, puithiam rawngbâwl hna ka tân a thawh theihna tûrin Arona chu silhfênte siamsak rawh se. 4 Tin, hêngte hi a ni silhfên atâna an siam tûrte chu: âwmbel te, kawr te, kawrfual te, kawr zeh mawi te, lukhum leh kâwnghrênte nên. Tin, i u Arona leh a fapate chuan puithiam rawngbâwl hna ka tân an thawh theih nân, silhfên thianghlim an siamsak tûr a ni. 5 Tin, rangkachak te, la dumpâwl te, senduk te, senlâr te, lazai sîn tak kawpte nên an la tûr a ni. 6 “Tin, puithiam kawr chu rangkachak te, la dumpâwl te, senduk te, senlâr te, lazai sîn tak kawpte hmangin, mi themthiam takin a buatsaih angin an siam tûr a ni. 7 Tin, chumi kawr hmâwr hma lam leh hnung lama ṭhui belhbawm, dârbak pahnih neihtîr tûr a ni; a inzawm tlat theihna tûrin. 8 Tin, kawr chunga kâwnghrên tûr themthiam taka tah, chumi kawr chi bawk tluan khat vek hman tûr a ni; chu chu rangkachak nên, la dumpâwl nên, senduk nên, senlâr nên, lazai sîn tak kawp nêna tah tûr a ni. 9 Tin, onukion lung pahnih i la tûr a ni a, chutah chuan Israela thlahte hming i chuantîr tûr a ni: 10 lung pakhatah chuan an hming paruk, lung dang pakhatah chuan a la awmate paruk; hming chu an pian dân indawtin i chuantîr tûr a ni. 11 Hming nemnaa chuang ang, lunga ziak thiam miin a ziak ṭhin ang hian, Israela thlahte hming ang zêlin lung pahnihah chuan i ziak tûr a ni. Rangkachaka phûm tûrin i siam tûr a ni. 12 Tin, chumi lung pahnih chu Israela thlahte hriat rengna lung atân, puithiam kawr dârbakah chuan i bel tûr a ni. Tichuan, Arona chuan hriat rengna tûrin, LALPA hmaah an hmingte chu a koki khing hnihah chuan a bât ang. 13 “Tin, rangkachak zaite i phiar tûr a ni a, 14 rangkachak hlîr hlak khaidiat pahnih nên, hruihrual anga herhin i siam tûr a ni; tin, chumi khaidiat herhte chu phiarah chuan i zawm tûr a ni.
Puithiam âwmbel
15 “Tin, rorêlna âwmbel, mi thiam tak siam ang i siam tûr a ni. Puithiam kawr siam ang khân i siam tûr a ni a: rangkachak te, la dumpâwl te, a senduk te, a senlâr te, lazai sîn tak kawpte hmangin i siam tûr a ni. 16 Kil li neia siama thuah tûr a ni: a dung lam khâp khat, a vâng lam pawh khâp khat bawk a ni tûr a ni. 17 Tin, chutah chuan lunghlu, lunghlu tlar li i zep tûr a ni: tlar khatna chu sardion te, topazion te, smaragdos te; 18 tin, tlar hnihna chu anthrax te, sappheiros te, sordonuks te; 19 tin, tlar thumna chu huakinthos te, akates te, amethustos te; 20 tin, tlar lina chu berullos te, onukion te, jaspis te a ni tûr a ni. Rangkachakah chuan phûm ṭhêt tûr a ni. 21 Tin, lungte chu Israela thlahte hming ang zêlin, sâwm leh pahnih chu an hming ang zêlin a ni tûr a ni; hming nemnaa chuang ang, hnam tin an hming ang zêlin, hnam sâwm leh hnam hnihte tân chuan a ni tûr a ni. 22 Tin, âwmbel chungah chuan hruihrual ang khaidiatte, rangkachak hlîr hlak herh i siam tûr a ni a. 23 Tin, âwmbel chungah chuan rangkachak khâng pahnih i siam tûr a ni a; tin, chumi khâng pahnih chu âwmbel tlâng hmâwr ve veah chuan i vuah tûr a ni. 24 Tin, rangkachak khaidiat herh pahnih chu, âwmbel tlâng hmâwr ve vea khâng pahnihah chuan i thlung tûr a ni. 25 Tin, khaidiat herh hmâwr lehlam pahnihte chu rangkachak zai phiar pahnihah chuan i zawm tûr a ni a, chu chu puithiam kawr hma lama dârbakah chuan i thlung tûr a ni. 26 Tin, rangkachak khâng pahnih i siam tûr a ni a, chûng chu âwmbel kil pahnih, puithiam kawr dep chhûng lampangah chuan i vuah tûr a ni. 27 Tin, rangkachak khâng pahnih i siam tûr a ni a, chûng chu a hma lama puithiam kawr dârbakna pahnih hnuai lampang, a inzawmna lai vêl, puithiam kawr hrênna themthiam taka tah chung lamah chuan i vuah tûr a ni. 28 Tin, puithiam kawra khângahte chuan âwmbela khângte chu hrui dumpâwlin an chilh zawm tûr a ni, themthiam taka tah puithiam kawr hrênna chung lama a awm theih nân leh, âwmbel chu puithiam kawr nên a inhran loh nân. 29 “Tin, Arona chuan hmun thianghlima a kal hunah LALPA hmaah a hriat reng theihna tûrin, a thinlung zâwn taka rorêlna âwmbelah chuan Israela thlahte hming chu a pu zêl tûr a ni. 30 Tin, rorêlna âwmbelah chuan Urim leh Thumim i dah tûr a ni a; chu chu Arona chuan LALPA hmaa a kal hunah chuan a thinlung zâwnah chuan a dah zêl tûr a ni. Tin, Arona chuan Israela thlahte rorêlna chu LALPA hmaa a kal hunah a thinlung zâwnah chuan a pu zêl tûr a ni.
Puithiam incheina tûr thil dang
31 “Tin, puithiam kawrfual, a dumpâwl hlîr hlak i siam tûr a ni. 32 Tin, a lai takah lu thawn nân tihâwng tûr a ni a; chumi âwng chu a thlêr chhiat theih mai lohna tûrin, kawrbân bûl angin a tlâng vêl chu cheh tûr a ni. 33 Tin, a fêmahte chuan pawmgranet lem - a dumpâwl te, a senduk te, a senlâr tein - a fêm vêlin i siam tûr a ni a; tin, chumi inkârahte chuan rangkachak tengeng a vêlin i siam tûr a ni. 34 Kawrfual fêm vêlahte chuan rangkachak tengeng pakhat leh pawmgranet pakhat zêl i siam tûr a ni. 35 Tin, Arona chu rawng a bâwl laiin chutiang chuan a inthuam tûr a ni; tichuan, hmun thianghlima LALPA hmaa a luh leh a chhuah hunah a ri chu hriat theih a ni tûr a ni; chutichuan, a thi lo vang. 36 “Tin, rangkachak hlîr hlak phêk i siam tûr a ni a, a pangah chuan hming nemnaa chuang ang, ‘LALPA PUAL’ tih i chuantîr tûr a ni. 37 Chu chu hrui dumpâwlah chuan i bel tûr a ni a, puithiam lukhumah chuan bel tûr a ni; puithiam lukhum hma lamah a awm tûr a ni. 38 Chu chu Arona chalah a awm tûr a ni a, Israela thlahten an thilpêk thianghlim atâna an hlan tûr thil serha sualna awmte chu Arona chuan a phur zêl tûr a ni; chu chu LALPA hmaa chhân tlâka a awm theih nân a chalah a awm chawt tûr a ni. 39 Tin, kawr chu puan zai sîn tak, zeh mawiin i tah tûr a ni; tin, puan zai sîn takin puithiam lukhum i siam tûr a ni. 40 Tin, Arona fapate chu kawr i siamsak tûr a ni a; tin, kawnghrênte, diarte i siamsak bawk tûr a ni, tiropuitu leh timawitu atân. 41 Chûng chuan i u Arona leh a fapate chu i thuam tûr a ni; tin, ka tân puithiam hna thawka rawng an bâwl theihna tûrin, anmahni chu hriak thihin, tihrangin, i tithianghlim tûr a ni. 42 Tin, an taksa saruak khuh nan puan zai sîn kekawr i siamsak tûr a ni; kâwng aṭanga malpui thleng ni sela. 43 Chu chu Arona leh a fapaten inbiakna puan ina an luh hun leh, hmun thianghlima rawngbâwl tûra maichâm bula an kal hunin an ha zêl tûr a ni; chuti lo chuan, suala ngaihin an thi dah ang e. Chu chu amah leh a hnua a thlahte thleng pawha kumkhuaa thuruat ngheh a ni ang.
Arona leh a fate puithiama nemngheh dân tûr
1 “Tin, puithiam hna thawka ka rawng an bâwl theihna tûra anmahni tihthianghlim nân, an chungah hetiang hian i ti tûr a ni: bâwngpatuai pakhat leh berâmpa sawisêl bo pahnih nên, 2 chhang dawidim telh loh nên, chhangpêr dawidim telh loh hriaka chawhpawlh nên, chhangpêr pan dawidim telh loh hriaka chulh nên i rawn la tûr a ni; chhangphut dip tak chiin i siam tûr a ni. 3 Chûng chu fawng pakhata dahin, fawng chawpin bâwngpa leh berâmpa pahnih nên chuan i rawn keng tûr a ni. 4 Tin, Arona leh a fapate chu inbiakna puan in kawngka bulah chuan rawn hruaiin, tuiin i lo sil tûr a ni. 5 Tin, silhfênte chu rawn lain, Arona chu kawr nên, puithiam kawrfual nên, puithiam kawr nên, âwmbel nên hâktîrin, puithiam kawr hrênna themthiam taka tah chuan i hrêng tûr a ni. 6 Tin, puithiam lukhum chu khumtîrin, lukhum chungah chuan lukhum thianghlim chu i khumtîr tûr a ni. 7 Tichuan, hriak thih mi rawn lain, a lûah leihin i thih tûr a ni. 8 “Tin, a fapate chu rawn hruaiin kawr i hâktîr tûr a ni. 9 Tin, Arona leh a fapate chu kâwnghrêna hrêngin, diar i khimtîr tûr a ni. Puithiam nihna chu kumkhua atâna ruat ngheh tlatin an chang tawh ang. Chutiang chuan Arona leh a fapate chu i tithianghlim tûr a ni. 10 Tin, inbiakna puan in bulah bâwngpa i rawn la tûr a ni: Arona leh a fapate chuan bâwngpa lu chungah chuan an kut lo nghat rawh se. 11 Tichuan, inbiakna puan in kawngka bulah, LALPA hmaah chuan bâwngpa chu i lo talh tûr a ni. 12 Tin, bâwngpa thisen chu lo lain, maichâm kîte chu i kutzungṭangin i hnawih tûr a ni; tin, maichâm bulah chuan thisen chu i leihbaw vek tûr a ni. 13 Tin, a kawchhûng thau zawng zawng nên, a thin tuamtu râng nên lain maichâmah chuan i hâl tûr a ni. 14 Bâwngpasa leh a vun leh a êk erawh chu daipâwn lamah i hâl tûr a ni; chu chu sual tâna hlan a ni. 15 Berâmpa pakhat i rawn la bawk tûr a ni; tin, Arona leh a fapaten chu berâmpa lu chungah chuan an kut lo nghat rawh se. 16 Tin, berâmpa chu lo talhin, a thisen chu lain, maichâm chung chu a vêlin i theh tûr a ni. 17 Tin, berâmpa chu i chan tûr a ni a; tin, a kawchhûng leh a kete chu silin, a sahrangte nên, a lû nên i dah tûr a ni. 18 Tin, berâmpa chu a pumin maichâmah chuan i hâl tûr a ni. Chu chu LALPA tâna hâlral thilhlan a ni a; LALPA tâna meia hlan rimtui chu a ni e. 19 “Tin, berâmpa pakhat i rawn kai leh tûr a ni; Arona leh a fapaten chu berâmpa lu chungah chuan an kut lo nghat rawh se. 20 Tichuan, berâmpa chu lo talhin, a thisen chu lain, Arona beng ding lam tlângah te, a fapate beng ding lam tlângah te, an kut ding lam zungpuiah te, an ke ding lam zungpuiah te i tât tûr a ni a; tin, maichâm chung vêlah chuan thisen chu i theh tûr a ni. 21 Tin, maichâm chunga thisen leh, hriak thih mi chu rawn lain, Arona leh a silhfênahte leh, a hnêna tel ve a fapate leh a fapate silhfênahte chuan i theh tûr a ni; tichuan, amah leh a silhfênte leh, a hnêna tel ve a fapate leh a fapate silhfênte chu tihthianghlim an lo ni tawh ang. 22 “Berâmpa thau nên, a mei thau tak nên, a kawchhûng thau nên, a thin tuamtu râng nên, a kal pahnih leh a bawhtu thau nên, a bawp ding lam nên i la bawk tûr a ni; chu chu tihhranna berâmpa chu a ni si a; 23 tin, fawnga chhang dawidim telh loh LALPA tâna chhiah mi chu chhangpêr pakhat nên, chhangpêr hriaka chawhpawlh pakhat nên, chhangpêr pan pakhat nên i telh tûr a ni; 24 tin, chûng chu Arona kut leh a fapate kutah chuan i dah vek tûr a ni a, LALPA hmaa thên thilhlan atân i thên tûr a ni. 25 Tin, an kut ata chu lâksakin, LALPA tâna rimtui atân maichâmah hâlral thilhlan chungah chuan i hâl tûr a ni. Chu chu LALPA tâna meia thilhlan a ni. 26 Tin, Arona tihhranna berâmpa irâwm chu lain, LALPA hmaa thên thilhlan atân i thên tûr a ni; chu chu i chanvo tûr ni rawh se. 27 Tin, Arona leh a fapate puala tihhranna berâmpa irâwm, thên thilhlan leh chawikân thilhlan, a bawp thên tawh leh chawikân tawh chu i tithianghlim tûr a ni. 28 Chu chu Israela thlahte laka kumkhuaa Arona leh a fapate chanvo tûra ruat a ni ang. Chu chu chawikân thilhlan a ni si a; remna thilhlana an inthawinate zînga Israela thlahten an chawikân thilhlan tûr chu a ni ang, LALPA tâna an chawikân thilhlan ngei chu. 29 “Tin, Arona silhfên tihthianghlimte chu a hnuah a fapaten an la rochung zêl ang, chûngte chuan an inthuama, hriak thih leh tihthianghlim an nih theih nân. 30 A fapa, a aiawha puithiam hna thawk tûra ruata chu, hmun thianghlima rawngbâwl tûra inbiakna puan ina a luh hunah, ni sarih chhûng chu inthuamin a awm tûr a ni. 31 Tin, tihhranna berâmpa chu rawn lain, a sa chu hmun thianghlimah i chhûm tûr a ni. 32 Tichuan, Arona leh a fapate chuan berâmpasa leh fawnga chhangpêrte chu inbiakna puan in kawngka bulah ei rawh se. 33 Tin, chûng inremna thil, anmahni tihhran nân leh tihthianghlim nâna hlante chu an ei tûr a ni; amaherawhchu, thil thianghlim a nih avângin mi dang zawngin an ei ve tûr a ni lo. 34 Tin, chumi tihhranna sa emaw, chhang emaw chu a tûk thlenga a bâng a la awm chuan, a bâng chu meiin i hâl ral tûr a ni. Chu chu thil thianghlim a nih avângin ei tûr a ni lo ve. 35 Tichuan, thu ka pêk zawng zawng che ang hian Arona leh a fapate chungah chuan i ti tûr a ni. Ni sarih anmahni i tihrang tûr a ni. 36 Tin, ni tin sual hlan inthawina sebâwngpa, inremna tûrin i hlân tûr a ni. Tichuan, inremna i siam hunin maichâm chu i tifai dâwn nia; tin, a tithianghlim tûrin hriak i hnawih tûr a ni. 37 Maichâm atân inremna ni sarih siamin i tithianghlim tûr a ni a; tichuan, maichâm chu thil thianghlim tak a lo ni ang. Maichâm dek apiang chu a lo thianghlim zêl ang.
Ni tin thilhlan
38 “Chutichuan, maichâm chunga i hlan tûr chu hei hi a ni: ni tin kum khat tling berâmno pahnih zêl. 39 Berâmno pakhat chu zîng lamah i hlân tûr a ni a, berâmno pakhat chu tlai lamah i hlân tûr a ni. 40 Bêramno pakhat hlannaah chuan chhangphut dip tak, epha hmun sâwma ṭhena hmun khat, hriak sâwr hin hmun lia ṭhena hmun khat nêna chawhpawlh i telh tûr a ni a; in tûr thilhlan atân uain hin hmun lia ṭhena hmun khat nên. 41 Tin, berâmno pakhat chu tlai lamah i hlân tûr a ni a, chu chu zîng lama ei tûr thilhlan dân ang leh in tûr thilhlan dân angin rimtui, LALPA tâna meia thilhlan atân i hlân tûr a ni. 42 Chu chu in thlahte thlenga inbiakna puan in kawngka bula LALPA hmaa hâlral thilhlan fo tûr a ni ang a, chutah chuan a be tûr chein ka lo kal ṭhîn ang. 43 Israela thlahte pawh chutah chuan ka rawn be ṭhîn ang a; tichuan, Puan in chu ka ropuinaa tihthianghlim a ni ang. 44 Tin, inbiakna puan in leh maichâm chu ka tithianghlim ang. Arona pawh a fapate nên ka tâna puithiam hna thawka ka rawng an bâwl theihna tûrin ka tithianghlim bawk ang. 45 Tichuan, Israela thlahte zîngah chuan ka chêng ang a, an Pathian ka ni ang. 46 Chutichuan, anmahniho zînga ka chên theihna tûra Aigupta ram ata hruai chhuaktu LALPA an Pathian chu ka ni tih an hria ang. Kei hi LALPA an Pathian ka nih hi.
Rimtui hâlna maichâm
1 “Tin, rimtui hâlna tûr maichâm i siam tûr a ni; thingri thingin i siam tûr a ni. 2 A dung lam tawng khat, a vâng lam tawng khat a ni tûr a ni a, kil li neia siam tûr a ni; tin, a sân lam chu tawng hnih ni sela. A kîte chu maichâm nên chuan inzawm vek tûr a ni. 3 Tin, a chung te, a pang vêl te leh a kîte chu rangkachak hlîr hlak tîin i luan tûr a ni; tin, a kotlâng vêlah chuan rangkachak i dah tûr a ni. 4 Tin, a kotlâng hnuai lamah, a sîr tuakah chuan rangkachak khâng pahnih i siam tûr a ni. A sîr pahnihah chuan i siam tûr a ni a, chûng chu a zâwnfung rawlhna tûr a ni ang. 5 Tin, thingri thinga zâwnfungte siamin rangkachak tîin i luan tûr a ni. 6 Tin, chu chu thuhriattîrna chunga ka rawn biak ṭhinna tûr che zahngaihna ṭhutphah hmaah, thuhriattîrna bâwm kianga puanzâr bulah i dah tûr a ni. 7 Tin, Aronan chutah chuan englo rimtui tak hâl tûr rimtui a hâl tûr a ni a; tûk tin khâwnvârte a tihfai hun apiangin a hâl ṭhîn tûr a ni. 8 Tin, Aronan tlai lamah khâwnvârte a chhit hun chuan rimtui chu a hâl ṭhîn tûr a ni; chu chu in thlahte thlenga LALPA hmaa rimtui a ni reng ang. 9 Chutah chuan rimtui dang emaw, hâlral thilhlan emaw, ei tûr thilhlan emaw in hlân tûr a ni lo va; tin, chutah chuan in tûr thilhlan pawh in leih tûr a ni lo. 10 Tin, Aronan kum khatah vawi khat ki chungahte chuan inremna a siam tûr a ni; inremna tûra sual thawina thisen chuan kum tin vawi khat in thlahte thlengin inremna chu a siam ṭhîn tûr a ni. Chu chu LALPA tân thianghlim tak a ni,” tiin.
Pathian chênna biakbûk tân chhiah
11-12 Tin, LALPAN Mosia hnênah, “Israela thlahte awm zât i chhiar hun chuan, a awm zât i chhiar ang zêlin mi tinin an nunna tlanna chu LALPA an pe zêl tûr a ni, anmahni i chhiar huna an zînga hri a lên loh nân. 13 Hei hi an pêk tûr chu a ni: chhiar tawhte zînga tel tûra kal apiangte chuan, hmun thianghlima sekel an pêk ṭhin ang sekel chanve an pe tûr a ni (sekel chu gera sawmhnih a ni). LALPA puala thilhlan atân sekel chanve. 14 Chhiar tawhte zînga tel tûra kal apiang, kum sawmhnih achin chung lam zawng chuan LALPA puala thilhlan chu an pe tûr a ni. 15 In nunna tlanna tûra LALPA puala thil in hlan chuan sekel chanve aia tam chu mi hausain a pe tûr a ni lo va, mi rethei pawhin chumi aia tlêm chu a pe tûr a ni lo. 16 Tin, Israela thlahte tlanna man tangka chu lo lain, inbiakna puan ina rawngbâwl nân i lo ruat tûr a ni; in nunna tlan nâna LALPA hmaa Israela thlahte tâna i hriat rengna a lo nih theihna tûrin,” tiin a sawi a.
Dâr maihûn
17-18 Tin, LALPAN Mosia hnênah, “Insilna tûr dâr maihûn, a hûnchhan dâr nên i siam bawk tûr a ni. Chu chu inbiakna puan in leh maichâm inkârah i hûng tûr a ni a, chutah chuan tui i dah tûr a ni. 19 Tin, Arona leh a fapaten chutah chuan an kete an sil ṭhîn tûr a ni. 20 Inbiakna puan in chhûnga an luh hunin emaw, LALPA tâna meia thilhlan hâl tûra maichâm bula rawngbâwl tûra an lo kal hunin emaw, tui chuan an insil tûr a ni; chuti lo chuan, an thi mai ang. 21 Chutichuan, an thih loh nân an kut leh an kete chu an sil ṭhîn tûr a ni. Chu chu an tân kumkhua atâna thuruat a ni ang - amah leh a thlahte leh an thlahte thleng tân pawh,” tiin a sawi a.
Hriak thih tûr
22-23 LALPA vêkin Mosia hnênah, “Rimtui tui ber chi zînga mi - murra tui sekel zanga leh, thakthîng rimtui, chumi zâtve sekel zahnih leh sawmnga zet - leh fu rimtui sekel zahnih leh sawmnga leh, 24 thakthîng chi dang sekel zanga, hmun thianghlima sekel an pêk ṭhin ang, olive hriak hin khat nên rawn lain, 25 rimtui siamtu siam angin hriak thih chu hriak thianghlim atân i siam tûr a ni. Chu chu hriak thih chi hriak thianghlim a ni ang. 26 Tin, inbiakna puan in te, thuhriattîrna bâwm te, 27 dawhkân leh a bungbêl zawng zawngte, khâwnvâr dahna leh a hmanruate, rimtui hâlna maichâm te, 28 hâlral thilhlan maichâm leh a hmanrua zawng zawngte, maihûn leh a hûnchhante nên, chu chuan i hnawih vek tûr a ni. 29 Tin, thianghlim tak an lo nih theih nân i tithianghlim tûr a ni; chûng dek apiangte chu an lo thianghlim zêl ang. 30 Tin, ka tân puithiam hna thawka ka rawng an bâwl theih nân Arona leh a fapate chu hriak thihin i tithianghlim tûr a ni. 31 Tin, Israela thlahte hnênah, ‘He hriak hi in thlahte thlenga ka hriak thianghlim thih mi chu a ni ang. 32 Mihring taksaah chuan leih tûr a ni lo va; hemi siam dân anga siam, a ang tak hian in siam tûr a ni hek lo. Hei hi zawng a thianghlim a; tichuan, in tân thianghlim a ni tûr a ni. 33 Tu pawhin a anpui siam sela emaw, mi dang tân tu pawhin lo hmang sela emaw, chu mi chu a chipuite zîng ata tihboral a ni ang,’ tiin sawi ang che,” tiin a sawi leh a.
Rimtui hâl tûr
34 Tin, LALPAN Mosia hnênah, “Rimtui tui tak - stakte te, onuka te, galbanum te - la ang che, rimtui tui tak beraw fîm tak nên; bûk inzât vekin. 35 Chu chu rimtui siamtu siam angin chia al, fîm leh thianghlim takin rimtui i siam tûr a ni. 36 A ṭhente chu râwt dip dep tûr a ni a, ka rawn biak ṭhinna tûr che inbiakna puan in chhûnga thuhriattîrna bulah chuan i dah tûr a ni. Chu chu in tân thil thianghlim tak a ni ang. 37 Tin, chumi rimtui i siam tûr, a siam dân tûr anga siam chu zawng nangmahni tân in siam tûr a ni lo ve, LALPA tâna thil thianghlimah i ngai tûr a ni. 38 Tu pawhin hnim atân ngawta chutiang a siam chuan chu mi chu a chipuite zîng ata tihboral a ni ang,” a ti a.
Pathian chênna biakbûk sa tûr mi themthiam
1-2 Tin, LALPAN Mosia hnênah, “Ngai teh, Juda hnama mi Hura fapa Uria, chu mi fapa Bezalela chu ka thlang tawh a. 3-5 Tin, ani chu finna te, hriat thiamna te, hriatna te, kawng tinrênga themthiamna te, thiltih tûr fing taka suangtuah thiamna te, zeh tûra lunghlute phel thiamna te, thing zai mawi dân thiamna te, kawng tinrênga themthiamna te nei tûrin Pathian Thlarauvin ka tikhat tawh e. 6 Tin, ngai teh, a hnêna thawk ve tûrin Dan hnama mi Ahisamaka fapa Oholiaba chu keimahin ka ruat leh e; thil siam tûra thu ka pêk zawng zawng che: 7 inbiakna puan in te, thuhriattîrna bâwm te, chumi chunga zahngaihna ṭhutphah te, puan in chhûnga bungrua zawng zawng te; 8 tin, dawhkân leh a hmanrua te, rangkachak hlîr hlaka siam khâwnvâr dahna, a hmanrua zawng zawngte nên, rimtui hâlna maichâm te; 9 tin, hâlrala thilhlanna maichâm, a bungbêl zawng zawngte nên, maihûn leh a hûnchhan te; 10 tin, silhfên mawi tak taka tah te, puithiam rawng an bâwl huna hâk tûr puithiam Arona silhfên thianghlim leh a fapate silhfên te; 11 tin, hriak thih mi te, hmun thianghlim atâna rimtui tui takte hi an siam theihna tûrin mi themthiamho zawng zawngte finna ka pe e. Tih tûra thu ka pêk zawng zawng che ang kha an ti tûr a ni,” tiin a sawi a.
Sabbath - chawlh tûr
12-13 Tin, LALPAN Mosia hnênah, “Israela thlahte hnênah chuan, ‘Ka Chawlhnite hi in serh ngei ngei tûr a ni, in thlahte thlenga keimah leh nangmahni inkâra chhinchhiahna a ni si a; kei hi LALPA, nangmahni tithianghlimtu che u ka ni tih in hriat theih nân. 14 Chuvângin, Chawlhni hi in serh tûr a ni, chu chu in tân ni thianghlim a ni si a. Tu pawh tibawlhhlawh apiang chu tihhlum ngei ngei tûr a ni; tu pawh chumi nia hna eng pawh thawk chu, chu mi chu a chipuite zîng ata tihboral tûr a ni. 15 Ni ruk chhûng hna thawh nân hman tûr a ni a; a ni sarih ni erawh chu chawlh dêrna Chawlhni, LALPA tâna ni thianghlim a ni. Tu pawh Chawlhnia hna thawk apiang chu tihhlum ngei ngei tûr a ni. 16 Chutichuan, Israela thlahte hian Chawlhni chu an thlahte thlenga kumkhuaa thuthlun nân, chu Chawlhni chu an serh tûr a ni. 17 Keimah leh Israela thlahte inkârah hian kumkhuaa thuthlun chhinchhiahna a ni; ni ruk chhûngin LALPAN lei leh vânte a siam a; tin, a ni sarih ni chuan a châwl a, a intihahdam ta a ni si a,’ ti bawk ang che,” tiin a sawi a. 18 Tichuan, Sinai tlânga amah a biak zawh chuan thuhriattîrna lungphêk pahnih, lungphêk, Pathian kutzungṭanga ziak chu Mosia a pe ta a.
Rangkachak bâwngno lem
1 Tin, mipuite chuan Mosia chu tlâng ata lo chhuk thla har ta êmin an hria a, mipuite chu Arona hnênah an kal khâwm a, a hnênah chuan, “Khai, kan hma hruai tûrin pathiante min siamsak rawh; he Mosia, Aigupta ram ata min hruai chhuaktu lah hi a chanchin kan hre ta si lo va,” an ti a. 2 Tichuan, Aronan an hnênah, “In nupuite, in fapate leh in fanute beh lai, rangkachak bengbehte kha han thlawn ula, ka hnênah han la rawh u,” a ti a. 3 Chutichuan, mipuiho zawng zawng chuan rangkachak bengbeh an beh laite chu an thlawn vek a, Arona hnênah chuan an rawn la a. 4 Tin, ani chuan an kut ata chu a lo la a, thîr zumin a han din a, bâwngno lemah a chhûng ta a. Tin, anni chuan, “Aw Israel-te u, hêngte hi Aigupta ram ata rawn hruai chhuaktu che u in pathiante an nih hi!” an ti a. 5 Tin, chu chu Aronan a han hmuhin, a hmaah chuan maichâm a siam ta a. Tin, Arona chu a tlângau va, “Naktûk hian LALPA tân kût awm rawh se,” a ti a. 6 Tichuan, a tûk zîng takah an tho va, hâlrala thilhlante an hlân a, remna thilhlante an rawn la a; tichuan, mipui chu ei leh in tûrin an ṭhu khâwm a, infiam tûrin an tho leh a. 7 Tin, LALPAN Mosia chu a bia a, “Zu chhuk tawh khai, i mite Aigupta ram ata i rawn hruai chhuahte khu an intichhe zo ta vek mai. 8 Ka thupêkte chu an hawisan hma zet mai. Bâwngno lem an insiam a, an bia a, a hnênah chuan an inthawi a, ‘Aw Israel-te u, hêngte hi Aigupta ram ata rawn hruai chhuaktu che u in pathiante an nih hi!’ an ti e,” a ti a. 9 Tin, LALPAN Mosia hnênah, “He miteho hi ka enthla reng a, ngai teh, hnam luhlul tak an lo nih hi! 10 Tichuan, lo ngawi rawh, anmahni kâng ral zo vek khawpin an chungah ka thinur chu ling hle teh se. Tin, nang hi chi ropui takah ka siam ang che,” a ti a. 11 Tin, Mosian LALPA a Pathian hnênah, “LALPA, thiltihtheihna nasa tak leh kut chak taka i mi, Aigupta ram ata i rawn hruai chhuahte chungah hian engah nge i thinurna chu a lin hle le? 12 Aigupta miten engah tehlul nge, ‘An tâna ṭha lo tûr tlângahte thah tûr leh, lei chung ata kâng ral vek tûrin a hruai chhuak a lo nih hi,’ an la rawn tih ang le? I thinur nasa tak hi han tireh la, i mite chunga he thil ṭha lo tih i tum hi han lamlêt leh ang che. 13 I chhiahhlawh Abrahama te, Isaaka te, Israela te hnêna, ‘Vâna arsi zâtin i thlahte chu ka la tipung ang a, he ram ka lo sawi tawh zawng zawng hi i thlahte ka la pe bawk ang a; tichuan, kumkhuain an luah hlen tawh ang,’ tia nangmah ngei inchhâla chhia i lo chham tawhnate kha hre reng ang che,” tiin a ngên chiam a. 14 Tichuan, LALPAN, “Ka mite chungah thil ṭha lo ka ti ang,” a tih chu a lamlêt ta a. 15 Tin, Mosia chu tlâng ata thuhriattîrna lungphêk pahnih kengin a lêt thla leh ta a; lungphêk a lehlam lehlam panga ziak chuan ve venate chu; a lehlam lehlam ve veahte chuan ziak a ni. 16 Tin, lungphêkte chu Pathian kutchhuak a ni a; tin, a ziakte pawh chu Pathian ziak ngei, lungphêkte chunga ziak a ni. 17 Tin, Josuan mipui au thâwm a han hriat chuan Mosia hnênah, “Riahhmun lamah indo thâwm ri a awm ka ti!” a ti a. 18 Tin, ani chuan, “Hnehtu au thâwm a nih loh chu, hnehate au thâwm pawh a ni hek lo; hla sa thâwm a ni ka hriat zâwk ni,” a ti a. 19 Tin, heti hi a ni a, riahhmun kiang a va thlen chuan, sebâwngno lem leh lâm chu a hmu ta a. Tichuan, Mosia thinrim chu a ling ta phut mai a, a lungphêk kente chu a paih ta ṭhuai a, tlâng hnuaiah chuan a paih keh ta a. 20 Tin, sebâwngno lem an siam chu a la a, meiah a rawh a, a râwt dip derh a, tuiah a phul chiam a, Israela thlahte chu a intîr ta a. 21 Tin, Mosian Arona hnênah chuan, “Hênghote hian i chungah eng nge maw an tiha, hetiang thil sual nasa tak mai an chunga i thlentîr le?” a ti a. 22 Tin, Arona chuan, “Ka pu thinrim hi ling teh thut mai suh se a! Hêng mipuiho hi sual lam âwn tlat mi an ni tih i hria alâwm. 23 Ka hnênah, ‘Kan hma hruai tûrin pathiante min siamsak rawh; he Mosia, Aigupta ram ata min hruai chhuaktu lah hi a chanchin kan hre ta si lo va,’ an rawn ti a. 24 Tin, keiin an hnênah, ‘Tu pawh rangkachak nei apiangin rawn thlawn rawh se,’ ka ti a. Chutichuan, min rawn pe a, keiin meiah ka lo paih lût a; tichuan, he sebâwngno lem hi a lo chhuak ta mai alâwm maw le,” a ti a. 25 Tin, mipuite chu an duh duhin an tâl tih Mosian a hria a (Arona chuan an hmêlmate laka hmuhsitawma awm khawpin an duh duhin a lo tâltîr ta si a); 26 tichuan, Mosia chu riahhmun luhna kawngkaah a ding a, “Tu pawh LALPA lama ṭang apiang chu ka hnênah lo kal rawh se,” a ti a. Tichuan, Levia fate zawng zawng chu a hnênah an va kal khâwm a. 27 Tin, an hnênah, “LALPA, Israel-te Pathianin, ‘Mi tinin in khandaih pai ula, riahhmun chhûngah hian a luhna kawngka aṭanga kawngka lehlam thlengin vâk vêl ula, mi tinin in unaupa pawh, mi tinin in ṭhianpa pawh, mi tinin in ṭhenawmpa pawh that zêl rawh u,’ a ti a ni,” a ti a. 28 Tin, Levia fate chuan Mosia thu ang chuan an ti a. Tin, chumi ni chuan mi sângthum an thi a. 29 Tin, Mosian, “Vawiinah hian LALPA hnênah intihrang rawh u, a ni, mi tinin mahni fapa te, mahni unaupa te an lo do ta si a; tichuan, vawiinah hian malsâwmnain a rawn vûr thei dâwn che u nia,” a ti a. 30 Tin, heti hi a ni a, a tûkah chuan Mosian mipuite hnênah chuan, “Thil sual nasa tak mai in lo ti ta a. Chutichuan, LALPA hnênah ka han chho vang e; in sualnaah hian inremna ka siam thei mahna,” a ti a. 31 Tichuan, Mosia chu LALPA hnênah a han kal leh a, “Aw, hênghote hian thil sual nasa tak mai an lo ti ta a, rangkachak pathiante chu an lo insiam ta. 32 Amaherawhchu, an sual i ngaidam thei ang emaw chu? I theih loh zawngin, i lehkhabua i lo ziak tawh ata kha mi thai bo tûrin ka ngên a che,” a ti a. 33 Tin, LALPAN Mosia hnênah, “Tu pawh ka chunga thil tisual apiang chu ka lehkhabu ata ka thai bo vang. 34 Tichuan, kal la, kalna tûr ka hrilh tawh che hmunah khân mipuihote hi va hruai phawt rawh. Ngai teh, ka vântirhkohvin i hma a hruai zêl ang. Amaherawhchu, ka rawn hrem hunah chuan an sualna ngeiah chuan ka rawn hrem dâwn a ni,” a ti a. 35 Tin, Arona din sebâwngno lem chu an siam avângin LALPAN mipuite chu a hrem ta a.
Pathianin Sinai tlâng chhuahsan thu a pe
1 Tichuan, LALPAN Mosia chu a bia a, “Chhuak ula, Abrahama te, Isaaka te, Jakoba te hnêna, ‘I thlahte hnênah ka la pe ang,’ tia chhia ka lo chham tâk ramah chuan, nang leh Aigupta ram aṭanga i rawn hruai chhuahte nên hian heta ta hi han chho tawh u, 2-3 hnutetui leh khawizu luanna ramah chuan. Tin, in hmaah vântirhkoh ka rawn tîr ang a; tichuan, Kanaan-ho te, Amor-ho te, Hit-ho te, Periz-ho te, Hiv-ho te, Jebus-ho te chu ka hnawt chhuak ang. Kei zawng in zîngah ka han chho ve dâwn lo ve, hnam luhlul tak in lo ni si a; kawnglakah ka tiboral hlauh dah ang che u,” a ti a. 4 Tin, mipuite chu chu thu lâwmawm lo tak an hriat chuan an ṭap hlawm a, tu mah rêng rêng an inchei duh ta lo va. 5 Tin, LALPAN Mosia hnênah, “Israela thlahte hnênah, ‘Hnam luhlul tak in ni e. In zîngah rei lo tê pawh ka han tel ve zawngin ka tiboral ngei ang che u. Chuvângin, in incheinate kha hlîp vek rawh u; tichuan, ka tih dân tûr che u ka hre thei ang, a ti,’ ti ang che,” a ti a. 6 Tin, Israela thlahte chuan an incheinate chu Horeb tlâng aṭang chuan an hlîp thla hlen ta a.
LALPA chênna biakbûk
7 Tin, Mosian puan in kha a chhawm zêl a, riahhmun pâwn lam hla deuh takah a zâr ṭhîn a; chu chu inbiakna puan in a ti a. Tin, heti hi a ni a, tu pawh LALPA zawng duh apiang chu riahhmun pâwn lama inbiakna puan inah chuan an va kal ṭhîn a. 8 Tin, heti hi a ni a, Mosia chu puan in pana a chhuah hunin mipui zawng zawng chu an tho vek a, mi tin mahni puan in kawngkaah an ding ṭheuh va, Mosia puan ina a luh thlengin an thlîr reng ṭhîn. 9 Tin, heti hi a ni a, Mosia chu puan ina a luh veleh chhûm ding chu a lo chhuk a, puan in kawngkaah chuan a lo ding ṭhîn a; tin, LALPAN Mosia chu a rawn be ṭhîn. 10 Tin, mipui zawng zawngin chhûm ding chu puan in kawngkaa ding an hmu a; tichuan, mipui zawng zawng chu an tho va, mahni puan in kawngka ṭheuhvah chuan chibai an lo bûk ṭhîn a. 11 Tin, miin a ṭhian a bia ang mai hian LALPAN Mosia chu inhmatawnin a be ṭhîn a. Tin, riahhmun lamah chuan a lo kîr leh ṭhîn a; a rawngbâwltu Josua, Nuna fapa, tlangvâl erawh chu puan in chhûng ata chu a lo chhuak leh ve ṭhîn lo.
LALPAN a mite hnêna awm zêl a tiam
12 Tin, Mosian LALPA hnênah chuan, “Ngai teh, nangin ka hnênah, ‘He mite hi han hruai chho rawh,’ i ti a ni a; tu nge ni ka hnêna i rawn tirh ve dâwn mi la hrilh si lo. Nang lah chuan, ‘I hmingah ka hre chiang che alâwm; tin, ka mittlungin i awm tih ka hre bawk alâwm,’ i ti a. 13 Chuvângin, i mit ka tlun si chuan, nangmah ka hriat chian theih nân che leh i mittlunga ka awm theih nân, tûnah hian i kawngte hi khawngaih takin mi hriattîr ang che. Tin, he hnam hi i mite ngei an ni tih ngaihtuah ang che,” a ti a. 14 Tin, ani chuan, “In zingah ka tel ve zêl ang a; tichuan, ka chawlhtîr ang che u,” a ti a. 15 Tin, ani chuan a hnênah, “Kan zînga i tel ve zêl si loh chuan heta ta hi min hruai chhuak ma ta che. 16 Kei leh i mite hi i mittlungin kan awm a ni tih hi engtin nge hriatna a awm theih tâk ang? Lei chunga mihring zawng zawngte hi kei leh i mite nên kan inthliar hranna tûr chuan, nang kan hnêna i kal ṭhin hi a ni lo vem ni?” a ti a. 17 Tin, LALPAN Mosia hnênah, “Chu pawh chu i sawi ang chuan ka ti ang e; ka mit i tlung si a, i hmingah ka hre chiang bawk si chia,” a ti a. 18 Tin, ani chuan, “I ropuina chu khawngaih takin mi han entîr teh,” a ti a. 19 Tin, ani chuan, “Ka ṭhatna zawng zawng chu i hmaah ka lantîr ang a, LALPA hming chu i hmaah ka puang zêl ang. Ka khawngaih apiang chu ka khawngaih ang a, zah ka ngaihna chung apiangah chuan zah ka ngai ang,” a ti a. 20 Tin, ani chuan, “Ka hmêl zawng i hmu thei lo vang; mi hmua nung reng thei tu mah rêng rêng an awm si lo va,” a ti a. 21 Tin, LALPAN, “En teh, ka kianga hi hmun pakhat a awm hi, lungpui chungah hian i ding ang a. 22 Tin, heti hi a ni ang a, ka ropuinain a rawn kal pelh chhûng che chuan, lungpui khi chhûngah hian ka dah ang chia, ka kal pelh hma loh che chuan ka kutin ka khuh ang chia. 23 Tin, ka kut chu ka han la leh ang a; tichuan, ka hnung lam chu i hmu ang; ka hmêl erawh chu hmuh tûr a ni lo ve,” a ti a.
Thupêk ziakna lungphêk siam nawn
1 Tin, LALPAN Mosia hnênah, “Lungphêk pahnih hmâna mi ang kha chher leh rawh; tin, lungphêkah chuan hmâna i tihkeh tâk lungphêka thu chuang ang kha ka ziak leh ang e. 2 Naktûk zîngah inpeih tum ang che; tin, zîngah chuan Sinai tlângah lo chho la, tlâng chhîpah ka hmaan lo ding ang che. 3 I hnênah tu mah lo kal ve suh se, tlângah rêng rêng chuan tu mah a lanin lo lang hauh suh se; berâm rualte leh bâwng rualte pawh tlâng pangah chuan tla hlek bawk suh se,” a ti a. 4 Chutichuan, lungphêk pahnih hmâna mi ang kha a chher a. Tin, Mosia chu zîng takah a tho va, LALPAN thu a pêk angin Sinai tlângah chuan a han lâwn a; tin, lungphêk pahnih a keng a. 5 Tin, LALPA chu chhûmah chuan a lo chhuk a; tin, a kiangah a va ding a, LALPA hming chu a lam ta a. 6 Tin, LALPA chuan a hma lamah chuan a kal pêl a, “LALPA chu, LALPA chu, Pathian lainatnaa khat, mi khawngaih thei tak, thinnel tak, ngilneihna leh thutak ngah, 7 mi sâng tam tak chunga khawngaihna lantîr ṭhîn, khawlohna te, bawhchhiatna te, suahsualnate ngaidam ṭhîn; thiam lova ruatte chhuah mai ngai lo; pate khawlohna avânga fate, fate fa lehte, chhuan thumna leh chhuan lina thleng pawha hrem ṭhîn chu,” tiin a puang ta a. 8 Tichuan, Mosia chu a kaikûn thuai a, chibai a bûk ta a. 9 Tin, ani chuan, “Tûnah hian i mittlung ka nih chuan, aw LALPA, LALPA chu kan hnênah khawngaih takin kal ve ang hmiang, hnam luhlul tak an ni na a; tichuan, kan khawlohna leh kan sualna ngaidam la, i ro chan atân min nei ang che,” a ti a.
Thuthlung nemngheh thar a ni
10 Tin, ani chuan, “Ngai teh, thu ka thlung e. Khawvêl zawng zawng leh tu hnam zîngah mah la tih ngai loh, i mite zawng zawng mit hmuhah hian thil mak ka ti dâwn e; tichuan, i vêla awmho zawng zawngte hian LALPA thiltih chu an hmu ang. I tâna ka thiltih tûr hi râpthlâk tak a ni dâwn si a. 11 Vawiina ka thupêk tûr che hi pawm rawh. Ngai teh, i hmaah chuan Amor-ho te, Kanaan-ho te, Hit-ho te, Periz-ho te, Hiv-ho te, Jebus-ho te ka hnawt chhuak dâwn e. 12 Fîmkhur rawh; chuti lo chuan, i kalna tûr rama chêngte hnênah thu i thlung ang a, in zîngah hian thang a lo ni dah ang e. 13 Amaherawhchu, an maichâmte chu in tichim vek tûr a ni a, an lungphunte chu tikeh sawm vekin, an Aseri-te chu in kit vek tûr a ni; 14 pathian dang rêng rêng chu i be tûr a ni si lo va; LALPA chu a hming rêng pawh Thîkthuchhiaa a ni a, Pathian thîkthuchhia a ni si a; 15 chuti lo chuan, chumi rama mite hnênah chuan thu i thlung ang a, an pathiante lakah an uirê ang a, an pathiante hnênah an inthawi ang a, an rawn sâwm chein an inthawina chu i ei dah ang e; 16 tin, i fapate tân an fanute i nei ang a, an fanute chu an pathiante lakah an uirê ang a, i fapate pawh an pathiante lakah an uirêtîr dah ang e. 17 Milem chhûn pathiante chu i siam tûr a ni lo. 18 “Chhang dawidim telh loh kût i nei tûr a ni. Thu ka lo pêk tâk che ang khân, ni sarih chhûng chu chhang dawidim telh loh, Abib thla hun ruatah khân i ei tûr a ni; Abib thla khân Aigupta ram ata chu i lo chhuak a ni si a. 19 Chhûl keu hmasa ber apiang chu ka ta a ni; tin, i ran pa zawng zawng, sebâwngpa leh berâmpa piang thla hmasa berte pawh. 20 Tin, sabengtung piang thla hmasa ber chu berâmnovin i tlan tûr a ni. Tin, i tlan duh loh leh a ring chu i ulh tliak tûr a ni. I fapa piang hmasa zawng zawng chu i tlan tûr a ni. Tichuan, ka hmaah tu mah hi kut ruakin in lo lang tûr a ni lo. 21 Ni ruk chhûngin hna i thawk tûr a ni a, a ni sarih ni erawh chuan i châwl tûr a ni; lei leh lai leh buh seng lai pawhin i châwl tûr a ni. 22 Chawlhkâr kût, buh thar tirh kût chu, kum a lo ral a, buh khung vek hnua pâwl kût nên i nei tûr a ni. 23 I mipa zawng zawngte chu kum khatah vawi thum, LALPA PATHIAN, Israel-te Pathian hmaah chuan an rawn inlan ṭhîn tûr a ni. 24 I hmaah hnam tin ka hnawt chhuakin, i ramrite chu ka zauh dâwn si a; kum khatah vawi thum LALPA i Pathian hmaa inlan tûra i han kal hunah chuan tu mahin i ram hi an rawn ît hek lo vang. 25 “Ka tân inthawina sa thisen chu chhang dawidim telh nên chuan i rawn hlân tûr a ni lo, kalhlên kût inthawina pawh chu a tûk thlengin awmtîr tûr a ni hek lo. 26 I lova thlai thar hmasa ber chu LALPA i Pathian inah i rawn dah tûr a ni. Kêlnosa, a pui hnutetuiin i chhûm tûr a ni lo,” a ti a. 27 Tin, LALPAN Mosia hnênah, “Hêng thute hi ziak rawh khai, hêng ang thute hian a nia i hnênah leh Israel-te hnêna thu ka thlun ni,” a ti a. 28 Tin, chutah chuan LALPA hnênah ni sawmli leh zan sawmli a awm a; chaw rêng rêng a ei lo va, tui pawh a in hek lo. Tin, lungphêkahte chuan thuthlunna thu, thu sâwm pêkte chu a ziak ta a.
Sinai tlâng aṭangin Mosia a chhuk
29 Tin, heti hi a ni a, Mosia chu thuhriattîrna lungphêk pahnih chu a kuta kengin Sinai tlâng ata chu a chhuk a, tlâng ata a chhuk chuan, Mosia chuan chutia an inbiakna avâng chuan a hmai vun chu a lo êng ta tih a hre hauh lo va. 30 Tin, Arona leh Israela thlah zawng zawngten Mosia an han hmuh chuan, ngai teh, a hmai vun chu a lo êng a, an rawn hnaih ngam lo va. 31 Tin, Mosian anmahniho chu a han au va; tin, Arona leh pung khâwmho rorêltu zawng zawngte chu a hnênah an lo kîr leh a; tin, Mosian anniho chu a lo bia a. 32 Chumi hnuah chuan Israela thlahte zawng zawng chuan an rawn hnaih a; tichuan, Sinai tlânga LALPA nêna an inbiakna zawng zawngte chu thu pein a lo hrilh chhâwng a. 33 Tin, Mosian anmahni chu a biak zawh chuan a hmai chu hmaikhuhnain a khuh ta a. 34 Amaherawhchu, Mosia LALPA be tûra a hmaa a luh hun apiang chuan, a lo chhuah leh hma loh chuan hmaikhuhna chu a hlîp ṭhîn a; tin, a lo chhuak leh ṭhîn a, a thupêkte chu Israela thlahte a hrilh chhâwng ṭhîn a. 35 Tin, Israela thlahte chuan Mosia hmai chu an han en a, Mosia hmai vun chu a lo êng ṭhîn a; tin, Mosia chu Pathian be tûra a luh leh hma chuan hmaikhuhna chuan a hmai a khuh leh ṭhîn a.
Sabbath chungchânga dân
1 Tin, Mosian Israela thlah pung khâwmho zawng zawngte chu a ko khâwm a, an hnênah, “Hêng hi a nih hi LALPAN in tih tûra thu a pêk che u chu: 2 Ni ruk chhûng hna thawh nân hman tûr a ni a, a ni sarih ni erawh chu in tân ni thianghlim, LALPA tâna chawlh dêrna Chawlhni a ni tûr a ni: tu pawh chumi nia hna thawk apiang chu tihhlum tûr a ni ang. 3 Chawlhni chuan in chênna hmun rêng rêngahte chuan mei in chhêm tûr a ni lo,” a ti a.
Biakbûk tâna thilpêk
4 Tin, Mosian Israela thlahte pung khâwmho zawng zawng hnênah chuan, “Hei hi a nih hi LALPAN thu a pêk che u chu: 5 ‘In zîng ata LALPA tâna thilhlan tûr rawn la rawh u. Tu pawhin a thinlunga pêk châk apiang chuan LALPA tân hlan tûr chu rawn la rawh se: rangkachak te, tangkarua te, dâr te, 6 la dumpâwl te, senduk te, senlâr te, lazai sîn te, kêl hmul te nên; 7 tin, berâmpa vun chhum sen te, savun ṭha mi te, thingri thingte nên; 8 tin, khâwnvâr atân hriak te, hriak thih mi atân leh hâl tûr rimtui tak atân englo rimtui nên; 9 tin, puithiam kawr leh kawr âwma zeh tûrin onukion lungte leh lunghlute nên.
LALPA chênna biakbûk tâna hman tûr thilte
10 “ ‘Tin, in zînga mi themthiam apiang chu lo kal sela, LALPAN siam tûra thu a pêk apiang chu siam rawh se: 11 biakbûk te, a puan in te, a khuhna te, a chilh behna te, a ban rem khâwm te, a bangrel te, a ban te, a nghahchhan ker kuakte nên; 12 bâwm leh a zâwnfung te, zahngaihna ṭhutphah te, a daidanna tûr puanzâr nên; 13 dawhkân leh a zâwnfung te leh a hmanrua zawng zawng te, chhangdah te nên; 14 tin, êng atân khâwnvâr dahna te leh a hmanrua zawng zawng te, a khâwnvâr te, chhit ên atân hriak te nên; 15 tin, rimtui hâlna maichâm leh a zâwnfung te, hriak thih mi te, hâl tûr rimtui tak te, biakbûk kawngkaa zâr tûr kawngka puanzâr te nên; 16 hâlrala thilhlanna maichâm, a dâr lên leh a zâwnfungte leh a hmanrua zawng zawng te, maihûn leh a hûnchhan te nên; 17 biakbûk hung chhûng kawtlaia puanzâr te, a ban te, a ban nghahchhan ker kuak te leh a hung chhûng kawngkaa puanzâr te nên; 18 biakbûk kilh behna te, a hung chhûng kawtlai kilh behna te, a hrui te nên; 19 hmun thianghlima rawngbâwlna tûra silhfên mawi taka tah te, puithiam hna an thawh huna hâk tûr puithiam Arona silhfên thianghlim leh a fapate silhfênte,’ tiin,” a ti a.
Mipuiten an thilpêk an rawn la khâwm
20 Tichuan, Israela thlah pung khâwmho zawng zawngte chu Mosia hnên ata an ṭîn ta vek a. 21 Tin, mi tin thinlung taka phûr sârh apiang leh rilru taka phal apiang chu an lo kal a, inbiakna puan ina hman tûr leh, rawngbâwlna lam atâna thil hman ṭûl apiang leh, silhfên thianghlim tûr chu LALPA tân an rawn thawh hlawm a. 22 A hmei a pain pêk châk apiangte chu an lo kal a, banbun te, bengbeh te, hming nemna zungbun te, ṭhi te, rangkachak incheina tinrêngte an rawn la a; mi tin rangkachak hlan tûr nei apiangin LALPA tân an hlân ṭheuh va. 23 Tin, mi tin la dumpâwl te, senduk te, senlâr te, lazai sîn te, kêl hmul te, berâmpa vun chhum sen te, savun ṭha mi te nei apiangin an rawn keng hlawm a. 24 Mi tin tangkarua leh dârte thawh apiangin LALPA tâna thilhlan tûr an rawn keng a. Tin, mi tin thingri thing, hmanraw tinrêng atâna hman tlâk nei apiangin an rawn la a. 25 Tin, hmeichhe themthiamho zawng zawngte chuan la an kai a, chûng an la kaih dumpâwl te, senduk te, senlâr te, lazai sîn te chu an rawn keng hlawm a. 26 Tin, hmeichhe themthiam phûr sârhho zawng zawngte pawhin kêl hmul an kai a. 27 Tin, puithiam kawr leh kawr âwma zeh tûrin rorêltuten onukion lungte leh lunghlute an rawn keng a; 28 tin, chhit ên atân te, hriak thih mi atân te, hâl tûr rimtui tak atân hriak leh rimtuite pawh. 29 Israela thlahte chuan LALPA hnênah duh thua thilhlan an rawn hlân a; mi tin, a hmei a pa, LALPAN Mosia kuta thil siam tûra thu a pêk zawng zawngte siamna tûra thinlunga châk taka kengtute chuan.
LALPA chênna bûk siam tûr mi themthiam
30 Tin, Mosian Israela thlahte hnênah chuan, “Ngai teh u, LALPAN Juda hnama mi Hura fapa Uria, chu mi fapa Bezalela chu a thlang tawh e. 31 Chu mi chu finna te, hriat thiamna te, hriatna te, kawng tinrênga themthiamna te nei tûrin Pathian Thlarauvin a tikhat tawh a, 32 thiltih tûr fing taka suangtuah thiamna te, rangkachak leh tangkarua leh dâr chher thiamna te, 33 lunghlute zeh tûra phel thiamna te, thing zai mawi dân thiamna te, kawng tinrênga themthiamna te nei tûrin. 34 Tin, amah nên, Dan hnama mi Ahisamaka fapa Oholiaba nên mite zirtîr theihna finna a pe ve ve a. 35 Anni chu kawng tinrênga themthiamna te, englo ziak thiamna te, themthiamna te, la dumpâwl te, senduk te, senlâr te, lazai sîn te zeh mawi thiamna te, puan tah thiamna te, hnathawh tinrêng thiamna te, thiltih tûr fing taka suangtuah thiamna te nei tûrin thinlung finnain a tikhat tawh e.
1 “Tin, Bezalela leh Oholiaba leh mi themthiam tu pawh, LALPAN thu a pêk ang zêla hmun thianghlima rawngbâwlna hna tinrêng thawk thei tûra finna leh hriat thiamna a pêk apiangte chuan an bei tûr a ni,” a ti a.
Mipuiten thilpêk an rawn la ṭeuh
2 Tin, Mosian Bezalela leh Oholiaba leh mi themthiamho, LALPAN an thinlunga finna a pêka, chumi hna bei peih tûra thinlung taka phûr sârh apiang chu a ko va. 3 Tin, Israela thlahten hmun thianghlima rawngbâwl nâna thil siam tûra an rawn thawh zawng zawng chu Mosia hnên aṭangin an la zêl a. Tin, tûk tin duh thua thilhlante chu a hnênah an rawn hlân zêl bawk a. 4 Tin, mi themthiamho zawng zawng, hmun thianghlim atâna hna tinrêng thawkte chuan an hnathawh lai chu an tlânsan ṭheuh va, 5 Mosia hnênah, “LALPAN siam tûra thu a pêk siam nân mite chuan a chuang a liamin thil an rawn la e,” tiin an thlen a. 6 Tin, Mosia chuan thu a pe a, “Hmun thianghlim atâna thil pêk tûr chu a hmei a pa, tu mahin rawn buatsaih tawh suh se,” tiin an riahhmunah chuan an tlângautîr ta a. Chutichuan, mite chuan an rawn lâk phal a ni ta lo va. 7 An neih sa chu siam ṭûl apiang siamna tûr chuan a tâwk hle mai a, a tam lutuk mah a ni.
LALPA chênna biakbûk sak thu
8 Tin, an zînga mi themthiam hnathawkho zawng zawngte chuan biakbûk chu puanzâr sâwm neiin an siam a; chûng puanzârte chu lazai sîn tak kawp te, dumpâwl te, senduk te, senlâr te hmangin cherub lemte mi thiam tak siam chuantîrin a siam a. 9 Puanzâr chu a sei lam tawng sawmhnih leh tawng riat ṭheuh a ni a, puanzâr chu a hlai lam tawng li ṭheuh a ni; puanzâr zawng zawng chu a inchen vek a. 10 Tin, puanzâr pangate chu a zawm vek a, puanzâr panga dangte pawh chu a zawm bawk a. 11 Tin, puanzâr zawm khat hmâwrtawng ber tlângah chuan a beng a dumpâwlin a siam a; chutiang bawkin puanzâr zawm lehlam hmâwrtawng ber tlângah chuan a siam bawk a. 12 Puanzâr pakhatah chuan beng sawmnga a siam a, puanzâr zawm khat tlângah pawh chuan beng sawmnga a siam bawk a; chûng bengte chu a inep thliah a. 13 Tin, rangkachak chilh behna sawmnga a siam a, a chilh behnate chuan puanzârte chu a chilh bet a; tichuan, biakbûk chu pindan pakhat a lo ni ta a. 14 Tin, biakbûk chung khuh nân kêl hmul puanzârte a siam a; puanzâr sâwm leh pakhat a siam a. 15 Puanzâr chu a sei lam tawng sawmthum ṭheuh a ni a, puanzâr chu a hlai lam tawng li ṭheuh a ni; puanzâr sâwm leh pakhatte chu a inchen vek a. 16 Puanzâr pangate chu a ṭhui zawm vek a, puanzâr paruk pawh chu a ṭhui zawm vek a. 17 Tin, puanzâr zawm khat hmâwrtawng ber tlângah chuan beng sawmnga a siam a, puanzâr zawm lehlam tlângah chuan beng sawmnga a siam bawk a. 18 Tin, puan in chu pindan pakhat a lo nih theih nân a chilh zawmna tûrin dâr chilh behna sawmnga a siam a. 19 Tin, berâmpa vun chhum senin puan in chung khuhna te, savun ṭha miin a chunga khuh lehna te a siam a. 20 Tin, biakbûk ban rem khâwm tûrte chu ngîl taka dingin thingri thingin a siam a. 21 Ban rem khâwm sei lam chu tawng sâwm a ni a, a vâng lam chu tawng khat leh a chanve ṭheuh a ni. 22 Ban rem khâwm tinah chuan ke pahnih inzawmin a awm a. Chutiang chuan biakbûk ban rem khâwm zawng zawng chu a siam a. 23 Tin, biakbûk atân chuan ban rem khâwmte a siam a, chhim chhawng chhim lampang atân chuan ban rem khâwm sawmhnih a siam a. 24 Tin, chumi ban rem khâwm sawmhnih nghahchhan atân chuan tangkaraw tlang ker kuak sawmli a siam a: a ke pahnih atân ban rem khâwm pakhat nghahchhan ker kuak pahnih leh, a ke pahnih atân ban rem khâwm dang pakhat nghahchhan ker kuak pahnih a siam a. 25 Tin, biakbûk sîr lehlam hmâr chhawng lam atân chuan ban rem khâwm sawmhnih a siam a, 26 tangkaraw tlang ker kuak sawmli nên: ban rem khâwm pakhat atân nghahchhan ker kuak pahnih a siam a. 27 Tin, biakbûk kawmchâr khawthlang chhawng lam atân chuan ban rem khâwm paruk a siam a, 28 Tin, biakbûk kawmchâr kil ve ve atân chuan ban rem khâwm pahnih a siam a. 29 Tin, a hnuai lamah chuan thlawp a ni a, chutiang bawkin a chhîp lam khâng hmasa ber thlengin thlawp a ni. A kil pahnihah chuan chutiang chuan a ti ve ve a. 30 Tin, ban rem khâwm pariat, a nghahchhan tûr tangkaraw tlang ker kuak sâwm leh paruk nên a awm a, ban rem khâwm tin innghah nân ker kuak pahnih zêl a awm a ni. 31 Tin, thingri thingin bangrel: biakbûk bang lehlam ban rem khâwm atân panga, 32 biakbûk bang lehlam ban rem khâwm atân panga, biakbûk kawmchâr khawthlang chhawng lam ban rem khâwm atân pawh panga a siam a. 33 Tin, bangrel laita, ban rem khâwm lai taka mi chu ban rem khâwm hmâwrtawng ber aṭangin, a lehlam hmâwrtawng ber thlenga thil tlang tûrin a siam a. 34 Ban rem khâwmte chu rangkachak tîin a luan a, bangrelte thil nân rangkachak khângte a siam a; tin, chûng bangrelte chu rangkachak tîin a luan a. 35 Tin, puanzâr tûr chu lazai sîn tak kawp te, a dumpâwl te, a senduk te, a senlâr te hmangin cherub lemte mi thiam tak siam chuantîrin a siam a. 36 Tin, chumi atân chuan thingri ban pali a siam a, chûng chu rangkachak tîin a luan a, a bânnate chu rangkachak a ni; tin, chûng nghahchhan atân chuan tangkaraw tlang ker kuak pali a chhûng a. 37 Tin, puan in kawngkaa zâr tûr lazai sîn tak kawp te, a dumpâwl te, a senduk te, a senlârte hmangin, puan zeh mawi thiam tak zeh nên a siam a; 38 tin, chumi zârna tûr ban panga, a bânnate nên a siam a. Tin, ban lubâwkte leh a zârfungte chu rangkachak tîin a luan a; mahse, chûng nghahchhan ker kuak pangate chu dâr a ni a.
Thuthlung bâwm siam thu
1 Tin, Bezalela chuan thingri thingin bâwm chu a siam a; a dung lam chu tawng hnih leh a chanve a ni a, a vâng lam chu tawng khat leh a chanve a ni a, a sân lam chu tawng khat leh a chanve a ni. 2 A chhûng leh a pâwn chu rangkachak hlîr hlak tîin a luan a, rangkachakin a tlâng a kâwm a. 3 Tin, chumi a ke palia vuah atân chuan rangkachak khâng pali a chhûng a: khâng pahnih chu a lehlam atân a ni a, khâng pahnih chu a lehlam atân a ni. 4 Tin, thingri thingin zâwnfungte a siam a, chûng chu rangkachak tîin a luan a. 5 Tin, bâwm chu zâwn theih tûrin a panga khângah chuan zâwnfungte chu a rawlh a. 6 Tin, rangkachak hlîr hlakin zahngaihna ṭhutphah a siam a; a dung lam chu tawng hnih leh a chanve a ni a, a vâng lam chu tawng khat leh a chanve a ni. 7 Tin, cherub pahnih rangkachakin a siam a; zahngaihna ṭhutphah hmâwr ve vea mi chu a chherin a chher a: 8 a hmâwr lehlamah cherub pakhat, a hmâwr lehlamah cherub pakhat. Zahngaihna ṭhutphah nêna inbelhbawm hlâwm vekin a hmâwr ve vea cherub-te chu a siam a. 9 Tin, cherub-te chuan zahngaihna ṭhutphah chu an thlaa hliapin an thlate chu an zâr duai a. Inhmatawnin, zahngaihna ṭhutphah lam chu cherub-te chuan an hawi ve ve a.
Chhanghlan dahna dawhkân
10 Tin, thingri thingin dâwhkân chu a siam a; a dung lam chu tawng hnih a ni a, a vâng lam chu tawng khat a ni a, a sân lam chu tawng khat leh a chanve a ni. 11 Tin, chu chu rangkachak hlîr hlak tîin a luan a, rangkachakin a tlâng a kâwm a. 12 Tin, kutphah bawka hlaiin a kâwm a siam a, chu chu rangkachakin a tlâng a kâwm leh a. 13 Tin, chumi atân chuan rangkachak khâng pali a chhûng a, chumi khâng chu dawhkân ke pali kil ṭheuhvah chuan a vuah a. 14 Dawhkân chu zâwna, a zâwnfung chu rawlh theih tûrin khângte chu a kâwm siin a vuah a. 15 Tin, dawhkân chu zâwn nân zâwnfungte chu thingri thingin a siam a, rangkachak tîin a luan a. 16 Tin, dawhkâna bungbêl - thlêng te, no te, a bun chhuahna tûr berhbu te, uain thâwlte chu - rangkachak hlîr hlakin a siam a.
Khâwnvâr dahna siam thu
17 Khâwnvâr dahna chu rangkachak hlîr hlakin a siam a; chumi khâwnvâr dahna chu a ngul bul leh a ngul chu a chherin a chher a; a no te, a pârfung te, a pârte chu a inzawm vek a. 18 A sîrahte chuan pêng paruk a lo pêng chhuak a: khâwnvâr dahna ngul sîr lehlamah chuan pêng pathum a awm a, khâwnvâr dahna ngul sîr lehlamah chuan pêng pathum a awm bawk a. 19 A lehlam pang pêngah chuan vaiumkhal kuhmûm ang no pathum, a pârfung leh a pâr a siam a; tin, a lehlam pang pêngah pawh vaiumkhal kuhmûm ang no pathum, a pârfung leh a pâr a siam a; chutiang chuan khâwnvâr dahna pêng paruk atân a siam a. 20 Tin, khâwnvâr dahna ngulah chuan no pali, vaiumkhal kuhmûm anga siam, a pârfung leh a pârte a awm a. 21 Chumi inzawm vek pêng pahnih hnuaiah chuan pârfung hmasa ber a awm a, chumi inzawm vek pêng pahnih hnuaiah chuan pârfung dang a awm a, chumi inzawm vek pêng pahnih hnuaiah chuan pârfung dang a awm leh bawk a; khâwnvâr dahna ngula pêng parukah chuan a awm vek a ni. 22 Chûng a pârfungte leh a pêngte chuan a zawm vek a; a pum chuan rangkachak hlîr hlaka chher a ni. 23 Tin, chumi atân chuan khâwnvâr pasarih nên, chaichehte nên, meivâp dahnate nên rangkachak hlîr hlakin a siam a. 24 Chumi khâwnvâr dahna leh a hmanrua tûr zawng zawng siam nân chuan rangkachak hlîr hlak talent khat a hmang a.
Rimtui hâlna tûr maichâm
25 Tin, rimtui hâl nân thingri thingin maichâm a siam a. A dung lam chu tawng khat a ni a, a vâng lam chu tawng khat a ni a, kil li a ni; tin, a sân lam chu tawng hnih a ni. A kîte nên chuan a inzawm vek a ni. 26 Tin, a chungte, a pang vêlte leh a kîte chu rangkachak hlîr hlak tîin a luan a; tin, rangkachakin a tlâng a kâwm a. 27 Tin, a kotlâng hnuai lamah, a sîr tuakah chuan rangkachak khâng pahnih a siam a; chûng chu a zâwnfung rawlhna tûr a ni. 28 Tin, thingri thing zâwnfungte a siam a, rangkachak tîin a luan a.
Hriak siam thu
29 Hriak thih chi, hriak thianghlim leh englo rimtui tak hâl tûr rimtui fîm tak, rimtui siamtu siam angin a siam bawk a.
Thuthlung bâwm siam thu
1 Tin, Bezalela chuan thingri thingin bâwm chu a siam a; a dung lam chu tawng hnih leh a chanve a ni a, a vâng lam chu tawng khat leh a chanve a ni a, a sân lam chu tawng khat leh a chanve a ni. 2 A chhûng leh a pâwn chu rangkachak hlîr hlak tîin a luan a, rangkachakin a tlâng a kâwm a. 3 Tin, chumi a ke palia vuah atân chuan rangkachak khâng pali a chhûng a: khâng pahnih chu a lehlam atân a ni a, khâng pahnih chu a lehlam atân a ni. 4 Tin, thingri thingin zâwnfungte a siam a, chûng chu rangkachak tîin a luan a. 5 Tin, bâwm chu zâwn theih tûrin a panga khângah chuan zâwnfungte chu a rawlh a. 6 Tin, rangkachak hlîr hlakin zahngaihna ṭhutphah a siam a; a dung lam chu tawng hnih leh a chanve a ni a, a vâng lam chu tawng khat leh a chanve a ni. 7 Tin, cherub pahnih rangkachakin a siam a; zahngaihna ṭhutphah hmâwr ve vea mi chu a chherin a chher a: 8 a hmâwr lehlamah cherub pakhat, a hmâwr lehlamah cherub pakhat. Zahngaihna ṭhutphah nêna inbelhbawm hlâwm vekin a hmâwr ve vea cherub-te chu a siam a. 9 Tin, cherub-te chuan zahngaihna ṭhutphah chu an thlaa hliapin an thlate chu an zâr duai a. Inhmatawnin, zahngaihna ṭhutphah lam chu cherub-te chuan an hawi ve ve a.
Chhanghlan dahna dawhkân
10 Tin, thingri thingin dâwhkân chu a siam a; a dung lam chu tawng hnih a ni a, a vâng lam chu tawng khat a ni a, a sân lam chu tawng khat leh a chanve a ni. 11 Tin, chu chu rangkachak hlîr hlak tîin a luan a, rangkachakin a tlâng a kâwm a. 12 Tin, kutphah bawka hlaiin a kâwm a siam a, chu chu rangkachakin a tlâng a kâwm leh a. 13 Tin, chumi atân chuan rangkachak khâng pali a chhûng a, chumi khâng chu dawhkân ke pali kil ṭheuhvah chuan a vuah a. 14 Dawhkân chu zâwna, a zâwnfung chu rawlh theih tûrin khângte chu a kâwm siin a vuah a. 15 Tin, dawhkân chu zâwn nân zâwnfungte chu thingri thingin a siam a, rangkachak tîin a luan a. 16 Tin, dawhkâna bungbêl - thlêng te, no te, a bun chhuahna tûr berhbu te, uain thâwlte chu - rangkachak hlîr hlakin a siam a.
Khâwnvâr dahna siam thu
17 Khâwnvâr dahna chu rangkachak hlîr hlakin a siam a; chumi khâwnvâr dahna chu a ngul bul leh a ngul chu a chherin a chher a; a no te, a pârfung te, a pârte chu a inzawm vek a. 18 A sîrahte chuan pêng paruk a lo pêng chhuak a: khâwnvâr dahna ngul sîr lehlamah chuan pêng pathum a awm a, khâwnvâr dahna ngul sîr lehlamah chuan pêng pathum a awm bawk a. 19 A lehlam pang pêngah chuan vaiumkhal kuhmûm ang no pathum, a pârfung leh a pâr a siam a; tin, a lehlam pang pêngah pawh vaiumkhal kuhmûm ang no pathum, a pârfung leh a pâr a siam a; chutiang chuan khâwnvâr dahna pêng paruk atân a siam a. 20 Tin, khâwnvâr dahna ngulah chuan no pali, vaiumkhal kuhmûm anga siam, a pârfung leh a pârte a awm a. 21 Chumi inzawm vek pêng pahnih hnuaiah chuan pârfung hmasa ber a awm a, chumi inzawm vek pêng pahnih hnuaiah chuan pârfung dang a awm a, chumi inzawm vek pêng pahnih hnuaiah chuan pârfung dang a awm leh bawk a; khâwnvâr dahna ngula pêng parukah chuan a awm vek a ni. 22 Chûng a pârfungte leh a pêngte chuan a zawm vek a; a pum chuan rangkachak hlîr hlaka chher a ni. 23 Tin, chumi atân chuan khâwnvâr pasarih nên, chaichehte nên, meivâp dahnate nên rangkachak hlîr hlakin a siam a. 24 Chumi khâwnvâr dahna leh a hmanrua tûr zawng zawng siam nân chuan rangkachak hlîr hlak talent khat a hmang a.
Rimtui hâlna tûr maichâm
25 Tin, rimtui hâl nân thingri thingin maichâm a siam a. A dung lam chu tawng khat a ni a, a vâng lam chu tawng khat a ni a, kil li a ni; tin, a sân lam chu tawng hnih a ni. A kîte nên chuan a inzawm vek a ni. 26 Tin, a chungte, a pang vêlte leh a kîte chu rangkachak hlîr hlak tîin a luan a; tin, rangkachakin a tlâng a kâwm a. 27 Tin, a kotlâng hnuai lamah, a sîr tuakah chuan rangkachak khâng pahnih a siam a; chûng chu a zâwnfung rawlhna tûr a ni. 28 Tin, thingri thing zâwnfungte a siam a, rangkachak tîin a luan a.
Hriak siam thu
29 Hriak thih chi, hriak thianghlim leh englo rimtui tak hâl tûr rimtui fîm tak, rimtui siamtu siam angin a siam bawk a.
Puithiam inthuamna tûr tah thu
1 Tin, la dumpâwl te, a senduk te, a senlâr te hmangin hmun thianghlima rawngbâwlna tûra silhfên mawi takte an siam a; Arona tân silhfên thianghlimte an siam bawk a, LALPAN Mosia thu a pêk ang khân. 2 Rangkachak zai te, la dumpâwl te, a senduk te, a senlâr te, la zai sîn tak kawpte hmangin puithiam kawr chu a siam a. 3 Rangkachak chu pan takin an chhu pêr a, la dumpâwl te, a senduk te, a senlâr te, la zai sîn tak tea mi themthiam takin a zeh tûrin an zai thlûr seng a. 4 A dârbak ṭhui belhbawmin an siam a; a hmâwr ve vea ṭhui belhbawm a ni. 5 Tin, chumi kawr chunga kâwnghrên tûr themthiam taka tah chu, chumi kawr chi bawk tluan khat vek a ni a: rangkachak zai te, la dumpâwl te, a senduk te, a senlâr te, la zai sîn tak kawptea tah a ni, LALPAN Mosia thu a pêk ang khân. 6 Tin, Israela thlahte hming ang zêlin, nemnaa ziak ang chuanna rangkachak zai phiara phûm onukion lungahte chuan an ziak a. 7 Tin, Israela thlahte hriat rengna lung atân puithiam kawr dârbakah chuan a bel a, LALPAN Mosia thu a pêk ang khân.
Puithiam âwmbel siam thu
8 Tin, âwmbel chu puithiam kawr siam ang bawk mi thiam tak siam angin rangkachak zai te, la dumpâwl te, a senduk te, a senlâr te, la zai sîn tak kawpte hmangin a siam a. 9 Chu chu kil li nei a ni a, âwmbel chu an thuah a; a dung lam chu khâp a ni a, a vâng lam pawh khâp bawk a ni a, thuah a ni. 10 Tin, chutah chuan lunghlute tlar liin an zep a: tlar khatna chu saridon te, topazio te, smaragdon te a ni a; 11 tlar hnihna chu anthrax te, sappheiros te, sardonukion te a ni a; 12 tlar thumna chu huakinthos te, akates te, amethustos te a ni a; 13 tlar lina chu krusolithos te, berullion te, onukion te a ni a: rangkachak zai phiara phûm fel ṭhêt a ni. 14 Tin, lung chu sâwm leh pahnih, Israela thlahte hming ang zêlin a ni a: hming nemnaa chuang ang, hnam tin an hming ang zêlin, hnam sâwm leh hnam hnihte tân chuan a ni. 15 Tin, âwmbel chungah chuan hruihrual ang khaidiatte, rangkachak hlîr hlak herh an siam a. 16 Rangkachak zai phiar pahnih leh rangkachak khâng pahnih an siam bawk a; tichuan, âwmbel tlâng hmâwr ve veah chuan khângte chu an vuah a. 17 Tin, rangkachak khaidiat herh pahnih chu âwmbel tlâng hmâwr ve vea khâng pahnihah chuan an thlung a. 18 Tin, khaidiat herh hmâwr lehlam pahnihte chu rangkachak zai phiar pahnihah chuan an zawm a, chu chu puithiam kawr hma lama dârbakah chuan an thlung a. 19 Tin, rangkachak khâng pahnih an siam a, chûng chu âwmbel kil pahnih, puithiam kawr dep chhûng lampangah chuan an vuah a. 20 Rangkachak khâng pahnih dang an siam leh a, chûng chu a hma lama puithiam kawr dârbakna pahnih hnuai lampang, a inzawmna lai vêl, puithiam kawr hrênna themthiam taka tah chung lamah chuan an vuah a. 21 Tin, puithiam kawra khângahte chuan âwmbela khângte chu hrui dumpâwlin an chilh zawm a, themthiam taka tah puithiam kawr hrênna chung lama a awm theih nân leh, âwmbel chu puithiam kawr nên a inhran loh nân, LALPAN Mosia thu a pêk ang khân.
Puithiam inthuamna tûr dang siam thu
22 Puithiam kawrfual, a dumpâwl hlîr hlaka tah a siam a; 23 tin, kawrfual lai tak chu kawr bân bûl angin a tiâwng a, a âwng chu a thlêr chhiat theih mai lohna tûrin a tlâng vêl chu a chep a. 24 Kawrfual fêmahte chuan pawmgranet lem - a dumpâwl te, a senduk te, a senlâr te, la zai kawptein an siam a. 25 Tin, rangkachak hlîr hlak tengengte an siam a, chûng tengeng chu kawrfual fêmah a vêlin pawmgranet inkârahte chuan an dah a, pawmgranet inkâr zêlah an dah a ni: 26 tengeng pakhat leh pawmgranet pakhat zêl kawrfual fêmah a vêlin rawngbâwlna tûra inthuam nân an dah a, LALPAN Mosia thu a pêk ang khân. 27 Tin, Arona leh a fapate tân chuan la zai sîn taka tah kawrte an siam a, 28 la zai sîn taka siam puithiam lukhum te, la zai sîn taka siam diar ṭha tak te, la zai sîn tak kawpa siam la zai sîn kekawr te, 29 la zai sîn tak kawp te, a dumpâwl te, a senduk te, a senlârte hmanga puan zehmawi thiam taka zeh kawnghrên te nên, LALPAN Mosia thu a pêk ang khân. 30 Tin, lukhum thianghlim atâna rangkachak phêk chu rangkachak hlîr hlakin an siam a, a pangah chuan hming nemna a chuang ang, “LALPA PUAL” tih an chuantîr a. 31 Tin, puithiam lukhum chung lama bel tûrin hrui dumpâwlin an thlung a, LALPAN Mosia thu a pêk ang khân.
An siam zo
32 Chutichuan, inbiakna puan in biakbûk hna zawng zawng chu an zo ta a. Tichuan, LALPAN ti tûra Mosia thu a pêk ang chiah zêlin Israela thlahte chuan an ti a. 33 Tin, Mosia hnênah biakbûk an rawn kalpui a, puan in te, a hmanrua zawng zawng te: a chilh behna te, a ban rem khâwm te, a bangrel te, a ban te, a nghahchhan ker kuak te nên; 34 berâmpa vun chhum sena siam a khuhna te, savun ṭha mia siam a khuhna te, a daidanna tûr puanzâr te nên; 35 thuhriattîrna bâwm leh a zâwnfung te, zahngaihna ṭhutphah nên; 36 dawhkân te, a hmanrua zawng zawng te, chhangdah te nên; 37 rangkachak hlîr hlaka siam khâwnvâr dahna te, a khâwnvâr, khâwnvâr dah tûr te, a hmanrua zawng zawng leh chhit ên atân a hriak nên; 38 rangkachak maichâm te, hriak thih mi te, hâl tûr rimtui tak te, puan in kawngkaa zâr tûr puanzâr te nên; 39 dâr maichâm te, a dâr lên te, a zâwnfung te, a hmanrua zawng zawng te, maihûn leh a hûnchhan te nên; 40 biakbûk hung chhûng kawtlaia puanzâr te, a ban te, a ban nghahchhan ker kuak te, a hung chhûng kawngkaa puanzâr te, a hrui te, a kilh behna te, inbiakna puan in biakbûk chhûnga a hmanraw thil zawng zawng nên; 41 hmun thianghlima rawngbâwlna tûra silhfên mawi taka tah te, puithiam Arona leh a fapaten puithiam hna an thawh huna an hâk tûr silhfên thianghlimte nên. 42 LALPAN ti tûra Mosia thu a pêk ang zawng zawng chu Israela thlahte chuan an ti vek a. 43 Tin, Mosian chûng hnathawh zawng zawng chu a han en a, ngai teh, an lo zo vek tawh a; LALPA thupêk ang takin an zo vek a ni. Tichuan, Mosian anni chu mal a sâwm a.
LALPA chênna bûk tundin thu leh hlan thu
1 Tin, LALPAN Mosia hnênah, 2 “A thla khatna ni khat niah chuan inbiakna puan in biakbûk chu i din tûr a ni. 3 A chhûngah chuan thuhriattîrna bâwm i dah tûr a ni a, bâwm chu puanzârin i daidang tûr a ni. 4 Dawhkân kha la lûtin, a chunga thil awmte chu i dah fel tûr a ni; khâwnvâr dahna kha la lûtin, a khâwnvârte chu i dah tûr a ni. 5 Rimtui hâlna rangkachak maichâm kha thuhriattîrna bâwm hmaa dahin, biakbûk kawngka puanzâr kha i zâr tûr a ni. 6 Tin, hâlrala thilhlanna maichâm kha inbiakna puan in biakbûk kawngka bulah i hûng tûr a ni. 7 Tin, inbiakna puan in leh maichâm inkârah chuan maihûn hûngin, chutah chuan tui i dah tûr a ni. 8 Tin, biakbûk vêl chuan a hung chhûng kawtlai siamin, a hung chhûng kawtlai kawngka puanzâr chu i zâr tûr a ni. 9 “Tin, hriak thih mi lain, biakbûk leh a chhûnga awm zawng zawngte chu hnawihin, i tithianghlim tûr a ni, a bungbêl zawng zawngte nên; tichuan, a lo thianghlim ang. 10 Tin, hâlrala thilhlanna maichâm leh a hmanrua zawng zawngte chu hriak hnawihin, maichâm chu i tithianghlim tûr a ni; tichuan, maichâm chu thianghlim tak a lo ni ang. 11 Tin, maihûn leh a hûnchhan chu hriak hnawihin i tithianghlim tûr a ni. 12 “Tin, Arona leh a fapate chu inbiakna puan in kawngka bula rawn hruaiin tuiin i sil tûr a ni. 13 Arona chu silhfên thianghlimte chu i sintîr tûr a ni; tichuan, puithiam hna thawka ka tân rawng a bâwl theihna tûra hriak thihin, i tithianghlim tûr a ni. 14 Tin, a fapate pawh rawn hruaiin kawr i haktîr tûr a ni. 15 Puithiam hna thawka ka tân rawng an bâwl theihna tûrin, an pa hriak i thih ang khân anmahni chu hriak i thih tûr a ni; hriak thiha an awm hi, an thlahte thleng pawha kumkhuaa puithiam tûra ruat an ni reng tawh ang tih, an tân chhinchhiahna a ni ang,” tiin a sawi a. 16 Chutiang chuan Mosian a ti a; LALPAN tih tûra a pêk ang zawng zawng chuan a ti vek a. 17 Tin, heti hi a ni a, a kum hnihna thla tîr ber, chumi thla ni khat ni tak chuan biakbûk chu an din ta a. 18 Tin, Mosia chuan biakbûk chu a han din a, a nghahchhan ker kuakte a han rem a, a ban rem khâwmte chu a han din a, a bangrelte chu a han rawlh a, a bante chu a han tung a. 19 Tin, biakbûk chungah chuan puan in a zâr a, chumi puan in chung chu a khuhnain a khuh leh a, LALPAN Mosia thu a pêk ang khân. 20 Thuhriattîrna chu a la a, bâwm chhûngah a dah a, bâwmah chuan a zâwnfungte a rawlh a, bâwm chungah chuan zahngaihna ṭhutphah a dah a. 21 Tin, bâwm chu biakbûk chhûngah chuan a dah a, a daidanna puanzâr chu a zâr a, thuhriattîrna bâwm chu a daidang ta a, LALPAN Mosia thu a pêk ang khân. 22 Dawhkân chu inbiakna puan in chhûng, biakbûk hmar lampang, puanzâr pâwn lamah chuan a hûng a; 23 dawhkânah chuan LALPA hmaah chhang chu a dah fel diam a, LALPAN Mosia thu a pêk ang khân. 24 Khâwnvâr dahna chu inbiakna puan in chhûng biakbûk chhim lampang dawhkân epah chuan a dah a; 25 tin, khâwnvârte chu LALPA hmaah chuan a dah a, LALPAN Mosia thu a pêk ang khân. 26 Rangkachak maichâm chu inbiakna puan in chhûng puanzâr hmaah chuan a dah a; 27 tin, a chungah chuan englo rimtui tak hâl tûr rimtui a hâl a; LALPAN Mosia thu a pêk ang khân. 28 Biakbûk kawngka puanzâr a zâr a. 29 Tin, inbiakna puan in biakbûk kawngka bulah chuan hâlrala thilhlanna maichâm a hûng a, a chungah chuan hâlral thilhlan leh ei tûr thilhlan a hlân a, LALPAN Mosia thu a pêk ang khân. 30 Tin, maihûn chu inbiakna puan in leh maichâm inkârah chuan a hûng a, insilna tûrin tui a chhûng a; 31 tin, Mosia leh Arona leh a fapate chuan chutah chuan an kut leh an kete an sil a. 32 Inbiakna puan ina an luh dâwn leh maichâm bula an kal dâwnin an insil a ni, LALPAN Mosia thu a pêk ang khân. 33 Tin, biakbûk leh maichâm vêl chuan hung chhûng kawtlai chu a siam a, a hung chhûng kawtlai kawngka puanzâr chu a zâr a. Chutichuan, Mosia chuan hna chu a zo ta a.
LALPA chênna bûk chunga chhûm
34 Tichuan, inbiakna puan in chu chhûmin a rawn tuam ta mup a, biakbûk chu LALPA ropuinain a lo khat ta a. 35 Tin, chutia chhûm a lo zîn tâk mupa, LALPA ropuinaa biakbûk chu a lo khah tâk avângin, Mosia chu inbiakna puan in chhûngah chuan a lût thei ta lo va. 36 Tin, chhûm chuan biakbûk chu a kian chhohsan veleh Israela thlahte chu an insawn zêl a, an kalna tûr lama a kal chhûng zawng chuan. 37 Chhûm chuan a kian chhohsan loh erawh chuan a kian chhohsan hma loh zawng insawn lovin an awm reng ṭhîn. 38 Chhûnah chuan LALPA chhûm chu biakbûk chungah a zîng a, chutah chuan zânah mei a lo awm ṭhîn a, Israel-ho zawng zawng chuan an kalna tûr lama an kal chhûng zawng chuan chu chu an hmu zêl ṭhîn a ni.
Pumhâl thilhlan
1 LALPAN Mosia a ko va, inbiakna puan in aṭangin a bia a, 2 “Israela thlahte chu bia la, an hnênah, ‘In zînga tu pawhin LALPA hnêna thilhlan in hlanin, ran, bâwng rual zînga mi emaw, berâm leh kêl zînga mi emaw in hlân tûr a ni. 3 “ ‘A thilhlan chu bâwng rual zînga mi, hâlral thilhlan a nih chuan a pa, sawisêl bo a hlân tûr a ni; a thilhlan chu LALPA hmaa pawm a nih theih nân inbiakna puan in kawngka bulah a hlân tûr a ni. 4 Tin, hâlral thilhlan lu chungah chuan a kut a nghat ang a; tichuan, a tân inremna siamna tûrin pawmsak a ni ang. 5 Tin, LALPA hmaah bâwngpa a talh ang a; tin, Arona fapa puithiamten thisen chu an hlân ang a, inbiakna puan in kawngka bula maichâm chu thisen chuan an theh vêl tûr a ni. 6 Tin, hâlral thilhlan chu a lip ang a, a chan tûr a ni. 7 Tin, puithiam Arona fapate chuan maichâmah chuan mei an dah ang a, mei chungah chuan thing an chhep khâwm ang. 8 Tin, Arona fapa puithiamte chuan sa hrang te, a lu te, a thau te chu maichâma mei chunga thingah chuan an dah fel ang a; 9 a kawchhûngte leh a kete erawh chu tuiin a sil ang. Puithiam chuan LALPA tâna rimtui tak, meia hlan hâlral thilhlan atân a pum chuan maichâmah a hâl tûr a ni. 10 “ ‘A thilhlan chu hâlral thilhlan atâna ran rual zînga mi, berâm emaw, kêl emaw a nih chuan, a pa, sawisêl bo a hlân tûr a ni. 11 Maichâm sîr, hmâr lampangah LALPA hmaah a talh ang a; tin, Arona fapa puithiamte chuan maichâm chu a thisen chuan an theh vêl tûr a ni. 12 Tin, a chan ang a, a lu nên, a thau nên; tin, puithiamin maichâm chunga mei chunga thingah chuan a dah fel ang; 13 a kawchhûngte leh a kete erawh chu tuiin a sil ang. Tin, a pumin puithiamin a hlân ang a, maichâmah a hâl tûr a ni; LALPA tâna rimtui tak, meia hlan hâlral thilhlan a ni. 14 “ ‘Tin, LALPA tâna a thilhlan chu sava lam hâlral thilhlan a nih chuan, a thilhlanah ṭhuro emaw, pârvano emaw a hlân tûr a ni. 15 Puithiamin maichâmah a rawn keng ang a, a lu a ṭhuai bung ang a, maichâmah a hâl ang; tin, a thisen chu maichâm pangah chuan an far kangtîr ang a. 16 Tin, a chawkchaweng chu a hmul nên maichâm kiang, chhak lampanga meivâp dahna hmunah chuan a paih ang a. 17 Tin, a thlate chu a ṭhuai thlawn ang a, a tak erawh chu phel lovin; tin, puithiamin maichâmah, mei chunga thingah chuan a hâl tûr a ni. Chu chu LALPA tâna rimtui tak, meia hlan hâlral thilhlan a ni.
Buhbâl thilhlan
1 “ ‘Tu pawhin thilhlan, chhangphut thilhlan LALPA hnêna a hlan hunin, a thilhlan chu chhangput dip tak a ni tûr a ni. Hriak a leih ang a, a chungah beraw a dah bawk ang a; 2 tin, Arona fapa puithiamte hnênah a kalpui ang a, anin a vei khatin chuta chhangphut dip tak chu, a hriak nên a beraw zawng zawng nên chuan a la chhuak ang a; tin, puithiam chuan maichâm chungah chuan hriat rengna, LALPA tâna rimtui tak, meia thilhlan atân a hâl ang. 3 Chhangphut thilhlan lâk bângte chu Arona leh a fapate ta tûr a ni ang. Chu chu LALPA tâna meia thilhlantea thil thianghlim tak pakhat a ni. 4 “ ‘Tin, chhangphut thilhlan, a urnaa ur thilhlan i hlan chuan chhangphut dip tak, hriaka hmeh dawidim telh loh chhang emaw, hriaka chulh dawidim telh loh chhangpêr pan emaw a ni tûr a ni. 5 Tin, i thilhlan chu thlênga ur chhangphut thilhlan a nih chuan dawidim telh loh, hriaka hmeh, chhangphut dip tak a ni tûr a ni. 6 I phel ang a, hriakin i leih tûr a ni; chu chu chhangphut thilhlan a ni e. 7 Tin, i thilhlan chu kanbêla kan, chhangphut thihlan a nih chuan chhangput dip tak leh hriaka siam a ni tûr a ni. 8 Tin, chûng thila siam chhangphut thilhlan chu LALPA hnênah i rawn la ang a; chu chu puithiam hnêna hlan a ni ang a, anin maichâmah a rawn kalpui tûr a ni. 9 Tin, puithiamin chhangphut thilhlan ata hriat rengna chu a la chhuak ang a, maichâmah chuan a hâl ang; chu chu LALPA tâna rimtui tak, meia thilhlan a ni. 10 Tin, chhangphut thilhlan lâk bângte chu Arona leh a fapate pual tûr a ni ang; chu chu LALPA tâna meia thilhlantea thil thianghlim ber a ni. 11 Chhangphut thilhlan rêng rêng, LALPA hnêna in hlan tûr chu dawidim tela siam tûr a ni lo; LALPA tâna meia thilhlanah chuan dawidim emaw, khawizu emaw rêng rêng in hâl tûr a ni lo. 12 Siam hmasak ber thilhlan ang zawngin LALPA hnênah in hlân ang a; nimahsela, rimtui atâna maichâmah chuan dah tûr a ni lo. 13 I chhangphut thilhlan zawng zawng chu Pathian thuthlung entîrna chi i al tûr a ni; i thilhlan zawng zawng chu chi i al zêl tûr a ni; i thilhlan zawng zawngah chuan chi i hlân tel tûr a ni. 14 “ ‘Rah hmasa ber chhangphut thilhlan LALPA hnêna i hlan chuan buh thar hmasa bera mi, chhangphut thilhlan atân chhangpêr i hlân tûr a ni. 15 Tin, hriak i leih ang a, a chungah beraw i dah tûr a ni; chu chu chhangphut thilhlan a ni. 16 Tin, puithiamin chhangpêr leh hriak ṭhen chu hriat reng nân beraw zawng zawng nên chuan a hâl tûr a ni; chu chu LALPA tâna meia thilhlan a ni.
Remna thilhlan inthawina
1 “ ‘A thilhlan chu remna thilhlan inthawi a niha, bâwng rual zînga mi a hlan chuan, a nu emaw, a pa emaw pawh ni sela, LALPA hmaah sawisêl bo a hlân tûr a ni. 2 A thilhlan lu chungah chuan a kut a nghat ang a, inbiakna puan in kawngka bulah a talh ang a; tin, Arona fapa puithiamte chuan maichâm chu thisen chuan an theh vêl tûr a ni. 3 Tin, remna thilhlan inthawinaa mi LALPA tâna meia thilhlan a hlân ang a; a kawchhûng thau leh a rîlbawh zawng zawng leh, 4 a kal pahnih leh, a bawhtu thau a nêma mi leh a thin tuamtu râng, a kalte chawpin a phawrh tûr a ni. 5 Tin, Arona fapaten maichâmah, meia thil awm chunga hâlral thilhlan chungah chuan an hâl tûr a ni; chu chu LALPA tâna rimtui tak, meia thilhlan a ni. 6 “ ‘Tin, remna thilhlan inthawinaa LALPA tâna a thilhlan chu berâm rual zînga mi a nih chuan a nu pawh ni sela, a pa pawh ni sela, sawisêl bo a hlân tûr a ni. 7 A thilhlana berâmno a hlan chuan LALPA hmaah a hlân ang a. 8 A thilhlan lu chungah chuan a kut a nghat ang a, inbiakna puan in kawtah a talh ang a; tin, Arona fapaten maichâm chu thisen chuan an theh vêl tûr a ni. 9 Tichuan, remna thilhlan inthawinaa mi, LALPA tâna meia thilhlan a hlân ang; a thau te, a mei thau tak a tluanin, a kâwngruh thlengin a la vek ang a; a kawchhûng thau te, a rîlbawh zawng zawng te, 10 a kal pahnih leh a bawhtu thau a nêma mi leh a thin tuamtu râng, a kalte chawpin a phawrh tûr a ni. 11 Tin, puithiamin chu chu maichâmah a hâl tûr a ni; chu chu LALPA tâna meia thilhlan ei tûr chhiah a ni. 12 “ ‘A thilhlan chu kêl a nih chuan LALPA hmaah a hlân ang a. 13 A lu chungah a kut a nghat ang a, inbiakna puan in kawtah a talh ang a; tin, Arona fapaten maichâm chu thisen chuan an theh vêl tûr a ni. 14 Tin, chumia a thilhlan chu a hlân ang a, LALPA tâna meia thilhlan chu; a kawchhûng thau leh a rîlbawh zawng zawng leh, 15 a kal pahnih leh a bawhtu thau a nêma mi leh, a thin tuamtu râng, a kalte chawpin a phawrh tûr a ni. 16 Tin, chûng chu puithiamin maichâmah a hâl tûr a ni a, rimtui atâna meia thilhlan ei tûr chhiah a ni. A thau zawng zawng chu LALPA pual a ni. 17 Thau emaw, thisen emaw ei loh tûr tih hi in thlahte zêl tân pawh in awmna apiangah zawm tûra thupêk ding reng a ni ang,’ ti rawh,” tiin.
Tih palh sual tâna thilhlan
1 Tin, LALPA chuan Mosia a bia a, 2 “Israela thlahte chu bia la, ‘LALPAN thil tih loh tûra thu a pêkte, a enga pawh hi miin hriat loh vângin lo ti palh sela, a titu chu 3 hriak thih puithiam ni sela, mipui thiam loh chantîr thei thil a tihsual chuan, a thil tihsual tâk sual thawi nân LALPA hnênah bâwngtuai sawisêl bo, sual thawinaah hlân rawh se. 4 Bâwng chu inbiakna puan in kawngka bulah LALPA hmaah a rawn kai ang a, bâwng lu chungah a kut a nghat ang a, LALPA hmaah bâwng chu a talh tûr a ni. 5 Tin, hriak thih puithiam chuan bâwng thisen eng emaw zât chu a la ang a, inbiakna puan inah chuan a rawn keng ang. 6 Puithiam chuan thisenah chuan a kutzungṭang a chiah ang a, a ṭhen chu LALPA hmaah, hmun thianghlim puanzâr bulah chuan vawi sarih a theh tûr a ni. 7 Tin, puithiam chuan LALPA hmaah, inbiakna puan ina rimtui hâlna maichâm kîahte chuan thisen chu tlêm a tât ang; tin, bâwng thisen la awm zawng zawng chu, inbiakna puan in kawngka kianga hâlral thilhlan maichâm bulah chuan a chhûng chhuak tûr a ni. 8-10 Tin, sual thawina bâwng thau zawng zawng chu a la vek ang a; remna thilhlan inthawina bâwngpaa mi lâk angin, a kawchhûng thau leh a rîlbawh zawng zawng leh a kal pahnih leh a bawhtu thau a nêma mi leh a thin tuamtu râng, a kalte chawpin a phawrh ang a; tin, puithiamin hâlral thilhlan maichâmah a hâl tûr a ni. 11 Tin, bâwng vun te, a sa zawng zawng te, a lu nên, a kete nên, a kawchhûng te, a êk te, 12 a bâwng pum chu dai pâwn lam hmun faiah, vut paihnaah a kalpui ang a, thing chungah a hâl ang; vut paihnaah chuan hâl tûr a ni. 13 “ ‘Israel chu a hnam puma an lo suala, hre lova LALPA thupêk eng pawh an lo bawhchhiat palh chuan, 14 chu thil tihsual chu hriat chhuah a nih veleh mipuiin sual thawi nân bâwngtuai an hlân ang a, inbiakna puan in kawtah an rawn kai tûr a ni. 15 Tin, mipuiho upate chuan LALPA hmaah bâwng lu chungah chuan an kut an nghat ang a; tin, bâwng chu LALPA hmaah talh tûr a ni. 16 Tin, hriak thih puithiam chuan inbiakna puan inah bâwng thisen eng emaw zât chu a rawn keng ang a; 17 tin, puithiamin thisenah chuan a kutzungṭang a chiah ang a, puanzâr bulah LALPA hmaah vawi sarih a theh tûr a ni. 18 Tin, thisen chu inbiakna puan ina LALPA hmaa maichâm kîah chuan tlêm a tât ang a; thisen la awm zawng zawng chu inbiakna puan in kawngka kianga, hâlral thilhlan maichâm bulah chuan a chhûng chhuak tûr a ni. 19 Tin, a thau zawng zawng chu a la vek ang a, maichâmah a hâl tûr a ni. 20 Chutiang chuan bâwng chu a ti ang a; sual thawina bâwng a tih ang chiahin hei pawh hi a ti tûr a ni. Tin, puithiamin inremna a siamsak ang a, ngaihdam an ni ang. 21 Tin, bâwng chu daipâwn lamah a kalpui ang a, bâwng hmasa a hâl angin a hâl tûr a ni. Chu chu mipuite tâna sual thawina a ni. 22 “ ‘Rorêltuin thil a tihsuala, LALPA a Pathianin tih loh tûra thu a pêk zawng zawng a enga pawh a tih palha thiam loh a chana, 23 a thil sual tih chu hriattîr a nih chuan a thilhlanah kêl, a pa, sawisêl bo a rawn kai ang. 24 Kêl lu chungah chuan a kut a nghat ang a, LALPA hmaa hâlral thilhlan an talh ṭhinnaah chuan a talh tûr a ni. Chu chu sual thawina a ni. 25 Tin, puithiamin sual thawina thisen chu a kutzungṭangin tlêm a pir ang a, hâlral thilhlan maichâm kîahte chuan a tât ang a, hâlral thilhlan maichâm bulah a thisen chu a chhûng chhuak tûr a ni. 26 Tin, a thau zawng zawng chu remna thilhlan inthawina thau a hâl angin maichâmah a hâl tûr a ni. Tichuan, a sual chungchâng thu-ah chuan puithiamin inremna a siamsak ang a, ngaihdam a ni ang. 27 “ ‘Tin, vântlâng zînga mi a tua pawhin LALPAN tih loh tûra thu a pêkte a enga pawh tisual palhin, thiam loh lo chang ta sela, 28 a thil sual tih chu hriattîr a nih chuan a thilhlanah kêl, a nu, sawisêl bo, a thil tihsual tâk sual thawi nân a rawn kai tûr a ni. 29 Sual thawina lu chungah chuan a kut a nghat ang a, hâlral thilhlanna hmunah chuan sual thawina chu a talh tûr a ni. 30 Tin, puithiamin thisen chu a kutzungṭangin tlêm a pir ang a, hâlral thilhlan maicham kîahte chuan a tât ang a, a thisen la awm zawng zawng chu maichâm bulah chuan a chhûng chhuak tûr a ni. 31 Tin, a thau zawng zawng chu remna thilhlan inthawina thau an lâk angin a la vek ang a; tin, puithiamin LALPA tâna rimtuiah maichâmah a hâl tûr a ni. Tichuan, puithiamin inremna a siamsak ang a, ngaihdam a ni ang. 32 “ ‘Tin, sual thawi nâna a thilhlana berâmno a rawn ken chuan, a nu, sawisêl bo a rawn keng tûr a ni. 33 Sual thawina lu chungah chuan a kut a nghat ang a, hâlral thilhlan an talhnaah chuan sual thawi nân a talh tûr a ni. 34 Tin, puithiamin sual thawina thisen chu a kutzungṭangin tlêm a pir ang a, hâlral thilhlan maichâm kîahte chuan a tât ang a, a thisen la awm zawng zawng chu maichâm bulah chuan a chhûng chhuak ang. 35 A thau zawng zawng chu berâmno thau, remna thilhlan inthawinaa mi lâk angin a la vek ang a, puithiamin LALPA tâna meia thilhlan angin maichâmah a hâl tûr a ni. Tichuan, puithiamin a thil tihsual tâk chungchâng thu-ah inremna a siamsak ang a, ngaihdam a ni ang.
Sual tâna thilhlan tûr
1 “ ‘Tu pawh a thil hmuh emaw, a thil hriat emawa hretu a niha, rorêlna hmaa puang tûra tih a nih hnu pawha a sawi duh lohva, thil a tihsual chuan a khawlohna mawh chu a phur ang. 2 Tin, tu pawhin thil thianghlim lo rêng rêng, ramsa thianghlim lo ruang emaw, ran thianghlim lo ruang emaw, a vaha vâk chi rannung thianghlim lo ruang emaw, hre lo pawha a khawiha, a lo thianghlim loh chuan thiam loh a chang ang. 3 Tin, mihring pawh a thianghlim lohna eng ang pawh ni sela, a thianghlim lohna chu hre lo pawha a khawih chuan, a hriat chhuah hun chuan thiam loh a chang ang. 4 Tin, tu pawhin thil ṭha lo emaw, thil ṭha emaw ti tûra a kaa hre lo pawha chhia a chham zung zung chuan, eng pawh ni sela, a chhechham chhuah zung zung mai chu a hriat chhuah hunah chuan thiam loh a chang ang. 5 Tin, heti hi a ni ang a, hêng thil pakhatah pawh hian thiam loh a chan hun chuan a sualna chu a puang ang a; 6 sual thawi nân berâm rual zînga mi a nu, berâmno emaw, kêl emaw a thil tihsual tâk man atân LALPA hnêna hlan tûrin, a bawhchhiat thawina chu a rawn keng ang. Tichuan, puithiamin a sualna chungchâng thu-ah chuan inremna a siamsak ang. 7 “ ‘A neihin berâmno a tlin loh chuan, LALPA hnêna hlan tûrin a sual man atân chuan a bawhchhiat thawinaah ṭhuro pahnih emaw, pârvano pahnih emaw a rawn keng tûr a ni: pakhat chu sual thawi nân, pakhat chu hâlral thilhlan atân. 8 Puithiam hnênah a rawn keng ang a, ani chuan sual thawina tûr chu a hlân hmasa ang a, phel lovin a lu chu a nghâwngah a ṭhuai bung ang. 9 Tichuan, sual thawina thisen chu maichâm pangah chuan tlêm a theh ang a; tin, thisen la awm zawng chu maicham bulah chuan far kangtîr tûr a ni. Chu chu sual thawina a ni. 10 Tin, a pakhata chu dân angin hâlral thilhlanah a hlân ang a. Tichuan, puithiamin a thil tihsual tâk chungchâng thu-ah inremna a siamsak ang a, ngaihdam a ni ang. 11 “ ‘Amaherawhchu, a neihin ṭhuro pahnih emaw, pârvano pahnih emaw pawh a tlin loh chuan, a sual man atâna thilhlanah sual thawi nân chhangphut dip tak, epha hmun sâwma ṭhena hmun khat a rawn keng ang. Hriak a leih tûr a ni lo va, a chungah beraw a dah tûr a ni hek lo, sual thawina a nih avângin. 12 Puithiam hnênah a rawn keng ang a, puithiamin hriat rengna atân a vei khatin a la ang a, maichâm chungah LALPA tâna meia thilhlan angin a hâl tûr a ni. Chu chu sual thawina a ni. 13 Tin, chûng thil zînga a enga pawh a tihsual tâk chungchâng thu-ah chuan, puithiamin inremna a siamsak ang a, ngaihdam a ni ang. A la awm zawng chu chhangphut thilhlan ang bawkin puithiam chanpual tûr a ni ang,’ ti rawh,” tiin.
Bawhchhiat thawina
14 Tin, LALPAN Mosia a bia a, 15 “Tu pawhin thil a tihsuala, LALPA thil thianghlimte chunga a sual palh chuan a bawhchhiat thawina, berâm rual zînga mi berâmpa sawisêl bo, hmun thianghlim sekel ang, tangka sekel eng emaw zât hua i ngaih, bawhchhiat thawinaah LALPA tân a rawn kai tûr a ni. 16 Tin, thil thianghlim chunga a lo tih dik loh tâkna chu a rûl ang a, a hmun ngaa ṭhena hmun khat a belh ang a, puithiam a pe tûr a ni. Tichuan, puithiam chuan bawhchhiat thawina berâmpa chuan inremna a siamsak ang a, ngaihdam a ni ang. 17 Tu pawhin thil a tihsuala, tih loh tûra LALPAN thu a pêkte a enga pawh a tih chuan, hre lo mah sela thiam loh a chang rêng rêng ang a, a khawlohna mawh chu a phur ang. 18 Tin, berâm rual zînga mi berâmpa sawisêl bo, i ngaiha âwm tâwk, bawhchhiat thawinaah puithiam hnênah a rawn kai tûr a ni. Tichuan, puithiam chuan hre lova a tihsual palh chungchâng thu-ah chuan inremna a siamsak ang a, ngaihdam a ni ang. 19 Chu chu bawhchhiat thawina a ni; LALPA hmaa thiam loh chang a ni ngei a ni,” tiin.
1 Tin, LALPA chuan Mosia a bia a, 2 “Tu pawhin thil tisualin, LALPA thu bawhchhe ta sela, sum kawltîr thu emaw, hlêp thu emaw, rûkrûk thu emawa a ṭhenawmte tihderin a ṭhenawmte bum ta sela, 3 a nih loh leh, thil bote chharin, tihderin dâwtin chhia chham ta sela, hêng thil zawng zawng a enga pawh hi a tihsual chuan, 4 heti hi a ni ang a, a sual ngeia, thiam loh a chan chuan a thil rûk te, buma a thil lâk te, a hnêna sum kawltîr te, thil bo a chhar te, 5 dâwta chhia a chhamna thil eng pawh chu a rûl leh tûr a ni. A kim chiahin a rûl leh vek ang a, a hmun ngaa ṭhena hmun khat chu a chuangin a belh ang a, thiam loh a chan ni chuan a neitu chu a pe tûr a ni. 6 A bawhchhiat thawina berâm rual zînga mi, i ngaiha âwm tâwk, berâmpa sawisêl bo, bawhchhiat thawinaah LALPA tân puithiam hnênah a rawn kai tûr a ni. 7 Tichuan, puithiamin LALPA hmaah inremna a siamsak ang a, ngaihdam a ni ang, thiam loh channa tûra thil a tih apiang chungchângahte chuan,” tiin.
Maichâm mei mit lo tûr
8 Tin, LALPAN Mosia a bia a, 9 “Arona leh a fapate hnênah, ‘Hei hi hâlral thilhlan dân tûr chu a ni: hâlral thilhlan chu maichâm chunga a hâlnaah chuan zankhuain a tûk thlengin a awm ang a; tin, maichâma mei chu a nung reng tûr a ni. 10 Tin, puithiam chuan a puan zai sîn silhfên a inbel ang a, a tisa khuh nân a puan zai sîn kekawr a ha ang a; tin, maichâma hâlral thilhlan kâng vâpte chu a la ang a, maichâm sîrah a dah tûr a ni. 11 Tin, a silhfên chu a hlîp ang a, silhfên dang a inbel ang a, a vâpte chu daipâwn lam hmun faiah a kalpui tûr a ni. 12 Tin, maichâm chunga mei chu tihnun reng a ni ang a, a mit tûr a ni lo. Tin, puithiam chuan tûk tin thing a tuah ang a, hâlral thilhlan chu a dah fel ang a; chutah chuan remna thilhlante thau chu a hâl tûr a ni. 13 Maichâmah mei a nung reng ang a; a mit tûr a ni lo.
Buhbâl thilhlan
14 “ ‘Tin, hei hi chhangphut thilhlan dân tûr chu a ni: Arona fapate chuan maichâm bulah, LALPA hmaah an hlân tûr a ni. 15 Tin, anin a vei khatin chhangphut thilhlana mi, chhangphut dip tak leh a hriak leh chhangphut thilhlan chunga beraw zawng zawng chu a la chhuak ang a, chu chu LALPA tâna rimtui tak, hriat rengna atân maichâmah a hâl tûr a ni. 16 Tin, lâk bângte chu Arona leh a fapaten an ei tûr a ni; chu chu hmun thianghlimah dawidim tel lovin an ei ang a; inbiakna puan in kawtlaiah an ei tûr a ni. 17 Dawidim telin ur tûr a ni lo. Meia ka thilhlana an chanvo atân ka pêk a ni; chu chu sual thawina leh bawhchhiat thawina anga thil thianghlim tak a ni. 18 Arona thlah mipa zawng zawngin an ei tûr a ni. Chu chu LALPA tâna hâlral thilhlan chungchâng thu-ah in thlahte zêl chena kumkhaw dân a ni ang. Tu pawh chumi khawih apiangte chu tihhran an ni ang,’ tiin thu pe rawh,” tiin. 19 Tin, LALPA chuan Mosia a bia a, 20 “Hriak thiha a awm nia Arona leh a fapaten LALPA hnêna an hlan tûr thilhlan chu hei hi a ni: chhangphut thilhlana hlan ṭhin tûr, chhangphut dip tak epha hmun sâwma ṭhena hmun khat, zîngah a chanve, tlaiah a chanve. 21 Urna thlêngah hriak pawlha siam tûr a ni. A inchiahchhuah hunah i rawn la lût ang a, a phel tê têin chhangphut thilhlan chu LALPA tâna rimtuiah i hlân tûr a ni. 22 A fapate zînga mi a thlâktu, hriak thih puithiam chuan a hlân ang a; kumkhaw dân tûr angin LALPA tân hâl ral vek tûr a ni. 23 Puithiam chhangphut thilhlan apiang chu hâl ral vek tûr a ni a, ei hauh loh tûr a ni,” tiin.
Sual thawina thilhlan
24 Tin, LALPA chuan Mosia a bia a, 25 “Arona leh a fapate hnênah, ‘Hei hi sual thawi dân tûr chu a ni: hâlral thilhlan talh ṭhinnaah sual thawina pawh chu LALPA hmaah talh tûr a ni. Chu chu thil thianghlim tak a ni. 26 Sual thawina hlântu puithiam chuan a ei ang a; inbiakna puan in kawtlaiah, hmun thianghlimah ei tûr a ni. 27 Tu pawh chumi sa khawih apiangte chu tihhran an ni ang; tin, a thisen chu eng puanah pawh theh per ni sela, a kaina apiang chu hmun thianghlimah i su tûr a ni. 28 A chhumna hlum bêl chu tihkeh tûr a ni a; dâr bêla chhum a nih erawh chuan nawh faia tleuh fai tûr a ni. 29 Puithiam chhûngkuaa mipa tawh phawt chuan chumi chu an ei thei ang. Chu chu thil thianghlim tak a ni. 30 Sual thawina, a thisen hmun thianghlima inremna siamna tûra inbiakna puan ina rawn lâk chu ei tûr a ni lo; hâl tûr a ni.
Bawhchhiat thawina
1 “ ‘Tin, hei hi bawhchhiat thawi dân tûr chu a ni, thil thianghlim tak a ni: 2 hâlral thilhlan an talh ṭhinnaah bawhchhiat thawina pawh chu an talh tûr a ni; tin, a thisen chuan maichâm chu a theh vêl tûr a ni. 3 Tin, a thau zawng zawng chu a hlân tûr a ni: a mei thau tak te, a kawchhûng thau te, 4 a kal pahnih leh a bawhtu thau, a nêma mi leh a thin tuamtu râng, a kalte chawpin a phawrh ang a; 5 tin, puithiam chuan LALPA tâna meia thilhlanah maichâm chungah a hâl tûr a ni. Chu chu bawhchhiat thawina a ni. 6 Puithiam chhûngkuaa mipa tawh phawt chuan chumi chu an ei thei ang; hmun thianghlima ei tûr a ni. Chu chu thil thianghlim tak a ni. 7 Bawhchhiat thawina chu sual thawina ang bawk a ni a, dân khat a ni: chumia inremna siamtu puithiam chuan chu chu a nei tûr a ni. 8 Puithiam, mi tu pawh hâlral thilhlana a hlansaktu puithiam ngei chuan, hâlral thilhlana a hlan vun chu a pumbil tûr a ni. 9 Tin, a urnaa ur chhangphut thilhlan apiang te, kan bêla kan leh thlênga ur zawng zawng chu a hlântu puithiam pual tûr a ni. 10 Chhangphut thilhlan zawng zawng chu hriaka hmeh pawh, a ro pawh, a dang ang bawkin Arona fapate zawng zawngin an insem tlâng tûr a ni.
Inremna thilhlan
11 “ ‘Tin, hei hi miin LALPA hnêna a hlan tûr, remna thilhlan inthawi dân tûr chu a ni. 12 Lâwm thu sawi nâna a hlan chuan, lâwm thu sawi inthawinaah chuan hriaka hmeh dawidim telh loh chhang leh, hriaka chulh dawidim telh loh chhangpêr pante leh, chhangphut dip tak hriaka ngun taka hmeh a hlân tel tûr a ni. 13 Lâwm thu sawi nâna a remna thilhlan inthawinaah chuan, chhang dawidim telh a hlân tel tûr a ni. 14 Tin, chumi ata chu thilhlan tina mi LALPA tâna thên thilhlan atân pakhat ṭheuh a hlân ang a; remna thilhlan thisena thehtu puithiam pual tûr a ni. 15 Tin, lâwm thu sawi nâna a remna thilhlan inthawina sa chu thilhlan a hlan ni la lain ei zawh tûr a ni a; a tûk thlengin eng mah a khêk tûr a ni lo. 16 “ ‘Amaherawhchu, a thilhlan inthawina chu thutiam emaw, mahni duhthua thilhlan emaw a nih chuan, a inthawina a hlan ni la la chuan ei tûr a ni a; tin, ei bâng chu a tûkah ei tûr a ni. 17 Amaherawhchu, inthawina sa a ni thum ni thlenga la awm cheu chu hâl tûr a ni. 18 A remna thilhlan inthawina sa chu ni thum ni thlenga an ei chuan, pawmsak a ni lo vang a, a hlântu pawh chu hlâna ngaih a ni hek lo vang; thil tenawm a ni ang a, tu pawh a ei apiangin an khawlohna mawh chu an phur ang. 19 Tin, sa, thil thianghlim lo rêng rêng nêna intawk chu ei tûr a ni lo va, hâl tûr a ni. Tin, sa chu a thianghlim apiang chuan an ei ang. 20 Remna thilhlan inthawina sa, LALPA chanpual, thianghlim lo chunga eitu erawh chu, chu mi chu a chipuite zîng ata tuithlârin a awm tûr a ni. 21 Tin, tu pawhin thil tenawm, thianghlim lo rêng rêng, mi thianghlim lo emaw, ran thianghlim lo emaw, thil thianghlim lo rêng rêng a khawiha, remna thilhlan inthawina sa, LALPA chanpual a ei chuan, chu mi chu a chipuite zîng ata tuithlârin a awm tûr a ni,’ tiin hrilh rawh,” tiin. 22 Tin, LALPA chuan Mosia a bia a, 23 “Israela thlahte hnênah, ‘Sebâwng emaw, berâm emaw, kêl emaw thau in ei tûr a ni lo. 24 Amaha thi thau leh sa seh thau chu thil dang engah pawh hman theih a ni ang a; ei erawh chu in ei hauh tûr a ni lo. 25 Tu pawh, LALPA tâna miin meia thilhlan an hlan sathau ei chu a chipuite zîng ata tuithlârin a awm tûr a ni. 26 In awmna tawh phawtah chuan thisen rêng rêng, sava emaw, ramsa emaw thisen in ei tûr a ni lo. 27 Tu pawh ni sela, thisen ei rêng rêng chu, chu mi chu a chipuite zîng ata tuithlârin a awm tûr a ni,’ tiin hrilh rawh,” tiin. 28 Tin, LALPA chuan Mosia a bia a, 29 “Israela thlahte hnênah, ‘LALPA hnêna a remna thilhlan inthawina hlân apiang chuan, LALPA tâna a thilhlan chu a remna thilhlan inthawina ata a rawn hlân tûr a ni. 30 LALPA tâna meia thilhlan chu ama kut ngeiin a rawn keng ang a; a thau chu a ir chawpin a rawn la tûr a ni, a ir chu LALPA hmaa thên thilhlana thên a nih theih nân. 31 Tin, puithiamin maichâmah a thau chu a hâl ang a; a ir erawh chu Arona leh a fapate pual tûr a ni. 32 A bawp ding lam chu inremna thilhlan inthawina ata thên thilhlanah puithiam in pe tûr a ni. 33 Arona fapate zînga remna thilhlan thisen leh thau hlântu apiang chuan, a chanvo atân a bawp ding lam a nei tûr a ni. 34 A ir leh a bawp an thên ṭhin chu Israela thlahte an remna thilhlan inthawinate ata chu ka tîl hrang a, Israel thlahte kumkhaw tih dân tûr atân puithiam Arona leh a fapate ka pe a ni,’ tiin hrilh rawh,” tiin. 35-36 Hei hi a ni, anmahni hriak a thih nia Israela thlahten an pêk tûra LALPAN thu a pêk, puithiam hna thawka LALPA rawngbâwl tûra a hlan ni achina LALPA tâna meia thilhlan ata Arona chanvo leh a fapate chanvo tûr chu. Hei hi kumkhuaa an thlahte zêl thlenga an tih dân tûr a ni. 37-38 Hei hi Sinai thlalêra Israela thlahten thilhlan LALPA hnêna hlân tûra thu a pêk nia, Sinai tlânga LALPAN Mosia thu a pêk hâlral thilhlan te, chhangphut thilhlan te, sual thawina te, tihhranna te, remna thilhlan inthawina dân te chu a ni.
Arona leh a fate puithiama nemngheh thu
1 Tin, LALPAN Mosia a bia a, 2 “Arona chu a fapate nên hruai la, silhfên te, hriak thih mi te, sual thawina bâwngpa te, berâmpa pahnih te, chhang dawidim telh loh bâwm khat nên chuan keng bawk la; 3 tin, mi zawng zawng chu inbiakna puan in kawngka vêlah awm khâwmtîr rawh,” tiin. 4 Tin, Mosia chuan LALPAN thu a pêk ang chuan a ti a; mi zawng zawng chu inbiakna puan in kawngka vêlah chuan an awm khâwm a. 5 Tin, Mosian pung khâwmho hnênah chuan, “Hei hi a ni, LALPAN tih tûra thu a pêk chu,” a ti a. 6 Tin, Mosian Arona leh a fapate chu a rawn hruai a, a bual a. 7 Tichuan, kawr chu a hâktîr a, kâwng hrênna chuan a hrêng a, kawrfual chu a hâktîr a, puithiam kawr chu a bel a; puithiam kawr hrênna thiam taka tah chuan a hrêng a, chu chuan a hrêng bet a. 8 Tin, âwmbel chu a bel a; tin, âwmbelah chuan Urim leh Thumim a dah a. 9 Diar chu a khimtîr a; tin, diar pang hma lamah chuan rangkachak phêk, tihhran chhinchhiahna thianghlim chu a bel a, LALPAN Mosia thu a pêk ang khân. 10 Tin, Mosia chuan hriak thih mi chu a la a, biakbûk leh a chhûnga thil awm zawng zawngte chu a thih a, a tithianghlim hlawm a. 11 Chu bawk chuan maichâm chu vawi sarih a theh a, maichâm leh a bungbêl zawng zawng te, maihûn leh a hûnchhante chu tihthianghlim tûrin a thih a. 12 Tin, a tihthianghlimna tûrin hriak thih mi chu Arona lûah a leih a, a thih a. 13 Tin, Mosian Arona fapate chu a rawn hruai a, kawr a haktîr a, kâwng hrênnain a hrêng a, diar a khimtîr a, LALPAN Mosia thu a pêk ang khân. 14 Tin, sual thawina bâwngpa chu a rawn kai a, Arona leh a fapate chuan sual thawina bâwngpa lu chungah chuan an kut an nghat a. 15 Tin, Mosia chuan a talh a; thisen chu a la a, chu chu inremna maichâm tâna siam nân a kutzungṭangin maichâm kîahte chuan a vêlin a tât a, maichâm chu a thian a, maichâm bulah thisen chu a leih a, a tithianghlim a. 16 Tin, a rîlbawh zawng zawng te, a thin tuamtu râng te, a kal pahnih leh a thaute a la a, maichâmah Mosian a hâl a. 17 Bâwngpa erawh chu a vun nên, a sa nên, a êk nên, daipâwnah a hâl a, LALPAN Mosia thu a pêk ang khân. 18 Tin, hâlral thilhlan berâmpa chu a han hlân a, Arona leh a fapate chuan berâmpa lu chungah chuan an kut an nghat a. 19 Tin, Mosia chuan a talh a; tin, maichâm chu thisen chuan a theh vêl a. 20 Tin, berâmpa chu a chan a, a lu leh sa hrangte leh a thaute chu a hâl a. 21 Tin, a kawchhûng leh a kete chu a sil a; berâmpa chu maichâmah a vaiin a hâl vek a; LALPA tâna meia thilhlan a ni a, LALPAN Mosia thu a pêk ang khân. 22 Tin, berâmpa dang, tihhranna berâmpa chu a han hlân leh a; Arona leh a fapate chuan berâmpa lu chungah chuan an kut an nghat a. 23 Tin, Mosia chuan a talh a, thisen chu a la a, Arona beng ding lam hmâwrah te, a kut ding lam zungpuiah te, a ke ding lam zungpuiah te a hnawih a. 24 Tin, Mosia chuan Arona fapate chu a hruai a, an beng ding lam hmâwrah te, an kut ding lam zungpuiah te, an ke ding lam zungpuiah te a hnawih a; tin, maichâm chu thisen chuan a theh vêl a. 25 Tin, a thau te, a mei thau tak te leh a rîlbawh zawng zawng te, a thin tuamtu râng te, a kal pahnih leh a thaute leh a bawp ding lam a la a; 26 LALPA hmaa chhang dawidim telh loh bâwm ata chu chhang dawidim telh loh pakhat leh, hriaka hmeh chhangpêr pakhat leh chhangpêr pan pakhat a la a, sa thau chungah leh a bawp ding lam chungah chuan a dah a; 27 tin, a vai chuan Arona kutphah chungah leh a fapate kutphah chungah chuan a dah a, LALPA hmaa thên thilhlanah a thên a. 28 Tin, Mosian an kut ata chu a la a, halrâl thilhlan chungah maichâmah a hâl a; chu chu rimtui atâna tihhranna a ni; LALPA tâna meia thilhlan a ni. 29 Tin, Mosian a ir chu a la a, LALPA hmaa thên thilhlanah a thên a; chu chu tihhranna berâmpaa Mosia chanvo a ni, LALPAN Mosia thu a pêk ang khân. 30 Tin, Mosian hriak thih mi ata leh maichâma thisena mi a la a, chu chuan Arona leh a silhfên a theh a, a fapate leh a fapate silhfênte pawh; Arona leh a silhfên chu a tithianghlim a, a fapate leh a fapate silhfênte pawh. 31 Tin, Mosian Arona leh a fapate hnênah chuan, “Inbiakna puan in kawngka bulah sa chu chhûm ula, ‘Arona leh a fapaten an ei tûr a ni,’ tia thu ka pêk ang khân, chutah chuan tihhranna bâwma chhang nên ei rawh u. 32 Tin, sa leh chhang ei bângte chu in hâl tûr a ni. 33 In intihhranna ni a kim hma loh chuan inbiakna puan in kawngka chu chhuahsan lovin ni sarih in awm tûr a ni; ni sarih a tihrang dâwn si che u a. 34 Tûna tih ang hian inremna siamsak tûr che uin LALPAN tih tûr thu a pe a ni. 35 Inbiakna puan in kawngka bulah chuan ni sarih, chhûn leh zân in awm reng ang a, in thih loh nân LALPA thupêk chu in zâwm tûr a ni; chutianga thupêk chu ka ni,” a ti a. 36 Tichuan, LALPAN Mosia hmanga tih tûra thu a pêk zawng zawng chu Arona leh a fapate chuan an ti a.
Aronan inthawina a hlân
1 Tin, heti hi a ni a, a ni riat ni chuan Mosian Arona leh a fapate leh Israel upahote chu a ko va. 2 Tin, Arona hnênah chuan, “Sual thawi nân bâwngno a pa leh hâlral thilhlanah berâmpa, sawisêl bo ve ve kai la, LALPA hmaah hlân rawh. 3 Tin, Israela thlahte hnênah chuan, ‘Sual thawi nân kêlpa, hâlral thilhlanah bâwngno leh berâmno kum khat mi ve ve sawisêl bo ṭhiau 4 leh, bâwngpa leh berâmpa LALPA hmaa remna thilhlana hlanah rawn kai ula, hriaka hmeh chhangphut thilhlan nên; vawiinah hian in hnênah LALPA a lo lang dâwn e,’ tiin hrilh rawh,” a ti a. 5 Tin, Mosian thu a pêk ang chuan inbiakna puan in kawtah an rawn kai a; tin, mi zawng zawng chuan an va hnaih a, LALPA hmaah chuan an va ding a. 6 Tin, Mosia chuan, “Hei hi a ni in tih tûra LALPAN thu a pêk che u kha; tichuan, LALPA ropuina chu in zîngah a lo lang ang,” a ti a. 7 Tin, Mosian Arona hnênah, “Maichâm chu rawn hnaih la, i sual thawina te, i hâlral thilhlan te hlân la, nangma tân leh mipuite tân inremna siam rawh. Mipuite thilhlan chu hlân la, an tân inremna siam rawh, LALPA thupêk angin,” a ti a. 8 Tin, Arona chuan maichâm chu a va hnaih a, ama puala sual thawina bâwngno chu a talh a. 9 Tin, Arona fapate chuan thisen chu a hnênah an hlân a, thisenah chuan a kutzungṭang a chiah a, maichâm kiahte chuan a tât a, thisen chu maichâm bulah a leih a. 10 Sual thawina thau te, a kal te, a thin tuamtu râng te erawh chu maichâm chungah a hâl a, LALPAN Mosia thu a pêk ang khân. 11 Tin, a sa leh a vun chu daipâwnah a hâl a. 12 Tin, hâlral thilhlan chu a talh a; Arona fapate chuan thisen chu an pe a, anin maichâm chu a theh vêl a. 13 Hâlral thilhlan sa hrang chu a mal malin a lu nên an pe a, ani chuan maichâmah a lo hâl a. 14 Tin, a kawchhûng te, a kete a sil a, maichâmah hâlral thilhlan chungah chuan a hâl a, 15 Tin, mipuite thilhlan chu a hlân a, mipuite sual thawina kêl chu a kai a, a talh a, a hmaa mi ang bawk khân sual thawinaah a hlân a. 16 Tin, hâlral thilhlan chu a hlân a, a dân ang zêlin a hlân a ni. 17 Tin, chhangphut thilhlan chu a hlân a, chuta mi chu a vei khatin a la a, zîng lam hâlral thilhlan tih loh pawh chu maichâmah chuan a hâl bawk a. 18 Mipuite puala remna thilhlan inthawina bâwngpa leh berâmpa chu a talh bawk a; tin, Arona fapaten a thisen chu an pe a, maichâm chu a theh vêl a; 19 tin, bâwngpa thau leh berâmpa thau te, a mei thau tak te, a rîlbawh te, a kal te, a thin tuamtu rângte an pe bawk a; 20 a thau chu a ir chungah te chuan an dah a; tin, ani chuan a thau chu maichâmah chuan a hâl a. 21 Tin, a ir leh a bawp ding lam chu Arona chuan LALPA hmaah thên thilhlanah a thên a, Mosia thupêk ang khân. 22 Tin, Arona chuan mipui lamah chuan a bân a phar a, mal a sâwm hlawm a; tin, sual thawina leh hâlral thilhlan leh remna thilhlan a hlân zo chu a lo chhuk a. 23 Tin, Mosia leh Arona chu inbiakna puan inah an va lût a; tin, an lo chhuak leh a, mipuite chu mal an sâwm a. Tin, LALPA ropuina chu mi zawng zawng chungah chuan a lo lang a. 24 Tin, LALPA hma aṭang chuan mei a lo chhuak a, hâlral thilhlan leh thaute chu maichâmah chuan a kâng ral ta a. Tin, chu chu mipui zawng zawngin an hmuh chuan an au dur dur a, an bawkkhup ta ṭhuap a.
Nadaba leh Abihua thil sual tih
1 Tin, Arona fapa, Nadaba leh Abihua-te chuan an mei lâkna chu an la ve ve a, chutah chuan meiling an dah a, rimtui an phul a, LALPA hmaah a thupêk lohvin mei hman loh chi an hlân a. 2 Chutichuan, LALPA hma aṭangin mei a lo chhuak a, anni chu a kâng hlum a, LALPA hmaah chuan an thi ta a. 3 Chutichuan, Mosian Arona hnênah, “ ‘Mi rawn hnaihtuahte chuan thianghlimin ka lang ang a; mipui zawng zawng hmaah chuan chawimawiin ka awm ang,’ tia LALPAN a sawi kha hei hi a nih hi,” a ti a. Tin, Arona chu a ngawi reng a. 4 Tichuan, Mosia chuan Arona pami Uziela fapa, Misaela leh Elzaphana-te chu a ko va, an hnênah, “Lo hnai ula, in unaute hi hmun thianghlim ata daipâwnah zâwn chhuak rawh u,” a ti a. 5 Chutichuan, an lo hnai a, an puithiam kawr ha chungin daipâwnah an zâwn chhuak a, Mosia sawi ang chuan. 6 Tin, Mosian Arona hnênah leh a fapa Eleazara leh Ithamara-te hnênah chuan, “In sam thlah suh ula, in puante pawt thlêr hek suh u; chuti lo chuan, in thi ang a, mi zawng zawng chungah LALPA a thinur ang; in unau, Israel chhûngkaw pum puiin mei, LALPA hâl chu sûn zâwk rawh se. 7 Tin, inbiakna puan in kawngka ata chu in chhuak tûr a ni lo; chuti lo chuan, in thi ang, LALPA hriak, thih mi chu in chungah a awm si a,” a ti a. Tichuan, Mosia thu ang chuan an ti ta a.
Puithiamho thil hlan dân tûr
8 Tin, LALPAN Arona chu a bia a, 9 “Nang emaw, i fapate emaw pawhin inbiakna puan in chhûnga in kal laiin uain leh zu rêng rêng in suh u; chuti lo chuan, in thi ang. Chu chu in thlahte zêl thlenga kumkhaw dân tûr a ni ang a; 10 chu chu a thianghlim leh a thianghlim lo leh, a thiang leh a thiang lo in thlei theihna tûr leh, 11 LALPAN Mosia hmanga an hnêna a sawi, thupêk zawng zawngte chu Israela thlahte in zirtîr theih nân a ni ang,” tiin. 12 Tin, Mosian Arona hnênah leh a fapa la dam Eleazara leh Ithamara-te hnênah chuan, “LALPA tâna meia thilhlana mi, chhangphut thilhlan lâk bângte chu la ula, maichâm bulah dawidim tel lovin ei rawh u; thil thianghlim a ni si a. 13 LALPA tâna meia thilhlana i pual leh i fapate pual a nih avângin hmun thianghlimah in ei tûr a ni; chutianga thu pêk chu ka ni e. 14 A ir thên leh a bawp ding lam thên chu hmun faiah in ei tûr a ni, nang leh i fapate leh i fanuteho nên; Israela thlahte remna thilhlan inthawinaa i pual leh i fapate puala ruat a ni si a. 15 Bawp thên leh ir thên chu LALPA hmaa thên thilhlana thên tûrin, meia thilhlan thau nên an rawn keng tûr a ni a. Chu chu nang leh i fapate nên, kumkhuaa in pual tûr a ni ang, LALPA thupêk ang khân,” a ti a. 16 Tin, Mosia chuan sual thawina kêl chu ngun takin a zawng a; tin, ngai teh, an lo hâl tawh reng a. Tichuan, Arona fapa la dam, Eleazara leh Ithamara-te chungah chuan a thinur a, 17 “Engati nge sual thawina chu hmun thianghlimah in ei loh? Thil thianghlim, mipuiho khawlohna phur tûra LALPA hmaa remna siamsakna tûra a pêk che u a ni si a. 18 Ngai teh u, a thisen chu hmun thianghlimah in la lût hlei nêm; thu ka pêk ang khân hmun thianghlimah chuan in ei ngei ngei tûr a ni asin,” tiin. 19 Tin, Arona chuan Mosia hnênah, “Ngai teh, vawiinah hian LALPA hmaah an sual thawina leh an hâlral thilhlan chu an hlân a ni a; hetiang thil hi ka chungah a lo awm ta mai si a! Vawiinah hian sual thawina chu lo ei ta ila, LALPA ngaiha thil tih âwm a lo ni dâwn maw?” a ti a. 20 Tin, Mosian chu chu a hriatin a lungawi ta a.
Sa ei thiangte
1 Tin, LALPAN Mosia leh Arona a bia a, 2 “Israela thlahte chu bia ula, ‘Lei chunga sa zawng zawng zînga nungcha in ei tûrte chu hêng hi a ni: 3 sa zînga a tin kâka, tin kâk chhuak, chaw ṭhial nawn chi tawh phawt chu in ei thei ang a. 4 Amaherawhchu, chaw ṭhial nawn chi emaw, tin kâk chhuak emaw zînga mi hêngte hi chu in ei tûr a ni lo: sanghâwngsei, chaw chu ṭhial nawn mah sela, a tin a kâk loh avângin, in tân a bawlhhlawh a ni; 5 tin, sazupui, chaw chu a ṭhial nawn na a, a tin a kâk loh avângin, in tân a bawlhhlawh a ni; 6 tin, zupui, chaw chu a ṭhial nawn na a, a tin a kâk loh avângin, in tân a bawlhhlawh a ni; 7 tin, vawk, a tin chu a kâk a, a kâk chhuak na a, chaw a ṭhial nawn loh avângin, in tân a bawlhhlawh a ni. 8 An sa in ei tûr a ni lo va, an ruang pawh in khawih tûr a ni lo; in tân a bawlhhlawh a ni. 9 “ ‘Tuia chêng zawng zawngah hêngte hi in ei thei ang: tuifinriat leh lui leh tuia awm, pângparh leh phuhlip nei tawh phawt chu in ei thei ang. 10 Tuia chêng zawng zawngte leh tuia nungcha awm zawng zawng zînga tuifinriata mi te, luia mi te, pângparh leh phuhlip nei lo apiangte chu in tâna thil tenawm a ni. 11 In tân thil tenawm a ni ang; an sa in ei tûr a ni lo va, an ruangte chu thil tenawmah in neih tûr a ni. 12 Tuia mi, pângparh leh phuhlip nei lo tawh phawt chu in tân thil tenawm a ni. 13 “ ‘Tin, sava zînga mi chu hêng hi thil tenawma in neih tûr a ni; ei loh tûr a ni a, thil tenawm an ni: mupui te, lungdûp te, muârla te, 14 mutê te, ngawihûp chi rêng rêng te, 15 choâk chi rêng rêng te, 16 sava sâng te, vabak te, tuifinriat sava te, mu chi rêng rêng te, 17 hrângkir te, luidung mû te, chingpirinu te, 18 chhimbuk sialki nei te, tuivalawng te, mulukawlh te, 19 kânghlai te, dîl sava chi rêng rêng te, chhuangtuar leh bâkte. 20 “ ‘Thla nei, ke palia kal chi zawng zawng chu in tân thil tenawm a ni. 21 Amaherawhchu, thla nei, ke palia kal chi pawh lei chunga perh nâna an keṭang chung lama bawp nei zawng zawng zînga mi hêngte hi in ei thei ang. 22 Hêngte pawh hi in ei thei ang: khaukhuap chi rêng rêng te, khauêkṭhingṭial chi rêng rêng te, perhpâwng chi rêng rêng leh khau chi rêng rêngte. 23 Amaherawhchu, thla nei, ke pali nei, a kala kal chi zawng zawng chu in tân thil tenawm a ni vek ang. 24 “ ‘Tin, hêng avângte hian bawlhhlawh in lo kai ang; tu pawh, hêng sa ruang khawih apiang chu tlai lam thlengin an bawlhhlawh ang a; 25 tin, tu pawh hêng ruang latu apiangte hian an puante an su tûr a ni a, tlai lam thlengin an bawlhhlawh ang: 26 ran a tin kâka, tin kâk chhuak lo, chaw pawh ṭhial nawn lo chi zawng zawng chu in tân thil bawlhhlawh a ni a; tu pawh chûng khawih apiang chu an bawlhhlawh ang. 27 Tin, fuliafa zawng zawng zînga ke bâwra kal apiangte chu in tân thil bawlhhlawh a ni a; an ruang khawih apiang chu tlai lam thlengin an bawlhhlawh ang. 28 Tin, an ruang latu apiang chuan an puante an su tûr a ni a, tlai lam thlengin an bawlhhlawh ang. In tân thil bawlhhlawh a ni. 29 “ ‘Tin, leia a bawha bawkvâk chi zînga in tâna thil bawlhhlawh chu hêngte hi a ni: bui te, chaichîm te, tangkeu chi rêng rêng te, 30 chawkê te, tangkâwng te, laitel te, kâwlchawr te, laikîng te. 31 Hêng hi a bawha bawkvâk chi zawng zawng zînga in tâna thil bawlhhlawhte chu an ni. Tu pawhin hêng thi hnute hi an khawih chuan tlai lam thlengin an bawlhhlawh ang. 32 Tin, an thiha eng pawh an delh chu a bawlhhlawh zêl ang; hmanrua hman tawh phawt chu thing bungbêl emaw, puan emaw, savun emaw, saiip emaw pawh ni sela, tuiah chiah tûr a ni. Tin, tlai lam thlengin a bawlhhlawh ang; chumi zawhah chuan a thianghlim tawh ang. 33 Hlum bêl, a enga pawh a tlâkna apiang chu in tikeh zêl tûr a ni; a chhûnga awm zawng zawng chu a bawlhhlawh a ni: 34 chumi bêla ei mi awm zawng zawng pawh, chumia awm tuia chiah tawh rêng rêng chu thil bawlhhlawh a ni ang; tin, in mi, in theih chi zawng zawng pawh, chumi bêla mi rêng rêng chu thil bawlhhlawh a ni ang. 35 Tin, thil eng pawh an ruang a eng lai pawhin a delh tawh phawt chu thil bawlhhlawh a ni zêl ang; chhang urna emaw, ur lumna bêl emaw pawh tihkeh vek tûr a ni; a bawlhhlawh tawh a, in tân thil bawlhhlawh a ni ang. 36 Amaherawhchu, tuikhur emaw, tuizêm, tui tling khâwm emaw chu a bawlhhlawh lo vang a, an ruang khawih apiang erawh chu a bawlhhlawh ang. 37 Tin, chi, chîn tûr rêng rêng chu an ruang a eng lai pawhin lo delh ta ang sela, a bawlhhlawh lo va. 38 Amaherawhchu, chi, tuia chiah hnu chu an ruang a eng lai pawhin delh sela, in tân thil bawlhhlawh a ni. 39 “ ‘Ran in ei theih chi rêng rêng eng pawh thi sela, a ruang khawih apiang chu tlai lam thlengin a bawlhhlawh ang. 40 A sa ei apiang chuan a puante a su tûr a ni a, tlai lam thlengin a bawlhhlawh ang. A ruang latu pawhin a puante a su tûr a ni a, tlai lam thlengin a bawlhhlawh ang. 41 “ ‘Tin, rannung lei chunga a bawha bawkvâk chi zawng zawng chu thil tenawm an ni a; ei tûr an ni lo. 42 A tlenga tleng chi leh ke palia kal chi emaw, ke tam tak nei chi emaw, lei chunga a bawha bawkvâk chi rêng rêng chu in ei tûr a ni lo, thil tenawm an ni si a. 43 A bawha bawkvâk chi rêng rêngin in intitenawm tûr a ni lo va; in bawlhhlawh phahna tûrin, chûng chuan in intibawlhhlawh tûr a ni lo. 44 Kei hi LALPA in Pathian ka ni si a; chuvângin, intithianghlim ula, thianghlimin awm rawh u; kei ka thianghlim si a. Lei chunga chêng, a vaha vâk, a eng ang chi mahin intibawlhhlawh suh u. 45 In Pathian ni tûra Aigupta ram ata hruai chhuak chhotu che u LALPA chu ka ni si a. Kei ka thianghlim si a; chuvângin, nangni pawh in thianghlim tûr a ni. 46 “ ‘Hei hi sa leh savate leh nungcha, tuia chêng chi tinrêng leh, leia a bawha bawkvâk chi tinrêngte chungchâng thua dân tûr chu a ni, 47 thianghlim leh thianghlim lo thleina tûr leh, nungcha ei theih mi leh nungcha ei theih loh mi thleina tûrin,’ ti rawh u,” tiin.
Nau neih zawha hmeichhe then dân tûr
1 Tin, LALPAN Mosia a bia a, 2 “Israela thlahte hnênah, ‘Hmeichhiain nau a paia, fapa a hrin chuan ni sarih a bawlhhlawh ang a; hmeichhe dân pângngai hun laia a bawlhhlawh angin a bawlhhlawh ang. 3 Tin, a ni riat niin naute serh hmâwr vun tan tûr a ni. 4 Thisen avânga inthianin ni sawmthum leh ni thum a la awm cheu tûr a ni; a inthen ni a kim hma loh chuan thil thianghlim rêng rêng a khawih tûr a ni lo va, hmun thianghlimah pawh a lût tûr a ni hek lo. 5 Hmeichhia a hrin erawh chuan, hmeichhe dân pângngai hun laia a bawlhhlawh angin chawlhkâr hnih a bawlhhlawh ang; tin, thisen avânga inthianin ni sawmruk leh ni ruk a la awm cheu tûr a ni. 6 “ ‘Tin, fapa emaw, fanu emaw avânga a inthenna ni a kim veleh, hâlral thilhlanah berâmno kum khat mi leh sual thawi nân pârvano emaw, ṭhuro emaw inbiakna puan in kawngka bulah puithiam hnênah a rawn keng tûr a ni. 7 Tin, anin LALPA hmaah a hlân ang a, inremna a siamsak ang a; tichuan, a thisen chhuahna ata tihthianghlim a ni ang. Hei hi mipa emaw, hmeichhia emaw hringtu tâna dân a ni. 8 Tin, a neihin berâmno a tlin loh chuan ṭhuro tuak khat emaw, pârvano tuak khat emaw a keng tûr a ni: pakhat chu hâlral thilhlanah, pakhat chu sual thawi nân. Chutiang chuan puithiamin inremna a siamsak ang a; tichuan, a thianghlim tawh ang,’ tiin sawi rawh,” tiin.
Vuna natna chi hrang hrang tih dân tûr
1 Tin, LALPAN Mosia leh Arona a bia a, 2 “Mi a tisa vun a vûn emaw, a khir emaw, a bawl emaw, a vuna phâr hri ni âwma a lan chuan puithiam Arona hnênah emaw, a fapa, puithiamte zînga tu ber emaw hnênah hruai tûr a ni. 3 Tin, puithiam chuan tisa vuna hri chu a lo en ang a; tin, a hri awmna laia hmul chu a lo vâra, a hri chu a tisa vun aia thûka a lan chuan phâr hri a ni a. Tin, puithiam chuan amah chu a lo en ang a, mi bawlhhlawh a nih a puang tûr a ni. 4 A tisa vuna bawlte chu a lo vâra, vun aia thûka a lan lohva, a hmul chu a vâr loh chuan hri veitu chu puithiamin ni sarih a khung hrang ang. 5 Tin, puithiam chuan ni sarih ni chuan amah chu a en ang a; tin, ngai teh, a hri chu a ngai renga a hmuha, a hri chu a ṭai darh loh chuan puithiam chuan ni sarih vêk a khung hrang leh ang. 6 Tichuan, puithiam chuan ni sarih ni chuan a en leh ang a; tin, ngai teh, hri chu a lo thîma, hri chu a vuna a ṭai darh loh chuan puithiam chuan a thianghlim tih a puang tûr a ni; khir mai a ni a, a puante a su ang a, a lo thianghlim ang. 7 Amaherawhchu, a thianna tûra puithiam a inentîr hnua a khir chu a vuna a ṭai darh zau chuan, puithiam a inentîr leh tûr a ni. 8 Tin, puithiam chuan a lo en ang a; tin, ngai teh, a khir chu a vuna a ṭai darh chuan puithiam chuan a bawlhhlawh tih a puang ang. Phâr a ni. 9 “Phâr hri miin a vawn chuan puithiam hnênah hruai tûr a ni. 10 Tin, puithiamin a lo en ang a; tin, ngai teh, vuna a vâra a lo vûn chhuaha, a hmul a tihvâra, a vûng chu a lâwn chuan, 11 phâr benvawn a tisaah a awm a ni a. Puithiamin a bawlhhlawh tih a puang ang a, khung hran tûr a ni lo, bawlhhlawh a ni si a. 12 Tin, a phâr chu vuna a ṭai darh zauva, a hri veitu chu a vun, a lû aṭanga a ke lêr thlenga puithiam hriat theih chin phârin a bawm chuan, 13 puithiam chuan a en ang a; tin, ngai teh, phârin a tisa zawng zawng a bawm chhuah tawh chuan hri veitu chu a thiang tih a puang tûr a ni. A vâr zo tawh a, a thianghlim tawh a ni. 14 Amaherawhchu, a tisa a lo lâwn chuan a lo bawlhhlawh ang. 15 Puithiam chuan a tisa lâwng chu a lo en ang a, a bawlhhlawh tih a puang tûr a ni; tisa lâwng chu a bawlhhlawh a ni. Phâr a ni. 16 Amaherawhchu, tisa lâwng chu a lo danglam leha, a lo vâr leh chuan puithiam hnênah a kal ang a. 17 Tin, puithiamin a lo en ang a; tin, ngai teh, a hri chu a lo vâr chuan puithiam chuan hri veitu chu a bawlhhlawh lo tih a puang tûr a ni. A thianghlim tawh a ni. 18 “Tin, tisa vun a lo khawihlia, a lo dama, 19 a khawihlina hmuna a lo vâr pâwn emaw, vâr sen deuhva a lo bawl emaw chuan puithiam entîr tûr a ni. 20 Tin, puithiam chuan a lo en ang a; tin, ngai teh, vun aia thûka a lana, a hmul chu a lo vâr chuan puithiamin a bawlhhlawh tih a puang tûr a ni. Phâr hri a ni a, khawihliah a lo piang chhuak a ni. 21 Amaherawhchu, puithiamin a lo ena, hmul vâr a awm lohva, vun aia a thûk lohva, a thîm deuh chauh a nih chuan, puithiamin ni sarih a khung hrang ang a; 22 tin, vuna a ṭai darh chuan puithiamin a bawlhhlawh tih a puang tûr a ni. Hri a ni. 23 Amaherawhchu, a bawl vâr chu a awmna ngaia a awma, a ṭai darh loh chuan khawihli ser mai a ni a; puithiamin a thianghlim tih a puang tûr a ni. 24 “Tin, tisa vun a kana, a kâng lâwng chu vâr sen deuh emaw, a vâr emawa a lo bawl chhuah chuan, 25 puithiamin a lo en ang a; tin, ngai teh, a bawl lai taka hmul chu a vâra, vun aia thûka a lan chuan phâr a ni a, kângah chuan a lo piang chhuak a ni. Tichuan, puithiamin a bawlhhlawh tih a puang tûr a ni. Phâr hri a ni. 26 Amaherawhchu, puithiamin a lo ena, tin, ngai teh, a lo bawla, a hmul vâr a awm lohva, vun aia thûk lova thîm deuh chauh a nih chuan puithiamin ni sarih a khung hrang ang. 27 Tin, puithiamin ni sarih niah amah chu a en ang a, vuna a ṭai darh zau chuan puithiamin a bawlhhlawh tih a puang tûr a ni. Phâr hri a ni. 28 Tin, a bawl chu a awmna ngaia a awm renga, vuna a ṭai darh lohva, thîm deuh chauh a nih chuan mei kan pâwn mai a ni a, puithiamin a thianghlim tih a puang tûr a ni; kâng ser mai a ni si a. 29 “Tin, hmeichhia emaw, mipa emawin a luah emaw, a khabe hmul laiah emaw hri a vei chuan, 30 puithiamin hri chu a lo en ang a; tin, ngai teh, vun aia thûka a lana, hmul eng sîn tak a awm chuan puithiamin a bawlhhlawh tih a puang tûr a ni; pupangliah a ni a, lû leh khabe hmul phâr a ni. 31 Tin, puithiamin pupangliah hri chu a ena, vun aia thûk lova a lana, a hmul dum a awm loh chuan puithiamin pupangliah hri veitu chu ni sarih a khung hrang ang. 32 Tin, ni sarih niah puithiamin hri chu a en ang a; tin, ngai teh, pupangliah chu a ṭai darh lohva, hmul eng a awm lohva, pupangliah chu vun aia thûka a lan loh chuan, 33 meh tûr a ni a, pupangliah lai erawh chu a mêt tûr a ni lo. Tin, puithiamin pupangliaha chu ni sarih dang a khung hrang leh ang a. 34 Tin, ni sarih ni chuan puithiamin pupangliah chu a en leh ang a; tin, ngai teh, pupangliah chu a vuna a darh lohva, vun aia thûka a lan loh chuan puithiamin a thianghlim tih a puang tûr a ni; tin, a puante a su ang a, a lo thianghlim tawh ang. 35 Amaherawhchu, pupangliah chu a inthen fai hnua vuna a ṭai darh zau chuan, 36 puithiamin amah chu a lo en ang a; tin, ngai teh, pupangliah chu vuna a ṭai darh chuan, puithiam tân chuan hmul eng chu zawn a ngai kher lo vang; a bawlhhlawh a ni. 37 Amaherawhchu, pupangliah chu a ngai renga a hmuha, hmul dum a ṭo chuan pupangliah chu a dam a ni a, a thianghlim a ni; puithiamin a thianghlim tih a puang tûr a ni. 38 “Tin, hmeichhia emaw, mipa emaw, an tisa vunah bawl, bawl vâr tak a awm chuan, 39 puithiamin a en ang a; tin, ngai teh, an tisa vuna bawl chu a vâr thîm deuh chauh a nih chuan bawl mai a ni a, vuna lo piang a ni a; a thianghlim a ni. 40 “Mi a sam a tlâk kawlh chuan lukawlh a ni a; nimahsela, a thianghlim a ni. 41 A chhîp sam a tlâk kawlh chuan chalkawlh a ni a; nimahsela, a thianghlim a ni. 42 Amaherawhchu, lukawlhah emaw, chalkawlhah emaw, hri sen deuhva vâr a awm chuan, a lukawlh emaw, a chalkawlh emawa lo piang phâr a ni. 43 Tichuan, puithiamin a lo en ang a; tin, ngai teh, a lukawlh emaw, a chalkawlh emawa hri lo pâwng chhuak chu a sen vâr hiara, tisa vuna phâr anga a lan chuan, 44 mi phâr a ni a, a bawlhhlawh a ni. Puithiamin a bawlhhlawh tih a puang ngei ngei tûr a ni; a phârna chu a lu-ah a ni. 45 “Phâr hri vei chu a puante pawh thlêr a ni ang a, a sam te a thlah ang a, a hmui chung lam a tuam ang a, ‘Ka bawlhhlawh e! Ka bawlhhlawh e!’ tiin a au tûr a ni. 46 Phârin a bawm chhûng chu bawlhhlawh a ni ang a; a bawlhhlawh a, amahin a awm hrang tûr a ni; a awmna tûr chu daipâwn a ni.
Hri inkai theih
47-48 “Silhfên pawh, sahmul silhfên emaw, la zai sîn silhfên emaw pawh, tah emaw, phiar emaw pawh, la zai sîn emaw, sahmul emaw pawh, savun emaw, eng pawh savuna siamah emaw phâr hri a awma, 49 chu hri chu silhfênah emaw, savunah emaw, tahah emaw, phiarah emaw, eng pawh savuna siamah emaw a hring deuh emaw, a sen deuh emawa a lo lan chhuah chuan, phâr hri a ni a, puithiam entîr tûr a ni. 50 Tin, puithiamin hri chu a lo en ang a, hri kaina chu ni sarih a khung hrang ang. 51 Tin, ni sarih niah hri chu a en ang a, hri chu silhfên, tahah emaw, phiarah emaw, eng atân pawha an hman savunahte emaw a ṭai chuan hri chu phâr nghet tak chi a ni a; a bawlhhlawh a ni. 52 Silhfên chu, tah emaw, phiar emaw, sahmul emaw, la zai sîn emaw, savuna siam chi rêng rêng emaw, phâr awmna tawh phawt chu a hâl tûr a ni, phâr nghet tak chi a ni si a; hâl ngei tûr a ni. 53 Tin, puithiamin a lo ena, silhfên, tah emaw, phiar emaw, savuna siam chi rêng rêng pawha hri chu a ṭai loh chuan, 54 hri awmna chu puithiamin sûk thu a pe ang a, ni sarih dang a khung hrang leh ang. 55 Tin, hri awmna sûk hnu chuan puithiamin a en leh ang a; tin, ngai teh, hri lan dân chu a danglam loh chuan hri chu ṭai lo mah sela, a thianghlim chuang lo va, i hâl tûr a ni; a nghet chi a ni, a chhûng lam emaw, a pâwn lam emawa kawlh pawh ni rawh se. 56 Tin, puithiamin a lo ena, sûk hnua thîm deuh chauh a nih chuan silhfên ata emaw, savun ata emaw, tah ata emaw, phiar ata emaw chu a pawt thla ang. 57 Tin, hri chu silhfên tahah emaw, phiarah emaw, savuna siamahte emaw a la lan cheu chuan, a lo chhuak leh a ni a; hri awmna chu i hâl tûr a ni. 58 Tin, silhfên chu tah emaw, phiar emaw, eng pawh savuna siam chi rêng rêng emaw i sûka, hriin a kiansan chuan sûk leh tûr a ni a; tichuan, a lo thianghlim tawh ang. 59 Hei hi silhfên, sahmul emaw, la zai sîn emaw, tah emaw, phiar emaw, savuna siam chi rêng rêngte emawa phâr hri awm, a thianghlim leh a thianghlim loh puan dân tûr chu a ni,” tiin.
Vun na dam then dân tûr
1 Tin, LALPA chuan Mosia a bia a, 2 “Hei hi phâr inthen nia a tih dân tûr a ni ang: puithiam hnênah hruai tûr a ni a; 3 tin, puithiam chu daipâwnah a kal chhuak ang a; tin, puithiam chuan a en ang a; tin, ngai teh, phâr chu a phârna hri a dam chuan, 4 puithiam chuan a inthian tûra chu sava nung thiang pahnih leh, sidar thing leh la zai sen leh husop kensak tûrin thu a pe ang. 5 Tin, puithiam chuan sava pakhat chu hlum bêlah lui tui chungah talh tûrin thu a pe ang a. 6 Sava nung chu sidar thing te, la zai sen te, husop te nên chuan a keng ang a, lui tui chunga sava talh thisenah chuan a hnim vek ang. 7 Tin, phârna laka inthian tûra chu vawi sarih a theh ang a, a thianghlim tih a puang ang a; tin, sava nung chu ramah a chhuah ang. 8 Tin, a inthian tûra chuan a puante a su ang a, a inmêt kâwng vek ang a, a inbual tûr a ni; tichuan, a lo thianghlim ang. Chumi zawhah chuan riahhmunah a kal ang a; amaherawhchu, a puan in pâwn lamah ni sarih a awm tûr a ni. 9 “Tin, heti hi a ni ang a, a ni sarih ni chuan a sam zawng zawng leh a khabe hmul leh a mit ko hmulte a mêt kâwng ang a, a hmul zawng zawng a mêt kâwng ang; tin, a puante a su ang a, a inbual tûr a ni; tichuan, a lo thianghlim tawh ang. 10 Tin, ni riat ni chuan berâmno a pa pahnih sawisêl bo leh berâmno a nu pakhat sawisêl bo, kum khat mi leh chhangphut thilhlan atân chhangphut dip tak, epha hmun sâwma ṭhena hmun thum hriaka hmeh leh hriak log khat a keng tûr a ni. 11 Tin, a thiantu puithiam chuan inthian tûra leh chûng thil chu, inbiakna puan in kawngka bulah LALPA hmaah a dah ang a. 12 Tin, puithiam chuan berâmno pakhat chu hriak log khat nên chuan a la ang a, bawhchhiat thawi nân a hlân ang a, LALPA hmaa thên thilhlan atân thên tûr a ni. 13 “Tin, sual thawina leh hâlral thilhlan an talh ṭhinna hmun, hmun thianghlimah chuan berâmno a pa chu a talh tûr a ni; sual thawina chu puithiam pual a ni ang bawkin, bawhchhiat thawina pawh chu puithiam pual a ni si a; thil thianghlim tak a ni e. 14 Puithiam chuan bawhchhiat thawina thisen chu a la ang a, inthian tûra beng ding lam hmâwrah te, a kut ding lam zungpuiah te, a ke ding lam zungpuiah te a hnawih ang. 15 Tin, hriak log khata mi chu puithiam chuan a la ang a, ama vei lam kutphahah a chhûng ang a; 16 puithiam chuan a kut vei lama hriakah chuan a zungṭang ding lam a hnim ang a, hriak chuan LALPA hmaah a kutzungṭangin vawi sarih a theh ang. 17 Tin, a kuta hriak la awm zawng chuan inthian tûra beng ding lam hmâwr te, a kut ding lam zungpui te, a ke ding lam zungpuitea bawhchhiat thawina thisen chungah te chuan a hnawih ang. 18 Puithiam chuan a kuta hriak la awm zawng chuan inthian tûra lu a hnawih ang a; tin, puithiam chuan LALPA hmaah inremna a siamsak tûr a ni. 19 Tin, puithiam chuan sual thawina chu a hlân ang a, a thianghlim lohna avânga inthian tûra chu inremna a siamsak ang a; tin, chumi zawhah chuan hâlral thilhlan chu a talh ang. 20 Tin, puithiam chuan hâlral thilhlan leh chhangphut thilhlan chu maichâmah chuan a hlân ang a, puithiam chuan inremna a siamsak ang a; tichuan, a lo thianghlim tawh ang. 21 “Tin, mi rethei a niha, chutiang chu a tlin loh chuan, berâmno a pa pakhat bawhchhiat thawina, inremna siamsak nâna thên tûr leh, chhangphut thilhlan atân chhangphut dip tak epha hmun sâwma ṭhena hmun khat, hriaka chawhpawlh, hriak log khat nên a keng ang a; 22 tin, ṭhuro tuak khat emaw, pârvano tuak khat emaw, a neih theih zâwk zâwk apiang; pakhat chu sual thawina, pakhat chu hâlral thilhlanah a ni ang. 23 Ni riat niah a inthen nân puithiam hnênah, inbiakna puan in kawngka bulah LALPA hmaah a rawn keng tûr a ni. 24 “Tichuan, puithiamin bawhchhiat thawina berâmno leh hriak log khat chu a la ang a; tin, thên thilhlanah LALPA hmaah puithiam chuan a thên ang. 25 Tin, bawhchhiat thawina berâmno chu a talh ang a; puithiam chuan bawhchhiat thawina thisen chu a la ang a, inthian tûra beng ding lam hmâwrah te, a kut ding lam zungpuiah te, a ke ding lam zungpuiah te a hnawih ang. 26 Tin, puithiam chuan hriak chu ama kutphah vei lamah a bun ang a; 27 tin, puithiam chuan a kut vei lama hriak ṭhenkhat chu a kut ding lamin LALPA hmaah vawi sarih a theh ang. 28 Tin, puithiam chuan a kuta hriak chuan inthian tûra beng ding lam hmâwr te, a kut ding lam zungpui te, a ke ding lam zungpuitea bawhchhiat thawina thisen chung takahte chuan a hnawih ang. 29 Puithiam kuta hriak la awm zawngte chuan, LALPA hmaa inremna siamsak tûrin, inthian tûra lu chu a thih tûr a ni. 30 Tin, ṭhuro emaw, pârvano emaw, a neih theih zâwk zâwk apianga pakhat chu a hlân ang a; 31 a neih theih zâwk zâwk apiang, sual thawi nân pakhat, hâlral thilhlanah pakhat, chhangphut thilhlan nên. Chutiang chuan puithiam chuan inthian tûra chu LALPA hmaah inremna a siamsak ang. 32 Hei hi phâr hri vei, inthenna dân ang tlin lote tâna dân a ni,” tiin.
In chhûnga phâr hri
33 Tin, LALPAN Mosia leh Arona a bia a, 34 “Luah tûra ka pêk che u Kanaan ram in luh huna, in luah tûr ram khawii inah pawh phâr hri ka dah chuan, 35 chumi in neitu chuan, ‘He inah hian hri ni âwm tak awm âwmin ka hria,’ tiin puithiam a hrilh tûr a ni. 36 Tin, puithiam chu hri en tûra a luh hma chuan, in chhûnga thil awm zawng zawng chu bawlhhlawha a chan loh nân, in chu tihruah tûrin puithiam chuan thu a pe ang a; chumi zawh chuan puithiam chu in en tûr chuan a lût ang. 37 Tin, hri chu a en ang a; tin, ngai teh, hri chuan a hring lam deuh emaw, a sen lam deuh emawa bang a ei khuar tawha, bang aia phaia a lan chuan, 38 puithiam chu in ata kawngkaah a chhuak ang a, in chu ni sarih a khâr ang. 39 Tin, ni sarih niah puithiam chuan a va en leh ang a; tin, ngai teh, hri chu banga a lo ṭai chuan, 40 hri awmna lung chu lâk chhuaha, daipâwnah hmun bawlhhlawha paih tûrin puithiam chuan thu a pe ang. 41 Tin, in chhûng lam chu a ziah vêltîr ang a; tin, lung chârna an ziah khawh chu daipâwnah hmun bawlhhlawhah an chhûng ang. 42 Tin, lung dang an la ang a, chûng lung hmunahte chuan an dah ang; tin, lung chârna dang an la ang a, in chu a bel ang. 43 “Tin, lung a lâk chhuaha, in chu a ziaha, a bel zawh hnua hri chu ina a lo chhuah leh chuan, 44 puithiam chu a va lût ang a, a va en leh ang; tin, ngai teh, hri chu ina a lo ṭai chuan chu ina phâr chu a nghet chi a ni a; in chu a bawlhhlawh a ni. 45 In chu a ṭhiat ang a, a lung te, a thing te, a lung chârna zawng zawngte pawh; tin, daipâwnah hmun bawlhhlawhah a thiar chhuak ang. 46 Tu pawh chu in khâr chhûnga lût rêng rêng chu tlai lam thlengin an bawlhhlawh bawk ang. 47 Tin, tu pawh chumi ina mu apiangte chuan an puante an su ang a; tin, tu pawh chu ina chaw ei apiangte chuan an puante an su tûr a ni. 48 Tin, puithiam chu a luha, a han en vêla, in chu bel ṭhat a nih hnua hri chu a ṭai loh chuan, in chu a thianghlim tih puithiamin a puang ang, hri chu a kian tawh avângin. 49 “In thenna tûr chuan sava pahnih leh sidar thing leh la zai sen leh husop a keng ang. 50 Sava pakhat chu hlum bêlah lui tui chungah a talh ang a; 51 tin, sidar thing leh husop leh la zai sen leh sava nung chu a la ang a, sava talh tâk thisenah leh lui tuiah chuan a hnim ang a, in chu vawi sarih a theh ang. 52 Tin, in chu sava thisen te, lui tui te, sava nung te, sidar thing te, husop te, la zai sente chuan a thian ang. 53 Sava nung erawh kha chu khua aṭangin ramah a thlawh chhuahtîr tûr a ni. Chutiang chuan in tân chuan inremna a siam ang a; tichuan, a lo thianghlim tawh ang. 54 “Hei hi phâr hri chi tinrêng leh pupangliah chungchânga dân chu a ni; 55 puana phâr awm leh ina mite, 56 pâwng te, khir te, bawl chungchângahte pawh, 57 a thianghlim loh lai leh a thianghlim lai kawhhmuhna tûrin hei hi phâr chungchânga dân chu a ni,” tiin.
Taksa aṭanga thil bawlhhlawh chhuak
1 Tin, LALPA chuan Mosia leh Arona a bia a, 2 “Israela thlahte chu bia ula, an hnênah, ‘Mipa tu pawh a tisaah thil a puh chuan a thil pût avâng chuan a bawlhhlawh a ni. 3 A thil puh chhûng zawng chu a bawlhhlawh a ni: a tisaah chuan a pût reng emaw, a pût chu dan emaw pawh ni sela, a bawlhhlawh tho a ni. 4 Thil pûta mutna khum tawh phawt chu a bawlhhlawh ang a, a ṭhutna tawh phawt chu a bawlhhlawh bawk ang. 5 Tin, tu pawh a khum khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang. 6 Thil pûta ṭhutnaa ṭhu apiangte chuan an puante an su ang a, an inbual tûr a ni a, tlai lam thlengin an bawlhhlawh ang. 7 Tu pawh thil pûta tisa chu khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang. 8 “ ‘Thil pûta chuan mi bawlhhlawh lo chil a chhâk chuan, a puante a su ang a, a inbual tûr a ni a, tlai lam thlengin a bawlhhlawh ang. 9 Chuanna eng pawh thil pûta chuanna chu a bawlhhlawh ang. 10 Tu pawh a innghahna hnu thil khawih apiangte chu tlai lam thlengin an bawlhhlawh ang. Chûng thil chawi sawntu apiangte chuan an puante an su ang a, an inbual tûr a ni; tlai lam thlengin an bawlhhlawh ang. 11 Tin, tu pawh, thil pûta chuan a kut tleuh lova a khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang. 12 Thil pûta hlumbêl khawih hnu chu tihkeh tûr a ni; tin, thing bungbêl zawng zawng chu tleuh fai vek tûr a ni. 13 Tin, thil pûta chu, a thil pût tihthianghlim a nih chuan a inthen nân ni sarih a intuk ang a, a puante a su ang a, lui tuiah a inbual ang a; tichuan, a lo thianghlim tawh ang. 14 A ni riat ni chuan ṭhuro tuak khat emaw, pârvano tuak khat emaw kengin LALPA hmaah inbiakna puan in kawngka bulah a kal ang a, puithiam a pe tûr a ni. 15 Puithiam chuan sual thawi nân pakhat, hâlral thilhlanah pakhat a hlân tûr a ni; chutiang chuan puithiam chuan a thil pût thu-ah LALPA hmaah inremna a siamsak ang. 16 “ ‘Tu pawh inpâwlna chi amah aṭanga a chhuah chuan a pumin a inbual vek tûr a ni a, tlai lam thlengin a bawlhhlawh ang. 17 Tin, silhfên te, savun te, inpâwlna chi awmna tawh phawt chu, sûk faia sil fai vek tûr a ni a, tlai lam thlengin a bawlhhlawh ang. 18 Tin, hmeichhia a mutpui pawhin an pahnihin an inbual ve ve tûr a ni a; tin, tlai lam thlengin an bawlhhlawh ang. 19 “ ‘Hmeichhiain thil pût a neiha, a taksa aṭanga thil pût chu thi a nih chuan, ni sarih chhûng chu a bawlhhlawh ang; tin, tu pawh amah khawih apiang chu tlai lam thlengin an bawlhhlawh ang. 20 A bawlhhlawh chhûnga a mutna tawh phawt chu a bawlhhlawh ang a, a ṭhutna tawh phawt pawh a bawlhhlawh bawk ang. 21 Tu pawh a khum khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang. 22 Tu pawh a ṭhutna khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang. 23 Khuma thil awm emaw, a ṭhutnaa thil awm emaw khawih apiangte chu tlai lam thlengin an bawlhhlawh ang. 24 Tu pawhin an mutpuia, a bawlhhlawhna chu an kai chuan ni sarih an bawlhhlawh ang a; an mutna khum apiang chu a bawlhhlawh ang. 25 “ ‘Hmeichhia a bawlhhlawh hun pângngai ni lova ni rei fe a thi a puh emaw, a bawlhhlawh dân pângngai aia rei a thi a puh emaw chuan, a bawlhhlawhna dân pângngai chhûnga a awm ṭhin angin, thi pûta a bawlhhlawh chhûng zawng chuan a awm bawk tûr a ni; a bawlhhlawh a ni. 26 A thi puh chhûng zawnga a mutna khum tawh phawt chu, a bawlhhlawh dân pângngai hun laia a khum ang a ni ang a; a ṭhutna apiang chu a bawlhhlawh dân pângngai hun laia a bawlhhlawh angin a bawlhhlawh ang. 27 Tu pawh chûng thil khawih apiang chu an bawlhhlawh ang a, an puante an su ang a, an inbual tûr a ni a, tlai lam thlengin an bawlhhlawh ang. 28 Amaherawhchu, a thi pût chu tihthianghlim a nih chuan ni sarih a intuk ang a, chumi hnuah chuan a lo thianghlim tawh ang. 29 Tin, a ni riat niah ṭhuro tuak khat emaw, pârvano tuak khat emaw a keng ang a, inbiakna puan in kawngka bulah puithiam a pe tûr a ni. 30 Tin, puithiamin sual thawi nân pakhat, hâlral thilhlanah pakhat a hlân tûr a ni. Chutiang chuan puithiam chuan thi pûta a bawlhhlawhna thu-ah LALPA hmaah inremna a siamsak ang. 31 “ ‘Hetiang hian Israela thlahte chu an bawlhhlawhna ata chu in tihrang tûr a ni, an zînga ka biakbûk an tihbawrhbân châng pawha an bawlhhlawhna avânga an thih loh nân. 32 “ ‘Hei hi thil pûtate leh bawlhhlawh phaha inpâwlna chi chhuakate tâna dân chu a ni; 33 an bawlhhlawhna avânga peihsam lo te, a hmei a pa, thil pûtho te, hmeichhia, an bawlhhlawh laia mutpuitute tân pawh,’ ” tiin.
Inremna ni
1 Arona fapate pahnihin LALPA an va hnaiha an thih phah hnu chuan, LALPAN Mosia a bia a; 2 LALPAN Mosia hnênah, “I unau Arona bia la, puanzâr chhûng hmun thianghlimah, bâwm chunga zahngaihna ṭhutphah hmaah chuan eng lai mahin lo lût hauh suh se, a thi dah ang e; zahngaihna ṭhutphah chungah, chhûmah ka rawn inlâr dâwn a ni. 3 Hetiang hian Arona chu hmun thianghlimah a kal tûr a ni: sual thawi nân bâwngtuai, hâlral thilhlanah berâmpa nên. 4 Puan zai sîn kawr thianghlim chu a ha ang a, a tisa khuh nân puan zai sîn kekawr chu a ha ang a, puan zai sîn kâwnghrênin a inhrêng ang a, puan zai sîn diar a khim tûr a ni. Hêng hi silhfên thianghlim a ni a; a inbual tê tê ang a, a inbel tûr a ni. 5 Tin, Israela thlahte mipuiho ta kêlpa pahnih sual thawi nân leh, hâlral thilhlanah berâmpa pakhat a keng ang a. 6 Arona chuan ama puala sual thawina bâwngpa chu a hlân ang a, amah leh a chhûngte tân inremna a siam ang. 7 Kêl pahnih chu a kai ang a, inbiakna puan in kawngka bulah LALPA hmaah a dah ang a. 8 Tin, Arona chuan kêl pahnih chungchângah chuan ṭhum a vâwr ang a: pakhat chu LALPA pual a ni ang a, pakhat chu Azazela pual a ni ang. 9 Tin, Arona chuan LALPA puala tlu kêl chu a la ang a, sual thawi nân a hlân ang a. 10 Azazela puala tlu kêl erawh chu inremna siamna tûra Azazela tân thlalêra chhuah tûrin, LALPA hmaah a nungin a dah ang. 11 “Arona chuan ama puala sual thawina bâwngpa chu a la ang a, amah leh a chhûngte tân inremna a siam ang a, ama puala sual thawina bâwngpa chu a talh ang. 12 LALPA hmaa maichâm ata mei lâkna meilinga khat a la ang a, rimtui tui tak râwt dip dep ṭhûm khat nên puanzâr chhûng lamah a luhpui ang a; 13 rimtui khu chuan thuhriattîrna chunga zahngaihna ṭhutphah chu a bawhna tûrin, LALPA hmaa meiah rimtui chu a phul ang, thihna a tawh loh nân. 14 Bâwngpa thisen eng emaw zât chu a la ang a, a kutzungṭangin zahngaihna ṭhutphah chhak lampang chu a theh ang a, a kutzungṭangin zahngaihna ṭhutphah bul chu thisen chuan vawi sarih a theh tûr a ni. 15 “Tin, mipui pual sual thawina kêl chu a talh ang a, a thisen chu puanzâr chhûng lamah a luhpui ang a, a thisen chu bâwngpa thisen a tih ang khân a ti ang a, zahngaihna ṭhutphah leh zahngaihna ṭhutphah bul chu a theh ang. 16 Israela thlahte bawlhhlawhnate avâng leh an bawhchhiatnate, an sualna zawng zawngte avângin hmun thianghlim pualah inremna a siam ang a; chutiang bawk chuan an bawlhhlawhnate zînga awm, inbiakna puan in pualah pawh a siam bawk tûr a ni. 17 Hmun thianghlima inremna siam tûra a luh lai chuan, amah leh a chhûngte leh Israel mipuiho puala inremna a siam zawha a lo chhuah leh hma loh chuan, tu mah rêng rêng inbiakna puan in chhûngah chuan an awm tûr a ni lo. 18 LALPA hmaa maichâm lamah chuan a chhuak ang a, chumi pual chuan inremna a siam ang a, bâwngpa thisen leh kêl thisen eng emaw zât chu a la ang a, maichâm kîahte chuan a vêlin a tât ang. 19 Tin, a kutzungṭangin vawi sarih a theh ang a, a thian ang a, Israela thlahte bawlhhlawhnate lak ata chu a tithianghlim ang.
Sual phur kêl
20 “Tin, hmun thianghlim leh inbiakna puan in leh maichâm puala inremna a siam zawh chuan kêl nung chu a hlân ang a. 21 Arona chuan kêl nung lu chungah chuan a kut khinghnih a nghat ang a, a chungah chuan Israela thlahte khawlohna zawng zawng te, an bawhchhiatna zawng zawng te, an sualna zawng zawngte chenin a chham ang a, chûngte chu kêl lu chungah chuan a nghat ang a, mi pakhat an ruat diama khân thlalêr lamah a hruai bo daih ang. 22 Tin, kêl chuan an khawlohna zawng zawng chu chên loh leiah a phur ang a, kêl chu thlalêrah chuan a chhuah tûr a ni. 23 “Tin, Arona chu inbiakna puan inah chuan a lût ang a, hmun thianghlim a luh laia puan zai sîn silhfên a inbel chu a hlîp ang a, chutah chuan a hnutchhiah ang. 24 Tin, hmun thianghlimah a inbual ang a, a silhfên a inbel ang a, a lo chhuak ang a, ama puala hâlral thilhlan leh mipui puala hâlral thilhlan chu a hlân ang a, amah leh mipui tân inremna a siam ang. 25 Tin, sual thawina thau chu maichâmah a hâl ang. 26 Tin, Azazela pual kêl chhuahtu apiang chuan an puan an su ang a, an inbual ang a, chumi zawhah chuan an awmhmun lamah an haw leh tûr a ni. 27 Sual thawina bâwngpa leh sual thawina kêl thisen inremna a siam nâna hmun thianghlima an luhpui chu, daipâwn lama kalpui tûr a ni ang a; a vun te, a sa te, a êk te chu an hâl tûr a ni. 28 A hâltu chuan a puan a su ang a, a inbual ang a, chumi zawhah chuan an awmhmun lamah a haw leh tûr a ni.
Inremna ni hman dân tûr
29 “Hei hi in kumkhaw dân tûr a ni ang a: thla sarihna, chumi thla ni sâwm ni chuan in rilrute in tihrehawm ang a, in rama mi rêng emaw, ram dang mi in zînga khawsa emawin hna eng mah an thawk tûr a ni lo: 30 hemi ni hian nangmahni tihthianghlim nân in tân inremna siam a ni dâwn a ni; tichuan, LALPA hmaah in sualna zawng zawng lak ata in thianghlim ang. 31 In tân chawlh hle hle ni a ni a, in rilrute in tihrehawm ang a; kumkhaw dân tûr a ni. 32 Tin, puithiam, a pa aia puithiam ni tûra hriak thih tûr leh tihhran tûra chuan inremna a siam ang a; puan zai sîn silhfên, silhfên thianghlim chu a inbel ang a; 33 hmun thianghlim pualah inremna a siam ang a, inbiakna puan in leh maichâm pualah inremna a siam bawk ang a; tin, puithiamte leh mipuiho tân inremna a siam leh bawk ang. 34 An sualna zawng zawngte avânga kum tin vawi khat, Israela thlahte tân inremna siam hi in kumkhaw dân tûr a ni,” a ti a. Tichuan, LALPAN Mosia thu a pêk ang chuan a ti a.
Thisen chhuah
1 Tin, LALPA chuan Mosia a bia a, 2 “Arona leh a fapate leh Israela thlahte zawng zawng bia la, an hnênah, ‘Hei hi LALPA thupêk chu a ni: 3 “Israel chhûngkaw zînga mi rêng rêng, bâwngpa emaw, berâmno emaw, kêl emawte riahhmun emaw, daipâwn emawa talha, 4 LALPA biakbûk hmaa LALPA tâna thilhlana inbiakna puan in kawngka bula rawn la lo apiang, chu mi chu thisen chhuaha ngaih a ni ang; thisen chhuah ngei a ni a, chu mi chu a chipuite zîng ata tuithlârin a awm tûr a ni; 5 chu chu Israela thlahten an inthawinate, tâmlaka an inthawinate chu an rawn lâka, LALPA tân ngeia inbiakna puan in kawngka bulah, puithiam hnênah an rawn lâka, LALPA tâna remna thilhlan inthawinaa an inthawi theih nân a ni. 6 Tin, puithiamin inbiakna puan in kawngka bula maichâm chu thisen chuan a theh ang a, a thau chu LALPA tâna rimtui takah a hâl tûr a ni. 7 An uire ṭhinna kêlpa hnênah chuan an inthawi tawh tûr a ni lo, tih hi. Hei hi an thlahte zêl chena an kumkhaw dân tûr a ni,” ’ tiin. 8 “Tin, an hnênah, ‘Israel chhûngkaw zînga mi rêng rêng emaw, ram dang mi an zînga khawsaten emaw hâlral thilhlan emaw, inthawina emaw hlâna, 9 LALPA hnêna inthawi tûra inbiakna puan in kawngka bula rawn la lo an awm chuan, chu mi chu a chipuite zîng ata tuithlârin a awm tûr a ni. 10 “ ‘Tin, tu pawh Israel chhûngkaw zînga mi emaw, ram dang mi an zînga khawsa emaw, eng thisen pawh ei apiang chu, chu thisen eitu chungah chuan ka hmai ka thuar ang a, a chipuite zîng ata tuithlârin ka awmtîr ang. 11 Tisa nunna chu thisenah chuan a awm si a; in nunna atâna inremna siamna tûra maichâm chunga ka pêk che u a ni; nunna atâna inremna siamna chu thisen ngei chu a ni si a.’ 12 Chu vâng chuan Israela thlahte hnênah, ‘Tu mahin thisen in ei tûr a ni lo va, ram dang mi in zînga khawsate pawhin thisen an ei tûr a ni hek lo,’ ka ti a ni. 13 “Tin, Israela thlahte zînga mi emaw, ram dang mi an zînga khawsain emaw ram vâka, sa emaw, sava emaw, ei theih chi a rawn hawn chuan a thisen chu a tichhuak ang a, vaivutin a vûr tûr a ni. 14 Tisa zawng zawng nunna thu-ah chuan a thisen leh a nunna chu angkhat chiah a ni; chuvângin, Israela thlahte hnênah chuan, ‘Eng sa thisen mah in ei tûr a ni lo, tisa zawng zawng nunna chu a thisen chu a ni si a; tu pawh a ei apiang chu tuithlârin a awm tûr a ni.’ 15 Tin, amaha thi emaw, sa seh emaw ei apiang chu, chumi rama mi rêng emaw, ram dang mi emaw pawh ni sela, an puan an su ang a, an inbual tûr a ni a, tlai lam thlengin an bawlhhlawh ang a; chumi hnuah chuan an thianghlim tawh ang. 16 An sûk lohva, an inbual loh phei chuan, an khawlohna mawh chu an phur ang, ka ti a, ti rawh,” tiin.
Mutpui loh tûrte
1 Tin, LALPA chuan Mosia a bia a, 2 “Israela thlahte chu bia la, an hnênah, ‘Kei hi LALPA in Pathian chu ka ni. 3 In awm tawhna Aigupta ram mite tih ang kha ti suh ula, ka hruai luhna tûr che u Kanaan ram mite tih ang pawh ti suh ang che u; an dân pawh zâwm bawk hek suh u. 4 Ka rorêlte chu in pawm ang a, ka dânte chu zawhin in zâwm tûr a ni: kei hi LALPA in Pathian chu ka ni. 5 Chuvângin, ka dân leh ka rorêlte chu in zâwm tûr a ni; chu chu miin a tih chuan a nun phah ang: kei hi LALPA chu ka ni. 6 “ ‘Tu mân in chhûng bulte rêng rêng chu an saruakna hlîm tûrin in pan tûr a ni lo: kei hi LALPA chu ka ni. 7 I pa saruakna emaw, i nu saruakna emaw chu i hlîm tûr a ni lo. I nu a ni a, a saruakna i hlîm tûr a ni lo. 8 I pa nupui saruakna i hlîm tûr a ni lo; i pa saruakna a ni. 9 I farnu, i pa fanu emaw, i nu fanu emaw, i pianpui emaw, i pianpui loh emawte saruakna pawh i hlîm tûr a ni lo. 10 I fapaa fanu emaw, i fanua fanu emaw saruakna, an saruakna chu i hlîm tûr a ni lo. An saruakna chu nangma saruakna a ni si a. 11 I pa nupuia fanu, i pa hrin saruakna chu - i farnu a ni a - a saruakna i hlîm tûr a ni lo. 12 I pa farnu saruakna chu i hlîm tûr a ni lo; i pa chhûng bul a ni. 13 I nu laizâwn saruakna chu i hlîm tûr a ni lo; i nu chhûng bul a ni si a. 14 I pa unau saruakna chu i hlîm tûr a ni lo va. A nupui chu i pan tûr a ni lo, i nu a ni. 15 I monu saruakna chu i hlîm tûr a ni lo, i fapaa nupui a ni a, a saruakna i hlîm tûr a ni lo. 16 I unaupa nupui saruakna chu i hlîm tûr a ni lo, i unaupa saruakna a ni. 17 Nufa faa saruakna chu i hlîm tûr a ni lo. A saruakna hlîm tûrin a fapaa fanu emaw, a fanua fanu emaw i nei tûr a ni lo; i chhûng bulte an ni a. Suahsualna nasa tak a ni. 18 I nupuia laizâwn chu a saruakna hlîm tûrin i nupui la dam chhûng chuan i nei kawp tûr a ni lo. 19 “ ‘Tin, hmeichhia a bawlhhlawh dân pangngaia a bawlhhlawh chhûng chuan, a saruakna hlîm tûrin i pan tûr a ni lo. 20 A laka intibawlhhlawh tûrin i vêng pa nupui i mutpui tûr a ni lo. 21 Moleka puala meia tihluh tûrin i rîla rahte rêng rêng i pe tûr a ni lo va, i Pathian hming i tichhe tûr a ni hek lo. Kei hi LALPA chu ka ni. 22 Hmeichhia angin mipa i pâwl tûr a ni lo; thil tenawm a ni. 23 Intihbawlhhlawhna tûrin ran rêng rêng i pâwl tûr a ni lo va, hmeichhia rêng rêng inpâwltîr tûrin ran hmaah a ding tûr a ni hek lo; suahsualna chungchuang a ni. 24 “ ‘Hêng thil, a enga mahah hian intibawlhhlawh suh u; hêng thil zawng zawngah hian in hmaa ka hnawh chhuah tâk hnamte chu an lo bawlhhlawh tawh a; 25 ram pawh chu a bawlhhlawh tawh a ni; chuvângin, chuta a khawlohna chu ka hrem a, ram chuan a chhûnga awmte chu a luak chhuak ta vek a. 26 Chuvângin, nangni chuan ka dân te, ka rorêlte in zâwm tûr a ni a, hêng thil tenawm hi a enga mah in ti tûr a ni lo, in rama mi rêng emaw, ram dang mi in zînga khawsate pawhin 27 (hêng thil tenawm zawng zawng hi in hmaa he rama awmte khân an lo ti tawh a, ram pawh chu a bawlhhlawh tawh a ni); 28 in hmaa awm hnam a law chhuak ang bawka in tihbawlhhlawha ram chuan a luak chhuah ve lohna tûr che uin. 29 Tu pawh hêng thil tenawm hi a enga pawh titu apiang chu an chipuite zîng ata tuithlârin an awm ang. 30 Chuvângin, hêng thil tenawm in hmaa an chîn ang hi in chîn ve loh nân leh, chûngah chuan in intihbawlhhlawh loh nân ka thupêk hi in zâwm tûr a ni: kei hi LALPA in Pathian chu ka ni,’ ti rawh,” tiin.
Thiang leh thiang lo
1 Tin, LALPA chuan Mosia a bia a, 2 “Israela thlah, mipuiho zawng zawng chu bia la, an hnênah, ‘In thianghlim tûr a ni; kei, LALPA in Pathian hi ka thianghlim si a. 3 Mi tinin in nu leh in pa in ṭih tûr a ni a; tin, ka Chawlhnite in serh tûr a ni: kei hi LALPA in Pathian chu ka ni. 4 Milem lamah thle suh ula, milem chhûn pathiante insiam hek suh u: kei hi LALPA in Pathian chu ka ni. 5 Tin, LALPA tâna remna thilhlana in inthawi hunin pawm tlâk ni tûrin in hlân tûr a ni. 6 In hlan ni tak leh a tûka ei tûr a ni a; ni thum ni thlenga awm a awm chuan hâl tûr a ni. 7 Ni thum nia ei a nih vaih chuan thil tenawm a ni a, pawmsak a ni lo vang. 8 A ei apiang chuan, LALPA thil thianghlim a tihbawrhbân avângin, a khawlohna mawh a phur ang a; chu mi chu a chipuite zîng ata tuithlârin a awm zâwk ang. 9 “ ‘Tin, in lova buh in seng hunin in vau fêmte thlengin in seng vek tûr a ni lo va, a ṭo pawh in zawng tûr a ni lo. 10 Tin, in grêp huana a ṭo in zawng tûr a ni lo va, in grêp huana a rah tla pawh in chhar khâwm tûr a ni lo va, mi rethei leh ram dang mi in zuahsak tûr a ni: kei hi LALPA in Pathian chu ka ni. 11 Rûk in ru tûr a ni lo va, a derin thil in ti tûr a ni lo va, dâwt in inhrilh tûr a ni hek lo. 12 Pathian hming tihliauvin ka hming chhâlin dâwtin chhia in chham tûr a ni lo: kei hi LALPA chu ka ni. 13 I ṭhenawmte i bum tûr a ni lo va, i ruksak tûr a ni hek lo. Inhlawhfa hlawh chu zankhua khuain, a tûk thlengin i kawl tûr a ni hek lo. 14 Bengngawng chu ânchhia i lawh tûr a ni lo va, mitdel hmaah tlûkna i dah tûr a ni hek lo; amaherawhchu, i Pathian chu i ṭih tûr a ni: kei hi LALPA chu ka ni. 15 Rorêlnaah chuan fel lo takin in rêl tûr a ni lo; mi rethei i thlei tûr a ni lo va, mi thiltithei i zah chuang tûr a ni lo; fel takin i ṭhenawm ro i rêlsak tûr a ni. 16 I chipuite zîngah mite rêlin i vâk vêl ruai tûr a ni lo va, i ṭhenawm thisen thu-ah a ni lo zâwngin i ṭang tûr a ni hek lo: kei hi LALPA chu ka ni. 17 “ ‘I rilruin i unau i haw tûr a ni lo. I ṭhenawm chu i zilhhau ngei tûr a ni, a sualnaa i hul nân. 18 Phuba i la tûr a ni lo va, i chipui thlahte huatna i pai tûr a ni hek lo; nangmah i inhmangaih angin i ṭhenawm i hmangaih tûr a ni zâwk. Kei hi LALPA chu ka ni. 19 Ka thupêkte chu in pawm tûr a ni. I ran chu chi hrang hrang thlahtîr suh. I lovah thlai chi hnih chîng suh la, thil chi hrang pahnih tah pawlh puan i sin tûr a ni hek lo. 20 “ ‘Tu pawh bawihnu, pasal hualtu nei, la tlan loh, la chhuahtîr loh hmeichhia nêna mu dûn apiangte chu hrem an ni ang; tihhlum tûr zawng an ni lo vang, ani chu la chhuah loh a nih avângin. 21 Inbiakna puan in kawngka bulah LALPA hnêna a bawhchhiat thawina, bawhchhiat thawina berâmpa chu a rawn kai tûr a ni. 22 Tin, a thil tihsual tâk, a sualnaah LALPA hmaah bawhchhiat thawina berâmpa chuan puithiamin inremna a siamsak ang; tichuan, a thil tihsual tâk, a sualnaah chuan ngaihdam a ni ang. 23 “ ‘Tin, ram chu in va luaha, ei atân thei kûng chi tinrêng in phun hun chuan a rah chu thiang lovah in ngai tûr a ni. In tân kum thum thiang lova ngaih tûr a ni a; ei hauh loh tûr a ni. 24 Amaherawhchu, a kum li kum chuan a rah zawng zawng chu LALPA fak nân a puala tihhran tûr a ni. 25 Tin, a kum nga kum chuan in tân a pun zêl theih nân a rah chu in ei tûr a ni: kei hi LALPA in Pathian chu ka ni. 26 A thisen chawpin eng mah in ei tûr a ni lo va, dawi te in hmangin aien te in chîng tûr a ni hek lo. 27 I bekbawr aṭangin a vêlin i lû i mêt tûr a ni lo va, i khabe hmul sîr tuak i tan tûr a ni hek lo. 28 Mitthi avângin in taksa in zai tûr a ni lo va, in inṭial tûr a ni hek lo: kei hi LALPA chu ka ni. 29 “ ‘Nawhchizuara siam tûrin i fanu tibawrhbâng suh; ram chu uirena ramah a lo chang ang a, suahsualnain a lo khat dah ang e. 30 Ka Chawlhnite chu in serh tûr a ni a, ka hmun thianghlim chu in zah tûr a ni: kei hi LALPA chu ka ni. 31 Ramhuai aienthiam zâwlte chu pan suh ula, dawithiamte pawh in bawlhhlawh phahna tûrin zawng chhuak suh u: kei hi LALPA in Pathian chu ka ni. 32 Lûa kêlsam ṭote hmaah chuan i ding zêl ṭhîn tûr a ni a, tar hmêl chu i zah tûr a ni a, i Pathian chu i ṭih tûr a ni; kei hi LALPA chu ka ni. 33 Tin, ram dang mi, in rama khawsa ve an awm chuan in tichhe tûr a ni lo. 34 Ram dang mi in zînga khawsate chu in tân in rama mi rêng ang an ni tûr a ni a, nangmah i inhmangaih angin i hmangaih tûr a ni; nangni pawh Aigupta ramah khân ram dang mi in nih kha: kei hi LALPA in Pathian ka nih hi. 35 Rorêl thu-ah te, tehna hmawlhah te, khînah te, tehnaah te fel lo takin in ti tûr a ni lo. 36 Bûkna dik tak, khîn dik tak, epha dik tak, hin dik tak in nei tûr a ni: kei hi LALPA in Pathian, Aigupta ram ata hruai chhuaktu che u kha ka ni. 37 Tin, ka thupêk zawng zawngte leh ka rorêl zawng zawngte chu in pawm ang a, in zâwm tûr a ni: kei hi LALPA chu ka ni,’ ti rawh,” tiin.
Thu awih lo hremna
1 Tin, LALPAN Mosia a bia a, 2 “Israela thlahte hnênah chuan, ‘Israela thlahte zînga mi emaw, Israel rama khawsa ram dang mi emaw, an rîla rah Moleka pe apiangte chu tihhlum ngei tûr a ni a; hemi rama mite hian lungin an dêng tûr a ni. 3 Tin, kei pawhin, ka hmun thianghlim tibawlhhlawh tûr leh, ka hming thianghlim tibawrhbâng tûra a rîla rah Moleka a pêk avângin, chu mi chungah chuan ka hmai ka thuar ang a, a chipuite zîng ata ka tiboral ang. 4 Tin, hemi rama mite hian a rîla rah Moleka a pêk an hai dera an tihhlum loh chuan, 5 amah leh a chhûngte chungah chuan ka hmai ka thuar ang a, Moleka laka uire tûra mi uiresan apiangte nên an chipuite zîng ata ka tiboral ang. 6 Tin, an laka uire tûra ramhuai aienthiam zâwlte leh dawithiamte pantu chungah chuan ka hmai ka thuar ang a, a chipuite zîng ata ka tiboral ang. 7 Intithianghlim ula, thianghlimin awm rawh u: kei hi LALPA in Pathian chu ka ni si a. 8 Ka thupêkte chu in pawmin in zâwm tûr a ni; kei hi LALPA, a tithianghlimtu che u ka ni. 9 “ ‘A nu emaw, a pa emaw ânchhe lawh apiang chu tihhlum ngei tûr a ni. A nu emaw, a pa emaw ânchhe lawh a ni a, a chungah a thisen mawh chu a awm tûr a ni. 10 Mi nupui uiretu, a ṭhenawm nupui uiretu chu, a uirepa leh a uirenu chu tihhlum ngei tûr a ni. 11 Tin, pate nupui mutpui chu, a pa saruakna hlîm a ni a; tihhlum ve ve ngei tûr an ni a, an thisen mawh chu an chungah a awm tûr a ni. 12 Miin a monu a mutpui chuan tihhlum ve ve ngei tûr an ni ang; suahsualna chungchuang ti an ni a, an thisen mawh chu an chungah a awm tûr a ni. 13 Miin hmeichhia a mutpui anga mipa a mutpui chuan thil tenawm tak an ti ve ve a ni a, tihhlum ngei tûr an ni; an thisen mawh chu an chungah a awm tûr a ni. 14 Miin nufa faa nupuia a neih chuan suahsualna nasa tak a ni a, in zînga suahsualna a awm loh nân amah leh anni pahnih pawh hâl hlum tûr an ni. 15 Miin ran a mutpui chuan tihhlum ngei tûr a ni a, ran pawh chu in tihlum tûr a ni. 16 Tin, hmeichhiain ran a va hnaiha, a inpâwltîr chuan hmeichhia chu i tihlum tûr a ni, ran pawh chu. Tihhlum ngei tûr an ni a; an thisen mawh chu an chungah a awm tûr a ni. 17 “ ‘Miin a farnu, a pa fanu emaw, a nu fanu emaw a neiha, a saruakna a hmuha, ani pawhin a saruakna a hmuh chuan thil zahthlâk tak a ni a, an chipuite thlahho mit hmuhah tihboral tûr an ni; a farnu saruakna hlîm a ni a, a khawlohna mawh a phur ang. 18 Tin, miin hmeichhia a fel loh laia a mutpuia, a saruakna a hlîm chuan a thi chhuahna hlîm a ni a; an chipuite zîng ata tihboral ve ve tûr an ni. 19 Chutichuan, i nu laizâwn emaw, i pa farnu emaw saruakna i hlîm tûr a ni lo; a laichîn hnai saruaka siam a ni a; an khawlohna mawh an phur ang. 20 Miin a pami nupui a mutpui chuan a pami saruakna hlîm a ni a; an sual mawh an phur ang a, fanau lovin an thi ang. 21 Miin a unaupa nupui a neih chuan thil bawlhhlawh a ni a; a unaupa saruakna hlîm a ni a; fanau lovin an awm ang. 22 “ ‘Chutichuan, ka thupêk zawng zawng te, ka rorêl zawng zawngte in pawm ang a, in zâwm tûr a ni; tichuan, awm tûra ka hruaina che u ram chuan a luak chhuak dâwn lo che u nia. 23 In hmaa ka hnawh chhuah tâk hnam dânte chu in zawh tûr a ni lo; hêng thil zawng zawng hi an ti ṭhîn a, chu vâng chuan ka ten a ni. 24 Amaherawhchu, nangni hnênah chuan, “An ram, hnutetui leh khawizu luanna ram chu in luah ang a, in luah atân ka pe ang che u,” ka lo ti tawh a ni. Kei hi LALPA in Pathian, hnam dangte laka tihrangtu che u hi ka ni. 25 Chuvângin, sa thiang leh thiang lo leh sava thiang leh thiang lo in thlei hrang ang a; sa emaw, sava emaw, leia a bawha bawkvâk chi rêng rêng emaw, in tâna thiang lova ka thlei hrante chuan in nunna in titenawm tûr a ni lo. 26 Ka tâna mi thianghlim in ni tûr a ni; kei LALPA hi ka thianghlim si a; ka ta in nihna tûrin hnam dangte lakah ka tihrang che u a ni. 27 “ ‘Mipa pawh hmeichhia pawh, ramhuai aienthiam zâwl emaw, dawithiam emaw chu tihhlum ngei tûr a ni; lungin an dêng tûr a ni; an thisen mawh chu an chungah a awm tûr a ni,’ ti leh bawk rawh,” tiin.
Puithiamho invawn thianghlimna
1 Tin, LALPAN Mosia hnênah, “Arona fapa, puithiamte chu bia la, an hnênah, ‘An chipuite zînga mitthi avângin tu mah an intibawlhhlawh tûr a ni lo; 2 an chhûng bul - an nu te, an pa te, an fapa te, an fanu te, an unau te, 3 an farnu, an la awmpui, nula, pasal la nei lo te avâng chuan an intibawlhhlawh thei ang. 4 An chipuite zînga a puipa ber an nih avângin an intibawlhhlawhin an intibawrhbâng tûr a ni lo. 5 “ ‘An lu an mêt kawlh tûr a ni lo va, an khabe hmul sîr tuak an tan tûr a ni bawk lo va, an taksa an zai tûr a ni hek lo. 6 An Pathian tân mi thianghlim an ni tûr a ni a, an Pathian hming an tihliau tûr a ni lo; LALPA tâna meia thilhlan te, an Pathian tâna ei tûr chhiahte an hlân ṭhîn a ni a; chuvângin, an thianghlim tûr a ni. 7 Hmeichhia, nawhchizuar emaw, hminghliau emaw, a pasal mâk hnu emaw an nei tûr a ni lo; an Pathian tân mi thianghlim an ni si a. 8 Chuvângin, i tithianghlim tûr a ni; i Pathian tâna ei tûr chhiah chu an hlân ṭhîn si a. I tân mi thianghlim an ni tûr a ni; kei LALPA, a tithianghlimtu che u hi ka thianghlim si a. 9 Puithiam tu pawh a fanu nawhchizuara a intihbawrhbân chuan a pa tibawrhbâng a ni a, hâl tûr a ni. 10 “ ‘A unaute zînga puithiam lalber, a lû hriak thih mia thih tawh, silhfên bel tûra tihhran tawh chuan a sam a thlah tûr a ni lo va, a puante a pawt thlêr tûr a ni lo va; 11 mitthi ruang awmnaah a lût tûr a ni lo va, a nu emaw, a pa emaw avângin a intibawrhbâng tûr a ni hek lo; 12 hmun thianghlim ata chu a chhuak tûr a ni lo va, a Pathian hmun thianghlim a tibawrhbâng tûr a ni bawk hek lo; a Pathian hriak thih mia tihhranna chu a chungah a awm si a: kei hi LALPA chu ka ni. 13 Nupuiah chuan nula thianghlim a nei tûr a ni. 14 Hmeithai emaw, mâk hnu emaw, hmeichhe hminghliau emaw, nawhchizuar emaw chu a nei tûr a ni lo va; ama chipui, nula thianghlim nupuiah a nei tûr a ni. 15 Tin, a chipuite zîngah a thlahte chu a tibawrhbâng tûr a ni lo. Kei hi LALPA, a tithianghlimtu chu ka ni si a,’ ti rawh,” a ti a. 16 Tin, LALPAN Mosia a bia a, 17 “Arona hnênah, ‘An chhuante zêl thlenga i thlahte zînga chiangkuan lohna nei apiang chuan, a Pathian ei tûr chhiah hlân tûrin rawn hnaih suh se. 18 Tu pawh chiangkuan lohna nei apiang chuan an rawn hnaih hauh tûr a ni lo: mitdel te, kebai te, hnârpêr te, fuke sei lutuk apiang te, 19 ke tliak te, kut tliak te, 20 êlkun te, mi tawngchham te, mit chiangkuang lo te, mi buar te, mi phuhlip te, tilmu keh te chuan. 21 Puithiam Arona thlah chiangkuan lohna nei rêng rêng chuan LALPA tâna meia thilhlan hlân tûrin an rawn hnaih tûr a ni lo. Chiangkuan lohna nei an ni a; an Pathian ei tûr chhiah hlân tûrin an rawn hnaih hauh tûr a ni lo. 22 An Pathian ei tûr chhiah, a thianghlim leh a thianghlim ber pawh chu an ei thei ve ve ang. 23 Amaherawhchu, chiangkuan lohna nei an nih avângin puanzâr chhûngah emaw, maichâm kiang hnaiah emaw zawng an kal thei lo vang, ka hmun thianghlimte an tibawrhbâng dah ang e. Kei hi LALPA, anmahni tithianghlimtu chu ka ni si a,’ ti rawh,” tiin. 24 Chutiang chuan Mosia chuan Arona leh a fapate leh Israela thlahte zawng zawng hnênah a sawi a.
Thilhlan thianghlim
1 Tin, LALPAN Mosia a bia a, 2 “Arona leh a fapate hnênah sawi la, Israela thlahte thil thianghlim, ka tâna an hlan lakahte chuan inthiarfihlîm rawh se, ka hming an tihliau dah ang e. Kei hi LALPA chu ka ni a. 3 An hnênah, ‘In chhuante zêl thlenga in thlahte zawng zawng zînga mi, tu pawh bawlhhlawh chunga Israela thlahten LALPA tâna an hlan thil thianghlim rawn hnaih apiang chu, ka lak ata tuithlârin a awm tûr a ni. Kei hi LALPA chu ka ni. 4 “ ‘Arona thlah tu pawh phâr emaw, thil pût emaw chuan, a thianghlim hma loh chuan thilhlan thianghlimte zinga mi chu a ei tûr a ni lo. Tin, tu pawh, mitthi tihbawlhhlawh emaw, chi chhuaka emaw khawih apiang te, 5 tu pawh amah tibawlhhlawh thei, a bawha bawkvâk rêng rêng emaw, bawlhhlawh kai theih nei mi emaw khawih apiangte; 6 chutiang khawihtu chu tlai lam thlengin a bawlhhlawh ang a; tin, a inbual loh chuan thilhlan thianghlimte zînga mi chu a ei tûr a ni lo. 7 Tin, ni a tlâk chuan a thianghlim tawh ang; chumi hnuah chuan thilhlan thianghlimte zînga mi chu a ei thei tawh ang, a ei tûr a nih avângin. 8 Intibawlhhlawh tûrin amaha thi emaw, sa seh emaw a ei tûr a ni lo. Kei hi LALPA chu ka ni. 9 Chuvângin, ka thupêk chu a pawm tûr a ni; chuti lo zawng, an tihbawrhbân chuan a sual mawh an phur ang a, an thih phah ang. Kei hi LALPA, anmahni tithianghlimtu ka ni si a. 10 “ ‘Ram dang miin thilhlan thianghlim chu an ei tûr a ni lo; puithiam hnêna khawsa emaw, inhlawhfa emaw chuan thilhlan thianghlim chu an ei tûr a ni lo. 11 Amaherawhchu, puithiamin tu emaw ama suma a lei chuan, chu mi chuan a ei thei ang; tin, a ina piangte chuan a ei tûr chu an ei ve ang. 12 Puithiam fanuin ram dang mi a neih chuan thên thilhlan, thilhlan thianghlimte zînga mi chu a ei tûr a ni lo. 13 Amaherawhchu, puithiam fanu chu fa nei lovin hmeithaiin emaw, mâkin emaw a awma, a pa in lama a kîr leh chuan a nulât lai ang bawk khân a pa ei tûr chu a ei ve leh ang; nimahsela, ram dang mi chuan an ei tûr a ni lo. 14 Miin hre lova thilhlan thianghlim chu a ei chuan a hmun ngaa ṭhena hmun khat chu a dah belh ang a, thilhlan thianghlim chu puithiam a pe tûr a ni. 15-16 An thilhlan thianghlimte ei chuan thiam lohna thlensaktu, khawlohna mawh chu inphurhtîr tûrin Israela thlahte thilhlan thianghlim, LALPA hnêna an hlante chu an tibawrhbâng tûr a ni lo. Kei hi LALPA, anmahni tithianghlimtu chu ka ni si a,’ ti rawh,” tiin. 17 Tin, LALPAN Mosia a bia a, 18 “Arona leh a fapate leh Israela thlahte zawng zawng bia la, an hnênah, ‘Israel chhûngkaw zînga mi emaw, Israel-te zînga awm, ram dang mi emaw, tu pawh an thilhlan, hâlral thilhlana LALPA hnêna an hlan, an thutiamna emaw, mahni duh thua thilhlan emaw hlân apiangte chuan, 19 chhân tlâk in nih theihna tûrin bâwng emaw, berâm emaw, kêl emaw, a pa sawisêl bo in hlân tûr a ni. 20 Sawisêl kai rêng rêng chu in hlân tûr a ni lo; pawmsak tlâk che u a ni dâwn si lo va. 21 Tu pawh thutiam tikimchang tûrin emaw, mahni duh thua thilhlanah emaw remna thilhlan inthawina, a ran rual zînga mi emaw, a berâm rual zînga mi emaw LALPA hnêna hlân apiang chuan, pawm tlâk a nih theih nân sawisêl bo a hlân tûr a ni a; sawisêl kaina rêng rêng a awm tûr a ni lo. 22 A mitdel te, a ruh tliak te, a silawng te, pân nei te, a tangseh te, a phâr te chu LALPA hnênah in hlân tûr a ni lo va, meia thilhlanah LALPA hnênah maichâmah in hlân tûr a ni hek lo. 23 Mahni duh thua thilhlanah chuan bâwngpa emaw, berâmno emaw fuke sei lua emaw, tawi lua emaw pawh in hlân thei ang a; thutiam nân erawh chuan pawmsak a ni lo vang. 24 A tilmu chhut duk emaw, chhut perh emaw, chhut keh emaw, lâk emaw chu LALPA hnênah in hlân tûr a ni lo va, in ramah hian chutiang chu inthawi nân in hmang tûr a ni hek lo. 25 Ram dang mi aṭanga lain chûng zînga mi rêng rêng chu in Pathian ei tûr chhiahah in hlân tûr a ni lo, chûnga chhiatna leh sawisêl kaina a awm avâng chuan; pawmsak theih che u a ni lo vang,’ ti rawh,” tiin. 26 Tin, LALPAN Mosia a bia a, 27 “Bâwngpa emaw, berâm emaw, kêl emaw, a lo pianin a pui hnênah ni sarih a awm tûr a ni; ni riat ni aṭanga chumi hnu lamah chuan LALPA tâna meia thilhlanah pawm theih a ni ang. 28 Bâwngpui emaw, berâmpui emaw, a no nên ni khatah in talh tûr a ni lo. 29 Tin, lâwm thu sawi inthawia LALPA hnêna in inthawi hunin, chhân tlâk in nih theihna tûrin in inthawi tûr a ni. 30 Chumi ni chuan ei zawh tûr a ni a; a tûk thlengin eng mah in khêk tûr a ni lo. Kei hi LALPA chu ka ni. 31 Chuvângin, ka thupêkte hi in pawmin in zâwm tûr a ni. Kei hi LALPA chu ka ni. 32 Tin, ka hming thianghlim hi in tihliau tûr a ni lo va, Israela thlahte zîngah chawimawiin ka awm tûr a ni. Kei hi nangmahni chawimawitu, 33 in Pathian ni tûra Aigupta ram ata hruai chhuaktu che u ka ni. Kei hi LALPA chu ka ni,” tiin.
Sakhaw hman kûtte
1 Tin, LALPAN Mosia a bia a, 2 “Israela thlahte bia la, an hnênah, ‘LALPA kût hunbi, inkhâwmpui thianghlima in siam tûr ka kût hunbi chu hêngte hi a ni. 3 Ni ruk hna thawh tûr a ni a, ni sarih ni erawh chu urhsûn taka lâk chawlhna, inkhâwmpui thianghlim a ni. Eng hna mah in thawk tûr a ni lo; in awmna apiangah LALPA tâna Chawlhni a ni. 4 “ ‘LALPA kût hunbi, inkhâwmpui thianghlim, a hun tak zêla in siam tûr chu hêngte hi a ni.
Kalhlên kût leh chhang dawidim telh loh kût
5 “ ‘Thla khatna, ni sâwm leh ni li ni tlai lam chu LALPA kalhlên kût a ni. 6 Tin, chumi thla vêk ni sâwm leh ni nga ni chu LALPA tâna chhang dawidim telh loh kût a ni; ni sarih chhûng chu chhang dawidim telh loh in ei tûr a ni. 7 A ni khat ni chuan inkhâwmpui thianghlim in nei ang a, hna rêng rêng in thawk tûr a ni lo. 8 Ni sarih chhûng chuan meia thilhlan LALPA hnênah in hlân tûr a ni. A ni sarih ni chu inkhâwmpui thianghlim a ni a; hna rêng rêng in thawk tûr a ni lo,’ ti rawh,” tiin. 9 Tin, LALPAN Mosia a bia a, 10 “Israela thlahte bia la, an hnênah, ‘Ram ka pêk che u in va thlena, chuta buhte in sem hun chuan, in buh thar hmasate phal khat chu puithiam hnênah in rawn keng tûr a ni. 11 Pawmsak theih che u a nih nân, anin buhphal chu LALPA hmaah a lo thên ang a; Chawlhni tûk tûk lehah puithiam chuan a thên tûr a ni. 12 Tin, buhphal in thên ni chuan berâmno a pa, sawisêl bo kum khat mi hâlral thilhlanah LALPA hnênah in hlân tûr a ni. 13 Tin, chuta chhangphut thilhlan chu, chhangphut dip mi epha hmun sâwma ṭhena hmun hnih hriaka hmeh LALPA tâna rimtui tak, meia thilhlan a ni tûr a ni; tin, chuta in tûr thilhlan chu uain hin hmun lia ṭhena hmun khat a ni tûr a ni. 14 In Pathian tâna thilhlan chu in hlan hma chuan, chumi hma rêng rêng chuan a chhangin emaw, a kanin emaw, a vuiin emaw in ei tûr a ni lo; hei hi in awmna apiangah in thlahte zêl thlenga kumkhaw dân tûr a ni.
Pâwl kût
15 “ ‘Chawlhni tûk tûk leh, thên thilhlan buhphal in rawn ken ni aṭangin in chhiar ang a, Chawlhni vawi sarih a tling tûr a ni. 16 Chawlhni vawi sarihna tûk aṭang chuan ni sawmnga in chhiar ang a, LALPA hnênah chhangphut thar thilhlan in hlân tûr a ni. 17 In awmna hmun aṭangin epha hmun sâwma ṭhena hmun hniha siam, chhang hlâwm thên tûr pahnih, chhangphut dip mi, dawidim nêna âwm, LALPA tâna siam hmasak ber hlan tûr in rawn keng tûr a ni. 18 Tin, chhang hlan rual chuan berâmno pasarih sawisêl bo kum khat mi leh, bâwngtuai leh berâmpa pahnih in hlân tûr a ni. Chûngte chu an chhangphut thilhlan leh an in tûr thilhlante nên chuan, LALPA tâna hâlral thilhlan, LALPA tâna rimtui tak, meia thilhlan a ni ang. 19 Tin, sual thawi nân kêlpa pakhat leh, remna thilhlan inthawinaah berâmno a pa pahnih kum khat mi in hlân tûr a ni. 20 Puithiamin siam hmasak ber chhang chu berâmno pahnih nên chuan, LALPA hmaa thên thilhlanah a thên ang a; puithiam pual, LALPA tâna thianghlim a ni ang. 21 Tin, chumi ni vêk chu in ruat ang a, in tân inkhâwmpui thianghlim a ni ang a, hna rêng rêng in thawk tûr a ni lo. Hei hi in awmna apiangah in thlahte zêl thlenga kumkhaw dân tûr a ni. 22 “ ‘In lova buh in seng hunin in vau fêmte thlengin in seng vek tûr a ni lo va, a ṭo pawh in zawng tûr a ni lo. Mi rethei leh ram dang mi in zuahsak tûr a ni. Kei hi LALPA in Pathian chu ka ni,’ ti rawh,” tiin.
Kum thar kût
23 Tin, LALPA chuan Mosia a bia a, 24 “Israela thlahte bia la, an hnênah, ‘Thla sarihna, chumi thla ni khat ni chu in tân urhsûn taka lâk chawlhna, tawtawrâwt tuma hriat rengna, inkhâwmpui thianghlim a ni ang a. 25 Hna rêng rêng in thawk tûr a ni lo va; LALPA tâna meia thilhlan in hlân tûr a ni,’ ti rawh,” tiin.
Inremna ni
26 Tin, LALPA chuan Mosia a bia a, 27 “Thla sarihna ni sâwm ni erawh hi chu inremna ni a ni a. In tân inkhâwmpui thianghlim a ni ang a; in rilrute in tihrehawm ang a, LALPA tâna meia thilhlan in hlân tûr a ni. 28 Chumi ni chuan eng hna mah in thawk tûr a ni lo, LALPA in Pathian hmaa remna siamsak tûr che ua in remna ni a ni si a. 29 Tu pawh ni sela, chumi nia an rilru tihrehawm lote chu an chipuite zîng ata tuithlârin an awm ang. 30 Tu pawh ni sela, chumi nia hna eng pawh thawk apiang, chu mite chu an chipuite zîng ata ka tiboral ang. 31 Eng hna mah in thawk tûr a ni lo. Hei hi in awmna apiangah in thlahte zêl thlenga kumkhaw dân tûr a ni. 32 In tân Chawlhni urhsûn taka lâk chawlhna a ni ang a, in rilrute in tihrehawm tûr a ni; chumi thla ni kua ni tlai lam, chumi tlai aṭanga tlai lam leh thleng chu Chawlhniah in hmang tûr a ni,” tiin.
Bâwkte kût
33 Tin, LALPAN Mosia a bia a, 34 “Israela thlahte bia la, an hnênah, ‘Thla sarihna, ni sâwm leh ni nga ni hi LALPA tâna ni sarih awm bâwkte kût a ni a. 35 A ni khatna chu inkhâwmpui thianghlim a ni ang. Hna rêng rêng in thawk tûr a ni lo. 36 Ni sarih chhûng chuan meia thilhlan LALPA hnênah in hlân ang a, a ni riat ni chu in tân inkhâwmpui thianghlim a ni ang a, meia thilhlan LALPA hnênah in hlân tûr a ni. Inkhâwmpui ṭiakna ropui tak a ni a; hna rêng rêng in thawk tûr a ni lo. 37-38 Hêngte hi a ni, LALPA kût hunbi, LALPA Chawlhni te, in thilpêk te, in thutiam zawng zawng te, mahni duh thua thilhlan, LALPA hnêna in hlan ṭhinte tiam lova, LALPA tâna meia thilhlan te, hâlral thilhlan te, chhangphut thilhlan te, inthawina te, in tûr thilhlante a ni bîk ṭheuhva hlan tûra inkhâwmpui thianghlima in siam tûrte chu. 39 “ ‘Tin, thla sarihna ni sâwm leh ni nga nia in lova thil hâwngte in seng zawh chuan LALPA kût chu ni sarih in awhtîr ang a; a ni khatna ni chu chawlh dêrna a ni ang a, a ni riat ni pawh chu chawlh dêrna a ni bawk ang. 40 A ni khat ni chuan thingkûng mawi tak tak rah te, tûm kau te, thing buk tak zâr te, luia tuipuisuthlah te in keng ang a, LALPA in Pathian hmaah ni sarih in hlim ang. 41 He kût hi LALPA tân kum tin ni sarih in awhtîr tûr a ni. Hei hi in thlahte zêl thlenga kumkhaw dân tûr a ni a; thla sarihnaah in nei ṭhîn ang. 42 Chhâwlbûkah ni sarih in awm ang a. Israel rama mi rêngte chu chhâwlbûkah in awm vek ang a; 43 tichuan, in thlahte chuan Israela thlahte chu, Aigupta ram ata ka hruai chhuah lai khân chhâwlbûkah ka awmtîr tih an hre thei ang. Kei hi LALPA in Pathian chu ka ni,’ ti rawh,” tiin. 44 Tichuan, Mosian LALPA kût hunbi siamte chu Israela thlahte hnênah a puang ta a.
Khâwnvâr enkawl dân tûr
1 Pathianin Mosia a bia a, 2 “Israela thlahte chu olive hriak fîm tak, chhit tûra sâwr, khâwnvâr tihalh reng nân i hnêna rawn la tûrin thu pe rawh. 3 Inbiakna puan ina thuhriattîrna puanzâr pâwn lamah chuan, tlai lam aṭanga zîng lam thleng atân LALPA hmaah Aronan dah fel rawh se; hei hi in thlahte zêl thlenga kumkhaw dân tûr a ni. 4 LALPA hmaah khâwnvâr dahna thianghlim tak chungah chuan khâwnvârte chu dah fel ṭhîn rawh se.
Pathian hnêna chhang hlan
5 “Tin, chhangphut dip mi la la, chu chu chhang sâwm leh pahnihah i âwm tûr a ni; chhang pakhatah chuan epha hmun sâwma ṭhena hmun hnih hman tûr a ni. 6 LALPA hmaah rangkachak hlang dawhkân chungah tlar hnihin, tlar khata paruk ve vein i tiang tûr a ni. 7 Chhang chungah, a tlar hnihah chuan beraw fîm tak i dah tûr a ni, hriat rengna, LALPA tâna meia thilhlan ang a nih theih nân. 8 Chawlhni apiangin LALPA hmaah a dah fel ṭhîn tûr a ni; kumkhaw thuthlunna, Israela thlahte tân a ni. 9 Tin, Arona leh a fapate pual a ni ang a, hmun thianghlimah an ei tûr a ni; kumkhaw dâna LALPA tâna meia thilhlante zînga mi, a tâna thil thianghlim tak a ni,” tiin.
Rorêl dik leh a âwm tâwka hremna
10 Israel hmeichhe fapa, a pa Aigupta mi, mi pakhat chu Israela thlahte zîngah a va kal a; chu Israel hmeichhe fapa leh Israel mi, mi pakhat chu riahhmunah an insual a. 11 Israel hmeichhe fapa chuan ânchhe lawhin Pathian hming a sawichhia a; tichuan, Mosia hnênah an rawn hruai a. A nu hming chu Selomithi a ni a, Dan chi Dibria fanu a ni. 12 LALPA kâ aṭanga thuchhuak nghah nân tân inah an khung a. 13 Tin, LALPAN Mosia a bia a, 14 “Anchhe lawhtu chu daipâwnah hruai ula; a hretu zawng zawng chuan a luah an kut nghat sela, mi zawng zawng chuan lungin dêng rawh se. 15 Tin, Israela thlahte chu bia la, an hnênah, ‘Tu pawh a Pathian ânchhia lawh apiang chuan a sual mawh a phur ang a. 16 Tin, LALPA hming sawichhia apiang chu tihhlum ngei tûr a ni. Mi zawng zawngin lungin an dêng ngei ngei tûr a ni; LALPA hming an sawichhiat chuan ram dang mi pawh, he rama mi rêng pawh tihhlum tûr a ni. 17 Thi khawpa mi chunga kut thlâk apiang chu tihhlum ngei tûr a ni. 18 Thi khawpa ran chunga kut thlâk apiang chuan a rûl tûr a ni: nun aiah nun. 19 Tin, miin a ṭhenawm a tihhmêlhem chuan a tih ang tak chuan a chungah tih ve tûr a ni: 20 ruh tliak aiah ruh tliak, mit aiah mit, ha aiah ha; mi a tihhmêlhem angin a chungah pawh tih ve tûr a ni. 21 Ran tihlum apiang chuan a rûl tûr a ni a; mi tihlum apiang chu tihhlum ve tûr a ni. 22 Ram dang mite tân leh he rama mi rêngte tân dân hmun khat in nei tûr a ni. Kei hi LALPA in Pathian ka nih hi,’ i ti tûr a ni,” tiin. 23 Tichuan, Mosia chuan Israela thlahte chu a bia a, ânchhe lawhtu chu daipâwnah an hruai chhuak a, lungin an dêng a. Israela thlahte chuan LALPAN Mosia thu a pêk ang chuan an ti ta a.
Kum sarihna
1 Tin, LALPAN Sinai tlângah Mosia a bia a, 2 “Israela thlahte bia la, an hnênah, ‘Ram ka pêk che u in va thlen hun chuan, ram chu LALPA hmingin a châwl tûr a ni. 3 I lovah kum ruk chhûng chu thil i chîng ang a, i grêp huan chu kum ruk chhûng i sât no vang a, a hâwngte i seng ang a; 4 a kum sarih kum erawh chu ram chawlh dêrna, LALPA hminga chawlhna a ni ang a; i lovah buhbâl i chîng tûr a ni lo va, i grêp huan i sât no tûr a ni hek lo. 5 I buhhli chu i seng tûr a ni lo va, i enkawl loh grêp chu i lo tûr a ni lo; ram chawlh dêrna kum a ni tûr a ni. 6 Ram chawlh kuma mi chu in ei chawp atân a ni ang: i tân te, i chhiahhlawh leh i chhiahhlawhnu tân te, i hlawhfa tân te, i hnêna khawsa ram dang mi tân te, 7 i bâwng rual tân te, i rama ran tân te. Chuta a hâwng zawng zawng chu ei chawp atân a ni ang.
Inpêk lêt leh kum - Jubili
8 “ ‘Tin, chawlh kum, kum sarih chu i chhiar ang a, kum sarih hmun sarih a ni ang a; chawlh kum, kum sarih chhûng chu kum sawmli leh kum kua a ni ang. 9 Chumi hnu thla sarihna, ni sâwm ni chuan tawtawrâwt ring tak chu i ham vêltîr ang a; inremna niah chuan in ram zawng zawngah tawtawrâwt in ham vêltîr tûr a ni. 10 Tin, kum sawmngana chu in lâwm ang a, ram chhûng zawng zawngah, chuta awm zawng zawng hnênah zalênna thu in puang tûr a ni. In tân Jubili a ni ang a; mi tinin mahni ta ngai in ta leh ang a, mi tin mahni in chhûngkhûr ṭheuhvah in awm leh ang. 11 Chumi kum sawmngana chu in tân Jubili a ni ang a; eng mah in chîng lo vang a, a hli pawh in la lo vang a, grêp enkawl loh rah pawh in lo tûr a ni hek lo. 12 Jubili a ni si a; in tân a thianghlim tûr a ni; chu in lova thil hâwng chu in ei tûr a ni. 13 He Jubili kumah hian mi tinin mahni ta ngai in ta leh ṭheuh tûr a ni. 14 I ṭhenawm hnênah eng emaw i hralha, i ṭhenawm laka eng emaw i lei pawhin in inbum tûr a ni lo. 15 Jubili hnua kum zât ang zêlin i ṭhenawm thil i lei ang a, buhbâl hâwn kum tam azirin i hnênah a hralh tûr a ni. 16 A kum tam dân azir zêlin a man chu i tipung ang a, a kum tlêm dân azir zêlin a man chu i tikiam ang; buhbâl hâwn kum tam dân azirin i laka hralh a ni e. 17 In inbum tûr a ni lo va, i Pathian chu i ṭih tûr a ni. Kei hi LALPA in Pathian chu ka ni si a.
Kum sarihna kuma ei tûr kum ruknaah a haw ang
18 “ ‘Chuvângin, ka thuruatte chu i zâwmin ka rorêlte chu i pawmin i ṭih tûr a ni; tichuan, chu ramah chuan thlamuang takin in khawsa dâwn nia. 19 Ram chuan a rah a chhuah ang a, hnianghnârin in chên ang a, thlamuang takin in va khawsa dâwn nia. 20 A nih leh, “A kum sarih kum chuan eng nge kan ei ang le? Ngai teh, eng mah kan chîng dâwn si lo va, kan thil hâwngte kan seng bawk dâwn si lo va,” in ti a nih chuan, 21 a kum ruk kum chuan ka malsâwmna in chungah ka thlentîr ang a, kum thum chhûng atân chuan rah a chhuah ang. 22 Tin, a kum riat kum chuan in chîng ang a, thil hâwng in vawn, a hluite chu in ei ang a, a kum kaw kum thlengin; a lo thar leh thleng chuan in vawn, a hluite chu in ei tûr a ni.
Ram leh in pêk kîr leh tûr
23 “ ‘Kumkhua atân ram chu hralh hlen tûr a ni lo, ram chu ka ta a ni si a; mikhual, ka hnêna khawsa mai in ni si a. 24 In ram luah zawng zawng chu a neitu hmasain a tlan lêt thei tûr a ni. 25 I unau chu lo retheiin, a ram ṭhenkhat lo hralh sela, a laichîn bul berin a unauvin a lo hralh chu a rawn tlan tûr a ni. 26 Tin, miin tlansaktu tûr a neih lohva, a lo neihnuna, tlanna khawp a neih chuan, 27 a hralh chin kum chu chhût sela, a hralhna pa chu a têl chuanna chu pe kîr rawh se; tichuan, a ram chu a luah leh ang. 28 A tâna a tlan lêt leh theih loh erawh chuan, a hralh tâka chu Jubili kum thlengin a leitu kutah chuan awm rawh se; tin, Jubili kum chuan a chhuak leh ang a, ani chuan a ram chu a luah leh ang. 29 “ ‘Tin, miin kulh nei khuaa in a hralh chuan, a hralh achin kum khat zên zâwn chhûng chuan a tlan leh thei ang; kum khat pumhlûm chhûng chuan tlan leh theihna a nei ang. 30 Kum khat chhûnga a tlan theih loh chuan, kulh nei khuaa in chu kumkhuain, a thlahte zêl thleng pawhin a leitu ta a ni tlat tûr a ni a. Jubili-ah pawh a chhuak chuang lo vang. 31 Kulh nei lo khuaa inte erawh chu thingtlâng ram anga ngaih a ni ang a. Tlan theih a ni ang a, Jubili-ah a chhuak ang. 32 Amaherawhchu, Levi-hote khua, an chanpuala khuaa inte chu Levi-hote chuan eng lai pawhin an tlan thei ang. 33 Tin, Levi-ho zînga miin a tlan loh chuan hralh tawh in leh a chanpual khua chu Jubili-ah a chhuak ang; Levi-hote khuaa inte chu Israela thlahte zînga an chanpual a ni si a. 34 An khaw dai vêla lote erawh chu hralh theih a ni lo vang, an kumkhaw chanpual a ni si a.
Rethei hnêna hawhtîr thu
35 “ ‘I unau a lo retheiha, a rawn belh che chuan i lo chhawmdâwl tûr a ni; mikhual, i hnêna khawsa angin i awmpui tûr a ni. 36 A lakah tangka emaw, thil emaw, a pung la suh; Pathian ṭih zâwk rawh, i unau chu i hnêna a khawsak theih nân. 37 A pung ûmin i sum i pûktîr tûr a ni lo va, pung ûmin i ei tûrte pûktîr hek suh. 38 Kei hi LALPA in Pathian, Kanaan ram pe tûr che u leh in Pathian ni tûra Aigupta ram ata hruai chhuaktu che u ka ni.
Bawih chhuah tûr
39 “ ‘Tin, i bula chêng i unau a lo retheiha, i hnêna a rawn tlûk luh chuan bawih angin i chhawr tûr a ni lo. 40 Inhlawhfa ang leh i hnêna khawsa ve angin i hnênah a awm tûr a ni a, Jubili kum thlengin i rawng a bâwl ang. 41 Chumi zawhah chuan i hnên ata a chhuak ang a, amah leh a fate nên anmahni chhûngkaw ngaiah an lût leh ang. An pi leh pute in leh lo chu an luah leh tûr a ni. 42 Aigupta ram ata ka hruai chhuah, ka chhiahhlawhte an ni si a; bawih hralha hralh tûr an ni lo. 43 Rura takin a lakah i awm tûr a ni lo va, i Pathian chu i tih tûr a ni zâwk. 44 Bawihnu leh bawihpaa i neih tûrte chu in vêl hnamte zînga mi, bawihnu leh bawihpa atân chuan in lei tûr a ni. 45 Tin, in zînga khawsa ram dang mi leh in rama piang an chhûngte zînga mite pawh in lei thei bawk ang; chûng chu in mi in sa an ni ang. 46 Tin, in hnua in fate rochun atân an mi an saa an neih atân in siam ang a; chûng zînga mite chu kumkhuaa in bawih atân in nei ang. Amaherawhchu, in unau Israela thlahte lakah chuan rura takin in awm tûr a ni lo. 47 “ ‘Ram dang mi emaw, i hnêna khawsa tu emaw a lo neihnuna, a kianga i unaupa a lo retheiha, i hnêna ram dang mi hnênah emaw, i hnêna khawsa hnênah emaw, ram dang mite thlah chhûng hnênah emaw a tlûk luh chuan, 48 a tlûk luh hnu pawhin tlan leh theih a ni ang. A unaute zînga miin an tlan thei ang a: 49 a pamiin emaw, a pami fapain emaw a tlan thei ang a; a chite zinga a laichîn hnaiin a tlan thei bawk ang. Tin, amah pawh a lo neihnun leh chuan a intlan thei ang. 50 A tlûk luhna pa nên a tlûk luh aṭanga Jubili kum leh tûr chhût dun sela: a tlûk luh man chu a kum azirin a ni ang a; tin, hlawhfaa rawih chhût ang zêla chhûtsak a ni ang. 51 Kum tam tak a la bâk chuan a tlanna man chu a belh chhûng hu tâwk man a pe kîr leh tûr a ni. 52 Jubili kum thlenna tûr kum rei lo tê chauh a la awm a nih chuan chhût dûn sela; a awm kum tam zia azirin a tlanna man a pe kîr tûr a ni. 53 Kum khat bi zêla rawih inhlawhfa angin a bêl tûr a ni a, i mit hmuhah rura takin a ti tûr a ni lo. 54 Chûng ang zâwnga tlan a nih loh pawhin, Jubili kum chuan a chhuak ang - amah leh a fate nên. 55 Israela thlahte chu keima chhiahhlawhte an ni si a; Aigupta ram ata ka hruai chhuah, ka chhiahhlawhte an ni: kei hi LALPA in Pathian chu ka ni.
Thupêk awih vânga malsâwmna
1 “ ‘Milem in insiam tûr a ni lo va, milem siam chawp emaw, lung phun emaw in din tûr a ni lo va, chibai bûk atân in ramah hian milem chuanna lung in phun tûr a ni hek lo: kei hi LALPA in Pathian chu ka ni si a. 2 Ka Chawlhnite chu in serh ang a, ka hmun thianghlim chu in zah tûr a ni: kei hi LALPA chu ka ni. 3 “ ‘Ka thuruatte chu in zawma, ka thupêkte in pawma, in zawm chuan, 4 ruahtuite chu a hun têah ka tlâktîr ang a, lei chuan thil a hâwntîr ang a, rama thingte chuan rah an chhuah ang a. 5 In hruiha buh chuan grêp lawh hun a man phâk ang a, in lawh chuan thil chîn hun a man phâk ang a; in chhang chu hnianghnârin in chên ang a, in ramah hian thlamuang takin in khawsa ang. 6 He ram hi râlmuang takin ka awmtîr ang a, in mu hle hle ang a, tu mân an tihlau lo vang che u; ramsa sualte chu he ram ata hi ka hnawt ṭiau vang a, khandaihin in ram a fang tlang hek lo vang. 7 In hmêlmate chu in ûm ang a, in hmaah khandaiha thahin an awm ang. 8 Mi pangain za in ûm ang a, zain sîng in ûm ang a; in hmêlmate chu in hmaah khandaiha thahin an awm ang. 9 Tin, ka duhsak ang che u a, chi tam tak ka thlahtîr ang che u a, ka tipung ang che u; tin, in lakah ka thuthlung ka tinghet ang. 10 Rei tak in vawn a hluite chu in ei ang a, a thar dah nân a hluite chu in la chhuak ang. 11 In zîngah ka biakbûk chu ka awmtîr ang a, ka nunna chuan a hnuchhawn lo vang che u. 12 In zîngah ka chêng ang a, in Pathian ka ni ang a, nangni pawh ka mite in ni ang. 13 Kei hi LALPA in Pathian, an bawih in nih lohna tûra Aigupta ram ata hruai chhuaktu che u chu ka ni a; in nghâwngkawlte chu ka titliak a, ding charin ka kaltîr tâk che u hi.
Thupêk awih loh hremna tûr
14 “ ‘Amaherawhchu, ka thu in pawm lohva, hêng thupêk zawng zawngte hi in zawm lohva, 15 ka thuruatte in duh lohva, in nunnain ka rorêlte a huata, ka thupêk zawng zawngte zâwm lova ka thuthlung in bawhchhiat chuan, 16 kei pawhin in chungah hei hi ka ti ang: in chungah thil hlauhawm tak, in nunna tihmuih telh telh leh in mit tichau telh telh ngawrna leh sikserhte ka lêntîr ang. Tin, in thlai chite chu in chîng thlâwn mai mai a ni ang, in hmêlmate chuan an ei zêl dâwn a ni. 17 In chungah chuan ka hmai ka thuar ang a, in hmêlmate hmaah in tlâwm ang; nangmahni hawtuten in chungah ro an rêl ang a, tu ma ûm lohvin in tlân ang. 18 Tin, chuti chung pawha ka thu in la pawm loh cheu chuan, in sualte avângin vawi sarih ka la hrem leh ang che u. 19 In chakna chhuan tawlawl chu ka chhu chhia ang a, in vân chu thîr angah ka siam ang a, in lei chu dâr angah. 20 Tin, in tha in sêng thlâwn mai mai a ni ang; in ram chuan thil a hâwntîr lo vang a, rama thingte chuan rah an chhuah hek lo vang. 21 Mi kalhzâwnga in awma, ka thu in pawm loh chuan in sualnate azirin, a leh sarihin in chungah hremna ka thlentîr ang. 22 “ ‘Tin, in zîngah ramsate ka rawn kaltîr ang a, chu chuan in fate a lâksak ang che u a, in rante a sehsak ang che u a, a tikiam tial tial ang che u a, in kawngte a lo ṭhing ṭhuap ang. 23 Chuti chung pawha ka thununna in pawm chuan lohva, mi kalhzâwnga in la awm cheu chuan, 24 kei pawh nangmahni kalhzâwngin ka awm ang a, keimah ngeiin in sual avângin vawi sarih ka hrem ang che u. 25 In chungah khandaih ka lên ang a, chu chuan thuthlung phuba a la ang. Mahni khaw chhûng ṭheuhvah in tawm khâwm ang a, in zîngah hri ka lêntîr ang; tin, hmêlmate kuta pêk in ni ang. 26 In rin pui ber chhang ka tihchahsak che u hunah chuan, hmeichhe sâwmin a âwmna pakhatah an âwm ang a, in chhang chu bûk chiah zêlin an pe leh ang che u; in ei ang a, in kham chuang lo vang. 27 “ ‘Chuti chung pawha ka thu in pawm chuan lohva, mi kalh zâwnga in la awm cheu chuan, 28 thinrim takin nangmahni kalhzâwngin ka awm ang a; in sual avângin vawi sarih ka hrem bawk ang che u. 29 In fapate sa in ei ang a, in fanute sa in ei bawk ang. 30 Tin, in hmunsângte ka tichim ang a, in ni lemte ka titlu ang a, in ruangte chu in milemte ruang chungah ka paih ang; tin, ka nunna chuan a haw dâwn che u a ni. 31 In khawpuite chu ka tiṭiau vang a, in hmun thianghlimte chu ka tiram ang a, in rimtuite chu ka hnîm lo vang. 32 In ram chu ka tiṭiau vang a, in hmêlma chuta awmte chuan mak an ti ang. 33 Tin, hnam dangte zîngah ka tidarh ang che u a, a ûm tûr che uin khandaih chu ka phawi ang; tichuan, in ram chu a ṭiau vang a, in khuate chu a ram ang. 34 “ ‘Tin, ram chuan a ṭiau chhûng zawng leh, in hmêlmate rama in awm chhûng chuan a Chawlhniahte chuan a hlim ang; chutih hnuah chuan ram chu a châwl ang a, a Chawlhniahte chuan a hlim ang. 35 A ṭiau chhûng zawng chuan a châwl ang; in awm laia in Chawlhnia châwl ve ṭhîn lote kha. 36 Tin, in zînga mi la awm chhunte chu, an hmêlmate ramah an thinlungah chauhna ka awmtîr ang; tin, hnahthel lêng riin a ûm ang a, khandaih laka tlânchhia angin an tlânchhia ang a, tu ma ûm hleih lohvin an tlu ang. 37 Tu ma ûm hleih lohvin khandaiha ûm ang maiin an inpal thlu rem rum ang; in hmêlmate lo dang tûrin chakna rêng rêng in nei lo vang. 38 Hnam dangte zîngah in boral ang a, in hmêlmate ram chuan a ei zo vang che u. 39 Tin, in zînga mi la awm chhunte chu in hmêlmate ramah an khawlohna avângin an hmuih telh telh ang; an pi leh pute chuan an khawlohnate an hmuih phah angin, anni pawhin an hmuih phah ve bawk ang. 40 “ ‘Ka chunga an sualna avâng leh an khawlohna leh, an pi leh pute khawlohna leh mi kalh zâwnga an awm avânga, 41 kei pawh anmahni kalh zâwnga ka awma, an hmêlmate rama ka awmtîrte chu an phat lohva, an thinlung tan loh chu a intihhnuaia, an khawlohna avânga hremna chu an pawm chuan, 42 Jakoba hnêna ka thuthlung chu ka hre reng ang a, Isaaka leh Abrahama hnêna ka thuthlungte pawh ka hre reng ang a; tin, ram pawh chu ka hre reng bawk ang. 43 Ram pawh chu an kiansan ang a, anmahni awm lova a ṭiau chhûng chuan a chawlh niahte chuan a hlim ang; ka rorêlnate an duh loh avâng leh an nunnain ka thuruatte a huat ṭhin avângin, an khawlohna hremna chu an pawm tûr a ni. 44 Chuti chung pawh chuan an hmêlmate rama an awm chu, anmahni tiboral dêr tûrin an laka ka thuthlung bawhchhiain ka paihthla lo vang a, ka haw hek lo vang. Kei hi LALPA an Pathian chu ka ni si a. 45 An Pathian ka nih theihna tûra hnam tinte mit hmuha Aigupta ram ata ka hruai chhuah, an thlahtute thuthlung chu anmahni avâng hian ka hre reng zâwk ang. Kei hi LALPA chu ka ni,’ ti rawh,” tiin. 46 Hêng hi Sinai tlânga Mosia hmanga amah leh Israela thlahte kâra LALPAN a siam thupêk te, rorêl te leh dân te chu a ni.
LALPA hnêna thilpêk chungchâng
1 Tin, LALPAN Mosia a bia a, 2 “Israela thlahte bia la, an hnênah, ‘Miin eng emaw pawimawh bîk chungchângah thu a tiam chuan, a mihring hu tâwk i ruat ang chu LALPA pual a ni ang a, 3 mipa a nih chuan i ruat dân tûr chu kum sawmhnih aṭanga kum sawmruk mi chu hmun thianghlim sekel ang, tangkaraw sekel sawmnga hu a ni ang; 4 hmeichhia a nih chuan i ruat dân tûr chu sekel sawmthum a ni ang. 5 Tin, kum nga aṭanga kum sawmhnih mi a nih chuan, i ruat dân tûr chu mipa chu sekel sawmhnih, hmeichhia chu sekel sâwm a ni ang. 6 Tin, thla khat aṭanga kum nga mi a nih chuan, i ruat dân tûr chu mipa chu tangkaraw sekel nga, hmeichhia chu tangkaraw sekel thum a ni ang. 7 Tin, kum sawmruk aṭanga a chung lam a nih chuan, i ruat dân tûr chu mipa chu sekel sâwm leh panga, hmeichhia chu sekel sâwm a ni ang. 8 Amaherawhchu, i ruat aia a lo retheih chuan puithiam hnênah hruai tûr a ni ang a, puithiamin a lo ruat ang; thutiamtu theih tâwk ang ang puithiamin a lo ruat ang. 9 “ ‘Tin, thilhlan, LALPA hnêna an hlan tûr chu ran a nih chuan, tu pawhin LALPA tâna chutiang an pêk rêng rêng chu thil thianghlim a ni tûr a ni. 10 A tidanglam tûr a ni lo va, a ṭhain a chhia, a chhiain a ṭha thlâkthleng tûr a ni hek lo; ran, ran vêka a thleng luih chuan a pahnihin a thlengna nên chuan a thianghlim tûr a ni. 11 Tin, ran thianghlim lo, LALPA hnêna hlan ngai loh mi a nih chuan, ran chu puithiam hmaah a dah tûr a ni; 12 tin, puithiam chuan a ṭhat dân azirin a man tâwk a lo ruat ang a; nang puithiamin i ruat tâwk ang apiang chu a ni zêl ang. 13 Amaherawhchu, a tlan leh tak tak dâwn chuan i ruat zât hmun ngaa ṭhena hmun khat a belh tûr a ni. 14 “ ‘Tin, miin a in chu LALPA pual atâna a hlan dâwn chuan a ṭhat leh ṭhat loh azirin puithiamin a ruat tûr a ni; puithiam ruat ang ang chu a ni ang. 15 Tin, a hlântu chuan a in chu a tlan leh dâwn chuan, a man tûra i ruat zât hmun ngaa ṭhena hmun khat a belh tûr a ni; tichuan, a ta a ni leh ang. 16 “ ‘Tin, miin a rama lo, a ṭhen LALPA pual atâna a hlan dâwn chuan i ruat dân tûr chu a chi tuh azir zêlin a ni ang. Barli homer khat hmun chu tangkaraw sekel sawmnga man a ni ang. 17 A lo chu Jubili kum aṭanga hlan a nih chuan i ruat ang chu a ni reng ang a. 18 Jubili kum hnua hlan a nih erawh chuan, puithiamin a man chu Jubili thlen lehna tûr kum azir zêlin a ruatsak ang a, i ruat dân aṭanga a kiam tâwk siam a ni ang. 19 A hlântuin a tlan leh dâwn tak tak chuan, a man i ruat zât hmun ngaa ṭhena hmun khat a belh ang a, a ta a ni leh chiah ang. 20 Lo chu a tlan duh lo emaw, mi dang hnênah a hralh emaw a nih chuan tlan leh theih a ni tawh lo vang; 21 Jubili kuma a chhuah leh hun chuan lo chu LALPA tâna thianghlim, a puala lo hluihlâwn ang a ni ang a, puithiam ta tûr a ni ang. 22 A rama mi ni lo, lo a lei LALPA hnêna a hlan chuan, 23 Jubili kum thlengin i ruat dân angin puithiamin a man chu a ruatsak ang a, i ruat ang chuan LALPA tâna thil thianghlimah chumi ni chuan a pe tûr a ni. 24 Tin, Jubili kum chuan a leina pa, a ram neitu pângngai chuan a nei leh ang. 25 I ruat dân zawng zawng chu hmun thianghlim sekel ang zêl a ni tûr a ni; sekel khat chu gera sawmhnih a ni ang. 26 “ ‘Amaherawhchu, ran zînga piang hmasa ber, a pian hmasak ber avânga LALPA pual atâna ruat tawh phawt chu tu mân an hlân tûr a ni lo; sebâwngpa pawh, berâm pawh ni sela, LALPA pual a ni. 27 Tin, ran thianghlim lo a nih chuan i ruat dân angin a tlan tûr a ni ang a, a hmun ngaa ṭhena hmun khat a belh tûr a ni; tin, tlan a nih loh chuan i ruat dân angin hralh tûr a ni ang. 28 “ ‘Amaherawhchu, miin a thil neihte zînga mi, LALPA puala a hlan tawh phawt chu, mihring emaw, ran emaw, a rama lo emaw pawh ni se, hralh tûr a ni lo va, tlan tûr a ni hek lo; chutianga thil hlan tawh zawng zawng chu LALPA tâna thianghlim tak a ni. 29 Mihring pawh ni se, chutianga hlan tawh phawt chu tlan tûr a ni lo; tihhlum ngei ngei tûr a ni. 30 “ ‘Ram chhûnga mi, sâwma pakhat zawng zawng, lova thil hâwngte pawh, thei rahte pawh LALPA pual a ni a; LALPA tâna thianghlim a ni. 31 Miin a sâwma pakhat zînga mi a eng pawh a tlan dâwn chuan a hmun ngaa ṭhena hmun khat a belh tûr a ni. 32 Ran leh berâm rual zînga sâwma pakhat, tiang hnuaia lût a sâwmna zêl chu LALPA tâna thianghlim a ni ang. 33 A chhiat leh ṭhat a fiah tûr a ni lo va, a thlâkthleng tûr a ni hek lo; a thleng luih chuan a pahnihin a thlengna nên chuan thil thianghlim a ni ang a, tlan leh theih a ni lo vang,’ ti rawh,” tiin. 34 Hêng hi Sinai tlânga Israela thlahte tâna LALPAN Mosia a pêk, thupêkte chu a ni.
Israel-te zînga chhiarpui hmasa
1 Aigupta ram ata an lo chhuah kum hnih kum, thla hnihna, ni khat niah Sinai thlalêrah inbiakna puan inah LALPAN Mosia a bia a, 2 “Israela thlahte pung khâwm zawng zawngte chu, a chi chiin, a chhûngkua kuain, an hming indawt dân ang zêlin mipa zawng zawng chhiar vek rawh; 3 kum sawmhnih achin chung lam Israel-te zînga mi râlkai chin zawng zawng chu, nang leh Aronan a pâwl pâwlin in chhiar vek tûr a ni. 4 Tin, i hnênah hnam tin zînga mi pakhat, chi hrang hrang ata chhûngkaw puipa zêl an awm tûr a ni. 5 Tin, hêng hi i hnêna awm tûr hmingte chu a ni: Reuben hnama mi Sedeura fapa Elizura; 6 Simeon hnama mi Zurisadaia fapa Selumiela; 7 Juda hnama mi Aminadaba fapa Nasona; 8 Isakar hnama mi Zuara fapa Nethanela; 9 Zebulun hnama mi Helona fapa Eliaba; 10 Josefa thlah, Ephraim hnama mi Amihuda fapa Elisama; Manase hnama mi Pedazura fapa Gamaliela; 11 Benjamin hnama mi Gideonia fapa Abidana; 12 Dan hnama mi Amisadaia fapa Ahiezera; 13 Aser hnama mi Okrana fapa Pagiela. 14 Gad hnama mi Deuela fapa Eliasapha; 15 Naphtali hnama mi Enana fapa Ahira. 16 Hêngho hi mipuite zing ata thlan, an pi leh pute hnama puipa, Israel chhûngkaw puipate an ni,” tiin. 17 Chutichuan, Mosia leh Arona chuan chûng an hming lamhote chu an hruai a; 18 mipui zawng zawngte chu thla hnihna, ni khat niah an ko khâwm vek a; a chi chiin, a chhûngkua kuain, an hming indawt dân ang zêlin, kum sawmhnih achin chung lam zawng chu an thlahtute hming an târ lang a. 19 LALPAN Mosia thu a pêk angin Sinai thlalêrah chuan a chhiar ta a. 20 Israela fapa upa ber Reubena thlah chhuante chu a chi chiin, a chhûngkua kuain, an hming indawt dân ang zêlin, mipa kum sawmhnih achin chung lam, 21 Reubena thlah râlkai chin zawng zawngte chu 46,500 an ni. 22 Simeona thlah chhuante chu a chi chiin, a chhûngkua kuain, an hming indawt dân ang zêlin, mipa kum sawmhnih achin chung lam, 23 Simeona thlah râlkai chin zawng zawngte chu 59,300 an ni a. 24 Gada thlah chhuante chu a chi chiin, a chhûngkua kuain, an hming indawt dân ang zêlin, kum sawmhnih achin chung lam, 25 Gada thlah râlkai chin zawng zawngte chu 45,650 an ni. 26 Juda thlah chhuante chu a chi chiin, a chhûngkua kuain, an hming indawt dân ang zêlin, kum sawmhnih achin chung lam, 27 Juda thlah râlkai chin zawng zawngte chu 74,600 an ni. 28 Isakara thlah chhuante chu a chi chiin, a chhûngkua kuain, an hming indawt dân ang zêlin, kum sawmhnih achin chung lam, 29 Isakara thlah râlkai chin zawng zawngte chu 54,400 an ni. 30 Zebuluna thlah chhuante chu a chi chiin, a chhûngkua kuain, an hming indawt dân ang zêlin, kum sawmhnih achin chung lam, 31 Zebuluna thlah râlkai chin zawng zawngte chu 57,400 an ni. 32 Josefa thlah zînga mi Ephraima thlah chhuante chu a chi chiin, a chhûngkua kuain, an hming tam dân ang zêlin, kum sawmhnih achin chung lam, 33 Ephraima thlah râlkai chin zawng zawngte chu 40,500 an ni. 34 Manasea thlah chhuante chu a chi chiin, a chhûngkua kuain, an hming tam dân ang zêlin, kum sawmhnih achin chung lam, 35 Manasea thlah râlkai chin zawng zawngte chu 32,200 an ni. 36 Benjamina thlah chhuante chu a chi chiin, a chhûngkua kuain, an hming tam dân ang zêlin, kum sawmhnih achin chung lam, 37 Benjamina thlah râlkai chin zawng zawngte chu 35,400 an ni. 38 Dana thlah chhuante chu a chi chiin, a chhûngkua kuain, an hming tam dân ang zêlin, kum sawmhnih achin chung lam, 39 Dana thlah râlkai chin zawng zawngte chu 62,700 an ni. 40 Asera thlah chhuante chu a chi chiin, a chhûngkua kuain, an hming tam dân ang zêlin, kum sawmhnih achin chung lam, 41 Asera thlah râlkai chin zawng zawngte chu 41,500 an ni. 42 Naphtalia thlah chhuante chu a chi chiin, a chhûngkua kuain, an hming tam dân ang zêlin, kum sawmhnih achin chung lam, 43 Naphtalia thlah râlkai chin zawng zawngte chu 53,400 an ni. 44 Chûngte chu an ni, Mosia leh Aronan Israel puipa sâwm leh pahnih, chhûngkaw puipate nêna an chhiarte chu. 45 Chutichuan, Israela thlah a chhûngkua kuaa kum sawmhnih achin chung lam râlkai chin zawng zawng, Israel rama mi chu an chhiar a: 46 an chhiar zawng zawngte chu 6,03,550 an ni. 47 Levi mite thlahtute zawng an chhiar ve lo. 48 LALPAN Mosia hnênah, 49 “Levi chi zawng i chhiar ve tûr a ni lo va, Israel mite zîngah i chhiar tel tûr a ni hek lo; 50 Levi-hote chu Pathian chênna in enkawltu leh, a bungrua zawng zawng leh, chumia thil awm zawng zawng enkawltuah i ruat zawk tûr a ni: biakbûk leh a bungrua zawng zawng an zâwn ṭhîn ang a; an enkawl ang a, biakbûk chu a vêlah an awmchilh ṭhîn ang. 51 Tin, biakbûk chu in sawn dâwn apiangin Levi-ho chuan an ṭhiat ang a; tin, biakbûk zâr dâwn apiangin Levi-hovin an zâr ṭhîn ang. Hnam dang rawn inrawlh apiang chu tihhlum tûr an ni ang. 52 Tin, Israela thlahte chuan mahni hmun ṭheuhvah, a pâwl pâwlin an tam dân azir zêlin an puan inte an zâr ang a. 53 Levi-ho erawh chuan Israela thlahte pung khâwmho chunga thinurna a awm loh nân Pathian chênna in vêlah an zâr tûr a ni; Levi-ho chuan hriattîrna biakbûk chu an enkawl tûr a ni,” tiin a lo sawi tawh si a. 54 Chutiang chuan Israela thlahte chuan an ti a; LALPAN Mosia thu a pêk ang zawng zawng chuan an ti ta a.
Riahhmuna chi hrang hrang awmna tûr ruat
1 Tin, LALPAN Mosia leh Arona a bia a, 2 “Israela thlahte chuan an chhûngkaw chhinchhiahnate târ ṭheuhvin an pâwl tih dân angin an puan in an zâr tûr a ni; inbiakna puan in ân ṭheuhvin a vêlin an zâr tûr a ni. 3 Ni lo chhuahna khawchhak lampanga an chhûngkaw chhinchhiahna târin, puan in zâr tûrte chu Juda pâwlho an ni ang a; tin, Juda thlahte puipa tûr chu Aminadaba fapa Nasona a ni ang.” 4 A pâwlte tam lam chu 74,600 an ni. 5 “Tin, a dawta puan in zârtu tûrte chu Isakar chi an ni tûr a ni a, Isakara thlahte puipa tûr chu Zuara fapa Nethanela a ni ang.” 6 A pâwlte tam lam chu 54,400 an ni. 7 “Tin, Zebulun chite: Zebuluna thlahte puipa tûr chu Helona fapa Eliaba a ni ang.” 8 A pâwlte tam lam chu 57,400 an ni. 9 “An pâwl tam dân azir zêla Juda-ho an chhiarte chu 1,86,400 an ni. Anniho hian hma an hruai zêl tûr a ni. 10 “An chhûngkaw chhinchhiahna târin a chhim lampangah Reuben-ho chu an awm ang a; Reubena thlah puipa tûr chu Sedeura fapa Elizura a ni ang.” 11 A pâwlte tam lam chu 46,500 an ni. 12 “Tin, a dawta zâr tûr chu Simeon chi an ni ang: Simeona thlahte puipa tûr chu Zurisadaia fapa Selumiela a ni ang.” 13 A pâwlte tam lam chu 59,300 an ni. 14 “Tin, Gad chite: Gada thlahte puipa tûr chu Reuela fapa Eliasapha a ni ang.” 15 A pâwlte tam lam chu 45,650 an ni. 16 “Reuben-ho tam lam chu 1,51,450 an ni. Anni hi an dawta chhuak tûr an ni. 17 “Chutichuan, inbiakna puan in chu a chhuak ang a, Levi-ho chu a laiah an awm ang a, an awmna azir zêlin a pâwl pâwlin an kal ṭheuh tûr a ni. 18 “An chhûngkaw chhinchhiahna târin a thlang lampangah chuan Ephraim-ho an awm ang a: Ephraima thlahte puipa tûr chu Amihuda fapa Elisama a ni ang.” 19 A pâwlte tam lam chu 40,500 an ni. 20 “Tin, a dawtah chuan Manase chi an ni ang: Manasea thlahte puipa tûr chu Pedazura fapa Gamaliela a ni ang.” 21 A pâwl tam lam chu 32,200 an ni. 22 “Tin, a dawt lehah Benjamin chite: Benjamina thlahte puipa tûr chu Gideonia fapa Abidana a ni ang.” 23 A pâwlte tam lam chu 35,400 an ni. 24 “Tin, Ephraim-hote tam lam chu 1,08,100 an ni. Tin, a dawttu dawt lehtuah an chhuak tûr a ni. 25 “An chhûngkaw chhinchhiahna târin Dan-ho chu a hmâr lampangah an awm ang: Dana thlahte puipa tûr chu Amisadaia fapa Ahiezera a ni ang.” 26 A pâwlte tam lam chu 62,700 an ni. 27 “Tin, a dawta puan in zâr tûr chu Aser chi an ni ang: Asera thlahte puipa tûr chu Okrana fapa Pagiela a ni ang.” 28 A pâwlte tam lam chu 41,500 an ni. 29 “Tin, a dawt lehah Naphtali chite: Naphtalia thlahte puipa tûr chu Enana fapa Ahira a ni ang.” 30 A pâwlte tam lam chu 53,400 an ni. 31 “Dan-ho tam lam chu 1,57,600 an ni. Tin, anniho hian a pâwl pâwla chhuakin hnu an dâl zêl tûr a ni,” tiin. 32 Hêng hi Israela thlahte chhûngkaw tina mi an chhiarte chu, an tam lam 6,03,550 an ni. 33 Levi-ho erawh chu Israela thlahte zînga chhiar an ni ve lo, LALPAN Mosia thu a pêk ang khân. 34 Chutiang chuan Israela thlahte chuan an ti a; LALPAN Mosia thu a pêk ang zêlin a pâwl pâwlin puan in an zâr a; tin, chutiang bawkin a chi chiin, a chhûngkua kua zêlin an chhuak ṭhîn a.
Arona fate
1 Hênghote hi, Sinai tlânga LALPAN Mosia a biak laia Arona leh Mosia chhuana mite an ni. 2 Tin, Arona fapate hming chu a upa ber Nadaba te, Abihua te, Eleazara te, Ithamara te an ni. 3 Hêng hi puithiam atâna hriak thih, puithiam hna thawk tûra a tihhran Arona fapate hming chu a ni. 4 Tin, Nadaba leh Abihua chu, Sinai thlalêra mei thiang lo LALPA hmaa an hlan lai khân LALPA hmaah an thi a; fa an nei lo. Eleazara leh Ithamara chuan an pa Arona dam laiin puithiam hna hi an thawk a.
Levia chiten puithiamho rawng an bâwlsak tûr a ni
5 Tin, LALPAN Mosia a bia a, 6 “Levi chite chu puithiam Arona hnênah hruai la, a rawng an bâwl theih nân a hnênah awmtîr rawh. 7 Tin, anni chuan biakbûka rawngbâwl hna thawkin, inbiakna puan in bulah amah leh pung khâwm zawng zawng pualah rawng an bâwl ang. 8 Tin, bungrua zawng zawng an vawng ang a, Israela thlahte puala biakbûk rawngbâwl hna an thawk ang. 9 Tin, Levi-hote chu Arona leh a fapate hnênah i hlân ang a; Israela thlahte pualah a hnêna hlan an ni. 10 Arona leh a fapate chu i ruat ang a, an puithiam nihna chu an chang reng ang; hnam dang rawn inrawlhte chu tihhlum an ni ang,” tiin.
Levia thlahte chhiarpui
11 Tin, LALPAN Mosia a bia a, 12 “Ngai teh, Levi-hote hi Israela thlahte zîng ata Israel thlahte fa tîr chhûl keu hmasa ber aiah keimah ngeiin ka lâk an ni a. Levi-ho chu ka ta an ni ang, 13 fa tîr zawng zawng chu ka ta an ni si a. Aigupta rama fa tîr zawng zawng ka tihhlum ni khân Israel-te zînga fa tîr zawng zawng, a mihring a ranin ka pual atân ka hauh a ni. Ka ta an ni ang: kei hi LALPA chu ka ni,” tiin. 14 Tin, LALPAN Sinai thlalêrah Mosia a bia a, 15 “Levia thlahte chu a chhûngkua kua leh a thlah thlahin chhiar la: mipa tawh phawt chu thla khat achin chung lam chu i chhiar tûr a ni,” tiin. 16 Tichuan, Mosia chuan a tih tûra thupêk angin LALPA thu ang chuan a chhiar hlawm a. 17 Levia fapate hming chu Gersona te, Kohatha te, Meraria te an ni. 18 Tin, an thlahtu Gersona fapate hming chu Libnia leh Simeia an ni. 19 An thlahtu Kohatha fapate chu Amrama te, Izara te, Hebrona te, Uziela te an ni. 20 An thlahtu Meraria fapate chu Mahlia leh Musia an ni. Hêng hi an chhûngkua ang zêla Levi-ho thlahte chu an ni. 21 Gersona chu Libni-ho leh Simei-ho thlahtu a ni; hêng hi Gerson-ho thlahte an ni. 22 Mipa zawng zawng thla khat achin chung lam an chhiarte chu 7,500 zet an tling a. 23 Gerson-ho thlahte chuan an puan in chu biakbûk thlang lampangah an zâr tûr a ni. 24 Tin, Gerson-ho chhûngkaw puipa chu Laela fapa Eliasapha a ni ang. 25 Gersona faten inbiakna puan ina an enkawl tûr chu biakbûk leh Puan In a ni ang, a chung te, inbiakna puan in kawngkhâr puanzâr te, 26 a kawtlai zâr te, biakbûk bula a kawtlai kawngkhâr puanzâr te, maichâm vêla mi te, chuta hman tûr hrui zawng zawngte nên. 27 Tin, Kohatha chu Amram-ho te, Izhar-ho te, Hebron-ho te, Uziel-ho te thlahtu a ni; hêngho hi Kohatha thlahte an ni. 28 Mipa zawng zawng thla khat achin chung lam an chhiar dân ang chuan 8,300 an ni, hmun thianghlim enkawltu tûr chu. 29 Kohatha fapate thlahte chuan biakbûk chhim lampangah an puan in an zâr tûr a ni. 30 Kohath-ho thlahte chhûngkaw puipa tûr chu Uziela fapa Elizaphana a ni ang. 31 An enkawl tûr chu bâwm te, dawhkân te, sathaukhâwnvâr dahna te, maichâm te, hmun thianghlima rawngbâwlna bungbêl zawng zawng te, puanzâr te, chuta rawngbâwlna thil zawng zawngte a ni ang. 32 Tin, puithiam Arona fapa Eleazara chu Levi-ho puipate puipa a ni ang a, hmun thianghlim enkawltute chu a ho vang. 33 Meraria chu Mali-ho leh Musi-ho thlahtu a ni. Hêng hi Meraria thlahte an ni. 34 Mipa zawng zawng thla khat achin chung lam an chhiar dân ang chuan 6,200 an ni. 35 Meraria thlah chhûngkaw puipa chu Abihaila fapa Zuriela a ni a. Biakbûk hmâr lampangah an puan in an zâr tûr a ni. 36 Meraria fapate enkawl tûra ruat chu biakbûk ban rem khâwm te, a bangrel te, a ban te, a nghahchhan ker kuak te, a hmanrua zawng zawng te, rawngbâwlna hmanrua zawng zawngte an ni a; 37 a kawt hung vêlna ban te, a nghahchhan ker kuak te, a kilhbehna leh a hruite nên. 38 Biakbûk chhak lampang inbiakna puan in bul, ni chhuahna lama puan in zârtu tûr chu Mosia leh Arona leh a fapate an ni ang a, hmun thianghlimah Israela thlahte pualah a ṭûl apiang an thawk ang; hnam dang rawn inrawlh apiang chu tihhlum tûr an ni ang. 39 LALPA thupêka Levi-ho a thlah thlaha mipa zawng zawng thla khat achin chung lam Mosia leh Aronan an chhiar zawng zawng chu 22,000 an ni.
Levia mite chu fa tîr aiah Pathian ta
40 Tin, LALPAN Mosia hnênah, “Israela thlahte zînga fa tîr, mipa, thla khat achin chung lam zawng zawng chhiar la, ka ta an ni, a zât hre rawh. 41 Tin, Levi-hote chu (LALPA chu ka ni a) Israela thlahte zînga fa tîr zawng zawng aiah ka hauh a ni; tin, Levi-ho rante chu Israela thlahte ran zawng zawnga piang hmasa ber aiah,” a ti a. 42 Tin, Mosia chuan LALPAN thu a pêk angin Israela thlahte zinga fa tîr zawng zawng chu a chhiar a. 43 An hming indawt ang zêla thla khat achin chung lam fa tîr mipa zawng zawng an chhiarte chu 22,273 an ni. 44 Tin, LALPAN Mosia a bia a, 45 “Israela thlahte zînga fa tîr zawng zawng aiah Levi-ho chu ka ta an ni ang; kei hi LALPA chu ka ni. 46 Tin, Levi-hote aia an tamna Israela thlahte fa tîr 273 tlanna tûrin, 47 mi pakhat tân sekel 5 ṭheuh i la tûr a ni; hmun thianghlima sekel hman tûr a ni (sekel chu gera 20 a ni). 48 A chuangho tlanna sum chu Arona leh a fapate i pe tûr a ni,” tiin. 49 Tin, Mosia chuan Levi-hovin an tlan bâka an tlanna sum chu a la a; 50 Israela thlahte fa tîr lak aṭangin sum chu a la a; hmun thianghlim sekel angin 1,365 a la a. 51 LALPAN Mosia thu a pêk, LALPA thu angin Mosia chuan tlanna sum chu Arona leh a fapate a pe a.
Levia chi zînga Kohatha thlahte hna
1 Tin, LALPAN Mosia leh Arona a bia a, 2 “Levia fate zînga Kohatha thlahte, a thlah thlahin, a chhûngkua kuain, 3 kum sawmthum achin chung lam, kum sawmnga thlengin rawngbâwlna hna, inbiakna puan ina thawk tûr zawng zawng zât chu chhiar vek rawh u. 4 Inbiakna puan in hmun thianghlim bera Kohatha fapate hnathawh tûr chu hei hi a ni: 5 awmhmun an sawn dâwn apiangin Arona chu a fapate nên an lût ang a, hmun thianghlim puanzâr an hlîp thla ang a, chu chuan thuthlung bâwm an khuh ang a; 6 chu chu savun ṭha miin an khuh ang a, chu chu puan dumpâwlin an khuh ang a, a zâwnfung an vuah tûr a ni. 7 Tin, entîrna chhang dawhkân chungah puan dumpâwl an phah ang a, chutah chuan thlêng te, fian te, berhbu te leh note a bun chhuahna tûr an dah tûr a ni; tin, chatlak lova chhang dah chu chutah chuan a awm tûr a ni. 8 Chu chu puan senin an khuh ang a; a khuhna savun ṭha miin an khuh ang a, a zâwnfung an vuah tûr a ni. 9 Tin, a êntu khâwnvâr dahna leh chumi atâna an hman tûr a khâwnvâr te, a chaicheh te, a vâp dahna te, hriak bûr zawng zawngte puan dumpâwlin an khuh tûr a ni. 10 Chumi leh a hmanrua zawng zawng chu a khuhna savun ṭha mia khuhin a zâwnnaah an dah tûr a ni. 11 “Tin, rangkachak maichâm chu puan dumpâwlin an khuh ang a, a khuhna savun ṭha miin an khuh leh ang a, a zâwnfung an vuah tûr a ni; 12 hmun thianghlima an hmanrua, rawngbâwlna bungbêl zawng zawng chu an la vek ang a, puan dumpâwlin an fûn ang a, a khuhna savun ṭha miin an khuh ang a, a zâwnnaah an dah tûr a ni. 13 Tin, maichâma meivâp chu an lâwk fai ang a, a chungah puan dumpâwl an phah ang a, 14 tin, a chungah chuan an rawngbâwl vêlna bungbêl zawng zawng mei lâkna te, sa thurna thîr kawm te, vut lawhna te, maihûn te, maichâm bungbêl zawng zawngte an dah ang a; tin, a khuhna savun ṭha miin an khuh ang a, a zâwnfung an vuah tûr a ni. 15 “Tin, Arona leh a fapaten hmun thianghlim leh hmun thianghlim bungrua zawng zawng an khuh zawha, awmhmun sawn dâwn apiangin, Kohatha fapate chu a zâwn tûrin an lo thawk ṭhîn ang a; nimahsela, thil thianghlimte chu an khawih tûr a ni lo, an khawih zawngin an thi ang. Chûng chu inbiakna puan ina Kohatha fapate chanpual tûr a ni. 16 Tin, puithiam Arona fapa Eleazara thawh tûr chu, chhit tûr hriak te, rimtui te, chatlak lova chhangphut thilhlan te, hriak thih mi te, biakbûk, chuta thil awm zawng zawng te, hmun thianghlim leh a bungruate ngaihtuah vêl a ni,” tiin. 17 Tin, LALPAN Mosia leh Arona a bia a, 18 “Kohatha thlah chhûngkua chu Levi-ho zîng ata bo mai lova, thil thianghlimte khawih lova thi lova an awm theih nân hetiang hian ti rawh u: 19 Arona leh a fapate chu lût sela, an thawh tûr leh an chanpual tûr ṭheuh ruatsak rawh se; 20 amaherawhchu, thil thianghlim en tûrin rei lo tê pawh lût suh se, an luh chuan an thi ang,” tiin.
Levia chi zînga Gersona thlahte hna
21 Tin, LALPAN Mosia a bia a, 22 “Gersona fapate pawh an chhûngkua kuain, a thlah thlahin chhiar vek rawh; 23 kum sawmthum achin chung lam kum sawmnga mi thlengin, rawngbâwlna hna inbiakna puan ina thawk tûr zawng zawng zât chu chhiar vek rawh. 24 Gersona thlahho chanpual chu rawngbâwl lam leh phurh lam a ni: 25 biakbûk puanzâr te, inbiakna puan in te, a khuhna te, a chung khuhna savun ṭha mi te, inbiakna puan in kawngkhâr puanzâr te, 26 kawt hung puanzâr te, kawt hung kawngkhâr puanzâr te, biakbûk leh maichâm bula mi, a hrui te, an hmanrua zawng zawngte an phur ang a, tih ṭûl apiang an ti tûr a ni. 27 Gersona thlahte chuan Arona leh a fate kawhhmuh ang zêlin hna an thawk ang a, an tih tûr tê tê chena ruatsak tûrin thu i neihtîr ang. 28 Chûng chu inbiakna puan ina Gersona thlahte thawh chu a ni. An tih tûr chu puithiam Arona fapa Ithamara ruat tûr a ni.
Levia chi zînga Meraria thlahte hna
29 “Meraria fapate chu a thlah thlahin, a chhûngkua kuain i chhiar tûr a ni; 30 kum sawmthum achin chung lam kum sawmnga mi thlengin inbiakna puan ina thawk tûr zât i chhiar vek tûr a ni. 31 Inbiakna puan ina an hnathawh, an chanpual tûr chu hei hi a ni - biakbûk ban rem khâwm te, a bangrel te, a ban te, a nghahchhan ker kuak te, 32 a kawt hung vêlna ban te, a nghahchhan ker kuak te, a kilhbehna te, a hrui te, a hmanrua zawng zawng leh a hmanraw dang zawng zawng phurh te; a hming lam zêl ṭheuhvin an chanpual tûr i ruatsak tûr a ni. 33 Chûng chu an ni, puithiam Arona fapa Ithamara hova inbiakna puan ina Meraria fapate thlahtehovin, an tih tûr tê tê chena an rawngbâwl dân tûr chu,” tiin.
Levia chite chhiarpui
34 Tichuan, Mosia leh Arona leh pung khâwmho zînga puipate chuan Kohath-ho fapate chu a thlah thlahin, a chhûngkua kuain, 35 inbiakna puan ina thawk tûr zât chu kum sawmthum achin chung lam kum sawmnga mi thlengin an chhiar a. 36 Chûngho a thlah thlaha an chhiar chu 2,750 an ni. 37 Chûng chu an ni, inbiakna puan ina rawngbâwl ṭhîn Kohath-ho thlah an chhiar, Mosia hmanga LALPA thupêk anga Mosia leh Aronan an chhiarte chu. 38-39 Tin, Gersona fapate, inbiakna puan ina thawk tûra rawngbâwl zât tûr chu a thlah thlahin, a chhûngkua kuain kum sawmthum achin chung lam kum sawmnga mi thlenga chhiar an ni a; 40 chûng a thlah thlaha, a chhûngkua kuaa an chhiarte chu 2,630 an ni. 41 Chûng chu an ni, Gersona fapate thlahho inbiakna puan ina rawngbâwlho zawng zawng, LALPA thupêk anga Mosia leh Aronan an chhiarte chu. 42-43 Tin, Meraria fapate, inbiakna puan ina thawk tûra rawngbâwl zât tûr chu, a thlah thlahin, a chhûngkua kuain, kum sawmthum achin chung lam kum sawmnga mi thlenga chhiar an ni a; 44 chûng a thlah thlaha, a chhûngkua kuaa an chhiarte chu 3,200 an ni. 45 Chûng chu an ni, Meraria fapate thlahho an chhiar, Mosia hmanga LALPA thupêk anga Mosia leh Aronan an chhiarte chu. 46-47 Levi-ho, rawngbâwl tûr leh inbiakna puan ina phurh mi phurtu tûr zât a thlah thlahin, a chhûngkua kuain, kum sawmthum achin chung lam kum sawmnga mi thlengin, Mosia leh Arona leh Israel-ho puipate chuan an chhiar a; 48 chûng an chhiarte chu 8,580 an ni. 49 Mosia hmanga LALPA thupêk angin mi tin an thawh tûr leh an chanpual tûr zir zêlin chhiar an ni a; chutiang tak chuan LALPAN Mosia thu a pêk anga chhiar an ni.
Mi bawlhhlawhte riahhmun pâwnah
1 Tin, LALPAN Mosia a bia a, 2 “Israela thlahte chu an riahhmun ata phâr zawng zawng leh, thi pût zawng zawng leh, mitthi avânga bawlhhlawh apiangte chu tichhuak vek tûrin thu pe rawh. 3 A hmei a pain i tichhuakin daipâwnah i dah tûr a ni; a lai taka ka awmna ṭhin an riahhmun chu an tibawlhhlawh dah ang e,” tiin. 4 Tichuan, Israela thlahte chuan chutiang chuan an ti a, daipâwnah an dah chhuak a; LALPAN Mosia hnêna a sawi angin Israela thlahte chuan an ti a.
Thil tihsual rulh leh tûr
5 Tin, LALPAN Mosia a bia a. 6 “Israela thlahte hnênah sawi la, ‘Mipa emaw, hmeichhia emawin LALPA chungah thil eng pawh lo tisualin thiam loh chang sela, 7 an tihsualnaah chuan thupha an chawi tûr a ni. A tihsual man chu kim takin rulh tûr a ni a; tin, a hmun ngaa ṭhena hmun khat a tihsualna pa chu a pek belh tûr a ni. 8 Amaherawhchu, sual man têltuin laichîn a neih loh chuan, sual man LALPA hnêna hlana chu puithiam pual tûr a ni ang a; inremna berâmpa tiam lovin inremna a siam tûr a ni ang. 9 Tin, Israela thlahte thil thianghlim thên thilhlan zawng zawng, hlansak tûra an pêk puithiam hnêna an hlan apiang a hlântu puithiamin a nei ang. 10 An thil serh chu anmahnin an nei ang, puithiam hnêna an pêk chu puithiamin a nei tûr a ni,’ tiin,” a ti a.
Pasal thîkthuchhia nupui chungchâng rêl dân tûr
11 Tin, LALPAN Mosia a bia a, 12 “Israela thlahte hnênah sawi la, an hnênah, ‘Tu nupui pawh uirêin, 13 miin mutpui sela, a pasal chuan hre lovin, chesual ngei si inpuang bawk si lo, kut man ni bawk si lo sela, 14 a pasal chuan thîkthu avângin ringhlel tlat ta sela emaw, nupui chesual lo pawh a rinhlelh tlat si chuan, 15 chutiang thu-ah chuan, chu mi chuan a tâna thilhlan barli chhangphut epha hmun sâwma ṭhena hmun khat kengin, a nupui chu puithiam hnênah a hruai tûr a ni; hriak a leih tûr a ni lo va, thil rimtui a telh tûr a ni hek lo; thîk thawina chhangphut thilhlan, hriat rengna thilhlan khawlohna hriat chhuahna a ni si a. 16 “ ‘Tin, puithiam chuan a rawn hruai ang a, LALPA hmaah a dintîr ang a; 17 tin, puithiam chuan hlumbêlin tui thianghlim a la ang a, biakbûk chhuata vaivut a la ang a, tuiah chuan a phul ang a. 18 Tin, puithiam chuan hmeichhia chu LALPA hmaah a dintîr ang a, a sam a thlahtîr ang a, hriat rengna chhangphut thilhlan, thîk thawina thilhlan chu a kentîr ang a; puithiam chuan ânchhe thlentîrtu tui khâ chu a keng ang. 19 Tin, puithiam chuan hmeichhia chu chhia a chhamtîr ang a, hmeichhe hnênah chuan, “I pasal ni lo mi dang tu mahin an mutpui loh chia, bawlhhlawhna lama i kal pên loh chuan ânchhe thlentîrtu he tui khâ ata hi i lo fihlîm ang a; 20 amaherawhchu, khaw dang hawia i bawlhhlawha, i pasal ni lo mi tuin emaw a mutpui che chuan i fihlîm lo vang,” a ti tûr a ni. 21 Tin, puithiam chuan hmeichhia chu a vau vang a, chhia a chhamtîr ang a, hmeichhe hnênah puithiam chuan, “LALPAN i malpui a tihbala, i pum a tihvûn chuan, LALPAN i chipuite ânchhe dawntîrtuah siam che rawh se; 22 tin, ânchhe thlentîrtu he tui hi i rîlah a lût ang a, i pum a tivûng ang a, i malpui a tirâwp ang,” a ti ang a; tin, hmeichhia chuan, “Amen, Amen,” a ti ang a. 23 “ ‘Tin, puithiam chuan chûng ânchhe thute chu lehkhabuah a ziak ang a, tui khâah chuan a chiah tûr a ni. 24 Tin, hmeichhia chu ânchhe thlentîrtu tui khâ chu a intîr tûr a ni a; tichuan, ânchhe thlentîrtu tui chu a kawchhûngah a lût ang a, a lo khâ ang. 25 Tin, puithiam chuan thîk thilhlan chhangphut, hmeichhe kut ata chu a la ang a, LALPA hmaah chhangphut thilhlan chu a thên ang a, maichâmah a kalpui ang a; 26 puithiam chuan chhangphut thilhlan hriat chhuahtîrtu chu vei khatin a la ang a, maichâmah chuan a hâl ang a, chumi zawhah chuan tui chu hmeichhia a intîr tûr a ni. 27 Tin, tui a han intîr chuan heti hi a ni ang a; a lo bawlhhlawha, a pasal chunga thil a tisual a lo nih chuan ânchhe thlentîrtu tui chu a kawchhûngah a lût ang a, a lo khâ ang a, a pum a lo vûng ang a, a malpui a lo râwp ang a; tichuan, hmeichhia chu a chipuite ânchhe dawntîrtu a lo ni ang. 28 Amaherawhchu, hmeichhia chu a bawlhhlawh lohva, a thianghlim chuan a fihlîm ang a, nau pai thei zêl a ni ang. 29 Hei hi, nupui, khaw dang hawia a pasal ni lo mi dang nêna intibawlhhlawh emaw, 30 mipain thîkna rilru a lo puta, a nupui a thîk emawa rêl dân chu a ni a; tichuan, LALPA hmaah a hruai ang a, puithiam chuan hêng dân zawng zawng ang hian a chungah a ti tûr a ni. 31 Chutichuan, mipa chu khawlohnaah chuan a fihlîm ang a, hmeichhia chuan a sualna mawh a phur ang,’ ti rawh,” tiin.
Nazarit thutiam chungchâng
1 Tin, LALPAN Mosia a bia a, 2 “Israela thlahte hnênah sawi la, an hnênah, ‘Mipa emaw, hmeichhia emaw pawhin eng emaw thutiam bik, LALPA tâna inpêkna Nazarit thutiam a tiam lai chuan, 3 uain leh zu a nghei tûr a ni; uain thûr pawh, zu thûr pawh a in tûr a ni lo va, grêp tui pawh a inin grêp rah a tharlâm pawh, pho vuai pawh a ei tûr a ni hek lo. 4 A intihhran chhûng zawng chuan grêp hruia mi a mu pawh, a pil pawh a ei tûr a ni lo. 5 Intihhranna thu a tiam chhûng zawng chuan a lu pawh meh hauh loh tûr a ni; LALPA tâna a intihhran chhûng ni a kim hma loh chuan tihhran a ni ang a, a sam a zuah tûr a ni. 6 LALPA tâna a intihhran chhûng zawng chuan mitthi ruang a hnaih tûr a ni lo. 7 A pa te, a nu te, a unaupa te, a farnu te emaw thih thu-ah pawh a intibawlhhlawh tûr a ni lo, Pathian tâna a intihhranna chuan a phuar avângin. 8 A intihhran chhûng zawng chuan LALPA pual a ni. 9 “ ‘A kiangah mi lo thi ta thutin a intihhranna lu chu lo tibawlhhlawh ta ang sela, a inthen ni, a ni sarih niah a lu a mêt tûr a ni. 10 Tin, ni riat niah inbiakna puan in kawngkaa puithiam hnênah ṭhuro tuak khat emaw, pârvano tuak khat emaw a rawn keng tûr a ni; 11 tin, puithiam chuan pakhat chu sual thawi nân a hlân ang a, pakhat chu hâlral thilhlanah, mitthi avânga a tisualnaah inremna a siamsak ang a; tin, chumi ni vêk chuan a lû chu a tithianghlim tûr a ni. 12 Tin, thiam loh thawi nân berâmno a pa kum khat mi rawn kengin, a intihhranna nite chu LALPA hnênah a tiṭha leh ang; a intihhranna chu tihbawlhhlawh a nih tâk avângin a hmaa mi kha engmahlo a ni ta si a. 13 “ ‘Tin, hei hi Nazarit mi, an intihhran ni bi a kim huna tih dân tûr chu a ni: inbiakna puan in kawngkaah hruai tûr a ni ang a; 14 tin, LALPA tâna thilhlanah berâmpa kum khat mi sawisêl bo hâlral thilhlanah pakhat, sual thawi nân berâmno a nu kum khat mi sawisêl bo pakhat, remna thilhlan atân berâmpa sawisêl bo pakhat, 15 dawidim telh loh chhang leh chhangphut dip tak, hriaka hmeh siam chhang hlâwm leh, hriaka chulh chhangpêr pan bâwm khat, an chhangphut thilhlan tûr leh in tûr thilhlan tûrte nên an hlân tûr a ni. 16 Tin, puithiamin chûng chu LALPA hmaah a hlân ang a, a sual thawina leh a hâlral thilhlan chu a hlân ang; 17 tin, berâmpa chu bâwma chhang dawidim telh lohte nên chuan, remna inthawi thilhlan atânte LALPA hnênah a hlân ang a; puithiam chuan chhangphut thilhlan leh in tûr thilhlan pawh chu a hlân tel bawk ang. 18 Nazarit mi chuan inbiakna puan in kawngkaah a intihhranna lu chu a mêt ang a, intihhranna sam chu a la ang a, remna inthawi thilhlan hnuaia meiah chuan a rawh tûr a ni. 19 “ ‘Tin, puithiam chuan berâmpa dâr chhum hmin leh, bâwma dawidim telh loh chhang pakhat leh, dawidim telh loh chhangpêr pan pakhat a la ang a, Nazarit chuan a intihhranna lu a meh zawhin a kentîr ang a; 20 tin, puithiam chuan thên thilhlanah LALPA hmaah a thên tûr a ni; hei hi puithiam pual a ni ang, thên irâwm leh thên bawp nên. Chumi zawhah chuan Nazarit chuan uain a in thei tawh ang. 21 Hei hi a ni, Nazarit thutiam dân leh LALPA hmaa an thilhlan dân chu, ama duh thua a hlan tiam lovin; a intihhranna thutiam azir zêlin a ti tûr a ni,’ ti rawh,” tiin.
Puithiamten mipui mal an sâwma chham tûr
22 Tin, LALPAN Mosia a bia a, 23 “Arona leh a fapate hnênah, ‘Hetiang hian Israela thlahte mal in sâwm tûr a ni; an hnênah: 24 “LALPAN malsâwm che uin vêng zêl che u rawh se; 25 LALPAN a hmêl in chungah êntîr sela, khawngaih zêl che u rawh se, 26 LALPAN in lam lo hawi sela, thlamuanna pe che u rawh se,” tiin sawi rawh u,’ tiin sawi rawh. 27 “Chutianga ti chuan Israela thlahahte ka hming chuantîr a ni ang a; tin, keiin anni chu mal ka sâwm ang,” tiin.
Chi hrang hrang hruaituten biakbûk tân thilpêk an rawn keng
1 Chutichuan, Mosian biakbûk chu a din zawha, hriak a thiha, a tihthianghlima, a bungrua zawng zawng leh a maichâm leh a bungbêl zawng zawng hriak a thiha, a tihthianghlim ni chuan heti hi a ni a, 2 Israel-ho puipa, an chhûngkaw puipate chuan thilhlan an hlân a, chûngho chu an hnam puipate, an chhiarhote chunga awm an ni a: 3 an thilhlante chu, tawlailîr chung nei paruk leh bâwngpa sâwm leh pahnih, puipa pahnihin tawlailîr pakhat zêl, pakhatin bâwngpa pakhat zêl LALPA hmaah an rawn la a, biakbûk bulah chuan an rawn hlân a. 4 Tin, LALPAN Mosia a bia a, 5 “Biakbûk hna atân a ṭangkai dâwn a, lo la hlawm rawh khai; Levi-ho, an hna zir ang zêlin i pe ṭheuh dâwn nia,” tiin. 6 Tichuan, Mosian tawlailîrte leh bâwngpate chu a la a, Levi-hote chu a pe a. 7 Tawlailîr pahnih leh bâwngpa pali chu Gersona fapate chu an hna azir zêlin a pe a. 8 Tin, tawlailîr pali leh bâwngpa pariat chu puithiam Arona fapa Ithamara ho, Meraria fapate chu an hna azir zêlin a pe a. 9 Kohatha fapate erawh chu a pe ve lo; hmun thianghlim hna chu an pual a ni a, a zâwna zâwn ṭhîn an ni. 10 Puipahote chuan hriak thih ni chuan maichâm hlan nâna an thilhlante chu maichâm bulah an hlân a. 11 Tin, LALPAN Mosia hnênah, “Puipa tinin maichâm hlan nâna an thilpêk chu a indawt zêlin ni tin an hlân tûr a ni,” a ti a. 12 Ni khat nia a thilhlan hlântu tûr chu Juda chi Aminadaba fapa Nasona a ni a. 13 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 14 sekel sâwm tluka rit rimtuia khat rangkachak fian pakhat; 15 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 16 sual thawi nân kêlpa pakhat; 17 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga. Hêng hi Aminadaba fapa Nasona thilhlante chu a ni. 18 Ni hnih ni chuan Isakar-ho puipa Zuara fapa Nethanela chuan a hlân a. 19 A thilhlan atân chuan tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 20 sekel sâwm tluka rit rimtuia khat rangkachak fian pakhat; 21 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 22 sual thawi nân kêlpa pakhat; 23 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a hlân a. Hêng hi Zuara fapa Nethanela thilhlante chu a ni. 24 Ni thum ni chuan Zebuluna thlahte puipa Helona fapa Eliaba chuan a hlân a. 25 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 26 sekel sâwm tluka rit rimtuia khat rangkachak fian pakhat; 27 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 28 sual thawi nân kêlpa pakhat; 29 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Helona fapa Eliaba thilhlante chu a ni. 30 Ni li ni chuan Reubena thlahte puipa Sedeura fapa Elizura chuan a hlân a. 31 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atâna hriak chawhpawlh chhangphut dip taka khat ve ve; 32 sekel sâwm tluka rit rimtuia khat rangkachak fian pakhat; 33 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 34 sual thawi nân kêlpa pakhat; 35 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Sedeura fapa Elizura thilhlante chu a ni. 36 Ni nga ni chuan Simeona thlah Zurisadaia fapa Selumiela chuan a hlân a. 37 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 38 sekel sâwm tluka rit rimtuia khat rangkachak fian pakhat; 39 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 40 sual thawi nân kêlpa pakhat; 41 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Zurisadaia fapa Selumiela thilhlante chu a ni. 42 Ni ruk ni chuan Gada thlahte puipa Deuela fapa Eliasapha chuan a hlân a. 43 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 44 sekel sâwm tluka rit rimtuia khat rangkachak fian pakhat; 45 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 46 sual thawi nân kêlpa pakhat; 47 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Deuela fapa Eliasapha thilhlante chu a ni. 48 Ni sarih ni chuan Ephraima thlahte puipa Amihuda fapa Elisama chuan a hlân a. 49 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, hâlral thilhlan atân hriaka chawhpawlh chhangphut dip taka khat ve ve; 50 sekel sâwm tluka rit rimtuia khat rangkachak fian pakhat; 51 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 52 sual thawi nân kêlpa pakhat; 53 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Amihuda fapa Elisama thilhlante chu a ni. 54 Ni riat ni chuan Manasea thlahte puipa Pedazura fapa Gamaliela chuan a hlân a. 55 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat; chhangphut thilhlan atâna hriak chawhpawlh chhangphut dip taka khat ve ve; 56 sekel sâwm tluka rit rimtuia khat rangkachak fian pakhat; 57 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat, 58 sual thawi nân kêlpa pakhat; 59 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Pedazura fapa Gamaliela thilhlante chu a ni. 60 Ni kua ni chuan Benjamina thlah Gideonia fapa Abidana chuan a hlân a. 61 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 62 sekel sâwm tluka rit rimtuia khat rangkachak fian pakhat, 63 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 64 sual thawi nân kêlpa pakhat; 65 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Gideonia fapa Abidana thilhlante chu a ni. 66 Ni sâwm ni chuan Dana thlahte puipa Amisadaia fapa Ahiezera chuan a hlân a. 67 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 68 sekel sâwm tluka rit rimtuia khat rangkachak fian pakhat; 69 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 70 sual thawi nân kêlpa pakhat; 71 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Amisadaia fapa Ahiezera thilhlante chu a ni. 72 Ni sâwm leh ni khat ni chuan Asera thlahte puipa Okrana fapa Pagiela chuan a hlân a. 73 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atân hriaka chawhpawlh chhangphut dip taka khat ve ve; 74 sekel sâwm tluka rit rimtuia khat rangkachak fian pakhat; 75 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 76 sual thawi nân kêlpa pakhat; 77 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Okrana fapa Pagiela thilhlante chu a ni. 78 Ni sâwm leh ni hnih ni chuan Naphthalia thlahte puipa Enana fapa Ahira chuan a hlân a. 79 A thilhlan chu tangkaraw thlêng pakhat, a rih lam sekel za leh sawmthum, hmun thianghlima sekel sawmsarih tluka rit tangkaraw berhbu pakhat, chhangphut thilhlan atan hriak chawhpawlh chhangphut dip taka khat ve ve; 80 sekel sâwm tluka rit rimtuia khat rangkachak fian pakhat; 81 hâlral thilhlan atân bâwngpatuai pakhat, berâmpa pakhat, berâmno a pa kum khat mi pakhat; 82 sual thawi nân kelpa pakhat; 83 tin, remna inthawi thilhlan atân bâwngpa pahnih, berâmpa panga, kêlpa panga, berâmno a pa kum khat mi panga a ni. Hêng hi Enana fapa Ahira thilhlante chu a ni. 84 Tichuan, maichâm hriak thih nia Israel puipaho thilhlante chu tangkaraw thlêng sâwm leh pahnih, tangkaraw berhbu sâwm leh pahnih, rangkachak fian sâwm leh pahnih a ni a; 85 tangkaraw thlêng chu sekel za leh sawmthum tluka rit ṭheuh a ni a, berhbu chu sawmsarih ṭheuh a ni. Tangkaraw bungbêl zawng zawng chu hmun thianghlima sekel sînghnih leh zali tluka rit a ni. 86 Rimtuia khat rangkachak fian sâwm leh pahnih chu hmun thianghlima sekel sâwm tluka rit ṭheuh a ni; rangkachak fian zawng zawng chu sekel za leh sawmhnih tluka rit a ni. 87 Hâlral thilhlan atâna bâwngpa zawng zawng chu sâwm leh pahnih a ni a, berâmpa sâwm leh pahnih, berâmno a pa kum khat mi sâwm leh pahnih, an chhangphut thilhlante nên; tin, sual thawi nân kêlpa sâwm leh pahnih; 88 tin, remna inthawi thilhlan atâna bâwng chu bâwngpa sawmhnih leh pali a ni a, berâmpa chu sawmruk, kêlpa chu sawmruk, berâmno a pa kum khat mi chu sawmruk a ni. Hei hi hriak thih hnua maichâm hlan nâna thilpêkte chu a ni. 89 Chutichuan, inbiakna puan ina amah be tûra Mosia a luh chuan, thuthlung bâwm chunga zahngaihna ṭhutphah chung lama cherub pahnihte inkâr aṭang chuan, amah rawn biain aw chu a hria a; tin, a be ta a.
Khâwnvâr dah dân tûr
1 Tin, LALPAN Mosia a bia a, 2 “Arona bia la, a hnênah, ‘Khâwnvârte i hâlin khâwnvâr pasarih chuan sathaukhâwnvâr dahna hma lam a ên tûr a ni,’ ti rawh,” tiin. 3 Tin, Arona chuan chutiang chuan a ti a; LALPAN Mosia thu a pêk ang chuan khâwnvâr dahna hma lamah chuan khâwnvâr chu a chhi a. 4 Hemi khâwnvâr dahna siam dân hmang chu rangkachak a chhera chher a ni; a bul ngul leh a pâr chenin chher a ni: LALPAN a lem Mosia a entîr ang chiahin khâwnvâr dahna chu a siam a.
Levia chite then leh serh hran
5 Tin, LALPAN Mosia a bia a, 6 “Levi-hote chu Israela thlahte zîng ata tihrang la, tithianghlim rawh. 7 Anmahni tithianghlim tûrin hetiang hian i ti tûr a ni: an chungah tlen faina tui thlawr la, an taksa zawng zawng mehtîr la, an puante sûktîr la, intihthianghlimtîr rawh. 8 Tin, bâwngpatuai pakhat leh chhangphut thilhlan, hriaka pawlh chhangphut dip tak nên lâktîr la; tin, sual thawi nân bâwngpatuai pakhat dang i kai bawk tûr a ni. 9 Tin, Levi-hote chu inbiakna puan in bulah chuan hruai la, Israela thlahte mipui zawng zawng chu pun khâwmtîr vek rawh; 10 tin, Levi-hote chu LALPA hnênah i hlân ang a; Israela thlahte chuan Levi-hote chungah an kut an nghat ang a; 11 tichuan, Arona chuan Levi-hote chu, LALPA rawng an bâwl theih nân Israela thlahte hmingin thên thilhlanah LALPA hnênah a hlân ang a. 12 Tin, Levi-hote chuan bâwngpa lû-ahte chuan an kut an nghat ang a; tin, Levi-hote tâna inremna siam nân, pakhat chu sual thawi nân, pakhat chu hâlral thilhlanah LALPA hnênah i hlân tûr a ni. 13 “Tin, Levi-hote chu Arona leh a fapate hmaah chuan i awmtîr ang a, LALPA tâna thên thilhlanah i hlân tûr a ni. 14 Chutiang chuan Israela thlahte zîng ata Levi-hote chu i tihrang ang a; tichuan, Levi-hote chu ka ta an ni ang. 15 Tin, chumi zawhah chuan Levi-hote chu inbiakna puan ina rawngbâwl tûrin an lût ang a; tin, nangin anni chu i tithianghlim ang a, thên thilhlanah i hlân tûr a ni. 16 Israela thlahte zîng ata ka puala ruat an ni si a; chhûl keu zawng zawng Israela thlahte fa tîr zawng zawng aiah ka pualah ka nei tawh a ni. 17 Israela thlahte zînga fa tîr zawng zawng chu ka ta an ni rêng a; mihring nên, rante nên; Aigupta rama fa tîr zawng zawng ka tihhlum lai khân ka puala ka ruat tawh a ni. 18 Tichuan, Israela thlahte zînga fa tîr zawng zawng aiah Levi-hote hi ka nei tawh a ni. 19 Tichuan, Israela thlahte aia inbiakna puan ina rawngbâwl tûr leh, Israela thlahten hmun thianghlim an rawn hnaih pawha Israela thlahte zînga hri a lên lohna tûra remna siam tûrin, Israela thlahte zîng ata Levi-hote hi Arona leh a fapate ka pe a ni,” tiin. 20 Chutiang chuan Mosia te, Arona te, Israela thlahte pung khâwmho zawng zawng chuan Levi-hote chungah chuan an ti a. Levi-ho chungchâng thua LALPAN Mosia thu a pêk ang zawng zawng chuan an chungah Israela thlahte chuan an ti a. 21 Tichuan, Levi-hote chu sual lakah an inthian fai a, an puante an su a; tin, Aronan LALPA hmaah thên thilhlanah a hlân a; tin, anmahni tihthianghlim nân Aronan inremna a siamsak a. 22 Tin, chumi zawhah Levi-hote chu Arona leh a fapate hnuaia an rawngbâwl hna thawk tûr chuan inbiakna puan in chhûngah an lût a; Levi-hote chungchâng thua LALPAN Mosia thu a pêk angin an chungah an ti ta a. 23 Tin, LALPAN Mosia a bia a, 24 “Levi-hote chanpual chu hêng hi a ni: kum sawmhnih leh kum nga chin chung lam chuan inbiakna puan ina rawngbâwl hna an bei ang a; 25 kum sawmnga mite chuan rawngbâwl hna chu an chawlhsan ang a, rawng an bâwl tawh lo vang. 26 Amaherawhchu, inbiakna puan in enkawl thu-ah chuan an unaute an puibâwm zêl ang a, rawng erawh chu an bâwl tawh lo vang. Hetiang hian Levi-hote chu an hnathawh i rêlsak tûr a ni,” tiin.
Kalhlên kût hman vawi hnihna
1 Tin, LALPAN Aigupta ram ata an lo chhuah achin kum hnihna, thla khatnaah Sinai thlalêran Mosia a bia a, 2 “Israela thlahte chuan kalhlên kût chu a hunbi zêlah nei rawh se. 3 A hunbiah, hemi thla ni sâwm leh ni li tlai lamah in nei tûr a ni. Chumia tih tûra ruat ang zawng zawng leh a dân ang zawng zawng chuan in nei tûr a ni,” tiin. 4 Tichuan, Mosian Israela thlahte chu kalhlên kût nei tûr chuan a hrilh a. 5 Chutichuan, Sinai thlalêrah chuan thla khatna, ni sâwm leh ni li ni tlai lamah kalhlên kût chu an hmang ta a; LALPAN Mosia thu a pêk ang zawng zawng chuan Israela thlahte chuan an ti a. 6 Tin, tute emaw mitthi ruang avânga thianghlim lo an awm a, chumi ni chuan kalhlên kûtah an tel ve thei lo va; tichuan, chumi ni chuan Mosia leh Arona hmaah chuan an kal a. 7 Chungho chuan a hnênah, “Mitthi ruang avângin kan thianghlim lo a ni a; eng vângin nge Israela thlahte zînga a hunbia LALPA hnêna thilhlan kan hlan ve min khap?” an ti a. 8 Tin, Mosian an hnênah, “Lo ngawi rih teh u, in chungchâng thu-ah LALPAN engtin nge thu a pêk dâwn ka han hre rih phawt ang e,” a ti a. 9 Tin, LALPAN Mosia a bia a, 10 “Israela thlahte hnênah, ‘In zînga mi pawh, in thlahte zînga mi pawh, mitthi ruang avânga thianghlim lo emaw, lo thang bo emaw an awm hlauh chuan LALPA tâna kalhlên kût chu an nei ve rêng rêng tûr a ni. 11 Thla hnihna, ni sâwm leh ni li ni tlai lamah an nei tûr a ni. Chhang, dawidim telh loh hnimhnah khâ nên an ei tûr a ni. 12 A tûk atân chuan a enga mah an dah tûr a ni lo va, a ruh an titliak tûr a ni hek lo. Kalhlên kûta tih tûr ruat ang zawng zawng chu an ti tûr a ni. 13 Amaherawhchu, thianghlim si, thang bona nei si lova kalhlên kûta tel lo ringawt chu, a chipuite zîng ata chu mi chu tuithlâr a ni ang; a hunbia LALPA hnêna thilhlan chu a hlan loh avângin chu mi chuan a sual mawh a phur ang. 14 Tin, hnam dang mi in hnêna awmin LALPA tâna kalhlên kûta tel ve an duh chuan, kalhlên kûta tih tûr ruat leh a dân angin an ti tûr a ni; he rama mi rêng rêng leh hnam dang mite tân dân angkhat in nei tûr a ni,’ tiin sawi rawh,” tiin.
Chhûm ding êng
15 Chutichuan, biakbûk din ni chuan Pathian chênna in chu chhûmin a tuam mup a; tin, tlai lamah chuan biakbûk chungah chuan mei alh ang mai hi a tûk zîng thlengin a awm a. 16 Chutiang chuan a awm reng a: chhûm chuan a tuam reng a, zânah chuan mei angin a lang a. 17 Chhûmin puan in chu a kiansan apiangin Israela thlahte chuan kal zai an rêl ṭhîn a; tin, chhûm a dinna hmun apiangah chuan Israela thlahte chuan awmhmun an khuar ṭhîn a. 18 LALPA thupêkin Israela thlahte chu an kal zêl a, LALPA thupêk bawkin awmhmun an khuar ṭhîn a; biakbûk chunga chhûm chu a awm chhûng zawng awmhmun an khuar reng a. 19 Tin, biakbûk chunga chhûm chu rei tak a awm chuan, Israela thlahte chuan LALPA thu chu an zâwm a, an kal lo va. 20 Tin, a châng chuan chhûm chu biakbûk chungah chuan ni rei lo tê chauh a awm ṭhîn a; tichuan, LALPA thupêk angin awmhmun an khuar a, LALPA thupêk angin an kal ṭhîn. 21 Tin, a châng chuan chhûm chu tlai lam aṭanga zîng thlengin a awm a: zînga chhûm chu a invawrh sân chuan an kal ṭhîn a; chhûnah emaw, zânah emaw, chhûm chu a invawrh sân apiangin an kal mai ṭhîn a ni. 22 Biakbûk chungah chhûm chu ni hnih emaw, thla khat emaw, kum khat emaw pawh a awma, chuta a awm reng chuan Israela thlahte chuan awmhmun an khuar reng a, an kal ṭhîn lo va; a invawrh sân erawh chuan an kal ṭhîn. 23 LALPA thupêkin awmhmun an khuar ṭhîn a, LALPA thupêkin an kal ṭhîn; Mosia hmanga LALPA thupêkin LALPA thu chu an zâwm a ni.
Tangkaruaa siam tawtawrâwt
1 Tin, LALPAN Mosia a bia a, 2 “Tangkaraw tawtawrâwt pahnih siam la; a chhera chherin siam rawh: mipuiho koh khâwm nân leh chhuahtîr nân i hmang tûr a ni. 3 Chu chu an ham kawp chuan mipui zawng zawng chu i hnênah inbiakna puan in kawngka bulah an rawn inkhâwm vek tûr a ni. 4 Tin, pakhat chauh an ham chuan, Israel mipuite hotu puipate chauh i hnênah an lo kal khâwm tûr a ni ang a. 5 Tin, râlkhêl hama in ham chuan chhak lampanga awmhote an chhuak tûr a ni ang. 6 Tin, râlkhêl hama in ham leh chuan chhim lampanga awmhote an chhuak tûr a ni; an chhuahna tûrin râlkhêl hamin an hâm tûr a ni. 7 Amaherawhchu, mipuite lo kal khâwmna tûr chuan in hâm phawt ang a, râlkhêl ham erawh chuan hâm lovin. 8 Arona fapa puithiamhote chuan tawtawrâwt chu an hâm tûr a ni; chu chu in tân in thlahte thlenga kumkhaw dân tûr a ni ang. 9 In rama hmêlma hnuaichhiahtu che u do tûra in kal hunin, râlkhêl hamin tawtawrâwtte chu in hâm tûr a ni; tichuan, LALPA in Pathian hmaah chuan hriat reng in ni ang a, in hmêlmate lakah chuan chhanhim in ni ang. 10 In hlimna niah te, in kût hunbi neiah te, in thla tharah te chuan in hâlral thilhlanah leh in remna thilhlan inthawinaahte chuan tawtawrâwt in hâm tûr a ni; tichuan, in Pathian hmaa in tâna hriat rengna a ni dâwn nia: kei hi LALPA in Pathian ka nih hi,” tiin.
Israel-ten hmun an sawn
11 Tin, kum hnihna, chumi thla ni sawmhnih ni chuan heti hi a ni a, chhûm chu Pathian chênna in chung ata chu a lo invawrh sâng ta a. 12 Tichuan, Israela thlahte chu an kal dân bi ang chuan Sinai thlalêr ata chu an chhuak a; tin, Paran thlalêrah chuan chhûm chu a ding ta a. 13 Mosia hmanga LALPA thupêk angin an chhuak ta phawt a. 14 A hmasa berin Juda pâwlho an chhungkaw chhinchhiahna kengin an chhuak a; a hotu chu Aminadaba fapa Nasona a ni a. 15 Isakar-ho hotu chu Zuara fapa Nethanela a ni a. 16 Zebulun-ho hotu chu Helona fapa Eliaba a ni a. 17 Tin, biakbûk chu an ṭhiat a, Gersona fapate leh Meraria fapa, biakbuk zâwntute chu an chhuak a. 18 Tin, Reuben-ho chu an chhûngkaw chhinchhiahna kengin an chhuak a; a hotu chu Sedeura fapa Elizura a ni a. 19 Simeon-ho hotu chu Zurisadaia fapa Selumiela a ni a. 20 Gad-ho hotu chu Deuela fapa Eliasapha a ni. 21 Tin, Kohath-hote chuan thil thianghlim chu an zâwn a, an chhuak a; tin, a dangte chuan an thlen veleh biakbûk chu an lo din diam a. 22 Ephraim-ho chu an chhungkaw chhinchhiahna kengin an chhuak a; a hotu chu Amihuda fapa Elisama a ni.
Mipui an kal chhuak
23 Manase-ho hotu chu Pedazura fapa Gamaliela a ni a. 24 Benjamin-ho hotu chu Gideonia fapa Abidana a ni a. 25 Tin, a hnuhnûng berah Dan-ho chu an chhûngkaw chhinchhiahna kengin an chhuak a; a hotu chu Amisadaia fapa Ahiezera a ni a. 26 Aser-ho hotu chu Okrana fapa Pagiela a ni a. 27 Naphtali-ho hotu chu Enana fapa Ahira a ni a. 28 Chutiang chu a ni Israela thlahte an chhûngkaw chhinchhiahna kenga an kal dân chu; chutiang tak chuan an chhuak ta a. 29 Tin, Mosia puzawn, Midian mi Reuela fapa Hobaba hnênah Mosian, “ ‘Ka pe ang che u,’ LALPAN a tih hmunah chuan kan kal dâwn a ni a; kan hnênah lo kal ve la, ṭha takin i chungah kan ti ang; LALPA chuan Israela thlahte chungchâng thu chu ṭha takin a sawi tawh si a,” a ti a. 30 Ani chuan a hnênah, “Ka lo kal lo mai ang e, keimahni ramah ka laichînte hnênah ka kal zâwk ang e,” a ti a. 31 Tin, ani chuan, “Min kalsan lul suh khai, thlalêrah chuan awmhmun kan khuarna tûr i hre zâwk si a, kan tân mit i lo ni dâwn a ni. 32 Tin, heti hi a ni ang a, kan hnêna i kal ve chuan, a ni, heti hi a ni ang a, LALPAN thil ṭha min tihsak ang zêlin kan tihsak ve zêl ang che,” a ti a. 33 Chutichuan, LALPA tlâng aṭanga ni thum kalah chuan an kal a; tin, LALPA thuthlung bâwm chu an tâna innghahna hmun remchâng zawngin, ni thum an kal chhûng hian an hma a hruai a. 34 An bûk ata an chhuahin LALPA chhûm chu an chungah a awm zêl a. 35 Tin, heti hi a ni a, bâwm chu a chhuah dâwn apiangin Mosian, “Aw LALPA, lo thawk la, i hmêlmate chu tidarh la, a hawtu che chu i hmaah tlânchhe rawh se,” a ti ṭhîn a. 36 Tin, a innghah apiangin, “Aw LALPA, Israel mipuiho hnênah hian lo kîr leh rawh,” a ti ṭhîn a.
Tabera hmun an thleng
1 Tin, mipuite chuan LALPA beng hriatah phunnawi hmangte angin thil ṭha lo tak an sawi ṭhîn a; chu chu LALPAN a lo hriatin a thin a alh ta a; tichuan, LALPA mei chu an zîngah chuan a lo thawk a, an riahhmun pâwn lam chu a lo kâng ta dur dur mai a. 2 Chutichuan, mipuite chuan Mosia an au va; tin, Mosia chu LALPA hnênah a ṭawngṭai a, mei chu a rêm ta a. 3 Chumi hmun hming chu Tabera an ti a, LALPA mei chu an zînga a lo thawh avâng chuan.
Mosian hruaitu mi sawmsarih a thlang
4 Tin, an zînga hnam dang nêna inneih pawlhhote chuan tisa châkna an lo nei ta a; Israela thlahte pawh an ṭap leh a, “Tu nge sa ei tûr min pe dâwn? 5 Duh duha Aigupta rama sangha kan ei ṭhinte chu kan hre reng a, fanghma te, hmazil te, purûn hel ei mi te, rûn bâl te, purûn vâr mite pawh; 6 nimahsela, tûnah chuan kan thlîng a ro zo ta, eng mah rêng rêng beisei tûr a awm lo, manna mai lo hi chu,” an ti a. 7 Manna chu koriander mu ang, a lan dânah chuan tuikeplung ang hi a ni. 8 Mite chuan an chhar khâwm a, râwtsawmnaah an râwt sawm a, sumah te an dêng a, bêlah an chhûm a, chhangah te an siam a; han ei chuan hriaka kan chhang ang a ni a. 9 Riahhmuna zâna dai a tlâkin manna chu a tla tel ve a. 10 Tin, mipuite chu an chhûngkua kuain an puan in kawngka ṭheuhvah an ṭap tih Mosian a lo hria a; tin, LALPA thin chu nasa takin a alh ta a. Tin, Mosia pawh a lungni lo va; 11 tichuan LALPA hnênah, “Eng vângin nge i chhiahhlawh hi mi tihhrehawm? Engtizia nge i mit ka tlun lohva, hêng mipui zawng zawng phurrit hi ka chunga i nghah? 12 Hêng mipui zawng zawng hi ka hrin em an nih? An pi leh pute chhechhama pêk i tiam rama hruai lût tûrin, ‘Nau pawmtuin hnute hne lai a pawm angin i ângchhûngah pawm rawh,’ i mi tih atân em ni ka hruai chhuah hlawm? 13 Hêng mipui zawng zawng pêk tûr hi khawi ata nge sa ka neih ang? ‘Kan ei atân sa mi pe rawh,’ tia ṭapin mi bei si a. 14 Hêng mipui zawng zawng hi mahni ngawt chuan ka phur zo lo, ka tân a rit lutuk a ni. 15 Hetianga mi tih dâwn chuan mi khawngaih la, mi tihlum daih law law mai la, mi tirethei tawh suh khai,” a ti a. 16 Tin, LALPAN Mosia hnênah, “Israel-te upa, mipuite upa leh an hotu nia i hriat mi sawmsarihte kha ka hnênah han hruai khâwm la, inbiakna puan inah nangmah nêna ding ho tûrin han hruai rawh. 17 Tichuan, ka lo chhuk ang a, chutah chuan ka rawn bia ang che: tin, nangmaha thlarau chu an chungah ka dah ang a; nangmah chauhva phur lovin mipuite phurrit chu an phurhpui ang che. 18 Tin, nangin mipui hnênah, ‘Naktûk atân hian intithianghlim vek ula; tichuan, sa chu in ei mawlh ang, “Sa ei tûr tuin nge min pe dâwn? Aigupta rama kan nawm nên khân,” tiin LALPA beng hriatah in ṭap a; chuvângin, LALPAN sa a pe ang che u a, in ei mawlh ang. 19 Ni khat emaw, ni hnih emaw, ni nga emaw, ni sâwm emaw, ni sawmhnih emaw mai pawh ni lovin, 20 thla khat pumhlûm, ngei hlui khawp leh luak chhuak hlui khawpin in ei ang; in zînga awm LALPA chu duh lova, “Engati nge Aigupta ram ata kan chhuah ni?” tia a hmaah in ṭah avângin,’ ti ang che,” a ti a. 21 Tin, Mosian, “Ka awmpui mipuiho kea kal thei ṭhiau pawh 6,00,000 an ni a, ‘Thla khat pumhlûm ei tûr sa ka pe ang,’ i ti a. 22 Berâm rual leh ran rual pawh talhsak ila, an khawpkham dâwn em ni? Tuifinriata sangha zawng zawng pawh mansak vek ila, an khawpkham dâwn em ni?” a ti a. 23 Tin, LALPAN Mosia hnênah, “LALPA kut chu a tawi ta em ni? I chungah ka thu angin a thlen leh thlen loh i hre mai ang,” a ti a. 24 Tichuan, Mosia chu a chhuak a, LALPA thu chu mipuite chu a hrilh a; tin, mipuihote upa sawmsarihte chu a ko khâwm a, Puan In vêlah chuan a dintîr a. 25 Chutichuan, LALPA chu chhûmah chuan a lo chhuk a, a rawn bia a, amaha Thlarau chu upa sawmsarihte chungah chuan a dah a; tin, heti hi a ni a, Thlarau chu an chunga a han awm veleh chuan thu an sawi ta dual dual a; nimahsela, chutiang chuan an ti an ti leh tawh lo. 26 Amaherawhchu, bûkah chuan mi pahnih an la awm ta a: pakhata hming chu Eldada a ni a, pakhat leha hming chu Medada a ni. Thlarau chu an chungah a awm a. Chhiarte zînga tel chu an ni a, inbiakna puan inah erawh chuan an kal ve lo; bûkah chuan thu an sawi bual bual a. 27 Tichuan, tlangvâl pakhat a va tlân a, Mosia a va hrilh a, “Eldada leh Medadan bûkah thu an sawi bual bual mai,” a ti a. 28 Tin, Nuna fapa Josua, a tleirâwl tirh aṭanga Mosia rawngbâwltu chuan a chhâng a, “Ka pu Mosi, khap rawh khai,” a ti a. 29 Tin, Mosian a hnênah, “Keimah avânga ngaimawh em i nih? LALPA mi zawng zawngte chu zâwlnei ni vek sela, LALPAN an chungah a thlarau chu dah ṭheuh sela tih nâk alaiin.” a ti a. 30 Tichuan, Mosia chu bûkah chuan a lût leh a, amah leh Israel-ho upate nên.
LALPAN vahmîm a tîr
31 Tin, LALPA hnên aṭang chuan thli a lo tleh a, tuifinriat lam ata vahmîm a rawn lên a, bûk lehlam pang ni khat kal, a lehlam pang ni khat kal ve ve awhin bûk vêl chuan tawng hnih laia sângin a tlâktîr a. 32 Tin, mipuite chuan chumi ni nilêng leh zankhua leh, a tûk nilêng chuan vahmîm chu an va chhar khâwm a, a chhar tlêm ber pawhin homer sâwm a chhar a; bûk vêlah chuan mahni tân an pho ṭheuh va. 33 Tin, chumi sa chu an ei lai, an la ei zawh hmain, mipuite chungah LALPA thin chu a alh ta a, mipuite chu hripui nasa takin LALPAN a hrem ta a. 34 Chumi hmun hmingah chuan Kibroth-hat-tava an ti a; chutah chuan tisa châkna neitute chu an phûm avângin. 35 Tin, Kibroth-hat-tava aṭang chuan mipuite chu Hazeroth-ah an kal a; Hazeroth-ah chuan an awm ta a.
Miriami hrem a ni
1 Tin, Miriami leh Arona chuan Mosian Kus hmeichhia nupuia a neih avangin an sawichhia a: Kus hmeichhia chu a nei ngei si a. 2 Anni chuan, “Mosia hnênah chauh hian em ni LALPAN thu a sawi bîk? Keini hnênah pawh hian a sawi ve lo vem ni?” an ti a. Chu chu LALPAN a lo hria a. 3 Mosia chu lei chunga mihring zawng zawnga zaidam lâwtlak a ni a. 4 Tin, Mosia leh Arona leh Miriami hnênah LALPAN, “In pathumin lo chhuak ula, inbiakna puan inah lo kal rawh u,” a ti ta thut mai a. Tichuan, an pathum chuan an va kal a. 5 Tin, LALPA chu chhûm dingah a lo chhuk a, puan in kawngkaah a lo ding a, Arona leh Miriami chu a ko va; tin, an pahnih chuan an lo chhuak a. 6 Tin, ani chuan, “Ka thu hi ngaithla rawh u: in zîngah hian zâwlnei in awm chuan a hnênah kei LALPA hi inlârnain ka inhriattîr ang a, mang lamah ka bia ang. 7 Ka chhiahhlawh Mosia hi zawng chutiang a ni lo; ka chhûngkaw thu zawng zawngah chuan a rinawm a ni. 8 Ani nên zawng ṭawngkain, thurûk awm lovin tlang takin kan inbia a; LALPA hmêl pawh a hmu ang; chuvângin, ka chhiahhlawh Mosia hi engtiziaa sawichhe ngam nge in nih?” a lo ti a. 9 Tichuan, LALPA chu an chungah a thinur ta êm êm a, a kal leh ta a. 10 Tin, puan in chunga chhûm chu a kiang ta a; tin ngai teh, Miriami chu vûr ang maia varin a lo phâr ta a; Arona chuan Miriami chu a han en a, ngai teh, phâr a lo ni ta reng mai a. 11 Chutichuan, Aronan Mosia hnênah, “Aw ka pu, kan chungah sual nghat lul suh ang che, âtthlâk takin kan lo ti a, kan lo sual ta a ni e. 12 Mi, a nu chhûl ata a lo chhuah tirh aṭanga thi sa deuhthaw angin awm lul suh se,” a ti a. 13 Tichuan, Mosian, “Aw Pathian, tidam leh teh khai,” tiin LALPA chu a au va. 14 Tin, LALPAN Mosia hnênah, “A pain a hmaia chil a chhâk ngawt pawhin ni sarih chu a zak dâwn lâwm ni? Daipâwnah ni sarih bibo sela, chumi zawhah hruai luh leh ni rawh se,” a ti a. 15 Chutichuan, Miriami chu dai pâwnah ni sarih a bibo va; Miriami an hruai luh leh hma chuan mipuite chu an tawl sawn lo va. 16 Chumi zawhah chuan mipuite chu Hazeroth ata an chhuak a, Paran thlalêrah awmhmun an khuar a.
Ram enthlatute
1 Tin, LALPAN Mosia a bia a, 2 “Israela thlahte ka pêk, Kanaan ram va enthla tûrin mite tîr rawh khai: an hnam chhûngkaw tina mi, an puipa zînga mi pakhat ṭheuh zêl i tîr tûr a ni,” a ti a. 3 Tin, Mosia chuan Paran thlalêr aṭang chuan LALPA thupêk angin a kaltîr ta hlawm a, an za chuan Israela thlahte zînga puipa ṭhiau an ni. 4 Hêng hi an hming a ni: Reuben hnam zînga mi Zakura fapa Samua; 5 Simeon hnam zînga mi Horia fapa Saphata; 6 Juda hnam zînga mi Jephunea fapa Kaleba; 7 Isakar hnam zînga mi Josefa fapa Igala; 8 Ephraim hnam zînga mi Nuna fapa Hosea; 9 Benjamin hnam zînga mi Raphua fapa Paltia; 10 Zebulun hnam zînga mi Sodia fapa Gadiela; 11 Josef hnam (Manase hnam an tih) zînga mi Susia fapa Gadia; 12 Dan hnam zînga mi Gemalia fapa Amiela; 13 Aser hnam zînga mi Mikaela fapa Sethura; 14 Napthali hnam zînga mi Vopsia fapa Nabia; 15 Gad hnam zînga mi Makia fapa Geuela. 16 Hêng hi ram enthla tûra Mosian a tirhate hming chu a ni. Nuna fapa Hosea chu Mosian Josua a ti a. 17 Tichuan, Mosian Kanaan ram enthla tûrin anniho chu a tîr a, an hnênah, “Chhim lam kawngah kal phawt ula, tlângahte lâwn chho ula, 18 ram chu eng ang nge tih te, chûnga chêng mipuite chu an chak nge chak lo tih te, an tlêm leh an tam te, 19 an awmna ram chu a ṭha nge ṭha lo tih te, an awmna khuate chu eng ang nge ni, puan in mai nge kulh nei in tih te, 20 tin, ram chu a chênghnâwng nge hnâwng lo, a ngaw nge ngaw lo tihte va thlithlai ula. Tin, huai takin awm ula, chumi ram theirahte chu rawn hâwn ang che u,” a ti a. Grêp rah hmasa rah hun lai tak a ni a. 21 Chutichuan, an chhuak chho ta a, ram chu Zin thlalêr aṭanga Hamath luhna Rehob thlengin an enthla vek a. 22 Chhim lamah an chho phawt a, Hebron an va thleng a, chutah chuan Anaka thlah Ahiman-ho te, Sesai-ho te, Talmai-ho te an awm a (Hebron chu Aigupta rama Zoan din hma kum sariha din tawh a ni). 23 Tin, Eskol ruam an va thleng a, chuta grêp rah bâwr khat, a ṭang chawpin an sât chhum a; tiangin mi pahnihin an zâwn a. Pawmgranet leh theipuite pawh an hâwn bawk a. 24 Chumi hmun chu Eskol ruam an ti a, Israela thlahten chuta ta grêp bâwr chu an sah thlâk avângin. 25 Tin, an ram va enthla chu ni sawmli an thang a, an lo haw leh ta a. 26 Chutichuan, Paran thlalêra Kadesh-ah chuan Mosia leh Arona leh Israel mipui zawng zawng hnên chu an lo thleng a, an hnênah leh mipui zawng zawng hnênah chuan thu an rawn thlen a, chumi ram theite chu an entîr a. 27 Tin, a hnênah, “I mi tirhna ramah chuan kan kal a, hnutetui leh khawizu luanna a lo ni ngei mai; hei hi a rama thei a ni. 28 Amaherawhchu, a rama mi awmte chu mi chak pui pui an ni a, khuate pawh kulh nei, ropui tak tak a ni; tin, Anaka thlahte pawh kan hmu bawk a. 29 Amalek-ho chu chhim lam ramah an awm a; Hit-ho te, Jebus-ho te, Amor-ho te chu tlângahte an awm a; tin, Kanaan-hote chu tuifinriat kam leh Jordan lui dungah an awm,” tiin an hrilh a. 30 Tichuan, Mosia hmaah Kaleban mipui chu a tingawi ṭhuap a, “I han thawk thuai ang u khai, i han la ang u, kan ngam ngei ngei ang,” a ti a. 31 Nimahsela, a kalpuite chuan, “Kan han hneh thei hlawm lo vang â, kan aiin an chak si a,” an ti a. 32 Tichuan, Israela thlahte hnênah an ram han enthlâk chu, “Kan ram han enthlâk chu a chhûnga chêngte ei zawh hmang a ni; tin, a awmte kan hmuh chu mi âwmkhauh pui pui an ni a. 33 Tin, chutah chuan Anaka thlahte, mi lianho, âwmkhauh pui pui kan hmu a; khau ang lekin kan inhmu a, anni pawhin khau ang lekin min hmu a ni,” tiin, a ṭha lo lamin an sawi a.
Mipui an phunnawi
1 Chutichuan, pung khâwmho zawng zawng chu aw chhuah meuhvin an ṭap a; chumi zân chuan mipuite chu an ṭap an ṭap a. 2 Israela thlahte zawng zawng chu Mosia chungah leh Arona chungah an phunnawi a: pung khâwmho zawng zawng chuan an hnênah, “Aigupta ramah khân Pathianin min tihlum ta thên sela aw! A nih loh leh thlalêrah hian min tihlum thên mai sela aw! 3 Engati nge khandaiha thi mai tûra Pathianin he ramah hian min hruai le aw! Kan nupui fanaute chu man tûr mai an ni dâwn si a. Aigupta rama kîr leh hi kan tân a ṭha zâwk dâwn lâwm ni âw?” an ti a. 4 Tichuan, an inbe hlawm a, “Hotu i siam ang u khai, Aigupta ramah i kîr leh ang u,” an ti a. 5 Chutichuan, Mosia leh Arona chu Israela thlah mipui pung khâwmho zawng zawng hmaah chuan an bawkkhup a. 6 Tin, Nuna fapa Josua leh Jephunea fapa Kaleba, ram va enthlatute zînga tel vete chuan an puan an pawt thlêr a; 7 Israela thlah pung khâwmho zawng zawng hnênah chuan, “Enthla tûra kan va fan chhuah ram chu ram ṭha tak a ni a. 8 Kan chunga LALPA a lâwm chuan chu ramah chuan min hruai ang a, min pe ang; hnutetui leh khawizu luanna ram chu. 9 LALPA chungah hel lo phawt mai ula, chumi rama mite chu hlau bawk hek suh u, kan chaw tûr an ni mai a; an inhumhimna chu engmahlo a ni a, LALPA chu kan hnênah a awm alâwm. Anni chu hlau suh u,” tiin an sawi a. 10 Nimahsela, pung khâwmho zawng zawng chuan lunga den an rawt a. Chutichuan, LALPA ropuina chu inbiakna puan inah Israela thlahte zawng zawng hmaah a lo lang a.
Mipui tân Mosia a ṭawngṭai
11 Tichuan, LALPAN Mosia hnênah, “Hêng mipuite hian eng chen nge mi ngaihnêp ang a, an zînga chhinchhiahna ka tih ṭhin chung pawhin eng chen nge mi rin loh dâwn? 12 Hriin ka hrem ang a, ka timang ang a, nangmahah hian an aia ropui leh thiltithei zâwk hnam ka din teh zâwk ang,” a ti a. 13 Tin, Mosian LALPA hnênah, “Aigupta miten an hre reu reu vang e; hêng mipuite hi an zîng ata i thiltihtheihnaa i hruai chhuah an ni si a; 14 hemi rama mite hi an hrilh ang a; hêng mipuite zîngah hian i awm tih an hre tawh a; hmaichhan meuhvin an hmu tawh si chia, i chhûm chu an chungah a awm ṭhîn a; tin, chhûnah chhûm ding, zânah meiin an hma i hruai ṭhîn si a. 15 Hêng mipuite hi i tihhlum phiar chuan i hmingthan hretu chuan, 16 ‘LALPA chuan hêng mipuite hi chhechhama a tiam ramah chuan a hruai theih loh avângin thlalêrah a tihlum a ni,’ tiin an sawi dah ang e. 17-18 ‘LALPA chu thinnel tak, ngilneihna ngah, khawlohna te, bawhchhiatna te ngaidam ṭhîn; thiam lova ruatte chhuah mai ngai lo; pate khawlohna avânga fate, fate fa lehte, chhuan thumna leh chhuan lina thleng pawha hrem ṭhîn a ni,’ tia i lo sawi tawh ang khân i thiltihtheihna chu hlen teh hrâm khai. 19 I ngilneihna a nasat ang ngei leh Aigupta ram ata tûn thlenga i ngaidam ang hian, mipuite khawlohna hi ngaidam teh khai,” a ti a. 20 Tin, LALPA chuan, “I thu ang chuan ka ngaidam e; 21 amaherawhchu, ka nunna leh LALPA ropuina tihkhah leilung chhâlin ka sawi e, 22 Aigupta ram leh thlalêra ka ropuina leh ka thil mak tihte hmua, chuti chung pawha vawi sâwm zet mi la fiaha, ka thu la pawm lo mi zawng zawngte hian, 23 an thlahtute hnêna chhechhama ka tiam ram chu an hmu tawp lo vang a; an zînga mi ngainêptu rêng rêngte pawhin an hmu bawk hek lo vang; 24 ka chhiahhlawh Kaleba erawh hi chuan rilru dang a puta, mi zui takzet avângin, ani hi chu a va kalna ramah chuan ka hruai ang a, a thlahte chuan an luah ang. 25 Khai le, Amalek-ho leh Kanaan-ho chu ruamah chuan an awm a; naktûkah lêt ula, Tuifinriat Sen kawng lam thlalêrah lût rawh u,” a ti a.
Pathianin phunnawiho a hrem
26 Tin, LALPAN Mosia leh Arona a bia a, 27 “Hêng mi suaksual pung khâwmho, ka chunga phunnawi ṭhîn hi eng chen nge ka dawh ang? Israela thlahte phunnawina, ka chunga an phunnawinate chu ka hria e. 28 An hnênah, ‘Ka nunna chhâlin ka sawi e, ka beng hriat ngeia in sawi ang takin in chungah ka ti ang: 29 in ruangte chu he thlalêrah hian a awm ang a; in zînga mi chhiar tawh sa zawng zawng, kum sawmhnih achin chung lam mi ka chunga phunnawiho zawng zawngte chu, 30 bân phar meuhva, “Ka awmtîr ang che u,” ka tih ramah chuan Jephunea fapa Kaleba leh Nuna fapa Josua chauh lo chu in lût tawp lo vang. 31 Amaherawhchu, “Man tûr mai an ni ang,” in tih in fanaute hi chu ka hruai lût ang a, in duh loh ram chu an hria ang. 32 Nangni erawh chu in ruang he thlalêrah hian a awm ang. 33 In fate chu thlalêrah kum sawmli an tei an tei ang a, thlalêra in ruangte a riral hma loh chuan in nawhchizawrhna chu an tuar ang. 34 Ram in va enthlâk ni zât, ni sawmli chu, ni khat aiah kum khat zêl, kum sawmli chhûng zet in bawhchhiatna in tuar phah ang a; tichuan, ka tum dân ka tihdanglam hi in hria ang. 35 Kei LALPA hian mi suaksual pung khâwm, mi dodâla pung khâwmho chungah hei hi ka ti ngei ang ka lo ti tawh a: hemi thlalêrah hian an boral ang a, chutah chuan an thi ang, LALPAN a ti,’ ti rawh u,” tiin. 36-37 Tin, ram enthla tûra Mosia tirh lo kîr leh, ram chanchin a ṭha lo zâwnga rawn sawia, a chunga pung khâwmho phunnawitîrtu, ram a ṭha lo zâwnga rawn sawitute chu LALPA hmaah hriin an thi a. 38 Ram enthla tûra kalte zînga Nuna fapa Josua leh Jephunea fapa Kaleba erawh chu an thi ve lo va.
An luah tûr ram beih hmasak ber ṭum
39 Tichuan, Mosian chûng thute chu Israela thlahte zawng zawng chu a hrilh a, mipuite chu an lungngai ta hle mai a. 40 Chutichuan, zîng takah an tho va, tlâng chhîpah an han chho va, “Ngai teh, hei kan lo kal e, LALPAN min tiamna hmunah chuan kan kal ang e, kan lo sual ta a ni e,” an ti a. 41 Tin, Mosian, “Hmuingîlna a ni lo vang tih hre reng chungin engah nge LALPA thupêk in bawhchhiat teh rêng? 42 In zîngah LALPA a awm si lo va, hmêlmate lo tihhlum mai tûrin chho suh u. 43 In hmaah khian Amalek-ho leh Kanaan-ho an awm a ni, khandaiha tihhlum in ni mai ang; LALPA chu in hawisan tâk avângin in hnênah LALPA chu a awm lo vang,” a ti a. 44 Nimahsela, tlang chhîpah chuan kal an tum ṭâlh a. Amaherawhchu, LALPA thuthlung bâwm leh Mosia chu bûk ata an chhuak ve lo. 45 Chutichuan, chumi tlânga awm Amalek-ho leh Kanaan-ho chu an lo chhuk a, an bei a, Horma thlengin an vaw thlu rum mai a.
Inthawi dân tûr
1 Tin, LALPAN Mosia a bia a, 2 “Israela thlahte bia la, an hnênah, ‘In awmna tûr ram ka pêk che u in thlen huna, 3 LALPA hnêna meia thilhlan, hâlral thilhlan emaw, thutiam hlen tûra inthawina emaw, mahni duh thua thilhlan emaw, in kût hunbiah emaw, ran rual zinga mi emaw, berâm rual zînga mi emawa LALPA tâna rimtui siam tûr emawa in hlan hun chuan, 4 LALPA hnêna a thilhlan hlântu apiangin chhangphut thilhlan, chhangphut dip mi epha hmun lia ṭhena hmun khat, hriak hin hmun lia ṭhena hmun khata hmeh a hlân tûr a ni; 5 tin, in tûr thilhlanah uain hin hmun lia ṭhena hmun khat hâlral thilhlan emaw, inthawina emawa hlannaah berâmno hming kimin in buatsaih tûr a ni. 6 Tin, berâmpaah chuan chhangphut thilhlan, chhangphut dip mi epha hmun sâwma ṭhena hmun hnih, hriak hin hmun thuma ṭhena hmun khata hmeh in buatsaih tûr a ni; 7 tin, in tûr thilhlanah chuan LALPA tâna rimtuiah uain hin hmun thuma ṭhena hmun khat in hlân tûr a ni. 8 Hâlral thilhlanah emaw, thutiam hlen tûra inthawinaah emaw, LALPA hnêna remna thilhlanah emawa bâwngpa in buatsaih hun chuan, 9 bâwngpa hlan rual chuan chhangphut thilhlan chhangphut dip mi epha hmun sâwma ṭhena hmun thum hriak hin chanvea hmeh in hlân tûr a ni. 10 Tin, in tûr thilhlanah uain hin chanve, LALPA tâna rimtui meia thilhlan in hlân tûr a ni. 11 “ ‘Chutiang chuan bâwngpa te, berâmpa te, berâmno a pa te, kêlno te an hming kimin tih tûr a ni. 12 An tam dân azir zêlin in buatsaih ang a, an tam dân ang zêl chuan in hlân tûr a ni. 13 Chumi rama piang zawng zawng chuan hetiang zêl hian, LALPA tâna rimtui meia thilhlan an hlan hunin an ti tûr a ni. 14 Tin, hnam dang mi in hnêna khawsa ṭhîn emaw, tu pawh in hnêna khawsa zêl ṭhîn tûrte emaw, LALPA tâna rimtui meia thilhlan hlân duh apiang chuan in tih ang takin an ti ve tûr a ni. 15 In thlahte thleng atân mipuite leh hnam dang in hnêna awmte tân pawh, dân angkhat chauh a awm tûr a ni; LALPA hmaah hnam dangte chu nangmahni ang chiah an ni ang. 16 In tân leh in hnêna hnam dang awmte tân dân hmun khat leh tih dân hmun khat chauh a awm ang,’ ti rawh,” tiin. 17 Tin, LALPAN Mosia a bia a, 18 “Israela thlahte bia la, an hnênah, ‘Heti hi a ni ang a, ka hruaina tûr che u ram in va thlena, 19 chumi ram chhang in ei hun chuan LALPA hnênah thên thilhlan in hlân tûr a ni. 20 In chhang hmeh hmasak ber zînga mi hlâwm khat chu thên thilhlanah in hlân tûr a ni; hruiha mi thên thilhlanah in thên angin in thên tûr a ni. 21 In thlahte thlengin in chhang hmeh hmasak ber chu LALPA hnêna thên thilhlan atân in hlân zêl tûr a ni. 22-23 “ ‘Tin, hêng thupêk zawng zawng, LALPAN Mosia hnêna a sawi, LALPAN thu a pêk tirh aṭanga in thlahte thleng atâna Mosia hmanga thu a pêk zawng zawng che u hi, in pawm lohva, in bawhchhiat chuan, 24 hetiang hi a ni ang a, pung khâwmhovin hre lova tihpalh a nih chuan, pung khâwmho zawng zawng chuan hâlral thilhlan LALPA tâna rimtuiah bâwngtuai pakhat an hlân ang a, a dân pangngai angin chhangphut thilhlan leh in tûr thilhlan nên, sual thawi nân kêlpa pakhat an hlân tel bawk tûr a ni. 25 Tin, puithiamin Israela thlah pung khâwm zawng zawng tân remna a siam ang a, ngaihdam an ni ang, tihpalh a nih avâng leh an thilhlan, LALPA tâna meia thilhlan leh an tihsual aiah sual thawina an hlân tak avângin; 26 Israela thlah pung khâwm zawng zawngte chu ngaihdam an ni ang a, an zînga hnam dang awmte pawh; mipui zawng zawngin an tihpalh a nih avângin. 27 “ ‘Tin, miin hre lovin thil a tihsual chuan sual thawi nân kêlnu pakhat kum khat mi a hlân tûr a ni. 28 Hre lova LALPA hmaa tisualtu tân chuan puithiamin remna a siam tûr a ni; tichuan, ngaihdam a ni ang. 29 Hre lova tisualtu tân, Israela thlah, chu rama piangte tân leh hnam dang mi an zînga awmte tân pawh dân angkhat in nei tûr a ni. 30 Amaherawhchu, hre reng sia tilui chu, chu rama piang emaw, hnam dang emaw pawh ni sela, LALPA sawichhia a ni a; chu mi chu a chipuite zîng ata tuithlâr tûr a ni. 31 LALPA thu chu a hmuhsita, a thupêk chu a bawhchhiat avângin chu mi chu tuithlâr hlauh tûr a ni a, a khawlohna mawh chu a phur ang,’ ti rawh,” tiin.
Chawlhni bawhchhia
32 Israela thlahte thlalêra an awm lai chuan mi pakhat, Chawlhnia thing fawm hi an hmu a. 33 A thing fawm hmutute chuan Mosia leh Arona leh mipuiho hnênah chuan an hruai a. 34 Engtia tih tûr nge tih la puan loh a nih avângin tân inah an khung a. 35 Tin, LALPAN Mosia hnênah, “Chu mi chu tihhlum ngei ngei tûr a ni, daipâwnah mipui zawng zawng chuan lungin an dêng tûr a ni,” a ti a. 36 Tichuan, LALPAN Mosia thu a pêk ang chuan mipui zawng zawng chuan daipâwnah an hruai a, lungin an dêng hlum ta a.
Puan fêm siam dân tûr
37 Tin, LALPAN Mosia a bia a, 38 “Israela thlahte hnênah an thlahte thlenga an puan hmâwrah a fêm siam tûr leh, a hmâwr tin fêmah a dumpâwl dah tûrin ti rawh: 39-40 chumi fêm chu in en ṭhina, LALPA thupêk zawng zawng in hriat renga in zawm nân leh, nawhchizuara in awm ṭhin anga in thinlung duh zâwng leh, in mit la zâwng ûma in awm loh nân leh, ka thupêk zawng zawngte chu in hriat renga, in zawma, in Pathian tâna in thianghlim theih nân a ni. 41 In Pathian ni tûra Aigupta ram ata hruai chhuaktu che u LALPA in Pathian ka ni. Kei hi LALPA in Pathian chu ka ni,” tiin.
Kora te, Dathana te leh Abirama te helna
1 Levia fapa Kohatha, chu mi fapa Izara, chu mi fapa Kora chu Eliaba fapate, Dathana leh Abirama leh Peletha fapa Ona, Reubena thlahte nên chuan mite an hruai a; 2 Israela thlahte, mi lâr deuh deuh mipui zînga hotu, rorêltua thlante zînga mi zahnih leh sawmngate nên, Mosia hmaah an va thawk a. 3 Mosia leh Arona phiarin an pung khâwm a, an hnênah, “In induh êm mai, mipuite chu an thianghlim ṭheuh si a, LALPA pawh an zîngah a awm si a. Eng vângin nge LALPA mipui pung khâwmho chunga in indah chungnun bîk?” an ti a. 4 Chu chu Mosian a han hriat chuan a bawkkhup a; 5 tin, Kora leh a pâwlte zawng zawng hnênah chuan, “Naktuk zîngah LALPAN a tate leh a thianghlimte chu tilangin amah va hnaih tûrin a ti ang a, a thlante ngei chu amah va hnaih tûrin a ti ang. 6 Nang, Kora leh i pâwlte zawng zawng chuan heti hian ti rawh u: naktûkah mei lâknate keng ula, 7 chutah chuan mei dah ula, LALPA hmaah rimtui phul rawh u; tin, LALPAN a thlan apiang chu a thianghlim ang. Levia fapate u, in induh êm mai,” tiin a sawi a. 8 Tin, Mosian Kora hnênah, “Nangni Levia fapate u, ngaithla rawh u, 9-10 LALPA biakbûka rawngbâwla, mipuite hmaa an rawngbâwla ding tûra Israel-te Pathianin amah hnaih tûra Israel mipuite zîng ata a tihhran che u leh, Levia fapa in unaute zawng zawng nêna amah hnaih tûra a awmtîr che u hi, thil tê thamah in ngai a ni maw, puithiam nihna in la zawn cheu? 11 Chu vâng chuan nang leh i pâwlte zawng zawng LALPA dodâlin in pung khâwm a ni. Tin, Arona hian eng nge maw a tiha, a chungah hian in phunnawi?” a ti a. 12 Tin, Mosia chuan Eliaba fapa Dathana leh Abirama a kohtîr a; anni chuan, “Kan lo chho lo vang; 13 thlalêra mi tihlum tûrin hnutetui leh khawizu luanna ram ata min hruai chhuak hi thil tê tham em ni? Kan chungah i intilal lehnghâl si. 14 Hnutetui leh khawizu luanna ramah min hruai lût lo va, lo leh grêp huan ro tûr min pe bawk hek lo. Hêngho mitte hi chawl i phulsak dâwn em ni? Kan lo chho lo tawp ang,” an ti a. 15 Tichuan, Mosia chu a thin a rim ta hle mai a, LALPA hnênah, “An thilhlan chu pawm suh. An sabengtung pakhat mah ka la lo va, tu mah ka tina hek lo,” a ti a. 16 Tin, Mosian Kora hnênah chuan, “Naktûkah nang leh i mi pung khâwmho, nang nên, anni nên, Arona nên LALPA hmaah lo awm rawh u. 17 An mei lâkna keng ṭheuh sela, rimtui phul sela, LALPA hmaah mei lâkna ṭheuh, mei lâkna 250 chu rawn keng rawh se; nang leh Arona pawhin in mei lâkna keng ve ve rawh u,” a ti a. 18 Tichuan, mi tinin an mei lâkna chu an keng a, mei an dah a, rimtui an phul a, Mosia leh Arona-te nên inbiakna puan in kawngkaah chuan an va ding a. 19 Tin, Kora chuan mipui zawng zawng chu anmahni dodâlin, inbiakna puan in kawngkaah chuan a awm khâwmtîr a; tin, mipui zawng zawng chungah chuan LALPA ropuina a lo lang a. 20 Chutichuan, LALPAN Mosia leh Arona chu a bia a, 21 “Hêng mipui zîng ata hi inthiarfihlîm rawh u, ka rawn tihboral thut theih nân,” tiin. 22 Tichuan, anni chu an bawkkhup a “Aw Pathian, nunna zawng zawng hnâr i ni, mi pakhat sual avângin mipui zawng zawng chungah i thinur dâwn em ni?” an ti a. 23 Tin, LALPAN Mosia a bia a, 24 “Mipuite hnênah chuan, ‘Kora te, Dathana te, Abirama te hi bûk ata kiansan vek rawh u,’ tiin sawi rawh,” a ti a. 25 Tichuan, Mosia chu a tho va, Dathana leh Abirama-te hnênah chuan a va kal a, Israel-ho upate chuan an zui a. 26 Tin, pung khâwmho hnênah chuan, “Hêng mi sualho puan in a ṭangte hian chhuak rawh u khai; an eng mah hi khawih suh u; chuti lo chuan, an sualna zawng zawngah hian in tel ve dah ang e,” tiin a sawi a. 27 Chutichuan, Kora te, Dathana te, Abirama te bûk ata chu an chhuak ta sung sung mai a; tin, Dathana leh Abirama chu an puan in ata an lo chhuak a, an puan in kawngkaah chuan an nupui te, an fapa te, an fanau tê tête nên an ding a. 28 Tin, Mosian, “Keima rilru puakchhuaka tih a ni lo va, hêng thil ti tûr hian LALPAN mi tîr a ni tih hemiah hian in hria ang. 29 Hêng mite hi mi zawng zawng thih dân ang mai bawka an thiha, mi zawng zawng hrem ang bawka hrem an nih chuan Pathianin mi tîr lo a ni ang. 30 Amaherawhchu, LALPAN thil thar a siama, leiin a kâ a âna, anmahni leh an ta zawng zawng a lema, Seol-ah a nunga an luh erawh chuan hêng mite hian LALPA an lo ngainêp a ni tih in hria ang,” a ti a. 31 Tin, heti hi a ni a, chûng thu zawng zawng chu a sawi zawh chuan, an hnuai lei chu a lo khi chat ta phuk mai a; 32 tichuan, lei chuan a kâ a âng a, an chhûngkuain Kora mite zawng zawng, an bungrua zawng zawng nên a lem ta vek hlawm a. 33 Chutichuan, anmahni leh an ta zawng zawng chu Seol-ah chuan a nung chungin an pil ta vek a, lei chuan a kâ a chîp hnan a, pung khâwm zîng ata chu an boral ta a. 34 Tichuan, an vêla Israel mi zawng zawngte chu an au thâwmah chuan an tlân darh a, “Leiin min lem ve dah reu reu vang e,” an ti a. 35 Tin, LALPA aṭangin mei a lo chhuak a, rimtui hlântu mi zahnih leh sawmngate chu a rawn kâng hlum ta a.
Mei lâkna maichâm khuh nân an chher
36 Tin, LALPAN Mosia a bia a, 37 “Nangin mei chu tidarh la, puithiam Arona fapa Eleazara chu mei ata mei lâkna chu la chhuak tûrin hrilh rawh, thil thianghlim a ni si a. 38 Anmahni nunna chunga sualho mei lâknate pawh chu la la, maichâm khuhna thlêngah chher ni rawh se. LALPA hmaa hlan a ni a; chuvângin, a thianghlim a ni; chu chu Israela thlahte tâna chhinchhiahna a ni ang,” tiin. 39-40 Tin, puithiam Eleazara chuan kângho dâr mei lâknate chu a la a, Israela thlahte tâna hriat rengna te, Arona thlah ni lo hnam dang rêng rêng, LALPA hmaa rimtui hâl tûra an kal hnaih loh nân te, Kora leh a pâwlte anga an awm loh nân te, Mosia hmanga a hnêna LALPAN a sawi ang chuan maichâm khuh nân an chher ta a.
Aronan mipuite a chhan
41 Nimahsela, a tûkah chuan, “LALPA mite in tihlum a ni,” tiin Israela thlah mipui zawng zawng chu Mosia leh Arona chungah an phunnawi a. 42 Tin, heti hi a ni a, Mosia leh Arona chunga mipui an pun khâwm lai chuan inbiakna puan in lam chu an hawi a; tin, ngai teh, chhûmin a rawn khuh a, LALPA ropuina a lo lang a. 43 Tin, Mosia leh Arona chu inbiakna puan in kawtah chuan an kal a. 44 Tin, LALPAN Mosia a bia a, 45 “Hêng mipui zîng ata hi inthiarfihlîm rawh u, ka rawn tihboral thut theih nân,” tiin. Tin, anni chu an bawkkhup a. 46 Tin, Mosian Arona hnênah, “I mei lâkna keng la, maichâm ata mei dah la, rimtui phul la, mipui hnênah kalpui thuai la, an tân remna siam rawh; LALPA hnên ata thinurna a lo chhuak a ni. Hri a lêng ṭan mêk a ni,” a ti a. 47 Tin, Arona chuan Mosia sawi ang chuan a keng a, pungho zîngah chuan a tlân lût a; tin, ngai teh, hri chu mipui zîngah chuan a lo lêng ṭan tawh a. Tin, rimtui chu a phul a, mipui tân chuan remna a siam a. 48 Mitthi leh mi nung inkârah a ding a, hri chu a kiang ta a. 49 Tichuan, Kora chungchâng thua thite tiam lovin, hri-a thi zawng zawng chu sîngkhat leh sângli leh zasarih an ni. 50 Tin, Arona chu inbiakna puan in kawngkaa Mosia hnênah chuan a lêt leh a; tichuan, hri chu a kiang ta a.
Arona tiang
1 Tin, LALPAN Mosia a bia a, 2 “Israela thlahte bia la, an chhûngkaw tin pualah tiang pakhat ṭheuh zêl, an chhûngkaw zir zêla an puipate zawng zawng zât, tiang sâwm leh pahnih la la; tin, an tiangah chuan an hming ṭheuh ziak rawh. 3 Tin, Levia tiangah chuan Arona hming ziak ang che: an chhûngkaw tin atân tiang pakhat zêl a ni tûr a ni. 4 Tin, kan inbiakna, inbiakna puan in thuhriattîrna hmaah chuan i dah tûr a ni. 5 Tin, heti hi a ni ang a, ka mi thlan tûra tiang chu a chawr ang a; tichuan, Israela thlahte phunnawina, i chunga an phunnawina hi ka tireh dâwn a ni,” tiin. 6 Chutichuan, Mosia chuan Israela thlahte chu a bia a, an puipate zawng zawng chuan an chhûngkaw tin pualah, puipa tinin tiang pakhat zêl, tiang sâwm leh pahnih an pe a: Arona tiang pawh chu an tiang zîngah chuan a tel ve a. 7 Tichuan, Mosian thuhriattîrna puan inah LALPA hmaah tiangte chu a dah a. 8 Tin, a tûkah chuan Mosia chu thuhriattîrna puan inah chuan a va kal a; tin, ngai teh, Levi chhûngkaw puala Arona tiang chu a lo chawr a, a kuhmûm a, a pâr a, vaiumkhal a lo rah a. 9 Tin, Mosia chuan LALPA hma ata tiang zawng zawng chu Israel-hote hnênah a la chhuak a; an lo en a, anmahni tiang ṭheuh chu an la a. 10 Tin, LALPAN Mosia hnênah, “Helhmang fate an ni tih hriattîr ṭhîn nân Arona tiang chu thuhriattîrna bulah dah leh rawh; tichuan, ka chunga an helna hi i tihrehsak thei dâwn nia, an thih loh nân,” a ti a. 11 Chutiang chuan Mosia chuan a ti a; LALPAN thu a pêk ang chuan a ti a. 12 Tin, Israela thlahte chuan Mosia hnênah, “Ngai teh, kan boral a ni alâwm, kan chhe zo ta, kan chhe zo vek alâwm. 13 LALPA biakbûk rawn hnaih apiangte chu an thi zêl a; kan boral vêk dâwn em ni ang?” an ti a.
Puithiamte leh Levia chite hna
1 Tin, LALPAN Arona hnênah, “Nang leh i fapate leh in chhûngkua hian hmun thianghlim bawhchhiatna mawh chu in phur ang a, puithiamho bawhchhiatna mawh erawh chu nangmah ngei leh i fate chauhvin an phur ang. 2 Tin, Levia chi, i pa chi, i unauten an zawm ve chia, rawng an bâwl theih nân i kiang hnaiah awmtîr la; amaherawhchu, nang leh i fapate chu thuhriattîrna puan in bulah in awm tûr a ni. 3 I hna an puibâwm ang chia, puan in lam hna zawng zawng an chang ang a; amaherawhchu, hmun thianghlim bungbêl leh maichâm chu rawn hnaih suh se, an thih loh nân, anni emaw, nang emaw pawh. 4 Anni chuan an kawp ang chia, puan in lam hna zawng zawngah inbiakna puan in hna chu an chang ang a; hnam dang chuan an rawn hnaih tûr che u a ni lo. 5 Tin, nangin hmun thianghlim hna leh maichâm hna chu i chang ang, Israela thlahte chunga thinurna a awm tawh loh nân. 6 Tin, ngai teh, kei hian i unau Levi-hote chu Israela thlahte zîng ata ka thlang chhuak a, inbiakna puan in rawngbâwl tûra LALPA hnêna pêk, i tâna thilpêk an ni ang. 7 Tin, nang leh i fapate hian maichâm leh puanzâr chhûng lam thu-ah in puithiam hna chu in thawk ang; tin, nangin rawng i bâwl ang. Puithiam hna hi in rawngbâwl hna atân ka pe che u a; hnam dang rawn inrawlh ve apiang erawh chu tihhlum an ni ang,” a ti a.
Puithiamho chanvo tûr
8 Tin, LALPAN Arona a bia a, “Ngai teh, kei hian ka tâna thên thilhlan, Israela fate thilhlan zawng zawngte lain nang leh i fapaten kumkhuaa in chanpual atân ka pe che u a. 9 Meia hâl bâng thil thianghlimte chu i ta a ni ang a: an thilhlan tinrêng - an chhangphut thilhlan te, an sual thawina thilhlan te, an thiam loh thawina thilhlan ka hnêna an hlan tûrte lamin nang leh i fapate pual a ni ang. 10 Thil thianghlim eiin chumi chu in ei ang a, mipa zawngin an ei ang a; i pual a ni ang. 11 Hêng hi i pual a ni ang: chhangphut thilhlana an thilpêk, Israela thlahte thên thilhlan zawng zawngte lamin; nang leh i fapate leh i fanute nên in kumkhaw chanpualah ka pe che u a ni. I ina mi thianghlim zawng zawngin an ei thei ang. 12 Hriak ṭha ber te, grêp ṭha ber te, buh ṭha ber te, rah hmasa ber LALPA tâna an pêkte chu ka pe a che. 13 An lova rah hmin hmasa ber LALPA tâna an rawn lâk chu i ta a ni ang a; i ina mi thianghlim zawng zawngin an ei thei ang. 14 Israel-ho thilhlan zawng zawng chu i ta a ni ang. 15 LALPA tâna an pêk, chhûl keu hmasa ber apiang chu, mihring pawh, ran pawh i ta a ni ang a; amaherawhchu, fa tîr chu i tlan ngei tûr a ni ang a, ran thianghlim lo no piang thla hmasa ber pawh chu i tlan tûr a ni. 16 Thla khat a nihin tlan tûrte chu tlanna man i ruat dân angin, hmun thianghlima hman sekel ngain i tlan tûr a ni (sekel chu gera sawmhnih a ni). 17 Amaherawhchu, bâwngpa piang thla hmasa ber te, berâm piang thla hmasa ber te, kêl piang thla hmasa berte chu i tlan tûr a ni lo; an thianghlim a ni. An thisen chu maichâmah i theh ang a, LALPA tâna rimtuiah an thaute chu meia thilhlanah i hâl tûr a ni. 18 An sa chu i ta a ni ang, thên thilhlan irâwm leh a bawp ding lam i ta a ni ang hian. 19 Thil thianghlima thên thilhlan, Israela thlahten LALPA tâna an hlante chu in kumkhaw chanpual atân ka pe che u a ni; LALPA hmaa nang leh i fapate leh i fanute nêna chatuan chi thuthlung a ni ang.” a ti a. 20 Tin, LALPAN Arona hnênah, “An ramah chuan rochan in nei lo vang a, an zîngah chanvo in nei ve hek lo vang; Israela thlahte zînga i chanvo leh i rochan chu keimah hi ka ni.
Levia chite chanvo tûr
21 “Tin, Levia thlahte chu ngai teh, rawngbâwl hnaa an rawngbâwl hna, puan in rawngbâwl hnaa an rawngbâwl manah Israel rama sâwma pakhat zawng zawng hi ka pe a ni. 22 Tûn achinah chuan Israela thlahte chuan inbiakna puan in chu an rawn hnaih tûr a ni lo; sual mawh phurin an thi dah ang e. 23 Levi-ho hi erawh chuan inbiakna puan in rawngbâwl hna an thawk ang a, a mawh engkim an phur ang; hei hi i thlahte chen atâna dân a ni ang a, Israela thlahte zingah rochan an nei lo vang. 24 Israela thlahten sâwma pakhat LALPA tâna thên thilhlanah an hlan chu Levi-ho rochan atân ka pe a ni; chu vâng chuan an hnênah, ‘Israela thlahte zîngah rochan an nei lo vang,’ ka lo ti tawh rêng a ni,” a ti a.
Levia chite sâwma pakhat pêk dân tûr
25 Tin, LALPAN Mosia a bia a, 26 “Chûng thu lovah pawh chuan, Levi-ho chu bia la, an hnênah, ‘In rochan atâna Israela thlahte sâwma pakhat ka pêk che u an lak ata in dawn hun chuan, chumi sâwma pakhat ata sâwma pakhat chu LALPA hnênah thên thilhlanah in hlân tûr a ni. 27 Tichuan, in thên thilhlan chu hruia buh leh uain haw hmasa bera ngaih a ni ang. 28 Chutiang chuan Israela thlahte laka sâwma pakhat in dawn zawng zawnga mi chu, LALPA tâna thên thilhlanah in hlân ve zêl bawk tûr a ni a; tin, chumi LALPA thên thilhlan chu puithiam Arona in pe tûr a ni. 29 In thil dawn zawng zawnga mi chu a ṭha ber, a thianghlim ber zêl LALPA thên thilhlanah in hlân tûr a ni. 30 Chuvângin, an hnênah, chumia ṭha ber in thên hun chuan Levi-ho hruiha hâwng leh uain hâwng anga ngaih a ni ang. 31 Khawiah pawh in ei thei ang, nangni leh in chhûngte pawhin; inbiakna puan ina in rawngbâwl man a ni si a. 32 A ṭha ber in thên chuan a sual mawh in phur lo vang a, Israela thlahte thil thianghlim chu in tibawrhbâng lo vang a, in thi dâwn lo nia,’ ti rawh,” tiin.
Bâwng sen vâp
1 Tin, LALPAN Mosia leh Arona a bia a, 2 “Hei hi LALPA thupêk dân chu a ni, ‘Israela thlahte chu bâwngla sen hmêlhem lo, sawisêl bo, nghâwngkawl la bel hauh loh rawn kai tûrin hrilh rawh. 3 Puithiam Eleazara i pe ang a; tin, anin daipâwnah a hruai chhuak ang a, a hmaah tuin emaw a tihlum tûr a ni; 4 tin, puithiam Eleazara chuan a kutzungṭangin a thisen chu a la ang a, inbiakna puan in hma lamah a thisen chu vawi sarih a theh ang. 5 Tin, tuin emaw bâwngla chu a mit hmuhah a hâl ang a; a vun te, a sa te, a thisen te, a êk te nên a hâl ang. 6 Tin, puithiamin sidar thing leh husop leh lazai sen a la ang a, bâwngla an hâlah chuan a paih lût tûr a ni. 7 Tin, puithiam chuan a silhfênte a su ang a, a inbual ang a, chumi zawhah chuan riahhmunah a kal ang a; tlai lam thlengin puithiam chu a thianghlim lo vang. 8 Tin, a hâltu chuan a silhfênte a su ang a, a inbual ang a, tlai lam thlengin a thianghlim lo vang. 9 Tin, mi bawrhbâng lovin bâwngla vâp chu a la khâwm ang a, daipâwn hmun faiah a dah ang a, Israela thlah mipuite tâna inthenna tuiah hman tûr a ni; chu chu sual thawina a ni. 10 Tin, bâwngla vâp tikhâwmtu chuan a silhfênte a su ang a, tlai lam thlengin a thianghlim lo vang. Hei hi Israela thlahte tân leh hnam dang an hnêna awmte tân kumkhaw dân tûr a ni.
Ruang khawih
11 “ ‘Tu ruang pawh a dektu apiang chu ni sarih an thianghlim lo vang. 12 Chu mi chu ni thum niah leh ni sarih niah a inthian ang a; tichuan, a lo thianghlim ang. Amaherawhchu, ni thum niah leh ni sarih niah a inthen loh chuan a thianghlim lo vang. 13 Tu pawhin tu ruang pawh a deha, a inthen loh chuan LALPA biakbûk a tibawlhhlawh a ni. Chu mi chu Israel mite zîng ata tuithlâr tûr a ni. Inthenna tui chu a chungah theh loh a nih avângin a thianghlim lo vang; a thianghlim lohna chu a chhûngah a la awm a ni. 14 Mi, puan ina a thih chuan hei hi a tih dân tûr chu a ni: puan ina lût apiang leh puan in chhûnga awm apiangte chu ni sarih an thianghlim lo vang a; 15 tin, bungbêl inhawng, a chhinnaa chhin loh apiang chu a bawlhhlawh a ni. 16 Tin, tu pawhin tâmlakah khandaiha thah emaw, awmlaia thi ruang emaw, mihring ruh emaw, thlân emaw a deh chuan ni sarih a thianghlim lo vang. 17 “ ‘Tin, a thianghlim lote pualah sual thawina vâp chu an la ang a, bêlah tuikhur tui nên an chhûng ang. 18 Tin, mi thiangin husop a la ang a, tuiah chuan a hnim ang a, puan in te, bungbêl zawng zawng te, chuta mi awm zawng zawng te, ruh emaw, thah ruang emaw, mitthi ruang emaw, thlân emaw khawihtute chu a theh ang. 19 Mi thiangin ni thum ni leh ni sarih niah mi thianghlim lo chu a theh ang a; ni sarih niah a tithianghlim ang a; a silhfênte a su ang a, a inbual ang a, tlai lamah chuan a lo thianghlim tawh ang. 20 Mi thianghlim lo inthian lo erawh chuan LALPA hmun thianghlim a tihbawlhhlawh avângin, chu mi chu pung khâwmho zîng ata tuithlâr tûr a ni. Inthenna tui chuan theh loh a ni a; a thianghlim lo a ni. 21 Hei hi an tân kumkhaw dân tûr a ni: inthenna tuia theh apiang chuan an silhfênte an su ang a; tin, inthenna tui khawih apiang chu tlai lam thlengin an thianghlim lo vang. 22 Tin, mi thianghlim lovin a khawih apiang chu a thianghlim lo zêl ang a; tin, chu mi khawihtu apiangte chu tlai lam thlengin an thianghlim lo vang,’ ” tiin.
Kadesh hmuna thil thleng
1 Tin, Israela thlah, pung khâwmho zawng zawngte chu thla khatnaah chuan Zin thlalêrah an lût a, mipuite chuan Kadesh-ah awmhmun an khuar a; chutah chuan Miriami chu a thi a, chutah chuan an phûm a. 2 Tin, pung khâwmho chuan tui an nei ta lo va; Mosia leh Arona chungchâng thu-ah an inpun khâwm chiam a. 3 Tin, mipui chuan, “LALPA hmaa kan unaute an thih lai khân Pathianin min lo tihlum ve ta thên zâwk sela aw! 4 Engati nge LALPA mipuihote hi thi tûra thlalêrah hian i hruai luh ni, keimahni leh kan rante nên? 5 Eng vângin nge he ram ṭha lo taka min hruai lût tûrin Aigupta ram ata min tihchhuah ni? Buhbâl te, theipui te, grêp kûng te, pawmgranet te awm lohna hmun a ni a, tui in tûr rêng rêng lah a awm hek lo,” tiin Mosia chu an bei vak a. 6 Tin, Mosia leh Arona chu mipui zîng ata chu inbiakna puan in kawngkaah an kal a, an bawkkhup a; tin, LALPA ropuina an hnênah a lo lang a. 7 Tichuan, LALPAN Mosia chu a bia a, 8 “Tiang la la; pung khâwmhote chu awm khâwmtîr la, nang leh i unau Arona nên. An mit hmuhah lungpui chu a tui tichhuak tûrin hrilh la, lungpui ata chu tui i lâk chhuahsak ang a; tichuan, pung khâwmho leh an rante chu i intîr dâwn nia,” tiin. 9 Chutichuan, Mosia chuan LALPA hma ata tiang chu a thupêk ang chuan a la a. 10 Mosia leh Arona chuan pung khâwmho chu lungpui bulah chuan an awm khâwmtîr a, an hnênah, “Helhmanghote u, ngai teh u, he lungpui ata hi tui kan lâk chhuahsak dâwn che u em ni?” an ti a. 11 Tin, Mosia chuan a bân a phar a, lungpui chu a tiang chuan vawi hnih a han vua a; tichuan, tui a lo chhuak ta dur dur mai a, pung khâwmhote leh an rante chuan an in ta a. 12 Tin, LALPAN Mosia leh Arona hnênah chuan, “Mi rin lohva, Israela thlahte mit hmuha mi chawimawi loh avângin, hêng pung khâwmho hi ka pêk ramah chuan in hruai lo vang,” a ti a. 13 Hei hi Meriba tuite chu a ni; Israela thlahte chuan LALPA chu an bei vak a, chutah chuan chawimawia a awm tâk avângin.
Edom lalin a ram pal tlang a phal lo
14 Tin, Mosian Kadesh aṭangin Edom lal hnênah mi a tîr a, “I unaupa Israela chuan heti hian a ti, ‘Kan chunga tuarna lo thleng zawng zawng hi i hria a; 15 kan pi leh pute Aigupta rama an chhuka, rei tak Aigupta rama kan awm te, Aigupta miten keini leh kan pi leh pute ṭha lo taka min tih ziate kha. 16 Tichuan, LALPA kan au va, kan aw chu a lo hria a, vântirhkoh a rawn tîr a, Aigupta ram ata min hruai chhuak a; tin, ngai teh, i ram dep ber khua Kadesh-ah kan awm e. 17 Khawngaih takin i ram hi kan kal tlang teh ang. Lo emaw, grêp huanah emaw kan kal lo vang a, tuichhunchhuah tuite kan in hek lo vang; Lal Lamlianah kan kal zêl ang a, i ram kan pelh hma loh chuan ding lamah emaw, vei lamah emaw kan pêng lo vang,’ ” a ti a. 18 Tin, Edoma chuan a hnênah, “Mi pal tlang tûr a ni lo, mi pal chuan a bei tûr chein khandaih nên ka lo thawk ang,” a ti a. 19 Chutichuan, Israela thlahte chuan a hnênah, “Lamlianah kan kal chho vang a; tin, keimahni leh kan ranin i tui kan in chuan a man chu kan pe ang che; thil dang eng mah ti lovin a kalin kan kal tlang mai ang e,” an ti a. 20 Tin, ani chuan, “Kal lo vang,” a ti a. Tichuan, Edoma chu mipui tam tak nên, mi chak takte nên anmahni bei tûrin a lo thawk ta a. 21 Edoma chuan Israel mite chu a rama kal a phal ta lo va; tichuan, Israel mite chuan an kîrsan leh ta a.
Arona thih thu
22 Tichuan, Kadesh aṭangin an chhuak a; Israela thlah, mipuiho zawng zawng chuan Hor tlâng an va thleng a. 23 Tin, LALPAN Mosia leh Arona chu, Edom ram dep Hor tlângah chuan a bia a, 24 “Arona chu a chipuite hnênah hruai a ni ang; Meriba tuiahte khân ka thu dodâla in hel avâng khân Israela thlahte ka pêk ramah chuan a lût dâwn lo a ni. 25 Arona leh a fapa Eleazara chu Hor tlângah rawn hruai chho rawh; 26 Arona chu a silhfênte hlihsak la, a fapa Eleazara bel rawh; Arona chu a chipuite hnênah hruai a ni ang a, chutah chuan a thi ang,” tiin. 27 Tin, Mosia chuan LALPA thupêk ang chuan a ti a, mipui zawng zawng mit hmuhah Hor tlângah chuan an chho va. 28 Tichuan, Mosia chuan Arona chu a silhfênte a hlihsak a, a fapa Eleazara a bel a; tin, Arona chu tlâng chhîpah chuan a thi ta a. Tichuan, Mosia leh Eleazara chu tlâng ata chu an chhuk a. 29 Tin, mipui zawng zawng chuan Arona a thi tih an hriat chuan, Israel-ho zawng zawng chuan ni sawmthum an sûn a.
Kanaan mite an hneh
1 Tin, Kanaan mi, Arad lal Chhim lama awmin Israel mite Atharim kawngah an lo kal tih sawi thâwm a hria a; tichuan, Israel mite chu a bei a, salahte a man nual a. 2 Tin, Israel mite chuan LALPA hnênah thu an tiam a, “Hêng mite hi kan kuta min pêk chuan an khuate hi kan tiboral hlauh ang e,” an ti a. 3 Tichuan, LALPAN Israel mite thu chu a pawm a, Kanaan mite chu a pe a, anmahni leh an khuate chu an tiboral hlauh va; a hmun hmingah chuan Horma an vuah a.
Dâr rûl khai
4 Tin, Hor tlâng aṭang chuan Tuifinriat Sen lamah Edom ram kal hualin an kal a; kawng a kual avângin mipuite rilru chu a lungni lo hle mai a. 5 Mipuite chuan Pathian leh Mosia kalhin, “Thlalêra thi tûrin engati nge Aigupta ata min hruai chhuah? Chhang awm hlei lo, tui pawh awm hlei lo; he chhang tenawm pawh hi kan nunnain a ten tawh a ni,” an ti a. 6 Chutichuan, LALPAN mipui zîngah chuan rûl chuk na mite a tîr a, mite a chu a, Israel mite tam tak an thi a. 7 Tin, mite chu Mosia hnênah an kal a. “LALPA leh nangmah kalhin kan lo ṭawng ta hi kan lo sual ta a ni e, kan zînga rûlte hi tibo tûrin LALPA hnênah ṭawngṭai rawh khai,” an ti a; tichuan, mite chu Mosia chuan a ṭawngṭaisak a. 8 Tin, LALPAN Mosia hnênah, “Rûl chuk na mi, a lem siam la, banah khai rawh; tin, heti hi a ni ang a, rûl chuk apiangin chu chu an en chuan an dam ang,” a ti a. 9 Chutichuan, Mosian dâr rûl a siam a, banah a khai a; tin, heti hi a ni a, rûl chuk apiangin dâr rûl chu an enin an dam zêl a.
Hor tlâng aṭangin Moab phaiah an kal
10 Tin, Israela thlahte chu an kal ta zêl a, Oboth-ah awmhmun an khuar a. 11 Tin, Oboth aṭang chuan an kal leh a, ni chhuahna lam Moab thlalêr bul Iye-abarim-ah awmhmun an khuar a. 12 Chuta ṭang chuan an kal leh a, Zered ruamah awmhmun an khuar a. 13 Chuta ṭang chuan an kal leh a, Amor-ho ramri aṭanga lo filawr thlalêra Arnon lehlam pangah awmhmun an khuar a; Arnon chu Moab ramri, Moab leh Amor-ho inkâra awm a ni a. 14 Chuvângin, LALPA Indonate Buah chuan “Supha-a Vaheb, Arnon ruamte, 15 Ar awmna lama thle Moab rama innghat Ruam awihtlân pangpêrte chu,” tia sawi a ni. 16 Chuta ṭang chuan Beer-ah an kal leh a; chu chu LALPAN Mosia hnêna, “Mipuite chu ko khâwm la, tui ka pe ang e,” a tihna tuichhunchhuah chu a ni. 17 Tin, he hla hi Israel-ten an sa a: “Aw tuikhur, lo chik chhuak la, zaiin chawi la, 18 Lalten an laih tuikhur chu. An lal tiang leh an talhtuma Mipuite mi lianho laih chu.” Tin, thlalêr aṭang chuan Matana-ah an kal leh a; 19 tin, Matana aṭangin Nahaliel-ah, Nahaliel aṭang chuan Bamoth-ah, 20 Bamoth aṭang chuan Moab lova ruam leh thlalêr zuk chhuk en Pisga chhîpah.
Lal Sihona leh Oga an titlâwm
21-22 Tin, Israel mite chuan Amor-ho lal Sihona hnênah, “I ramah hian min kal tlangtîr rawh khai. Lovah emaw, grêp huanah emaw kan pêng lo vang a; tuichhunchhuah tuite chu kan in lo vang. I ram kan pelh hma loh chuan Lal Lamlianah kan kal zêl ang e,” tiin mi an tîr a. 23 Nimahsela, Sihona chuan Israel mite chu a rama kal tlang a phal lo va. Tichuan, Sihona chuan a mite zawng zawng chu a khâwm vek a, Israel mite bei tûrin thlalêrah chuan an thawk chhuak ta zâwk a, Jahaz a va thleng a; tin, Israel mite chu a bei a. 24 Tin, Israel mite chuan khandaihin an bei a, a ram chu Arnon aṭanga Jabok thlengin, Amona thlahte thleng hialin an neihsak a; Amona thlahte ram chu kulha hung tlat a ni. 25 Tin, Israel mite chuan chûng khua zawng zawngte chu an la a; tichuan, Israel mite chu Amor-ho khua zawng zawngahte chuan an awm a, Hesbon leh a khawper zawng zawngahte pawh chuan. 26 Hesbon khua chu Amor-ho lal Sihona khua a ni a, ani chu chumi hmaa Moab lal lo beia a kut ata a ram zawng zawng, Arnon thlenga lâksaktu a ni. 27 Chuvângin, hlaa phuahtute chuan, “Hesbon-ah lo kal ula, Sihona khawpui chu din leh tihngheh ni se; 28 Hesbon aṭangin mei a chhuak a, Sihona khawpui aṭangin meialh; Moab-a Ar a kâng zo va, Arnon hmun sâng lalhote chu. 29 I chung a pik e, Moab! In boral ta, aw Kemos mi! A fapate chu tlân bo atân, A fanute salah a pe, Amor-ho lal Sihona hnênah. 30 Kan han kâp a, Hesbon a boral, Dibon thlengin, Nopha thlengin kan tiṭiau, Chu chuan Medeba a thleng,” an ti. 31 Chutiang chuan a ni, Amor-ho ramah Israel mite chu an awm. 32 Tin, Mosian Jazer va thlîthlai tûrin mi a tîr a, chuta khuate chu an la a, Amor-ho awmte chu an hnawt chhuak a. 33 Tin, an lêt a, Basan kawng lamah an chho va. Tin, Basan lal Oga chu anmahni bei tûrin, amah leh a mite zawng zawng, Edrei-a lo bei tûrin a thawk chhuak a. 34 Tin, LALPAN Mosia hnênah, “Amah chu hlau suh; amah pawh, a mite zawng zawng pawh, a ram pawh i kutah ka pe tawh a ni; Hesbon-a awm Amor-ho lal Sihona chunga i tih angin i ti tûr a ni,” a ti a. 35 Chutichuan, amah pawh, a fapate pawh, zuah rêng rêng nei lovin a mite zawng zawng nên an that a; a ram chu an luahsak ta a.
Moab lalin Balaama a sâwm
1 Tin, Israela thlahte chu an kal zêl a, Jeriko zâwn Jordan râla Moab phaiahte awmhmun an khuar a. 2 Tin, Zipori fapa Balaka chuan Israel miten Amor-ho an tih dân zawng zawng chu a hria a. 3 Tin, Moab-hote chuan mite chu an hlau hle mai a, an tam si a; Israela thlahte avâng chuan Moab-hote chu an mangang a. 4 Tichuan, Moab-hote chuan Midian-ho upate hnênah, “Hêng mipuite hian bâwngin hlobet an pet zo angin kan vêla mi zawng zawng an pet zo dâwn e,” an ti a. Chumi lai chuan Zipori fapa Balaka chu Moab lal a ni a. 5-6 Tin, ani chuan, “Ngai teh, hnam pakhat, Aigupta ram aṭanga lo chhuakho an lo awm a; ngai teh, leilung an dâp a, min depah an awm a! Khawngaih takin lo kal la, hêng mite hi ânchhia min va lawhsak teh khai, keia tân chuan an chak lutuk a ni. Kan that theiin, kan ngam theiin, kan ram ata hi kan hnawt chhuak thei mial mahna; mal i sâwm apiangte chu malsâwmin an awm a, ânchhia i lawh apiangte chu ânchhe dawngin an awm ṭhîn tih ka hre si a,” tia ko tûrin a thlahte awmna ram Lui kama Pethor-ah Beora fapa Balaama hnênah mi a tîr a. 7 Tichuan, Moab upate leh Midian upate chu aien man tûr kengin an chhuak ta a, Balaama hnên chu an va thleng a, Balaka thuchah chu an hrilh a. 8 Tin, ani chuan an hnênah, “Zânin chu hetah riak ula, LALPAN min hrilh ang angin in hnênah thu ka rawn thlen ang che u,” a ti a. Tichuan, Moab mi liante chu Balaama hnênah chuan an riak ta a. 9 Tin, Balaama hnênah chuan Pathian a lo kal a, “I hnêna mite hi tute nge ni?” a ti a. 10-11 Tin, Balaama chuan Pathian hnênah, “Zipori fapa Moab lal Balaka chuan ka hnênah, ‘Ngai teh, Aigupta ram aṭanga lo kal hnam chuan leilung an dâp a. Lo kal la, ânchhia mi va lawhsak rawh, ka do theiin ka hnawt chhuak thei mial mahna,’ tiin mi a rawn tîr a ni,” a ti a. 12 Tin, Pathianin Balaama hnênah chuan, “An hnênah i kal tûr a ni lo. Chung mite chu ânchhia i lawh tûr a ni lo, mal ka sâwmte an ni e,” a ti a. 13 Tichuan, Balaama chu zîngah a tho va, Balaka mi liante hnênah chuan, “In ramah haw leh tawh u; LALPAN in hnêna kal tûra chhuah a phal lo a ni,” a ti a. 14 Chutichuan, Moab mi liante chu an tho va, Balaka hnênah an kal a, “Balaama chuan kan hnêna lo kal a duh lo,” a ti a. 15 Tin, Balaka chuan mi lian tam lehzual, an aia ropui zâwk a tîr leh a. 16 Tin, Balaama hnên an va thleng a, a hnênah, “Zipori fapa Balaka chuan heti hian a ti a ni, ‘Ka hnêna i lo kal hi eng mahin dâl teh suh se; 17 mi ropui takah ka siam ang chia, ka hnêna i sawi apiang chu ka ti zêl ang. Chuvângin, lo kal hrâm la, hêng mite hi ânchhia mi va lawhsak teh hrâm khai,’ a ti,” an ti a. 18 Tin, Balaama chuan Balaka mite chu a chhâng a, an hnênah, “Balaka hian a in chu tangka leh rangkachaka khatin mi pe dâwn mah sela, eng khaw tê mah LALPA ka Pathian thu bawhpêlin ka ti thei lo. 19 Chuvângin, LALPAN ka hnênah engtin nge a sawi leh dâwn teh rêng, zânin pawh hetah riak teh phawt u khai,” a ti a. 20 Tin, zânah chuan Balaama hnênah Pathian chu a lo kal a, a hnênah, “Heng mite hi nangmah kova lo kal an nih chuan, tho la, an hnênah kal rawh; amaherawhchu, i hnêna ka sawi chauh hi i ti tûr a ni,” a ti a. 21 Tichuan, Balaama chu zîngah a tho va, a sabengtung a thuam a, Moab mi liante hnênah chuan a kal ta a.
Balaama leh a sabengtung
22 Tin, a kal avâng chuan Pathian thin chu a lo alh ta a; tin, LALPA vântirhkoh chu a lo dang tûrin kawngah a lo ding a. A sabengtung chunga chuang a ni a, a chhiahhlawhte pahnih a hnênah chuan an awm ve a. 23 Tin, sabengtung chuan LALPA vântirhkoh, khandaih kenga kawnga ding chu a hmu a; tichuan, sabengtung chu kawng ata chu a pêng a, ram lakah a kal a. Tin, Balaama chuan sabengtung chu kawnga lêttîr tumin a vua a. 24 Tin, LALPA vântirhkoh chu grêp huan pal leh pal inkâr khuarah a ding a. 25 Tin, sabengtung chuan LALPA vântirhkoh chu a hmu a, pal chu a va nghêng a, Balaama ke chu palah chuan a nghêng bet a; tichuan, a vaw leh a. 26 Tin, LALPA vântirhkoh chu piah leh deuhvah a kal a, hmun chêp lai tak, ding lam emaw, vei lam emaw pawha pênna awm lohna lai takah a ding a. 27 Tin, sabengtung chuan LALPA vântirhkoh chu a hmu a, Balaama chu a bawhpui ta a; tichuan, Balaama thin chu a lo alh ta a, a tiangin sabengtung chu a vua a. 28 Chutichuan, LALPAN sabengtung chu a ṭawngtîr a, Balaama hnênah chuan, “Eng ka tih che nge, hetia vawi thum zet mi vuak tâk?” a ti a. 29 Tin, Balaaman sabengtung hnênah chuan, “Mi tihnawmnah avângin a ni. Khandaih phei chu lo keng ila, ka tihlum tawh hial ang che chu,” a ti a. 30 Tin, sabengtung chuan Balaama hnênah, “Tûn thlenga i chuan fona i sabengtung ka ni lâwm ni? Hetiang hian ka ti ngai che em ni?” a ti a. Ani chuan, “Ti ngai lo ve,” a ti a. 31 Tin, LALPAN Balaama mit chu a tihvârsak a; tichuan, LALPA vântirhkoh, khandaih kenga kawnga ding chu a hmu ta a; a kûn a, hmaia lei siin a bawkkhup a. 32 Tin, LALPA vântirhkoh chuan a hnênah, “Engati nge hetia vawi thum tlawng i sabengtung i vuak? Ngai teh, ka hmaah hian i kal lohna tûra i kal avângin lo dang tûr chein ka lo chhuak a ni. 33 Sabengtung chuan mi hmu a, ka hmaah vawi thum a pêng a nih kha; pêng lo phei sela chu ani chu tihlum si lovin ka tihlum hial ang che chu,” a ti a. 34 Tin, Balaama chuan LALPA vântirhkoh hnênah, “Ka lo sual ta a ni; mi dang tûrin kawngah i ding tih ka hre si lo va. Chuvângin, i lâwm loh chuan ka kîr leh mai ang e,” a ti a. 35 Tin, LALPA vântirhkoh chuan Balaama hnênah, “Heng mite hnênah hian kal la; amaherawhchu, i hnêna ka thusawi chauh i sawi tûr a ni,” a ti a. Chutichuan, Balaama chu Balaka mi liante hnênah chuan a kal ta a.
Moab lal Balakan Balaama a lo lâwm
36 Tin, Balakan Balaama a lo kal tih a hriat chuan, Arnon lama an ramri chin Moab khawpui thlengin a va hmuak a. 37 Tin, Balaka chuan Balaama hnênah, “Ṭhahnemngai taka ko tûr chein mi ka rawn tîr a ni lâwm ni? Engati nge ka hnênah i lo kal duh loh? Mi ropui takah ka siam thei lo che em ni?” a ti a. 38 Tin, Balaama chuan Balaka hnênah, “Ngai teh, hei ka lo kal ta a; eng pawh mai sawi theihna rêng rêng ka nei em ni? Pathianin ka kâa thu a dah chauh ka sawi dâwn a ni,” a ti a. 39 Tichuan, Balaama chu Balaka hnênah chuan a kal ta a, Kiriath-huzoth an va thleng a. 40 Tin, Balaka chu bâwng leh berâmin a inthawi a, Balaama leh a hnêna mi lian awmte chu a pe a. 41 Tin, heti hi a ni a, a tûk zîngah Balaka chuan Balaama chu a hruai a, Baala hmun sângahte chuan a chhohpui a, chuta ṭang chuan mipui awmna chin zawng zawng a hmu phâk a.
Balaama hrilh lâwkna hmasa
1 Tin, Balaama chuan Balaka hnênah, “Hetah hian maichâm pasarih min siam la, bâwngpa pasarih leh berâmpa pasarih min buatsaihsak rawh khai,” a ti a. 2 Balaka chuan Balaama sawi ang chuan a ti a; tin, Balaka leh Balaama chuan maichâm tinah chuan bâwngpa pakhat leh berâmpa pakhat an hlân a. 3 Tin, Balaama chuan Balaka hnênah, “I hâlral thilhlan bulah hian lo ding reng la, kei chu ka han kal hrang ang a; LALPA chu mi be tûrin a lo kal mai pawh a ni thei a, mi hrilh apiang chu ka hrilh ang che,” a ti a. Tichuan, tlâng kawlh vel vulah a han kal a. 4 Tin, Pathianin Balaama chu a lo tâwk a; tin, Balaama chuan a hnênah, “Maichâm pasarih chu ka siam tawh a; tin, maichâm tinah chuan bâwngpa pakhat leh berâmpa pakhat ka hlân ṭheuh va,” a lo ti a. 5 Tin, LALPAN Balaama kâah chuan thu a dah a, “Balaka hnênah chuan kîr leh ta la, va sawi chhâwng rawh,” a ti a. 6 Tichuan, a hnên lamah chuan a lêt leh ta a; tin, ngai teh, a hâlral thilhlan bulah chuan a lo ding reng a, amah leh Moab mi lian zawng zawngte nên. 7 Tin, ani chuan thu chu a sawi ta a. “Aram ata Balakan min hruai a, Chhak lam tlânga Moab lal chuan, ‘Lo kal la, Jakob-ho ânchhia min lawhsak rawh, Lo kal la, Israel-ho min demsak rawh,’ 8 Engtin nge Pathian ânchhe lawh loh ka lawh ang? Engtin nge Pathian dem loh ka dem ang? 9 Lungpui chung aṭangtein anni chu ka hmu si a, Tlâng aṭangtein anni chu ka hmu a, Ngai teh, hnam hrang daih an ni, Hnam dang zînga telh loh tûr an ni. 10 Jakob-ho vaivut chu tu nge chhiar thei ang a, Israel-ho hmun lia ṭhena hmun khat chu tu nge chhiar thei ang? Mi fel thih angin thi ve ila, Ka tâwpna chu a tâwpna ang ni se!” a ti a. 11 Tin, Balaka chuan Balaama hnênah, “I mi tih dân hi engtizia nge ni? Ka hmêlmate ânchhe lawh tûrin ka hruai chia, hei, mal i sâwm ta hlauh zâwk si!” a ti a. 12 Ani chuan a chhâng a, “LALPAN ka kâa a dah chu ka sawi ngei tûr a ni lâwm ni?” a ti a.
Balaama hrilh lâwk vawi hnihna
13 Tin, Balaka chuan a hnênah, “Hmun dangah i kal leh teh ang, chuta ṭang chuan i hmu thei hlawm ang a; an awmna chin zawng zawng i hmu ang a, an za erawh chuan i hmu vek kher lo vang; chuta ṭang chuan ânchhia min lawhsak ang che,” a ti a. 14 Tichuan, Zophim-ho awmna Pisga chhîpah a hruai chho va, maichâm pasarih a siam a, maichâm tinah chuan bâwngpa pakhat leh berâmpa pakhat a hlân a. 15 Tin, Balaka hnênah chuan, “Sawlaia LALPA ka va biak hlânin i hâlral thilhlan bulah hian lo ding reng rawh,” a ti a. 16 Tin, LALPAN Balaama chu a lo tâwk a, a kâah chuan thu a dah a, “Balaka hnênah kîr leh ta la, a hnênah va sawi chhâwng rawh,” a ti a. 17 Tin, a hnênah chuan a va kal a, ngai teh, a hâlral thilhlan bulah chuan a lo ding reng a, Moab mi liante pawh a hnênah chuan an awm ve a. Tin, Balaka chuan a hnênah, “LALPAN eng nge a lo sawi?” a ti a. 18 Tichuan, ani chuan thu chu a sawi ta a: “Tho la, Balak, ngaithla rawh; Zipori fapa, ka thu ngai rawh. 19 Pathian chu dâwt hmang mihring a ni lo va, Inlamlêt hmang hringfa a ni hek lo. A sawi tawh chu a ti lo vang em ni? A lo sawi tawh chu a tipuitling lo vang em ni? 20 Ngai teh, malsâwm tûrin thu ka hmu, Mal a sâwm tawh a, ka tidanglam thei lo. 21 Jakob-ho khawlohna rêng a hmu lo va, Israel-hovah chhiatna rêng ka hmu hek lo. LALPA an Pathian chuan a awmpui a, An lal atân an hmang a ni. 22 Aigupta aṭangin Pathianin a hruai chhuak hlawm, Sele tha ang mai an pu a, 23 Jakob-ho chungah dawi âtna a awm lo. Israel-ho chungah dawi vaihna a awm hek lo. Jakob-ho leh Israel-ho hnênah Pathian thiltih chu tihlan zêl a ni. 24 Ngai teh, mipuite chu sakeibakneipui angin an tho va, Sakeibaknei angin an zuang tho va, An sa seh an ei hma chuan an mu lâwng, An seh thisen an in hma chuan,” a ti a. 25 Tin, Balaka chuan Balaama hnênah, “Anchhia lawh hek suh la, malsâwm hek suh,” a ti a. 26 Nimahsela, Balaama chuan a chhâng a, Balaka hnênah, “ ‘LALPAN a sawi zawng zawng chu ka ti ngei tûr a ni,’ tiin ka hrilh che a ni lâwm ni?” a ti a.
Balaama hrilh lâwk vawi thumna
27 Tin, Balaka chuan Balaama hnênah, “Hawh teh, hmun dangah ka hruai teh ang che; chuta ṭang chuan ânchhia min lawhsak Pathianin a remti mial dah law maw,” a ti a. 28 Tichuan, Balaka chuan Balaama chu thlalêr zuk chhuk en Peor chhîpah a hruai chho va. 29 Tin, Balaaman Balaka hnênah chuan, “Hetah hian maichâm pasarih min siamsak la, bâwngpa pasarih leh berâmpa pasarih min buatsaihsak rawh,” a ti a. 30 Tin, Balaka chuan Balaama sawi ang chuan a ti a, maichâm tinah chuan bâwngpa pakhat leh berâmpa pakhat a hlân a.
1 Chutichuan, Israel-ho malsâwmsak chu LALPA duh zâwng a ni tih Balaaman a hriatin, ni danga a tih ang khân dawi âtna lam ti tûra kal lovin thlalêr lam a pan ta zâwk a. 2 Tin, Balaama chu a vanvadâk a, Israel mite chu an hnam dân zir zêla awm a hmu a; tin, Pathian thlarau a chungah a lo thleng a. 3 Tin, thu chu a sawi ta a: “Beora fapa Balaama, Mit vâra, 4 Pathian thute hriaa, Engkimtitheia inlârna hmua, Tlu bawkkhupa mit lo vâr ta chuan, 5 ‘Aw Jakob-ho, in puan inte chu a va ṭha êm! Aw Israel-ho, in biakbûkte chu! 6 Ruam angin a pharh duai a, Lui kama huan ang, LALPA phun sasua ang, Lui kama sidar thingte ang an ni. 7 Ruahtui tam tak a dawng ang a, Tui tamna hmunah thlai chîte a chîng ang. A lal chu Agaga aiin a ropui ang a; A ram chu chawimawiin a awm ang. 8 Aigupta ata Pathianin a hruai chhuak a, Sele tha ang mai an pu a, An hmêlma, hnam dangte chu an ei zo vang a, An thalin an kâp tlang ang. 9 An kûn a, sakeibaknei angin an bawk a, Sakeibakneipui ang maiin; tu nge titho ngam ang? Malsâwmtu apiang che u chu malsâwmin awm sela, Anchhe lawhtu apiang che u chu ânchhe lawhin awm rawh se,’ a ti,” a ti a. 10 Tichuan, Balaama chungah chuan Balaka thin chu a alh a; Balaka chuan Balaama hnênah, “Ka hmêlmate ânchhe lawh tûrin ka ko chia, hei, vawi thum zet mal i sâwm ta a. 11 Chuvângin, i awmnaah kal bo daih rawh; ropui taka chawisân che ka rilrûk a ni a; nimahsela, ngai teh, LALPAN chawisân che a dâl ta a nih hi,” a ti a. 12-13 Tin, Balaama chuan Balaka hnênah, “Balaka hian a in chu tangkarua leh rangkachaka khatin min pe dâwn mah sela, a ṭha lam emaw, a chhe lam emaw, keima rilru puakchhuak chuan LALPA thu piah lam chu eng mah ka ti thei lo; ‘LALPAN a sawi apiang chu ka sawi ang,’ tiin i mi tirhte hnênah pawh ka sawi rêng a ni lâwm ni?
Balaama hrilh lâwkna hnuhnûng ber
14 “Ngai teh, ka mite hnênah ka kal tawh ang a, hawh teh, hêng mite hian tûn hnua i mite chunga an tih dân tûr ka hrilh teh ang che,” a ti a. 15 Tin, ani chuan thu chu a sawi ta a: “Beora fapa Balaama, Mit vâra, 16 Pathian thute hriaa, Chungnungbera hriatna hriaa, Engkimtitheia inlârna hmua, Tlu bawkkhupa mit lo vâr ta chuan, 17 Nakin hnua a awm dân tûr ka hmu a, Tûn mai piah lam ka hmuhsak a: ‘Jakoba aṭangin lal tiang a lo chhuak ang a, Israela aṭangin arsi a lo chhuak ang a, Moab ram tluanin a chhun tlang ang a, Setha thlahte a titlâwm ang. 18 A hmêlma ṭhîn Edom leh Seir-te chu a chang ang, Israel-te chan a ṭhat chhûng zawng. 19 Jakoba aṭangin tu emaw a lal ang a, Khuaa la awm chhunte chu a tiboral ang,’ a ti,” a ti a. 20 Tin, Amalek lam a hawi a, thu chu a sawi a, “Amalek chu hnam bul ber a ni na a, A lêr lam chu boralna a ni,” a ti a. 21 Tin, Ken lam a hawi a, thu chu a sawi a, “I awmna hmun chu a nghet a, I bu chu lungpuia chheh a ni. 22 Mahse, Kain chu a ṭiau vang a, Assur-hovin sala an hruai bo che thlengin,” a ti. 23 Tin, thu chu a sawi leh a, “Pathianin hetianga a tihin tu nge nung thei ang le? 24 Mahse, Kittim ram aṭangin lawngte a lo thleng ang a, Assur an tihrehawm ang a, Eber an tihrehawm ang a, Ani pawh a boral ang,” a ti a. 25 Tichuan, Balaama chu a tho va, a khaw lamah a haw ta a; Balaka pawh chu a haw ve ta a.
Peor hmun an thleng
1 Tichuan, Israel-ho chu Sitim-ah an awm a; tin, Moab-ho fanute chu an pâwl ta hlawm a. 2 An pathiante hnêna an inthawinaahte chuan an sâwm a; tichuan, an ei a, an pathiante chu chibai an bûk ve a. 3 Tin, Israel-ho chuan Peor hmuna Baala chu an pawm ve ta a; tichuan, Israel-ho chungah LALPA thin chu a alh ta a. 4 Chutichuan, LALPAN Mosia hnênah, “Mipuite hotu zawng zawng chu hruai la, LALPA thinurna ṭihbaiawm tak mai chu Israel-ho chung ata a kian theih nân, chhûn êngah LALPA hmaah khai hlum rawh,” a ti a. 5 Tin, Mosian Israel-ho rorêltute hnênah chuan, “Peor hmuna Baala pawm apiangte chu tihlum vek rawh u,” a ti a. 6 Tin, ngai teh, Israela thlahte zinga mi pakhatin inbiakna puan in kawngkaa an ṭah lai takin, Mosia mit hmuhah leh Israel-ho pung khâwmte mit hmuhah, Midian hmeichhe pakhat a chhûngte hnênah a rawn hruai a. 7 Tin, puithiam Arona fa Eleazara fapa Phinehasan a han hmuh chuan pung khâwmho zîng ata chu a tho va, fei a chuh a; 8 tin, Israel mi chu puan in chhûngah chuan a ûm lût a, Israel mi nên an pahnih chuan a chhun tlang a, hmeichhia chu a pumah. Chutichuan, Israela thlahte chunga hremna chu a reh ta a. 9 Chumi hremnaa thite chu sînghnih leh sângli an ni. 10 Tin, LALPAN Mosia a bia a, 11 “Puithiam Arona fa Eleazara fapa Phinehasa hian ka thîk anga an zînga a thîkna chuan ka thinurna chu Israela thlahte lak ata a tikiang ta a; tichuan, ka thîkna chuan Israela thlahte chu ka tiboral lo vang a. 12 Chuvângin, ‘Ngai teh, ka inremna thuthlung chu a chungah ka thlung ang a; 13 tin, amah leh a hnua a thlahte tân kumkhaw puithiam nihna thuthlung a ni ang a; a Pathian tân a thîka, Israela thlahte tân inremna a siam avângin,’ ti rawh,” tiin. 14 Israel mi an thah, Midian hmeichhia nêna an thah tâka hming chu Zimria, Simeon-ho zînga an chhûngkaw puipa Salua fapa a ni a. 15 Tin, Midian hmeichhia an thah tâka hming chu Kozbi, Zura fanu a ni; ani chu Midian-ho chhûngkaw zînga an hotu a ni. 16 Tin, LALPAN Mosia a bia a, 17 “Midian-ho chu bei ula, titlâwm rawh u; 18 Peor hmunah an bum che u a, hrem tâk Midian-ho mi lian fanu, Kozbi an thah tâk chungchâng thu-ah in chungah thil dik lo tak an tih avâng hian,” tiin.
Chhiarpui vawi hnihna
1 Tin, hremna a reh hnuah chuan heti hi a ni a, LALPAN Mosia leh puithiam Arona fapa Eleazara chu a bia a, 2 “Israela thlahte pung khâwmho zawng zawng chu, kum sawmhnih achin chung lam, a chi chiin Israel rama râlkai chin zawng zawng chhiar vek rawh u,” tiin. 3 Tichuan, Mosia leh puithiam Eleazara chuan Jeriko zâwn, Jordan kam, Moab phaiah anniho chu an bia a, 4 “Mipuite chu kum sawmhnih achin chung lam chhiar rawh u,” tiin, LALPAN Mosia leh Aigupta ram aṭanga lo chhuak Israela thlahte hnêna thu a pêk ang khân. 5 Israela fa tîr chu Reubena a ni a. Reubena fapate: Hanok-ho chhûngkaw zînga mi Hanoka; Palu-ho chhûngkaw zînga mi Palua; 6 Hezron-ho chhûngkaw zînga mi Hezrona; Karmi-ho chhûngkaw puipa Karmia. 7 Hêngho hi Reuben-ho chhûngkua an ni: chhiar tling zawng zawngte chu 43,730 an ni. 8 Palua thlah, Eliaba. 9 Tin, Eliaba thlahte: Nemuela, Dathana, Abirama an ni. Hêng Dathana te leh Abirama te hi an ni, LALPA an beih laia Mosia leh Arona beitu Kora pâwla tel pung khâwmho thlahte chu; 10 tin, chumi pâwl an thih lai chuan leiin a kâ a âng a, Kora te nên chuan a lem tlâng a, meiin mi zahnih leh sawmnga a lem ṭum khân; tichuan, chhinchhiahna an lo ni ta a. 11 Amaherawhchu, Kora fapate chu an thi lo. 12 A chhûngkua kuain Simeona thlahte: Nemuela thlahte Nemuel-ho, Jamina thlahte Jamin-ho; Jakina thlahte Jakin-ho; 13 Zera thlahte Zera-ho; Saula thlahte Saul-ho an ni. 14 Hêngho hi Simeona thlahte chu an ni a, 22,200 an ni. 15 A chhûngkua kuain Gada fapate: Zephona thlahte Zephon-ho; Hagia thlahte Hagi-ho; Sunia thlahte Suni-ho; 16 Oznia thlahte Ozni-ho; Eria thlahte Eri-ho; 17 Aroda thlahte Arod-ho; Arelia thlahte Areli-ho. 18 Hêngho hi an chhiar dân anga Gada fapate thlahte chu an ni a, 40,500 an ni. 19 Tin, Juda fapate, Era leh Onana: Era leh Onana chu Kanaan ramah an thi a. 20 Tin, Juda thlahte chhûngkaw kal dân chu hetiang hi a ni: Sela thlahte Sela-ho; Pereza thlahte Perez-ho; Zera thlahte Zera-ho an ni. 21 Tin, Pereza thlahte chu: Hezrona thlahte Hezron-ho; Hamula thlahte Hamul-ho an ni. 22 Hêngho hi an chhiar dân anga Juda fapate thlahte chu an ni a, 76,500 an ni. 23 A chhûngkua kuain Isakara thlahte: Tola thlahte Tola-ho; Pua thlahte Pu-ho; 24 Jasuba thlahte Jasub-ho; Simrona thlahte Simron-ho an ni. 25 Hêng hi an chhiar dân anga Isakara fapate thlahte an ni a, 64,300 an ni. 26 A chhûngkua kuain Zebuluna thlahte: Sereda thlahte Sered-ho; Elona thlahte Elon-ho; Jahleela thlahte Jaleel-ho an ni. 27 Hêng hi an chhiar dân anga Zebulun-ho thlahte chu an ni a, 60,500 an ni. 28 A chhûngkua kuain Josefa thlahte: Manasea leh Ephraima. 29 Manasea thlahte: Makira thlahte Makir-ho; tin, Makiran Gileada a hring a; Gileada thlahte Gilead-ho an ni. 30 Hêng hi Gileada thlahte an ni: Iezera thlahte Iezer-ho; Heleka thlahte Helek-ho; 31 Asriela thlahte Asriel-ho; Sekema thlahte Sekem-ho; 32 Semida thlahte Semida-ho; Hephera thlahte Hepher-ho an ni. 33 Tin, Hephera fapa Zelophehada chuan fapate nei lovin fanute a nei a: Zelophehada fanute hming chu Malai te, Novai te, Hoglai te, Milkai te, Tirzai te an ni. 34 Hêngte hi Manasea thlahte an ni. An chhiar zawngte chu 52,700 an ni. 35 Hêng hi a chhûngkua kuain Ephraima thlahte an ni: Suthela thlahte Suthel-ho; Bekera thlahte Beker-ho; Tahana thlahte Tahan-ho an ni. 36 Tin, hêng hi Suthela thlahte an ni: Erana thlahte Eran-ho an ni. 37 Hêng hi an chhiar dân anga Ephraima thlahte chhûngkua an ni a, 32,500 an ni. Hêng hi an chhûngkaw indawt dân ang zêla Josefa thlahte an ni. 38 A chhûngkua kuain Benjamina thlahte: Bela thlahte Bela-ho; Asbela thlahte Asbel-ho; Ahirama thlahte Ahiram-ho; 39 Suphama thlahte Supham-ho; Huphama thlahte Hupham-ho an ni. 40 Tin, Bela thlahte chu Arda leh Naamana an ni: Arda thlahte Ard-ho; Naamana thlahte Naaman-ho an ni. 41 Hêng hi an chhûngkaw indawt dân ang zêla Benjamina thlahte an ni; tin, an chhiar zawngte chu 45,600 an ni. 42 Hêng hi a chhûngkua kuain Dana thlahte an ni: Suhama thlahte Suham-ho an ni. Hêng hi an chhûngkaw indawt dân ang zêla Dana thlahte an ni. 43 Suham-ho thlahte zawng zawng an chhiar dân ang chuan 64,400 an ni. 44 Hêng hi a chhûngkua kuain Asera thlahte: Imna thlahte Imna-ho; Isvia thlahte Isvi-ho; Beria thlahte Beria-ho an ni. 45 Beria thlahte: Hebera thlahte Heber-ho; Malkiela thlahte Malkiel-ho an ni. 46 Asera fanu hming chu Seri a ni. 47 Hêng hi Asera fapate thlahte an chhiar zawngte chu an ni a, 53,400 an ni. 48 A chhûngkua kuain Naphtalia thlahte: Jazeela thlahte Jazeel-ho; Gunia thlahte Guni-ho; 49 Jezera thlahte Jezer-ho; Silema thlahte Silem-ho an ni. 50 Heng hi an chhûngkaw indawt dân ang zêla Naphtalia thlahte an ni; an chhiar zawngte chu 45,400 an ni. 51 Hêng hi Israela thlah an chhiar zawngte chu an ni a, 6,01,730 an ni. 52 Tin, LALPAN Mosia a bia a, 53 “Hêngho hi an tam lam ang zêlin ram hi semsak tûr a ni. 54 A tam deuhte chu ram i pe tam ang a, a tlêm deuhte chu ram i pe tlêm ang a; chhiar dân ang chuan ram pêk ṭheuh tûr a ni. 55 Amaherawhchu, ṭhumvâwrin ram chu sem tûr a ni; an pute hnam hming indawt dân ang zêlin ram chu an chang ang. 56 Ṭhumvâwr ang zêlin ram chu a tam leh a tlêmte hnênah sem a ni ang,” a ti a. 57 Tin, hêng hi Levi-ho chhûngkua kuaa chhiarte chu an ni: Gersona thlahte Gerson-ho; Kohatha thlahte Kohath-ho; Meraria thlahte Merari-ho an ni. 58 Hêngho hi Levia thlahte an ni: Libna thlahte, Hebrona thlahte, Mahlia thlahte, Musia thlahte, Kora thlahte an ni. Tin, Kohatha chuan Amrama a hring a. 59 Tin, Amrama nupui hming chu Jokebedi, Levia fanu, Aigupta rama Levia laka piang a ni a; tin, ani chuan Amrama lakah Arona leh Mosia leh an farnu Miriami a hring a. 60 Tin, Arona chuan Nadaba te, Abihua te, Eleazera te, Ithamara te a hring a. 61 Tin, Nadaba leh Abihua chu LALPA hmaa hman loh tûr chi mei an hman lai khân an thi a. 62 Tin, chhiar zawng zawng mipa thla khat achin chung lam zawng zawngte chu 23,000 an ni. Israel mite zîngah ram sem chang ve tûr an nih loh avângin Israel mite zîngah chhiar an ni lo va. 63 Hêngte hi a ni Jeriko zâwn, Jordan kam, Moab phaia Israela thlahte chhiartu Mosia leh puithiam Eleazaran an chhiarte chu. 64 Sinai thlalêra Israel mite Mosia leh puithiam Aronan an chhiarte kha pakhat mah awm an awm tawh lo. 65 LALPAN, “Thlalêrah an thi ngei ngei tûr a ni,” a lo ti tawh si a. Jephunea fapa Kaleba leh Nuna fapa Josua lo chu tu mah dam an awm tawh lo.
Zelophehada fanute chungchâng
1 Tin, Josefa fapa Manasea thlah, Manasea fa Makira, chu mi fa Gileada, chu mi fa Hephera fapa Zelophehada fanute chu an lo kal a; a fanute hming chu: Malai te, Novai te, Hoglai te, Milkai te, Tirzai te a ni. 2 Tin, inbiakna puan in kawngkaah Mosia leh puithiam Eleazara leh mi lianho leh pung khâwmho zawng zawng hmaah chuan an va ding a, 3 “Thlalêrah khân kan pa a thi a, LALPA bei tûra pung khâwm pâwl, Kora pâwlah khân a tel ve lo ve; nimahsela, ama sual avângin a thi a, fapa a nei lo va. 4 Fapa a neih loh avâng maiin engah nge kan pa hming chu a thlahte zîng ata a bo vang? Kan pa unaute zîngah chanvo min pe ve rawh u,” an ti a. 5 Tin, Mosian an thu chu LALPA hmaah a thlen a. 6 Tin, LALPA chuan Mosia a bia a, 7 “Zelophehada fanute chuan an tidik a ni; an pa unaute zîngah chanvo i siam ngei tûr a ni a, an pa chanvo chu i pe tûr a ni. 8 Tin, Israela thlahte hnênah, ‘Mi, fapa nei lova a thih chuan a ro chu a fanute in pe tûr a ni. 9 Tin, fanu a neih loh chuan a ro chu a unaute in pe tûr a ni. 10 Tin, unaute a neih loh chuan a ro chu a pa unaute in pe tûr a ni. 11 Tin, a pain unaute a neih loh chuan a ro chu a laichîn in pe ang a, anin a khâwm ang. Tin, LALPAN Mosia thu a pêk angin Israela thlahte tân dân thupêk nghet a ni ang,’ tiin sawi rawh,” tiin.
Mosia aiawh tûrin Josua thlan a ni
12 Tin, LALPAN Mosia hnênah, “Abarim tlângah khian han chho la, Israela thlahte ka pêk tûr ram han thlîr rawh. 13 Tin, i han hmuh zawh chuan i unaupa Arona chu a chipuite hnênah hruai a ni ang bawkin nang pawh hruai i ni tawh ang. 14 Zin thlalêra pung khâwmho an phunnawi laia an mit hmuhah tuiah khân, mi chawimawi tûra ka thupêk che kalha i hel avâng khân,” a ti a (Chûng chu Zin thlalêra Kadesh-a Meriba tuite chu a ni). 15 Tin, Mosian LALPA a bia a, 16-17 “LALPA, nunna zawng zawng hnâr Pathian chuan, LALPA mi pung khâwmte chu vêngtu nei lo berâm anga an awm loh nân pung khâwm chunga hotu, an hma hruaia, anmahni hruai chhuaka hruai lûttu tûr ruat rawh se,” tiin. 18 Tin, LALPAN Mosia hnênah, “Nuna fapa, mi rilru nei tak Josua chu hruai la, a chungah i kut nghat la, 19 puithiam Eleazara leh pung khâwmho hmaah dintîr la, an mit hmuhah thuneihna pe rawh. 20 Tin, Israela thlah pung khâwmho zawng zawngin a thu an awih theih nân thuneihna hlân rawh. 21 Tichuan, ani chu puithiam Eleazara hmaah a ding ang a, anin LALPA hmaah Urim hmangin thu a la ang a; a thuin an chhuak ang a, a thuin an lût ang, amah leh Israela thlah zawng zawngte, pung khâwmho zawng zawngte nên,” a ti a. 22 Tin, Mosia chuan LALPA thupêk ang chuan a ti a. Josua chu a hruai a, Eleazara leh pung khâwmho zawng zawng hmaah chuan a dintîr a. 23 Tin, a chungah a kut a nghat a, Mosia hmanga LALPAN a sawi ang khân thuneihna a pe ta a.
Hlan reng tûr thilhlan
1 Tin, LALPAN Mosia a bia a, 2 “Israela thlahte chu thu pe la, an hnênah, ‘Ka chaw, ka tâna rimtui meia thilhlan, ka hnênah thilhlan chu a hun tak zêl ṭheuhvah in hlan tûr a ni,’ ti la. 3 Tin, an hnênah, ‘Hei hi meia thilhlan LALPA hnêna in hlan tûr chu a ni: berâmno a pa, kum khat mi, sawisêl bo, ni tin pahnih, hâlral thilhlan hlan reng atân. 4 Berâmno pakhat chu zîngah in hlân ang a, pakhat chu tlai lamah in hlân ang a, 5 chhangphut thilhlan atân chhangphut dip mi epha hmun sâwma ṭhena hmun khat, hriak sâwr hin hmun lia ṭhena hmun khata chawhpawlh nên. 6 LALPA tâna meia thilhlan, rimtui atâna Sinai tlânga ruat hâlral thilhlan hlan reng tûra kha a ni. 7 Tin, berâmno pakhat hlannaa in tûr thilhlan chu, hin hmun lia ṭhena hmun khat a ni tûr a ni; LALPA tâna uain, in tûr thilhlan chu hmun thianghlimah i bun chhuak tûr a ni. 8 Tin, berâmno pakhat chu tlai lamah i hlân tûr a ni; zîng lama chhangphut thilhlan ang leh chumia in tûr thilhlan ang bawk chu, LALPA tâna rimtui atân meia thilhlan chu i hlân tûr a ni.
Sabbath nia hlan tûr
9 “ ‘Tin, Chawlhniah berâmno, a pa kum khat mi sawisêl bo pahnih leh, chhangphut thilhlan atân chhangphut dip mi, epha hmun sâwma ṭhena hmun hnih hriaka chawhpawlh leh, chumia in tûr thilhlan nên i hlân tûr a ni; 10 hei hi Chawlhni apianga hâlral thilhlan reng leh, chumia in tûr thilhlan tiam lova hâlral thilhlan hlan tûr chu a ni.
Thla thara hlan tûr
11 “ ‘Tin, in thla thar apiangah LALPA tân hâlral thilhlan in hlân tûr a ni: bâwngpatuai pahnih leh berâmpa pakhat leh berâmno a pa kum khat mi sawisêl bo pasarih; 12 tin, bâwngpa tinah chhangphut thilhlan atân chhangphut dip mi, hriaka chawhpawlh epha hmun sâwma ṭhena hmun thum; tin, berâm pakhatah chhangphut thilhlanah chhangphut dip mi hriaka chawhpawlh hmun sâwma ṭhena hmun hnih; 13 tin, berâmno tinah chhangphut thilhlanah chhangphut dip mi, hriaka chawhpawlh hmun sâwma ṭhena hmun khat; hei hi hâlral thilhlan rimtui LALPA tân meia thilhlan a ni. 14 Tin, an in tûr thilhlan chu bâwngpa pakhatah uain hin chanve a ni ang a, berâmpa pakhatah hin hmun thuma ṭhena hmun khat, berâmno pakhatah hin hmun lia ṭhena hmun khat; hei hi kum tluana thla tin hâlral thilhlan a ni. 15 Tin, LALPA hnêna sual thawi nân kêlpa pakhat in hlân tûr a ni; hâlral thilhlan hlan reng leh chumia in tûr thilhlan tiam lovin.
Chhang dawidim telh loh kûta hlan tûr
16 “ ‘Tin, thla khatna, ni sâwm leh ni li ni chu LALPA kalhlên kût a ni. 17 Tin, chumi thla ni sâwm leh ni nga ni chu ruai ni a ni ang; ni sarih chu chhang dawidim telh loh ei tûr a ni ang. 18 Ni khat ni chuan inkhâwmpui thianghlim a awm ang a; eng hna mah in thawk tûr a ni lo. 19 Meia thilhlan hâlral thilhlan erawh chu LALPA hnênah in hlân tûr a ni: bâwngpatuai pahnih leh berâmpa pakhat leh berâmno a pa kum khat mi pasarih; in ngaiha sawisêl bo a ni tûr a ni. 20 Chhangphut dip mi, hriaka chawhpawlh, an chhangphut thilhlan nên: bâwngpa pakhatah hmun sâwma ṭhena hmun thum, berâmpa pakhatah hmun sâwma ṭhena hmun hnih; 21 berâmno pasarih chu beramno pakhatah hmun sâwma ṭhena hmun khat a ni tûr a ni; 22 tin, in tâna inremna siamna tûrin sual thawi nân kêlpa pakhat. 23 Hêng hi zînga thilhlan, hâlral thilhlan hlan reng tiam lovin in hlân tûr a ni. 24 Hetiang hian LALPA tâna rimtui, meia thilhlan ei tûr chu ni tin, ni sarih in hlân tûr a ni; hâlral thilhlan hlan reng leh chumia in tûr thilhlan tiam lovin. 25 Tin, a ni sarih ni chuan inkhâwmpui thianghlim in nei ang a, eng hna mah in thawk tûr a ni lo.
Pâwl kûta thil hlan tûr
26 “ ‘Tin, in chawlhkâr kût, in buh thar tirh kût LALPA tâna thil thar chhangphut thilhlan in hlan ni pawhin, inkhâwmpui thianghlim in nei ang a; eng hna mah in thawk tûr a ni lo. 27 LALPA tâna rimtui hâlral thilhlan erawh chu in hlân tûr a ni: bâwngpatuai pahnih, berâmpa pakhat, berâmno a pa kum khat mi pasarih; 28 an chhangphut thilhlan, chhangphut dip mi hriaka chawhpawlh nên: bâwngpa pakhatah hmun sâwma ṭhena hmun thum, berâmpa pakhatah hmun sâwma ṭhena hmun hnih, 29 berâmno pasarih, berâmno pakhat ṭheuhvah hmun sâwma ṭhena hmun khat; 30 in tana inremna siam nân kêlpa pakhat nên (in ngaiha sawisêl bo a ni tûr a ni). 31 Hâlral thilhlan hlan reng leh, chumia chhangphut thilhlan leh in tûr thilhlan tiam lovin in hlân tûr a ni.
Kum thar ni kûta hlan tûr
1 “ ‘Tin, thla sarihna, a ni khat ni chuan inkhâwmpui thianghlim in nei ang a; eng hna mah in thawk tûr a ni lo. In tân tawtawrâwt ham ni a ni tûr a ni. 2 LALPA tâna rimtuiah hâlral thilhlan in hlân ang a; bâwngpatuai pakhat, berâmpa pakhat, berâmno a pa kum khat mi sawisêl bo pasarih. 3 An chhangphut thilhlan, chhangphut dip mi hriaka chawhpawlh, bâwngpa pakhatah hmun sâwma ṭhena hmun thum, berâmpa pakhatah hmun sâwma ṭhena hmun hnih, 4 berâmno pasarih, pakhat ṭheuhvah hmun sâwma ṭhena hmun khat; 5 in tâna inremna siam nân sual thawina kêlpa pakhat nên; 6 thla thar hâlral thilhlan leh chumia chhangphut thilhlan te, hâlral thilhlan hlan reng leh chumia chhangphut thilhlan te, in tûr thilhlan te, an tih dân pângngai LALPA tâna rimtuia meia thilhlante tiam lovin.
Inremna nia thil hlan tûr
7 “ ‘Tin, he thla sarihna, ni sâwm ni hian inkhâwmpui thianghlim in nei ang a. Chaw in nghei tûr a ni a, eng hna mah in thawk tûr a ni lo. 8 LALPA tâna rimtuiah hâlral thilhlan erawh chu in hlân tûr a ni: bâwngpa pakhat, berâmpa pakhat, berâmno a pa kum khat mi pasarih; 9 in ngaiha sawisêl bo a ni tûr a ni. An chhangphut thilhlan, chhangphut dip mi hriaka chawhpawlh, bâwngpa pakhatah hmun sâwma ṭhena hmun thum, berâmpa pakhatah hmun sâwma ṭhena hmun hnih, 10 berâmno pasarih, berâmno pakhat ṭheuhvah hmun sâwma ṭhena hmun khat; 11 sual thawi nân kêlpa pakhat nên; inremna tûra sual thawina te, hâlral thilhlan hlan reng te, chumia chhangphut leh an in tûr thilhlante tiam lovin.
Bâwkte kûta hlan tûr
12 “ ‘Tin, thla sarihna, ni sâwm leh ni nga niah inkhâwmpui thianghlim in nei ang a; eng hna mah in thawk lo vang a, LALPA tân ni sarih in kût tûr a ni. 13 Tin, LALPA tâna rimtuiah meia thilhlan, hâlral thilhlan in hlân tûr a ni: bâwngpatuai sâwm leh pathum, berâmpa pahnih, berâmno a pa kum khat mi sâwm leh pali; sawisêl bo ṭheuh a ni tûr a ni. 14 An chhangphut thilhlan, chhangphut dip mi hriaka chawhpawlh, bâwngpa sâwm leh pathum, bâwngpa pakhatah hmun sâwma ṭhena hmun thum, berâmpa pahnih, berâmpa pakhatah hmun sâwma ṭhena hmun hnih, 15 berâmno sâwm leh pali, berâmno pakhatah hmun sâwma ṭhena hmun khat; 16 sual thawi nân kêlpa pakhat nên; hâlral thilhlan hlan reng, chumia chhangphut thilhlan te, in tûr thilhlante tiam lovin. 17 “ ‘Tin, a ni hnih niah bâwngpatuai sâwm leh pahnih, berâmpa pahnih, berâmno a pa kum khat mi, sawisêl bo, sâwm leh pali in hlân tûr a ni; 18 an chhangphut thilhlan leh in tûr thilhlan a dân ang takin an tam dân ang zêlin bâwngpa tân te, berâmpa tân te, berâmno tân te, 19 sual thawi nân kêlpa pakhat nên; hâlral thilhlan hlan reng te, chumia chhangphut thilhlan te, in tûr thilhlante tiam lovin. 20 “ ‘Tin, a ni thum ni chuan bâwngpa sâwm leh pakhat, berâmpa pahnih, berâmno a pa kum khat mi sawisêl bo sâwm leh pali; 21 an chhangphut thilhlan leh in tûr thilhlan a dân ang takin an tam dân ang zêlin bâwngpa tân te, berâmpa tân te, berâmno tân te, 22 sual thawi nân kêlpa pakhat nên; hâlral thilhlan hlan reng leh chumia in tûr thilhlan tiam lovin. 23 “ ‘Tin, a ni li ni chuan bâwngpa sâwm, berâmpa pahnih, berâmno a pa kum khat mi sawisêl bo sâwm leh pali; 24 an chhangphut thilhlan leh in tûr thilhlan, a dân ang takin an tam dân ang zêlin bâwngpa tân te, berâmpa tân te, berâmno tân te, 25 sual thawi nân kêlpa pakhat nên; hâlral thilhlan hlan reng te, chumia chhangphut thilhlan leh in tûr thilhlante tiam lovin. 26 “ ‘Tin, a ni nga ni chuan bâwngpa pakua, berâmpa pahnih, berâmno a pa kum khat mi sawisêl bo sâwm leh pali; 27 an chhangphut thilhlan leh in tûr thilhlan, a dân ang takin an tam dân ang zêlin bâwngpa tân te, berâmpa tân te, berâmno tân te, 28 sual thawi nân kêlpa pakhat nên; hâlral thilhlan hlan reng te, chumia chhangphut thilhlan leh chumia in tûr thilhlante tiam lovin. 29 “ ‘Tin, a ni ruk ni chuan bâwngpa pariat, berâmpa pahnih, berâmno a pa kum khat mi sawisêl bo sâwm leh pali; 30 an chhangphut thilhlan leh in tûr thilhlan, a dân ang takin an tam dân ang zêlin bâwngpa tân te, berâmpa tân te, berâmno tân te, 31 sual thawi nân kêlpa pakhat nên; hâlral thilhlan hlan reng te, chumia chhangphut thilhlan leh chumia in tûr thilhlante tiam lovin. 32 “ ‘Tin, a ni sarih ni chuan bâwngpa pasarih, berâmpa pahnih, berâmno a pa kum khat mi sawisêl bo sâwm leh pali; 33 an chhangphut thilhlan leh in tûr thilhlan, a dân ang takin an tam dân ang zêlin bâwngpa tân te, berâmpa tân te, berâmno tân te, 34 sual thawi nân kêlpa pakhat nên; hâlral thilhlan hlan reng te, chumia chhangphut thilhlan leh chumia in tûr thilhlante tiam lovin. 35 “ ‘Tin, a ni riat ni chuan inkhâwmpui ropui tak in nei ang a, eng hna mah in thawk tûr a ni lo. 36 LALPA tâna rimtuiah meia thilhlan hâlral thilhlan erawh chu in hlân tûr a ni: bâwngpa pakhat, berâmpa pakhat, berâmno a pa kum khat mi sawisêl bo pasarih; 37 an chhangphut thilhlan leh an in tûr thilhlan, bâwngpa tân te, berâmpa tân te, berâmno tân te, a dân ang takin an tam dân ang zêlin, 38 sual thawi nân kêlpa pakhat nên; hâlral thilhlan hlan reng leh chumia chhangphut thilhlan leh chumia in tûr thilhlan tiam lovin. 39 “ ‘In thutiam te, in duhthua thilhlan te, in hâlral thilhlan te, in chhangphut thilhlan te, in in tûr thilhlan te, in remna thilhlante tiam lovin hêng hi in hunbi nei kût niin LALPA hnênah in hlân tûr a ni,’ ti rawh,” tiin. 40 Tin, LALPAN Mosia thu a pêk zawng zawng chu Israela thlahte chu Mosia chuan a hrilh a.
Thu intiamkam chungchâng thu
1 Tin, Mosian Israela thlahte hnamho puipate chu a bia a, “Hei hi a ni, LALPAN thu a pêk chu: 2 miin LALPA hnêna thu a tiam emaw, chhechhama mahni intiamkamna emaw a neih chuan a hlen ngei tûr a ni; a thu ang zawng zawng chu a ti vek tûr a ni. 3 Pate ina awm lai nula pawhin LALPA hnêna thu a tiam emaw, chhechhama intiamkamna emaw a neih chuan, 4 a pain a thutiam emaw, a intiamkamna emaw chu a hriata, a ngawihsan mai chuan a thutiam emaw, a intiamkamna emaw chu a ti ngei tûr a ni. 5 A pain a hriat nî ngeia a phal loh erawh chuan a thutiam emaw, a intiamkamna emaw ata chu a fihlîm ang a, a pain a phal loh avângin LALPAN ani chu a ngaidam ang. 6 “Ngaihtuah thui mang lova thutiam emaw, intiamkamna emaw nei laiin pasal a neiha, 7 a pasalin a hriat nîa a ngawihsan mai chuan a thutiam emaw, a intiamkamna emaw chu a hlen ngei tûr a ni. 8 Amaherawhchu, a pasalin a hriat nîa a phal loh chuan ngaihtuah thui lova thu a lo intiamkamna emaw ata chu a fihlîm ang; tin, LALPAN a ngaidam ang. 9 Hmeithaite, mâkchhiat tâwkte erawh chuan an thutiam emaw, an intiamkamna emaw chu an hlen ngei tûr a ni. 10 Pasalte ina awm laia thutiam emaw, intiamkamna emaw chu, 11 a pasalin a hriat pawha a ngawihsana, a hnial loh chuan a thu intiamkamna chu a hlen tûr a ni. 12 Amaherawhchu, a pasalin a hriat nîa a ṭhiat emaw, a tihbosak emaw chuan a thutiam leh a intiamkamna chu sût a ni tawh ang. 13 Thutiam emaw, intiamkamna emaw rêng rêng a pasalin a remtihpuiin a ṭhiatsak thei bawk a ni. 14 Amaherawhchu, a pasalin a hriata a ngawihsan mai chuan, a thutiam ang leh a intiamkamna ang ngei chuan a ti tûr a ni; a hriat nî aṭanga a ngawihsan avângin a nemnghehpui tihna a ni. 15 A hriat veleh a ṭhiata, a tihbosak erawh chuan a mawh chu aman a phur tûr a ni,” tiin. 16 Hêng hi, mipa leh a nupui kâr leh, pa leh a fanu nulât laia a pa ina la awm reng an kâra dân tûra LALPAN Mosia thu a pêkte chu a ni.
Midian-ho hrem nân indona
1 Tin, LALPAN Mosia a bia a, 2 “Midian-ho chungah Israela thlahte phuba la rawh. Chumi zawhah chuan i chipuite hnênah hruai i ni tawh ang,” tiin. 3 Tichuan, Mosia chuan mipuite chu a bia a, “Midian-ho chunga LALPA phuba lâkna hlen tûra Midian-ho beia indo tûrin in zînga mi inrâlthuam rawh se. 4 Israel hnam zawng zawng zînga hnam tina mi sângkhat zêl indonaah in kaltîr tûr a ni,” tiin. 5 Chutichuan, Israel-ho sâng tam tak zîng ata, hnam tin aṭangin 1,000 ṭheuh, indonaa kal tûrin sipai 12,000 an theh chhuak a. 6 Tichuan, Mosian chi tin zînga mi 1,000 ṭheuh leh puithiam Eleazara fapa Phinehasa, hmun thianghlima bungbêlte, thupêk vêl nâna tawtawrâwtte kengin indonaah a kaltîr a. 7 Tin, LALPAN Mosia thu a pêk angin Midian-ho an do va; mipa zawng zawng an that a. 8 An mi thahte zîngah chuan Midian-ho lalte pawh an tel a; Midian-ho lal panga - Evia te, Rekema te, Zura te, Hura te, Reba te chu; Beora fapa Balaama pawh khandaihin an that a. 9 Tin, Israela thlahte chuan Midian-ho nunaute salah an hruai a; tin, an ran zawng zawng te, an berâm rual zawng zawng te, an bungrua zawng zawngte chu râllâk sum atân an la a. 10 An awmna khua zawng zawng te, an riahhmun zawng zawngte an hâl vek a. 11 Tin, mihring leh ran, sal leh râllâk sum zawng zawng an kalpui vek a. 12 Tin, sal te, man te, râllâk sumte chu Mosia leh puithiam Eleazara leh Israela thlah pung khâwmho hnênah, Jeriko zâwn Jordan kam Moab phaia an riahhmunah chuan an rawn thlen a.
Râl bei lo haw leh thu
13 Tin, Mosia leh puithiam Eleazara leh pung khâwmho puipa zawng zawngte chuan daiah an lo va hmuak a. 14 Tin, Mosia chu sipai hotu, sâng chunga hotute leh za chunga hotu te, indona aṭanga lo hawte chungah chuan a thinur a. 15 Tichuan, Mosian an hnênah, “Hmeichhia chu damin in la zuah vek maw? 16 Ngai teh u, Balaama remruat chuan Peor chungchâng thu-ah, Israela thlahte chu LALPA chunga bawhchhiatna tithlengtute chu hêng hi an ni, LALPA mi pung khâwmho zîngah chuan hri a lo lên tâk kha. 17 Chuvângin, naupang zînga mipa zawng zawng chu that ula, hmeichhia mi pâwl tawh zawng zawng that bawk rawh u. 18 Hmeichhe naupang, mi pâwl loh zawng zawng erawh chu in tân zuah rawh u. 19 Tin, daiah ni sarih riak ula; tu pawh mi that leh mitthi khawih apiangte chu ni thum ni leh ni sarih niah inthian rawh u, nangmahni leh in salte pawh. 20 Tin, thuamhnaw rêng rêng leh savuna thil siam zawng zawng te, kêl hmula thil siam zawng zawng te, thinga thil siam zawng zawng thu-ah chuan in inthian tûr a ni,” a ti a. 21 Tin, puithiam Eleazara chuan indonaa kal indo mite hnênah chuan, “Hei hi LALPAN Mosia thu a pêk dân thuruat chu a ni: 22 eng pawh ni sela, rangkachak te, tangkarua te, dâr te, thîr te, rângva te, suan te, 23 eng pawh meia hâla chhe thei lo apiangte chu meiah in thawlh tlang ang a; tichuan, a lo thianghlim ang; eng pawh ni sela, tlen faina tuiin tihthianghlim tûr a ni. Amaherawhchu, meia hâl tuar thei lo apiang chu tuiah in thawlh tlang tûr a ni. 24 Tin, a ni sarih niah in puan in su ang a, in lo thianghlim ang a, chumi zawhah chuan riahhmunah in lo lût dâwn nia,” a ti a.
Râllâk sum sem dân
25 Tin, LALPAN Mosia a bia a, 26 “Nang nên, puithiam Eleazara nên, pung khâwmho chhûngkaw puipate nên râllâk suma an lâk mihring leh rante chu chhiar vek ula; 27 tin, râllâk sum chu hmun hnihah ṭhen ula, indonaa kal indo mite tân leh punghote tân; 28 tin, indonaa kalho chan aṭang chuan mihring te, bâwng te, sabengtung te, berâm te, thil nung zawng zawng zanga zêlah pakhat, LALPA hnênah chhiah pêk tûr tihhransak rawh. 29 Chûng chu la ula, LALPA tâna thên thilhlanah puithiam Eleazara pe rawh u. 30 Tin, a chanve Israela thlahte pual chu sawmnga ata pakhat tîl hrang zêl la, mihring aṭang te, bâwng aṭang te, sabengtung aṭang te, berâm rual aṭang te, ran rual aṭangtein; tin, chûng chu LALPA biakbûk enkawltu Levi-hote pe rawh,” a ti a. 31 Tichuan, LALPAN Mosia thu a pêk ang chuan Mosia leh puithiam Eleazara chuan an ti a. 32 Sipaiten an man râllâk sum tiam lovin an lâk chu berâm 6,75,000, 33 bâwng 72,000, 34 sabengtung 61,000, 35 mihring chu hmeichhia, mipa la pâwl ngai loh 32,000 an ni a. 36 Tin, a chanve, indonaa kalte chanvo chu, berâm 3,37,500 a ni a; 37 tin, LALPA chhiah berâm chu 675 . 38 Tin, bâwng chu 36,000 a ni a, chumia LALPA chhiah chu 72 a ni a. 39 Tin, sabengtung chu 30,500 a ni a, chumia LALPA chhiah chu 61 a ni. 40 Tin, mihring chu 16,000 an ni a, chumia LALPA chhiah chu mi 32 an ni. 41 Tin, LALPAN Mosia thu a pêk angin chhiah, LALPA thên thilhlan chu Mosian puithiam Eleazara a pe a. 42 Tin, Mosian râl kâp mite an chanvo a pêk zawha Israel-ho chanvo chu, 43 berâm 3,37,500, 44 bâwng 36,000, 45 sabengtung 30,500, mihring 16,000, 46-47 Israel-hovin an chan aṭang chuan Mosia chuan mihring leh ran sawmnga zêlah pakhat a la a, LALPA thupêk angin LALPA biakbûk enkawltu Levi-ho a pe a. 48 Tin, sipaite chunga hotu te, za chunga hotu te chuan Mosia an va hnaih a, 49 Mosia hnênah, “I chhiahhlawhte hian kan kuta awm indo mite chu kan chhiar a, tu mah kim lo kan awm lo va. 50 Tin, kan nunna atân LALPA hmaa inremna siamna tûrin LALPA tâna thilhlan miin an neihzâwng, rangkachaka siam cheimawi thuam - kebun te, bânbun te, hming nemna zungbun te, bengbeh te, ṭhî te kan rawn la e,” an ti a. 51 Tin, Mosia leh puithiam Eleazara chuan rangkachaka siam an thuam zawng zawng chu an lo la a. 52 Sâng chunga hotu leh za chunga hotute rangkachak, LALPA hnêna thên thilhlana an hlan zawng zawng chu sekel 16,750 a ni. 53 (Râl kâp mite chuan râllâk sum chu mahni tân ṭheuhva la an ni a.) 54 Tin, Mosia leh puithiam Eleazara chuan sâng chunga hotu leh za chunga hotute rangkachak chu an la a, Israela thlahte hriat rengna atân inbiakna puan inah LALPA hmaah an rawn la a.
Jordan lui khawchhak lama chêng tate
1 Reubena leh Gada thlahte chuan ran an ngah hle mai a; tin, Jazer ram leh Gilead ram an hmuh chuan a hmun chu ran tâna hmun ṭha tak niin an hria a; 2 tichuan, Gada thlahte leh Reubena thlahte chuan Mosia leh puithiam Eleazara leh pung khâwmho puipate chu an va bia a, 3-4 “Israel pung khâwmho hmaa LALPAN a tihtlâwm ram Atarot te, Dibon te, Jazer te, Nimra te, Hesbon te, Eleale te, Sebam te, Nebo te, Beon te chu ran tâna ṭha tak ram a ni a; tin, i chhiahhlawhte hian ran kan nei a. 5 Rem i tih zâwng a nih chuan he ram hi kan luah atân min pe la, Jordan lui min hruai kai lo mai rawh khai,” an ti a. 6 Tin, Mosia chuan Gada thlahte leh Reubena thlahte hnênah chuan, “In unaute chu indonaah an kal ang a, nangni chu hetah hian in lo awm mai ang maw? 7 Engati nge LALPAN a pêk rama lût lo tûra Israela thlahte rilru in tihzâm dâwn? 8 Kadesh-barnea aṭanga ram va thlithlai tûra ka tirh khân hetiang bawk hian in pute chuan an ti a. 9 Eskol ruam an han thlen chhoh khân ram chu an han hmu a, LALPAN ram a pêkah chuan an luh lohna tûrin Israel thlahte rilru an tihzâmsak a. 10 Tichuan, chumi ni chuan LALPA chu a thinur ta êm êm a, 11 ‘Aigupta ram ata lo chhuak, kum sawmhnih achin chung lam mi rêng rêng chuan Abrahama te, Isaaka te, Jakoba te hnêna chhechhama ka pêk ram chu tu mân an hmu lo vang, min zui tak tak loh avângin; 12 Keniz mi Jephunea fapa Kaleba leh Nuna fapa Josua-te chauh lo chuan; anni chuan LALPA chu an zui tak tak avângin,’ tiin chhia a chham a. 13 Tin, Israel-hote chungah LALPA thin chu a alh a, LALPA mit hmuha thil ṭha lo titu chhuan zawng zawng an boral vek hma loh chuan, thlalêrah kum sawmli a vah a vahtîr a. 14 Tin, ngai teh u, Israel-te chunga LALPA thinurna ṭihbaiawm tak belhchhahin, nangni chhuan sual hian in pute ai in awh ta a. 15 LALPA zui lova in awm miau chuan anniho hi thlalêrah a awmtîr leh mai dâwn a ni a. Hêng mi zawng zawngte hi in tiboral mai ang asin,” a ti a. 16 Tin, an va hnaih a, a hnênah, “Hetah hian kan ran tân berâm huangte leh kan fanaute tân khuate kan siam ang a; 17 keini erawh chu an hmun tûr kan thlen hma loh chuan, Israela thlahte hmaa kal zêl tûrin kan inrâlthuam diam ang e; hemi rama mite avâng hian kan fanaute chu kulh nei khuaahte an awm ang a. 18 Israela thlah mi tinin an hmun luah tûr an luah ṭheuh hma loh chuan kan in lamah kan haw lo vang. 19 Kan luah tûr chu he lam râl Jordan chhak lam a nih avângin Jordan râl lehlam leh a piah lam chu kan luahpui dâwn lo nia,” an ti a. 20 Tin, Mosian an hnênah, “Chutianga in tiha, indonaa LALPA hmaa kal tûra in inrâlthuama, 21-22 a hma ata a hmêlmate a hnawh chhuaha, LALPA hmaa ram chu hneh a nih hma lohva in zînga inrâlthuam zawng zawngten LALPA hmaah Jordan in kai vek chuan, nakinah in haw ang a, LALPA chungah leh Israel-te chungah in thiam lo lo dâwn nia; tichuan, he ram hi LALPA hmaa in luah tûr a lo ni ang a. 23 Amaherawhchu, chutianga in tih loh chuan, ngai teh u, LALPA chungah in sual a ni ang a, in sual chuan a hmuchhuak ngei ngei ang che u tih hre rawh u. 24 In fanaute tân khuate siam ula, in berâmte tân pawh huangte siam ula, in sawi ang chuan ti rawh u,” a ti a. 25 Tin, Gada thlahte leh Reubena thlahte chuan Mosia hnênah, “I chhiahhlawhte hian kan pu thupêk ang chuan kan ti ang e. 26 Kan nupui fanau te, kan berâm rual te, kan ran rual zawng zawngte chu Gilead ram khuaahte hian an lo awm ang a; 27 amaherawhchu, i chhiahhlawh, indo tûra inrâlthuam zawng zawngte chuan kan pu sawi ang chuan LALPA hmaah kan va kai ang e,” tiin an sawi a. 28 Chutichuan, Mosia chuan an chungchâng thu-ah chuan puithiam Eleazara te, Nuna fapa Josua te, Israel hnam chhûngkaw puipate chu thu a pe a. 29 Tin, Mosia chuan an hnênah, “Gada thlahte, Reubena thlahte, indo tûra inrâlthuam zawng zawngte hian LALPA hmaa Jordan lui an kaipui che ua, ram chu in hmin chuan Gilead ram chu an luah atân in pe tûr a ni. 30 Amaherawhchu, inrâlthuama an kaipui loh che u chuan Kanaan ramah in zîngah an tel ve mai ang,” a ti a. 31 Tin, Gada thlahte leh Reubena thlahte chuan, “I chhiahhlawhte hnêna LALPAN a sawi ang chuan kan ti ang. 32 Inrâlthuamin LALPA hmaah Kanaan ramah kaiin kan lût ang a; tichuan, kan ram luah tûr chu Jordan lui piah lamah a la ni reng ang,” tiin an chhâng a. 33 Tin, Mosia chuan, Gada thlahte leh Reubena thlahte leh Josefa fapa Manasea thlah hnam chanvete chu Amor lal Sihona ram te, Basan lal Oga ram, chûng ramte chu a khaw awm zawng zawng nên, a vêl ram khuate nên lam a pe a. 34 Tin, Gada thlahte chuan Dibon te, Atarot te, Aroer te, 35 Atrot-sophan te, Jazer te, Jogbeha te, 36 Beth-nimra te, Beth-haran te an din a, khawpui kulh nei te, berâm huang te nên. 37 Tin, Reubena thlahte chuan Hesbon te, Eleale te, Kiriathaim te, 38 Nebo te, Baal-meon te (a hmingte hi tihdanglam tâk a ni), Sibma te an din a; an khaw siamte chu hming dang an vuah a. 39 Tin, Manasea fapa Makira thlahte chu Gilead ramah an kal a, an la a, Amor-ho chuta awmte chu an chhuhsak a. 40 Tin, Mosian Gilead ram chu Manasea fapa Makira chu a pe a, chutah chuan a awm a. 41 Tin, Manasea fapa Jaira chuan chûnga khuate chu a va la a, Havoth-jair a vuah a. 42 Tin, Noba chuan Kenath a va la a, a khawperte nên, ama hming chawiin Noba a vuah a.
Aigupta ram aṭanga Moab ram thlenga hmun tlawhte
1 Mosia leh Arona kaihhruaia Aigupta ram ata Israel-te a pâwl pâwla an chhuaha, an kal zêl dân chu hetiang hian a ni. 2 LALPA thupêka an kal chhuaha, an kal zêlnate chu Mosian a ziak a; an kal chhuaha an kalnate chu hêngahte hian a ni: 3 Israel-te chu kalhlên kût zawh aṭanga thla khatna ni sâwm leh ni nga niah Rameses aṭangin an chhuak a; kalhlên kût tûk chuan Aigupta mite mit hmuhah, 4 an fa tîr zawng zawng LALPAN a tihhlumsak an phûm laiin, Israela thlahte chu muk takin an chhuak a. LALPAN an pathiante pawh a hrem a. 5 Tichuan, Israela thlahte chu Rameses aṭangin an chhuak a, Sukkoth-ah awmhmun an khuar a. 6 Tin, Sukkoth aṭangin an chhuak a, thlalêr tawntirha Etham-ah awmhmun an khuar a. 7 Tin, Etham aṭang chuan an chhuak a, Baal-zephon bula Pi-hahirot lamah an tawlh kîr leh a, Migdol bulah awmhmun an khuar a. 8 Tin, Hahirot bul ata chu an chhuak a, tuifinriat an kal tlang a, thlalêrah an lût a; tin, Etham thlalêrah ni thum an kal a, Mara-ah awmhmun an khuar a. 9 Tin, Mara aṭang chuan an chhuak a, Elim an thleng a; Elim-ah chuan tuihna sâwm leh pahnih leh tûm kûng sawmsarih a awm a; chutah chuan awmhmun an khuar a. 10 Tin, Elim aṭang chuan an chhuak a, Tuifinriat Sen bulah awmhmun an khuar a. 11 Tin, Tuifinriat Sen aṭang chuan an chhuak a, Sin thlalêrah awmhmun an khuar a. 12 Sin thlalêr aṭang chuan an chhuak a, Dopka-ah awmhmun an khuar a. 13 Tin, Dopka aṭang chuan an chhuak a, Alus-ah awmhmun an khuar a. 14 Alus aṭang chuan an chhuak a, Rephidim-ah awmhmun an khuar a, chutah chuan mipuite tui in tûr a awm lo va. 15 Tin, Rephidim aṭang chuan an chhuak a, Sinai thlalêrah awmhmun an khuar a. 16 Sinai thlalêr aṭang chuan an chhuak a, Kibroth-hat-tava-ah awmhmun an khuar a. 17 Tin, Kibroth-hat-tava aṭang chuan an chhuak a, Hazeroth-ah awmhmun an khuar a. 18 Hazeroth aṭang chuan an chhuak a, Rithma-ah awmhmun an khuar a. 19 Tin, Rithma aṭang chuan an chhuak a, Rimon-perez-ah awmhmun an khuar a. 20 Rimon-perez aṭang chuan an chhuak a, Libna-ah awmhmun an khuar a, 21 Libna aṭang chuan an chhuak a, Risa-ah awmhmun an khuar a. 22 Tin, Risa aṭang chuan an chhuak a, Kehelatha-ah awmhmun an khuar a. 23 Tin, Kehelatha aṭang chuan an chhuak a, Sepher tlângah awmhmun an khuar a. 24 Tin, Sepher tlâng aṭang chuan an chhuak a, Harada-ah awmhmun an khuar a. 25 Tin, Harada aṭang chuan an chhuak a, Makheloth-ah awmhmun an khuar a. 26 Tin, Makheloth aṭang chuan an chhuak a, Tahath-ah awmhmun an khuar a. 27 Tin, Tahath aṭang chuan an chhuak a, Tera-ah awmhmun an khuar a. 28 Tin, Tera aṭang chuan an chhuak a, Mithka-ah awmhmun an khuar a. 29 Tin, Mitka aṭang chuan an chhuak a, Hasmona-ah awmhmun an khuar a. 30 Hasmona aṭang chuan an chhuak a, Moseroth-ah awmhmun an khuar a. 31 Tin, Moseroth aṭang chuan an chhuak a, Bene-jaakan-ah awmhmun an khuar a. 32 Tin, Bene-jaakan aṭang chuan an chhuak a, Hor-hagidgad-ah awmhmun an khuar a. 33 Tin, Hor-hagidgad aṭang chuan an chhuak a, Jotbatha-ah awmhmun an khuar a. 34 Tin, Jotbatha aṭang chuan an chhuak a, Abrona-ah awmhmun an khuar a. 35 Tin, Abrona aṭang chuan an chhuak a, Ezion-geber-ah awmhmun an khuar a. 36 Tin, Ezion-geber aṭang chuan an chhuak a, Zin thlalêrah awmhmun an khuar a (chu chu Kadesh an ti bawk). 37 Tin, Kadesh aṭang chuan an chhuak a, Edom ram dep Hor tlângah awmhmun an khuar a. 38 Tin, puithiam Arona chu LALPA thupêkin Hor tlângah chuan a han chho va, Israela thlahte Aigupta ram ata an lo chhuah kum sawmli kum, thla ngana, ni khat niin chutah chuan a thi a. 39 Tichuan, Arona chu Hor tlânga a thih chuan kum za leh sawmhnih leh pathum a ni. 40 Tin, Kanaan mi, Kanaan rama Chhima awm Arad lal chuan Israela thlahte lo kal chu a lo hria a. 41 Tin, Hor tlâng aṭang chuan an chhuak a, Zalmon-ah awmhmun an khuar a. 42 Tin, Zalmon aṭang chuan an chhuak a, Punon-ah awmhmun an khuar a. 43 Tin, Punon aṭang chuan an chhuak a, Oboth-ah awmhmun an khuar a. 44 Oboth aṭang chuan an chhuak a, Moab ram dep Iye-abarim-ah awmhmun an khuar a. 45 Tin, Iyim aṭang chuan an chhuak a, Dibon-gad-ah awmhmun an khuar a. 46 Tin, Dibon-gad aṭang chuan an chhuak a, Almon-diblathaim-ah awmhmun an khuar a. 47 Tin, Almon-diblathaim aṭang chuan an chhuak a, Nebo bula Abarim tlângahte chuan awmhmun an khuar a. 48 Tin, Abarim tlâng aṭangte chuan an chhuak a, Jeriko zâwn, Jordan kam Moab phaiah awmhmun an khuar a. 49 Jordan kam Beth-jesimoth aṭanga Abel-sitim thlengin Moab phaiah awmhmun an khuar a.
Jordan kai hnua an tih dân tûr
50 Tin, Jeriko zâwn, Jordan kam Moab phaiah chuan LALPAN Mosia a bia a, 51 “Israela thlahte chu bia la, an hnênah, ‘Jordan lui in kâna, Kanaan ram in luh hun chuan, 52 chumi rama awm zawng zawngte chu in hnawt chhuak vek ang a, an lung milem zawng zawngte chu in tichhe vek ang a, an milem chhûnte in tichhe vek ang a, an hmun sângte pawh in ṭhiat vek tûr a ni; 53 tin, ram chu in luah ang a, chutah chuan in awm ang; in luah atân ram chu ka pe tawh che u a ni. 54 Tin, a chi zir ang zêlin ṭhumvâwrin ram chu in luah ang a; a rual deuhte chu ram zau deuh in pe ang a, a rual lo deuhte chu ram zîm deuh in pe ang; ṭhumvâwra a tlûkna apiang chu an pual a ni ang a. In pi leh pute chi kal dân ang zêlin in luah tûr a ni. 55 Amaherawhchu, chumi rama awmte chu in hnawh chhuah loh chuan, in awmtîrte chu in mit tân chhuntu leh in pang tânte hlîng ang an ni ang a, in awmna ramah chuan an timangang ang che u. 56 Tin, heti hi a ni ang a, an chunga tih ka rilrûk ang chu in chungah ka ti ang,’ ti rawh,” tiin.
Ramri
1 Tin, LALPAN Mosia a bia a, 2 “Israela thlahte chu thu pe la, an hnênah, ‘Kanaan ram in thlen hun chuan (Kanaan ram, a ramri zir ang zêla in luah tûr ram chu) 3 chhim lama in luah tûr chin chu Zin thlalêr aṭanga Edom ram hrûl zêl a ni ang a, chhim lam ramri chu Tuifinriat Al tâwp aṭanga chhak lampang a ni ang; 4 tin, in ramri chu Akrabim chhohna chhim lampangah a kawi ang a, Zin-ah a kal tlang ang a; tin, a lo chhuahna chu Kadesh-barnea chhim lamah a ni ang; tin, Hazar-adar-ah a kal ang a, Azmon-ah a kal zêl ang; 5 tin, ramri chu Azmon aṭangin Aigupta lui thlengin a kawi ang a, a chhuahna chu tuifinriatah a ni ang. 6 Tin, thlang lampangah chuan tuifinriat zau chu a ramri atân i chang ang a; hei hi thlang lama in ramri a ni ang. 7 Tin, hei hi hmâr lama in ramri a ni ang: tuifinriat zau aṭangin Hor tlâng huamin i siam ang a; 8 Hor tlâng aṭanga Hamath luhna thlengin i siam ang a, ramri chhuahna chu Zedad-ah a ni ang a; 9 tin, ramri chu Ziphron-ah a kal zêl ang a; tin, a chhuahna chu Hazar-enan-ah a ni ang; hei hi hmâr lama in ramri a ni ang. 10 Tin, chhak lama in ramri chu Hazar-enan aṭangin Sepham thlengin i siam ang a; 11 tin, ramri chu Sepham aṭangin Ribla thlengin Ain chhak lampangah a chhuk ang a; tichuan, ramri chu a chhuk zêl ang a, Kinereth tuifinriat chhak lampang a chhun ang a; 12 tin, ramri chu Jordan-ah a chhuk ang a; tin, a chhuahna chu Tuifinriat Al-ah a ni ang. Hei hi a chhehvêla ramri kal dân ang hian in ram a ni ang,’ ti rawh,” tiin. 13 Tichuan, Mosia chuan Israela thlahte chu thu a pe a, “Hei hi LALPAN hnam kua leh a chanvete pêk tûra thu a pêk, ṭhumvâwra in luah tûr ram chu a ni. 14 Reubena thlahte hnamin an chhûngkaw zir zêl leh, Gada thlahte hnamin an chhûngkaw zir zêl leh, Manase hnam zâtve pawhin an ram luah tûr chu an chang ta si a. 15 Hnam hnih leh hnam zâtvete chuan an ram luah tûr chu, ni chhuahna lam Jeriko zâwn Jordan râl chhak lamah an chang tawh a,” tiin. 16 Tin, LALPAN Mosia a bia a, 17 “Luah tûra ram ṭhensawmpuitute hming chu hêngte hi a ni: puithiam Eleazara leh Nuna fapa Josua-te hi.
Ram semtu tûr hming
18 “Tin, ram luah tûr ṭhentu atân hnam tin zînga puipa pakhat ṭheuh in thlang tûr a ni,” tiin. 19 Chûng mite hming chu hêng hi a ni: Juda hnama mi Jephunea fapa Kaleba; 20 Simeona thlahte hnama mi Amihuda fapa Semuela; 21 Benjamin hnam mi Kislona fapa Elidada; 22 Dana thlahte hnam zînga puipa Joglia fapa Bukia; 23 Josefa thlahte zînga mi, Manasea thlahte puipa Ephoda fapa Haniela; 24 Ephraima thlahte hnam zînga puipa Siptana fapa Kemuela; 25 Zebuluna thlahte hnam zînga puipa Parnaka fapa Elizaphana; 26 Isakara thlahte hnam zînga puipa Azana fapa Paltiela, 27 Asera thlahte hnam zînga puipa Selomia fapa Ahihuda; 28 Naphtalia thlahte zînga puipa Amihuda fapa Pedahela. 29 Hêngho hi Kanaan rama Israela thlah ram luah tûr sem tûra LALPAN thu a pêkate chu an ni.
Levia chite awmna tûr khua
1 Tin, Jeriko zâwn Jordan kam, Moab phaiah chuan LALPAN Mosia a bia a, 2 “Israela thlahte chu thu pe la, an ramahte chuan Levi-ho awmna tûr khuate siamsak rawh se; tin, ran tlatna tûrin khaw dai kiang vêlte Levi-ho in pe tûr a ni. 3 Khuate chu an awmna tûr a ni ang a, a vêlte chu an bâwng leh an ran, an vulh zawng zawng tân a ni ang. 4 Tin, dai kiang Levi-ho in pêk tûr chu khaw kulh aṭanga tawng sângkhata thui a ni tûr a ni. 5 Tin, kulh pawn lam aṭangin in teh ang a, chhak lampangah tawng sânghnih, chhim lampangah tawng sânghnih, thlang lampangah tawng sânghnih, hmâr lampangah tawng sânghnih, khua a lai taka awmin. Hei hi an dai kiang pual a ni ang. 6 Tin, Levi-ho in pêk tûr khuate chu tualthatte tlân nân tualtlânna khaw paruk a ni ang a; chûng lo chu khaw sawmli leh khaw hnih in pe bawk tûr a ni. 7 Levi-ho in pêk tûr khua zawng zawng chu khaw sawmli leh khaw riat a ni ang; dai kiang nên in pe tûr a ni. 8 Israela thlahte luah khua in pêk dân tûr chu: a tam deuh aṭangin in pe tam ang a, a tlêm deuh aṭangin in pe tlêm ang a, mi tinin an luah ram tam dân azirin an khua chu Levi-ho an pe tûr a ni,” tiin.
Humhimna khuate
9 Tin, LALPAN Mosia a bia a, 10 “Israela thlahte bia la, an hnênah, ‘Jordan lui in kaia Kanaan ram in luh hun chuan, 11 tualtlânna tûr khua in ruat tûr a ni, tualthat palhtu tlân nân. 12 Chûng khuate chu phuba latu laka in tualtlânna a ni ang; pung khâwm hmaa rorêlsak tûra a din hmaa tualthattu chu a thih loh nân. 13 Tichuan, in tân tualtlânna tûr in ruatte chu khaw paruk a ni ang. 14 Jordan râlah khaw thum in ruat ang a, Kanaan ramah khaw thum in ruat ang a, tualtlânna khuate a ni ang. 15 Israela thlahte leh hnam dang leh an hnêna chêngte tân he khaw paruk hi tualtlânna a ni ang; chutah chuan tu pawh mi that palh apiang an tlân dâwn nia. 16 Amaherawhchu, thîr hmanga mi a beiha, a thih chuan tualthat a ni a; tualthat chu tihhlum ngei tûr a ni. 17 Tin, thi khawpa lunga mi a chhuta, a thih chuan tualthat a ni a; tualthat chu tihhlum ngei tûr a ni. 18 Tin, thi khawpa mi thinga a vuaka, a thih chuan tualthat a ni a; tualthat chu tihhlum ngei tûr a ni. 19 Thisen phuba latu chuan tualthattu chu a that nghâl mai ang; a hmuh hun hunah a tihlum tûr a ni. 20 Tin, mi a huat vânga a nam vak emaw, lo châng rua a vawm emawa a thihin emaw, 21 intaina avânga a chum hlum emaw chuan, a tihlumtu chu tihhlum ngei tûr a ni. Tualthat a ni. Thisen phuba latu chuan a hmuh hun hunah a tihlum tûr a ni. 22-23 “ ‘Amaherawhchu, intai vâng ni lêm lova nam thut emaw, châng ni kher lova mi an awm tih pawh hre lova, a hmêlma pawh ni lova, a pawi khawih pawh tum ni chuang lova lung emawa a dena, mi lo thi ta a nih chuan, 24 pung khâwmhovin hêng rorêlna dân ang hian a tihlumtu leh thisen phuba latu ro chu an rêlsak tûr a ni. 25 Tin, pung khâwmho chuan tualthattu chu thisen phuba latu lak ata chu an hum ang a, pung khâwmho chuan a tlânna, a tualtlânna khuaah chuan an awmtîr leh ang a, hriak thianghlima thih puithiam lal ṭang lai thih hma chu chutah chuan a awm tûr a ni. 26 Amaherawhchu, eng lai pawhin tualthattu chu a tlânna, a tualtlânna khaw ramri pawn lama a kala, 27 thisen phuba latuin a tualtlânna khaw pâwna a hmuha, thisen phuba latuin a thah chuan, thisenah chuan thiam loh a chang lo vang, 28 puithiam lal a thih hma loh chu a tualtlânna khuaa awm reng tûr a nih avângin. Puithiam a thih hnu erawh chuan tualthattu chu a awmna ramah chuan a haw leh tûr a ni. 29 Hêng thil hi in thlahte thlenga in awmna apianga in rorêl dân tûr a ni ang. 30 “ ‘Tu pawhin mi a thah chuan tualthattu chu hretute kâ aṭanga thuchhuakin tihhlum tûr a ni; amaherawhchu, hretu pakhat chu mi tihhlumna tûr chuan a tâwk lo. 31 Tin, tualthattu chu in tlan tûr a ni lo; thihna khawpa thiam loh chang a ni a, tihhlum ngei tûr a ni zâwk. 32 Tin, tualtlânna khuaa tlân chu, chutih laia puithiam lal thih hma chuan a awmna khaw hluia kîr leh tûra tlan phal a ni lo vang. 33 Chutichuan, in awmna ram chu in tibawlhhlawh lo vang a; thisen chuan ram chu a tibawlhhlawh a, thisen chhuahna ram tihbawlhhlawh sil nân a chhuahtu thisen ngawt lo chu hman theih a ni si lo. 34 In awmna ram, ka awmna hi in tibawlhhlawh tûr a ni lo, kei LALPA hi, Israela thlahte zîngah ka awm si a,’ ti rawh,” tiin.
Ro khâwm hmeichhiaten mahni hnam mi chauh an nei thei ang
1 Tin, Josefa chhûngte zînga mi, Manasea fa Makira fapa Gileada thlahte chhûngkaw puipate zînga mite chuan an rawn hnaih a, Mosia leh hotu, Israela thlah puipate hmaah chuan thu an sawi a, 2 “LALPA chuan kan pu hi Israela thlahte chu, ṭhumvâwra an luah tûr ram pe tûrin thu a pe a; tin, LALPAN kan pu chu kan unaupa Zelophehada luah tûr chu a fanute pe tûrin thu a pe a. 3 Tin, anni chuan Israela thlahte zînga mi, hnam dang tu fate pawh nei sela, kan pi leh pute ram an luah chu lâksaka, an va telnate hnam ramah belh tûr a ni ang a; chutiang chuan kan ram chanpual ata chu theh chhuah a lo ni ang a. 4 Tin, Israela thlahte Jubili a lo thlen hun chuan, an ram chu an va telna tûrte apiang hnam ramah belh a ni ang a; chutichuan, kan pi leh pute hnam ram ata chu an ram lâk hêk a lo ni dâwn a,” an ti a. 5 Tin, Mosia chuan LALPA thu angin Israela thlahte chu thu a pe a, “Josefa fapate hnam hian an sawi dik a ni. 6 Zelophehada fanute chungchâng thua LALPAN thu a pêk chu heti hian a ni, ‘ṭha an tih apiang nei sela; amaherawhchu, an pate hnampui zînga mi ngei an nei tûr a ni,’ tiin. 7 Chutichuan, Israela thlahte ram chu hnam dang dang hnênah sawn sawn a ni lo vang. Israela thlahte chuan an pi leh pute hnam ram chu an chang reng tûr a ni. 8 Tin, Israela thlahte zînga ro luahtu tûr fanu apiang chu, Israela thlahten an pi leh pute ram an luah ṭheuh zêl theih nân, a pa hnampui zînga mi ngei nupui a ni tûr a ni. 9 Chutichuan, ram chu hnam dang dang hnênah sawn sawn a ni dâwn lo nia. Israela thlahte chuan anmahni ram ṭheuh chu an chang reng tûr a ni si a,” tiin. 10 Tin, LALPAN Mosia thu a pêk ang chiahin Zelophehada fanute chuan an ti a. 11 Zelophehada fanu Malai te, Tirzai te, Hoglai te, Milkai te, Novai te chuan an pa unauva fapate an nei a ni. 12 Josefa fa Manasea fapate an nei a, an ram chu an pa hnamah chuan a awm reng a ni. 13 Hêng hi LALPAN Mosia hmanga Jeriko zâwn Jordan râla Moab phaia Israela thlahte a pêk, thupêkte leh rorêl dânte chu a ni.
Thuhmahruai
1 Hêng thu hi Jordan chhak lam thlalêr, Paran leh Tophel leh Laban leh Hazeroth leh Dizahab inkâra Suph va dep, Araba-a Mosian Israel mi zawng zawng hnêna a sawi chu a ni. 2 Horeb tlâng aṭangin Kadesh-barnea chu Seir tlâng lam kawngah ni sâwm leh ni khat kal a ni. 3 Tin, kum sawmli kum, thla sâwm leh thla khatna, chumi thla ni khat nî chuan heti hi a ni a, LALPAN anmahni hrilh tûra thu a pêk ang zawng zawng chu Israela thlahte hnênah Mosian a sawi a; 4 Hesbon-a awm Amor-ho lal Sihona leh Edrei leh Astaroth-a awm Basan lal Oga a thah hnuin, 5 Jordan chhak lam Moab ramah he dân hi Mosian a puang ṭan ta a, 6 “LALPA kan Pathian chuan Horeb tlângah min bia a, ‘He tlângah hian in awm rei tâwk tawh e. 7 Insuan tawh ula, kal chhuak ula, Amor-ho tlâng ramah leh a chhehvêl zawng zawng, Araba-ah te, tlâng ramah te, phai ramah te, Chhim ramah te, Kanaan-hote awmna tuifinriat kamah te leh Lebanon-ah te, luipui, Euphrates lui thlengin kal rawh u. 8 Ngai teh u, ram chu ka pe tawh diam a che u; in pu Abrahama te, Isaaka te, Jakoba te leh an hnua an thlah leh zêlte hnêna chhechhama LALPAN a pêk ram chu va luah rawh u,’ tiin.
Mosian rorêltu tûrte a ruat
9 “Tin, chumi lai chuan in hnênah, ‘Keimah ngawt chuan ka zo lo che u a; 10 LALPA in Pathian chuan a tipung che u a, ngai teh u, tûnah hian in tam lam chu vâna arsi zât zet a lo ni ta a. 11 LALPA, in pi leh pute Pathian chuan tûn aia a lêt sângin tipung che u sela, a tiam che u angin malsâwm che u rawh se. 12 Engtin nge keimah chauhvin in buaina te, in phurrit te, in innghirnghona te chu ka phurh zawh ang? 13 In hnam zînga mi, mi fing, hmang hre mi, chinchâng hre mite inthlang chhuak ula, in chunga hotuah ka siam ang e,’ tiin ka bia che u a. 14 Tin, nangnin, ‘I thil sawi chu kan tân a ṭha hle mai,’ tiin mi chhâng a. 15 Chutichuan, in hnam hotute chu ka pawm a, in hnam zînga mi, mi fing, chinchâng hre mite in chunga hotuah ka siam a, sâng chunga hotu te, za chunga hotu te, sawmnga chunga hotu te, sâwm chunga hotu te, puipate pawh. 16 “Tin, chumi lai chuan in rorêltute chu, ‘In unaute kâra thu chu ngaihthlâksak ula, unau leh unau kârah leh ram dang mi, a awmpui nêna an kârah fel takin rêl rawh u. 17 Rorêlnaah thlei bîk in nei tûr a ni lo; mi tê leh mi lian inang rengin in ngaihthlâksak tûr a ni; tu mah in hlau tûr a ni lo; rorêlna chu Pathian ta a ni si a: in tâna thu khirh lutuk chu ka hnênah in rawn thlen thîn ang a; tin, chu chu ka lo ngaithla ṭhîn ang,’ tiin thu ka pe a. 18 Tin, chumi lai chuan thil in tih dân tûr zawng zawngah thu ka pe che u a.
Kadesh-barnea khua aṭangin enthlatute an tîr
19 “Tin, LALPAN thu min pêk angin Horeb tlâng aṭang chuan kan chhuak a, Amor-ho tlâng ram kawnga thlalêr zau tak leh râpthlâk tak in hmuh kha kan kal tlang vek a, Kadesh-barnea khua kan va thleng a. 20 Tin, in hnênah, ‘LALPA kan Pathianin min pêk Amor-ho tlâng ram chu in lo thleng ta a. 21 Ngai teh u, LALPA in Pathianin ram chu a pe tawh diam che u a ni; chho ula, LALPA in pi leh pute Pathianin a lo sawi tawh ang khân han luah rawh u; hlau suh ula, zâm hek suh u,’ ka ti a. 22 Tin, ka hnênah in lo kal vek a, ‘A ram te va thlîthlaia, kan chhohna tûr lam kawng leh kan va kalna tûr khaw chanchin te min rawn hrilh leh tûrin, kan hmaah mi va tîr ila,’ in ti a. 23 Chu chuan mi tilâwm hle mai a; tichuan, in zînga mi, mi sâwm leh pahnih, hnam khata pakhat zêl ka thlang a; 24 tichuan, an chhuak ta a, tlângah chuan an lâwn chho va, Eskol ruam an han thleng a, an en thlîthlai vek a. 25 Chu rama theite chu an lo va, min rawn hawn a, chanchin min rawn thlen a, ‘LALPA kan Pathianin ram min pêk chu ṭha tak a ni,’ an ti a. 26 “Nimahsela, in chho duh lo va, LALPA in Pathian thupêk chu in helsan a; 27 in puan inahte in phunnawi a, ‘LALPA chuan min huat avângin min tiboral tûra Amor-hote kuta pêk tûrin Aigupta ram ata min hruai chhuak a ni. 28 Khawiah chuan nge kan han chhoh vang? Kan unaute chuan, “Mihring chu kan aiin an lian a, an sâng zâwk bawk a; khuate chu a lian hle a, vân tawngin kulh a nei; tin, Anak-ho thlahte pawh kan hmu bawk a,” tiin kan thinlung an titui a,’ in ti a. 29 Tin, keiin in hnênah, ‘Anmahni chu ṭih suh ula, hlau bawk hek suh u. 30 LALPA in Pathian, in hmahruaitu chuan in mit hmuha Aigupta rama a tihsak tâk che u zawng zawng ang khân, a beihpui ang che u a, 31 thlalêrah pawh miin a fa a pua angin, LALPA in Pathian chuan hemi hmun in thlen thleng hian, kawng tluanin a puak zia che u in hmuh kha,’ ka ti a. 32-33 Nimahsela, chuti chung pawhin in puan in zârna tûr zawnsak tûr leh in kalkawng kawhhmuh tûra zâna meia, chhûna chhûma in hma hruaitu LALPA in Pathian chu in ring lo va.
Israel-te LALPAN a hrem
34 “Tin, LALPAN in thusawi chu a lo hria a, a thinrim a, 35 ‘He chhuan sual taka mi hi chuan pakhat tê mahin, in pi leh pute pêk tûra chhia ka chham ram ṭha tak chu an hmu lo vang a, 36 Jephunea fapa Kaleba chauh lo chuan; ani zawngin a hmu ang; a va rah ram chu amah leh a fate ka pe ang, ani chuan LALPA chu a pawm tlat avangin,’ tiin chhia a chham a. 37 Nangmahni avângin ka chungah pawh LALPA chu a thinur a, ‘Nang pawh hi chutah chuan i lût lo vang. 38 I rawngbâwltu Nuna fapa Josua hi chu a lût ang; ani hi fuih rawh, Israel-hote chu a luahtîr dâwn a ni. 39 In fanau tê tê, “Râllâkin an la mai ang,” in tih leh, tûna a chhia a ṭha la hre lo in fate hi an lût ang a, anni chu ka pe ang a, an luah ang. 40 Nangni erawh chu insuan ula, Tuifinriat Sen lamah thlalêrah kal rawh u,’ tiin. 41 “Tin, nangnin, ‘LALPA chungah kan lo sual ta a ni, kan han chho vang a, LALPA kan Pathianin thu min pêk zawng zawng angin kan han bei ang e,’ tiin mi chhâng a. Tichuan, indona thuamhnaw in inbel ṭheuh va, tlânga han chhoh chu thil namênah in ngai a. 42 Tin, LALPAN ka hnênah, ‘Chho suh u, han bei bawk hek suh u; in zîngah ka awm si lo, in hmêlmate chuan an lo tihlum dah ang che u, an hnênah ti rawh,’ mi ti a. 43 Chu chu ka hrilh che u a, in pawm lo va, LALPA thupêk chu in helsan ta zâwk a, tlângah chuan in han chho lui ta a. 44 Tin, chu tlânga awm Amor-ho chuan an lo bei che u a, khuai mi ûm angin an lo ûm che u a, Seir aṭangin Horma thlengin an that zêl che u a. 45 Tin, in lo kîr leh a, LALPA hmaah in ṭap a; nimahsela, LALPA chuan in aw chu a ngaithla duh lo va, a beng pawh a rawn chhi duh lo va. 46 Chutichuan, chuta in awm chhûng chu han ngaihtuahin Kadesh-ah chuan rei tak in awm a ni.
Thlalêrah an vâk an vâk
1 “Tin, kan insuan a, LALPAN ka hnêna a sawi angin Tuifinriat Sen lamah thlalêrah kan lût ta a; Seir tlâng chu rei tak kan vêl a. 2 Tin, LALPA chuan mi bia a, 3 ‘He tlâng hi in vêl rei tâwk tawh e; hmâr lam panin insuan tawh rawh u. 4 Mipuite chu Seir tlânga awm, Esauva thlah in unaute ramah in kal tlang dâwn a ni; anni chuan an lo hlau vang che u a; chuvângin, fîmkhur hle ula; 5 bei suh ang che u; an ram chu a khawii lai mah, kephaha rah khawp lek pawh ka pe dâwn hauh lo a che u; Seir tlâng chu a pualah Esauva ka pe tawh a ni. 6 An chaw te chu in eiah sumin in lei ang a; tin, an tuite chu in inah sumin in lei bawk tûr a ni. 7 LALPA in Pathian chuan in thawh apiangah te mal a sâwm ṭhîn che u a, he thlalêr zau tak hi in kal tlang dân te chu a hre si a; hêng kum sawmli chhûng zawng hian LALPA chu in hnênah a awm a, eng mah in tlâkchham loh kha, tiin thu pe rawh,’ tiin. 8 Chutichuan, Elath leh Ezion-geber aṭangin Araba kawnga kalin Seir tlânga awm Esauva thlah kan unaute ram kan pal tlang a. “Tin, kan insuan a, Moab thlalêr lamah kan kal a. 9 Tin, LALPA ka hnênah, ‘Moab-ho chu tibuai suh ula, râl beihin bei suh u; an ram chu in pualah ka pe dâwn lo a che u, Lota thlahte pualah Ar chu ka pe tawh a ni.’ ” 10 (Tûn hma lam chuan Anak-ho angin mi lian leh tam leh mi sâng pui pui Em-ho an awm thîn a; 11 chûngho pawh chu Anak-ho ang bawka Repha-ho tih an ni a; nimahsela, Moab-ho chuan Em-ho an ti ṭhîn a ni. 12 Tûn hma lam chuan Seir tlângah hian Hor-ho pawh an awm bawk ṭhîn a; nimahsela, Esauva thlahte hian an luahsak a; an that a, a hmunah chuan an awm ta a, Israel-hovin LALPAN an puala a pêk ram an tih ang khân.) 13 “ ‘Chutichuan, tho ula, Zered lui chu kân rawh u khai,’ a ti a. Tichuan, Zered lui chu kan kân ta a. 14 Kadesh-barnea aṭangin kan chhuak leh a, Zered lui kan kân a, LALPAN an hnêna chhia a chham anga, mipui zînga chumi chhuana râl kâp mi zawng zawng an mang vek inkâr chu, kum sawmthum leh kum riat a ni. 15 Mipui zîng ata an boral dêr hma loh chuan anmahni tiboral tûrin LALPA kutin a tai reng bawk a. 16 “Chutianga mipui zîng ata râl kâp mi zawng zawng an borala, an lo thih zawh hnu chuan heti hi a ni a, 17 LALPAN min bia a, 18 ‘Vawiinah hian Moab ram, Ar chu i kal tlang tûr a ni a; 19 tin, Amona thlahte ep i va thlen hnaih pawhin tibuai suh la, bei hek suh; Amon-ho ram chu i pualah ka pe dâwn lo che, Lota thlahte pualah ka pe tawh a ni. 20 (Chu pawh chu Repha-ho rama ngaih a ni bawk; chutah chuan tûn hma lamin Repha-ho an awm ṭhîn a. Nimahsela, Amon-ho chuan Zamzum-ho an ti ṭhîn a, 21 Anak-ho anga mi lian leh tam leh mi sâng pui pui an ni a; nimahsela, LALPAN a tihboralsak a, an luah ve ta thung a, an hmunah chuan an awm ta a; 22 Seir tlânga awm Esauva thlahte chu Hor-ho a tihboralsak laia a tih ang khân; tichuan, an luah ve ta thung a, an hmunah chuan tûn thleng hian an la awm ta a ni. 23 Tin, Gaza thlenga khaw tê têa awm Av-ho chu Kaptor aṭanga lo chhuak Kaptor-hovin an tiboral a, an hmunah chuan an awm ta a.) 24 Tho ula, kal chhuak ula, Arnon ruam kân rawh u; ngai teh u, Amor mi Hesbon lal Sihona leh a ram chu ka pe tawh che u a ni. Luah phawt ula, râl beihin bei rawh u. 25 Vawiinah hian, vân hnuai chhîna hnam tin chungah chuan nangmah ṭihna leh hlauhna ka awm ṭantîr ang a, i chanchin an lo hria ang a, an khûr ang a, nangmah avângin na tak tuarin an awm ang,’ tiin.
Israel-ten Lal Sihona an hneh
26 “Tin, Kedemoth thlalêr aṭangin Hesbon lal Sihona hnênah rem thu kengin mi ka tîr a, 27 ‘I ramah hian mi kal tlangtîr rawh khai; lamlianah zêl ka kal ang a, ding lamah emaw, vei lamah emaw pawh ka pêng lo vang e. 28-29 Ka eiah chaw a leiin sumin mi leitîr ang a, ka inah tui pawh sumin mi leitîr bawk ang a; Jordan ka kâna LALPA kan Pathianin min pêk ram ka luh hma loh chuan, Seir-a awm Esauva thlahte leh Ar-a awm Moab-hote mi tih ang khân mi kal tlangtîr ringawt mai rawh khai,’ tiin. 30 Nimahsela, Hesbon lal Sihona chuan a ramah min kal tlangtîr phal lo va; LALPA in Pathian chuan in kuta a pêk theihna tûr che uin a rilru a tikhauh va, a tiluhlul a ni, in hriat tâk ang hian. 31 Tin, LALPAN ka hnênah, ‘Ngai teh, Sihona leh a ram chu ka pe dâwn ta che a ni, a ram chu nei tûrin luah phawt mai rawh,’ mi ti a. 32 Tichuan, Sihona leh a mite zawng zawng chu Jahaz-a min bei tûrin an lo thawk a. 33 Tin, LALPA kan Pathian chuan min pe a; tichuan, amah leh a fapate leh a mite zawng zawng chu kan that a. 34 Tin, chumi ṭum chuan a khua zawng zawng chu kan la a, chûng khuaa mihring zawng zawng chu, hmeichhia leh an fanau tê tête nên lam kan tiboral vek a, zuah rêng rêng kan nei lo va; 35 kan lâk khuaa râllaka kan lâk thil leh rante chauh kan pualah kan la a ni. 36 Arnon ruam fêma Aroer aṭanga Gilead thlengin, kan tân sâng lutuk khua a awm hauh lo mai a, LALPA kan Pathianin min pe vek a ni. 37 Amona thlahte ram chauh in hnaih lo a ni, Jabok lui lehlam kam zawng zawng leh tlâng rama khuate leh, LALPA kan Pathianin min khapna apiangte nên.
Israel-ten Lal Oga an hneh
1 “Chutichuan, kan insuan a, Basan kawngah kan chho va; Basan lal Oga leh a mite zawng zawng chu Edrei-a min bei tûrin an lo thawk a. 2 Tin, LALPAN ka hnênah, ‘Amah chu hlau suh, amah leh a mite zawng zawng leh a ram chu i kutah ka pe tawh diam a ni; Hesbon-a awm Amor-ho lal Sihona chunga i tih ang khân a chungah i ti dâwn nia,’ a ti a. 3 “Chutichuan, LALPA kan Pathian chuan Basan lal Oga pawh a mite zawng zawng nên kan kutah a pe a; tichuan, pakhat tê mah zuahsak lovin kan that vek a. 4 Chumi ṭum chuan a khua zawng zawng khaw sawmruk, Basan-a Oga ram, Argob ram zawng zawng chu kan la vek a; kan lâksak loh khaw pakhat tê mah a awm lo. 5 Hêng khua zawng zawng hi kulh sâng tak tak, kawngkhâr leh kalhna nei vek a ni a, kulh nei lo khaw tam tak tiam lo pawhin. 6 Hesbon lal Sihona chunga kan tih ang khân kan tiboral vek a, khuaa mihring zawng zawng chu kan tiboral vek a, hmeichhia leh an fanau tê tête nên lam. 7 Amaherawhchu, ran zawng zawng leh khuaa râllâka kan lâk thilte chu kan pualah kan la a. 8 Chumi ṭum chuan Jordan râla awm Amor-ho lal pahnih kut ata chu, Arnon ruam aṭanga Hermon tlâng thlenga ram chu kan la a; 9 (chu Hermon chu Zidon-ho chuan Sirion an ti a, Amor-ho chuan Senir an ti a ni;) 10 phai ram khua zawng zawng leh Gilead ram zawng zawng leh Basan ram zawng zawng nên, Basan rama Oga ram khua, Saleka leh Edrei thlengin. 11 (Basan lal Oga chauh a ni, Repha-ho zînga la awm chhun chu; ngai teh, a khum chu thîr a ni; Amona thlahte khua Raba-ah chuan a la awm reng a ni lâwm ni? Mihring tawnga tehin a dung lam tawng kua, a vâng lam tawng li a ni.)
Jordan lui khawchhak lama khawsa ta hnamte
12 “Chumi ṭum chuan chumi ram chu kan luah a; Arnon ruam kianga Aroer aṭangin Gilead tlâng ram zâtve thlengin, chuta khaw awmte nên Reuben-ho leh Gad-ho ka pe a; 13 tin, Gilead ram la awm zawng leh Oga ram Basan zawng zawng chu Manase hnam zâtvete ka pe a; Argob ram zawng zawng leh Basan ram zawng zawng chu. (Hei hi Rephaim-ho ram an ti bawk ṭhîn a. 14 Manasea fapa Jaira chuan Argob ram zawng zawng, Gesur-ho leh Maakath-ho ram thlengin a la a, chûng chu, Basan chu, ama hming chawiin Havoth-jaira a ti a, tûn thlengin a la ti reng.) 15 Tin, Gilead chu Makira ka pe a. 16 Tin, Reuben-ho leh Gad-ho chu Gilead aṭanga Arnon ruam, ruam lai tak thlengin an ram chin atân ka pe a, Amona thlahho ramri, Jabok lui thlengin; 17 tin, Araba leh Jordan pawh ramri atân Kinereth aṭanga Pisga chhak lam pangpêr hnuaia Tuifinriat Al, Araba tuifinriat thlengin. 18 “Tin, chumi lai chuan, ‘LALPA in Pathianin he ram hi in pualah a pe che u a ni, Israela thlah, in unaute hmaah in mi huaisen zawng zawng chu inrâlthuamin han kal ve rawh se. 19-20 Amaherawhchu, nangmahni anga in unaute chu LALPAN râlmuanga a siam hma leh LALPA in Pathianin Jordan râla ram a pêk chu an luah ve hma loh chuan, in nupuite leh in fanau tê tête leh in rante chu (ran in ngah tih ka hria a) in khua ka pêk tâk che uah hian lo awm sela; tichuan, in pual ṭheuh tûra ka pêk che uah hian in lo haw leh ṭheuh dâwn nia,’ tiin thu ka pe che u a. 21 Tin, chumi lai bawk chuan Josua chu, ‘LALPA in Pathianin chûng lal pahnihte chunga thil a tih zawng zawng chu i mitin a hmu vek a; chutiang tak bawk chuan in luhna tûr ram zawng zawng chungah LALPAN a ti ang. 22 Anmahni chu hlau suh ang che u; a beihpuitu che u chu LALPA in Pathian a ni si a,’ tiin thu ka pe a.
Kanaan ramah Mosia a luh ve phal a ni lo
23-24 “Tin, chumi lai vêk chuan, ‘Aw LALPA PATHIAN, i chhiahhlawh hnênah hian i ropuizia leh i kut chak tak chu i lantîr ta phawt chu a ni a; vânah emaw, leiah emaw hian i thiltih ang leh i thiltih ropui tak ang ti thei Pathian hi tu nge awm? 25 Mi kaitîr la, Jordan râla ram ṭha tak, chu tlâng mawi tak leh Lebanon chu mi hmuhtîr teh khai,’ tiin, LALPA chu ka ngên chiam a. 26 Nimahsela, nangmahni avângin ka chungah LALPA chu a thinur hle a, ka thu chu a pawm lo va; tichuan, LALPA chuan, ‘Tâwk tawh rawh se, he thu-ah hian mi be leh tawh suh; 27 Pisga tlâng chhipah han chuang la, thlang lamah te, hmâr lamah te, chhim lamah te, chhak lamah te i mit han lên la, han thlîr rawh; Jordan hi i kân dâwn lo a ni. 28 Amaherawhchu, Josua hi thu pe la, fuih ṭha la, tichak rawh; hêng mipuite hi a hruai kai dâwn a, i han hmuh tûr ram chu a luahtîr dâwn a ni,’ mi ti a. 29 Chutichuan, Beth-peor ep ruamah chuan kan awm ta a nih kha.
Thu awih tûrin Mosian Israel-te a fuih
1 “Khai le, aw Israel mite u, LALPA, in pi leh pute Pathianin ram a pêk che u chu nungdama in luah theihna tûra in pawm tûra ka zirtîr ṭhin che u dânte leh rorêlte chu ngaithla rawh u. 2 LALPA in Pathian thupêk ka pêk che u hi in pawm theihna tûrin, thu ka pêk che u hi in belhchhah tûr a ni lo va, in tikiam tûr a ni hek lo. 3 Baal-peor avânga LALPA thiltih chu in mitin a hmu a; Baal-peor betu zawng zawngte chu LALPA in Pathianin in zîng ata a tiboral a. 4 LALPA in Pathian vuantu apiangte erawh chu tûn thleng hian nungdamin in la awm ṭheuh va. 5 Ngai teh u, in va luah tûr ramah pawh in zawm zêl tûrin, LALPA ka Pathianin thu mi pêk ang takin dânte leh rorêlte chu ka zirtîr che u a. 6 Chutichuan, pawm ula, zâwm rawh u; chu tak chu, hêng dân zawng zawngte hi hriaa, ‘He hnam ropui tak hi mi fing tak leh thil hre mi tak an ni ngei mai,’ titu hnamte mit hmuhah chuan in finna leh thil hre mi in nihna a ni ang. 7 “Kan koh apianga LALPA kan Pathianin min hnaih anga anmahni hnaih ṭhîn Pathian nei hnam ropui tu nge awm ve? 8 Heti taka fel, dânte leh rorêlte, tûna in hmaa ka zam zawng zawng ang dân nei hi hnam ropui dang tu nge awm ve? 9 Eng pawh ni sela, fîmkhur ula, ngun takin invawng phawt mai rawh u; chuti lo chuan, in mitin a thil hmuhte chu in theihnghilh ang a, in dam chhûngin in thinlung ata a bo dah ang e. In fate leh in tute zirtîr rawh u; 10 tin, Horeb tlânga LALPA in Pathian hmaa in dina, LALPAN ka hnêna, ‘Mipuite chu min koh khâwmsak rawh, leilunga an awm chhûng zawnga mi ṭih dân an zîr theih nân leh an fate zirtîr tûrin ka thute ka lo hriattîr ang e,’ mi tih ni pawh kha in theihnghilh dah ang e. 11 Tichuan, in lo hnai a, tlâng bulah chuan in lo ding a, vânlaizâwl tawngin tlâng chu thim te, chhûm te, thim chhah mup te awmtîrin a kâng ta a. 12 Tin, LALPA chuan mei aṭang chuan a rawn bia che u a. A thusawi chu in hria a; nimahsela, riruang eng mah in hmu lo va, aw chauh in hria a ni. 13 A thuthlung zawm tûra thu a pêk che u, thu sâwm pêk chu in hnênah a puang a, lungphêk pahnihah a ziak a. 14 Tin, chumi lai chuan luah tûra in va kaina rama in zawm tûrin dânte leh rorêlte zirtîr tûrin LALPAN thu mi pe a.
Milem be lo tûra fîmkhur tûr
15-19 “Chuvângin, fîmkhur hle rawh u; milemte insiam chawpin, a pa ang emaw, a nu ang emaw, leia ran ang emaw, boruaka thlâwk ṭhîn, sava thla nei ang emaw, leia a vaha vâk mi ang emaw, lei hnuai tuia sangha zînga mi ang emawte siamin in intichhe dah rual ang e; Horeb tlânga mei aṭanga LALPAN a rawn biak ni che u khân riruang eng mah in hmu si lo va; a nih loh leh vân lam in han hawia, ni te, thla te, arsi te, vâna mi zawng zawngte rêng pawh in han hmuhin, LALPA in Pathianin vân hnuai chhîna mi zawng zawng a ruatsakte chuan a hîp ang che u a, in bia ang a, an rawng te in bâwl mai dah rual ang e. 20 LALPA chuan a mite, a ro ni tûrin thîr rawh tuina ata, Aigupta ram ata chu a hruai chhuak zâwk che u a ni, tûna in nih ang hi. 21 Chuti chang pawh ni lovin, nangmahni avângin LALPA chu ka chungah a thinur a, Jordan lui chu ka kân lohva, in luah atâna ram ṭha tak LALPA in Pathianin a pêk che uah chuan ka luh loh nân chhia a chham bawk a. 22 Kei chu he rama thi tûr ka ni a, Jordan lui chu ka kai dâwn lo a ni; nangni erawh chu in kai ang a, chu ram ṭha tak chu in luah ang. 23 Fîmkhur hle rawh u, LALPA in Pathian thuthlung, in laka a thlun chu in theihnghilh ang a, LALPA in Pathianin eng anpui maha siam a phal loh milemte in insiam chawp dah rual ang e. 24 LALPA in Pathian chu kan ral hmang mei, thîkthuchhe tak Pathian a ni si a. 25 “Tu leh fate in han neiha, chu rama rei fe in awm hnua, in intihkhawlohva, eng emaw anpuitea milem siam chawp maite in dina, a thin tiur tûra LALPA in Pathian mit hmuha thil ṭha lo in tih vaih chuan, 26 Jordan kâna in va luah tûr ram ata chu in boral thuai mai ang tih, in chungchâng thu-ah min hriatpuitu atân tûnah hian lei leh vân ka sâwm a ni; in chêng rei lo vang a, in boral vek mai ang. 27 LALPA chuan hnam tin zîngah a tidarh ang che u, hnamte zîngah chuan tlêm tê chauhvin in awm ang. 28 Chutah chuan, pathian, thing leh lunga mihring siam, hmu thei hlei lo, hre thei hlei lo, ei thei hlei lo, rim pawh hre thei hlei lote in bia ang a. 29 Nimahsela, chutah pawh chuan LALPA in Pathian chu in zawna, in thinlung zawng zawng leh in rilru zawng zawnga in zawn chuan in hmu leh ang. 30 Hrehawma in awma, in chunga chûng thil zawng zawng chu a lo thlen hunah, a tâwp a tâwpah chuan LALPA in Pathian lam in lo hawi leh ang a, a thu chu in pawm tawh ang a; 31 LALPA in Pathian chu zahngai thei tak Pathian a ni si a; a thlahthlam lo vang che u a, a tiboral lo vang che u a, in pi leh pute hnêna chhechhama a thuthlun chu a theihnghilh hek lo vang. 32 “In awm hma, tûn hma lam te chu han chhût ula, leilunga Pathianin mihring a siam achin vân hnuai chhînah, hetianga thil ropui hi a awm ngaiin, hriat a ni ngai emaw chu? 33 Mei aṭanga thu rawn sawi in hriata in la nun cheu sina pathian aw miin an hre ngaiin, 34 hnam dang zing ata fiahna te, chhinchhiahna te, thil mak te, indona te, kut chak tak te, bân phar te, thil râpthlâk tea LALPA in Pathianin in mit hmuha Aigupta rama a tih zawng zawng anga hnam hruai chhuak ngam pathian an awm ngai emaw chu? 35 LALPA chu Pathian a ni tih in hriat theih nân in hnêna tihlan a ni a; amah lo chu a dang rêng an awm lo. 36 A zirtîr nân che u vân aṭangin a aw a rawn hriattîr che u a, lei chungah hian a meipui chu a hmuhtîr che u a; mei aṭanga a thu chu in lo hria a. 37-38 In pi leh pute a hmangaih avângin an hnua an thlahte chu a thlang che u a, amah telin, a thiltihtheihna ropui takin hnam dang in aia ropui leh thiltithei zâwk a hnawh chhuahsak che u a, an ram chu luah tûra luhtîr che uin Aigupta ram ata chu a hruai chhuak che u a, tûna in nih ang hi. 39 Chuvângin, tûnah hian in thinlungah vawng ula, chung lam vânah leh hnuai lam leiah hian LALPA chu Pathian a ni tih hre rawh u; a dang rêng an awm lo. 40 Kumkhua atâna LALPA in Pathianin a pêk che u ramah chuan, nangmahni leh in thlahte tâna ṭha tûr leh in chên rei theih nân, a dânte leh a thupêkte, tûna ka pêk che u hi in zâwm tûr a ni,” tih hi.
Jordan lui khawchhak lama humhimna khuate
41-42 Chutichuan, Mosia chuan tualthattu, a ṭhenawm khawvêng, tûn hma pawha a huat lêm loh that palhtu tualtlânna, Jordan râl ni chhuahna lampangah khaw pathum a ruat a; chûng khua, a engah pawh a tlân chuan a him ang a: 43 chûng chu Reuben-ho pualah thlalêra tlâng zâwla Bezer te, Gad-ho pualah Gilead-a Ramoth te, Manase-ho pualah Basan-a Golan te a ni a.
Mosian Pathian hnên ata dân a dawng
44 Tin, hei hi Mosian Israela thlahte dân a pêk chu a ni; 45-46 hêng hi, Aigupta ram ata an lo chhuah laia Israela thlahte hnêna Mosian Jordan râla, Mosia leh Israela thlahten Aigupta rama an lo chhuah laia an thah, Hesbon-a awm Amon-ho lal Sihona rama Beth-peor zâwn ruama a sawi hriattîrna te, dân te, rorêl te chu a ni; 47 a ram leh Basan lal Oga ram, Jordan râl ni chhuahna lama Amor-ho lal pahnihte ram chu an luah a; 48 Arnon ruam fêma Aroer aṭanga Sion tlâng (Hermon an ti bawk) thleng leh 49 Jordan râl chhak lampang Araba zawng zawng, Pisga pangpêr hnuaia Araba tuifinriat thlengin.
Thu sâwm pêk
1 Tin, Mosian Israel-ho zawng zawng chu a ko khâwm a, an hnênah, “Aw Israel mite u, in zira in pawm tûra dân te, rorêl te in beng hriata vawiina ka sawi hi ngaithla rawh u. 2 LALPA kan Pathianin Horeb-ah chuan kan hnênah thu a thlung a. 3 LALPA chuan he thu hi kan pi leh pute hnênah khân a thlung lo va, keiniho, tûn thlênga mi nungdama la awm zawng zawngte hnênah ngei hian a ni, a thlun zâwk ni. 4 LALPA chuan tlângah mei aṭangin inhmatawnin a bia che u a 5 (chumi lai chuan LALPA thu kawhhmuh tûr che uin LALPA nêna in inkârah ka ding a; mei avâng chuan in hlau si a, tlângah chuan in han chho lo va): 6 “ ‘Kei hi LALPA i Pathian, Aigupta ram ata, bâwih ata hruai chhuaktu che ka ni. 7 “ ‘Keimah lo chu pathian dang rêng rêng i nei tûr a ni lo. 8 “ ‘Milem siam chawp, chung lam vâna mi emaw, hnuai lam leia mi emaw, lei hnuai lama tuia mi emaw, a eng anpui mah i insiam tûr a ni lo; 9 chung chu chibai i bûk tûr a ni lo va, an rawng i bâwl tûr a ni hek lo. Kei LALPA i Pathian hi Pathian thîkthuchhia, pate khawlohna avânga fate hrem ṭhîn, mi hawtute chu chhuan thumna leh chhuan lîna thlenga hrem thîn leh, 10 mi hmangaiha ka thupêkte pawmtu sâng tam takte chunga khawngaihna lantîr ṭhîn ka nih hi. 11 “ ‘LALPA i Pathian hming chu i lam mai mai tûr a ni lo. LALPA chuan a hming lam mai maitu chu thiam loh chantîr lohvin a chhuah dâwn si lo va. 12 “ ‘LALPA i Pathianin thu a pêk che angin Chawlhni chu thianghlim reng tûrin serh rawh. 13 Ni ruk chhûngin i thawk ang a, i hna zawng zawng chu i thawk tûr a ni; 14 a ni sarih nî erawh chu LALPA i Pathian tân Chawlhni a ni e; chumi nî chuan hna rêng rêng i thawk tûr a ni lo, nang pawhin, i fapa pawhin, i fanu pawhin, i bâwihpa pawhin, i bâwihnu pawhin, i bâwngpa pawhin, i sabengtung pawhin, i ran a enga pawhin, i ina ram dang mite pawhin; nangmah ang bawka i bâwihpa te, i bâwihnu te pawh an chawlh theih nân. 15 Nang pawh Aigupta ramah khân bâwih i ni tawh a, LALPA i Pathianin chuta ta chu kut chak tak leh bân phara a hruai chhuah che i ni tih hre reng rawh; chu vâng chuan a ni, LALPA i Pathianin Chawlhni serh tûr thu a pêk che ni. 16 “ ‘LALPA i Pathianin thu a pêk che angin i nu leh i pa chawimawi rawh; tichuan, LALPAN ram a pêkah che hian i hmuingîl ang a, i dam rei dâwn nia. 17 “ ‘Tual i that tûr a ni lo. 18 “ ‘I uire tûr a ni lo. 19 “ ‘I ru tûr a ni lo. 20 “ ‘I vêngte chungah hretu derah i insiam tûr a ni lo. 21 “ ‘I vêngte nupui i awt tûr a ni lo va, i vêngte in emaw, a lo emaw, a bâwihpa emaw, a bâwihnu emaw, a bâwngpa emaw, a sabengtung emaw, i vêngte thil a enga mah i awt tûr a ni lo,’ tiin.” 22 “Hêng thute hi tlângah mei te, chhûm te, thim chhah mup aṭangtein LALPAN aw ring takin in zavaia pung khâwmho hnênah a sawi a, a belhchhah leh chuang lo va. Chûng chu lungphêk pahnihah a ziak a, mi pe a.
Mipuiin an hlau
23 “Tin, tlâng chu a kan laia, thim aṭanga aw chu in han hriat chuan heti hi a ni a, min rawn hnaih a, in hnam puipa zawng zawng leh in upate chuan; 24 tin, ‘Ngai teh, LALPA kan Pathian chuan kan hnênah a ropuizia leh a lenzia a lantîr a, mei aṭanga a aw chu ka hria a; Pathianin mihring a biak pawha thihna a nih chuan lohna chu vawiinah kan lo hre ta a. 25 Chuvângin, engah nge kan thih ang? Hemi mei nasa tak hian min kâng ral mai ang asin; LALPA kan Pathian aw chu kan hriat leh chuan ka thi mai ang. 26 Mei aṭanga Pathian nung aw kan hriat anga hre vea dam si, tisa pu zawng zawng zîngah tu nge awm? 27 Nangin va hnaih la, LALPA kan Pathianin a sawi tûr zawng zawng chu va ngaithla teh khai; tin, LALPA kan Pathianin i hnêna a sawi zawng zawng chu nangin kan hnênah i sawi ang a; tichuan, kan lo ngaithla ang a, kan zâwm dâwn nia,’ in ti a. 28 “Tin, mi biak laia in thusawi chu LALPAN a lo hria a; tichuan, LALPAN ka hnênah, ‘Hêng mipuiten i hnêna thu an sawi chu ka lo hria a; an thusawi zawng zawng chu a ṭha hle mai. 29 Chutiang rilru chu pu ṭhîn sela aw, mi ṭih ang a, ka thupêkte chu an zâwm fo vang a, anmahni leh an fate pawh kumkhuain an hmuingîl hle tûr. 30 An hnênah, “In puan inahte va haw rawh u,” ti rawh. 31 Nang erawh chu ka kiangah ding la, luah tûra ram ka pêkah an pawm tûra i zirtîr tûr thupêk zawng zawng te, dân te, rorêl te chu ka hrilh ang che,’ a ti a. 32 Chuvângin, LALPA in Pathianin thu a pêk che u anga ti tûrin fîmkhur rawh u; ding lamah emaw, vei lamah emaw in pêng tûr a ni lo. 33 In va luah tûr ramah in awma, in hmuingîlna tûr leh in chên rei theih nân LALPA in Pathianin thu a pêk che u kawng in zawh tluan chhuak tûr a ni.
Thupêk ropui
1-2 “Tin, luah tûra in va kaina rama in zawm tûr leh nangni leh in fapate leh in tupaten LALPA in Pathian chu in ṭiha, in dam chhûng zawnga a dân zawng zawng leh a thupêk ka pêk che u hi in zawmna tûr leh, in lo chên rei theihna tûra LALPA in Pathianin nangmahni zirtîr tûra thu min pêk, thupêk te, dân te, rorêl te chu hêngte hi a ni. 3 Chuvângin, aw Israel mite u, in hmuingîla, LALPA in pi leh pute Pathianin a ṭawngtiam che u angin, hnutetui leh khawizu luanna rama nasa taka in lo pun theih nân ngaithla ula, zâwm tûrin fîmkhur rawh u. 4 “Aw Israel mite u, ngaithla teh u, LALPA kan Pathian chauh chu LALPA a ni a; 5 LALPA in Pathian chu in thinlung zawng zawngin, in rilru zawng zawngin, in chakna zawng zawngin in hmangaih tûr a ni. 6 Tin, hêng thu, vawiina ka pêk che u hi in thinlungah a châm reng ang a; 7 in fate ṭhahnemngai takin in zirtîr ang a, in ina in ṭhut lai te, kawnga in kal lai te, in mut lai te, in thawh hun tein in sawi ṭhîn tûr a ni. 8 Tin, chhinchhiahna atân in bânah in zem ang a, in mit leh mit inkâra chal hrênna atân a awm bawk tûr a ni. 9 Tin, in in kawngka biangah te, in kawngkhârah te in ziak tûr a ni.
Thupêk awih loh hlauhawmzia
10-11 “Tin, heti hi a ni ang a, LALPA in Pathianin in pu, Abrahama te, Isaaka te, Jakoba te hnêna chhechhama a pêk che u ram, in din ni hauh lo, khaw ropui leh mawi tak tak te; in tihkhah ni hauh lo, thil ṭha tinrênga khat in te; in chhun ni hauh lo, tuikhur chhun sa te; in chîn ni hauh lo, grêp huan leh olive thingte awmnaa a hruai luh che ua, in eia, in tlai hle hun chuan, 12 fîmkhur hle ang che u; chuti lo chuan, Aigupta ram ata, bâwih ata hruai chhuaktu che u LALPA in Pathian chu in theihnghilh mai dah ang e. 13 LALPA in Pathian chu in ṭih ang a, ama rawng chu in bâwl ang a, a hming chhâlin chhia in chham tûr a ni. 14 Pathian dang, in vêla mite pathiante chu in be tûr a ni lo, 15 in zînga awm LALPA in Pathian chu Pathian thîkthuchhia a ni; LALPA in Pathian thin chu in chungah a thawk ang a, leilung ata hi a tiboral mai dah ang che u. 16 “Masa-a in fiah ang khân LALPA in Pathian chu in fiah tûr a ni lo. 17 LALPA in Pathianin a pêk che u - thupêk te, a thuhriattîr te, a dân te hi fîmkhur takin in zâwm tûr a ni. 18-19 In hmuingîlna tûr leh LALPAN a sawi tawh anga in hmêlma zawng zawng hnawt chhuak tûra, LALPAN in pi leh pute hnêna chhia a lo chham tawh ram ṭha tak chu in va luah theih nân, LALPA mit hmuha dik leh ṭha chu in ti tûr a ni. 20 “Tin, in faten, ‘LALPA kan Pathianin thu a pêk che u thuhriattîr te, dân te, rorêl te hi engtizia nge ni le?’ tia nakin lama an la rawn zawh hun che u chuan, 21 nangnin in fate hnênah, ‘Aigupta ramah Pharaoa bâwih kan ni a, LALPAN Aigupta ram ata chu kut chak takin min hruai chhuak a; 22 tin, LALPAN kan mit hmuhah Aigupta ram chungah te, Pharaoa chungah te, a chhûngte zawng zawng chungah te, chhinchhiahna leh thil mak nasa tak leh manganthlâk takte a entîr a; 23 keini erawh chu min pêk tûra kan pi leh pute hnêna chhia a lo chham ram chu min pêk theih nân chuta ta chu min hruai chhuak a. 24 Tichuan, hêng dân zawng zawng hi zâwm tûr leh kan ṭhat rengna tûra LALPA kan Pathian chu ṭih tûrin LALPA chuan thu min pe a, vawiin anga nungdama min zuah reng theih nân. 25 A thu min pêk anga LALPA hmaa a thupêk zawng zawng zâwm tûra kan fîmkhur chuan kan tân damna a ni dâwn a ni,’ in ti tûr a ni.
LALPA pual hnam
1 “LALPA in Pathianin in va luah tûr rama a hruai luh che ua, in hmaa hnam tam tak - Hit-ho te, Girgas-ho te, Amor-ho te, Kanaan-ho te, Periz-ho te, Hiv-ho te, Jebus-ho te, in aia ropui leh thiltithei zâwk hnam sarihte a hnawh chhuah hun leh, 2 LALPA in Pathianin a pêk hun che ua, in thah hunah chuan, in tiboral vek tûr a ni; anmahni nên thu in thlung tûr a ni lo va, in khawngaih tûr a ni hek lo; 3 nupui pasalah in nei tûr a ni hek lo, in fanute chu an fapate in neihtîr tûr a ni lo va, an fanute chu in fapate in neihtîr tûr a ni hek lo. 4 In fapate, mi zui lai hi pathian dangte biakna lamah an hruai kawi mai ang a; tin, LALPA thin pawh chu in chungah a thawk ang a, a tiboral thuai mai ang che u. 5 An chungah hetiang hian in ti zâwk tûr a ni: an maichâmte in tichim ang a, an lungphunte in tikeh sawm ang a, an Aseri-te in kit ang a, an milem siam chawpte in hâl vek tûr a ni. 6 LALPA in Pathian tân hnam thianghlim in ni si a; leilunga hnam ahluana a pual bîk ni tûra LALPA in Pathianin a thlan che u in ni a. 7 “Hnam dang aia in tam avângin LALPAN in chungah a hmangaihna a fûktîr a, a thlang che u a ni lo va; hnam zawng zawnga hnam tlêm ber in ni asin; 8 LALPAN a hmangaih che u avâng leh in pi leh pute hnêna chhia a lo chham chu hlen a duh avâng zâwkin asin, LALPAN Aigupta lal Pharaoa kut ata kut chak takin bâwih ata a tlan chhuah che u ni. 9 Chuvângin, LALPA in Pathian chu Pathian a ni tih hre rawh u; Pathian rinawm, amah hmangaiha a thu zâwmtu chunga chhuan sâng thlenga thuthlung leh khawngaihna nghat renga, 10 amah hawtute tiboral tûra anmahni chung la laa thungrûl ṭhîn a ni; amah hawtute chu a rial rei lo vang a, anmahni chung la laah a thungrûl ang. 11 Chuvângin, thupêk te, dân te, rorêl te zawm tûra vawiina thu ka pêk che u hi in zâwm tûr a ni.
Thuawih vânga malsâwmna dawn tûr
12 “Tin, heti hi a ni ang a, hêng rorêlte hi in ngaihthlâka, in zawma, in tih avângin LALPA in Pathianin in pi leh pute hnêna chhia a lo chham, thuthlung leh khawngaihna chu in chungah a nghat ang a; 13 a hmangaih ang che u a, mal a sâwm ang che u a, a tipung ang che u; pêk tûra in pi leh pute hnêna chhia a chham ramah chuan in rîla rah leh in lei rah pawh mal a sâwm ang, in buh te, in uain te, in hriak te, in bâwngno leh in berâmnote pawh. 14 Hnam zawng zawnga malsâwmna dawng nasa ber in ni ang a; in zîngah a hmei a pa ching rêng rêng an awm lo vang, in ran zîngah pawh. 15 Tin, LALPAN hri zawng zawng a tihkiansak vek ang che u a, in hriat tawh hnu Aigupta ram hrite chu in chungah a lêntîr lo vang a, a hawtute che u zawng zawng chungah a lêntîr zâwk ang. 16 LALPA in Pathianin a pêk tûr che u hnam zawng zawng in tiboral vek tûr a ni; in khawngaih tûr a ni lo va, an pathian rawng pawh in bâwl tûr a ni lo; in tân thang a ni dâwn si a. 17 “In rilrua, ‘Hêng hnamte hi kan aiin an tam si a, engtin nge kan luhchhuah theih ang?’ ti in nih chuan, 18 anni chu hlau suh ula; LALPA in Pathianin Pharaoa leh Aigupta mi zawng zawng chunga a thiltihte kha hre rawh u, 19 fiahna nasa tak in mit ngeia in hmuh te, chhinchhiahna te, thil mak te, kut chak tak te, bân phar tea LALPA in Pathianin a hruai chhuahna che u kha; khatiang khân LALPA in Pathianin in mi hlauhte chungah chuan a ti zêl ang. 20 LALPA in Pathian chuan an zîngah khawinghal a tîr leh nghâl ang, a la dam, in laka birute chu an boral vek thlengin. 21 Anni chu in hlau tûr a ni lo; LALPA in Pathian chu in zîngah a awm si a, Pathian ropui tak, ṭihbaiawm tak mai chu. 22 LALPA in Pathian chuan chûng hnamte chu zawi zawiin a hnawh chhuahsak hret hret ang che u a; in tiboral nghâl mai tûr a ni lo va; chuti lo chuan, ramsate in pawi khawih khawpin an lo pung mai ang. 23 An boral hma loh chu LALPA in Pathianin a pe ang che u a, buai namênlovin a tibuai ang. 24 An lalte chu in kutah a pe ang a, an hming chu vân hnuai ata hi in thai bo daih tûr a ni; in tihboral dêr thlengin a chelh tûr che u tu mah rêng rêng an awm lo vang. 25 An pathian lem siam chawpte chu in hâl tûr a ni; chumia tangkarua emaw, rangkachak emaw chu in ît tûr a ni lo va, in tân in la tûr a ni hek lo; chuti lo chuan, in âwk dah ang e; LALPA in Pathian ngaihin thil tenawm a ni si a; 26 in in chhûnga thil tenawm la lûtin, chu thil ang chuan ânchhe dawngah i insiam tûr a ni lo; ten namênlova tenin in haw hle tûr a ni, ânchhe dawng thil a ni si a.
Ram ṭha tak neih tûr
1 “Nungdama in awma, in lo pun zêla, pêk tûr che ua in pi leh pute hnêna LALPAN chhia a chham ram chu in va luah theih nân, thupêk vawiina ka pêk che u hi zâwm tûrin in fîmkhur tûr a ni. 2 Tin, a thupêkte chu in zâwm dâwn nge dâwn lo, in rilru hriat nân fiah tûr leh tihrehawm tûr che u a, thlalêra kum sawmli a hruaina zawng zawng che u kawng chu hre reng rawh u. 3 Mihring hi chhang chauhvin an nung lo va, LALPA kâa thu tin chhuakin an nung zâwk a ni tih a hriattîr theih nân che u, a tihrehawm che u a, in ṭâm te a phal a, in hriat ngai loh, in pi leh pute pawhin an hriat ngai bîk loh manna chuan a châwm che u a. 4 Hêng kum sawmli chhûng hian in silhfênte chu in sin chul lo va, in kete pawh a vûng lo va. 5 Tin, miin a fa a thunun ṭhîn angin, LALPA in Pathian chuan a thunun ṭhîn che u a ni tih hi in rilruin hre reng rawh u. 6 Tin, a kawng zawh tûr leh amah chu ṭih tûrin LALPA in Pathian thupêkte chu in zâwm tûr a ni. 7 LALPA in Pathian chuan ruam leh tlâng aṭanga lo chhuak lui tui te, tuikhur leh tui thûk tak awmna ram, 8 buh te, barli te, grêp te, theipui te, pawmgranet te awmna ram, hriak nei olive leh khawizu awmna ram, 9 chham lova chhang in ei ṭhinna tûr ram, eng mah in tlâkchham lohna tûr, a lungte chu thîr, a tlângte chu dâr laih chhuah theihna ram ṭha takah chuan a hruai lût dâwn si che u a. 10 In eia, in tlai hle hun chuan, ram ṭha tak a pêk che u avâng chuan LALPA in Pathian chu in fak ang.
LALPA theihnghilh lo tûra fîmkhur tûr
11 “A thupêk te, a rorêl te, a dân te, vawiina ka pêk che u hi zâwm lovin LALPA in Pathian chu in theihnghilh dah rual ang e, fîmkhur rawh u; 12 chuti lo chuan, in eia, in tlaia, in ṭha takte in saka, in luah hun leh, 13 in ran rual te, in berâm rual te a lo puna, in tangkarua te, in rangkachak te a lo puna, in thil neih zawng zawngte a lo pun hun chuan, 14 in rilrute a lo chapo vang a, bâwih ata Aigupta ram aṭanga hruai chhuaktu che u LALPA in Pathian chu in theihnghilh mai ang. 15 Ani chuan thlalêr zau tak leh râpthlâk tak, rûl chuk na mite leh khawmualkaikuangte awmna, tui awm lohna, ram rovah a hruai tlang che u a; meilung lungpui aṭangin tui a tihchhuahsak che u a, 16 in pi leh pute hriat ngai loh manna chuan a châwm che u a, tûn hnu lam thua in ṭhat theih nân a tihrehawm che u a, a fiah theihna tûr che uin. 17 Tin, ‘Hêng kan sum leh paite hi keimahni chakna leh kan kutkawih a ni,’ in ti rilru dah ang e, fîmkhur bawk rawh u. 18 Tûna a ngheh anga in pi leh pute hnêna chhechhama thuthlun chu a tihnghehna tûrin, LALPA in Pathian chu hre reng rawh u, sum leh pai deh chhuah theihna petu che u chu amah chu a ni zâwk asin. 19 Tin, heti hi a ni ang a, LALPA in Pathian chu in theihnghilha, pathian dangte in zuia, an rawngte in bâwla, in biak vaih chuan in boral ngei ngei ang tih vawiinah hian ka hriattîr a che u. 20 In hmaa hnam dangte a tihboral angin nangni pawh in boral ang, LALPA in Pathian aw chu ngaithla duh lo in nih dâwn avângin.
Mipui thuawih lo
1-2 “Aw Israel mite u, ngaithla teh u, ‘Anak-ho chu tuin nge chelh ang i?’ an tih ṭhin, in aia ropui leh thiltithei zâwk hnam, khawpui vân tawnga kulh nei leh ropui tak, mi lian tak, sâng pui pui, in hriat tawh sa Anaka thlahte ram chu va luah tûrin tûnah chuan Jordan lui chu in kân dâwn ta a. 3 Chuvângin, LALPA in Pathian chu kan ral hmang mei anga in hmaa kal ṭhîna chu a ni tih tûnah hian hre rawh u; ani chuan anni chu a tiboral ang a, a tihtlâwmsak ang che u a; tichuan, LALPAN in hnêna a sawi tawh ang khân, anni chu in hnawt chhuak ang a, in tiboral thuai mai ang. 4 “LALPA in Pathianin a hnawh chhuahsak hnu che u chuan, ‘Kan felna avângin he ram hi luah tûrin LALPAN min hruai lût a ni,’ in rilruin ti hauh suh u; hêng hnamte hi an sual avâng zâwkin a ni, LALPAN a hnawh chhuahsak dâwn che u ni. 5 In fel avâng emaw, in rilru dik avâng emawin an ram chu in luah dâwn lo va, hêng hnam sual avâng leh LALPAN in pu Abrahama te, Isaaka te, Jakoba te hnêna a chhechham thu tinghet tûrin, LALPA in Pathianin anni chu a hnawh chhuahsak che u a ni zâwk e. 6 Chuvângin, he ram ṭha tak hi in fel avânga luah tûrin LALPAN a pe che u a ni lo tih hre rawh u; hnam luhlul tak in ni si a. 7 “Thlalêra LALPA thin in tihur ṭhinzia te kha hre reng ula, theihnghilh suh u; Aigupta ram ata in chhuah nî aṭanga hemi hmun in lo thlen thleng hian LALPA chunga hel hmang in ni a. 8 Horeb-ah pawh khân LALPA thin tiura, tiboral hial tûr che uin LALPA a thinrim a. 9 Lungphêk, in hnêna LALPAN thuthlunna lungphêk, la tûra tlânga ka han chhoh lai khân ni sawmli leh zan sawmli tlângah chuan ka han awm a; chhang pawh ka ei lo va, tui pawh ka in hek lo. 10 Tin, LALPA chuan lungphêk pahnih, Pathian kutzunga ziak chu mi pe a; chumiah chuan in pun khâwm nîa tlâng chunga mei aṭanga LALPAN in hnêna thu a sawi zawng zawng kha a chuang a. 11 Tin, ni sawmli leh zan sawmli hnuah chuan heti hi a ni a, lungphêk pahnih, thuthlunna lungphêk chu mi pe a. 12 Tin, LALPA chuan ka hnênah, ‘Tho la, heta ta hi chhuk thuai rawh; Aigupta ram ata i hruai chhuah, i mite chu an intihchhiat zawh tâk khu; zawh tûra thu ka pêk kawng ata chu an pêng ta pang mai a, milem chhûn chawp an insiam tâk mai khu,’ a ti a. 13 Tin, LALPA chuan, ‘He mite hi ka en ka enin, ngai teh, hnam luhlul tak an ni; 14 anmahni tiboral tûr leh vân hnuai ata an hming thai bo tûrin ka tih tihin ka han ti teh ang: tin, nang hi anmahni aia hnam thiltithei leh ropui zâwkah ka siam teh ang che,’ tiin min be bawk a. 15 “Chutichuan, tlâng ata chu ka lêt thla a, tlâng chu a kâng ta a; thuthlunna lungphêk pahnih chu ka kut khinghnihin ka keng a. 16 Tin, ka han thlîr a, ngai teh u, LALPA in Pathian chungah in lo sual ta a; bâwngno lem chhûn chawp in insiam a, LALPAN thu a pêk che u kawng ata chu in pêng ta pang mai a. 17 Tin, lungphêk pahnih chu ka chawi a, ka kut khinghnih ata chu ka paih a, in mit hmuhah ka tikeh a. 18 Tin, hmâna ka tih ang khân ni sawmli leh zan sawmli LALPA hmaah ka bawkkhup a; a thin tiur tûra LALPA mit hmuha in thil tihsual tâk, in sualna zawng zawng avângin chhang pawh ka ei lo va, tui pawh ka in hek lo. 19 Nangmahni tiboral tûra LALPA thinurna, a thinrimna leh lungnihlohna nasa tak chu ka hlau si a. Nimahsela, chumi ṭum pawh chuan LALPAN ka thu chu mi ngaihthlâksak a. 20 Tin, LALPA chu Arona tiboral duh hial khawpin a thinur a; nimahsela, Arona pawh ka ṭawngṭaisak nghâl bawk a. 21 In sualna avânga in siam bâwngno lem chu ka la a, ka hâl a, ka chhu sawm a, vaivut angin ka râwt dip derh a; tin, a dip chu tlâng aṭanga lui lo luangah chuan ka paih a. 22 “Tin, Tabera-ah te, Masa-ah te, Kibroth-hat-tava-ah te pawh LALPA chu in tithinur a. 23 Tin, LALPAN, ‘Ram ka pêk che u chu han luah rawh u,’ tia Kadesh-barnea aṭanga a tirh lai che u khân LALPA in Pathian thupêk chu in helsan a, amah chu in ring lo va, a aw chu in ngaithla bawk hek lo. 24 Ka hriat tirh che u ata LALPA chunga hel hmang mi in ni reng a. 25 Chutichuan, LALPAN, ‘Ka tiboral dâwn,’ a tih che u avâng khân LALPA hmaah ka bawkkhup a, ni sawmli leh zan sawmli ka bawhkhuh kha. 26 Tin, LALPA hnênah chuan ka ṭawngṭai a, ‘Aw LALPA PATHIAN, ropuinaa i tlan, kut chak taka Aigupta ram ata i tlan chhuah, i mite leh i rochante chu tiboral suh ang che. 27 I chhiahhlawh Abrahama te, Isaaka te, Jakoba te chu hre reng la, he miteho hi an luhlulzia te, an suahsualzia te, an sualzia teah en suh ang che; 28 chuti lo chuan, i mi hruai chhuahna rama mite chuan, LALPAN a ram tiamah chuan a hruai theih loh avâng leh a huat avângin, thlalêra thah tûrin a hruai chhuak a ni, an ti dah ang e. 29 I thiltihtheihna ropui tak leh i bân phara i hruai chhuah, i mite leh i rochante an ni miau si a,’ ka ti a.
Mosian thupêk a dawng leh
1 “Chumi lai chuan LALPAN ka hnênah, ‘Lungphêk pahnih, hmâna mi ang kha chher leh la, tlângah ka hnênah lo kal la, thingin bâwm siam rawh. 2 Tin, hmâna lungphêk i tihkeh tâktea thu chuang kha lungphêkahte chuan ka ziak ang a, bâwmah chuan i dah dâwn nia,’ a ti a. 3 Tichuan, thingri thingin bâwm ka siam a, hmâna mi ang lungphêk pahnih ka chher a, lungphêk pahnih chu kengin tlângah chuan ka chho va. 4 Tin, lungphêkahte chuan a hmasaa ziak ang, in pun khâwm nîa tlânga mei aṭanga LALPAN in hnêna a sawi thu sâwm pêk chu a ziak a, LALPA chuan mi pe a. 5 Tin, tlâng ata chu ka lêt thla a, lungphêk chu ka bâwm siamah chuan ka dah a; LALPAN thu mi pêk angin chutah chuan a awm ta reng a. 6 (“Tin, Israela thlahte chu Beeroth Bene-jaakan aṭangin Mosera-ah an kal a; chutah chuan Arona chu a thi a, tah chuan an phûm a; tin, a fapa Eleazaran a aiawhin puithiam hna a thawk a. 7 Chuta ṭang chuan Gudgoda-ah an kal a; tin, Gudgoda aṭang chuan tui tamna ram Jotbatha-ah an kal a. 8 “Chumi lai chuan tûn thlenga LALPA thuthlung bâwm zâwna, LALPA hmaa a rawng bâwla, a hminga malsâwmsaktu ni tûrin Levi chi chu a tihrang a. 9 Chuvângin, Levia chuan a unaute zîngah chanvo pawh, rochan pawh a nei lo va; LALPA in Pathianin a hnêna a sawi angin LALPA chu a rochan a ni.) 10 “Tin, a hma ang bawk khân tlângah chuan ni sawmli leh zan sawmli ka awm a; tin, chumi ṭum pawh chuan LALPAN ka thu chu a ngaithla a, LALPA chuan a tiboral duh ta lo che u a nih kha. 11 Tin, LALPAN ka hnênah, ‘Tho la, mipuite hma hruai rawh; anmahni pêk tûra an pi leh pute hnêna chhechhama ka tiam ram chu an luah tûr a ni,’ a ti a.
Pathian thil phût
12 “Khai le, Israel mite u, in laka LALPA in Pathianin a phût chu eng mah dang a ni lo va, in ṭhatna tûra LALPA in Pathian ṭiha, a kawng zawng zawng chu zawha, amah hmangaiha, in thinlung zawng zawng leh in rilru zawng zawnga LALPA in Pathian rawng bâwla, 13 LALPA thupêkte, a dânte zawm tûra tûna thu ka pêk che u pawm hi a ni. 14 Ngai teh u, vân te, vânte vân leh leilung leh a chhûnga awm zawng zawng hi LALPA in Pathian ta vek a ni a. 15 Nimahsela, in pi leh pute hmangaih chu a lâwm zâwng a ni a, hnam dang zawng zawng aiin nangniho hi a hnam thlan in la ni ta cheu va. 16 Chuvângin, in thinlung hmâwr vun tan ula, tihmawh tawh suh u. 17 LALPA in Pathian chu pathiante Pathian, hotute Hotu, Pathian ropui tak, chak tak, ṭihbaiawm tak, tu mah duhsak bîk nei lova, thamna pawh la ngai lo a ni si a. 18 Pa nei lote leh hmeithaite chu fel takin ro a rêlsak ṭhîn a, ram dang mite chu ei tûr leh silhfênte pein a hmangaih ṭhîn a. 19 Chuvângin, ram dang mite chu hmangaih ve rawh u; nangni pawh Aigupta ramah khân ram dang mi in nih kha. 20 LALPA in Pathian chu in ṭih ang a, ama rawng chu in bâwl ang a; tin, amah chu in vuan tlat ang a, a hming chhâlin chhia in chham tûr a ni. 21 Amah chu in fak tûra chu a ni, hêng in mita in hmuh tâk thil ropui tak leh râpthlâk takte tihsaktu che u in Pathian a ni. 22 In pi leh pute chu Aigupta ramah sawmsarih an chhuk a; tûnah chuan tam lama vâna arsi zâtin LALPA in Pathianin a titam ta che u a ni.
LALPA ropuizia
1 “Chuvângin, LALPA in Pathian chu in hmangaihin a thurochhiah te, a dân te, a rorêl te, a thupêk te in zâwm fo tûr a ni. 2 Tûnah hian hre rawh u khai; LALPA in Pathian thununna te, a ropuizia te, a bân chakzia te, a bân pharzia te, 3 a chhinchhiahna te, a thiltih, Aigupta ram chhûnga Aigupta lal Pharaoa chung leh a ram chhûng zawng zawnga a tih te, 4 Aigupta sipaiho leh an sakawr leh an tawlailîr chunga a thiltih te; an ûm lai che ua, Tuifinriat Sen tuia a vûrtîr zia te, tûn thlenga LALPAN a tihboral zia te; 5 hemi hmun in thlen hma loh zawnga thlalêra in chunga a thiltih dân te; 6 Reubena fa Eliaba fapa Dathana leh Abirama-te chunga a tih dân te; leiin a kâ a âna Israel mite zawng zawng zînga anmahni leh an chhûngte leh an puan inte leh, an ran hruai zawng zawng a lem vek dân te hre lo in thlahte hnêna sawi ka ni lo va; 7 in mit ngeia LALPAN thil ropui tak a tih zawng zawng hmutute hnênah a ni zâwk e.
Ram tiam nawm tûrzia
8-9 “Chuvângin, in lo chaka, luah tûra in va pan ram chu in luah theih nân leh hnutetui leh khawizu luanna ram, in pi leh pute leh an thlahte pêk tûra LALPAN chhia a chham ramah chuan in chên rei theih nân tûna thu ka pêk che u, thupêk zawng zawngte hi in zâwm tûr a ni. 10 In va luah tûr ram chu, in lo chhuahna Aigupta ram, thlai huana chi in tuha, in kea tui in leih ṭhinna ang a ni lo va; 11 in va luah tûr ram chu tlângte leh ruam, vân ruahtui dawng ram a ni zâwk a. 12 LALPA in Pathian zawn chhuah ram a ni a; LALPA in Pathian mit chu kum thar aṭanga a tâwp thlengin a fu reng ṭhîn. 13 “Tin, heti hi a ni ang a, LALPA in Pathian chu hmangaih tûr leh, in thinlung zawng zawng leh in rilru zawng zawnga a rawng bâwl tûra ka thupêk, tûna ka pêk che u hi ṭhahnemngai taka in zawm chuan, 14 in ram ruahtui chu a hun takah, ruahtui tla hmasa leh ruahtui tla hnuhnûng chu ka pe ang che u a; tichuan, in buh te, in uain te, in hriak te in seng lût thei ang. 15 In rante tân pawh in ramah hlobet te ka awmtîr bawk ang a, nangni pawhin in ei ang a, in tlai ang. 16 Fimkhur rawh u khai; chuti lo chuan, in thinlung chu bumin a awm ang a; in pêng ang a, pathian dang rawng te in bâwl ang a, in be mai dah ang e; 17 chuti a nih chuan LALPA thin in chungah a lo thawk ang a, vân chu a khâr ang a, ruah a sûr lo vang a, lei chuan a rah a chhuah lo vang a; tichuan, LALPA pêk che u, ram ṭha tak ata hi in boral thuai mai ang. 18 “Chuvângin, hêng ka thute hi in thinlung leh in rilruah khung ula, chhinchhiahna atân in bân in zem ang a; tin, in mit leh mit inkâra chal hrênna atân a awm bawk tûr a ni. 19 Chûng chu in fate in zirtîr ang a, in ina in ṭhut lai te, kawnga in kal lai te, in mut lai te, in thawh hun tein in sawi ṭhîn tûr a ni. 20 Tin, in kawngka biangah te, in kawngkhârah te in ziak tûr a ni; 21 tichuan, in pi leh pute pêk tûra chhia a chham ramah chuan in dam chhûng nî leh, in fate dam chhûng nî chu lei chunga vân nî ang khian a tisei ang. 22 LALPA in Pathian chu hmangaih tûr leh a kawng zawng zawng zawh tûr leh, amah vuan tlat tûra ṭhahnemngai taka hêng thu ka pêk che u thupêk zawng zawng hi in zawm phawt zawngin, 23 LALPA chuan hêng hnam zawng zawng hi a hnawh chhuahsak ang che u a, in aia ropui zâwk leh thiltithei zâwk hnamte ram chu in luah ang. 24 In kephaha in rah apiang chu in ta a ni ang a, thlalêr aṭang leh Lebanon tlâng aṭangin lui, Euphrates lui aṭang chuan thlang lam tuifinriat thlengin in ram a ni ang. 25 Tu mah rêng rêngin an chelh lo vang che u; LALPA in Pathianin in hnêna a sawi tawh ang khân, in va rah tûr ram zawng zawngah chuan nangmahni ṭihna leh hlauhna a awmtîr ang. 26 “Ngai teh u, vawiinah hian in hmaah malsâwmna leh ânchhia ka dah a: 27 LALPA in Pathian thupêkte, tûna ka pêk che u hi in zawm chuan, malsâwmna; 28 LALPA in Pathian thupêkte chu in zawm lohva, in hriat ngai loh pathian dangte be tûra ka thupêk che u in pênsan erawh chuan, ânchhia. 29 “Tin, heti hi a ni ang a, in va luah tûr rama LALPA in Pathianin a hruai luh che u hnuah chuan, malsâwmna chu Gerizim tlângah in dah ang a, ânchhia chu Ebal tlângah. 30 Ni tlâkna piah, Araba-a awm Kanaan-ho ram, Gilgal zâwn More sasaw sîr, Jordan râla mi a ni lâwm ni? 31 LALPA in Pathianin a pêk che u ram va luah tûr chuan Jordan chu in kân tûr a ni a, in luah ang a, chutah chuan in awm ang. 32 Tin, tûna in hmaa ka dah, dân leh rorêl zawng zawng chu zâwm tûrin in fîmkhur tûr a ni.
Pathian biakna tûr hmun pakhat
1 “LALPA, in pi leh pute Pathianin a pêk che u ram in luaha, leilunga in awm chhûnga fîmkhur taka in zawm tûr dân te leh rorêl dânte chu hêngte hi a ni. 2 In va luah tûr ram hnamten tlâng lian te, tlâng tê te, thing hring tin hnuaitea an pathiante rawng an bâwlna hmun zawng zawng chu in tichhe vek tûr a ni; 3 an maichâmte in tichim ang a, an lungphunte in tisawm vek ang a, an Aseri-te in hâl tûr a ni; an pathian lem siam chawpte chu in kihsak ang a, chuta an hming chu in thai bo tûr a ni. 4 Chutiang chuan LALPA in Pathian chungah in ti tûr a ni lo. 5 LALPA in Pathianin hnam zawng zawng zînga a hming awmna tûr hmun, a la ruat tûr chu in zawng zâwk ang a, chutah chuan in kal tûr a ni. 6 Chutah chuan in hâlral thilhlan te, inthawina te, in sâwma pakhat te, in kût thên thilhlan te, in thutiam te, in duh thua thilhlan te, in ran rual leh in berâm rual zînga piang hmasa berte in rawn la tûr a ni; 7 tin, chutah chuan LALPA in Pathian hmaah in ei ang a, in kutkawih LALPA in Pathianin mal a sâwmna che uah chuan hlim takin in awm tûr a ni, in chhûngkuain. 8 “Mi tinin mahni ṭha tih zâwng ang maia tûna kan tih ang hian in ti tûr a ni lo. 9 LALPA in Pathianin a pêk che u ram leh chawlhna chu in la thleng rih si lo va. 10 Jordan lui in kaia, LALPA in Pathianin a luahtîr tûr che ua in awma, him taka in awm theihna tûra in vêla hmêlma zawng zawng laka a chawlhtîr hunah che u erawh chuan heti hi a ni ang a, 11 LALPA in Pathianin a hming awmtîrna tûr a ruat hmuna rawn lâk tûra ka tih zawng zawng chu chutah chuan in rawn la tûr a ni, in hâlral thilhlan te, in inthawina te, in sâwma pakhat te, in kût thên thilhlan te, LALPA hnêna in tiam ṭha ṭhate chu; 12 tin, LALPA in Pathian hmaah chuan hlim takin in awm ang, nangmahni leh in fapate, in fanute nên, in bâwihpate, in bâwihnute nên, in ina awm, Levi-hote nên, anni chuan in zîngah chanvo leh ram nei ve si hek lo. 13 Hmun in hmuhna apiangah in hâlral thilhlante hlân mai lo tûrin fîmkhur rawh u khai; 14 in hnamte zînga LALPAN a la ruat tûr hmunah chuan in hâlral thilhlante chu in hlân zâwk ang a, chutah chuan thu ka pêk zawng zawng che u chu in ti tûr a ni. 15 Amaherawhchu, LALPA in Pathianin malsâwmna a dawntîr che u ang zêlin, in nunnain a châk ang ang chu in in ṭheuhvah in talh ang a, a sa in ei thei ang; thianghlim lote leh thianghlimte pawhin sangai te, sakhi te ang hi chu an ei thei ang. 16 A thisen erawh chu in ei tûr a ni lo; tui angin leiah in leihbaw tûr a ni. 17 “In inah chuan sâwma pakhat, in buh te, in uain te, in hriak te leh in ran rual leh berâm rual zînga piang hmasa ber te, in thutiama mi te, in duh thua thilhlan te, in kût thên thilhlan te chu in ei thei lo vang a; 18 LALPA in Pathianin hmun a la ruat tûrah, LALPA in Pathian hmaah in ei zâwk tûr a ni, nangmahni leh in fapate leh in fanute, in bâwihpate, in bâwihnute, in khuaa awm Levi-hote nên; LALPA in Pathian hmaah in kutkawih apiangah hlim takin in awm tûr a ni, 19 In rama in awm chhûng zawng Levi-ho chu thlauthla lo tûrin fîmkhur rawh u. 20 “LALPA in Pathianin a tiam che u anga in ram a tihzauva, in nunnain sa ei a châk avânga, ‘Sa ka ei ang,’ in tih hunah chuan, in nunnain a châk zâwng apiang sa chu in ei thei ang. 21 LALPA in Pathianin a hming awmna tûr chu in hlat luattuk chuan, thu ka pêk che u ang khân LALPAN a pêk che u in ran rual leh in berâm rual zînga mi in talh ang a, in nunnain a châk ang zâwng chu in inah in ei tûr a ni. 22 Sangai sa te, sakhi sa te in ei ang maiin in ei ang a, thianghlim lote leh thianghlimte pawhin angkhat rengin in ei ang. 23 Thisen erawh chu ei lo tûrin fîmkhur rawh u; thisen chu nunna a ni si a; nunna chawpin sa chu in ei tûr a ni lo. 24 In ei hauh lo tûr a ni; tui angin leiah in leihbaw mai tûr a ni. 25 In ei tûr a ni lo; tichuan, LALPA mit hmuha thil dik in tih hian nangmahni leh in hnua in fate tân a la ṭha dâwn nia. 26 In thil thianghlimte leh in thutiama mite chauh keng ula, LALPAN hmun a la ruat tûrah chuan kal ang che u. 27 Tin, LALPA in Pathian maichâmah in hâlral thilhlan chu, a sa leh a thisen in hlân ang a; in inthawina thisente chu LALPA in Pathian maichâmah chuan in chhûng chhuak ang a, a sa chu in ei ang. 28 Hêng thu ka pêk zawng zawng che u hi ngun takin ngaichâng rawh u; tichuan, LALPA in Pathian mit hmuha thil ṭha leh thil dik in tih hian in tân leh in hnua in fate tân kumkhuain a la ṭha dâwn nia.
Milem biak loh tûr
29 “LALPA in Pathianin in va hneh tûr hnamte a tihbosak che ua, an ram in luaha, in khawsak hnuah chuan, 30 tihborala an awmna angah khân in awh ve lohna tûrin fîmkhur ula, ‘Hêng hnamte hian engtin nge an pathian rawng an bâwl? An tih angin keini pawhin i ti ve ang u,’ tiin, an pathiante chungchâng thu te zâwt vêl suh u. 31 Chutiang chuan LALPA in Pathian chungah in ti tûr a ni lo; an pathian chungah chuan LALPA ngaiha thil tenawm tinrêng, a huat tak maite chu an ti ṭhîn a; an fapate, an fanute ngei pawh an pathiante tân an hâl ṭhîn a ni. 32 “Tih tûra thu ka pêk che u apiang chu in ti tûr a ni; in belhchhah tûr a ni lo va, in tikiam tûr a ni hek lo.
1 “In zîngah zâwlnei emaw, mang neitu emaw an lo awma, chhinchhiahna emaw, thil mak emaw an entîr che ua, 2 chhinchhiahna emaw, thil mak emaw an entîr che u a lo thlena, in hriat ngai loh, ‘Pathian dang i zui ang u khai, an rawng i bâwl ang u,’ in hnêna an tih chuan, 3 chu zâwlnei emaw, mang neitu emaw thute chu in pawm tûr a ni lo; LALPA in Pathian chuan in thinlung zawng zawng leh in nunna zawng zawngin, LALPA in Pathian chu in hmangaih nge hmangaih lo tih hriat nân a fiah che u a ni e. 4 LALPA in Pathian chu in zui ang a, amah chu in ṭih ang a, a thupêkte chu in zâwm ang a, a thusawite chu in pawm ang a, a rawng te in bâwl ang a, amah chu in vuan tlat tûr a ni. 5 Tin, chu zâwlnei emaw, mang neitu emaw chu tihhlum tûr a ni. Aigupta ram ata hruai chhuaka, bâwih ata tlantu che u, LALPA in Pathianin zawh tûr thu a pêk che u kawng ata chu tipêng tûr che ua, LALPA in Pathian chunga helna thu a sawi avângin. Chutiang chuan in zînga thil ṭha lo chu in tibo tûr a ni. 6 “I unaupa emaw, i fapa emaw, i nupui pawm lai emaw, i ṭhian bul emaw pawhin in thlahtute la biak ngai loh pathian dangte be tûrin an thlêm thei che u a, 7 in bul hnaia chêngte pathian emaw, ram hla taka chêngte pathian emaw be tûrin an râwn thei che u a. 8 Mahse, chutiang mi chuan an thlêm thlu tûr che u a ni lo, an thurâwn chu ngaithla suh ang che u. In thupin in zuah tûr a ni hek lo. 9 In tihlum ngei ngei tûr a ni zâwk a; a tihlum tûrin kut i thlâk hmasa ang a, chumi hnuah mipui zawng zawngin. 10 Lungin in dêng hlum tûr a ni, Aigupta ram aṭanga bâwih ata hruai chhuaktu che u LALPA in Pathian hnên ata tihpênna che u a zawn avângin. 11 Tichuan, Israel mi zawng zawngin an hria ang a, an hlau vang a, in zîngah chutiang suahsual rêng rêng chu an chîng tawh lo vang. 12 “LALPA in Pathianin in awmna tûra a pêk che u in khaw pakhatah chuan, 13 in zîng ata mi dukdaklo ṭhenkhat lo chhuaka, chumi khawpuia mite chu in hriat ngai loh pathian dangte be tûrin an hruai bo tih thu sawi in hriat chuan, 14 zâwt vêl ula, zawng chhuak ula, ṭhahnemngai takin zâwt rawh u; tin, ngai teh u, thu dik a lo niha, chutiang thil tenawm in zîngah tih a ni tih hriat chian a nih chuan, 15 khandaihin chumi khuaa awmte chu in tihlum ngei ngei tûr a ni a; a chhûnga awm zawng zawng, ran rualte nên khandaihin in tiboral vek tûr a ni. 16 Tin, râllâk sum zawng zawng chu khawlaiah in la khâwm ang a; tin, khua leh râllâk sum zawng zawng chu LALPA in Pathian hnênah pumhâl thilhlanah in hâl ang a, lei pâwng mai a ni kumkhua ang a, din a ni leh tawh lo vang. 17-18 Râllâk sum chu a enga mah in khawih tûr a ni lo; LALPA chuan a thinurna nasa tak chu a lamlêt ang a, zahngaihna a hmuhtîr ang che u a, a khawngaih ang che u a, LALPA in Pathian mit hmuha thil ṭha ti tûra thupêk zawng zawng, tûna ka pêk che u hi, in zawm phawt chuan a tipung dâwn che u nia, in pi pute hnêna chhia a lo chham tawh ang khân.
Mitthi sûn dân dik lo
1 “LALPA in Pathian fate in ni a; mitthi avângin in inzai tûr a ni lo va, in mit hmul in mêt kâwng tûr a ni hek lo. 2 LALPA in Pathian tân hnam thianghlim in ni si a, leilunga hnam zawng zawng zînga a pual bîk ni tûra LALPAN a thlan che u in ni a.
Sa thiang leh thiang lo
3 “Thil tenawm rêng rêng in ei tûr a ni lo. 4 Hêng sate hi a ni in ei theih tûr chu: bâwngpa te, berâm te, kêl te, 5 sakhi te, sangai te, sakhipa te, sathâr te, ramkêl te, ramlâwi te, ramberâm te hi. 6 Tin, sa tinrêng, tin kâka tin kâk chhuak, chaw ṭhial nawn chi tawh phawt zînga mi chu in ei thei ang. 7 Amaherawhchu, hêng chaw pawh ṭhial nawn si, an tin pawh kâk site hi chu in ei tûr a ni lo: sanghâwngsei te, zupui te, sazupui te hi; chaw chu an ṭhial nawn na a, an tin a kâk loh avângin in tân a bawlhhlawh a ni. 8 Tin, vawk hi a tin chu a kâk na a, chaw a ṭhial nawn loh avângin in tân a bawlhhlawh a ni; a sa in ei tûr a ni lo va, a ruang pawh in khawih tûr a ni lo. 9 “Tuia chêng zawng zawngah hêngte hi in ei thei ang: pângparh leh phuhlip nei tawh phawt chu in ei thei ang a, 10 pângparh leh phuhlip nei lo apiang chu in ei thei lo vang, in tân a bawlhhlawh a ni. 11 “Sava thianghlim zawng zawng chu in ei thei ang a. 12 Hêngte erawh hi chu in ei tûr a ni lo: mupui te, lungdûp te, muarla te, 13 mulukawlh tê te, ngawihûp te, mute chi rêng rêng te; 14 choâk chi rêng rêng te, 15 sava sâng te, vabak te, tuifinriat sava te, mu chi rêng rêng te, 16 hrângkir te, chhimbuk te, chingpirinu te, chhimbuksialki te, 17 tuivalawng te, mulukawlh te, lui dung mû te, 18 kânghlai te, dîl sava chi rêng rêng te, chhuangtuar leh bâkte. 19 Thla nei, kea kal chi zawng zawng chu in tân thil bawlhhlawh a ni a, in ei tûr a ni lo. 20 Sava thianghlim zawng zawng chu in ei thei ang. 21 “Amaha thi chu eng mah in ei tûr a ni lo; in awmpui ram dang mite ei atân in pe thei ang a, hnam dang mite hnênah in hralh thei bawk ang; nangni zawng LALPA in Pathian tâna hnam thianghlim in ni si a. Kêlnotê chu a pui hnutêin in chhûm tûr a ni lo.
Sâwma pakhat pêk tûr
22 “Kum tin in lova thlai haw zawng zawng sâwma pakhat in tîl hrang ngei ngei tûr a ni. 23 LALPA in Pathian ṭih nachâng in lo hriat fo theih nân sâwma pakhat, in buh te, in uain te, in hriak te leh in bâwng rual leh in berâm rual zînga piang hmasa berte chu LALPA in Pathian hmaah, a hming awmna tûra a la ruat tûrah chuan in ei tûr a ni. 24 LALPA in Pathianin mal a sâwm hun che ua, LALPA in Pathianin a hming awmna tûr a la ruat tûr chu, a hlat lutuk avânga in tân kawng a thui luattuka in ken theih loh chuan, 25 pawisaah in chantîr ang a, pawisa chu in keng ang a, LALPA in Pathian hmun ruatah chuan in kal tûr a ni; 26 tin, pawisa chu in rilrua in duh ber, bâwngpa emaw, berâm emaw, uain emaw, zupui emaw, in rilrua in châk zâwng ang apiang atân in hmang ang a; chutah chuan LALPA in Pathian hmaah in ei ang a, hlim takin in awm tûr a ni, nangni leh in chhûngte nên; 27 Levi-ho in awmnaa awmte chu thlauthla hauh suh ang che u; in zîngah chanvo pawh, rochan pawh an nei ve si lo va. 28 “Kum thum a vei kum apiangin, chumi kuma in thil hâwng zawng zawnga sâwma pakhat chu in la khâwm vek ang a, in awmnaah in dah tûr a ni; 29 tin, in awmnaa awm Levi-ho pawh, in zînga chanvo, rochan pawh nei ve lote leh ram dang mite leh pa nei lote leh hmeithaite chuan an ei ang a, an lo khawsa ve thei ang; tichuan, LALPA in Pathianin in kutkawih zawng zawngah chuan mal a sâwm dâwn che u nia.
Kum sarihna
1 “Tin, kum sarih a vei kum apiangin ngaihdamna in siam tûr a ni. 2 Ngaihdam dân chu hetiang hi a ni: leiba neitu apiangin an ṭhenawmte an lo pûktîr chu an ngaidam tûr a ni; a ṭhenawm pawh, a unau pawh a ṭhîng lui tûr a ni lo, LALPA ngaihdamna chu puan a nih tawh avângin. 3 Hnam dang mi chu in ṭhîng lui thei ang a; amaherawhchu, in ta eng pawh in unaute lo hman chu in ngaidam tûr a ni. 4-5 Hêng thupêk, tûna ka thupêk zawng zawng che u hi, pawm tûra LALPA in Pathian aw chu ṭhahnemngai taka in zawm phawt chuan, mi rethei rêng rêng in awm hauh lo vang a (LALPA in Pathianin luah tûra a pêk che u ramah chuan, LALPAN mal a sâwm ngei ngei dâwn che u a ni); 6 LALPA in Pathian chuan a tiam che u angin mal a sâwm ang che u a, hnam tam tak in pûktîr ang a, nangni erawh chuan in pûk lo vang; hnam tam tak chungah ro in rêl ang a, in chungah erawh chuan ro an rêl ve lo vang. 7 “LALPAN ram a pêk che u in awmnaah in unaute zîngah rethei an awm chuan, in unau retheite lakah chuan in rilru tikhauh suh ula, kawm hek suh u, 8 an lakah chuan in thilphal ngei ngei tûr a ni a, an tlâkchhamnaa an mamawh phuhrûkna khawp in pûktîr tûr a ni. 9 ‘Ngaihdam kum, kum sarihna chu a lo thleng dâwn ta,’ tiin, in unau retheite chu hmu mawha eng mah pe duh lovin, in thinlungah dik lo taka ngaihtuahna awm lo tûrin fîmkhur rawh u; chuti lo chuan, ani chuan i chungchâng thu-ah LALPA a au vang a, in tân sual a lo ni dah ang e. 10 In pe ngei ngei tûr a ni a; tin, in pêk hunah pawh in thinlung a hnûr hauh lo tûr a ni; chutiang thil avâng chuan a ni, LALPA in Pathianin in thiltih zawng zawngah leh, in kutkawih zawng zawngah mal a sâwm dâwn che u ni. 11 Chu ramah chuan mi retheite awm loh lai a awm dâwn si lo va; chuvângin, ‘In rama in unaute chungah te, tlachhamte chungah te, in mi retheite chungah te in thilphal ngei ngei tûr a ni,’ tiin thu ka pe che u a ni.
Israel mi bâwih en dân tûr
12 “In unau, Hebrai pa emaw, Hebrai nu emaw, in hnêna an hralha, kum ruk in rawng an bâwl chuan, kum sarih kum chuan in chhuahtîr tûr a ni. 13 Tin, in chhuahtîr hun chuan kutbêngin in chhuahtîr tûr a ni lo; 14 in berâm ruala mi te, in hruiha mi te, in uain sâwr khura mi te ui lo takin in pe tûr a ni; LALPA in Pathianin mal a sâwm dân che u ang zêlin in pe tûr a ni. 15 Aigupta ramah khân bâwih in ni tawh a, LALPA in Pathianin a tlan che u tih kha in hre reng tûr a ni; chu vâng chuan a ni, tûnah hian hêng thu hi ka pêk che u ni. 16 Tin, heti hi a ni ang a, nangmahni leh in chhûngkua an ngainat avâng leh in intihthiam avânga in hnêna, ‘Ka chhuahsan lo vang che u,’ an tih tlat chuan, 17 thîr zum in la ang a, kawngkhâr chhanah an beng in vit ang a; tichuan, kumkhuain in bâwih an ni ang. Tin, in bâwihnu pawh chutiang bawk chuan in ti tûr a ni. 18 Chhuahtîr chu thil harah in ngai tûr a ni lo. Inhlawhfa thawh leh hnih thawkin kum ruk in rawng an bâwlsak tawh si che u a; tin, LALPA in Pathianin in thiltih apiangah mal a sâwm zêl ang che u.
Ran piang hmasa ber LALPA ta
19 “In ran rual te, in berâm rualte zînga a pa, piang hmasa ber apiangte chu LALPA in Pathian pualah in pe tûr a ni; in bâwngpa piang hmasa ber chu hnathawkah in chhawr tûr a ni lo va, in berâm rualte zînga piang hmasa ber hmul chu in mêt tûr a ni lo. 20 LALPA in Pathian hmaah kum tinin LALPAN hmun a la ruat tûrah chuan in ei tûr a ni, nangni leh in chhûngte nên. 21 Sawisêl kaina nei, a ke bai emaw, a mit del emaw, sawisêl kaina nei tawh phawt chu LALPA in Pathian hnêna inthawi nân in hmang tûr a ni lo. 22 Nangmahni awmhmunah in ei tûr a ni; thianghlim lote leh thianghlimte pawhin hêng sangai te, sakhi te ang hi chu in ei thei ang. 23 A thisen erawh chu in ei hauh lo tûr a ni; tui angin leiah in leihbaw mai tûr a ni.
Kalhlên kût
1 “Abib thla chu thla serhah nei ula, LALPA in Pathian tâna kalhlên kût nân hmang rawh u: Abib thla hian a ni, LALPA in Pathian chuan Aigupta ram ata zânah a hruai chhuah che u ni. 2 LALPAN a hming awmna a la ruat tûrah chuan, LALPA in Pathian hnênah in berâm rual zînga mi leh ran rual zînga miin, kalhlên kûtah in inthawi tûr a ni. 3 Chhang dawidim telh nên in ei tûr a ni lo; in dam chhûng zawnga Aigupta ram ata in chhuah nî chu in hriat reng theih nân ni sarih chhang dawidim telh loh, hrehawmna chhang nên in ei tûr a ni, Aigupta ram aṭang chuan hmanhmawh taka chhuak in nih kha. 4 In ram chhûngah ni sarih chhûng chu dawidim rêng rêng a awm tûr a ni lo va; tin, ni khat nî tlai lama in inthawina sa chu zankhuain a tûk zîng thlengin eng mah a awm tûr a ni lo. 5 LALPA in Pathianin a pêk che u in awmna khawiah mah kalhlên kût inthawiin in inthawi thei lo vang a; 6 LALPA in Pathianin a hming awmna a la ruat tûrah chauh chuan a ni ang; chutah chuan Aigupta ram ata in lo chhuah hun ang tlai lamah, ni tlâkah kalhlên kût inthawiin in inthawi tûr a ni a. 7 Tin, in rawh ang a, LALPAN hmun a la ruat tûrah chuan in ei ang a; tin, zîngah in haw leh ang a, in puan inah in kal tûr a ni. 8 Ni ruk chhûng chu chhang dawidim telh loh in ei tûr a ni; tin, a ni sarih nî chu LALPA in Pathian tân inkhâwmpui thianghlim a ni ang a, hna in thawk tûr a ni lo.
Pâwl kût
9 “Chawlhkâr sarih in chhût ang a; in buh seng ṭan nî aṭangin chawlhkâr sarih chu in chhût tûr a ni. 10 “LALPA in Pathianin mal a sâwm che u ang zêlin, in deh chhuah zînga mi mahni duh thua thilhlan chu hlânin, LALPA in Pathian tan chawlhkâr kût in nei tûr a ni; 11 tin, LALPA in Pathianin a hming awmna a la ruat tûrah chuan nangni nên, in fapa te, in fanu te, in bâwihpa te, in bâwihnu te, in awmnaa awm Levi-ho te, in zînga awm ram dang mi te, pa nei lo te, hmeithaite nên LALPA in Pathian hmaah hlim takin in awm ang a. 12 Tin, Aigupta ramah khân bâwih in ni tih in hre reng tûr a ni a; tin, hêng dânte hi fîmkhur takin in zâwm tûr a ni.
Bâwkte kût
13 “In hrui ata leh in uain sâwr khur ata in chhêk khâwm zawhah, ni sarih chhûng bâwkte kût in nei tûr a ni; 14 in kûtah chuan nangni nên, in fapa te, in fanu te, in bâwihpa te, in bâwihnu te, in awmnaa awm Levi-ho te, ram dang mi te, pa nei lo te, hmeithaite nên hlim takin in awm tûr a ni. 15 LALPAN hmun a la ruat tûrah chuan LALPA in Pathian tân ni sarih in kût tûr a ni; LALPA in Pathianin in thil haw zawng zawngah leh in kutkawih zawng zawngahte mal a sâwm ang che u a, lâwm tak hlîrin in awm dâwn nia. 16 Kum tin in mipa zawng zawngte chu vawi thum LALPA hmaah, hmun a la ruat tûrah chuan an inlan tûr a ni: chhang dawidim telh loh kûtah te, chawlhkâr kûtah te, bâwkte kûtah te; tin, LALPA hmaah tu mah kutruakin in inlan tûr a ni lo va, 17 LALPA in Pathianin malsâwmna a dawntîr che u ang zêlin mi tinin an theih ang tâwk an pe tûr a ni.
Dik taka thu rem dân tûr
18 “LALPA in Pathianin a pêk che u in kulh kawngka zawng zawngah, in hnam ang zêlin, rorêltute leh hotute in insiam ṭheuh vang a, mipuite ro fel takin an rêlsak tûr a ni. 19 Dik lo takin ro in rêl tûr a ni lo; tu mah duhsak bîk in nei tûr a ni lo; thilpêk in la tûr a ni hek lo; thilpêk chuan mi fingte mit a tihdelsak a, mi felte thu a tihkhawlohsak si ṭhîn a. 20 LALPA in Pathianin a pêk che u ram chu nungdama in luah theih nân a fel chauhva chu in zâwm tûr a ni. 21 “LALPA in Pathian maichâm in la siam tûr sîrah chuan thing eng chi mahin Aseri in din tûr a ni lo. 22 LALPA in Pathianin a huat zâwng lung pawh in phun tûr a ni hek lo.
1 “Bawngpa emaw, berâm emaw, sawisêl kai leh ṭhat lohna nei rêng rêng chuan LALPA in Pathian hnênah in inthawi tûr a ni lo; chu chu LALPA in Pathian tân thil tenawm a ni si a. 2-3 “In zîngah LALPA in Pathianin a pêk che u in awmna khawiah pawh mipa emaw, hmeichhia emaw pawh, thuthlung bawhchhiaa pathian dang rawng va bâwla, ka thupêk loh, nî emaw, thla emaw, vâna mi rêng rêng biaa, LALPA in Pathian mit hmuha thil ṭha lo ti an awma, 4 an hrilh chia, nangin i lo hriata, ṭhahnemngai taka in zawha, tin, ngai teh, a lo dika, thu a chian chiaha chutiang thil tenawm Israel-te zînga tih a lo nih chuan, 5 chu thil sual titu, mipa emaw, hmeichhia emaw chu in kulh kawngkhâr pâwnah, mipa emaw, hmeichhia emaw ngei chu in hruai chhuak ang a, lungin in dêng hlum tûr a ni. 6 Hretu pahnih emaw, pathum emaw kâ aṭangin thi tûra chu tihhlum tûr a ni a, hretu pakhat kâ aṭang chuan tihhlum tûr a ni lo. 7 Tihhlumna tûrah chuan hretute chuan kut an thlâk hmasa ang a, chumi hnuah mipui zawng zawngin. Chutiang chuan in zîng ata chu thil ṭha lo chu in tibo tûr a ni. 8 “Thisen inchhuah thu-ah te, sum leh pai thu-ah te, invuak thu-ah te, in awmnaa inkhinna thu rêng rêngtea in tâna rêl harsa lutuk a lo awm chuan, LALPA in Pathianin hmun a la ruat tûrah chuan in kal ang a, 9 chumi huna puithiam Levi-hote leh rorêltute hnênah chuan in kal ang a, in râwn ang a; tin, annin thu tihthlûk dân an lo kawhhmuh dâwn che u nia; 10 tichuan, nangnin LALPAN hmun a la ruat tûr aṭanga thu tihthlûk dân an lo kawhhmuh che u ang chuan in ti ang a, an zirtîr che u ang zêlin fîmkhur takin in ti dâwn nia. 11 Thu tihthlûk dân an lo zirtîr che u leh rorêl dân an lo hrilh che u ang zêl chuan in ti ang a; thu tihthlûk dân an lo kawhhmuh che u chu ding lamah emaw, vei lamah emaw in pênsan tûr a ni lo. 12 LALPA in Pathian hmaa rawngbâwla ṭang ṭhîn puithiam leh rorêltu thu pawm lova, tilui apiang, chu mi chu tihhlum tûr a ni. Israel zîng ata, chu thil ṭha lo chu in tibo tûr a ni. 13 Tichuan, mi zawng zawngin an hria ang a, an hlau vang a, an tilui leh tawh lo vang.
Lal neih dân tûr
14 “LALPA in Pathianin ram a pêk che u in va thlena, in va luaha, in va awma, ‘Kan vêla hnam zawng zawngte ang bawkin lal i nei ang u,’ in tih hunah chuan, 15 LALPA in Pathianin a thlana ngei chu lalah in nei tûr a ni a; in unau zînga mi pakhat in lalah in siam tûr a ni; hnam dang mi, in unau ni lo chu nangmahni awptu atân in siam tûr a ni lo. 16 Amaherawhchu, sakawr a ngah tûr a ni lo vang a, sakawr a ngah theih nân Aigupta rama mite nên chuan inthurual tûr a ni bawk hek lo; LALPA chuan, ‘Tûn achinah chuan chumi lamah chuan in lêt leh tawh tûr a ni lo,’ in hnênah a ti tawh tlat si a. 17 A rilru a vah bo loh nân nupui pawh a ngah tûr a ni lo va, tangkarua leh rangkachak pawh a ngah tûr a ni hek lo. 18 Tin, heti hi a ni ang a, a ram lalṭhutthlênga a ṭhut hun chuan puithiam Levi-hote kawl ṭhin dân hi lehkhabuah a ziak chhâwntîr ang a; 19 a kawl ang a, a dam chhûng zawng a chhiar ṭhîn tûr a ni, hêng dân leh hêng thuruat zawng zawng hi pawma, zâwma, ti tûra LALPA a Pathian ṭih dân a zir theiha, 20 a rilru a unaute chungah a dah lohva, ding lamah emaw, vei lamah emaw thupêk chu a pênsan lohna tûr leh, Israel-te zînga amah leh a thlahte a ramah hian an dam rei phah nân a chhiar ṭhîn tûr a ni.
Puithiamho chanpual
1 “Puithiam Levi-ho, Levi hnam zawng zawng chuan Israel-te zîngah chanvo leh rochan an nei tûr a ni lo va; LALPA hnêna meia thilhlan leh a puala mi an ei tûr a ni. 2 An unaute zîngah rochan chu an nei tûr a ni lo; an rochan chu an hnêna a sawi angin LALPA a ni si a. 3 Inthawina hlântu mipuite laka puithiam pual tûr chu hêng hi a ni ang: bâwngpa pawh, berâm pawh, a dâr leh a bekbawr khinghnih leh a pumpui puithiam an pe tûr a ni. 4 In buhbâl te, in uain te, in hriak haw hmasa te, in berâm hmul meh hmasak ber te in pe bawk tûr a ni. 5 LALPA in Pathianin LALPA hminga rawngbâwla awm kumkhua tûrin, in hnam zawng zawng zîng ata a thlan an ni si a, anmahni leh an fapate nên. 6 “Tin, Levi mi tu pawh a awmna Israel ram, in awmna a khawii pawh chhuahsana, a rilrua châk taka LALPAN a la ruat tûr hmunah a lo kal chuan, 7 chuta LALPA hmaa awm ṭhîn Levi-ho, a unaute ang bawkin LALPA a Pathian hmingin rawng a bâwl tûr a ni. 8 An puithiam man tiam lovin, mi dang pual ang ei tûr chu an chang ve tho vang.
Hnam dangte anga fate hlan loh tûr
9 “LALPA in Pathianin a pêk che u ram in va thlen hun chuan, chûng hnamte thil tenawm tih ang chu in chîng ve tûr a ni lo. 10 A fapa emaw, a fanu emaw meia kal tlangtîr te, aien chîng te, ṭhumvâwr chîng te emaw, mitlâkdawi hmang emaw te, dawithiam te, 11 dawi ât te, ramhuaizâwl rawih te, dawithiam te, mitthi biak chîng mite in zîngah an awm tûr a ni lo. 12 Hêng thil ti mi apiangte hi LALPA ngaihin mi tenawm an ni si a; tin, hêng thil tenawm avâng hian a ni, LALPA in Pathianin a hnawh chhuahsak che u ni. 13 LALPA in Pathian hmaah in ṭha famkim tûr a ni.
Pathianin zâwlnei a rawn tîr ang
14 “Chûng in va luah tûr rama hnamte chuan ṭhumvâwr leh aien chîngte an pawm ṭhîn a; nangni zawng LALPA in Pathianin chutiang tih chu a phal lo a ni. 15 LALPA in Pathianin keimah ang hi in unaute zînga mi zâwlnei a siamsak ang che u. A thu chu in ngai tûr a ni, 16 ‘LALPA kan Pathian aw chu min hriattîr tawh suh la, he mei nasa tak hi min hmuhtîr leh tawh suh la, kan thi dah ang e,’ tia Horeb tlânga pun khâwm nîa LALPA in Pathian in duh dân ang khân. 17 Tin, LALPA chuan ka hnênah, ‘An thusawi chu an sawi ṭha hle a. 18 An unaute zînga nangmah ang zâwlnei ka siamsak a; a kâah ka thute ka dah ang a, a hnêna thu ka pêk apiang chu an hnênah a sawi ang a. 19 Tin, heti hi a ni ang a, ka hminga ka thu a sawi pawm lo apiang chu ka ngaihtuah ang. 20 Ka hminga sawi tûr ka pêk loh sawi luitu zâwlnei emaw, pathian dangte hminga thusawitu zâwlnei emaw, chu zâwlnei chu tihhlum tûr a ni,’ a ti a. 21 Tin, in thinlunga, ‘Engtin nge thu chu LALPA sawi a ni lo tih kan hriat ang?’ in tih chuan, 22 zâwlneiin LALPA hminga thu a sawia, a thil sawi chu a thlen lohva, a hlawhtlin loh chuan, chu chu a ni LALPA sawi lohva chu; zâwlnei chuan uangthuang takin an sawi mai mai a ni, amah chu in hlau tûr a ni lo.
Humhimna tûr khuate
1 “LALPA in Pathianin an ram a pêk che u hnam LALPAN a tihbova, in luaha, an khuaah te, an inah te in awm hunah chuan, 2 LALPA in Pathianin luah tûra a pêk che u, in ramah chuan in tân khaw pathum in ruat tûr a ni. 3 Tualthat apiang an tlân luhna tûrin, LALPAN a luahtîr tûr che u ram chu hmun thumah in ṭhen ang a, in ramrite in siam ang a, kawngte in buatsaih tûr a ni. 4 “Tin, tualthat chuta tlân lûta him theite chu hêngte hi an ni: mi a ṭhenawm khawvêng tûn hma lama huatna pawh nei lêm lova that palh apiangte, 5 mi a ṭhenawm khawvêng nên thing kit tûra ram kala, thing kit tûra a hrei han chêka, hreifang thlawnin ṭhenawm khawvêng chu vawm hlum ta ang te hi, chumi zînga khaw pakhatah chuan a tlân ang a, a him ang a, 6 thisen phuba latu chuan a thinur lin laia tualthattu chu a ûma, kawng a thui avânga ûmphâkin a va vaw hlum hlauh dah ang e; tûn hma lama huatna te lo nei lêm lo a nih avângin thi âwm a ni si lo. 7 Chuvângin, ‘Khaw pathum in tân in ruat tûr a ni,’ tiin thu ka pe che u a ni. 8-9 Tin, LALPA in Pathianin in pi leh pute hnêna chhia a lo chham anga in pi leh pute pêk a lo tiam ram chu a pêk che ua, LALPA in Pathian chu hmangaih tûr leh a kawng zawh fo tûra a thupêk zawng zawng, tûna thu ka pêk che u hi in pawma, in ram chu a tihzau chuan hemi khaw pathum tiam lovin in tân khaw pathum dang in belhchhah leh ang, 10 LALPAN luah tûra a pêk che u in ram chhûngah chuan pawi khawih lo thisen chhuah a awm lohva, in chunga thisen a awm loh nân. 11 “Amaherawhchu, miin a ṭhenawm khawvêng a huata, a châna, a beiha, thi khawp hiala a vuaka, chumi khaw zînga pakhata a tlân chuan, 12 an khaw upaten mi tîr sela, chuta ta chu va hruai sela, tihhlum tûrin thisen phuba latu kutah hlân rawh se. 13 In khawngaih tûr a ni lo va, in tâna ṭha tûrin Israel ram ata pawi khawih lo thisen chhuahna chu in tibo tûr a ni.
Hmânlai ramri
14 “LALPA in Pathianin luah tûra a pêk che u ram, in luah tûr rama a hmaa an lo phun tawh in ṭhenawm ramri chu in sawn tûr a ni lo.
Thuhretu chungchâng
15 “Mi a khawlohna emaw, a sualna rêng rêng emaw hretu pakhat chu a tâwk lo vang; hretu pahnih kâ emaw, hretu pathum kâ emawa thuin tihngheh tûr a ni. 16 Hretu fel lo takin mi thil tidik lova a puh chuan, 17 an inkhinnaah an pahnihin LALPA hmaah chumi huna puithiamte leh rorêltute hmaah chuan an ding tûr a ni; 18 tin, rorêltute chuan ngun takin an dap ang a; tin, ngai teh, thuhretu chu hretu der a niha, a unau chu dâwta puh a nih chuan, 19 a unau chunga tih a lo tum ang chuan a chungah in ti tûr a ni; chutiang chuan in zînga thil ṭha lo chu in tibo tûr a ni. 20 A la awmhote chuan an hria ang a, an hlau vang a, tûn hnuah chutiang thil ṭha lo rêng rêng chu in zîngah an ti tawh dâwn lo nia. 21 In khawngaih tûr a ni lo va: nun aiah nun, mit aiah mit, ha aiah ha, kut aiah kut, ke aiah ke a ni ang.
Indo chungchânga tih dân tûr
1 “In hmêlmate do tûra in chhuaha, sakawr te, tawlailîr te, mipuite in aia tam in hmuhin, anmahni chu in hlau tûr a ni lo; Aigupta ram ata hruai chhuaktu che u LALPA in Pathian chu in hnênah a awm si a. 2 Tin, in indo dâwn hnaih chuan puithiam chuan mipuite chu va pan sela, bia sela, 3 an hnênah, ‘Aw Israel-te u, hre rawh u khai, tûnah chuan in hmêlmate in do dâwn ta a ni a, zâm suh ula, ṭih suh ula, khûr hek suh u, anni chu hlau hek suh u; 4 nangmahni chhandam tûra in hmêlmate beihsak tûr che ua in hnêna awm zêl chu LALPA in Pathian a ni si a,’ ti rawh se. 5 “Tin, hotute chuan mipuite hnênah, ‘In thar saa la hlân lo in awm em? A inah haw leh rawh se, indonaah a va thi hlauh ang a, mi dangin an hlân dah ang e. 6 Tin, grêp huan siama, a rah la chhawr lo in awm em? A in lamah haw leh rawh se, indonaah a thi hlauh vang a, mi dangin an chhawr dah ang e. 7 Tin, nupui huala la nei lo in awm em? A in lamah haw leh rawh se, indonaah a thi hlauh vang a, mi dangin an nei dah ang e,’ tiin sawi rawh se. 8 Tin, hotute chuan mipuite hnênah, ‘Hlau leh zâm in awm em? A in lamah haw rawh se, a unaute thinlung chu a thinlung angin a tuiral ve dah ang e,’ lo ti zêl rawh se. 9 Tin, heti hi a ni ang a, hotuten mipuite hnêna thu an sawi zawh chuan mipuite hmahruaitu tûr sipai hotute an ruat tûr a ni. 10 “Bei tûra khua in va hnaih hun chuan remna thu han sawi phawt ula. 11 Tin, heti hi a ni ang a, an lo rem che ua, an lo inpêk chuan heti hi a ni ang a, chuta mi awm zawng zawng chu hnathawka in rawih tûr an ni ang a, in rawng an bâwl ang. 12 Tin, an lo rem duh loh che ua, an lo do dâwn che u chuan in hual ang a; 13 tin, LALPA in Pathianin in kuta a pêk hun che u chuan, chuta mipa zawng zawng chu khandaihin in tihlum vek tûr a ni. 14 Hmeichhia leh an fanau tê tête, rante leh khuaa thil awm rêng rêngte erawh chu chuta râllâk thil zawng zawng nên lam in pualah in la tûr a ni; tin, LALPA in Pathianin a pêk che u in hmêlmate laka râllâk thil chu in chên tûr a ni. 15 Hêng hnamho khuate ni lo, in awmna aṭanga khaw hla zawng zawng chu chutiang chuan in ti zêl tûr a ni. 16 LALPA in Pathianin luah tûra a pêk che u hêng hnam khuate erawh hi chu, LALPA in Pathianin thu a pêk che u angin, nung tawh phawt chu eng mah in zuah tûr a ni lo va, 17 Hit mi te, Amor mi te, Kanaan mi te, Periz mi te, Hiv mi te, Jebus mi te chu in tiboral vek tûr a ni; 18 an pathiante chunga an tih ṭhin thil tenawm zawng zawng chu an zirtîr lohna tûr che uin; chuti lo chuan, LALPA in Pathian chungah thil in tisual dah ang e. 19 “Lâk tuma in beiha, khua chu rei tak in hual pawhin chûnga thingte chu hreipuiin in kit tûr a ni lo; in ei atân a ni a, in kit tûr a ni lo. Thing chu mihring em an niha in hual ni? 20 A rah ei loh mi thing a ni tih in hriatte erawh zawng in tichhiain in kit ang a, dotu che u khua chu a chhiat hma loh chuan kulhin in hung hnan tûr a ni.
Tualthat man chhuah theih loh chungchâng
1 “LALPA in Pathianin luah tûra a pêk che u ramah hian tâmlakah mi, tihhlumin lo awm ang sela, a tihlumtu hriat ni si lo sela, 2 in upate leh in rorêltute an lo kal ang a, an tihhlumna vêl khua aṭang chuan an teh ang a; 3 tin, heti hi a ni ang a, a ruang aṭanga khaw hnai ber, chumi khaw upate chuan bâwng rual zînga bâwnglâ, la chhawr loh, nghâwngkawl la bel loh an kai ang a; 4 tin, chu khaw upate chuan bâwnglâ chu tui luanna, lei la leh loh leh eng mah la chîn lohna ruamah an kai chhuk ang a, ruamah chuan bâwngla ring chu an tan ang a; 5 tin, Levia fapa puithiamten an rawn pan ang a, anni chu LALPA in Pathianin a rawngbâwltu leh LALPA hminga malsâwmtu atân a ruatte an ni si a; thubuai leh invuak thu chu an rêl ang ang a ni ang; 6 tin, ruang hnaih ber khaw upate zawng zawng chuan ruama bâwngla ring an tan chungah chuan an kut an sil ang a; 7 ‘Kan kutin he thisen hi a chhuah lo va, kan mitin a hmu bawk hek lo. 8 Aw LALPA, i tlan chhuah i mi Israel-hote hi ngaidam la, i mi Israel-hote zîngah hian pawi khawih lo thisen chhuahna hi a awm phal suh ang che,’ an ti ang a, an ṭang tûr a ni. Tichuan, thisen thu-ah chuan ngaihdam an ni ang. 9 Chutiang chuan LALPA mit hmuha thil ṭha tiin pawi khawih lo thisen chhuahna chu in tikiang tûr a ni.
Indonaa hmeichhia an man tih dân tûr
10 “In hmêlmate rûn tûra in kal chhuaha, LALPA in Pathianin in kuta a pêk che ua, sala in hruaia, 11 sal zînga hmeichhe hmêlṭha tak, in mi duh zâwng tak, nupui atâna in mi duh zâwng tak in hmuh chuan, 12 in inah in hruai hâwng ang a, an lû an mêt ang a, an tin an zai ang a; 13 an sal kawr chu an hlîp ang a, in inah an awm ang a, thla khat zet an nu leh an pa an sûn ang a, chumi hnuah chuan in pâwl ang a, an pasal in ni ang a, in nupui an ni ang. 14 Tin, in lung a dum loh chuan an duh duhnaah an kal in phal tûr a ni, sum leh paiah in hralh hauh tûr a ni lo va, sal bâwlin in bâwl tûr a ni lo, in tihminghliau tawh si a.
Fa hmasa ro pêk dân tûr
15 “Miin nupui pahnih nei ang sela, pakhat chu duhin pakhat chu hua sela, a duha leh a huata chuan fa hrinsak ve ve sela; tin, fapa upa ber chu a huata fa ni sela, 16 a ro neih chu a fapate a khâwmtîr hunah chuan a duh taka fapa chu a fapa upa, a huata fa aia uah a siam tûr a ni lo. 17 Amaherawhchu, a huata fa, a fa upa ber chu a neih zawng zawnga chan hnih huiah a siam tûr a ni; a chakna bul a ni a, fa tîr nihna chu a pual a ni.
Fa thu awih lo tih dân tûr
18 “Miin fapa luhlul tak, hel hmang tak nei ang sela, a nu leh a pa thu âwih lovin, an thununna pawm duh lo sela, 19 a nu leh a pa chuan an kai ang a, an khaw upate hnênah an khaw kulh kawngka bulah an hruai tûr a ni. 20 Tin, an khaw upate hnênah chuan, ‘He kan fapa hi luhlul tak leh hel hmang tak a ni a, kan thu pawh a âwih duh lo va; inkhawhral hmang leh ruih hmang mi a ni,’ an ti tûr a ni. 21 Tichuan, khuaa mi zawng zawng chuan lungin an dêng hlum tûr a ni; chutiang chuan in zîng ata, chu thil ṭha lo chu in tibo tûr a ni; tin, Israel mi zawng zawngin an hria ang a, an hlau vang.
Thinga khai ruang phûm ngei tûr leh dân chi hrang hrang
22 “Tin, miin thihna khawp sual a tiha, tihhlum a niha thinglêra in khai chuan, 23 a ruang chu thingah chuan zankhuain a awm tûr a ni lo va, chumi nî la la chuan in phûm tûr a ni; thinga khai apiang chu Pathian ânchhe dawng a ni si a; LALPA in Pathianin luah tûra a pêk che u in ram chu in tihbawlhhlawh loh nân.
1 “In unaute bâwngpa emaw, an berâm emaw bo chu in hmuhin in ngawihsan mai tûr a ni lo va, in unaute inah in hruai hawsak leh ngei tûr a ni. 2 Tin, in unaute chu in kiang hnaia awm an nih lohva, a neitu chu in hriat loh emaw a nih chuan, in in lamah in hruai haw ang a, in hnênah a awm reng ang a, in unauvin a rawn zawn hun hunah in lo pe leh tûr a ni. 3 An sabengtung pawh chutiang bawk chuan in ti tûr a ni a, chutiang bawk chuan an silhfênte pawh in ti tûr a ni a, chutiang bawk chuan in unau thil hloh in chhar tawh phawt chu in ti tûr a ni a, in ngawih bopui tûr a ni lo. 4 “In unaute sabengtung emaw, an bâwngpa emaw, kawnga tlu in hmuhin in ngawihsan mai tûr a ni lo va, in tun thawhpui ngei tûr a ni. 5 “Hmeichhiain mipa thuamhnaw an inbel tûr a ni lo va, mipain hmeichhe silhfên an inbel tûr a ni hek lo; tu pawh chutiang ti apiang chu LALPA in Pathian ngaihin mi tenawm an ni. 6 “Kalkawnga thingah emaw, leiah emaw sava bu, a puiin a no emaw, a tui emaw awm a awp lai in hmuh chuan a no chu a pui chawpin in la tûr a ni lo va, 7 a pui chu chhuah ngei ngei tûr a ni a, a no erawh chu in la thei ang; chutichuan, in tân a ṭha ang a, in dam rei dâwn nia. 8 “In thar in sak chuan, chuta mi an tlâka in in chu thisen chhuahna in a nih loh nân, in in chung in hung tûr a ni. 9 Tin, in grêp huanah thil chi hnih in chîng tûr a ni lo; chuti lo chuan, in chi tuh leh in grêp huana thil hâwng zawng zawng chu LALPA pual a ni mai ang. 10 “Bâwngpa leh sabengtung lei in leh duntîr tûr a ni lo. 11 Sahmul leh la tah pawlh in inbel tûr a ni lo. 12 “In intuamna puan chu a tlâng paliah fêm in neihtîr tûr a ni.
Mipat hmeichhiat chungchânga thianghlimna
13 “Miin nupui a neiha, a pâwla, a huat leh sia, 14 ‘He hmeichhia hi ka nei a, ka han pâwl a, nula thianghlim a nihna ka hmu lo va,’ tia mualpho taka a siama, a hming a tihchhiat chuan, 15 nula nu leh pa chuan kulh kawngkaah chumi khaw upate hnênah nula thianghlim a nihna chu an rawn tilang tûr a ni a; 16 tin, nula pa chuan upate hnênah, ‘He mi hi ka fanu ka neihtîr a, a haw leh si a; 17 tin, ngai teh u, “I fanu hi nula thianghlim a nihna ka hmu lo ve,” tiin mualpho takin a siam a; mahse, hêngte hi ka fanu nula thianghlim a nihna chu a ni alâwm,’ a ti ang a. Tichuan, chumi khaw upate hmaah chuan puan an phah ang a. 18 Tin, chu khaw upate chuan chu mi chu an hrem ang a; 19 Israel nula thianghlim a tihhmingchhiat avângin tangkarua sekel za an chawitîr ang a, nula pa chu an pe tûr a ni. Ani chu a nupui a ni ang a, a dam chhûngin a ṭhen thei lo vang. 20 Amaherawhchu, chumi thu chu a lo dika, nula chu nula thianghlim a nihna a lan loh chuan, 21 nula chu a pa kawngkaah an hruai chhuak ang a, a awmna khuaa mite chuan lungin an dêng hlum ang, a pa ina nawhchizuara Israel-te zînga thil sual âtthlâk tak a tih avângin. Chutiang chuan in zîng ata, chu thil ṭha lo chu in tibo tûr a ni. 22 “Miin pasal nei a mutpui an hmuh chuan an pahnih chuan an thi tûr a ni, a mutpuitu mipa leh hmeichhia chu; chutiang chuan Israel zîng ata, chu thil ṭha lo chu in tibo tûr a ni. 23 “Nula thianghlim, mi nupui hual, miin khuaah a hmuha, a mutpui chuan, 24 an pahnihin khaw kulh kawngkaah in hruai chhuak ang a, lungin in dêng hlum tûr a ni; hmeichhia chu khuaa awm sia, a au loh avângin; tin, mipa chu a ṭhenawm nupui a tihhminghliau avângin; chutiang chuan in zîng ata, chu thil ṭha lo chu in tibo tûr a ni. 25 “Amaherawhchu, miin ramhnuaiah nula, mi hual a hmuha, a tihluiha a mutpui chuan, a mutpuitu mipa chauh chu tihhlum tûr a ni a, 26 a nula chu eng mah in tih tûr a ni lo, nula chungah chuan thihna khawp sual a awm lo; hetiang hi chu, mi a ṭhenawm beia that ang a ni a; 27 ramah a va tawng fuh a, mi hual nula chu a au va, chhantu an awm si lo va. 28 “Miin nula thianghlim, hual loh a hmuha, a mana, a mutpui an hmuh chuan, 29 a mutpuitu mipa chuan nula pa chu tangkarua sekel sawmnga a pe tûr a ni a; tin, ani chu a nupui a ni ang, a tihhminghliau tawh avângin; a dam chhûngin a ṭhen thei lo vang. 30 “Tu mân mahni pate nupui mutpuiin an pate an timualpho tûr a ni lo.
LALPA mite zînga tel lo tûrte
1 “Mi, a tilmu keh leh a zahmawh tan chu LALPA mite pung khâwm zîngah an tel tûr a ni lo. 2 Sâwn chu LALPA mite pung khâwm zîngah an tel tûr a ni lo; chhuan sâwmna thlengin a thlahte chu LALPA mite pung khâwm zîngah an tel tûr a ni lo. 3 “Amon mite leh Moab mite chu LALPA mite pung khâwm zîngah an tel tûr a ni lo. Chhuan sâwmna thlengin an zînga mi chu LALPA mite pung khâwm zîngah an tel hauh lo tûr a ni; 4 Aigupta ram aṭanga in lo chhuah laia chhang leh tuia an lo hmuah loh che u avâng leh, ânchhe lawh tûr che ua Mesopotamia rama Pethor khuaa Beora fapa Balaama an rawih avâng khân. 5 Nimahsela, LALPA in Pathian chuan Balaama thu chu a pawm duh lo va, LALPA in Pathian chuan a hmangaih che u avângin, LALPA in Pathian chuan ânchhia chu in tân malsâwmnaah a chantîr ta zâwk a. 6 In dam chhûng zawng anmahni nêna inremna leh an hmuingîlna eng tikah mah in ngaihtuahpui tûr a ni lo. 7 “Edom mite chu in lungten tûr a ni lo, in unaute an ni si a; Aigupta mite chu in lungten tûr a ni lo, an ramah chuan in va mikhual tawh avângin. 8 An thlahte chu chhuan thumna aṭangin LALPA mite pung khâwm zîngah chuan an tel tûr a ni.
Râl beihnaa riahhmun vawn fai
9 “In hmêlmate beia in va riahna hmunah chuan thil ṭha lo tinrêng lakah in inthiarfihlîm tûr a ni. 10 In zîngah tu pawh zâna amaha thil chhuak avânga bawlhhlawh an awm chuan, riahhmun ata a chhuak ang a, riahhmunah chuan a lût leh tûr a ni lo va; 11 amaherawhchu, khua a lo tlai lamin a inbual ang a; tin, ni tlâkah riahhmunah a lût leh tûr a ni. 12 Tin, riahhmun pâwn lamah hmun in ruat ang a, chutah chuan in kal ṭhîn tûr a ni; 13 tin, in hmanraw zîngah chuan suahdûr in nei ang a; tin, heti hi a ni ang a, chu chuan in va ṭhutna tûr chu in lai khuar ang a, in zunram thiar chu in vûr leh tûr a ni; 14 LALPA in Pathian chu in riahhmunah nangmahni chhanhim tûr leh, in hmêlmate hlân tûr che uin a lo tel zêl si ṭhîn a; chuvângin, in riahhmun chu a thianghlim tûr a ni; chuti lo chuan, in zînga thil bawlhhlawh a hmu ang a, a kal bosan dah ang che u.
Dân zawm tûr chi hrang hrang
15 “Chhiahhlawh, in hnêna a pu rawn tlân chhuahsan chu a pu hnênah in pe lêt leh tûr a ni lo. 16 In awmnaa a duh ber a thlan apiangah chuan in zîngah a awm ve mai tûr a ni; in hnehchhiah tûr a ni lo. 17 “Israela fanute zîngah nawhchizuar an awm tûr a ni lo va, Israela fapate zîngah mipa inzuar an awm tûr a ni hek lo. 18 Nawhchizawrh man emaw, uicho man emaw, thutiam nân LALPA in Pathian inah in keng tûr a ni lo; a eng ve ve pawh chu LALPA in Pathian ngaihin thil tenawm a ni. 19 “A pung ûmin in unaute in pûktîr tûr a ni lo; tangka lama pung emaw, ei tûr lama pung emaw, eng pawh a pung ûma pûktîr rêng rêng chu. 20 Ram dang mite chu a pung ûmin in pûktîr thei ang; nimahsela, in unaute chu a pung ûmin in pûktîr tûr a ni lo; chutichuan, in va luah tûr rama in kutkawih zawng zawngah LALPA in Pathianin mal a sâwm dâwn che u nia. 21 “LALPA in Pathian hnêna thu in tiamin, rei rial lovin pêk nghâl tûr a ni; LALPA in Pathian chuan a phût dâwn ngei si che u a, in tân sual a lo ni mai ang. 22 Thutiam kawnga in insûm chuan in tân sual a ni lo vang. 23 In kâa chhuak tawh chu in ti ngei tûr a ni; duh thua thilhlan in kaa in tiam, LALPA in Pathian hnêna in tiam ang zêlin. 24 “In ṭhenawm grêp huana in kalin, in duhtâwkin in ei thei a; amaherawhchu, in êmah in khung tûr a ni lo. 25 In ṭhenawm buh ding lai hmuna in kalin, a vui chu in thliak thei a; amaherawhchu, in ṭhenawm buh ding laiah chuan favah in ruai tûr a ni lo.
Inmâk leh inneih leh
1 “Miin nupui a neiha, a chunga thil mawi lo eng emaw a hriat avânga a mit a tlun loh chuan heti hi a ni ang a, inmâkna lehkha a ziaksak ang a, a pe ang a, a in ata a chhuahtîr tûr a ni. 2 Tin, a in ata a chhuah hnu chuan mi dang a va nei thei ang. 3 Tin, a pasal hnuhnûng zâwk chuan a huata, inmâkna lehkha a ziaksaka, a pêka, a in ata a chhuahtîr emaw, a pasal hnuhnûng zâwk, nupuia neitu chu a thi emaw a nih chuan, 4 a pasal hmasa, amah kaltîrtu khân, tibawlhhlawh tawh a ni a, a nei leh thei lo vang; LALPA ngaihin tenawm a ni, LALPAN luah tûra a pêk che u ramah chuan sual in luhtîr tûr a ni lo.
Dân chi hrang hrang
5 “Mi, nupui nei hlim chu sipaiah a kal tûr a ni lo va, eng hna thawkah mah phût tûr a ni lo; a in lamah kum khat chu a duh ang angin a awm ang a, a nupui nên hlim takin an awm tûr a ni. 6 Buh râwt sawmna emaw, a chung lam lung emaw tu mah in hrênsak tûr a ni lo, mi nunna hrênsak in ni dâwn si a. 7 “Tu pawh, Israela thlah, a unaute zînga mi rua, sal deha dek emaw, zuar emaw hriat chhuah an nih chuan, chu rûkrupa chu tihhlum tûr a ni; chutiang chuan in zîng ata, chu thil ṭha lo chu in tibo tûr a ni. 8 “Phâr hri chungchâng thu-ah chuan, ngun taka dap chhuaka, puithiam, Levi-hote zirtîr dân ang zêla ti tûrin fîmkhur rawh u; anmahni thu ka pêk angin fîmkhur takin in ti tûr a ni. 9 Aigupta ram ata in lo chhuahna kawnga LALPA in Pathianin Miriami chunga a tih dân kha hre reng rawh u. 10 “Eng pawh in ṭhenawm in pûktîrin, a hrêng la tûrin a inah in lût tûr a ni lo. 11 Pâwnah in ding ang a, in pûktîra chuan hrêng chu pâwnah a rawn lâksak tûr che u a ni. 12 Mi rethei a nih chuan a hrêng chu in mutpui tûr a ni lo; 13 a silhfênah chuan a muta, a fak theih nân che u a hrêng chu ni tlâkah in pe kîr leh ngei tûr a ni; tichuan, LALPA in Pathian ngaihin in tân thil fel a ni ang. 14 “In mi rawih, mi rethei leh tlachhamte chu in unau emaw, in ram, in awmnaa awm ram dang mi emaw pawh ni sela, in hnehchhiah tûr a ni lo; 15 a thawh ni chuan a hlawh chu in pe tûr a ni a, niin a tlâk hnan tûr a ni lo; mi rethei a ni a, chutah chuan a rilru a dah ṭhîn a ni; chuti lo chuan, in chungchâng thu-ah LALPA a au vang a, in tân sual a lo ni dah ang e. 16 “Fate avângin pate tihhlum tûr a ni lo va, pate avângin fate tihhlum tûr a ni hek lo; mi tin mahni sual avâng ṭheuhva tihhlum tûr an ni. 17 “Ram dang mite leh pa nei lote ro chu dik lo takin in rêlsak tûr a ni lo va, hmeithai puan chu hrêngah in lâksak tûr a ni hek lo; 18 nangni pawh Aigupta ramah khân bawih in ni tawh a, LALPA in Pathianin chuta ta chu a tlan che u a ni tih in hre reng tûr a ni; chu vâng chuan a ni hêng thil hi ti tûra thu ka pêk che u ni. 19 “In lova buh in senga, buhphal in khâwm hmaih chuan in la leh tûr a ni lo, ram dang mi te, pa nei lo te, hmeithaite ta tûr a ni; tichuan, LALPA in Pathian chuan in kutkawih zawng zawngah mal a sâwm dâwn che u nia. 20 In olive thing in vuakin a zârte chu in vaw nawn tûr a ni lo; ram dang mi te, pa nei lo te, hmeithaite ta tûr a ni. 21 In grêp, huana mi in lawhin a ṭo in zawng tûr a ni lo; ram dang mi te, pa nei lo te, hmeithaite ta tûr a ni. 22 Tin, Aigupta ramah khân bawih in ni tawh tih in hre reng tûr a ni; chu vâng chuan a ni, hêng thil hi ti tûra thu ka pêk che u ni.
1 “Mi an inkhin chuan, rorêlnaah an kal ang a, rorêltuten an lo rêlsak ang a, mi fel chu thiam an chantîr ang a, mi sual chu thiam loh an chantîr tûr a ni; 2 tin, heti hi a ni ang a, mi sual chu vuak âwm a nih chuan, rorêltu chuan a muttîr ang a, a hmaah a vuaktîr tûr a ni, a sual dân azirin vuak zat tûr chu thliah a ni ang. 3 Vawi sawmli thlenga vuak theih a ni ang a, chu aia chuangliam chu ni lovin; hei aia chuanga a vuak chuan in unaupa chu in mualpho lu dah ang e. 4 “Sebâwngpain buh a chîl laiin a hmui in phuar tûr a ni lo.
Unaupa thi tâna tih tûr
5 “Unauza awm ho sela, fapa nei lovin an zînga mi chu thi sela, a thia nupui chuan pâwn lama mi, mi dang a nei tûr a ni lo; a pasal unau chuan a rochung ang a, nupuiah a nei ang a, pasal unau tih tûr chu a chungah a ti tûr a ni. 6 Tin, heti hi a ni ang a, a fa tîr hrinsak chuan Israel zînga a hming a bo loh nân a unau thi taa hming chu a pu tûr a ni. 7 Tin, ani chuan a unaupa nupui chu neih a duh loh chuan, a unaupa nupui chu kulh kawngkaa upate hnênah a han chho vang a, ‘Ka pasala unaupain Israel zîngah a unau hming awmtîr zêl a duh lo va, pasal unaupa tih tûr chu ka chungah a ti duh lo,’ a han ti tûr a ni. 8 Chutichuan, an khaw upate chuan ani chu an ko vang a, an bia ang a; tin, ani chuan, ‘Ka nei duh lo a ni,’ tia a ṭan tlat chuan, 9 a unaupa nupui chuan upate hmaah a han pan ang a, a pheikhawk a hlihsak ang a, a hmaiah chil a chhâk ang a, ‘A unaupa chhûngkaw din duh lotu chungah chuan heti anga tih ni zêl rawh se,’ a ti ang a, a chhâng tûr a ni. 10 Tichuan, ‘Chhûngkaw pheikhawk hlihsaka’ tiin Israel-te zîngah chuan a hming puttîr tûr a ni ang.
Dân dang dang
11 “Mi insual sela, a pakhat zâwka nupui chuan a sualpui lak ata a pasal chhanchhuak tûrin a zahmawhah pawhsak sela, 12 a kut chu in tansak tûr a ni a, in khawngaih tûr a ni lo. 13 “In ipah chuan khîn chi dang dang, a rit leh a zâng in nei tûr a ni lo. 14 In inah tehna chi dang dang, a lian leh a tê in kawl tûr a ni lo. 15 Khîn dik tak leh fel tak in nei tûr a ni. Tehna dik tak leh fel tak in nei tûr a ni si; tichuan, LALPAN ram a pêk che uah hian in dam rei dâwn nia. 16 Chutiang thil titu, fel lo taka titu zawng zawng chu LALPA in Pathian ngaihin tenawm an ni.
Amalek mite tihhlum tûr thupêk
17 “Aigupta ram ata in lo chhuahna kawnga Amalek-ho lo tih dân che u kha hre reng rawh u; 18 Pathian pawh hlau lovin in chauh lai leh in ngui laia kawnga an lo tawh che ua, in zînga hnufual mi chhiaṭhaho a hnufualte zawng an lo beih dân te kha. 19 Chuvângin, heti hi a ni ang a, LALPA in Pathianin luah tûra ram a pêk hun che ua, in vêla in hmêlmate zawng zawng laka LALPA in Pathianin râlmuanna a pêk hun che u chuan, vân hnuai chhîna Amalek-ho hriat rengna chu in tibo hlauh tûr a ni; in theihnghilh hauh tûr a ni lo.
Buh seng huna thilhlan
1 “Tin, heti hi a ni ang a, LALPA in Pathianin rochun leh luah tûra ram a pêk che u in va luha, in va awm hun chuan, 2 LALPA in Pathianin a pêk che u in ram leilung rah haw hmasa ber ṭheuhte chu in rawn la ang a; bâwmah in dah ang a, LALPA in Pathianin a hming awmtîrna tûra a la ruat tûrah chuan in kal tûr a ni. 3 Tin, chumi huna puithiam hnênah chuan in kal ang a, a hnênah, ‘Min pêk tûra kan pi leh pute hnêna chhia a lo chham ramah kan lo kal ta tih, vawiinah hian LALPA in Pathian hnênah kan tilang a ni,’ in ti ang a. 4 “Tin, puithiam chuan in kut ata bâwm chu a la ang a, LALPA in Pathian maichâm bulah a hûng ang. 5 Tin, nangnin LALPA in Pathian hmaah chuan, ‘Kan pu chu Suria mi, mi vâkvai a ni a, Aigupta ramah a zuk chhuk a, a zuk chêng a, tlêm tê an ni a; tin, chutah chuan hnam ropui tak, thiltithei tak, tam tak an lo ni ta a; 6 tin, Aigupta mite chuan min tinawmnah a, min tirethei a, hna hautak tak min thawhtîr a; 7 tichuan, LALPA kan pi leh pute Pathian chu kan au va, LALPA chuan kan aw chu a lo hria a, kan retheihzia te, kan rimzia te, hnehchhiah kan nihziate chu a hria a; 8 tin, LALPA chuan Aigupta ram ata chu kut chak tak te, bân phar te, thil hlauhawm tak te, chhinchhiahna te, thil maktein min hruai chhuak a, 9 he hmunah hian min hruai lût a, he ram, hnutetui leh khawizu luanna ram hi min pe a. 10 Tin, ngai teh, aw LALPA, nangin min pêk leilung rah hmasa ber ṭheuhte kan rawn la e,’ in va ti tûr a ni. Tin, LALPA in Pathian hmaah chuan in hûng ang a, LALPA in Pathian hmaah chibai bûkin in kûn ang a; 11 tin, LALPA in Pathianin in chhûngkua te, nangni te, Levi mi te, in zînga ram dang mite thil ṭha a pêk zawng zawng che uah chuan hlim takin in awm tûr a ni. 12 “Tin, kum thum kum, sâwma pakhat pêk kuma in thil hâwng zawng zawng sâwma pakhat in pêk zawh chuan, Levi mi te, ram dang mi te, pa nei lo te, hmeithaiten in awmnaah chuan an eia, an lo khawsak ve theihna tûrin in pe tûr a ni; 13 tin, LALPA in Pathian hmaah, ‘I thu min pêk, i thupêk zawng zawng angin kan in ata thil thianghlimte chu kan dah chhuak a, Levi mi te, ram dang mi te, pa nei lo te, hmeithaite kan pe tawh a; i thupêk chu a enga mah kan bawhchhe lo va, kan theihnghilh hek lo va; 14 kan lusûn laiin chuta mi chu kan ei lo va, kan bawlhhlawh laiin kan thehthang hek lo va, mitthi pualah kan pe hek lo; LALPA kan Pathian aw chu kan ngaichâng a, i thu min pêk zawng zawng ang chuan kan ti a ni. 15 I awmna thianghlim vân aṭang chuan rawn en la, hnutetui leh khawizu luanna ram, kan pi leh pute pêk tûra chhia i lo chham tawh ang khân i mi Israel-te leh i leilung min pêk hi malsâwm ang che,’ in ti tûr a ni.
LALPA pual mite
16 “Vawiinah hian LALPA in Pathian chuan hêng dân leh rorêlte hi zâwm tûrin thu a pe che u a ni; chuvângin, in thinlung zawng zawng leh in rilru zawng zawngin in pawmin in zâwm tûr a ni. 17 Vawiinah hian LALPA chu a kawngte zawha, a dânte, a thupêkte leh a rorêlte zâwma a awte ngaihchân tumin in Pathianah in thlang ta a; 18 tin, vawiinah hian a tiam che u ang khân, a thupêk zawng zawng in zawma, ama pual bîk ni tûr leh, 19 a lo sawi tawh anga LALPA in Pathian tân mi thianghlim in nih theihna tûr leh, hnam a siam zawng zawng zînga fak te, hmingṭhat te, chawimawi te hlawh tûrin LALPAN a thlang che u a ni,” a ti a.
Lung phêka Pathian dân ziak
1 Tin, Mosia leh Israel upate chuan mipuite chu, “Thupêk zawng zawng vawiina ka pêk che u hi pawm rawh u. 2 LALPA in Pathianin ram a pêk che ua kal tûra Jordan in kân ni chuan heti hi a ni ang a, lung lian tak tak in phun ang a, lung chârna in hnawih tûr a ni. 3 In kai hnuin a chungah chuan he dân thu zawng zawng hi in ziak tûr a ni; tichuan, LALPA, in pi leh pute Pathianin a lo tiam che u ang khân hnutetui leh khawizu luanna ram, LALPA in Pathianin a pêk che u ramah chuan in kal thei ang. 4 Tin, Jordan lui in kân zawh chuan heti hi a ni ang a, vawiina thu ka pêk che u ang hian Ebal tlângah lungte chu in phun ang a, lung chârna in hnawih tûr a ni. 5 Tin, chutah chuan LALPA in Pathian tân maichâm, lung maichâm in siam tûr a ni a, thîr hmanrua in hmang tûr a ni lo. 6 LALPA in Pathian maichâm chu lung chher lohvin in siam tûr a ni a; chumiah chuan LALPA in Pathian tân hâlral thilhlante in hlân ang a; 7 remna thilhlantein in inthawi ang a, chutah chuan in ei ang a, LALPA in Pathian hmaah chuan hlim takin in awm tûr a ni. 8 Tin, lung chungahte chuan he dân thu zawng zawng hi fiah takin in ziak tûr a ni,” tiin thu an pe a. 9 Tin, Mosia leh puithiam Levi-hote chuan Israel mi zawng zawng chu an bia a, “Aw Israel mite u, ngun takin ngaithla rawh u; vawiinah hian LALPA in Pathian mite in lo ni ta a. 10 Chuvângin, LALPA in Pathian thu chu in awih tûr a ni a, vawiina thu ka pêk che u, a thupêkte leh a dânte chu in zâwm tûr a ni,” tiin.
Thu awih lo tân ânchhia
11 Tin, chumi nî vêk chuan Mosian mipuite chu thu a pe a, 12 “Jordan lui râl in kai hnu chuan mipuite malsâwm tûrin Gerizim tlângah hêngho hi an ding tûr a ni: Simeon hnam te, Levi hnam te, Juda hnam te, Isakar hnam te, Josef hnam te, Benjamin hnamte hi; 13 tin, ânchhe lawh tûrin hêngho hi Ebal tlângah an ding tûr a ni: Reuben hnam te, Gad hnam te, Aser hnam te, Zebulun hnam te, Dan hnam te, Napthali hnamte hi. 14 Tin, Levi-hote chuan an han sawi ṭan ang a, Israel mi zawng zawng hnênah chuan aw ring takin: 15 “ ‘Themthiamte kutchhuak LALPA tâna tenawm milem din chawp emaw, chhûn chawp emaw vawng ru apiang chu ânchhe dawngin awm rawh se,’ an ti ang a. Tin, mipui zawng zawng chuan, ‘Amen!’ an lo ti ang a, an lo chhâwn tûr a ni. 16 “ ‘A nu emaw, a pa emaw zah lo apiang chu ânchhe dawngin awm rawh se,’ an ti ang a. Tin, mipui zawng zawng chuan, ‘Amen!’ an lo ti tûr a ni. 17 “ ‘A ṭhenawm ramri sawntu chu ânchhe dawngin awm rawh se,’ an ti ang a. Tin, mipui zawng zawng chuan, ‘Amen!’ an lo ti tûr a ni. 18 “ ‘Kawng ata mitdel kawng lova kaltîrtu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni. 19 “ ‘Ram dang mi te, pa nei lo te, hmeithaite ro dik lo taka rêlsaktu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni. 20 “ ‘A pa nupui mutpuitu chu ânchhe dawngin awm rawh se, a pa timualpho a nih avângin,’ an ti ang a. Mipui zawng zawng chuan, ‘Amen!’ an lo ti tûr a ni. 21 “ ‘Ran eng pawh pâwltu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni. 22 “ ‘A farnu, a pa fanu emaw, a nu fanu emaw mutpuitu chu ânchhe dawngin awm rawh se,’ an ti ang a. Mipui zawng zawng chuan ‘Amen!’ an lo ti tûr a ni. 23 “ ‘A pizawn mutpuitu chu ânchhe dawngin awm rawh se,’ an ti ang a. Mipui zawng zawng chuan ‘Amen!’ an lo ti tûr a ni. 24 “ ‘A ṭhenawm that rutu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni. 25 “ ‘Pawi khawih lo thah nâna thamna latu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni. 26 “ ‘He dân thu pawm nghehpui lotu chu ânchhe dawngin awm rawh se,’ an ti ang a. Mipui zawng zawngin, ‘Amen!’ an lo ti tûr a ni.
Thu awih nihlawhna
1 “Tin, heti hi a lo la ni ang a, LALPA in Pathian awkâ chu ngun taka in ngaihthlâka, vawiina thu ka pêk che u thupêk zawng zawng fîmkhur taka in zawm chuan, LALPA in Pathian chuan khawvêl hnam zawng zawnga chungnung berah a siam ang che u; 2 tin, LALPA in Pathian thu in pawm phawt chuan hêng malsâwmna zawng zawng hi in chungah a lo awm ang a, a zui zêl ang che u. 3 In lam leh ram lamahte chuan malsâwmin in awm ang a. 4 In rîla rah te, in lei rah te, in ran rual pung, in bâwngpui leh in berâm rual pungte chu malsâwmin a awm ang. 5 In bâwm leh in chhang hmehna thlêngte malsâwmin a awm ang a. 6 In chhuakvâk te chu malsâwmin in awm ang a, in lo hâwng te pawh malsâwmin in awm ang. 7 In hmêlma, nangmahni beitute chu LALPAN a tihtlâwmsak ang che u a; a bei tûr che uin kawng khatah an lo lût ang a, kawng sarihah an tlânchhia ang. 8 LALPAN in buh in chungah te, in kutkawih zawng zawng chungahte malsâwmna thu a pe ang a; LALPA in Pathianin ram a pêk che uah chuan mal a sâwm ang che u. 9 “In hnêna chhia a lo chham tawh angin, LALPA chuan ama tâna hnam thianghlimah a tinghet ang che u, LALPA in Pathian thupêkte in zawma, a kawngte in zawh phawt chuan. 10 Tichuan, khawvêl hnam tinin LALPA ta in nih an hria ang a, an hlau vang che u. 11 Tin, nangmahni pêk tûra in pi leh pute LALPAN a lo tiam ramah chuan in rîla rahah te, in ran rualah te, in lei rahahte LALPAN nasa takin a tipung ang che u. 12 LALPA chuan a hun taka in ram châwm tûr ruahtui pe tûr che u leh, in kutkawih zawng zawng malsâwm tûrin vân, a ro bâwm ṭha chu, a hawnsak ang che u a; tichuan, hnam tam tak in pûktîr ang a, nangni erawh chuan in pûk lo vang. 13 Tin, LALPAN mei ni lovin lu-ah a siam ang che u a, a hnuaihnung ni lovin a chungnung zêl in ni ang; LALPA in Pathian thupêk awiha, tûna ka pêk che u hi fîmkhur taka pawma, vawiina thu ka pêk che u, 14 a thute hi a enga mah, ding lam emaw, vei lam emawa pathian dangte zui leh rawngbâwl tûra in pênsan loh phawt chuan.
Thu awih loh rah tûr
15 “Amaherawhchu, heti hi a lo la ni ang a, LALPA in Pathian awkâ chu ngun taka in ngaihthlâk lohva, vawiina thu ka pêk che u thupêk zawng zawng hi fîmkhur taka in zawm loh chuan, hêng ânchhia zawng zawng hi in chungah a lo awm ang a, a nangchîng ang che u. 16 In lam leh ram lamahte chuan ânchhia in dawng ang. 17 In bâwm leh in chhang hmehna thlêngte chu ânchhe dawngin a awm ang. 18 In rîla rah te, in lei rah te, in bâwngpui leh in berâm rual pungte chu ânchhe dawngin an awm ang. 19 In vâk chhuak te chu ânchhe dawngin in awm ang a, in lo hâwng te pawh ânchhe dawngin in awm ang. 20 LALPAN in chungah, in kutkawih zawng zawngah ânchhia te, buaina te, zilhhaunate a rawn tîr ang a, in tlâwm ang a, in boral thuai ang; in thil tihsualte avânga mi hnuchhawn avângin. 21 Luah tûra in luhna ram ata chu a tihboral hma loh che u chuan LALPAN hri a vawntîr tlat ang che u. 22 LALPAN ngawrna te, khawsik te, vûnna te, sat huam huamna te, khandaih te, rona te, ṭawihnatein a hrem ang che u a, in boral hma loh chuan a ûm zêl ang che u. 23 In chung lama in vân chu dâr a ni ang a, in hnuai lama lei chu thîr a ni ang. 24 In ram ruah chu vaivut leh vaivut khu-ah LALPAN a chantîr ang a; in boral hma loh chu vân aṭangin in chungah a lo tla ang. 25 “LALPAN in hmêlmate lakah a titlâwm ang che u a; anmahni bei tûrin kawng khatah in chhuak ang a, kawng sarihah in tlânchhia ang a; khawvêl hnam tin zîngah kil tin kil tangah in vâk in vâk ang. 26 In ruang chu chunglêng sava zawng zawng leh ramsa zawng zawng chaw a ni ang a, a hnawt botu an awm hauh lo vang. 27 Tihdam theih loh Aigupta khawihli te, ngâwtna te, vûnna te, uithaktein LALPAN a hrem ang che u. 28 Âtna te, mitdelna te, zâmnatein LALPAN a hrem ang che u a; 29 mitdelin thimthama a dap a dap angin chhûn ênah pawh in dap in dap ang a, in khawsak thu-ah chuan in hmuingîl lo vang; tin, hnehchhiah atân leh râllâk atân ngawt in ni châmchî ang a, chhanchhuak tûr che u tu mah an awm lo vang. 30 Nupui in hual ang a, mi dangin an mutpui ang; in in sa ang a, in luah lo vang; grêp huan in siam ang a, a rah chu in chhawr lo vang. 31 In mit hmuhah in bâwngpate chu thah a ni ang a, a sa chu in ei lo vang; in sabengtungte chu an lâk luihsak ang che u a, an pe leh lo vang che u; in berâmte chu in hmêlmate pêk a ni ang; chhantu che u tu mah in nei lo vang. 32 In fanute, in fapate chu hnam dangte pêk an ni ang a, nilêngin anmahni ngaiin in thlîr reng ṭhîn ang a; in thlîrna lamah in mitte a chau vang a, eng mah tih theih in nei si lo vang. 33 In lei rahte leh in thawh rim rahte chu in hriat loh hnamin an ei zo vang a, hnehchhiah atân leh nêksâwr atân ngawt in ni châmchî ang; 34 chutichuan, chûng thil chu in hmuhin in ât phah ang. 35 LALPAN in khûpah te, in keah te, tihdam theih loh khawihli na chi a veitîr ang che u, in kephah aṭanga in chhîp thlengin. 36 “Nangmahni leh in lal chawpin in pi leh pute chena in hriat ngai loh hnam hnênah LALPA chuan a hruai ang che u a; chutah chuan pathian dang, thing leh lung rawng te in bâwl ang. 37 Tichuan, LALPAN a la hruai bona tûr che u hnam zawng zawng zîngah chuan mak tih leh hau bûr leh a chhe lama tehkhinna in lo la ni ang. 38 Lovah buh chi tam tak in feh chhuahpui ang a; tlêm tê chauh in seng ang, khauvin a ei zo vek dâwn a ni. 39 Grêp huan in siam ang a, in enkawl ang a; nimahsela, a uain chu in in lo vang a, grêp chu in lo hek lo vang, changpâtin a ei zo dâwn a ni. 40 In ram zawng zawngah olive thing in chîng ang a; nimahsela, a hriak chu in thih lo vang, in olive rahte chu a hlamtla zo vang. 41 Fanu fapa in hring ang a; nimahsela, in ta an ni lo vang, salah an la hruai dâwn a ni. 42 In thei kûng zawng zawng leh in lei rah chu khau chan a ni ang. 43 “Ram dang mi, in zînga awmte chuan an sân khalh telh telh ang che u a, nangni chu in hnuai telh telh ang. 44 An pûktîr ang che u a, nangni chuan in pûktîr ve lo vang. Anni chu lu an ni ang a, nangni chu mei in ni ang. 45 Hêng ânchhia zawng zawng hi in chungah a lo awm ang a, a ûm ang che u a, a nangchîng ang che u, a tihboral zawh thleng che uin; a thupêkte leh a dân a pêk che u zâwm tûra LALPA in Pathian awkâ chu in ngaihthlâk loh avângin. 46 In chungah leh in thlahte chungah kumkhuaa chhinchhiahna leh mak tih atân a la awm ang. 47 Thil engkima in lo muk pawha LALPA in Pathian chu rilru lâwm tak leh hlim taka a rawng in bâwl loh avângin, 48 nangmahni bei tûra LALPAN a la rawn tirh tûr in hmêlmate rawng chu rilṭâm chung te, tuihâl chung te, saruak chung te, thil engkim tlachham chungtein in bâwl ang a; an tihboral hma loh che u chuan in nghâwngah thîr nghâwngkawl an bât ang. 49 Hla tak aṭangin kâwlkil ata nangmahni bei tûr hnam, LALPAN mupui bir angin a rawn tîr ang; an ṭawng in hriat loh hnam; 50 upate pawh pawisa lo leh ṭhalaite pawh duhsak chuang lo hnam kawlhsen tak chu. 51 Tin, in ran rual pung te, in lei rah te, in boral hma loh zawng an ei ang a, buh te, uain te, hriak te, in bâwng pung te, in berâm rual note an zuahsak lo vang che u, in boralna an thlensak thleng che uin. 52 In ram zawng zawnga in rin pui, in kulh sângte a chim thlengin in kulh kawngka zawng zawngah an hual ang che u a, LALPA in Pathianin a pêk che u in ram zawng zawnga in kulh kawngka zawng zawngah an hual ang che u. 53 “In hmêlmaten an dan chêpna che u avângin an hualna che u leh an dan chêpnaah che u chuan in rîla rah, LALPAN a pêk che u in fanute leh in fapate sa in ei ang. 54 In zînga mi nun tluang, mi tlang takte pawhin an unaupa te, an nupui duh tak te, an la awmpui an fanaute takngial pawh an hmu mawh ang a; 55 eng mah an neih tawh loh avângin an fate sa an ei tûr chu a tuate mah an pe lo vang; an hualna che u leh an dan chêpna che u avangin. 56 In zînga hmeichhe awm no leh chhiaṭhate, an chhiaṭhat leh an awm no avânga lei pawh rap duh lote chuan an pasal duh tak te, an fanu te, an fapa te, 57 an pawm lai fa sên leh an fa la piang tûrte pawh an hmu mawh ang a; engkim an tlâkchham tawh avângin a rûkin an ei ang; an hualna che u leh an dan chêpna che u, in hmêlmaten in kulh kawngkaa an dan chêpna che u avângin. 58 “LALPA IN PATHIANA tih hming ropui tak leh hlauhawm tak hi, in hlauh theihna tûra he lehkhabua chuang thu zawng zawng hi fîmkhur taka in zawm loh chuan, 59 LALPAN nangmahni leh in thlahte chungah hri mak tak, hripui lêng reng, natna hrehawm tak lêng reng chi a lêntîr ang. 60 In hlauh hle ṭhin Aigupta ram hrite kha in chungah a lêntîr leh ang a, a vuan tlat ang che u. 61 He dân lehkhabua chuang lo, natna leh hri tinrêng pawh in boral hma loh chu LALPAN in chungah a lêntîr ang. 62 Vâna arsi zât ni ṭhînte kha tlêm tê chauh in lo ni tawh ang, LALPA in Pathian awkâ chu in zawm loh avângin. 63 Tin, heti hi a ni ang a, a tiṭha tûr che u leh a tipung tûr che ua LALPA chu a lâwm ang khân, a tiboral tûr che u leh a tichhe tûr che uin LALPA chu a lâwm ang a, in va luah tûr in luhna ram ata chu sawn bo in ni ang. 64 “Tin, LALPA chuan kâwlkil aṭanga kâwlkil lehlam thlengin chi tin zîngah a tidarh ang che u a, chutah chuan thing leh lung - in pi leh pute chena in hriat ngai loh pathian dangte rawng in bâwl ang. 65 Chûng hnam zîngah chuan hahdamna rêng rêng in hmu lo vang a, in ke tân chawlhna rêng rêng a awm lo vang a; chutah chuan LALPAN khurhna rilru te, mit chauhna te, nguina rilrute a pe zâwk ang che u. 66 In nunna chu hlauthâwng rêng rêngin a awm ang a, chhûn leh zân hlau rengin in awm ang a, in nunnain ngaihngam taka awm a nei lo vang. 67 Zîng lamah chuan, ‘Tlai ni tawh sela aw!’ in ti ang a, tlai lamah chuan, ‘Zîng ni tawh sela aw!’ in ti ang; thil hlauhawm in thinlungin a hlauh tûr avâng leh in mita in thil hmuh tûr avâng chuan, 68 ‘In hmu leh tawh lo vang,’ in hnêna ka tih kawngah chuan lawngin Aigupta ramah LALPAN a hruai leh ang che u; tin, chutah chuan in hmêlmate bawihpa atân te, bawihnu atân te in inzuar ang a, tu mân an duh dâwn lo che u a ni,” tiin.
Moab rama Israel-te hnêna LALPA thuthlung
1 Horeb tlânga an hnêna thu a thlun tiam lova, LALPAN Moab rama Israela thlahte hnêna Mosia thu a thluntîr, a thuthlung thute chu hêng hi a ni. 2 Tichuan, Mosian Israel mi zawng zawng chu a ko va, an hnênah, “Aigupta rama Pharaoa chungah te, a mite zawng zawng chungah te, a ram zawng zawng chungah te in mit hmuh ngeia LALPAN thil a tih zawng zawng kha in hmu a; 3 fiahna nasa tak te, chhinchhiahna te, thil mak te in mit ngeia in hmuh kha. 4 Nimahsela, LALPAN vawiin thleng hian hriat thiamna thinlung te, hmuh theihna mit te, hriat theihna beng te a la pe lo che u a ni. 5 Thlalêrah kum sawmli ka hruai ta che u a; in silhfênte chu in sin chul lo va, in pheikhawkte chu in bun chul lo bawk a. 6 Kei hi LALPA in Pathian ka ni tih in hriat theih nân chhang in ei lo va, uain pawh, zupui pawh in in lo va. 7 Tin, he hmun in lo thlen hian, Hesbon lal Sihona leh Basan lal Oga chu min do tûrin an lo thawk a, anni chu kan lo hneh a; 8 tin, an ram chu kan la a, Reuben-ho te, Gad-ho te, Manase hnam zâtvete luah atân kan pe a. 9 Chutichuan, in thiltih zawng zawnga in hmuingil zêl theih nân he thuthlung thute hi pawm ula, zâwm rawh u. 10 “Tûnah hian in zain - in hnam puipa te, 11 in upa te, in hotu te leh Israel mi dang zawng zawng, in fanau tê tê te, in nupui te, in awmpui ram dang mi, in thing kittu leh in tui chawitute chenin LALPA hmaah in ding a ni. 12 LALPA in Pathianin in pawm tûra thuthlung a siamah hian vawiinah in lût dâwn ta a; 13 in thlahtu Abrahama te, Isaaka te, Jakoba te hnênah leh in hnêna a lo tiam tawh anga in Pathian a nih theih nân, ama mi atân a tinghet che u a ni. 14 He chhechham leh thuthlung thu hi in hnênah chauh thlung ka ni lo va, 15 vawiina LALPA kan Pathian hmaa dingte leh tûna kan hnêna awm ve lote hnênah pawh hian a ni 16 (Aigupta rama kan awm dân te, hnam dangte tâwn tlanga in kal tlang dânte in hria a; 17 an zînga an thil tenawmte leh an milem, thing leh lung te, tangkarua leh rangkachakte in hmu bawk a). 18 “Chuti lo chuan, in zînga mipa emaw, hmeichhia emaw, chhûngkua emaw, hnam emaw, chûng hnam pathiante be tûr chuan an thinlungin tûnah hian LALPA kan Pathian chu hawisanin, in zîngah thil khâ leh sai chawr chhuahna bul te in lo awm dah ang e; 19 tin, chuti a nih zawngin he chhechham thu hi hre reng sia, luhlul taka duh ang anga a awm pawha a tân eng mah pawi lo tûr anga mahni inthlamuan chawp chu, 20 chutiang mi chu LALPAN a ngaidam dâwn hauh lo va, LALPA thinurna leh a thîkna chuan chu mi chu a ur ang a, he lehkhabua ânchhe chuang zawng zawng hi a chungah a awm ang a, LALPAN vân hnuai ata a hming chu a thai bo zâwk ang. 21 He dân bua chuang ânchhe thuthlung zawng zawng ang hian, Israel hnam zawng zawng zîng ata tihrangin thil ṭha lo lamah LALPAN a teltîr ang. 22 “Tin, ṭhangthar lo la awm tûr, in hnua in fate lo la awm tûr leh, ram dang mi hla tak aṭanga lo kal tûrte chuan, chumi rama hri leh LALPAN natna a veitîrte, 23 a ram pum pui chu kât leh chi leh kâng hlum, eng mah chîn lohna, eng mah chawr lohna, hlobette pawh chawr lohna, Sodom leh Gomorra leh Adma leh Zeboiim tihchhiat, LALPAN thinur leh thinrima a tihchhiat anga chhia a nih an hmuh hun chuan, 24 hnam tinin, ‘Eng vângin nge he ram hi hetianga LALPAN a tih? He thinur ling nasa tak hi engtizia nge ni?’ an ti ang. 25 Chutichuan, miin, ‘Aigupta ram ata a hruai chhuah laia a thuthlun, LALPA an pi leh pute Pathian thuthlung chu an hawisana, 26 pathian dang, an hriat ngai loh pathiante, anin a ruatsak ni lote rawng an bâwla, an biak vâng a ni. 27 Chu vâng chuan he lehkhabua chuang ânchhia zawng zawng thlentîr tûrin he ram chungah hian LALPA thin a thawk a ni. 28 Tin, thinrim leh thinur leh thinrim tak maiin an ram ata a pawt chhuak vek a, ram dangah a theh lût a ni, tûna an awm dân ang hian,’ an ti ang. 29 Thil inthupte chu LALPA kan Pathian ta a ni a; thil tihlante erawh chu, he a dân thu zawng zawng hi kan zawm theih nân keini leh kan thlahte ta kumkhua tûr a ni.
Nunna chu thlang rawh u
1 “Tin, LALPAN a hnawh darhna che u hnam dang zînga in awm laia, in chungah hêng tûna malsâwmna leh ânchhia in hnêna ka sawi hi a lo thlenin, duh thlan tûr in neih hi hre reng ang che u. 2 LALPA in Pathian lam in hawi leha, tûna thu ka pêk che u ang hian, nangni leh in fate nên, in thinlung zawng zawng leh in rilru zawng zawnga a awkâ in zawm hunah chuan, 3 LALPA in Pathianin in sal nihna a tibo vang a, a khawngaih ang che u a, LALPA in Pathianin hnam tin zînga a tihdarhna che u ata a hruai khâwm leh ang che u. 4 In zînga mi, vân tawp thlenga hnawh chhuah an awm chuan, LALPA in Pathianin chuta ta chu a hruai khâwm ang che u a, chuta ta chu a hruai chhuak ang che u; 5 tin, LALPA in Pathianin in pi leh puten an luah ramah khân a hruai lût leh ang che u a, in luah ang a; ani chuan a tihmuingîl ang che u a, in pi leh pute khûmin a tipung ang che u. 6 Tin, in nun theihna tûra LALPA in Pathian chu in thinlung zawng zawng leh, in rilru zawng zawnga in hmangaih theihna tûrin, LALPA in Pathianin in thinlung leh in thlahte thinlung serh a tansak ang che u. 7 Tin, LALPA in Pathianin hêng ânchhia zawng zawng hi a tiduhdahtu che u, in hmêlmate leh a hawtu che u chungah a awmtîr ang. 8 Tin, in lo hawi leh ang a, LALPA awkâ hi in pawm ang a, vawiina thu ka pêk che u, a thupêk zawng zawngte hi in zâwm ang. 9 “Tin, LALPA in Pathian chuan in kutkawih zawng zawngah te, in rîla rahah te, in bâwng rual pungah te, in lei rahahte nasa takin a tipung ang che u a, in pi leh pute chunga a lâwm ang khân in chungah LALPA a lâwm leh ang; 10 he dân bua chuang a thupêkte, a dânte zâwm tûra LALPA awkâ in zawma, in thinlung zawng zawng leh in rilru zawng zawnga LALPA in Pathian lam in hawi phawt chuan. 11 “He thupêk, tûna ka pêk che u hi in tân a har lutuk lo va, a hlat lo bawk che u a ni. 12 “ ‘Kan hriata kan zawm theihna tûrin tu nge vânah min kalsak ang a, min han lâksak ang?’ tih tûrin vâna mi a ni lo va. 13 ‘Kan hriata kan zawm theihna tûrin tuifinriat râlah tu nge min kalsak ang a, min rawn lâksak ang?’ tih tûrin tuifinriat râla mi a ni hek lo. 14 In zawm theih nân thu chuan a hnaih hle che u a, in kâah leh in thinlungah a awm a ni. 15 “Tûnah hian in hmaah nunna leh ṭhatna, thihna leh thil ṭha lo ka dah a; 16 LALPA in Pathian hmangaih tûr te, a kawng zawh tûr te, a thupêk te, a dân te, a rorêlte pawm tûra tûna thu ka pêk che u hi in zawm chuan nungdamin in awm ang a, in lo pung ang a, in va luah tûr ramah chuan LALPA in Pathianin mal a sâwm dâwn che u a ni. 17 Amaherawhchu, in thinlungin khaw dang a hawia, in ngaihthlâk lohva, hruai bova in awma, pathian dangte in biaka, a rawng te in bâwl chuan, 18 in boral ngei ngei ang tih tûnah hian ka hrilh che u a ni; Jordan lui kâna, luah tûra in va luhna ramah chuan in dam rei lo vang. 19 In hmaah nunna leh thihna, malsâwmna leh ânchhia ka dah tih tûnah hian in chungchâng thua hretu atân lei leh vân ka ko a ni; chutichuan, nunna chu thlang rawh u, in nun theih nân, nangni leh in thlahte nên; 20 LALPA in Pathian hmangaiha, a awkâ awiha, amah vuan tlatin; amah chu in nunna, in dam reina a ni si a; tichuan, in pu Abrahama te, Isaaka te, Jakoba te chhechhama pêk a tiam ramah chuan in awm dâwn a ni,” a ti a.
Josuan Mosia ai a awh
1 Tin, Mosian Israel mi zawng zawng hnênah hêng thu hi a va sawi a. 2 An hnênah, “Tûnah chuan kum za leh sawmhnih ka lo ni ta a; ka chhuakvâk thei tawh lo va; tin, LALPAN, ‘He Jordan lui hi i kân lo vang,’ mi ti a. 3 LALPA in Pathian chuan in hma a hruai ang a; hêng hnamte hi a tihbosak ang che u a, an ram chu in luah ang; tin, LALPAN a lo sawi tawh angin Josuan in hma a hruai ang. 4 Tin, LALPAN Amor-ho lalte, Sihona leh Oga leh an ram chunga a tih ang khân an chungah a ti ang; anni chu a tiboral a nih kha. 5 LALPAN anni chu a hlân ang che u a, thu ka pêk che u thupêk ang zawng zawng khân an chungah in ti tûr a ni. 6 Chhel tak leh huai takin awm ula, ṭih suh ula, anni chu hlau hek suh u; in hnêna kala chu LALPA in Pathian a ni si a; a tithlâwn lo vang che u a, kal pawh a kalsan tawp lo vang che u,” a ti a. 7 Tin, Mosian Josua chu a ko va, Israel mite zawng zawng mit hmuhah a hnênah, “Chak tak leh huai takin awm rawh, hêng mite hnênah hian an pi leh pute LALPAN chhechhama pêk a lo tiam tawh ramah chuan i kal tûr a ni a, anniho hi i luahtîr tûr a ni. 8 Tin, i hmahruaitu chu LALPA a ni ang a, i hnênah a awm zêl ang a, a tithlâwn lo vang chia, kal pawh a kalsan tawp lo vang che; hlau suh la, zâm hek suh,” a ti a.
Kum sarih danah dân hi chhiar tûr
9 Tin, Mosia chuan chu dân chu a ziak a, LALPA thuthlung bâwm zâwntu Levia fapa puithiamte leh Israel upateho zawng zawng chu a pe a. 10 Tichuan, Mosian, “Kum sarih kum, ngaihdam kum apianga bâwkte kûtah, 11 hmun a la ruat tûra Israel mi zawng zawng LALPA in Pathian hmaa an rawn inlan hunah, he dân hi Israel mi zawng zawng hriatah in chhiar tûr a ni.
LALPAN Mosia thil a hrilh hnuhnûngte
12 “Mipuiho a hmei a pa, in fanau tê tê te, in awmpui ram dang mi te, anni chuan an ngaihthlâka, an zira, LALPA in Pathian chu an ṭiha, he dân thu zawng zawng hi fîmkhur taka an zawm theih nân leh, 13 an fate, la hre ve lote pawhin an hriata, Jordan lui kâna in va luah tûr rama in awm chhûng zawng zawnga LALPA in Pathian ṭih an zir theih nân ko khâwm rawh u,” tiin thu a pe a. 14 Tin, LALPAN Mosia hnênah, “Ngai teh, i thih hun a lo hnai ta a; Josua chu ko la, inbiakna puan inah chuan va inlan rawh u, thu ka pe dâwn e,” a ti a. Tin, Mosia leh Josua chu an kal a, inbiakna puan inah chuan an va inlan a. 15 Tin, LALPA chu Puan Inah chuan chhûmdingin a inlâr a; tin, chhûmding chu Puan In kawngka lu chungah chuan a ding a. 16 Tin, LALPAN Mosia hnênah, “Ngai teh, i pi leh pute hnênah i muhîl dâwn ta a, hêng mite hi an tho vang a, an va awmna tûrte zînga ram dang pathiante lakah chuan an uirê ang a, mi hawisan ang a, ka thuthlung an hnêna ka thlun chu an bawhchhia ang. 17 Chutichuan, chumi hun chuan an chungah ka thin a thawk ang a, ka hawisan ang a, ka bîkbosan ang a, an ral ang a, thil ṭha lo leh manganna tam tak an chungah a thleng ang a; chutichuan, chumi ni chuan, ‘Kan Pathian kan zînga a awm loh avângin hêng thil ṭha lo hi kan chungah a lo thleng a ni lâwm ni?’ an ti ang a. 18 Pathian dangte lam hawia thil ṭha lo an la tih tûr zawng zawng avâng chuan, an lakah chumi hun chuan ka inthup ngei ngei dâwn a ni. 19 “Chuvângin, hetiang hla hi in tân phuah la, Israela thlahte zirtîr rawh; Israela thlahte chungchâng thu-ah he hla hi mi hriatpuitu a nih theih nân vawntîr rawh. 20 An pi leh pute hnêna chhechhama ka tiam, hnutetui leh khawizua luang ramah chuan ka hruaia, ei leh bâra an awma, an tlaia, an lo thau hun meuh chuan pathian dangte lam an hawi ang a, an rawng te an bâwl ang a, mi hmusit ang a, ka thuthlungte an bawhchhe dâwn a ni. 21 Tin, heti hi a ni ang a, thil ṭha lo leh manganna tam tak an chunga a lo thlen hunin, he hla hi a hriat chhuahtîrtu a ni ang; an thlahte kâ aṭangin theihnghilh theih a ni dâwn si lo va; tûnah ka chhechham rama ka hruai hma rêng pawhin an suangtuah vêl dân chu ka hre sa tawh reng a ni,” a ti a. 22 Chutichuan, Mosian chu hla chu chumi ni la la chuan a phuah a, Israela thlahte a zirtîr a. 23 Tin, Nuna fapa Josua chu a fuih a, “Chhel tak leh huai takin awm rawh khai; Israela thlahte chu an hnêna chhechhama ka tiam ramah chuan i hruai lût dâwn a ni; tin, i hnênah ka awm zêl ang,” a ti a. 24 Tin, heti hi a ni a, Mosian he dân thute hi lehkhabua a ziak zawha peih diam a nih hnuin, 25 thuthlung bâwm zâwntu Levi-hote chu Mosian, 26 “He dân bu hi la ula, in chungchâng thua hretu atân LALPA in Pathian thuthlung bâwm sîrah dah rawh u. 27 Hel in chînzia leh in luhlulziate ka hria a ni; ngai teh u, tûna ka la dampui lai che u mahin LALPA chungah in hel ṭhîn a; ka thih hnu lek phei chuan eng ti takin nasa ang maw! 28 An beng hriata hêng thu hi ka sawia, an chungchâng thua hretua lei leh vân ka koh theih nân in hnam puipa zawng zawngte, in hotute mi koh khâwmsak rawh u. 29 Ka thih hnu chuan nasa takin in intichhia ang a, ka thupêk che u kawng ata hi in pêng ang tih ka hre reng a ni; tin, a tâwpah phei chuan thil ṭha lovin a tlâkbuak ang che u; in kut thiltiha tithinur tûra LALPA mit hmuha thil ṭha lo in tih dâwn avângin,” tiin thu a pe a. 30 Tichuan, Mosian Israel pung khâwmho zawng zawng beng hriatah chuan he hla thu hi a tâwp thlengin a sawi vek a:
Mosia hla
1 “Beng lo chhi ru, vânte u, ka hril dâwn e; Ka ṭawngkam chhuak leilungin ngai se: 2 Ruahtui angin ka thu chu a sûr ang, Dai angin ka thusawi chu a far ang; Hlobet no dep chunga ruah ang leh, Hnim hnah chunga ruah angin. 3 LALPA hming chu ka puang dâwn e: Ropuina kan Pathian pe ru. 4 “Lungpuia chu, a thiltih a fel famkim; A awm dân zawng zawng chu dân a ni a, Pathian rinawm, khawlohna nei lo, Fel leh ṭha a ni. 5 ṭha lo takin a chungah an ti a, a fate an ni lo, an sawisêl kaina a ni: Chhuan bengtlalo leh tihmawh an ni. 6 Aw, mi â leh fing lote u, Chutin maw, LALPA chu in thungrulh dâwn? A hringtu che, i pa a ni lâwm ni? A siam chia, a din nghet che a ni lâwm ni? 7 “Hmasâng nite chu hre reng la, Chhuan tam tak kumte chu ngaihtuah teh. I pa zâwt la, a kawhhmuh ang che; I upate pawh, an hrilh ang che. 8 Chungnungberan hnamte ram a pêk laia, Mihring fate a ṭhen lai khân Hnamte ramri a kham a, Israela thlahte zâtin. 9 LALPA chanvo chu a mite an ni a; Jakob-ho chu a rochan an ni. 10 “Thlalêr ramah a chhar a, Thlalêr ruak rûm vung vungah; A vêla awm chilhin a enkawl a, A mitnautê angin a vawng. 11 Mupuiin a bua no a chawk thova, A no chunga thla a zâpa, A thlate a zâra, a laa, A thlaa a chawi ṭhîn angin, 12 LALPA chauhvin a hruai ṭhîn a, Ram dang pathian ni lovin. 13 Lei hmun sângah te a chuantîr a. Lova thil hâwng a eitîr ṭhîn a; Lungpui ata khawizu a dâwttîr ṭhîn a. Lung chang ata hriak nên. 14 Bâwnghnute khal, berâm hnutê, Berâmno thaute nên; Basan ram berâmpa leh kêlte, Buh kal thaute nên; Grêp thisen, uain i in a. 15 “Mahse, Jesurun-ho an lo thau va, an inchhek a; I lo thau va, i lo chum a, i lo maih ta! A siamtu Pathian a hawisan ta a, A chhandamna Lungpui chu a ngainêp. 16 Ram dang pathiantein a thîkthu a chawk tho va, Thil tenawmin a chawk thinrim. 17 Pathian ni lo, ramhuaite hnênah an inthawi a, An hriat ngai loh pathiante hnênah, Pathian tharte tlaikhawhnua lo awm, In pi, in pute hlauh ngai loh hnênan. 18 A hringtu che Lungpui i ngaisâng lo, A siamtu che Pathian i theihnghilh bawk. 19 “Chu chu LALPAN a hmu a, a hua, A fanu leh fapate tihthinur vângin. 20 ‘Ka bîkbosan ang a, Engtin nge an awm dâwn teh rêng,’ a ti; Chhuan bengtlalo an ni, Rin kai lo fanaute. 21 Pathian ni lo thilin ka thîkthu an chawk tho va; An thil lawilovin mi tithinur a. Chia sawi lohtein ka thîktîr ang a. Hnam âtein ka tithinrim ang. 22 Ka thinur a alh a, Seol mawng kil lam a kâng, Leilung, a thil hâwng chawpin a kâng zo, Tlâng nghahchhante a kâng. 23 “An chungah chhiatna ka tiang khâwm ang a, An chungah thal ka thlah ang. 24 Rilṭâmin an râwp ang a, meipui leh chhiatna namênlovin a kâng ral ang, An chungah ramsa hâte ka tîr ang a, Vaivuta tleng mite tûr nên. 25 Pâwn lamah khandaihin an thi ang a, Chhûng lamah thlabârin, Nula tlangvâl, hnute hne lai, Lua kêlsam ṭote nên lam. 26-27 An hmêlmate chuan ngai sualin, ‘Kan kut chu chawisânin a awm ta, Hêng zawng zawng hi LALPA tih a ni tawp lo,’ hmêlma thinrim chuan an ti ang tih hlauthâwng lo ila chuan, ‘Ka tidarh vek ang a, Mihring zînga anmahni hriat rengna ka tibo teh daih ang,’ ka ti mai tûr. 28 “Finna nei lo hnam an ni a, Anmahniah hriat thiamna a awm lo. 29 Aw, fing sela chuan hêng hi an hre thiam ang a, An tûn hnu lam thu an ngaihtuah tûr. 30 Engtin nge pakhatin sâng a ûm ang a, Pahnihin sîng an tlânchhiattîr ang, An Lungpuiin a hralha, LALPAN a hlan a nih si loh chuan? 31 An lungpui chu kan Lungpui ang a ni si lo, Kan hmêlmate ngei ngaih dân pawhin. 32 A grêp hrui chu Sodom grêp hrui, Gomorra rama mi a ni; A grêpte chu mît grêp a ni, A bâwrte chu a khâ. 33 An uain te chu dragon tûr leh Rûlrial tûr ṭha tak a ni. 34 “Chu chu ka khâwl khâwm, Ka ro bâwma châr chiah a ni lâwm ni? 35 Phuba lâk leh thungrulh chu keima tih tûr a ni; An rahbi a la tleu ngei dâwn e; An chhiatna ni chu a lo hnai ta, An chunga thil lo thleng tûrte chu a lo thleng thuai ang. 36 LALPA chuan a mite ro a rêl dâwn a, A chhiahhlawhte pawh a tihsak ang, A thiltihtheihna bova, Khuahkhirh leh khirh loh tu mah rêng awm lova a hmuh hun chuan. 37 Khawiah nge an pathian, An rin lungpui, 38 An inthawina thau eitu, An in tûr thilhlan uain intute chu? Lo thovin rawn pui che u sela, Nangmahni humtu ni rawh se. 39 “Kei, keimah ngei ka nih hi hria ula, Pathian dang an awm lo ve; Ka tihlum ṭhîn a, ka tinung bawk ṭhîn; Ka hliam ṭhîn a, ka tidam bawk ṭhîn; Ka kut ata mi chhuhsak thei rêng rêng an awm lo. 40 Vân lamah ka kut ka phar a, Ka nunna chhâlin ka sawi e, 41 Ka khandaih tlê ka tah hriama, Ka kutin rorêlna a vawn chuan, Ka hmêlmate chungah phuba ka la ang a, Mi hawtute chu ka thungrûl ang. 42 Ka thalte chu thisenin ka tirui ang a, Ka khandaihin tisa a lem ang; Thahte leh salte thisen nên Hmêlma hotute lu aṭangin, ka ti, a ti ang. 43 “Aw, nangni hnam tinte u, a mite nên lâwm rawh u; A chhiahhlawhte thisen phuba chu a la dâwn a ni; Amah dotute chungah phuba a la dâwn, A ram leh a mite tân inremna famkim a siam ang.”
Mosia thuchah hnuhnûng
44 Tin, mipuite beng hriatah chûng hla thu zawng zawng chu Mosian a va sawi a, amah nên, Nuna fapa Hosea nên. 45 Tin, Mosian chûng thu zawng zawng chu Israel mi zawng zawng hnêna a sawi zawh chuan, 46 an hnênah, “Tûna in hnêna ka thu hriattîr che uah hian in thinlung nghat tlat ula, hêng dân thu zawng zawng hi fîmkhur taka zâwm tûrin in fate thu pe rawh u. 47 In tân thil engmahlo mai mai a ni lo va, in nunna a ni si; tin, hêng thil ti hian luah tûra Jordan in va kân ramah chuan in dam rei dâwn a ni,” a ti a. 48 Tin, chumi ni vêk chuan LALPAN Mosia a bia a, 49 “Moab rama Jeriko zâwna Abarim tlângdunga Nebo tlângah chuan han chho la, Israela thlahte luah tûra ka pêk Kanaan ram chu han thlîr rawh; 50 tichuan, i unaupa Arona Hor tlânga a thia, a chite hnêna hruai a ni ta ang bawk khân i lâwn chhohna tlângah chuan i thi ang a, i chite hnêna hruai i ni ang; 51 Zin thlalêra Kadesh-a Meriba tuia Israela thlahte zînga ka chunga in sual avâng leh, Israela thlahte zînga mi chawimawi loh avâng khân. 52 Ram chu i han hmu ang a; nimahsela, Israela thlahte ka pêk ramah chuan i lût lo vang,” tiin.
Israel hnamte Mosian mal a sâwm
1 He malsâwmna hian a ni, Pathian mi Mosian a thih hmaa Israela thlahte mal a sâwm ni: 2 “Sinai aṭangin LALPA chu a lo kal a, Seir aṭangin an hnênah a thawk a, Paran tlâng aṭangin a êng chhuak a, Mi thianghlim sângsâwm zîng aṭangin a lo kal; A kut ding lamah chuan an tân dân alh thei a awm a. 3 A ni, chi tinte chu a hmangaih a, A mi thianghlim zawng zawng chu i kutah an awm a, I ke bulah an ṭhu a; I thu chu an pawm ṭheuh vang. 4 Mosia chuan dân min pe a, Jakob-ho mipui tân ro luah tûr. 5 Jesurun-ah a lal a, Mipuiho puipate an pung khâwm a, Israel chi zawng zawng a huhovin. 6 “Reubena chu dam reng sela, thi lovin, A mite erawh chu tlêm thung rawh se,” a ti a. 7 Tin, hei hi Juda-ho mal a sâwmna a ni: “LALPA, Juda aw chu ngaithla la, A mite hnênah hruai lût rawh; A kutin a tân a chuh a, A hmêlmate beihpuitu i ni ang,” tih hi. 8 Tin, Levi-ho chungthuah chuan: “I Thumim leh i Urim chu i mi thianghlim hnênah a awm, Masa-a i fiaha, Meriba tuiahte i beih kha; 9 ‘Ka nu leh ka pa ka hre lo,’ titu khân, A unaute a hre lo, Ama fate ngei pawh a hre hek lo; I thu chu an pawm a, I thuthlung an zâwm a ni. 10 Jakob-ho chu i rorêlte an zirtîr ang a, Israel-hote, i dân. I hmaah rimtui an dah ang, I maichâmah pumhâl thilhlan. 11 Malsâwm rawh, LALPA, a sum a pai, A kutkawihte lo pawm la; A beitute kâwng chu vua la, A hawtute kâwng nên, an chêt leh tawh loh nân,” a ti a. 12 Tin, Benjamin-ho chungthuah chuan: “LALPA duh taka chu a kiangah himin a awm ang, Nilêngin a awp ang a, A paw ṭhîn ang,” a ti a. 13 Tin, Josef-ho chungthuah chuan: “A ram chu LALPA malsâwmin awm rawh se, Vân thil hlu, daitein, Tui thûk tak hnuai lama tuitein, 14 Ni rah chhuah thil hlutein, Thlaten thil hlu a chhuahtein, 15 Hmasâng tlângtea thil duhawm bertein, Chatuan tlânga thil hlutein, 16 Leilung leh a chunga thil hlutein, Hnimbuka awma duhsaknain; Malsâwmna chu Josef-ho lu chungah lo awm rawh se, A unaute hnên ata tihhrana chhîpah chuan. 17 A ropuina chu a bâwngpa piang hmasa ropuina ang a ni a, A kî chu selechal kî ang a ni; Chûng chuan hnam tin a si ang, kâwlkil thlengin; Ephraim-ho sângsâwmte an ni a, Manase-ho sângte an ni,” a ti a. 18 Tin, Zebulun-ho chungthuah chuan: “Lâwm rawh, Zebulun, i chhuahvahnaah te, Tin, Isakar, i puan inahte. 19 Tlângah chi tin an ko vang a, Tah chuan felna inthawinate an hlân ang; Tuifinriat mukna an tlân dâwn si, ṭiauva ro inphûmte nên,” a ti a. 20 Gad-ho chungthuah chuan: “Gad-ho tizautu chu fakin awm rawh se. Sakeibakneipui angin a châng a, Bân a ham thlêr a, a ni, chhîp zawl te pawh. 21 A ṭha lai ber a tân a thlang a. Rorêltu chanvo chu vohvin a awm si a. Puipahote hnênah a kal a, LALPA rorêlna fel a zui a; Israel-te hnêna a rorêlnate chu,” a ti a. 22 Dan-ho chungthuah chuan: “Dana chu sakeibakneino a ni, Basan aṭanga lo zuang chhuak chu,” a ti a. 23 Naphtali-ho chungthuah chuan: “Aw, Naphtali, duhsaknaa lungawi, LALPA malsâwmnaa tlai, Chhim leh thlang luah rawh,” a ti a. 24 Aser-ho chungthuah chuan: “Asera chu fanauva malsâwmin awm sela, A unaute zîngah tlatlum sela; Hriakah a ke chiah rawh se. 25 I kalhnate chu thîr leh dâr a ni ang, I dam chhûng ni angin i chakna pawh a awm ang,” a ti a. 26 “Pathian ang tu mah rêng an awm lo, aw Jesurun, A pui tûr chea vâna chuang, Ropui taka vâna chuang chu. 27 Chatuan Pathian chu i awmna a ni a, Hnuai lamah chuan chatuan bân a awm, Hmêlmate chu a vai kiansak chia, ‘Tiboral rawh,’ a ti. 28 Tin, Israela chu râlmuang takin a awm a, Jakoba tuichhunchhuah a pumbil; Buh leh uain ramah chuan, A ni, a vânten daifîm an fartîr. 29 I nihlawh e, aw Israel, Nang ang rêng tu nge awm, LALPA chhandam mite? Nangmah puitu phaw, I ropuina khandaih a ni. I hmêlmate i hnênah an intulût ang a, An hmun sângte i chîl ang,” a ti a.
Mosia thih thu
1 Tin, Mosia chu Moab phai aṭangin Jeriko zâwna Nebo tlâng, Pisga tlâng chhipah chuan a han chho va. Tin, LALPAN Gilead ram zawng zawng, Dan thlengin a entîr a; 2 Naphtali leh Ephraim ram zawng zawng, Manase leh Judai ram zawng zawng, a thlang lam tuifinriat thleng, 3 Chhim ram leh tûm khawpui Jeriko phai ruam, Zoar thlengin, 4 Tin, LALPAN a hnênah, “He ram hi a ni, Abrahama te, Isaaka te, Jakoba te hnêna, ‘I thlahte ka la pe ang,’ tia chhechhama ka lo tiam kha; a hmuh zawng ka hmuhtîr phawt chia; nimahsela, chutah chuan i kal lo vang,” a ti a. 5 Chutichuan, LALPA chhiahhlawh Mosia chu LALPA thu angin Moab ramah chuan a thi ta a. 6 Tin, Beth-peor zâwna Moab rama ruamah a phûm a; nimahsela, a thlân chu tûn thlengin tu mahin an hre lo. 7 Mosia chu a thih chuan kum za leh kum sawmhnih mi a ni; a mit a thim lo va, a tha pawh a ṭhum chuang lo. 8 Tin, Israela thlahte chuan Mosia chu Moab phaiah ni sawmthum an ṭah a; chutichuan, Mosia sûna ṭah nite chu a lo tâwp ta a. 9 Tin, Nuna fapa Josua chu finna thlarauvin a khat a, Mosia chuan a chungah a kut a nghah avângin; tin, Israela thlahte chuan a thu an zâwm a, LALPAN Mosia thu a pêk ang chuan an ti a. 10 Tin, chuta chin chu Israel-te zîngah, Mosia anga LALPAN hmaichhan meuhva a biak zâwlnei rêng rêng an awm ta lo va, 11 chhinchhiahnate zawng zawng leh thil mak zawng zawng, Pharaoa leh a chhiahhlawh zawng zawng hnên leh Aigupta ram zawng zawnga entîra, 12 kut chak tak leh hlauhawm tak taktea Israel mi zawng zawng mit hmuha Mosian a tih ang ti vete.
Kanaan ram la tûrin Pathianin Josua thu a pe
1 Tin, heti hi a ni a, LALPA chhiahhlawh Mosia thih hnu chuan Mosia rawngbâwltu Nuna fapa Josua hnênah LALPAN, 2 “Ka chhiahhlawh Mosia chu a thi ta a; chutichuan, tho la, nang leh hêng mipuiho zawng zawng nên hian Jordan lui hi kân ula, anmahni, Israela thlahte ka pêk ramah chuan kal rawh u. 3 Mosia hnêna ka sawi tawh ang khân in kephaha in rah apiang chu ka pe vek a che u. 4 Thlalêr aṭang leh he Lebanon tlâng aṭanga lui lian pui Euphrates lui thlenga Hit-ho ram zawng zawng, ni tlâkna lam tuifinriat zau tak thlengin in ramri a ni ang. 5 I dam chhûng zawng tu mah rêng rêngin an chelh lo vang che; Mosia hnêna ka awm ang khân i hnênah pawh ka awm ve dâwn e. Ka tithlâwn lo vang chia, kal pawh ka kalsan tawp lo vang che. 6 Chak tak leh huai takin awm rawh; an thlahtute chhechhama pêk ka lo tiam tâk ram kha hêngho hi i luahtîr dâwn si a. 7 Ka chhiahhlawh Mosian dân zawng zawng zawm tûra thu a pêk che kha zâwm tlat tûrin chak tak leh huai takin awm phawt mai rawh; i kalna apianga i lo hmuingîl zêl theihna tûrin i ding lamah emaw, i vei lamah emaw pênsan hauh suh ang che. 8 He dân bu hian i kâ chu chhuahsan hlek suh se; chumi thuziak zawng zawng chu i zawm tlat theih nân chhûn leh zân i ngaihtuah zâwk tûr a ni; tichuan, i kawngte chu i lo titluang zel ang a, i lo hmuingîl zêl dâwn nia. 9 Thu ka pe che a ni lâwm ni? Chak tak leh huai takin awm rawh; hlau suh la, zâm hek suh; LALPA i Pathian chu i kalna apiangan i hnênah a awm zêl dâwn alâwm,” tiin a sawi a.
Josuan mi dangte thu a pe
10-11 Chutichuan, Josuan mipui hotute hnênah chuan, “Riahhmun va fang ulangin, mipuite hnênah, ‘Ei tûrte buatsaih rawh u khai, ni thum chhûngin LALPA in Pathianin ram luah tûr a pêk che u hi luah tûrin Jordan lui hi in kân dâwn a ni e,’ tiin thu pe ang che u,” tiin thu a pe a. 12 Tin, Reuben-hote, Gad-hote leh Manase hnam zâtvete hnênah chuan Josuan, 13 “LALPA in Pathianin chawlhna a pe che u a, he ram hi a la pe dâwn che u tia LALPA chhiahhlawh Mosian thu a pêk che u hi hre reng ang che u. 14 In nupuite, in fanau tê tête leh in ran rualte hi chu Jordan lui râla Mosian ram a lo pêkah che u chuan an awm ang a; nangni mi chak huaisenho zawng erawh chu inrâlthuamin in lo kai hmasa ang a, in unaute in lo ṭanpui ang a, 15 LALPAN in unaute chu nangmahni ang bawka chawlhna a pêka, LALPA in Pathianin ram a pêk chu anni pawhin an luah ve hma loh chuan. Tichuan, LALPA chhiahhlawh Mosian Jordan lui râl, ni chhuahna lam ram in puala a lo pêk che u lamah chuan in lêt leh ang a, in la luah dâwn nia,” tiin a sawi a. 16 Tin, anni chuan, “Tih tûra i thu min pêk zawng zawng chu kan ti zêl ang e; tin, i mi tirhna apiangah pawh kan kal zêl ang. 17 Kawng engkima Mosia thu kan zâwm zêl ṭhîn ang khân, i thu pawh kan zâwm zêl ang e; LALPA i Pathian chu Mosia hnêna a awm ṭhîn ang khân i hnênah hian awm ve phawt mai rawh se. 18 Tu pawh i thupêk chunga hela, thu i pêk apiang zâwm duh lo chu tihhlum tûr an ni ang. Chak tak leh huai takin awm phawt mai rawh,” tiin Josua chu an chhâng a.
Josuan Jeriko khua enthla tûr mi a tîr
1 Tin, Nuna fapa Josua chuan, “A ram leh Jeriko khuate chu va en vêl teh u,” tiin mi pahnih, Sitim hmun aṭangin a rûk tein enthlatu atân a tîr a. Tin, an va kal a, nawhchizuar pakhat, a hming Rahabi inah an va lût a, chutah chuan an thleng ta a. 2 Tin, miin, “Ngai teh, zâninah hian ram en thlîthlai tûrin Israela thlahte an lo kal e,” tiin Jeriko khaw lal chu an hrilh a. 3 Tin, Jeriko khaw lal chuan, “I ina lo thleng mikhualte kha han hruai rawh, ram pum pui en thlîthlai tûra lo kal an ni e,” tia hrilh tûrin Rahabi hnênah mi a tîr a. 4 Tichuan, hmeichhia chuan mi pahnihte chu a hruai a, a thukru a; tin, an hnênah, “Ni, mite chu ka hnênah chuan an lo kal ngei mai a; nimahsela, khawi aṭanga lo kal nge an nih zawng ka hre lo. 5 Tin, heti hi a ni a, khaw thim, kulh kawngka khâr hun dâwn lai vêl khân chu mite chu an chhuak leh ta a. Khawi lamah nge an kal tâk pawh ka hre lo; ûm thuai ula, in la ûmpha ang e,” a ti a. 6 Nimahsela, in chungah a hruai chho va, in chungah a ziza kûng tian khâwm zîngah a thukru a ni a. 7 Tin, mite chuan Jordan lui lamah, kai thlengin an ûm ta a; tin, a ûmtute chu an chhuah veleh kulh kawngka chu an khâr ta a. 8 Tin, an mut hmain in chungah an hnênah chuan a han kal a, 9 chu mite hnênah chuan, “He ram hi LALPAN a pe tawh che u a. 10 Aigupta ram ata in lo chhuah khân LALPAN Tuifinriat Sen kha a tihkangsak che u a, Jordan lui râla Amor-ho lal pahnih, Sihona leh Oga-te in tihboral tâk hlauh dân te kan lo hria a. 11 Chu chu kan lo hriat veleh kan hlau va; mi tinin an hlau che u a, an zâm zo ta, nangmahni avang hian zâm lo rêng an awm lo, LALPA in Pathian chu chung lam vânah leh hnuai lam leiah Pathian a ni si a. 12 Chutichuan, hei in chungah hian ka khawngaihzia che u ka lo lantîr ta a ni a, nangni pawhin ka pa chhûngte chungah in khawngaihna chu rawn lantîr ve ula, 13 ka nu leh ka pa te, ka nuṭate, ka laizâwnte leh an neih apiangte chu zuah ula, thihna lak ata kan nunna hi min chhanhimsak tûrin, LALPA hming chhâlin khawngaih takin ka hnênah chhia chham ula, chhinchhiahna takmeuh mi siamsak rawh u khai,” a ti a. 14 Tin, mite chuan a hnênah, “Kan thiltih hi i sawi chhuah dâwn loh chuan in thih ai kan thi ang; tichuan, heti hi a ni ang a, LALPAN ram hi min pêk hunah kan khawngaih chein, i chungah rinawm takin kan ti ang e,” an ti a. 15 Chutichuan, tukverhah hruizênin a thlâk thla ta a, a in chu khawpui kulh tlânga awm a ni si a; kulh chungah chuan a awm a ni. 16 Tin, an hnênah chuan, “Tlâng lam panin kal tawh u khai; chuti lo chuan, a ûmtute che u khân an hmu hlauh dah ang che u. Chutah chuan ni thum va biru ang che u, a rawn ûmtu che u an kîr leh hma loh chuan. Chumi zawhah erawh chuan in kal leh dâwn nia,” a ti a. 17 Tin, mite chuan a hnênah, “I chhe min chhamtîr ngawt hi zawngin thiam loh min chantîr dâwn mai hauh lo a nia. 18 Ngai teh, he rama kan lo luh hian he la sen hi i mi thlâkna tukverhah hian lo ṭâwn bet ang che; tin, in chhûngah i hnênah i pa te, i nu te, i nuṭate leh i pa chhûngte zawng zawng chu hruai lût vek ang che. 19 Tin, heti hi a ni ang a, tu pawh i in kawngka aṭanga khawlaia chhuak apiang chu ama lu chungah a thisen chu a awm ang a, keini zawng thiam loh changin kan awm lo vang. Tin, tu pawh in chhûnga i hnêna awm apiangte chu an chunga kut an thlâk chuan, kan lu chungah thisen chu a awm ang. 20 Amaherawhchu, kan thiltih hi i sawi chhuah chuan chhia min chhamtîrnaah hian thiam loh changin kan awm lo vang,” an ti a. 21 Ani chuan, “In thu ang zêl chuan ni ang hmiang,” a ti a. Tichuan, anni chu a kaltîr ta a, an kal ta a. Tin, tukverhah chuan la sen chu a ṭâwn bet a. 22 Tichuan, an kal ta a, tlâng chu an va thleng a, chutah chuan ni thum, a ûmtute chu an kîr leh hma loh chu an va awm a. A ûmtute chuan kawng tluanin an zawng a; nimahsela, an hmu zo lo va. 23 Chutichuan, mi pahnihte chu an kîr leh a, tlâng ata chu an chhuk a, an kân a, Nuna fapa Josua hnên chu an va thleng a; an chunga thil thleng zawng zawng chu an hrilh a. 24 Tin, Josua hnênah chuan, “LALPAN a ram pum pui chu kan kutah a lo pe takmeuh mai; chu chang a ni lo va, chumi rama chêng zawng zawng chu kan hmaah an tui zêl mai a ni,” an ti a.
Israel-ten Jordan lui an kân
1 Tin, Josua chu zîng takah a tho va, Israela thlahte zawng zawng nên chuan Sitim hmun ata chu an insuan a, Jordan lui an va thleng a, an kai hmain chutah chuan an riak a. 2 Tin, heti hi a ni a, ni thum chinah hotute chuan riahhmun chu an va fang vêl a, 3 “LALPA in Pathian thuthlung bâwm leh puithiamho Levi chiten an zâwn lai in hmuh hunah chuan, in awmna hmun ata hi insuan ula, zui ang che u. 4 Amaherawhchu, nangmahni nêna a inkâr chu teha tawng sânghnih emaw a ni tûr a ni. Hnaih suh ang che u; tichuan, in kalna tûr kawng chu in hre thei dâwn nia; tûn hmain hemi kawng hi zawng in la zawh ngai si lo va,” tiin mipuite chu thu a pe a. 5 Tichuan, Josuan mipuite hnênah, “Intithianghlim rawh u, naktûkah LALPAN in zîngah thil mak takte a ti dâwn e,” a ti a. 6 Tin, Josuan puithiamte hnênah chuan, “Thuthlung bâwm hi zâwn ula, mipuite hmaah kai ang che u,” tiin a sawi a. Chutichuan, thuthlung bâwm chu an zâwn a, mipuite hma chu an hruai ta a. 7 Tin, LALPAN Josua hnênah, “Mosia hnêna ka awm ang khân i hnênah pawh ka awm dâwn e tih an hriat theih nân, vawiinah hian Israel-ho zawng zawng mit hmuhah ka chawimawi ṭan dâwn a che. 8 Tin, thuthlung bâwm zâwntu puithiamhote chu, ‘Jordan lui in thlen chuan tui chu dai ula, vaukam bulah ding reng rawh u,’ tiin thu pe ang che,” a ti a. 9 Tin, Josuan Israela thlahte hnênah chuan, “Lo kal ula, LALPA in Pathian thu hi rawn ngaithla teh u khai,” a ti a. 10 Tin, Josua chuan, “Hemiah hian Pathian nung chu in zîngah a awm a, in hmaah hian Kanaan-hote, Hit-hote, Hiv-hote, Periz-hote, Girgas-hote, Amor-hote, Jebus-hote hi a hnawt chhuak ngei ngei dâwn a ni tih in hria ang. 11 Ngai teh u, leilung pum pui LALPA thuthlung bâwm chuan in hmaah Jordan lui a kân e. 12 Chutichuan, Israel hnamte zînga mi hi sâwm leh pahnih, hnam tin aiawh mi pakhat zêl thlang chhuak ang che u. 13 Tin, heti hi a ni ang a, LALPA, leilung pum pui LALPA bâwm zâwntu puithiamte kephah chu Jordan tuia a innghah veleh chuan, Jordan tui, chhak lam aṭanga tui lo luangte chu a chat hlauh ang a; tichuan, a lo inhlâwm ding luah mai ang,” a ti a. 14 Tin, heti hi a ni a, mipuite chu Jordan lui kai tûra an puan in ata an chhuah chuan, thuthlung bâwm zâwntu puithiamhote chu mipuite hmaah chuan an kal a; 15 bâwm zâwntute chu Jordan lui an va thlena, bâwm zâwntu puithiamte ke chuan vaukam tui a han rah veleh (buh seng chhûng zawng hi chuan Jordan lui hi a kuang zawng zawngah a liam reng ṭhîn a), 16 chhak lam aṭanga tui lo luang thla lai chu a ding ta a, hla feah Zarethan ram bula Adam khuaah chuan a inhlâwm ding ta luah a. Tin, Araba tuifinriat, Tuifinriat Al lama luang chhuk lai chu a chat ta hlauh va; tichuan, mipuite chu Jeriko khaw zâwn takah chuan an kai ta a. 17 Tin, LALPA thuthlung bâwm zâwntu puithiamte chu Jordan lui laiah, lei chârah an ding reng mai a; tin, mipuiho zawng zawng chuan Jordan lui an kai fai vek thlengin, Israel-ho zawng zawng chu lei chârah an kal kai ta vek a.
Hriat rengna lung an phun
1 Tin, heti hi a ni a, a hnam pum pui chuan Jordan lui an kai fai vek hnuin LALPAN Josua hnênah chuan, 2 “Mipuite zînga mi hi mi sâwm leh pahnih, hnam tina mi pakhat zêl thlang chhuak langin, 3 an hnênah, ‘Jordan lui lai, puithiamhote dinna lai taka mi saw lung sâwm leh pahnih la ula, pu phei ula, riahhmun, zânina in riahna tûrah dah ang che u,’ tiin thu pe ang che,” tiin a sawi a. 4 Chutichuan, Josua chuan Israela thlahte zînga mi sâwm leh pahnih, hnam tina mi a thlan chhuahte chu a ko va; 5 tin, Josua chuan an hnênah, “LALPA in Pathian bâwm hmaah khân Jordan lui laiah kai ula, Israela thlahte a hnam zât zêlin, mi tinin lung pakhat ṭheuh pu ang che u. 6 Tichuan, hêng hi in zîngah chhinchhiahna a la ni dâwn nia, nakinah in faten, ‘Hêng lungte hi eng in tihna nge ni le?’ tia an la rawn zawh hunah chuan, 7 nangnin an hnênah, ‘LALPA thuthlung bâwm hmaah Jordan tuite a lo chah tâk vâng a ni; Jordan a kân laiin, Jordan tuite chu a lo chat ta a ni. Tichuan, hêng lungte hi Israela thlahten kumkhuaa an hriat rengna tûr a nih hi,’ in la ti dâwn nia,” a ti a. 8 Tin, Israela thlahte chuan Josuan thu a pêk ang chuan an ti a, Israela thlahte a hnam zât zêlin, Jordan lui laia mi lung sâwm leh pahnih an la a; tin, an riahna hmunah an pu phei a, chutah chuan an dah a. 9 Tin, thuthlung bâwm zâwntu puithiamho dinna lai tak, Jordan lui laiah chuan Josuan lung sâwm leh pahnih a phun a; chûng chu tûn thlengin a la awm reng a ni. 10 Mosian Josua thu a lo pêk tâk zawng zawng anga LALPAN mipuite hnêna ti tûra Josua thu a pêk chu an tih zawh vek hma loh chuan, bâwm zâwntu puithiamte chu Jordan lui laiah chuan an ding reng mai a; tichuan, mipuite chu an intihmanhmawh a, an kai ta a. 11 Tin, heti hi a ni a, mipui zawng zawng chu an kai fai vek hnu chuan, LALPA bâwm leh puithiamte chu mipuite mit hmuhah chuan an kai ve ta a. 12 Tin, Reubena thlahte, Gada thlahte leh, Manase hnam zâtvete chu, Mosian an hnêna a lo sawi tawh ang khân, Israela thlahte hmaah chuan inrâlthuamin an kai a. 13 Râlthuama inthuam diam mi sîngli lai indo tûrin Jeriko phaiahte chuan LALPA hmaah an kai a ni. 14 Chumi ni chuan LALPAN Josua chu Israel-ho zawng zawng mit hmuhah a chawimawi a; Mosia an ṭih ang bawk khân a dam chhûng zawng chuan an ṭih ta a. 15-16 Tin, LALPAN Josua hnênah chuan, “Puithiamho, thuhriattîrna bâwm zâwntute kha Jordan lui ata lo chhuah thu pe rawh,” tiin a sawi a. 17 Chutichuan, Josuan puithiamhote chu, “Jordan lui ata kha lo chhuak tawh rawh u,” tiin thu a pe a. 18 Tin, heti hi a ni a, puithiamho, LALPA thuthlung bâwm zâwntute chu Jordan lui lai ata an lo chhuaha, puithiam kete chuan khawmual a rah veleh, Jordan tuite chu a luan pângngaiin a lo luang leh a, a hma ang bawk khân a kuang zawng zawngah chuan a luang liam leh ta dûl dûl a. 19 Tin, mipuite chu thla khatna, ni sâwm niah Jordan lui ata chu an chhuak a, Jeriko chhak lampang, Gilgal-ah awmhmun an khuar ta a. 20 Tin, chûng lung sâwm leh pahnih, Jordan lui ata an put chhuah chu Josuan Gilgal-ah chuan a phun a. 21 Tin, Israela thlahte hnênah chuan, “Nakin hnua in thlahten an pate, ‘Hêng lungte hi eng tihna nge ni le?’ tia an la rawn zawh hunah chuan, 22 ‘Israel-hote chuan Jordan lui hi lei chârah an kal kai a ni,’ tiin in thlahte chu in la hriattîr dâwn zuk nia. 23 LALPA in Pathianin hmânah Tuifinriat Sen chu kan kai hma lohva kan hmaa a lo tikang chat ta ang khân, LALPA in Pathianin Jordan tuite hi in kai hma loh chuan in hmaah a tikang chat ta a nih hi; 24 leilunga hnam tinrêngin LALPA kut hi a lo chak a ni tih an hriat theiha, LALPA in Pathian chu kumkhuaa an ṭih theih nân,” tiin a sawi a.
1 Tin, heti hi a ni a, Jordan lui piah thlang lama awm Amor-ho lal zawng zawng leh, tuifinriat kama awm Kanaan ram lal zawng zawng chuan, an kai hma loh chuan LALPAN Jordan tuite chu Israela thlahte hmaah chuan a tikang chat tih an lo hriatin, Israela thlahte avâng chuan an thinlungte chu a lo tui zo va, zâm lo rêng rêng an awm hek lo.
Gilgal hmuna serh tan thu
2 Chutih lai chuan LALPAN Josua hnênah, “Meilung chemtê siam langin, Israela thlahte hi an serh tan a ṭum hnihna tansak leh rawh,” a ti a. 3 Tin, Josuan meilung chemtête chu a siam a, Israela thlahte chu vun hmâwr tlângah an serh a tansak a. 4 Josuan an serh a tan chhan chu hei hi a ni: Aigupta ram ata chhuakho zawng zawng, mipa râl kâp mi zawng zawngte kha Aigupta ram ata an chhuah hnu khân, kawnglakah thlalêrah an thi zo ta a ni. 5 Aigupta ram ata chhuakho zawng zawng kha chu serh tan sa vek an ni a; amaherawhchu, Aigupta ram ata an chhuaha thlalêra kawnglaka piang zawng zawng kha chu serh tan an ni ve lo. 6 LALPA aw an ngaihthlâk duh loh avânga mipuiho zawng zawng, Aigupta ram ata lo chhuak, râl kâp mite chena, tihborala an awm vek thlengin, Israela thlahte chu thlalêrah kum sawmli zet an vâk an vâk a; LALPAN chhechhama a lo tiam tawh ang ngeiin, an thlahtute hnêna a lo tiam tawh hnutetui leh khawizua luang ram chu an hmuh ve a phal ta lo a ni. 7 Tichuan, an thlahte, anmahni aia a dinate chu Josuan an serh a tansak a, kawnglakah khân an serh tan a nih loh avângin serh tan loh an la ni reng si a. 8 Tin, heti hi a ni a, mipuiho zawng zawng serh an tan zawh chuan, an dam hma loh zawng an riahhmun, mahni awmna ṭheuhvah chuan an awm a. 9 Tin, LALPAN Josua hnênah, “Vawiinah hian Aigupta-ho hmuhsitna che u hi nangmahni ata chu ka lum bo ta e,” a ti a. Chutichuan, chumi hmun chu tûn thlengin Gilgal an lo ti ta a ni. 10 Tin, Israela thlahte chuan Gilgal-ah awmhmun an khuar a; tin, Jeriko phaiahte chuan chumi thla ni sâwm leh ni li ni tlaiah chuan kalhlên kûtin an kût a. 11 Tin, kalhlên kût zawh tûk ni la la chuan chumi rama buh, chhang dawidim telh loh leh chhangpêr kan an ei a. 12 Tin, chumi rama buh an ei tûk aṭang chuan manna kha a tla ta lo va; Israela thlahte chuan manna chu an dawng leh ta ngai bawk hek lo; chumi kum chuan Kanaan rama buh leh bâl chu an ei ta zâwk a ni.
Josua leh khandaih keng mi pakhat
13 Tin, heti hi a ni a, Josua chu Jeriko khaw bula a awm lai chuan a dâk a, a han en a; tin, ngai teh, a hma zâwn lawkah chuan mi pakhat, a khandaih phawi sa kengin a lo ding reng a. Tin, Josua chuan a han pan a, a hnênah chuan, “Kan lama ṭang nge i nih kan hmêlmate lama ṭang?” a ti a. 14 Tin, ani chuan, “Ni lo ve, LALPA sipaihote hotua lo kal ka ni zâwk e,” a ti a. Tichuan, Josua chu leiah a bawkkhup a, chibai a bûk a, a hnênah, “Ka LALPAN a chhiahhlawh hnênah hian eng nge sawi tûr a neih le?” a ti a. 15 Tin, LALPA sipaihote hotu chuan Josua hnênah, “I kephah ata i pheikhawk kha phelh rawh; i dinna hmun kha a thianghlim a ni e,” a ti a. Tichuan, Josua chuan a phelh ta a.
Jeriko hneh thu
1 (Jeriko khua chu Israel-te an luh theih loh nân an khâr tlat a; tu mah an chhuak lo va, tu mah an lût hek lo.) 2 Tin, LALPAN Josua hnênah, “En teh, Jeriko leh an lal leh mi chak huaisente hi i kutah ka pe tawh e. 3 Tin, râl kâp mi zawng zawng hian khawpui hi vêlin vawi khat chu in han vêl chhuak phawt ang a. Chutiang chuan ni ruk in ti tûr a ni. 4 Tin, puithiam pasarihin bâwm hma lamah berâmpa ki tawtawrâwt pasarih an keng ang a; tin, a ni sarih ni chuan khawpui chu vawi sarih in vêl chhuak ang a; tin, puithiamten tawtawrâwtte chu an hâm ang. 5 Tin, heti hi a ni ang a, berâmpa ki an ham rîk ruai ruai huna tawtawrâwt ri in hriat chuan, mipui zawng zawng chu ring takin au dur dur rawh se; tichuan, khawpui kulh chu a chim rup ang a, mipui chu mahni hma zâwn ṭheuhvah chuan an chho vang,” a ti a. 6 Tin, Nuna fapa Josua chuan puithiamhote chu a ko va, an hnênah, “Thuthlung bâwm hi zâwn ula, puithiam pasarihin LALPA bâwm hma lamah chuan berâmpa ki tawtawrâwt pasarih keng rawh se,” a ti a. 7 Tin, ani chuan mipuihote hnênah chuan, “Kal zêl ula, khawpui chu vêl chhuak rawh u; tin, inrâlthuamho kha LALPA bâwm hma lamah chuan kal zêl rawh se,” a ti a. 8 Tin, chutiang chu a lo ni ta a, Josuan mipuihote hnêna thu a sawi zawh chuan LALPA hmaa berâmpa ki tawtawrâwt pasarih keng puithiam pasarihte chu an kal zêl a, tawtawrâwt chu an hâm a; tin, LALPA thuthlung bâwm chuan a zui a. 9 Tin, inrâlthuamho chu tawtawrâwt hâm puithiamte hmaah chuan an kal a; tin, hnudâltute chuan bâwm chu an chhawm a, puithiamho chuan kal pahin tawtawrâwt an hâm zêl a. 10 Tin, Josuan mipuite chu, “Au suh ula, in aw pawh hriat ni suh sela, au tûra thu ka pêk ni che u a thlen hma loh chuan in kâ aṭangin thu rêng rêng chhuak hek suh se. Chumi hunah chuan au vang che u,” tiin thu a pe a. 11 Chutichuan, LALPA bâwm chu khawpui vawi khat vêlin a han vêl chhuahtîr a; tin, riahhmunah chuan an kal a, riahhmunah chuan an riak leh ta a. 12 Tin, Josua chu zîng takah a tho va, puithiamte chuan LALPA bâwm chu an zâwn a. 13 Tin, LALPA bâwm hmaa berâmpa ki tawtawrâwt pasarih keng puithiam pasarihte kha an kal zêl a, tawtawrâwt an hâm a. Tin, inrâlthuamte chu an hmaah an kal a; tin, hnudâltute chuan LALPA bâwm an chhawm a, puithiamte chuan an kal pahin tawtawrâwt an hâm zêl a. 14 Tin, a ni hnih ni chuan khawpui chu vawi khat an han vêl chhuak leh a, riahhmunah chuan an kîr leh a. Chutiang chuan ni ruk an ti a. 15 Tin, heti hi a ni a, a ni sarih ni chuan zîng tak, vârṭianah an tho va, an tih dân pângngaiin vawi sarih an vêl chhuak a. Chumi ni chauh chuan khawpui chu vawi sarih an vêl chhuak a. 16 Tin, heti hi a ni a, a vawi sarihnaa puithiamhoten tawtawrâwt an han ham chuan Josuan mipuiho hnênah, “Au rawh u khai, LALPAN khawpui hi a pe tawh che u asin. 17 Khawpui hi a chhûnga thil awm zawng zawng chawp hian LALPA tâna hluihlâwn vek tûr a ni. Rahabi, nawhchizuar chauh, amah leh in chhûnga a hnêna awm zawng zawng erawh chu, kan mi tirhte kha a lo thuhrûk avângin zuah tûr a ni. 18 Nangni chu, chu thil hluihlâwn lakah chuan inthiarfihlîm hlauh rawh u; chuti lo chuan, in hluihlâwn tawh hnu chuan thil hluihlâwn chu in la dah ang e. Israel-ho riahhmun hi thil hluihlâwnah in siam mai ang a, manganna in thlen dah ang e. 19 Tangkarua te, rangkachak te, dâr leh thîr bungbêlte erawh chu LALPA pual a ni vek a; LALPA sum ina dah tûr a ni ang,” a ti a. 20 Chutichuan, mipuite chu an au va, puithiamten tawtawrâwt an hâm a. Tin, heti hi a ni a, mipuiten tawtawrâwt ri an han hriat veleh chuan mipuiho chu an au ta dur dur a, kulh chu a chim ta rup a; tichuan, mipuite chu mahni hma zâwn ṭheuhvah chuan an chho va, khawpuiah chuan an lût a, khawpui chu an la ta a. 21 Tin, khawpui chhûnga mi zawng zawng, a hmei a pa, a pui a pangin, bâwngpa te, berâm te, sabengtungte nên khandaihin an tihlum fai vek a. 22 Tin, Josuan mi pahnih, ram va enthlatute hnênah khân, “Nawhchizuar inah sâwn va lût ula, a hnêna chhia in lo chham tawh ang khân chu hmeichhia chu a neih zawng zawng nên va hruai chhuak rawh u,” a ti a. 23 Tin, enthlatu tlangvâlte chu an va lût a, Rahabi nên, a nu nên, a nuṭate nên, a neih zawng zawng nên chuan an va hruai chhuak a, a laichîn unaute zawng zawng pawh an va hruai chhuak a; Israel-ho riahhmun pâwn lamah an awmtîr ta a. 24 Tin, khawpui chu a chhûnga thil awm zawng zawng nên meiin an hâl vek a. Tangkarua te, rangkachak te, dâr leh thîr bungbêlte chauh chu LALPA sum inah an dah a. 25 Amaherawhchu, Rahabi, nawhchizuar leh a neih zawng zawng leh a pa chhûngte chu Josuan a zuah vek a. Tichuan, Israel-hote zîngah chuan tûn thlengin a la tel ta reng a ni; Josuan Jeriko khua enthla tûra a mi tirhte kha a lo thuhrûk avângin. 26 Tin, chumi lai chuan Josuan, “He Jeriko khawpui hi rawn din apiang chu LALPA hmaah ânchhe dawngin awm rawh se; a fa tîr chânin a lungphûm chu a phûm ang a, a fa tlum ber chânin a kulh kawngkâte chu a din ang,” tiin anni chu a vau va. 27 Chutichuan, LALPA chu Josua hnênah a awm a; tin, a ram pum puiah chuan a hming a lo thang ta a.
Akana sualna
1 Amaherawhchu, Israela thlahte chuan thil hluihlâwnah chuan thil an lo tisual ta a, Juda hnama mi Zera fa Zabdia, chu mi fapa Karmia, chu mi fapa Akana chuan thil hluihlâwn a lo la a; tichuan, Israela thlahte chungah chuan LALPA thin a lo rim ta a. 2 Tin, Josuan Jeriko khua aṭangin Bethel chhak lam Beth-aven dep Ai khuaah chuan mi a tîr a, an hnênah, “Han kal ta ula, ram han enthla teh u,” tiin a sawi a. Tin, mite chu an han kal a, Ai khua chu an han enthla a. 3 Tin, Josua hnênah an kîr leh a, a hnênah, “Mi zawng zawng chu han kal kher suh se; mi sânghnih emaw, sângthum emaw vêl han kal sela, Ai khua bei rawh se. Mi zawng zawng han tihhah kher tûr a ni lo ve, tlêm te chauh an ni si a,” an ti a. 4 Chutichuan, mipui zînga mi, mi sângthum emaw chutah chuan an han kal a; tin, Ai-ho hmaah chuan an tlânchhe ta a. 5 Tin, Ai-hote chuan mi sawmthum leh paruk emaw lai an lo that a, kulh kawngka bul aṭangin Sebarim thleng hialin an rawn ûm a, an liam thlâknaah chuan an that hlawm a; tin, mite thinlung chu a tui zo va, tui ang mai an lo ni ta a. 6 Tin, Josua chuan a puante a pawt thlêr a, LALPA bâwm hmaah amah leh Israel-ho upate chu an hmaia lei siin tlai thlengin an bawkkhup a; tin, an luah vaivut an phul a. 7 Tin, Josua chuan, “E khai aw, eng atân nge aw LALPA PATHIAN, keini mipuiho hi tihboral tûra Amor-ho kuta pêk atân Jordan lui hi min hruai kai tehlul ni? Jordan lui râlah khân lungawi taka awm hle hle tâk zâwk tûr aw! 8 Aw LALPA, hetia hmêlmate ûma Israel-ho an tlânchhe ta mai hi engtin nge ka tih tâk ang le? 9 Kanaan-hote leh hênglai rama chêng zawng zawng hian an hria ang a, min rawn hual ang a, lei ata hi kan hming an tiboral daih dâwn a nih hi. I hming ropui tak hi engtin nge i tih tâk ang le?” a ti a. 10 Tin, LALPA chuan Josua hnênah, “Tho rawh, engati nge khatia i bawhkhuh reng ni? 11 Israel-ho hian thil an tisual a ni e; a ni, ka thuthlung pawm tûra thu ka pêk kha an bawhchhia a nih hi; a ni, thil hluihlâwna mi pawh kha an la bawk a ni; an ru bawk a, an zêp ru bawk a, an bungraw zîngah ngei an thukru a ni. 12 Chu vâng chuan alâwm, Israela thlahten an hmêlmate an ngam theih loh, hluihlâwn thil an lo nih tâk avângin alâwm hmêlmate ûma an tlânchhiat ni; thil hluihlâwn chu in zîng ata in tihboral phawt loh zawngin in hnênah hian ka awm dâwn tawh lo a ni. 13 Tho la, mipuiho hi tithianghlim phawt mai rawh; tin, an hnênah, ‘Naktûk atân intithianghlim rawh u khai; LALPA, Israel-te Pathianin, “Aw Israel-te u, in zîngah hian hluihlâwn thil a awm a ni e; in zîng ata hluihlâwn thil hi in lâk bo hma loh zawng in hmêlmate in hneh thei lo vang. 14 Chutichuan, zîngah a chi chia rawn inlantîr tûr in ni. Tin, heti hi a ni ang a, LALPAN chu mi chi a lo mana chu a hnam hnamin in rawn inlan leh tûr a ni; tin, LALPAN chu mi hnam a lo mana chu a chhûng chhûngin in rawn inlan leh tûr a ni; tin, LALPAN chu mi chhûng a lo mana chu a mal malin in rawn inlan leh tûr a ni. 15 Tin, heti hi a ni ang a, tu pawh hluihlâwn thil lo la apiang chu amah leh a neih zawng zawng meiin hâl vek tûr a ni ang; LALPA thuthlung a bawhchhiat avâng leh, Israel-hote zînga thil sual âtthlâk tak a tih avângin,” a ti a ni,’ ti ang che,” a ti a. 16 Chutichuan, Josua chu zîng takah a tho va, Israel-hote chu a chi chiin a rawn inlantîr a; tin, Juda chite chu man an lo ni ta a. 17 Tin, Juda hnamte chu a rawn inlantîr leh a, Zer hnamte chu a lo man a; tin, Zer-ho chhûngte chu a mal malin a rawn inlantîr leh a, Zabdia chu man a lo ni a. 18 Tin, a chhûngteho chu a mal malin a rawn inlantîr leh a; tichuan, Juda chia mi Zera fapa Zabdia, chu mi fapa Karmia, chu mi fapa Akana chu man a lo ni ta a. 19 Tin, Josuan Akana hnênah chuan, “Ka fapa, LALPA, Israel-te Pathian chu fak rawh aw, a hnênah chuan inpuang rawh khai, i thiltih chu mi han hrilh teh; ka lakah chuan zêp suh khai,” a ti a. 20 Tin, Akana chuan Josua chu a chhâng a, a hnênah, “LALPA, Israel-te Pathian chungah chuan thil ka lo tisual ta ngei mai, hetiang hian a ni ka lo tih tâk ni: 21 râllâk zînga mi Babulon ram puan ṭha tak leh, tangkarua sekel zahnih leh rangkachak tlang sekel sawmnga bûk ka hmu a, ka awt ta êm a, ka la ta mai a ni. Tin, ngai teh, ka puan in chhûngah leiah thuhrûk a ni a, tangkarua chu chumi hnuaiah chuan a awm,” a ti a. 22 Chutichuan, Josua chuan mite a tîr a, puan in chhûngah chuan an va tlân a; tin, ngai teh, a puan inah chuan thuhrûk a lo ni ngei a, a hnuaiah chuan tangkarua chu a awm. 23 Tichuan, puan in chhûng ata chu an la a, Josua leh Israela thlahteho zawng zawng hnênah chuan an rawn la a; tin, anni chuan LALPA hmaah an dah a. 24 Tin, Josua leh Israel-ho zawng zawng chuan Zera fapa Akana chu tangkarua te, puan te, rangkachak tlang te, a fapa te, a fanu te, a bâwngpa te, a sabengtung te, a berâm te, a puan in te leh a neih zawng zawng nên chuan an hruai a, Akor ruamah an chhohpui a. 25 Tin, Josuan, “Engati nge min tihmangan le? LALPAN vawiinah hian nang pawh a timangang ve dâwn che a nih hi,” a ti a. Tichuan, Israel-ho zawng zawng chuan ani chu lungin an dêng a; tin, anni chu meiin an hâl a, lungin an dêng a. 26 Tin, a chungah chuan lung an tiang vûm thûr a, tûn thleng hian a la awm; tin, LALPAN a thinrimna nasa tak chu a lamlêt ta a. Chutichuan, chumi hmun hmingah chuan tûn thleng hian Akor ruam an la ti reng a.
Ai khua tihchhiat thu
1 Tin, LALPAN Josua hnênah, “Hlau suh la, zâm hek suh; râl kâp mi zawng zawng i hnênah hruai langin, tho la, Ai khuaah han kal rawh. Ngai teh, Ai khaw lal leh, a mite leh a khua leh a ram chu i kutah ka pe tawh e. 2 Jeriko leh an lal chunga i tih ang khân Ai khua leh an lal chungah pawh i ti dâwn nia. Râllâk leh rante chauh chu nangmahni pualah nei ang che u. Khawpui châng ru tûr a hnung lamah dah ang che,” a ti a. 3 Chutichuan, Josua leh râl kâp mi zawng zawng chu Ai khaw lama han kal tûr chuan an thawk ta a; tin, Josuan mi chak huaisen sîngthum a thlang chhuak a, zânah a kaltîr a. 4 An hnênah, “Ngai teh u, khawpui hnung lamah khawpui bei tûrin châng ru ang che u. Khawpui aṭanga hla takah chuan kal suh ula, inpeih rengin awm ngawt mai rawh u. 5 Tin, kei leh ka hnêna awmho zawng zawng chuan khawpui chu kan rawn hnaih ang a; tin, heti hi a ni ang a, a hma ang bawka min rawn bei tûra an lo chhuah veleh, an hmaah kan tlânchhia ang a. 6 Tichuan, min ûm tûrin an lo chhuak ang a, khua ata thui fe kan thlêm chhuah thlengin; anni chuan, ‘A hma ang bawk khân kan hmaah an tlânchhe leh ta le,’ an ti dâwn nia; tichuan, an hmaah kan tlânchhia ang. 7 Tichuan, chân rûkna ata in lo chhuak ang a, khawpui chu in la dâwn nia, LALPA in Pathianin in kutah a pe dâwn e. 8 Tin, heti hi a ni ang a, khawpui chu in lâk veleh khawpui chu hâl ang che u. LALPA thu ang zêlin in ti tûr a ni. Ngai teh u, thu ka pêk tawh che u hi,” tiin thu a pe a. 9 Tin, Josua chuan a kaltîr ta a; tichuan, chân rûkna hmunah chuan an kal a, Ai khaw thlang lamah, Bethel leh Ai khaw inkârah chuan an awm a; Josua erawh chu chumi zân chuan mipuite zîngah a riak a. 10 Tin, Josua chu zîng takah a tho va, mipuite chu a kai khâwm a; tin, amah leh Israel-ho upate chu mipuiho hmaah chuan Ai khaw lamah an han kal ta a. 11 Tin, mipuiho zawng zawng, a hnêna râl kâp mi awmte chu an han kal a, an han hnaih a, khawpui bulah chuan an han kal a, Ai khaw hmâr lampangah an han riak a. Ai khua nêna an inkârah chuan ruam a awm. 12 Tin, mi sângnga lai a hruai a, khawpui thlang lampang, Bethel leh Ai khaw inkârah chuan a chân rûktîr a. 13 Chutichuan, mipui, khawpui hmâr lampanga sipaihote ṭanhmun leh khawpui thlang lampanga a chângrutute ṭanhmun chu an han ruat fel a; tin, Josua chu chumi zân chuan ruam lai takah a kal a. 14 Tin, heti hi a ni a, Ai khaw lalin chu chu a lo hmuh veleh hmanhmawh takin zîng takah a tho va, chumi khuaa mite chu amah leh a hote zawng zawng nên, a hmun ruat Araba zâwnah chuan Israel-hote chu bei tûrin an chhuak ta a; nimahsela, khaw hnung lamah chuan amah bei tûrin an châng ru tih a hre lo va. 15 Tin, Josua leh Israel-ho zawng zawng chu dawl ta ni âwm takin an awm a, thlalêr lam kawngah an tlân chiam a. 16 Tin, khawpuia awm zawng zawng chu anmahni ûm tûrin an inko khâwm a. Tichuan, Josua chu an ûm a, khawpui ata chu thui fe thlêm chhuahin an awm ta a. 17 Tin, Ai khuaah leh Bethel khuaah chuan Israel-hote ûm lo chu pakhat mah an awm ta lo va. Khawpui chu khâr lohvin an chhuahsan ta mai a, Israel-hote chu an ûm ta a. 18 Tin, LALPAN Josua hnênah, “I fei ken kha Ai khaw lam hawiin lek rawh; i kutah ka pe dâwn a nia,” a ti a. Tichuan, Josua chuan a fei ken chu khawpui lam hawiin a han lek ta a. 19 Tin, châng rutute kha an awmna ata chu an lo chhuak thuai a; a kut a han phar veleh an tlân a, khawpuiah chuan an lût a, an la ta a; tin, khua chu an hâl ta thuai a. 20 Tin, Ai-hote chuan an hnung lam chu an han thlîr chuan, ngai teh, khawpui chu vân lama khu chho ngut ngutin an hmu ta a, khawii lam mah maha tlân theihna rêng rêng an nei ta lo mai a; tichuan, thlalêra tlânte khân a ûmtute chu an rawn do lêt ta thung a. 21 Tin, Josua leh Israel-ho zawng zawng chu, châng rututen khawpui an lâka, khawpui khu chu a chho ngut ngut an han hmuh chuan an lêt leh a, Ai-hote chu an that ta a. 22 Tin, mi dangte chu a bei tûrin khaw chhûng ata an lo chhuak a; chutichuan, Israel-hote chuan an kârcheh ta a, a ṭhen a lehlamah an awm a, a ṭhen a lehlamah. Tichuan, an that a, pakhat mah zuah leh chhuah rêng rêng an nei lo va. 23 Tin, Ai khaw lal chu a nungin an man a, Josua hnênah an hruai a. 24 Tin, heti hi a ni a, Israel-hote chuan Ai khuaa mi, phûla awm zawng zawng chu thlalêr rama an va ûmna hmuna an thah zawha, an zaa khandaiha an thah chimih vek hnu chuan, Israel-ho zawng zawng chu Ai khaw lamah an kîr leh a, khandaihin an han bei a. 25 Tin, chumi nia thi zawng zawng chu a hmei a pain sîngkhat leh sânghnih an ni, Ai khuaa mi zawng zawng chu. 26 Josuan a fei lekna kut chu Ai-ho zawng zawng a tihboral dêr hma loh chuan a la thla si lo va. 27 LALPAN Josua thu a pêka, tih tûr a tih ang ngei khân chu khawpuia rante leh râllâkte chauh chu Israel-hote chuan anmahni pualah an nei a. 28 Chutichuan, Josuan Ai khua chu a hâl a, kumkhua atân leipâwngah a siam a, tûn thleng hian tihṭiau a lo ni ta. 29 Tin, Ai khaw lal chu tlai thlengin thinglêrah a khai a. Tin, ni tlâk dâwnin Josuan thu a pe a; tichuan, a ruang chu thinglêr ata an la thla a, khawpui kulh kawngka luhnaah an paih a, a chungah lung an tiang vûm thûr a, tûn thlengin a la awm.
Ebal tlângah dân an chhiar chhuak
30-31 Tin, Mosia dân lehkhabua ziak tawh angin, LALPA chhiahhlawh Mosian Israela thlahte thu a lo pêk tawh ang khân, Josuan Ebal tlângah LALPA, Israel-te Pathian tân maichâm, lung chher loh, tu mahin thîra an la chher ngai hek loh maichâm a siam a. Chutah chuan LALPA tân hâlral thilhlante an hlân a, remna inthawiin an inthawi a. 32 Tin, chutah chuan Israela thlahte hma ngeiah Mosian dân a ziak kha lungahte chuan a ziak chhâwng a. 33 Tin, Israel-ho zawng zawng, an upate leh hotute, an rorêltute nên, Levi chi puithiamho, LALPA thuthlung bâwm zâwntute hmaah, bâwm lehlampangah chuan hnam dang pawh, chumi rama piang pawh an ding za vek a; a zâtve chu Gerizim tlâng pangah an awm a, a zâtve chu Ebal tlâng pangah an awm a; LALPA chhiahhlawh Mosian Israel-hote chu mal an sâwmsak phawt tûr a ni tih thu a pêk tawh ang khân. 34 Tin, chumi zawhah chuan dân thu zawng zawng, malsâwmna thu leh ânchhe dawn thu chu a chhiar a, dân lehkhabua chuang zawng zawng ang kha. 35 Mosia thupêk zawng zawng chu Israel-ho pung khâwm zawng zawng leh, hmeichhiate leh naupang tê tête leh, an zînga hnam dang chêng vete hriatah chuan Josuan chhiar loh rêng rêng a nei lo.
Gibeon miten Josua an bum
1 Tin, heti hi a ni a, Jordan râla lalho zawng zawng - tlânga mi te, phaia mi te, tuifinriat zau tak kam tluana Lebanon thlenga awm zawng zawng - Hit-hote, Amor-hote, Kanaan mite, Periz-hote, Hiv-hote, Jebus-hoten an lo hriat chuan, 2 Josua leh Israel-ho chu thu khat vuaa beih rawn tumin an pung khâwm chiam a. 3 Nimahsela, Gibeon khuaa awmte chuan Josuan Jeriko khua leh Ai khua a tih dân an lo hriat chuan, 4 fin vervêkin an che ve ta thung a, palai angin an insiam a, ip hlui tak tak an sabengtung an phurhtîr a, uain peng hlui tak, a chhe thawm tawhte nên; 5 pheikhawk hlui tak tak bel ṭup hi an bun a, puan hlui tak an inbel a; an ei tûra an rawn ken chhangte chu ro hul, hmuar un a ni a. 6 Josua hnênah Gilgal-a an riahhmunah chuan an va kal a, a hnênah leh Israel-hote hnênah chuan, “Ram hla tak aṭanga lo kal kan ni a; chutichuan, kan hnênah hian thu thlung rawh u,” an ti a. 7 Tin, Israel-hote chuan Hiv-hote hnênah chuan, “Kan zînga chêng ve hi in lo ni reng ang e; engtin nge in hnênah thu kan thlun theih ang?” an ti a. 8 Tin, anni chuan Josua hnênah, “I chhiahhlawhte kan nih hi,” an ti a. Tin, Josua chuan an hnênah, “Tute nge maw in nih le? Khawi lam aṭanga lo kal nge in nih?” a ti a. 9 Tin, anni chuan a hnênah, “LALPA i Pathian hming avângin i chhiahhlawhte hi ram hla tak aṭanga lo kal kan ni e; a hmingthanzia te, Aigupta rama a thiltih zawng zawng te, 10 Jordan lui râla Amor-ho lalte pahnih - Hesbon ram lal Sihona te, Basan ram lal Astaroth khuaa awm Oga te chunga a thiltih zawng zawngte kha kan lo hre si a. 11 Tin, kan upate leh kan rama chêngho zawng zawngten kan hnênah, ‘Kalkawng atân ei tûrte keng ula, anmahni va be rawh u; tin, an hnênah, “In chhiahhlawh kan nih hi; kan hnênah thu thlung ang che u,” ti ang che u,’ tiin an sawi a. 12 Hêng kan ei atâna kan chhangte hi in hnêna lo kal tûra kan lo chhuah niin kan in aṭanga a luma kan rawn ken a ni a; nimahsela, tûnah zawng en teh mah u, a ro hul tawh a, a hmuar un tawh hi. 13 Tin, hêng uain peng kan thunnate pawh hi a thar a ni a, en teh mah u, a pawh vek tawh hi; tin, hêng kan puante leh kan pheikhawkte pawh hi kan lo kalna a thui khawp a, a hlui vek tawh hi,” an ti a. 14 Tin, Israel-hote chuan an ei tûr han ken chu an la a; LALPA kamchâng rêng an ngai lo va. 15 Tichuan, Josua chuan anmahni nên inremna a siam a, anmahni chu zuah tûrin an hnênah thu a thlung ta a; tin, pung khâwmho mi liante pawh chuan an hnênah chhia an chham a. 16 Tin, heti hi a ni a, an hnênah thu an thlun achin ni thum hnuah chuan, an khaw ṭhenawm, anmahni zînga lo awm ve reng an ni tih an hre chhuak ta a. 17 Tin, Israela thlahte chu an kal zêl a, a ni thum niah khawpuite chu an va thleng a. An khawpuite chu Gibeon te, Kephira te, Beeroth te, Kiriath-jearim te a ni. 18 Pungkhâwmho mi liante chuan LALPA, Israel-te Pathian chhâla an hnêna chhia an lo chham tawh avângin, Israela thlahte chuan an khawih lo. Tichuan, pung khâwmho zawng zawngte chu mi lianho chungah chuan an phunnawi ta a. 19 Nimahsela, mi lianho zawng zawngte chuan pung khâwmho zawng zawngte hnênah chuan, “LALPA, Israel-te Pathian chhâlin an hnênah chhia kan lo chham tawh si a; chuvângin, anmahni chu kan dek thiang lo a ni. 20 Hetiang hian an chungah ti ila, i zuah mai ang u; chuti lo zawng, an hnênah chhia kan lo chham tawh si avângin kan chungah hian thinurna a lo thleng mai ang asin,” an ti a. 21 Tin, mi lianho vêk chuan an hnênah, “Zuahin awm rawh se,” an ti a. Chutichuan, pung khâwmho zawng zawng thing fawmtuah leh tui chawituah an lo awm ta a, mi lianhoten an hrilh ang chuan. 22 Tichuan, Josuan anmahni chu a kohtîr a, an hnênah, “Engati nge, ‘Ram hla tak aṭanga lo kal kan ni e,’ tia min bum mai le? Kan zînga chêng ve in lo ni reng mai si a. 23 Chuvângin, ânchhedawng in lo nih tâk hi. Eng lai pawhin in zînga mi ṭhenkhat hi bawih an ni reng ang a, ka Pathian in atâna thing fawmtuah leh tui chawituah an awm fo vang,” tiin a sawi a. 24 Josua chu an chhâng a, “LALPA in Pathian chuan he ram hi a chhiahhlawh Mosia chu a pe a, a chhûnga chêngte zawng zawng tihlum vek tûrin thu a pe ngei tih kan ring a; tichuan, hma in rawn sâwn zêl dân kan hriatin min thah kan hlau va, hetiang hian kan rawn ti ta mai a ni. 25 Tûnah hian ngai teh, i kuta awm kan ni a; i ngaiha ṭha leh dika i hriat ang ang chuan kan chungah hian ti zêl mai ang che,” an ti a. 26 Chutichuan, an chungah chutiang chuan a ti ta a, Israela thlahte lak ata chu a chhanchhuak a, anmahni chu an that ta lo va. 27 Tin, Josuan chumi ni chuan a ruatna apiangah, pung khâwmhote leh LALPA maichâm atân thing fawmtuah leh tui chawituah a ruat a, tûn thleng hian.
Amor mite an tlâwm
1 Tin, heti hi a ni a, Jerusalem khaw lal Adoni-zedekan Josuan Ai khua a la a, a tichhe dêr a, Jeriko khua leh an lal a tihchhiat angin Ai khua leh an lal pawh a tichhe dêr a, Gibeon khuaa mite chuan Israel-hote nên inremna an siam a, an zîngah an chêng ve ta tih a lo hriat chuan, 2 a hlau ta hle mai a; Gibeon khua chu khaw lian tak, lal khawpui ang a ni si a, Ai khua aiin a ropui zâwk a, a mihring zawng zawngte pawh chu mi chak tak an ni si a. 3 Chutichuan, Jerusalem lal Adoni-zedeka chuan Hebron khaw lal Hohama te, Jarmuth khaw lal Pirama te, Lakis khaw lal Japhia te, Eglon khaw lal Debira teho chu, 4 “Lo kal ula, min rawn pui rawh u khai, Gibeon i va bei teh ang u; Josua leh Israela thlahte nên inremna an siam ta si a,” tiin a chah khâwm a. 5 Chutichuan, Amor-ho lalte panga - Jerusalem khaw lal te, Hebron khaw lal te, Jarmuth khaw lal te, Lakis khaw lal te, Eglon khaw lal te chu an pung khâwm a, an sipaiteho zawng zawng nên an han chho va, Gibeon khaw epah an awm ta mup a, an bei ta a. 6 Tin, Gibeon-hote chuan an riahhmun Gilgal-ah, Josua hnênah mi an tîr a, “I chhiahhlawhte hi ngaihthah suh ang che; rang takin kan hnênah lo chho la, min rawn chhandam la, min rawn ṭanpui rawh; tlâng rama chêngho Amor lalte min bei tûrin an pung khâwm chiam e,” tiin. 7 Chutichuan, Josua leh a hnêna râl kâp mi zawng zawngte leh mi chak huaisenho zawng zawngte chu Gilgal aṭang chuan an han chho va. 8 Tin, LALPAN Josua hnênah, “Anni chu hlau suh khai, i kutah ka pe vek tawh e; an zînga mi tu mah chelh tûr rêng rêng che an awm dâwn lo ve,” a ti a. 9 Chutichuan, Josua chuan a bei ta thut a, zankhuain Gilgal aṭanga lo han kal tawh a ni a. 10 Tin, LALPAN Israel-hote hmaah chuan anmahni chu a tibuai ta nuaih mai a, Gibeon khuaah chuan tam tak a that a, Beth-horon chhohna lam kawngah a ûm a, Azeka leh Makkeda khaw thlengin a that zêl a. 11 Tin, heti hi a ni a, Israel-ho hmaa an tlânchhiata, Beth-horon aṭanga liam thlâkna hmuna an awm lai chuan, LALPAN vân aṭangin rial lian pui puiin Azeka khaw thlengin a zuk dentîr chiam a, an thi a. Israela thlahten khandaiha an sah hlum ai mahin rial den hlum chu an tam zâwk a ni. 12 Chutichuan, LALPAN Amor-hote chu Israela thlahte a pêk ni chuan Josuan LALPA hnênah thu a sawi a; Israel-hote mit hmuhah, “Nia, Gibeon khaw chungah ding reng rawh; Nang pawh Thlaa, Aijalon ruamah hian awm reng rawh,” a ti a. 13 Tichuan, mite chuan an hmêlmate chunga phuba an lâk hma loh chuan ni chu a ding ta reng a, thla pawh chu a awm ta reng a. He thu hi Jasara buah ziak a ni lo vem ni? Tichuan, ni chu vânlaizâwlah a awm ta reng a, ni khat pumhlûm lai tlâk zai rêng rêng a rêl lo. 14 LALPAN chutianga mihring aw a ngaihthlâk ni ang chuan a hmain ni rêng rêng a awm ngai lo va, a hnuah pawh a awm ngai hek lo; LALPAN Israel-hote chu a dopui a ni si a. 15 Tin, Josua leh Israel-ho zawng zawngte chu an riahhmun Gilgal-ah an kîr leh ta vek a.
Josuan Amor lal panga a man
16 Tin, chûng lal pangate chu an tlân bo va, Makkeda pûkah an biru a. 17 Tin, “Lal pangate chu an hmu ta, Makkeda pûkah an biru a ni,” tiin Josua an hrilh a. 18 Tichuan, Josuan, “Pûk kawngkaah chuan lung lian pui pui lum ula, a vêngtute pawh lo awmtîr rawh u. 19 Nangni erawh chu awm suh u; in hmêlmate chu ûm ta zêl ula, hnudâltute kha that ula; an khuaah rêng rêng luhtîr suh u, LALPA in Pathianin in kutah anmahni chu a pe tawh si a,” a ti a. 20 Tin, heti hi a ni a, Josua leh Israela thlahten an chimih hma lohva an thah chiam zawha, a awm chhunate chu kulhpui nei khuaahte an tlân luh hnu chuan, 21 mi zawng zawng chu Josua hnên lamah Makkeda-ah chuan râlmuang takin an lo haw leh ta a. Tu mahin Israela thlahte lamah rêng rêng an lei an phût lo. 22 Chutichuan, Josuan, “Pûk kawngka kha han hawng tawh ula, lal pangate kha pûk ata ka hnênah han hruai rawh u,” a ti a. 23 Tin, chutiang chuan an ti a, chûng lal panga - Jerusalem khaw lal te, Hebron khaw lal te, Jarmuth khaw lal te, Lakis khaw lal te, Eglon khaw lal te chu pûk ata a hnênah an rawn hruai a. 24 Tin, heti hi a ni a, chûng lalte chu Josua hnêna an rawn hruai chuan, Josuan Israel-ho zawng zawng chu a ko khâwm a, a hnêna kal ve râl kâp mite zînga puipa deuh deuhte hnênah chuan, “Lo kal hnai ula, hêng lalho ring hi han rap teh u,” a ti a. Tichuan, an lo kal hnai a, an ring chu an rawn rap ta a. 25 Tin, Josuan an hnênah, “Hlau suh ula, zâm hek suh u; chak tak leh huai takin awm rawh u, in hmêlma in do zawng zawng chungah LALPAN hetiang hian a ti zêl dâwn a ni e,” a ti a. 26 Tin, chumi zawhah chuan Josuan a bei a, a tihlum a, thing panga lêrah a khai a; tichuan, tlai thlengin thinglêrah chuan an inkhai a. 27 Tin, heti hi a ni a, ni tlâk dâwnin Josuan thu a pe a, thinglêr ata chu an la thla a, an bihrûkna pûkah khân an paih lût a, pûk kawngka chu lung lian pui puiin an chhîn a, tûn thleng pawh hian a la awm reng.
Josuan Amor-ho ram dang pawh a la zêl
28 Tin, Josuan chumi ni chuan Makkeda khua chu a la a, an lal chawpin khandaihin a bei a. Chu khuaa awm zawng zawngte nên chuan a tihlum fai vek a, pakhat mah zuah rêng rêng a nei lo. Tichuan, Jeriko khaw lal chunga a tih ang bawk khân Makkeda khaw lal chungah pawh a ti a. 29 Tin, Josua chuan Israel-ho zawng zawngte nên Makkeda khua aṭangin Libna khua chu an bei a. 30 Tichuan, LALPAN chu khua chu an lal chawpin Israel-te kutah a pe leh bawk a; tin, chu khua chu beiin a chhûnga awm zawng zawngte chu khandaihin a tihlum vek a. A chhûnga mi pakhat mah zuah rêng rêng a nei lo; tichuan, Jeriko khaw lal chunga a tih ang bawk khân chumi khaw lal chungah pawh chuan a ti a. 31 Tin, Josua chu Israel-ho zawng zawngte nên Libna khua aṭangin Lakis khaw lamah an kal a, ṭanhmun an khuar a, an bei ta a. 32 Tichuan, LALPAN Lakis khua chu Israel-te kutah a pe a, a ni hnih niah a la a, chu khua chu beiin a chhûnga awm zawng zawngte chu khandaihin a tihlum vek a, Libna khaw chunga a tih ang bawk khân. 33 Chutichuan, Gezer khaw lal Horama chu Lakis khua pui tûrin a han kal a; tin, Josua chuan amah leh a hote nên pakhat mah zuah hlek lovin a lo that phiar a. 34 Tin, Josua chu Israel-ho zawng zawngte nên Lakis khua aṭangin Eglon khaw lamah an kal a, ṭanhmun an khuar a, an bei ta a. 35 Chumi ni chuan an la a; tin, chumi ni vêk chuan chu khua chu beiin a chhûnga awm zawng zawngte chu a tihlum fai vek a, Lakis khaw chunga a tih ang bawk khân. 36 Tin, Josua chu Israel-ho zawng zawngte nên Eglon khua aṭangin Hebron khaw lamah an han kal a; an bei ta a. 37 Tichuan, an la a, chu khua leh an lal leh, a khawper zawng zawngte chu khandaiha beiin a tihlum vek a, Eglon khaw chunga a tih ang bawk khân pakhat mah zuah rêng rêng a nei lo va; a khua lama chhu chhe vekin a chhûnga awm zawng zawngte chu a tihlum fai vek a. 38 Tin, Josua leh Israel-ho zawng zawngte chu Debir khaw lamah an lêt leh a; an bei ta a. 39 Tichuan, chu khua leh an lal leh, a khawper zawng zawngte chu a la a; khandaihin an bei a, a chhûnga awm zawng zawngte chu a tihlum fai vek a. Pakhat mah zuah rêng rêng a nei lo; Hebron khaw chunga a tih ang khân Debir khua leh an lal chungah pawh a ti a, Libna khua leh an lal chunga a tih ang bawk khân. 40 Chutichuan, Josuan a ram pumin - tlâng ram te, Chhim ram te, phai ram te, awih pangpêr ram te chhu chhe vekin an lal zawng zawngte chu a tihlum vek a; pakhat mah zuah rêng rêng a nei lo; LALPA, Israel-te Pathian thupêk angin nung tawh phawt chu a tichimit ta vek zâwk a. 41 Tin, Josua chuan Kadesh-barnea aṭanga Gaza thlengin, Gosen ram zawng zawng nên Gibeon thlengin a chhu chhe vek a. 42 Chûng lalho zawng zawngte leh an ramte chu LALPA, Israel-te Pathianin Israel-hote chu a dopui avângin, Josua chuan ṭum khata a man vek an ni. 43 Tin, Josua leh Israel-ho zawng zawngte chu an riahhmun Gilgal-ah an kîr leh ta vek a.
Jabina leh a ṭanrualpuite Josuan a hneh
1 Tin, heti hi a ni a, Hazor khaw lal Jabinan chu chu a lo hriat chuan, Madon khaw lal Jobaba te, Simron khaw lal te, Aksaph khaw lal te, 2 hmâr lam tlâng ram lal te, Kineroth chhim lama Araba lal te, phai ram lal te, thlang lampanga Dor khaw zosâng lal te, 3 chhak lam leh thlang lama awm Kanaan mi te, tlâng lama awm Amor-ho te, Hit-ho te, Periz-ho te, Jebus-ho te, Mizpa ram Hermon tlâng hnuaia awm Hiv-ho hnênah te mi a tîr a. 4 Tin, an sipaihote zawng zawng nên mi tam tak, an tam lam chu tuifinriat kama ṭiauvaivut zât zet, sakawr leh tawlailîr tam tak nên an thawk ta chiam a. 5 Chûng lalho zawng zawngte chu an intâwk khâwm a, Israel-hote chu beih tumin Merom tuiahte chuan an riak khâwm a. 6 Tin, LALPAN Josua hnênah, “Anni chu hlau suh, naktûk hetih hun hian anniho chu tihhlum sa vekin Israel-te ka rawn pe mai dâwn e. An sakawr thate i chhahsak ang a, an tawlailîrte chu i hâlsak dâwn nia,” a ti a. 7 Chutichuan, Josua leh râl kâp mi zawng zawngte chu Merom tuiahte chuan an va thawk ta thut a, an bawh ta a. 8 Tin, LALPAN anmahni chu Israel-te kutah a pe a, an bei a, Zidon ropui thleng te, Misrephoth-maim hmun thleng te, chhak lampanga Mizpa ruam thleng tein an ûm a; pakhat mah zuah rêng nei lovin an that vek a. 9 Tin, LALPAN a tirh angin Josua chuan an chungah a ti a: an sakawr thate a chhahsak a, an tawlailîrte chu a hâlsak a. 10 Tin, chutih lai chuan Josua chu a lêt leh a, Hazor khua chu a la a, an lal chu khandaihin a that a; tûn hma chuan Hazor khua chu chûnglai vêl ram zawng zawng zînga khawpui ber a ni. 11 Tin, chu khuaa awm zawng zawngte chu khandaihin an that vek a, an tichimit vek a. Nung tawh phawt chu pakhat mah an zuah lo. Tichuan, Hazor khua chu a hâl ta a. 12 Tin, chûng lalho khawpui zawng zawngte leh an lal zawng zawngte chu Josuan a man vek a, khandaiha beiin a that a, a tichimit vek a; LALPA chhiahhlawh Mosian thu a pêk ang khân. 13 Mualpâwnga khawpui lo din sa tawhte erawh kha chu, Hazor khua ngawt lo chu Israel-hote chuan pakhat mah an hâl lo; chu khua erawh chu Josuan a hâl a ni. 14 Tin, chûng khawpuia an râllâk zawng zawngte leh rante chu Israela thlahte chuan anmahni pualah an nei a; mihring erawh chu an tihboral vek hma loh zawng khandaihin an that zêl a, nung tawh phawt chu zuah an nei lo. 15 LALPAN a chhiahhlawh Mosia thu a pêk ang bawkin Mosia pawhin Josua chu thu a pe ve a, chutiang chuan Josuan a ti zêl a. LALPAN Mosia thu a pêk zawng zawng chu tih loh rêng a nei lo.
Josua ram lâkte
16 Chutichuan, Josuan chûng ram zawng zawng - tlâng ram te, Chhim ram zawng zawng te, Gosen ram zawng zawng te, phai ram te, Araba te, Israel-ho tlâng ram te, an phai ramte nên a la vek a, 17 Seir tlâng han sutu Halak tlâng aṭanga Hermon tlâng hnuaia Lebanon ruama Baal-gad thlengin. An lal zawng zawngte chu a man a, a that a, a tihlum a. 18 Josuan chûng lalho zawng zawng chu rei tak a do a ni. 19 Gibeon khuaa awm Hiv-hote tih chauh loh chu Israel-hote nêna remna siam khua rêng rêng an awm lo. Dova an lâk vek a ni. 20 LALPAN Mosia thu a pêk anga a tihchimih veka, duhsakna nei hlek lova a tihboral theihna tûra an thinlung tihkhauhsaka, Israel-hote dotîr ṭhîntu chu LALPA chu a ni si a. 21 Tin, chûnglai chuan Josua chu a kal a, tlang ram aṭang te, Hebron khua aṭang te, Debir khua aṭang te, Anab khua aṭang te, Judai tlâng ram zawng zawng aṭang te, Israel tlâng ram zawng zawng aṭangtein Anak-ho chu a tichimit vek a; Josua chuan an khawpuite chawpin a tiboral vek a. 22 Israela thlahte ramah chuan Anak-ho chu pakhat mah awm an awm tawh lo; Gaza khuaah te, Gath khuaah te, Asdod khuaah te erawh chuan awm chu an la awm. 23 Chutichuan, LALPAN Mosia hnêna a sawi zawng zawng ang khân, Josua chuan ram pum pui chu a la ta a; tin, Josua chuan Israel-hote chu an hnam inṭhen dân ang zêlin an rochan atân a pe hlawm a. Tichuan, ram chu râlmuangin a awm ta a.
Mosian a lo hneh tawh lalte
1 Hêngte hi a ni chûng ram lal, Israela thlahten an tihborala, an ram Jordan lui râl, ni chhuahna lam ram, Arnon ruam aṭanga Hermon tlâng thleng te, chhak lampanga Araba zawng zawng nêna an neihsak lalte chu: 2 Amor-ho lal Sihona, Hesbon-a awm chuan Arnon ruam sîra awm Aroer khua aṭangin ro a rêl a ni a; tin, ruam lai taka khawpui te, Amona thlahte ramri Jabok lui thlengin Gilead ram zâtve chungah chuan a rêl bawk a; 3 tin, chhak lamah chuan Araba-ah Kineroth dîl thlengin a ni a; tin, chhak lamah vêk Beth-jesimoth kalna kawng lamah Araba tuifinriat, Tuifinriat Al thlengin a ni a; tin, chhim lamah chuan Pisga awih pangpêr hnuai thlengin a ni a. 4 Astaroth leh Edrei khuaa awm Rephaim hnam la awm chhunte zingah chuan Basan lal Oga a lal a; 5 ani chuan Hermon tlângah te, Saleka khuaah te leh Basan ram zawng zawngah Gesur-ho leh Makat-ho ramri thleng leh Hesbon lal Sihona ramri chin Gilead ram zâtve thlengin ro a rêl a. 6 LALPA chhiahhlawh Mosia leh Israela thlahte chuan chûnghote chu an that a; tin, LALPA chhiahhlawh Mosia chuan Reuben chite, Gad chite, Manase hnam zâtvete chu an rochanah a sem a.
Josuan lal a hnehte
7 Tin, hêng ram lalho hi a ni Josua leh Israela thlahten Jordan lui râl thlang lampanga an thahte chu, Lebanon ruam Baal-gad aṭanga Seir tlâng han sutu Halak tlâng thlengin; tin, Josua chuan Israel hnamte an inṭhen dân ang zêlin chu ram chu an rochan atân a pe hlawm a; 8 tlâng ramah te, phai ramah te, Araba-ah te, tlâng pangpêr ramah te, chûng chu Hit mi te, Amor mi te, Kanaan mi te, Periz mi te, Hiv mi te, Jebus mite ram kha a ni. 9 Jeriko khaw lal, pakhat; Bethel khaw depa Ai khaw lal, pakhat; 10 Jerusalem khaw lal, pakhat; Hebron khaw lal, pakhat; 11 Jarmuth khaw lal, pakhat; Lakis khaw lal, pakhat; 12 Eglon khaw lal, pakhat; Gezer khaw lal, pakhat; 13 Debir khaw lal, pakhat; Geder khaw lal, pakhat; 14 Horma khaw lal, pakhat; Arad khaw lal, pakhat; 15 Libna khaw lal, pakhat; Adulam khaw lal, pakhat; 16 Makkeda khaw lal, pakhat; Bethel khaw lal, pakhat; 17 Tapua khaw lal, pakhat; Hepher khaw lal, pakhat; 18 Aphek khaw lal, pakhat; Lasaron khaw lal, pakhat; 19 Madon khaw lal, pakhat; Hazor khaw lal, pakhat; 20 Simron-meron khaw lal, pakhat; Aksaph khaw lal, pakhat; 21 Taanak khaw lal, pakhat; Megido khaw lal, pakhat; 22 Kedes khaw lal, pakhat; Karmel tlânga Jokneam khaw lal, pakhat; 23 Dor khaw zosânga Dor khaw lal, pakhat; Gilgal-a Goiim hnamho lal, pakhat; 24 Tirza khaw lal, pakhat; lal zawng zawng chu sawmthum leh pakhat an ni.
Ram lâk tûr hmabâk la awmte
1 Tin, Josua chu a lo upa a, a lo tar ta hle mai a; tin, LALPA chuan a hnênah, “I lo upain i lo tar ta hle a, ram lah chu lâk tûr a la tam mai si a. 2 Hêng ramte hi a ni la lâk loh chu: Philistia ram zawng zawng leh Gesur-ho ram zawng zawng, 3 Aigupta ram bula awm Sihor aṭanga hmâr lampanga Ekron ramri thlengin (chu chu Kanaan mite rama ngaih a ni); Philistia-ho lal panga - Gaza mite, Asdod mite, Askelon mite, Git mite leh Ekron mite chu; chhim lama Avim ram pawh; 4 Kanaan mite ram zawng zawng leh Zidon mite rama Meara, Amor-ho ramri Aphek khaw thlengin; 5 Gebal mite ram leh ni chhuahna lam Lebanon ram zawng zawng, Hermon tlâng hnuai Baal-gad aṭanga Hamath khaw luhna thlengin; 6 Lebanon aṭanga Misrephoth-maim hmun thlengin, tlâng rama chêng zawng zawng, Zidon mi zawng zawngte chu - anni chu Israela thlahte hmaah hian ka hnawt chhuak ang a; thu ka pêk che ang khân Israel-hote rochanah siamsak phawt mai ang che. 7 Chutichuan, he ram hi hnam kuate leh Manase hnam zâtvete rochanah semsak ang che,” a ti a.
Jordan lui khawchhak lam ram insem dân
8 Amah nên Reuben chite leh Gad-hote chuan, Jordan chhak lampangah khân an chanpual tûr Mosian a pêk chu an lo dawng tawh a, LALPA chhiahhlawh Mosia ngeiin a lo pêk tawh ang khân: 9 Arnon ruam sîra awm Aroer khua aṭang leh ruam lai taka khawpui leh, Medeba phai ram zawng zawng, Dibon thlengin; 10 Amor-ho lal Sihona, Hesbon khuaa lala ṭhua khawpui zawng zawng, Amona thlahte ramri thlengin; 11 Gilead ram leh, Gesur-ho leh Maakath-ho ramri chin leh Hermon tlâng zawng zawng leh Basan ram zawng zawng, Saleka khaw thlengin; 12 Astaroth leh Edrei khuaa lala ṭhu Basan ram lal Oga ram zawng zawng nên (chûng chu Rephaim hnam la awm chhunte an ni); chûngho chu Mosian a bei a, a lo hnawt chhuak tawh a ni. 13 Amaherawhchu, Gesur-hote leh Maakath-hote chu Israela thlahte chuan an hnawt chhuak lo; Gesur-ho leh Maakath-ho zawng tûn thleng hian Israel-hote zîngah an la chêng ta reng zâwk a ni. 14 Levi hnamte chauh a ni rochan tûr a pêk ve loh ni; a hnêna a lo sawi tawh ang khân, LALPA, Israel-te Pathian tâna meia thilhlante chu an rochan a ni zâwk si a.
Reuben-ho ram chan tûr
15 Tin, Reubena thlahte hnam chu an chhûngkaw zir zêlin Mosian ram a lo pe tawh a. 16 Tin, an ramri chu Arnon ruam sîra awm Aroer khua aṭanga ruam lai taka khawpui leh Medeba phai ram zawng zawng; 17 Hesbon leh chumi phai rama khawpui zawng zawng: Dibon te, Bamoth-baal te, Bethbaal-meon te; 18 Jahaz khua te, Kedemoth te, Mephaath te; 19 Kiriathaim te, Sibma te, ruam tlânga Zereth-sahar te; 20 Beth-peor te, Pisga âwih pangpêr te, Beth-jesimoth te; 21 phai ram khawpui zawng zawng te, Hesbona rorêl, Amor-ho lal Sihona mi lianho, Midian-hote lala awm Evia te, Rekema te, Zura te, Hura te, Reba te, an awmna ram chawpa Mosian a lo tihboral tâkte nên khân a ni. 22 Beora fapa Balaama, aienthiam pawh Israela thlahten mi dang an thahte zîngah chuan khandaihin an that tel a. 23 Tin, Reubena thlahte ram chin chu Jordan leh a kam zawng chu a ni. Hêng ram leh khawpuite leh khuate hi a ni, Reubena thlahte tâna an chhûngkaw zir zêla rochana an ruat chu.
Gad-ho ram chan tûr
24 Tin, Mosian Gad chi, Gada thlahte chu an chhûngkaw zir zêlin ram a pe a. 25 Tin, an ramri chu Jazer khua leh Gilead ram khawpui zawng zawng leh Amona thlahte ram zâtve, Raba khaw depa awm Aroer thlengin; 26 Hesbon aṭanga Ramath-mizpe leh Betonim thlengin; Mahanaim aṭanga Debir ramri thlengin; 27 tin, ruamah chuan Beth-haram te, Beth-nimra te, Sukkoth te, Zaphon te, Hezbon lal Sihona ram dang te, Jordan leh a kam te, Jordan râl chhak lampanga Kinereth dîl tâwp rak thlengin a ni. 28 Hêngte hi a ni Gada thlahte tâna an chhûngkaw zir zêla an rochana ruat chu, a khawpuite leh khuate chu.
Khawchhak lam Manase-ho chan tûr ram
29 Mosian Manase hnam zâtvete chu ram a pe a; Manase chi zâtvete tân a ni an chhûngkaw zir zêla a pêk ni. 30 An ramri chu Mahanaim aṭangin Basan ram zawng zawng, Basan ram lal Oga ram zawng zawng leh Basan rama Jair khawpui zawng zawngte nên, chu chu khaw sawmruk a ni; 31 Gilead ram zâtve leh Basan ram lal Oga rama Astaroth te, Edrei khuate nên; chûng chu Manasea fa Makira thlah, Makira thlah zâtvete tân, an chhûngkaw zir zêla ruat a ni. 32 Hêng Moab phai, Jeriko zâwn, Jordan râl, chhak lampang te hi a ni Mosian an rochan tûra a lo sem chu. 33 Levi chite erawh chu Mosian rochan tûr a pe ve lo; an hnêna a lo sawi tawh ang khân, LALPA, Israel-te Pathian chu an rochan a ni zâwk.
Jordan khawthlang lam ram sem dân
1 Hêngte hi a ni Israela thlahten Kanaan rama an lâk, puithiam Eleazara te, Nuna fapa Josua te, Israela thlahte hnam chhûngkaw puipaten an rochan atâna an lo sem tâkte chu, 2 hnam kuate leh hnam zâtvete chanpual atâna LALPAN Mosia hmanga thu a lo pêk tâk ang khân. 3 Mosia chuan hnam hnih leh hnam zâtvete kha Jordan râlah khân an rochan tûr a lo pe ta si a; Levi chite erawh chu an zîngah rochan tûr a pe ve lo. 4 Josefa thlahte chu hnam hnih an ni - Manase leh Ephraim chu. Levi chiteho chu chumi ramah chuan chanpual an pe lo, an awmna tûr khawpuite leh a daivêl ran tlatna tûr hmun leh an in lo khuarna ngawt lo chu. 5 LALPAN Mosia thu a pêk ang khân Israela thlahte chuan an ti a, ram chu an sem a.
Hebron chu Kaleba hnêna pêk a ni
6 Chutichuan, Juda thlahte chu Gilgal khuaah Josua hnênah an va kal a. Keniz mi Jephunea fapa Kaleba chuan a hnênah, “Kadesh-barnea hmuna Pathian mi Mosia hnêna LALPAN ka chungchâng leh i chungchâng thua a sawi kha i hria a. 7 LALPA chhiahhlawh Mosian Kadesh-barnea hmun aṭanga ram va enthla tûra mi tirh lai khân kum sawmli mi ka ni tawh a; tin, ka rilrua awm ang chiah chu a hnênah ka thlen leh a. 8 Amaherawhchu, ka unau ka hnêna kal vete khân mipuite thinlung an tihtuisak a; kei erawh chuan LALPA ka Pathian chu ka pawm tlat a. 9 Tichuan, Mosian chumi ni chuan, ‘LALPA ka Pathian hi i pawm tlat avângin, i kein a lo rah tâk ram chu kumkhuain nangmah leh i thlahte rochan tûr a ni ngei ngei ang,’ tiin chhia a chham a. 10 Tichuan, ngai teh, LALPAN Mosia hnêna chûng thu chu a sawi achin Israel-hote thlalêra an vah chhûng zawngte khân, LALPAN a sawi tawh angin kum sawmli leh kum nga zet chu mi damtîr a; tichuan, ngai teh, tûnah hian kum sawmriat leh kum nga ka lo ni ta a. 11 Chuti chung pawhin tûn thleng pawh hian Mosia mi tirh lai ang mai bawk khân ka la chak reng a, hmâna indo leh chhuahvah nân thahrui ka nei ang bawk khân tûnah pawh hian ka la nei reng asin. 12 Chutichuan, he tlâng, LALPAN khami nia a lo sawi tawh kha mi pe ta che; khatia Anak-hote an awma, an khawpuite pawh a ropuiin, kulha hung khup a ni tih khami ni khân i hriat kha. LALPA chuan mi awmpuiin, anmahni chu ka hnawt chhuak thei mahna, LALPAN a lo sawi tawh ang khân,” a ti a. 13 Chutichuan, Josua chuan mal a sâwm a; tin, Jephunea fapa Kaleba chu a rochan atân Hebron khua chu a pe ta a. 14 Tichuan, Hebron khua chu tûn thleng hian Keniz mi, Jephunea fapa Kaleba rochan a lo ni ta a ni; LALPA, Israel-te Pathian chu a pawm tlat avângin. 15 Tin, Hebron khaw hming chu a hma chuan Kiriath-arba a ni; Arba chu Anak-ho zînga mi lian ber a ni. Tichuan, ram chu râlmuangin a awm ta rih a.
Juda-ho ram chan tûr
1 Tin, Juda thlahte hnam an chhûngkaw zir zêla an chanpuala ruat chu Edom ramri chin chhim lampang, Zin thlalêr thleng hialin, chhim tâwp thleng rakin a ni. 2 Tin, chhim lampanga an ramri chin chu Tuifinriat Al tâwp rak, chhim chhawng litengsâwl aṭangin a ni; 3 tin, Akrabim chhohna chhim lam panin a kal zêl a, Zin a va thleng a; tin, Kadesh-barnea chhim lamah a chho va, Hezron a va thleng a; tin, Adar-ah a chho va, Karka a kualkhung a. 4 Azmon-ah a kal zêl a, Aigupta luiah a chhuak a; tichuan, tuifinriat chu ramri tâwp chin chu a ni. Chu chu chhim lampanga in ramri chin tûr chu a ni ang. 5 Chhak lampang ramri chu tui Tuifinriat Al, Jordan chhuah tak chu a ni. Tin, Hmâr lampang ramri chu tuifinriat litengsâwl, Jordan chhuah aṭangin a ni a. 6 Ramri chu Beth-hogla-ah a chho va. Beth-araba hmârah a kal zêl a; tin, ramri chu Reubena fapa Bohana lungah a chho zêl a. 7 Tin, ramri chu Akor ruam aṭangin Debir-ah a chho zêl a, lui chhim lama awm Adumim-a chhohna depa Gilgal lam panin hmâr lamah a kal zêl a. Ramri chu En-semes tuiahte chuan a kal zêl a, En-rogel-ah a chhuak a ni. 8 Tin, ramri chu Hinoma fapa ruamah Jebus-ho ram sîr chhim lam (chu chu Jerusalem a ni) thlengin a chho va; tin, ramri chu Hinom thlang lampang ruam bula awm tlâng chhîpah a chho va, chu chu Rephaim hmâr lampang ruam tâwp rak a ni. 9 Tin, ramri chu tlâng chhîp aṭangin Nephtoa lui tuite thlengin an kaltîr a, Ephron tlânga khawpuiahte a kal zêl a; tin, ramri chu Baala-ah (chu chu Kiriath-jearim a ni) an kaltîr a. 10 Tin, ramri chu Baala aṭangin thlang lampangah Seir tlâng thlengin a insawh kual thla leh a, hmâr lampangah Jearim (chu chu Kesalon a ni) tlâng hrûlah a kal zêl a, Beth-semes-ah a chhuk a, Timna lamah a kal zêl a. 11 Tin, ramri chu hmâr lampang Ekron hrûlah a kal chhuak a; tin, ramri chu Sikron-ah an kaltîr a; tin, Baala tlângah a kal zêl a, Jabneel-ah a chhuak a; tichuan, ramri chu tuifinriatah a va tâwp a ni. 12 Tin, thlang lampang ramri chu tuifinriat zau tak leh a kam chin zawng chu a ni. Chûng ramri chin zawng chu a ni, Juda thlahte tâna an chhûngkaw zir zêla ruat chu.
Kaleban Hebron leh Debir a hneh
13 Tin, Jephunea fapa Kaleba chu LALPAN Josua thu a pêk angin, Juda thlahte zîngah chuan chanpual a siamsak ve a, chu chu Kiriath-arba a ni a, Arba chu Anaka pa a ni (chu chu Hebron an ti bawk). 14 Tin, Kaleba chuan chu khua ata chu Anaka fapate pathum - Sesaia te, Ahimana te, Talmaia te, Anaka fate chu a hnawt chhuak a. 15 Tin, chuta ṭang chuan Debir khuaa mite a han rûn a; a hma chuan Debir khaw hming chu Kiriath-sepher a ni. 16 Tin, Kaleban, “Tu pawh Kiriath-sepher han beia, han la thei apiang chu ka fanu Aksi nupuiah ka neihtîr ang,” a ti a. 17 Tin, Kaleba unau Kenaza fapa Othnielan a han la a; tichuan, a fanu Aksi chu nupuiah a neihtîr ta a. 18 Tin, a pasal hnên a va thlen chuan a pa ram dîl tûrin a lo fuih a. Tin, sabengtung ata a chhuk a, Kaleba chuan a hnênah, “Eng nge i duh le?” a lo ti a. 19 Ani chuan, “Eng emaw dîl che ka duh a ni; chhim lam ram ro takah mi awmtîr ta si a, tuikhur mi pe tel bawk tûrin ka ngên a che,” a ti a. Tichuan, tuikhur chhakta leh thlangta chu a pe ta a.
Juda khuate
20 Chûng chu a ni Juda thlahte hnam an chhûngkaw zir zêla an rochan chu. 21 Tin, chhima Edom ramri va deptu Juda thlahte hnam khawpui hmâwrtawngte chu Kabzeel te, Eder te, Jagur te, 22 Kina te, Dimona te, Adada te, 23 Kedes te, Hazor te, Ithnan te, 24 Ziph te, Telem te, Bealoth te, 25 Hazor-hadatta te, Kerioth-hezron (chu chu Hazor a ni) te, 26 Amam te, Sema te, Molada te, 27 Hazar-gadda te, Heshmon te, Beth-pelet te, 28 Hazar-sual te, Beer-sheba te, Biz-iothia te, 29 Baala te, Iim te, Ezem te, 30 Eltolad te, Kesil te, Horma te, 31 Ziglag te, Madmana te, Sansanna te, 32 Lebaoth te, Shilhim te, Ain te, Rimon te a ni: khawpui zawng zawngte chu a khawperte nên khaw sawmhnih leh khaw kua a ni. 33 Tin, phai ram lamah chuan Eshtaol te, Zora te, Ashna te, 34 Zanoa te, En-ganim te, Tapua te, Enam te, 35 Jarmuth te, Adulam te, Soko te, Azeka te, 36 Shaaraim te, Adithaim te, Gedera te, Gederothaim te: khawpuite chu a khawperte nên khaw sâwm leh khaw li a ni. 37 Zenan te, Hadasha te, Migdal-gad te, 38 Dilean te, Mizpe te, Joktheel te, 39 Lakis te, Boz-kath te, Eglon te, 40 Kabbon te, Lahmas te, Kithlis te, 41 Gederoth te, Beth-dagon te, Naama te, Makkeda te: khawpuite chu a khawperte nên khaw sâwm leh khaw ruk a ni. 42 Libna te, Ether te, Ashan te, 43 Iphta te, Ashna te, Nezib te, 44 Keila te, Akzib te, Maresa te: khawpuite chu a khawperte nên khaw kua a ni. 45 Ekron leh a chhehvêl khuate leh a khawperte chu: 46 Ekron aṭanga tuifinriat thleng hialin Asdod hrûla awm zawng zawng a khawperte nên. 47 Asdod leh a chhehvêl khuate leh a khawperte chu, Gaza leh a chhehvêl khuate leh a khawperte chu - Aigupta lui leh tuifinriat zau leh a kam chin thlengin. 48 Tin, tlâng ram lamah chuan Samir te, Jatir te, Soko te, 49 Danna te, Kiriath-sanna (chu chu Debir a ni) te, 50 Anab te, Eshtemo te, Anim te, 51 Gosen te, Holon te, Gilo te: khawpuite chu a khawperte nên khaw sâwm leh khaw khat a ni. 52 Arab te, Duma te, Eshan te, 53 Janim te, Beth-tappua te, Apheka te, 54 Humta te, Kiriath-arba (chu chu Hebron a ni) te, Zior te: khawpuite chu a khawperte nên khaw kua a ni. 55 Maon te, Karmel te, Ziph te, Juta te, 56 Jezreel te, Jokdeam te, Zanoa te, 57 Kain te, Gibea te, Timna te: khawpuite chu khawperte nên khaw sâwm a ni. 58 Halhul te, Beth-zur te, Gedor te, 59 Maarath te, Beth-anoth te, Eltekon te: khawpuite chu a khawperte nên khaw ruk a ni. 60 Kiriath-baal te (chu chu Kiriath-jearim a ni), Raba te: khawpuite chu a khawperte nên khaw hnih a ni. 61 Thlalêr lamah chuan Beth-araba te, Middin te, Sekaka te, 62 Nibshan te, Chi Khawpui te, En-gedi te: khawpuite chu a khawperte nên khaw ruk a ni. 63 Jerusalem khuaa mi Jebus-ho erawh chu Juda thlahten an hnawt chhuak thei lo va; chutichuan, Jebus-hote chu Juda thlahte nên tûn thleng hian Jerusalem-ah an la chêng za ta reng a ni.
Ephraim leh khawthlang Manase-ho chan tûr ram
1 Josefa thlahte chanpual chu, Jeriko zâwn Jordan aṭangin thlalêr kiang, chhak lampanga Jeriko tuiahte chuan a chhuak a, Jeriko aṭang chuan tlâng ramah Bethel thlengin a chho zêl a; 2 tin, Bethel aṭangin Luz-ah a chhuak a, Ark-ho ramria Ataroth thlengin a kal zêl a; 3 tin, thlang lampangah Japhlet-ho ramri Beth-horon thlangta zâwk ramri, Gezer thlengin a chhuk zêl a, chu chu tuifinriatah a chhuak a. 4 Tichuan, Josefa thlahte Manase leh Ephraim chite chuan chanpualah an nei ta a.
Ephraim-ho chan tûr
5 An chhûngkaw zir zêla Ephraima thlahte ramri chu hetiang hi a ni: chhak lampanga an chanpual ramri chu Ataroth-adar a ni a, Beth-horon chhakta thlengin. 6 Tin, ramri chu Mikmethath hmârah thlang lampangah a chhuak a; tin, ramri chu chhak lampangah Taanath-silo thlengin a lêt leh a, Janoa chhak lamah a kal zêl a. 7 Tin, Janoa aṭang chuan Ataroth-ah te, Naara-ah te a chhuk zêl a, Jeriko a thleng a, Jordan-ah a chhuak a. 8 Tapua aṭangin ramri chu thlang lampangah Kana luitê thlengin a kal a, chu chu tuifinriatah a chhuak a. Chûng chu a ni Ephraima thlahte hnam an chhûngkaw zir zêla an chanpual chu. 9 Manasea thlahte chanpual zînga Ephraima thlahte tâna khawpui ruat hransakte nên, a khawpui zawng zawngte leh a khawperte pawh. 10 Tin, Gezer-a awm Kanaan-hote chu an hnawt chhuak lo va; Kanaan mite chu Ephraim-hote zîngah tûn thleng hian an la awm a, hnathawka rawih atân chhiahhlawhah an awm ta zâwk a ni.
Khawthlang Manase-ho chan tûr
1 Tin, Manasea thlahte chanpual chu hêng hi a ni, ani chu Josefa fa tîr kha a ni a: Gileada pa, Manasea fa tîr Makira erawh chu indo mi a nih avângin Gilead leh Basan ram chu a nei a. 2 Tin, chanpual chu Manasea thlahte dang zawng zawng tân an chhûngkaw zir zêlin a ni: Abiezera thlahte tân te, Heleka thlahte tân te, Asriela thlahte tân te, Sekema thlahte tân te, Hephera thlahte tân te, Semida thlahte tân te; chûngte chu an chhûngkaw zir zêla Josefa fapa Manasea thlah mipate chu an ni. 3 Manasea fa Makira, chu mi fa Gileada, chu mi fa Hephera, chu mi fa Zelophehada erawh chuan fapa nei lovin fanu hlîr a nei a ni. Chûng a fanu hmingte chu Malai te, Novai te, Hoglai te, Milkai te, Tirzai te an ni. 4 Tin, puithiam Eleazara hmaah leh Nuna fapa Josua hmaah leh mi lianhote hmaah an va kal a, “Kan unaute zîngah hian chanpual min pe ve tûrin LALPAN Mosia kha thu a pe a ni,” tiin an sawi a. Chutichuan, LALPA thupêk angin an pa unaute zîngah chuan chanpual a pe ve ta a. 5 Jordan râla mi Gilead leh Basan ram tiam lovin, Manasea chanpualah hmun sâwm a tlu a, 6 Manasea fanute chuan a fapate zîngah chanpual an neih ve avâng a ni; tin, Gilead ram chu Manasea fapa dangte chuan an chang a. 7 Tin, Manasea ramri chu Sekem chhak lama awm Aser aṭanga Mikmethath thlengin a ni; tin, ramri chu ding lampangah En-tapua mite awmna thlengin a kal a. 8 Tapua ram chu Manasea ta a ni a, Manasea ramri depa Tapua erawh chu Ephraima thlahte ta a ni. 9 Tin, ramri chu Kana luitêah, luitê chhim lampangah chuan a chhuk thla a. Chûng khawpuite chu Manasea khawpuite zînga mi, Ephraima ta a ni. Manasea ramri chu luite hmâr lampangah a ni a; tin, tuifinriatah a chhuak a. 10 Chhim lampang chu Ephraima ta a ni a, hmâr lampang chu Manasea ta a ni a, tuifinriat chu a ramri a ni. Hmâr lamah chuan Aser thlengin a va ni a, chhak lamah chuan Isakar thlengin a han ni a. 11 Isakar leh Aser ramah chuan Manasean Beth-san leh a chhehvêl khuate, Ibleam leh a chhehvel khuate, Dor-a awmte leh a chhehvêl khuate, Endor-a awmte leh a chhehvêl khuate, Taanak-a awmte leh a chhehvêl khuate, Megiddo-a awmte leh a chhehvêl khuate, zo khawsâng pathumte chu a nei a. 12 Nimahsela, Manasea thlahte chuan chûng khawpuia awmte chu an hnawt chhuak thei lo va; Kanaan mite chu chûng ramah chuan an awm lui tlat mai a. 13 Tin, heti hi a ni a, Israela thlahte chu an lo chak tâk tial tial chinah chuan, Kanaan-hote chu hnathawka rawih atân an awmtîr a, an hnawt chhuak fai vek ta lo.
Ephraim leh khawthlang Manase-hovin ram an dîl belh
14 Tin, Josefa thlahten Josua hnênah, “Engtizia nge maw ni rochun tûr chanpual hmun khat chan khat chauh min pêk bîk ni le, kan tam tehlul nên, LALPA lahin tûn thlengin mal min sâwm nasa hle mai si nên?” tiin an sawi a. 15 Tin, Josuan an hnênah, “In tam ahnu, Periz-hote leh Rephaim-ho ramngawte khi in awm nân han ṭhiat ta che u; Ephraim tlâng ram hi in tân a chêp luattuk si chuan,” a ti a. 16 Tin, Josefa thlahte chuan, “Tlâng ram hi kan tân a tâwk lo a ni; phai rama Kanaan-ho chêng zawng zawng, Beth-san leh a khawpuia awmte leh Jezreel ruama awmte hian thîrtawlailîr an nei ṭheuh bîk a,” an ti a. 17 Tin, Josuan Josefa chhûngte, Ephraima leh Manasea thlahte hnênah chuan, “In tam hle a, chak pawh in chak bawk a; chutichuan, chan khat chauh zawng in nei lo vang chu; 18 tlâng ram khi in tân ni ang hmiang. Ramngaw mah ni sela, in ṭhiat ang a, a ram chin zawng chu in ta a ni dâwn nia; Kanaan-hote chuan thîrtawlailîrte neiin, chak hle mah sela, in la hnawt chhuak dâwn a ni,” tiin a sawi a.
Ram la bâng sem dân
1 Tin, Israela thlah mipuiho zawng zawng chu Silo khuaah an inkhâwm chiam a, chutah chuan inbiakna puan in an zâr a. Ram chu an thuhnuaiah a lo awm ta a. 2 Tin, Israela thlahte zîngah chuan an chanpual la sem ve loh hnam sarih an la awm a. 3 Tichuan, Josuan Israela thlahte hnênah chuan, “LALPA in thlahtute Pathianin a lo pêk tawh che u ram hi eng chen nge luah lova in la muan dâwn le? 4 Hnam hrang ṭheuhva mi, mi pathum zêl inthlang chhuak ula, anni chu ka lo tîr ang a; anni chu an thawk ang a, ram chu an va fang ang a, an chanpual tâwk tûr ang ṭheuh zêlin an va ziak ang a; tin, ka hnênah an lo kîr leh ang. 5 Tin, hmun sarihah an ṭhen phawt ang a. Juda-ho chu chhim lamah an chanpualah an awm ang a; tin, Josefa chhûngte chu hmâr lamah an chanpualah an awm ang. 6 Ram chu hmun sarihah va ṭhen ula, chumi ziak chu mi rawn pe ang che u; tichuan, hetah hian LALPA kan Pathian hmaah ṭhum ka lo vâwrsak ang che u. 7 Levi-ho hi zawngin in zîngah hian chanvo an nei ve lo va, LALPA puithiam hna hi an chanpual a ni si a. Tin, Gad-ho te, Reuben-ho te leh Manase hnam zâtvete kha zawngin Jordan râl chhak lamah khân, an chanpual chu LALPA chhiahhlawh Mosian a lo pêk kha an lo chang tawh a,” a ti a. 8 Tichuan, chung mite chu an thawk chhuak ta a; tin, ram chanchin va ziak chhuak tûrte chu Josuan, “Ram chu va fang ta ula, rawn ziak chhuak ula, ka hnênah rawn thlen leh ula, hetah Silo khuaah hian LALPA hmaah ṭhum ka lo vâwrsak ang che u,” tiin thu a pe a. 9 Tin, mite chu an kal a, ram chu an va fang a, hmun sarihah an ṭhen a, lehkhabuah a khuain an ziak chhuak a; riahhmun Silo-ah chuan Josua hnênah an kal leh a. 10 Tin, Josuan Silo-ah chuan LALPA hmaah ṭhum a lo vâwrsak a, chutah chuan Josuan Israela thlahte chu an inṭhen dân ang zêl chuan ram chu a sem ta a.
Benjamin-ho chan tûr
11 Tin, ṭhumvâwr chu Benjamina thlahte hnam an chhûngkaw zir zêlin an chungah a tlu ta a; tin, an ramri chin chu Juda thlahte leh Josefa thlahte inkâr a ni. 12 Hmâr lampanga an ramri chin chu Jordan aṭangin a ni; ramri chu Jeriko sîrah hmâr lampangah a chho zêl a; tin, thlang lampangan tlâng ramah a chho zêl a; ramri tâwpna chu Beth-aven thlalêrah a ni. 13 Ramri chu chuta ṭang chuan Luz lamah, Luz (chu chu Bethel a ni) sîrah, chhim lampangah a kal zêl a; tin, ramri chu Beth-horon thlangta chhim lampanga tlâng hrûlah, Ataroth-adar-ah a chhuk a. 14 Tin, ramri chu a kal zêl a, Beth-horon chhim lampanga tlâng bul aṭang chuan thlang lama chhim lampangah a kual phei a; chu chu Kiriath-baal (chu chu Kiriath-jearim a ni), Juda thlahte khawpuiah a tâwp a. Chu chu thlang lampang ram chu a ni. 15 Tin, chhim lampanga ram chu Kiriath-jearim tâwp aṭangin a ni; tin, ramri chu thlang lamah a chhuak a, Nephtoa lui tuiahte chuan a kal zêl a. 16 Tin, ramri chu Rephaim hmâr lampang ruama Hinoma fapa ruam bula tlâng hmâwrah chuan a chhuk a, Jebus-ho sîrah, chhim lampangah Hinom ruamah a chhuk a, En-rogel-ah a chhuk a. 17 Tin, hmâr lam zâwngin a kal a, En-semes-ah a kal a, Adumim chhohna dep Geliloth-ah a kal a; tin, Reubena fapa Bohana lungah a chhuk a. 18 Tin, Araba sîr hmâr lampangah a kal zêl a, Araba-ah a chhuk a. 19 Tin, ramri chu Beth-hogla sîr, hmâr lampangah a kal zêl a; tin, ramri tâwpna chu Jordan chhim tâwp, Tuifinriat Al hmâr litengsâwlah a ni. Chu chu chhim lam ramri a ni. Jordan chu chhak lampanga ramri chin a ni. 20 Chu chu a ni, Benjamina thlahte an chhûngkaw zîr zêla an chanpual ramin a hual chhûng chu. 21 Tichuan, Benjamina thlahte an chhûngkaw zir ang zêla an khawpuite chu Jeriko te, Beth-hogla te, Emek-keziz te, 22 Beth-araba te, Zemaraim te, Bethel te, 23 Avim te, Para te, Ophra te, 24 Kephar-amoni te, Ophni te, Geba te: khawpui sâwm leh pahnih a khawperte nên; 25 Gibeon te, Rama te, Beeroth te, 26 Mizpe te, Kephira te, Moza te, 27 Rekem te, Irpeel te, Tarala te, 28 Zela te, Eleph te, Jebus te (chu chu Jerusalem a ni), Gibeath te, Kiriath te a ni: khawpui sâwm leh pali, a khawperte nên. Chu chu a ni, Benjamina thlahte an chhûngkaw zir zêla an chanpuala ruat chu.
Simeon-ho chan tûr
1 Tin, ṭhumvâwr vawi hnihna chu Simeona chungah, Simeona thlahte hnam chungah an chhûngkaw zir zêlin a tlu leh ta a. An chanpual chu Juda thlahte chanpual zîngah a tel ve a ni. 2 An chanpuala tlute chu Beer-seba (Seba emaw) te, Molada te, 3 Hazar-sual te, Bala te, 4 Eltolad te, Bethul te, Horma te, 5 Ziglag te, Beth-markaboth te, Hazar-susa te, 6 Beth-lebaoth te, Saruhen te: khawpui sâwm leh pathum a khawperte nên; 7 Ain te, Rimon te, Ether te, Ashan te: khawpui pali a khawperte nên; 8 chûng khawpui vêla khawper zawng zawng Baalath-beer, Chhim Rama thlengin. Chûng chu a ni, Simeona thlahte hnam an chhûngkaw zir zêla an chanpuala ruat chu. 9 Simeona thlahte chanpual chu Juda thlahte chan zînga mi a ni, Juda thlahte chanpual chu an tân a zau lutuk si a. Chuvângin, Simeona thlahte chanpual chu an chan zîngah a tel ve a ni.
Zebulun-ho chan tûr
10 Tin, ṭhumvâwr vawi thumna chu Zebuluna thlahte chungah an chhûngkaw zîr zêlin a tlu leh ta a; tin, an chanpual ramri chu Sarid thlengin a ni. 11 An ramri chu thlang lampangah Marala thleng rakin a kal zêl a, Dabeseth an va thleng a, Jokneam bula luitê a va thleng a. 12 Tin, Sarid aṭangin chhak lampang ni chhuahna lamah Kisloth-tabor ramri thlengin a kawi chho va, Daberath-ah a chhuak a, Japhia-ah a chho leh a. 13 Tin, chuta ṭang chuan chhak lampangah Gath-hepher leh Eth-kazin-ah a kal zêl a, Nea lam panin Rimon-ah a chhuak a. 14 Tin, ramri chu hmâr lamah Hannathon-ah a kual phei leh a; tin, a chhuahna chu Iphta-el ruamah a ni. 15 Katath te, Nahalal te, Simron te, Idala te, Bethlehem te: khawpui sâwm leh pahnih a khawperte nên. 16 Chûng chu a ni, Zebuluna thlahte an chhûngkaw zir zêla an chanpuala ruat chu; khawpuite leh a khawperte chu.
Isakar-ho chan tûr
17 Tin, ṭhumvâwr vawi lina chu Isakara chungah, Isakara thlahte chungah an chhûngkaw zir zêlin a tlu leh ta a. 18 Tin, an ramri chin chu Jezreel te, Kesuloth te, Sunem te, 19 Hapharaim te, Sion te, Anaharath te, 20 Rabith te, Kision te, Ebez te, 21 Remeth te, En-ganim te, En-hada te, Beth-pazez te thlengin a ni. 22 Tin, ramri chuan Tabor te, Sahazuma te, Beth-semes te a va thleng a; tichuan, an ramri chhuahna chu Jordan-ah a ni: khawpui sâwm leh paruk a khawperte nên. 23 Chûng chu a ni, Isakara thlahte hnam chhûngkaw zir zêla an chanpuala ruat chu; khawpuite leh a khawperte chu.
Aser-ho chan tûr
24 Tin, ṭhumvâwr vawi ngana chu Asera thlahte hnam chungah an chhûngkaw zir zêlin a tlu leh ta a. 25 Tin, an ramri chin chu Helkath te, Hali te, Beten te, Aksaph te, 26 Alamelek te, Amad te, Misal te a ni; thlang lampangah Karmel leh Sihor-libnath a zuk thleng a. 27 Ni chhuahna lampangah Beth-dagon-ah a kual chho va; tin, Zebulun leh hmâr lampangah Iphta-el ruamah Beth-emek leh Neiel a va thleng a; tin, vei lampangah Kabul te, 28 Ebron te, Rehob te, Hamon te, Kana te, Zidon ropui thleng rakin a kal zêl a. 29 Tin, ramri chu Rama-ah leh Tura khawpui kulh neiah a kual phei a; tin, ramri chu Hosa-ah a kual phei zêl a, a chhuahna chu Akzib ram tuifinriatah a ni. 30 Uma te, Aphek te, Rehob te: khaw sawmhnih leh pahnih a khawperte nên. 31 Chûng chu a ni, Asera thlahte hnam an chhûngkaw zir zêl an chanpual chu; chûng khawpuite leh a khawperte chu.
Naphtali-ho chan tûra ruat
32 Tin, ṭhumvâwr vawi rukna chu Naphtalia thlahte chungah an chhûngkaw zîr zêl bawkin, Naphtalia thlahte chungah a tlu leh ta a. 33 Tin, an ramri chin chu Heleph aṭang te, Zaananim-a sasua aṭang te, Adami-nekeb leh Jabneel aṭangtea Lakum thleng a ni; a chhuahna chu Jordan-ah a ni. 34 Ramri chu thlang lampangah Aznoth-tabor-ah a chhuk a, chuta ṭangin Hukok-ah a kal a; tin, chhim lamah Zebulun a va thleng a, thlang lamah Aser a thleng a, ni chhuahna lamah Judai rama Jordan a han thleng a. 35 Tin, khawpui kulh neite chu Zidim te, Zer te, Hamath te, Rakath te, Kinereth te, 36 Adama te, Rama te, Hazor te, 37 Kedes te, Edrei te, En-hazor te, 38 Iron te, Migdal-el te, Horem te, Beth-anath te, Beth-semes te a ni: khawpui sâwm leh pakua a khawperte nên. 39 Chûng chu a ni, Naphtalia thlahte hnam an chhûngkaw zir ang zêla an chanpual chu, khawpuite leh a khawperte nên.
Dan-ho chan tûr
40 Tin, ṭhumvâwr vawi sarihna chu Dana thlahte hnam chungah an chhûngkaw zir zêlin a tlu ta a. 41 Tin, an chanpual ramri chu Zora te, Estaol te, Ir-semesh te, 42 Saalabin te, Aijalon te, Ithla te, 43 Elon te, Timna te, Ekron te, 44 Elteke te, Gibethon te, Baalath te, 45 Jehud te, Bene-berak te, Gath-rimon te, 46 Me-jarkon te, Rakon, Jopa dep ramte nên a ni. 47 Tin, Dana thlahte ramri chuan chûng chu a va pêl a ni; Dana thlahte chuan Lesem an han bei a, an la a; khandaihin an tiboral a, an nei ta a, chutah chuan an awm ta nghâl a ni a. An pu Dana hming chawiin Lesem chu Dan an ti ta a ni. 48 Chu chu a ni, Dana thlahte hnam an chhûngkaw zir zêla an chanpual chu; chûng khawpuite leh a khawperte nên.
Ram sem an zo ta
49 Chutichuan, an chanpual atâna ramri siam ang zêlin ram chu an sem zo ta a; tichuan, Israela thlahten Nuna fapa Josua chu an zîngah chanpual an siamsak ve a. 50 LALPA thupêk angin Ephraim tlâng rama a khawpui dîl Timnath-sera khua ngei chu an pe a; tin, khawpui chu a siam a, chutah chuan a awm ta a. 51 Chûngte chu a ni, puithiam Eleazara te, Nuna fapa Josua te leh Israela thlahte hnam chhûngkaw puipaten Silo-a LALPA hmaah inbiakna puan in kawngkaa ṭhumvâwra an rochan atâna an sem tâkte chu. Chutichuan, ram ṭhen chu an zo ta a ni.
Humhimna khuate
1 Tin, LALPAN Josua chu a bia a, 2 “Israela thlahte hnênah hian, ‘Inhumhimna khuate siam rawh u khai, Mosia hmanga in hnêna ka sawi tawh kha: 3 tu pawh hre lova mi lo that palhtu chu, chutah chuan a tlân lût thei dâwn nia; tichuan, thisen phuba latu lakah chuan in tân inhumhimna a ni ang. 4 Chûng khawpuite zînga a engah emaw chuan a tlân ang a, khawpui kulh kawngka luhnaah a va ding ang a, chumi khaw upaho beng hriatah a chanchin chu a va thlen ang a; tin, anni chuan khaw chhûngah an hnênah an hruai lût ang a, an zînga a chên ve theihna tûrin awmna tûr chu an ruatsak ang. 5 Tin, thisen phuba latuin a rawn ûm chuan, a thattu chu a kutah an lo pe tûr a ni lo; a ṭhenawm chu hre lovin a that a ni a, tûn hmain huatna a nei si lo va. 6 Mipui hmaa rorêlsak tûra a din hma leh, chûnglaia puithiam lala awma chu a thih hma loh chuan chumi khuaah chuan a awm reng tûr a ni; tin, chumi hunah chuan mi thattu chu ama khaw chhûng ngei, a tlan chhuahsan khua, ama in chhûngah ngei chuan a lût leh tûr a ni,’ tiin sawi ang che,” tiin. 7 Tichuan, Naphtali tlâng rama Galili-a Kadesh khua te, Ephraim tlâng rama Sekem khua te, Judai tlâng rama Kiriath-arba khua (chu chu Hebron a ni) te chu an ruat ta a. 8 Tin, chhak lamah Jordan râlah Jeriko-ah chuan Reuben hnam rama thlalêr phaizâwla Bezer khua te, Gad hnam rama Gilead rama Ramoth khua te, Manase hnam rama Basan rama Golan khua te an ruat a. 9 Chûng khuate chu a ni, Israela thlahte zawng zawng leh an zînga hnam dang awmte tâna ruat chu: tu pawh mi that palhtu chu chutah chuan a tlân luha, mipuite hmaa a din zet hma loh chuan thisen phuba latu kuta a thih lohna tûrin.
Levi chite awmna tûr khuate
1 Tichuan, Levi chi chhûngkaw puipate chu puithiam Eleazara hnênah leh Nuna fapa Josua hnênah leh Israela thlahte hnam chhûngkaw puipate hnênah te chuan an va kal a; 2 Kanaan rama Silo khuaah chuan, “LALPAN Mosia hmangin kan awmna tûr khawpuite, kan ran tlatna tûr a daivêlte nên min pe tûrin thu a lo pe tawh asin,” tiin an sawi a. 3 Chutichuan, Israela thlahte chuan LALPA thupêk angin an chanpual ata chûng khawpuite chu a daivêlte nên Levi chite an pe a. 4 Tin, ṭhumvâwr chu Kohath mite hnam chungah a tlu ta a; tichuan, puithiam Arona thlah Levi chia mite chuan Juda hnam chanpuala mi te, Simeon hnam chanpuala mi te, Benjamin hnam chanpuala mi te khawpui sâwm leh pathum ṭhumvâwrin an chang ve a ni. 5 Tin, Kohatha thlah dangte chuan Ephraim hnam thlahte chanpuala mi te, Dan hnam chanpuala mi te, Manase hnam zâtvete chanpuala mi te khawpui sâwm ṭhumvâwrin an chang ve a ni. 6 Tin, Gersona thlahte chuan Isakar hnam thlahte chanpuala mi te, Aser hnam chanpuala mi te, Naphtali hnam chanpuala mi te, Basan rama Manase hnam zâtvete chanpuala mi te, khawpui sâwm leh pathum ṭhumvâwrin an chang ve a. 7 Meraria thlahte chuan an chhûngkaw zir zêlin Reuben hnam chanpuala mi te, Gad hnam chanpuala mi te, Zebulun hnam chanpuala mite khawpui sâwm leh pahnih an chang ve a. 8 Tin, Israela thlahte chuan LALPAN Mosia hmanga thu a pêk ang khân, Levi mite chu khawpuite leh a daivêlte chu ṭhumvâwrin an pe a. 9 Tin, Juda thlahte hnam chanpuala mi te, Simeona thlahte hnam chanpuala mi te chu an pe a, hêng khawpui a hming lamte hi: 10 chûng chu Levia thlah, Kohath-ho hnam te, Arona thlahteho ta tûr a ni; ṭhumvâwr chu an chungah a tlu hmasa ber rêng a. 11 Tin, Judai tlâng rama Kiriath-arba khua chu a daivêlte nên an pe a, chu Arba chu Anaka pa a ni a (chu chu Hebron a ni). 12 Khawpui chhehvêlte leh a khawperte erawh chu Jephunea fapa Kaleba chanpual atân an pe a. 13 Tin, puithiam Arona thlahte chu Hebron, mi thattute inhumhimna khawpui chu a daivêlte nên, Libna khua a daivêlte nên, 14 Jatir khua a daivêlte nên, Estemoa khua a daivêlte nên, 15 Holon khua a daivêlte nên, Debir khua a daivêlte nên, 16 Ain khua a daivêlte nên, Juta khua a daivêlte nên, Beth-semes khua a daivêlte nên: chûng hnam hnihte chanpuala mi khawpui pakuate chu an pe a. 17 Tin, Benjamin hnam chanpuala mi chu Gibeon khua a daivêlte nên, Geba khua a daivêlte nên, 18 Anathoth khua a daivêlte nên, Almon khua a daivêlte nên: khawpui pali an pe bawk a. 19 Arona thlah, puithiamho khawpui zawng zawng chu khawpui sâwm leh pathum a ni, a daivêlte nên. 20 Tin, Kohatha thlahte chhûngkua, Levi-ho, Kohatha thlah dangte pawh chuan an chanpual khawpuite chu Ephraim hnam chanpuala mi a ni an neih ni. 21 Tin, mi thattute inhumhimna khawpui Ephraim tlâng rama Sekem chu a daivêlte nên, Gezer khua a daivêlte nên, 22 Kibzaim khua a daivêlte nên, Beth-horon khua a daivêlte nên: khawpui pali an pe a. 23 Tin, Dan hnam chanpuala mi Elteke khua a daivêlte nên, Gibethon khua a daivêlte nên, 24 Aijalon khua a daivêlte nên, Gath-rimon khua a daivêlte nên: khawpui pali. 25 Tin, Manase hnam zâtvete chanpuala mi Taanak khua a daivêlte nên, Gath-rimon khua a daivêlte nên: khawpui pahnih. 26 Kohatha thlah dangte hnam khawpui zawng zawng chu khaw sâwm a ni, a daivêlte nên. 27 Tin, Gersona thlahteho, Levi hnamte chu Manase hnam zâtvete chanpuala mi, mi thattute inhumhimna khawpui, Basan rama Golan chu a daivêlte nên, Be-estara khua a daivêlte nên: khawpui pahnih an pe a. 28 Tin, Isakar hnam chanpuala mi Kision khua a daivêlte nên, Daberath khua a daivêlte nên, 29 Jarmuth khua a daivêlte nên, En-ganim khua a daivêlte nên: khawpui pali. 30 Tin, Aser hnam chanpuala mi Misal khua a daivêlte nên, Abdon khua a daivêlte nên, 31 Helkath khua a daivêlte nên, Rehob khua a daivêlte nên: khawpui pali. 32 Tin, Naphtali hnam chanpuala mi, mi thattute inhumhimna khawpui, Galili rama Kadesh chu a daivêlte nên, Hamoth-dor khua a daivêlte nên, Kartan khua a daivêlte nên: khawpui pathum. 33 Gerson-ho an chhûngkaw zir zêla an chanpual khawpui zawng zawng chu khawpui sâwm leh pathum a ni, a daivêlte nên. 34 Tin, Meraria thlahteho chhûngkua, Levi-ho dangte chu Zebulun hnam chanpuala mi Jokneam khua a daivêlte nên, Karta khua a daivêlte nên, 35 Dimna khua a daivêlte nên, Nahalal khua a daivêlte nên: khawpui pali. 36 Tin, Reuben hnam chanpuala mi Bezer khua a daivêlte nên, Jahaz khua a daivêlte nên, 37 Kedemoth khua a daivêlte nên, Mephaath khua a daivêlte nên: khawpui pali. 38 Tin, Gad hnam chanpuala mi, mi thattute inhumhimna khawpui, Gilead rama Ramoth a daivêlte nên, Mahanaim khua a daivêlte nên, 39 Hesbon khua a daivêlte nên, Jazer khua a daivêlte nên: a vaiin khawpui pali. 40 Chûng zawng zawng chu Levi-ho chhûngkaw dang, Meraria thlahteho an chhûngkaw zir zêla an khawpuite chu a ni; tichuan, an chanpual chu khawpui sâwm leh pahnih a ni. 41 Israela thlahteho chanpuala mi Levi-ho khawpui zawng zawng chu khawpui sawmli leh pariat a ni, a daivêlte nên. 42 Chûng khawpuite chuan daivêl a nei ṭheuh a ni; chûng khawpui zawng zawng chu chutiang vek chu a ni.
Israel-ten ram chu an luah ta
43 Chutichuan, LALPAN an thlahtute chhechhama pêk a lo tiam tâk ram zawng zawng chu Israel-te chu a pe a; tichuan, ram chu an luah a, awmhmun an khuar ta a. 44 Tin, LALPAN an thlahtute hnêna chhechhama a lo tiam tawh ang ngei khân hmun tinah muanna a pe a. An hmêlma zawng zawngte chu tu mah an hmaa ṭang thei rêng rêng an awm lo; LALPAN an hmêlma zawng zawngte chu an kutah a pe vek a. 45 LALPAN Israela chhûngte hnêna a ṭha lam thu a lo sawi zawng zawng kha thlâwn rêng rêng a awm lo va, a lo thleng vek a ni.
Jordan chhaka ram neite Josuan a hawtîr
1 Chutichuan, Josuan Reuben-hote, Gad-hote, Manase hnam zâtvete chu a ko va, 2 an hnênah, “LALPA chhiahhlawh Mosian thu a pêk apiang che u in pawm zêl a, thu ka pêk apiang che u pawh in pawm zêl a. 3 Hei leh chen hi vawiin thlengin in unauteho chu in thlahthlam lo va, LALPA in Pathianin tih tûra thu a pêk che u in zâwm ṭhîn a. 4 Tichuan, LALPA in Pathianin an hnêna a lo sawi tawh ang khân in unaute hi muanna a lo pêk tâk hi; chuvângin, LALPA chhiahhlawh Mosian Jordan râla in chanpual atâna ram a lo pêk tâk che uah khân, in puan in lamah te chuan haw leh tawh u. 5 LALPA chhiahhlawh Mosian LALPA in Pathian chu hmangaiha, a kawng zawng zawng chu zawha, a thupêkte chu pawma, amah chu vuan tlata, in thinlung zawng zawng leh in thlarau zawng zawnga a rawngbâwl tlat tûra thu a lo pêk che u kha, chu thupêk leh dânte chu fîmkhur takin vawn ṭhat tum phawt mai ang che u,” a ti a. 6 Chutichuan, Josuan anmahni chu mal a sâwm a, a kaltîr ta a; tichuan, an puan in lamahte an haw ta a. 7 Tin, Manase hnam zâtvete kha Mosian Basan ramah chanpual a pe a; a zâtve dangte kha erawh chu Josuan thlang lampang Jordan râlah an unaute zîngan chanpual a pe zâwk a. Tin, Josuan an in lama a hâwtîr dâwn lai khân mal a sâwm a, 8 an hnênah, “In puan in lamahte chuan hausa takin haw ta ula, ran tam tak nên, tangkarua te nên, rangkachak te nên, dâr te nên, thîr te nên, silhfên tam tak te nên. In hmêlmate laka in râllâkte kha in unaute nên insem tlâng rawh u,” tiin a sawi a. 9 Tin, Reubena thlahte leh Gada thlahte leh Manase hnam zâtvete chu an kîr leh a, Kanaan ram Silo khua ata chu Israela thlahte hnên aṭang chuan Gilead ram, LALPAN Mosia hmanga thu a lo pêk tâk ang khân, an chanpual rênga lo ruat tawh rama kal tûrin an chhuak ta a.
Jordan lui kama maichâm
10 Tin, Kanaan rama Jordan bial an va thlen chuan Reubena thlahte leh, Gada thlahte leh, Manase hnam zâtvete chuan Jordan lui kamah chuan maichâm lian pui, langsâr tak an siam ta a. 11 Tin, Israela thlahte chuan, “Ngai teh u, Reubena thlahte leh Gada thlahte leh, Manase hnam zâtvete khân Kanaan ram bul tak, Jordan bial, Israela thlahte ram lampangah maichâm an siam e,” tia mi sawi an hria a. 12 Tin, chu chu Israela thlahte chuan an lo hriatin, Israela thlah mipuiho zawng zawng chu anmahni han do tumin Silo khuaah an inkhâwm ta chiam a. 13 Tin, Israela thlahte chuan Gilead rama Reubena thlahte leh, Gada thlahte leh, Manase hnam zâtvete hnênah chuan puithiam Eleazara fapa Phinehasa an tîr a, 14 a hnênah mi lian sâwm, Israel-ho hnam zînga chhûngkaw puipa ber pakhat zêl nên; chûngte chu Israel-ho hnam zinga an chhûngkaw puipa bêr zêlte an ni. 15 Tin, Reubena thlahte leh, Gada thlahte leh, Manase hnam zâtvete hnênah Gilead ramah chuan an kal ta a, an hnênah, 16 “LALPA mipuiho zawng zawngin, ‘Israel-te Pathian chungah eng nge maw in tihsual le, LALPA chungah vawiinah hian hel tuma maichâm siamin vawiinah hian LALPA chu in hawisan le? 17 Peor hmuna bawhchhiatna te kha kan tân tê luaah ngaih theih em ni? Tûn thleng pawh hian khâng kan sualte kha kan la intlêng fai zo lo a ni a, LALPA mipuiho zîngah khân hri kha a lêng nachungin, 18 vawiinah hian LALPA chu hawisan in tum chu le? Tichuan, vawiina LALPA chunga in lo hel ta mai hi, naktûkah zawng Israel mipuiho zawng zawng chungah a thinrim ngei dâwn mai. 19 Amaherawhchu, in ram luah hi a bawlhhlawh chuan, LALPA ram chhûng, LALPA biakbûk awmna hmunah lo kal ve mai ula, kan zîngah chêng ve ta mai che u; amaherawhchu, LALPA kan Pathian maichâm tih loh maichâm dang siam zâwngin LALPA chungah hel suh ula, kan chungah pawh hian hel ma ta che u. 20 Zera fapa Akana khân hluihlâwn thilah khân thil a tisual a, Israel mipuiho zawng zawng chungah khân thinurna a tla a ni lâwm ni kha? Kha mi kha ama bawhchhiatnaah amah ngawtin a boral bîk loh kha,’ an ti asin,” tiin an sawi a. 21 Chutichuan, Reubena thlahte leh, Gada thlahte leh, Manase hnam zâtvete chuan Israel-ho hnam puipate chu an chhâng a, an hnênah, 22-23 “LALPA, pathiante Pathian, LALPA, pathiante Pathian chuan a hria a, Israel-ho pawhin an hria ang; kan maichâm siam hi LALPA hawisan tuma, hel tumna emaw, thil tihsual tumna emawa siam kan nih chuan (vawiinah pawh hian min zuah lo mai rawh), hâlral thilhlan nân emaw, ei tûr thilhlan nân emaw, remna thilhlan nân emaw a nih chuan, amah LALPA ngeiin rawn ngaihtuah ang hmiang. 24 Nakin hnuah hian in thlahten kan thlahte hnênah hian, ‘Nangnin LALPA, Israel-te Pathian hi enga in hman phâk vena nge maw awm ni? 25 Nangni Reubena thlahte leh Gada thlahte u, LALPAN keini leh nangni tân Jordan hi ramri china a siam asin ni. LALPAah hian chanpual in nei ve hlei nêm,’ an la rawn ti hlauh dah ang e, tia fîmkhur avânga tih chhan nei taka ti kan ni asin. In thlahtehovin kan thlahte chu LALPA ṭih nachâng hre lovin an la siam mai thei asin. 26 Chuvângin, ‘Hawh u, maichâm i siam teh ang u, hâlral thilhlan nân leh inthawi nân erawh chu ni lovin; 27 keini leh, nangni leh, kan hnua kan thlahteho kârah hriatna a ni ang a; tichuan, kan hâlral thilhlante leh kan inthawinate leh, kan remna thilhlante hian LALPA rawng kan bâwl theih nân leh, an thlahte pawhin nakinah kan thlahte hnênah chuan, LALPAah chanpual in nei ve lo ve, an la tih loh nân,’ kan ti a ni. 28 Chuvângin, ‘Heti hi a ni ang a, nakin hnuah te kan hnênah emaw, kan thlahte hnênah emaw chutianga an la rawn tih huna keinin, “En ta che u, kan thlahtuten LALPA maichâm awm dân an siam hi, hâlral thilhlanna tûr leh inthawina tûr a ni lo ve; keini leh nangni kârah hriatna a ni zâwk e,” kan la tih atân,’ kan ti asin. 29 LALPA chungah chuan helin, vawiinah hian LALPA hawisana, LALPA kan Pathian maichâm, a biakbûk bula maichâm ngawt lo hi hâlral thilhlan nân emaw, ei tûr thilhlan nân emaw, inthawi nân emawa maichâm siam kan nih lohzia mai chu,” an ti a. 30 Tin, puithiam Phinehasa leh a hnêna awm mipuiho mi lian, Israel-ho hnam puipate chu, Reubena thlahte leh Gada thlahte leh Manasea thlahte thusawi an hriat chuan a tilâwm ta hle a. 31 Tin, puithiam Eleazara fapa Phinehasa chuan Reubena thlahte leh Gada thlahte leh Manasea thlahte hnênah chuan, “LALPA chungah thil in tihsual loh avângin, tûnah zawng LALPA chu kan zîngah a awm ngei a ni tih kan hre ta alâwm. Tichuan, Israela thlahte hi LALPA kut ata in chhanchhuak ta a nih hi,” a ti a. 32 Chutichuan, puithiam Eleazara fapa Phinehasa leh mi lianho chu Reubena thlahte leh Gada thlahte hnên aṭang chuan, Gilead ram ata chu Kanaan ram lamah Israela thlahte hnên lamah chuan an haw leh ta a, thu chu an va thlen leh a. 33 Tin, chûng thu chuan Israela thlahte chu a tilâwm hle a, Israela thlahte chuan Pathian chu an fak ta a; Reubena thlahte leh Gada thlahte chu han dova, an awmna ram han tihchhiatsak thu te chu an sawi leh ta lo va. 34 Reubena thlahte leh Gada thlahte chuan chu maichâm chu Ed an ti a, “LALPA chu Pathian a lo ni ngei mai tih kan kârah hian hriatna a nih hi,” an ti a ni.
Josua thlahna thuchah
1 Tin, heti hi a ni a, kum eng emaw zât a lo vei hnua, LALPAN Israel-hote chu an kiang vêla hmêlma zawng zawngte laka muanna a pêk hnu chuan, Josua pawh chu a lo upain a lo tar ta hle a. 2 Tichuan, Josuan Israel-ho zawng zawngte, an upate leh an puipate, an rorêltute leh an hotute chu a kohtîr a, an hnênah, “Kei zawng ka lo upain ka lo tar ta. 3 LALPA in Pathianin nangmahni avânga hêng hnam zawng zawngte chunga a tih dân hi in hmu a; LALPA in Pathianin, amah ngeiin a ni dosak che u ni. 4 Ngai teh u, hêng hnam a la awmate hi hêng hnam ka tihbo tâkho zawng zawng ramte nên hian, Jordan aṭanga ni tlâkna lam Tuifinriat Zau thleng rakin in chite rochanah ka ruatsak a che u. 5 Tin, LALPA in Pathianin in hmaah hian a hnawt chhuak ang a, in hmuh phâk lohvah a hnawt bo vek ang a; tichuan, LALPA in Pathianin in hnêna a sawi tawh ang khân an ram chu in nei dâwn nia. 6 Chuvângin, Mosia dân lehkhabua ziak zawng zawngte hi ding lamah emaw, vei lamah emaw in pênsan hauh loh nân huai takin pawm ula, ti rawh u; 7 hêng hnam in zînga la awmate nên hian inchiahpiah lova, an pathiante hming pawh lam lova, an hming chhâla chhia chham lova, an rawng pawh bâwl lova, kûna chibai in bûk hek loh nân, vawiin thlenga in la tih cheu ṭhin ang hian, 8 LALPA in Pathian chu vuan tlat zawk ṭhîn ang che u. 9 LALPAN in hmaah chi ropui tak leh chak takte chu a hnawh chhuah tâk vek hi; nangni hmaah zawng vawiin thlengin tu mah ṭang thei rêng rêng an awm loh hi. 10 In zînga mi pakhatin mi sângkhat a ûm ang; in hnêna a lo sawi tawh angin, LALPA in Pathian hian a ni, dosak ṭhîn che u ni. 11 Chutichuan, LALPA in Pathian chu hmangaih tûrin fîmkhur ṭha hle rawh u. 12 Chuti lo chuan, in hawisan hlauhva, hêng hnam, la awmho in zînga la chêng rengte hi in kûngkaiha, anmahni nêna nupui pasala in inneiha, anmahni chu in pâwla, anni pawhin an pâwl vaih che u zawngin, 13 LALPA in Pathianin hêng hnamte hi in mit hmuhah chuan a hnawh chhuahsak dâwn tawh tawp lo che u a. LALPA in Pathianin ram ṭha tak a pêk che u ata hi in boral vek hma loh chuan, anmahni chu in tân thang leh fal leh, in nâk atâna vuakna tiang leh, in mit atâna hlîng an lo ni zâwk ang tih chiang takin hre rawh u. 14 “Tin, ngai teh u, tûnah hian leilung zawng zawng dân angin ka kal ve dâwn ta a ni. LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo tih chu in thinlung zawng zawng leh in rilru zawng zawngin in hria e; in chungah a lo thleng ta vek a, pakhat mah thlâwn a awm lo ve. 15 Tin, heti hi a ni ang a, LALPA in Pathianin thil ṭha in hnêna a sawi zawng zawngte kha in chunga a lo thleng ta vek ang bawk hian, LALPA in Pathianin he ram ṭha tak a pêk che u ata hi a tihboral vek hma loh che u chuan, LALPAN thil ṭha lote in chungah a la rawn thlentîr ve ang. 16 LALPA in Pathian thuthlung, pawm tûra a pêk che u hi in bawhchhiata, pathian dangte rawng in bâwla, kûna chibai in bûk chuan, LALPA thinurna chu in chungah a ling ang a, ram ṭha tak a pêk che u ata hi in boral thuai mai ang,” a ti a.
1 Tin, Josuan Israel hnam zawng zawngte chu Sekem-ah a ko khâwm a, Israel-ho upate, an puipate, an rorêltute, an hotute a kohtîr a; tin, Pathian hmaah an rawn inlan hlawm a. 2 Tin, Josuan mi zawng zawng hnênah chuan, “LALPA, Israel-te Pathianin heti hian a ti a ni: ‘In thlahtute kha hmânlaiin Lui piah lamah khân an awm ṭhîn a, Abrahama pa leh Nahora pa Tera meuh pawh kha; anni chuan pathian dangte rawng an bâwl ṭhîn a. 3 Tin, in thlahtu Abrahama kha Lui râl ata ka hruai chhuak a, Kanaan ram chhûng zawng zawngah khân ka hruai a, a thlahte chu ka tipung a, Isaaka kha ka pe a. 4 Tin, Isaaka chu Jakoba leh Esauva ka pe a. Tin, Esauva chu a chanpual atân Seir tlâng ka pe a; tin, Jakoba leh a fate kha Aigupta-ah an zuk chhuk a. 5 Tin, Mosia leh Arona ka tîr a, Aigupta ram chu an zîngah thil mak tiin ka hrem a; tin, chumi zawhah chuan ka hruai chhuak che u a. 6 Tin, in thlahtute chu Aigupta ram ata ka hruai chhuak a, tuipui in va thleng a; tichuan, Aigupta mite chuan in thlahtute chu tawlailîrte leh sakawr chung chuang mite nên Tuifinriat Sen thlengin an ûm a. 7 “ ‘Tin, anni chuan LALPA an han au va; Aigupta mite nêna in inkâr chu a rawn tithim ta mup a, tuipui a rawn tuamtîr a, a chîm pil ta a. Tichuan, Aigupta rama ka thiltih kha in mit ngeiin a hmu a. Tin, thlalêrah khân rei tak in awm a. 8 Tin, Jordan lui râla awm Amor-ho ramah chuan ka hruai che u a, an lo do che u a; mahse, in kutah ka pe a, an ram chu in luah ta a, anni chu ka tihboralsak ta che u a. 9 Tin, Moab lal, Zipora fapa Balaka kha a lo thawk a, Israel-hote a lo do va; tin, Beora fapa Balaama kha anchhia lawh tûr che uin a kohtîr a. 10 Nimahsela, Balaama thu kha ka lo ngaithla duh lo va; chuvângin, mal a sawm ta zâwk che u a. Tichuan, a kut ata chu ka chhanchhuak ta che u a ni. 11 Tin, Jordan lui in kai a, Jeriko khua in han thleng a; tin, Jeriko khuaa miten an lo do che u a - Amor-ho te, Periz-ho te, Kanaan-ho te, Hit-ho te, Girgas-ho te, Hiv-ho te, Jebus-ho te nên khân; tichuan, anni chu in kutah ka pe ta a. 12 In hmaah khawinghal ka tîr a, chu chuan in hmaah anmahni chu a ûm a, Amor-ho lalte pahnih pawh kha; in khandaihin emaw, in thalngulin emaw a ni lo. 13 Tin, in thawh chhuah hauh loh ram leh nangmahni siam hauh loh khawpuite ka pe che u a, chûngah chuan in awm a; in phun loh grêp huan leh olive huana mite chu in ei a,’ tiin. 14 “Chuvângin, LALPA chu ṭih ula, tihtakzet leh dik takin a rawng chu bâwl ula, in thlahtuten Lui râl leh Aigupta rama a rawng an bâwl ṭhin pathiante kha paih vek ula; LALPA rawng bâwl ang che u. 15 Tin, LALPA rawng bâwl hi ṭha lo âwm anga in hriat chuan, vawiinah hian tu rawng nge in bâwl dâwn thlang mai rawh u: in thlahtuten Lui râla a rawng an bâwl ṭhin pathiante kha nge, in luah ram Amor-hote pathiante kha? Kei leh ka chhûngte erawh hi zawngin LALPA rawng a ni kan bâwl dâwn ni,” a ti a. 16 Tin, mipuite chuan, “LALPA Pathian chu kalsanin pathian dangte rawng chu kan bâwl loh tûrzia mai chu; 17 amah LALPA kan Pathian ngei chu alâwm kan thlahtute nêna Aigupta ram bawih ata min hruai chhuaka, kan mit hmuha chhinchhiahna ropui tak takte tia, kan kalna apiang leh, mipui zawng zawng kan tâwn tlangna pawha min vêng him zêltu chu. 18 Tichuan, LALPAN kan hma ngeiah hnam tin, chûng rama awm Amor-hote ngei pawh chu a hnawt chhuak vek a; chuvângin, keini pawhin LALPA rawng a ni kan bâwl dâwn ni, amah chu kan Pathian a ni si a,” an ti a, an chhâng a. 19 Tin, Josuan mipuite hnênah chuan, “LALPA rawng chu in bâwl thei lo vang, ani zawng Pathian thianghlim a ni si a. Pathian thîkthuchhia a ni a; in bawhchhiatnate leh in sualnate chu a ngaidam lo vang. 20 LALPA chu in kalsana, hnam dang pathiante rawng in bâwl zawngin, in chunga a ṭha chung hian, in chungah thil ṭha lovin a ṭuan ve ang a, a tiboral mai tûr che u a nia,” a ti a. 21 Tin, mipuite chuan Josua hnênah, “Ni lo ve; LALPA rawng kan bâwl tlat zâwk dâwn a ni!” an ti a. 22 Tin, Josuan mipuite hnênah, “A râwng bâwl tumin LALPA chu in thlang ta ngei mai tih thuhretute chu nangmahni ngei hi in ni ta e,” a ti a. Tin, anni chuan, “Thuhretute chu kan ni ta alâwm,” an ti a. 23 Tin, amah vêk chuan, “Chuti a nih chuan in zînga hnam dang pathian awmte chu dah bo daih ula, in thinlungte chu LALPA, Israel-te Pathian lamah chuan thlêktîr rawh u,” a ti a. 24 Tin, mipuite chuan Josua hnênah, “LALPA kan Pathian rawng chu kan bâwl ang a, a thu kan zâwm zêl ang,” an ti a. 25 Chutichuan, Josuan chumi ni chuan mipuite hnênah thu a thlung a, Sekem khuaah chuan dân leh rorêlna a ruatsak a. 26 Tichuan, Josuan chûng thu chu Pathian dân buah a ziak a; tin, lung lian pui a la a, LALPA hmun thianghlim bula sasaw hnuaiah a phun a. 27 Tin, Josuan mipuiho zawng zawng hnênah chuan, “Ngai teh u, he lung hi kan thuhretu ni rawh se, LALPAN kan hnêna thu a sawi zawng zawng chu a hriat tâk vek hi. Chuvângin, in thuhretu a ni dâwn a ni; chuti lo zawng, in Pathian hi in phatsan mai dah ang e,” a ti a. 28 Chutichuan, Josuan mipuite chu anmahni chanpual ram ṭheuhvah a hawtîr ta a.
Josua leh Eleazara an thi
29 Tin, heti hi a ni a, chûng thil hnuah chuan Nuna fapa Josua, LALPA chhiahhlawh chu kum za leh kum sâwm miin a thi a. 30 Tin, Gaas tlâng hmâr lampang, Ephraim tlâng rama ama chanpual ramri chhûng Timnath-sera-ah chuan an phûm ta a. 31 Tin, Josua dam chhûng leh, upaho Josua khûma dam te, LALPAN Israel-hote tâna thil a tih zawng zawng hretute dam chhûng chuan Israel-hote chuan LALPA rawng an bâwl ṭhîn a. 32 Tin, Israela thlahten Aigupta ram ata Josefa ruh an chhawm chhoh kha Sekem khuaa hmun, Sekema pa Hamora fate laka Jakoban tangka zaa a leiah khân an phûm a; tichuan, chûng chu Josefa thlahte pualah a lo awm ta a. 33 Tin, Arona fapa Eleazara chu a thi a; tin, Ephraim tlâng rama a puala an pêk, a fapa Phinehasa tlângah chuan an phûm ta a.
Juda leh Simeon-hovin Adoni-bezeka an man
1 Tin, Josua thih hnu chuan heti hi a ni a, Israela thlahte chuan, “Kanaan-hote chu dova kan tâna bei tûrin tu nge han kal hmasa phawt ang le?” tiin, LALPA chu an râwn a. 2 Tin, LALPA chuan, “Juda han kal rawh se. Ngai teh u, a kutah ram chu ka pe tawh e,” a ti a. 3 Tin, Judan a unau Simeona hnênah, “Kanaan-hote bei tûrin ka ram chanpualah hian lo chho ve rawh; kei pawh i ram chanpualah ka lo kal ve dâwn nia,” a ti a. Chutichuan, Simeona chu a hnênah a kal ve ta a. 4 Tin, Juda chu a han kal a; tichuan, Kanaan-hote leh Periz-hote chu LALPAN an kutah a pe ta a; tin, Bezek khuaah mi sîngkhat an that a. 5 Tin, Bezek khuaah chuan Adoni-bezeka an han hmu a; tin, an bei a, Kanaan-hote leh Periz-hote chu an that chiam a. 6 Adoni-bezeka erawh chu a tlân a; tichuan, an ûm a, an man a, a kutzungpuite leh kezungpuite an tansak a. 7 Tin, Adoni-bezeka chuan, “Lal sawmsarih kutzungpui leh kezungpui tan chhumte chuan ka dawhkân hnuaia buh mal an chhar ṭhîn a; ka tih ang chiahin Pathianin mi thungrûl ve ta a nih hi le,” a ti a. Tin, Jerusalem khuaah an hruai a, chutah chuan a thi ta a. Juda-hovin Jerusalem leh Hebron an la 8 Tin, Juda thlahte chuan Jerusalem khua an han do va, an la a, khandaihin an bei a, khawpui chu an hâl a. 9 Tin, chumi hnuah chuan Juda thlahte chu Kanaan-ho, tlâng rama awm te, Chhim lama awm te, phaia awm te chu do tûrin an zuk kal a. 10 Tin, Juda chuan Kanaan-ho Hebron khuaa awmte chu a va bei a (a hma chuan Hebron khaw hming chu Kiriath-arba a ni). Tichuan, Sesaia te, Ahimana te, Talmaia te an that a.
Othnielan Debir khua a la
11 Tin, chuta ṭang chuan Debir khuaa awmte chu a bei a (A hma chuan Debir khaw hming chu Kiriath-sepher a ni). 12 Tin, Kaleban, “Tu pawh Kiriath-sepher khua chu beia, la apiang chu ka fanu Aksi nupuiah ka neihtîr ang,” a ti a. 13 Tin, Kaleba nau Kenaza fapa Othnielan a la a; tichuan, a fanu Aksi chu nupuiah a neihtîr ta a. 14 Tin, a pasal hnên a va thlen chuan a pa ram dîl tûrin a lo fuih a. Tin, sabengtung ata a chhuk a; Kaleba chuan a hnênah, “Eng nge i duh le?” a lo ti a. 15 Ani chuan, “Eng emaw dîl che ka duh a ni. Chhim lam ram ro takah mi awmtîr ta si a, tuikhur mi pe tel bawk tûrin ka ngên a che,” a ti a. Tichuan, Kaleba chuan tuikhur chhakta leh thlangta chu a pe ta a.
Juda leh Benjamin-ho an chak zêl
16 Tin, Mosia puzawn Ken-ho thlahte chu Arad chhim lama Judai thlalêrah chuan Juda thlahte nên tûm khawpui ata chu an han chho va; an zîngah chuan an han chêng ve ta a. 17 Tin, Juda chu a unau Simeona nên an thawk a, Zephath khuaa awm Kanaan-ho chu an that a, an tichimit vek a. Chu khawpui hming chu Horma an ti. 18 Tin, Juda chuan Gaza khua a ram chin nên, Askelon khua a ram chin nên, Ekron khua a ram chin nên a la bawk a. 19 Tin, LALPA chu Juda hnênah a awm a; tichuan, tlâng rama chêngte chu a hnawt bo vek a; ruama chênghote erawh chu thîr tawlailîrte an neih avângin a hnawt chhuak thei lo a ni. 20 Tin, Mosian a lo sawi tawh angin Hebron khua chu Kaleba an pe a. Chuta mi Anaka fapate pathum chu a hnawt chhuak a. 21 Tin, Benjamina thlahte chuan Jebus-ho, Jerusalem khuaa awmte chu an hnawt chhuak lo; Jebus-hote chu Benjamina thlahte nên tûn thleng hian Jerusalem-ah an la chêng za ta reng a ni.
Ephraim leh Manase-hovin Bethel an la
22 Tin, Josefa chhûngte pawh chu Bethel khaw bei tûrin an thawk ve bawk a; tin, an hnênah LALPA a awm a. 23 Tin, Josefa chhûngte chuan Bethel khuaah chuan enthlatute an tîr a (A hma chuan chu khaw hming chu Luz a ni). 24 Tin, enthlatute chuan mi pakhat, khaw chhûng ata lo chhuak hi an han hmu a, a hnênah, “Khawngaih takin khawpui chhûng luhna min entîr teh khai; tichuan, ṭha takin kan ti dâwn che nia,” an ti a. 25 Tin, khawpui chhûng luhna chu a entîr a; tichuan, khandaihin chu khua chu an bei a; chu mi leh a chhûngte zawng zawng erawh chu an zuah a. 26 Tin, chu mi chu Hit-ho ramah a lût a, khua a siam a, chumi khaw hmingah chuan Luz a vuah a, tûn thlengin chumi hming chu a la pu a ni.
Israel-hovin an hnawh chhuah lohte
27 Tin, Manasea chuan Beth-san khua leh a khawpera awm te, Taanak khua leh a khawpera awm te, Dor khua leh a khawpera awm te, Ibleam khua leh a khawpera awm te, Megido khua leh a khawpera awmte chu a hnawt chhuak lo; chu ramah chuan Kanaan-hote erawh chu an awm ta reng a. 28 Tin, heti hi a ni a, Israela thlahte chu an lo chak tâk tial tial chinah chuan Kanaan-hote chu hnathawka rawih atân an awmtîr a, an hnawt chhuak fai vek ta lo. 29 Tin, Ephraima chuan Gezer khuaa Kanaan-ho awmte chu a hnawt chhuak lo; Kanaan-ho chu Gezer khuaah chuan an zîngah an chêng ve ta zâwk a ni. 30 Zebuluna chuan Kitron khuaa awmte leh Nahalol khuaa awmte chu a hnawt chhuak lo; Kanaan-ho chu an zîngah an chêng ve a, hnathawka rawih atân an awm ta zâwk a ni. 31 Asera chuan Ako khuaa awm te, Zidon khuaa awm te, Ahlab khuaa awm te, Akzib khuaa awm te, Helba khuaa awm te, Aphik khuaa awm te, Rehob khuaa awmte chu a hnawt chhuak lo. 32 Asera thlahte chu chumi rama awm Kanaan-hote zîngah chuan an chêng ve ta zâwk a ni; anni chuan an hnawt chhuak lo a ni. 33 Naphtalia chuan Beth-semes khuaa awm te, Beth-anath khuaa awmte chu a hnawt chhuak lo; chumi rama awm Kanaan-hote zîngah chuan a chêng ve ta zâwk a ni. Amaherawhchu, Beth-semes khuaa awmte leh Beth-anath khuaa awmte chu an hnathawka rawih atân an awm ta a ni. 34 Tin, Amor-ho chuan Dana thlahte chu tlâng ramah an hnawt chho va, ruama an chhuk an phal si lo va; 35 Amor-ho erawh chu Heres tlângah te, Aijalon khuaah te, Saalbim khuaah te an awm ta reng a; nimahsela, Josefa chhûngte kut chu a chak a, an hnathawka rawih atân an lo awm ta a ni. 36 Tin, Amor-ho ram chin chu Akrabim chhohna leh Sela aṭangin a chho ta zêl a ni.
Bokim khuaah LALPA vântirhkoh
1 Tin, LALPA vântirhkoh Gilgal khua aṭangin Bokim khuaah a han chho va. Tin, ani chuan, “Aigupta ram ata kha ka chhuahtîr che u a, in thlahtute hnêna chhechhama ka lo tiam tâk ramah khân ka hruai lût che u a, ‘In hnêna thu ka thlun kha ka bawhchhe tawp lo vang. 2 Tichuan, hêng rama awmhote nên hian thu thlung suh ula; an maichâmte tihchimsak ang che u,’ ka ti a. Nimahsela, ka thupêk in pawm lo va. Eng vângin nge hetianga in tih? 3 Chuvângin, ‘Anni chu ka hnawh chhuahsak tawh lo vang che u, in nâkahte hlîng ang an ni zâwk ang a; tin, an pathiante chu in tân thang an ni ang,’ ka ti bawk a nih kha,” a ti a. 4 Tin, heti hi a ni a, LALPA vântirhkohvin Israela thlahte zawng zawng hnênah chûng thu chu a han sawi chuan, mipuiho chu râwl chhuah meuhvin an ṭap ta hlawm a. 5 Tin, chumi hmun hmingah chuan Bokim an vuah a; tin, chutah chuan LALPA hnênah an inthawi ta a.
Josua thih thu
6 Josuan mipuite a ṭîn darhtîr hnu chuan, Israela thlahte chu mi tin mahni chanpual ṭheuh ram chu luah tûrin an kal ta a. 7 Josua dam chhûng leh upaho Josua khûma damte, LALPAN Israel-te tâna thil ropui tak a tih zawng zawng hmu ṭhîntute dam chhûng chuan mipuiten LALPA rawng an bâwl ṭhîn a. 8 Tichuan, Nuna fapa Josua, LALPA chhiahhlawh chu kum za leh kum sâwm miin a thi a. 9 Tin, Gaas tlâng hmâr lampang, Ephraim tlâng rama ama chanpual ramri chhûng, Timnath-heres khuaah chuan an phûm ta a. 10 Tin, chûng chhuan zawng zawngte pawh chu an thlahtute hnên lamah an kal khâwm zo ta a, chu mite hnuah chuan LALPA leh Israel-te tâna a thiltihte pawh hre lo chhuan dang an lo awm ta a.
Israel-ten LALPA biak an bâng
11 Tin, Israela thlahte chuan LALPA mit hmuhin thil sual an lo ti a, Baal-hote rawng an bâwl ta a. 12 LALPA, an thlahtute Pathian, Aigupta ram ata hruai chhuaktu kha an hawisan a; pathian dang, an kiang vêla awmho pathiante zînga mi chu an zui a, chibai an bûk ta a; tichuan, LALPA chu an tithinur ta a. 13 Tin, LALPA chu an hawisan a, Baala leh Astarothi rawng an bâwl ta a. 14 Chutichuan, LALPA thin chu Israel-te chungah chuan a ur ta a, anmahni rawk ṭhîntute kutah chuan a pe ta hlawm a, an hmêlma, an kiang vêla awmte hnênah chuan a hralh a; tichuan, an hmêlmate chu an chelh ta lo va. 15 Khawiah pawh kal sela, LALPA kut chu an chungah a chhe lamin a tla zêl a, LALPAN a lo sawi tawh ang leh, LALPAN an hnêna chhechhama a lo sawi tawh ang khân. Tichuan, mangan namênin an mangang ta lo va. 16 Tin, LALPAN rorêltute a siamsak a, chûngte chuan anmahni rawktute kut ata chu an rawn chhanchhuak ta a. 17 Chuti chung pawhin an rorêltute thu chu an pawm lo va, pathian dangte lakah chuan an uirê a, chibai an lo bûk ta zâwk a. An thlahtuten LALPA thupêkte pawma an zawh ṭhin kawng chu an pênsan ta thuai mai a. 18 Tin, LALPAN rorêltute a siamsak chuan, LALPA chu rorêltu hnênah chuan a awm a, rorêltu dam chhûng chuan an hmêlmate kut ata chu a chhanchhuak zêl a; anmahni hnehchhiah leh timangangtute avângin an rûm a; chuvângin, LALPA chu a inchhîr ta a. 19 Nimahsela, heti hi a ni a, rorêltu chu a thih veleh an hnungtawlh leh ta a; pathian dangte rawng bâwla, chibai bûk thu-ah an thlahtute ai mahin an lo che chhe lehzual ta a. An thiltih ṭhinte leh an luhlulte pawh an bâng hek lo. 20 Tin, LALPA thin chu Israel-te chungah chuan a ur ta a; tichuan, “He hnam hian an thlahtute thu ka pêk, ka thuthlun chu an bawhchhia a, ka thu an pawm ta si lo va; 21 chuvângin, kei pawhin tûn achinah zawng, Josua thih hmaa hnawh chhuah bâk hnamte hi ka hnawh chhuahsak tawh lo vang. 22 An thlahtute zawh ang khân LALPA dân an zawh dâwn nge dâwn lo tih Israel-hote fiah nân anmahni chu ka hmang ang,” a ti a. 23 Chutichuan, LALPAN chûng hnamte chu hnawt chhuak nghâl ta lovin a awmtîr ta a; Josua kutah pawh a pe ta hek lo.
Rama hnam dang la awmte
1 Hêng hnamte hi a ni LALPAN Israel-te Kanaan rama râl la bei ve ngai hauh lo fiahna tûra a awmtîrte chu, 2 chûng Israela thlah chhuanho, tûn hmaa eng mah la hre hauh lote chuan an lo hriat nân leh râl beih dân zirtîr tûr atân chauh awmtîr an ni; 3 chûngte chu Philistia-ho lal panga te, Kanaan mi zawng zawng te, Zidon-hote, Lebanon tlânga awm Hiv-hote an ni, Baal-hermon tlâng aṭanga Hamath khaw luhna thlengin. 4 LALPAN Mosia hmanga an thlahtute thu a lo pêkte kha, an pawm dâwn leh dâwn loh hriat nân chûngho chu Israel-te fiahna tûr an ni. 5 Tin, Israela thlahte chu Kanaan-hote, Hit-hote, Amor-hote, Periz-hote, Hiv-hote, Jebus-hote zîngah chuan an awm a. 6 Tin, an fanute chu nupuiah an nei a, an fanute chu an fapate an neihtîr thung a; an pathiante rawng an bâwl a.
Othniela
7 Tin, Israela thlahte chuan LALPA mit hmuhin thil sual an lo ti ta a, LALPA an Pathian chu an theihnghilh a, Baal-ho leh Astarothi rawng an bâwl ta a. 8 Chutichuan, LALPA thin chu Israel-te chungah chuan a ur ta a, Mesopotamia ram lal Kusan-risathaima hnênah a hralh ta a; tichuan, Israela thlahte chu Kusan-risathaima thuhnuaiah kum riat an awm a. 9 Tin, Israela thlahte chuan LALPA an auh veleh LALPAN Israela thlahte chu chhandamtu a siamsak a, chu mi chuan a chhandam ta a, chu chu Kaleba nau Kenaza fapa Othniela a ni. 10 LALPA thlarau chu a chungah a lo thleng a; tichuan, Israel-te ro a rêlsak ta a. Râl bei tûrin a va thawk a; tin, LALPAN Mesopotamia ram lal Kusan-risathaima chu a pe a; Kusan-risathaima chu a hneh ta a. 11 Tin, ram chu kum sawmli râlmuangin a awm a. Tin, Kenaza fapa Othniela chu a thi ta a.
Ehuda
12 Tin, Israela thlahte chuan LALPA mit hmuhin thil sual an lo ti leh ta a. Chutichuan, LALPA mit hmuha thil an lo tihsual avângin LALPAN Moab lal Eglona chu Israel-te laka chakin a siam a. 13 Tin, ani chuan Amona thlahte leh Amalek-hote a pun khâwm a, Israel-hote chu a va bei a, tûm khawpui chu a luah ta a. 14 Tichuan, Israela thlahte chu Moab lal Eglona thuhnuaiah kum sâwm leh kum riat an awm a. 15 Nimahsela, Israela thlahte chuan LALPA an han auh veleh LALPAN Gera fapa Ehuda, Benjamin mi, veikhawr, chhandamtu a siamsak a. Amah chu Israela thlahte chuan Moab lal Eglona pêk tûrin lâwmman an kentîr a. 16 Tin, Ehuda chuan khandaih hriam tawn, tawng chena seiin a chher a; chu chu a malpui ding lam puan hnuaiah a taivawn a. 17 Tin, Moab lal Eglona chu lâwmman chu a han pe a; Eglona chu mi thau tak a ni a. 18 Tin, Ehudan lâwmman a han pêk zawh veleh chuan lâwmman kengtute chu a kaltîr leh ta a. 19 Ani erawh chu Gilgal khaw kianga lung chherna hmun aṭangin a lêt leh a, “I e lalpa, thurûk hrilh tûr che ka nei e,” a ti a. Tin, ani chuan, “Ngawi ṭhiap rawh u,” a ti a. Tichuan, a bula dingho zawng zawngte chuan an chhuahsan ta vek a. 20 Tin, Ehuda chu a hnênah a va kal a; ani chu a thlan daihna pindanah amah chauhvin a lo ṭhu a. Tin, Ehuda chuan, “Pathianin i hnêna sawi tûr thu mi chah e,” a ti a. Tichuan, lal chu a ṭhutphah ata chu a tho va. 21 Tin, Ehuda chuan a kut vei lamin a malpui ding lama khandaih chu a han phawi a, a pumah a chiu ta vak mai a. 22 A fawng pawh chu a lût pil hmawk a, a hnungah a tlang a ni; tin, a khandaih chu thauvin a hnawh tlat avangin a phawi lo. 23 Chutichuan, Ehuda chu hulhliapah a chhuak a, pindan kawngkhârte chuan a khârkhung a, a kalh ta tlat a. 24 Tin, chutia a chhuah tâk hnu chuan chhiahhlawhte chu an lo kal a; tin, an han hmuh chuan ngai teh, pindan kawngkate chu a lo inkalh tlat mai a, “A thlan daihna pindanah a inthiarfihlîm rih a ni ang chu maw,” an ti a. 25 Tin, hrilhhai khawpa an nghah reng hnu pawhin pindan kawngkate chu a hawng ta hauh lo mai a. Chutichuan, chabi an la a, an han hawng a. Ngai teh, an lalpa chu chhuatah chuan thiin a lo lum dêr mai a. 26 Tin, Ehuda lah chu khatia an nghah reng chhûng khân a lo tlân bo tawh a. Lung chherna hmun kha a pêl a, 27 Seira-ah a tlân a. Tin, heti hi a ni a, chumi hmun a thlen chuan Ephraim tlâng ramah chuan tawtawrâwt a hâm a; tin, Israela thlahte chu tlâng ram ata a hnênah an chhuk a, ani chuan an hma a hruai ta a. 28 Tin, ani chuan an hnênah, “Mi zui rawh u khai, LALPAN in hmêlma Moab-hote hi a pe tawh che u a ni,” a ti a. Tichuan, an zui thla a, Moab ram dep Jordan lui kaite chu an chhuhsak a, tu mah an kaitîr lo. 29 Chumi ṭum chuan Moab-ho sângkhat lai, mi âwmkhauh ṭhiau leh mi chak huaisen ṭha ṭhiau an that a; pakhat mah tlân chhuak an awm lo. 30 Chutichuan, chumi ni chuan Moab-hote chu Israel-hote lakah an tlâwm ta a; tin, ram chu kum sawmriat chhûng râlmuangin a awm a.
Samgara
31 Tin, a hnuah chuan Anatha fapa Samgara a lo lang ve a, chu mi chuan Philistia-ho mi zaruk chu sebâwng chhunna tiangin a chhun hlum a; amah bawk chuan Israel-hote chu a chhandam a ni.
Debori leh Baraka
1 Ehuda thih hnu chuan Israela thlahten LALPA mit hmuhin thil sual an lo ti leh ta a. 2 Tichuan, Hazor khaw ṭhuttu, Kanaan ram lal Jabina hnênah chuan LALPAN a hralh ta a. Chu mi sipai hotu ber chu Sisera a ni a, Jentailte ram Haroseth khuaa awm a ni. 3 Tin, Israela thlahte chuan LALPA an au va; Jabina chuan thîr tawlailîr zakua lai a nei a; tin, kum sawmhnih chhûng zet Israela thlahte chu nasa takin a lo hnehchhiah tawh a ni. 4 Tin, chûng lai chuan zâwlnei Debori, Lapidotha nupuiin Israel-te ro a rêl a. 5 Ephraim tlâng rama Rama leh Bethel khaw inkara Debori tûm thing hnuaiah a awm ṭhîn a; tin, Israela thlahte chu a hnênah an ro rêltîr tûrin an kal ṭhîn. 6 Tin, Kedes-naphtali ram ata Abinoama fapa Baraka chu a chah a, a hnênah, “LALPA, Israel-te Pathianin, ‘Tabor tlângah han kal langin, Naphtalia thlahte leh Zebuluna thlahte mi sîngkhat hruai rawh. 7 Tichuan, Kison luiah Jabina sipai hotu Sisera chu a tawlailîrte leh a hote nên ka rawn tîr ang a; tin, ani chu ka pe che,’ tiin thu a pe a ni lâwm ni?” a ti a. 8 Tin, Barakan a hnênah, “Mi kalpui la; tichuan, ka kal ang e; mi kalpui dâwn loh erawh chuan ka kal lo vang,” a ti a. 9 Tin, ani chuan, “Ka kalpui mawlh ang che; amaherawhchu, i kalnaah chuan hmingṭhat i hlawh dâwn lo a nih chu; LALPAN Sisera chu hmeichhe hnênah a hralh dâwn a ni e,” a ti a. Tin, Debori chu a tho va, Baraka hnênah Kedes khaw lamah chuan a kal ve ta a. 10 Tin, Baraka chuan Zebulun-ho leh Naphtali-ho chu Kedes-ah a chah khâwm a; mi sîngkhat amah nên an han kal a, Debori pawh a hnênah chuan a han kal ve a. 11 Tin, Ken mi Hebera chu Ken mi Mosia puzawn Hobaba thlahte zîng ata a lo awm hrang a, Kedes kianga Zaananim rama sasaw thing hmun daiah a puan in a va zâr a. 12 Tin, Abinoama fapa Baraka chu Tabor tlângah a chho tih Sisera an hrilh a. 13 Tichuan, Sisera chuan a tawlailîr zawng zawng, thîr tawlailîr zakua leh a hote chu Jentailte ram Haroseth khua ata, Kison luiah a khâwm chiam a. 14 Chutichuan, Debori chuan Baraka hnênah, “Khai le, vawiin hi LALPAN Sisera a pêk ni che a ni e. I hma hruaitu chu LALPA a ni lâwm ni?” a ti a. Tichuan, Baraka chu Tabor tlâng ata a chhuk a, mi sîngkhatin an zui thla a. 15 Tin, LALPAN Sisera leh a tawlailîr zawng zawng leh, a sipaiho zawng zawngte chu khandaihin Baraka hmaah chuan a tibuai ta nuaih hlawm a; tin, Sisera chu a tawlailîr ata a chhuk a, kein a tlân bo ta daih a. 16 Baraka erawh chuan tawlailîrte leh sipaiho chu Jentail ram Haroseth thleng chuan a ûm ta a; tichuan, Sisera sipaiho zawng zawngte chu khandaihin an that vek a; pakhat mah dam an awm lo. 17 Sisera erawh chu Ken mi Hebera nupui Jaeli puan inah kein a tlân lût a; Hazor lal Jabina leh Ken mi Hebera chhûngte chu inrem reng an ni a. 18 Tin, Jaeli chu Sisera hmuak tûrin a lo chhuak a, a hnênah, “Ka pu, lo lût rawh, ka hnênah lo lût rawh; hlau suh,” a ti a. Tichuan, puan in chhûngah chuan a hnênah a lût ta a; tin, ani chuan puanin a khuh a. 19 Tin, a hnênah, “Khawngaih takin tui tlêm te mi han pe teh khai, ka tui a hâl êm mai e,” a ti a. Tin, bâwnghnute ûm a han hawng a, a intîr a, a khuh leh ta a. 20 Tin, a hnênah, “Puan in kawngkaah khân ding la; tichuan, ‘Hetah hian mi an awm em?’ tia an rawn zawh che chuan, ‘Awm lo,’ lo ti zêl ang che,” a ti a. 21 Chutichuan, Hebera nupui Jaeli chuan puan in khenkilhna a la a, tuboh a keng a, zawi tein a phei a, khenkilhna chuan a bekbawrah a khêng a, a khêng tlang a, leiah a bûr ta ngur mai a; a chauvin a mut a tui hle mai si a. Tichuan, a thi ta a. 22 Tin, ngai teh, Barakan Sisera a rawn ûm chu va hmuah tumin Jaeli chu a va chhuak a, a hnênah, “Lo kal teh khai, i mi zawna chu ka lo entîr teh ang che,” a ti a. Tichuan, a hnênah a va kal a; tin, ngai teh, Sisera chu a lo thi reng mai a, puan in khenkilhna chu a bekbawrah a lo bûr ngur mai a. 23 Chutichuan, Pathianin chumi ni chuan Israela thlahte hmaah Kanaan ram lal Jabina chu a titlâwm ta a. 24 Tichuan, Israela thlahte chu Kanaan ram lal Jabina lakah an lo chak ta deuh deuh va, Kanaan ram lal Jabina chu chhe dêr khawpin an lo siam ta a.
Debori leh Baraka hla
1 Chutichuan, Debori leh Abinoama fapa Baraka chuan chumi ni chuan: 2 “Hotute chuan Israel zîngah zai an zâp a. Mipuite chu châk takin an lo inpêk tâk hi, LALPA chu fak rawh u. 3 “Aw, nangni lalte u, lo ngaithla ula; Aw, nangni hotute u, beng lo chhi rawh u; Keimah ngeiin LALPA chawimawiin hla ka sa ang a, LALPA, Israel-te Pathian fakin hla ka sa ang. 4 “LALPA, Seir ram ata i lo kal chhuaha, Edom phûl ata i lo kal chhuah khân, Lei chu a nghîng dur dur a, vânte pawh a lo far a, A ni, chhûmte chuan ruah a sûrtîr a. 5 Tlângte chu LALPA hmaah a lo khûr a, Sinai tlâng lam pawh saw - LALPA, Israel-te Pathian hmaah chuan. 6 “Anatha fapa Samgara dam lai te leh, Jaeli dam laite khân lamliante chu a ṭhing ṭhup a. Zin veivâkte chu kawng mai maiahte an kal ṭhîn a. 7 Israel rama khuate chu luah lohvin a ram zo va, a ram zo va, Kei Debori hi ka chêta, Israel ram nu hi ka chêt hma loh kha chuan. 8 Pathian tharte an vuan a; Tichuan, kulh kawngkhâr bulahte khân indona a lo awm a; Israel rama sîngli zet zîngah Phâw leh fei kha awm rêng rêng a awm em ni? 9 Ka rilru chu Israel-hote rorêltu, Mipuite hnêna chak taka inpete lamah chuan a awm: LALPA chu fak rawh u. 10 “Nangni sabengtung vâr chunga chuangte u, Nangni puan phah chhah taka ṭhute u; Nangni mi mirte u, chûng thute chu puang rawh u. 11 Thal kâptute thâwm rêng rêng hriat phâk loh, Tui chawina hmunah chuan, LALPA thil fel tihte chu an sawi an sawi ang, Israel ram chunga a thil fel tihte ngei chu. “Chutichuan, LALPA mipuite chu kulh kawngkhâr lamahte chuan an zu chhuk a. 12 “Harh la, harh la, Debor; harh la, harh la, hla sa rawh. 13 “Tichuan, mi lian la awm chhunte leh mipuite chu an lo chhuk a; Mi chak tak mi beihpui tûrin LALPA chu a lo chhuk ta. 14 Amaleka zungzâmte chu Ephraim aṭangin an lo chhuk a; Benjamin, i mite zînga miten an rawn zui che, Makir aṭangin ram rorêltute an lo chhuk; Tin, Zebulun aṭangin ziaktu tiang kengtute chu an lo chhuk, 15 Isakar mi liante chu Debori hnênah an tel a; Isakara angin Baraka pawh Ruam lamah chuan amah nên an tlân chhuk chiam a. Reuben-ho tui luannaahte chuan An tum a urh hle mai. 16 Eng atân nge berâm huang kârahte i ṭhut reng, Berâm rual kohna phênglâwng ngaithla tûr maiin? Reuben-ho tui luannaahte chuan Ngun taka inngaihtuah chhuahna a awm. 17 Gilead-ho chu Jordan râlah an awm reng a; tin, Dan-ho chu engah nge lawngahte an awm reng? Aser-ho chu tuifinriat kamah an ṭhu hle hle a, an litengsâwlahte chuan an awm reng. 18 Zebulun-ho leh Napthali-ho hi Phûl hmun sânga thih huam reng mi an ni. 19 “Lalten an rawn bei a; Tichuan, Kanaan lalte chuan Megido tui kiang, Taanak khuaah an bei a; Sum lâk rêng an nei lo. 20 Vân aṭangin an rawn bei a; Arsiten an hmun aṭangin Sisera chu an rawn bei a. 21 Kison luiin anni chu a hnâwl vek a, Hmasâng lui, Kison lui chuan. Aw ka thlarau, chak takin kal zêl rawh. 22 Tichuan, sakawrte chu an per ta tlut tlut a, Sakawr chakte chu an zuan an zuan avângin. 23 ‘Meroz chu ânchhia lawh ru,’ LALPA vântirhkohvin a ti. ‘Chuta awmte chu nasa takin ânchhia lawh rawh u; LALPA ṭanpuiin, LALPAN mi chak tak a beihnaa ṭanpui tûra an lo kal loh vângin.’ 24 “Hmeichhia azawngah Jaeli, Ken mi Hebera nupui hi engthâwl ber a ni ang, Hmeichhia puan ina chêngho azawngah chuan engthâwl ber a ni ang. 25 Ani chuan tui a rawn dil a, hnutetui a lo pe a, Mi ṭha novin hnutetui khal a lo pe a. 26 Kilhna a keng a, A ding lamin hnathawk mi tuboh; Tin, tuboh chuan Sisera chu a khêng a, a luah a khêng tlang a; A ni, a bekbawrah chuan a khêng a, a khêng bûr ta ngur a. 27 A ke bulah a awp rawk a, a tlu a, a bawk ta dêr a; A ke bulah a awp rawk a, a tlu ta a; A awp rawkna hmunah chuan a thi ta dêr mai. 28 “Sisera nu chu tukverhah a han dâk a, Zâwngdaikalh âwngah a au va, ‘Engati nge a tawlailîr a lo thlen har? Engati nge a tawlailîr a muan?’ a ti. 29 A hmeichhe fingten an lo chhâng a, A ni, amah a inchhâng chawp leh a, 30 ‘An hmu zo ta lo vem ni? Râllâk an insem ta lo vem ni le? Mi tinin nula pahnih khat emaw ṭheuh; Sisera chan tûr chu râllâk puan ze hrang hrang, Râllâk puan zeh mawi, ze hrang hrang, Râllâl nghâwnga bah tûr puan a khing hniha zeh mawi, ze hrang hrang,’ tiin. 31 “Chutiang chuan aw LALPA, i hmêlmate zawng zawng chu boral vek sela! Amah hmangaihtute erawh chu chak taka kal, ni ang hi ni rawh se,” tiin hla an sa a. Tin, ram chu kum sawmli chhûng râlmuangin a awm a.
Gideona
1 Tin, Israela thlahte chuan LALPA mit hmuhin thil an lo tisual leh ta a; tichuan, LALPAN Midian-ho kutah kum sarih a awmtîr a. 2 Tin, Midian-hote chu Israel-hote lakah chuan an lo chak ta hle a. Midian-hote avâng chuan Israela thlahte chu tlângah te, pûkah te, kulhah te an biru a. 3 Tin, heti hi a ni a, Israel-hoten thil an han chîn te hian Midian-hote, Amalek-hote, khawchhak fateho chu an han chho va, 4 an han bei a, awmhmun an han khuar a, Gaza thlengin leia thil ṭote chu an tihchhiatsak a, Israel ramah ei tûr rêng rêng an zuah lo, berâm te, bâwng te, sabengtung te lamin. 5 An ran rualte leh an puan inte nên an thawk a, khau ang maiin tam tak an thawk si ṭhîn a; anmahni leh an sanghâwngseite chu chhiar sên pawh an ni lo; ram chu tichhe tûrin an kal ṭhîn a ni. 6 Chutichuan, Israel-hote chu Midian-ho avâng chuan an lo rethei ta hle mai a; tin, Israela thlahte chuan LALPA chu an au ta a. 7 Tin, heti hi a ni a, Midian-ho avânga Israela thlahten LALPA an han auh veleh chuan, 8 LALPAN Israela thlahte hnênah chuan zâwlnei a rawn tîr a, ani chuan an hnênah, “LALPA, Israel-te Pathianin heti hian a ti a ni, ‘Aigupta ram ata ka hruai chho che u a, bawih ata ka hruai chhuak che u a; 9 Aigupta-ho kut ata leh, hnehchhiahtu che u zawng zawng kut ata chu ka chhanchhuak che u a, in hma ata anmahni chu ka hnawt chhuak a, an ram chu ka pe che u a; 10 tin, keiin, “Kei hi LALPA in Pathian ka nih hi, hêng in awmna ram neitu Amor-ho pathiante hi in hlau hlek tûr a ni lo ve,” ka ti a; nimahsela, ka thusawi chu in pawm si lo,’ a ti e,” a ti a ni. 11 Tin, LALPA vântirhkoh a lo kal a, Ophra khuaa Abiezrit mi Joasa sasaw thing hnuaiah a ṭhu a; tin, a fapa Gideonan Midian-hote hmuh theih loh tûrin grêp sâwrna khurah buh a lo vua a. 12 Tin, LALPA vântirhkoh chu a hnênah a rawn inlâr a, a hnênah, “Nang mi chak huaisen, LALPA chu i hnênah a awm e,” a ti a. 13 Tin, Gideonan a hnênah, “Aw ka pu, LALPA kan hnêna a awm si chuan, engtizia nge hetianga kan chunga thil a lo thlen si? Min thlahtute khân, ‘LALPAN Aigupta ram ata chu min hruai chho a ni lâwm ni?’ tia a thiltih mak tak takte min hrilh ṭhinte kha khawiah nge a nih zawh tâk? Tûnah zawng LALPAN min thlauthla dêr tawh a, Midian-ho kutah min pe tawh alâwm,” a ti a. 14 Tin, LALPA chuan amah chu a en a, a hnênah, “He i chakna hian kal la, Israel-ho hi Midian-ho lak ata chhandam ang che. Ka tîr che a ni lâwm ni?” a ti a. 15 Tin, ani chuan a hnênah, “Aw LALPA, engtin nge Israel-hote hi ka han chhandam tehlul ang? Ngai teh, Manasea thlah zîngah hnam rethei ber kan ni a, kei lah hi ka pa chhûngte zînga tê ber ka ni si a,” a ti a. 16 Tin, LALPA chuan a hnênah, “I hnênah ka awm zêl dâwn alâwm; tichuan, Midian-ho chu pakhat ang maiin i hneh vek mai ang,” a ti a. 17 Tin, ani chuan a hnênah, “I mit tlung ka lo nih chuan, nangmah ngeiin mi bia a ni tih chhinchhiahna eng emaw mi entîr ta che. 18 I hmaa hlan tûr thilpêk ka va lâka, i hnêna ka lo kal leh hma loh chuan heta ta hi khawngaih takin lo kal bo hauh suh ang che,” a ti a. Tin, ani chuan, “I lo kal leh hma loh chu ka lo awm reng ang e,” a ti a. 19 Tin, Gideona chu a lût ta a, kêlno leh chhangphut epha khat, dawidim telh loh a buatsaih a. A sa chu fawngah a dah a, a tui chu bêlah a dah a; tin, sasaw thing hnuaiah a hnênah chuan a rawn keng a, a rawn hlân a. 20 Tin, Pathian vântirhkoh chuan a hnênah, “Sa leh chhang dawidim telh loh kha la langin, he lung chungah hian dah la, a tui kha bun chhuak rawh,” a ti a. 21 Chutiang chuan a han ti a. Chutichuan, LALPA vântirhkoh chuan a tiang ken hmâwr chuan sa leh chhang dawidim telh loh chu a han khawih a; tin, lung aṭang chuan mei a lo chhuak a, sa leh chhang dawidim telh loh chu a kâng ral ta vek a. Tin, LALPA vântirhkoh chu a hmuh theih lohvah a kal ta a. 22 Chutichuan, Gideona chuan LALPA vântirhkoh a ni tih a hre ta a. Tin, Gideonan, “E khai aw, aw LALPA PATHIAN! LALPA vântirhkoh chu a hmaichhan ngeiah ka hmuh tâk chu le,” a ti a. 23 Tin, LALPAN a hnênah, “Thlamuang takin awm la; hlau suh, i thi lo vang,” a ti a. 24 Chutichuan, Gideonan chutah chuan LALPA tân maichâm a siam a, Jehova-salom a vuah a. Tûn thlengin Abiezrit mite khua Ophra-ah a la awm reng a ni. 25 Tin, heti hi a ni a, chu zân vêkah chuan LALPAN a hnênah, “I pa bâwngpa, bâwngpa pahnihna kum sarih mi chu la langin, i pa neih Baala maichâm hi tichim la, a bula Aseri hi kit rawh; 26 tin, he kulh chungah hian kawngzâwng nei têin LALPA i Pathian tân maicham siam langin, bâwngpa pahnihna chu la la, Aseri i kih tûr thing hmangin hâlral thilhlan hlân rawh,” a ti a. 27 Chutichuan, Gideona chuan a chhiahhlawhte zînga mi sâwm a hruai a, LALPAN a hnêna a sawi ang chuan a ti ta a; tin, heti hi a ni a, a pa chhûngte leh khawpuia mite chu a hlauh avângin chhûnah a ti ngam lo va, zânah a ti a ni. 28 Tin, khawpuia mite chu zîng taka an han thawh chuan ngai teh, Baala maichâm chu tihchimin a lo awm a, a bula Aseri chu kih thlûkin a lo awm a, maichâm siam chunga bâwngpa pahnihna hlan chu a lo awm ta mai a. 29 “Hei tu tih nge maw ni chu le?” tiin an inbe hlawm a. Tin, an han inzawha, an han indap vêl hnu chuan, “Joasa fapa Gideona tih a lo ni reng alâwm maw le,” an ti ta a. 30 Tichuan, khawpuia mite chuan Joasa hnênah, “I fapa chu han hruai chhuak rawh, a thi ngei tûr a ni; Baala maichâm a tihchim avâng leh a bula Aseri a kih avângin,” an ti a. 31 Tin, Joasa chuan amah rawn khingtu zawng zawngte hnênah chuan, “Baala chu in ṭan dâwn a ni maw? Amah chu in hum dâwn a ni maw? Tu pawh amah ṭan apiang chu zîngah la la hian tihhlum tûr a ni! Pathian a nih chuan a maichâm tihchim avângin inṭan chawp ang hmiang,” a ti a. 32 Chutichuan, “A maichâm tihchim avângin Baalan amah khing rawh se,” tiin, chumi ni chuan Jerubaala a vuah ta a. 33 Tichuan, Midian-ho zawng zawngte leh, Amelek-hote leh, khawchhak fate chu an pung khâwm chiam a; lui an kân a, Jezreel ruamah an inkulh a. 34 Nimahsela, LALPA Thlarau chu Gideona chungah a lo thleng a; tin, tawtawrâwt a han hâm a, Abiezrit-ho chuan an pan khâwm ta chiam a. 35 Tin, Manase-ho zawng zawng zîngah mite a tlântîr a, chûngho pawh chuan an pan khâwm ta chiam a. Aser-ho hnênah te, Zebulun-ho hnênah te, Naphtali-ho hnênah te pawh mite a tlântîr a; anni pawh chuan an han fin ve ta a. 36 Tin, Gideonan Pathian hnênah, “I sawi anga keima kuta Israel-te hi i chhandam dâwn chuan, 37 ngai teh, hruih zâwlah berâm hmul ka dah ang a; berâm hmulah chauh chuan dai a lo awma, lei zawng zawng chu a lo ro vek chuan, i sawi angin keima kutin Israel-te hi i chhandam dâwn a ni tih ka hria ang,” a ti a. 38 Chutiang chu a lo ni ngei a. A tûk zîng taka a han thawha, berâm hmul chu a han hmeh sâwr chuan berâm hmula mi chu dai berhbu khat zet a han sâwr chhuak ta mai si a. 39 Tin, Gideonan Pathian hnênah, “Ka chungah thinrim suh ang che, vawi khat chauh ka han sawi leh teh ang: khawngaih takin, vawi khat tal berâm hmulin mi fiahtîr leh teh ang che; tûn ṭumah chuan berâm hmul chauh chu lo hul sela, lei chung zawng zawngah dai lo awm leh thung rawh se,” a ti a. 40 Tin, chutiang chuan Pathianin chumi zân chuan a rawn ti a. Berâm hmul chauh chu a lo hul a, lei chung zawng zawngah chuan dai a lo awm ta thung a.
Gideonan Midian-ho a hneh
1 Chutichuan, Jerubaala (chu mi chu Gideona a ni) leh a hnêna mipui awm zawng zawngte chu zîng takah an tho va, Harod lui bulah an inkulh a; tin, Midian-hote kulh chu an awmna hmâr lampang More tlâng bul ruamah a ni. 2 Tin, LALPAN Gideona hnênah, “I hnêna awmte kha Midian-hote an kuta ka pêk nân zawng an tam lutuk e; chuti lo zawng, Israel-hoten, ‘Keimahni kut ngeia inchhandam kan ni alâwm,’ tiin mi uan khum dah ang e. 3 Chuvângin, ngai teh, mipuihote beng hriatah, ‘Tu pawh hlau leh khûr apiang chu kîr leh sela, Gilead tlâng ata hi haw leh rawh se,’ tiin puang rawh,” a ti a. Tichuan, mipuite chu sînghnih leh sânghnih an kîr leh a; tin, sîngkhat an la awm a. 4 Tin, LALPAN Gideona hnênah, “Mite kha an la tam lutuk fo mai; luiah hruai thla la, chutah chuan keiman ka thliarsak ang che. Heti hi a ni ang a, ‘He mi hi chu i hnênah kal ve rawh se,’ ka tih apiang chu i hnênah kal sela; tin, ‘He mi hi chu i hnênah kal ve suh se,’ ka tih apiang chu kal suh se,” a ti a. 5 Chutichuan, mipuite chu luiah chuan a hruai thla a. Tin, LALPAN Gideona hnênah, “Ui anga an leia tui a liaha liak apiangte chu a hrangin dah zêl langin; chutiang bawkin kûna ṭhingṭhia tui dâwt apiangte pawh,” a ti a. 6 Tin, an kutphaha mi a liaha liakte chu mi zathum an ni a, mi dang zawng zawng chu kûna ṭhingṭhia tui dâwt vek an ni. 7 Tichuan, LALPAN Gideona hnênah, “Mi zathum, a liaha liakate kha hmangin ka chhandam dâwn che u a, Midian-hote hi i kutah ka pe dâwn a ni. Mipui zawng zawngte chu mahni hmun ṭheuhvah haw vek rawh se,” a ti a. 8 Chutichuan, mipuite chuan ei tûrte leh an tawtawrâwtte chu an keng a. Tin, Israel mi zawng zawngte chu an puan in lamah a hawtîr ta vek a, mi zathumte erawh chu a awmtîr a. Midian-ho kulh chu an hnuai ruamah chuan a ni. 9 Tin, heti hi a ni a, chumi zânah chuan LALPAN a hnênah, “Tho la, kulhah chuan zuk chhuk rawh khai; i kutah ka pe tawh e. 10 Amaherawhchu, zu chhuk i hlauh chuan, i chhiahhlawh Pura nên hian kulhah chuan zuk kal phawt ula; 11 tichuan, an thusawi i hria ang a; chumi hnuah zawng i kut chu tihchakin a awm ang a, kulhah chuan i kal ngam tawh ang,” a ti a. Chutichuan, a chhiahhlawh Pura nên chuan kulha râl vêngho tawntirh ber awmnaah chuan an zuk kal a. 12 Tin, Midian-hote leh Amalek-hote leh khawchhak fateho zawng zawng chu, ruamah chuan khau ang maiin tam tak an lo awm hmur mai a; an sanghâwngseite chu chhiar sên rual loh, an tam lam chu tuifinriat kama ṭiauvaivut zât zet a ni a. 13 Tin, Gideona a zuk thlen chuan, ngai teh, mi pakhat hian a ṭhianpa chu a mumang a lo hrilh a, a hnênah, “Ngai teh, mumang ka lo nei a; tin, ngai teh, barli chhang hlâwm hi Midian-ho kulhah hian a lo lum a, puan inah hian a lo lum lût a, a rawn tichim a, a tiletling tawp a, puan in chu a pêr ta thlawp mai a,” a ti a. 14 Tin, a ṭhianpa chuan a chhâng a, “Chu chu Israel mi, Joasa fapa Gideona ngûnhnâm a nih mai chu! Pathianin Midian-ho leh sipaiho zawng zawng chu a kutah a pe a nih chu,” a ti a. 15 Tin, chuti chu a ni a, Gideonan chu mumang leh a awmzia an inhrilhfiah chu a hriatin, Pathian a be ta a. Tichuan, Israel-hote kulh lamah chuan a kîr leh a, “Tho rawh u khai; LALPAN Midian sipaihote chu in kutah a pe tawh e,” a ti a. 16 Tichuan, mi zathumte chu pâwl thumah a siam a, an vai chuan tawtawrâwt leh bêl ruak, a chhûnga meichher dah sa a pe ṭheuh va. 17 Tin, ani chuan an hnênah, “Mi en ula, ka tih angin ti ve zêl ang che u; tin, ngai teh u, kulh tawntirh ber ka thlen veleh ka tih ang zêlin ti ve ang che u: 18 kei leh ka hnêna awm zawng zawngte hian tawtawrâwt kan han ham veleh, kulh vêla awm zawng zawngte pawhin tawtawrâwt in hâm vek bawk ang a, ‘LALPA tân leh Gideona tân,’ ti ṭheuh vang che u,” a ti a. 19 Chutichuan, Gideona leh a hnêna awm mi zate chuan zân vên laita, râlvêng an inthlâk hlimchhâwn lai takin kulh tawntirh an zuk thleng a; tin, tawtawrâwt chu an han hâm a, an bêl ken chu an tikeh sawm vek a. 20 Tin, a pâwl thum chuan tawtawrâwt chu an hâm a, an bêl chu an tikeh a, an vei lamin meichher an keng a, an ding lamin tawtawrâwt ham tûr an keng a; tin, “LALPA leh Gideona ngûnhnâm!” tiin an au dur dur a. 21 Tin, kulh vêlah chuan mi tin chu mahni dinna hmun ṭheuhvah an ding vek a; tichuan, sipaiho zawng zawng chu an tlân ta a; tin, an au chiam a, an tlânchhiattîr ta a. 22 Tin, tawtawrâwt zathum chu an hâm a; tin, LALPAN sipaiho zawng zawngte chu anmahni leh anmahni khandaihin a inbeihtîr ta chiam a; tichuan, sipaihote chu Zerera lampang Beth-sita thleng, Tabath kiang Abel-mehola ramri thlengin an tlânchhia a. 23 Tin, Israel-ho chu Naphtali aṭang te, Aser aṭang te, Manase zawng zawng aṭang te chuan an pung khâwm a, Midian-ho chu an ûm ta a. 24 Tin, Gideonan Ephraim tlâng ram zawng zawngah chuan, “Midian-ho hi rawn bei rawh u, Beth-bara thlengin luite chu lo lâk khalh ang che u, Jordan lui nên,” tiin mite a tlân vêltîr a. Chutichuan, Ephraim-ho zawng zawng chu an pung khâwm a, Beth-bara thlengin luite chu Jordan lui nên an lo lâk khalh vek a. 25 Tin, Midian lal pahnih Oreba leh Zeeba an man a. Oreba chu Oreb lungpuiah an that a, Zeeba chu Zeeb grêp sâwr khurah an that a. Midian-ho chu an ûm ta a; Oreba leh Zeeba lu chu Jordan lui râla Gideona hnênah an rawn la a.
Midian-ho tihtlâwm
1 Tin, Ephraim-hote chuan a hnênah, “Engtiziaa hetianga min ti nge i niha, Midian-ho i beihnaah chuan min sâwm ve loh?” an ti a, an hau nasa hle mai a. 2 Tin, ani chuan an hnênah, “Nangni aiin eng nge ka tihuchuak bîk le? Abiezer-ho grêp lawh ai hian Ephraim-ho grêp hmaih chhar hi a nasa zâwk lo vem ni? 3 Pathianin Midian-ho lal Oreba leh Zeeba chu in kutah a rawn pe ta a ni a. Tichuan, nangni ai hian keiin eng nge ka lo tihuchuak theih bîk ni?” a ti a. Chutichuan, chumi thu a han sawi chuan a chunga an thinrim chu a reh ta a. 4 Tin, Gideona leh a hnêna mi zathum awmte chuan Jordan lui chu an zuk thleng a, an kân a, chau chung chungin an ûm zêl a. 5 Tin, Sukkoth khuaa mite hnênah chuan, “Hêng ka hnungzuite hi khawngaih takin chhangpêr pe teh u khai; an chau tawh êm mai a, Midian-ho lal Zeba leh Zalmuna ka ûm a ni e,” a ti a. 6 Tin, Sukkoth khuaa mi lianhote chuan, “Zeba leh Zalmuna chu i kuta awm tawh ang renga chutia i sipaihote chhang kan han pêk mai tûr chu?” an ti a. 7 Tin, Gideona chuan, “Aw le, LALPAN Zeba leh Zalmuna chu ka kuta mi pêk hunah, thlalêr hlîng leh hnimhlîngneite chuan in taksa chu ka chhun thlêr diai duai mai ang maw le,” a ti a. 8 Tin, chuta ṭang chuan Penuel-ah a han kal a, an hnênah chutiang bawk chuan a sawi leh a: tin, Penuel khuaa mite chuan Sukkoth khuaa mite chhân ang bawkin an lo chhâng ve a. 9 Tin, Penuel khuaa mite hnênah chuan, “Remna thu hâwna ka lo kîr leh hunah he kulh hi ka rawn tichim ang maw le,” tiin a sawi bawk a. 10 Zeba leh Zalmuna chu Karkor-ah an awm a, an sipaihote khawchhak fate sipaiho thi bâng zawng zawng, sîngkhat leh sângnga laite nên; khandaih keng mi ṭhiau nuai khat leh sînghnih an thi si a. 11 Tin, Gideona chu Noba leh Jogbeha chhak lama puan ina chênghote kawngah a han chho va, sipaihote chu a han bei a; sipaihote chu râlmuang takin an lo awm si a. 12 Tin, Zeba leh Zalmuna chu an tlânchhe ta a; tin, ani chuan a ûm a; tichuan, Midian-ho lal pahnih Zeba leh Zalmuna chu a man a, sipaiho zawng zawngte chu a tibuai ta nuaih nuaih a. 13 Tin, Joasa fapa Gideona chu Heres chho aṭangin indona ata chu a kîr leh ta a. 14 Tin, Sukkoth khaw tlangvâl pakhat hi a man a, thu te a zâwt a; tichuan, Sukkoth khuaa mi lianhote leh upate hming chu a ziaksak vek a, sawmsarih leh pasarih an ni a. 15 Tin, Sukkoth khuaa mite hnênah chuan a han kal a, “Zeba leh Zalmuna hi en teh u le, he mite hi alâwm, ‘Zeba leh Zalmuna chu i kuta awm tawh reng anga chutia i mi chaute chhang kan han pêk mai tûr chu?’ tia mi tihel vei kha,” a ti a. 16 Tichuan, chumi khaw upate chu a man a, thlalêr hlîng leh hnimhlîngneite chuan Sukkoth mite chu a zirtîr a. 17 Tin, Penuel khaw kulh chu a tichim a, khuaa mite pawh chu a that a. 18 Tichuan, Zeba leh Zalmuna hnênah chuan, “Tabor tlânga in mi thahte kha mi eng ang nge an nih?” a ti a. Tin, anni chuan, “Nangmah ang bawk hi an ni; lal fa anna an nei ṭheuh mai,” an ti a. 19 Tin, ani chuan, “Ka unau, ka nu fapate ngei an ni asin. LALPA chu a nung ngei ang hian, anni chu lo zuah ta ni ula chu, ka that lo tûr che u,” a ti a. 20 Tin, a fapa upa ber Jethera hnênah chuan, “Khai le, nangin that rawh,” a ti a. Nimahsela, tlangvâl chuan a khandaih a phawi lo; tlangvâl mai a la nih avângin a hlau a ni. 21 Tichuan, Zeba leh Zalmuna chuan, “Nangmah kha lo thawk la, min rawn bei ta che; patling leh patling inbeih tûr alâwm,” an ti a. Tin, Gideona chu a tho va, Zeba leh Zalmuna chu a that ta a; tin, an sanghâwngsei nghâwnga nghâwngkawlte chu a la a. 22 Chutichuan, Israel mite chuan Gideona hnênah, “Nangin kan chungah ro rêl tawh ang che, nang leh i fapa leh, i fapaa fapate chen pawhin; nangin Midian-hote lakah hian min chhandam ta si a,” an ti a. 23 Tin, Gideonan an hnênah, “Kei zawngin in chungah hian ro ka rêl lo vang a, ka fapa lahin in chungah ro a rêl hek lo vang; LALPAN in chûngah ro a rêl zâwk ang,” a ti a. 24 Tin, Gideonan an hnênah, “Thil pakhat erawh chu dîl che u ka duh a ni, mi tinin in râllâk bengbeh chu mi pe ta ṭheuh che u,” a ti a (Ismael-ho an nih avângin rangkachak bengbeh an nei a ni). 25 Tin, anni chuan, “Kan pe mawlh ang che,” an ti a. Chutichuan, puan an phah a, mi tinin an râllâk bengbeh chu an theh chhuak ta ṭheuh va. 26 Tin, chûng rangkachak bengbeh a dîlte chu a rih lam rangkachak sekel sângkhat leh zasarih a ni; nghâwngkawlte, bengbehte, Midian lalte puan senduk tiam lovin, an sanghâwngseite khaidiat awrh pawh tel lovin. 27 Tin, Gideonan chûng chuan ephod a siam a, a awmna Ophra khuaah a dah a. Chutah chuan chumi lakah chuan Israel-ho zawng zawng chu an lo uire zo ta a. Tichuan, Gideona leh a chhûngte tân pawh thang a lo ni ta mai a. 28 Chutichuan, Midian-ho chu Israela thlahte hmaah chuan tihtlâwmin an lo awm ta a; tichuan, an chechâng ta lo va. Tin, Gideona dam chhûng chuan ram chu kum sawmli chhûng râlmuangin a awm a.
Gideona thih thu
29 Tin, Joasa fapa Jerubaala chu a in lamah a awm ta a. 30 Tin, Gideona chuan ama hrin ngei fapa sawmsarih a nei a, nupui tam tak nei a ni si a. 31 Tin, Sekem khuaa a hmeiin fapa a hrinsak bawk a, a hmingah Abimeleka a sa a. 32 Joasa fapa Gideona chu tar kûna damin a thi a; tichuan, Abiezrit mi Ophra khuaa a pa Joasa thlânah an phûm ta a. 33 Tin, heti hi a ni a, Gideona thih veleh chuan Israela thlahte chu an lo hnungtawlh leh ta a, Baal-te lakah an uirê a, Baal-berith chu an pathianah an lo siam ta a. 34 Tin, Israela thlahte chuan an vêla hmêlmate zawng zawng lak ata chhanchhuaktu LALPA an Pathian chu an hre ta lo va; 35 Jerubaala (Gideona chu), Israel-hote chunga theihtâwpa ṭhat chhuah ṭhîntu chhûngte chungah pawh chuan ṭhat an chhuah ve ta hek lo.
Abimeleka
1 Tin, Jerubaala fapa Abimeleka chu Sekem khuaah a nu nuṭate hnênah a kal a, a nu pate chhûngkua zawng zawngte nên a bia a, 2 “Sekem khuaa mi zawng zawngte beng hriatah thu sawi ula, ‘Jerubaala fa zawng zawng mi sawmsarihten in chunga ro an rêl nge ṭha zâwk in tih, pakhatin in chungah ro a rêl?’ ti teh u khai. Tin, kei pawh in thisen zawmpui ka ni tih hi hre reng bawk ang che u,” tiin a sawi a. 3 Tin, a nu nuṭate chuan Sekem khuaa mi zawng zawngte beng hriatah chuan chûng a thu zawng zawng chu an sawi a; tichuan, Abimeleka zui duhna rilru an lo pu ta a, “Ani chu kan unau a ni alâwm,” an ti ta si a. 4 Tin, Baal-berith in ata tangka sawmsarih an pe a, chu chuan Abimelekan mi ho tak tak leh mi tawrawt pui puite a ruai a, anni chuan amah chu an zui a. 5 Tin, Ophra khuaa a pa inah a va kal a, Jerubaala fapa, a unau sawmsarihte chu lung pakhat chungah a that hlawm a. Jerubaala fapa naupang ber Jothama erawh chu a damah a ṭang a; a lo biru hlauh a ni. 6 Tin, Sekem khuaa mi zawng zawng leh Beth-milo-a mi zawng zawng chu an pung khâwm a; tichuan, Abimeleka chu Sekem khuaa lungphun bul sasaw kiangah chuan lalah an siam ta a. 7 Tin, chu chu Jothama an hrilh chuan Gerizim tlâng chhîpah a han ding a, aw ring takin a au va, an hnênah, “Nangni Sekem khuaa mite u, ka thusawi hi ngaithla teh u; tichuan, Pathian pawhin in thu a lo ngaithla ve dâwn nia. 8 Vawi khat chu thing hi an lal atâna hriak thih tûrin an va chhuak a; olive thing hnênah hian, ‘Nang kan lalah awm ta che,’ an ti a. 9 Nimahsela, olive thing chuan an hnênah, ‘Pathian leh mihring chawimawi phah nâna an mi hmanna ber ka hriak hi chhuahsanin thing chungah lehlam lehlaman ka phe ka phe tehlul ang maw?’ a ti a. 10 Tin, thingte chuan theipui kûng hnênah hian, ‘Hawh teh, nang kan lalah awm ang che,’ an va ti a. 11 Nimahsela, theipui kûng chuan an hnênah, ‘Ka thlumna leh ka rah ṭha tak hi chhuahsanin, thing chungah lehlam lehlaman ka phe ka phe tehlul ang maw?’ a ti a. 12 Tin, thingte chuan grêp hrui hnênah, ‘Hawh teh, nang kan lalah awm ang che,’ an ti a. 13 Tin, grêp hrui chuan an hnênah, ‘Pathian leh mihring tilâwm ṭhîntu ka uain hi chhuahsanin, thing chungah lehlam lehlaman ka phe ka phe tehlul ang maw?’ a ti a. 14 Chutichuan, thing zawng zawng chuan hlîng hnênah, ‘Hawh teh, nang kan lalah awm ang che,’ an ti a. 15 Tin, hlîng chuan thing hnênah, ‘In lal atâna hriak mi thih takzet in nih chuan ka hlimah hian lo bi ta che u; in nih loh erawh chuan hlîngah chuan mei lo chhuakin Lebanon tlânga sidar thingte chu kâng zo vek rawh se,’ a ti a. 16 “Chutichuan, Abimeleka in lal atâna in lo siam ta hi tihtakzet leh fel taka ti in niha, Jerubaala leh a chhûngte chu ṭha taka in tiha, a phu ang zêla a chunga lo ti te in niha 17 (ka pa hian râl a lo dosak che u a, a lo thih phah ta hial a, Midian-ho kut ata chu a lo chhanchhuak ta che u a: 18 vawiinah hian ka pa chhûngte chungah chuan in lo hel a, a fapate sawmsarih zet lung pakhat chungah in lo tihlum a, in unaupa a nih avângin a bawihnu fapa Abimeleka hi Sekem khaw mite lalah in lo siam ta si a), 19 vawiinah hian Jerubaala leh a chhûngte chunga tih tak zet leh fel taka ti in nih phawt zawngin le, Abimeleka chungah hian lâwm rawh u; tin, ani pawh in chungah hian lâwm rawh se. 20 Chutiang a nih loh erawh chuan Abimeleka aṭang hian mei lo alh chhuak sela, Sekem khuaa mite leh Beth-milo mite chu kâng zo vek rawh se; tin, Sekem khuaa mite leh Beth-milo aṭangin mei lo alh chhuak sela, Abimeleka chu kâng zo vek rawh se,” a ti a. 21 Chutichuan, Jothama chu a tlân a, a tlân bo va, Beer-ah a tlân a, a unaupa Abimeleka a hlauh avângin chutah chuan a awm ta reng a. 22 Tin, Abimeleka chu Israel-ho chungah kum thum a lal a. 23 Tin, Pathianin Abimeleka leh Sekem khuaa mite kârah chuan rilru sual a awmtîr a; tichuan, Sekem khuaa mite chuan Abimeleka chungah vervêk takin an ti ta a; 24 chu chu Jerubaala fapa sawmsarihte chunga râwng taka an tih avânga an chunga phuba lâkna a lo thlen theihna tûr leh, anmahni thattu an unaupa Abimeleka chungah leh, a unaute that tûra a kut lo tichaktu Sekem-hote chunga an thisen a awm theihna tûrin a ni. 25 Tin, Sekem khuaa mite chuan tlâng chhîpahte amah châng rutute an dah a, chumi kawnga kal apiangte chu an lo suam ṭhîn a; chumi thu chu Abimeleka an hrilh a. 26 Tin, Ebeda fapa Gaala a unauteho nên an lo thawk a. Sekem khuaah an lût a; Sekem-hote chuan an lo ringhlel lo va. 27 Tin, lo lamah an va kal a, an grêp huana mi an lo va, an chîl a, an kût a, an pathian inah an lût a, an eiin an in a, Abimeleka chu ânchhia an lawh a. 28 Tin, Ebeda fapa Gaala chuan, “Tu nge ni Abimeleka chu? Sekema pawh hi tu nge maw a niha, keinin a rawng kan han bâwl tehlul tûr chu? Jerubaala fa a ni lâwm ni? Zebula hi a upa a ni lâwm ni? Sekema pa Hamora hote rawng i bâwl ang u hmiang! Engah nge ani rawng chu kan bâwl ang? 29 Hêngho hi ka thuin han awm teh sela chu aw! Abimeleka hi ka han titlâwm dêr mai tûr,” a ti a. Tin, Abimeleka hnênah, “I sipaite tipung la, lo thawk rawh khai,” a ti a. 30 Tin, chumi khaw rorêltu Zebula chuan Ebeda fapa Gaala thusawi chu a lo hriat chuan, a thin a ur ta thut a. 31 Tichuan, fin vervêkin Abimeleka hnênah chuan, “Ngai teh, Ebeda fapa Gaala leh a unauteho Sekem-ah an lo kal a; tin, ngai teh, i chunga helpui tumin khuaa mite an fuihpawrh e. 32 Chutichuan, i hote nên a zân a zânin lo thawk ula, phûlah lo châng rawh u. 33 Tichuan, heti hi a ni ang a, zîngah ni chhuah veleh, tho la, khua chu rawn bei mai ang che; tin, ngai teh, amah leh a hote chuan an rawn beih dâwn veleh che, remchâng i tih dân ang angin an chungah lo ti mai ang che,” tia hrilh tûrin mite a tlântîr a. 34 Chutichuan, Abimeleka leh a hote zawng zawng chu a zân a zân chuan an tho va, pâwl lia insiamin Sekem khua chu an hual ta a. 35 Tin, Ebeda fapa Gaala chu a va chhuak a, khawpui luhna kawngkaah chuan a va ding a; Abimeleka chu a hote nên chuan an chân rûkna hmun ata chu an lo thawk ta a. 36 Tin, Gaalan mipuite a han hmuh chuan Zebula hnênah, “Ngai teh, tlâng chhîp aṭangin mipuite an lo chhuk e,” a ti a. Tin, Zebula chuan a hnênah, “Tlâng hlim saw mihring angin i hmu mai a ni ang,” a ti a. 37 Tin, Gaala chuan, “En ta che maw le, ram lai taka saw mipui an lo chhuk, pâwl khat phei chu Meonenim sasaw thing kawngah an lo kal saw,” a ti leh a. 38 Tichuan, Zebula chuan a hnênah, “ ‘Tu nge maw Abimeleka, a rawng kan han bâwl tûra chu ni?’ tia i sawina ka kha khawiah nge ni ta? Hêngho hi i mi hmuhsitate ngei kha an ni lâwm ni? Va chhuak la, va bei mawlh rawh khai,” a ti a. 39 Tichuan, Gaala chuan Sekem-hote hma chu a va hruai a. Abimeleka chu a va bei ta a. 40 Tin, Abimeleka chuan a lo ûm a, a tlânchhe ta a, khawpui luhna kawngka thlengin mi tam tak hliamin an tlu phung mai a. 41 Tin, Abimeleka chu Aruma khuaah chuan a awm ta a; tichuan, Zebula chuan Gaala leh a unauteho chu Sekem khuaa awm thei lo tûrin a hnawt chhuak ta vek a. 42 Tin, heti hi a ni a, a tûkah chuan Sekem mipuite chu phûlah an va kal chhuak a; tin, Abimeleka an va hrilh a. 43 Tin, mipuite chu a hruai a, pâwl thumah a siam a, phûlah chuan an châng a. Tin, a han hawi a, ngai teh, mipuite chu khawpui ata an lo chhuak a; tichuan, anmahni chu a lo bei a, a lo that a. 44 Tin, Abimeleka leh a pâwlhote chuan an lo bawh a, khawpui luhna kawngkaah chuan an va ding a; tin, pâwl hnihte chuan phûla awmho zawng zawng chu an bawh chiam a, an that ta hlawm a. 45 Tin, Abimeleka chuan khawpui chu chumi ni chuan nilêngin a bei a; khawpui chu a la a, a chhûnga mite chu a that a; khawpui chu a chhu chhe vek a, chiin a theh ta a. 46 Tin, Sekem kulha awm zawng zawngte chuan chumi thu chu an lo hria a. El-berith kulhbîngah an lût ta vek a. 47 Tin, Sekem kulha mi zawng zawngte chu an awm khâwm vek tih Abimeleka an hrilh a. 48 Tin, Abimeleka leh a hnêna awmho zawng zawngte chu Zalmon tlângah an chho va. Tin, Abimeleka chuan hreipui a keng a, thingzâr a chêk thla a, a pu ta a; tin, a hote hnênah chuan, “Ka tih dân in hmu a, ka tih ang hian nangni pawhin ti ve thuai thuai rawh u,” a ti a. 49 Tin, mi zawng zawngin thingzâr chu an chêk thla ve ṭheuh va, Abimeleka chu an zui a, kulhbîng vêlah chuan an dah zêl a, kulhbîngah chuan an hâl khum ta a; chutichuan, Sekem kulha mi zawng zawngte pawh chu an thi a, mipa leh hmeichhia sângkhat lai an ni. 50 Tichuan, Abimeleka chu Thebez khuaah a kal a, Thebez khua chu a hâl a, a la a. 51 Amaherawhchu, chu khawpui chhûngah chuan kulhpui a awm a, chutah chuan mipa leh hmeichhia zawng zawng leh khawpui chhûnga mi zawng zawng chu an tlân lût a, an inkhâr khum tlat a, kulh chungah chuan an awm khâwm a. 52 Tin, Abimeleka chu kulh lamah chuan a han kal a, a han bei a, hâl tumin kulh kawngka bulah a kal a. 53 Tin, hmeichhia tuin emaw buh râwt sawmna chung lam lung hi Abimeleka luah a zuk thlâk a, a lu ruh a keh a. 54 Tichuan, a râlthuam kengtu tlangvâl chu a ko thuai a, a hnênah, “I khandaih kha phawi la, mi han that teh khai; tichuan, miten, ‘Hmeichhe thah a ni,’ mi tih loh nân,” a ti a. Tin, a tlangvâl chuan a vit tlang ta zawk a; tichuan, a thi ta a. 55 Tin, Israel-hote chuan Abimeleka chu a thi tih an hriat veleh mi tin mahni in lamah an haw ta ṭheuh va. 56 Abimelekan a unaute sawmsarih a thaha, a pa chunga a tih dân kawnga a suahsualna kha Pathianin chutiang chuan a lo thungrûl ta a ni. 57 Tin, Sekem khuaa mite suahsualna zawng zawng kha Pathianin a rawng thungrûl ve ta bawk a; tin, Jerubaala fapa Jothama ânchhia kha an chungah chuan a lo tla ta a ni.
Tola
1 Tin, Abimeleka hnuah chuan Israel-hote chhanchhuak tûrin Isakar mi Dodova fa Pua fapa Tola a lo chhuak a, Ephraim tlâng ram Samir khuaah a awm a. 2 Tin, kum sawmhnih leh kum thum Israel-te ro a rêl a; tin, a thi a, Samir khuaah an phûm a.
Jaira
3 Chumi hnuah chuan Gilead mi Jaira a lo chhuak a, kum sawmhnih leh kum hnih Israel-te ro a rêl a. 4 Tin, chu mi chuan fapa sawmthum, sabengtungno sawmthum chunga chuang ṭhîn mi a nei a; tin, Gilead ramah khaw sawmthum an nei a, chûng chu tûn thleng hian Havoth-jair an ti a. 5 Tin, Jaira chu a thi a, Kamon khuaah an phûm a.
Jephtha
6 Tin, Israela thlahte chuan LALPA mit hmuhin thil sual an lo ti leh ta a, Baala-te leh Astorethi-te, Suria-ho pathiante, Zidon-ho pathiante, Moab-ho pathiante, Amona thlah pathiante, Philistia-ho pathiante rawng an lo bâwl ta a; tichuan, LALPA chu an hawisan a, a rawng an bâwl ta lo va. 7 Chutichuan, LALPA chu Israel-te chungah chuan a thinrim ta hle mai a, Philistia-hote hnênah leh Amona thlahte hnênah a hralh ta a. 8 Tin, chumi kum chuan Israela thlahte chu an timangangin, an hnehchhiah êm êm mai a - Jordan râl Gilead rama Amor-ho rama Israela thlah awm zawng zawngte chu kum sâwm leh kum riat chhûng zet an hnehchhiah a. 9 Tin, Amona thlahte chu Juda-hote, Benjamin-hote leh Ephraima thlahte bei tûrin Jordan râl an kai a; chutichuan, Israel-hote chu mangan namênin an mangang ta lo va. 10 Tin, Israela thlahte chuan, “Kan Pathian chu kan lo hawisan tâk ngeia, Baala-te rawng chu kan lo bâwl tâk avângin i chungah thil kan lo tisual ta a ni,” tiin LALPA an au va. 11 Tin, LALPAN Israela thlahte hnênah, “Aigupta-ho lak ata te, Amor-ho lak ata te, Amona thlahte lak ata te, Philistia-ho lak ata te ka chhanchhuak che u a ni lo vem ni? 12 Zidon-hote, Amalek-hote, Maon-hote pawhin an hnehchhiah che u a; tin, mi au va; tichuan, an kut ata chu ka chhanchhuak che u a. 13 Nimahsela, nangnin mi hawisan a, pathian dangte rawng chu in bâwl ta zâwk a. Chuvângin, ka chhanchhuak tawh lo vang che u. 14 In thlan pathiante chu au ta che u; anni chuan in mangan hunah chuan chhanchhuak che u ang hmiang,” a ti a. 15 Tin, Israela thlahte chuan LALPA hnênah, “Thil kan lo tisual ta a ni! Nangin ṭha i tih ang angin kan chungah rawn ti langin; a chhan erawh chu vawiinah hian khawngaih takin min rawn chhanchhuak hrâm rawh khai,” an ti a. 16 Tichuan, an zînga hnam dang pathiante chu an dah bo vek a, LALPA rawng chu an bâwl ta a. Tin, Israel-hote manganna chu a tihtâwpsak ta a ni. 17 Tin, Amona thlahte chu an pung khâwm a, Gilead ramah chuan an va inkulh a. Tin, Israela thlahte chu an inkhâwm ve chiam a, Mizpe khuaah an inkulh a. 18 Tin, mipuiho, Gilead rama mi lianhote chu an inbia a, “Amona thlahte bei ṭan tûr hi tu nge awm le? Gilead rama awm zawng zawngte chunga hotuah a awm ang,” an ti a.
1 Tin, Gilead mi Jephtha chu mi chak huaisen a ni a, nawhchizuar fapa a ni; tin, Gileada chuan Jephtha chu a hring a. 2 Tin, Gileada chu a nupui chuan fapate a hrinsak bawk a; tin, a nupuia fapate chu an lo puitlin chuan Jephtha chu an hnawt chhuak a, a hnênah, “Nang zawngin kan pa in ro i luah thei lo vang, hmeichhe dang laka fa i ni si a,” an ti a. 3 Chutichuan, Jephtha chu a unauteho hnên ata chu a tlân bo va, Tob ramah a awm ta a; tin, Jephtha hnênah chuan mi ho tak takte an chêng khâwm a, an zui ṭhîn a. 4 Tin, heti hi a ni a, nakin deuhvah chuan Amona thlahte chuan Israel-hote chu an do ta a. 5 Tin, heti hi a ni a. Amona thlahte chuan Israel-hote chu an han do chuan, Gilead-ho upate chu Tob rama mi Jephtha hruai tûrin an kal chhuak ta a. 6 Jephtha hnênah chuan, “Amona thlahte kan beih theihna tûrin kan hotu berah lo awm ta che,” an ti a. 7 Tin, Jephtha chuan Gilead-ho upate hnênah, “Mi hua a, ka pa in ata chu mi hnawt chhuak a ni lâwm ni? Engati nge in mangan veleh ka hnêna in lo kal hi?” a ti a. 8 Tin, Gilead-ho upate chuan Jephtha hnênah, “Chu vâng tak chuan alâwm tûnah hian i lam kan lo hawi leh, Amona thlahte va bei tûra kan hnêna i kal theihna tûrin; tin, Gilead rama awm zawng zawngte chungah kan hotuah i awm ang,” an ti a. 9 Tin, Jephtha chuan Gilead-ho upate hnênah chuan, “Amona thlahte bei tûra mi hruai hâwn leha, tin, LALPAN anni chu mi pêk chuan in hotuah ka awm takmeuh ang maw?” a ti a. 10 Tin, Gilead-ho upate chuan Jephtha hnênah, “LALPA chu kan kârah hretu a ni ang; i thu ang angin kan ti ngei ngei ang,” an ti a. 11 Chutichuan, Jephtha chu Gilead-ho upate hnênah chuan a kal ta a, mite chuan hotu atân leh a puipa ber atân an lo siam ta a; tin, Jephtha chuan Mizpe khuaah LALPA hmaah thu engkim a sawi ta a. 12 Tin, Jephtha chuan Amona thlahte lal hnênah chuan, “Engtiziaa hetia ka ram rawn bei tûra ka hnêna lo kal mai nge maw i nih le?” tiin palai a tîr a. 13 Tin, Amona thlahte lal chuan, “Israel-ho Aigupta ram ata an lo chhuah lai khân ka ram an lâk vâng alâwm, Arnon aṭanga Jabok leh Jordan thlengin. Chuvângin, chûng ramte chu tlang takin mi rawn pe leh mai rawh,” tiin Jephtha palaite chu a lo chhâng a. 14 Tichuan, Jephtha chuan Amona thlahte lal hnênah palai a tîr leh a, 15 a hnênah, “Jephthan heti hian a ti e: ‘Israel-hoten Moab ram an lâksak lo va, Amona thlahte ram pawh an lâksak hek lo; 16 Aigupta ram ata an lo chhuahna Tuifinriat Sen thlenga thlalêr kha Israel-ten an kal tlanga, Kadesh kha an thlen khân, 17 Israel-hovin Edom lal hnênah, “Khawngaih takin i ram kan kal tlang ang e,” tiin palai an tîr a; nimahsela, Edom lal chuan a lo ngaithla duh lo va. Tin, chutiang bawkin Moab lal hnênah a tîr leh a; nimahsela, a lo remti lo va. Tichuan, Israel-hote chu Kadesh-ah an awm ta a. 18 Tichuan, thlalêr chu an kal tlang a, Edom ram leh Moab ram chu an kal hual a, Moab ram chhak lampangah an kal a. Arnon lehlam pangah awmhmun an khuar a; Moab ram chhûngah zawng an lût hauh lo a ni, Arnon chu Moab ramri chin a ni si a. 19 Tin, Israel-hovin Amor-ho lal Sihona, Hesbon lal hnênah palai an tîr a; Israel-ho chuan a hnênah, “Kan hmun lama kal nân khawngaih takin i ram kan kal tlang ang e,” an ti a. 20 Nimahsela, Sihona chuan Israel-ho chu a ram kal tlang atân chuan a ring zo lo va. Sihona chuan a mite zawng zawng chu a khâwm a, Jahaz khuaah a inkulh a, Israel-ho chu a bei ta a. 21 Tin, LALPA, Israel-te Pathianin Sihona leh a hote zawng zawng chu Israel-hote kutah a pe a, an that ta a. Chutichuan, Israel-hote chuan chumi ram Amor-hote awmna ram zawng zawng chu an nei ta vek a. 22 Tichuan, Amor-ho ramri chin zawng zawng Arnon aṭanga Jabok thleng rakin, thlalêr aṭanga Jordan thleng rakin an nei ta vek a ni. 23 Chutichuan, LALPA, Israel-te Pathianin a mi Israel-hote hmaah Amor-ho chu a chhuhsak a ni a, nangin i neihsak theih thu em ni? 24 I pathian Kemosan i puala a lo ruatsak che chu i nei dâwn a ni lâwm ni? Chutichuan, LALPA kan Pathianin kan hmaa a chhuhsakte chu kan nei ang. 25 Moab lal Zipora fapa Balaka aiin i chak zâwk em ni? Ani chuan Israel-hote kha a chawk buaiin, a do ngai em ni? 26 Israel-ho, Hesbon-ah leh a khawperah te, Aroer leh a khawperah te, Arnon ramri dep khawpui zawng zawngah te chuan kum zathum zet an awm lai khân, eng vânga la lova lo la awm reng nge i nih? 27 Chuvângin, i chungah hian thil eng mah ka tisual lo ve; nangmah zâwk hian mi beih i tum avângin ka chungah hian thil i tisual a ni e. LALPA, Rorêltu chuan tûnah hian Israela thlahte leh Amona thlahte kâra thu chu ngaihtuah rawh se,’ a ti,” tiin. 28 Nimahsela, Amona thlahte lal chuan Jephtha thuchah chu a lo ngaithla duh lo va. 29 Chutichuan, LALPA Thlarau chu Jephtha chungah a lo thleng a; tichuan, Gilead leh Manasea ram a kal tlang a, Gilead rama Mizpe aṭang chuan Amona thlahte hnênah chuan a kal zêl a. 30 Tin, Jephthan LALPA hnênah chhia a chham a, “Amona thlahte hi ka kuta mi pêk takmeuh chuan, 31 heti hi a ni ang a, Amona thlahteho hnên aṭanga râlmuanga ka hâwn leh hun chuan eng pawh ka kawngka aṭanga mi rawn hmuak hmasa ber apiang chu LALPA ta tûr a ni ang a, hâlral thilhlan atân ka hmang ngei ngei ang,” a ti a. 32 Chutichuan, Jephtha chu Amona thlahte bei tûr chuan a kal ta a; tin, LALPAN a kutah a pe ta a. 33 Tin, Aroer aṭanga Minith thlengin a bei zêl a, khaw sawmhnih zet; tin, Abel-keramim thlengin a that chiam a. Chutichuan, Amona thlahte chu Israela thlahte hmaah chuan an lo tlâwm ta a.
Jephtha fanu
34 Tin, Jephtha chuan a awmna Mizpe khuaa a in chu a thleng ta a; tin, ngai teh, a fanu chuan khuangtête nên lâmin a lo hmuak a; a fa neih chhun a ni a, amah lo chu fapa leh fanu dang rêng rêng a nei lo. 35 Tin, heti hi a ni a, amah a han hmuh veleh chuan a puante a pawt thlêr a, “E khai, ka fanu! Mi titlâwm ta hle mai a! Mi timangangtu zînga mi i ni ta! LALPA lamah ka kâ ka lo âng ta si a, chu chu zûk leh thei ka ni si lo,” a ti a. 36 Tin, ani chuan a hnênah, “Ka pa, LALPA lamah i kâ zu lo âng ta chia, i kâa i thuchhuak ang ngeiin ka chungah i ti tûr alâwm; LALPAN i hmêlma Amona thlahte chung ngeiah chuan i phuba zuk la ta si a,” a ti a. 37 Tin, a pa hnênah chuan, “Hetiang hian ka ti ang e: thla hnih chhûng chu keimahin ka han tâl hrang ang a, tlângahte ka han rawl ang a, ka nulâtna hi ka han sûn ang e, kei leh ka ṭhianteho nên hian,” a ti a. 38 Tin, ani chuan, “Kal ta che,” a ti a. Tichuan, thla hnih thang tûrin a tîr a; tin, a chhuak ta a, amah leh a ṭhianteho nên chuan; tin, tlângahte chuan a nulâtna chu a han sûn a. 39 Tin, heti hi a ni a, thla hnih hnuah chuan a pa hnênah a haw leh ta a, ani chuan chhia a lo chham tawh ang khân a chungah a ti ta a. Mipa tu mahin an pâwl lo. 40 Chutichuan, Israel-hote zîngah chuan Israela fanuten Gilead mi Jephtha fanu chu kum tin ni li sûn dânah an lo nei ta a.
Jephtha leh Ephraim-hote
1 Tin, Ephraim-hote chu an pung khâwm chiam a, hmâr lam panin an kal a; tin, Jephtha hnênah, “Engati nge Amona thlahte bei tûra i hnêna kal tûra min rawn sâwm ve loh ni? I inah kan hâl khung dâwn che a ni,” an ti a. 2 Tin, Jephtha chuan an hnênah, “Amona thlahteho hi ka mite nên theihtâwp chhuahin kan bei a ni a; ka chah lai che u khân an kut ata mi chhanchhuak si lo. 3 Tichuan, nangnin mi chhanchhuak duh lo tih ka hriat veleh thih dâwn miah lovin ka ṭang a, Amona thlahte bei tûrin ka va thawk a; tichuan, LALPAN anniho chu ka kutah mi pe ta a. Chuvângin, eng atan nge mi bei tûra vawiinah hian in lo thawh ni?” a ti a. 4 Chutichuan, Jephtha chuan Gilead mi zawng zawng chu a khâwm chiam a, Ephraim-ho chu a bei ta a. Tin, Gilead-hote chuan Ephraim-ho chu an that ta chiam a, “Nangni Ephraim hnam tlân bo Gilead-ho, Ephraim-ho zîngah leh Manase-ho zînga tel ve mai maiho,” an tih ṭhin avângin. 5 Tin, Gilead-hote chuan Ephraim-ho dep Jordan lui kaite chu an lo man a. Tin, heti hi a ni a, Ephraim-ho tlân bote chuan, “Ka lo kai ang e,” an tih apiangin Gilead-hote chuan an hnênah, “Ephraim mi i ni em?” an lo ti zêl a. Annin, “Ni lo ve,” an lo tih chuan, 6 an hnênah, “ ‘Shiboleth’ han ti teh,” an lo ti a; tin, anni chuan, “Siboleth,” an lo ti zâwk ṭhîn a, an lam fiah ve thiam si ṭhîn lo va; tichuan, an man a, Jordan lui kaiahte chuan an lo that zêl a. Chumi ṭum chuan Ephraim-ho chu sîngli leh sânghnih an that a. 7 Tin, Jephtha chuan Israel-ho chungah kum ruk ro a rêl a. Tichuan, Gilead mi Jephtha chu a thi a, Gilead rama khaw pakhatah an phûm ta a.
Ibzana, Elona leh Abdona
8 Tin, a hnuah chuan Bethlehem khuaa mi Ibzanan Israel-ho chungah ro a rêl a. 9 Chu mi chuan fapa sawmthum a nei a, fanu sawmthum ram dangah a kaltîr a; tin, a fapate tân chuan ram dang mi fanu sawmthum a hruaisak bawk a. Tin, Israel-ho chungah kum sarih ro a rêl a. 10 Tin, Ibzana chu a thi a, Bethlehem khuaah an phûm a. 11 Tin, a hnuah chuan Zebulun mi Elonan Israel-ho chungah ro a rêl a; Israel-ho chungah kum sâwm ro a rêl a. 12 Tin, Zebulun mi Elona chu a thi a, Zebulun rama Aijalon khuaah an phûm a. 13 Tin, chumi hnuah chuan Pirathon mi, Hilela fapa Abdonan Israel-ho chungah ro a rêl a. 14 Chu mi chuan fapa sawmli leh tupa sawmthum, sabengtungno sawmsarih chunga chuang ṭhîn mi a nei a. Ani chuan Israel-ho chungah kum riat ro a rêl a. 15 Tin, Pirathon mi, Hilela fapa Abdona chu a thi a, Ephraim ram, Amalek mite tlâng ramah Pirathon khuaah an phûm ta a.
Samsona pian thu
1 Tin, Israela thlahte chuan LALPA mit hmuhin thil sual an lo ti leh ta a; tichuan, LALPAN Philistia-ho kutah kum sawmli a awmtîr a. 2 Tin, Zora khuaah Dan hnam mi pakhat a awm a, a hming chu Manoa a ni a; a nupui chu a ching a, nau rêng rêng a pai ngai lo va. 3 Tin, chu hmeichhe hnênah chuan LALPA vântirhkoh a rawn inlâr a, a hnênah chuan, “Ngai teh khai, i ching a, nau rêng rêng i la pai ngai lo va; nimahsela, i rai ang a, fapa i hring ang. 4 Chutichuan, fîmkhur rawh khai, uain leh zû rêng rêng in suh la, ei thiang lo thil rêng rêng pawh ei hauh suh ang che. 5 Ngai teh, i rai ang a, fapa i hring dâwn si a. A luah chuan bakmehna rêng rêng rawih a ni lo vang, naupang chu chhûla a awm lai aṭangin Pathian tâna Nazarit mi a ni dâwn si a; ani chuan Israel-hote hi Philistia mite kut ata chu a chhanchhuak ṭan ang,” a ti a. 6 Chutichuan, hmeichhia chuan a pasal hnênah, “Pathian mi mi pakhat ka hnênah a lo kal a, a hmêl chu vântirhkoh hmêl ang, ṭihbaiawm tak a ni; khawi lam mi nge a nih ka zâwt hlei lo va, ani chuan a hming mi hrilh bawk lo va. 7 Amaherawhchu, ka hnênah, ‘Ngai teh, i rai ang a, fapa i hring ang; chutichuan, uain leh zû rêng rêng in suh la, ei thiang lo thil rêng rêng pawh ei hauh suh ang che; naupang chu chhûla a awm lai aṭanga a thih thlengin Pathian tâna Nazarit mi a ni dâwn si a,’ a ti a,” tiin a sawi a. 8 Chutichuan, Manoa chuan LALPA hnênah a ngên chiam a, a hnênah, “Aw LALPA, khawngaih takin Pathian mi i rawn tirha kha kan hnênah lo kal leh sela, naupang lo piang tûr chu engtin nge kan tih ang min han zirtîr rawh se,” a ti a. 9 Tin, Pathianin Manoa thusawi chu a lo ngaithla a; tin, hmeichhia chu phûla a ṭhut laiin a hnênah Pathian vântirhkoh chu a lo kal leh a; a pasal Manoa erawh chu a hnênah a awm ve lo va. 10 Tin, hmeichhia chu hmanhmawh takin a tlân ta thuai a, a pasal chu a va hrilh a, a hnênah, “Ngai teh, hmannia ka hnêna lo kala kha ka hnênah a rawn inlâr leh ta e,” a ti a. 11 Tichuan, Manoa chu a tho va, a nupui chu a zui a, chu mi hnên chu a va thleng a, a hnênah, “Nangmah hi em ni hmeichhe hnêna thu sawitu chu?” a ti a. Tin, ani chuan, “Ni e,” a ti a. 12 Tin, Manoa chuan, “I thu ang zêl chuan lo thleng rawh se! Naupang awm dân tûr chu engtin nge ni ang a, eng nge ni a thawh tûr chu ni ang le?” a ti a. 13 Tin, LALPA vântirhkoh chuan Manoa hnênah, “Hmeichhe hnêna ka sawi zawng zawng kha ngaihtuah ṭha mai rawh se. 14 Grêp hruia mi rêng rêng chu ei tûr a ni lo va, uain leh zû rêng rêng a in tûr a ni lo, ei thiang lo thil rêng rêng pawh a ei tûr a ni lo; thu ka pêk tâk zawng zawng kha vawng ṭha rawh se,” a ti a. 15 Tin, Manoan LALPA vântirhkoh hnênah chuan, “Khawngaih takin kan chelh ang chia, kêlno kan han buatsaihsak rih ang che,” a ti a. 16 Tin, LALPA vântirhkoh chuan Manoa hnênah, “Mi chelh mah la, i chaw zawng ka ei lo vang. Hâlral thilhlan tûra buatsaih i nih erawh chuan LALPA hnênah i hlân tûr a ni,” a ti a. Manoa chuan ani chu LALPA vântirhkoh a ni tih a hre si lo va. 17 Tin, Manoan LALPA vântirhkoh hnênah chuan, “Tu nge i hming, i thusawi ang ngeia a lo thlen huna kan chawimawi theihna tûr chein?” a ti a. 18 Tin, LALPA vântirhkoh chuan a hnênah, “Engati nge ka hming mi zawh? Sawi mi a ni hlei nêm,” a ti a. 19 Chutichuan, Manoa chuan kêlno chu ei tûr thilhlan nên a va la a, lungpui chungah chuan LALPA hnênah a hlân a. Tin, vântirhkoh chuan Manoa leh a nupuiin an thlîr reng lai chuan thil mak tak a ti ta a - 20 maichâm aṭanga meialh chu vân lama a chhoh lai chuan, LALPA vântirhkoh chu maichâma meialhah chuan a chho ta mai a! Manoa leh a nupuiin chu thil an hmuh chuan leiah an bawkkhup ta dêr a. 21 Amaherawhchu, LALPA vântirhkoh chu Manoa leh a nupui hnênah chuan a rawn inlâr leh ta lo. Tichuan, Manoa chuan LALPA vântirhkoh a ni tih a hre ta a. 22 Tin, Manoa chuan a hnênah, “Pathian kan hmuh tâk avâng hian kan thi ngei ang,” a ti a. 23 Nimahsela, a nupui chuan a hnênah, “LALPAN min tihhlum a tum te chuan hâlral thilhlan leh ei tûr thilhlan kan hlante kha a chhâng duh hlei nâng, hêng ang zawng zawngte pawh hi min entîr lo vang a, hêng ang thilte pawh hi tûn ṭumah min hrilh hek lo vang,” a ti a. 24 Tin, hmeichhia chuan fapa chu a hring ta a, a hmingah Samsona an sa a; tin, nausên chu a lo sei lian a, LALPAN mal a sâwm a. 25 Tin, Zora leh Estaol inkâra Mahane-dan hmunah chuan LALPA thlarauvin a rawn khawih harh ṭan ta a.
Samsona leh Timna khaw nula
1 Tin, Samsona chu Timna khuaah chuan a zuk kal a, Timna khuaah chuan Philistia-ho fanute zînga mi hmeichhe pakhat hi a zuk hmu a. 2 Tin, a lo hâwn chhoh leh chuan a nu leh a pa chu a hrilh a, “Timna khuaah, Philistia-ho fanute zînga mi hmeichhe pakhat ka hmu a; ka nupuiah mi neihsak rawh u,” a ti a. 3 Tichuan, a nu leh a pa chuan a hnênah, “I unaute fanute zîngah emaw, kan chite zawng zawng zîngah hian emaw hmeichhia an awm hauh lo vem ni le, Philistia-ho serh tan lohte zînga nupui tûr i zuk zawn tâk mai?” an ti a. Tin, Samsona chuan a pa hnênah, “Mi neihsak mai rawh; ka duh êm asin maw le,” a ti a. 4 Nimahsela, a nu leh a pa chuan chu chu LALPA tih a ni tih an hre lo va - Philistia-ho chungah remchâng a zawng a ni si a. Chutih lai chuan Philistia-hote chuan Israel-hote chungah ro an rêl a. 5 Chutichuan, Samsona chu a nu leh a pa nên Timna khuaah chuan an zuk kal a, Timna khuaa grêp hmun hi an zu thleng a. Tin, ngai teh, sakeibaknei vânglai hian a lo rûm khum a. 6 Tin, LALPA thlarau chu a chungah nasa takin a lo thleng a; tichuan, kêlno pawh sawm ang maiin a pawt sawm ta mai a, eng mah a keng si lo va. Nimahsela, a thiltih chu a nu leh a pa a hrilh lo. 7 Tin, a zuk kal a, hmeichhia chu a kâwm a; Samsona chuan a duh hle mai a. 8 Tin, nakin deuhvah chuan zuk neih tumin a kal leh a, sakeibaknei ruang chu en tumin a va pêng a; tin, ngai teh, sakeibaknei taksaah chuan khuai hi a lo awm mur mur a, a zû pawh a lo awm a. 9 Chu chu a la a, a kal leh ta a, a kal pahin a ei zêl a. Tin, a nu leh a pa hnên chu a han thleng a, a pe ve a, anni pawh chuan an ei a; amaherawhchu, khawizu chu sakeibaknei taksaa mi a lâk a ni tih eng mah a hrilh lo va. 10 Tin, a pa chu hmeichhe hnênah chuan a zuk kal a. Tin, chutah chuan Samsonan ruai a ṭheh a; chu chu tlangvâlte tih dân a ni rêng a. 11 Tin, heti hi a ni a, amah an hmuh veleh a hnêna awm ve tûrin ṭhian sawmthum an hruai a. 12 Tin, Samsona chuan an hnênah, “Tûnah hian thu khirh ka zâwt teh ang che u le. Ruaiṭheh ni, ni sarih chhûnga mi hrilhfiah theiha, in hriat chhuah theih chuan puanzaisîn silh sawmthum leh inthlâkna puan sawmthum ka pe ang che u. 13 Amaherawhchu, mi hrilhfiah theih loh chuan, puanzaisîn silh sawmthum leh inthlâkna puan sawmthum mi pe tûr a ni,” a ti a. Tin, anni chuan a hnênah, “I thu khirh chu han sawi teh le, kan lo ngaithla ang e,” an ti a. 14 Tin, ani chuan an hnênah, “Eitu ata ei tûr lo chhuaka, Chak tak ata thil thlum tak lo chhuak, tih hi,” a ti a. Tin, ni thum chhûngin chu thu khirh chu an hrilhfiah thei ta lo va. 15 Tichuan, heti hi a ni a, a ni sarih ni chuan Samsona nupui hnênah, “I pasal hi he thu khirh hi min hrilhfiah tûrin thlêm rawh; chuti lo chuan, nang leh i pa chhûngte hi kan hâl dâwn a ni. Min tikawnkaw tûrin a ni maw min sâwm? A ni lâwm ni?” an ti a. 16 Tichuan, Samsona nupui chu a hmaah a ṭap a, “Mi lo hmangaih lovin, mi hua a lo nih zâwk hi le! Ka chiteho lêm thu khirh i zâwt a, kei zawng mi hrilhfiah ve si lo va,” a ti a. Tin, ani chuan a hnênah, “Ngai teh, ka nu leh ka pa pawh ka hrilh lo va, nang ka hrilh ang che maw?” a ti a. 17 Tin, an ruaiṭheh, ni sarih chhûng zawng chuan a hmaah a ṭap a ṭap mai a. Tin, heti hi a ni a, a ni sarih ni chuan a ngen tlut tlut avângin a hrilh ta nge nge a. Tichuan, ani chuan a thu khirh chu a chiteho a hrilh ve ta a. 18 Tin, a ni sarih ni, ni tlâk hmain chumi khuaa mite chuan a hnênah, “Khawizû aia thlum zâwk eng nge ni le? Tin, sakeibaknei aia chak zâwk eng nge ni le?” an ti a. Tin, ani chuan an hnênah, “Ka bâwnglâ hian lei let suh ula chuan, Ka thu khirh hi in hre chhuak hauh lo vang le,” a ti a. 19 Tin, LALPA thlarau chu a chungah nasa takin a lo thleng a; tin, Askelon khuaah a zuk kal a, mi sawmthum a that a, an thuam a hlihsak a, inthlâkna puante chu thu khirh hrilhfiahtute chu a pe ta a. Tichuan, a thin a rim ta êm êm mai a, a pa in lamah a chho ta a. 20 Nimahsela, Samsona nupui chu ṭhian atâna a hman, a ṭhiana kha an lo pe ta mai a.
1 Nimahsela, heti hi a ni a, a nakin deuhvah chuan, buh seng hun lai hian Samsona chuan kêlno kengin a nupui a va kan a, “Pindan chhûngah sâwn ka nupui hnênah ka va lût dâwn e,” a ti a. Nimahsela, a pain a luh a lo phal ta lo va. 2 Tin, a pa chuan, “Amah hi i haw hle emaw ka ti a; chuvângin, i ṭhian ka lo pe ta a ni. A nau hi amah aiin a hmêl a ṭha zâwk a ni lâwm ni? A aiah khawngaih takin nei zâwk mai rawh khai,” a ti a. 3 Tin, Samsona chuan an hnênah, “Tûn ṭum chu Philistia-hote pawi khawih mah ila dem ka kai lo vang,” a ti a. 4 Chutichuan, Samsona chuan sihal zathum a va man a; meichher a la a, an mei leh mei chu a zawm a, an mei inkârah chuan meichher chu a dah ṭheuh va. 5 Tin, meichherte chu a han hâl veleh chuan Philistia-ho buh ding zîngah chuan a tlân luhtîr chiam a, buhphal leh buh la dingte chu, olive hmunte nên lam a kâng ta vek a. 6 Chutichuan, Philistia-hote chuan, “Tu tih nge maw ni le?” an ti a. Tin, anni chuan, “Timna khuaa mi mâkpa Samsona tih a ni, a nupui a chhuhsaka, a ṭhianpa kha a neihtîr avângin,” an ti a. Tin, Philistia-hote chuan an pafain an han hâl hlum ta a. 7 Tin, Samsona chuan an hnênah, “Hetianga in tih chuan in chungah phuba ka la ve phawt ang a, chumi zawhah chuan ka ti tawh lo vang,” a ti a. 8 Tichuan, a bei vak a, a that chiam a; tin, a chhuk thla a, Etam lungpui keh kârah a awm ta a.
Samsonan Philistia mite a hneh
9 Chutichuan, Philistia-ho chu an han chho va, Judai ramah chuan an han inkulh a, Lehi hmunah an inzâr chiam a. 10 Tin, Judai rama mite chuan, “Engtizia nge min bei tûra in lo kal mai?” an ti a. Tin, anni chuan, “Samsona phuara, kan chunga a tih ang bawka a chunga ti ve tûrin kan lo kal a ni,” an ti a. 11 Chutichuan, Judai rama mi, mi sângthum chu Etam lungpui keh kârah chuan an zuk kal a, Samsona hnênah, “Philistia-ho hi kan chunga rorêltute an ni tih i hre na nge? Engtiziaa hetianga kan chunga thil rawn ti ta mai nge i nih le?” an ti a. Tin, ani chuan an hnênah, “Ka chunga an tih ang bawkin an chungah ka ti ve ta a ni,” a ti a. 12 Tin, anni chuan a hnênah, “Nangmah hi phuara, Philistia-ho kuta pe tûrin kan lo chhuk a ni,” an ti a. Tin, Samsona chuan an hnênah, “Nangni chuan mi tihlum lo tûrin ka hnênah chhia chham rawh u,” a ti a. 13 Tin, anni chuan a hnênah, “Tihlum lo ve; amaherawhchu, kan phuar tlat ang chia, an kutah kan pe dâwn che a ni; thah zawng kan that hauh lo vang che,” tiin an sawi a. Tichuan, hruizên thar pahnihin an phuar a, lungpui ata chu an hruai chho ta a. 14 Lehi hmun a lo thlen chuan Philistia-hovin an lo hmuak a, an lo au dur dur a. Tin, LALPA thlarau chu a chungah nasa takin a lo thleng a; tichuan, a bân phuarna hruizên chu ziza zai kâng chat ang mai a lo ni ta a, a phuarnate chu a kut ata a tla ta tawp mai a. 15 Tin, sabengtung khabe ruh tharlâm hi a hmu a, a han ban a, a la a, chu chuan mi sângkhat a vaw hlum a. 16 Tin, Samsona chuan, “Sabengtung khabe ruhin ka tiang pâwng thêr thûr mai le, Sabengtung khabe ruhin mi sângkhat ka vaw hlum e,” a ti a. 17 Tin, heti hi a ni a, thu a sawi zawh veleh chuan a khabe ruh ken chu a paih ta a; tin, chu hmun chu Ramath-lehi an lo ti ta a. 18 Tin, a tui a lo hâl ta êm êm mai a; LALPA a au va, “Nangin i chhiahhlawh kut hi hmangin ropui takin mi lo chhanchhuak ta a; tûnah hian tuihâlin ka thi mai dâwnin, serh tan lohho kutah hian ka tlu lût mai dâwn em ni ang le?” a ti a. 19 Tichuan, Pathianin Lehi hmuna khuarkhurum chu a han tikhichat ta phuk a; tin, tui a lo chik chhuak ta a, chu chu a han in veleh a rilru a lo chak leh ta a, a lo harh ta huai a. Chutichuan, chumi hmingah chuan En-hakore an ti ta a, tûn thlengin Lehi hmunah chuan a la awm reng a. 20 Tichuan, Philistia-ho hun lai chuan Israel-te chungah kum sawmhnih ro a rêl a ni.
Gaza khuaah Samsona a kal
1 Tin, Samsona chu Gaza khuaah a kal a, chutah chuan nawhchizuar hi a va hmu a, a pâwl ta a. 2 Tin, “Samsona hetah a lo kal e,” tiin Gaza mite chu an hrilh a. Tichuan, an hual ta a, khawpui kulh kawngka bulah chuan zankhuain an châng a. Zankhua chuan an ngawi ṭhiap a, “Khua lo vâr teh phawt se; tichuan, kan that dâwn nia,” an ti a. 3 Tin, Samsona chu zanlai thlengin a mu a; tin, zanlaiah chuan a tho va, khawpui kulh kawngkhârte leh a ban pahnih chu a chelh a, a kalhnate nên lam chuan a phawi chhuak vek a, a kovah a pu a, Hebron zâwn tlâng chhîpah a pu chho ta luah mai a.
Samsona leh Delili
4 Tin, heti hi a ni a, nakin deuhvah chuan Sorek ruama mi hmeichhe pakhat a ngaizâwng ta a, a hming chu Delili a ni. 5 Tin, Philistia-ho mi liante chu a hnênah an han chho va, a hnênah, “Amah chu kan hneha, phuara kan sawisak theih nân a chakna chhan hriat tumin thlêm rawh khai; tichuan, kan zavai hian tangkarua sângkhat leh za kan pe ṭheuh vang che,” an ti a. 6 Chutichuan, Delili chuan Samsona hnênah, “I chak viauna chhan hi mi hrilh teh khai, engtin nge sawisak tûrin phuar theih i nih ang?” a ti a. 7 Tin, Samsonan a hnênah, “Thalhrui thar, la ro hlek lo pasarihin mi phuar sela; tichuan, ka chak lo vang a, mi dang ang mai bawk ka ni ang,” a ti a. 8 Chutichuan, Philistia-ho mi liante chuan thalhrui thar pasarih, la ro hlek lo chu an han pe a, chûng chuan a phuar ta a. 9 Pindan chhûngrilah châng rutute a dah a. Tichuan, a hnênah, “Samson, Philistia-hovin an rawn bei dâwn a che,” a ti a. Tin, thalhruite chu meiin ziza hrui ṭawm a kâng chat ang mai hian a tichat ta mai a. Chutichuan, a chakna chhan chu hriat a ni lo. 10 Tin, Delili chuan Samsona hnênah, “Ngai teh, mi tihder a, dâwt mi hrilh a nih hi. Engtia phuar theih tûr nge i nih mi hrilh tawh rawh khai,” a ti a. 11 Tin, ani chuan a hnênah, “Hruizên thar, la hman hlek lohvin mi han phuar mai sela; tichuan, ka chak lo vang a, mi dang ang mai bawk ka ni ang,” a ti a. 12 Chutichuan, Delili chuan hruizên thar a la a, a phuar ta a; tin, a hnênah, “Samson, Philistia-hovin an rawn bei dâwn a che,” a ti a. Pindan chhûngrilah chuan a châng rutute kha an awm a. Tin, a kut phuarna chu lazai tihchah ang maiin a han tichat ta a. 13 Tin, Delili chuan Samsona hnênah, “Mi i la tihderin, dâwt mi la hrilh cheu a nih hi. Engtia phuar theih tûr nge i nih mi hrilh teh khai,” a ti a. Tin, a hnênah, “Ka sam phiar sarih hi puanah tah hnan la a ni mai,” a ti a. 14 Tin, kilhnain a kilh bet tlat a, a hnênah, “Samson, Philistia-hovin an rawn bei dâwn a che,” a ti a. Tichuan, a mu chu a han harh a, puanbu kilh behna leh puanbu chawp chuan a tithlawn ta vek mai a. 15 Tin, a hnênah, “I thinlung hi mi pe hlek si lovin, engtiziaa, ‘Ka hmangaih che,’ ti thei nge maw i nih le? Hei vawi thum tlawng i mi tihderna chu i tilang tawh a ni a, i chak viauna chhan hi mi la hrilh ta lo fo mai a,” a ti a. 16 Tin, heti hi a ni a, ni tin a ngen tlut tluta, a thlêm a thlêm ṭhin avângin thihna khawp hialin a rilru a lo mangang ta a. 17 Tichuan, a rilru zawng zawng chu a hrilh ta vek a, a hnênah, “Ka luah hian bakmehna rêng rêng rawih a la ni ngai lo va; ka nu chhûla ka awm lai aṭanga Pathian tâna Nazarit mia lo awm ka ni a. Tûnah hian lo inmêt ta ila, ka chakna chu a bo vek mai ang; tichuan, ka chak lo vang a, mi dang ang mai bawk ka ni ang,” a ti a. 18 Tin, a rilru zawng zawng chu a hrilh ta vek tih Delili chuan a hriat veleh Philistia-ho mi liante chu, “Lo chho leh phawt rawh u, a rilru zawng zawng chu mi hrilh vek tawh e,” tiin a chah ta hlawm a. Chutichuan, Philistia-ho mi liante chu a hnênah chuan an han kal a, tangkarua chu an keng a. 19 Tin, a mal chungah a muthilhtîr a; tin, mi a ko va, a sam phiar sarih chu a hlep thla ta vek a. Tichuan, a sawisa ṭan ta a; tin, a chakna chu a bo ta vek mai a. 20 Tin, “Samson, Philistia-hovin an rawn bei dâwn a che,” a han ti a. Tin, a mu chu a han harh a, “Ni dang ang bawk khân ka chhuak leh mai ang a, ka tâl chhuak leh mai ang chu,” a ti a. Nimahsela, LALPAN a kalsan tawh tih rêng rêng a hre lo va. 21 Tin, Philistia-ho chuan an man a, a mit an kher chhuahsak a; tin, Gaza khuaah an chhukpui a, dâr kawlte an buntîr ta a; lung inah buh a râwt sawm ṭhîn a. 22 Chutih lai chuan, a lu meh hnu khan a sam a lo sei leh ta a.
Samsona thih thu
23 Tin, Philistia-ho mi liante chu an pathian Dagona hnêna inthawina ropui tak hlân tûr leh, inchawk hlim tûrin an pung khâwm chiam a: “Kan pathianin kan hmêlmapa Samsona min pe tawh alâwm,” an ti a. 24 Tin, mipuite chuan an han hmuh chuan an pathian chu an fak a, “Kan pathianin kan hmêlmapa leh kan ram tichhetu, mi tam tak min thattupa chu kan kutah min pe ta alâwm,” an ti a. 25 Tin, heti hi a ni a, an thinlung a hlim lai tak chuan, “Samsona chu ennawm atân han ko teh u,” an ti a. Tichuan, Samsona chu lung in ata an va ko chhuak a, an hmaah chuan ennawmah a awm ta a; ban leh ban inkârah hian an dintîr a. 26 Tin, Samsona chuan a kaitu naupang hnênah, “Hemi in dotu ban hi mi han dehtîr teh khai, ka han nghêng teh ang,” a ti a. 27 Chumi in chu mipa leh hmeichhiain an khat mup mai a. Philistia-ho mi lian zawng zawng chu chutah chuan an awm vek a; tin, Samsona ennawma thlîrtute chu in chungah chuan mipa leh hmeichhia sângthum lai an awm a. 28 Tin, Samsona chuan LALPA chu a au va, “Aw LALPA PATHIAN, khawngaih takin mi han hre reng langin, khawngaih takin tûn ṭumah chauh hian mi han tichak la, aw Pathian, ka mit khinghnih phuba hi Philistia-hote chungah hian ka han la thuai teh ang,” a ti a. 29 Tin, Samsona chuan chumi in dotu ber sût pahnih chu a han dek a, a kut ding lamin pakhat a rinchhan a, a kut vei lamin pakhat. 30 Tin, Samsona chuan, “Philistia-ho hi ka han thihchilh teh ang!” a ti a. Tichuan, a theihtâwpin a kûn vak a; tin, mi liante leh mipui, a chhûnga awm zawng zawng chu in chim chuan a delh ta chiam mai a. Chutichuan, a dam laia a tihhlumte ai chuan a thihchilhte chu an tam zâwk a. 31 Tichuan, a unaute leh a pa chhûngte zawng zawng chu an lo chhuk a, an la a, an zâwn chho va, Zora leh Estaol inkâra a pa Manoa phûmna hmunah an phûm ta a. Tichuan, kum sawmhnih Israel-hote chungah ro a rêl a ni.
Mika milim
1 Tin, Ephraim tlâng ramah mi pakhat a awm a, a hming chu Mika a ni. 2 Tin, ani chuan a nu hnênah, “Tangkarua sângkhat leh za an rûksak chia, nang pawhin ânchhia i lawha, ka beng hriat ngeia i sawi kha, ngai teh, kha tangkarua kha ka hnênah a awm asin, keima lâk a ni e,” a ti a. Tin, a nu chuan, “Ka fapa chu LALPA malsâwmin awm rawh se,” a ti a. 3 Tin, tangkarua sângkhat leh za chu a nu a pe leh a; tin, a nu chuan, “He tangkarua hi keima kut ngeiin ka fapa puala milem siam nân leh milema chhûn atân LALPA hnênah ka hlân e; chuvângin, tûnah hian ka pe leh dâwn che a ni,” a ti a. 4 Tin, tangkarua chu a nu a han pêk chuan, a nu chuan tangkarua zahnih chu a la a, tangkaraw chhertu a pe a, ani chuan milemah a lo siam a, milemah a lo chhûng a; chu chu Mika inah chuan a awm a. 5 Tin, chu Mika chuan pathiante in a nei a, ephod leh milemte a siam a, a fapa pakhat chu a puithiam atân a tihrang ta a. 6 Chûng lai chuan Israel ramah lal an awm lo va; mi tinin mahni ṭha tih zâwng zâwngin an ti mai a. 7 Tin, Bethlehem-juda-a mi Juda hnam, Levi chi tlangvâl pakhat a awm a, chutah chuan a va awm ve lawk a. 8 Chu mi chu Bethlehem-juda khawpui ata a chhuak a, awmna zawngin a vâk a ni a. Chutia a vahna lamah chuan Ephraim tlâng rama Mika in chu a va thleng a. 9 Tin, Mika chuan a hnênah, “Khawi aṭanga lo kal nge i nih le?” a ti a. Tin, ani chuan a hnênah, “Bethlehem-juda-a mi Levi chi ka ni a, awmna hmun zawngin ka vâk a ni,” a ti a. 10 Tin, Mika chuan a hnênah, “Ka hnênah hian awm ta che, ka paah leh puithiamah awm langin, kum tin tangkarua tlang sâwm ka pe ang chia, silhfên silh khat leh i ei tûrte pawh,” a ti a. Chutichuan, Levi chi chu a lût ta a. 11 Tin, Levi chi chuan chu mi hnêna awm chu a remti ta a; tichuan, chu tlangvâl chu a fapa pakhatah a awm ta a. 12 Tin, Mika chuan Levi chi chu a tihrang ta a; tichuan, tlangvâl chu a puithiamah a lo awm a, Mika inah chuan a awm ta a. 13 Chutichuan, Mika chuan, “Tûnah zet chuan Levi chi ka puithiam atân ka nei tawh si a, LALPAN mi tihmuingîl ngei ang tih ka hria e,” a ti a.
Mika leh Dan-ho
1 Chûng lai chuan Israel ramah lal an awm lo va: tin, chûng lai chuan Dan chite chuan ram luah tûr an zawng a; chutih lai pawh chuan Israel chite zîngah ram luah tûr an la chang ve si lo va. 2 Tin, Dana thlahte chuan an hnam pum pui zînga mi, pasalṭha panga, Zora leh Estaol khua aṭangin ram va enthla tûr leh va thlîthlai tûrin an tîr a; an hnênah chuan, “Va kal ta ula, ram chu va thlîthlai teh u,” an ti a; tichuan, Ephraim tlâng rama Mika in chu an va thleng a, chutah chuan an riak ta a. 3 Mika in kianga an awm lai chuan Levi chi tlangvâl aw chu an hria a, chu lam chu an va pan a, a hnênah, “Tuin nge hetah hian hruai che? He hmunah hian eng nge maw i tih le? Engtin nge hetah hian i khawsak?” an ti a. 4 Tin, ani chuan an hnênah, “Mika hian heti hian mi lo siam ta a, mi ruai a, a puithiamah hian ka awm a ni,” a ti a. 5 Tin, anni chuan a hnênah, “Kan kalna tûrah hian kan hmuingîl dâwn nge dâwn lo tih kan hriat theih nân Pathian min râwnsak teh ang che,” an ti a. 6 Tin, puithiam chuan an hnênah, “Thlamuang takin kal tawh u. In kalna tûr chu LALPAN a hriatpui zêl a che u,” a ti a. 7 Chutichuan, mi pangate chu an chhuak ta a, Lais khuaah an va lût a, chuta mite chu Zidon mite ang bawka râlmuang tak leh thlamuang taka an awm hle hlezia an va hmu a; chumi ramah chuan eng maha han intichhe thei tûra thuneitu lêm chuang tu mah an awm lo va, Zidon-hote nên lah an inhlat a, inhmanna rêng rêng an nei si lo. 8 Tin, Zora leh Estaol khuaa an unaute hnên lamah chuan an haw ta a; tin, an unaute chuan an hnênah, “Engtin nge ni le?” an ti a. 9 Tin, anni chuan, “Tho rawh u khai, i han bei ang u. Ram chu kan han hmu ta ngei mai a; ngai teh u, a ṭha hle a nia. In chechâng na nge? Chumi rama han lûta, han luah tûr chuan muang suh u khai. 10 In han kal chuan râlmuanga awm mite a nia in han hmuh ang ni, ram lah chu a zau si a. Pathianin a pe tawh che u a nia, leia thil awmah zawng eng mah tlâkchham tûr awm hauh lohna hmun a nia,” an ti a. 11 Tichuan, Zora leh Estaol khua aṭang chuan Dan hnamte chu indona thuam inbelin mi zaruk an chhuak ta a. 12 Tin, an han chho va, Judai ram Kiriath-jearim khuaah awmhmun an han khuar a; chuvângin, chumi hmun chu tûn thlengin Mahane-dan an la ti a ni. Ngai teh, Kiriath-jearim thlang lama awm a ni. 13 Chuta ṭang chuan Ephraim tlâng ram lam an pan a, Mika in chu an han thleng a. 14 Chutichuan, Lais ram enthla tûra mi panga chhuakte chuan an chhâng a, an unaute hnênah chuan, “Hêng inahte hian ephod te, milem te, milem siam chawp te, milem chhûn chawpte a awm tih in hria em? Chutichuan, engtin nge in tih dâwn ngaihtuah rawh u,” an ti a. 15 Tin, chuta ta chu an pêng a, Levi chi tlangvâl awmna Mika in ngei chu an va thleng a, a chungchâng thu an zâwt a. 16 Dana thlah, mi zaruk indona thuam inbelte chu kulh kawngka bulah an ding a. 17 Tin, mi panga, ram enthlatute chu an han chho va, an han lût a, milem siam chawp te, ephod te, milem te, milem chhûn chawpte chu an la a. Puithiam chu mi zaruk, indona thuam inbelte zîngah kulh kawngka bulah chuan a ding ve a. 18 Chûngte chu Mika ina an han luha, milem siam chawp te, ephod te, milem te, milem chhûn chawpte an han lâk chuan, puithiam chuan an hnênah, “Eng nge maw in tih chu le?” a ti a. 19 Tin, anni chuan, “Ngawi rawh, i kutin i hmui kha hup la, kan hnênah lo kal ve la, kan paah leh puithiamah lo awm rawh. I tân hian chhûng khat chauh puithiama awm nge ṭha zâwk Israel zînga chi khat leh hnam khat puithiama awm?” an ti a. 20 Tin, puithiam rilru chu a lâwm ta hle mai a; tichuan, ephod te, milem te, milem siam chawpte chu a la a, mipuiho zîngah chuan a tel ve ta a. 21 Chutichuan, an kal chhuak ta a, an fanau tê tête, rante, bungruate chu an hmachhawm zêl a. 22 Mika in aṭanga thui fe an kal hnu chuan Mika ṭhenawmte chu an inpun khâwm a, Dana thlahteho chu an va ûmpha ta a. 23 Tin, Dana thlahteho chu an han au va. Tin, anni chu an lo lehhawi a, Mika hnênah chuan, “Eng i ti nge ni le, mi khati zozai i rawn kalpui mai?” an ti a. 24 Tin, ani chuan, “Ka pathian siamte leh puithiam chu in kalpui a, in kal ta daih mai a, eng nge neih ka neih tâk ni? Eng titiha, ‘Eng i ti nge ni le?’ mi ti mai nge in nih chu le?” a ti a. 25 Tin, Dana thlahteho chuan a hnênah, “Kan zîngah hian ṭawng mai mai suh khai; chuti lo zawng, mi thinchhe kut i tuar mai ang a, i chhûngte nên hian in nun in chân mai tûr a nia,” an ti a. 26 Tichuan, Dana thlahteho chu an kal ta a. Tin, Mika chuan beih ngam rual niin a hre si lo va, a in lamah a haw leh ta a. 27 Tin, Mika thil siam leh a puithiam neih chu an kalpui ta a, Lais khua, râlmuanga awm hle hlete hnên chu an han thleng a, khandaihin an han that a; tin, khua chu an hâl ta a. 28 Zidon aṭanga a hlat êm avângin a han chhanchhuaktu tûr lah tu mah an awm si lo va, tute nên mah inzawmna rêng rêng an nei lo bawk a. Chumi hmun chu Beth-rehob bul ruama awm a ni. Tin, khua chu an din leh a, chutah chuan an awm ta a. 29 Tin, a khaw hmingah chuan Israela fa, an thlahtu Dana chawiin Dan an vuah a. Amaherawhchu, a hma chuan chu khua chu Lais an ti ṭhîn a ni. 30 Tin, Dana thlahte chuan milem siam chawp chu anmahni tân an lo din ta a; tin, Mosia fa Gersoma fapa Jonathana leh a fapate chu, ram chu miin an lâk hma loh chuan Dan chite puithiamah an awm ta a. 31 Chutichuan, Mika siam milem siam chawp chu Silo khuaa Pathian in a awm chhûng zawng chuan an din ta.
Levi mi pakhat leh a hmeinu
1 Tin, heti hi a ni a, chûng laia Israel rama lal an awm loh lai chuan Levi chi mi pakhat hi Ephraim tlâng ram tâwp lamah a awm a, Bethlehem-judai rama mi hmeiah a nei a. 2 Tin, a hmei chuan a uiresan a; tichuan, Bethlehem-judai rama a pa hnênah a tlânsan a, chutah chuan thla li zet a awm a. 3 Tin, a pasal chu a tho va, a chhiahhlawh leh sabengtung pahnih hruaiin tlang taka va thlêma, lungawia hruai haw leh tumin a va ûm zui a. Tin, ani chuan a pa inah chuan a lo hruai lût a; tin, nula pa chuan a hmuh chuan a lo lâwm hle mai a. 4 Tin, a pu, nula pa chuan a hnêna awm tûrin a lo chelh a; a hnênah chuan ni thum a awm a. Tichuan, an eiin an in tlâng a, chutah chuan a thleng a. 5 Tin, heti hi a ni a, a ni li ni chuan zîng takah an tho va, ani chu chhuah tumin a tho va; tin, nula pa chuan a mâkpa hnênah chuan, “Chhang tlêm tal eiin i thinlung chu tiharh rih la, chumi hnuah chuan in la kal ang chu maw le,” a ti a. 6 Chutichuan, an ṭhu a, an pahnih chuan an eiin an in dûn a. Tin, nula pa chuan chu mi hnênah chuan, “Lungawi takin riak hrâm rawh khai, i thinlung chu hlim takin awm rawh se,” a ti a. 7 Tin, chu mi chu chhuah tumin a han tho va; nimahsela, a pu chuan a thlêm chiam a; tichuan, a riak leh ta a. 8 Tin, a ni nga tûk zîng takah chuan chhuah tumin a tho va; tin, nula pa chuan, “I thinlung chu tiharh rih la maw le, tlai ni nêm hun thleng tal chuan awm rih rawh khai,” a ti a; tin, an pahnih chuan chaw te an ei dûn leh ta a. 9 Tin, chu mi chu a hmei nên, a chhiahhlawh nên chhuah tuma a han thawh chuan a pu, nula pa chuan a hnênah, “Ngai teh, hei khua pawh a tlai tawh a, zânin chu riak leh rih hrâm rawh khai. Ngai teh, khua pawh a thim hnai mai tawh alâwm; hetah hian riak leh la, i thinlung chu hlim taka a awm theih nân; tichuan, naktûk zîng takah i tho vang a, i haw mai tûr alâwm,” a ti a. 10 Nimahsela, chu mi chuan chumi zân chuan riah a duh ta lo va, a tho va, a chhuak ta a, Jebus khaw zâwn a va thleng a (chu chu Jerusalem khua a ni), sabengtung pahnih thuam sa a hruai a; a hmei pawh chu a tel ve a. 11 Jebus khaw kiang an thlen chuan khua a tlai hle tawh a; tin, chhiahhlawh chuan a pu hnênah, “Hawh teh, he Jebus-ho khawpuiah hian i lût mai ang khai, i riak teh ang u,” a ti a. 12 Tin, a pu chuan a hnênah, “Israela thlahte ni si lo hnam dang khuaah te chuan lût lo ve; Gibea khaw lam i pan zêl zâwk ang u,” a ti a. 13 Tin, a chhiahhlawh hnênah, “Hawh, hêng hmun khawii zâwk emaw hi i pan ang; Gibea khuaah emaw, Rama khuaah emaw kan riak dâwn nia,” a ti a. 14 Chutichuan, an kal leh ta zêl a; Benjamin-ho Gibea khaw kiang an thlen chuan ni a tla ta a. 15 Tin, Gibea khuaa riak tûr chuan an lût ta a. Tin, a lût a, chu khawpui khawlaiah chuan a ṭhu a, tu mah thleng peih rêng rêng an awm lo va. 16 Tin, ngai teh, putar pakhat hi tlaiah chuan a feh a lo hâwng a; chu mi chu Ephraim tlâng rama mi a ni a, Gibea khuaah chuan a va awm rih lawk a ni; chumi hmuna mite erawh chu Benjamina chite an ni. 17 Tin, a han hawi a, khawlaia mikhualpa chu a han hmu a; tin, putar chuan, “Khawiah nge i kal dâwn le? Khawi aṭanga lo kal nge i nih?” a ti a. 18 Tin, ani chuan a hnênah, “Bethlehem-judai ram aṭanga Ephraim tlâng tâwp ram lama kal tum ka ni; chuta awm chu ka ni. Bethlehem-judai ramah ka va kal a; tûnah hian LALPA inah kal ka tum a ni. Mahse, tu mah mi thleng peih an awm lo a ni. 19 Kan sabengtung tân phei chuan buhpâwl leh ran chawte zawng kan nei a; tin, kei leh, i bâwihnu leh, i chhiahhlawhte hnêna awm ve tlangvâl tân te pawh hian chhang leh uain a awm bawk a; eng mah tlâkchham zawng kan nei hauh lo ve,” a ti a. 20 Tin, putar chuan, “Thlamuang takin awm rawh khai! I mamawh zawng zawng chu keiman ka tum vek ang e; khawlaiah zawng riak lul suh ang che,” a ti a. 21 Chutichuan, a inah a hruai lût a, sabengtungte chu chaw a pe a. Tin, an kete an sil a, an eiin an in ta a. 22 Chutia hlim leh lâwm taka an awm lai chuan, ngai teh, chumi khuaa mi, Beliala fapa ṭhenkhat chuan in chu an rawn hual vêl ta hlawm a, kawngkhâr an rawn chhu dawt dawt a. In neitupa putar hnênah chuan, “I ina lo thlengpa kha han hruai chhuak rawh, kan lo pâwl teh ang,” an ti a. 23 Tin, in neitupa chu an hnênah a va chhuak a, an hnênah chuan, “Ni lo ve, ka unaute u! Chuti êma sual chu ti lul suh u khai! He mi hi ka mikhual a nih hi, hetiang thil âtthlâk tak zawng ti lo ve. 24 Ngai teh u, hetah hian ka fanu nula leh a hmei an awm a; anni chu ka rawn hruai chhuak ang a, anni chu tlâwm ula, ṭha in tih ang apiangin an chungah ti nâng che u; he mi chungah erawh hi chuan chutiang thil âtthlâk chu ti suh ang che u,” a ti a. 25 Nimahsela, chu mite chuan a thu an pawm duh lo va. Chutichuan, mi chuan a hmei chu a hruai a, an hnênah chuan a va hruai chhuak ta a. Tin, anni chuan an lo pâwl a, khawvâr hma loh chuan zankhuain an sawisa hrep a; tin, khua a lo vâr veleh an chhuah ta a. 26 Chutichuan, hmeichhia chu khua a lo vâr veleh a kal a, a hotupa thlen inpa kawngka bulah chuan a tlu thlawp a, khaw ên hnu thlengin a awm ta reng a. 27 Tin, a hotupa chu zîngah chuan a han tho va, kawngkate chu a han hawng a, kal tumin a va chhuak a; ngai teh, a hmeinu chu kawngka bulah chuan rahkaah a lo tlu zangphar dêr mai a. 28 Tin, ani chuan a hnênah, “Tho rawh, i kal ang,” a han ti a; nimahsela, a chhâng ta hauh lo mai a. Tichuan, a sabengtung chungah a hlâng a; tin, a tho va, a hmun lamah chuan a kal ta a. 29 Tin, in a va thlen chuan chemtê a la a, a hmei chu a fûke hmun sâwm leh hmun hnihah a chan sawm a, Israel ram zawng zawngah a thawn darh a. 30 Tin, heti hi a ni a, a lo hmu apiang chuan, “Israela thlahte Aigupta ram ata an lo chhuah achin hetiang thiltih rêng rêng hi tûn thleng hian a la awm ngaiin hmuh a la ni ngai hauh lo mai. Ngaihtuah ula, inrâwn ula, sawi teh u,” an ti a.
Israel-ten indo an puahchah
1 Chutichuan, Israela thlahte zawng zawng chu an thawk ta chiam a, thu khat vuain Dan khua aṭanga Beer-seba khaw thlengin Gilead rama mite nên Mizpe khuaah LALPA hnênah an inkhâwm ta a. 2 Tin, mi zawng zawng hotute, Israel chite zawng zawng lam pawh chu Pathian mite inkhâwmhonaah chuan an va tel a, sipai khandaih keng mi nuai li an ni a. 3 (Benjamina thlahte chuan Israela thlahte chu Mizpe khuaah an han chho tih an lo hria a.) Tin, Israela thlahte chuan, “Engtiziaa hetianga suahsualna hi lo awm nge ni min hrilh teh u?” an ti a. 4 Tin, Levi chi, hmeichhia an thaha pasal chuan, “Benjamin chite awmna Gibea khuaah ka hmei nên riah tumin kan va lût a. 5 Tin, Gibea mite chuan min rawn bei ta mai a, zânah in an rawn hual a. Mi thah an tum a, ka hmei chu an sawisa hrep a, a thi ta a. 6 Tichuan, ka hmei ruang chu ka la a, ka chan a, Israel-ho ram luah zawng zawngah ka thawn darh a; Israel ramah hian thil tenawm tak leh âtthlâk tak an lo ti ta si a. 7 Nangni Israela thlahte u, in vai hian ngai teh u, in ngaih dân leh in remtih dân chu sawi rawh u khai,” a ti a. 8 Tichuan, mipuiho zawng zawng chu thu khat vuain an tho ṭhup a, “Tu mah mahni puan in lamah kan haw hauh lo vang a, tu mah mahni inah kan lût hek lo vang. 9 Gibea-ho kan tih dân tûr chu hetiang hi a ni: ṭhum kan vâwr ang a; 10 Israel-hote chunga thil dik lo tak an tih ang zêla an tiha, Gibea hmuna Benjamin-ho kan han beihnaa mipuite ei tûr lo hlântu atân Israel hnam zawng zawng zînga mi zaah sâwm zêl, sângkhatah za zêl, sîngkhatah sâng zêl kan thlang chhuak ang,” an ti a. 11 Chutichuan, Israel mi zawng zawng chu thu khat vaw ṭhapin chu khawpui bei tûr chuan an pung khâwm ta a. 12 Tin, Israel hnamte chuan Benjamin hnam zawng zawngte hnênah chuan, “In zînga hetiang suahsualna lo awm ta mai hi engtizia nge ni? 13 Gibea khuaa mi Beliala fate chu rawn hruai rawh u; tichuan, Israel rama sual hi a reh theih nân kan lo tihlum ang e,” tiin mi an tîr a. Nimahsela, Benjamin chite chuan an unau Israela thlahte thusawi chu an pawm duh lo va. 14 Tin, Benjamina thlahte chu Israela thlahte do tûrin khawpui atate an lo chhuak khâwm a, Gibea khuaah an lût chiam a. 15 Tin, chumi nia Benjamina thlahte khawpui ata khandaih kenga chhuakho chu, Gibea khuaa mi zasarih thlan ṭhiau tiam lovin sînghnih leh sângruk an ni. 16 Chûng zawng zawng zîngah chuan veikhawr zasarih, thlan ṭhiau an awm a; an vai chuan virvawma samzai tia pawh ṭhelh hlek lo mi an ni.
Benjamin-ho beih thu
17 Tin, Israel mite chu Benjamin mite tiam lovin khandaih keng mi ṭhiau nuai li an ni; chûngho zawng zawng chu indo mi vek an ni. 18 Tin, Israela thlahte chu an tho va, Bethel-ah an han chho va, Pathian an han râwn a, “Benjamina thlahte chu tu nge han bei hmasa ang le?” an ti a. Tin, LALPAN, “Juda-ho han kal hmasa rawh se,” a ti a. 19 Tichuan, Israela thlahte chu zîngah an tho va, Gibea khua chu an han hual a. 20 Tin, Israel mite chu Benjamin-ho bei tûr chuan an thawk a; tin, Israel mite chuan Gibea khuaah chuan anmahni bei tûrin ṭan an han siam a. 21 Tin, Benjamina thlahte chu Gibea khua ata chu an lo chhuak a, chumi ni chuan Israel-hote zînga mi sînghnih leh sânghnih an rawn that ta buaih mai a. 22 Tin, mipuiho, Israel mite chu an han infuih leh a, an beih ṭan nia an beihna hmunah vêk chuan bei tûrin ṭan an han siam leh a. 23 (Tin, Israela thlahte chu an han chho va, Pathian hmaah tlai thlengin an han ṭap a, “Kan unau Benjamina thlahte hi bei tûrin kan han thawk leh dâwn em ni ang?” tin LALPA an zâwt a. Tin, LALPA chuan, “Han bei leh rawh u,” a ti a.) 24 Tin, a ni hnih ni chuan Israela thlahte chuan Benjamina thlahte chu an han hnaih a. 25 Tin, Benjamin-ho pawh chu a ni hnih ni chuan bei tûrin Gibea khua ata an chhuak ve a, Israela thlahte zînga mi sîngkhat leh sângriat an rawn that leh ta buaih mai a, chûng zawng zawng chu khandaih keng mi an ni. 26 Chutichuan, Israela thlahte zawng zawng leh mipuiho zawng zawng chu an han chho va, Bethel-ah an han kal a, an ṭap a, LALPA hmaah an ṭhu a, chumi ni chuan tlai thlengin chaw an nghei a; tin, LALPA hnênah hâlral thilhlan leh remna thilhlante an hlân a. 27 Tin, Israela thlahte chuan LALPA an râwn a (chûng lai chuan chutah chuan Pathian thuthlung bâwm chu a awm a; 28 tin, chûng lai chuan Arona fa Eleazara fapa Phinehasa chuan a rawng a bâwl ṭhîn a ni a), “Kan unau Benjamina thlahte chu kan han bei leh ang nge kan bânsan tawh mai ang?” tiin. Tin, LALPAN, “Han chho rawh u, naktûkah zawng in kutah ka pe tawh dâwn e,” a ti a. 29 Tin, Israel-hote chuan Gibea khaw vêlah chuan chângtu an indah ru ta a. 30 Tin, Israela thlahte chu Benjamina thlahte bei tûrin a ni thum ni chuan an han thawk leh a, ni dang ang bawk khân Gibea khaw bei tûr chuan ṭan an han siam leh a. 31 Tin, Benjamina thlahte chu mite bei tûr chuan an va chhuak a, khua chu an chhuahsan a; tichuan, ni dang ang bawk khân mite chu beiin an that ṭan leh ta mai a, phûl faia Bethel khaw chhohna leh Gibea khaw kawng lamlianahte chuan Israel-hote chu sawmthum an that a. 32 Tin, Benjamina thlahte chuan, “A hma ang bawk khân kan hmaah an tlâwm leh ta le,” an ti a. Israela thlahte erawh chuan, “I tlân ang u khai, khawpui ata hi lamlian lamah i tawlh chhuahtîr ang u,” an ti a. 33 Tichuan, Israel-ho zawng zawng chuan an ṭanhmun chu an chhuahsan a, Baal-tamar hmunah ṭanhmun an siam a. Tin, Israel-ho, lo châng rutute kha an chânna hmun Maaregeba hmun ata an lo chhuak a. 34 Tin, Israel-ho zawng zawng zînga thlan ṭhiau sîngkhatin Gibea khua chu an bei a, an inbei chu a nasa ngei mai. Nimahsela, Benjamin-ho chuan an chan a chhe dâwn ta ngei mai tih zawng an hre lo. 35 Tin, LALPAN Benjamin-ho chu Israel-hote hmaah chuan a tihlum chiam a. Israela thlahte chuan chumi ni chuan Benjamin-ho chu mi sînghnih leh sângnga leh za an that a; chûngho zawng zawng chu khandaih keng mi vek an ni.
Israel-hovin an hneh
36 Chutichuan, Benjamina thlahte chuan an tlâwm ta tih an lo inhre ta a. Israela thlahte chuan Gibea khaw bei tûra a rûka chângtute an dah kha an rin avângin Benjamin-ho chu an han hnungtawlhsan a ni. 37 Tin, a rûka chângtute chuan Gibea khua chu an bawh ta thut a; tichuan, a rûka chângtute chu an inzâr darh a, khuaa mi zawng zawng chu khandaihin an bei ta chiam a. 38 Israel-hote leh a rûka chângtute khân an intiamna chu khawpui chhûnga mei tihkhûk ngut ngut a ni. 39 Tin, Israel-hote chu an han tawlh rih a; tichuan, Benjamin-ho chuan an han bei ṭan a, Israel mite chu sawmthum lai an that a, “Kan inbeih tirh ni ang bawk khân kan hmaah an tlâwm leh ta ngei mai le,” an ti a. 40 Nimahsela, khawpui chhûngah chuan meikhu a lo din tâk luah veleh Benjamin-ho chu an han lehhawi a; tin, ngai teh, khawpui chu a pumin vân lamah a khu chho ta ngut ngut mai a. 41 Tichuan, Israel-hote chu an rawn inher leh ta a; Benjamin-ho chuan mak an ti hle a, an chan a chhe dâwn tih an hre ta si a. 42 Chuvângin, Israel-hote hmaah chuan thlalêr lamah an tlânchhe ta a; nimahsela, an ûm zui ngat ngat a; tin, khawpui ata lo chhuakte chuan chutah chuan an lo tihlum a. 43 Benjamin mite chu an hual ta tlat a, an ûm a, ni chhuahna lam Gibea dep an chawlhna hmunah an ûmpha a. 44 Benjamin-ho chu mi sîngkhat leh sângriat an thi a; an vai chuan mi chak huaisen ṭhiau an ni. 45 Tin, an tawlh a, thlalêr lam Rimon lungpuiah an tlânchhia a; mi sângnga chu lamlianahte an râwt a. Tichuan, Gidom thlengin an ûm zui ngat ngat a, mi sanghnih an that a. 46 Chutichuan, chumi nia Benjamin-ho thi zawng zawngte chu khandaih keng mi ṭhiau sînghnih leh sângnga an ni a, an vai chuan mi chak huaisen an ni. 47 Mi zaruk erawh chu thlalêr lam Rimon lungpuiah an tlânchhia a, chumi Rimon lungpuiah chuan thla li an awm a. 48 Tin, Israel-hote chu Benjamin-ho chungah chuan an thawk leh a, khawpui chhûnga mi tawh phawt chu ran te, an hmuh apiangte chu khandaihin an sât hlum zêl a. Chu lo pawh chu khua an hmuh apiangte pawh chu an hâl zêl a.
Benjamin-ho tân nupui tûr
1 Tin, Israel mite chuan Mizpe khuaah, “Kan zînga mi tu mahin kan fanute hi Benjamin-ho nupuiah i neihtîr hauh suh ang u,” tiin chhia an chham a. 2 Tin, mipuiho chu Bethel-ah an kal a, Pathian hmaah tlai thlengin an ṭhu a, an awte chhuahin an ṭap vak vak a. 3 Anni chuan, “Aw LALPA, Israel-te Pathian, engtizia nge Israel-te zînga hetiang thil hi a lo awma, vawiinah hian Israel-te hi hnam khata kim ta lo nge ni le?” an ti a. 4 Tin, heti hi a ni a, a tûkah chuan mipuiho chu zîng takah an tho va, chutah chuan maichâm an siam a, hâlral thilhlante leh remna thilhlante an hlân a. 5 Tin, Israela thlahte chuan, “Israel hnam zawng zawng zînga LALPA hnêna pung khâwmho zînga han tel ve lo chu tute nge ni le?” an ti a. Mizpe khuaa LALPA hnêna han kal ve lo apiangte chu, “Tihhlum ngei tûr a ni ang,” tiin chhia an lo chham tawh tlat si a. 6 Tin, Israela thlahte chu an unau Benjamin-ho chungchângah chuan an inchhîr ta a, “Vawiinah hian Israel-ho zînga hnam khat chu chhawk an ni ta si a. 7 A awm chhunate tân chuan an nupui tûr engtin nge kan tih tâk ang le? Kan fanute hi nupuiah neihtîr hauh lo tûrin LALPA hming chhâlin chhia kan chham ta si a,” an ti a. 8 Tin, anni chuan, “Israel-ho hnam zînga mi tu hnam ber nge ni Mizpe khuaa LALPA hmaa han inlan ve lo hi le?” an ti a. Tin, ngai teh, pung khâwmho awmna hmunah chuan Jabes-gilead mite chu pakhat mah an kal ve lo va. 9 Mipuiho an han inchhiar chuan, ngai teh, Jabes-gilead rama awmte chu pakhat mah an lo awm lah lo va. 10 Tin, inkhâwmhote chuan mi huaisen ṭha ṭhiau sîngkhat leh sânghnih an tîr a, “Kal ta ula, Jabes-gilead rama awmte chu hmeichhia leh an fanau tê tête nên khandaihin va sât hlum vek rawh u. 11 In tih dân tûr chu hetiang hi a ni: mipa zawng zawng leh hmeichhia, mipa mutpui tawh phawt chu tiboral vek ang che u,” tiin thu an pe a. 12 Tin, Jabes-gilead rama awmte zîngah chuan nula zali, mipa la pâwl ngai hauh loh an hmu a; tichuan, an awmna Silo khuaah chuan an hruai a, chu chu Kanaan ram a ni. 13 Tin, inkhâwmho zawng zawngte chuan mi an tîr a, Rimon lungpuia awm Benjamin-ho an va bia a, an hnênah inrem thu an puang a. 14 Tin, chu veleh chuan Benjamin-ho chu an kîr a, Jabes-gilead rama hmeichheho an zuahte chu an pe a; chuti chung pawhin an la indaih ta lo va. 15 Tin, Israel hnam zînga LALPAN intihhranna a lo siam tâk avângin mipuiho chu Benjamin-ho chungchângah chuan an inchhîr ta a. 16 Chutichuan, inkhâwmho upate chuan, “A la damte nupui tûr hi engtin nge kan tih ang le, Benjamin-ho zînga an hmeichhiate chu tihboral an lo ni ta si a?” an ti a. 17 Anni chuan, “Israel hnam hi tihmanga a awm loh nân Benjamin-ho la awm chhunate hi engtin nge thlah kan neihtîr theih ang le? 18 Kan fanute hi nupuiah kan neihtîr thei si lo va,” an ti a; Israela thlahte chuan, “Tu pawh Benjamin-ho nupuia neihtîr apiang chu ânchhe dawngin awm rawh se,” tiin chhia an lo chham tawh si a. 19 Tin, anni chuan, “Ngai teh u, Bethel hmâr lam, Bethel aṭanga Sekem kalna lamlian chhak lampanga Lebona chhim lama awm Silo khuaah kum tin LALPA tân kût a awm ṭhin kha,” an ti a. 20 Tin, anni chuan Benjamina thlahteho hnênah chuan, “Va kal ta ula, grêp hmunah va châng ru tawh u; 21 tin, lo thlîr ula; tichuan, ngai teh u, Silo khuaa nulaho chu lâmnaa lâm tûra an lo chhuah chuan, grêp hmun ata chu lo chhuak ula, Silo nulaho chu mahni nupui atân man ṭheuh ula; tichuan, Benjamin-ho ramah kal vek ang che u. 22 Tin, heti hi a ni ang a, an pate emaw, an nuṭate emaw, sawisêl tûra kan hnêna an lo kal leh an hnênah, ‘Min khawngaih rawh u khai, indonaah khân an nupui tûr kan lo mansak ṭheuh ta si lo va; nangni lahin in lo pe bawk si lo va; lo pe ni ula, thiam loh in hlawh dâwn si a,’ kan lo ti dâwn nia,” tiin thu an pe a. 23 Tin, Benjamina thlahte chuan chutiang chuan an ti a, lâmho zînga mi anmahni zât ṭheuh nupuiah an man a, an kal bopui ta a; tin, an ram lamah chuan an hâwng a, khawpuite chu an chei leh a, chutah chuan an awm ta a. 24 Tin, chu veleh chuta ṭang chuan Israela thlahte chu mahni chi chi leh mahni hnam hnamin an intêl hrang leh a, chuta ta chu anmahni ram ṭheuhvah chuan an haw leh ta a. 25 Chûng lai chuan Israel-te zîngah lal rêng rêng an awm lo va; mi tinin mahni ṭha tih zâwng zâwngin an ti mai a ni.
Elimeleka leh a chhûngten Moab-ah ṭâm an tlân
1 Rorêltute chuan ro an rêl laiin heti hi a ni a, chumi ramah chuan ṭâm a lo tla a. Tin, Bethlehem-juda-a mi pakhat Moab rama awm tûrin amah leh a nupui leh a fapate pahnih nên an kal a. 2 Chu mi hming chu Elimeleka a ni a, a nupui hming chu Naomi a ni a, a fapate pahniha hming chu Mahlona leh Kiliona, Bethlehem-juda-a Ephrath mi an ni. Moab ramah chuan an kal a, chutah chuan an awm ta reng a. 3 Tin, Elimeleka, Naomi pasal chu a thi a, amah leh a fapate pahnih chauh an ni ta a. 4 Tin, Moab ram hmeichhia nupuiah an nei a: a pakhata hming chu Orpi a ni a, a pakhata hming chu Ruthi a ni; chutah chuan kum sâwm emaw lai an awm a. 5 Tin, Mahlona leh Kiliona chu an thi ta ve ve a; tichuan, chu hmeichhia chu a fate pahnih leh a pasal chuan an thihsan ta a. 6 Chutichuan, a mote nên chuan Moab ram ata chu haw leh tûrin an tho va, LALPAN ei tûr pein a mite chu a kan dân te Moab ram aṭanga a lo hriat avângin. 7 Tichuan, a awmna ata chu a mote pahnih nên chuan an chhuak a; Judai rama haw leh tûrin an kal ta a. 8 Tin, Naomi chuan a mote pahnih hnênah chuan, “In nu in lam ve vea haw leh tûrin kal rawh u khai; mitthi chung leh ka chunga in tih ang hian LALPA chuan in chungah ngilnei takin ti ve rawh se. 9 LALPA chuan in pahnihin pasalte ina khawsakna in tawn theih nân khawngaih che u rawh se,” a ti a. Tichuan, a fâwp a; tin, aw chhuah meuhvin an ṭap ta chiam mai a. 10 Tin, a hnênah, “Kan kal lo vang, i chite hnêna i hâwnnaah chuan kan tel ve zâwk ang,” an ti a. 11 Tin, Naomi chuan, “Ka fanute u, haw leh zâwk rawh u; engah nge ka hnênah chuan in kal ve tehlul ang le? In pasal tûr fapa ka pai leh thei dâwn em ni? 12 Ka fanute u, haw leh ula, kal rawh u khai; pasal han nei tûrin ka upa lutuk tawh si a. Tin, ka bei a la sei reng e ti mah ila, zâninah mai pawh hian pasal neiin fapate pawh nei mah ila, 13 an puitlin thlengin in awm dâwn em ni ang? Pasal lovin in awm reng dâwn em ni ang? Ni kawng lo ve a, ka fanute u, nangmahni avâng hian ka lungngaihna a zualkai zâwk a ni, LALPA kut chu ka chungah a tla ta a nih hi,” a ti a. 14 Tin, an aw chhuahin an ṭap leh ta chiam mai a; tin, Orpi chuan a pi chu a fâwp a, Ruthi erawh chuan a vuan tlat a. 15 Tin, ani chuan, “Ngai teh, i mopuinu chu a chite hnên leh a pathian hnên lamah chuan a kîr leh ta a; nang pawh i mopuinu ûmin haw ve tawh aw,” a ti a. 16 Tin, Ruthi chuan, “Nangmah ṭhen tûr leh nangmah zui lova haw leh tûr chuan mi thlêm lo hrâm hrâm rawh; i kalna apiangah ka kal ang a; i riahna apiangah ka riak ang a; i chite chu ka chite an ni ang a, i Pathian chu ka Pathian a ni ang. 17 I thihna apiangah chuan ka thi ang a, chutah chuan mi phûm ve mai tûr a ni. Nang leh kei hi thihna chauh lo chuan thil dangina min ṭhen dâwn chuan LALPAN a tih tihin mi ti mai sela, chu aia nasa pawhin,” a ti a. 18 Chutichuan, a hnêna kal a tum tlat tih a lo hriat chuan a ngawihsan ta a. 19 Tichuan, Bethlehem thlengin an kal dûn ta a. Tin, heti hi a ni a, Bethlehem an thlen chuan a khuain an phu ta mur mur mai a, hmeichhiate chuan, “Hei, Naomi kha a ni maw?” an ti a. 20 Ani chuan an hnênah, “Naomi mi ti suh u, Marai mi ti zâwk rawh u. Engkimtitheia chuan lungchhiatthlâk takin mi ti ta si a. 21 Muk takin ka chhuak a, LALPA chuan kutbêngin mi hruai hâwng leh a ni. LALPA chuan ka chungah a lungnih lohna a tilang a, Engkimtitheia chuan mi tihhrehawm te hre reng siin, engati nge Naomi min la tih cheu ni le?” a ti a. 22 Chutichuan, Naomi chu a lo kîr a, a monu Moab mi Ruthi nên Moab ram aṭang chuan an lo kîr a ni. Barli seng ṭan tirh laiin Bethlehem chu an thleng a ni.
Boaza lovah Ruthi a feh
1 Tin, Naomi chuan a pasala laichîn, Elimeleka thlah, mi neinung tak laichîn a nei a; a hming chu Boaza a ni. 2 Tin, Moab mi Ruthi chuan Naomi hnênah, “Lo lamah ka kal ang a, mi lo khawngaihtu apiang buhṭo ka va zawng ang e aw?” a ti a. Tin, a hnênah, “Kal ta che, ka fanu,” a ti a. 3 Tichuan, a kal ta a, buh sengtute seng hmaih chu a va zawng ta a. Elimeleka thlah Boaza lovah ngei chuan a va kal fu hlauh mai a. 4 Tichuan, ngai teh, Bethlehem aṭangin Boaza chu a va kal a, buh sengtute hnênah chuan, “In hnênah LALPA awm rawh se,” a ti a. Tin, anni chuan, “LALPAN malsâwm che rawh se,” tiin an chhâng a. 5 Chutichuan, Boaza chuan a chhiahhlawh, buh sengtute chunga hotu hnênah chuan. “Hei khawi lam nula nge ni le?” a ti a. 6 Tin, a buh sengtute chunga hotu a chhiahhlawh chuan, “Moab nula, Moab ram ata Naomi hnêna lo kal ve a ni. 7 Tin, ani chuan, ‘Min khawngaih la, in buhṭo ka zawng ang a, buh sengtuten an buhphal an khâwm zawhin ka zawng zêl ang e,’ a ti a; tichuan, a lo kal a, ina rei lo tê a han awm tih loh chu zîng ata a la awm ta reng a ni,” tiin a chhâng a. 8 Chutichuan, Boaza chuan Ruthi hnênah chuan, “Ka fanu, ngai teh aw, lo dangah chuan buhṭo zawngin kal suh la, heta ta hi kal sawn suh, ka chhiahhlawh nulate hnênah hian awm reng rawh. 9 An buh seng hi en reng la, an hnu chhui zêl rawh; tlangvâlte chu eng mah tih loh tûr chein thu ka pe tawh diam e; tin, i tui a hâl apiangin tuibêla tlangvalte tui chawi sa va in ṭhîn ang che,” a ti a. 10 Chutichuan, a kûn a, lei siin a bawkkhup a, a hnênah, “Hnam dang ka ni si a, nangin hetianga min hriat duha min lo khawngaih hi engtizia nge ni?” a ti a. 11 Tin, Boaza chuan a chhâng a, a hnênah, “I pasal thih achin i pi chunga i thiltih dân zawng zawngte miin mi hrilh vek a; tin, i nu leh i pa leh i pianna ram kalsana tûn hma lama i mi hriat ngai lohte hnêna i lo kal dânte pawh hi. 12 LALPA chuan i thiltih chu rûl sela, LALPA, Israel-te Pathian, inhumhim nâna a thla hnuai i rawn chuha chuan i ṭhat man pe ṭeuh che rawh se,” a ti a. 13 Tin, ani chuan, “Ka pu, mi khawngaih ang che; nangin mi thlamuan a, i chhiahhlawh nulate zînga mi ni mah suh ila, i chhiahhlawhnu hi ṭha takin mi be ta si a,” a ti a. 14 Tin, chaw ei hun chuan Boazan a hnênah, “Lo haw teh khai, chhangte hi han ei ve la, chhang themte chu uain thûrah han chiah ve rawh,” a ti a. Chutichuan, buh sengtute kiangah chuan a ṭhu a; tin, chhangpêr chu an pe a, a ei a, a kham hnu pawhin a la ei bâng ta cheu va. 15 Tin, buhṭo zawng tûra a thawh leh chuan, Boaza chuan a tlangvâlte hnênah, “Buhphal zînga mite pawh hi chhar zêl sela, hau suh ang che u. 16 Tin, a têla mite pawh, pawh chhuahsak ula, hnutchhiah zêl ula, chhar sela, hau suh u,” tiin thu a pe a. 17 Chutichuan, lova buhṭo chu tlai lam thlengin a zawng a; tin, a zawn sa chu a vua a, barli epha khat emaw lai a ni. 18 Tin, a phur a, khuaah chuan a haw ta a, a pi chuan a buhṭo zawn chu a lo hmu a. Tin, ani chuan a kham hnua a ei bâng chu a phawrh a, a pe a. 19 Tin, a pi chuan a hnênah, “Vawiinah hian khawi lama buhṭo nge i zawn? A lo hre duhtu che chu malsâwmin awm rawh se,” a ti a. Tin, ani chuan, tu hnênah nge a va thawh tih a pi chu a hrilh a, “Vawiina ka va thawhna pa chu a hming Boaza a ni,” a ti a. 20 Tin, Naomi chuan a monu hnênah chuan, “LALPA, mi nung leh mitthi chunga a khawngaihna bâng chuang ngai lova chuan amah chu malsâwm rawh se,” a ti a. Tin, Naomi chuan a hnênah, “Chu mi chu kan lamhnai, kan laichîn bul a ni asin,” a ti a. 21 Tin, Moab mi Ruthi chuan, “A nih tak chu, ka hnênah pawh, ‘Ka buh hi an seng zawh vek hma loh chu ka tlangvâlho hnênah hian tel reng ang che,’ mi ti nghe nghe asin,” a ti a. 22 Tin, Naomi chuan a monu Ruthi hnênah chuan, “Ka fanu, lo danga an hmuh hauh lohna tûr chein a chhiahhlawh nulaho zîngah hlîr chuan kal la a ṭha ang,” a ti a. 23 Chutichuan, barli leh huit seng zawh thlengin Boaza chhiahhlawh nulaho zîngah hlîr chuan buhṭo zawngin a kal a; tin, a pi hnênah chuan a awm a.
Ruthiin pasal tûr a hmu
1 Tin, a pi Naomi chuan a hnênah, “Ka fanu, i tâna ṭha tûr khawsakna ka zawnsak dâwn lâwm che ni? 2 Kan laichînpa Boaza, a chhiahhlawh nulate nêna hna i va thawhna kha a awm a ni lâwm ni? Ngai teh, zâninah hian hruihah barli a zâp fai dâwn a. 3 Chutichuan, inbual la, inthih la, i incheina puan sin la, hruihah chuan zuk kal rawh; amaherawhchu, chaw te a eia a in zawh hma loh chuan a hnênah inhriattîr hauh suh ang che. 4 Tin, heti hi a ni ang a, a mut hunah chuan a mutna chu chhinchhiah la; tin, lût la, a ke hlîm la, mu rawh; tin, ani chuan i tih tûr chu a lo hrilh ang che,” a ti a. 5 Tin, ani chuan a hnênah, “I sawi apiang chu ka ti ang e,” a ti a. 6 Tichuan, hruihah chuan a zuk kal a, a piin a hrilh ang apiang chuan a ti a. 7 Tin, Boaza chuan chaw a ei a, a in zawh chuan a rilru a lo hlim ta êm êm a, buh vûm bulah chuan mu tûrin a kal ta a; tin, zawi têin a va kal a, a ke chu a hlîm a, a mu ve ta a. 8 Tin, heti hi a ni a, zanlaiah chuan chu pa chuan a hlau va, lehlam a hawi a; tin, ngai teh, a ke bulah chuan hmeichhia a lo mu reng mai a. 9 Tin, ani chuan, “Tu nge i nih?” a ti a. Ani chuan, “I chhiahhlawhnu Ruthi ka ni; chutichuan, i chhiahhlawhnu hi i puan mi han zâwn rawh, ka laichîn bul i ni si a,” a ti a. 10 Tin, ani chuan, “Ka fanu, LALPAN malsâwm che rawh se! Tlangvâl rethei emaw, hausa emaw i zui loh dânah hian a tîr ai mahin a hnu lamah hian ṭhatna i tilang nasa ta zâwk a. 11 Chutichuan, ka fanu, hlau suh aw. I sawi ang zêlin i chungah ka ti ang, kan khuaa mi zawng zawngte hian hmeichhe fel tak i ni tih an hre vek si a. 12 Tin, laichîn inhnai kan ni ngei mai a; amaherawhchu, keimah aia hnai zâwk a awm a. 13 Zânin chu awm phawt la, naktûk zîngah chuan i chungah ani chuan a laichîn tih tûr a tih duh chuan a ṭha a ni ang a; laichîn pual chu ti ang hmiang. Amaherawhchu, laichîn tih tûr chu i chunga a tih duh loh chuan, laichîn tih tûr chu LALPA a nung ngei ang hian keiman ka ti ngei ang! Zîng thlengin mu reng mai rawh,” a ti a. 14 Tichuan, zîng thlengin a ke bulah chuan a mu ta a; tin, tu mah la inhmuh chian theih hmain a tho va, “Hruihah chuan hmeichhia chu a lo kal tih rêng rêng tu mân hre suh se,” a ti rêng a. 15 Tin, a hnênah, “I puan bah kha han la la, dawh rawh,” a ti a. Tichuan, a dawh a, barli chu tehkhâwng rûkin a teh a, a chhûng a; tin, khuaah a kal ta a. 16 Tin, a pi hnên a han thlen chuan, “Ka fanu, eng nge i an le?” a lo ti a. Tin, ani chuan chu pain a chunga thil a lo tih zawng zawng chu a hrilh a. 17 “He barli tehkhâwng ruk hi mi pe a, ‘I pi hnênah chuan kutbêngin haw hauh suh ang che,’ mi ti a ni,” a ti a. 18 Tin, ani chuan, “Ka fanu, eng angin nge thil a lo awm dâwn i hriat hma loh chuan awm mai rawh; vawiina he thil hi a tih zawh hma loh chuan chu pa chu a ngawi mai dâwn si lo va,” a ti a.
Boazan Ruthi a nei
1 Tichuan, Boaza chu kulh kawngkaah chuan a han chho va, chutah chuan a ṭhu a; tin, ngai teh, an laichîn bul a chungchâng thu Boazan a sawi kha a lo kal a. Chu mi hnênah chuan, “E! Nang kha, lo pêng la, ṭhu teh khai,” a ti a. Tin, ani chu a lo pêng a, a ṭhu ta a. 2 Tin, chumi khuaa upaho zînga mi sâwm a hruai a, an hnênah, “Hetah hian ṭhu teh u khai,” a ti a, an ṭhu ta a. 3 Tin, an laichîn bula hnênah chuan, “Moab ram aṭanga lo kîr Naomi chuan kan unaupa Elimeleka ram kha a zuar a; 4 tichuan, i hnêna, ‘Hênga ṭhute mit hmuhah leh kan upateho mit hmuhah hian lei rawh. I tlan duh chuan tlan la; amaherawhchu, i tlan duh loh chuan ka hriat theih nân min hrilh ang che; nang lo chu tu mah a han tlantu âwm dang an awm si lo va; tin, kei hi i dawtah chuan ka ni a,’ tia hriattîr che ṭûlin ka hria,” a ti a. Tin, ani chuan, “Ka tlan ang e,” a ti a. 5 Tin, Boaza chuan, “Naomi hnêna mi, chumi ram i lei ni chuan mitthi nupui, Moab hmeichhia Ruthi lakah mitthi hming dai lova a ro luahtu tûr an awm zêl theih nân i lei bawk tûr a ni,” a ti a. 6 An laichîn bul pa chuan, “Keima tân chuan ka tlan thei lo; chuti lo zawng, keima ro luah lam thu ka tikhawlo dah ang e, tlan phâk ka nihna ai chu nangman chang mai rawh; kei zawngin ka tlan thei lo a nih hi,” a ti a. 7 Hmânlaia Israel-te zîngah thil engkim an tihngheh nâna an intlan dân leh an inthleng dân chu hetiang hi a ni: pheikhawk an hlîp a, an vêngte an pe a, chu chu Israel-te zînga an tihngheh dân a ni. 8 Chutichuan, an laichîn bul chuan Boaza hnênah, “Nangman i tân lei zâwk rawh,” a ti a. Tin, a pheikhawk a hlîp a. 9 Tin, Boaza chuan upate leh mipui zawng zawngte hnênah chuan, “Vawiinah hian nangniho hi Elimeleka thil neih zawng zawng leh Kiliona leh Mahlona thil neih zawng zawng, Naomi hnêna mi ka lei tih hretute in ni a. 10 Tin, chu chauh chu ni lovin, mitthi chu a hming dai lova ro luahtu siamsak tûr leh, mitthi chu a unaute zîngah leh a awmna hmun kulh kawngkaa a hming a bo loh nân Moab hmeichhia Ruthi, Mahlona nupui chu ka nupui atân ka lei a; chu chu vawiinah hian nangniho hi a hretute in ni e,” a ti a. 11 Tin, kulh kawngkaa mipui zawng zawng leh upate chuan, “Hretute kan ni e. I ina hmeichhe lo lûta chu Rakili leh Leaii, Israel chhûngkaw dintu pahnihte ang khân LALPA chuan siam rawh se; tin, Ephratha-ah chuan chhuanawm takin ti la, Bethlehem-ah chuan hmingthang takin lo awm ang che. 12 Tin, LALPAN he nula laka thlah a la siamsak tûr che avâng hian, i chhûngkua chu Tamarin Juda a hrinsak Pereza chhûngkua ang lo ni rawh se,” an ti a.
Boaza thlahte
13 Chutichuan, Boaza chuan Ruthi chu a hruai a, a nupui a lo ni ta a; tin, a pâwl a, LALPA chuan nau a paitîr a; tin, fapa a hring a. 14 Tin, hmeichhiate chuan Naomi hnênah chuan, “Vawiin ngeia laichîn hnai chham lova awmtîrtu che LALPA chu fakin awm sela; Israel-te zîngah hian a hming lo thang rawh se. 15 Tin, ani chu i nunna tungdingtu leh i tar lam châwmtu a lo ni ang a; i monu, nangmah hmangaihtu, fapa pasarih aia i tâna ṭha chuan amah chu a hring ta si a,” an ti a. 16 Tin, Naomi chuan nau chu a la a, a pawm a, a awm ta a. 17 Tin, a vêngte hmeichhia chuan a hming an saksak a, “Naomi tân fapa a lo piang,” tiin a hmingah Obeda an sa a. Ani chu Davida pa Jesaia pa a ni a. 18 Hêng hi Pereza thlahte chu an ni: Pereza chuan Hezrona a hring a; 19 Hezrona chuan Rama a hring a, Rama chuan Aminadaba a hring a; 20 Aminadaba chuan Nasona a hring a, Nasona chuan Salmona a hring a; 21 Salmona chuan Boaza a hring a; Boaza chuan Obeda a hring a; 22 Obeda chuan Jesaia a hring a; tin, Jesaia chuan Davida a hring a ni.
Elkana leh a chhûngte Silo khuaah an kal
1 Ephraim tlâng ram Ramathaim-zophim khuaah chuan mi pakhat a awm a, a hming chu Elkana a ni; chu mi chu Jehorama fapa a ni a, chu mi chu Elihua fapa a ni a, chu mi chu Tohua fapa a ni a, chu mi chu Ephraim mi Zupha fapa a ni. 2 Tin, nupui pahnih a nei a: a pakhata hming chu Hani a ni a, a pakhata hming chu Penini a ni a; tin, Penini chuan fate a nei a, Hani erawh chuan fate a nei ve lo va. 3 Tin, chu mi chu an khua aṭangin Silo khuaah Sipaihote LALPA be tûr leh inthawi tûrin kum tin a han kal ṭhîn a. Chutah chuan Elia fapate pahnih, Hophnia leh Phinehasa, LALPA puithiamte an awm a. 4 Tin, Elkana inthawi ni a lo thlen chuan, a nupui Penini leh a fapate leh a fanute zawng zawng chu chanvo a siam a; 5 Hani chu hmangaih êm êm mah se, LALPAN fa nei thei lova a siam avângin chan khat chauh a siamsak a. 6 Fa a neih theih loh avânga a lungngaihna tizual tûrin amah ertu Penini chuan a lo deusawh ṭhîn a. 7 Tin, chutianga kum tin a tih avângin LALPA ina a han kal apiang chuan a lungngaihna chu a lo chawhthawhsak ṭhîn a; chutichuan, a ṭap a ṭap a, chaw pawh a ei lo va. 8 Tin, a pasal Elkana chuan a hnênah, “Hani, engati nge i ṭah? Engati nge chaw i ei loh? Engati nge i thin a nat? Fapa sâwm ai pawhin i tân ka ṭha zâwk lâwm ni?” a ti a.
Hani leh Elia
9 Chutichuan, Silo khuaa chaw an eia an in zawh chuan Hani chu a tho va. Tin, puithiam Elia chu LALPA biak in kawngka ban bula a ṭhutnaah chuan a ṭhu a. 10 Tin, Hani chu a rilru a mangang êm êm mai a, LALPA hnênah a ṭawngṭai a, lungchhe takin a ṭap a. 11 Tin, thu a tiam a, “Aw Sipaihote LALPA, i bawihnu tlâwmzia hi min hriatsak takmeuhva, min hriat renga, i bawihnu hi min theihnghilh lohva, i bawihnu hi fapa i pêk chuan, a dam chhûng zawng LALPA ka pe ve thung ang a, a lu pawh meh rêng rêng a ni lo vang,” a ti a. 12 Tin, heti hi a ni a, LALPA hmaa a ṭawngṭai reng lai chuan Elia chuan a hmui phun chu a lo chhinchhiah a. 13 Hani chuan a rilruin a sawi a, a hmui chauh a phu a, a aw chu hriat a ni lo va. Chuvângin, Elia chuan zu a rui niin a ring a. 14 Chutichuan, Elia chuan a hnênah, “Eng chen nge rui renga i awm dâwn le? I uain chu dah bo rawh khai,” a ti a. 15 Tin, Hani chuan, “Ka rui lo asin ka pu, hmeichhe rilru lungngai tâwpkhâwk ka ni a; uain pawh, zupui pawh ka in hauh lo va, LALPA hmaah ka rilru ka phawrh zâwk a ni. 16 I bawihnu hi Beliala fanuah puh lul suh ang che; ka rilrua khat liam ka lungnih lohna leh ka lungngaihna ka sawi a nih hi,” tiin a chhâng a. 17 Tin, Elia chuan, “Thlamuang takin kal rawh khai, Israel-te Pathian chuan i thil dîl chu pe che rawh se,” tiin a chhâng a. 18 Tin, ani chuan, “I chhiahhlawhnu hian i mit lo tlung rawh se,” a ti a. Chutichuan, hmeichhia chu a kal ta a, chaw te a ei a, lungngai hmêl a pu ta lo va.
Samuela pian thu leh hlan thu
19 Tin, zîng takah an tho va, LALPA chu an bia a, an haw a, Rama khuaa an in chu an thleng leh ta a. Tin, Elkana chuan a nupui Hani chu a pâwl a; tin, LALPA chuan ani chu a hre reng a. 20 Chutichuan, heti hi a ni a, Hani chuan nau a pai a; tin, a hun a lo thlen chuan fapa a hring a; “LALPA ka dîl a ni,” tiin a hmingah Samuela a sa a. 21 Tichuan, Elkana leh a chhûngte zawng zawng chu LALPA hnêna an kum tin inthawina hlân tûr leh a thutiam hlen tûrin an kal chho va. 22 Hani erawh chu a kal chho ve lo va; a pasal hnênah chuan, “Kei zawng naupangin hnute hnêk a bân hma loh chuan ka kal chho ve lo vang e; chumi hnuah chuan LALPA hmaa a inlan theih nân ka hruai ang a, chutah chuan a awm reng tawh dâwn nia,” a ti a. 23 Tin, a pasal Elkana chuan a hnênah, “Ṭha âwm i tih apiang chuan ti rawh, a hnute hnêk i bântîr thlengin awm rawh; amaherawhchu, LALPA chuan a thu chu tinghet ngei rawh se,” a ti a. Chutichuan, a hnute hnêk bân hma loh chuan hmeichhia chu a awm ta a, a fapa chu hnutê a hnêktîr a. 24 Tin, hnute hnêk a bântîr chuan, chhangphut epha khat leh uain saidawiûm khat kengin sebâwng pathum nên a han hruai a, Silo khuaa LALPA inah chuan a kalpui a. Naupang chu a la naupang hle a. 25 Tin, bâwngpa chu an talh a, naupang chu Elia hnênah an hruai a. 26 Tin, ani chuan, “Aw ka pu, i nunna chhâlin ka sawi e, kei chu e ka pu, hemi hmuna i kianga dinga LALPA hnêna ṭawngṭai hmeichhia kha ka ni ngei a. 27 He naupang dîl hian ka ṭawngṭai a ni a; tin, LALPA chuan ka dîl chu mi pe ta a. 28 Chuvângin, kei pawhin LALPA hnênah ka hlân a ni; a dam chhûng zawnga LALPA tâna hlan a ni,” a ti a. Tin, chutah chuan LALPA chu an bia a.
Hani ṭawngṭaina
1 Tin, Hani chu a ṭawngṭai a: “LALPA chungah ka thinlung a lâwm êm êm a, Ka ki chu LALPA-ah chawimawiin a awm; Ka hmêlmate chungah ka kâ tihzauvin a awm a, I chhandamnaah chuan ka lâwm êm êm avângin. 2 “LALPA anga thianghlim hi an awm lo; Nangmah ang rêng an awm si lo, Kan Pathian ang lungpui rêng a awm hek lo. 3 “Chuti taka chapovin thu sawi tawh suh ula; In kâ aṭangin ṭawng chaltlai rêng rêng chhuak suh se; LALPA chu finna Pathian a ni si a, Amahin thiltihte a bûk fel ṭhîn. 4 “Mi chak thalngulte a titliak a, Petekte tai chu chaknaa hrênin a awm a. 5 Tlaipuar ṭhînte chu ei tûr zawngin an inhlawhfa ta a, Rilṭâm ṭhînte chu an châwl ta. A ni, ching chuan pasarih a hring ta; Fa tam tak nei nu chu a chau ta. 6 “LALPA chuan a tihlum ṭhîn a, a tinung bawk ṭhîn. Thlânah a chhuktîr ṭhîn a, a hruai chhuak bawk ṭhîn. 7 LALPA chuan a tirethei ṭhîn a, a tihausa bawk ṭhîn; A titlâwm ṭhîn a, a chawisâng bawk ṭhîn. 8 Vaivut ata rethei chu a kaitho ṭhîn a, Pachhia chu êkdûr ata a chawikâng ṭhîn; Mi liante hnêna a awmtîr theiha, Ropuina lalṭhutthlêng an chan theih nân. Leilung nghahchhan chu LALPA ta a ni a, Khawvêl chu a chungah a nghat ta si a. 9 “A mi thianghlimte ke chu a vêng ang a, Mi sualte erawh chu thim zîngah tihngawih ṭhiapin an awm ang; Chakna chuan tu mân an ngam dâwn si lo va. 10 LALPA beitute chu an keh sawm ang; Vân aṭanga khawpui riin a do vang. LALPA chuan kâwlkil thlengin ro a rêl ang a; A lal chu chakna a pe ang a, A hriak thiha ki chu a chawimawi ang,” tiin. 11 Chutichuan, Elkana chu Rama khuaah a inah chuan a haw ta a. Tin, naupang chuan puithiam Elia hmaan LALPA rawng chu a bâwl ta a.
Elia fapate
12 Tin, Elia fapate chu Beliala fapate an ni a; LALPA chu an hre lo va. 13 Tin, mipuite laka puithiamte tih dân chu, miin inthawina an rawn hlan hian, sa chhum lai takin puithiam chhiahhlawh hi sa thurna thîrkut zum thum nei mi kengin a lo kal ṭhîn a. 14 Tin, bêl rawng zau emaw, bêl dâwt nei emaw, bêl khaina nei emaw, bêl emaw chhûng chu a zuk chhun a; tin, chumi sa thurna zumin a rawn thur chhuah zawng zawng chu puithiamin a la ṭhîn a ni. Chutiang chuan Israel mi, chuta lo kal zawng zawngte lak ata chu Silo khuaah chuan an lo tihsak ṭhîn a. 15 A ni, a thau chu a hâl hmain puithiam chhiahhlawh chu a lo kal a, inthawia hnênah chuan, “Puithiam tâna hem hmin tûr sa mi pe rawh; i sa chhum chu a duh lo va, a hel a duh a ni,” a ti ṭhîn a. 16 Tin, mi chuan a hnênah, “A thau chu hâl phawt mai sela; tin, chumi zawhah chuan i nunnain a duh zât zât i la dâwn nia,” an lo tih te hian, ani chuan, “Ni lo ve, mi pe nghâl tûr a ni; mi pek loh chuan ka la lui rêng rêng ang,” a ti ṭhîn a. 17 Tichuan, tlangvâlte sualna chu LALPA mit hmuhin a lo nasa ta êm êm mai a; mite chuan LALPA hnêna inthawina hlan te chu an ngaihnêp phah ta si a.
Silo khuaah Samuela a awm ta
18 Amaherawhchu, Samuela chu naupang mah ni sela, puan zai sîn puithiam kawr hain LALPA hmaah rawng a bâwl a. 19 Tin, chu lo pawh chu a nuin kawrfualte a ṭhuisak a, an kum tin inthawina hlân tûra a pasal nêna an kalin kum tin a kensak ṭhîn a. 20 Tin, Elia chuan Elkana leh a nupui chu mal a sâwm a, “LALPA tâna in thilhlan in hlan hi he hmeichhe thlah hian LALPAN rûl che u rawh se,” a ti a. Tichuan, an in lamah an haw ta a. 21 Tin, LALPA chuan Hani chu a kan a, nau a pai a, fapa pathum leh fanu pahnih a hring a. Tin, naupang Samuela chu LALPA hmaah chuan a lo sei lian ta a.
Elia leh a fate
22 Elia chu a lo tar ta hle mai a; Israel mite zawng zawng chunga a fate thiltih zawng zawng leh, inbiakna puan in kawngka bula rawngbâwltu hmeichhiate an lo mutpui ṭhin thute a lo hria a. 23 Tichuan, an hnênah, “Engati nge hetiang thil in tih ni le? Hêng mi zawng zawng aṭangte hian in thiltih dân ṭha lote ka lo hria a ni. 24 Khai! Khai! Ka fate u, in chanchin ka lo hriat chu a ṭha lo lam hlîr a ni. LALPA mite chu in bawhchhiattîr a ni. 25 Mi pakhat mi dang chunga a sual chuan Pathianin ro a rêlsak ang a. Amaherawhchu, mi, LALPA chunga a sual chuan tuin nge ngenpui ang?” a ti a. Chuti chung pawhin an pa thu chu an awih duh chuang lo va; chuvângin, LALPA chuan anmahni chu tihhlum a tum ta a. 26 Tin, naupang Samuela chu a ṭhang lian deuh deuh va; Pathian leh mihring duh zâwngin a awm a.
Elia chhûngte chungchâng hrilh lâwkna
27 Tin, Elia hnênah chuan Pathian mi pakhat a lo kal a, a hnênah, “LALPA chuan heti hian a ti: ‘Aigupta rama Pharaoa bawiha an awm lai khân in thlahtute hnênah khân ka inlâr a ni lâwm ni? 28 Tin, Israel hnam zawng zawng zîng ata ka maichâma kala, rimtui hâla, ka hmaa puithiam kawr ha tûrin ka puithiam atân amah chu ka ruat a ni lâwm ni? Tin, i thlahtute chu Israel mite hâlral thilhlan zawng zawng ka pe a ni lâwm ni? 29 Eng vângin nge ka awmnaa hlan tûra ka ruat ka hnêna inthawina leh ka puala thilhlan chu in rah beha, keimah aia i fate i chawimawi zâwka, nangmahni intihthau nâna ka mi Israel-te inthawina a ṭha ṭha in hman ni?’ tiin. 30 Chuvângin, LALPA, Israel-te Pathian chuan, ‘Kei chuan i chhûngte leh i pa chhûngte chu kumkhuain ka hmaah in awm ang chu ka ti ngei mai a,’ a ti a; nimahsela, tûnah hian LALPA chuan, ‘In awm tawp lo vang; mi chawimawi apiangte chu ka chawimawi ang a, mi hmusit apiangte chu ka ngaihnêp an ni dâwn si a. 31 Ngai teh, i bân te, i pa chhûngte bânte ka tan ni chu a lo thleng dâwn ta, i inah tar kûna dam rêng rêng an awm lo vang. 32 Israel mite Pathianin neihnunna a la pêk hunah te chuan ka awmna ina tuarna i la hmu ang a; tin, i inah chuan tar kûna dam rêng rêng an awm lo vang. 33 Tin, i mi, ka maichâm ata ka tihbo loh tûra chu i mit tikham tûr leh i rilru tilungngaitu tûr a ni ang a; i ina lo piang apiangte chu an vânglai takin an thi zêl ang. 34 Tin, i fapate pahnih Hophnia leh Phinehasa chunga thil lo thleng tûr chu i tân chhinchhiahna a ni ang: ni khatah an pahnihin an thi ve ve ang. 35 Tin, puithiam rinawm tak ka tân ka din ṭha leh ang a, chu chuan ka thinlung leh ka rilru remzâwngin a ti ang a; tin, chhûngkaw nghet takah ka din ang a, kumkhuain ka hriak thiha hmaah chuan a awm ang. 36 Tin, heti hi a ni ang a, i ina la awm zawng zawngte chu tangkarua leh chhang dîlin an kal ang a, chibai an bûk ang a, “Chhang tlêm tal ei tûr ka hmuh theih nân puithiam hna eng emaw min thawhtîr rawh khai,” an ti ang,’ a ti a ni,” a ti a.
Samuela hnênah LALPA a inlan
1 Tin, naupang Samuela chuan Elia hmaah chuan LALPA rawng a bâwl a. Chûng lai chuan LALPA thu chu a thleng khât hle mai a; a langa inlârnate a awm lo va. 2 Tin, heti hi a ni a, chûng lai chuan Elia chu ama hmuna a mut laiin (a mit a thim tawh deuh va, khua a hmu ṭha thei tawh mang lo va), 3 Pathian khâwnvâr pawh a la mih hmain, Pathian bâwm awmna LALPA biak inah chuan Samuela chu a han mu a; 4 LALPA chuan Samuela a ko va. Ani chuan, “Heta hi ka awm,” a ti a. 5 Tin, Elia hnênah chuan a va tlân a, a hnênah, “Heta hi ka awm e, mi ko va,” a ti a. Tin, ani chuan “Ka ko lo va che; va mu leh tawh,” a ti a. Tichuan, a kal a, a va mu leh ta a. 6 Tin, LALPA chuan Samuela chu a ko leh a. Tin, Samuela chu a tho va, Elia hnênah chuan a kal a, “Heta hi ka awm e, mi ko va,” a ti a. Tin, ani chuan a chhâng a, “Ka ko lo va che, ka fapa, va mu leh tawh,” a ti a. 7 Chûng lai chuan Samuela chuan LALPA chu a hre lo va, LALPA thu a hnêna puan a la ni bawk lo va. 8 Tin, LALPA chuan Samuela chu a ko leh a, chu chu a vawi thumna a ni. Tin, a tho va, Elia hnênah chuan a kal a, “Heta hi ka awm e, mi ko va,” a ti a. Tichuan, Elia chuan naupang chu LALPAN a ko a ni tih a lo hre ta a. 9 Chuvângin, Elia chuan Samuela hnênah, “Kal la, va mu leh ta la, a koh leh che chuan, ‘LALPA, thu sawi rawh, i chhiahhlawhin a ngaithla e,’ i ti a ni ang chu,” a ti a. Tichuan, Samuela chu a hmunah chuan a va mu leh ta a. 10 Tin, LALPA chu a lo kal a, a ding a, a hmaa a koh ang khân, “Samuel, Samuel,” tiin a ko leh a. Chutichuan, Samuela chuan, “Thu sawi rawh, i chhiahhlawhin a ngaithla e,” a ti a. 11 Tin, LALPA chuan Samuela hnênah, “Ngai teh, Israel ramah hian a hria apiangte beng a khing hnih hniha ṭhâwng zâwng takin thil ka ti dâwn a ni. 12 Chumi ni chuan a chhûngkaw chungchâng thu ka sawi zawng zawng chu, a bul aṭangin a tâwp thlengin Elia chungah ka ti dâwn a ni. 13 A faten Pathian an sawichhiatna sual chu hre reng pawha a khap loh avângin, a chhûngkua chu kumkhua atân ka ngaihtuah dâwn a ni tih ka hrilh tawh si a. 14 Chuvângin, Elia chhûngkaw hnênah chuan Elia chhûngte bawhchhiatna chu inthawinain emaw, thilhlanin emaw, eng tikah mah tihkian theih a ni lo vang tiin chhia ka chham tawh a ni,” a ti a. 15 Tin, Samuela chu zîng thlengin a mu a; tin, LALPA in kawngkhârte chu a hawng a. Chutichuan, Samuela chuan chumi inlârna chu Elia hriattîr a hlauthâwng a. 16 Chutichuan, Elia chuan Samuela chu a ko va, “Samuel, ka fapa,” a ti a. Tin, ani chuan, “Heta hi ka awm e,” a ti a. 17 Tin, ani chuan, “Eng thil nge LALPA chuan i hnênah a sawi le? Ka lakah eng mah zêp suh aw. I hnêna a sawi zawng zawng chu ka laka zêp i neih chuan i chungah Pathianin a tih tihin ti sela, chu aia nasa pawhin,” a ti a. 18 Tin, Samuela chuan engkim a hrilh fai ta vek a, a lakah chuan eng mah zêp a nei lo va. Tichuan, ani chuan, “LALPA a ni alâwm, ṭha a tih ang zêlin ti rawh se,” a ti a. 19 Tin, Samuela chu a lo ṭhang lian deuh deuh va, a hnênah LALPA a awm zêl a, a thu rêng rêng chu leilungah a luan raltîr lo va. 20 Tichuan, Dan aṭanga Beer-seba thleng raka Israel mite zawng zawng chuan, Samuela chu LALPA zâwlnei atân tihngheh a ni tih an lo hre ta a. 21 Tin, LALPA chu Silo-ah chuan a inlâr leh a. LALPA chu thuin Samuela hnênah chuan Silo-ah a inlâr a ni si a.
Philistia-hovin thuthlunna bâwm an man
1 Tin, Samuela thu chu Israel mite zawng zawng zîngah a thang chhuak ta a. Tin, Israel mite chu Philistia mite do tûrin an kal chhuak a, Ebenezer kiangah ṭanhmun an khuar a; tin, Philistia mite chuan Aphek-ah ṭanhmun an khuar a. 2 Tin, Philistia mite chu Israel mite dang tûrin an lo inzâr pharh a. Tin, an han inbeih chuan Philistia mite hmaah chuan Israel mite chu an tlâwm ta a, indona hmunah chuan sipai sângli emaw lai an that a. 3 Tin, mipuite chu an riahhmuna an va kal chuan Israel upate chuan, “Eng vângin nge vawiinah hian Philistia mite hmaah LALPA chuan min tihtlâwm ni aw? Kan hnêna awma, kan hmêlmate kut ata min chhandam tûrin Silo ata LALPA thuthlung bâwm chu i han la ang u,” an ti a. 4 Chutichuan, mipuite chuan Silo-ah chuan mi an tîr a, chuta ta chu cherub-ho chunga ṭhu, sipaihote LALPA thuthlunna bâwm chu an va la ta a. Tin, Pathian thuthlunna bâwm an lâknaah chuan Elia fapate pahnih, Hopnia leh Phinehasa an tel ve a. 5 Chutichuan, LALPA thuthlunna bâwmin an riahhmun a lo thlen chuan, Israel mi zawng zawngte chu ring takin an au dur dur mai a, lei te lam pawh a nghawr ri dur dur mai a. 6 Tin, Philistia miten an au thâwm an hriat chuan, “Hebrai-ho riahhmuna au thâwm ri ta dur dur mai chu engtizia nge ni le?” an ti a. Tin, an riahhmunah LALPA bâwm a lo thleng a ni tih an hre ta a. 7 Tin, Philistia mite chuan an hlau ta a, “Riahhmunah pathian a lo kal ta a nih chu,” an ti a. “Kan chung a pik e! Tûn hma lamah chutiang a awm ngai si lo va. 8 Kan chung a pik e! Chûng pathiante kut chak tak ata chu tuin nge min chhandam ang? Chûng pathiante chu an ni, Aigupta mite thlalêra hri chi tinrênga tihlumtu kha. 9 Aw, nangni Philistia mite u, in chhiahhlawha an awm ang khân Hebrai-hote chhiahhlawha in awm loh nân chak takin awm ula, intimipa rawh u; intimipa ula, bei zêl rawh u,” an ti a. 10 Tichuan, Philistia mite chuan an bei a, Israel mite chu an tlâwm a, an puan in lam ṭheuhvah an tlân ta vek mai a. An that nasa êm êm mai a, Israel-ho zînga sipai sîngthum an thi a ni. 11 Pathian bâwm pawh chu an lâksak a; tin, Elia fapate pahnih, Hophnia leh Phinehasa-te chu an that bawk a.
Elia thih thu
12 Sipai zînga Benjamina thlah mi pakhat a tlân a, a puante ṭet phung leh a lûa lei kai luamin chumi ni la la chuan Silo a va thleng a. 13 Tin, a va thlen chuan ngai teh, Elia chuan kawng sîra a ṭhutnaah ṭhu chungin a lo thlîr reng a, Pathian bâwm avâng khân a rilruin a khûr a khûr a. Tin, mi chuan khua a han thlena, chanchin chu a han sawi chuan a khuain an au ta chuah chuah mai a. 14 Tin, Elian an au thâwm a lo hriatin, “Chu ri mur mur chu engtizia nge ni?” a ti a. Tin, mi chu hmanhmawh takin a va kal a, Elia chu a va hrilh a. 15 Elia chu kum 98 mi a ni a, a mit a thim tawh a, khua a hmu thei tawh lo va. 16 Tin, mi chuan Elia hnênah chuan, “Sipai zîng aṭanga lo kal ka nih hi, vawiinah hian sipai zîng ata lo tlân ka ni,” a ti a. Tin, ani chuan, “Ka fapa, eng angin nge thil a awm le?” a ti a. 17 Tin, chanchin rawn thlentu chuan a chhâng a, “Israel mite chu Philistia mite hmaah chuan an tlânchhia a; tin, mipui zîngah inthahna nasa tak a awm bawk a; tin, i fapate pahnih, Hophnia leh Phinehasa pawh an thi a; tin, Pathian bâwm pawh an lâksak ta,” a ti a. 18 Tin, heti hi a ni a, chutia Pathian bâwm thu a han sawi veleh chuan Elia chu kawngkhâr bula ṭhutphah ata a zangthalin a tlu a; a nghâwng a tliak a, a thi ta a, amah a tar tawhin a inzo tawh lo a ni. Tichuan, Israel-te chungah kum sawmli ro a rêl a ni.
Phinehasa nupui thih thu
19 Tin, a monu, Phinehasa nupui chuan nau a pai a, a hrin a hnai tawh hle a; Pathian bâwm an lâksak tih thu a han hriata, a pu leh a pasal an thi tih a han hriat chuan a kaikûn a, nau a hring ta a, a nâ chuan a rawn nang ta nghâl si a. 20 Tin, a thih dâwn ṭêpa a kianga ding hmeichhiate chuan a hnênah, “Hlau suh, fapa i hrin tâk hi,” an ti a. Nimahsela, a chhâng hauh lo va, a ngaihsak hek lo. 21 Tin, “Ropuina chuan Israel chu a chhuahsan ta!” tiin naupang hmingah chuan Ikaboda a sa a, Pathian bâwm chu an lâksak ta a, a pu leh a pasal pawh an thi ta si a. 22 “Ropuina chuan Israel-te chu a chhuahsan ta, Pathian bâwm chu an lâksak ta si a,” a ti a.
Philistia mite zîngah thuthlunna bâwm a awm
1 Chutichuan, Philistia mite chuan Pathian bâwm chu an la a, Ebenezer ata chu Asdod khuaah an kalpui ta a. 2 Tin, Philistia mite chuan Pathian bâwm chu an la a, Dagona biak inah an la lût a, Dagona kiangah chuan an dah a. 3 Tin, Asdod khuaa mite chu a tûk zing taka an han thawh chuan, ngai teh, LALPA bâwm hmaah chuan Dagona chu a hmaia lei siin a lo tlu dêr mai a. Tichuan, Dagona chu an la a, a awmna hmunah chuan an dah leh a. 4 Tin, a tûk leh zîng taka an han thawh chuan, ngai teh, LALPA bâwm hmaah chuan Dagona chu a hmaia lei siin a lo tlu dêr mai a. Dagona lu leh a kutphah bâwr khing hnih chhum chu kawngka bulah chuan a lo lum reng mai a; Dagona taksa chauh chu a lo awm ta mai a. 5 Chumi avâng chuan Dagona puithiam te, Dagona biak ina lo kal ṭhîn rêng rêngte pawhin Asdod khuaa Dagona kawngka bul chu tûn thlengin an rap ngam lo a ni. 6 Chutichuan, LALPA kut chuan Asdod khuaa mite chu a delh ta hle mai a, chhiatna a thlensak ta hlawm a; Asdod khua leh a chhehvêlte chu ngâwtin a hrem ta bawk a. 7 Tichuan, Asdod khuaa miten chutiang chu a nih an lo hriatin, “Israel-te Pathian bâwm chu kan hnênah awm reng teh suh se, kan chung leh kan pathian Dagona chunga a kutthlâk a na êm mai,” an ti a. 8 Chutichuan, Philistia lal zawng zawngte chu an hnênah an ko khâwm a, “Israel-te Pathian bâwm chu engtin nge kan tih ang?” an ti a. Tin, anni chuan, “Israel-te Pathian bâwm chu Gath khuaah va kalpui rawh u,” tiin an chhâng a; tichuan, Israel-te Pathian bâwm chu an va kalpui ta a. 9 Tin, heti hi a lo ni a, chutia an kalpui lai chuan LALPA kut chuan khua chu a tibuai ta nuaih nuaih mai a; khuaa mihringte chu a lian a têin a hrem a, ngâwtna hri an chungah a lêntîr a. 10 Tichuan, Pathian bâwm chu Ekron-ah an thawn lêt a, a va thlen chuan Ekron khuaa mite chu, “Israel-te Pathian bâwm chu keimahni leh kan mite tihlum tûrin kan hnênah an rawn la ta,” tiin an au ta chiam mai a. 11 Chutichuan, Philistia lal zawng zawngte chu an ko khâwm a, “Israel-te Pathian bâwm hi kal botîr ula, keimahni leh kan mite min tihhlum loh nân a awmhmun pângngaiah kal leh rawh se,” an ti a. Khaw pum puiah chuan thihna khawp buai nuaih nuaihna a awm a; Pathian kut chuan chu khua chu a delh hle mai si a. 12 Tin, a thi lote chu an ngâwt hlawm a; tichuan, chu khaw au thâwm chuan vân khi a han thleng a.
Thuthlunna bâwm kîr leh thu
1 Tin, LALPA bâwm chu Philistia mite ramah chuan thla sarih a awm a. 2 Tin, Philistia mite chuan, “LALPA bâwm chu engtin nge kan tih ang? A awmna pângngaia kaltîr lehna zia min hrilh teh u khai,” tiin puithiamte leh aienthiamte an ko va. 3 Tin, anni chuan, “Israel-te Pathian bâwm hi in kaltîr dâwn pawhin a ruak chuan kaltîr hauh suh u, a hnênah bawhchhiat thawina hlân ngei ngei rawh u. Tichuan, tihdamin in awm ang a; tin, engtiziaa a kut chu in hnên ata sawn lo nge ni tih in hria ang,” an ti a. 4 Chutichuan, anni chuan, “A hnêna kan bawhchhiat thawina hlan tûr chu eng nge ni ang?” an ti a. Tin, anni chuan, “Philistia lal zâtin rangkachak ngâwt lem panga leh rangkachak chaichîm lem panga; in zaa chunga hri lêng leh in lalte chunga lêng chu hmun khat a ni si a. 5 Chuvângin, in ngâwt lemte leh in ram tichhetu chaichîm lemte siam ula, Israel-te Pathian chu chawimawi rawh u; tichuan, a kut chu in chungah te, in pathian leh in ram chungah te a tizâng duh mahna. 6 Aigupta mite leh Pharaoan rilru an tihkhauh ang khân engati nge in rilru in tihkhauh ni? An zînga thil mak tak a tih khân mite chu an kaltîr a, an chhuak ta a ni lâwm ni? 7 Chuvângin, tûnah hian tawlailîr thar buatsaih ula, bâwngpui pahnih, a hnute sâwr lai, nghâwngkawl la bel ngai hauh loh nên; chûng bâwngpuite chu tawlailîrah chuan bel ula; tin, a note chu in lamah rawn hruai hâwnsak rawh u. 8 Tin, LALPA bâwm chu la ula, tawlailîrah chuan dah ula; tin, bawhchhiat thawi nâna in hlan rangkachak thil hlu chu thingremah khungin a sîrah dah ula. Kaltîr ula, thlah mai rawh u. 9 Tichuan, amaha ramri lampang kawng zawhin Beth-semes-ah a kal emaw en teh u; a kal chuan kan chunga thil ṭha lo tak hi ama tih a lo ni ang a, a kal loh chuan min hremtu chu ama kut a lo ni lo tih kan hria ang a, kan chungah a lo awm ve hrim hrim mai a ni ang,” an ti a. 10 Tin, mite chuan chutiang chuan an ti a; bâwngpui, a hnute sâwr lai pahnih an hruai a, tawlailîrah chuan an bel a, a note chu in lamah an khung a. 11 Tin, LALPA bâwm chu tawlailîrah chuan an dah a, rangkachak chaichîm lem leh ngâwt lem dahna thingrem nên. 12 Tin, bâwngpuite chuan Beth-semes lam panin kawng chu an zawh ta ngat ngat a; tichuan, bû chung zêlin kawngpui chu an zawh a, ding lamah emaw, vei lamah emaw an pêng hlek lo va; tin, Philistia lalte chuan Beth-semes ramri thlengin an zui a. 13 Tin, Beth-semes khuaa mite chuan ruamah hian an buh an lo seng a, an hawi chho va, bâwm chu an han hmu a, an lâwm ta hle mai a. 14 Tin, tawlailîr chu Beth-semes khuaa mi Josua lovah chuan a lût a, lungpui lian tak awmna laiah chuan a ding ta reng a; tin, tawlailîr thing chu an ek a, LALPA biak nân bâwngpuite chu hâlral thilhlanah an hmang ta a. 15 Tin, Levi chite chuan LALPA bâwm chu rangkachak thil hlu awmna thingrem nên chuan an la thla a, lungpui chungah chuan an dah a; tin, Beth-semes khuaa mite chuan chumi ni vêk chuan hâlral thilhlante leh inthawinate LALPA hnênah an hlân a. 16 Tin, chu chu Philistia lal pangate chuan an en zawh hnuin, chumi ni la la chuan Ekron khaw lamah an haw leh ta a. 17 Philistia miten rangkachak ngâwt lem LALPA hnêna bawhchhiat thawi nâna an hlan chu heti zât hi a ni: Asdod khaw pualah pakhat, Gaza khaw pualah pakhat, Askelon khaw pualah pakhat, Gath khaw pualah pakhat, Ekron khaw pualah pakhat; 18 tin, rangkachak chaichîm lem chu khua zawng zawng, kulh nei khua leh thingtlâng lam khua pawh chhiar veka lal pangate ta, Philistia mite khaw zât a ni a; LALPA bâwm an nghahna lungpui ngei chu Beth-semes khuaa mi Josua lovah chuan tûn thleng hian a la awm reng a ni.
Thuthlunna bâwm Kiriath-jearim khuaah
19 Tin, LALPA bâwm chhûng an en avângin Beth-semes khuaa mite chu a hrem a. An zîngah mi sîngnga leh sawmsarih zet a hrem a ni; LALPAN a hrem nasat êm avâng chuan mite chu an ṭap a. 20 Beth-semes khuaa mite chuan, “He Pathian thianghlim, LALPA hmaah hian tu nge ding thei ang a, kan hnên ata hi tu hnênah nge a kal chhoh tâk ang le?” an ti a. 21 Chutichuan, Kiriath-jearim khuaa mite hnênah chuan, “Philistia mite chuan LALPA bâwm chu an rawn dah leh ta a, lo chhuk ula, in hnên lamah la chho rawh u khai,” tia hrilh tûrin mite an tîr ta a.
1 Tichuan, Kiriath-jearim khuaa mite chu an zu kal a, LALPA bâwm chu an la chho va, tlânga Abinadaba inah chuan an la lût a, a fapa Eleazara chu LALPA bâwm enkawltu atân an tihrang a.
Israel rorêltuah Samuela
2 Tin, heti hi a ni a, Kiriath-jearim-a bâwm a awm chhûng chu rei tak a ni a, kum sawmhnih zet a ni. Tin, Israela chhûngte zawng zawngin LALPA chu an lunglên leh ta a. 3 Tin, Samuela chuan Israela chhûngte zawng zawng hnênah chuan, “In thinlung takzeta LALPA lam lo hawi in nih tak tak chuan, ram dang pathiante leh Astorethi-te chu in zîng ata dah bo daih ta che u, in thinlung chu LALPA tân buatsaih ula, ama rawng chauh bâwl rawh u; tichuan, Philistia mite kut ata hi a chhanchhuak dâwn che u nia,” tiin a sawi a. 4 Tin, Israel mite chuan Baala-te leh Astorethi-te chu an dah bo ta a, LALPA rawng chauh chu an bâwl ta a. 5 Tin, Samuela chuan, “Israel mi zawng zawngte chu Mizpe-ah ko khâwm vek ula, LALPA hnênah ka ṭawngṭaisak ang che u,” a ti a. 6 Tichuan, Mizpe-ah an kal khâwm ta a; tin, tui an chawi a, LALPA hmaah chuan an leihbua a. Chumi ni chuan chaw an nghei a, chutah chuan, “LALPA chungah chuan kan lo sual ta a ni,” an ti a. Tin, Samuela chuan Mizpe-ah chuan Israel mite ro a rêlsak a. 7 Tin, Philistia miten Mizpe-ah Israel mite an awm khâwm tih an hriat chuan Israel mite bei tûrin Philistia lalhote chu an thawk chho va. Chu chu Israel miten an lo hriat chuan Philistia mite chu an hlau va. 8 Tichuan, Israel mite chuan Samuela hnênah, “Philistia mite kut ata min chhandam tûra LALPA kan Pathian min auhsak chu bâng suh khai,” an ti a. 9 Tin, Samuela chuan berâmno hnute hne lai a la a, pumhâl hlan atân LALPA hnênah a hlân a. Tichuan, Israel mite tân Samuela chuan LALPA chu a au va; tin, LALPA chuan a chhâng a. 10 Samuelan hâlral thilhlan a hlan lai tak chuan Philistia mite chuan Israel mite chu beih tumin an rawn hnaih a. Nimahsela, chumi ni chuan LALPAN Philistia mite chungah khawpui nasa tak maiin a rîktîr ta dur dur mai a, a tibuai ta nuaih nuaih a, Israel mite hmaah chuan an tlâwm ta dêr mai a. 11 Tin, Israel mite chu Mizpe aṭang chuan an chhuak a, Philistia mite chu an ûm a, Beth-kar hnuai an thlen thlengin an that zêl a. 12 Chutichuan, Samuela chuan lung a la a, Mizpe leh Sen inkârah chuan a phun a. “Hei leh chen hi LALPAN min pui a ni,” tiin, a hmingah chuan Ebenezer a vuah a. 13 Chutichuan, Philistia mite chu an tlâwm ta a, Israel-te ramah chuan an kal leh ta lo va; tin, LALPA kut chuan Philistia mite chu Samuela dam chhûng zawng chuan a tai ta reng a. 14 Tin, Philistia miten Israel mite khua an lâkte chu Ekron aṭanga Gath thlengin Israel mite an pe kîr leh a, a ram chu Israel miten Philistia mite kut ata an chhanchhuak a. Tin, Israel mite leh Amor mite chu inremin an awm a. 15 Tin, Samuela chuan a dam chhûngin Israel mite ro a rêl a. 16 Tin, kum tinin Bethel leh Gilgal leh Mizpe hi a kan vêl ṭhîn a; chûng hmunahte chuan Israel mite ro a rêl ṭhîn a. 17 Tin, a in awmna a nih avângin Rama khuaah chuan a haw ṭhîn a; chutah chuan Israel mite ro a rêl a, chutah chuan LALPA tân maichâm a siam a.
Mipuiin lal neih an duh
1 Tin, heti hi a ni a, Samuela chu a lo upa ta a, a fapate chu Israel mite chunga rorêltuah a siam a. 2 A fa tîr hming chu Joela a ni a, a dawttu hming chu Abija a ni a; Beer-seba-a rorêltu an ni. 3 Nimahsela, a fate chuan a awm dân chu an la ve lo va, sum leh pai lam an ûm a, thamnate an la a, dik lo takin ro an rêl a. 4 Chutichuan, Israel mite upaho zawng zawng an inkhâwm a, Rama khuaah Samuela hnênah an kal a; 5 a hnênah, “Ngai teh, i lo upa ta hle mai a, i fapate lah chuan i awm dân an la ve si lo va; hnam dang zawng zawngte ang bawka kan chunga rorêl tûrin lal min siam rawh khai,” an ti a. 6 Nimahsela, a hnênah, “Ro min rêlsaktu tûr lal min pe rawh,” an tih thu chuan Samuela chu a tilâwm lo hle mai a. 7 Tichuan, Samuela chu LALPA hnênah a ṭawngṭai a. Tin, LALPA chuan Samuela hnênah, “Mipuiten i hnêna an sawi zawng zawng chu ngaithla rawh; nang duh lo che an ni lo va, an chunga lal atân keimah mi duh lo an ni zâwk e. 8 Aigupta ram ata ka hruai chhuah ni aṭanga tûn thlenga an thiltih dân zawng zawng, min hawisana pathian dang rawng te min bâwlsan ṭhîn ang bawk hian i chungah an ti a nih hi. 9 Chuvangin, an thu chu ngaithla rawh. Amaherawhchu, urhsûn taka tiamkamin an chunga rorêltu lal chêt dân tûr chu kawhhmuh chiah rawh,” a ti a. 10 Tin, Samuela chuan LALPA thu zawng zawng chu lal dîltu mipuite chu a hrilh vek a. 11 “In chunga rorêltu tûr lal chêt dân tûr chu hetiang hi a ni ang: in fapate chu a sakawr leh a tawlailîr chuanpuiah a ruat ang a, tawlailîr hmaa tlânte an awm ang. 12 A sipai sâng hotuah te, sawmnga hotuah te a ruat ang a; tin, ṭhenkhat chu a lei lettu atân te, a buh sengtu atân te, a indo thuamhnaw siamtu atân te, a tawlailîr hmanraw siamtu atân te a hmang ang a. 13 Tin, in fanute chu rimtui siamtuah te, chaw chhûmtuah te, chhang siamtuah te a hmang ang. 14 Tin, in lo te, in grêp huan te, in olive huan te, a ṭha ṭha te a chhuhsak ang che u a, a chhiahhlawhte a pe ang. 15 Tin, in thlai chî leh in grêp huana mi sâwma pakhat a lâksak ang che u a, a chhiahhlawhte leh hotute a pe ang. 16 Tin, in chhiahhlawhpa te, in chhiahhlawhnu te, in tlangvâl ṭha ṭha te, in sabengtung te a chhuhsak ang che u a, a hnathawktu atân a ruai ang. 17 In berâm ruala mi sâwma pakhat a lâksak ang che u a; tin, a chhiahhlawhte in ni ang. 18 Tin, chumi hunah chuan in la thlan tûr in lal avâng chuan in rûm chhuak ang a; nimahsela, chumi hun chuan LALPAN a chhâng lo vang che u,” a ti a. 19 Nimahsela, mipuite chuan Samuela thu chu an pawm duh lo va, “A ni lo ve, lal kan nei ngei tûr a ni; 20 tichuan, hnam dang zawng zawngte ang kan lo ni ang a; tin, kan lal chuan ro min rêlsak ang a, kan hnamte hruaiin râlte min dopui ang,” an ti a. 21 Tin, Samuela chuan mipuite thusawi zawng zawng chu a hria a, LALPA hnênah a thlen lehchhâwng a. 22 Tin, LALPA chuan Samuela hnênah, “An thu chu pawm la, lal siamsak rawh,” a ti a. Tin, Samuela chuan Israel mite hnênah chuan, “Mi tin mahni khuaah haw ṭheuh rawh u,” a ti a.
Saula leh Samuela an intâwk
1 Benjamin rama Benjamina thlah mi pakhat, mi chak huaisen tak hi a awm a, a hming chu Kisa a ni a, chu mi chu Abiela fapa a ni a, chu mi chu Zerora fapa a ni a, chu mi chu Bekoratha fapa a ni a, chu mi chu Aphia fapa a ni a. 2 Tin, ani chuan fapa a nei a, a hming chu Saula a ni, tlangvâl tlâwntlai ṭha tak a ni a, Israel mite zîngah chuan a aia tlâwntlai ṭha rêng rêng an awm lo va; tu mah a koki khûm pawh an awm lo. 3 Tin, Saula pa Kisa sabengtungte a bo hlawm a. Tin, Kisa chuan a fapa Saula hnênah chuan, “Tho la, chhiahhlawh pakhat hruai la, sabengtung va zawng teh khai,” a ti a. 4 Tichuan, Ephraim tlâng ram te a fang a, Salisa ram te pawh a fang a; nimahsela, an hmu lo va. Tichuan, Saalim ram an fang leh a, chutah pawh chuan an awm lo va. Tin, Benjamin mite ram a fang leh a; nimahsela, an hmu ta chuang lo va. 5 Zuph ram an thlen chuan Saula chuan a hnêna awm ve, a chhiahhlawh hnênah chuan, “Hawh teh, i haw leh teh tawh mai ang; chuti lo chuan, ka pain sabengtung ngaihtuah ṭhulhin keimahni min ngaihtuah dah ang e,” a ti a. 6 Tin, ani chuan a hnênah, “Ngai teh, he khuaah hian Pathian mi a awm a, mi zahawm tak a ni a, a sawi apiang chu a lo thleng ngei ngei ṭhîn a ni. Hawh teh, chutah chuan i kal teh ang; kan kalna tûr te hi min hrilh thei mial mahna,” a ti a. 7 Chutichuan, Saula chuan a chhiahhlawh hnênah chuan, “Nimahsela e, ngai teh, kal ta ang ila, chu mi chu eng nge kan kensak ang? Kan bâwmah chhang lah a awm tawh si lo va, Pathian mi lâwmman ken tûr a awm hauh lo mai. Eng nge kan neih aw?” a ti a. 8 Tin, chhiahhlawh chuan Saula chu a chhâng leh a, “Ngai teh, tangkarua sekel hmun lia ṭhena hmun khat chu ka la keng a. Chu chu, kan kalna tûr min hrilh manah Pathian mi chu ka pe ang e,” a ti a. 9 (Tûn hma lam chuan Israel-hote zînga miin Pathian râwn an duh hian, “Hawh teh, hmutheitu hnênah i kal teh ang,” an ti ṭhîn a; tûnlaia zâwlnei an tih ṭhina hi tûn hma lam chuan hmutheitu an ti ṭhîn a ni.) 10 Chutichuan, Saula chuan a chhiahhlawh hnênah, “A ṭhat hlauh chu; i kal teh ang hmiang,” a ti a. Chutichuan, Pathian mi awmna khuaah chuan an kal ta a. 11 Khaw pan chhohnaa an han chhoh lai chuan nula tui chawi tûra lo chhuakte an han hmu a, an hnênah, “Hetah hian hmutheitu chu a awm em?” an ti a. 12 Tin, anni chuan an chhâng a, “Awm e, in hmaah a lo kal asin. Hmanhmawh rawh u khai; vawiinah hian hmun sângah mite an inthawi avângin he khuaah hian a lo kal a ni. 13 Khua in han luh veleh hmun sânga chaw ei tûra a kal hmain in han hmu nghâl mai ang. Inthawina chu malsâwmtu tûr a nih avângin, a thlen hma loh chuan mipui chuan chaw an ei dâwn lo a ni; chumi hnuah chuan an mi sâwmte chuan an ei ṭhîn a ni. Chuvângin, kal chho thuai ula, in han hmu nghâl mai ang,” an ti a. 14 Tichuan, khuaah chuan an kal chho ta a; tin, khua an han luh chuan ngai teh, Samuela hmun sânga kal tûr chuan a tâwk a. 15 Tin, Saula lo kal hma ni khatah chuan LALPA chuan Samuela chu a bekbawr a, 16 “Naktûk hetih hun lai hian Benjamin ram aṭangin i hnênah mi pakhat ka rawn kaltîr dâwn a, ka mi Israel-te chunga hotu ni tûrin hriak i thih ang a, ani chuan Philistia mite kut ata ka mite a chhandam ang; an au thâwm chuan ka hnên a lo thlen tâk avângin ka mite chu ka ngaihsak a ni,” tiin. 17 Tin, Samuelan Saula a hmuh chuan LALPAN a hnênah, “En teh, i hnêna ka mi sawia kha; ani hian ka mite chungah thu a nei ang,” a ti a. 18 Chutichuan, Saula chuan kulh kawngkaah Samuela chu a va hnaih a. “Hmutheitu in chu khawiah nge a awm min hrilh teh khai,” a ti a. 19 Tin, Samuela chuan Saula chu a chhâng a. “Keimah hi hmutheitu chu ka ni; ka hmaah hian hmun sâng lam panin kal la, vawiinah hian ka hnênah chaw i ei dâwn a ni; tin, naktûk zîngah chuan ka kaltîr ang chia, i rilrua awm zawng zawng pawh ka hrilh ang che. 20 Tin, i sabengtung, ni thum bo tawhte thu chu lungkham suh, an hmu tawh e. Israel-te zînga ropuina zawng zawng chu tu tân nge ni? I tân leh i pa ina mi zawng zawng tân a ni lâwm ni?” a ti a. 21 Tin, Saula chuan a chhâng a, “Israel hnam zînga tê ber, Benjamin hnam ka ni lâwm ni? Tin, kan chhûngkua pawh Benjamin hnam chhûngkua zawng zawng zînga tê ber a ni lâwm ni? Engtiziaa hetianga ka hnêna sawi nge i nih le?” a ti a. 22 Tin, Samuela chuan Saula leh a chhiahhlawh chu a hruai a, mikhual pindanah chuan a hruai lût a, an mi sâwm, sawmthum lai zîngah chuan hmun ropui berah a ṭhuttîr a. 23 Tin, Samuela chuan chaw chhûmtu hnênah chuan, “I hnêna dah hran tûr ka tih, chanvo ka pêk che kha han la rawh khai,” a ti a. 24 Chutichuan, chaw chhûmtu chuan a bawp leh a chunga awm chu a rawn la a, Saula hmaah chuan a va hlui a. Tin, Samuela chuan, “En teh, ka lo dah hrana chu! Kîl la, ei rawh; hemi hun atân hian hei hi kan lo ruatsak rêng che a ni, ‘Mite ka sâwm khâwm e,’ ka ti tawh bawk si a,” a ti a. Chutichuan, chumi ni chuan Saula chuan Samuela te nên chawhlui an kîl za ta a.
Samuelan lal ni tûrin Saula hriak a thih
25 Tin, hmun sâng ata khuaa an chhuk chuan, in chungah Saula chu mutna an siamsak a, a mu ta a. 26 Tin, zîng takah, vârṭianah an tho va; Samuela chuan in chunga awm Saula chu a ko va, “Tho la, ka kaltîr teh tawh ang che,” a ti a. Chutichuan, Saula chu a tho va, an pahnih chuan an kal chhuak a, amah leh Samuela chu an chhuak ta a. 27 Khaw hmâwr lam chu an zuk thlen chuan, Samuela chuan Saula hnênah, “Chhiahhlawh hi ka hma lamah kaltîr la, (ani chu a kal ta a) nang erawh chu ding rih la, Pathian thu ka han hrilh teh rih ang che,” a ti a.
Saula chu lal atân an puang
1 Chutichuan, Samuela chuan hriak bâwm chu a han phawrh a, a luah chuan a leih a, a fâwp a, “LALPA chuan a rochante chunga hotu ni tûrin hriak a thih che a ni lâwm ni? 2 Vawiina mi chhuahsan hnu hian, Zelza-ah Benjamin ramria Rakili thlân kiangah mi pahnih i hmu ang a; tin, anni chuan i hnênah, ‘Sabengtung i zawn chu an hmu tawh e. Tin, ngai teh, i pa chuan sabengtung chu a ngaihtuah tawh lo va, nangmah mawlh a ngaihtuah che a, “Ka fapa chu engtin nge ka tih tâk ang?” a ti a ti mai,’ an ti ang a. 3 Tin, chuta ṭang chuan kal zêl la, Tabor sasua chu i va thleng ang a. Chutah chuan mi pathum, Bethel-a Pathian hnêna han kal tûrten an lo tâwk ang chia, pakhat chuan kêlno pathum a pawm ang a, pakhat chuan chhangpêr tlang thum a keng ang a, pakhat leh chuan uain peng a keng ang. 4 Tin, chibai an bûk ang chia, chhangpêr tlang hnih an pe ang chia, chu chu i la ang a. 5 Chumi zawhah chuan Philistia sipaiho awmna Pathian tlâng chu i va thleng ang a. Tin, heti hi a ni ang a, chuta khua i va thlen chuan zâwlneiho, perhkhuang te, khuangtê te, phênglâwng te, ṭingṭang kengte hruaia hmun sâng aṭanga lo chhuk i tâwk ang a; tin, thu an sawi dual dual ang. 6 Tichuan, LALPA thlarau chu nasa takin i chungah a lo thleng ang a, nang pawh thu an sawi dual dualnaah chuan i tel ve ang a, mi danglam daihah i lo chang mai ang. 7 Tin, hêng chhinchhiahnate hi i chunga a lo awm hunah chuan thil lo awmin a zir ang zêlin i ti tûr a ni; Pathian i hnênah a awm zêl si a. 8 Tin, ka kal hmain Gilgal-ah lo zuk kal la; tin, ngai teh, kei pawh hâlral thilhlante leh remna inthawinate hlân tûrin i hnênah ka lo chhuk ang a. I hnêna ka lo kala, i tih tûr ka rawn hrilh hma che chuan ni sarih i lo awm tûr a ni ang,” a ti a. 9 Tin, chutiang chu a lo ni ta ngei a, Samuela ṭhen tûra a hnuchhawn veleh chuan Pathianin thinlung danglam daih a pe ta a; tin, chûng chhinchhiahna zawng zawngte chu chumi ni chuan a lo thleng ta vek a. 10 Chutichuan, Gibea tlâng chu an han thlen chuan, ngai teh, zâwlneihovin an tâwk a; tin, LALPA thlarau nasa takin a lo thleng a, thu an sawi dual dualnaah chuan a tel ve ta a. 11 Tin, heti hi a ni a, tûn hma lama amah lo hre tawhten zâwlneite thu sawi dual dualnaah a tel ve tih an hriat chuan, mite chu an inbia a, “Kisa fapa chunga thil lo awm hi eng nge ni ta? Saula pawh chu zâwlnei zîngah a tel ve ta elo maw?” an ti a. 12 Tin, a awmna khuaa mi pakhatin a chhâng a, “An pate chu tu nge maw an nih bîk le?” a ti a. Chutichuan, “Saula pawh chu zâwlnei a ni ve ta elo maw?” tih chu infiamna takah an hmang ta reng a. 13 Tin, an thu sawi dual dualnaa a tel zawh chuan hmun sâng chu a thleng ta a. 14 Tin, Saula pami chuan a hnênah leh a chhiahhlawh hnênah chuan, “Khawiah nge in kal?” a ti a. Tin, ani chuan, “Sabengtung kan zawng a; tin, kan hmuh zawh tâk loh avângin Samuela hnênah kan kal ta a ni,” a ti a. 15 Tin, Saula pami chuan, “Samuela chuan i hnênah eng nge ni a sawi min hrilh teh khai,” a ti a. 16 Tin, Saula chuan a pami hnênah chuan, “Sabengtungte chu an hmu tawh tih min hrilh teh meuh mai,” a ti a. Amaherawhchu, ram chungchâng thu Samuelan a sawi chu a hrilh lo. 17 Chutichuan, Samuela chuan mipuite chu Mizpe-ah LALPA hnênah a ko khâwm a; 18 tin, Israela thlahte hnênah chuan, “LALPA, Israel-te Pathian chuan heti hian a ti a ni: ‘Israel-ho chu Aigupta aṭangin ka hruai chhuak a, Aigupta mite kut ata leh a hnuaichhiahtu che u ram zawng zawng ata ka chhanchhuak che u a. 19 Nimahsela, vawiinah hian in manganna zawng zawng leh hrehawmna zawng zawng ata chhanhimtu che u in Pathian ngei chu in duh lo va, a hnênah, “A ni lo ve, lal min siamsak rawh,” in ti a,’ tiin. Chuvângin, tûnah hian a hnama hnam leh a chia chiin LALPA hmaah rawn inlan rawh u,” a ti a. 20 Chutichuan, Samuela chuan Israel chi zawng zawng chu a rawn inlantîr a; tin, Benjamin chi chu thlan a lo ni ta a. 21 Tin, Benjamin chiho chu a chhûngkuain a rawn inlantîr a, Matri mi chhûng chu thlan a lo ni ta a. Tin, Kisa fapa Saula chu thlan a lo ni ta a. Nimahsela, amah an han zawng a, an hmu lo va. 22 Chutichuan, LALPA chu an han zâwt nawn leh a, “Mi lo kal tûr an la awm em?” an ti a. Tin, LALPA chuan a chhâng a, “Ngai teh u, bungraw zîngah a biru a ni,” a ti a. 23 Chutichuan, an tlân a, an va hruai chhuak a; tin, mipui zînga a han din chuan mi zîngah chuan a sâng ber mai a, tu mah a koki khûm pawh an awm lo. 24 Tin, Samuela chuan mi zawng zawng hnênah chuan, “LALPA mi ruat hi in hmu em? Mipui zawng zawng zîngah amah ang rêng rêng an awm lo ve,” a ti a. Tin, mipuite chu an au va, “Pathianin lalber humhim rawh se,” an ti a. 25 Chutichuan, Samuela chuan mipuite chu ram awm dân tûr chu a hrilh a, lehkhabuah a ziak a, LALPA hmaah chuan a dah a. Tin, Samuela chuan mipuite chu mahni in lam ṭheuhvah a hawtîr ta a. 26 Tin, Saula pawh chu Gibea khuaah a in lamah a haw ve ta a; tin, mi huaisenho, an thinlung Pathianin a khawihte chu a hnênah an kal ve a. 27 Nimahsela, Beliala fapa tute emaw chuan, “He mi hian engtin nge min chhandam theih tehlul ang?” an ti a. Tichuan, amah chu an ngainêp a, lâwmman rêng rêng an pe duh lo va. Nimahsela, ani chu a ngawi reng mai a.
Saulan Amon mite a hneh
1 Chutichuan, Amon mi Nahasa chu a lo thawk a, Jabes-gilead beih tumin a han ep a; tin, Jabes mi zawng zawng chuan Nahasa hnênah chuan, “Kan hnênah thu thlung la; tichuan, i rawng kan bâwl ang e,” an ti a. 2 Tin, Amon mi Nahasa chuan an hnênah, “Hetiang hian a ni in hnênah thu ka thlun ang ni: in mit ding lam zawng zawng kher chhuah vek tûr a ni ang a; chu chu Israel mi zawng zawng tân hmingchhiatna a ni ang,” a ti a. 3 Tin, Jabes khuaa upate chuan a hnênah, “Israel ram zawng zawngah mi kan han tirh rih theih nân ni sarih min ngaichâng rih rawh; chuta mi chhandam tûr tu mah an awm loh chuan i hnênah kan lo chhuak mai ang e,” an ti a. 4 Chutichuan, an mi tirhte chuan Saula awmna khua Gibea chu an lo thleng a, mipuite beng hriatah chuan chûng thu chu an sawi a; tin, mipuite chuan an aw an chhuah a, an ṭap a. 5 Tin, ngai teh, lo aṭangin Saula chu sebâwng khalhin a lo haw a; tin, Saula chuan, “Eng an ti nge ni mipuite chu an ṭah?” a ti a. Tin, Jabes khuaa mite thusawi chu an hrilh a. 6 Tin, chûng thu chu a hriat veleh chuan Saula chungah Pathian thlarau a lo thleng ta chiam mai a, nasa takin a thin chu a ur ta thut a. 7 Chutichuan, bâwng tuak khat a talh a, a sa chu a chan sawm vek a, Israel ram zawng zawngah chuan a semtîr a, “Tu pawh Saula leh Samuela rawn zui duh lo apiang an sebâwng chu hetianga tih ve hi a ni ang,” tiin. Chutichuan, mipuite chuan LALPA chu an hlau ta a, thukhat vuain an lo thawk chhuak ta a. 8 Tin, Bezek hmunah chuan a chhiar a; Israel mite chu nuai thum an ni a, Juda mite chu sîngthum an ni a. 9 Tin, an mi rawn tirhte hnênah chuan, “Jabes-gilead mite hnênah chuan, ‘Naktûk ni lum vânglai tak hmain chhanchhuah in ni ang,’ va ti ang che u,” an ti a. Tin, an mi tirhte chu an va kal a, Jabes mite chu an hrilh a; tichuan, an lâwm ta hle mai a. 10 Chutichuan, Jabes mite chuan, “Naktûkah hian in hnênah kan lo chhuak ang a, kan chungah in duh duhin ti mai ang che u,” an ti a. 11 Tin, heti hi a lo ni a, a tûkah chuan Saula chuan mipuite chu pâwl thumah a siam a; tin, zîng vên hun lai takin an riahhmunah chuan an lût a, Amon mite chu chhûn ni sat vânglai tak thlengin an that a; tin, heti hi a ni a, an thah bângte chu an darh vek a, pahniha awm dûn rêng rêng pawh an awm lo va. 12 Tin, mipuite chuan Samuela hnênah, “Tute nge ni, ‘Saulan kan chungah ro a rêl tehlul ang maw?’ ti kha? Chûng mite chu rawn hruai la, kan lo tihlum ang e,” an ti a. 13 Tin, Saula chuan, “Vawiin kher hi chuan tu mah tihhlum tûr a ni lo ve; vawiinah hian LALPA chuan Israel-te zîngah chhandamna a rawn thawk chhuak ta si a,” a ti a. 14 Chutichuan, mipuite hnênah chuan, “Hawh u, Gilgal-ah i kal ang u khai, chutah chuan ram chu i din thar leh ang u,” a ti a. 15 Chutichuan, mipui zawng zawng chu Gilgal-ah chuan an kal ta a, Saula chu Gilgal-ah chuan LALPA hmaah lalah an siam ta a. Chutah chuan LALPA hmaah remna inthawinate an hlân a; tichuan, chutah chuan Saula leh Israel mi zawng zawngte chu an lâwm ta êm êm mai a.
Samuelan inthlahna thu a sawi
1 Tin, Samuela chuan Israel mite zawng zawng hnênah chuan, “Ngai teh u, ka hnêna in thusawi zawng zawng chu ka pawm a, lal tûr chu ka siamsak ta che u a. 2 Tûnah hian ngai teh u, lal chuan a lo kaihruai ta che u a; kei chu ka lo tarin ka lu te pawh a lo ṭuak ta a, ngai teh u, ka fapate chu in hnênah an awm a. Ka tleirâwl lai aṭangin tûn thlengin ka kaihruai che u a. 3 Heta hi ka awm a. LALPA hma leh a hriak thiha hmaah hian mi sêl teh u le: tu bâwngpa nge ka chhuhsak ngai? Tu sabengtung nge ka chhuhsak ngai? Tu nge ka bum tawh ngai? Tu nge ka tihduhdah ngai? Ka mit tidel tûrin tu lakah nge thamna ka lâk ngai? Ka rûl leh vek ang che u,” a ti a. 4 Tin, anni chuan, “Min bum ngai lo va, min tiduhdah ngai hek lo, tu ma kut aṭangin lâk âwm loh i la ngai hek lo,” an ti a. 5 Tin, ani chuan an hnênah, “Ka kutah hian eng mah âwm lo in hmu lo tih vawiinah hian LALPA chu in lakah hretu a ni a, a hriak thiha pawh chu hretu a ni,” a ti a. Tin, anni chuan, “Amah chu hretu a ni,” an ti a. 6 Tin, Samuela chuan mipui hnênah chuan, “Mosia leh Arona ruattu leh Aigupta ram ata in pute hruai chhuaktu LALPA chu a ni asin. 7 Chutichuan, ding ṭhap ula, LALPA hmaah hian LALPAN in chungah leh in pute chunga thil a lo tihfel ṭhin dân ka han chhûtpui teh ang che u. 8 Aigupta rama Jakoba a luh hnu khân, in pute chuan LALPA an au va; tichuan, LALPA chuan Mosia leh Arona a tîr a, anni chuan in pute chu Aigupta ram aṭangin an hruai chhuak a, he hmunah hian an awmtîr ta a. 9 Nimahsela, LALPA an Pathian chu an theihnghilh a, ani chuan Hazor sipai hotu Sisera kutah leh Philistia mite kutah leh Moab lal kutah a hralh a; tin, anni chuan an do va. 10 Tin, LALPA chu an au va, ‘LALPA chu kan hawisana, Baala-te leh Astorethi-te rawng kan bâwl avângin kan lo sual ta a ni; nimahsela, kan hmêlmate kut ata hi min chhanchhuak tawh la; tichuan, i rawng kan bâwl ang e,’ an ti a. 11 Tin, LALPA chuan Jerubaala te, Bedana te, Jephtha te, Samuela te a tîr a, in hmêlma lehlam lehlam mite kut ata a chhanchhuak che u a, him takin in awm a. 12 Tin, Amona thlahte lal Nahasa chu nangmahni do tûrin a lo kal tih in hriat veleh ka hnênah, ‘A ni lo ve, lalin ro min rêl rawh se,’ in ti a; LALPA Pathian chu in lal a ni reng si a. 13 “Chutichuan, in lal, in thlan leh dîl chu en teh u; en teh u, LALPA chuan lal a siamsak ta che u a nih hi. 14 LALPA chu in ṭiha, a rawng in bâwla, a aw in ngaihthlâka, LALPA thupêk in helsan lohva, nangmahni leh in chunga rorêltu lal nên LALPA in Pathian zuitu in nih chuan a ṭha ang a; 15 amaherawhchu, LALPA aw chu ngaithla lova, LALPA thupêk in helsan chuan, in puten LALPA kut an tuar ang bawkin nangni pawhin in tuar ang. 16 Chutichuan, ding ṭhap ula, LALPAN in mit hmuha thil ropui tak a tih tûr hi lo en rawh u. 17 Vawiin hian buh an seng a ni lâwm ni? Khawpui rîktîr tûr leh ruah sûrtîr tûrin LALPA chu ka au vang a; tichuan, lal in dil thu-ah hian LALPA mit hmuha thil in tihsual hi a nasatzia in hriain in hmu ang,” a ti a. 18 Chutichuan, Samuela chuan LALPA chu a au va, LALPA chuan chumi ni chuan khawpui a rîktîr a, ruah a sûrtîr a; tichuan, mipui chuan LALPA leh Samuela chu an hlau ta êm êm a. 19 Tin, mipui zawng zawng chuan Samuela hnênah chuan, “Kan thih loh nân LALPA i Pathian hnênah chuan i chhiahhlawhte hi min ṭawngṭaisak rawh; he thil ṭha lo tak, lal kan lo dîl hi, kan sual zawng zawng belhchhahtu a nih tâk hi,” an ti a. 20 Tin, Samuela chuan mipuite hnênah chuan, “Hlau suh u; he thil ṭha lo tak hi tih zawng in ti ngei tak a; mahse, LALPA in zui chu pênsan chuang lo ula, in thinlung zawng zawngin LALPA rawng chu bâwl zâwk rawh u; 21 eng maha hnemhnâng lo tûr leh chhanchhuak thei lo che u zuiin pênsan suh u, engmahlo an ni si a. 22 A hming ropui tak avâng hian LALPA chuan a mite chu a hawisan dâwn si lo va; a mite atâna siam che u chu LALPA lâwm zâwng tak a ni si a. 23 Chu chang pawh a ni lo va, in tâna ṭawngṭai bâna, LALPA chunga sual chu keia tân chuan a hnai lo tawp mai a ni; kawng ṭha leh kawng dik ka kawhhmuh zêl zâwk ang che u. 24 LALPA chu ṭih phawt mai ula, in thinlung zawng zawngin tihtakzetin a rawng bâwl ula; in tân thil a tih ropuizia hi ngaihtuah rawh u khai. 25 Amaherawhchu, sual taka thil in la tih cheu chuan in boral ang, nangmahni leh in lal nên,” a ti a.
Philistin mite nêna indo
1 Saula chu kum sawmthum mi a nihin a lal ṭan a; tin, Israel-hote chungah kum ... hnih a lal a. 2 Tin, Saula chuan Israel-ho zînga mi sângthum a thlang a: sânghnih chu Mikmas-ah leh Bethel tlângah Saula hnênah an awm a; tin, sângkhat chu Benjamin rama Gibea-ah Jonathana hnênah an awm a; tin, a dang zawng zawng chu anmahni puan inah a hawtîr vek a. 3 Tin, Jonathana chuan Gibea-a Philistia râlvêngtu sipaiho a bei a; chu chu Philistia mite chuan an lo hria a. Tichuan, Saula chuan, “Hebrai mite khân lo hre rawh se,” tiin an ram zawng zawngah chuan tawtawrâwt a hamtîr a. 4 Tin, Israel-ho zawng zawngte chuan, Saula chuan Philistia râlvêngtu sipaihote a bei tih leh, Israel-hote pawhin Philistia mite huat an phur a ni tih thute an lo hre ta a. Chutichuan, mipuite chu Saula hnênah Gilgal-ah an pung khâwm ta chiam mai a. 5 Tin, Philistia mite chu Israel-ho bei tûr chuan an inpun khâwm ta chiam a; tawlailîr sîngthum, sakawr chung chuang mi sângruk, mihring tuifinriat kama ṭiau zât zeta tam an ni; tin, an chho va, Beth-aven chhak lampangah Mikmas-ah chuan ṭanhmun an khuar a. 6 Tin, Israel mite chuan hnawhchêpin an awm tih an inhriat chuan (mite chu an mangang ta hle mai a) mite chu pûkah te, hnim hnawkah te, lungpui phênah te, kulhah te, khuarkhurumah te an biru a. 7 Hebrai mi ṭhenkhatte chu Jordan râlah Gad leh Gilead ramahte an tlân a; Saula erawh chu Gilgal-ah a la awm reng a, mipuite chuan khûr zawih zawih chungin an zui a. 8 Samuelan ni a ruat angin ni sarih a awm a; nimahsela, Samuela chu Gilgal-ah chuan a la kal ta lo va; tichuan, mipuiin an tlân darhsan ta a. 9 Tin, Saula chuan, “Hâlral thilhlan tûr leh remna thilhlan tûrte chu hetah ka hnênah han la rawh u,” a ti a. Chutichuan, hâlral thilhlan chu a hlân a. 10 Tin, heti hi a ni a, hâlral thilhlan a hlân zo chauh va, Samuela chu a lo thleng ta a; tin, Saula chu chibai bûk tûrin amah hmuakin a lo kal a. 11 Tin, Samuela chuan, “Eng nge ni i lo tih chu le?” a ti a. Tin, Saula chuan, “Mipuite chuan mi kal bosan tawh a; tin, nang lah chu ni ruat niah chuan i lo thleng ta lo va; tin, Philistia mite lah chu Mikmas-ah an pung khâwm luih tawh tih ka hre si a. 12 Chu vâng chuan, ‘Philistia mite chuan Gilgal-ah min rawn bei dâwn ṭêp si a; tin, LALPA khawngaihna ka la dîl si lo,’ ka ti a. Chu vâng chuan, hâlral thilhlân chu hlân lo thei ka ni lo a ni,” a ti a. 13 Tin, Samuela chuan Saula hnênah chuan, “I thiltih dân hi a âtthlâk hle mai. LALPA i Pathian thupêk, thu a pêk che hi i zâwm lo a ni. LALPA chuan Israel-te chungah hian i lalna hi kumkhuaa tihngheh tum zawng a ni a le. 14 Nimahsela, i lalna chu a kin tawh ang; LALPA thupêk che i zawm loh avângin. LALPA chuan ama thinlung ang pu mi a zawng a, a mite chunga hotu ni tûrin LALPAN a ruat tawh a ni,” a ti a. 15 Tin, Samuela chu a tho va, Gilgal ata chu Benjamin rama Gibea khuaah chuan a han kal ta a. Tin, Saula chuan a hnêna mi awmte chu a chhiar a, zaruk lai an ni a. 16 Tin, Saula leh a fapa Jonathana leh an hnêna mi awmte chu Benjamin rama Geba khuaah chuan an awm a; nimahsela, Philistia mite chuan Mikmas-ah chuan ṭanhmun an khuar a. 17 Tin, lamthamhote chu Philistia mite ṭanhmun aṭangin pâwl thumin an lo chhuak a. Pâwl khatte chuan Shual rama Ophra lam pan kawng chu an zawh a, 18 pâwl khat dang chuan Beth-horon lam pan kawng an zawh a, pâwl khat chuan thlalêr dep Zeboim ruam lam hawi ramri kawng chu an zawh a. 19 Israel-ho ram pum puiah chuan thîrdeng rêng rêng an awm lo va; Philistia mite chuan, “Hebrai mite hian khandaihte emaw, feite emaw an siam dah reu reu ang e,” an ti a ni. 20-21 Nimahsela, Israel mi zawng zawngte chu bâwngtuthlawh te, leilehna thîr hriam te, thîrkut te, hreipui te, tiang hmâwra zum te a bil chuan an leilehna hmâwr zum te, an leilehna thîr hriam te, an hreipui te, an bâwngtuthlawhte tah hriamtîr tûrin Philistia-hote hnênah an zuk chhuk ṭhîn a ni. 22 Chutichuan, an indo ni chuan Saula leh Jonathana hnêna mi awmte chu khandaih emaw, fei emaw nei rêng rêng an awm lo va; Saula leh a fapa Jonathana erawh chuan an nei a. 23 Tin, Philistia râlvêngtu sipaiho chu Mikmas kâwnah an kal ta a.
Jonathana huaizia
1 Tin, heti hi a ni a, ni khat chu Saula fapa Jonathana chuan a râlthuam kengtu tlangvâl hnênah chuan, “Hawh teh, lehlam râl Philistia mi râlvêngtu sipaiho awmnaah sâwn i va kal teh ang,” a ti a. Nimahsela, a pa chu a hrilh lo va. 2 Tin, Saula chu Gibea ram hmâwr lam daiha Migron-a pawmgranet theikûng hnuaiah a awm a; tin, a hnêna mi awmte chu zaruk emaw lai an ni a. 3 Tin, Silo khuaa LALPA puithiam Elia fapa Phinehasa fapa Ikaboda unaupa, Ahituba fapa Ahija chu puithiam kawr hain a awm ve a. Tin, Jonathana chu a kal tih mipuite chuan an hre lo va. 4 Tin, Jonathanan Philistia mi râlvêngtu sipaiho awmnaa kal a tumna kâwn leh kâwn inkârah chuan, a lehlam lehlamah chuan lungpui tohlâwt a awm a: a pakhata hming chu Bozez a ni a, pakhata hming chu Sene a ni a. 5 Lung tohlâwt pakhat chu Mikmas zâwn hmâr lampanga awm a ni a, a dang pakhat chu Gibea zâwn chhim lampanga awm a ni. 6 Tin, Jonathana chuan a râlthuam kengtu tlangvâl hnênah chuan, “Hawh, serh tan lohho sipaite awmnaah sâwn i kal teh ang; LALPA chuan thil min tihsak mial mahna. LALPA tân chuan a tam emaw, a tlêm emawa chhandam chu eng mah theih lohna a awm ve chuang si lo va,” a ti a. 7 Tin, a râlthuam kengtu chuan a hnênah, “I rilrua awm ang tak chuan ti rawh; ngai teh, i rilru chiah chu ka rilru a ni,” a ti a. 8 Chutichuan, Jonathana chuan, “Hawh teh, an hnênah sâwn kan va kal kai ang a, kan va inlan ang a. 9 Tin, kan hnêna, ‘In hnênah kan lo kal hma loh chuan lo awm rawh u,’ min tih chuan kan hmunah chuan kan ding reng ang a, an hnênah kan chho lo vang a. 10 ‘Kan hnên lamah hian lo chho rawh u,’ an tih erawh chuan kan chho vang a. LALPAN kan kutah min pe tawh a ni tih kan tân chhinchhiahna a ni ang,” a ti a. 11 Tin, an pahnihin Philistia mi râlvêngtu sipaite hmuhah chuan an va inlan a; tin, Philistia-hote chuan, “En teh u, Hebrai mite an bihrûkna khuarkhurum ata an lo chhuak ta,” an ti a. 12 Tin, râlvêngtu sipaiho awmnaa mite chuan Jonathana leh a râlthuam kengtu chu, “Lo chho ula, thil eng emaw kan lo entîr ang che u,” tiin an lo au va. Tin, Jonathana chuan a râlthuam kengtu hnênah chuan, “Mi rawn zui chho rawh khai; LALPA chuan anni chu Israel-hote kutah a pe ta a ni,” a ti a. 13 Tichuan, Jonathana chu a kut leh ke thawhin a lâwn chho va, a râlthuam kengtu chuan a zui a; tin, anni chu Jonathana hmaah chuan an tlu zawih zawih a, a râlthuam kengtu chuan a rawn that ve zêl a. 14 Chutichuan, Jonathana leh a râlthuam kengtuin an thah hmasak ber ṭum chuan ṭîn chanve hmun emaw vêl tûrah hian mi sawmhnih emaw lai an that a ni. 15 Tin, an riahhmuna mi te, phûla mi te, mipui zawng zawngte chu an khûr a. Râlvêngtu sipaite leh lamthamhote pawh chu an khûr ve a; tin, lîr a nghîng a; chutichuan, namênlova khurhna a lo awm a. 16 Tin, Benjamin ram Gibea-a Saula râlvêngtute chuan an han thlîr vêl a, ngai teh, mipuite chu an ṭeh darh hum hum a, lehlam lehlamah an chavai nuaih nuaih mai a. 17 Chutichuan, Saula chuan a hnêna mipui awmte hnênah chuan, “Tûnah hian inchhiar ula, tute nge kim lo han en teh u khai,” a ti a. Tin, an han inchhiar chuan ngai teh, Jonathana leh a râlthuam kengtu chu an lo awm ve ta lo va. 18 Tin, Saula chuan Ahija hnênah chuan, “Pathian bâwm chu han la rawh khai,” a ti a. Chumi lai chuan Pathian bâwm chu Israela thlahte hnêna awm a ni a. 19 Tin, heti hi a ni a, Saulan puithiam a biak lai mêk te chuan Philistia mite riahhmun lama buai mur mur chu a zual ta deuh deuh mai a; tin, Saula chuan puithiam hnênah, “I kut la rawh,” a ti a. 20 Tichuan Saula leh a hnêna mipui awm zawng zawngte chu an kal khâwm a, indonaah chuan an kal ta a; tin, ngai teh, anmahni leh anmahni khandaihin an inbei ta chiam a; tichuan, an buai ta nuaih nuaih mai a. 21 Chutichuan, chûng lai ram vêla mi riahhmuna han kal ve, tûn hma lama Philistia-ho lama ṭang Hebrai mite pawh chu, Saula leh Jonathana hnêna awm Israel mite lamah chuan an lo pakai leh ta a. 22 Chutiang bawkin Ephraim tlâng rama Israel mi biru zawng zawngte pawh khân Philistia mite an tlân bo tih an lo hria a, anni pawh chuan indonaah tel vein an ûm zui ve ta ngat ngat a. 23 Chutichuan, LALPAN chumi ni chuan Israel-hote chu a chhanhim ta a; tin, Beth-aven thleng rawkin an bei a.
An indo zawh hnu lawka thil thleng
24 Tin, chumi ni chuan Israel mite chu an mangang a; nimahsela, Saula chuan, “Kan hmêlmate chunga phuba ka lâka, khua a lo tlai lam hmaa tu pawhin chaw a ei chuan ânchhia dawng rawh se,” tiin mipuite chu a vau va. Chutichuan, tu mahin chaw rêng rêng a tem pawh an tem miah lo va. 25 Tin, mipui zawng zawngte chuan ramhnuai an va thleng a, leiah chuan khawizu te a lo awm a. 26 Tin, mipuiin ramhnuai an va thlen chuan ngai teh, khawizu te a lo luang a; nimahsela, tu mahin an pir lo, mipuite chuan chhechham chu an hlau a ni. 27 Nimahsela, Jonathana chuan a pain mipuite chu chhechhama a vau lai a hre ve lo va; chutichuan, a tiang ken hmâwr chu khawithlârah chuan a vit lût a, a pir a; tichuan, a mitmeng a lo fiah ta a. 28 Chutichuan, mipui zînga mi pakhat chuan a bia a, “I pa chuan mipuiho hi, ‘Vawiina chaw ei apiang chu ânchhe dawngin awm rawh se,’ tiin min vau tlat a, mipuite pawh an chau hle rêng mai,” a ti a. 29 Chutichuan, Jonathana chuan, “Ka pa hian mite a timangang mai a nih hi maw! En ta che u, khawizu tlêm tê ka han tem mai avânga ka mitmeng a lo fiah tâkzia hi! 30 Mipui hian an râllâk thil hi an hmuh apiang, vawiinah hian an duh duhin ei thei phei sela chu a va nasa lehzual dâwn êm! Chumi avâng chuan Philistia mite chu kan thah nasat theih loh phah a nih hi,” a ti a. 31 Tichuan, chumi ni chuan Mikmas aṭangin Aijalon thlengin Philistia mite chu an bei a; tin, mipuite an chau ta hle mai a. 32 Chutichuan, mipuite chuan an râllâk thil chu a bawhin an bawh a, berâm te, sebâwngpa te, sebâwngno te an man a, leiah an tihlum a, mipuite chuan a thisen chawpin an ei ta mai a. 33 Chutichuan, “Ngai teh, mipuite chuan thisen chawpa eiin LALPA chungah thil an tisual ta,” tiin Saula chu an hrilh a. Tin, ani chuan, “Vervêk takin thil in ti a ni; vawiinah hian lung lian tak mi rawn lumsak rawh u,” a ti a. 34 Tin, Saula chuan, “Mipui zîngah chuan vâk darh vek ula, an hnênah, ‘Mi tinin a sebâwng leh a berâm ka hnênah rawn la sela, hetah hian rawn talh sela, ei rawh se; a thisen chawpa eia LALPA chungah thil tisual lovin, a ti e,’ va ti rawh u,” a ti a. Tin, chumi zân chuan mi zawng zawng chuan mahni bâwngpa an rawn kai ṭheuh va, chutah chuan an talh a. 35 Tin, Saula chuan LALPA tân maichâm a siam a. Chu chu LALPA tâna a maichâm siam hmasak ber a ni. 36 Tin, Saula chuan, “Zânah Philistia mite zuk bei ila, zîng khaw ên thlengin i rawk ang u khai, tu mah rêng rêng i zuah suh ang u,” a ti a. Tin, anni chuan, “Ṭha i tih ang apiangin ti rawh,” an ti a. Puithiam erawh chuan, “Heti laiah hian Pathian i hnaih teh rih ang u,” a ti a. 37 Tin, Saula chuan Pathian a râwn a, “Philistia mite chu ka zuk bei ang em? Israel-ho kutah i pe ang em?” a ti a. Nimahsela, chumi ni chuan a chhâng lo va. 38 Tin, Saula chuan, “Nangni mipui hotu zawng zawngte chu lo hnai teh u khai, vawiinah hian a eng berah nge kan tihsual hriat chhuah tum teh u. 39 Israel-hote chhandam ṭhîntu LALPA nunna chhâlin ka sawi e, ka fapa Jonathana thiltihah pawh lo ni sela, a thi ngei ngei tûr a ni,” a ti a. Nimahsela, mipui zînga mi chuan tu mah chhâng rêng rêng an awm lo va. 40 Chutichuan, Israel-ho zawng zawng hnênah chuan, “Nangniho hi a hrangin awm khâwm ula; tin, kei leh ka fapa Jonathana hi a hrangin kan awm ang e,” a ti a. Tin, mipuite chuan Saula hnênah, “Ṭha i tih ang apiangin ti rawh,” an ti a. 41 Chutichuan, Saulan LALPA, Israel-te Pathian hnênah chuan, “A dik tak chu han tilang ang che,” a ti a. Tin, ṭhumvâwr chu Jonathana leh Saula chungah chuan a tlu a; mipuite erawh chu an fihlîm a. 42 Tin, Saula chuan, “Kei leh ka fapa Jonathana thlei nân ṭhum vâwr rawh u,” a ti a. Tichuan, Jonathana chungah chuan a tlu a. 43 Chutichuan, Saula chuan Jonathana hnênah chuan, “Eng nge ni i tih min hrilh rawh khai,” a ti a. Tin, Jonathana chuan a hrilh a, “Ka tiang ken hmâwrin khawizu tlêm chu ka tem ngei mai a; ngai teh, ka thi ngei tûr a ni,” a ti a. 44 Tin, Saula chuan, “Pathianin a tih tihin ti mai sela, chu aia nasa pawhin; i thi ngei ngei tûr a ni, Jonathan,” a ti a. 45 Tin, mipuite chuan Saula hnênah chuan, “Israel-te zîngah he chhandamna ropui tak thawktu Jonathana hi a thi ang maw? Hnai lo ve! LALPA nunna chhâlin kan sawi e, a sam zai khat pawh hi leiah a tla hlek lo vang; vawiin hian Pathian a thawhpui a nih hi,” an ti a. Chutichuan, mipui chuan Jonathana chu thi lo tûrin an chhanhim ta a. 46 Chutichuan, Saulan Philistia mite a ûm chu a kîrsan ta a; tin, Philistia mite chu anmahni awmhmun lamah an kal ta a. 47 Chutichuan, Saula Israel-ho chunga rorêltua a han ṭan chuan kil tinah a hmêlma Moab-hote, Amona thlahte, Edom-hote, Zoba lalhote, Philistia mite chu a do va; a thlêkna lam apiang maiah chuan a hneh zêl mai a. 48 Huai takin a bei a, Amalek mite chu a hneh a, Israel-ho chu anmahni rawktute kut ata a chhanchhuak a ni. 49 Saula fapate chu Jonathana te, Isvia te, Malkisua te an ni a. Tin, a fanute pahnih hming chu hêng hi a ni: a upa zâwk hming chu Merabi a ni a, a naupang zâwk hming chu Mikali a ni. 50 Saula nupui hming chu Ahinoami, Ahimaaza fanu a ni. Tin, a sipaite hotu hming chu Abnera, Saula pami Nera fapa a ni. 51 Kisa chu Saula pa a ni a; tin, Abnera pa Nera chu Abiela fapa a ni a. 52 Chutichuan, Saula dam chhûng zawng zawng chuan Philistia mite nên nasa tak maiin an indo ṭhîn a. Tin, Saula chuan mi chak emaw, mi huai emaw a hmuh apiang chu a la zêl ṭhîn a ni.
Amalek-hote nêna indo
1 Tin, Samuela chuan Saula hnênah, “LALPAN a mite chungah, Israel-hote chunga lal atâna hriak thih tûr chein mi tîr a ni; chutichuan, LALPA thusawi aw chu ngaithla teh khai. 2 Sipaihote LALPA chuan, ‘Amalek miten Israel-hote chunga an thiltih, Aigupta ram ata an lo chhuah laia an lo dâl dânte kha ka chhinchhiah reng a. 3 Amalek-hote bei tûrin kal la, an thil neih zawng zawng zuah rêng rêng nei lovin tiboral vek rawh; a hmei a pa leh nausên te, hnute hne lai te, bâwngpa te, berâm te, sanghâwngsei te, sabengtung te nên tihlum vek ang che,’ a ti a ni,” a ti a. 4 Chutichuan, Saula chuan mipuite a ko khâwm a, Telaim khuaah a chhiar a, sipai nuai hnih leh Juda mi sîngkhat an ni a. 5 Tin, Saula chuan Amalek-ho khua chu a zuk thleng a, ruamah chuan a lo lambun a. 6 Tin, Saula chuan Ken-hote hnênah chuan, “Lo chhuak ula, Amalek-hote zîng ata hi inthiarfihlîm rawh u; chuti lo chuan, ka tihlum tel dah ang che u. Nangni zawngin Israela thlahte zawng zawng Aigupta ram aṭanga an lo chhuak kha in lo khawngaih si a,” a ti a. Chutichuan, Ken-hote chu Amalek mite zîng ata an chhuak ta a. 7 Chutichuan, Saula chuan Amalek mite chu Havila aṭanga Aigupta ram dep Sur thlengin a bei a. 8 Tin, Amalek mite lal Agaga chu a nungin a man a, mipui zawng zawngte chu khandaihin a sât hlum vek a. 9 Amaherawhchu, Saula leh mipuite chuan Agaga chu an zuah a, berâm ṭha ṭha te, bâwngpa ṭha ṭha te, a thau thau te, berâmno te, a ṭha zawng zawngte nên, chûngte chu an tihlum duh lo va; a ṭha lo leh an duh loh apiang erawh chu an tihlum vek a.
LALPAN Saula a hnâwl
10 Chutichuan, LALPA thu chu Samuela hnênah a lo thleng a, 11 “Saula lala ka lo ruat ta chu ka inchhîr a ni, a mi zui lai chu mi hnuchhawnin ka thupêk angin a ti si lo va,” a ti a. Tin, Samuela chu a thinur a, zankhuain LALPA chu a au va. 12 Tin, Samuela chu Saula hmuak tûrin zîng takah a tho va; tin, “Saula chu Karmel-ah a kal a; ngai teh, chutah chuan hriat rengna lung a phun a; tin, a kîr leh a, a kal zêl a, Gilgal-ah a chhuk ta,” tiin Samuela chu an hrilh a. 13 Tin, Samuela chu Saula hnên lamah chuan a kal ta a; tin, Saula chuan a hnênah, “LALPAN malsâwm che rawh se! LALPA thupêk ang chuan ka ti ta e,” a ti a. 14 Tin, Samuela chuan, “Chûng berâm bê ka benga lo lût leh bâwngpa bû ka han hriatte chu engtizia nge ni si?” a ti a. 15 Tin, Saula chuan, “Amalek mite ta an rawn lâksak a ni; LALPA i Pathian hnênah inthawi nân mipuiten berâm ṭha ṭha leh bâwngpa ṭha ṭha an zuah a ni; tin, a dang zawng zawng chu kan tihlum vek a ni,” a ti a. 16 Chutichuan, Samuela chuan Saula hnênah, “Ngawi rawh, nizâna LALPAN ka hnêna thu a sawi ka hrilh ang che,” a ti a. Ani chuan a hnênah, “Sawi rawh khai,” a ti a. 17 Tin, Samuela chuan, “Nangma ngaihin mi tê tak ni mah la, Israel hnam hotu atâna a siam i ni lâwm ni? Tin, LALPA chuan Israel-ho lal atân hriak a thih chia; 18 tin, LALPA chuan a tîr chhuak chia, ‘Kal la, mi sualho, Amalek mite chu tihlum vek la, an boral dêr hma loh chuan bei zêl rawh,’ a ti chia. 19 Engati nge LALPA thu chu zâwm lova, râllâk thil chu a bawha i bawha, LALPA mit hmuha thil ṭha lo i tih mai?” a ti a. 20 Tin, Saula chuan Samuela hnênah, “E, LALPA thu chu ka zâwm alâwm, LALPA min tirhna lamah chuan ka kal a, Amalek lal Agaga ka rawn man a, Amalek mite chu ka tihlum vek alâwm. 21 Amaherawhchu, mipuite chuan râllâk thil berâm leh bâwngpate tihboral tûr zînga a ṭha ṭhate chu, Gilgal khuaah LALPA i Pathian hnênah inthawi nân an rawn la a ni,” a ti a. 22 Tin, Samuela chuan, “LALPA chuan LALPA thu zawm chu a lawm angin hâlral thilhlante leh inthawinate hi a lâwm em ni? Ngai teh, inthawina aiin thuawih chu a ṭha zâwk a, berâmpa thau aiin a thu pawm chu a ṭha zâwk a ni. 23 Helna hi aienthiamna sual te nên a inang a, luhlulna hi milem biak leh pathian lem biak tluk a ni. LALPA thu i duh loh avângin ani pawhin lal atân a duh ta bîk lo che a ni,” a ti a. 24 Tin, Saula chuan Samuela hnênah, “Thil ka tisual dêr mai a ni, LALPA thupêk leh i thu chu ka lo bawhchhe reng mai a nih hi; mipuite ka hlauhva, an thu ka lo awihna lamah hian. 25 Chutichuan, ka sual ngaidam la, LALPA ka biak theih nân mi hawpui leh rawh khai,” a ti a. 26 Tin, Samuela chuan Saula hnênah, “Ka hawpui tawp lo vang che, LALPA thu chu i duh si lo va; tin, LALPA pawhin Israel-hote lal atân a duh ta bîk lo che a ni,” a ti a. 27 Chutichuan, Samuela chu kal tûra a han her chuan Saula chuan a puan fêm chu a han chelh a, a thlêr ta a. 28 Tin, Samuela chuan a hnênah, “Vawiin aṭang hian LALPAN Israel ram hi a chhuhsak ta chia, i aia ṭha zâwk i ṭhenawm a pe ta a ni. 29 Tin, Israel-te Thahruia chu a daw lo vang a, a inlamlêt hek lo vang. Mihring anga inlamlêt leh mai mi a ni si lo va,” a ti a. 30 Chutichuan, ani chuan, “Ka lo sual ta a ni; nimahsela, ka mite zînga upaho leh Israel-hote hmaah hian mi chawimawi tûrin ka ngên a che; tin, LALPA i Pathian chu ka biak theih nân mi hawpui leh hrâm ang che,” a ti a. 31 Chutichuan, Samuela chuan Saula chu a hawpui ta a, Saula chuan LALPA chu a be ta a. 32 Chutichuan, Samuela chuan, “Amalek mite lal Agaga chu ka hnênah han hruai rawh u,” a ti a. Tichuan, Agaga chu a hnênah chuan khûr chungin a va kal a. Tin, Agaga chuan, “Thihna kha chu ka pumpelh tawh a ni chêk ang chu maw?” a ti a. 33 Tin, Samuela chuan, “I khandaihin hmeichhiate fa nei lova a siam angin i nu pawh hmeichhe zînga fa nei lo mi a ni ang,” a ti a. Chutichuan, Samuela chuan Agaga chu Gilgal khuaah LALPA hmaah chuan a sât sawm ta berh mai a. 34 Tin, Samuela chu Rama khuaah a kal a; tin, Saula chu a inah Saula awmna khua Gibea-ah a chho ta a. 35 Chutichuan, Samuela chuan a thih ni thlengin Saula chu a tlawh leh ta lo va. Samuela chu Saula avângin lungngaih chu a lungngai a ni; tin, LALPA chu, Israel-te lal atâna Saula a lo siam chu a inchhîr a ni.
Lal atân Davida hriak thih a ni
1 Chutichuan, LALPA chuan Samuela hnênah, “Israel mite lal atân ka duh tawh loh ahnu, Saula avâng hian eng chen nge maw i lungngaih dâwn le? I kîah hriak thun khat la, kal rawh; Bethlehem mi Jesaia hnênah ka tîr dâwn che a ni. A fapate zînga mi lal atân ka ruat tawh reng a ni,” a ti a. 2 Tin, Samuela chuan “Engtin nge ka kal theih ang? Saulan a lo hriat chuan min tihlum mai ang asin,” a ti a. Tin, LALPA chuan, “Bâwnglâ hruai la, ‘LALPA hnêna inthawi tûra lo kal ka ni,’ ti ang che. 3 Tin, inthawinaah chuan Jesaia chu ko la, i tih tûr chu ka hrilh ang chia; tin, a hming ka hrilh tûra che chu hriak mi thihsak ang che,” a ti a. 4 Tichuan, Samuela chuan LALPA sawi ang chuan a ti a, Bethlehem-ah chuan a kal ta a. Tin, khuaa upate chuan khûr chungin amah an lo hmuak a, “Ṭha lam thua lo kal em i nih le?” an ti a. 5 Tin, ani chuan, “Ṭha lam thu-ah ni e; LALPA hnêna inthawi tûra lo kal ka ni. Intithianghlim ula, inthawinaah lo kal ve rawh u,” a ti a. Tin, Jesaia leh a fapate chu a tithianghlim a, inthawinaah chuan a ko va. 6 Tin, heti hi a ni a, an lo kal chuan Eliaba chu a lo en a, “LALPA hriak thiha chu a hmaa awma hi a ni ngei mai,” a ti a. 7 Nimahsela, LALPA chuan Samuela hnênah, “A hmêl lam emaw, a sân lam emaw en suh; ani hi chu ka duh loh a ni. LALPA chuan mihring en dân angin a en ve si lo va; mihring chuan pâwn lama lan dân an en ṭhîn a, LALPA erawh chuan thinlung lam a en zâwk ṭhîn a ni,” a ti a. 8 Tin, Jesaia chuan Abinadaba a han ko va, Samuela hmaah chuan a kaltîr a. Ani chuan, “Hei pawh hi LALPA thlan a la ni lo,” a ti a. 9 Tin, Jesaia chuan Sama a va kaltîr leh a. Tin, ani chuan, “Hei pawh hi LALPA thlan a la ni lo cheu,” a ti a. 10 Tichuan, Jesaia chuan a fapate pasarih chu Samuela hmaah chuan a kaltîr a. Tin, Samuela chuan Jesaia hnênah, “LALPAN hêngho hi a thlang lo a ni,” a ti a. 11 Tin, Samuela chuan Jesaia hnênah, “Hetah hian i fate an awm kim vek em?” a ti a. Ani chuan, “A naupang ber a la awm a, ngai teh, berâm a vêng a ni,” a ti a. Tin, Samuela chuan Jesaia hnênah, “Va kohtîr rawh khai; a lo thlen hma loh chu kan ṭhu dâwn lo a ni,” a ti a. 12 Chutichuan, a va kohtîr a, a rawn hruai a. Ani chu sâr veng vawng, mitmeng mawi tak, hmêlṭha tak mai a ni a. Tin, LALPA chuan, “Tho la, hriak thih rawh; hei ngei hi a ni e,” a ti a. 13 Chutichuan, Samuela chuan hriak bâwm ki chu a la a, a unaute zîngah chuan amah chu hriak a thih a; tichuan, LALPA thlarau chu chumi ni aṭang chuan nasa takin Davida chungah a lo thleng ta a. Chutichuan, Samuela chu a tho va, Rama khuaah a kal ta a.
Saula inah Davida a chêng
14 Tin, LALPA thlarau chuan Saula chu a chhuahsan a, LALPA tirh ramhuaiin amah a tibuai a. 15 Tin, Saula chhiahhlawhte chuan a hnênah, “Ngai teh, Pathian tirh ramhuaiin a tibuai che a ni a. 16 Kan pu chuan i chhiahhlawh i hmaa awmte ṭingṭang tum thiam tak zawn thu min pe rawh khai; tichuan, Pathian tirh ramhuaiin a man hun chein a tum ang a, i ṭha mai ang,” an ti a. 17 Tin, Saula chuan a chhiahhlawhte hnênah chuan, “Tum thiam tak chu mi han zawnsak ula, ka hnênah rawn hruai rawh u le,” a ti a. 18 Chutichuan, tlangvâl pakhat chuan a chhâng a, a hnênah, “Ngai teh, Bethlehem mi Jesaia fapa pakhat chu ka hmu tawh a, chu mi chu tum thiam tak, mi huai tak, indo mi, thusawi thiam tak, hmêlṭha tak a ni a, a hnênah LALPA pawh a awm,” a ti a. 19 Chutichuan, Saula chuan Jesaia hnênah chuan mi a tîr a, “I fapa Davida, berâm vênga awm chu ka hnênah han kaltîr rawh,” a ti a. 20 Tin, Jesaia chuan sabengtung, chhang leh uain peng khat phur leh kêlno a la a, a fapa Davida chu Saula pêkah a kentîr a. 21 Tin, Davida chuan Saula hnên chu a va thleng a, a hmaah chuan a va ding a. Ani chuan a lo ngaina hle mai a, a râlthuam kengtuah a ṭang ta a. 22 Tin, Saula chuan Jesaia hnênah, “Davida hi ka hnênah awm rawh se, ka mit a tlung hle mai,” tia hrilh tûrin mi a tîr a. 23 Tin, heti hi a ni a, Pathian tirh ramhuaiin Saula a man apiangin Davida chuan ṭingṭang a la a, a tum ṭhîn a. Chutichuan, Saula chu a lo harh a, a ṭha leh ṭhîn a; tin, ramhuai chuan a chhuahsan ṭhîn a.
Goliatha, mi lianin Israel-te a cho
1 Tin, Philistia mite chuan indo tûrin an sipaite an khâwm chiam mai a. Judai ram chhûng Soko khuaah an pung khâwm a, Ephes-damim hmunah Soko khua leh Azeka khaw inkârah ṭanhmun an khuar a. 2 Tin, Saula leh Israel mite chu an pung khâwm a, Ela ruamah ṭanhmun an khuar a, Philistia mite lo dang tûrin an inzâr darh a. 3 Tin, Philistia mite chu tlâng pangah an awm a; tin, Israel mite chu a lehlam tlâng pangah an awm a, an inkârah chuan ruam a awm a. 4 Tin, Philistia mite ṭanhmun aṭang chuan an mi chak, a hming Goliatha, Gath khuaa mi, tawng ruk leh khâpa sâng hi a lo chhuak a. 5 Dâr lukhum hi a khum a, âwmphaw a ha a; a âwmphaw rih lam chu dâr sekel sângnga a ni a. 6 A ngalah chuan dâr ngalphaw a bun a, a hnungzângah chuan dâr feitê a pai a. 7 A fei ngul chu themkawl ang hi a ni a; tin, a fei lû chu thîr sekel zaruka rit a ni a; tin, a phaw kengtu chu a hmaah a kal a. 8 Tin, a ding a, Israel sipaite chu a au va, an hnênah, “Engati nge indo tûra in rawn inzâr darh? Kei Philistia mi, nangni Saula chhiahhlawh in ni lâwm ni? Mi inthlang ula, ka hnênah lo chhuk rawh se. 9 Mi beih theiha mi tihhlum chuan in chhiahhlawhah kan awm ang a; amaherawhchu, keiin ka ngama ka tihhlum chuan kan chhiahhlawhah in awm ang a, kan rawng in bâwl ang,” a ti a. 10 Tin, Philistia mi chuan, “Vawiinah hian Israel-ho sipaite chu ka cho a ni; mi pakhat han thawh ula, kan lo inbei ang e,” a ti a. 11 Tin, Saula leh Israel-ho zawng zawngin chu Philistia mi thusawi chu an han hriat chuan an zâm a, an hlau ta êm êm mai a.
Indona hmunah Davida a kal
12 Tin, Davida chu Jesaia fapa a ni a, ani chu Bethlehem-juda-a Ephrath mi kha a ni a, fapa pariat a nei a; ani chu Saula lal lai chuan upa tak, tar tak a ni tawh a. 13 Tin, Jesaia fapa upate pathum chuan indonaah Saula chu an zui a. A fapate pathum indonaa kalte hming chu a upa ber Eliaba te, a dawttu Abinadaba te, a pathumna Sama te an ni. 14 Tin, Davida chu a naupang ber a ni a; tin, a upate pathum chuan Saula an zui a. 15 Davida chu Saula hnên aṭangin Bethlehem-ah a pa berâm enkawlin a va kal a va kal ṭhîn a. 16 Tin, Philistia mi chuan zîng leh tlai apiangah hian a va hnaih ṭhîn a, ni sawmli chhûng a va intâr lang ṭhîn a. 17 Tin, Jesaia chuan a fapa Davida hnênah chuan, “Bâr atâna pho ro epha khat leh he chhang hlâwm sâwm hi keng la, i unaute hnênah an riahhmunah va kalpui thuai rawh khai. 18 Tin, bâwnghnute khal tlang sâwm hi an pâwla sâng hotu kensak la; tin, i unaute engtin nge an awm han zâwt la, an chanchin han hria ang che. 19 Saula leh anni leh Israel mi zawng zawngte chu Philistia mite beiin Ela ruamah chuan an awm e,” a ti a. 20 Tin, Davida chu zîng takah a tho va, berâmte chu vêngtu pakhat a kawltîr a, Jesaian thu a pêk ang chuan a keng a, a kal ta a; tin, indona hmuna chhuak mêk sipaihote chu inbei tûra an lo au dur dur lai takin ani chuan tawlailîr awmna hmun chu a va thleng a. 21 Tin, Israel-ho leh Philistia mite chu inbei tûrin an lo inzâr a, sipai leh sipai chu an lo inep a. 22 Tin, Davida chuan a bungrua chu bungraw enkawltu hnênah chuan a dah a, sipai hnên lamah chuan a va tlân a, a ute chu chibai a va bûk a. 23 Tin, anmahni a biak lai chuan ngai teh, an mi chak Gath khuaa Philistia mi, a hming Goliatha chu Philistia mite sipai pâwl zîng ata a lo chhuak a, a thusawi ngai bawk kha a han sawi a. Chu chu Davida chuan a lo hria a. 24 Tin, Israel mi zawng zawngte chuan chu mi chu an han hmuh chuan an tlânchhia a, an hlau êm êm mai a. 25 Tin, Israel mite chuan, “Kha mihring lo chhuaka kha in hmu em? Israel mite cho tûrin a lo chhuak a ni ngei mai; tu pawh amah tihlum apiang chu lalin nasa takin sum lamin a tihausa ang a, a fanu a pe ang a; tin, a pa chhûngkua chu Israel-ho zîngah hian chhiah a âwl ang,” an ti a. 26 Tin, Davida chuan a kianga dingte hnênah chuan, “He Philistia mi hi tihluma Israel-ho hmingchhiatna tirehtu chu engtia tih tûr nge ni ang? He serh tan loh Philistia mi hi tu nge maw a niha, Pathian nung sipaite a han cho vei le?” a ti a. 27 Tin, mipuite chuan hetiang hian an chhâng a, “A tihlumtu apiang chu kan sawi ang khân tih a ni ang,” an ti a. 28 Tin, a u upa ber Eliaban mite hnêna a thusawi lai chu a lo hria a; tichuan, Eliaba chu Davida chungah chuan a thin a ur ta thut a. “Engah nge i lo chhuk ve ni? Thlalêra berâm tlêm awmte kha tu nge i vêntîr ni? I chapozia leh i rilru ṭhat lohzia ka hria a ni; indo en tûr tein i lo kal mai mai a,” a ti a. 29 Tin, Davida chuan, “Eng nge maw ka tih le? A chhan a awm a ni lâwm ni?” a ti a. 30 Tin, ani chuan mi dang hnên lam a hawisan a, a sawi ngai bawk a sawi a; tin, mipuite chuan a hmaa an chhân ang bawkin an chhâng leh a. 31 Tin, Davida thusawi chu an hriatin Saula hnênah an sawi chhâwng a; tin, ani chuan a ko va. 32 Tin, Davida chuan Saula hnênah, “Amah avâng chuan tu ma rilru zâm suh se; i chhiahhlawh hian chu Philistia mi chu ka va bei ang e,” a ti a. 33 Tin, Saula chuan Davida hnênah, “Nang zawng chu Philistia mi bei tûr chuan i kal thei êm lo vang e; tleirâwl chauh i la ni si a, ani zawng a tleirâwl tirh ata indo mi a ni si a,” a ti a. 34 Tin, Davida chuan Saula hnênah, “I chhiahhlawh hian ka pa berâm ka vêng ṭhîn a; sakeibaknei emaw, savawm emaw a lo kala berâm rual zîng ata berâmno a lâk te hian, 35 ka ûm a, ka bei a, a kâ ata chu ka chhanchhuak ṭhîn asin; tin, mi bei tûra a lo thawh te hian a bak hmulah ka man a, ka bei a, ka tihlum ṭhîn a ni. 36 I chhiahhlawh hian sakeibaknei leh savawmte ka tihlum ve ve tawh ṭhîn a; chu serh tan loh Philistia mi chu anmahni angin a awm ve mai ang maw le, Pathian nung sipaite a cho vei a,” a ti a. 37 Tin, Davida chuan, “Sakeibaknei kutbâwr ata leh savawm kutbâwr ata mi chhanchhuaktu LALPA chuan chu Philistia mi kut ata chu mi chhanchhuak ang,” a ti a. Tin, Saula chuan Davida hnênah, “Kal teh le, i hnênah LALPA a awm ang chu,” a ti a.
Davidan Goliatha a that
38 Tin, Saula chuan Davida chu ama thuam a bel a, dâr lukhum a khumtîr a, âwmphaw a hâktîr a. 39 Tin, Davida chuan a thuam chungah chuan a khandaih a pai a, kal a han tum a; chutiang chuan a la tichhin ngai si lo va. Tin, Davidan Saula hnênah, “Ka kalpui thei dâwn hauh lo mai! Hetiang hian ka la tichhin ngai lo a ni,” a ti a. Tichuan, Davida chu a inhlîp ta a. 40 Tin, a tiang chu a keng a, luitêa lung mûm mâm thel thawl panga a thlang a, a berâm vên ip, a iptêah chuan a pai a; tin, a virvawm chu a keng a, Philistia mi chu a va pan hnai ta a. 41 Tin, Philistia mi chu a lo kal zêl a, Davida chu a rawn pan hnai a; tin, phaw kengtu chu a hmaah a kal a. 42 Tin, Philistia mi chu a han hawi vêl a, Davida chu a han hmuh chuan a hmusit hle mai a; sâr veng vawng, mitmeng mawi tak, tleirâwl mai a ni si a. 43 Chutichuan, Philistia mi chuan Davida hnênah chuan, “Ui emaw ka niha tiangte nêna mi rawn pan chu le?” a ti a. Tichuan, Philistia mi chuan a pathiante chhâlin Davida chu ânchhia a lawh a. 44 Tin, Philistia mi chuan Davida hnênah, “Lo kal teh, i sate kha chunglêng savate leh ramsate ka lo eitîr teh ang,” a ti a. 45 Chutichuan, Davida chuan Philistia mi hnênah chuan, “Nang zawng khandaih te, fei te, feitê te kengin i lo thawk a; kei zawng sipaite LALPA, Israel sipaite Pathian, i chova hmingin ka lo thawk zâwk a ni. 46 Vawiinah hian LALPAN nang hi ka kutah mi pe dâwn a ni; tin, ka that ang chia, i lu ka tansak ang che. Tin, Philistia sipaiho ruangte chu vawiinah hian chunglêng savate leh ramsate ka eitîr dâwn a ni; chutichuan, lei chunga mi zawng zawng hian Israel-ho zîngah hian Pathian a awm tih an hre thei ang. 47 Tin, heta pungho zawng zawng hian LALPA chuan khandaih leh feiin a chhandam lo tih an hre thei ang a; indona chu LALPA indona a ni si a, ani chuan nangniho hi kan kutah mi pe dâwn a ni,” a ti a. 48 Tin, heti hi a ni a, Philistia mi chu a lo thawha Davida bei tûra a rawn hnaih chuan, Davida chu sipaiho lamah chuan Philistia mi chu bei tûrin a tlân ta thuai a. 49 Tin, Davida chuan a ip chu a han zen a, lung a han phawrh a, a virvawm chuan a han vawm a, Philistia mi chu a chaldâr takah a han vawm a, a chalah chuan lung chu a lût a, a tlu bawkkhup ta dêr mai a. 50 Chutichuan, Davida chuan Philistia mi chu virvawm leh lungin a ngam a, Philistia mi chu a vawm a, a that ta a; Davida chuan khandaih a keng hauh lo va. 51 Tichuan, Davida chu a tlân a, Philistia mi kiangah chuan a va ding a, a khandaih chu a la a, a pai ata chu a phawi a, chu chuan a that a, a lu a tan ta a. Tin, Philistia miten an mi chak chu a thi tih an hriatin an tlânchhe ta a. 52 Tin, Israel mi leh Juda mite chu an tho va, an au va, Philistia mite chu Gath thleng leh Ekron kulh kawngkhâr thleng rawkin an ûm ta a. Tin, Philistia mite zînga hliamho chu Saaraim kawng tluanin Gath leh Ekron thlengin an tlu rum mai a ni. 53 Tin, Israela thlahte chuan Philistia mite an ûm chu an kirsan a, an riahhmun chu an suan ta a. 54 Tin, Davida chuan Philistia mi lu chu a la a, Jerusalem-ah a kalpui a, râlthuam erawh chu a puan inah a dah a.
Saula hmaah Davida
55 Saulan Philistia mi bei tûra Davida kal a hmuh khân sipai hotu Abnera hnênah chuan, “Abner, he tleirâwl hi tu fa nge ni?” a ti a. Tin, Abnera chuan, “I nunna chhâlin ka sawi e, aw lalpa, ka hre hauh lo mai,” a ti a. 56 Tin, lal chuan, “He naupang hi tu fa nge ni zâwt chhuak rawh khai,” a ti a. 57 Tin, Davida, Philistia mi a that lo haw chu Abnera chuan a hruai a, Philistia mi lu keng chungin Saula hnênah chuan a kalpui a. 58 Tin, Saula chuan a hnênah, “Tu fapa nge i nih le tlangvâl?” a ti a. Tin, Davida chuan a chhâng a, “Bethlehem mi i chhiahhlawh Jesaia fapa ka ni,” a ti a.
1 Tin, heti hi a ni a, Saula hnêna thu a sawi zawh chuan Jonathana nunna leh Davida nunna chu a lo inzawm ta chiah mai a; tichuan, Jonathana chuan ama nunna a hmangaih ang chiahin a hmangaih ta a. 2 Tin, Saula chuan chumi ni chuan a awmtîr ta nghâl a, a pa inah a hâwntîr phal ta lo va. 3 Chutichuan, Jonathana leh Davida chuan thu an thlung a, ama nunna ang chiaha a hmangaih avângin. 4 Tin, Jonathana chuan a puan sin lai a hlîp a, Davida a pe a, a thuam leh a khandaih leh a thalngul leh a tai hrênna lamin a pe a. 5 Tin, Saulan a tirhna apiangah Davida chu a kal ṭhîn a, fel takin a che ṭhîn a. Tin, Saula chuan râl kâp mite hotu atân a siam a, chu chu mi zawng zawng ngaihah leh Saula chhiahhlawhte ngaihah pawh a ṭha êm êm a ni.
Saulan Davida a thîk
6 Tin, heti hi a ni a, an lo hâwna, Davida chu Philistia mi thata a lo haw chuan, Israel khaw tinah hmeichhiate chu hla sa leh lâm chungin khuangtê leh thil ri theite nên, hlim takin Lal Saula hmuak tûrin an lo chhuak a. 7 Tin, hmeichhiate chu lâm chungin hlain an inchhâwn a, “Saulan a sânga sâng a that, Davidan a sînga sîng,” an ti a. 8 Chutichuan, Saula chu a thinur ta viau mai a, chûng thu chuan a tilâwm lo hle mai a; “Davida chu a sînga sîng thatah an ngai a, kei erawh chu a sânga sâng chauh thatah mi ngai a. Ram tih ngawt loh chu a neih tûr dang eng nge awm tawh?” a ti a. 9 Chutichuan, Saula chuan chumi ni aṭang chuan Davida chu a hmumawh ta a. 10 Tin, heti hi a ni a, a tûkah chuan Saula chungah chuan Pathian tirh ramhuai a lo thleng ta chiam mai a, in chhûngah chuan thu a sawi ta bual bual mai a. Tin, Davida chuan ni danga a tih ang bawkin ṭingṭang a tum a; Saula chuan a fei a keng reng a. 11 Tin, Saula chuan fei chu a han lek a, “Bangah sâwn Davida saw ka khawh bet tlat teh ang,” a ti a. Davida chuan vawi hnih a kiansan a. 12 Tin, a hnênah LALPA a awm avâng leh, Saula chu a kalsan avângin Saula chuan Davida chu a hlau va. 13 Chu vâng chuan Saula chuan a hnên aṭangin a insawntîr a, sâng chunga a sipai hotuah a siam a; tin, mipui zîngah chuan a lûtin a chhuak ṭhîn a. 14 Tin, Davida chu a thiltih apiangah fel takin a che ṭhîn a; LALPA chu a hnênah a awm a. 15 Tin, Saula chuan fel takin a che ṭhîn tih a hmuhin a hlau hle mai. 16 Nimahsela, Israel-ho leh Juda-ho zawng zawngte chuan Davida chu an ngaina êm êm a; an zînga lûta chhuak ṭhîn a ni si a.
Davidan Saula fanu nupuiah a nei
17 Tin, Saula chuan Davida hnênah, “Ngai teh, ka fanu upa zâwk Merabi hi i nupuiah ka neihtîr ang che; huai takin mi ṭan phawt mai la, LALPA indonate chu do vang che,” a ti a. Saula chuan, “Kei chuan a chunga kut thlâk lovin Philistia miten a chungah kut thlâk zâwk rawh se,” a ti rilru a ni. 18 Tin, Davida chuan Saula hnênah, “Tu nge maw ka niha, ka nunna leh Israel-te zînga ka pa chhûngte pawh eng nge maw an niha, lal mâkpa ka han nihna tûr chu?” a ti a. 19 Nimahsela, heti hi a ni a, Saula fanu Merabi chu Davida neihtîr a lo hun chuan, Meholath mi Adriela nupui atân a pe ta mai a. 20 Tin, Saula fanu Mikali chuan Davida chu a hmangaih a. Saula chu an hrilh a, chu chuan a tilâwm a. 21 Tin, Saula chuan, “A awhna thang a lo nih theih nân leh, Philistia miten a chungah kut an thlâk theih nân ani hi ka pe teh ang,” a ti a. Chu vâng chuan Saula chuan Davida hnênah, “Vawiinah hian ka mâkpa i ni nawn leh ang,” a ti a. 22 Chutichuan, Saula chuan a chhiahhlawhte chu thu a pe a, “A rûk têin Davida bia ula, ‘Ngai teh, lal chu i chungah a lâwm hle mai a, a chhiahhlawh zawng zawng pawhin an hmangaih che a ni; chutichuan, lal mâkpaah awm ang che,’ ti rawh u,” a ti a. 23 Tin, Saula chhiahhlawhte chuan chûng thu chu Davida beng hriatah an sawi a. Tin, Davida chuan, “Mi rethei leh tu ma ngaihsân mang loh keini ang tân hian lal mâkpa han nih chu thil namênah in ngai em ni?” a ti a. 24 Tin, Saula chhiahhlawhte chuan, “Davida chuan chutiang chuan a ti a ni,” tiin an hrilh a. 25 Tin, Saula chuan, “Davida hnênah hetiang hian sawi ang che u, ‘Lal chuan lal hmêlma phuba lâk nân Philistia mite serh vun za tih loh chu man eng mah a duh lo ve, a ti,’ ti rawh u,” a ti a. Saula chuan Davida chu Philistia mite kuta thihtîr a rilrûk tlat a. 26 Tin, a chhiahhlawhten chûng thu chu Davida an han hrilh chuan, lal mâkpa a han ni tûr chu Davida chu a lâwm hle mai a. Tin, ni tiam te chu a la ral lo va; 27 tichuan, Davida leh a mite chu an tho va, Philistia mite chu zahnih an va that a. Tin, Davida chuan an serh vun a rawn hâwn a, lal mâkpa a nih theihna tûrin lal chu kim takin an pe a. Tichuan, Saula chuan a fanu Mikali chu nupuiah a neihtîr ta a. 28 Tin, Saula chuan Davida hnênah chuan Pathian a awm tih a hre chiang ta a; tin, Saula fanu Mikali chuan ani chu a hmangaih a. 29 Tichuan, Saula chuan Davida chu a hlau zual ta sauh mai a. Saula chu Davida hmêlma a ni ta kumkhua a. 30 Chutichuan, Philistia-ho mi liante chu an va thawk chhuak ṭhîn a. Tin, heti hi a ni a, an thawh chhuah apiangin Davida chu Saula chhiahhlawh zawng zawngte aia felin a che ṭhîn a; tichuan, a hming chu an chawisâng ta hle mai a.
Saulan Davida a tirethei
1 Chutichuan, Saula chuan a fapa Jonathana leh a chhiahhlawh zawng zawngte chu Davida that tûrin a ti a. 2 Nimahsela, Saula fapa Jonathana chuan Davida chu a ngaina hle mai a. Tichuan, Jonathana chuan Davida chu, “Ka pa Saula hian thah a tum chia; chuvângin, naktuk zîngah chuan fîmkhur la, hmun biruah biru reng rawh khai. 3 Tin, ka kal chhuak ang a, i awmna phûlah ka pa kiangah ka va ding ang a, i chungchâng thu-ah ka pa ka bia ang a. Tin, eng emaw ka hriat chuan ka hrilh ang che,” a ti a. 4 Tin, Jonathana chuan a pa Saula hmaah chuan Davida chu a fak a, a hnênah, “Lal chuan a chhiahhlawh chungah, Davida chungah hian thil sual ti lul suh se, i chungah eng mah a tisual si lo va, a thiltihte chu i tâna ṭha tak a ni zâwk si a, 5 Thih dâwn lovin Philistia mi kha a bei a; tin, LALPAN Israel-ho zawng zawng chhandamna ropui tak a thawh chhuahsak a. Chu chu nang pawhin i hmu a, i lâwm hle kha. Chuvângin, thisen pawi khawih lo chungah chuan engah tehlul nge thil i tihsual anga, a chhan eng mah awm lovin Davida chu i thah ang?” a ti a. 6 Chutichuan, Saula chuan Jonathana thusawi chu a pawm a, Saula chuan chhechhamin, “LALPA nunna chhâlin ka sawi e, ani chu tihhlum tûr a ni tawp lo vang,” a ti a. 7 Tin, Jonathana chuan Davida chu a ko va, Jonathana chuan chûng thil zawng zawng chu a hrilh a. Tin, Jonathana chuan Davida chu Saula hnênah chuan a hruai a, tûn hma lam ang bawk khân a hnênah a awm leh ta a. 8 Tin, indona a lo awm leh a; tichuan, Davida chu a thawk chhuak a, Philistia mite chu a va bei a, a va that chiam a, a hmaah chuan an tlânchhia a. 9 Tin, Saula chu a ina fei kenga a ṭhut laiin LALPA tirh ramhuai a chungah a lo thleng a; tin, Davida chuan ṭingṭang a tum a. 10 Tin, Saula chuan a fei chuan Davida chu banga khawh beh tlat a tum a; nimahsela, Saula kiang ata chu a pût chhuak var a, fei chu bangah chuan a khawh bûr ta ngur mai a; tin, Davida chu a tlân chhuak a, chumi zân chuan a him ta a. 11 Tin, Saula chuan Davida in lamah zînga lo chânga that tûrin mi a tîr a; tin, Davida nupui Mikali chuan, “Zâninah hian i nun i humhim loh zawngin naktûkah an that dâwn che a ni,” tiin a hrilh a. 12 Chutichuan, Mikali chuan Davida chu tukverhah a thlâk thla a; tichuan, a tlân bo va, a him ta a. 13 Tin, Mikali chuan milem a la a, khumah chuan a muttîr a; tin, a lu atân kêl hmul a dah a, puanin a khuh a. 14 Tin, Davida hruai tûra Saulan mi a rawn tirh chuan, “A damlo,” a lo ti a. 15 Tin, Saula chuan Davida va en tûrin mi a tîr a, “A khum chawpin rawn zâwn chho ula, ka lo that ang e,” a ti a. 16 Tin, a mi tirhte chu an va luh chuan ngai teh, khumah chuan milem chu a lu lama kêl hmul lukham khamin a lo awm a. 17 Tin, Saula chuan Mikali hnênah, “Engati nge hetianga mi buma, a himna tûra ka hmêlma i chhuahtîr ni?” a ti a. Tin, Mikali chuan Saula chu a chhâng a, “Ka kaltîr loh chuan mi thah a tum alâwm maw le,” a ti a. 18 Tichuan, Davida chu a tlân bo va, a him ta a, Rama khuaah Samuela hnên a va thleng a, a chunga Saula thiltih zawng zawng chu a hrilh a. Tin, amah leh Samuela chu an kal a, Naioth-ah an awm a. 19 Tin, Saula chu, “Ngai teh, Davida chu Rama khuaa Naioth-ah a awm,” tiin an hrilh a. 20 Tichuan, Davida hruai tûrin Saula chuan mi a tîr a. Tin, zâwlnei pâwlho thusawi dual dual lai leh Samuela chu an chunga hotua awm an va hmuh chuan, Saula mi tirhte chungah chuan Pathian thlarau a lo thleng a, anni pawh chuan thu an sawi ve ta dual dual a. 21 Tin, chu chu Saula an han hrilh chuan, mi dang a tîr leh a, anni pawh chuan thu an va sawi ve leh ta dual dual mai a. Tin, Saula chuan a vawi thumnaah chuan mi a tîr leh a, anni pawh chuan thu an va sawi ve leh ta dual dual mai a. 22 Chutichuan, amah pawh chu Rama khuaah chuan a kal ve ta a; tin, Seku hmuna tuichhunchhuah zau tak chu a va thleng a, “Samuela leh Davida hi khawiah nge an awm?” a ti a, a zâwt a. Tin, tu emaw hian, “Ngai teh, Rama khuaa Naioth-ah an awm,” a ti a. 23 Chutichuan, Rama khuaa Naioth-ah a kal a; tin, Pathian thlarau chu a chungah chuan a lo thleng ve ta a, a kal zêl a, Rama khuaa Naioth a thlen thlengin thu a sawi bual bual zêl a. 24 Tin, ani pawhin a silhfênte a hlîp ve a, Samuela hmaah chuan thu a sawi ve ta bual bual a, chumi nilêng leh chumi zankhua chuan ruakin a mu a. Chu vâng chuan, “Saula pawh chu zâwlnei zîngah a tel ve ta elo maw ni?” tih hi an chîng hlen ta.
Jonathanan Davida a pui
1 Chutichuan, Davida chu Rama khuaa Naioth ata chu a tlân a, Jonathana hnênah a kal a, “Eng nge maw ka tih le? Eng nge ni ka bawhchhiat? I pa chungah hian eng nge ka tihsuala, hetia mi thah a tum hi ni le?” a ti a. 2 Tin, ani chuan, “That suh e a! I thi tawp lo vang! Ngai teh, ka pa chuan mi hriattîr lovin eng mah rêng rêng, lian se tê se a ti ngai lo va. Engah tehlul nge hêng thu hi ka lakah a zêp ang? A zêp tawp lo vang!” a ti a. 3 Tin, Davida chuan, “I pa chuan i mi khawngaih dân hi a hre chiang hle mai si a; ‘Jonathana chuan hei chu hre kher suh se; chuti lo zawng, a lungngai dâwn êm mai e,’ a ti a ni ang. Amaherawhchu, LALPA nunna leh i nunna chhâlin ka sawi e, thihna nêna kan inkâr chu pên khat chauh a ni,” tiin a sawi uar leh a. 4 Chutichuan, Jonathana chuan Davida hnênah, “I nunnain a duh apiang chu ka tihsak zêl ang che,” a ti a. 5 Tin, Davida chuan Jonathana hnênah, “Ngai teh, naktûk hi thla thar a ni dâwn a, lal hnêna chawhlui kîl ngei tûr ka ni a; nimahsela, a ni thum ni tlai lam thlengin phûl lamah biru tûrin ka kal zâwk ang e. 6 Tin, i pain ka awm loh hi lo hre chhuak ta a nih leh, ‘Davida chuan a khua Bethlehem-a va kal lawk mi dîl ngawih ngawih a; an chhûngkaw tâna an kum tin inthawi hun a ni e,’ lo ti la. 7 Tin, ‘A ṭhat chu,’ a tih chuan i chhiahhlawh chu a thla a muang ang a; amaherawhchu, a thin a rim chuan thil ṭha lo tih a tum a ni tih hre mai ang che. 8 Chuvângin, i chhiahhlawh hi ṭha takin ti ang che, i chhiahhlawh chu LALPA thuthlungah i luhpui tawh si a. Amaherawhchu, bawhchhiatna nei ka nih chuan nangman mi that mai rawh; eng atân nge i pa hnênah mi hruai kher kher ang?” a ti a. 9 Tin, Jonathana chuan, “That suh e a! I chungah thil ṭha lo tih ka pan a tum tih ka hriat phawt chuan ka hrilh dâwn lo che em ni?” a ti a. 10 Chutichuan, Davida chuan Jonathana hnênah, “I pain bung takin lo chhâng ta hlauh ang che sela tuin nge mi hrilh ang?” a ti a. 11 Tin, Jonathana chuan Davida hnênah, “Hawh teh, phûlah i va kal teh ang,” a ti a. Tichuan, phûlah chuan an va kal dûn ta a. 12 Tin, Jonathana chuan Davida hnênah, “LALPA, Israel-te Pathian chu hretu ni rawh se; naktûk hetih hunah emaw, ni thum niah emaw ka pa ka han dâwp hunah, ngai teh, Davida chungchâng thu a ṭha lam a nih chuan a hnênah mi tîrin ka hrilh dâwn lo che em ni? 13 Tin, ka pan i chungah ṭhil ṭha lo ti duh ta sela, ka hrilh loh chea, thlamuang taka i kal theih nâna ka thlah loh che chuan, LALPAN Jonathana chu a tih tihin ti sela, chu aia nasa pawhin. Tin, LALPA chu i hnênah awm rawh se, ka pa hnêna a awm ṭhîn angin. 14 Tin, ka thih lohna tûra ka dam chhûng chauhva LALPA khawngaihna chu mi hmuhtîr ni lovin, 15 kumkhuain ka chhûngte pawh i khawngaih bâng suh ang che; LALPAN Davida hmêlma lei chung ata a tihbo vek hnu thleng pawhin bâng suh ang che,” a ti a. 16 Chutichuan, Jonathana chuan, “Davida hmêlmate lakah LALPAN a phût ang,” tiin Davida chhûngte hnênah thu a thlung a. 17 Tin, Jonathana chuan amah a hmangaihna chhâlin Davida hnênah chhia a chham leh a; ama nunna a hmangaih ang chiahin a hmangaih si a. 18 Chutichuan, Jonathana chuan a hnênah, “Naktûk hi thla thar a ni dâwn a; i ṭhuthmun a ruah dâwn avângin i awm loh a lang ngei dâwn a. 19 Ni thum i awm hnu chuan chhuk thuai la, hmâna thil a lo awm laia i bihrûkna hmunah khân lo kal la, Ezel lung bulah chuan awm reng ang che. 20 Tin, inthemthiam ni âwm takin thal pathumin a sîrah ka rawn kâp ang a. 21 Tin, ngai teh, ‘Kal la, thalte kha va zawng hmu rawh,’ tiin naupang ka tîr ang a. Naupang hnêna, ‘En teh, thalte chu i hnung lama kha a awm e, la la, lo kal rawh,’ ka tih chuan LALPA nunna chhâlin ka sawi e, i tân a muanawmin hlauh tûr a awm lo a ni ang a. 22 Amaherawhchu, naupang hnêna, ‘En teh, thalte chu i piah lama saw a awm e,’ ka tih chuan kal bo mai ang che; LALPA chuan a kal botîr che a ni ang. 23 Tin, nang leh keiin thil kan sawi tâk chungchang thu-ah chuan ngai teh, nang nêna kan kârah chuan LALPA chu a awm kumkhua a ni,” a ti a. 24 Chutichuan, Davida chu phûlah chuan a biru a; tin, thla a lo thar chuan lal chu chaw kîlin a ṭhu a. 25 Tin, lal chu ni danga a ṭhutna pângngai bang kianga a ṭhutnaah chuan a ṭhu a. Tin, Jonathana chu a ding a; tin, Abnera chu Saula kiangah a ṭhu a; Davida hmun erawh chu a ruak a. 26 Nimahsela, Saula chuan chumi ni chuan eng mah a sawi lo: “A chungah thil eng emaw a awm ang a, a thianghlim lo emaw a ni ang, a thianghlim lo a ni ngei ang,” a ti rilru a. 27 Tin, heti hi a ni a, thla thar tûk a ni hnih ni chuan Davida hmun chu a la ruak ta cheu va; tichuan, Saula chuan a fapa Jonathana hnênah chuan, “Engati nge Jesaia fapa hi niminah leh vawiinah chawhlui kîl tûra a lo kal loh?” a ti a. 28 Tin, Jonathana chuan Saula chu a chhâng a, “Davida chuan Bethlehem-a kal mi dîl ngawih ngawih a, 29 ‘Mi kaltîr hrâm rawh khai, kan chhûngte chuan khuaah chuan inthawina an nei dâwn a, ka unau chuan awm ve tûrin mi chah tlat a; chutichuan, mi khawngaih theih chuan mi kaltîr la, ka unaute ka va tlawh ang e,’ a ti a. Chu vâng chuan lal dawhkânah chuan a lo kal lo a ni,” a ti a. 30 Chutichuan, Jonathana chungah chuan Saula thin chu a lo ur ta thut a, a hnênah, “Nang, hmeichhe kawhmawh leh luhlul fapa, Jesaia fapa chu i mualpho nân leh i nu saruakna timualpho tûrin i thlang tih ka hre lo vem ni tehlul? 31 Jesaia fapa hi he leia a awm chhûng zawng tihngheh i ni lo vang, i ram pawh. Chuvângin, kohtîr nghâl la, ka hnênah han hruaitîr rawh, a thi ngei tûr a ni,” a ti a. 32 Tin, Jonathanan a pa Saula chu a chhâng a, a hnênah, “Engah nge maw tihhlum tûr a nih ang le? Eng nge a tih?” a ti a. 33 Tin, Saula chuan khawh tumin a fei chu a han lek a; chumi avâng chuan Jonathana chuan a pan Davida chu thah a lo tum ngei a ni tih a hre ta a. 34 Chutichuan, Jonathana chu dawhkân ata chu thinrim takin a tho va, chumi thla ni hnih ni chuan chaw a kîl ve ta lo va; a pa chuan Davida a tihmualpho êm avângin a lungngaihpui a ni. 35 Tin, heti hi a ni a, zîngah chuan Jonathana chu naupang tê hruaiin phûl lamah Davida nêna an hmun ruatah chuan a kal ta a. 36 Tin, a naupang hnênah chuan, “Tlân la, ka thal kahte hi va zawng rawh khai,” a ti a. Tin, naupang chu a tlân lai chuan, a piah lamah chuan thal a kâp a. 37 Tin, naupang chuan Jonathana thal kah tlâkna hmun a va thlen chuan Jonathana chuan naupang chu a au va, “Thal chu i piah lama saw a ni lâwm ni?” a ti a. 38 Tin, Jonathana chuan naupang chu a au va, “Lo tlân thuai rawh, hmanhmawh rawh, muang suh,” a han ti a. Tin, Jonathana naupang chuan thal chu a chhar khâwm a, a pu hnên lamah chuan a kal ta a. 39 Nimahsela, naupang chuan eng mah a hre lo va, Jonathana leh Davida chauh chuan thil awmzia chu an hria a. 40 Tin, Jonathana chuan a naupang chu a hriamhrei chu a pe a, a hnênah, “Kal ta la, khuaah lo han hawpui teh ta,” a ti a. 41 Tin, naupang chu a kal tâk veleh Davida chu a awmhmun chhim lampang ata chu a lo tho va, hmaia lei siin chibai vawi thum a bûk a; tin, an infâwp a, an ṭap dûn a, Davida chu a zualkai bîk a. 42 Tin, Jonathana chuan Davida hnênah, “Thlamuang takin kal rawh aw, ‘LALPA chu nang nêna kan kârah leh ka thlahte leh i thlahte kârah kumkhuain awm rawh se,’ tia LALPA hminga chhia kan chham dun tawh kha,” a ti a. Tichuan, a tho va, a kal ta a; tin, Jonathana chu khuaah chuan a lût ta a.
Davidan Saula a tlânchhiatsan
1 Chutichuan, Davida chu Nob khuaah puithiam Ahimeleka hnênah chuan a kal a. Tin, Ahimeleka chuan khûr chungin Davida chu a lo hmuak a, a hnênah, “Engtizia nge i va mal ve, tu mah kalpui i neih loh?” a ti a. 2 Tin, Davida chuan puithiam Ahimeleka hnênah chuan, “Lalin thil ti tûrin thu mi pe a, ka hnênah, ‘Ka thil tihtîr tum rêng rêng che leh ka thupêk che hi tu mahin hre suh se,’ a ti tlat a; tin, tlangvâlhote lo awmna tûr hmunte chu ka ruat a. 3 Chutichuan, engte nge i kutah awm le? Chhang hlâwm nga min pe la, a nih loh leh i neih ang apiang pawh,” a ti a. 4 Tin, puithiam chuan Davida chu a chhâng a, “Chhang narân chu ka nei lo va; chhang thianghlim erawh chu ka nei a, tlangvâlte chu hmeichhe laka an inthiarfihlîm phawt chuan,” a ti a. 5 Tin, Davida chuan puithiam chu a chhâng a, a hnênah, “Tûn ni thum chhûng chu hmeichhe lakah rêng rêng chuan kan inthiarfihlîm vek takzet a ni; ka lo chhuah dâwn lai pawh khân tlangvâlte bungbêl chu a thianghlim a ni, khawiilova kal narân mai tûr kan ni nain; vawiin lek phei chuan an bungbêl chu a va thianghlim lehzual dâwn em!” a ti a. 6 Chutichuan, puithiam chuan chhang thianghlim chu a pe ta a; chutah chuan chhangdah an lâk nia chhang luma thlâk tûra LALPA hma ata an lâka chauh lo chu chhang dang a awm si lo va. 7 Tin, chumi ni chuan Saula chhiahhlawh zînga mi pakhat LALPA hmaa hrên a awm a; a hming chu Doega a ni a, Edom mi, Saula ran vêngtu zînga hotu ber a ni a. 8 Tin, Davida chuan Ahimeleka hnênah chuan, “Fei emaw, khandaih emaw i kawl lo maw? Lal hnaah chuan hmanhmawh a ṭul avângin ka khandaih leh ka hriamhrei a enga mah ka rawn keng hman lo a ni,” a ti a. 9 Tin, puithiam chuan, “Philistia mi Goliatha, Ela ruama i thaha khandaih chu ngai teh, puithiam kawr phênah hian puana tuamin a awm reng mai. Chumi chu i lâk duh chuan la rawh; chu chauh lo chu a dang a awm lo,” a ti a. Tin, Davida chuan, “Chu lo liam; min pe rawh khai,” a ti a. 10 Chutichuan, Davida chu a tho va, chumi ni chuan Saula hlauvin a tlân bo va, Gath lal Akisa hnênah a kal ta a. 11 Tin, Akisa chhiahhlawhte chuan a hnênah, “He mi hi an ram lal Davida a ni lâwm ni kha? ‘Saulan a sânga sâng a that, Davidan a sînga sîng,’ tia lâm chungin a chungchâng thu hlain an sa dur dur a ni lâwm ni kha?” an ti a. 12 Tin, Davida chuan chûng thute chu a rilruah a pai ta a, Gath lal Akisa chu a hlau ta hle mai a. 13 Chutichuan, a hmaah chuan a awm dân a tidanglam a, an mit hmuhah chuan a â der ta chiam mai a, kawngkhârte chu a ham vak vak a, a khabe hmulahte chuan a chil a tiluang duah duah ta mai a. 14 Chutichuan, Akisa chuan a chhiahhlawhte hnênah chuan, “En teh u, mi â a nih in hre reng si a, engati nge ka hnênah in rawn hruai ni? 15 Mi â ka tlâkchham vângin em ni he mi hi a âtzia tilang tûra ka hmaa in rawn hruai ni? He mi hi ka inah a lo lût tehlul ang maw?” a ti a.
Saulan puithiamho a that
1 Chutichuan, Davida chu chuta ta chu a chhuak a, Adulam pûkah a tlân ta a; tin, a unaute leh a pate chhûngkua zawng zawngin an lo hriat chuan chutah chuan a hnênah an zuk kal a. 2 Tin, mangang apiang te, leibat nei apiang te, lungnih lohna nei apiangte a hnênah chuan an kal khâwm a; tichuan, an hotuah a awm ta a; tin, a hnênah chuan mi zali emaw lai an awm ta a. 3 Tin, Davida chu chuta ta chu Moab rama Mizpe-ah a kal a; Moab lal hnênah chuan, “Pathianin thil min tihsak tûr ka hriat hma loh chu ka nu leh ka pate i hnênah lo awm rawh se aw,” a ti a. 4 Tin, Moab lal hmaah chuan a hruai a; tichuan, Davida chu kulhbîngah a awm chhûng zawng chuan a hnênah an awm a. 5 Tin, zâwlnei Gada chuan Davida hnênah, “Kulhbîngah chuan awm reng suh; chhuak la, Judai ramah kal rawh,” a ti a. Chutichuan, Davida chu a chhuak a, Hereth ngawah chuan a lût ta a. 6 Tin, Saula chuan Davida leh a hnêna awmte chu an hmu ta tih a lo hria a. Saula chu Gibea-ah Rama khuaah tamarisk thing hnuaiah a fei kengin a ṭhu a; tin, a vêlah chuan a chhiahhlawh zawng zawngte chu an ding a. 7 Tin, Saula chuan a kiang vêla ding a chhiahhlawhte hnênah chuan, “Nangni Benjamin mite u, ngaithla rawh u; Jesaia fapa chuan lote leh grêp huante a pe ṭheuh dâwn che uin, a sipai sâng hotuah te, a sipai za hotuahte a siam vek dâwn che u em ni? 8 In zain mi phiara, ka fapain Jesaia fapa hnêna thu a thlun ka hnêna tilang rêng rêng in awm lohva, ka fapain ka chhiahhlawh hi mi do tûr leh vawiin ni te pawha mi châng tûra a fuih thu ka hnêna tilang in awm loh ni?” a ti a. 9 Chutichuan, Saula chhiahhlawhte kianga ding Edom mi Doega chuan a chhâng a, “Jesaia fapa chu Nob khuaah, Ahituba fapa Ahimeleka hnêna lo kal ka hmu a. 10 Tin, ani chuan LALPA a râwnsak a, ei tûr a pe a; tin, Philistia mi Goliatha khandaih a pe bawk,” a ti a. 11 Chutichuan, lal chuan Ahituba fapa puithiam Ahimeleka leh a pa chhûngkua, Nob khuaa puithiam awm zawng zawngte chu a kohtîr a. 12 Tin, Saula chuan, “Nang, Ahituba fapa, lo ngaithla rawh,” a ti a. Tin, ani chuan, “Ka pu, heta hi ka awm e,” a ti a. 13 Tin, Saulan a hnênah, “Chhang leh khandaihte lo pea LALPA te râwnsakin, vawiin nia a tih anga mi do tûr leh mi châng tûra engati nge nangmah leh Jesaia fapa hian mi phiar vêl ni?” a ti a. 14 Chutichuan, Ahimeleka chuan lal chu a chhâng a, “Lal mâkpa, i mi râwn ber ṭhin, in chhûngkuaa mi zahawm Davida ang rêng rênga mi rinawm hi i chhiahhlawh zawng zawngte zîngah tu nge awm? 15 Vawiin hi Pathian ka biakrâwnsak ṭan ni em ni? A ni lo. Lal chuan a chhiahhlawh emaw, ka pa chhûngkuate rêng rêng emaw min puh lul suh se; i chhiahhlawh hian hêng thu zawng zawng hi a enga mah ka hre lo a ni,” a ti a. 16 Tin, lal chuan, “Ahimelek, i thi ngei ngei tûr a ni, nang leh i pa chhûngkua zawng zawngte nên,” a ti a. 17 Tin, lal chuan a kianga ding sipaite hnênah chuan, “Lehhawi ula, LALPA puithiamho hi that rawh u, Davida lamah an ṭang a, a tlân bo tih hre reng sia ka hnêna an sawi loh avângin,” a ti a. Nimahsela, lal chhiahhlawhte chuan LALPA puithiamte bei tûrin kut an lek duh lo va. 18 Tin, lal chuan Doega hnênah chuan, “Nang lehhawi la, puithiamte hi bei rawh,” a ti a. Tin, Edom mi Doega chu a lehhawi a, puithiamte chu a bei a, chumi ni chuan puanzaisîn sin puithiam kawr ha, mi sawmriat leh panga a that a. 19 Tin, Nob, puithiam khua chu khandaihin a bei a; a hmei a pain naupang leh hnute hne laite lamin, bâwng te, sabengtung te, berâmte nên khandaihin a sât hlum a. 20 Tin, Ahituba fapa Ahimeleka fapate zînga pakhat, a hming Abiathara chu a tlân chhuak a, Davida hnênah a tlân a. 21 Tin, Abiathara chuan Saulan LALPA puithiamte a thah thu chu Davida a hrilh a. 22 Tin, Davida chuan Abiathara hnênah chuan, “Edom mi Doega chuta a awm ni ngei khân Saula a hrilh ngei ngei ang tih ka hre sa reng a ni; i pa chhûngkua zawng zawngte chu keimah avânga thi an ni a. 23 Nang chu ka hnênah awm la, hlau suh; kei mi thah tum chuan nang pawh thah an tum ang che; ka hnêna i awm erawh chuan i him ang,” a ti a.
Davidan Keila khua a chhan
1 Tin, “Ngai teh, Philistia mite chuan Keila khua an bei a, hruiha buhte chu an lâksak vek mai,” tih Davida chu an hrilh a. 2 Tichuan, Davida chuan LALPA chu, “Chûng Philistia mite chu ka zuk bei ang em?” tiin a râwn a. Tin, LALPA chuan Davida hnênah, “Philistia mite chu zuk bei la, Keila khua chu zuk humhim rawh,” a ti a. 3 Tin, Davida mite chuan a hnênah, “Ngai teh, Judai rama awm chung pawh hian kan hlau a ni a, Keila khuaa zuk kala Philistia sipaite zuk beih chu a va hlauhawm lehzual âwm ve!” an ti a. 4 Chutichuan, Davida chuan LALPA chu a râwn leh a. Tin, LALPA chuan a chhâng a, a hnênah, “Tho la, Keila khuaah chhuk rawh, Philistia mite chu i kutah ka pe ang e,” a ti a. 5 Chutichuan, Davida leh a mite chu Keila khuaah an kal a, Philistia mite chu an zuk bei a, an rante chu an lâksak a, an that chiam a. Chutiang chuan Davidan Keila khuaa mite chu a humhim ta a. 6 Tin, heti hi a ni a, Ahimeleka fapa Abiathara Keila khuaa Davida hnêna a tlân lai khân puithiam kawr kenga chhuk thla a ni a. 7 Tin, Keila khuaah Davida chu a kal tih Saula an hrilh a. Saula chuan, “Pathianin ka kutah a pe ta a nih chu; kulh kawngka leh a kalhna nei khuaah chuan lûtin a inkhung ta si a,” a ti a. 8 Tin, Saula chuan mi zawng zawng chu indo tûrin, Keila khua zuk beia Davida leh a mite zuk hual tûrin a ko khâwm a. 9 Tin, Davida chuan Saulan a chungah thil ṭha lo a suangtuah tih chu a lo hria a, puithiam Abiathara hnênah chuan, “Puithiam kawr kha han la teh khai,” a ti a. 10 Chutichuan, Davida chuan, “Aw LALPA, Israel-te Pathian, Saula chuan keimah avângin khua chu tichhe tûrin Keila khuaah chuan lo chhuk a tum tih i chhiahhlawh hian ka hre tlat a. 11 Keila khuaa mite hian a kutah min pe ang em? I chhiahhlawhin ka lo hriat ang chuan Saula chu a lo chhuk dâwn em? Aw LALPA, Israel-te Pathian, khawngaih takin i chhiahhlawh hi mi hrilh ang che,” a ti a. Tin, LALPA chuan, “A lo chhuk dâwn,” a ti a. 12 Chutichuan, Davida chuan, “Keila khuaa mite chuan kei leh ka mite hi Saula kutah min pe ang em?” a ti a. Tin, LALPA chuan, “An pe ang che,” a ti a. 13 Chutichuan, Davida leh a mite, zaruk emaw lai chu an tho va, Keila khua ata chu an chhuak a, kalna remchâng lai apiangah chuan an kal ta a. Tin, Davida chu Keila khua ata a tlân chhuak ta tih Saula an hrilh a; tichuan, thawh chhuah a ṭhulh ta a.
Tlâng ramah Davida a inkulh
14 Tin, Davida chu thlalêrah, kulhbîngahte a awm a, Ziph thlalêra tlâng ramah a awm ta reng a. Tin, Saula chuan amah chu ni tin a zawng a; nimahsela, Pathianin a kutah a pe lo va. 15 Tin, Davida chuan amah tihhlum tumin Saula chu a lo thawk tih a hria a; tichuan, Davida chu Ziph thlalêr ramhnuaiah a awm a. 16 Tin, Saula fapa Jonathana chu a tho va, ramhnuaiah Davida hnênah chuan a kal a, Pathianah a kut a tihchaksak a. 17 Tin, a hnênah, “Hlau hauh suh, ka pa Saula kut chuan a zawng chhuak lo vang che. Israel-te lalah i awm ang a, kei i dawttu ka ni ang; chu pawh chu ka pa Saula hian a hre reng a ni,” a ti a. 18 Tin, an pahnih chuan LALPA hmaah thu an thlung a; tin, Davida chu ramhnuaiah a awm reng a, Jonathana chu a in lamah a haw ta a. 19 Chutichuan, Ziph mite chu Gibea-ah Saula hnênah an han chho va, “Davida chu kan hnênah ramhnuai kulhbîngah, thlalêr chhim lampang Hakila tlângah a biru reng a ni lâwm ni? 20 Chuvângin, aw lalpa, i nunnain lo chhuk a duhthusâm ang ngei chuan lo chhuk tawh la; tin, keini lo tih ve tûr chu lal kuta amah lo hlan chu a ni ang,” an ti a. 21 Tin, Saula chuan, “LALPA chuan malsâwm che u rawh se; nangniho chuan mi khawngaih hle a ni. 22 Kal ula, va chian lehzual ula, hnuhma va chhui ula, chutah a hmutu pawh va chian fel leh tê tê rawh u; fing vervêk takin thil a ti ṭhîn tih miin min hrilh a ni. 23 Chuvângin, a bihrûkna hmun zawng zawngte hre diam vek ula; tin, ka hnênah lo kal leh ngei ngei ula; tichuan, in hnênah ka kal ve dâwn nia. Tin, heti hi a ni ang a, he rama a awm phawt chuan Juda mi sâng tam tak zîng ata chu ka zawng chhuak ang,” a ti a. 24 Tin, an tho va, Saula kal hmain Ziph-ah chuan an kal ta a. Nimahsela, Davida leh a mite chu thlalêr chhim lam Araba-ah Maon thlalêrah chuan an awm a. 25 Saula leh a mite chuan an zawng ṭan ta a; chu thu chu Davida an hrilh chuan Maon thlalêr lungpui pan chuan a chhuak a, chutah chuan a awm ta reng a. 26 Saula chu tlâng lehlam pangah a kal a; Davida leh a mite chu tlâng lehlam pangah chuan Saula hlauvin hmanhmawh takin an kal bawk a. Saula leh a mite chuan Davida leh a mite chu an man teuh tawh hle a. 27 Nimahsela, Saula hnênah chuan, “Hmanhmawh la, lo kal rawh, Philistia mite chuan kan ram an rawn bei a ni,” tiin zualko a lo thleng a. 28 Chutichuan, Saula chuan Davida a ûm chu a kîrsan a, Philistia mite bei tûr chuan a kal ta a; chuvângin, chumi hmun chu Sela-hamalekoth an ti ta a. 29 Tin, Davida chu chuta ta chu a chho va. En-gedi kulhbîngahte chuan a awm ta a.
Davidan Saula nun a zuah
1 Tin, heti hi a ni a, Saula Philistia mite a va ûm lo haw chu, “Ngai teh, Davida chu En-gedi thlalêrah a awm e,” tiin an hrilh a. 2 Chutichuan, Saula chuan Israel mi zawng zawngte zîng ata thlan ṭhiau mi sângthum a hruai a, sathârte chênna lungpui zîng lamah chuan Davida leh a mite zawngin an kal ta a. 3 Kawnglakah chuan berâm huang, pûk awmna hi a va thleng a; tin, Saula chu inthiarfihlîm tûrin a va lût a. Davida leh a mite chu pûk chhûngril lamahte chuan an awm a. 4 Davida mite chuan a hnênah, “Ngai teh, LALPAN i hnênah, ‘Ngai teh, i hmêlma chu i kutah ka pe ang a, a chungah ṭha i tih ang angin ti ang che,’ a tih ni kha a nih tâk hi,” an ti a. Chutichuan, Davida chu a tho va, a rûk têin Saula puan fêm chu a va hlep a. 5 Nakinah chuan Saula puan fêm a va hleh chuan Davida rilru chu a chhun ta hle a. 6 A mite hnênah chuan, “LALPA hriak thih a ni tih hre reng chung sia, a chunga kut thawha LALPA hriak thih ka lalpa chunga he thil ka tih hi a âwm lo tawp mai,” a ti a. 7 Chutichuan, Davidan chûng thu chuan a mite chu a khap bet a, Saula bei tûra an thawh chu a phal ta lo va. Tin, Saula chu pûk ata chu a chhuak a, a kal leh ta a. 8 A hnu lawkah chuan Davida pawh chu a tho va, pûk ata chu a chhuak a, “LALPA, ka lalpa,” tiin Saula chu a au zui a. Tin, Saula a han lehhawi chuan Davida chuan a hmaia lei siin chibai a bûk a. 9 Tin, Davida chuan Saula hnênah, “Ngai teh, ‘Davidan i chhiatna a zawng a ni,’ tia miten i hnêna an sawi chu engah nge i âwih ṭhin? 10 Ngai teh, vawiinah hian LALPAN pûkah hian ka kuta a hlanzia che hi i mit ngeiin i hmu a; ṭhenkhat chuan tihlum tûr chein min nawr a; nimahsela, ka zuah chia; ‘Ka LALPA hriak thih a ni si a,’ ka ti a. 11 Chu chauh pawh ni lovin, ka pa, en teh, hei i puan fêm pawh ka ken reng hi! I puan fêm ka hleh theih sia, ka tihhlum loh cheah hian ka kutah hian thil ṭha lo leh bawhchhiatna a awm lo tih leh, ka nunna lâk tumin mi zawng mi zawng mah la, i chungah ka sual lo tih hre ngei ngei rawh khai. 12 LALPAN nang nêna kan chungthu hi rêl sela; tin, LALPA chuan i lakah phuba mi lâksak rawh se; mahse, kei chuan i chungah kut ka thlâk lo rêng rêng ang. 13 Hmânlai thufingin, ‘Mi sual aṭangin sual a lo chhuak ṭhîn a,’ a ti a; nimahsela, i chungah kut ka thlâk lo vang. 14 Israel lal chu tu zawngin nge a lo chhuah? Tu nge i ûm? Ui thisâwn, uihli lek. 15 Chuvângin, LALPA chu rorêltu ni sela, nang nêna kan chungthu hi titlu sela, mi ngaihtuahsakin mi sawipui sela, i kut ata mi chhanchhuak rawh se,” a ti a. 16 Tin, heti hi a ni a, Davidan Saula hnênah hêng thu hi a sawi zawh chuan Saula chuan, “I aw elo ni, ka fapa Davida?” a ti a. Tin, Saula chu aw chhuah meuhvin a ṭap ta a. 17 Tin, Davida hnênah chuan, “Kei ai chuan i fel zâwk êm êm a ni; nang zawngin ka chungah thil ṭha i ti a, kei erawh chuan thil ṭha lo ka ti a ni. 18 Tin, vawiinah hian ka chungah thil ṭha i tihzia i tilang a ni; LALPAN i kuta mi pêk pawha mi tihhlum lohvah hian. 19 Miin a hmêlma hmu ang sela, him takin a chhuah duh ang em? Chuvângin, vawiina ka chunga i thiltihah hian LALPAN thil ṭhain rûl che rawh se. 20 Ngai teh, lal i la ni ngei dâwn a ni tih ka hre ta e. 21 Chuvângin, ka hnua ka thlah lo awm tûrte chu tiboral lo tûr leh, ka pa chhûngkaw zîng ata ka hming tibo lo tûrin LALPA hmingin ka hnênah chhia chham rawh khai,” a ti a. 22 Chutichuan, Davida chuan Saula hnênah chhia a chham ta a. Tin, Saula chu a haw ta a; Davida leh a mite erawh chu kulhbîngah chuan an chho va.
Samuela thih thu
1 Tin, Samuela chu a thi ta a; tin, Israel mi zawng zawngte chu an inko khâwm a, an ṭah a. Rama khuaa a inah chuan an phûm ta a. Tin, Davida chu a tho va, Paran thlalêrah a chhuk a.
Davida leh Abigaili
2 Maon khuaah chuan mi pakhat a awm a, a khawsakna chu Karmel tlângah a ni; mi ropui tak a ni a, berâm sângthum leh kêl sâng a nei a; Karmel tlângah chuan a berâm hmul a mêt a. 3 Chu mi hming chu Nabala a ni a, a nupuia hming chu Abigaili a ni. Chu hmeichhia chu bengvâr tak, hmêlṭha tak a ni a; a mipa erawh chu mi tawhkhirh tak leh sual tak a ni a, Kaleba thlah a ni. 4 Tin, Davidan thlalêr aṭang chuan Nabalan a berâm hmul a mêt tih a lo hria a. 5 Tichuan, Davida chuan tlangvâl sâwm a tîr a, tlangvâlte hnênah chuan Davidan, “Karmel tlângah han chho ula, Nabala hnênah han kal ula, ka hmingin chibai han bûk ang che u. 6 Tin, mi neinung taka hnênah chuan heti hian han sawi ang che u, ‘I chungah te, i chhûngkuate chungah te, i neih zawng zawng chungah te thlamuanna awm rawh se. 7 I berâm hmul i mêt tih ka lo hria a. I berâm vêngtute chu kan hnênah an awm ṭhîn a, an pawi eng mah kan khawih lo va, Karmel tlânga an awm chhûng rêng rêngin an eng mah an chân lo va. 8 I tlangvâlte zâwt la, an hrilh mai ang che. Chutichuan, tlangvâlte hi lo khawngaih ang che, ruaiṭheh ni takin kan lo thleng a nih hi. I neih ang ang chu i chhiahhlawhte leh i fapa Davida hi lo pe teh ang che, a ti e,’ va ti rawh u,” a ti a. 9 Tin, Davida tlangvâlte chu an va thlen chuan, Davida hmingin chûng thu zawng zawng chu Nabala hnênah chuan an sawi a, an ngawihsan ta a. 10 Tin, Nabala chuan Davida chhiahhlawhte chu a chhâng a, “Davida chu tu nge maw ni le? Jesaia fapa chu tu nge maw ni le? Tûnlai hian chhiahhlawh, pute tlân bosan hmang an tam mai a. 11 Ka chhang te, ka tui te leh ka berâm hmul mêttute tâna sa ka talh te chu tute nge an nih pawh hriat hleih lohte ka pe tehlul ang maw?” a ti a. 12 Chutichuan, Davida tlangvâlte chu an lêt a, an kîr leh a; chûng thu zawng zawng chu an hrilh a. 13 Tin, Davida chuan a mite hnênah chuan, “In khandaih pai ṭheuh rawh u,” a ti a. Tin, an khandaih an pai ṭheuh va, Davida pawhin a khandaih a pai a. Mi zali laiin Davida chu an zui chho va; tin, mi zahnih chu bungraw vêngin an awm a. 14 Tin, tlangvâl pakhat chuan Nabala nupui Abigaili hnênah chuan, “Ngai teh, Davida chuan thlalêr aṭangin kan pu chibai bûk tûrin mi a rawn tîr a, ani chuan a lo hau va. 15 Nimahsela, chung mite chu kan chungah an ṭha hle mai a, kan pawi eng mah an khawih lo va, phûla kan awm laia kan awm ho chhûng zawng zawng khân eng mah kan hloh lo va; 16 berâm vênga an hnêna kan awm chhûng zawng zawngin chhûn leh zân kan tân kulh an ni ngawt mai a. 17 Chuvângin, eng nge i tih dâwn ngun takin ngaihtuah teh khai; kan pu chungah leh a chhûngkua zawng zawngte chungah hian thil ṭha lo tih tum an awm a ni. Ani lah hi a Beliala fapa khawp a, tu ma biak theih loh a ni si a,” tiin a sawi a. 18 Tin, Abigaili chuan hmanhmawh takin chhang hlâwm zahnih nên, berâm panga chhum tûra peih diam nên, vai bûk nga nên, grêp rah pho ro bâwr za nên, theipui hlâwm zahnih nên a la khâwm a, sabengtung a phurhtîr a. 19 Tin, a chhiahhlawh tlangvâlte hnênah chuan, “Ka hmaah lo kal ta zêl ula, ngai teh u, ka rawn zui ang che u,” a ti a. Nimahsela, a pasal Nabala chu a hrilh lo. 20 Tichuan, chutiang chu a ni a, a sabengtung chungah chuan a chuang a, leisekawtah a chhuk laiin, ngai teh, Davida leh a mite chuan an rawn pan a; tichuan, an intâwk ta a. 21 Davida chuan, “A eng mah a hloh loh nân thlalêrah he pa neih zawng zawngte hi a thlâwn mai maiin ka vênsak a lo nih ngei hi le; thil ṭha chu thil ṭha lovin mi thungrûl ta mai si a. 22 Naktûk zîng khaw ên thlenga a ta zawng zawng zînga mipa naupang pakhat chauh pawh ka zuah vaih chuan, Pathianin Davida hmêlmate chu a tih tihin ti rawh se, chu aia nasa pawhin ti rawh se,” a ti tawh si a. 23 Tin, Abigaili chuan Davida a hmuh chuan a sabengtung ata chu a chhuk thuai a, Davida hmaah chuan a hmaia lei siin chibai a bûk a. 24 Tin, a ke bulah chuan a bawkkhup a, “Keiman, ka pu, keimah ngeiin khawlohna chu ka hlawh mai ang e. Tin, i chhiahhlawhnu hian i beng hriatah thu sawi sela, i chhiahhlawhnu thusawi chu khawngaih takin ngaihthlâksak ang che. 25 Ka pu, Beliala mi Nabala chu engah mah ngai suh khai. A hming ang chiah chiah hi a ni a, Nabala tih takah a â a nih hi. Kei i chhiahhlawhnu hi zawngin ka pu tlangvâl rawn tirhte chu ka lo hmu lo a ni. 26 Chuvângin, tûnah hian ka pu, LALPA nunna leh i nunna chhâlin ka sawi e, LALPAN thisen chhuah lo tûr leh i kuta phuba la lo tûrin a siam si chia, i hmêlmate leh ka pu ṭhat lohna zawngtute chu Nabala ang ni mai rawh se. 27 Tin, hei ka pu tâna i chhiahhlawhin lâwmman ka rawn ken hi ka pu rawn zuitu tlangvâlte hi pêk ni rawh se. 28 I chhiahhlawhnu sualna hi khawngaih takin ngaidam ang che. LALPA chuan ka pu chu chhûngkaw nghet tak a dinsak ngei ngei ang a, ka pu chuan LALPA indonaahte a dopui si a; i dam chhûng zawngin nangmahah chuan sualna rêng rêng hmuh tûr a awm lo vang. 29 Nangmah ûm tûr leh i nunna tibo tûrin mite lo thawk mah sela, ka pu nunna chu LALPA i Pathian nêna nunna têl zinga têl a ni ang a; i hmêlmate nunna erawh chu virvawm phana vawm ang daihin a vawm bo vang. 30 Tin, heti hi a ni ang a, LALPAN i chungchâng thua a thil ṭha tiam ang zawng zawng ka pu chungah a tih huna Israel-te lala a siam hun che chuan, 31 a chhan awm lova thisen i chhuah lohva, ka pu chuan phuba i lâk hek loh hi i tân lungngaihna rêng rêng a ni lo vang a, ka pu tân lungnih lohna rêng rêng a ni hek lo vang. Tin, LALPAN ka pu chunga thil ṭha a tih hunah chuan i chhiahhlawhnu hi hre reng ang che,” a ti a. 32 Tin, Davida chuan Abigaili hnênah chuan, “Vawiina mi lo hmuak tûra tîrtu che LALPA, Israel-te Pathian chu fakin awm rawh se. 33 Tin, i remhriatna chu malsâwmin awm sela; tin, nang, thisen chhuah thiam loh channa laka mi humtu leh, keima kuta phuba la lova mi siamtu chu malsâwmin awm bawk ang che. 34 Nang chuan mi lo hmuak thuai suh la chuan, LALPA, Israel-te Pathian nunna chhâlin ka sawi e, naktûk khaw ên thleng chuan Nabala chu naupang pakhat chauh pawh ka zuahsak lo tawp ang,” a ti a. 35 Chutichuan, Davida chuan a thil rawn kensakte chu a la a; tin, a hnênah chuan, “Thlamuang takin i in lamah haw chho ta la; tin, i thu chu ka awih a, i dîl chu ka pawmsak a che aw,” a ti a. 36 Tin, Abigaili chu Nabala hnênah a han kal a; tin, ngai teh, a inah chuan lal ruai ṭheh ang maiin ruai a lo ṭheh a. A ruih hle avângin Nabala chu a hlim huam mai a; chuvângin, a tûk khaw ên hma loh chuan eng mah a hrilh lo va. 37 Tin, heti hi a ni a, zîng lama Nabala uain rui chu a lo harh chuan a nupui chuan chûng thu chu a han hrilh a, a rilru a mit ta sulh a, lung ang maiin a lo awm ta a. 38 Tin, heti hi a ni a, ni sâwm hnuah chuan LALPAN Nabala chungah kut a thlâk a, a thi ta a. 39 Tin, Davidan Nabala chu a thi tih a han hriat chuan, “Ka hmingchhiatna tûra Nabala thiltih laka mi sawipuia, a chhiahhlawh thil ṭha lo ti lova mi khaptu LALPA chu fakin awm rawh se. Nabala thil ṭha lo tih chu LALPAN ama chung ngeiah a tlâktîr ta a ni,” a ti a. Tin, Davida chuan Abigaili chu a nupui atâna va be tûrin mi a tîr a. 40 Davida chhiahhlawhte chuan Karmel tlânga Abigaili hnên an han thlen chuan, “Davida chuan a nupui atâna hruai tûr chein min tîr a ni,” tiin ani chu an bia a. 41 Tin, a tho va, a hmaia lei siin chibai a bûk a, “Ngai teh u, in chhiahhlawhnu hi ka pu chhiahhlawhte ke sil tûra chhiahhlawh ka ni e,” a ti a. 42 Tichuan, Abigaili chu a tho thuai a, sabengtung chungah a chuang a, a hnungzui nula pangate nên chuan Davida mi tirhte chu an zui a, a nupuiah a awm ta a. 43 Davida chuan Jezreel-a mi Ahinoami a lo nei tawh bawk a; tichuan, a nupuiah an awm ta ve ve a. 44 Saula chuan a fanu Mikali, Davida nupui kha Galim khuaa mi Laisa fapa Paltia a lo neihtîr tawh a ni.
Davidan Saula nun a zuah leh
1 Tin, Ziph-ho chu Gibea-ah Saula hnênah an kal a, “Davida chu thlalêr dep Hakila tlângah chuan a biru a ni lâwm ni?” tiin an va sawi a. 2 Chutichuan, Saula chu a tho va, Ziph thlalêrah chuan Israel mite zîng ata thlan ṭhiau mi sângthum hruaiin Ziph thlalêrah Davida zawng tûrin a zuk kal ta a. 3 Tin, Saula chuan thlalêr dep, kawnglakah Hakila tlângah chuan ṭanhmun a khuar a. Davida erawh chu thlalêrah chuan a awm reng a; tin, Saula chu amah zawngin thlalêrah a lo kal tih a hria a. 4 Chuvângin, Davida chuan enthlatute a tîr a, Saula chu a lo kal tak tak a ni tih a hre chiang ta a. 5 Chutichuan, Davida chu a tho va, Saula ṭanhmun khuarnaah chuan a kal a. Tin, Davida chuan Saula leh a sipai hotu, Nera fapa Abnera mutna chu a hmu a. Saula chu tawlailîr hual chhûngah a mu a, a vêlin mite chuan awmhmun an rem a. 6 Chutichuan, Davida chuan Hit mi Ahimeleka leh Joaba unau, Zeruii fapa Abisaia hnênah, “Saula ṭanhmunah chuan tu nge ka hnênah kal ve ang?” tiin a sawi a. Tin, Abisaia chuan, “Keimah i hnênah chuan ka zuk kal ve ang e,” a ti a. 7 Tichuan, Davida leh Abisaia chu mipuiho awmnaah zânah chuan an kal a; tin, ngai teh, Saula chu tawlailîr hual chhûngah chuan a lo mu a, a lu lamah chuan a fei chu leiah a vit bûr a. Tin, Abnera leh mite chu a vêlah chuan an lo mu a. 8 Chutichuan, Abisaia chuan Davida hnênah, “Vawiinah hian Pathianin i hmêlma chu i kutah a pe che a nih hi; chuvângin, fei hian vawi khatah leiah hian ka han chhun bet tlat mai teh ang aw? Ka chhun nawn leh tawh lo vang,” a ti a. 9 Nimahsela, Davida chuan Abisaia hnênah, “Tiboral suh; LALPA hriak thih chunga kut thlâka thiam chang thei tu nge awm thei ngai?” a ti a. 10 Tin, Davida vêk chuan, “LALPA nunna chhâlin ka sawi e, LALPA chuan a chungah kut a thlâk ang chu; a nih loh vêk leh a thih ni a lo la thleng mai ang a; a nih loh vêk leh indonaah a kal ang a, a boral mai ang. 11 LALPA hriak thiha chungah chuan kut ka thlâk loh tûrzia mai chu. A lu bula fei leh tuithâwl erawh hi chu la ila; tichuan, i kal ang,” a ti a. 12 Chutichuan, Davida chuan Saula lu bula fei leh tuithâwl chu a la a, an kal leh ta a; tu mân an hmu lo va, tu mân an hriain harh an awm hek lo. LALPAN tui taka a muthilhtîr avângin an muhîl vek a ni. 13 Chutichuan, Davida chu râl lehlamah chuan a kal a, hla feah tlâng chhîpah a ding a; an inkâr chu hla tak a ni a. 14 Tin, Davida chuan mipuite leh Nera fapa Abnera chu, “Abner, mi han chhâng dâwn lâwm ni?” tiin a au va. Chutichuan, Abnera chuan a chhâng a, “Lal han au veitu chu tu nge maw i nih le?” a ti a. 15 Tin, Davida chuan Abnera hnênah, “Mi huaisen i ni lâwm ni? Israel-te zîngah hian nang ang tu nge awm? Engtizia nge lal i pu i vên loh ni? Lal i pu chu tiboral tûrin tu emaw a lo kal kha le. 16 I thiltih dân hi a ṭha lo a ni. LALPA nunna chhâlin ka sawi e, LALPA hriak thih i pu chu i vên ṭhat loh avângin thi mai tlâk i ni e. Lal lu bula fei leh tuithâwl kha khawiah nge a awm tâk han en teh rêng,” a ti a. 17 Tin, Saula chuan Davida aw chu a han hria a, “Chu i aw elo ni, ka fapa Davida?” a han ti a. Tin, Davida chuan, “Aw lalpa, ka pu, ka aw a ni e,” a ti a. 18 Tin, “Eng vângin nge ka pu hian a chhiahhlawh hi a ûm ni? Eng thil nge ka tih? Ka kutah thil sual eng nge awm? 19 Chuvângin, lalpa, ka pu chuan a chhiahhlawh thu hi ngaithla teh se: mi do tûra i thinlung chawk thotu chu LALPA a nih chuan thilhlan chu lo pawm sela; mihring fate an nih erawh chuan LALPA hmaa ânchhe dawngin awm rawh se, ‘Kal la, pathian dangte rawng bâwl rawh,’ tia, LALPA ro ka luah theih lohna tûra vawiin hian min hnawt bo an ni si a. 20 Chuvângin, ka thisen chu LALPA hmuh phâk lohvah leilungah luang suh se. Varung veh tûra tlângahte mi a ramvâk angin Israel lal chu uihli lek zawng tûrin a kal chhuak a nih hi,” a ti a. 21 Chutichuan, Saula chuan, “Thil ka lo tisual dêr mai a ni. Ka fapa Davida, lo haw leh rawh. I mit hmuhah ka nunna hi vawiinah hian a hlut êm avângin eng mah rêng rêng ka tih tawh hauh lo vang che. Ngai teh, thil âtthlâk tak ka lo ti ta a, ka lo tisual dêr mai a nih hi,” a ti a. 22 Tin, Davida chuan a chhâng a, “Aw lalpa, fei hi han en teh, tlangvâl pakhat lo kal sela, han la rawh se. 23 Tin, LALPA chuan mi tin an fel leh an rinawm man a pe dâwn a; vawiinah hian LALPAN nang hi ka kutah min pe na a, LALPA hriak thih chungah ka kut ka lek duh lo a ni. 24 Tin, ngai teh, vawiina i nunna ka ngaihhlutsak che ang bawk hian LALPA chuan ka nunna hi mi ngaihhlutsak sela, manganna zawng zawng ata hi mi chhanchhuak rawh se,” a ti a. 25 Chutichuan, Saula chuan Davida hnênah, “Ka fapa Davida, malsâwmin awm rawh khai. Thiltithei takin i awm ang a, i ngam zêl ang,” a ti a. Chutichuan, Davida chu a hâwng a; tin, Saula chu a hmun lamah chuan a haw leh ta a.
Philistia-ho zîngah Davida a tel
1 Tin, Davida chuan a rilruin, “Eng tikah emaw chuan Saula kutah hian ka la boral ngei mai dâwn zawng a nih hi. Philistia mite rama tlân bo aia ṭha hi a awm dâwn lo a nih hi; tichuan, Saula chuan Israel ram chhûng zawng zawngah a mi zawn hi a bei a dawng tawh ang a; tichuan, a kut ata ka chhuak a ni ang,” a ti a. 2 Chutichuan, Davida chu a tho va, amah leh a hnêna mi zaruk awmte chu Maoka fapa, Gath lal Akisa hnênah an kal ta a. 3 Tin, Davida chu amah nên, a mite nên, mi tin an chhûngkuain, Davida pawh a nupui pahnih, Jezreel mi Ahinoami leh Nabala nupui, Karmel-a mi Abigaili-te nên Gath khuaah Akisa hnênah an awm ta a. 4 Tin, Davida chu Gath khuaah a tlân tih Saula an hrilh a; tichuan, a zawng leh ta lo va. 5 Tin, Davida chuan Akisa hnênah, “Min khawngaih la, i rama khaw pakhatah hian awmhmun min pe ve la, chutah chuan ka awm ang e. I chhiahhlawh hi engah nge lal khuaah i hnênah a awm reng ang?” a ti a. 6 Chutichuan, Akisa chuan chumi ni chuan Ziglag khua chu a pe ta a; chuvângin, Ziglag chu tûn thlengin Judai ram lalte ta a ni ta reng a. 7 Tin, Philistia rama Davida a awm chhûng chu kum khat pumhlûm leh thla li a ni. 8 Tin, Davida leh a mite chu an han chho va, Gesur mi te, Girzi mi te, Amalek mi te an rûn a. Chûng hnamte chu Telam aṭanga Zur ram lampang, Aigupta ram thlenga awm an ni a. 9 Tin, Davida chuan ram chu a bei a, a hmei a pain zuah rêng rêng a nei lo va, berâm te, sebâwng te, sabengtung te, sanghâwngsei te, an silhfên te a lâksak a; tin, a haw leh a, Akisa hnênah a kal a. 10 Tin, Akisa chuan, “Vawiinah hian khawi lam nge i rûn?” a ti a. Tin, Davida chuan, “Juda Chhim ram te, Jerameel-ho Chhim ram te, Ken-ho Chhim ram te,” a ti a. 11 Tin, “ ‘Philistia rama a awm chhûng rêng rêngin Davida chuan hetiang hian a ti fo ṭhîn a ni,’ an ti dah ang e,” tiin, Davida chuan a hmei a pain Gath khuaa hruai tûr zuah rêng rêng a nei ngai lo a ni. 12 Tin, Akisa chuan Davida thusawi chu awihin, “Ama mi Israel-te chu a inhuattîr ta hle mai a; chuvângin, kumkhuain ka chhiahhlawhah a awm ang,” a tih phah ta a.
1 Tin, heti hi a ni a, chûng lai chuan Philistia mite chuan an sipaite chu Israel mite beia do tûrin an khâwm chiam mai a. Tin, Akisa chuan Davida hnênah, “Nang leh i mite chu sipaiho zîngah ka hnênah in kal ngei dâwn a ni tih hre rawh,” a ti a. 2 Tin, Davida chuan Akisa hnênah, “Aw le, i chhiahhlawh thiltihtheih dân chu i hre mai ang,” a ti a. Tin, Akisa chuan Davida hnênah, “A ṭhat chu! Mi vêngtuah ka siam kumkhua ang che,” a ti a.
Saulan aienthiam a ruai
3 Samuela chu a thi tawh a, Israel mi zawng zawng chuan an ṭah a, ama khua ngei Rama khuaah chuan an phûm tawh a. Tin, Saula chuan ramhuai aienthiam zâwlte leh dawithiamte chu a ram ata a hnawt chhuak vek tawh a. 4 Tin, Philistia mite chu an pung khâwm a, Sunem-ah chuan ṭanhmun an va khuar a; tin, Saula chuan Israel mi zawng zawng a khâwm a, Gilboa-ah ṭanhmun an khuar ve a. 5 Tin, Saulan Philistia sipaihote a hmuh chuan a hlau va, a rilru a khûr zawih zawih mai a. 6 Tin, Saula chuan LALPA a han râwn pawhin LALPA chuan mang emaw, Urim emaw, zâwlnei emawin a chhâng lo rêng rêng a. 7 Chutichuan, Saula chuan a chhiahhlawhte hnênah chuan, “Ramhuai aienthiam zâwl hmeichhia, a hnêna ka kala ka râwn tûrin mi zawnsak rawh u,” a ti a. Tin, a chhiahhlawhte chuan a hnênah, “Ngai teh, Endor khuaah ramhuai aienthiam zâwl hmeichhia a awm asin,” an ti a. 8 Tin, Saula chu a inbâwl danglam a, puan danglam a inbel a, amah leh mi dang pahnih nên an kal a, zânah hmeichhe hnên chu an va thleng a; tin, “Ramhuai aienna chuan ai mi ensak la, i hnêna a hming ka lam apiang chu mi koh chhuahsak ang che,” a ti a. 9 Tin, hmeichhia chuan a hnênah, “Ngai teh, Saula thiltih chu i hria a, a rama ramhuai aienthiam leh dawithiamte chu a tibo zo tawh a, engati nge ka thihna tûrin ka nunna thang i kam dâwn ni le?” a ti a. 10 Tin, Saula chuan LALPA hming chhâlin, “LALPA nunna chhâlin ka sawi e, hemi thil avâng hian i chungah hremna a thleng lo vang,” tiin a hnênah chhia a chham a. 11 Chutichuan, hmeichhia chuan, “Tu nge ka han koh chhuahsak ang che?” a ti a. Tin, ani chuan, “Samuela mi han koh chhuahsak rawh,” a ti a. 12 Tin, hmeichhia chuan Samuela a han hmuh chuan a au vak a; tin, hmeichhia chuan Saula hnênah, “Engati nge mi bum? Saula i ni reng si a?” a ti a. 13 Tin, lal chuan a hnênah, “Hlau suh. Eng nge ni i hmuh tâk le?” a ti a. Tin, hmeichhia chuan Saula hnênah, “Lei aṭanga pathian lo chhuak ka hmu,” a ti a. 14 Tin, a hnênah, “Eng ang nge a nih?” a ti a. Ani chuan, “Putar pui hi a lo chhuak a, kawrfual a ha,” a ti a. Tin, Saula chuan Samuela a ni tih a hria a, a hmaia lei siin chibai a bûk a. 15 Tin, Samuela chuan Saula hnênah, “Engati nge hetianga mi koh chhuah buai ni?” a ti a. Tin, Saula chuan a chhâng a, “Ka mang a ang êm êm atin ni; Philistia mite chuan min do va, Pathian lah chuan mi hawisan a, zâwlnei emaw, mumang emaw pawhin mi chhâng ta lo rêng rêng a. Chu vâng chuan, ka tih tûr mi hrilh tûrin ka ko ta che a ni,” a ti a. 16 Tin, Samuela chuan, “Chutia LALPAN a hawisan chia, i hmêlma a lo ni ta tih hre reng chung si chuan engah nge thu mi zawh? 17 Keimah hmanga a sawi ang khân LALPA chuan i chungah a ti ta a nih chu. LALPA chuan i kut ata ram chu a chhuhsak che a, i ṭhenawm, Davida chu a pe ta a ni. 18 LALPA thu i awih loh avâng leh Amalek-ho chunga a thinurna nasa tak i hlen loh avâng khân, tûnah hian i chungah he thil hi a ti ta a nih hi. 19 Chu lo pawh chu, LALPA chuan nangmah leh Israel-hote chu Philistia mite kutah a pe ang che u a; tin, naktûkah hian nang leh i fapate chu ka hnênah in lo awm ang. LALPA chuan Israel sipaihote pawh chu Philistia mite kutah a pe ang,” a ti a. 20 Chutichuan, Samuela thusawi avâng chuan Saula chuan a hlau ta êm êm a, leiah a tlu ta dêr a. Tha leh zung rêng rêng a nei ta lo va, nilêng leh zankhuaa chaw ei lo a ni si a. 21 Tin, hmeichhia chu Saula hnênah chuan a kal a, a lungngai êm êm tih a hria a, a hnênah, “Ngai teh, i chhiahhlawhnu hian i sawi chu ka awih a, thih leh thih tiin ka hnêna i thusawite chu ka pawm a ni. 22 Chuvângin, nang pawhin i chhiahhlawhnu thu chu awih ve thung ang che; chaw tlêm tal ka han hlui ang chia; tichuan, i hâwn huna thahrui i neih theih nân ei ang che,” a ti a. 23 Nimahsela, a duh lo va, “Ka ei lo vang,” a ti a. Nimahsela, a chhiahhlawhte chuan hmeichhia nên chuan an tîr lui a; an thu chu a awih ta a. Chutichuan, lei ata chu a tho va, khumah chuan a ṭhu a. 24 Tin, hmeichhia chuan sebâwngno châwm thau a inah chuan a nei a, a va talh thuai a. Tin, chhangphut a la a, a hmet a, dawidim tel lo chhang a siam a. 25 Tin, Saula leh a chhiahhlawhte hmaah chuan a va hlui a; tin, an lo ei ta a. Chutichuan, an tho va, chumi zân chuan an kal ta a.
Philistia-hovin Davida an hnar
1 Chutichuan, Philistia mite chuan an sipai zawng zawngte chu Aphek-ah an khâwm vek a; tin, Israel mite chuan Jezreel-a tuikhur kiangah ṭanhmun an khuar a. 2 Tin, Philistia-ho lalte chu za têl têl te, sâng têl têl tein an kal zut zut mai a. Tin, Davida leh a mite chuan Akisa nên hnu an dâl a. 3 Chutichuan, Philistia lalte chuan, “Hêng Hebrai-hote hian eng nge an tih?” an ti a. Akisa chuan Philistia lalte hnênah chuan, “He mi hi Davida, Israel-te lal Saula chhiahhlawh, hei leh chen ka hnêna awm tawha, ka hnêna a lo tlûk luh ata tûn thleng pawha a sualna ka hmuh lohva chu a ni lâwm ni?” a ti a. 4 Nimahsela, Philistia lalte chu a chungah an thinrim a; Philistia lalte chuan a hnênah, “Chu mi chu i hmun ruatsakah khân haw tûrin kîrtîr la, indonaah kan hnênah zuk kal ve suh se; chuti lo chuan, indonaah kan hmêlma lamah a ṭang mai dah ang e. Kan mite lu a la ang a, a pu nên an inrem leh hlauh si ang e. 5 He Davida hi a ni lâwm ni, lâm chunga - ‘Saulan a sânga sâng a that, Davidan a sînga sîng,’ tia a chungchâng thu hlaa an saka kha?” an ti a. 6 Chutichuan, Akisa chuan Davida chu a ko va, a hnênah, “LALPA nunna chhâlin ka sawi e, mi dik tak i lo ni a, sipaihote zînga ka hnênah i kal leh i haw ṭhinte chu ka mit hmuhah chuan a ṭha hle mai a. Ka hnêna i lo kal ni ata vawiin thlengin i chungah eng mah ṭhat lohna rêng rêng ka hmu hauh lo mai. Nimahsela, lalhote hian an ngaina lo che a ni. 7 Chuvângin, Philistia lalhote i tihlungnih loh loh nân kîr leh la, lungawi takin kal ang che,” a ti a. 8 Tin, Davida chuan Akisa hnênah, “A nih leh, eng thil nge maw ka lo tih le? I hnêna ka awm chhûng zawng vawiin thleng hian, ka pu, lalber hmêlma chu do lova ka han kîr leh maina tûrin i chhiahhlawh chungah hian eng nge maw hriat i neih le?” a ti a. 9 Tin, Akisa chuan a chhâng a, Davida hnênah, “Ka mit hmuhah chuan Pathian vântirhkoh ang maiin i ṭha a; nimahsela, Philistia lalhote hian, ‘Indonaah kan hnênah a han kal ve lo vang,’ an ti tlat mai a. 10 Chuvângin, i hnêna kal ve i pu chhiahhlawhte nên hian zîng takah tho ula; tin, zîng takah in thawha khua a ên veleh kal ang che u,” a ti a. 11 Chutichuan, Davida leh a mite chu Philistia rama kîr leh tûra zînga chhuak tûrin zîng takah an tho ta a. Tin, Philistia mite chu Jezreel-ah an chho ta a.
Amalek mite nêna inbeih thu
1 Tin, heti hi a ni a, ni thum nia Davida leh a miten Ziglag an thlen chuan, Amalek-hovin Chhim lam leh Ziglag khua chu an lo rûn tawh reng a, Ziglag khua chu an lo sawisa a, an lo hâl a; 2 hmeichhiate leh chumi khuaa awm apiangte chu a lian a têin salah an man a; tu mah that lovin an hruai a, an hâwnpui tawh a. 3 Tin, Davida leh a miten khua an va thlen chuan, ngai teh, a lo kâng fai vek tawh a; tin, an nupuite, an fapate, an fanute chu salah an lo man tawh a. 4 Chutichuan, Davida leh a hnêna awmte chuan an aw an chhuah a, an ṭah hleih theih loh thlengin an ṭap a. 5 Tin, Davida nupuite pahnih Jezreel mi Ahinoami leh Karmel-a mi Nabala nupui Abigaili-te pawh salah an hruai a. 6 Tin, Davida chu a mangang hle mai a; an fapate leh an fanute avânga mi zawng zawng an thin a nat êm êma, amah chu lunga den thu an sawi avângin. Nimahsela, Davida chu a Pathian LALPAah chuan a intichak a. 7 Tin, Davida chuan Ahimeleka fapa puithiam Abiathara hnênah chuan, “Puithiam kawr mi va lâksak teh khai,” a ti a. Tin, Abiathara chuan Davida chu puithiam kawr chu a va lâksak a. 8 Tin, Davida chuan, “Chûngho chu ûm ila ka la ûmpha ang em le?” tiin LALPA a zâwt a. Ani chuan a chhâng a, “Um rawh, i ûmpha ngei ngei ang a, i chhanchhuak vek ngei ngei ang,” a ti a. 9 Chutichuan, Davida chu a kal ta a, amah leh a hnêna mi zarukte nên; tin, Besor lui chu an va thleng a, an mi hnutchhiahte chu chutah chuan an awm ta a. 10 Davida erawh chuan a ûm zêl a, amah leh mi zalite nên chuan, mi zahnih chu an chauh tawh avângin Besor lui chu an kân ve thei ta lo va, an lo awm ta a ni. 11 Tin, phûlah hian Aigupta mi an va hmu a, Davida hnênah an hruai a; chhang an pe a, a lo ei a; tin, tui in tûr an pe a. 12 Tin, theipui hlâwm tlang khat leh grêp rah pho ro bâwr hnih an pe a. Chûng chu a han ei chuan a lo harh leh ta a; ni thum leh zan thum chaw ei lo leh tui in lo a ni si a. 13 Tin, Davida chuan a hnênah, “Tu mi nge i nih? Khawi aṭanga lo kal nge i nih?” a ti a. Tin, ani chuan, “Aigupta ram tlangvâl, Amalek mi chhiahhlawh ka ni a; tin, ni thum a ni ta a, ka damloh avângin ka puin mi kalsan ta mai a ni. 14 Kereth Chhim ram leh Juda chan Chhim ramte kan rûn a, Kaleb Chhim ram kan rûn bawk a; tin, Ziglag khua kan hâl bawk a,” a ti a. 15 Tin, Davida chuan a hnênah, “Chûnghote awmnaah chuan min zuk hruai thei ang em?” a ti a. Tin, ani chuan, “Min that lo tûr leh ka pu kuta mi pe leh lo tûrin Pathian hming chhâlin ka hnênah chhia chham la; tichuan, chûngho awmnaah chuan ka zuk hruai ang che,” a ti a. 16 Tin, a zuk hruai thlâk chuan, ngai teh, Philistia ram leh Judai rama râllâk tam tak an lâk avângin ruai an ṭheh a, an eiin an in a, an lo awm darh nuaih mai a. 17 Tichuan, Davida chuan ni tlâk aṭanga a tûk tlai lam thlengin a bei ta a, tlangvâl zali, sanghâwngsei chunga chuanga tlânchhehote chauh lo chu tu mah dama chhuak rêng rêng an awm lo va. 18 Tin, Davida chuan Amalek miten an lâk zawng zawng chu a la leh vek a; tin, Davida chuan a nupui pahnihte chu a chhanchhuak a. 19 Chutichuan, a lian a têin, an fapate, an fanute, an râllâk leh an thil lâk rêng rêng eng mah chân an nei lo va, Davida chuan a lâksak leh vek a. 20 Tin, Davida chuan berâm rual leh ran rual zawng zawngte chu a la a, ran dangte hmaah an khalh a, “Hêng hi Davida râllâk a nih hi,” an ti a. 21 Tin, mi zahnih, an chauh avânga Davida zui thei ta lova Besor luia an awmtîrte hnên chu Davida chuan a va thleng a. Tin, anni chu Davida hmuak tûr leh a hnêna awmte hmuak tûrin an kal chhuak a. Tin, Davidan mipuite kiang a va thlen chuan chibai a bûk hlawm a. 22 Chutichuan, Davida hnêna kalhote zînga mi sualte leh Beliala mi zawng zawngte chuan an chhâng a, “Kan hnêna an kal ve loh avângin râllâk thil kan va chhuh leh rêng rêng chu kan pe ve lo vang a, an hruaia, an kal theih nân an nupuite leh an fate ṭheuh erawh chu an hruai kan phal ang,” an ti a. 23 Chutichuan, Davidan, “Unaute u, LALPA, min humsaka, min do tûra lo thawkho kan kuta petu thil min pêkte chu chutiang chuan in ti lo vang. 24 Tuin nge he thu-ah hian in thu pawm ang? Indonaa zuk kalte chan ang bawk chu bungraw vênga lo awmte chuan an chang ve tûr a ni alâwm; inang vekin chan tûr a ni,” a ti a. 25 Tichuan, chumi ni aṭanga tûn thleng hian Israel-te tân thupêkah leh dâna luang tûrin a siam ta a. 26 Tin, Davidan Ziglag khua a thlen chuan râllâk ṭhenkhat chu, “Hei, LALPA hmêlmate laka râllâk, lâwmman atân ka thawn a che u,” tiin, 27 Bethel-a awm te, Chhim Ramoth-a awm te, Jatir-a awm te, 28 Aroer-a awm te, Sipmoth-a awm te, Estemo-a awm te, 29 Rakal-a awm te, Jerameel khuatea awm te, Ken khuatea awm te, 30 Horma-a awm te, Borasan-a awm te, Athak-a awm te, 31 Hebron-a awmte leh Davida leh a mite chêttlatna ṭhin hmun zawng zawnga awm Juda upa, a ṭhiante hnênah chuan a thawn a.
Saula leh a fate thih thu
1 Chutichuan, Philistia mite chuan Israel-hote chu an bei a; tin, Israel mite chu Philistia mite lakah chuan an tlânchhia a, Gilboa tlângah chuan thahin an awm ta zul mai a. 2 Philistia mite chuan Saula leh a fapate chu an ûm zui ta ngat ngat a. Tin, Philistia mite chuan Saula fapate - Jonathana leh Abinadaba leh Malkisua chu an that a. 3 Saula chu an bei nasa ta êm êm mai a. Thal kâp mite chuan an kâp fuh a, na takin an hliam ta a. 4 Chutichuan, Saula chuan a râlthuam kengtu hnênah chuan, “I khandaih phawi la, mi han chhun tlang rawh; chuti lo chuan, hêng serh tan lohhote hi an lo kal ang a, mi rawn chhun tlang ang a, mi uankhum dah ang e,” a ti a. Nimahsela, a râlthuam kengtu chuan a ti duh lo va, a hlau êm êm si a. Chuvângin, Saula chuan a khandaih chu a la a, a bawh ta a. 5 Tin, a râlthuam kengtu chuan Saula a thi tih a hriat chuan a khandaih chu a bawh ve a, an thi dûn ta a. 6 Chutichuan, Saula nên, a fapate pathum nên, a râlthuam kengtu nên, a mite zawng zawng nên, chumi ni ngei chuan an thi za ta a ni. 7 Tin, ruam râl lehlama Israel mi awmte leh Jordan râla awmten, Israel mite an tlânchhia tih leh Saula leh a fapate an thi tih an hriat chuan, khuate chu an chhuahsan a, an tlân bo ta a; tin, Philistia mite chuan an va luah ta a. 8 Tin, heti hi a ni a, a tûkah chuan Philistia-hoten an râl thahte thuam hlihsak tûra an va kal chuan Saula leh a fapate pathum Gilboa tlânga an lo thi chu an va hmu a. 9 Tin, a lu chu an tan a, a râlthuam chu an hlîp a, chanchin chu an milem biakna inah leh mite hnêna puang tûrin Philistia ramah chuan an thawn vêl a. 10 Tin, a râlthuam chu Astarothi inah an dah a; a ruang chu Beth-san kulh bangah an târ a. 11 Tin, Jabes-gilead-a awmten Philistia miten Saula an tih dân chungchâng thu chu an lo hriat chuan, 12 mi huaisen zawng zawngte chu an tho va, zankhuain an kal a, Saula ruang leh a fapate ruang chu Beth-san kulh bang ata chu an la a; tin, Jabes an lo thleng a, chutah chuan an hâl a. 13 Tin, an ruhte chu an la a, Jabes-a tamarisk thing hnuaiah an phûm a; tin, ni sarih chaw an nghei a.
Davidan Saula thih thu a hria
1 Tin, heti hi a ni a, Saula thih hnuah Davida Amalek-ho rûn a lo haw a, Davida chu Ziglag khuaa ni hnih a awm hnu chuan, 2 heti hi a ni a, a ni thum ni chuan ngai teh, mi pakhat an ṭanhmun ata Saula hnên aṭangin a puante pawt thlêrin a lua lei kai luam hi a lo kal a; tin, Davida hnên a lo thlen chuan leia bawkkhupin chibai a bûk a. 3 Tin, Davida chuan a hnênah, “Khawi aṭanga lo kal nge i nih?” a ti a; tin, ani chuan a hnênah, “Israel mite ṭanhmun aṭangin ka rawn tlân chhuak a ni,” a ti a. 4 Tin, Davida chuan a hnênah, “Eng angin nge thil a awm le? Min hrilh teh khai,” a ti a. Ani chuan a chhâng a, “Indona ata mite chu an tlânchhia a, mi tam tak chu an tlu a, an thi hlawm a; tin, Saula leh a fapa Jonathana-te pawh an thi ve asin,” a ti a. 5 Tin, Davida chuan a hrilhtu tlangvâl hnênah chuan, “Engtin nge Saula leh a fapa Jonathana chu an thi tih i hriat?” a ti a. 6 Tin, a hrilhtu tlangvâl chuan, “Eng emaw ti tiin Gilboa tlângah chuan ka lo awm hlauh va; tin, ngai teh, Saula chu a fei rinchhana ding ka hmu a; tin, tawlailîrte leh sakawr chung chuang mite chuan an rawn hnaih ta chiam mai a. 7 Tin, a hnung lam a han hawi chuan mi han hmu a, mi han au va. Tin, keiin, ‘Heta hi ka awm e,’ tiin ka chhâng a. 8 Tichuan, ka hnênah, ‘Tu nge i nih?’ mi ti a. Tin, keiin, ‘Amalek mi ka ni,’ tiin ka chhâng a. 9 Tin, ani chuan ka hnênah, ‘Ka kiangah hian lo ding la, mi han that teh mai, ka la nung ting a, mangannain mi tlâkbuak ta si a,’ a ti a. 10 Chutichuan, a kiangah chuan ka ding a, chutia tlu tawh dêr hnu chu a dam zo tawh lo rêng rêng ang tih ka hriat avângin ka that ta mai a, a lua lallukhum leh a bâna bânbun chu ka la a, ka pu hnênah hetah hian ka rawn la a ni,” a ti a. 11 Chutichuan, Davida chuan a silhfênte chu a chelh a, a pawt thlêr ta a; chutiang bawk chuan a hnêna mi awm zawng zawng chuan an ti a. 12 Tichuan, Saula leh a fapa Jonathana leh LALPA mite leh Israela chhûngte chu an sûn a, an ṭah a, tlai lam thlengin chaw an nghei a, khandaiha tihhlum an nih tâk avângin. 13 Tin, Davida chuan a hrilhtu tlangvâl hnênah chuan, “Khawi lam mi nge i nih?” a ti a. Tin, ani chuan, “Ram dang mi, Amalek mi fapa ka ni,” a ti a, a chhâng a. 14 Tin, Davida chuan a hnênah, “LALPA hriak thih tiboral tûra a chunga kut thlâk chu engtiziaa hlau lo nge i nih le?” a ti a. 15 Chutichuan, Davida chuan tlangvâl pakhat a ko va, “Va hnaih la, va that rawh,” a ti a. Tin, a va sât a, a thi ta a. 16 Tin, Davida chuan a hnênah, “I thisen chu nangma lu chung ngeiah awm rawh se; nangma ka ngeiin, ‘LALPA hriak thih chu ka that a ni,’ tiin a puang si,” a ti a.
Davidan Saula leh Jonathana a sûn
17 Tichuan, Davida chuan Saula leh a fapa Jonathana chu he ṭah hla hian a ṭah a; 18 tin, thal kah hla chu Juda thlahte zirtîr tûrin a tîr hlawm a, ngai teh, Jasara buah ziak a ni. 19 “Aw Israel, i ropuina chu i hmun sângahte an that a, Mi liante an tlûk tâk hi! 20 “Gath-ah chuan hril suh ula, Askelon kawtthlêrahte chuan puang suh u; Chuti lo chuan, Philistia fanute an lâwm ang a, Serh tan loh fanuho hlimin an au dah rual ang e. 21 “Nangni Gilboa tlângte u, In chungah dai leh ruah tla suh se, thilhlan tûrte chhuah hek suh; Chutah chuan mi lian phaw chu mualpho takin an paih si a, Saula phaw, hriak thih loh mi phaw ang maiin. 22 Thahte thisen aṭang leh mi lian thau aṭangin Jonathana thal chu a lêt lo va, Saula khandaih chu a thlâwnin a lêt ngai lo. 23 “Saula leh Jonathana nun dân chu a duhawmin a mawi a, An thih pawhin an inṭhen lo; Mupuite aiin an chak zâwk a, Sakeibakneite aiin an chak zâwk. 24 “Nangni Israela fanute u, Saula chu ṭah rawh u, Puan sen mawite a bân che u a, In puanahte rangkachaka cheimawinate beltu che u chu. 25 “Indo lai taka mi liante an lo tlûk tâk mai chu! I hmun sângahte Jonathana an that ta. 26 “Ka unaupa Jonathan, i chungthuah hian ka mangang a ni; Ka chungah i ṭha êm êm ṭhîn a, I mi hmangaihna chu a mak a, Hmeichhe hmangaihna a khûm a ni. 27 “Mi liante chu an tlu a, Indona thuamhnawte pawh a boral zo ta!”
Juda lalah Davida a ṭang ta
1 Tin, heti hi a ni a, chumi hnuah chuan Davida chuan, “Judai rama khawiiah emaw ka han kal ang em?” tiin LALPA a râwn a. Tin, LALPA chuan a hnênah, “Han kal rawh khai,” a ti a. Tin, Davida chuan, “Khawiiah nge ka han kal ang?” a ti a. Tin, ani chuan, “Hebron-ah,” a ti a. 2 Chutichuan, Davida chu chutah chuan a han kal ta a, a nupuite pahnih, Jezreel mi Ahinoami leh Karmel mi Nabala nupui Abigaili-te nên. 3 Tin, Davida chuan a hnêna mi awm zawng zawng chu a hruai chho va, mi tin an chhûngkuate ṭheuh nên, Hebron khuaahte chuan an awm ta a. 4 Tin, Juda mite chu an va kal a, Juda mite chunga lal atân Davida chu hriak an thih a. Chutichuan, “Saula phûmtute chu Jabes-gilead mite an ni,” tiin Davida chu an hrilh a. 5 Tichuan, Jabes-gilead mite hnênah chuan Davida chuan mi a tîr a, an hnênah, “In pu, in pu Saula chu in khawngaihzia tilanga in lo phûm avângin LALPA chuan malsâwm che u rawh se. 6 Tichuan, LALPA chuan in chungah ngilneihna leh thutak lantîr sela; hêng thil in tih avâng hian kei pawhin in ngilneih man chu ka rûl ang che u. 7 Chutichuan, in kutte chu lo chak sela, huai takin awm rawh u; in pu Saula chu a thi ta si a, Juda chite chuan an chunga lal atân hriak min thih ta bawk a,” a ti a.
Israel lalah Isbosetha an siam
8 Tin, Nera fapa Abnera, Saula sipaite hotu chuan, Saula fapa Isbosetha chu Mahanaim-ah a hruai a; 9 Gilead chungah te, Asur chungah te, Jezreel chungah te, Ephraim chungah te, Benjamin chungah leh Israel zawng zawng chungahte lalah a siam ta a. 10 (Saula fapa Isbosetha chu Israel chunga ro a rêl ṭan lai chuan kum sawmli mi a ni a, kum hnih ro a rêl a.) Nimahsela, Juda mite chuan Davida chu an pawm zâwk a. 11 Davidan Hebron-a Juda chite chunga ro a lo rêlna chu kum sarih leh thla ruk a ni tawh a.
Juda leh Israel inbei
12 Tin, Nera fapa Abnera leh Saula fapa Isbosetha chhiahhlawhte chu Mahanaim ata an chhuak a, Gibeon-ah an kal a. 13 Tin, Zeruii fapa Joaba leh Davida chhiahhlawhte chu an kal chhuak a, Gibeon dîlah chuan an intâwk a; tichuan, pâwl khat chu dîl râl lehlamah an ṭhu a, pâwl khat chu dîl râl lehlamah. 14 Tin, Abnera chuan Joaba hnênah, “Tlangvâlte chu lo thawk sela, kan hmaah han inbei teh rêng ang hmiang,” a ti a. Tin, Joaba chuan, “Lo thawk ang hmiang,” a ti a. 15 Chutichuan, an thawk a, a zât chin ruat chiahin an kai phei a, Benjamin chi, Saula fapa Isbosetha lama ṭang sâwm leh pahnih; tin, Davida chhiahhlawh sâwm leh pahnih. 16 An khingpuite chu an lu ṭheuhvah an inman a, mahni bitumate chu khandaihin an nâkah an inchhun ṭheuh va; tichuan, an tlu za ta vek mai a. Chuvângin, chumi hmun chu Helkath-hazurim an ti ta a, chu chu Gibeon-a awm a ni. 17 Tichuan, chumi nia an inbei chu a nasa ta hle mai a; tin, Abnera leh Israel mite chu Davida chhiahhlawhte lakah chuan an tlâwm ta a. 18 Tin, chutah chuan Zeruii fapate pathum: Joaba te, Abisaia te, Asahela te an awm a; Asahela chu zukpui ang maia ngalchak a ni. 19 Chutichuan, Asahela chuan Abnera chu a ûm a; Abnera a ûm chu ding lam leh vei lama pêng hauh lovin a ûm ngat ngat a. 20 Chutichuan, Abnera chu a han lehhawi a, “Nang i ni maw, Asahel?” a han ti a. Tin, ani chuan a chhâng a, “Keimah ni e,” a ti a. 21 Tin, Abnera chuan a hnênah, “I ding lamah emaw, i vei lamah emaw khân pêng la, tlangvâl pakhat kha man la, a inrâlthuamna lâksak rawh,” a ti a. Nimahsela, Asahela chuan amah a ûm chu a pênsan duh chuang lo va. 22 Tin, Abnera chuan Asahela hnênah, “Mi pênsan rawh. Engah nge ka chhun thlûk ang che? I unaupa Joaba hmêl ka hmu ngam dâwn em ni?” a ti leh a. 23 Nimahsela, a pêng duh chuang lo va; chuvângin, Abnera chuan a fei chhawr lamin a pumah a chhun a, fei chu a hnung lamah a tlang a, chutah chuan a tlu ta tawp a, chumi hmunah chuan a thi ta a. Tin, heti hi a ni a, Asahela a tlûka a thihna hmun lo thleng apiang chu chutah chuan an ding chawt zêl a. 24 Joaba leh Abisaia chuan Abnera chu an ûm zêl a; tin, Gibeon thlalêr kawnga Gia dep Amma tlâng an thlen chuan ni a tla a. 25 Tin, Benjamina thlahte chu Abnera hnênah an pung khâwm a, pawl khatah an insiam a, tlâng chhîpah an va ding ta a. 26 Chutichuan, Abnera chuan Joaba a au va, “Khandaihin a sâm reng dâwn em ni ang? A tâwp lamah chuan a la lungngaihthlâk hle dâwn tih i hre lo vem ni? Eng chen nge mipuite chu an unaute ûm tawh lo tûra i hrilh dâwn le?” a ti a. 27 Tin, Joaba chuan, “Pathian nunna chhâlin ka sawi e, eng mah han sawi lo la chu naktûk zîng thlengin ka miten an ûm dâwn che u asin le,” a ti a. 28 Chutichuan, Joaba chuan tawtawrâwt chu a han hâm a, mipuite chu an ding ta ṭhup mai a, Israel mite chu an ûm ta lo va, an bei leh ta lo. 29 Tichuan, Abnera leh a mite chu Araba kal tlangin chumi zân chuan an kal zankhua a, Jordan an kân a, Bithron an kal tlang zak a; Mahanaim an thleng a. 30 Tin, Joaba chuan Abnera a ûm chu a kîrsan ta a. Tin, mipui zawng zawng a han khâwm vek chuan Davida hote sâwm leh pakua leh Asahela an lo kim ta lo va. 31 Davida hote erawh chuan Benjamin mite leh Abnera mite chu zathum leh sawmruk an tihlum a. 32 Chutichuan, Asahela ruang chu an la a, Bethlehem-a a pa thlânah an phûm a. Tin, Joaba leh a mite chu zankhuain an kal a, Hebron an thlenin khua a vâr a.
1 Saula chhûngte leh Davida chhûngte chu rei tak an indo va; Davida chu a lo chak tial tial a, Saula chhûngte erawh chu an chak lo tial tial a.
Davida fate
2 Davida chuan Hebron khuaah chuan fapate a nei a: a fa hmasa ber chu Amnona, Jezreel mi Ahinoami laka mi a ni; 3 a dawttu chu Kileaba, Karmel mi Nabala nupui Abigaili laka mi a ni; a pathumna chu Absaloma, Gesur lal Talmaia fanu Maaki fapa a ni; 4 a palina chu Adonija, Hagithi fapa a ni a; a pangana chu Sephatia, Abitali fapa a ni a; 5 a parukna chu Ithreama, Davida nupui Ekli laka mi a ni. Hêngte hi Davida fa Hebron-a piangte chu an ni.
Davida lamah Abnera a ṭang ta
6 Tin, heti hi a ni a, Saula chhûngte leh Davida chhûngte an indo chhûng chuan Abnera chu Saula chhûngte zîngah chuan a intichak deuh deuh va. 7 Saula chuan hmei a nei a, a hming chu Rizpi a ni a, Aii fanu a ni. Tin, Isbosetha chuan Abnera hnênah, “Engati nge ka pa hmeinu hnênah i kal?” a ti a. 8 Chutichuan, Isbosetha thusawi chuan Abnera chu a tithinur ta hle mai a. “Juda-ho uicho lu mai em ka nih ni? Vawiin thlengin i pa Saula chhûngte leh a unaute leh a ṭhiante chungah ngilneihna ka tilang a, Davida kutah ka hlân lo chia; nimahsela, nangin he hmeichhe chunga sualah hian mi puh ta mai a. 9-10 Saula chhûngte lak ata ram chu lâksaka, Israel leh Juda-te chungah Dan aṭanga Beer-seba thlenga Davida lalṭhutthlêng tungding tûra LALPAN Davida hnêna chhia a chham anga ka tih loh chuan, Pathianin Abnera chu a tih tihin ti sela, chu aia nasa pawhin,” a ti a. 11 Tichuan, Abnera chu a hlauh avângin chhân rêng rêng a chhâng ngam ta lo va. 12 Tin, Abnera chuan a aiah Davida hnênah, “He ram hi tu ta nge ni?” tiin mi a tîr a; tin, “Ka hnênah thu thlung rawh; tichuan, ngai teh, Israel mi zawng zawngte i hnên lama ṭang tûrin ka kut chu i lamah a ṭang ang,” tiin a sawi bawk a. 13 Tin, ani chuan, “Aw le, i hnênah chuan thu ka thlung ang e; amaherawhchu, i lakah thil pakhat ka phût dâwn a ni: chu chu hei hi a ni, mi hmu tûra i lo kal hunah Saula fanu Mikali i rawn hruai phawt loh chuan ka hmêl i hmu thei lo vang,” a ti a. 14 Tin, Davida chuan Saula fapa Isbosetha hnênah chuan, “Philistia mite serh vun zaa ka lei ka nupui Mikali chu mi rawn pe rawh,” tiin mi a tîr a. 15 Tin, Isbosetha chuan mi a tîr a, a pasal Laisa fapa Paltiela ngei hnên ata chu an hruai ta a. 16 Tin, a pasal chu a hnênah a kal a, ṭap chung zêlin a kal a, Bahurim thlengin a zui a. Chutichuan, Abneran a hnênah, “Kal rawh, kîr leh rawh,” a ti a; tin, a kîr leh ta a. 17 Chutichuan, Abnera chuan Israel mite upaho chu a bia a, “Tûn hma khân Davida chu in lalah in duh ṭhîn a. 18 Tûnah hian siam rawh u khai. LALPAN Davida chungchâng thu-ah chuan, ‘Ka chhiahhlawh Davida kutin ka mi Israel-te chu Philistia mite kut ata leh, an hmêlmate zawng zawng kut ata ka chhanchhuak ang,’ tiin a sawi e,” tiin. 19 Tin, Abnera chuan Benjamin mite beng hriatah a sawi bawk a; tin, Abnera chu Israel mite leh Benjamina chhûng zawng zawngten ṭha an tih ang apiang, Hebron-a Davida beng hriatah sawi tûrin a kal bawk a. 20 Chutichuan, Abnera chu Hebron-a Davida hnênah mi sawmhnih nên an kal a. Tin, Davida chuan Abnera leh a hnêna mi sawmhnihte tân ruai a ṭheh a. 21 Abnera chuan Davida hnênah, “Ka tho vang a, i hnêna thu an thlun theih nân leh i duhthusâm ang taka ro i rêl theih nân Israel mite zawng zawng ka lalpa hnêna kai khâwm tûrin ka kal tâng e,” a ti a. Tin, Davida chuan Abnera chu a kaltîr a; tichuan, thlamuang takin a kal ta a.
Abnera a tualthi
22 Tin, ngai teh, Davida mite leh Joaba rammu chu an lo haw a, râllâk sum tam tak an rawn hâwn a; nimahsela, Abnera chu Hebron-a Davida hnênah chuan a lo awm tawh lo, a lo kaltîr tawh si a, ani pawh thlamuang takin a kal ta a ni. 23 Joaba leh a hnêna mipui zawng zawng an lo thlen chuan, “Nera fapa Abnera chu lal hnênah a lo kal a, ani chuan a kaltîr leh ta a, thlamuang takin a kal ta,” tiin Joaba chu an hrilh a. 24 Chutichuan, Joaba chu lal hnênah a kal a, “I thil lo tih hi engtizia nge ni le? Ngai teh, Abnera chu i hnênah a lo kal a, engati nge i kal botîra, a kal tawh daih mai le? 25 Nera fapa Abnera chu i hria a, nangmah tihder tûrin, i chhuak lam leh i lût lam leh i thiltih apiang hriat tumin a lo kal a ni,” a ti a. 26 Tin, Davida hnên ata Joaba a lo chhuah chuan Abnera ûm tûrin mi a tîr a, Sira tuichhunchhuah aṭangin an rawn hruai kîr a; nimahsela, Davida chuan a hre lo. 27 Tin, Abneran Hebron a lo thlen chuan Joaba chuan kulh kawngkhârah biak rûk tûrin a hruai hrang a, a unau Asahela thisen chhuak thungrulh nân a pumah a vit hlum ta a. 28 Tin, nakina Davidan a han hriat chuan, “Nera fapa Abnera thisen chhuah thu-ah hian kei leh ka ram chu LALPA mit hmuhin kan thiang kumkhua ang a; 29 Joaba lu chungah tla sela, a pa chhûngte zawng zawng chungah nên; Joaba chhûngte zîngah chuan thi pût emaw, phâr emaw, tiang rinchhana awm mi emaw, khandaiha thi emaw, ṭâm emaw lo awm lovin awm suh se,” a ti a. 30 Chutichuan, an unaupa Asahela chu Gibeon-a indonaah a thah avângin, Joaba leh a unau Abisaia chuan Abnera chu an that ta a.
Abnera an phûm
31 Tin, Davida chuan Joaba leh a hnêna mipui awm zawng zawngte hnênah chuan, “In puante chu pawt thlêr ula, saiip puan sin ula, Abnera chu sûn rawh u,” a ti a. Tin, Davida chuan hlâng chu a zui a. 32 Tin, Abnera chu Hebron-ah chuan an phûm a; lal chuan a aw a chhuah a, Abnera thlânah chuan a ṭap ta a, mipui zawng zawng pawh an ṭap a. 33 Tin, lal chuan Abnera chu a ṭah a, “Abnera chu mi â thihin a thi dâwn em ni? 34 I kut chu phuar a ni lo va, i ke chu kawl bun a ni hek lo, Mi suaksual fate hmaa mi a tlu anga i tlûk tâk mai le?” a ti a. Tin, mi zawng zawng chuan an ṭah leh a. 35 Tichuan, chhûn a la nih laiin Davida chu chaw eitîr tûrin mi zawng zawng chu an lo kal a; nimahsela, Davida chuan, “Ni tlâk hmaa chaw emaw, thil dang emaw pawh a eia ka ei hlek chuan Pathianin a tih tihin mi ti rawh se, chu aia nasa pawhin,” tiin chhia a chham a. 36 Chu chu mi zawng zawngin an hriatin an lâwm êm êm a; lal thiltih apiang chuan mipui zawng zawngte chu a tilâwm zêl a. 37 Chutichuan, mipui zawng zawng leh Israel mi zawng zawng chuan, chumi ni chuan Nera fapa Abnera thah chu lal thu a ni lo tih an lo hre ta a. 38 Tin, lal chuan a mite hnênah chuan, “Vawiin hian Israel mi lian, mi ropui tak a thi tih in hre na nge? 39 Lal atâna hriak thih ni mah ila, vawiinah hian ka chak lo a ni; tin, hêng mi, Zeruii fapate hi ka tân tuar an har lutuk a ni. LALPAN thil ṭha lo titua chu a sualzia ang zêlin thungrûl rawh se,” a ti a.
Isbosetha a tualthi
1 Tin, Saula fapa Isbosethan Hebron-ah Abnera a thi tih a lo hriat chuan a kutte a lo chak ta lo va; tin, Israel mite zawng zawng chu an zâm ta a. 2 Tin, Saula fapa Isbosetha chuan sipai pâwl hotu pahnih a nei a: pakhata hming chu Baana a ni a, a danga hming chu Rekaba a ni. Benjamina thlah Beeroth mi Rimona fapate an ni a. (Beeroth chu Benjamina rama ngaih a ni si a. 3 Beeroth khuaa mite chu Gitaim-ah an tlân a, tûn thlengin chutah chuan an awm ta a.) 4 Tin, Saula fapa Jonathana chuan fapa kebai a nei a. Jezreel aṭanga Saula leh Jonathana chanchin an hriat lai chuan kum nga mi a ni a; tichuan, a enkawltu chuan a pawm a, a tlân bopui a. Tin, heti hi a ni a, tlân bo tûra a hmanhmawhna lamah a thlauh va, a ke a lo bai ta a, a hming chu Mephibosetha a ni. 5 Tin, Beeroth mi Rimona fapate Rekaba leh Baana chu an kal a, Isbosetha inah chuan chhûn ni sat vânglai taka a chhûn chawlh lai takin an kal a. 6 Buh la tûr ni âwm takin in chhûng lamah chuan an lût a, a pumah an vit a; tin, Rekaba leh a unaupa Baana chu an tlân bo ta a. 7 Tin, ina an va luha a mutna pindana khuma a mu chu an vit a, an that a, a lû an tan a, a lû chu an la a, Araba kal tlangin zankhuain an kal a. 8 Tin, Isbosetha lu chu Hebron-ah Davida hnênah an rawn la a, lal hnênah chuan, “Ngai teh, hei, nangmah thah tum, i hmêlma Saula fapa Isbosetha lu; LALPA chuan ka lalpa phuba chu vawiinah hian Saula leh a thlah lakah a lâksak ta a ni,” an ti a. 9 Tin, Davida chuan Beeroth mi Rimona fapa Rekaba leh a unaupa chu a chhâng a, an hnênah, “LALPA, ka manganna zawng zawng ata mi chhandamtu nunna chhâlin ka sawi e, 10 chanchin ṭha rawn thlena inngaiin, ‘Ngai teh, Saula chu a thi ta,’ tiin mi pakhatin mi rawn hrilh a, ani chu ka man a, Ziglag-ah ka that a; chu chu a chanchin ṭha rawn thlen mana ka lo pêk chu a ni. 11 Mi fel, ama in chhûng luma, a khumlaizâwl ngeia mi, mi sualin an thah thisen man chu in lakah ka phût lehzualin, leilung ata hi ka va tibo dâwn tehlul che u êm!” a ti a. 12 Chutichuan, Davida chuan a tlangvâlte chu thu a pe a, anni chuan an that a, an kut leh an ke an tansak a, Hebron-a dîl kamah chuan an khai a. Isbosetha lu erawh chu an la a, Hebron-a Abnera thlânah an phûm ta a.
Davida chu Israel leh Juda lal a lo ni ta
1 Chutichuan, Israel chi zawng zawng chu Hebron-a Davida hnênah an lo kal a, “Ngai teh, i thisen zawmpui kan ni a. 2 Tûn hmaa Saula kan chunga a lal laia Israel-te hruai chhuak leh hruai lûttu i ni ṭhîn a; tin, LALPA chuan i hnênah, ‘Ka mi Israel-te chu i châwm ang a, Israel-te chungah hotuah i awm ang,’ a ti a,” an ti a. 3 Chutichuan, Israel upa zawng zawng chu Hebron-ah lal hnênah an kal a; tin, Lal Davida chuan Hebron-ah chuan LALPA hmaah an hnênah thu a thlung a; tin, Davida chu Israel-te chunga lal atân hriak an thih a. 4 Davida chu a lal tirh lai chuan kum sawmthum mi a ni a, kum sawmli a lal a. 5 Hebron-ah chuan Juda-te chungah kum sarih leh thla ruk a lal a; tin, Jerusalem-ah Israel-te leh Juda-te zawng zawng chungah kum sawmthum leh kum thum a lal a. 6 Tin, lal leh a mite chu chumi rama chêngho Jebus mi rûn tûrin Jerusalem-ah an kal a; chûngho chuan Davida a lo luh theih loh ringin, Davida hnênah, “Hetah hian i lo lût tawp lo vang, mitdel leh kebaiten an lo dang ang che,” an ti a. 7 Nimahsela, Davida chuan Zion kulh chu a la ta mial a, chu chu Davida khua a ni. 8 Chumi ni chuan Davida chuan a hote hnênah, “Jebus-ho khu ka huat ang meuhva thah duh hial khawpa haw ve in awm em? ‘Mitdel leh kebaiho khua’ bei tûrin lui luanna zuiin luhkhung rawh se,” a ti a. Chu vâng alâwm, “Mitdel leh kebaite chu LALPA inah an lût tûr a ni lo,” tih a nih tâk ni. 9 Tin, Davida chu kulhah chuan a awm a, Davida khua a vuah ta a. Tin, Davida chuan Milo aṭangin a vêlin kulh a siam a, a chhûng lamah nên. 10 Tichuan, Davida chu a lo ropui ta deuh deuh va, LALPA, sipaihote Pathian chu a hnêna a awm zêl avângin. 11 Tin, Tura lal Hiraman Davida hnênah mi a tîr a, sidar thingte a thawn a, themthiamte leh lungchhertute a tîr bawk a, Davida in an saksak a. 12 Tin, Davida chuan LALPAN Israel mite chunga lalah amah chu a tinghet a, a mi Israel-te avângin ram chu a chawimawi a ni tih a hre ta a. 13 Tin, Davida chuan Hebron a chhuahsan hnuah Jerusalem-a mi hmei leh nupui a neih belhchhah a. Tichuan, Davida chuan fapate leh fanute a la nei leh cheu va. 14 Tin, Jerusalem-a a neih hmingte chu hêng hi an ni: Samua te, Sobaba te, Nathana te, Solomona te, 15 Ibhara te, Elisua te, Nephega te, Japhia te, 16 Elisama te, Eliada te, Elipheleta te hi.
Philistin-ho hneh thu
17 Tin, Davida chu Israel mite lal atân hriak an thih tih Philistia miten an hriatin, Philistia mi zawng zawng chu Davida zawng tûrin an chho ta a; tin, Davida chuan a lo hria a, kulhbîngah a chhuk a. 18 Tin, Philistia mite chu Rephaim ruamah an inzâr a. 19 Tin, Davida chuan, “Philistia mite bei tûrin ka han chho vang em? Ka kutah hian anniho chu i pe dâwn em?” tiin LALPA a râwn a. Tin, LALPA chuan Davida hnênah, “Han chho rawh; Philistia mite chu i kutah ka pe ngei ngei dâwn a ni,” a ti a. 20 Tichuan, Davida chu Baal-perazim-ah a kal a, chutah chuan Davidan anniho chu a bei a, “LALPAN ka hmêlmate chu tuikhuah sah ang maiin ka hmaah min tihdarhsak ta,” a ti a. Chuvângin, chumi hmun hmingah chuan Baal-perazim a vuah a. 21 Tin, chutah chuan an milemte an kalsan a, Davida leh a mite chuan an la a. 22 Tin, Philistia mite chu an chho leh a, Rephaim ruamah an inzâr leh a. 23 Tin, Davidan LALPA a han râwn chuan, ani chuan, “Han chho suh; an hnung lamah kal hual la, thingtheihmu kûng zâwnahte han bei rawh. 24 Tin, heti hi a ni ang a, thingtheihmu lêra kal thâwm ang ri ṭhup ṭhup i hriat chuan, che rawh! Philistia sipaite bei tûrin i hmaah LALPA a chhuak ta tihna a ni ang,” a ti a. 25 Chutichuan, LALPAN thu a pêk angin Davida chuan a ti a; Philistia mite chu Geba aṭangin Gezer thlengin a bei a.
Jerusalem-ah thuthlung bâwm lâk kîr
1 Tin, Davida chuan Israel mite zînga mi thlan ṭhiau sîngthum a khâwm leh a. 2 Tin, Davida chu a tho va, Judai rama Baale khua aṭangin, cherub-te chunga chuang sipaihote LALPA hming an puttîr Pathian bâwm chu la chho tûrin, a hnêna mi awm zawng zawngte nên chuan an thawk ta a. 3 Tin, Pathian bâwm chu tawlailîr tharah an dah a, tlânga Abinadaba in ata an la chhuak a; Abinadaba fapa Uza leh Ahiova-te chuan tawlailîr thar chu an khalh a. 4 Tin, tlânga Abinadaba in ata chu Pathian bâwm chawpin an la chhuak a; Ahiova chu Pathian bâwm hma lamah chuan a kal a. 5 Tin, Davida leh Israel mi zawng zawngte chuan LALPA hmaah chuan thil ri thei chi hrang hrang - fâr thinga siam leh ṭingṭang te, perhkhuang te, khuangtê te, tawtawrâwt bi nei te, dârbenthek te an tum a. 6 Tin, Nakona hruih zâwl an thlen chuan Uza chuan Pathian bâwm chu a han ban a, a chelh a; sebâwng chu a pai a pai avângin. 7 Tin, LALPA thin chu Uza chungah chuan a ur ta thut a, a thiltih dik loh avâng chuan Pathianin chutah chuan a tihlum a, Pathian bâwm kiangah chuan a thi ta a. 8 Tin, LALPA chu Uza chunga a ṭuan tâk avângin Davida chu a thinur a, chumi hmun chu Perez-uza a vuah a, tûn thleng hian a la ni ta reng a. 9 Tin, chumi ni chuan Davida chuan LALPA chu a hlau va; “Engtin nge LALPA bâwm chu ka hnên a lo thlen theih tâk ang?” a ti a. 10 Chutichuan, Davida chuan LALPA bâwm chu Davida khuaa ama hnênah chuan a suan duh ta lo va; Davida chuan Git mi Obed-edoma in lamah a dah ta zâwk a. 11 Tin, LALPA bâwm chu Git mi Obed-edoma inah chuan thla thum a awm a; tichuan, Obed-edoma leh a chhûngte zawng zawng chu LALPAN mal a sâwm a. 12 Tin, Lal Davida chu, “Pathian bâwm avângin Obed-edoma chhûngkua leh a in leh lo zawng zawng LALPAN mal a sâwm a ni,” tiin an hrilh a. Tichuan, Davida chuan Pathian bâwm chu Obed-edoma in ata Davida khuaah chuan lâwm takin a zuk la ta a. 13 Tin, heti hi a ni a, LALPA bâwm zâwntute chu pên ruk an kal veleh sebâwngpa leh ran châwm thauvin an inthawi a. 14 Tin, Davida chu a theihtâwpin LALPA hmaah a lâm a, Davida chuan puanzaisîn puithiam kawr a ha a. 15 Chutichuan, Davida leh Israel mi zawng zawngte chuan au dur dur chung leh tawtawrâwt hâm ruai ruai chungin LALPA bâwm chu an la chho ta a. 16 Tin, heti hi a ni a, LALPA bâwm chu Davida khuaa a luh lai chuan Saula fanu Mikali chuan tukverh aṭangin a lo thlîr a, LALPA hmaa Davida zuang leh lâm chu a hmu a, a hmusit rilru ta a. 17 Tichuan, LALPA bâwm chu an la lût a, a dahna tûra Davidan a zâr, puan in chhûnga a hmun tûrah chuan an dah ta a; tin, Davida chuan hâlral thilhlante leh remna thilhlante LALPA hmaah chuan a hlân a. 18 Tin, Davidan hâlral thilhlan leh remna thilhlante chu a hlan zawh chuan sipaihote LALPA hmingin mipuite chu mal a sâwm a. 19 Tin, mipui zawng zawng, Israel pum puite chu a hmei a pain mi tin, chhang hlâwm khat leh sa hrang khat leh grêp rah pho ro bâwr khat a sem ṭheuh va. 20 Chutichuan, mi zawng zawng mahni in lam ṭheuhvah an haw ta a. Chutichuan, Davida chu a chhûngte malsâwm tûrin a haw leh ta a. Tin, Saula fanu Mikali chu Davida hmuak tûrin a lo chhuak a, “Vawiina Israel lal chu a va ropui ve le, mi ho tak, zah nachâng hre lo, saruaka awm ang maiin vawiinah a chhiahhlawh nulate mit hmuhah saruakin a awm kha le!” a lo ti a. 21 Tin, Davida chuan Mikali hnênah chuan, “I pa leh a chhûngte zawng zawng aia mi thlanga, LALPA mi, Israel-te chunga lala mi ruattu LALPA hmaah asin. LALPA hmaah chuan lâm âwm rêng ka ni alâwm. 22 Hêng ai mah hian ka la zahpuiawm ang, keimah pawh ka la insit cheu vang; amaherawhchu, chûng chhiahhlawh nula i sawite chawimawi chuan ka awm ang,” a ti a. 23 Chutichuan, Saula fanu Mikali chuan a thih thlengin fa a nei lo va.
Davida hnêna zâwlnei Nathana thu
1 Tin, heti a ni a, lal chu a ina a awma, LALPAN an vêla a hmêlmate zawng zawng laka râlmuanga a awmtîr hnu chuan, 2 lal chuan zâwlnei Nathana hnênah, “Hei, kei chu sidar thing inah ka awm a; nimahsela, Pathian bâwm chu puan in maiah a awm a,” a ti a. 3 Tin, Nathana chuan lal hnênah, “I rilrua awm ang tak chuan va ti rawh, LALPA i hnênah a awm alâwm,” a ti a. 4 Tin, heti a ni a, chumi zân vêk chuan Nathana hnênah, 5 “Ka chhiahhlawh Davida chu va hrilh rawh, ‘LALPA chuan heti hian a ti: Ka awmna tûrin nangin in min saksak dâwn em ni? 6 Israela thlahte Aigupta ram ata ka hruai chhuah aṭangin tûn thlengin inah ka awm lo va, puan inah leh biakbûkah ka awm zêl zâwk ṭhîn a. 7 Israela thlahte zînga ka kalna zawng zawngah pawh, ka mi Israel-te châwm tûra thu ka pêk rorêltute hnênah, “Engati nge sidar thingin in min saksak loh?” tiin ka sawi ngai em ni?’ 8 “Chuvângin, ka chhiahhlawh Davida hnênah, ‘Sipaite LALPA chuan heti hian a ti a ni: Berâm tlatna hmun ata i berâm vêng lai chu ka mi Israel-te chunga hotu atân ka la chia. 9 Tin, i kalna apiangah i hnênah ka awm zêl a, i hmaah chuan i hmêlmate ka tibo zêl a; leia mi ropui takte hming ang hming ropui tak ka siam che a. 10 Chu bâkah chuan, ka mi Israel-te tân hmun ka ruat ang a, anmahni pual hmunah an awma, an insuan tawh loh nân anni chu ka phun ang a; tûn hma ang khân suahsualna faten an tirethei tawh lo vang a, ka mi Israel-te chunga rorêltute ka ruat lai ang kha a ni tawh hek lo vang; 11 tin, i hmêlma zawng zawng lak ata hi ka chawlhtîr ang che. Tin, chu lo rêngah pawh, LALPAN chhûngkua chu a dinsak ang che tih a hrilh bawk che a ni. 12 I ni a kina i pute hnêna i mut hunah chuan, i hnua i thlah, i rîla rah tûr chu ka tungding ang a, a ram chu ka tinghet ang. 13 Ani chuan ka hming atân in a sa ang a; tin, a ram lalṭhutthlêng chu kumkhua atân ka tinghet ang. 14 A Pa ka ni ang a, ani chu ka fapa a ni ang a. Thil a tihsual chuan, mihring tiang leh mihring fate vuaknain ka thunun ang. 15 Nimahsela, i hmaa ka sawn bo Saula hnên ata ka lâk bo ang khân ka zahngaihna chuan ani zawng a kalsan lo vang. 16 Tin, i chhûngkua leh i ram chu chatuana tihngheh tlat a ni ang a, i lalṭhutthlêng chu chatuana tihngheh a ni ang,’ a ti,” tiin LALPA thu a lo thleng a. 17 Chûng thu zawng zawng ang zêl leh chu inlârna ang chiah chuan Nathana chuan Davida hnênah a sawi a.
Davida lâwm thu hrilna ṭawngṭai
18 Chutichuan, Lal Davida chu a lût a, LALPA hmaah chuan a ṭhu a; “Aw LALPA PATHIAN, tu nge maw ka niha, ka chhûngte pawh tu nge maw an niha, heti chen chen mi hruai? 19 Aw LALPA PATHIAN, chûng pawh chu nanga mit hmuhah chuan thil tê tham mai zawng a ni a; nimahsela, i chhiahhlawh chhûngkaw lo awm dân tûr thu chu kum tam tak chhûng atân i lo sawi tawh bawk a; aw LALPA PATHIAN, hêngte pawh hi mihringte tih dân ang bawk a ni a. 20 Davida hian i hnênah eng nge a sawi lehchuan ang? I chhiahhlawh hi i hre vek si, aw LALPA PATHIAN. 21 I chhiahhlawh hriat tûrin i thu avâng leh nangma thinlung ang zêlin hêng thil ropui tak hi i ti ta a. 22 Chu vâng chuan aw LALPA Pathian, nang chu i ropui a ni; kan benga kan hriat dânin nangmah ang rêng rêng an awm lo va, nangmah lo chu Pathian rêng rêng an awm hek lo. 23 Aigupta ram ata leh hnam tin leh an pathiante lak ata i tâna i thlan chhuah, i mite hmaa i tân thil ropui tak leh i ram tâna thil hlauhawm tak ti tûr leh, ama hming ropui tak siam tûra Pathianin ama mite atâna a rawn thlan chhuah, i mi Israel-te ang rêng rêng hi khawvêlah hian hnam dang tu nge awm? 24 Chutichuan, i mi Israel-te chu chatuana i mite an lo nih theih nân i tân i tinghet ta a; tin, LALPA, nang chu an Pathian i lo ni ta a. 25 “Tichuan, aw LALPA Pathian, i chhiahhlawh chungchâng thu leh a chhûngte chungchâng thu i sawi chu chatuan atân tinghet la, i sawi tawh ang khân ti ang che. 26 Tin, ‘Sipaihote LALPA chu Israel-te Pathian a ni,’ tiin, i hming chu chatuana chawimawiin awm rawh se; tichuan, i chhiahhlawh Davida chhûngte chu i hmaah tihnghehin an awm ang. 27 Aw sipaihote LALPA, Israel-te Pathian, i chhiahhlawh hnênah, ‘Chhûngkua chu ka dinsak ang che,’ tiin i puang tawh si a. Chuvângin, i chhiahhlawh chuan he ṭawngṭaina hi i hnênah a thlen ngam a ni. 28 Aw LALPA PATHIAN, Nang chu Pathian i ni a, i thu chu thutak a ni a; tin, he thil ṭha hi i chhiahhlawh hnênah i tiam tawh a. 29 Chuvângin, i chhiahhlawh chhûngte chu i hmaa chatuana an awm reng theih nân malsâwm ang che; aw LALPA PATHIAN, nang chuan i sawi tawh si a; tin, i malsâwmnain i chhiahhlawh chhûngte chu chatuana malsâwmin awm rawh se,” a ti a.
Davida a chak zêl
1 Tin, chumi hnuah chuan heti a ni a, Davida chuan Philistia mite chu a bei a, a hneh a; tichuan, Davida chuan Philistia mite thuneihna bulpui chu a chhuhsak a. 2 Tin, Moab mite a bei a, leiah a muttîr a, tehna hruiin a teh a. Tlar hnih chu tihhlum tûrin a teh a, tlar khat chu a tluana nunga zuah tûrin a teh a. Tichuan, Moab mite chu Davida chhiah khua an lo ni ta a, chhiahte an pe ṭhîn a. 3 Davida chuan Luia a ram la leh tûra a kal pahin Zoba lal Rehoba fapa Hadadezera pawh a bei a. 4 Tichuan, Davida chuan a sakawr chung chuang mi 1,700 leh sipai 20,000 a mansak a. Davida chuan tawlailîr hnûk mi sakawr zawng zawng chu an tha a chhahsak bawk a, tawlailîr za hnûktu tûr erawh chu a zuah a. 5 Tin, Damaska-a Suria mi, Zoba lal Hadadezera chhan tûra kalte chu Davidan Suria mite zînga mi 22,000 a that a. 6 Chutichuan, Davida chuan Suria rama Damaska-ah chuan sipai a dah a; tichuan, Suria mite chu Davida chhiah khua an lo ni ta a, chhiahte an pe ṭhîn a. Tin, LALPAN Davida chu a kalna apiangah a hnehtîr zêl a. 7 Tin, Davida chuan Hadadezera hote rangkachak phawte a lâksak a, Jerusalem-ah a hâwn a. 8 Tin, Hadadezera khua Beta aṭang te, Berothai aṭangtein Davida chuan dâr tam tak a la a. 9 Tin, Hamath lal Toia chuan Hadadezera sipai zawng zawng Davidan a hneh tih a lo hria a. 10 Hadadezera chu a beiha a hneh avânga chibai bûk tûr leh lâwmpui tûrin Toia chuan a fapa Jorama chu Davida hnênah a tîr a; Hadadezera chuan Toia hi a do ṭhîn si a. Tin, Jorama chuan tangkaraw bêl te, rangkachak bêl te, dâr bêlte a rawn keng a. 11 Chûng chu ram dang a ngam zawng zawnga mi tangkarua leh rangkachak a hlante nên chuan Lal Davidan LALPA hnênah a hlân bawk a; 12 Suria-ho ta te, Moab-ho ta te, Amona thlahho ta te, Philistia-ho ta te, Amalek-ho ta te, Zoba lal Rehoba fapa Hadadezera laka a râllâkte chu. 13 Tin, Davida chu Chi Ruamah, Suria mi 18,000 a bei haw chu a hming a lo thang ta a. 14 Tin, Edom-ah chuan sipai a dah a; Edom ram hmun tinah sipai a dah thluah mai a; tichuan, Edom mi zawng zawng chu Davida chhiah khua an lo ni ta a. Tichuan, LALPAN Davida chu a kalna apiangah a hnehtîr zêl a. 15 Chutichuan, Davida chuan Israel mi zawng zawng chungah ro a rêl a; tin, Davida chuan a mi zawng zawngte chungah chuan fel takin ro a rêl a. 16 Zeruii fapa Joaba chu sipai hotu ber a ni a; Ahiluda fapa Jehosaphata chu chanchin ziaktu a ni a; 17 Ahituba fapa Zadoka leh Abiathara fapa Ahimeleka chu puithiam an ni a; Seria chu ziaktu a ni a; 18 Jehoiada fapa Benaia chu Kereth mi leh Peleth mite hotu a ni a; tin, Davida fapate chu puithiam an ni.
Davida leh Mephibosetha
1 Tin, Davida chuan, “Jonathana avânga khawngaihna ka tihlan theihna tûrin Saula chhûngte zînga mi awm an la awm em aw?” a ti a. 2 Tin, Saula chhûngte chhiahhlawh pakhat a hming Ziba a awm a, Davida hnêna kal tûrin an ko va. Tin, lal chuan a hnênah, “Ziba i ni em?” a ti a. Tin, ani chuan, “Ni e, kei i chhiahhlawhpa hi,” a ti a. 3 Tin, lal chuan, “Pathian khawngaihna ka tihlan theihna tûrin Saula chhûngte zînga mi an la awm lâwm ni le?” a ti a. Tin, Ziba chuan lal hnênah, “Jonathana chuan fapa pakhat a la nei a, a ke pawh a bai nghe nghe,” a ti a. 4 Tin, lal chuan a hnênah, “Khawiah nge a awm?” a ti a. Tin, Ziba chuan lal hnênah, “Ngai teh, Lo-debar-ah Amiela fapa Makira inah a awm,” a ti a. 5 Chutichuan, Lal Davida chuan mi a tîr a, Lo-debar ata Amiela fapa Makira ina mi chu an va hruai a. 6 Tin, Saula fa Jonathana fapa Mephibosetha chu Davida hnênah chuan a lo kal a, a hmaia lei siin chibai a bûk a. Tin, Davida chuan, “Mephiboseth,” a ti a. Ani chuan, “En teh, i chhiahhlawh hi,” a ti a, a chhâng a. 7 Tin, Davida chuan a hnênah, “Hlau suh, i pa Jonathana avângin ka khawngaih ngei ngei ang chia, i pu Saula ram zawng zawng ka neihtîr leh ang chia, ka dawhkânah chaw i kîl ve fo tawh ang,” a ti a. 8 Tin, chibai a bûk a, “Kei, ui thisâwn ang mai, i chhiahhlawh hi eng nge maw a niha i ngaihsak ni?” a ti a. 9 Chutichuan, lal chuan Saula chhiahhlawh Ziba chu a ko va, a hnênah, “Saula thil zawng zawng leh a chhûngte zawng zawng thilte chu i pu fapa hi ka pe vek a ni. 10 Tin, a tân lei i lehsak ang a, nang leh i fapate leh i chhiahhlawhte nên; tin, i pu fapa chuan ei tûrte a neih theih nân i thawh chhuahte chu i rawn la ang a; i pu fapa Mephibosetha erawh hi chuan ka dawhkânah chaw a kîl fo vang,” a ti a. Ziba chuan fapa sâwm leh panga leh chhiahhlawh sawmhnih a nei a. 11 Chutichuan, Ziba chuan lal hnênah, “Ka lal, ka puin a chhiahhlawh thu a pêk ang zêlin i chhiahhlawh hian a ti ang,” a ti a. Lal chuan, “Mephibosetha zawngin ka dawhkânah lal fapa ang bawkin chaw a kîl ang,” a ti a. 12 Mephibosetha chuan fapa naupang a nei a, a hming chu Mika a ni. Tin, Ziba ina awm zawng zawng chu Mephibosetha chhiahhlawh an ni a. 13 Chutichuan, Mephibosetha chu Jerusalem-ah a awm ta a, lal dawhkânah chaw a kîl ve fo va; a ke khinghnih a bai a ni.
Davidan Amon leh Suria mite a hneh
1 Tin, heti hi a ni a, chûng hnuah chuan Amona thlahte lal chu a thi a, a fapa Hanuna chu a ai awhin a lal a. 2 Tin, Davida chuan, “A pa chuan mi lo khawngaih angin kei pawhin Nahasa fapa Hanuna chu ka khawngaih ve ang,” a ti a. Chutichuan, Davida chuan a pa chungchâng thua thlamuan tûrin ama mite a tîr a. Tin, Davida mite chuan Amona thlahte ram an va thleng a. 3 Nimahsela, Amona thlahte puipaho chuan an pu Hanuna hnênah chuan, “Davida hian i pa a zah avângin i hnênah thlamuantu a rawn tîr niin i ring em ni? Davida hian a mite hi khuate rawn tichhe tûra thlîthlai leh enthla tûrin i hnênah a rawn tîr a ni lâwm ni?” an ti a. 4 Chutichuan, Hanuna chuan Davida mite chu a man a, an khabe hmul khingkhat a mehsak a; tin, an silhfênte chu a lai takah an mawng thleng pha chauhvin a tansak a, a kaltîr ta a. 5 Tin, Davida an han hrilh chuan, a hmuak tûrin mi a tîr a; anni chu an zak hle mai si a. Tin, lal chuan, “In khabe hmul a chawr sei hma chu Jeriko-ah awm rih ula, chumi hnuah chuan in lo haw a ni ang chu,” a ti a. 6 Tin, Amona thlahten Davida huat zâwng an lo ni ta tih an inhriat chuan, Amona thlahte chuan Beth-rehob-a mi Suria-ho leh Zoba-a mi Suria-ho sipai sînghnih leh, lal Maaka, a mi sângkhat nên, Tob mite sîngkhat leh sânghnih nên an chah a, an ruai a. 7 Tin, Davidan chu chu a hriatin Joaba leh sipai huaisen zawng zawngte a tîr a. 8 Tin, Amona thlahte chu an lo chhuak a, khaw luhna kawngkhâr lamah chuan ṭanhmun an siam a; tin, Zoba-a mi leh Rehob-a mi Suria-hote leh Toba leh Maaka hote erawh chu a hrangin phûlah an awm a. 9 Chutichuan, an hma lam leh an hnung lamah an rawn bei dâwn tih Joaban a hriatin Israel mite zînga mi a ṭha ṭha a thlang chhuak a, Suria mite bei tûrin ṭanhmun a lo siam a. 10 Tin, mi dang zawng zawng chu a unaupa Abisaia kutah a dah vek a, Amona thlahte bei tûrin ṭanhmun a siam bawk a. 11 “Suria mite hi ka chelh dâwn loh chuan nangin min pui ang a; tin, nangin Amona thlahte i chelh dâwn loh chuan ka rawn pui ang che. 12 Huai takin awm la, kan mite leh kan Pathian khaw chhanin i intipachang ang u; tin, LALPA chuan ṭha a tih ang zêlin ti rawh se,” a ti a. 13 Chutichuan, Joaba leh a hnêna mite chuan Suria mite bei tûrin indona hmun lam chu an va hnaih a; tin, a hmaah chuan an tlânchhia a. 14 Tin, Amona thlahten Suria mite an tlânchhia tih an hriat chuan, anni pawh chu Abisaia hmaah chuan an tlânchhe ve ta a, khuaah chuan an lût a. Tin, Joaba chuan Amona thlahte chu a kîrsan a, Jerusalem-ah a haw ta a. 15 Tin, Suria miten Israel-te hmaah an chan a chhe ta tih an lo hriat chuan an inpun khâwm a. 16 Tin, Hadarezera chuan mi a tîr a, Lui piah lama Suria mite chu a hruai chhuak a, Hadarezera sipai hotu Sobaka chuan hma a hruai a; Helam-ah an kal a. 17 Tin, chu chu Davida an hrilh a; tin, ani chuan Israel mi zawng zawng a ko khâwm a, Jordan lui an kai a, Helam-ah chuan an kal a. Tin, Suria mite chuan Davida do tûr chuan ṭanhmun an lo siam a, an lo bei a. 18 Tin, Suria mite chu Israel-te hmaah chuan an tlânchhe ta a; tin, Davida chuan Suria mi tawlailîr zasarih chunga chuang leh sakawr chung chuang mi sîngli a that a; tin, an sipai hotu Sobaka pawh a that a, chutah chuan a thi ta a. 19 Chutichuan, Hadarezera chhiahhlawha awm lal zawng zawngten Israel-te hmaah an chan a chhe ta tih an lo hriat chuan Israel-te nêna inremna an siam a, an chhiahhlawhah an awm ta a. Chutichuan, Suria mite chuan Amona thlahte chu an pui leh ngam ta lo va.
Davida leh Bathsebi
1 Tin, heti hi a ni a, kum a lo veia, lalte indo tûra an chhuah ṭhin lai hun chuan Davidan Joaba chu a tîr a, a mite leh Israel mi zawng zawngte nên; tin, Amona thlahte chu an tiboral a, Raba khua an hual a, Davida erawh chu Jerusalem-ah a awm a. 2 Tin, heti hi a ni a, tlai nêmah chuan a khum ata Davida chu a tho va, lal in chungah a han kal a; tin, in chung aṭang chuan hmeichhe pakhat inbual lai hi a han hmu a; chu hmeichhia chu hmêlṭha tak a ni. 3 Tin, Davida chuan mi a tîr a, chu hmeichhe chanchin chu a zawh fiahtîr a. Tin, “Eliama fanu, Bathsebi, Hit mi Uria nupui a ni lâwm ni?” an ti a. 4 Tin, Davida chuan mi a tîr a, an hruai ta a; tin, a hnên chu a va thleng a, a lo mutpui ta a (a fel loh loh lai tak a ni a); tin, a in lamah a haw leh ta a. 5 Tichuan, hmeichhia chu a lo rai ta a; tin, “Nau ka pai ta,” tiin Davida chu a hrilhtîr a. 6 Tin, Davida chuan Joaba hnênah, “Hit mi Uria chu ka hnênah han kaltîr rawh,” tiin a chah a. Tin, Joaba chuan Uria chu Davida hnênah a kaltîr a. 7 Tin, Urian a hnên a han thlen chuan, Davida chuan Joaba leh mite chu eng nge an ana, indonaahte eng nge an an tih a zâwt a. 8 Tin, Davida chuan Uria hnênah, “I in lamah haw la, i kete zuk sil rawh,” a ti a. Chutichuan, Uria chu lal in ata chu a chhuak a; tin, lal chuan ei tûrtein a ûmzui a. 9 Nimahsela, Uria chu a pu chhiahhlawhhote zîngah lal in kawngkhâr bulah chuan a mu ve ta mai a, a in lamah chuan a haw ta lo va. 10 Tin, Davida chu, “Uria chu a in lamah a haw lo,” tiin an han hrilh veleh chuan Davidan Uria hnênah, “Khawilo ni hâwng i ni lâwm ni? Engati nge i in lamah i hâwn loh?” a ti a. 11 Tin, Uria chuan Davida hnênah, “Pathian bâwm te, Israel-te leh Juda-te chu bûkah an awm a; tin, ka pu Joaba leh ka pu mite chu ramhnuaiah an inkulh a; kei ka inah hâwngin ka eiin ka in ang a, ka nupui hnênah ka mu bîk ang maw? I nunna leh i thlarau nunna chhâlin ka sawi e, chu chu ka ti lo tawp ang,” a ti a. 12 Tin, Davida chuan Uria hnênah, “Vawiinah pawh hetah awm la, naktûkah i kal dâwn nia,” a ti a. Chutichuan, Uria chu Jerusalem-ah chuan chumi ni leh a tûkah pawh chuan a awm ta a. 13 Tin, Davida chuan a ko va, a hmaah chuan a eiin a in a, a tirui ta dêr mai a; tin, tlai lamah chuan a in lamah haw lovin a pu chhiahhlawhte zîngah mu tûr chuan a chhuak ta a. 14 Tin, heti hi a ni a, a tûk zîngah chuan Davida chuan Joaba chu lehkha a thawn a, Uria chu a kentîr a. 15 Tin, lehkhaah chuan, “Uria chu râl zualna lai berah hmatâwntîr ula, an thaha a thih hlauh nân thlahthlam rawh u,” tiin a ziak a. 16 Tin, heti hi a ni a, Joaban khua chu a hual vêl lai chuan mi huai huai awmna nia a hriatah chuan Uria chu a ṭantîr a. 17 Tin, khuaa mite chu an chhuak a, Joaba chu an bei a, mi ṭhenkhat, Davida mite zînga mi ngei chu an thi a; tin, Hit mi Uria pawh a thi a. 18 Chutichuan, Joaba chuan mi a tîr a, indo chungchâng thu lam zawng zawng chu Davida a hrilh a; 19 tin, a mi tirh chu, “Lal hnêna indo chanchin zawng zawng i sawi zawha, 20 a thin a ur thut maia, ‘Engati nge bei tûra chutianga khaw bul lawka in kal mai? Kulh aṭangin an kâp mai ang che u tih in hre lâwm ni? 21 Jerubesetha fapa Abimeleka kha tuin nge that kha? Buh râwt sawmna lung chungnung zâwk, hmeichhiain kulh aṭangin a chungah a zuk thlâk a. Thebez-ah khân a thi a ni lâwm ni? Engati nge chutianga kulh bul lawka in kal ni?’ a tih chuan, ‘I chhiahhlawh Hit mi Uria pawh kha a thi asin,’ ti ang che,” tiin a hrilh a. 22 Chutichuan, a mi tirh chu a kal ta a, a va thleng a, Joaban a tirh chhan zawng zawng chu Davida a hrilh a. 23 Tin, a mi tirh chuan Davida hnênah, “Mite chuan min rawn nawr a, phûlah min rawn bei a; tin, keinin an khaw luhna kawngkhâr thleng rawkin kan nawr ta a. 24 Tin, kâptute chuan kulh aṭangin i chhiahhlawhte chu an kâp a; tichuan, lal chhiahhlawh ṭhenkhatte an thi a; tin, i chhiahhlawh Hit mi Uria pawh kha a thi asin,” a ti a. 25 Chutichuan, Davida chuan a mi tirh hnênah chuan, “Joaba hnênah chuan heti hian va ti rawh, ‘Hêng hian i rilru tilâwm lo chuang suh se, khandaih chuan a tua mah a thlei si lo; nasa lehzualin khua chu bei ula, tichhe rawh u,’ tiin fuih rawh,” a ti a. 26 Tin, Uria nupui chuan a pasal Uria a thi tih a lo hriat chuan a pasal chu a sûn a. 27 Tin, a sûn hun bi a pelh hnu chuan Davida chuan a in lamah a hruaitîr a, a nupuiah a nei ta a, fapa a hrinsak a. Nimahsela, Davida thiltih chuan LALPA a tilungni lo va.
Nathana leh Davida
1 Tin, LALPA chuan Davida hnênah Nathana a tîr a. Tin, a hnênah chuan a kal a, “Khaw pakhatah hian mi pahnih an awm a: pakhat chu mi hausa a ni a, pakhat chu mi rethei a ni a. 2 Mi hausa chuan berâm rual tam tak leh ran rual tam tak a nei a; 3 mi rethei erawh chuan berâmno, a nu, tê tak tê a lei, a vulh pakhat chauh lo chu eng mah a nei lo va; a hnênah a fate nêna ṭhang lian a ni a. A thlêng zenpui leh a no ṭâwmpui, a ângchhûnga awm, a fanu ang chiaha a ngaih a ni. 4 Tin, mi hausa hnênah chuan khualzin pakhat hi a va thleng a; tin, a hnêna mikhual lo thleng chu ama berâm leh ran chu talh phal lovin, mi rethei berâmno chu a chhuhsak a, a hnêna lo kal pa chu a talh a,” a ti a. 5 Tichuan, Davida chu chu mi chungah chuan a thinur ta viau mai a; Nathana hnênah chuan, “LALPA nunna chhâlin ka sawi e, chu thil titu chu tihhlum mai tlâk a nih chu! 6 Tin, hetiang thil a tih avâng leh khawngaihna a neih loh avângin a berâmno chu a leh liin a rul tûr a ni ang,” a ti a. 7 Chutichuan, Nathana chuan Davida hnênah, “Nangmah hi i ni alâwm! LALPA, Israel-te Pathian chuan heti hian a ti: ‘Israel-te lal atân hriak ka thih chia, Saula kut ata ka chhanchhuak chia; 8 tin, i pu in ro chu ka luahtîr chia, i pu nupuite chu i ângchhûngah ka dah a; tin, Israela chhûngte leh Juda chhûngte chu ka pe chia; tin, chûng chu a la tlêm luattuk chuan thil dangte pawh ka pêk belh tûr che alâwm. 9 Engati nge LALPA thu chu ngainêpa, a mit hmuha thil ṭha lo i tih mai? Hit mi Uria chu khandaihin i tihlum a, a nupui chu i nupui atân i neihsak a, Amona thlahte khandaihin ani chu i that a. 10 Chu vâng chuan khandaih chuan i chhûngte chu a kiansan tawp lo vang; nang chuan mi ngainêpin Hit mi Uria nupui chu i nupui atân i chhuhsak ta si a.’ 11 LALPA chuan heti hian a ti a ni: ‘Ngai teh, nangma chhûngkaw zîng aṭang ngeiin i chungah thil ṭha lo ka chhuahtîr ang a, i mit hmuh ngeiah i nupuite chu ka lâksak ang chia, i vêngte ka pe ang a, chhûn ênah i nupuite an mutpui ang. 12 Nang chuan a rûkin i ti a, kei erawh chuan Israel mite zawng zawng mit hmuhah chhûn ênah ka ti ang,’ ” a ti a. 13 Tin, Davida chuan Nathana hnênah, “LALPA chungah thil ka tisual ta a ni,” a ti a. Tin, Nathana chuan Davida hnênah, “LALPA pawhin i sual chu a dah bo ve ta e; i thi lo vang. 14 Amaherawhchu, he i thiltih hian Pathian sawichhiatna remchâng tak LALPA hmêlmate tân i siam avângin naupang i laka piang chu a thi ngei ngei ang,” a ti a. 15 Tichuan, Nathana chuan a in lamah a hâwnsan ta a.
Davida fa thih thu
Tin, Uria nupuiin Davida a hrinsak chungah chuan LALPAN a kut a thlâk a, a damlo ta hle a. 16 Chutichuan, Davidan naupang tân chuan Pathian hnênah a ngên chiam a; tin, Davida chuan chaw te a nghei a, a lût a, zankhuain leiah a mu a. 17 Tin, a chhûngte zînga upate chu an tho va, lei ata chu kai tho tûrin a kiangah an ding a; nimahsela, a tho duh lo va, an hnênah pawh chaw a ei hek lo. 18 Tin, heti hi a ni a, a ni sarih ni chuan naupang chu a thi ta a. Tin, Davida chhiahhlawhte chuan naupang chu a thi ta tih hrilh chu an hlau va, “Ngai teh, naupang a la dam lai khân a hnênah thu kan sawi a, a ngaithla duh si lo va, naupang chu a thi ta tih engtin nge kan hrilh ngam ang? Eng emaw tiin a inti mai ang e,” an ti a. 19 Nimahsela, Davidan chutia a chhiahhlawhte inbe ruho a hmuh chuan, Davida chuan naupang chu a thi ta a ni tih a hre ta a; tin, Davida chuan a chhiahhlawhte hnênah, “Naupang chu a thi ta elo?” a ti a. Tin, anni chuan, “Thi ta,” an ti a. 20 Chutichuan, Davida chu lei ata chu a tho va, a insil a, hriak a inthih a, a puante a inthlâk a; tin, LALPA inah a kal a, Pathian chibai a bûk a; tin, a in lamah a kal leh a; tin, chaw a han lam a, a hmaah chuan an hlui a, a lo ei ta a. 21 Chutichuan, a chhiahhlawhte chuan a hnênah, “I thiltih dân hi engtizia nge ni? Naupang chu a dam lai khân chaw te i nghei a, i ṭap a; nimahsela, naupang chu thi ta chêng a, i tho va, chaw te i ei ta zâwk mai si a,” an ti a. 22 Tin, ani chuan, “Naupang chu a la dam lai khân chaw te ka ngheiin ka ṭap tak a; ‘Naupang chu a dam theih nân LALPA chuan mi khawngaih mahna, tu nge hria ang i?’ ka ti a ni a. 23 Nimahsela, tûnah chuan a thi ta si a, engah nge chaw ka nghei tawh ang? Ka ko kîr leh thei dâwn em ni? A hnênah keimah hi ka la kal ang a; nimahsela, ani zawng ka hnênah a lo kîr leh tawh lo vang,” a ti a.
Solomona a piang
24 Tichuan, Davida chuan a nupui Bathsebi chu a thlamuan a, a hnênah a lût a, a mutpui a; tin, fapa a hring a, a hmingah Solomona a sa a. Tin, ani chu LALPAN a hmangaih a; 25 tin, zâwlnei Nathana chu a chahtîr a; tin, ani chuan LALPA chawiin a hmingah chuan Jedidia a sa a.
Davidan Raba a la
26 Chutichuan, Joaba chuan Amona thlahte khawpui Raba a rûn a, khawpui chu a la a. 27 Tin, Joaba chuan Davida hnênah mi a tîr a, “Raba chu ka rûn a, a ni, tuite khawpui chu ka la ta asin. 28 Chutichuan, mi la awm zawng zawng chu khâwm la, khawpui chu beih tumin ep la, la rawh; keimahin khawpui chu ka lâk zawngin ka hming a pu mai dah ang e,” a ti a. 29 Chutichuan, Davida chuan mi zawng zawng chu a khâwm a, Raba-ah chuan an kal a, an va rûn a, an la ta a. 30 Tin, an lal lallukhum khum lai chu a lâksak a, a rih lam chu rangkachak talent bûk a ni a, lunghlute pawh a tel a; tin, Davida an khumtîr a. Tin, khawpuia mi râllâk sum tam tak a la a. 31 Tin, mipuite chu a kawi chhuak a, thingzaina te, leilehna thîr zum te, thîr hreipui te hmangin hna an thawhtîr a, leirawhchante an siamtîr a. Amona thlahte khawpui zawng zawng chu chutiang chuan a ti a. Tin, Davida leh mi zawng zawng chu Jerusalem-ah an haw leh ta a.
Amnona leh Tamari
1 Tin, chumi hnuah chuan heti hi a ni a, Davida fapa Absaloma chuan farnu hmêlṭha tak a nei a, a hming chu Tamari a ni a. Tin, Davida fapa Amnona chuan ani chu a hmangaih a. 2 Tichuan, Amnona chu a farnu Tamari avâng chuan a buai ta hle a, a damlo ta a; ani lah chu nula thianghlim a ni si a. A chunga thil eng emaw han tih chu Amnona tân chuan khirh tak a ni. 3 Amaherawhchu, Amnona chuan ṭhian a nei a, a hming chu Jonadaba a ni a, Davida unaupa Simea fapa a ni. Jonadaba chu mi fing vervêk tak a ni. 4 Tin, a hnênah, “Aw, nang lal fapa hi engtizia nge a ni têla i chêr telh telh chu le? Mi hrilh duh dâwn lâwm ni?” a ti a. Tin, Amnona chuan a hnênah, “Ka unaupa Absaloma farnu Tamari hi ka hmangaih miau mai a ni,” a ti a. 5 Tin, Jonadaba chuan a hnênah, “I khumah mu reng la, damlo der la; tin, i pain a rawn en hunah che a hnênah, ‘Khawngaih takin ka farnu Tamari chu ka hnênah lo kal sela, chhang ei tûr mi rawn pe sela; tin, ka hmuh theihah, ka mit hmuh ngeiah ei tûr mi siamsak teh se, a kuta mi ngei ka lo ei ang e,’ lo ti ang che,” a ti a. 6 Chutichuan, Amnona chu a mu a, a damlo der ta a; tin, lalin a va en chuan Amnona chuan lal hnênah, “Khawngaih takin ka farnu Tamari lo kal sela, ka mit hmuh ngeiah hian chhangpêr pahnih emaw mi siam sela, ama kuta mi ngei ka lo ei ang e,” a ti a. 7 Chutichuan, Davida chuan Tamari hnênah, “I nuṭa Amnona in lamah kal la, ei tûr va siamsak rawh khai,” tiin mi a tîr a. 8 Chutichuan, Tamari chu a nuṭa Amnona in lamah chuan a kal a; tin, ani chu a lo mu reng a. Tin, chhang diak a la a, a hmet a, a mit hmuhah chhangpêr chu a siam a, a ur a. 9 Tin, a urna chu a la a, a hmaah chuan a bun a; nimahsela, a ei duh lo va. Tin, Amnona chuan, “Mi zawng zawng hian mi chhuahsan vek rawh se,” a ti a. Tichuan, an chhuahsan ta vek a. 10 Tin, Amnona chuan Tamari hnênah, “I kuta mi ngei ka ei theih nân ei tûr chu pindanah hian han la tawh rawh le,” a ti a. Tin, Tamari chuan a chhangpêr siamte chu a la a, a nuṭa Amnona hnênah pindanah chuan a la lût a. 11 Eitîr tûra a kiang hnaia a va kalpui chu a lo man a, a hnênah, “Ka farnu, lo mu ve teh,” a ti a. 12 Tin, ani chuan a chhâng a. “Ni lo ve a, ka nuṭapa, mi tilui suh, Israel-te zîngah hetiang thil hi tih tûr a ni lo ve. He thil sual âtthlâk tak hi ti suh khai. 13 Tin, kei hian ka mualphona chu khawiah nge ka thangpui ang? Tin, nang pawh Israel-te zînga mi âa ngaih i lo ni mai ang asin. Chuvângin, lal be zâwk rawh khai, i mi neih chu a hnial lo vang e,” a ti a. 14 Nimahsela, a thu chu a pawm lo va, amah aiin a chak zâwk si a, a tilui a, a mutpui ta a. 15 Chutichuan, Amnona chuan huat namênlohvin a haw leh ta si a; a huatna chu amah a hmangaih laia a hmangaihna ai maha nasain a ni a huat ni. Tichuan, Amnona chuan a hnênah, “Tho la, kal daih mai rawh,” a ti a. 16 Tin, ani chuan a hnênah, “Chuti tûr chu ni lo ve! Hetianga dik lo taka mi tihchhuah hi ka chunga i tih tâk ai mah khân a ṭha lo zâwk a ni,” a ti a. Nimahsela, a pawm duh chuang lo va. 17 Chutichuan, a rawngbâwltu a chhiahhlawh chu a ko va, “He hmeichhia hi ka hnên ata chhuahtîr la, kawng kalh hnan tlat rawh,” a ti a. 18 Tamari chuan kawrfual ze hrang hranga zia a ha a; chutiang kawrfual chu lal nula thianghlimten an ha ṭhîn a. Chutichuan, a chhiahhlawh chuan a hruai chhuak a, kawng a kalh hnan ta tlat a. 19 Tin, Tamari chuan a luah vut a phul a, a kawrfual, ze hrang hranga zia a hâk chu a pawt thlêr a, a chhîpah a kut a dah a, ring taka ṭap chung zêlin a kal ta a. 20 Tin, a nuṭa Absaloma chuan a hnênah, “I nuṭa Amnona chu i hnênah a lo lût a ni maw? Nimahsela, ngawi mai rawh, ka farnu. I nuṭa a ni alâwm, engto duh suh,” a ti a. Chutichuan, Tamari chu a nuṭa Absaloma inah ngui takin a inkhung ta tlat mai a. 21 Nimahsela, Lal Davidan chûng thil zawng zawng chu a han hriat chuan a thinrim ta hle mai a. 22 Tin, Absaloma chuan Amnona hnênah a chhia a ṭha, a enga mah a sawi duh lo va; Absaloma chuan a farnu Tamari a tihluih avângin Amnona chu a haw hle a ni.
Absaloman phuba a la
23 Tin, heti hi a ni a, kum hnih pumhlûm a ral hnu chuan Ephraim kianga Baal-hazor-ah Absaloman berâm hmul a mehtîr a; tin, Absaloma chuan lal fapate zawng zawng chu a sâwm a. 24 Tin, Absaloma chu lal hnênah a kal a. “Ngai teh, i chhiahhlawhin berâm hmul a mehtîr a, lal leh a chhiahhlawhte chu i chhiahhlawh hnênah hian kal ve ang hmiang,” a ti a. 25 Tin, lal chuan Absaloma hnênah, “Ni lo ve, kan tihautak lutuk dah ang che,” a ti a. Tin, ani chuan a sâwm lui chiam a; nimahsela, a kal duh chuang lo va, mal erawh chu a sâwm a. 26 Chutichuan, Absaloman, “A nih loh leh ka unaupa Amnona tal kan hnênah kal ang hmiang,” a ti a. Tin, lal chuan a hnênah, “Engah nge a kal bîk ang?” a ti a. 27 Nimahsela, Absaloma chuan Amnona leh lal fapate zawng zawng tal chu a hnêna kal ve tûrin a ngen ṭâlh a. 28 Tin, Absaloma chuan a chhiahhlawhte chu, “Ngai teh u, Amnona uain ina a hlim laiin in hnênah, ‘Amnona chu that rawh u,’ ka tih che u chuan, that ula, hlau suh u, thu ka pe tawh che u a ni lâwm ni? Intihuai ula, intipasalṭha ang che u,” tiin thu a pe a. 29 Chutichuan, Absaloma chhiahhlawhte chuan Amnona chungah Absaloma thupêk ang chuan an ti a. Chutichuan, lal fapate zawng zawng chu an tho va, an sabengtung chungah an chuang ṭheuh va, an tlân bo ta a. 30 Tin, heti hi a ni a, kawnglaka an la awm laiin, “Absaloman lal fapate zawng zawng chu a that ta vek mai a, pakhat mah a zuah lo,” tiin Davida hnênah chanchin a lo thleng a. 31 Chutichuan, lal chu a tho va, a silhfênte a pawt thlêr a, leiah a mu ta a; tin, a chhiahhlawh zawng zawngte chu an silhfênte pawt thlêrin a kiangah an ding a. 32 Tin, Davida unau Simea fapa Jonadaba chuan a chhâng a, “Ka pu chuan lal fapa tlangvâl zawng zawngte chu an that vek a ni tih ring suh se, Amnona chauh a ni thi ni; a farnu Tamari a tihluih achin kha Absaloma chuan hetianga tih hi a tum rêng a ni. 33 Chuvângin, ka pu lalpa chuan lal fapate zawng zawng chu an thi emaw tih ringin engto suh se, Amnona chauh a ni thi ni,” a ti a. 34 Absaloma erawh chu a tlân bo ta a. Tin, a râl vêngtu tlangvâl chuan a mit a lên a, a han en a; tin, ngai teh, a hnung lama tlâng panga kawngah chuan mi tam tak an lo kal a. 35 Tin, Jonadaba chuan lal hnênah, “Ngai teh, lal fapate chu an lo kal e; i chhiahhlawhin a sawi ang chiah kha a ni ngei mai,” a ti a. 36 Tin, heti hi a ni a, a sawi zawh veleh chuan ngai teh, lal fapate chu an lo thleng a, an aw chhuah meuhvin an ṭap a; tin, lal pawh chu a chhiahhlawhte nên chuan an ṭap ta vak vak mai a. 37 Absaloma erawh chu a tlân bo va, Gesur lal Amihuda fapa Talmaia hnênah a kal a. Tin, Davida chuan ni tin a fapa chu a sûn a. 38 Chutichuan, Absaloma chu a tlân bo va, Gesur ramah a kal a, chutah chuan kum thum a va awm a. 39 Tin, Lal Davida chuan Absaloma hnêna kal a châk êm êm a. Amnona chungchâng thu-ah chuan a thlamuang ta a, ani chu a thi tawh si a.
Joaban Absaloma hruai kîr leh a tum
1 Chutichuan, Zeruii fapa Joaba chuan lal rilru chu Absaloma chungah a chêng tih a lo hria a. 2 Tichuan, Joaba chuan Tekoa khuaah mi a tîr a, chuta hmeichhe fing pakhat chu a va hruaitîr a, a hnênah, “Lusûn angah insiam la, lusûn puan sin la, sahriak pawh inthih lovin, hmeichhia rei tak mitthi sûn angin awm rawh. 3 Tin, lal hnênah kal la, a hnênah hetiang hian thu va sawi ang che aw,” a ti a. Chutichuan, Joaba chuan thu a fah a. 4 Tin, Tekoa khuaa hmeichhia chuan lal hnêna thu a sawi dâwn chuan hmaia lei siin a bawkkhup a, chibai a bûk a, “Aw lalpa, min pui rawh,” a ti a. 5 Tin, lal chuan a hnênah, “Engtizia nge ni le?” a ti a. Tin, ani chuan a chhâng a, “Hmeithai ka ni taktak a, ka pasal chu a thi tawh a. 6 Tin, i bawihnu hian fapa pahnih a nei a; an pahnih chuan lovah an insual a, tu mah ṭhelhtu an awm si lo va, a pakhat chuan pakhat chu a vua a, a tihlum ta a. 7 Tin, ngai teh, an chhûngkua zawng zawng chuan i bawihnu hi an do rawn a, ‘A unaupa thattu chu a unaupa a thah avânga kan thah ve theih nân min pe rawh khai; tichuan, ro luahtu tûr pawh kan tiboral ang,’ an ti a; chutiang chuan ka meiling la awma chu an timit ang a, ka pasal chu hming nei lo leh lei chungah thlah rêng rêng nei lovin a awm mai dâwn a ni,” a ti a. 8 Tin, lal chuan hmeichhe hnênah chuan, “I inah haw la, i chungchâng thu-ah chuan thu ka pe mai ang,” a ti a. 9 Tin, Tekoa khuaa hmeichhia chuan lal hnênah chuan, “Aw lalpa, ka pu, bawhchhiatna mawh chu ka chungah leh ka pa chhûngte chungah tla mai rawh se; tin, lal leh lalṭhutthlêng chuan mawh phur suh se,” a ti a. 10 Tin, lal chuan, “Tu pawh i chungah eng emaw sawi apiang chu ka hnênah rawn hruai la, an tawk leh tawh hlek lo vang che,” a ti a. 11 Tin, ani chuan, “Thisen chhuahtute chungah phuba latuten tiboral tawh lo tûrin lal chuan LALPA i Pathian chu hre reng rawh se aw; chuti lo zawng, ka fapa hi an tiboral dah ang e,” a ti a. Tin, ani chuan, “LALPA nunna chhâlin ka sawi e, i fapaa sam zai khat pawh leiah hian a tla lo vang,” a ti a. 12 Chutichuan, hmeichhia chuan, “I bawihnu hian lalpa ka pu hnênah thu kam khat chauh han sawi leh teh se aw,” a ti a. Tin, ani chuan, “Sawi ta che,” a ti a. 13 Tin, hmeichhia chuan, “A nih leh eng vângin nge Pathian mite dodâla hetianga tih i tum? Hêng thu aṭang hian lal chu thiam loh chang angin a lang a ni, lal chuan a mi, tlân bova chu a hruai hâwn si loh avângin. 14 Kan thi ngei ngei tûr a ni a; tin, tuisik leia baw hnu ruh theih tawh loh ang hi kan ni a. Pathianin nunna hi a la bo a ni lo va, tlân bova chu a laka mi hrang a nih loh nân rem a ruat a ni zâwk a ni. 15 Chutichuan, lalpa ka pu hnêna he thu sawi tûra ka lo kal pawh hi mi ka hlauh vâng a ni a. Tin, i bawihnu chuan, ‘Lal hnênah ka sawi phawt ang a, lal chuan a bawihnu dîlna chu a hlawhtlintîr mahna. 16 Lal chuan kei leh ka fapa hi Pathian ro luah lo tûra tihboral tumtu laka i bawihnu hi chhanchhuak tûrin a lo ngaihthlâksak ang chu,’ ka ti a. 17 Chutichuan, i bawihnu tân hian lalpa ka pu thu chu thlamuanawm tak ni sela, a chhia a ṭha lo thlei tûrin lalpa ka pu chu Pathian vântirhkoh ang mai a ni si a. Tin, LALPA Pathian chu i hnênah awm rawh se ka ti a ni,” a ti a. 18 Tin, lal chuan a chhâng a, hmeichhe hnênah chuan, “Ka zawh apiang che chu ka lakah eng mah zêp suh ang che aw,” a ti a. Tin, hmeichhia chuan, “LALPA ka pu chuan sawi ang hmiang,” a ti a. 19 Tin, lal chuan, “Hêng thu-ah rêng rêng hian Joaban telna a nei em?” a ti a. Tin, hmeichhia chuan a chhâng a, “LALPA ka pu, i thlarau nunna chhâlin ka sawi e, lalpa ka puin a sawi tawh chu tu mahin ding lamah emaw, vei lamah emaw an pumpelh thei lo vang. I chhiahhlawh Joaba chuan mi tîr a, hêng thu zawng zawng hi i bawihnu a fah vek a ni. 20 Thil awm dân tidanglam tûrin hêng thil hi i chhiahhlawh Joaba chuan a tih a ni; tin, ka pu chu khawvêla thil awm zawng zawng hre theiin Pathian vântirhkoh ang maiin a fing a ni,” a ti a. 21 Tin, lal chuan Joaba hnênah, “Ngai teh, he thil hi ka remti ta e: va kal la, tlangvâl Absaloma chu va hruai leh rawh le,” a ti a. 22 Tin, Joaba chu hmaia lei siin a bawkkhup a, chibai a bûk a, lal chu mal a sâwm a. Tin, Joaba chuan, “Aw lalpa ka pu, lalpa chuan a chhiahhlawh dîlna chu a hlawhtlintîr avângin, vawiinah hian i chhiahhlawh hian i mit ka tlung tih ka lo hre ta,” a ti a. 23 Chutichuan, Joaba chu a tho va, Gesur-ah chuan a kal a, Absaloma chu Jerusalem-ah a hruai ta a. 24 Tin, lal chuan, “Ama in lamah kal sela, ka hmêl chu rawn hmu suh se,” a ti a. Chutichuan, Absaloma chu ama in lamah chuan a kal a, lal hmêl chu a hmu ta lo va.
Absaloma leh Davida an inrem leh ta
25 Israel zawng zawng zîngah Absaloma ang rênga hmêlṭhata fak kai tu mah an awm lo va. A ke lêr aṭangin a chhîp thlengin sawisêlna rêng rêng a awm lo va. 26 A lu a meh chuan (kum vei apiangin a mêt ṭhîn a, a sam chu a rih êm ṭhin avângin a mêt ṭhîn a ni) a sam chu a bûk ṭhîn a, lal bûk dâna sekel hnih a tling ṭhîn a ni. 27 Tin, Absaloma chuan fapa pathum leh fanu pakhat a nei a, a fanu hming chu Tamari a ni a, hmeichhe hmêlṭha tak a ni. 28 Chutichuan, Absaloma chu kum hnih pumhlûm Jerusalem-ah a awm a; nimahsela, lal hmêl rêng rêng chu a hmu lo va. 29 Chutichuan, Absaloma chuan lal hnêna tirh atân Joaba chu a chah a; nimahsela, a kal duh lo va. Tin, a chah nawn leh a, a kal duh chuang lo va. 30 Chutichuan, a chhiahhlawhte hnênah, “I e u, Joaba lo chu ka lo kiang a ni a, barli a nei a, va hâl rawh u,” a ti a. Tichuan, Absaloma chhiahhlawhte chuan lo chu an va hâl ta a. 31 Chutichuan, Joaba chu a tho va, Absaloma hnênah a inah a kal a, a hnênah, “Eng vângin nge i chhiahhlawhten ka lo an hâl?” a ti a. 32 Tin, Absaloma chuan Joaba chu a chhâng a, “Ngai teh, ‘Eng atân nge Gesur aṭangin ka lo kal? Chutah chuan awm reng ila ka tân a ṭha zâwk tûr,’ tia lal hnêna tirh atân ka chah chia. Chuvângin, lal hmêl chu mi hmuhtîr rawh khai; tin, bawhchhiatna nei ka lo nih chuan mi tihlum mai ang hmiang,” a ti a. 33 Chutichuan, Joaba chu lal hnênah chuan a kal a, a hrilh a. Tin, Absaloma chu a ko va, lal hnênah a kal a, lal hmaah chuan hmaia lei siin a bawkkhup a. Tin, lal chuan Absaloma chu a fâwp a.
Absaloman hel zai a rêl
1 Tin, heti hi a ni a, chûng thil hnuah chuan Absaloma chuan tawlailîr leh sakawrte leh mi sawmnga a hmaa tlân tûrin a buatsaih a. 2 Tin, Absaloma chu zînga takah a tho va, kulh kawngkhâr kawngah chuan a lo ding ṭhîn a; tin, lal hnêna thupawi rawn sawi tûr apiangte chu Absaloma chuan a lo ko va, “Khawii khua nge i nih?” a lo ti zêl ṭhîn a. Tin, “I chhiahhlawh hi Israel hnamte zînga hnam pakhat ka ni,” an ti zêl ṭhîn a. 3 Tin, Absaloma chuan, “I e, i thu chu a ṭhain a dik a; nimahsela, ngaihtuahtu tûr lalin tu mah a ruat lo,” a lo ti ṭhîn a. 4 Tin, Absaloma vêk chuan, “Mi tin, thupawi sawi tûr nei emaw, dîl tûr nei emaw apiang chu ka hnênah an lo kalna tûrin, kei hi hemi ram rorêltuah mi siam sela ka va ti êm ve aw! Chutichuan, fel takin ka rêlsak ṭhîn tûr,” te a lo ti bawk ṭhîn a. 5 Hetiang pawh hian a ti a, tu pawh amah chibai bûk tûra han hnaih apiangte chu a lo ban a, a chelh a, a lo fâwp ṭhîn a. 6 Chutichuan, Israel mi, lal hnêna thusawi tûra lo kal apiangte chu Absaloma chuan chutiang chuan a lo ti zêl ṭhîn a. Chutichuan, Absaloma chuan Israel mite thinlung chu a hîpsak a. 7 Tin, heti hi a ni a, kum li a lo vei chuan Absaloma chuan lal hnênah, “Hebron khuaa LALPA hnêna ka thutiam hlen tûrin mi kaltîr rawh khai. 8 I chhiahhlawh hian Suria rama Gesur-a ka awm lai khân, ‘LALPAN Jerusalem-a mi hruai leh phawt chuan LALPA rawng ka bâwl ang,’ tiin thu ka lo tiam tawh a ni,” a ti a. 9 Tin, lal chuan a hnênah, “Thlamuang takin kal rawh khai,” a ti a. Chutichuan, a tho va, Hebron-ah chuan a kal ta a. 10 Nimahsela, Absaloma chuan, “Tawtawrâwt ri in hriat veleh, ‘Absaloma chu Hebron-ah lal a ni,’ ti ang che u,” tiin Israel hnam zawng zawngte hnênah mi a tîr ru ta hlauh va. 11 Tin, Absaloma hnênah chuan a mi sâwm, mi zahnih Jerusalem aṭangin an kal ve a, rilru ṭha tak puin an kal a, eng mah an hre ve lo. 12 Tin, Absaloma chuan inthawinate chu a hlan laiin, Gilon mi Ahithophela, Davida rorêlpui chu, a khua Gilo ata a chah a. An thu phiar chu a nasa hle mai a; Absaloma lamah chuan mipuite chu an pung tulh tulh mai si a.
Jerusalem aṭangin Davida a râltlân
13 Tin, Davida hnênah chuan, “Israel mite rilru chu Absaloma lamah a thle hle mai,” tiin mi a lo kal a. 14 Tin, Davida chuan Jerusalem-a a ṭhuihruai zawng zawngte hnênah chuan, “Tho ula, i tlân chhuak ang u, tu mah Absaloma lakah hian kan chhuak thei âwm si lo va. Chhuak thuai rawh u khai; chuti lo zawng, min rawn ûmphâk thuai mai ang a, kan chungah hian thil ṭha lo tak a rawn thlen ang a, khandaihin khua hi a rawn bei dah ang e,” a ti a. 15 Tin, lal mite chuan lal hnênah, “Ngai teh, i chhiahhlawhte hi kan pu, kan lalin a ruat apiang ti tûrin kan inpeih reng e,” an ti a. 16 Tin, lal chu a chhuak a, a chhûngte zawng zawngin an zui a. Tin, lal chuan in nghâk tûrin hmeichhe sâwm, hmeihote chu a dah a. 17 Tin, lal chu a chhuak a, mipui zawng zawngte chuan an zui a; tin, Beth-merhak-ah an châwl rih a. 18 Tin, a mi zawng zawngte chuan an kal pêl a; tin, Kerith mi zawng zawng te, Peleth mi zawng zawng te, Git mi zawng zawng te, mi zaruk Gath aṭanga amah rawn zuitute chuan lal chu an bêl zêl a. 19 Chutichuan, lal chuan Git mi Itaia hnênah chuan, “Engtizia nge nang hi i lo kal ve? Kîr leh la, lal hnênah awm rawh. Nang chu mikhual, ram danga mi i ni bawk si a, nangma hmun lamah kîr leh rawh khai. 20 Nimin lawka lo kal i ni, vawiinah hian kan hnêna a chhuk a chhova min zui tûrin ka tih ve tûr che i ni em ni? Ka kal theih theihnaah ka kal dâwn a ni a; nang chu kîr leh la, i unaute zawng zawng hi hruai kîr rawh. Khawngaihna leh thutak i hnênah awm rawh se,” a ti a. 21 Tin, Itaia chuan lal chu a chhâng a, “LALPA nunna leh lal, ka pu nunna chhâlin ka sawi e, lal, ka pu hi i awmna tawh phawtah chuan, thih leh thih a ni ang a, dam leh dam a ni ang a, i chhiahhlawh hi a awm ve zêl ang,” a ti a. 22 Tin, Davida chuan Itaia hnênah chuan, “Kal ula, kal zêl rawh u le,” a ti a. Tichuan, Git mi Itaia chu a mite zawng zawng leh an fanau zawng zawngte nên chuan an kal a. 23 Tin, ring takin a ram ṭahin an ṭap a, mipuite chu an kal vek a; thlalêr kawng lam panin lal pawh chuan Kidron lui chu a kân a; tin, mipui zawng zawngte chuan an kân bawk a. 24 Tin, Zadoka te chu Pathian thuthlun bâwm zâwnin Levi-ho zawngte nên a hnênah an kal ve a; Pathian bâwm chu an nghat a, mipuiin khua chu an chhuahsan kim vek thlengin Abiathara chu a han chho va. 25 Tin, lal chuan Zadoka hnênah, “Pathian bâwm chu khawpui chhûngah zâwn haw leh rawh u. LALPA mit tlunga ka awm chuan mi hruai haw leh ang a, Pathian bâwm leh a awmna chu mi hmuhtîr leh ang. 26 Amaherawhchu, ‘Nangmahah lâwmna rêng ka nei lo,’ a tih chuan ngai teh, heti mai hi ka ni a, ṭha a tih ang angin ka chungah hian ti mai rawh se,” a ti a. 27 Lal chuan puithiam Zadoka hnênah chuan, “Hmutheitu i ni lâwm ni? I fapate pahnih, i fapa Ahimaaza leh Abiathara fapa Jonathana nên thlamuang takin khawpuiah haw leh rawh u. 28 Ngai teh, kei chu chanchin mi rawn hriattîr hma loh chu thlalêra lui kaiahte hian ka lo awm ang e,” a ti a. 29 Chutichuan, Zadoka leh Abiathara chuan Pathian bâwm chu Jerusalem-ah an kalpui leh a; tin, chutah chuan an awm ta a. 30 Chutichuan, Davida chu Olive tlâng chhohnaah chuan a lâwn chho va, chhoh pah chuan a ṭap zêl a; a lu a khum a, ke lâwngin a kal a. Tin, a hnêna mi awm zawng zawngte chuan lu an khum ṭheuh va, ṭap chung zêlin an chho va. 31 Tin, tuin emaw Davida chu, “Ahithophela chu Absaloma lamah ṭangin phiartute zîngah a tel ve,” tiin a hrilh a. Tin, Davida chuan, “Aw LALPA, Ahithophela remruat chu âtnaah chantîr tûrin ka ngên a che,” a ti a. 32 Tin, heti hi a ni a, Davida chu Pathian biakna tlâng chhîp a han lâwn chhuah chuan, ngai teh, Ark mi Husaia chu a kawr pawh thlêr haa, a lua lei kai luamin amah hmuak tûrin a lo kal a. 33 Tin, Davida chuan a hnênah, “Ka hnêna i kal ve chuan ka tân phurrit i ni mai ang a. 34 Amaherawhchu, khawpui lamah chuan i kîra, Absaloma hnêna, ‘Aw lalpa, i chhiahhlawhah ka awm ang e, tûn hma lama i pa chhiahhlawha ka awm ang khân tûnah hian i chhiahhlawhah ka awm tawh thung ang e,’ i va tih erawh chuan Ahithophela remruat mi dâlsaktu i ni zâwk ang. 35 Chutah chuan i hnênah puithiam Zadoka leh Abiathara pawh an awm ve a ni lâwm ni? Chutichuan, heti hi a ni ang a, lal ina thuchhuak i hriat apiang chu puithiam Zadoka leh Abiathara i hrilh ṭhîn ang a. 36 Ngai teh, an fapate pahnih, Zadoka fapa Ahimaaza leh Abiathara fapa Jonathana pawh an hnênah an awm kha; tin, i thil hriat apiangte chu mi hriattîr tûrin anmahni chu i rawn tîr ṭhîn dâwn nia,” a ti a. 37 Chutichuan, Davida ṭhian Husaia chu khawpuiah chuan a lût a; tin, Absaloma chu Jerusalem-ah a lût ta a.
Davida leh Ziba
1 Tin, Davida chuan tlâng chhîp lâwn chhuahna a pelh hlek hnu chuan, ngai teh, Mephibosetha chhiahhlawh Ziba chuan a lo hmuak a, sabengtung pahnih a thuam a, chhang tlang zahnih leh grêp pho ro bâwr za leh nipui thei za leh uain peng khat a phurhtîr a. 2 Tin, lal chuan Ziba hnênah chuan, “Hêng hi engtizia nge ni?” a ti a. Tin, Ziba chuan, “Sabengtungte hi lal chhûngte chuan nân a ni ang a, chhang leh nipui theite hi tlangvâlte ei atân a ni ang a, uain hi chu thlalêra chau apiangte in atân a ni ang,” a ti a. 3 Tin, lal chuan, “A nih leh khawiah nge i pu fapa chu?” a ti a. Tin, Ziba chuan lal hnênah, “Ngai teh, Jerusalem-ah a awm; ‘Vawiinah hian Israel-hote chuan ka pa ram mi pe leh dâwn,’ a ti nghe nghe asin,” a ti a. 4 Tin, lal chuan Ziba hnênah chuan, “Ngai teh, Mephibosetha thil neih zawng zawng chu i ta vek a ni ta,” a ti a. Tin, Ziba chuan, “Chibai ka bûk takzet che a ni; aw lalpa ka pu, i mit tlun zêl ka tum ang e,” a ti a.
Davida leh Simeia
5 Tin, Lal Davidan Bahurim a thlen chuan ngai teh, Saula chhûngte zînga mi Gera fapa a hming Simeia a lo chhuak a; ânchhe lawh chung zêlin a lo chhuak a. 6 Davida chu lungin a dêng a, Lal Davida chhiahhlawh zawng zawngte pawh. Tin, mipui zawng zawng leh sipai huaisen zawng zawngte chu a ding lamah leh a vei lamah an awm a. 7 Tin, Simeia chuan ânchhe lawh chungin heti hian a ti a, “Kal bo daih rawh! Kal bo daih rawh! Nang thisen chhuah hmang leh Beliala mihringpa. 8 A rorêl ai i rêl tâk Saula chhûngte thisen chu LALPAN i chungah a rawn lêttîr ta a; tin, LALPA chuan ram chu i fapa Absaloma a pe ta. Tin, ngai teh, thisen chhuah hmang mi i nih avângin nangmaha pawi i inkhawih chawp a ni,” a ti a. 9 Chutichuan, Zeruii fapa Abisaia chuan lal hnênah, “Engati nge he ui thisâwn hian lalpa ka pu chu ânchhia a lawh mai mai? A lu ka va tan teh mai ang aw?” a ti a. 10 Tin, lal chuan, “Nangni Zeruii fapate u, nangni hian mi lo hriatsak tûr eng nge awm? LALPAN a hnêna, ‘Davida ânchhia lawh rawh,’ a tih si chuan lawh mai ang hmiang. ‘Engati nge hetianga i tih?’ tuin nge ti tehlul ang?” a ti a. 11 Tin, Davida chuan Abisaia leh a chhiahhlawh zawng zawngte hnênah chuan, “Ngai teh u, ka fapa, ka rîla rah ngei chuan mi thah a tum a ni a; he Benjamin mi hian a va tum nasa lehzual dâwn êm! Eng mah tih suh ula, ânchhia chu lawh mai rawh se; LALPA tihtîr a ni si a. 12 LALPA chuan ka hrehawmzia hi a rawn hmu ang, LALPA chuan vawiina ânchhe mi lawh hi a ṭha lamin mi rûl leh mai pawh a ni thei e,” a ti a. 13 Chutichuan, Davida leh a mite chu kawngah chuan an kal zêl a; tin, Simeia chu an râl tlâng pangah chuan a kal zêl a, a kal pah chuan ânchhia a lawh zêl a, lungtein a dêng a, vaivuttein a theh a. 14 Tin, lal leh a hnêna mi awm zawng zawngte chuan chau takin Aiphim an thleng a; tichuan, chutah chuan an châwl hahdam a.
Jerusalem khuaah Absaloma a lût
15 Tin, Absaloma leh mipui zawng zawng, Israel mite chu Jerusalem-ah an kal a; tin, a hnênah Ahithophela pawh a tel a. 16 Tin, heti hi a ni a, Ark mi Husaia, Davida ṭhian chuan Absaloma hnên a thlenin Absaloma hnênah, “Pathianin lalber humhim rawh se! Pathianin lalber humhim rawh se!” a ti a. 17 Tin, Absaloma chuan Husaia hnênah, “Hetiang hi a ni maw i ṭhian i khawngaih dân chu? Engati nge i ṭhian hnêna i kal loh?” a ti a. 18 Tin, Husaia chuan Absaloma hnênah, “Ka kal lo vang; LALPA leh hêng mipuite leh Israel mi zawng zawngin an thlana thu thuin ka awm ang a, a hnênah ka awm zâwk ang. 19 Tin, tu rawng nge ka bâwl ang? A fapa hmaah rawng ka bâwl tûr a ni lâwm ni? I pa hmaa rawng ka bâwl ang khân i hmaah ka bâwl ang,” a ti a. 20 Chutichuan, Absaloma chuan Ahithophela hnênah, “Engtin nge kan tih ang, i ngaih dân sawi teh khai,” a ti a. 21 Tin, Ahithophela chuan Absaloma hnênah, “I pa hmei, in nghâka a dahte hnênah va lût rawh; tin, Israel mi zawng zawngin i pain a lungten che tih an lo hria ang a; tichuan, i lama ṭangte zawng zawng kut chu a chak dâwn nia,” a ti a. 22 Chutichuan, in chungah Absaloma tân puan in an zâr a; tichuan, Israel mite zawng zawng mit hmuhah a pa hmeite hnênah chuan a lût a. 23 Chûng laia rem a ruat, Ahithophela remruatte chu Pathian thu anga ngaih a ni ṭhîn a. Chutiang bawk chuan Ahithophelan Davida leh Absaloma rem a ruatpui zawng zawngte chu ngaih a ni ṭhîn.
Husaian Absaloma thu a râwn
1 Tin, chûng lo pawh chu Absaloma hnênah Ahithophela chuan, “Mi sîngkhat leh sânghnih ka thlang chhuak ang a; tin, zâninah hian Davida ûmin ka thawk ang e. 2 A chauh lai leh a chak loh lai tak ka va nangchîng ang a, ka va tihlau vang e. Tichuan, a hnêna mi awm zawng zawng chu an tlân bo vang a; tichuan, lal chauh chu ka va that mai ang e. 3 Tin, mipuite chu i hnênah ka rawn hruai kîr vek ang. I mi zawna tih loh mi zawng zawng an lo kîr chuan mi zawng zawng inremin an awm ang,” a ti a. 4 Tichuan, chumi thu chuan Absaloma leh Israel upaho zawng zawngte chu a tilâwm ta hle a. 5 Chutichuan, Absaloma chuan, “Ark mi Husaia chu ko ve phawt ula, a sawi ve dân i lo ngaithla teh ang u,” a ti a. 6 Tin, Husaian Absaloma hnên a lo thlen chuan Absaloma chuan, “Ahithophela chuan hetiang hian a sawi a, a sawi ang hian kan ti dâwn em ni ang? Ti dâwn lo ila, nangin han sawi ve teh khai,” tiin a lo bia a. 7 Tin, Husaia chuan Absaloma hnênah, “Tûn ṭuma Ahithophela remruat hi a ṭha lo a ni,” a ti a. 8 Tin, Husaia chuan, “I pa leh a mite chu i hria a, sipai huai tak, mi kawlhsen tak, phûla savawm, a no lâksak ang mai an ni a; tin, i pa chu indo mi a ni a, mipui zîngah a riak kher lo vang. 9 Ngai teh, tûnah pawh khawii lai khuarkhurumah emaw, khawii hmunah emaw a biru reng ang. Tin, heti hi a ni ang a, an inbeih tirhah mi ṭhenkhat an tlûk nual chuan a hria apiangin, ‘Absaloma zuitute chu an that chiam mai,’ an ti mai ang a. 10 Tichuan, mi huaisen tak, sakeibaknei rilru ang pu mi meuh pawh a lo zâm hle mai ang a; Israel mi zawng zawng lah chuan i pa chu sipai huai tak a nih leh a hnêna mi awmte chu mi huaisen tak tak an nih an hre vek si a. 11 Keia remruat ve dân chu, Israel mite zawng zawng chu Dan aṭangin Beer-seba thleng rawkin tuifinriata ṭiau zât zetin i hnênah ko khâwm vek ila; tin, indonaah chuan nangmah meuh kal ve la. 12 Chutichuan, khawii hmunah pawh kan tawn fuhna apiangah leia dai tla ang maiin kan bawh ang a; tin, amah leh a hnêna mi awm zawng zawngte chu pakhat mah kan zuah lo vang. 13 “Chu lovah pawh, khuaah a luh chuan Israel mi zawng zawng, hruizên kengin chumi khuaah chuan kan va kal ang a, lung tê tak tê pawh awm hauh lo khawpin luiah kan hnûk thla vek ang,” a ti leh nghâl bawk a. 14 Tichuan, Absaloma leh Israel mi zawng zawngte chuan, “Ark mi Husaia remruat chu Ahithophela remruat ai chuan a ṭha zâwk,” an ti ta a. LALPA chuan Ahithophela remruat ṭha tak chu letthla tûrin a lo ruat tawh rêng a ni.
Davidan a lo hria a, a tlân bo
15 Chutichuan, Husaia chuan puithiam Zadoka leh Abiathara hnênah, “Chutiang khatiang chuan Ahithophela chuan Absaloma leh Israel upate rem a ruatsak a; tin, keiin chutiang khatiang chuan rem ka ruat a. 16 Chuvângin, ‘Zanin chu thlalêra lui kaiahte riak tawh lovin kân ngei ngei rawh; chuti lo chuan, lal leh a hnêna awm zawng zawngte chu an tiboral vek dah ang e,’ tiin Davida hrilhtîr thuai rawh u khai,” a ti a. 17 Jonathana leh Ahimaaza chu En-rogel-ah an awm a, bawihnu pakhat hian anni chu a va hrilh ṭhîn a; tin, anni chuan Lal Davida chu an va hrilh lehchhâwng ṭhîn a. Khawpuia an lût chu tu ma hmuh loh tûr a ni a. 18 Nimahsela, naupangin a lo hmu a, Absaloma a hrilh a; tichuan, an pahnihin an tlân bo ta thuai a, Bahurim-a mi pakhat, a tuala tuichhunchhuah nei inah an va kal a, tuichhunchhuahah chuan an lût ta a. 19 Tin, hmeichhiain tuichhunchhuah chhinnain a chhîn a, a chungah chuan buh a pho va, tu ma hriat theih a ni lo. 20 Tin, Absaloma chhiahhlawhte chu ina hmeichhe hnênah chuan an va kal a; “Ahimaaza leh Jonathana-te kha khawiah nge?” an ti a. Tin, hmeichhia chuan an hnênah, “Lui an kân tawh ang,” a lo ti a. Tin, an va zawng a, an hmu lo va, Jerusalem-ah an kîr leh ta a. 21 Tin, heti hi a ni a, an kal liam hnu chuan tuichhunchhuah ata chu an lo chhuak a, Lal Davida chu an va hrilh a; Davida hnênah chuan, “Chhuak ula, lui chu kân thuai rawh u; hetiang hian Ahithophela chuan a phiar che u a ni,” an ti a. 22 Chutichuan, Davida leh a hnêna mi awm zawng zawng chu an chhuak a, Jordan lui an kân a; khua a lo var chuan pakhat mah Jordan lui kân lo an awm lo. 23 Tin, Ahithophelan a remruat ang chu an zâwm lo tih a hriatin a sabengtung chu a thuam a, a chhuak a, a khaw lamah a haw a, a chhûngte khawsak dân tûr a ruatsak diam a, a inâwk hlum ta a; tichuan, a thi a, a pa thlânah an phûm ta a. 24 Chutichuan, Davida chuan Mahanaim a va thleng a. Tin, Absaloma chuan a hnêna Israel mi zawng zawngte nên Jordan lui an kân a. 25 Tin, Absaloma chuan Joaba aiah Amasa chu sipaite hotuah a dah a. Amasa chu, mi pakhat a hming Ithra, Israel mi Joaba nu Zeruii laizâwn Nahasi fanu Abigaili pâwltu fapa a ni a. 26 Tin, Israel mite leh Absaloma chuan Gilead ramah ṭanhmun an va khuar a. 27 Tin, heti hi a ni a, Davidan Mahanaim a thlen chuan Amona thlah Raba khuaa mi Nahasa fapa Sobia te, Lo-debar khuaa mi Amiela fapa Makira te, Rogelim khuaa Gilead mi Barzilaia te chuan, 28-29 “Mipuite chu thlalêrah chuan an rilṭâmin an chauvin, an tuihâl tawh êm êm a ni,” an tih avânga khum te, maihûn te, hlum bêl te, buh te, barli te, chhangphut te, vai te, be te, dailuah te, be kan ro te, khawizû te, bâwnghnute khal te, berâm leh bâwnghnute khal uih te, Davida leh a hnêna mi awmte ei tûrin an rawn keng a.
Absaloma a tlâwm a, thah a ni
1 Tin, Davida chuan a hnêna mi awmte chu a chhiar a, sipai sâng chunga hotute, za chunga hotute a siam a. 2 Tin, Davida chuan mite chu a tîr chhuak a, hmun thuma ṭhena hmun khat chu Joaban a ho va; tin, hmun thuma ṭhena hmun khat chu Joaba unaupa, Zeruii fapa Abisaian a ho va; tin, hmun thuma ṭhena hmun khat chu Git mi Itaian a ho va. Tin, lal chuan mipui hnênah, “Keimah ngei pawh in hnênah ka kal ve ngei ngei ang,” a ti a. 3 Nimahsela, mipuite chuan, “Kal ve lo ve! Keiniho hi chu tlân bo ta pawh ni ila, pawi an ti lo vang a; tin, a chanve lai pawh hi va thi mah ila, pawi an ti hek lo vang. Nang chu keiniho sîng tlukin i hlu si a; chuvângin, khawpui aṭanga min ṭanpui tûra inpeih renga i lo awm chu a ṭha zâwk a ni,” an ti a. 4 Tin, lal chuan an hnênah, “Ṭha in tih ang apiang chuan ka ti ang,” a ti a. Chutichuan, lal chu kulh kawngka bulah chuan a ding a; tin, mipui zawng zawng chu za têl têl leh sâng têl têlin an chhuak ta zut zut mai a. 5 Tin, lal chuan Joaba leh Abisaia leh Itaia chu, “Keimah vângin, tlangvâl Absaloma chu dîm takin va ti ang che u,” tiin thu a pe a. Mipui zawng zawngin Absaloma chungchâng thua lalin sipai hotute zawng zawng thu a pêk lai chu an hria a. 6 Chutichuan, mipuite chu Israel mite do tûrin indona hmun lamah chuan an kal ta a. Tin, an indona chu Ephraim ramngaw a ni a. 7 Tin, chutah chuan Davida mite hmaah chuan Israel mite chu an tlâwm ta a; tin, chutah chuan chumi ni chuan mi sînghnih zet an that a. 8 An indona chuan chumi lai ram zawng zawng chu a huam vek mai si a; chumi ni chuan khandaih ai mahin ramngawin a lem hnem zâwk a ni. 9 Tin, Absaloma chuan Davida mite chu a va tâwk ta thut a. Absaloma chu a sabengtung chungah a chuang a. Sabengtung chu sasaw thingzâr buk tak hnuaiah a lût a, Absaloma lu chu sasaw thingah chuan a tâng ta a, lei si lo, vân si lovin a uai ta reng mai a. Tin, sabengtung chu a tlân ta zêl a. 10 Tin, tu emaw hian a hmu a, Joaba a hrilh a, “Ngai teh, sasaw thinga Absaloma inkhai reng ka hmu,” a ti a. 11 Tin, Joaba chuan a hrilhtu hnênah chuan, “Ngai teh, chu chu i hmu si a, engati nge i tihhluma, leiah i tihthlâk nghâl loh? Chutiang chuan ti la chu tangkaraw sâwm leh kâwnghrên ka pe tûr che a,” a ti a. 12 Tin, mi chuan Joaba hnênah, “Tangkaraw sâng pawh hmu dâwn mah ila, lal fapa chungah ka kut ka thlâk lo rêng rêng ang; kan beng hriat ngeiah lalin nang leh Abisaia leh Itaia hnênah, ‘Tlangvâl Absaloma chu tu mahin khawih hlek suh se,’ tiin thu a pe si che u a. 13 Rinawm lo takin lo that ta ringawt mai ila (lal lakah chuan eng mah thup theih a ni âwm si lo va), nang chu i inthiarfihlîm leh mai âwm si a,” a ti a. 14 Chutichuan, Joaba chuan, “Hetiang chuan i kiangah ka awm reng thei tawp lo mai,” a ti a, fei pathum a keng a, sasaw thing zînga dama lo la awm Absaloma thinhnûn takah chuan a chhun a. 15 Tin, Joaba râlthuam kengtu tlangvâl sâwm chuan an rawn hual a, Absaloma chu an chhun a, an that ta a. 16 Tin, Joaba chuan tawtawrâwt a hâm a, Israel-ho ûmtu mipuite chu an lo kîr ta a. Joaba chuan mipuite chu a dang ta tlat mai a. 17 Tin, Absaloma ruang chu an la a, ngawah khuarkhurum thûk takah chuan an paih a, a chungah chuan lung an tiang khâwm thûr a; tin, Israel mi zawng zawngte chu mahni puan in ṭheuhvah an tlân haw ta a. 18 Absaloma chuan a dam laiin lal ruamah lung tian a lo tiang tawh diam a; “Ka hming daih lohna tûrin fapa pawh ka nei si lo va,” a ti a. Chumi lung tian hmingah chuan ama hming a puttîr a; tûn thlengin Absaloma hriat rengna tih a ni.
Absaloma thih thu Davida an hrilh
19 Chutichuan, Zadoka fapa Ahimaaza chuan, “Ka va tlân ang a, LALPAN a hmêlma phuba a lâksak dân chanchin hi lal chu ka va hrilh ang e,” a ti a. 20 Tin, Joaba chuan a hnênah, “Vawiinah zawng chanchin chu va la hrilh suh, ni dangah la hrilh zâwk ang che. Lal fapa chu a thih tâk avângin, vawiinah zawng chanchin eng mah va hrilh suh ang che,” a ti a. 21 Tichuan, Joaba chuan Kus mi hnênah chuan, “Kal la, i thil hmuh va hrilh rawh le,” a ti a. Tin, Kus mi chuan Joaba chu kûnin chibai a bûk a, a tlân ta a. 22 Chutichuan, Zadoka fapa Ahimaaza chuan Joaba hnênah, “Eng pawh ni sela, Kus mi kha ka va ûm tâng e,” a ti leh a. Tin, Joaba chuan, “Ka fapa, chanchin hrilh man i hmu dâwn si lo va, engah nge i tlân ang?” a ti a. 23 Nimahsela, ani chuan, “Eng pawh ni sela, ka tlân ang e,” a ti a. Tin, ani chuan a hnênah, “Tlân mai rawh le,” a ti a. Chutichuan, Ahimaaza chu phaizâwl lam kawngah a tlân a, Kus mi chu a lehpêl a. 24 Tichuan, Davida chu kulh kawngka chhâwng inkârah chuan a lo ṭhu a. Tin, râlvêngtu chu kulh kawngka pâwnta zâwk chung lamah chuan a chho va, a han hawi vêl ruai ruai a; tin, ngai teh, mi pakhat amah chauhvin a lo tlân a. 25 Tin, râlvêngtu chu a au va, lal chu a hrilh a. Tin, râlvêngtu chuan, “Mi pakhat mai a nih chuan chanchin rawn sawi tûr a nei a ni ang,” a ti a. Tin, a lo kal thuai thuai a, a lo hnai ta telh telh a. 26 Tin, râlvêngtu chuan mi dang lo tlân a hmu leh a; tin, râlvêngtu chuan kawngkhâr vêngtu a au va. “Ngai teh, mi dang amah chauhvin a lo tlân leh e,” a ti a. Tin, lal chuan, “Ani pawh chuan chanchin a rawn thlen ve dâwn a nih chu,” a ti a. 27 Tin, râlvêngtu chuan, “A hmasa zâwka tlân dân chu Zadoka fapa Ahimaaza tlân dân ang hlein ka hria,” a ti a. Tin, lal chuan, “Ani chu mi ṭha tak a ni a, chanchin ṭha a rawn thlen dâwn a ni ang,” a ti a. 28 Tin, Ahimaaza chuan a au va, lal hnênah, “A fel vek e,” a ti a. Tin, a hmaia lei siin lal hmaah chuan chibai bûkin a kûn a, “LALPA ka pu beih tuma kut thlâk tumtute dangchattu LALPA i Pathian chu fakin awm rawh se,” a ti a. 29 Tin, lal chuan, “Tlangvâl Absaloma chu a dam alâwm maw?” a ti a. Tin, Ahimaaza chuan a chhâng a, “Joaban lal chhiahhlawh, kei i chhiahhlawh ngei hi mi tirh chhuah laiin an buai mur mur ka hmu a; nimahsela, eng nge ni tih erawh chu ka hre lo,” a ti a. 30 Tin, lal chuan, “Ka sîrah hian lo ding rih rawh,” a ti a. Tin, a sîrah a lo ding a. 31 Tin, ngai teh, Kus mi chu a lo thleng a; tin, Kus mi chuan, “LALPA ka pu tân chanchin ka rawn thlen e; i chunga helho zawng zawng phuba chu vawiinah hian LALPAN a lâksâk ta che a ni,” a ti a. 32 Tin, lal chuan Kus mi hnênah chuan, “Tlangvâl Absaloma chu a dam alâwm maw?” a ti a. Tin, Kus mi chuan a chhâng a, “LALPA ka pu hmêlmate leh i chhiatna zawngtute zawng zawng chu chu tlangvâl ang chuan awm vek rawh se,” a ti a. 33 Chutichuan, lal chu a mangang ta hle mai a, kulh kawngka chunga pindanah chuan a chho va, a ṭap a. Tin, a chhoh pah chuan, “Aw ka fapa Absalom, ka fapa, ka fapa Absalom, i aiah han thi teh zâwk ila aw! Aw Absalom ka fapa, ka fapa!” a ti a.
Joaban Davida a zilh
1 Chutichuan, Joaba chu an hrilh a, “Ngai teh, lal chuan Absaloma chu a ṭah a, a sûn e,” an ti a. 2 Tichuan, chumi nia an hnehna chu mi zawng zawng tân sûnna a lo ni ta zâwk a. “Lal chu a fapa avâng chuan a lungngai êm êm mai,” an tih chu chumi ni chuan mipuite chuan an lo hre ta si a. 3 Tin, mipuite chu indonaa mi an tlân bo, an zah avânga a rûka an kal bo angin chumi ni chuan a rûkin khawpuiah an lût a. 4 Tin, lal chuan a hmai a hup a, “Aw ka fapa Absalom! Aw Absalom, ka fapa, ka fapa!” tiin lal chu a ṭap hawm hawm a. 5 Tin, Joaba chu inah lal hnênah chuan a lût a, “I nunna te, i fapate leh i fanute nunna leh i nupuite leh i hmeite nunna chhanhimtute chu vawiinah hian zak takin i siam tâk hi; 6 nangmah hawtute chu i hmangaiha, nangmah hmangaihtute i huat tlat maiah hian. Hotute leh sipaite chu i tân eng mah ni lo angin vawiinah hian i tilang ta a; Absaloma chu dam sela, keini zawng zawng hi vawiinah hian thi ta vek zâwk ni ila, chu chu i lâwm zâwng tak ni âwmin vawiinah hian ka hria a ni. 7 Chuvangin, tho la, chhuak la, i mite tilungawi zâwng takin thu sawi rawh. I chhuah loh chuan LALPA chhâlin chhia ka chham a ni, mi pakhat mah zâninah hian i hnêna awm an awm lo vang. Tin, chu chu i tân i tleirâwl ata tûn thlenga i chunga thil ṭha lo lo thleng zawng ai mahin a ṭha lo zâwk ang,” a ti a. 8 Chutichuan, lal chu a tho va, kulh kawngkaah chuan a ṭhu a. “Ngai teh u, lal chu kulh kawngkaah chuan a ṭhu e,” tiin mipui zawng zawng chu an hrilh a. Tin, mipui zawng zawng chu lal hmaah chuan an va kal ta a.
Jerusalem-ah Davida a kîr
Israel-ho erawh chu mahni puan in ṭheuhvah an tlân haw ta a. 9 “Lal chuan kan hmêlmate kut ata min chhanchhuak a, Philistia mite kut ata min chhandam ta a; tin, tûnah hian he ram aṭang hian Absaloma chu a tlân chhuahsan a. 10 Tin, Absaloma, kan lal atâna hriak kan thiha chu indonaah a thi ta si a. Engati nge lal chu kam khat maha koh kîr zai in rêl loh?” tiin Israel mite zawng zawng chu an inhnial ta mur mur mai a. 11 Chutichuan, Lal Davida chuan puithiam Zadoka leh Abiathara hnênah chuan, “Juda upate hnênah chuan, ‘Engati nge lal chu a in lama hruai kîr thu-ah a zawiawi berah in ṭan? Israel miten lal hruai kîr thu an sawi chu lal hnên a thleng tawh si a. 12 Ka unaute in ni a, ka thisen zawmpui in ni si a, engati nge ni a zawiawi bera in ṭan chu ni ngai le?’ tiin sawi rawh u. 13 Tin, Amasa hnênah, ‘Ka thisen zawmpui i ni lâwm ni? Joaba aiah ka hmaa sipaite hotua ka siam lohva ka siam loh che chuan, Pathianin a tih tihin min ti mai sela, chu aia nasa pawhin,’ a ti e, va ti rawh u,” tiin mi a tîr a. 14 Chutichuan, Juda mite zawng zawng rilru chu mi pakhat rilru ang maiin a tithle ta dual a; tichuan, lal hnênah, “I mite zawng zawng nên khân lo haw leh rawh u,” ti tûrin mi an tîr a. 15 Chutichuan, lal chu a haw leh a, Jordan a va thleng a. Tin, Juda-te chu lal lo hmuaka, lal chu Jordan-a lo hruai kai tûrin Gilgal-ah an kal a. 16 Tin, Bahurim khuaa mi Benjamin mi Gera fapa Simeia chu hmanhmawh takin Lal Davida hmuak tûrin Juda-hote rualin a chhuk ve a. 17 Tin, a hnênah Benjamin mi sâng nên, Saula chhûngte chhiahhlawh Ziba, a fapa sâwm leh panga leh a chhiahhlawh sawmhnih nên an tel ve a; tin, lal mit hmuhah chuan Jordan an kân hmawk hmawk a. 18 Tin, lal chhûngte hruai kai nân leh ṭha a tih ang apianga a tih atân lawng an kal kaipui a. Tin, Jordan lui a han kai chuan Gera fapa Simeia chu lal hmaah chuan a bawkkhup a. 19 Tin, lal hnênah chuan, “Ka pu chuan khawlohna neiah mi ruat lo hrâm sela, lalpa ka puin Jerusalem a chhuahsan nia i chhiahhlawhin dik lo taka a lo tih tâkte chu hre reng hek suh sela, lal chuan rilruah pai suh se. 20 I chhiahhlawh hian thil ka tisual tih ka inhria a; chuvângin, ngai teh, Josefa chhûng zawng zawngte zînga ka pu lalpa chu hmuak tûra vawiinah hian a lo chhuk hmasa bera ka ni nghe nghe asin,” a ti a. 21 Nimahsela, Zeruii fapa Abisaia chuan a chhâng a, “LALPA hriak thiha chu ânchhia a lawh avângin Simeia hi tihhlum tûr a ni dâwn lâwm ni?” a ti a. 22 Tin, Davida chuan, “Nangni Zeruii fapate u, nangni hian mi lo hriatsak tûr eng nge awm? Vawiinah hian mi dotute in ni lâwm ni? Vawiinah hian Israel zinga mi rêng rêng tihhlum tûr em ni? Vawiinah hian Israel mite chungah lal ka nih hi ka hre lo vem ni?” a ti a. 23 Tin, lal chuan Simeia hnênah chuan, “I thi tawp lo vang,” a ti a. Lal chuan a hnênah chhia a chham a.
Davidan Mephibosetha a khawngaih
24 Tin, Saula fapa Mephibosetha chu lal hmuak tûrin a lo chhuk a; lal a kal chhuah ni aṭanga râlmuanga a lo haw leh ni thleng chuan a kete chu a chei lo va, a khabe hmul a chep rual lo va, a puante pawh a su hek lo. 25 Tin, heti hi a ni a, lal hmuak tûra Jerusalem-a a kal chu lalin a hnênah, “Mephiboseth, engati nge ka hnênah i kal ve loh?” a ti a. 26 Tin, ani chuan a chhâng a, “Aw lalpa, ka pu, ka chhiahhlawhin mi bum a ni. I chhiahhlawh chuan, ‘Lal hnêna kal tûra ka chuan nân sabengtung ka thuam ang e,’ ka ti a; i chhiahhlawh hi a ke a bai si a. 27 Tin, lalpa ka pu hnênah chuan i chhiahhlawh hi a hêk a; nimahsela, lalpa ka pu chu Pathian vântirhkoh ang a ni a. Chuvângin, ṭha i tih ang angin ti ang che. 28 Ka pa chhûngte zawng zawng chu lalpa ka pu hmaah chuan tihhlum vek âwm an ni ngei a; mahse, i chhiahhlawh hi i chaw kîlpuite zîngah i teltîr a. Chuvângin, lal hnênah hian thil dang phût ngam âwm ka la ni cheu vem ni?” a ti a. 29 Tin, lal chuan a hnênah, “I chungchâng thu hi engah nge i sawi leh ṭhin? ‘Nang leh Ziba chuan ram chu insem rawh u,’ ka ti e,” a ti a. 30 Tin, Mephibosetha chuan lal hnênah, “E, amahin nei vek rawh se, lalpa ka pu chu ama inah râlmuangin a lo thleng ta si a,” a ti a.
Davidan Barzilaia a khawngaih
31 Tin, Gilead mi Barzilaia chu Rogelim aṭangin a lo chhuk a; lal chu Jordan-a hruai kai tûrin a hnênah Jordan a kai ve a. 32 Barzilaia chu upa tak a ni a, kum sawmriat mi zet a ni a; Mahanaim-a lal awm chhûng khân ei tûrte a lo tum a, mi neinung tak a ni a. 33 Tin, lal chuan Barzilaia hnênah chuan, “Ka hnênah kai ve la, ka hnênah Jerusalem-ah ka châwm ang che,” a ti a. 34 Tin, Barzilaia chuan lal hnênah, “Eng chen la dam tûr nge ka niha, Jerusalem-a lal hnêna ka han chhoh vena tûr chu? 35 Tûnah hian kum sawmriat ka ni a; a chhia leh a ṭha pawh thlei thei em ka nih? I chhiahhlawh hian ka thil ei leh inte hi a tui leh tui loh pawh ka hre thei tawh em ni? Mipa leh hmeichheho hla sak ri pawh ka hre thei tawh em ni? Chuvângin, i chhiahhlawh hi eng atân nge lalpa ka pu tân phurrit ka nih mai ang? 36 I chhiahhlawh hian lal hnênah Jordan râl kai ve chauh ka tum a ni. Engah nge lal chuan chutianga ṭhat man mi rulh ve thung kher ang? 37 Khawngaih takin, i chhiahhlawh hi mi hawtîr leh mai la, ka nu leh ka pa thlân awmna keimahni khua ngeiah ka thi ang e. Amaherawhchu, en teh, i chhiahhlawh Chimhama hi; lalpa ka pu hnênah kai sela, a chungah ṭha i tih ang apiangin ti ang che,” a ti a. 38 Tin, lal chuan a chhâng a, “Chimhama chu ka hnênah a kal ve ang a, ṭha i tih ang zêlin a chungah ka ti ang; tin, thil eng pawh mi dil apiang chu ka tihsak zêl ang che,” a ti a. 39 Tin, mipui zawng zawngte chu Jordan râl an kai a; tin, lal chuan Barzilaia chu a fâwp a, mal a sâwm a; tin, ama hmun lamah a haw leh ta a. 40 Chutichuan, lal chu Gilgal-ah a kai a, Chimhama chu a hnênah chuan a kai ve a. Tin, Juda mi zawng zawng chuan lal chu an hruai kai a, Israel mi pawh a chanve an tel a.
Davida chungchângah Juda-te leh Israel-te an inhnial
41 Tin, ngai teh, Israel mi zawng zawng chu lal hnênah an lo kal a, lal hnênah chuan, “Engati nge kan unau Juda mite hian an chan bîk chia, lal leh a chhûngte leh Davida mi zawng zawngte pawh Jordan râla an hruai tel vek mai?” an ti a. 42 Tin, Juda mi zawng zawngte chuan Israel mite chu an chhâng a, “Lal chu kan lamhnai a nih avâng a ni. Engati nge hemi thu-ah hian in thinrim mai? Lal neih ringa awm em kan nih tehlul? Thil pêk eng emaw te pawh min nei em ni?” an ti a. 43 Tin, Israel mite chuan Juda mite chu an chhâng a, “Lalah hian chan sâwm kan nei a; chuvângin, Davida-ah hian nangni aiin chanvo kan ngah zâwk asin. Engati nge min ngaihnêp mai? Lal hruai kîr thu hi rawt hmasatu kan ni lâwm ni kha?” an ti a. Chutichuan, Juda mite thu chu Israel mite thu ai chuan a rum ta zâwk a.
Seba a hel
1 Tin, chutah chuan Benjamin mi, Bikria fapa a hming Seba, Beliala mi pakhat a lo awm kher a. Tawtawrâwt a hâm a, “Davida-ah hian chanvo kan nei lo va, Jesaia fapaah hian ro luah tûr kan nei hek lo; aw Israel mite u, in puan in lam ṭheuhvah haw rawh u,” a ti a. 2 Chutichuan, Israel mi zawng zawngin Davida an zui chu an lêtsan a, Bikria fapa Seba chu an zui ta a. Juda mite erawh chuan Jordan aṭangin Jerusalem thlengin an lal chu an vuan ta tlat a. 3 Chutichuan, Davida chuan Jerusalem-a a in chu a thleng a; tin, lal chuan hmeichhe sâwm, a hmeite, in nghâk atâna a dahte chu a hruai a, a khung a, an ei tûr a tum a; nimahsela, an hnênah a lût lo va. Tichuan, an thih ni thlenga khunga awmin hmeithaiin an awm ta a. 4 Chutichuan, lal chuan Amasa hnênah, “Ni thum chhûngin Juda mite mi koh khâwmsak la; tin, nang pawh lo awm ve ang che,” a ti a. 5 Chutichuan, Amasa chu Juda mite ko khâwm tûrin a kal ta a; amaherawhchu, a hun ruatsak aiin a va thang rei ta a. 6 Tichuan, Davidan Abisaia hnênah chuan, “Bikria fapa Seba hian Absaloma ai mahin kan pawi a khawih dâwn alâwm le. I pu mite hruai la, ûm rawh u khai; chuti lo chuan, khaw kulh neiahte a lût hman ang a, kan hmuh phâk lohvah kan chhuah mai dah ang e,” a ti a. 7 Tichuan, Joaba hote, Kereth mite, Peleth mite leh an mi chak zawng zawngte chuan amah an zui chhuak ta a. Jerusalem aṭang chuan Bikria fapa Seba ûm tûr chuan an chhuak ta a. 8 Gibeon-a lungpui awmna an va thlen chuan Amasa chuan anmahni chu a lo hmuak a. Tin, Joaba chuan indona thuamhnaw a inbel a; tin, a chungah chuan khandaih a pai chawpin kâwnghrênah a pai a; tin, a kal zâwngin a dawk chhuak a. 9 Tin, Joaba chuan Amasa hnênah chuan, “Unaupa, i ṭha rih alâwm maw?” a ti a. Tin, Joaba chuan Amasa chu fawh tumin a khabe hmul chu a kut ding lamin a chelh a. 10 Nimahsela, Amasa chuan Joaban khandaih a ken chu a ngaihsak lo va. Chutichuan, a pumah chuan a vit a, a rilte chu a tithla nuaih mai a, a vit nawn leh ta lo va; tichuan, a thi ta a. Tichuan, Joaba leh a unaupa Abisaia chuan Bikria fapa Seba chu an ûm ta a. 11 Tin, a kiangah Joaba hote zînga tlangvâl pakhat chu a ding a, “Joaba lama ṭang leh Davida lama ṭang apiang chuan Joaba zui zêl rawh se,” a ti a. 12 Tin, Amasa chu lamlian lai takah a thiin a lo bual nuaih mai a. Tin, chu mi chuan mi zawng zawng ding renga a hmuh chuan Amasa ruang chu lamlian ata phûl lamah sawnin puanin a khuh a, a kianga lo kal apiang an ding zêla a hmuh avângin. 13 Tin, lamlian ata dah sawn a nih hnu chuan Bikria fapa Seba ûm tûrin mi zawng zawngin Joaba chu an zui ta a. 14 Seba chuan Abel thleng leh Beth-maaka thlengin Israel hnam tin chu a tlawh vek a, Ber mite pawh a tlawh a; tichuan, mite chu an pung khâwm a, amah an zui ve ta a. 15 Beth-maaka-ah chuan an rawn hual a; tin, a khaw hrûlah lei an tiang pâwng a, kulh hrûlah chuan an ding a. Tin, Joaba hnêna mi awm zawng zawngte chuan tichim tûrin kulh chu an chhu bur bur a. 16 Chutichuan, hmeichhe fing pakhat khua aṭang chuan a lo au va, “Khai khai! Joaba hnênah, ‘Lo kal hnai rawh, i hnênah thu ka lo sawi teh ang,’ a ti, han ti rawh u khai,” a ti a. 17 Tin, a hnênah chuan a va kal hnai a; tin, hmeichhia chuan, “Joaba i ni em?” a ti a. “Ni e,” a ti a, a chhâng a. Chutichuan, a hnênah, “I bawihnu thusawi hi ngaithla teh,” a ti a. Tin, ani chuan a chhâng a, “Ka ngaithla e,” a ti a. 18 Chutichuan, “Hmânlai chuan, ‘Abel khuaah hian an inrâwn phawt ang,’ an ti ṭhîn a; chutiang chuan thu an titâwp ṭhîn. 19 Kei hi Israel zînga inrem duh leh rinawm pâwla mi ka ni a. Nang chuan Israel khua, a khaw bulpui hi tihchhiat i tum a nih hi. LALPA ro chu engah nge tihmang i tum?” tiin a sawi a. 20 Tin, Joaba chuan a chhâng a, “Chutiang a ni awzâwng lo ve, tihmang emaw, tihchhiat emaw ka tum lo rêng rêng e. 21 Chutiang lam thu chu a ni lo ve. Ephraim tlâng rama mi Bikria fapa a hming Seba chuan lal dodâlin, Davida ngei dodâlin a kut a lek a; amah chu min pe mai ula, khua chu ka chhuahsan mai ang e,” a ti a. Tin, hmeichhia chuan Joaba hnênah, “Ngai teh, a lu chu kulhah kan rawn paih liamsak ang che,” a ti a. 22 Chutichuan, hmeichhia chu a finna thawhin mipui zawng zawngte zîngah chuan a kal a. Tin, Bikria fapa Seba lu chu an tan a, Joaba hnên lamah chuan an theh chhuak a. Tin, tawtawrâwt a hâm a, mahni puan in lam ṭheuhvah khua ata chu an darh ta a. Tin, Joaba chu Jerusalem-ah lal hnênah chuan a haw leh ta a.
Davida hnuaia hotute
23 Joaba chu Israel sipai zawng zawng hotu a ni a; Jehoiada fapa Benaia chu Kereth mi leh Peleth mite hotu a ni a; 24 Adorama chu hnathawka rawih luihte hotu a ni a; Ahiluda fapa Jehosaphata chu chanchin ziaktu a ni a; 25 Seva chu lehkhaziaktu a ni a; Zadoka leh Abiathara chu puithiam an ni a; 26 tin, Jair mi Ira pawh chu Davida puithiam a ni.
Saula thlahte an tihlum
1 Tin, Davida dam laiin a kum zâwnin kum thum ṭâm a tla a; tin, Davida chuan LALPA chu a râwn a. Tin, LALPA chuan, “Saula leh a chhûngte, thisen chhuahtute vâng a ni e, Gibeon mite a that mai si a,” a ti a. 2 Tin, lal chuan Gibeon mite chu a ko va (Gibeon mite chu Israela thlahte an ni lo va, Amor mi la awm chhunte kha an ni zâwk a; Israel thlahte chuan an lakah chhia an lo chham tawh a; Saula chuan Israela thlahte leh Juda thlahte tâna ṭhahnem a ngaih avângin thah a tum ṭhîn mai a ni); 3 Davida chuan Gibeon mite hnênah chuan. “Eng nge ka tihsak ang che u? LALPA ro chu mal in sâwm theih nân eng anga inremna nge ka siam ang?” a ti a. 4 Tin, Gibeon mite chuan a hnênah, “Saula leh a chhûngte nêna kan chungthuah hian tangkarua leh rangkachak lam thu a ni lo va, Israel zîngah hian mi tihhlum theihna kan nei hek lo,” an ti a. Tin, ani chuan, “In sawi ang apiang chu ka tihsak ang che u,” a ti a. 5 Tin, lal hnênah chuan, “Mi tiboraltu leh Israel ram chhûngah rêng rêng awm lova tiboral tûra mi phiartu chu, 6 a fapa pasarihte min pe la, LALPA mi ruat Saula awmna Gibea khuaah chuan LALPA hmaah kan khai hlum ang e,” an ti a. Tin, lal chuan, “Pe ang hmiang,” a ti a. 7 Nimahsela, lal chuan LALPA hnêna Davida leh Saula fapa Jonathana kâra, an pahniha kâra chhechhamna avângin Saula fapa Jonathana fapa Mephibosetha chu a hum a. 8 Lal chuan Aii fanu Rizpiin Saula fapa pahnih a hrinsak Armonia leh Mephibosetha erawh chu a hruai a; tin, Meholath mi Barzilaia fapa Adriela, Saula fanu Mikalin fapa panga a hrinsakte nên; 9 tin, Gibeon mite kutah chuan a hlân a; tin, anni chuan LALPA hmaah tlângah an khai hlum a. Tichuan, an pasarih chuan hmun khatah an thi za a, buh seng hun, barli seng ṭan tirh lai vêlin an tihlum a. 10 Tin, Aii fanu Rizpi chuan saiip puan a la a, buh seng tirh ata vân aṭanga ruahin a rawn nan thlenga a awm nân lungpui chungah a inzâr a; an chunga chhûna chunglêng savate fûk leh zâna ramsate awm pawh a phal lo va. 11 Tin, Aii fanu, Saula hmeinu Rizpi thiltih chu Davida an hrilh a. 12 Tin, Davida chu a kal a, Philistia miten Gilboa-a Saula an thah nia Philistia miten Beth-san mual laia an khai rutu, Jabes-gilead mite hnên ata Saula ruh leh a fapa Jonathana ruhte chu a la a. 13 Chuta Saula ruhte leh a fapa Jonathana ruhte chu a la chho va; tichuan, an khaiate ruh chu an la khâwm a. 14 Tin, Saula ruhte leh a fapa Jonathana ruhte chu Benjamin rama Zela khuaa a pa Kisa thlânah an phûm a. Tichuan, lal thupêk ang zêlin an ti a. Tin, chumi hnuah chuan chumi ram chungah chuan Pathian a lungawi ta a.
Philistia mi liante nêna inbeih
15 Tin, Philistia mite chuan Israel mite chu an do leh a, Davida chu a mite nên an chhuk a, Philistia mite chu an zu bei a; tin, Davida chu a chau ta hle mai a. 16 Tin, Isbi-benoba, mi lian fapate zînga mi, a fei rih lam dâr sekel zathum, ngûnhnâm thar pai chuan Davida chu thah a tum a. 17 Nimahsela, Zeruii fapa Abisaian a chhan a, Philistia mi chu a bei a, a that ta a. Tin, Davida mite chuan, “Israel-te khâwnvâr i tihmih loh nân, indo tûrin kan hnênah i chhuak ve tawh hauh lo vang,” tiin a lakah chhia an chham a. 18 Tin, heti hi a ni a, chumi hnuah chuan Philistia mite nên Gob khuaah indona a awm leh a. Chutichuan, Husath mi Sibekaia chuan mi lian fapate zînga mi Sapha a that a. 19 Tin, Philistia mite nên Gob khuaah an indo leh a; tin, Bethlehem mi Jaare-oregima fapa Elhananan Git mi Goliatha a that a, a fei ngul chu themkawl ang a ni. 20 Tin, Gath khuaah indona a awm leh a, chutah chuan mi sâng tak mai, a kut lehlam lehlama zungṭang paruk, a ke lehlam lehlama zungṭang paruk, a vaia sawmhnih leh pali nei hi a awm a; ani pawh mi lian laka piang a ni. 21 Tin, Israel mite chu a va cho va, Davida unau Simeia fapa Jonathana chuan a lo that a. 22 Tin, chûng palite chu Gath khuaah mi lian laka piang an ni a, chûng chu Davida leh a mite kutah an thi a.
Davida hnehna hla
1 Tin, Davida chuan a hmêlma zawng zawng kut ata leh Saula kut ata LALPAN a chhanchhuah ni chuan, he hla thu hi LALPA hnênah a sawi a. 2 Tichuan, ani chuan, “LALPA chu ka lungpui leh ka kulhpui leh mi chhanhimtu a ni a, ka ta ngei a ni; 3 Ka lungpui Pathian, amah chu ka ring ang; Ka phaw leh ka chhandamna ki, ka kulhbîng sâng leh ka inhumhimna a ni; Ka chhandamtu, nangin pâwngnawrna lak ata mi chhandam ṭhîn a. 4 Fak tlâk LALPA chu ka ko vang a; Chutichuan, mi dotute lakah chhandamin ka awm ang. 5 “Thihna fâwn chuan min hual vêl a, Pathian ngaihsak lohna tui lian chuan mi tihlau va. 6 Seol hruihrualte chuan mi phuar vêl a; Thihna thangte chuan mi âwk a. 7 Ka manganin LALPA chu ka ko ṭhîn a, A ni, ka Pathian chu ka au ṭhîn; Ani chuan a biak in aṭang chuan ka aw a hria a; Tin, ka au thâwm chu a bengah a lût ta a. 8 “Chu veleh lei hi a nghîng a, a khûr ta a. A thinur avângin vân innghahnate lamin a khûrin a nghîng ta a. 9 A hnâr aṭang chuan meikhu a chho ta ngut ngut a, A kaa chhuak mei chuan a kâng ta hluah hluah a; Chu chuan meihawl pawh a tialh ta dur dur a. 10 Tin, ani chuan vânte pawh a tikûn a, a chhuk ta a; A ke hnuaiahte chuan thim chhah mup hi a awm a. 11 Cherub chungah a chuang a, a thlâwk ta a; A ni, thli thlaahte chuan an hmu a. 12 Tin, thim chu amah hual vêlna bûktêah a siam a, Tuite, vâna chhûm chhah mupte chu fâwk khâwmin. 13 A hmaa ênna avâng chuan Meilingte chu a alh a. 14 “LALPA chu vânah khian a lo ri dur dur a, Chungnungbera chuan a aw a chhuah a. 15 Tin, thalte chu a kâp chhuak a, anniho chu a tidarh a; Kâwl te a phêttîr a, a tibuai ta nuaih hlawm a. 16 Chu veleh LALPA zilhhauna avânga, A hnâra thaw chhuakin a chhêm vak avâng chuan, Leilung nghahchhante chu tihlanin a awm ta a. 17 “Ani chuan chung lam aṭangin a rawn ban a, mi chelh a; Tui tam tak ata mi hnûk chhuak a; 18 Mi dotu chak tak lakah chuan mi chhanhim a, Mi hawtute lakah pawh; keia tân chuan an chak lutuk si a. 19 Anni chuan ka vânduai ni chuan mi bei a; Nimahsela, LALPA chu ka innghahna ber a ni. 20 Ani chuan hmun thâwl takah mi hruai chhuak a; Ka chunga a lâwm avângin mi chhanhim ta a ni. 21 “LALPA chuan ka felzia ang zêlin ka chungah a ti a; Ka kutte a thianghlimzia ang ngeiin mi rûl a ni. 22 LALPA kawngte chu ka zawh a, Ka Pathian hnên ata chu sual takin ka kal bo ngai si lo va. 23 A rorêlna zawng zawng chu ka hmaah a awm ṭhîn a; A thuruatte lah chu ka hawisan ngai si lo va. 24 Ama lakah chuan sawisêl bo ka ni bawk a, Ka khawlohna ata ka inthiarfihlîm ṭhîn a. 25 Chuvângin, LALPA chuan ka felzia ang zêlin mi lo rûl ta a; A mit hmuha ka thianghlimzia ang zêlin. 26 “Mi khawngaih thei tak lakah chuan khawngaih thei takin i intilang ang a, Mi ṭha famkim lakah chuan ṭha famkimin i intilang ang a; 27 Mi thianghlim lakah chuan thianghlimin i intilang ang a; Tin, mi luhlul lakah chuan luhlulin i intilang ang. 28 Hrehawm tuar mite chu i chhandam ang a; Mi chapote erawh chu i tihtlâwm theih nân an chungah i mit a fu reng a. 29 Aw LALPA, ka khâwnvâr i ni si a; LALPA chuan ka thimna hi a tiêng ang. 30 Nangma ṭanpuiin râl ka bawh si a; Ka Pathian ṭanpui bawkin kulh ka zuan khûm a ni. 31 “Pathian zawng a kawng chu a ṭha famkim a; LALPA thu chu fiah a ni tawh; Amah ringtu zawng zawngte tân chuan ani chu phaw a ni. 32 LALPA lo chu tu nge Pathian awm ni? Kan Pathian lo chu tu nge lungpui awm ni? 33 Pathian chu ka kulhpui nghet tak a ni a, Ka kawng a tiṭha famkim ṭhîn. 34 Ka kete chu zukpui ke angin a siam a, Ka hmun sângahte mi awmtîr ṭhîn. 35 Ka kutte hi râl kâp tûrin a zirtîr ṭhîn a; Chutichuan, ka bânte hian dâr thalngul a kuai zo hial a. 36 “Nangin i chhandamna phaw chu mi pe bawk a; I inngaihtlâwmnain mi siam lian ta. 37 Ka hnuaia ka ke pênna chu i tizau va; Tichuan, ka kete hi a tleng lo. 38 Mi dotute chu ka ûmpha a, ka tiboral a; Tihboral dêra an awm hma loh chuan ka kîr hek lo. 39 An thawh leh theih lohna tûrin ka tiboral dêr a, ka sât chhawk a; A ni, ka ke hnuaiah an tlu ta a. 40 Nangin inbeihna atân chuan chaknain ka taiah mi hrêng si a; Mi rawn beitute chu ka hnuaiah i tudawl ta a. 41 Mi hawtute chu ka tihboral theihna tûrin, Nangin mi dotute chu mi hnuchhawnin i awmtîr ta bawk a. 42 An hawi vêl a; nimahsela, chhandamtu tûr tu mah an awm lo va; LALPA ngei chu an han en a; nimahsela, a chhâng si lo. 43 Chu veleh leia vaivut ang maiin ka vaw sawm dep a; Kawtlai chirhdiak ang maiin ka tipherh a, ka theh darh vek a. 44 “Nangin ka mite sualna lakah pawh mi chhanhim ta a; Hnam tin lu ni tûrin mi vawng ṭha a. Ka hriat ngai loh hnam chuan ka rawng an bâwl tawh ang. 45 Hnam dangte chu ka hnênah an inpe ang a; Ka chanchin an hriat veleh ka thu an zâwm ang. 46 Hnam dangte chu an chuai ang a, An kulhbîng atate chu khûr chungin an lo chhuak ang. 47 “LALPA chu a nung reng e! Ka Lungpui chu fakin awm sela! Mi chhandamna Lungpui, Pathian chu chawimawiin awm rawh se! 48 Phuba mi lâksaktu leh Hnam tin ka hnuaia tudawltu Pathian ngei chu a ni; 49 Mi dotute lak ata mi la chhuak a. A ni, nangin mi beitute chung lamah chuan mi chawi kâng a; Mi nunrâwng lak ata chu mi chhanhim ṭhîn a. 50 Chuvângin, aw LALPA, hnam tin zîngah chuan lâwm thu ka hrilh ang chia, I hming fakin ka zai bawk ang. 51 Ani chuan chhandamna ropui tak a lal a pe thîn a; A hriak thiha chungah, Davida leh a thlahte chung ngeiah chuan Kumkhuain a ngilneihzia a lantîr ang,” a ti a.
Davida thu hnuhnûng
1 Hêng hi Davida thusawi hnuhnûng ber a ni. Jesaia fapa Davida, Sâng taka chawi sâna, Jakoba Pathian hriak thiha, Israel-te hla mawi tak phuahtu chuan a sawi a: 2 “LALPA thlarau chuan keimah mi hmangin a sawi a, A thu chu ka leiah a awm a. 3 Israel-te Pathian chuan a sawi a, Israel-te Lungpui chuan: ‘Mi chunga fel taka rorêl ṭhîna chu, Pathian ṭih chunga rorêl ṭhîna chu, 4 Ni a lo chhuaha chhûm awm hauh lo Zîng êng ang hi a ni ang a, Ruah sûr hnua khaw lo thianga, Leia hlobet chawr no dep ang hi a ni ang. 5 “ ‘Kan chhûngkua chu Pathian hnêna mi a ni lâwm ni? Chatuan thuthlung chu ka hnênah a thlung a, Engkim fel leh tinghet tlatin. Ka chhandamna kim leh duhthusâm kim, A chawr chhuahtîr lâwng maw? 6 Mi suaksualte erawh chu an zain a hnâwla hnâwl bo mi, hlîng ang an ni ang a, Kuta lâk mi an ni si lo. 7 A khawihtu tûr chuan thîr leh fei ngul rawih zâwk tûr a ni a; Tichuan, an hmunah hâl ral vek an ni ang,’ tiin mi bia a,” a ti a.
Davida sipai hmingthangte
8 Hêng hi Davida sipai huaisen hmingte chu a ni: Takemon mi Josebasebetha chu sipai hotute zînga hotu ber a ni a; ani chu ṭum khata mi zariat thattu Eznit mi Adinoa an tih bawk kha a ni. 9 Tin, a dawttu chu Aho mi Dodova fapa Eleazara a ni a; chu mi chu Philistia mite indo tûra an pun khâwma, an chova, Israel mite an kal bo vek laia Davida hnêna sipai huaisen pathumte zînga pakhat kha a ni. 10 Ani chu a tho va, Philistia mite chu a kut a khama a khandaih pawh thlah thei lo hial khawpin a that a. Chumi ni chuan LALPAN nasa takin a ngamsak a; tin, mipuite chu a hnungah râllâk thil la tûr ngawtin an lo kîr leh a. 11 Tin, chumi dawttu chu Harar mi Agea fapa Samma a ni a. Tin, dailuah awm chûkna hmunah Philistia mite chu lâk tumin an infâwk khâwm a; tin, mipuite chuan Philistia mite chu an tlânchhiatsan a. 12 Nimahsela, ani chu chumi hmunah chuan a ding a, a vêng tlat a, Philistia mite chu a that a; tin, LALPAN nasa takin a ngamsak a. 13 Tin, sipai huai huai sawmthum zînga pathumte chu an chhuk a, buh seng lai takin Davida hnênah Adulam pûkah an kal a; tin, Philistia sipaiho chuan Rephaim kâwnah ṭanhmun an khuar a. 14 Tin, chutih lai chuan Davida chu kulhbîngah a awm a, chutih lai bawk chuan Philistia sipaiho chu Bethlehem-ah an awm a. 15 Tin, Davida chuan tui a châk êm êm mai a, “Bethlehem-a tuichhunchhuah tui, kulh kawngkhâr kianga mi kha in tûra mi pe han awm teh sela aw!” a ti a. 16 Chutichuan, sipai huaisen pathumte chuan Philistia sipaiho chu an tâwn tlang a, kulh kawngkhâr kianga mi Bethlehem-a tuichhunchhuah tui chu an va chawi a, an keng a, Davida hnênah an kalpui a; nimahsela, a lo in duh lo va, LALPA tân a bun chhuak ta zâwk a. 17 “Aw LALPA, hei hi ka tih loh tûrzia mai chu! Thih huama kalte thisen chu ka in dâwn em ni?” a ti a; chutichuan, a in duh ta lo va. Chûng thilte chu sipai huaisen pathumte chuan an ti a ni. 18 Zeruii fapa Joaba unau Abisaia chu an pathum zînga hotu ber a ni a. A feiin mi zathum a bei a, a that a, pathumte zîngah chuan hmingṭhat a hlawh a. 19 Pathumte zîngah chuan chawimawi tlâk ber a ni lâwm ni? Chuvângin, an hotu atân an siam a; nimahsela, chungnung ber pathum zînga chhiar tel a kai lo. 20 Tin, Kebzeel mi huai fapa Jehoiada fapa Benaia, thil nasa tak titu chuan Moab mi huaisen Ariela fapate pahnih a that a; tin, a zuk chhuk a, vûr tlâk hun laiin khuarkhurumah sakeibaknei a zuk that bawk a. 21 Tin, Aigupta mi, mi lian tak a that a. Aigupta mi chuan fei a keng a; nimahsela, Benaia chuan tiang kengin a zuk pan a, Aigupta mi fei ken chu a chhuhsak a, ama fei chuan a chhun hlum ta a. 22 Jehoiada fapa Benaia chuan chutiang thil chu a tih avângin sipai huaisen pathumte zîngah chuan hmingṭhat a hlawh a. 23 Mi sawmthumte ai chuan chawimawi tlâk a ni a; nimahsela, chungnung ber pathumte zînga chhiar tel a kai lo. Tin, Davida chuan amah vêngtu hotu atân a dah a. 24 Joaba unau Asahela chu sawmthum zînga pakhat a ni a; Bethlehem khuaa mi Dodova fapa Elhanana te, 25 Harod mi Sama te, Harod mi Elika te, 26 Pal mi Heleza te, Teko mi Ikesa fapa Ira te, 27 Anathoth mi Abiezera te, Husath mi Mebunaia te, 28 Aho mi Zalmona te, Netophath mi Maharaia te, 29 Netophath mi Baana fapa Heleba te, Benjamina thlah Gibea khuaa mi Ribaia fapa Ithaia te, 30 Pirathon mi Benaia te, Gaas-a luitea mi Hidaia te, 31 Arbath mi Abi-albona te, Bahurim mi Azmavetha te, 32 Saalbon mi Eliaba te, Jasena fapate zînga Jonathana te, 33 Harar mi Sama te, Harar mi Sarara fapa Ahiama te, 34 Maakath mi Ahasbaia fapa Elipheleta te, Gilon mi Ahithophela fapa Eliama te, 35 Karmel mi Hezraia te, Arbit mi Paaraia te, 36 Zoba khuaa mi Nathana fapa Igala te, Gad mi Bania te, 37 Zeruii fapa Joaba râlthuam kengtu Amon mi Zeleka te, Beerot mi Naharaia te, 38 It mi Ira te, It mi Gareba te, 39 Hit mi Uria te an ni: an za chuan sawmthum leh pasarih an ni.
Davidan Israel leh Juda-te chhiarpui a nei
1 Tin, LALPA thinurna chu Israel-te chungah a lo thawk leh ta thut a, “Kal la, Israel mi leh Juda mite chhiar vek rawh,” tiin, Davida chu an pawi khawih tûrin a chawk tho va. 2 Tin, lal chuan a hnêna awm sipai hotu Joaba hnênah chuan, “Israel hnam zawng zawng zîngah hian Dan aṭanga Beer-seba thlengin vâk vêl la, mi eng zât nge an nih ka hriat theih nân chhiar vek rawh u,” a ti a. 3 Tin, Joaba chuan lal hnênah, “LALPA i Pathian chuan mipuite tipungin, eng zâta tam pawh, a leh za pawh lalpa ka pu hian hmu hman rawh se; nimahsela, lalpa ka pu chuan chu chu engah nge maw hriat a châk le?” a ti a. 4 Nimahsela, lal thu chuan Joaba leh sipai hotute chu a hneh ta a. Tichuan, Joaba leh sipai hotute chu Israel mite chhiar tûr chuan lal hnên ata chu an chhuak ta a. 5 Tin, Jordan râl an va kai a; tin, Gad ruam lai tak ding lama khaw awm Aroer-ah chuan Jazer thlengin awmhmun an khuar a. 6 Tin, Gilead ram leh Tahtim-hodsi ram an thleng a; tin, Dan-jaan an thleng a, Zidon panin an kal vel a; 7 tin, Tura kulh te an va thleng a; tin, Hiv-ho leh Kanaan mite khua zawng zawng an thleng a; tin, Judai chhim lam Beer-seba-ah an kal a. 8 Chutichuan, ram zawng zawng an fan chhuah hnu chuan thla kua leh ni sawmhnih ralah Jerusalem-ah an lo haw a. 9 Tin, Joaba chuan mihring zât chin chu lal a pe a. Tin, Israel ramah chuan khandaih keng mi, mi huaisen nuai riat an awm a; tin, Juda mi chu nuai nga an awm a. 10 Tin, mihring a han chhiar zawh chuan Davida thinlung chu a na ta hle mai a. Tin, Davida chuan LALPA hnênah, “Ka thiltihah hian nasa takin ka lo sual ta a ni; nimahsela, tûnah hian aw LALPA, i chhiahhlawh khawlohna hi dah bo tûrin ka ngên a che; âtthlâk takin ka lo ti ta a ni e,” a ti a. 11 Tin, zînga Davida a han thawh chuan Davida zâwlnei, zâwlnei Gada hnênah LALPA thu a lo thleng a, 12 “Kal la, Davida hnênah, ‘LALPAN heti hian a ti: “Thil kawng thum ka ruatsak chia, i chunga ka tih tûrin pakhat thlang rawh,” a ti e,’” tiin. 13 Chutichuan, Gada chu Davida hnênah a kal a, a hrilh a, a hnênah, “I ramah hian kum sarih ṭâm i chunga a lo tlâk nge, i hmêlma hmaa an ûm chhûng chea thla thum lo tlân bo rih nge, i rama ni thum hri lo lên? Mi tîrtu eng angin nge ka chhân dâwn inngaihtuah la, mi hrilh rawh khai,” a ti a. 14 Tin, Davida chuan Gada hnênah, “Ka mang a ang hle mai. LALPA kutah tlu lût phawt mai ila, a zahngaihna chu a nasa hle si a; mihring kutah chuan mi tlûk luhtîr lul suh ang che,” a ti a. 15 Chutichuan, LALPA chuan Israel mite chungah chuan zîng aṭangin hun ruat ang thleng chuan hri a lêntîr a; tichuan, mipui zînga mi chu Dan aṭangin Beer-seba thlengin mi sîngsarih an thi a. 16 Tin, vântirhkohvin tichhe tûra Jerusalem lama a kut a han lek chuan, LALPAN thil ṭha lo tih a tum chu a lamlêt a, mite tiboraltu vântirhkoh hnênah chuan, “A tâwk tawh e; i kut lek tawh suh,” a ti a. Tin, LALPA vântirhkoh chu Jebus mi Arauna hruih bulah chuan a awm a. 17 Tin, Davidan mi tihlumtu vântirhkoh a hmuh chuan LALPA a bia a, “Ngai teh, ka lo sual ta a, dik lo takin thil ka lo ti ta a ni; mahse, hêng berâmte hian eng thil nge an tih? I kut chuan keimah leh ka pa chhûngte mi khawih zâwk rawh se aw,” a ti a. 18 Tin, chumi ni chuan Gada chu Davida hnênah a kal a, a hnênah, “Chho la, Jebus mi Arauna hruihah LALPA tân maichâm han siam rawh,” a ti a. 19 Tin, Davida chu LALPAN thu a pêk anga Gadan a hrilh ang chuan a chho ta a. 20 Tin, Arauna chu a han hawi a, a lam pana lal leh a hote lo kal chu a hmu a. Tichuan, Arauna chu a chhuak a, a hmaia lei siin lal hmaah chuan a bawkkhup a. 21 Tin, Arauna chuan, “Eng vângin nge lalpa ka pu chu a chhiahhlawh hnênah a lo kal le?” a ti a. Tin, Davida chuan, “Mipuite laka hri a kian theihna tûra LALPA tâna maichâm siam nâna i hruih lei tûrin,” a ti a. 22 Tin, Arauna chuan Davida hnênah, “LALPA ka pu chuan âwm a tih chu la sela, hlân ang hmiang. En teh, hâlrala hlan atân bâwngpate chu a awm a; tin, thing atân hruih hmanruate leh sebâwng thuamnate chu a awm a. 23 Aw lalpa, hêng zawng zawng hi Arauna chuan lal a pe vek e,” a ti a. Tin, Arauna chuan lal hnênah, “LALPA i Pathian chuan lo chhâng che rawh se,” a ti a. 24 Tin, lal chuan Arauna hnênah, “Ni lo ve a, man neiin a lei ngeiin ka leisak zâwk ang che; eng mah insêngso lovin LALPA ka Pathian hnênah hâlral thilhlante ka hlân tawp lo vang,” a ti a. Chutichuan, Davida chuan hruih leh sebâwngpate chu tangka sekel sawmngain a lei ta a. 25 Tin, Davidan chutah chuan LALPA tân maichâm a siam a, hâlral thilhlante leh remna thilhlante a hlân a. Chutichuan, LALPA chu an ram chungah chuan a lungawi a, Israel ram ata hri chu a kiang ta a.
Davida a lo tar ta
1 Tin, Davida chu a lo upain, a lo tar ta hle a; tichuan, puanin an khuh ṭhîn a; nimahsela, a lum thei chuang hauh lo va. 2 Chutichuan, a puipaten a hnênah, “Kan pu lal tân hian nula i zawng teh ang u; lal bulah hian awm reng sela, enkawl rawh se; tin, i ângchhûngah hian lo mu sela, kan pu lal hi a lo lum thei dâwn nia,” an ti a. 3 Chutichuan, Israel ram zawng zawngah chuan nula hmêlṭha an zawng a, Sunam mi Abisagi an va hmu a, lal hnênah chuan an hruai ta a. 4 Chu nula chu a hmêl a ṭha hle mai a; lal chu a enkawl a, a rawng a bâwlsak ṭhîn a; nimahsela, lal chuan a pâwl lo.
Adonijan lal a tum
5 Tichuan, Hagithi fapa Adonija chu, “Keimah ka la lal dâwn hi maw,” tiin a inngai ropui hle mai a; tawlailîr leh sakawr chung chuang mite, mi sawmnga a hmaa tlân tûrte nên a buatsaih a. 6 A pa lah chuan eng lai mahin, “Engati nge hetiangin i tih?” tiin a tilungni lo ngai si lo va; tin, amah chu hmêlṭha tak a ni bawk a. Absaloma chhang a ni. 7 Ani chuan Zeruii fapa Joaba leh puithiam Abiathara chu a râwn a; anni chu Adonija lamah an ṭang a, an ṭanpui ṭhîn a. 8 Puithiam Zadoka te, Jehoiada fapa Benaia te, zâwlnei Nathana te, Simeia te, Reia te leh Davida ho mi huaisente erawh chu Adonija lamah an ṭang ve lo va. 9 Tin, Adonija chuan berâmte, sebâwngpate, ran châwm thaute Zohelet lungah a talh a, chu chu En-rogel bula awm a ni; tin, lal fapa, a unau zawng zawngte leh, Judai rama lal puipaho zawng zawngte chu a sâwm a. 10 zâwlnei Nathana te, Benaia te, mi huaisenhote leh a unaupa Solomona erawh chu a sâwm ve lo.
Davidan Solomona lalah a siam
11 Chutichuan, Nathanan Solomona nu Bathsebi hnênah, “Hagithi fapa Adonija hi kan pu Davida hriat lohvin a lal ta mai tih i hre na nge? 12 Chutichuan, nangma himna tûr leh i fapa Solomona himna tûr ka lo hrilh teh ang che. 13 Lal Davida hnênah va lût ta la, a hnênah, ‘Aw lalpa, ka pu, i bawihnu hnênah hian, “I fapa Solomona hi ka hnuah a la lal ngei ngei dâwn a, amah hi ka lalṭhutthlêngah hian a la ṭhu dâwn e,” ti khân chhia i chham a ni lâwm ni kha? Engati nge Adonija lala a awm tâk mai?’ va ti teh. 14 Ngai teh, lal i va biak lai takin kei pawhin ka rawn zui lût ve mai ang chia, i thusawi chu ka rawn nemnghehpui dâwn che nia,” tiin a sawi a. 15 Tin, Bathsebi chu lal hnênah pindanah chuan a va lût a; lal chu a upa tawh hle mai a, Sunam mi Abisagi chuan lal rawng chu a bâwl a. 16 Tin, Bathsebi chuan lal chu kûnin chibai a bûk a. Tin, lal chuan, “Eng nge i duh le?” a lo ti a. 17 Tin, ani chuan, “Ka pu, LALPA i Pathian hming chhâlin i bawihnu hnênah hian, ‘I fapa Solomona hi ka hnuah a la lal ngei ngei dâwn a, amah hi ka lalṭhutthlêngah hian a la ṭhu dâwn e,’ ti khân chhia i chham tawh a. 18 Ngai teh, hei Adonija a lal ta reng mai; nang, ka pu lalpa lah hian i hre ve si lo va. 19 Bâwngpate, ran châwm thaute, berâmte a talh ṭeuh va, lal fapa zawng zawngte leh, puithiam Abiathara leh, sipai hotu Joaba te a sâwm a; i chhiahhlawh Solomona erawh chu a sâwm ve lo. 20 Tichuan, ka pu, lalpa hnuah hian a lalṭhutthlêngah tu nge la ṭhu dâwn tih i hrilh chângin Israel-ho zawng zawng mit hi nang, ka pu lalpa, i chungah a fu ṭhup a ni. 21 Chuti lo zawng, heti hi a ni ang a, ka pu lalpa hi a puteho hnêna a muthilh ve hunah chuan, kei leh ka fapa Solomona hi thil tisualtuah min ruat mai dâwn a ni,” a ti a. 22 Tin, ngai teh, chutia lal a biak lai tak chuan, zâwlnei Nathana chu a lo lût ve a. 23 “En teh, zâwlnei Nathana a lo kal e,” tiin lal chu an hrilh a. Tin, lal kiang a va thlen chuan, lal hmaah chuan a hmaia lei siin a bawkkhup a. 24 Tin, Nathana chuan, “Aw lalpa, ka pu, ‘Ka hnuah Adonija hi a lal ang a, ka lalṭhutthlêngah a ṭhu ang,’ i ti em ni? 25 Vawiinah hian a chhuk a, bâwngpate, ran châwm thaute, berâmte a talh ṭeuh mai a, lal fapa zawng zawngte, sipai hotute, puithiam Abiathara te a sâwm a; tin, ngai teh, an eiin an in ho va, ‘Pathianin Lal Adonija hi humhim rawh se,’ an ti a ni. 26 Amaherawhchu, kei i chhiahhlawh ngei leh, puithiam Zadoka leh, Jehoiada fapa Benaia leh, i chhiahhlawh Solomona hi zawng min sâwm ve lo a ni. 27 Hei hi lalpa ka pu thua tih a nih si chuan, lalpa ka pu hian a hnua lalṭhutthlênga ṭhu tûra hi tu ber nge ni tih i chhiahhlawhte hi i lo la hrilh lo a ni ang maw?” a ti a. 28 Chutichuan, Lal Davida chuan a chhâng a, “Bathsebi mi han kohsak teh u,” a ti a. Tin, lal kiangah chuan a va kal a, lal hmaah a va ding a. 29 Tin, lal chuan chhia a chham a, “Manganna zawng zawnga ka nunna humhimtu LALPA nunna chhâlin, 30 i hnêna LALPA, Israel-te Pathian hming chhâla, ‘I fapa Solomona hi ka hnuah chuan a lal ngei ngei ang, ka aiah ka lalṭhutthlêngah hian a la ṭhu dâwn e,’ tia chhia ka chham ang ngei khân, vawiin ngeiah pawh hian ka la ti dâwn a ni,” a ti a. 31 Chutichuan, Bathsebi chu a hmaia lei siin a bawkkhup a, lal chu chibai a bûk a, “Ka pu Lal Davida hi kumkhuain dam reng rawh se,” a ti a. 32 Tin, Lal Davidan, “Puithiam Zadoka leh, zâwlnei Nathana leh Jehoiada fapa Benaia mi va koh teh u,” a ti a. Tin, a hmaah chuan an va kal a. 33 Tin, lal chuan an hnênah, “In pu puipate hruai ula, ka fapa Solomona hi keima sabengtung ngei chungah chuantîr ula, Gihon hmunah zuk hruai rawh u. 34 Tin, puithiam Zadoka leh zâwlnei Nathanan Israel-te lal atân hriak zuk thih rawh se; tin, tawtawrâwt hâm ula, ‘Pathianin Lal Solomona humhim rawh se,’ ti rawh u. 35 Tichuan, amah chu in zui chho vang a, ka lalṭhutthlêngah hian a lo ṭhu dâwn nia, amah hi ka aia lal tûr a ni si a; tin, amah hi Israel ram leh Judai ram hotu atân ka ruat a ni e,” a ti a. 36 Tin, Jehoiada fapa Benaia chuan lal chu a chhâng a, “Amen! LALPA, ka pu lalpa Pathian pawhin remti ve rawh se. 37 LALPA chu ka pu lalpa hnêna a awm ṭhîn angin, Solomona hnênah pawh awm ve zêl sela, ka pu Lal Davida lalṭhutthlêng aiin a lalṭhutthlêng chu tiropui zâwk rawh se,” a ti a. 38 Chutichuan, puithiam Zadoka te, zâwlnei Nathana te, Jehoiada fapa Benaia te, Kereth mite, Peleth mite chu an zuk kal a, Solomona chu Davida sabengtung chungah an chuantîr a, Gihon hmunah an hruai a. 39 Tin, puithiam Zadoka chuan Puan In ata hriak dahna ki a la a, Solomona chu a thih ta a. Tin, tawtawrâwt an hâm a; tichuan, mi zawng zawngin, “Pathianin Lal Solomona humhim rawh se,” an ti a. 40 Tin, mipuiho zawng zawng chuan amah chu an zui chho va, mipuite chuan phênglâwngte an tum a, an lâwm nasa khawp a, an thâwm ri chuan lei a nghawr khi a. 41 Tin, Adonija leh a sâwmho a hnêna awm zawng zawngte chuan an ruaiṭheh zawh chuan an han hria a. Tin, Joaban tawtawrâwt ham rîk a han hriat chuan, “Khawpui chhûnga thâwm ri awm ta dur dur chu engtizia nge maw ni chu le?” a ti a, 42 Chutia a tih lai tak chuan ngai teh, puithiam Abiathara fapa Jonathana a va kal a. Adonija chuan, “Lo kal teh khai, nang zawng mi fel i ni a, chanchin ṭha i rawn thlen châwk ang chu maw?” a lo ti a. 43 Tin, Jonathanan a chhâng a, Adonija hnênah chuan, “Thlen lo ve! Kan pu, Lal Davidan Solomona lalah a siam ta alâwm maw le. 44 Ama rualin puithiam Zadoka te, zâwlnei Nathana te, Jehoiada fapa Benaia te, Kereth mite, Peleth mite lalin a tîr a; lal sabengtung chungah an chuantîr a. 45 Tin, puithiam Zadoka leh zâwlnei Nathanan Gihon hmunah lal atân hriak an thih ta a; chuta ṭang chuan hlim takin an lo chho va, chu chuan khawpui chhûng a khâwk rum rum a ni. Chu chu a ni in thâwm hriat chu. 46 Tin, Solomona chu ram lalṭhutthlêngah chuan a ṭhu ta bawk a. 47 Tin, lal puipate chu, ‘I Pathianin i hming aiin Solomona hming chu tiṭha zâwk sela, i lalṭhutthlêng aiin a lalṭhutthlêng chu tiropui zâwk rawh se,’ tia kan pu Lal Davida lawmpui tûrin an kal chiam bawk a; tin, lal chu khum siin a kûn a. 48 Tin, lal pawh chuan heti hian a ti, ‘LALPA, Israel-te Pathian, vawiin ngeia ka lalṭhutthlênga ṭhu tûr rawn ruattu chu fakin awm rawh se, ka mit ngeiin a hmuh tâk hi,’ a ti bawk a,” a ti a. 49 Tin, Adonija mi sâwmte zawng zawng chuan an hlau ta a, an tho va, mahni kawng kawngah an kal ta vek a. 50 Tin, Adonija chuan Solomona chu a hlau ta a; a tho va, maichâm ki a va vuan ta a. 51 Tin, “Ngai teh, Adonijan Lal Solomona a hlau va; ‘Lal Solomona hian a chhiahhlawh hi khandaiha tihlum lo tûrin ka hnênah chhia chham phawt rawh se,’ tiin maichâm ki a vuan e,” tiin Solomona chu an hrilh a. 52 Tin, Solomona chuan, “Mi rinawm tak a nih a tihlan phawt chuan a sam zai khat pawh leiah a tla lo vang; amaherawhchu, suahsualna a nei tih hriatna a awm chuan a thi ang,” a ti a. 53 Chutichuan, Lal Solomona chuan mi a tîr a, maichâm ata chu an va hruai thla a. Tin, a va kal a, Lal Solomona chu chibai a bûk a; tin, Solomona chuan a hnênah, “I inah haw tawh,” a lo ti a.
Davidan Solomona thu a chah
1 Tin, Davida thih hun chu a lo hnai ta a, a fapa Solomona chu thu a pe a, 2 “Leilung zawng zawng dân angin ka kal ve dâwn ta a ni; tichuan, chak takin awm la, patling takin awm rawh; 3 i thiltih apiang leh, i hawina lam apianga i hmuingîl theih nân Mosia Dâna ziak anga LALPA i Pathianin a kawngte zawh tûr leh, a thuruat te, a thupêk te, a rorêl te leh a thuhriattîrte pawm tûra thu a pêkte hi zâwm rawh; 4 LALPAN ka chungchâng thua, ‘I thlahten an thinlung tak leh an rilru taka ka mit hmuha thutaka awm tûra an awm dâna an fimkhur chuan, Israel-te lalṭhutthlênga ṭhu tûr i hmai lo vang,’ tia a sawi kha a tinghet dâwn nia. 5 Tin, Zeruii fapa Joaba mi tih zia, Israel-te sipai hotu pahnih, Nera fapa Abnera leh Jethera fapa Amasa-te a tih zia ngei kha i hria e. Khatia a thaha, inrem laia indo thisen chhuaha a chhuaha, a taia kâwnghrênah leh a pheikhawk buna indo thisen a tihkai ziate kha. 6 Tichuan, i remhriat dân angin ti langin, a lua kêlsam ṭo hi thlânah thlamuang takin liamtîr suh ang che. 7 Gilead mi Barzilaia fate chungah erawh chuan khawngaihna lantîr langin, i dawhkâna chaw kîltuah teltîr ve ang che, i unau Absaloma laka ka tlân bo lai khân ka hnênah an lo kal si a. 8 Tin, ngai teh, Bahurim khuaa mi Benjamina thlah, Gera fapa Simeia hi i hnênah a awm a, ani chuan Mahanaim hmuna ka kal lai khân ânchhe ṭha lo tak mi lawh a; amaherawhchu, Jordan-ah mi hmuak tûrin a lo chhuk a, chutah chuan, ‘Khandaihin ka that lo vang che,’ tiin LALPA hming chhâlin a hnênah chhia ka lo chham tawh a. 9 Chutichuan, thiam chang zawngin chhuah suh, mi fing i ni si, a chungah engtia tih tûr nge ni tih zawng i hre mai ang a; a lua kêlsam ṭo chu thisen nên thlânah i liamtîr dâwn nia,” a ti a. 10 Tin, Davida chu a puteho hnênah a muhîl ve ta a, Davida khawpuiah an phûm a. 11 Israel-hote chunga Davida lal chhûng chu kum sawmli a ni: Hebron khuaah kum sarih a lal a, Jerusalem khuaah kum sawmthum leh kum thum a lal a. 12 Tin, Solomona chu a pa Davida lalṭhutthlêngah chuan a ṭhu a; tichuan, a ram chu nasa taka tihnghehin a lo awm ta a.
Adonija thih
13 Tin, Hagithi fapa Adonija chu Solomona nu Bathsebi hnênah a kal a. Ani chuan, “Ṭha lam thua lo kal em i nih le?” a ti a. Anin, “Ṭha lam thu-ah ni e,” a ti a. 14 Tin, “I hnênah eng emaw sawi tûr ka nei a ni,” a ti leh a. Ani chuan, “Sawi ta che,” a ti a. 15 Tin, ani chuan, “Ram hi ka ta a ni tawh tih leh, Israel-ho zawng zawngte pawh hian keimah hi lal atân mi thlîr reng a ni tih i hria a. Nimahsela, ram chu ka unaupa tân a lo inlet leh ta zâwk a; LALPA lo ruat dânah a ta a ni rêng a ni. 16 Tûnah hian thil pakhat dîl tûr che ka nei a, mi remtih lohsak lul suh ang che,” a ti a. Tin, ani chuan a hnênah, “Sawi ta che,” a ti a. 17 Tin, ani chuan, “Khawngaih takin Lal Solomona mi biaksak la (i thu zawng a hnial âwm si lo va), Sunam mi Abisagi hi nupuiah mi neihtîr rawh se,” a ti a. 18 Tin, Bathsebi chuan, “Aw le, lal chu ka lo biaksak ang che,” a ti a. 19 Chutichuan, Bathsebi chu Adonija biaksak tûrin Lal Solomona hnênah chuan a kal ta a. Tin, lal chu amah lâwm tûrin a tho va, a hmaah a kûn a, a lalṭhutthlêngah chuan a ṭhu a; tin, lal nu tân chuan lalṭhutthlêng a hûntîr a; a ding lamah chuan a ṭhu ta a. 20 Tichuan, “Thil pakhat tê tak tê ka dîl dâwn che a ni; min remtih lohsak lul suh ang che,” a ti a. Tin, lal chuan a hnênah, “Dîl ta che, ka nu, ka remtih lohsak hauh lo vang che,” a ti a. 21 Tin, ani chuan, “Sunam mi Abisagi hi i unaupa Adonija nupui atân neihtîr rawh,” a ti a. 22 Tin, Lal Solomona chuan a chhâng a, a nu hnênah chuan, “Engtiziaa Sunam mi Abisagi hi Adonija tâna dîl nge maw i nih le? Ram pawh hi dîlsak ta nghâl law law che, ani chu ka u a ni alâwm; ama tân leh puithiam Abiathara leh Zeruii fapa Joaba tân pawh chuan dîl ta che,” a ti a. 23 Chutichuan, Lal Solomona chuan LALPA hming chhâlin, “Adonija thil dîl hian ama chunga thihna thu sawi a niha a nih loh nâ chuan Pathianin a tih tihin mi ti mai sela, chu aia nasa pawhin. 24 Tichuan, LALPA, a thutiam anga mi tingheta, ka pa Davida lalṭhutthlênga mi ṭhuttîra, chhûngkua mi lo dinsaktu nunna chhâlin ka sawi e, Adonija hi vawiin ni la la hian tihhlum ngei ngei tûr a ni,” tiin chhia a chham ta a. 25 Chutichuan, Lal Solomona chuan Jehoiada fapa Benaia chu a tîr a; ani chuan a va bei a, a that ta a.
Abiathara hnawh chhuah leh Joaba thih
26 Tin, puithiam Abiathara hnênah chuan lalin, “Anathoth khuaah nangma in leh lovah haw daih tawh, thi mai tlâk zawng i ni a; nimahsela, ka pa Davida hmaa LALPA PATHIAN bâwm i lo zâwn ṭhin avâng leh, ka pa hrehawm tuarna zawng zawngahte chuan i lo tuar ve tawh ṭhin avângin tûnah zawng ka tihlum rih lo vang che,” a ti a. 27 Chutichuan, Solomona chuan Abiathara chu LALPA puithiam a nihna a bân ta a; LALPAN Silo khuaa Elia chhûngte chungchâng thu a sawi kha a thlentîr theihna tûrin. 28 Tin, chumi thu chu Joaban a lo hria a; Joaba chu Absaloma lamah khân a ṭang lo na a, Adonija lama ṭang a ni si a. Tichuan, Joaba chu LALPA puan inah a tlân a, maichâm kite chu a vuan ta a. 29 Tin, “LALPA puan inah Joaba a tlân a; ngai teh, maichâm bulah a awm,” tiin Lal Solomona chu an hrilh a. Tichuan, Lal Solomona chuan Jehoiada fapa Benaia chu, “Han bei tawh,” tiin a tîr a. 30 Tin, Benaia chu LALPA puan inah a han kal a, a hnênah chuan, “Lalin, ‘Lo chhuak rawh se,’ a ti e,” a ti a. Tin, ani chuan, “Ni lo ve; hetah hian ka thi mai ang e,” a ti a. Tin, Benaia chuan, “Joaban hetiang hian a lo ti a, hetiang hian mi lo chhâng a ni,” tiin lal hnênah thu a thlen leh a. 31 Tin, lal chuan a hnênah, “A sawi ang chuan han ti la, han bei la, phûm rawh; a chhan awm hauh lova Joaban thisen a chhuah lak ata kha kei leh ka pa chhûngte hi i tihfihlîm theihna tûrin. 32 Tichuan, amah aia mi fel zâwk leh ṭha zâwk mi pahnih - Nera fapa Abnera, Israel-te sipai hotu leh Jethera fapa Amasa, Juda-te sipai hotu kha ka pa Davida hriat lohva a beiha, khandaiha a thah avângin LALPAN a thisen chu ama lu chungah ngei a rawn lêttîr ang. 33 Chutichuan, an thisen chu Joaba lu chungah leh a thlahte lu chungah kumkhuain a lêt ang a; Davida chungah te, a thlahte chungah te, a chhûngte chungah te, a lalṭhutthlêng chungah te erawh chuan LALPA hnên aṭanga thlamuanna kumkhuain a awm reng ang,” a ti a. 34 Chutichuan, Jehoiada fapa Benaia chu a han chho va, a han bei a, a that ta a; tin, thlalêra ama inah chuan an phûm ta a. 35 Tin, lalin Jehoiada fapa Benaia chu sipaihote chungah a ai a awhtîr a; tin, puithiam Zadoka chu lalin Abiathara ai a awhtîr a.
Simeia thih
36 Tin, lalin Simeia chu a kohtîr a, a hnênah, “Jerusalem-ah hian in sa la, chutah chuan awm la, chuta ta chu khawi dangah mah chhuak suh. 37 I chhuah ni, Kidron lui i kân ni la la chuan i thi ngei ngei ang tih hre rawh khai; i thisen chu nangma lu chungah ngei a awm ang,” a ti a. 38 Tin, Simeia chuan lal hnênah, “A dik alâwm; lalpa ka puin a sawi ang chuan i chhiahhlawhin a ti zêl ang,” a ti a. Tin, Simeia chu Jerusalem-ah chuan rei fe chu a awm a. 39 Tin, heti hi a ni a, kum thum a lo vei hnu chuan Simeia chhiahhlawhte zînga pahnih chu Gath khaw lal Maaka fapa Akisa hnênah an tlân a. Tin, “Ngai teh, i chhiahhlawhte chu Gath khuaah an awm e,” tiin Simeia chu an hrilh a. 40 Tin, Simeia chu a tho va, a sabengtung a thuam a, a chhiahhlawhte zawng tûrin Gath khuaah Akisa hnênah chuan a kal ta a; tin, Simeia chuan Gath khua ata a chhiahhlawhte chu a va hruai ta a. 41 Tin, Simeia chu Jerusalem khua ata a chhuak a, Gath khuaah a va kal a, a lo haw leh tih Solomona chu an hrilh a. 42 Tin, lal chuan Simeia chu a kohtîr a, a hnênah, “ ‘I chhuah ni, ram danga i chhuah ni la la chuan i thi ngei ngei ang,’ ti khân LALPA hming chhâlin chhia ka chhamtîr chein, ka hriattîr che a ni lâwm ni? Tin, nang pawhin ka hnênah khân, ‘I thusawi ka hriat hi a ṭha e,’ i tih kha. 43 Eng vânga LALPA chhechham leh thu ka pêk che kha hlen lo nge i nih?” a ti a. 44 Tin, lal vêk chuan Simeia hnênah, “I thinlung chhûngril suahsualzia, ka pa Davida chunga i tih zia te kha i hre vek a; chutichuan, LALPAN i suahsualna hi nangma lu chungah ngei a rawn lêttîr ang. 45 Lal Solomona erawh chu malsâwmin a awm ang a, Davida lalṭhutthlêng chu LALPA hmaa kumkhuaa tihngheh a ni ang,” a ti a. 46 Chutichuan, lal chuan Jehoiada fapa Benaia chu thu a pe a; ani chu a chhuak a, Simeia chu a va bei a, a that ta a. Tichuan, ram chu Solomona kutah tihnghehin a awm ta a.
Solomona finna dîlin a ṭawngṭai
1 Tin, Solomonan Aigupta lal Pharaoa nêna inkûngkaihna a siam a, Pharaoa fanu a nei a; ama in leh LALPA in a sak hma leh, Jerusalem khua kulha a hung vêl hma loh chuan Davida khawpuiah a awmtîr a. 2 Mipuihote chu hmun sângahte an inthawi mai ṭhîn a, chumi hma chuan LALPA hming atân in sak a la awm rih loh avângin. 3 Solomona chuan LALPA chu a hmangaih a, a pa Davida thuruatte chu a zâwm ṭhîn a; hmun sângahte a inthawi a, rimtuite a hâl mai ṭhîn pawh a. 4 Tin, lal chu inthawi tûrin Gibeon khuaah a kal a, chu chu hmun sâng pawimawh taka chu a ni si a; Solomona chuan chumi maichâm chungah chuan hâlral thilhlan sângkhat zet a hlân a. 5 Tin, Gibeon khuaah chuan LALPA chu Solomona hnênah zânah a mumangah a rawn inlâr a; tin, Pathianin, “Dîl teh, eng nge ka pêk ang che?” a ti a. 6 Tin, Solomona chuan, “I chhiahhlawh ka pa Davida kha i mit hmuha thutakah leh, felnaah leh, thinlung dik tak pua a awm ang zêl khân nang chuan a hnênah khawngaihna nasa tak i lantîr a; nangin he khawngaihna nasa tak hi a tân i vohsak a, nangin a lalṭhutthlênga ṭhu tûr fapa i pe a, vawiina a lo awm ta ngei ang hian. 7 Tichuan, aw LALPA ka Pathian, nangin i chhiahhlawh hi ka pa Davida aiah chuan lalah i lo siam ta a; kei zawng naupangchhia mai ka ni a, thu haw lam leh kal lam pawh hi ka la hre lo va. 8 I chhiahhlawh hi i mite i thlanho, mi tam tak, an tam avânga chhiar sên rual loh leh, a zât hriat sên rual lohte zîngah hian a awm a ni a. 9 Chutichuan, i mite rorêlsakna tûrin i chhiahhlawh hi hriatna thinlung pe ang che, a chhia leh a ṭha ka thliar theih nân. I mi heti zozai hi tuin nge rorêlsak thei ang le?” a ti a. 10 Tin, Solomonan chu thil chu a dîl avângin, chu thusawi chuan LALPA a tilâwm hle mai a. 11 Tin, Pathianin a hnênah, “Nangin i tân dam reina dîl lova, hetiang hi i dîl zâwk avâng leh, i tân hausaknate pawh dîl lova, i hmêlmate thihna pawh dîl lova, i tân rorêl thiamna i dîl zâwk avângin; 12 ngai teh, i dîl ang chuan ka ti ta a; ngai teh, finna leh hriatna thinlung ka pe a che; tichuan, i hmaah nangmah ang rêng rêng tu mah an awm lo va, i hnuah pawh nangmah ang rêng rêng tu mah an awm tawh hek lo vang. 13 Tin, i dîl loh, hausakna leh ropuina pawh ka pe bawk a che; tichuan, i dam chhûngin lal zîngah chuan nangmah ang rêng rêng an awm lo vang. 14 I pa Davidan a zawh anga ka thuruatte leh ka thupêkte pawm tûra ka kawngte i zawh chuan ka dam reitîr bawk ang che,” a ti a. 15 Tin, Solomona chu a han harh a; ngai teh, mumang a lo ni a. Tin, Jerusalem-ah a kal a, LALPA thuthlunna bâwm hmaah a ding a, hâlral thilhlan leh remna thilhlante a hlân a, a puipa zawng zawngte tân ruai a ṭheh a.
Solomonan thubuai khirh a rem
16 Hmeichhe pahnih, nawhchizuar hi lal hnênah chuan an kal a, a hmaah an han ding a. 17 Tin, hmeichhe pakhat chuan, “Aw ka pu, he hmeichhia nên hian in khata chêng dûn kan ni a; chumi ina a awm ve lai chuan nau ka hring a. 18 Tin, heti hi a ni a, ka nau hrin achin ni thum hnuah chuan he hmeichhia pawh hian a hring ve a. Awm dûn kan ni a; chu ina awm keimahni pahnih ngawt lo chu, chu inah chuan tu mah mikhual awm an awm lo va. 19 Tin, he hmeichhe fa hi zânah a lo thi a; a delh hlum a ni. 20 Tichuan, zanlaiah a tho va, i bawihnu hi a muthilh hlânin, ka fapa, ka bula mi chu a la a, a pawm a, a fa thia chu mi pawmtîr a. 21 A tûk zînga ka fa hnute pe tûra ka han thawh chuan, ngai teh, a thi a lo ni reng mai a; nimahsela, zînga ka han en chian chuan, ngai teh, ka fapa, ka hrina kha a lo ni hauh lo mai a,” a ti a. 22 Tin, hmeichhe dang chuan, “Ni lo, a dam zâwka hi ka fapa a ni a, a thia hi i fapa a ni,” a ti ve a. Pakhat chuan, “Ni lo, a thia hi i fapa a ni a, a dama hi ka fapa a ni zâwk,” a la ti tlat bawk a. Chutiang chuan lal hmaah chuan an sawi ve ve a. 23 Tichuan, lal chuan, “Pakhatin, ‘A dam zâwka hi ka fapa a ni a, a thia hi i fapa a ni,’ a ti a; tin, pakhatin, ‘Ni lo, a thia hi i fapa a ni a, a dama hi ka fapa a ni zâwk,’ a ti bawk si a,” a ti a. 24 Tin, lal chuan, “Khandaih mi han lâk teh u,” a ti a. Tichuan, khandaih chu lal hmaah chuan an rawn la a. 25 Tin, lal chuan, “Naute dama kha bung hnihah chhuah ula, a chanve chu pakhat kha pe ula, a chanve chu pakhat kha pe rawh u,” a ti a. 26 Tichuan, naute dama nu chuan a fa chu a lainat êm êm mai si a, lal hnênah chuan, “Aw ka pu, naute dama hi amah pe mai rawh, a thah zawng that lul suh ang che,” a ti a. Pakhat zâwk erawh chuan, “Ka ta ni bîk hek suh, i ta ni bîk hek suh; bung mai rawh,” a ti a. 27 Tichuan, lal chuan a chhâng a, “Naute dama kha pe rawh u, that hlek suh u; amah ngei kha a nu a nih kha,” a ti a. 28 Tin, Israel-ho zawng zawng chuan chu thua lal rêl dân chu an lo hria a, lal chu an ṭih ta hle mai a; rorêlna tûrin Pathian finna chu amahah chuan a awm tih an hre ta si a.
Solomona hnuaia hotute
1 Tin, Lal Solomona chu Israel-ho zawng zawng lalah a awm ta a. 2 Hêngte hi a mi lianho neihte chu an ni: Zadoka fapa Azaria chu puithiam a ni a; 3 Sisa fapa, Elihorepha leh Ahija-te chu lehkhaziaktu an ni a; Ahiluda fapa Jehosaphata chu chanchin ziaktu a ni a; 4 Jehoiada fapa Benaia chu sipai hotu a ni a; Zadoka leh Abiathara chu puithiam an ni a; 5 Nathana fapa Azaria chu hotute chunga mi a ni a; Nathana fapa Zabuda chu puithiam leh lal ṭhian a ni fâwm a; 6 Ahisara chu in chhûng lam hotu a ni a; Abda fapa Adonirama chu hnathawka rawih luihte hotu a ni. 7 Tin, Solomona chuan Israel-ho zawng zawng chungah chuan hotu sâwm leh pahnih a nei a, chûngho chuan lal tân leh a chhûngkuate tân chuan ei tûr an ngaihtuah ṭhîn a; mi pakhatin kum khatah thla khat zêl ei tûr a ngaihtuah tûr a ni. 8 Hêngte hi an hmingte chu a ni: Ephraim tlâng ramah Ben-hura; 9 Makaz khuaah te, Saalbim khuaah te, Beth-semes khuaah te, Elon-beth-hanan khuaah te Ben-dekera; 10 Aruboth ramah Ben-heseda; ani chuan Soko leh Hepher ram zawng zawng a chang tel a; 11 Dor khaw zosang ram zawng zawngah Ben-abinadaba; ani chuan Solomona fanu Taphathi nupuiah a nei a; 12 Taanak khua leh Meggido khuaah te, Jezreel khaw hnuai, Zarethan khaw bula awm Beth-san bial zawng zawngah te, Beth-san aṭanga Abel-mehola-ah te, Jokneam ram dep thlengin Ahiluda fapa Baana; 13 Ramoth-gilead khuaah Ben-gebera; ani chuan Manasea fapa Jaira khua, Gilead rama awmte chu a chang tel a; Basan rama Argob bial, khaw ropui tak tak khaw sawmruk, kulh leh a kalhna dâr tlâwn neite pawh a chang tel a; 14 Mahanaim khuaah Idova fapa Ahinadaba; 15 Naphtali ramah Ahimaaza; ani pawh chuan Solomona fanu Basemathi nupuiah a nei a; 16 Aser leh Bealoth khuaahte Husaia fapa Baana; 17 Isakar ramah Parua fapa Jehosaphata; 18 Benjamin raman Ela fapa Simeia; 19 Amor-ho lal Sihona leh Basan lal Oga ram, Gilead ramah Uria fapa Gebera; chu ramah chuan hotu pakhat a awm.
Solomona lal chhûnga hamṭhatna
20 Juda-te leh Israel-te chu tuifinriat kama ṭiauvaivut zât zetin an tam a, en eiin an in a, hlim takin an awm ṭhîn a. 21 Tichuan, Solomona chuan Lui aṭangin Philistia-ho ram leh Aigupta ramri thlengin ram zawng zawng chungah chuan ro a rêl a. Lâwmmante an rawn keng ṭhîn a, Solomona dam chhûng zawng chuan a rawng an bâwl ṭhîn a. 22 Solomona ni khat ei tâwk chu chhangphut dip tak tehkhâwng sawmthum leh, chhangphut tehkhâwng sawmruk a ni a; 23 bâwngpa thau tak sâwm te, bâwngpa tla mi sawmhnih te, berâm za te nên; chûng lo pawh chu sakhi te, sangai te, sakhipa te, âr châwm thaute pawh. 24 Lui râl piah lam ram zawng zawng - Tipsa aṭanga Gaza thlengin, Lui ral piah lama lalho zawng zawng chungah chuan a lal a; a chhehvêla mi zawng zawngte nên chuan râlmuangin an awm hlawm a. 25 Tin, Solomona dam chhûng zawng chuan Juda-ho leh Israel-ho chu, Dan aṭanga Beer-seba khaw thlengin, mi tin mahni grêp hrui bulah leh mahni theipui bulah chuan thlamuang takin an awm ṭheuh va. 26 Tin, Solomona chuan a tawlailîr hnûktu sakawr in sîngli leh sakawr chung chuang mi sîngkhat leh sânghnih a nei a. 27 Chûng hotute chuan mahni chan thla zêlah, Lal Solomona leh Lal Solomona dawhkâna rawn kîl vetu zawng zawngte ei tûr chu an ngaihtuah ṭhîn a; pêk kim loh an nei ngai lo. 28 Mi tinin an tih tûra ruat ang zêlin a awmna tûr hmunah chuan, sakawrte leh ran tlân chak takte tân barli leh buhpâwlte an rawn dah bawk ṭhîn a. 29 Tin, Pathianin Solomona chu finna leh hriatna nasa tak leh, rilru zauna, tuifinriat kama ṭiauvaivut ang mai a pe a. 30 Solomona finna chuan khawchhak fate zawng zawng finna leh Aigupta mite finna zawng zawng chu a khûm vek a. 31 Mi zawng zawng aiin a fing a ni: Mahola fate - Ezra mi Ethana te, Hemana te, Kalkola te, Darda te ai pawhin; tichuan, a vêl hnam zawng zawngte zîngah chuan a hming a thang ta a. 32 Thufing sângthum a sawi a; tin, a hlate chu sângkhat leh panga a ni. 33 Thing chanchin te pawh Lebanon tlânga sidar thing aṭanga kulha lo chawr chhuak husop chenin a sawi ṭhîn a; sa chanchin te, bawkvâka kal chi chanchin te, sangha chanchin te pawh a sawi ṭhîn a. 34 Tichuan, Solomona finna chanchin hre tawh phawt chu, khawvêl lalho zawng zawng aṭangin, chi tina mi a finna ngaithla tûr an lo kal ṭhîn a.
Solomonan tempul a puah
1 Tin, Tura lal Hiraman Solomona hnênah a mite a tîr a, a pa aiah lal atân hriak an thih tih a lo hre ta si a; Hirama chu Davida ngaina ṭhîntu a ni fo rêng a. 2 Tin, Solomona chuan Hirama hnênah, 3 “Ka pa Davida khân LALPAN a kephah hnuaia a dah hma loh kha chuan a vêl kil tin kil tanga indonate avâng khân, LALPA a Pathian hming atân in a sa thei lo tih i hria a. 4 Tûnah erawh chuan LALPA ka Pathianin kil tin kil tangah muanna min lo neihtîr ta a; hmêlmate an awm ta lo va, vânduaina pawh a awm ta hek lo. 5 Tin, ngai teh, LALPAN ka pa Davida hnêna, ‘I fapa, i aia i lalṭhutthlêng ka la luahtîr tûra chuan ka hming atân in chu a la sa ang,’ tia a lo sawi tawh ang khân, LALPA ka Pathian hming atân in sak ka tum a. 6 Chutichuan, Lebanon tlânga mi sidar thingte mi kihsak tûrin thu pe langin, ka chhiahhlawhte pawh i chhiahhlawhte zîngah an tel ve ang a; tin, i chhiahhlawhte hlawh chu i sawi ang apiang ka pe zêl ang che; Zidon mite anga thing kih thiam kan zîngah tu mah an awm lo tih i hre si,” tiin mi a tîr a. 7 Tin, heti hi a ni a, Hiraman Solomona thu a lo hriat chuan a lâwm ta êm êm mai a, “Hêng mi tam tak chunga rorêl tûra fapa fing tak Davida petu LALPA chu vawiinah hian fakin awm rawh se,” a ti a. 8 Tin, Hiraman Solomona hnênah, “I thu mi han chah chu ka lo hria a; sidar thing thu leh fâr thing thu chu i mamawh apiang ka lo ti ang e. 9 Ka chhiahhlawhten Lebanon tlâng aṭangin tuifinriat thlengin an rawn la thla ang a; i hmun mi ruatsak tûra tuifinriata tawlh tûrin ka têltîr ang a, chumi hmunah chuan ka phelhtîr ang a, nangin i lo la dâwn nia; tin, nang pawhin ka chhûngkuate ei tûr tumin ka mamawh i lo phuhru ve thung a ni ang chu,” tiin mi a tîr a. 10 Chutichuan, Hirama chuan sidar thing leh fâr thing chu Solomona hnênah a mamawh apiang a pe a. 11 Tin, Solomonan Hirama chu a chhûngkuate ei atân buh tehkhâwng sînghnih leh hriak sâwr tehkhâwng sawmhnih a pe a. Chu chu Solomonan kum tina Hirama a pêk ṭhin dân chu a ni. 12 Tin, LALPAN a tiam ang ngeiin Solomona chu finna a pe a; tin, Hirama leh Solomona kârah chuan inremna a awm a, an pahnih chuan thu an thlung dûn ta a. 13 Tin, Lal Solomona chuan Israel-ho zawng zawng zînga mi hnathawka rawih luih pâwl a siam a; rawih luih pâwl chu mi sîngthum an ni. 14 Lebanon-ah chuan thla khata inthlâk zêlin sîngkhat a tîr ṭhîn a: thla khat Lebanon-ah an han awm a, thla hnih anmahni in lamah; Adonirama chu hnathawka rawih luihte hotu a ni. 15 Tin, Solomona chuan thil phur mi sîngsarih leh, lung chhêr mi sîngriat tlângahte a nei a; 16 chûngte chu tiam lovin Solomona chuan a hna chunga hotu bîk, hnathawk vêngtu sângthum leh zathum a nei bawk a. 17 Tin, lal thupêkin in lungphûm chu lung chher saa rem tûrin lung lian pui pui, lung man tam tak takte an rawn la a. 18 Tin, in satuho, Solomona mite leh Hirama mite leh Gebal mite chuan lungte chu an chher a, in sakna tûr chuan thing leh lungte chu an buatsaih a.
Solomonan tempul a sa
1 Tin, heti hi a ni a, Israela thlahte Aigupta ram ata an chhuah achin kum zali leh sawmriatna kum, Israel-hote chunga Solomona a lal kum lina, Ziv thla, thla hnihnaah chuan LALPA in sak chu a ṭan a. 2 Tin, Solomonan LALPA tâna in a sak chu a dung lam tawng sawmruk a ni a, a vâng lam chu tawng sawmhnih a ni a, a sân lam chu tawng sawmthum a ni. 3 Tin, chumi ina hmun thianghlim hma lama hulhliap chu a in vâng lam chen, tawng sawmhniha sei a ni a, a hma lama mi vâng lam chu tawng sâwm a ni. 4 Tin, in atân chuan tukverh zîm tê thil kawkalh awmin a siam a. 5 Tin, a in bang vêlin, biak in bang vêlah pawh, biakna hmun bang vêlah pawh chumi in bang si chuan in chhâwng nei a sa a; tin, a vêl chuan pindan a siam a. 6 A chhâwng hnuaihnung ber chu a vâng lam tawng nga a ni a, a laita chu a vâng lam tawng ruk a ni a, a pathumna chu a vâng lam tawng sarih a ni; kalkhangte chu in banga inrawlh ngai lovin pâwn lamah chuan a vêlin in bangah chuan a nghahna a siam vâng a ni. 7 Tin, in chu, an sak lai chuan lung a laihna hmuna chher sa veka sak a ni; tichuan, an sak chhûng zawng chu tuboh ri te, hreipui ri te, thîr hriamhrei ri rêng rêngte chumi inah chuan hriat a ni lo. 8 Pindan laita berte kawngka chu chumi in ding lampangah chuan a awm a. A laitaah chuan rahka vialah an lâwn chho va; tin, a laita aṭang chuan a pathumnaah. 9 Chutichuan, in chu a han sa a, a zo ta a; in chu sidar khanchhuk leh a phêkin a khuh a. 10 Tin, in chhâwng neite chu a in si vekin tawng nga ṭheuhva sângin a sa a; chûngte chu in nên chuan sidar thinga zawm a ni. 11 Tin, LALPA thu chu Solomona hnênah a lo thleng a, 12 “He in i sak lai mêk chungchâng thu hi - ka thuruatte i pawma, ka rorêlte i zawma, ka thupêk zawng zawngte zâwm tûra i pawm phawt zawngin, i pa Davida hnêna ka lo sawi tawh, ka thu kha i chungah hian ka tinghet ang. 13 Tin, Israela thlahte zîngah hian ka chêng ang a, ka mi Israel-hote hi ka thlahthlam lo vang,” tiin. 14 Tichuan, Solomona chuan in chu a sa a, a zo ta a.
Tempul chhûng lam chei dân
15 In chhûng lam bangah chuan sidar thingphel a hmang a; a chhuat aṭanga chung lam thlengin a chhûng lamah chuan thing a bel vek a; a chhuatah chuan fâr thingphel a phah belh a. 16 Tin, kawmchâr lam tawng sawmhnih chu a chhuat aṭanga a bangte chenin sidar thingphel vekin a siam a; biakna hmun, hmun thianghlim ber atân pawh a chhûng lamah chuan a hmang a. 17 Tin, in, biakna hmun bula biak in chu a dung lam tawng sawmli a ni. 18 Tin, in chhûng lamah chuan a kuhmûm leh a pâr parh lema ker mawi sidar thing a awm a. A vai chuan sidar thing vek a ni a; lung rêng rêng a lang lo. 19 Tin, LALPA thuthlunna bâwm dahna tûrin chumi inah a chhûnga biakna lamah chuan hmun a buatsaih a. 20 Tin, chumi biakna hmun chhûng chu a dung lam tawng sawmhnih, a vâng lam tawng sawmhnih, a sân lam tawng sawmhnih a ni a. Chu chu rangkachak hlîr hlak tîin a luan a; tin, sidar maichâm chu a luan bawk a. 21 Chutichuan, Solomona chuan chumi in chhûng chu rangkachak hlîr hlak tîin a luan a. Pindan chhûngril ber luhna kawngkaah chuan rangkachak khaidiat a thlung a, rangkachakin a luan a. 22 Tin, in chu a zaa a peih thlengin a pumin rangkachak tîin a luan zêl a; biakna hmuna maichâm pum pui pawh chu rangkachak tîin a luan a. 23 Tin, biakna hmunah chuan tawng sâwm ve vea sâng, cherub pahnih olive thingin a siam a. 24 Tin, cherub thla pakhat chu tawng nga a ni a, cherub thla lehlam chu tawng nga bawk a ni: thla pakhat hmâwr aṭanga a thla lehlam hmâwr inkâr chu tawng sâwm a ni. 25 Cherub pakhat pawh chu tawng sâwm a ni a; cherub-te chu intiat chiah leh pian dân inang ve ve chiah an ni. 26 Cherub pakhat sân zâwng chu tawng sâwm a ni a, cherub pakhat pawh chu chumi chen bawk chu a ni. 27 Tin, cherub-te chu in chhûngril zâwkan chuan a dah a; tin, cherub-te thla chu a inzâr a, pakhat thla chuan bang lehlam a va dek a, cherub pakhat thla pawhin bang lehlam chu a dek bawk a. Chumi in lai takah chuan an thla leh an thla chu a insi a. 28 Tin, cherub-te chu rangkachak tîin a luan a. 29 Tin, in bang zawng zawngte chu a vêlin cherub te, tûm thing leh pangpâr parh lem ker mawite in chhûng lam leh pâwn lamah chuan a siam a. 30 Tin, a in chhuat chu chhûng lam leh pâwn lamah rangkachak tîin a luan a. 31 Tin, biakna hmun luhna atân olive thing kawngkhâr a siam a; kawngka lu chung leh kawngka biangte chu a bang hmun ngaa ṭhena hmun khat tiat a ni. 32 Tichuan, olive thingin kawngkhâr pahnih a siam a; chumiah chuan cherub-te, tûm thing leh pangpâr parh lemte ker mawiin a siam a, chûng chu rangkachak tîin a luan a; tin, cherub-te leh tûm thingte chu rangkachak a hnawih a. 33 Tin, biak in luhna atân a bang hmun lia ṭhena hmun khat tiatin olive thing kawngka ban a siam a. 34 Fâr thingin kawngkhâr pahnih a siam bawk a; kawngkhâr pakhata phêk hnih chu thlep thei a ni a, kawngkhâr pakhata phêk hnih pawh chu thlep thei a ni. 35 Chûngahte chuan cherub-te, tûm thing leh pangpâr parh lemte a ker a; chûng ker mawi chu mâm takin rangkachak tîin a luan a. 36 Biak in hung chhûng kawtlai chhûngril zâwk chu lung chher chhâwng thum leh sidar thingphel thuah khatin a siam a. 37 A kum lina, Ziv thlaah chuan LALPA in lungphûm chu rem a ni a. 38 Tin, kum sâwm leh kum khatna, Bul thla, thla riatnaah chuan in chu ruahman ang chiahin a engkim chu peih vek a ni a. Chutichuan, kum sarih a sa a ni.
Solomona lal in
1 Tin, Solomona chuan ama in chu kum sâwm leh kum thum a sa a, a in chu a peih vek a. 2 Lebanon Ngawpui In sidar ban tlar li, ban chunga sidar thingphel chungah chuan a sa bawk a; a dung lam chu tawng za a ni a, a vâng lam chu tawng sawmnga a ni a, a sân lam chu tawng sawmthum a ni. 3 Tin, chu chu bana innghat pindan sawmli leh panga chung lamah chuan sidar thingphela khuh a ni a; tlar khatah chuan sâwm leh panga zêl. 4 Tin, tlar thumin tukverh a awm a, êng leh êngte chu tlar thumin a inep vek a. 5 Tin, kawngkhâr leh ban zawng zawngte chu thingphelin kil lia siam a ni a; êng leh êngte chu tlar thumin a inep vek a. 6 Tin, hulhliap chu ban neiin a siam a: a dung lam chu tawng sawmnga a ni a, a vâng lam chu tawng sawmthum a ni a; tin, chûng hmaahte chuan hulhliap a siam a, bante leh a hmaa luhna kailâwnte nên. 7 Tin, a rorêlna tûr lalṭhutthlêng hulhliap, rorêlna hulhliap chu a siam bawk a; chu chu chhuat lehlam aṭanga a lehlam thlenga sidar thinga khuh a ni. 8 Tin, a awmna tûr in, hulhliap chhûng, hung chhûng kawtlai danga awm chu chutiang bawka siam a ni. Pharaoa fanu (Solomonan nupuia a neih) chu hulhliap ang bawk chuan a in a saksak bawk a. 9 Chûng zawng zawng chu lung man tam tak tak, lung a tâwk chiah zêla chher, zainaa zaia sak a ni a, chhûng lam pawh, pâwn lam pawh a lungphûm aṭanga a lêr thlengin; tin, chutiang bawkin pâwn lamah hung chhûng kawtlai zau tak thlengin. 10 Tin, lungphûm chu lung man tam tak tak, lung lian pui pui, lung tawng sâwm te, lung tawng riat tea rem a ni a. 11 Chumi chung lam chu lung man tam tak tak, lung a tâwk chiah zêla chher, leh sidar thing a ni a. 12 Tin, a vêlin hung chhûng kawtlai zau tak chu lung chher chhâwng thum leh sidar thingphel thuah khata hung a ni a; LALPA in hung chhûng kawtlai chhûngril zâwk leh, in hulhliap ang bawk khân.
Themthiam Hirama hna
13 Tin, Lal Solomona chuan mi a tîr a, Tura khua ata Hirama a ko va. 14 Chu mi chu Naphtali hnam hmeithai fa a ni a, a pa chu Tura khuaa mi, dâr chher mi a ni; ani chu dâr chher kawngah rêng rêng chuan a fingin a hre thiamin a themthiam hle mai a. Lal Solomona hnênah chuan a kal a, hna zawng zawng chu a thawhsak vek a.
Dâr ban pahnih
15 Tin, dâr ban pahnih a siam a, tawng sâwm leh tawng riata sâng ve ve, teh kuala tawng sâwm leh tawng hnih ve ve a ni a. 16 Ban chhîpa dah tûr dâr chhûn bâwk pahnih a siam a: bâwk pakhat sân lam chu tawng nga a ni a, bâwk pakhat sân lam pawh chu tawng nga a ni. 17 Ban chhîpa bâwk atân te chuan ṭial chik chek leh herh chîn chiante hi a awm a; bâwk pakhat atân chuan pasarih, bâwk dang pakhat atân pawh chuan pasarih bawk. 18 Tichuan, bante chu a siam a; chûng ban chhîpa bâwkte tuamna tûr chuan ṭial chik chek pakhat chungah a vêlin tlar hnih a awm a; tin, chutiang bawk chuan bâwk pakhat chungah pawh a awmtîr bawk a. 19 Hulhliap chhîpa bâwkah chuan lili lem hi a chuang a, tawng li. 20 Ban pahnih chhîpa bâwkahte chuan a tlângah, ṭial chik chek bul lawkah chuan pawmgranet te a awm bawk a; tin, pawmgranet chu chumi bâwkahte chuan zahnih ve ve a tlarin a awm a. 21 Biak in hulhliapah chuan bante chu a dintîr a; ding lam ban chu a dintîr a, a hmingah Jakin a vuah a; tin, vei lam ban chu a dintîr a, a hmingah Boaz a vuah a. 22 A ban chhîpah chuan lili lem a chuang a; tichuan, ban lam hna chu peih a ni ta a.
Dâr tuizêm
23 Tin, dâr tuizêm lian pui, tawng sâwm tla, a sân lam tawng nga a chhûng a, a tlâng chu tawng sawmthum bial vêl a ni. 24 A tlâng hnuaiah chuan kuhmûm lem hian a vêl chhuak a, tawng sâwm a ni a, zêm vêl chuan a awm a. Chûng kuhmûmte chu tlar hnihin a awm a, chhûn tel nghâl a ni. 25 Chu chu bâwngpa sâwm leh pahnih chungah a innghat a, pathumin hmâr lam an hawi a, pathumin thlang lam an hawi a, pathumin chhim lam an hawi a, pathumin chhak lam an hawi a. Tin, tuizêm chu a chungah chuan a inhûng a, an mei lam chuan chhûng lam a hawi a. 26 Kutphah bawka chhah a ni a; a tlâng chu lili pangpâr ang, no tlang anga siam a ni a. Bath sânghnih dawng a ni.
Dâr tawlailîr
27 Hûnchhan sâwm dârin a siam bawk a; hûnchhan pakhat sei lam chu tawng li a ni a, a vâng lam chu tawng li bawk a ni a, a sân lam chu tawng thum a ni. 28 Tin, hûnchhan siam dân chu hetiang hi a ni: chûng chuan khuar a nei a, a khuarte chu a tlângte inkârah a awm a; 29 a tlângte inkâr khuarahte chuan sakeibaknei te, sebâwngpa te, cherub-te a chuang a; a tlâng chungahte chuan hûnchhan a awm a. Sakeibakneite leh sebâwngpate hnuai lamah chuan cheimawina tê tête pawh a awm thliah a. 30 Hûnchhanahte chuan dâr tawlailîr pali leh dâr tlûng a awm ṭheuh va, a kil liahte chuan innghahna a awm ṭheuh va. Insilna bêl hnuai lamah chuan a innghahna chhûn a awm a, a sîrah chuan cheimawina a awm ṭheuh va. 31 Belvâlkual chhûng kotlâng chu tawng khat tla a ni a; a rawng kotlâng chu belvâl anga bial a ni a, tawng khat leh a chanve a ni; tin, a rawng tlâng vêl chu ṭial mawi a ni a, a khuarte chu kil li a ni a, a bial lo. 32 Tawlailîr palite chu a khuar hnuai lamahte chuan a awm a; tin, tawlailîr tlângte chu hûnchhanah chuan a awm a. Tawlailîr sân lam chu tawng khat leh a chanve a ni. 33 Chûng tawlailîrte siam dân chu sakawr tawlailîr ke siam dân ang hi a ni a; a tlûng te, a belvâlkual te, a chhunkalhna te, a lai bâwkte chu chhûn vek a ni. 34 Tin, hûnchhan kil li ṭheuhvah chuan innghahna pali a awm a; chumi innghahnate chu hûnchhan nên pumkhat vek a ni. 35 A hûnchhan chungah chuan belvâlkual, tawng chanvea sâng hi a awm a. Hûnchhan chunga a hûnna kete leh a khuarte chu pumkhat vek a ni. 36 A hûnna ke phêkahte leh a khuarahte chuan a zau ang zia ziain cherub te, sakeibaknei te, tûm thingte a chuantîr a, a vêl chuan cheimawina hi a awm thliah a. 37 Chutiang vek chuan hûnchhan sâwmte chu a siam a. A vai chuan pumkhata chhûn a ni ṭheuh va, intiat ṭhiau, siam dân inang chiah vek a ni. 38 Tin, insilna bêl sâwm dârin a siam a; insilna bêl pakhat chuan bath sawmli a dawng a, insilna bêl chu tawng li ṭheuh a ni. Hûnchhan sâwm chungah chuan insilna bêl pakhat a inhûng ṭheuh va. 39 Tin, hûnchhante chu in ding lampangah panga a hûng a, in vei lampangah panga. Tuizêm chu in ding lampangah chhak lamah chhim chhawngin a hûng a.
Tempul chhûng cheina
40 Hirama chuan insilna bêl te, vut lawhna te, maihûnte a siam a. Chutichuan, Hirama chuan LALPA in atâna Solomona a siamsak zawng zawng chu a peih ta vek a: 41 ban pahnih te, ban chhîpa bêl anga bâwk pahnih tuamna ṭial chik chek pahnih te, 42 chumi tuamna ṭial chik chek pahnih atâna pawmgranet zali te, ban chhîpa bêl anga bâwk pahnih tuamna tûr ṭial chik chek ve ve atâna pawmgranet tlar hnihte kha; 43 hûnchhan sâwm leh hûnchhan chunga insilna bêl sâwm te, 44 tuizêm leh a hnuaia sebâwngpa sâwm leh pahnih te, 45 bêlte leh, vut lawhte leh, maihûnte nên. Chûng bungbêl zawng zawng LALPA in atâna Hiraman Lal Solomona a siamsak chu dâr nawh tlêta siam vek a ni. 46 Jordan phaizâwlah Sukkoth leh Zarethan inkâr bellei hmunah a ni, lal chuan a chhûn ni. 47 Tin, Solomona chuan chûng bungbêl zawng zawng chu a tam êm êm avângin bûk chhuah lohvin a dah mai a; dâr bûk zât chu hriat chhuah rual a ni lo. 48 Tin, Solomona chuan LALPA ina bungbêl awm zawng zawng chu a siam a; rangkachak maichâm leh chhangdah awmna dawhkân chu rangkachakin; 49 biakna hmun hmazâwn khâwnvâr dahna ding lama panga leh vei lama panga chu rangkachak hlîr hlakin; pangpâr te, khâwnvâr te leh chaichehte chu rangkachakin; 50 no te, khâwnvâr puan chehna te, maihûn te, fian te, mei lâknate chu rangkachak hlîr hlakin; in chhûngril zâwk, hmun thianghlim ber kawngkhâra mite leh in (biak in chu) kawngkhâr vuahnate chu rangkachakin. 51 Chutichuan, Lal Solomonan LALPA in atâna a siam zawng zawng chu a lo peih ta vek a; tichuan, Solomona chuan a pa Davida lo hlan sa tawh - tangkarua te, rangkachak te, bungbêl te chu a la lût a, LALPA ina rote zîngah a dah ta a.
Tempul chhûnga Thuthlung Bâwm lâk luh
1 Chutichuan, Solomona chuan Israel upaho te, an hnam puipa zawng zawng te, Israela thlahho chhûngkaw puipate chu, Jerusalem khuaa Lal Solomona hnênah chuan Davida khawpui Zion ata LALPA thuthlung bâwm zâwn chho tûrin a khâwm chiam a. 2 Tin, Israel mi zawng zawng chu Ethanim thla (thla sarihnaah chuan) kûtnaah Lal Solomona hnênah an inkhâwm chiam a. 3 Tin, Israel upaho zawng zawng chu an lo kal a, puithiamte chuan bâwm chu an zâwn a. 4 Tin, LALPA bâwm leh, inbiakna puan in leh, chuta bungbêl thianghlim zawng zawng chu an zâwn chho va; chûngte chu puithiamte leh Levi chite chuan an zâwn chho va. 5 Tin, Lal Solomona leh Israel-ho pung khâwm zawng zawng, a hnêna rawn inkhâwmte chu bâwm hmaah an awm ho va, berâm leh bâwngpa, a tam avânga chhiar sên rual loh leh a zât hriat sên rual lohvin an inthawi a. 6 Tichuan, puithiamte chuan LALPA thuthlung bâwm chu a awmna tûrah an la lût a, in chhûnga biakna hmun, hmun thianghlim berah, cherub-te thla hnuaiah chuan. 7 Cherub-te chuan bâwm awmna chung zâwnah chuan an thla an zâr reng si a, cherub-te chuan bâwm leh a zâwnfungte chu an huap vek a. 8 Tin, a zâwnfungte chu a sei khawp a, a zâwnfung hmâwrte chu biakna hmunhma, hmun thianghlim aṭang chuan a hmuh theih a; amaherawhchu, pâwn lamah zawng a lang lo. Tûn thleng hian chutah chuan a la awm reng a ni. 9 Aigupta ram ata an chhuaha LALPAN Israela thlahte hnêna thu a thlun laia, Mosian Horeb tlânga lungphêk pahnih a dahte chauh lo kha chu, chumi bâwm chhûngah chuan eng mah dang a awm lo. 10 Tin, heti hi a ni a, puithiamhote chu hmun thianghlim ata an lo chhuah veleh chuan LALPA in chu chhûm chuan a khat ta mup mai a; 11 tichuan, chhûm avâng chuan puithiamte chu rawngbâwlin an awm thei ta lo hial a; LALPA ropuinain LALPA in chu a tikhat ta vek si a.
Solomonan mipuite hnênah thu a sawi
12 Chutichuan, Solomona chuan thu a sawi ta a: “LALPAN, ‘Thim chhah mupah chuan ka awm ang,’ a ti rêng a. 13 I chênna tûr in, kumkhuaa i awmna tûr chu ka lo saksak ta ngei che a nih hi,” a ti a. 14 Tin, lal chu a lehhawi a, Israel-ho pung khâwm zawng zawng chu mal a sâwm a; tichuan, Israel-ho pung khâwm zawng zawng chu an ding ṭhup a. 15-16 Tin, ani chuan, “LALPA, Israel-te Pathian, ka pa Davida hnêna ama kâ ngeia, ‘Aigupta ram ata ka mi Israel-te ka hruai chhuah ni aṭangin Israel-ho hnam zînga khawii khua mah hi ka hming awmna tûr in sak nân ka la thlang ngai lo va; amaherawhchu, ka mi Israel-te hotu atân hian Davida hi ka thlang a ni,’ tia lo sawitu, ama kut ngeia rawn puitlintu hi fakin awm rawh se. 17 Ka pa Davida khân Israel-te Pathian, LALPA hming tân in sak a rilruin a tum ṭhîn a. 18 Nimahsela, LALPAN ka pa Davida hnênah, ‘I rilruah chuan ka hming tân in sak i tum ṭhîn a, hetiang rilru i lo pu hi i tiṭha e. 19 Nimahsela, nang zawngin in chu i sa lo vang; i fapa, i ṭhâlbea la chhuak tûra chuan ka hming tân in chu a la sa zâwk ang,’ a lo ti tawh a. 20 Tin, LALPAN a thusawi chu a rawn tinghet ta a; LALPA lo tiam tawh ang ngeiin ka pa Davida hmun chu ka lo luah tain, Israel lalṭhutthlêngah chuan ka lo ṭhu ta a; Israel-te Pathian, LALPA hming tân in chu ka lo sa ta ngei si a. 21 Chutah chuan bâwm awmna tûr hmun chu ka lo ruat ta a, chumiah chuan Aigupta ram ata a hruai chhuah laia kan pute hnêna a lo thlun, LALPA thuthlung chu a awm a,” a ti a.
Solomona a ṭawngṭai
22 Tin, Solomona chu LALPA maichâm hmaa Israel pung khâwmho zawng zawng hmuhah a ding a, vân lam banin a kut a phar a, 23-24 “Aw LALPA, Israel-te Pathian, i chhiahhlawh, an thinlung zawng zawnga i mit hmuha awm ṭhate hnêna thuthlung hlena khawngaihna tilang ṭhîn, i chhiahhlawh ka pa Davida hnêna thutiam hlentu, chung lam vânah leh hnuai lam leiah hian nangmah ang hi Pathian dang rêng rêng an awm lo ve; a ni, nangin i kâin thu i sawi a, i kutin i rawn hlawhtlintîr ta a, vawiina a lo awm ta ngei ang hian. 25 Chutichuan, aw LALPA, Israel-te Pathian, i chhiahhlawh ka pa Davida hnêna, ‘I thlahte chu ka mit hmuha i awm anga ka mit hmuha awm ve tûra an awm dâna an fîmkhur phawt chuan, ka mit hmuhah Israel-te lalṭhutthlênga ṭhu tûr i hmai lo vang,’ tia i lo tiam tâk kha hlen ang che. 26 Chutichuan, aw Israel-te Pathian, nangin i chhiahhlawh ka pa Davida hnêna thu i lo sawi tawh kha khawngaih takin thlentîr ngei ang che. 27 Nimahsela, Pathian chu leiah hian a awm takmeuh ang emaw chu? Ngai teh, vân leh vânte vânah pawh i leng lo a ni a; he ka in sakah hian i va leng lo nasa lehzual âwm êm! 28 Nimahsela, aw LALPA ka Pathian, vawiina i chhiahhlawhin a auhna che leh ṭawngṭaina a chham hi ngaihthlâksakin, i chhiahhlawh ṭawngṭaina leh dîlna hi rawn ngaihsak ang che: 29 hemi hmun lam hawia i chhiahhlawh hian ṭawngṭaina a chham tûr chu ngaithlaa nangin, ‘Chutah chuan ka hming chu a awm ang,’ i tihna hmun ngei in lamah hian chhûn leh zâna i mit i lên reng ṭhin theihna tûrin. 30 Tin, i chhiahhlawh leh i mi Israel-te hian hemi hmun lam hawia an ṭawngṭai hunin an dîlnate lo ngaihthlâksak ṭhîn ang che. A ni, i chênna hmun vânan lo ngaithla langin; tin, lo ngaithlain ngaidam ang che. 31 “Mi tu pawhin a vêngte chungah thil tisualin, chhechhamtîr hial lo ṭûl sela, hemi ina i maichâm hmaah hian rawn chham sela, 32 nangin vân aṭangin lo ngaithla langin, che la, mi sual chu ama lu chungah ngei a awm dân nghata thiam loh chantîrin, mi fel chu a felna ang ang hlawhtîra thiam chantîrin i chhiahhlawhte ro rêlsak ang che. 33 “I mi Israel-te hian i chungah thil an tihsual avânga hmêlmate laka an lo tlâwma i lam an lo hawi leha, i hming an faka, hemi ina ṭawngṭaia thil an rawn dîl chuan, 34 nangin vân aṭangin lo ngaihthlâksak la, i mi Israel-te sualna chu ngaidam la, an pute ram i pêkah hruai leh ang che. 35 “I chunga thil an tihsual avânga vân a pina, ruahte a lo sûr loh hunah chuan, hemi hmun lam hawia an ṭawngṭaia, i hming an faka, anmahni i tihretheih avânga an sualte an sim chuan, 36 nangin vân aṭangin lo ngaithla la, i chhiahhlawhte leh i mi Israel-te sualna hi ngaidam langin, an kalna tûr kawng ṭha i kawhhmuh dâwn si a; tin, i mite an rochan atâna i pêk i ramah hian ruah han sûrtîr ang che. 37 “Kan ramah hian ṭâm te a lo tlâka, hri te a lo lêna, rona emaw, ṭawihna emaw, khaukhuap emaw, pangang emaw a lo awma, an hmêlmaten an kawngka vêlahte an rawn huala, hri eng pawh, natna eng pawh a lo thlen chuan, 38 i mi Israel zawng zawng zînga mahni thinlunga hri awma hriaa, hemi in lam hawia kut rawn phar apiangin ṭawngṭaina leh dîlna an rawn hlan rêng rêng chu, 39 i awmna vân aṭangin lo ngaithla la, ngaidam la, che la, nang an thinlung hretu, mi tin an awm dân ang zêlin hlawhtîr ang che (nang zawng, nangmah chauh hi mihring fa zawng zawng thinlung hretu i ni si a); 40 kan pute i pêk rama an awm chhûng zawng hian an ṭih theihna tûr chein. 41 “I mi Israel-te ni lo hnam dang mi, i hming avânga ram hla tak ata lo kalte chungchâng thu pawh hi 42 (i hming ropui tak te, i kut chak tak te, i bân i phar thu te hi an la hre hlawm dâwn si a): chûngte chuan hemi in lam hawia an rawn ṭawngṭai hunin, 43 nangin i awmna vân aṭangin lo ngaithla la, hnam dang mi chuan a dîl ang ang che chu lo tihsak ang che; i mi Israel-te ang bawka khawvêla hnam tinin i hming an hriata, an ṭih chia, hemi ka in sak hian i hming a pu a ni tih an lo hriat theih nân. 44 “I miten an hmêlmate chu i tirhna lam apiangah lo bei sela, i khawpui thlan lam hawi leh, i hming tân in ka lo sak lam hawia LALPA hnêna an ṭawngṭai chuan, 45 an ṭawngṭaina leh an dîlna chu nangin vân aṭangin lo ngaithla la, an thu-ah che ang che. 46 I chunga thil an tihsuala (tu mah thil tisual lo an awm âwm si lo va), an chunga i thinura, hmêlma kuta i pêka, hmêlma ram hla takah emaw, hnai teah emaw pawh sala an hruaia, 47 sala an hruaina rama an inngaihtuah chhuaha, an inchhîra, ‘Thil kan lo tisual a, dik lo tak leh sual takin kan ti ta,’ tia sala hruaitute rama an rawn ngen chea, 48 an hmêlma sala hruaitute rama an thinlung tak leh an rilru taka i lam an lo hawia, an pute i pêk ram lam leh, i khawpui thlan lam leh i hming tâna ka in sak lam hawia i hnêna an ṭawngṭai chuan, 49 an ṭawngṭaina leh an dîlna chu nangin i awmna vân aṭangin lo ngaithla la, an thu-ah che ang che; 50 tin, i mi i chunga thil tisualtute leh i laka an lo bawhchhiat kawnga an bawhchhiatna zawng zawng chu ngaidam la; sala hruaitute chuan anmahni an khawngaih theih nân khawngaihna neihtîr ang che, 51 i mi, i rochan, Aigupta ram ata, thîr rawh tuina chhûng ata i hruai chhuahte an ni si a; 52 an auh apiang chea i lo ngaihthlâk tûra i chhiahhlawh dîlna leh, i mi Israel dîlna lama i mit i len theih nân. 53 Aw LALPA PATHIAN, kan pute Aigupta ram ata i hruai chhuah laia i chhiahhlawh Mosia hmanga i sawi angin, i rochan atân khawvêl hnam tin zîng ata i tihrang a ni si a,” a ti a.
Ṭawngṭai tihtâwpna
54 Tin, heti hi a ni a, Solomonan LALPA hnêna a ṭawngṭaina leh dîlna zawng zawng a chham zawh chuan, LALPA maichâm lama ṭhingṭhia, vân lam bana kut phara a awm chu a tho va. 55-56 Tin, a ding a, aw ring takin, “A thutiam zawng zawng ang zêla a mi Israel-te chawlhna petu LALPA chu fakin awm rawh se. A chhiahhlawh Mosia hmanga a thutiam ṭha zawng zawng kha thu pakhat mah a thlâwn lo va. 57 LALPA kan Pathian chu kan pute hnêna a awm ang khân kan hnênah awm sela; min kalsanin, min thlahthlam suh se; 58 tichuan, a kawng zawng zawng zawh tûr leh, kan pute thu a pêk tawh anga a thupêkte, a thuruatte, a rorêlte pawm tûra kan thinlungte a lama a hawitîr theihna tûrin. 59-60 Tin, LALPA hi Pathian a ni a, tu mah dang an awm lo tih khawvêla hnam tinin an lo hriat theihna tûra a chhiahhlawh thu-ah leh, a mi Israel-te thu-ah hian a ni zir ang zêla a chêt theihna tûrin hêng ka thusawi, LALPA hmaa dîlna ka thlente hi chhûn leh zân LALPA kan Pathian hmaah chuan châm reng rawh se. 61 Chutichuan, a thuruat anga awm tûr leh a thupêkte zâwm tûrin LALPA kan Pathian lamah chuan in thinlungte ṭha famkim rawh se, vawiin ang hian,” tiin Israel pung khâwmho zawng zawng chu mal a sâwm a.
Tempul hlanna
62 Tin, lal leh Israel-ho zawng zawng chuan LALPA hmaah inthawina an hlân za a. 63 Tin, Solomonan LALPA tâna a hlan remna thilhlan inthawi nân sebâwngpa sînghnih leh sânghnih leh, berâm nuai khat leh sînghnih a hlân a. Chutiang chuan lal leh Israela thlahte zawng zawng chuan LALPA in chu an hlân a ni. 64 Chumi ni vêkah chuan lalin LALPA in hma zâwna hung chhûng kawtlai tak chu a tithianghlim a, chutah chuan hâlral thilhlan te, chhangphut thilhlan te, remna thilhlan sa thau te chu a hlân a, LALPA hmaa dâr maichâm chu chûng thilhlante dawng tûra a têt luattuk avângin. 65 Chutichuan, chumi ṭum chuan Solomona leh Israel-ho zawng zawng, mipui pung khâwmho tam tak, Hamath khaw luhna achin Aigupta ram lui thlenga mite chu, LALPA kan Pathian hmaah chuan ni sarih leh ni sarih - ni sâwm leh ni li chhûng zet an kût za a. 66 A ni riat ni chuan mipuihote chu a ṭîntîr a; tin, lal chu mal an sâwm a, LALPAN a chhiahhlawh Davida leh a mi Israel-te chunga a ṭhatna chuti zozaia a lantîr avâng chuan rilru hlim leh lâwm takin an in lamah an haw ta a.
Solomona hnênah Pathian a inlâr leh
1 Tin, heti hi a ni a, Solomonan LALPA in leh lal in a saka, Solomonan châk taka a tum zawng zawng a tih zawh vek hnuah chuan, 2 Gibeon khuaa a hnêna a inlâr ang khân LALPA chu Solomona hnênah a rawn inlâr leh a. 3 Tin, LALPA chuan a hnênah, “I ṭawngṭaina leh i dîlna ka hmaa i rawn thlente kha ka lo ngaithla a; hemi in i sak hi kumkhuaa ka hming awmtîr nân ka tithianghlim tawh e, ka mit leh ka thinlung chu chutah chuan a awm kumkhua tawh ang. 4 Tin, nang pawh hi thu ka pêk apiang che anga ti tûra i pa Davida awm anga thinlung ṭha tak pu leh rilru dik tak pua ka mit hmuha i awma, ka thuruatte leh ka rorêlte i pawm reng zawngin, 5 Israel-te chungah hian i ram lalṭhutthlêng chu kumkhua atân ka tinghet ang, i pa Davida hnêna, ‘Israel-te lalṭhutthlênga ṭhu tûr i hmai lo vang,’ tia ka lo tiam tawh ang khân. 6 Amaherawhchu, nangin emaw, in thlahten emaw min zui chu min kîrsana, ka thupêkte leh ka thuruatte ka hriattîr che u hi in pawm lohva, pathian dangte rawng in va bâwla, in va biak chuan, 7 Israel-hote hi ram ka pêk ata ka tiboral ang a; tin, hemi in, ka hming tâna ka tihthianghlim tawh sa hi ka mit hmuh phâk lohvah ka sawn bo daih ang. Tichuan, Israel-te hi hnam tinrêngte zîngah tihelna leh a chhe lam tehkhinnaah hman an la ni ang. 8 Tin, he in hi sâng teh mah sela, a kal pêl apiangte chu mak tiin an la faifûk ang a, ‘Engati nge LALPAN he ram leh he in hi heti taka a tih le?’ an ti ang. 9 Tin, miten, ‘LALPA an Pathian, an pute Aigupta ram ata hruai chhuaktu kha an kalsana, pathian dangte an vawna, an biaka, an rawng te an bâwl tâk vâng a ni; chuvângin, LALPAN hêng chhiatna zawng zawng hi an chungah a rawn thlentîr ta a nih hi,’ tiin an la chhâng ang,” a ti a.
Solomona leh Hirama inremna
10 Tin, heti hi a ni a, Solomonan in pahnih, LALPA in leh lal in a sak chhûng, kum sawmhnih a vei hnuin 11 (Tura lal Hiraman Solomona chu sidar thing te, fâr thing te, rangkachak te a mamawh apiang a tum vek a ni a), Lal Solomona chuan Hirama chu Galili rama khaw sawmhnih a pe a. 12 Tin, Hirama chu Tura khua aṭangin Solomonan khua a pêkte chu en tûrin a chhuak a; a duh zâwng a ni lo hle a. 13 Tin, ani chuan, “Ka unaupa, hêng i khaw mi pêkte hi khaw eng nge maw ni ngai le?” a ti a. Tichuan, tûn thleng hian Kabul ram an ti ta a ni. 14 Tin, Hirama chuan lal chu rangkachak talent 120 a thawn a.
Solomona thiltih dangte
15 Lal Solomonan hnathawka rawih luih pâwl a siam chhan chu hei vâng hi a ni: LALPA in leh ama in satu atân leh, Milo te, Jerusalem kulh te, Hazor khua te, Megido khua te, Gezer khua te siamtu atân a ni. 16 Aigupta lal Pharaoa chu a han chho va, Gezer khua a han la a, a hâl a, chu khuaa awm Kanaan-hote chu a that a, a fanu Solomona nupui hnênah inthlahna thilpêk atân a lo pe tawh a ni. 17 Tin, Solomonan Gezer khua te, Beth-horon thlangta zâwk khua te, 18 Baalath khua te, Israel rama thlalêra Tamar khua te, 19 Solomonan thil dah khâwmna khua a neih zawng zawng te, a tawlailîr dahna khua te leh, a sakawr chung chuang mi dahna khua te, Jerusalem khua te, Lebanon-ah te leh a rorêlna ram chhûng zawng zawnga Solomonan châk taka siam a tum zawng zawngte chu a siam a ni. 20 Tin, Israela thlahte ni ve lo, Amor-hote, Hit-hote, Periz-hote, Hiv-hote, Jebus-ho la awm zawng zawngte kha chu, 21 an thlah, chûng rama la awm Israela thlahten an tihboral zawh vek theih lohvate zîngah chuan Solomonan chhiahhlawh, hnathawka rawih luih pâwl a siam a, tûn thleng hian. 22 Israela thlahte erawh chu Solomonan chhiahhlawhah a siam ve lo va; indo mi te, a puipa te, a mi lian te, a sipai hotu te, a tawlailîr leh a sakawr chung chuang mi hotute an ni zâwk a ni. 23 Chûngte chu Solomona hna chunga hotu bîk zanga leh sawmnga, hnathawk vêngtute chu an ni. 24 Pharaoa fanu erawh chu Davida khawpui ata chu ama in, Solomonan a saksakah chuan a chho ta a; tichuan, Milo chu a siam ta a. 25 Tin, Solomona chuan LALPA tâna maichâm a siamah chuan kum tin vawi thum hâlral thilhlan leh remna thilhlan a hlân ṭhîn a, LALPA hmaa maichâmah chuan rimtuite a hâl tel bawk ṭhîn a. Chutichuan, in chu a peih ta a. 26 Tin, Lal Solomona chuan Edom rama Tuifinriat Sen kam Eloth bula awm Ezion-geber hmunah lawng rual a siam a. 27 Tin, Hiraman a chhiahhlawh lawng mite tuifinriata che ṭhang, lawnga Solomona chhiahhlawhte kalpuiah a tîr a, 28 Chung mite chu Ophir-ah an va kal a, chuta mi chu rangkachak talent zali leh sawmhnih an rawn hâwn a, Lal Solomona hnênah an rawn thlen a.
Seba lalnuin a tlawh thu
1 Tin, LALPA hming tâna a thiltih chungchâng thua Solomona hmingthanzia Seba lalnuin a lo hriat chuan, thu khirh tak taka fiah tumin a hnênah a kal a. 2 Tin, Jerusalem khuaah hnungzuitu tam tak hruaiin, englo rimtuite leh rangkachak tam tak leh lunghlute phur sanghâwngseite kengin a kal a; tin, Solomona hnên a thlen chuan a thinlunga a thu pai zawng zawng chu phawrh fai vekin a bia a. 3 Tin, Solomona chuan a thu zawh zawng zawng chu a chhâng vek a; lal hriat loh, a hrilhfiah theih loh rêng rêng a awm hauh lo mai. 4 Tin, Seba lalnuin Solomona finzia zawng zawng te, a in sak te, 5 a dawhkâna ei tûr te, a puipateho ṭhut dân te, a rawngbâwltuho bâwl dân te, an inchei dân te, a no hlântu te, LALPA ina a hlan hâlral thilhlante a han hmuh chuan rilru ahleih a nei ta lo va. 6 Tichuan, lal hnênah, “I thiltihte leh i finziate keima rama ka lo hriat kha thuthang dik tak a lo nih ngei hi le. 7 Nimahsela, keimahin ka mit ngeia ka rawn hmuh hma loh chuan an sawi chu ka lo awih lo va; tichuan, ngai teh, a zâtve pawh mi lo hrilh hlei nêm, an sawi ka lo hriat aiin i finzia leh i ṭhatzia a lo nasat hi. 8 I mite, hêng i chhiahhlawh, i bula awm fova, i finna thu ngaithla fovate hi an nihlawh e! 9 LALPA i Pathian, i chunga lâwm êm êm, Israel-te lalṭhutthlênga ṭhuttîrtu che hi fakin awm rawh se! LALPAN Israel-te hi kumkhuain a hmangaih a; chuvângin, fel taka rorêl tûrin lalah a siam che a nih hi,” a ti a. 10 Tin, lal chu rangkachak talent za leh sawmhnih leh englo rimtui tam zet mai leh lunghlute a pe a. Seba lalnuin Lal Solomona englo rimtui a pêk ang zozaia tam hi a lût ngai ta lo. 11 Tin, Hirama lawng rual, Ophir aṭanga rangkachak va phurte pawh chuan Ophir aṭangin almug thing tam tak leh lunghlute an rawn phur a. 12 Tin, lalin almug thingte chu LALPA in leh lal in hung nân leh, hla satute tân ṭingṭang leh perhkhuangte siam nân lam pawh a hmang a. Tûn thlengin chutiang almug thing rêng rêng chu a lûtin, hmuh pawh hmuh a ni ngai ta lo. 13 Tin, Lal Solomonan a duhsak vânga a pêkte bâkah pawh Lal Solomona chuan Seba lalnu chu a duh zawng zawng, a dîl apiang chu a pe a. Chutichuan, a awmna ram lamah a hâwng leh ta a, a hote nên.
Lal Solomona hausakzia
14-15 Solomona hnêna kum khat chhûnga rangkachak lût rih lam chu, sumdâwngtute laka lût leh thil zuartute, mi inawmpawlhho lal zawng zawngte leh ram awptute laka lûtte chhiar lovin, rangkachak talent zaruk leh sawmruk leh paruk bûk a ni. 16 Tin, Lal Solomona chuan rangkachak den phêkin phaw lian zahnih a siam a; phaw pakhatah rangkachak sekel zaruk a duh a. 17 Tin, rangkachak den phêkin phaw zathum a siam a; phaw pakhatah rangkachak maneh thum a duh a. Chûng chu lal chuan Lebanon ngawpui inah a dah a. 18 Tin, lal chuan saingho lalṭhutthlêng ropui tak a siam bawk a, chu chu rangkachak ṭha ber tîin a luan a. 19 Lalṭhutthlêng kai chhohnaah chuan rahka paruk a awm a, chumi lalṭhutthlêng hnung lam chu a rawn kum phei kulh a; a ṭhutna sîr tuakah chuan dona a awm ve ve a, dona bulahte chuan sakeibaknei pahnih hi a ding a. 20 Tin, rahka parukah chuan a sîr tuakah sakeibaknei sâwm leh pahnih a ding a; chutiang chu khawii ramah mah an siam ngai lo. 21 Lal Solomona no zawng zawng chu rangkachak vek a ni a; tin, Lebanon ngawpui ina bungbêl zawng zawngte pawh chu rangkachak hlîr hlak vek a ni a. Tangkarua rêng rêng a awm lo; Solomona dam lai chuan chu chu eng hûah mah an ngai lo. 22 Lal chuan tuifinriatah chuan Hirama lawng rual kawppuitu Tarsis lawng rual a nei a. Tarsis lawng rual chuan kum thum dan zêlah rangkachak te, tangkarua te, saingho te, zâwng te, ârâwnte a rawn phur si ṭhîn a. 23 Chutichuan, Lal Solomona chuan khawvêla lal zawng zawng chu hausakah leh finah a khûm vek a. 24 Pathianin a thinlunga finna thu a dahsak chu ngaithla tûrin khawvêla mi zawng zawng chuan Solomona chu an pan huai huai ṭhîn a. 25 Tin, mi tinin lâwmman kum tin pêk bi neiin tangkaraw bungbêl te, rangkachak bungbêl te, puan te, râlthuam te, englo rimtui te, sakawr te, sabengtungte an rawn pe ṭhîn a. 26 Tin, Solomona chuan tawlailîrte leh sakawr chung chuang mite a khâwm chiam a; tawlailîr sângkhat leh zali leh sakawr chung chuang mi sîngkhat leh sânghnih a nei a, chûng chu tawlailîr dahna khuaah te, Jerusalem khuaa lal awmnaahte chuan a awmtîr a. 27 Tin, lal chuan Jerusalem khuaah chuan a tam êm avângin tangkaruate chu lung ang maia ngaih khawpin a awmtîr a, sidar thingte chu phaia theipui thing ang leka ngaih khawpin a awmtîr a. 28 Tin, Solomona neih sakawrte chu Aigupta ram ata rawn tawlh chhuah a ni a; tin, lal sumdâwngtute chuan chûng chu a rual rualin an lo khâr ṭhîn a, a ruala lei zêl a ni. 29 Aigupta rama mi tawlailîr chu tangkarua sekel zaruk zêlin an tithleng ṭhîn a, sakawr chu tangkarua sekel za leh sawmnga zêlin; chutiang bawk chuan Hit-ho lal zawng zawng leh Suria lalte pawh an tihthlensak ṭhîn a ni.
Solomonan Pathian a hawisan
1 Solomona chuan Pharaoa fanu chang lo pawh hnam dang hmeichhe tam tak - Moab te, Amon te, Edom te, Sidon te, Hit-ho hmeichhiate a hmangaih a; 2 chûng hnamho chungchâng thu chu LALPAN Israela thlahte hnênah, “Anmahni pâwl suh ula, anni pawhin pâwl che u suh se, an pathiante lamah in thinlung an hruai kawi ngei dâwn si a,” tiin a lo sawi tawh rêng a. Chûngho chu Solomona chuan hmangaihnain a vuan tlat a. 3 Tichuan, nupui zasarih, lal fanu a nei a, hmei zathum nên; tin, a nupuite chuan a thinlung an hruai kawisak ta a. 4 Tin, heti hi a lo ni ta a, Solomona chu a lo upat hnu chuan, a nupuite chuan pathian dangte lamah a thinlung an hruai kawisak a; tichuan, a pa Davida thinlung angin LALPA a Pathian lamah chuan a thinlung chu a lo ṭha famkim ta lo va. 5 Solomona chuan Zidon-ho pathiannu Astarothi leh Amon-ho pathian tenawm tak Milkoma chu a lo zui ve ta mai a. 6 Tin, Solomona chuan LALPA mit hmuhin thil sual a lo ti ta a, a pa Davida angin LALPA chu a zui tlat ve ta lo va. 7 Chutichuan, Solomona chuan Jerusalem bula tlângah Moab-ho pathian tenawm tak Kemosa tân leh, Amona thlahte pathian tenawm tak Moleka tân hmun sâng a lo siam ta a. 8 Chutiang bawkin hnam dang a nupui zawng zawng, an pathiante hnêna inthawia rimtui hâl ṭhînte tân pawh a siamsak a. 9-10 Chutichuan, LALPA, Israel-te Pathian, a hnêna vawi hnih lai inlâra, he thu, pathian dangte a zui tûr a ni lo tih thu lo petu chu, a thinlungin a hawisan tâk avângin Solomona chungah chuan LALPA thin a lo ur ta a; LALPAN thu a pêk chu pawm si hek lo. 11 Chuvângin, LALPAN Solomona hnênah chuan, “Hetiang hian i lo awm ta a, ka thuthlungte leh ka thuruatte pawm tûra thu ka pêk che hi i lo pawm ta si lo va, ram hi ka chhuhsak ngei ang chia, i chhiahhlawh ka pe ang. 12 Amaherawhchu, i pa Davida avângin i dam chhûng êm chuan ka ti rih lo vang a; nimahsela, i fapa zawng ka chhuhsak dâwn a ni. 13 Ram zawng zawng erawh chu ka chhuhsak vek lo vang a; nimahsela, ka chhiahhlawh Davida avâng leh ka thlan Jerusalem avâng hian hnam khat chu i fapa ka pe ang,” a ti a.
Solomona hmêlmate
14 Tin, LALPAN Edom mi, Hadada chu Solomona hmêlmaah a rawn din chhuak ta a; amah chu Edom rama lal thlah a ni. 15 Tin, heti hi a ni a, Davida Edom rama a awm laia, an mi thahte phûm tûra sipai hotu Joaba a han kala, Edom mi mipa fa tawh phawt chu a han thah vek hnu khân 16 (Joaba leh Israel mi zawng zawng chu thla ruk zet, Edom rama mipa zawng zawng a tihhlum vek hma loh chuan an awm a ni a), 17 Hadada chu a pa chhiahhlawhte zînga Edom mi ṭhenkhat nên Aigupta rama kal tûrin an tlân a. Hadada chu naupang tê a la ni a. 18 Midian ram ata an chhuak a, Paran-ah an kal a; tin, Paran aṭangin mite an hruai a, Aigupta ram, Aigupta ram lal Pharaoa hnên an zuk thleng a; ani chuan in te a lo pe a, ei tûr te a lo ngaihtuahsak a, ram te a lo pe bawk a. 19 Hadada chuan Pharaoa mit a tlung hle mai a; tichuan, a nupui ngei laizâwn, Lalnu Tahpenesi laizâwn chu nupuiah a neihtîr a. 20 Tin, Tahpenesi laizâwn chuan fapa Genubatha a hrinsak a, Tahpenesi chuan Pharaoa inah a hnute hnêk bânna a siamsak a. Tin, Genubatha chu Pharaoa inah Pharaoa fate zîngah chuan a awm ta a. 21 Tin, Hadadan Aigupta ram aṭanga Davida chu a puteho hnênah a muhîl ta tih leh, sipai hotu Joaba pawh a thi tawh tih a lo hriatin, Hadada chuan Pharaoa hnênah, “Kan rama ka haw theih nân mi chhuahtîr ta che,” a ti a. 22 Chutichuan, Pharaoan a hnênah, “Ka hnêna i awm hian tlâkchham eng nge i neih ni le, ngai teh, chutia in ram lama haw leh i tum tâk mai?” a ti a. Tin, ani chuan, “Eng mah phei chu nei lo ve; nimahsela, mi kaltîr rêng rêng rawh khai,” a ti a. 23 Tin, Pathianin a hmêlmaah Eliada fapa Rezona, a pu Hadadezera, Zoba lal hnên ata tlân bo tawh kha a rawn din chhuak leh a. 24 Davidan Zoba khuaa mite a thah khân ani chuan a hnênah mite a kai khâwm a, sipai hotuah a ṭang ta a. Tin, Damaska khuaah an kal a, chutah chuan an awm a, Damaska khuaah chuan lalah a ṭhu ta a. 25 Hadada tihhrehawmna belhchhahin Solomona dam chhûng zawng, Israel-te hmêlma a ni ṭhîn rêng a; Israel-te a haw hle mai a, Suria ram chungah ro a rêl a.
Jeroboama hnêna Pathian thutiam
26 Tin, Nebata fapa Jeroboama, Zereda khuaa Ephraim mi, Solomona chhiahhlawh pawh chuan (a nu hming chu Zeru-i a ni a, hmeithai a ni a), chu mi pawh chuan lal chungah a kut a lek ve a. 27 Lal chunga a kut a lek chhan chu hetiang hi a ni: Solomonan Milo a siam a, a pa Davida khua chu a chhe laite a siam ṭha a. 28 Chu Jeroboama chu mi chak huaisen a ni a; tichuan, Solomonan chu tlangvâl chu mi taima tak nia a hriat avângin, Josefa chhûngte hnathawh zawng zawng chunga hotuah a siam a. 29 Tin, chûng lai chuan heti hi a ni a, Jeroboama Jerusalem khua ata a kal chhuak chu Silo mi zâwlnei Ahijan kawnglakah a lo hmu a; Ahija chuan puan thar a sin a, an pahnih chauh chuan phûlah an awm dûn a. 30 Tin, Ahija chuan a puan thar sin chu a la a, phel sâwm leh phel hnihah a pawt thlêr a. 31 Jeroboama hnênah chuan, “Phel sâwm hi la rawh khai, LALPA, Israel-te Pathianin heti hian a ti a ni: ‘Ngai teh, ram hi Solomona ka chhuhsak ang a, hnam sâwm chu ka pe dâwn che a ni 32 (amaherawhchu, ka chhiahhlawh Davida avâng leh Israel hnam zawng zawng zînga ka thlan khawpui, Jerusalem avâng hian hnam khat zawng a nei ang chu); 33 anni chuan mi kalsan a, Zidon-ho pathiannu Astarothi te, Moab-ho pathian Kemosa te, Amon-ho thlahte pathian Milkoma-te an biak avâng leh, ka mit hmuha thil ṭha ti tûr leh, ka thuruatte leh ka rorêlte hi pawm tûra a pa Davida anga ka kawngte an zawh loh avângin. 34 Ram pum pui zawng ka chhuhsak lo vang; amaherawhchu, ka thupêkte leh ka thuruatte pawmtu, ka thlan, ka chhiahhlawh Davida avângin a dam chhûng chuan lalah ka la awmtîr ang. 35 Nimahsela, ram hi a fapa ka chhuhsak ang a, nangmah hi ka pe dâwn che a ni, hnam sâwmte chu. 36 Tin, ka chhiahhlawh Davidan ka hming awmtîr nâna ka thlan khawpui Jerusalem-ah hian, ka hmaa khâwnvâr a neih reng theihna tûrin hnam khat chu a fapa ka pe ang. 37 Nang hi ka ruat ang chia, i duh ang angin ro i rêl ang a, Israel-te lalah i awm ang. 38 Tin, heti hi a ni ang a, thu ka pêk apiang che i pawma, ka kawngte i zawha, ka chhiahhlawh Davida anga ka thuruatte leh ka thupêkte zâwm tûra ka mit hmuha thil ṭha i tih chuan i hnênah ka awm zêl ang a, Davida ka din nghehsak ang khân chhûngkaw nghet ka dinsak ang chia, Israel-te hi ka pe ang che. 39 Chu vâng chuan Davida thlah chu ka tihrehawm dâwn a ni; amaherawhchu, kumkhua zawngin a ni lo vang,’ a ti e,” tiin. 40 Chutichuan, Solomona chuan Jeroboama chu thah a tum ta a. Nimahsela, Jeroboama chu a tho va, Aigupta ram lal Sisaka hnênah a tlân a, Solomona thih hma loh chuan Aigupta ramah a awm ta a.
Solomona a thi
41 Solomona chanchin dangte leh, a thiltih zawng zawng leh a finnate chu Solomona thiltih ziakna buah a chuang a ni lâwm ni? 42 Solomonan Israel-ho zawng zawng chunga Jerusalem khuaa ro a rêl chhûng chu kum sawmli a ni. 43 Tichuan, Solomona chu a pute hnênah chuan a muhîl a, a pa Davida khawpuiah chuan an phûm ta a. Tin, a fapa Rehoboama chu a aiawhin a lal ta a.
Hmâr lam hnamte an hel
1 Tin, Rehoboama chu Sekem khuaah a kal a; Israel-ho zawng zawng chu Sekem khuaah chuan lala siam tûrin an kal tawh si a. 2 Tin, heti hi a ni a, Nebata fapa Jeroboaman chumi thu chu a lo hriat chuan (Lal Solomona hnên aṭanga a tlân bona Aigupta rama la awm a ni a; tichuan, Jeroboama Aigupta rama a la awm reng chu an zuk kohtîr a), 3 Jeroboama leh Israel pung khâwmho zawng zawng chu an lo kal a, Rehoboama hnênah, 4 “I pa khân kan nghâwngkawl a tirit êm êm ṭhîn a; chuvângin, i pa min chhawr rimna leh, a nghâwngkawl rit tak kan chunga a nghah hi min tihzânsak la; tichuan, i rawng kan bâwl ang e,” tiin an rawn sawi a. 5 Tin, ani chuan an hnênah, “Ni thum chhûng chu lo va kal kiang ta rih ula; tin, ka hnênah lo kal leh ang che u,” a ti a. Tin, mipuite chu an kal kiang ta a. 6 Tin, Lal Rehoboama chuan a pa Solomona dam laia a bula awm ṭhîn upahote chu, “Hêng mipuihote hi ka chhân dân tûr rem eng nge mi ruatpui le?” tiin a râwn a. 7 Tin, anni chuan a hnênah, “Tûnah hian hêngho chhiahhlawha i awma, an rawng i bâwla, anmahni chu i chhâna, an hnêna thu ṭha tak sawi i tum chuan, kumkhuain i chhiahhlawhah an awm ang,” tiin an sawi a. 8 Nimahsela, upaho remruatpui chu a pawm lo va, ama rualpui tlangvâlho, a bula awm ṭhînte chu a râwn ta zâwk a. 9 An hnênah chuan, “Hêng mipuiho, ka hnêna, ‘I pan kan chunga nghâwngkawl a nghah hi min tihzânsak rawh,’ tia sawitute hi ka chhân dân tûr rem eng nge mi ruatpui le?” a ti a. 10 Tin, a rualpui tlangvâlhote chuan a hnênah, “Hêng mipuiho, ‘I pa khân kan nghâwngkawl a tirit êm ṭhîn a, nang chuan min tihzânsak rawh khai,’ i hnêna titute hnênah chuan hetiang hian ti la, hetiang hian an hnênah sawi ang che: ‘Ka pa kâwng ai chuan ka zungtê hi a lian zâwk. 11 Ka pa khân nghâwngkawl rit tak a lo bahtîr che u a, kei chuan in nghâwngkawl chu ka belhchhah dâwn asin; ka pan vuaknain a lo hrîng ṭhîn che u a, kei erawh chuan khawmualkaikuangin ka hrîng dâwn che u a ni!’ tiin,” an ti a. 12 Chutichuan, Jeroboama leh mipuiho zawng zawng chu lalin, “Ni thum chinah ka hnênah lo kal leh ang che u,” tia a hrilh ang khân, a ni thum ni chuan Rehoboama hnênah an va kal a. 13 Tin, lal chuan mipuite chu chang takin a lo chhâng a, upahote remruatpui kha a pawm lo va; 14 tlangvâlhote remruatpui ang khân, “Ka pan in nghâwngkawl a lo tirit a, kei chuan in nghâwngkawl chu ka belhchhah dâwn asin; ka pan vuaknain a lo hrîng ṭhîn che u a, kei erawh chuan khawmualkaikuangin ka hrîng dâwn che u a ni!” a ti a. 15 Chutichuan, lal chuan mipuite thusawi kha a pawm ta lo va; chu chu LALPA vâng a ni, LALPAN Silo mi Ahija hmanga, Nebata fapa Jeroboama hnêna a thu lo sawi tawh kha a tihngheh theih nân. 16 Tin, Israel-ho zawng zawng chuan lalin an thusawi a pawm lo tih an hriatin, mipuite chuan, “Davidaah hian chanvo eng nge kan neih le? Jesaia fapaah chuan ro luah tûr kan nei hek lo. Aw Israel-te u, in puan in lamah haw rawh u. Aw David, i chhûngkua ngaihtuah mai tawh,” tiin lal chu an chhâng a. Chutichuan, Israel-ho chu an puan in lamah an kal ta a. 17 Israela thlah, Judai ram khuaa awmte erawh chu, an chungah Rehoboaman ro a rêl a. 18 Tichuan, Lal Rehoboama chuan hnathawka rawih luihte hotu Adorama a tîr a; ani chu Israel-ho zawng zawng chuan lungin an dêng a, a thi ta a. Tin, Lal Rehoboama chu Jerusalem khuaa tlân tumin a tawlailîrah a chuang ta thuai a. 19 Chutichuan, Israel-hote chu Davida chhûngte chungah an lo hel ta a ni, tûn thleng hian. 20 Tin, heti hi a ni a, Israel-ho zawng zawngin Jeroboama chu a lo kîr leh tih an hriatin punkhâwmnaa lo kal tûrin an kohtîr a, Israel-ho zawng zawng chunga lalah an siam ta a. Juda hnam ngawt lo chu tu mahin Davida chhûngte an zui lo.
Semaia hrilh lâwkna
21 Tin, Rehoboama chuan Jerusalem khua a han thlen chuan, Israela chhûngte chu dova, Solomona fapa Rehoboama rama la leh tûrin Juda chhûngte zawng zawng leh, Benjamin hnam, mi huaisen ṭhiau thlan chhuah nuai khat leh sîngriat zet a khâwm a. 22 Nimahsela, Pathian mi Semaia hnênah Pathian thu a lo thleng a, 23 Judai ram lal Solomona fapa Rehoboama hnênah leh Juda leh Benjamina chhûngte zawng zawng hnênah leh mipui dangte hnênah chuan, 24 “LALPAN heti hian a ti, ‘Han kal suh u, Israela thlah, in unauteho chu han do hek suh u. Mahni in lamah haw leh vek tawh u; hei hi keima tih a ni e, tiin,’ sawi rawh,” tiin. Chutichuan, LALPA thu chu an awih a, LALPA thu ang chuan an kîr a, an haw leh ta vek a.
Jeroboaman Pathian a hawisan
25 Chutichuan, Jeroboama chuan Ephraim tlâng ramah Sekem khua a siam a, chutah chuan a awm a; tin, chuta ṭang chuan a chhuak a, Penuel khua a siam a. 26 Tin, Jeroboama chuan a rilruin, “Ram hi Davida chhûngte ta a lo ni leh nghe nghe ang â: 27 he miteho hi Jerusalem khuaa LALPA ina inthawinate hlân tûra an kal chuan, he miteho thinlung hi an lalpa Rehoboama, Judai ram lal lamah hian a thle leh mai ang a; tichuan, kei hi min that ang a, Judai ram lal Rehoboama lamah an pakai leh mai ang â,” a ti a. 28 Chutichuan, lal chuan mi a râwn a, rangkachak bâwngno lem pahnih a siam a, an hnênah chuan, “In tân Jerusalem khuaa han kal chu a harsa lutuk êm a, aw Israel-te u, en teh u, Aigupta ram ata hruai chhuaktu che u in pathiante hi!” a ti a. 29 Tin, pakhat chu Bethel-ah a dah a, pakhat chu Dan-ah a dah a. 30 Chu thil chu sual a lo ni ta a ni; mipuite chu a pahniha be tûrin Dan thleng thlengin an kal si a. 31 Tin, hmun sâng inte a sa a, Levia fate ni lo, vântlang zînga mi puithiamahte a siam a.
Bethel khuaa maichâm din Pathian lawm loh zâwng
32 Jeroboama chuan Judai rama kût an neih ang bawkin thla riatna, chumi thla ni sâwm leh ni nga ni chu kût niah a ruat ve a, maichâmah chuan a han kal a. Bethel-ah chuan a bâwngno lem siam hnêna inthawiin chutiang chuan a ti a ni. Tin, a siam hmun sâng puithiamte chu Bethel-ah a dah a. 33 Tin, amahin a duh anga a ruat thla ngei, thla riatna, ni sâwm leh ni nga niah chuan Bethel-a a maichâm siamah a han kal a. Tin, Israela thlahte tân kût a ruat a, maichâma rimtui hâl tûrin a han kal a.
1 Tin, ngai teh, Judai ram aṭangin Pathian mi, LALPA thuin Bethel-ah a lo kal a; tin, Jeroboama chu maichâm bulah rimtui hâl tûrin a lo ding a. 2 Tin, LALPA thuin maichâm chu a au khum a, “Aw maichâm, maichâm, LALPAN heti hian a ti, ‘Ngai teh, Davida chhûngte zîngah fapa a hming Josia a lo piang ang a, i chunga rimtui hâl ṭhîntu, hmun sâng puithiamte hi i chungah hian inthawi nân a la rawn hlân ang a, i chungah hian mihring ruhte an la rawn hâl ang,’ tiin,” a ti a. 3 Tin, chumi ni vêk chuan chhinchhiahna a pe a, “Hei hi LALPAN chhinchhiahna tûr a tih chu a ni: ‘Ngai teh u, maichâm hi a la khi phawk ang a, a chunga meivâpte hi a la baw vek ang,’ tih hi,” tiin. 4 Tin, heti hi a ni a, Pathian miin Bethel-a maichâm a han au khum thu lalin a hriat chuan, Jeroboama chuan, “Man rawh u,” tiin maichâm aṭang chuan a kutin a han ban a. Tin, man tuma a banna kut chu a lo zeng ta a; tichuan, a kut chu a la leh thei ta lo va. 5 Pathian miin LALPA thua chhinchhiahna tûra a sawi ang khân maichâm pawh chu a khi bawk a, maichâma meivâpte chu a baw ta vek a. 6 Tin, lal chuan a chhâng a, Pathian mi hnênah chuan, “Ka kut hi a lo dam leh theihna tûrin LALPA i Pathian khawngaihna ngên la, mi ṭawngṭaisak teh khai,” a ti a. Tin, Pathian mi chuan LALPA hnênah a ngên a; tin, lal kut chu a lo dam leh a, a hma ang bawkin a lo awm leh ta a. 7 Tichuan, lal chuan Pathian mi hnênah, “Ka in lamah ka hnênah lo kal la, va châwl hahdam rih rawh khai; tin, lâwmman ka pe dâwn che nia,” a ti a. 8 Tin, Pathian mi chuan lal hnênah, “I in lo zâtve pawh mi pe dâwn mah la, i hnênah zawng ka lo kal chuang lo vang; hemi hmunah hian chhang ka eiin tui rêng rêng pawh ka in hek lo vang. 9 ‘Chhang va eiin tui rêng rêng pawh va in suh la, i va kalna kawngah pawh haw leh tawh suh,’ tia LALPA thua tirh ka ni asin,” a ti a. 10 Chutichuan, kawng dangah a kal a, Bethel-a a lo kalna kawngah chuan a haw leh ta lo va.
Bethel zâwlnei putar
11 Bethel khuaah chuan zâwlnei putar pakhat hi a awm a, a fapate chuan chumi nia Bethel-a Pathian mi thiltih zawng zawng chu an hrilh vek a; lal hnêna a thusawite pawh chu an pa an hrilh bawk a. 12 Tin, an pa chuan an hnênah “Khawii lam kawngah nge a kal tâk?” a ti a. A fapate chuan Judai ram aṭanga lo kal Pathian mi haw lehna kawng chu an kawhhmuh a. 13 Tichuan, a fapate hnênah, “Sabengtung mi han siam teh u,” a ti a. Chutichuan, sabengtung chu an siamsak a; tichuan, a chuang ta a. 14 Tin, Pathian mi chu a ûm ta a, sasaw thing hnuaia a ṭhu hi a va hmu a; a hnênah, “Nangmah hi em ni Judai ram aṭanga lo kal Pathian mi chu?” a ti a. Tin, ani chuan, “Ni e,” a ti a. 15 Tichuan, ani chuan a hnênah, “Ka in lamah ka hnênah lo kal la, chhang va ei rawh khai,” a ti a. 16 Tin, ani chuan, “I ruala kîr leh thei ka ni lo va, i hnêna lo kal thei pawh ka ni hek lo; hemi hmunah hian i hnênah chhang ka eiin tui rêng rêng pawh ka in hek lo vang. 17 ‘Chhang va eiin, tui rêng rêng pawh va in suh la, i va kalna kawngah pawh kîr leh tawh suh,’ tia LALPA thua hrilh ka ni si a,” a ti a. 18 Tin, ani chuan a hnênah, “Kei pawh nangmah ang bawka zâwlnei ka ni alâwm; vântirhkohvin LALPA thuin, ‘Chhang te eia tui te in tûrin i in lamah hruai kîr leh rawh khai,’ tiin mi bia sin,” a ti a. Nimahsela, a hnênah dâwt a sawi a ni. 19 Chutichuan, a hnênah chuan a kîr leh ve a, a inah chuan chhang te a eiin tui te a in ta a. 20 Tin, heti hi a ni a, dawhkân an kîl lai chuan a hruai kîrtu zâwlnei hnênah chuan LALPA thu chu a lo thleng a; 21 Judai ram aṭanga lo kal Pathian mi hnênah chuan, “LALPAN heti hian a ti, LALPA thusawi i awih lohva, LALPA i Pathianin thu a pêk che i pawm loh avâng leh, 22 i lo kîr leha, ‘Chhang va eiin tui rêng rêng pawh va in suh ang che,’ a tihna hmun ngeiah chhang i eia, tui te i in avângin i ruang hi i pute thlâna dah a ni ve lo vang,” tiin a sawi chhuak ta a. 23 Tin, heti hi a ni a, chhang te a eia, tui te a in zawh chuan, zâwlnei a hruai kîr leha chu sabengtung a siamsak a. 24 Tin, a kal ta chu kawnglakah sakeibaknei nên an intâwk a, a lo seh ta a. Tin, a ruang chu kawngah chuan theh thal dêrin a awm a, sabengtung chu a bulah chuan a ding a. Sakeibaknei pawh chu ruang bulah chuan a ding ve reng a. 25 Tin, ngai teh, mi an va kal a, kawnga ruang theh thal dêra awm leh ruang bula sakeibaknei ding reng chu an va hmu a. Zâwlnei putar pui awmna khuaah chuan an va sawi a. 26 Tin, kawnglak ata va hruai kîr lehtu zâwlnei chuan chumi thu a lo hriat veleh chuan, “Pathian mi, LALPA thusawi awih duh lo pa kha a nih chu. Chutichuan, LALPAN a hnêna a sawi, a thu ang ngeiin LALPAN sakeibaknei hnênah a pe a, a lo ham a, a seh hlum ta a nih chu,” a ti a. 27 Tin, a fapate hnênah chuan, “Sabengtung mi siamsak teh u,” tiin a sawi a. Tichuan, an siamsak ta a. 28 Tin, a kal ta a, a ruang kawnga theh thal dêra lo awm leh sabengtung leh sakeibaknei, ruang bula lo ding reng chu a va hmu a. Sakeibaknei chuan ruang chu a lo la ei lo va, sabengtung pawh chu a lo la tipem lo va. 29 Tin, zâwlnei chuan chu Pathian mi ruang chu a hlâwm a, sabengtung chungah chuan a hlâng a, a kîrpui ta a. Tichuan, zâwlnei putar awmna khuaah chuan sûn tûr leh vui tûrin a lût ta a. 30 Tin, a ruang chu ama thlânah a zalh a; tichuan, “A va pawi tehlul êm, ka unaupa!” tiin an ṭah a. 31 Tin, heti hi a ni a, a vui hnu chuan a fapate hnênah, “Ka thih hunah Pathian mi phûmna thlânah hian mi rawn phûm ve ang che u; a ruh bulah ka ruhte hi rawn dah ang che u. 32 Pathian thua Bethel-a maichâm leh, Samari ram khawpuitea hmun sâng in zawng zawng a au khumna thu kha lo thleng ngei ngei tûr a ni si a,” tiin a sawi a.
Jeroboama sual an chhiat phah
33 Chûng thil hnuah pawh Jeroboama chuan a awm dân dik lo chu a la bân chuang lo va, vântlang zînga mi hmun sâng puithiam atân a la siam ta cheu va; hmun sâng puithiamte an awm theihna tûrin a duh apiang a tihrang ṭhîn a. 34 Chu thil chu Jeroboama chhûngkaw sualna, anmahni tichimittu leh khawvêl ata tiboral hlauhtu a lo ni ta.
Jeroboama fa thih thu
1 Chûng lai chuan Jeroboama fapa Abija a damlo va. 2 Tin, Jeroboama chuan a nupui hnênah, “Tho la, Jeroboama nupui i ni tih an hriat loh nân che intidanglam la, Silo-ah va kal teh khai; ngai teh, chutah chuan zâwlnei Ahija, he miteho chunga lala ka la awm tûr ka chungchâng thu sawitu kha a awm e. 3 Tin, chhangpêr sâwm leh chhang hlâwm tê tê leh khawizu ûm khat keng langin, a hnênah va kal teh; naupang awm dân tûr chu a lo hrilh ang che,” a ti a. 4 Tin, Jeroboama nupui chuan chutiang chuan a ti a, a tho va, Silo-ah chuan a kal a, Ahija inah chuan a va kal ta a. Ahija chuan khua a hmu thei tawh lo va, a upat avângin a mit a thim tawh si a. 5 Tin, LALPAN Ahija hnênah, “Ngai teh, Jeroboama nupui, a fapa chungchânga râwn tûr chein a lo kal e, a damlo a ni a. Hetiang hian lo hrilh ang che; heti hi a ni ang a, a lo luh hunah chuan hmeichhe dang ni âwm takin a rawn insiam dâwn a ni,” a ti a. 6 Tin, heti hi a ni a, Ahijan chutia kawngkaa a lo luh laia a ke rah ri a han hriat veleh chuan, “Nang, Jeroboama nupui, lo lût rawh khai. Engtiziaa mi danga insiam nge i nih? Chanchin ṭha lo tak hrilh tûr chea tirh ka ni asin. 7 Kal leh ta la, Jeroboama hnênah, ‘LALPA, Israel-te Pathianin heti hian a ti: “Mipuite zîng ata ka chawisâng chia, ka mi Israel-te chungah hian hotuah ka siam chia, 8 Davida chhûngte ram ka chhuhsak a, chu chu ka pe chia; nimahsela, nang zawng ka chhiahhlawh Davida angin i awm ve lo va, ani zawngin ka thupêkte a pawm a, ka mit hmuha thil ṭha chauh tih tumin a thinlung zawng zawngin mi zui ṭhîn a; 9 nang erawh chuan i hmaa mite zawng zawng aiin thil i tisual nasa bîk a, mi tihthinrim nân pathian dangte leh milem chhûnte i siam a, mi hnuchhawnsan ta a; 10 chuvângin, ngai teh, Jeroboama chhûngkaw chungah hian thil ṭha lo ka rawn thlentîr ang a, Jeroboama aṭang hian mipa fa tawh phawt chu Israel rama mi, khuahkhirh leh khirh loh pawh ka tiboral ang a, miin êk a phiat fai hliau ang mai hian Jeroboama chhûngkua hi a mang vek hma loh chuan ka phiat bo hlauh dâwn a ni. 11 Jeroboama chhûngkaw zînga mi, khawpuia thi apiangte chu uiin an ei ang a, rama thi apiangte chu chunglêng savaten an ei ang; chu chu LALPAN a sawi tawh a ni,” ti ang che.’ 12 Chutichuan, tho la, i in lamah haw leh mai tawh. Khawpui chhûng i rah veleh naupang chu a thi dâwn a ni. 13 Tichuan, Israel-ho zawng zawngin an sûn ang a, an vui ang, Jeroboama chhûngkaw zîngah chuan amah chauh chu thlâna dah tûr a ni dâwn si a; Jeroboama chhûngkaw zîngah hian amah chauhvah hian LALPA, Israel-te Pathian chunga ṭhatna eng emaw a lan avângin. 14 Tin, LALPAN tûn la laa Jeroboama chhûngkua rawn tiboraltu tûr Israel-te chunga lal a insiam ang; tûnah pawh hian engtin nge ni ta ang le? 15 LALPA chuan tuia rairuang nghîng nghîng ang maiin Israel-te chu a rawn vaw nghîng ang a; tichuan, LALPA thin tirima an Aseri-te chu an siam avângin an pute a lo pêk tawh, he ram ṭha tak ata hi Israel-hote chu a la pawt chhuak fai vek ang a, Lui piah lamah chuan a la tidarh vek ang. 16 Tin, Israel-hote thil tihsualtîra a tih, Jeroboama sualnate avângin Israel-hote chu a hawisan ang,” a ti a. 17 Tin, Jeroboama nupui chu a tho va, a chhuak ta a, Tirza khua a va thleng a; tin, in kawngka bul a va thlen chuan naupang chu a thi ta a. 18 Tin, LALPAN a chhiahhlawh zâwlnei Ahija hmanga thu a lo sawi tawh ang ngei khân Israel-ho zawng zawng chuan an vui a, an sûn ta a.
Jeroboama thih thu
19 Jeroboama chanchin dang - a râl beih thu te, a rorêl thu te chu - ngai teh, Israel lalte lal lai thu ziakna buah chuan a chuang a. 20 Tichuan, Jeroboama rorêl chhûng chu kum 22 a ni; tin, a pute hnênah a muhîl a, a fapa Nadaba chu a aiawhin a lal ta a.
Juda lal Rehoboama
21 Tin, Solomona fapa Rehoboama chu Judai ramah a lal a. A lal ṭan tirh lai chuan Rehoboama chu kum sawmli leh kum khat mi a ni a, LALPAN a hming awmtîr nâna Israel hnam zawng zawngte zînga a thlan khawpui Jerusalem-ah chuan kum 17 a lal a. A nu hming chu Naami, Amon mi a ni. 22 Juda-ho chuan LALPA mit hmuhin thil sual an ti a; an pute thiltih zawng zawng khûma an sualnate chuan a thikthu a chawhthawhsak a. 23 Tlâng sâng tinah leh thing hring tin hnuaiah hian lungphunte phunin hmun sângte leh Aseri-te lam hi an siam bawk si a. 24 Tin, chu ramah chuan mipa inzuarte pawh an awm a. Israel thlahte hmaa LALPAN a hnawh chhuah tâk hnamte thiltih tenawm tinrêng ang chu an ti ve a. 25 Tin, Lal Rehoboama lal kum nga kum chuan heti hi a ni a, Aigupta lal Sisakan Jerusalem khua chu a han bei a; 26 LALPA ina rote leh lal ina rote chu a la a, a vai chuan a la ta vek a. Solomona rangkachak phaw siam zawng zawng chu a la tel vek bawk a. 27 Tin, Lal Rehoboama chuan chûng aiah chuan dâr phawte a siam a, lal in kawngka vêngtu hotute a kawltîr a. 28 Tin, heti hi a ni a, lal chu LALPA ina a luh apiangin vêngtute chuan an keng a; tin, vêngtute pindanah an dah leh zêl ṭhîn a. 29 Rehoboama chanchin dangte leh a thiltih zawng zawng chu, Juda lalte lal lai thu ziakna buah chuan a chuang a ni lâwm ni? 30 Rehoboama leh Jeroboama chu indo rêng rêngin an awm ṭhîn a. 31 Tin, Rehoboama chu a pute hnênah chuan a muhîl a, Davida khawpuiah a pute zîngah chuan an phûm ta a. A nu hming chu Naami, Amon mi a ni. Tin, a fapa Abijama chu a aiawhin a lal ta a.
Juda lal Abijama
1 Nebata fapa Lal Jeroboama kum sâwm leh kum riat a lal kum chuan Juda-hote chungah Abijama chu a lal ṭan a. 2 Jerusalem khuaah kum thum a lal a. A nu hming chu Maaki, Abisaloma fanu a ni. 3 A hmaa a pain thil sual a tih zawng zawng kha a ti ve a; a pu Davida thinlung angin a thinlung chu LALPA a Pathian lamah a ṭha famkim ve lo va. 4 Nimahsela, Davida avângin LALPA a Pathianin a hnua a fapa la tundinna tûr leh, Jerusalem khua din nghet tûrin Jerusalem khuaah chuan khâwnvâr a neihtîr a; 5 Hit mi Uria chungchâng tih lohvah chuan, Davidan LALPA mit hmuha thil ṭha a tih ṭhin avâng leh a dam chhûng zawnga ti tûra thu a pêk tawh phawt chu a hnial ngai hauh loh avângin. 6 Rehoboama chu a dam chhûng zawng Jeroboama nên an indo reng ṭhîn a. 7 Abijama chanchin dangte leh a thiltih zawng zawng chu Juda lalte lal lai thu ziakna buah chuan a chuang a ni lâwm ni? Tin, Abijama leh Jeroboama chu an indo ṭhîn a. 8 Tin, Abijama chu a pute hnênah chuan a muhîl a; tichuan, Davida khawpuiah an phûm ta a. Tin, a aiawhin a fapa Asa chu a lal ta a.
Juda lal Asa
9 Israel lal Jeroboama kum sawmhnih a lal kum chuan Asa chu Juda-hote chungah a lal ṭan a. 10 Tin, kum sawmli leh kum khat Jerusalem-ah a lal a. A nu hming chu Maaki, Abisaloma fanu a ni. 11 Tin, Asa chuan a pu Davida ang bawkin LALPA mit hmuha thil ṭha a ti ṭhîn a. 12 Tin, mipa inzuarhote chu a ram ata a hnawt chhuak a, a putena milem an lo siam zawng zawng chu a thehthang bo vek a. 13 Tin, a nu Maaki pawh chu, milem tenawm tak tak Aseri a siam avângin a lal nu nih a bân a. Tin, Asa chuan a milem siam chu a sât thlu a, Kidron luiah a hâl a. 14 Hmun sângte erawh chu a thehthang bo lo va. Nimahsela, Asa thinlung chu a dam chhûng zawng LALPA lamah a ṭha famkim a ni. 15 Tin, a pain thil a lo hlan sa tawhte leh, amah ngeiin a lo hlan tawh - tangkarua te, rangkachak te, bungbêlte chu LALPA inah a la lût a. 16 Tin, Asa leh Israel lal Baasa chu an lal chhûng zawng an indo reng ṭhin a. 17 Tin, Israel lal Baasa chuan Juda-ho a han bei a, Juda lal Asa hnênah lût tûr leh chhuak tûr dan nân Rama khua a siam a. 18 Chutichuan, Asan LALPA in leh lal ina ro la awm, tangkarua leh rangkachak zawng zawng chu a la a, a chhiahhlawhte a pe a; tin, Lal Asa chuan Damaska khuaa awm Suria lal Heziona fa Tabrimona fapa Ben-hadada hnênah chuan, 19 “Kei leh nanga kârah leh ka pa leh i pa kârah thuthlung a awm a. Ngai teh, lâwmman atân tangkarua leh rangkachak ka han thawn a che. Ti teh, Israel lal Baasa hian mi ṭînsanna tûrin a hnêna i thuthlun kha ṭhiat teh mai,” tiin a thawn a. 20 Tin, Ben-hadada chuan Lal Asa thu chu a lo pawm a; tichuan, Israel khuate chu bei tûrin a sipai hotute a tîr a, Ijon khua te, Dan khua te, Abel-beth-maaka khua te, Kineroth bial zawng zawng, Naphtali ram zawng zawngte nên a bei a. 21 Tin, heti hi a ni a, Baasan chumi thu chu a lo hriat veleh Rama khaw siam chu a bâng a, Tirza khuaah a awm ta a. 22 Chutichuan, Lal Asa chuan Judai ram zawng zawngah thu a than vêl ta a; tu mah âwl rêng rêng an awm lo. Tichuan, Baasan Rama khaw siam nâna lung leh thing a hmante chu an thiar a; tin, chûng hmang chuan Lal Asan Mizpe khua leh Benjamin rama Geba khua a siam a. 23 Asa chanchin dang zawng zawng te, a thiltihtheihzia zawng zawng te, a thiltih zawng zawng te, a khaw siamte chu Juda lalte lal lai thu ziakna buah chuan a chuang a ni lâwm ni? Amaherawhchu, a tar lamah a keah hri eng emaw a lo vei ta a. 24 Tin, Asa chu a pute hnênah a muhîl a, a pu Davida khawpuiah a pute zîngah an phûm ta a. Tichuan, a fapa Jehosaphata chu a aiawhin a lal ta a.
Israel lal Nadaba
25 Tin, Jeroboama fapa Nadaba chu Juda lal Asa lal kum hnihnaah chuan Israel-hote chungah a lal ṭan a, Israel-hote chungah kum hnih a lal a. 26 LALPA mit hmuhin thil ṭha lo tak a ti ṭhîn a, a pa kawng zawh chu a zawh ve a, Israel-hote thil tihsualtîra a tih sualna kha a ti ve a. 27 Tin, Isakara chhûngte zînga mi Ahija fapa Baasan amah a phiar ru a, Philistia-ho chan, Gibethon khuaah Baasa chuan a that ta a; Nadaba leh Israel-ho zawng zawngte chuan Gibethon khua chu an hual lai a ni. 28 Juda lal Asa lal kum thumnaah a ni, Baasa chuan a thaha, a aiawha a lal ni. 29 Tin, heti hi a ni a, lal a nih veleh chuan a tihchimih hma loh chuan Jeroboama chhûngte zawng zawng chu a that a, nung tawh phawt chu pakhat mah Jeroboama chu a zuahsak lo, LALPAN Silo khuaa mi a chhiahhlawh Ahija hmanga a lo sawi tawh ang khân; 30 chu chu Israel-hote thil tihsualtîra a tih, Jeroboama sualnate avâng leh LALPA, Israel-te Pathian chu a tihthinrim vâng a ni. 31 Nadaba chanchin dangte leh a thiltih zawng zawngte chu Israel lalte lal lai thu ziakna buah a chuang a ni lâwm ni? 32 Tin, Asa leh Israel lal Baasa chu an lal chhûng zawng an indo reng ṭhîn a.
Israel lal Baasa
33 Juda lal Asa lal kum thumnaah chuan Ahija fapa Baasa chu Tirza khuaah Israel-ho zawng zawng chungah a lal ṭan a, kum sawmhnih leh kum li a lal a. 34 LALPA mit hmuhin thil ṭha lo tak a ti ṭhîn a, Jeroboama kawng zawh chu a zawh ve a, Israel-hote thil tihsualtîra a tih sualna kha a ti ve a.
1 Tin, Baasa chungchâng thu-ah Hanania fapa Jehua hnênah LALPA thu a lo thleng a: 2 “Vaivut ata ka chawisâng chia, ka mi Israel-te chungah hian hotuah ka siam chia; tin, nangin Jeroboama kawng zawh chu i zawh ve a, an sualnatea mi tihthinrim nân ka mi Israel-te thil i tihsualtîr a; 3 ngai teh, Baasa leh a chhûngte hi ka tibo hlauh dâwn a ni; tichuan, Nebata fapa Jeroboama chhûngte ang maiin i chhûngte hi ka siam ang. 4 Baasa chhûngkaw zînga mi khawpuia thi apiang chu uiin an ei ang a; tin, a chhûngkaw zînga mi rama thi apiangte chu chunglêng savaten an ei ang,” tiin. 5 Baasa chanchin dang te, a thiltih te, a thiltihtheihziate chu Israel lalte lal lai thu ziakna buah a chuang a ni lâwm ni? 6 Tin, Baasa chu a pute hnênah chuan a muhîl a, Tirza khuaah an phûm ta a. Tin, a fapa Ela chu a aiawhin a lal ta a. 7 Tin, Baasa leh a chhûngte chungchâng thu-ah chuan, a kutchhuaka LALPA tihthinrim nâna Jeroboama chhûngte anna neia, LALPA mit hmuha thil ṭha lo tak a tih avâng leh amah chu a thah avângin, Hanania fapa zâwlnei Jehua hmanga a sawi LALPA thu chu a lo thleng a.
Israel lal Ela
8 Juda lal Asa lal kum sawmhnih leh kum ruknaah chuan Baasa fapa Ela chu Tirza khuaan Israel-ho chungah a lal ṭan a, kum hnih a lal a. 9 Tin, a puipa Zimria, a tawlailîr zâtve chunga hotuin a phiarru a; chutih lai chuan Tirza khuaah, Tirza khuaa a in chhûng lam hotu Arza inah a lo inin rui a. 10 Juda lal Asa lal kum sawmhnih leh kum sarih kumah chuan Zimria chu a va lût a, a bei a, a that a, a aiawhin a lal ta a. 11 Tin, heti hi a ni a, a han lal ṭana, a lalṭhutthlênga a han ṭhut veleh chuan, Baasa chhûngte zawng zawng chu a that vek a; a laichînte leh a ṭhiante zînga mi mipa fa tawh phawt chu pakhat mah a zuah lo. 12-13 Chutiang chuan LALPA, Israel-te Pathian chu an lawilohnaa tihthinrim nâna Israel-hote thil tihsualtîra an tih, Baasa sualna zawng zawng leh a fapa Ela sualnate avânga LALPAN zâwlnei Jehua hmanga Baasa chungchâng thua a lo sawi tawh ang khân, Zimria chuan Baasa chhûngte zawng zawng chu a tiboral vek a ni. 14 Ela chanchin dangte leh a thiltih zawng zawngte chu Israel lalte lal lai thu ziakna buah a chuang a ni lâwm ni?
Israel lal Zimria
15 Juda lal Asa lal kum sawmhnih leh kum sarihnaah chuan Zimria chu Tirza khuaah ni sarih a lal a. Philistia-ho chan Gibethon khua chu, mite chuan an hual a ni. 16 Tin, a hualtute chuan Zimrian a phiarru a, lal a that ta tih an sawi an lo hria a; chutichuan, Israel-ho zawng zawng chuan sipai hotu Omria chu, chumi ni chuan an riahhmunah Israel-te chunga lalah an siam ta a. 17 Tin, Omria chu Israel-ho zawng zawng nên Gibethon khua aṭang chuan an han chho va, Tirza khua chu an han hual ta a. 18 Tin, heti hi a ni a, Zimrian khua chu an la tih a hriat chuan lal ina kulhah a tlân lût a, lal inah chuan a inhâl khum a, a thi ta a, 19 LALPA mit hmuha thil ṭha lo tak tia a sualnate avâng leh, Jeroboama kawng zawh chu zawh vea Israel-hote thil tihsualtîra a sualna avangin. 20 Zimria chanchin dangte leh, a phiarrûkna thute chu Israel lalte lal lai thu ziakna buah a chuang a ni lawm ni?
Israel lal Omria
21 Chutichuan, Israel mipuite chu pâwl hnihah an lo inṭhen ta a: mipui zâtve chuan Ginatha fapa Tibnia chu lala siam tumin an zui a, a zâtvein Omria an zui a. 22 Nimahsela, Omria zuitute chuan Ginatha fapa Tibnia zuitute chu an hneh ta a. Tichuan, Tibnia chu a thi a, Omria chu a lal ta a. 23 Juda lal Asa lal kum sawmthum leh kum khatnaah Omria chu Israel-te chungah a lal ṭan a, kum sâwm leh kum hnih a lal a. Tirza khuaah kum ruk a lal a. 24 Tin, Semera ta Samari tlâng chu tangkaraw talent hnihin a lei a; tin, tlângah chuan khua a siam a, a khaw siam hmingah chuan chumi tlâng neitu Semera hming chawiin Samari a puttîr a. 25 Omria chuan LALPA mit hmuhin thil ṭha lo tak a ti ṭhîn a, a hmaa mite zawng zawng aiin thil a tisual nasa bîk a. 26 Nebata fapa Jeroboama dân zawng zawng kha a la a, an lawilohna avânga LALPA, Israel-te Pathian tihthinrim nâna Israel-hote thil a tihsualtîrna ang khân a sual ve si a. 27 Omria thiltih chanchin dangte leh a thiltihtheihzia a tihlan thute chu, Israel lalte lai thu ziakna buah a chuang a ni lâwm ni? 28 Chutichuan, Omria chu a pute hnênah chuan a muhîl a, Samari khuaah an phûm ta a. Tichuan, a fapa Ahaba chu a aiawhin a lal ta a.
Israel lal Ahaba
29 Juda lal Asa lal kum sawmthum leh kum riatnaah Omria fapa Ahaba chu Israel-te chungah a lal ṭan a; tin, Omria fapa Ahaba chu Samari khuaan kum sawmhnih leh kum hnih Israel-te chungah a lal a. 30 Tin, Omria fapa Ahaba chuan a hmaa mite zawng zawng aiin LALPA mit hmuhin thil ṭha lo tak a ti ṭhîn a. 31 Tin, heti hi a ni a, Nebata fapa Jeroboama sualna ang tih ve te chu engmahlova ngai ni âwm takin, Zidon-ho lal Ethbaala fanu Jezebeli nupuiah a nei a, Baala rawng te bâwlsanin a be ve ta mai a. 32 Tin, Samari khuaa Baala in a sakah chuan Baala tân maichâm a siam a. 33 Tin, Ahaba chuan Aseri a siam a, a hmaa Israel lalte zawng zawng aiin Ahaba chuan LALPA, Israel-te Pathian tihthinrimna thil a ti nasa bîk a ni. 34 A lal lai chuan Bethel mi Hielan Jeriko khua a siam a. A fa tîr Abirama chânin a lungphûm chu a phûm a; tin, a fa tlum Seguba chânin a kulh kawngkhârte chu a din a, LALPAN Nuna fapa Josua hmanga a lo sawi tawh ang khân.
Elija leh khawkhêng
1 Tisbe khua, Gilead rama Tisbe khuaa mi Elijan Ahaba hnênah chuan, “LALPA, a bula ka awm ṭhinna Israel-te Pathian nunna chhâlin ka sawi e: kum eng emaw ti chhûng chu ka thu lo chuan dai leh ruah rêng rêng a tla lo vang,” a ti a. 2 Tin, LALPA thu chu a hnênah a lo thleng a, 3 “Heta ta hi chhuak la, khawchhak lam panin kal la, Jordan bula awm Kerith luiah han biru rawh. 4 Tin, heti hi a ni ang a, chumi lui tui chu i tlân ang a; chuta a châwm tûr chein choâkte thu ka pe tawh e,” tiin. 5 Chutichuan, a kal a, LALPA thu ang chuan a ti ta a; Jordan bula awm Kerith luiah chuan a han awm ta a. 6 Tin, choâkten zîng lamah chhang leh sa an rawn putsak ṭhîn a, tlai lamah chhang leh sa an rawn putsak leh ṭhîn a; tin, lui tui chu a tlân a. 7 Tin, nakin deuhvah chuan heti hi a ni a, chûng ramah chuan ruah rêng rêng a sûr loh avângin lui chu a lo kang chat ta a.
Elija leh Zarephath hmeithai
8 Tin, LALPA thu a hnênah a lo thleng a, 9 “Tho la, Zidon rama Zarephath khuaah kal la, chutah chuan awm rawh. Ngai teh, a châwm tûr chein hmeithai pakhat thu ka pe tawh e,” tiin. 10 Chutichuan, a tho va, Zarephath khuaah chuan a kal ta a; tin, chumi khaw kulh kawngka chu a va thlen chuan, ngai teh, hmeithai pakhat thing fawm hi a lo awm a. Tin, ani chu a han au va, “Bêlin tui tlêm tê mi han lâk teh khai, ka lo in ang e,” a han ti a. 11 Tin, la tûra a kal chu a han au va, “Chhang tlêm tê pawh mi han ken teh ang che,” a ti a. 12 Tin, ani chuan, “LALPA i Pathian nunna chhâlin ka sawi e, chhang zawng ka nei lo va, bêlah chhangphut vei khat lek leh, ûmah sahriak tlêm tê chauh ka nei a; tin, ngai teh, ka hâwna ka tân leh ka fapa tâna siamna tûrin thingṭang pahnih emaw lek ka fawm a ni a; tichuan, kan ei ang a, kan thi mai ang,” a ti a. 13 Tin, Elijan a hnênah, “Hlau suh; i sawi ang chuan va ti ta che; amaherawhchu, chumi chuan chhang tê tak tê mi han siamsak phawt la, chu chu mi rawn lâk la, chumi zawhah chuan i tân leh i fapa tân i la siam dâwn nia. 14 LALPA, Israel-te Pathianin heti hian a ti a ni: ‘LALPAN lei chungah hian ruah a rawn sûrtîr hma loh chuan chhangphut bêl chu a ruak chuang lo vang a, sahriak ûm pawh a kang lo vang,’ tiin,” a ti a. 15 Tichuan, Elija sawi ang chuan a va ti a; tin, amah leh a chhûngte leh Elija nên chuan ni eng emaw zât an ei a. 16 Elija hmanga a sawi LALPA thu ang khân chhangphut bêl chu a ruak chuang lo va, sahriak ûm pawh a kang hek lo. 17 Tin, chûng thil hnuah chuan heti hi a ni a, in neitunu, hmeichhe fapa chu a lo damlo ta a; a na chu a na hle mai a, a thaw a tâwp ta a. 18 Tin, ani chuan Elija hnênah, “Aw nang Pathian mi, nang leh kei hi eng nge maw kan nih? Ka sualna mi hriat chhuahtîr tûr leh ka fapa mi thahsak tûra lo kal i nih hi le!” a ti a. 19 Tin, ani chuan a hnênah, “I fapa chu mi han pe teh,” a ti a. Tichuan, a pawm lai chu a lâksak a, a awmna pindanah chuan a pawm chho va, ama khumah a muttîr a. 20 Tin, LALPA a au va, “Aw LALPA ka Pathian, ka chênna hmeithainu chungah pawh hian a fapa tihhlumsakin thil ṭha lo i rawn thlentîr ta em ni le?” a ti a, 21 Tichuan, naupang chungah chuan vawi thum a bawk a, LALPA chu a au va, “Aw LALPA ka Pathian, khawngaih takin he naupang nunna hi amahah hian han awmtîr leh ang che,” a ti a. 22 Tin, LALPAN Elija thu chu a lo ngaihthlâksak a; tichuan, naupang nunna chu amahah chuan a lo awm leh a, a lo harh leh ta a. 23 Tin, Elija chuan naupang chu a hruai a, pindan ata chu in chhûngah a chhukpui a, a nu a pe ta a; tin, Elijan, “En teh, i fapa hi a dam leh ta e,” a ti a. 24 Tin, hmeichhia chuan Elija hnênah, “Tunah zet chuan Pathian mi i ni a, i kâa LALPA thu hi thutak a ni tih ka lo hre ta,” a ti a.
Elija leh Baala puithiamho
1 Tin, ni rei fe hnuah chuan heti hi a ni a, a kum thum kumah chuan LALPA thu Elija hnênah a lo thleng a, “Va kal la, Ahaba hnênah va inlan rawh; tichuan, lei chungah hian ruah ka rawn sûrtîr dâwn e,” tiin. 2 Tin, Elija chu Ahaba hnêna inlan tûr chuan a kal ta a. Samari ramah chuan ṭâm chu a nasa hle mai a. 3 Tin, Ahaban Obadia, a in chhûng lam hotu chu a ko va (Obadia chu LALPA ṭih mi tak a ni a; 4 heti hi a ni a, Jezebelin LALPA zâwlneite a râwt chiam lai khân Obadia chuan zâwlnei za a hruai a, pûkah sawmnga têlin a thukru a, chhang leh tuiin a châwm ṭhîn a ni). 5 Tin, Ahaba chuan Obadia hnênah, “Tuihna zawng zawng leh luikawr zawng zawng awmna lam ram va fang teh khai; sakawr leh sabengtungte hi kan chhandam theihna tûrin hlobet te kan hmuhsak thei mahna; chuti lo chuan, rante hi kan chân vek dah ang e,” a ti a. 6 Chutichuan, ram fan chhuah tûr an insem a; Ahaba chu amahin kawng pakhatah a kal a, Obadia chu amahin kawng dangah a kal a. 7 Tin, chutia Obadia a kal lai chuan, ngai teh, Elija nên an intâwk a; tin, ani chuan a la hria a; tichuan, a bawkkhup a, “Nang i ni maw, ka pu Elija?” a ti a. 8 Tin, ani chuan a chhâng a, “Ni e; kal ta la, ‘Ngai teh, Elija sâwtah sâwn a awm e,’ tiin i pu va hrilh rawh,” a ti a. 9 Tin, ani chuan, “Thil eng nge ka tihsuala, i chhiahhlawh hi thah tûra Ahaba kuta pêk i duh mai le? 10 LALPA i Pathian nunna chhâlin ka sawi e, ka puin nangmah zawntîr lohna hnam leh ram rêng rêng a nei lo asin; ‘Hetah a awm lo ve,’ an tih chuan an hmuh loh che thu-ah ram leh hnam chu chhia a chhamtîr zêl mai a ni a. 11 Tûnah hian nangin, ‘Kal ta la, ngai teh, “Elija sâwtah sâwn a awm e,” tiin i pu va hrilh rawh,’ i ti mai a. 12 Heti hi a ni ang a, ka kalsan veleh che hian LALPA thlarauvin ka hriat lohnaah a la bo si ang chia; tichuan, Ahaba ka va hrilha, a rawn hmuh theih si loh che chuan mi that mai ang asin. Nimahsela, i chhiahhlawh hian ka tleirâwl tirh ata LALPA chu ka ṭih ṭhîn si a. 13 Jezebelin LALPA zâwlneite a râwt chiam laia ka thiltih, LALPA zâwlneite zînga mi za, sawmnga têla pûka ka thuhrûka, chhang leh tuia ka châwm zia te kha ka pu hi an hrilh lo che em ni? 14 Tûnah hian nangin, ‘Kal ta la, ngai teh, “Elija chu sâwtah sâwn a awm e,” tiin i pu va hrilh rawh,’ i ti mai a; mi that ngei ang le,” a ti a. 15 Tin, Elija chuan, “A bula ka awm ṭhinna sipaihote LALPA nunna chhâlin ka sawi e, vawiinah hian a hnênah ka inlan ngei ngei dâwn a ni,” a ti a. 16 Chutichuan, Obadia chu Ahaba be tûrin a kal a, a va hrilh ta a; tin, Ahaba chu Elija hmuh tumin a kal ta a. 17 Tin, heti hi a ni a, Ahaban Elija a va hmuh chuan Ahaban a hnênah, “Nang i ni maw, Israel-ho timangangtupa?” a ti a. 18 Tin, ani chuan a chhâng a, “Israel-ho ka timangang lo ve; nang leh i pa chhûngten alâwm timangang zâwk ni, LALPA thupêkte hi hawisana, Baala-te i pawm zâwkah hian. 19 Chutichuan, tûnah hian Israel-ho zawng zawng leh Baala zâwlnei zali leh sawmnga leh, Aseri zâwlnei, Jezebeli dawhkâna chawhlui kîl ve ṭhîn zalite kha ka hnênah Karmel tlângah hian va koh khâwmtîr rawh,” a ti a. 20 Chutichuan, Ahaba chuan Israel thlahteho zawng zawng hnênah mi a tîr a, zâwlneihote chu Karmel tlângah chuan a ko khâwm a. 21 Tin, Elija chuan mipuiho zawng zawng chu a va hnaih a, “Tuilairapin eng chen nge in awm dâwn? LALPA chu Pathian a nih chuan, amah chu zui ula; tin, Baala a nih leh, amah chu zui rawh u,” a ti a. Mipuite chuan kam khat mahin an chhâng lo va. 22 Tichuan, Elija chuan mipuite hnênah chuan, “LALPA zâwlnei la awm chu keimah chauh hi ka ni a; Baala zâwlneite erawh chu mi 450 an ni a. 23 Chutichuan, bâwngpa pahnih mi han pe sela; annin bâwngpa pakhat chu an pualah thlang sela, chan sawm sela, thing chungah chuan dah sela, a hnuaiah mei chhêm lovin; tin, keiin bâwngpa pakhat chu ka buatsaih ve ang a, thing chungah chuan ka dah ang a, mei ka chhêm bîk lo vang e. 24 Tin, nangnin in pathian hming chu lam ula, kei pawhin LALPA hming ka lam ang a; tichuan, meia rawn chhângtu Pathian apiang chu Pathian ni rawh se,” a ti a. Tin, mi zawng zawng chuan an chhâng a, “A dik alâwm,” an ti a. 25 Tichuan, Elija chuan Baala zâwlneite hnênah chuan, “Nangnin bâwngpa pakhat hi in pualah thlang ula, buatsaih hmasa rawh u, nangni zawng in tam deuh hi; tin, in pathian hming chu lam ula; amaherawhchu, a hnuaiah mei chhêm suh u,” a ti a. 26 Tin, bâwngpa an pual chu an la a, an buatsaih a, “Aw Baala, min han chhâng rawh khai,” tiin zîng aṭangin chhûn thlengin Baala hming chu an lam a. Nimahsela, aw riva rêng rêng a awm lo va, chhângtu rêng rêng lah an awm hek lo. Tin, an maichâm siam vêlah chuan an zuang an zuang mai a. 27 Tin, chhûn lai takah chuan heti hi a ni a, Elija chuan anmahni chu tielin, “Au ring che u le, pathian a ni si a; a inngaihtuah rih emaw, a bibo rih lawk emaw, a thang bo rih emaw, a nih loh leh a muhîl hlauhva, tihharh tûr emaw a ni ang e,” a ti a. 28 Tin, ring takin an au va, an tih ṭhin dânin chemtê leh feitein thi chhuak zawih zawih khawpin an inzaiin an invit a. 29 Tin, ni a lo thlangher chuan heti hi a ni a, tlai lam inthawi hun thlengin an sawi dual dual mai a; nimahsela, aw riva rêng rêng a awm lo va, chhângtu tûr rêng rêng emaw, a lo ngaihsaktu rêng rêng emaw an awm bawk hek lo. 30 Tichuan, Elija chuan mipuiho zawng zawng hnênah chuan, “Mi rawn hnaih teh u khai,” a ti a; tin, mipuiho zawng zawng chuan an va hnaih a. Tin, LALPA maichâm tihchim tawh chu a siam ṭha a. 31 Tin, “I hming chu Israela a ni ang,” tia LALPA thu lo dawngtu Jakoba fate hnam zât lung sâwm leh pahnih Elija chuan a la a. 32 Tin, lungte chuan LALPA hmingin maichâm a siam a; tin, maichâm vêl chu buh chi tehkhâwng hnih leng zetin a lai khuar a. 33 Tin, thing chu a han chhep fel a, bâwngpa chu a chan sawm a, thing chungah chuan a dah a. Tin, “Bêl pali tuiin tikhat ula, hâlral thilhlan leh thing hi han leih rawh u,” a ti a. 34 Tin, “Han leih leh rawh u,” a ti a, an han leih leh a. Tin, “Han leih nawn leh rawh u,” a ti a, an han leih nawn leh a. 35 Tin, tui chu maichâm vêlah chuan a luang ta dûl dûl a; tin, laih khuar chu tuiin a tikhat bawk a. 36 Tin, tlai lam inthawi hun lai chuan heti hi a ni a, zâwlnei Elija chuan a va pan hnai a, “Aw LALPA, Abrahama te, Isaaka te, Israela te Pathian, nang hi Israel rama Pathian i nih leh, kei hi i chhiahhlawh ka niha, hêng zawng zawng hi nangma thua ti ka nih vawiinah hian hre hlawm rawh se. 37 Mi lo ngaihthlâksak la, hêng mipuite hian nang LALPA hi Pathian i ni a, an thinlungte i lamlêttîr leh ta a ni tih hi an lo hriat theih nân aw LALPA, mi lo ngaihthlâksak ang che,” a ti a. 38 Tichuan, LALPA mei chu a lo tla a, hâlral thilhlan te, thing te, lung te, vaivut te chu a kâng ral a, laih khuara tui chu a hîp kang ta vek a. 39 Tin, mipuiho zawng zawngin chu chu an han hmuh chuan an bawkkhup a, “LALPA hi a lo ni, Pathian chu! LALPA hi a lo ni, Pathian chu! LALPA hi a lo ni, Pathian chu!” an ti a. 40 Tin, Elija chuan an hnênah, “Baala zâwlneite hi man ula, pakhat mah chhuah suh u,” a ti a. Tin, an man a, Elija chuan Kison luiah a hruai thla a, chutah chuan a that hlawm a.
Khawkhen a reh
41 Tichuan, Elija chuan Ahaba hnênah, “Han chho ta langin, eiin han in tawh rawh; ruahpui sûr tûr thâwm a awm a nia,” a ti a. 42 Chutichuan, Ahaba chu ei leh in tûrin a han chho ta a. Tin, Elija chu Karmel tlâng chhîp lamah a han chho va; tin, lei lamah a kûn a, a kapkârah a hmai a rawlh a. 43 Tin, a chhiahhlawh hnênah, “Han chho ta la, tuifinriat lam han thlîr teh khai,” a ti a. Tin, a han chho va, a han thlîr a; “Eng mah a awm lo,” a ti a. Tin, ani chuan, “Kal leh rawh, vawi sarih,” a ti a. 44 Tin, a vawi sarihnaah chuan heti hi a ni a, “Ngai teh, tuifinriat aṭangin mihring kut tiat lek chhûm a chho nel nel e,” a ti a. Tin, ani chuan, “Han kal ta la, Ahaba hnênah, ‘I tawlailîr buatsaih la, chhuk tawh rawh, ruahin a dang dah ang che,’ ti ang che,” a ti a. 45 Tin, rei lo têah chuan heti hi a ni a, vân chu thli leh chhûmin a lo duk ta kuih mai a, ruahpuivânâwn a lo sûr ta a. Tin, Ahaba chu tawlailîra chuangin Jezreel khuaah a kal ta a. 46 Tin, LALPA kut chu Elija chungah a awm a; tichuan, a puan a veng a, Ahaba hmaah chuan Jezreel khaw luhna thlengin a tlân ta a.
Sinai tlângah Elija a kal
1 Tin, Ahaba chuan Elija thiltih zawng zawng, khandaiha zâwlnei zawng zawng a thah thu te nên Jezebeli a hrilh a. 2 Tichuan, Jezebeli chuan Elija hnênah, “Kha mite zînga mi pakhat nunna ang khân, naktûk hetih hun hmaa i nunna ka siamsak ve loh che chuan pathianten an tih tihin mi ti mai sela, chu aia nasa pawhin,” tiin mi a tîr a. 3 Tichuan, a hlau va, a tho va, a tlânchhe ta a, Judai rama Beer-seba khua a va thleng a, chutah chuan a chhiahhlawh a hnutchhiah a. 4 Ani erawh chu thlalêrah ni khat banah a kal a, Juniper thing hnuaiah a ṭhu a. Tin, thih a dîl ta a, “A tâwk ta e, aw LALPA, tûnah hian ka nunna hi la mai teh, ka pute aiin ka ṭha chuang bîk si lo va,” a ti a. 5 Tichuan, Juniper thing hnuaiah chuan a mu a, a muhîl ta a; tin, ngai teh, vântirhkoh hian a rawn khawih a, a hnênah, “Tho la, ei rawh,” a ti a. 6 Tin, a han en vêl a, ngai teh, a lu bulah chuan chhangpêr, lung sâa hem hmin diam leh tuithâwl hi a lo awm a. Tichuan, a ei a, a in a, a mu leh ta a. 7 Tin, LALPA vântirhkoh chu a lo kal nawn leh a, a rawn khawih a, “Tho la, ei rawh, i kalna tûr i chelh lo vang e,” a ti a. 8 Tin, a tho va, a eiin a in a; tichuan, chu chaw avâng chuan Pathian tlâng Horeb thlengin ni sawmli leh zan sawmli a kal a. 9 Tin, chuta pûk pakhat chu a va thleng a, chutah chuan a awm ta a; tin, ngai teh, LALPA thu a hnênah a lo thleng a, a hnênah, “Hetah hian eng nge i tih, Elija?” a ti a. 10 Ani chuan, “LALPA, sipaihote Pathian tân hian ṭhahnem ka ngai êm êm ṭhîn a; Israela thlahte chuan i thuthlung an hawisan a, i maichâmte an tichim a, i zâwlneite khandaihin an sât hlum si a. A la awm chu keimah chauh hi ka ni a; ka nunna mi lâksak an tum a ni,” a ti a. 11 Tin, ani chuan, “Va chhuak la, tlângah sâwn LALPA hmaah va ding rawh,” a ti a. Tin, ngai teh, LALPA a lo kal a, thlipui na takin tlângte chu LALPA hmaah chuan a rawn chhêm khî a, lungpuite chu a phel rem rum a; nimahsela, thli-ah chuan LALPA chu a awm lo. Tin, thli tleh zawh chuan lîr a lo nghîng a; nimahsela, lîrnghîngah chuan LALPA chu a awm lo. 12 Tin, lîrnghîn zawh chuan mei a lo chhuak a; nimahsela, meiah chuan LALPA chu a awm lo. Tin, mei zawhah chuan aw dam diai hi a lo chhuak a. 13 Tin, heti hi a ni a, Elijan chu chu a hriat chuan a puanin a hmai a khuh a, a va chhuak a, pûk kawngkaah a va ding a. Tin, ngai leh, awin a hnênah, “Hetah hian eng nge i tih, Elija?” a rawn ti a. 14 Tin, ani chuan, “LALPA, sipaihote Pathian tân hian ṭhahnem ka ngai êm êm ṭhîn a, Israela thlahte lah chuan i thuthlung an hawisan a, i maichâmte an tichim a, i zâwlneite khandaihin an sât hlum si a. A la awm chu keimah chauh hi ka ni a, ka nunna mi lâksak an tum a ni,” a ti a. 15 Tin, LALPAN a hnênah, “Haw leh ta langin, thlalêr lamah Damaska khuaan kal rawh; i va thlen chuan Suria lal atân Hazaela hriak i thih ang a. 16 Tin, Israel lal atân Nimsia fapa Jehua hriak i thih ang a; tin, i aiawha zâwlnei ni tûrin Abel-mehola khuaa mi Saphata fapa Elisa hriak i thih bawk ang. 17 Tin, heti hi a ni ang a, Hazaela khandaih pumpelh apiang chu Jehuan a that ang a; tin, Jehua khandaih pumpelh apiang chu Elisan a that ang. 18 Nimahsela, Israel ramah hian Baala hmaa la ṭhingṭhi ngai lo leh, la fâwp ngai lo mi sângsarih ka tân ka hum dâwn a ni,” a ti a.
Elisa kohna
19 Chutichuan, chuta ta chu a chhuak a, Saphata fapa Elisa chu a va hmu a, ani chuan lei a lo let a, a hmaah chuan sebâwng tuak sâwm leh tuak hnih a awm a, a sâwm leh pahnihna chu amahin a lo khalh a; tin, Elija chuan a va pan a, a puan a va bahtîr a. 20 Tin, sebâwngte chu a kalsan a, Elija chu a ûm a, “Ka nu leh ka pa ka va fâwp rih zet ang e aw; tichuan, ka rawn zui ang che,” a ti a. Tin, ani chuan a hnênah, “Va haw leh ta che, eng nge ka tih che kha le?” a ti a. 21 Tin, a va zui chu a hâwng a, sebâwng tuak khat a khalha chu a talh a, a sa chu sebâwng thuamhnawte chuan a chhûm a, mite a sem a, an ei ta a. Tichuan, a tho va, Elija chu a ûm a, a rawng a bâwlsak ta a.
Suria nêna indona
1 Tin, Suria lal Ben-hadada chuan a sipaiho zawng zawng a khâwm vek a; lal sawmthum leh pahnih an tel a, sakawr leh tawlailîrte nên a han chho va, Samari khua a han hual a, a han bei a. 2 Israel lal Ahaba hnênah chuan khawpui chhungah mi a tîr a, a hnênah, “Ben-hadadan heti hian a ti, 3 ‘I tangkarua leh i rangkachakte kha ka ta a ni e; i nupuite leh i fate, a ṭha ṭhate chenin ka ta a ni,’ tiin,” a ti a. 4 Tin, Israel lal chuan a lo chhâng a, “Aw lalber, ka pu, i sawi ang chuan a ni alâwm; keimah leh ka neih zawng zawng chu i ta a ni e,” a ti a. 5 Tin, a mi tirhte chu an kal leh a, “Ben-hadadan heti hian a ti, ‘I hnênah, “I tangkarua te, i rangkachak te, i nupuite, i fate chu mi pe tûr a ni,” tiin mi ka rawn tîr tak a; 6 nimahsela, naktûk hetih hun vêlah hian ka mite i hnênah ka rawn tîr ang a, i in leh i mite in chu an rawn dap dâwn a ni. Tin, heti hi a ni ang a, i mit la apiangte chu an la ang a, an rawn kalpui vek ang,’ tiin,” an ti a. 7 Tichuan, Israel lal chuan a rama upaho zawng zawng chu a ko va, “Lo hre teh u khai, he mi hian thil ṭha lo tak tih a tum zia hi; ka hnênah mi a rawn tîr a, ka nupuite, ka fate, ka tangkarua te, ka rangkachak te a rawn ngên a, ka lo hnial pawh a ni si lo,” a ti a. 8 Tin, upaho zawng zawng leh mipuiho zawng zawng chuan a hnênah, “Lo bengkhawn duh suh, rem pawh ti hek suh,” an ti a. 9 Chutichuan, Ben-hadada mi tirhte hnênah chuan, “Lalber ka pu hnênah chuan, ‘I chhiahhlawh hnêna mi tîra i rawn ngen hmasak zawng zawng ang kha chuan ka ti ang a; amaherawhchu, hei hi zawng ka ti thei lo vang, a ti e,’ ti rawh u,” a ti a. Tin, a mi tirhte chu an kal leh ta a, chumi thu chu an va thlen leh a. 10 Tin, Ben-hadada chuan a hnênah mi a tîr leh a, “Ka hnung zuitute zawng zawng hian Samari khaw vaivut vei khat ṭheuh pawh an hmuh theih dâwn chuan, pathianten an tih tihin mi ti sela, chu aia nasa pawhin,” a ti a. 11 Tin, Israel lal chuan a chhâng a, “ ‘Mi a inrâlthuam lai rengin, a inrâlthuamna hlîp thla tawh ang rengin an uang ngai lo ve,’ tiin va hrilh rawh u khai,” a ti a. 12 Tin, heti hi a ni a, amah leh lalten bûktêa zu an lo in ho laiin chumi thu chu Ben-hadada chuan a lo hria a, a mite hnênah chuan, “Insiam rawh u khai,” a ti a. Tichuan, khaw bei tûr chuan an insiam ta a. 13 Tin, ngai teh, zâwlnei pakhat hian Israel lal Ahaba chu a va hnaih a, “LALPAN heti hian a ti: ‘Hêng mipui tam tak hi i hmu em? Ngai teh, vawiinah hian i kutah ka pe dâwn a ni; tichuan, kei hi LALPA chu ka ni tih i hria ang,’ tiin,” a ti a. 14 Tin, Ahaban, “Tu hmangin maw?” a ti a. Tin, ani chuan, “LALPAN heti hian a ti, ‘Ram ṭhentea hotute tlangvâlho hmang hian,’ tiin,” a ti a. Tichuan, ani chuan, “Tuin nge râl rêl ang?” a ti a. Tin, ani chuan a chhâng a, “Nangmahin,” a ti a. 15 Tichuan, ani chuan ram ṭhentea hotute tlangvâlho chu a han khâwm a, zahnih leh sawmthum leh pahnih an ni a; tin, chung mite zawhah chuan mi zawng zawng, Israela thlahte zawng zawng chu a khâwm a, sângsarih an ni a. 16 Tin, chhûnlai takah hian an va chhuak ta a. Ben-hadada leh lalho, amah ṭanpuitu lal sawmthum leh pahnihte erawh chu bûktêah an lo inin rui a. 17 Tin, ram ṭhentea hotute tlangvâlho chu an va chhuak hmasa a; tin, Ben-hadada chuan mi a tîr a, anni chuan, “Samari khua aṭanga lo chhuak an awm e,” tiin an hrilh a. 18 Tin, ani chuan, “Inrem tuma lo kal an nih leh a nungin lo man ula; indo tuma lo kal an nih leh a nung bawkin lo man rawh u,” a ti a. 19 Tichuan, chûngho, ram ṭhentea hotute tlangvâlho leh a rawn zuitu sipaihote chu khua ata an chhuak a. 20 Tin, an va bitum ṭheuh chu an va that a; tichuan, Suria-ho chu an tlânchhe ta a, Israel-ho chuan an ûm a; tin, Suria lal Ben-hadada chu sakawr chunga chuangin sakawr chung chuang mite nên an tlân chhuak ta a. 21 Tin, Israel lal chu a va chhuak a, sakawr leh tawlailîrte chu a va bei a, Suria-ho chu a that chiam a.
Suria-in a bei nawn
22 Tin, zâwlnei chuan Israel lal chu a va hnaih a, a hnênah, “Intichak sauh sauh langin, i tih dân tûr ngaihtuah rawh khai, kum a lo vei hian Suria lal chuan a rawn bei leh dâwn che a nia,” a ti a. 23 Tin, Suria lal hote chuan a hnênah, “An pathian hi tlâng pathian a ni a; chuvângin, keimahni aiin an chak a nih hi. Phaizâwlah bei tawh ila, anni ai chuan kan chak zâwk ngei ang e. 24 Tin, hetiang hian ti ang che: lalho hi an zavaiin thlâk vek la, an aiah ram awptute dah langin; 25 tin, sipaiho sakawr leh tawlailîr te, i chân tâk zât chiah kha sipaiho din ṭha leh ang che; tichuan, phaizâwlah kan bei ang a, anni ai chuan kan chak zâwk ngei ang e,” an ti a. Tin, an thu chu a pawm a, chutiang chuan a ti ta a. 26 Tin, a kum lehah chuan heti hi a ni a, Ben-hadada chuan Suria-ho chu a khâwm a, Israel-hote bei tûrin Aphek khuaah a han chho va. 27 Tin, Israela thlahte chu an pung khâwm a, ei tûr te an chhêk tê tê a, bei tûrin an thawk ta a; tin, Israela thlahte chuan kêlno tlêm tê tê rual hnih ang lek hian an va ep ve a; Suria-hote erawh chu a ram khahin an khat mup mai a. 28 Tin, Pathian mi chuan Israel lal chu a va hnaih a, a va bia a, a hnênah, “LALPAN heti hian a ti: ‘Suria-hovin, “LALPA chu tlâng Pathian a ni a, ruam Pathian zawng a ni lo va,” an ti a ni; chuvângin, hêng mipui tam takte hi i kutah ka pe dâwn e; tichuan, kei hi LALPA chu ka ni tih in hria ang,’ tiin,” a ti a. 29 Tin, ni sarih chhûng zet chu an inep reng a. Tin, heti hi a ni a, a ni sarih ni chuan an inbei ta a; tin, Israela thlahte chuan Suria mite chu ni khatah sipai nuai khat an that a. 30 Mi dangte erawh chu Aphek-ah, khawpui chhûngah an tlân lût a, a la awmate chu mi sînghnih leh sângsarih kulh chimin a delh hlawm a. Tin, Ben-hadada chu a tlânchhia a, khawpui chhûngah pindan chhûngrilan a lût a. 31 Tin, a hoten a hnênah, “Ngai teh, Israela chhûngkaw zînga lalte hi mi khawngaih thei tak lal an ni tih thu kan hria a. Saiip puan fêngin, kan luah hruia inhlîngin Israel lal hnênah min va kaltîr rawh khai; ani chuan a zuah duh mial mahna che,” an ti a. 32 Chutichuan, saiip puan an fêng a, an luah hruiin an hlîng a, Israel lal hnênah chuan an va kal a, “I chhiahhlawh Ben-hadadan, ‘Khawngaih takin mi zuah rawh se,’ a ti e,” an ti a. Ani chuan, “A la dam a ni maw? Ka unaupa a ni alâwm,” a ti a. 33 Chu mite chuan ngaihṭha takin, a rilru thu tak a sawi a ni ang tih ringin, “I unaupa Ben-hadada ni e,” an ti var a. Tichuan, ani chuan, “Va kal ula, rawn hruai rawh u,” a ti a. Tichuan, Ben-hadada chu a lo chhuak a, a hnênah a kal a; tin, ani chuan tawlailîrah a lo chuantîr a. 34 Tin, Ben-hadada chuan a hnênah, “Ka pain i pa laka khua a lo lâk tâkte kha ka pe kîr leh ang a; tin, ka pain Samari khuaa dâwrpui hmun a siam ang khân Damaska khuaah i dâwrpui hmun tûr i siam ve dâwn nia,” a ti a. Tin, Ahaba chuan, “Chutianga thu inthlung chuan ka kaltîr ang che,” a ti a. Chutichuan, a hnênah thu a thlung a, a kaltîr ta a.
Zâwlneiin Ahaba a thiam lo
35 Tin, zâwlnei fapate zînga mi pakhat hian LALPA thuin a ṭhianpa hnênah, “Mi han vaw teh khai,” a ti a. Tin, chu mi chuan a vaw duh lo va. 36 Tichuan, a hnênah, “LALPA thu i awih loh avângin, ngai teh, nang hian mi liamsan veleh, sakeibakneiin a lo seh ang che,” a ti a. Tin, a liamsan tâk veleh chuan sakeibakneiin a lo hmu a, a seh ta a. 37 Tichuan, mi dang a va hmu leh a, “Mi han vaw teh khai,” a ti a. Chu mi chuan a han vua a, a vaw sil ta a. 38 Chutichuan, zâwlnei chu a kal a, kalkawngah lal a lo châng a, a chal hrênnaa a mit khuhin a inbâwl danglam a. 39 Tin, lal a lo thlen chuan lal chu a lo au va, “I chhiahhlawh hi indona rûnpui hmunah ka va kal a; tin, ngai teh, mi pakhat hi a lo hawi a, ka hnênah mi pakhat a rawn hruai a, ‘He mi hi lo vêng rawh; a tlân bo hlauh zawngin a nun aiah i nun i chân ang a, a nih loh leh tangkarua talent khat i pe tûr a ni,’ a ti a. 40 Tin, i chhiahhlawh hi ka buai vêl chung avângin a lo bo ta daih mai a,” a ti a. Tin, Israel lal chuan a hnênah, “Chutiang tak chu a ni, i chunga thu tlu chu; nangmahin zuk titlu tawh diam chia,” a ti a. 41 Tin, ani chuan a mit ata chal hrênna chu a hlîm ta thuai a; tin, Israel lal chuan zâwlneite zînga mi a ni tih a hre ta a. 42 Tin, ani chuan a hnênah, “LALPAN heti hian a ti: ‘Ka ânchhe lawha chu i chhuah tâk avângin a nun aiah i nun, a mite aiah i mite i chân ang,’ tiin,” a ti a. 43 Tin, Israel lal chu ngui tak leh lungni lo takin a haw a, Samari khuaah a kal ta a.
Nabotha grêp huan
1 Tin, chûng thil hnuah chuan heti hi a ni a, Jezreel mi Nabothan grêp huan a nei a, chu chu Jezreel-ah Samari lal Ahaba in bul lawkah a awm a. 2 Tin, Ahaban Nabotha chu, “Ka in bul a nih avâng hian, thlai hmunah i grêp huan hi mi pe rawh khai, a aiah grêp huan ṭha zâwk ka pe ang che; a nih loh leh i duh zâwk phei chuan a tangkain a man tâwk chu ka pe ang che,” tiin a bia a. 3 Tin, Nabotha chuan Ahaba hnênah, “Ka pute ro han pêk che chu ka tân a âwmin a âwm lo ve,” a ti a. 4 Tin, Jezreel mi Nabothan chutiang thu a hnêna a sawi avâng chuan Ahaba chu ngui tak leh lungni lo takin a inah a lût ta a, “Ka pute ro ka pe thei lo vang che,” a ti tlat si a. Tichuan, a khumah a mu a, lehlam a hawi a, chaw rêng rêng a ei duh ta lo va. 5 Chutichuan, a nupui Jezebeli chu a va kal a, a hnênah, “Engtizia nge i rilru chuti taka a lungngaiha, chaw rêng rêng i ei loh le?” a ti a. 6 Tin, ani chuan a hnênah, “Jezreel mi Nabotha ka bia a, a hnênah, ‘I grêp huan hi mi leitîr rawh, a nih loh leh i duh zâwk chuan a aiah grêp huan dang ka pe ang che,’ ka ti a; tin, ani chuan, ‘Ka grêp huan zawng ka pe lo vang che,’ tiin mi chhâng alâwm maw le,” a ti a. 7 Tin, a nupui Jezebeli chuan a hnênah, “Israel ram lal hi i ni lâwm ni? Tho la, chaw ei la, rilru hlim takin awm rawh khai; Jezreel mi Nabotha grêp huan chu keiman ka pe ang che,” a ti a. 8 Chutichuan, Ahaba hmingin lehkha a ziak a, nemnain a nem a; tin, lehkha chu a awmna khuaa Nabotha ṭhenawm upate leh mi ṭhate hnênah a thawn a. 9 Tin, lehkhaah chuan, “Chaw nghei thu lo puang ulangin, mipui zîngah Nabotha chu hmatâwntîr ula; 10 mi pahnih Beliala fate a hmaah ṭhuttîr ula, ‘Pathian leh lal i sawichhia a ni,’ tia a hêktu atân lo siam rawh u. Tin, hruai chhuak ula, lo dêng hlum rawh u,” a ti a. 11 Tin, a awmna khuaa mi, a awmna khuaa awm upate leh mi ṭhate chuan Jezebelin an hnêna a thawn lehkhaa a ziak ang chuan an lo ti a. 12 Chaw nghei thu an puang a, mipui zîngah Nabotha chu an hmatâwntîr a. 13 Tin, mi pahnih Beliala fapate chu a hmaah chuan an va ṭhu a; tin, Beliala mite chuan mipuiho hmaah chuan, “Nabotha hian Pathian leh lal a sawichhia e,” tiin amah Nabotha chu an hêk a. Tichuan, khua ata an hruai chhuak a, lungin an dêng a, a thi ta a. 14 Tichuan, Jezebeli hnênah, “Nabotha chu lungin an dêng a, a thi ta e,” tiin mi an tîr a. 15 Tin, Jezebelin Nabotha chu lungin an dêng a, a thi ta tih a hriatin heti hi a ni a, Jezebeli chuan Ahaba hnênah, “Tho la, Jezreel mi Nabotha grêp huan, a leitîr phal loh che kha nei tawh rawh le; Nabotha chu a dam tawh lo, a thi tawh e,” a ti a. 16 Tin, Ahaban Nabotha a thi ta tih a hriatin heti hi a ni a, Jezreel mi Nabotha grêp huan nei tûra thawk thla tûrin Ahaba chu a tho ta a. 17 Tin, LALPA thu chu Tisbe mi Elija hnênah a lo thleng a, 18 “Tho la, Samari khuaa awm Israel lal Ahaba be tûrin zuk kal rawh khai. Ngai teh, Nabotha grêp huanah a awm a, neih tumin chutah chuan a chhuk a ni e. 19 A hnênah, ‘LALPAN heti hian a ti, “I that a, i neihsak lehnghâl elo?” tiin,’ ti langin; a hnênah, ‘LALPAN heti hian a ti, “Uiin Nabotha thisen an liahna hmun ngeiah hian nanga thisen pawh hi an liak ve dâwn a ni,” tiin,’ ti ang che,” tiin. 20 Tin, Ahaba chuan Elija hnênah, “Mi rawn hmu ta maw, ka hmêlmapa?” a ti a. Tin, ani chuan a chhâng a, “Ka hmu ta che a nih hi, LALPA mit hmuha thil ṭha lo ti tûrin inhralh ta hek che. 21 Ngai teh, i chungah hian thil ṭha lo ka rawn thlentîr ang a, ka rawn tibo hlauh ang chia, Ahaba aṭang hian mipa fa tawh phawt chu Israel rama mi khuahkhirh leh khirh loh pawh ka tiboral ang. 22 Nangin mi tihthinrim avâng leh Israel-ho thil i tihsualtîr avângin, Nebata fapa Jeroboama chhûngte leh Ahija fapa Baasa chhûngte ang maiin i chhûngte hi ka siam ang,” a ti a. 23 Tin, Jezebeli chungchâng thu pawh LALPAN a sawi a, “Jezreel khaw kulh bulah uiin Jezebeli hi an la ei ang. 24 Ahaba chhûngkaw zînga mi khawpuia thi apiangte chu uiin an ei ang a; rama thi apiangte chu chunglêng savaten an ei ang,” tiin. 25 A nupui Jezebeli fuihpawrha LALPA mit hmuha thil ṭha lo ti tûra inpe, Ahaba ang rêng rêng hi tu mah an awm lo. 26 LALPAN Israela thlahte hmaa a hnawh chhuah Amor-hote thiltih tinrêng ang milemte biain thil tenawm takin a ti ṭhîn a. 27 Tin, Ahaban chûng thu a hriat chuan heti hi a ni a, a puan a pawt thlêr a, saiip puan a sin a, chaw a nghei a, saiip puanah a mu a, dîm takin a che ta a. 28 Tin, LALPA thu chu Tisbe mi Elija hnênah a lo thleng a, 29 “Ahaba ka hmaa a inngaihtlâwmzia hi i hmu em? Ka hmaa a inngaihtlâwm avâng hian ama chhanah hi chuan thil ṭha lo ka thlentîr lo vang a, a fapa chhanah erawh chuan a chhûngte chungah thil ṭha lo ka thlentîr ang,” tiin.
Zâwlnei Mikaian Ahaba a zilh
1 Tin, kum thum chhûng chu Suria-ho leh Israel-hote chu indo lovin an awm a. 2 Tin, a kum thum kum chuan heti hi a ni a, Juda lal Jehosaphata chu Israel lal hnênah a zuk kal a. 3 Tin, Israel lal chuan a puipate hnênah, “Ramoth-gilead khua hi keimahni ta a ni tih hre reng sia engtia Suria lal hi chhuhsak lova awm mai mai nge kan nih le?” a ti a. 4 Tin, Jehosaphata hnênah chuan, “Ramoth-gilead khua mi han beihpui ve duh ang emaw chu?” a ti a. Tin, Jehosaphatan Israel lal hnênah chuan, “Kei leh nang, ka mite leh i mite chu pumkhat kan ni a, ka sakawrte leh i sakawrte chu pumkhat an ni alâwm,” a ti a. 5 Tin, Jehosaphata chuan Israel lal hnênah, “LALPA thu ngaichâng rih zet la maw le,” a ti a. 6 Chutichuan, Israel lal chuan zâwlneiho mi zali lai a ko khâwm a, an hnênah, “Ramoth-gilead khua bei tûrin ka han thawk ang nge thawk lo vang?” a ti a. Tin, anni chuan, “Han thawk rawh, LALPAN lal kutah a pe dâwn a ni,” an ti a. 7 Nimahsela, Jehosaphatan, “Hetah hian LALPA zâwlnei dang tu emaw tal han râwn tûr an awm lo vem ni le?” a ti a. 8 Tin, Israel lal chuan Jehosaphata hnênah, “LALPA min râwnsak tûr mi pakhat, Imla fapa Mikaia zawng a la awm kha maw! Nimahsela, ani hi chu ka huat zâwng tak a ni, ka chungchâng thu hi a chhe lam ngawt lo chu a ṭha rêng rêng a sawi ngai si lo va,” a ti a. 9 Tichuan, Israel lal chuan hotu pakhat a han ko va, “Imla fapa Mikaia han hruai thuai teh,” a ti a. 10 Tin, Israel lal leh Juda lal Jehosaphata chu Samari kulh kawngka luhna bula hruih zâwlah an lal puana inthuamin, an lalṭhutthlêng ve veah an ṭhu a; tin, zâwlnei zawng zawng chuan an hmaah thu an sawi a. 11 Tin, Kenaana fapa Zedekia chuan thîr kîte a siamsak a, “LALPAN heti hian a ti, ‘Hêngte hian Suria-hote chu boral dêr khawpin i si ang,’ tiin,” a ti a. 12 Chutiang bawkin zâwlnei zawng zawng chuan, “Ramoth-gilead-ah chuan han chho la, han hlawhtling rawh khai, LALPAN lal kutah hian a pe dâwn a ni,” tiin an sawi a. 13 Tin, Mikaia va ko tûra an tirha chuan a hnênah, “Ngai teh khai, zâwlnei hian thukhat vuain a ṭha lamin lal hnênah thu an sawi ṭheuh va; an sawi tâk ṭheuh ang chuan han sawi ve la, a ṭha lamin han sawi ve rawh aw,” tiin a sawi a. 14 Tin, Mikaia chuan, “LALPA nunna chhâlin ka sawi e, LALPAN ka hnêna a sawi chu a ni, ka han sawi dâwn ni,” a ti a. 15 Tin, lal hnên a han thlen chuan, lal chuan a hnênah, “Mikai, Ramoth-gilead khua bei tûrin kan han thawk ang nge thawk lo vang?” a ti a. Tin, ani chuan a chhâng a, “Han thawk u la, han hlawhtling rawh u khai; LALPAN lal kutah a pe dâwn a ni,” a ti a. 16 Tin, lalin a hnênah, “Thutak ngawt lo chu ka hnênah LALPA hminga sawi lo tûrin vawi eng zât nge maw chhia ka chhamtîr dâwn che le?” a ti a. 17 Tin, ani chuan, “Israel-ho zawng zawng chu vêngtu nei lo berâm angin tlângahte an darh vek ka hmu a; LALPAN, ‘Hêngho hian hotu an nei ta lo va, mi tin mahni in lamah thlamuang takin haw dial mai rawh se,’ a ti a ni,” a ti a. 18 Tin, Israel lal chuan Jehosaphata hnênah, “Ka chungchâng thu hi a chhe lam ngawt lo chu a ṭha lam rêng rêng zawng a sawi lo vang tih ka hrilh che a ni lâwm ni kha?” a ti a. 19 Tin, Mikaia chuan, “Chuvângin, LALPA thu hi ngaithla teh, LALPA chu a lalṭhutthlênga ṭhu ka hmu a, vâna mipuiho zawng zawng, a ding lam leh vei lama dingte nên. 20 Tin, LALPAN, ‘Ahaba hi Ramoth-gilead khuaa han kala, râla thi tûrin tuin nge thlêm ang?’ a ti a. Pakhatin hetiang hian a ti a, mi dangin chutiang chuan a ti a. 21 Tichuan, thlarau pakhat hi a lo chhuak a, LALPA hmaah a ding a, ‘Keiman ka thlêm ang e,’ a ti a. 22 Tin, LALPAN a hnênah, ‘Engin maw?’ a ti a. Tin, ani chuan, ‘Ka va kal ang a, zâwlnei zawng zawng hmuiah chuan thlarau dawtheiah ka va chang ang,’ a ti a. Tin, anin, ‘I thlêm ngei ang a, hlawh pawh i hlawhtling bawk ang; va kal ta la, chutiang chuan va ti tawh le,’ a ti a. 23 Chutichuan, ngai teh, LALPAN hêng i zâwlneiho zawng zawng hmuiah hian thlarau dawthei a dah a, i chungchâng thu hi a ṭha lo lamin LALPAN a sawi tawh a ni,” a ti a. 24 Tichuan, Kenaana fapa Zedekia chuan a rawn hnaih a, Mikaia biangah a rawn bêng a, “LALPA thlarau chuan i hnêna thu sawi tûrin khawi lamah nge mi kalsan?” a ti a. 25 Tin, Mikaia chuan, “Ngai rawh, pindan chhûngrila biru tûra i luh niah i la hria ang,” a ti a. 26 Tin, Israel lal chuan, “Mikaia hi hruai ula, khawpui awptu Amona leh lal fapa Joasa hnênah kalpui leh tawh u; 27 tin, ‘Lalin heti hian a ti: “He mi hi lung inah khung ula, thlamuang taka ka lo haw leh hma loh chuan chaw leh tui tlêm tê chauh pe rawh u,” tiin,’ ti rawh u,” a ti a. 28 Tin, Mikaia chuan, “Thlamuang taka i lo haw leh hrim chuan LALPAN kei mi hmangin thu a sawi lo a ni ang le,” a ti a. Tin, amah vêk chuan, “Nangni mipuite u, in vaiin lo hre rawh u,” a ti a.
Ahaba a thi
29 Chutichuan, Israel lal leh Juda lal Jehosaphata chu Ramoth-gilead khuaah chuan an han chho va. 30 Tin, Israel lal chuan Jehosaphata hnênah, “Ka inbâwl danglam ang a, inbeihnaah chuan ka han kal ve ang e; nang erawh chuan i lal puan sin ang che,” a ti a. Tichuan, Israel lal chu a inbâwl danglam a, inbeihnaah chuan a han kal a. 31 Tin, Suria lal chuan a tawlailîr chunga hotu sawmthum leh pahnihte hnênah chuan, “Israel lal ngawt lo chu mi tê pawh, mi lian pawh a tua mah bei suh ang che u,” tiin thu a pe a. 32 Tin, tawlailîr chunga hotute chuan Jehosaphata an han hmuh chuan, heti hi a ni a, “Israel lal a ni ngei mai le!” an ti a. Tichuan, beih tumin an hual ta a; tin, Jehosaphata chu a au chhuak a. 33 Tin, tawlailîr chunga hotute chuan Israel lal a ni lo tih an hriat chuan heti hi a ni a, an ûm chu an lêt leh ta a. 34 Tin, mi pakhat hian tum bîk nei lovin a thalngul a kuai a, Israel lal chu âwmphaw leh âwmphaw inkârah a kâp a; tichuan, a tawlailîr khalhtu hnênah, “Kai her la, sipaiho zîng ata hi mi chhuahpui rawh khai, hliam na tak ka tawh tâk hi,” a ti a. 35 Tin, chumi ni chuan inbeihna chu a nasa ta hle mai a; lal chu a tawlailîrah chuan Suria-hote hmuhah an dintîr a; tin, tlai lamah chuan a thi ta a. Tin, amah an hliamna aṭang chuan thisen chu tawlailîr chhûngah chuan a luang zawih zawih a. 36 Tin, ni tlâk dâwn vêl lai chuan, sipaihote zîngah, “Mi tin mahni khaw lamah, mi tin mahni ram lamah haw vek tawh rawh se,” tiin an au vêl ta chiam a. 37 Chutichuan, lal chu a thi ta a, Samari khuaah an luhpui a; tichuan, Samari khuaah lal chu an phûm ta a. 38 Tin, Samari khaw dîl kamah tawlailîr chu an sil a; tin, LALPA thu sawi ang ngei khân uiin a thi te chu an liak ta a (chutah chuan nawhchizuarhote chu an insil ṭhîn). 39 Tichuan, Ahaba chanchin dang te, a thiltih zawng zawng te, a saingho in sak te, a khaw siam zawng zawngte chu Israel lalte lal lai thu ziakna buah a chuang a ni lâwm ni? 40 Chutichuan, Ahaba chu a pute hnênah chuan a muhîl ta a. Tichuan, a fapa Ahazia chu a aiawhin a lal ta a.
Juda lal Jehosaphata
41 Tin, Israel lal Ahaba lal kum linaah Asa fapa Jehosaphata chu Juda-te chungah a lal ṭan a. 42 Jehosaphata chu a lal ṭan lai chuan kum sawmthum leh kum nga a ni a; Jerusalem khuaah kum sawmhnih leh kum nga ro a rêl a. A nu hming chu Azubi, Silhia fanu a ni. 43 Tin, a pa Asa kawng zawh zawng zawng chu a zawh ve a. Pênsan hauh lovin LALPA mit hmuha thil ṭha a ti ṭhîn a. Hmun sângte erawh chu a thehthang bo lo va, hmun sângahte chuan mite chu an la inthawiin, rimtui an la hâl reng ṭhîn. 44 Tin, Jehosaphata chuan Israel lal nêna inremna a siam a. 45 Tichuan, Jehosaphata chanchin dang te, a thiltihtheihzia a tihlan thu te, a râl beih thu te chu Juda lalte lal lai thu ziakna buah a chuang a ni lâwm ni? 46 Tin, a pa Asa dam laia mipa inzuarho la awmate kha a ram ata a hnawt chhuak vek a. 47 Tin, Edom ramah chuan lal an awm lo va, lal aiawhtuin ro a rêl a. 48 Jehosaphata chuan Ophir-a rangkachak phur tûr Tarsis lawngte a tu a; nimahsela, a kal ta lo, Ezion-geber hmunah lawngte chu a chhe ta vek si a. 49 Tichuan, Ahaba fapa Ahazia chuan Jehosaphata hnênah, “Ka mite hi i mite nên lawngahte kal za ang hmiang,” a ti a. Nimahsela, Jehosaphata chuan a remti lo. 50 Tin, Jehosaphata chu a pute hnênah a muhîl a, a pute zîngah a pu Davida khawpuiah an phûm ta a. Tichuan, a fapa Jehorama chu a aiawhin a lal ta a.
Israel lal Ahazia
51 Tin, Juda lal Jehosaphata lal kum sâwm leh kum sarih kumin, Ahaba fapa Ahazia chu Samari khuaah Israel-te chungah a lal ṭan a, Israel-te chungah kum hnih a lal a. 52 Tin, LALPA mit hmuhah thil ṭha lo a ti ṭhîn a, a nu leh a pa kawng zawh te, Nebata fapa Israel-hote tihsualtîrtu Jeroboama kawng zawhte a zawh ve ṭhîn a. 53 Tin, a pa tih ang apiang tiin Baala rawng a bâwl a, a be ṭhîn a, LALPA, Israel-te Pathian chu a tithinrim ṭhîn a ni.
Elija leh Lal Ahazia
1 Tin, Ahaba thih hnuin Moab-ho chu Israel-te chungah an hel a. 2 Tin, Ahazia chu Samari khuaa a pindan chungnung kawkalh tukverhah a tla thla a, a intina ta a; tichuan, mi a tîr a, an hnênah, “Kal ta ula, he ka nâ hi ka ṭha chhuak leh thei ang emaw Ekron khaw pathian Baal-zebuba va râwn teh u,” a ti a. 3 Nimahsela, LALPA vântirhkohvin Tisbe mi Elija hnênah, “Tho la, Samari khaw lal mi tirhte lo be tûrin han kal la; tin, an hnênah, ‘Israel ramah hian Pathian a awm tâk loh vângin em ni Ekron khaw pathian Baal-zebuba chu râwn tûra in kal ni? 4 LALPAN heti hian a ti a ni: “Khuma i kai kha i lo chhuk leh tawh lo vang a, i thi ngei ngei ang,” tiin,’ ti rawh,” a ti a. Tichuan, Elija chu a kal ta a. 5 Tin, a mi tirhte chu a hnênah an lo lêt a, ani chuan an hnênah, “Engtizia nge in lo kîr leh mai?” a ti a. 6 Tin, anni chuan a hnênah, “Mi pakhat min be tûrin a lo kal a, kan hnênah, ‘Kal ta ula, rawn tîrtu che u lal hnênah chuan kîr leh ta ula, a hnênah, “LALPAN heti hian a ti: Israel ramah hian Pathian a awm tâk loh vângin em ni Ekron khaw pathian Baal-zebuba chu râwn tûra i tirh ni? Chutichuan, khuma i kai kha i lo chhuk leh tawh lo vang a, i thi ngei ngei ang, tiin,” ti rawh,’ a ti a ni,” an ti a. 7 Tin, ani chuan an hnênah, “Rawn be tûr che ua lo kal, chûng thu rawn hrilhtu che u chu mi eng ang nge ni?” a ti a. 8 Tin, anni chuan an chhâng a, “Sahmul puana inthuam mi a ni a, a kâwng savun kâwnghrênin a hrêng,” an ti a. Tin, ani chuan, “Tisbe mi Elija a nih chu,” a ti a. 9 Tichuan, lal chuan sipai sawmnga hotu, a hote sawmnga nên a hnênah a tîr ta a. Tin, a hnênah a han chho va; tin, ngai teh, ani chu tlâng chhîpah hian a lo ṭhu a. Tin, ani chuan, “Nang, Pathian mi, lalin, ‘Lo chhuk rawh,’ a ti e,” a ti a. 10 Tin, Elija chuan a chhâng a, sipai sawmnga hotu hnênah chuan, “Pathian mi ka nih zet chuan vân ata mei lo tla thla sela, nangmah leh i hote sawmnga kha rawn kâng ral vek che u rawh se,” a ti a. Tichuan, vân ata mei a lo tla a, amah leh a hote sawmnga chu an kâng ral ta vek a. 11 Tin, a hnênah sipai sawmnga hotu dang, a hote sawmnga nên a tîr leh a. Ani chu a han chho va, a hnênah, “Nang Pathian mi, lalin, ‘Lo chhuk thuai rawh,’ a ti e,” a ti a. 12 Tin, Elija chuan a chhâng a, an hnênah, “Pathian mi ka nih zet chuan vân ata mei lo tla thla sela, nangmah leh i hote sawmnga kha rawn kâng ral vek che u rawh se,” a ti a. Tichuan, Pathian mei chu vân ata a lo tla a, amah leh a hote sawmnga chu an kâng ral ta vek a. 13 Tin, sipai sawmnga dang hotu, a hote sawmnga nên a tîr leh pek a. Tin, chu mi sipai sawmnga dang hotu chu a han chho va, Elija hmaah chuan a han ṭhingṭhi a, a hnênah, “Aw Pathian mi, ka nunna leh hêng i chhiahhlawh mi sawmngate nunna hi i mit hmuhah hian lo hlu teh se. 14 Ngai teh, vân ata mei a lo tla a, sipai sawmnga hotute pahnih kha an hote sawmnga nên khân an lo kâng ral ta a; keia nunna erawh hi chu i mit hmuhah hian lo hlu teh se,” tiin a han ngen a. 15 Tichuan, LALPA vântirhkoh chuan Elija hnênah, “A rual hian chhuk rawh, amah chu hlau suh,” a ti a. Tin, a tho va, lal hnênah an chhuk dûn ta a. 16 Tin, ani chuan a hnênah, “LALPAN heti hian a ti: ‘Ekron khaw pathian Baal-zebuba râwn tûra mite i tirh vei hi, Israel ramah hian Pathian râwn tûr a awm tâk loh vâng em ni le? Chuvângin, khuma i kai kha i lo chhuk leh tawh lo vang a, i thi ngei ngei ang,’ tiin,” a ti a. 17 Chutichuan, Elijan a sawi LALPA thu ang chuan Ahazia chu a thi ta a. Tin, fapa a neih loh avângin Juda lal Jehosaphata fapa Jehorama kum hnih a lal kum chuan Jehorama chu a aiawhin a lal ṭan ta a. 18 Ahazia thiltih chanchin dangte chu Israel lalte lal lai thu ziakna buah a chuang a ni lâwm ni?
Elija vânah hruai a ni
1 Tin, LALPAN Elija chu vânah ṭhâwngaleivira a hruai chhoh dâwn vêl chuan heti hi a ni a, Elija chu Elisa nên Gilgal aṭangin an chhuak ta a. 2 Tin, Elijan Elisa hnênah, “Hetah hian lo awm rawh khai; LALPAN Bethel thlenga kal tûrin mi tîr a ni,” a ti a. Tin, Elisa chuan, “LALPA nunna leh i nunna chhâlin ka sawi e, ka awmsan tawp lo vang che,” a ti a. Tichuan, Bethel-ah an chhuk dûn ta a. 3 Tin, Bethel-a awm zâwlneiho fapate chu Elisa hnênah an kal a, a hnênah, “Vawiinah hian LALPAN i chunga hotu hi a lâk bosak dâwn che tih i hria em?” an ti a. Tin, ani chuan, “Aw, ka hria asin; ngawi mai rawh u!” a ti a. 4 Tin, Elija chuan a hnênah, “Elisa, hetah hian lo awm rawh khai; LALPAN Jeriko-a kal tûrin mi tîr a ni,” a ti a. Tin, ani chuan, “LALPA nunna leh i nunna chhâlin ka sawi e, ka awmsan tawp lo vang che,” a ti a. Tichuan, Jeriko-ah chuan an kal dûn ta a. 5 Tin, Jeriko-a awm zâwlneiho fapate chuan Elisa chu an va hnaih a, a hnênah, “Vawiinah hian LALPAN i chunga hotu hi a lâk bosak dâwn che tih i hria em?” an ti a. Tin, ani chuan a chhâng a, “Aw, ka hria asin; ngawi mai rawh u!” a ti a. 6 Tin, Elija chuan a hnênah, “Hetah hian lo awm rawh khai; LALPAN Jordan-a kal tûrin mi tîr a ni,” a ti a. Tin, ani chuan, “LALPA nunna leh i nunna chhâlin ka sawi e, ka awmsan tawp lo vang che,” a ti a. Tichuan, an pahnih chuan an kal dûn ta a. 7 Tin, zâwlneiho fapate zînga mi sawmnga chu an va kal a, anmahni epin hla fêah an va ding a; tin, anni pahnih chu Jordan lui kamah an lo ding a. 8 Tin, Elija chuan a puan chu a la a, a tumtêl a, tui chu a han vua a, lehlam lehlamah a lo inṭhen ta a; tichuan, an pahnih chuan lei chârah an kal kai ta a. 9 Tin, an kai hnu chuan heti hi a ni a, Elija chuan Elisa hnênah, “I hnên ata lâk bova ka awm hma hian eng nge ka tihsak ang che, mi dîl rawh,” a ti a. Tin, Elisa chuan, “I thlarau chan hnih chang ila,” a ti a. 10 Tin, ani chuan, “Thil khirh tak i dîl a nih hi; khirh mah sela, i hnên ata lâk bova ka awm lai mi hmuh chuan i chang ang a, mi hmuh loh erawh chuan i chang lo vang,” a ti a. 11 Tin, an kal dûn zêl a, an tîtî lai chuan heti hi a ni a, ngai teh, meitawlailîr leh meisakawrte a lo lang ta phut a, an kâra tlain a inṭhentîr ta a; tin, Elija chu ṭhâwngaleiviran vânah a chho ta a. 12 Tin, chu chu Elisa chuan a hmu a, “Ka pa, ka pa, Israel-te tawlailîr leh sakawr chung chuang mite hentu!” tiin a au va. Tin, Elija chu a hmu ta lo va; tichuan, ama puan chu a chelh a, hmun hnihah a pawt thlêr a. 13 Elija puan lo tla pawh chu a khai a, a lêt leh a, Jordan lui kamah chuan a ding a. 14 Tin, Elija puan lo tla chu a la a, tui chu a han vua a, “LALPA, Elija Pathian chu khawiah nge?” a ti a. Tin, tui a han vuak ve chuan lehlam lehlamah a lo inṭhen ta a, Elisa chu a kal kai ta a. 15 Tin, Jeriko khuaa zâwlneiho fapa, amah epa awmten an han hmuh chuan, “Elija thlarau chu Elisa chungah a fu ta ngei mai le,” an ti a. Amah be tûrin an va kal a, a hmaah chuan lei siin chibai an bûk a. 16 Tin, anni chuan a hnênah, “Ngai teh hei, i chhiahhlawhte hian mi ngalchak tak tak sawmnga kan awmpui a; i pu zawng tûrin tîr rawh khai; LALPA thlarauvin a hruai chho ta ang a, khawii lai tlângah emaw, khawii lai ruamah emaw a thlâk ta mai te hi a ni ang e,” an ti a. Tin, ani chuan, “Kaltîr lo vang,” a ti a. 17 Tin, a tân zahthlâk khawpa an ngen hnu chuan, “Kaltîr ta che u,” a ti ta a. Chutichuan, mi sawmnga an tîr a, ni thum an zawng a; nimahsela, an hmu zo ta lo va. 18 Tin, Jeriko khuaa a la châm lai chuan a hnênah an lo kîr leh a; ani chuan an hnênah, “In hnênah khân, ‘Kal suh u,’ ka ti che u a ni lâwm ni?” a ti a.
Elisa thil mak tihte
19 Tin, chumi khuaa mite chuan Elisa hnênah, “En teh, hei, he khaw hmun hi a nuam hle mai a, kan pu pawhin i hmu ve reng a; nimahsela, tui hi a ṭha lo va, a ram pawh hi nau chhiatna ram a ni,” an ti a. 20 Tin, ani chuan, “Tuithâwl thar mi han lâk ula, chi han thun teh u,” a ti a. Tichuan, an rawn lâksak a. 21 Tin, tuikhurah a va kal a, chu chu a han theh lût a, “LALPAN heti hian a ti, ‘He tui hi ka titui tawh e, tûn achinah chuan thihna leh nau chhiatna a awm tawh lo vang,’ tiin,” a ti a. 22 Chutichuan, Elisa sawi angin tûn thlengin tui chu a tui ta a. 23 Tin, chuta ṭang chuan Bethel-ah a han chho va; tin, chumi kawnga a kal lai chuan khua ata mipa naupangho an lo chhuak a, an rawn nuihzat a, a hnênah, “Nang lukawlhpa, han chho tawh! Nang lukawlhpa, han chho tawh,” an ti a. 24 Tin, a han lehhawi a, anmahni chu a han hmu a. LALPA hmingin ânchhia a lawh ta a. Tin, ramhnuai ata savawmnu pahnih an lo chhuak a, an zînga naupang sawmli leh pahnih an rawn seh ta a. 25 Tin, chuta ṭang chuan Karmel tlângah a kal a, chuta ṭang chuan Samari khuaah a haw leh ta a.
Israel leh Moab an indo
1 Tin, Juda lal Jehosaphata kum sâwm leh kum riat a lal kumin, Ahaba fapa Jehorama chu Israel-ho chungah Samari khuaah a lal ṭan a; tin, kum sâwm leh kum hnih a lal a. 2 Tin, LALPA mit hmuhah thil ṭha lo tak a ti ṭhîn a; amaherawhchu, a nu leh a pa ang êm zawngin thil a ti lo; ani zawngin a pain Baala lung a lo phun kha a paih a ni. 3 Nimahsela, Israel-hote thil tihsualtîra a tih Nebata fapa Jeroboama sualnaahte chuan a bet tlat a; a kalsan leh tawh lo. 4 Moab lal Mesa chu berâm vulh mi a ni a; ani chuan Israel lal lakah berâmno nuai khat hmul leh berâmpa nuai khat hmul chhiahah a chawi ṭhîn a. 5 Amaherawhchu, Ahaba thih hnu chuan heti hi a ni a, Moab lal chu Israel lal chungah a hel ta a. 6 Tin, chutih lai chuan Lal Jehorama chu Samari khua ata a chhuak a, Israel-ho zawng zawng chu a khâwm vek a. 7 Tichuan, a chhuak a, Juda lal Jehosaphata hnênah, “Moab lal ka chungah a hel a, Moab-ho mi han beihpui duh ang emaw chu?” tiin mi a tîr a. Tin, ani chuan, “Han beihpui e a; kei leh nang, ka mite leh i mite chu pumkhat kan ni a, ka sakawrte leh i sakawrte chu pumkhat an ni alâwm,” a ti a. 8 Tin, amah vêk chuan, “Khawi lam kawngah nge kan han kal ang?” a ti a. Tin, ani chuan a chhâng a, “Edom thlalêr lam kawngah le,” a ti a. 9 Chutichuan, Israel lal chu Juda lal nên, Edom lal nên an kal ta a, ni sarih an kal kual a; tin, sipaihote leh an sa hruaite in tûr tui a awm lo va. 10 Tin, Israel lal chuan, “E khai aw! LALPAN lal pathumte hi Moab-ho kuta pêk tûrin min hruai khâwm a ni ngei mai le,” a ti a. 11 Nimahsela, Jehosaphata chuan, “Hetah hian LALPA min râwnsak tûr LALPA zâwlnei tu emaw tal an awm lâwm ni?” a ti a. Tin, Israel lal chhiahhlawh pakhat chuan a chhâng a, “Elija kut tuia leih thîntu Saphata fapa Elisa hetah hian a awm asin,” a ti a. 12 Tin, Jehosaphata chuan, “A hnênah chuan LALPA thu a awm mai chu,” a ti a. Chutichuan, Israel lal leh Jehosaphata leh Edom lal chu a hnênah an zuk kal ta a. 13 Tin, Elisa chuan Israel lal hnênah chuan, “Nang leh keiin inhmanna eng nge kan neih le? I pa zâwlneite hnênah leh i nu zâwlneite hnênah kal daih tawh,” a ti a. Tin, Israel lal chuan a hnênah, “Kal lo ve; lal pathumte hi Moab-ho kuta pêk tûrin LALPAN min hruai khâwm a nih hi,” a ti a. 14 Tin, Elisan, “A bula ka awm ṭhinna sipaihote LALPA nunna chhâlin ka sawi e, Juda lal Jehosaphata hi zah lo ni ila chuan i lam pawh ka hawi duhin, hmuh pawh ka hmu duh hlek lo tûr che a nia le. 15 Eng pawh ni sela, ṭingṭang tum thiam mi han koh ta che u,” a ti a. Tin, ṭingṭang tum thiamin a han tum chuan, heti hi a ni a, LALPA kut chu a chungah a lo awm ta a. 16 Tin, ani chuan, “LALPAN heti hian a ti: ‘Hemi ruam zawng zawng hi lai khuar thliah rawh u,’ tiin. 17 LALPA vêkin heti hian a ti a ni: ‘Thli rêng rêng in hre lo vang a, ruah rêng rêng pawh in hmu hek lo vang; nimahsela, hemi ruam hi tuiin a khat vek ang; tichuan, nangni leh in ran rualte leh in sate hian in tlân ang,’ tiin. 18 Chu chu LALPA ngaih chuan thil tê tham mai a ni a; Moab-ho hi in kutah a pe bawk dâwn a ni. 19 Tin, kulhpui nei khua zawng zawng leh khawpui ṭha zawng zawng chu in tichhia ang a, thing ṭha zawng zawng chu in kit ang a, tuikhur zawng zawng chu in hnawh ping ang a, hmun ṭha lai zawng zawng chu lungin in vawm chhe vek ang,” a ti a. 20 Tin, zîngah, thil hlan hun vêl lai chuan heti hi a ni a, ngai teh, Edom ram lam aṭangin tui a lo luang chiam a, a ram chu tuiin a lo khat ta a. 21 Tin, Moab-ho zawng zawng chuan anmahni bei tûrin lalho an lo thawk chho tih an lo hriat chuan, râlkai chin zawng zawng an inko khâwm chiam a, ramriah an lo ṭang a. 22 Tichuan, zîng takah an tho va, niin tui chu a zuk chhun a; tin, Moab-ho chuan an zâwna tui chu thisen ang maia sen kûkin an han hmu a. 23 “Thisen a nih saw, lalho hi anmahni leh anmahni an indo va, anmahni leh anmahni an inthat a ni ngei mai le; hawh u, Moab-hote u, râllâk sum i va chuh ang u,” an ti a. 24 Tin, Israel-ho riahhmun an va thlen chuan, Israel-ho chu an tho phut mai a, Moab-ho chu an bei a; tichuan, an hmaah an tlânchhe ta chiam a; tin, Moab-ho that chung zêlin an ramah an ûm lût a. 25 Tin, khuate chu an tichhia a; an hmun ṭha lai zawng zawng chu mi tinin an vawm a, lungin a khat ta vek a; tin, tuikhur zawng zawng an hnawh ping a, thing ṭha zawng zawng an kit a; Kir-hareseth khuaa mi chauh a ni, lung chu an khawih loh ni; chu pawh chu virvawma vawm miin an hual a, an bei a. 26 Tin, Moab lal chuan an indo chu chelh dâwnin a inhre ta lo va, Edom lal hnên thleng tûra tâwn tlang tumin khandaih keng mi zasarih a hruai chhuak a; nimahsela, an thei ta lo va. 27 Tichuan, a fapa upa ber, a aia la lal tûra chu kulh tlângah chuan hâlral thilhlanah a hmang ta a. Tin, Israel-hote chu an thinrim ta êm êm mai a, an kîrsan a, an ram lamah an haw leh ta a.
Elisan hmeithai rethei a ṭanpui
1 Zâwlneite fapaho nupuite zînga hmeichhe pakhat hian Elisa hnênah, “I chhiahhlawh, ka pasal chu a lo thi ta a; tin, i chhiahhlawh khân LALPA chu a ṭih ṭhîn tih i hria a. Hei a leibatna chu ka fate pahnih bawih atâna hruai tûrin a lo kal a ni,” tiin a mangan thu a sawi a. 2 Tin, Elisa chuan a hnênah, “Eng nge ka tihsak ang che? Mi hrilh teh, inah eng nge i neih?” a ti a. Tin, ani chuan, “I bawihnu hian sahriak ûm khat chauh lo chu inah eng mah ka nei lo,” a ti a. 3 Tichuan, ani chuan, “Va kal ta la, i ṭhenawmteho zawng zawng bêl, bêl ruak va hawh khâwm tawh khai; tlêm tê mai zawng hawh suh. 4 Tin, lût la, nang leh i fate nên kawng inkhâr khum ula; chûng bêl zawng zawngah chuan thun langin, a khat chu dah hrang zêl ang che,” a ti a. 5 Chutichuan, a hnên ata chu a kal ta a, amah leh a fapate nên chuan kawng an inkhâr khum a; anni chuan bêlte chu an rawn la a, ani chuan a lo thun zêl a. 6 Tin, bêlte chu a khah hnu chuan, heti hi a ni a, a fapaa hnênah, “Bêl mi han lâk leh rawh,” a ti a. Tin, ani chuan a hnênah, “Bêl a awm tawh lo,” a ti a. Tin, sahriak chu a kang ta a. 7 Tichuan, Pathian mi chu a va hrilh a. Tin, ani chuan, “Va kal la, sahriak chu va zuar ta la, i leiba chu va rûl langin, a bâk chuan i fapate nên va khawsa tawh u,” a ti a.
Sunem nu hausa leh Elisa
8 Tin, ni khat chu Elisa chu Sunem khuaah a va zin a, chutah chuan hmeichhe neinung tak a awm a; ani chuan chaw ei tûrin a lo kai lût a. Chutichuan, a kal apiangin chutah chuan chaw ei tûrin a lût ṭhîn a. 9 Tin, ani chuan a pasala hnênah, “Ngai teh hei, he mi, mi rawn pal fo ṭhîntu hi Pathian mi thianghlim a ni tih ka hria e. 10 Hawh teh, in chhâwng tê i siamsak ang khai; khum te, dawhkân te, ṭhutphah te, khâwnvâr dahna te i dahsak ang; tichuan, kan hnêna a lo kal apiang hian a lût ṭhîn dâwn nia,” a ti a. 11 Tin, ni khat chu a va kal leh a, chumi in chhâwngah chuan a va lût a, a mu a. 12 Tin, a chhiahhlawh Gehazia hnênah, “He Sunam nu hi han ko teh,” a ti a. Tin, a va koh hnu chuan a hmaah a lo ding a. 13 Tin, ani chuan a hnênah, “ ‘Ngai teh, nangin hei theihtâwpin min duat a, eng nge kan tihsak ve ang che? Lal emaw, sipai hotu emaw biaksak che i duh em?’ tiin a hnênah hian sawi teh,” a ti a. Tin, ani chuan a chhâng a, “Mahni chipuite zînga chêng ka ni alâwm,” a ti a. 14 Tin, ani chuan, “Eng emaw chu kan tihsak tâk ang?” a ti a. Tin, Gehazia chuan a chhâng a, “Fapa chu a nei hauh lo mai a le, a pasal lah chu a tar tawh si a,” a ti a. 15 Tin, ani chuan, “Va ko teh,” a ti a. Tin, a va koh hnu chuan kawngkaah a lo ding a. 16 Tin, ani chuan, “Tûn ang hun a lo thlen leh tikah chuan fapa i pawm tawh ang,” a ti a. Tin, ani chuan, “A, ka pu, nang Pathian mi, i bawihnu lakah hian daw ma ta che,” a ti a. 17 Tin, hmeichhia chu a rai a, Elisan a hnêna a sawi ang ngei khân chumi hun a lo thlen leh chuan fapa a hring ta a. 18 Tin, nausên chu a lo sei lian a, ni khat chu a pa hnênah buh latute hnênan a kal ve a. 19 Tin, a pa hnênah chuan, “Ka lu, ka lu,” a ti a. Tin, ani chuan a chhiahhlawh hnênah, “A nu hnênah pawm tawh,” a ti a. 20 Tin, a hruai a, a nu hnên a thlen chuan a mal chungah chhûnlai thlengin a ṭhu a; tichuan, a thi ta a. 21 Tin, a chho va, Pathian mi khumah chuan a han mut a, kawng a khâr khum a, a chhuak ta a. 22 Tin, a pasal chu a au va, “Chhiahhlawh tu emaw leh sabengtung pakhat emaw mi han ngaihtuahsak teh, Pathian mi hnênah ka va tlân ang a, ka lo kîr leh ang e,” a ti a. 23 Tin, ani chuan, “Eng atân nge vawiin khera a hnêna kal i tum? Thla thar pawh a la ni lo va, Chawlhni pawh a la ni si lo va,” a ti a. Tin, ani chuan, “A rem mai ang,” a ti a. 24 Tichuan, sabengtung a thuam a, a chhiahhlawh hnênah, “Tlântîr la, kal zêl rawh khai; thu ka pêk loh che chuan mi timuang hauh suh,” a ti a. 25 Chutichuan, a kal ta a, Pathian mi hnênah chuan Karmel tlângah a va kal a. Tîn, Pathian mi chuan hla tak aṭanga a lo hmuh chuan, heti hi a ni a, a chhiahhlawh Gehazia hnênah, “En teh, sawta saw Sunem nu kha a ni; 26 amah hmuak tûrin va tlân la, a hnênah, ‘I dam em le? I pasal a dam em? Naupang kha a dam em?’ lo va ti tawh khai,” a ti a. Tin, ani chuan a lo chhâng a, “Dam e,” a lo ti a. 27 Tin, tlânga Pathian mi hnên a han thlen chuan a ke a han vuan ta tlat a. Tin, amah chu rawn nam kian tumin Gehazia chuan a va pan a; nimahsela, Pathian mi chuan, “Eng mah tih suh, a rilru a mangang a nih hi; LALPAN ka lakah a la thup rih a, mi la hrilh rih lo ve,” a ti a. 28 Tichuan, ani chuan, “Ka pu hi fapa ka dîl che em kha? ‘Mi tihder suh ang che,’ ka ti lâwm ni kha?” a ti a. 29 Tichuan, Gehazia hnênah, “I puan veng la, ka tiang hi kengin va kal tawh khai. Tu pawh va hmu la, chibai bûk suh ang che; tin, tu pawhin chibai an bûk che chuan bûk ve kher suh ang che; tin, ka tiang hi naupang hmaiah nghat ang che,” a ti a. 30 Tin, naupang nu chuan, “LALPA nunna leh i nunna chhâlin ka sawi e, ka thlah dâwn tawp lo che a ni,” a ti a. Tin, a tho va, a zui ta a. 31 Tin, Gehazia chuan anni chu a lo hmakhalh a, tiang chu naupang hmaiah chuan a han nghat a; nimahsela, awkâ leh hriat theihna rêng rêng a nei lo va. Chutichuan, a be tûrin a kîr leh a. “Naupang chu a meng hauh lo mai,” tiin a hrilh a. 32 Tin, Elisa chu ina a va luh chuan ngai teh, naupang chu a lo thi tawh reng a, a khumah chuan an lo la mut a. 33 Chutichuan, a va lût a, an pahnih chuan kawng a khâr hnan a, LALPA hnênah a ṭawngṭai a. 34 Tin, a han lâwn a, naupang chu a bawhkhuh a, a hmui leh a hmui, a mit leh a mit, a kut leh a kut a chuktuah a; tin, a chungah chuan a kaikûn a; tichuan, naupang taksa chu a lo lum ta tial tial a. 35 Chutichuan, a zuk chhuk leh a, in chhûngah chuan a han vei a; tin, a han lâwn a, a chungah chuan a han kaikûn leh a; tichuan, naupang chu vawi sarih a han hahchhiau va, naupang chu a lo meng ta a. 36 Tin, Gehazia a ko va, “He Sunem nu hi han ko teh,” a ti a. Chutichuan, a va ko va. Tin, a hnêna a va luh chuan, “I fapa hi pawm rawh,” a ti a. 37 Tichuan, a va lût a, a ke bulah a bawkkhup a, a hmaia lei siin chibai a bûk a; tin, a fapa chu a pawm a, a chhuak ta a.
Elisa thil mak tih dang pahnih
38 Tin, Elisa chu Gilgal-ah a kal leh a, chumi ramah chuan ṭam a tla a. Tin, zâwlneiho fapate chu a hmaah an ṭhu khâwm a; a chhiahhlawh hnênah, “Bêl lian tak kha chhuang langin, zâwlneiho fapate hi thil chhumkawi chhumsak rawh khai,” a ti a. 39 Tin, mi pakhat ram lamah chawhmeh zawng tûrin a va kal a, ram hrui hi a va hmu a, chuta mi ram âwmpâwng chu a puan tlin tâwkin a rawn fûn a, a zai sawm a, bêla thil chhumkawiah chuan a thlâk ta a; eng tih an hre hauh lo mai a. 40 Chutichuan, chu miteho ei atân chuan an han suak chhuak a. Tin, thil chhumkawi chu an han ei chuan, heti hi a ni a, “E khai, Pathian mi, bêl chhûngah hian thihna a awm alâwm le,” an ti ta chûl mai a. Tichuan, an ei thei ta lo va. 41 Tin, ani chuan, “Chhangphut han la teh u,” a ti a. Tin, chu chu bêlah a han thlâk a, “He mite eiah hian han suak chhuak teh u,” a ti a. Tichuan, bêlah chuan hlauhawm eng mah a awm ta lo va. 42 Tin, Baal-salisa aṭangin mi pakhat a lo kal a, Pathian mi chu buh thar hmasa bera siam buhsanghar chhangpêr sawmhnih leh buh thar vui a ipin a rawn kensak a. Ani chuan, “He miteho ei atân hian pe ta che,” a ti a. 43 Tin, a chhiahhlawh chuan, “Eng â ni? Hei hi mi za zet ka hlui ang maw?” a ti a. Ani erawh chuan, “He miteho ei atân hian pe rawh; LALPAN heti hian a ti: ‘An ei ang a, an ei bâng bawk ang,’ tiin,” a ti a. 44 Chutichuan, a han hlui a, an ei a, LALPA tih ang ngeiin an ei bâng bawk a.
Phâr Naamana tihdam
1 Suria lal sipai hotu Naamana chu LALPAN Suria-hote chhanhimtua a hman ṭhin avângin, a pu ngaiha ropui leh mi zahawm tak a ni a; amah chu mi chak huaisen a ni bawk a, phâr a ni pawh a. 2 Suria-hote chu a pâwl pâwlin an rammu a, Israel ram aṭangin hmeichhe naupang tê hi salah an rawn hâwn a; ani chuan Naamana nupui rawng a bâwl ṭhîn a. 3 Tin, ani chuan a pi hnênah, “Ka pu hi Samari khuaa zâwlnei hmaah va kal sela ka va ti êm ve aw! A phâr hi a lo tidam mai tûr a,” a ti a. 4 Tin, Naamana chu a va lût a, “Israel rama hmeichhe naupang tê khân chutiang khatiang chuan a ti e,” tiin a pu chu a hrilh a. 5 Tin, Suria lal chuan, “Va kal tak rawh khai, Israel lal hnênah lehkha ka thawn ang e,” a ti a. Tichuan, a chhuak ta a, tangkarua talent sâwm leh, rangkachak tlang sângruk leh silhfên inthlâkna tûr sâwm a keng a. 6 Tin, “He lehkha hi i lo hmu ang a, ngai teh, ka puipa Naamana hi a phâr i lo tihdamsak tûrin i hnênah ka rawn tîr a ni e,” tihna lehkha chu Israel lal a va pe a. 7 Tin, Israel lalin chu lehkha chu a han chhiar chuan heti hi a ni a, a puan a pawt thlêr a, “Mite tihlum theia, tinung leh thei ṭhîn Pathian em ka niha, he mi hian phâr tidam tûra ka hnêna a rawn tirh ngawt mai hi le? Ngaihtuah ula, ka chungah remchâng a zawng a ni tih hre rawh u khai,” a ti a. 8 Tin, Pathian mi Elisan Israel lalin a puan a pawt thlêr tih a lo hriat chuan, heti hi a ni a. “Eng vângin nge i puan i pawh thlêr? Ka hnênah lo kal ang hmiang; tichuan, Israel ramah hian zâwlnei a awm tih a hre mai ang chu,” tiin lal hnênah mi a tîr a. 9 Chutichuan, Naamana chu a sakawrte nên, a tawlailîrte nên chuan a va kal a, Elisa in kawngka bulah chuan a va ding a. 10 Tin, Elisa chuan, “Jordan luiah vawi sarih va inbual la, i tisa ngai i pu leh ang a, i lo thianghlim tawh ang,” tiin mi a tîr a. 11 Nimahsela, Naamana chu a thinrim ta hle mai a, a kal leh ta a, “Ngai teh u, amah ngei chu ka hnênah a lo chhuak ang a, a lo ding ang a, LALPA a Pathian hming chu a han lam ang a, a phâr lai chunga a kut thênin phâr hi a han tidam dâwn emaw ka ti asin le. 12 Damaska khaw lui Abana te, Pharpar te chu Israel ram lui zawng zawng aiin a ṭha zâwk lo vem ni? Chûngah chuan inbualin ka intithianghlim thei lo vem ni?” a ti a. Chutichuan, a lehhawi a, thinrim zetin a kal ta a. 13 Tin, a chhiahhlawhte chuan an va hnaih a, an va bia a, “Ka pa, zâwlnei khân thil khirhkhân tak tihtîr dâwn ta che sela, i ti mai dâwn lâwm ni? ‘Va inbual la, va intithianghlim rawh,’ i hnêna a han ti kha tih zâwk âwm tak a ni lâwm ni le?” an ti a. 14 Tichuan, a zuk chhuk a, Pathian mi sawi ang chuan Jordan luiah vawi sarih a zuk inhnim a; tin, a tisa chu nausên tisa ang mai a lo ni leh a, a lo thianghlim ta a. 15 Tin, amah leh a hote zawng zawng nên chuan Pathian mi awmna lamah an kîr leh a, a hmaah an va ding a; tin, ani chuan, “Ngai teh hei, Israel ramah ngawt lo chuan leilung zawng zawngah hian Pathian a lo awm lo ve tih ka hre ta; chutichuan, i chhiahhlawh lâwmman hi la teh khai,” a ti a. 16 Nimahsela, ani chuan, “A bula ka awm ṭhinna LALPA nunna chhâlin ka sawi e, eng mah hi ka la lo vang,” a ti a. Tichuan, la tûrin a thlêm chiam a; nimahsela, a duh lo tlat a. 17 Tin, Naamana chuan, “A nih loh leh, i chhiahhlawh hi sabengtung pahnih phur lei mi lâktîr rawh khai; tûn achinah zawng i chhiahhlawh hian LALPA hnênah ngawt lo chuan, hâlral thilhlan leh inthawina rêng rêng hi, pathian dangte hnênah ka hlân dâwn tawh hauh lo a nia. 18 He thilah hian LALPAN i chhiahhlawh hi ngaidam rawh se: ka pu hi ka kut rinchhana chibai bûk tûra Rimona ina a luha, Rimona ina ka kûn chuan, Rimona ina ka kûn ve thu-ah chuan, LALPAN i chhiahhlawh hi ngaidam rawh se,” a ti a. 19 Tin, ani chuan a hnênah, “Thlamuang takin kal rawh,” a ti a. Chutichuan, a hnên ata chu a chhuak leh a, eng emaw chen a kal hman a. 20 Nimahsela, Pathian mi Elisa chhiahhlawh Gehazia chuan, “Khawinge, ka pu hian Suria mi Naamana hi a thil rawn kente la hlek lovin a chhuah leh ta mai a; LALPA nunna chhâlin ka sawi e, ka va ûm ang a, eng emaw tal ka va lâksak teh ang,” a ti a. 21 Chutichuan, Gehazia chuan Naamana chu a ûm ta a. Tin, Naamanan tuin emaw a rawn ûm a han hmuh chuan, lo biak tumin tawlailîr ata chu a chhuk a, “Ṭha lam thu alâwm maw?” a ti a. 22 Tin, ani chuan, “Ṭha lam thu ni e. Ka puin, ‘Ngai teh hei, Ephraim tlâng ram aṭangin zâwlneiho fapate zînga tlangvâl pahnihin mi rawh tlawh ta thut mai a, anni chu tangkarua talent khat leh silhfên inthlâkna tûr pahnih pe rawh khai,’ tiin mi rawn tîr a ni e,” a ti a. 23 Tin, Naamana chuan, “Talent hnih hi la rawh khai,” a ti a. Tichuan, la tûrin a thlêm chiam a; tin, tangkarua talent hnih chu silhfên inthlâkna tûr pahnih nên chuan ip hnihah a thun a, a chhiahhlawhte pahnih a phurhtîr a, a hmaah chuan an kalpui ta a. 24 Tin, tlâng a va thlen chuan a lâksak a, in chhûngah a dah a; tin, chu mite chu a kaltîr a, an kal ta a. 25 Ani erawh chu a lût a, a pu hmaah chuan a va ding a. Tin, Elisa chuan a hnênah, “Khawi aṭangin nge i lo kal le, Gehazi?” a ti a. Tin, ani chuan “I chhiahhlawh hi khawiah mah ka kal lo ve,” a ti a. 26 Tin, ani chuan a hnênah, “A be tûr chea a tawlailîr ata kha mi lo chhuk lai khân ka rilru i hnênah a kal ve zêl a ni lâwm ni? Tangka te, silhfên te, olive huan te, grêp huan te, berâm te, sebâwngpa te, bawihpa leh bawihnu te hi lâk a hun em ni? 27 Chutichuan, Naamana phâr khân a man ang chia, kumkhuain i thlahte pawh a man zêl ang,” a ti a. Tichuan, a hnên ata chu vûr anga vâra phârin a kal chhuak ta a.
Hreifang tla bo
1 Tin, zâwlneiho fapate chuan Elisa hnênah, “En teh hei, i bula kan ṭhut khâwmna hi kan tân a chêp lutuk a. 2 Jordan luiah kan zuk kal ang a, chuta thing chu kan zuk la ṭheuh ang a, kan ṭhut khâwmna tûr chutah chuan kan zu siam teh ang aw?” an ti a. Tin, ani chuan a chhâng a, “Kal ta che u,” a ti a. 3 Tin, mi pakhat chuan, “I chhiahhlawhte hnênah hian kal ve ta che,” a ti a. Tin, ani chuan, “Ka kal ve ang e,” tiin a chhâng a. 4 Chutichuan, an hnênah a kal ve ta a. Tin, Jordan lui an thlen chuan thing chu an han kit a. 5 Tin, mi pakhatin thing a han kih lai tak chuan, hreifang chu tuiah a tla ta a; tin, ani chu, “E khai aw, ka pu! Kan hawh asin ni le,” tiin a au ta a. 6 Tin, Pathian mi chuan, “Khawii laiah nge a tlâk?” a ti a. Tin, ani chuan a tlâkna lai a entîr a. Tichuan, thingtuai a han sât a, chutah chuan a han paih lût a, thîr chu a lo lâng ta a. 7 Tin, ani chuan, “Chhar rawh le,” a ti a. Chutichuan, a han ban a, a chhar ta a.
Suria sipai an tlâwm
8 Suria lal chuan Israel-te a rûn dâwn a, “Chumi khami hmunah chuan i châng ang u,” tiin a puipateho a râwn a. 9 Tin, Pathian mi chuan Israel lal hnênah, “Chutiang hmuna kal lo tûrin fîmkhur rawh; chutah chuan Suria-ho an lo chhuk dâwn a nia,” tiin mi a tîr ṭhîn a. 10 Tin, Israel lal chuan Pathian miin a lo hrilh tawh hmun chu mi a va en thlithlaitîr ṭhîn a. Chutah chuan vawi hnih khat chang pawh ni lovin, a lo inhumhim ṭhîn a. 11 Tichuan, chumi thu-ah chuan Suria lal thinlung chu a mangang hle mai a; tin, a puipate chu a ko va, an hnênah, “Kan zînga mi a tu hi nge Israel lal lama ṭang mi hrilh duh dâwn lâwm ni?” a ti a. 12 Tin, a puipate zînga mi pakhat chuan, “Tu mah kan ṭang lo ve, aw lalber ka pu; Israel rama awm zâwlnei Elisa hian i pindan chhûngrila i sawite hi Israel lal a hrilh zêl ṭhîn a ni zâwk e,” a ti a. 13 Tin, ani chuan, “Khawiah nge a awm va zawng teh u, ka va mantîr ang e,” a ti a. Tin, “Ngai teh, Dothan khuaah a awm e,” tiin an hrilh a. 14 Chutichuan, sakawr te, tawlailîr te, sipai tam takte chutah chuan a tîr a, zânah an va kal a, khua chu an hual ta mup a. 15 Tin, Pathian mi chhiahhlawh chu zîng taka a thawha, a va chhuah chuan, ngai teh, sipaiho chuan sakawr nên, tawlailîr nên khua chu an lo hual mup mai a. Tin, a chhiahhlawh chuan a hnênah, “E khai aw, ka pu! Engtin nge kan tih tâk ang le?” a ti a. 16 Tin, ani chuan, “Hlau ma ta che; an lama ṭang ai chuan kan lama ṭang an tam zâwk alâwm,” a ti a. 17 Tin, Elisa chu a ṭawngṭai a, “LALPA, a hmuh theihna tûrin a mit han tihmensak teh ang che,” a ti a. Tin, LALPAN chu tlangvâl mit chu a han tihmensak a; tichuan, a hmu ve ta a. Tin, ngai teh, Elisa vêlah chuan tlâng chu mei tawlailîr leh sakawrin a khat mup mai a. 18 Tin, Suria-ho a lama an lo chhuk chuan Elisa chu LALPA hnênah a ṭawngṭai a, “Hêngho hi an mit han tihdelsak teh ang che,” a ti a. Tin, Elisa thu angin an mit a rawn tihdelsak ta a. 19 Tin, Elisa chuan an hnênah, “Hei chu kawng a ni lo ve, hei chu khua pawh a ni hek lo. Mi zui rawh u, in mi zawna hnênah chuan ka hruai ang che u,” a ti a. Tichuan, Samari khuaah a hruai ta a. 20 Tin, Samari khaw chhûng an han thlen chuan heti hi a ni a, Elisan, “LALPA, hêngho hian an hmuh theihna tûrin an mit han tihmensak ang che,” a ti a. Tin, LALPAN an mit chu a han tihmensak a, an hmu ta a; tin, ngai teh, Samari khaw chhûngah an lo awm reng mai a! 21 Tin, Israel lal chuan anniho chu a hmuh chuan Elisa hnênah, “Ka pa, ka that ang em? Ka that ang em?” a ti a. 22 Tin, ani chuan a chhâng a, “That lo ve a. I khandaih leh i thalngula i sal mante chu i that dâwn em ni? Chhang leh tui han hlui langin, eiin in sela, an pu hnênah haw leh rawh se,” a ti a. 23 Tichuan, ei tûr tam tak a buatsaihsak a; tin, an eia an in zawh chuan a hâwntîr ta vek a, an pu hnên lamah an haw leh ta a. Tichuan, Suria-ho pâwlte chu Israel ramah chuan an rammu leh ta lo.
Samari khawpui hual thu
24 Tin, chumi hnuah chuan heti hi a ni a, Suria lal Ben-hadada chuan a sipai zawng zawng a khâwm a, Samari khua a han hual a. 25 Tin, Samari khuaah chuan ṭam a nasa ta êm êm mai a; tin, ngai teh, an hual tlat a, sabengtung lu hi tangkaraw sawmriatah an hralh a; tin, ṭhuro êk hi kab hmun lia ṭhena hmun khat tangkaraw ngaah an hralh hial a. 26 Tin, Israel lal chu kulh tlânga a kal lai hmeichhe pakhat hian, “Aw lalber, ka pu, mi pui rawh,” tiin a lo au va. 27 Tin, ani chuan, “LALPAN a ṭanpui nghâl loh chein keiin khawi atain nge ka han ṭanpui tehlul ang che? Hruih zâwl atain emaw, grêp sâwrna khur atain emaw em ni dâwn?” a ti a. 28 Tin, lal chuan a hnênah, “Eng i ti nge ni le?” a ti leh a. Tin, ani chuan a chhâng a, “He hmeichhia hian ka hnênah, ‘Vawiinah hian i fapa hi kan eiah thawh rawh khai, naktûkah ka fapa hi kan ei ve thung dâwn nia,’ a ti a. 29 Tichuan, ka fapa chu kan chhûm a, kan ei a; tin, a tûkah chuan keiin a hnênah, ‘I fapa chu kan eiah thawh ve thung rawh le,’ ka ti a, a fapa chu a thukru ta bîk mai a ni,” a ti a. 30 Tin, lalin chu hmeichhe thusawi chu a hriatin heti hi a ni a, a puan a pawt thlêr ta a (kulh tlânga a kal lai a ni a); tin, mipuite chuan an han en a, ngai teh, a pang depah chuan saiip puan hi a lo sin reng a. 31 Tichuan, ani chuan, “Vawiinah hian Saphata fapa Elisa hian a lu a la put nâ chuan Pathianin a tih tihin mi ti mai sela, chu aia nasa pawhin,” a ti a. 32 Tin, Elisa chu a inah a ṭhu a, upahote pawh an ṭhu ve a; tin, lalber chuan a hnênah mi pakhat a tîr a; nimahsela, a mi tirh chuan a hnên a lo thlen hmain upaho hnênah chuan, “He tualthattupa fapa hian ka lu la tûrin mi a rawn tîr tih in hre ve em u? Ngawi teh u, a mi tirh chu a lo thlen veleh, kawng lo khâr ula, kawngkhâr khân lo dang tlat ang che u; a hnungah chuan a pu pên ri a hriat nghe nghe lâwm ni?” a ti a. 33 Tin, chutia anmahni a la biak lai mêk chuan ngai teh, a mi tirh chu a lo thleng thla ta a; tin, lalber chuan, “Ngai teh, he thil ṭha lo hi LALPA rawn tirh a nih hi; LALPA chu engah nge ka la ngaihchân cheu vang?” a ti a.
1 Tin, Elisan, “LALPA thu hi lo hre rawh u. LALPAN heti hian a ti: ‘Naktûk hetih hun vêlah hian Samari kulh kawngka bulah chuan chhangphut dip mi tehkhâwng khat chu sekel khatah an hralh ang a, barli tehkhâwng hnih chu sekel khatah,’ tiin,” a ti a. 2 Tin, sipai hotu, lalin a kut a rawn rinchhana chuan Pathian mi chu a chhâng a, “Ngai teh, LALPAN vânah tukverh a hawn chu le! Chutiang chu a ni thei tehlul ang maw?” a ti a. Tin, ani chuan, “Ngai rawh, i mit zawngin i hmu ngei ang a, a ei erawh chu i ei dâwn lo a ni,” a ti a.
Suria sipai rual an tlânchhia
3 Tin, kulh luhna kawngka bulah chuan phâr pali an awm a; anni chuan, “Eng atân nge maw thih nghâk maia kan ṭhut reng le? 4 ‘Khaw chhûngah i lût teh mai ang u,’ han ti dâwn ila, khaw chhûng an ṭâm a, kan va thi mai âwm si a; tin, hetah hian ṭhu reng dâwn ila, kan thi tho tho âwm bawk si a. Chutichuan, hawh teh u, Suria sipaihote hnên lamah i tlu lût rawk mai teh ang u. Min zuah leh kan nung ang a; min thah leh kan thi a ni mai ang chu,” tiin an inbia a. 5 Tichuan, Suria-hote riahhmuna kal tûr chuan thimhmulah an thawk chhuak ta a; tin, Suria-ho riahhmun tawntirh an va thlen chuan, ngai teh, tu mah an lo awm lo va. 6 LALPAN Suria sipaihote chu tawlailîr thâwm te, sakawr thâwm te, sipai tam tak thâwm te a hriattîr a ni a; tichuan, “Ngai teh u, Israel lal hian Hit lalhote, Aigupta lalhote hi min rawn bei tûrin a ruai a nih hi,” tiin an inbia a. 7 Chutichuan, an tho va, thimhmulah chuan an tlânchhe ta a, an puan inte, an sakawrte, an sabengtungte leh an riahhmun chu a awm ngai ngaiin an tlânsan a, an tlânchhe ta chiam a. 8 Tin, chûng phârho chuan riahhmun tawntirh an va thlen chuan puan in pakhatah hian an va lût a, an eiin an in a, chuta tangkarua leh rangkachak te, silhfên te chu an la a, an va thukru a; tin, an va lêt leh a, puan in dangah an lût leh a, chuta mi pawh chu an la a, an va thukru leh a. 9 Nakinah chuan, “Kan tidik hauh lo mai a! Vawiin hi chanchin lâwmawm thlen nî a ni a, keini hi kan ngawi reng mai a; khawvâr kan nghah chuan hrem kan tâwk mai ang; chutichuan, hawh u, lal chhûngte i va hrilh ang u,” tiin an inbia a. 10 Chutichuan, khaw kawngkhâr vêngtu chu an va au va, “Suria-ho riahhmunah kan va kal a; tin, ngai teh, tu mah an lo awm lo va, mihring thâwm rêng rêng pawh a awm lo va, sakawrte leh sabengtungte chauh a lo inthlung a, puan inte pawh chu a awm ngai ngaiin a awm reng mai,” tiin an hrilh a. 11 Tin, kawngkhâr vêngtute chu a ko va; tin, anni chuan lal in chhûnga mite chu an va hrilh a. 12 Tin, lal chu zânah chuan a tho va, a puipate hnênah chuan, “Suria-hote min tih dân hi ka hrilh teh ang che u. Kan rilṭâmzia hi an hria a; chuvângin, ‘Khawpui ata an lo chhuah chuan a nungin kan lo man ang a, khaw chhûngah kan lût dâwn zuk nia,’ tiin ramah biru tûrin an riahhmun an chhuahsan a nih hi,” a ti a. 13 Tin, a puipa pakhat chuan a chhâng a, “Khawpuia sakawr awm chhunte zînga panga hi tute emaw hruaitîr rawh khai (ngai teh, Israel mipuiho, a la dam zawng zawngte ang bawk an ni tho tho va; ngai teh, Israel mipuiho thia ngaihte ang bawk an ni tho tho alâwm); tichuan, i va tîr teh rêng ang u,” a ti a. 14 Chutichuan, tawlailîr hnûktu sakawr pahnih an hruai a; tin, lal chuan, “Va en teh ta u,” tiin, Suria sipaihote ûm tûrin a tîr a. 15 Tin, Jordan lui thlengin an va ûm a; tin, ngai teh, Suria-hoten an hmanhmawh avânga an paih silhfênte leh bungruate chu kawng tluanin a awm zel zul mai a. Tin, a mi tirhte chu an lo kir leh a, lal chu an rawn hrilh a. 16 Tin, mipui chu an va chhuak a, Suria-ho riahhmun chu an va suam ta chiam a. Chutichuan, LALPA thu ang ngeiin chhangphut dip mi tehkhâwng khat chu sekel khatah an hralh a, buhsanghar tehkhâwng hnih chu sekel khatah. 17 Tin, lal chuan sipai hotu, a kut a rawn rinchhana kha kulh kawngka vêngtuah a ruat a; tin, mipuite chuan kulh kawngka bulah chuan an chîl ta nuaih nuaih a, Pathian miin a hnêna lal a lo chhuk laia a lo sawi ang khân a thi ta a. 18 Heti hi a ni a, Pathian miin lal hnêna, “Naktûk hetih hun vêlah hian Samari kulh kawngka bulah buhsanghar tehkhâwng hnih chu sekel khatah an hralh ang a, chhangphut dip mi tehkhâwng khat chu sekel khatah,” a tiha, 19 sipai hotuin Pathian mi chu a chhâna, “Ngai teh, LALPAN vânah tukverh a hawn dâwn chu le! Chutiang chu a ni thei tehlul ang maw?” a tiha, anin, “Ngai rawh, i mit zawngin i hmu ngei ang a, a ei erawh chu i ei dâwn lo a ni,” tia a sawi kha. 20 Chutiang ngei chuan a chungah a lo thleng ta a ni; mipuiin kulh kawngka bulah chuan an chîl nuaih nuaih a, a thi ta a ni.
Sunem nu ṭâm tlân lo haw leh
1 Tin, Elisan a fapa a tihdamsak hmeichhe hnênah chuan, “Tho la, nang leh i chhûngte nên, in awm theih theihna hmunah va awm rih rawh u; LALPAN ṭâm a tlâktîr dâwn e; he ramah hian kum sarih chhûng zet a tla nghe nghe dâwn a ni,” tiin a lo sawi tawh a. 2 Tichuan, hmeichhia chu a tho va, Pathian mi thu ang chuan a ti a; a chhûngte nên chuan Philistia-ho ramah kum sarih an va awm ta a. 3 Tin, kum sarih a lo vei hnuah chuan heti hi a ni a, chu hmeichhia chu Philistia-ho ram ata a lêt leh ta a; tin, a in leh a lo lal dîl tûrin a va kal a. 4 Tin, lal chuan Pathian mi chhiahhlawh Gehazia chu, “Elisan thil ropui a tih zawng zawng mi han hrilh teh khai,” tia a lo biak lai a ni a. 5 Tin, mi pakhat thi tawh a tihnun leh thu lal a lo hrilh lai mêk chuan heti hi a ni a, ngai teh, a fapa a tihnun lehsak hmeichhia chuan a in leh a lo lal chu a rawn dîl ve a. Tin, Gehazia chuan, “Aw lalber ka pu, hei hi a ni hmeichhia chu; tin, hei hi a ni a fapa Elisan a tihnun lehsaka chu,” a ti a. 6 Tin, lalin hmeichhia chu a han zawh chuan a hrilh ta a. Chutichuan, lal chuan hotu pakhat a ruatsak a, “A ta zawng zawng, a lova thil haw zawng zawng chenin, he ram a chhuahsan ata tûn thlenga mi hi pe leh vek rawh,” a ti a.
Elisa leh Suria lal Benhadada
7 Tin, Elisa chu Damaska khuaah a kal a; tin, Suria lal Ben-hadada chu a damlo va; tichuan, “Pathian mi hetah a lo kal e,” tiin an hrilh a. 8 Tin, lalin Hazaela hnênah, “Lâwmman keng langin, Pathian mi be tûrin va kal la, ka nâ hi ka ṭha chhuak leh thei ang emaw LALPA mi lo râwnsak teh se,” a ti a. 9 Chutichuan, Hazaela chu amah be tûr chuan a va kal a, lâwmman atân Damaska khuaa thil ṭha tinrêng, sanghâwngsei sawmli phur a keng a, a hmaah chuan a va ding a, “I fapa Ben-hadada, Suria lalin, ‘Ka nâ hi ka ṭha chhuak leh ang em?’ ti tûrin i hnênah hian mi rawn tîr a ni,” a ti a. 10 Tin, Elisa chuan a hnênah, “Kal leh ta langin, a hnênah, ‘I ṭha chhuak leh mawlh ang, a ti e,’ ti ang che; amaherawhchu, a la thi ngei dâwn a ni tih zawng LALPAN mi hriattîr a ni,” a ti a. 11 Tichuan, a tân zahthlâk khawpin a melh ta reng mai a; tin, Pathian mi chu a ṭap ta a. 12 Tin, Hazaela chuan, “Engati nge ka pu chu a ṭah mai?” a ti a. Ani chuan a chhâng a, “Israela thlahte chunga i thil ṭha lo tih tûr ka hriat vâng a ni; an kulhte i la hâlsak ang a, an tlangvâlte khandaihin i la that ang a, an fanau tê tête chu i la paih sawm ang a, nau pai lai an hmeichhiate chu i la pir thlêr dâwn a ni,” a ti a. 13 Tin, Hazaela chuan, “Kei i chhiahhlawh, uicho mai mai hian chutiang thil nasa tak chu han ti thei zia em ka nih?” a ti a. Tin, Elisa chuan a chhâng a, “Suria-ho chungah i la lal dâwn tih LALPAN mi hriattîr a ni,” a ti a. 14 Tichuan, Elisa hnên ata a chhuak a, a pu hnên lamah chuan a kal ta a; ani chuan, “Elisa chuan eng nge a lo hrilh che?” a ti a. Tin, ani chuan, “ ‘A ṭha chhuak leh mawlh ang,’ tiin mi hrilh,” a ti a. 15 Tin, a tûkah chuan heti hi a ni a, puan chhah tak a la a, tuiah a hnim a, chu chuan a hmai a upsak a, a thi ta a; tichuan, Hazaela chu a aiawhin a lal ta a.
Juda lal Jehorama
16 Tin, Israel lal Ahaba fapa Jorama kum nga a lal kum chuan (chumi lai chuan Jehosaphata chu Juda lal a ni a), Juda lal Jehosaphata fapa Jehorama chu a lal ṭan a. 17 A lal ṭan lai chuan kum sawmthum leh kum hnih mi a ni a; Jerusalem khuaah kum riat ro a rêl a. 18 Ahaba chhûngte angin, Israel lalte kawng zawh chu a zawh ve a, Ahaba fanu nupuiah a nei a ni; tichuan, LALPA mit hmuha thil ṭha lo tak a ti ṭhîn a. 19 Amaherawhchu, LALPAN a chhiahhlawh Davida avângin Judai ram chu a tichhe duh lo va, a thlahte chena khâwnvâr neihtîr reng a lo tiam tawh si a. 20 Ama chhanah chuan Edom-ho chu Juda-te lakah an hel a, an chunga lal tûr an insiam chawp a. 21 Tichuan, Jehorama chu Zair khuaah a tawlailîr zawng zawng nên a va kal a; tin, zânah a thawk chhuak a, anmahni hualtu Edom-hote leh an tawlailîr chunga hotute chu a va bei ta a; tin, mite chu an puan in lamahte an tlân ta vek a. 22 Chutichuan, Edom-ho chu tûn thlengin Juda-te lakah an la hel ta reng a ni. Chumi lai vêk chuan Libna khua pawh an lo hel ve a. 23 Tin, Jehorama chanchin dangte leh a thiltih zawng zawngte chu Juda lalte lal lai thu ziakna buah a chuang a ni lâwm ni? 24 Tin, Jehorama chu a pi leh pute hnênah a muhîl a, a pi leh pute zîngan Davida khawpuiah an phûm ta a. A fapa Ahazia chu a aiawhin a lal ta a.
Juda lal Ahazia
25 Israel lal Ahaba fapa Jorama lal kum sâwm leh kum hnih kum chuan, Juda lal Jehorama fapa Ahazia chu a lal ṭan a. 26 Ahazian ro a rêl ṭan lai chuan kum sawmhnih leh kum hnih mi a ni a; tin, Jerusalem khuaah kum khat ro a rêl a. Tin, a nu hming chu Athali, Israel lal Omria fanu a ni. 27 Ahaba chhûngte kawng zawh chu a zawh ve a, Ahaba chhûngte angin, LALPA mit hmuha thil ṭha lo tak a ti ṭhîn a; Ahaba chhûngte mâkpa a ni si a. 28 Tin, ani chu Ahaba fapa Joraman Ramoth-gilead khuaa Suria lal Hazaela a han beihnaah chuan a tel ve a; tin, Suria-ho chuan Jorama chu an lo hliam a. 29 Tin, Lal Jorama chu Suria lal Hazaela an beihnaa Suria-hovin Rama khuaa an lo hliam chu Jezreel khuaa intidam tûrin a kîr leh ta a. Tin, Juda lal Jehorama fapa Ahazia chu Ahaba fapa Jorama a nat avâng chuan kan tûrin Jezreel khuaah a zuk kal a.
Israel lal atân Jehua hriak thih a ni
1 Tin, zâwlnei Elisan zâwlneiho fapate zînga pakhat a ko va, a hnênah, “I puan veng la, he hriak bâwm hi keng la, Ramoth-gilead khuaah va kal rawh. 2 I va thlen chuan Nimsia fa Jehosaphata fapa Jehua va zawng chhuak langin; va lût la, a unauteho zîng ata ko chhuak la, pindan chhûngrilah luhpui rawh. 3 Tichuan, hriak bâwm hi la la, a luah leih langin, ‘LALPAN heti hian a ti: “Israel-te chunga lalah hriak ka thih a che,” tiin,’ ti rawh. Tichuan, kawng hawng la, tlân chhuak rawh, awm rei suh,” a ti a. 4 Chutichuan, tlangvâl, zâwlnei tlangvâl chu Ramoth-gilead-ah chuan a kal ta a. 5 Tin, a va thlen chuan ngai teh, sipai hotuho an lo ṭhu khâwm a; tin, ani chuan, “Sipai hotu, i hnênah thuchah sawi tûr ka nei e,” a ti a. Tin, Jehua chuan, “A tu bera hnênah hian nge ni?” a ti a. Tin, ani chuan, “Nangma hnênah hian a ni, sipai hotu,” a ti a. 6 Tin, a tho va, inah chuan a lût a; tin, a luah hriak chu a leih a, a hnênah, “LALPA, Israel-te Pathianin heti hian a ti: ‘LALPA mipuiho, Israel-ho chunga lalah hriak ka thih a che. 7 Ka chhiahhlawh zâwlneite thisen leh LALPA chhiahhlawh zawng zawngte thisen phuba chu Jezebeli laka ka lâk theihna tûrin i pu Ahaba chhûngte chu i tiboral vek ang. 8 Ahaba chhûngte zawng zawng chu an boral vek ang a; Ahaba aṭang hian mipa fa tawh phawt chu Israel rama mi khuahkhirh leh khirh loh pawh ka tiboral dâwn a ni. 9 Tin, Ahaba chhûngte chu Nebata fapa Jeroboama chhûngte leh Ahija fapa Baasa chhûngte angin ka siam ang a. 10 Tin, uiin Jezebeli chu Jezreel khaw kulh bulah an ei ang a, a phûmtu tûr rêng rêng an awm lo vang,’ tiin,” a ti a. Tichuan, kawng a hawng a, a tlân chhuak ta a. 11 Tichuan, Jehua chu a pu puipate hnênah chuan a lo chhuak a; pakhat chuan a hnênah, “Ṭha lam thu em ni le? Kha mi âpa kha engtiziaa i hnêna lo kal nge ni le?” a ti a. Tin, ani chuan an hnênah, “In hriat mi a ni a, a thusawi pawh kha in hria alâwm,” a ti a. 12 Anni chuan, “Hre teh suh e! Min han hrilh teh khai,” an ti a. Ani chuan, “Hetiang tak hian min ti alâwm maw le: ‘LALPAN heti hian a ti: “Israel-ho chunga lal atân hriak ka thih a che,” ’ tiin,” a ti a. 13 Tichuan, mi tinin an puan chu an hlîp hmawk hmawk a, kailâwn chungah an phahsak ta ṭheuh va, “Jehua lal a ni ta e,” tiin tawtawrâwt an hâm ta a. 14 Chutichuan, Nimsia fa Jehosaphata fapa Jehua chuan Jorama chu a phiar ta a (Suria lal Hazaela avângin Jorama leh Israel-ho zawng zawng chuan Ramoth-gilead khua chu an vêng a; 15 Lal Jorama erawh chu Suria lal Hazaela nên an inbeihnaa Suria miten an hliam kha Jezreel khuaa intidam tûrin a kîr leh a nih kha). Tin, Jehua chuan, “Ka lama ṭang in nih chuan tu mah rêng rêng Jezreel khuaa hêng thu hi sawi tûrin khua ata hi kal chhuahtîr suh u,” a ti a. 16 Chutichuan, Jehua chu tawlailîrah a chuang a, Jezreel khuaah a kal a; Jorama chu chutah chuan a mu a ni a. Tin, Juda lal Ahazia pawh Jorama kan tûrin a zuk kal a. 17 Tin, Jezreel kulhah râlvêng a ding a, ani chuan Jehua ho lo kal chu a han hmu a, “Mi tam tak ka hmu e,” a ti a. Tin, Jorama chuan, “Sakawr chung chuang mi anmahni hmuak tûrin va tîr la, ‘ṭha lam thu em ni le?’ va ti teh se,” a ti a. 18 Chutichuan, mi pakhat sakawr chunga chuang hi a hmuak tûrin a va kal a, “Lalin heti hian a ti: ‘ṭha lam thu em ni le?’ tiin,” a ti a. Tin, Jehua chuan, “Ṭha lam thu chu nanga lo hriat tûr eng nge awm ni? Ka hnungah hian va kal ve rawh,” a ti a. Tin, râlvêng chuan, “Kan mi tirha chuan an hnên chu a va thleng ngei a; nimahsela, a lo kîr leh ta hauh lo mai,” tiin a hrilh a. 19 Tichuan, mi pakhat sakawr chunga chuang hi a tîr leh a, chu mi pawh chuan an hnên a va thleng a, “Lalin heti hian a ti: ‘ṭha lam thu em ni le?’ tiin,” a ti a. Tin, Jehuan a chhâng a, “Ṭha lam thu chu nanga lo hriat tûr eng nge awm ni? Ka hnungah hian va kal ve rawh,” a ti a. 20 Tin, râlvêng chuan, “Ani pawhin an hnên chu a va thleng ngei a, ani pawh chu a lo kîr leh ta hauh lo mai; tin, a khalh dân pawh Nimsia fapa Jehua khalh dân chiah a ni; mi â ang maiin a khalh ṭhîn a ni,” a ti a.
Israel lal Jorama an that
21 Tin, Jorama chuan, “Buatsaih teh u,” a ti a. Tin, a tawlailîr chu an buatsaih a. Tin, Israel lal Jorama leh Juda lal Ahazia chu mahni tawlailîr ve vein an va chhuak a, Jehua hmuak tûrin an va kal a, Jezreel mi Nabotha huanah an va hmu a. 22 Tin, Joraman Jehua a han hmuh chuan heti hi a ni a, “Ṭha lam thu em ni le, Jehu?” a han ti a. Tin, ani chuan a lo chhâng a, “I nu Jezebeli hian uirê leh dawi a chîn nasat chhûng hian ṭha lam thu eng nge awm thei ang?” a ti a. 23 Tin, Jorama chuan a kai her a, a tlân a, Ahazia hnênah, “Inbumna a awm a nih hi, Ahazi,” a ti a. 24 Tin, Jehua chuan a thalngul chu a theihpatâwpin a kuai a, Jorama dâr leh dâr inkârah a kâp a, thal chu a lungah a lût tlang a, a tawlailîrah a awp ta rawk a. 25 Tichuan, Jehuan a sipai hotu Bidkara hnênah, “Pawm la, Jezreel mi Nabotha huan hmunah paih thla rawh; hmâna nang nêna a pa Ahaba hnunga kan chuan dun laia LALPAN he phur hi a chunga a nghah rêng a nih kha: 26 LALPAN, ‘Niminah Nabotha thisen leh a fapate thisen ka hmu ngei alâwm,’ a tih kha; tin, LALPAN, ‘Hemi hmun ngeiah hian ka thungrûl dâwn che a ni,’ a tih leh kha. Chutichuan, LALPA thu angin pawm la, hemi hmunah ngei hian paih thla rawh,” a ti a.
Juda lal Ahazia an that
27 Nimahsela, Juda lal Ahazian chu chu a hmuh chuan huan in lamah a tlân ta a. Tin, Jehua chuan a ûm a, “Ani pawh tawlailîrah khân that nghâl rawh u,” a ti a; tichuan, Ibleam khaw kiang, Gur chhohnaah an bei a. Tin, Migiddo khuaah a tlân lût a, chutah chuan a thi ta a. 28 Tin, mite chuan Jerusalem khuaah tawlailîrin a kalpui a, ama thlânah, a pi leh pute zîngah Davida khawpuiah an phûm ta a. 29 Ahaba fapa Jorama kum sâwm leh kum khat a lal kumin Ahazia chu Juda-ho chungah a lal ṭan a.
Lalnu Jezebeli an tihlum
30 Tin, Jehua chu Jezreel khuaa a va luh chuan, Jezebelin a lo hria a; tichuan, a mitte a lo hnawih a, a sam te a lo chei a, tukverhah a dâk a. 31 Tin, Jehua kulh kawngkaa a lo luh lai takin, “Ṭha lam thu em ni le, nang, mahni pute thattu, Zimri pa?” a lo ti a. 32 Tin, ani chu tukverh lam hawi chuan a han dâk chho va, “Tu nge ka lama ṭang che u? Tute nge?” a ti a. Mi tilreh pahnih emaw, pathum emaw hi a lam hawiin an lo dâk chhuak a. 33 Tin, ani chuan, “Han theh thla rawh u,” a ti a. Chutichuan, an theh thla a, a thi chuan bang leh sakawrte chu a per nguai mai a; tin, ani chuan a lo chîl a. 34 Tin, a lût a, a eiin a in a. “Anchhe dawngnu kha va ngaihven ta ula, va phûm rawh u, lal fanu a ni si a,” a ti a. 35 Tin, phûm tûrin an va kal a; nimahsela, a luruh te, a kebâwr te, a kutphahbâwr te ngawt lo chu an va hmu ta lo va. 36 Chutichuan, an lo kal leh a, an rawn hrilh a. Tin, ani chuan, “Hei hi LALPAN a chhiahhlawh Tisbe mi Elija hmanga, ‘Jezreel kulh bulah uiin Jezebeli chu an la ei ang a; 37 Jezebeli ruang chu Jezreel khaw kulh bula huana êk dûr ang mai a la ni ang a; tichuan, “Hei chu Jezebeli a ni â!” an tih loh nân,’ tih thu a sawi kha a nih hi,” a ti a.
Ahaba thlahte an that mang
1 Ahaban Samari-ah chuan fapa sawmsarih a nei a. Tin, Jehua chuan Samari-ah, Jezreel khaw hotu, upate hnênah leh Ahaba fate lo enkawl tleitute hnênah chuan, 2 “He lehkha hi in hmuh veleh, in pu fate chu in hnênah an awm a ni a; tin, tawlailîrte, sakawrte, kulhpui nei khuate pawh, râlthuamna nên in nei a; 3 chutichuan, in pu fate zînga mi a ṭha ber leh a fel ber zawng chhuak ula, a pa lalṭhutthlêngah ṭhuttîr ula, in pu chhûngte do chu dopui rawh u,” tia ziak lehkha a thawn a. 4 Nimahsela, anni chuan an hlau ta êm êm mai a, “Ngai teh u, lal pahnih pawh khân an chelh tawh lo a ni a, keinin engtin nge kan chelh tehlul ang?” an ti a. 5 Tin, lal in chhûnga hotu ber te, khawpui awptu te, upaho te, naupangho lo enkawl tleitute nên chuan Jehua hnênah, “I chhiahhlawhte kan ni e, ti tûra min hrilh apiang chu kan ti zêl ang; tu mah lalah kan siam lo vang; nangin ṭha i tih ang angin ti ang che,” tiin mi an tîr a. 6 Tin, an hnênah, “Ka lama ṭang in niha, ka thu in awih dâwn chuan in pu fapate lu han la ula, naktûk hetih hun hma hian Jezreel khuaah ka hnênah lo kal ang che u,” tiin lehkha a thawn leh a. Lal fapate chu sawmsarih an ni a, khawpui mi lianho, anmahni enkawl tleitute hnênah chuan an awm a. 7 Tin, lehkha chu an han hmuh chuan heti hi a ni a, lal fapate chu an man a, a sawmsarih chuan an that a, an lu chu bâwmrângah an dah a, Jezreel khuaah a hnênah an thawn ta a. 8 Tin, zualko a lo thleng a, “Lal fapate lu chu an rawn la ta e,” tiin a hrilh a. Tin, ani chuan, “Kulh luhna kawngka bulah hmun hnihah tiang khâwm ula, naktûk thlengin awm rawh se,” a ti a. 9 Tin, a tûkah chuan heti hi a ni a, a va chhuak a, a ding a, mi zawng zawng hnênah chuan, “Mi fel in ni e; ngai teh u, ka pu chu ka phiar a, ka lo tihlum ta tak a; a nih leh, hêngho zawng zawng hi tu thah nge ni? 10 LALPAN Ahaba chhûngte chungchâng thu a sawi, ‘LALPA thu chu leilungah hian a luang ral hlek lo vang tih hre rawh u,’ tia LALPAN a chhiahhlawh Elija hmanga a sawi kha a rawn hlen ta a nih hi,” a ti a. 11 Chutichuan, Jehua chuan Jezreel khuaa Ahaba chhûngte la awm zawng zawng leh, a mi lian zawng zawng leh a ṭhian zawng zawng leh, a puithiamte chu pakhat mah zuahsak hlek lovin a that fai vek a. 12 Tin, a tho va, a chhuak a, Samari-ah a kal ta a.
Lal Ahazia chhûngte an that
13 Jehua chuan Juda lal Ahazia unauteho a hmu a, “Tute nge in nih?” a ti a. Tin anni chuan, “Ahazia unaute kan ni a, lal fateho leh lalnu fateho chibai kan zuk bûk dâwn a ni,” tiin an chhâng a. 14 Tin, ani chuan, “A nungin man rawh u,” a ti a. Tichuan, a nungin an man a, berâm hmul mehna in khur bulah chuan an that a, mi sawmli leh pahnih zet an ni a; pakhat mah a zuah lo.
Ahaba chhûngte zawng zawng an that
15 Tin, chuta ta a chhuah hnu chuan Rekaba fapa Jehonadaba, amah hmuak tûra lo kal a va hmu a; tichuan, chibai a bûk a, a hnênah, “I chunga rilru dik ka pu ang hian, rilru dik i pu ve emaw chu?” a ti a. Jehonadaba chuan, “Pu e,” tiin a chhâng a. “A nih leh i kut mi han pe teh,” a ti a. Tichuan, a kut chu a han pe a; tin, ani chuan a hnênah a tawlailîr chhûngah a kai lût a. 16 Tin, ani chuan, “Ka hnênah lo kal ve la, LALPA tâna ṭhahnem ka ngaihzia hi han hmu ve teh rêng khai,” a ti a. Chutichuan, a tawlailîrah a chuantîr ve ta a. 17 Tin, Samari a va thlen chuan, Ahaba chhûngte Samari-a la awm chhunate chu a tihboral zawh vek hma loh chuan a that zêl a, Elija hnêna a sawi LALPA thu ang ngei khân.
Baala betute an that
18 Tin, Jehua chuan mipuiho zawng zawng chu a ko khâwm a, an hnênah chuan, “Ahaba khân Baala rawng hi a bâwl hlek chauh a ni a, Jehua erawh hi chuan nasa takin a nia a bâwl dâwn ni. 19 Chutichuan, Baala zâwlneiho zawng zawngte, a betu zawng zawngte leh a puithiam zawng zawngte ka hnênah hian han ko khâwm teh u. Tu mah kim lo suh se; Baala hnênah hian inthawina ropui tak hlan tûr ka nei a; tu pawh a kim lo apiang chu a nung hlek lo vang,” a ti a. Nimahsela, Jehua chuan Baala betute chu tihhlum tumin, fin vervêkin a ti a ni. 20 Tin, Jehua chuan, “Baala hmingin kûtpui siam rawh u,” a ti a. Tichuan, chu chu an than vêl ta a. 21 Tin, Jehua chuan Israel ram zawng zawngah a thawn vêl a; tichuan, Baala betute zawng zawng chu an lo kal a, tel lo rêng rêng an awm lo. Tin, Baala inah chuan an lût a; tin, Baala in chu kawngka aṭanga kawmchâr thlengin an khat hmur mai a. 22 Tin, inthuamna puan enkawltu hnênah, “Baala betu zawng zawngte hi inthuamna puan han lâksak rawh,” a ti a. Tichuan, inthuamna puante chu a rawn lâksak a. 23 Tin, Jehua chu, Rekaba fapa Jehonadaba nên Baala inah chuan an lût a; tin, Baala betute hnênah chuan, “Hetah hian Baala betute chauh lo, LALPA mite hi an lo awm ve dah ang e, zawng ula, en vêl teh u,” a ti a. 24 Tin, inthawinate leh hâlral thilhlan hlân tûrin an lût ta a. Jehua chuan pâwnah mi sawmriat a lo dintîr tawh rêng a, “Hêng in kuta ka pêk che u hi tu pawh an chhuah vaih chuan, a chhuahtu chuan a nun aiah ama nunna chu a chân ang,” a ti a. 25 Tin, hâlral thilhlan a hlan zawh veleh heti hi a ni a, Jehua chuan vêngtu sipai leh an hotute hnênah, “Va lût ula, va that rawh u; tu mah chhuahtîr suh u,” a ti a. Tin, khandaihin an sât chiam a; tin, vêngtu sipai leh an hotute chuan an paih chhuak a; tin, Baala in chhûngrilah chuan an lût zêl a. 26 Tin, Baala ina milemte chu an la chhuak a, an hâl a. 27 Tin, Baala lungphun chu an tichim a, Baala in chu an tichhia a, dailênna inah an hmang ta a, tûn thleng hian an la hmang a ni. 28 Chutiang chuan Jehua chuan Israel ram ata Baala chu a tiboral a ni. 29 Nimahsela, Nebata fapa Jeroboama sualna - Israel-hote thil tihsualtîra a tihte chu Jehua chuan a bân chuang lo, chu chu Bethel khua leh Dan khuaa rangkachak bâwngno lemte biak a ni. 30 Tin, LALPAN Jehua hnênah, “Ka mittlung taka thil i tih avâng leh ka rilru duhthusâm ang taka Ahaba chhûngte chunga i tih avângin, i fapate chu chhuan lina thlengin Israel-te lalṭhutthlêngah an ṭhu ang,” a ti a. 31 Nimahsela, Jehua chuan LALPA, Israel-te Pathian dân chu a thinlung zawng zawngin a pawm lo va; Jeroboaman Israel-hote thil tihsualtîra a tih sual kha a bân chuang lo va.
Jehua a thi
32 Chûng lai chuan LALPAN Israel-te ram chu a tihzîmsak ṭan ta a; tichuan, Hazaelan Israel ram zawng zawngah chuan a hneh zêl a; 33 Jordan aṭanga khawchhak lam Gilead ram zawng zawng - Gad-hote, Reuben-hote, Manase-hote - Arnon ruama Aroer aṭanga Gilead leh Basan ram thleng rakin. 34 Jehua chanchin dangte, a thiltih zawng zawngte, a thiltihtheihzia zawng zawngte chu Israel lalte lal lai thu ziakna buah chuan a chuang a ni lâwm ni? 35 Tichuan, Jehua chu a pi leh pute hnênah chuan a muhîl a, Samaria khuaah an phûm ta a. Tin, a fapa Jehoahaza chu a aiawhin a lal ta a. 36 Tin, Samari rama Israel-te chunga Jehua rorêl chhûng chu kum sawmhnih leh kum riat a ni.
Juda lalnu Athali
1 Ahazia nu Athalin a fapa a thi tih a lo hriat chuan, a tho va, lal fate zawng zawng chu a that vek a. 2 Ahazia fapa Joasa erawh chu Lal Jorama fanu, Ahazia farnu Jehosebi chuan lal fapa an thahte zîng ata chu a hruai bo va, a enkawltu nên khum pindanah a awmtîr a, Athali hmuh theih loh tûrin an thukru a; tichuan, thah a ni ta lo va. 3 Tin, ani chu amah nên chuan LALPA inah kum ruk an biru a; tichuan, Athali chuan chu ramah chuan ro a rêl ta a. 4 Tin, a kum sarihnaah chuan Jehoiadan Kereth mite leh vêngtu sipaite zînga mi sipai za hotute chu a kohtîr a, LALPA inah a hnênah a hruai luhtîr a; tin, an hnênah thu a thlung a, LALPA inah chuan chhia a chhamtîr a, lal fapa chu a entîr hlawm a. 5 Tin, ani chuan, “In tih tûr chu hetiang hi a ni: in zînga Chawlhnia lo kal tûrte hi hmun thuma ṭhena hmun khatin lal in chu in vêng ang a, 6 hmun thuma ṭhena hmun khat chu Sur kulh kawngkaah in awm ang a, hmun thuma ṭhena hmun khat chu vêngtute hnung lama kulh kawngkaah in awm ang; chutiang chuan in chu in vêng ang a, a dangtuah in awm tûr a ni. 7 In zînga pawl hnih, Chawlhnia ṭîn tûr zawng zawng chuan lal kiang velah LALPA in chu in vêng ang a. 8 Tin, mi tinin hriamhrei kengin lal chu in hual vêl ang a; tu pawh hual chhûnga lo lût apiang chu lo thah zêl tûr a ni. Lal chu a lût leh a chhuak chu zui zêl rawh u,” tiin thu a pe a. 9 Tin, sipai za hotute chuan puithiam Jehoiada thupêk ang zawng zawng chuan an ti a; tin, mahni hote ṭheuh Chawlhnia lo kal tûrte leh, Chawlhnia ṭîn tûrte chu an hruai a, puithiam Jehoiada hnênah an kal a. 10 Tin, puithiam chuan sipai za hotute chu LALPA ina awm, Lal Davida fei leh phawte chu a pe a. 11 Tin, vêngtu sipaite chuan hriamhrei keng ṭheuhvin, in ding lampang aṭanga vei lampang thlengin, maichâm leh in hrûlah chuan lal chu an din hual mup a. 12 Tichuan, lal fapa chu a rawn hruai chhuak a, lallukhum a khumtîr a, hriattîrna thu chu a pe a; tin, lalah an siam a, hriak an thih a; tin, an kut an bêng a, “Pathianin lalber humhim rawh se,” an ti a. 13 Tin, vêngtu sipaite leh mipuihote thâwm chu Athalin a lo hriat chuan, LALPA inah mipuite zîngah chuan a va kal a. 14 Tin, a han en a, ngai teh, lal chu dân angin ban hrûlah a lo ding a, sipai hotute leh tawtawrâwt tumtute chu lal bulah an ding a. Tin, chumi rama mi zawng zawng chu an hlim êm êm a, tawtawrâwt an hâm chiam a. Tichuan, Athali chuan a puante a pawt thlêr a, “Phiarrûkna! Phiarrûkna a ni ta le!” tiin a au va. 15 Tin, puithiam Jehoiada chuan sipaite chunga hotua ruat sipai za hotute chu thu a pe a, an hnênah, “Sipaihote kârah chhuahtîr rawh u; tu pawh a zui apiang chu khandaiha sah hlum tûr a ni,” a ti a; puithiam chuan, “LALPA inah zawng thah tûr a ni lo ve,” a lo ti tawh si a. 16 Chutichuan, kawng an kian a; tin, sakawr luhna kawngah lal inah a kal a; chutah chuan a ni, an thah tâk ni.
Puithiam Jehoiadan thuthlung a siam thar
17 Tin, Jehoiada chuan LALPA leh lal leh mipuite kârah chuan LALPA mite an lo nihna tûr thu a thlung ta a; lal leh mipuite kârah pawh. 18 Tin, chumi rama mi zawng zawng chu Baala inah an kal a, an tichim a; a maichâmte leh a lemte chu an tisawm dep a, Baala puithiam Matana pawh maichâm bulah an that a. Tin, puithiam chuan LALPA in vêngtu hotute a ruat a. 19 Tin, sipai za hotute, Kereth mite, vêngtu sipaite leh, chumi rama mi zawng zawng chu a hruai a, LALPA in ata lal chu an han hruai thla a, vêngtute kawngkaa lûtin lal inah an kal a. Tichuan, lalhote lalṭhutthlêngah a ṭhu ta a. 20 Chutichuan, chumi rama mi zawng zawng chu an lâwm a; tin, khawpui chu buai lovin a awm ta a; tin, Athali chu khandaihin lal inah an that a. 21 Jehoasa chu ro a rêl ṭan lai chuan kum sarih mi a ni.
Juda lal Joasa
1 Jehua kum sarih a lal kum chuan Jehoasa chu a lal ṭan a; Jerusalem khuaah kum sawmli a lal a; a nu hming chu Zibi, Beer-seba khuaa mi a ni. 2 Tin, puithiam Jehoiadan Jehoasa chu a zirtîr chhûng zawng LALPA mit hmuha thil ṭha a ti ṭhîn a. 3 Amaherawhchu, hmun sângte zawng thehthang bo a ni chuang lo; hmun sângahte chuan mite chu an la inthawiin rimtui an la hâl reng ṭhîn. 4 Tin, Jehoasan puithiamte hnênah, “LALPA ina lâk luh thil serh tlanna sum zawng zawng, chhiar tawhte zînga kal apiangte tâna tuk, an nun tlanna sum te, tu pawhin LALPA ina lâk luh an phal sum zawng zawngte chu, 5 puithiamten an hmêlhriatte hnên aṭangin lo la ṭheuh sela; tichuan, in chhia, a chhe lai apiang siam rawh se,” a ti a. 6 Nimahsela, heti hi a ni a, Lal Jehoasa chu kum sawmhnih leh kum thum a lal hnu pawhin puithiamte chuan in chhia chu an la siam lo fo va. 7 Tichuan, Lal Jehoasa chuan puithiam Jehoiada leh puithiam dangte chu a ko va, an hnênah, “Engati nge in chhe laite hi in siam loh? Tûnah zawng in hmêlhriatte hnên ata tangka chu la tawh suh ula, in chhe siam nân pe chhuak tawh zâwk rawh u,” a ti a. 8 Tin, puithiamte chuan mite hnên ata tangka lâk tawh loh leh, in chhe laite siamtu nih loh chu an remti a. 9 Amaherawhchu, puithiam Jehoiadan bâwm a la a, a chhîn a rek pawp a, LALPA ina luha ding lampang, maichâm bulah a hûng a; chutah chuan LALPA ina tangka lâk luh zawng zawng chu kawngkhâr vêngtu puithiamte chuan an la dah zêl a. 10 Tin, heti hi a ni a, bâwmah chuan tangka a tam ta hle tih an hriatin, lal lehkhaziaktu leh puithiam lalber chu an han kal a, an fûn a, LALPA ina tangka awm chin chu an chhiar a. 11-12 Tin, an tangka chhiar chu hnathawkho, LALPA in satute chunga hotute an pe a, anni chuan LALPA in beitu, themthiamte leh in satute hlawhah te, lung chhertute leh lung lai chhuaktute hlawhah te, LALPA in chhe laite siamna tûr thing leh lung chherah te leh in siam nâna mamawh apiangahte an hmang ṭhîn a. 13 Amaherawhchu, LALPA in chhûnga an tangka rawn lâk chuan LALPA in atân tangkaraw note, khâwnvâr puan chehnate, maihûnte, tawtawrâwtte, rangkachak bungbêlte, tangkaraw bungbêlte an siam lo; 14 hnathawktute an pe ṭhîn a, anni chuan LALPA in siam nan an hmang zâwk ṭhîn a ni. 15 Tin, hnathawktute pêk atâna tangka an vawntîrate pawh kha an en zuipui chuang lêm lo; anni chuan rinawm takin an ti si ṭhîn a. 16 Bawhchhiat thawina thilhlan tangka leh, sual thawina thilhlan tangkate chu LALPA inah chuan an la lût lo; puithiamte pual a ni. 17 Tichuan, Suria lal Hazaela chuan Gath khua a han bei a, a han la a; tin, Hazaela chu Jerusalem-a kal zêl a tum a. 18 Tin, Juda lal Jehoasa chuan Juda lal a puteho Jehosaphata te, Jehorama te, Ahazia te lo hlan tawh thil serh zawng zawng leh, ama thil serhte leh, LALPA ina mi leh lal ina ro dah khâwmnaa mi rangkachak awm zawng zawng chu a la vek a, Suria lal Hazaela a thawn a; tichuan, Jerusalem chu a hawisan leh ta a. 19 Tichuan, Joasa chanchin dang te, a thiltih zawng zawngte chu Juda lalte lal lai thu ziakna buah a chuang a ni lâwm ni? 20 Tin, a mite chu an tho va, an phiarru a, Joasa chu Silla pan chhukna kawnga Milo inah an bei a, an tihlum a. 21 Ama mi Simeathi fapa Jozakara leh Somera fapa Jehozabada-ten an that a ni; tichuan, a pi leh pute zîngah Davida khawpuian an phûm a. Tichuan, a fapa Amazia chu a aiawhin a lal ta a.
Israel lal Jehoahaza
1 Juda lal Ahazia fapa Joasa kum sawmhnih leh kum thum a lal kum chuan, Jehua fapa Jehoahaza chu Israel-te chungah Samari khuaan a lal ṭan a, kum sâwm leh kum sarih a lal a. 2 Tin, LALPA mit hmuha thil ṭha lo tak a ti ṭhîn a, Israel-hote thil tihsualtîra a tih Nebata fapa Jeroboama sualnate kha a chîng ve a, a kalsan leh ta lo. 3 Tin, LALPA chu Israel-te chungah chuan a thinrim ta êm êm a; tichuan, Suria lal Hazaela kutah leh Hazaela fapa Benhadada kutah chuan a pe ta zêl a. 4 Tin, Jehoahaza chuan LALPA hnênah a ngên chiam a; tin, LALPAN a thu chu a lo ngaihthlâksak a; Israel-te hnehchhiaha an awma, Suria lalin anmahni a hnehchhiahzia chu a hmu reng si a. 5 Tichuan, LALPAN Israel-hote chu chhandamtu a pe a; chutichuan, Suria-hote hnuaia an awm chu an chhuak a, Israela thlahte chu tûn hma ang bawk khân anmahni in lamah an awm leh ta hle hle a. 6 (Amaherawhchu, Israel-te thil tihsualtîra a tih Jeroboama chhûngteho sualnate kha an kalsan lo va, an la chîng ta reng zâwk a; tin, Samari khuaah chuan Aseri pawh chu a la awm reng nghe nghe a.) 7 Jehoahaza chu a mite zînga sakawr chung chuang mi sawmnga leh, tawlailîr sâwm leh, sipai sîngkhat tih loh chu neih a phalsak si lo va; Suria lal chuan a tiboral vek a, vaivut chîl dip ang maiin a siam a ni. 8 Tichuan, Jehoahaza chanchin dang te, a thiltih zawng zawng te, a thiltihtheihziate chu Israel lalte lal lai thu ziakna buah a chuang a ni lâwm ni? 9 Tin, Jehoahaza chu a pi leh pute hnênah a muhîl ta a; tin, Samari khuaah an phûm a. Tin, a fapa Joasa chu a aiawhin a lal ta a.
Israel lal Jehoasa
10 Juda lal Joasa kum sawmthum leh kum sarih a lal kum chuan Jehoahaza fapa Jehoasa chu Israel-te chungah Samari khuaan a lal ṭan a, kum sâwm leh kum ruk a lal a, 11 Tin, LALPA mit hmuha thil ṭha lo tak a ti ṭhîn a; Israel-te thil tihsualtîra a tih Nebata fapa Jeroboama sualna zawng zawngte kha a kalsan lo va, a la chîng ta reng zâwk a. 12 Tichuan, Joasa chanchin dang te, a thiltih zawng zawng te, Juda lal Amazia a beih laia a thiltihtheihziate chu Israel lalte lal lai thu ziakna buah a chuang a ni lâwm ni? 13 Tin, Joasa chu a pi leh pute hnênah a muhîl ta a; tin, Jeroboama chu a lalṭhutthlêngah a ṭhu a; tin, Joasa chu Samari khuaah Israel lalte zîngah an phûm a.
Elisa a thi
14 Tin, Elisa chu a thihpuina tûr natnain a lo na tawh a; tichuan, Israel lal Joasa chu a hnênah a zuk kal a, a ṭah a, “Ka pa, ka pa, Israel-te tawlailîr leh sakawr chung chuang mite hentu,” a ti a. 15 Tin, Elisa chuan a hnênah, “Thalngul leh thalte han la teh,” a ti a; tin, thalngul leh thalte a han la a. 16 Tin, Israel-te lal hnênah chuan, “Thalngul kha han chelh teh,” a ti a; tichuan, a han chelh a. Tin, Elisa chuan lal kut chungah a kut a nghat a. 17 Tin, ani chuan, “Chhak lam tukverh han hawng teh,” a ti a; tin, a han hawng a. Tin, Elisa chuan, “Kâp rawh,” a ti a; tin, a han kâp a. Tin, ani chuan, “LALPA hnehna thal, Suria-ho hnehna thal a nih kha; Aphek khuaah chuan Suria-hote chu boral dêr khawpin i hneh dâwn nia,” a ti a. 18 Tin, “Thalte kha han la teh,” a ti leh a; tichuan, a han la a. Tin, Israel lal hnênah chuan, “Lei kha han chhun teh,” a ti a; tichuan, vawi thum a chhun a, a bâng ta mai a. 19 Tichuan, Pathian mi chu a chungah a thinrim ta a, “Vawi nga vawi ruk lai i chhun tûr asin ni le; tichuan, Suria-hote chu boral dêr khawpin i hneh tûr a ni a. Amaherawhchu, Suria-ho chu vawi thum chauh i hneh dâwn a nih tâk hi,” a ti a. 20 Tin, Elisa chu a thi a, an phûm ta a. Tin, kum a lo vei hian Moab-ho pâwlte chuan an ram chu an rawn rûn ṭhîn a. 21 Tin, mi pakhat an phûm dâwn lai takin heti hi a ni a, ngai teh, hmêlma pâwl pakhat an han hmu a; tichuan, chu mi chu Elisa thlânah chuan an thlâk ta mai a; tin, a ruang chuan Elisa ruhte chu a zuk deh veleh a lo nung leh a, a ding ta mai a.
Israel leh Suria indo
22 Tin, Suria lal Hazaela chuan Jehoahaza chhanah chuan Israel-te chu a hnehchhiah reng a. 23 Nimahsela, LALPAN Abrahama hnênah te, Isaaka hnênah te, Jakoba hnênah te thu a thlun avângin anmahni chu a khawngaih a, a lainat a, a ngaihsak a, anmahni chu a tiboral duh lo va, a hnên ata a la paih thla duh lo cheu va. 24 Tin, Suria lal Hazaela chu a thi a; a fapa Benhadada chu a aiawhin a lal ta a. 25 Tin, Jehoahaza fapa Jehoasa chuan Hazaela fapa Benhadadan a pa Jehoahaza a rûna, khua a lâksakte kha a chhuhsak leh a. Joasa chuan vawi thum a hneh a, Israel ram khuate chu a la leh a.
Juda lal Amazia
1 Israel lal Joahaza fapa Joasa kum hnih a lal kum chuan Juda lal Joasa fapa Amazia a lal ṭan a. 2 A lal ṭan tirh chuan kum sawmhnih leh kum nga mi a ni a, Jerusalem-ah kum sawmhnih leh kum kua a lal a; a nu hming chu Jehoadini, Jerusalem mi a ni. 3 Tin, LALPA mit hmuha thil fel tak a ti ṭhîn a, a pu Davida erawh chu a tluk lo; a pa Joasa thiltih ang apiang a ti ve ṭhîn a. 4 Amaherawhchu, hmun sângte zawng thehthang bo a ni chuang lo; hmun sângahte chuan mite chu an la inthawiin, rimtui an la hâl reng ṭhîn. 5 Tin, a ram chu a han din ngheh veleh heti hi a ni a, a mite, a pa, lal thattute chu a that ve thung a. 6 Amaherawhchu, chûng tualthattu fate chu a that lo; Mosia dân bua, “Fate avângin pate tihhlum tûr a ni lo va, pate avângin fate tihhlum tûr a ni hek lo, mi tin mahni sual avângin an thi tûr a ni,” tia LALPA thupêk dân ziak ang khân. 7 Edom-ho chu Chi Ruamah sîngkhat a that a, Sela khua a bei a, a la a, a hmingah chuan Joktheel a ti a, tûn thlengin an la ti a ni. 8 Tichuan, Amazian Israel lal Jehua fapa Jehoahaza fa Jehoasa hnênah, “Hawh teh, hmaichhanah i lo inen teh ang,” tiin mi a tîr a. 9 Tin, Israel lal Jehoasa chuan Juda lal Amazia hnênah, “Lebanon tlânga hlîngin Lebanon tlânga sidar hnênah, ‘I fanu kha ka fapa nupuiah neihtîr teh khai,’ tiin a chah a; tin, Lebanon tlânga ramsa a lo kal a, hling chu a rawn chîl thlu ta dêr mai a. 10 Nang hian Edom-ho chu i hneh ngei tak a, i rilru a lo chapo ta a nih hi. I chapo kha tawmpui hle hle mai rawh; nang leh Juda ram chawp chawpa chhiatna, i tâna ṭha lo tûr thil enga tân nge i cho chhuah dâwn ni?” tiin mi a tîr ve a. 11 Nimahsela, Amazia chuan a lo ngaithla duh lo va. Chutichuan, Israel lal Jehoasa chu a han chho va; Juda lal Amazia nên chuan Juda ram Beth-semes khuaah hmaichhanah an inen ta ngei a. 12 Tin, Juda chu Israel-te lakah a lo tlâwm ta a; mi tin mahni in lamah an tlân haw ta ṭheuh va. 13 Tin, Israel lal Jehoasa chuan Juda lal Ahazia fapa Jehoasa fa Amazia chu Beth-semes-ah chuan a man a, Jerusalem khuaah a kal a, Jerusalem kulh chu Ephraim kulh kawngka aṭanga kulh kil kawngka thlengin tawng zali zet a tichim a. 14 Tin, LALPA ina mi leh lal ina ro dah khâwmnaa mi, rangkachak leh tangkarua leh bungbêl zawng zawng, a awm apiang a la a, hrênga tâng tûrte nên; tin, Samari khaw lamah a haw leh ta a. 15 Tichuan, Jehoasa thiltih chanchin dang te, a thiltihtheihzia te, Juda lal Amazia a beih thute chu Israel lalte lal lai thu ziakna buah a chuang a ni lâwm ni? 16 Tin, Jehoasa chu a pi leh pute hnênah a muhîl a, Samari khuaan Israel lalte zîngah an phûm a. Tichuan, a fapa Jeroboama chu a aiawhin a lal ta a.
Juda lal Amazia a thi
17 Juda lal Joasa fapa Amazia chu Israel-te lal Jehoahaza fapa Jehoasa thih hnuin kum sâwm leh kum nga a la dam a. 18 Tichuan, Amazia chanchin dangte chu Juda lalte lal lai thu ziakna buah a chuang a ni lâwm ni? 19 Tin, Jerusalem khuaah amah an phiarru a; tichuan, Lakis khuaah a tlân a; nimahsela, Lakis khuaah chuan mi an ûmtîr a, chutah chuan an that ta a. 20 Tin, a ruang chu sakawrin an kalpui a, a pi leh pute zîngan Davida khawpui Jerusalem-ah an phûm ta a. 21 Tin, Juda mi zawng zawngten kum sâwm leh kum ruk mi, Azaria an hruai a, a pa Amazia aiah lalah an siam ta a. 22 Ani chuan Elath khua chu a siam ṭha leh a, Juda ramah a telh leh a, chumi hnuah chuan lal chu a pi leh pute hnênah a muhîl ta a.
Israel lal Jeroboama pahnihna
23 Juda lal Joasa fapa Amazia kum sâwm leh kum nga a lal kum chuan Israel lal Joasa fapa Jeroboama chu Samari khuaah a lal ṭan a, kum sawmli leh kum khat a lal a. 24 Tin, LALPA mit hmuha thil ṭha lo tak a ti ṭhîn a; Israel-te thil tihsualtîrtu Nebata fapa Jeroboama sualna zawng zawng kha kalsan rêng a nei lo va. 25 LALPA, Israel-te Pathianin a chhiahhlawh, Gath-hepher mi Amittaia fapa zâwlnei Jona hmanga thu a sawi ang khân, Hamath luhna aṭanga Araba tuifinriat thlengin Israel ramah a telh leh a. 26 LALPAN Israel-te hrehawmzia chu a nasa êm êm mai tih a hre si a; khuahkhirh leh khirh lohte pawh an awm si lo va, Israel-te ṭanpuitu tûr tu mah an awm hek lo. 27 LALPAN Israel-te hming hi vân hnuaiah hian a tichimit hlauh dâwn tih zawng a sawi lo rêng a; Joasa fapa Jeroboama hmangin a chhandam ta zâwk a ni. 28 Tichuan, Jeroboama chanchin dang te, a thiltih zawng zawng te, a thiltihtheihzia te, a râl beih thu te, tûn hmaa Juda ram chan ni ṭhîn Damaska leh Hamath khua Israel-te tân a lo lâksak leh tâk thute chu Israel lalte lal lai thu ziakna buah a chuang a ni lâwm ni? 29 Tin, Jeroboama chu a pi leh pu, Israel lalte hnênah chuan a muhîl ve a. Tichuan, a fapa Zakaria chu a aiawhin a lal ta a.
Juda lal Uzia
1 Israel lal Jeroboama kum sawmhnih leh kum sarih a lal kum chuan Juda lal Amazia fapa Azaria a lal ṭan a. 2 A lal ṭan tirh chuan kum sâwm leh kum ruk mi a ni a, Jerusalem-ah kum sawmnga leh kum hnih a lal a; a nu hming chu Jekoli, Jerusalem mi a ni. 3 Tin, a pa Amazia thiltih ang apiang ti vein, LALPA mit hmuha thil ṭha tak a ti ṭhîn a. 4 Amaherawhchu, hmun sângte zawng thehthang bo a ni chuang lo; hmun sângahte chuan mite chu an la inthawiin, rimtui an la hâl reng ṭhîn. 5 Tin, LALPAN lal chu a rawn hrem ta a; chutichuan, a thih ni thlengin a lo phâr a, in hrangah a awm ta a. Tin, lal fapa Jothama chu an rama mite rorêlsakin in chhûng lam hotuah a awm ta a. 6 Tichuan, Azaria chanchin dang, a thiltih zawng zawngte chu Juda lalte lal lai thu ziakna buah a chuang a ni lâwm ni? 7 Tin, Azaria chu a pi leh pute hnênah chuan a muhîl a; tin, a pi leh pute zîngan Davida khawpuiah an phûm ta a. Tichuan, a fapa Jothama chu a aiawhin a lal ta a.
Israel lal Zakaria
8 Juda lal Azaria kum sawmthum leh kum riat a lal kum chuan Jeroboama fapa Zakaria chu Israel-te chungah Samari khuaan thla ruk a lal a. 9 Tin, a pute tih ang bawk LALPA mit hmuha thil ṭha lo tak a ti ṭhîn a; Israel-te thil tihsualtîrtu Nebata fapa Jeroboama sualnate kha a kalsan lo va. 10 Tin, Jabesa fapa Saluman amah a phiarru a, mipuite hmaah a bei a, a that a, a aiawhin a lal ta a. 11 Tichuan, Zakaria chanchin dangte chu ngai teh, Israel lalte lal lai thu ziakna buah chuan a chuang a ni. 12 Chu chu LALPAN Jehua hnêna, “I fapate chu chhuan lina thlengin Israel-te lalṭhutthlêngah an ṭhu ang,” tih thu a sawi kha a ni. Tichuan, chutiang tak chu a lo ni ta ngei rêng a.
Israel lal Saluma
13 Juda lal Uzia kum sawmthum leh kum kua a lal kum chuan Jabesa fapa Saluma chu a lal ṭan a; Samari khuaah thla khat chhûng a lal a. 14 Tin, Gadia fapa Menahema chu Tirza khua aṭangin a han chho va, Samari khuaah a kal a, Jabesa fapa Saluma chu Samari khuaah chuan a bei a, a that a, a aiawhin a lal ta a. 15 Tichuan, Saluma chanchin dang te, a phiarrûkna thute chu ngai teh, Israel lalte lal lai thu ziakna buah a chuang a ni. 16 Chutichuan, Menaheman Tirza aṭang chuan Tipsa khua leh a chhûnga awm zawng zawng leh a ramte chu a bei a; an inhawn loh avângin a bei a ni; chûnga nau pai lai hmeichhia zawng zawng chu a pir thlêr a.
Israel lal Menahema
17 Juda lal Azaria kum sawmthum leh kum kua a lal kum chuan, Gadia fapa Menahema chu Israel-te chungah a lal ṭan a, Samari khuaah kum sâwm a lal a. 18 Tin, LALPA mit hmuha thil ṭha lo tak a ti ṭhîn a; Israel-te thil tihsualtîrtu Nebata fapa Jeroboama sualnate kha a dam chhûngin a kalsan lo. 19 Assuria lal Pulan an ram chu a rawn bei a; ram chu a neih nghehpui theih nân Menahema chuan Pula chu tangkarua talent sâng a pe a. 20 Tin, Menahema chuan Assuria lal pêk atân Israel mi neinungho zawng zawng lakah chuan tangkarua sekel sawmnga ṭheuh a khawn a. Chutichuan, Assuria lal chu a haw leh a, chu ramah chuan a awm reng lo. 21 Tichuan, Menahema chanchin dang te, a thiltih zawng zawngte chu Israel lalte lal lai thu ziakna buah a chuang a ni lâwm ni? 22 Tin, Menahema chu a pi leh pute hnênah a muhîl a. Tichuan, a fapa Pekahia chu a aiawhin a lal ta a.
Israel lal Pekahia
23 Juda lal Azaria kum sawmnga a lal kum chuan Menahema fapa Pekahia chu Israel-te chungah Samari khuaan a lal ṭan a, kum hnih a lal a. 24 Tin, LALPA mit hmuha thil ṭha lo tak a ti ṭhîn a; Israel-te thil tihsualtîra a tih Nebata fapa Jeroboama sualnate kha a kalsan lo. 25 Tin, a sipai hotu Remalia fapa Pekan amah chu a phiarru a, Samari khuaa lal ina kulhah Argoba nên, Ariea nên a that ta a; a hnênah chuan Gilead mi sawmnga an awm ve a. Tichuan, Pekahia chu a that a, a aiawhin a lal ta a. 26 Tichuan, Pekahia chanchin dang te, a thiltih zawng zawngte chu ngai teh, Israel lalte lal lai thu ziakna buah chuan a chuang a ni.
Israel lal Peka
27 Juda lal Azaria kum sawmnga leh kum hnih a lal kum chuan, Remalia fapa Peka chu Israel-te chungah Samari khuaan a lal ṭan a, kum sawmhnih a lal a. 28 Tin, LALPA mit hmuha thil ṭha lo tak a ti ṭhîn a; Israel-te thil tihsualtîrtu Nebata fapa Jeroboama sualnate kha a kalsan lo. 29 Israel lal Peka lal laiin Assuria lal Tiglath-pileseran Ijon khua te, Abel-beth-maaka khua te, Janoa khua te, Kedes khua te, Hazor khua te, Gilead leh Galili ram te, Naphtali ram zawng zawng chu a la a; tin, Assuria raman salah a hruai a. 30 Tin, Ela fapa Hosean Remalia fapa Peka chu a phiarru a, a bei a, a that a, Uzia fapa Jothama kum sawmhnih a lal kum chuan a aiawhin a lal ta a. 31 Tichuan, Peka chanchin dang te, a thiltih zawng zawngte chu ngai teh, Israel lalte lal lai thu ziakna buah chuan a chuang a ni.
Juda lal Jothama
32 Israel lal Remalia fapa Peka kum hnih a lal kum chuan Juda lal Uzia fapa Jothama chu a lal ṭan a. 33 A lal ṭan tirh chuan kum sawmhnih leh kum nga mi a ni a; Jerusalem-ah kum sâwm leh kum ruk a lal a; a nu hming chu Jerusi, Zadoka fanu a ni. 34 Tin, a pa Uzia thiltih ang apiang ti vein LALPA mit hmuha thil ṭha tak a ti ṭhîn a. 35 Amaherawhchu, hmun sângte zawng thehthang bo a ni chuang lo; hmun sângahte chuan mite chu an la inthawiin, rimtui an hâl reng ṭhîn. LALPA in kawngka chhakta zâwk chu a siam ṭha a. 36 Tichuan, Jothama chanchin dang te, a thiltih zawng zawngte chu Juda lalte lal lai thu ziakna buah a chuang a ni lâwm ni? 37 Chûng lai chuan Suria lal Rezina leh, Remalia fapa Peka chu Juda-ho bei tûrin LALPAN a tîr ṭan ta a. 38 Tin, Jothama chu a pi leh pute hnênah a muhîl a, a pi leh pute zîngan a pu Davida khawpuiah an phûm ta a. Tichuan, a fapa Ahaza chu a aiawhin a lal ta a.
Juda lal Ahaza
1 Remalia fapa Peka kum sâwm leh kum sarih a lal kum chuan Juda lal Jothama fapa Ahaza chu a lal ṭan a. 2 Ahaza chu a lal ṭan tirhin kum sawmhnih mi a ni; tin, Jerusalem-ah kum sâwm leh kum ruk a lal a. A pu Davida angin LALPA a Pathian mit hmuha thil ṭha tak a ti ve lo va. 3 Israel lalte kawng zawh chu a zawh ve a, a ni, LALPAN Israela thlahte hmaa a hnawh chhuah tâk hnamten thil tenawm tak an tih ṭhin angin a fapa meiah a luhtîr a. 4 Tin, hmun sângah te, tlângah te, thing hring tin hnuaiahte a inthawi a, rimtui a hâl ṭhîn a. 5 Tichuan, Suria lal Rezina leh Israel lal Remalia fapa Peka chu Jerusalem bei tûrin an han chho va, Ahaza chu an han hual a; nimahsela, an hneh thei lo va. 6 Chûng lai chuan Suria lal Rezina chuan Elath khua chu Suria ram atân a la leh a, Juda-te chu Elath khua ata a hnawt chhuak a; tin, Suria-ho chuan Elath khua chu an va luah a, tûn thlengin an la awm a. 7 Chutichuan, Ahaza chuan Assuria lal Tiglath-pilesera hnênah, “I chhiahhlawh leh i fapa ka ni alâwm. Mi bei tûra lo thawk Suria lal kut ata leh Israel lal kut ata hi mi han chhanchhuak teh khai,” tiin mi a tîr a. 8 Tin, Ahaza chuan LALPA ina tangkarua leh rangkachak awm apiang, lal ina ro dah khâwmnaa mi nên a la a, Assuria lal hnênah lâwmmanah a thawn a. 9 Tin, Assuria lal chuan a thusawi chu a lo pawm a; tichuan, Assuria lal chuan Damaska khua chu a han bei a, a la a, a mite chu Kir raman salah a hruai a, Rezina chu a that a. 10 Tin, Lal Ahaza chu Assuria lal Tiglath-pilesera be tûrin Damaska khuaah a kal a, Damaska khuaa maichâm chu a va hmu a; tichuan, Lal Ahaza chuan chu maichâm lem leh an siam dân ang chiaha entawn tûr puithiam Urija hnênah a thawn a. 11 Tin, puithiam Urija chuan maichâm a han siam a; Lal Ahazan Damaska khua aṭanga a thawn ang chiah chuan puithiam Urija chuan Damaska khua aṭanga Lal Ahaza lo haw leh hmain a lo siam hman diam a. 12 Tin, Damaska khua ata lal a lo thlenin lal chuan maichâm chu a han hmu a; tin, lal chuan maichâm chu a pan hnai a, a han lâwn chho va. 13 Tin, maichâmah chuan a hâlral thilhlan te hâlin a chhangphut thilhlan te a hlân a, a in tûr thilhlan a leih a, a remna thilhlan te thisen chu a theh a. 14 Tin LALPA hmaa dâr maichâm, a maichâm leh LALPA in inkâra mi, in hma zâwn ata chu a la sawn a, a maichâm hmâr lampangah chuan a dah ta a. 15 Tin, Lal Ahaba chuan, “Maichâm lian puiah hian zîng hâlral thilhlan te, tlai lam chhangphut thilhlan te, lal hâlral thilhlan te, a chhangphut thilhlan te, kan rama mipui zawng zawng hâlral thilhlan te, an chhangphut thilhlan te, an in tûr thilhlante nên hian hâlin hlân la; tin, a chungah chuan hâlral thilhlan thisen zawng zawng leh inthawina thisen zawng zawng chu theh ang che. Dâr maichâm erawh chu ka biakna tûr a ni ang,” tiin puithiam Urija chu thu a pe a. 16 Chutichuan, puithiam Urija chuan Lal Ahaza thupêk ang zawng zawng chuan a ti ta a. 17 Tin, Lal Ahaza chuan hûnchhan khuarte chu a tichhia a, insilna bêl chu a dah sawn a; a hûnna dâr sebâwngpa ata te tuizêm chu a la thla a, lungrem chungah a hûng a. 18 Tin, Chawlhni atâna chung nei kawng ina an siam leh pâwn lama lal luhna chu Assuria lal avângin LALPA inah a thlâkthleng ta hlauh va. 19 Tichuan, Ahaza thiltih chanchin dangte chu Juda lalte lal lai thu ziakna buah a chuang a ni lâwm ni? 20 Tin, Ahaza chu a pi leh pute hnênah a muhîl a, a pi leh pute zîngan Davida khawpuiah an phûm ta a. Tichuan, a fapa Hezekia chu a aiawhin a lal ta a.
Israel lal Hosea
1 Juda lal Ahaza kum sâwm leh kum hnih a lal kum chuan Ela fapa Hosea chu Israel-te chungah Samari khuaan a lal ṭan a, kum kua a lal a. 2 Tin, LALPA mit hmuha thil ṭha lo tak a ti ṭhîn a; amaherawhchu, a hmaa Israel lalte ang êm zawngin a ti lo. 3 Assuria lal Salmaneseran a han rûn a; tichuan, Hosea chu a chhiah khuaah a awm ta a, chhiah te a pe ṭhîn a. 4 Tin, Assuria lal chuan Hosean a phiar rûk thu a lo hria a, Aigupta lal Soa hnênah mi a tîr bawk a, kum tina a pêk ṭhin ang khân Assuria lal chu chhiah a pe ta bawk si lo va; chuvângin, Assuria lal chuan tân inah phuar chungin a khung ta a.
Samari khawpui chhiat
5 Tichuan, Assuria lal chuan ram zawng zawng chu a hrût chhuak vek a, Samari khuaah a han chho va, kum thum a hual a. 6 Hosea kum kua a lal kum chuan Assuria lal chuan Samari khua chu a la a, Israel-hote chu Assuria ramah a hruai a, Hala ramah te, Gozan rama Habor luiah te, Media-ho khuaahte a awmtîr a. 7 Chutianga an lo awmna chhan chu Israela thlahte chuan Aigupta lal Pharaoa kut ata, Aigupta ram aṭanga hruai chhuaktu LALPA an Pathian chunga thil an tihsuala, pathian dangte an pawisak zâwka, 8 LALPAN Israela thlahte hmaa a lo hnawh chhuah tâk hnamte thuruat leh Israel lalte pawm thuruatte anga an awm vâng a ni. 9 Tin, Israela thlahte chuan LALPA an Pathian chungah chuan thil ṭha lo tak a rûkin an ti ṭhîn a, an khua zawng zawngah râlvêngtute in sâng aṭanga kulh nei khaw thlengin hmun sâng te an siam a. 10 Tlâng sâng tinah leh thing hring tin hnuaiah hian lungphunte phunin, Aseri te an siam a. 11 Chûng hmun sâng zawng zawngah chuan LALPAN an hmaa a ûm bo tâk hnamte tih dân ang khân rimtuite an hâl ṭhîn a; LALPA tihthinrim nân thil sual tak an ti bawk ṭhîn a, 12 LALPAN an hnêna, “Hetiang hi ti suh u,” a tih milemte rawng an bâwl bawk ṭhîn. 13 LALPA chuan, “Dân zawm tûr, in pi leh pute ka pêk leh ka chhiahhlawh zâwlneite hmanga ka hriattîr che u ang zêl chuan, in awm dân sual hi hawisan ula, ka thupêkte leh ka thuruatte chu pawm rawh u,” tiin, Israel-te leh Juda-te chu zâwlnei tin leh hmutheitu tin hmangin a hriattîr ṭhîn a. 14 Chuti chung pawhin an pawm duh lo va, an pi leh pu, LALPA an Pathian ring duh lotute an intiluhlul angin an intiluhlul ve a. 15 Tin, a thuruat te, an pi leh pute hnêna a thuthlun te, an hnêna a thuhriattîrte chu an pawisa duh lo va; thil lawilo mai mai an pawm a, engmahlo mai an lo ni ta a; an chungchâng thua LALPAN, “Ammahni ang chuan ti suh u,” a lo tih tawh, an kiang vêla hnamte tih dân an la ve a. 16 Tin, LALPA an Pathian thupêk zawng zawng chu an hawisan a, bâwngno lem chhûn pahnih an siam a; tin, Aseri an siam a, vâna awm zawng zawng khi an bia a, Baala rawng an bâwl ṭhîn a. 17 Tin, an fapate leh an fanute chu meiah an luhtîr a, aien te leh dawi te an chîng a, LALPA tihthinrim nâna a mit hmuha thil ṭha lo tak ti tûrin an inhralh a. 18 Chu vâng chuan LALPA chu Israel-te chungah a thinrim ta êm êm a, a mit hmuh phâk lohvah a suan bo ta daih a; Juda hnam chauh lo chu awm an awm ta lo va. 19 Juda-te pawh chuan LALPA an Pathian thupêkte chu an zâwm lo va, Israel-te pawm thuruatte angin an awm zâwk a. 20 Tin, LALPAN Israela thlahte rêng rêng chu a duh ta lo va, anmahni chu a tirethei a, a mit hmuh phâk lohva a suan bo daih hma loh chuan rawktute kutah a pe ta a. 21 Israel-te chu Davida chhûngte an nihna a paihsak ta si a; tichuan, Nebata fapa Jeroboama kha lalah an siam a; tin, Jeroboama chuan Israel-ten LALPA an zui chu a lo kuai pêng a, thil sual nasa tak a tihtîr a. 22-23 Tin, Israela thlahte chuan Jeroboama thil tihsual ang zawng zawng chu an ti ve a; chûngte chu LALPAN a zâwlneite zawng zawng hmanga a lo sawi tawh anga a mit hmuh phâk lohva a suan bo daih hma loh chuan an kalsan lo va. Chutichuan, Israel-hote chu anmahni ram ata Assuria ramah an hruai ta a, tûn thlengin an la awm a ni.
Assuria-hoten Israel ram an luah
24 Tin, Assuria lalin Babulon khuaa mite, Kutha khuaa mite, Ava khuaa mite, Hamath khuaa mite, Sepharvaim khuaa mite a chah chhuak a, Samari ram khuaahte chuan Israela thlahte hmun a luahtîr a; tichuan, Samari ram chu an luah a, a khuaahte chuan an awm ta a. 25 Tichuan, chuta an han awm tirh chuan heti hi a ni a, LALPA an ṭih lo va; chutichuan, LALPAN an zîngah sakeibakneite a tîr a, mi ṭhenkhat an seh a. 26 Chutichuan, Assuria lal hnênah, “I suanho hnamte, Samari ram khua i luhtîrte hian hêng lai ram Pathian biak dân hi an hre ve lo va; chu vâng chuan an zîngah sakeibakneite a tîr ta a; tin, ngai teh, hêng lai ram Pathian biak dân an hriat ve loh avângin an seh ṭhîn a ni,” tiin an sawi a. 27 Tichuan, Assuria lal chuan, “Khata sala in hruaite zînga mi puithiam pakhat hruai ula, lo awm ve sela, chu ram Pathian biak dân chu zirtîr rawh se,” tiin thu a pe a. 28 Chutichuan, Samari ram aṭanga an hruaite zînga puithiam pakhat chu Bethel khuaah a va awm a, LALPA an ṭih dân tûr a zirtîr a. 29 Nimahsela, hnam tin chuan mahni pathian thian an siam ṭheuh va, Samari miten hmun sâng an lo siam inahte chuan hnam tinin mahni awmna khua ṭheuhvah an dah a. 30 Babulon mite chuan Sukkoth-benoth an siam a; tin, Kuth-ho chuan Nergal an siam a; tin, Hamath-ho chuan Asima an siam a, 31 Ava-ho chuan Nibhaz leh Tartak an siam a; tin, Sepharvaim-ho chuan Sepharvaim-ho pathian Adrammelek leh Anammelek hmingin an fate an hâl ṭhîn a. 32 Chutichuan, LALPA chu an ṭih a, an zînga mi hmun sâng puithiamahte an insiam a, hmun sâng inahte chuan mi an thawi ṭhîn a. 33 LALPA chu an ṭih a, an hruai chhuahna rama mite hnam tih dân angin anmahni pathiante rawng chu an bâwl ṭhîn a. 34 Tûn hma lama an tih dân angin tûn thlengin an la ti reng a ni; LALPA chu an ṭih lo va, LALPAN Jakoba thlah Israel-te tia a vuahte hnênah, 35 “Pathian dangte chu ṭih suh ula, anmahni chu chibai bûk suh ula, an rawng bâwl suh ula, an hnênah inthawi suh u; 36 LALPA, thiltihtheihna nasa tak leh bân phar meuhva Aigupta ram ata hruai chhuaktu che u amah chu in ṭih zâwk tûr a ni a, amah chu chibai in bûk tûr a ni a, ama hnênah in inthawi tûr a ni. 37 Tichuan, thuruat te, rorêl te, dân te, thupêkte a lo ziaksak tâk che u kha kumkhuain in pawm reng tûr a ni a; pathian dangte chu in ṭih tûr a ni lo. 38 Tin, in hnêna thu ka thlun hi in theihnghilh tûr a ni lo; pathian dangte in ṭih tûr a ni hek lo. 39 LALPA in Pathian erawh chu in ṭih tûr a ni; tichuan, in hmêlma zawng zawngte kut ata chu a chhanchhuak ang che u,” tia thu a thluna, an tâna LALPA thupêk te, thuruat te, rorêl te, dân siamte chu an zâwm hek lo. 40 Eng ti pawhin an pawm duh chuang lo va, tûn hma lama an tih dân angin an la ti reng a. 41 Chutichuan, chûng hnamte chuan LALPA zawng an ṭih a, an milem siam chawpte rawng pawh an bâwl bawk a; chutiang bawkin an thlahte leh an thlahte thlah thleng pawhin, tûn thleng hian an pi leh pute tih angin an la ti reng a ni.
Juda lal Hezekia
1 Tin, Ela fapa Israel lal Hosea kum thum a lal kum chuan heti hi a ni a, Juda lal Ahaza fapa Hezekia chu a lal ṭan a. 2 A lal ṭan tirh chuan kum sawmhnih leh kum nga a ni; tin, Jerusalem-ah kum sawmhnih leh kum kua a lal a; a nu hming chu Abii, Zakaria fanu a ni. 3 Tin, a pu Davida thiltih apiang ti vein LALPA mit hmuha thil ṭha tak a ti ṭhîn a. 4 Hmun sângte a thehthang bo va, lungphunte a tichim a, Aseri te a kit a; tin, Mosia dâr rûl siamte chu a tikeh sawm vek a; chûng lai hun thleng chuan Israela thlahten a hnênah rimtui an hâl ṭhîn a ni; chu chu Nehustan an ti ṭhîn. 5 Ani chuan LALPA, Israel-te Pathian chu a ring a; chutichuan, a hnua Juda lal zawng zawng zîngah amah ang tu mah an awm lo va, a hmaah pawh an awm hek lo. 6 LALPA chu a vuan tlat a, amah a zui chu a bâng duh lo va, a thupêk LALPAN Mosia a pêkte chu a zâwm a. 7 Tichuan, LALPA chu a hnênah a awm a; a chhuahvahna apiangah a hmuingîl zêl a. Assuria lal chungah a hel a, a rawng a bâwl ta lo va. 8 Philistia-hote chu Gaza khaw thlengin a ram chin zawng zawng nên, râlvêngtute in sâng aṭanga kulh nei khaw thlengin a hneh vek a. 9 Tin, Lal Hezekia kum li a lal kum, Israel lal Ela fapa Hosea kum sarih a lal kum chuan heti hi a ni a, Assuria lal Salmanesera chuan Samari khua a han bei a, a han hual a. 10 Tin, kum thum a vei kumin an la ta a; Hezekia kum ruk a lal kum, Israel lal Hosea kum kua a lal kumin a ni, Samari khua chu an lâk ni. 11-12 Tin, LALPA an Pathian thu chu an pawm duh lohva, a thuthlung chu an bawhchhiat zâwka, LALPAN a chhiahhlawh Mosia thu a pêk zawng zawngte ngei kha an pawm duh lohva an tih duh loh avângin, Assuria lal chuan Israel-hote chu Assuria ramah a hruai a, Hala ramah te, Gozan rama Habor luiah te, Media-ho khuaahte a awmtîr ta a ni.
Assuria-hovin Jerusalem an vau
13 Tin, Lal Hezekia kum sâwm leh kum li a kal kumin, Assuria ram lal Senakeriba chu Judai rama khua kulhpui nei zawng zawng bei tûrin a han chho va, a la ta a. 14 Tin, Juda lal Hezekia chuan Lakis khuaa Assuria lal hnênah chuan, “Thil ka lo tisual ta a ni e; mi kiansan leh mai rawh; i mi tuk apiang chu ka pe zêl ang e,” tiin thu a thawn a. Tin, Assuria lal chuan Juda lal Hezekia chu tangkarua talent zathum leh rangkachak talent sawmthum a tuk a. 15 Tichuan, Hezekia chuan LALPA ina tangkarua awm zawng zawng leh lal ina ro dah khâwmnaa mi zawng zawng chu a pe a. 16 Chumi ṭum ngei chuan Hezekia chuan LALPA biak in kawngkhâra mi leh, Juda lal Hezekian bana rangkachak a luante chu a la thla vek a, Assuria lal a pe a ni. 17 Tin, Assuria lal chuan Tartan te, Rabsari te leh Rabsake te sipai tam tak nên Lakis khua aṭangin Jerusalem khuaa Lal Hezekia hnênah chuan a tîr a. Tin, Jerusalem khua chu an han thleng a. Tin, an han thlen chuan Puansutu Phûl kalkawnga dîl chhakta zâwk tuilâkna kiangah chuan an ding a. 18 Tin, lal chu an han auh chuan, in chhûng lam hotu Hilkia fapa Eliakima te, lehkhaziaktu Sebna te, chanchin ziaktu Asapha fapa Joa te chu an hnênah an va chhuak a. 19 Tin, Rabsakea chuan an hnênah, “Hezekia hnênah han sawi rawh u khai, ‘Lal ropui tak Assuria lal chuan heti hian a ti: I rin i nghahna hi eng nge ni le? 20 Indona atân chuan remruat thiam leh chakna kan nei a ni, i ti a; nimahsela, chu chu ṭawngka mai a ni. Tu nge i rina ka chunga i hel tâk ni le? 21 Ngai teh, he luang sâwp tiang, Aigupta hi i ring ta a ni a; chu chu miin a rinchhan chuan a kutah a chhun ang; Aigupta lal Pharaoa chu amah ringtu zawng zawng chungah chuan chutiang chu a ni ṭhîn. 22 A nih loh leh ka hnênah, “LALPA kan Pathian chu a ni kan rin ni,” in tih chuan, ani chu Hezekian Juda-ho leh Jerusalem-ho hnêna, “Jerusalem khuaa he maichâm hmaah hian in be tûr a ni,” tia a hmun sângte leh a maichâmte a lâk bosaka kha a ni lâwm ni? 23 “ ‘Chutichuan, ka pu Assuria lal nên chuan thu intiam rawh u khai; tichuan, sakawr sânghnih ka pe ang che, a chunga chuang tûrte i hmuh theih dâwn phawt chuan. 24 Engtin nge tawlailîrte leh sakawr chung chuang mite thu-ah Aigupta chunga i rinna nghatin, ka pu mite zînga tê ber hotu pakhat pawh hi i dan kîr zawh dâwn tehlul ni? 25 Tin, he ram hi LALPA thu lova tichhe tûra lo chho em ka nih? LALPAN chu ram chu han beia, tichhe tûrin min hrilh a ni,’ tiin,” a ti a. 26 Tin, Hilkia fapa Eliakima leh Sebna leh Joa-te chuan Rabsakea hnênah, “Khawngaih takin i chhiahhlawhte hi Suria ṭawngin min be tawh zâwk rawh, chu chu kan hre thei si a; kulh chunga mite beng hriatah hian Juda ṭawngin min be tawh suh,” an ti a. 27 Nimahsela, Rabsakea chuan an hnênah, “Ka pu chuan in pu hnên leh in hnên chauhvah hêng thu hi sawi tûrin mi tîr em ni? Kulh chunga ṭhuho, nangni leh anni, mahni êk la ei tûr leh mahni zun la in tûrte hnênah hian mi tîr bawk a ni lâwm ni?” a ti a. 28 Tin, Rabsakea chu a ding a, Juda ṭawngin aw ring takin a au va, “Lal ropui tak Assuria lal thu hi ngaithla rawh u. 29 Lal chuan heti hian a ti: Hezekia bumin awm suh u; ani chuan a kut ata a chhanhim thei dâwn si lo che u a; 30 Hezekia chuan, ‘LALPAN min chhanhim ngei ang a; tin, he khawpui hi Assuria lal kutah pêk a ni lo vang,’ tiin LALPA chu rintîr che u suh se. 31-32 “Hezekia thu chu pawm suh u; Assuria lal chuan heti hian a ti a ni: ‘Min rem ula, ka hnênah hian lo chhuak rawh u; tin, nangmahni ram anga buh leh uain ram, chhang leh grêp huan ram, olive leh khawizu ram, thi lova in nun theihna tûr rama ka rawn hruai hma loh che u chuan mi tinin mahni grêp hruiha mi leh mi tinin mahni theipui kûnga mi ei ṭheuh ula, mi tinin mahni tuikhur tui tlân ṭheuh rawh u. Hezekian, LALPAN min chhanhim ang, tia a thlêm che u pawhin pawm duh suh u. 33 Hnam tinte pathian zawng zawng zînga mi rêng rêngin an ram chu Assuria lal lakah an chhanhim tawh ngai em ni? 34 Hamath leh Arpad pathiante kha khawiah nge an awm tâk? Sepharvaim te, Hena te, Iva te pathiante pawh kha khawiah nge an awm tâk? Samari khua kha ka lakah an chhanhim em ni? 35 Ram tin pathian zawng zawng zînga mi chuan tute nge an ram ka laka chhanhima, LALPA chuan Jerusalem khua hi ka lakah a han chhanhim tehlul ang?’ tiin,” a ti a. 36 Anni erawh chu an ngawi reng a, kam khat mahin an chhâng lo; lal thupêk dân chu, “Ani chu chhâng suh u,” tih a ni si a. 37 Chutichuan, lal in chhûng lam hotu Hilkia fapa Eliakima te, lehkhaziaktu Sebna te, chanchin ziaktu Asapha fapa Joa te chu an silhfên pawh thlêrte inbelin Hezekia hnênah chuan an kal a, Rabsakea thusawite chu an hrilh a.
Lalin zâwlnei Isaia a râwn
1 Tin, Lal Hezekia chuan chu chu a hriatin heti hi a ni a, a silhfênte chu a pawt thlêr a, saiip puan a inbel a, LALPA inah chuan a lût ta a. 2 Tin, in chhûng lam hotu Eliakima leh, lehkhaziaktu Sebna leh, puithiam upate chu saiip puan inbelin Amoza fapa zâwlnei Isaia hnênah a tîr a. 3 Tin, anni chuan a hnênah, “Hezekian heti hian a ti: ‘Vawiin ni hi manganna leh zilhhauna leh hmingchhiatna ni a ni; nautê chu an pian a hun tawh si a, hring tûrin chakna a awm tawh si lo. 4 A pu Assuria lalin Pathian nung sawichhe tûra a tirh Rabsakea thusawi zawng zawng chu LALPA i Pathian chuan a hria ang a, a thusawi, LALPA i Pathianin a hriata chu a la zilhhau mahna. Chumi avâng chuan a la awm chhunte chu ṭawngṭaisak rawh,’ a ti e,” an ti a. 5 Chutichuan, Lal Hezekia mite chu Isaia hnênah an kal a. 6 Tin, Isaia chuan an hnênah, “In pu hnênah heti hian sawi ang che u, ‘LALPA chuan heti hian a ti: “I thu hriat, Assuria lal miten mi sawichhiatnate kha hlau suh. 7 Ngai teh, a kawchhûngah thlarau ka awmtîr ang a, thuthang a hria ang a, ama ramah a haw leh ang; tichuan, ama ram ngeiah khandaiha tihthlûkin ka awmtîr ang,” a ti e,’ tiin,” a ti a.
Assuria-hovin an rawn vau leh
8 Chutichuan, Rabsakea chu a kîr leh a, Assuria lal chuan Libna khua a lo beih lai a va hmu a; Lakis khua ata chu a chhuak tih a hre tawh rêng a ni. 9 Tin, “Ngai teh, nangmah bei tûrin a chhuak ta,” tia Tirhaka, Ethiopia ram lal chungchâng thu mi sawi a lo hriat chuan Hezekia hnênah mite a tîr a, 10 “Heti hian Juda lal Hezekia hnênah sawi ang che u: ‘I Pathian, i rina chuan, “Jerusalem khua chu Assuria lal kutah pêk a ni lo vang,” tiin bum che suh se. 11 Ngai teh, Assuria lalten ram zawng zawng tichhe veka a chunga an thiltihte kha i hria a; nang hi chhanhim i ni dâwn bîk em ni? 12 Hnam tin pathiante chuan ka pi leh puten an tihboralte kha an chhanhim em ni? Gozan te, Haran te, Rezeph te, Eden fa Telasar khuaa awmte kha. 13 Hamath lal te, Arpad lal te, Sepharvaim khawpui lal te, Hena lal te, Iva lal te kha khawiah nge an awm tâk?’ tiin,” a ti a. 14 Tin, Hezekia chuan a mi tirhte kut ata lehkha chu a hmu a, a han chhiar a; tichuan, Hezekia chu LALPA inah chuan a han lût a, LALPA hmaah chuan a pharh a. 15 Tin, Hezekia chu LALPA hmaah a ṭawngṭai a, “Aw LALPA, cherub-te chunga ṭhu Israela Pathian, nang, nang chauh hi leilung ram zawng zawng Pathian chu i ni; lei leh vân hi nangma siam a ni. 16 Aw LALPA, i beng lo chhi la, ngaithla teh; Pathian nung sawichhe tûra Senakeriban thu a rawn sawi hi ngaithla teh. 17 LALPA, Assuria lalten hnamte leh an ramte chu an tichhe ṭhîn tak a, 18 an pathiante chu meiah an paih bawk ṭhîn a: chûngte chu pathian an ni lo rêng a, mihring kuta siam, thing leh lung an ni zâwk a. Chuvângin, an tiboral a ni. 19 Chuvângin, aw LALPA kan Pathian, nang, nangmah chauh hi LALPA Pathian i ni tih leilung luah ram zawng zawng hian an hriat theih nân, a lakah hian min chhandam ngei ngei ang che,” tiin.
Lal hnêna Isaia thuthlen
20 Chumi lai chuan Amoza fapa Isaia chuan Hezekia hnênah, “LALPA, Israela Pathian chuan heti hian a ti a ni: ‘Assuria lal Senakeriba chhiatna tûr lama ka hnêna i ṭawngṭai kha ka lo hria e,’ tiin. 21 Hei hi a chungchâng thu LALPAN a sawi chu a ni: ‘Zion fanu nula chuan a hmusit chia, a nuihzatbûr che; Jerusalem fanu chuan a lu a thin khum che. 22 Tu nge i tihhmingchhiata, i sawichhiat? Tu chungah nge i aw i tihpâwra, i mit i lek sân? Israel-ho Mi Thianghlima chungah alâwm. 23 I mi tirhte hmangin LALPA chu i tihmingchhia a, “Ka tawlailîr tam tak nên Lebanon ram ril tlâng sângte ka lo thleng chho ta a; chuta sidar thing sâng takte leh fâr thing ṭha ṭhate chu ka kit ang a; a lei ṭha hmun ramngaw, a chênna hmun ril berah chuan ka lût ang. 24 Ram dang tui ka lai chhuak a, ka tlân ṭhîn a, ka kephah hnuai hian Aigupta lui zawng zawng chu ka tikang vek ang,” i ti a. 25 Keiman hmânlai ata chûng chu ka tih a nihziate, hmasâng ata chûng chu ka siam a nihzia te i hre lo vem ni? Khaw kulh neite chu in chim khâwm ang maia tichhetu atân ka ruat ta che a nih hi. 26 Chu vâng chuan a chhûnga awmte chu chakna an nei lo va, an zâm a, an lo mualpho tâk kha; phûl hlobet ang leh, hnim hring ang leh, in chunga hlobet ang leh, buh a len hmaa thli em vuai ang an nih kha. 27 Kei chuan i ṭhut te, i luh leh i chhuah te, ka chunga i thinurte hi ka hria asin. 28 Ka chunga i thinur avâng leh, i ṭawng chaltlai chu ka bengah a lo luh chhoh tâk avâng hian ka hnârvuah chu i hnârah ka vuah ang a, ka thîrbarh chu i hmuiah, i lo kalna kawng ngeiah khân ka kîrtîr leh ang che,’ tiin. 29 “Tin, hei hi i tân chhinchhiahna a ni ang: kuminah buhhli in ring ang a, nakkumah a hli bawk; tin, a kum thumnaah chuan buhte tuh ula, ât ula, grêp huante siam ula, a rahte ei rawh u. 30 Tichuan, Juda chhûngte zînga la dam chhunte chuan a chhuk zâwngin zung an kai ang a, a chho zâwngin an rah leh ang. 31 Jerusalem aṭangin a la awm chhunte, Zion tlâng aṭangin a la damte chu an chhuak dâwn a ni. LALPA ṭhahnemngaihna chuan chûng chu a ti ang. 32 Chuvângin, LALPA chuan Assuria lal chungchâng thu chu heti hian a sawi: ‘He khawpui hi a lo thleng lo vang a, hetah hian thal a kâp hek lo vang, phaw nên a kiangah a lo kal hek lo vang a, a khaw hrûlah lei an tiang pâwng hek lo vang. 33 A lo kalna kawngah, chumiah ngei chuan a lêt leh ang a, he khawpui hi a lo thleng lo vang. 34 Keimah avâng leh ka chhiahhlawh Davida avângin he khawpui hi chhanhim tûrin ka vêng dâwn a ni,’ LALPAN a ti,” tiin mi a tîr a. 35 Tichuan, chumi zân chuan heti hi a ni a, LALPA vântirhkoh chu a thawk chhuak a, Assuria-ho riahhmunah chuan mi nuai khat leh sîngriat leh sângnga a tihlum a; tin, zîng taka an han thawh chuan, ngai teh, mitthi ruang hlîr a lo ni ta mai a. 36 Chutichuan, Assuria lal Senakeriba chu a chhuak a, a lêt leh a, a kal leh ta zêl a, Ninevi khuaah chuan a awm ta a. 37 Tin, a pathian Nisroka inah chuan amah a biak laiin heti hi a ni a, a fapate Adrammeleka leh Sarezera-te chuan khandaihin an tihlum a; tichuan, Ararat ramah an tlân bo ta a. Tichuan, a fapa Esar-haddona chu a aiawhin a lal ta a.
Hezekia damloh leh a dam leh thu
1 Chûng lai chuan Hezekia chu thih ngamin a nâ a. Tichuan, Amoza fapa zâwlnei Isaia chu a hnênah a lo kal a, a hnênah, “LALPA chuan heti hian a ti: ‘I chhûngte awm dân tûr sawi rawh khai, i dam chhuak zo dâwn si lo va,’ tiin,” a ti a. 2 Chutichuan, bang lam hawiin a let a, LALPA hnênah, 3 “Aw LALPA, i hmaah thutak leh thinlung ṭha famkim pua ka awm ṭhinzia leh, i mit hmuha thil ṭha ka tih ṭhinzia kha khawngaih takin hre reng ang che,” tiin a ṭawngṭai a. Tin, Hezekia chu a ṭap ta zawih zawih a. 4 Tin, Isaia chuan khawpui lai tak pawh chu a thlen hmain heti hi a ni a, LALPA thu a hnênah a lo thleng a, 5 “Kîr leh la, ka mite hotu Hezekia hnênah sawi rawh, ‘LALPA, i pu Davida Pathian chuan heti hian a ti: “I ṭawngṭaina kha ka hria a, i mittui tla pawh ka hmu e; ngai teh, ka tidam ang chia, ni thum niah chuan LALPA inah i han kal ang. 6 Tin, i dam chhûng kumte hi kum sâwm leh kum ngain ka tisei ang a; tin, nang leh he khawpui hi Assuria lal lakah ka chhanhim ang a; tin, keimah avâng leh ka chhiahhlawh Davida avângin he khawpui hi ka hum ang,” a ti,’ tiin,” a ti a. 7 Tin, Isaian, “Theipui rah khâwn khat han la rawh u” a ti a. Tichuan, an rawn la a, khawihliah chuan an bel a, a lo dam leh ta a. 8 Tin, Hezekia chuan Isaia hnênah, “LALPAN mi tidam ang a, LALPA inah a ni thum niin ka han kal ang tih chhinchhiahna eng nge ni ang?” a ti a. 9 Tin, Isaian, “LALPAN a thil sawi hi a ti ngei dâwn tih hei hi i tân LALPA laka chhinchhiahna tûr chu a ni ang: hlim chu rahka sâwm thlenga a tawlh chhoh nge i duh rahka sâwm thlenga a tawlh kîr?” a ti a. 10 Tin, Hezekia chuan a chhâng a, “Hlim chu rahka sâwm thlenga a tawlh chhoh chu a awl êm a, chu zawng ni lo ve, hlim chu rahka sâwm thlengin tawlh kîr zâwk rawh se,” a ti a. 11 Tichuan, zâwlnei Isaia chuan LALPA a han au va; tin, Ahaza dâr chin hriatnaa hlim hniam tawh chu rahka sâwm thlengin a tikîr leh ta a.
Babulon lam aṭanga tlawhtu
12 Chumi lai chuan Baladana fapa Babulon lal Merodak-baladana chuan lehkhate leh lâwmpuinate Hezekia a thawn a, Hezekia chu a nâ tih a hriat avângin. 13 Tichuan, Hezekia chuan anni chu a lo lâwm a, a thil hlu dahna in zawng zawng te, tangkarua te, rangkachak te, englo rimtui te, hriak hlu tak te, a râlthuam dahna in chhûng te, a ro awm zawng zawngte chu a entîr a. A ina mi leh a ram chhûnga mi Hezekian a entîr loh rêng rêng a awm lo. 14 Chumi lai chuan zâwlnei Isaia chu Lal Hezekia hnênah a kal a, a hnênah, “Kha mite khân eng nge an sawi? Khawi aṭangin nge i hnênah an lo kal?” a ti a. Tin, Hezekia chuan, “Ram hla tak, Babulon aṭangin an lo kal a ni,” a ti a. 15 Tichuan, ani chuan, “I inah hian eng eng nge an hmuh?” a ti a. Tin, Hezekia chuan, “Ka in chhûnga awm zawng zawng chu an hmu vek a, ka ro zînga mi ka entîr loh rêng rêng a awm lo,” tiin a chhâng a. 16 Tin, Isaia chuan Hezekia hnênah chuan, “LALPA thu hi lo ngaithla rawh khai: 17 ‘Ngai teh, i in chhûnga awm zawng zawng leh vawiin thlenga i pi leh puten an lo khâwl khâwmte chu Babulon khuaa an kalpui nite a lo la thleng ang; eng mah rêng rêng hnutchhiah a awm lo vang,’ LALPAN a ti. 18 ‘Tin, i rîla rah, i hrin tûr, i fate ngei zînga mi pawh an kal bopui ang a; Babulon lal inah chuan mi tilreh an la ni ang,’ a ti,” a ti a. 19 Tichuan, Hezekia chuan Isaia hnênah, “I sawi LALPA thu hi a ṭha e,” a ti a. Tin, “Ka dam chhûng hian remna leh thutak a awm dâwn phawt chuan,” a ti leh nghâl a.
Lal Hezekia tâwpna
20 Tichuan, Hezekia chanchin dang te, a thiltihtheihzia zawng zawng te, dîl leh tuilâkna a siama, khawpui chhûnga tui a lâk luh thute chu Juda lalte lal lai thu ziakna buah a chuang a ni lâwm ni? 21 Tin, Hezekia chu a pi leh pute hnênah a muhîl ta a. Tichuan, a fapa Manasea chu a aiawhin a lal ta a.
Juda lal Manasea
1 Manasea chu a lal ṭan tirhin kum sâwm leh kum hnih mi a ni a; Jerusalem-ah kum sawmnga leh kum nga a lal a. A nu hming chu Hephzibi a ni. 2 Tin, LALPAN Israela thlahte hmaa a hnawh chhuah tâk hnamten thil tenawm tak an tih ṭhin ang, LALPA mit hmuha thil ṭha lo takte chu a ti ṭhîn a. 3 A pa Hezekian a tihchhiat tawh hmun sângte chu a din leh a; Israel lal Ahaba tih angin Baala maichâmte a din a, Aseri te a siam a, vâna awm zawng zawng khi a bia a, an rawng a bâwl a. 4 LALPAN, “Jerusalem-ah ka hming ka awmtîr ang,” a tihna LALPA inah chuan maichâmte a siam a. 5 LALPA in hung chhûng kawtlai pahnihah chuan vâna awm zawng zawng tân maichâm a siam a. 6 Tin, a fapa chu meiah a luhtîr a, aien te a chîng a, dawi te a hmang a, ramhuai aienthiam zâwlte leh dawithiamte a ruai ṭhîn a. LALPA mit hmuha thil ṭha lo nasa tak, a tithinrim tûrin a ti ṭhîn a. 7-8 Tin LALPAN Davida leh a fapa Solomona hnêna, “He in leh Jerusalem khua, Israel chi zawng zawng zînga ka thlanah hian ka hming chu kumkhuain ka awmtîr ang a; thu ka pêk ang zawng zawng leh ka chhiahhlawh Mosian dân a pêk ang zawng zawng kha an pawm phawt chuan an pi leh pute ka pêk tawh ram ata chu Israel-te kete pawh hi ka pên chhuahtîr tawh bawk hek lo vang,” a lo tih tawh inah chuan Aseri lem a siam chu a dah a. 9 Nimahsela, an pawm duh lo va; LALPAN Israela thlahteho hmaa a hnawh chhuah tâk hnamte tih ai maha nasa zâwk thil tisual tûrin, Manasea chuan mite a thlêm ṭhîn a. 10 Tin, LALPAN a chhiahhlawh zâwlneite hmangin thu a sawi a: 11 “Juda lal Manasea hian hêng thil tenawm takte hi a ti a, a hmaa Amor-hote ai mahin a tisual nasa a, Juda-ho hi a milemtein thil a tihsualtîr avângin, 12 LALPA, Israel-te Pathianin heti hian a ti: ‘Ngai teh u, Jerusalem leh Juda chungah hian a hria apiangte beng khing hnih ṭhâwng khawp thil ṭha lo ka rawn thlentîr dâwn e. 13 Samari tehna hrui leh Ahaba chhûng dârmûmkhai chu Jerusalem chungah ka zam ang a; miin thlêng a hru a, a tilinglet ang maiin Jerusalem chu ka hru ang. 14-15 Tin, ka ro chan la awm chhunte chu ka paih thla ang a, an hmêlmate kutah ka pe ang; tichuan, an pi leh pute Aigupta rama an lo chhuah ata vawiin thleng hian ka mit hmuha thil ṭha lo tak an ti a, mi tihthinrim avâng hian an hmêlma zawng zawngte man tûr leh râllâk tûr an ni ang,’ tiin,” a ti a. 16 LALPA mit hmuha thil ṭha lo tak tia Juda-te thil a tihsualtîra sualna tiam lovin Manasea chuan pawi khawih lo thisen nasa takin a chhuah bawk a, Jerusalem dung leh vâng a khat a. 17 Tichuan, Manasea chanchin dang te, a thiltih zawng zawng te, a thil tihsualte chu Juda lalte lal lai thu ziakna buah a chuang a ni lâwm ni? 18 Tin, Manasea chu a pi leh pute hnênah chuan a muhîl a, Uza huana ama in bul huanah an phûm ta a. Tichuan, a fapa Amona chu a aiawhin a lal ta a.
Juda lal Amona
19 Amona chu a lal ṭan tirhin kum sawmhnih leh kum hnih a ni a; Jerusalem-ah kum hnih a lal a. A nu hming chu Mesulemethi, Jotba khuaa Haruza fanu a ni a. 20 Tin, a pa Manasea tih ang bawk LALPA mit hmuha thil ṭha lo tak a ti ve ṭhîn a. 21 A pa kawng zawh zawng zawng chu a zawh ve a, a pain milem rawng a bâwl te chu a bâwl a, chibai a bûk ve a. 22 LALPA, a pi leh pute Pathian chu a kalsan a; LALPA kawng chu a zawh lo va. 23 Tin, Amona miten amah an phiarru a, lal chu ama inah an tihlum a. 24 Nimahsela, chumi rama mite chuan Lal Amona phiarrutu zawng zawng chu an tihlum ta vek a. Tichuan, chumi rama mite chuan a fapa Josia chu a aiawhin lalah an siam ta a. 25 Tichuan, Amona thiltih dangte chu Juda lalte lal lai thu ziakna buah a chuang a ni lâwm ni? 26 Tin, Uza huana ama thlânah an phûm a. Tichuan, a fapa Josia chu a aiawhin a lal ta a.
Juda lal Josia
1 Josia chu a lal ṭan tirhin kum riat mi a ni a; Jerusalem-ah kum sawmthum leh kum khat a lal a. A nu hming chu Jedidi, Bozkath khuaa Adaia fanu a ni. 2 Tin, LALPA mit hmuha thil fel tak a ti ṭhîn a, a pu Davida kawng zawh zawng zawng chu a zawh ve a, ding lamah emaw, vei lamah emaw a pênsan lo va.
Dân bu an hmuchhuak
3 Tin, Lal Josia a lal kum sâwm leh kum riat kumin heti hi a ni a, lal chuan Mesulama fa Azalia fapa lehkhaziaktu Saphana chu a tîr a, 4 “Puithiam lalber Hilkia hnênah han kal la, kawngkhâr vêngtuten mite hnên ata an lo lâk khâwm LALPA ina tangka an rawn dah chu chhiar sela, 5 LALPA in satu hnathawktute pe rawh se; tin, anni chuan in chhe siamtu, LALPA ina hnathawkho pe rawh se; 6 thingrem siamtu te, in satu te, in chhe siamtute chuan in chhe lai siamna thing leh lungchher an lei theih nân,” tiin LALPA inah a tîr a. 7 Amaherawhchu, tangka an pêkate chu an en zuipui leh chuang lêm lo; rinawm taka an tih ṭhin avângin. 8 Tin, puithiam lalber Hilkia chuan lehkhaziaktu Saphana hnênah, “LALPA inah dân lehkhabu chu ka chhar ta e,” a ti a. Tin, Hilkia chuan lehkhabu chu Saphana a pe a, ani chuan a chhiar ta a. 9 Tin, lehkhaziaktu Saphana chu lal hnênah a kal a, lal hnênah thu chu a va thlen leh a, “I mite chuan ina tangka awm chu an pe chhuak vek a, LALPA in satu hnathawktute an pe vek ta e,” a ti a. 10 Tin, lehkhaziaktu Saphana chuan, “Puithiam Hilkian lehkhabu mi lo pe asin,” tiin lal chu a hrilh a. Tin, Saphana chuan lal hmaah a chhiar a. 11 Tin, lalin dân lehkhabu thute chu a han hriat chuan heti hi a ni a, a puante a pawt thlêr ta a. 12 Tin, lal chuan puithiam Hilkia te, Saphana fapa Ahikama te, Mikaia fapa Akbora te, lehkhaziaktu Saphana te, lal mi Asaia te hnênah chuan, 13 “Kei leh, mipui leh, Juda-ho zawng zawng hi he lehkhabu chhara thu chuang thu-ah hian LALPA min va râwnsak teh u; kan tih tûra hemi lehkhabua ziak ang zawng zawng hi kan pi leh puten an lo zawm loh avângin kan chungah hian LALPA thinurna chu a alh nasat tawh êm hi,” a ti a. 14 Chutichuan, puithiam Hilkia te, Ahikama te, Akbora te, Saphana te, Asaia te chu silhfên enkawltu Harhasa fa Tikva fapa Saluma nupui zâwlnei Huldi hnênah chuan an kal a, an va bia a. (Ani chu Jerusalem Misne-a awm a ni a.) 15 Tin, ani chuan an hnênah, “LALPA, Israel-te Pathianin heti hian a ti: ‘Ka hnêna rawn tîrtu che u hi hrilh rawh u. 16 LALPAN heti hian a ti e: “Ngai teh, hemi hmunah leh, a chhûnga chênghote chungah hian thil ṭha lo tak ka rawn thlentîr dâwn a ni, Juda lalin lehkhabua a thu chhiar zawng zawng ang kha: 17 mi kalsana, pathian dangte hnênah rimtui an hâla, an kutchhuaka mi tihthinrim avângin hemi hmunah hian ka thinurna a alh nasa dâwn a, a mit mai dâwn lo ve.” ’ 18 Nimahsela, LALPA râwn tûra rawn tîrtu che u Juda lal hnênah chuan hetiang hian sawi ang che u: ‘LALPA, Israel-te Pathianin heti hian a ti: “I thu hriat chungchâng thu-ah chuan - 19 hemi hmun leh, a chhûnga chêngte hi tihṭiau leh ânchhe dawngin an la awm ang tih thu ka sawi kha i lo hriata, i rilru te a nêma, LALPA hmaa i inngaihtlâwma, i puante i pawh thlêra, ka hmaa i ṭah avângin, kei pawhin i thu chu ka lo hria e,” LALPAN a ti. 20 Chutichuan, ngai teh, i pi leh pute hnênah ka hruai ang chia, i thlânah thlamuang taka hruaiin i awm ang a, hemi hmuna thil ṭha lo tak ka rawn thlentîr tûr chu i mitin a hmu vek hek lo vang, a ti e,’ tiin,” a ti a. Tichuan, thu chu lal hnênah an va thlen leh a.
Josian milem biakna a tibo
1 Tin, lal chuan mite a tîr a, Judai ram leh Jerusalem khawpuia upa zawng zawng a hnênah a ko khâwm chiam a. 2 Tin, lal chu Judai rama mi zawng zawng nên, Jerusalem khuaa mi zawng zawng nên, puithiamte leh zâwlneite nên, mipui zawng zawng nên a lian a têin LALPA inah chuan an han chho va; tin, LALPA ina an lehkhabu chhara thuthlung bua chuang zawng zawng chu an beng hriatah a chhiar a. 3 Tin, lal chu ban hrûlah a ding a, chumi lehkhabua chuang thuthlung thu chu tinghet tûrin, thinlung zawng zawng leh thlarau zawng zawnga LALPA zui tûr leh, a thupêkte, a thuhriattîrte, a thuruatte pawm tûrin LALPA hmaah chuan thu a thlung a. Tin, mipui zawng zawng pawhin an thlunpui a. 4 Tin, lalin puithiam lalber Hilkia te, a dawttu puithiam te, kawngkhâr vêngtute chu LALPA biak in chhûnga Baala leh, Aseri leh, vâna thil awmho zawng zawng tâna siam bungbêl zawng zawng chu la chhuak vek tûrin thu a pe a; tichuan, Jerusalem pâwn lam, Kidron phûlah a hâl a, a vâp chu Bethel-ah a kalpui a. 5 Tin, milem beho puithiamte, Juda lalten Judai ram khawpui hmun sângahte, Jerusalem vêla rimtui hâl tûra an lo ruatte chu a bântîr a; Baala tân te, ni tân te, thla tân te, arsi tân te, vâna awmho zawng zawng tântea rimtui hâltute pawh chu. 6 Tin, LALPA ina Aseri chu Jerusalem pâwn lam, Kidron luiah a la chhuak a, Kidron luiah chuan a hâl a, a rap sawm dep a, a dip chu mi narânte thlânah a theh a. 7 Tin, Aseri puan tahho hmeichhe awmna, LALPA ina mipa inzuarho awmna inte chu a ṭhiatsak a. 8 Tin, Juda khawpui atate chu puithiam zawng zawng a hruai chhuak a, puithiamhote rimtui hâlna hmun sângte chu Geba aṭanga Beer-seba thlengin a tibawrhbâng vek a; khawpui kawngka luha vei lampang, khawpui awptu Josua Kawngka luhna kawngkatea hmun sângte chu a tichim a. 9 Hmun sâng puithiamte chu Jerusalem-a LALPA maichâmah an han chho ve lo na a, an unaute zîngah chhang dawidim telh loh erawh chu an ei ve ṭhîn. 10 Tin, tu mahin an fapa emaw, an fanu emaw Moleka puala meia an luhtîr tawh lohna tûrin, Hinoma thlahte ruama Topheth chu a tibawrhbâng a. 11 Tin, LALPA in luhnaa a in hual chhûnga lal in vêngtu Nathan-meleka pindan bula Juda lalten ni tâna sakawr an pêkte chu a suan bo vek a; ni tawlailîrte chu a hâl a. 12 Tin, Ahaza in chhâwng chunga Juda lalten maichâm an siamte leh Manasean LALPA in hung chhûng kawtlai pahniha maichâm a siamte chu lal chuan a tichim a, a tisawm berh a, a nawite chu Kidron luiah a paih a. 13 Tin, Jerusalem bul chhiatna tlâng ding lampanga Zidon-ho pathian tenawm tak Astarothi tân te, Moab-ho pathian tenawm tak Kemosa tân te, Amona thlahte pathian tenawm tak Milkoma tân te, Israel lal Solomonan hmun sâng a siamte chu lal chuan a tibawrhbâng a. 14 Tin, lungphunte chu a tikeh sawm vek a, Aseri-te chu a kit a, chûng hmunahte chuan mihring ruh a dah ta a. 15 Tin, chu lo pawh chu Israel-te thil tihsualtîrtu Nebata fapa Jeroboaman Bethel-a maichâm leh hmun sâng a siam chu, chumi maichâm leh hmun sâng lamin a tichim bawk a; tichuan, hmun sâng chu a hâl ta a. 16 Tin, Josia chu a han hawi a, tlânga thlânte chu a han hmu a; tichuan, thlâna ruhte chu a va lâktîr a, chûng thu lo sawitu Pathian miin a lo sawi, LALPA thu ang ngeiin maichâmah chuan a hâl a, a tibawrhbâng a. 17 Tichuan, ani chuan, “Saw, tu lungphun nge ka han hmuh saw?” a ti a. Tin, khuaa mite chuan, “Pathian mi, Judai ram aṭanga lo kal, Bethel-a maichâm chunga i tih tâk hi lo sawi lâwktu thlân a nih saw,” tiin an hrilh a. 18 Tin, ani chuan, “Eng mah tih suh u; tu mahin a ruhte chu la sawn suh se,” a ti a. Chutichuan, a ruhte chu Samari ram aṭanga zâwlnei lo kala ruhte nên eng mah an tih lo. 19 Tin, Israel lalten LALPA tithinrima an sak Samari ram khuatea hmun sâng in zawng zawng pawh chu Josia chuan a suan bo va, Bethel khuaa a tih ang chiahin a tihsak ve a. 20 Tichuan, chuta hmun sâng puithiam awm zawng zawng chu maichâm chungah a that a, chûngah chuan mihring ruhte a hâl a, Jerusalem-ah a haw leh ta a.
Josian kalhlên kût a hmang
21 Tin, lal chuan mi zawng zawng hnênah, “He thuthlung bua chuang ang hian LALPA, in Pathian tân kalhlên kût nei rawh u,” tiin thu a pe a. 22 Israel-te chunga rorêltuten ro an rêl achin, Israel lalte lal chhûng zawng zawng te, Juda lalte lal chhûng zawng zawng te pawhin chutiang taka kalhlên kût chu an la nei lo. 23 Lal Josia lal kum sâwm leh kum riat kumah chuan chu Kalhlên Kût chu Jerusalem khuaah LALPA tân an nei ta chauh a ni.
Josia thiltih dangte
24 Tin, LALPA ina puithiam Hilkian a chhar lehkhabua dân thu chuangte kha a tihngheh theih nân ramhuai aienthiam zâwl te, dawithiam te, pathian lem te, milem te, Judai ram leh Jerusalem khuaa thil tenawm an hmuh ṭhin zawng zawng chu Josia chuan a tibo vek bawk a. 25 Mosia dân zawng zawng anga thinlung zawng zawng leh thlarau zawng zawng leh chakna zawng zawnga LALPA pawm, amah ang rêng rêng a hmaa lal tu mah an awm lo va, a hnuah pawh amah ang chu tu mah an awm leh tawh hek lo. 26 Chuti chung pawhin LALPA chuan a thinrimna nasa tak, Manasean a lo tihthinrimna zawng zawng avânga Juda chunga a thinrimna alh chu a la tireh chuang lo. 27 Tin, LALPAN, “Israel ka sawn bo ang hian Juda pawh hi ka hmuh phâk lohvah ka sawn bo ve ang a, he khua ka thlan Jerusalem ngei leh, ‘Chutah chuan ka hming chu a awm ang,’ ka tih in hi ka thehthang bo daih ang,” a ti a.
Josia lal a tâwp
28 Tichuan, Josia chanchin dang te, a thiltih zawng zawngte chu Juda lalte lal lai chanchin ziakna buah a chuang a ni lâwm ni? 29 A lal lai chuan Aigupta lal Pharao-nekoa chu Assuria lal bei tûrin Euphrates luiah a han chho va; tin, Lal Josia chuan ani chu a lo bei a. Tin, Pharao-nekoa chuan amah chu a hmuh veleh Megido khuaah a that ta a. 30 Tin, a mite chuan Megido aṭang chuan a ruang chu tawlailîrin an kalpui a, Jerusalem-ah an luhpui a, ama thlânah an phûm ta a. Tichuan, chumi rama mite chuan Josia fapa Jehoahaza chu an hruai a, hriak an thih a, a pa aiah lalah an siam ta a.
Juda lal Jehoahaza
31 Jehoahaza chu a lal ṭan tirhin kum sawmhnih leh kum thum a ni a; Jerusalem-ah thla thum a lal a. A nu hming chu Hamutali, Libna khuaa Jeremia fanu a ni. 32 Tin, a pi leh pute tih dân ang zawng zawng LALPA mit hmuha thil ṭha lo tak a ti ṭhîn a. 33 Tin, Pharao-nekoa chuan Jerusalem-a rorêl thei tawh lo tûrin Hamath rama Ribla khuaah a tântîr a; tin, an ram chu tangkarua talent zakhat leh rangkachak talent khat a chawitîr a. 34 Tin, Pharao-nekoa chuan Josia fa Eliakima chu a pa Josia aiah a laltîr a, a hming chu Jehoiakima tiin a thlâksak a; Jehoahaza erawh chu a hruai daih a, Aigupta ramah a kal a, chutah chuan a thi ta a.
Juda lal Jehoiakima
35 Tin, Jehoiakima chuan tangkarua leh rangkachak chu Pharaoa a pe phawt a; an ramte chu Pharaoa thupêk angin a tangkaa pe tûrin chhiah a chawitîr ve thung a; Pharao-nekoa hnêna pêk tûrin mi tin chawi tûra a tuk zât ṭheuh ang zêlin chumi rama mite ta tangkarua leh rangkachak a chawitîr a. 36 Jehoiakima chu a lal ṭan tirhin kum sawmhnih leh kum nga a ni a; Jerusalem-ah kum sâwm leh kum khat a lal a. A nu hming chu Zebidi, Ruma khuaa Pedaia fanu a ni. 37 Tin, a pi leh pute tih dân ang zawng zawng LALPA mit hmuha thil ṭha lo tak a ti ṭhîn a.
1 A lal lai chuan Babulon lal Nebukadnezzara a lo lian a, Jehoiakima chu chhiah khuaah kum thum a awm a; chumi hnuah chuan a hawisan a, a chungah a hel ta a. 2 Tin, LALPAN Kaldai pâwl tê te, Suria pâwl tê te. Moab pâwl tê te, Amona thlah pâwl tê te amah bei tûrin a tîr chhuak a; a chhiahhlawh zâwlneite hmanga a sawi LALPA thu angin Judai ram tihchhiattîr tûrin a tîr a. 3-4 Manasea thiltih zawng zawng, a thil tihsual leh pawi khawih lo thisen a chhuaha, Jerusalem chu pawi khawih lo thisena a tihkhah avângin, a hmuh phâk lohva suan bo tûr thu Juda chungah LALPA thuin a lo thleng ta ngei a, LALPAN a ngaidam duh lo a ni. 5 Tichuan, Jehoiakima chanchin dang leh a thiltih zawng zawng chu Juda lalte lal lai chanchin ziakna buah a chuang a ni lâwm ni? 6 Chutichuan, Jehoiakima chu a pi leh pute hnênah a muhîl a. Tin, a fapa Jehoiakina chu a aiawhin a lal ta a. 7 Tin, Aigupta lal chu a ram ata a lo chhuak leh ta lo va, Babulon lal chuan Aigupta ram luitê aṭanga Euphrates lui thlenga Aigupta lalram huam zawng zawng a la tawh si a.
Juda lal Jehoiakina
8 Jehoiakina chu a lal ṭan tirhin kum sâwm leh kum riat a ni a; Jerusalem-ah thla thum a lal a. A nu hming chu Nehusti, Jerusalem khuaa Elnathana fanu a ni. 9 Tin, a pa tih dân ang zawng zawng tiin, LALPA mit hmuha thil ṭha lo tak a ti ṭhîn a. 10 Chutih lai chuan Babulon lal Nebukadnezzara mite chu Jerusalem-ah an han chho va, khua chu an han hual ta a. 11 Tin, chutia a miten an han hual lai chuan Babulon lal Nebukadnezzara chu khuaah a han kal a; 12 tichuan, Juda lal Jehoiakina chu a nu te, mi te, a mi lian te, a puipate nên chuan Babulon lal hnênah an va chhuak a; tin, a lal kum riat kumin Babulon lal chuan a man a. 13 Tin, LALPA sawi ang khân LALPA ina ro zawng zawng leh lal ina ro zawng zawng chu a la chhuak a, LALPA biak ina Israel-te lal Solomonan rangkachak bungbêl a siam zawng zawng chu a sât sawm vek a. 14 Tin, Jerusalem-a mi zawng zawng - mi lian zawng zawng te, mi chak huaisen ṭha zawng zawng te, sîngkhat zet, mi themthiam leh thîrdêng zawng zawng nên a hruai vek a; chumi rama mi, a rethei theite tih loh chu tu mah an awm tawh lo. 15 Tin, Jehoiakina chu Babulon-ah a hruai a. Lal nu te, lal nupui te, a puipa te, chumi rama mi chakte chu Jerusalem aṭangin Babulon-ah salah a hruai a. 16 Tin, Babulon lal chuan pasalṭha zawng zawng sângsarih zet leh, themthiam leh thîrdêng sângkhat, mi chak ṭha zawng indo thei mi ṭhiau chu Babulon-ah salah a hruai vek a. 17 Tin, Jehoiakina pa unau Matania chu Babulon lal chuan a aiah a laltîr a, a hming chu Zedekia tiin a thlâksak a.
Juda lal Zedekia
18 Zedekia chu a lal ṭan tirhin kum sawmhnih leh kum khat a ni a; Jerusalem-ah kum sâwm leh kum khat a lal a. A nu hming chu Hamutali, Libna khuaa Jeremia fanu a ni. 19 Tin, Jehoiakima tih dân ang zawng zawng tiin, LALPA mit hmuha thil ṭha lo tak a ti ṭhîn a. 20 LALPA thinurna avângin a hmuh phâk lohva a thehthang bo thlengin, Jerusalem leh Juda chungah thil a lo thleng zêl a ni. Zedekia chu Babulon lal chungah chuan a hel ta a.
Jerusalem chhiat
1 Tin, a lal kum ruk kum, thla sâwmna, ni sâwm ni takin heti hi a ni a, Babulon lal Nebukadnezzara chuan a sipai zawng zawng nên Jerusalem a han bei a, awmhmun an han khuar a; tin, kulhin an hual vêl ta a. 2 Chutichuan, Lal Zedekia lal kum sâwm leh kum khatna thlengin khua chu an hual a. 3 Thla lina, ni kua ni chuan khua chu an ṭâm ta êm êm a, chuta mite tân chuan ei tûr rêng rêng a awm ta lo va. 4 Tin, khawpui kulh chu an tipawp a; tichuan, zânah indo mi zawng zawng chu lal huan bul, kulh bang pahnih inkâra kulh kawngkaah an tlânchhe ta vek a (Kaldai-ho chuan khua chu an hual vêl a ni a). Tin, lal chu Araba kawng lamah a kal a. 5 Nimahsela, Kaldai sipaihote chuan lal chu an ûm a, Jeriko phaiah an ûm phâk a; a sipai zawng zawng chuan an tlân darhsan ta vek a. 6 Tichuan, lal chu an man a, Babulon lal hnênah Ribla khuaah an hruai a; tin, a chungchâng an rêl a. 7 Tin, Zedekia fapate chu a mit hmuh ngeiah an that a, Zedekia mitte chu an kher chhuahsak a, kawl an buntîr a, Babulon-ah an kalpui ta a.
Tempul tihchhiat
8 Tichuan, Babulon lal, Lal Nebukadnezzara lal kum kuana, thla ngana, ni sarih ni chuan Babulon lal mi, vêngtu pâwl hotu Nebuzaradana chu Jerusalem-ah a lût a. 9 LALPA in leh lal in chu a hâl a; Jerusalem in zawng zawng, in ropui tak takte chu a hâl a. 10 Tin, vêngtu pâwl hotu hnêna awm Kaldai sipai zawng zawng chuan Jerusalem vêla kulh chu an tichim vek a. 11 Tin, khawpui chhûnga mi la awm, inpeho Babulon lal hnêna inpete, mipui la awmte chu vêngtu pâwl hotu Nebuzaradana chuan salah a hruai vek a. 12 Chumi rama a rethei theite zînga mi erawh chu vêngtu pâwl hotu chuan grêp hrui enkawltu atân leh lo nei mi atân a hnutchhiah a. 13 Tin, LALPA ina dâr bante leh, LALPA ina hûnchhan leh dâr tuizem chu Kaldai-hote chuan an tikeh sawm vek a, a dâr chu Babulon-ah an kalpui a. 14 Tin, bêl te, vut lawhna te, khâwnvâr puan chehna te, fiante leh dâr bungbêl zawng zawng, rawngbâwl nâna an hmante chu an la a. 15 Tin, mei lâkna te, maihûn te nên; vêngtu pâwl hotu chuan rangkachaka siamte chu a rangkachak chu a la a, tangkaruaa siamte chu a tangkarua chu a la a. 16 Solomonan LALPA in atân a siam ban pahnih leh dâr tuizem leh a hûnchhante chu, chûng hmanrua zawng zawnga dâr bûk zât chu hriat rual a ni lo. 17 Ban pakhat sân lam chu tawng sâwm leh tawng riat a ni a, a chhîpah chuan dârchhûnbâwk a awm a. Chumi chhûnbâwk san lam chu tawng thum a ni; chhûnbâwk vêl chuan ṭial chik chek leh pawmgranet a chuang a, dâr vek a ni. Chumi ang bawk chuan ban pakhat pawh chu ṭial chik chek a ni.
Juda rama mite Babulon-ah hruai an ni
18 Tin, vêngtu pâwl hotu chuan puithiam lal Seraia leh a dawttu puithiam Zephania leh kawngkhâr vêngtu pathum a man a; 19 indo mite chunga hotu pakhat nên, lal hmêl hmu pha ṭhîn khawpui chhûnga la awm panga nên, mipuite hming ziaktu sipai hotu lehkhaziaktu nên, khawpui chhûnga la awm, chu rama mi sawmruk nên khawpui chhûng ata a man bawk a. 20 Tin, vêngtu pâwl hotu Nebuzaradana chuan a hruai a, Babulon lal hnênah Ribla khuaah a kalpui a. 21 Tin, Babulon lal chuan Hamath ram, Ribla khuaah chuan a lo tihlum a. Chutichuan, Juda chu a ram chhûng aṭanga sala hruai chhuahin a lo awm ta a.
Juda ram awptu Gedalia
22 Tin, Babulon lal Nebukadnezzaran Judai rama a hnutchhiahte pawh chu an chungah chuan Saphana fa Ahikama fapa Gedalia chu awptuah a siam a. 23 Tichuan, sipai pâwl hotu zawng zawng leh an hoten Babulon lalin Gedalia awptuah a siam tih an hriat chuan Mizpe khuaah Gedalia hnênah an kal a, chûngte chu Nethania fapa Ismaela te, Karea fapa Johanana te, Netophath mi Tanhumetha fapa Seraia te, Maaka mi fapa Jaazania te, an hote nên an ni. 24 Tin, Gedalia chuan chûng mite leh an hote hnênah chuan chhia a chham a, an hnênah, “Kaldai-ho chhiah khuaa awm hi hlau suh u. He ramah hian awm reng mai ula, Babulon lal thuhnuaiah awm rawh u; tichuan, in tân a ṭha dâwn nia,” a ti a. 25 Nimahsela, thla sarihnaah chuan heti hi a ni a, lal thlah, Elisama fa, Nethania fapa Ismaela chu mi sâwm hruaiin a kal a, Gedalia chu Mizpe khuaa Juda-te leh Kaldai-ho a hnêna awmte nên an bei a, an that ta vek a. 26 Tichuan, mi zawng zawng a lian a têin sipai hotute nên an chhuak a, Aigupta ramah an kal ta a; Kaldai-hote chu an hlau a ni.
Jehoiakina tân in ata a chhuak
27 Tin, Juda lal Jehoiakina sala a tân kum sawmthum leh kum sarihna, thla sâwm leh thla hnihna, ni sawmhnih leh ni sarih niin heti hi a ni a, Babulon lal Evil-merodaka a lal ṭan kumin Juda lal Jehoiakina chu tân in ata a hruai chhuak a. 28 A hnênah ṭha takin thu a sawi a, Babulon-a lalho awm vete lalṭhutthlêng chungah chuan a lalṭhutthlêng chu a dah sâng ta bîk a. 29 Jehoiakina chuan a tân in silhfênte chu a thlâk a, a dam chhûng zawng chuan lal hnênah chaw a kîl ve ta ṭhîn a. 30 Tichuan, a châwm nân a mamawh tâwk tûr lalin ni tin, a dam chhûng zawng chuan chanvo a siamsak reng a.
Adama aṭanga Abrahama thleng inthlah chhâwng chanchin
1 Adama, Setha, Enosa, 2 Kenana, Mahalalela, Jareda, 3 Enoka, Methusela, Lameka, 4 Nova, Sema, Hama, Japhetha-te. 5 Japhetha fapate chu Gomera te, Magoga te, Madaia te, Javana te, Tubala te, Meseka te, Tirasa te an ni. 6 Gomera fapate chu Askenaza te, Diphatha te, Togarma te an ni. 7 Javana fapate chu Elisa te, Tarsisa te, Kittima te, Rodanima te an ni. 8 Hama fapate chu Kusa te, Mizraima te, Puta te, Kanaana te an ni. 9 Kusa fapate chu Seba te, Havila te, Sabta te, Raama te, Sabteka te an ni. Raama fapate chu Seba te, Dedana te an ni. 10 Kusan Nimroda a hring a; ani chu leia mi chak huaisen lo awm ṭanna a ni. 11 Mizraiman Ludima te, Anamima te, Lehabima te, Naphtuhima te, 12 Pathrusima te, Kasluhima te (chu mi lakah chuan Philistia-ho hi an lo chhuak a ni), Kaphtorima te a hring a. 13 Kanaana chuan Zidona, a fa tîr leh Hetha te, 14 Jebus-ho te, Amor-ho te, Girgas-ho te; 15 Hiv-ho te, Ark-ho te, Sin-ho te, 16 Arvad-ho te, Zemar-ho te, Hamath-ho te a hring a. 17 Sema fapate chu Elama te, Asura te, Arpaksada te, Luda te, Arama te, Uza te, Hula te, Gethera te, Meseka te an ni. 18 Arpaksada chuan Sela a hring a; tin, Sela chuan Ebera a hring a. 19 Ebera lakah chuan fapa pahnih an piang a: pakhata hming chu Pelega a ni a, a dam laiin lei hi ṭhena a awm avângin; a unaupa hming chu Joktana a ni a. 20 Tin, Joktana chuan Almodada te, Selepha te, Hazarmavetha te, Jera te, 21 Hadorama te, Uzala te, Dikla te, 22 Ebala te, Abimaela te, Seba te, 23 Ophira te, Havila te, Jobaba te a hring a. Chûng zawng zawng chu Joktana thlahte an ni. 24 Sema te, Arpaksada te, Sela te, 25 Ebera te, Pelega te, Reuva te, 26 Seruga te, Nahora te, Tera te, 27 Abrama te (chu chu Abrahama a ni).
Ismaela thlahte
28 Abrahama fapate chu Isaaka te, Ismaela te an ni. 29 Hêngte hi an thlahte chu an ni: Ismaela fa tîr chu Nebaiotha a ni a; tin, Kedara te, Adbeela te, Mibsama te, 30 Misma te, Duma te, Masa te, Hadada te, Tema te, 31 Jetura te, Naphisa te, Kedema te. Chûngte chu Ismaela thlahte an ni. 32 Tin, Abrahama hmei Keturi fapate chu Zimrana te, Joksana te, Medana te, Midiana te, Isbaka te, Suaha te an ni. Joksana fapate chu Seba leh Dedana an ni. 33 Midiana fapate chu Epha te, Ephera te, Hanoka te, Abida te, Elda te an ni. Chûng zawng zawng chu Keturi fapate an ni.
Esauva thlahte
34 Abrahaman Isaaka a hring a. Isaaka fapate chu Esauva leh Israela an ni. 35 Esauva fapate chu Eliphaza te, Reuela te, Jeusa te, Jalama te, Kora te an ni. 36 Eliphaza fapate chu Temana te, Omara te, Zephia te, Gatama te, Kenaza te, Timna te, Amaleka te an ni. 37 Reuela fapate chu Nahatha te, Zera te, Sama te, Miza te an ni.
Edom rama mi lo awm sate
38 Tin, Seira fapate chu Lotana te, Sobala te, Zibeona te, Ana te, Disona te, Ezera te, Disana te an ni. 39 Tin, Lotana fapate chu Horia leh Homama an ni a; tin, Lotana chuan farnu Timni a nei a. 40 Sobala fapate chu Aliana te, Manatha te, Ebala te, Sephia te, Onama te an ni. Zibeona fapate chu Aia leh Ana an ni. 41 Ana fapa chu Disona a ni. Disona fapate chu Hamrana te, Esbana te, Ithrana te, Kerana te an ni. 42 Ezera fapate chu Bilhana te, Zaavana te, Jaakana te an ni. Disana fapate chu Uza leh Arana an ni.
Edom ram lalte
43 Israela thlahte chunga lal an la awm hmaa Edom ram lalte chu hêngte hi an ni: Beora fapa Bela a ni a, a khawpui hming chu Dinhaba a ni. 44 Tin, Bela chu a thi a, Bozra khuaa mi Zera fapa Jobaba chu a aiah a lal ta a. 45 Tin, Jobaba chu a thi a, Teman-ho rama mi Husama a aiah a lal ta a. 46 Tin, Husama chu a thi a, Bedada fapa Hadada, Moab phûla Midian-ho thattu kha a aiah a lal ta a. A khawpui hming chu Avith a ni. 47 Tin, Hadada chu a thi a, Masreka mi Samla a aiah a lal ta a. 48 Tin, Samla chu a thi a, Luipui kama Rehoboth khuaa mi Saula a aiah a lal ta a. 49 Tin, Saula chu a thi a, Akbora fapa Baal-hanana a aiah a lal ta a. 50 Tin, Baal-hanana chu a thi a, Hadada a aiah a lal ta a; a khawpui hming chu Pai a ni. A nupui hming chu Mezahaba fanu Matredi fanu Mehetabeli a ni. 51 Hadada pawh chu a thi a. Tin, Edom-ho hotute chu hotu Timna te, hotu Alia te, hotu Jethetha te, 52 hotu Oholibama te, hotu Ela te, hotu Pinona te, 53 hotu Kenaza te, hotu Temana te, hotu Mibzara te, 54 hotu Magdiela te, hotu Irama te an ni. Chûng chu Edom-ho hotute an ni.
Juda thlahte
1 Hêngte hi Israela fapate chu an ni: Reubena, Simeona, Levia, Juda, Isakara, Zebuluna, 2 Dana, Josefa, Benjamina, Naphtalia, Gada, Asera. 3 Juda fapate chu Era, Onana, Sela-te an ni. Chûng mite pathum chu Kanaan mi Bathsuii laka piang an ni. Tin, Juda fa tîr Era chu LALPA mit hmuhin mi sual a ni a; tichuan, a tihlum ta a. 4 Tin, a monu Tamari chuan Pereza leh Zera a hrinsak a. Juda fapate zawng zawng chu panga an ni. 5 Pereza fapate chu Hezrona leh Hamula an ni. 6 Tin, Zera fapate chu Zimria te, Ethana te, Hemana te, Kalkola te, Dara te an ni a, an vaiin panga an ni. 7 Tin, Karmia fapa chu Akara, Israel-te tibuaitu, thilhlan bawhchhetupa kha a ni. 8 Tin, Ethana fapa chu Azaria a ni.
Lal Davida thlahtute
9 Hezrona fapate, a laka piangte chu Jerameela te, Rama te, Kelubaia te an ni. 10 Raman Aminadaba a hring a; tin, Aminadaban Juda thlah mi lian Nasona a hring a; 11 Nasonan Salma a hring a, Salman Boaza a hring a; 12 Boazan Obeda a hring a, Obedan Jesaia a hring a; 13 Jesaian a fa tîrah Eliaba a hring a, a pahnihna chu Abinadaba, a pathumna chu Simea, 14 a palina chu Nethanela, a pangana chu Radaia, 15 a parukna chu Ozema, a pasarihna chu Davida a ni. 16 Tin, an farnute chu Zeruii leh Abigaili an ni. Tin, Zeruii fapate chu Abisaia te, Joaba te, Asahela te an ni a, pathum an ni. 17 Abigailin Amasa a hring a; tin, Amasa pa chu Ismael mi Jethera a ni.
Hezrona thlahte
18 Hezrona fapa Kaleban a nupui Azubi, Jeriothi fanu lakah chuan fate a hring a. Tin, hêngte hi a fapate chu an ni: Jesera, Sobaba, Ardona. 19 Tin, Azubi chu a thi a, Kaleba chuan Ephrathi a nei a, ani chuan Hura a hrinsak a. 20 Tin, Hura chuan Uria a hring a, Urian Bezalela a hring a. 21 Tin, chumi hnuah chuan Hezrona chuan Gileada pa Makira fanu a pâwl a, kum sawmruk a nihin chu mi chu a nei a; ani chuan Seguba a hrinsak a. 22 Seguba chuan Jaira a hring a, ani chuan Gilead ramah khawpui sawmhnih leh pathum a nei a. 23 Gesura leh Arama chuan Jaira khawpuite, Kenath khua leh a khawperte nên, khaw sawmruk an lâksak a. Chûng zawng zawng chu Gileada pa Makira fapate chu an ni. 24 Tin Kaleb-ephratha khuaa Hezrona a thih hnu chuan Hezrona nupui Abiji chuan Tekoa pa Asura a hrinsak a.
Jerameela thlahte
25 Tin, Hezrona fa tîr Jerameela fapa upa ber chu Rama a ni a; tin, Buna te, Orena te, Ozema te, Ahija te an ni. 26 Jerameela chuan nupui dang a nei a, a hming chu Atari a ni a, Onama nu a ni. 27 Jerameela fapa upa ber Rama fapate chu Maaza te, Jamina te, Ekera te an ni. 28 Tin, Onama fapate chu Samaia leh Jada an ni a. Samaia fapate chu Nadaba leh Abisura an ni. 29 Tin, Abisura nupuia hming chu Abihaili a ni a; tin, ani chuan Abana leh Molida a hrinsak a. 30 Nadaba fapate chu Seleda leh Apaima an ni; Seleda erawh chu fa nei lovin a thi a. 31 Apaima fapa chu Isia a ni a, Isia fapa chu Sesana a ni a, Sesana fapa chu Alaia a ni. 32 Tin, Samaia unaupa Jada fapate chu Jethera leh Jonathana an ni a; Jethera chu fa nei lovin a thi a. 33 Tin, Jonathana fapate chu Peletha leh Zaza an ni. Chûngte chu Jerameela thlahte an ni. 34 Sesana chuan fanute tih loh chu fa a nei lo va. Tin, Sesana chuan Aigupta mi chhiahhlawh a nei a, a hming chu Jara a ni. 35 Sesana chuan a fanu chu a chhiahhlawh Jara nupuiah a neihtîr a; tin, Ataia a hrinsak a. 36 Ataia chuan Nathana a hring a, Nathana chuan Zabada a hring a; 37 Zabada chuan Ephlala a hring a, Ephlala chuan Obeda a hring a; 38 Obeda chuan Jehua a hring a, Jehua chuan Azaria a hring a; 39 Azaria chuan Heleza a hring a, Heleza chuan Eleasa a hring a; 40 Eleasa chuan Sismaia a hring a, Sismaia chuan Saluma a hring a; 41 Saluma chuan Jekamia a hring a, Jekamia chuan Elisama a hring a.
Kaleba thlahte
42 Jerameela unaupa Kaleba fa tîr chu Ziph-ho thlahtu Mesa a ni a, a fapa Maresa chu Hebrona pa a ni. 43 Hebrona fapate chu Kora te, Tapua te, Rekema te, Sema te an ni. 44 Seman Jorkeama pa Rahama a hring a; tin, Rekeman Samaia a hring a. 45 Samaia fapa chu Maona a ni a; tin, Maona chu Beth-zura pa a ni. 46 Kaleba hmei Ephi chuan Harana te, Moza te, Gazeza te a hring a; Harana chuan Gazeza a hring a. 47 Jadaia fapate chu Regema te, Jothama te, Gesana te, Peletha te, Epha te, Saapha te an ni. 48 Kaleba hmei Maaki chuan Sebera leh Tirhana a hring a. 49 Madmana pa Saapha leh Makbena leh Gibea pa Seva a hring bawk a; tin, Kaleba fanu chu Aksi a ni. 50 Hêngte hi Kaleba thlahte an ni: Hura fa, Kiriath-jearim-ho thlahtu, Ephrathi fa tîr Sobala; 51 Bethlehem-ho thlahtu Salma; Beth-gader-ho thlahtu Harepha te hi. 52 Tin, Kiriath-jearim-ho thlahtu Sobala chuan Haroe-ho leh Menuhoth-ho zâtve a thlah a. 53 Tin, Kiriath-jearim hnamte chu Ithra-ho te, Puth-ho te, Sumath-ho te, Misra-ho te an ni; chûngho aṭang chuan Zorath-ho te leh Estaol-ho te an lo chhuak a. 54 Salma thlahte chu Bethlehem-ho te, Netophath-ho te, Atroth-beth-joab-ho te, Manahath-ho zâtve te, Zor-ho te an ni. 55 Tin, Jabez-a awm lehkhaziaktu hnamte chu Tirath-ho te, Simeath-ho te, Sukath-ho te an ni. Chûngte chu Rekaba thlahte zînga mi Hamatha thlah Ken-hote chu an ni.
Lal Davida fate
1 Tichuan, hêngte hi Davida fapa, Hebron khuaa a hrinte chu an ni: a fa tîr chu Jezreel khuaa Ahinoami laka mi Amnona a ni a; a dawttu chu Karmel khua Abigaili laka mi Daniela a ni a; 2 a pathumna chu Gesur lal Talmaia fanu Maaki fapa Absaloma a ni a; a palina chu Hagithi fapa Adonija a ni a; 3 a pangana chu Abitali laka mi Sephatia a ni a; a parukna chu a nupui Egli laka mi Ithreama a ni. 4 Hebron khuaah chuan paruk a hring a. Chutah chuan kum sarih leh thla ruk a lal a; tin, Jerusalem khuaah kum sawmthum leh kum thum a lal a. 5 Tin, Jerusalem khuaa a hrinte chu: Simea te, Sobaba te, Nathana te, Solomona te an ni a; an pali chuan Amiela fanu Bathsuii laka mi an ni. 6 Tin, Ibhara te, Elisama te, Elipheleta te, 7 Noga te, Nephega te, Japhia te, 8 Elisama te, Eliada te, Elipheleta te - pakua an ni. 9 Chûng zawng zawngte chu Davida fapate an ni, hmei fate tiam lovin; tin, Tamari chu an farnu a ni.
Solomona thlahte
10 Solomona fapa chu Rehoboama a ni a, chu mi fapa chu Abija a ni a, chu mi fapa chu Asa a ni a, chu mi fapa chu Jehosaphata a ni a, 11 chu mi fapa chu Jorama a ni a, chu mi fapa chu Ahazia a ni a, chu mi fapa chu Joasa a ni a, 12 chu mi fapa chu Amazia a ni a, chu mi fapa chu Azaria a ni a, chu mi fapa chu Jothama a ni a, 13 chu mi fapa chu Ahaza a ni a, chu mi fapa chu Hezekia a ni a, chu mi fapa chu Manasea a ni a, 14 chu mi fapa chu Amona a ni a, chu mi fapa chu Josia a ni. 15 Tin, Josia fapate chu a fa tîr chu Johanana a ni a, a dawttu chu Jehoiakima a ni a, a pathumna chu Zedekia a ni a, a palina chu Saluma a ni. 16 Jehoiakima fapate chu Jekonia leh Zedekia an ni.
Jekonia thlahte
17 Tin, sal tâng Jekonia fapate chu Sealtiela te, 18 Malkirama te, Pedaia te, Senazara te, Jekamia te, Hosama te, Nedabia te an ni. 19 Pedaia fapate chu Zerubabela leh Simeia an ni. Zerubabela fapate chu Mesulama leh Hanania an ni a, Selomithi chu an farnu a ni; 20 tin, Hasuba te, Ohela te, Berekia te, Hasadia te, Jusab-heseda te - panga an ni. 21 Hanania fapa chu Pelatia a ni a, chu mi fapa chu Jesaia a ni a, chu mi fapa chu Rephaia a ni a, chu mi fapa chu Arnana a ni a, chu mi fapa chu Obadia a ni a, chu mi fapa chu Sekania a ni. 22 Sekania fapa chu Semaia a ni. Semaia fapate chu Hatusa te, Igala te, Baria te, Nearia te, Saphata te an ni a - paruk an ni. 23 Nearia fapate chu Elioenaia te, Hizkia te, Azrikama te an ni a - pathum an ni. 24 Tin, Elioenaia fapate chu Hodavia te, Eliasiba te, Pelaia te, Akuba te, Johanana te, Delaia te, Anania te an ni a - pasarih an ni.
Juda thlahte
1 Juda fapate chu Pereza te, Hezrona te, Karmia te, Hura te, Sobala te an ni. 2 Tin, Sobala fapa Reaian Jahatha a hring a; tin, Jahathan Ahumaia leh Lahada a hring a, chûng chu Zorath-ho hnamte an ni. 3 Etama pa fapate chu Jezreela te, Isma te, Idbasa te an ni a, an farnu hming chu Hazelelponi a ni; 4 tin, Gedora pa Penuela leh Husa pa Ezera an ni. Chûngte chu Bethlehema pa, Ephrathi fa tîr, Hura thlahte an ni. 5 Tin, Tekoa pa Asura chuan nupui pahnih Heli leh Naari a nei a. 6 Tin, Naari chuan Ahuzama te, Hephera te, Temenia te, Haahastaria te a hrinsak a. Chûngte chu Naari fapate an ni. 7 Tin, Heli fapate chu Zeretha te, Izara te, Ethnana te an ni. 8 Tin, Hakozan Anuba te, Zobeba te, Haruma fapa Aharlel-ho thlahte a hring a. 9 Tin, Jabeza chu a unaute aia mi zahawm a ni a, a nu chuan, “Lungngai chunga ka hrin a ni a,” tiin a hmingah Jabeza a ti a ni. 10 Tin, Jabeza chuan, “Aw, mal mi sâwm ngei ngei la, ka ramri hi mi zauh la, i kut chuan mi awmpuiin lungngaihna ka chungah a thlen loh nân sual lak ata mi thiarfihlîm ang che,” tiin Israel-te Pathian chu a au va. Tichuan, Pathianin a thil dîl chu a hlawhtlintîr a.
Chhûngkaw dangte
11 Suha unaupa Keluban Mehira a hring a, chu mi chu Estona pa a ni. 12 Tin, Estona chuan Beth-rapha te, Pasea te, Ir-nahasa pa Tehina te a hring a. Chûngte chu Reka-hote an ni. 13 Kenaza fapate chu Othniela leh Seraia an ni. Othniela fapa chu Hathatha a ni. 14 Tin, Meonothaian Ophra a hring a; tin, Seraian Ge-harasim-ho thlahtu Joaba a hring a, chu mite chu kut themthiam mi an ni. 15 Tin, Jephunea fapa Kaleba fapate chu Irua te, Ela te, Naama te an ni a. Ela fapa chu Kenaza a ni. 16 Jehalelela fapate chu Zipa te, Zipha te, Tiria te, Asarela te an ni. 17 Ezra fapate chu Jethera te, Mereda te, Ephera te, Jalona te an ni. Pharaoa fanu Bithiaii, Mereda nupui fapate chu Miriama te, Samaia te, Estemoa pa Isba te an ni. 18 Tin, a nupui Juda hmeichhiain Gedora pa Jereda te, Sokoa pa Hebera te, Zanoa pa Jekuthiela te a hring a. 19 Tin, Nahama farnu Hodia nupuia fapate chu Garm-ho thlahtu Keila pa leh Maakath-ho thlahtu Estemoa an ni. 20 Tin, Simona fapate chu Amnona te, Rina te, Ben-hanana te, Tilona te an ni. Tin, Isia fapate chu Zohetha leh Ben-zohetha an ni.
Sela thlahte
21 Juda fapa Sela fapate chu Leka pa Era te, Maresa pa Laada te, Asbea-ho puan zai sîn siamtuhote an ni a; 22 tin, Jokima te, Kozeba-ho te, Joasa te, Sarapha, Moab rama rorêla awma, chumi hnua Jasubi-lehem-a awm taa te kha an ni. 23 Chûng thuziak chu hmasânga mi a ni. Chûngho chu bêl vawtu, Netaim leh Gedera khuaa awm an ni a, lal hnênah a hna thawkin an awm a ni.
Simeona thlahte
24 Simeona fapate chu Nemuela te, Jamina te, Jariba te, Zera te, Saula te an ni; 25 Saula fapa chu Saluma a ni a, chu mi fapa chu Mibsama a ni a, chu mi fapa chu Misma a ni. 26 Tin, Misma fapa chu Hamuela a ni a; chu mi fapa chu Zakura a ni a, chu mi fapa chu Simeia a ni. 27 Simeia chuan fapa sâwm leh paruk leh fanu paruk a nei a; a unaute erawh chuan fa an ngah ve lo va, Juda thlahte angin an thlahte pawh an pung ve lo. 28 Beer-seba-ah te, Molada-ah te, Hazar-sual-ah te an awm a, 29 Bilha-ah te, Ezem-ah te, Tolad-ah te, 30 Bethuel-ah te, Horma-ah te, Ziglag-ah te, 31 Beth-markaboth-ah te, Hazar-susim-ah te, Beth-biri-ah te, Saraim-ah te pawh. Chûngte chu Davida lal thlenga an khawpuite chu a ni. 32 Tin, an khua chu khaw nga - Etam te, Ain te, Rimon te, Token te, Asan te a ni; 33 tin, chumi vêla khaw tê zawng zawng Baal thlengin a ni. Chûngte chu an chênna a ni a, an thlahtute thu ziakna an kawl bawk. 34 Tin, Mesobaba te, Jamleka te, Amazia fapa Josa te, 35 Joela te, Josibia fapa Jehua te (chu mite pa chu Asiela fapa Seraia a ni a), 36 Elioenaia te, Jaakoba te, Jesohaia te, Asaia te, Adiela te, Jesi-miela te, Benaia te, 37 Siphia fapa Ziza te, chu mite pa chu Allona a ni a, chu mi chu Jedaia fapa a ni a, chu mi chu Simria fapa a ni a, chu mi chu Semaia fapa a ni a. 38 Chûng an hming an lamte chu an chhûngkaw puipate an ni a, an chhûngkua chu nasa takin an lo pung ta a. 39 Tin, Gedor luhnaah, ruam chhak lampang thlengin an ran rualte tlatna tûr zawngin an kal a. 40 Tin, ran tlatna hnim tui tak tak leh ṭha tak tak an hmu a, a ram chu a zauvin a reh a, râlmuanawm tak a ni; a hmaa lo awmte chu Hama thlahte an ni a. 41 Tichuan, chûng an hming an ziakate chu Judai ram lal Hezekia lal lai khân an lût a, an puan inte leh chutih laia Meunim-ho lo awmte chu an tiboral vek a, tûn thlengin an hmun chu an luahsak a; an ran rual tân tlatna a awm avângin. 42 Tin, ṭhenkhat Simeona fapateho, mi zanga lai Seir tlângah an kal a, an hotu atân Isia fapate - Pelatia te, Nearia te, Rephaia te, Uziela te an hmang a. 43 Tichuan, Amalek-ho hnam tlân bo la awmte kha an hneh a, tûn thlengin chutah chuan an awm ta a.
Reubena thlahte
1 Israela fa tîr Reubena fapate chu (ani chu fa tîr zawng a ni a; amaherawhchu, a pa khum a tihbawlhhlawh avângin a fa tîr nihna chu Israela fapa Josefa fapate pêk a ni a; tichuan, thlahtute chhuina chu fa tîr nihnaa chhui tûr a ni ta lo; 2 Juda chuan a unaute a khûm ta si a, amahah chuan mi lian chu a lo chhuak a, fa tîr nihna erawh chu Josefa chan a ni). 3 Israela fa tîr Reubena fapate chu Hanoka te, Palua te, Hezrona te, Karmia te an ni. 4 Joela fapa chu Semaia a ni a, chu mi fapa chu Goga a ni a, chu mi fapa chu Simeia a ni a, 5 chu mi fapa chu Mika a ni a, chu mi fapa chu Reaia a ni a, chu mi fapa chu Baala a ni a, 6 chu mi fapa chu Beera, Assuria lal Tiglath-pileseran sala a hruai chu a ni; ani chu Reuben-ho mi lian a ni. 7-8 An thlahtute hnam chhui dâna a unaute hnam hotute chu Aroer aṭanga Nebo leh Baal-meon thlenga awm Jeiela te, Zakaria te, Bela te an ni; chu mi pa chu Azaza a ni a, chu mi pa chu Sema a ni a, chu mi pa chu Joela a ni. 9 Anni chuan chhak laman Euphrates lui aṭanga thlalêr luhna thlengin an luah a, Gilead ramah chuan an ran a lo pun tâk avângin. 10 Tin, Saula dam lai chuan Hagar-ho an rûn a, chûngho chu an kutah an lo tlâwm ta a; tichuan, Gilead chhak lam ram tluanin an puan inte an zâr a.
Gada thlahte
11 Tin, Gada fapate chu an ep Basan raman Saleka thlengin an awm a: 12 hotu Joela te, a dawttu Saphama te, Janaia te, Basan-a mi Saphata te, 13 an chhûngte, an unau Mikaela te, Mesulama te, Seba te, Joraia te, Jakana te, Ziaa te, Ebera te nên pasarih an ni. 14 Hêngte hi Huria fapa Abihaila fapate an ni, chu mi chu Jaroa fapa a ni a, chu mi chu Gileada fapa a ni a, chu mi chu Mikaela fapa a ni a, chu mi chu Jesisaia fapa a ni a, chu mi chu Jadoa fapa a ni a, chu mi chu Buza fapa a ni a; 15 Ahia chu Abdiela fapa a ni a, chu mi chu Gunia fapa a ni a, an chhûngkaw hotu a ni. 16 Tichuan, Gilead rama Basan-ah leh a khawpuiahte leh Saron dai vêl zawng zawng an ram chin thlengin an luah a. 17 Chûng zawng zawng chu Judai ram lal Jothama lal lai leh Israel ram lal Jeroboama lal laia thlahtute chhuinaah ziak an ni.
Khawchhak lama awm râl tu mi rual
18 Reuben-ho te, Gad-ho te, Manase hnam zâtvete zînga huaisen ṭha ṭhiau, phaw leh kâwlhnâm keng thei, thal kah thiam, indo thiamte chu sîngli leh sângli leh zasarih leh sawmruk an ni. 19 Hagar-hote, Jetur-hote, Naphis-hote, Nodab-hote chu an do va. 20 Tin, ṭanpuiin an awm a; tichuan, Hagar-ho leh an hnêna awm zawng zawng chu an kutah pêk an ni ta a; indo lai chuan Pathian an au va, anni chu a lo chhâng a, amahah chuan rinna an nghah avângin. 21 Tin, an rante an mansak a; an sanghâwngsei sîngnga leh berâm nuai hnih leh sîngnga leh sabengtung sânghnih leh mihring nuai khat nên. 22 Chu indo chu Pathian remtihpui a nih avângin mi tam tak an that a ni. Sal tân thlengin an awmna ram chu an luahsak ta reng a.
Khawchhak Manase-ho
23 Tin, Manasea thlah hnam zâtvete chu chumi ramah chuan an awm a; Basan aṭanga Baal-hermon te, Senir te, Hermon tlâng thlengin an sâwn zau zêl a. 24 Tin, hêngte hi an chhûngkaw puipate chu an ni: Ephera te, Isia te, Eliela te, Azriela te, Jeremia te, Hodavia te, Jadiela te, mi chak huaisen, mi hmingthang, an pute chhûngkaw puipate chu.
Khawchhak hnamte Assuria lalin bawihah a hruai bo
25 Tin, an pi leh pute Pathian chungah thil an tisual a, an hmaa Pathianin a lo tihboral tâk, chu rama mi pathiante lakah chuan an uire ta a. 26 Tin, Israel-te Pathian chuan Assuria lal Pula (chu chu Assuria lal Tilgath-pilnesera) rilru chu a chawk tho va, ani chuan Reuben-ho te, Gad-ho te, Manase hnam zâtvete chu a man a, Hala-ah te, Habor-ah te, Hara-ah te, Gozan luiah te a hruai a, tûn thleng hian an la awm.
Puithiam lalber chhûng chanchin
1 Levia fapate chu Gersona te, Kohatha te, Meraria te an ni. 2 Tin, Kohatha fapate chu Amrama te, Izara te, Hebrona te, Uziela te an ni. 3 Tin, Amrama thlahte chu Arona te, Mosia te, Miriami te an ni a. Tin, Arona fapate chu Nadaba te, Abihua te, Eleazara te, Ithamara te an ni. 4 Eleazara chuan Phinehasa a hring a, Phinehasan Abisua a hring a; 5 Abisuan Bukia a hring a, Bukian Uzia a hring a; 6 Uzian Zerahia a hring a, Zerahian Meraiotha a hring a; 7 Meraiothan Amaria a hring a, Amarian Ahituba a hring a; 8 Ahituban Zadoka a hring a, Zadokan Ahimaaza a hring a; 9 Ahimaazan Azaria a hring a, Azarian Johanana a hring a; 10 Johananan Azaria a hring a (chu mi chuan a ni, Jerusalem-a Solomona sak biak ina puithiam hna thawk ni); 11 Azarian Amaria a hring a, Amarian Ahituba a hring a; 12 Ahituban Zadoka a hring a, Zadokan Saluma a hring a; 13 Saluman Hilkia a hring a, Hilkian Azaria a hring a; 14 Azarian Seraia a hring a, Seraian Jehozadaka a hring a; 15 LALPAN Judai ram leh Jerusalem khua Nebukadnezzara kuta a pêk lai khân Jehozadaka chu salah a tâng ve a.
Levia thlah mi dange
16 Levia fapate chu Gersoma te, Kohatha te, Meraria te an ni. 17 Hêng hi Gersoma fapate hming chu a ni: Libnia leh Simeia. 18 Kohatha fapate chu Amrama te, Izara te, Hebrona te, Uziela te an ni. 19 Meraria fapate chu Mahlia leh Musia an ni. Chûngte chu an chhûngkaw kal dân ang zêla Levi-ho hnamte chu an ni. 20 Gersoma fapa chu Libnia a ni a, chu mi fapa chu Jahatha a ni a, chu mi fapa chu Zima a ni a, 21 chu mi fapa chu Joa a ni a, chu mi fapa chu Idova a ni a, chu mi fapa chu Zera a ni a, chu mi fapa chu Jeatheraia a ni. 22 Kohatha fapate chu: Aminadaba a ni a, chu mi fapa chu Kora a ni a, chu mi fapa chu Asira a ni a, 23 chu mi fapa chu Elkana a ni a, chu mi fapa chu Ebiasapha a ni a, chu mi fapa chu Asira a ni a, 24 chu mi fapa chu Tahatha a ni a, chu mi fapa chu Uriela a ni a, chu mi fapa chu Uzia a ni a, chu mi fapa chu Saula a ni. 25 Elkana fapate chu: Amasaia leh Ahimotha an ni. 26 Elkana thlahte chu: Elkana fapa chu Zophaia a ni a, chu mi fapa chu Nahatha a ni a, 27 chu mi fapa chu Eliaba a ni a, chu mi fapa chu Jerohama a ni a, chu mi fapa chu Elkana a ni. 28 Samuela fapate chu a upa zâwk chu Joela a ni a, a dawttu chu Abija a ni. 29 Meraria fapa chu Mahlia a ni a, chu mi fapa chu Libnia a ni a, chu mi fapa chu Simeia a ni a, chu mi fapa chu Uza a ni a, 30 chu mi fapa chu Simea a ni a, chu mi fapa chu Hagia a ni a, chu mi fapa chu Asaia a ni.
Tempul zaipâwl
31 Chûngte chu a ni, bâwm dah hnua LALPA ina hla hruaitu atâna Davidan a ruatte chu. 32 Tichuan, Solomonan Jerusalem-a LALPA in a sak hma loh chu, inbiakna puan inah chuan hlain rawng an bâwl ṭhîn a, an inchhâwk kual ṭhîn a ni. 33 Tin, hêngte hi chûng hna thawktute chu an ni, an fapate nên, Kohath-ho thlahte chu: hla satu Hemana a ni a, chu mi pa chu Joela a ni a, chu mi pa chu Samuela a ni a, 34 chu mi pa chu Elkana a ni a, chu mi pa chu Jerohama a ni a, chu mi pa chu Eliela a ni a, chu mi pa chu Tova a ni a, 35 chu mi pa chu Zupha a ni a, chu mi pa chu Elkana a ni a, chu mi pa chu Mahatha a ni a, chu mi pa chu Amasaia a ni a, 36 chu mi pa chu Elkana a ni a, chu mi pa chu Joela a ni a, chu mi pa chu Azaria a ni a, chu mi pa chu Zephania a ni a, 37 chu mi pa chu Tahatha a ni a, chu mi pa chu Asira a ni a, chu mi pa chu Ebiasapha a ni a, chu mi pa chu Kora a ni a, 38 chu mi pa chu Izara a ni a, chu mi pa chu Kohatha a ni a, chu mi pa chu Levia a ni a, chu mi pa chu Israela a ni a. 39 Tin, a unaupa chu Asapha, a ding lama che ṭhîn a ni a, Asapha pa chu Berekia a ni a, chu mi pa chu Simea a ni a, 40 chu mi pa chu Mikaela a ni a, chu mi pa chu Baaseia a ni a, chu mi pa chu Malkija a ni a, 41 chu mi pa chu Ethnia a ni a, chu mi pa chu Zera a ni a, chu mi pa chu Adaia a ni a, 42 chu mi pa chu Ethana a ni a, chu mi pa chu Zima a ni a, chu mi pa chu Simeia a ni a, 43 chu mi pa chu Jahatha a ni a, chu mi pa chu Gersoma a ni a, chu mi pa chu Levia a ni a. 44 Tin, vei lama che ṭhîn an unau, Meraria fapa chu Ethana a ni a, chu mi pa chu Kisia a ni a, chu mi pa chu Abdia a ni a, chu mi pa chu Maluka a ni a, 45 chu mi pa chu Hasabia a ni a, chu mi pa chu Amazia a ni a, chu mi pa chu Hilkia a ni a, 46 chu mi pa chu Amzia a ni a, chu mi pa chu Bania a ni a, chu mi pa chu Semera a ni a, 47 chu mi pa chu Mahlia a ni a, chu mi pa chu Musia a ni a, chu mi pa chu Meraria a ni a, chu mi pa chu Levia a ni a. 48 Tin, an unau Levi-hote chu Pathian biakbûka rawngbâwl hna zawng zawng thawk tûra ruat an ni.
Arona thlahte
49 Arona leh a thlahte erawh chuan Pathian chhiahhlawh Mosian thu a lo pêk tawh zawng zawng ang khân, hmun thianghlim ber hna zawng zawng chu changin, Israel-te tâna remna siam nân hâlral thilhlanna maichâmah leh rimtui hlanna maichâmah an hlân ṭhîn a. 50 Tin, hêngte hi Arona fapate chu an ni: Eleazara chu a fapa a ni a, chu mi fapa chu Phinehasa a ni a, chu mi fapa chu Abisua a ni a, 51 chu mi fapa chu Bukia a ni a, chu mi fapa chu Uzia a ni a, chu mi fapa chu Zerahia a ni a, 52 chu mi fapa chu Meraiotha a ni a, chu mi fapa chu Amaria a ni a, chu mi fapa chu Ahituba a ni a, 53 chu mi fapa chu Zadoka a ni a, chu mi fapa chu Ahimaaza a ni.
Levia chite khawsakna
54 Tin, hêngte hi an ram chhûnga an awmhmun khuar dân ang zêla an awmhmunte chu a ni: Arona fa, Kohath mi hnamte chu (ṭhum vâwr chu an chunga tlu hmasa ber a ni rêng a) 55 Judai rama Hebron leh a daivêlte chu an pe a. 56 Khawpui daivêlte leh a khawperte erawh chu Jephunea fapa Kaleba an pe a. 57 Tin, Arona fapate chu inhumhimna khawpui Hebron te, Libna khua a daivêlte nên, Jatir leh Estemoa khua a daivêlte nên, 58 Hilen khua a daivêlte nên, Debir khua a daivêlte nên, 59 Asan khua a daivêlte nên, Beth-semes khua a daivêlte nên; 60 Benjamin hnamte zîng ata Geba khua a daivêlte nên, Alemeth khua a daivêlte nên, Anathoth khua a daivêlte nên an pe a. An hnam zînga khawpui pêk zawng zawng chu khaw sâwm leh khaw thum a ni. 61 Tin, Kohatha fapa dangte chu hnam zâtve, Manasea thlahte hnam zâtve chanpuala mite khawpui sâwm, ṭhum vâwrin an pe a. 62 Tin, Gersoma fapate chu an hnam kal dân ang zêlin, Isakar hnam chanpuala mi te, Aser hnam chanpuala mi te, Naphtali hnam chanpuala mi te, Basan rama Manase hnam chanpuala mi te, khawpui sâwm leh pathum an pe a. 63 Meraria fapate chu an hnam kal dân ang zêlin Reuben hnam chanpuala mi te, Gad hnam chanpuala mi te, Zebulun hnam chanpuala mi te, ṭhum vâwrin khaw sâwm leh pahnih an pe a. 64 Tin, Israela thlahte chuan Levi-ho chite chu khawpuite leh a daivêlte an pe a. 65 Tichuan, Juda hnam chanpuala mi te, Simeon hnam chanpuala mi te, Benjamin hnam chanpuala mi te khawpui hming sawi tâkte chu ṭhum vâwrin an pe a ni. 66 Tin, Kohatha thlahte hnam ṭhenkhat chuan Ephraim-hote chanpuala mi khawpuite an chang a. 67 Tin, Ephraim tlâng rama inhumhimna khawpui Sekem chu a daivêlte nên an pe a, Gezer a daivêlte nên; 68 Jokmeam a daivêlte nên, Beth-horon a daivêlte nên, 69 Aijalon a daivêlte nên, Gath-rimon a daivêlte nên. 70 Tin, Manase hnam zâtvete chanpuala mi chu - Kohatha thlahte hnam la awmte tân chuan - Aner a dai vêlte nên, Bileam a daivêlte nên an pe a. 71 Manase hnam zâtvete chanpuala mi Gersoma fapate an pêk chu Basan rama Golan a daivêlte nên, Astaroth a daivêlte nên a ni. 72 Isakar hnam chanpuala mi Kedes a daivêlte nên, Daberath a daivêlte nên, 73 Ramoth a daivêlte nên, Anem a daivêlte nên; 74 Aser hnam chanpuala mi Masal a daivêlte nên, Abdon a daivêlte nên, 75 Hukok a daivêlte nên, Rehob a daivêlte nên; 76 Naphtali hnam chanpuala mi Galili rama Kedes a daivêlte nên, Hamon a daivêlte nên, Kiriathaim a daivêlte nên a ni. 77 Tin, Meraria thlah Levi-ho dangte an pêk chu Zebulun hnam chanpuala mi Rimono khua a daivêlte nên, Tabor khua a daivêlte nên; 78 Jeriko zâwn Jordan râl, Jordan chhak lampangah Reuben hnam chanpuala mi thlalêra Bezer khua a daivêlte nên, Jahzah khua a daivêlte nên, 79 Kedemoth khua a daivêlte nên, Mephaath khua a daivêlte nên; 80 Gad hnam chanpuala mi Gilead rama Ramoth khua a daivêlte nên, Mahanaim khua a daivêlte nên, 81 Hesbon khua a daivêlte nên, Jazer khua a daivêlte nên a ni.
Isakara thlahte
1 Isakara fapate chu Tola te, Pua te, Jasuba te, Simrona te an ni a, pali an ni. 2 Tola fapate chu Uzia te, Rephaia te, Jeriela te, Jamaia te, Ibsama te, Samuela te an ni a, Tola thlahtea chhûngkaw puipa an ni. Anmahni chhuana mi chak huaisen an ni a; Davida dam lai chuan sînghnih leh sânghnih leh zaruk an ni. 3 Uzia fapa chu Izrahia a ni a; Izrahia fapate chu Mikaela te, Obadia te, Joela te, Isia te an ni. Panga an ni a, an vaiin puipa an ni. 4 Tin, an chhûngkaw chhiarnaa chhiar tel sipai sîngthum leh sângruk an awm bawk a; nupui leh fapa tam tak nei an ni. 5 Tin, Isakar hnam zawng zawng chhiarnaa chhiar tel an unaute chu mi chak huaisen sîngriat leh sângsarih an ni.
Benjamina leh Dana thlahte
6 Benjamina fapate chu Bela te, Bekera te, Jediaela te an ni a, pathum an ni. 7 Bela fapate chu Ezbona te, Uzia te, Uziela te, Jerimotha te, Iria te an ni a, panga an ni. Chhûngkaw puipa, mi chak huaisen an ni a, thlahte chhiarnaa chhiarte chu sînghnih leh sânghnih leh sawmthum leh pali an ni. 8 Bekera fapate chu Zemira te, Joasa te, Eliezera te, Elioenaia te, Omria te, Jeremotha te, Abija te, Anathotha te, Alemetha te an ni. Chûng zawng zawng chu Bekera fapate an ni. 9 Tin, anni chu thlahte chhiarnaa ziak dân chuan chhûngkaw puipa, mi chak huaisen sînghnih leh zahnih an ni. 10 Jediaela fapa chu Bilhana a ni a; Bilhana fapate chu Jeusa te, Benjamina te, Ehuda te, Kenaana te, Zethana te, Tarsisa te, Ahisahara te an ni. 11 Jediaela thlah zawng zawngte chu chhûngkaw puipa mi chak huaisen, sîngkhat leh sângsarih leh zahnih an ni. 12 Ira fapa Supima leh Hupima te, Ahera fapa Husima te nên.
Naphtalia thlahte
13 Naphtalia fapate chu Jaziela te, Gunia te, Jezera te, Saluma te an ni a, Bilhaii fate an ni.
Manasea thlahte
14 Manasea fapate chu, a nupuiin Asriela a hring a (A hmeinu Aram miin Gileada pa Makira a hring a; 15 Makira chuan Hupim leh Supim mi nupuiah a nei a; tin, a farnu hming chu Maaki a ni), a dawttu hming chu Zelophehada a ni; tin, Zelophehada chuan fanute a nei a. 16 Makira nupui Maaki chuan fapa a hring a, a hmingah Peresa a sa a. A unaupa hming chu Seresa a ni a; a fapate chu Ulama leh Rakema an ni. 17 Ulama fapa chu Bedana a ni. Chûngte chu Manasea thlah Makira fapa Gileada fapate chu an ni. 18 Tin, a farnu Hamoleketin Isoda te, Abiezera te, Malaa te a hring a. 19 Tin, Semida fapate chu Ahiana te, Sekema te, Likhia te, Aniama te an ni.
Ephraima thlahte
20 Ephraima fapa chu Suthela a ni a, chu mi fapa chu Bereda a ni a, chu mi fapa chu Tahatha a ni a, chu mi fapa chu Eleada a ni a, chu mi fapa chu Tahatha a ni a, 21 chu mi fapa chu Zabada a ni a, chu mi fapa chu Suthela a ni a, Ezera leh Eleada, chumi rama chêng Gath khuaa mite ran rual zuk lâk an tum avânga an lo thah tâkte nên. 22 An pa Ephraima chuan ni rei tak a sûn a; tin, a unaute chu amah hnêm tûrin an va kal a. 23 Tin, a nupui chu a pâwl a, a rai a, fapa a hring a, vânduainain an in chhûng a tlâkbuak avângin a hmingah chuan Beria a sa a. 24 Tin, a fanu chu Seerai a ni a, chu mi chuan Beth-horon thlangta zâwk leh chhakta zâwk leh Uzen-seera a siam a. 25 A fapa chu Repha a ni a, Resepha nên, chu mi fapa chu Tela a ni a, chu mi fapa chu Tahana a ni a, 26 chu mi fapa chu Ladana a ni a, chu mi fapa chu Amihuda a ni a, chu mi fapa chu Elisama a ni a, 27 chu mi fapa chu Nuna a ni a, chu mi fapa chu Josua a ni. 28 Tin, an chanpual leh an chênnate chu Bethel leh a khawperte, chhak lamah Naaran, thlang lamah Gezer a khawperte nên, Sekem pawh a khawperte nên, Aza a khawperte thlengin; 29 tin, Manasea thlahte ramri lamah chuan Beth-san leh a khawper te, Taanak leh a khawper te, Megido leh a khawper te, Dor leh a khawperte nên a ni. Chûngah chuan Israela fa Josefa thlahte chu an awm a ni.
Asera thlahte
30 Asera fate chu Imna te, Isva te, Isvia te, Beria te, an farnu Seri te an ni. 31 Tin, Beria fapate chu Hebera leh Birzaitha pa Malkiela an ni. 32 Tin, Hebera chuan Japhleta te, Somera te, Hothama te, an farnu Suai te a hring a. 33 Japhleta fapate chu Pasaka te, Bimhala te, Asvatha te an ni. Chûngte chu Japhleta thlahte an ni. 34 Semera fapate chu Ahia te, Roga te, Jehuba te, Arama te an ni. 35 Tin, a unaupa Helema fapate chu Zopha te, Imna te, Selesa te, Amala te an ni. 36 Zopha fapate chu Suaha te, Harnephera te, Shuala te, Beria te, Imra te, 37 Bezera te, Hoda te, Samma te, Silsa te, Ithrana te, Beera te an ni. 38 Jethera fapate chu Jephunea te, Pispa te, Ara te an ni. 39 Tin, Ula fapate chu Ara te, Haniela te, Rizia te an ni. 40 Chûng zawng zawngte chu Asera thlah, chhûngkaw puipa, mi chak huaisen, hotu berte chu an ni. Tichuan, thlahte chhiarnaah râlkaia chhiarte chu sînghnih leh sângruk an ni.
Benjamina thlahte
1 Tin, Benjaminan a fa tîrah Bela a hring a, a dawtah Asbela, a dawt lehah Ahara, 2 a dawt lehah Noha, a dawt leh pekah Rapha. 3 Bela fapate chu Adara te, Gera te, Abihuda te, 4 Abisua te, Naamana te, Ahova te, 5 Gera te, Sephuphana te, Hurama te an ni. 6 Ehuda fapate chu hêngte hi an ni; hêngte hi Geba-a chêngho chhûngkaw puipate an ni a, Manahath-ah salah an hruai a: 7 chûngte chu Naamana te, Ahija te, Gera te an ni a, salah a hruai a, ani chuan Uza leh Ahihuda a hring a. 8 Tin, Saharaima chuan a nupuite a kaltîr hnuin Moab ramah fate a hring a; a nupuite chu Husimi leh Baari an ni. 9 Tin, ani chuan a nupui Hodesi lakah Jobaba te, Zibia te, Mesa te, Malkama te, 10 Jeuza te, Sakia te, Mirma te a nei a. Chûngte chu a fapa, chhûngkaw puipate chu an ni. 11 Tin, Husimi lakah Abituba leh Elpaala a hring a. 12 Tin, Elpaala fapate chu Ebera te, Misama te, Semeda te (chu mi chuan Ono leh Lod khua leh a khawperte a siam a);
Gath leh Aijalon-a awm Benjamin-ho
13 Gath-a awmho hnawt chhuaktu, Aijalon-a awmho chhûngkaw puipa, Beria leh Sema te nên; 14 Ahiova te, Sasaka te, Jeremotha te, 15 Zebadia te, Arada te, Edera te, 16 Beria fapa - Mikaela te, Ispa te, Joha te.
Benjamin-ho, Jerusalem-a awmte
17 Zebadia te, Mesulama te, Hizkia te, Hebera te, 18 Elpaala fapa - Ismeraia te, Izlia te, Jobaba te, 19 Jakima te, Zikria te, Zabdia te, 20 Elienaia te, Zilethaia te, Eliela te, 21 Simeia fapa - Adaia te, Beraia te, Simratha te. 22 Ispana te, Ebera te, Eliela te, 23 Abdona te, Zikria te, Hanana te, 24 Hanania te, Elama te, Anthothija te, 25 Sasaka fapa - Iphdeia te, Penuela te. 26 Samseraia te, Seharia te, Athalia te, 27 Jerohama fapa - Jaaresia te, Elija te, Zikria te nên. 28 Chûngte chu anmahni chhuanah chuan chhûngkaw puipa, hotute an ni. Chûngte chu Jerusalem-ah an awm.
Benjamin-ho, Gibeon leh Jerusalem-a awm
29 Gibeon-ah chuan Gibeona pa Jeiela a awm a, a nupuia hming chu Maaki a ni; 30 tin, a fapa upa ber chu Abdona a ni a, a fa dangte chu Zura te, Kisa te, Baala te, Nadaba te, 31 Gedora te, Ahiova te, Zekera te an ni. 32 Tin, Miklothan Simea a hring a. Tin, anni pawh chu Jerusalem-ah an unaute zîngah, an unaute depah an awm a.
Lal Saula thlahte
33 Neran Kisa a hring a, Kisan Saula a hring a, Saulan Jonathana te, Malkisua te, Abinadaba te, Esbaala te a hring a. 34 Jonathana fapa chu Merib-baala a ni a; tin, Merib-baalan Mika a hring a. 35 Mika fapate chu Pithona te, Meleka te, Tarea te, Ahaza te an ni. 36 Tin, Ahazan Jehoada a hring a, Jehoadan Alemetha leh Azmavetha leh Zimria a hring a; tin, Zimrian Moza a hring a. 37 Mozan Binea a hring a, chu mi fapa chu Rapha a ni a, chu mi fapa chu Eleasa a ni a, chu mi fapa chu Azela a ni. 38 Azela chuan fapa paruk a nei a, an hming chu hêngte hi a ni: Azrikama te, Bokerua te, Ismaela te, Searia te, Obadia te, Hanana te. Chûng zawng zawngte chu Azela fapate an ni. 39 Tin, a unaupa Eseka fapate chu a fa tîr Ulama a ni a, a dawttu chu Jeusa a ni a, a dawt lehtu chu Elipheleta a ni. 40 Ulama fapate chu mi chak huaisen, thal kâp mi an ni a, fapa te, tupa te tam tak an nei a, za leh sawmnga an ni. Chûng zawng zawng chu Benjamina thlahte an ni.
Sal tâng kîr lehte
1 Chutichuan, Israel zawng zawng chu thlahte chhiarnaa chhiar an ni a; tichuan, ngai teh, Israel lalte lehkhabuah a chuang a ni. Juda-te erawh chu an bawhchhiatna avângin Babulon-ah sala hruaiin an awm a. 2 Tin, an chanpual khua luah ṭantute chu Israel-ho te, puithiamho te, Levi-ho te, Nethin-ho te an ni. 3 Tin, Jerusalem-ah chuan Juda thlahte, Benjamina thlahte, Ephraima leh Manasea thlahte an awm a: 4 Uthaia chu Amihuda fapa a ni a, chu mi chu Omria fapa a ni a, chu mi chu Imria fapa a ni a, chu mi chu Bania fapa a ni a, chûngte chu Juda fapa Pereza thlahte an ni. 5 Silon-ho thlahte chu: Asaia chu an zînga upa ber a ni a, a fate nên. 6 Zera thlahte chu: Jeuela, a unaute nên, zaruk leh sawmkua an ni. 7 Benjamina thlahte chu: Salua chu Mesulama fapa a ni a, chu mi chu Hodavia fapa a ni a, chu mi chu Hasenua fapa a ni a; 8 Ibneia chu Jerohama fapa a ni a; Ela chu Uzia fapa a ni a, chu mi chu Mikria fapa a ni a; Mesulama chu Sephatia fapa a ni a, chu mi chu Reuela fapa a ni a, chu mi chu Ibnija fapa a ni; 9 tin, anmahniho chhuanah chuan unau zakua leh sawmnga leh paruk an ni. Chûng zawng zawngte chu an hnam zînga an chhûngkaw puipate an ni.
Jerusalem khuaa puithiam chêngte
10 Puithiamte chu: Jedaia te, Jehoiariba te, Jakina te, 11 Hilkia fapa Azaria te an ni a; chu mi chu Mesulama fapa a ni a, chu mi chu Zadoka fapa a ni a, chu mi chu Meraiotha fapa a ni a, chu mi chu Pathian ina hotu Ahituba fapa a ni a; 12 Jerohama fapa Adaia te nên, chu mi chu Pasura fapa a ni a, chu mi chu Malkija fapa a ni a, Adiela fapa Maasaia te nên, chu mi chu Jazera fapa a ni a, chu mi chu Mesulama fapa a ni a, chu mi chu Mesilemitha fapa a ni a, chu mi chu Imera fapa a ni a; 13 an unaute chu chhûngkaw puipa, sângkhat leh zasarih leh sawmruk an ni a. Pathian ina rawngbâwl hna thawk mi tak an ni.
Jerusalem khuaa Levia chi chêngte
14 Levi-hote chu: Hasuba fapa Semaia a ni a, chu mi chu Azrikama fapa a ni a, chu mi chu Hasabia fapa a ni a, chûngte chu Meraria fapate an ni; 15 Bakbakara te, Heresa te, Galala te, Matania te an ni a, chu mi chu Mika fapa a ni a, chu mi chu Zikria fapa a ni a, chu mi chu Asapha fapa a ni. 16 Semaia fapa Obadia, chu mi chu Galala fapa a ni a, chu mi chu Jeduthuna fapa a ni; tin, Asa fapa Berekia, chu mi chu Netophath-ho khuaa mi Elkana fapa a ni a.
Jerusalem-a chêng tempul vêngtute
17 Tin, kawngkhâr vêngtute chu Saluma te, Akuba te, Talmona te, Ahimana te, an unaute nên an ni. Saluma chu hotu ber a ni. 18 Ani chu tûn hmain lal kulh kawngka chhakta vêngtu a ni ṭhîn a; anni chu Levia thlahte riahhmun kawngkhâr vêngtu an ni. 19 Korea fapa chu Saluma a ni a, chu mi chu Ebiasapha fapa a ni a, chu mi chu Kora fapa a ni a, chûngte chu an unau an chhûngte Kora-hote nên rawngbâwltu, biakbûk kawngkhârte vêngtu an ni a. An pute chu LALPA biakbûk rawngbâwltu, a luhnate vêngtu an ni ṭhîn. 20 Tûn hma chuan Eleazara fapa Phinehasa chu an hotu a ni a; LALPA chu a hnênah a awm a. 21 Meselemia fapa Zakaria chu inbiakna puan in kawngkhâr vêngtu a ni a. 22 Chûng kawngkhâr vêngtu atâna thlan zawng zawngte chu zahnih leh sâwm leh pahnih an ni. Davida leh zâwlnei Samuelan an thawh tûr an lo ruatte chu mahni khua ṭheuhva thlahte chhiarnaa ziak an ni. 23 Chutichuan, anmahni leh an fate chuan LALPA in kawngkhâr, biakbûk in kawngkhârte chu enkawlin, vêngtu chan an chang ṭhîn a ni. 24 A kil pali - chhak lampangah te, thlang lampangah te, hmâr lampangah te, chhim lampangah te chuan - kawngkhâr vêngtute an awm ṭhîn a. 25 Tin, khuaa mi an unaute chu, ni sarih apiangin hunbi nei têin an hnêna awm tûrin an kal ve ṭhîn tûr a ni. 26 Kawngkhâr vêngtu hotu palite chu Levi hnamte an ni a, Pathian ina sum dahna leh pindan enkawltu an ni si a. 27 Tichuan, enkawlna chu an hna a nih avâng leh, tûk tina kawng hawn chu an hna a nih avângin Pathian in vêlahte chuan an riak ṭhîn a ni.
Levia chi hmun danga chêngte
28 ṭhenkhat chuan rawngbâwlna bungbêl an enkawl a, an dah luh dâwn leh an lâk chhuah dâwnin an chhiar zêl ṭhîn a ni. 29 ṭhenkhat chu bungrua te, hmun thianghlima bungbêl zawng zawng te, chhangphut dip tak te, uain te, hriak te, beraw leh rimtui te enkawl tûra ruat an ni a. 30 Tin, puithiam fapa ṭhenkhat chuan rimtui an siam ṭhîn a. 31 Kora hnam, Saluma fapa upa ber, Levi mi Matithia chu bêla thil kan lam ngaihtuahtu a ni. 32 Tin, Kohath-ho thlahte zînga mi an unau ṭhenkhat chu chhangdah, Chawlhni apianga buatsaiha chhang dahtute an ni. 33 Chûngte chu hla satuho, Levi-ho chhûngkaw puipa, biak in pindan nghâktu, rawngbâwlna danga âwlte an ni a; chhûn leh zâna thawk reng an ni. 34 Chûngte chu anmahni chhuan zawng zawnga hotu, Levi-ho chhûngkaw puipate an ni a, Jerusalem-a awm an ni.
Lal Saula thlahtu leh thlahte
35 Gibeon-ah chuan Gibeon-ho thlahtu Jeiela a awm a (a nupuia hming chu Maaki a ni), 36 a fa tîr chu Abdona a ni a, a dangte chu Zura te, Kisa te, Baala te, Nera te, Nadaba te, 37 Gedora te, Ahiova te, Zakaria te, Miklotha te an ni leh a. 38 Tin, Miklothan Simeama a hring a. Anniho pawh chu Jerusalem-ah an unau zain an unaute depah an awm a. 39 Neran Kisa a hring a, Kisan Saula a hring a, Saulan Jonathana te, Malkisua te, Abinadaba te, Esbaala te a hring a. 40 Jonathana fapa chu Merib-baala a ni a, Merib-baala chuan Mika a hring a. 41 Mika fapate chu Pithona te, Meleka te, Tahrea te, Ahaza te an ni. 42 Tin, Ahazan Jara a hring a; Jaran Alemetha te, Azmavetha te, Zimria te a hring a; tin, Zimrian Moza a hring a; 43 Mozan Binea a hring a, chu mi fapa chu Rephaia a ni a, chu mi fapa chu Eleasa a ni a, chu mi fapa chu Azela a ni. 44 Azela chuan fapa paruk a nei a, an hmingte chu Azrikama te, Bokerua te, Ismaela te, Searia te, Obadia te, Hanana te an ni; chûngte chu Azela fapate an ni.
Lal Saula a thi
1 Chutichuan, Philistia mite chuan Israel-hote chu an bei a; tin, Israel mite chu Philistia mite hmaah chuan an tlânchhia a, Gilboa tlângah chuan thahin an awm ta zul mai a. 2 Tin, Philistia mite chuan Saula leh a fapate chu an ûm ta ngat ngat a; tin, Philistia mite chuan Saula fapa Jonathana te, Abinadaba te, Malkisua te chu an that a. 3 Saula chu a chau ta êm êm mai a, thal kâp mite chuan an ûmpha a, an hliam ta a. 4 Chutichuan, Saula chuan a râlthuam kengtu hnênah chuan, “I khandaih kha phawi la, mi han chhun tlang rawh; hêng serh tan lohte hian mi uankhum dah ang e,” a ti a. Nimahsela, a râlthuam kengtu chuan a ti duh lo va; a hlau êm êm si a. Chutichuan, Saula chuan a khandaih chu a la a, a bawh ta a. 5 Tin, a râlthuam kengtu chuan Saula a thi tih a hriat chuan, ani pawh chuan a khandaih chu a bawh ve a, a thi ve ta a. 6 Chutichuan, Saula leh a fapate pathum chu an thi ta a, an pafa za chuan an thi ta a ni. 7 Tichuan, ruama awm Israel mi zawng zawngte chuan an tlânchhia tih leh, Saula leh a fapate chu an thi ta tih an hriat chuan, an khuate chu an chhuahsan a, an tlân bo ta a; tin, Philistia mite chuan an va luah ta a. 8 Tin, heti hi a ni a, a tûkah chuan Philistia-hoten an râl thahte thuam hlihsak tûra an va kal chuan Gilboa tlânga Saula leh a fapate lo thi chu an va hmu a. 9 Tin, a thuam an hlîp a, a lu leh a râlthuam chu an la a, an pathian lemte leh mite hnêna chanchin puan tûrin Philistia ramah chuan an thawn vêl a. 10 Tin, a râlthuam chu an pathiante inah an dah a, a lu chu Dagona inah an târ a. 11 Tin, Jabes-gilead mi zawng zawngten Philistia mitena Saula an tih dân zawng zawng thu an lo hriat chuan, 12 mi huaisenho zawng zawngte chu an thawk chhuak a, Saula ruang leh a fapate ruang chu an la a, Jabes khuaah an kalpui a, a ruhte chu Jabes khuaa sasaw hnuaiah an phûm a, ni sarih chaw an nghei a. 13-14 Chutichuan, Saula chu LALPA thu pawm duh lova, LALPA chunga a bawhchhiat avâng leh, LALPA chu râwn lova ramhuaizâwl aienthiam aientîra a râwn avângin a thi a ni. Chu vâng chuan a ni, a tihhluma, ram pawh chu Jesaia fapa Davida chu a pêk tâk ni.
Israel leh Juda lalah Davida a ṭang
1 Chutichuan, Israel-ho zawng zawng chu Hebron-a Davida hnênah an kal khâwm a, “Ngai teh, i thisen zawmpui kan ni a. 2 Tûn hmaa Saula a lal lai khân Israel-te hruai chhuak leh hruai lûttu i ni ṭhîn a; tin, LALPA i Pathianin i hnênah, ‘Ka mi Israel-te chu i châwm ang a, ka mi Israel-te chungah hotuah i awm ang,’ a ti chia,” an ti a. 3 Chutichuan, Israel-ho upa zawng zawng chu Hebron-ah lal hnênah chuan an kal a; tin, Davidan Hebron-ah chuan LALPA hmaah an hnênah thu a thlung a. Tin, LALPAN Samuela hmanga a sawi ang khân Davida chu Israel-te lal atân hriak an thih ta a. 4 Tin, Davida leh Israel-ho zawng zawng chu Jerusalem-ah an kal a (chu chu Jebus a ni); tin, chutah chuan chumi rama mi, Jebus-hote chu an awm a. 5 Tin, Jebus-a awmhote chuan Davida hnênah, “Hetah hian i lo lût tawp lo vang,” an ti a. Nimahsela, Davida chuan Zion kulh chu a la ta rêng rêng a; chu chu Davida khua tih a ni ta a. 6 Tin, Davidan, “Tu pawh Jebus-ho han bei hmasa apiang chu sipai hotu berah a awm ang,” a ti a. Tichuan, Zeruii fapa Joaba chu a han chho hmasa a, hotu berah an siam ta a. 7 Tin, Davida chu kulhah chuan a awm ta a; chuvângin, Davida khawpui an ti a ni. 8 Tin, Milo aṭangin khawpui vêl kulh chu a siam ṭha a; tin, Joaban khawpui chhûng a siam ṭha a. 9 Tichuan, Davida chu a lo ropui ta deuh deuh va; sipaihote LALPA chu a hnênah a awm avângin.
Davida sipai hmingthangte
10 Hêngte hi Davida sipai hmingthang, Israel zawng zawngte nêna ṭanga, Israel-te chungchâng thua LALPAN a sawi anga lala siam tûra a ram dinpuitu huaisen tak takte chu an ni. 11 Hêngte hi sipai huaisen, Davida hnêna awmte an ni: Hakmon mi fapa Jasobeama, sawmthum pâwl hotu, zathum chungah a fei leka ṭum khata thattu chu. 12 Tin, a dawttu chu Aho mi Dodova fapa Eleazara, sipai huaisen pathumte zinga pakhat kha. 13 Ani chu barli awm chûkna, Philistia mite indo tûra an infâwk khâwmna hmun Pas-dammim-ah khân Davida hnênah a awm a; tin, mipuite chu Philistia mite hmaah chuan an tlânchhe ta a. 14 Tin, anni chu chumi hmunah chuan an ding a, an lo ṭang tlat a, Philistia mite chu an that a; tichuan, LALPAN ropui taka ngamsakin a chhandam a. 15 Tin, sipai sawmthum zînga huaisen pathumte chu lungpuiah Adulam pûkah Davida hnênah an chhuk a; Philistia sipaiho chuan Rephaim ruamah ṭanhmun an khuar a. 16 Chutih lai chuan Davida chu kulhbîngah a awm a; tin, Philistia sipaiho chu Bethlehem-ah an awm a. 17 Tin, Davida chuan, “Bethlehem-a tuichhunchhuah tui, kulh kawngkhâr kianga mi kha in tûra mi pe han awm teh sela aw!” a ti a, a tui a hâl êm êm a. 18 Tin, pathumte chuan Philistia sipaiho chu an tâwn tlang a, kulh kawngkhâr kianga mi Bethlehem-a tuichhunchhuah tui chu an va chawi a, Davida hnênah an rawn la a; nimahsela, Davida chuan a lo in duh lo va, LALPA tân a bun chhuak a. 19 “Hei hi ka in loh tûrzia mai chu! Hêng thih huama inpehote thisen chu ka in dâwn em ni? Thih huama inpein an rawn la a ni si a,” a ti a. Chutichuan, a in duh ta lo va. Mi huaisen pathumte chuan chutiang chuan an ti a. 20 Tin, Joaba unau Abisaia chu pathumte zînga hotu ber a ni a; mi zathumte chungah a fei a lek a, anmahni chu a thah avângin pathumte zîngah chuan hmingṭhat a hlawh a. 21 Pathumte zîngah chuan pahnihte ai chuan amah chu chawimawi tlâk a ni a, an hotuah an siam a, pathum hmasate zîngah erawh chuan a tel lo. 22 Tin, Kabzeel mi huai, thil nasa tak titu Jehoiada fapa Benaia chuan Moab mi Ariela fapate pahnih chu a that a; tin a zuk chhuk a, vûr tlâk hun laiin khuarkhurumah sakeibaknei a zuk that bawk a. 23 Tin, Aigupta mi, mi âwmkhauh pui, tawng ngaa sâng a that a; chu Aigupta mi chuan fei lian pui, puan tahtu themkawl ang hi a keng a. Tin, ani chuan tiang nên chuan a zuk pan a, Aigupta mi fei chu a pawh thlâksak a, ama feiin a chhun hlum ta a. 24 Jehoiada fapa Benaia chuan chutiang chuan a ti a, sipai huaisen pathumte zînga hmingṭhat a hlawh a. 25 Ngai teh u, mi sawmthumte ai chuan chawimawi tlâk a ni a, pathum hmasate zîngah erawh chuan a tel lo; tin, Davida chuan a vêngtu pâwl hotuah a dah a. 26 Sipaite zînga mi huaisen dangte chu hêngte hi an ni: Joaba unau Asahela te, Bethlehem khuaa mi Dodova fapa Elhanana te, 27 Haror mi Samotha te, Pelon mi Heleza te, 28 Teko mi Ikesa fapa Ira te, Anathoth mi Abiezera te, 29 Husath mi Sibekaia te, Aho mi Ilaia te, 30 Netophath mi Maharaia te, Netophath mi Baana fapa Heleda te, 31 Benjamina thlah Gibea khuaa mi Ribaia fapa Ithaia te, Pirathon mi Benaia te, 32 Gaas luitêa mi Huraia te, Arbath mi Abiela te, 33 Baharum mi Azmavetha te, Saalbon mi Eliaba te, 34 Gizon mi Hasema fapate, Harar mi Sagea fapa Jonathana te, 35 Harar mi Sakara fapa Ahiama te, Ura fapa Eliphala te, 36 Mekerath mi Hephera te, Pelon mi Ahija te, 37 Karmel mi Hezroa te, Ezbaia fapa Naaraia te, 38 Nathana unaupa Joela te, Hagria fapa Mibhara te, 39 Amon mi Zeleka te, Zeruii fapa Joaba râlthuam kengtu Beeroth mi Naharaia te, 40 Ithra mi Ira te, Ithra mi Gareba te, 41 Hit mi Uria te, Ahlaia fapa Zabada te, 42 Reuben mi Siza fapa Adina, Reuben mite zînga hotu, a hnêna mi sawmthumte nên, 43 Maaka fapa Hanana te, Mithna mi Josaphata te, 44 Asterath mi Uzia te, Aroer mi Hothama fapa Sama leh Jeiela te, 45 Simria fapa Jediaela te, a unaupa Tiz mi Joha te, 46 Mahav mi Eliela te, Elnaama fapate Jeribaia leh Josavia te, Moab mi Ithma te, 47 Mezoba mi Eliela te, Obeda te, Jaasiela te pawh.
Benjamin hnam aṭanga Davida zuitu hmasate
1 Tichuan, Kisa fapa Saula avânga Davida chu Ziglag-a a inkhung tlat laia a hnêna lo kalte chu hêngte hi an ni; anni chu indonaa amah puitu mi huaisente zînga mi an ni. 2 Thalngul keng mi, ding lam leh vei lama virvawma lung vawm leh thalngula thal kah thiam an ni a; Benjamin mi Saula chite an ni. 3 A puipa ber chu Ahiezera a ni a; tin, Gibeath mi Semaa fapa Joasa; tin, Azmavetha fapa Jeziela leh Peletha te; Beraka te, Anathoth mi Jehua te; 4 sawmthum zînga mi huaisen, sawmthum hotu Gibeon mi Ismaia te; Jeremia te, Jahaziela te, Johanana te, Gederat mi Jozabada te; 5 Eluzaia te, Jerimotha te, Bealia te, Semaria te, Harup mi Sephatia te; 6 Kora mi Elkana te, Isia te, Azarela te, Joezera te, Jasobeama te; 7 Gedor mi Jerohama fapa Joela leh Zebadia te an ni.
Gad hnam aṭanga Davida zuitute
8 Tin, Gad mite zînga mi, mi chak huaisen, indo thiam, phaw leh fei hman thiam ṭhenkhat chu thlalêra kulhah Davida hnênah khân an pakai a; an hmêlte chu sakeibaknei hmêl ang a ni a, tlânga sakhilâ anga zuanzâng an ni: 9 a pakhatna chu Ezera a ni a, a dawttu chu Obadia, a dawt lehtu chu Eliaba, 10 a dawt lehtu chu Mismana, a dawt lehtu chu Jeremia, 11 a dawt lehtu chu Ataia, a dawt lehtu chu Eliela, 12 a dawt lehtu chu Johanana, a dawt lehtu chu Elzabada, 13 a dawt lehtu chu Jeremia, a dawt lehtu chu Makbanaia. 14 Chûng Gad mite chu sipai hotute an ni; an zînga chak lo ber pawh chu za hen a ni a, a chak ber chu sângkhat hen a ni. 15 Chûngho chu an ni, thla khatnaa Jordan lui a kuang zawng zawng a liam laia va kal kaia, ruama chêngho zawng zawng chhak lam leh thlang lama tlânchhiattîrtute kha.
Benjamin leh Juda-ho aṭanga zuitute
16 Tin, Benjamin-ho leh Juda-ho zînga mi ṭhenkhat chu kulhah Davida hnênah an kal a. 17 Tichuan, Davida chu anmahni hmuak tûrin a kal a, “Ṭha lam thua mi pui tûra ka hnêna lo kal in nih chuan, ka thinlungin a zawm tlat ang che u a; amaherawhchu, ka kutin pawi a khawih lo tih hre reng chung sia ka hmêlmate mi mantîr tuma lo kal in nih chuan, kan pi leh pute Pathian chuan chhinchhiahin, zilhhau che u rawh se,” a va ti a. 18 Chutichuan, sawmthum chunga hotu Amasaia chungah chuan thlarau a lo thleng a, “David, i mite kan ni e; Jesaia fapa, i lama ṭang kan ni e! I chungah thlamuanna awm rawh se, nangmah puitute chungah pawh thlamuanna awm rawh se! I Pathian chuan a ṭanpui ṭhîn si chia,” a ti a. Tichuan, Davida chuan anmahni chu a la a, sipai pâwl hotuahte a siam ta a.
Manase-ho aṭanga zuitute
19 Tin, Philistia-hoten Saula do tûra an thawh lai khân Davida pawh a tel ve a, Manase-ho zînga ṭhenkhat pawh Davida lamah an pakai a; amaherawhchu, Philistia hotute a pui ta chuang lo; “A pu Saula lamah a pakai ang a, kan lu kan hloh dah ang e,” tiin an inrâwn a, an hnar kîr leh ta a ni. 20 Tin, Ziglag khua a thlen chuan Manase-ho zînga sipai sâng hotu - Adna te, Jozabada te, Jediaela te, Mikaela te, Jozabada te, Elihua te, Zilethaia te chu a lamah an pakai a. 21 Davidan rawlrâl pâwlho a bei chu an beihpui ve a; an vai chuan mi chak huaisen, sipai hotu an ni a. 22 Ni tin Davida lama ṭang tûrin an kal an kal a, Pathian sipaiho ang maia sipai pâwl ropui tak an lo ni ta a.
Davida sipai zât
23 LALPA thu anga Saula ram Davida luahtîr tûra Hebron khuaa Davida hnêna indona râlthuama inthuam kal zât chu hetiang a ni: 24 Juda thlah, indona râlthuama inthuam, phaw leh fei keng mi chu sângruk leh zariat an ni a; 25 Simeona thlah, indonaa mi chak huaisen chu sângsarih leh za; 26 Levia thlah sângli leh zaruk; 27 Jehoiada chu Arona thlah hruaitu a ni a, a hnênah sângthum leh zasarih an tel ve a; 28 Zadoka, tlangvâl chak huaisen, a chhûngkaw zînga mi, sipai hotu sawmhnih leh pahnih nên; 29 Benjamina thlahte zinga mi, Saula chite sângthum, tûn hma chuan a tam zâwkte chu Saula ho lama ṭang an ni ṭhîn a; 30 Ephraima thlahte zînga mi, mi chak huaisen, an chhûngkaw zînga mi hmingthang sînghnih leh zariat; 31 Manase hnam zâtvete zînga mi, Davida lala siam tûra thla; chhuah lo kalte sîngkhat leh sângriat; 32 Isakara thlahte zînga mi, chûng lai hun thil chinchâng hre mi, Israel-tena an thiltih tûr ṭûl hre mi, hotu deuh deuh zahnih unau zawng zawng chu an thuhnuaia awm an ni a; 33 Zebulun-ho zînga mi, râl bei tlâk ṭhiau, indona hmanraw tinrêng nêna ṭan khawh thiam sîngnga, Davida tâna rilru nghet tak pu mi an ni a; 34 Naphtali-ho zînga mi, sipai hotu sangkhat leh fei keng mi sîngthum leh sângsarih nên; 35 Dan-ho zinga mi, râlthuama inthuam sa sînghnih leh sângriat leh zaruk; 36 Aser-ho zînga mi, râl bei tlâk ṭhiau ṭan khawh thiam sîngli; 37 Jordan râla Reuben-ho zînga mi te, Gad-ho zînga mi te, Manase hnam zâtve zînga mite, indona hmanrua tinrêngte nêna thawk nuai khat leh sînghnih. 38 Chûng zawng zawng chu indo mi, ṭan khawh thiam mi an ni a, Davida chu Israel-ho zawng zawng chunga lala siam tûrin rilru hmun khat puin Hebron-ah an kal a; tin, Israel dang zawng zawngte pawhin Davida chu lala siam tûrin rilru hmun khat an pu ṭheuh va. 39 Tin, Davida hnênah chuan ni thum ei leh bârin an awm a; an unauten an buatsaihsak vek a ni. 40 Chu chang pawh ni lovin, an laichîn unau, Isakar ram aṭang te, Zebulun ram aṭang te, Naphtali ram aṭang te lamin sabengtung te, sanghâwngsei te, sakawr te, sebâwngpatein ei tûr lam chhang te, theipui hlâwm te, grêp rah pho ro bâwr te, uain te, hriak te an phurhtîr a, bâwngpa te, berâmte tam tak an rawn keng bawk a; Israel ram chu lâwmnain a khat a.
Kiriath-jearim khua aṭangin thuthlung bâwm an sawn
1 Tin, Davida chuan hotu zawng zawng, sâng hotute leh za hotute chu a râwn hlawm a. 2 Tin, Davidan Israel pung khâwmho zawng zawng hnênah chuan, “Ṭha in tih zâwng a niha, LALPA kan Pathiaan remtih zâwng a nih bawk chuan, Israel ram zawng zawnga kan unau la awmte chu, dai vêl nei khuaa awm puithiamte leh Levi-hote nên kan hnêna rawn inkhâwm ve tûr hian i sâwm vêl ang u hmiang; 3 tin, kan Pathian bâwm hi i la leh teh ang u, Saula lal lai khân kan ngaihven hauh lo mai a,” a ti a. 4 Tichuan, pung khâwmho zawng zawng chuan chutianga tih chu an duh a, mi zawng zawng ngaiha thil dik a ni rêng a. 5 Chutichuan, Davidan Aigupta lui Sihor aṭanga Hamath khaw luhna thlenga Israel mi zawng zawngte chu Kiriath-jearim khuaa Pathian bâwm chu la tûrin a khâwm vek a. 6 Chutichuan, Davida leh Israel mi zawng zawng chu Judai rama Baala-a Kiriath-jearim an tihah chuan, cherub-ho chunga ṭhu LALPA hming chuanna thuthlung bâwm chu la tûrin an han chho va. 7 Tin, Pathian bâwm chu Abinadaba in ata tawlailîr tharin an kalpui a, Uza leh Ahiovan tawlailîr chu an khalh a. 8 Tin, Davida leh Israel mi zawng zawngte chuan hla sain, ṭingṭang te, perhkhuang te, khuangtê te, dârbenthek te, tawtawrâwt te nên, Pathian hmaah an lâm bûng bûng a. 9 Tin, Kidona hruih an han thlen chuan, Uza chuan bâwm chu chelh tumin a han ban a, bâwngte chu an pai an pai avângin. 10 Tin, LALPA thin chu Uza chungah a thawk ta thut mai a, bâwm a chelh avâng chuan a tihlum ta a; chutah chuan Pathian hmaah a thi ta a. 11 Tin, LALPAN Uza chunga kut a thlâk avângin Davida chu a thinur a; chumi hmun chu Perez-uza a vuah a; tûn thleng hian a la ni ta reng a. 12 Tin, Davida chuan chumi ni chuan Pathian chu a hlau va, “Engtin nge Pathian bâwm chu ka hawn theih tâk ang?” a ti a. 13 Chutichuan, Davida chuan bâwm chu Davida khuaah ama hnênah chuan a suan ta lo va, Git mi Obed-edoma inah a dah ta zâwk a. 14 Tin, Pathian bâwm chu Git mi Obed-edoma inah, a chhûngte hnênah chuan thla thum a awm a; tichuan, Obed-edoma chhûngte leh a neih zawng zawng chu LALPAN mal a sâwm a.
Jerusalem-a Davida thiltih
1 Tin, Tura lal Hiraman Davida hnênah mi a tîr a, sidar thingte a thawn a, lung chhertute, themthiamte a in sa tûrin a tîr bawk a. 2 Tin, Davida chuan LALPAN Israel mite chunga lalah amah chu a tinghetin, a mi Israel-te avângin a ram chu a chawimawi a ni tih a hre ta a. 3 Tin, Davida chuan Jerusalem-ah nupuite a neih belhchhah leh a, Davida chuan fanu leh fapate a nei leh a. 4 Jerusalem-a a fa neihte chu hêngte hi an ni: Samua te, Sobaba te, Nathana te, Solomona te, 5 Ibhara te, Elisua te, Elpeleta te, 6 Noga te, Nephega te, Japhia te, 7 Elisama te, Beeliada te, Elipheleta te.
Philistia mi an hneh
8 Tin, Philistia miten Davida chu Israel mi zawng zawngte lal atân hriak an thih tih an hriatin, Philistia mi zawng zawng chu Davida zawng tûrin an chho ta a; tin, Davida chuan a lo hria a, anmahni bei tûrin a kal ta a. 9 Tin, Philistia mite chu Rephaim ruamah an inzâr a. 10 Tin, Davida chuan, “Philistia mite bei tûrin ka han chho dâwn em? Ka kutah hian anniho chu i pe dâwn em?” tiin LALPA a râwn a. Tin, LALPA chuan Davida hnênah, “Han chho rawh; anniho chu i kutah ka pe dâwn a ni,” a ti a. 11 Tichuan, Baal-perazim-ah an chho va, chutah chuan Davidan anniho chu a hneh a, “LALPAN ka hmêlmate chu ka kut hmangin tuikhuah sah ang maiin min tihdarhsak ta,” a ti a. Chutichuan, chumi hmun hmingah chuan Baal-perazim an vuah a. 12 Tin, chutah chuan an milemte an kalsan a, Davidan thu a pe a, an hâl ta a. 13 Tin, Philistia-hote chu ruamah an inzâr leh a. 14 Tin, Davidan Pathian a râwn leh a; tin, Pathianin a hnênah, “Um lovin kiansan la, thingtheihmu kûng zâwn lamah han bei zâwk rawh. 15 Tin, heti hi a ni ang a, thingtheihmu lêra kal thâwm ang ri ṭhup ṭhup i hriat chuan che rawh, Philistia sipaite bei tûrin i hmaah Pathian a chhuak ta tihna a ni ang,” a ti a. 16 Tin, Pathianin thu a pêk angin Davida chuan a ti a; Philistia sipaite chu Gibeon aṭanga Gezer thlengin an bei a. 17 Tichuan, ram tinah Davida hming chu a lo thang ta a; LALPAN hnam tin amah a ṭihtîr ta a.
Thuthlung bâwm sawn an inpuahchah
1 Tin, Davida chuan Davida khawpuiah chuan inte a sa a; tin, Pathian bâwm awmna hmun a buatsaih a, puan in a zârsak a. 2 Tichuan, Davidan, “Pathian bâwm hi Levi-hote chauh lo chuan tu mân an zâwn tûr a ni lo ve; Pathian bâwm hi kumkhuaa zâwntu leh a rawngbâwltu atâna LALPA thlan an ni e,” a ti a. 3 Tin, Davidan LALPA bâwm a dahna tûr hmun a buatsaihnaa zâwn chho tûrin Jerusalem-ah Israel-ho zawng zawng chu a khâwm a. 4 Tin, Davidan Arona fate leh Levi-ho a khâwm a: 5 Kohatha thlahte zînga mi, puipa ber Uriela, a unaute nên za leh sawmhnih; 6 Meraria thlahte zînga mi, puipa ber Asaia, a unaute nên zahnih leh sawmhnih; 7 Gersoma thlahte zînga mi, puipa ber Joela, a unaute nên za leh sawmthum; 8 Elizaphana thlahte zînga mi, puipa ber Semaia, a unaute nên zahnih; 9 Hebrona thlahte zînga mi, puipa ber Eliela, a unaute nên sawmriat; 10 Uziela thlahte zînga mi, puipa ber Aminadaba, a unaute nên za leh sâwm leh pahnih. 11 Tin, Davidan puithiam Zadoka leh Abiathara leh Levi-ho Uriela te, Asaia te, Joela te, Semaia te, Eliela te, Aminadaba te a ko va, 12 an hnênah, “Nangni hi Levi-ho puipa berte in ni a; Israel-te Pathian, LALPA bâwm chu a hmun ka buatsaiha in zâwn chhoh theih nân nangni hi in unaute nên intithianghlim rawh u. 13 A tîrah pawh khân nangnin in zâwn loh avângin LALPA kan Pathian chu kan chungah a ṭuan a nih kha, thupêk angin kan lo ti si lo va,” a ti a. 14 Chutichuan, Israel-te Pathian, LALPA bâwm chu zâwn chho tûr chuan puithiamte leh Levi-hote chu an intithianghlim a. 15 Tin, LALPA thupêk Mosian a sawi ang khân, Levia thlahte chuan bâwm chu a zâwnfung chuan an zâwn ta a. 16 Tin, Davidan Levi-ho puipate chu an unaute zînga mi hla sa mite, thil tum rîk mi perhkhuang te, ṭingṭang te, dârbenthekte nêna ring tak leh hlim taka hla sa tûrin a ruattîr a. 17 Chutichuan, Levi-ho chuan Joela fapa Hemana te, a unaute zînga mi Berekia fapa Asapha te, an unau Meraria fapate zînga mi Kusaia fapa Ethana te an ruat a. 18 Tin, an unaute zînga mi Zakaria te, Bena te, Jaaziela te, Semiramotha te, Jehiela te, Unia te, Eliaba te, Benaia te, Maaseia te, Matithia te Eliphelehua te, Mikneia te, kawngkhâr vêngtu Obed-edoma leh Jeiela te nên an ruat bawk a. 19 Chutichuan, hla satuho Hemana te, Asapha te, Ethana te chu dârbenthek ring taka bêng tûra ruat an ni a; 20 tin, Zakaria te, Aziela te, Semiramotha te, Jehiela te, Unia te, Eliaba te, Maaseia te, Benaia te chu perhkhuangte nêna Alamoth sa tûra ruat an ni a; 21 tin, Matithia te, Eliphelehua te, Mikneia te, Obed-edoma te, Jeiela te, Azazia te chu ṭingṭangte nêna Sheminith saa hmahruai tûra ruat an ni. 22 Tin, Levi-ho puipa Kenania chu hla sa hotu a ni a, a thiam avângin hla hruaitu ber a ni. 23 Tin, Berekia leh Elkana chu bâwm vêng vêltu an ni. 24 Tin, puithiamho Sebania te, Josaphata te, Nethanela te, Amasaia te, Zakaria te, Benaia te, Eliezera ten Pathian bâwm hmaah chuan tawtawrâwt an tum a; tin, Obed-edoma leh Jehia chu bâwm vêng vêltu an ni bawk a.
Jerusalem-ah thuthlung bâwm an la
25 Chutichuan, Davida leh Israel upaho leh sipai sâng hotute chu, Obed-edoma ina mi LALPA thuthlunna bâwm chu zuk la chho tûrin hlim takin an kal ta a; 26 tin, heti hi a ni a, LALPA thuthlunna bâwm zâwntu Levi-hote chu Pathianin a ṭanpui a, sebâwngpa pasarih leh berâmpa pasarihin an inthawi a. 27 Tin, Davida leh bâwm zâwntu Levi-ho zawng zawng leh, hla satute leh hla sa hotu Kenania te chu puan zai sînin an inthuam a, Davida chuan puan zai sîn, puithiam kawr a ha bawk a. 28 Chutichuan, Israel mi zawng zawng chuan au dur dur chung leh, tawtawrâwt bi nei leh tawtawrâwt hâm ruai ruai leh, dârbenthek te, perhkhuang te, ṭingṭangte nêna ri bûng bûngin LALPA thuthlunna bâwm chu an la chho ta a. 29 Tin, heti hi a ni a, LALPA thuthlunna bâwm Davida khuaa a luh lai chuan, Saula fanu Mikali chuan tukverh aṭangin a lo thlîr a, Lal Davida lâma zuang chu a hmu a, a hmusit rilru ta a.
1 Tin, Pathian bâwm chu an la lût a, a dahna tûra Davidan a zâr, puan in chhûngah chuan an dah ta a; tin, Pathian hmaah chuan hâlral thilhlante leh remna thilhlante an hlân a. 2 Tin, Davidan hâlral thilhlan leh remna thilhlante a hlan zawn chuan, LALPA hmingin mipuite chu mal a sâwm a. 3 Tin, Israel mi zawng zawngte chu a hmei a pain chhang hlâwm khat leh sa hrang khat leh grêp rah pho ro bâwr khat a pe ṭheuh va. 4 Tin, LALPA bâwm hmaa rawngbâwl tûr leh LALPA, Israel-te Pathian chu hre renga amah fak tûr leh a hnêna lâwm thu sawi tûr Levi-ho ṭhenkhat a ruat a: 5 a hotu berah chuan Asapha, a dawtah perhkhuang leh ṭingṭang tum mi Zakaria te, Jeiela te, Semiramotha te, Jehiela te, Matithia te, Eliaba te, Benaia te, Obed-edoma te: Jeielan ṭingṭang a tum a, Asapha chuan dârbenthek a bêng a; 6 tin, puithiam Benaia leh Jahaziela chuan Pathian thuthlunna bâwm hmaah tawtawrâwt an hâm reng a. 7 Tichuan, chumi ni chuan Davidan LALPA hnêna lâwm thu hril tûrin Asapha leh a unaute chu a hmang ṭan ta a, he fakna hla hi a hlân a:
Fakna hla
8 Aw, LALPA hnênah lâwm thu hril ula, Hnamte zîngah chuan a thiltihte chu hriattîr rawh u. 9 Amah chawimawiin hla sa ula, amah fakin zai rawh u; A thil mak tih zawng zawng thu chu hril rawh u. 10 A hming thianghlim chu chhuang rawh u; LALPA zawngtute thinlung chu hlim rawh se. 11 LALPA leh a chakna chu zawng ula; A hmêl chu zawng fo rawh u. 12 A thil ropui tak tihte hre reng ula, A thiltihte leh a kâa a rorêlte chu, 13 Aw, a chhiahhlawh Israela thlahho, Jakoba thlah, a thlante u! 14 Ani chu LALPA kan Pathian chu a ni a; A thupêkte chu khawvêl pum huap a ni. 15 A thuthlun chu kumkhuain hre reng ula, Chhuan sâng thlenga a thu lo pêk, 16 Abrahama hnêna a thuthlun leh, Isaaka hnêna a chhechham chu; 17 Chu vêk chu Jakoba hnênah thuruatah, Israela hnêna kumkhaw thuthlung atân a tinghet a, 18 “Kanaan ram hi ka pe ang che, I ro chanpual tûr ram chu,” tiin. 19 Mi tlêm tê chauh in niha, A ni, tlêm tê, khualzin ang mai in nih lai khân; 20 Hnam hrang hrang hnênah an kal lâwr a, Ram hrang hrang aṭangin mi hrang hrang hnênah. 21 Tu ma hnehchhiah a phal lo va; A ni, anmahni avângin lalte pawh a zilhhau va, 22 “Ka hriak thihate chu tawk suh ula, Ka zâwlneite pawi rêng rêng khawih suh u,” tiin. 23 Leilung luah zawng zawngte u, LALPA chawimawiin hla sa ula; Ni tin a chhandamna thu chu hriattîr rawh u. 24 Hnam tin zîngah a ropuizia hril ula, Mi tinrêngte zîngah a thil mak tihte chu hril rawh u. 25 LALPA chu a ropui a, nasa taka fak tûr a ni si a; Pathian zawng zawng aia ṭih tûr a ni. 26 Hnamte pathian chu milem an ni si a; LALPA erawh chuan vânte khi a siam a ni. 27 Chawimawina leh ropuina a hmaah a awm a; Chakna leh hlimna a hmun thianghlimah a awm. 28 Mi tina chi tinrêngte u, LALPA chu bel ula, LALPA chu ropuina leh chakna bel rawh u. 29 LALPA chu a hming ropuina bel ula; Thil hlan tûr keng ula, a hmaah lo kal rawh u; Thianghlim mawina inbelin LALPA chu chibai bûk rawh u. 30 Leilung zawng zawngte u, a hmaah khûr rawh u! Khawvêl hi a nghîn theih lohna tûrin tihnghehin a awm. 31 Vânte khi lâwm takin awm sela, lei pawh hi hlim takin awm rawh se; Hnam tin zîngah chuan, “LALPA chuan ro a rêl,” ti rawh se. 32 Tuifinriat leh a chhûnga thil awm zawng zawng hi ri hum hum sela; Lo leh a chhûnga awm zawng zawng hi lâwm takin awm rawh se! 33 Chutih hunah chuan ramhnuaia thing zawng zawng hi LALPA hmaah chuan hlimin an zai ang, Lei ro rêl tûrin a lo kal dâwn si a. 34 Aw, LALPA hnênah lâwm thu hril rawh u, ani chu a ṭha si a; A ngilneihna pawh kumkhuain a awm dâwn si a. 35 “Aw, kan chhandamna Pathian, min chhandam la, I hming thianghlim fak tûr leh, I fakawmna chhuang tûrin, Hnam tin zîng ata min hruai khâwm la, min chhanhim ang che,” ti rawh u. 36 Israel-te Pathian LALPA chu fakin awm rawh se, Chatuan ata chatuan thleng pawhin. Tin, mipui zawng zawng chuan, “Amen,” an ti a, LALPA chu an fak a.
Jerusalem-ah leh Gibeon-a Pathian biak kaihruaitute
37 Chutichuan, chuta LALPA thuthlunna bâwm hmaa ni tin a ṭûl dân ang anga rawngbâwl tûrin, Davida chuan Asapha leh a unaute a dah ta a; 38 Obed-edoma leh Hosa, an unau sawmruk leh pariatten an pui tûr a ni a, Jeduthuna fapa Obed-edoma leh Hosa-te chu kawngkhâr vêngtu tûr an ni; 39-40 LALPAN Israel-hote thu a pêk, LALPA dâna ziak zawng zawng anga hâlral thilhlan maichâm chunga tûk leh zâna, Gibeon hmun sânga LALPA biakbûk hmaa hâlral thilhlante hlân reng tûr atân erawh chuan, puithiam Zadoka leh, a unau puithiamhote ruat an ni a; 41 an zînga tela, a khawngaihna chu kumkhua atân a nih avânga LALPA hnêna lâwm thu sawi tûrin Hemana leh Jeduthuna leh mi dang, an hming lama thlan chhuahte chu ruat an ni a. 42 Hemana leh Jeduthuna-te chu tawtawrâwt te, dârbenthek te leh thil tum chi dangte ruala tum tûr kawltu an ni a. Jeduthuna leh a fate chu kawngkhâr vêngtu tûr an ni. 43 Tichuan, mipui zawng zawng chu mahni in lam ṭheuhvah an haw ta a; tin, Davida pawh chu a chhûngte malsâwm tûrin a haw ve ta a.
Davida hnêna zâwlnei Nathana thuthlen
1 Tin, heti hi a ni a, Davida chu a ina a awm laiin zâwlnei Nathana hnênah Davida chuan, “Hei, kei chu sidar thing inah ka awm a; nimahsela, LALPA thuthlunna bâwm chu puan zâr hnuai maiah a awm a,” a ti a. 2 Tin, Nathana chuan Davida hnênah, “I rilrua i vei ang tak chuan ti ta che; Pathian i hnênah a awm si a,” a ti a. 3 Tin, chumi zân vêk chuan heti hi a ni a, Nathana hnênah Pathian thu a lo thleng a, 4 “Ka chhiahhlawh Davida chu va hrilh rawh, ‘LALPA chuan heti hian a ti: Ka awmna tûrin nangin in mi saksak tûr a ni lo. 5 Israela thlahte Aigupta ram ata ka hruai chhuah aṭangin tûn thlengin inah ka awm lo va; puan in leh biakbûkah ka awm zêl zâwk ṭhîn a. 6 Israel-ho zawng zawngte nêna kan kalna rêng rêngah pawh, ka mite châwm tûra thu ka pêk Israel-ho rorêltute hnênah, “Engati nge sidar thingin in mi sak loh?” ka ti ngai em ni?’ 7 “Chuvângin, ka chhiahhlawh Davida hnênah heti hian sawi rawh, ‘Sipaihote LALPA chuan heti hian a ti a ni, “Berâm tlatna hmun ata i berâm vêng lai chu ka mi Israel-te chunga lal tûrin ka la chia; 8 i kalna apiangah i hnênah ka awm zêl a, i hmêlmate ka tihbosak zêl chia, leia mi ropui takte angin hming ropui tak ka siamsak dâwn che a ni. 9-10 Tin, ka mi Israel-te tân hmun ka ruat ang a, insuan tawh lova anmahni pual hmuna an awm reng theih nân anni chu ka phun ang a; tûn hmaa ka mi Israel-te chunga rorêltute ka ruat laia suahsualna faten an ti ṭhîn ang khân, an tirethei tawh hek lo vang a; i hmêlma zawng zawngte pawh ka titlâwm bawk ang. Tin, chu lo pawh chu LALPA chuan chhûngkua a dinsak ang che tih ka hrilh che a ni. 11 “ ‘ “Tin, i ni a kina, i pi leh pute hnêna i kal hunah chuan, heti hi a ni ang a, i hnuan i thlah, i fate zînga mi chu ka tungding ang a; tin, a ram chu ka tinghet ang. 12 Ani chuan in mi saksak ang a; tin, a lalṭhutthlêng chu kumkhuain ka tinghet ang. 13 Tichuan, a pa ka ni ang a, ani chu ka fapa a ni ang a; ka zahngaihna i hmaa mi ka lâk bosak ang khân, ani zawng ka lâk bosak lo vang; 14 ka inah leh ka ramah ani chu kumkhuain ka din nghet ang a; tin, a lalṭhutthlêng chu kumkhuaa tihngheh a ni ang,” ’ ” tiin. 15 Chûng thu zawng zawng leh chu inlârna ang chiah chuan Nathana chuan Davida hnênah a sawi a.
Davida lâwm thu hril ṭawngṭai
16 Chutichuan, Lal Davida chu a lût a, LALPA hmaah chuan a ṭhu a, “Aw, LALPA Pathian, tu nge maw ka niha, ka chhûngte pawh tu nge maw an niha, heti chen chen mi hruai? 17 Aw Pathian, chûng pawh chu nanga mit hmuhah chuan thil tê tham zawng a ni a; nimahsela, aw LALPA Pathian, i chhiahhlawh chhûngkaw lo awm dân tûr thu chu kum tam tak chhûng atân i lo sawi tawh a, mi lian angah mi ngai bawk a, aw LALPA Pathian. 18 I chhiahhlawh chawimawia a awm chungchâng thu-ah hian Davidan i hnênah eng nge a sawi leh cheu vang? I chhiahhlawh hi i hre chiang hle si a. 19 Aw LALPA, i chhiahhlawh avângin nangma rilrua chhuak ang zêlin hêng thil ropui tak hi hriattîr tûrin thil ropui tak takte i ti ta a. 20 Aw LALPA, kan beng hriatah chuan nangmah ang rêng rêng an awm lo va, nangmah lo chu Pathian rêng rêng an awm hek lo. 21 Aigupta ram ata i tlan chhuah i mite hmaa hnam dangte titlâwma, thil ropui tak leh hlauhawm takte tia hming ropui tak siamsak tûr chea Pathianin ama mite atâna a tlan chhuah, i mi Israel-te ang rêng rêng hi khawvêlah hnam dang tu nge awm? 22 I mi Israel-te chu kumkhuaa i mite atân i lo siam ta si a; nang LALPA chu an Pathian i lo ni ta a. 23 “Tichuan, aw LALPA, i chhiahhlawh chungchâng thu leh a chhûngte chungchâng thu i sawi chu kumkhua atân tinghet la, i sawi tawh ang khân ti ang che. 24 Tin, ‘Sipaihote Pathian chu Israel-te Pathian, Israel-te tan ngeia Pathian a ni,’ tiin i hming chu kumkhuaa tihngheha chawimawiin awm sela; i chhiahhlawh Davida chhûngte chu i hmaa tihnghehin awm rawh se. 25 Aw nang ka Pathian, i chhiahhlawh hnênah chhûngkua i dinsak ang tih i lo puang tawh si a; chuvângin, i chhiahhlawh hi i hnênah ka la ṭawngṭai ngam ta a ni. 26 Aw LALPA, nang chu Pathian i ni a, he thil ṭha hi i chhiahhlawh chu i lo tiam tawh a, 27 i chhiahhlawh chhûngte chu i hmaa kumkhuaa an awm reng theih nân mal i lo sâwm ta a; aw LALPA, nangin mal i sâwm chu kumkhaw malsâwmna a ni,” a ti a.
Davida râllâkte
1 Tin, chumi hnuah chuan heti hi a ni a, Davidan Philistia mite chu a bei a, a hneh a, Gath khua leh a khawperte chu Philistia mite a chhuhsak a. 2 Tin, Moab-ho a bei leh a, Moab mite chu Davida chhiah khua an lo ni ta a, chhiahte an pe ṭhîn a. 3 Tin, Davida chuan Euphrates luia a ram din nghet tûra a kal pahin, Zoba lal Hadarezera pawh Hamath bulah a bei leh a. 4 Tichuan, Davida chuan tawlailîr sângkhat leh sakawr chung chuang mi sângsarih leh sipai sînghnih a mansak a; tin, Davida chuan tawlailîr hnûk mi sakawr zawng zawng chu an tha a chhahsak a, tawlailîr za hnûk tûr erawh chu a zuah a. 5 Tin, Damaska-a Suria mite chu Zoba lal Hadarezera chhan tûrin an lo kal a; tin, Davidan Suria mi sînghnih leh sânghnih a that a. 6 Chutichuan, Davida chuan Damaska-a Suria mite zîngah chuan sipai a dah a; tichuan, Suria mite chu Davida chhiah khua an lo ni a, chhiahte an pe ṭhîn a. Tin, LALPA chuan Davida chu a kalna apiangah a hnehtîr zêl a. 7 Tin, Davida chuan Hadarezera ho rangkachak phawte a lâksak a, Jerusalem-ah a hâwn a. 8 Tin, Hadarezera khua Tibhath leh Kun-a mi Davida chuan dâr tam tak a hâwn a, chûng chuan Solomonan dâr tuizêm, a hûnna leh a suahna dâr note a siam a. 9 Tin, Hamath lal Toua chuan Zoba lal Hadarezera sipai zawng zawng Davidan a hneh tih a lo hria a, 10 Hadarezera a rûna, a thah avânga chibai bûk tûr leh lawmpui tûrin a fapa Hadorama chu Davida hnênah a tîr a, Hadarezera leh Toua chu indo ṭhîn an ni si a; rangkachak leh tangkarua leh dâr bungbêl tinrêng a kensak a. 11 Chûngte pawh chu ram dang a ngam zawng zawnga mi tangkarua leh rangkachak a lâkte nên chuan Davidan LALPA hnênah a hlân a: Edom-ho laka mi te, Moab-ho laka mi te, Amona thlahte laka mi te, Philistia-ho laka mi te, Amelek-ho laka mi te. 12 Chu lo pawh, Zeruii fapa Abisaian Edom-ho sîngkhat leh sângriat Chi Ruamah a that a. 13 Tin, Edom ramah chuan sipaite a dah a; tichuan, Edom mi zawng zawng chu Davida chhiah khua an lo ni ta a. Tin, LALPAN Davida chu a kalna apiangah a hnehtîr zêl a. 14 Chutichuan, Davida chuan Israel mi zawng zawng chungah ro a rêl a; a mi zawng zawng chungah chuan fel takin ro a rêl a. 15 Zeruii fapa Joaba chu sipai hotu ber a ni a; Ahiluda fapa Jehosaphata chu chanchin ziaktu a ni. 16 Ahituba fapa Zadoka leh Abiathara fapa Abimeleka chu puithiam an ni a, Savsa chu ziaktu a ni; 17 Jehoiada fapa Benaia chu Kereth mi leh Peleth mite hotu a ni a; Davida fapate chu lal thu zai satu ber an ni.
Davidan Amon leh Suria mite a hneh
1 Tin, chûng hnuah chuan heti hi a ni a, Amona thlahte lal Nahasa chu a thi a, a fapa chu a aiawhin a lal a. 2 Tin, Davida chuan, “A pa chuan mi lo khawngaih ṭhin avângin kei pawhin Nahasa fapa Hanuna chu ka khawngaih ve ang,” a ti a. Chutichuan, Davida chuan a pa chungchâng thua thlamuan tûrin mite a tîr a. Tin, Davida mite chuan Amona thlahte ramah Hanuna hnên chu amah thlamuan tûrin an va thleng a. 3 Nimahsela, Amona thlah puipahote chuan Hanuna hnênah, “Davida hian i pa a zah avângin thlamuantu tûr i hnênah a rawn tîr niin i ring em ni? A mite hi ram tichhe tûra thlîthlai leh enthla tûra i hnêna lo kal an ni lâwng maw?” an ti a. 4 Chutichuan, Hanuna chuan Davida mite chu a man a, an khabe hmul a meh kâwnsak a; tin, an silhfênte chu a lai takah an mawngtam khuh pha chauhvin a tansak a, a hawtîr ta a. 5 Tichuan, tuten emaw a mite a lo tih dân chu Davida an va hrilh a; tin, a hmuak tûrin mi a tîr a, anni lah chu an zak hle mai si a. Tin, lal chuan, “In khabe hmul a chawr sei hma chu Jeriko-ah awm rih ula, chumi hnuah chuan in lo haw a ni ang chu,” a ti a. 6 Tin, Amona thlahten Davida huat zâwng an ni ta tih an lo inhriat chuan, Hanuna leh Amona thlahte chuan Mesopotamia rama mite, Aram-maaka-a mite, Zoba-a mi te, tawlailîr leh sakawr chung chuang mite rawih nân tangkaraw talent sângkhat an thawn a. 7 Chutichuan, tawlailîr sîngthum leh sânghnih Maaka lal leh a mite nên an ruai a, Medeba bulah ṭanhmun an khuar a. Tin, Amona thlahte chu an khua aṭangte chuan an chhuak a, an pung khâwm a, indo tûrin an thawk ta a. 8 Tin, Davidan chu chu a hriatin, Joaba leh sipai huaisenho zawng zawngte chu a tîr chhuak a. 9 Tin, Amona thlahte chu an lo thawk a, khawpui kawngkhâr bulah an inzâr a; tin, lalho lo tel vete chu a hrangin phûlah an awm a. 10 Chutichuan, a hma lam leh hnung lamah an rawn bei dâwn tih Joaban a hriatin, Israel mite zînga mi a ṭha ṭha a thlang chhuak a, Suria mite bei tûrin an lo inzâr a. 11 Tin, mi dang zawng zawng chu a unaupa Abisaia kutah a dah vek a, Amona thlahte bei tûrin an inzâr bawk a. 12 Tin, ani chuan, “Suria mite hi ka chelh dâwn loh chuan, nangin mi pui ang a; tin, Amona thlahte i chelh dâwn loh chuan, ka rawn pui thung ang che. 13 Huai takin awm ula, kan mite leh kan Pathian khuate chhanin i intipachang ang u; tin, LALPAN ṭha a tih ang zêlin ti rawh se,” a ti a. 14 Chutichuan, Joaba leh a hnêna mite chuan indona hmun lama Suria mite chu an va hnaih a; tin, a hmaah chuan an tlânchhe ta a. 15 Tin, Amona thlahten Suria mite an tlânchhia tih an han hmuh chuan, anni pawh chu a unaupa Abisaia hmaah chuan an tlânchhe ve ta a, khuaah an lût a. Tichuan, Joaba chu Jerusalem-ah a haw ta a. 16 Tin, Suria miten Israel-te hmaah an chan a chhe ta tih an lo hriat chuan, mi an tîr a, Lui piah lama Suria-hote chu an ko chhuak a; tin, Hadarezera sipai hotu Sophaka chu an hotu ber a ni. 17 Tin, chu chu Davida an hrilh a; tin, ani chuan Israel mi zawng zawng a ko khâwm a, Jordan lui an kai a, an va hmu a, bei tûrin an inzâr a. Chutichuan, Davida hote chu an han inzâr zawh chuan Suria-hote chu an bei ta a. 18 Tin, Suria mite chu Israel-te hmaah chuan an tlânchhe ta a; tin, Davida chuan Suria mi, tawlailîr sângsarih chunga chuang leh sipai sîngli a that a; tin, sipai hotu Sophaka pawh a that a. 19 Tichuan, Hadarezera mite chuan Israel-te hmaah an chan a chhe ta tih an lo hriat chuan, Davida nên inremna an siam a, chhiah khuaah an awm ta a; Suria mite pawh chuan Amona thlahte chu an pui leh duh ta lo.
Davidan Raba a la
1 Tin, heti hi a ni a, kum a lo veia, lalte indo tûra an chhuah ṭhin lai hun chuan, Joaban sipai rûnpui a hruai chhuak a, Amona thlahte ram chu a chhu chhia a, Raba khua an hual a. Davida erawh chu Jerusalem-ah a awm a. Tin, Joaba chuan Raba khua chu a bei a, a la ta a. 2 Tin, Davida chuan an lal lallukhum khum lai chu a lâksak a, a rih lam chu rangkachak talent khat a ni a, lunghlute pawh a tel a; tin, Davida an khumtîr a; tin, khawpuia mi râllâk sum tam tak chu a la bawk a. 3 Tin, chuta mipuite chu a kawi chhuak a, thing zaina te, lei lehna thîr zum te, hreipuitein hna a thawhtîr a. Chutiang chuan Amona thlah khawpui zawng zawng chu Davidan a ti a. Tin, Davida leh mi zawng zawng chu Jerusalem-ah an haw leh ta a.
Philistia mi lian nêna inbeih thu
4 Tin, heti hi a ni a, chumi hnuah chuan Philistia mite nên Gezer-ah indona a awm a; tichuan, Husath mi Sibekaian mi lian thlahte zînga mi Sippaia a that a. Tin, an tlâwm ta a. 5 Tin, Philistia mite nêna indona a awm leh a; tin, Jaira fapa Elhananan Git mi Goliatha unaupa Lahmia a that a, a fei ngul chu lian tak a ni. 6 Tin, Gath khuaah indona a awm leh a, chutah chuan mi sâng tak mai, a kut lehlam lehlama zungṭang paruk, a ke lehlam lehlama zungṭang paruk, a vaia sawmhnih leh pali nei hi a awm a; ani pawh mi lian laka piang a ni. 7 Tin, ani chuan Israel mite a va cho va, Davida unau Simeia fapa Jonathana chuan a lo that a. 8 Chûngte chu Gath khuaa mi lian laka piang an ni a; chûng chu Davida leh a mite kutah an thi a.
Davida hovin chhiarpui an nei
1 Tin, Setanan Israel-te chu a bei a, Davida chu Israel-te chhiar duhna a neihtîr ta a. 2 Tin, Davida chuan Joaba leh a mi liante hnênah, “Kal ula, Beer-seba aṭanga Dan thlengin Israel mite chhiar ula, a zât ka hriat theih nân mi rawn hrilh leh ang che u,” a ti a. 3 Tin, Joaba chuan lal hnênah, “LALPAN a mite hi a leh za pawhin tipung sela, lalpa ka pu, ka pu mite vek an ni lâwm ni? Ka puin chu chu engah nge maw hriat a châk le? Eng atân nge Israel-te thiam loh chan phahna a nih ang le?” a ti a. 4 Nimahsela, lal thu chuan Joaba chu a hneh ta a. Chutichuan, Joaba chu a chhuak a, Israel ram zawng zawngah chuan a kal a, Jerusalem-ah a haw leh a. 5 Tin, Joaba chuan mihring awm zât chu Davida a hrilh a. Israel rama khandaih keng mi zawng zawng chu maktaduai khat leh nuai khat an ni a; tin, Judai rama khandaih keng mi chu nuai li leh sîngsarih an ni. 6 Levi-ho leh Benjamin-ho erawh chu a chhiar tel ve lo; lal thu chu Joaba huat zâwng tak a ni si a. 7 Tin, chu thilah chuan Pathian a lâwm ta lo va; chutichuan, Israel-ho chu a hrem ta a. 8 Tin, Davidan Pathian hnênah, “He ka thil lo tihah hian nasa takin ka lo sual ta a ni; nimahsela, i chhiahhlawh khawlohna hi khawngaih takin ngaidam ang che, âtthlâk takin ka lo ti a ni e,” a ti a. 9 Tin, LALPAN Davida zâwlnei, Gada hnênah, 10 “Kal la, Davida hnênah, ‘LALPAN heti hian a ti: “Thil kawng thum ka ruatsak a che; i chunga ka tih tûrin a pakhat chu thlang rawh,” a ti e,’ ti rawh,” tiin a sawi a. 11 Chutichuan, Gada chu Davida hnênah a kal a, a hnênah, “LALPAN heti hian a ti: ‘A eng nge i duh thlang rawh, 12 kum thum ṭâm tlâk nge, i hmêlmate khandaiha ûm phâka awma, thla thum i hmêlmaten an tihtlâwm che nge, ni thum chhûng hri, LALPA khandaiha LALPA vântirhkohvin Israel ram zawng zawnga mi tihboral zêl?’ tiin. Chutichuan, mi tîrtu chu engtin nge ka chhân dâwn, inngaihtuah la, mi hrilh rawh khai,” a ti a. 13 Tin, Davida chuan Gada hnênah, “Ka mang a ang hle mai. LALPA kutah tlu lût phawt mai ila, a zahngaihna hi a nasa hle si a; mihring kutah chuan min tlûk luhtîr lul suh ang che,” a ti a. 14 Chutichuan, LALPAN Israel-te zîngah chuan hri a lêntîr ta a; Israel-hote chu sîngsarih an thi a. 15 Tin, Jerusalem khua tichhe tûrin Pathianin vântirhkoh a tîr a; tin, a han tihchhiat dâwn lai tak chuan, LALPA chuan a han en a, thil ṭha lo tih a tum chu a lamlêt a, mite tiboraltu vântirhkoh hnênah chuan, “A tâwk tawh e; i kut lek tawh suh,” a ti a. Tin, LALPA vântirhkoh chu Jebus mi Ornana hruih bulah chuan a ding a. 16 Tin, Davida chu a han dâk a, LALPA vântirhkoh, khandaih phawi saa Jerusalem lam tina, lei leh vân inkâra ding a hmu a. Chutichuan, Davida leh upaho chu saiip puan sinin leiah an bawkkhup ta a. 17 Tin, Davidan Pathian hnênah, “Keimah hi a ni lâwm ni, mipuite chhiar tûr tih thu petu chu? Keimah hi a ni, thil lo tisuala, suahsualthlâk taka thil lo ti ta chu; hêng berâmte hian eng thil nge an tih ve? Aw LALPA ka Pathian, keimah leh ka chhûngte chungah i kut thlâk zâwk la, i mite hian hri hi tuar tawh suh se,” a ti a. 18 Tichuan, LALPA vântirhkohvin Gada hnênah Davida chu han chhova, Jebus mi Ornana hruiha LALPA tâna maichâm han siam tûra Davida hrilh tûrin thu a pe a. 19 Tin, Gadan LALPA hminga a sawi ang chuan Davida chu a chho ta a. 20 Tin, Ornana chu a han lehhawi a, vântirhkoh chu a hmu a; tin, a fapa pali a hnêna awm vete chu an biru a, Ornana erawh chuan buh a lo chîl mêk a. 21 Tin, Davidan Ornana hnên a va thlen chuan, Ornana chu a han hawi a, Davida chu a hmu ta a; tin, hruih ata chu a chhuak a, a hmaia lei siin Davida hmaah chuan a bawkkhup a. 22 Tichuan, Davidan Ornana hnênah, “He hruih hi LALPA tâna maichâm ka siam nân mi pe rawh khai; a man kim chiah têlin mi pe rawh, mipuite laka hri a kian theihna tûr hian,” a ti a. 23 Tin, Ornanan Davida hnênah chuan, “Nei mai rawh, lalpa ka pu chuan âwm a tih ang angin ti rawh se. En teh, hâlrala hlan atân bâwngpa te, thing atân hrui hmanrua te, chhangphut thilhlan atân buhte ka pe ang che; ka tum vek ang che,” a ti a. 24 Tin, Lal Davidan Ornana hnênah chuan, “Ni lo ve a; a man kim chiahin ka lei zâwk ang e, man lovin i ta chu LALPA tân ka la lo vang a, hâlral thilhlan pawh ka hlân lo vang,” a ti a. 25 Chutichuan, Davidan chumi hmun lei nân chuan Ornana chu rangkachak sekel zaruk a pe a. 26 Tin, Davidan chutah chuan LALPA tân maichâm a siam ta a, hâlral thilhlante leh remna thilhlante a hlân a, LALPA a au va; tin, ani chu maichâm chunga meiin vân aṭangin a rawn chhâng ta a. 27 Tin, LALPAN vântirhkoh chu thu a pe a, a khandaih chu a paiah a khung leh ta a. 28 Tin, Davidan Jebus mi Ornana hruihah LALPAN a rawn chhâng tih a hriatin chutah chuan a inthawi ta a. 29 Chutih lai chuan Mosian thlalêra LALPA biakbûk leh hâlral thilhlanna maichâm a siam kha Gibeon khuaa hmun sângah a awm a ni. 30 Nimahsela, Davida chu LALPA vântirhkoh khandaih a hlauh avângin Pathian râwn tûrin chutah chuan a kal thei lo a ni.
1 Tichuan, Davidan, “Hei hi LALPA Pathian in a lo ni a, hei hi Israel-te hâlral thilhlanna maichâm a lo nih hi le,” a ti a.
Davidan tempul sakna tûr a buatsaih
2 Chutichuan, Davidan Israel rama hnam dang awmte chu koh khâwm thu a pe a; tin, Pathian in sakna tûrin lungchhertute chu lung a chhertîr a. 3 Tin, Davida chuan kawt hung kawngkhâr leh a vuah nân a kilhna tûr thîr tam tak a lo siam khâwl a, dâr tam tak bûk sên loh nên, 4 sidar thing chhiar sên loh nên; Zidon mi leh Tura miten Davida hnênah chuan sidar thing tam tak an rawn la a ni. 5 Tin, Davidan, “Ka fapa Solomona hi a la naupangin, eng mah a la hre rih lo va, LALPA in sak tûr chu ropui tak, a hming leh a ropuina chu ram tina thang chhuak tûr a ni a; chuvângin, ka lo buatsaih lâwk dâwn e,” a ti a. Chutichuan, Davida chuan a thih hmain a lo buatsaih lâwk nasa hle a. 6 Tichuan, a fapa Solomona a ko va, LALPA, Israel-te Pathian in sa tûr chuan thu a pe a. 7 Tin, Davidan a fapa Solomona hnênah chuan, “LALPA ka Pathian tân hian in sak ka lo rilrûk ṭhîn a. 8 Nimahsela, ‘Nang zawngin thisen i chhuah nasa êm a, indote i uar êm êm a; lei chungah hian ka mit hmuha thisen i chhuah nasat avângin, ka tân in i sa lo vang. 9 Ngai teh, fapa i la nei ang a, ani chu remna duh mi a ni ang a, a vêl rama a hmêlmate zawng zawng lakah chuan râlmuanna ka pe ang; a hming chu Solomona a ni ang a, ama chhanah chuan Israel-hote chu râlmuang leh thlamuang takin ka awmtîr ang. 10 Ani chuan ka tân in a sa ang a, ani chu ka fapa a ni ang a, kei a pa ka ni ang; tin, Israel-te chunga a ram lalṭhutthlêng chu kumkhua atân ka tinghet ang,’ tiin LALPA thu ka hnênah a lo thleng a ni. 11 “Chutichuan, ka fapa, LALPA chu i hnênah awm sela; hmuingîl zêl la, i chungchâng thu a lo sawi lâwk tawh ang khân, LALPA i Pathian in chu sa ang che. 12 LALPAN finna leh hriatnate neihtîr phawt che sela, Israel-te chunga thuneihna pe che rawh se; tichuan, LALPA i Pathian dân chu i zâwm thei dâwn nia. 13 Tichuan, Israel-te chungchâng thua thuruatte leh rorêlnate LALPAN Mosia a pêk kha i zawm chuan, i hmuingîl zêl ang. Chak takin awm la, huai takin awm rawh; hlau suh la, zâm hek suh. 14 Ngai teh, ka mangan laiin LALPA in atân rangkachak talent nuai khat leh, tangkaraw talent maktaduai khat ka lo buatsaih tawh a; tin, dâr leh thîrte pawh bûk sên loh, tam tak a ni; thing leh lung pawh ka buatsaih lâwk tawh a; chûng chu i chhunzawm thei tawh ang chu. 15 Tin, hnathawktu, thing zaitute leh lung chhertute leh themthiam hna tinrêng thawk thei i ngah bawk a; 16 chhiar sên rual loh rangkachak te, tangkarua te, dâr te, thîrte pawh. Bei nghâl mai rawh khai, LALPA chu i hnênah awm rawh se,” a ti a. 17 Davida chuan Israel-ho puipate zawng zawng chu a fapa Solomona ṭanpui tûrin thu a pe a, 18 “LALPA in Pathian chu in hnênah a awm lâwm ni? Kil tin kil tangah râlmuanna a pe lo che u em ni? He rama mite hi ka kutah a rawn hlân ta a, ram chu LALPA hmaah leh a mite hmaah lâk a ni ta a. 19 Tichuan, in thinlung leh in rilruin LALPA in Pathian lam hawi ula; bei nghâl ula, LALPA thuthlung bâwm leh Pathian bungbêl thianghlimte chu LALPA tâna in in sak tûra in lâk luh theih nân LALPA Pathian hmun thianghlim chu siam rawh u,” tiin.
1 Tin, Davida chu a dam reiin a lo upa ta hle a; tichuan, a fapa Solomona chu Israel-te lalah a siam a.
Levi-ho hnathawh tûr
2 Tin, Israel-ho puipa zawng zawng chu puithiamte leh Levi-hote nên a ko khâwm a. 3 Tin, Levi-hote chu kum sawmthum achin chung lam chhiar an ni a; an tam lam chu patling sîngthum leh sângriat an ni. 4 Chûng zînga sînghnih leh sângli chu LALPA in satuho hotu tûr an ni a, sângrukte chu hotute leh rorêltu tûrte an ni a, 5 sânglite chu kawngkhâr vêngtu tûrte an ni a; tin, sânglite chu, “Fakna tûra thil tum rîk chi ka siam,” Davidan a tihte hmanga LALPA faktu tûrte an ni. 6 Tin, Levia fa Gersona te, Kohatha te, Meraria te zâtin Davidan pâwl a siam a. 7 Gerson mite chu Ladana leh Simeia an ni. 8 Ladana fate chu puipa ber Jehiela te, Zethama te, Joela te, pathum an ni. 9 Simeia fate chu Selomotha te, Haziela te, Harana te, pathum an ni. Hêngte hi Ladana thlah chhûngkaw puipate chu an ni. 10 Tin, Simeia fate chu Jahatha te, Ziza te, Jeusa te, Beria te an ni. Hêng palite hi Simeia fate chu an ni. 11 Tin, Jahatha chu a upa ber a ni a, Ziza chu a chhang a ni. Jeusa leh Beria erawh chuan fa an ngah lo va; chuvângin, chhûngkaw pakhat anga chhiar an ni. 12 Kohatha fate chu Amrama te, Izara te, Hebrona te, Uziela te, pali an ni. 13 Amrama fate chu Arona leh Mosia an ni; Arona chu, amah leh a thlahte chu kumkhua atâna thil thianghlim takte tithianghlima, kumkhuaa LALPA hmaa rimtui hâla, a rawng bâwla, a hminga malsâwmtu tûra tihhran an ni. 14 Pathian mi Mosia erawh chu, a fate chu Levi hnam zînga chhiar an ni. 15 Mosia fate chu Gersoma leh Eliezera an ni. 16 Gersoma fate zînga upa ber chu Sebuela a ni. 17 Eliezera fate zînga upa ber chu Rehabia a ni. Eliezera chuan fapa dang rêng rêng a nei lo; Rehabia erawh chuan fapa tam tak a nei. 18 Izara fate zîng upa ber chu Selomitha a ni. 19 Hebrona fatea upa ber chu Jeria a ni a, a chhang chu Amaria, a chhang leh chu Jahaziela, a chhang leh chu Jekameama a ni. 20 Uziela fatea upa zâwk chu Mika a ni a, a chhang chu Isia a ni. 21 Meraria fate chu Mahlia leh Musia an ni. Mahlia fate chu Eleazara leh Kisa an ni. 22 Tin, Eleazara chu a thi a, fapate nei lovin fanute chauh a nei a; tin, Kisa fapa, an nuṭaten nupuiah an nei a. 23 Musia fate chu Mahlia te, Edera te, Jeremotha te, pathum an ni. 24 Chûngte chu Levia thlah, an chhûngkua ang zêla hming ziaka an chhiar chhûngkaw puipa, LALPA in saka thawk, kum sawmhnih achin chung lama chhiar zawngte chu an ni. 25 Davidan, “LALPA, Israel-te Pathianin a mite chu râlmuang takin a awmtîr ta a, Jerusalem-ah hian a awm ta reng a; 26 Levi-hote pawh hian biakbûk leh a rawngbâwl nân bungbêl zawng zawng hi an zâwn a ngai tawh lo ve,” a ti a ni. 27 Davida thupêk hnuhnûng avângin Levi-hote chu kum sawmhnih achin chung lam thlengin chhiar an ni si a. 28 An hnathawh chu Pathian ina rawngbâwla Arona fapate ṭanpuia, kawt hung chhûng leh pindan chhûnga thil thianghlim zawng zawng tihthianghlima, LALPA ina rawngbâwl a ni si a; 29 chhang chhiah tûr te, chhangphut thilhlan atâna chhangphut dip tak, dawidim telh loh chhangpêr pan emaw, bêla ur emaw, kan emaw, a teh leh a lenzia ang zawng zawng tûr buatsaih vêl te nên; 30 tin, tûk tina LALPA hnêna lâwm thu sawi leh amah fak te nên, tlaiah pawh chuti bawk; 31 tin, Chawlhniah te, thla tharah te, kût bi neiah te, a tih tûra ruat ang zêla LALPA hnêna hâlral thilhlan zawng zawng LALPA hmaa hlan reng te nên; 32 tin, inbiakna puan in enkawl te, hmun thianghlim enkawl te, LALPA ina rawngbâwla an unau Arona fapaten tih tûr an ruat apiang tih te nên.
Puithiamho hnathawh tûr
1 Tin, Arona fapate pâwl ṭhen dân chu hetiang hi a ni. Arona fapate chu Nadaba te, Abihua te, Eleazara te, Ithamara te an ni. 2 Nadaba leh Abihua erawh chu an pa aiin an thi hmasa a, fa an nei lo; chuvângin, Eleazara leh Ithamara chuan puithiam hna an thawk a ni. 3 Tin, Davidan Eleazara fapa Zadoka leh Ithamara fapa Ahimeleka te nên an rawngbâwl dân tûr a semsak a. 4 Tin, Ithamara thlahte ai chuan Eleazara thlah puipaa ṭang an tam zâwk a, hetiang hian an ṭhen a: Eleazara thlaha mi, chhûngkaw puipa chu sâwm leh paruk an ni a; tin, Ithamara thlaha mi, chhûngkaw puipa chu pariat an ni. 5 Chutiang chuan ṭhumvâwrin, ai khata luangin an ṭhen a; Eleazara thlaha mi leh Ithamara thlaha mite zîngah, hmun thianghlima mi liante leh Pathian mi liante an awm ve ve si a. 6 Tin, Levi mi, lehkhaziaktu, Nethanela fapa Semaian lal leh mi lianhote: puithiam Zadoka te, Abiathara fapa Ahimeleka te, puithiamho leh Levi-ho chhûngkaw puipate mit hmuhah chuan a ziak a; chhûngkaw puipa pakhat chan chu Eleazara chungah a tlu a, pakhat chu Ithamara chungah a tlu a. 7 Tichuan, ṭhumvâwr vawi khatna chu Jehoiariba chungah a tlu a, vawi hnihna chu Jedaia chungah, 8 vawi thumna chu Harima chungah, vawi lina chu Seorima chungah, 9 vawi ngana chu Malkija chungah, vawi rukna chu Mijamina chungah, 10 vawi sarihna chu Hakoza chungah, vawi riatna chu Abija chungah, 11 vawi kuana chu Jesua chungah, vawi sâwmna chu Sekania chungah, 12 vawi sâwm leh vawi khatna chu Eliasiba chungah, vawi sâwm leh vawi hnihna chu Jakima chungah, 13 vawi sâwm leh vawi thumna chu Hupa chungah, vawi sâwm leh vawi lina chu Jesebeaba chungah, 14 vawi sâwm leh vawi ngana chu Bilga chungah, vawi sâwm leh vawi rukna chu Imera chungah, 15 vawi sâwm leh vawi sarihna chu Hezira chungah, vawi sâwm leh vawi riatna chu Hapizeza chungah, 16 vawi sâwm leh vawi kuana chu Pethahia chungah, vawi sawmhnihna chu Jehezkela chungah, 17 vawi sawmhnih leh vawi khatna chu Jakina chungah, vawi sawmhnih leh vawi hnihna chu Gamula chungah, 18 vawi sawmhnih leh vawi thumna chu Delaia chungah, vawi sawmhnih leh vawi lina chu Maazia chungah. 19 Chu chu LALPA, Israel Pathianin an pu Arona thu a lo pêk, LALPA in chhûnga rawng an bâwl dân tûr a lo ruat dân chu a ni.
Levia chite zât
20 Tin, Levia thlah dangte zînga mi chu: Amrama fate zingah chuan Subaela a ni; Subaela fate zîngah Jehdeia. 21 Rehabia lamah chuan: Rehabia-hote zîngah puipa Isia. 22 Izhar-ho zîngah Selomotha; Selomotha fate zîngah Jahatha. 23 Hebrona fate chu, a upa ber Jeria a ni a, a chhang Amaria, a chhang leh Jahaziela, a chhang leh Jekameama a ni. 24 Uziela fate zînga mi Mika; Mika fate zînga mi Samira a ni. 25 Mika unaupa chu Isia a ni a; Isia fate zînga mi Zakaria. 26 Meraria fate chu Mahlia leh Musia an ni: Jaazia fate zînga mi Benoa a ni. 27 Meraria thlahte chu, Jaazia lakah Benoa te, Sohama te, Zakura te, Ibria te an ni. 28 Mahlia lakah Eleazara a ni a, ani chuan fapa a nei lo. 29 Kisa lakah chuan Kisa fapa Jerameela a ni. 30 Tin, Musia thlahte chu, Mahlia te, Edera te, Jerimotha te an ni. Chûngte chu Levi-ho thlahte zînga an chhûngkaw puipate chu an ni. 31 Anni pawh chuan Arona fa an unaute ang bawkin, Lal Davida te, Zadoka te, Ahimeleka te, puithiamho leh Levi-ho chhûngkaw puipate mit hmuhah ṭhum an vâwr ve bawk a; chhûngkaw puipa ber leh an unaute pawh ai khata luangin.
Tempul zaipâwl
1 Tin, Asapha te, Hemana te, Jeduthuna teho fapa ṭhenkhat chu ṭingṭang te, perhkhuang te, dârbenthek te nêna fak dual duala rawngbâwltu atân Davida leh sipai hotuten an tihrang bawk a. Chutianga thawka rawngbâwltute tam lam chu: 2 Asapha fapate zînga mi chu: Zakura te, Josefa te, Nethania te, Asarela te an ni a; anni chu Asapha fate, lal thupêk anga fak dual dual ṭhîn, Asapha thu thua awm an ni. 3 Jeduthuna lakah chuan, Jeduthuna fa: Gedalia te, Zeria te, Jesaia te, Simeia te, Hasabia te, Matithia te, paruk an ni, ṭingṭang nêna LALPA hnêna lâwm thu sawia fak dual duala, an pa Jeduthuna thu thua awm an ni. 4 Hemana lakah chuan, Hemana fa: Bukia te, Matania te, Uziela te, Sebuela te, Jerimotha te, Hanania te, Hanana te, Eliatha te, Gidaltia te leh Romamti-ezera te, Josbekasa te, Malothia te, Hothira te, Mahaziotha te an ni a. 5 Chûng zawng zawng chu lal tâna zâwlnei Hemana fa, englo ki tawtawrâwt hâmtu tûrte an ni. Pathianin Hemana chu fapa sâwm leh pali leh fanu pathum a pe a. 6 Chûng zawng zawng chu LALPA inah dârbenthek nên, perhkhuang nên, ṭingṭang nên, Pathian ina rawngbâwl nâna hla nêna remtu, an pa thu thua awm an ni. Asapha te, Jeduthuna te, Hemana te chu lal thupêka awm an ni ve thung a. 7 Tin, an tam lam chu, an unau, LALPA tâna hla sak zir, thiam sa tawh zawng zawngte nên chuan zahnih leh sawmriat leh pariat an ni. 8 Tin, a lian a tê, zirtîrtu leh zirtuin an chan tûr angkhat vekin ṭhum an vâwr a. 9 Tichuan, ṭhumvâwr vawi khatna chu Asapha fapa Josefa chungah a tlu a; vawi hnihna chu Gedalia chungah, amah leh a unaute leh a fapate chu sâwm leh pahnih an ni; 10 vawi thumna chu Zakura chungah, a fapate leh a unaute chu sâwm leh pahnih; 11 vawi lina chu Izria chungah, a fapate leh a unaute chu sâwm leh pahnih; 12 vawi ngana chu Nethania chungah, a fapate leh a unaute chu sâwm leh pahnih; 13 vawi rukna chu Bukia chungah, a fapate leh a unaute chu sâwm leh pahnih; 14 vawi sarihna chu Jesarela chungah, a fapate leh a unaute chu sâwm leh pahnih; 15 vawi riatna chu Jesaia chungah, a fapate leh a unaute chu sâwm leh pahnih; 16 vawi kuana chu Matania chungah, a fapate leh a unaute chu sâwm leh pahnih; 17 vawi sâwmna chu Simeia chungah, a fapate leh a unaute chu sâwm leh pahnih; 18 vawi sâwm leh vawi khatna chu Azarela chungah, a fapate leh a unaute chu sâwm leh pahnih; 19 vawi sâwm leh vawi hnihna chu Hasabia chungah, a fapate leh a unaute chu sâwm leh pahnih; 20 vawi sâwm leh vawi thumna chu Subaela chungah, a fapate leh a unaute chu sâwm leh pahnih; 21 vawi sâwm leh vawi lina chu Matithia chungah, a fapate leh a unaute chu sâwm leh pahnih; 22 vawi sâwm leh vawi ngana chu Jeremotha chungah, a fapate leh a unaute chu sâwm leh pahnih; 23 vawi sâwm leh vawi rukna chu Hanania chungah, a fapate leh a unaute chu sâwm leh pahnih; 24 vawi sâwm leh vawi sarihna chu Josbekasa chungah, a fapate leh a unaute chu sâwm leh pahnih; 25 vawi sâwm leh vawi riatna chu Hanania chungah, a fapate leh a unaute chu sâwm leh pahnih; 26 vawi sâwm leh vawi kuana chu Malothia chungah, a fapate leh a unaute chu sâwm leh pahnih; 27 vawi sawmhnihna chu Eliatha chungah, a fapate leh a unaute chu sâwm leh pahnih; 28 vawi sawmhnih leh vawi khatna chu Hothira chungah, a fapate leh a unaute chu sâwm leh pahnih; 29 vawi sawmhnih leh vawi hnihna chu Gidaltia chungah, a fapate leh a unaute chu sâwm leh pahnih; 30 vawi sawmhnih leh vawi thumna chu Mahaziotha chungah, a fapate leh a unaute chu sâwm leh pahnih; 31 vawi sawmhnih leh vawi lina chu Romamti-ezera chungah, a fapate leh a unaute chu sâwm leh pahnih.
Tempul vêngtute
1 Kawngkhâr vêngtu pâwl ṭhen dân chu: Kora mi chu Asapha fapate zînga Korea fapa Meselemia chuan fapate a nei a. 2 A fa tîr chu Zakaria a ni a, a dawttu chu Jediaela, a dawt lehtu chu Zebadia, a dawt lehtu chu Jathniela, 3 a dawt lehtu chu Elama, a dawt lehtu chu Jehohanana, a dawt lehtu chu Eliehoenaia a ni. 4 Tin, Obed-edoma chuan fapate a nei a: a fa tîr chu Semaia a ni a, a dawttu chu Jehozabada, a dawt lehtu chu Joa, a dawt lehtu chu Sakara, a dawt lehtu chu Nethanela, 5 a dawt lehtu chu Amiela, a dawt lehtu chu Isakara, a dawt lehtu chu Peulethaia a ni a; ani chu Pathianin mal a sâwm a ni. 6 A fapa Semaia lakah chuan fapa, an chhûngkaw puipate an piang bawk a, mi chak huaisen an ni hlawm a ni. 7 Semaia fapate chu Othnia te, Rephaela te, Obeda te, Elzabada te an ni a, an unau Elihua leh Semakia chu mi chak tak an ni. 8 Chûng zawng zawng chu Obed-edoma thlahte an ni a, anmahni leh an fapate leh an unaute chu rawngbâwlna kawnga mi puitling an ni; Obed-edoma laka mite chu sawmruk leh pahnih an ni. 9 Meselemia chuan fapa leh unau, mi chak tak tak sâwm leh pariat a nei. 10 Tin, Meraria thlahte zînga Hosa chuan fapate a nei bawk a: Simria chu puipa ber a ni a (fa tîr a ni lo na a, a pain puipa berah a siam a ni), 11 a dawttu chu Hilkia a ni a, a dawt lehtu chu Tebalia, a dawt lehtu chu Zakaria a ni; Hosa fapate leh a unaute chu an zain sâwm leh pathum an ni. 12 Chûng puipaho zînga mi chu an unaute anga LALPA ina rawngbâwl hnaa chanvo neia kawngkhâr vêngtu pâwla an ṭhente chu an ni. 13 A lian a têin, an chhûngkaw zir ang zêlin kawngka tina awm tûr ṭhum an vâwr a. 14 Tin, chhak lam atâna ṭhumvâwr chu Selemia chungah a tlu a. Tin, rorêltu fing tak, a fapa Zakaria tân ṭhum an vâwr a, hmâr lam chu a pualah a tlu a; 15 chhim lam chu Obed-edoma pualah; tin, thil dah khâwmna in chu a fapate pualah. 16 Thlang lam chu a chhohna kawnga Saleketh kawngkhâr vênna nên, Supima leh Hosa pualah. 17 Chhak lamah Levi-ho paruk an awm a, ni tin hmâr lamah pali, ni tin chhim lamah pali; tin, thil dah khâwmna inah pahnih ve ve. 18 Thlang lam in hual chhûng atân chuan a luhnaah pali, in hual chhûngah chuan pahnih. 19 Chûngte chu an ni, Kora fapate leh Meraria fapate, kawngkhâr vêngtu pâwla an ṭhente chu.
Tempula thawh tûr dang thawkte
20-21 Tin, an unau Levi-ho, Pathian sum dah khâwmna in leh thil thianghlim dah khâwmna in vawngtute chu Ladana chhûngkaw puipa, Ladana laka Gerson mi thlah, 22 Jehielia leh a unau Zethama leh Joela-te an ni; chûngte chu LALPA sum dah khâwmna in vawngtute an ni. 23 Amram-ho te, Izhar-ho te, Hebron-ho te, Uziel-ho te zînga mi, 24 Mosia fa Gersoma fapa Sebuela chu sum dah khâwmna in vawngtu a ni. 25 Tin, a unaute chu Eliezera fapa Rehabia te, Jesaia te, Jorama te, Zikria te, Selomitha te an ni. 26 Selomitha leh a unaute chu Lal Davida leh an chhûngkaw puipa, sipai sâng hotute leh za hotute leh sipai pâwl hotuten an tihthianghlim tawh, thil thianghlim dah khâwmna in zawng zawng vawngtu an ni. 27 Indonaa râllâk thilte chu LALPA in siam ṭhat nân an dah a ni. 28 Zâwlnei Samuela te, Kisa fapa Saula te, Nera fapa Abnera te, Zeruii fapa Joaba-tena an tihthianghlim zawng zawng, tu pawhin thil an tihthianghlim tawh phawt chu Selomitha leh a unaute vawn vek a ni.
Levi mi dangte tih tûr
29 Izhar mi Kenania leh a fapate chu Israel ram pâwn lam chungchâng thua hotute leh rorêltute an ni. 30 Hebron mi Hasabia leh a unau mi huaisen sângkhat leh zasarihte chu Jordan râl thlang lama Israel-ho awptu an ni; LALPA hna zawng zawng leh lal rawngbâwlna lam hnaah. 31 Hebron thlahte hruaitu ber chu Jeria a ni a. Davida lal kum sawmli kum khân Hebron thlahte chhui chhuahna a awm a, Gilead rama Jazer-ah chuan an zîngah mi chak huaisen an lo awm ṭeuh mai a. 32 Davida chuan Jeria chhûngte zînga mi huaisente chu mi sânghnih leh zasarih a thlang chhuak a, chûng mite chu Jordan lui khawchhak lam Reuben-hote, Gad-hote leh chhak lam Manase-hote rama Israel-te sakhaw thu leh tualchhûng thu rêl tûrin a ruat a.
Sipai leh sawrkâr hnathawkho
1 Israel-ho an tam chin chu chhûngkaw puipa te, sipai sâng hotu te, za hotu te leh lal rawngbâwltu zawng zawng, kum khat chhûnga thla tina inthlâk zêl ṭhîn, pâwl tina mi chu sînghnih leh sângli an ni. 2 Pâwl khatna thla khatnaa hotu chu Zabdiela fapa Jasobeama a ni a, a pâwlah chuan sînghnih leh sângli an awm. 3 Ani chu Pereza thlaha mi, thla khatnaa sipai hotu zawng zawng hotu ber a ni. 4 Thla hnihnaa pâwl hotu chu Aho mi Dodaia a ni a, Miklotha pawh a pâwl hotu a ni; a pâwlah chuan sînghnih leh sângli an awm. 5 Thla thumnaa sipaihote hotu ber chu puithiam Jehoiada fapa Benaia a ni a, a pâwlah chuan sînghnih leh sângli an awm. 6 He Benaia hi a ni, sawmthumte zînga mi huaisen, sawmthumte chunga mi chu; a pâwlah chuan a fapa Amizabada a tel. 7 Thla linaa sipai hotu chu Joaba unaupa Asahela a ni a, a fapa Zebadian a zui a ni; tin, a pâwlah chuan sînghnih leh sângli an awm. 8 Thla nganaa sipai hotu chu Izra mi Samhutha a ni a; a pâwlah chuan sînghnih leh sângli an awm. 9 Thla ruknaa sipai hotu chu Teko mi, Ikesa fapa Ira a ni a; tin, a pâwlah chuan sînghnih leh sângli an awm. 10 Thla sarihnaa sipai hotu chu Ephraima thlah Pelon mi Heleza a ni a, a pâwlah chuan sînghnih leh sângli an awm. 11 Thla riatnaa sipai hotu chu Zera thlah, Husath mi Sibekaia a ni a; a pâwlah chuan sînghnih leh sângli an awm. 12 Thla kuanaa sipai hotu chu Benjamina thlah Anathoth mi Abiezera a ni a; a pâwlah chuan sînghnih leh sângli an awm. 13 Thla sâwmnaa sipai hotu chu Zera thlah Netophath mi Maharaia a ni a; a pâwlah chuan sînghnih leh sângli an awm. 14 Thla sâwm leh thla khatnaa sipai hotu chu Ephraima thlah Pirathon mi Benaia a ni a; a pâwlah chuan sînghnih leh sângli an awm. 15 Thla sâwm leh thla hnihnaa sipai hotu chu Othniela thlah Netophath mi Heldaia a ni a; a pâwlah chuan sînghnih leh sângli an awm.
Israel hnam chi hrang hrang inawp dân
16 Chûng lo pawh chu, Israel hnamho chunga Reuben-hote zîngah chuan Zikria fapa Eliezera chu rorêltu a ni a; Simeon-ho zîngah Maaka fapa Sephatia; 17 Levi-ho zîngah Kemuela fapa Hasabia; Arnon-ho zîngah Zadoka; 18 Juda-ho zîngah Davida unaute zînga mi Elihua; Isakar-ho zîngah Mikaela fapa Omria; 19 Zebulun-ho zîngah Obadia fapa Ismaia; Naphtali-ho zîngah Azriela fapa Jerimotha; 20 Ephraima thlahte zîngah Azazia fapa Hosea; Manase hnam zâtvete zîngah Pedaia fapa Joela; 21 Gilead rama Manase hnam zâtvete zîngah Zakaria fapa Idova; Benjamin-ho zîngah Abnera fapa Jaasiela; 22 Dan-ho zîngah Jerohama fapa Azarela. Chûngte chu Israel hnam hotute an ni. 23 Davida chuan kum sawmhnih achin hnuai lam chu a chhiar lo va, Israel-hote chu vâna arsi zât khian a la tipung ang tih LALPAN a lo sawi tawh avângin. 24 Zeruii fapa Joaba chuan a han chhiar ṭan a; nimahsela, a chhiar zo lo va, Israel-te chungah thinurna a lo thleng ta a; Lal Davida lal lai chanchin ziakna buah a zât ziak a ni bawk hek lo.
Lal sum leh pai enkawl dân
25 Lal sum enkawltu chu Adiela fapa Azmavetha a ni a; tin, lo lamah te, khawpuiah te, khawperah te, in sângtea sum enkawltu chu Uzia fapa Jonathana a ni a. 26 Lova leileh hna thawkho enkawltu chu Keluba fapa Ezria a ni a. 27 Grêp huan enkawltu chu Ramath mi Simeia a ni a; tin, grêp huana mi uain sâwr dah khâwmna enkawltu chu Siphmit mi Zabdia a ni a. 28 Phai ruama olive thing leh theipui kûngte enkawltu chu Geder mi Baal-hanana a ni a; tin, hriak dah khâwmna enkawltu chu Joasa a ni. 29 Tin, Saron-a tla ran rual enkawltu chu Saron mi Sitraia a ni a; ruama ran rual enkawltu chu Adlaia fapa Saphata a ni. 30 Sanghâwngsei enkawltu chu Ismael mi Obila a ni a; tin, sabengtung enkawltu chu Meronoth mi Jehdeia a ni a; 31 tin, berâm rual enkawltu chu Hagar mi Jaziza a ni. Chûng zawng zawng chu Lal Davida sum enkawltute an ni.
Davida remruatpuitute
32 Tin, Davida pami, mi fing, lehkha thiam tak Jonathana chu remruattu a ni a; tin, Hakmonia fapa Jehiela chu lal fapate zirtîrtu a ni. 33 Ahithophela chu lal remruatpuitu a ni a; tin, Ark mi Husaia chu lal ṭhian a ni. 34 Ahithophela dawtah chuan Benaia fapa Jehoiada leh Abiathara an ni a; tin, lal sipaiho hotu chu Joaba a ni.
Tempul sak dân tûr Davidan a sawi
1 Tin, Davidan Israel hotu zawng zawng: hnam puipa te, lal rawngbâwla inthlâk ṭhîn pâwl hotu te, sipai sâng hotu te, za hotu te, lal leh a fapate sum leh thil neih zawng zawng chunga hotu te, mi lian leh mi chak, mi chak huaisen zawng zawng nên Jerusalem-ah a ko khâwm a. 2 Tichuan, Lal Davida chu a ding a, “Ka unaute leh ka mite u, ka thu hi lo ngaithla teh u: kei chuan LALPA thuthlunna bâwm dahna leh kan Pathian ke nghahchhan tûr in sa ila tih ka lo rilrûk ṭhîn a; tin, sakna tûr pawh ka ngah tawh diam a. 3 Nimahsela, Pathianin ka hnênah, ‘Nang zawng indo mi, thisen chhuah mi i nih avângin ka hming tân in i sa lo vang,’ a ti a. 4 Amaherawhchu, LALPA, Israel-te Pathianin ka pa chhûngte zawng zawng zîng ata Israel-te lala kumkhuaa awm tûrin mi lo thlang ta a, Juda hnam chu puipa atân a lo thlang ta si a. Tin, Juda hnam zîngah pawh ka pa chhûngte leh ka pa fapate zîng ata Israel zawng zawng lalah mi lo thlang chhuak ta bîk a. 5 Tin, ka fapa zawng zawng zîngah chuan (LALPAN fapa tam tak mi pe a) Israel-te lal atân LALPA ram lalṭhutthlênga ṭhu tûrin ka fapa Solomona hi a lo thlang ta a. 6 “Tichuan, ka hnênah, ‘I fapa Solomonan ka in leh ka kawtlaite chu a din ang; ka fapa atân ka thlang tawh a; tichuan, a pa ka ni ang. 7 Ka thupêkte leh ka rorêlte a pawm reng chuan tûna in tih reng ang hian a ram chu kumkhua atân ka tinghet ang,’ a ti a. 8 Chutichuan, LALPA mipui, Israel-ho zawng zawng mit hmuhah leh kan Pathian hriatah hian, LALPA in Pathian thupêk zawng zawng hi pawm tûr leh ngaihven tûrin ka fuih a che u; tichuan, he ram ṭha tak hi in luah ang a, in hnua in thlahte kumkhua atân in rochun chhâwntîr zêl ang. 9 “Tin, nang ka fapa Solomon, i pa Pathian hi hria la, thinlung ṭha famkim leh rilru phûr takin a rawng bâwl ang che; LALPA chuan thinlung a en ṭhîn a, rilrua suangtuah zawng zawng hi a hre vek a ni; amah i zawn chuan i hmu ang a, i hawisan erawh chuan kumkhuain a thlauthla ang che. 10 Fîmkhur rawh khai; hmun thianghlim tûr in sa tûrin LALPAN a lo ruat tâk che hi; chak takin awm la, bei rawh,” a ti a. 11 Chutichuan, Davida chuan a fapa Solomona chu biak in hulhliap lem te, a in lem te, sum dah khâwmna in lem te, a pindan chungnung lem te, a chhûng pindan lem te, zahngaihna ṭhutphah lem te, 12 a rilrua a suangtuah ang zawng zawng, LALPA in hung chhûng kawtlai lem te, a vêl pindan zawng zawng lem te, Pathian ina sum dah khâwmna in lem te, thil serh dah khâwmna in lem te chu a pe a; 13 puithiamte leh Levi-hote a pâwl pâwla an awmna tûr lem te, LALPA ina rawngbâwlna lam tûr zawng zawng lem te, LALPA ina rawngbâwlna tûr bungbêl zawng zawng lemte pawh; 14 rawngbâwlna lam atâna bungbêl chi tin, rangkachak bungbêl tûr, rangkachak hman zât tûr te, rawngbâwlna lam atâna tangkaraw bungbel tûr, rangkachak hman zât tûr te, 15 rangkachak khâwnvâr dahna leh a khâwnvâr tûr rangkachak hman zât tûr te, khâwnvâr dahna leh a khâwnvâr tûr zêl atâna hman zât tûr te, khâwnvâr dahnaa hman ṭûlna ṭheuh ang zêla tangkaraw khâwnvâr dahna tûr zêl atâna hman zât tûr te nên; 16 chhang chiahna dawhkân tûr, pakhat zêl atâna rangkachak hman zât tûr te, tangkaraw dawhkân atâna tangkaraw hman zât tûr te, 17 rangkachak hlîr hlak sa thurna thîr kawm te, maihûn te, note nên; rangkachak berhbu tûr, berhbu pakhat zêl atâna hman zât tûr te, tangkaraw berhbu tûr, berhbu pakhat zêl atâna hman zât tûr te; 18 rangkachak thianghlima siam, rimtui hâlna maichâm tûr te; cherub-te an thla zâra LALPA thuthlunna bâwm tuam chuanna lem ang siamna tûr rangkachak te nên. 19 Davida chuan, “Hêngte hi tih dân tûr rem a ruat sa tichiang tûra LALPAN ama kut ngeia a ziak ang kha a ni,” a ti a. 20 Tin, Davidan a fapa Solomona hnênah chuan, “Chak tak leh huai takin awm la, bei rawh; hlau suh la, zâm hek suh; LALPA Pathian, ka Pathian hi i hnênah a awm e. LALPA in lam hna zawng zawng hi peih vek a nih hma loh chuan a kalsanin a thlahthlam lo vang che. 21 Tin, ngai teh, Pathian in hna tinrêng thawktu pâwl puithiamte leh Levi-hote an awm a, eng hna pawha kawng tinrênga hna thiam, châk tak ṭheuhva ṭanpuitu tûr che i hnênah an awm zêl ang a; hotute leh mipui zawng zawng pawhin i thupêk apiang chu an zâwm zêl bawk ang,” a ti a.
Tempul sak nâna thilpêk
1 Tin, Lal Davidan mipui zawng zawng hnênah chuan, “Pathian thlan chhuah ka fapa Solomona hi a la naupangin eng mah a la hre rih lo va; a thawh tûr lah chu a ropui si a; biak in chu mihring tân a ni lo va, LALPA Pathian tân a ni zâwk si a. 2 Tichuan, ka Pathian in tân chuan rangkachak lam thil atân rangkachak te, tangkaraw lam thil atân rangkarua te, dâr lam thil atân dâr te, thîr lam thil atân thîr te, thing lam thil atân thingte chu theihtâwpin ka lo buatsaih tawh a; a zeh tûr onuk lung te, lungmawi te, a bel tûr lungmawi chi hrang hrang leh lunghlu chi tinrêng leh sailungvâr lung tam takte nên. 3 Chu chauh lo pawh chu, ka Pathian in hi ka duhsak êm êm mai a, keima sum rangkachak leh tangkaruate pawh, in thianghlim tâna ka lo buatsaih zawng zawng tiam lo hian, ka Pathian in tân ka pe a ni: 4 chu chu bangte luan nân Ophir rangkachak, rangkachak talent sângthum leh tangkaraw thianghlim talent sângsarih; 5 hmanna kawng hrang hranga mi thiamte hman tûrin rangkachak hmanna tûra rangkachak te, tangkaraw hmanna tûra tangkarua te a ni. Vawiin hian LALPA tâna lâwm taka pe phal tu nge awm le?” a ti a. 6 Tichuan, chhûngkaw puipate, Israel hnam hotute, sâng hotute leh za hotute, lal hnathawk hotute nên lâwm takin an pe a. 7 Pathian in sak nân rangkachak talent sângnga leh darik sîngkhat, tangkarua talent sîngkhat leh dâr talent sîngkhat leh sângriat, thîr talent nuai khat an pe a ni. 8 Tin, lunghlu neite chuan Gerson mi Jehiela vawn LALPA sumah an dah a. 9 Tichuan, mipuite chu an hlim êm êm mai a, rilru hmun khat pua lâwm taka LALPA an pêk avângin; Lal Davida pawh hlim namênlovin a hlim a.
Davidan Pathian a fak
10 Chutichuan, Davidan mipui zawng zawng hmaah chuan LALPA hnênah lâwm thu a sawi a: “Aw LALPA, kan pu Israela Pathian, chatuana fakin awm rawh.
Davida rorêl chhûng khaikhâwmna
11 “Aw LALPA, ropuina te, thiltihtheihna te, chawimawina te, hnehna te, lalna te hi i ta a ni a; lei leh vâna awm zawng zawng hi i ta a ni si a; aw LALPA, ram chu i ta a ni a, mi zawng zawnga chungnung ber i ni. 12 Hausakna leh chawimawinate hi i hnêna mi a ni a, engkim chungah thu i nei a; tin, thiltihtheihna leh chakna i kutah a awm a; i kutah hian mi zawng zawng tihropuina leh chakna pêk theihna a awm. 13 Chutichuan, kan Pathian, lâwm thu kan hrilh chia, i hming ropui hi kan fak e. 14 Nimahsela, tu nge maw ka niha, ka mite pawh hi tute nge maw an niha, hetiang te lâwm taka kan lo hlan theih ni le? Thil zawng zawng hi i hnên aṭanga chhuak a ni a, i ta chu kan rawn pe leh mai che a ni si a. 15 Kan pi leh pute ang khân keini zawng i hmaah hian mikhual, mi hnêna khawsa ve mai ang kan ni a; leilunga kan dam chhûng nite chu hlim ang chauh a ni a, beisei tûr rêng a awm lo. 16 Aw LALPA kan Pathian, i hming thianghlim tâna in kan saksakna tûr chea hêng thil kan lo buatsaih zawng zawng hi nangma kutchhuak a ni a, i ta vek a ni e. 17 Ka Pathian, nangin thinlungte i fiah ṭhîn a, felna te i lâwm ṭhîn tih ka hre bawk. Kei zawngin rilru tak takin hêng thil zawng zawng hi lâwm takin ka rawn hlân a; tin, heta i mite pawh lâwm taka i hnêna rawn hlântu ka hmuh hian ka lâwm êm êm a ni. 18 Aw LALPA, kan pu Abrahama te, Isaaka te, Israela te Pathian, i miten hetiang rilru an put reng theihna tûrin an rilrute hi i tân tinghet la; 19 tin, ka fapa Solomona hi i thupêk te, i thuhriattîr te, i dân te zâwma, chûng zawng zawng ti tûr leh ka lo buatsaih lâwk in sa tûr hian rilru famkim han puttîr ang che,” Davida chuan a ti a. 20 Tin, Davidan mipui zawng zawng hnênah chuan, “Khai le, LALPA in Pathian chu fak rawh u,” a ti a. Tichuan, mipui zawng zawng chuan LALPA, an pi leh pute Pathian chu an fak a, an kûn a, LALPA leh lal chu chibai an bûk a. 21 Tin, a tûkah chuan LALPA hnênah inthawi nân leh LALPA hnêna hâlral thilhlan atân, bâwngpa sângkhat leh berâmpa sângkhat leh berâmno sângkhat, an in tûr thilhlante nên Israel-ho zawng zawng tân inthawina tam tak an hlân a. 22 Tichuan, chumi ni chuan LALPA hmaah hlim takin an ei a, an in hlawm a. Tin, Davida fapa Solomona chu lalah an siam nawn leh a, LALPA mi lian atân hriak an thih a; tin, Zadoka chu puithiam atân. 23 Chutichuan, Solomona chu LALPA lalṭhutthlêngah chuan a pa Davida aiah lalah a ṭhu ta a, hmuingîl takin a awm a; tin, Israel-ho zawng zawngin a thu an zâwm a. 24 Tin, hotu zawng zawng leh mi chak huaisente leh Lal Davida fapa dang zawng zawng chu Lal Solomona lakah an intulût a. 25 Tin, LALPAN Solomona chu Israel-ho zawng zawng mit hmuhah nasa takin a tiropui a, Israel rama a hmaa lalte zînga tu ma la chan ngai loh, lal nihna ropui tak a chantîr a. 26 Jesaia fapa Davida chu Israel-ho zawng zawng chungah a lal a. 27 Israel-ho chunga a lal chhûng chu kum sawmli a ni; Hebron khuaah kum sarih a lal a, Jerusalem-ah kum sawmthum leh kum thum a lal a. 28 Tin, upa tak, tarkûna damin, hausa tak leh chawimawi hlawhin a thi a; tin, a fapa Solomona chu a aiawhin a lal ta a. 29 Ngai teh, Lal Davida chanchin chu a tîr aṭanga a tâwp thlengin, zâwlnei Samuela lehkhabuah te, zâwlnei Nathana lehkhabuah te, zâwlnei Gada lehkhabuah te a chuang a, 30 a lal thu te, a thiltihtheihzia zawng zawng te, amah leh Israel-ho leh ram zawng zawng chunga thil lo awm dânte nên.
Lal Solomona finna dîlin a ṭawngṭai
1 Tin, Davida fapa Solomona chu a ram chhûngah chuan tihchakin a awm a, LALPA a Pathian chu a hnênah a awm a, nasa takin a tiropui a. 2 Tin, Solomona chuan Israel-ho zawng zawng, sipai sâng hotu te, za hotu te, rorêltu te, Israel ram zawng zawnga mi lian, chhûngkaw puipa zawng zawng chu a bia a. 3 Chutichuan, Solomona leh inkhâwmho zawng zawng chu Gibeon khuaa hmun sângah chuan an kal a; chutah chuan LALPA chhiahhlawh Mosian thlalêra a siam Pathian biakna bûk kha a awm a ni. 4 Pathian bâwm erawh chu Davidan a lo buatsaih tawhna hmunah Kiriath-jearim aṭangin Davida chuan a lo la chho tawh a; Jerusalem-ah a dahna tûr puan in a lo zâr sa tawh rêng a. 5 Tin, Hura fa Uria fapa Bezalela siam dâr maichâm kha LALPA biakna bûk bulah chuan a awm bawk a; tin, Solomona leh mipuihote chuan an va pan a. 6 Solomona chu inbiakna puan in bula dâr maichâm awmna LALPA hmaah chuan a han chho va, hâlral thilhlan sângkhat a han hlân a. 7 Chumi zân chuan Solomona hnênah Pathian a inlâr a, a hnênah, “Eng nge ka pêk ang che, mi dîl rawh,” a ti a. 8 Tin, Solomona chuan Pathian hnênah, “Ka pa Davida hnênah khân khawngaihna nasa tak i lantîr a, a aiawhin lalah mi lo siam ta a. 9 Tichuan, aw LALPA Pathian, ka pa Davida hnêna i thutiam kha tipuitling ang che; nangin vaivut zât zet mipuite lalah mi lo siam ta a. 10 Tichuan, hêng mipuiho hmaa lût leh chhuaka ka awm theih nân finna leh hriatna mi han pe ang che; i mi heti zozai hi tuin nge rorêlsak thei ang le?” a ti a. 11 Tin, Pathianin Solomona hnênah, “Hetiang rilru i puta, sum leh pai te, hausakna te, chawimawina te, nangmah hawtu che nunna te dîl lova, dam reina te pawh dîl lova, an chunga lala ka siamna che ka mite ro i rêlsak theihna tûra finna leh hriatnate mi dîl zâwk avângin, 12 finna leh hriatna chu pêk i ni tawh e; tin, i hmaa lalte pawhin an la neih ngai loh, i hnu pawha an neih hauh loh tûr sum leh pai te, hausakna te, chawimawinate ka pe bawk ang che,” a ti a.
Lal Solomona thuneihna leh a hausakzia
13 Chutichuan, Solomona chu hmun sâng bula biakbûk awmna Gibeon khuaa a zin chu Jerusalem-ah a haw a, Israel-te chungah ro a rêl ta a. 14 Tin, Solomona chuan tawlailîrte leh sakawr chung chuang mite a khâwm chiam a; tawlailîr sângkhat leh zali leh sakawr chung chuang mi sîngkhat leh sânghnih a nei a, chûng chu tawlailîr dahna khuaah te, Jerusalem khuaa lal awmnaah te chuan a dah a. 15 Tin, lal chuan Jerusalem khuaah chuan rangkachak leh tangkaruate chu lung ang maia ngaih khawpin a dah ṭeuh va, sidar thingte chu phaia theipui thing ang leka ngaih khawpin a dah bawk a. 16 Tin, Solomona neih sakawrte chu Aigupta ram ata rawn tawlh chhuah a ni a; lal sumdâwngtute chuan chûng chu a rual rualin an lo khâr ṭhîn a, a ruala lei zêl a ni. 17 Aigupta rama mi tawlailîrte chu tangkarua sekel zaruk zêlin an tithleng ṭhîn a; tin, sakawrte chu tangkarua sekel za leh sawmnga zêlin; chutiang bawk chuan Hit-ho lal zawng zawng leh Suria lalte pawh an tihthlensak ṭhîn a ni.
Tempul sa tûrin a inpuahchah
1 Tin, Solomona chuan LALPA hming tân in sak a tum a, lal in tûr nên. 2 Solomona chuan thil phur mi sîngsarih leh, tlânga thing kittu sîngriat leh anmahni vêngtu sângthum leh zaruk a ruat a. 3 Tin, Solomona chuan Tura lal Hurama hnênah, “Ka pa Davida thil i lo tihsaka, a awmna tûr in sak nân sidar te i lo thawh ang khân mi tihsak ve ta che. 4 LALPA ka Pathian tân in sak ka tum ta a. Chu in chu rimtui hâla LALPA biakna hmun, Israel-te hnêna tih tûr thupêk ding reng - chhangdah hlan te, Chawlhni leh thla thar leh LALPA kan Pathian hminga kût nitea zîngah leh tlaia hâlral thilhlan hlan rengna tûr a ni ang. Hêngte hi Israel-te tâna kumkhaw thuruat chu a ni e. 5 Tin, ka in sak tum hi ropui tak tûr a ni a, kan Pathian hi pathian zawng zawng aia ropui a ni si a. 6 Vân zau tak pawha leng lo Pathian chu tu mân in an saksak thei lo vang a. Kei tehlul hian rimtui hâla amah biak nân chauh lo chuan engtin nge in ka saksak theih ang le? 7 Chutichuan, Judai ram leh Jerusalem-a mi themthiamte ka pa Davidan a lo rawih ṭhin, tûna ka hnêna awmte zînga thawk ve tûr hian mi pakhat, rangkachak te, tangkarua te, dâr te, thîr lam te khawih thei, puan senduk te, senlâr te, dumpâwl te siam thiam, ziak eng ang pawh thiam mî rawn tîr ang che. 8-9 Lebanon-a mi sidar thing te, fâr thing te, algum thing te pawh mi han thawn ang che; i miten Lebanon-a thing kih an thiam hle tih ka hre si a; tichuan, ngai teh, thing tam tak mi buatsaihsak tûrin ka mite chu i mite zîngah tel ve rawh se; ka in sak tum hi in ropui tak tûr a ni si a. 10 Tin, ngai teh, i mi, thing kittute chu chhangphut tehkhâwng sînghnih leh barli tehkhâwng sînghnih leh uain bath sînghnih leh hriak bath sînghnih ka pe ang e,” tiin mi a tîr a. 11 Tichuan, Tura lal Hurama chuan, “LALPAN a mite a hmangaih avângin an lalah a siam che a nih hi,” tiin, Solomona chu lehkhain a chhâng a. 12 Hurama chuan, “LALPA, Israel-te Pathian, lei leh vân siamtu, LALPA in leh lal in sa tûra finna leh hriatna nei fapa fing tak Lal Davida petu chu fakin awm rawh se. 13-14 Mi themthiam, finna leh hriatna nei, Dana thlaha mi hmeichhe pakhat fa, a hming Hurama ka rawn tîr e; a pa chu Tura khuaa mi, rangkachak lam te, tangkaraw lam te, dâr lam te, thîr lam te, lung lam te, thing lam te, puan senduk te, dumpâwl te, puan zai sîn te, senlâr te deh thiam, ziak eng ang pawh thiam, thiam tinrêng thiam a ni a; i mi themthiamho leh ka pu i pa Davida themthiamho zîngah chuan a rawn thawk ve ang. 15 Chutichuan, buh te, barli te, hriak te, uain thu te ka lalpan a sawi chu chhiahhlawhte chu rawn thawn ang hmiang; 16 tichuan, keinin Lebanon-a thing chu i duh zât zât kan lo kit ang a, tuifinriatah Jopa thlengin kan rawn tawlhsak ang chia; tin, nangin Jerusalem-ah i thiar chho dâwn nia,” a ti a.
Tempul sak an ṭan
17 Tin, Solomona chuan Israel rama a pa Davidan a lo chhiar tawh sa, hnam dang mi zawng zawng chu a chhiar a, nuai khat leh sîngnga leh sângthum leh zaruk an ni a. 18 Tin, thil phur mi sîngsarih leh tlânga thing kittu sîngriat leh, mipuite thawh dân rêlbâwlsaktu tûr sângthum leh zaruk a ruat a.
1 Chutichuan, Solomona chuan Jerusalem-ah, Moria tlâng, a pa Davida hnêna LALPA inlârna, Jebus mi Ornana hruih zâwl, Davidan hmun a lo buatsaih saah chuan LALPA in chu a sa ṭan ta a. 2 A lal kum li kum, thla hnihna, ni hnih niin a sa ṭan a. 3 Pathian in sak dân tûr Solomonan a han rêl dân chu hetiang hi a ni: a dung lam chu tawng teh dân hluiin tawng sawmruk a ni a, a vâng lam chu tawng sawmhnih a ni. 4 A hma lama hulhliap dung lam chu in vâng lam chen bawk, tawng sawmhnih a ni a, a sân lam chu za leh sawmhnih a ni a; a chhûng chu rangkachak hlîr hlak tîin a luan a. 5 Tin, pindan lian zâwk bangah chuan fâr thing a bel a, chu chu rangkachak hlîr hlak tîin a luan a, chutah chuan tûm thing leh khaidiat lem a chuantîr a. 6 Tin, a timawi tûrin in chu lunghlutein a chei a; rangkachak chu Parvaim rangkachak a ni. 7 In chu, a kalkhang te, a bang te, a chhuat te, a kawngkhâr te chu rangkachakin a luan a; bangahte chuan cherub lemte a chuantîr a. 8 Tin, hmun thianghlim ber a siam a; a dung lam chu in vâng lam chen bawk, tawng sawmhnih a ni a, a vâng lam chu tawng sawmhnih a ni a; rangkachak hlîr hlak tîin a luan a, talent zaruk a tling a. 9 Tin, a kilhna rih lam chu rangkachak sekel sawmnga a ni. Tin, pindan chungnungte chu rangkachakin a luan a. 10 Tin, hmun thianghlim berah chuan cherub lem pahnih a siam a; chûng chu rangkachakin a luan a. 11 Tin, cherub thlate chuan tawng sawmhnih a awh a; cherub pakhat thla chu tawng nga a ni a, bang a va thleng a; tin, a thla lehlam pawh chu tawng nga bawk a ni a, cherub pakhat thla chu a va thleng a. 12 Tin, cherub pakhat thla pawh chu tawng nga a ni a, bang chu a va thleng a; tin, a thla lehlam chu tawng nga bawk a ni a; cherub pakhat thla chu a va thleng a. 13 Chûng cherub-te chuan tawng sawmhnih awhin an thla an zâr a, an ding a, in chhûng lam hawiin an ding a. 14 Tin, puanzâr tûr a dumpâwl te, a senduk te, a senlâr te, la zai sîn taktein a siam a, chutah chuan cherub lemte a chuantîr a.
Dâr ban pahnih
15 Tin, a hma lamah chuan tawng sawmthum leh tawng ngaa sâng ban pahnih a phun a, chumi chhîp chu tawng nga ve ve a ni. 16 Chumi hmunah chuan khaidiat a siam a, ban chhîpte chu a zem a; tin, pawmgranet za a siam a, khaidiatah chuan a khai a. 17 Tin, biak in hma lamah chuan bante chu a phun a, pakhat ding lamah, pakhat vei lamah; tin, ding lama mi chu Jakin a ti a, vei lama mi chu Boaz a ti a.
Tempul chhûng bungrua
1 Tin, dâr maichâm, a dung lam tawng sawmhnih, a vâng lam tawng sawmhnih, a sân lam tawng sâwm a siam bawk a. 2 Dâr zêm bial lian pui, a tlâng leh a tlâng inkâra tawng sâwm tla, a sân lam tawng nga a chhûng bawk a; a tlâng chu tawng sawmthum bial vêl a ni. 3 A tlâng hnuai chu kuhmûm lemte hian a vêl chhuak a, tawng khatah sâwm zêl, dâr zêm vêl chuan a awm a. Kuhmûm lem chu tlar hnih a ni a, dâr zêma chhûn belhbawm a ni. 4 Chu chu bâwngpa sâwm leh pahnih chungah a innghat a, pathumin hmâr lam an hawi a, pathumin thlang lam an hawi a, pathumin chhim lam an hawi a, pathumin chhak lam an hawi a; hnung lam an inchhawn ṭheuh va, 5 tuizêm chu kutphah bawka chhah a ni a, ṭin sângkhat leh zahnih dawng a ni, a tlâng chu no tlâng ang, lili pâr anga siam a ni. 6 Insilna tûr maihûn sâwm a siam bawk a, ding lampangah panga a hûng a, vei lampangah panga a hûng a; chûng chu hâlral thilhlan silna tûr a ni a; dâr zêm erawh chu puithiamte insilna tûr a ni. 7 Tin, a siam dân tûra ruat angin rangkachak khâwnvâr dahna sâwm chu a siam a, biak in chhûngah chuan ding lamah panga, vei lamah panga a dah a. 8 Dawhkân sâwm a siam bawk a, biak in chhûngah chuan ding lamah panga, vei lamah panga a dah a. Tin, rangkachak maihûn za a siam a. 9 Chûng lo pawh chu kawtzâwl, puithiamho ta leh a pâwn zâwkah kawtzâwl zau a siam a, kawngkhârpui a siam bawk a, dârin a luan a. 10 Tin, zêm chu in ding lampangah chhak lamah chhim chhawngin a hûng a. 11 Tin, Hurama chuan bêl te, vutlawh te, maihûnte a siam a. Chutichuan, Pathian in atâna Lal Solomona a siamsak chu Hurama chuan a peih ta a; 12 ban pahnih te, bêl anga bâwk te, ban chhîpa bêl anga bâwk pahnih te, ban chhîpa bêl anga bâwk pahnih tuamna ṭial chik chek pahnih te, 13 chumi tuamna ṭial chik chek pahnih atâna pawmgranet zali te, ban chhîpa bêl anga bâwk pahnih tuamna tûr ṭial chik chek ve ve atâna pawmgranet tlar hnih te. 14 Hûnchhan te, hûnchhan chunga bêlte pawh a siam a; 15 zêm pakhat leh a hnuaia sebâwngpa sâwm leh pahnihte nên. 16 Bêl te, vut lawhna te, sa thurna te leh a bungbêl zawng zawngte pawh chu Hurama chuan LALPA in atân dâr nawh tlêta Lal Solomona a siamsak a ni. 17 Chûngte chu Jordan phaizâwlah Sukkoth leh Zereda bellei hmunah lal chuan a chhûng a. 18 Chutiang chuan Solomonan bungbêl tam tak a siam a; dâr chu bûk sên rual a ni lo. 19 Tin, Solomona chuan Pathian ina bungbêl awm zawng zawng chu a siam a, rangkachak maichâm te, chhang chhiahna dawhkân te, 20 ruat anga hmun thianghlim hmaa chhit tûr khâwnvâr dahna te, a khâwnvâr chawpin, rangkachak hlîr hlakin a siam a; 21 tin, pangpâr te, khâwnvâr te leh chaichehte chu rangkachak, rangkachak hlîr hlakin a siam a; 22 tin, khâwnvâr puan chehna te, maihûn te, fian te, mei lâknate chu rangkachak hlîr hlak bawkin; tin, in chhûng luhna, in chhûngril zâwk hmun thianghlim ber kawngkhârte leh a in, biak in kawngkhârte chu rangkachakin a siam a.
1 Tichuan, Solomona chuan LALPA in atâna a sak chu a peih ta vek a; tin, Solomona chuan a pa Davidan thil a lo hlan tawh zawng zawng chu a la lût a; tangkarua te, rangkachak te, hmanrua zawng zawngte chu Pathian ina ro dahnaah a dah ta a.
Tempul chhûngah thuthlung bâwm an la lût
2 Chutichuan, Solomona chuan Israel upaho te, an hnam puipa, Israela thlahho chhûngkaw puipa zawng zawng chu, Davida khawpui Zion ata LALPA thuthlunna bâwm zâwn chho tûrin Jerusalem khuaah a khâwm chiam a. 3 Chutichuan, Israel mi zawng zawng chu thla sarihnaah kûtah chuan lal hnênah an kal khâwm chiam a. 4 Tin, Israel upaho zawng zawng chu an lo kal a, Levi-hote chuan bâwm chu an zâwn a. 5 Tin, LALPA bâwm leh, inbiakna puan in leh puan ina bungbêl thianghlim zawng zawng chu an zâwn chho va; chûngte chu puithiam Levi-hote chuan an zâwn chho va. 6 Tin, Lal Solomona leh Israel-ho pung khâwm zawng zawng a hnêna rawn inkhâwmte chu bâwm hmaah an awm ho va, berâm leh bâwngpa sawi sên rual loh leh chhiar sên rual lohvin an inthawi a. 7 Tichuan, puithiamte chuan LALPA thuthlunna bâwm chu a awmna tûrah an la lût a, in chhûnga biakna hmun, hmun thianghlim berah, cherub-te thla hnuaiah chuan. 8 Cherub-te chuan bâwm awmna chung zâwnah chuan an thla an zâr reng a, cherub-te chuan bâwm leh a zâwnfungte chu an khuh vek a. 9 Tin, a zâwnfungte chu a sei khawp a, a zâwnfung hmâwrte chu biakna hmunhma, hmun thianghlim aṭang chuan a hmuh theih a; amaherawhchu, pâwn lamah zawng a lang lo; tûn thleng hian chutah chuan a la awm reng a ni. 10 Aigupta ram ata an chhuaha, LALPAN Israela thlahte hnêna thu a thlun laia Mosian Horeb tlânga lungphêk pahnih a dah chauh lo kha chu, chumi bâwm chhûngah chuan eng mah dang a awm lo.
LALPA ropuina
11 Tin, heti hi a ni a, puithiamhote chu hmun thianghlim ata an lo chhuah veleh chuan (puithiam awmho zawng zawng chu an intithianghlim a, a pâwlin an insiam chuang lo va; 12 Levi-ho hla satu zawng zawng pawh an zavaiin, Asapha te, Hemana te, Jeduthuna te, an fapate leh an unaute nên, puan zai sîna inthuamin dârbenthek te, perhkhuang te, ṭingṭangte nên, maichâm chhak lampangah an ding a, an zîngah chuan puithiam za leh sawmhnih tawtawrâwt hâmin an awm bawk a ni), 13 heti hi a ni a, tawtawrâwt hâmtute leh hla satuten LALPA fakna leh lâwm thu sawi nâna an tum rîk chu ri khat ang maiin a hriat a; tawtawrâwt leh dârbenthek leh thil tum rîk nêna an aw an han chhuaha, “Ani chu a ṭha si a, a ngilneihna chu kumkhuain a awm dâwn a ni,” tia LALPA an han fak chuanin, LALPA in chu chhûmin a khat ta mup mup mai a; 14 tichuan, chhûm avâng chuan puithiamte chuan rawng pawh an bâwl thei ta lo hial a; LALPA ropuinain Pathian in chu a khat ta vek si a.
Mipui hnênah Solomonan thu a sawi
1 Chutichuan, Solomonan thu a sawi a: “LALPAN, ‘Thim chhah mupah chuan ka awm ang,’ a ti tak a; 2 nimahsela, i chênna tûr in, kumkhuaa i awmna tûr chu ka lo saksak ta che a nih hi,” tiin. 3 Tin, lal chu a lehhawi a, Israel-ho pung khâwm zawng zawng chu mal a sâwm a; Israel-ho pung khâwm zawng zawng chu an ding ṭhup a. 4 Tin, ani chuan, “LALPA, Israel-te Pathian, ka pa Davida hnêna ama kâ ngeia, 5 ‘Aigupta ram ata ka mi Israel-te ka hruai chhuah ni aṭangin Israel-ho hnam zînga khawii khua mah hi, ka hming awmna tûr in sak nân ka la thlang ngai lo va; ka mi Israel-te chunga hotu tûr mi tu mah ka la thlang ngai hek lo. 6 Amaherawhchu, ka hming awmna tûrin Jerusalem hi ka lo thlang ta a, ka mi Israel-te hotu atân Davida hi ka lo thlang ta a ni,’ tia lo sawitu, ama kut ngeia rawn puitlintu hi fakin awm rawh se. 7 Ka pa Davida khân Israel-te Pathian, LALPA hming tân in sak a rilrûk ṭhîn a. 8 Nimahsela, LALPAN ka pa Davida hnênah, ‘Ka hming tân in sak i rilrûk ṭhîn a, hetiang rilru i lo pu hi i tiṭha e; 9 nimahsela, nang zawngin in chu i sa lo vang a; i fapa, i ṭhâlbea la chhuak tûra chuan ka hming tân in chu a la sa zâwk ang,’ a lo ti tawh a. 10 Tin, LALPAN a thusawi chu a rawn hlen ta a; LALPA lo tiam tawh ang ngeiin ka pa Davida hmun chu ka lo luah a, Israel lalṭhutthlêngah chuan ka lo ṭhu a, Israel-te Pathian, LALPA hming tân in chu ka lo sa ta a ni. 11 Chutah chuan Israela thlahte hnêna a lo thlun, LALPA thuthlunna bâwm chu ka dah ta a ni,” a ti a.
Solomona ṭawngṭaina
12 Tin, LALPA maichâm bulah Israel pung khâwm zawng zawng hmuhah chuan a ding a, a bân a phar a 13 (Solomona chu dâr dawhkân a sei lam tawng nga, a zau lam tawng nga, a sân lam tawng thuma siam biak in kawtlai taka a hûnah chuan a chuang a, Israel pung khâwmho zawng zawng hmaah chuan a ṭhingṭhi a, vân lam hawiin a bân a phar a), 14 “Aw LALPA, Israel-te Pathian, lei leh vânah nangmah ang rêng Pathian an awm lo, an thinlung zawng zawnga i kawng zawhtu i chhiahhlawhte chungah chuan thuthlung hlenin i khawngaih ṭhîn a; 15 i chhiahhlawh ka pa Davida hnêna i thutiam chu i hlen a; a ni, vawiinah hian i kaa i lo sawi tawh chu i kutin i hlawhtlintîr ta a. 16 Chutichuan, aw LALPA, Israel-te Pathian, i chhiahhlawh ka pa Davida hnêna, ‘I thlahte chu i awm anga awm ve tûra an awm dâna an fîmkhur phawt chuan, ka mit hmuha Israel-te lalṭhutthlênga ṭhu tûr chu i hmai lo vang,’ tia i lo tiam tâk kha hlen ang che. 17 Chutichuan, LALPA, Israel-te Pathian, i chhiahhlawh Davida hnêna i thu lo sawi chu hlawhtlintîr ngei ang che. 18 “Amaherawhchu, nang Pathian chu lei mihringte zîngah i chêng takmeuh dâwn em ni le? Ngai teh, vân zau takah pawh i leng lo a ni a, he ka in sakah hian i va leng lo nasa lehzual âwm êm! 19 Nimahsela, aw LALPA ka Pathian, i chhiahhlawhin a auhna che leh a ṭawngṭaina hi ngaihthlâksakin, i chhiahhlawh ṭawngṭaina leh dîlna hi rawn ngaihsak ang che: 20 hemi hmun lam hawia i chhiahhlawh a ṭawngṭaina chu ngaithlaa, ‘Chutah chuan ka hming chu a awm ang,’ i tihna hmun ngei in lamah hian chhûn leh zâna i mit i lên reng ṭhin theihna tûrin. 21 Tin, i chhiahhlawh leh i mi Israel-te hian hemi hmun lam hawia an ṭawngṭai hunin, an dîlnate lo ngaihthlâksak ṭhîn ang che; a ni, i chênna hmun vânan lo ngaithla la; tin, lo ngaithlain ngaidam ang che. 22 “Mi tu pawhin a vêngte chungah thil tisualin, chhechhamtîr hial lo ṭûl sela, hemi ina i maichâm hmaah hian rawn chham sela, 23 nangin vânan lo ngaithla la, che la, mi sual chu a sual mana thiam loh chantîrin, mi fel chu a fel mana thiam chantîrin i chhiahhlawhte rorêlsak ang che. 24 “I mi Israel-te hian i chunga thil an tihsual avânga hmêlmate laka an lo tlâwma, i lam an lo hawi leha, i hming an ṭana, hemi ina ṭawngṭaia thil an rawn dîl che chuan, 25 nangin vânan lo ngaihthlâksak la, i mi Israel-te sualna chu ngaidam la, anmahni leh an pi leh pute i pêk ramah chuan hruai leh ang che. 26 “I chunga thil an tihsual avânga vân a lo pina, ruah te a lo sûr lohva, hemi hmun lam hawia an ṭawngṭaia, i hming an ṭana, anmahni i tihhrehawm avânga an sualte an sim chuan, 27 nangin vânan lo ngaithla la, an kalna tûr kawng ṭha kawhhmuhin i chhiahhlawhte leh i mi Israel-te sualna hi ngaidamin, i mite an rochan atân i pêk i ramah hian ruah han sûrtîr ang che. 28 “Kan ramah hian ṭâm te a lo tlâka, hri te a lo lêna, rona emaw, ṭawihna emaw, khaukhuap emaw, pangang emaw a lo awma, an hmêlmaten an khuate an rawn huala, hri eng pawh, natna eng pawh a lo thlen chuan, 29 an hri vei emaw, an lungngaihna emaw hria apiangin, he in lam hawia bân phara, i mi Israel-te zînga tu pawhin ṭawngṭaina leh dîlna an rawn thlen chu, 30 i awmna vânan lo ngaithla la, ngaidam la, mi tin an awm dân ang ṭheuh zêlin hlawhtlintîr ang che, an thinlung i hre ṭheuh si a (Nangmah chauh hi mihring fate thinlung hretu i ni si a); 31 kan pi leh pute i pêk rama an awm chhûng zawnga i kawng zawh theihna tûra an ṭihna tûr chein. 32 “Tin, i mi Israel-te ni lo, hnam dang mi, i hming ropui tak leh i kut chak tak leh i bân phar avânga ram hla tak ata lo kala, hemi in lam hawia an rawn ṭawngṭai hunin, 33 nangin i awmna vânan lo ngaithla la, hnam dangte pawh an koh dân che ang zêlin an chungah ti ang che; tichuan, i mi Israel-te ang bawkin khawvêla hnam tinin i hming an hria ang a, an ṭih ang chia, he in ka sak hian i hming a pu tih an hre dâwn nia. 34 “I miten an hmêlmate chu i tirhna lam apianga an beihin, i khawpui thlan leh i hming tâna in ka lo sak lam hawia i hnêna an ṭawngṭai chuan, 35 nangin an ṭawngṭaina leh an dîlna chu vânan lo ngaithla la, an thu-ah chuan pui zêl ang che. 36 “I chunga an lo suala (tu mah sual lo an awm si lo), an chunga i thinura, hmêlma kuta i pêka, ram hla takah emaw, hnai deuhvah emaw sala an hruai emaw pawha, 37 sala an hruaina rama an inngaihtuah chhuaha, an inchhîra, ‘Kan lo sual ta a, dik lo tak leh suahsualthlâk takin thil kan lo ti ta a ni,’ tia, 38 an tânna rama dîlna an rawn thlena, sala hruaituten an hruaia an tânna rama an thinlung tak leh an rilru tak taka i lam an lo hawia, an pi leh pute ram lam leh i khawpui thlan leh i hming tâna ka in sak lam hawia i hnêna an ṭawngṭai chuan, 39 an ṭawngṭaina leh an dîlna chu nangin i awmna vânan lo ngaithla la, an thu-ah chuan pui zêl la, i chunga lo sual ta i mite chu ngaidam ang che. 40 “Aw ka Pathian, khawngaih takin i mit lo meng la, he hmuna ṭawngṭainaah hian i beng lo chhi ang che. 41 Aw LALPA Pathian, i awmna hmunah chuan chho rawh, nang leh i chakna bâwm nên; aw LALPA Pathian, i puithiamte chu chhandamnain thuam la, i mi thianghlimte chu ṭhatnain tihlim rawh. 42 Aw LALPA Pathian, i hriak thiha hmêl chu hawi kîrtîr suh la, i chhiahhlawh Davida thil ṭha tihte chu hre reng ang che,” a ti a.
Tempul hlan
1 Tin, Solomona a han ṭawngṭai zawh chuan vân aṭangin mei a lo chhuk a, hâlral thilhlan leh inthawinate chu a rawn kâng ral ta a; tin, LALPA ropuinain in chu a lo khat ta a. 2 LALPA ropuinain LALPA in chu a tihkhah avângin LALPA inah chuan puithiamte chu an lût thei ta lo va. 3 Tin, Israela thlahte zawng zawng chuan vân aṭanga mei lo chhuk leh in chunga LALPA ropuina chu an en reng a, lungrem chungah chuan hmaia lei siin an bawkkhup a, “Ani chu a ṭha si a, a ngilneihna chu kumkhuain a awm dâwn a ni,” tiin chibai an bûk a, lâwm thu an sawi a. 4 Tichuan, lal leh mipuite chuan LALPA hmaah inthawinate an hlân a. 5 Lal Solomona chuan inthawina bâwngpa sînghnih leh sânghnih leh, berâm nuai khat leh sînghnih a hlân a. Chutiang chuan lal leh mipuite chuan Pathian in chu an hlân a. 6 Tin, puithiamte chu an hmun ṭheuhvah an ding a; tin, Levi-hote pawh chu LALPA hnêna lâwm thu sawi nâna phuah, “A ngilneihna chu kumkhuain a awm dâwn a ni,” tia LALPA fak nâna Davidan a hman ṭhin, thil ri thei nêna LALPA hla sain an ding bawk a; tin, puithiamte chuan tawtawrâwt an hâm a, Israel mi zawng zawng chu an ding ṭhup a. 7 Tin, Solomona chuan LALPA in hma zâwna hung chhûng kawtlai tak chu a tithianghlim bawk a; chutah chuan hâlral thilhlan te, remna thilhlan thaute a hlân a; Solomona dâr maichâm siam chu hâlral thilhlan te, chhangphut thilhlan te, thau te hlan nân a têt luattuk avângin. 8 Chutichuan, chumi ṭum chuan Solomona leh Israel mi zawng zawng, mipui pung khâwm nasa tak chu Hamath khaw luhna aṭanga Aigupta ram lui thlenga mite nên ni sarih an kût a. 9 Tin, ni riat ni chuan inkhâwmna ropui tak an nei a; maichâm lawmna atân ni sarih an awh a; kût ni atân ni sarih an awh a ni. 10 Tin, thla sarihna, ni sawmhnih leh ni thum ni chuan mipuite chu a ṭîntîr a, LALPAN Davida leh Solomona leh a mi Israel-te chunga a ṭhatna a lantîr avâng chuan, hlim tak leh lâwm takin mite chu an in lamah an haw ta a.
Solomona hnênah Pathian a inlar leh
11 Chutiang chuan Solomona chuan LALPA in leh lal in chu a puitlin ta a; Solomona chuan a rilrua a tum ang takin LALPA in leh ama in chu tluang takin a puitlin ta a. 12 Tin, zânah Solomona hnênah LALPA a rawn inlâr a, a hnênah, “I ṭawngṭaina chu ka lo hria a, he hmun hi ka tâna inthawina inah ka ruat tawh e. 13 Vân te ka khara, ruah te a sûr loh emaw, khaukhuapte ka tirha, ram te a tihchhiat emaw, ka mite zînga hri ka lêntîr emaw pawhin, 14 ka hming pu ka mite chuan inngaitlâwma an ṭawngṭaia, mi zawna, an awm dân sualte an hawisan chuan, vân aṭangin ka lo ngaithla ang a, an sualte ka ngaidam ang a, an ram chu ka tidam leh ang. 15 He hmuna ṭawngṭainaah hian ka mit ka lên ang a, ka beng ka chhi ang. 16 Chutah chuan ka hming kumkhuaa a awm theih nân he in hi ka ruat a, ka tithianghlim tawh a ni; chutah chuan ka mit leh ka thinlung a awm kumkhua tawh ang. 17 Tin, nanga chungchâng thu-ah pawh, i pa Davida anga ka mit hmuha i awma, thu ka pêk ang zêl chea i awma, ka thuruatte leh ka rorêlte i pawm chuan, 18 ‘Israel-te zîngah rorêltu i hmai lo vang,’ tia i pa Davida hnêna thu ka thlun ang khân, i ram lalṭhutthlêng ka tinghet ang. 19 Amaherawhchu, in hmaa ka zam, ka dânte leh ka thupêkte in hawisana, pathian dangte rawng in bâwla, in biak chuan, 20 anmahni ka pêk ram ata hi ka tiboral hlauh ang a; tin, he in, ka hming tâna ka tihthianghlim tawh sa hi ka mit hmuh phâk lohvah ka sawn bo daih ang a, hnam tin zînga tihelna leh a chhe lama tehkhinnaah ka siam ang. 21 “Tin, he in sâng tak hi a kianga kal apiangin mak an ti ang a, ‘Engati nge he ram leh he in hi LALPAN hetianga a tih?’ an ti ang. 22 Tin, ‘LALPA, an pi leh pute Pathian, Aigupta ram ata hruai chhuaktu chu an hawisana, pathian dangte an vawna, an biaka, an rawng te an bâwl tâk avângin hêng chhiatna zawng zawng hi an chungah a thlentîr a nih hi,’ an la ti ang,” a ti a.
Solomona thiltihte
1 Tin, heti hi a ni a, Solomonan LALPA in leh ama in a sak chhûng kum sawmhnih a lo vei chuan, 2 Huraman Solomona khua a pêkte chu Solomona chuan a din a, Israela thlahte a awmtîr a. 3 Tin, Solomona chuan Hamath-zoba a bei a, a hneh a. 4 Tin, thlalêrah Tadmor a din a, Hamath-a bungraw dahna khuate nên. 5 Tin, Beth-horon chhakta zâwk leh thlangta zâwk pawh, kulhte, kawngkhârte, a kalhnate neiin a din bawk a; 6 tin, Baalath khua te, a bungraw dahna khua zawng zawng te, a tawlailîr dahna khua te, a sakawr chung chuang mite awmna khua te, Jerusalem leh Lebanon leh a ram chhûng zawng zawngah Solomona chuan a duh ang angin a din a. 7-8 Tin, Israela thlahte ni ve lo, Hit-ho te, Amor-ho te, Periz-ho te, Hiv-ho te, Jebus-hote thlah, Israela thlahten an tihboral loh, chu rama la awmte chu Solomonan chhiahhlawh hnathawka rawih luih pâwlah a siam a, tûn thleng hian. 9 Israela thlahte erawh chu Solomonan a hnathawktu chhiahhlawh atân a siam ve lo va, indo mi te, a sipai hotu te, puipa te, a tawlailîr leh a sakawr chung chuang mi hotute an ni zâwk a. 10 Chûngte chu mipuite ho ṭhîntu, Solomona puipa berte an ni a, zahnih leh sawmnga an ni. 11 Tin, Solomona chuan Pharaoa fanu chu Davida khawpui ata a puala in a saksakah chuan a hruai chho va, “Ka nupui chu Israel lal Davida inah chuan a awm tûr a ni lo, LALPA bâwm lo thlenna hmun thianghlim a ni,” a ti a ni. 12 Chutichuan, Solomona chuan hulhliap hma lama a siam LALPA maichâmah chuan Mosia thupêk angin, 13 ni tin atâna bituk tâwk ang zêlin Chawlhniah te, thla thar niah te, kût bi nei, kum khatah vawi thum chhang dawidim telh loh kûtah te hâlral thilhlante a hlân a. 14 Tin, a pa Davida lo ruat ang khân, puithiam pâwl te leh Levi-hote chu an chanpual ṭheuhva ni tina thawh ṭûl ang zêla fak tûr te, puithiamte hmaa rawngbâwl tûr tein a ruat a; tin, kawngkhâr tinah a pâwl pâwla vêngtute a ruat bawk a; chutiang chuan Pathian mi Davida chuan a lo ruat a ni. 15 Lalin puithiamhote, Levi-hote thu a pêk chu eng kawngah mah, sum thu-ah te pawh an ngaihthah ngai hauh lo. 16 Tin, LALPA in an din ṭan tirh aṭanga an peih thlengin Solomona lo buatsaih ang chiah a ni. Tichuan, LALPA in chu puitlin a ni ta a. 17 Chutichuan, Solomona chu Edom rama tuifinriat kama Ezion-geber-ah leh Eloth-ah a kal a. 18 Tin, Hurama chuan a chhiahhlawh tuifinriata che ṭhang mite chu, lawngte nên a kaltîr a; Solomona chhiahhlawhte nên Ophir-ah an kal a, chuta mi chu rangkachak talent zali leh sawmnga an rawn hâwn a, Lal Solomona hnênah an rawn thlen a.
Seba lalnuin a tlawh
1 Tin, Solomona hmingthanzia Seba lalnuin a lo hriat chuan Solomona chu thu khirh tak taka fiah tumin hnung zuitu tam tak hruaiin, sanghâwngseitea englo rimtuite leh rangkachak tam tak leh lunghlute phurin, Jerusalem-ah a han kal a; tin, Solomona hnên a han thlen chuan, a rilrua awm zawng zawng chu phawrh fai vekin a bia a. 2 Tin, Solomona chuan a thu zawh zawng zawng chu a chhâng vek a; Solomona chuan a chhân theih loh rêng rêng a awm lo va. 3-4 Tin, Solomona finzia te, a in sak te, a dawhkâna ei tûr te, a puipateho ṭhut dân te, a rawngbâwltuteho rawngbâwl dân te, an inchei dân te, a no hlântute leh an inchei dân te, LALPA ina a han chhohna te Seba lalnuin a han hmuh chuan rilru ahleih a nei ta lo va. 5 Lal hnênah chuan, “I thiltihte leh i finzia thuthang ka rama ka lo hriat chu a dik ngei a lo nih hi le; 6 nimahsela, keima mit ngeia ka rawn hmuh hma loh chuan an sawi mai chu ka awih ṭhîn lo va, ngai teh, i finna ropuizia zâtve pawh mi lo hrilh hlei nêm le; i hmingthan ka lo hriat dân chu i khûm daih mai a. 7 I mite chu an va nihlawhin, hêng i chhiahhlawh i bula awm fova, i finna thu ngaithla fo ṭhînte hi an va nihlawh êm! 8 LALPA i Pathian, i chunga lâwm, a lal atâna a lalṭhutthlênga ṭhuttîrtu che LALPA i Pathian chu fakin awm rawh se; i Pathianin Israel-ho hi kumkhuaa tihngheh atân a hmangaih a; chuvângin, fel taka rorêl tûrin an lalah a siam che a nih hi,” a ti a. 9 Chutichuan, lal chu rangkachak talent za leh sawmhnih leh englo rimtui tam tak mai leh lunghlute a pe a, Seba lalnuin Lal Solomona englo rimtui a pêk ang rêng rêng hi a awm lo. 10 Tin, Solomona chhiahhlawhte leh Hurama chhiahhlawhte, Ophir aṭanga rangkachak va phurte pawh chuan algum thing leh lunghlute an rawn phur a. 11 Tin, lal chuan algum thing chu LALPA in leh lal in hung nân leh hla satute tâna ṭingṭang leh perhkhuangah a siam a; chutiang chu Judai ramah tûn hma lam chuan an la hmu ngai lo. 12 Tin, Seba lalnu hnênah chuan a duh apiang, lal hnêna a rawn ken aia tam zâwk fe chu Lal Solomona chuan a pe bawk a. Chutichuan, a ram lamah a hote nên an haw leh ta a.
Lal Solomona hausakzia
13-14 Mi inawmpawlhho leh sumdâwnghote rawn lâk luh tiam hauh lovin, Solomona hnêna kum khat chhûnga rangkachak lo lût rih lam chu rangkachak talent zaruk leh sawmruk leh paruk bûk a ni; tin, Arabia lal zawng zawng leh ram awptute chuan Solomona hnênah rangkachak te, tangkarua te an rawn la ṭhîn a. 15 Tin, Lal Solomona chuan rangkachak den phêkin phaw lian mi zahnih a siam a: phaw lian pakhatin rangkachak sekel zaruk a duh a. 16 Tin, rangkachak den phêkin phaw zathum a siam a; phaw pakhatin rangkachak sekel zathum a duh a; chûng chu Lebanon ngawpui inah chuan a dah a. 17 Tin, lal chuan saingho lalṭhutthlêng ropui tak a siam bawk a, rangkachak hlîr hlakin a luan a. 18 Lalṭhutthlêngah chuan a kai chhohna rahka paruk te, lalṭhutthlêng nêna zawm, rangkachak ke nghahchhan te, ṭhutthlêng sîr tuaka bân nghahna te, a bân nghahna bula ding sakeibaknei lem pahnih te a awm a. 19 Tin, rahka paruk sîr tuak chungah chuan sakeibaknei sâwm leh pahnih a ding a; chutiang chu khawii ramah mah an siam ngai lo. 20 Lal Solomona no zawng zawng chu rangkachak vek a ni a; tin, Lebanon ngawpui ina bungbêl zawng zawng pawh rangkachak hlîr hlak vek a ni a; Solomona dam lai chuan tangkarua chu engah mah an ngai lo. 21 Lal chuan lawng rual, Hurama chhiahhlawhte Tarsis-a kal ṭhîn kawppui a nei a, kum thum dan zêlah Tarsis lawng rual chuan rangkachak te, tangkarua te, saingho te, zâwng te, ârâwn te a rawn phur ṭhîn a. 22 Chutichuan, Lal Solomona chuan khawvêl lal zawng zawng chu hausakah leh finah a khûm vek a ni. 23 Tichuan, Pathianin a thinlunga a dah, a finna thu chu ngaithla tûrin khawvêl lal zawng zawng chuan Solomona chu an pan huai huai ṭhîn a. 24 Tin, kum tin pêk bi neiin tangkaraw bungbêl te, rangkachak bungbêl te, puan te, râlthuam te, englo rimtui te, sakawr te, sabengtungte an rawn pe ṭheuh ṭhîn a. 25 Tin, Solomona chuan sakawr leh tawlailîr dahna hmun sângli a nei a; tin, sakawr chung chuang mi sîngkhat leh sânghnih a nei a, chûngte chu tawlailîr dahna khuaah te, Jerusalem-a lal hnênahte a awmtîr a. 26 Tin, Lui aṭanga Philistia ram leh Aigupta ram thlenga lal zawng zawng chungah a lal a. 27 Tin, lal chuan Jerusalem khuaah chuan a tam êm avângin tangkaruate chu lung ang maia ngaih khawpin a awmtîr a, sidar thingte chu phaia theipui thing ang leka ngaih khawpin a awmtîr a. 28 Tin, Solomona tân sakawrte Aigupta aṭangte leh ram tin aṭangtein an rawn la ṭhîn a.
Solomona lal chhûng khai khâwmna
29 Solomona chanchin dangte chu a bul aṭanga a tâwp thlengin zâwlnei Nathana ziak chanchin buah te, Silo mi Ahija hrilh lâwkna buah te, Nebata fapa Jeroboama chungchâng thua zâwlnei Idova inlârna buah te a chuang lo vem ni? 30 Tin, Solomona chu Jerusalem-ah Israel mi zawng zawng chungah kum sawmli a lal a. 31 Tin, Solomona chu a pi leh pute hnênah a muhîl a, a pa Davida khuaah an phûm a, a aiah a fapa Rehoboama a lal ta a.
Hmâr lam hnamte an hel
1 Tin, Rehoboama chu Sekem khuaah a kal a; Israel-ho zawng zawng chu Sekem khuaah lala siam tûrin an kal tawh si a. 2 Tin, heti hi a ni a, Nebata fapa Jeroboaman chumi thu chu a lo hriat chuan (Lal Solomona hnên ata tlân bova, Aigupta rama la awm a ni si a) Aigupta ram ata Jeroboama chu a lo haw leh a. 3 Mi an tîr a, an zu ko va; tichuan, Jeroboama leh Israel-ho zawng zawng chu an lo kal a, Rehoboama hnênah chuan, 4 “I pa khân kan nghâwngkawl a tirit êm ṭhîn a; chuvângin, i pain min chhawr rimna leh a nghâwngkawl rit tak kan chunga a nghah hi min tihzânsak la; tichuan, i rawng kan bâwl ang,” tiin an sawi a. 5 Tin, ani chuan an hnênah, “Ni thum hnuah lo kal leh zâwk rawh u,” a ti a. Tichuan, mipuite chu an kal kiang ta rih a. 6 Tin, Lal Rehoboama chuan, “Heng mipuite chhânna tûr hian rem eng nge mi ruatpui dâwn le?” tiin, a pa Solomona dam laia a bula awm ṭhîn upahote chu a râwn a. 7 Tin, anni chuan a hnênah, “Hêng mipuite hi i khawngaiha, i tihlâwma, an hnêna thu ṭha tak takte i sawi chuan kumkhuain i mite an ni ang,” tiin an sawi a. 8 Nimahsela, upaho remruatpui chu a pawm lo va, ama rualpui tlangvâlho, a bula awm ṭhînte chu a râwn ta zâwk a. 9 An hnênah chuan, “Hêng mipuiho, ka hnêna, ‘I pan kan chunga nghâwngkawl a nghah hi min tihzânsak rawh,’ tia sawitute hi ka chhân dân tûr rem eng nge mi ruatpui le?” a ti a. 10 Tin, a rualpui tlangvâlhote chuan a hnênah, “Hêng mipuiho, ‘I pa khân kan nghâwngkawl a tirit êm ṭhîn a, nang chuan min tihzânsak rawh khai,’ i hnêna titute hnênah chuan hetiang hian ti la, hetiang hian an hnênah sawi ang che, ‘Ka pa kâwng ai chuan ka zungtê hi a lian zâwk a. 11 Ka pa khân nghâwngkawl rit tak a lo bahtîr che u a, kei chuan in nghâwngkawl chu ka belhchhah dâwn asin; ka pa'n vuaknain a hrîng ṭhîn che u a, kei erawh chuan khawmualkaikuangin ka hrîng dâwn che u a ni,’ tiin,” an ti a. 12 Chutichuan, Jeroboama leh mipuiho zawng zawng chu lalin, “Ni thum chinah lo kal leh ang che u,” tia a hrilh ang khân a ni thum ni chuan Rehoboama hnênah chuan an va kal a. 13 Lal chuan chang takin a lo chhâng hlawm a, Lal Rehoboama chuan upahote remruatpui kha a pawm lo va, 14 tlangvâlhote remruatpui ang khân, “Ka pan in nghâwngkawl a lo tirit a, keiin chu chu ka belhchhah zâwk dâwn a ni; ka pan vuaknain a lo hrîng ṭhîn che u a, kei erawh chuan khawmualkaikuangin ka hrîng dâwn che u a ni,” a ti a. 15 Chutichuan, lal chuan mipuite thusawi kha a pawm ta lo va; chu chu Pathian vâng a ni, LALPAN Silo mi Ahija hmanga Nebata fapa Jeroboama hnêna a thu lo sawi tawh kha a tihngheh theih nân. 16 Tin, lalin an thu a pawm lo tih Israel-ho zawng zawngten an hriatin mipuite chuan, “Davida-ah chuan chanvo eng nge kan neih le? Jesaia fapaah chuan ro luah tûr kan nei hek lo. Aw Israel mite u, in puan in lamah haw ṭheuh rawh u! Aw David, i chhûngkua ngaihtuah mai rawh,” tiin lal chu an chhâng a. Chutichuan, Israel-ho zawng zawng chu an puan in lamah an haw ta a. 17 Israela thlah, Judai ram khuaa awmte erawh chu an chungah Rehoboama a lal a. 18 Tichuan, Lal Rehoboama chuan hnathawka rawih luihte hotu Hadorama a tîr a; ani chu Israel-ho zawng zawng chuan lungin an lo dêng a, a thi ta a. Tin, Lal Rehoboama chu Jerusalem khuaa tlân tumin a tawlailîrah a chuang ta thuai a. 19 Chutichuan, Israel-hote chu Davida chhûngte chungah an lo hel ta a ni, tûn thleng hian.
Semaia hrilh lâwkna
1 Tin, Rehoboama chuan Jerusalem a han thlen chuan, Israel-hote dova, Rehoboama ram la leh tûrin Juda leh Benjamina chhûngte, mi huaisen ṭhiau thlan chhuah, nuai khat leh sîngriat zet a khâwm a. 2 Nimahsela, Pathian mi Semaia hnênah LALPA thu a lo thleng a, 3 “Judai ram lal Solomona fapa Rehoboama hnênah leh Judai ram leh Benjamin rama Israel mi zawng zawng hnênah, 4 LALPAN heti hian a ti, ‘In han kal tûr a ni lo va, in unaute chu han do hek suh u! Mahni in lamah haw leh vek rawh u; hei hi keima tih a ni e,’ tiin sawi rawh,” tiin. Chutichuan, LALPA thu chu an awih a, Jeroboama do tûra an kal tûr chu an kîr leh ta a.
Rehoboaman kulh a siam
5 Tin, Rehoboama chu Jerusalem khuaah a awm a, Judai ramah invên nân khuate a siam a: 6 Bethlehem khua te, Etam te, Tekoa te, 7 Beth-zur te, Soko te, Adulam te, 8 Gath te, Maresa te, Ziph te, 9 Adoraim te, Lakis te, Azeka te, 10 Zora te, Aijalon te, Hebron khua te; chûng chu Judai leh Benjamin rama kulh nei khuate a ni. 11 Tin, chûng kulhte chu a tinghet a, hotute a dah a, ei tûr te, hriak te, uain te a chhêk khâwm a. 12 Tin, khaw tinah chuan phaw te, fei te a dah a, khaw nghet takah a siam hlawm a. Tin, Judai leh Benjamin ram chu a ta a ni.
Puithiam leh Levia chi Juda ramah an lût
13 Tin, Israel ram zawng zawnga puithiamte leh Levi-hote chu an ram aṭang ṭheuhvin a hnênah an kal a. 14 Levi-hote chuan an ram leh an awmnate an chhuahsan a, Judai ram leh Jerusalem-ah an kal a; Jeroboama leh a fapaten LALPA tâna puithiam hna thawk lo tûrin an bântîr si a, 15 a hmun sâng atân leh kêlpa leh bâwngno lem a siam atâna puithiamte a ruat tâk zâwk avângin. 16 Tin, Israel hnam, LALPA, Israel-te Pathian lama rilru thle zawng zawngte chuan an zui a, LALPA an pi leh pute Pathian hnêna inthawi tûrin Jerusalem-ah an kal a. 17 Chutichuan, Judai ram chu an tinghet a; kum thum chhûng chu Solomona fapa Rehoboama chu an tinghet a; kum thum chhûng chu Davida leh Solomona kawng chu an zawh a ni.
Rehoboama chhûngkua
18 Tin, Rehoboama chuan Davida fapa Jerimotha fanu Mahalathi nupuiah a nei a, chu chu Jesaia fapa Eliaba fanu Abihaili fanu a ni. 19 Fapate a hrinsak a: Jeusa te, Semaria te, Zahama te. 20 Ani hnuah chuan Absaloma fanu Maaki a nei a; ani chuan Abija te, Ataia te, Ziza te, Selomitha te a hrinsak a. 21 Tin, Rehoboama chuan Absaloma fanu Maaki chu a nupuite leh a hmeite zawng zawngah chuan a hmangaih bîk a (nupui sâwm leh pariat leh hmei sawmruk a nei a, fapa sawmhnih leh pariat leh fanu sawmruk a nei a ni). 22 Tin, Rehoboama chuan Maaki fapa Abija chu a unaute zînga chungnung berah a dah a; lala siam a rilrûk nghe nghe a ni a. 23 Fing takin rem a ruat a, a fapate zawng zawng chu Judai ram leh Benjamin ram zawng zawnga kulh nei khuaahte a awm darhtîr vek a; ei tûr tam tak a pe a, nupui tam tak a zawnsak hlawm a.
Aigupta-in Judai ram a rûn
1 Tin, Rehoboama chu a lo lal ngheh tâk chinah chuan, a lama ṭang Israel-ho zawng zawng nên LALPA dân chu an hawisan ta a. 2-3 Tin, heti hi a ni a, Lal Rehoboama kum nga a lal kum chuan LALPA chunga an sual avângin Aigupta lal Sisaka chuan tawlailîr sângkhat leh zahnih leh sakawr chung chuang mi sîngruk nên Jerusalem a han bei a. Aigupta rama mi a hnêna kalte chu chhiar sên rual an ni lo: Lub-ho te, Sukki-ho te, Ethiopia-ho te an ni a. 4 Judai rama kulh nei khuate a la a, Jerusalem a va thleng a. 5 Tin, zâwlnei Semaia chu Rehoboama leh Juda-ho puipa, Sisaka avânga Jerusalem-a pung khâwmho hnênah chuan a han kal a, an hnênah, “LALPA chuan heti hian a ti, ‘Mi hawisan ta a; chuvângin, kei pawhin Sisaka kutah ka dah ta che u a ni,’ tiin,” a han ti a. 6 Chutichuan, Israel-ho puipate leh lal chu an intihnuai a, “LALPA chu a fel a ni,” an ti a. 7 Tin, LALPAN an intihhnuai chu a lo hriat chuan LALPA thu Semaia hnênah a lo thleng a, “An intihnuai ta a; ka tiboral vek lo vang a, ṭhenkhat ka chhanhim ang a, Sisaka hmangin Jerusalem chungah ka thinurna ka leih lo vang. 8 Amaherawhchu, a chhiahhlawhte an ni ang, ka rawngbâwl leh ram dang mi rawngbâwl dân an hriat nân,” tiin. 9 Chutichuan, Aigupta lal Sisaka chu Jerusalem beiin a han chho va, LALPA ina rote leh lal ina rote a la a; a la zo vek a ni. Solomona siam rangkachak phawte pawh a la a. 10 Tin, Lal Rehoboama chuan chûng aiah chuan dâr phawte a siam a, lal in kawngkhâr vêngtu sipai hotute a kawltîr a. 11 Tin, heti hi a ni a, lal chu LALPA ina a luh apiangin vêngtute chuan an keng a; tin, vêngtute pindanah chuan an dah leh zêl ṭhîn a. 12 Tin, a han intihhnuai tâk avâng chuan a tihboral hlauh loh nân a chunga LALPA thinurna chu a kiang ta a; tin, Judai ram chu a la ṭha reng bawk a.
Rehoboama rorêl chanchin khaikhâwmna
13 Chutichuan, Lal Rehoboama chu Jerusalem-ah chuan a intinghet a, ro a rêl a: Rehoboama chu a lal ṭan tirhin kum sawmli leh kum khat a ni a, LALPAN a hming awmtîrna tûra Israel hnam zawng zawng zînga a thlan khua Jerusalem-ah kum sâwm leh kum sarih a lal a; a nu hming chu Naami, Amon mi a ni. 14 LALPA zawn nân a rilru a hman loh avângin thil ṭha lo a ti a. 15 Tichuan, Rehoboama chanchin chu a bul aṭanga a tâwp thlengin zâwlnei Semaia ziak chanchin buah leh zâwlnei Idova ziak chanchin bua thlahte chanchin zîngah ziak a ni lâwm ni? Rehoboama leh Jeroboama chu an indo reng mai a ni. 16 Tin, Rehoboama chu a pi leh pute hnênah a muhîl a, Davida khuaah an phûm a. Tichuan, a aiah a fapa Abija a lal ta a.
Abija leh Jeroboama an indo
1 Jeroboama kum sâwm leh kum riat a lal kumin Juda-ho chungah Abija a lal ṭan a. 2 Jerusalem-ah kum thum a lal a; a nu hming chu Maaki, Gibea mi Uriela fanu a ni. Tin, Abija leh Jeroboama chu an indo va. 3 Tin, Abija chuan sipai indo mi, mi huaisen nuai li thlan ṭhiau nên an va bei a; tin, Jeroboama chuan mi chak huaisen thlan ṭhiau nuai riat inzârin a lo do va. 4 Tin, Abija chu Ephraim tlâng rama Zemaraim tlângah a ding a, “Aw Jeroboam, Israel-ho zawng zawng nên lo ngaithla rawh u; 5 LALPA, Israel-te Pathian chuan Israel ram chu Davida leh a fate hnênah chi thuthlungin kumkhua atân a pe tih hre âwm tak in ni lâwm ni? 6 Nimahsela, Nebata fapa Jeroboama, Davida fapa Solomona chhiahhlawh chu a pu chungah a lo hel ta mai a. 7 Tin, Rehoboama a la naupana, a rilru a la nêma, a lo dodâl theih loh lai khân Solomona fapa Rehoboama kalhin mi bengtlaloho, Beliala fate an pung khâwm a. 8 Tin, Davida fapate lakah hian LALPA ram chu do theih in inring a; tam pawh in tam hle a, Jeroboaman pathian atâna a siamsak che u rangkachak bâwngno lemte pawh in hnênah a awm bawk a. 9 LALPA puithiam, Arona fapate leh Levi-hote chu hnawt chhuakin, ram dang mite tih dân angin puithiam in insiam a ni lâwm ni? Tichuan, bâwngtuai leh berâm pasariha rawn inhlân apiangte chu pathian ni lawilo puithiam an ni thei zêl mai a. 10 “Nimahsela, keini zawng, LALPA chu kan Pathian a ni a, amah chu kan hawisan lo va; LALPA tâna rawngbâwltu mahni hna ṭheuh thawk Arona fapa puithiamte leh Levi-hote kan nei a. 11 Tin, ni tin leh zan tin LALPA tân hâlral thilhlan te, rimtui te an hâl ṭhîn a; chhang chhiah pawh dawhkân thianghlimah an dah fel diam ṭhîn a, tlai lam apianga hâl tûrin rangkachak khâwnvâr dahna a khâwnvârte nên; keini zawngin LALPA kan Pathian thupêk chu kan zâwm reng a, nangni erawh chuan amah chu in hawisan a ni. 12 Tin, ngai teh u, Pathian chu kan hma hruaiin kan hnênah a awm a; tin, a puithiamte an tawtawrâwta nangmahni hnawt tûra hâm tûrin an awm bawk a. Aw, Israela thlahte u, LALPA, in pi leh pute Pathian chu do lul suh u, in hmuingîl tawp hlei lo vang e,” a ti a. 13 Nimahsela, Jeroboama chuan an hnung lamah a chân rûktîr a; tichuan, Juda-te hma lamah an awm a, châng rutute chu an hnung lamah an awm a. 14 Tin, Juda-te chu an han lehhawi chuan râl chu an hnung lam leh an hma lamah an lo awm a, LALPA chu an au ta a, puithiamte chuan tawtawrâwt an hâm a. 15 Chutichuan, Juda-te chu an au ta dur dur a; chutia Juda-te an au dur dur chuan heti hi a ni a, Abija leh Juda-ho hmaah chuan LALPAN Jeroboama leh Israel-ho zawng zawng chu a titlâwm ta a. 16 Tichuan, Israela thlahte chu Juda-ho hmaah chuan an tlânchhia a, Pathianin an kutah a pe ta a. 17 Chutichuan, Abija leh a hote chuan an that ta chiam mai a; tichuan, Israel mi thlan ṭhiau nuai nga an that a. 18 Chumi ṭuma Israela thlahte tlâwm dân chu chutiang chu a ni, Juda thlahte chuan LALPA an pi leh pute Pathian an rin avângin an ngam ta a. 19 Tin, Abija chuan Jeroboama chu a ûm a, hêng khuate hi a lâksak a: Bethel leh a khawperte, Jesana a khawperte nên, Ephron a khawperte nên. 20 Abija lal chhûng chuan Jeroboaman din chhuah lehna a nei ta lo; LALPAN a hrem a, a thi ta a. 21 Abija erawh chu a lo chak ta deuh deuh va, nupui sâwm leh pali a nei a, fapa sawmhnih leh pahnih leh fanu sâwm leh paruk a hring a. 22 Abija chanchin dangte leh a awm dân te, a thusawite chu zâwlnei Idova hrilhfiahna buah a chuang a ni.
Lal Asan Ethiopia mite a hneh
1 Chutichuan, Abija chu a pute hnênah a muhîl a, Davida khawpuiah an phûm a, a aiah a fapa Asa a lal ta a; a lal chhûng chuan an ram chu kum sâwm zet râlmuangin a awm a. 2 Asa chuan LALPA a Pathian mit hmuhah thil ṭha leh thil dik a ti ṭhîn a; 3 ram dang pathian maichâmte leh hmun sângte a thehthang bo va, lungphunte a tichim a, Aseri-te a kit a. 4 Juda-hote chu LALPA, an pi leh pute Pathian zawng tûr leh a dân leh a thupêk zâwm tûrin thu a pe a. 5 Tin, Juda-te khua zawng zawnga hmun sângte leh rimtui hâlna maichâmte chu a thehthang bo vek bawk a; a hnuaiah ram chu râlmuangin a awm a. 6 Tin, Judai ramah chuan kulh nei khuate a siam a; ram chu râlmuangin a awm a, LALPAN râlmuanna a pêk avângin chûng kum chuan tu mah do a nei lo. 7 Juda-te hnênah chuan, “Hêng khuate hi i din ṭha ang u khai, kulhtein hung ila, in sâng te, kulh kawngkhâr te, a kalhna te i siam ang u; LALPA kan Pathian hi kan zawn tâk avângin ram chu kan hnuaiah a lo awm ta a; amah chu kan zawng a, ani chuan kil tin kil tangah râlmuangin min awmtîr ta a ni,” a ti a. Chutichuan, an din ṭha a, an hmuingîl ta zêl a. 8 Tin, Asa chuan Juda mi, phaw leh fei keng mi sipai nuai thum a nei a; tin, Benjamin mi, phaw leh thal hmang mi nuai hnih leh sîngriat; chûng zawng zawng chu mi chak huaisen vek an ni. 9 Tin, Ethiopia mi Zera, sipai maktaduai leh tawlailîr zathum nên anmahni bei tûrin a lo thawk a; Maresa a lo thleng a. 10 Tichuan, Asa chu a bei tûrin a va thawk a, Maresa-ah Zephatha ruamah an va inzâr a. 11 Tin, Asa chuan LALPA a Pathian a au va, “LALPA chauh lo chu mi chak tak laka chak lo ṭanpuitu an awm lo va; aw LALPA kan Pathian, min ṭanpui rawh khai; nangmah ringin i hmingin hêng mipuiho hi kan rawn bei a ni a. Aw LALPA, kan Pathian i ni a, mihringin nang chu ngam suh se,” a ti a. 12 Chutichuan, LALPAN Asa leh Juda-te hmaah chuan Ethiopia mite chu a bei a; tichuan, Ethiopia mite chu an tlânchhe ta a. 13 Tin, Asa leh a hote chuan Gerar thlengin an ûm a. Ethiopia mite chuan thi an tam êm avângin ṭan an khawh thei ta lo va, LALPA leh a sipaite hmaah chuan tihtlâwm an ni ta a; râllâk sum tam tak an la a. 14 Gerar vêla khua zawng zawng chu an bei a, LALPA chu an hlau ta a, khua zawng zawng chu an rawk a, râllâk sum a tam hle mai a ni. 15 Ranpuho puan inte pawh an bei a, berâm leh sanghâwngsei tam tak an kawi a, Jerusalem-ah an haw leh ta a.
Lal Asa siam ṭhatna
1 Tin, Odeda fapa Azaria chungah Pathian thlarau a lo thleng a; 2 Asa hmu tûrin a kal chhuak a, a hnênah, “Asa leh Juda mi zawng zawng leh Benjamin mite u, ka thu ngaithla teh u. A lama in ṭan chhûng zawng LALPA chu in lamah a ṭang a, amah in zawn chuan in hmu ang a, amah in hawisan chuan ani pawhin a hawisan ang che u. 3 Israel mite chu rei tak Pathian tak nei lo leh zirtîrtu leh puithiam nei lo leh dân nei lovin an lo awm a; 4 amaherawhchu, an mangana, LALPA, Israel-te Pathian lam an hawia, an zawn veleh an hmu a nih kha. 5 Tin, chûng lai chuan a chhuak lam leh a lût lamte tân râlmuanga awmna a awm lo va, ram chhûnga awm zawng zawngte tân manganna nasa tak hlîr a ni zâwk a. 6 Hnam leh hnam, khua leh khua an intichhe rem rum a; Pathianin hrehawm tinrêngin a timangang a nih kha. 7 Nimahsela, nangni zawng chak takin awm ula, inthlahdah suh u, in thiltih man chu in hmu dâwn a ni,” a ti a. 8 Tin, Asan chûng thute leh zâwlnei Odeda thusawite chu a hriatin a intihuai a, Judai ram leh Benjamin ram zawng zawng ata leh Ephraim tlâng rama a khaw lâk ata thil tenawmte chu a thehthang bo vek a; LALPA hulhliap bula LALPA maichâm chu a din ṭha a. 9 Tin, Judai ram leh Benjamin rama mi zawng zawng, a hnêna khawsa ve Ephraim leh Manase leh Simeon rama mite nên a ko khâwm vek a; LALPA a Pathian a hnênah a awm tih an hriatin Israel ram aṭangin an rawn bêl ta huai huai mai si a. 10 Chutichuan, Asa kum sâwm leh kum nga a lal kum, a thla thumnaah Jerusalem-ah an pung khâwm chiam a. 11 Tin, chumi ni chuan an râllâk bâwngpa zasarih leh berâm sângsarihin LALPA hnênah an inthawi a. 12 Tin, an rilru leh an thinlung zawng zawngin LALPA an pi leh pute Pathian zawng tûr leh, 13 tu pawh LALPA, Israel-te Pathian zawng lo chu a lian a tê, a hmei a pain tihhlum tûr thu an thlung a. 14 Tin, LALPA hnênah aw ring takin, au râwlin, tawtawrâwt ri nên, tawtawrâwt bi nei ri nên chhia an chham a. 15 Juda mi zawng zawng chu lungsi taka chhechham an nih avângin an lâwm tlâng hle a, LALPA chu tihtakzetin an zawng a, hmuh pawh an hmu ta rêng a, hmun tinah râlmuangin an awm ta a. 16 Tin, Lal Asa nu Maaki pawh chu milem tenawm tak Aseri a siamsak avângin a lal nu nihna a bân a; tin, Asa chuan a milem chu a sât thlu a, a tisawm dep a, Kidron luiah a hâl a. 17 Amaherawhchu, Israel ram ata hmun sângte chu thehthang bo a ni lo va; nimahsela, Asa rilru chu a lal chhûng chuan a fel hle reng a. 18 Tin, a pan thil a lo hlan leh ama lo hlan tangkarua te, rangkachak te, bungbêlte chu Pathian inah a la lût a. 19 Tin, Asa lal lai kum sawmthum leh kum nga chhûng chuan indo rêng rêng a awm lo va.
Israel mite nêna intihbuai
1 Asa kum sawmthum leh kum ruk a lal kumin Israel lal Baasa chuan Juda-te a han bei a, Juda lal Asa hnêna lût tûr leh chhuak tûr dan nân Rama khua a siam a. 2 Chutichuan, Asan LALPA in leh lal ina ro tangkarua leh rangkachakte chu a la chhuak a, Damaska-a Suria lal Ben-hadada hnênah, 3 “Ka pa leh i pa kârah thuthlung a awm a, ngai teh, tangkarua leh rangkachakte ka thawn a che; ti teh, Israel lal Baasa hian mi ṭînsanna tûrin a hnêna i thuthlun kha ṭhiat leh teh mai,” tiin a thawn a. 4 Tin, Ben-hadada chuan Lal Asa thu chu a lo pawm a; tichuan, Israel khuate chu bei tûrin sipai hotute a tîr a; Ijon khua te, Dan khua te, Abel-maim khua te, Naphtali rama bungraw dahna khua zawng zawngte an bei a. 5 Tin, heti hi a ni a, Baasan chumi thu chu a lo hriat veleh Rama khua a siam lai chu a chawlhsan a, a thiltih tum chu a ṭhulh ta a. 6 Chutichuan, Lal Asa chuan Juda mi zawng zawng chu a hruai a, Baasan Rama khaw siam nâna lung leh thing a hmante chu an la vek a, chu chuan Geba leh Mizpa khua a siam a.
Zâwlnei Hanania
7 Tin, chumi lai chuan zâwlnei Hanania chu Juda lal Asa hnênah a lo kal a, a hnênah, “LALPA i Pathian ring lovin Suria lal i ring a; chuvângin, Suria lal sipai rualte chu i chhuah ta a ni. 8 Ethiopia-ho leh Lub-hote chu sipai rual lian tak, tawlailîr leh sakawr chung chuang mite tam tak an ni lâwm ni kha? Nimahsela, LALPA i rin avâng khân i kutah a pe a nih kha. 9 A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn a ni. Atthlâk takin thil i ti a nih hi; tûn achinah chuan do i nei reng tawh ang,” a ti a. 10 Chutichuan, Asa chu zâwlnei chungah chuan a thinrim a, tân inah a khung ta a; a thusawi avângin a thinrim ta hle mai a ni. Tin, Asa chuan mi ṭhenkhat pawh a tiduhdah leh ta nghâl zêl a.
Lal Asa lal a tâwp
11 Tin, ngai teh u, Asa chanchin chu a bul aṭanga a tâwp thlengin Juda leh Israel lalte chanchin ziakna buah a chuang a ni. 12 Tin, kum sawmthum leh kum kua a lal kumin Asa chu a ke a lo na ta a, a nâ chu nasa tak a ni; nimahsela, a natnaah chuan LALPA râwn lovin damdawi thiamte a râwn zâwk a. 13 Tin, Asa chu a pi leh pute hnênah a muhîl a, kum sawmli leh kum khat a lal kumin a thi a. 14 Tin, Davida khawpuia ama puala a ker, ama thlânah an phûm a, rimtui tui tak, rimtui siamtuten rimtui chi hrang hrang an siama khat khumah an zalh a, a pualah meipui nasa tak an chhep a.
Jehosaphata lal a ni
1 Tin, a fapa Jehosaphata a aiah a lal a, Israel mite do tûrin a indin nghet a. 2 Tin, Judai rama kulh nei khua zawng zawngah sipaite a dah a, Judai ram leh a pa Asan a lo lâk Ephraim rama khuaahte chuan râlvêngtute a dah a. 3 Tin, Jehosaphata hnênah chuan LALPA a awm a; Baala te zawng lovin a pu Davidan a zawh hmasak tawh kawng chu a zawh a, 4 an pi leh pute Pathian chu zawnga, Israel mite tih ang ti lova a thupêkte a zawm zâwk avângin. 5 Chuvângin, LALPAN a ram chu a kutah a tinghet a; tichuan, Judai rama mi zawng zawngin Jehosaphata chu lâwmman te an rawn pe a, a lo hausain a lo ropui ta hle mai a. 6 Tin, a rilru chu LALPA lamah a thle a; tin, Judai ram ata hmun sângte leh Aseri-te a thehthang bo vek bawk a. 7 Tin, kum thum a lal kumin a mi lian Ben-haila te, Obadia te, Zakaria te Nethanela te, Mikaia te chu Judai ram khuatea mite zirtîr tûrin a tîr chhuak bawk a. 8 Tin, Levi mi, Semaia te, Nethania te, Zebadia te, Asahela te, Semiramotha te, Jehonathana te, Adonija te, Tobija te, Tob-adonija te an tel ve a; tin, puithiam Elisama leh Jehorama an tel bawk a. 9 Tin, LALPA dân bu an keng a, Judai ramah chuan an zirtîr a, Judai ram khua zawng zawng an fang a, mite an zirtîr a.
Jehosaphata ropuizia
10 Tin, Judai ram vêl ram zawng zawnga mite chuan LALPA chu an hlau va, tu mân Jehosaphata chu an do ngam lo va. 11 Tin, Philistia mi ṭhenkhatin Jehosaphata chu lâwmman an rawn pe a, chhiah atân tangkarua te an pe bawk a; tin, Arabia mite pawhin ran rual, berâmpa sângsarih leh zasarih leh kêlpa sângsarih leh zasarih an rawn kaih a. 12 Tichuan, Jehosaphata chu a lo ropui ta hle mai a, Judai ramah kulhte leh thil dah khâwmna khuate a siam a, 13 Judai ram khuaahte chuan hna tam tak a nei a; tin, Jerusalem-ah sipai mi chak huaisente a ngah bawk a. 14 Tin, an chhûngkua kua zêla an awm dân chu hetiang hi a ni - Juda chhûngkuaa sâng hotute chu, hotu Adna chuan mi chak huaisen nuai thum a ho va; 15 a dawttu Jehohananan nuai hnih leh sîngriat a ho va; 16 tin, a dawt lehtu Zikria fapa Amasia chu inphal taka LALPA tâna inpein, mi chak huaisen nuai hnih a ho va; 17 tin, Benjamin chhûngkuate - mi chak huaisen Eliadan thal leh phaw hmang mi nuai hnih a ho va; 18 a dawttu Jehozabada chuan râl kâp tûra inpeih diam nuai khat leh sîngriat a ho va. 19 Hêng zawng zawng hi Judai rama kulh nei khuaa lalin a dahte tiam lova lal hnêna awm rengte an ni.
Zâwlnei Mikaian Ahaba fîmkhur tûrin a hrilh
1 Tichuan, Jehosaphata chu a lo hausain a lo ropui ta hle mai a; tin, Ahaba nêna inkûngkaihna a siam a. 2 Tin, kum eng emaw zât hnu chuan Samari-ah Ahaba hnênah a zuk kal a; tin, Ahaba chuan amah leh a hote chu berâm leh bâwngpa tam tak a lo talh a, Ramoth-gilead khuaa han chhohpuiah a sâwm a. 3 Tin, Israel lal Ahaba chuan Juda lal Jehosaphata hnênah chuan, “Ramoth-gilead khuaah kan han chho dûn dâwn lâwm ni?” a ti a. Tin, ani chuan a chhâng a, “Kei leh nang, ka mite leh i mite chu pumkhat kan ni alâwm, râl chu kan bei za ang chu,” a ti a. 4 Tin, Jehosaphata chuan Israel lal hnênah chuan, “LALPA thu ngaichâng rih phawt la maw le,” a ti a. 5 Chutichuan, Israel lal chuan zâwlneiho mi zali a ko khâwm a, an hnênah, “Ramoth-gilead khua bei tûrin kan han thawk ang nge thawk lo vang?” a ti a. Tin, anni chuan, “Han thawk rawh khai, Pathianin lal kutah a pe dâwn a ni,” an ti a. 6 Nimahsela, Jehosaphata chuan, “LALPA zâwlnei tu emaw kan han râwn tûr an awm lâwm ni aw?” a ti a. 7 Tin, Israel lal chuan Jehosaphata hnênah, “LALPA min râwnsak tûr mi pakhat chu a la awm kha maw! Nimahsela, ani zawng ka huat zâwng tak a ni; ka chungchâng thu hi a chhe lam ngawt lo chu a ṭha lam rêng rêng a sawi ngai si lo va; chu mi chu Imla fapa Mikaia a ni,” a ti a. Tin, Jehosaphata chuan, “Lal chuan chutiang chuan ti teh suh se â,” a ti a. 8 Tichuan, Israel lal chuan hotu pakhat a han ko va, “Imla fapa Mikaia han hruai thuai teh,” a ti a. 9 Tin, Israel lal leh Juda lal Jehosaphata chu Samari kulh kawngka luhna bul hmun thâwl laiah an lal puana inthuamin an lalṭhutthlêng ve veah an ṭhu a; tin, zâwlnei zawng zawng chuan an hmaah thu an sawi a. 10 Tin, Kenaana fapa Zedekian thîr kîte a siam a, “LALPAN heti hian a ti, ‘Hêngte hian Suria-hote chu boral dêr khawpin i si ang,’ tiin,” a ti a. 11 Tin, chutiang bawkin zâwlnei dangte pawh chuan, “Ramoth-gilead-ah chuan han chho la, han hmuingîl rawh khai; LALPAN lal kutah hian a pe dâwn a ni,” tiin an sawi a. 12 Tin, Mikaia ko tûra an tirha chuan, “Ngai teh khai, zâwlneite chuan thukhat vuain a ṭha lamin lal hnênah thu an sawi ṭheuh va; chuvângin, nang pawhin an sawi tâk angin a ṭha lamin han sawi ve teh khai,” tiin a sawi a. 13 Tin, Mikaia chuan, “LALPA nunna chhâlin ka sawi e, ka Pathianin a sawi ang chiahin a ni ka sawi dâwn ni,” a lo ti a. 14 Tin, lal hnên a han thlen chuan lalin a hnênah, “Mikai, Ramoth-gilead khua bei tûrin kan han thawk ang nge thawk lo vang?” a ti a. Tin, ani chuan, “Han thawk ula, han hmuingîl rawh u, i kutah pêk a ni dâwn a ni,” a ti a. 15 Tin, lal chuan a hnênah, “Thutak ngawt lo chu ka hnênah LALPA hminga sawi lo tûrin vawi eng zât nge maw chhia ka chhamtîr dâwn che le?” a ti a. 16 Tin, ani chuan, “Berâm, vêngtu nei lo angin Israel-ho zawng zawngte chu tlângahte darh vekin ka hmu a; tin, LALPAN, ‘Hêngho hian hotu an nei ta lo va, mahni in lamah thlamuang takin haw dial mai rawh se,’ a ti a ni,” a ti a. 17 Tin, Israel lal chuan Jehosaphata hnênah, “Ka chungchâng thu hi a chhe lam ngawt lo chu a ṭha lam rêng rêng zawng a sawi hlei lo vang e, tih ka hrilh che a ni lâwm ni kha?” a ti a. 18 Tin, Mikaia chuan, “Khai le, LALPA thu ngaithla teh u, LALPA chu a lalṭhutthlênga ṭhua vân mipuiho zawng zawng a ding lam leh a vei lama dingin ka hmu a. 19 Tin, LALPA chuan, ‘Israel lal Ahaba hi Ramoth-gilead-a han chhova, han thi tûrin tuin nge thlêm dâwn?’ a tih hun chuan pakhatin, ‘Chutin khatin,’ a ti a, mi dangin, ‘Chutiang khatiang chuan,’ a ti a. 20 Tin, thlarau pakhat a lo chhuak a, LALPA hmaah a ding a, ‘Keiman ka thlêm ang e,’ a ti a. Tin, LALPAN a hnênah, ‘Engin maw?’ a ti a. 21 Tin, ani chuan, ‘Ka va kal ang a, a zâwlneite zawng zawng kâah chuan thlarau dawtheiah ka va chang ang,’ a ti a. Tin, ani chuan, ‘I va thlêm ngei ang a, hlawh pawh i hlawhtling bawk ang. Va kal ta la, chutiang chuan va ti rawh le,’ a ti a. 22 Chutichuan, ngai teh, LALPA chuan hêng i zâwlneite kâah hian thlarau dawthei a dah a; i chungchâng thu LALPAN a ṭha lo lamin a sawi ta a ni,” a ti a. 23 Chu veleh Kenaana fapa Zedekia chuan a va hnaih a, Mikaia chu a biangah a va bêng a, “I hnêna thusawi tûrin LALPA thlarau chuan khawii lamah nge mi chhuahsan?” a ti a. 24 Tin, Mikaia chuan, “Ngai teh, pindan chhûngrila biru tûra i luh niah i la hria ang,” a ti a. 25 Chutichuan, Israel lal chuan, “Mikaia hi hruai ula, khaw awptu Amona leh lal fapa Joasa hnênah kalpui leh rawh u; 26 tin, lalin heti hian a ti, ‘He mi hi lung inah khung ula, thlamuang taka ka lo haw leh hma loh chuan hrehawm chaw leh hrehawm tui lo pe rawh u, a ti,’ ti ang che u,” a ti a. 27 Tin, Mikaia chuan, “Thlamuang taka i lo haw leh chuan kei mi hmangin LALPAN thu a sawi lo a ni ang le,” a ti a. Tin, amah vêkin, “Nangni mipui zawng zawng pawhin lo hre rawh u,” a ti a.
Ahaba a thi
28 Tin, Israel lal leh Juda lal Jehosaphata chu Ramoth-gilead khuaah chuan an han chho va. 29 Tin, Israel lal chuan Jehosaphata hnênah chuan, “Ka inbâwl danglam ang a, inbeihnaah chuan ka kal ve ang a; nang erawh chu i lal puan inbel rawh,” a ti a. Chutichuan, Israel lal chu a inbâwl danglam a, inbeihnaah chuan an han kal a. 30 Tin, Suria lal chuan a tawlailîrte chunga hotute hnênah chuan, “Israel lal ngawt lo chu mi tê pawh mi lian pawh bei suh ang che u,” tiin thu a pe a. 31 Tin, heti hi a ni a, tawlailîr chunga hotute chuan Jehosaphata an han hmuh chuan, “Israel lal a nih saw maw,” an ti a. Tichuan, beih tumin an hual ta a; nimahsela, Jehosaphata chu a au va, LALPAN a pui ta a; tichuan, Pathianin a tihkîrsak ta a. 32 Tin, heti hi a ni a, tawlailîr chunga hotuten Israel lal a ni lo tih an hriat chuan ûm lovin an kîrsan leh ta a. 33 Tin, mi pakhat hian tum bîk nei lêm lovin a thalngul a han kuai a, Israel lal chu a âwmphaw inkârah a kâp a; tichuan, a tawlailîr khalhtu hnênah chuan, “Khalh lêt la, mipui zîng ata hi mi chhuahpui rawh khai, hliam na tak ka tuar a ni,” a ti a. 34 Tin, chumi ni chuan inbeihna chu a nasa hle mai a; tin, Israel lal chu Suria-hote lam hawiin a tawlailîrah tlai lam thlengin a ding a; tin, ni tlâk dâwn vêlah a thi ta a.
Zâwlneiin Jehosaphata a zilh
1 Tin, Juda lal Jehosaphata chu thlamuang takin Jerusalem-a a inah a haw leh ta a. 2 Tin, zâwlnei Hanania fapa Jehua chuan a lo hmuak a, Lal Jehosaphata hnênah, “Mi suaksual chu i ṭanpuiin LALPA hawtute chu i hmangaih dâwn a ni maw? Hemi avâng hian LALPA thinurna i chungah a lo awm ta a ni. 3 Amaherawhchu, he ram ata Aseri i thehthang bova, LALPA i zawn avâng hian ṭhatna kawng eng emaw zawng i la nei cheu a ni,” a ti a.
Jehosaphata siam ṭhatna
4 Tin, Jehosaphata chu Jerusalem-ah a awm a; tin, Beer-seba aṭanga Ephraim tlâng ram thlengin a mite zîngah a kal leh a, LALPA, an pi leh pute Pathian lamah a hruai kîr leh hlawm a. 5 Tin, khaw tinah Judai ram kulh nei khua zawng zawngahte chuan rorêltute a dah a, 6 rorêltute hnênah chuan, “In thiltih chu ngun taka ngaihtuahin ti rawh u; mihring tâna rorêl in ni lo va, LALPA tân a ni zâwk si a; rorêlnaah chuan in hnênah a tel zêl a ni. 7 Chuvângin, LALPA hlau ula, fîmkhur takin ti rawh u; LALPA kan Pathianah chuan khawlohna leh thlei bîk neihna leh tham einate a awm lo a ni,” a ti a. 8 Tin, Jehosaphata chuan Jerusalem-ah LALPA rorêl tûr leh thubuaite remtu atân Levi-hote, puithiamte, Israel chhûngkaw puipate a dah bawk a. 9 Tin, “LALPA ṭih chungin rinawm takin, rilru dik tak puin in ti tûr a ni. 10 Khawii khuaa mi pawhin thubuai an rawn sawia, tualthah te, dân leh thupêk thu-ah te, thuruat leh rorêl thu-ah te an rawn inkhin chuan, LALPA chungah thil an tihsual loh nân fimkhur tûrin hrilh ang che u, nangmahni leh in unaute chungah thinurna a lo thleng dah rual ang e; chutiang chuan ti ula, thiam loh in chang dâwn lo nia. 11 Tin, ngai teh u, LALPA lam thu zawng zawngah chuan puithiam lalber Amaria chu in hotu a ni a; tin, lal lam thu zawng zawngah chuan Juda-te chhûngkaw chunga rorêltu chu Ismaela fapa Zebadia a ni; Levi-hote pawh in hotute an ni ve ang. Huai takin ti ula, mi ṭhate hnênah chuan LALPA chu awm rawh se,” a ti a.
Edom nêna indo
1 Tin, chumi hnuah chuan heti hi a ni a, Moaba thlahte leh Amona thlahte chu Meun-ho ṭhenkhatte nên Jehosaphata bei tûrin an lo thawk a. 2 Chutichuan, tuten emaw Jehosaphata hnênah, “Nangmah bei tûrin mipui tam tak mai, tuifinriat râl Suria aṭangin an lo thawk chiam mai; ngai teh, Hazazon-tamar-ah an awm tawh,” tiin an hrilh a (chu chu En-gedi an ti bawk ṭhîn). 3 Tin, Jehosaphata chuan a hlau va, LALPA zawng tûrin a inpe a; Judai ram zawng zawngah chaw nghei tûr thu a than vêl a. 4 Tichuan, Juda-te chu LALPA ṭanpuina zawngin an pung khâwm a; Juda khaw tin aṭangin LALPA zawng tûrin an lo chhuak a. 5 Tin, Jehosaphata chu LALPA inah, kawt hung chhûng thar bulah Juda-ho leh Jerusalem-ho pung khâwm zîngah chuan a ding a; 6 “Aw LALPA, kan pi leh pute Pathian, vâna Pathian i ni lâwm ni? Hnam tin chunga rorêltu i ni lâwm ni? I kutah chuan thiltihtheihna leh chakna a awm a, tu ma chelh rual i ni lo va. 7 Aw kan Pathian, he rama chêngte hi i mi Israel-te i hnawh chhuahsak a, i ṭhian Abrahama thlahte chatuan atân i pe a ni lâwm ni? 8-9 Tin, he ramah hian an lo awm ta a, ‘Kan chungah thil ṭha lo, khandaiha rorêlna te emaw, hri te emaw, ṭâm te emaw a lo thlen chuan he in bulah leh i hmaah kan lo ding ang a (he inah hian i hming a awm si a), kan mangannaah chuan kan au vang chia, nangin min ngaihthlâksakin min chhandam ang chu,’ tiin i hming tân hmun thianghlim an dinsak chia. 10 “Tichuan, ngai teh, Amona thlahte leh Moab-ho leh Seir tlânga mi, Israel-ho Aigupta ram ata an lo chhuah laia beih i phal lohva, an kîrsana an tihboral tâk lohhoten, 11 kan luah atâna i ram min pêk ata hnawh chhuaha mi rawn thungrulh an tum dân hi lo hre teh. 12 Aw kan Pathian, an chungah ro i rêl dâwn lâwm ni? Mi chu zozai, mi rawn bei tûra lo thawkte chu han bei thei ziazâng kan ni si lo va; a tih ngaihna rêng rêng kan hre bawk hek lo, i lam kan lo hawi mai zâwk a ni e,” a ti a. 13 Tin, Juda-te zawng zawng chu an fanau tê tê, an nupuite leh an fate nên LALPA hmaah an ding a. 14 Chutichuan, mipui zînga Jahaziela chungah chuan LALPA thlarau a lo thleng a, chu mi chu Zakaria fapa a ni a, chu mi chu Benaia fapa a ni a, chu mi chu Jeiela fapa a ni a, chu mi chu Asapha thlah Levi mi Matania fapa a ni a. 15 Tin, ani chuan, “Nangni Judai rama mi zawng zawng leh Jerusalem-a awm zawng zawngte leh nang, Lal Jehosaphat, lo ngaithla rawh u! LALPAN in hnênah heti hian a ti: ‘Hlau suh ula, chûng mipui tam tak avâng chuan zâm hek suh u; indona chu nangni indona a ni lo va, Pathian indona a ni zâwk si a. 16 Naktûkah zuk bei rawh u; ngai teh u, Ziz pan chhohnaah an lo chho va, Jeruel thlalêr bul ruam tâwp lamah chuan in zu hmu ang a. 17 He indona hi in beih a ngai lo vang. Inzâr ula, ding ngawt mai ula, in lama ṭang LALPA chhandamna chu en reng mai rawh u, aw Juda mite leh Jerusalem mite u!’ tiin. Hlau suh ula, zâm hek suh u. Naktûkah bei tûrin thawk rawh u, LALPA chu in lamah a ṭang si a,” a ti a. 18 Chutichuan, Jehosaphata chu a hmaia lei siin a kûn a; tin, Juda mite zawng zawng leh Jerusalem mi zawng zawng chu LALPA chibai bûkin LALPA hmaah an kûn a. 19 Tin, Kohatha thlah leh Kora thlah Levi-hote chu aw ring taka LALPA, Israel-te Pathian fak tûrin an lo ding a. 20 Tin, a tûkah chuan zîng takah an tho va, Tekoa thlalêrah an lût a; tin, an kal lai chuan Jehosaphata chu a ding a, “Aw, Juda mite leh Jerusalem mite u, ka thu hi ngaithla rawh u; LALPA in Pathian chu ring ula, nghet takin in awm dâwn nia; a zâwlneite chu ring ula, hmuingîl takin in awm dâwn nia,” a ti a. 21 Tin, mipuite a fuih zawh chuan sipaite hmaa kal chunga LALPA chawimawina leh a thianghlim mawizia fak tûra hla satu tûrte a ruat a, “LALPA hnênah lâwm thu sawi rawh u, a ngilneihna chu kumkhuain a awm dâwn si a, ti rawh u,” a ti a. 22 Tin, hla an saka an han fak veleh chuan Amona thlah te, Moaba thlah te, Seir tlânga mite, Juda-ho bei tûra lo thawkte châng rutu tûr LALPAN a dah a; tichuan, an tlâwm ta a. 23 Amona thlahte leh Moaba thlahte chuan Seir tlânga awmte chu thah chimih vek leh tihboral dêr tumin an bei ta mai a; tin, Seir tlânga mite an tihboral zawh chuan anmahni leh anmahni chu intihboral tumin an inbei ta chiam mai a. 24 Tin, Juda-te chuan thlalêr thlîrna hmun sâng an han thlen chuan mipui lam chu an han en a; tin, ngai teh, mitthi ruang chu leiah chuan a lum rum mai a, pakhat tê mah tlân chhuak an awm lo va. 25 Tichuan, Jehosaphata leh a hote chu râllâk sum la tûrin an va kal a, an zîngah chuan sum leh pai te, silhfên te, lunghlu te an va hmu ta ṭeuh mai a, an phurh zawh loh khawpin an la a; a tam khawp a, ni thum zet râllâk sum chu an chhêk a. 26 Tin, a ni li ni chuan Beraka ruamah an inkhâwm a, chutah chuan LALPA chu an chawimawi a; chumi avâng chuan tûn thleng hian chumi hmun hmingah chuan Beraka ruam an ti ta a ni. 27 Chutichuan, Juda mi leh Jerusalem mi zawng zawng chu an haw leh ta a; tin, Jehosaphata chuan Jerusalem-a hlim taka haw tûrin an hma a hruai a; LALPAN an hmêlmate chungthuah hlim taka a awmtîr tâk avângin. 28 Tichuan, perhkhuang te, ṭingṭang te, tawtawrâwtte nên Jerusalem-a LALPA in chu an han thleng ta a. 29 Tin, LALPAN Israel-te hmêlma a bei tih an han hriat chuan ram tina mite chuan Pathian chu an hlau ta a. 30 Tichuan, Jehosaphata ram chu râlmuangin a awm ta a; a Pathianin an vêla mite laka râlmuanna a pêk avângin.
Jehosaphata lal a tâwp
31 Chutichuan, Jehosaphata chu Juda-te chungah a lal ta a; kum sawmthum leh kum nga mi a nihin a lal ṭan a; tin, Jerusalem-ah kum sawmhnih leh kum nga a lal a; a nu hming chu Azubi, Silhia fanu a ni. 32 LALPA mit hmuha thil ṭha tiin a pa Asa kawng chu pênsan hauh lovin a zawh a. 33 Amaherawhchu, hmun sângte chu thehthang bo a ni lo va, mipuite pawhin an pi leh pute Pathian chungah an thinlung an la nghat bawk hek lo. 34 Tin, ngai teh u, Jehosaphata thiltih zawng zawng chu a bul aṭanga a tawp thlengin, Hanania fapa Jehua chanchin ziaknaah a chuang a, chu chu Israel lalte chanchin buah a chuang a ni. 35 Chumi hnuah chuan Juda lal Jehosaphata chuan Israel lal Ahazia a thurualpui a; chu mi chuan ṭha lo takin thil a ti ṭhîn a. 36 Tin, Tarsis lama kal tûr lawng an siam tlâng a, Ezion-geber-ah lawngte chu an siam a. 37 Chutichuan, Maresa mi Dodavahua fapa Eliezeran Jehosaphata hnênah, “Ahazia i thurualpui avângin LALPAN i thiltih tum hi a tihkhawlohsak ta che a ni,” a ti a. Tichuan, lawngte chu a chhe ta vek a, Tarsis-ah chuan an kal thei ta lo va.
1 Tin, Jehosaphata chu a pi leh pute hnênah a muhîl a, a pute zîngah a pu Davida khawpuiah an phûm a. Tichuan, a fapa Jehorama chu a aiah a lal ta a.
Juda lal Jehorama
2 Tin, ani chuan unau, Jehosaphata fapate a nei hlawm a, Azaria te, Jehiela te, Zakaria te, Azariahua te, Mikaela te, Sephatia te an ni. Hêng zawng zawng hi Israel lal Jehosaphata fapate vek an ni. 3 Tin, an pa chuan thil ropui tak a pe a, tangkarua te, rangkachak te, thil hlu tak tak te, Judai rama kulh nei khuate nên; nimahsela, ram chu Jehorama hnênah fa u ber a nih avângin a pe a. 4 Chutichuan, Jehoraman a pa ram a han luah chuan a lo intichak ta a, a unaute zawng zawng chu Israel-te zînga puipa tam takte nên khandaihin a tihlum vek a. 5 Jehorama chu kum sawmthum leh kum hnih a nihin a lal ṭan a; Jerusalem-ah kum riat a lal a. 6 Ahaba chhûngte tih angin Israel lalte kawng chu a zawh ve a, Ahaba fanu nupuiah a nei a ni; tichuan, LALPA mit hmuha thil ṭha lo tak a ti ṭhîn a. 7 Nimahsela, LALPAN Davida chhûngkua chu a tiboral duh lo va, Davida hnêna thuthlung avâng leh amah leh a thlahte chena khâwnvâr neihtîr reng a lo tiam tawh avângin. 8 Ama chhanah chuan Edom-ho chu Juda-te lakah an hel a, lal an insiam chawp a. 9 Tichuan, Jehorama chu a sipai hotute leh a tawlailîr zawng zawngte nên a va thawk chhuak a, zânah a va thawk a, anmahni leh tawlailîr chunga hotute hualtu Edom-hote chu a va bei a. 10 Chutichuan, Edom-hote chu tûn thlengin Juda-te lakah an la hel ta reng a ni; tin, LALPA, an pi leh pute Pathian chu a hawisan avângin, chumi lai bawk chuan Libna khua pawh a lakah an hel ve a. 11 Tin, Judai ram tlângahte hmun sâng a siam a, Jerusalem mite chu a uiretîr a, Juda-te chu a hruai bo va. 12 Tin, zâwlnei Elija aṭangin a hnênah lehkha a lo thleng a, “LALPA, i pu Davida Pathian chuan heti hian a ti: ‘I pa Jehosaphata kawngte i zawh lo va, Juda-te lal Asa kawngte pawh i zawh bawk hek lo va, 13 Israel lalte kawng i zawh zâwka, Juda-te leh Jerusalem-a awmte Ahaba chhûngte anga i uiretîra, i unau, i pa chhûngte, i aia ṭha zâwk i thah bawk avângin, 14 ngai teh, LALPAN i mite - i fate, i nupuite leh i rante hripuiin a hrem ang a; 15 tin, nangin rîl natna nasa tak i nei ang a, ni tin chu natna avânga i rîl chu a tlâk a tlâka, a tlâk zawh vek thlengin,’” tiin. 16 Chutichuan, Ethiopia mite kiang vêla mi Philistia-ho leh Arabia-ho rilru chu Jehorama bei tûrin LALPAN a chawk tho va. 17 Tichuan, Juda-te chu an han bei a, an ramah an lût a, lal ina thil zawng zawng chu an la vek a, a fapate, a nupuite pawh; chutichuan, a fapa naupang ber Jehoahaza chauh lo chu a fa pawh an hnutchhiahsak lo. 18 Tin, chumi hnuah chuan LALPAN tihdam theih loh rîl natnain a hrem a. 19 Tin, heti hi a ni a, a kum hnihna a lo vei hnuin a natna avâng chuan a rîl chu a tla ta a, natna râpthlâk takin a lo thi ta a. A mite chuan a pute meipui an chhehsak ang khân an chhehsak ve lo. 20 A lal tirhin kum sawmthum leh kum hnih a ni a, Jerusalem-ah kum riat a lal a; tu ma ui hlawh lovin a thi a, Davida khawpuiah an phûm a, lalho thlânah erawh chuan a ni lo.
Juda lal Ahazia
1 Chutichuan, Jerusalem mite chuan a fapa naupang ber Ahazia chu a aiah lalah an siam a; a fa ûte zawng zawng chu sipai rual, Arabia mite nêna an ṭanhmuna lo kalho chuan an that ta vek si a. Chutichuan, Juda lal Jehorama fapa Ahazia chu a lal ta a. 2 Ahazia chu a lal ṭan tirhin kum sawmli leh kum hnih a ni a, Jerusalem-ah kum khat a lal a; a nu hming chu Athali, Omria fanu a ni. 3 Ani pawh chuan Ahaba chhûngte kawng zawh chu a zawh ve a; a nu chu thil sual taka ti tûra kaihruaitu a ni. 4 Ahaba chhûngkuate tih ang bawkin LALPA mit hmuha thil ṭha lo a ti a; a pa thih hnuin a chhiatna tûra kaihruaitu an ni. 5 An kaihhruai ang chuan a awm bawk a, Ramoth-gilead-ah Suria lal Hazaela do tûrin Israel lal Ahaba fapa Jehorama hnênah a kal a; tichuan, Suria-ho chuan Jehorama chu an lo hliam a. 6 Suria lal Hazaela a va beihnaa Rama-a an lo hliam tidam tûrin Jezreel-ah a kal a. Tichuan, Juda lal Jehorama fapa Azaria chu Ahaba fapa Jehorama a damloh avâng chuan a kan tûrin Jezreel-ah chuan a kal a. 7 Ahazia Jehorama hnêna a kala, a boralna chu Pathian tih a ni a; Nimsia fapa Jehua bei tûrin Jehorama hnênah a kal avângin. Chu mi chu Ahaba chhûngte timang tûra LALPA ruat a ni si a. 8 Tin, heti hi a ni a, Ahaba chhûngte tichhe tûra a beih laiin Juda puipate leh Ahazia unau fapatehovin Ahazia rawng an bâwl lai a hmu a, a that ta hlawm a. 9 Ahazia chu an zawng a, an man a (Samari-ah a biru a ni), Jehua hnênah an rawn hruai a, an that a; tin, “A thinlung zawng zawnga LALPA zawng ṭhîn Jehosaphata fapa a ni si,” an ti a, a phûmin an phûm a. Tichuan, Ahazia chhûngte chuan an ramah thuneihna an nei ta lo va.
Juda lalnu Athali
10 Tin, Ahazia nu Athali chuan a fapa a thi tih a lo hriat chuan a tho va, Juda lal zawng zawng chu a that ta vek mai a. 11 Ahazia fapa Joasa erawh chu lal fanu Jehosabeathi chuan lal fapa an thahte zîng ata chu a hruai bo va, a enkawltu nên khum pindanah a thukru hlauh mai a. Chutichuan, lal Jehorama fanu Jehosabeathi, puithiam Jehoiada nupuiin (Ahazia farnu a ni a) Athali hmuh theih loh tûrin a thukru a; tichuan, an that ta lo va. 12 Tin, an hnêna chêngin Pathian inah kum ruk a rûkin a awm a; tichuan, Athali chu an ramah chuan a lal ta a.
Athali chunga hel thu
1 A kum sarih kumah chuan Jehoiada chu a intichak a, sipai za hotu, Jehorama fapa Azaria te, Jehohanana fapa Ismaela te, Obeda fapa Azaria te, Adaia fapa Maaseia te, Zikria fapa Elisaphata te hnênah thu a thlung a. 2 Tin, Judai ram an fang a; Judai ram khaw tina Levi-hote leh Israel-te chhûngkaw puipate an khâwm a, Jerusalem an han thleng a. 3 Tin, pung khâwmho zawng zawng chuan Pathian inah lal hnênah chuan thu an thlung a. Tin, an hnênah, “Ngai teh u, LALPAN Davida fapate chungchâng thu a lo sawi angin lal fapa chu a lal tûr a ni. 4 In tih tûr chu hetiang hi a ni: puithiamte leh Levi-ho Chawlhnia lo kal ṭhînte chu hmun thuma ṭhena hmun khat kawngkhâr vêngtute in ni ang a. 5 Tin, hmun thuma ṭhena hmun khat chu lal inah in awm ang a; tin, hmun thuma ṭhena hmun khat chu kulh kawngkaah; tin, mipui zawng zawng chu LALPA in kawt hung chhûngah an awm ang. 6 Nimahsela, puithiamte leh rawngbâwltu Levi-hote chauh lo chu tu mah LALPA inah lût suh se; anni chu an thianghlim avângin an lût ang a, mipui zawng zawng erawh chu LALPA ngaichângin an awm tûr a ni. 7 Tin, Levi-hovin an hriamhrei kengin lal chu an din hual ang a; tin, tu pawh ina lo lût chu thah tûr a ni. Tin, lal chu a chhuah leh a luhin a hnênah awm zêl rawh u,” a ti a. 8 Chutichuan, Levi-ho leh Juda zawng zawngte chuan puithiam Jehoiada thupêk ang zawng zawng chuan an ti a; tin, mahni hote ṭheuh Chawlhnia lo kal tûrte leh Chawlhnia ṭîn tûrte chu an hruai a; puithiam Jehoiada chuan a ṭîn tûr pâwl chu a la ṭîntîr si lo va. 9 Tin, puithiam Jehoiada chuan sipai za hotute chu LALPA ina awm Lal Davida fei leh phaw tê leh phaw liante chu a pe a. 10 Tin, mite chu hriamhrei keng ṭheuhvin in ding lampang aṭangin vei lampang thlengin maichâm leh in hualin lal chu a din hualtîr a. 11 Chutichuan, lal fapa chu an rawn hruai chhuak a, lallukhum an khumtîr a, thuhriattîrna chu an pe a, lalah an siam a, Jehoiada leh a fapate chuan hriak an thih a, “Pathianin lal chu humhim rawh se,” an ti a. 12 Tin, Athalin mipui lal chawimawia an zi mur mur thâwm chu a hriatin LALPA inah mipui zîngah chuan a va kal a; 13 tin, a han en a, ngai teh, kawngkaa ban bulah lal chu a ding a, a kiangah sipai hotute leh tawtawrâwt hâmtute nên; tin, chumi rama mi zawng zawng chu an hlim êm êm a, tawtawrâwtte an hâm dur dur a; tin, hla satute chuan an thil ri theite tumin fakna hla an sa ho va. Tichuan, Athali chuan a puante a pawt thlêr a, “Phiarrûkna! Phiarrûkna a ni ta le!” a ti a. 14 Tin, puithiam Jehoiada chuan sipaite chunga hotua ruat sipai za hotute chu a hruai chhuak a, an hnênah, “Sipaihote kârah chhuahtîr ula; tin, tu pawh a zui apiang chu khandaiha sah hlum ni rawh se,” a ti a; puithiam chuan, “LALPA inah zawng thah tûr a ni lo ve,” a lo ti tawh si a. 15 Chutichuan, kawng an kian a; tin, sakawr luhna kawngkaah lal inah a kal a, chutah chuan an that a ni.
Jehoiada siam ṭhatna
16 Tin, Jehoiada chuan amah leh mipui zawng zawng leh lal kârah chuan LALPA mite ni tûrin thu a thlung ta a. 17 Tin, mipui zawng zawng chu Baala inah an kal a, an tichhia a, a maichâm te, a lemte an tisawm dep a, Baala puithiam Matana chu maichâm bulah an that a. 18 Tin, Jehoiada chuan, Mosia dân bua a ziak anga hlim tak leh hla sa chunga Davidan LALPA ina LALPA hnêna hâlral thilhlan tûra a lo ruat, puithiam Levi-ho hnuaia thawk tûrin Davida thupêk angin LALPA biak in vêngtu tûrte chu a ruat a. 19 Thianghlim lo tawh phawt chu an luh loh nân LALPA in kawngkhâr vêngtute a ruat a. 20 Tin, za chunga hotu te, mi ṭha te, mipui awptute chumi rama mi zawng zawngte chu a hruai a, LALPA ina lal chu an han hruai thla a; kawngkhâr chhakta zâwkah lal in lamah an kal a, lal chu an ram lalṭhutthlêngah chuan a ṭhuttîr ta a. 21 Chutichuan, chu rama mi zawng zawng chu hlim takin an awm a, khua chu râlmuangin a awm ta a; Athali chu khandaihin an that a.
Juda lal Joasa
1 Joasa chu a lal ṭan tirhin kum sarih mi a ni a, Jerusalem-ah kum sawmli a lal a; a nu hming chu Zibi, Beer-seba-a mi a ni. 2 Tin, Joasa chuan puithiam Jehoiada dam chhûng chuan LALPA mit hmuhin thil ṭha a ti a. 3 Tin, Jehoiada chuan nupui pahnih a neihsak a, fanu leh fapate a hring a. 4 Tin, heti hi a ni a, chumi zawhah chuan Joasa chuan LALPA in siam ṭhat a rilrûk a. 5 Puithiamte leh Levi-ho a ko khâwm a, “Juda-ho khuaahte kal ula, kum tina in Pathian in siam ṭhat nân Israel mi zawng zawng hnênah tangka va khawn khâwm rawh u khai, muangchâng suh ang che u,” a ti a. Nimahsela, Levi-hote chu an hmanhmawh chuang lo va. 6 Tin, lal chuan puithiam lalber Jehoiada chu a ko va, a hnênah, “Engati nge Levi-hote chu LALPA chhiahhlawh Mosia leh Israel mipuite ruat hriattîrna puan in atâna thawh bi ruat chu, Juda mi leh Jerusalem-a mite thawh tûrin i phût loh? 7 Mi sualnu Athali fapate chuan Pathian in chu an tichhe zo ta si a; tin, LALPA ina thilhlan zawng zawng chu Baala te an pe zo ta bawk si a,” a ti a. 8 Chutichuan, lalin thu a pe a, bâwm an siam a, LALPA in kawngka pâwn lamah chuan an dah a. 9 Tin, thlalêra Pathian chhiahhlawh Mosian Israel mite tih tûra thawh bi a ruat chu LALPA tâna rawn thawh tûrin, Judai ram zawng zawng leh Jerusalem-ah thu a than vêl ta a. 10 Tichuan, mi liante leh mipuite chu an lâwm a, an tangka te an rawn la a, an khawn zawh hma chuan bâwmah chuan an rawn dah ta ruih ruih mai a. 11 Tin, Levi-hoten lal puipate hnênah bâwm chu an rawn lâka, tangka tam tak a awm tih an hriat chuan, lal lehkhaziaktu leh puithiam lal ruat puipa chuan bâwm ata an bun chhuak a, an la a, a hmunah chuan an dah leh a. Chutiang chuan ni tin an ti a, tangka chu tam tak an khâwl khâwm ta a. 12 Tin, lal leh Jehoiada chuan LALPA in hna thawktute kutah an pe a, LALPA in siam ṭha tûrin lung chhertute leh themthiamte an ruai a; tin, LALPA in siam ṭha tûrin thîr leh dâra themthiamte pawh. 13 Tichuan, thawktute chuan an bei a, an thawk ṭha hle mai a, Pathian in chu a ngai chiahin an siam ṭha a, an din nghet leh ta a.
Jehoiada thiltih an sût
14 Tin, an zawh chuan tangka la awm zawng zawng chu lal leh Jehoiada hnênah an rawn la a, chu chuan LALPA ina rawngbâwl nâna bungbêl te, hlanna bungbêl te, thîrfian te, rangkachak leh tangkaraw bungbêlte lamin an siam a. Tichuan, Jehoiada dam chhûng chuan LALPA inah hâlral thilhlan chu an hlân reng a. 15 Nimahsela, Jehoiada chu upa tak, tarkûna damin a thi ta a. A thih chuan kum za leh sawmthum mi a ni. 16 Tin, Israel-te zîngah Pathian chungah leh a in chungchânga thil a tihṭhat avângin Davida khawpuiah lalte zîngah an phûm a. 17 Tin, Jehoiada thih hnu chuan Juda mi liante chu an lo thawk a, lal hnênah dawvân an rawn kai a. Lal chuan an thu chu a lo pawm a. 18 Tichuan, an pi leh pute Pathian, LALPA in chu an hawisan a, Aseri-te leh milemte rawng an bâwl ta a; tin, an sualna avângin Juda-te leh Jerusalem chungah thinurna a lo thleng ta a. 19 Nimahsela, LALPA hnênah hruai leh tûrin an hnênah zâwlneite a tîr a, an thiam lohzia te an hriattîr a; nimahsela, an beng an chhi duh chuang lo. 20 Tin, puithiam Jehoiada fapa Zakaria chungah Pathian thlarau a lo thleng a, ani chu mipui chung lamah a ding a, an hnênah, “Pathianin heti hian a ti: ‘Engati nge hmuingîl theih loh phaha LALPA thupêk chu in bawhchhiat? LALPA chu in hawisan avângin ani pawhin a hawisan che u a ni,’” a ti a. 21 Tin, ani chu an phiar ta a, lal thupêkin LALPA biak in hung chhungah chuan lungin an dêng hlum ta a. 22 Chutiang chuan Lal Joasa chuan Zakaria pa Jehoiada khawngaihna chu hre reng lovin a fapa chu a that ta a ni. Tin, a thih dâwn chuan, “LALPAN a rawn ngaihtuah ang a, phuba a la rawn lâksak ang,” a ti a.
Joasa lal a tâwp
23 Tin, heti hi a ni a, kum a lo vei chuan Suria sipaiten an rawn bei a; Judai ram leh Jerusalem-ah an lût a, an mi lian zawng zawngte chu an that a, Damaska lal hnênah an râllâk sum zawng zawngte chu an thawn ta vek mai a. 24 Suria sipaite chu tlêm tê chauh an lo thawk a ni a; an pi leh pute Pathian, LALPA chu an hawisan avângin LALPAN sipai tam tak maite chu an kutah a pe a ni. Chutiang chuan Joasa chungah hremna an thlentîr a ni. 25 Tin, an hawsan hnu chuan (natna nasa tak tuarin an hawsan a ni) ama mite ngeiin puithiam Jehoiada fapate thisen avâng khân an phiar a, a khuma a mu lai chu an that a, a thi ta a. Davida khawpuiah chuan an phûm a; nimahsela, lalte thlânah an phûm ve lo. 26 Hêngte hi amah phiartute chu an ni: Amon mi Simeathi fapa Zabada leh Moab mi Simrithi fapa Jehozabada. 27 Tichuan, a fapate chungchâng thu te, a chunga phurrit tak lo innghah chungchâng thu te, Pathian in a din ṭhat chungchâng thu te chu, ngai teh, lal chanchin hrilhfiahna buah chuan ziak a ni. Tichuan, a aiah a fapa Amazia chu a lal ta a.
Juda lal Amazia
1 Amazia chu a lal ṭan tirh chuan kum sawmhnih leh kum nga mi a ni a, Jerusalem-ah kum sawmhnih leh kum kua a lal a; a nu hming chu Jehoadani, Jerusalem mi a ni. 2 LALPA mit hmuhin thil ṭha a ti a; amaherawhchu, a rilru a pe famkim lo. 3 Tin, heti hi a lo ni a, a ram chu a lo din ngheh chuan a pa thattu, a chhiahhlawhte a that a. 4 Amaherawhchu, an fate chu a that lo va, Mosia lehkhabu, dâna chuang, “Fate avângin pate an thi tûr a ni lo va, pate avângin fate an thi tûr a ni hek lo, mi tin mahni sual avângin an thi tûr a ni,” tia LALPAN thu a pêk angin a ti a.
Edom nêna indo
5 Tin, Amazia chuan Juda-te chu a khâwm chiam a, Juda leh Benjamin mi zawng zawng an chhûngkaw zir zêlin sâng hotute hnuaiah te, za hotute hnuaiah te a awmtîr a; tin, kum sawmhnih achin chung lam zawng a chhiar a, fei leh phaw lek thei, râlkai chin thlan ṭhiau mi nuai thum an awm a. 6 Tin, Israel rama mi, mi chak huaisen nuai khat, tangkaraw talent zain a ruai bawk a. 7 Nimahsela, a hnênah Pathian mi, mi pakhat a lo kal a, “Aw lalpa, Israel sipaite chu i hnênah kal ve suh se, LALPA chu Israel mite (Ephraima thlahte zawng zawng huamin) hnênah chuan a awm si lo va. 8 Kal pawh ni la, huai takin indonaah chuan che rawh! Chuti lo chuan, Pathianin hmêlma hmaah chuan a titlâwm mai ang che; Pathian chuan ṭanpui theihna leh tihtlâwm theihna a nei si a,” a rawn ti a. 9 Tin, Amazian Pathian mi hnênah chuan, “A nih leh, Israel sipaite ka pêk tâk talent za chu engtin nge kan tih tâk ang?” a ti a. Tin, Pathian mi chuan, “LALPA chuan chu aia tam tak chu a pe thei che a ni,” a ti a. 10 Tichuan, Amazia chuan Ephraim ram aṭanga sipai lo kalte chu haw leh tûrin a tihrang a; chu vâng chuan Juda-te chungah chuan an thin a rim hle mai a, thinrim engphiarin an haw leh ta a. 11 Tin, Amazia chuan zâm lovin a mite chu a hruai chhuak a, Chi Ruamah an kal a, Seira thlahte sîngkhat an that a. 12 Tin, sîngkhat dang chu Juda-ten a nungin an man a, lungpui chhîpah an hruai a, lungpui chhîp aṭang chuan an nam thla chiam mai a, an keh sawm ta rem rum mai a. 13 Amaherawhchu, Amazian a hnêna râl kâp tûra kal ve lo tûra a hâwntîr sipaite chuan Judai ram khua te, Samari aṭanga Beth-horon thlengin an lo bei a, mi sângthum an that a, râllâk sum tam tak an la a. 14 Tin, heti hi a ni a, Amazia chu Edom-ho thata a lo haw chuan Seira thlahteho pathiante a rawn hâwn a, a pathian atân a din a, chibai a bûk a, rimtuite a hâlsak hlawm a. 15 Chu vâng chuan Amazia chungah chuan LALPA thin a alh ta a, a hnênah zâwlnei a tîr a, chu mi chuan a hnênah, “I kut ata a mite pawh chhanchhuak thei hlei lo pathiante chu engah tehlul nge i zawn ni?” a ti a. 16 Tin, heti hi a ni a, a hnêna thu a sawi lai mêk chuan lal chuan, “Lal rorêltuah kan siam che em ni? Ngawi mai rawh; engah nge i nun i chân dâwn?” a ti a. Tichuan, zâwlnei chuan, “Pathianin hetianga i tih avâng leh ka remruat i ngaihsân loh avângin tihboral che a rilrûk tih ka hria a ni,” a ti a, a ngawi ta a.
Israel nêna indo
17 Chutichuan, Juda lal Amazia chuan a remruat chu a pawm a, Israel lal Jehua fapa Jehoahaza fa Joasa hnênah, “Hawh teh, hmaichhanah i lo inen teh ang,” tiin mi a tîr a. 18 Tin, Israel lal Joasa chuan Juda lal Amazia hnênah, “Lebanon tlâng hlîngin Lebanon tlânga sidar thing hnênah, ‘I fanu kha ka fapa nupuiah neihtîr teh khai,’ tiin a chah a; tin, Lebanon tlânga ramsa a lo kal a, hlîng chu a rawn chîl thlu ta dêr mai a. 19 Nang hian, ‘Ngai teh, Edom chu ka hneh,’ tiin i chapo a nih hi, i inah tawm hle hle mai rawh; nang leh Juda ram chawp chawpa chhiatna, i tâna pawi tûr thil engah nge i chawh chhuah dâwn ni?” tiin mi a tîr ve a. 20 Nimahsela, Amazia chuan a lo ngaithla duh lo va; Edom-ho pathiante a zawn avânga Judai ram chu an hmêlmate kuta a pêk theihna tûra Pathian tih a ni a. 21 Chutichuan, Israel lal Joasa chu a han chho va; Juda lal Amazia nên chuan Judai ram Beth-semes khuaah hmaichhanah an inen ta ngei a. 22 Tin, Juda-te chan chu Israel-te ai chuan a lo chhe ta zâwk a; mi tin mahni in lamah an tlân haw ta ṭheuh va. 23 Tin, Israel lal Joasa chuan Juda lal, Ahazia fapa Jehoasa fa Amazia chu Beth-semes-ah chuan a man a, Jerusalem-ah a hruai a, Jerusalem kulh chu Ephraim kulh kawngka aṭanga kulh kil kawngka thlengin tawng zali zet a tichim a. 24 Tin, Obed-edoma enkawl LALPA ina mi bâkah lal ina ro dah khâwmnaa mi, rangkachak leh tangkarua leh bungbêl awm zawng zawng a la a, hrênga tâng tûrte a hruai bawk a; tin, Samari khuaah a haw leh ta a. 25 Tin, Juda lal Joasa fapa Amazia chu Israel-te lal Jehoahaza fapa Joasa thih hnuin kum sâwm leh kum nga a la dam a. 26 Tichuan, Amazia thiltih dangte chu a bul aṭanga a tâwp thlengin, ngai teh, Juda lal leh Israel lalte lal lai thu ziakna buah a chuang a ni lâwm ni? 27 Chutichuan, Amazian LALPA zui a bânsan veleh Jerusalem-ah chuan an phiar a, Lakis khuaah a tlân a; nimahsela, Lakis khuaah chuan mi an ûmtîr a, chutah chuan an that ta a. 28 Tin, a ruang chu sakawrin an phur a, a pi leh pute hnênah Juda khawpuiah an phûm ta a.
Juda lal Uzia
1 Tin, Juda mi zawng zawng chuan kum sâwm leh kum ruk mi Uzia chu an hruai a, a pa Amazia aiah lalah an siam ta a. 2 Ani chuan lal chu a pi leh pute hnênah a muthilh hnuah Eloth khua chu a siam ṭha a, Judai ramah a telh leh a. 3 Uzia chu a lal ṭan tirhin kum sâwm leh kum ruk mi a ni a, Jerusalem-ah kum sawmnga leh kum hnih a lal a, a nu hming chu Jekoli, Jerusalem mi a ni a. 4 Tin, a pa Amazia thiltih ang apiang ti vein LALPA mit hmuha thil ṭha tak a ti ṭhîn a. 5 Pathian inlârna hre thiam Zakaria dam chhûng chuan Pathian zawng tûrin a insiam tlat a; Pathian a zawn chhûng zawng chuan Pathianin a tihmuingîl zêl a. 6 Philistia-ho rûn tûrin a thawk chhuak a, Gath kulh te, Jabne kulh te, Asdod kulh te a tichim a; tin, Asdod ramah leh Philistia-ho zîngahte khua a siam a. 7 Tin, Pathianin Philistia-hote lakah leh Gur-baal-a awm Arabia-ho leh Meun-ho lakahte a ṭanpui a. 8 Tin, Amon-hote chuan Uzia lakah chhiah an chawi ṭhîn a; tichuan, a lo chak tâk êm avângin Aigupta ram thlengin a hming a thang ta a. 9 Tin, Uzia chuan Jerusalem-ah Kil Kawngkaah te, Ruam Kawngkaah te, kulh kawina lai kawngkaah te in sâng a sa bawk a, kulhin a hung a. 10 Tin, thlalêrah pawh in sâng a sa a, ran tam tak a neih avângin tui te a lai chhuak thluah mai a, phai lam leh phaizâwlahte pawh; tin, lo nei mite leh uain sâwr mite tlâng lamah leh ram ṭhaahte chuan a nei a, thlawhhma lam ngaina mi tak a ni. 11 Tin, Uzia chuan sipai indo mi, lal sipai hotu Hanania hnuaia mi, lehkhaziaktu Jeiela leh hotu Maaseia-ten an ruat ang zêla a pâwl pâwla râl kâp mi a nei bawk a. 12 Mi chak huaisen ṭhiau, an chhûngkaw puipa zawng zawng chu sînghnih leh sângruk an ni a. 13 Tin, an hnuaiah chuan sipai zir thiam sa ṭhiau nuai thum leh sângsarih leh zanga hmêlma laka lal ṭanpuitu râl bei mi tak tak an awm a. 14 Tin, Uzia chuan sipai zawng zawng tân phaw te, thalngul te, virvawm atân lungte a buatsaih a. 15 Tin, Jerusalem-ah in sâng leh kulh kil tina daha thal lo kahna leh lung lian fe fea lo denna tûr, mi fingte hriat chhuah khâwlte a siam a. A hming chu ram tin ram tangah a thang ta a; a lo chak hle thlengin a mak a maka ṭanpuiin a awm a.
A chapo vângin Uzia hrem a ni
16 Nimahsela, a lo chak tâk hnu chuan a rilru a lo sâng ta a, ṭha lo takin thil a ti a, LALPA a Pathian chungah thil a tisual ta a; maichâma rimtui hâl tûrin LALPA biak inah a lût ta mai a. 17 Tin, puithiam Azaria chuan a zui a, mi huai tak tak LALPA puithiam sawmriat an tel ve a. 18 Tin, Lal Uzia chu an khap a, a hnênah, “Uzi, LALPA tâna rimtui hâl hi i tih tûr a ni lo va, rimtui hâl tûra tihhran Arona fapa puithiamte tih tûr a ni zâwk e. Hmun thianghlim ata hi chhuak rawh, thil i tisual a nih hi! LALPA Pathian laka i ropuina tûr pawh a ni hek lo,” an ti a. 19 Chutichuan, Uzia chu a thinur ta a; rimtui hâlna tûr mei lâkna a keng a. Tin, chutia puithiamte chunga a thinur lai tak chuan LALPA inah, rimtui hâlna bulah puithiamte hmaah chuan a chalah a lo phâr chhuak ta a. 20 Tin, puithiam hotu Azaria leh puithiam zawng zawng chuan an han en a, ngai teh, a chalah chuan a lo phâr a; chuta ṭang chuan an nam chhuak ta thuai a. A ni, LALPAN a hrem avângin amah pawh hmanhmawh tak bawkin a chhuak ta a. 21 Tichuan, Lal Uzia chu a thih ni thlengin a lo phâr ta a. A phâr avângin in hrangah a awm ta a; LALPA in ata chu tihchhuah a ni a. Tichuan, a fapa Jothama chu an rama mite rorêlin lal ina awptuah a awm ta a. 22 Tichuan, Uzia thiltih dang zawng zawngte chu a bul aṭanga a tâwp thlengin Amoza fapa zâwlnei Isaian a ziak a. 23 Chutichuan, Uzia chu a pi leh a pute hnênah chuan a muhîl a, lal inphûmna hmuna a pi leh a pute zîngah an phûm a, “Ani zawng phâr a ni si a,” an ti a. Tichuan, a fapa Jothama chu a aiah a lal ta a.
Juda lal Jothama
1 Jothama chu a lal ṭan tirhin kum sawmhnih leh kum nga mi a ni a, Jerusalem-ah kum sâwm leh kum ruk a lal a; a nu hming chu Jerusi, Zadoka fanu a ni. 2 Tin, a pa Uzia thiltih ang apiang ti vein LALPA mit hmuha thil ṭha a ti ṭhîn a. LALPA biak inah erawh chuan a lût ve lo. Nimahsela, mite chuan ṭha lo takin thil an la ti fo mai a. 3 LALPA ina kawngkhâr chhakta zâwk a siam a; tin, Ophel kulh chungah chuan in tam tak a sa bawk a. 4 Tin, Judai tlâng ramah khuate a siam a, ramhnuaiah in ropui tak tak te, in sâng te a sa bawk a. 5 Tin, Amona thlahte lal a do va; a hneh a. Tin, Amona thlahte chuan chumi kum chuan tangkarua talent za leh buh phur sîng leh barli phur sîngkhat an pe a. Chutiang bawk chuan Amona thlahte chuan a kum hnihna leh a kum thumnaah pawh an pe a. 6 Chutichuan, Jothama chuan LALPA a Pathian hmaa a kawng a rêl fel avângin a lo chak ta a. 7 Tichuan, Jothama thiltih dang zawng zawng, a râl do zawng zawngte, a awm dân zawng zawngte chu, ngai teh, Israel leh Juda lalte chanchin ziakna buah a chuang a. 8 A lal ṭan tirhin kum sawm hnih leh kum nga mi a ni a, Jerusalem-ah kum sâwm leh kum ruk a lal a. 9 Tin, Jothama chu a pi leh a pute hnênah a muhîl a, Davida khawpuiah an phûm a. Tichuan, a fapa Ahaza chu a aiah a lal ta a.
Juda lal Ahaza
1 Ahaza chu a lal ṭan tirhin kum sawmhnih mi a ni a, Jerusalem-ah kum sâwm leh kum ruk a lal a; a pu Davida angin LALPA mit hmuha thil ṭha a ti ve lo va. 2 Israel lalte kawng a zawh zâwk a, Baala-te tân milem chhûn chawpte a siam bawk a. 3 Hinoma fapa ruamah rimtui te a hâl a LALPAN Israela thlahte hmaa a hnawh chhuah tâk hnamten thil tenawm tak an tih ṭhin angin a fate meiah a luhtîr a. 4 Tin, hmun sângah te, tlângah te, thing hring tin hnuaiah te a inthawi a, rimtuite a hâl ṭhîn a.
Suria leh Israel nêna indo
5 Chuvângin, LALPA a Pathianin Suria lal kutah a pe a; an bei a, a mite tam tak salah an hruai a, Damaska-ah an kalpui a. Tin, Israel lal kutah pêk a ni bawk a, ani chuan tam tak a that a. 6 Remalia fapa Peka chuan Judai ramah nuai khat leh sînghnih ni khatah a that a, an za chuan mi huaisen ṭheuh an ni; an pi leh pute LALPA Pathian chu an hawisan vâng a ni. 7 Tin, Ephraim mi chak Zikrian lal fapa Maaseia leh in chhûng puipa Azrikama leh Elkana, lal dawttu chu a that a. 8 Tin, Israela thlahten an unaute nuai hnih, hmeichhia te, an fapa te, an fanute salah an hruai a; râllâk tam tak an lâksak bawk a, râllâk chu Samari-ah an thlen a.
Zâwlnei Odeda
9 Nimahsela, chutah chuan LALPA zâwlnei a lo awm a, a hming chu Odeda a ni; Samari-a lo kal tûr sipaite chu a va hmuak a, an hnênah, “Ngai teh u, LALPA, in pi leh pute Pathian chu Juda-te chungah a thinur a, in kutah a pe che u a ni a, thinrima in thahna chuan vân a han tawng ta a. 10 Tin, Juda leh Jerusalem mite chu bawihnu leh bawihpaa siam in tum a; nimahsela, nangni ngei pawh hian LALPA in Pathian chungah in tisual ve a ni lâwm ni? 11 Chuvângin, ka thu hi pawm ula, in unau sala in mante hi hâwntîr leh rawh u, LALPA thinurna nasa tak mai chu in chungah a awm a ni,” a ti a. 12 Tichuan, Ephraim-ho hotu ṭhenkhat, Johanana fapa Azaria te, Mesilemotha fapa Berekia te, Saluma fapa Jehizkia te, Hadlaia fapa Amasa te chuan indona aṭanga lo hawte chu an lo kalh ve bawk a, 13 an hnênah, “Salte chu in rawn hruai lût tûr a ni lo, kan sual leh kan bawhchhiatna belhchhahin LALPA chungah bawhchhiatna min thlensak dâwn a ni; kan sualna chu a nasa hle si a, Israel mite chungah thinurna nasa tak a awm a ni,” an lo ti a. 14 Chutichuan, sipaite chuan mi liante leh mipui hmaah chuan salte leh râllâk sumte chu an hnutchhiah ta a. 15 Tin, an hming lam tâkhote chu an lo tho va, salte chu an hruai a, râllâk thil chuanin saruaka awm zawngte chu silhfên an bân a, an tuam a, pheikhawkte an buntîr a, ei tûr leh in tûr an pe a, hriak te an thih a, a chhiaṭhate zawng zawng chu sabengtungah an chuantîr a, tûm khua Jeriko-a an unaute hnênah an kaltîr ta a; tin, anni chu Samari-ah an haw leh ta a.
Ahazan ṭanpuituah Assuria a sâwm
16 Chumi lai chuan Lal Ahaza chuan Suria lalte ṭanpuia sâwm tûrin mi a tîr a; 17 Edom-ho chuan Juda-ho chu an han beiha, salah te an rawn man leh avângin. 18 Tin, Philistia-hote pawhin phai lam khuate leh Juda Chhim te an rawn la a, Beth-semes te, Aijalon te, Gederoth te, Soko te a khawperte nên; tin, Timna leh a khawper te, Gimzo pawh a khawperte nên an la a, chûngah chuan an awm a. 19 Juda lal Ahaza khan Juda-te dik lo takin a timualpho fo va, LALPA chungah thil sual nasa tak a tih avâng khân LALPAN Juda-te chu a titlâwm a ni. 20 Tin, Suria lal Tilgath-pilnesera a hnênah a kal a, tihchak ahnêkin a timangang zâwk a. 21 Ahaza chuan LALPA in leh lal in leh mi lian ina mi thilte a la a, Suria lal a pe a; nimahsela, a sâwt chuang si lo.
Ahaza sualna
22 A mangan lai tak te pawh chuan he Lal Ahaza hian LALPA chungah thil a la tisual deuh deuh ta mai a. 23 Amah beitu Damaska-ho pathian hnênah te a inthawi a; “Suria lalte pathian chuan anmahni a puih avângin mi puih ve theih nân an hnênah ka inthawi dâwn a ni,” te a ti a. Nimahsela, amah leh Israel mi zawng zawng chhiatna a ni si a. 24 Tin, Ahaza chuan Pathian ina bungbêlte chu a khâwm vek a, Pathian ina bungbêlte chu a tisawm vek a, LALPA in kawngkhârte chu a khâr tlat a; tin, Jerusalem kil tinah maichâm a siam a. 25 Tin, Juda khaw tam takah chuan pathian dangte tân rimtui hâl nân hmun sângte a siam a, LALPA, a pi leh pute Pathian a tithinur a. 26 A thiltih dang zawng zawng leh a awm dân zawng zawng, a bul aṭanga a tâwp thlengin, ngai teh, Juda leh Israel lalte chanchin buah a chuang a. 27 Tin, Ahaza chu a pi leh a pute hnênah a muhîl a, Jerusalem khawpuiah chuan an phûm a; Israel lalte thlânah chuan an dah lo a ni. Tichuan, a fapa Hezekia chu a aiah a lal ta a.
Juda lal Hezekia
1 Hezekia chu kum sawmhnih leh kum nga mi a nihin a lal ṭan a, Jerusalem-ah kum sawmhnih leh kum kua a lal a; a nu hming chu Abiji, Zakaria fanu a ni a. 2 Tin, a pu Davida thiltih apiang ti vein LALPA mit hmuha thil ṭha a ti ṭhîn a.
Tempul then
3 Ani chuan a lal ṭan kum thla khatnaah LALPA in kawngkhârte chu a hawng a, a chei ṭha a. 4 Puithiamte leh Levi-hote a hruai lût a, chhak lampang hmun zau laiah a hruai khâwm a, 5 an hnênah, “Nangni Levi-hote u, ka thu hi ngaithla rawh u! Nangmahni intithianghlim phawt ula; tin, LALPA, in pi leh pute Pathian in hi tithianghlim ula, hmun thianghlim ata bawlhhlawhte hi paih chhuak rawh u. 6 Kan pi leh pute chuan thil an lo tisual ta a, LALPA kan Pathian mit hmuha thil ṭha lo chu an lo ti a, an lo hawisan a, LALPA awmna chu an hawisan a, an lo hnuchhawn ta a. 7 Hulhliap kawngkhârte chu an khâr a, khâwnvârte chu an timit a, Israel-te Pathian hmun thianghlimah chuan rimtuite an hâl lo va, hâlral thilhlante an hlân lo bawk a. 8 Chu vâng chuan LALPA thinurna chu Juda-te leh Jerusalem chungah a awm a, in mita in hmuh ang hian, ram tin ram tanga tei tei tûr leh mak tih atân leh nuihzatbûr atân a lo siam ta a ni. 9 Ngai teh u, kan pi leh pute chu khandaiha tihtlâwmin an lo awm a, kan fanu leh kan fapate, kan nupuite chu chûng avâng chuan salah an lo awm a. 10 Ngai teh u, a thinurna nasa tak chu a kian theih nân LALPA, Israel-te Pathian hnênah thuthlun ka tum a ni. 11 Ka naute u, ngûrchuai suh u, LALPA chuan, a rawngbâwltu in ni a, a hmaa a rawngbâwla awm tûr leh rimtui hâltuah a thlang tawh che u a ni,” a ti a. 12 Chutichuan, Levi mi Amasaia fapa Mahatha te, Kohath mi Azaria fapa Joela te, Meraria fapate zînga Abdia fapa Kisa te, Jehalelela fapa Azaria te, Gerson mi Zima fapa Joa te, Joa fapa Edena te, 13 Elizaphana fapate zînga mi Simria leh Jeiela te, Asapha fapate zînga mi Zakaria leh Matania te, 14 Hemana fapate zînga mi Jehuela leh Simeia te, Jeduthuna fapate zînga mi Semaia leh Uziela te chu an thawk chhuak a. 15 An unaute an ko khâwm a, an intithianghlim a, LALPA thua lal thupêk anga LALPA in tifai tûrin an lût a. 16 Tin, puithiamte chu a tifai tûrin LALPA in chhûngril lamah an lût a, LALPA biak ina thil bawlhhlawh an hmuh zawng zawng chu LALPA in kawtah an la chhuak a. Tin, Levi-hovin an la a, Kidron luiah an kalpui a. 17 Thla khatna ni khat niah an bei ṭan a, chumi thla ni riat niah LALPA hulhliap an bei thleng a; tichuan, ni riatah LALPA in chu an tithianghlim a; thla khatna, ni sâwm leh ni ruk niah an zo vek a.
Tempul hlan nawn leh a ni
18 Chutichuan, Lal Hezekia hnênah lal inah an lût a, “LALPA in chu kan tifai zo ta vek e, hâlral thilhlan hlanna maichâm te, chumia bungbêl zawng zawng te, chhang chhiahna dawhkân te, chumia hmanrua zawng zawngte pawh. 19 Tin, Lal Ahazan a lal laia thil a tihsuala, a thehthang bo bungbêl zawng zawngte pawh kan din leh vek a, kan tithianghlim bawk a; tin, ngai teh, LALPA maichâm hma lamah a awm e,” an ti a. 20 Chutichuan, Lal Hezekia chu zîng takah a tho va, khuaa mi lianhote chu a ko khâwm a, LALPA inah chuan an chho va. 21 Tin, ram leh hmun thianghlim leh Juda-hote tâna sual thawina tûr, bâwngpa pasarih leh berâmpa pasarih leh berâmno pasarih leh kêlpa pasarih an kai chho va. Tin, Arona fapa puithiamte chu LALPA maichâma hlân tûrin thu a pe a. 22 Chutichuan, bâwngpate chu an talh a, puithiamte chuan thisen chu an la a, maichâm chu an theh a; tin, berâmpate pawh chu an talh a, a thisen chuan maichâm chu an theh a; tin, berâmnote pawh chu an talh a, a thisen chuan maichâm chu an theh a. 23 Tin, kêlpate chu sual thawi nân lal leh mipuiho kiangah chuan an rawn kai hnai a, an chungah chuan an kut an nghat a. 24 Tin, puithiamte chuan an talh a, an thisen chuan Israel mi zawng zawng tâna remna siam nân maichâmah sual thawina an hlan a; Israel mi zawng zawng tân hâlral thilhlan leh sual thawina siam tûrin lal chuan thu a pe a. 25 Tin, Davida leh lal zâwlnei Gada leh zâwlnei Nathana thupêk angin, LALPA inah chuan Levi-ho chu dârbenthek te, perhkhuang te, ṭingṭangte tum tûrin a dah a; thupêk chu a zâwlneite hmanga LALPA pêk a ni si a. 26 Tin, Levi-ho chu Davida siam thil tum rîk mi nên an ding a, puithiamte chu tawtawrâwt nên. 27 Tin, Hezekia chuan maichâma hâlral thilhlan hlân tûr chuan thu a pe a. Tin, hâlral thilhlan an han hlan ṭan chuan LALPA hla chu tawtawrâwt leh Israel lal Davida siam thil tum rîk nên an sa ṭan bawk a. 28 Tin, mipuite chuan Pathian chibai an bûk a, hla satute chuan hla an sa a, tawtawrâwt hâmtute chuan an hâm a, hâlral thilhlan hlan zawh hma loh chuan chutiang chuan an ti reng a. 29 Tin, thilhlan an hlan zawh chuan lal leh a hnêna awm ve zawng zawngte chuan kûnin Pathian chibai an bûk a. 30 Tin, Lal Hezekia leh mi liante chuan Levi-hote chu Davida leh zâwlnei Asapha phuah fakna hla sa tûrin thu an pe a. Tin, hlim takin fakna hla an sa a, an kûn a, Pathian chibai an bûk a. 31 Chutichuan, Hezekia chuan, “LALPA tân in intithianghlim ta a, lo hnai ula, LALPA inah inthawina leh lâwm thu sawina thilhlan rawn hlân rawh u khai,” a ti a. Tîn, mipuite chuan inthawina te, lâwm thu sawina thilhlante an rawn hlân a, a duh apiangin hâlral thilhlan an rawn hlân a. 32 Tin, mipuiin hâlral thilhlan an rawn hlan zât chu bâwngpa sawmsarih leh berâmpa za leh berâmno zahnih a ni; hêng zawng zawng hi LALPA tâna hâlral thilhlan vek a ni. 33 Thilhlan zawng zawng chu bâwngpa zaruk, berâmpa sângthum a ni. 34 Amaherawhchu, puithiam an tlêm lutuk a, hâlral thilhlan chu an lip sêng lo va; chuvângin, an unau Levi-hote chuan, an peih hma chuan puithiamte chu an intihthianghlim thlengin an puibâwm a (Levi-hote chu puithiamhote ai mahin intihthianghlim thu-ah an khermei zâwk si a). 35 Tin, hâlral thilhlante chu a tam êm a, hâlral thilhlan tin atâna remna thilhlan thau te, in tûr thilhlan atân te pawh a tam êm êm bawk a. Chutichuan, LALPA in rawngbâwl dân an tifel a. 36 Mipuite tâna Pathianin a buatsaih thil avâng chuan Hezekia leh mi zawng zawng chu an lâwm êm êm a; rin loh taka thil lo awm thut a ni lehnghâl si a.
Kalhlên kût hmang tûra inpuahchah
1 Tin, Hezekia chuan Israel ram leh Judai ram zawng zawngah mi a tîr a, Ephraim ram leh Manase ramahte pawh, LALPA, Israel-te Pathian tâna kalhlên kût nei tûra Jerusalem-a LALPA ina lo kal tûrin lehkha a thawn bawk a. 2 Lal leh a mi liante leh Jerusalem-a mipui zawng zawng chuan thla hnihnaah kalhlên kût neih an rawt a. 3 Chumi lai chuan puithiam intithianghlimte an la tam tâwk lo va, Jerusalem-a mipui an la pun khâwm loh avângin an la kût thei lo va. 4 An thil ruat chu lal leh mipuiho ngaihin a dik a. 5 Chutichuan, Israel ram zawng zawng, Beer-seba aṭanga Dan thlengin LALPA, Israel-te Pathian tâna kalhlên kût nei tûra Jerusalem-a lo kal tûra puan tûrin thu an tinghet ta a; a dân ang tak chuan chutianga tam chuan an la ti ngai lo va. 6 Chutichuan, lehkha tlânpuitute chu lal leh a mi lianhote lehkha kengin, Israel leh Judai ram zawng zawnga kal tûrin lal thupêk angin an chhuak a, “Nangni Israela thlahte u, Suria lalte kut ata chhuaka la dam chhunte lam chu a lo hawi leh theih nân LALPA - Abrahama te, Isaaka te, Israela te Pathian lam chu rawn hawi leh rawh u. 7 Nangni zawng in pi leh pute leh in unaute, LALPA an pi leh pute Pathian chunga thil tisuala an awma, ṭiau tûra a thlahthlam tâk in hmuhte ang chuan awm ve suh u. 8 In pi leh pute ang khân tihmawh ve tawh suh ula, LALPA hnênah intulût zâwk ula, kumkhua atâna a tihthianghlim, a hmun thianghlimah chuan lo lût ula, LALPA in Pathian rawng chu bâwl rawh u; tichuan, a thinurna nasa tak chu in lak ata a kiantîr dâwn nia. 9 LALPA lam in lo hawi leh zawngin in unaute leh in fate chu sala mantute chuan an khawngaih ang a, he ramah hian an lo kal leh dâwn nia: LALPA in Pathian chu ngilnei tak leh zahngai thei tak a ni si a, a lam in hawi phawt chuan a hawisan lo vang che u,” tiin. 10 Chutichuan, lehkha tlânpuitute chu khaw tinah Ephraim leh Manase ram zawng zawngah Zebulun thlengin an kal a: nimahsela, anni chuan an lo nuihzatbûr a, an lo hmusit a. 11 Amaherawhchu, Aser-ho leh Manase-ho leh Zebulun-ho ṭhenkhatin an bengkhawn a, Jerusalem-ah chuan an lo kal a. 12 Judai ram te phei chu LALPA thua lal leh mi lianhote thupêk chu zâwm tûrin Pathianin rilru hmun khat a puttîr a.
Kalhlên kût an hmang
13 Tichuan, thla hnihnaah chuan chhang dawidim telh loh kût nei tûrin mi tam tak Jerusalem-ah chuan an lo pung khâwm chiam a, an tam ngei mai. 14 Tin, an tho va, Jerusalem-a maichâmte chu an la a; tin, rimtui hâlna maichâmte pawh an la a, Kidron luiah an paih a. 15 Tichuan, thla hnihna ni sâwm leh ni li ni chuan kalhlên kûtna chu an talh a; tin, puithiamte leh Levi-ho chu an inzahpui a, an intithianghlim a, hâlral thilhlan chu LALPA inah an la lût a. 16 Tin, Pathian mi Mosia dân ang takin an hmun ṭheuhvah an ding a; tin, puithiamte chuan Levi-ho aṭanga an dawn thisen chu an theh a. 17 Mipui zîngah chuan intithianghlim lo an tam si a; chuvângin, LALPA tâna tithianghlim tûrin a thianghlim lo apiangte pualah Levi-hote chuan kalhlên kûtna an talh a. 18-19 Ephraim mi te, Manase mi te, Isakar mi te, Zebulun mi tam takte chu an intithianghlim lo na a, dân lo angin kalhlên kûtna chu an ei ve a. Hezekian, “Tu pawh an thinlunga Pathian LALPA, an pi leh pute Pathian zawngtu apiangte chu hmun thianghlim dân ang takin intithianghlim lo mah sela, LALPA ngilnei taka chuan ngaidam ṭheuh rawh se,” tiin a ṭawngṭaisak a. 20 Tin, LALPAN Hezekia ṭawngṭaina chu a ngaithla a, mipuite chu a tidam ta a. 21 Tin, Israel mi Jerusalem-a awmte chuan chhang dawidim telh loh kût chu hlim takin ni sarih an hmang a; tin, Levi-ho leh puithiamho chuan ṭingṭang ring tak nêna LALPA chawimawia hla sain ni tin LALPA an fak a.
An kût nawn
22 Tin, Hezekia chuan thiam tak maia LALPA mawi taka faktu Levi-hote chu a lo thlamuan a. Chutichuan, LALPA, an pi leh pute Pathian hnêna thupha chawiin, remna thilhlante hlânin ni sarih chhûng chu kût ruai an ṭheh ṭumtla a. 23 Tin, mipui chuan ni sarih dang kût leh an rawt a; tichuan, ni sarih dang hlim takin an kût leh a. 24 Tin, Juda lal Hezekia chuan mipuite chu bâwngpa sângkhat leh berâm sângsarih talh atân a pe a; mi lianhote pawhin mipuite chu bâwngpa sângkhat leh berâm sîngkhat an pe bawk a; puithiam tam tak an intithianghlim a. 25 Tichuan, Juda mipui zawng zawng chu puithiamte nên, Levi-hote nên, Israel ram aṭanga mipui lo kal zawng zawngte leh hnam dang Israel ram aṭanga lo kal Judai rama awmte chu an hlim êm êm mai a. 26 Chutichuan, hlimna ropui tak Jerusalem-ah chuan a awm a; Israel lal Davida fapa Solomona chinah chutiang rêng rêng chu Jerusalem-ah a la awm ngai lo. 27 Chutichuan, puithiam Levi-hote chu an tho va, mipuite chu mal an sâwm a, an aw chu ngaihthlâkin a awm a, an ṭawngṭaina chuan a awmna thianghlim vân chu a thleng ta a.
Hezekian sakhaw nun a siam thar
1 Tin, chûng zawng zawng chu an tih zawh chuan chuta Israel mi awm zawng zawng chuan, Judai ram zawng zawng leh Benjamin ram leh Ephraim leh Manase rama mi lungphunte an tisawm a, Aseri-te an kit a, hmun sângte leh maichâmte an tihchim vek hma loh chuan Judai ram khuaahte an kal zêl a. Tin, Israela thlahte zawng zawng chu an ramah mahni khaw lam ṭheuhvah an haw leh ta a. 2 Tin, Hezekia chuan puithiamte leh Levi-hote chu an pâwl dân ang zêlin mi tin puithiamte leh Levi-hoten an thawh ṭheuh tûrin, hâlral thilhlan leh remna thilhlan hlântu atân te, rawngbâwltu atân te, lâwm thu sawitu leh LALPA awmna kawngkaa vêngtu tûrte pâwl a siamsak hlawm a. 3 Tin, LALPA dâna chuang angin zîng lam leh tlai lam hâlral thilhlan atân te, Chawlhni leh thla thar leh hunbi nei kût atânte lal chanvo atân ran a ruat bawk a. 4 Tin, Jerusalem-a mipuite chu LALPA dâna an intihchak nân puithiamte leh Levi-hote chanpual pe tûrin thu a pe bawk a. 5 Tin, thupêk chu a han darh veleh chuan Israela thlahte chuan an buh te, uain te, hriak te, khawizu te, an lova thil haw hmasa berte an rawn pe chiam a; tin, an engkim sâwma pakhat an rawn pe chiam bawk a. 6 Tin, Israela thlahte leh Juda thlahte, Juda khuatea awmho chuan an bâwng leh berâm sâwma pakhat te, LALPA an Pathian puala an voh sâwma pakhat te an rawn pe a, an dah khâwm ṭeuh mai a. 7 Thla thumnaah an dah khâwm ṭan a, thla sarihnaah an dah khâwm zo va. 8 Tin, Hezekia leh an mi lianten an han hmuh chuan LALPA leh a mi Israel-te chu an fak a. 9 Chutichuan, Hezekian an thil dah khâwm chungchâng thu chu puithiamho leh Levi-hote chu a zâwt a. 10 Tin, Zadok mi, puithiam hotu Azarian a chhâng a, “Miten LALPA ina thilpêk an rawn lâk tirh aṭangin kan ei zêl a, kan khawpkham hle a, a la awm rui mai a; LALPAN a mite mal a sâwm zêl a, hemi la awm rui hi kan ei bâng a nih hi,” a ti a. 11 Chutichuan, Hezekian LALPA inah chuan pindante siam tûrin thu a pe a; tichuan, an siam ta a. 12 Tin, thilpêk te, sâwma pakhat te, Pathian pualte chu rinawm takin an thiar lût a; an hotu chu Levi mi Konania a ni a, a unau Simeia chu a dawttu a ni. 13 Tin, Konania leh a unau Simeia hnuaiah chuan Lal Hezekia leh Pathian ina hotu Azaria ruatin endiktu Jehiela te, Azazia te, Nahatha te, Asahela te, Jerimotha te, Jozabada te, Eliela te, Ismakia te, Mahatha te, Benaia te an awm a. 14 Tin, Levi mi Imna fapa Korea, chhak lam kawngkhâr vêngtu chu Pathian hnêna mahni duh thua thilpêk enkawltu leh LALPA tân thilpêk leh thil thianghlim semtu a ni a. 15 Tin, ama hnuaiah, puithiam awmna khuaahte chuan Edena te, Miniamina te, Jesua te, Semaia te, Amaria te, Sekania te an awm leh a, chûng chuan an unaute chu a pâwl pâwlin a lian leh a tête hnênah an chanvo tûr an sem bawk a; 16 thlahtua ngaih mipa kum thum achin chung lam, ni tina LALPA ina thawh tûr mamawh nei an pâwl dân ang zêla kal ṭhînte tiam lovin. 17 Puithiamte hna inchhâwk dân tûr chu a chi chiin an ruat a, Levia chite erawh chu kum sawmhnih achin chung lam a pâwl pâwlin an ruat a. 18 Puithiamte chu an nupui te, an fapa te, an fanu te leh an chhûngkuaa mi dangte nên rinawm taka an intihthianghlim reng avângin chhinchhiah vek an ni a. 19 Tin, Arona thlah, khaw tin daifêma awm puithiamte leh Levi-ho thlahte ziaknaa chuang apiangte chanvo pe tûrin mi ruat bîk an awm. 20 Tin, chutiang chuan Judai ram zawng zawngah Hezekian a ti a. LALPA a Pathian mit hmuha ṭha leh dik leh rinawm thil a ti ṭhîn a. 21 Pathian ina rawngbâwl lam thu-ah te, dân lam thu-ah te, thupêk lam thu-ah te, a Pathian zawn thu-ah te, a tih apiangah a rilru zawng zawngin a ti a, a hmuingîl ta zêl a.
Assuria-hovin Jerusalem an vau
1 Chutianga rinawm taka thil an tih hnu chuan Assuria lal Senakeriba a lo thawk a, Judai ramah chuan a lo lût a, kulh nei khuate chu a rawn hual a, lâk a rawn tum a. 2 Tin, Senakeriba a lo thawk a, Jerusalem rawn beih a tum tih Hezekian a hriat chuan, 3 khaw pâwn lama tuite chu tihchah tûrin a mi liante leh a mi chakte chu a râwn a; tichuan, an ṭanpui a. 4 Chutichuan, mi tam tak an pung khâwm a, tui zawng zawng leh ram chhûnga luang tlang luite chu an dang chat a, “Assuria lalte chu an lo luha, tui tam tak engah nge an rawn neih tehlul ang?” an ti a. 5 Tichuan, a intihuai a, kulh chim lai zawng zawng chu a siam a, in sângte a din ṭha a, pâwn lam kulhte pawh. Tin, Davida khuaa Milo chu a tinghet a, hriamhreite leh phawte tam tak a siam a. 6 Tin, indonaa mipui hotute a siam a, khawpui kawngkhâr hmun zau laiah a ko khâwm a, 7 “Chak tak leh huai takin awm rawh u; Assuria lal leh a hote mipui chu hlau suh ula, zâm hek suh u; kan lama ṭang chu a lama ṭang aiin a chak zâwk si a. 8 A lama ṭang chu tisa sipai an ni a; min pui tûr leh mi dosak tûra kan lama ṭang erawh chu LALPA kan Pathian a ni si a,” tiin thlamuanna thu a sawi a. Tin, mipui chuan Juda lal Hezekia thusawite chu an ring a. 9 Chumi hnuah chuan Assuria lal Senakeriba chuan (amah leh a sipaite chu Lakis-ah an awm a) Juda lal Hezekia leh Jerusalem-a Juda mi zawng zawngte hnênah chuan, 10 “Assuria lal Senakeriba chuan heti hian a ti, ‘Jerusalem lâk chu eng nge ni in han rin lohna? 11 Hezekia chuan, “LALPA kan Pathianin Assuria lal kut ata min chhanchhuak ang,” tiin rilṭâm leh tuihâla in thihna mai tûrin a thlêm che u a ni lâwm ni? 12 Hezekia bawk hi a ni lâwm ni, a hmun sângte leh a maichâmte tichima Juda mi leh Jerusalem-a mite hnêna, “Maichâm pakhatah Pathian in bia ang a, rimtui in hâl ang,” tia thu petu kha? 13 Kei leh ka puten ram tin hnam tin chunga kan thiltihte kha in hre lo vem ni? Eng hnam pathian mahin ka kut ata an ram chu an humsak thei lo a ni lâwm ni? 14 Tu hnam pathian nge ka puten an tihboral ka kut ata an mite chhanchhuak thei awma, nangni Pathian pawhin ka kut ata a han chhanchhuah theih bîkna tûr che u? 15 Chuvângin, Hezekia chuan bum che u suh sela, chutiang chuan thlêm che u suh sela, amah chu ring suh u; eng hnam pathian leh eng ram pathian mah an mite ka kut ata leh ka pute kut ata chhanchhuak thei an awm lo va; engtin nge in Pathian chuan ka kut ata a chhanchhuah theih bîk tehlul ang che u?’ ” tiin Jerusalem-ah a mite a tîr a. 16 Tin, a mite chuan chu aia nasa chuan LALPA Pathian leh a chhiahhlawh Hezekia chungchâng thu a ṭha lo lamin an sawi a. 17 Tin, Israel-te LALPA, Pathian chawk thinur zâwng leh a sawichhe zâwngin lehkha a ziak bawk a, “Ram tin, hnam tin pathianten ka kut ata an mite an chhanchhuak thei lo ang bawkin, Hezekia Pathian pawhin ka kut ata a mite a chhanchhuak tawp lo vang,” tiin. 18 Tin, khua chu an lâk theih nân a râp tûr leh timangang tûrin Jerusalem-a kulha awmte chu Juda ṭawngin ring takin an au khum a. 19 Jerusalem Pathian chu mihring kuta siam, khawvêl pathian ang lekfangin an sawi a. 20 Chutichuan, Lal Hezekia leh Amoza fapa zâwlnei Isaia chu chumi avâng chuan an ṭawngṭai a, vâna mi an au va. 21 Tin, LALPAN vântirhkoh a tîr a, chu chuan Assuria lal riahhmuna mi chak huaisen zawng zawng te, hma hruaitu hotute chu a tihlum a. Tichuan, zak tak hmêl puin a ram lamah a haw leh ta a. Tin, a pathian ina a va kal chu ama rîla rahte ngeiin khandaihin an lo tihlum ta a. 22 Chutiang chuan LALPAN Hezekia leh Jerusalem-a mite chu, Assuria lal Senakeriba kut ata leh mi dang zawng zawng kut ata chu a chhanhim a, an vêla mite lakah a vêng a. 23 Tin, mi tam takin Jerusalem-ah LALPA tân thilpêk an rawn la a, thil hlu tak takte Juda lal Hezekia chu an rawn pe a; chuta ṭang chuan hnam tin mit hmuhah chawimawiin a awm ta a.
Hezekia damloh leh chapo thu
24 Chûng lai chuan Hezekia chu thih ngamin a na a, LALPA hnênah a ṭawngṭai a; tin, a lo chhâng a, chhinchhiahna a pe a. 25 Nimahsela, Hezekia chuan a tâna ṭha tûra tih ang chuan a ti lo va, a rilru a lo chapo tâk avângin; chuvângin, a chungah leh Juda-te leh Jerusalem chungah thinurna a lo thleng ta a. 26 Amaherawhchu, Hezekia chuan a rilru chapona chu inchhîrin a inngaitlâwm leh a, amah leh Jerusalem-a mite nên; tichuan, Hezekia dam chhûng chuan LALPA thinurna chu an chungah a thleng ta lo va.
Hezekia hausak leh ropuizia
27 Tin, Hezekia chuan sum leh pai a lo ngah a, a lo ropui ta hle mai a; tangkarua te, rangkachak te, lunghlu te, rimtui te, phaw te leh bungbêl ṭha tak tak dah khâwmna in a sa a; 28 buh te, uain te, hriak te dah khâwmna in pawh a sa bawk a; tin, ran tinrêng dahna leh berâm huangte a siam a. 29 Tin, khuate pawh a siam bawk a, berâm rual leh bâwng rual a ngah êm êm mai a; Pathianin neinung takin a siam a. 30 Hezekia bawk hian Gihon lui tui chhakta zâwk a tiping a, Davida khaw thlang lampangah a luan thlâktîr bawk a. Tichuan, Hezekia chu a thiltih zawng zawngah chuan a hmuingil zêl a. 31 Babulon mi lianten palaia an tirha a rama thil mak an zawh thu-ah chuan, a rilrua awm zawng zawng a hriat theih nân Pathianin thlahthlamin a fiah a.
Hezekia lal a tâwp
32 Hezekia thiltih dang zawng zawng te, a thil tihṭhat te chu, ngai teh, Amoza fapa zâwlnei Isaia inlârna bu, Juda lal leh Israel lalte chanchin buah a chuang a. 33 Tin, Hezekia chu a pi leh pute hnênah a muhîl a, Davida fapate thlân hmun chhohnaah an phûm a; Juda-te zawng zawng leh Jerusalem-a mite chuan a thih ni chuan ropui takin an chawimawi a. Tin, a fapa Manasea chu a aiah a lal ta a.
Juda lal Manasea
1 Manasea chu a lal ṭan tirhin kum sâwm leh kum hnih a ni a, Jerusalem-ah kum sawmnga leh kum nga a lal a. 2 Tin, LALPA mit hmuha thil ṭha lo, Israela thlahte hmaa LALPAN a hnawh chhuah Pathian hre lo hnamten thil tenawm tak an tih ang chu a ti ve ṭhîn a. 3 A pa Hezekian a tihchim hnu hmun sângte a din ṭha a, Baala-te tân maichâmte a din a, Aseri lemte a siam a, vâna awm zawng zawng khi a bia a, an rawng te a bâwl a. 4 “Jerusalem-ah kumkhuain ka hming a awm ang,” LALPAN a tihna LALPA inah chuan maichâmte a siam a. 5 LALPA in hung chhûng kawtlai pahnihah chuan vâna awm zawng zawng tân maichâmte a siam a. 6 Hinoma fapa ruamah meiah a fate chu a luhtîr a; aien te a chîng a, dawi te a hmang a, ramhuai aienthiam zâwlte leh dawithiamte a ruai ṭhîn a; LALPA tithinur tûrin a mit hmuha thil ṭha lo a ti ṭhîn a. 7-8 Tin, Pathianin Davida leh a fapa Solomona hnêna, “He in leh Jerusalem khua, Israel chi zawng zawng zînga ka thlanah hian ka hming chu kumkhuain ka awmtîr ang a; thu ka pêk zawng zawng leh dân zawng zawng te, thuruat te, thiltih tûr Mosia hmanga ka pêkte kha an zawm phawt chuan, an pi leh pute ka pêk tawh ram ata chu Israel-hote ke chu ka pên chhuahtîr tawh lo vang,” a lo tih tawhna Pathian inah chuan ama siam, milem siam chawp a dah a. 9 Tin, Manasea chuan Juda-te leh Jerusalem-a mite chu thil a tihsualtîr a; tichuan, LALPAN Israel-te hmaa a tihboral tâk hnamte ai mahin thil an tisual zâwk a.
Manasea a inchhîr
10 Tin, LALPAN Manasea leh a mite hnênah thu a sawi ṭhîn a; nimahsela, an ngaihsak lo va. 11 Chu vâng chuan LALPAN Assuria sipai hotute a tîr a, Manasea chu khaidiatin an hlîng a, kawl an buntîr a, Babulon-ah an kalpui ta a. 12 Tin, mangang taka a awm lai chuan LALPA a Pathian chu a zawng a, a pi leh pute Pathian hmaah chuan nasa takin a intihnuai a, 13 a hnênah a ṭawngṭai a, khawngaih a hlawh a, a dîlna chu a ngaihthlâksak a, Jerusalem-ah a ramah chuan a hruai leh ta a. Tichuan, Manasea chuan LALPA chu Pathian a nih a hre ta a. 14 Chumi hnuah chuan Davida khaw pâwn lama Gihon thlang lampang ruamah Sangha Kawngkhâr luhna thlengin kulh a siam a, Ophel hual vêlin sâng takin a din a; tin, Juda khua kulh nei zawng zawngah chuan hotu huaisen tak takte a dah a. 15 Ram dang pathiante leh milemte chu LALPA in ata a thehthang bo va, LALPA in tlâng leh Jerusalem-a maichâm a siam zawng zawng chu khua ata an paih vek a. 16 LALPA maichâm a siam a, remna thilhlan inthawina te, lâwm thu sawina te a hlân a, Juda-te chu LALPA, Israel-te Pathian rawngbâwl tûrin thu a pe a. 17 Mipuite chu hmun sângahte chuan an la inthawi reng a; amaherawhchu, LALPA an Pathian hnênah chauh a ni ta zâwk a.
Manasea lal a tâwp
18 Manasea chanchin dang zawng zawng te, a Pathian hnêna a ṭawngṭai thu te, LALPA, Israel-te Pathian hminga zâwlneiin a hnêna thu an sawi thute chu, ngai teh, Israel lalte chanchin zîngah a chuang a. 19 A ṭawngṭaina te leh Pathianin a khawngaihna leh a intihhnuai hmaa a sualna zawng zawng leh hmun sâng a siama, Aseri leh milem siam chawp a dinna hmun zawng zawng pawh, ngai teh, Hozaia chanchin ziakna buah a chuang vek a ni. 20 Chutichuan, Manasea chu a pi leh pute hnênah a muhîl a, ama inah an phûm a. Tichuan, a fapa Amona chu a aiah a lal ta a.
Juda lal Amona
21 Amona chu a lal ṭan tirhin kum sawmhnih leh kum hnih a ni a, Jerusalem-ah kum sawm hnih a lal a. 22 A pa Manasea tih ang bawkin LALPA mit hmuha thil ṭha lo a ti a; a pa Manasean a siam milem siam chawp zawng zawng hnênah Amona chu a inthawi a, an rawng a bâwl a. 23 A pa Manasea a intihnuai ang khân LALPA hmaah a intihnuai ve lo va. Amona hi chu a sual zual sauh sauh mai a ni. 24 Tin, a chhiahhlawhten an phiar a, ama inah an tihlum a. 25 Nimahsela, Amona phiartu zawng zawng chu mipuiin an that ve vek a. Tichuan, mipuite chuan a fapa Josia chu a aiah lalah an siam ta a.
Juda lal Josia
1 Josia chu a lal ṭan tirhin kum riat mi a ni a, Jerusalem-ah kum sawmthum leh kum khat a lal a. 2 Tin, LALPA mit hmuhah thil ṭha a ti ṭhîn a, a pu Davida kawngte a zawh a, ding lamah emaw, vei lamah emaw a pênsan lo va.
Josian milem pathian bia a bei
3 Kum riat a lal kum, naupang tak a la nih lai aṭang rêngin a pu Davida Pathian a zawng ṭan a; tin, kum sâwm leh kum hnih a lal kumin Judai ram leh Jerusalem-a hmun sâng te, Aseri te, milem siam chawp te, milem chhûn chawpte a thian fai a. 4 Baala maichâmte chu a mit hmuhah an tichim a; tin, chûng aia sânga ni lemte chu a kit a; Aseri te, milem siam chawp te, milem chhûn chawpte chu a tisawm dep a, an hnêna inthawi ṭhînte thlân chungah a theh darh vek a. 5 Puithiamte ruh chu an maichâmahte a hâl a, Judai ram leh Jerusalem chu a thian fai a. 6 Tin, chutiang bawk chuan Manase te, Ephraim te, Simeon te, Naphtali khuate lamin a ti vek a. 7 Tin, maichâmte a tichim a, Aseri te, milem siam chawpte chu a tisawm dep a, Israel ram zawng zawnga ni lemte chu a kit vek a, Jerusalem-ah a haw leh a.
Dân bu hmuhchhuah a ni
8 Tin, a lal kum sâwm leh kum riat kum, a ram leh inte a then fai kum chuan Azalia fapa Saphana te, khaw awptu Maaseia te, Joahaza fapa lehkhaziaktu Joa te chu LALPA a Pathian in siam ṭha tûrin a tîr a. 9 Tin, puithiam Hilkia hnênah an kal a, kawngkhâr vêngtu Levi-hoten Manase mi te, Ephraim mi te, Israel-ho la awm chhun te, Juda mi leh Benjamin mi te, Jerusalem-a mite hnên ata an lo lâk khâwm, Pathian ina an rawn dah tangka chu an pe a. 10 Tin, LALPA in satu hnathawktute an pe a; tin, LALPA in hnathawktute chuan in siam ṭhatute leh cheitute an pe a; 11 Juda lalten an lo tihchhiat tâk in siam ṭhat nân lung chher te, a zawmna te leh a khanchhukte atâna thing lei nân themthiamte leh in satute chu an pe a. 12 Tin, mite chuan hna chu rinawm takin an thawk a; an hotu, hnathawh rêlbâwltute chu, Meraria fapate zînga Levi mi Jahatha leh Obadia te, Kohath mi fapate zînga mi Zakaria leh Mesulama-te an ni a; tin, Levi mi mi dang, thil tum thiam zawng zawngte nên. 13 A phurha phur mite hotu pawh an ni a, hna tinrêng thawktute thawh tûr rêlbâwltu an ni. Lehkhaziaktu te, hotu te, kawngkhâr vêngtute chu Levi mite zînga mi an ni. 14 Tin, LALPA ina an rawn dah sumte an han phawrh chuan, puithiam Hilkia chuan Mosia hmanga pêk LALPA dân bu chu a hmuchhuak a. 15 Tin, Hilkia chuan lehkhaziaktu Saphana hnênah chuan, “LALPA inah dân bu kan hmuchhuak ta,” a ti a. Tin, Hilkia chuan lehkhabu chu Saphana a pe a. 16 Tin, Saphana chuan lehkhabu chu lal hnênah a kalpui a, “I chhiahhlawhten tih tûra ruat zawng zawng chu an ti a. 17 LALPA ina tangka awm chu an bun chhuak a, hotute leh hnathawktute chu an pe a,” tiin thu a thlen a. 18 Tin, lehkhaziaktu Saphana chuan, “Puithiam Hilkia chuan lehkhabu mi pe,” tiin lal chu a hrilh bawk a. Tin, Saphana chuan lal hmaah a chhiar a. 19 Tin, heti hi a ni a, lalin dân thute chu a han hriat chuan a puan a pawt thlêr a. 20-21 Tin, lal chuan, “Kal ula, dân thu in hmuhchhuah chungchâng thu-ah hian, keimah leh Israel leh Judai rama mite tân LALPA min va râwnsak teh u; kan pi leh puten he dân bua chuang ang hian LALPA thu chu an lo zawm loh avâng hian, kan chungah LALPA thinurna chu a lo awm nasa ta a ni si a,” tiin Hilkia te, Saphana fapa Ahikama te, Mika fapa Abdona te, lehkhaziaktu Saphana te, lal chhiahhlawh Asaia te chu thu a pe a. 22 Tichuan, lalin thu a pêkate leh Hilkia chu, silhfên enkawltu Hasra fa Tokhatha fapa Saluma nupui zâwlnei Huldi hnênah chuan an va kal a, chumi thu-ah chuan an va bia a (Ani chu Jerusalem Misne-a awm a ni). 23 Tin, ani chuan an hnênah, “LALPA, Israel-te Pathian chuan heti hian a ti: Ka hnêna rawn tîrtu che u chu hrilh ula, 24 ‘LALPA chuan heti hian a ti: Ngai teh u, he hmun leh a chhûnga awmte chungah hian thil ṭha lo ka thlentîr ang a, Juda lal hmaa an chhiar chhuah tâk lehkhabua chuang ânchhia zawng zawngte pawh; 25 an kut thiltiha min tihthinur nâna min hawisana, pathian dangte tâna rimtui an hâl avângin he hmun chungah hian ka thinurna leih a ni a, tihdaih a ni lo vang,’ tiin. 26-27 Amaherawhchu, LALPA râwn tûra rawn tîrtu che u Juda lal hnênah chuan hetiang hian sawi ang che u, ‘LALPA, Israel-te Pathian chuan heti hian a ti: Chûng thu i hriatte chuan i thinlung a tihnêm avânga Pathian hmaa i intihhniama, he hmun chungchâng thu leh a chhûnga awmte chungchâng thu i hriata, ka hmaa i intihhnuaia, i puan i pawh thlêra, ka hmaa i ṭah avângin kei pawhin i thu chu ka lo ngaithla a. 28 Ngai teh, i pi leh i pute hnênah ka kaltîr ang chia, i thlânah thlamuang takin i kal ang a, he hmun leh a chhûnga awmte chunga ka rawn thlentîr tûr thil ṭha lo zawng zawngte chu i mitin a hmu lo vang,’ tiin, ti rawh u,” a ti a. Tin, lal hnênah thu chu an thlen ta a.
LALPA thu zâwm tûrin Josian thu a thlung
29 Tichuan, lal chuan mi a tîr a, Judai ram leh Jerusalem-a upa zawng zawng chu a ko khâwm a. 30 Tin, lal leh Juda mi zawng zawng, Jerusalem-a mi zawng zawng te, puithiam leh Levi-ho te, mipuiho zawng zawng a lian a têin LALPA inah an chho va; LALPA ina an hmuhchhuah thuthlung bua thu zawng zawng chu an beng hriatah a chhiar a. 31 Tin, lal chu a hmunah a ding a, chumi lehkhabua chuang thuthlung thu chu tinghet tûrin, a thinlung zawng zawng leh thlarau zawng zawnga LALPA zui tûr leh a thupêk te, a thuhriattîr te, a thuruatte pawm tûrin LALPA hmaah chuan thu an thlung a. 32 Tin, Jerusalem leh Benjamin mi zawng zawng chu chutianga awm tûrin a ti a. Tin, Jerusalem-a mite chuan Pathian, an pi leh pute Pathian thuthlung ang chuan an ti a. 33 Tin, Josia chuan, Israel ramin a huam zawng zawng ata thil tenawm zawng zawng chu a thehthang bo va, Israel rama awm zawng zawng chu LALPA an Pathian rawng a bâwltîr a. Tin, a dam chhûng chuan LALPA, an pi leh pute Pathian an zui chu an pênsan lo.
Josian kalhlên kût a hmang
1 Tin, Josia chuan Jerusalem-ah LALPA tân kalhlên kût a nei a; kalhlên kûtna tûr chu thla khatna, ni sâwm leh ni li niah an talh a. 2 Tin, puithiamte chu an hnathawh a ruatsak a, LALPA ina rawngbâwl hna thawk tûrin a fuih a. 3 Tin, Israel mite zirtîrtu, Pathian tâna tihhran Levi-hote hnênah chuan, “Israel lal Davida fapa Solomona in sakah chuan bâwm thianghlim chu dah rawh u; in kokia zâwn a ngai tawh lo vang; LALPA in Pathian leh a mi Israel-te rawng bâwl tawh rawh u khai. 4 Tin, Israel lal Davida ziak ang leh a fapa Solomona ziak angin, in chhûngkaw puipa zir zêlin a pâwl pâwlin inbuatsaih rawh u. 5 Tin, in unauteho chhûngkaw puipa zir zêlin Levi-hote puala chanvo neiin hmun thianghlimah chuan awm rawh u. 6 Kalhlên kûtna tûr talh ula, intithianghlim ula, Mosia hmanga LALPA sawi anga ti tûrin in unaute tân buatsaih rawh u,” a ti a. 7 Tin, Josian chuta mi awm zawng zawng chu kalhlên kûta hlan tûrin ran rual zînga mi berâmno leh kêlno sîngthum leh bâwngpa sângthum a pe a; chûngte chu lal sum zînga mi a ni. 8 Tin, a mi liante chuan mipui te, puithiam te, Levi-hote chu mahni duh thua hlan atân an pe a. Pathian in hotu Hilkia te, Zakaria te, Jehiela te chuan kalhlên kûta hlan tûrin ran no sânghnih leh zaruk leh bâwngpa zathum puithiamte an pe a. 9 Tin, Konania te, a unau Semaia leh Nethanela te, Levi-hote hotu Hasabia te, Zeiela te, Jozabada te pawhin kalhlên kûta hlan atân Levi-hote chu ran no sângnga leh bâwngpa zanga an pe a. 10 Tichuan, rawngbâwlna chu an buatsaih a, lal thupêk angin puithiamte chu an hmunah an ding a, Levi-hote chu an pâwl dân ang zêlin. 11 Tin, kalhlên kûtna tûr chu an talh a, puithiamte chuan thisen chu an theh a, Levi-hote chuan an lip a. 12 Tin, Mosia lehkhabua chuang anga an chhûngkaw ṭhen dân zir zêla LALPA hnêna hlan atâna pêk tûrin, hâlral thilhlante chu an la sawn a. Bâwngpate pawh chu chutiang bawk chuan an ti a. 13 Tin, kalhlên kûtna tûr chu dân angin an hem hmin a; tin, thilhlan thianghlim sa chu bêl te, bêl khaina nei te, bêl rawng zautein an chhûm kawi a, mi zawng zawng hnênah an kalpui a. 14 Tin, chumi zawhah chuan anmahni leh puithiamte tân an buatsaih a; Arona fa puithiamte chu hâlral thilhlan leh sa thau hlânin zân thlengin an buai si a; chuvângin, Levi-hote chuan anmahni leh Arona fa puithiamte tân an buatsaih a ni. 15 Tin, Davida leh Asapha leh Hemana leh lal zâwlnei Jeduthuna-te thupêk angin, hla satu Asapha fapate chu an hmunah an ding a; tin, kawngkhâr vêngtute chu kawngkhâr tinah an awm a; an unau Levi-hoten an buatsaihsak avângin an hna kalsan a ngai lo va. 16 Chutichuan, Lal Josia thupêk anga kalhlên kût nei tûr leh LALPA maichâma hâlral thilhlan hlân tûrin, chumi ni vêk chuan LALPA rawngbâwlna thil zawng zawng chu an buatsaih a. 17 Tin, Israela thlah chuta awmte chuan chumi ni chuan kalhlên kût an nei a, chhang dawidim telh loh kût pawh ni sarih an nei bawk a. 18 Zâwlnei Samuela dam lai ata Israel ramah kalhlên kût chutiang rêng rêng chu an nei ngai lo va; Israel lal tu mahin Josia leh puithiamte leh, Levi-hote leh Juda zawng zawng leh, Israel-te leh Jerusalem-a miten an neih anga nei an awm hek lo. 19 Kum sâwm leh kum riat Josia a lal kumin chu kalhlên kût chu an nei a ni.
Josia lal a tâwp
20 Chûng zawng zawng hnua Josian biak in a buatsaih zawh chuan, Aigupta lal Nekoa chu Karkhemis bei tûrin Euphrates luiah a han chho va; tin, Josia chuan a han bei a. 21 Nimahsela, ani chuan, “Nang Juda lal, kei leh nang eng nge kan intihna tûr awm? Nang bei tûrin ka lo kal lo va, ka do laite bei tûr zâwkin asin ni ka lo kal; Pathianin hmanhmawh tûrin thu min pe a, ka lama ṭang Pathian chu dodâl suh khai, a tiboral dah ang che,” tiin palai a tîr a. 22 Nimahsela, Josia chuan a kîrsan duh lo va, a do theih nân a inbâwl danglam a, Pathian kâ aṭanga Nekoa thusawi chu a pawm lo va, Megido ruamah lo bei tûrin a kal a. 23 Tin, thal kâp mite chuan Josia chu an han kâp a; tin, lal chuan a chhiahhlawhte hnênah, “Min kal bopui rawh u, hliam nasa tak ka tâwk ta,” a ti a. 24 Chutichuan, a chhiahhlawhte chuan tawlailîr ata chu an la chhuak a, a tawlailîr dangah chuan an dah a, Jerusalem-ah an kalpui a, a thi a, a pi leh pute thlânah an phûm ta a. Juda mi zawng zawng leh Jerusalem-a miten Josia chu an sûn a. 25 Jeremia chuan Josia chu a ṭah a. Tin, hla satu hmeichhia leh mipate chuan tûn thlengin Josia an ṭah hla chu an la chham a. Israel ramah chuan dânah an neih a, ngai teh, ṭah hlaah chuan a chuang ta a. 26 Josia thiltih dang zawng zawng, LALPA dâna chuang anga a thiltih ṭha te, 27 a hmasa ber leh a hnuhnûng berte pawh, ngai teh, Israel lal leh Juda lalte chanchin buah a chuang a.
Juda lal Joahaza
1 Tichuan, chumi rama mite chuan Josia fapa Joahaza chu an hruai a, Jerusalem-ah a pa aiah lalah an siam ta a. 2 Joahaza chu a lal ṭan tirhin kum sawmhnih leh kum thum a ni a, Jerusalem-ah thla thum a lal a. 3 Aigupta lalin Jerusalem-a a lalna a bân a, an ram chu tangkaraw talent za leh rangkachak talent khat a chawitîr a. 4 Tin, Aigupta lal chuan a unaupa Eliakima chu Juda leh Jerusalem-a lalah a siam a, a hming chu Jehoiakima tiin a thlâksak a. Tin, Nekoa chuan a unaupa Joahaza chu Aigupta ramah a hruai a.
Juda lal Jehoiakima
5 Jehoiakima chu a lal ṭan tirhin kum sawmhnih leh kum nga a ni a, Jerusalem-ah kum sâwm leh kum khat a lal a; LALPA a Pathian mit hmuha thil ṭha lo a ti ṭhîn a. 6 Babulon lal Nebukadnezzara chu amah bei tûrin a lo thawk a, Babulon-a hruai tûrin kawl a buntîr a. 7 Nebukadnezzara chuan LALPA in bungbêlte pawh Babulon-ah a la a, Babulon-a a pathian biak inah a dah a. 8 Jehoiakima chanchin dang te, a thil tenawm tih te leh a awm dânte chu, ngai teh, Israel lal leh Juda lalte chanchin buah a chuang a. Tichuan, a fapa Jehoiakina chu a aiah a lal ta a.
Juda lal Jehoiakina
9 Jehoiakina chu a lal ṭan tirhin kum riat mi a ni a, Jerusalem-ah thla thum leh ni sâwm a lal a; LALPA mit hmuha thil ṭha lo a ti ṭhîn a. 10 Kum a lo vei chuan Lal Nebukadnezzara chuan mi a tîr a, LALPA ina bungbêl ṭha tak takte nên Babulon-ah a hruaitîr a, a unaupa Zedekia chu Judai ram leh Jerusalem-a lalah a siam a.
Juda lal Zedekia
11 Zedekia chu a lal ṭan tirhin kum sawmhnih leh kum khat a ni a, Jerusalem-ah kum sâwm leh kum khat a lal a. 12 LALPA a Pathian mit hmuha thil ṭha lo a ti ṭhîn a; LALPA kâ aṭanga thu sawitu zâwlnei Jeremia lakah chuan a intihnuai duh lo va.
Jerusalem chhiat
13 Pathian hminga chhechhamtîrtu Lal Nebukadnezzara chungah a hel bawk a; luhlul a chhuah a, LALPA, Israel-te Pathian lam hawi lo tûrin a rilru a tikhauh va. 14 Puithiam hotu zawng zawng leh mipuite pawhin Pathian hre lo mite tih ang bawk thil tenawm tak takte an ti a; Jerusalem-a a tihthianghlim LALPA inte pawh chu an tibawlhhlawh a. 15 Tin, LALPA, an pi leh pute Pathian chuan an hnênah theihpatâwpa ṭhahnemngaiin mi a tîr a, a mite leh a awmna hmun chu a lainat avângin. 16 Nimahsela, Pathian mi tirhte chu an hmusit a, a thute chu an ngainêp a, a mite chunga LALPA thinurna chu a lo thawk a, tihlungawi lehna rêng awm lo khawp hialin a zâwlneite chu an tinawmnah a. 17 Chuvângin, Kaldai lal an chungah a thawhtîr a, ani chuan an tlangvâlte chu an hmun thianghlimah khandaihin a that a, nula leh tlangvâl pawh, tar pawh, tarchhia pawh lainatna rêng rêng a nei lo va; a kutah a pe vek a. 18 Tin, Pathian ina bungbêl zawng zawng, a lian pawh, a tê pawh, LALPA ina sum dah khâwm zawng zawng te, lal sum dah khâwm leh a mi liante sum dah khâwmte lamin Babulon-ah a la vek a. 19 Tin, Pathian in te an hâl a, Jerusalem kulh te an tichim a, chuta in ropui zawng zawng chu an hâl a, chuta bungbêl ṭha mi zawng zawng chu an tichhe vek a. 20 Khandaiha thah bâng zawng zawng chu Babulon-ah a hruai a, amah leh a fapate chhiahhlawhah Persia-ho lo len thlengin an awm ta a. 21 LALPAN zâwlnei Jeremia hmanga thu a lo sawi Chawlhni serh thei lova an awm chhûng kum sawmsarih, Chawlhni an serh leh theih thlengin, ram chu tihchhiatin a awm ang, a tih kha a lo thleng ta a ni.
Lal Kuran Juda-ho an rama kîr tûrin a ti
22 Chutichuan, Persia lal Kura lal tirh kumin Jeremia kâa LALPA thu chu a thlen kim theih nân, a ram zawng zawnga than chhuak vek tûr leh, a ziaka ziak tûr pawhin LALPAN Persia lal Kura thinlung chu a chawk tho va, 23 “Persia lal Kura chuan heti hian a ti: ‘Khawvêl ram zawng zawng chu LALPA, vân Pathian chuan min pe ta a; tin, Judai rama Jerusalem-ah chuan a in saksak tûrin thu mi pe a ni. In zînga ama mite tawh phawt hnênah chuan LALPA a Pathian chu awm sela, han chho rawh se,’” tiin.
Lal Kuran Juda-te kîr tûrin thu a pe
1 Persia lal Kura lal tirh kumin zâwlnei Jeremia hmanga a lo sawi tawh chu LALPAN a thlen kimtîr ta a. He thupêk pe tûr leh a ram zawng zawnga chhiar vek tûra thawn chhuak tûrin LALPA chuan Kura thinlung chu a chawk tho va. 2 “Persia lal Kura chuan heti hian a ti: ‘Khawvêl ram zawng zawng chu LALPA, vân Pathian chuan mi pe ta a; tin, Judai rama Jerusalem-ah chuan a in saksak tûrin thu mi pe a ni. 3 In zînga ama mite tawh phawt hnênah chuan a Pathian chu awm rawh se; tichuan, Judai rama Jerusalem-ah chuan han chho sela, LALPA, Israel-hote Pathian in, Jerusalem-a awm chu han sa rawh se; amah chu Pathian a ni. 4 Tin, tu pawh, khawii hmunah pawha an awmnaa la châmbang apiangte chu, an awmna hmuna mite chuan Jerusalem-a awm Pathian in tân anmahni duh thua an thawh tiam lovin, tangkarua te, rangkachak te, bungrua te, ran tein lo ṭanpui rawh se,’ ” tiin. 5 Chutichuan, Juda leh Benjamin chia chhûngkaw puipa deuh deuhte, puithiamte, Levi-hote, Jerusalem-a LALPA in han sa tûra Pathianin an thinlung a chawh thawh zawng zawngte chu an thawk ta a. 6 Tin, anmahni duh thua thawh tiam lovin, an vêla mi zawng zawngte chuan tangkaruaa siam bungbêl te, rangkachak te, bungrua te, ran te, thil hlu tak takte an pein, an ṭanpui a. 7 Lal Kura pawhin Nebukadnezzaran LALPA ina bungbêl Jerusalem aṭanga a lâk chhuaha, a pathiante ina a dahte chu a la chhuak leh a; 8 chûng ngei chu Persia lal Kura chuan a vawngtu Mithredatha a lâk chhuahtîr a, a chhiar a, Juda puipa Sesbazzara a hlân a. 9 Tin, hêng hi a zât chin chu a ni: rangkachak maihûn sawmthum, tangkaraw maihûn sâng, chemtê sawmhnih leh pakua; 10 rangkachak no sawmthum, tangkaraw no chi dang zali leh sâwm, bungbêl dang sângte nên. 11 Rangkachak leh tangkaraw bungbêl zawng zawng chu sângnga leh zali a ni. Salte chu Babulon ata Jerusalem-a an hruai chhoh lai khân Sesbazzaran hêng zawng zawng hi a keng chho va.
Sal tâng kîr lehte
1 Judai rama mi sala hruai, Babulon lal Nebukadnezzaran Babulon-a a hruai, Jerusalem leh Judai rama kîr leh, mi tin mahni khaw lam ṭheuhva hawte chu hêng hi an ni. 2 Hêngho hi: Zerubabela te, Jesua te, Nehemia te, Seraia te, Reelaia te, Mordekaia te, Bilsana te, Mispara te, Bigvaia te, Rehuma te, Baana-te ruala kîr an ni. Israel mite patling tam lam chu: 3 Parosa thlahte chu 2,172 ; 4 Sephatia thlahte chu 372 ; 5 Ara thlahte chu 775 ; 6 Pahath-moaba thlah zînga Jesua leh Joaba thlahte chu 2,812 ; 7 Elama thlahte chu 1,254 ; 8 Zatua thlahte chu 945 ; 9 Zakaia thlahte chu 760 ; 10 Bania thlahte chu 642 ; 11 Bebaia thlahte chu 623 ; 12 Azgada thlahte chu 1,222 ; 13 Adonikama thlahte chu 666 ; 14 Bigvaia thlahte chu 2,056 ; 15 Adina thlahte chu 454 ; 16 Atera, Hezekia an tih bawk thlahte chu 98 ; 17 Bezaia thlahte chu 323 ; 18 Jora thlahte chu 112 ; 19 Hasuma thlahte chu 223 ; 20 Gibara thlahte chu 95 ; 21 an thlahtute aṭanga hêng khuaa lo chêng tawh ṭhînte pawh hetiang hian an kîr leh a: Bethlehem mite chu 123 ; 22 Netopha mite 56 ; 23 Anathoth mite 128 ; 24 Azmavetha mite chu 42 ; 25 Kiriath-arima te, Kephira te, Beerotha mite chu 743 ; 26 Rama leh Geba mite chu 621 ; 27 Mikma mite 122 ; 28 Bethel leh Ai mite 223 ; 29 Neboa mite chu 52 ; 30 Magbisa mite chu 156 ; 31 Elam danga mite chu 1,254 ; 32 Harima mite chu 320 ; 33 Loda te, Hadida te, Onova mite chu 725 ; 34 Jeriko-a mite chu 345 ; 35 Senaa mite chu 3,630 an ni a. 36 Puithiamte: Jesua chhûngte zînga Jedaia thlahte chu 973 ; 37 Imera thlahte chu 1,052 ; 38 Pasura thlahte chu 1,247 ; 39 Harima thlahte chu 1,017 an ni. 40 Levi chite: Hodavia thlah Jesua leh Kadmiela thlahte chu 74 an ni. 41 Hla satute: Asapha thlahte chu 128 an ni. 42 Kawngkhâr vêngtu thlahte: Saluma thlahte, Atera thlahte, Talmona thlahte, Akuba thlahte, Hatita thlahte, Sobaia thlahte chu, an vaia fin khâwmin 139 an ni. 43 Nethin-ho: Ziha thlah te, Hasupha thlah te, Tabaotha thlahte, 44 Kerosa thlahte, Siaha thlahte, Padona thlahte, 45 Lebana thlahte, Hagabaha thlahte, Akuba thlahte, 46 Hagaba thlahte, Salmaia thlahte, Hanana thlahte, 47 Gidela thlahte, Gahara thlahte, Reaia thlahte, 48 Rezina thlahte, Nekoda thlahte, Gazama thlahte, 49 Uza thlahte, Pasea thlahte, Besaia thlahte, 50 Asnaa thlahte, Meunima thlahte, Nephisima thlahte, 51 Bakbuka thlahte, Hakupha thlahte, Harhura thlahte, 52 Bazlutha thlahte, Mehida thlahte, Harsa thlahte, 53 Barkosa thlahte, Sisera thlahte, Tema thlahte, 54 Nezia thlahte, Hatipha thlahte. 55 Solomona chhiahhlawhte thlahte: Sotaia thlahte, Hasopheretha thlahte, Peruda thlahte, 56 Jaala thlahte, Darkona thlahte, Gidela thlahte, 57 Sephatia thlahte, Hatila thlahte, Pokereth-hazebaima thlahte, Amia thlahte. 58 Nethin mi zawng zawng leh Solomona chhiahhlawhho thlahte chu 392 an ni. 59 Tin, mi 652 Delaia thlahte, Tobia thlahte, Nekoda thlahte, Tel-mela aṭang te, Tel-harsa aṭang te, Kerub aṭang te, Adan aṭang te, Imer aṭangtea lo chhuak chho an awm a; 60 nimahsela, Israel mi an nih leh nih loh an chhui thei lo va. 61 Tin, puithiam chite zînga Habaia thlahte, Hakoza thlah te, Gilead mi Barzilaia fanu zînga mi nupuia neia an hming pu nghâl Barzilaia thlahte chuan, 62 thlahtu chhuina hming ziaknaah an hming an hmu zo lo va; chuvângin, puithiama pawm an ni ta lo va. 63 Ram awptu chuan urim leh thumim hmangtu tûr puithiam a awm hma loh chuan chaw thianghlim an ei a khap a. 64 Mipui pung khâwm zawng zawng chu 42,360 an ni a, 65 an chhiahhlawh mipa leh hmeichhia 7,337 tiam lovin; tin, hla satu mipa leh hmeichhia 200 an nei bawk a. 66 An sakawr chu 736 a ni a, an sabengtung chu 245 a ni a, 67 an sanghâwngsei chu 435 a ni a, an sabengtung tê chi chu 6,720 a ni. 68 Jerusalem-a LALPA in an thlen chuan chhûngkaw puipa ṭhenkhatte chuan, Pathian in chu a hmun ngaia din lehna tûrin thilhlan an pe a: 69 an pêk theih tâwkin in sakna thawhlâwmah chuan rangkachak darik 61,000, tangkarua maneh 5,000 leh puithiam silhfên za an pe a. 70 Chutichuan, puithiamte, Levi chite, mi ṭhenkhatte, hla satute, kawngkhâr vêngtute leh Nethin-hote chu an khuaahte an awm ta a, Israel mi zawng zawng chu anmahni khuaah.
Jerusalem-ah Pathian biak an ṭan
1 Tin, thla sarihna a lo thlena, Israel mite chu khuaahte an awm lai chuan, mite chu thukhat vuain Jerusalem khuaah an inkhâwm a. 2 Chutichuan, Jozadaka fapa Jesua leh a unau puithiamte leh Sealtiela fapa Zerubabela leh a unaute chu an tho va, Pathian mi Mosia dâna chuang angin hâlral thilhlan nân Israel-te Pathian maichâm an siam a. 3 Tin, maichâm chu a hmun ngaiah chuan an din a; chûng rama awmte chu an hlau hle nâ a, maichâmah chuan LALPA tân hâlral thilhlante an hlân a, zîng lam leh tlai lamah hâlral thilhlan chu an hlân ṭhîn a ni. 4 An ziak ang khân bâwkte kût chuan an kût a, ni tina tih tûr chin ruat, a bi tâwk thliah ang zêlin ni tina hâlral thilhlan chu an hlân a; 5 chumi hnuah chuan an ni tin hâlral thilhlan te, thla thar thilhlan te, LALPA tâna kût ni an ruata an serh apianga thilhlan te; tin, mahni duh thua thilhlan, LALPA hnêna lâwm taka hlan ṭhinte chu an hlân a. 6 Thla sarihna, ni khat aṭangin hâlral thilhlante LALPA hnênah an hlân ṭan a; nimahsela, LALPA biak in lungphûm chu an la phûm lo va.
Tempul sak thar an ṭan
7 Lung chhertu leh themthiamte pawh tangka an pe a; tin, Persia lal Kuran a phal dân ang zêlin, sidar thing Lebanon aṭanga tuifinriat, Jopa thlenga rawn la tûrin Zidon mite leh Tura mite chu ei tûrte leh in tûrte leh hriak te an pe a. 8 Tin, Jerusalem-a Pathian in an thlenna kum hnihna, thla hnihnaah chuan Sealtiela fapa Zerubabela te, Jozadaka fapa Jesua te, an unau puithiam leh Levi chi dangte leh sala chhuak Jerusalem-a chho zawng zawng nên chuan an bei ṭan a; Levi chite chu kum sawmhnih mi aṭanga a chung lam mite chu LALPA in saka hotu atân an ruat a. 9 Chutichuan, Jesua chu a fapate leh a unaute nên, Kadmiela, a fapate nên, Juda fapate nên chuan Pathian in satute chu an ho tlâng ta a: Henadada fapate, an fapate leh an unau Levi chite nên. 10 Tin, a satuten LALPA in lungphûm an han rem chuan puithiamte chu an thuam inbela tawtawrâwt kengin, Levia chi Asapha fapate chu Israel lal Davida tih dân ruat anga LALPA fak tûrin an dintîr a. 11 “Ani chu a ṭha si a, a ngilneihna chu Israel mite chungah a awm kumkhua dâwn a ni,” tiin, LALPA fak leh a hnêna lâwm thu sawiin hlain an inchhâwn a. LALPA in lungphûm an phûm tâk avânga LALPA an faknaah chuan mipui zawng zawng chu an au dur dur mai a. 12 Puithiam leh Levi chi leh chhûngkaw puipa tam tak, a in hmasa hmutu putarhote erawh chu an mit hmuhah, hemi in lungphûm an phûm chuan an ṭap vak vak mai a. Tin, mi tam tak chu lâwm avângin an au vak vak bawk a; 13 chutichuan, mite chuan lâwm avânga au thâwm leh mipui ṭap thâwm chu an thlei thei chuang lo va; mipui chu ring takin an au vak vak mai a, an thâwm chu hla tak aṭangin an hria a ni.
Tempul sak dodâlna
1 Juda mi leh Benjamina mite hmêlmate chuan sal chhuakhovin LALPA, Israel-te Pathian biak in an saksak tih an lo hriat chuan, 2 Zerubabela leh an chhûngkaw puipate hnên lamah an va kal a, an hnênah, “Kan sakpui ve ang che u; keini pawhin in zawn ang hian in Pathian chu kan zawng ve a; heta min hruai chhotu Assuria lal Esar-haddona a lal lai aṭang khân a hnênah kan inthawi ṭhîn asin,” an ti a. 3 Nimahsela, Zerubabela leh Jesua leh Israel-te chhûngkaw puipa dangte chuan an hnênah, “Kan Pathian in saksaknaah hian in tel vena kawng rêng rêng a awm lo ve; Persia lal Kura thu min pêk angin keimahniho ngawtin LALPA, Israel-te Pathian kan saksak dâwn a ni,” an ti a. 4 Chutichuan, chumi rama mite chuan Juda mite kut chu an tihchauhsak a, an in sa chu an tibuai a. 5 Persia lal Kura lal chhûng zawng, Persia lal Daria lal thleng hialin an thiltih tumte engmahlova siam tûrin sawipuitute an ruai a.
Jerusalem din leh dodâltute
6 Chutichuan, Ahasuera lal lai, a lal ṭan tirh laiin Judai ram leh Jerusalem-a awmte hêkna lehkha an phuah a. 7 Tin, Artazerzia lal lai chuan Bislama te, Mithredatha te, Tabeela te leh an ṭhian dangte nên chuan Persia lal Artazerzia chu lehkha an thawn a; an lehkha ziak chu Aramaik ṭawngin Aramaik hawrawpa ziak a ni. 8 Hotu Rehuma leh lehkhaziaktu Simsaia chuan Jerusalem-a mite hêkin Persia lal Artazerzia hetiang lehkha hi an thawn a: 9 Lehkha thawntute chu: Hotu Rehuma leh lehkhaziaktu Simsaia leh a ṭhiante - rorêltute leh ram awptute, Persia mi te, Elam rama awm ṭhîn Erek mi te, Babulon mi te leh Susan mi te; 10 mi ropui Asurbanipalan sala a hruai Samaria khuaah leh Euphrates lui thlang lama a awmtîr tâkte an ni. 11 Lal Artazerzia chu hetiangin lehkha an thawn a: “Lalber Artazerzia chu i chhiahhlawh Euphrates lui khawthlang lam ram miten chibai kan bûk e. 12 I hnên aṭanga Juda mi lo chhote chu kan hnênah Jerusalem-ah an lo kal a; khaw hel hmang leh sual chu an din ṭha a, a kulh chu an peih tawh a, a lungphûm chu an siam ṭha tawh tih lal chuan lo hre rawh se. 13 Hemi khua hi an dina, a kulhte an siam zawh chuan, chhiah te, thil neih man te leh lei mante an chawi duh lo vang a, a tâwpah chuan lalte tân chhiatna a lo ni mai ang tih lalin lo hre rawh se. 14 Lal ina chi liak kan nih avângin lal mawi lohna hmuh hi kan tân a fel lo hle si a; 15 chuvângin, i pi leh pute thil chhinchhiah ziakna buah i zawna, chumi ziakna buah chuan i hmuha, hemi khua hi hel hmang khua a nih leh lalte leh an ramte tâna thil hlauhawm tak a niha, an hel kumkhuaa, chumi avâng chuan he khua hi a lo chhia a ni tih i hriat nân lehkha kan thawn a, lal kan hriattîr a ni. 16 Hemi khua hi an dina, a kulhte an peih vek chuan lui râl lamah rêng rêng chuan chan i neih loh phah ang tih lal kan hriattîr a ni,” an ti a. 17 Chutichuan, lalber chuan chhânna a thawn a, “Hotu Rehuma te, lehkhaziaktu Simsaia te leh an ṭhian dang Samaria ram leh Euphrates lui thlang lama awmte chibai ka bûk a che u. 18 Kan hnêna in lehkha rawn thawn kha ka hmaah fiah takin an chhiar a. 19 Tin, thu ka pe a, an zawng a, he khua hi hmân aṭangin lal chungah an hel ṭhîn a, chutah chuan helna leh buaina a awm ṭhîn tih chu kan hmu chhuak a ni. 20 Jerusalem-ah khân lal thiltithei tak tak, lui râl lehlam ram thlenga rorêlte pawh an lo awm tawh a; chhiah te, thil neih man te, lei mante an la ṭhîn a. 21 Khâng mite kha chawlhtîr ula, thu ka pêk hma loh chuan khua chu din suh se. 22 Muang hauh suh u; engah tehlul nge lalte tâna chhiatna thil pawi tak a lo zualkai ang?” a ti a. 23 Chutichuan, Lal Artazerzia lehkha chu Rehuma leh lehkhaziaktu Simsaia leh an ṭhiante hmaa an chhiar zawh chuan, hmanhmawh takin Jerusalem-a Juda-te hnênah an kal a, thuneihnain an bân luihtîr a. 24 Chutichuan, Jerusalem-a Pathian in an beih chu an chawlhsan ta a; Persia lal Daria lal kum hnihna thlengin chawlhsan a ni ta a.
Tempul sak hna an chhunzawm
1 Chutih lai chuan zâwlnei pahnih, Hagaia leh Idova fapa Zakaria-te chuan, Judai ram leh, Jerusalem-a Juda awmte hnênah Israel-te Pathian hmingin thu an sawi a. 2 Chutichuan, Sealtiela fapa Zerubabela leh Jozadaka fapa Jesua chuan Jerusalem-a Pathian in chu an han bei ṭan leh ta a; tin, an hnênah chuan anmahni ṭanpuiin Pathian zâwlneite chu an awm a. 3 Chu veleh chuan lui râl ram awptu Tatenaia leh Sethar-bozenaia leh an ṭhiante chu an hnênah chuan an kal a, an hnênah chuan heti hian an sawi a, “He in sa tûr leh he kulh tizo tûr hian tuin nge thu pe che u?” an ti a. 4 Tin, hetiang hian an hnênah, “Hemi in satute hming hi tute nge ni?” kan ti a. 5 Nimahsela, an Pathian mit chu Juda upate chungah chuan a fu a, Daria hnênah an thu chu thlena, chhânna a lo thlen hma loh chuan ram awptute chuan an bântîr chuang lo. 6 Lui râl lehlam awptu Tatenaia leh Sethar-bozenaia leh a ṭhian, lui râla awm Apharsak-hoten Lal Daria hnênah lehkha an thawn a, 7 hetiang hian an ziak a: “Lal Daria hnênah thlamuanna kim awm rawh se. 8 Hei hi lalin lo hre rawh se. Judai ramah Pathian ropui tak in, lung lian tak taka sak leh bang thinga rem, taima tak leh tluang taka an lo beih tawhnaah chuan kan kal a. 9 Chutichuan, ‘He in sa tûr leh he kulh tizo tûr hian tuin nge thu pe che u?’ tiin an upate kan zâwt a. 10 An hotu hmingte chu kan ziak a, kan hriat fiahtîr theih nân che an hmingte pawh chu kan zâwt a. 11 “Tin, anni chuan heti hian mi chhâng a, ‘Lei leh vân Pathian chhiahhlawhte kan ni a, kum kha leh chena sak, Israel lal ropui tak pakhat lo sak zawh tawh in chu kan sa ṭha leh a ni. 12 Amaherawhchu, kan pi leh puten vân Pathian chu thinrim khawpa an tihlungawi loh avângin, Kaldai mi Babulon lal Nebukadnezzara kutah a pe a, ani chuan he in hi a tichhia a, mite chu Babulon lamah a hruai a. 13 Nimahsela, Babulon kal Kura lal tirh kumin, Lal Kura chuan he Pathian in hi sak ṭhat leh thu a pe a. 14 Tin, Pathian ina rangkachak leh tangkaruaa siam bungbêl, Jerusalem-a Pathian ina mi Nebukadnezzaran a lâk chhuah, Babulon-a biak ina a lâk luhte chu Lal Kura chuan Babulon biak in ata a la chhuak a, mi pakhat a hming Sesbazzara, ram awptu atâna a siama chu a pe a. 15 Tin, a hnênah, “Hêng bungbêl hi la la, kal la, Jerusalem-a biak inah dah la; tin, biak in chu a hmun ngaiah sak ni rawh se,” a ti a. 16 Chutichuan, Sesbazzara ngei chu a kal a, Jerusalem-a biak in lungphûm chu a phûm a; chuta chin chu tûn thleng hian sak a ni ta reng a; nimahsela, la peih loh a la ni reng a,’ tiin. 17 Chutichuan, lal ṭha tih zâwng a nih chuan, chutiang chu a ni ngei emaw, Babulon-a lal sum ina mi chu han zawng sela; tin, lal Kura chuan Jerusalem-a biak in sak chungchâng thu-ah hian a duh dân min han hrilh rawh se,” tiin.
Lal Kura thupêk an chhar chhuak
1 Chutichuan, Lal Daria chuan thu a pe a, Babulon-a an ro dah khâwmna, lehkhabu dahna in chu an zawng ta a. 2 Tichuan, Media rama Akametha khuaa lal inah lehkhabu zial an hmu a, chutah chuan vawn ṭhat atân hetianga ziak hi a awm a: 3 “Jerusalem-a Pathian in chungchângah Lal Kura chuan a lal ṭan tirh kumin hetiang hian thu a pe a: ‘An inthawina thilhlanna in chu sak ṭhat leh ni se; a lungphûm pawh nghet taka rem ni rawh se. 4 A sân lam tawng sawmruk, a zau lam tawng sawmruk, lung lian pui pui tlar thuma rem hnuah thingphêk tlar khat siam tûr a ni a, a sakna hi lal sum aṭanga pêk tûr a ni. 5 Tin, Pathian ina rangkachak leh tangkaraw bungbêl Nebukadnezzaran Jerusalem biak in ata a lâk chhuaha Babulon-a a lâkte pawh pêk kîr ni sela, Jerusalem-a biak ina a hmun ngai tê vêka la kîrin, Pathian inah dah tûr a ni,’ tiin.
Lal Darian hna chhunzawm thu a pe
6 “Chuvângin, lui râl ram awptu Tatenaia leh Sethar-bozenaia leh lui râla awm an ṭhian Apharsak-hote u, intifihlîm rawh u khai. 7 He Pathian biak in an sa leh hi eng mah tih suh u; Juda-te awptu leh Juda upate chuan he Pathian in hi a hmun ngaiah sa rawh se. 8 Chu bâkah, hêng Juda upaten he Pathian in an sakna tûrah hian ṭanpui tûrin thu ka pe a che u. Hna a bahlah loh nân a sakna tûr pawh Euphrates lui khawthlang bial chhiah, lal sum tûr aṭanga pêk thuai tûr a ni. 9 Tin, vân Pathian tân hâlral thilhlan tûr an mamawh apiang, bâwngpatuai te, berâmpa te, berâmno te, buh chi te, uain te, hriak te, Jerusalem-a puithiamte thu ang zêlin ni tinin pêk ngei ngei tûr a ni; 10 chutichuan, vân Pathian chu rimtuia inthawinate an hlân thei ang a, lal leh a fapate chu an dam rei nân an ṭawngṭaisak thei bawk ang. 11 Tu pawh he thu tidanglam apiang, chumi avâng chuan a khanchhuk phawisaka, amah chu chutah chuan khai kâna, a in chu êk dûra siam tûr a ni ang tih thu ka pe bawk a ni. 12 Tin, chuta a hming awmtîrtu Pathian chuan Jerusalem-a Pathian in tihchhiat tuma he thu tidanglam tûra kut lek apiang, lal zawng zawng leh hnam zawng zawngte chu tiboral vek rawh se. Kei Daria hian thu ka pe a ni; zawm nghâl chiah tûr a ni.”
Tempul an hlân
13 Chutichuan, lui râl ram awptu Tatenaia leh Sethar-bozenaia leh a ṭhiante chuan Lal Daria lehkhathawn avângin chutiang chuan an ti ta nghâl a. 14 Tin, zâwlnei Hagaia leh Idova fapa Zakaria thusawi avângin Juda upate chuan tluang takin an sa a. Israel-te Pathian thupêk ang leh Persia lal Kura leh Daria leh Artazerzia-te thupêk ang chuan an sa a, an zo ta a. 15 Tin, in chu Lal Daria kum ruk a lal kum, Adar thla ni thum niah an zo va. 16 Tin, Israela thlah, puithiam te, Levi chite leh sal chhuakho dangte chuan chumi Pathian in hlanna chu lâwm takin an hmang a. 17 Tin, chumi Pathian in hlannaah chuan bâwngpa za, berâmpa zahnih, berâmno zali an hlân a; tin, Israel zawng zawng tân sual thawi nân Israel hnam zâtin kêlpa sâwm leh pahnih. 18 Mosia lehkhabua chuang angin Jerusalem-a Pathian rawngbâwl tûr chuan puithiamte leh Levi chite chu an pâwl ṭheuhvah an awmtîr a.
Kalhlên kût
19 Tin, sal chhuakhote chuan thla khatna, ni sâwm leh ni li ni chu kalhlên kût ni atân an hmang a. 20 Puithiamte leh Levi chite chu an inthian ho va, an za chuan an lo thianghlim ta a; chutichuan, kalhlên kûtna tûr chu sal chhuakho zawng zawng tân leh an unau puithiamte leh anmahni tân an talh a. 21 Tin, Israela thlah, sal ata lo chhuak lehte leh LALPA, Israel-te Pathian zawng tûra chu rama Pathian thu awih lo bawlhhlawhna ata inthiarfihlîma, anniho zâwm zawng zawng tate chuan an ei a, 22 chhang dawidim telh loh kût chu lâwm takin ni sarih an hmang a: LALPA chuan anni chu a tihlim a, Pathian, Israel-te Pathian in saknaa an kutte tihchaksak tûrin Assuria lal rilru chu an lamah a thlêktîr a ni.
Ezran Jerusalem a thleng
1 Tin, chûng thil hnuah chuan Persia lal Artazerzia lal laiin Ezra chu Babulon aṭangin a chho va; chu mi chu Seraia fa a ni a, chu mi chu Azaria fa a ni a, chu mi chu Hilkia fa a ni a, 2 chu mi chu Saluma fa a ni a, chu mi chu Zadoka fa a ni a, chu mi chu Ahituba fa a ni a, 3 chu mi chu Amaria fa a ni a, chu mi chu Azaria fa a ni a, chu mi chu Meraiotha fa a ni a, 4 chu mi chu Zerahia fa a ni a, chu mi chu Uzia fa a ni a, chu mi chu Bukia fa a ni a, 5 chu mi chu Abisua fa a ni a, chu mi chu Phinehasa fa a ni a, chu mi chu Eleazara fa a ni a, chu mi chu puithiam lal Arona fa a ni. 6 Ezra chu lehkhaziaktu, LALPA, Israel-te Pathian pêk Mosia dân thiam tak a ni a. LALPA a Pathianin a duhsakna avângin lal chuan a dîl zawng zawng chu a pe zêl a. 7 Tin, Lal Artazerzia kum sarih a lal kum chuan Israela thlah ṭhenkhat te, puithiam ṭhenkhat te, Levi chi ṭhenkhat te chu Jerusalem-ah an chho va. 8 Tin, lal chu kum sarih a lal kum, thla nganaah ani chu Jerusalem-ah a kal a. 9 Thla khatna, ni khat niah Babulon aṭangin a chhuak a, a Pathianin amah chu vêng zêlin thla ngana, ni khat niah Jerusalem a thleng a ni. 10 Ezra chuan LALPA dân chu hriaa zâwm tûr leh Israel-hote chu thuruatte leh rorêlte zirtîr tûrin a thinlung a siam tlat a.
Lal Artazerzian Ezra lehkha a pe
11 Tin, hei hi Lal Artazerzian puithiam Ezra, lehkhaziaktu, LALPA thupêk thu leh Israel mite tâna a thuruatte zirtu hnêna a lehkhathawn thu chu a ni: 12 Lalte lal Artazerzian puithiam Ezra, vân Pathian dân ziaktu chibai ka bûk e. 13 Ka ram chhûnga Israel mi zawng zawng leh an puithiamte leh Levi chite, Jerusalem-a mahni duh thua kal châkna nei apiangte chu, i hnêna kal tûrin thu ka pe e. 14 I kawl Pathian dân ang zêla Judai ram leh Jerusalem chanchin ngai chiang tûr leh, 15 Jerusalem-a awm Israel-te Pathian mahni duh thua lal leh a rorêltuten an pêk, tangkarua leh rangkachak keng tûra lal leh a rorêltu pasarihin an tirh che i ni a, 16 Babulon ram zawng zawnga i hmuh zât apiang tangkarua leh rangkachak, mahni duh thua mipuite leh puithiamten an pêk, Jerusalem-a an Pathian in atâna lâwm taka an pêkte nên; 17 chutichuan, hêng tangka hian bâwngpa te, berâmpa te, berâmno te, ei tûr leh in tûr thilhlan tûr nên i lei nghâl ang a; tin, Jerusalem-a in Pathian ina maichâmah chuan i hlân dâwn nia. 18 Tin, tangkarua leh rangkachak hman bângte chu in Pathian remtih zâwng âwmin nang leh i unauten ṭha in tih ang angin ti ang che u. 19 Tin, i Pathian in rawngbâwl nâna bungbêl an pêk che chu Jerusalem-a Pathian hnênah chuan hlân ang che. 20 Tin, i Pathian in tâna mamawh danga hman ṭûlna a awm phawt chuan lal sum ina mi hmang ang che. 21 Kei, lal Artazerzia ngeiin lui râla sum enkawltu zawng zawngte chu - Puithiam Ezra, vân Pathian dân ziaktuin a dîl apiang che u chu, 22 tangkarua chu talent za, buh chu bûk za, uain chu bath za, hriak chu bath za, chi chu eng zât tih pawh awm chuang lovin pe nghâl ang che u, tiin thu ka pe e. 23 Vân Pathianin thu a pêk apiang chu, chutiang chiahin vân Pathian in atân tih ni rawh se; thinurna chu lal leh a fate ram chungah hian engah tehlul nge a awm ang ni? 24 Tin, puithiamte, Levi chite, hla satute, kawngkhâr vêngtute, Nethin-hote, he Pathian ina rawngbâwltute hi chhiah te, thil neih man te, lei man te chu chawitîr loh tûr a nih kan hriattîr bawk a che. 25 Tin, nang Ezra, i kawl Pathianin finna a pêk che angin lui râla awmho zawng zawngte ro an rêlsak theih nân hotute leh rorêltute, i Pathian dân hre mite ruat la, hre lote chu zirtîr ang che u. 26 Tin, tu pawh i Pathian dân leh lal dân zâwm lo apiang chu thi khawpin emaw, ram ata hnawh chhuahin emaw, an bungrua lâksakin emaw, tân ina tântîrin emaw an chungah rorêlna a awm nghâl tûr a ni, a ti a.
Ezran Pathian a fak
27-28 Jerusalem-a LALPA in timawi tûra lal chu hetiang rilru puttîrtu leh, lal leh a rorêltu hma leh lal mi lian lâr tak takho hmaa ka chunga khawngaihna zâmtîrtu LALPA, kan pi leh pute Pathian chu fakin awm rawh se. Tin, LALPA ka Pathianin mi khawngaih a, mi tichak a; tichuan, ka hnêna han kal ve tûrin Israel zînga mi hotu deuh deuhte ka thlang khâwm ta a.
Sal tânna ata lo kîr lehte
1 Hêngte hi Lal Artazerzia lal laia Babulon ram ata ka hnêna kal chhoho, chhûngkaw puipa leh an thlahte hming chu a ni: 2 Phinehasa thlahte zîngah Gersoma; Ithamara thlahte zîngah Daniela; Davida thlahte zîngah Hatusa; 3 Sekania thlahte, Parosa thlahte zîngah Zakaria, mipa za leh sawmnga nên; 4 Pahath-moaba thlahte zîngah Zerahia fa Eliehoenaia, mipa zahnih nên; 5 Sekania thlahte zîngah Jahaziela fa, mipa zathum nên; 6 Adina thlahte zîngah Jonathana fa Ebeda, mipa sawmnga nên; 7 Elama thlahte zîngah Athalia fa Jesaia, mipa sawmsarih nên; 8 Sephatia thlahte zîngah Mikaela fa Zebadia, mipa sawmriat nên; 9 Joaba thlahte zîngah Jehiela fa Obadia, mipa zahnih leh sâwm leh pariat nên; 10 Selomitha thlahte zîngah Josiphia fa, mipa za leh sawmruk nên; 11 tin, Bebaia thlahte zîngah Bebaia fa Zakaria, mipa sawmhnih leh pariat nên; 12 tin, Azgada thlahte zîngah Hakatana fa Johanana, mipa za leh sâwm nên; 13 Adonikama thlahte zîngah (a hnuhnûng ber an ni a) an hming chu hêng hi a ni - Elipheleta te, Jeuela te, Semaia te, mipa sawmruk nên; 14 Bigvaia thlahte zînga Uthaia leh Zabuda, mipa sawmsarih nên.
Ezran Tempul rawngbâwl tûr Levia chi a khâwm
15 Ahava lama luang lui kamah chuan ka awm khâwmtîr a; chutah chuan ni thum kan awm a. Tin, mipuite leh puithiamte chu ka han en vêl a, Levia thlahte rêng rêng ka hmu ve ta lo va. 16 Chutichuan, puipa deuh deuh, Eliezera te, Ariela te, Semaia te, Elnathana te, Jariba te, Elnathana te, Nathana te, Zakaria te, Mesulama te ka chah a; zirtîrtu Joiariba leh Elnathana-te pawh. 17 Tin, Kasiphia hmuna hotu Idova hnênah ka tîr a, kan Pathian ina rawngbâwltu tûr rawn hruai tûrin Kasiphia hmuna Idova leh a unaute Nethin-ho hnêna an han sawi tûr ka hrilh a. 18 Tin, Pathian min khawngaihna avângin Issekela, Mahlia thlahte zîngah; Israela fapa, chu mi fapa Levia; Serebia, a fate leh a unau sâwm leh pariatte nên; 19 Hasabia, Meraria thlahte zîngah Jesaia, a unaute leh an fate sawmhnih nên; 20 Nethin-ho, Davida leh an mi lianten Levi chite rawngbâwl tûra an pêkte zînga mi Nethin-ho zahnih leh sawmhnihte nên min hruaisak a. An zaa hming ziak ṭheuh a ni.
Ezra hova chaw ngheia ṭawngṭai
21 Chutichuan, kan Pathian hmaa kan intihtlâwma, a hnêna keini leh kan fate leh kan bungrua zawng zawngte nêna tluang taka kal theihna dîl tûrin, Ahava luiah chuan chaw nghei thu ka puang a. 22 “Kan Pathian duhsakna chu amah zawngtute zawng zawng chungah an ṭhatna tûrin a awm zêl a; a thiltihtheihna leh a thinurna erawh chu amah hawisante chungah a awm zêl ṭhîn,” tia lal hnêna kan lo sawi tawh avângin, kalkawnga kan hmêlmate laka min ṭanpui tûra sipai leh sakawr chung chuang mite lal dîl chu zahthlâk ka ti si a. 23 Chutichuan, chaw kan nghei a, chumi chu kan Pathian kan dîl chiam a; kan dîlna chu min ngaihthlâksak a.
Tempul sak nân thilpêk
24 Chutichuan, puithiam tûpa deuh deuhte zînga mi sâwm leh pahnih, Serebia leh Hasabia leh an unaute zînga mi sâwm ka tihrang a; 25 tin, lal leh a rorêltute leh a mi liante leh chuta awm Israel-te zawng zawngin kan Pathian in atân an thilhlan, tangkarua te, rangkachak te, bungbêlte chu ka bûk a, ka hlân a; 26 ka bûka an kuta ka hlan chu tangkaraw talent zaruk leh sawmnga; tangkaraw bungbêl talent za; rangkachak talent za; 27 rangkachak berhbu sawmhnih, darik sângkhat ṭheuh; dâr tle mi mawi tak, rangkachak ang maia hlu bungbêl pahnih a ni a. 28 Tin, an hnênah, “LALPA tâna tihthianghlim in ni a, bungbêlte pawh tihthianghlim a ni; tangkarua leh rangkachakte hi LALPA, in pi leh pute Pathian tâna mahni duh thua hlan vek a ni. 29 Puithiam tûpa deuh deuhte leh Levi chite leh Israel mite chhûngkaw puipa hmaa Jerusalem-a LALPA ina pindana in bûk hma loh chuan vêng ula, kawl rawh u,” ka ti a. 30 Chutichuan, puithiamte leh Levi chite chuan Jerusalem-a kan Pathian ina ken tûrin, tangkarua leh rangkachak leh bungbêl bûkte chu an la ta a.
Jerusalem-a kîr leh thu
31 Chutichuan, Jerusalem-a kal tûrin thla khatna, ni sâwm leh ni hnih niah Ahava lui aṭang chuan kan chhuak ta a; tin, kan Pathianin min khawngaih a, hmêlma lak ata leh kawnglaka châng rutute lak ata chu min humhim zêl a. 32 Tin, Jerusalem chu kan han thleng a, chutah chuan ni thum kan hahchâwl a. 33 Tin, a ni li ni chuan tangkarua te, rangkachak te, bungbêlte chu kan Pathian inah bûkin puithiam Uria fapa Meremotha kutah kan hlân a; tin, a hnênah chuan Phinehasa fapa Eleazara a awm a; tin, an hnênah chuan Levi chi Jesua fapa, Jozabada leh Binuia fapa Noadia te an awm a; 34 chhiar vek leh bûk vek a ni a. A bûk zât chu chumi lai la la chuan an ziak vek a. 35 Sal chhuakhote chuan Israel-te Pathian hnênah hâlral thilhlan an hlân a, Israel zawng zawng pualah bâwngpa sâwm leh pahnih, berâmpa sawmkua leh paruk, berâmno sawmsarih leh pasarih; sual thawi nân kêlpa sâwm leh pahnih. Hêng zawng zawng hi LALPA hnêna hâlral thilhlan vek a ni. 36 Tin, lal thuruatte chu lal upate leh lui râl ram awptute chu an hrilh a; tin, anni chuan mipuite chu ṭanpuiin Pathian in sak chu an chhunzawmpui ta a.
Ezran inneih pawlhte a thliar
1 Tin, chûng thiltih zawh chuan mi liante chuan, “Israel mite leh puithiamte leh Levi chite chu he ram mite lakah hian inthiarfihlîm chuang lovin, Kanaan-ho te, Hit-ho te, Periz-ho te, Jebus-ho te, Amon-ho te, Moab-ho te, Aigupta-ho te, Amor-hote thiltih tenawm tak an tih ang zêl an ti ve a. 2 An fanute chu anmahni leh an fapaten an nei ta mai a; chutichuan, chi thianghlim chu he ram mite nên hian an chawhpawlh a. A ni, mi liante leh rorêltute chu he bawhchhiatna thu-ah hian a tûpa berte an ni,” tiin mi rawn hrilh a. 3 Tin, chu thil chu ka hriat chuan ka kawr leh ka puan ka pawt thlêr a, ka sam leh ka khabe hmul ka pawt thla a, a ngaihna hre lovin ka ṭhu ta ngawih ngawih mai a. 4 Chutichuan, sal chhuakho bawhchhiatna avânga Israel-te Pathian thua khûr apiangte chu ka hnênah an lo kal khâwm a; tlai lam inthawi hun thlengin a ngaihna hre lovin ka ṭhu ta ngawih ngawih a. 5 Tin, tlai lam inthawi hun chuan ka lungngaihna ata ka kawr leh ka puan thlêr chung chuan ka tho va; tin, ka ṭhingṭhi a, LALPA ka Pathian lamah ka bân ka phar a. 6 Tin, “Aw ka Pathian, i lam lo hawi hi ka zak a, ka hmai te a sen ṭâwn ṭâwn a ni, ka Pathian; kan bawhchhiatnate chu min chîm pil khawpin a pung a, kan thiam lohna chuan vân a tawng a. 7 Kan pi leh pute chenin tûn thleng hian kan thiam lo let dêr a ni; kan bawhchhiatna avângin kan lalte, kan puithiamte nên ram dang lal man te, khandaiha thah te, sala tân te, rawk te, mualphonate kan tâwk a, vawiina kan awm ang hian. 8 Tin, tûnah hian kan Pathian chuan kan mitte a tihvâra, sala kan awm min tihharha, a hmun thianghlimah chuan min awm ngheh tlattîrna tûrin a la awm chhunte chu min chhuahtîrin, LALPA kan Pathian khawngaihna kan dawng rih mai a ni a. 9 Chhiah khua zawng kan ni ngei mai a; nimahsela, kan Pathian chuan chhiah khua kan nih chhûng pawhin min thlahthlam chuang lo va, min tiharh tûr leh kan Pathian in din tûr leh, Judai ram leh Jerusalem-a kulh nei tûrin, Persia lalte mit hmuhah chuan kan chungah khawngaihna a zâm zautîr ta zâwk a. 10 Aw kan Pathian, tûnah hian eng nge kan sawi tâk ang? I thupêkte chu kan hawisan ta si a. 11 I chhiahhlawh zâwlneite hmanga, ‘In va kalna tûr, in ram luah tûr chu a rama mi awmte bawlhhlawhna avângin a bawlhhlawh a, kil tin kil tang an tenawmnain a titenawm vek a ni. 12 Chuvângin, in fanute chu an fapate neihtîr suh ula, an fanute chu in fapate neihtîr hek suh ula, an thawvenna leh an hmuingîlna rêng rêng zawnsak hek suh ula, in lo chaka, chumi rama thil ṭha chu in eia, kumkhuaa in fate in inrochun theih nân,’ tia thu i pêkte chu. 13 Tin, kan thil tihsual avâng leh kan thiam lohna nasa tak avânga kan chunga hetiang thil a lo awma, nang kan Pathianin kan bawhchhiatnain a phu aia nêpa min hrem hnua la awm cheute min la nei tih hre reng chung siin, 14 i thupêkte chu kan bawhchhe lehin, hêng thil tenawm titute nên hian kan la inneih pawlh cheu dâwn em ni? A bâk rêng awm lo leh pumpelh rêng pawh awm lova min tiboral khawpin kan chungah i thinur hial dâwn lâwm ni? 15 Aw LALPA, Israel-te Pathian, nang chu i fel a, vawiinah hian tlêm zawng min la zuah hi. Ngai teh, thiam lovin i hmaah kan awm a, hemi avâng hian tu mah i hmaa ding thei rêng rêng kan awm lo a ni,” ka ti a.
Inneih pawlh tawh loh dân tûr
1 Tin, Pathian in lam hawia bawkkhupa ṭap chunga Ezra a ṭawngṭaia, thupha a chawi lai chuan a hnênah Israel mi, mi tam tak, a hmei a pain naupangte nên an lo kal khâwm chiam a; mipuite chu nasa takin an ṭap a. 2 Tin, Elama thlah zînga mi Jehiela fapa Sekania chuan Ezra hnênah, “Kan Pathian chungah chuan thil chu kan tisual ta ngei mai a, hemi rama hnam dang hmeichhiate chu nupuiah kan nei a; nimahsela, Israel mite tân hemi chungchâng thu-ah hian beiseina a la awm cheu a ni. 3 Chutichuan, hawh u, ka pu leh kan Pathian thupêka khûr apiangte remruat ang zêlin, chûng mipuite zawng zawng leh an laka piang apiangte chu ṭhen tûrin kan Pathian hnênah thu i thlung teh ang u; tin, chu chu dân ang zêla tih ni rawh se. 4 Tho rawh khai, hemi hi i puala lum a ni a; keini pawh i lama ṭang kan ni a; huai takin awm la, ti mai rawh,” tiin a tihpui a. 5 Chutichuan, Ezra chu a tho va, puithiam tûpa deuh deuhte leh Levi chite leh Israel mi zawng zawngte chu, chu thu anga ti tûr chuan chhia a chhamtîr a. Chutichuan, chhia chu an chham ta a. 6 Chutichuan, Ezra chu Pathian in lam a hawi chu a tho va, Eliasiba fapa Jehohanana pindanah a lût a; tin, chutah chuan zankhuain sal chhuakte thil tihsual avânga lungngaiin eng mah a eiin a in lo va. 7-8 Tin, Judai ram zawng zawng leh Jerusalem-a sal chhuakho zawng zawng hnênah chuan Jerusalem-a inkhâwm veka, tu pawh an mi liante leh an upate thupêk anga ni thum chhûnga lo kal lo apiangte chu an bungrua zawng zawng hrênsak veka, anmahni pawh chu sal chhuakho zîng ata hnawh chhuah tûr a ni ang, tih thu an puang a. 9 Chutichuan, Juda mi leh Benjamin mite chu chumi ni thum chhûng chuan Jerusalem-ah an inkhâwm vek a. Chu chu thla kuana, ni sawmhnih ni a ni a; Pathian in kawt zau laiah chuan mipui zawng zawng chu an ṭhu a, chûng thu avâng leh ruahpui nasa tak a sûr avâng chuan an khûr an khûr mai a. 10 Tin, puithiam Ezra chu a ding a, an hnênah, “Thil in lo tisual ta a, Israel mite thiam lohna belhchhahin hnam dang hmeichhiate nupuiah in nei a. 11 Chuvângin, LALPA, in pi leh pute Pathian hnênah chuan thupha chawi ula, a lâwm zâwng ti tawh rawh u khai; tin, he rama hnam dang leh an hmeichhiate lak ata hi inthiarfihlîm rawh u,” a ti a. 12 Chutichuan, mipui zawng zawngte chuan an chhâng a, ring takin, “Kan chungchâng thu chu i sawi ang tak chuan kan ti ngei tûr a ni. 13 Amaherawhchu, mi kan tam si a; ruah sûr hun lai a lo ni bawk si a, pâwnah hian kan ding reng thei lo ve. Tin, ni hnih khat thila han tih mai mi a ni bawk hek lo, hemi thu-ah hian kan lo bawhchhe nasa hle si a. 14 Mipui zawng zawng aiah kan mi liante ruat ni sela, kan chunga Pathian thinurna nasa tak hi a kiana, hemi thu hi kan tihfel hma loh chuan, kan khuaa hnam dang hmeichhe neitute zawng zawng chu khaw tina an upate leh rorêltute nên an lo kal hun bi ruatah lo kal zêl rawh se,” an ti a. 15 Asahela fapa Jonathana leh Tikva fapa Jahzeia-te chauhvin hemi thu hi an kalh a; tin, Levi chi Mesulama leh Sabethaian an ṭanpui a. 16 Tin, sal chhuakho chuan chutiang chuan an ti ta a. Tin, puithiam Ezra chuan chhûngkaw puipate zînga mi an hminghmerh vekin a ruat a; tin, thla sâwmna, ni khat niah chumi thu chu ngaihtuahin an inkhâwm a. 17 Tin, thla khatna, ni khat niah hnam dang hmeichhe neitute chu an tifel ta a.
Hnam dang nupui neih chungchâng
18 Tin, puithiam fate zînga hnam dang hmeichhia nupuia lo nei an hriatte chu: Jesua leh a unaute zîngah Jozadaka fapa leh a unau - Maaseia te, Eliezera te, Jariba te, Gedalia te. 19 Anni chuan an nupuite ṭhen tûrin thu an thlung a; tin, an thiam loh avângin an thiam lohna chu berâm rual zînga mi berâmpa pakhatin an thawi a. 20 Tin, Imera thlahte zîngah Hanania leh Zebadia; 21 Harima thlahte zîngah Maaseia te, Elija te, Semaia te, Jehiela te, Uzia te. 22 Pasura thlahte zîngah Elioenaia te, Maaseia te, Ismaela te, Nethanela te, Jozabada te, Elasa te an ni a. 23 Tin, Levi chite zîngah Jozabada te, Simeia te, Kelaia te (Kelita an ti bawk ṭhîn), Pethahia te, Juda te, Eliezera te an ni a. 24 Tin, hla satute zîngah Eliasiba a ni a; kawngkhâr vêngtute zîngah Saluma te, Telema te, Uria te an ni a. 25 Tin, Israel-hote zîngah Parosa thlaha mi Ramia te, Izia te, Malkija te, Mijamina te, Eleazera te, Malkija te, Benaia te; 26 Elama thlaha mi Matania te, Zakaria te, Jehiela te, Abdia te, Jeremotha te, Elija te; 27 Zatua thlaha mi Elioenaia te, Eliasiba te, Matania te, Jeremotha te, Zabada te, Aziza te; 28 Bebaia thlaha mi Jehohanana te, Hanania te, Zabaia te, Athlaia te; 29 Bania thlaha mi Mesulama te, Maluka te, Adaia te, Jasuba te, Seala te, Jeremotha te; 30 Pahath-moaba thlaha mi Adna te, Kelala te, Benaia te, Maaseia te, Matania te, Bezalela te, Binuia te, Manasea te; 31 Harima thlaha mi Eliezera te, Isija te, Malkija te, Semaia te, Simeona te, 32 Benjamina te, Maluka te, Semaria te; 33 Hasuma thlaha mi Matenaia te, Matata te, Zabada te, Elipheleta te, Jeremaia te, Manasea te, Simeia te; 34 Bania thlaha mi Ma-adaia te, Amrama te, Uela te, 35 Benaia te, Bedeia te, Keluhia te, 36 Vania te, Meremotha te, Eliasiba te, 37 Matania te, Matenaia te, Jaasua te, 38 Bania te, Binuia te, Simeia te, 39 Selemia te, Nathana te, Adaia te, 40 Maknadebaia te, Sasaia te, Saraia te, 41 Azarela te, Selemia te, Semaria te, 42 Saluma te, Amaria te, Josefa te; 43 Neboa thlaha mi Jeiela te, Matithia te, Zabada te, Zebina te, Idova te, Joela te, Benaia te an ni. 44 Hêng zawng zawng hian hnam dang nupuiah an nei a; tin, ṭhenkhat chuan chûng an nupuite lakah chuan fate an nei a.
Nehemian Jerusalem a vei
1 Hakalia fapa Nehemia thute chu. Heti hi a ni a, kum sawmhnihna, Kisleu thlaa lal khawpui Susan-a ka awm laiin, 2 ka unau pakhat Hanania leh Judai ram ata mi ṭhenkhat an lo kal a; tin, Juda-ho sala tâng chhuak la damte chanchin leh Jerusalem chanchin ka zâwt a. 3 Tin, ka hnênah, “Sala tâng chhuak, chumi rama dama la awmte chu chan chhe tak leh sawichhiatin an awm a. Jerusalem kulh chu a chim rem rum tawh a, a kawngkhârte pawh a kâng asin,” an ti a. 4 Tin, heti hi a ni a, chûng thu chu ka hriat chuan ka ṭhu chawt a, ka ṭap a, ni eng emaw zât chu lungngaiin ka awm a; tin, chaw ka nghei a, vân Pathian hmaah ka ṭawngṭai a, 5 “Aw LALPA, vân Pathian, Pathian ropui leh hlauhawm, nangmah hmangaiha i thupêk pawmtute chunga thuthlung hlena khawngaihna tilangtu, 6 Israela thlahte sualna, i chunga kan sualna thupha ka chawi chhûng hian i beng lo chhiin i mit lo meng la, i chhiahhlawh ṭawngṭaina, i hnêna a chhûn a zâna i chhiahhlawh Israela thlahte ka ngensakna hi lo ngaithla teh ang che; kei leh ka pa chhûngte chu kan lo sual ta si a. 7 I chungah ṭha lo takin thil kan lo ti ta a, i chhiahhlawh Mosia hnêna i pêk, thupêkte, dânte, rorêlte chu kan lo zâwm ta lo va. 8 I chhiahhlawh Mosia hnêna, ‘In bawhchhiat chuan hnam tin zîngah ka tiṭaiṭâm ang che u a; 9 amaherawhchu, ka lam in lo hawi leha, ka thupêkte in pawma in zawm chuan, in zînga mi vân tâwp thleng pawha hnawh chhuah awm mah sela, chûng ata pawh chu ka kai khâwm leh ang a, ka hming ka awmtîrna tûra ka ruat hmunah chuan ka hruai leh ang,’ tia thu i pêk kha khawngaih takin hre reng ang che. 10 Tin, hêngho hi i chhiahhlawhte leh i mite, i thiltihtheihna nasa tak leh i kut chak taka i tlan chhuahte an ni a. 11 Aw LALPA, khawngaih takin i chhiahhlawh ṭawngṭaina leh i hming ṭih lâwm zâwnga neih, i chhiahhlawhte ṭawngṭainaah hian i beng lo chhi ang che; tin, vawiinah hian i chhiahhlawh hi min hlawhtlintîr la, he mi mit hmuhah hian khawngaih takin zahngaihna dawntîr ang che,” ka ti a. Kei chu lal no hlântu ka ni si a.
Nehemia Jerusalem-ah a kal
1 Tin, heti hi a ni a, Lal Artazerzia kum sawmhnih a lal kum, Nisan thlaah uain an rawn hlui hnuin uain chu ka la a, lal chu ka pe a. Tûn hma lam chuan a hmaah lungngai hmêl ka pu ngai lo va. 2 Tin, lal chuan ka hnênah, “I damlo pawh a ni si lo va, engtizia nge lungngai hmêl i put chu le? Thil dang a ni lo vang, i rilru lam a lungngai a nih hi maw,” mi ti a. Chutichuan, ka hlau ta êm êm mai a. 3 Tin, kei chuan lal hnênah, “Lal chu kumkhuain dam reng rawh se! Mi thlahtute thlân awmna khua chu a ramin a kawngkhârte chu a kâng vek si a, lungngai hmêl pu lo thei em ka nih ang?” ka ti a. 4 Chutichuan, lal chuan ka hnênah, “Eng nge ni i dîl?” a ti a. Chutichuan, vân Pathian hnênah ka ṭawngṭai ta a. 5 Tin, lal hnênah chuan, “Lal remtih zâwng a niha, i chhiahhlawh hian i mit ka lo tlun ṭhin chuan, Judai ramah mi thlahtute thlân awmna khuaah mi kaltîr la, khua chu ka va din leh ang e,” ka ti a. 6 Tin, lal chuan ka hnênah (lalnu pawh a kiangah chuan a ṭhu a), “Eng chen nge i thang ang a, eng tikah nge i lo haw leh ang?” a ti a. Chutichuan, lal chuan lâwm takin mi kaltîr ta a; tin, keiin hunbi ka tiam a. 7 Chu chauh chu ni lovin lal hnênah chuan, “Lal remtih zâwng a nih chuan, lui râla rorêltute hmuh atân Judai ram ka thlen thlenga mi kaltîr zêl phalna tûrin lehkhate mi pe la; 8 tin, lal ngaw hâk vêngtu Asapha hmuh tûrin in vênna kulhbîng kawngkhâr rel atân te, khawpui kulh atân te, ka va luah tûr in atân te thing mi pêk theihna tûrin lehkha mi pe bawk rawh,” ka ti a. Tin, ka Pathianin mi duhsak avângin lal hnêna ka dîl ang zêlin mi pe a. 9 Chutichuan, lui râla rorêltute hnên chu ka han thleng a, lal lehkhate chu ka han pe a. Tin, lal chuan ka hnênah sipai hotute leh sipai sakawr chung chuang mite a kaltîr ve a ni. 10 Tin, Horon mi Sanbalata leh Amon mi, chhiahhlawh Tobia-ten an lo hriat chuan, Israela thlahte thawvenna ngaihtuah tûrin mi an lo kal zu nia, tiin an lo lungni lo hle mai a. 11 Chutichuan, Jerusalem ka han thleng a, ni thum ka han awm phawt a. 12 Tin, zânah chuan ka tho va, kei leh mi dang tlêm tête nên; Jerusalem tâna ka tih tûr ka Pathianin ka rilrua a dah chu tu mah ka hrilh lo va, ka chuanna sa ngawt lo chu sa dang kan keng lo va. 13 Tin, zânah chuan Ruam Kawngkaah ka chhuak a, Dragon Tuichhunchhuah lam leh Bawlhhlawh Kawngka lamah ka kal a, Jerusalem kulh chim leh a kawngkhâr kângte chu ka en vêl a. 14 Tin, Tuichhunchhuah Kawngka leh Lal Dîl thlengin ka kal zêl a; nimahsela, ka chuanna sa kal tlang theihna rêng rêng a awm lo va. 15 Chutichuan, zânah lui ka zawh chho va, kulh chu ka en a; tin, ka lêt leh a, Ruam Kawngkaah chuan ka lût a, chutiang chuan ka haw leh ta a. 16 Rorêltute chuan khawiah nge ka kala, eng nge ka tih pawh an hre lo; tin, Juda-te, puithiamte, mi ṭhate, rorêltute leh mi dang hnathawktu tûr rêng rêng pawh ka la hrilh rih lo bawk a. 17 Chutichuan, an hnênah, “Kan chan a chhiatzia hi in hmu a, Jerusalem a ram tih te, a kawngkhârte a kâng tih te pawh in hria a; hawh u, sawichhiat kan nih tawh loh nân Jerusalem kulh chu i din leh ang u,” ka ti a. 18 Tin, ka Pathian mi duhsak thu te ka hrilh a, ka hnêna lal thusawite pawh. Tin, anni chuan, “I tho vang u khai; i din teh tak ang u,” an ti a. Chutichuan, chu hna ṭha thawk tûr chuan an kut an tichak a. 19 Amaherawhchu, Horon mi Sanbalata leh Amon mi, chhiahhlawh Tobia leh Arab mi Geseman an hriat chuan, min nuihzatbûr a, min hmusit a, “In thiltih hi engtizia nge ni? Lal chungah in hel elo ni?” te min ti a. 20 Chutichuan, anni chu ka chhâng a, an hnênah, “Vân Pathian chuan mi tihmuingîl ang a; chutichuan, keini a chhiahhlawhte chu kan tho vang a, kan din ang a; nangni erawh chuan Jerusalem-ah hian chanvo emaw, thuneihna emaw, hnuhma emaw in nei lo rêng rêng,” ka ti a.
Jerusalem kulh din ṭhat leh thu
1 Chutichuan, puithiam lal Eliasiba chu a unau puithiamte nên chuan an tho va, Berâm Kawngka chu an siam a; an tithianghlim a, a kawngkhârte an siam a; Hamea in sâng thlengin an tithianghlim a, Hananela in sâng thleng chuan. 2 Tin, a dawt chu Jeriko miten an siam a. Tin, anmahni dawt chu Imria fapa Zakuran a siam a. 3 Tin, Sangha Kawngka chu Hasena fapaten an siam a; a relte an dah a, a kawngkhârte an rel a, a kalhnate leh a bahnate an rem a. 4 Tin, anni dawt chu Hakoza fa Uria fapa Meremothan a siam ṭha a. Tin, anni dawt chu Mesezabela fa Berekia fapa Mesulaman a siam ṭha a. Tin, anni dawt chu Baana fapa Zadokan a siam ṭha a. 5 Tin, anni dawt Teko-hovin an siam ṭha a; nimahsela, an mi liante chuan an hotu hnaah chuan an ring an rawlh ve duh lo. 6 Tin, Kawngka Hlui chu Pasea fapa Joiada leh Besodeia fapa Mesulaman an siam ṭha a, a relte an dah a, a kawngkhârte an rel a, a kalhnate leh a bahnate an rem a. 7 Tin, anni dawt chu Gibeon mi Melatia leh Meronoth mi Jadonan lui râl ram awptu thuhnuaia awm Gibeon mi leh Mizpa mite nên an siam ṭha a. 8 A dawt chu rangkachak chhertu zînga mi Harhaia fapa Uzielan a siam ṭha a. Tin, a dawt lehah chuan rimtui siamtu zînga mi Hananian a siam ṭha a, Kulh Chhah thlengin Jerusalem chu an siam ṭha a. 9 Tin, anni dawt chu Jerusalem bial chanve hotu Hura fapa Rephaian a siam ṭha a. 10 Tin, anni dawt chu Harumapha fapa Jedaian a in zâwn a siam ṭha a. Tin, a dawt chu Hasabneia fapa Hatusan a siam ṭha a. 11 Harima fapa Malkija leh Pahath-moaba fapa Hasuba-te chuan hmun dang leh Meipui Chhehna In sâng an siam ṭha a. 12 Tin, a dawt chu Jerusalem bial chanve hotu Hallohesa fapa Saluman a fanute nên an siam ṭha a. 13 Ruam Kawngka chu Hanuna leh Zanoa-hoten an siam ṭha a; an siam a, a kawngkhârte an rel a, a kalhnate leh a bahnate an rem a; tin, Bawlhhlawh Kawngka thlengin kulh tawng sângkhat an siam bawk a. 14 Bawlhhlawh Kawngka erawh chu Beth-hakkerem bial hotu Rekaba fapa Malkijan a siam ṭha a; a siam a, kawngkhârte a rel a, a kalhnate leh a bahnate a rem a. 15 Tin, Mizpa bial hotu Kol-hozea fapa Sallunan Tuikhur Kawngka chu a siam ṭha a; a siam a, a khuh a, a kawngkhârte a rel a, a kalhnate leh a bahnate a rem a; tin, Lal Huan kianga Sela Dîl hungna chu Davida khua aṭanga chhuk thla kailâwn thlengin a siam ṭha bawk a. 16 Tin, a dawt chu Azbuka, Beth-zur bial chanve hotu fapa Nehemia chuan Davida thlân zâwn leh dîl khuah leh mi huaisente in thlengin a siam ṭha a.
Levia chi kulha hnathawkte
17 A dawt chu Levi-hovin an siam ṭha a, Bania fapa, Rehuma te hovin. A dawt chu Keila bial chanve hotu Hasabia chuan ama bial hmingin a siam ṭha a. 18 A dawt chu an unauten an siam ṭha a, Keila bial chanve hotu Henadada fapa Bavaia-tehovin. 19 Tin, a dawt chu Mizpa hotu Jesua fapa Ezera chuan hmun dang, kulh kawi ṭannaa râlthuam dahna pan chhohna zâwn a siam ṭha a. 20 A dawt chu Zabaia fapa Baruka chuan ṭhahnemngai takin hmun dang, kulh kawi ṭanna aṭanga puithiam lal Eliasiba in kawngkhâr thlengin a siam ṭha a. 21 A dawt chu Hakoza fa, Uria fapa Meremothan hmun dang, Eliasiba in kawngkhâr aṭanga Eliasiba in tâwp thlengin a siam ṭha a.
Puithiamho kulha hnathawkte
22 Tin, a dawt chu a chhehvêla puithiamhovin an siam ṭha a. 23 Anni dawt chu Benjamina leh Hasuban an in zâwn chu an siam ṭha a. An dawt chu Anania fa Maaseia fapa Azarian a in kiang a siam ṭha a. 24 A dawt chu Henadada fapa Binuian hmun dang, Azaria in aṭanga kulh kawi ṭanna, a kil thlengin a siam ṭha a. 25 Uzaia fapa Palala chuan kulh kawi ṭanna zâwn leh tân in kianga lal in chungnung zâwk aṭanga lawr in sâng zâwn a siam ṭha a. A dawt chu Parosa fapa Pedaian a siam ṭha a. 26 (Nethin-ho chu chhak lampanga Tui Kawngkhâr zâwn thleng leh in sâng lawr thlengin Ophel-ah an awm a.)
Hnathawktu dangte
27 A dawt chu Teko-hovin hmun dang, in sâng lian pui lawr zâwn leh Ophel kulh thlengin an siam ṭha a. 28 Sakawr Kawngka chung lam chu puithiamhoten mahni in zâwn ṭheuh an siam ṭha a. 29 Anni dawt chu Imera fapa Zadokan a in zâwn a siam ṭha a. Tin, a dawt chu chhak lam kawngkhâr vêngtu Sekania fapa Semaian a siam ṭha a. 30 A dawt chu Selemia fapa Hanania leh Zalapha fapa parukna Hanuna-te chuan hmun dang an siam ṭha a. A dawt chu Berekia fapa Mesulaman a awmna zâwn a siam ṭha a. 31 A dawt chu rangkachak chhertu zînga mi Malkija chuan Hamipkad Kawngkhâr zâwn Nethin-ho in leh sumdâwngho in thleng leh a kil pan chhohna thlengin a siam ṭha a. 32 Tin, a kil pan chhohna leh a Berâm Kawngka inkâr chu rangkachak chhertu leh sumdâwnghoten an siam ṭha a.
Nehemian kalhtute a hmin
1 Nimahsela, heti hi a ni a, Sanbalatan kulh kan siam tih a han hriat chuan a thinur a, nasa takin a thin a tirim a, Juda-te a chêksawlh ta a. 2 Tichuan, a unaute leh Samari sipaite hmaah chuan thu a sawi a, “Hêng Juda mi chhiaṭhahote hian eng nge maw an tih le? Khawpui sak ṭhat an tum em ni vei le? An inthawi tehlul ang maw? Ni khat thil thu-ah an puitlin tehlul ang maw? Bawlhhlawh awm khâwm mai mai ata lung kâng chhe tawh si an din thar leh ang maw?” a ti a. 3 Tin, a kianga Amon mi Tobia chuan, “Han din teh rêng se; sihal pawh han lâwn sela an lung kulh chu a tichim mai ang chu,” a ti a. 4 Aw kan Pathian, ngai teh, hmuhsitin kan awm hi; an mi sawichhiatna chu anmahni lu chungah lêttîr la, anni pawh khawii ramah emaw mualpho takin tântîr reng ang che! 5 An bawhchhiatna chu khuh suh la, an sualnate chu i hma ata thai bovin awmtîr suh ang che; kulh siamtute hmaah an tihthinur che hi. 6 Chutichuan, kulh chu kan siam a; a sân lam chanvein kulh zawng zawng chu kan zawm chhuak vek a; mipuite chuan thawh châkna rilru an pu hle mai a ni. 7 Amaherawhchu, heti hi a ni a, Sanbalata te, Tobia te, Arab mite, Amon mite leh Asdod miten Jerusalem kulh chu siam ṭhat a ni zêl tih leh, a chhe laite kan thawm ṭan tih an hriat chuan an thinur ta hle mai a; 8 tichuan, Jerusalem chu rawn beiha buaina rawn siam an phiar tlâng ta a. 9 Nimahsela, anmahni avângin kan Pathian hnênah kan ṭawngṭai a, chhûn leh zânah an laka vêngtu kan dah reng a. 10 Tin, Juda chuan, “Thawktute tha a chau zo tawh a, bawlhhlawh lah a nasa si a; kulh chu ka siam thei dâwn ta lo a nih hi,” a ti a. 11 Tin, kan hmêlmate lah chuan, “An zînga kan han kala, kan han thaha, hna chu kan han tihtâwpsak hma chuan an hre lo vang a, min hmu hek lo vang,” an lo ti bawk si a. 12 Nimahsela, Juda mi an kianga chêngte chuan kan hnêna lo kalin kan hmêlmate min phiarna chu min hrilh fo bawk a. 13 Chu vâng chuan kulh phên, a hniam lai ber, hmun thawthâwl takahte mipuite chu a chhûng chhûngin an khandaih te, an fei te, an thal ngulte kengin ṭanhmun ka khuartîr a. 14 Tin, ka han en vêl a, ka tho va, mi ṭhate leh rorêltute leh mipui dangte hnênah chuan, “Anmahniho chu hlau hauh suh ula, LALPA ropui tak leh hlauhawm tak mai chu hre rengin in unaute, in fapate, in fanute, in nupuite, in inte hum tûrin bei rawh u,” ka ti a. 15 Tin, heti hi a ni a, kan hmêlmaten kan lo hria tih leh, an thiltih tum chu Pathianin engmahlovah a siam tih an hriatin, kulh lamah mahni hnathawhna ṭheuhvah kan kal leh ta vek a. 16 Tin, heti hi a ni a, chuta chin chu kan tlangvâlho zâtvete chuan hna an thawk a; tin, a zâtvete chuan feite, phawte, thal ngulte, âwmphawte chu an kawl a; tin, rorêltu chuan Juda chhûngte, kulh siamtu zawng zawngte chu an ṭan tlat a. 17 Kulh siamna tûr hmanraw phurtute pawhin an kut khing khatin hna an thawk a, khing khatin hriamhrei an keng a; 18 a siamtute chuan an khandaih an pai ṭheuh va, chutiang chung chuan an siam a ni. Tin, tawtawrâwt hâmtu chu ka kiangah a awm a. 19 Tin, mi ṭhate leh rorêltute leh mipuite hmaah chuan, “Hna chu a nasain a zau êm mai a, kulhah hian kan darhsarhin kan inhlat hle mai si a; 20 tawtawrâwt ri in hriatna lam apiangah chuan, chutah chuan kan hnênah lo tlân khâwm ula; kan Pathianin min dosak ang,” ka ti a. 21 Chutiang chuan hna chu kan thawk a; tin, a zâtve chuan khawfîngchah aṭangin arsi lan thlengin feite chu an kawl reng a. 22 Chutiang bawkin chumi lai vêk chuan mipuite hnênah, “Zâna min vênga chhûnlâwna hnathawk atân tu pawh an chhiahhlawhte nên Jerusalem chhûngah riak vek rawh se,” ka ti a ni. 23 Chutichuan, kei pawh, ka unaute pawh, ka tlangvâlte pawh, vêngtu mi zui ṭhînte pawh, tu mah rêng rêngin kan silhfên kan hlîp lo va, hriamhrei inbel chung ṭheuhvin tui lamah chuan kan kal ta ṭhîn a.
Rethei tihduhdah
1 Chutichuan, mipuite leh an nupuite chu an unau Juda-te chunga phunnawiin an au ta mur mur mai a. 2 “Keiniho hi kan fapate leh kan fanute nên kan ṭhahnem hle a, ei tûr lamah hian kan hautak hle si a,” an ti a. 3 ṭhenkhatin, “Kan tam si a, ei tûr kan nei lo. Kan lote kan dahkham si a,” an ti a. 4 “Lal hnêna chhiah chawi atân sum kan pûk a, chumi atân chuan kan lote leh kan grêp huante kan dahkham a. 5 Kan tisa chu kan unaute tisa ang bawk a ni a, kan fate pawh an fate ang bawk an ni si a; nimahsela, hei, kan fanute leh kan fapate hi chhiahhlawh atâna bawihah kan luhtîr takngial dâwn hi; kan fanu ṭhenkhat phei chu bawihah an lût tawh nghe nghe a. Chhan ngaihna hre hek lo i, miin kan lote leh kan grêp huante lah chu an nei ta si a,” tite an awm nual bawk a. 6 Chûng thute leh an au thâwm chu ka hriatin ka thinur hle mai a. 7 Chutichuan, ka rilruin ka ngaihtuah a, mi ṭhate leh rorêltute chu ka khak a, an hnênah, “Mi tinin in unaute a pung ûmin sum in pûktîr rêng mai a,” ka ti a. Tin, an chungchâng ngaihtuah tûrin mi ka khâwm chiam a. 8 Tin, an hnênah, “Hnam dangte hnêna hralh kan unau Juda-hote chu kan theih ang angin kan tlan a. Nangnin in unaute chu zawrh in tum a ni maw? Keini hnênah kher hian hralh an ni dâwn em ni?” ka ti a. Chutichuan, an ngawi reng mai a, chhân ngaihna rêng an hre lo va. 9 “In thiltih hi a ṭha tawp lo mai. Kan hmêlma, hnam dangte mi sawichhiatna avângte hian kan Pathian ṭiha in awm a ṭûl a ni lâwm ni? 10 Kei leh ka unaute leh ka tlangvâlte pawhin chutianga a pung ûm chuan kan sum leh buh kan pûktîr ve bawk asin. A pung ûma pûktîr hi i bân teh daih ang u khai. 11 Vawiinah ngei hian an lote, an grêp huante, an olive huante, an inte leh an sum leh an buh leh an uain leh hriak hmun zaa hmun khat in lâk ṭhin pawh chu pe leh vek rawh u khai,” ka ti bawk a. 12 Chutichuan, anni chuan, “Kan pe leh vek ang, an lakah eng mah kan phût lo vang; i tih ang tak chuan kan ti ang,” an ti a. Chutichuan, puithiamte ka ko va, an hmaah chumi thutiam ang taka ti ngei tûr chuan chhia ka chhamtîr a. 13 Ka puan ven chu ka thing a, “Hemi thutiam anga ti lo apiang hi Pathianin a in aṭang leh a hnathawh aṭangin hetiang hian thing thla rawh se; hetianga thin thlâk hian awm sela, tihruahin awm rawh se,” ka ti a. Tin, pung khâwmho zawng zawng chuan, “Amen,” an ti a, LALPA an fak a. Tin, mipuite chuan chumi thutiam ang chuan an ti ta a.
Nehemia hmasial lohzia
14 Chu lo pawh chu Judai rama anmahni awptu atâna ruat ka nih achin, Lal Artazerzia kum sawmhnih a lal kum aṭanga kum sawmthum leh kum hnih a lal kum thleng, kum sâwm leh pahnih chhûng chuan kei leh ka unaute hian ram awptu buh chhiah kan la lo va. 15 Nimahsela, tûn hmaa ram awptute kha mite lakah an lo hautak hle mai a, tangkarua sakel sawmli tiam lovin an chhangte leh uainte an lâksak ṭhîn a. Chumi ahnuhmanah an chhiahhlawhte chu mite chungah an intilal hle mai a; nimahsela, kei zawngin Pathian ṭihna avângin chutiang chuan ka ti ve lo. 16 A ni, hemi kulh hna thawk hian ka awm reng a, ram rêng rêng lei pawh ka lei lo. Ka tlangvâlho zawng zawng pawh hna chu thawkin chutah chuan an awm khâwm reng bawk a ni. 17 Chu chang pawh ni lovin, kan vêla hnam dangte zîng aṭanga lo kal tiam lovin, Juda-te leh rorêltute zînga ka dawhkân kîl mi za leh sawmnga an awm reng a ni. 18 Tin, ni khat atâna an buatsaih chu sebâwngpa pakhat leh berâm paruk a ṭha ṭhiau a ni a; tin, ârte pawh ka tân an buatsaih a, ni sâwm dan zêlah uain chi hrang hrang tam zet nên. Chutiang chuan buatsaih mah sela, he mite tuar hi a rip êm avângin ram awptu pual chhang chu ka phût lo rêng rêng a ni. 19 Aw ka Pathian, he mite tâna ka thiltih zawng zawng hi ka ṭhatna tûrin hre reng ang che.
Nehemia an phiar
1 Tin, heti hi a ni a, Sanbalata leh Tobia leh Arab mi Gesema leh kan hmêlma dang rêng rêngten kulh te ka siam a, a pawp lai rêng rêng a awm ta lo tih an han hriat chuan (amaherawhchu, chumi lai chuan kawngkaah chuan kawngkhârte ka la rel lo va), 2 Sanbalata leh Gesema chuan, “Lo kal la, Ono phaia khaw pakhatah i intâwk khâwm teh ang u,” tiin thu min rawn thawn a. Nimahsela, ka chunga thil ṭha lo tih an tum a lo ni reng a. 3 Tin, keiin an hnênah, “Hna ropui tak ka thawk a, ka lo chhuk thei lo. Engah nge in hnêna ka rawn chhuksan hlânin hna chu a chawlh ang?” tiin mi ka tîr a. 4 Tin, chutiang hlîr chuan vawi li thu mi rawn thawn a, chutiang hlîr chuan ka chhâng bawk a. 5 Chutichuan, Sanbalata chuan chutiang bawkin a vawi nganaah chuan a chhiahhlawh lehkha châr loh kengin ka hnênah a rawn tîr a. 6 Chumiah chuan, “Nang leh Juda-ho chuan hel in rilrûk a, chu vâng chuan kulh chu i siam a ni tih thu hnam dangte zîngah a thang a, Gaasmu-an a sawi bawk a; tin, an sawi dân hmangah chuan nang hi an lal nih i tum a. 7 Tin, ‘Judai ramah chuan lal a awm,’ tia i chanchin Jerusalem-a puang vêl tûrin zâwlnei pawh i ruat tawh hial bawk a. Hêng thu hi lal hnênah an sawi thuai ngei ang a. Chuvângin, lo kal la, i lo inrâwn ang hmiang,” tih a chuang a. 8 Chutichuan, a hnênah, “I sawi ang rêng rêng hian eng mah tih a awm lo, i phuah chawp mai a ni,” tiin a hnênah mi ka tîr a. 9 “An hnathawh chu an puitlin theih loh nân an kutte chu tihchak lohvin a awm ang,” tia mi sawiṭhaih duh vek an ni a. Chutichuan, aw Pathian, ka kutte hi min tihchaksak teh ang che. 10 Chumi zawhah chuan Mehetabela fa Delaia fapa Semaia, chhuakvâk thei lova inah chuan ka kal a; tin, ani chuan, “Pathian inah, biak in chhûng ngeiah inhmu ang khai, biak in kawngte i khâr tlat ang, nangmah that tûrin an lo kal dâwn a ni; zânah rawn thah che an tum a ni,” a lo ti a. 11 Tin, kei chuan, “Keini ang hi han tlânchhe tûr em kan nih? Mahni nun humhim tûr pawhin biak inah tu nge lût duh ang? Ka lût tawp lo vang,” ka ti a. 12 Tin, ka han hre chhuak a, Pathian tirh a lo ni hauh lo mai a, keimah mi dodâlin chûng thu chu a sawi a lo ni zâwk a, Tobia leh Sanbalatan an rawih a lo ni reng a. 13 Ka hlauhva, chutianga ka tiha, thil ka tihsuala, mi tihhmingchhiatna tûr an neih theiha min sawichhiat nân an rawih a ni a. 14 Aw ka Pathian, Tobia leh Sanbalata hi an thiltih ang zêl hian hre reng ang che, zâwlneinu Noadii leh zâwlnei dang, mi tihhlauh tum zawng zawng nên hian.
An hna an zo
15 Chutichuan, kulh chu mi sawmnga leh ni hnihah, Elul thla, ni sawmhnih leh ni nga niah peih a ni ta a. 16 Tin, heti hi a ni a, kan hmêlma zawng zawngten chu chu an lo hriat chuan kan vêla hnam dangte chuan an hlau ta a, chan chhe ta hlein an inhria a, hna chu kan Pathian thawh a ni tih an hre ta si a. 17 Chu lo rêngah pawh, chûng lai chuan Juda mi ṭhate chuan Tobia chu lehkha tam tak an thawn ṭhîn a; tin, Tobia lehkha pawh an hmu bawk ṭhîn a. 18 Ani chu Ara fapa Sekania mâkpa a nih avângin Judai rama mi tam tak chhechhama amah thurualpui an awm a; tin, a fapa Jehohanana chuan Berekia fapa Mesulama fanu chu nupuiah a nei a ni a. 19 Ka hriatah a thiltih ṭhatte an sawi ṭhîn a, ka thusawite a hnênah an thlen bawk ṭhîn. Tichuan, Tobia chuan min tihṭhaih tûrin lehkhate a rawn thawn ṭhîn a ni.
1 Tin, heti hi a ni a, kulhte kan siama, kawngkhârte kan rela, kawngkhâr vêngtute, hla satute, Levi-hote ruat an nih zawh chuan, 2 ka unau Hanania leh kulhbîng hotu Hanania chu Jerusalem ka awptîr a; mi rinawm tak, mi ahluana Pathian ṭih mi a ni si a. 3 Jerusalem kulh kawngkhârte hi ni a tlângsân fe hma chu hawng suh u, tlaiah, vêngtute an ṭîn hmain khâr sela, kalh vek rawh se. Tin, Jerusalem-a awmte zînga mi, vêngtute ruat ula, an awmna tûr ruatah awm sela, a ṭhen erawh chuan mahni in bul vêl an vêng ṭheuh tûr a ni.
Sal tânna ata kîr lehte
4 Khua chu a zauvin a lian hle a; nimahsela, a mi awmte an tlêm hle mai a, inte pawh la sak loh a ni si a. 5 Tin, ka Pathianin ka rilruah, mi ṭhate, rorêltute, mipuite ko khâwm veka, an thlahtute ang zêla chhiar tûrin mi hriattîr a. Tin, a tîr taka kal chhote thlahtute hming ziakna bu chu ka hmuchhuak a, chutah chuan hetianga ziak ka hmu a: 6 sala hruai, Babulon lal Nebukadnezzaran a hruaite zînga sala tâng chhuak, Jerusalem leh Judai rama mahni khua ṭheuhva haw leha, chumi rama awm tate chu hêngte hi an ni: 7 Zerubabela te, Jesua te, Nehemia te, Azaria te, Raamia te, Nahamania te, Mordekaia te, Bilsana te, Misperetha te, Bigvaia te, Nehuma te, Baana te rual hian an kal a ni. Israel-ho zînga mi vântlâng tam lam chu: 8 Parosa thlahte sânghnih leh za leh sawmsarih leh pahnih; 9 Sephatia thlahte zathum leh sawmsarih leh pahnih; 10 Ara thlahte zaruk leh sawmnga leh pahnih; 11 Jesua leh Joaba thlahte zînga Pahath-moaba thlahte sânghnih leh zariat leh sawm leh pariat; 12 Elama thlahte sângkhat leh zahnih leh sawmnga leh pali; 13 Zatua thlahte zariat leh sawmli leh panga; 14 Zakaia thlahte zasarih leh sawmruk; 15 Binuia thlahte zaruk leh sawmli leh pariat; 16 Bebaia thlahte zaruk leh sawmhnih leh pariat; 17 Azgada thlahte sânghnih leh zathum leh sawmhnih leh pahnih; 18 Adonikama thlahte zaruk leh sawmruk leh pasarih; 19 Bigvaia thlahte sânghnih leh sawmruk leh pasarih; 20 Adina thlahte zaruk leh sawmnga leh panga; 21 Hezekia thlaha mi Atera thlahte sawmkua leh pariat; 22 Hasuma thlahte zathum leh sawmhnih leh pariat; 23 Bezaia thlahte zathum leh sawmhnih leh pali; 24 Haripha thlahte za leh sâwm leh pahnih; 25 Gibeona thlahte sawmkua leh panga; 26 Bethlehem leh Netopha khuaa mi za leh sawmriat leh pariat; 27 Anathoth khuaa mi za leh sawmhnih leh pariat; 28 Beth-azmavet khuaa mi sawmli leh pahnih; 29 Kiriath-jearim te, Kephira te leh Beerot khuaa mite zasarih leh sawmli leh pathum; 30 Rama leh Geba khuaa mi zaruk leh sawmhnih leh pakhat; 31 Mikma khuaa mi za leh sawmhnih leh pahnih; 32 Bethel leh Ai khuaa mi za leh sawmhnih leh pathum; 33 Nebo danga mi sawmnga leh pahnih; 34 Elam danga thlahte sângkhat leh zahnih leh sawmnga leh pali; 35 Harima thlahte zathum leh sawmhnih; 36 Jerikova thlahte zathum leh sawmli leh panga; 37 Loda te leh Hadida te leh Onova thlahte zasarih leh sawmhnih leh pakhat; 38 Senaa thlahte sângthum leh zakua leh sawmthum. 39 Puithiamte - Jesua chhûngte zînga mi Jedaia thlahte zakua leh sawmsarih leh pathum; 40 Imera thlahte sângkhat leh sawmnga leh pahnih; 41 Pasura thlahte sângkhat leh zahnih leh sawmli leh pasarih; 42 Harima thlahte sângkhat leh sawm leh pasarih. 43 Levi-hote - Hodeva thlaha mi Jesua leh Kadmiela thlahte sawmsarih leh pali. 44 Hla satute - Asapha thlahte za leh sawmli leh pariat. 45 Kawngkhâr vêngtute - Saluma thlahte, Atera thlahte, Talmona thlahte, Akuba thlahte, Hatita thlahte, Sobaia thlahte za leh sawmthum leh pariat. 46 Nethin-ho - Ziha thlahte, Hasupha thlahte, Tabaotha thlahte, 47 Kerosa thlahte, Sia thlahte, Padona thlahte, 48 Lebana thlahte, Hagaba thlahte, Salmaia thlahte, 49 Hanana thlahte, Gidela thlahte, Gahara thlahte, 50 Reaia thlahte, Rezina thlahte, Nekoda thlahte, 51 Gazama thlahte, Uza thlahte, Pasea thlahte, 52 Besaia thlahte, Meunima thlahte, Nephisesima thlahte, 53 Bakbuka thlahte, Hakupha thlahte, Harhura thlahte, 54 Bazlitha thlahte, Mehida thlahte, Harsa thlahte, 55 Barkosa thlahte, Sisera thlahte, Tema thlahte, 56 Nezia thlahte, Hatipha thlahte. 57 Solomona chhiahhlawhte thlah: Sotaia thlahte, Sopheretha thlahte, Perida thlahte; 58 Jaala thlahte, Darkona thlahte, Gidela thlahte, 59 Sephatia thlahte, Hatila thlahte, Pokereth-hazebaima thlahte, Amona thlahte. 60 Nethin mi zawng zawng leh Solomona chhiahhlawhte thlah chu zathum leh sawmkua leh pahnih an ni. 61 Tin, Tel-mela te, Tel-harsa te, Kerub te, Adon te, Imer aṭangtea lo chhote chu hêngho hi an ni a; nimahsela, an pi leh pute chhûngte leh an thlah zêlte Israel mi an nih leh nih loh an chhui thei lo va: 62 Delaia thlahte, Tobia thlahte, Nekoda thlahte zaruk leh sawmli leh pahnih. 63 Tin, puithiamte zînga mi: Hobaia thlahte, Hakoza thlahte, Gilead mi Barzilaia fanu zînga mi nupuia neia, an hming pu ta nghâl Barzilaia thlahte chu: 64 chûngho chuan an thlahtute ang zêla chhiarte zîngah chuan an hming ziakna an zawng a; nimahsela, an hmu lo va; chuvângin, bawlhhlawha ngaihin an awm a, an puithiam nihna chu an bân a. 65 Tin, ram awptu chuan anni chu Urim leh Thumim inbela puithiam a din hma loh chuan thil serhte chu an ei tûr a ni lo tih a hrilh a. 66 Mipui pung khâwm zawng zawng chu sîngli leh sânghnih leh zathum leh sawmruk an ni a, 67 an chhiahhlawh hmeichhia leh mipa sângsarih leh sawmthum leh pasarih tiam lovin; tin, hla satu hmeichhia leh mipa zahnih leh sawmli leh panga an ni a. 68 An sakawr chu zasarih leh sawmthum leh paruk a ni a, sabengtung lian chi chu zahnih leh sawmli leh panga a ni a, 69 an sanghâwngsei chu zali leh sawmthum leh panga a ni a, an sabengtung chu sângruk leh zasarih leh sawmhnih a ni. 70 Tin, chhûngkaw puipa ṭhenkhatten chumi hna atân chuan thil an thawh a. Ram awptu chuan thawhlâwmah rangkachak darik sângkhat, maihûn sawmnga, puithiam silhfên zanga leh sawmthum a thawh a. 71 Tin, chhûngkaw puipa ṭhenkhatten in sakna thawhlâwmah rangkachak darik sînghnih leh tangkarua bûk sânghnih leh zahnih an thawh a. 72 Tin, mi dang zawng zawng pêk chu rangkachak darik sînghnih leh tangkarua bûk sânghnih leh puithiam silhfên sawmruk leh pasarih a ni. 73 Tichuan, puithiamte, Levi-hote, kawngkhâr vêngtute, hla satute leh mi ṭhenkhatte leh, Nethin-ho leh Israel mi zawngte chu mahni khua khuaah an awm ta a. Chutichuan, thla sarihna a lo thlen chuan Israela thlahte chu an khuaahte chuan an awm a.
Mipui hnênah Ezran dân bu a chhiar
1 Tin, mi zawng zawng chu thu khat vuain Tui Kawngkhâr hmazâwn hmun zau laiah chuan an kal khâwm a; tin, lehkhaziaktu Ezra chu LALPAN Israel-hote zawm tûra thu a pêk, Mosia dân bu chu rawn keng tûrin an hrilh a. 2 Chutichuan, thla sarihna ni khat niah puithiam Ezra chuan pung khâwmho, nutling patling leh a hre thiam thei chin zawng zawng hmaah chuan dân chu a rawn keng a. 3 Tin, chuta mi chu Tui Kawngkhâr hmazâwn hmun zau laiah chuan, nutling patling leh a hre thiam thei chinte hmaah chuan zîng tak aṭangin chhûn thlengin a chhiar a; tin, mi zawng zawng chuan dân bu thu-ah chuan an beng an chhi ṭhup mai a. 4 Tin, chutiang atâna an siam rêng thing dawhkân sângah chuan lehkhaziaktu Ezra chu a ding a; tin, a sîr ding lamah chuan Matithia te, Sema te, Anaia te, Uria te, Hilkia te, Maaseia te an ding a; tin, a vei lamah chuan Pedaia te, Misaela te, Malkija te, Hasuma te, Hasbadana te, Zakaria te, Mesulama te. 5 Tin, Ezra chuan mi zawng zawng mit hmuhah chuan lehkhabu zial chu a han phelh a (mi zawng zawng aia sânga ding a ni a); tin, a han phelh chuan mi zawng zawng chu an ding ta vek a; 6 tichuan, Ezra chuan LALPA, Pathian ropui tak chu a fak a. Tin, mipui zawng zawng chuan an bân pharin, “Amen, Amen!” tiin an lo chhâwn a. Tin, an kûn a, an hmaia lei siin LALPA chu chibai an bûk a. 7 Tin, Jesua te, Bania te, Serebia te, Jamina te, Akuba te, Sabethaia te, Hodija te, Maaseia te, Kelita te, Azaria te, Jozabada te, Hanana te, Pelaia te, Levi-hote chuan mipuite chu dân an hrilhfiah a; mipuite chu an dinhmunah chuan an awm reng a. 8 Tin, lehkhabu, Pathian dân bua mi chu fiah takin an chhiar a; a awmzia an hrilhfiah a; tichuan, an chhiar chu an hriat chiantîr zêl a. 9 Tin, ram awptu Nehemia leh, puithiam leh lehkhaziaktu ni fâwm Ezra leh mipuite zirtîrtu Levi-hote chuan mipui zawng zawng hnênah chuan, “Vawiin hi LALPA in Pathian tâna ni thianghlim a ni a; lungchhe suh ula, ṭap hek suh u,” an ti a. Dân thu chu an hriatin mipui zawng zawng chu an ṭap an ṭap mai si a. 10 Chutichuan, ani chuan an hnênah, “Kal ula, thil thau eiin thil thlum in ula, eng mah buatsaih nei lote tân chanpual thawn ang che u; vawiin hi kan LALPA tâna ni thianghlim a nih hi. Lungngaiin awm suh u; LALPA chunga lâwmna chu in chakna a ni si a,” a ti a. 11 Chutichuan, Levi-hote chuan, “Ngawi hle hle rawh u, vawiin hi ni thianghlim a ni si a; lungngaih pawh lungngai duh suh u,” tiin mipui zawng zawng chu an tingawi ta ṭhuap mai a. 12 Tichuan, thu a hrilhfiah chu an hriat thiam avângin mipui zawng zawng chu ei tûr te, in tûr te, mi dang chanpual thawn tûr te, hlim taka awm tûr tein an ṭîn ta vek a.
Bâwkte kût an hmang
13 Tin, a ni hnih ni chuan mipui zawng zawng zînga chhûngkaw puipa te, puithiam te, Levi-hote chu dân thu zir tûr bawk chuan lehkhaziaktu Ezra hnênah an kal khâwm a. 14 Tin, LALPAN Mosia hmanga zawm tûra thu a pêk dânah chuan, thla sarihna kût laia Israela thlahte chhâwlbûka an awm tûr thu ziak an hmu a, 15 “Tlângah kal ula, olive zâr te, olive suak zâr te, lênhmui zâr te, tûm kau te, thing lian tak tak zârte chhâwlbûk sak nân va la rawh u,” tiin, an khua zawng zawngah leh Jerusalem khuaa an tlângthantîr tûr leh puan vêl tûr a nih thute an chhiar a. 16 Chutichuan, mipuite chu an va kal a, an va la a, mi zawng zawngin an in chungah te, an kawtah te, Pathian in kawtah te, Tui Kawngkhâr hmun zau laiah te, Ephraim kawngkhâr hmun zau laiah te chhâwlbûk an insiam ṭheuh va. 17 Tin, sal chhuak pung khâwmho zawng zawng chuan chhâwlbûk an siam a, chhâwlbûkahte chuan an awm a. Nuna fapa Josua hun aṭanga chumi ni thleng chuan Israela thlahte chuan chutiang tak chuan an ti ngai lo va. Tichuan, lâwmna nasa tak a lo awm ta a. 18 Ni tin, a ṭan tirh ni aṭanga a tâwp thlengin Pathian dân bua mi a chhiar bawk a. Tin, ni riat ni chu kût ṭiak ni a ni a, thupêk angin inkhâwmna urhsûn takin an titâwp ṭhîn.
Mipuiten an sual an puang
1 Chutichuan, chumi thla ni sawmhnih leh ni li ni chuan Israela thlahte chu chaw ngheia saiip puan sinin, lei kai luamin an kal khâwm a. 2 Tin, Israel hnam chu hnam dangte lakah an intihrang a, an ding a, an sualnate leh an pi leh pu bawhchhiatnate thupha an chawi a. 3 Tin, mahni hmun hmunah an ding a, chumi ni hmun lia ṭhena hmun khat chhûng chuan LALPA an Pathian dân bu an chhiar a; tin, hmun lia ṭhena hmun khat dang chhûng chuan thupha an chawi a, LALPA an Pathian an bia a. 4 Chutichuan, Levi-ho dawhkân sângah chuan Jesua te, Bania te, Kadmiela te, Sebania te, Bunia te, Serebia te, Bania te, Kenania te chu an ding a, ring takin LALPA an Pathian an au va. 5 Chutichuan, Levi mi, Jesua leh Kadmiela te, Bania te, Hasabneia te, Serebia te, Hodia te, Sebania te leh Pethahia te chuan, “Ding ula, LALPA in Pathian chu chatuan ata chatuan thlengin fak rawh u,” an ti a.
Mipui ṭawngṭaina
“Chawimawina leh fakna zawng zawngina a phâk loh, i hming ropui chu fakin awm rawh se. 6 LALPA, nangmah chauh hi LALPA i ni a, vânte vân leh a chhûnga awm zawng zawngte nên, leilung leh a chhûnga awm zawng zawngte nên, tuifinriat leh a chhûnga awm zawng zawngte nên i siam a, a zain i vawng ṭha ṭhîn a; tin, vâna awmhote chuan chibai an bûk ṭhîn che a. 7 Abrama chu thlanga, Kaldai ram Ur khua ata hruai chhuaka, a hminga Abrahama saksaktu LALPA Pathian i ni a; 8 tin, a thinlung chu i hmaah rinawmin i hria a, Kanaan-hote, Hit-hote, Amor-hote, Periz-hote, Jebus-hote, Girgas-hote ram chu pe tûrin, a thlahte lam pe tûrin thu i thlung a; tin, i thu i hlen bawk a; fel tak i ni si a. 9 “Aigupta rama kan pi leh pute hrehawmzia chu i hmu reng a, Tuifinriat Sen kama an au thâwmte chu i hria a; 10 Pharaoa leh a chhiahhlawh zawng zawngte leh a rama mi zawng zawngte chungah chhinchhiahnate leh thil makte i lantîr a; chapo takin an chungah thil an ti tih i hre si a; tichuan, tûn thleng hian hming i insiam ta a. 11 Tin, an hmaah tuifinriat chu i tiṭhen a; tichuan, lei chârah tuifinriat chu an kal tlang a; tin, anmahni ûmtute chu tui thûk takah, tui thûk taka lung paih luh ang maiin i paih lût a. 12 Tin, chhûnah chhûm dingin i hruai ṭhîn a, zânah pawh an kalna tûr kawnga anmahni ên tûrin meialh dingin i hruai ṭhîn a. 13 “Sinai tlângah chuan i lo chhuk bawk a, vân aṭangin an hnênah thu i sawi a, rorêlna dik tak te, dân dik tak te, thuruat leh thupêk ṭha takte i pe a; 14 tin, i Chawlhni thianghlim chu anmahni i hriattîr a, i chhiahhlawh Mosia hmangin thupêk te, thuruat te, dân te i pe a; 15 tin, an rilṭâm tihreh nân vân aṭangin chhang i pe a, an tuihâl tihreh nân lungpui ata tui i tihchhuahsak a, pêk i tum ram chu luah tûrin i pe a. 16 Nimahsela, anni leh kan pi leh pute chuan chapo takin thil an ti a, an intiluhlul a, i thupêkte chu an pawm lo va, 17 an awih duh lo va, an zînga i thil mak tihte pawh chu an hre duh tawh hek lo; an intiluhlul a, an helin an bawih nihna lama lêt leh tûrin hotu an ruat ta zâwk a. Nimahsela, nang chu ngaidam tûra inpeih reng Pathian, mi khawngaih thei, lainatnaa khat, thinnel, ngilneihna ngah i ni a, anmahni i thlahthlam chuang lo va. 18 A ni, bâwngno lem an insiam a, ‘Hei hi a ni, Aigupta ram ata hruai chhuaktu che u in pathian chu,’ an tiha, thinurthlâk tak thil an tih laite pawh khân, 19 i ngilneihna nasa tak chuan thlalêrah khân i thlahthlam chuang lo va. Kawnga anmahni hruai tûra an chunga chhûm ding chuan chhûnah a kalsan lo va, anmahni ên tûr leh an kalna tûr kawng kawhhmuh tûra meialh ding pawh chuan zânah a kalsan hek lo. 20 Anmahni zirtîr tûrin i thlarau ṭha tak chu i pe bawk a, i manna chuan i châwm a, an tuihâl tihreh nân tui i pe a. 21 A ni, thlalêrah khân kum sawmli i châwm a, eng mah an tlachham lo va; an silhfênte a hlui lo va, an kete chu a vûng lo va. 22 Tin, ram leh hnamte i pe a, chûng chu an chanpual i sem ṭheuh va. Chutichuan, Sihona ram, Hesbon lalram leh Basan lal Oga ram chu an luah a. 23 An thlahte chu vâna arsi zâtin i tipung bawk a, an luah tûra an pi leh pute hnêna i lo sawi tawh ramah chuan i hruai lût ta a. 24 Chutichuan, an thlahte chuan ram chu an luah ta a; tin, nangin chumi rama awm Kanaan mite chu an hmaah i titlâwm a, an duh duha tih atân an lalte leh chumi rama mite nên an kutah i pe a. 25 Kulh nei khawpuite, ram ṭha tak takte an la a, thil ṭha tinrênga khat inte an luah a, tuikhur hiah sa te, grêp huan te, olive huan te, theikûng tam takte an nei a. Tichuan, an ei a, an puar a, an lo thau va, i ṭhatna nasa takah chuan nuam an chên a. 26 Nimahsela, an tihmawh a, i chungah an hel a, i dân chu an hnuchhawn daih a, i lam hawi lehtîr tuma zilhtu i zâwlneite chu an that a, thinurthlâk tak tak thil an ti a. 27 Chu vâng chuan anmahni tihrehawmtu an hmêlmate kutah chuan i pe a; an mangan laia an auh che khân vân aṭangin i lo ngaithla a; tin, i ngilneihna nasa tak chuan an hmêlmate laka chhanchhuaktu tûr chhandamtute i pe a. 28 “Nimahsela, râlmuanga an han awm hnu chuan, i mit hmuhah thil ṭha lo an ti leh mai a. Chuvângin, an hmêlmate kutah i pe a; tichuan, an chungah thu an nei a; mahse, an inlamlêta an auh che khân vân aṭangin i lo ngaithla a; vawi tam tak i ngilneihna chuan i chhanchhuak a. 29 I dâna i hruai luh leh theih nân i zilh ṭhîn a; nimahsela, chapo takin thil an ti a, i thupêkte an pawm lo va, i rorêlna kalhin thil an tisual a (miin an zawma an nunpui tûr chu); tin, tukkhum chhah an chhawn a, an intiluhlul a, an ngaithla duh lo va. 30 Nimahsela, kum tam tak anmahni i dawh a, i thlarauva i zâwlneite hmangin i zilh ṭhin a; nimahsela, an beng an chhu ngawng a; chuvângin, chûng rama mite kutah chuan i pe ta a. 31 “Nimahsela, i ngilneihna nasa tak chuan an tâwp hlenna hlauh chu i thlensak lo va, i thlahthlam hek lo; Pathian, mi khawngaih thei tak, lainatnaa khat i ni si a. 32 Chuvângin, kan Pathian, Pathian ropui, engkim ti thei leh hlauhawm, thuthlung hlena khawngaihna tilangtu chuan kan chung leh kan lalte, kan mi liante, kan puithiamte, kan zâwlneite, kan pi leh pute leh i mite zawng zawng chunga Assuria lalte lal lai aṭanga tûn thlenga hrehawmna lo thleng zozaite hi, thil tê thamah ngai suh ang che. 33 “Eng pawh ni sela, kan chunga thil lo thleng zawng zawngah hian nang chu i fel a; nang chuan dik takin thil i ti a, keini erawh chuan ṭha lo takin kan ti a ni. 34 Kan lalte, kan mi liante, kan puithiamte, kan pi leh pute pawhin i dân chu an zâwm lo va, i thupêk leh i thu hriattîr, anmahni i zilhnate chu an pawm hek lo. 35 An chunga i ṭhat ṭhin tehlul nên, an ramah, ram zau tak leh ram ṭha tak i pêkah chuan i rawng an bâwl lo va, an thil tihsual an bân chuang hek lo. 36 “Ngai teh, tûnah hi chuan bawih kan ni ta a, a chhûnga thil rah leh thil ṭha kan pi leh pute ei atân i pêk ramah hian bawih kan ni. 37 Kan sual avânga kan chunga lal atâna i ruatte lah chuan an neihnun phah a; kan taksa chungah leh kan ran chungahte lam pawh an duh duhin thu an nei a; kan mangang êm êm mai a ni.
Mipuiten thutiam an ziak
38 “Chûng zawng zawng avâng chuan thu nghet tak kan thlung a, kan ziak a; kan mi liante, kan Levi-hote leh kan puithiamten min nemnghehpui a,” tiin.
1 Tichuan, min nemnghehpuitute chu hêng hi an ni: Hakalia fapa, ram awptu Nehemia leh Zedekia te, 2 Seraia te, Azaria te, Jeremia te, 3 Pasura te, Amaria te, Malkija te, 4 Hatusa te, Sebania te, Maluka te, 5 Harima te, Meremotha te, Obadia te, 6 Daniela te, Ginethona te, Baruka te, 7 Mesulama te, Abija te, Mijamina te, 8 Maazia te, Bilgaia te, Semaia te: hêngho hi puithiam an ni. 9 Tin, Levi-hote: Azania fapa Jesua te, Henadada fate zînga mi Binuia te, Kadmiela te; 10 tin, an unau Sebania te, Hodija te, Kelita te, Pelaia te, Hanana te, 11 Mika te, Rehoba te, Hasabia te, 12 Zakura te, Serebia te, Sebania te, 13 Hodia te, Bania te, Beninua te. 14 Mipui hotute: Parosa te, Pahath-moaba te, Elama te, Zatua te, Bania te; 15 Bunia te, Azgada te, Bebaia te; 16 Adonija te, Bigvaia te, Adina te, 17 Atera te, Hezekia te, Azura te, 18 Hodia te, Hasuma te, Bezaia te, 19 Haripha te, Anathotha te, Nebaia te, 20 Magpiasa te, Mesulama te, Hezira te, 21 Mesezabela te, Zadoka te, Jadua te, 22 Pelatia te, Hanana te, Anaia te, 23 Hosea te, Hanania te, Hasuba te, 24 Hallohesa te, Pilha te, Sobeka te, 25 Rehuma te, Hasabna te, Maaseia te, 26 Ahia te, Hanana te, Anana te, 27 Maluka te, Harima te, Baana te.
An thutiam ziak
28 Tin, mi dang - puithiamte, Levi-hote, kawngkhâr vêngtute, hla satute, Nethin-hote leh Pathian dân zawm tuma chûng rama mite laka inthiarfihlîm zawng zawngte, an nupuite, an fapate, an fanute, chinchâng hre thei tawh chinte chuan, 29 an unaute, an mi liante chu an vuan tlat a, Pathian chhiahhlawh Mosia pêk Pathian dân zâwm tûra LALPA, kan LALPA thupêk zawng zawngte leh a rorêlnate leh a thuruatte chu zâwm leh vawnga, 30 chu rama mite chu kan fanute neihtîr lova, kan fapate tân an fanute nei hek lova, 31 chu rama miten Chawlhnia thil zawrh tûr bungrua emaw, ei tûr rêng rêng zawrh tûr emaw an rawn lâka Chawlhni emaw, awmni kham ni emawa leisak lova, kum sarihnaa ram dah tuia leiba zawng zawng ṭhîng lo tûrin ânchhe dawn huamin chhia an chham a. 32 Tin, kan Pathian in lama rawngbâwlna atân sekel hmun thuma ṭhena hmun khat kum tina pêk tûrin dân kan insiam bawk a. 33 Chhangdah atân te, chhangphut thilhlan fo tûr atân te, hâlral thilhlan fo tûr atân te, Chawlhni atân te, thla thar atân te, hunbi nei kût atân te, thil thianghlim atân te, Israel mite tâna inremna siamna tûra sual thawina atân leh kan Pathian in lama tih tûr zawng zawng tih nân te. 34 Kan pi leh pute chhûngkua ang zêla kum tina hunbi ruata dân bua ziak anga, LALPA kan Pathian maichâma hâl tûr thing hlan kan Pathian ina chhêktu tûr hriat nân puithiamho nên, Levi-ho nên, mipuite nên ṭhum kan vâwr a. 35 Tin, kum tina kan lova thlai thar hmasa ber leh thing chi tinrêng rah hmasa ber LALPA ina dah lût tûr te, 36 dâna ziak anga kan fapa leh kan ran piang hmasa berte, kan bâwng rual leh berâm rual zinga piang hmasa berte pawh, kan Pathian ina rawngbâwltu puithiamte hnêna kan Pathian ina hruai tûr te, 37 kan Pathian in pindana puithiamte hnêna kan chhang hmeh hmasa ber te, kan thên thilhlan te, thing chi tinrêng rah te, uain leh hriak keng tûr te, kan lova mi sâwma pakhat Levi-hote pêk tûr tein dân kan insiam bawk a, anni Levi-hote chuan kan khaw zînga thlawhhma nei khua apiangah sâwma pakhat an la ṭhîn a ni a. 38 Tin, Levi-hoten sâwma pakhat an lâk laiin Arona thlah puithiam chu Levi-hote hnênah an awm tûr a ni a; Levi-hote chuan sâwma pakhat an lâk ata sâwma pakhat chu kan Pathian inah, ro dah khâwmna pindanah chuan an rawn dah tûr a ni. 39 Israela thlahte leh Levia thlahte chuan, buh leh uain leh hriak thên thilhlan chu hmun thianghlim bungbêl leh rawngbâwltu puithiamte, kawngkhâr vêngtute, hla satute awmna pindanah chuan an dah tûr a ni a; chutiang chuan a ni, kan Pathian in chu thlahthlam lo tûra dân kan insiam ni.
Jerusalem khuaa awmte
1 Mipui hotute chu Jerusalem-ah an awm a; sâwm zînga pakhat zêl khawpui thianghlim Jerusalem-a awmtîr tûr leh, sâwm zînga pakua, khaw danga awm tûrte hriat nân a bâk mipuite pawh chuan ṭhum an vâwr a. 2 Lungni taka Jerusalem-a awm tûra inpe zawng zawngte chuan mipuite fak an hlawh a. 3 Hêngte hi chumi ram hotu Jerusalem-a awmte chu an ni. Amaherawhchu, Judai ram khuaahte chuan, an khuaa mahni chan tûr ṭheuhvah an awm a; chûngte chu Israel-hote, puithiamhote, Levi-hote, Nethin-ho leh Solomona chhiahhlawhte thlan an ni. 4 Jerusalem-ah chuan Juda thlaha mi leh Benjamina thlaha mite an awm. Juda thlahte zînga mi: Pereza thlahte zînga mi, Mahalalela fapa Sephatia, chu mi fapa Amaria, chu mi fapa Zakaria, chu mi fapa Athaia, chu mi fapa Uzia leh, 5 Silo mi fapa Zakaria, chu mi fapa Joiariba, chu mi fapa Adaia, chu mi fapa Hazaia, chu mi fapa Kol-hozea, chu mi fapa Baruka, chu mi fapa Maaseia. 6 Pereza thlah, Jerusalem-a awm zawng zawngte chu mi huaisen zali leh sawmruk leh pariat an ni. 7 Tin, Benjamina thlahte zînga mi chu hêngte hi an ni: Jesaia fapa Ithiela, chu mi fapa Maaseia, chu mi fapa Kolaia, chu mi fapa Pedaia, chu mi fapa Joeda, chu mi fapa Mesulama, chu mi fapa Salua. 8 A dawt lehah chuan Gabaia te, Salaia te, an zain Benjamina thlah Jerusalem-a awmte chu mi zakua leh sawmhnih leh pariat an ni. 9 Tin, Zikria fapa Joela chu an hotu a ni; Hasenua fapa Juda chu khaw hotu ber dawttu a ni. 10 Puithiamte zînga mi: Joiariba fapa Jedaia te, Jakina te, 11 Pathian in hotu Ahituba fapa Meraiotha, chu mi fapa Zadoka, chu mi fapa Mesulama, chu mi fapa Hilkia, chu mi fapa Seraia te; 12 an unau, ina rawngbâwltute zawng zawng nên zariat leh sawmhnih leh pahnih an ni a; tin, Malkija fapa Pasura, chu mi fapa Zakaria, chu mi fapa Amzia, chu mi fapa Pelalia, chu mi fapa Jerohama, chu mi fapa Adaia leh 13 a unaute, an chhûngkaw puipate nên zahnih leh sawmli pahnih an ni a; tin, Imera fapa Mesilemotha, chu mi fapa Ahzaia, chu mi fapa Azarela, chu mi fapa Amasaia leh 14 an unau mi chak huaisente nên za leh sawmhnih leh pariat an ni: an hotu chu Hagedolima fapa Zabdiela a ni a. 15 Tin, Levi-hote zinga mi: Bunia fapa Hasabia, chu mi fapa Azrikama, chu mi fapa Hasuba, chu mi fapa Semaia te; 16 Levi-ho puipate zînga mi Pathian in pâwn lam hna enkawltu Sabethaia leh Jozabada-te; 17 Asapha fapa Zabdia, chu mi fapa Mika, chu mi fapa, ṭawngṭaia lâwm thu sawi ṭantu ber Matania te; a unaute zînga a dawttu Bakbukia te; Jeduthuna fapa Galala, chu mi fapa Samua, chu mi fapa Abda te. 18 Khawpui thianghlima Levi-ho awm zawng zawng chu zahnih leh sawmriat leh pali an ni. 19 Chûng lote pawh chu kawngkhâr vêngtu Akuba te, Talmona te leh an unau kulh kawngka vêngtute, za leh sawmsarih leh pahnih an ni a. 20 A bâk Israel-te leh puithiamte leh Levi-hote chu Judai ram khaw tinah mahni ram ṭheuhvah an awm a. 21 Nethin-ho erawh chu Ophel-ah an awm a. Ziha leh Gispa chu Nethin-ho hotu an ni a. 22 Jerusalem khuaa Levi-hote hotu chu Asapha fa, hla satute zînga mi Mika, chu mi fapa Matania, chu mi fapa Hasabia, chu mi fapa Bania, chu mi fapa Uzia a ni a, Pathian in lam hna ngaihtuahtu a ni. 23 An chungchâng thu-ah lal thupêk a awm a, hla satute chu ni tina an tla tâwk ruat tûr thu a awm bawk si a. 24 Juda fapa Zera thlaha mi Mesezabela fapa Pethahia chu mipuite chungchâng thu-ah engkima lal aiawh a ni a.
Khaw danga awmte
25 Tin, an khua leh an ram thu-ah chuan, Juda thlah ṭhenkhatte chu Kiriath-arba leh a khawperah te, Dibon leh a khawperah te, Jekabzeel leh a khawperah te; 26 Jesua-ah leh Molada-ah leh Beth-pelet-ah te; 27 tin, Hazar-sual-ah te, Beer-seba leh an khawperah te; 28 Ziglag-ah te, Mekona leh a khawperah te; 29 En-rimon-ah te, Zora-ah te, Jarmuth-ah te, 30 Zanoa-ah te, Adulam-ah leh an khawperah te; Lakis leh a ramah te; Azeka leh a khawperah te an awm a. Chutichuan, Beer-seba aṭangin Hinom ruam thlengin awmhmun an khuar a. 31 Tin, Benjamina thlahte chu Geba piah lama Mikmas-ah te, Aija-ah leh Bethel leh a khawperah te; 32 Anathoth-ah te, Nob-ah te, Anania-ah te; 33 Hazor-ah te, Rama-ah te, Gitaim-ah te; 34 Hadid-ah te, Zeboim-ah te, Neballat-ah te; 35 Lod-ah leh themthiamte ruam Ono-ah te an awm a. 36 Tin, Judai rama awm ṭhîn Levi-ho pâwl ṭhenkhat chu Benjamin ramah an tel ta a.
Puithiam leh Levi-ho hming
1 Sealtiela fapa Zerubabela leh Jesua hnêna kal chho puithiamte leh Levi-hote chu hêngte hi an ni: Seraia te, Jeremia te, Ezra te, 2 Amaria te, Maluka te, Hatusa te, 3 Sekania te, Rehuma te, Meremotha te, 4 Idova te, Ginethoia te, Abija te, 5 Mijamina te, Ma-adia te, Bilga te, 6 Semaia te, Joiariba te, Jedaia te, 7 Salua te, Amoka te, Hilkia te, Jedaia te. Hêngho hi Jesua dam laia puithiam zîng leh an unaute zînga a hotute an ni. 8 Chûng lo pawh Levi-hote: Jesua te, Binuia te, Kadmiela te, Serebia te, Juda te, lâwm thu sawinaa hotu Matania te, amah leh a unaute chu. 9 Bakbukia leh Unia leh an unaute pawh chu a pâwl pâwlin an inchhâwn ṭhîn a. 10 Tin, Jesua chuan Joiakima a hring a, Joiakima chuan Eliasiba a hring a, Eliasiba chuan Joiada a hring a, 11 Joiada chuan Jonathana a hring a, Jonathana chuan Jadua a hring a.
Puithiam chi hotute
12 Tin, hêngho hi Joiakima dam lai chuan puithiam, an chhûngkaw puipate an ni: Seraia thlaha mi Meraia te; Jeremia thlaha mi Hanania te; 13 Ezra thlaha mi Mesulama te; Amaria thlaha mi Jehohanana te; 14 Malukia thlaha mi Jonathana te; Sebania thlaha mi Josefa te; 15 Harima thlaha mi Adna te; Meraiotha thlaha mi Helkaia te; 16 Idova thlaha mi Zakaria te; Ginethona thlaha mi Mesulama te; 17 Abija thlaha mi Zikria te; Miniamina thlaha mi te, Moadia thlaha mi Piltaia te; 18 Bilga thlaha mi Samua te; Semaia thlaha mi Jehonathana te; 19 tin, Joiariba thlaha mi Matenaia te; Jedaia thlaha mi Uzia te; 20 Salaia thlaha mi Kalaia te, Amoka thlaha mi Ebera te; 21 Hilkia thlaha mi Hasabia te; Jedaia thlaha mi Nethanela te.
Puithiam leh Levia chite chhinchhiahna bu
22 Levia chite chungchângah chuan, Eliasiba te, Joiada te, Johanana te, Jadua te dam laiin chhûngkaw puipate chhinchhiah fel a ni a; chutiang bawkin puithiamte pawh Persia lal Daria lal thlengin chhinchhiah an ni a. 23 Eliasiba fapa Johanana dam lai thleng pawhin Levia fa, chhûngkaw puipate chu chanchin ziakna buah chuan an chuang a ni.
Tempula hna an insem dân
24 Tin, Levi-ho puipate: Hasabia te, Serebia te, Kadmiela fapa Jesua te leh an unau, Pathian mi Davida thupêk anga a pâwl pâwla inchhâwna fak leh lâwm thu sawitu tûrte nên. 25 Matania te, Bakbukia te, Obadia te, Mesulama te, Talmona te, Akuba te chu kawngkhâr kianga bungraw dah khâwmna in leh kawngka vêngtute an ni. 26 Hêngho hi Jesua, Jozadaka fapaa fapa Joiakima dam laia mi leh ram awptu Nehemia leh Ezra puithiam leh lehkhaziaktu dam laia mi an ni a.
Nehemian kulh a hlân
27 Jerusalem kulh an hlannaah chuan dârbenthekte, perhkhuangte, ṭingṭangte nêna hla sa leh lâwm thu sawia lâwm taka a hlannaa tel tûra Jerusalem-a rawn hruai tûrin, Levi-hote chu an hmun zawng zawng ata an zawng chhuak a. 28 Jerusalem chhehvêl ata leh Netophath-ho khuate aṭangin hla satuho fate an kal khâwm a; 29 Beth-gilgal aṭang leh Geba leh Azmavet ram atate pawh hla satute chuan Jerusalem vêlah chuan khua an lo siam ta hlawm si a. 30 Tin, puithiamte leh Levi-hote chu an intithianghlim a; tin, mipui te, kulh te, a kawngkhârte an tithianghlim a. 31 Chutichuan, Juda-ho mi liante chu kulh chungah chuan ka hruai chho va, lâwm thu sawia inzui duah duaha kal tûr pâwl lian tak pâwl hnih ka ruat a; pâwl khat chu Bawlhhlawh Kawngka lamah; 32 tin, anni chu Hosaia leh Juda-ho mi lian zâtve te, 33 Azaria te, Ezra te, Mesulama te, 34 Juda te, Benjamina te, Semaia te, Jeremia te, 35 tawtawrâwt keng puithiam fapa ṭhenkhat te, Asapha fapa Zakura, chu mi fapa Mikaia, chu mi fapa Matania, chu mi fapa Semaia, chu mi fapa Jonathana, chu mi fapa Zakaria te; 36 a unau Semaia te, Azarela te, Milalaia te, Gilalaia te, Maaia te, Nethanela te, Juda te, Pathian mi Davida tum ṭhin thilte keng Hanania te chuan an zui a; tin, lehkhaziaktu Ezran an hma a hruai a. 37 Tin, Tuikhur Kawngka an thlenin, kulh chhoh ṭanna an hmazâwn Davida khaw kailâwna chhovin Davida in chhakah an kal a, chhak lampanga Tui Kawngka thleng rakin. 38 Tin, lâwm thu sawitu pâwl dangte chu anmahni tâwk tûrin an kal a; tin, keiin mipui zâtvete nên Meipui Chhehna In sâng chhakah, kulh chungah Kulh Chhah thlengin kan zui a; 39 Ephraima Kawngka chungah te, Kawngka Hlui chungah te, Sangha Kawngka chungah te, Hananela In Sâng leh Hamea In Sâng chungah te, Berâm Kawngka thleng rakin; tin, Tân In Kawngkaah chuan an ding a. 40 Chutichuan, lâwm thu sawituho pâwl hnihte chu Pathian inah an ding a, kei leh rorêltu zâtvete nên; 41 tin, tawtawrâwt keng puithiamho Eliakima te, Maaseia te, Miniamina te, Mikaia te, Elioenaia te, Zakaria te, Hanania te; 42 tin, Maaseia te, Semaia te, Eleazara te, Uzia te, Jehohanana te, Malkija te, Elama te, Ezera te pawh. Tin, hla satute chuan an hotu Jezrahia hovin ring takin an sa a. 43 Chumi ni chuan inthawina nasa tak mai an hlân a, an hlim hle mai a; Pathianin hlim namênlohvin a tihlim a ni; tin, hmeichhiate leh naupangte chen pawhin an hlim hle mai a; chutichuan, Jerusalem hlimna chu hla tak aṭang pawhin an hria a.
Tempula hman tûr thil
44 Tin, chumi ni chuan thawhlâwm te, thên thilhlan te, thlai thar hmasa ber te, sâwma pakhat te dah khâwmna pindantea hotu, dânin a ruat ang, puithiam leh Levi-ho chanvo khaw tin lo zir ang zêla la khâwmtu tûrte an ruat a; Juda-te chu rawngbâwltu puithiamte leh Levi-ho avâng chuan an lâwm hle mai a ni. 45 Davida leh a fapa Solomona thupêk angin, hla satute leh kawngkhâr vêngtute pawhin an Pathian rawngbâwl dân tûr leh intihthianghlimna dân chu an zâwm a. 46 Hmânlaia Davida leh Asapha dam lai chuan hla sa pâwl hotu an awm ṭhîn a, Pathian fakna leh lâwmna hlate an sa ṭhîn a ni. 47 Zerubabela dam lai leh Nehemia dam lai chuan, Israel zawng zawngin hla satute leh kawngkhâr vêngtute chu ni tina an tla tâwk tûr chanvo an siam ṭhîn a. Levi-ho chanvo a tihhransak bawk a; tin, anni Levi-hote chuan Arona fapate chanvo an tihhransak ṭhîn a.
Hnam dang laka inthiarfihlîm
1 Chumi ni chuan mipui beng hriatah Mosia lehkhabu an han chhiar a; tin, chumiah chuan Amon mite leh Moab mite chu, Pathian mite inkhâwmnaah chuan eng tikah mah an tel ve hauh lo tûr a ni tih a chuang a; 2 Israela thlahte chhang leh tuia hmuak lova, anmahni ânchhe lawh tûra Balaama an rawih avâng khân. Nimahsela, kan Pathianin ânchhia chu malsâwmnaah a chantîr ta zâwk a. 3 Tin, heti hi a ni a, dân chu an han ngaihthlâk zawh chuan Israel mite zîng ata a chawhpawlhtu hnam dang mite chu an tihrang ta a.
Nehemia dân siam ṭhatte
4 Chumi hma chuan kan Pathian in pindantea hotu atâna ruat, puithiam Eliasiba, Tobia lamhnai chuan 5 tûn hma lama Levi-hote, hla satute, kawngkhâr vêngtute chanvo, chhangphut thilhlan te, rimtui te, bungbêl te, buh sâwma pakhat te, uain leh hriak leh puithiamte tâna thên thilhlante an dah ṭhinna pindan zau tak Tobia a buatsaihsak a. 6 Nimahsela, chûng thil zawng zawng awm laite chuan Jerusalem khuaah ka awm lo va; Babulon lal Artazerzia kum sawmthum leh kum hnih a lal kumin lal hnênah ka kal a, ni eng emaw zât hnuah phalna ka dîl leh a; 7 tin, Jerusalem khuaah ka va kal a, Pathian in hung chhûng kawtlaitea pindan buatsaihsaka, Tobia tâna Eliasiban thil ṭha lo a tih chu ka han hre ta a. 8 Mi tilungni lo êm êm mai a; chuvângin, Tobia in chhûng bungrua zawng zawng chu chumi pindan ata chu ka theh chhuak vek a. 9 Tin, thu ka pe a, pindante chu an thian fai a; tichuan, Pathian in bungbêlte chu chhangphut thilhlan te leh rimtui te nên ka la lût leh a. 10 Tin, Levi-hote leh hla satute chu an chan ai pêk an nih loh avângin mahni lo lam ṭheuhvah an tlân darh vek a ni tih ka hre leh ta bawk a. 11 Tichuan, rorêltute ka khak a, “Engati nge Pathian in chu thlahthlam a nih reng mai le?” ka ti a. Tin, anni chu ka ko khâwm vek a, an hmun ṭheuhvah ka awmtîr leh a. 12 Chutichuan, Juda mi zawng zawng chuan buh sâwma pakhat te, uain te, hriak te chu thawhlâwm dah khâwmnaahte chuan an rawn la a. 13 Tin, puithiam Selemia leh lehkhaziaktu Zadoka leh Levi-ho zînga mi Pedaia-te chu thawhlâwm dah khâwmnate hotu atân ka siam a; anmahni puibâwmtuah chuan Matania fa Zakura fapa Hanana a awm a; rinawma ngaih an ni a, an hnathawh chu an unaute hnêna thil sem vêl a ni. 14 Aw ka Pathian, hemi thu-ah hian min hre reng la, ka Pathian in leh a rawngbâwlna atâna ka thiltih ṭhatte chu thai bo lul suh ang che. 15 Chûng lai chuan Judai ramah Chawlhnia uain sâwr khurtea rap sâwr te, buhphal rawn phur te, uain te, grêp te, theipui te leh phurrit tinrêng phurhtîr tûra sabengtung siam laite ka hmu a; chûng chu Chawlhniah Jerusalem-ah an rawn phur lût a; ei tûr zawrh nite chuan a dik lohzia ka hriattîr a. 16 Tura rama mi chuta chêng vete pawhin sangha leh bungraw tinrêng an rawn la a, Chawlhniah Juda mite hnênah Jerusalem-ah an zuar a. 17 Chutichuan, Juda mi liante chu ka khak a, an hnênah, “Chawlhni tibawrhbânga in thil ṭha lo tih hi engtizia nge ni? 18 In pi leh pute pawh khân hetiang hi an ti a ni lâwm ni? Tin, kan Pathian chuan hêng thil ṭha lo zawng zawng hi kan chungah leh he khaw chungah hian a rawn thlentîr ta a ni lâwm ni? Chuti chung pawhin Chawlhni tibawrhbângin Israel mite chunga thinurna in la thlen belhtîr cheu mai ka ti,” ka ti a. 19 Tin, heti hi a ni a, Chawlhni dâwna Jerusalem kulh kawngkhâr a thim deuh veleh kawngkhârte khâr tûrin thu ka pe a; tin, Chawlhni a ral hma loh chuan hawn loh tûrin thu ka pe bawk a. Chawlhnia thil phurh rêng rêng an lâk luh loh nân ka tlangvâl ṭhenkhat chu kawngkhâr ka vêntîr a. 20 Chutichuan, sumdâwng mite leh bungraw tinrêng zuar mite chu vawi khat emaw, vawi hnih emaw chu Jerusalem pâwn lamah an riak a. 21 Chutichuan, a dik lohzia ka hriattîr a, an hnênah, “Engati nge kulh bulah in riah? Hetianga in tih leh chuan in chungah ka kut ka thlâk ang,” ka ti a. Chuta chin chu Chawlhni chuan an lo kal leh ta lo va. 22 Tin, Levi-hote chu inthian faia, Chawlhni tihthianghlimna tûra kulh kawngkhâr rawn vêng tûrin thu ka pe a. Aw ka Pathian, hemi thu-ah pawh hian min hre reng la, i khawngaihna nasa tak avângin min zuah ang che. 23 Chûng lai chuan Juda mi, Asdod hmeichhia te, Amon hmeichhia te, Moab hmeichhiate nupuia neite chu ka hmu a. 24 An fate zînga a zâtve chu Asdod ṭawngin an ṭawng a, chûngho ṭawng dân ang ang chauh lo chuan Juda ṭawngin an ṭawng thei lo va. 25 Tichuan, anni chu ka ko khawm a, ânchhia ka lawh a, ṭhenkhat chu ka vua a, an sam te ka pawh thlâksak a, an fanute chu chûngho fapate neihtîr lo tûr leh chûngho fanute chu an fapate tân emaw, anmahni tân emaw nei lo tûrin Pathian chhâlin chhia ka chhamtîr a. 26 “Israel lal Solomona pawh kha hetiang thilahte hian a sual a ni lâwm ni? Chuti chung pawhin hnam tam tak zingah chuan amah ang lal an awm lo va, a Pathian mi duh tak a ni a, Pathianin Israel ram zawng zawng chunga lalah a siam bawk a; nimahsela, ani meuh pawh chu ram dang hmeichhiain a tisual ta mai a ni a. 27 Chutichuan, ram dang hmeichhiate neia kan Pathian chunga thil ṭha lo tak mai hi ti tûrin in thu kan zâwm dâwn em ni?” ka ti a. 28 Tin, puithiam lal Eliasiba fa, Joiada fapa pakhat chu Horon mi Sanbalata mâkpa a ni a; chuvângin, ka hnên aṭangin ka tlân botîr ta a. 29 Aw ka Pathian, puithiamna hna leh puithiamna hna thuthlung leh Levi-ho thuthlung an tihbawlhhlawh avângin hre reng hlawm ang che. 30 Chutiang chuan ram dang mite lakah ka tithianghlim a, puithiamte, Levi-hote tân an hnathawhna ṭheuhva an rawngbâwl dân tûr ka ruatsak a; 31 a hun ruat ṭheuhva thing hlan atân leh thlai thar hmasa ber atânte nên. Aw ka Pathian, a ṭha lamin min hre reng ang che.
Lalnu Vastiin Lal Ahasuera thu a hnial
1 Lal Ahasuera a lal laiin (chu Ahasuera chu India aṭanga Ethiopia thlenga ram ṭhen za leh sawmhnih leh pasarih chunga lal a ni a) heti hi a ni a. 2 Lal Ahasuera a ram lalṭhutthlêng lal khua Susan-a a ṭhut lai, 3 a lal kum thum kum khân a mi liante zawng zawng leh a mite tân ruai a ṭheh a; Persia leh Media rama thuneitute, an ram ṭhen mi ṭhate leh mi liante chu an awm vek a; 4 a ram ropui tak rote leh a lal ropui nasatzia chu rei tak, ni za leh ni sawmriat zet a entîr a. 5 Tin, chûng zawhah chuan mi lian leh mi tê lal khua, Susan-a lo tel zawng zawng tân lal in huan hung chhûng kawtlaiah lal chuan ni sarih zet ruai a ṭheh a; 6 puan, a vâr te, a hring te, a dumpâwl te, lazai sin sendukin tangkaraw khângah leh sailungvâr banahte an thlung a; rangkachak leh tangkaraw ṭhutphahte chu sailungvâr, a sen te, a vâr te, a eng te, a dum tea rem chungah an hûng a. 7 Rangkachak novin uain chu an sem a (no chu chi hrang hrang, inang lo thluah a ni), lal chuan a ngah khawp a, uain chu a awm leng lung mai a ni. 8 Tin, uain chu dân angin an in a; tu mah tihluih an ni lo va, mi tinin an duh anga an tih ṭheuhna tûrin lal chuan a ina hotu zawng zawngte chu a hrilh a. 9 Tin, Lalnu Vasti pawhin Ahasuera lal inah chuan hmeichheho tân ruai a ṭheh a. 10-11 A ni sarih nî chuan lal rilru chu uain chuan a tihpuamsak ta a, pindan vêngtu pasarih, Lal Ahasuera hmaa rawngbâwl ṭhîn Mehumana te, Biztha te, Harbona te, Bigtha te, Abagtha te, Zethara te, Karkasa te chu Lalnu Vasti, a lallukhum khum chunga mipuite leh mi liante a hmêlṭhatzia inentîr tûra lal hmaa va hruai tûrin thu a pe a; a hmêl a ṭha hle si a. 12 Nimahsela, Lalnu Vasti chuan pindan vêngtuten kal tûra lal thupêk an hrilh chu a hnial a; chuvângin, lal chu a thinrim ta hle mai a, a thinrim a alh ta a. 13 Chutichuan, lal chuan thil hre mi mi fingte hnênah chuan (dân leh rorêl dân hria zawng zawngte chu chutiang chuan lalin a râwn ṭhîn rêng a ni; 14 amah dâwltute chu Karsena te, Sethara te, Admatha te, Tarsisa te, Meresa te, Marsena te, Memukana te, Persia leh Media ram mi lian pasarih, lal hmêl hmu fotu, an rama amah hnaih ber ṭhînte an ni), 15 “Pindan vêngtuten an hriattîr si, Lal Ahasueran a tih anga a tih loh avângin Lalnu Vasti chungah chuan dân anga ti tûrin engtin nge kan tih ang?” a ti a. 16 Memukana chuan lal leh mi liante hmaah chuan, “Lalnu Vasti chuan lal chungah chauh a tisual a ni lo va, mi lian zawng zawng leh Lal Ahasuera ram ṭhen zawng zawnga hnam tin chungah pawh a tisual a ni. 17 He lalnu thiltih hi hmeichhia zawng zawngin an han hre darh ang a, ‘Lal Ahasuera chuan Vasti a hmaa rawn hruai tûrin thu a pe a; nimahsela, a kal lo,’ tih thu a han than chuan an pasalte an hmuhsit phah mai ang. 18 Tin, vawiinah ngei pawh hian Persia leh Media mi liannuho, lalnu thiltih hriate hian lal mi liante chungah an ti ve mai ang a. Chutichuan, inhmuhsitna leh thinurna nasa tak a chhuak ang. 19 Lal ṭha tih zâwng a nih chuan, lal thupêk than chhuak sela, Lalnu Vasti chu Lal Ahasuera hmaah lo kal tawh hauh suh se, tih thu hi tihdanglam tawh hauh loh tûrin Persia leh Media ram dân zîngah ziak ni sela; tin, lalin amah aia ṭha zâwk a lalnu nihna luahtîr sela. 20 Tin, lal thupêk chu a ram zawng zawngah (zau teh mah sela) than chhuah a nih hunah chuan, an nupuiten a mi lian a mi tein an pasalte an pawisa ang,” a ti a. 21 Chu thu chuan lal leh mi liante chu a tilâwm hle a; tichuan, lal chuan Memukana thu ang chuan a ti a. 22 Lalram zawng zawngah, ram tinah anmahni lehkha ṭheuhvin, hnam tin anmahni ṭawng ṭheuhvin mipain mahni in chhûng ṭheuhvah thu an nei tûr a ni tih thu a thawn ta a ni.
Estheri lalnuah a ṭang
1 Chûng thil hnua Lal Ahasuera thinrim chu a lo daih hnu chuan, Vasti leh a thiltih leh a chungchânga thupêk chu a hre chhuak a. 2 Chutichuan, lal chhiahhlawh, a rawngbâwltute chuan a hnênah, “Lal tân nula hmêlṭha zawn ni sela; 3 lal pindan enkawltu Hegaia, hmeichhe enkawltu hnuaiah, Susana lal hmeichhe dah khâwmna inah nula hmêlṭha zawng zawng ko khâwm tûrin lalin a ram chhûnga ram ṭhen zawng zawngah hotu ruat sela; tin, an intihthianghlimna tûrte pêk ni ṭheuh sela; 4 lal tilâwmtu ber nula chu Vasti aiah lalnu ni sela,” an ti a. Tichuan, chu chuan lal chu a tilâwm a, chutiang chuan a ti ta a. 5 Lal khawpui Susan-ah chuan Juda mi, mi pakhat a awm a, a hming chu Mordekaia a ni a, Benjamin mi Kisa fa Simeia fapa Jaira fapa a ni; 6 Babulon lal Nebukadnezzaran Juda lal Jekonia sala a hruai laia Jerusalem aṭanga hruai a ni. 7 A pami fanu, Hadasi, Estheri an tih chu a enkawl seilian a; pa a nei lo va, nu a nei bawk si lo va. Nula chu a nalhin a hmêl a ṭha hle mai a; a nu leh a pa an thih hnuin Mordekaia chuan a fanu atân a awmpui ta a ni. 8 Chutichuan, lal thupêk leh lal thuruat chu an lo hriata, nula tam tak, lal khawpui Susan-a Hegaia vênnaah an kal khâwm chiam lai chuan heti hi a ni a, Estheri chu lal inah hmeichhe vêngtu Hegaia vênnaah chuan an hruai lût a. 9 Tin, nula chuan a tilâwm a, a duhsakna a chang a, lal in ata a chanvo leh a intihthianghlimna tûr chu a pe thuai mai a, nula pasarih pêk âwm deuh deuhte nên; amah leh a nulâtpuite chu hmeichhe awmna hmun ṭha berah a hruai ta a. 10 Estheri chuan eng chi nge a nih leh tute nge a laichînte a hriattîr hauh lo va; Mordekaia chuan hriattîr lo tûrin thu a pe tlat a ni. 11 Estheri chuan eng nge a tih ṭhina, engtin nge a awm tih hre tûrin Mordekaia chu ni tin hmeichhe awmna kawt hung chhûngah chuan a kal ṭhîn a. 12 Tin, thla sâwm leh thla hnih hmeichhe tâna dân anga an chungchânga thiltih hnua Lal Ahasuera hnênah nulaho an kal hun a lo thlen chuan (chutiangah chuan an intihthianghlim hun a kim tawh ṭhîn a, hetiang hian an ti ṭhîn a ni, thla ruk chhûng murra hriakin an zût a, thla ruk dang leh chhûng rimtui leh hriak dangin an zût leh a), 13 hetiang hian an kal ṭhîn a, lal ina luhpui tûrin hmeichhe awmna ata an duh apiang an pe ṭhîn a ni. 14 Tlai lamah an kal a, a tûkah, hmei vêngtu, lal pindan vêngtu Saasgaza vên hmeichhe awmna pahnihnaah an lêt leh ṭhîn a; lalin a duha, an hming lama a kohte chauh lo chu lal hnênah an kal leh tawh ṭhîn lo. 15 Chutichuan, Mordekaia pami Abihaila fanu, a fanu atâna a awmpui Estheri chu lal hnêna a kal hun a thlen chuan, hmeichhe vêngtu, lal pindan vêngtu Hegaia ruat chauh lo chu eng mah a duh lo va. Estheri chu a hmu apiangte duh zâwng mi nih a kai a. 16 Chutichuan, Estheri chu Lal Ahasuera lal inah thla sâwmna, Tebeth thlaah kum sarih a lal kumah an hruai lût a. 17 Lal chuan hmeichhe dang zawng zawng aiin a hmangaih a, nula dang zawng zawng aiin khawngaihna leh duhsakna a hlawh a; tichuan, lallukhum a khumtîr a, Vasti aiah lalnuah a siam ta a. 18 Chutichuan, Estheri hmingin lal chuan a mi liante leh a mite tân ruai ropui tak a ṭheh a; a rama mite tân awm nî a khamsak a, lal tih âwm rêngin phal takin thilte a sem a.
Mordekaian lal nunna a hum
19 Tin, nulaho an inkhâwm leh lai chuan Mordekaia chu lal kawt hung kawngkaah a ṭhu a. 20 Mordekaia thupêk avângin Estheri chuan tute nge a laichînte leh eng chi nge a nih a la hriattîr lo fo va; Estheri chuan Mordekaia thu chu a awmpui laia a zâwm ṭhîn ang khân a la zâwm reng a ni. 21 Tin, lal kawt hung kawngkaa Mordekaia a ṭhut lai chuan lal pindan vêngtu zînga mi pahnih Bigthana leh Teresa, kawngka vêng ṭhîntute chu an thinur a, Lal Ahasuera chungah kutthlâkna remchâng an zawng a. 22 Chu thil chu Mordekaian a lo hria a, Lalnu Estheri chu a hrilh a; tin, Estheri chuan Mordekaia hmingin lal a hrilh a. 23 Tin, chumi thu chu an han chhui chiang a, chutiang chu a lo ni ngei tih an hriat chhuah chuan thingah an khai hlum ve ve a; chu chu lal kawl, lal chanchin ziakna buah an ziak a.
Hamanan Juda-ho mang a tum
1 Chûng thil hnuah chuan Lal Ahasuera chuan Agag mi Hamedatha fapa Hamana chu a kaisântîr a, a chawisâng a, a mi liante zawng zawng aiin a ṭhut chungnuntîr a. 2 Tin, lal kawt hung kawngkaa awm, a mite zawng zawng chuan Hamana chu an zah a, chibai an lo bûk ṭhîn a; chutianga tih tûrin lalin thu a pe a ni. Nimahsela, Mordekaia chuan a hmaa kûnin chibai a bûk duh lo va. 3 Tin, lal mite, lal kawt hung kawngkaa awm zawng zawngte chuan Mordekaia hnênah, “Engati nge lal thupêk i bawhchhiat?” an ti a. 4 Tin, heti hi a ni a, nî tin a hnêna an sawia a pawm chuan loh hnu chuan, Mordekaia thu chu a ngaimawh nge ngaimawh lo tih hriat nân Hamana chu an hrilh a, Juda mi a ni tih a lo hrilh tawh hlawm si a. 5 Tin, Hamanan Mordekaia a hmaa kûna chibai a bûk loh a han hriat chuan Hamana chu thinrimin a khat ta ṭeuh mai a. 6 Nimahsela, Mordekaia chung chauhva kut han thlâk chu eng mah thamah a ngai lo va, Mordekaia chi chu an hrilh tawh bawk si a; chuvângin, Ahasuera ram chhûng zawng zawnga Juda-ho, Mordekaia chipuite chu tihhlum vek a tum ta a. 7 Lal Ahasuera kum sâwm leh kum hnih a lal kum, thla khatna, Nisan thlaah Hamana hmaah ni tin, thla tin, thla sâwm leh pahnihna Adar thla thlengin Aienna ṭhum an vâwr reng a. 8 Tin, Hamanan Lal Ahasuera hnênah, “I ram ṭhen chhûng tinah hnam eng emaw, hnam dang nên inang lo, intihrang an awm darh nuaih a; an dânte chu hnam dangte dân nên a inang lo riau mai a, lal dân pawh an zâwm hek lo; chuvângin, chutiang awmtîr phal chu lal tân a manhla lo hle mai a. 9 Lalin rem a tih chuan tihhlum vek tûr a ni tih ziak tlat ni sela; lal sum ina dah tûrin lal sum enkawltute kutah tangkaraw talent sângsâwm ka pe ang e,” a ti a. 10 Tin, lal chuan a zungbun a phawi a, Juda-te hmêlma Agag mi, Hamedatha fapa Hamana chu a pe a. 11 Lal chuan Hamana hnênah, “Tangka leh chûng mite pawh chu ṭha i tih ang anga tih tûra pêk i ni,” a ti a. 12 Chutichuan, thla khatna ni sâwm leh ni thum nîin lal lehkhaziaktute chu an ko va, Hamana thupêk ang chuan lal upate, ram ṭhen tin awptute, hnam tin puipate an thawn a, ram ṭhen tinah anmahni lehkhain, hnam tin anmahni ṭawng ṭheuhvin. Lal Ahasuera hminga thawn a ni a, lal zungbuna nem a ni. 13 Tin, lalram ṭhen tinah, Juda mi zawng zawngte chu, ṭhalai leh tar te, naupang tê tê te, hmeichhia te, ni khatah, thla sâwm leh thla hnihna, Adar thla ni sâwm leh ni thum nî takin tihboral veka, thah veka, tihchimih veka, an sum chu râllâka lâksak tûrin lehkha an thawn darh a. 14 Chumi nî atâna lo inpeih diam tûrin chumi thupêk chu ram ṭhen tina pêka hnam tin hnêna puan tûrin chumi lehkha chu an thawn a. 15 Lal thupêkin an kal hmanhmawhtîr a, thupêk chu lal khawpui Susan-ah an puang a. Lal leh Hamana chuan zu an in der der mai a; nimahsela, Susan khua chu a mangang hle a.
Mordekaian ṭanpui tûrin Estheri a sâwm
1 Chûng an thiltih zawng zawng chu a hriat chuan Mordekaia chuan a puan a pawt thlêr a, saiip puan leh vaivut a inbel a, khawlaiah a kal a, ring tak leh lungchhe takin a ṭap a. 2 Lal kawt hung kawngka bul thlengin a kal a, tu mah saiip puan sina lal kawt hung chhûng luh chu phal a ni si lo va. 3 Lal thupêk chu a thlenna ram tawh phawt maiah chuan Juda-te chu an ṭap ngawih ngawih a, chaw an nghei a, an chiau vawng vawng a, mi tam tak chu saiipah leh vaivut zîngahte an mu a. 4 Tin, Estheri chu a nulate leh a pindan vêngtute chuan an va hrilh a; tichuan, lalnu chu a lungngai ta êm êm mai a, Mordekaia chu a saiip puan hlîpa, a sin tûrin a puan a thawn a; nimahsela, a lo duh lo va. 5 Chutichuan, Estheri chuan lal pindan vêngtu pakhat, amah vêngtu atâna ruat Hathaka chu a ko va, chûng chu eng nge nia, engtizia nge ni tih hriat nân Mordekaia hnênah a kaltîr a. 6 Chutichuan, Hathaka chu lal kawt hung kawngka zâwna mual zau laiah, Mordekaia hnênah chuan a va kal a. 7 Tin, Mordekaia chuan a chunga thil lo thleng zawng zawng leh Juda-te tihhlumna tûra lal sum zînga dah tûra Hamanan tangka pêk a tiam zât chiah te a lo hrilh a. 8 Tin, Estheri entîr tûr leh a awmzia hrilhfiah tûr te leh lal hnêna dîlsak tûrin a tîr a, anmahni tihboralna tûra Susan-a an puan thupêk ziak chhâwn a pe bawk a. 9 Tin, Hathaka chuan Mordekaia thuchahte chu Estheri a va hrilh a. 10-11 Tichuan, Hathaka chu Estheri chuan a lo bia a, “Lal chhiahhlawhte lalram ṭhen tina mite chuan, tu pawh, hmeichhia pawh, mipa pawh tihhluma a awm loh nâna lalin rangkachak tiang a lama a leknate chauh lo chu, lal hnêna a in chhûngrila lût chu tihhlum zêl tûr a ni tih dân awm chu an hre ṭheuh va; hei, ni sawmthum chhûng chu lal hnêna lût tûrin koh ka la ni lo va,” tiin Mordekaia hnêna sawi tûrin thu a chah a. 12 Tin, Estheri thuchah chu Mordekaia an hrilh a. 13 Tin, Mordekaia chuan Estheri a va chhântîr leh a, “Juda mi zawng zawngten an pumpelh loh tûr chu lal inah chuan i pumpelh dâwn bîk emaw tih inring suh. 14 Tûn hun anga i ngawih mai mai chuan, hmun danga Juda-te tân himna leh chhuahna a lo awm pawhin, nang leh i pa chhûngte chu kan boral ang. Lal nihna i lo chan hi hetih hun atân ngei hian a ni dâwn lâwm ni?” va ti tûrin a tîr a. 15 Chutichuan, Estheri chuan Mordekaia va chhâng leh tûr chuan a tîr a, 16 “Susan-a awm Juda mi zawng zawng ko khâwm vek la, keimah avângin chaw nghei ula, ni thum leh zan thum eng mah ei lo leh in lovin awm rawh u. Kei leh ka nulahote pawhin kan nghei ve ang a. Tin, dân lo angin lal hnênah ka lût ang a; tin, ka boral leh ka boral a ni mai ang,” tiin. 17 Chutichuan, Mordekaia chu a kal a, Estherin thu a pêk zawng zawng ang chuan a ti a.
Estherin lal leh Hamana ruai ṭheh tûrin a sâwm
1 Tin, ni thum ni chuan heti hi a ni a, Estheri chuan a lal silhfên a inbel a, lal rorêlna in zâwn taka lal in hung chhûngah chuan a va ding a, lal chu lalṭhutthlênga a in luhna hawiin a ṭhu a. 2 Tin, Lalnu Estheri chu lal kawt hung chhûnga a ding lalin a han hmuh chuan a chungah a lâwm a; lal chuan a rangkachak lal tiang ken chu Estheri lamah chuan a han lek a. Chutichuan, Estheri chuan a va hnaih a, lal tiang hmâwr chu a han khawih a. 3 Tin, lal chuan a hnênah, “Lalnu Esther, eng nge i duh le? Eng nge dîl i duh? Ka ram zâtve hial pawh ka pe ang che,” a ti a. 4 Tin, Estheri chuan, “Lalin ṭha a tih zâwng a nih chuan, vawiina a tâna ruai ka buatsaih ei tûrin lal leh Hamana lo kal teh se,” a ti a. 5 Tin, lal chuan, “Estheri sawi ang chuan Hamana chu han ko thuai rawh u,” a ti a. Chutichuan, lal leh Hamana chu Estheri ruai buatsaih ei tûr chuan an kal a. 6 Tin, an uain ruaiah chuan lalin Estheri hnênah, “Eng nge i dîl dâwn? Pêk i ni ang. Eng nge ni i duh? Ka ram zâtve hial pawh pêk i ni ang,” a ti a. 7 Tin, Estheri chuan, “Ka thil dîl leh ka thil ngen chu: 8 lal mittlung ka niha, ka thil dîl chu lalin pêk rem a tih zâwng a niha, ka thil ngen chu tih rem a tih zâwng a nih chuan, lal leh Hamana chu ka ruai buatsaih ei tûrin lo kal sela, lal tih ang chuan naktûkah hian ka ti mai ang,” a ti a, a chhâng a.
Hamanan Mordekaia tihhlum a tum
9 Chutichuan, Hamana chu chumi ni chuan hlim tak leh lâwm takin a chhuak ta a; nimahsela, Hamana chuan lal kawt hung kawngkaa Mordekaia chu a hmaa a lo ding leh chechâng lo a han hmuh chuan, Mordekaia chungah chuan a thinur ta êm êm mai a; 10 amaherawhchu, Hamana chu a insûm hrâm hrâm a, a haw ta a; a ṭhiante leh a nupui Zeresi chu a kohtîr a. 11 Tichuan, Hamana chuan a sum leh pai ropuizia te, fa a ngahzia te, lalin a kaisântîrna thil zawng zawng te, lal puipate leh a mite dang aia a tihchungnunnate chu an hnênah a sawi a. 12 Chuti chauh pawh ni lovin, Hamana chuan, “Lalnu Estheri chuan le, a ruaiṭhehah chuan keimah chauh lo chu tu mah lal hnênah a teltîr lo va; naktûkah hian lal nên min sâwm a ni. 13 Nimahsela, Juda mi Mordekaia lal kawt hung kawngkaa ṭhu ka hmuh chhûng chuan hêng zawng zawng hi ka tân eng mah hnemhnânna a awm lo,” a ti bawk a. 14 Chutichuan, a nupui Zeresi leh a ṭhiante zawng zawng chuan a hnênah, “Tawng sawmngaa sângin khai hlumna siamtîr la; tin, Mordekaia chu khai hlumtîr tûrin zîngah lal hrilh la, ruaiṭhehnaah chuan lal hnênah hlim takin kal mai rawh,” an ti a. Chu chuan Hamana chu a tilâwm a, khai hlumna chu a siamtîr a.
Lalin Mordekaia a chawimawi
1 Chumi zân chuan lal chu a muhîl thei lo va; lal chanchin ziakna bu rawn la tûrin thu a pe a, a hmaah chuan an chhiar a. 2 Bigthana leh Teresa, lal pindan vêngtu, kawngkhâr vêngtu pahnihten Lal Ahasuera chunga kutthlâk an tum thu Mordekaian a lo hriattîr thu ziak chu an han hmuchhuak a. 3 Tin, lal chuan, “Chumi thu avâng chuan Mordekaia hian eng ang chawimawina leh ropuina nge a hmuh phah le?” a ti a. Lal chhiahhlawh, a rawngbâwl ṭhînte chuan, “Eng mah tihsak a hlawh lo,” an ti a. 4 Tin, lal chuan, “Tu nge ni kawt hung chhûnga awm saw?” a ti a. Chumi lai chuan Hamana chu a khai hlumna siama Mordekaia khai hlumtîr tûr thu lal hnêna sawi tûrin, lal kawt hung pâwn zâwk chhûngah chuan a lo kal a ni a. 5 Tin, lal chhiahhlawhte chuan a hnênah, “Ngai teh, lal kawt hung chhûnga awm chu Hamana a ni,” an ti a. Tin, lal chuan, “Lo lût rawh se,” a ti a. 6 Chutichuan, Hamana chu a lût a. Tin, lal chuan a hnênah, “Lalin mi chawimawi a duha chu eng tihsak nge ṭha ang le?” a ti a. Tichuan, Hamana chuan, “Lalin keimah aia a chawimawi duh zâwk tu nge awm ang?” a ti rilru a. 7 Tichuan, Hamana chuan lal hnênah, “Lalin a chawimawi duh chu, 8 lalin a inbel ṭhin lal puan te, lal chuan ṭhinna sakawr te, lallukhum, lalin a khum ṭhinte rawn lâksak ni sela; 9 tin, lalin a chawimawi duha chu thuam nân lal puan leh sakawr chu lal upa min ber kutah pêk ni sela, chuantîr sela, kawtthlêr fanpui sela, a hmaah chuan, ‘Lalin a chawimawi duha chu hetiang hian tih a ni ang,’ tiin puang zel sela,” a ti a. 10 Chutichuan, lal chuan Hamana hnênah, “I sawi ang chuan lal puan leh sakawr chu va la thuai thuai la, lal kawt hung kawngkaa ṭhu ṭhîn, Juda mi Mordekaia chungah chutiang tak chuan va ti rawh; i sawi tâk zawng zawng kha hmaih awm hauh suh se,” a ti a. 11 Chutichuan, Hamana chuan lal puan leh sakawr chu a va la a, Mordekaia chu a thuam a, kawtthlêrah a chuan vêltîr a, a hmaah chuan, “Lalin a chawimawi duha chu hetiang hian tih a ni ang,” tiin a puang a. 12 Tin, Mordekaia chu lal kawt hung kawngkaah chuan a lo kal leh a, Hamana erawh chu ngui takin inlukhuhin a in lamah a haw ta var mai a. 13 Tin, Hamana chuan a nupui Zeresi leh a ṭhian zawng zawngte hnênah chuan a chunga thil lo awm dân engkim chu a hrilh a. Tichuan, a mi fingte leh a nupui Zeresi chuan a hnênah, “Tawhsual i tawhna Mordekaia chu Juda mi a nih chuan i chelh lo tawp ang a, a hmaah chuan i chesual ngei ang,” an ti a. 14 Chutia a hnêna an sawi lai mêk chuan lal pindan vêngtute chu an va kal a, Estheri buatsaih ruaiṭhehnaa kal tûr chuan Hamana chu hmanhmawh takin an hruai ta a.
1 Chutichuan, lal leh Hamana chuan Lalnu Estheri ruai chu an kîlpui a. 2 Tin, a ni hnih nia uain an in lai chuan lal chuan Estheri hnênah, “Lalnu Esther, eng nge i duh le? Pêk i ni ang. Eng nge ni i dîl dâwn? Ram zâtve hial pawh pêk i ni ang,” a ti leh a. 3 Chutichuan, Lalnu Estheri chuan, “Aw lalpa, i mittlung ka niha, lal remtih zâwng a nih chuan, ka duh chu ka nunna mi zuahsak a ni a, ka dîl chu ka chipuite nunna zuah a ni. 4 Kei leh ka chipuite chu tihborala thah vek tûra tih kan ni a. A hmei a pain bawihah hralh tûra tih ni lek ila chu eng mah ka sawi lo tûr; mahse, tihmang tûr kan ni a, lal tân a hek hle ang, hmêlmapa chuan a rûl sêng lo vang,” a ti a, a chhâng a.
Hamana an khai hlum
5 Chutichuan, Lal Ahasuera chu a ṭawng ta a, Lalnu Estheri hnênah chuan, “A rilru pawha chutiang han ti ngam chu tu nge a niha, khawiah nge a awm?” a ti a. 6 Tin, Estheri chuan, “Taitu leh hmêlma a ni, he mi sualpa Hamana hi a ni,” a ti a. Chutichuan, lalnu leh lalpa hmaah chuan Hamana chu a khûr ta a. 7 Tin, lal chu a zu ruai ṭhehna ata chu thinurin a tho va, lal huanah a lût a; tin, Hamana chu Lalnu Estheri hnêna a nunna zuahsak dîlin a ding a, lal chuan a chungah thil ṭha lo tih tum âwm taka a hriat avângin. 8 Chutichuan, lal chu lal huan ata chu uain ruai ṭhehna hmunah chuan a kal leh a, Hamana chu Estheri ṭhutna, ṭhutthlêngah chuan a tlu dêr mai a. Chutichuan, lal chuan, “He inah ka mit hmuh ngeiah lalnu chu a tilui elo maw?” a ti a. Chutia lal a ṭawng veleh chuan Hamana hmai chu an khuh ta a. 9 Chutichuan, lal pindan vêngtu zînga pakhat, lal hmaa lo awm Harbona chuan, “Ngai teh, lal tâna thu ṭha sawitu Mordekaia khai hlum nâna tawng sawmngaa sâng, Hamana siam sa diam khai hlumna Hamana inah a awm,” a ti a. Tin, lal chuan, “Chumiah chuan khai hlum rawh u,” a ti a. 10 Chutichuan, Mordekaia khai hlumna tûra a buatsaihah chuan Hamana chu an khai hlum ta a. Tichuan, lal thinurna chu a lo dai ta a.
Juda-ten an lo bei lêt tûr a ni
1 Chumi ni chuan Juda-te hmêlma Hamana in chu Lal Ahasuera chuan Lalnu Estheri a pe a. Tin, Mordekaia chu lal hmaah a lo kal a; Estheri chuan a eng nge a nih a lo hrilh tawh a. 2 Tin, lal chuan Hamana a lâksak, a zungbun chu a phawi a, Mordekaia a pe a. Tin, Estheri chuan Mordekaia chu Hamana in chhûng hotuah a siam a. 3 Tin, Estheri chuan lal hmaah chuan thu a sawi leh a, a ke bulah a bawk a, mittui tla chungin Agag mi Hamana thil ṭha lo tih tum Juda-te chunga a remruat chu tihbo a dîl a. 4 Tin, lal chuan rangkachak tiang chu Estheri lamah chuan a han lek phei a. Chutichuan, Estheri chu a tho va, lal hmaah chuan a ding a, 5 “Lal ṭha tih zâwng a niha, a mittlung ka niha, lal ngaiha a dika, a lâwm zâwng ka nih chuan, Agag mi Hamedatha fapa Hamana remruat lehkha, lalram ṭhen zawng zawnga mi Juda-te tihboral vek tûr tih a ziak chu tih leh loh tûrin ziak ni sela. 6 Engtin nge ka chipuite chunga thil ṭha lo lo thleng han hmuh chu ka tuar zawh ang? Engtin nge ka laichînte boral han hmuh chu ka tuar zawh ang?” a ti a. 7 Chutichuan, Lal Ahasuera chuan Lalnu Estheri leh Juda mi Mordekaia hnênah chuan, “Ngai teh u, Juda-te chunga a kut a thlâk avângin Hamana in chu Estheri ka pe e, amah pawh chu an khai hlum ta a. 8 Tin, Juda-te hnênah i duh ang takin lal zungbuna nemin châr rawh; lal hminga ziak leh lal zungbuna nem leh châr chu tu mân an tidanglam thei lo a ni,” a ti a. 9 Chutichuan, lal lehkhaziaktute chu chumi lai la la, thla thumna, Sivan thla ni sawmhnih leh ni thum niah chuan an ko va, Mordekaia thupêk ang chuan Juda-te hnênah te, hotute hnênah te, India aṭanga Ethiopia thlenga ram ṭhen hrang za leh sawmhnih leh pasariha ram awptute leh puipate hnêna thawn tûrin lehkha an ziak a, ram ṭhen tinah chuan anmahni lehkha ṭheuhvin, hnam tin anmahni ṭawng ṭheuhvin, Juda-te hnênah pawh an lehkha leh an ṭawngin an thawn a. 10 Lal Ahasuera hmingin a ziak a, lal zungbunin an nem a, lehkha chu sakawr an phurhtîr a, ama vulh ṭhiau, lal tâna chhawr ṭhin sabengtung chak mi chunga chuangin an tlânpui a. 11 Tin, chu lehkhaah chuan lal chuan Juda-ho khaw tina awmte chu inpun khâwma lo invêng tûrin a ti a; eng mi pawh, khawi rama mi pawh, anmahni leh hmeichhia leh naupangte bei tûra lo thawk apiang chu lo beia that chimit vek tûr leh, an neih zawng zawng pawh rawksak tûrin a ti a. 12 Lal Ahasuera ram ṭhen zawng zawng chungah he thil ti tûra Juda-te tâna ni ruat chu thla sâwm leh thla hnihna, Adar thla ni sâwm leh ni thum ni, Juda zawng zawng thah vek tûra ruat ni chu a ni. 13 Tin, chumi lehkhaa thupêk chu, chumi nia an hmêlmate chunga phuba an lâk theihna tûra Juda-te chu inpeih diama an lo awm theih nân ram ṭhen zawng zawnga thawn chhuaha, mi zawng zawng hnêna puan tûr, tih a ni. 14 Chutichuan, hmanhmawh takin lal thupêkin lal tâna chhawr ṭhin sabengtung chak mi chunga chuang lehkha tlânpuitute chu an chhuak a; tin, thupêk chu lal khawpui Susan-a puan chhuah a ni. 15 Tin, Mordekaia chu lal puan, a dumpâwl leh a vâr inbelin, rangkachak lallukhum ropui tak leh puanzaisîn kawrfual senduk inbelin lal in ata chu a chhuak a; Susan khua chu an au dur dur a, an lâwm êm êm a. 16 Juda-ho chuan êng te, lâwmna te, hlimna te, chawimawina te an nei. 17 Lal thupêk leh lal thu tihtlûk thlenna ram ṭhen leh khua apiang chu an lâwmin an hlim êm êm a, ruai te an ṭheh a, awmni an kham a. Tin, chûng ram mite zînga tam tak chu Juda-ah an insiam a; Juda-te chu an lo hlauh tak avângin.
Juda-ten an hmêlmate an that
1 Chutichuan, thla sâwm leh thla hnihna, Adar thla ni sâwm leh ni thum ni, Juda-ho hmêlmaten an chunga rorêl an beisei ni, lal thupêk anga an tih ni tûr chu a lo hnai ta a. Nimahsela, a leha lingin Juda-ten anmahni hawtute chunga ro an rêlna a lo ni ta zâwk a. 2 Lal Ahasuera ram ṭhen zawng zawnga Juda-hote chu, an chhiatna zawngtu chunga kut thlâk tûrin an khuaahte chuan an pung khâwm a. Tu mân an chelh ta lo va, anmahni chu mi zawng zawngin an hlau ta a. 3 Chumi ram ṭhena mi ṭha zawng zawng te, hotu te, ram awptu te, lal hnathawktute chuan Juda-te chu an ṭanpui ta a, Mordekaia an hlauh avângin. 4 Mordekaia chu lal ina mi ropui tak a ni a, a hming chu an ram ṭhen zawng zawngah a thang ta bawk a; Mordekaia chu a ropui ta deuh deuh a ni. 5 Tin, Juda-te chuan an hmêlmate chu khandaihin an sâm a, an that a, an tiboral a, anmahni hawtute chungah an duh ang angin an ti a. 6 Lal in Susan-ah chuan Juda-ten mi zanga an that a, an tiboral a. 7-10 Tin, Hamedatha fapa, Juda-te hmêlma Hamana fapate sâwm - Parsandatha te, Dalphona te, Aspatha te, Poratha te, Adalia te, Aridatha te, Parmasta te, Arisaia te, Aridaia te, Vaizatha te chu an tihlum a; râllâk sum erawh chu an khawih lo. 11 Chumi ni chuan lal khawpui Susan-a an thah zât chu lal hmaah an rawn thlen a. 12 Tin, lal chuan lalnu Estheri hnênah, “Juda-te chuan lal khawpui Susan-ah hian mi zanga leh Hamana fapate sâwm an that a, an tiboral ta. Lalram ṭhen dangah chuan engtin tak ti ang maw? Eng nge i dîl dâwn le? Pêk i ni ang. Eng nge i la duh leh dâwn? Tih a ni ngei ang,” a ti a. 13 Tin, Estheri chuan, “Lalin rem a tih chuan, Susan-a Juda-te hian vawiina thupêk ang bawk hian naktûkah pawh ti sela. Hamana fapa sâwmte chu khai hlumnaah khai kân ni rawh se,” a ti a. 14 Tin, lal chuan chutianga ti tûr chuan thu a pe a; Susan-ah thupêk chu an puang a, Hamana fapa sâwmte chu an khai kâng a. 15 Tin, Susan-a Juda-te chu Adar thla ni sâwm leh ni li ni pawhin an pung khâwm a, Susan-ah mi zathum an that a; nimahsela, râllâk sum chu an khawih lo. 16 Tin, Juda dang lalram ṭhen tina awmte pawh an pung khâwm a, inchhanhim tûrin ṭan an khawh a, an hmêlmate lakah râlmuangin an awm a, anmahni hawtute zînga mi sîngsarih leh sângnga an that a; nimahsela, râllâk sum chu an khawih lo. 17 Adar thla ni sâwm leh ni thum niah chu chu an ti a; tin, ni sâwm leh ni li ni chuan an châwl a, ruaiṭheh ni leh hlimna niah an siam a. 18 Susan-a Juda-te erawh chu chumi ni, ni sâwm leh ni thum leh ni sâwm leh ni li ni chuan an pung khâwm a; ni sâwm leh ni nga ni chuan an châwl a, ruaiṭheh ni leh hlimna niah an siam a. 19 Chu vâng chuan a ni, kulh nei lo khuatea Juda-te chuan Adar thla ni sâwm leh ni li ni chu hlimna leh ruaiṭhehna ni leh, ni ropui leh ei tûr inpêk tawnna niah an siam ni. 20 Tin, Mordekaia chuan chûng thil chu a ziak a, Lal Ahasuera ram ṭhente chhûnga Juda-te zawng zawng, lamhnai leh lamhlaa mite lehkha a thawn a, 21-22 Adar thla ni sâwm leh ni li ni leh ni sâwm leh ni nga ni chu kum tin awmnia hman tûrin thu a pe a; chumi ni chuan Juda-te chu an hmêlmate laka râlmuanga an awm tâk avâng leh, chumi thlaa lungngaihna chu an tân lâwmnaa a chan tâka, ṭahna ni chu ni lâwmawm taka a lo chan tâk avângin; tin, ruaiṭheh ni leh hlimna ni leh chanvo inthawn ni leh mi retheite thilpêk ni atâna siam tûrin thu a pe bawk a. 23 Tichuan, an lo tih ṭan tawh sa ang leh Mordekaian an hnêna a thawn angin Juda-te chuan tih an tum ta a; 24 Agag mi Hamedatha fapa Hamana, Juda-te hmêlma chuan Juda-te chu tiboral tûrin a phiar a, Aienna a lo siam tawh diam si a, chu chu anmahni timang tûr leh tiboral tûra aienna a ni; 25 nimahsela, lal hmaa chu thu chu a lo thlen chuan suahsualthlâk taka Juda-te a phiarna chu ama lu chungah a lêt ang a, amah leh a fapate chu khai kân tûr an ni tih lehkhain thu a pe a ni.
Purim (Aien) kût
26 Tin, chu aienna avâng chuan chûng nite chu Aien nite an ti a. Chutichuan, chûng lehkha thu zawng zawng avâng te, chûng thil lo thleng an hmuh avâng te, an chunga thil lo thleng avângte chuan, 27 Juda-te chuan anmahni chhanah leh an thlahte leh anmahni rawn bêl apiangte chhanah thlasik anga khêl lovin, chûng nite chu, lehkhathawna chuang ang leh a hun ruat ang tak chuan kum tin awmnia hmang tûrin an ti a; 28 tin, chûng nite chuan chhuan zawng zawnga chhûngkaw tinah, ram ṭhen tinah, khaw tinah an hre rengin awmniah an hmang tûr a ni; tin, chûng Aien nite chu Juda-te zingah ngaihthah mai tûr a ni lo va, chumi hriat rengna pawh an thlahteah a tâwp mai tûr a ni lo an ti a. 29 Chutichuan, Abihaila fanu, Lalnu Estheri leh Juda mi Mordekaia chuan Aien chungchânga lehkhathawn pahnihna chu tinghet tûrin thu nei takin an ziak a. 30 Tin, Ahasuera ram ṭhen za leh sawmhnih leh pasariha Juda-ho zawng zawng hnênah chuan Mordekaia chuan ṭha takin lehkha a thawn a. 31 “Juda mi Mordekaia leh Lalnu Estheri thupêk ang leh, anmahni ngei pawhin anmahni leh an thlahte tâna chaw nghei leh ṭah ni tûra an lo ruat angin, hêng Aien nite hi a hun ruatah an serh tûr a ni,” tiin. 32 Aien kût hman dân chu Estheri thupêkin lehkhaah ziak a ni.
Lal Ahasuera leh Mordekaia ropuizia
1 Chutichuan, Lal Ahasuera chuan a ram leh tuifinriat thliarkârte chu chhiah a chawitîr a. 2 A thiltihtheihna leh a chaknaa a thiltih zawng zawng leh Mordekaia ropuina chungchâng, lalin a tihchungnun dân thu kimchang takin Media leh Persia lalte lal lai chanchin ziakna buah a chuang a ni lâwm ni? 3 Juda mi, Mordekaia chu Lal Ahasuera dawttu a ni a, Juda-te zingah chuan mi ropui tak, a unaute tam tak lung tiawia, a chipuite ṭhatna zawnga, a hnampuite zawng zawng hnêna thlamuanna thu sawi ṭhîn a ni.
Setanan Joba a fiah
1 Uz ramah chuan mi pakhat a awm a, a hming chu Joba a ni; chu mi chu mi famkim, mi ngîl tak, Pathian ṭih mi, thil ṭha lo laka insûm thei mi a ni a. 2 Tin, fapa pasarih leh fanu pathum a nei a. 3 A neihnunzia chu, berâm sângsarih, sanghâwngsei sângthum, bâwngpa tuak zanga, sabengtungpui zanga leh chhiahhlawh tam tak a nei a ni; tichuan, chu mi chu khawchhak fate zîngah chuan mi ropui ber a ni a. 4 Tin, a fapate chu an inah an hun zêlah ruai inṭheh chhâwkin an kal khâwm ṭhîn a, an farnu pathumte chu an hnêna ei leh in tûrin an sâwm ṭhîn a. 5 Tin, chutia an ruaiṭhehte an zawh hnuah chuan Joba chuan anmahni a ko va, a thian hlawm a; zîng takah a tho va, an zaa hming kimin hâlral inthawi a hlân a. Joba chuan, “Ka fapate hian thil an lo tisualin Pathian an lo sawichhia a ni mahna,” a ti a ni. Joba chuan hetiang hian a ti ziah ṭhîn a ni. 6 Tin, Pathian fapate LALPA hmaa an inlan ni a lo awm a, Setana pawh an zîngah a lo tel ve a. 7 Tichuan, LALPA chuan Setana hnênah chuan, “Khawi lam aṭanga lo kal nge i nih?” a ti a. Tin, Setana chuan LALPA chu a chhâng a, a hnênah, “Leia ka vahvêlna aṭang leh ka chhuk ka chhohna aṭangin,” a ti a. 8 Tin, LALPA chuan Setana hnênah, “Ka chhiahhlawh Joba hi i ngaihtuah ngai em? Lei chungah hian amah anga famkim, mi ngîl, Pathian ṭih mi, thil ṭha lo laka insûm thei mi tu mah an awm lo asin,” a ti a. 9 Tichuan, Setana chuan LALPA chu a chhâng a, a hnênah, “Joba chuan chhan awm lovin a ṭih em ni? 10 Amah chu a in nên, a neih zawng zawng nên, kil tinah i hung vêl a ni lâwm ni? A kut hnathawh mal i sâwm a, he ramah hian a lo neinung sâwt êm êm atin a ni. 11 Tûnah hian i kut thawh la, a neih zawng zawng hi han khawihsak teh, i hmaichhan ngeiah a sawichhe mai ang che,” a ti a.
Joba fate leh a sum leh pai an boral
12 Tin, LALPA chuan Setana hnênah chuan, “Ngai rawh, a neih zawng zawng chu i kutah a awm e; amah tak erawh chu khawih suh ang che,” a ti a. Tichuan, Setana chu LALPA hma ata chu a chhuak ta a. 13 Ni khat chu a fanu a fapaten an u ber inah chaw an eia uain an in laiin, 14 Joba hnênah chuan zualko a lo tlân a, “Bâwngpate chuan lei an hrût laia sabengtungte an kianga an tlat laiin, 15 Seba miten an rawn bei a, an la a, chhiahhlawhte chu khandaihin an that a, keimah chauh hi hrilh tûr chein ka lo chhuak a ni,” a rawn ti a. 16 A la sawi lai mêk chuan mi dang a lo tlân leh a, “Vân aṭangin Pathian mei a lo tla a, berâmte leh chhiahhlawhte chu a kâng a, a tiral vek mai a, keimah chauh hi hrilh tûr chein ka lo chhuak a ni,” a ti a. 17 A la sawi lai mêk chuan mi dang a lo tlân leh a, “Kaldai-ho pâwl thumah an insiam a, sanghâwngseite chu an rawn bei a, an la vek a; a ni, chhiahhlawhte pawh chu an that a, keimah chauh hi hrilh tûr chein ka lo chhuak a ni,” a ti a. 18 A la sawi lai mêk chuan mi dang a lo tlân leh a, “I fanute leh i fapaten an u ber ina chaw an eia uain an in laiin, 19 ngai teh, thlalêr aṭangin thlipui a lo thawk a, in chu kil liah a rawn nam a, nula leh tlangvâlhote chu a delh a, an thi ta vek mai a; keimah chauh hi hrilh tûr chein ka chhuak a ni,” a ti a. 20 Tichuan, Joba chu a tho va, a puan a pawt thlêr a, a lu a ziat kawlh a, leiah a tlu a, Pathian a bia a; 21 “Ka nu pum ata saruakin ka lo chhuak a, saruak vêkin ka kir leh dâwn a nih hi. LALPAN a pe a, LALPAN a la leh ta a; LALPA hming chu fakin awm rawh se,” a ti a. 22 Hêng zawng zawngah hian Joba chu a sual lo va, Pathian chu a mawhchhiat hek lo.
Setanan Joba a fiah leh
1 Pathian fapate LALPA hmaa an inlan ni a lo awm leh a, Setana pawh LALPA hmaa inlan tûrin an zîngah a lo kal ve a. 2 Tin, LALPA chuan Setana hnênah, “Khawi lam aṭanga lo kal nge i nih?” a ti a. Tin, Setana chuan LALPA chu a chhâng a, “Leia ka vah vêlna aṭang leh ka chhuk ka chhohna aṭangin,” a ti a. 3 Tin, LALPA chuan Setana hnênah chuan, “Ka chhiahhlawh Joba hi i ngaihtuah ngai em? Amah anga mi famkim, mi ngîl, Pathian ṭih mi, thil ṭha lo laka insûm thei mi hi leiah tu mah an awm lo asin. Chhan awm lova mi tihchhiattîr chung pawhin a ngai reng a la ni,” a ti a. 4 Tin, Setana chuan LALPA chu a chhâng a, “Vun aiah vun tih a ni a. A ni, miin a neih zawng zawng a nunna atân a pe phal ang chu! 5 Tûnah i kut thawh la, a ruh leh a tisa ngei khawihsak teh, i hmaichhan ngeiah a sawichhe mai ang che,” a ti a. 6 Tin, LALPA chuan Setana hnênah, “Ngai rawh, i kutah a awm e, a nunna erawh chu zuah ang che,” a ti a. 7 Chutichuan, Setana chu LALPA hma ata chu a chhuak a, Joba chu a kephah hnuai aṭangin a lu thlengin pânchhia a veitîr a. 8 A inhiah nân lampei a la a, vut zîngah a ṭhu a. 9 Tichuan, a nupui chuan a hnênah, “I ngai rengin em ni i awm dâwn? Pathian chu sawichhia la, thi la a ni mai,” a ti a. 10 Mahse, ani chuan a hnênah, “Nang hi hmeichhe â ṭawngin i ṭawng a nih hi. Eng nge, Pathian hnên ata thil ṭha kan hmu a, thil ṭha lo pawh kan hmu lo vang em ni?” a ti a. Hêng zawng zawngah hian Joba chuan thu sual a sawi lo.
Joba a ṭhianten an rawn en
11 Tin, Joba ṭhian pathumte chuan hêng thil ṭha lo a chunga lo thleng zawng zawng hi an hriat chuan, mahni hmun ṭheuh aṭangin an lo kal a; Elifaza, Temani mi leh Bildada, Suhi mi leh Zofara, Naamathi mite chu. Amah tuarpui tûr leh thlamuan tûra a hnêna lo kal hun an ruat tlâng a. 12 Hla deuh aṭanga an han en chuan an hre lo va, an râwl an chhuah a, an ṭap a; an puante an pawt thlêr a, an lu chungah vaivut an vânvawrh a. 13 Chutichuan, ni sarih leh zan sarih leiah an ṭhutpui a, tu mahin a hnênah thu kam khat mah an sawi lo; a natna chu na êmin an hria a ni.
Pathian hnênah Joba a vui
1 Hetih hnu hian Joba chuan a ka a âng a, a pian ni chu ânchhia a lawh ta a. 2 Tichuan, Joba chuan heti hian a sawi a: 3 Ka pian ni chu boral rawh se, Mipa fa a pai ta e, tihna zân nên chuan. 4 Chu ni chu thim lo ni se; Chung lam aṭangin Pathianin ngaihsak lo se, Eng pawh chu a chungah êng suh se; 5 Thim leh thihna hlim chuan an ta atân chuh se, Chhûmin bawh reng mai sela; Chhûn tithimtu zawng zawng khân tihlau rawh se. 6 Chu zân chu zawng thimin chelh reng mai sela, Chu kuma nite zîngah chuan him ve lo sela; Thla chhiarna zîngah pawh lo tel suh se. 7 Chu zân chu zân khawhar lo ni se, Tah chuan hlim thâwm lêng suh se. 8 Ni ânchhe lawh thiamte chuan ânchhia lawh rawh se, Leviathan chawh thawh thiamte chuan. 9 A vârṭian arsi chu thim sela; Eng lo nghâk se, hmu si lo sela, Zîng khawfîngchat pawh hmu hek suh se; 10 Ka nu chhûl kawngka a lo khâr loh avâng leh Ka mit hmuha buaina a thup hek loh avângin. 11 Engati nge chhûla ka lo thih loh? Engati nge pum ata ka chhuaha ka thaw a lo tâwp loh? 12 Engah nge mal chunga mi lo chawi? Engah nge ka hnêk tûr hnutêin mi lo hmuah? 13 Chutin ka mu ang a, ka reh riai tawh tûr, Ka muhîl ang a, ka châwl tawh tûr; 14 Lei lalte leh remruatpuitute, Hmun ram lo indinsaktute nên chuan. 15 A nih loh leh hotute, rangkachak sum neia, Tangkaruaa an in tikhattute nên chuan; 16 A nih loh leh, a hun lova piang thup bo ang ka ni tawh tûr, Nausên êng hmu ngai lote ang mai hian. 17 Tah chuan mi suaksualten chawhbuai an bâng a, Tah chuan mi chaute pawh an châwl a. 18 Tah chuan mi tângte an châwl hahdam hlawm a, Vêngtu aw pawh an hre lo. 19 Tah chuan mi lian mi tê an awm za a, Chhiahhlawh pawh a pu lakah a fihlîm. 20 Engah nge hrehawm tuar hnênah êng pêk a niha, Engah nge rilrua mangang hnênah nunna pêk a nih? 21 Thih châk êm êma hmu si lo, Ro phûm zawn aia nasaa zawngtu, 22 Thlân an hmuha lâwma, Nasa taka hlim êm êm tûr hnênah chuan? 23 Mi a kawng thup bosaka hnênah engati nge êng pêk a nih, Pathianin huang a hung hnan hnênah chuan? 24 Ka ei dâwn pawhin ka thaw a pik a, Ka rûm chu tui angin a luang chhuak a. 25 Ka ṭihzâwng tak ka chungah a lo thleng a, Ka hlauh zâwng tak ka hnênah a lo thleng. 26 Ka hahdam lo va, ka awm hle hle thei lo va, Ka châwl thei hek lo; buaina a lo thleng zâwk a ni.
Elifaza
1 Tichuan, Elifaza, Temani mi chuan a chhâng a, heti hian a ti a: 2 I hnênah thu kam khat sawi ila, i hua ang em? Mahse, ṭawng lovin tu nge insûm thei ang le? 3 Ngai teh, mi tam tak i lo zirtîr a, Kut chak lote i tichak tawh a. 4 I thuin tlute a tungding a, Khûp zâwite chu i tichak a. 5 Tûnah i chungah a lo thleng ve ta a, i chau va, A han khawih chia, i buai ta a ni. 6 I Pathian ṭih hi i rinchhan ber, I kawng ngîlna hi i beisei chhan a ni lo vem ni? 7 Han ngaihtuah vang vang teh: pawi khawih lo tu nge boral? Khaw nge mi ngîl tihbovin an awm ngai? 8 Keia hmuh dân chuan khawlohna lei leta, Buaina tuh chuan a ngai vêk an seng leh ṭhîn. 9 Pathian thawah an boral ṭhîn a, A thinrimna chhêmin an ral ṭhîn. 10 Sakeibaknei rûm te, sakeibaknei kawlh awrâwl te, Sakeibaknei vânglai ngho te a tliak e. 11 Sakeibaknei upa chu ei tûr chhamin a boral a, Sakeibakneipui no hruaite chu an darh e. 12 A rûk têin ka hnênah thu a lo thleng a, Ka beng hian a phun ru ser ser chu a hria. 13 Mi mut reh lai taka Zân inlârna chu ka ngaihtuah laiin, 14 Hlauhna ka chungah a lo thleng a, khurhna nên, Ka ruh zawng zawng a tinghîng a. 15 Tichuan, ka hmai hmaah thlarau a kal a, Ka hmulthi a ding sung sung. 16 A ding a; mahse, a hmêl lan dân ka thlei thei lo; Rîruang zawng ka hmaah a awm ngei mai; A reh ṭhiap a; tin, aw ka hria a: 17 Pathian hmaah mihring thi thei a fel tâwk em ni? A siamtu hmaah mihring a thianghlim tâwk em ni? 18 Ngai rawh, a chhiahhlawhte pawh a ring zo lo va, A vântirhkohte pawh â a ti a ni a, 19 Hlum ina chêngte chu a va ring lo zual dâwn êm, Vaivuta siam mai a ni a, Phêngphehlep anga awngrawp maite chu! 20 Zing leh tlai kârah an boral a, Tukhaw ngaihsak lohvin an ral zêl ṭhîn a ni. 21 An chhûnga puan in thlunna hrui pawh chah a nihin An thi mai a ni lâwm ni, finna nei lovin?
1 Han ko teh, chhâng tûr che an awm teh rêng emaw? Mi thianghlim tu lam ber nge i hawi dâwn? 2 Vuina hian mi â a tihlum thei a, Itsîknain mi mâwl a that thei. 3 Mi â tak zung kai ka hmu a; Mahse, a chênna chu ânchhia ka lawh nghâl a. 4 A fate chu an him awzâwng lo, Kulh kawngka bulah chuan chîl thlûkin an awm a, Chhanchhuaktu tûr lah an awm hek lo. 5 A buh thar tûr rilṭâmten an ei zo va, Hlîng kâr ata pawh an la a, A neih zawng zawng chu tuihâlten an hap zo va. 6 Tuarna hi vaivut ata lo chhuak a ni lo va, Buaina pawh hi lei aṭanga lo ṭo chhuak a ni hek lo; 7 Buai tûrin mihring hi a lo piang a ni zâwk, Mei si chung lamah a chho angin. 8 Kei zawngin Pathian lam ka zawng ang a, Pathian hnênah ka chungthu ka kawltîr ang - 9 Thil ropui tak zawn chhuah rual lohte, Thil mak tak mai chhiar sên lohte titu chu. 10 Ani chuan lei chungah ruah a rawn sûrtîr a, Lo chungah tui a rawn luantîr a. 11 Mi tlâwmte chu a chawisâng a, Lusûnte chu himnaah a dah chho va, 12 Mi fingte remruat a phet chhia a, An kutin an tum a puitlin lo. 13 Mi fingte chu anmahni fin vervêknain a âwk a, Mi vervêk remruat chu theh thlâk dêr a ni. 14 Chhûn êngah thim an tâwk a, Chhûnlaiah zân angin an dap ṭhîn. 15 An kâa khandaih lak ata retheite a chhanchhuak a, Mi chak kut ata tlachhamte pawh. 16 Chutichuan, retheite chuan beisei an nei a, Khawlohnain a ka a chîp a. 17 Ngai rawh, Pathianin mi a thunun chu a eng a thâwl e; Chuvângin, Engkimtitheia thununna chu ngainêp suh. 18 Ani chuan a tina a, a tuam leh a, A tihliam a, kutin a tidam leh a ni. 19 Buaina parukah a chhanchhuak ang chia, A ni, pasarihah, thil ṭha lo rêng rêngin a khawih lo vang che. 20 Ṭâm tlâkin thihna ata a tlan ang chia, Indonaah chuan khandaih thiltihtheihna lak ata. 21 Ṭawngkam ṭha lo lakah thup i ni ang a, Chhiatna a lo thlen pawhin i hlau lo vang. 22 Chhiatna leh ṭâm chu i nuihsan ang a, Leia sakawlhte i hlau hek lo vang. 23 Rama lungte chu i thurualpui dâwn si a, Rama sakawlhte chuan an rem ang che. 24 Tin, i puan in chu a râlmuang tih i hria ang a, I huang chu i tlawh ang a, kim lo eng mah a awm lo vang. 25 I thlahte chu tam tak an ni ang a, I rîla rahte chu leia hlobet zât an ni tih i hria ang. 26 Kum tling takin i thlân i thleng ang a, A hun têa buhphal têl khâwm tâk ang mai hian. 27 En teh, kan chhui chhuah tâk hi, heti ngei hi a ni; Ngaithla la, i tâna ṭha tûrin hre rawh.
Joba
1 Tichuan, Joba chuan a chhâng a, heti hian a ti a: 2 Aw, ka manganna hi bûk ni teh sela, Ka vânduaina hi bûknaah dah ni teh sela! 3 Tuipui ṭiau aiin a rit dâwn si; Chu vâng chuan ka thu a bung a ni. 4 Engkimtitheia thal ka chhûngah a awm si a, A tûr chu ka thlarauvin a in zo va; Pathian ṭihbaiawmna chuan mi ep a. 5 Ramsabengtungin hlobet a peh laiin a hrâm em ni? Bâwngpa pawh a buhpâwl chungah a bû em ni? 6 Tuina nei lo chu chi tel lovin a ei theih em ni? Artui pâwnvâr pawh hian hânna a nei em ni? 7 Ka nunna hian khawih pawh a duh lo ve, Ka tân ei tûr tenawm tak ang a ni. 8 Aw, ka dîl chu hmu thei teh ila! Pathianin ka thil châk chu mi pe teh se! 9 Pathianin mi râwt sawm mai duh teh se! A kut lekin mi tan chhum mai teh sela! 10 Chuti pawhin thlamuanna ka la nei cheu, A ni, ka lâwm cheu vang, natna thlah loh chung pawhin, Mi thianghlima thu chu ka phat loh avângin. 11 Ka chakna hi eng nge ni a, ka han nghah rengna tûr chu? Ka tâwpna eng nge ni a, ka han dawh rengna tûr chu? 12 Ka chakna hi lung chakna em ni? Ka tisa pawh hi dâr em ni? 13 Tha han so tûr rêng ka nei lo va, Keimahah sâwm khâwm tûr rêng a awm lo. 14 Chau ṭêp tawh chungah chuan a ṭhian a ngilnei tûr a ni a, Engkimtitheia ṭihna hawisantu chungah pawh. 15 Ka unaute chu kawrte rum anga bum hmang an ni a, Kawrte tui relhru ang mai hi; 16 Tui khal avânga lo duma, Vûr inthup ṭhinna chu. 17 A lum hun chuan an kang thîn a, A lo sat chuan an hmun ata an bo ṭhîn. 18 Sumdâwng rualte chuan an kawng an rawn pênsan a, Ram rovah an lût a, an boral a. 19 Tema sumdâwng rualte chuan an en a, Seba khualzinte chuan an beisei a. 20 An beisei tak a, an hlawhchham a, An va kal a, an hrilhhai a. 21 Ka chungah chutiang chauh chu in ni, Ka chhiat tawh in hmu a, in hlau va. 22 “Mi pe teh u,” emaw, “In sum in pai mi hlân teh u,” emaw, 23 “Hmêlma kut ata mi chhanchhuak teh u,” emaw, “Hnehchhiahtute kut ata mi tlan teh u,” emaw ka ti em ni? 24 Mi zirtîr ula, ka ngawi ang e; Ka bona lai mi hriattîr rawh u. 25 Thu dik chu a chak êm êm! Mahse, in thu hian eng nge a thawh? 26 Ṭawng mai mai hi zilh in tum em ni? Mi mangang ṭawng hi thli ang mai a ni. 27 A ni, pa nei lo chungah ṭhum in vâwr duh a, Sumdâwn nân in ṭhian in hmang a. 28 Tûnah mi en teh mah u, In hmai hmaah ka daw hauh lo vang. 29 Inlamlêt ula, mi dem mai teh suh u, Inlamlêt ula, ka thu hi rêl fel a la ni hlei nêm. 30 Ka leiah dik lohna a awm em ni? Thil ṭha lo chu a thlei thei lo vem ni?
1 Leiah hian mihringin tawn tûr a nei reng a ni lâwm ni? A nite chu inhlawhfa ni ang a ni lâwm ni? 2 Chhiahhlawh daihlim châk êm êmtu ang leh Inhlawhfa a hlawh thlîr rengtu ang hian. 3 Engmahlo maiin thla tam ka lo hmang ral a, Zân ninawm takte ka tân ruat a ni. 4 Ka mutin, “Eng tikah tak tho vang i maw,” ka ti a; Mahse, zân a rei êm êm; Khawfîngchah thlengin ka let ka let a. 5 Ka tisa chu lung leh bawlhhlawhin a khat a, Ka vun chu a lo phui a, a keh thar leh a. 6 Ka nite hi puantahtu khawhthei aiin a liam rang a, Beiseina tel lovin an ral a. 7 Ka nunna hi thli mai a ni tih hre reng la, Ka mitin thil ṭha a hmuh tawh dâwn loh hi. 8 Mi hmutu mit chuan mi hmu ngai tawh lâwng, I mit ka chungah a fu ang a; mahse, ka awm tawh lo vang. 9 Chhûm a kiang a, a boral angin Seol-a chhuk tawh an chhuak leh ngai lo. 10 A inah chuan a kîr ngai tawh lo vang a, A hmunin amah a hre leh tawh hek lo vang. 11 Chu vâng chuan ka kam ka sûm lo vang; Thinlung lunghnûrin ka sawi dâwn e; Rilru na ngawih ngawihin ka phunnawi dâwn e. 12 Tuipui nge maw ka nih a, tuipui rûlpui nge maw ka nih a, Nangin mi enthlatu i dah ni? 13 Ka khumin mi tinuam ang a, Ka phunnawi chhan hi ka mut hmunin a tinêp ang, ka ti a; 14 Nang lah chuan mumangah mi tihṭhaih a, Inlârnate hmangin mi tihlau va. 15 Ka nun hian reh hlum a thlang hial ta zâwk a, He ka taksaa chên reng ai hian. 16 Ka ning hluah hluah, ka nung rei lo vang; Ka awm awmin ka awm ang e, ka nite hi engmahlo an nih hi. 17 Mihring hi eng nge maw a niha, i ngaihsâna, A chunga i rilru i nghah tlata, 18 Tûk tin amah i tlawh ṭhina, Eng lai pawha i fiah ṭhin ni? 19 Eng chen nge khaw dang hawisan lovin i awm ang a, Ka chil ka lem chhûng tê pawh mi hlamchhiah lova i awm dâwn? 20 Ka sual a nih pawhin i chungah eng nge ka tih ni, Aw, mihringte vêngtu? Engah nge i chhinchhiah atân mi daha, Mahni tâna phurrit ka nih tâk hial hi le? 21 Engah nge ka bawhchhiat i ngaihdam lohva, Ka khawlohna i lâk bo loh le? Tûnah vaivutah ka mu dâwn ta si a, Mi zawng chiam ang a; mahse, ka awm lo vang.
Bildada
1 Tichuan, Bildada, Suhi mi chuan a chhâng a, heti hian a ti a: 2 Eng chen nge hêng thil hi i sawi dâwn a, I kamchhuak chu thlipui ang a nih reng dâwn? 3 Pathianin rorêlna a kailek ngai em ni? Engkimtitheian a dik chu a kailek ngai em ni? 4 I fate a chungah an sual a nih chuan An sual avângin a hrem ṭhîn a. 5 Pathian i zawn ngat ngata, Engkimtitheia hnêna i dîl ngat ngat chuan, 6 Thianghlim leh ngîl i nih chuan I tân bengvâr a thawh ngei ang a, Dinhmun dik a pe ang che. 7 I bul lamah tê mah la, I tâwp lamah i lian ang. 8 Hmânlai hun kha zâwt chhuak teh aw, An pi pute hmuhchhuah kha ngaihtuah teh, 9 Nimina mi lek kan ni, eng kan hre si lo. Leia kan awm chhûng hi hlimthla chauh a nih hi. 10 Chûng chuan an zirtîrin an hrilh chein, An hriatna ṭhate chu an sawi chhuak dâwn lâwm ni? 11 Dûm lovah pumphîr a ṭo thei em ni? Tui lovah phairuang a ṭha thei em ni? 12 A la duah lai reng pawhin sah thlûk lohvin, Thlai dangte aiin a uai hma ṭhîn. 13 Pathian theihnghilhtu kawng chu chutiang a ni, Pathian ngaihsak lo mi beiseina chu a bo vang. 14 A innghahna chu a chim darh ang a, A rinchhan chu maimaw rîl mai a ni. 15 A in a nghêng a; mahse, a dâwl lo. A vuan tlat a; mahse, a tuar lo vang. 16 Ni chhuah hma chuan a hring a, A chawrte chuan a huan a hliap a, 17 Sih tui sîrah a zung a thlâk a, Lung hmun a hmu a. 18 A hmun ata tihbo a nihin, Ka hmu ngai lo che, tiin a phat ang. 19 Ngai teh, hei hi a kawnga hlimna chu a ni mai, Lei aṭang chuan a dangte an lo ṭo chhuak ang. 20 Ngai teh, Pathianin mi ṭha a paih bo lo vang a, Thil sual titu a tungding hek lo vang. 21 I kâ nuihnain a tikhat ang a, I hmui pawh hlim au thâwmin. 22 A hawtu che chu zahnaa tuam an ni ang a, Mi suaksual puan in pawh a awm tawh lâwng.
Joba
1 Tichuan, Joba chuan a chhâng a, heti hian a ti a: 2 Chuti a nih zawng dik takin ka hria; Mahse, engtin nge Pathian hmaah mi a fel theih ang? 3 Amah hnialkalh duh ang se, Vawi sângah vawi khat pawh a chhâng thei lo vang. 4 Thinlunga fing, chaknaa engkim ti thei, A laka inchhungawng tu nge hmuingîl? 5 Tlângte a sawn a, an hre lo va, A thinrima a tihdanglam lai khân. 6 Lei a hmunah a sawi nghîng a, A bante chu a nghîng dur dur a. 7 Ni thu a pe a, a chhuak lo va, Arsite pawh chu a khârkhip a. 8 Mahni chauhva vân tipharhtu leh Tuipui fâwn chunga kal chu. 9 Zângkhua te, Chhohreivûng te, Siruk te siamtu, Chhim lam pindante siamtu chu. 10 Thil ropui chhui chhuah rual loh te, A ni, thil mak tak chhiar sên rual loh titu chu. 11 Ngai teh, ka bulah a kal a, ka hmu si lo; A tlang ta zêl a, ka hre si lo. 12 Ngai teh, a la mai a, tu nge khap thei? Eng nge i tih, tu nge ti ang le? 13 Pathianin a thinrimna a sûm lo vang a, Rahab puitute a hnuaiah an kûn a. 14 Kei tehlulin engtin nge ani chu ka chhân ang a, Amah hnial nân thu eng nge ka thlan chhuah ang? 15 Dik mah ila, ani zawng ka chhâng lo vang, Ka khinna chu ka dîl zâwk ang. 16 Ko ila, ani chuan mi chhâng sela, Ka thu a dawnsawn ka ring chuang lo. 17 Thlipuiin mi tichhia a, Chhan awm lovin ka hliamte mi belhchhah a, 18 Thâwk ka lâk pawh mi phalsak lo va, Hrehawmin mi tikhat a. 19 Chakna thu-ah chuan, en teh, Chaka chu, Rorêlna lam thu-ah ani chu tu nge khâwm ang? 20 Dik mah ila, ka kâ hian thiam loh mi chantîr ang. Demawm lo mah ila, mi chantîr ang. 21 Demawm lo ka ni, ka inngaisâng lo; Ka nun hi ka hmusit a ni. 22 A thuhmun vek mai; chu vâng alâwm, Ṭha famkim pawh, suaksual pawh a tichhia, ka tih ni. 23 Chhiatnain thihna a thlen thut chuan, Mi nun tlang tuarna chu a nuihzat ang. 24 Lei hi mi suaksual kutah pêk a ni a. A rorêltute hmai a khuha, Amah a nih loh chuan tu dang nge ni ang? 25 Ka hunte hi zualko tlân aiin an chak a, An thlâwk bo va, thil ṭha rêng an hmu lo. 26 An kal liam a, lawng chak tak angin, Mupui tum nei bir angin. 27 Ka vuina hi ka theihnghilh ang a, Ka lungngai hmêl hi ka dah bo vang a, Ka intihlim ang, ka tihin, 28 Ka lungngaihna zawng zawng hi ka hlau va, Nangin mi tlangah mi ngai lo vang tih ka hria. 29 Thiam loh chang tûr ka ni a, Eng nge sâwt lo tûra ka ṭan tehchiam ang? 30 Vûrin inbual mah ila, Ka kutte chingalin sil mah ila, 31 Khuarkhurumah mi hnim tho vang a, Ka silhfênte ngei pawhin mi ten ang. 32 Rorêlna hmaa ding dûna ka chhân tûrin, Ani chu kei anga mihring a ni si lo. 33 Kan chunga kut nghat ve ve tûr, Kan kâra thu titlutu rêng an awm lo. 34 Ka lak ata a tiang la bo sela, A ṭihbaiawmnain mi tihlau suh se. 35 Tichuan, amah hlau lovin ka ṭawng ang, Mahni chuan chutiang ka ni si lo.
1 Ka thlain a ning e, ka nun hi; Ka nawmmâkin ka phunnawi dâwn e, Rilru na êm êm chungin ka ṭawng dâwn hi. 2 Pathian hnênah heti hian ka ti dâwn: “Mi thiam lo suh, i mi demna mi entîr zâwk rawh. 3 Mi hnehchhiaha, i kut hnathawh hmuhsita, Mi suaksual remruat tihên hi ṭha i ti em ni? 4 Tisa mitte chu i nei vein Mihring hmuh angin i hmu em ni? 5 I nite chu mihring nite ang em ni? I kumte pawh mihring kumte ang em nia, 6 Ka khawlohnate i chhui tehchiama, Ka sualna pawh i zawn tehchiam ni? 7 Mi suaksual ka ni lo tih i hria, I kut ata chhanchhuak tûr lah chu an awm lo. 8 “I kutin mi din a, mi siam a, kim biaiin; Mahse, nangin mi tiboral a. 9 Nangin hlum angin mi siam tih hre reng teh aw; Vaivutah mi chantîr leh dâwn em ni? 10 Nangin hnutetui angin mi leih chhuakin, Hnutekhal angin mi hlâwm a ni lâwm ni? 11 Vun leh tisain mi tuam a, Ruh leh thatein mi phuar khâwm a. 12 Nangin nunna leh duhsakna mi pe a, I mi enkawlna chuan ka thlarau a zuah a. 13 Mahse, hêng hi i thinlungan i lo thup a, Nangmahah hei hi a awm tih ka hria. 14 Lo sual ila, nangin mi chhinchhiah ang a, Ka khawlohna ata mi tichhuak lo vang. 15 Mi suaksual lo ni ta ila, ka chung a pik ang; Mi fel ni ila, ka inluling lo vang; Mualpho let dêr chungin leh ka hrehawm enin. 16 Lo indah sâng ila, nangin sakeibaknei pêlin mi pêl a, Ka chungah mak takin i inentîr leh a. 17 Ka chungah i thu i tharthawh a, Ka chungah i thinur i tipung a, A hlawp hlawpin mi bei a. 18 “Eng vânga chhûl ata mi la chhuak nge i nih? Tu ma hmuh hmain lo thi tawh ila, 19 Awm lo ang mai ka lo ni ang a, Chhûl ata thlâna lâk ka lo ni mai tûr. 20 Ka nite hi rei lo tê a ni lâwm ni? Châwl se, mi ngawihsan se, thâw han la hlek teh ila. 21 Kîr tawh lohna tûr hmuna ka kal hma hian, Thimna leh thihna daihlim ramah chuan, 22 Thim chhah mup ram, thim tak mai chu. Thihna daihlim, kawngzâwng awm lo, Êng pawh thim a nihna hmunah chuan.”
Zofara
1 Tichuan, Zofara, Naamathi mi chuan a chhâng a, heti hian a ti a: 2 Thu heti zozai hi chhân loh theih em ni ang? Mi ṭawng tamin thiam an chang ang em ni? 3 I uan thu hian mi a tingawi ang em ni? Tham lo taka i ṭawng hian tu mân an tizak lo vang che maw? 4 “Ka rin dân hi a dik a, I mit hmuhah ka thiang a ni,” i ti si a. 5 Mahse, aw, Pathian chu han ṭawng teh se, I chungah a kâ han âng teh se; 6 A finna thurûk a hriattîr tûr chia, Finna thuah tam tak a ni si a; Chuvângin, hre ta che, i khawlohna aia nêpin, Pathianin i chungah a tih hi. 7 Pathian chu i zawng chhuak zo vem ni? Engkimtitheia chu i hmu kim thei em ni? 8 Vân aia sâng a ni a, nangin eng nge i tih theih? Seol aia thûk a ni, nangin eng nge i hriat theih? 9 An tehna chu lei aiin a sei zâwk a, Tuifinriat aiin a zau zâwk. 10 A kal tlang a, a khâr a, A koh khâwm chuan tu nge dâl thei ang? 11 Mi lawilo chu a hre si a, Khawlohna pawh a hmu, zawng lo mah sela, 12 Ramsabengtungno mihringa a pian hunah, Mi lawilo chuan hriatna a nei chauh vang. 13 Nang chuan i thinlung i dah dika, A lama kut i phar chuan; 14 I kuta khawlohna a awm chuan dah bo daih la, I puan inah fel lohna chêng suh sela; 15 Tichuan, hmêlhem lovin i dâk chhuak ngei ang; A ni, i nghet ang a, i hlau lo vang; 16 I hrehawm i theihnghilh ang a, Tui luang bo tawh angin i hre reng lo vang, 17 I nun chu chhûnpachang aiin a êng ang, Thim pawh awm se, zîng ang a ni ang. 18 Tin, muanawm takin i awm ang, beisei a awm vângin; A ni, i en vêl ang a, muang takin i châwl ang. 19 I mu ang a, tu mân an tihlau lâwng che, A ni, tam takin an be tlawn ang che. 20 Mahse, mi suaksual mit chu a thlâwn ang a, Tlân chhuahna kawng rêng an nei lo vang. An nghahfâk ber pawh thih mai a ni.
Joba
1 Tichuan, Joba chuan a chhâng a, heti hian a ti a: 2 A ni ngei mai, mi fing zawng in lo nih hi, In rualin finna a thi ang. 3 Mahse, nangni angin hriatna ka nei ve bawk, In lakah ka neu bîk lo ve, A ni, tu nge thil hetiang hi hre lo awm? 4 Ṭhiante nuihzatbûr ka ni, Kei, Pathian kova, a chhâna ngei hi Mi fel, mi famkim si, nuihzatbûr ka ni. 5 Mi nuamsa rilruah chuan vânduai hmuhsitna a awm; Rahbi tleute a châng reng a ni. 6 Suamhmang puan in a hmuingîl a, Pathian tithinurtute an him a, An kuta an pathian rawn kengtute chu. 7 Rante pawh zâwt teh khai, an zirtîr ang che, Chunglêng savate pawh zâwt la, an hrilh ang che; 8 Lei pawh bia la, a zirtîr ang che, Luipui sanghate chuan i hnênah an puang ang. 9 Hêng thil zawng zawngah hian tu nge hre lo awm, LALPA kut chuan hei hi a ti a ni tih hi? 10 A kutah thil nung tin nunna leh Mihring chi zawng zawng thlarau a awm. 11 Bengin thu a chian lo vem ni, Kâin ei tûr a tem ang hian? 12 Upa hnênah finna a awm a, Khuareiah hriat thiamna. 13 A hnênah finna leh chakna a awm a, Remhriatna leh hriat thiamna a nei a. 14 Ngai rawh, a ṭhiat a, sak leh rual a ni lo, Mi a khâr hnan a, hawn rual a ni lo. 15 Ngai rawh, tuite chu a chelh a, an lo kang a, A rawn tîr chhuak leh a, leilung an tuam. 16 A hnênah chakna leh finna a awm a, Bum leh bumtu a ta an ni. 17 Remruattute ruakin a hruai bo va, Rorêltute a tiâ a. 18 Lalte phuarna chu a phelh a, An kâwng chu kâwnghrênin a hrêng a. 19 Puithiamte ruakin a hruai bo va, Mi chakte a titlu a. 20 Mî rinte thusawi a sawn a, Upate hriatna a la bo. 21 Mi liante chungah hmuhsitna a leihbua a, Mi chakte taihrên a phelhsak a. 22 Thim ata thil thûkte a dap chhuak a, Thihna hlim chu êngah a la chhuak. 23 Hnamte chu a tipung a, a tiral a, Hnamte chu a tilian a, a hruai bo va. 24 Lei mipui hotute thinlung a la bo va, Thlalêr kawng awm lohnaah a vahvaihtîr a. 25 Êng awm lovin thimah an dap a, Zu rui angin a paitîr a.
1 En ta che u, hêng zawng zawng hi ka mitin a hmu a, Ka bengin a hria a, a hre thiam a ni. 2 In hriat chu ka hre ve bawk e, In lakah ka neu bîk lo ve. 3 Mahse, Engkimtitheia hnênah chuan sawi ngei ka duh a, Pathian nêna ngaihtuah dun ka châk a ni. 4 Nangni, dâwt phuahchawptu in ni a, In zain dâktawr hlu lo in ni e. 5 Ngawi hmiah mai teh ula aw! Fin in hlawh zâwk tûr. 6 Ka ngaihtuah dân ngaithla ula, Ka dîlna kamchhuak bengkhawn rawh u. 7 Pathian tân khawlo takin in ṭawng ang maw? A tân dâwtin in ṭawng ang maw? 8 Amah ṭanin hleih in neih ang maw? Pathian tân in pâwng ṭan dâwn em ni? 9 Zawng chhuak che u sela, a ṭha dâwn em ni? Miin mihring a bum angin amah in bum dâwn em ni? 10 A rûka hleih in neih chuan A zilhhau ngei ang che u. 11 A ropuina chuan a tihlau lo vang che u maw? A ṭihbaiawmna chu in chungah a tla lo vang maw? 12 In upa thute chu thufing vaivut mai a ni a, In invênnate chu invênna hlum mai a ni. 13 Ka ṭawng theih nân lo ngawi teh u, Ka chungah eng pawh lo thleng ang hmiang. 14 Ka tisa hi ka hâin ka pet ang a, Ka nun hi ka kutah ka dah em ni ang? 15 Mi tihlum hial mah sela, amah chu ka nghâk cheu vang; Mahse, a hmaah ka kawng chu ka ṭan ang. 16 Hei hi ka chhandamna a ni a, A hmaah Pathian hre lo mi an lo kal dâwn loh hi. 17 Ka sawi hi ngun takin ngai ula, Ka puan chhuah hi in bengah lût rawh se. 18 Ngai teh u, ka thu ka rem fel tawh a, Thiam ka chang ang tih ka hria. 19 Tu nge mi hnialtu tûr awm? Tichuan, ka ngawi ang a, thlarau ka thlah mai ang. 20 Ka chungah thil pahnih hi ti lo phawt la; Tichuan, i hmêl lakah ka inthup lo vang: 21 Ka hnên ata i kut la kîr daih la, I ṭihbaiawmna hian mi tihlau suh se. 22 Tichuan, mi ko la, ka chhâng ang che, A nih loh leh, kei ṭawng ila, mi chhâng thung ang che. 23 Ka khawlohna leh sualnate engtia tam nge ni? Ka bawhchhiatna leh ka sualna mi hriattîr rawh. 24 Engah nge i hmêl i thupa, I hmêlmaa mi ngaih le? 25 Hnahthel lêng chu i chhaih buai dâwn em ni? Buhpâwl ro chu i ûm dâwn em ni? 26 Ka chungah na takin i ziak a, Ka tleirâwl lai khawlohnate mi phurhtîr a. 27 Ka keah kawl mi buntîr a, Ka kawng zawng zawng i chhinchhiah a, Ka kephah hualin ramri i kham a, 28 Thil mawih ṭawih ral mai ang leh, Silhfên thîm ei ang lek ka ni chung hian.
1 Hmeichhe hrin mihring tawh phawt chu Rei lo tê dam, buainaa khat a ni. 2 Pangpâr angin a lo chhuak a, a vuai leh a, Hlimthla angin a thlâwk bo va, a awm hlen lo. 3 Chutiang mi chungah chuan i mit i mengin, Rorêlnaah i hnênah mi hruai em ni le? 4 Tu nge thianghlim lo ata Thianghlim la chhuak thei le? Tu mahin. 5 A nite chu ruat sa a niha, a thla zât lah chu i hnêna a awma, A pelh theih loh tûra ramri chu i ruat ahnuin, 6 Hawi bosan langin, a chawlh theih nân, Hlawhfa anga a nî a tlingtlâk thlengin. 7 Thing chu râwt pawh ni se, a chawr leh ang, A chawrno a tâwp lo vang tih beiseina a awm. 8 Leia a zung lo tar mah se, A bul chu lei chinah thi mah se, 9 Tui rimah a chawr ṭiam ṭiam ang a, Thil phun angin a lo buk chhuak ang. 10 Mahse, mihring chu a thi a, a rîral a, A ni, mihring chuan a thlarau a thlah a, khaw nge a awm tâk? 11 Tuipui ata tui a kal bo va, Luipui a kang a, a ro châr a; 12 Chutiangin mi an mu a, an tho leh lo. Vân awm loh hma loh chuan an ṭhangharh lo vang, An muhîl kaihthawh an ni hek lo vang. 13 Seol-ah chuan mi thukru teh la, I thinur reh hma chu mi thukru teh la, Hun bîk mi ruatsakin mi hre reng teh la aw! 14 Mi a thih chuan a nung leh ang em ni? Ka hun ruat chhûng hi chuan ka nghâk ang, Ka chhuahna a thlen thlengin. 15 Mi ko vang a, keiin ka chhâng ang che; I kut hnathawh i ngaina a ni. 16 Mahse, nangin ka pênte i chhiar a, Ka sual i enthla lo vem ni? 17 Ipah ka bawhchhiatna chilh a ni a, Ka khawlohna i ṭhui khâwm a. 18 Tlâng chim meuh pawh chu a rîral a, Lungpui pawh a hmun ata sawn a ni a; 19 Tui chuan lungte a hrût hêk a, Tui lian chuan lei vaivut a lên bo va; Chutiangin mihring beisei chu i tibo va. 20 Ani chu i hneh kumkhua a, a ral ta a, A hmêl i tidanglam a, i tîr bo va. 21 A fapaten an rawn chawimawi a, a hre lo va; Tihtlâwmin an awm a, a hre hek lo. 22 A taksa nâ chu a hre chauh va, A thlarauvin amah a sûn a.
Elifaza
1 Tichuan, Elifaza, Temani mi chuan a chhâng a, heti hian a ti a: 2 Mi fingin hriatna lothlâwn hmangin a chhângin, Khawchhak thliin a pum a tipuar ang em ni? 3 Ṭawng tlâktlailo hmangin emaw, Thusawi ṭhatna nei lo hmangin emaw a sawi dâwn em ni? 4 A ni, ṭihna chu i tibo va, Pathian hmaa inhlanna i tineu va ni. 5 I khawlohna chuan i kâ a thunun a, Fin vervêk ṭawng i thlang a nih hi. 6 Kei ni lovin, nangma ṭawngkam ngeiin a thiam lo che a, A ni, i hmui ngeiin a hêk che a ni. 7 Piang hmasa ber i ni em ni? A nih loh leh, tlângte awm hmain i piang tawh em ni? 8 Pathian thurûk chu i hria em ni? Nangma tân chauh finna i khûrkhung em ni? 9 Kan hriat loh eng nge i hriat bîk? Kan hriat thiam loh eng nge i hriat thiam bik? 10 Kan hnênah hian lûa kêlsam ṭo tawhte leh upa takte, I pa aia upa daihte an awm a ni. 11 I tân Pathian ṭawng thlamuanna hi a neu lutuk em ni? Nêm taka a tihna thu che hi? 12 Engah nge i thinlungin a hruai bo che? Engtizia nge i men tâl tawp tawp ni? 13 Pathian chungah thaw i sang a, I kâa chutiang thu a chhuah kha? 14 Thianghlim tûr chuan mihring hi eng nge a nih? Fel tûr chuan hmeichhe hrin hi eng nge a nih? 15 Ngai teh, a mi thianghlimte chungah rinna a nghat lo va, A ni, a mit hmuhah chuan vân pawh a fai lo. 16 Mi tenawm leh bawlhhlawh sa, Khawlohna, tui ina in chu a va ni lo lehzual dâwn êm! 17 Mi ngaithla la, ka entîr ang che, Ka hmuh chu ka puang dâwn e 18 (Mi fingten an hril ṭhina chu, An pi puten an thup loh, 19 Anmahni chauh ram an lo pêk, Mi dang tu mah tel lohna chu): 20 Mi suaksual chuan a dam chhûng zawng nâ a tuar a, Hnehchhiahtu tâna kum tuk zâtte pawh chu. 21 Hlauhawm thâwmte chu a bengin a hria a, A hmuingîl laiin rawktuin a rawn bei a. 22 Thim ata chhuah a inring lo va, A hmabâk chu khandaih a ni. 23 Ei tûr zawngin a vâkvai a, “Khaw nge?” tiin, Thimna ni chu a kutah ngâ sa a ni tih a hria. 24 Hrehawmna leh thawpikna chuan a tihlau va; Lal inpeih sain indona a hneh angin amah an hneh a; 25 Pathian chunga a kut a lek leh Engkimtitheia chunga chapo taka a chêt avângin; 26 Luhlul takin ama chungah a tlân a, A phaw lai pâwng chhah pui nên chuan; 27 A thauvin a hmai a tuam a, A kâwngah thau a chheng a; 28 Khawpui ṭiau hnuahte a chêng a, Tu ma luah loh inahte chuan. 29 A hausa lo vang a, a sum leh pai chu a awm hlen hek lo vang a, An neihte chu lei lamah an kûr hek lo vang. 30 Thim ata a chhuak lo vang a, Meialhin a zârte a hliau ro vang a, A kâa a thawah a kal bo vang. 31 Mahni inbumin engmahlovah innghat suh se, A hmuh tûr chu engmahlo a ni dâwn si a. 32 A hun hmain a tlingtla ang a, A zâr chu a hring lo vang. 33 Grêp hrui angin a rah hel a sawi ṭîl ang a, Olive thing angin a pâr a thing thla ang. 34 Pathian ngaihsak lo pâwlte chu an cha dêr ang a, Thamna puan inte chu meiin a kâng ral ang. 35 Pawi khawih an ngaihtuah a, Khawlohna an rawn chhuah a, An pumin bumna a buatsaih a ni.
Joba
1 Tin, Joba chuan a chhâng a, heti hian a ti a: 2 Chutiang thil chu tam tak ka hria a ni, In zain thlamuantu tuar hrehawm in ni e. 3 Thu ruakin tâwp a nei ang em? A nih leh, engin nge chawk tho chia i han chhân ni? 4 Kei pawh in ṭawng angin ka ṭawng thei a ni; Ka nih ang hi ni ula chuan, In chungah thu ka zawm khâwm chiam thei ang a, Lu ka thin khum thei ang che u. 5 Mahse, ka kâ chuan ka tichak ang che u a, Ka hmuia thlamuanna thuin a tinuam ang che u. 6 Sawi mah ila, ka lungngaihna a dai lo va, Ngawi mah ila, eng nge ka nawm chuanna? 7 Mahse, Aman mi tichau va, Ka pâwlpuite zawng zawng chu i tiṭiau va. 8 Nangin mi chelh bet a, chu chu ka chunga hretu a ni a, Ka chêrna hian mi hêk a. Chu chu ka hmaichhana hriattîrtu a ni. 9 A thinurin mi tai thlêr a, mi tiduhdah a, Ka chungah a ha a ṭhial a, Ka khingpuiin ka chungah a mit a lên a. 10 Ka chungah an kâ an âng a, Dichim takin biangah mi bêng a, Ka chungah an inhâwr khâwm a. 11 Pathian ngaihsak lo kutah mi hlân a, Mi suaksualte kutah chuan mi theh lût a. 12 Nuamsa takin ka awm a, aman mi phel darh a, A ni, ka ringah mi la a, mi pawt sawm a; A tin tûr atân mi târ bawk a. 13 A thal kâptute chuan mi hual vêl a, Ka kalte chu a ṭhen darh a, a dîm lo, Lei chungah ka mît a leih bua a. 14 Chhiatna chunga chhiatnain mi tichhia a, Mi hrâng angin ka chungah a lo thawk a. 15 Ka vun chungah saiip puan ka bel a, Ka ki chu vaivutah ka tâl a. 16 Ṭah vângin ka hmêl a sen a, Ka mit vunah thihna hlim a awm; 17 Ka kutah pâwngnêkna a awm lo va, Ka ṭawngṭaina a thianghlim chung pawhin. 18 Aw leilung, ka thisen chu khuh bo suh la, Ka ṭah hian chawlh hmun nei suh se. 19 Tûnah pawh, ngai rawh, ka thuhretu vânah a awm a ni e, Mi hriatpuitu chu vân sângah a awm. 20 Ka ṭhiante chuan mi nuihsan a; Mahse, Pathian hnênah ka mittui a sûr a. 21 Pathian hnênah miin mihring hi ṭan teh sela aw, Mihring fapain a ṭhenawm a ṭan ang hian! 22 Kum rei lo tê a lo ral hunah Ka kîr leh lohna tûr kawng chu ka zawh dâwn si a.
1 Ka thlarau a rawih ta, ka nite a ral ta, Ka chanpual chu thlân a ni ta. 2 Nuihsantute ka hnênah an awm zawng a nih hi, An thu thin tiurah chuan ka mit a fu a. 3 I hnênah ka tân thutiam siam teh, Tu nge ka tân zakhamna ni ang? 4 Hriat thiamna lakah an thinlung i thup a; Chuvângin, anni zawng i chawisâng lo vang. 5 Hlâwkna atâna a ṭhian thlauthlatua chu, A fate mit pawh a chuai ang. 6 Mite zînga kamram mai atân mi siam a, Tenawm langsâr tak ka lo ni ta. 7 Lungngaih vângin ka mit pawh a thim a, Ka bung zawng zawng hi hlimthla ang a lo ni ta. 8 Mi ngîl takte chuan hei hi mak an ti ang, Mi pawi khawih lo chu pathian nei lote chungah a thinur ang. 9 Mi fel chuan a kawng ngai a chelh tlat a, Kut fai nei chu a chak deuh deuh vang. 10 In zain lo kîr ula, lo kal teh u, In zîngah mi fing ka hmu chuang lo vang. 11 Ka nite a liam ta, ka thil tumate a thlâwn zo ta, Ka thinlung ngaihtuah ṭhinte ngei chu. 12 Zân chu chhûnah a chantîr a; Êng chuan thim a hnaih e, an ti a. 13 Seol chu ka in anga ka ena, Thim hnuaiah ka khum ka dawha, 14 Chhiatna hnênah, “Ka pa i ni,” ka tiha, Changpât hnênah, “Ka nu leh ka farnu in ni,” ka tih chuan, 15 Ka beisei chu khawiah nge? Ka beisei chu tu nge hmu ang? 16 Seol kawngkaah a chhuk ang a, Vaivutah kan chhuk dûn ang.
Bildada
1 Tichuan, Bildada, Suhi mi chuan a chhâng a, heti hian a ti a: 2 Eng chen nge thu remchâng in dap dâwn? Ngaihtuah ula, chumi hnuah kan sawi ang. 3 Eng tizia nge ran anga ngaih kan niha, I mit hmuha tenawm kan nih? 4 Nang, mahni thinurnaa intai thlêrtu, Nangmah avângin lei kalsan a ni dâwn em ni? Lungpui pawh a hmun ata sawn a ni dâwn em ni? 5 A ni, mi suaksual êng chu tihmih a ni ang a, A mei sî pawh a de lo vang. 6 A puan ina êng chu a thim ang a, A kianga khâwnvâr chu tihmih a ni ang. 7 A ke pên chakna chu a chêp ang a, Ama remruat ngeiin a paih thla ang. 8 Ama ke ngeiin lênah a paih lût a, Hum chungah a kal a. 9 A kerêkah thangin a hlîng ang a, Ani chu thangin a man ang. 10 A tân leiah valh phûm a ni a, Kawngah a tân thang kam a ni. 11 Kil tinah hlauhawmin a tihlau vang a, A hnungah chuan a ûm zêl ang. 12 A chakna a ṭâmchhâwl ang a, A kiangah chhiatna a inpeih reng. 13 A taksa bung hrangte a ei zo vang a, Thihna fa tîrin a bung hrangte a ei zo vang. 14 A rin pui puan in ata chu kar phawh a ni ang a, Hlauhawmho lal hnênah hruai a ni ang. 15 A mi ni ngai lo a puan inah an chêng ang a, A chênnaah kât theh darh a ni ang. 16 Chhûngrilah a zung a mawih ang a, Chung lamah a zâr a vuai bawk ang. 17 Lei ata a hriat rengna a boral ang a, Kawtthlêrah hming a nei tawh lo vang. 18 Êng ata thimah len luh a ni ang a, Khawvêl ata ûm chhuah a ni ang. 19 A mite zîngah tu leh fa a nei lo vang a, A chênnaah châmbâng tûr a nei hek lâwng. 20 Thlang lama miten ani hi mak an ti ang a, Chhak lama mite an thlabâr ang. 21 Mi fel lo chênna zawng chutiang chu a ni ngei a, Chu chu Pathian hre lotu hmun a ni e.
Joba
1 Tin, Joba chuan a chhâng a, heti hian a ti a: 2 Eng chen nge mi tihhrehawm ang a, Thutea mi vuak vual dâwn? 3 Vawi sâwm lai mi dem chhe ta a. Ṭha lo taka ka chunga tih hi in zak hek lo. 4 Dik lo pawh lo ni ta ila, Ka dik lohna chu keimahah ka pai ang. 5 Ka chunga intilian in niha, Ka chhiatna hi mi hnialfunga hmang in nih chuan, 6 Hre ta che u, Pathianin mi paih thla a, A lênin mi tuam a nih hi. 7 Ngai teh u, “Pâwngnêkna!” tiin ka au chhuak a; Mahse, chhân ka ni lo va; Ṭanpui dîlin ka au va; mahse, rêl dikna a awm lo. 8 Ka kawng dai a theu hnan a, ka pêl thei lo, Ka kawngte chu thimin a khuh a ni. 9 Ka ropuina mi hlihsak a, Ka lûa lallukhum chu a la a. 10 Kawng tinah mi tichhia a, ka ral a ni ta; Ka beiseina chu thing angin a pawt phawng a. 11 A thinurna ka chungah a mût kai a, A hmêlma angah mi chhiar a. 12 A sipai rual an kal khâwm a, Ka lamah kawng an thlâk a, Ka puan in vêlah bûk an khuar a. 13 Ka unaute ka lakah a tihla a, Ka hmêlhriatte ka lakah an mi hrang zo va. 14 Ka laichînten mi chu-kha ta lo va, Ka ṭhian bulten mi theihnghilh zo va, 15 Ka ina chêngte leh ka in awm nulaten Mikhualah mi chhiar a, An mit hmuhah hmel hriat loh ka ni ta. 16 Ka chhiahhlawh ka ko va, mi chhâng lo va. Kam thlumin ka ngên tûr a lo ni ta. 17 Ka nupui tân ka rim a chhia a, Ka chhûl khat kualpui tân ka tenawm a. 18 Naupangte lamin mi hmusit a, Ka han tho hi mi êu va. 19 Ka ṭhian ṭha zawng zawngten mi ten a, Ka hmangaih ṭhinte chu ka lakah an ner ta. 20 Ka vun leh ka tisa hi ka ruhah a bet a, Ka hahni chu ka la chang hrâm a. 21 Aw, nangni ka ṭhiante u, Mi khawngaih rawh u, mi khawngaih rawh u, Pathian kutin mi khawih a nih hi. 22 Engah nge Pathian ang ziazânga mi tihduhdaha, Ka tisa tuarna hi tâwk in la tih loh ni? 23 Aw, ka thute chu ziak ni teh sela! Lehkhabuahte chuang teh sela aw! 24 Ziakna thîr leh suanin, Lungpuiah kumkhua atân ziak ni teh sela aw! 25 Ka Tlantu chu a nung tih ka hre si a, Nakinah chuan leiah hian a lo la ding ang. 26 Ka vun hi tihchhiata a awm hnuin, Ka tisain Pathian ka la hmu ang. 27 Keima tân ngei ka la hmu ang a, Ka mitin a la thlîr ang, mi dang ni lovin. Ka chhûngah ka rilru a chau ta! 28 “Engtin nge amah chu kan tihduhdah ang, Thil bulte amahah hmu siin?” in tih chuan, 29 Khandaih chu hlau rawh u, Thinurna chuan khandaih hremna a thlen si a, Rorêlna a awm tih in hriat theih nân.
Zofara
1 Tin, Zofara, Naamathi mi chuan a chhâng a, heti hian a ti a: 2 Hei vâng hian ka ngaihtuahnate chuan chhânna mi siam a, Ka chhûnga hmanhmawhna a awm avâng hian. 3 Zilhna mi tizaktu chu ka hre ta a, Ka hriat thiamna rilru chuan mi chhâng a ni. 4 Hmasâng ata leia mihring awm achin, Hei hi i hre lo vem ni? 5 Mi suaksual hlimna chu a tawi a, Pathian hre lo mi lâwmna chu Mit khap kâr chauh a ni, tih hi? 6 A ropuina chuan vânte thleng chhovin, A lû chuan chhûmte tawng mah se, 7 Ama zun êk angin a boral vang vang ang; Amah hmu tawhte chuan, “Khawiah nge a awm tâk?” an ti ang. 8 Mumang ang maiin a thlâwk bo vang a, Hmuh a ni lo vang; A ni, zân inlârna anga ûm bo a ni ang. 9 Amah hmu ṭhîn mit khân a hmu tawh ngai lo vang a, A hmun pawhin a hmu ngai tawh hek lo vang. 10 A faten mi retheite khawngaihna an dîl ang a, A kutin a sum leh pai chu a theh kîr ang. 11 A ruhte chu a tleirâwl sualnain a khat a; Mahse, vaivutah a mutpui ang. 12 Suahsualna hi a kâah thlum mah se, A lei hnuaiah thukru mah se, 13 Zuat hliauvin thlah phal lo mah se, A kam chhûngah hmuam reng zâwk mah sela, 14 A pum chhûngah a lo danglam a, A chhûngah rûl tûr kha tak a ni ta a. 15 Hausaknate chu a lem a, a law chhuak leh a, Pathianin a pum ata a paih chhuak a. 16 Rûl chu a fâwp ang a, Rûlrial tûr chuan amah a that ang. 17 Luipuite chu a thlîr lo vang a, Khawizû leh bâwnghnutekhala luang luite chu. 18 A thawh chhuah chu a theh kîr ang a, Hrawk tlai nân a hmang lo vang; A lâk khâwmte chu a chên lo vang. 19 Retheite chu a hnehchhiahin a hawisan a, In, a sak loh chu, a chhuhsak a. 20 A duhâmna chu a kawchhûngah a awm hle hle thei lo va, A lâwmna thilte chu eng mah a hum lo vang. 21 A ei zawh loh eng mah a awm lo va; Chuvângin, a sum leh pai chuan a tuar lo vang. 22 A hausak vânglai tak chu a chêp hun a ni ang a, Tlachhamte chuan a chungah kut an lên huai huai ang. 23 A pum tipuar tûrin a thinur hlauhawm tak chu A chungah a tîr ang a, A ei atân a chungah a sûrtîr ang. 24 Thîr hriamhrei chu a tlân bosan ang a, Dâr thalngul chuan amah a kâp tlang ang. 25 A han pawt phawi a, a taksa ata a lo chhuak a, A ni, a hmâwr tle tak chu a mit ata a lo chhuak a, Thil râpthlâk a chungah a thleng a ni. 26 A ro atân thim chhah mup khâwl khâwm a ni a, Chhêm loh mei chuan a kâng ral ang a, A puan in ata hnutchhiah awm apiang a tiral ang. 27 Vânte chuan a khawlohna an puang ang a, Leiin amah a do vang. 28 A ina thil pungte chu an bo vang a, A thinur niah chuan a bungruate an luang ral ang. 29 Hei hi Pathian laka mi suaksual chanpual a ni a, Ro luah tûr Pathianin a tân a ruat chu a ni.
Joba
1 Tin, Joba chuan a chhâng a, heti hian a ti a: 2 Ka thusawi hi ngun takin ngaithla teh u, Hei hi in thlamuanna thu chu ni rawh se. 3 Mi ngaichâng ula, ka han sawi phawt ang a, Ka sawi zawhah la nuihsan ang che u. 4 Keia phunnawina hi mihring chungah em ni? Dawhthei rual ka ni em ni? 5 Mi en ula, mak ti ula, kutin in kâ hup rawh u. 6 Ka han ngaihtuahin ka mang a ang a, Hlauhnain ka thauvah mi a man ṭhîn. 7 Engtizia nge mi suaksualte chu an nuna, An lo upata, a ni, an lo hmuingîl theih ni? 8 An chi thlahte chu an hnênah an mit hmuhah a tinghet a, An rîla rahte chu an hmai hmaah. 9 An in lote chu hlauhawm lakah a him a, Pathian tiang chu an chungah a tla hek lo. 10 An bâwngpain chi a thlah a, a pelh ngai lo va, An bâwngpuiin no a nei a, a chhiat ngai lo. 11 Ran rual angin an fanaute an chhuahtîr a, An fate chu an tualchai a. 12 An perhkhuang leh ṭingṭang remin an zai a, An phênglâwng thâwmah an hlim za a. 13 An nite chu neinung takin an khawh ral a, Seol-ah chuan thlamuang takin an liam a. 14 Tin, Pathian hnênah, “Min kalsan rawh, I kawngte hriat hi kan châk lo ve. 15 Engkimtitheia chu tu nge a nih, a rawng kan bâwlna tûr chu? A hnênah kan ṭawngṭaiin hlâwkna eng nge kan hmuh ang?” an ti a. 16 A! An sum leh pai chu an kuta awm a lo ni lo, Mi suaksualte remruatna chu ka lakah a hla a ni. 17 Mi suaksual meichher chu vawi eng zât meuh nge a miha, Vânduaina an chunga a thlena, A thinurnain Pathianin lungngaihna a pêk hlawm? 18 Vawi eng zât nge buhpâwl, thliin a chhêm ang an niha, Favai, thlipui len bo ang an nih? 19 “Pathianin khawlohna an fate tân a dah,” in ti a, Anmahni chungah thlentîr ang hmiang, an hriat theih nân. 20 Anmahni mit ngeiin an chhiatna chu hmu se, Engkimtitheia thinurna chu in ang hmiang. 21 A bo hnuah a in chu a tân eng nge a nih, A thla zât tihtâwp a nih hun chuan? 22 Pathian tu nge hriatna zirtîr ang, Mi chungnungte pawh rorêlsaktu chu? 23 A vânglai takin mi a thi a, Muang tak leh nuam taka awmin. 24 A taksa chu thauvin a khat a, A ruh thlîng pawh a hnâwng a ni. 25 Tin, mi dang lungngai takin a thi a, Ṭhatna rêng rêng tem ngai lovin. 26 Vaivutah angkhatin an mu a, Changpâtin a bâwm khat hlawm a. 27 Ngai teh, in ngaihtuahte zawng ka hria alâwm, Dik lo taka ka chunga in phiarte chu. 28 “Khaw nge hotu in chu a awm? Mi suaksual chên kualna puan in chu khaw nge?” in ti a. 29 Zin vêl mite in zâwt ngai lo vem ni? An sawite chu in pawm lo vem ni? 30 Mi sual chu vânduai niah zuahin a awm a, Thinur niah hruai chhuah an ni, tih hi. 31 Tu nge a hmai hmaah a kawng chu puang ang a, Tu nge a thiltih chu thungrûl ang? 32 Thlânah kalpui a ni a, A thlân chu vên a ni a. 33 Lei tlang pawhin a delh na lo. Mi zawng zawngin a hnu an chhui a, A hmaa chhiar sên loh lo awm tawhte ang khân. 34 Tichuan, engtin nge thu engmahlo takmeuhva mi thlamuan dâwn? In chhânnaah hian dâwt mai lo chu eng mah a awm lo.
Elifaza
1 Tin, Elifaza, Temani mi chuan a chhâng a, heti hian a ti a: 2 Mihring hian Pathian tân ṭangkaina a nei em ni? Miin a fin chu a ṭangkaipui ngei tak e. 3 Mi fel i nih chu Engkimtitheia tân a hlu em ni? I kawngte i tihfamkim chu a tân a hlâwk em ni? 4 Amah i ṭih nân em ni a zilh che a, Rorêlnaa a luhpui che? 5 I suahsualna a nasa a ni lo maw? I khawlohnain tâwp rêng a nei hek lo. 6 Engmahlovan i unau hnên ata dahkham i phût a, Saruakte chu an silhfên i hlihsak a. 7 Chaute hnênah tui in tûr i pe lo va, Rilṭâmte tân chaw i ui a. 8 Tharum thawhin mi ram i la lui a, I duhsakzâwngte i pe a. 9 Hmeithaite chu ruakin i tîr bo va, Pa nei lote bân chu i titliak a. 10 Chu vâng chuan i vêlin thang a awm a, Hlauhna chuan a tibuai ta thut che a ni. 11 I hmuh theih loh thimna leh Tui tam tak chuan a khuh che. 12 Vân sângah Pathian a awm lo vem ni? Arsi sâng berte en la, an sânzia mai chu. 13 Pathianin eng nge a hriat? Thim chhah danah a rêl thei em ni? 14 A hmuh loh nân chhûm chhah takin a khuh a, Vân kual chungah chuan a kal vêl a, i ti a. 15 Kawng hlui chu i zawh dâwn em ni? Mi suaksualten an zawh ṭhina kha? 16 Anni chu an hun hmaa lâk bovin an awm a, An innghahna chu lui len bovin a awm a; 17 Pathian hnêna, “Min kiansan rawh, Engkimtitheia chuan eng nge min tih theih?” titute chu. 18 Chuti chungin an inte thil ṭhain a tikhat - Mi suaksualte remruat chu ka lakah a hla a ni. 19 Mi felte chuan an hmu a, an lâwm a, Mi pawi khawih lote chuan anmahni an nuihsan a, 20 “Kan chunga lo dingte tihbovin an awm a, A bâng meiin a kâng ral a,” tiin. 21 Nangmah ngeiin amah tlawn la, remna siam rawh; Tichuan, i tân thil ṭha a lo chhuak ang. 22 A kâa chhuak dân chu dawng ngei teh aw, I thinlungah a thu dah ṭha ang che. 23 Engkimtitheia hnêna i kîr chuan tundin i ni ang a, I puan in ata fel lohna i dah bo daih phawt chuanin. 24 I rote chu vaivutah dah la, Ophir rangkachakte chu luite lung zîngah dah rawh. 25 Engkimtitheia chu i ro a ni ang a, Tangkarua hlu takte chu i ta a ni ang. 26 Tin, Engkimtitheiaah chuan i lâwm tawh ang a, Pathian lam chu i hawi tawh ang. 27 A hnênah i ṭawngṭai ang a, a ngaithla ang che; Tin, i thutiamte chu i hlen ang. 28 Thil i ruat ang a, i tân a ding nghet ang a; Tin, i kawngte chu êngin a chhun fo vang. 29 An paih thlâk che pawhin, “Din chhuahna a awm,” i ti ang a, Mi inngaitlâwm chu a chhandam ang. 30 Pawi khawih lo ni lo pawh a chhanchhuak ang a, A ni, i kut thianghlimna azârah chhanchhuahin a awm ang.
Joba
1 Tichuan, Joba chuan a chhâng a, heti hian a ti a: 2 Vawiin pawh ka vuina hi a nasa e, Ka rûm chung pawhin kut chu a rit a ni. 3 Aw, amah ka hmuh theihna tûr lam chu hria ila, A ṭhuthmunah chuan ka kal tûr a! 4 Ka thu chu a hmaah ka thlen ang a, Ka kâ ṭanfungin a khat ang. 5 A mi chhânna tûr thute ka hre duh a, Ka hnêna a sawi tûr chu hriat thiam ka duh. 6 A thiltihtheihna ropui chuan mi khing dâwn em ni? Hnai lo ve, mi bengkhawn zâwk ang. 7 Tichuan, mi fel chuan a hnênah a ngên ang a, Mi ngaihtuahtu hnên ata chu ka chhuak vang vang ang. 8 Ngai teh, hma lam ka han pan a, amah a awm si lo, Hnung lam ka han pan a, amah ka hmu thei chuang lo. 9 Vei lama a thawh lai pawhin ka hmu thei chuang lo va, Ding lamah a nih leh, a biru a, ka hmu thei lo. 10 Ka kawng zawh chu a hria a, Mi fiah hunah rangkachak angin ka chhuak dâwn si. 11 Ka ke hian a hniakhnung tak a dai zêl a, A kawng ka zawh a, ka pêng lo ve. 12 A kamchhuak thupêk chu ka pênsan lo va, A kaa thute chu ka dân aiin ka roh zâwk a. 13 Mi nghet a ni a, tu nge khawih her thei ang? A duh zâwng chu a ti mai a ni. 14 Ka chana ruat chu a ti a, A rilruah chutiang chu a awm ṭeuh a ni. 15 Chu vâng chuan a hmaah ka buai a, Ka ngaihtuahin amah ka hlau. 16 Pathianin ka thinlung chu a tichau va, Engkimtitheia chuan mi tibuai a. 17 Thimna chuan mi hual vêl a, Thim chhah pui chuan ka hmai a khuh a.
1 Engkimtitheian engah nge hun a ruat loh? Amah hretuten engah nge a nite an hmuh loh? 2 Ri sawn chîngte an awm a, Ran rual an man lui a, an vulh a. 3 Pa nei lote sabengtung an ûm bosak a, Hmeithai bâwngpa, dahkham atân an lâksak a, 4 Tlachhamte kawng an botîr a, Leia retheite an biru a. 5 Ngai teh, thlalêra ramsabengtungte angin, Taima taka ei tûr zawngin an hna an va thawk a, An fate tân thlalêrin chaw a tum a. 6 An chaw tûr ram ata an ât a, Mi sual grêp huan hmaiṭhelh an vai. 7 Silhfên lovin zankhuain an mu a, Khaw vâwtah inkhuhna an nei lo. 8 Tlânga ruahpuiin a nan huh a, Phen tûr nei lovin lungpui an bêl a. 9 Pa nei lo hnute hne lai pawh thlâksak chîngte an awm a, Retheite hnên ata dahkhamah an la a. 10 Silhfên lovin saruakin an vâkvai a, Rilṭâm chungin buhphalte an pu a; 11 Hriak an siam a, chûng mite hung chhûngah chuan, Uain sâwrna an chîl a, tuihâl chungin. 12 Khawpui bit takah mite an rûm a, Mi hliam rilru chu a au chhuak a; Pathian lahin thil dik lo chu a bengkhawn hek lo. 13 Êng laka helte an awm a, A kawngte lah an hre lo va, A kawng takah pawh an awm lo. 14 Vârṭianah tualthattu chu a tho va, Rethei leh tlachhamte a that a, Zânah chuan rûkru ang mai a ni. 15 Uirepa mitin thimhmul a thlîr a, “Tu mân mi hmu lo vang,” tiin. Hmai khuhnain a hmai a tuam a. 16 Thimah inte an lai pawp a, Chhûnah an inkhâr khung a, Êng rêng an hre lo. 17 An za atân zîng chu thihna daihlim ang a ni a, Thihna daihlim ṭihbaiawm chu an nêl a. 18 Tui chungah chuan chak taka len an ni a, Leiah hian an chanvo chu ânchhedawng a ni. Grêp huan kawng lam a hawi lo ve. 19 Khaw ro leh lumin vûrtui a tiral a, Seol-in thil tisualte. 20 Chhûlin a theihnghilh a, changpâtin tui takin a ei a, Hriat reng a ni tawh lo vang a, Suahsualna chu thing angin a tliak ang. 21 Ching, fa hring lo chu a ei a, Hmeithai thil ṭha a tihsak lo. 22 Pathian chuan a chaknain thiltitheite nun chu a tisei a, Dam an beisei loh hnu pawhin an tho chhuak a. 23 Himna a siamsak a, tah chuan an châwl a, An kawngah chuan a mitte a fu reng a. 24 Chawisân an ni a, rei lo têan an ral a; Mi dang angin an vuai a, an chuai a, Buh vui anga ah chhumin an awm ta a. 25 Tûnah chuti ni suh sela, tu nge daw mi ti thei anga, Ka ṭawng kha engmahlovah sawi thei ang?
Bildada
1 Tichuan, Bildada, Suhi mi chuan a chhâng a, heti hian a ti a: 2 A hnênah chuan rorêlna leh hlauhawmna a awm a, A hmun sângahte chuan remna a siam a. 3 A sipai rualte chu chhiar rual em ni? Tu chungah nge a êng a chhuah loh? 4 Engtin nge Pathian hmaah mi a fel theih ang le? Engtin nge hmeichhe hrin a thianghlim theih ang? 5 Ngai teh, thla meuh pawh khian ênna a nei nêm, Arsite pawh a mit hmuhah chuan an thianghlim lo, 6 Mihring lek phei chu e, thil lung mai a ni! Mihring fapa chu changpât mai a ni.
Joba
1 Tichuan, Joba chuan a chhâng a, heti hian a ti a: 2 Chakna nei lo mi chu i va han pui ve le! Thahrui nei lo bân chu i va han chhan ve le! 3 Finna nei lo chu i han zilh fing a, Hriatna ṭha tak i sawi hnem teh e! 4 Tu hnênah nge thu i chhâk chhuaha, Tu thlarau nge i hnên ata lo chhuak ni?
Bildada
5 Thi tawhte an khûr a, Tuite leh a chhûnga chêngte hnuaiah chuan. 6 A hmaah chuan Seol chu saruak a ni a, Abadon chuan khuhna a nei lo. 7 Hmun ruakah chuan hmâr a tipharh a, Lei chu engmahlovah a khai kâng a. 8 A chhûm chhah tak chuan tuite a fûn khâwm a, A hnuaia chhûm chu a keh lo va. 9 A lalṭhutthlêng hma chu a khuh a, A chungah chhûm a zîntîr a. 10 Tui ramri a siam a, Thim leh êng thlen chinte nên. 11 Vân dona bante chu a nghîng dur dur a, A zilhhauna chu mak an ti a. 12 A thiltihtheihnain tuipui a tingawi a, A hriat thiamnain Rahab chu a tan chhum a. 13 A thawin vân chu a tithiang a, A kutin rûlpui tlân chak chu a thil tlang a. 14 Ngai teh, hêng hi a kawng pâwn lam lek a ni, A chanchin kan hriat hi a va beitham êm! A thiltihtheihna ri thâwm chu tu nge hre zo thei ang?
Joba
1 Tin, Joba chuan a thusawi a chhunzawm a, heti hian a ti a: 2 Ka thiamna thu la botu, ka thlarau tilungngaitu, Pathian, Engkimtitheia chu nung na pui! 3 (Keimahah hian ka thaw a la kim a, Ka hnârah Pathian thaw a la châm;) 4 Ka hmuiin fel lohna thu a phuh chhuak tawp lo vang, Ka leiin bumna thu a sawi hek lo vang. 5 Thiam ka chantîr dâwn teuh lo mai che u, Ka thih thlengin ka dikna ka dah bo lo vang. 6 Ka felna chu ka chelh tlat ang a, ka thlah lo vang; Ka nun chhûng hian ka thinlungin mi dem lo ve. 7 Ka hmêlma chu mi suaksual ni sela, Mi beitu chu mi fel lo lo ni teh se. 8 Pathian ngaihsak lo tân beiseina eng nge awm, Pathianin a sah chhuma a thlarau a lâk si chuan? 9 Buainain a nan laiin Pathianin a au thâwm a ngaithla ang em? 10 Engkimtitheiaah chuan a lâwm ang em? Pathian chu eng lai pawhin a ko vang em? 11 Pathian kut chungchâng ka zirtîr ang che u, Engkimtitheia hnêna awm chu ka zêp lo vang. 12 Ngai ru, nangni ngeiin in vaiin in hmu a, Engtiziaa khawlo cheu nge in nih?
Zofara
13 Pathian hnêna mi suaksual chanvo chu hei hi a ni, Hnehchhiahtute ro chan, Engkimtitheia hnên aṭanga an dawn chu: 14 A fate an pun chuan khandaih tuar tûr lekfang an ni; A rîla rahten chaw khamkhawp pawh an nei lo vang. 15 A hnua dam chhunte chu hriin a phûm ang a, An nupuite pawhin an sûn lo vang. 16 Tangkaruate vaivut angin a khâwl a, Hlum ang maiin a silhfênte a tiang khâwm na a; 17 Tiang khâwm mah se, mi fel chuan a sinsak ang a, Pawi khawih lote chuan tangkarua chu an insem ang. 18 Maimawm angin a in chu a sa a, Vêngtuin chhâwlbûk a siam ang lekin. 19 Hausain a mu a; mahse, a tho tawh lâwng; A mit a han meng a, a awm tawh lo. 20 Tui lian angin hlauhawmin a nang a, Zânah thlipuiin a la a. 21 Khawchhak thliin a lên bo va, a bo ta a, A hmun ata a nuai bo ta. 22 Zahngai lovin a nuai ang a, A thiltihtheihna hmaah chuan a kat rawk rawk ang. 23 A kut a ben khum ang a, A chek khum ang a, a hmun ata a ûm chhuak ang.
Finna fak
1 Tangkaraw laih chhuahna khur a awm a, Rangkachak tihthianghlimna hmun pawh a awm. 2 Lei ata thîr lâk chhuah a ni a, Lung ata dâr rawh tui a ni. 3 Miten thim an titâwp a, Hmun hla berte pawh an zawng chhuak a, Thim chhah tak leh thihna daihlima lungte pawh chu. 4 Mite chên lohnaah khur an lai a, A chunga kal vêlten an theihnghilh a, Mi hlatnaah an inkhai a, an inthên an inthên a. 5 Lei hi chaw lo chhuahna a ni a, A chhûng chu mei kan anga chawh leh a ni a, 6 Chuta lungte chu saphir hmun a ni a, Rangkachak nawite a awm a. 7 Chu kawng chu sa hel ei vâten an hre lo va, Mu mit pawhin a hmu bawk hek lo. 8 Ramsa ngêng ngalhte pawhin an rap ngai lo va, Tah chuan sakeibaknei kawlh a kal ngai hek lo. 9 Mi chuan lung chang takah a kut a thlâk a, Tlâng lian pui pui, a bul nên lam a hai let a. 10 Lungpuite a verh tlang seng sung a, Thil hlu tinrêng a mitin a hmu. 11 Pût hauh lovin luite a khuap chat a, Thil inthupte êngah a la chhuak a. 12 Mahse, khaw nge finna hmuhna tûr chu? Hriatna awmna hmun chu khawiah nge? 13 Mihringin a man chin a hre lo va, Mi nung ramah hmuh a ni hek lo. 14 Thûkna chuan, “Keimahah a awm lo,” a ti a, Tuipui chuan, “Ka hnênah a awm lo,” a ti bawk a. 15 Rangkachaka lei theih a ni lo va, A man atân tangkarua bûk chhuah mi a ni hek lo. 16 Ophir rangkachakin a tluk thei lo va, Oniks lunghlu emaw, saphir emaw pawhin a tluk thei hek lo. 17 Rangkachak leh lung fîmin a tluk lo va, Rangkachak thianghlim chei mawiin thleng theih a ni lo. 18 Koral te, krustal te, sawi rual a awm lo, A ni, finna man chu lunghlu aiin a chungnung. 19 Ethiopia topaz pawhin a khan lo va, Rangkachak thianghlim nên khaikhin rual a ni lo. 20 A nih, finna chu khawi ata nge? Hriatna awmna hmun chu khawiah nge? 21 Thinlung zawng zawng mit lakah thup a ni a, Chunglêng savate lakah khâr tlat a ni. 22 Boralna leh Thihna chuan, “A thâwm zawng kan bengin kan hria,” an ti a. 23 Pathianin a kawng chu a hria a, A awmna hmun pawh a hria. 24 Lei tâwp thlengin a thlîr a, Vân hnuai pum pui hi a hmu. 25 Thli chakna a pêk lai khân, A ni, tuite pawh tehnaa a teh chhuah lai khân, 26 Ruahtui tân dân a siam lai khân, Khawpui ri, kâwlphe tân kawng a siam lai khân, 27 Ani chuan a hmu a, a puang a, A tinghet a, a ni, a zawng chhuak a. 28 Tin, mihring hnênah, “Ngai rawh, LALPA ṭih hi, hei ngei hi finna a ni, Thil ṭha lo kalsan hi hriat thiamna a ni,” a ti a.
Joban a thutâwp a sawi
1 Tin, Joba chuan a thusawi a chhunzawm a, heti hian a ti a: 2 Aw, tûn hma thla ral taahte khân awm ni ila, Pathianin mi vên lai niahte khân, 3 A khâwnvâr ka lu chungah a êng ṭhîn a, Thimah pawh a êng ringin ka kal tlang a, 4 Ka vânglai nite ka hman laia, Pathian pâwlna ka puan ina a awm lai khân, 5 Engkimtitheia ka hnêna a awm ṭhin laia, Ka fate ka vêla an awm lai khân, 6 Ka kalnate hnutekhala chulh a nih laia, Lungpuiin ka tân hriak a luan chhuahtîr dûl dûl lai khân! 7 Khawpui kawngka pana ka kala, Kawtthlêra ṭhutna ka buatsaih laite khân. 8 Tlangvâlten mi hmu a, an biru a, Upate an tho va, an ding a; 9 Hotute chu an ṭawng lai an châwl a, An kutin an kâ an hup a; 10 Mi liante aw a reh a, An dang chungah an lei a bet a. 11 Benga hriaten nihlawh mi ti a. Mita hmuten mi hriatpui a; 12 Mi rethei ṭap ka chhanchhuah ṭhin avângin. Pa nei lo, puitu nei lote pawh. 13 Boral dâwn ṭêpte malsâwmna ka chungah a thleng a, Hmeithai thinlung pawh hlimin ka zaitîr a. 14 Felna chu ka inbel a, mi tuam vêl a, Ka tihdik ṭhinzia hi kawrfual leh lukhum ang a ni. 15 Mitdel tân mit ka ni a, Kebai tân ke ka ni a. 16 Tlachham tân pa ka ni a, Ka hmêlhriat lohte pawh an thu ka buaipui a. 17 Mi fel lo ngho chu ka titliak a, A haa a thil seh chu ka pawt chhuak a. 18 Tichuan, “Ka bu zâwlah ka thi ang a, Ka nite chu ṭiauvut angin ka tipung ang a, 19 Tui lamahte ka zung a zâm darh ang a, Zankhuain ka zârah dai a châm reng ang a, 20 Ka ropuina hi keimahah a thar reng ang a, Ka kutah ka thalngul pawh a thar reng,” ka ti rilru a. 21 Ka lamah miten beng an dawh a, an ngaithla a, Ka thu nghâkin an ngawi ṭhap ṭhîn. 22 Ka sawi zawhah an ṭawng ve tawh ngai lo; Ka thusawi chu an chungah a tla. 23 Ruahtui angin mi nghâk reng ṭhîn, Ruah hnuhnûng châk angin an ka an lo âng a. 24 An inrinhlelh laiin ka nuihpui a, Ka hmêl hlim chu an tihnual lo. 25 An kawng ka thlang a, hotuah ka ṭhu a, Sipai rual zîngah lalber angin ka awm a, Lusûnte thlamuantu angin.
1 Tûnah zawng ka aia nauten mi nuihzat a, An pate ka ran rual vêngtu ui zînga Telah pawh ka duh lohte khân. 2 A ni, chûng thaṭhum mite chu, An kut thahrui ka hnemhnânpui em ni? 3 Tlachham leh rilṭâmin an chêr a, Ram ro leh kawlh chu an khel a. 4 Hnimbuk hnah nêmte an thliak a, Juniper zungte an chaw a ni. 5 Mihring zîng ata hnawh bovin an awm a, Rûkru angin an au zui a. 6 Ruam kumkârahte an chêng a, Lei khuarkhurum leh lungpui pûkahte. 7 Hnimbuk zîngahte an chiau va, ṭaiṭên hnuaiahte chuan an tawm khâwm a. 8 Mi âte fa an ni, a ni, tlâktlailo ber fate; Ram ata vuak chhuah an ni. 9 Tûnah zawng an hla ka lo ni ta; A ni, an kamchhe tleuhna mai ka ni ta. 10 Min ten a, an inthiarfihlîm a; Ka hmaia chil chhâk pawh an tîm lo. 11 A hruihrual chu a phelha, mi nghaisak tâk avângin, Ka hmaah insûmkârna an thlah ṭhak a. 12 Ka ding lamah mi rûrâho an lo thawk a; Ka ke an nêk per a, An tihchhiatna kawng chu ka chungah an din a. 13 Ka kawng an tichhia a, Ka vânduaina an tizual a, Tu mân an dâl lo. 14 A pawp zau laiah an lo kal a, A chim zîngah mi hual a. 15 Ṭihbaiawm ka chungah a thleng a, Ka ropuina chu thlî angin an ûm bo va, Ka mi ṭhatna chu chhûm angin a rîral ta. 16 Keimah ata ka thlarau leih chhuah a ni; Chhiatna nite chuan mi man ta e. 17 Zânah chuan ka ruhte a kher ngut ngut a, Ka na mi fêp sup sup hi a châwl lo. 18 Ka na hian ka silhfênte a tikhawlo va, Ka kawrnghâwng angin mi rêk a. 19 Chirhdiakah chuan mi paih lût a, Vaivut leh vut ang mai ka ni ta e. 20 Nang ka au che a, mi chhâng lo va, Ka ding a, nangin mi hawi lo. 21 Ka lakah i nun a lo râwng ta a, I kut chakin mi tiduhdah a. 22 Nangin thlîah mi chawi kâng a, a chungah mi chuantîr a; Nangin thlipuiah mi tiral ta. 23 Nangin thihna mi thlen ang tih ka hria asin, Mi nung zawng zawng tâna ruat inah chuan. 24 Chim chhe vûm chungah miin a kut a phar ngeiin, A vânduainaah chuan ṭanpui dîlin a au dâwn lâwm ni? 25 Buaina tâwkte tân ka ṭap ṭhîn lâwm ni? Chhambalte tân ka lungngai ṭhîn lâwm ni? 26 Thil ṭha ka zawng a, thil chhia a lo thleng a, Êng ka nghâk a, thim a lo thleng a. 27 Ka thin a phu hlawp hlawp a, a reh thei lo va, Tuarna nîte chu ka chungah a thleng a. 28 Ni em vâng ni lovin ka dum a, Pungkhâwmho zînga dingin ṭanpui ka dîl a. 29 Kâwl-uite tân unaupa ka ni a, Ostrich-te tân ṭhian ka ni a. 30 Ka vun chu a lo dum a, a khawk a, Ka ruhte chu a lum vut vut a. 31 Chu vâng chuan ka perhkhuang ri chu sûnnaah a chang a, Ka phênglâwng chu ṭap râwlah.
1 Ka mit tân thuthlung ka siam a; Engah nge nula ka melh ang? 2 Chunga Pathian laka chanvo leh Chungnung ber Engkimtitheia laka ro chan tûr chu eng nge ni? 3 Mi fel lo tâna vânduaina leh, Khawlohna titute tâna chhiatna a ni lo vem ni? 4 Ka kawngte chu a hmuin, Ka ke pên zawng zawng a chhiar lo vem ni? 5 Dâwt lama kal ka niha, Bumna lama ka ke pên rang ṭhîn ka nih chuan. 6 (Bûkna dik taka tehin awm ila, Ka dikna hi Pathianin a hriat nân.) 7 Tin, kawng lova pêng ka lo niha, Ka mit hmuh ang maia thinlung pu ka lo niha, Ka kutah hian kaidum rêng a bei phawt chuan, 8 Ka tuh chu mi dangin ei mai ang hmiang; Ka chîn zawng pawh kar chhuah ni rawh se. 9 Ka thinlung hian hmeichhia a îta, Ka ṭhenawm kawngkâah châng te ka nih chuan, 10 Ka nupui chuan mi dang sum dêng sela, Mi dangte chuan tlâwm rawh se. 11 Chu chu sual hnuatthlala tak, Khawlohna, rorêltuten an hrem ngei tûr chu a ni si a. 12 Ral dêr khawpa kângtu mei a ni bawk a, Ka sum neih zawng zawng pawh a khawrh fai vek dâwn a ni. 13 Ka chhiahhlawhnu emaw, ka chhiahhlawhpa emaw, Ka chunga an vuivaina thu thlen ka ngaihsak loh luih chuan, 14 Pathian a lo thawh hunah eng nge ka tih tâk ang le? A rawn zawh chian hunah engtin nge ka chhân ang? 15 Pum chhûnga kei mi siamtu khân ani pawh a siam lo vem ni? Pum chhûnga mi dintu chu thuhmun a ni lâwm ni? 16 Tlachhamte duh zâwng ka sûm bosaka, Hmeithaite bei ka tihdawna, 17 Ka chaw keimah maia ka eia, Fahrahin a ei ve loh chuan, 18 (A naupan lai aṭangin pa angin ka châwm lian a, A nu pum aṭangin ka kaihhruai a ni tawh si.) 19 Tu pawh silhfên lova boral emaw, Rethei intuamhlâwmna nei lo emaw hmu ka niha, 20 A kâwngin mal mi sâwm lo a nih chuan, Ka berâm hmula tuam lum a nih loh chuan; 21 Kawngkâah chuan ṭanpuitu ka hmuh avânga, Fahrah chunga kut lek ka nih chuan, 22 Ka koki hi ka dâr saiphêng nên phawk hlawk sela, Ka bân hi khingkhangruh aṭangin thlawn hlauh rawh se. 23 Pathian lak ata vânduaina chu ka ṭihzâwng tak a ni si a. A ropuina avângin eng ti rual ka ni lo. 24 Rangkachak chu ka nghahfâka ka hmana, Rangkachak ṭha mi chu ka rinchhana ka ngaiha, 25 Ka hausakna a nasat avâng leh Ka kutin a thawh chhuah nasat avânga lâwm ka lo niha, 26 Nî khi a ên lai leh Thla kal ruau ruau lam ka hawia, 27 Ka thinlung hi a rûk têa hîp bo a niha, Ka kut pawhin ka kâ a hup chuan, 28 Chu pawh chu rorêltute hrem ngei tûr khawlohna a ni a, Chunga Pathian hnêna daw ka nih dâwn avângin. 29 Mi hawtu chhiatna chunga lâwm ka nih emawa, Thil ṭha lovin a tlâkbuak laia lâwm hlut ka nih emaw chuan, 30 (A ni, a nunna ânchhe lawh khawpa Sual ti tûrin ka kâ ka phal lo.) 31 Ka puan ina mite chuan, “A buhbâla inhnangfâk lo tu nge awm?” an tih loh chuan, 32 (Mikhualte kawtthlêrah an riak lo va, Mi zin vâkte tân ka kawng ka hawng ṭhîn.) 33 Mite tih dân anga ka bawhchhiatna zêpa, Mahni âwm chhûnga khawlohna thukruin. 34 Mipui tam takte hlauh avâng leh Chhûngkuate hmuhsit hlauh avânga Ngawi reng leh lêng chhuak ngam lo ka nih chuan - 35 Aw, mi bengkhawntu nei teh ila aw! (En teh u, hei ka chhinchhiahna ka dah e, Engkimtitheian mi chhâng teh se.) Ka khingpuipan mi hêkna a ziak chu nei teh ila aw! 36 Ka kokîah ka pu ang a, Lallukhum angin ka inbel tûr a! 37 Ka pheikhai zât pawh ka hrilh ang a, Mi lian ni ve angin amah ka pan tûr. 38 Ka ram chu mi duh lova au chhuak a niha, A lei rûtkhuarte an ṭap hlawm a nih chuan, 39 Man pe lova a rah chhuahte ei ka lo niha, A neitute nun hlohtîr emaw ka lo nih chuan, 40 Buh aiah hlîng ṭo zâwk sela, ṭai aiah hlo har ṭo rawh se. Joba thu chu a tâwp ta.
Elihua thusawi
1 Tin, hêng mi pathumte hian Joba chu an chhâng zêl ta lo va, fel a intih êm avângin. 2 Tichuan, Barakela fapa Elihua, Buz mi, Ram thlahho zînga mi chu a thinrim ta êm êm mai a; Pathian ai maha amah thiam a inchantîr avângin Joba chungah chuan a thin a rim a ni. 3 Joba ṭhian pathumte chungah pawh chuan a thinrim bawk a, Joba chu thiam lo an ti chunga chhân ngaihna an hriat loh avângin. 4 Anni chu a aia upa an nih avângin Elihua chu Joba hnênah thu sawi ve lovin a lo inkhêk reng a. 5 Tin, Elihua chuan hêng mi pathumte hian chhân ngaihna rêng an hre ta lo tih a hriatin a thinur ta hle mai a. 6 Tichuan, Barakela fapa Elihua, Buz mi chuan a chhâng a, heti hian a ti a: Ka naupang a, nangni in upa a, Chu vâng chuan ka tîm a, Ka ngaih dân pawh ka hrilh ngam lo che u a, 7 “Khuareiin hril sela, Kum tamin finna zirtîr teh se,” ka ti a. 8 Mahse, mi thil hriat thiamtîrtu chu Mihringa thlarau awm, Engkimtitheia thaw chu a ni. 9 Kum tam hi an fing chuang lo va, Upaten thu dik an hre thiam chuang lo. 10 Chu vâng chuan, “Mi ngaithla ula, Ka ngaih dân ka han sawi teh ang,” ka ti a ni. 11 Ngai teh u, in thu ka nghâk reng a, Sawi tûr in dap thleng khân, In ṭan dânah beng ka lo chhi reng a. 12 A ni, ngun takin ka ngaithla che u a, Ngai rawh u, Joba hnial hneh thei emaw, A thu letthla thei emaw in zîngah tu mah in awm lo. 13 Fîmkhur rawh u; “Fing tak kan tâwk a lo ni, Mihring ni lovin, Pathian chauhvin a hneh thei ang,” In ti rawk ang e. 14 A thuin kei mi la vawm ve lo va, In tih dân ang maiin ka chhâng dâwn hek lo. 15 An inkhâp thlu dêr a, an dan reng hi, Kam khat mah sawi tûr an nei ta lo. 16 Dang renga dinga an chhân tawh loh avâng hian, Kei pawhin ka nghâk ve reng dâwn em ni? 17 Keima pualin ka chhâng ang a, Ka ngaih dan ka han sawi teh ang. 18 Thu lah ka ngah hle si a, Chhûng lam rilruin mi tur nasa a ni. 19 Ngai rawh u, ka thinlung hi uain hu chhuahna nei lo ang a ni a. Uain peng thar angin a puak dâwn ṭêp a ni. 20 Thuin ka inhrithla dâwn e, Ka kâ ka âng ang a, ka chhâng ang. 21 Tu mah ka zahpah lo mai ang a, Tu mah ka fak der hek lo vang. 22 Fak der ka thiam si lo va; Chuti lo chu, mi Siamtuin mi la bo thuai mai ang.
1 Eng pawh ni se, Joba, ka ṭawng hi ngaithla la, Ka thu zawng zawngah hian beng lo chhi teh. 2 Ngai teh, hei ka kâ ka âng ta a, Ka leiin thu a sawi hi. 3 Ka thute chuan ka thinlung ngîlzia a tilang a, Ka hmui chuan a thil hriat chu dik takin a sawi dâwn e. 4 Pathian thlarau chuan mi siam a, Engkimtitheia thaw chuan nunna mi pe. 5 I theih chuan mi chhâng la, Ṭan khawh la, ka hmaah hian I thute chu siam rem rawh le. 6 Ngai teh, Pathian lam thu-ah chuan Nangmah ang bawk ka ni a, Hluma siam ve bawk ka ni. 7 Ngai teh, kei hi mi hlau suh la, Ka nawr lutuk lo vang che. 8 Ka beng hriatah i sawi tawh tak a, I thu ri chu ka lo hre tawh a. 9 “Ka thiang a ni, bawhchhiatna nei lovin; Ka fihlîm a ni, khawlohna nei lovin; 10 I e, ka chungah remchâng a dap chhuak a, A hmêlmaah mi chhiar a ni; 11 Ka keah kawl mi bun a, Ka kalna zawng zawng a chhui chhuak a ni,” i ti a. 12 Ngai teh, ka chhâng ang che, Hetah hian i fel zo zân lo ve; Pathian chu mihring aiin a ropui zâwk a ni. 13 Thu khat mah a chhân loh avângin Engah nge amah i beih le? 14 Pathianin kawng khatin thu a sawi ṭhîn a, A ni, kawng hnih pawhin, pawisak loh pawh ni se. 15 Mumangah, zân inlârnaah chuan Mite tui taka an muthilha, Khumlaizâwla an mut chiah chiah laiin, 16 Mite beng chu a tihawng a, An thu dawn chu a tinghet a, 17 Mihring chu a thiltih ṭhulhtîra, A chapona chu a thupsak theih nân; 18 Ani chu thlâna liam lovin a vawng a, A nun pawh khandaih laka boral lovin. 19 A khumlaizâwlah natnaa thununin a awm a, A ruh zawng zawng na sup supin; 20 Tichuan, chaw te a hua a, Sa tui hmêl takte pawh a duh lo va, 21 A tisa a lo chêr deuh deuh va, hmuh tham a ni lo va, Ruh hlîr ruh hlîr a lo ni a. 22 Ani chuan thihna kotlâng a hnaih a, A nun chuan tiboraltute a hnaih tawh a ni. 23 Mi hnêna a tâna ṭha hriattîr tûrin A tân vântirhkoh, palai pakhat, Sâng zînga mi awm sela; 24 Tin, chu mi chuan amah duhsak takin, “Thlâna liam lovin chhanhim ang che, Tlanna ka hmu ta e; 25 A taksa hi tleirâwl thar leh sela, A vânglai chakna nite chu lo kîr leh tawh se,” ti sela; 26 Chu mi chu Pathian hnênah a ṭawngṭai a, Ani chuan a lo pawm a. A hmêl chu hlim takin a hmu ang a. Anin a hnênah felna chu a pe leh ang. 27 Mite hmaah hla sain: “Ka sual a, thil dik chu ka tikhawlo va; Mahse, mi thungrûl lo ve. 28 Thlâna liam lo tûrin mi chhanhim a, Ka nunin khaw êng a lo hmu ang,” a ti a. 29-30 Ngai rawh, mihringin nunna êng a hmuh theih nâna Thlân ata hruai kîr tûrin, Pathianin hêng thil zawng zawng hi, Mihring hnênah vawi hnih vawi thum a ti a ni. 31 E, Joba, ngun takin mi ngaithla teh, Lo ngawi la, ka han sawi ang e. 32 Sawi tûr i neih chuan mi chhâng la, Sawi rawh, thiam chantîr che ka duh a ni; 33 Chuti a nih loh chuan, mi ngaithla rawh, Lo ngawi la, finna ka zirtîr ang che.
1 Tin, Elihua chuan a sawi zêl a: 2 Nangni mi fingte u, ka thute ngaithla ula, Nangni mi thiamte u, in beng dawh rawh u. 3 Kâin ei mi a hria angin, Bengin thu a thliar a ni. 4 Kan tâna dik chu thlang ila, A ṭha chu keimahniin i chian ang u. 5 Joba chuan, “Fel zawng ka fel a ni, Pathianin ka thiamna mi hnâwlsakin, 6 Ka thiam reng chung hi dawtheiah mi chhiar mai pawh a; Bawhchhiatna ka nei lo chungin Ka hliam chu tihdam rual a ni lo,” a ti si. 7 Joba ang hi tu nge awm, Tui anga deuna ina, 8 Khawlohna titute pâwla, Mi suaksualte nêna lêng ṭhîn chu? 9 “Pathian chunga lâwm hi Mihringin engah mah a sâwtpui lo ve,” a ti vei nên. 10 Chuvângin, nangni, mi rilru neite u, Mi ngaithla rawh u, Pathian chuan thil suaksual tiin, Engkimtitheia chuan thil dik lo chu a ti teuh lo vang. 11 Mite an thiltih ang zêlin a thungrûl ang a, Mi tin an awm dân ang zêlin an chungah a thlentîr dâwn si a. 12 A ni, Pathian chuan suaksual takin a ti lul lo vang a, Engkimtitheia chuan a rêl khawlo hek lo vang. 13 Tu nge lei hi amah awptîra, Khawvêl pum pui hi a hnêna kawltîr ni? 14 Ama thlarau chu a hnêna a lâk kîra, Ama thaw chu a hnêna a lâk khâwm leh chuan, 15 Mi nung zawng zawng an boral rual ang a, Mihring chu vaivutah a chang leh mai ang. 16 Hriat thiamna i neih chuan hei hi ngaithla la, Ka ṭawng ri hi bengkhawn rawh: 17 Thu dik hawtu chuan ro a rêl ang em ni? Mi fel leh thiltitheia chu thiam loh i chantîr ang em ni? 18 Ani chu lalber hnêna, “Tlâktlailopa,” Mi lian hnêna, “Suaksualpa,” titu, 19 Hotute pawh duhsak bîk lo leh, Mi rethei aia mi hausa ngaihsak chuang lo a ni a, An zain a kutchhuak an ni si a. 20 Mit khap kâr lovah an thi a, Zanlaiah mite an khûr a, an ral a, Mi chakte pawh kut lova lâk bovin an awm. 21 Mihring awm dân chungah mit a lên a, A pheikhai zawng zawng a hmu vek si. 22 Khawlohna titute an bihrûk theihna tûr Thim a awm lo va, thihna daihlim a awm hek lo. 23 Pathian hmaa rorêlnaa kal tûrin Mihring tân hun bi a ruat si lo. 24 Mi chakte chu a tiṭiau va - an thu rêl lovin, An hmunah mi dangte a dah ṭhîn. 25 Chutiang chuan an thiltihte chu hriain, Zânah anmahni a tichhia a, a nuai bo va. 26 Mite mit hmuhah anni chu Mi sual hremin a hrem a, 27 Ama laka an pên bo avâng leh, A dânte an pawisak loh avângin; 28 A beng thleng khawp khawpin retheite an rûmtîr a, Ani chuan hnehchhiahte au thâwm chu a lo hria a. 29 Ani chu lo ngawi sela tu nge thiam loh chantîr thei ang? A hmêl a thup laiin tuin nge hmu thei ang? Hnam tân emaw, mi mal tân emaw thuhmun a ni. 30 Pathian hre lo mi chuan ro a rêl lohna tûr leh Mipui an âwkai loh nân. 31 Miin Pathian hnênah chuan, “Pawi ka khawih lo na a, hremna ka tuar si; 32 Ka hmuh loh chu mi zirtîr la, Khawlohna ka tih pawhin, Ka ti tawh lo vang,” a ti ngai em ni? 33 Pathian thungrulhna chu i duh ang kher em ni dâwn a, I lo hnial ni? Kei ni lovin nangin i thlang tûr a ni; Chuvângin, i hriat chu sawi rawh khai. 34 Mi rilru neite leh mi fingte, Mi ngaithla apiang pawhin, 35 “Joba hi chinchâng hre lovin a ṭawng mai mai a ni e, A thu-ah hian finna a awm lo ve,” mi tihpui ang. 36 Joba hi mi sual ṭawnga a ṭawng avâng hian Fiah fai vekin awm se ka ti a ni. 37 A sual belhchhahin a hel a, Kan zîngah a kut a bêng a, Pathian chungah a thu a tuitam mai a nih hi.
1 Tin, Elihua chuan a sawi zêl a: 2 Hei hi dikah i ngai em, “Pathian hmaah ka fel a ni,” i tih hi? 3 “Thil tisual lo ila ka tân ṭhat chuanna eng nge awma, Ka tân hlâwkna eng nge awm chuang?” i tih te hi? 4 Ka han chhâng teh ang che, Nang leh i pâwlpuite nên. 5 Vân lam dâk la, en teh, Chhûmte khi en la, nang aia a sân zâwk khi. 6 Thil i tihsual pawhin, a tân eng nge pawi? I bawhchiatna a pun pawhin, a tân eng nge pawi ang? 7 I fel pawhin, a tân hnemhnânpui tûr i awm em ni? I kut ata eng nge a dawn? 8 I suahsualna chuan nang ang mihring chauh a khawih a, I felna chuan mihring fa chauh a khawih thei a ni. 9 Hnehchhiahna a tam avângin an rûm a, Mi chakte bân avângin chhan ngaiin an au va. 10 Mahse, tu mân, “Min siamtu Pathian chu khawiah nge, Zâna hla min saktîrtu, 11 Hnuailêngte aia min zirtîr hnem zâwktu, Chunglêngte aia finga min siamtu chu?” an ti lo. 12 Tah chuan an rûm a, tu mân an chhâng lo, Mi sualte chapona avângin. 13 Pathianin dîlna lawilo chu a ngaithla lo vang a, Engkimtitheian a ngaihsak hek lo vang, 14 Nang lek phei chu e! “Amah ka hmu lo ve, Thu rêl tûr chu a hmaah a awm reng a, Amah ka nghâk reng e,” i han ti a. 15 Tûnah hian thinrima a rawn hrem mai loh avâng leh, Uanthuanna a rawn pawisak mai loh avângin, 16 Joba hian a kâ a âng mai mai a, Chinchâng hre lovin a thu a tuitam mai a nih hi.
1 Elihua chuan a sawi zêl a: 2 Ngawi rih la, ka kawhhmuh ang che; Pathian hmingin sawi tûr ka la nei cheu a nia. 3 Ka hriatna ka han fawm khâwm vak teh ang, Mi siamtu chu felna ka bel dâwn a ni. 4 Ka thu a daw hauh lo a nia, Hriatna famkim nei chu i kiangah a awm hi. 5 Ngai rawh, Pathian chu chak tak a ni a, Tu mah a hmusit mai lo; Rilru chaknaah chuan a ropui a ni. 6 Mi suaksual chu a zuah lo va, Hnehchhiahte erawh chu dik takin a rêlsak ṭhîn. 7 Mi felte chu a ensan lo va, Lalṭhuthlênga lalte kiangah Kumkhuain a ṭhuttîr a, chawimawiin an awm zâwk ṭhîn. 8 Kawl bun an lo niha, Hnehchhiahna hruia phuar an lo nih chuan, 9 An thiltih leh an bawhchhiatnate a entîr a, An lo chapo tawhziate nên. 10 Zirtîrna lamah an beng a tivâr a, Khawlohna lakah an inlamlêt nân thu a pe a. 11 An pawisaka a rawng an bâwl chuan, An nite chu hmuingîl takin an hmang ral ang a, An kumte chu nuam takin. 12 An pawisak loh erawh chuan khandaihin an boral ang a, Hriatna lovin an thi ang. 13 Thinlunga Pathian zah lo mite chuan thinur an khâwl a, Ama phuar an nih pawhin ṭanpui dîlin an au lo. 14 Mi bawlhhlawhte zîngah chuan An vânglaiin an thi a. 15 Ani chuan hrehawm tuartu chu A hrehawmna hmangin a tichhuak a, Hnehchhiahna hmangin a beng a tivâr a. 16 A ni, manganna ata chu hmun zau tak, Nêkchêp lohnaah chuan a hruai chhuak ang chia, I chawhlui chu thauvin a khat ang. 17 Mahse, nang chu mi suaksualte sawisêlnain i khat a, Sawisêlna leh rorêl dikna chuan a man che a ni. 18 Thinur avângin hmuhsitna rilru i pu dah ang e, Tlanna man nasatzia hian hruai bo che suh se. 19 Manganga i awm loh nân i awkâ emaw, I thahrui chakna emaw a tâwk em ni? 20 Zân chu châk suh, mite an hmun ata an boralna hun a ni e. 21 Fîmkhur la, khawlohna lam hawi suh, Hei hi hrehawm tuar aia i thlan a ni si. 22 Ngai rawh, Pathian chuan a theihnain zo takin a ti a ni; Tu nge amah ang zirtîrtu awm? 23 Tu nge a tih dân tûr ruatsak? Tu nge, “I ti dik lo,” ti thei? 24 A hnathawh tiropui tûrin hre reng rawh, Miten zaia an chawi ṭhina chu. 25 Mi tinin chu chu an en a, Miten hla tak aṭangin an thlîr a. 26 Ngai rawh, Pathian chu a ropui e, kan lo hre lo pawh a; A kum zât te chu zawn chhuah rual a ni lo. 27 Tui mal far tê tê chu a hîp chho va, Tuihûa intifîmin ruahah a chang a, 28 Vânin a sûrtîr a, Mihring chungah a tla buan buan ṭhîn. 29 A ni, chhûm ṭai darh dân te hi mihringin a hre thei em ni? A bûk zâr ri dur dur te hi? 30 Ngai teh, a vêlah a êng a theh darh a, Tuifinriat mawngte a khuh a. 31 Hêng hian mite thu a rêlsak a, Ei tûr tam tak a pe a. 32 Kâwlphein a kutte chu a khuh a, A tum tak fuh tûrin a tîr ṭhîn a. 33 Khawpui ri chuan a chungchâng a puang a, Ran rualte pawhin thlipui lo thawkah chuan an puang a.
1 Hei vâng hian ka thinlung a khûr a, A phu hlawp hlawp asin. 2 Ngaithla ngun ula, a awrâwl te leh A kâa lo chhuak rite chu. 3 Vân pum pui hnuaiah a tîr chhuak a, A kâwlphe chu lei tâwp thleng thlengin. 4 A hnuah chuan a awrâwl a chhuah a, A ropuina aw chu a tiri dur dur a; A aw an hriat pawhin a chawlhtîr chuang lo. 5 Pathian chuan mak takin a aw a tiri dur dur a, Thil ropui tak, kan hriat phâk loh a ti a ni. 6 Vûr hnênah chuan, “Leiah tla rawh,” a ti a, Chutiang bawk chuan ruah leh ruahpuite hnênah pawh. 7 Mi tinrêng kut chu a tikhawng zo va, A mi siam zawng zawngten an hriat nân. 8 Tichuan, ramsaten bîk bona an pan a, An bu zâwlah an awm reng a. 9 Chhim lam pindan ata thli chhia a lo thawk a, Hmâr lam ata khaw vâwt. 10 Pathian thaw vângin tuikhal a lo awm a, Tui zau tak pawh a khal zo va, 11 A ni, chhûm chhah puite chu hnâwngin a tikhat a, Chhûmah chuan kâwlphe a tidarh a. 12 Ama hruaiin an vir zawr zawr a, Khawvêl chên theihna zawng chungah hian, A thupêk apiang an tih theih nân. 13 Zilh nân emaw, a ram ṭhat nân emaw, Zahngaih vâng emawa a rawn awmtîr a ni. 14 Joba, hei hi ngaichâng teh, Bengsikin Pathian thiltih makte chu ngaihtuah teh. 15 Chûng chu Pathianin thu a pêk dân leh, A chhûma kâwl a phêttîr dânte i hria em ni? 16 Chhûm a kân theih dân te, Hriatna famkim neitu thiltih makte hi i hria em ni? 17 Chhim thli avânga lei a reh ṭhiapa, I silhfên a lo lumzia te hi? 18 Ani chu vân i kaih pharhpui thei em ni? Dârthlalang chhûn khal ang maia khauh chu? 19 A hnêna kan sawi tûr chu min hriattîr rawh le; Thimna avângin kan sawi thiam loh hi. 20 Ka sawi dâwn tih amah hrilh tûr em ni? Mahni intihboral miin a châk ngai em ni? 21 Tûnah, thli a lo thâwta a chhêm kianin, Vân zâwla êng ropui chu miin an en ngam lo. 22 Hmâr aṭangin rangkachak êng a lo zâm a, Pathian chu ropui râpthlâk takin a inthuam a. 23 Engkimtitheia chu kan hmuchhuak thei lo va, Thiltihtheihna leh diknaah a ropui a, Felna a ngah a, a hnehchhiah lo vang. 24 Chuvângin, miten amah an ṭih a, Intifingte chu tu mah a pawisa chuang lo ve.
LALPAN Joba a chhâng
1 Tin, LALPA chuan ṭhâwngaleivir aṭangin Joba chu a chhâng a, heti hian a ti a: 2 Hriatna tel lo thua Thurâwn tithimtu hi tu nge ni? 3 Mipa takin i puan veng la, Thu ka zâwt ang chia, mi hrilh ang che. 4 Leilung nghahchhan ka phûm lai khân khawiah nge i awm? I hriat thiam chuan sawi rawh. 5 A len lam bî te tu nge thliah? I hre meuh maw! A nih leh, a chung zâwl tehna tu nge zam? 6 A nghahchhan chu khawiah nge a din ngheha, Tu nge a kil lung phûm ni, 7 Vârparh arsite an zai khâwma, Pathian fate zawng zawng an au lai khân? 8 Tuipui chu chhûla a lo chhuah lai khân Tuin nge kawng lo khâr hnan? 9 A silhfên atân chhûm ka siam a, A tuam puanah thim chhah tak; 10 A chîm chin tûr te ka siam a, A danna leh khârna tûr te; 11 “Heti thleng chauh hian lo kal la, pêl hauh suh, Tah hian i fâwn vêl tâwp rawh se,” ka ti a ni. 12 Lei khuhna tikianga, Mi suaksualte thing chhuak tûrin, 13 I pian achinah, zîng hnênah thu i pein, Khawfîngchat hi a hmun tûr i hriattîr ngai em? 14 Lei hi nemnaa hlum nem angin a tilang dang a, Silhfên ze hrang ang nukin a lang ta a. 15 Mi suaksualte êng chu chhuhsak a ni a, An bân lek sân chu tihtliah a ni. 16 Tuipui hnârahte i lût tawh ngai em? A thûkzia te i fang chhuak tawh em ni? 17 Thihna kawngkate chu i hnênah tihlan a ni tawh em? Thihna daihlim kawngkâ chu i hmu tawh em ni? 18 Lei zauzia te hi i hre phâk em ni? I hriat vek chuan sawi rawh. 19 An ramri i hruai theiha, An in lam kawng chin i hriat theihna tûr chuan, 20 Êng chênna kawng chu khawiah nge? Thim pawh chu khawiah nge a hmun? 21 I hria ang chu, chûngah chuan i piang tawh a, I ni te pawh a tam tawh alâwm! 22 Vûr dah khâwlna hmunah i lût tawhin, Rial dah khâwlna hmunah pawh i lût tawh em ni? 23 Buai hun atân te leh indo leh inbeih ni atâna ka khêk chu a ni. 24 Eng kawngin nge êng hi a ṭai darha, Chhak lam thli pawh hi lei chungah a intheh darh? 25 Tuin nge ruahpui tâna luankawr leh, Ṭêk tâna kawng siam - 26 Tu ma awm lohna leh mihring chên lohna Thlalêra ruah surtîr tûr te, 27 Ram ro leh pilril tihnâwng tûr te, Hlobet hring ṭotîr tûr tein? 28 Ruahin pa a nei em ni? Daifîmte hi tu hrin nge? 29 Tu chhûl aṭangin nge tuikhal hi a lo chhuah? Vân aṭanga vûr lo tla ṭhîn hi tu hrin nge? 30 Tuite pawh lung ang maiin a sak a, Tuipui thûk chungte a khal a. 31 Siruk khi i phuar khâwm theiin, Chhohreivûng tlar khi i phelh darh thei em ni? 32 Arsite khi a hun bîah i hruai chhuak thei em ni? Zângkhuahote khi i hruai thei em ni? 33 Vân thil ruatte chu i hriain, Leiah hian thu i neihtîr thei em? 34 A nan tûr chein chhûm ata Ruahpuivânawn i au thla thei em ni? 35 Kâwlphê te chu i hnêna lo kala, “Heta hi kan awm,” ti tûrin i tîr chhuak thei em ni? 36 Tu nge chhûm dumahte khian finna daha, Tu nge arsi thlâwkte hriat thiamna pe? 37 Tu nge finnaa chhûmte hi chhiar theia, Vân tuithâwl tu nge leih baw thei? 38 Vaivutte a inhlâwm khâwma, Lei tlangte a inbelhbawm hi. 39 Sakeibaknei tân ei tûr i zawnsakin, Sakeibaknei vânglaite châk daih i pe thei em ni, 40 An pûkahte an bawha, Seh tûr an chân lai hian? 41 Choâk hi, a note ei tûr tlachhama, Pathian hnêna an hrâm lai leh An vahvaih laiin tuin nge chaw pe?
1 Lung bang sathâr no neih hun i hria em ni? Sazuk no neih hun i chhinchhiah thei em ni? 2 An pai chhûng thla zât i chhiarin, An hrin hun te i hria em ni? 3 An bawk a, no an hring a, An vei zo mai a ni. 4 An note chu an pian a tlang a, Rampalailêngah an ṭhang lian a, An kal darh a, an puite hnênah an kîr tawh lo. 5 Ramsabengtung tuin nge se zâwl chhuah? Ramsabengtung chak thlunna tu phelh nge? 6 An awm nân thlalêr ka ruatsak a, An chên nân ram ṭau. 7 Khawpui hulûm chu a hmusit a, Khalhtu au ri a hre ngai lo. 8 A tlatna chu tlâng dungah a ni a, Thil hring apiang a zawng chhuak ṭhîn. 9 I tân selepa chu chhawr theih em ni ang? I ran inah a riak duh ang em? 10 Lei lehnaah hrui i bahtîr thei ang em? I hnungah lei ruam a rawn chawk rual ang em ni? 11 A chak êm avâng maiin i ring thei dâwn em ni? I hna chu i kawltîr dâwn em ni? 12 I buhte i hruih zâwla rawn dah khâwm tûrin I ring mai thei em ni? 13 Ostrich thla uangthuang takin a inkhawng vêl a; Mahse, a thla ki leh a hmulte chu an ngilnei em ni? 14 Leiah a tui a hnutchhiah a, Vaivutah a khuh lum a. 15 Miin a rap keh thei a, Ramsaten an chil keh thei tih a hre leh tawh lo. 16 Ama no ni lo ang hrimin a note lakah a inchhu ngawng a, A thiltih chu a thlâwn dâwn emaw, a pawisa chuang lo. 17 Pathianin finna a haihchhamtîra, Hriat thiamna a pêk hek loh avângin. 18 Tlân bo tuma a han insingsak meuh chuan, Sakawr leh a chung chuangte chu a tham lo mai. 19 Sakawr chaknate hi i pêk em ni? A nghâwngah thahrui i bân em ni? 20 Khau anga kat tûrin i siam em ni? A hnâr tum dur dur hlauhawmzia te hi! 21 Phai ruamah a ke a phiat tlut tlut a, A tha a so va, indo hriamhrei hmachhawn tûrin a chhuak a. 22 Hlauh rêng a hre lo va, a zâm ngai lo va, Khandaih lakah a tîm ngai hek lo. 23 A chungah thal bâwm a ri rawk rawk a, Fei leh thal a tle zawr zawr mai a. 24 Hlauhawm tak leh thinur takin a khawh puat puat a, Tawtawrâwt thâwmah a ding hle hle thei lo. 25 Tawtawrâwt a rîk phawt chuan “Chei! Chei!” a ti a, Inbeihna chu hla takah a rim a hria a, Hotute râwl leh inbeihna hawhaw nên. 26 I finna avângin mu chu a thlâwk chhovin, Chhim lamah thla a zâr em ni? 27 Muvanlai thlâwk chho leh, Sâng taka bu a chhep hi i thupêk em ni? 28 Khâm kovahte a chêng a, Lung tohlâwt hmun him takah a riak ṭhîn. 29 Chuta ṭang chuan ei tûr a bihthla a, A mit chuan hla tak a hmu. 30 A note pawhin thisen an dâwt a, Saruang awmnaah chuan a awm zêl a ni.
1 Tin, LALPA chuan Joba hnênah a sawi zêl a: 2 Sawisêltu chuan Engkimtitheia chu a hnial ang maw? Pathian hnialtu chuan chhâng ang hmiang! tiin. 3 Tichuan, Joba chuan LALPA chu a chhâng a: 4 Ngai teh, kei mi pawimawh tham lo tê hian Engtin nge ka chhân ang che? Ka kâ ka hup mai a ni. 5 Vawi khat ka sawi tawh a, ka chhâng tawh lo vang che; A ni, vawi hnih; ka chhunzawm tawh lo vang, a ti a. 6 Tin, LALPA chuan Joba chu ṭhâwngaleivir aṭangin heti hian a chhâng a: 7 Mipa takin i puan veng la, Thu ka zâwt ang chia, mi hrilh ang che. 8 Ka thurêlte mi sûtsak dâwn em ni? Thiam i chan theih nân Thiam loh mi chantîr dâwn em ni? 9 Pathian bân ang i nei em ni? Amah angin khawpui ri aw i chhuah thei em ni? 10 Lalna leh zahawmna han inbel la, Chawimawina leh ropuinain inthuam rawh khai. 11 I thinrimna khat liam chu leih chhuak la, Mi chapo apiang chu en bîkin titlâwm teh khai. 12 Mi chapo apiang chu en bîkin tihniam la, Mi suaksualte chu an dinhmunah rap bet rawh le. 13 Vaivutah phûm hlawm la, Hmun birûah an hmêlte phuar khâwm teh le. 14 Tichuan, i kut ding lam ngeiin a chhanhim thei che tih Kei ngei hian ka hria ang chu. 15 En teh, nangmah ang bawka Behemoth ka siam hi, Bâwng anga hnim ring mi a ni. 16 Ngai teh mah, a chakna chu a kâwngah a awm a, A thahrui chu a dul thuara awm a ni. 17 Sidar angin a mei a tikhauh va, A malpui thâte chu a phiar tlat mai. 18 A ruhte chu ngên kawrawng ang a ni a, A fuke chu thîr tlâwn ang a ni. 19 Pathian siam u ber a ni a, A siamtu chuan a tân khandaih a siamsak a. 20 Tlângte chuan chaw an chhuahsak ṭhîn a, Chu chu ramsa zawng zawng tualchaina a ni. 21 Lotus buk hnuaiahte a bawk a, Pumphîr hnuai leh dûmahte pawh. 22 Lotus buk chuan a zâr hlim a, Luia tuipuisuthlah chuan a hual vêl a. 23 Ngai rawh, tui a lo len buan buan pawhin a hlau ngai lo; A kâ thleng pawhin Jordan lian mah se, a zuam zêl. 24 A inrâlrin laiin miin an man thei em ni? A hnârah an thil thei ang em ni?
1 Nghakuaiin leviathan i hnûk chhuak thei em ni? Hruihrualin a lei i phuar bet thei em ni? 2 Phairuang hruiin a hnârah i thil thei em ni? Nghakuaiin a khabe i thil tlang thei em ni? 3 I hnênah dîlna tam tak a siam ang em ni? I hnênah thu nêmin a sawi ang maw? 4 Kumkhuaa rawngbâwltua i hman tûrin I hnênah thuthlung a siam ang em ni? 5 Sava ang lekin i khâl thei dâwn em ni? I hmeichhiate kaih atân i hlîng thei ang maw? 6 Sangha mantuhoten indâwr nân an hmang ang em ni? Sumdâwng mite zîngah an sem darh ang em ni? 7 A vun khatin thîr hlîngte, A lûah nghafei te i riah thei em ni? 8 A chungah kut han thlâk teh, In inbeih dân tûr chu ngaihtuah rawh, I ti leh tawh ngai lo vang! 9 Ngai rawh, mihring beiseina chu a thlâwn a ni; A hmuh mai pawhin a beidawng nghâl a ni. 10 Amah chawk tho tûrin tu mah an rorum ngam lo. Chuti a nih chuan tu nge ka hmaah ding thei ang? 11 Tu nge ka rulh leh tûra thil mi pe hmasa awm? Vân hnuaia thil engkim hi ka ta a ni. 12 A fuke thu-ah ka ngawi reng lo vang a, A thahrui chakzia leh a taksa inphut tâwkziaahte pawh. 13 Tu nge a vun pâwnlâng chu hlîp thei ang? A khabe thuah hnih chhûngah tu nge lût thei ang? 14 Tuin nge a hmêl kawngkapui chu hawng thei ang? A ha kual vêl chu ṭihbaiawm tak a ni. 15 A vun châr chu a chhuan ber a ni a, Châr ang maia phui tlat a ni. 16 A insîk phui chiah avângin, A kârah boruak pawh a lût thei lo. 17 An inzawm ṭheuh va, an inphan tlat avângin Kaih ṭheh theih a ni lo. 18 A thaw chhuak chu a vâr sung sung a, A mitte chu khawfîngchat ang ru mai a ni. 19 A kâ aṭangin meialh a chhuak a, Meisîte a ṭêk ur ur a. 20 A hnâr aṭangin meikhu a lo chhuak a, Sa so bêl nghawr leh phairuang mût ang vut vutin. 21 A thaw te chuan meihawl a tivâm a, A ka aṭangin meialh a chhuak a. 22 A nghâwngah chakna a awm a, A hmaah ṭihbaiawmna a tualchai reng a. 23 A ṭâng chhûng vun pawh khing rût, Taksa nên inbelhbawm tlat, khawih chêt rual loh a ni. 24 A thinlung chu lung anga sak a ni a, A ni, râwt sawmna lung hnuai zâwk ang mai a ni. 25 Amah a lo thawh chhuah meuh chuan Pasalṭhate pawhin an hlau va, An thlaphângin mahni pawh an inhre tawh ṭhîn lo. 26 Miin khandaihin bei mah sela, a hneh lo vang; Fei emaw, thal emaw, feiṭam emaw pawhin. 27 Thîrte chu buhpâwl ang lekah a ngai a, Ngên chu thing mawih angah. 28 Thalin a titlânchhe lo va, A lakah chuan virvawmte chu pâwl bul ang lek a ni. 29 Talhtumte chu pâwl bul ang lekah a ngai a, Feiṭam vung te chu a nuihsan mai a ni. 30 A hnuai lampangte pawh lampei hriam tak ang a ni a; Diakahte chuan buhchîl khâwl ang maiin a bawk a. 31 Tui thûk tak chu bêl angin a tiso buah buah a, Tuipui chu hlo bûr ang lekah a siam a. 32 A kalna hnu chu a êng ruak a, Miin tuipui chu vâr buahin an hmu ṭhîn. 33 Lei chungah hian amah ang rêng an awm lo ve, Hlauh nei hauh lova siam chu. 34 Thil sâng apiang a en ṭhîn a, Inlulingte zînga a ber a ni.
Joba
1 Tin, Joba chuan LALPA chu a chhâng a: 2 “Engkim i ti thei tih ka hria e, I tum dâl rual eng mah a awm lo. 3 ‘Tu a ni nge, hriatna lova thurâwn thup botu hi?’ Chu vâng alâwm ka hriat thiam lohte, Ka tâna mak lutuk, ka hriat loh thilte ka sawi ni. 4 ‘Ngaithla rawh le, ka han sawi ang e; Thu ka zâwt ang chia, mi hrilh ang che.’ 5 Benga hriatna mai zawngin ka hre tawh chia; Mahse, tûnah zawng ka hmu ta che. 6 Chu vâng tak chuan ka inten a, Vut leh vaivuta ṭhuin ka sim ta e,” tiin. 7 Tin, LALPAN Joba hnênah hêng thute a sawi hnu hian LALPA chuan Elifaza, Temani mi hnênah chuan, “I chungah leh i ṭhian pahnihte chungah khân ka thinurna a nasa a ni, ka chhiahhlawh Joba angin ka chungchâng thu dik takin in sawi si lo. 8 Chutichuan, tûnah bawngpa pasarih leh berâmpa pasarih kengin ka chhiahhlawh Joba hnênah va kal ula, in tân hâlral inthawi va hlân rawh u; tin, ka chhiahhlawh Joba chuan a ṭawngṭaisak ang che u a, chu chu ka lo pawm ang a, in âtzia ang zêl chuan ka ti lo vang che u; ka chhiahhlawh Joba angin ka chungchâng thu dik takin in sawi si lo va,” a ti a. 9 Chutichuan, Temani mi Elifaza leh Suhi mi Bildada leh Naamathi mi Zofara-te chu an va kal a, LALPAN thu a pêk ang zêl chuan an ti a; tin, LALPA chuan Joba dîlna chu a pawm ta a. 10 Tin, Joba chuan a ṭhiante pathum tâna a ṭawngṭai chuan, LALPAN Joba chan chu a tiṭha leh ta a; LALPA chuan Joba chu a hmaa a neih lêt hnih a pe leh ta a. 11 Tichuan, a unau leh a farnu zawng zawngte leh, tûn hmaa a hmêlhriat zawng zawngte chu a hnênah an lo kal a, a inah chuan chawhlui te an kîl a; LALPAN a chunga thil ṭha lo a thlentîr zawng zawng thu-ah chuan an tuarpui a, an thlamuan a; mi tinin a hnênah chuan tangkaraw tlangte leh rangkachak zungbunte an pe ṭheuh va. 12 Chutichuan, LALPA chuan Joba hun hnuhnûng chu a tîr aia nasa takin mal a sâwm a; berâm sîngkhat leh sângli, sanghâwngsei sângruk, sebâwng tuak sângkhat leh sabengtungpui sângkhat a nei a. 13 Fapa pasarih leh fanu pathum a nei bawk a. 14 Tin, a hmasa bera hmingah chuan Jemimai a sa a, pahnihna hmingah chuan Keziai, pathumna chu Keren-hapuki. 15 Tin, ram zawng zawngah pawh Joba fanute anga hmeichhe hmêlṭha an awm lo; an pa chuan anni chu an nuṭate zîngah ro chan tûr a pe ve hlawm a. 16 Tin, hetih hun hian Joba chu kum za leh kum sawmli a dam a, a fapate, a fapaa fapate, chhuan li thlengin a hmu a. 17 Chutichuan, Joba chu tar tak, khûpbihin a thi ta a.
Engthâwlna tak tak
1 Mi suaksualte remruat anga awm ngai lova, Mi sualte kawng pawha ding ngai lova, Hmusittute ṭhutphah pawha ṭhu ngai lo mi chu, a eng a thâwl e. 2 A lâwmna chu LALPA dânah a ni zâwk a; A dân thu chu a chhûn a zânin a ngaihtuah ṭhîn. 3 Ani chu tui luang kianga thing phun, A hun têa rah ṭhîn, A hnah pawh uai ngai lo ang hi a ni a; A thiltih apiang chu a hmuingîl zêl ang. 4 Mi suaksualte erawh chu chutiang an ni lo va; Buhsî thliin a len bo ang hi an ni zâwk. 5 Chuvângin, mi suaksualte chu rorêlna hmaah chuan an ding thei lo vang a, Mi sualte pawh mi felte inkhâwmnaah chuan an ding thei hek lo vang. 6 LALPA chuan mi felte kawng chu a hre si ṭhîn a; Mi suaksualte kawng erawh chu a boral ang.
Pathian lal thlan
1 Hnam tin chu engati nge an thinura, Mi tinin engati nge thil sâwt lo an ngaihtuah? 2 Leia lalten an ep huai huai a, Hotute pawhin LALPA leh a hriakthiha chu an phiar hlawm a, 3 “An phuarnate hi tichatin, An hruihrualte hi kan hnên ata i paih daih ang u,” tiin. 4 Vâna ṭhua chu a nui ang a; LALPA chuan anniho chu a nuihzatbûr ang. 5 Chumi hunah chuan thinurin an hnênah thu a sawi ang a, Thinrim takin anmahni a timangang tawh ang: 6 “Keimah ngeiin ka tlâng thianghlim Zion-ah chuan, Ka lal siam chu ka ṭhuttîr ta a ni,” tiin. 7 Thuruat chu ka hril dâwn: LALPAN ka hnênah, “Nang zawng ka Fapa i ni e; Vawiin hian ka hring che a ni. 8 Mi dîl rawh; tichuan, i rochun atân hnam tin ka pe ang chia, Kâwlkil tâwp thlengin i ro atân ka pe bawk ang che. 9 Anni chu thîrtiangin i tikeh ang a; Bêlvawtu bêl an paih keh sawm ang hian i paih keh sawm ang,” a ti a. 10 Chutichuan, aw lalte u, fing tawh ula; Leia rorêltute u, thununin awm tawh rawh u. 11 Ṭih chungin LALPA rawng bâwl ula, Khûr chungin lâwm rawh u. 12 Fapa chu fâwp rawh u; chuti lo chuan, a thinur ang a, kawnglakah in boral dah ang e, A thin chu a thawk thuai dâwn si a. Amaha an rinna nghat zawng zawngte chu an eng a thâwl e.
Davida Fakna Hla, a fapa Absaloma hnên ata a tlân bo laia mi.
Zînga ṭanpui dîla ṭawngṭaina
1 LALPA, mi dotute hi an va pung ta êm! Mi beitute hi tam tak an ni. 2 Ka chungchâng thu an sawi a, “Pathianin a pui lo vang,” an ti a. (Selah) 3 Nimahsela, aw LALPA, nang chu ka vêlin ka phaw i ni a; Ka ropuina leh ka lu dâwm kângtu i ni e. 4 Ka awin LALPA chu ka au va, A tlâng thianghlim aṭangin mi chhâng ṭhîn a. (Selah) 5 Kei zawng ka mu chu ka lo muhîl ta a; Ka han harh leh a, LALPA chuan mi lo chelh reng ṭhîn a ni. 6 Mi dova, mi hual vêltu, Mi sîngkhat pawh hi ka hlau lo vang. 7 Aw LALPA, tho la, aw ka Pathian, mi chhandam rawh; Mi dotute zawng zawng chu an biangruhah i vaw si a; Mi suaksualte hâ chu i tibal a. 8 Chhandamna chu LALPA ta a ni. I malsâwmna chu i mite chungah awm rawh se. (Selah)
Hla Hruaitu tân; ṭingṭang chi hrang hranga sak mi. Davida Fakna Hla.
Tlaia ṭanpui dîla ṭawngṭaina
1 Aw ka felna Pathian, ka koh hun che chuan mi chhâng ang che; Ka manganin nangin mi tithawveng ṭhîn a: Mi khawngaih la, ka ṭawngṭaina hi mi ngaihthlâksak ang che. 2 Aw mihring fate u, ka ropuina hi eng chen nge mualphonaa in chantîr dâwn? Eng chen nge thil engmahlo hi in ngainat anga, dâwt thu in zawn dâwn? (Selah) 3 LALPA chuan Pathian ngaihsak mi chu ama tân a dah hrang tih hi hre zâwk rawh u; LALPA chuan ka koh apiangin a lo ngaithla ang. 4 Hlau ula, thil tisual suh u; In khumlaizâwlah chuan in thinlungin inngaihtuah ula, ngawi ṭhiap rawh u. (Selah) 5 Felna inthawinate chu hlân ula, LALPA chu ring rawh u. 6 “Ṭhatna rêng rêng tuin nge mi hmuhtîr ta ang le?” titute chu tam tak an awm. LALPA, nang ngeiin i hmêl êng khân mi han ên ang che. 7 An buh leh an uain lo hlâwk chânga an lâwmna aia Lâwmna nasa zâwk ka thinlungah hian i awmtîr a. 8 Thlamuang takin ka mu ang a, ka muhîl bawk ang; LALPA, nangmah ngei hi a ni, Mahni chauh pawha him taka mi awmtîr ṭhîn hi ni.
Hla Hruaitu tân; Nehiloth nêna sak mi. Davida Fakna Hla.
Hum tûra ngenna
1 Aw LALPA, ka thu-ah hian beng lo chhi la, Ka ngaihtuahna hi ngaihtuah ang che. 2 Ka Lal leh ka Pathian, Ka au thâwm hi ngaithla ang che, I hnêna ṭawngṭai ka ni si a. 3 Aw LALPA, zîngah chuan ka aw hi i lo hre ṭhîn ang a; Zîngah chuan ka ṭawngṭaina hi i hmaan ka rêl fel diam ang a, Ka lo ngaihven ṭhîn ang. 4 Suahsualnaa lâwm ṭhîn Pathian i ni si lo va; Mi sual chu i hnênah an thleng lo vang. 5 Mi uangthuangte chu i mit hmuhah an ding thei lo vang a; Thil tisualtute zawng zawng chu i haw ṭhîn. 6 Dâwt thu sawi hmangte chu i tiboral ang a; LALPAN thisen chhuah hmang leh bum hmang mi chu a ten riau ṭhîn. 7 Kei erawh chu, i ngilneihna nasa tak avângin, i inah ka lo lût ang a; Ṭih chung chein i biak in thianghlim lam hawiin chibai ka bûk ṭhîn ang che. 8 Aw LALPA, ka hmêlmate avâng hian i felna avâng chuan mi hruai la; I kawng chu ka hmaah hian titluang ang che. 9 An kâah chuan rinawmna rêng rêng a awm lo va; An kawchhûng chu suahsualna hlîr a ni; An hrawk chu thlân inhawng a ni a; An leiin mi an fak der ṭhîn. 10 Aw Pathian, anniho hi thiam loh chantîr ang che; Anmahni remruat ngeite chu tlûk phah nân hmang rawh se: An bawhchhiatna tam tak avâng hian nam chhuak ang che; I chungah an hel si a. 11 Nangmaha an rinna nghat zawng zawngte erawh chu nangmahah chuan lâwm sela, I hum ṭhin avângin hlimin au kumkhua hlawm rawh se; I hming ngainate pawh chu nangmahah chuan lâwm takin awm rawh se. 12 Mi fel chu mal i sâwm dâwn si a; Aw LALPA, ani chu phaw ang hian duhsaknain i hual vêl ang.
Hla Hruaitu tân; ṭingṭang chi hrang hranga sak mi, Sheminith-a sak tûr. Davida Fakna Hla.
Mangan laia ṭanpui dîlna
1 Aw LALPA, thinurin mi zilhhau suh la, Thinrimin mi thunun hek suh ang che. 2 Aw LALPA, mi khawngaih ang che, ka chau zo ta si a; Aw LALPA, mi tidam ang che, ka ruhte hi a na vek si a. 3 Ka nunna pawh a mangang êm êm bawk a ni; Aw LALPA, nangin eng chen nge mi thlahthlam dâwn le aw? 4 Aw LALPA, lo kîr leh la, ka nunna chhanhim la; I ngilneihna avângin mi chhandam ang che. 5 Thih hnu chuan nangmah hriat rengna a awm si lo va; Seol-ah tuin nge lâwm thu hrilh dâwn che? 6 Ka rûmna lamah ka chau ta; Zan tin ka mutna chu mittuiin a huh a; Ka khum chu ka mittuiin ka tihuh ṭhîn. 7 Hmuh pawh ka hmu thei ta lo; Hmêlma avângin ka ṭap a, ka mit pawh a thim zo ta. 8 Nangni thil tisualtu zawng zawngte u, mi kalsan vek rawh u; LALPAN ka ṭap thâwm a hre tawh si a, 9 LALPAN khawngaih ka dîlna chu a ngaithla tawh a; LALPAN ka ṭawngṭaina chu a lâwm ang. 10 Mi dotute zawng zawng chu an mualphovin an mangang êm êm ang a; An kîr leh ang a, Vawilehkhatah an la mualpho thut ang.
Davida Shiggaion hla, Benjamin mi Kusa thusawi chungchângahte amah vêkin LALPA chawimawia a sak chu.
Dik taka rorêlsak tûra dîlna
1 Aw LALPA ka Pathian, nangmahah ka rinna ka nghat a; Mi ûmtute zawng zawng lakah hian mi chhandamin mi chhanhim ang che; 2 Chuti lo chuan, chhanhimtu awm lovin, sakeibaknei angin, Ka nunna hi pawt sawmin, a sawisa dah ang e. 3 Aw LALPA ka Pathian, hetianga ti ka lo niha, Ka kuta sualna lo awm a niha, 4 Ka ṭhian chu sualnaa thungrûl ka lo nih chuan, (A ni, enga khaw lawilova mi dotu hi ka chhanhim zâwk a ni;) 5 Dotu hian ka nunna hi ûmin, ûmphâk mai rawh se. A ni, ka nun hi leiah chîl thluin, Ka ropuina hi vaivut zîngah dah mai rawh se. (Selah) 6 Aw LALPA, thinurin tho la, Mi dotute thinrimna dovin thawk la; Ka tân intiharh rawh; dikna i phût si a. 7 Tichuan, mi tin inkhâwmho chuan hual vêl che rawh se; Tin, nang chu an chung lamah chuan kîr leh ang che. 8 LALPAN mi tin ro a rêl ṭhîn; Aw LALPA, keimaha ka felna leh ka rilru ṭhatna awm ang zêl hian ro mi rêl ang che. 9 Aw, mi suaksualte suahsualna chu lo tâwp tawh sela, Mi felte erawh chu tinghet ang che; Pathian fel tak chuan thinlungte leh rilrute a fiah ṭhîn si a. 10 Ka phaw chu Pathian hnênah a awm, Amah chu thinlung dik tak pu chhandamtu a ni. 11 Pathian chu rorêltu fel tak a ni, A ni, ni tin mi sualte chunga lungnih lohna nei Pathian a ni. 12 Mi a hawi kîr loh zawngin ani chuan a khandaih a tât hriam ang; A thal ngul chu a kuai a, a peih ta. 13 Thihna hriamhreite chu amah thah nân a siam ta diam bawk a; A thalte chu alh theiin a siam a. 14 En teh, sualna a vei a; A ni, suahsualna a pai a, Dâwt thu a hring ta a. 15 Khuarkhurum a siam a, thûk takin a lai a, Ama hum siamah chuan a tla ta a. 16 A suahsualna chu ama lu chung ngeiah a kîr leh ang a, Râwng taka a thiltih chu ama chhîp ngeiah a tla ang. 17 A felna avâng hian, LALPA hnênah lâwm thu ka sawi ang a, LALPA Chungnungbera hming fakin ka zai bawk ang.
Hla Hruaitu tân; Gittith-a sak tûr. Davida Fakna Hla.
Pathian ropuina leh mihring chanvo
1 Aw LALPA, kan LALPA, Lei chung zawng zawngah hian i hming chu a va ṭha êm! I ropuina chu vân chungahte khian i dah a. 2 Hmêlma leh phuba latu tihdaihna tûrin, Nangmah dotute avângin Nausênte leh hnute hne laite kâa chhuak chuan chakna i tinghet a. 3 I vân, i kutchhuakte, Thla leh arsi i ruathote khi, ka ngaihtuah châng chuan, 4 “Mihring hi eng nge maw a niha, i hriat reng ṭhin ni? Mihring fapa pawh hi eng nge maw a niha, i kan ṭhin ni?” ka ti ṭhîn. 5 Ani chu Pathian aia hnuai deuh chauhvin i siam a, Ropuina leh chawimawina i khumtîr si a. 6 I kutchhuak chungahte hian thu i neihtîr a; A ke hnuaiahte engkim i dah a: 7 Berâm leh bâwng zawng zawngte nên, A ni, ramsate nên pawh; 8 Chunglêng sava leh tuifinriat sangha, Tuifinriat kawnga kal apiangte nên. 9 Aw LALPA, kan LALPA, Lei chung zawng zawngah hian i hming a va ṭha êm!
Hla Hruaitu tân; Muth-labben-a sak tûr. Davida Fakna Hla.
Dik taka rorêl vânga lâwm thu sawina
1 LALPA hnênah chuan ka thinlung zawng zawngin lâwm thu ka sawi ang a; I thil mak tih zawng zawng chu ka hriattîr ang. 2 Nangmahah chuan ka lâwmin ka hlim ang a; Aw, nang Chungnungber, i hming fakin ka zai ang. 3 Mi dotute chu an tlânchhiat veleh, I hmaah chuan an petek a, an boral a ni. 4 Ka tâna âwm rêngah leh ka thu-ah hian nangin mi ṭan si a; Fel taka rorêlin lalṭhutphahah chuan i ṭhu a. 5 Hnam tin i zilhhau va, mi suaksualte chu i tiboral a, An hming chu kumkhaw tlaitluan atân i thai bo ta a. 6 Dotute chu an mang zo va, kumkhua atân eng mah nei lovin an awm ta; I khaw tihṭiau tawhte chu, Anmahni hriat rengna lamin a boral ta bawk a. 7 LALPA erawh chu kumkhua atân lalah a ṭhu a; A lalṭhutphah chu rorêlna tûrin a buatsaih ta. 8 Ani chuan khawvêl hi fel takin ro a rêlsak ang a, Thlei bîk nei lovin mi tin ro chu a rêl ang. 9 Chutichuan, LALPA chu hnehchhiahna tuarte tân chuan kulhbîng sâng a lo ni ang a; Mangan hunahte chuan kulhbîng sâng a lo ni ang; 10 Tichuan, i hming hretute chuan an ring ang che; Nang zawngin LALPA, nangmah zawngtute chu i kalsan ngai si lo. 11 LALPA, Zion-a awm chu fakin zai ula; Mite zîngah chuan a thiltihte chu hril rawh u. 12 Thisen chhuah chhuahchhâl ṭhîntu chuan anni chu a hre reng si ṭhîn a: Mi retheite au thâwm a theihnghilh ngai lo. 13 Aw LALPA, mi khawngaih la; Thihna kawngkhâr ata mi kai chhuak ṭhîntu, Mi hawtute avânga ka manganna hi en teh; 14 Nangmah fakna zawng zawng chu ka hriattîr theihna tûrin; Zion fanu kawngkaahte chuan. I mi chhandamnaah hian ka hlim ang. 15 Hnam tin chu an khuarkhurum siamah chuan an pil a; An lên phah rûkah chuan anmahni ke ngei a âwk ta a. 16 LALPA chu a inhriattîr a, ro a rêl ta a; Mi suaksual chu ama kutchhuak ngeiah chuan a âwk ṭhîn a. (Higgaion. Selah) 17 Mi suaksualte chu Seol-ah an kîr leh ang, Hnam tin, Pathian theihnghilh hmang zawngte nên chuan. 18 Pachhiate chu theihnghilhin an awm fo lo vang a, Retheite beiseina chu kumkhua chuan a bo hek lo vang. 19 Aw LALPA, tho teh; mihring maiin ngam che suh se. Hnam tin chu i mit hmuhah rorêlsakin awm rawh se. 20 Aw LALPA, anni chu tihlau la; Hnam tinin mihring mai an ni tih inhre rawh se. (Selah)
Dik taka rorêl tûra ngenna
1 Aw LALPA, engati nge hla taka i din ṭhin le? Engati nge mangan laitea i inthup ṭhin le? 2 Mi suaksualte chapona avângin mi retheite chu ûm nekin an awm ṭhîn; An thil sual ngaihtuah chhuahahte chuan anmahni ngei âwk rawh se. 3 Mi suaksual chuan a thinlung duh zâwng a chhuang a, Mi duhâm chuan LALPA chu a paih thla a, a hmusit ṭhîn. 4 Mi suaksual chuan chapo hmêl puin, “A phût lo vang,” a ti ṭhîn. A ngaihtuahna zawng zawng chu, “Pathian rêng a awm lo,” tih hlîr a ni. 5 A awm dânte chu eng lai pawhin a nghet reng a; I rorêlnate chu chung lam hla takah, a hmuh phâk lohvah a awm daih a; Amah dotute zawng zawng lah chu a nuihsan mai ṭhîn. 6 A rilru chuan, “Ka nghîng lo vang; Chhuan zawng zawng thlengin mangangin ka awm lo vang,” a ti a. 7 A kâ chu ânchhe lawhna te, tihderna te, tihduhdahna tein a khat a; A lei hnuaiah chuan thil tihsualna leh khawlohna a awm. 8 Khaw tina chân rûkna hmunahte a ṭhu ṭhîn a; Hmun fianrialahte chuan pawi khawih lo mite a that ṭhîn; A mitin eng mah ti thei lo mi chu a châng ru reng ṭhîn a ni. 9 Sakeibakneiin a pûka a châng ru angin, ani chuan fianrialah a châng ru reng ṭhîn a; Mi rethei man tûrin a châng ṭhîn a; Mi rethei chu a man ngei a; Tichuan, a lênin a hnûk bo ṭhîn. 10 A bawk pêr a, a kûn a, Eng mah ti thei lo mite chu a mi chakte tihtlûkin an awm ṭhîn. 11 A rilru chuan, “Pathianin a theihnghilh a ni; A hmai chu a thup a; eng tikah mah a hmu lo vang,” a ti ṭhîn a. 12 Aw LALPA, tho la; Aw Pathian, i kut han lek teh! Mi retheite chu theihnghilh suh ang che. 13 Eng vângin nge mi suaksual chuan Pathian a hmuhsita, A rilruin, “I phût lo vang,” a tih ṭhin ni? 14 Hmuh chu i hmu tawh reng a; i kuta thungrûl tûrin thil tihsual leh tihvuina i en reng si a; Eng mah ti thei lo mi chu i hnênah a inkawltîr ṭhîn a: Pa nei lo ṭanpuitu i nih ṭhin kha. 15 Mi suaksual bân chu titliak la; Mi sual chu a suahsualna zawng chhuak ang che, I hmuh loh ṭhuai hma loh chuan. 16 LALPA chu kumkhaw tlaitluan atâna Lalber a ni a: Hnam tin chu ama ram ata an boral ta. 17-18 LALPA, leia mi chu hlauhawm taka a awm leh tawh lohna tûrin, Pa nei lo leh hnehchhiahna tuarte rorêlsak nân, Thuhnuairawlhte duh zâwng chu i ngaithla tawh a; An thinlung chu i buatsaih ang a, i beng chu i ngaihthlâktîr ang.
Hla Hruaitu tân. Davida Fakna Hla.
LALPAa innghat ngam
1 LALPA-ah chuan ka rinna ka nghat ṭhîn. Engtizia nge ka nunna hnênah hian, “In tlângah chuan sava angin thlâwk bo rawh u. 2 En teh u, thinlung dik tak pu thim hnuaia an kah theihna tûrin, Mi suaksualte chuan thalngul an kuai a, An thal chu a hruiah an vuah diam saw. 3 Lungphûmte chu tihchhiata a awm chuan, Mi felin eng nge a tih theih ang?” in tih ni? 4 LALPA chu a biak in thianghlimah a awm a, LALPA chu, a lalṭhutphah zawng vânah a awm; Mihring fate hi a mitin a en a, an thiltihte a fiah ṭhîn. 5 LALPA chuan mi fel chu a fiah ṭhîn a; Mi suaksual leh nunrâwnna ngaina erawh chu a nunnain a haw ṭhîn. 6 Mi suaksualte chungah chuan thangte a sûrtîr ang a; Mei leh kât leh thli lum tak hi an no chan tûr a ni ang. 7 LALPA chu a fel si a, felna hi a ngaina ṭhîn a; Mi dik takte chuan a hmêl an la hmu ang.
Hla Hruaitu tân; Sheminith-a sak tûr. Davida Fakna Hla.
Puih dîlna ṭawngṭai
1 LALPA, min ṭanpui rawh; Pathian ngaihsak mi an awm tawh si lo va; Mihring fate zîng ata hi mi rinawm an bo ta si a. 2 Mi tinin an vêngte hnênah thu engmahlo mai mai an sawi ṭhîn a: Mi fak derna hmui leh bumna thinlung puin thu an sawi ṭhîn. 3 LALPA chuan fak derna hmui zawng zawng chu a hlep ang a, Thu chapo tak sawina lei nên chuan; 4 Anni chuan, “Kan lei hian kan hneh ang; Kan hmuite hi keimahni ta ngei alâwm, Tu nge kan chungah lal awm ni?” an ti ṭhîn. 5 LALPA chuan, “Retheite an hnehchhiah avâng leh, Pachhiate rûm avângin ka tho nghâl mai ang a; An nuihsana chu him takin ka awmtîr teh ang,” a ti a. 6 LALPA thute hi thu thianghlim tak a ni; Tangkarua, lei chunga rawh tuina meia fiaha, Vawi sarih tihthianghlim tawh hnu ang hi a ni. 7 Aw LALPA, nangin anni chu i vawng ṭha ang a, Hêng ṭhangtharte lakah hian kumkhuain i humhim ang. 8 Mihring fate zîngah hian sualna chu chawimawia a awmin, Mi suaksualte chu an vâk vêl ruai ṭhîn.
Hla Hruaitu tân. Davida Fakna Hla.
Puih dîla ṭawngṭai
1 Aw LALPA, eng chen nge mi theihnghilh dâwn? Kumkhuain em ni? Eng chen nge ka lakah hian i hmai i thup dâwn le? 2 Nilêngin ka thinlunga lungngaihna neiin, Eng chen nge ka rilruin rem ka ruat ka ruat dâwn? Eng chen nge ka hmêlma chu ka chungah chawimawia a awm dâwn? 3 Aw LALPA ka Pathian, ngaihtuah la, mi chhâng teh khai; Ka mit mi tihvârsak ang che; chuti lo chuan, thihna muthilhin ka muhîl dah ang e; 4 Ka hmêlma chuan, “Amah ka ngam ta,” a ti dah ang e; Ka nghînin mi dotute an lâwm dah ang e. 5 Nimahsela, kei zawngin i ngilneihna hi ka ring a; I mi chhandamnaah hian ka thinlung a lâwm ang; 6 Ka chungah ṭha taka a tih tâk avângin, LALPA chawimawiin hla ka sa ang.
Hla Hruaitu tân. Davida Fakna Hla.
Mihring suahsualzia
1 Mi â chuan a rilruin, “Pathian rêng a awm lo,” a ti a. An chhe zo va, thil tenawm tak an ti a; Tu mah thil ṭha ti rêng an awm lo. 2 “Hre thiama, Pathian zawng rêng rêng an awm emaw,” tiin, LALPA chuan vân aṭangin mihring fate hi a zuk en a. 3 A ni lo lamah an pêng ta vek a; bawlhhlawh takin an lo awm ta hlawm a; Tu mah thil ṭha ti rêng an awm lo, pakhat tê mah an awm lo. 4 Thil tisualtute zawng zawng chuan hriatna rêng rêng an nei lo vem ni? Chhang an ei angin ka mite an ei zo vek ṭhîn a, LALPA lah an ko ngai hek lo. 5 Pathian chu mi fel thlahte zîngah a awm ṭhin avângin, An hlau êm êm ang. 6 Mi rethei remruat chu in mualphosak ṭhîn, LALPA chu a inhumhimna a nih avângin. 7 Israel-ho chhandamna chu Zion aṭangin lo chhuak teh sela aw! LALPA chuan a mite sala an awm chu a hruai kîr leh hunah, Chumi hunah chuan Jakob-ho chu an hlim tawh ang a, Israel-ho chu an lâwm tawh ang.
Davida Fakna Hla.
Pathian thil phût
1 LALPA, i puan inah chuan tu nge lo mikhual ang? I tlâng thianghlimah chuan tu nge lo awm ang? 2 Dik taka awma, fel taka tia, A rilrua thu tak tak sawi mi chu; 3 A leia mi rêl ngai lova, A ṭhian chung pawha thil sual ti ngai lova, A vêngte hming pawh sawichhe ngai lo mi chu. 4 Mi sual tak chu a hmuhsitin a awm ṭhîn a; LALPA ṭihtute erawh chu a chawimawi ṭhîn. Mahni tâna pawi tûr pawh chhechhama tiam tawh chu tidanglam ngai lova, 5 A pung ûm tûra a tangka pûktîr ngai lova, A thiam zâwk thiam loh chantîrna tûra thamna pawh la ngai lo mi chu. Chûng thil titu chu eng tikah mah a nghîng lo vang.
Davida Miktam.
Ringtu ṭawngṭaina
1 Aw Pathian, mi humhim rawh; Nangmahah chuan ka rinna ka nghat si ṭhîn a. 2 LALPA hnênah chuan, “Nang chu ka LALPA i ni a; Nangmah lo chu ṭhatna rêng rêng ka nei lo ve. 3 Leia mi thianghlim awmte zawng, Anni chu mi ṭha, ka lâwmna zawng zawng awmna chu an ni,” ka ti a ni. 4 LALPA aia pathian dang thlangtute chu, An lungngaihnate a la pung ang; An thisen hlan in mite chu ka hlân ve lo vang a, Ka hmuiin an hmingte ka lam hek lo vang. 5 LALPA chu ka ro chan tûr leh ka no chan tûr chu a ni; Nangin ka chanpual chu mi tihnghehsak ṭhîn a. 6 Tehna hruite chu hmun nuam takahte ka pualah a tla ta hlauh a ni; A ni, ro ṭha tak ka luah ta a ni. 7 LALPA, rem mi ruatsaktu chu ka fak ang; A ni, zânahte hian ka rilruin mi thunun ṭhîn. 8 LALPA chu ka hmaah ka awmtîr fo va; Ka ding lama a awm avângin ka nghîng lo vang. 9 Chuvângin, ka thinlung hi a lâwm a, ka ropuina hi a hlim a; Ka tisa pawh him takin a awm ang. 10 Ka thlarau Seol-ah i hnutchhiah dâwn si lo va; I mi thianghlim hi ṭawihna hmuh i phal dâwn hek lo. 11 Nangin nunna kawng chu mi hriattîr ang; I hmaah chuan hlima khah liamna a awm a; I kut ding lamah chuan kumkhaw lâwmna a awm bawk a.
Davida ṭawngṭaina.
Sual nei lo ṭawngṭaina
1 Aw LALPA, ka felna thu hi hria la, ka au thâwm hi ngaithla la; Dâwt sawi ngai lo hmui aṭanga chhuak, ka ṭawngṭainaah hian beng lo chhi ang che. 2 Ka chunga thutlûkna chu i hma aṭanga chhuak ni sela; I mitin thlei bîk neih lohna chu en rawh se. 3 Ka thinlung hi i fiah a; zânah mi tlawh a; Mi fiah tawh a, eng mah i hmu si lo va; Ka kâin a sawi sual lo vang ka ti tlat a ni. 4 Mihring thiltihah zawng, i hmuia thuchhuak avângin Mi nunrâwng kawnga kal lo tûrin ka invawng ṭha a ni. 5 Ka ke pênte hian i kawng chu a zawh tlat a, Ka kete hi a tleu ngai lo. 6 Aw Pathian, ka ko ṭhîn chia, nangin mi chhâng dâwn si a; Ka lamah hian i beng rawn dawh la, ka thusawi hi ngaithla ang che. 7 Aw, nangmaha rinna nghat apiang anmahni beitute laka i kut ding lama chhandam ṭhîntu, I ngilneihna mak tak chu lantîr ang che. 8-9 Mi suaksual, mi tichhetu, Mi do tlata mi hual vêltute lakah chuan mitnautê angin mi vawng ṭha la, I thla hnuaiahte mi thukru ang che. 10 Mahni an inchâwm thau va, An kâin chapo takin an ṭawng thîn. 11 Tûnah zawng kan ke pênna apiangah min hual vêl tawh a, Leia min titlu tûrin an mitte chu kan chungah an fûktîr tlat a. 12 Anni chu sakeibaknei sa seh châk tak ang leh, Sakeibaknei vânglai hmun fianrialtea bawk reng ang mai chu an ni. 13 Aw LALPA, tho la, Amah chu hmachhawn la, kûntîr tlat rawh; Ka nunna hi mi suaksualte lakah i khandaihin chhanhim ang che; 14 Aw LALPA, i kutin mihringte lakah, Khawvêl mihringte lakah hian chhanhim ang che; Anni chanvo zawng tûn dam chhûnga an neih hi a ni a, An pum chu i rovin i tihkhahsak ṭhîn; Fate lungawi tâwk zetin an nei a, An sum hman bâng chu an fa sênte an thihsan ṭhîn. 15 Kei erawh zawngin felna neiin i hmêl ka hmu ang a; Nangmah anna neia ka men hunah chuan ka lungawi tâwk zet ang.
Hla Hruaitu tân. LALPA chhiahhlawh Davida Fakna Hla, amah dotute zawng zawng kut ata leh Saula kut ata LALPAN a chhanhim ni chuan he hla thute hi LALPA hnênah a sawi a; heti hian a sawi:
Davida hnehna hla
1 Aw LALPA, ka chakna, ka hmangaih a che. 2 LALPA chu ka lungpui leh, ka kulhpui leh, mi chhanhimtu a ni; Ka Pathian, ka lungpui nghet tak a ni a, amahah chuan rinna ka nghat ang; Ka phaw leh, ka chhandamna ki leh, ka kulhbîng sâng a ni. 3 Fak tlâk LALPA chu ka ko vang a; Chutichuan, mi dotute lakah chhandamin ka awm ang. 4 Thihna hruihrualte chuan mi zem a, Pathian ngaihsak lohna tuiliante chuan mi tihlau va. 5 Seol hruihrualte chuan mi phuar vêl a; Thihna thangte chuan mi âwk a. 6 Ka manganin LALPA chu ka ko ṭhîn a, Ka Pathian ka au ṭhîn; Ani chuan a biak in aṭang chuan ka aw a hria a, A hmaa ka au thâwm chu a bengah a lût ta a. 7 Chu veleh lei hi a nghîng a, a khûr ta a, A thinur avângin tlângte pawh chu A nghahchhante lamin a khûrin a nghîng ta a. 8 A hnâr aṭang chuan meikhu a chho ta ngut ngut a, A kâa chhuak mei chuan a kâng ta hluah hluah a; Chu chuan meihawl pawh a tialh ta dur dur a. 9 Ani chuan vânte pawh a tikûn a, a chhuk ta a; A ke hnuaiahte chuan thim chhah mup hi a lo awm a. 10 Cherub chungah a chuang a, a thlâwk ta a, A ni, thli thlaah te chuan a thlâwk ta thuak a. 11 Thim hi a bihrûkna hmunah, amah hual vêlna bûktêah a siam a; Tuia thimna, vâna chhûm chhah mupte chu. 12 A hmaa ênna avâng chuan a chhûm chhah mupte chu a kiang a, Rialte leh meilingte a tla ta dur dur a. 13 LALPA chu vânahte khian a ri dur dur bawk a, Chungnungbera chuan a aw a chhuah a; Rialte leh meilingte a tla ta dur dur a. 14 Tin, a thalte chu a kâp chhuak a, anniho chu a tidarh a; A ni, kâwl te a phêttîr zawih zawih reng a, a tibuai ta nuaih hlawm a. 15 Chu veleh, aw LALPA, i zilhhau avânga, I hnâra thaw chhuakin a chhêm vak avâng chuan, Tui luannate chu a lo lang a, Leilung nghahchhante chu tihlanin a awm ta. 16 Ani chuan chung lam aṭangin a rawn ban a, mi chelh a; Tui tam tak ata mi hnûk chhuak a. 17 Mi dotu chak tak lakah chuan mi chhanhim a, Mi hawtute lakah pawh, keia tân chuan an chak lutuk si a. 18 Anni chuan ka vânduai ni chuan mi bei a; Nimahsela, LALPA chu ka rin pui ber a ni. 19 Ani chuan hmun thâwl takah mi hruai chhuak a; Ka chunga a lâwm avângin mi lo chhanhim ta a ni. 20 LALPA chuan ka felzia ang ngeiin ka chungah a ti a; Ka kutte a thianghlimzia ang ngeiin mi rûl a ni. 21 LALPA kawngte chu ka zawh a, Ka Pathian hnên ata sual takin ka kal bo ngai si lo va. 22 A rorêlna zawng zawng chu ka hmaah a awm ṭhîn a, A thuruatte chu ka paih ngai si lo va. 23 Ama lakah chuan sawisêl bo ka ni bawk a, Ka khawlohna ata ka inthiarfihlîm ṭhîn. 24 Chuvângin, LALPA chuan ka felzia ang zêlin mi lo rûl ta a, Ka kutte a mit hmuha a thianghlimzia ang zêlin. 25 Mi khawngaih thei tak lakah chuan khawngaih thei takin i intilang ang a; Mi ṭha famkim lakah chuan ṭha famkimin i intilang ang a; 26 Mi thianghlim lakah chuan thianghlimin i intilang ang a; Tin, mi luhlul lakah chuan luhlulin i intilang ang. 27 Hrehawm tuar mite chu i chhandam dâwn si a, Mit chapote erawh chu i titlâwm ang. 28 Nangin ka khâwnvâr hi mi hâlsak dâwn si a; LALPA ka Pathian chuan ka thimna hi a tiêng ang. 29 Nangma ṭanpuiin râl ka bawh si a; Ka Pathian ṭanpui bawkin kulh bang ka zuan khûm a ni. 30 Pathian zawng, a kawng chu a ṭha famkim a; LALPA thu chu fiah a ni tawh; Amaha rinna nghat zawng zawngte tân chuan ani chu phaw a ni. 31 LALPA lo chu tu nge Pathian awm ni? Kan Pathian lo chu tu nge lungpui awm ni? 32 Chaknaa ka taia mi hrêngtu leh, Ka kawng tiṭha famkimtu Pathian chu. 33 Ani chuan ka ke hi zukpui ke angin a siam a, Ka hmun sâng takahte mi awmtîr ṭhîn a. 34 Ka kutte hi râl kâp tûrin a zirtîr ṭhîn a, Chutichuan, ka bânte hian dâr thalngul a kuai zo hial a. 35 Nangin i chhandamna phaw chu mi pe bawk a; I kut ding lamin mi kai a, I inngaihtlâwmnain mi siam lian ta. 36 Ka hnuaia ka ke pênna chu i tizau va; Tichuan, ka kete hi a tleng lo. 37 Mi dotute chu ka ûm ang a, ka ûm phâk mai ang; Tihborala an awm hma loh chuan ka hawi kîr tawh hek lo vang. 38 An thawh leh theih lohna tûrin ka sât chhawk ang a; Ka ke hnuaiah hian an tlu hlawm ang. 39 Nangin inbeihna atân chuan chaknain ka taiah mi hrêng si a; Mi rawn beitute chu ka hnuaiah i tudawl ta. 40 Mi hawtute chu ka tihboral theihna tûrin, Nangin mi dotute chu mi hnuchhawnin i awmtîr ta bawk a. 41 Anni chu an au va; nimahsela, chhandamtu tûr tu mah an awm lo va; LALPA ngei chu an au va; nimahsela, a chhâng si lo. 42 Chu veleh vaivut thli chhêm len ang maiin ka vaw sawm dep a; Kawtlai chirhdiak ang mai hian ka paih chhuak ta a. 43 Nangin mite insualna lakahte chuan mi chhanhim a; Hnam tin lu-ah mi siam a; Ka hriat ngai loh mite chuan ka rawng an bâwl tawh ang. 44 Ka chanchin an hriat veleh ka thu an zâwm ang a; Mikhualte chu ka hnênah an intulût ang. 45 Mikhualte chu an zâm ang a, An kulhbîng atate chu khûr chungin an lo chhuak ang. 46 LALPA chu a nung reng e; ka lungpui chu fakin awm sela; Mi chhandamtu Pathian chu chawimawiin awm rawh se; 47 Phuba mi lâksaktu leh, Mi tin ka hnuaia tudawltu Pathian ngei chu. 48 Ani chuan mi dotute lakah mi chhanchhuak a; A ni, nangin mi beitute chung lamah chuan mi chawi kâng a; Mi nunrâwng lak ata chu mi chhanhim ṭhîn. 49 Chuvângin, aw LALPA, hnam tin zîngah chuan lâwm thu ka hrilh ang chia, I hming fakin ka zai bawk ang. 50 Ani chuan chhandamna ropui tak a lal siam hnênah a pe ṭhîn a; A hriak thiha chungah, Davida leh a thlahte chung ngeiah chuan, Kumkhuain a ngilneihzia a lantîr ang.
Hla Hruaitu tân. Davida Fakna Hla.
Pathian ropuizia thil siamah a lang
1 Vânte khian Pathian ropuizia chu a hriattîr a; Boruak zau tak khian a kutchhuak chu a lantîr ṭhîn a. 2 Chhûn hian chhûn hnênah thu a sawi chhâwng zêl a, Zân hian zân hnênah hriatna a lan chhâwntîr zêl a. 3 Thusawi rêng rêng leh ṭawng rêng rêng a awm lo va; An aw chu benga hriat theih a ni lo. 4 An tehna hrui chu leilung luah zawng zawngah zam chhuahin a awm a; An thu chu kâwlkil thlengin a thang chhuak ta a. Chûngahte chuan ni tân khian puan in a zâr a. 5 Chu ni chu mo neitu tûr a pindan ata chhuak ang chu a ni a, Mi chak tak angin a tlânna kawnga a tlân tûr chu a hlim ṭhîn. 6 A chhuahna chu kâwlkil tâwp aṭangin a ni a, A tlân kualna chu a tâwp lehlam thlengin a ni a, A lum hre lova thuhrûk rêng rêng a awm lo. 7 LALPA dân chu a ṭha famkim a, nunna a siam ṭha ṭhîn; LALPA thuhriattîr chu a rinawm a, mi mâwl a tifing ṭhîn; 8 LALPA thununna thu chu a dik a, thinlung a tilâwm ṭhîn; LALPA thupêk chu a thianghlim a, mitte a tivâr ṭhîn. 9 LALPA ṭihna chu a fai a, kumkhua atân a awm ṭhîn; LALPA rorêlnate chu a tak a, a fel vêl vek a ni. 10 Chûng chu rangkachak aia duhawm zâwk a ni a, a ni, rangkachak thianghlim tam tak ai pawhin; Khawizû leh khawithlâr aiin a thlum zâwk bawk a ni. 11 Chu lo pawh chu, chûng chuan i chhiahhlawh hi zilhin ka awm ṭhîn a: Chûng zawm chu lâwmman nasa tak neihna a ni ṭhîn. 12 Tuin nge mahni tihsualte hre thei ang? Sual inthupte lakah hian mi tifihlîm ang che. 13 Thil tisual lui lo tûrin i chhiahhlawh hi mi chelh tlat la; Ka chungah thu neihtîr suh ang che; Chutichuan, ṭha famkimin ka awm ang a, Bawhchhiatna nasa tak lakah sawisêl bovin ka awm ang. 14 Aw LALPA, ka lungpui leh mi tlantu, Ka kâa thuchhuakte leh ka thinlunga ngaihtuahnate hi i mit hmuhah lawm tlâk takin awm rawh se.
Hla Hruaitu tân. Davida Fakna Hla.
Hneh thei tûra dîlna
1 Mangan ni chuan LALPAN chhâng che rawh se; Jakoba Pathian hming chuan hmun sângah hlâng che rawh se; 2 Hmun thianghlim aṭang chuan ṭanpuina tirhsak che sela, Zion aṭang chuan tichak che rawh se. 3 I thilhlan zawng zawng chu hre reng sela, I hâlral thilhlan chu lâwm rawh se; (Selah) 4 I thinlung duh zâwng chu pe phal che sela, I remruat zawng zawng chu hlawhtlintîr che rawh se. 5 I chhandamnaah chuan hlimin kan zai ang a, Kan Pathian hmingin kan puanzârte hi kan la zâr ang: LALPA chuan i dîlna zawng zawng chu hlawhtlintîr rawh se. 6 LALPAN a hriak thiha hi a chhandam tih tûnah ka hre ta; A kut ding lam chhandamna thain a vân thianghlim aṭang khian amah a la chhâng ang. 7 Ṭhenkhatin tawlailîrte an ring a, ṭhenkhatin sakawrte an ring. Keini erawh chuan LALPA kan Pathian hming chu kan lam zâwk ang. 8 Anni zawng an kûn a, an tlu ta a; Keini erawh chu kan tho va, kan ding mar ta zâwk a. 9 LALPA, chhandam rawh; Kan koh hun chuan Lalberin min chhâng rawh se.
Hla Hruaitu tân. Davida Fakna Hla.
Hneh avânga fakna
1 Aw LALPA, lal chu i chaknaah hian a hlim ang a, I chhandamnaah hian a va hlim nasa dâwn êm! 2 A thinlung duh zâwng chu i pe a, A hmuia a thil dîl chu i phal lo lo ve. (Selah) 3 Ṭhatnaa malsâwmnatein i hmuak si a; Rangkachak thianghlim lallukhum i khumtîr a. 4 Ani chuan nunna a dîl chia, i lo pe a; Kumkhaw tlaitluana dam rengna chu. 5 I ṭanpui avângin a ropui êm êm a; Chawimawina leh ropuina a chungah i nghat ṭhîn a. 6 Kumkhua atân malsâwmna nasa tak dawngin i siam si a; I hmaa hlimnain i tilâwm ṭhîn. 7 Lal chuan LALPA chu a ring si a, Chungnungbera ngilneihna avângin a nghîng lo vang. 8 I kutin nangmah dotu zawng zawng chu a zawng chhuak vek ang a; I kut ding lamin nangmah hawtute chu a zawng chhuak ang. 9 I thinur hunah chuan anni chu rawh tuina meialh hluah hluah angin i siam ang. LALPA chuan anni chu thinurin a lem zo vang a, Mei chuan a kâng ral mai ang. 10 An rahte chu lei ata i tiboral ang a, An thlahte chu mihring fate zîng ata i tiboral bawk ang. 11 I chungah khân thil sual tih an tum si a; Thil sual an ngaihtuah chhuak a, an hlen thei si lo. 12 Nangin anni chu i hnungchhawntîr dâwn si a, I thal hruite chu an hmai tinin i kuai peih diam ang. 13 Aw LALPA, i chaknaah chuan chawimawiin lo awm ang che; Chutichuan, i thiltihtheihna fakin hla kan sa ang.
Hla Hruaitu tân; Aijeleth hash-shahar-a sak tûr. Davida Fakna Hla.
Lungngai au aw leh fakna hla
1 Ka Pathian, ka Pathian, engah nge mi kalsan? Engah nge mi ṭanpui tûrin i hlat êma, ka rûmna thute aṭanga i hlat le? 2 Aw ka Pathian, chhûnah ka au va; nimahsela, i chhâng si lo va; Zânah ka au bawk a, ka ngawi chuang lo. 3 Nimahsela, aw nang Israel-ho faknaa chêng ṭhîn, Nang zawng i thianghlim a ni. 4 Kan thlahtute chuan an lo ring chia; An ring a; tichuan, nangin i lo chhanhim ṭhîn. 5 An au chia; tichuan, chhanhimin an lo awm ṭhîn a; An ring chia; tichuan, mualphovin an awm ngai lo. 6 Kei erawh chu mihring rêng rêng ka ni lo va, changpât mai ka ni a; Mihringte sawichhiat leh mite hmuhsit ka ni. 7 Mi hmu apiangin mi nuihsan a; An hmui an kum a, an lu an thing a, 8 “LALPA chungah innghat ta che; ani chuan amah hi chhanhim ang hmiang; A chunga a lâwm avângin chhanhim ang hmiang,” an ti a. 9 Nang erawh chu chhûl ata mi la chhuaktu chu i ni a; Ka nu hnute chunga ka awm lai khân nangin mi rintîr a. 10 Chhûl aṭang rêngin nangma chunga nghah ka ni a; Nang chu ka nu pum chhûng aṭang rêngin ka Pathian i ni. 11 Mi hlat lul suh ang che; manganna tûr a hnai si a; Ṭanpuitu tûr rêng rêng an awm si lo. 12 Bâwngpa tam takin mi hual vêl a; Basan rama bâwngpa chak takte chuan mi hual vêl khup a. 13 Sakeibaknei koham hâhum hmang angin an kâin mi ân khum a. 14 Tui anga leihbuakin ka awm a, Ka ruh zawng zawng pawh a pelhsawlh zo va; Ka thinlung hi khawihnûn ang a ni a; Ka rîl zîngahte hian a tui zo ta. 15 Ka tha hi lampei angin a ro zo va; Ka lei pawh hi ka dangah a bet ta tlat a; Nangin thihna vaivutah hian mi hruai lût ta a nih hi. 16 Uite chuan mi hual vêl si a; Thil ṭha lo titu awm khâwmte chuan mi hual tlat a; Ka kut leh ka kete hi an tipawp a. 17 Ka ruh zawng zawng hi ka chhiar thei a; Anni lah chuan mi enin mi melh reng a: 18 Ka silhfênte an insem a, Ka kawr atân ṭhum an vâwr a. 19 Nang erawh chuan, aw LALPA, mi hlat lul suh la; Aw, mi tichaktu, mi ṭanpui tûrin hmanhmawh ang che. 20 Ka nunna hi khandaih lakah chuan chhanhim la; Ka neih chhun tak hi ui thiltihtheihna lakah chuan chhanhim ang che. 21 Sakeibaknei ka aṭang chuan mi chhandam ang che; A ni, selepa kîa mi chu nangin mi chhâng ta. 22 Ka unaute hnênah i hming ka hril ang a; Inkhâwmho zîngah chuan ka fak ang che. 23 LALPA ṭihtute u, amah chu fak rawh u; Jakoba thlah zawng zawngte u, amah chu chawimawi rawh u; Israela thlah zawng zawngte u, amah chu hlau rawh u. 24 Ani chuan hrehawm tuartu hrehawmzia chu a hmusit si lo va, a ten hek lo; A hmai chu a lakah a thup hek lo; Amah a auhvin a ngaithla zâwk a. 25 Inkhâwmna ropui taka ka fak ṭhinna che hi nangma hnêna mi a ni; Amah ṭihtute hmaah chuan ka thutiam ka hlen ang. 26 Thuhnuairawlhte chuan an ei ang a, an tlai ang; Amah zawngtute chuan LALPA chu an fak ang. In thinlung chu kumkhuain nungin awm rawh se. 27 Kâwlkila mi zawng zawng pawhin an hre leh ang a, LALPA lam an hawi tawh ang; Hnam tina chi tin i hmaah an kûn ang. 28 Ram chu LALPA ta a ni a, Hnam tin chunga rorêltu a ni si a. 29 Leia mi chapo zawng zawngte chuan bawkkhupin chibai an bûk ang a; Vaivuta chhuk tûr zawng zawngte chu a hmaah an la kûn ang, Mahni nunna tinung reng thei lote pawh chu. 30 Ṭhangtharten a rawng an bâwl ang a; Ṭhangthar lo awm zêlte hnênah chuan LALPA chanchin chu an hril ang. 31 An lo kal ang a, A thu anga lo la piang tûrte hnênah chuan a felna chu an puang ang.
Davida Fakna Hla.
LALPA, mi vêngtu
1 LALPA chu mi vêngtu a ni a; Ka tlachham lo vang. 2 Ani chuan hlobet hring dup hmunahte mi bawhtîr ṭhîn a; Chawlhna tui kamahte mi hruai ṭhîn. 3 Ka nunna hi mi siam ṭhat ṭhîn a, Ama hming avângin felna kawngahte mi hruai ṭhîn. 4 A ni, thihna hlim kawr ruam zawh mah ila, Thil ṭha lo rêng rêng ka hlau lo vang; nang ka hnênah i awm si a; I talhtum leh i tiangin mi thlamuan ṭhîn a ni. 5 Mi dotute mit hmuhah ka hmaah hian dawhkân i buatsaih ṭhîn a; Ka lu hi hriak i thih tawh a; ka novah hian a liam reng a. 6 Matheilovin ṭhatna leh ngilneihnain ka dam chhûng zawng hian mi zui zêl ang a; Tichuan, LALPA inah kumkhuain ka awm reng ang.
Davida Fakna Hla.
Lal ropui tak
1 Leilung leh a chhûnga thil awm zawng zawng hi LALPA ta a ni a, Khawvêl leh a chhûnga chêngte nên hian. 2 Tuifinriat chungahte amahin a din a ni si a, Luipui chungahte pawh a tinghet bawk a. 3 LALPA tlângah tu nge chho vanga, A hmun thianghlimah tu nge ding ang? 4 Kut fai leh thinlung thianghlim neia, A rilru engmahlo mai mai lama dah ngai lova, Bum tuma chhechham ngai lo mi chu. 5 Ani chuan LALPA hnên ata malsâwmna a dawng ang a, A chhandamtu Pathian hnên ata felna a dawng bawk ang. 6 Pathian zawngtute chu chutiang chu an ni, Aw Jakoba Pathian, i hmêl zawngtute chu. (Selah) 7 Aw kulh kawngkâte u, in lu chungte kha chawi sâng ula; Nangni kawngkhâr hlunte u, inkhai sâng rawh u; Tichuan, ropuina Lal hi a lo lût dâwn nia. 8 Ropuina Lal chu tu nge ni? LALPA chak tak leh thiltithei tak, LALPA, indonaa thiltithei tak chu a ni. 9 Aw kulh kawngkâte u, in lu chungte kha chawi sâng ula, A ni, kawngkhâr hlunte u, chawi sâng rawh u; Tichuan, ropuina Lal hi a lo lût dâwn nia. 10 Chu ropuina Lal chu tu nge ni? Sipaihote LALPA chu, Amah ngei hi ropuina Lal chu a ni. (Selah)
Davida Fakna Hla.
Kaihhruai leh vênhim ngenna
1 Aw LALPA, ka rilru hi i hnênah ka dah tlat ṭhîn. 2 Aw ka Pathian, nang ka ring chia, Mualphovin mi awmtîr suh la; Mi dotute mi ngam chu phal suh ang che. 3 Ani, nangmah nghâktu rêng rêng chu tu mah mualphovin an awm lo vang; A vâng awm lova vervêk taka titute erawh chu mualphovin an awm ang. 4 Aw LALPA, i kawngte chu mi hriattîr la; I kalkawng chanchinte mi zirtîr ang che. 5 I thutakah chuan mi hruai la, mi zirtîr ang che, Nang chu mi chhandamtu Pathian i ni si a; Nilênga ka nghah reng che hi. 6 Aw LALPA, i lainatnate leh i ngilneihziate chu hre reng ang che; Hmasânga lo awm kumkhua tawh a ni si a. 7 Ka tleirâwl lai sualnate leh ka bawhchhiatnate chu hre reng suh ang che; Aw LALPA, i ṭhatna avângin, I ngilneihna avângin mi hre reng ang che. 8 LALPA chu a ṭhain a dik a ni; Chuvângin, mi sualte chu kawng a entîr ang. 9 Thuhnuairawlhte chu rorêlna felah a hruai ang a; Thuhnuairawlhte chu ama kawng chanchin a zirtîr bawk ang. 10 A thuthlun leh a thu hriattîrte zâwmtute tân chuan, LALPA kalkawng zawng zawngte chu ngilneihna leh thutak vek a ni. 11 Aw LALPA, i hming avângin Ka khawlohna ngaidam ang che, nasa tak a ni si a. 12 LALPA ṭih mi chu tu nge ni? Chu mi chu a kawng thlan tûr chu a la entîr ang. 13 A nunna chu nuamsa takin a awm ang a; A thlahte chuan ram chu an la luah ang. 14 LALPA thurûk chu amah ṭihtute hnênah a awm a, A thuthlun chu anmahni a hriattîr ang. 15 Ka mitin LALPA lam a en fo ṭhîn; Ani chuan ka kete hi lên ata a la chhuak dâwn si a. 16 Ka lamah hian lo hawi la, mi khawngaih ang che; Khawhar leh hrehawm takin ka awm si a. 17 Ka thinlung buainate hi a lo nasa ta a; Aw, ka manganna atate hi mi hruai chhuak ang che. 18 Ka hrehawmzia leh ka manganzia hi ngaihtuah la, Ka sual zawng zawng ngaidam ang che. 19 Mi dotute chu ngaihtuah teh, tam tak an ni a; Nasa takin mi haw si a. 20 Aw, ka nunna vawng ṭha la, mi chhanhim ang che; Mualphovin mi awmtîr suh ang che, nangmahah chuan ka rinna ka nghat si a. 21 Ka rilru ṭhatna leh ka diknain mi chhanhim rawh se, Ka nghâk reng si chia. 22 Aw Pathian, Israel-ho hi an manganna zawng zawng ata chhanchhuak ang che.
Davida Fakna Hla.
Mi ṭha ṭawngṭaina
1 Aw LALPA, ro mi rêlsak ang che, Rilru ṭha tak puin ka awm si a. 2 Aw LALPA, mi en fiahin, mi fiah la; Ringhlel lovin LALPA chu ka ring bawk a. Ka rilru leh ka thinlung hi tithianghlim ang che. 3 I ngilneihna chu ka hmaah a awm si a, I thutakah ka awm fo bawk a. 4 Mi engmahlo mai maite hnênah ka ṭhu ngai lo va; Vervêkte hnênah pawh ka lût hek lo vang. 5 Thil ṭha lo titute inkhâwmho chu ka hua a, Mi suaksualte hnênah ka ṭhu lo vang. 6 Ka kutte hi sawisêl bonain ka sil ang a, Chutiangin, aw LALPA, i maichâm chu ka kal hual ang; 7 Lâwm thu sawina ka tihrîk theiha, I thil mak tih zawng zawng thute chu ka hrilh theih nân. 8 LALPA, i awmna in chu ka ngaina a, I ropuina awmna pawh. 9 Ka nunna hi mi sualte zîngah la tel suh la, Ka nun pawh hi thisen chhuah hmangte zîngah la tel hek suh ang che; 10 An kutah chuan ngaihtuahna sual a awm a, An kut ding lam chu thamnain a khat a. 11 Nimahsela, kei zawng rilru ṭha puin ka awm ang; Mi tlan la, mi khawngaih ang che. 12 Ka ke hi hmun zâwl takah a ding a; Inkhâwmnaahte chuan LALPA chu ka fak ang.
Davida Fakna Hla.
Ring nghettu fakna hla
1 LALPA chu ka êng leh mi chhandamtu a ni; tu nge ka ṭih ang? LALPA chu ka nunna kulhbîng a ni; tu nge ka hlauh vang? 2 Thil ṭha lo tiho, mi dotute leh ka hmêlmate chuan, ka sa ei tuma mi beih lai khân, An inchhuih a, an tlu ta hlawm a. 3 Sipai pâwlhovin mi beih tumin mi ep reng mah sela, Ka thinlung hian a hlau lo vang; Ka chungah indona lo chhuak mah sela, Chuti pawhin ka ring tlat ang. 4 LALPA hnênah thil pakhat ka dîl a, chu mawlh chu ka zawng ang; LALPA mawizia hmu tûr leh, a biak ina thu zâwt tûrin, Ka dam chhûng zawnga LALPA ina ka awm reng theihna tûr chu. 5 Mangan ni chuan a bûktêah mi dah ru dâwn si a, A humhimna puan inah chuan mi thukru ang a; Lungpui chungah mi hlâng kai ang. 6 Tûnah chuan mi dotu, mi hual vêltute chung lamah ka lu hi chawi kânin a awm ang; Tichuan, a puan inah chuan hlimna inthawinate ka hlân ang a; Ka zai ang, a ni, LALPA fakin ka zai ang. 7 Aw LALPA, ka awa ka auh che chuan ngaithla ang che; Mi khawngaih la, mi chhâng bawk ang che. 8 “Ka hmêl zawng rawh u,” tia i sawi lai khân ka thinlung chuan i hnênah, “LALPA, i hmêl ka zawng ang,” a ti a. 9 Ka lakah hian i hmai thup suh la; I chhiahhlawh hi thinurin tibo suh ang che; Nang chu mi ṭanpuitu i ni ṭhîn a; Aw, mi chhandamtu Pathian, mi paih thla suh la, mi kalsan lul suh ang che. 10 Ka nu leh ka pa chuan mi kalsan ta si a, Nimahsela, LALPA chuan mi la pawm ang. 11 Aw LALPA, i kawng chu mi entîr la; Ka hmêlmate avâng hian kalkawng phei takah mi hruai ang che. 12 Mi dotute duh duha tihah mi pe lul suh ang che; Hretu derten mi bei a, nunchhiat thu chhâk chhuak ṭhîntute chuan. 13 Mi nung ramah hian LALPA ṭhatna hmuh inring suh ila chuan ka chau tawh tûr a ni. 14 LALPA chu nghâk reng rawh; Chak takin awm la, i thinlung chu intihuai rawh se; A ni, LALPA chu nghâk reng rawh.
Davida Fakna Hla.
Ṭanpui dîlna
1 Aw LALPA, ka koh dâwn che hi; Ka lungpui, ka lakah i beng chhu ngawng suh ang che; Chuti lo zawng, nangin mi ngawihsan chuan, Khuarkhuruma chhukte ang maiin ka lo awm dah ang e. 2 Ka auh chea, ka kutte hi i biakna hmun thianghlim lama ka phar chuan, Khawngaih ka dîlna awte hi ngaithla ang che. 3 Mi suaksualte zîngah leh thil tisualtute zîngah chuan mi hnûk bo tel suh ang che; Chûnghote chuan an vêngte hnênah remna thu an sawi ṭhîn a; Nimahsela, an thinlungahte chuan suahsualna a awm reng si a. 4 An thiltih ang zêl leh, an thiltihte a sualzia ang zêlin rûl la; An kuta an thawh ang zêlin rûl la; An sual man hmuhtîr ang che. 5 LALPA hnathawhte leh a kuta a thiltih chu an ngaihsak loh avângin, Ani chuan anniho chu siam ṭha lovin a tichhia ang. 6 Khawngaih ka dilna awte hi a ngaihthlâk avângin LALPA chu fakin awm rawh se. 7 LALPA chu ka chakna leh ka phaw a ni a; Ka thinlung hian amah chu a ring a, tichuan, puihin ka awm a; Chuvângin, ka thinlung hi nasa takin a hlim a; Ka hlain amah ka fak ang. 8 LALPA chu an chakna a ni a, A hriakthiha tân chuan chhandamna kulhbîng a ni. 9 I mite chu chhandam la, i ro chan chu malsâwm ang che; Anniho chu châwm la, kumkhuain pawm ang che.
Davida Fakna Hla.
Thlipui zînga LALPA aw
1 Aw, mi thiltithei tak fate u, LALPA hnênah pe ula; LALPA hnênah chuan ropuina leh chakna pe rawh u. 2 LALPA hnênah a hming ropuina chu pe ula; Thianghlim mawina inbelin LALPA chu chibai bûk rawh u. 3 LALPA aw chu tui chungahte chuan a ri a; Ropuina Pathian chu a lo ri dur dur a, LALPA ngei chu tui tam tak chungahte a lo ri a. 4 LALPA aw chu thiltithei tak a ni a; LALPA aw chu ropui tak a ni. 5 LALPA aw chuan sidar thingte chu a titliak ang a; A ni, LALPA chuan Lebanon tlânga sidar thingte chu a titliak seng sung ṭhîn. 6 Bâwngno tualchai angin a chêttîr ṭhîn a; Lebanon leh Sirion tlângte chu seleno ang maiin. 7 LALPA aw chuan meialhte a phel ṭhîn. 8 LALPA aw chuan thlalêr a nghawr nghîng a; LALPA chuan Kadesh thlalêr chu a tinghîng ṭhîn. 9 LALPA aw chuan zukpuite chu no a chhiattîr a, Ngawpui thing hnahte chu a nuai kawlh vek ṭhîn; A biak inah chuan thil engkimin, “A ropui e,” an ti ṭheuh ṭhîn. 10 LALPA chu Tuilêt lai khân lalah a ṭhu a, A ni, LALPA chu kumkhua atân lalah a ṭhu a ni. 11 LALPA chuan a mite hnênah chakna a pe ang a, LALPA chuan a mite chu thlamuannain mal a sâwm ang.
Fakna Hla; Pathian hnêna In an pêk lai Hla; Davida Fakna Hla.
Lâwm thu hril ṭawngṭaina
1 Aw LALPA, ka chawimawi ang che, nangin mi kai chhuak a, Mi dotute chu mi diriamtîr loh avângin. 2 Aw LALPA, ka Pathian, Ka au chia, nangin mi tidam ta a. 3 Aw LALPA, nangin ka nunna hi Seol ata chu i hruai chhuak a; Khuarkhuruma ka chhuk lohna tûrin nangin mi humhim zêl a. 4 Aw, a mi thianghlimte u, LALPA fakin zai ula, A hming thianghlim chu fak rawh u. 5 A thinur chu mit khap kâr chauh a ni si a; A duhsaknaah chuan nunna a awm ṭhîn; Ṭahna hi riak tûrin tlai lamah a lo lût thei a, Zîngah erawh chuan hlimna a lo thleng ṭhîn. 6 Kei zawngin ka nun khaw nawm lai chuan, “Eng tikah mah ka nghîng lo vang,” ka ti a. 7 LALPA, nangin i duhsakna avângin ka tlâng chu i lo din nghehtîr tawh a; Nimahsela, i hmai i thup a, ka lo mangan tâk kha. 8 Aw LALPA, nang ka au chia; LALPA hnên ngeiah chuan khawngaihna ka dîl kha; 9 Thi ila, leilâwtah chhuk ila, i tân hlâwkna eng nge awm? Vaivutin a fak dâwn che em ni? I thutak hi a hriattîr dâwn em ni? 10 Aw LALPA, ngaithla la, mi khawngaih ang che; LALPA, nang mi ṭanpuitu ni ang che. 11 Ka mitthi ngaihna chu ka tân lâmnaah i chantîr a; Ka saiip puan chu mi hlihsak a, hlimnain ka taiah mi hrêng ta a; 12 Ka ropuina hi ngawi reng lova, nangmah faka a zaina tûrin. Aw LALPA ka Pathian, kumkhuain lâwm thu ka hrilh fo vang che.
Hla Hruaitu tân. Davida Fakna Hla.
Pathiana innghat ṭawngṭaina
1 Aw LALPA, nangmahah chuan ka rinna ka nghat ṭhîn a; Eng tikah mah mualphovin mi awmtîr suh la, I felna avângin mi chhanhim ang che. 2 Ka lamah hian i beng rawn dawh la, mi chhanhim thuai la; Ka tân lungpui nghet tak, mi chhandamna tûra humhimna in lo ni ang che. 3 Nang chu ka lungpui leh ka kulhpui i ni si a; Chu vâng chuan, i hming avângin mi hruaiin mi kai ang che. 4 Ka awh nân a rûka lên an phah lakah hian mi hnûk chhuak ang che; Nang chu ka kulhbîng i ni si a. 5 I kutah ka thlarau ka kawltîr e; Aw LALPA, thutak Pathian, nangin mi tlan ta. 6 Thil lawilo mai maite ngaihsakho chu ka hua a; Kei erawh zawngin LALPA ka ring a ni. 7 I ngilneihna avâng hian ka hlimin ka lâwm ang, Ka manganna hi i hmu si ṭhîn a; Ka nunna hi a hrehawm laite pawhin i hre ṭhîn. 8 Tin, mi dotu kutah nangin mi khung lo va; Ka ke hi hmun thâwl takah i nghat ta zâwk a. 9 Aw LALPA, mi khawngaih ang che, mangangin ka awm si a; Ka mit hi lungngaihna avângin a râwp telh telh a, a ni, ka nunna leh ka taksa lamin. 10 Ka dam chhûng hi lungngaiin a ral ta si a, ka kumte hi rûmin a ral ta bawk a ni; Ka khawlohna avângin ka tha a ṭhum a, ka ruhte pawh a râwp zo ta a. 11 Mi dotute avângin ka hming hi a lo chhe ta a, A ni, ka vêngte lakah nasa takin a chhe ta a ni, ka hmêlhriatte tân pawh hlauhawm tak ka ni ta; Kawtlaia mi hmute lah khân mi tlânsan ta si a. 12 Mitthi an theihnghilh ang takin theihnghilhin ka awm a, Bêl keh ang mai ka ni ta. 13 Mi tam tak mi hêkna ka hre si a, Ka vêla hlauhawm awm chu; Mi phiar ho lai khân, Ka nun mi lâksak an tum a. 14 Nimahsela, aw LALPA, ka ring chia, “Ka Pathian i ni,” ka ti a. 15 Ka hunte chu i kutah a awm a; Mi dotute kut ata leh, mi tiduhdahtute lakah hian mi chhanhim ang che. 16 I hmêlin i chhiahhlawh hi han chhun êng la, I ngilneihna avângin mi chhandam ang che. 17 Aw LALPA, mualphovin mi awmtîr suh ang che, ka ko si chia; Mi suaksualte chu mualphovin awm sela, Seol-ah ngawi rengin awm rawh se. 18 Hmui dawtheite chu ṭawng thei lovin awm rawh se; Chûngte chuan chapo leh hmusit chungin, Ṭawng chaltlai takin mi fel an sawichhe ṭhîn. 19 Aw, i ṭhatna, nangmah ṭihtute tâna i khâwl khâwm chu a va ropui êm! Mihring fate mit hmuha nangmaha rinna nghatte tâna i tihsak chu. 20 Anni chu mihring phiarna lakah chuan i humhimna mit hmuhah i thukru ang a, Lei hnialhrâtna lakah chuan bûktêah i dah ru ang. 21 LALPA chu fakin awm rawh se, A ngilneihna mak tak chu khawpui nghet takah mi hmuhtîr si a. 22 Kei lah chuan, ka hamhaihin, “I mit hmuh ata paih bovin ka awm ta,” ka lo ti ta mai a; Nimahsela, ka auh che khân, khawngaih ka dîlna awte kha i lo hre si a. 23 Aw, a mi thianghlim zawng zawngte u, LALPA chu hmangaih rawh u; LALPA chuan mi rinawm chu a humhim a, Chapo taka titu chu nasa takin a rûl ṭhîn. 24 LALPA beisei zawng zawngte u, Chak takin awm ula, in thinlung chu intihuai rawh se.
Davida Fakna Hla. Maskil.
Sual puan leh ngaihdamna
1 A bawhchhiatna ngaihdama awma, A sualna hliahkhuha awma chu, a eng a thâwl e. 2 Mi, LALPAN khawlohna neia a ruat lohva, A thlarauva tihderna rêng rêng awm lova chu a eng a thâwl e. 3 Ka ngawih reng lai khân, nilênga ka rûm ṭhinna lamah ka ruhte hi a chang zo vek a ni. 4 A chhûn a zânin i kutin mi delh si a, Ka taksa hnâwnna pawh, ṭhâl rumin thil a tidanglam angin, a lo danglam tâk hial kha. (Selah) 5 Ka sualna chu i hnênah ka puang a, Ka khawlohna chu ka zêp ta lo va: “Ka bawhchhiatna chu LALPA hnênah thupha ka chawi tawh ang,” ka ti a; Tichuan, ka sual khawlohna chu i lo ngaihdam tâk kha. (Selah) 6 Chu vâng chuan, Pathian ngaihsak mi tin chu zawn hmuh awla i awm laiin i hnênah ṭawngṭai ṭheuh rawh se; Tui liante chu a lo liam hun chuan anni chu a chîm pha ṭhuai dâwn lo nia. 7 Nang chu ka bihrûkna hmun i ni a; nang chuan manganna lakah mi humhim ang a; Chhanhimna hlatein mi hual vêltîr ang. (Selah) 8 Fing taka awmtîr chein i kalna tûr kawng chu ka entîr ang chia; Ka mita en reng chung chein rem ka ruatsak zêl ang che. 9 Ngaihtuahna nei hlei lo sakawr emaw, sabengtung emaw angin awm suh u; Chûng chuan thunun nân thîrbarh leh hrui an ngai a; Chuti lo chuan, i kiangah an lo kal lo vang. 10 Mi suaksual tân chuan lungngaihna tam tak a awm ang a; LALPA ringtu erawh chu ngilneihnain a hual vêl zâwk ang. 11 Mi felte u, LALPA-ah chuan hlimin lâwm ula; Thinlung dik tak pu zawng zawngte u, hlimin au rawh u.
Fakna hla
1 Aw, mi felte u, LALPA-ah chuan hlimin zai rawh u! Mi dik tân chuan Pathian fak hi a âwm rêng a ni. 2 Ṭingṭangin LALPA hnênah chuan lâwm thu sawi ula, Perhkhuang hrui sâwm nei mi nên amah fakin zai rawh u. 3 Amah chawimawiin hla thar sa ula, Thâwm nasa tak nên thiam takin tum rawh u. 4 LALPA thu chu a dik a, A thiltih zawng zawng chu rinawm taka tih a ni si ṭhîn a. 5 Felna leh rorêlna fel hi a ngaina ṭhîn a, Leilung hi LALPA ngilneihnain a khat a. 6 LALPA thuin vânte chu siam a ni a; Chûnga awmho zawng zawngte pawh chu a kâa thaw chuan siam an ni bawk a. 7 Ani chuan tuifinriat tuite chu englo dah khâwm thûr angin a tikhâwm a; Tui thûk takte chu dah khâwmna inahte a dah ṭha ṭhîn. 8 Leilung luah zawng zawng chuan LALPA chu ṭih sela; Khawvêla awm zawng zawng chu amah hlauvin awm rawh se. 9 Ani chuan a sawi a, a lo awm ta a; Thu a pe a, a lo awm nghet ta si a. 10 LALPAN hnam tin remruat chu engmahlovah a chantîr a; Mi tin ngaihtuahte chu eng mah sâwtna nei lovin a siam ṭhîn. 11 LALPA remruat erawh chu kumkhuain a awm nghet ang a, A thinlunga a ngaihtuahte chu chhuan zawng zawng thlengin a awm nghet ang. 12 LALPA Pathiana neih hnam chu an eng a thâwl e; Ama ro chana a thlan mite chu. 13 LALPA chuan vân aṭang khian a thlîr a; Mihring fate zawng zawng hi a hmu ṭhîn. 14 Leia awm zawng zawng hi a awmna hmun aṭang khian a rawn thlîr ṭhîn; 15 An zaa thinlung siam ṭhîna, An thiltih zawng zawng ngaihtuah ṭhîntu chuan. 16 Lal rêng rêng hi sipaiho tam vâng ngawta chhandama awm an awm ngai lo; Mi chak hi chak êm êm vâng ngawtin chhanhim an ni ngai lo. 17 Sakawr hi inchhandam nân eng mah a ni lo va, A chak êm êm avâng maiin tu mah a chhanhim hek lo vang. 18 Ngai teh, LALPA mit chu amah ṭihtute chungah chuan a fu reng ṭhîn a, A ngilneihna beiseitute chungah chuan; 19 An nunna thihna laka chhanhim tûr leh, Ṭâm tlâka anmahni tungnung tûrin. 20 Kan nunna hian LALPA a nghâk reng a; Ani chu min ṭanpuitu leh kan phaw a ni. 21 Amahah chuan kan thinlung hi a hlim dâwn a ni, A hming thianghlim kan rin avângin. 22 Aw LALPA, i ngilneihna chu kan chungah awm rawh se, Kan beisei ang zêl chein.
Davida Fakna Hla; Abimeleka hmaa a awm dân a intihdanglama, anin a lo hnawh chhuaha, a kal tâk laia mi.
Pathian ṭhatzia fakna
1 Eng lai pawhin LALPA chu ka fak ang a; Amah fakna chu ka kâah a chhuak fo vang. 2 Ka nunna hian LALPA chu a chhuang ang a; Thuhnuairawlhte chuan chu chu an hria ang a, an lâwm ang. 3 Aw, LALPA chu mi fakpui ula, A hming chu i chawimawi tlâng ang u. 4 LALPA chu ka zawng a; tin, ani chuan mi chhâng a, Ka hlauh zâwng zawng zawng lakah chuan mi chhanhim ta a. 5 Amah an en a; tin, an lo êng ta a; An hmêlte chu eng tikah mah a zak lo vang. 6 He mi rethei hi a au va; tin, LALPA chuan a hria a, A manganna zawng zawngah chuan a chhanchhuak ta a. 7 Amah ṭihtute chu, an vêlah LALPA vântirhkoh chuan a awm chilh a, A chhanhim ṭhîn. 8 Aw, LALPA ṭhatzia chu tem chhin teh rêng u; Amaha rinna nghat mi chu a eng a thâwl e. 9 Aw, a mi thianghlimte u, LALPA chu ṭih rawh u! Amah ṭihtute tân chuan tlâkchhamna rêng rêng a awm si lo. 10 Sakeibaknei vânglaite chu an tlachhamin an ril a ṭâm ṭhîn a; LALPA zawngtute erawh chuan thil ṭha rêng rêng an tlachham lo vang. 11 Hawh u, naupangte u, ka thu ngaithla rawh u; LALPA ṭih dân ka lo zirtîr ang che u. 12 Ṭhatna a hmuh theih nâna nunna duha, Dam rei ngaina mi chu tu nge ni? 13 I lei chu sual lakah vêng ṭha la, I hmui chu tihderna thu sawi lo tûrin vêng ṭha rawh. 14 Sual kalsan la, thil ṭha ti rawh; Remna zawng la, a ûmin ûm rawh. 15 LALPA mit chuan mi felte lam a en ṭhîn a, A beng chuan an au hre tûrin a ngaithla reng ṭhîn. 16 LALPA hmêl chuan thil tisualtute chu a do ṭhîn. Anmahni hriat rengna chu lei ata tiboral tûrin. 17 Mi felte chu an au va; tin, LALPA chuan a lo hria a, An manganna zawng zawngah chuan a chhanchhuak ta a. 18 LALPA chuan thinlunga lungchhiate chu a hnaih ṭhîn a, Rilrua inchhîr apiangte chu a chhandam ṭhîn. 19 Mi fel hrehawmnate chu a tam a; Nimahsela, LALPAN chûng zawng zawngah chuan a chhanchhuak ṭhîn. 20 A ruh zawng zawng a vawng ṭha a, Pakhat mah tihtliah a ni lo. 21 Thil ṭha lovin mi suaksualte chu a tihlum ang a, Mi fel hawtute chuan thiam loh an chang ang. 22 LALPA chuan a chhiahhlawhte nunna chu a tlan ṭhîn a, Amaha rinna nghatte chu pakhat mah thiam loh chang an awm lo vang.
Davida Fakna Hla.
Ṭanpui dîlna
1 Aw LALPA, mi beitute chu nangin bei la; Mi dotute chu nangin do vang che. 2 Phaw tê leh phaw lian chelh la, Mi ṭanpui tûrin ding ang che. 3 Fei pawh phawi la, mi ûmtute kawng lo dang la; Ka nunna hnênah hian, “I chhandamtu ka ni e,” ti ang che. 4 Ka nunna tihbo tuma zawngtute chu, tihmualphova tihzahin awm sela; Mi tihchhiatna tûr suangtuahtute chu tlânchhiattîrin, hrilhhai takin awm rawh se. 5 LALPA vântirhkohvina khalh zêl siin, Buhsî, thli len angin awm rawh se. 6 LALPA vântirhkohvina ûm zêl siin, An kawng chu thim tak leh nâl tak ni rawh se. 7 A vâng awm lovin mi awh nân an lên chu khuarkhurumah an phah ru a, A vâng awm lovin ka nunna tlâk nân khuarkhurum an lai si a. 8 A inrin loh hlânin chhiatna a chungah thleng sela; A lên phah rûkah khân amah ngei âwk bawk sela, Chumiah chuan tla chhe rawh se. 9 Tichuan, ka nunna hi LALPA-ah chuan a hlim ang a; A chhandamnaah chuan a lâwm ang. 10 Ka ruh zawng zawng hian, “LALPA, mi rethei a khin zawh rual loh laka chhanhimtu, A ni, rethei leh pachhia, a ram ṭhîntu laka chhanhimtu, Nang ang rêng rêng tu nge awm?” a ti ang. 11 Hretu fel lo takte an lo tho va; Ka thil hriat hauh loh thu-ahte mi chhâl a. 12 Ka nunnain thil chân khawpin thil ṭha thil sualin mi rûl a. 13 Kei erawh chuan an damloh laiin saiip puan ka sin a, Chaw ngheia intiretheiin ka ṭawngṭai a; Nimahsela, ka ṭawngṭaina chu chhân lohvin ka hnênah a lo lêt leh a. 14 Keima ṭhian emaw, ka unau ngei emaw chunga ka awm dân tûr ang maiin ka awm a, Mahni nu sûna ṭap ang maiin anmahni sûnin ka kaikûn a. 15 Nimahsela, kei ka bai chuan anni chu an lâwm zâwk a, an inkhâwm hial a; Mi sual mai maite chu mi bei tûrin an inkhâwm a, chu chu ka lo hre si lo va; Bâng duh lovin mi sawisa nek a; 16 Ruai ṭhehnatea nuihza fiamthu sawitute mai mai angin an ha mi ṭhial khum a. 17 LALPA, nangin eng chen nge i en dâwn le? Ka nunna hi tihchhiat an tumna lakahte chuan chhanchhuak la, Ka neih chhun tak hi sakeibaknei lakahte chuan chhanchhuak ang che. 18 Inkhâwmna ropui takah chuan lâwm thu ka hrilh ang chia, Mi tam tak zîngah ka fak ang che. 19 Ka hmêlmate chuan dik lo takah mi diriam suh se; Enga khaw lawilova mi hawtute chu an mitin inbe hek suh se. 20 Remna thu rêng an sawi si lo va, He rama awm hle hlete bumna thute an suangtuah zâwk a ni. 21 A ni, an kâin mi ân khum huau va, “Chei! Chei! Kan mitin kan hmu ta,” an ti a. 22 Aw LALPA, nangin i hmu e, ngawihsan suh ang che. Aw LALPA, mi hlat lul suh ang che. 23 Ka Pathian leh ka LALPA, ka rorêl tûrin, A ni, ka thua mi ṭan tûrin intiharh la, meng ang che. 24 Aw LALPA ka Pathian, i felna avângin ro mi rêl la; Anni chuan mi diriam suh se. 25 An rilru chuan, “Chei! Chutiang chu alâwm kan duh ni,” ti suh se; “Ani chu kan lem zo ta,” ti hek suh se. 26 Ka chhiatna chunga lâwmte chu mualpho tak leh hrilhhai takin awm hlawm sela; Ka chunga intiliante chu mualphona leh zahna sintîrin awm rawh se. 27 Ka felna chunga lâwmte chu hlima auvin lâwm takin awm sela; A ni, “A chhiahhlawh vânneihna chunga lâwm ṭhîn LALPA chu Chawimawiin awm rawh se,” ti fo rawh se. 28 Tichuan, ka lei hian felna thu a sawi ang a, I fakna thu pawh nilêngin a sawi bawk ang.
Hla Hruaitu tân. LALPA chhiahhlawh Davida Fakna Hla.
Mihring suahsualzia
1 Mi suaksual bawhchhiatna chuan ka thinlung chhûngah hian thu a sawi a, “A mit hmuhah Pathian hlauhna rêng rêng a awm lo,” tiin. 2 “Ka khawlohna an hmuchhuak lo vang, an haw hlei lo vang e,” tiin, Mahni mit hmuhah mahni vêk a infak chawp si ṭhîn a. 3 A kâa thuchhuakte chu sualna leh bumna thu hlîr a ni ṭhîn a; Finvâr leh thil ṭha tih a bâng ta a. 4 A khumlaizâwlah chuan thil sual a suangtuah ṭhîn a; Kawng ṭha lovah chuan a kal lui a, sualna chu a ten lo.
Pathian ṭhatzia
5 Aw LALPA, i ngilneihna chu vânahte khian a awm a; I rinawmna chuan vân dumte khi a tawng a ni. 6 I felna chu Pathian tlângte ang a ni a; I rorêlte chu tui thûk zau tak ang a ni; Aw LALPA, mihring leh sa i humhim ṭhîn. 7 Aw Pathian, i ngilneihna chu a va hlu êm! Mihring fate chuan i thla hnuai an chuh ṭhîn. 8 Anni chu i in chhûng thil ṭhain an tlai êm êm ang a; I lâwmna luia mi chu i intîr bawk ang. 9 Nunna tuikhur chu i hnênah a awm si a; I êngah chuan êng kan la hmu ang. 10 Aw, nangmah hretute chungah chuan i ngilneihna chu lantîr zêl la; Thinlung dik tak pute chungah pawh i felna chu lantîr zêl ang che. 11 Chapo ke chu mi bei tûrin ka lamah pên suh sela, Mi suaksual kut pawhin mi hnawt bo suh se. 12 Sawtah sâwn thil tisualtute chu an tlu reng a; Nam thlûk an ni a, an tho thei tawh lo vang.
Davida Fakna Hla.
Mi sual leh mi ṭha tâwpna tûr
1 Thil ṭha lo titute avângin intilungngai duh suh la, Fel lo taka tite chu awt hek suh. 2 Hlobet angin ah thlûkin an awm thuai ang a, Hnim hring angin an vuai dâwn si a. 3 LALPA chu ring la, thil ṭha ti rawh; He ramah hian awm la, rinawmna ûm zêl rawh. 4 LALPA chungah chuan lâwm bawk rawh; Tichuan, i thinlung duh zâwngte chu a pe ang che. 5 I awm dân tûr chu LALPA chungah nghat la; Amah chu ring la, aman a ti vek ang. 6 I felzia chu êng angin a chhuahtîr ang a, I thiam chanzia pawh chhûn lai ang maiin. 7 LALPA-ah chuan châwl la, amah chu nghâk fan fan rawh; A awm dâna vânneihna dawngtu avângin intilungngai duh suh, Ngaihtuahna sualte puitlintu avâng chuan. 8 Thinur hi bânsan la, thinrim hi sim rawh, Intilungngai duh suh, thil tihsualah a lo tlâk mai ṭhîn a ni. 9 Thil ṭha lo titute chu tihboralin an awm dâwn si a; LALPA nghâktute erawh chuan ram hi an luah ang. 10 Rei lo tê achinah mi suaksual chu a awm tawh dâwn si lo; A ni, a awmna hmun chu en en mah la, a awm tawh lo vang. 11 Thuhnuairawlhte erawh chuan ram hi an luah ang a, Remna chênin an hmuingîl ang. 12 Mi suaksual chuan mi fel a phiar a, A hâ a ṭhial khum ṭhîn. 13 LALPA chuan ani chu a nuihsan ang, A ni a lo thleng dâwn tih a hriat avângin. 14 Rethei leh pachhiate tithlu tûr leh awm dân dikte tihlum tûrin, Mi suaksualte chuan khandaih an phawi a, an thal ngul an kuai bawk a. 15 An khandaih chuan anmahni thinlung chu a chhun ang a, An thal ngulte chu tihtliahin a awm bawk ang. 16 Mi fel thil tlêm tê neih chu mi suaksual thil tam tak neih rei rui ai chuan a ṭha zâwk a ni. 17 Mi suaksual bânte chu tihtliahin a awm dâwn si a; Mi fel erawh chu LALPAN a chelh reng ṭhîn. 18 LALPA chuan mi ṭha famkim nite chu a hria a, A rochun tûr chu kumkhuaa awm reng tûr a ni. 19 Hun ṭha lovah an mualpho lo vang a, Ṭâm kumahte pawh an puar ang. 20 Mi suaksualte erawh chu an boral ang a, LALPA dotute pawh phûl hnim duah ang an ni ang. Tihboralin an awm ang a, meikhuah an zâm ral ang. 21 Mi suaksual chuan a pûk a, a pe leh ṭhîn lo va; Mi fel erawh chuan mi a khawngaih a, a pe zâwk ṭhîn. 22 A malsâwmna dawngtute chuan ram hi an luah dâwn a, A ânchhe lawh dawngtute chu tihboralin an awm dâwn a ni. 23 LALPA chuan an kalna tûrah a hruai ṭhîn a, A duh zâwng titute chu a vêng ṭhîn. 24 Tlu mah sela, an tlu hlen lo vang, LALPAN a kutin a chelh reng si a. 25 Naupang ka lo ni tawh a, tûnah tar ka lo ni ta a; Nimahsela, mi fel chu kalsana a awm ka hmu ngai lo va, A thlahte chaw khawn pawh ka hmu ngai hek lo. 26 Nilêngin mi a khawngaih a, a pûktîr ṭhîn a; A thlahte pawh an eng a thâwl ṭhîn. 27 Sual kalsan la, thil ṭha ti rawh; Tichuan, kumkhuain chêng reng ang che. 28 LALPA chuan rorêlna fel a ngaina si a. A mi thianghlimte chu a kalsan ngai lo; Kumkhua atân vawn ṭhatin an awm a, Mi suaksual thlahte erawh chu tihboralin an awm ang. 29 Mi felte chuan ram hi an luah ang a, A chhûngah hian kumkhuain an awm ang. 30 Mi fel kâ chuan finna thu a sawi ṭhîn a, A lei chuan rorêl felna thu a sawi bawk ṭhîn. 31 A Pathian dân chu a thinlungah a awm a, A pênsan ngai lo. 32 Mi suaksual chuan mi fel chu a enthla a, Tihhlum a tum ṭhîn. 33 LALPAN ani chu a kutah a kalsan lo vang a, A ro an rêl hunah chuan thiam loh chantîr a phal hek lo vang. 34 LALPA chu nghâk la, a kawng chu zawh rawh; Tichuan, ram hi luah tûrin a chawimawi ang che; Mi suaksualte tihborala an awm lai chu i la hmu ang. 35 Mi suaksual chu nasa taka thu neia, A ṭona hmuna thing chawr duah hluah anga a ṭawi bum lai ka hmu a. 36 Nimahsela, kawngah mi a va kal a; tin, ngai teh, ani chu a lo awm ta lo mai a; A ni, ka zawng a; nimahsela, hmuh theih a ni ta lo. 37 Mi sawisêl bo chu chhinchhiah la, mi dik tak chu en rawh, Chutiang mi tâwpna tûr chu thlamuanna a ni dâwn si a. 38 Bawhchhetute erawh chu a ruala tihchhiatin an awm hlawm ang a, Mi suaksualte tâwpna chu boralna a ni ang. 39 Amaherawhchu, mi felte chhandamna chu LALPA lak ata a ni a; Ani chu mangan laia an kulbîng a ni ṭhîn a. 40 LALPAN anni chu a ṭanpuiin a chhanhim ṭhîn a, Amahah chuan an tlûk luh avângin mi suaksualte lakah chuan a chhanhimin a chhandam ṭhîn.
Davida Fakna Hla, hriat chhuahtîr lehna tûrin.
Tuar lai ṭawngṭaina
1 Aw LALPA, thinurin mi zilhhau suh la, Thinrimin mi thunun hek suh ang che. 2 I thalte chu ka pangah a bûr tlat a, I kutin mi nem tlawk tlawk si a. 3 I lungnih lohna avângin ka tisaah hian dam lai rêng a awm lo va; Ka sualna avângin ka ruhahte hian hrisêl lai rêng a awm hek lo. 4 Ka khawlohnate chuan ka lu hi a chîm pil a, Phur rit tak ang, ka zawh rual loh hi a ni. 5 Ka âtna avângin Ka pemte hi a uihin a khawlo zo ta a. 6 Ka nâ a, ka kun tlawk tlawk a; Nilêngin lungngaiin ka vân ruai ṭhîn a; 7 Ka kâwng hi a sa hluah hluah vek a, Ka tisaah pawh hian dam lai rêng a awm lo. 8 Ka chau va, ka sil ûrh a; Ka thinlung nawm lohna avângin ka rûm vak vak a. 9 LALPA, ka duh zâwng zawng zawng hi i hmaah a awm vek a; Ka rûm pawh hi i lakah thuhrûk a ni lo. 10 Ka thin hi a phu hlawp hlawp a, thahrui ka nei ta lo va; Ka mit vârna lah chuan mi awm lohsan ta bawk a. 11 Mi hmangaihtute leh ka ṭhiante chu ka thil vei lakah hian an inthiarfihlîm ṭhîn a; Ka laichînte pawh hla takah an ding ṭhîn. 12 Ka nunna tihbo tuma zawngtute chuan mi awh nân thangte an kam ṭhîn a; Ka chhiatna tûr zawngtute pawh chuan thu ṭha lo takte an sawi a, Nilêngin bumna thute an ngaihtuah ṭhîn. 13 Nimahsela, kei chu mi bengngawng angin hre lovin ka awm a; Ṭawng thei lo mi, kâ âng ngai lo angin ka awm. 14 A ni, mi ṭawng hre thei lo, A kâa zilhhauna rêng chhuak ngai lo angin ka awm. 15 Aw LALPA, nangmah ka beisei si chia; Aw LALPA ka Pathian, nangin mi chhâng ang. 16 “Chuti lo chuan, mi diriam ang a, Ka ke a tleu veleh ka chungah an intilian dah ang e,” ka ti a ni. 17 Ka bai dâwn dâwn si a, Ka lungngaihna pawh ka hmaah a awm fo a ni. 18 Ka khawlohna chu ka puang ang a; Ka sualna avânga lungngaiin ka awm dâwn a ni. 19 Nimahsela, mi dotute chu an thothâng a ṭhain, an chak a; Dik lo taka mi hawtute chu an pung ta luai a. 20 Thil ṭha thil suala rûl ṭhîntute hi Thil ṭha ka ûm avângin mi dotute an ni a. 21 Aw LALPA, mi kalsan lul suh la; Aw ka Pathian, mi hlat lul suh ang che. 22 Aw LALPA, mi chhandamtu, Mi ṭanpui tûrin hmanhmawh ang che.
Hla Hruaitu tân, Jeduthuna tân. Davida Fakna Hla.
Tuar nei a inpuang
1 “Ka lei hian thil ka tihsual lohna tûrin, Ka awm dânte hi ka vêng ṭha ang a; Mi suaksualte ka hmaa an awm chhûng zawng, Ka kâ hi hmui phuarnain ka phuar ang,” ka ti a. 2 Chutichuan, ngawi rengin, ṭawng lovin ka awm a, A ṭha lamah pawh ka ngawi reng a; Nimahsela, ka lungngaihna chu chawhthawhin a awm zâwk mah a. 3 Ka kawchhûngah hian ka thinlung a sa huam huam a; Ka ngaihtuah ka ngaihtuah chuan mei chu a alh chhuak a; Tin, ka lei hian thu ka sawi ta a: 4 “LALPA, ka tâwpna tûr leh, ka dam chin tûr chu eng ti nge ni tih mi hriattîr la; Ka derdêpzia hi mi hriattîr ang che. 5 “Ngai teh, ka dam chhûng hi kutphah bawk lekin i siam a; Ka kum hi i mit hmuhah chuan eng mah tham a ni lo va; Mi tin hi an ṭhat lai ber pawhin an pumin engmahlo mai an ni. (Selah) 6 Mi tin hi hlim angin an lêng takmeuh va; An buai thlâwn takmeuh ṭhîn a ni; Ro a khâwl khâwm ṭhîn a, a khâwmtu tûr a hre si lo. 7 “Tin, LALPA, tûnah eng nge ka nghah le? Nangmahah a ni ka beiseina a awm ni. 8 Ka bawhchhiatna zawng zawng lakah mi chhanchhuak la; Mi â sawichhiatin mi awmtîr suh ang che. 9 Nangma tih a nih avângin ka ṭawng lo va, ka kâ ka âng hek lo. 10 I mi vuakna hi ka hnên ata mi lâk sawnsak la; I kutthlâka tihboral ka nih hi. 11 Mi a bawhchhiatna avânga zilhhaunatea i thunun hian, A duhawmna hi sûlrûl angin i tichhe ṭhîn a; Mi tin hi engmahlo mai an ni. (Selah) 12 “Aw LALPA, ka ṭawngṭaina hi ngaithla la, ka auhnaah hian beng chhi la; Ka mittui tla hi ngawihsan suh ang che. I mikhual ka ni a, Mi thlahtute zawng zawng ang khân pêm mai ka ni si a. 13 Aw, heta ta ka chhuaha, ka awm loh hlen daih hma hian, Ka harh lehna tûrin mi zuah ang che.”
Hla Hruaitu tân. Davida Fakna Hla.
Fakna hla
1 LALPA chu ka nghâk fan fan a; Tichuan, anin mi rawn thlêk a, ka au chu a ngaithla ta. 2 Boralna khuarkhurum ata, chirhdûp ban tak ata chu mi khai chhuak ta bawk a; Tin, ka ke chu lungpui chungah a nghat a, ka ke pênte chu a tinghet a. 3 Hla thar ka kâah a dah ta bawk a, kan Pathian fakna chu; Mi tam takin chûng chu an hmu ang a, an hlau vang a, LALPA chu an ring tawh ang. 4 LALPA chu a rinchhana neia, Chapote leh dâwt lama pêngte ngaihsak lo mi chu, a eng a thâwl e. 5 Aw LALPA, ka Pathian, nangin thil mak i tihte leh, Keimahni lam i ngaihtuahnate hi a tam êm êm mai a, Chûng chu i hmaa tihlan sên rual a ni lo va; Hriattîrin hril dâwn ila, Chhiar sên rual a ni lo vang. 6 Inthawina leh thilhlan chungah hian lâwmna rêng i nei lo va; Ka bengte hi mi tih-âwngsak ta a. Hâlral thilhlan leh sual tâna thilhlan chu i phût lo. 7 Chu veleh chuan keiin, “Ngai teh, ka lo kal e; Lehkhabu zialah chuan ka thu ziak a ni a. 8 Aw ka Pathian, i duh zâwng tih hi ka lâwm zâwng tak a ni; A ni, i dân thu chu ka thinlungah a awm reng e,” ka ti a. 9 Inkhâwmna ropui takah chuan felna chanchin ṭha ka tlângaupui a; Aw LALPA, ngai teh, Ka kâ hi ka ui lo vang tih i hria e. 10 I felna chu ka thinlung chhûngah ka zêp lo va; I rinawmna leh i chhandamna thu chu ka tlângaupui zâwk a; I ngilneihna leh i takna chu inkhâwmna ropui taka mite lakah chuan ka thup lo ve. 11 Aw LALPA, i lainatnate chu ka lakah ui suh la; I ngilneihna leh i takna chuan mi humhim fo rawh se.
Puih dîlna
12 Thil ṭha lo chhiar sên loh chuan mi hual vêl si a, Ka khawlohnate chuan mi ûm phâk a; chutichuan, ka dâk thei ta lo va; Chûng chu ka samzaite ai hian a tam zâwk a, ka thinlung hi a chau ta. 13 Aw LALPA, khawngaih takin mi chhanhim la; Aw LALPA, mi ṭanpui tûrin hmanhmawh ang che. 14 Ka nunna tihbo tuma zawngtute chu, Mualpho tak leh zak takin awm hlawm sela; Ka chhiatna chunga lâwmte chu hawi kîrtîrin tihzahin awm rawh se. 15 “Chei! Chei!” mi titute chu an mualpho avângin mangang takin awm rawh se. 16 A zawngtu che zawng zawng chu nangmahah chuan hlim tak leh lâwm takin awm sela; I chhandamna ngainatute chuan, “LALPA chu chawimawiin awm rawh se,” ti fo rawh se. 17 Kei zawng rethei leh pachhe tak ka ni a, Nimahsela, LALPAN mi ngaihtuah ṭhîn a. Nang chu mi ṭanpuitu leh mi chhanhimtu i ni a; Aw ka Pathian, rei rial lul suh ang che.
Hla Hruaitu tân. Davida Fakna Hla.
Damlo ṭawngṭaina
1 Retheite ngaihtuah mi chu a eng a thâwl e, Mangan ni chuan LALPAN ani chu a chhanhim ang. 2 LALPAN ani chu humhimin a tinung ang a, leiah hian malsâwmin a awm ang; Amah dotute duh duha tihah pe suh ang che. 3 LALPAN a chauhna mut hmunah chuan a tichak ang a; Nangin a damloh laiin a mutna i siamsak vek ṭhîn. 4 Keiin, “Aw LALPA, mi khawngaih la, Ka nunna hi tidam ang che, i chungah thil ka tisual si a,” ka ti a. 5 Mi dotute chuan, “Eng tikah nge a thih ang a, a hming a bo vang?” tiin, Mi sawichhe ṭhîn a. 6 Tin, an zînga tuin emaw mi rawn kan lahin, thu engmahlo mai mai a sawi ṭhîn a; A thinlung chuan sualna a la khâwm ṭhîn a; A kal chhuah veleh mi a hrilh ṭhîn. 7 Mi hawtute zawng zawng chuan mi hêkna thu sêsêin an la a; Mi tihchhiatna tûr an suangtuah ṭhîn. 8 “Natna ṭha lo takin a tlâkbuak ta a; Tûna a mu hi a tho leh tawh lo vang,” an ti a. 9 A ni, ka ṭhian kawmngeih, ka rin tak, Ka chhang eipui ngei chuan a keartui ka chungah a lek ta. 10 Nimahsela, aw LALPA, nangin mi khawngaih la, Anmahni ka thungrulh theihna tûrin mi kaitho leh ang che. 11 Hemiah hian ka chungah i lâwm tih ka hria, Mi dotu chuan mi ngam ṭhin loh avâng hian. 12 Kei zawng rilru ṭha tak ka putnaah hian nangin mi chelh reng a, A hmaah chuan kumkhua atân mi dah a. 13 LALPA, Israela Pathian chu, Chatuan ata chatuan thlengin fakin awm rawh se. Amen. Amen.
Hla Hruaitu tân; Kora fapate Maskil.
Ram danga hruai ṭawngṭaina
1 Sakhi, luite tui châka a thaw huam huam ang hian, Aw Pathian, ka nunna hi nangmah châkin a thaw huam huam a ni. 2 Ka nunna hi Pathian châkin, Pathian nung châkin a tuihâl a ni. Eng tikah nge Pathian hma ka thlen anga, ka inlan ang aw? 3 Ka mittui hi a chhûn a zânin ka chaw a ni. “Khawiah nge i Pathian le?” mi lo ti châmchi a. 4 Hêng thil hi ka hre reng a, ka nunna hi ka chhûngah ka leihbua a, Mipui zînga ka kala, hlimna leh fakna ri nêna mi tam tak kût, Pathian biak in pana an hma ka hruai ṭhinziate kha. 5 Aw ka nunna, engah nge i kun reng? Engah nge ka chhûngah hian i buai ni? Pathian beisei rawh; a hmêla damna avângin amah chu ka la fak dâwn si a. 6 Aw ka Pathian, ka nunna hi ka chhûngah hian a kun reng a; Chuvângin, Jordan leh Hermon ram aṭang te, Mizar tlâng aṭang te hian ka hre reng che a ni. 7 I tui luang ri dur durahte hian tui thûk leh tui thûk chu an inau va; I tuifâwn leh i tui inchhawk zawng zawngte chuan mi vûr pil ta a. 8 Nimahsela, LALPAN a ngilneihna chu chhûnah thu a pe ang a, A hla chuan zânah mi awmpui ang, Ka nunna Pathian hnêna ṭawngṭaina chuan. 9 Pathian, ka lungpui hnênah chuan, “Engah nge mi theihnghilh le? Engah nge dotu hnehchhiahna avânga lungngaia ka vân ruai ṭhin le?” ka ti ang. 10 Ka ruha khandaih awm ang maiin mi dotute chuan mi sawichhe ṭhîn a; “Khawiah nge i Pathian le?” mi lo ti châmchi a. 11 Aw ka nunna, engah nge i kun reng? Engah nge ka chhûngah hian i buai ni? Pathian beisei rawh; amah chu ka la fak dâwn si a, Ka hmêl tidamtu leh ka Pathian chu.
Ram danga hruai ṭawngṭaina
1 Aw Pathian, ro mi rêl la, Pathian ngaihsak lo hnam chungah hian ka thu mi sawipui ang che; Aw, mi bum hmang mi dik lo lakah hian mi chhanhim ang che. 2 Nang chu ka chakna Pathian i ni si a; engah nge mi thlauhthlâk le? Engah nge dotu hnehchhiahna avânga lungngaia ka vân ruai ṭhin le? 3 Aw, i êng leh i thutak chu tîr chhuak la, anni chuan mi hruai sela; I tlâng thianghlim leh i awmnate chu mi thlen rawh se. 4 Chutichuan, Pathian maichâm kiangah ka kal ang, Pathian, ka hlim êm êmna kiangah chuan; Aw Pathian, ka Pathian, ṭingṭangin ka fak bawk ang che. 5 Aw ka nunna, engah nge i kun reng? Engah nge ka chhûngah hian i buai ni? Pathian beisei rawh; amah chu ka la fak dâwn si a, Ka hmêl tidamtu leh ka Pathian chu.
Hla Hruaitu tân; Kora fapate Fakna Hla. Maskil.
Vênghim tûra dîlna
1 Aw Pathian, hmasânga an dam laia i thiltihte kha Kan thlahtuten min hrilh, kan bengin kan hria. 2 Nangin i kut ngeiin hnam tin chu i hnawt chhuak a, anni chu i phun ta thung a; Mi tin chu i tirethei a, anni chu i zâr zautîr ta thung a. 3 Ram hi luah tûra anmahni khandaiha an lâk a ni lo va, Anmahni bâna inchhandam an ni hek lo; An chunga i lâwm avângin I kut ding lam leh, i bân leh, i hmêl êngin a ni zâwk. 4 Aw Pathian, nang chu ka Lal i ni; Jakoba chhanhim nân thu pe ang che. 5 Nangmah avângin min dotute chu kan si thlu ang a; I hming avângin min beitute chu kan chîl nek ang. 6 Ka thal ngul hi ka ring dâwn si lo va, Ka khandaih hian mi chhandam hek lo vang. 7 Mi dotute lakah chuan nangin min chhandam ta zâwk a, Min hawtute chu i timualpho ta bawk. 8 Nilêngin Pathian kan chhuang a, I hming chu kumkhuain kan fak bawk ang. (Selah) 9 Tûnah erawh chuan nangin min thlauthla a, min tizak a; Kan sipaiho hnênah lah i chhuak ve ta ngai lo va. 10 Dotute lakah chuan min tlânchhiattîr ṭhîn a, Min hawtute chuan sum chu an duh duh an la ṭhîn. 11 Berâm talh tûr angin min dah a, Hnam tin zîngah min tidarh bawk a. 12 I mite hi engmahlovah i hralh a, An man chu i hausakpui chuang si lo. 13 Nangin kan vêla mite sawichhiatin min awmtîr a, Kan dep vêla mite hmuhsit leh nuihsanin min awmtîr bawk a. 14 Nangin hnam tin zîngah a chhe lam tehkhinnaah min awmtîr a, Mi tin zînga mite lu thinsanin min awmtîr bawk a. 15 Ka zahna hi nilêngin ka hmaah a awm ṭhîn a, Ka mualphona hian mi khuh zo ta, 16 Sawihnâwmtu leh sawichhetu aw avâng leh, Hmêlma leh phuba latu avângin. 17 Chûng zawng zawng chu kan chungah a thleng a; Nimahsela, kan theihnghilh ngai lo chia, I thuthlungah hian a derin kan ti ngai hek lo. 18 Kan thinlung hi a hawi kîr lo va, Kan ke pênte hian i kawng chu a pênsan ngai hek lo. 19 Nangin sihalte awmnaah min sawisak neka, Thihna daihlima min khuhna tûr hian. 20 Kan Pathian hming kan theihnghilh emaw, Ram dang pathian lama kan kutte kan phar emaw chuan, 21 Pathianin chu chu a zawng chhuak lo vang em ni? Thinlunga thurûkte hi a hre reng si a. 22 A ni, nangmah avângin nilêngin thahin kan awm ṭhîn; Berâm talh tûrte anga ngaih kan ni. 23 Aw LALPA, harh ta che, engah nge i muthilh ni? Meng la, kumkhua chuan min thlauthla suh ang che. 24 Eng vângin nge i hmai i thupa, Kan hrehawmzia leh hnehchhiah kan tuarzia hi i theihnghilh ṭhin ni? 25 Kan nunna hi vaivut siin a kûn a; Kan pum lah leiah a bet tlat si a. 26 Min ṭanpui tûrin tho la, I ngilneihna avângin min tlan ang che.
Hla Hruaitu tân; Sosanim-a sak tûr; Kora fapate Fakna Hla. Maskil. Hmangaihna Hla.
Lal inneih ni hla
1 Ka thinlung hi thil ṭhain a liam zawih zawih a; Lalber chungchâng thua ka thil phuah chu ka sawi dâwn e; Ka lei hi lehkha ziak thiam tak kawlawm a ni. 2 Mihring fate ai hian i hmêl a ṭha zâwk a; Khawngaihna hi i hmuiah leih a ni; Chuvângin, Pathianin kumkhua atân mal a sâwm che a ni. 3 Aw, mi chak, i khandaih chu i kâwngah vawng rawh, I ropuina leh i mawina nên. 4 Thutak leh thuhnuairawlhna leh felna avângin, I mawina inbelin hmuingîl takin sakawr chunga chuangin kal zêl ang che; Tichuan, i kut ding lamin thil râpthlâk takte a zirtîr dâwn che nia. 5 I thal chu a zum a, Lalber dotute thinlungah chuan a bûr reng a; Mi tin chu i hnuaiah an tlu ṭhîn. 6 Aw Pathian, i lalṭhutphah chu chatuanin a awm tûr a ni; Thlei bîk neih lohna lal tiang chu i ram lal tiang chu a ni. 7 Felna chu i ngaina a, suahsualna chu i huat kha; Chuvângin, Pathian, i Pathian chuan, i ṭhiante aia nasain hlimna hriak a thih tâk che hi. 8 I silhfên zawng zawng chu murra rim te, aloe rim te, thakthîng rim te a nam rum rum a; Sainghova siam lal intea ṭingṭang chi hrang hrang ri lo chhuakte chuan a tihlim che a nih hi. 9 I hmeichhe ṭhate zîngah chuan lalho fanute an tel ve a; I ding lamah chuan Ophir rangkachaka incheiin lalnu chu a ding a. 10 Aw ka fanu, ngaithla la, ngaihtuah la, beng chhi rawh; I mite leh i pa ina mite chu theihnghilh rawh; 11 Chutichuan, lalberin i hmêl ṭha tak hi a duh dâwn nia; Ani chu i LALPA a ni si a; tichuan, amah chu chibai bûk ṭhîn ang che. 12 Tura fanu chu thilpêk kengin chutah chuan a awm ang a; Mi zînga hausate ngei chuan i khawngaihna an ngên ang. 13 Lal in chhûnga lal fanu chu a ropui vêl vek a; A silhfên chu rangkachaka zeh mawi a ni. 14 Puan ṭhui mawi sinin lalber hnênah an hruai ang a; Amah zuitu, a ṭhian nulahote chu I hnênah an hruai ang. 15 Lâwm tak leh hlim takin an hruai ang a; Lalber inah chuan an lût ang. 16 I pate aiah i fate an awm ang a, Anni chu lei chung zawng zawngah hian mi lianah i siam ang. 17 I hming hi chhuan zawng zawngah hian hriat reng tûrin ka siam ang a; Tichuan, mi tinin kumkhaw tlaitluanin lâwm thu an hrilh ang che.
Hla Hruaitu tân; Sosanim-a sak tûr; Kora fapate Fakna Hla. Maskil. Hmangaihna Hla.
Lal inneih ni hla
1 Ka thinlung hi thil ṭhain a liam zawih zawih a; Lalber chungchâng thua ka thil phuah chu ka sawi dâwn e; Ka lei hi lehkha ziak thiam tak kawlawm a ni. 2 Mihring fate ai hian i hmêl a ṭha zâwk a; Khawngaihna hi i hmuiah leih a ni; Chuvângin, Pathianin kumkhua atân mal a sâwm che a ni. 3 Aw, mi chak, i khandaih chu i kâwngah vawng rawh, I ropuina leh i mawina nên. 4 Thutak leh thuhnuairawlhna leh felna avângin, I mawina inbelin hmuingîl takin sakawr chunga chuangin kal zêl ang che; Tichuan, i kut ding lamin thil râpthlâk takte a zirtîr dâwn che nia. 5 I thal chu a zum a, Lalber dotute thinlungah chuan a bûr reng a; Mi tin chu i hnuaiah an tlu ṭhîn. 6 Aw Pathian, i lalṭhutphah chu chatuanin a awm tûr a ni; Thlei bîk neih lohna lal tiang chu i ram lal tiang chu a ni. 7 Felna chu i ngaina a, suahsualna chu i huat kha; Chuvângin, Pathian, i Pathian chuan, i ṭhiante aia nasain hlimna hriak a thih tâk che hi. 8 I silhfên zawng zawng chu murra rim te, aloe rim te, thakthîng rim te a nam rum rum a; Sainghova siam lal intea ṭingṭang chi hrang hrang ri lo chhuakte chuan a tihlim che a nih hi. 9 I hmeichhe ṭhate zîngah chuan lalho fanute an tel ve a; I ding lamah chuan Ophir rangkachaka incheiin lalnu chu a ding a. 10 Aw ka fanu, ngaithla la, ngaihtuah la, beng chhi rawh; I mite leh i pa ina mite chu theihnghilh rawh; 11 Chutichuan, lalberin i hmêl ṭha tak hi a duh dâwn nia; Ani chu i LALPA a ni si a; tichuan, amah chu chibai bûk ṭhîn ang che. 12 Tura fanu chu thilpêk kengin chutah chuan a awm ang a; Mi zînga hausate ngei chuan i khawngaihna an ngên ang. 13 Lal in chhûnga lal fanu chu a ropui vêl vek a; A silhfên chu rangkachaka zeh mawi a ni. 14 Puan ṭhui mawi sinin lalber hnênah an hruai ang a; Amah zuitu, a ṭhian nulahote chu I hnênah an hruai ang. 15 Lâwm tak leh hlim takin an hruai ang a; Lalber inah chuan an lût ang. 16 I pate aiah i fate an awm ang a, Anni chu lei chung zawng zawngah hian mi lianah i siam ang. 17 I hming hi chhuan zawng zawngah hian hriat reng tûrin ka siam ang a; Tichuan, mi tinin kumkhaw tlaitluanin lâwm thu an hrilh ang che.
Hla Hruaitu tân; Kora fapate Fakna Hla; Alamoth-a sak tûr. Hla.
Pathian kan hnênah a awm
1 Pathian chu kan inhumhimna leh kan chakna, Mangan laia ṭanpui vartu hnai reng a ni. 2 Chuvângin, leilung hi lo danglamin, Tlângte hi tuifinriat chhûng daihah insawn mah sela, kan hlau lo vang; 3 A tuite chu ri hum humin phûl bulh bulh mah sela, A fâwn nasat avângin tlângte hi nghîng dur dur mah sela, kan hlau chuang hek lo vang. (Selah) 4 Lui pakhat a awm a, chumi pêngte chuan Pathian khawpui chu a tilâwm ṭhîn, Chungnungbera awmna hmun thianghlim chu. 5 Pathian chu a lai takah a awm a, a nghîng lo vang a; Pathianin khawfîngchah hunah chuan a ṭanpui ang. 6 Hnam tin an ri hum hum a, ramte chu a nghîng a; Ani chuan a aw a chhuah a, leilung hi a lo tui zo ta a. 7 Sipaihote LALPA chu kan hnênah a awm a; Jakoba Pathian chu kan kulhbîng sâng a ni. (Selah) 8 Hawh u, LALPA thiltihte hi en rawh u, Leilunga thil a tihchhiatziate hi. 9 Ani chuan indonate chu kâwlkil thlengin a tireh ṭhîn a; Thal ngul chu a titliak a, fei chu a sât bung ṭhîn a; Tawlailîrte chu meiah a rawh ral ṭhîn. 10 Ngawi ula, Pathian ka ni tih hi hre rawh u: Hnam tin zîngah chawimawiin ka awm ang a, leiah hian chawimawiin ka awm ang. 11 Sipaihote LALPA chu kan hnênah a awm a; Jakoba Pathian chu kan kulhbîng sâng a ni. (Selah)
Hla Hruaitu tân; Kora fapate Fakna Hla.
Rorêltu ropui ber
1 Aw, mi tinrêngte u, in kut bêng ula; Hlimna awin Pathian hnênah au rawh u. 2 LALPA Chungnungbera chu a hlauhawm si a; Lei chung zawng zawnga Lal ropui tak a ni. 3 Ani chuan mi tin chu kan hnuaiah a tudawl ang a, Hnam tin chu kan ke hnuaiah a tudawl bawk ang. 4 Ani chuan kan ro luah tûr chu min thlansak ang, A hmangaih Jakoba chhuan ber ram chu. (Selah) 5 Pathian chu au thâwm nên a chho va, LALPA chu tawtawrâwt ri nên a chho ta e, 6 Pathian fakin zai ula, fakin zai rawh u; Kan Lalber fakin zai ula, fakin zai rawh u. 7 Pathian chu khawvêl zawng zawng Lal a ni si a; Hre thiama fakin zai rawh u. 8 Pathian chu hnam tin chungah lalah a ṭhu a; Pathian chu a lalṭhutphah thianghlimah chuan a ṭhu a. 9 Abrahama Pathian mite ni tûrin, Mi tin zînga mi liante chu an awm khâwm a; Leilung phawte chu Pathian ta a ni si a; Ani chu nasa taka chawimawiin a awm.
Hla; Kora fapate Fakna Hla.
Zion, Pathian khawpui
1 LALPA chu a ropui a, nasa taka fak tûr a ni, Kan Pathian khawpuiah, a tlâng thianghlimah chuan. 2 A sânziaa mawi tak, khawvêl zawng zawng hlimna chu, Zion tlâng chu a ni, hmâr lam panga Lal ropui tak khawpui chu. 3 A lal inahte chuan Pathianin kulhbîng sâng a nih a inhriattîr a. 4 Ngai teh, lalte chu an inpun khâwm a, An lo kal a. 5 An hmu a; tichuan, mak an ti a; An mangang a, an kal bo ta thuai a. 6 Chutah chuan khurhnain a man a, Hmeichhe nau vei natna angin a man bawk a. 7 Khawchhak thlîin Tarsis lawng liante chu i tichhe ṭhîn a. 8 Sipaihote LALPA khawpuiah, kan Pathian khawpuiah chuan, Benga kan hriat ang ngeiin kan hmu ta: Pathianin chu khawpui chu kumkhua atân a tinghet ang. (Selah) 9 Aw Pathian, i biak in chhûngrilah chuan I ngilneihzia hi kan ngaihtuah tawh. 10 Aw Pathian, i hming ang ngeiin i fakna chu kâwlkil thlengin a awm a; I kut ding lam chu felnain a khat a ni. 11 I rorêlnate avângin Zion tlâng chu lâwm takin awm sela, Juda fanute chu hlim takin awm rawh se. 12 Zion chu vêlin kal hual ula; a râlvên in sângte pawh chhiar rawh u. 13 A kulhte chu chhinchhiah ngun ula, A lal inte chu ngaihtuah rawh u; Ṭhangthar lo awm lehte hnênah in hrilh theih nân. 14 He Pathian hi kumkhaw tlaitluana kan Pathian a ni dâwn si a: Thih thleng pawha min hruaitu a ni ang.
Hla Hruaitu tân; Kora fapate Fakna Hla.
Sum tama innghah âtthlâkzia
1 Mi tinrêngte u, hei hi ngaithla ula; Khawvêla awm zawng zawngte u, beng lo chhi rawh u, 2 Mi tê leh mi lian, Mi hausa leh mi rethei pawhin. 3 Ka kâ hian finna thu a sawi ang a; Ka thinlung ngaihtuah chu hriat thiamna thu a ni ang. 4 Tehkhin thu-ah ka beng ka chhî ang a; Ka thu ril sawi chu ṭingṭangin ka hrilhfiah ang. 5 Ni ṭha lovahte ka keartui bula khawlohna chuan mi hual vêl pawhin, Engah nge ka hlauh vang? 6 Mahni sum ringa, Mahni hausakna nasa tak chhuangtute chuan, 7 Tu mân an unau pawh an tlan thei tawp lo vang a, Pathian hnênah tlanna an pêksak thei hek lo vang 8 (An nun tlanna tûr chuan thil nasa tak sên tûr a ni a, Kumkhua pawha a tina tin loh mai tûr a ni): 9 A dam reng fo va, Ṭawihna a hmuh lohna tûr chuan. 10 Mi fingte pawh an thi a, Mi â leh mi mâwlte pawh an boral ve ve a, An sum mi dangte an hnutchhiah ṭhinte chu a hre si a. 11 An rilru ngaihtuah dân chu, An inte chu kumkhuaa awm tûr ang leh, An awmnate chu chhuan zawng zawng thlenga awm tûr angin a ni; An ramte chu anmahni hming vêk an puttîr ṭhîn. 12 Nimahsela, mihring hi chawimawiin an awm reng lo va; Sa boral ṭhînte ang mai hi an ni e. 13 Chûng an awm dân chu an âtna a ni; Nimahsela, an hnuah chuan miten an thusawite chu ṭha an ti ṭhîn. (Selah) 14 Berâm rual angin Seol tân ruat an ni a, Thihna chu an vêngtu a ni ang; Khua a vârin mi felten an chungah ro an rêl ang a; An taksa a ral ang a, Seol chu an chênna in tûr a ni. 15 Ka nunna erawh chu Pathianin Seol kut ata a tlan chhuak ang; Ani chuan mi lâwm dâwn si a. (Selah) 16 Mi tihhausaka a lo awma, A chhûngkaw ropuina chu a lo nasat tulh tulh pawhin, hlau suh ang che; 17 A thih hunah chuan eng mah a chhawm dâwn lo va; A ropuina chuan a zui thla dâwn si lo. 18 A dam laiin intiengthâwl mah sela (A hlawhtlin avângin miin fak ṭhîn mah se), 19 A thlahtute chhuan hnênah a kal ang; Eng tikah mah êng hmu tawh lo tûrte hnênah chuan. 20 Mihring, chawimawia awma, hriat thiamna nei si lo chu, Sa boral ṭhînte ang mai hi an ni.
Asapha Fakna Hla.
Pathian chibai bûk dân dik tak
1 Pathian, Pathian ngei, LALPA chuan thu a sawi a, Leilung hi ni chhuahna aṭanga a tlâkna thlengin a ko ta. 2 Mawi famkimna, Zion aṭang chuan, Pathian chu a êng chhuak ta a. 3 Kan Pathian chu a lo kal ang a, a ngawi reng lo vang: A hma lamah chuan mei a kâng hluah hluah ang a, A vêlah chuan thlipui nasa tak a tleh bawk ang. 4 A mite ro a rêl theihna tûrin Chung lam vânte leh lei hi a ko vang, 5 “Ka mi thianghlimte ka hnênah rawn hruai khâwm rawh u, Sa talha ka hnêna thu thlungtute chu,” tiin. 6 Tichuan, vânte khian a felna chu a tlangaupui ang, Amah Pathian ngei chu rorêltu a ni si a. (Selah) 7 “Aw ka mite u, ngaithla rawh u, thu ka sawi dâwn e; Aw Israel, ngaithla rawh, ka hriat fiahtîr dâwn a che: Kei hi Pathian, i Pathian ngei chu ka nih hi. 8 I inthawinate avângin ka zilhhau lo vang che; I hâlral thilhlante chu ka hmaah a awm chawt si a. 9 I in ata chu bâwngpa rêng rêng ka la chhuak lo vang a, I ran huang ata kêlpate pawh ka la chhuak hek lo vang. 10 Ramhnuaia sa tinrêngte hi ka ta a ni si a, Tlâng sângkhat lai chunga ran awmte pawh chu. 11 Tlânga sava zawng zawng ka hre vek a, Ramsate pawh hi ka ta a ni. 12 “Rilṭâm mah ila ka hrilh lo vang che; Leilung leh a chhûnga thil awm zawng zawng hi ka ta a ni si a. 13 Bâwngpa sa ka eiin kêl thisen ka in dâwn em ni? 14 Pathian hnênah lâwm thu sawi inthawina chu hlân zâwk la; I thutiam pawh Chungnungbera lakah hlen rawh. 15 Tin, mangan niah chuan mi ko la; Ka chhanhim ang che; tichuan, nangin mi chawimawi dâwn nia,” a ti a. 16 Mi suaksual hnênah erawh chuan Pathianin, “Ka thuruat hi engtiziaa hriattîra, Ka thuthlung hi engtiziaa i kâa lam ngun nge i nih? 17 Thunun i hua a, Ka thute hi hnung lamah i paih zêl si a. 18 Rûkru i hmuhin rem i tihpui a, Uirepate lah i kawppui bawk ṭhîn. 19 “I kâ hi sual i pe a, I lei hian bumna a siam bawk ṭhîn. 20 Ṭhu chungin i unau i sawisêl a; Mahni nute fapa ngei chu i hêk ṭhîn. 21 Chûng thil chu i ti a; nimahsela, ka ngawi reng a; Chutichuan, nangmah ang diakah mi ruat ṭhîn; Nimahsela, ka zilhhau ang chia, i mit hmuhah indawt zêlin ka tilang ang. 22 “Nangni Pathian theihnghilhtute u, hei hi ngaihtuah rawh u khai! Chuti lo chuan, ka pawt sawm dah ang che u, Nangmahni chhanhimtu rêng an awm dâwn si lo. 23 Tu pawh lâwm thu sawi inthawina hlân apiang chuan mi chawimawi ṭhîn a; Tin, a awm dân vawng ûptu hnênah chuan, Pathian chhandamna ka entîr ang,” a ti a.
Hla Hruaitu tân. Davida Fakna Hla; Bathsebi a pâwl hnua zâwlnei Nathana a hnêna a lo kal laia mi.
Ngaihdam dîlna
1 Aw Pathian, i ngilneih êm avângin mi khawngaih la; I lainatna nasat avângin ka bawhchhiatnate hi thai bo vang che. 2 Ka khawlohnate hi mi sil faisak var la, Ka sual hi mi tlen faisak ang che. 3 Ka bawhchhiatnate hi ka hre ta si a, Ka sual hi ka hmaah a awm fo ṭhîn a ni. 4 I chungah, i chung chauhvah thil ka tisual a, I mit hmuha thil sual chu ka lo ti ta a: Thu i sawiin thiam i chan theiha, Ro i rêlin sawisêl bo i nih theih nân. 5 Ngai teh, khawlohnaa dinin ka awm a; Ka nun sualin mi pai a. 6 Ngai teh, chhûngril lamahte hian takna i duh ṭhîn a; Tichuan, lang lo lamah hian finna mi hriattîr ang. 7 Husop-in mi tifai la; tichuan, ka fai ang. Mi sil fai la; tichuan, vûr aiin ka vâr ang. 8 Hlimna leh lâwmna chu bengin mi hriattîr ang che; I ruh tihtliahte hi a hlim theih nân. 9 Ka sualnate lakah hian i hmai thup la, Ka khawlohna zawng zawng hi thai bo vang che. 10 Aw Pathian, keimahah hian thinlung thianghlim tak siam la, Ka kawchhûngah hian thlarau dik tak siam thar leh ang che. 11 I hnên ata hi mi paih bo suh la; I thlarau thianghlim hi mi lâksak suh ang che. 12 I mi chhandam hlimna chu mi pe leh la, Thlarau tihnuamin mi chelh reng ang che. 13 Chutichuan, bawhchhetute chu i kawng chanchinte ka zirtîr ang a; Tichuan, mi sualte chu i lamah an hawi leh ang. 14 Aw Pathian, nang mi chhandamtu Pathian, thisen chhuahnate lakah mi chhanhim ang che; Tichuan, ka lei hian i felna thu hi hlim takin hlaah a sa ang. 15 Aw LALPA, nangin ka hmui hi hawng ang che; Tichuan, ka kâ hian i fakna chu a hriattîr dâwn nia. 16 Inthawina chungah lâwmna i nei si lo va, chuti ni suh sela chuan ka pe ang; Hâlral thilhlan chungah lungawina rêng i nei lo ve. 17 Pathian duh zâwng inthawinate chu thlarau lungchhia hi a ni. Aw Pathian, thinlung lungchhia leh inchhîr ngawih ngawih hi i hmusit lo vang. 18 I duh zâwng takin Zion chungah thil ṭha ti la; Jerusalem kulh chu rem ang che. 19 Chutichuan, felna inthawinate chungah lâwmna i nei tawh ang a, hâlral thilhlan leh hâlral pumhlan chungah chuan; Chutichuan, i maichâm chungah chuan bâwngpate an hlân tawh ang.
Hla Hruaitu tân. Davida Maskil: Edom mi Doegan Saula hnênah, “Davida chu Ahimeleka inah a kal,” tia a rawn hrilh laia mi.
Pathian rorêlna leh khawngaihna
1 Aw mi chak, engati nge thil tihsual i chhuan ni? Pathian ngilneihna chu a awm fo ṭhîn a ni. 2 I leiin thil sual tak tih a suangtuah ṭhîn; bakmeh chem hriam tak bum hmang ang hian. 3 Ṭha aiin sual i ngaina zâwk a; Felna thu sawi aiin dâwt thu sawi i ngaina zâwk bawk a. (Selah) 4 Aw, nang lei mi bum hmang, Thu mi lem zo thei zawng zawng chu i ngaina ṭhîn. 5 Pathianin kumkhua atân a tichhe ve ang che, A man ang chia, i awmna aṭangin a hnûk chhuak ang chia, Mi nung ram ata hi a pawt chhuak daih ang che. (Selah) 6 Mi felte pawhin an hmuin an hlau vang a; An nuihsan ang, 7 “En teh u, he mi hi a ni, Pathian a kulhbînga siam duh lova, A hausakna nasa tak ring zâwka, A sualnaa intichak vei chu ni,” tiin. 8 Kei erawh zawng Pathian ina olive thing chawr duah hluah ang ka ni; Pathian ngilneihna chu kumkhaw tlaitluanin ka ring ang. 9 Chu chu i tih avângin, kumkhuain lâwm thu ka hrilh fo vang che; I mi thianghlimte mit hmuhah chuan i hming chu ka nghâk reng ang, a ṭha si a.
Hla Hruaitu tân; Mahalath-a sak tûr. Davida Maskil.
Mihring sualzia
1 Mi â chuan a rilruin, “Pathian rêng a awm lo,” a ti ṭhîn a. An chhe zo va, thil sual tenawm tak an ti a; Tu mah thil ṭha ti rêng an awm lo. 2 Hre thiama Pathian zawng rêng rêng an awm emaw tih hre tûrin, Pathianin vân aṭangin mihring fate hi a zuk en a. 3 An kîr leh ta ṭheuh va, bawlhhlawh takin an lo awm ta vek a; Tu mah thil ṭha ti rêng an awm lo, pakhat mah an awm lo. 4 Thil tisualtute chuan hriat rêng rêng an nei lo vem ni? Chhang an ei angin ka mite an ei zo vek ṭhîn, Pathian lah an lam ngai hek lo. 5 Hlauhna rêng rêng awm lohnaah chuan hlau êm êmin an awm a; Pathianin beih tuma eptu che ruhte chu a tidarh ta si a; Pathianin anni chu a paihthlâk avângin i timualpho ta a. 6 Israel-ho chhandamna chu Zion aṭangin lo chhuak teh sela aw! Pathian chuan a mite sala an awm chu a hruai kîr leh hunah, Chumi hunah chuan Jakob-ho an hlim ang a, Israel-ho an lâwm ang.
Hla hruaitu tân; ṭingṭang chi hrang hranga sak mi. Davida Maskil: Ziph-hovin Saula hnênah, “Davida chu kan hnênah a biru a ni lâwm ni?” an rawn tih laia mi.
Hmêlma laka vênhim dîlna
1 Aw Pathian, i hmingin mi chhandam la, I chaknain ro mi rêl ang che. 2 Aw Pathian, ka ṭawngṭaina hi ngaithla la; Ka kâa thu chhuakahte hian beng lo chhi ang che. 3 Mikhualte chuan mi bei ta si a. Mi nunrâwngten ka nunna hi tihbo tumin an zawng bawk a; Pathian chu an hmaah an dah lo. (Selah) 4 Ngai teh, Pathian chu mi ṭanpuitu a ni a; LALPA chu ka nunna chelhtute zînga mi a ni. 5 Ani chuan sualna chu ka hmêlmate chûngah a thungrûl ang; Nangin anni chu i thutakna avâng chuan tiboral ang che. 6 Mahni duh thua thilhlanin i hnênah ka inthawi ang a; Aw LALPA, i hming chu ka fak ang, a ṭha si a. 7 Ka manganna zawng zawngah chuan mi chhanchhuak ta si a; Mi dotute chunga ka duhthusâm thleng chu ka mitin a hmu ta a ni.
Hla Hruaitu tân; ṭingṭang chi hrang hranga sak mi. Davida Maskil.
Ṭhianten an phatsan a, Pathian hnênah a ṭawngṭai
1 Aw Pathian, ka ṭawngṭainaah hian beng lo chhi la; Khawngaih ka dîlnaah hian inthup suh ang che. 2 Mi ngaithla la, mi chhâng ang che; Ka mangan thu avângin ka vân ruai a, ka rûm ṭhîn; 3 Dotu thâwm avâng te, Mi suaksual hnehchhiahna avâng tein. Anni chuan sualnain mi lum khumin, Thinurin mi tiduhdah si a. 4 Ka kawchhûngah hian ka thinlung a na êm êm a, Thih râpthlâknate chuan mi delh a. 5 Ṭihna leh khurhnain mi bawh a, Hlauhnain mi khuh zo ta. 6 Tichuan, “Aw, ṭhuro anga thla neih ka va duh êm! Chutichuan, ka thlâwk daih ang a, thlamuang takin ka awm ang. 7 Ngai teh, hla takah ka lêng ang a, Thlalêrah ka awm ang. (Selah) 8 Thli na tak leh thlipui hi Bîkna hmunah ka kalsan thuai tûr,” ka ti a. 9 Aw LALPA, an lei chu tichhiain tithlêr ang che, Khawpuiah chuan inpâwngnêkna leh innghirnghona ka hmu si a. 10 A chhûn a zânin khawpui chu kulh tlângah an vêl an vêl a: A chhûngah chuan sualna leh hrehawmna a awm bawk a. 11 Suahsualna a chhûngah a awm a; Bumna leh tihderna chuan a kawtlai chu a chhuahsan ngai lo. 12 Mi sawichhetu chu hmêlma a ni si lo va; Ni sela chu, ka tuar thei zâwk tûr. Ka chunga intiliana chu mi hawtu a ni hek lo; Ni sela chu, ka bihrûksan tûr: 13 Nimahsela, nang, ka mi anpui, Ka ṭhian, ka ṭhian kawmngeih i ni miau si a. 14 Kam thlum taka kan inbiakrâwn ṭhina, Mipui zînga Pathian biak ina kan lên ṭhin kha. 15 Thihna an chungah lo thleng thut sela, Khuarkhurumah chuan a nung chungin chhuk rawh se, Suahsualnate chu an awmnaah leh an kawchhûngahte a awm si a. 16 Kei zawngin Pathian ka ko vang a; Tichuan, LALPAN mi chhandam ang. 17 Tlaiah te, zîngah te, chhûnah te ka mangan thu ka sawiin, ka rûm ang a; Tichuan, anin ka aw a ngaithla ang. 18 Ka chunga mi beihna lakah chuan ka nunna hi thlamuang takin a chhanhim ta a, Mi beitute chu an tam si a. 19 Pathian, hmasâng chena awm renga chuan, A ngaithla ang a, anmahni a chhâng ang, (Selah) Danglamna nei ngai lo, Pathian ṭih ngai si lote chu. 20 Amah nêna inremte chungah chuan a kut a lek a; A thuthlung chu a tibawrhbâng ta a. 21 A kâ chu hnutetui khal angin a tlawr a, A thinlung erawh chu indona a ni si a; A thute chu hriak aiin a nâl a, Nimahsela, khandaih phawi sate a ni si a. 22 I rit phurh chu LALPA chungah nghat la; Tichuan, anin a tichak ang che; Mi fel chu eng tikah mah tihnghîn a phal lo vang. 23 Nimahsela, aw Pathian, nangin anni chu boralna khuarkhurumah chuan i chhuktîr ang; Thisena tuihâlte leh bum hmangte chu an dam chhûng chanve pawh an dam zo lo vang. Kei erawh chuan nang ka ring ang che.
Hla Hruaitu tân; Jonathelem rehokim-a sak tûr. Davida Fakna Hla: Miktam: Philistia-hovin Gath khuaa amah an man laia mi.
Pathian ring ṭawngṭaina
1 Aw Pathian, mi khawngaih ang che; mihringin mi lem zawh an tum si a; Nilêngin mi beiin mi hnehchhiah ṭhîn. 2 Ka hmêlmaten nilêngin mi lem zawh an tum a, Chapo taka mi beitute hi an tam si a. 3 Ka hlauh châng apiangin, Nangmah ka ring ang che. 4 Pathian ka ring a, a thu ka fak ang a, Pathian ka ring a, ka hlau lo vang; Tisa chuan eng nge mi tih theih ang? 5 Nilêngin ka thute an la kawi ṭhîn a; An ngaihtuahna zawng zawng chu ka ṭhat lohna tûr lam hlîr a ni. 6 An inkhâwm a, an biru a, Ka hniakte an chhinchhiah ṭhîn a, Ka nunna tihbo tuma an nghâk ṭhîn ang hian. 7 An sual hremna an pumpelh dâwn em ni? Aw Pathian, thinurin mi tin chu titlâwm ang che. 8 Nangin ka vahvaihnate hi i chhinchhiah ṭhîn a; Ka mittuite hi i savun pengah chuan thun ang che; I lehkhabuah a chuang hlawm lâwm ni? 9 Ka koh hun che ngei chuan mi dotute chu an tlânchhia ang; Hei hi ka hria, Pathianin mi ṭan hi. 10 Pathianah chuan a thu ka fak ang a, LALPA-ah chuan a thu ka fak ang. 11 Pathian ka ring a, ka hlau lo vang. Mihringin eng nge mi tih theih ang? 12 Aw Pathian, i hnênah thutiamte ka nei a; Lâwm thu sawi inthawinatein ka rûl ang che. 13 Ka nunna hi thihna lakah i chhanhim si a. Ka kete hi tlu lo tûrin i chhanhim a ni lâwm ni? Mi nung êngah hian Pathian hmaa ka lên theih nân.
Hla hruaitu tân; Al-tashheth-a sak tûr. Davida Fakna Hla, Miktam, Saula laka a tlân bo lai, pûka mi.
Ṭanpui dîlna
1 Aw Pathian, mi khawngaih rawh, mi khawngaih rawh; Ka nunna hi nangmahah chuan a tlu lût si a: A ni, i thla hnuai chu ka chuh ang, Vânduainate hi a kian hma loh chuan. 2 Pathian Chungnungbera chu ka au vang; Pathian, engkim mi tihsaktu chu. 3 Mi lem zawh tumtu chuan mi sawichhiat hunah, Ani chuan vân aṭangin a rawn tîr ang a, mi chhandam ang; (Selah) Pathianin a ngilneihna leh a thutak chu a rawn tîr chhuak ang. 4 Ka nunna hi sakeibaknei zîngah a awm a; Mihring kâng zîngah ka awm a, An hâte chu fei leh thal ang a ni a, An lei lah khandaih hriam tak ang. 5 Aw Pathian, nang chu vân khûm daih khian chawimawiin lo awm ang che; I ropuina chu leilung zawng zawng chungah hian lo awm rawh se. 6 Ka ke awh nân lên an phah a; Ka nunna hi a kun ngawih ngawih a; Ka hmaah khuarkhurum an lai a; Anmahni ngei a lai takah an tla ta a. (Selah) 7 Ka thinlung hi a nghet a ni, Aw Pathian, ka thinlung hi a nghet a ni; Hla ka sa ang, a ni, fakna hla ka sa ang. 8 Ka ropuina, harh rawh; perhkhuang leh ṭingṭangte u, harh rawh u: Kei chu zîng takah ka harh ang. 9 Aw LALPA, mi tin zîngahte lâwm thu ka hrilh ang che; Hnam tin zîngah nangmah fakin ka zai ang. 10 I ngilneihna chu vân tawng khawpin a nasa si a, I thutak chu vân dum tawng khawpin a nasa bawk a. 11 Aw Pathian, nang chu vân khûm daih khian chawimawiin lo awm ang che; I ropuina chu leilung zawng zawng chungah hian lo awm rawh se.
Hla Hruaitu tân; Al-tashheth-a sak tûr. Davida Fakna Hla, Miktam.
Mi sual hrem tûra ngenna
1 Felna thu chu ngawi rengin maw in sawi tak tak? Aw, mihring fate u, dik takin maw ro in rêl? 2 A ni, in thinlungah chuan thil sual tak in ti ṭhîn a; Leia in kuta thil râwng taka tih chu in bûk ṭhîn a. 3 Mi suaksualte chu an nu pum chhûng aṭang rêngin Pathian laka ṭhenin an awm a: An pian veleh dâwt thu sawiin an vâk bo ṭhîn. 4 An tûr chu rûl ang a ni a: Rûlrial bengngawng, a beng hup ṭhîn ang chu an ni; 5 Chu chuan rûl dawi ât thiamte aw chu a ngaithla ṭhîn lo, Eng anga thiam pawhin dawi mah sela. 6 Aw Pathian, an kâah chuan an hâte chu tibal la; Aw LALPA, sakeibaknei vânglaite ha lian pui puite chu kher chhuak ang che. 7 Anni chu tui chak taka luang angin tui ral sela; A thaltea tinin, sah chhum angin awm zêl rawh se. 8 Kawngkawrawi, tuia ral mai ṭhîn ang hi ni sela; A hun lova hmeichhe nau hrin, ni hmêl rêng rêng hmu lo ang hi ni rawh se. 9 In bêlte chuan hlîng thing lum a hriat hma pawhin ani chuan ṭhâwngaleivirin a la bo vang, A hring leh a kâng lai pawh. 10 Mi fel chuan phuba lâkna chu a hmuhin a lâwm ang a; Mi suaksual thisenah chuan a ke chu a sil ang. 11 Chutichuan, miten, “Mi fel tân chuan lâwmman a lo awm tak tak a; Leiah hian rorêltu Pathian a lo awm tak tak a nih hi,” an ti ang.
Hla Hruaitu tân; Al-tashheth-a sak tûr. Davida Fakna Hla, Miktam, Saulan mi a tirha, amah that tûra a ina an chân laia mi.
Himna dîla ṭawngṭaina
1 Aw ka Pathian, mi dotute lakah mi chhanhim la; Mi beitute lak ata hmun sângah mi hlâng ang che. 2 Thil tisualtute lakah mi chhanhim la, Thisen chhuah hmangte lakah mi chhandam ang che. 3 Aw LALPA, ka bawhchhiatna avâng ni lovin, ka sual avâng ni hek lovin, Ngai teh, ka nunna hi an châng reng si a, Mi chakte chu mi bei tûrin an pung khâwm a ni. 4 Ka sual loh pawhin an tlân a, an inbuatsaih a; Mi ṭanpui tûrin intiharh la, en rawh. 5 Aw LALPA, sipaihote Pathian, Israel-ho Pathian, Nangmah ngei chu hnam tinrêng tlawh tûrin tho la; Mi vervêk sual takte rêng rêng chu khawngaih suh ang che. (Selah) 6 Tlai lamah an lo kal leh a, ui angin an chiau chûl a, Khawpui chu an vêl an vêl a. 7 Ngai teh, an kâin an irh chhuak a; An hmuiah chuan khandaihte a awm a; “Tu nge hria awm ni?” an ti mai a. 8 Nimahsela, aw LALPA, nangin anni chu i nuihsan zâwk ang a; Hnam tinrêng chu i nuihzatbûr ang. 9 Aw mi tichaktu, ka nghâk reng ang che, Pathian chu ka kulhbîng sâng a ni si a. 10 Ka chunga ngilnei Pathian chuan mi hmuak ang a; Pathianin ka hmêlmate chungah ka duhthusâm chu mi hmuhtîr ang. 11 Anni chu that suh ang che; chuti lo chuan, ka miten an theihnghilh dah ang e; Aw LALPA, kan phaw ber, I thiltihtheihnain tidarh la, titlâwm ang che. 12 An ka sualna avâng leh an hmuia thu chhuak avângin, An chapona ngeiah chuan âwk rawh se, An thusawi ṭhin ânchhe lawhna leh dâwt thu avâng pawhin. 13 Anniho chu thinrimin tiboral la, an awm tawh lohna tûrin tiboral la; Pathianin Jakob-ho zîngah ro a rêl tih hre hlawm rawh se, Kâwlkil thlengin. (Selah) 14 Tin, tlai lamah lo kal leh sela, ui angin chiau chûl sela, Khawpui chu vêl vêl rawh se. 15 Anni chu ei tûr zawngin an vâk an vâk ang a, An tlai loh chuan an awm zankhua ang. 16 Nimahsela, kei chuan i chakna thu hi hlaah ka sa ang a; A ni, zîngah chuan i ngilneihna thu hi hlim takin hlaah ka sa ang; Nang chu ka kulhbîng sâng, Ka mangan nia ka inhumhimna i ni si ṭhîn a. 17 Aw mi tichaktu, nangmah fakin ka zai ang; Pathian chu ka kulhbîng sâng, ka chunga ngilnei Pathian chu a ni si a.
Hla Hruaitu tân; Susan Eduth-a sak tûr; Davida Miktam, zirtîr tûrin; ani chu Aram-naharaim-ho leh Aram-zoba-ho nên an inbei a; tin, Joaba a tîr a, Edom-ho sîngkhat leh sânghnih Chi Ruama a thah laia mi.
Chhanchhuah dîlna
1 Aw Pathian, nangin min thlauthla a, min tichhia a; I lo thinur ta a; aw, min tung ding leh ang che. 2 He ram hi i tikhûr a; i tikhi ta a; A kakte chu siam ṭha leh ang che; a nghîng a nghîng si a. 3 I mite hi thil khirh takte i tawhtîr a; Paina uain chu min intîr ta a. 4 Nangmah ṭihtute hnênah chuan puanzâr i pe ta a, Thutak avânga zâr a nih theih nân. (Selah) 5 I duh takte hi chhanhima an awm theih nân, I kut ding lamin chhandam la, min chhâng ang che. 6 Pathianin a thianghlimnaah chuan heti hian a sawi a: “Ka hlim ang a; Sekem khua chu ka sem ang a, Sukkoth ruam chu ka sem darh bawk ang. 7 Gilead ram chu ka ta a ni a, Manase ram pawh ka ta a ni; Ephraim ram pawh chu ka lu humhimna a ni a; Juda ram chu ka laltiang a ni. 8 Moab ram chu ka insilna bêl a ni a; Edom ramah chuan ka pheikhawk ka paih ang; Philistia ram, nang chu keimah avâng hian au ta che,” tiin. 9 Khawpui nghet takah chuan tuin nge mi hruai lût ang? Edom ramah chuan tuin nge mi hruai ang? 10 Aw Pathian, nangmah ngeiin min thlauthla a ni lâwm ni? Aw Pathian, kan sipaihote hnênah lah i chhuak ve ta si lo. 11 Dotute bei tûrin min ṭanpui ang che, Mihring ṭanpuina chu engmahlo mai mai a ni si a. 12 Pathian zârah huai takin kan ti ang, Ani chu min dotute rap bettu tûr a ni si a.
Hla Hruaitu tân; ṭingṭanga sak mi. Davida Fakna Hla.
Vênhim dîlna
1 Aw Pathian, ka au thâwm hi lo hria la; Ka ṭawngṭaina hi ngaithla ang che. 2 Ka thinlung a chauh laiin kâwlkil aṭang hian ka ko vang che; Lungpui ka aia sâng zâwkah chuan mi hruai ang che. 3 Nang chu ka tân inhumhimna, Dotute lakah râlvên in sâng nghet tak i ni si a. 4 I puan inah chuan kumkhuain ka awm ang a; I thla hnuai bihrûkna hmunah chuan ka tlu lût ang. (Selah) 5 Aw Pathian, nang chuan ka thutiamte i ngaithla si a; I hming ṭihtute ram luah chu mi pe a. 6 Lal dam chhûng hi i tisei ang a, A kumte chu chhuan tam tak tluk a ni ang. 7 Pathian hmaah kumkhuain a awm reng ang. Aw, amah humhim theihna tûrin ngilneihna leh thutak buatsaih ang che. 8 Chutichuan, ka thutiamte ni tin ka hlen theih nân, Kumkhuain i hming fakin ka zai ang.
Hla Hruaitu tân: Jeduthun dânin Davida Fakna Hla.
Pathian vên ngaihṭhatawmzia
1 Ka nunna hian Pathian chauh a nghâk a, Amah aṭang chuan ka chhandamna a lo chhuak dâwn a ni. 2 Amah chauh chu ka lungpui leh mi chhandamtu a ni; Ka kulhbîng sâng a ni a; nasa tak chuan ka nghîng lo vang. 3 Nangni zawng zawngin, tihlum tûrin, Lung bang âwn bei ang leh, pal tlu lek lek bei angin, Eng chen nge mi pakhat hi in beih dâwn? 4 A ropuina aṭanga nam thla tûr ngawtin an inrâwn a; Dâwt sawi hi an lâwm zâwng tak a ni. An kâin mal an sâwm a; nimahsela, an rilruin ânchhia an lawh si ṭhîn. (Selah) 5 Ka nunna, Pathian chauh nghâk rawh; Ka beiseina hi ama hnên aṭanga chhuak a ni si a. 6 Amah chauh chu ka lungpui leh ka chhandamna a ni; Ka kulhbîng sâng a ni a; ka nghîng lo vang. 7 Pathian hnênah ka chhandamna leh ka ropuina a awm a; Ka chakna lungpui leh ka inhumhimna chu Pathianah a awm. 8 Nangni mipuite u, eng lai pawhin amah chu ring ula; In thinlung chu a hmaah chuan leihbaw rawh u; Pathian chu kan tân inhumhimna a ni. (Selah) 9 Mi chi tête hi engmahlo mai an ni a, mi chi liante pawh hi dâwt mai an ni; Bûknaah chuan an kâng daih ang a; Engmahlo mai mai ai pawhin an zâng zâwk a ni. 10 Hnehchhiahna hi ring suh ula, Mi ram hman hi chhuanah neih hek suh ula; Hausaknate a lo pun chuan a chungah in thinlung chu nghat suh u. 11 Pathianin vawi khat a sawi a; E! Hei hi vawi hnih ka hre ta; Thiltihtheihna hi Pathian ta a ni, tih hi: 12 Aw LALPA, ngilneihna hi i ta bawk a ni: Mi tin an thiltih ang ṭheuhvin i rûl si ṭhîn a.
Davida Fakna Hla, Judai thlalêra a awm laia mi.
Pathian ngai nun
1 Aw Pathian, nang chu ka Pathian i ni a; zîng takah ka zawng ang che; Ram ro chau tak, tui awm lohnaah hian Ka nunna hi nangmah châkin a tuihâl a, ka tisa hian a ngai che a ni. 2 Chutiang bawkin hmun thianghlimah chuan ka en reng che kha, I thiltihtheihna leh i ropuina hmu tûrin. 3 I ngilneihna hi nunna aia a ṭhat zâwk avângin, Ka hmui hian a fak ang che. 4 Chutiang bawkin ka dam chhûng zawngin ka fak ang chia; I hmingin ka kutte ka phar ang. 5 Ka nunna hi thlîng leh thauva tlai angin a tlai ang a; Ka kâ hian hlim hmui puin a fak bawk ang che; 6 Ka khumlaizâwla ka hriat reng chia, Zâna i chungchâng thu ka suangtuah lai chuan. 7 Nang chu mi ṭanpuitu i ni si a, I thla hnuaiah chuan hlimin ka zai dâwn a ni. 8 Ka nunna hian a zui tlat chia; I kut ding lamin mi kai ṭhîn. 9 Ka nunna tihbo tuma zawngtute erawh chu lei hmun hnuaihnungahte chuan an lût ang. 10 Khandaih thiltihtheihna hnênah pêk an ni ang a; Sihalte chan an ni tawh ang. 11 Lal erawh chu Pathianah a hlim ang a; Amah chhâla chhechham apiang chuan an chhuang ang; Dâwt thu sawi hmang kâte chu hupin a awm dâwn si a.
Hla Hruaitu tân. Davida Fakna Hla.
Vênhim dîlna
1 Aw Pathian, ka mangan thu-ah hian ka aw hi lo hria la; Dotute hlauhawmna lakah hian ka nunna humhim ang che. 2 Thil ṭha lo titute inrâwn rûkna lakah mi thukru ang che, Thil tisualtute inhâwr khâwmho lakah chuan: 3-4 Chûngte chuan khandaih angin an lei an tât hriam a, Mi sawisêl bo chu hmun fianriala an kah theihna tûrin an thal, thu khâte chuan an tin a; Hlau lovin vawilehkhatah an kâp nghâl thut ṭhîn. 5 Thil sual tih kawngah an infuih a; Thang a rûka kam thu-ahte an inbe ṭhîn a; “Tuin nge chûng chu hmu ang?” an ti a. 6 Khawlohna an zawng chhuak ṭhîn a; “Ṭhahnemngai takin kan zawng zo ta,” an ti a; An chhûng lam ngaihtuahna leh thinlung chu thûk tak a ni ṭheuh nghâl a. 7 Nimahsela, Pathianin anmahni a kâp ang a; Vawilehkhatah thala hliamin an awm ang. 8 Chutiang chuan, anmahni lei ngei chuan anmahni a do avângin, tihpetekin an awm ang a; Anmahni hmu apiangin an lu an thing ang. 9 Tichuan, mi zawng zawngin an hlau vang a; Pathian hnathawh chu an hril ang a, A thiltih chu fing takin an ngaihtuah ang. 10 Mi felte chu LALPA-ah an lâwm ang a, amahah chuan rinna an nghat ang a; Thinlung dik tak pu zawng zawngte chuan an chhuang ang.
Hla Hruaitu tân. Fakna Hla. Davida Hla.
Fakna leh lâwm thu sawina
1 Aw Pathian, Zion-ah chuan faknain a nghâk reng a che; Thutiam chu i lakah hlen a ni ang. 2 Aw, ṭawngṭaina ngaithlatu, I hnênah tisa zawng zawng chu an lo kal ang. 3 Khawlohnate chuan mi hneh ṭhîn na a; Kan bawhchhiatnate zawng nangin i tlêng fai ang chu. 4 Mi, i biak in hung chhûng kawtlaiahte awm thei tûra i thlana, i kiang i pantîra chu a eng a thâwl e. I ṭhatna chuan kan tlai ang, I biak in hmun thianghlim ṭhatna chuan. 5 Aw, min chhandamtu Pathian, Thil râpthlâktein fel takin min chhâng ang; Nang kâwlkila mi zawng zawng leh, Tuifinriat chung hla taka awmte rina chu i ni; 6 Thiltihtheihnaa taia inhrênga, Mahni chaknaa tlângte tinghet ṭhîntu chu i ni; 7 Tuifinriat ri hum hum, a fâwn ri hum humte leh, Mi tin sa mur mur tireh ṭhîntu chu i ni. 8 Kâwlkil tâwpa awmte pawh chuan i hriattîrnate chu an hlau ṭhîn a; Zîng leh tlai chhuahnate chu hlimin i autîr ṭhîn. 9 Lei hi i kan a, tuiin i châwm a, Nasa takin i tiṭha ṭhîn; Pathian lui chu tuiin a khat a; Lei hi chutianga i buatsaih hnu chuan an tân buh i siamsak ṭhîn. 10 Lei hi a leileh rîn khawhna thlûrte chu tui tam takin i châwm a; A vûng thlûrte chu i timuk a; Ruahtuiin i tinêm a; A thil ṭote chu mal i sâwm ṭhîn a. 11 Kum chu i ṭhatna i khumtîr a; I kalna kawngte chu thil ṭhain a far ṭhîn. 12 Thlalêra ran tlatna hmunahte chuan a far a, Tlângte pawh chu hlimnaa phuar vêlin an awm a. 13 Ran tlatna hmunte chu ran rualin a dâpin a dâp a; Ruamte pawh chu buhin a tlim hmur a; Hlimin an au va, hla an sa bawk a.
Hla Hruaitu tân. Hla, Fakna Hla.
Fakna leh lâwm thu sawina hla
1 Leilung luah zawng zawngte u, Pathian chawimawiin hlim takin au rawh u. 2 A hming ropuizia chu hlain sa chhuak ula; A fakna chu tiropui rawh u. 3 Pathian hnênah, “I thiltihte chu a va râpthlâk êm! I thiltihtheihna ropui nasatzia avângin nangmah dotute chu i hnênah an intulût ang. 4 Leilung luah zawng zawng hian chibai an bûk ang chia, Nangmah fakin an zai ang a; I hming fakin an zai ang,” ti rawh u. (Selah) 5 Hawh u, Pathian thiltihte hi en rawh u; Mihring fate chunga a thiltihah hian a hlauhawm a ni. 6 Ani chuan tuifinriat kha lei rovah a chantîr a; Luipui kha kein an kal kai a. Chutah chuan amahah kan hlim a. 7 A thiltihtheihna chuan kumkhuain ro a rêl a; A mitin hnam tin a en ṭhîn; Hel hmangte chu inchawimawi suh se. (Selah) 8 Aw, mi tinte u, kan Pathian chu fak ula, Amah fakna thâwm chu hriattîr rawh u. 9 Ani chuan kan nunna hi a tinung reng a, Kan kete hi tihsawn a phal lo. 10 Aw Pathian, nangin min fiah a; Tangkaraw fiah angin min fiah a. 11 Nangin lênah min hruai lût a; Kan kâwngah hian phur rit tak i nghat a. 12 Mihringte chu tawlailîr chunga chuangin, kan lu chungah i kaltîr a; Mei leh tui kan kal tlang a; Nimahsela, hmun chênghnâwng taka lût tûrin min hruai chhuak a ni. 13 Hâlral thilhlante nên i inah ka lût ang a, Ka thutiamte chu i lakah ka hlen ang, 14 Ka hmuiin a sawia, Manganga ka awm laia ka kâin a sawite chu. 15 Sa thau tak hâlral thilhlante i hnênah ka hlân ang a, Berâmpa hâl rimtui nên; Bâwngpate, kêlte nên ka hlân ang. (Selah) 16 Hawh u, Pathian ṭih zawng zawngte u, ngaithla rawh u; Tichuan, ka nunna tâna a thiltih chu ka hriattîr ang che u. 17 Ani chu ka kâin ka au va, Ka leia chawimawiin a awm a. 18 Ka thinlunga sualna ka ngaihsak chuan, LALPAN mi ngaithla lo vang. 19 Nimahsela, Pathianin mi ngaithla tak tak a; Ka ṭawngṭaina thâwm chu a bengkhawn a ni. 20 Pathian-ka ṭawngṭaina hlawhchhamtîr lova, ka laka a ngilneih bâng hek lova chu, Fakin awm rawh se.
Hla Hruaitu tân; ṭingṭang chi hrang hranga sak mi. Fakna Hla, Hla.
Lâwm thu sawina hla
1 Pathianin min khawngaih sela, mal min sâwm sela, A hmêl chu kan chungah rawn êntîr rawh se; (Selah) 2 I kawng chu lei chunga mi hriat a nih theiha, I chhandamna chu hnam tinrêng zîngah hriat a nih theih nân. 3 Aw Pathian, mi tinin fak che rawh se; Mi tinrêngte chuan fak che rawh se. 4 Aw, hnam tin chu lâwm taka awmin, hlimin zai rawh se! Nangin mi tin chu thlei bîk nei lova ro rêlsakin, Lei chunga hnam tin chu i awp dâwn si a. (Selah) 5 Aw Pathian, mi tinin fak che rawh se; Mi tinrêngte chuan fak che rawh se. 6 Lei hian a thil ṭo chu a pe a; Pathian-keimahni Pathian ngei chuan mal min sâwm ang. 7 Pathianin mal min sâwm ang a; Kâwlkila mi zawng zawng pawhin amah an ṭih ang.
Hla Hruaitu tân. Davida Fakna Hla, Hla.
Hmêlma hnehna hla
1 Pathian chu tho sela, a dote chu tihdarhin awm sela; Amah hawtute pawh chu a hmaah tlânchhe rawh se. 2 Meikhu hi len bova a awm angin, anni chu lên bo vang che; Khawihnûn hi mei luma a tui ral angin, Mi suaksualte chu Pathian hmaah boral rawh se. 3 Mi felte erawh chu lâwm takin awm sela; Pathian hmaah hlim rawh se; A ni, lâwm takin hlim rawh se. 4 Pathian chawimawiin hla sa ula, a hming fakin zai rawh u; Tawlailîra thlalêrte kaltlang tûra tân chuan lamlian sial rawh u; A hming chu JAA a ni a, a hmaah chuan hlim rawh u. 5 Pathian, a awmna thianghlima awm chu, Pa nei lote pa leh hmeithaite ngaihtuahtu a ni. 6 Pathian chuan mi malte chu chhûngkaw zîngahte a teltîr ṭhîn a; Mi tângho chu a hruai chhuak a, vânneihnaah a hruai lût ṭhîn; Hel hmangte erawh chu ram rovah an awm ṭhîn. 7 Aw Pathian, i mite hma hruaia i lo chhuaha, Thlalêra i kaltlang lai khân, (Selah) 8 Lei hi a nghîng dur dur a, Vânte pawh khi Pathian hmaah chuan a far a; Sinai tlâng meuh pawh saw Pathian hmaah, Israel-ho Pathian hmaah chuan a nghîn dur dur kha. 9 Aw Pathian, nang chuan ruah tam tak i sûrtîr a, I ro chan chu a chauh lai khân i tinghet a. 10 I hote chuan chutah chuan awmhmun an khuar a; Aw Pathian, nang chuan i ṭhatnain retheite tân i buatsaih a. 11 LALPAN thu chu a pe ṭhîn a, Chanchin hriltu hmeichhe tam takin an hril darh a. 12 Sipaiho lalte chu an tlânchhia an tlânchhia a; In nghâktunu chuan râllâk sum chu a sem a. 13 Ṭhuro thla tangkaruaa tuama, A thla hmâwr pawh rangkachak enga tuam angin berâm huang kârahte i mu dâwn em ni? 14 Engkimtitheian chutah chuan lalte a tihdarh lai chu, Zalmon tlânga vûr sûr lai ang a ni. 15 Basan tlâng chu Pathian tlâng a ni a; Basan tlâng chu tlâng sâng tak a ni. 16 Tlâng sâng takte u, Pathianin a awmna tûra a tlâng duh chu engah nge îtsîka in melh ni? A ni, LALPA chu chutah chuan kumkhuain a awm reng dâwn asin. 17 Pathian tawlailîr chu a sînga sîng, a sânga sâng tam tak a ni; LALPA chu Sinai tlânga a awm ang khân, chûng zîngah chuan hmun thianghlimah a awm ta. 18 Nang chu chung lamah i chho va, i mante chu salah i hruai a; Mihringte zîngah thilpêkte i dawng a, A ni, hel hmangte zîngah pawh; LALPA Pathian chu an hnêna a awm theih nân. 19 LALPA, kan phur ni tina min phurhsaktu, Min chhandamtu Pathian chu, fakin awm rawh se. (Selah) 20 Pathian chu kan tân chhanhimtu Pathian a ni; Thihna ata chhuahnate chu LALPA JEHOVA ta a ni bawk. 21 Nimahsela, Pathianin amah dotute lu chu a sât phel phawk ang, A thiam lohnaa la kal zêla lu vun sam buk tak chu. 22 LALPAN, “Basan ram aṭangin ka hruai leh ang a, Tuifinriat mawng thûk tak ata chu ka hruai leh ang. 23 I ke chu thisena i hnim theiha, I ui leite chuan i dote laka chan a neih theih nân,” a ti a. 24 Aw Pathian, i kal laite an hmu a, Ka Pathian, ka Lalber hmun thianghlima kal laite chu. 25 Nula khuangte bêngho laiah chuan, Hla satute an kal hmasa a, englo tumtute chuan an zui a. 26 Inkhâwmnaahte hian Pathian fak ula, Israela tuihnaa chhuakte u, LALPA chu fak rawh u. 27 Fa tlum Benjamin-hovin hma hruaiin, Juda-ho mi liante leh an upahote, Zebulun-ho mi liante, Naphtali-ho mi lianten an zui a. 28 I Pathian chuan i thiltihtheihna chu thu a pe a: Aw Pathian, kan tân thil min tihsak chu tichak ang che. 29 Jerusalem-a i biak in avângin Lalhovin lâwmmante an la rawn kensak ang che. 30 Sakawlh, phairuang zînga chêng chu zilh la, Hnam dang, bâwngchal leh bâwngno rualte chu zilh la, Kûna an tangkate i hmaa an hlan hma chu; Indo châk mite chu tidarh rawh. 31 Aigupta ram aṭangin mi liante an lo chhuak ang a; Ethiopia-ho chu Pathian lama an kut phar tûrin an hmanhmawh ang. 32 Leilung ramte u, Pathian chawimawiin hla sa ula; Aw, LALPA fakin zai rawh u; (Selah) 33 Vânte vân hmasânga awmte chunga chuanga chu; Ngai teh, a aw a chhuah e, aw nasa tak mai chu. 34 Pathian hnênah chuan chakna pe rawh u: A ropuina chu Israel-ho chungah a awm a, A chakna chu vân dumahte khian a awm. 35 Aw Pathian, i hmun thianghlim aṭangte chuan i hlauhawm a ni. Amah Israel-ho Pathian ngei chuan a mite hnênah chakna leh thiltihtheihna a pe ṭhîn a ni. Pathian chu fakin awm rawh se.
Hla Hruaitu tân; Sosanim-a sak tûr. Davida Fakna Hla.
Ṭanpui dîlna
1 Aw Pathian, mi chhandam ang che; Tuite chu ka nunna thleng hian a lût ta si a. 2 Chirhdûp thûk tak, rahchhan rêng rêng awm lohnaah ka pil tual tual hi; Tui thûk tak, tui lian mi chîm pilnaahte ka lo luh tâk hi. 3 Ka auna lamah ka chau va; ka dang a ro zo va; Ka Pathian ka nghahnaah hian ka mit a vai zo ta. 4 Enga khaw lawilova mi hawtute chu ka samzai aiin an tam a; Dik lo taka mi dova mi tihboral tumte chu mi chak tak an ni: Ka lâk si loh pawh mi rulhtîr a. 5 Aw Pathian, nang chuan ka âtzia hi i hria a; Ka thiam lohnate pawh hi i lakah thup a ni lo. 6 Aw LALPA, sipaihote Pathian, nangmah nghâktute chu keimah avângin mualpho suh sela; Aw Israel-ho Pathian, nangmah zawngtute chu keimah avângin tihzahin awm suh se. 7 Nangmah avânga sawichhiat ka tuar avângin, Zahnain ka hmai a khuh zo ta. 8 Ka unaute lakah mikhual ka lo ni ta a, Ka nu fate lakah hriat ngai loh mi ka lo ni ta. 9 I ina ka ṭhahnemngaihnain mi ei zo va; Nangmah sawichhetute sawichhiatnate chu ka chungah a tla ta. 10 Ka ṭaha, chaw nghei chunga ka nunna ka thunun leh, Chu chu mi sawichhiatna a lo ni a. 11 Ka silhfêna saiip ka hman leh, An tân chhe lama tehkhinna ka lo ni zêl a. 12 Kulh kawngkâa ṭhute chuan ka chungchâng thu an sawi a; Zu ruih hmangte hla ka nih hi. 13 Nimahsela, aw LALPA, kei zawng hun lâwmawmah i hnênah a ni ka ṭawngṭai ni; Aw Pathian, i ngilneihna nasa tak avângin i chhandamna thutakin mi chhâng ang che. 14 Chirhdûp ata hi mi chhanhim la, mi piltîr lul suh ang che: Mi hawtute lakah leh tui thûk tak ata hi chhanhimin mi awmtîr ang che. 15 Tui lianin mi chîm pil suh sela, Tui thûk takin mi lem hek suh se; Khuarkhurum pawhin a kâ mi chîp hnan suh se. 16 Aw LALPA, mi chhâng ang che; i ngilneihna chu a ṭha si a; I lainatna nasatzia ang zêlin ka lam hi lo hawi ang che. 17 I chhiahhlawh lakah hian i hmai pawh thup suh ang che; Ka mangang si a, mi chhâng thuai ang che. 18 Ka nunna hi rawn hnaihin, tlan la; Mi dotute avâng hian mi chhanhim ang che. 19 Nangin mi min sawichhiatna te, ka mualphona te, ka zahna te hi i hria e; Mi dotute chu i hmaah an awm vek a ni. 20 Mi min sawichhiatna hian ka lung a tichhia a; nasa takin ka lungngai bawk a; Tichuan, mi khawngaihtu tûr ka zawng a; nimahsela, tu mah an awm si lo va; Mi thlamuantu tûrte ka zawng bawk a; nimahsela, tu mah ka hmu si lo. 21 Ka chaw atân englo khâ mi pe a; Ka tuihâl lahin in atân uain thûr mi pe a. 22 An hmaa an dawhkân chu thang lo ni sela; Thlamuang taka an awm laiin fal lo ni rawh se. 23 An mitte chu, an hmuh theih loh nân tihthimin awm rawh se; An kâwngte chu tikhûr fo vang che. 24 I lungnih loh êm êmna chu an chungah leihbua la, I thinurna nasa tak chuan anni chu man rawh se. 25 An awmna chu lo ram sela; An puan inahte chuan tu mah awm suh se. 26 I vuaka chu an tiduhdah a, I hliamate lungngaihzia chu an sawi si ṭhîn a. 27 An khawlohna chu khawlohnain belhchhah la; Anni chu i felnaah chuan lût suh se. 28 Anni chu nunna bu ata thai bovin awm sela, Mi felte zîngah chuan ziak ni ve suh se. 29 Nimahsela, kei chu rethei tak leh lungngai tak ka ni a; Aw Pathian, i chhandamna chuan hmun sângah mi dah rawh se. 30 Pathian hming chu hlain ka fak ang a, Lâwm thu sawiin amah chu ka chawimawi ang. 31 Chutiang chuan bâwngchal emaw, ki leh tin nei bâwngpa emaw ai chuan, LALPA a tilawm zawk ang. Chutiang chuan LALPA a tilâwm zâwk ang. 32 Thuhnuairawlhte chuan chu chu an hmu a, an lâwm a; Nangni Pathian zawngte u, in thinlung chu nungin awm rawh se. 33 LALPAN pachhiate chu ngaithlain, A mi tângte chu a hmusit si lo va. 34 Lei leh vân chuan amah chu fak rawh se, Tuifinriatte leh a chhûnga thil che thei tawh phawtte nên. 35 Pathianin Zion chu chhanchhuakin, Juda khuate chu a din dâwn si a; Tichuan, chutah chuan an awm ang a, an nei nghâl ang. 36 A chhiahhlawhho thlahte pawh chuan an rochung ang a; A hming ngainatute chu a chhûngah an awm ang.
Hla Hruaitu tân. Davida Fakna Hla; hriat rengna tûrin.
Mangang ṭawngṭaina
1 Aw Pathian, mi chhanhim tûrin hmanhmawh la; Aw LALPA, mi ṭanpui tûrin hmanhmawh ang che. 2 Ka nunna tihbo tuma zawngtute chu, Mualpho tak leh zak takin awm sela; Ka chhiatna chunga lâwmte chu tlânchhiattîrin tihzahin awm rawh se. 3 “Chei! Chei!” titute chu an mualpho avângin tlânchhiattîrin awm rawh se. 4 A zawngtu che zawng zawng chu nangmahah chuan hlim tak leh lâwm takin awm sela; I chhandamna ngainatute chuan, “Pathian chu chawimawiin awm rawh se,” ti fo rawh se. 5 Nimahsela, kei chu rethei leh pachhe tak ka ni a; Aw Pathian, ka hnênah lo kal thuai ang che! Nang chu mi ṭanpuitu leh mi chhanhimtu i ni a; Aw LALPA, rei rial lul suh ang che.
Solomona Fakna Hla.
Lal tâna dîlna
1 Aw Pathian, i rorêlnate chu lal pe la, I felna chu lal fapa pe ang che. 2 I mite chu felnain ro a rêlsak ang a, I mi retheite chu rorêlna felin ro a rêlsak ang. 3 Tlâng lian leh tlâng tête hian felnain mite hnênah thlamuanna an rawn thlen ang. 4 Ani chuan mi zînga retheite chu ro a rêlsak ang a, Pachhe fate chu a chhandam ang a, Hnehchhiahtu erawh chu a tisawm ang. 5 Ni khi a awm chhûng chuan an hlau vang che, Thla awm chhûng zawng pawhin, chhuan awm chhûng zawng zawng chuan. 6 Ani chu hlobet râwt chunga ruah angin a tla ang a; Lei châwmtu ruahtui ang maiin. 7 A dam lai chuan mi felte chu an duah hluah hluah ang a, Thlamuanna nasa tak chu a duah hluah hluah bawk ang, thla awm loh hma loh chuan. 8 Ani chuan tuifinriat aṭanga tuifinriat dang thleng pawhin thu a nei bawk ang, Luipui aṭanga kâwlkil thleng pawhin. 9 Thlalêra awmte chu a hmaah an kûn ang a; Amah dotute pawh chuan vaivut an liak ang. 10 Tarsis ram leh thliarkâra lalten lâwmman an rawn keng ang a; Seba leh Seba ram lalten thilpêkte an rawn hlân ang. 11 A ni, lal zawng zawng chu a hmaah an bawkkhup ang a; Hnam tinrêngin a rawng an bâwl ang. 12 Pachhiain a auhvin ani chuan a chhanhim ang a, Mi rethei, ṭanpuitu nei lo pawh chu a chhanhim ang. 13 Mi rethei leh pachhiate chu a khawngaih ang a, Pachhiate nunna chu a chhandam ang. 14 An nunna chu hnehchhiahna leh nunrâwnna lak ata a tlan ang a, An thisen chu ani ngaih chuan hlu tak a ni dâwn si a. 15 Tin, an nung ang a, Seba ram rangkachak chu amah pêk a ni ang a; Miten ani chu an ṭawngṭaisak fo vang a, Nilêngin mal an sâwmsak ang. 16 Leiah, tlâng chungahte hian buh tam tak a awm ang a; A vui chu Lebanon angin a nghîng suau suau vang a, Khuaa mite chu lei hlobet angin an duah hluah hluah ang. 17 A hming chu kumkhuain a dai lo vang a; A hming chu ni a awm chhûng chuan dai lovin a awm zêl ang. Mite chu amahah chuan malsâwmin an awm ang a; Hnam tinrêngin amah chu nihlawh an ti ang. 18 LALPA Pathian, Israel-ho Pathian chu fakin awm rawh se, Amah chauh hian thil mak a ti ṭhîn. 19 A hming ropui tak hi kumkhuain fakin awm bawk sela; Lei pum pui pawh hi a ropuinaa tihkhahin awm rawh se. Amen! Amen! 20 Jesaia fapa Davida ṭawngṭainate chu a tâwp ta.
Asapha Fakna Hla.
Pathian dikzia
1 Pathian chu Israel-ho chungah a lo ṭha ngei mai, Thinlunga thianghlimte chungah chuan. 2 Nimahsela, kei zawngin ka rap pelh ṭhelh ṭhelh a; Ka ke pênte hi a tleu lek lek a ni. 3 Mi suaksualte vânneihzia ka hmuh hian, Mi uangthuangte chu ka awt si a. 4 An thih lai chuan tuarna rêng an nei lo va; An chakna chu a nghet zâwk mah si a. 5 Mi dang anga hrehawmin an awm lo va; Mi dang anga sawisakin an awm hek lo. 6 Chuvângin, chapona chuan khaidiat angin an nghâwng a vêl a; Nunrâwnna chuan silhfên angin a tuam a. 7 Thau avângin an mit a pâwng a; Thinlunga duhthusâm aia nasa an nei a. 8 An nuihsan a, sual takin hnehchhiahna thu an sawi a; Chapo takin an ṭawng ṭhîn a. 9 An kâ chu vânahte khian an dah a, An lei chuan leilung hi a fang tlang ṭhîn a. 10 Chuvângin, a mite chu chutah chuan an kîr leh a, Nova tui khat chu anmahni in fai kêlhin a awm a. 11 “Pathianin engtin nge a hriat ang? Chungnungberan a hre chhuak ang em ni?” an ti a. 12 En teh, hêngho hi mi suaksualte an nih hi; Nuamsa taka awm fovin an hausa deuh deuh ṭhîn. 13 A thlâwn maiin a ni ka thinlung hi ka tihfaia, Ka kutte hi sawisêl bonaa ka sil ni. 14 Nilêngin sawisakin ka awm a, Tûk tin zilhhauvin ka awm si a. 15 “Chutiang chuan ka sawi ang,” lo ti ta ila; Ngai teh, i fateho chhuan chungah vervêk taka ti ka lo ni ang. 16 Chu chu ka hriat theihna tûrzia ka ngaihtuahin, Ka tân a har lutuk a ni; 17 Pathian hmun thianghlimah ka luha, An tâwpna tûr chu ka ngaihtuah hma chuan. 18 Anni chu hmun nâl takahte i dah ngei a; Chhiatnaahte i paihthla ṭhîn a. 19 Engtizia nge mit khap kâr chauhva an ṭiau tâk ni aw! Thil râpthlâk taktea tihboral daihin an awm ta a nih hi. 20 Miin men hnua mumang an ngainêp angin, Aw LALPA, i harh hunin anmahni lem pawh chu i ngainêp ang. 21 Ka thinlung hi a lungngai a, Ka rilruah pawh chhun angin ka awm si a; 22 Mi mâwl leh eng mah hre lo ka ni a, I lakah chuan sa ang mai ka nih hial ṭhin kha. 23 Nimahsela, i hnênah ka awm fo va; Ka kut ding lam hi i lo chelh ṭhîn a. 24 Nangin i remruatnain mi hruai ang a, Chumi hnuah chuan ropuinaah khian mi lâwm ang. 25 Vânah khian nang lo chu tu nge ka neih? Leiah pawh hian nang lo chu ka duh tu mah an awm lo. 26 Ka tisa leh ka thinlung hi a chau ta a; Nimahsela, Pathian chu kumkhuaa ka thinlung chakna tûr leh ka chanvo tûr a ni. 27 Ngai teh, nangmah hlata awmte chu an boral dâwn si a; A uiresantu apiang che chu i tiboral ta a. 28 Keia tân erawh zawng Pathian hnaih hi a ṭha a ni; LALPA Pathian chu ka inhumhimnaah ka hmang a, I hnathawh zawng zawng thu chu ka hrilh theih nân.
Asapha Maskil.
Hnam chhan tûra dîlna
1 Aw Pathian, engati nge kumkhua atân min thlauhthlâk le? Engati nge i ran tlatna hmuna berâmte chungah hian i thinur a khûk le? 2 I mite inkhâwmho, hmasanga i lei, Hnam, i ro atân i tlan kha, hre reng ang che; I awm ṭhinna Zion tlâng nên. 3 Chhe let dêr tawh chu han fang teh, Dotuten hmun thianghlimah chuan thil sual tinrêng an tih tâk hi. 4 Nangmah dotute chu i mite inkhâwmho zingah an haw haw dur dur a; An chhinchhiahnate chu chhinchhiahna tûrin an târ ta a. 5 Mi, ngaw bing thing hreipuia tinte angin an lang. 6 Tûnah chuan a thil ker mawi zawng zawng chu hreitê leh tubohtein an tichhe hlawm a. 7 I hmun thianghlim chu an hâl a; I hming awmna chu titlusawpin an tibawrhbâng a. 8 An rilruah chuan, “I tichhe vek hlawm ang u,” an ti a; He rama Pathian inkhâwmna in zawng zawng hi an hâl chhe zo ta. 9 Kan chhinchhiahnate chu kan hmu ta lo va; Zâwlnei rêng rêng an awm ta lo va; A rei tûr chin hria rêng rêng kan zîngah an awm hek lo. 10 Aw Pathian, dotu chuan eng chen nge a sawichhiat dâwn che? Hmêlma chuan i hming hi kumkhuain a sawichhe dâwn em ni? 11 Engati nge i kut, i kut ding lam kha i lâk tâk le? Phawrh chhuak leh la, anniho chu tiboral rawh. 12 Nimahsela, Pathian chu hmasâng chena ka Lal a ni, Lei lai taka chhandamna siam ṭhîntu chu. 13 Nang chuan i chaknain tuifinriat kha i tiṭhen a; Nang chuan tuia dragon-ho lute chu i tikeh a. 14 Nang chuan leviathan lute chu i tikeh sawm a, Ani chu thlalêra mi awmte hnênah chuan chaw atân i pe a. 15 Nang chuan tuihna leh tui lian chu i sah huk a; Nang chuan lui lian tak takte i tikang a. 16 Chhûn hi i ta a ni a, zân pawh i ta a ni; Nangin êntu leh ni khi i buatsaih a. 17 Nangin leilung ramri zawng zawng chu i kham vek a; Nangin nipui leh thlasik hi i siam a. 18 Aw LALPA, hei hi hre reng ang che, dotu chuan a sawichhiat chia, Hnam â tak chuan i hming an sawichhiat kha. 19 Aw, i ṭhuro nunna hi ram sakawlh hnênah chuan pe lul suh la; I mi retheite nunna hi kumkhua chuan theihnghilh suh ang che. 20 Thuthlung kha rawn pawisa ang che; Lei hmun thim laite chu nunrâwnna awmnain a khat si a. 21 Aw, hnehchhiahna tuarte chu mualphovin kîr suh sela; Rethei leh pachhiate chuan i hming fak rawh se. 22 Aw Pathian, tho la, nangma thu chu insawi chawp la; Mi â chuan nilênga a sawichhiatna che chu hre reng ang che. 23 Nangmah dotute thâwm chu theihnghilh suh ang che; Nangmah beitute sa mur mur chu a chho fo ṭhîn a ni.
Hla Hruaitu tân, Al-tashheth-a sak tûr. Asapha Fakna Hla, Hla.
Rorêltu Pathian
1 Aw Pathian, lâwm thu kan hrilh a che; Lâwm thu kan hrilh a che, i hming a hnai si a; Miten i thil mak tih thute chu an hril ṭhîn. 2 Hun ruat chu ka hmuh hunah chuan dik takin ro ka rêl ang. 3 Lei leh a chunga awm zawng zawngte chu an tui ral zo ta; Keiin a bante chu ka phun a ni. (Selah) 4 Mi uangthuangte hnênah chuan, “Uangthuang takin awm suh u,” ka ti a: Mi suaksualte hnênah, “In ki tisâng suh u,” ka ti bawk a. 5 In ki chu chung lamah tisâng suh ula; Ring khawng chungin ṭawng suh u. 6 Tihsânna chu chhak lam ata a ni lo va, thlang lam ata a ni hek lo. Chhim lam ata lah a ni hek lo. 7 Pathian chu rorêltu a ni zâwk: Ani chuan pakhat a titlâwm a, pakhat a tisâng ṭhîn. 8 LALPA kutah chuan no a awm si a, a uain chu a phûl a; Thil dang nêna chawhpawlhin a khat a, chuta mi chu a bun chhuak a; Matheilovin a nawite nên lam leia mi suaksual zawng zawngte chuan an in fai kêlh ang. 9 Nimahsela, kei chuan kumkhuain ka hriattîr ang a, Jakoba Pathian fakin ka zai ang. 10 Mi suaksualte ki zawng zawng pawh ka tansak ang a; Mi felte ki erawh chu tihsânin a awm ang.
Hla Hruaitu tân; ṭingṭang chi hrang hranga sak mi. Asapha Fakna Hla, Hla.
Hnehtu Pathian
1 Juda-ho zîngah chuan Pathian chu hriatin a awm a; Israel-ho zîngah chuan a hming chu a ropui a ni. 2 Salem-ah chuan a bâwktê chu a awm a, Tin, ama awmna chu Zion-ah a awm a. 3 Chutah chuan thalte chu a tichhia a; Phaw te, khandaih te, indona te nên. (Selah) 4 Nang chu i ropuiin i va nasa êm, râllâk sum dah khâwmna tlângah chuan! 5 Pasalṭhate chu rawkin an awm a, An muhîl chu an muhîl hlen ta a; Mi chakte pawh tu mahin an kut an lek thei ta lo. 6 Aw Jakoba Pathian, i zilhhauna avângin, Tawlailîr leh sakawr pawh muthilhtîr dêrin an awm ve ve a. 7 Nang, nangmah ngei chu ṭih tûr i ni a; I thinur tawh phawt chuan, tu nge i mit hmuhah ding thei ang le? 8 I rorêl thu chu vân aṭangin i hriattîr a; Lei hian a hlau va, a ngawi ta a. 9 Leia mi thuhnuairawlh zawng zawngte chhandam tûra, Pathian chu rorêl tûra a thawh lai khân. (Selah) 10 Mihring thinur chuan a tiropui zual che a, I thinurin a hmaihte chuan i inhrêng ang. 11 Thu tiam ula, LALPA in Pathian lakah hlen rawh u; A vêla mi zawng zawng chuan ṭih tûra chu lâwmmante rawn sinsak rawh se. 12 Ani chuan rorêltute huaina chu a sât bung ang a; Ani chu leia lalte tân chuan a hlauhawm a ni.
Hla Hruaitu tân; Jeduthun dânin. Asapha Fakna Hla.
Mangan laia muanawm
1 Ka awin Pathian chu ka au vang a; Ka awin Pathian ngei chu ka au vang a, ani chuan ka lamah beng a lo chhi ang. 2 Ka mangan ni chuan LALPA ka zawng a; Ka kut hi zânah pawh la thla lovin ka phar reng a; Ka nunna hian thlamuan a duh lo. 3 Pathian ka hre reng a, ka buai ṭhîn; Ka ngaihtuah a, ka thlarau hi a chau ṭhîn. (Selah) 4 Ka mitte hi i chelh meng reng ṭhîn a; Ṭawng thei lo khawpin ka mangang ṭhîn. 5 Hmasâng nite ka ngaihtuah a, Hmânlai kumte chu. 6 Zânah ka ngaihtuah neuh neuh va, Ka dâwn vêl a, ka inzâwt ṭhîn a; Ka thlarau pawhin ṭhahnemngai takin a zawng a. 7 LALPA chuan kumkhuain a thlauthla dâwn em ni aw? Eng tikah mah a lâwm dâwn tawh lo em ni aw? 8 A ngilneihna chu a bo hlen kumkhua dâwn em ni aw? A thutiam chu chhuan zawng zawng thlengin a bo dâwn em ni aw? 9 Pathian chuan khawngaih a theihnghilh em ni aw? A lainatnate chu thinurin a khâr ta em ni aw? (Selah) 10 Tin, “Chu chu ka chak lohna avâng a ni; Nimahsela, Chungnungbera kut ding lam kumte kha ka hre reng ang e. 11 “LALPA thiltih thute kha ka sawi ang a; Hmasânga i thil mak tihte kha ka hre reng ang e. 12 I hnathawh zawng zawng kha ka ngaihtuah bawk ang a, I thiltihte pawh kha ka chhût ang e,” ka ti a. 13 Aw Pathian, i kawng chu hmun thianghlimah a awm a; Kan Pathian ang hi pathian ropui tu nge awm? 14 Nang chu thil mak ti ṭhîntu Pathian chu i ni a: Mi tin zîngah chuan i chakzia i hriattîr ṭhîn. 15 I bânin i mite i chhanchhuak a, Jakoba leh Josefa fate chu. (Selah) 16 Aw Pathian, tuite chuan an hmu chia; Tuite chuan an hmu chia, an hlau va; Tui thûk takte chu an khûr bawk a. 17 Chhûmte khian tui an leihbua a; Vânte khian aw an chhuah a; I thalte pawh a phe zawk zawk a. 18 I khawpui ri thâwm chu ṭhâwngaleivirah a awm a; Kâwlphete chuan khawvêl hi a ên zawk zawk a; Lei hi khûrin a nghîng dur dur a. 19 I kawng chu tuifinriatah a awm a, I kalkawngte chu tui zau takah a awm a, I hniakte pawh hmuh theih a ni lo. 20 Mosia leh Arona kutin I mite chu berâm rual angin i hruai ṭhîn a ni.
Asapha Maskil.
Pathian leh a mite
1 Aw ka mite u, ka dân thu-ah hian beng lo chhi ula; Ka kâa thu-ahte hian in beng rawn dawh rawh u. 2 Tehkhin thuin ka kâ ka âng ang a; Hmasânga thuril sawite kha ka sawi chhuak ang: 3 Chûng chu kan bengin kan hria a, kan rilruin kan hre bawk a, Min thlahtute pawhin min hrilh kha. 4 Chûng chu an fate lakah kan zêp lo vang a, ṭhangthar lo la awm tûr hnênah LALPA fakna thu leh, A chakzia leh a thil mak tak tihziate chu kan hril zâwk ang. 5 Jakob-ho zîngah thuhriattîr a tinghet a, Israel-ho zîngah dân a ruat a. Chûng chu kan thlahtute hnênah thupêkin a pe a. Anni chuan chûng thu chu an fate hnêna an hriattîr tûrin; 6 Ṭhangthar lo la awm tûr, Naupang lo la piang tûrte chuan, an hriat theih nân; Chûngte chu an thawha, an fate an la hrilh chhâwn zêlna tûrin; 7 An beiseina chu Pathianah an nghah theiha, Pathian thiltihte chu an theihnghilh lohva, A thupêkte chu an zawm zâwk nân; 8 An thlahtute anga chhuan luhlul leh hel hmang, Chhuan thinlung siam dik lo, Pathian laka rilru rinawm lo pua an awm loh nân. 9 Ephraima thlahte chu râlthuama inthuama, thal ngul kengin, Inbeih niah chuan an tlânchhia a. 10 Pathian thuthlung chu an vawng lo va. A dân an zâwm lo bawk a; 11 A thiltihte chu an theihnghilh a, A thil mak tih a hmuhtîrte nên khân. 12 An thlahtute mit hmuhah thil mak takte a ti ṭhîn, Aigupta ramah, Zoan phûlah chuan. 13 Tuifinriat chu a tiṭhen phawk a, Anni chu a kal kaitîr a; Tuite chu englo dah khâwm thûr angin a dintîr luah a. 14 Chhûnah chuan chhûmin a hruai a, Zankhuain mei êngin a hruai bawk ṭhîn a. 15 Thlalêrah chuan lungpuite a tiphel a, Tui thûk tak ata ang mai hnianghnâra in tûr a pe a. 16 Lungpui aṭang chuan luite a tichhuak a, Tuite chu luipuite angin a luan thlâktîr a. 17 Chuti chung pawhin a chungah thil an la tisual ta cheu va, Thlalêrah chuan Chungnungbera lakah an hel a. 18 An châkna tihreh nâna ei tûr dîlin, An thinlungin Pathian an fiah a. 19 A ni, Pathian an sawi hnâwm a: “Thlalêrah hian Pathianin dawhkân a buatsaih thei em maw chu? 20 Ngai teh, lungpui chu a vua a, tuite kha a lo khawh chhuakin, Luite chu a kuang a liam dûl dûl ta tak a; Chaw pawh a pe thei nghâl em maw chu? A mite tân hian sa a buatsaih ang em maw chu?” an ti a. 21 Chutichuan, LALPA chuan a lo hria a, a thin a rim ta a: Jakob-ho chungah mei a lo alh chhuak a, Israel-ho chungah thinurna a lo chho ta a; 22 Pathian an rin lohva, A chhandamna pawh an rin loh avângin. 23 Nimahsela, chung lam vân dumte khi thu a pe a, Vân kawngkhârte khi a hawnsak a; 24 An ei atân manna kha an chungah a zuk sûrtîr a, Vân buh chu a pe a ni. 25 Mihringten mi chakte chhang chu an ei a; Puarna khawpin chaw a rawn pe a. 26 Khawchhak thli chu vânah a tlehtîr a; A thiltihtheihnain chhim thli chu a hruai a. 27 Sa chu vaivut zât laiin an chungah a sûrtîr a, Sava thla nei chu tuifinriata ṭiau vaivut zât laiin; 28 An riahhmun laiah a tlâktîr a, An awmna bûk kiang vêlahte chuan. 29 Chutichuan, an ei a, an puar hle a; An châk chu a pe ta a ni. 30 An châk a la reh lo va, An chaw chu an kâah a la awm a. 31 Chumi lai tak chuan Pathian thinurna chu an chungah a chho va, An mi nalh nalh ṭhenkhat a that a, Israel tlangvâlte chu a vaw thlu hlawm a. 32 Chuti chung pawhin thil an la tisual ta cheu va, A thil mak tihte chu an ring chuang lo. 33 Chuvângin, an dam chhûng nite chu engmahlo ang maiin a tihralsak a, An dam chhûng kumte chu hlauhnain a tihralsak bawk a. 34 Anmahni a thah apiangin amah chu an zawng ṭhîn a. An kîr leh a, zîng takah Pathian an zawng ṭhîn a. 35 Pathian chu an lungpui a ni tih leh, Pathian Chungnungbera chu an tlantu a ni tih an hre chhuak ṭhîn. 36 Nimahsela, amah chu an kâin an fak der a, An leiin a hnênah dâwt thu an sawi ṭhîn. 37 An thinlung chu a lakah a dik si lo va, A thuthlungah chuan an rinawm hek lo. 38 Nimahsela, ani chu lainatnaa a khah avângin an khawlohna chu a ngaidam a, anni chu a tiboral lo; A ni, vawi tam tak a thinurna chu a la kîr a, A thinrimna chu a zain a chawk tho duh ṭhîn lo. 39 Tisa chauh an ni tih a hre reng a; Thli, lêt leh lo tûra tleh liam ṭhîn ang hi. 40 Thlalêrah khân a chungah an va hel zingin, Ram rovah khân amah chu an va tilungngai zing êm! 41 Hawi kîr lehin Pathian an fiah a, Israel-ho Mi Thianghlima chu an tivui ṭhîn. 42 A kut chu an hre reng lo va, Dotu laka a chhanhim ni chu an hre reng ṭhîn hek lo. 43 Aigupta ramah a chhinchhiahnate a dah a, Zoan phûlah a thil makte a dah bawk a; 44 An luipuite leh an luitête chu thisenah a chantîr a; Tichuan, an in thei ta lo va. 45 An zîngah tho tam tak a tîr a, chûng chuan anmahni a ei zo va; Chungûte a tîr bawk a, chûng chuan anmahni a tiboral ta a. 46 An thil ṭote pawh chu pangang a pe a, An thawh rim rah chu khaukhuap a pe bawk a. 47 An grêp hruite chu rialin a tithi a, An theipui kûngte pawh chu vûrin a tithi bawk a. 48 An rante pawh chu rial a pe a, An ran rualte chu ṭêk sa tak a pe bawk a. 49 A thinur nasa tak chu an chungah a thlâk a, Thinrimna te, lungnih loh êm êmna te, manganna te, Thil ṭha lo tak thlentu tirhkoh pâwl te chu. 50 A thinurna atân chuan kawng a siamsak a, An nunna chu thihna lakah a hum lo va, An nun chu hri a pe ta zâwk a; 51 Aigupta rama fa tîr awm zawng zawng a tihlum a, Hama puan intea an chakna rah hmasa berte chu. 52 Nimahsela, ama mite chu berâm angin a hruai chhuak a, Ran rual angin thlalêrah khân a hruai a. 53 Him takin a hruai a; chutichuan, eng mah an hlau lo va; Nimahsela, tuifinriat chuan an hmêlmate chu a khuh zo ta a. 54 Tin, a hmun thianghlim ramri chu a hruai thleng a, He tlâng, a kut ding lama a leia hi. 55 Hnam tin chu an hmaah a hnawt chhuak a, Anni chu hruia tehin ro chan atân a sem a, An puan inahte chuan Israel hnamte chu a awmtîr ta a. 56 Nimahsela, Pathian Chungnungbera chu an fiah a, a chungah an hel a, A thuhriattîrte chu an zâwm si lo va. 57 Hawi kîrin, an thlahtute angin vervêk takin an ti ta zâwk a; Thal ngul rinawm lo angin an kal kawi a. 58 An hmun sângtein amah chu an tithinur si a, An milem siamtein an thîktîr bawk a. 59 Pathianin chu chu a lo hriatin a thin a rim a, Israel-ho chu a ten ta êm êm a; 60 Chutichuan, Silo biakbûk, Mihring zînga a puan in dah chu a kalsan a; 61 A chakna chu salah a mantîr a, A ropuina chu dotu kutah a mantîr ta bawk a. 62 A mite chu khandaih hnênah a pe a; A ro chan chungah chuan a thin a rim ta a. 63 Meiin an tlangvâlte chu a kâng ral a, An nulate chuan inneihna hla rêng rêng an nei ta lo. 64 An puithiamte chu khandaiha tihtlûkin an awm a; An hmeithaite chu ṭah rêng rêng an ṭap lo. 65 Chutih lai chuan LALPA chu, mi an muhîl an harh angin a harh ta a, Mi chak uain vânga au ang hian. 66 Amah dotute chu a vaw kîr a, Kumkhaw hmingchhiatna a hlawhtîr ta a. 67 Chu lo pawh chu Josefa puan in chu a duh lo va, Ephraim hnam chu a thlang lo bawk a; 68 Juda hnam chu a thlang ta zâwk a, A hmangaih Zion tlâng chu. 69 A in thianghlim chu vân sângte ang khian a sa a, Kumkhua atâna a tihngheh leilung ang hian. 70 A chhiahhlawh Davida chu a thlang a, Berâm huang ata te chu a la chhuak a; 71 Berâmpui no hruaite zuitu aṭangin a hruai chhuak a, A mite, Jakob-ho leh a ro chan Israel-ho châwm tûrin. 72 Chutichuan, ani chuan a thinlung ṭhatna ang zêlin anniho chu a châwm a; A kut thiamnain a hruai ta a.
Asapha Fakna Hla.
Hnam pum chhan tûra dîlna
1 Aw Pathian, hnam tin i ro chanah hian an lût a; I biak in thianghlim hi an tibawlhhlawh a; Jerusalem hi lung chim khâwmah an siam ta thluah a. 2 I chhiahhlawhte ruang chu chunglêng savate chawah an pe a, I mi thianghlimte sa chu ramsate an pe a. 3 An thisen chu Jerusalem vêlah hian tui angin an leihbua a; Anmahni phûmtu tûr lah tu mah an awm si lo. 4 Kan vêla mite sawichhiatin kan lo awm a, Kan dep vêla mite hmuhsit leh nuihsanin kan lo awm ta. 5 Aw LALPA, i thinur kumkhua dâwn em ni? I thîkna chu mei angin a alh dâwn em ni? 6 Nangmah hre lo hnam tin chungah hian i thinur chu leihbua ang che, I hming lam lo ram chungahte pawh. 7 Jakob-ho chu an ei zo va, An awmna chu an tiram ta si a. 8 Min thlahtute khawlohnate kha kan lakah chuan hre reng suh ang che! I lainatnate chuan min hmuak thuai rawh se, Nasa taka tihhniamin kan awm ta si a. 9 Aw, min chhandamtu Pathian, i hming ropui nân min ṭanpui la; I hming avângin min chhanhim la, kan sualte hi tlêng fai ang che. 10 Engati nge hnam tinin, “Khawiah nge an Pathian kha le?” an tih ni? I chhiahhlawhte thisen chhuak phuba lâkna chu kan mit hmuhah hnam tin zîngah hian hriat ni rawh se. 11 Mi tâng rûm chu i hmaah thleng rawh se; I thiltihtheihna nasat avângin thi tûra ruatte chu humhim la; 12 Aw LALPA, nangmah an sawichhiatna che kha, Kan vêla mite hi an ângchhûngah a lêt sarihin rûl leh ang che. 13 Chutichuan, keini i mite, i ran tlatna hmuna berâmte hian, Kumkhuain lâwm thu kan hrilh ang chia; Chhuan zawng zawng thlengin nangmah fakna chu kan hriattîr zêl ang.
Hla Hruaitu tân; Sosanim Eduth-a sak tûr. Asapha Fakna Hla.
Hnam tun din leh nâna dîlna
1 Aw, Israel-ho Vêngtu, Berâm pâwl anga Josef-ho hruaitu, beng lo chhi ang che; Nang cherub-te chunga ṭhua chu, lo êng chhuak ang che. 2 Ephraim-ho leh Benjamin-ho leh Manase-ho mit hmuhah chuan i chakna kha chawk tho la, Min chhandam tûrin lo kal ang che. 3 Aw Pathian, min hawi kîrtîr leh la; I hmêl kha tiêng ang che; tichuan, chhandamin kan awm dâwn nia. 4 Aw LALPA, sipaihote Pathian, Eng chen nge i mite ṭawngṭaina chungah hian i thinur dâwn le? 5 Anni chu mittui chhangin i châwm a, Mittui hi in tûrin tehna lian takin i pe ṭhîn. 6 Nangin kan vêla mite tân inhnialnaah min siam ṭhîn a, Min dotute chu an nui tlâng ṭhîn. 7 Aw, sipaihote Pathian, min hawi kîrtîr leh la; I hmêl kha tiêng ang che; tichuan, chhandamin kan awm dâwn nia. 8 Aigupta ram ata grêp hrui i rawn la a; Hnam tin chu i hnawt chhuak a, i phun ta a. 9 A hma i tifai zêl a, Thûk takin zung a kai a, ram chu a awh ta vek a. 10 Tlângte chu a hlima tuamin a awm hlawm a, A pêngte chu Pathian sidar thingte ang mai a ni. 11 A ṭangte chu tuifinriat thlengin a zâm chhuahtîr a, A chawrnote chu Luipui thlengin. 12 Engati nge a palte chu i tihchhiat ni? Kawnga kal apiangin an pawh thlâk tâk hi. 13 Ramhnuaia sanghal chuan a tichhia a, Ramsate pawhin an tlân ṭhîn. 14 Aw, sipaihote Pathian, khawngaih takin hawi kîr leh ang che; Vân aṭang khân rawn en chhuk la, he grêp hrui hi en la, rawn kan ang che. 15 A kûng i kut ding lamin a phun leh, A pêng i tâna i tihkhauh nên hian. 16 Meiah a kâng ta, kihin a awm ta; I hmêla zilhhauna avângin an boral ṭhîn. 17 I kut kha i ding lama mi chungah awm rawh se, Mihring fapa, i tâna i tihchaka chungah hian. 18 Chutichuan, kan kîrsan lo vang che; Min tiharh la; tichuan, i hming kan lam dâwn nia. 19 Aw LALPA, sipaihote Pathian, min hawi kîrtîr leh la; I hmêl kha tiêng ang che; tichuan, chhandamin kan awm dâwn nia.
Hla Hruaitu tân; Gittith-a sak tûr. Asapha Fakna Hla.
Kût ni hla
1 Pathian min tichaktu chawimawiin hlim takin zai ula; Jakob-ho Pathian chawimawiin hlim takin au rawh u. 2 Fakna hla sa ula, khuangtê te, Ṭingṭang ngaihnawm tak te, perhkhuang te nên rawn keng rawh u. 3 Thla tharah chuan tawtawrâwt hâm ula, thla hlei ngaa kan kût niah nên. 4 Chu chu Israel-ho tâna thuruat a ni si a, Jakob-ho Pathian dân a ni. 5 Chu chu Josef-ho zînga thu hriattîr nân a ruat a ni, Aigupta ram aṭanga a kal chhuah lai khân; Ṭawng ka la hriat loh ka hriat kha. 6 An koki chu thil rit aṭangin ka la sawn a; An kutte chu kho ka thlahtîr a. 7 Manganin mi ko va, ka chhanhim che u a; Khawpui ri bihrûkna hmunah khân ka chhâng che u a; Meriba tuiahte khân ka fiah che u kha. (Selah) 8 Aw, ka mite u, ngaithla ula, ka hriattîr ang che u; Aw Israel-hote u, ka thu ngaithla duh teh ula aw! 9 Ram dang pathian rêng rêng chu in zîngah a awm tûr a ni lo va; Mi dang pathian rêng rêng chu in be tûr a ni hek lo. 10 Kei hi LALPA in Pathian chu ka ni, Aigupta ram ata hruai chhotu che u kha; In kâ âng zau ula, ka tikhat dâwn nia. 11 Nimahsela, ka mite chuan ka aw an ngaithla si lo va; Israel-ho chuan mi duh loh kha. 12 Tichuan, an thinlung sak vângin ka thlahthlam a, An duh ang anga awm tûrin. 13 Aw, ka mite hian ka thu ngaithlain, Israel-ho hi ka kawngahte hian kal sela chu aw! 14 An hmêlmate chu ka titlâwm thuaiin, Anmahni dotute chungah chuan ka kut ka lek tûr. 15 LALPA hawtute chu a hmaah khûrin an kûn ang a; Kumkhuain hrem an tuar ang. 16 Nangni chu buhchangrumin ka châwm ang che u a, Lungpuia khawizûin ka titlai ang che u.
Asapha Fakna Hla.
Pathian-rorêltu ropui ber
1 Pathian chu Pathian inkhâwmna siamah chuan a ding a; Pathianhote zîngah ro a rêl a. 2 “Eng chen nge dik lo taka ro in rêl anga, Mi suaksualte chu in duhsak bîk dâwn? (Selah) 3 Retheite leh pa nei lote ro chu rêl ula; Hrehawm tuarte leh pachhiate chungah chuan dik takin ti rawh u. 4 Retheite leh pachhiate chu chhan ula; Mi suaksual kut ata chhanhim rawh u. 5 “An hre lo va, hriat thiamna an nei hek lo; Thimah chuan an vei an vei a; leilung nghahchhan zawng zawng chu a nghîng ta a. 6 ‘Pathiante in ni a, In zain Chungnungbera fate in ni,’ ka tih kha, 7 Nimahsela, mihringte ang maiin in la thi ang a, Mi lian pakhat ang khân in la tlu ang,” ka ti a. 8 Aw Pathian, tho la, lei ro hi rêl ang che; Hnam tinrêng hi i rochung dâwn si a.
Hla, Asapha Fakna Hla.
Israel hmêlma tlâwm nâna dîlna
1 Aw Pathian, ṭawng lovin awm suh ang che; Aw Pathian, ngawi reng suh la, awm hle hle lul suh ang che. 2 Ngai teh, nangmah dotute chu an sa mur mur a; Nangmah hawtute chu an dâk hraw hraw a. 3 I mite hi vervêk takin an phiar a, I mi thuhrûkte chungah hian a chhe lamin an inrâwn hlawm a. 4 “Hawh u, an hnam hloh khawpin i tiboral ang u! Israel-ho hming rêng rêng hi hriat renga a awm tawh lohna tûrin,” an ti a. 5 Thu khat vuain an inrâwn a; I chungah a chhe lama ti tûrin thu an intiam hlawm a. 6 Edom-ho leh Ismael-ho puan inte, Moab-ho leh Hagar-hote; 7 Gebal-ho leh Amon-ho leh Amalek-hote; Philistia-ho Tura khuaa awmte nên; 8 Assuria-ho pawh an lamah an ṭang ve a; Lota thlahte chu an ṭanpui a. (Selah) 9 Anniho chu Midian-ho chunga i tih ang te, Kison luia Sisera chunga i tih ang te, Jabina chunga i tih ang te khân ti ve ang che; 10 Chu mite chu En-dor khuaah an boral a; Lei tân êkdûr ang mai an lo nih tâk kha. 11 An mi liante chu Oreba leh Zeeba ang khân siam la, A ni, an lal zawng zawngte chu Zeba leh Zalmuna ang khân siam ang che. 12 Chu mite chuan, “Pathian awmnate chu I luahsak ang u,” an tih kha. 13 Aw ka Pathian, anniho chu vaivut vir chung chung ang hian siam ang che; Buh sisawp thli chhêm lên ur ur ang mai hian. 14 Ram kângtu mei ang leh, Tlâng kângtu meialh ang hian; 15 Anni chu i thlipuiin ûm la, I thli na takin tihlau ang che. 16 Aw LALPA, i hming an zawn theih nân An hmêl chu zahnain tikhat ang che. 17 Kumkhuain mualpho leh mangang takin awm sela; A ni, tihzaha awmin boral rawh se; 18 Nangmah chauh hi JEHOVA hming pu, Leilung zawng zawng chunga Chungnungber i nih an hriat theih nân.
Hla Hruaitu tân; Gittith-a sak tûr. Kora fapate Fakna Hla.
Pathian ina awm châk
1 Aw sipaihote LALPA, I awmnate chu a va duhawm êm! 2 Ka nunna hian LALPA biak in hung chhûng kawtlaite chu a ngai êm êm a, a ni, a chauh phah hial a; Ka thinlung leh ka tisa hi Pathian nung hnênah chuan a au chhuak a. 3 Aw sipaihote LALPA, ka Lal leh ka Pathian, I maichâm bulahte chuan chawngzawngin bu a chhep a, Vamûr pawhin bu a nei, a no dahna tûrin. 4 I ina awmte chu an eng a thâwl e: Nang chu an fak fo vang che. (Selah) 5 Nangmaha chakna nei mi chu a eng a thâwl e; A thinlunga Zion panna lamliante awma chu. 6 Ṭahna ruam chu an zawhin tuihna awmnate an siam ṭhîn a, A ni, ruahtui tla hmasa chuan malsâwmnain a khuh ṭhîn. 7 Chakna aṭangin chak lehzualnaah an kal ṭhîn a, Zion-ah Pathian hmaah chuan an inlan ṭheuh ṭhîn. 8 Aw LALPA, sipaihote Pathian, ka ṭawngṭaina hi mi ngaihthlâksak la; Aw Jakob-ho Pathian, beng lo chhi ang che. (Selah) 9 Aw Pathian, kan phaw ber, en teh, I hriak thiha hmêl hi en teh. 10 I biak in hung chhûng kawtlaia ni khat awm hi, ni sângkhat aiin a ṭha zâwk si a. Suahsualna puan intea awm ai chuan, Kan Pathian ina kawngkhâr vêngtu nih pawh ka duh zâwk a ni. 11 LALPA Pathian chu ni leh phaw a ni si a; LALPA chuan khawngaihna leh ropuina a pe ang a: Dik taka awmte lakah chuan thil ṭha rêng rêng a ui lo vang. 12 Aw sipaihote LALPA, Nangmah ring mi chu a eng a thâwl e.
Hla Hruaitu tân. Kora fapate Fakna Hla.
Hnam ṭhat nâna ṭawngṭaina
1 LALPA, i ram chungah hian i lâwm a; Jakob-ho sala an awm chu i hruai kîr leh ta a. 2 I mite khawlohnate i ngaidam a, An sualna zawng zawng i khuh zo ta a. (Selah) 3 I thinrimna zawng zawng chu i la bo va; I thinurna nasa tak chu i hawisan ta a. 4 Aw, min chhandamtu Pathian, min hawi kîrtîr la, Kan chunga i thinurna chu tibâng ang che. 5 Kan chungah i thinur kumkhua dâwn em ni le? I thinur chu chhuan zawng zawng thlengin i lantîr zêl dâwn em ni? 6 Nangmahah chuan i mite an hlim theih nân Min tiharh leh dâwn lâwm ni? 7 Aw LALPA, i ngilneihna chu min hmuhtîr la, I chhandamna chu min pe bawk ang che. 8 Pathian, LALPA thu sawi tûr chu ka ngaithla ang; A mite leh a mi thianghlimte hnênah thlamuanna thu a sawi dâwn si a; Nimahsela, anni chu âtna lamah hawi leh tawh suh se. 9 A chhandamna chu amah ṭihtute hnaihah chuan a awm ngei ngei ṭhîn a ni; Kan ramah hian ropuina a awm theih nân. 10 Ngilneihna leh thutak an intâwk a; Felna leh remna an infâwp a. 11 Thutak chu lei aṭangin a chawr chhuak a; Felna chuan vân aṭangin a rawn en chhuk ta a. 12 A ni, LALPA chuan thil ṭha a pe ang a; Kan ram hian a thil ṭo chu a pe bawk ang. 13 Felna chuan a hma a hruai ang a, A hniakte chu kawngah a siam ang.
Davida ṭawngṭaina.
Ṭanpui dîlna
1 Aw LALPA, ka lamah hian i beng rawn dawh la, mi chhâng ang che; Rethei leh pachhe tak ka nih hi. 2 Ka nunna hi vawng ṭha ang che; Pathian ngaihsak mi ka ni si a; Aw, nang ka Pathian, nangmah ringtu, i chhiahhlawh hi chhandam ang che. 3 Aw LALPA, mi khawngaih ang che, Nilêngin ka au si ṭhîn chia. 4 I chhiahhlawh nunna hi tihlim ang che; Aw LALPA, ka rilru hi i hnênah ka dah tlat si ṭhîn a. 5 LALPA, nang chu i ṭha a, ngaihdam i peih a, A kotu che apiang chungah ngilneihna i ngah si ṭhîn a. 6 Aw LALPA, ka ṭawngṭainaah hian beng lo chhi la; Khawngaih ka dîlna aw hi ngaithla ang che. 7 Ka mangan ni chuan ka ko vang che; Nangin mi chhâng dâwn si a. 8 Aw LALPA, pathiante zîngah nang ang rêng rêng an awm lo va, I thiltihte ang hi thiltih rêng rêng a awm hek lo. 9 Aw LALPA, i siam hnam tinrêngte chu an lo kal ang a, i hmaah an lo kûn ang a; I hming chu an rawn chawimawi ang. 10 Nang chu i ropui si a, thil makte i ti bawk ṭhîn a; Nangmah chauh hi Pathian i ni. 11 Aw LALPA, i kawng chu mi entîr ang che; i thutakah ka awm ang; I hming ṭih tûrin thinlung sakhat mi puttîr ang che. 12 Aw LALPA ka Pathian, ka thinlung zawng zawngin ka fak ang chia; I hming hi kumkhuain ka chawimawi ang. 13 Ka chunga i ngilneihna chu a nasain, Ka nunna hi khuarkhurum hnuaihnung ber ata i chhanhim si a. 14 Aw Pathian, mi chapote chuan mi bei a, Mi nunrâwng awm khâwmte chuan ka nunna hi tihbo tumin an zawng a, nang chu an hmaah an dah ṭhîn lo che. 15 Nimahsela, aw LALPA, nang chu Pathian, lainatnaa khat, mi khawngaih thei, Thinnel, ngilneihna leh thutak ngah i ni. 16 Aw, ka lam lo hawi la, mi khawngaih ang che; I chhiahhlawh hi i chakna pe la. I bawihnu fa hi chhandam ang che. 17 Mi duhsakna chu lantîr ang che; Mi hawtute chuan chu chu an hmuha an mualphona tûrin; LALPA, nangin mi ṭanpui a, mi thlamuan si a.
Kora fapate Fakna Hla; Hla.
Jerusalem chawimawina
1 A lungphûm chu tlâng thianghlimahte chuan a awm. 2 LALPA chuan Zion kulh kawngkhârte chu Jakob-ho awmna zawng zawng aiin a ngaina zâwk a ni. 3 Aw Pathian khawpui, I chungchâng thu ropui takin an sawi ṭhîn a ni. (Selah) 4 Mi hretute zîngah an tel ve tiin, Rahab leh Babulon chungchâng thu ka sawi ang; Philistia leh Tura hi, Ethiopia nên hian, en teh u; He mi hi chuta piang chu a ni. 5 A ni, “He mi leh saw mi saw amaha piang an ni a; Chungnungbera ngei chuan amah chu a tinghet ang,” tiin Zion chungchâng thu chu an sawi ang. 6 LALPAN mi tin hming a ziak hunah chuan, “He mi hi chuta piang chu a ni,” tiin a chhiar ang. (Selah) 7 Hla satuten, a lâmate nên chuan, “Ka tuihna zawng zawng chu nangmahah a ni a awm ni,” an ti ang.
Hla, Kora fapate Fakna Hla; Hla Hruaitu tân; Mahalath Leannoth-a sak tûr. Ezra mi Hemana Maskil.
Ṭanpui dîla au hla
1 Aw LALPA, mi chhandamtu Pathian, A chhûn a zânin i hmaah ka au ṭhîn. 2 Ka ṭawngṭaina hi i hnên thleng sela; Ka au thâwmah hian i beng rawn dawh ang che. 3 Ka nunna hi mangannatein a khat a, Ka nun hian Seol chu a rawn hnaih ta si a. 4 Khuarkhuruma chhukte zînga chhiar tel ka ni a; Chakna rêng rêng nei lo mi ang ka ni: 5 Râl thahho thlâna mute anga mitthi zînga paih thlâk ka ni; Chûngte chu i hriat tawh loh, I kut ata tihboral an ni. 6 Khuarkhurum hnuaihnung berah mi muttîr ta a, Hmun thim tak, thûk takahte chuan. 7 I thinrimna chuan mi delh tlat a, Nangin i tuifâwn zawng zawngin mi tihrehawm ta a. (Selah) 8 Ka hmêlhriatte chu mi hlatah i awmtîr a; An tâna tenawm takah mi siam ta a; Khârkhipin ka awm a, ka chhuak thei lo a ni. 9 Hrehawmna avângin ka mit a chhe telh telh a: Aw LALPA, ni tin ka ko chia, I lamah ka kutte ka phar a. 10 Mitthite tân chuan thil mak i ti dâwn em ni? Thi tawhte chuan thovin an fak dâwn che em ni? (Selah) 11 I ngilneihzia chu thlânah hriattîrin, I rinawmzia chu Boralna Hmunah hriattîrin a awm dâwn em ni? 12 I thil mak tihte chu thimah hriatin a awm dâwn em ni? I felna chu theihnghilhna ramah hriatin a awm bawk dâwn em ni? 13 Aw LALPA, kei erawh chuan ka au chia, Ka ṭawngṭaina chuan zîngah a hmuak ang che. 14 LALPA, engati nge ka nunna hi i thlauhthlâk le? Engati nge ka lakah i hmai i thup ni? 15 Ka naupan têt ata hrehawm tuar leh thi lek lekin ka awm thîn a; I thil râpthlâk takte ka tuarin ka thauvah mi man ṭhîn. 16 I thinrim nasa tak chuan mi vûr pil a; I thil râpthlâk takte chuan mi tiboral ta a. 17 Chûng chuan nilêngin tui angin mi vêl a, Mi hual vêl hlawm a. 18 Mi hmangaihtu leh ka ṭhian chu mi hlatah i awmtîr ta a, Ka hmêlhriatte chu thimah i awmtîr ta bawk a.
Ezra mi Ethana Maskil.
Ram buai lai hla
1 LALPA ngilneihna thute chu kumkhuain hlaah ka sa ang a; Ka kain i rinawmzia chu chhuan zawng zawng thlengin ka hriattîr ang. 2 “Ngilneihna chu kumkhua atân rem chhohvin a awm ang; I rinawmna chu vânahte ngei khian i tinghet ang,” ka ti ta a ni. 3 Ka mi thlan hnênah chuan thu ka thlung a, Ka chhiahhlawh Davida hnênah chhia ka chham ta a; 4 “I thlahte chu kumkhua atân ka tinghet ang a, I lalṭhutphah pawh chhuan zawng zawng thlengin ka rem chho vang,” tiin. (Selah) 5 Aw LALPA, vânte khian i thil mak tih hi an fak ang a; Mi thianghlimte inkhâwmnaah khian i rinawmna hi an fak bawk ang. 6 Vân dumahte khian LALPA nêna tehkhin theih tu nge awm ni? Mi thiltithei tak fate zîngah khian LALPA ang, 7 Mi thianghlimte inrâwn khâwmnaah Pathian hlauhawm tak, A kiang vêla mi zawng zawng aia ṭih ber tûr chu, tu nge awm ni? 8 Aw LALPA, sipaihote Pathian, Aw JAA, nang anga mi chak tu nge awm? I rinawmna chu i vêlah a awm si a. 9 Nang chuan tuifinriat chapona chungah ro i rêl ṭhîn a; A tuifâwn invawrh laite chu i tireh ṭhîn. 10 Nang chuan Rahab chu râl thah angin i tikeh sawm a; Nangmah dotute chu i bân tha chakin i tidarh ta a. 11 Vânte khi i ta a ni a, lei pawh hi i ta a ni; Khawvêl leh a chhûnga thil awm zawng zawng hi nangma din a ni. 12 Chhim leh hmâr chu nangma siam a ni a; Tabor leh Hermon chu i hming avângin hlimin an zai ṭhîn. 13 Nang chuan bân thiltithei tak i nei a; I kut chu a chak a, i kut ding lam chu chawimawiin a awm a. 14 Felna leh rorêlna fel chu i lalṭhutphah nghahchhan a ni a: Ngilneihna leh thutak chu i hmaah an kal ṭhîn. 15 Thâwm hlimawm hre ṭhîn hnam chu an eng a thâwl e! Aw LALPA, anni chu i hmêl êngah an awm ṭhîn. 16 I hming avângin nilêngin an hlim ṭhîn a, I felna avângin chawimawiin an awm ṭhîn. 17 Nang chu an chakna ropuina i ni si a, I duhsakna avângin kan ki hi chawimawiin a awm ang. 18 Kan phaw hi LALPA ta a ni si a; Kan lal hi Israel-ho Mi Thianghlima ta a ni. 19 Chumi lai chuan i mi thianghlimte hnênah inlârnaah thu i sawi a, “Mi pakhat chak tak chungah chuan ṭanpuina ka nghat a; Mi pakhat, mite zînga thlan chhuah chu ka chawimawi ta a. 20 Ka chhiahhlawh Davida chu ka chhar a; Ka hriak thianghlim chu amah chu ka thih ta a: 21 Ka kut hi a hnênah tihnghehin a awm ang a; Ka bân hian ani chu a tichak ang. 22 Hmêlma chuan a ngam lo vang a; Mi sual chuan a titlâwm hek lo vang, 23 Amah dotute chu a hmaah ka vaw thlu ang a, Amah hawtute chu ka sawisa ang. 24 Ani hnênah erawh chuan ka rinawmna leh ka ngilneihna chu a awm ang a; Ka hming avângin a ki chu chawimawiin a awm bawk ang. 25 A kut chu tuifinriatah chuan ka nghahtîr ang a, A kut ding lam chu luipuiahte chuan. 26 Ani chuan, ‘Nang chu ka Pa, Ka Pathian, ka inchhandamna lungpui i ni,’ tiin mi au vang. 27 Tin, keiin ani chu fa tîrah ka siam ang a, Leia lalte zînga chungnung berah ka siam ang. 28 Ka ngilneihna chu kumkhuain a tân ka vawn ṭhatsak ang a, Ka thuthlun chu a hnênah a awm nghet ang. 29 A chi thlahte chu kumkhuain ka awmtîr ang a, A lalṭhutphah chu vân awm chhûng ni chenin ka awmtîr bawk ang. 30 “A fate chuan ka dân hi an hawisana, Ka rorêlnate anga an awm lohva, 31 Ka thuruat an bawhchhiata, Ka thupêkte an vawn ṭhat loh chuan, 32 An bawhchhiatnate chu tiangin ka rawn kan ang a, An khawlohnate chu vuakin ka rawn kan ang. 33 Nimahsela, ka ngilneihna chu a hnên ata ka lâksak vek lo vang a, Ka rinawmna chu dâwta chan ka phal hek lo vang. 34 Ka thuthlung chu ka bawhchhe lo vang a, Ka hmuia thu chhuak chu ka tidanglam hek lo vang. 35 “Vawi khat ka thianghlimna chhâlin chhia ka chham a; Davida hnênah dâwt ka sawi lo vang; 36 A chi thlahte chu kumkhuain an awm ang a, A lalṭhutphah chu ka hmaah ni angin a awm bawk ang. 37 Thla angin kumkhua atân tihnghehin a awm ang a, Vân duma hretu rinawm ang khian,” i ti a. (Selah) 38 Nimahsela, nang chuan i thlauthlain i duh lo va, I hriak thiha chungah chuan i thin a rim ta a. 39 I chhiahhlawh thuthlun chu i ten a, A lallukhum chu leia paih thla hialin i titlâwm ta a. 40 A dai zawng zawng chu i titlu a; A kulhbîngte chu i tichhe ta a. 41 Kawnga kal apiangin a thil an lâksak ṭhîn a; A vêla mite sawichhiatin a lo awm ta a. 42 Amah dotute kut ding lam chu i chawimawi a; A hmêlma zawng zawngte chu i tihlim ta a. 43 A ni, a khandaih hma chu i bêng per a, Ani chu inbeihnaah chuan i din nghehtîr ta lo va. 44 A ênna chu i tihrehsak a, A lalṭhutphah chu leiah i paih thla ta a. 45 A tlangvâl lai nite chu i tihtawisak a; Ani chu mualphonain i khuh ta si a. (Selah) 46 Aw LALPA, i biru kumkhua dâwn em ni? Eng chen nge i thinrim chu mei anga a alh dâwn le? 47 Aw, ka hun hi a tawi tûrzia hre reng la: Mihring fate zawng zawng hi i va siam engmahlo êm! 48 Eng mi nge thih ni hmêl hmu lova nunga, Seol kut aṭanga a nunna chhanhim tûr chu? (Selah) 49 LALPA, i hmânlai khawngaihna, i rinawmnaa Davida hnêna chhechhama i tiamte kha, Khawiah nge a awm tâk? 50 LALPA, i chhiahhlawhte an sawichhiatna hi hre reng ang che; Hnam chak takte zawng zawng sawichhiatna ka ângchhûnga ka tuar ṭhinzia hi; 51 Aw LALPA, nangmah dotute sawichhiatna, I hriakthiha hniakte sawichhiatna chu. 52 LALPA chu kumkhuain fakin awm rawh se. Amen. Amen.
Pathian mi Mosia ṭawngṭaina.
Pathian engkim bul
1 LALPA, nang chu chhuan zawng zawng chenah kan awmna i ni ṭhîn. 2 Tlângte pian hmaa, Leilung leh khawvêl i din hma pawh khân, Chatuan ata chatuan thleng pawhin nang chu Pathian i ni. 3 Nang chuan mihring hi boralnaah i kîrtîr ṭhîn a; “Mihring fate u, kîr leh rawh u,” i ti ṭhîn. 4 Nanga ngaih chuan kum sângkhat hi nimin ral ta ang lek kha a ni si a, Zân vên khat chhûng ang lek bawk a ni. 5 Anni chu tui lian angin i lên bo ṭhîn a, ṭhang khat mu ang chauh an ni; Zîngah chuan hlobet chawr chhuak ang an ni: 6 Zîngah chuan a lo duahin a chawr chhuak a; Tlai lamah chuan ah thlûkin a awm a, a vuai ṭhîn. 7 I thinurnaa tihboralin kan awm a, I thinrimnaa tihmanganin kan awm bawk si a. 8 Kan khawlohnate chu i hmaah i dah a, Kan sual zêp rûkte chu i hmêl êngah i dah ta a. 9 Kan dam chhûng ni zawng zawng hi i thinrimnaah a ral ṭhîn a; Kan dam chhûng kumte hi thawnthu angin kan titâwp ṭhin. 10 Kan dam chhûng kumte chu kum sawmsarih a ni a, Chakna avângin kum sawmriat pawh a ni thei e; Nimahsela, a reina chu thawh rimna leh lungngaihna mai a ni; A ral thuai a, keini pawh kan thlâwk bo ṭhîn a nih hi. 11 Tuin nge i thinurna thiltihtheihzia hriaa, Nangmah ṭih tûrzia anga i thinrimna chu hria le? 12 Kan dam chhûng nite chhiar dân tûr min zirtîr ang che, Finna thinlung kan neih phah hialna tûrin. 13 Aw LALPA, lo kîr leh ang che; eng chen nge i thinur dâwn? I chhiahhlawhte chungthuah chuan i rilru lamlêt ang che. 14 Aw, zîngah chuan i ngilneihnain min titlai ang che; Kan dam chhûng zawng zawng hian kan hlima kan lâwm theihna tûrin. 15 Nangin min tihhrehawm ni leh, Thil ṭha lo kan tawh kum chhûng hu angte khân min tilâwm ang che. 16 I hnathawh chu i chhiahhlawhte hnênah lang sela, I ropuina chu an fate hnênah lang rawh se. 17 Tin, LALPA kan Pathian mawina chu kan chungah awm rawh se; Kan kut hnathawh hi kan chungah tinghet bawk ang che; A ni, kan kut hnathawh hi tinghet ang che.
Min vêngtu Pathian
1 Chungnungbera bihrûkna hmuna awma chu, Engkimtitheia hlimah chuan a awm reng ang. 2 LALPA chungthuah chuan, “Ani chu ka inhumhimna leh ka kulhpui a ni a; Ka Pathian, ka rina chu a ni,” ka ti ang. 3 Ani chuan thangkamtu thang lakah leh Hri ṭha lo tak lakah chuan a chhanhim dâwn che a ni. 4 A thlain a khuh ang chia, A thla hnuaiah chuan i tlu lût ang; A thutak chu phaw tê leh phaw lian a ni. 5 Zâna thil râpthlâk chu i hlau lo vang a, Chhûna thal lo lêng ṭhîn chu i hlau hek lo vang; 6 Thim hnuaia hri lêng ṭhîn chu i hlau lo vang a, Chhûn laia thil tichhe ṭhîn chhiatna chu i hlau hek lo vang. 7 I sîrah sâng an tlu ang a, I ding lamah sîng an tlu bawk ang; Nimahsela, nang chu a hnaih lo vang che. 8 I mitin i en ang a, Mi suaksualte rulhna chu a hmuhin i hmu chauh vang. 9 Aw LALPA, nang chu ka inhumhimna i ni si! Chungnungbera chu i awm nân i hmang a; 10 Thil ṭha lo rêng rêngin a tawk lo vang chia, Hri rêng rêng pawhin i puan in chu a rawn hnaih hek lo vang. 11 I kawng tinrênga humhim tûr chein, I chungthuah zawng a vântirhkohte chu thu a pe dâwn si a. 12 An kutin an dâwm ang chia; Chuti lo chuan, i kein lung i chhuih dah ang e. 13 Sakeibaknei leh rûlrial chu i rap ang a, Sakeibaknei vânglai leh rûlpui chu i chîl nek ang. 14 Ka chungah a hmangaihna a nghah tlat avângin ka chhanhim ang a, Ka hming a hriat avângin hmun sângah ka hlâng ang. 15 Ani chuan mi ko vang a; tichuan, ka chhâng ang; Kei chu a mangan lai chuan a hnênah ka awm ang a; Amah chu ka chhanhimin ka chawimawi ang. 16 Dam reinain ka tilungawi ang a, Ka chhandamna chu ka hmuhtîr bawk ang.
Fakna Hla, Chawlhni Hla
1 LALPA hnêna lâwm thu sawi leh, Aw Chungnungber, i hming faka zai hi thil ṭha tak a ni a, 2-3 Thil tum theih hrui sâwm nei mi te, perhkhuang te, ṭingṭang ri lung tichhe thei tea zînga i ngilneihna tihlan leh, Zan tin i rinawmna tihlan hi thil ṭha tak a ni. 4 LALPA, nang chuan i hnathawhin mi tilâwm si a; I kut thiltihte avângin hlimin ka zai ang. 5 Aw LALPA, i thiltihte chu a va ropui êm! I ngaihtuahnate chu a thûk êm êm a ni. 6 Mi mâwl chuan hei hi a hre lo va, Mi âin a hre thiam hek lo: 7 Mi suaksualte hlobet anga an lo chawra, Thil tisualtute zawng zawng an lo duah hluah hluah hian, Kumkhua atân tihboralin an awm dâwn a lo ni ṭhîn, tih hi. 8 Aw LALPA, nang erawh chu kumkhua atân sâng taka awm reng i ni. 9 Aw LALPA, ngai teh, nangmah dotute hi, Ngai teh, nangmah dotute hi an boral dâwn a ni; Thil tisualtute zawng zawng hi tihdarhin an awm vek ang. 10 Nimahsela, ka ki hi selepa ki angin i chawimawi a; Hriak thara thih ka ni ta. 11 Ka mitin ka hmêlmate chunga ka thu duhsâm thleng chu a hmu ta a, Ka bengin thil ṭha lo titu, mi rawn beitute chunga ka thu duhsâm thleng thâwm chu a hre ta. 12 Mi fel chu tûm angin a duah hluah hluah ang a, Lebanon tlânga sidar thing angin a ṭhang uak uak ang. 13 LALPA ina phunte chu Kan Pathian biak in hung chhûng kawtlaiah chuan an duah hluah hluah ang. 14 Tar hnuah pawh an la rah fo vang a; Tui pai ṭeuhvin an hring hluah hluah ang, 15 LALPA chu mi dik tak a ni tih lantîrna tûrin; Ani chu ka lungpui a ni a, amahah chuan fel lohna rêng rêng a awm lo.
Lal Pathian
1 LALPA chu lalah a ṭhu a, a ropuinain a inthuam a; LALPA chu a inthuam a, chaknain a taiah a inhrêng ta a. Khawvêl pawh hi, a nghîn theih lohna tûrin tihnghehin a awm a. 2 I lalṭhutphah chu hmasânga lo tihngheh tawh a ni a; Nang chu chatuana awm tawh i ni. 3 Aw LALPA, luipuite chuan an chhuah a, Luipuite chuan aw an chhuah a, Luipuite chuan an ri nasa tak chu an chhuah a. 4 Tui tam tak awte aiin, Tuifinriat fâwn chak takte ai pawhin, Chung lama LALPA chu a chak a ni. 5 I thuhriattîrte chu a rinawm êm êm a: Aw LALPA, kumkhuain thianghlimna hi i in nên a inmawi a ni.
Mi tin rorêlsaktu Pathian
1 Aw LALPA, nang phuba lâkna thu neitu Pathian, Nang phuba lâkna thu neitu Pathian, êng chhuak ang che. 2 Nang leia rorêltu, thawk la; Chapote chu an sual man rûl ang che. 3 LALPA, mi suaksualte chuan eng chen nge, Mi suaksualte chuan eng chen nge an ngam dâwn le? 4 Anni chu an ṭawng mai mai a, chaltlai takin thu an sawi a; Thil tisualtute zawng zawng chu an infak chawp ṭhîn. 5 Aw LALPA, i mite chu an tikeh sawm a, I rochan chu an tihrehawm ṭhîn. 6 Hmeithai leh mikhual chu an tihlum a, Pa nei lo chu an that ṭhîn. 7 “LALPAN a hmu lo vang a, Jakob-ho Pathianin a ngaihtuah hek lo vang,” an ti ṭhîn a ni. 8 Mi zînga mi mâwlte u, ngaihtuah rawh u; Mi âte u, eng tikah nge in fin ang aw? 9 Beng vuahtu chuan a hre lo vang em ni? Mit siamtu chuan a hmu lo vang em ni? 10 Hnam tin thununtu chuan a zilhhau lo vang em ni, Mihring finna zirtîrtu chuan? 11 LALPA chuan mihring ngaihtuahte chu engmahlo mai mai a ni tih a hria. 12 LALPA, i thununna dawngtute chu an eng a thâwl e, I dân thu ata i zirtîrna dawngtute chu. 13 Mangan ni ata i chawlhtîr dâwn si a, Mi sualte tân khuarkhurum laih zawh a nih hma chu. 14 LALPA chuan a mite a paih thla dâwn si lo va, A ro chan chu a kalsan hek lo vang. 15 Rorêlna chu felna lamah a kîr leh ang a, Thinlung dik tak pu zawng zawng chuan chu chu an zui ang. 16 Tu nge thil ṭha lo titute mi beihsak tûrin tho vang? Tu nge thil tisualtute mi beihsak tûrin ding ang? 17 LALPA chu mi ṭanpuitu ni suh sela chuan, Ka nunna hi rang takin hmun rehah a awm tawh ang. 18 “Ka ke a tleu ve,” ka tih khân, Aw LALPA, i ngilneihna chuan mi kai a. 19 Ka rilrua ngaihtuah tam tak ka neih lai chuan, I thlamuannate chuan ka nunna hi a tihlim ṭhîn. 20 Suahsualna lalṭhutphah, dâna thil tihsualna siam ṭhîna chuan pâwlna che a nei dâwn em ni? 21 Mi fel nunna beih tumin an pung khâwm hlawm ṭhîn a, Thisen sawisêl bo chu thiam loh an chantîr bawk ṭhîn. 22 Nimahsela, LALPA chu ka kulhbîng sâng a lo ni a; Ka Pathian chu ka inhumhimna lungpui a lo ni. 23 Ani chuan anmahni sualna ngei chu an chungah a tlâktîr a, Anmahni ṭhat lohna ngeiah chuan a tiboral ang a; LALPA kan Pathian chuan a tiboral ang.
Fakna hla
1 Aw lo kal rawh u, LALPA chawimawiin hlim takin i zai ang u; Kan inchhandamna lungpui chawimawiin hlim takin i au vang u. 2 Lâwm thu sawiin a hmaah i kal ang u khai, Fakna hla saa amah chawimawiin hlim takin aw i chhuah ang. 3 LALPA chu Pathian ropui tak a ni si a, Pathian zawng zawng chungah Lal ropui tak a ni. 4 Ama kutah chuan lei hmun thûk takte chu a awm a; Tlâng chhîp sâng takte chu a ta a ni bawk. 5 Tuifinriat hi a ta a ni, ama siam a ni si a; Khawmual pawh hi a kutchhuak a ni. 6 Aw lo kal ula, chibai bûkin i kûn ang u khai; LALPA min Siamtu hmaah i ṭhingṭhi ang u. 7 Ani chu kan Pathian a ni a, Keini hi a ran tlatna hmuna mi leh, a kuta berâmhote kan ni si a. Vawiin hian a aw chu lo hre teh ula aw! 8 Meriba-a an tih ang khân in thinlung tikhauh suh u, Thlalêra Masa ni ang khân: 9 Chumi lai chuan in thlahtute chuan mi thlêm a, Mi fiah a, ka thiltih chu an hmu a. 10 Kum sawmli chhûng zet chumi chhuanho chungah chuan ka lungni lo va, “An thinlunga ngaihsual hmang mi an ni a, Ka kawngte pawh an hre lo,” ka ti a. 11 Chuvângin, “Ka chawlhnaah chuan an lût lo vang,” tiin, thinurin chhia ka chham ta a.
Pathian - Lal ropui ber
1 Aw, LALPA chawimawiin hla thar sa ula; Leilung luah zawng zawngte u, LALPA chawimawiin zai rawh u. 2 LALPA chawimawia hla sain a hming fak ula; Ni tin a chhandamna thu chu hriattîr rawh u. 3 Hnam tin zîngah a ropuizia hril ula, Mi tinrêngte zîngah a thil mak tihte chu hril rawh u. 4 LALPA chu a ropui a, nasa taka fak tûr a ni si a; Pathian zawng zawng aia ṭih tûr a ni. 5 Mipuiho pathiante chu milemte an ni si a, LALPA erawh chuan vânte khi a siam a ni. 6 Chawimawina leh ropuina a hmaah an awm a; Chakna leh mawina chu a hmun thianghlimah an awm. 7 Mi tina chi tinrêngte u, LALPA chu pe ula, LALPA chu ropuina leh chakna pe rawh u. 8 LALPA chu a hming ropuina chu pe ula; Thilhlan tûr kengin a biak in hung chhûng kawtlaiahte chuan lo kal rawh u. 9 Aw, thianghlim mawina inbelin LALPA chu chibai bûk ula; Leilung luah zawng zawngte u, a hmaah khûr rawh u. 10 Hnam tin zîngah chuan, “LALPA chu lalah a ṭhu,” ti rawh u; Khawvêl pawh hi a nghîn theih lohna tûrin tihnghehin a awm a, Ani chuan thlei bîk nei lovin mi tin ro chu a rêl ang. 11 Vânte khi lâwm takin awm sela, lei pawh hi hlim takin awm rawh se; Tuifinriat leh a chhûnga thil awm zawng zawng hi ri hum hum rawh se. 12 Lo leh a chhûnga awm zawng zawng hi lâwm takin awm rawh se: Chutih hunah chuan ramhnuaia thing zawng zawng hi hlimin an zai ang, 13 LALPA hmaah chuan; ani chu a lo kal dâwn a ni, Lei rorêl tûrin a lo kal dâwn si a; Khawvêl hi fel takin ro a rêlsak ang a, Mi tinte chu a thutakin ro a rêlsak bawk ang.
Pathian - Rorêltu ropui ber
1 LALPA chu lalah a ṭhu a; lei hi hlim takin awm sela; Thliarkâr tam takte chu lâwm takin awm rawh se. 2 Chhûmte leh thim chhah mup chu a vêlah a awm a; Felna leh rorêlna fel chu a lalṭhutthlêng nghahchhan a ni. 3 A hma lamah chuan mei a kal a, A vêla amah dotute chu a kâng ral ṭhîn. 4 A kâwlphete chuan khawvêl hi a ên zawk zawk a; Lei hian a hmu a, a khûr a. 5 Tlângte chu khawihnûn ang hian LALPA hmaah a tui ral ta a, Khawvêl zawng zawng LALPA hmaah chuan. 6 Vânte khian a felna chu a tlângaupui ṭhîn a, Mi tinrêng chuan a ropuizia an hmu ta a. 7 Milem siam chawp rawngbâwltu zawng zawng chu mualphovin awm rawh se, Milem chhuangtute chu. Nangni pathian zawng zawngte u, amah chu chibai bûk rawh u. 8 Zion tlâng chuan a hria a, lâwm takin a awm a, Juda fanute chu hlim takin an awm bawk a, Aw LALPA, i rorêlnate avângin. 9 LALPA, nang chu leilung zawng zawng chungah hian chungnung ber i ni si a; Nang chu pathian zawng zawng chung daihah chawimawiin i awm a. 10 Aw, LALPA hmangaihtute u, sual haw rawh u. Ani chuan a mi thianghlimte nunna chu a vawng ṭha ṭhîn a; Anni chu mi suaksualte kut ata a chhanhim ṭhîn. 11 Mi felte tân khua a lo êng a, Thinlung dikte tân lâwmna a lo thleng. 12 Mi felte u, LALPA-ah lâwm takin awm ula; A hming thianghlim chu fak rawh u.
Fakna Hla.
Khawvêl rorêltu Pathian
1 Aw, LALPA chawimawiin hla thar sa rawh u; Thil mak takte a ti ta si a; A kut ding lam leh a bân thianghlim chuan a tân chhandamna a siamsak ta a. 2 LALPA chuan a chhandamna chu a hriattîr a; A felna chu hnam tin mit hmuhah chuan fiah takin a lantîr ta a. 3 Israela chhûngte chunga a ngilneihzia leh a rinawmzia chu a hre reng a; Kâwlkila mi zawng zawng pawhin kan Pathian chhandamna chu an hmu ta a. 4 Leilung luah zawng zawngte u, LALPA chawimawiin hlim takin au ula; Au chhuak ula, hlimin zai rawh u, a ni, fakna hla sa rawh u. 5 Ṭingṭang nên LALPA fakin zai rawh u, Ṭingṭang leh fakna hla thâwm nên. 6 Tawtawrâwtte leh tawtawrâwt bi nei ri nên, Lalber, LALPA hmaah chuan, hlim takin au rawh u. 7 Tuifinriat leh a chhûnga thil awm zawng zawng hi ri hum hum rawh se; Khawvêl leh a chhûnga chêngte nên hian. 8 Luipuite chuan an kut bêng sela; Tlângte chu hlimin zai ho rawh se, 9 LALPA hmaah chuan, lei rorêl tûrin a lo kal dâwn si a. Khawvêl hi fel takin ro a rêlsak ang a, Thlei bîk nei lovin mi tin ro chu a rêl ang.
Pathian - Lal ropui ber
1 LALPA chu lalah a ṭhu a; mi tin chu khûr rawh se! Ani chu cherub-te chungah a ṭhu a; lei hi nghîng rawh se. 2 LALPA chu Zion khaw chhûngah chuan ropui tak a ni a; Mi tinrêngte chungah chuan chungnung daih a ni. 3 Anni chuan i hming ropui tak leh hlauhawm tak chu fak rawh se- Amah chu a thianghlim a ni. 4 Lalber chakna chuan rorêlna a ngaina a; Nang chuan thlei bîk neih lohna i tinghet ṭhîn a, Nang chuan Jakob-ho zîngah ro i rêl a, fel takin i ti ṭhîn. 5 LALPA kan Pathian chu chawimawi ula, A ke nghahchhan bulah chuan chibai bûk rawh u: Amah chu a thianghlim a ni. 6 A puithiamte zîngah chuan Mosia leh Arona, A hming lamtute zîngah chuan Samuela; Anni chuan LALPA chu an ko va, ani chuan a chhâng ta a. 7 Chhûm dingah chuan an hnênah thu a sawi a: A thuhriattîrte leh thuruat a pêk chu an zâwm a. 8 Aw LALPA kan Pathian, nang chuan anni chu i chhâng a; Nang chu anmahni ngaidamtu Pathian i ni, An thiltih chungahte phuba la ṭhîn mah la. 9 LALPA kan Pathian chu chawimawi ula, A tlâng thianghlimah chuan chibai bûk rawh u; LALPA kan Pathian chu a thianghlim si a.
Lâwm thu sawia Fakna Hla
1 Ram zawng zawngte u, LALPA chawimawiin hlim takin au rawh u. 2 Lâwm chungin LALPA rawng bâwl ula; Hla sa chungin a hmaah lo kal rawh u. 3 LALPA chu Pathian a ni tih hre rawh u; Min siamtu chu amah chu a ni a, ama ta kan ni; A mite leh a ran tlatna hmuna berâmhote chu kan ni. 4 Lâwm thu sawi chungin a kawngkhârah chuan lût ula, Fak chungin a biak in hung chhûng kawtlaiah chuan lût rawh u. A hnênah lâwm thu sawi ula, a hming chu fak rawh u. 5 LALPA chu a ṭha si a; a ngilneihna chu kumkhuain a awm ang a; A rinawmna chu chhuan zawng zawng thlengin a awm ang.
Davida Fakna Hla.
Lalber thutiam
1 Ngilneihna leh rorêlna thu chu hlaah ka sa ang a; Aw LALPA, nangmah fakin ka zai ang. 2 Kawng ṭha famkimah chuan fing takin ka awm ang a: Aw, eng tikah nge ka hnênah i lo kal ang? Ka in chhûngah thinlung ṭha famkim puin ka awm ang. 3 Thil ṭha lo rêng rêng ka mit hmuhah chuan ka dah lo vang; Kal pêngte thiltih chu ka hua a ni; Keimahah a bet lo vang. 4 Thinlung luhlul chuan mi kalsan ang a; Thil sual rêng rêng ka hre lo vang. 5 Tu pawh a vêngte a rûka rêl apiang chu, chu mi chu ka tiboral ang a; Mit sâng leh thinlung chapo pu mi chu ka ngaithei lo vang. 6 He rama mi rinawmte chungah hian ka mit a fu ang, ka hnêna an awm theih nân; Kawng ṭha famkim zawhtu chu, chu mi chuan ka rawng a bâwl ang. 7 Bum hmang mi chu ka in chhûngah a awm lo vang a; Dâwt heh mi chu ka mit hmuhah tihnghehin a awm lo vang. 8 Tûk tin he rama mi suaksual zawng zawng hi ka tiboral ang; LALPA khawpui ata hi thil tisualtute zawng zawng tiboral tûrin.
Hrehawm tuartu ṭawngṭaina, a chauhva, LALPA hmaa a mangan thu a sawi laia mi.
Tlangvâl mangang ṭawngṭaina
1 Aw LALPA, ka ṭawngṭaina hi ngaithla la, Ka au thâwm hi i hnên thleng rawh se. 2 Ka mangan niah ka lakah hian i hmai thup suh la; Ka lamah hian i beng rawn dawh la; Ka koh hun che chuan mi chhâng thuai ang che. 3 Ka dam chhûng nite hi meikhu angin a zâm ral a, Ka ruhte hi thingthu nung angin a sâ a. 4 Ka thinlung hi hlobet anga em hlumin a awm a, a vuai zo ta; Chaw ei pawh ka theihnghilh si a. 5 Ka rûm thâwm avângin ka ruhte hi ka tisaah a bet tlat a ni. 6 Thlalêr tuivalawng ang ka ni a; Khaw ram chhimbuk ang mai ka lo ni ta. 7 Ka meng reng a, Chawngzawng, in chunga amah chauhva awm ang ka lo ni ta. 8 Mi dotute chuan nilêngin mi sawichhe ṭhîn a; Ka chunga kawlhte chuan keimah anga awm tûrin ânchhia an lawh ṭhîn. 9 Vut hi chaw angin ka ei a, Ka in tûr chu mittui nên ka pawlh ta si a. 10 I lungnih loh êm êm leh i thinur avângin, Nangin mi la kâng a, mi paih bo ta si a. 11 Ka dam chhûng nite hi hlim ral lam tung tawh ang a ni a; Hlobet angin ka vuai ta. 12 Aw LALPA, nang erawh chu kumkhuain i awm ang a; Nangmah hriat rengna pawh chhuan zawng zawng thlengin a awm bawk ang. 13 I tho vang a, Zion tlâng chu i khawngaih ang; Ani chu khawngaih a hun tawh si a, a ni, hun ruat chu a thleng ta. 14 I chhiahhlawhte chuan a lungte chu an ngainain, A vaivut pawh an khawngaih si a. 15 Chutichuan, hnam tinin LALPA hming chu an ṭih ang a, Leia lal zawng zawng chuan i ropuina chu an ṭih bawk ang. 16 LALPA chuan Zion khua chu a din leh ta si a, A ropuinaa inthuamin a lang ta a; 17 Pachhiate ṭawngṭaina chu a ngaihsak a, An ṭawngṭaina chu a hmusit lo. 18 Chu chu ṭhangthar lo la awm tûr tân chuan ziak a ni ang a, Siama lo la awm tûr hnam chuan LALPA chu an fak ang. 19 Ani chuan a hmun thianghlim sâng tak aṭangin a zuk en a; LALPA chuan vân aṭang khian lei hi a hmu a; 20 Mi tâng rûm chu ngaithla tûr leh, Thi tûra ruatte chu phelh tûrin; 21-22 LALPA rawngbâwl tûra mi tin leh ram tin an inkhâwm huna, Miten LALPA hming chu Zion khuaa an hril theiha, A fakna thu chu Jerusalem khuaa an hril theih nân. 23 Ani chuan kawnglakah hian ka tha a tiṭhum a; Ka dam chhûng hi a titawi a. 24 “Aw ka Pathian, ka vânglai niahte hian mi la bo suh ang che,” ka ti a; Nanga kumte chu chhuan awm chhûng zawng zawngin a awm ang. 25 Leilung nghahchhan chu hmasânga i phûm tawh a ni a; Vânte pawh i kutchhuak a ni. 26 Chûngte chu a la boral ang a, nang erawh chu i awm reng ang: A ni, chûng zawng zawngte chu silhfên angin a la hlui ang a; Puan angin i thlâk ang a, a lo danglam tawh ang; 27 Nang erawh chu i pângngai fo va, I kumte chuan ral ni rêng a nei lo vang. 28 I chhiahhlawhte fate chu an awm reng ang a, An thlahte chu i hmaah tihnghehin an awm ang.
Davida Fakna Hla.
Pathian hmangaihna
1 Aw ka nunna, LALPA chu fak la; Ka kawchhûnga awm zawng zawngte u, a hming thianghlim chu fak rawh u. 2 Aw ka nunna, LALPA chu fak la, A thiltih ṭhat zawng zawng chu theihnghilh suh. 3 Ani chuan i khawlohna zawng zawng a ngaidam ṭhîn a; I natna zawng zawng a tidam ṭhîn a; 4 Boralna lak ata i nun chu a tlan ṭhîn a; Ngilneihna leh lainatnate a khumtîr ṭhîn chia; 5 I kâ chu thil ṭhain a titlai ṭhîn a; Chutichuan, i tleirâwlna chu mupui anga siam tharin a awm leh ṭhîn. 6 LALPA chuan hnehchhiahna tuar zawng zawngte tân, Thil felte tihsakin, rote a rêlsak ṭhîn. 7 A kawngte chu Mosia a hriattîr a, A thiltihte chu Israela thlahte a hriattîr bawk a. 8 LALPA chu lainatnaa khat, mi khawngaih thei tak, Thinnel tak, ngilneihna ngah tak a ni. 9 Ani chuan a hau fo lo vang a; A thinur chu a pai kumkhua hek lo vang. 10 Kan sualnate angin kan chungah a ti lo va, Kan khawlohnate angin min thungrûl hek lo. 11 Vân khi lei chung sâng taka a awm angin, Amah ṭihtute chunga a ngilneihna chu a nasa a ni. 12 Chhak leh thlang a inhlat ang hian, Kan bawhchhiatnate chu kan hnên ata a dah sawn ta daih a. 13 Pain a fate a khawngaih ang hian, LALPA chuan amah ṭihtute chu a khawngaih ṭhîn. 14 Kan taksa siam dân hi a hriata, Vaivut mai kan ni tih a hriat reng avângin. 15 Mihring zawng, a dam chhûng nite chu hlobet ang a ni a; Phûl pangpâr ang hian a vul ṭhîn a. 16 Thliin a chhêm a, a bo ṭhîn a ni, A awmna chuan a hre leh tawh lo vang. 17 LALPA ngilneihna erawh chu amah ṭihtute chungah chuan chatuan ata chatuan thlengin a awm ang a, A felna pawh an tuchhuan thlengin a awm ang; 18 A thuthlun zâwm apiangte leh, A thuhrilhte awih tuma hre reng apiangte chungah chuan. 19 LALPA chuan a lalṭhutphah chu vânahte khian a tinghet a; A ram chuan engkim chungah ro a rêl a. 20 A vântirhkohte u, a thu ngaithlaa a thu zâwm ṭhîn, chaknaa ropuite u, LALPA chu fak rawh u. 21 A sipaihote u, a duh zâwng ti ṭhîn, a rawngbâwltute u, LALPA chu fak rawh u. 22 A rorêlna hmun zawng zawnga a thiltih zawng zawngte u, LALPA chu fak rawh u; Aw ka nunna, LALPA chu fak rawh.
Siamtu fakna hla
1 Aw ka nunna, LALPA chu fak rawh. Aw LALPA ka Pathian, nang chu i ropui êm êm a, Chawimawina leh ropuinain i inthuam a. 2 Nang chuan êng chu puan angin i inbel a; Vânte khi puan in chung angin i kai pharh a. 3 Ani chuan a pindan chungnung kalkhangte chu tuiahte khian a khang a, Chhûmte khi a tawlailîrah a siam a; Thli thla chungahte chuan a lêng a. 4 A vântirhkohte chu thli-ahte a chantîr a; A rawngbâwltute chu meialh dur durah a chantîr ṭhîn. 5 Leilung nghahchhante chu a phûm a, Kumkhuaa a nghîn loh nân. 6 Nang chuan leilung hi tui thûk tak chu puan angin i sintîr a; Tuite chu tlâng chungahte chuan a awm po va. 7 I zilhhauna avâng chuan a tlân bo va; I khawpui ri thâwm avâng chuan a kal bo ta thuai a; 8 Tlângahte a chho va, kawrahte a chhuk a, A tân hmun i buatsaih lamah chuan. 9 A pelh loh tûrin ri i kham a; Lei chîm pil tûra a lêt leh tawh lohna tûrin. 10 Ani chuan kawrahte chuan tuihnate a tîr chhuak a; Tlâng kârahte chuan a luang a. 11 Chûngte chuan ramsa tinrêngte in tûr a pe ṭhîn a; Ramsabengtungte chuan an tuihâl an tireh ṭhîn. 12 A kamahte chuan chunglêng savaten awmna an nei ṭhîn a, Thingbuk zîngahte chuan an hrâm ṭhîn. 13 Ani chuan a pindan chungnung aṭang te khian tlângte chu tuiin a châwm ṭhîn a, Lei hi i thiltih rahtein a tlai ṭhîn. 14 Hlobet chu rante tân a ṭotîr ṭhîn a, Thlai chu mihring hmanah a ṭotîr bawk ṭhîn; Lei aṭangin ei tûr a chhuahtîr theih nân. 15 Mihring thinlung tihlâwmna uain nên, A hmai tihmawmna tûr hriak nên, Mihring thinlung tihchakna chhang nên. 16 LALPA thingte chu a tlai ṭhîn, Lebanon tlânga sidar thing a phunate chu. 17 Chutah chuan savaten bu an chhep ṭhîn, Vacha erawh chu fâr thingte chu a in a ni. 18 Tlâng sângte chu sathâr tân a ni a, Lungpuite chu sazupui tân inhumhimna a ni. 19 Ani chuan thla khi hunbi hriat nân a ruat a, Ni khian a tlâk hun chu a hre ṭhîn. 20 Nang chuan thim i siam a, zân a lo ni ṭhîn a; Chumi hunah chuan ramhnuaia sa tinrêngte chu an tla chhuak ṭhîn. 21 Sakeibaknei vânglaite chuan an sa seh tûr chu hâhum zuiin, Pathian hnên ata an ei tûr an zawng ṭhîn. 22 Ni a chhuak a, an kal bo va, An awmna pûk ṭheuhvahte chuan an mu ṭhîn a. 23 Mihring chu hna thawkin a chhuak a, Tlai lam thlengin a thawk rim ṭhîn. 24 Aw LALPA, i thiltihte chu a va tam êm! Finnain i siam vek a ni: Leilung hi i hausaknain a khat a nih hi. 25 Sawta saw tuifinriat a awm, nasa tak, zau tak mai chu, Sawmiah sâwn thil bawkvâka kal chhiar sên loh a awm a, Sa tê leh sa liante chu. 26 Sawta saw lawngpuite a kal saw; Sawtah sâwn leviathan a awm, a chhûnga inkhêl tûra i siama chu. 27 Chûng zawng zawng chuan an nghâk ṭheuh che a ni, A hun taka an chaw i pêk ṭheuh ṭhinna tûrin. 28 Anmahni i pêk apiang an chhar ṭhîn a; I kut i phar a, ṭhatnain an tlai ṭhîn. 29 I hmai i thup a, an mangang ṭhîn a; An thaw chu i lâksak a, an thi a, An vaivutah chuan an kîr leh ṭhîn. 30 I thlarau chu i tîr chhuak a, siamin an awm ṭhîn a; Lei chung pawh hi i siam thar leh ṭhîn. 31 LALPA ropuina chu kumkhuain awm sela; LALPA chu a thiltihahte chuan hlim rawh se. 32 Ani chuan lei hi a en a, a khûr ṭhîn a; Tlângte chu a khawih a, a khu chhuak ṭhîn. 33 Ka dam chhûng zawngin LALPA chawimawiin hla ka sa ang a, Ka nun chhûng zawngin ka Pathian fakin ka zai ang. 34 Ka ngaihtuahna hi a tân thlum tak ni rawh se; Kei chu LALPA-ah chuan ka hlim ang. 35 Mi sualte chu lei aṭang hian tihboralin awm sela, Mi suaksualte chu awm tawh suh se. Aw ka nunna, LALPA chu fak rawh. LALPA chu fak rawh u.
Pathian leh a mite
1 Aw, LALPA hnênah lawm thu hril ula, a hming lam rawh u; Mi tin zîngah chuan a thiltihte chu hriattîr rawh u. 2 Amah chawimawiin hla sa ula, amah fakin zai rawh u; A thil mak tih zawng zawng thu chu tîtî rawh u. 3 A hming thianghlim chu chhuang rawh u; LALPA zawngtute thinlung chu hlim rawh se. 4 LALPA leh a chakna chu zawng ula; A hmêl chu zawng fo rawh u. 5-6 Aw, a chhiahhlawh Abrahama thlahte u, Jakoba thlah, a thlante u, A thil mak tihte hre reng rawh u; A thil makte leh a kâa a rorêl chhuakte chu. 7 Ani chu LALPA kan Pathian chu a ni a; A rorêlte chu lei chung zawng zawngah hian a awm. 8 A thuthlun chu kumkhuain a hre ṭhîn a, Chhuan sângkhat thlenga a thu lo pêk chu; 9 Abrahama hnêna a thuthlun leh, Isaaka hnêna a chhechham chu. 10 Chu vêk chu thuruat atân Jakoba hnênah a tinghet a, Israela hnêna kumkhaw thuthlung atân: 11 “Kanaan ram hi ka pe ang che, I ro chanpual tûr chu,” tiin; 12 Mi tlêm tê chauh an nih lai khan; A ni, tlêm tê mai, chumi ramah chuan mikhual an ni nghâl si a. 13 Hnam hrang hrang hnênah an kal lâwr an kal lâwr a, Ram hrang hrang aṭangin mi hrang hrang hnênah. 14 Tu ma hnehchhiah a phal lo va; A ni, anmahni avângin lalte pawh a zilhhau va; 15 “Ka hriak thihate chu tawk suh ula, ka zâwlneite pawi rêng rêng pawh khawih suh u,” tiin. 16 Chumi rama tla tûrin ṭâm a ko va; Ei tûr rêng a awm lohtîr ta a. 17 An hmaah mi a tîr a; Josefa chu chhiahhlawh atân hralhin a awm a. 18 A kete chu kawlin a tina a; Thîrkhaidiat bunin a awm ta a. 19 A thu a thlen hma loh chuan, LALPA thuin amah chu a fiah ṭhîn a. 20 Lalber chuan mi a tîr a, a phelh a, A chhuah ta a, mi tin rorêltu ngei chuan. 21 A chhûngte chunga hotuah leh, A sum zawng zawng chunga rorêltuah a siam a, 22 A mi liante chu duh duha phuar tûr leh, A upaho tifing tûrin. 23 Israela pawh chu Aigupta ramah a kal a; Jakoba chu Hama ramah chuan a awm ta rih a. 24 A mite chu nasa takin a tipung a, Anmahni dotute aiin a tichak ta zâwk a. 25 A mite haw tûrin an thinlung a inlamlêttîr a, A chhiahhlawhte chunga vervêk taka ti tûrin. 26 A chhiahhlawh Mosia chu a tîr a, A mi thlan Arona nên. 27 Anni chuan a chhinchhiahnate chu an zîngah an entîr a, Hama ramah chuan thil makte an entîr a. 28 Ani chuan thim a tîr a, a tithim ta a; Tichuan, a thute chu an hnial ta lo va. 29 An tuite chu thisenah a chantîr a, An sanghate chu a tihlum ta a. 30 An ram chu chungûin a khat ta a, An lalte pindanah lam pawh. 31 Ani chuan thu a sawi a; tichuan, tho tam tak an lo kal a, Hrik pawh an ram chhûng zawng zawngah a lo kal bawk a. 32 An hnênah ruah aiah rial a pe a, An ramah chuan meialh zawk zawk a pe ta bawk a. 33 An grêp hruite leh an theipui kûngte a tithi a; An rama thingte chu a titliak bawk a. 34 Ani chuan thu a sawi a; tichuan, khaukhuapte an lo kal a, Pangangte nên, chhiar sên rual loh mai hian. 35 Chûngte chuan an rama thlai tinrêng chu an ei zo va, An lei rahte pawh an ei zo ta bawk a. 36 An rama fa tîr awm zawng zawng a tihlum a, An chakna zawng zawng rah hmasa berte chu. 37 Tichuan, tangkarua leh rangkachak nên a hruai chhuak ta a, Ama hnamte zîngah chuan mi chak lo pakhat mah an awm lo. 38 An chhuah lai chuan Aigupta-ho chu an lâwm a; Anni chu an lo hlauh tâk avângin. 39 Ani chuan hliahtu atân chhûm a zâmtîr a, Zâna ên tûrin mei a pe bawk a. 40 An dîl a; tichuan, vahmîm a rawn hruai a, Vân chawin anmahni a titlai ta a. 41 Lungpui chu a hawng a; tichuan, tui a lo chhuak dur dur a, Hmun rovahte chuan lui ang maiin a luang ta a. 42 A thu thianghlim kha a hre reng si a, A chhiahhlawh Abrahama nên khân. 43 Tichuan, a mite chu hlim takin a hruai chhuak ta a, A mi thlante chu hla sa chung zêlin. 44 Tin, hnam tin ramte chu a peksak a; Anni chuan mi tin thawh chhuah sa chu an luah ta a; 45 A thuruatte chu an zawm theiha, A dânte chu an vawn ṭhat theih nân. LALPA chu fak rawh u.
A mite chunga LALPA ṭhatzia
1 LALPA chu fak rawh u. Aw LALPA hnênah lâwm thu hril rawh u; ani chu a ṭha si a. A ngilneihna pawh kumkhuain a awm dâwn si a. 2 Tu nge LALPA thiltih ropui takte chu sawi theia, A fakna zawng zawng hriattîr vek thei le? 3 Rorêlna vawng ṭhate chu an eng a thâwl e, Eng lai pawha fel taka titu nên. 4 Aw LALPA, i mite i duhsaknain mi hre reng la, Aw, i chhandamna nên mi kan ang che, 5 I mi thlante nihlawhna ka hmuh theiha, I ro chanho nêna ka chhuan theih nân. 6 Kan thlahtute nên khân thil kan tisual a, Thil sual kan ti a, sual takin kan ti ta a. 7 Kan thlahtute khân Aigupta rama i thil mak tihte kha an hre thiam lo va; I ngilneihna nasa tak kha an hre reng ta lo va, Tuifinriatah an hel ta zâwk a, Tuifinriat Senah khân. 8 Chuti chung pawhin ama hming avângin anni chu a chhandam ta a, A thiltihtheihna ropui tak chu a hriattîr theihna tûrin. 9 Tuifinriat Sen chu a zilhhau va; tichuan, a kang ta a; Chutichuan, anni chu thlalêra hruai tlang ang maiin tui thûk takahte chuan a hruai tlang ta a. 10 Anmahni hawtu kut ata chu a chhandam a, Hmêlma kut ata chu a tlan ta a. 11 Tuite chuan anmahni dotute chu a khuh zo va. Pakhat mah dama chhuak an awm ta lo va. 12 Chumi lai chuan a thute chu an ring a; A fakna hla an sa a. 13 Nimahsela, a thiltihte chu an theihnghilh ta thuai a; A remruat chu an nghâk peih lo va. 14 Thlalêrah chuan thil an châk êm êm a, Ram rovah chuan Pathian an fiah ta zâwk a. 15 An thil dîl chu a pe a; Nimahsela, an nunnaah chuan chêrna a luhtîr ta a. 16 An riahhmunah chuan Mosia chu an îtsîk a, LALPA mi thianghlim Arona nên. 17 Lei chu a âng a, Dathana chu a lem a, Abirama pâwlte chu a khuh zo ta a. 18 An pâwl zîngah chuan mei tihalhin a lo awm a; Meialh chuan mi suaksualte chu a kâng ral ta. 19 Horeb tlângah chuan bâwngno lem an siam a, A lem chhûn chu an be ta a. 20 Chutiang chuan an ropuina chu bâwngpa, hlobet ei mi ang lekah an chantîr ta a. 21 Pathian, an chhandamtu chu an theihnghilh ta a, Aigupta rama thil ropui tak tak, 22 (Hama ramah thil mak takte, Tuifinriat Sen kamah thil râpthlâk takte) titu chu. 23 Chuvângin, a tiboral dah ang e, tia a thinrim tikîr tûrin, A mi thlan Mosia chu a luhna tûrah chuan a hmaah ding lo phei sela chuan, A tiboral ang tih a sawi a. 24 A ni, ram duhawm tak chu an ngainêp a, A thu chu an ring duh lo va; 25 An puan inahte chuan an phunnawi ta zâwk a, LALPA aw chu an ngaithla duh lo va. 26 Chuvângin, an lamah chuan a kut a phar a, Anniho chu thlalêra a tihtlûkna tûr leh, 27 An chi thlah tûrte chu hnam tin zînga a tihtlûka, Ram tina a tihdarhna tûrin. 28 Baal-peor lamah chuan an bet a, Mitthi hnêna thilhlante chu an ei ve ta a. 29 Chutiang chuan an thiltihtein ani chu an tithinur a; Tichuan, hri chu an chungah a lo lêng ta a. 30 Chutih lai chuan Phinehasa chu a ding a, ro a rêl a; Tichuan, hri chu tihrehin a awm ta a. 31 Chu chu a felnaa ruat a ni, Kumkhuain, chhuan zawng zawng thlengin. 32 Meriba tuiahte pawh chuan ani chu an tithinur a, Chutichuan, anmahni avângin Mosia chungah thil ṭha lo a thleng ta hial a; 33 A thlarau chunga an hela, A hmuia ṭha lo taka a sawi avângin. 34 LALPAN an hnêna tihboral thu a pêk angin mipuite chu an tiboral lo va. 35 Hnam tin chu an pawlh a, An thiltihte chu an zir zâwk a. 36 An milem rawng te an bâwl a; Chûng chu an tân thang a lo ni ta a. 37 A ni, ramhuai hnênah te chuan an fapate, an fanutein an inthawi a, 38 Thisen sawisêl bo, an fapate leh an fanute thisen ngei chu an chhuah ta a. Chûngho chu Kanaan ram milemte hnênah an inthawi a; Chumi ram chu thisenin a lo bawlhhlawh ta a. 39 Chutiang chuan an hnathawhtea tihbawrhbânin an awm a, An thiltihahte chuan an lo uirê ta a. 40 Chuvângin, LALPA thin chu a mite chungah a thawk a, A ro chan chu a ten ta a. 41 Tichuan, anni chu hnam tin kutah a pe a; Anmahni hawtute chuan an chungah ro an rêl ta a. 42 Anmahni dotuten an hnehchhiah a, An kut hnuaiah chuan tihtlâwmin an awm ta a. 43 Vawi tam tak anni chu a chhanhim a; Nimahsela, a remruatnaah chuan an hel ṭhîn a, An khawlohnaah chuan tihhniamin an awm ta a. 44 Chuti chung pawhin ani chuan an au thâwm a hriat chuan, An mangang chu a ngaihsak a; 45 A thuthlun chu anmahni a hriatsak reng a, A ngilneihna nasat avângin a rilru a inlamlêt ta a. 46 Sala hruaitu zawng zawngte chu Anmahni a khawngaihtîr a. 47 Aw LALPA kan Pathian, min chhandam la, Hnam tin zîng ata min hruai khâwm ang che, I hming thianghlim chu fak tûr leh i fakna chhuang tûrin. 48 LALPA, Israel-te Pathian chu fakin awm rawh se, Chatuan ata chatuan thleng pawhin. Mi zawng zawng chuan, “Amen,” ti rawh se. LALPA chu fak rawh u.
Pathian ṭhatzia fakna
1 Aw, LALPA hnênah lâwm thu hril rawh u, ani chu a ṭha si a; A ngilneihna pawh kumkhuain a awm dâwn si a. 2 LALPA mi tlante chuan chutiang chu sawi rawh se, Dotu kut ata a tlan, 3 Ram tin ata a hruai khâwm, Chhak leh thlang, chhim leh hmâr atate chuan. 4 Thlalêra ram ro kawngah chuan an vâk an vâk a; Mihring awmna khua rêng rêng an hmu lo va. 5 Rilṭâm leh tuihâlin An nunna chu an kawchhûngah a chau ta a. 6 Chu veleh, an buainaah chuan LALPA chu an au va, Ani chuan an manganna atate chu a chhanhim a. 7 Mihring awmna khuaa an kal theih nân kawng ngîl takah a hruai ta a. 8 Aw, mihringte hian LALPA chu a ngilneihna avâng leh, Mihring fate chunga a thil mak tihte avâng hian fak teh sela aw! 9 Ani chuan nunna thil châk êm êm chu a titlaiin, Nunna rilṭâm chu ṭhatnain a tipuar si ṭhîn a. 10 Thim hnuaiah leh thihna hlima ṭhua, Hrehawmna leh thîra phuarte chu; 11 Pathian thu chungahte an hela, Chungnungbera remruat chu an ngaihnêp avângin; 12 Ani chuan an thinlung chu thawh rimnain a hmin ta a; An tlu a, ṭanpuitu tûr rêng rêng an awm si lo va. 13 Chu veleh, an buainaah chuan LALPA chu an au va, Ani chuan an manganna atate chu a chhandam a. 14 Thim hnuai ata leh thihna hlim ata chu a hruai chhuak a, An phuarnate chu a tichat ta a. 15 Aw, mihringte hian LALPA chu a ngilneihna avâng leh, Mihring fate chunga a thil mak tihte avâng hian fak teh sela aw! 16 Ani chuan dâr kawngkhârte chu a tichhia a, A kalhna thîr tlâwnte chu a tibung ta si a. 17 Mi âte chu an bawhchhiatna avâng leh, An khawlohnate avângin an intihrehawm ṭhîn a. 18 An nunna chuan ei tûr tinrêng hi a ten a; Thihna kulh kawngkhârte chu an hnaih ṭhîn. 19 Chu veleh, an buainaah chuan LALPA chu an au va, Ani chuan an manganna atate chu a chhandam ṭhîn. 20 A thu chu a tîr chhuak a, anni chu a tidam ṭhîn a, An boralna tûr atate chu a chhanhim ṭhîn. 21 Aw, mihringte hian LALPA chu a ngilneihna avâng leh, Mihring fate chunga a thil mak tihte avâng hian fak teh sela aw! 22 Anni chuan lâwm thu sawi inthawinate chu hlân sela, A thiltihte chu hla sain hril rawh se. 23 Tuifinriatah lawng liana zuk kala, Tui zau tak chungtea hnathawk ṭhînte chuan; 24 Chûngte chuan LALPA thiltihte leh, Tui thûk taka a thil mak tihte chu an hmu ṭhîn. 25 Ani chuan thu a pe a, thlipui a tlehtîr a, Chu chuan a tuifâwnte chu a tisâng ṭhîn. 26 Vânah an chho tual tual a, thûk takah an chhuk leh tual tual ṭhîn a: Manganna avângin an nunna chu a tui ral ṭhîn. 27 Zu rui angin an thle an thle a, an pai thlawk thlawk a, Awm ngaihna rêng rêng an hre ṭhîn lo. 28 Chu veleh, an buainaah chuan LALPA chu an au va, Ani chuan an manganna atate chu a hruai chhuak ṭhîn. 29 Thlipui chu a tibâng ṭhuap a; Chutichuan, a tuifâwnte chu a reh ṭhup ṭhîn. 30 Tin, a reh tâk avângin an lâwm ṭhîn a; Ani chuan an ngaih tak thli ûpah chuan a hruai thleng ṭhîn. 31 Aw, mihringte hian LALPA chu a ngilneihna avâng leh, Mihring fate chunga a thil mak tihte avâng hian fak teh sela aw! 32 Anni chuan mipui inkhâwmnaah amah chu fak sela, Upaho ṭhutnaah chuan fak rawh se. 33 Ani chuan luipuite chu thlalêrah a chantîr ṭhîn a, Tuihnate chu lei rovah a chantîr bawk ṭhîn. 34 Ram ṭha chu ram ro alah a chantîr ṭhîn, A chhûnga awmho suahsual avângin. 35 Thlalêr chu dîlah a chantîr ṭhîn a, Ram ro chu tuihnaahte a chantîr bawk ṭhîn. 36 Chutah chuan rilṭâmte chu a awmtîr ṭhîn, Awmna tûr khua an buatsaiha, 37 Lote an neiha, grêp huante an siama, A rah lo pungte chu an hmuh theihna tûrin. 38 Anni chu mal a sâwm ṭhîn a; chutichuan, nasa taka tihpunin an awm a; An rante chu a pulh a phal ṭhîn lo. 39 Tin, hnehchhiahna te, hrehawmna te leh lungngaihna te avângin An rawih ta telh telh a, an kun ta tlawk tlawk thung a. 40 Ani chuan mi liante chungah hmuhsitna a leihbaw ṭhîn a, Thlalêr, kawng rêng rêng awm lohnaah chuan a vah a vahtîr a. 41 Nimahsela, retheite chu hrehawmna aṭangin hmun sângah a hlâng ṭhîn a, Ran rual angin chhûngte a siamsak ṭhîn. 42 Mi dik takte chuan chu chu an hmu ang a, an lâwm ang; Khawlohna zawng zawng chuan a kâ a hup ang. 43 Tu pawh a fing apiangin chûngte chu an vawng ṭha ang a, LALPA ngilneihnate an ngaihtuah ang.
Hla, Davida Fakna Hla.
Hmêlma laka ṭanpui dîlna
1 Aw Pathian, ka thinlung hi a nghet a ni; Hla ka sa ang, a ni, fakna hla ka sa ang, ka ropuina ngeiin. 2 Perhkhuang leh ṭingṭangte u, harh rawh u! Kei chu zîng takah ka harh ang. 3 Aw LALPA, mi tin zîngah lâwm thu ka hrilh ang che, Hnam tin zîngah nangmah fakin ka zai ang. 4 I ngilneihna chu vân khûm khawpin a nasa si a, I thutak chuan vân dumte khi a tawng hial bawk a. 5 Aw Pathian, nang chu vân khûm daih khian chawimawiin lo awm ang che, I ropuina chu leilung zawng zawng chungah hian chawimawiin awm bawk rawh se; 6 I duh takte hi chhanhima an awm theih nân, I kut ding lamin chhandam la, min chhâng ang che. 7 Pathianin a thianghlimnaah chuan heti hian a sawi a, “Ka hlim ang; Sekem khua chu ka sem ang a, Sukkoth ruam chu ka sem darh bawk ang. 8 Gilead ram chu ka ta a ni a; Manase ram chu ka ta a ni a; Ephraim ram pawh chu ka lu humhimna a ni a; Juda ram chu ka laltiang a ni. 9 Moab ram chu ka insilna bêl a ni a; Edom ramah chuan ka pheikhawk ka paih ang a: Philistia ram chu ka au khum ang.” 10 Khawpui kulh neiah chuan tuin nge mi hruai lût ang? Edom ramah chuan tuin nge mi hruai ang? 11 Aw Pathian, nangin min thlauthla a ni lâwm ni? Aw Pathian, kan sipaihote hnênah lah i chhuak ve ta si lo. 12 Dotute bei tûrin min ṭanpui ang che, Mihring ṭanpuina chu engmahlo mai mai a ni si a. 13 Pathian zârah huai takin kan ti ang, Ani chu min dotute rap bettu tûr a ni si a.
Hla Hruaitu tân. Davida Fakna Hla.
Mi mangang phunnawi
1 Aw, ka fak Pathian, ngawi reng suh ang che! 2 Mi suaksual kâ leh ka bum hmang chu ka chungah an âng si a; Anni chuan lei dawtheiin ka hnênah thu an sawi a. 3 Huatna thuin mi hual vêl a, Enga khaw lawi lovin mi do va. 4 Ka hmangaih avângin mi dotute an lo ni ta a; Nimahsela, kei chu ṭawngṭai tûrin ka inpe tlat a. 5 Anni chuan thil ṭha chu thil sualin mi rûl a, Ka hmangaihna chu huatnain mi rûl bawk a. 6 Nangin a chungah mi sual dah la; A ding lamah hêktu ding rawh se. 7 Rorêlsaka a awm hunah thiam loh changin chhuak sela; A ṭawngṭaina chu sualnaah lo chang rawh se. 8 A dam chhûng nite chu tlêm sela; A hotu nihna chu mi dangin chang rawh se. 9 A fate chu pa lovin awm sela, A nupui chu hmeithaiin awm bawk rawh se. 10 A fate chu mi vâkvai lo niin, kutdawh sela; An ei tûr chu an hmun ramahte chuan zawng rawh se. 11 A pung ûma tangka pûktîrtu chuan a neih zawng zawng chu lâksak vek sela; Mikhualte chuan rawk sela, a thawh rim rah chu lâksak rawh se. 12 A chunga ngilneihna lantîr zêltu tûr tu mah awm suh sela; A fa, pa nei lote chu khawngaihtu tûr tu mah awm hek suh se. 13 A thlahte chu tihboralin awm sela; Ṭhangthar lo awm lehah chuan an hming chu thai bovin awm rawh se. 14 A thlahtute khawlohna chu LALPA hnênah hriat rengin awm sela; A nu sualna chu thai bovin awm suh se. 15 Chûngte chu LALPA hmaah awm fo rawh se, Ani chuan anmahni hriat rengna chu lei ata a tihboral theih nân. 16 Ngilneihna lantîr nachâng a hriat lohva, Mi rethei, pachhia leh lungchhiate chu tihhlum tuma a tihduhdah zâwk avângin. 17 A ni, ânchhe lawh hi a duh zâwng a ni a; tichuan, ama chungah a lo thleng a; Mi malsâwmsak hi a lâwm zâwng a ni lo va; Tichuan, amah hlat daihah a awm a. 18 Kawrfuala inthuam angin ânchhe lawhnain a inthuam a, Chu chu a kawchhûngahte chuan tui angin a lût a, A ruhahte chuan hriak angin a lût bawk a. 19 Chu chu a tân a inbel ṭhin silhfên angin awm sela, A inhrên fona kâwnghrên ni bawk rawh se. 20 Chûng chu mi dotute leh ka nunna sawichhetute LALPAN a thungrulhna a ni. 21 Nimahsela, aw Pathian, LALPA, nangin i hming avângin mi tihpui la: I ngilneihna a ṭhat avângin mi chhanhim ang che, 22 Rethei leh pachhe tak ka ni a, Ka thinlung hi ka kawchhûngah hliamin a awm bawk si. 23 Hlim ral lam tung tawh ang hian ka ral a; Khaukhuap ang hian len bovin ka awm a. 24 Ka khûpte hi chaw nghei avângin a chak ta lo va; Ka tîsa hian thau rêng a pu ta lo. 25 Anmahni sawichhiat ka lo ni ta a; Mi hmuh veleh an lu an thing ṭhîn. 26 Aw LALPA ka Pathian, mi ṭanpui la; Aw, i ngilneihna avângin mi chhandam ang che: 27 Chu chu i kut a ni tih an hriat theiha, LALPA, nangin i tih a ni tih an hriat theihna tûrin. 28 Annin ânchhia lawh rawh se, nang erawh chuan malsâwm zâwk ang che; An thawh veleh an mualpho vang a, i chhiahhlawh erawh chu a hlim ang. 29 Mi dotute chu zahna puan sintîrin awm sela, Kawra intuam angin anmahni mualphonain intuam rawh se. 30 Ka kâ hian LALPA hnênah lâwm thu nasa tak ka sawi ang a; A ni, mipui zîngah amah chu ka fak ang. 31 Ani chu pachhe ding lamah a ding ang, A nunna rorêlsaktute laka chhandam tûrin.
Davida Fakna Hla.
LALPA leh a lal thlan
1 LALPA thuchhuak chuan ka lalpa hnênah, “I hmêlmate i ke nghahchhana ka siam hma loh zawng, Ka ding lamah ṭhu rawh,” a ti a. 2 LALPA chuan i chakna tiang chu Zion tlâng aṭangin a tîr chhuak ang; nangin nangmah dotute zîngah ro rêl rawh. 3 I mite chu i thiltihtheihna niah chuan mahni duh thuin an inpe ṭhîn; Thianghlim mawinaah, zîng pum chhûng aṭangin, I tleirâwl daifîm chu i nei a. 4 LALPAN chhia a chham a, a inlamlêt tawh lo vang, “Nang zawng Melkisedeka awm dân anga chatuana puithiam i ni e,” tiin. 5 LALPA - i ding lama awm chuan a thinur niah chuan lalte a sât chhum rem rum ang. 6 Hnam tin zîngah ro a rêl ang a, Hmunte chu ruangin a tikhat ang a, Ram tam takah chuan lu chu a sât phel rem rum ang. 7 Kawnglaka luitêa mi a in ang a; Chu vâng chuan a lu chu a chawi sâng ang.
LALPA fakna
1 LALPA chu fak rawh u. Mi dik takte inrâwn khâwmnaah leh inkhâwmnaah chuan Ka thinlung zawng zawngin LALPA hnênah lâwm thu ka hrilh ang. 2 LALPA thiltihte chu a ropui a, A chunga lâwm apiangten zawn chhuah a ni ṭhîn. 3 A hnathawh chu a zahawmin a ropui a, A felna chu kumkhuaa awm tûr a ni. 4 Ani chuan a thil mak tihte chu a hriat rengtîr a; LALPA chu mi khawngaih thei tak, lainatnaa khat a ni. 5 Amah ṭihtute chu ei tûr a pe a; A thuthlun chu kumkhuain a hre reng ang. 6 A thiltihte chakzia chu a mite hnênah a lantîr a, Hnam tin ro chan chu anmahni pein. 7 A kut thiltihte chu thutak leh rorêlna fel a ni a; A thununna thu zawng zawng chu a rinawm a ni. 8 Chûng chu kumkhaw tlaitluan atân tihnghehin a awm a, Thutak leh dik taka tih a ni hlawm. 9 Ani chuan a mite hnênah tlanna a rawn tîr a; A thuthlun chu kumkhua atân a ruat a: A hming chu a thianghlimin a zahawm a ni. 10 LALPA ṭih chu finna bul a ni a; Chutianga ti apiangte chuan hriat thiamna ṭha an nei. Amah fakna chu kumkhuaa awm tûr a ni.
Mi ṭha nihlawhzia
1 LALPA chu fak rawh u. LALPA ṭih mi chu a eng a thâwl e, A thupêkahte nasa taka lâwm mi chu. 2 A thlahte chu leiah hian chak takin an awm ang a; Mi dik takte chhuan chu malsâwmin an awm ang. 3 A inah chuan sum leh hausakna a awm a; A felna chu kumkhuaa awm tûr a ni. 4 Mi dik tân chuan thimah chuan êng a lo chhuak ṭhin a; Ani chu mi khawngaih thei tak, lainatnaa khat, fel tak a ni. 5 Mi khawngaiha pûktîr ṭhîn mi chu ṭhatin a vûr ṭhîn a; Ani chu fel takin a khawsa ang. 6 Eng tikah mah a nghîng dâwn si lo va; Mi fel chu kumkhuaa hriat rengin a awm ang. 7 Chanchin ṭha lo takte a hlau lo vang; LALPA ringin a thinlung chu a nghet a ni. 8 A thinlung chu a nghet a, a hlau lo vang, Amah dotute chunga a duhthusâm thleng chu a hmuh hma loh zawng. 9 A sem darh a, pachhiate a pe a; A felna chu kumkhuaa awm tûr a ni; A ki chu ropui taka chawimawiin a awm ang. 10 Mi suaksual chuan chu chu a hmu ang a, a thinur ang a; A ha a ṭhial ang a, a tui ral ang; Mi suaksualte duh zâwng chu a boral ang.
LALPA ṭhatzia fakna
1 LALPA chu fak rawh u. Aw LALPA chhiahhlawhte u, fak ula, LALPA hming chu fak rawh u. 2 LALPA hming chu fakin awm rawh se, Tûn aṭanga kumkhuain. 3 Ni chhuahna aṭanga a tlâkna thlengin LALPA hming chu fak tûr a ni. 4 LALPA chu hnam tinrêngte chungah chuan chungnung daih a ni a, A ropuina chuan vânte khi a khûm daih a ni. 5-6 LALPA kan Pathian, Chung lama ṭhutphah neia, Vâna thil awmte leh leia thil awmte en tûra Intihnuai ṭhîna ang hi tu nge awm? 7 Ani chuan rethei chu vaivut ata a kaitho ṭhîn a, Pachhia chu êkdûr ata a chawi kâng ṭhîn; 8 Mi liante hnêna a awmtîr theihna tûrin, A mite zînga mi liante hnên ngeiah chuan. 9 Ani chuan hmeichhe ching chu in lo a vawntîr a, Fanau nei nu hlim takah a siam ṭhîn. LALPA chu fak rawh u.
Kalhlên kût hla
1 Israel-ho chu Aigupta ram ata an chhuaha, Jakoba chhûngte ngei chu awze mi zîng ata an chhuah lai khân, 2 Juda-ho chu a hmun thianghlim an lo ni ta a, Israel-ho chu a rorêlna ram an lo ni ta bawk a. 3 Tuifinriat chuan chu chu a hmu a, a tlân bo va; Jordan lui chu tihkîrin a awm ta a. 4 Tlâng liante chu berâmchalte angin an tualchai a, Tlâng tête chu berâmpatuai angin. 5 Aw nang tuifinriat, eng i ti nge ni i tlân bo tâk ni? Nang Jordan, eng i ti nge ni i kîr leh tâk ni? 6 Nangni tlâng liante u, eng in ti nge ni berâmchalte anga in tualchai tâk ni? Nangni tlâng tête u, eng in ti nge ni berâmpatuai anga in tualchai tâk ni? 7 Nang leilung, LALPA hmaah khûr rawh, Jakob-ho Pathian hmaah chuan; 8 Ani chuan lungpui chu dîlah a chantîr a, Meilung chu tuihnaah a chantîr bawk a.
Pathian dik awm chhun
1 Aw LALPA, keini min pe lovin, keimahni min pe lovin, I hming chu ropuina pe zâwk ang che, I ngilneihna leh i thutak avângin. 2 Engati nge hnam tinin, “Khawiah nge an Pathian kha le?” an tih ni? 3 Kan Pathian chu vânah a awm si a; A duh apiang a ti a ni. 4 An milemte chu tangkarua leh rangkachak a ni a, Mihring kutchhuak an ni. 5 Kâte an nei a, an ṭawng thei si lo va; Mitte an nei a, an hmu thei si lo va; 6 Bengte an nei a, an hre thei si lo va; Hnârte an nei a, rim an hre thei si lo va; 7 Kutte an nei a, eng mah an khawih thei si lo va; Kete an nei a, an kal thei si lo va; An hrawkin an ṭawng thei hek lo. 8 Chûng siamtute chu chûng ang chuan an awm ang; A ni, chûng ringtu apiangte chu. 9 Aw Israel-hote u, LALPA chu ring rawh u; Ani chu anmahni ṭanpuitu leh an phaw a ni. 10 Aw, Arona chhûngte u, LALPA chu ring rawh u; Ani chu anmahni ṭanpuitu leh an phaw a ni. 11 LALPA ṭihtute u, LALPA chu ring rawh u; Ani chu anmahni ṭanpuitu leh an phaw a ni. 12 LALPA chuan min hre reng a; mal min sâwm ang; Israela chhûngte chu mal a sâwm ang a; Arona chhûngte chu mal a sâwm ang. 13 LALPA ṭihtute chu mal a sâwm ang, A lian a têin. 14 LALPA chuan tipung deuh deuh che u rawh se, Nangmahni leh in fate nên. 15 LALPA malsâwm dawngtu in ni, Ani chu lei leh vân siamtu a ni. 16 Vânte khi LALPA vânte a ni a; Leilung erawh hi chu mihring fate a pe a ni. 17 Mitthite chuan LALPA chu an fak lo va, Hmun reh taka chhukte rêng rêng chuan an fak hek lo; 18 Keini erawh chuan LALPA chu kan fak tawh ang, Tûn aṭanga kumkhuain. LALPA chu fak rawh u.
Thihna aṭanga chhanchhuahin Pathian a chawimawi
1 LALPA chu ka hmangaih a ni, Ka aw leh khawngaih ka dîlnate chu a ngaihthlâk avângin. 2 Ka lama a beng a rawn dawh avângin ka dam chhûng zawngin amah chu ka ko vang. 3 Thihna hruihrualte chuan mi zem a, Seol natnate chuan mi man a; Manganna leh lungngaihna ka lo tâwk a. 4 Chu veleh LALPA hming chu ka lam a; “Aw LALPA, khawngaih takin ka nunna hi chhanhim ang che,” tiin. 5 LALPA chu mi khawngaih thei tak leh fel tak a ni a; A ni, kan Pathian chu mi lainat thei tak a ni. 6 LALPA chuan mi mâwlte chu a humhim ṭhîn a; Tihhniamin ka awm a, ani chuan mi chhandam ta a. 7 Aw ka nunna, i chawlhnaah chuan kîr leh rawh; LALPA chuan i chungah ṭha takin a ti ta si a. 8 Ka nunna hi thihna lakah, ka mitte hi mittui lakah, Ka kete hi tlûkna lakah i chhanhim si a. 9 Mi nung ramah hian LALPA hmaah ka lêng ang. 10 Ka ring a, thu ka sawi dâwn a nih hi; Nasa taka tihhrehawmin ka awm kha. 11 Ka hamhaihin, “Mi zawng zawng dâwt an ni,” ka lo ti ta mai a. 12 Ka chunga a thiltih ṭhat zawng zawng avâng hian LALPA chu eng nge ka pêk ve thung ang? 13 Chhandamna no ka la ang a, LALPA hming chu ka lam ang. 14 Ka thutiamte chu LALPA lakah ka hlen ang, A ni, a mite zawng zawng hmaah chuan. 15 A mi thianghlimte thihna chu LALPA ngaih chuan hlu tak a ni. 16 Aw LALPA, i chhiahhlawh ka ni takzet mai; I chhiahhlawh, i bawihnu fapa chu ka ni a; Phuara ka awm chu mi phelh ta a. 17 Lâwm thu sawi inthawina ka hlân ang chia, LALPA hming chu ka lam ang. 18 Ka thutiamte chu LALPA lakah ka hlen ang, A ni, a mite zawng zawng hmaah chuan; 19 LALPA biak in hung chhûng kawtlaiah, Aw Jerusalem, i lai takah ka hlen ang. LALPA chu fak rawh u.
LALPA fakna
1 Aw, hnam tinrêngte u, LALPA chu fak ula; Mi tinrêngte u, amah chu fak rawh u. 2 A ngilneihna chu kan chungah a nasain, LALPA thutak chu kumkhuain a awm dâwn si a. LALPA chu fak rawh u.
Hmêlma hneh vânga fakna
1 Aw, LALPA hnênah lâwm thu hril rawh u; ani chu a ṭha si a: A ngilneihna chu kumkhuain a awm dâwn si a. 2 A ngilneihna chu kumkhuain a awm ang tih, Israel-hote chuan sawi rawh se. 3 A ngilneihna chu kumkhuain a awm ang tih, Arona chhûngte chuan sawi rawh se. 4 A ngilneihna chu kumkhuain a awm ang tih, LALPA ṭihtute chuan sawi rawh se. 5 Ka manganna aṭangin LALPA chu ka ko va; LALPA chuan mi chhâng a, hmun thâwl takah mi awmtîr ta a. 6 LALPA chu ka lama ṭang a ni; ka hlau lo vang. Mihringin eng nge mi tih theih ang? 7 LALPA chu mi ṭanpuitu, ka lama ṭang a ni; Chuvângin, mi hawtute chungah ka duhthusâm chu ka hmu ang. 8 Mihring rin ai chuan LALPAa rinna nghah hi a ṭha zâwk a ni. 9 Mi liante rin ai chuan LALPAa rinna nghah hi a ṭha zâwk a ni. 10 Hnam tinrêngin mi hual vêl a; Anni chu LALPA hmingin ka tiboral ang. 11 Anni chuan mi hual vêl a; a ni, mi hual vêl a; Anni chu LALPA hmingin ka tiboral ang. 12 Khuai angin mi hual vêl a; Hlîng alh angin tihmihin an awm; Anni chu LALPA hmingin ka tiboral ang. 13 Nasa taka mi beih avângin ka tlu dâwn dâwn a; Nimahsela, LALPA chuan mi ṭanpui ta hlauh va. 14 LALPA chu ka chakna leh ka hla a ni; Mi chhandamtu a lo ni ta bawk a. 15 Lâwmna leh chhandamna thâwm chu mi felte puan inah a awm ṭhîn a; LALPA kut ding lam chuan huai takin a ti ṭhîn. 16 LALPA kut ding lam chu chawimawiin a awm ṭhîn a; LALPA kut ding lam chuan huai takin a ti ṭhîn. 17 Ka thi lo vang, ka dam ang a, LALPA thiltihte chu ka hriattîr zâwk ang. 18 LALPA chuan nasa takin mi thunun a; Thihna hnênah erawh chuan mi pe êm lo. 19 Felna kulh kawngkhârte hi mi hawnsak rawh u: Hêngah hian ka lût ang a, LALPA hnênah lâwm thu ka hril ang, 20 Hei hi LALPA kawngkhâr a ni; Mi felte chu an lût ang. 21 I hnênah lâwm thu ka sawi ang, nangin mi chhângin, Mi chhandamtu i lo ni ta si a. 22 In satute lung duh loh kha, a kila lung ṭangkai ber a lo ni ta. 23 Chu chu LALPA tih a ni a; Kan mit hmuhah a mak a ni. 24 Hei hi LALPA ni ruat chu a ni a; Hemiah hian kan hlimin kan lâwm ang. 25 Aw LALPA, khawngaih takin chhandam la; Aw LALPA, khawngaih takin vânneihna rawn tîr ang che. 26 LALPA hminga lo kal chu a eng a thâwl e: LALPA in aṭang hian mal kan sâwm che u a ni. 27 LALPA chu Pathian a ni, ani chuan êng min pe a; Inthawina tûr chu hruihrualin thlung rawh u, maichâm ki ngeiahte chuan. 28 Nang chu ka Pathian i ni a, lâwm thu ka hrilh ang chia; Ka Pathian i ni a, ka chawimawi ang che. 29 Aw, LALPA hnênah lâwm thu hril rawh u, ani chu a ṭha si a; A ngilneihna pawh kumkhuain a awm dâwn si a.
ALEPH
LALPA dân
1 Kawnga mi ṭha famkimte chu an eng a thâwl e, LALPA dân zawhtute chu. 2 A thuhriattîrte zâwmtute chu an eng a thâwl e, Thinlung zawng zawnga zawngtute chu. 3 A ni, anni chuan fel lohna rêng rêng an ti lo va; A kawngahte chuan an kal ṭhîn. 4 Nangin i thununna thute chu thupêkin min pe a, Ṭhahnemngai taka kan zawm theihna tûrin. 5 Aw, i thuruatte chu zâwm tûrin ka awm dânte hi tihnghehin awm teh sela aw! 6 Chumi hunah chuan ka mualpho lo vang, I thupêk zawng zawng ka pawisak hunah chuan. 7 Thinlung dik tak puin lâwm thu ka hrilh ang che, I rorêlna felte chu ka zir hunah chuan. 8 I thuruat chu ka zâwm ang e; Aw, mi kalsan hlen suh ang che.
BETH
LALPA dân zawm
9 Tleirâwlin engtin nge a awm dân a tihthianghlim ang? I thu ang zêla a awm dân vêng ṭhain. 10 Ka thinlung zawng zawng hian ka zawng chia; Aw, i thupêkte ka kal bosan chu phal lul suh ang che. 11 I chunga thil ka tihsual loh nân i thu chu ka thinlungah ka khâwl khâwm a. 12 Aw LALPA, i eng a thâwl e; I thuruatte chu mi zirtîr ang che. 13 I kâa i rorêl chhuak zawng zawng chu ka hmuiin ka hriattîr ta. 14 I thuhriattîr kawngah chuan ka hlim a, Hausakna zawng zawnga ka hlim ang maiin. 15 I thununna thute chu ka ngaihtuah ang a, I kawngte chu ka ngaihsak bawk ang. 16 I thuruat chungahte chuan ka lâwm ang a; I thu chu ka theihnghilh lo vang.
GIMEL
LALPA dâna lâwmna
17 Ka nun theihna tûrin i chhiahhlawh chungah hian ṭha takin ti ang che; Chutichuan, i thu ka zâwm ang. 18 I dân thu aṭanga thil mak ka hmuh theih nân, Ka mitte hi mi tihvârsak ang che. 19 Leiah hian mikhual ka ni a; I thupêkte chu ka lakah zêp suh ang che. 20 Ka nunna hi keh sawmin a awm a, Eng lai pawha i rorêlnate a ngaih avângin. 21 Mi chapo, ânchhe dawngte chu i zilhhau va, I thupêk vah bosan ṭhînte chu. 22 Sawichhiatna leh hmuhsitna hi ka hnên ata la bo vang che; I thuhriattîrte chu ka zâwm si a. 23 Mi liante pawh an ṭhu a, mi sawisêl a; Nimahsela, i chhiahhlawh hian i thuruatte chu a ngaihtuah zâwk a ni. 24 I thuhriattîrte chu ka lâwmna a ni a, Rem mi ruatsaktute pawh a ni.
DALETH
LALPA dân zawm tumna
25 Ka nunna hi vaivutah a bet tlat a; I thu ang zêlin mi tiharh ang che. 26 Ka awm dânte chu ka hriattîr chia, nangin mi chhâng a; I thuruatte chu mi zirtîr ang che. 27 I thununna kawng chu mi hriat thiamtîr ang che; Chutichuan, i thil mak tih thute chu ka ngaihtuah ang. 28 Ka nunna hi lungngaih avângin a tui ral ṭhîn; I thu ang zêlin mi tichak ang che. 29 Awm dân dik lo hi ka hnên ata la sawn la; Khawngaih takin i dân mi pe ang che. 30 Awm dân rinawm ka thlang a; I rorêlnate chu ka hmaah ka awmtîr a. 31 I thuhriattîrahte hian ka bet tlat a; Aw LALPA, mi timualpho suh ang che. 32 I thupêk kawngah chuan ka tlân ang, Ka thinlung hi i tihzau hunah chuan.
HE
Hriat thiam dîlna
33 Aw LALPA, i thuruat kawng chu mi entîr ang che; Tichuan, a tâwp thlengin ka zawh dâwn nia. 34 Hriat thiamna mi pe ang che; tichuan, i dân chu ka vawng ṭha dâwn nia; A ni, ka thinlung zawng zawng hian ka zâwm ang. 35 I thupêk kawngah mi kaltîr ang che; Chumiah chuan ka lâwm si a. 36 I thuhriattîr lamah chuan ka thinlung hi thlêktîr ang che, Duhâmna lamah ni lovin. 37 Thil engmahlo mai mai en lo tûrin ka mit mi lâktîr la, I kawngahte chuan mi tiharh ang che. 38 I thu chu i chhiahhlawh hnênah hian tinghet ang che, Chu chu nangmah ṭihtu tân a ni. 39 Mi sawichhiatna ka hlauh hi la bo vang che; I rorêlte chu a ṭha si a. 40 Ngai teh, i thununna thute chu hriat ka châk ṭhîn a; I felna avângin mi tiharh ang che.
VAU
LALPA dân rinchhan
41 Aw LALPA, i ngilneihnate chu ka hnênah lo kal rawh se, I chhandamna ngei chu, i thu ang zêlin. 42 Chutichuan, mi sawichhetu chhânna tûr ka nei ang; I thu ka ring si a. 43 Tin, thutak thu chu ka kâ ata hi la chhuak vek suh ang che; I rorêlnate chu ka beisei si ṭhîn a. 44 Chutichuan, i dân chu ka zâwm fo vang, Kumkhaw tlaitluanin. 45 Tin, dîpdâl lohvin ka lêng ang; I thununna thute chu ka zawng si a. 46 I thuhriattîr thute chu lalho hmaah ka sawi ang a, Ka zak lo vang. 47 Tin, i thupêk ka ngainat chungahte chuan ka lâwm ang. 48 I thupêk, ka ngainat lamahte chuan ka kutte ka phar ang a; I thuruatte chu ka ngaihtuah ang.
ZAIN
LALPA dân ring tâwk
49 I chhiahhlawh hnêna thutiam chu hre reng ang che, Nangin mi beiseitîr avângin. 50 Chu chu ka hrehawmnaah pawh ka thlamuanna a ni, I thu chuan mi tiharh ta si a. 51 Chapote chuan nasa takin mi nuihzatbûr a; Nimahsela, i dân chu ka kal kawisan lo. 52 Aw LALPA, hmasânga i rorêlte chu ka hre reng a, Ka inthlamuan ṭhîn. 53 Lungnihlohna nasa tak hian mi tlâkbuak ta a, Mi suaksual, i dân kalsantute avângin. 54 Ka khualzinna inah hian i thuruatte chu ka hla a ni ṭhîn. 55 Aw LALPA, zânah chuan i hming ka hre reng ṭhîn a, I dân pawh ka zâwm ṭhîn. 56 Chûng chu ka nei a, I thununna thute chu ka vawn ṭhat avângin.
KHETH
LALPA dân ngaisâng
57 LALPA chu ka chanvo a ni; I thu ka zâwm ang tih ka sawi tawh kha. 58 Ka thinlung zawng zawngin i khawngaihna ka ngên a; I thu ang zêlin mi khawngaih ang che. 59 Ka awm dânte ka ngaihtuah a, I thuhriattîr lamah chuan ka ke ka pên ta a. 60 I thupêkte zâwm tûrin ka hmanhmawh a, rei ka rial lo. 61 Mi suaksualho hruaihrualte chuan mi zem hlâwm reng a; Nimahsela, i dân chu ka theihnghilh lo. 62 Zanlaiah lâwm thu hrilh tûr chein ka tho vang, I rorêl felte avângin. 63 Nangmah ṭihtu zawng zawng leh, I thununna thu zâwmtute ṭhian ka ni. 64 Aw LALPA, leilung hi i ngilneihnain a khat a ni; I thuruatte chu mi zirtîr ang che.
TETH
LALPA dân hlutna
65 Aw LALPA, i thu ang zêlin i chhiahhlawh hi i tiṭha ṭhîn. 66 Ngaihtuah thiamna leh hriatna mi zirtîr ang che; I thupêkte chu ka ring si a. 67 Tihhrehawma ka awm hma khân ka vâk bo ṭhîn a; Tûnah erawh chuan i thu ka zâwm ta. 68 Nang chu i ṭha a, thil ṭha i ti bawk a; I thuruatte chu mi zirtîr ang che. 69 Chapote chuan ka chungah dâwt an phuah chawp a; Ka thinlung zawng zawng hian i thununna thute chu ka vawng ṭha ang. 70 An thinlung chu rîlbawh thau angin a thau va; Kei erawh chu i dân chungah ka lâwm ṭhîn. 71 I thuruatte ka zir theih nân Tihhrehawma ka lo awm kha ka tân a ṭha a ni. 72 Rangkachak leh tangkaraw sâng tam tak ai chuan, I kâa dân chhuak chu ka tân a ṭha zâwk e.
JOD
LALPA dân dikzia
73 I kutin mi siamin, mi din a ni; I thupêkte chu ka zir theih nân hriat thiamna mi pe ang che. 74 Nangmah ṭihtute chuan mi hmu ang a, an lâwm ang; I thu chu ka beisei ṭhin avângin. 75 Aw LALPA, i rorêlte chu a fel tih leh, Nang chuan rinawm takin a ni mi tihhrehawm ni tih ka hria. 76 I chhiahhlawh hnêna i thutiam ang zêlin, Khawngaih takin i ngilneihna chu ka thlamuanna tûr ni rawh se. 77 Ka nun theihna tûrin i lainatnate chu ka hnênah lo kal rawh se; I dân chu ka lâwmna a ni si a. 78 Chapote chu mualphovin awm rawh se, dik lo takin mi titlâwm ta si a; Nimahsela, i thununna thute chu ka ngaihtuah ang. 79 Nangmah ṭihtute chu ka lamah hawi rawh se; Tichuan, i thuhriattîrte chu an hre dâwn nia. 80 Ka mualpho lohna tûrin, Ka thinlung hi i thuruatahte chuan ṭha famkimin awm rawh se.
KAPH
Chhanchhuah ngenna
81 Ka nunna hi i chhandamna ngaiin a chau ta a; Nimahsela, i thu ka beisei ṭhîn. 82 I thu thlîr nân ka mit a vai zo ta a, “Nangin eng tikah nge mi thlamuan ang?” ka ti ka ti ṭhîn. 83 Meikhu ur savun peng ang chu ka lo ni ta si a; Nimahsela, i thuruatte chu ka theihnghilh lo ve. 84 I chhiahhlawh kum chin tûr hi eng zât nge ni dâwn? Mi tiduhdahtute chungah hian eng tikah nge ro i rêl dâwn? 85 Mi chapo, i dân anga awm lote chuan, Ka tlâk nân khuarkhurumte an lai a. 86 I thupêk zawng zawng chu a rinawm a ni; Anni chuan dik lo taka mi tihduhdah ṭhin hi; mi ṭanpui ang che. 87 Anni chuan leiah hian mi tiboral ṭhelh ṭhelh a; Nimahsela, i thununna thute chu ka hawisan si lo va. 88 I ngilneihna ang zêlin mi tiharh ang che; Chutichuan, i kâa thuhriattîr chu ka zâwm dâwn nia.
LAMED
LALPA dân rinawmzia
89 Aw LALPA, kumkhua atân i thu chu vânah nghet takin a awm a. 90 I rinawmna chu chhuan zawng zawng thlengin a awm ang: Leilung hi i tinghet a, a awm reng a ni. 91 Chûngte chu vawiin hian i rorêlte angin an awm reng a; Thil zawng zawng chu i chhiahhlawhte an ni si a. 92 I dân chu ka lâwmna ni suh sela chuan, Ka hrehawmnaah khân ka boral tawh tûr a ni. 93 I thununna thute chu eng tikah mah ka theihnghilh lo vang; Nangin chûng chuan mi tiharh ta si a. 94 I ta ka nih hi, mi chhandam ang che; I thununna thute chu ka zawng si a. 95 Mi suaksualte chuan mi tihboral tumin mi nghâk ṭhîn a; Nimahsela, i thuhriattîrte chu ka ngaihtuah ang. 96 Ṭhat famkimna zawng zawng tâwp chu ka hmu ta a; I thupêk erawh chu a zau khawp mai a ni.
MEM
LALPA dân ngainat
97 Aw, i dân hi ka va ngaina êm! Nilênga ka ngaihtuah ṭhin a ni. 98 I thupêkte chuan mi dotute aia fing zâwkin mi siam a; Kumkhuaa ka hnêna a awm fo ṭhin avângin. 99 Mi zirtîrtu zawng zawng aiin finna ka nei zâwk a ni; I thuhriattîrte hi ka ngaihtuah a nih ṭhin avângin. 100 Tarte ai chuan ka hre thiam zâwk a ni, I thununna thute hi ka vawn ṭhat avângin. 101 I thu ka zawm theihna tûrin Kawng sualah rêng rêng chuan ka kete hi pên ka phal lo. 102 I rorêlna lakahte chuan ka pêng lo; Nangin mi zirtîr avângin. 103 I thute hi ka tân a va thlum êm! A ni, ka kâ atân chuan khawizû aiin a thlum zâwk. 104 I thununna thute avângin hriat thiamna ka nei ṭhîn; Chuvângin, awm dân dik lo tinrêng hi ka hua a ni.
NUN
LALPA dân chu khâwnvâr a ni
105 I thu hi ka ke atânte hian khâwnvâr a ni a, Ka kawng atân êng a ni. 106 I rorêlna fel takte chu zâwm tûrin chhia ka chham a, Ka tinghet bawk a. 107 Nasa taka tihhrehawmin ka awm a; Aw LALPA, i thu ang zêlin mi tiharh ang che. 108 Aw LALPA, khawngaih takin ka kâa duhthua thilpêkte hi la la, I rorêlnate chu mi zirtîr ang che. 109 Ka nunna hi ka kutah a awm fo ṭhîn a; Nimahsela, i dân chu ka theihnghilh ngai lo. 110 Mi suaksualte chuan ka awh nân thang an kam a; Nimahsela, i thununna thute chu ka vah bosan lo ve. 111 I thuhriattîrte chu kumkhuaa rochunah ka la a; Ka thinlung tihlimtu a ni si a. 112 Kumkhuain, a tâwp thlengin, I thuruatte anga ti tûrin ka thinlung ka thlêktîr a.
SAMEK
LALPA dân chu himna a ni
113 Rilru mumal nei lo mite chu ka hua a; I dân erawh chu ka ngaina a ni. 114 Nang chu ka bihrûkna hmun leh ka phaw i ni a; I thu ka beisei a ni. 115 Nangni thil ṭha lo titute u, mi kalsan rawh u; Ka Pathian thupêkte ka vawn ṭhat theih nân. 116 Ka nun theihna tûrin i thu ang zêlin mi chelh reng la, Ka beisei chungah hian zakin mi awmtîr suh ang che. 117 Mi kai ang che; tichuan, ka him ang a, I thuruatte chu ka pawisa fo dâwn nia. 118 I thuruatte vah bosantu zawng zawng chu i hmusit a; An bumna chu dâwt a ni si a. 119 Leia mi suaksual zawng zawng chu englo êkchhia angin i tibo ṭhîn a; Chuvângin, i thuhriattîrte chu ka ngaina a ni. 120 Ka tisa hi nangmah ṭihin a khûr a; I rorêlnate chu ka hlau bawk a.
AIN
LALPA dân zawm
121 Ro ka rêl a, fel takin ka ti ṭhîn a; Mi hnehchhiahtute lakah mi thlahthlam suh ang che. 122 I chhiahhlawh chungchâng thu-ah a ṭhatna tûrin a bul tum la; Chapoten mi hnehchhiah suh se. 123 I chhandamna thlîr nân ka mit a vai zo ta a, I thu fel tak thlîr nân nên. 124 I ngilneihna avângin i chhiahhlawh chungah hian ti la, I thuruatte chu mi zirtîr ang che. 125 I chhiahhlawh ka ni a, hriat thiamna mi pe ang che; I thuhriattîrte chu ka hriat theih nân. 126 LALPA, thawh a hun ta; I dân hi engmahlovah an siam ta si. 127 Chuvângin, i thupêkte chu rangkachak aiin ka ngaina a ni, A ni, rangkachak thianghlim ai pawhin. 128 Chuvângin, kawng tinrêng thua i thununna thu zawng zawng chu dikin ka hria a; Awm dân dik lo tinrêng hi ka hua a ni.
PE
LALPA dân zawm châkna
129 I thuhriattîrte chu a mak a; Chuvângin, ka nunna hian a vawng ṭha ṭhîn. 130 I thu hrilhfiah hian mite a tiêng a; Mi mâwlte chu a hriat thiamtîr ṭhîn. 131 Ka kâ ka âng zau va, ka thaw hlawp hlawp a; I thupêkte chu ka châk avângin. 132 Ka lam lo hawi la, mi khawngaih ang che, I hming ngainatute i khawngaih ang khân. 133 Ka ke pênte hi i thu-ah tinghet la; Sualna rêng rêng ka chungah thu neihtîr suh ang che. 134 Mihring hnehchhiahna lakah chuan mi chhanhim ang che; Chutichuan, i thununna thute chu ka zâwm dâwn nia. 135 I hmêlin i chhiahhlawh hi chhun êng la; I thuruatte chu mi zirtîr ang che. 136 Ka mittui hi lui tui angin a luang thla a, I dân an zawm loh avângin.
TZADE
LALPA dân dikzia
137 Aw LALPA, nang chu i fel a, I rorêlte pawh a dik a ni. 138 I thuhriattîrte chu fel tak leh Rinawm êm êmin thu i pe a. 139 Ka ṭhahnemngaihna hian mi tiboral ta, Mi dotuten i thu an theihnghilh tâk avângin. 140 I thu hi a thianghlim êm êm a; Chuvângin, i chhiahhlawh hian a ngaina a ni. 141 Mi tê leh mi hmuhsit ka ni a; Nimahsela, i thununna thute chu ka theihnghilh ngai lo ve. 142 I felna chu kumkhaw felna tûr a ni a, I dân pawh thutak a ni. 143 Manganna leh thlaphânna chuan mi tlâkbuak ta a; Nimahsela, i thupêkte hi ka lâwmna a ni. 144 I thuhriattîrte chu kumkhua atân a fel a ni; Hriat thiamna mi pe ang che; tichuan, ka nung reng ang.
KOPH
Chhanchhuah dîlna
145 Ka thinlung zawng zawngin ka ko chia; aw LALPA, mi chhâng ang che: I thuruatte chu ka vawng ṭha dâwn nia. 146 Ka ko ṭhîn chia; mi chhandam ang che. Tichuan, i thuhriattîrte chu ka zâwm dâwn nia. 147 Khawfîngchat chu ka khalh a, ka au ṭhîn a; I thute chu ka beisei ṭhîn. 148 I thu ka ngaihtuah theihna tûrin Ka mitin zân vênte chu a men khalh ṭhîn. 149 I ngilneihna ang zêlin ka aw hi ngaithla la; Aw LALPA, i rorêlnate ang zêlin mi tiharh ang che. 150 Ngaihtuahna sual ûmho chuan an rawn hnaih a; Anni chu i dân hlata awm an ni. 151 Aw LALPA, nang chu i hnai a; I thupêk zawng zawng chu thutak a ni. 152 Hmasângah, i thuhriattîrte aṭangin, Chûng chu kumkhua atân i tinghet tih ka lo hre tawh.
RESH
Ṭanpui ngenna
153 Ka hrehawmzia hi ngaihtuah la, mi chhanhim ang che; I dân chu ka theihnghilh ngai si lo va. 154 Ka thu mi sawipuiin, mi tlan la; I thu ang zêlin mi tiharh ang che. 155 Chhandamna chu mi suaksualte lakah chuan a hla a ni; I thuruatte chu an zawn loh avângin. 156 Aw LALPA, i lainatnate chu a nasa a ni; I rorêlnate ang zêlin mi tiharh ang che. 157 Mi tiduhdahtute leh mi dotute chu tam tak an ni; Nimahsela, i thu hriattîrte chu ka kal kawisan lo. 158 Vervêk taka titute chu ka en a, ka lungni lo va; I thu an zawm loh avângin. 159 I thununna thute ka ngainatzia hi ngaihtuah la; Aw LALPA, i ngilneihna avângin mi tiharh ang che. 160 I thu infin khâwm chu thutak a ni a; I rorêlna fel tinrêng pawh hi kumkhuain a awm reng ang.
SHIN
LALPA dâna inpêkna
161 Mi lianten enga khaw lawi lovin mi tiduhdah a; Nimahsela, ka thinlung chuan i thute a ni a hlauh ni. 162 I thu-ah hian ka hlim a ni, Thil ropui tak râllâka hmutu angin. 163 Dâwt hi ka huain ka ten a; I dân erawh chu ka ngaina a ni. 164 Ni khatah vawi sarih ka fak ṭhîn che a ni, I rorêl felte avângin. 165 I dân ngainatute chuan thlamuanna nasa tak an nei a; Tlûkna rêng rêng an nei lo. 166 Aw LALPA, i chhandamna ka beisei reng a, I thupêkte angin ka ti ṭhîn. 167 Ka nunna hian i thuhriattîrte chu a zâwm ṭhîn a; Ka ngaina êm êm a ni. 168 I thununna thute leh i thuhriattîrte chu ka zâwm ṭhîn; Ka awm dân zawng zawng hi i hmaa awm a ni si a.
TAU
Ṭanpui dîla ṭawngṭaina
169 Aw LALPA, ka au thâwm hi i hmaah lo hnai rawh se; I thu ang zêlin hriat thiamna mi pe ang che. 170 Khawngaih ka dîlna hi i hmaah thleng rawh se; I thu ang zêlin mi chhanhim ang che. 171 Ka hmui hian fakna thu sawi rawh se; Nangin i thuruatte chu mi zirtîr ṭhin avângin. 172 Ka lei hi i thu fakin zai rawh se; I thupêk zawng zawng chu felna a nih avângin. 173 I kut chu mi ṭanpui tûra inpeih sain awm rawh se; I thununna thute chu ka thlang si a. 174 Aw LALPA, i chhandamna chu ka châk ṭhîn a; I dân chu ka lâwmna a ni. 175 Ka nunna hi nung rawh se; tichuan, a fak dâwn che nia; I rorêlnate pawhin mi ṭanpui rawh se. 176 Berâm bo angin ka vâk bo va; i chhiahhlawh hi zawng ang che; I thupêkte chu ka theihnghilh ngai si lo va.
Chhoh Hla
Ṭanpui dîlna
1 Ka mangannaah chuan LALPA chu ka au va; Tichuan, anin mi chhâng a. 2 Aw LALPA, hmui dawtheite lakah leh, lei mi bum hmang lakah chuan, Ka nunna hi chhanhim ang che. 3 Nang lei bum hmang, I hnênah eng nge an pêk ang chia, eng nge an belhchhah ang che? 4 Mi chak thal zum takte, Juniper thing lingte nên. 5 Mesek-ho ramah ka awm leh, Kedar-ho puan in zîngah ka awm hi, ka chung a va pik êm! 6 Ka nunna hi remna hawtu hnênah hian a chêng rei lutuk tawh a ni. 7 Kei chuan inrem ka duh a; Nimahsela, thu ka sawi veleh indo an duh ṭhîn.
Chhoh Hla.
LALPA, min humtu
1 Tlâng lamahte khian ka mit ka lên chho vang: Khawi lama mi nge mi ṭanpuina tûr lo thleng ang? 2 Mi ṭanpuina tûr chu LALPA, Lei leh vân siamtu hnêna mi a lo thleng ang. 3 Ani chuan i ke chu tihsawn a phal lo vang a; Nangmah vêngtu chu a muthlu lo vang. 4 Ngai teh, Israel-ho vêngtu chu a muthluin, a muhîl hek lo vang. 5 LALPA chu nangmah vêngtu a ni a; LALPA chu i ding lama hliahtu che a ni. 6 Chhûnah niin a em lo vang chia, Zânah thlain a em hek lo vang che. 7 LALPA chuan sual tinrêng lakah a vêng ang chia; I nunna chu a vêng ang. 8 LALPA chuan i chhuak leh i lût chu a vêng ang che, Tûn aṭanga kumkhuain.
Chhoh Hla; Davida ta.
Jerusalem fakna
1 “LALPA inah i kal ang u,” Ka hnêna an tih lai khân ka lâwm a. 2 Aw Jerusalem, i kulh kawngkhâr chhûngah kan kete chu a din tâk hi; 3 Jerusalem, khawpui din thar, Rinawm taka rem chu: 4 LALPA hming fak tûrin chutah chuan hnamte chu an chho ṭhîn, LALPA hnamte chu, Israel-ho hnêna thupêk ang khân. 5 Chutah chuan rorêl nân lalṭhutphahte hûn a ni si a, Davida chhûngte lalṭhutphahte chu. 6 Jerusalem thlamuanna tûr dîlsak rawh u: Nang ngainatute chu an thawveng ang. 7 I kulh chhûngahte chuan thlamuanna awm sela, I lal inahte chuan thawvenna awm rawh se. 8 Ka unaute leh ka ṭhiante avângin “I chhûngah thlamuanna awm rawh se,” ka ti ang. 9 LALPA kan Pathian in avâng chuan i ṭhatna tûr ka zawng ang.
Chhoh Hla.
Khawngaih dîlna
1 Aw, nang vâna ṭhu ṭhîn, I lamah ka mit ka len chhoh ṭhin hi. 2 Ngai teh, chhiahhlawhte mitin an pu kut lam a en ṭhîn ang leh, Chhiahhlawhnu mitin a pi kut lam a en ṭhîn angin, Keini mit pawhin LALPA kan Pathian lam a en reng a ni, Min khawngaih hma loh chuan. 3 Aw LALPA, min khawngaih rawh, min khawngaih rawh; Hmuhsitin kan awm rei tawh hi. 4 Mi nuamsate deu leh chapote hmuhsitin Kan nunna hi a awm rei tawh hle a ni.
Chhoh Hla; Davida ta.
Pathianin a mite a vêng
1 “Kan lama ṭang chu LALPA ni suh sela chuan,” Israel-hovin ti rawh se; 2 “Miten min beih lai khân Kan lama ṭang chu LALPA ni suh sela chuan, 3 Khami lai ngei khân anni chuan kan nung chungin min lem tawh ang, Kan chunga an thin a thawh lai khân; 4 Khami lai ngei khân tuite chuan min chîm pil tawh ang a, Lui chuan kan nunna hi a vûr pil tawh ang; 5 Khami lai ngei khân tui lian chuan kan nunna hi a vûr pil tawh ang. 6 Sa anga seh tûra an hnêna min pe lotu LALPA chu fakin awm rawh se. 7 Thang kamtute thang ata sava a chhuak angin kan nunna hi a chhuak ta; Thang chu a chhe ta a, keini hi kan chhuak ta hlauh a ni. 8 Min ṭanpuina tûr chu LALPA, lei leh vân siamtu hmingah a awm,” tiin.
Chhoh Hla.
Pathian mite himzia
1 LALPA ringtute chu Zion tlâng, tihnghîn rual loh, Kumkhuaa awm reng tûr ang chu an ni. 2 Tlângte chu Jerusalem vêla a awm angin, LALPA chu a mite vêlah a awm ṭhîn, Tûn aṭanga kumkhuain. 3 Suahsualna laltiang chu mi fel ram chan chungah chuan a innghat dâwn si lo; Mi felte chuan an kuttea khawlohna an ban loh nân. 4 Aw LALPA, ṭha taka awmte chungah chuan ṭha takin ti ang che, An thinlunga dik taka awmte chungah pawh. 5 An kawng kawitea pêngho erawh hi zawng, LALPA chuan thil tisualtute nên a hruai chhuak ang. Israel-ho chungah chuan thlamuanna awm rawh se.
Chhoh Hla.
Chhanchhuah dîlna
1 LALPAN Zion salte a hruai kîr leh lai khân, Mumanga mangtute ang mai kan ni a. 2 Chumi lai chuan kan kâ chu nuihin a khat a, Kan lei chu hla sakin. Chumi lai chuan hnam tin zîngah, “LALPAN an tân thil ropui takte a tihsak a ni,” an ti a. 3 LALPAN thil ropui takte min tihsak a, Kan lâwm hle a ni. 4 Aw LALPA, sala kan tâng hi min hruai kîr leh ang che, Chhim rama luite angin. 5 Mittui tla chunga tuhte chuan hlim takin an ât ang. 6 Ṭap chungin buh chi feh chhuahpui mah sela, A buhphalte kengin hlim takin a lo haw leh ang.
Chhoh Hla; Solomona ta.
Pathian kan bulpui
1 LALPAN in a sak loh chuan, A satute chuan an thawk rim thlâwn mai a ni; LALPAN khawpui a vawn ṭhat loh chuan, A vêngtu chu a meng thlâwn mai a ni. 2 Zîng takah in tho va, tlai takah in châwl a, Thawh rimna chaw in ei ṭhin hi, in tân a thlâwn mai a ni; Hetiang hian a mi duh tak chu a muthilhtîr ṭhîn a ni. 3 Ngai teh, fanaute hi LALPA laka kan ro chan an ni a, Rîla rah hi a lâwmman min pêk a ni. 4 Vânglai fate chu Mi chak kuta thal awmte ang hi an ni. 5 A thal bâwm faa khat nei mi chu lâwm takin a awm ṭhîn a; Kulh kawngkâa an dote an biak lai pawhin an mualpho lo vang.
Chhoh Hla.
Pathian ṭih lâwmman
1 LALPA ṭih apiang chu an eng a thâwl e, A kawng zawhtute chu. 2 I kut thawh rim rah chu i ei dâwn si a; Lâwm takin i awm ang a, thawvengin i awm bawk ang. 3 I nupui chu i in chhûngrilah chuan, grêp hrui rah duh mi tak angin a awm ang a; I fate chu, i dawhkân vêlah chuan olive ṭiakte angin an awm ang. 4 Ngai teh, LALPA ṭih mi chu chutiang chuan malsâwmin an awm ang. 5 LALPA chuan Zion aṭangin mal a sâwm ang che; Tichuan, i dam chhûng zawngin Jerusalem ṭhatna i hmu ang. 6 A ni, i tute chu i la hmu ang. Israel-ho chungah chuan thlamuanna awm rawh se.
Chhoh Hla.
Israel hmêlmate chhiat nâna ṭawngṭaina
1 “Ka naupan têt ata miten vawi tam tak mi timangang a,” Israel-hovin ti rawh se; 2 “Ka naupan têt ata miten vawi tam tak mi timangang a; Nimahsela, mi hneh si lo. 3 Leilettuten ka hnungzângah hian lei an let a; An leileh rîn khawh thlûrte chu an tisei hle a. 4 LALPA chu a fel a ni; Mi suaksualte hruihrual chu a zai chat ta a,” tiin. 5 Anni chu mualpho leh tlânchhiattîrin awm rawh se, Zion hawtu zawng zawngte chu. 6 In chunga hlobet, a ṭhan sân hmaa Vuai mai ṭhîn angin awm rawh se. 7 Tu mân chu chu an ât khâwm lo va, Tu mân seng tûrin an têl hek lo. 8 “LALPA malsâwmna in chungah awm rawh se; LALPA hmingin mal kan sâwm che u hi,” A kal pêltuten an ti ngai hek lo.
Chhoh Hla.
Ṭanpui dîlna
1 Aw LALPA, tui thûk tak aṭang hian ka au a che. LALPA, ka aw hi ngaithla ang che: 2 Khawngaih ka dîlna aw hi i bengin ngaithla rawh se. 3 LALPA, nangin khawlohnate i chhinchhiah chuan, Aw LALPA, tu nge ding ang le? 4 Nimahsela, i hnênah ngaihdamna a awm a ni, Ṭiha i awm theih nân. 5 LALPA chu ka nghâk reng a, ka nunna hian a nghâk reng a, A thu pawh ka beisei a ni. 6 Vêngtuten khawvâr an thlîr aia nasain, A ni, vêngtuten khawvâr an thlîr aia nasa mahin, Ka nunna hian LALPA chu a thlîr reng ṭhîn a ni. 7 Aw Israel-hote u, LALPA chu beisei rawh u; LALPA hnênah chuan ngilneihna a awm si a, A hnênah tlanna tam tak a awm bawk a. 8 Tichuan, ani chuan Israel-ho chu An khawlohna zawng zawng ata a chhanchhuak ang.
Chhoh Hla; Davida ta.
Inngaitlâwm ṭawngṭaina
1 LALPA, ka thinlung hi a chapo lo va, ka mitte hi a sâng hek lo; Thil ropui takahte ka intelh ngai hek lo va, Ka tâna thil mak lutukahte pawh. 2 Ka nunna hi ka awi tleiin ka tikhui ta ngei a; Naupang hnute hnêk bân tawh a nu hnêna a awm angin, Ka nunna hi naupang hnute hnêk bân tawh angin ka hnênah a awm a. 3 Aw Israel-hote u, LALPA chu beisei rawh u, Tûn aṭanga kumkhuain.
Chhoh Hla.
Tempul fak hla
1 LALPA, Davida chu a hrehawm tuarna zawng zawng hriatpui ang che; 2 LALPA hnêna chhia chhama, Jakoba Mi Chaka hnêna thu a tiamzia kha: 3 “Ka awmna inah ka lût hauh lo vang a, Ka khumah ka kai hek lo vang; 4 Ka hahchâwl lo vang a, Mutmu ka tuah hek lo vang; 5 LALPA hmun tûr ka zawn chhuah hma loh chuan, Jakoba Mi Chaka awmna tûr chu,” tiin. 6 Ngai teh, Ephratha-ah a chanchin kan hria a, Ngawbing phûlah chuan. 7 A awmnaah chuan kal ila, A ke nghahchhan bulah chibai i bûk ang u. 8 Aw LALPA, tho la, i chawlh hmun tûrah chuan lût ang che; Nang nên, i chakna bâwm nên. 9 I puithiamte chu felnain inthuam sela; I mi thianghlimte chu hlimin au rawh se. 10 I chhiahhlawh Davida avângin i hriak thiha hmêl chu hawi kîrtîr suh ang che. 11 LALPA chuan Davida hnênah thutakin chhia a chham ta a; Chu chu a hawisan lo vang: “I taksa raha mi i lalṭhutphahah chuan ka ṭhuttîr ang. 12 I fate chuan ka thuthlun leh, Ka thuhriattîr, anmahni ka la zirtîr tûr chu an zawm chuan, An fate pawh kumkhuain i lalṭhutphahah chuan an ṭhu zêl ang,” tiin. 13 LALPA chuan Zion chu a thlang si a. A awmna atân a duh a: 14 “Hei hi kumkhua atâna ka chawlh hmun tûr a ni: Hetah hian ka awm reng ang; ka duh zâwng a ni si a. 15 A ei tûrah mal ka sâwm rei rui ang a; A mi retheite chu chhangin ka titlai ang. 16 A puithiamte chu chhandamnain ka thuam ang a; A mi thianghlimte chu hlimin an au chiam ang. 17 Chutah chuan Davida ki chu ka chawr chhuahtîr ang; Ka hriak thiha tân chuan khâwnvâr ka ruat ta a. 18 Amah dotute chu mualphonain ka thuam ang a; Ani chungah erawh chuan a lallukhum chu a tle sur ang,” tiin.
Chhoh Hla; Davida ta.
Unau inhmangaih fakna
1 Ngai teh, unaute inngeih dial diala awm khâwm hi A va ṭhain, a va nuam êm! 2 Lua hriak hlu tak, khabe hmula luang thla, Arona khabe hmul ngeia luang thlaa, A kawrfual hmâwra luang thla ang kha a ni; 3 Hermon daifîm, Zion tlângtea tla ṭhîn ang hi a ni; Chutah chuan LALPAN malsâwmna thu a pe a, Kumkhuaa nunna tûr chu.
Chhoh Hla.
Pathian fak tûra sâwmna
1 Ngai teh u, LALPA chhiahhlawh, LALPA ina zâna ding ṭhîn zawng zawngte u, LALPA chu fak rawh u. 2 In kutte chu hmun thianghlim lamah phar ula, LALPA chu fak rawh u. 3 LALPAN Zion aṭangin malsâwm che rawh se; Lei leh vân siamtu ngei chuan.
Fakna hla
1-2 LALPA chu fak rawh u. LALPA hming chu fak ula; Aw LALPA chhiahhlawh, LALPA ina dinga, kan Pathian in hung chhûng kawtlaia dingte u, Amah chu fak rawh u. 3 LALPA chu fak rawh u, LALPA chu a ṭha si a; A hming fakin zai rawh u, a nuam si a. 4 LALPA chuan Jakob-ho hi ama tân a thlang si a, Israel-ho hi a ro bîk atân a thlang bawk a. 5 LALPA chu ropui tak a ni tih leh, Kan LALPA chu pathian zawng zawng aiin a chungnung a ni tih ka hre si a. 6 LALPA chuan a duh apiang a ti ṭhîn a, Vânah te, leiah te, tuifinriatah te, tui thûk tak zawng zawngah te pawh. 7 Ani chuan kâwlkil aṭangte chuan chhûmte a chhohtîr ṭhîn a; Kâwlphete ruah tân a siam ṭhîn a; A sum in aṭangte chuan thli a la chhuak ṭhîn. 8 Ani chuan Aigupta rama fa tîrte chu a tihlum a, Mihring leh sate pawh. 9 Aw Aigupta ram, ani chuan chhinchhiahnate leh thil makte i chhûngah a rawn tîr a, Pharaoa chungah leh a chhiahhlawh zawng zawng chungah chuan. 10 Ani chuan hnam tam tak a tihlum a, Lal ropui tak takte a that a; 11 Sihona, Amor-ho lal leh, Oga, Basan ram lal leh, Kanaan rama mi zawng zawng chu: 12 An ram chu ro chan atân a pe a, A mi Israel-ho ro chan atân. 13 Aw LALPA, i hming chu kumkhuain a awm ang a; Aw LALPA, nangmah hriat rengna chu chhuan awm chhûng zawng a awm bawk ang. 14 LALPA chuan a mite chu ro a rêlsakin, A chhiahhlawhte chungthuah chuan a rilru a lamlêt dâwn si a. 15 Hnam tin milemte chu tangkarua leh rangkachak an ni a, Mihring kutchhuak an ni. 16 Kâte an nei a, an ṭawng thei si lo va; Mitte an nei a, an hmu thei si lo va; 17 Bengte an nei a, an hre thei si lo va; An kâah chuan thaw rêng rêng a awm hek lo. 18 Chûng siamtute chu chûng ang chuan an awm ang; A ni, chûng ringtu apiangte chu. 19 Aw Israela chhûngte u, LALPA chu fak rawh u: Aw Arona chhûngte u, LALPA chu fak rawh u: 20 Aw Levia chhûngte u, LALPA chu fak rawh u: LALPA ṭihtute u, LALPA chu fak rawh u. 21 LALPA chu Zion aṭanga fakin awm rawh se, Jerusalem-a awma chu. LALPA chu fak rawh u.
Lâwm thu sawina hla
1 Aw, LALPA hnênah lâwm thu hril rawh u; ani chu a ṭha si a: A ngilneihna pawh kumkhuain a awm dâwn si a. 2 Aw, pathiante Pathian hnênah chuan lâwm thu hril rawh u: A ngilneihna chu kumkhuain a awm dâwn si a. 3 Aw, lalpate LALPA hnênah lâwm thu hril rawh u: A ngilneihna chu kumkhuain a awm dâwn si a. 4 Amah chauhva thil mak ropui tak ti ṭhîntu hnênah chuan: A ngilneihna chu kumkhuain a awm dâwn si a. 5 Finnaa vân siamtu hnênah chuan: A ngilneihna chu kumkhuain a awm dâwn si a. 6 Lei hi tui chunga dah duaitu hnênah chuan: A ngilneihna chu kumkhuain a awm dâwn si a. 7 Êntu ropui tak: A ngilneihna chu kumkhuain a awm dâwn si a. 8 Ni, chhûna rorêltu atân: A ngilneihna chu kumkhuain a awm dâwn si a. 9 Thla leh arsite, zâna rorêltu atâna siamtu hnênah chuan: A ngilneihna chu kumkhuain a awm dâwn si a. 10 Kut chak leh bân pharin: A ngilneihna chu kumkhuain a awm dâwn si a. 11 Aigupta-ho fa tîrte tihhlumsaka: A ngilneihna chu kumkhuain a awm dâwn si a. 12 Israel-ho an zîng ata hruai chhuaktu hnênah chuan: A ngilneihna chu kumkhuain a awm dâwn si a. 13 Tuifinriat Sen tiṭhen phawka, A ngilneihna chu kumkhuain a awm dâwn si a. 14 Israel-ho a lai taka kaitîra; A ngilneihna chu kumkhuain a awm dâwn si a. 15 Pharaoa leh a sipaiho erawh Tuifinriat Sena tiboraltu hnênah chuan: A ngilneihna chu kumkhuain a awm dâwn si a. 16 A mite thlalêra hruaitu hnênah chuan: A ngilneihna chu kumkhuain a awm dâwn si a. 17 Lal ropui tak takte tihluma: A ngilneihna chu kumkhuain a awm dâwn si a. 18 Lal hmingthang tak tak: A ngilneihna chu kumkhuain a awm dâwn si a. 19 Sihona, Amor-ho lal leh: A ngilneihna chu kumkhuain a awm dâwn si a. 20 Oga, Basan ram lalte thata: A ngilneihna chu kumkhuain a awm dâwn si a. 21 An ram ro chana: A ngilneihna chu kumkhuain a awm dâwn si a. 22 A chhiahhlawh Israela ro chana petu hnênah chuan: A ngilneihna chu kumkhuain a awm dâwn si a. 23 Ani chuan kan hnam tlâwm lai khân min hre reng a: A ngilneihna chu kumkhuain a awm dâwn si a. 24 Min dotute lakah min chhanhim a: A ngilneihna chu kumkhuain a awm dâwn si a. 25 Ani chuan tisa zawng zawng hnênah ei tûr a pe ṭhîn: A ngilneihna chu kumkhuain a awm dâwn si a. 26 Aw, vân Pathian hnênah chuan lâwm thu hril rawh u: A ngilneihna chu kumkhuain a awm dâwn si a.
Ram danga hruaite ṭah hla
1 Babulon lui kamahte, Chutah kan ṭhu a, a ni, kan ṭap ṭhîn, Zion kan ngaihtuahin. 2 Lui laia tuipuisuthlahahte chuan kan ṭingṭangte kan bâng ṭhîn a. 3 “Zion hla pakhat min saksak rawh u,” tiin, Chutah chuan sala min hruaituten hla saah min ngên a, Min tiretheituten hlimah min ngên bawk si ṭhîn. 4 Mi ramahte chuan LALPA hla engtin nge kan sak theih ang? 5 Aw Jerusalem, ka theihnghilh che chuan, Ka kut ding lam hian a thil thiam hi theihnghilh ve rawh se. 6 Ka hriat reng loh che chuan, Ka lei hi ka dangah bet tlat rawh se; Ka hlimna ber aia Jerusalem ka duh zâwk loh chuan. 7 Aw LALPA, Jerusalem ni chu Edoma thlahte chungah a chhe lamin hre reng ang che; “A lungphûm lam pawhin tichim rawh u, tichim rawh u,” titute kha. 8 Aw Babulon fanu, tihborala awm tûr, Kan chunga i tih anga thungrûl tûr che chu lâwm takin a awm ang. 9 I fanau tê tête chhuhsaka, lungpui vuak nâna hmangtu tûr chu Lâwm takin a awm ang.
Davida Fakna Hla.
Fakna hla
1 I hnênah ka thinlung zawng zawngin lâwm thu ka sawi ang a; Pathian dangte hmaah pawh nangmah fakin ka zai ang. 2 I biak in thianghlim lam hawiin chibai ka bûk ang chia, I ngilneihna leh i thutak avângin i hming ka fak ang; I thu chu i hming rêng rêng ai chuan i tilian ta si a. 3 Ka auh ni che khân nangin mi chhâng a, Ka nunna tichakin mi fuih a. 4 Aw LALPA, leia lal zawng zawng chuan lâwm thu an hrilh ang che, I kâa thu chhuakte chu an hre si a. 5 A ni, LALPA awm dân thute chu hlaah an sa ang; LALPA ropuizia chu a nasa si a. 6 LALPA chu chungnung tak a ni na a, mi tlâwmte chu a ngaihsak ṭhîn a; Mi chapote erawh chu hla tak aṭangin a hre ṭhîn. 7 Manganna zîngah lêng mah ila, nangin mi tiharh ang; Mi dotute thinur bei tûrin i kut i phar ang a, I kut ding lamin mi chhandam ang. 8 LALPA chuan ka chungchânga a tih tûr chu a hlen ang: Aw LALPA, i ngilneihna chu kumkhuain a awm ang a; Nangma kut thiltihte hi bânsan suh ang che.
Hla Hruaitu tân. Davida Fakna Hla.
Pathian-engkim hretu leh enkawl zui zêltu
1 Aw LALPA, nangin ngun takin mi en chhuak a, mi hre ta. 2 Nangin ka ṭhut leh ka din hi i hre ṭhîn a, Ka ngaihtuahna hi hla tak aṭang pawhin i hre thiam ṭhîn. 3 Ka kal leh ka mu hi mi en ngun ṭhîn a, Ka awm dân zawng zawng hi i hre vek a. 4 Ngai teh, aw LALPA, nangin i hriat fai vek loh chu, Ka leiah hian thu rêng rêng a awm lo. 5 Nangin ka hnung lam leh ka hma lamah mi hual a, Ka chungah i kut i nghat bawk a. 6 Chuti kauva hriatna chu ka tân a mak lutuk a; A sâng êm a, ka phâk lo a ni. 7 I thlarau hnên ata hi khawiah nge ka kal ang? I hma ata hi khawiah nge ka tlân bo vang? 8 Vânah han lâwn ila, chutah chuan i awm si a; Seol-ah mutna siam ila, ngai teh, chutah chuan i awm bawk si a. 9 Zîng thla zârin, Tuifinriat tâwp daihah va awm ila, 10 Chutah pawh chuan i kutin mi hruai ang a, I kut ding lamin mi chelh dâwn si a. 11 “Thimin mi khuh bo tlat se, Ka vêla êng hi zân thim ni se,” ti mah ila, 12 Thim pawhin i lakah chuan eng mah a hliah lo va, Zân hi chhûn angin a êng zâwk a ni; I tân chuan thim leh êng hi thuhmun reng a ni. 13 Nangmah ngeiin ka rilru i nei a; Ka nu pum chhûngah mi khuh a. 14 I hnênah lâwm thu ka hrilh ang che, hlauhawm tak leh mak taka siam ka ni si a; I thiltihte hi mak tak a ni a; Chu chu ka nunna hian a hre chiang hle a ni. 15 A rûka siama ka awma, Lei hmun hnuaihnung bera mawi taka siama ka awm lai khân ka ruhrel chu i lakah thupin a awm lo. 16 Ka rîruang la famkim lo chu i mitin a hmu a, I lehkhabuah chuan ka pêngte zawng zawng hi ziak vek a ni a, A ni têla siamin a awm zêl a, A pakhat mah la awm hmain. 17 Aw Pathian, i ngaihtuahnate chu ka tân a va hlu êm! A infin khâwm chu a va nasa êm! 18 Chhiar dâwn ila, a tam lam chu ṭiauvaivut aiin a tam zâwk ang; Ka han men chuan, i hnênah ka la awm cheu ṭhîn a ni. 19 Aw Pathian, mi suaksualte chu i that ngei dâwn si a; Chutichuan, nangni thisen chhuah châk mite u, mi kalsan rawh u. 20 Anni chuan sual takin an sawichhe si chia, Nangmah dotute chuan i hming chu an sawi nawmnah ṭhîn. 21 Aw LALPA, nangmah hawtute chu ka haw lo vem ni? Nangmah beitute chungah chuan ka lungni lo lo vem ni? 22 Anni chu huat tak têin ka hua a: Mi dotuahte ka ruat hlawm a. 23 Aw Pathian, ngun takin mi en chhuak la, ka thinlung hi hria ang che; Mi fiah la, ka ngaihtuahnate hi hria ang che; 24 Tin, keimahah hian suahsualna kawng rêng rêng a awm nge awm lo en la, Chatuan kawngah chuan mi hruai ang che.
Hla Hruaitu tân. Davida Fakna Hla.
Vênghim tûra ngenna
1 Aw LALPA, mi sual lakah chuan mi chhanhim la; Mi nunrâwng lakah chuan mi humhim ang che: 2 Anni chuan an thinlungah thil sualte an ngaihtuah ṭhîn a; Do tûrin an inkhâwm fo ṭhîn. 3 An lei chu rûl angin an tihriam a; An heh chhûngah chuan rûlrial tûr a awm a. (Selah) 4 Aw LALPA, mi suaksual kut lakah chuan mi vawng ṭha la; Mi nunrâwng lakah chuan mi humhim ang che: Anni chuan ka ke pênte hi nam kawi an tum a. 5 Mi chapote chuan ka awh nân thang an kam ru a, hruihrualte nên; Kawng sîrah chuan lên an phah a; Ka awh nân thangte an kam a. (Selah) 6 LALPA hnênah chuan, “Nang chu ka Pathian i ni a: Aw LALPA, khawngaih ka dîlna awte hi lo bengkhawn ang che. 7 Aw, Pathian, LALPA, mi chhandamna tichaktu, Nang chuan inbeih niah chuan ka lu mi khuhsak a. 8 Aw LALPA, mi suaksual duh zâwngte chu phal suh la; An ngaihtuahna sual chu puitlintîr suh ang che; chuti lo chuan, an inchawimawi dah ang e,” ka ti a. (Selah) 9 Mi hual vêltute lu chu, Anmahni hmuia an thu sual sawi chuan khuh rawh se. 10 Meilingte an chungah tla sela: Meia paihin awm sela; An thawh leh tawh lohna tûrin khuarkhurum thûk takahte paihin awm rawh se. 11 Thu ṭha lo sawitu chu leiah hian tihnghehin a awm lo vang a; Mi nunrâwng tichhe tûrin thil ṭha lovin a pêl ang. 12 LALPA chuan hrehawm tuarte chu an thu-ah a ṭan ang tih ka hria, Pachhiate chu an tâna âwm rêngah nên. 13 Matheilovin mi felte chuan i hming an fak ang a; Mi dikte chu i hmaah an awm ang.
Davida Fakna Hla.
Tlai lam ṭawngṭaina
1 LALPA, ka koh che hi; ka hnênah lo kal thuai la: Ka koh chein ka awah hian beng lo chhi ang che. 2 Ka ṭawngṭaina hi englo rimtui tak angin i hmaah tihchhuahin awm sela; Ka kut phar hi tlai lam inthawina angin awm rawh se. 3 Aw LALPA, ka ka bulah hian vêngtu ṭhuttîr la; Ka hmui kawngkhâr hi vêng ang che. 4 Suahsualna thilte thil tisual mite tihpui tûr chuan, Ka thinlung hi thil ṭha lo rêng rêng lamah chuan thlêktîr suh la; An ei tui tak takte chu mi eitîr suh ang che. 5 Mi fel chuan mi vaw rawh se, khawngaihna a ni ang; Mi zilhhau rawh se, lua hriak thih ang a ni ang; Ka luin duh lo suh se. An suahsual pawhin ka ṭawngṭai zêl dâwn si a. 6 An rorêltute chu lungpui sîrah paih thlâkin an awm a; Anni chuan ka thute chu an ngaithla tawh ang; a thlum si a. 7 Miin a leileh a tisawm ang hian, Kan ruhte hi thlân kovah tihdarhin a awm a. 8 Aw Pathian, LALPA, ka mitin i lam a en si ṭhîn a; Nangmahah chuan ka rinna ka nghat ṭhîn; ka nunna hi saruakin hnutchhiah suh ang che. 9 Ka awh nâna thang an kam lakah chuan mi humhim ang che. Thil tisualtute thang lakah te nên. 10 Keiin ka kal pelh lai takin, Mi suaksualte chu anmahni lênahte chuan tlu lût rawh se.
Davida Fakna Hla.
Tlai lam ṭawngṭaina
1 LALPA, ka koh che hi; ka hnênah lo kal thuai la: Ka koh chein ka awah hian beng lo chhi ang che. 2 Ka ṭawngṭaina hi englo rimtui tak angin i hmaah tihchhuahin awm sela; Ka kut phar hi tlai lam inthawina angin awm rawh se. 3 Aw LALPA, ka ka bulah hian vêngtu ṭhuttîr la; Ka hmui kawngkhâr hi vêng ang che. 4 Suahsualna thilte thil tisual mite tihpui tûr chuan, Ka thinlung hi thil ṭha lo rêng rêng lamah chuan thlêktîr suh la; An ei tui tak takte chu mi eitîr suh ang che. 5 Mi fel chuan mi vaw rawh se, khawngaihna a ni ang; Mi zilhhau rawh se, lua hriak thih ang a ni ang; Ka luin duh lo suh se. An suahsual pawhin ka ṭawngṭai zêl dâwn si a. 6 An rorêltute chu lungpui sîrah paih thlâkin an awm a; Anni chuan ka thute chu an ngaithla tawh ang; a thlum si a. 7 Miin a leileh a tisawm ang hian, Kan ruhte hi thlân kovah tihdarhin a awm a. 8 Aw Pathian, LALPA, ka mitin i lam a en si ṭhîn a; Nangmahah chuan ka rinna ka nghat ṭhîn; ka nunna hi saruakin hnutchhiah suh ang che. 9 Ka awh nâna thang an kam lakah chuan mi humhim ang che. Thil tisualtute thang lakah te nên. 10 Keiin ka kal pelh lai takin, Mi suaksualte chu anmahni lênahte chuan tlu lût rawh se.
Davida Fakna Hla.
Ṭanpui ngenna
1 Aw LALPA, ka ṭawngṭaina hi ngaithla la; khawngaih ka dîlnaah hian beng lo chhi la; I rinawmna avâng leh i felna avângin mi chhâng ang che. 2 I chhiahhlawh chungah hian rorêl suh ang che; I mit hmuhah chuan mi nung rêng rêng thiam chang an awm dâwn si lo. 3 Dotu chuan ka nunna a tiduhdah si a; Ka nun hi leiah a vaw thlu a; Thi tawh daihte angin, hmun thim takahte mi awmtîr a. 4 Chuvângin, ka thlarau hi ka kawchhûngah a chau va; Ka thinlung hi ka kawchhûngah a mangang ta a. 5 Hmasâng nite chu ka hre reng ṭhîn a; I thiltih zawng zawng chu ka ngaihtuah ṭhîn a; I kut hnathawhte chu ka chhût ṭhîn. 6 Ka kutte hi i lamah ka phar ṭhîn a; Ka nunna hi ram ro tak angin nangmah châkin a tuihâl ṭhîn. (Selah) 7 Aw LALPA, mi chhâng thuai ang che; ka thlarau a chauh dâwn hi! Ka lakah hian i hmai thup suh ang che; Chuti lo chuan, khuarkhuruma chhukte ang maiin ka lo awm dah ang e. 8 Zîngah chuan i ngilneihna thu mi hriattîr ang che; Nang ka ring si ṭhîn chia; Ka kalna tûr kawng chu mi hriattîr ang che; Ka rilru hi i hnênah ka dah tlat si ṭhîn a. 9 Aw LALPA, mi dotute lakah chuan mi chhanhim ang che; I mi thuhrûk tûrin i hnênah ka lo tlân a ni. 10 I duh zâwng tih mi zirtîr ang che, ka Pathian i ni si a; I thlarau chu a ṭha a ni; ram dik takah chuan mi hruai ang che. 11 Aw LALPA, i hming avângin mi tiharh la; I felna avângin ka nunna hi manganna ata hruai chhuak ang che. 12 I ngilneihna avângin mi dotute chu tiboral la, Ka nunna timangangtu zawng zawng chu tiboral ang che; I chhiahhlawh ka ni si a.
Davida Fakna Hla.
Hmêlma hneh vânga Lal lâwm thu
1 LALPA, ka lungpui chu fakin awm rawh se, Ani chuan ka kutte hi râl kah a zirtîr ṭhîn a, Ka kutzungṭangte hi bei tûrin a zirtîr bawk ṭhîn. 2 Ka ngilneihna leh ka kulhpui, Ka kulhbîng sâng leh mi chhanhimtu, Ka phaw leh ka rinna nghahna, Ka hnuaia ka mite tudawl ṭhîntu chu a ni. 3 LALPA, mihring hi eng nge maw a niha, i hriat ṭhin ni? Mihring fapa pawh hi eng nge maw a niha, i ngaihtuah ṭhin ni? 4 Mihring hi engmahlo mai ang a ni a; A dam chhûng nite chu hlim ral ṭhîn ang hi a ni. 5 Aw LALPA, i vânte tikûnin lo chhuk la; Tlângte chu khawih ang che; tichuan, a khu chhuak ang. 6 Kâwl phêttîr la, anniho chu tidarh ang che; I thalte chu kâp chhuak la, tibuai nuaih ang che. 7 Chung lam aṭangin i kutin rawn ban la; Mi chhanchhuak la, tui lian atate hi mi chhanhim ang che, Mikhualte kut ata hi; 8 An kâ chuan dâwt a sawi ṭhîn a, An kut ding lam chu dik lohnaa khat kut ding lam a ni. 9 Aw Pathian, nangmah chawimawiin hla thar ka sa ang a; Perhkhuang hrui sâwm nei mi nên nangmah fakin ka zai ang. 10 Amah chu a ni lalho hnêna chhandamna pea, Khandaih mi tikhawlo thei laka a chhiahhlawh Davida chhanchhuaktu chu ni. 11 Mi chhanchhuak la, mikhualte kut ata hi mi chhanhim ang che, An kâ chuan thu engmahlo mai mai an sawi ṭhîn a, An kut ding lam chu dik lohnaa khat kut ding lam a ni. 12 Thlai ṭhang duang ang maiin kan fapate ṭhang duang sela; Kan fanute pawh lal in kil lung chher mawi ang lo ni se; 13 Kan buhzêmte lo khatin thil tinrêng awm rei ruiin, Kan berâmte pawhin no a sânga sâng tam tak, A sînga sîng tam tak kan phûlahte nei sela; 14 Kan ran rualten no hruai duah duah sela, No pai fuh lo leh chhiat awm lovin; Kan kawtthlêrahte mangang au thâwm rêng awm lo sela! 15 Chutiang mite chu lâwm takin an awm ṭhîn a; A ni, LALPA Pathiana neih mite chu lâwm takin an awm ṭhîn.
Fakna Hla; Davida ta.
Fakna Hla
1 Aw Lalber, ka Pathian, ka chawimawi ang chia; I hming hi kumkhaw tlaitluanin ka fak ang. 2 Ni tin ka fak ang chia; I hming hi kumkhaw tlaitluanin ka fak ang. 3 LALPA chu a ropui a, nasa taka fak tûr a ni; A ropuizia chu chhui chhuah rual a ni lo. 4 Chhuan khatin chhuan dang hnênah i thiltihte chu an fak chhâwng zêl ang a; I thiltih ropui takte chu an hriattîr ang. 5 Nangmah chawimawina ropui tak leh, I thil mak tihte chu ka ngaihtuah ang. 6 Miten i thiltih râpthlâk takte chakzia chu an sawi ang a; Kei pawhin i ropuizia ka hriattîr bawk ang. 7 I ṭhatna ropui tak an hriat reng chu an sawi ang a, Kei pawhin i ropuizia ka hriattîr bawk ang. 8 LALPA chu mi khawngaih thei, lainatnaa khat, Thinnel, ngilneihna nasa tak nei a ni. 9 LALPA chu engkim chungah pawh a ṭha a ni; A lainatnate chu a thil siam zawng zawng chungah a awm a. 10 Aw LALPA, i thil siam zawng zawng chuan i hnênah lâwm thu an hril ang a; Mi thianghlimte pawhin an fak ang che. 11 I ram ropuizia thu sawiin, I thiltihtheihna thu chu tîtîah an la hmang ang; 12 Mihring fate hnênah a thiltih ropui takte leh, A ram mawina ropuizia hriattîr tûrin. 13 I ram chu chatuan ram tûr a ni a, I thuneihna chu chhuan awm chhûng zawngin a awm reng ang. 14 LALPA chuan tlu zawng zawng chu a chelh reng ṭhîn a, Kun ngawih ngawiha awm zawng zawng chu a kaitho ṭhîn. 15 I thil siam zawng zawng mitte chuan an nghâk ṭhîn che a; Nangin a hun takah an chaw i pe ṭhîn. 16 I kut i phar a, Thil nung zawng zawng châkna chu i tihrehsak ṭhîn. 17 LALPA chu a awm dân zawng zawngah a felin, A thiltih zawng zawngah mi khawngaih thei tak a ni ṭhîn. 18 LALPA chuan a kotu zawng zawngte chu a hnaih ṭhîn a. Tihtakzeta amah kotu zawng zawngte chu. 19 Amah ṭihtute duh chu a hlawhtlintîr ang a; An au thâwm a hria ang a, anni chu a chhandam ang. 20 LALPA chuan amah hmangaihtu zawng zawng chu a humhim ṭhîn a; Mi suaksualte erawh chu a tiboral vek ang. 21 Ka kâ hian LALPA fakna thu a sawi ang; Tin, tisa zawng zawng hian a hming thianghlim chu kumkhaw tlaitluanin fak rawh se.
Chhandamtu Pathian fakna
1 LALPA chu fak rawh u. Aw ka nunna, LALPA chu fak rawh. 2 Ka dam chhûng zawngin LALPA chu ka fak ang a; Ka nun chhûng zawngin ka Pathian fakin ka zai ang. 3 Mi liante chu ring suh ula, Mihring fapa, ṭanpuina rêng rêng awm lohna chu ring hek suh u. 4 A thawin a chhuahsan a, ani chu a leilungah a kîr leh a; Chumi ni ngei chuan a ngaihtuahnate chu a bo nghâl a ni. 5 Jakoba Pathian ṭanpuitua neih chu lâwm takin a awm ṭhîn, LALPA Pathiana beiseina neitu chu: 6 Ani chu lei te, vân te, Tuifinriat te leh an chhûnga awm zawng zawng siamtu a ni; Ani chuan kumkhua atân thutak a vawng ṭha ṭhîn a, 7 Ani chuan hnehchhiahna tuarte tân ro a rêl ṭhîn a, Ani chuan rilṭamte hnênah chaw a pe ṭhîn. LALPA chuan mi tângte chu a chhuah ṭhîn a; 8 LALPA chuan mitdelte mit a tivâr ṭhîn a; LALPA chuan kun ngawih ngawihte chu a kaitho ṭhîn a; LALPA chuan mi felte chu a hmangaih ṭhîn a; 9 LALPA chuan mikhualte chu a humhim ṭhîn a; Pa nei lo leh hmeithai chu a chelh reng ṭhîn a; Mi suaksualte kawng erawh chu a tiletling ṭhîn. 10 LALPA chu kumkhuain lalah a ṭhu ang a, Aw Zion, i Pathian chu chhuan zawng zawng thlengin lalah a ṭhu ang. LALPA chu fak rawh u.
Engkimtithei Pathian fakna
1 LALPA chu fak rawh u; Kan Pathian faka zai hi a ṭha si a; Chu chu a nuamin, fak hi a âwm rêng a ni. 2 LALPA chuan Jerusalem chu a din leh a; Israel hnawh chhuahhote chu a hruai khâwm leh a. 3 Lungchhiate chu a tidam a, An hliamte chu a tuam ṭhîn a. 4 Arsi tam chin a chhiar a; An hming a vuah ṭheuh hlawm ṭhîn a. 5 Kan LALPA chu a ropui a, thiltihtheih lamah pawh chak tak a ni a; A finna chuan tawpintai a nei lo. 6 LALPA chuan thuhnuairawlhte chu a chelh reng a; Mi suaksualte chu leiah a titlâwm ṭhîn. 7 Lâwm thu sawia LALPA chawimawiin hla sa ula; Ṭingṭang nên kan Pathian fakin zai rawh u: 8 Ani chuan vân khi chhûm a zâm hliahtîr a, Leilung tân ruah a buatsaih a, Tlângahte chuan hlobet a ṭotîr ṭhîn. 9 Ani chuan sa hnênah ei tûr a pe ṭhîn, Choâk no hrâm hrâmte hnênah nên. 10 Ani chu sakawr chakna chungah chuan a lâwm lo va; Mihring ke chungahte pawh lâwmna rêng rêng a nei ṭhîn lo. 11 LALPA chuan amah ṭihtute chungah chuan a lâwmna a nei ṭhîn, A ngilneihna beiseitute chungah chuan. 12 Aw Jerusalem, LALPA chu fak rawh; Aw Zion, i Pathian chu fak rawh. 13 Ani chuan i kulh kawngkhâr kalhna thing tlâwnte chu a tikhauh va; I chhûnga i fanau awmte chu mal a sâwm si a. 14 I ramri chhûngah chuan remna a siam a; Buh ṭha ber chiin a tikhat ṭhîn che a ni. 15 A thupêk chu leiah hian a tîr chhuak a; A thu chu chak takin a tlân ṭhîn. 16 Vûr sûr chu berâm hmul angin a pe a; Vûr tla chu vut angin a theh darh ṭhîn. 17 A tui khal chu chhang them nawi angin a paih chhuak ṭhîn a; Ama vawhna hmaah chuan tu nge ding thei ang? 18 A thu chu a tîr chhuak a, chûng chu a titui a; A thli a tlehtîr a, chutichuan, tuite chu a lo luang ṭhîn. 19 A thu chu Jakob-ho hnênah a lantîr a, A thuruatte leh a rorêlte pawh chu Israel-ho hnênah a lantîr ṭhîn. 20 Ani chuan eng hnam chungah mah chutiang chuan a ti ve ngai lo; A rorêlte lah chu an hre hek lo. LALPA chu fak rawh u.
Pathian fak tûra engkim sâwmna
1 LALPA chu fak rawh u. Vân aṭangte khian LALPA chu fak ula; Chung lamahte khian amah chu fak rawh u. 2 A vântirhkoh zawng zawngte u, amah chu fak ula; A sipai zawng zawngte u, amah chu fak rawh u. 3 Ni leh thlate u, amah chu fak ula; Arsi êng zawng zawngte u, amah chu fak rawh u. 4 Vân sângte u, amah chu fak ula, Vân chunga tui awmte u, amah chu fak rawh u. 5 Chûngho chuan LALPA hming chu fak rawh se; Ani chuan thu a pe a, siamin an lo awm ta si a. 6 Ani chuan chûngho chu kumkhaw tlaitluan atân a tinghet a; Thu, boral lo tûr chu a ruat a. 7 Lei aṭang hian, Nangni dragon-te leh tui thûk zawng zawngte u; 8 Mei leh rial te, vûr sûr leh chhûmte u; A thu zâwm ṭhîn thlipuite u; 9 Tlâng lian leh tlâng tê zawng zawngte u; Thing rah duhte leh sidar thing zawng zawngte u; 10 Ramsate leh ran zawng zawngte u; Rannungte leh chunglêng savate u; 11 Leia lalte leh mi tinrêngte u; Mi liante leh leia rorêltu zawng zawngte u; 12 Nula leh tlangvâlte; Putar leh naupangte u; LALPA chu fak rawh u. 13 Chûngho chuan LALPA hming chu fak rawh se, A hming chauh chu chawisânin a awm si a; A ropuina chuan lei leh vân a khûm daih a ni. 14 A mite ki chu a chawimawi bawk a, A mi thianghlim zawng zawng fakna chu; Israel fa, a kianga mite fakna chu. LALPA chu fak rawh u.
Fakna hla
1 LALPA chu fak rawh u. LALPA chawimawiin hla thar sa ula, Mi thianghlimte inkhâwmnaah chuan a fakna hla sa rawh u. 2 Israel-ho chu an siamtu chungah chuan lâwm sela; Zion fate chu an Lalber chungah chuan hlim rawh se. 3 A hming chu lâmin fak sela; Khuangtê leh ṭingṭang nên amah fakin zai rawh se. 4 LALPA chu a mite chungah a lâwm si ṭhîn a; Thuhnuairawlhte chu chhandamnain a timawi ang. 5 Mi thianghlimte chu ropuinaah lâwm takin awm sela; An khumlaizâwlah hlimin zai rawh se. 6 Pathian chawimawia fakna chu an kâah awm sela, Khandaih hriam tawn an kutah awm bawk rawh se; 7 Hnam tin chunga phuba laa, Mi tin chunga hremna thlentîr tûr leh, 8 An lalte chu khaidiata phuara, An mi ṭhate chu thîrkawlte buntîr tûr leh, 9 Rorêl ziak saa an chunga rêl tûrin: Chu chawimawina chu a mi thianghlim zawng zawng chuan an nei hlawm a. LALPA chu fak rawh u.
LALPA fak rawh u
1 LALPA chu fak rawh u. Pathian chu a hmun thianghlimah chuan fak ula; A thiltihtheihna boruak zau takah khian amah chu fak rawh u. 2 A thiltih ropui takte avângin amah chu fak ula; A ropui nasatzia ang zelin amah chu fak rawh u. 3 Tawtawrâwt riin amah chu fak ula; Perhkhuang leh ṭingṭangin amah chu fak rawh u. 4 Khuangtê leh lâmin amah chu fak ula; Ṭingṭang chi hrang hrang leh phênglâwngin amah chu fak rawh u. 5 Dârbenthek ri thûm miin amah chu fak ula; Dârbenthek ri fiak miin amah chu fak rawh u. 6 Engkim, thaw thei tawh phawt chuan LALPA chu fak rawh se. LALPA chu fak rawh u.
Thufing hlutna
1 Israel lal Davida fapa Solomona thufing: 2 Finna leh zirtîrna hriat theihna tûr te, Hriat thiamna thu ngaihruat dân thiamna te, 3 Felna te, rorêl te, hleih nei lova hmanghre taka zirtîrna pawm dân thiamna te; 4 Mi mâwlte remhriatna neihtîr tûr te, Tlangvâlte hriatna leh ngaihruat thiamna neihtîrna tûr leh, 5 Mi fingten an hriata, an thiamna te a lo puna, Thil ngai thiam miin rorêlna fingte a man thiamna tûr te, 6 Thufing leh a hrilhfiahna te, mi fing thu leh an thu ril sawite hriat thiamna te chu.
Tlangvâl hnêna thurâwn
7 LALPA ṭih hi finna bul a ni a; Nimahsela, mi âte chuan finna leh zirtîrna an hmusit ṭhîn. 8 Ka fapa, i pa zirtîrna che chu ngaithla la, I nu zirtîrna che chu hawisan suh; 9 I lu atân pârṭhi mawi tak a ni ang a, I nghâwng atân ṭhi ang a ni dâwn si a. 10 Ka fapa, mi sualin an thlêm che chuan zâwm suh. 11 “Hawh teh, thisen chhuah tûrin i châng ang khai, A vâng eng mah awm lovin pawi khawih lote chu i châng ru teh ang; 12 Seol angin a nung chungin i lem teh ang, An puma khuarkhuruma tla angin; 13 Thil hlu tak takte kan nei ang a, Râllâk sumin kan in kan tikhat dâwn nia. 14 Kan zîngah lo tel ve la, Tangka ip kan in ṭâwm dâwn nia,” te an tihin, 15 Ka fapa, an zîngah chuan tel ve suh la, An kawng ata inthiarfihlîm rawh; 16 An kete chu thil sual lamah a tlân a, Thisen chhuah tûrin an hmanhmawh ruai ṭhîn. 17 Lên chu a lothlâwn maia zâr a ni, Eng sava mit hmuhah pawh; 18 Chûngte chuan anmahni thisen an châng a, An nunna châng ru an ni. 19 Chutiang chu a ni hlâwknaa duhâm apiangte kawng chu; A neitute nun a lâksak ṭhîn.
Finna au thâwm
20 Kawtthlêrah finna chu ring takin a au va, Kawtthlêr ṭhuamahte chuan a aw a chhuah a; 21 Mipui inkhâwmna lai takah a au va, Khawpuiah, khaw luhna kawngkhâr bulah chuan a au chhuak a: 22 “Nangni mi mâwlte u, eng chen nge mâwlna in ngainat dâwn? Eng chen nge hmusittute hmuhsitnaah in hlim anga, Mi âten finna in huat dâwn? 23 Ka zilhna che u lamah hian lo hawi rawh u; Ngai teh u, in chungah ka thlarau ka leih ang a, Ka thu ka hriattîr ang che u. 24 Ka ko che u a, in duh lo va, Ka kut ka phar a, tu mân in ngaisâng lo va; 25 Ka remruat zawng zawng chu engmahlovah in ngai zâwk a, Ka zilhna rêng rêng in pawm duh lo va; 26 Chuvângin, kei pawh in vânduai ni chuan ka nui ang a, In hlauh hun a lo thlen chuan ka nuihsan ang che u, 27 In hlauhna thlipui anga a lo thlena, In vânduaina ṭhâwngaleivir anga a lo thlena, Hrehawmna leh manganna in chunga a lo thlen hunin. 28 Chutichuan, mi ko vang a; nimahsela, ka chhâng lo vang; Zîng takah mi zawng ang a; nimahsela, mi hmu lo vang. 29 Hriatna chu an huata, LALPA ṭihna chu an thlan loh avângin; 30 Ka remruat pakhat tê mah an duh lo va, Ka zilhna zawng zawngte chu an ngainêp a; 31 Chuvângin, anmahni kawng rah chu an ei ang a, Anmahni suangtuahnain an tlai ang. 32 Mi mâwlte hnungtawlhna chuan anmahni a that ang a, Mi âte hlawhtlinnain anmahni a tiboral ang. 33 Ka thu pawm apiangte erawh chu him takin an awm ang a, Thil ṭha lo hlau lovin an awm hle hle ang.”
Finna rah
1 Ka fapa, ka thute i dawna, Ka thupêkte i khâwl khâwma, 2 Finna lama i beng i chhita, I thinlung hriatna lam atân i pêk chuan; 3 A ni, hriatna i auhva, Hriat thiam theihna pawh i auh chuan; 4 Tangkarua anga i zawna, Ro phûm rûk anga i zawn chuan; 5 LALPA ṭih nachâng i lo hria ang a, Pathian hriatna chu i chhar chhuak ang. 6 LALPA chuan finna a pe ṭhîn a, A kâ aṭang chuan finna leh hriat thiamna a lo chhuak ṭhîn a ni; 7 Mi tluangte tân finna dik a chhêk khâwm ṭhîn a, Rinawm taka awm ṭhînte tân phaw a ni; 8 Rorêlna kawngte a vêna, A mi thianghlimte kawng a vawn ṭhat theih nân. 9 Tichuan, felna leh rorêlna chu i lo hre thiam ang a, Hleih neih lohna nên, a ni, kawng ṭha tinrêng pawh. 10 I thinlungah finna chu a lût ang a, I nunna atân hriatna chu tui tak a ni ang; 11 Remhriatnain a vêng ang chia, Hriat thiamnain a enkawl ang che; 12 Sual kawng ata chhanchhuak tûr che leh, Thil awihawm lo sawi mite laka chhanchhuak tûr chein; 13 Chûngte chuan kawng thima kal tûrin kawng dik chu an kalsan a; 14 Thil tha lo tih chu an lâwm zâwng a ni a, Thil sual bengtlalo mai maiahte an lâwm ṭhîn; 15 An kawngte chu a kawi a, An rin tlâk loh; 16 Hmeichhe sual lakah chuan a chhan ang che, Ram dang mi, kam thluma thlêmtu che lakah; 17 A tleirâwl lai ṭhian kalsana, A Pathian thuthlung theihnghilhtu lak ata chu. 18 A in chuan thihna lam a hawi a, A kawngte chuan mitthi lam. 19 A hnêna kal rêng rêng chu an kîr leh tawh ngai lo va, Nunna kawng an pawh ngai hek lo; 20 Mi ṭha kawng i zawha, Mi fel kawng chu i zawh zêl theih nân. 21 Mi tluangte chu leilungah hian an chêng ang a, Ṭha famkimte chu chutah chuan an awm reng ang. 22 Mi suaksualte erawh chu leilung ata tihboral an ni ang a, Vervêk taka titute chu tihboral phiar an ni ang.
Tlangvâlte hnêna thurâwn
1 Ka fapa, ka dân chu theihnghilh suh la, I thinlungin ka thupêkte chu zâwm reng zâwk rawh se; 2 Dam ni leh kum te, Thlamuanna te a pêk belhchhah dâwn che nia. 3 Khawngaihna leh thutak chuan hnuchhawn che suh se; I nghâwngah zem tlat la, I thinlung phêkah ziak rawh. 4 Tichuan, Pathian leh mihring mit hmuhah, Duhsakna leh hmingṭhatna i hlawh dâwn nia. 5 I thinlung zawng zawngin LALPA ring la, Nangma hriatnaah innghat suh; 6 I kawng zawng zawngah amah hre reng la, I kawngte chu a kawhhmuh zêl ang che. 7 Mahni ngaihin intifing suh la; LALPA chu ṭih la, sual kalsan rawh. 8 I lai atân hrisêlna a ni ang a, I ruh atân thlîng a ni ang. 9 I sumin LALPA chawimawi la, I thil lo pung hmasa ber zawng zawngte nên; 10 Tichuan, i buh in chu a lo khat liam ang a, I sâwrkhur chu uain tharin a luang liam ang. 11 Ka fapa, LALPA thununna che ngainêp suh la, A zilhhauna che ning hek suh. 12 LALPA chuan a hmangaihte chu a zilhhau ṭhîn a ni, Pain fa a lawm apiangte a zilhhau ṭhîn ang hian. 13 Finna hmuchhuaktu chu a nihlawh a, Hriat thiamna hmuchhuaktu pawh. 14 Tangkaraw peipun aiin a peipun chu a ṭha zâwk si a, A hlêp pawh rangkachak ṭha mi aiin. 15 Lunghlu sen mi aiin a hlu a; Thil i duhthusâm theih ang zawng zawng pawhin a hen lo. 16 A kut ding lamah dam reina a awm a, A kut vei lamah sum leh ropuina. 17 A kawngte chu nunkhaw nawmna kawng a ni a, A kawng zawng zawng chu thlamuanna a ni. 18 A vuan apiangte tân nunna thing a ni a, A kawl reng apiangte chu an hamṭha e. 19 LALPA chuan finnain leilung a din a, Hriatnain vânte a tinghet a; 20 A thiamnain tuifinriatte a sah a, Chhûmte chuan dai a fartîr a. 21 Ka fapa, i mit ata kiantîr suh la, Finna leh ngaihruat thiamna dik tak chu vawng tlat rawh; 22 I nunna atân nunna a ni ang a, I nghâwng atân khawngaihna. 23 Tichuan, i kawngah him takin i kal ang a, I ke chu a petek lo vang. 24 I mut hunin i hlau lo vang a, A ni, i mu ang a, tui takin i muhîl ang. 25 Hlauhna lo awm thutte chu hlau suh la, Mi suaksualte chunga ṭiauna a lo thlenin hlau hek suh. 26 LALPA chu i himna a ni si a, I ke chu âwk lo tûrin a vêng dâwn a ni. 27 A phute tân ṭhatna ui suh, I kutah tih theihna a awm phawt si chuan. 28 I ṭhenawm hnênah, “Kal leh ta rih la, lo kal leh rawh, Naktûkah ka pe ang che,” ti suh, I kawl reng si chuan. 29 I ṭhenawm chungah thil ṭha lo suangtuah suh, Ngaihngam takin i kiangah a awm tih hre siin. 30 A vâng awm lovin mi sual mai suh, I pawi eng mah a khawih loh chuan. 31 Mi nunrâwng awt suh la, A kawng a enga mah thlang suh. 32 Kawhmawh bâwl chîng chu LALPA ngaihin tenawm an ni si a; Mi ṭha famkim erawh chu a ṭhian an ni. 33 LALPA ânchhia chu mi suaksual inah a awm a, Mi felte chênna erawh chu mal a sâwm ṭhîn. 34 Mi hmusittute chu a hmusit ṭhîn a, Inngaitlâwmte erawh chu khawngaihna a pe ṭhîn. 35 Mi fing chuan ropuina an rochung ang a, Mi âte kaisânna erawh chu mualphona a ni ang.
Finna hlâwkzia
1 Ka fapate u, pa zirtîrna chu ngaithla ula, Hriat thiamna chu hre tûrin ngaithla rawh u; 2 Zirtîrna ṭha tak ka fah si che u a; Ka zirtîrna hi hawisan suh u. 3 Ka pa fapa ka ni a, Ka nu fa, fapa mal duata duat ka ni a. 4 Mi zirtîr a, ka hnênah, “I thinlung chuan ka thute hi vawng reng sela; Ka thupêkte hi zâwm la, nung rawh,” a ti a. 5 Finna nei la, hriat thiamna nei rawh; Theihnghilh suh la, Ka kâa thu chhuakte hi chhiat lam pansan suh. 6 Hawisan suh la, a humhim ang che; Hmangaih la, a vêng ang che. 7 Finna hi thupui ber a ni a; Chuvângin, finna hi nei rawh; A ni, i thil neih zawng zawng chân pawhin finna hi nei rawh. 8 Chawimawi la, anin a chawisâng ang che; I lawm chuan zahawmah a siam ang che, 9 Khawngaihna lukhum i lu a khumtîr ang a, Mawina lallukhum a pe ang che. 10 Aw ka fapa, ka thu ngaithla la, pawm rawh; Tichuan, i dam chhûng kum a lo tam ang. 11 Finna kawng ka zirtîr chia, Ṭhatna kawngah ka hruai chia. 12 I kal laiin i pheichheh a zâng ang a; I tlân pawhin i petek lo vang. 13 Zirtîrna chu vuan tlat la, chhuah suh; Vawng tlat rawh, i nunna a ni si a. 14 Mi suaksual kawngah chuan lût suh la, Mi sual kawngah chuan kal suh. 15 Pumpelh la, a kiangah kal suh; Hawisan la, kal zêl rawh. 16 Pawi an khawih phawt loh chuan an mu ngai lo va, Tute emaw tal chhiatna an thlensak loh chuan an mut a chhuak thei lo. 17 Suahsualna chhang an ei a, Nunrâwnna uain an in ṭhîn. 18 Mi felte kawng erawh chu zîng êng, chhûn vânglai tak thlenga êng zual deuh deuh ang hi a ni. 19 Mi suaksualte kawng chu a thim a, Eng nge an chhuih an hre lo. 20 Ka fapa, ka thu ngaithla la, Ka thusawiah i beng dawh rawh. 21 I mit hmuh ata chhuahtîr suh, I thinlung lai takah pai rawh. 22 A hmutute tân nunna a ni a, An tisa zawng zawng tân hrisêlna a ni si a. 23 Thil dang ber aiin i thinlung vêng ṭha rawh, Nunna lo chhuahna a ni si a. 24 Ṭawng chaltlai bânsan la, Mi bum chîng suh. 25 I mitin hma lam en la, Ngîl takin hma lam thlîr rawh. 26 I ke tân kawng tirualrem la, I kawng zawng zawng tihngheh ni rawh se. 27 Ding lamah emaw, vei lamah emaw pêng suh; Sual ata i ke sawn rawh.
Uirena laka fîmkhur tûr
1 Ka fapa, ka finna ngaithla la, Ka hriatnaah i beng dawh rawh; 2 Ngaihruat thiamna i vawna, I leiin hriatna a vawn theih nân. 3 Hmeichhe sual hmui ata khawizû a far a, A hmui chu hriak aiin a nâl si; 4 A tâwpna erawh chu sai angin a khâ a, Khandaih hriam tawn angin a hriam. 5 A ke chu thihnaah a chhuk a, A ke pênin Seol lam a pan. 6 Chutichuan, nunna kawng rualrem a hmu lo va, A kawngte chu a nghet lo va, a hre si lo. 7 Chuvângin, ka fapate u, ka thu ngaithla ula, Ka kaa thu hi hawisan teh suh u khai. 8 I kawng chu a hnên ata sawn daih la, A kawngka va hnaih suh. 9 Chuti lo chuan, i ropuina chu mi dang a pe ang a, I kumte chu mi nun chhia i pe dah ang a, 10 Ramdangmite chu i thahruiin i titlai ang a, I thawh rimna chu hmêlhriat loh inah a awm dah ang e. 11 Tin, i tisa leh i taksa a ral hunin, I hun tâwp lamah chuan i ṭap ang a, 12 “Engtiziaa zirtîrna chu ka lo huata, Ka thinlungin zilhhauna chu lo ngainêp nge maw ni aw? 13 Mi zirtîrtu thu lah ka lo awih ta hek lo va, Mi zirtîrtute chungah ka beng ka lo dawh ta bawk hek lo; 14 Mipuite leh pung khâwmho zîngah chuan, Ka lo thih teuh hle chu le!” i la ti ang. 15 I tuibêl ata tui in la, I tuichhunchhuaha tui tharlâm chu. 16 I tuihnate chu ram tina luang darhin, Kawtthlêrah te lui tui a luang dâwn em ni? 17 I tân chauh ni sela, Ramdangmite ṭâwmpui lohvin. 18 I tuichhunchhuah chu malsâwmin awm sela, I tleirâwl lai nupuiah chuan hlim rawh. 19 Zukpui duhawm tak leh zukchal nalh tak angin, Eng lai pawhin a ṭâng chhûng chuan tilungawi fo che sela, A hmangaihnaah chuan lâwm fo rawh. 20 Eng atân nge, nang, ka fapa chuan hmeichhe sual i lawm anga, A ṭâng i pawm ang? 21 Mihring kawngte chu LALPA mit hmuhah a awm a, A kawng zawng zawng a tihrualremsak ṭhîn. 22 Ama khawlohna ngeiin mi suaksual chu a man ang a, A sualna hruizêna thlunin a awm ang. 23 Zirtîrna tlâkchham vângin a thi ang a, A ât êm avângin a bo vang.
Fîmkhur ṭûlna dang
1 Ka fapa, i ṭhenawm tâna mawhphurtua i lo ṭana, Ramdangmi vuak nâna i kut i hman chuan, 2 I ṭawngka chhuakah i âwk a, I ṭawngka chhuakin a man che a ni. 3 Ka fapa, i ṭhenawm kutah i awm tih inhriain hei hi ti la, intichhuak rawh; Kal la, intihnuai la, i ṭhenawm chu luh ngut ngut rawh. 4 I mit chu muthilhtîr suh la, I mit vun mutthlûktîr hek suh. 5 Sa pêltu laka sakhi a tlân chhuak ang leh, Sava vehtu laka sava a thlâwk chhuak angin intichhuak rawh. 6 Nang, thatchhepa, fanghmîr tih dânte chhût la, fing rawh; 7 Anni chuan lal te, hotu te, rorêltu te nei lovin, 8 Nipuiah chaw an chhêk khâwm a, A seng hunin an ei tûrte an sêng khâwm ṭhîn. 9 Aw, thatchhepa, eng chen nge i mut dâwn? Eng tikah nge i muhîl chu i thawh dâwn? 10 I duh chuan mu hlek la, chhîng hlek rawh, Kut kuangkuahin châwl hlek teh; 11 I mut hlânin i rethei hman ang a, Tlâkchhamnain sipai angin a rawn nang thut ang che. 12 Mi tlâktlai lo, mi khawlo chu, Ṭawng chaltlai nên a vâk vêl a; 13 A mit a siai a, a kein thu a sawi a, A kutzungṭangin a zaizir ṭhîn. 14 A thinlungah luhlulna a awm a, thil sual a suangtuah reng a, Inrem lohna a tuh ṭhîn. 15 Chuvângin, a chhiatna a lo thleng thut ang a, Vawilehkhatah tihchhiatin a awm ang a, tihṭhat leh theih tawh lohvin. 16 Thil paruk LALPAN a huat ṭhin a awm a, A ni, pasarih a ten zâwng tak a awm: 17 Mit chapo te, lei dawthei te, Pawi khawih lo thisen chhuahna kut te, 18 Thil ṭha lo suangtuah ṭhîn thinlung te, Pawi khawih tûra ngal chak te, 19 Hretu der dâwt sawi ṭhîn te, Unau kâra inrem lohna tuhtute hi.
Uire lo tûra fîmkhur
20 Ka fapa, i pa thupêk chu zâwm la, I nu zirtîrna chu hawisan suh. 21 I thinlungah thlung reng la, I nghâwngah awrh rawh. 22 I vah vêlin a hruai ang chia, I mut hunin a vêng ang chia, I thawh hunin a bia ang che. 23 Thupêk chu khâwnvâr a ni a, dân chu êng a ni si a; Tin, zirtîrnain a zilhhauna chu nunna kawng a ni; 24 Hmeichhe khawlo lakah leh, Hmeichhe sual kam thlum laka vêng tûr chein. 25 I thinlungin a mawina ît suh la, A men novin hîp che suh se. 26 Nawhchizuarnu avângin pa chhang themah a chang a, Uirenu chuan nunna hlu tak a zawng ṭhîn. 27 Miin a puan kâng lovin mei a pawm thei em ni? 28 Miin a ke kâng lovin meiling a rap thei em ni? 29 Chutichuan, mi a ṭhenawm nupui hnêna kala, Tu pawh amah va khawih chu hrem lohvin a chhuak lo vang. 30 Miin a rilṭâm tihreh nâna rûk a rûk chuan an hmusit ṭhîn lo va; 31 Nimahsela, an hmuhchhuah chuan a leh sarihin a rûl ang; A ina a sum zawng zawng a pe ang. 32 Mi nu uiretu chuan hriatna a nei lo a ni, Ama nunna tichhe tûr thil a ti a ni. 33 Hliam a tuarin a hminghliau vang a, A hming a chhe hlen bawk ang. 34 Thîkthuchhiatna chu mipa thinrimna a ni a, Phuba lâk ni chuan a zuah lo vang. 35 Tlanna chu engah mah a ngai lo vang a; Thilpêk tam tak pe mah la, a lung a awi chuang lo vang.
1 Ka fapa, ka thu pawm la, Ka thupêkte khâwl khâwm rawh. 2 Ka thupêkte zâwm la, nungdamin awm rawh; Ka dân chu mitnautê angin vawng rawh. 3 I zungṭangah bun la, I thinlung phêkah ziak rawh. 4 Finna hnênah chuan, “Ka farnu i ni,” ti la, Hriatna chu i laichînnu vuah rawh; 5 Hmeichhe sual lakah vênga, Hmeichhe khawlo thlêmna laka vêng tûr chein.
Hmeichhe sual
6 Ka ina tukverh zâwngdaikalh âwng aṭang chuan ka han thlîr a, 7 Mi mâwl tlangvâl zîngah chuan, Tlangvâl hriatna nei lo ka hmu a, 8 A awmna lam hnaih kawtthlêrah chuan a kal ṭan a, A in lam a pan ta a, 9 Tlai lam thimhmulah, zân thim, thim tak hnuaiah. 10 Ngai teh, nawhchizuar anga inthuam leh fin vervêk rilru pu hmeichhiain a tâwk a. 11 A awm hle hle thei lo va, a tum a ruh a, A ke chuan a ina awm a duh lo va, 12 Kawtthlêrah te, pêng ṭhuam laiah te a awm a, Kil tin kil tangah a châng ṭhîn. 13 Chutichuan, a man a, a fâwp a, Tlângnêl tak hmêl puin a hnênah, 14 “Remna thilhlan inthawinate ka hlân tûr a ni a, Vawiinah ka thutiam ka hlen ta a. 15 Chuvângin, nangmah tawh tum chein ka lo kal a ni, Ngun taka zawn tum chein; tin, ka hmu ta chia. 16 Ka khumah âwngphah mawi tak ka phah a, Aigupta ram lazaia ṭial. 17 Ka khum chu beraw te, aloe te, thakthîngtein ka tirimtui a. 18 Hawh teh, zankhuain hmangaihna duhtâwkin i chên ang khai, Hmangaihnain inhnêm ang. 19 In neitupa lah a awm si lo, Hla takah a zin a; 20 Tangka ip a keng a, Thla hlei nga hunah a lo haw dâwn a ni,” a ti a. 21 A ṭawngkam thiamin a thlêm thlu a, A infak mawinain a hruai bo ta a. 22 A zui ta nghâl mai a, Bâwng, a talhna hmuna a kal ang leh, Mi â tihfin tûra kawl bun tûra a kal ang leh, 23 Savain a thihna tûr a ni tih hre lova, Thalin a thin a dawh tlang thlenga thang lam a pan angin. 24 Chuvângin, ka fapate u, ka thu hi ngaithla ula, Ka kaa thu chhuakte hi pawm rawh u. 25 I thinlungin a kawngte chu âwn suh sela, A kawngahte chuan kal bo suh. 26 Mi tam tak a hliam a, A ni, a thahte chu tam tak an ni. 27 A in chu Seol kawng a ni a, Thihna pindan a zuk chhun a.
Finna fak
1 Finna chu a auvin, Hriatna chuan a aw a chhuah lo vem ni? 2 Kawng sîr hmun sâng chungahte, Kawng pêng ṭhuamahte a ding ṭhîn a; 3 Khaw tawntirh kawngkaah, Khaw luhna kawngka bulah te ring takin a au va: 4 “Aw, nangni mihringte u, Ka auh che u hi, Ka aw chu mihring fate tân a ni. 5 Aw, nangni mi mâwlte u, Remhriatna hi lo hre thiam teh u; Nangni mi âte u, finna thinlung nei mi lo ni rawh u. 6 Ngaithla rawh u, thil ṭha tak mai ka sawi dâwn a ni, Ka thusawite chu thil dik hlîr a ni ang. 7 Ka kâ chuan thutak a sawi chhuak ang a; Suahsualna chu ka hmui tân thil tenawm a ni. 8 Ka kâa thu zawng zawngte chu a fel vêl vek a ni, Thu kawi leh bengtlalo rêng rêng a awm lo. 9 Hre thiamte tân a fiah vek a, Finna hmutute tân a dik vek a ni. 10 Ka zirtîrnate dawng rawh u, tangkarua te ni lovin; Tin, finna chu rangkachak duhawm mi ai pawhin. 11 “Finna chu lunghlu sen mi aiin a ṭha zâwk si a; Duhthusâm theih thil zawng zawng pawh a hen zo a awm lo. 12 Kei, finna chuan ka chên nân remhriatna ka siam a, Finna leh ngaihruat thiamna ka hre chhuak ṭhîn. 13 LALPA ṭih chu sual huat hi a ni; Chapona te, uanthuanna te, thil ṭha lo tih chîn te, Ṭawng chaltlai te hi ka haw takzet a ni. 14 Remruat leh hriatna dik hi ka ta a ni a; Hriat thiamna ka ni a, chak tak ka ni. 15 Kei mi hmangin lalin ro an rêl a, Hotuten rorêlna felin thu an titlu ṭhîn. 16 Kei mi hmangin hotuten ro an rêl a, Mi lian te, leilunga rorêltute zawng zawng pawhin. 17 Mi hmangaihtu chu ka hmangaih a, Ṭhahnemngai taka mi zawngtute chuan mi hmu ang. 18 Sum leh ropuinate ka hnênah a awm a, A ni, sum leh felna tlo tak mai chu. 19 Ka rah chhuah chu rangkachak aiin a ṭha zâwk a, a ni, rangkachak ṭha mi ai pawhin; Ka lâk luh chu tangkaraw ṭha mi aiin. 20 Felna kawng ka zawh a, Rorêlna kawng takah; 21 Mi hmangaihtute chu sum ka rochuntîr theih nân leh, An ro bâwmte ka tihkhah theih nân. 22 “LALPA chuan a thil siam bul berah mi din a, Hmasânga a thil siam bul berah. 23 Chatuan ata, a tîr têa din ka ni, Leilung awm hma rêngin. 24 Tuifinriat la awm hma daihin ka piang tawh a, Tuikhur tui tam tak la awm hma daihin. 25 Tlâng liante an din hma leh, Tlâng tête awm hmain ka piang tawh a; 26 Leilung a la din hma leh ram te a din hma, Khawvêla vaivut pawh a la awm ṭan hma daihin. 27 Vânte a tihngheh laiin ka awm tawh a, Tuifinriat chunga kal hualna a siam laiin, 28 Chung lam vân a tihngheh laiin, Tuifinriat a lo ngheh laiin; 29 Tuite chuan a thupêk an bawhchhiat lohna tûra tuifinriat rite a siamsaka, Leilung nghahchhan a ruat lai khân. 30 Chutih lai chuan mi themthiam angin a kiangah ka awm a; Ni tin a lâwmna ka ni a, A bulah ka hlim êm êm bawk ṭhîn. 31 Chên theihna leilungah hlim taka awmin, Ka lâwmna chu mihring fate chungah a ni. 32 “Khai le, ka fapate u, ka thu ngaithla rawh u, Ka kawng zawhtute chu mi nihlawh an ni si a. 33 Zirtîrna chu ngaithla ula, fing ula, Duh lo suh u. 34 Ka kawngka bula nghâka, Ka kawt hungna kawngkaa ni tin nghâk renga, Ka thu ngaithlatu chu a eng a thâwl e. 35 Mi hmu apiang chuan nunna a hmu a ni si a, LALPA duhsakna a dawng ang. 36 Amaherawhchu, ka chunga sual apiang chuan ama nunna a tikhawlo va; Mi hua apiang chuan thihna an duh a ni.”
Finna leh âtna
1 Finna chuan a in a sa a, A ban pasarih a phun a; 2 A rante a talh a, a uain te a chawhpawlh a, A dawhkânah pawh ei tûr a hlui a. 3 A nulate a tîr chhuak a, Khuaa hmun sâng ber berah a au va, 4 “Mi mâwl apiang chu he lamah hian lo kal rawh se,” tiin. Tin, hriatna nei lote chu, 5 “Lo kal ula, ka chhang ei ula, Ka uain chawhpawlh chu in rawh u. 6 Aw, nangni mi mâwlte u, âtna kawng chu chhuahsan ula, nung rawh u; Tin, hriatna kawngah chuan kal rawh u,” a ti a. 7 Hmuhsit chîng zilhtu chuan tihtauh khumna a tâwk ṭhîn a, Mi suaksual zilhtu chuan kut tuarna a insiam ṭhîn. 8 Hmuhsit chîng mi chu zilh suh, a haw dah ang che; Mi fing zilh la, a hmangaih ang che. 9 Mi fing zilh la, a fing lehzual sauh dâwn nia; Mi fel zirtîr la, thiamnaah a lo pung dâwn nia. 10 LALPA ṭih hi finna bul a ni a. Mi Thianghlima hriatna hi hriat thiamna a ni. 11 Keimahin i nite chu tihpun a ni ang a, I dam chhûng kumte chu a pung ang. 12 I lo fin chuan, i tâna fing i lo ni ang, Hmusittu i nih chuan nangmah chauhvin i tuar ang. 13 Hmeichhe â chu a awm hle hle thei lo va, A mâwl a, eng mah a hre lo. 14 A kawngkaah a ṭhu ṭhîn a, Khuaa hmun sângtea ṭhuphahah chuan; 15 Kawnga lo kal apiangte chu, 16 “Mi mâwl apiangte chu he lamah lo kal rawh u,” tia ko tûrin; Tin, hriatna nei lote hnênah chuan, 17 “Rûk tui chu a thlum a, A rûka chhang ei chu a tui a ni,” a ti a. 18 Nimahsela, chutah chuan mitthi an awm tih leh, A mi sâwmte chu Seol rila awm an nih a hre lo.
Solomona Thufingte
1 Solomona thufing. Fapa fingin pa lâwm a siam a, Fapa â erawh chu nu rihna a ni. 2 Suahsualna ro chuan hlâwkna a nei lo va, Felna erawh chuan thihna ata a chhanchhuak. 3 LALPA chuan mi fel nunna chu rilṭâm a phal lo vang a, Mi suaksualte duhthusâm erawh chu a paih bosak ṭhîn. 4 Kut dâwngdah chuan retheihna a thlen ṭhîn a, Mi taima kut erawh chuan hausakna a thlen ṭhîn. 5 Buh seng laia inchhêk khâwl chu fapa fing a ni a; A seng hun laia muhîl erawh chu fapa, Mualphona thlen ṭhîntu a ni. 6 Mi fel lu-ah chuan malsâwmnate a awm a, Mi suaksual ka erawh chu nunrâwnnain a tuam. 7 Mi fel hriat rengna chu malsâwmna a ni a, Mi suaksual hming erawh chu a ṭawih ral ang. 8 Mi fing chuan thinlungin thupêkte a dawng ṭhîn a, Mi â kamtam erawh chu a tlu ang. 9 Ngîl taka kal chu muanawm takin a kal ṭhîn a, A kawng tikhawlotu erawh chu hriat chhuahin a awm ang. 10 Mit siaitu chuan lungngaihna a thlen a, Mi â kamtam chu a tlu ang. 11 Mi fel kâ chu nunna tuikhur a ni a, Mi suaksual ka erawh chu nunrâwnnain a tuam; 12 Huatnain inhauna a chawk chhuak a, Hmangaihna erawh chuan bawhchhiatna zawng zawng a khuh ṭhîn. 13 Ngaihruat dik thiam mi kaah chuan finna hmuh a ni a; Amaherawhchu, hriat thiamna nei lo mi hnungzâng atân tiang a awm. 14 Mi fingte chuan hriatna an khâwl khâwm a; Mi a ka erawh chu boral hnaih rengna a ni. 15 Mi hausa sum chu a khawpui nghet a ni a; Mi rethei boralna chu an pachhiatna a ni. 16 Mi fel thawh rimna chuan nunna a thlen a, Mi suaksual hlâwkna chuan sualna. 17 Thununna pawm chu nunna kawngah a awm a, Zilhhauna hawisantu erawh chuan a tisual ṭhîn. 18 Huatna zêptu chu hmui dawthei nei mi a ni a, Mi rêlna thu chhâk chhuak mi chu mi â a ni. 19 Thu tam takah chuan bawhchhiatna a awm ṭhîn a, A ka sûm thei mi erawh chuan fing takin a ti ṭhîn. 20 Mi fel lei chu tangkaraw ṭha mi ang a ni a, Mi suaksual thinlung erawh chu eng hû mah a ni lo. 21 Mi fel ka chuan mi tam tak a châwm a, Mi â erawh chu hriat thiamna tlachhamin a thi. 22 LALPA malsâwmna chuan a tihausa ṭhîn a, Lungngaihna a belhchhah ṭhîn lo. 23 Mi â tân chuan thil sual tih hi nuamsip bâwlna ang a ni a, Chutiang bawk chuan hriat thiamna nei mi tân chuan finna chu a ni. 24 Mi suaksual chu, a hlauh ang ngeiin a chungah a lo thleng ang; Mi fel duhthusâm chu pêk a ni ang. 25 Ṭhâwngaleivir a lo virin mi suaksual chu a boral a, Mi fel erawh chu chatuan lungphûm a ni. 26 Ha tân uain thûr leh mit tân meikhu angin, Mi thatchhia chu a tîrtu tân a ni ang. 27 LALPA ṭihna chuan dam chhûng ni a tisei a; Nimahsela, mi suaksual kumte chu tihtawi a ni ang. 28 Mi fel nghahfâk chu lâwmna a ni ang a, Mi suaksual hmachhuan erawh chu a boral ang. 29 Mi dik tak tân LALPA kawng chu kulhbîng a ni ang a, Thil ṭha lo titu tân erawh chuan boralna a ni ang. 30 Mi felte chu tihsawnin an awm lo vang a, Mi suaksualte erawh chu leilungah an awm lo vang. 31 Mi fel ka chuan finna a chhâk chhuak a, Ṭawng chaltlai lei erawh chu tan chhum a ni ang. 32 Mi fel ka chuan pawm tlâk chu a hria a, Mi suaksual ka erawh chu chaltlai takin a ṭawng chhuak ṭhîn.
1 Bûkna dik lo hi LALPA mit hmuhin thil tenawm a ni a, Khîn dik chiah erawh chu a lâwm zâwng a ni. 2 Chapona a lo awmin mualphona a lo awm a, Inngaitlâwmte hnênah chuan finna a awm. 3 Mi fel rilru ṭhatna chuan anmahni a hruai ang a, Mi vervêkte luhlulna erawh chuan anmahni a tiboral ang. 4 Thinur ni chuan sum leh paiin ṭangkaina a nei lo vang a, Felna erawh chuan thihna ata a chhanchhuak ang. 5 Mi ṭha famkim felna chuan kawng a kawhhmuh ang a; Mi suaksual erawh chu ama suahsualnain a titlu ang. 6 Mi dik tak felna chuan anmahni a chhanchhuak ang a, Vervêk taka titute erawh chu anmahni pawi khawihna ngeia manin an awm ang. 7 Mi suaksual chu a thihin a hmachhuan chu a boral ang a, Thil ṭha lo titute nghahfâk chu a boral ang. 8 Mi fel chu manganna ata chhuahin a awm a, Mi suaksualin a hmun chu a luah thung a, 9 Pathian ngaihsak lo mi chuan a kain a ṭhenawmte a tiboral a, Mi fel erawh chu hriatna avângin chhanchhuahin a awm ang. 10 Mi felte chunga thil a tluan laiin khua a hlim a, Mi suaksualte an thihin au dur durna a awm ṭhîn. 11 Mi felte malsâwmnain khua chawimawiin a awm a, Mi suaksualte ka erawh chuan a tichhia. 12 A ṭhenawm hmusittu chuan finna a nei lo va, Hriatna nei mi erawh chu a ngawi ṭhîn. 13 Mi kamtam tei ruai mi chuan thurûkte a tilang a, Mi rilru rinawm nei mi chuan thil a thup ṭhîn. 14 Inhruaina fing awm lohnaah chuan mite an tlu ṭhîn a, Remruat thiam tamnaah himna a awm. 15 Tu pawh ramdangmi tâna mawhphurtua insiam chuan lungngaihna a insiam ang a, Mawhphurtua insiam hawtu erawh chuan ngaihngam taka awmna a nei. 16 Hmeichhe ṭha chuan zahawmna a chang ang a, Pâwng lâk chîng mi chuan sum a chang ang. 17 Zahngai thei mi chuan ama nunna atâna ṭha a ti ṭhîn a, Mi nunrâwng erawh chuan ama tisa buaina a thlen ṭhîn. 18 Mi suaksual chuan bumna hlawh a dawng ṭhîn a, Felna tuhtu erawh chuan a tak tak hlawh a dawng ṭhîn. 19 Felnaa nghet taka ding mi chuan nunna a chang ang a, Thil sual ûmtu chuan ama thihna. 20 Mi rilru bawlhhlawhte chu LALPA tâna tenawm an ni a, An kawnga mi fel famkimte erawh chu a lâwm zâwng an ni. 21 Inthurual mah sela, mi suaksualte chu hrem lohvin an chhuak lo vang a, Mi fel thlahte erawh chu chhanchhuahin an awm ang. 22 Hmeichhe hmêlṭha, ngaihruat thiamna nei lo chu, Vawk hnâra rangkachak khâng vuah ang a ni. 23 Mi fel duhthusâm chu thil ṭha chauh a ni a, Mi suaksual hmachhuan erawh chu thinurna a ni. 24 Sem darh chu pun lehzualna a ni a, Mamawh tâwk aliam kawmpui chu tlâkranna a ni. 25 Mi thilphal nunna chu tihthauvin a awm a, Tui leih ṭhîntu chuan mahni pawh a inleih a ni. 26 Buh kawmpuitu chu miin ânchhia an lawh ang a, A zuartu lu chungah erawh chuan malsâwmna a awm ang. 27 Ṭhahnemngai taka ṭhatna zawngtu chuan duhsakna a zawng a ni a; Pawi khawih tûr zawngtu erawh chu, ama chungah a thleng ang. 28 A sum ring mi chu a vuai ang a, Mi fel erawh chu hnim angin a duah ang. 29 Mahni chhûngkua tibuaitu chuan thli a rochung ang a, Mi â chu mi thinlung fing chhiahhlawhah a awm ang. 30 Mi fel rah chu nunna thing a ni a, Mi fing chuan mi rilru a hneh ṭhîn. 31 Ngai teh, mi fel mah leiah hian thungrulh an nih chuan, Mi suaksual leh thil tisualtu chu eng ang taka nasa lehzual ni ang maw!
1 Thununna ngaina mi chuan hriatna a ngaina ṭhîn a, Zilhhauna haw mi erawh chu ramsa ang mai a ni. 2 Mi ṭha chuan LALPA duhsakna a hlawh ang a, Suahsualna rilru pu mi erawh chu thiam loh a chantîr ang. 3 Mihring chu suahsualnain tihngheh a ni lo vang a; Amaherawhchu, mi fel dinhmun chu a nghîng lo vang. 4 Hmeichhe khawsak ṭha chu a pasal tân lallukhum a ni a, Zahpuiawm tak thil ti erawh chu a ruh timawihtu a ni. 5 Mi fel ngaihtuahnate chu a fel a, Mi suaksualte remruat erawh chu bumna a ni. 6 Mi suaksual ṭawngkam chu thisen chhuah tûra chânna a ni a, Mi dik tak ka erawh chuan anmahni a chhanchhuak ang. 7 Mi suaksualte chu paih thlâkin an awm a, an bo ṭhîn a, Mi fel chhûng erawh chu an awm reng ang. 8 Mi a fin dân ang zêla fakin a awm ang a, Mi luhlul erawh chu hmuhsit a ni ang. 9 Mahni inngaihlu, chhang pawh nei si lo ai chuan, Tu ma ngaihsân loh, chhiahhlawh nei chu a ṭha zâwk. 10 Mi fel chuan a ran nunna a engto va; Nimahsela, mi suaksual zahngaihna nêm ber pawh hi a râwng a ni. 11 A lei lettu chuan chhang a ngah ang a; Nimahsela, mi lêlo tih dân zâwmtu chu finna nei lo mi a ni. 12 Mi suaksualte chuan mi ṭha lote lên an duh a, Mi felte bul erawh chuan rah a chhuah ṭhîn. 13 Mi sual chu ama hmuia chhuak ngeiin a âwk ṭhîn a, Mi felte erawh chu buaina ata an chhuak ang. 14 Miin a ṭawngkam chhuak rah chu a seng ang a, Ama kut thiltih ngei chu a hnênah hlan a ni ang. 15 Mi a kawng chu ama mitah chuan a dik a, Mi fing erawh chuan rorêl a ngaichâng ṭhîn. 16 Mi a buaina chu a lang nghâl a, Mi fing erawh chuan mualphona a thup ṭhîn. 17 Thu dik sawi chuan felna a entîr a, Hretu dik lo erawh chuan bumna. 18 Khandaih chhun anga na taka mi chhun thu sawi an awm a, Mi fing lei erawh chu damna a ni. 19 Thutak hmui chu kumkhuain tihngheh a ni ang a, Lei dawthei erawh chu rei lo tê atân chauh a ni. 20 Thil ṭha lo suangtuahtute thinlungah chuan bumna a awm a, Remna rorêltute pawh chuan lâwmna an nei. 21 Mi felte chungah chuan pawi khawihna a thleng lo vang a, Mi suaksualte erawh chu thil ṭha lovin an khat ang. 22 Hmui dawthei hi LALPA ten zâwng tak a ni a, Dik taka titute erawh chu a lâwm zâwng an ni. 23 Mi fing chuan finna a thup a, Mi â thinlung erawh chuan âtna a puang. 24 Mi taima kut chuan rorêlna a keng ang a, Mi thatchhia erawh chu hna rim tak thawk tûra tih a ni ang. 25 Lungkham neih hian mi a tihrehawm a, Thu ṭha erawh chuan mi a tilâwm ṭhîn. 26 Mi fel chu a ṭhenawm tân hruaitu a ni a, Mi suaksualte kawng erawh chuan bona a thlensak ṭhîn. 27 Mi thatchhia chuan ramvâka a kah rawh tûr a nei lo; Nimahsela, mihring sum hlu chu taihmâk a ni. 28 Felna kawngah chuan nunna a awm a, Chumi kawngah chuan thihna a awm lo.
1 Fapa fing chuan a pa thununna a pawisa ṭhîn a, Hmuhsit chîng mi erawh chuan zilhhauna a ngaithla duh ṭhîn lo. 2 Mi ṭha chuan a kâa thu chhuak rah a dawng a, Bum hmangte duh zâwng erawh chu tharum thawh a ni. 3 A kâ vêng ṭha chuan a nunna a vêng ṭha a ni a, A kâ zau taka âng erawh chuan boralna a chang ang. 4 Mi thatchhe rilru chuan thil a duh ṭhîn a, Eng mah a nei chuang lo va; Mi taima rilru erawh chu tihtlai a ni ang. 5 Mi fel chuan dâwt a hua a, Mi suaksual erawh chu a tenawm a, mualphona a thlen ṭhîn. 6 Felna chuan dik taka awmte chu a vêng ṭhîn a, Suahsualna erawh chuan mi sual a theh thlu ṭhîn. 7 Hausaa inngai eng mah nei lo an awm a, Retheia inngai hausa hle si an awm. 8 Mi hausa chuan intlanna a nei a, Mi rethei erawh chuan a nei ve lo. 9 Mi fel êng chu a êng ṭha hle a, Mi suaksual khawnvâr erawh chu tihmih a ni ang. 10 Chapona chuan inhauna mai a tichhuak a, Thunun ṭhat mi hnênah erawh chuan finna a awm. 11 Engmahlo mai maia sum deh chhuah chu tihrîral a ni ang a; Thawh rima khâwl erawh chu a pung ang. 12 Beiseina tihkhawtlai hian thinlung a tina a, Duhthusâm lo thleng erawh chu nunna thing a ni. 13 Thu chu ngainêp apiang chuan boralna an inthlen ang a, Thupêk ṭih apiang erawh chu lâwmman pêk a ni ang. 14 Mi fingte zirtîrna chu nunna tuikhur a ni, Thihna thang hawisanna tûrin. 15 Hriatna ṭha chuan duhsakna a dawntîr a, Mi vervêk kawng erawh chu a bumboh. 16 Remhria zawng zawngin finnain an thawk a, Mi â erawh chuan âtna a zâr darh ṭhîn. 17 Zualko suaksual chu thil sualah a tlu lût ṭhîn a, Palai rinawm chu damna a ni. 18 Thununna duh lotu chungah chuan pachhiatna leh mualphona a thleng ang a, Zilhhauna ngaisângtu erawh chu chawimawi a ni ang. 19 Duhthusâm puitlina a lo awm chu rilru tân a thlum a; Nimahsela, mi âte tân chuan sual kalsan hi thil tenawm a ni. 20 Mi fing pâwl la, i lo fing ang a, Mi â pâwl erawh chu hrehawm tuar phahna a ni. 21 Mi sual chu thil sualin a zui zêl ṭhîn a, Mi fel erawh chu thil ṭhaa thungrulh a ni ang. 22 Mi ṭha chuan a tute thlenga rochun tûr a hnutchhiah ṭhîn a, Mi sual sum erawh chu mi fel tân khâwl khâwm a ni. 23 Mi rethei lei lehah chuan chaw tam tak a awm a; Nimahsela, rorêl dik lo awmna chu tihchhiatin a awm ṭhîn. 24 Tiang hmang duh lo chuan a fa a hua a ni, A hmangaihtu erawh chuan a thunun chawt ṭhîn. 25 Mi fel chuan a rilru tihtlai nân a ei ṭhîn a, Mi suaksual pum erawh chuan a tlachham ang.
1 Hmeichhe fing zawng zawngin in an sa a, A â erawh chuan anmahni kut ngeiin an ṭhiat ṭhîn. 2 Dik taka awm mi chuan LALPA a ṭih a, Mi tihmawh erawh chuan a hmusit a ni. 3 Mi a kaah chuan chapona tiang a awm a, Mi fingte ka erawh chuan anmahni a hum ṭhîn. 4 Bâwngpa awm lohnaah chuan bâwng chaw dahna a fai ṭhîn a; Amaherawhchu, pun hle-na chu bâwngpa thahruiah a awm. 5 Hretu dik chu a daw lo vang a, Hretu dik lo erawh chuan dâwt a phuh chhuak ṭhîn. 6 Hmuhsit chîng mi chuan finna a zawng a, a hmu ṭhîn lo va; Hriat thiamna neitu tân erawh chuan finna hi awlsam tak a ni. 7 Mi a hnên ata chu kal chhuak rawh, Amahah chuan hriatna ka i hmu lo vang. 8 Remhre finna chu mahni awm dân hriat hi a ni a, Mi âte âtna erawh chu bumna a ni. 9 Mi âte chuan thiam loh channa hi an ngai lêlo va, Mi dik zîngah erawh chuan duhsakna ṭha a awm, 10 Thinlung lungngaihna chu amah chauhvin a hria a, A lâwmna pawh mi dangin an hriatpui lo. 11 Mi suaksual in chu tihchhiat a ni ang a, Mi dik puan in erawh chu a vul ang. 12 Mi ngaiha kawng dik ni âwm taka lang, A tâwp chu thihna kawng ni si a awm. 13 Nuihnaah pawh rilru lungngaihna a awm a, Hlim tâwpna chu rihna a ni. 14 Thinlunga hnungtawlh mi chu ama duh dânin a khat ang a; Mi ṭha chu amah leh amah a intilungawi ang, 15 Mi mâwl chuan thu tin a ring a, Mi remhria erawh chuan a kalna a en ṭha ṭhîn. 16 Mi fing chuan a hlauthâwng a, sual a kalsan ṭhîn a; Mi â erawh chu a intihuai a, mahni a inring ṭhîn. 17 Thinram mi chuan âtthlâk takin thil a ti ang a; Tin, thil sual suangtuah hmang mi chu huat a ni. 18 Mi mâwl chuan âtna an rochung a, Mi remhria erawh chu hriatna khumtîrin a awm. 19 Mi sual chu mi ṭha hmaah a kûn a, Mi suaksual chu mi fel kawngka bulah. 20 Mi rethei chu a ṭhenawmte ngei pawhin an hua a, Mi hausa erawh chuan ṭhian tam tak an nei. 21 Tu pawh ṭhenawmte hmusit chuan thil a tisual a ni; Mi rethei lainattu erawh chu a eng a thâwl e. 22 Thil ṭha lo suangtuahtute chuan an tisual a ni lâwm ni? Thil ṭha suangtuah miah erawh chuan zahngaihna leh thutak a awm ang. 23 Thawh rimna zawng zawngah hian hlâwkna a awm a, Kaa sawi mai mai erawh chuan tlâkranna mai a thlen a ni. 24 Mi fing lallukhum chu a sum a ni a, Mi âte âtna chu âtna ngawt a ni. 25 Hretu dik chuan mite a chhanchhuak a, Dâwt chhâk chhuak mi chuan bumna a tichhuak ṭhîn. 26 LALPA ṭihnaah chuan rinna chak tak a awm a, A fate chuan inhumhimna hmun an nei ang. 27 LALPA ṭihna chu nunna tuikhur a ni, Thihna thang hawisanna tûrin. 28 Mipui tamnaah chuan lal ropuina a awm a, Mi tlêmnaah erawh chuan lal fapa boralna a awm. 29 Thinur har mi chu finna nasa tak nei mi a ni a, Mi ti thawt thawt erawh chuan âtna a chawimawi. 30 Rilru dam chu tisa nunna a ni a, Itsîkna erawh chu ruh mawihna a ni. 31 Mi rethei hnehchhiahtu chu a siamtu hnehchhiah a ni a, Tlachhamte khawngaihtu chuan a chawimawi a ni. 32 Mi suaksual chu a thil tihsualah chuan theh luh a ni a, Mi fel erawh chuan a thihnaah nghahfâk a nei. 33 Ngaihthiamna nei mi thinlungah chuan finna a chêng ṭhîn a, Mi a chhûng lama awm erawh chu a lang sa reng. 34 Felnain hnam a chawimawi a, Sualna erawh chu hnam tin tân hmingchhiatna a ni. 35 Lal duhsakna chu fing taka titu chhiahhlawh chungah a awm a, A thinurna erawh chu mualphona thlentu chungah a awm ang.
1 Chhânna nêmin thinur a tikiang ṭhîn a, Ṭawng huatthlala erawh chuan thinur a chawk tho ṭhîn. 2 Mi fing lei chuan finna thu dik a chhak chhuak ṭhîn a, Mi a ka erawh chuan thu âtthlâk a chhâk chhuak ṭhîn. 3 LALPA mit chu hmun tinah a awm a, Thil ṭha leh ṭha lo a enthla reng ṭhîn. 4 Lei dik tak chu nunna thing a ni a, Luhlulna awmna erawh chu thinlung lungchhiatna a ni. 5 Mi â chuan a pa thununna a ngainêp ṭhîn a, Zilhhauna ngaisâng chuan hmanghre takin a ti ṭhîn. 6 Mi fel inah chuan sum tam tak a awm a, Mi suaksual hlâwkna erawh chu buaina a ni. 7 Mi fing hmui chuan hriatna a tidarh a, Mi a thinlung erawh chuan chutiang chu a ti lo. 8 Mi suaksual inthawina chu LALPA tâna tenawm a ni a, Mi ṭha ṭawngṭaina erawh chu a lâwm zâwng a ni. 9 Mi suaksual kawng chu LALPA tâna tenawm a ni a, Felna kawng zawhtu erawh chu a hmangaih ṭhîn. 10 Kawng pênsantu thununna chu a na a, Zilhhauna hawtu chu a boral ang. 11 Seol leh Abaddon chu LALPAN a hmu tlang a, Mihring thinlung phei chu a va hmu chiang dâwn êm! 12 Hmuhsit chîng mi chuan zilhhauva awm a ngaina lo va, Mi fing hnênah chuan a kal duh lo vang. 13 Thinlung hlimin hmêl hlim a siam a, Thinlung lungngaihna erawh chuan rilru a tilungchhe ṭhîn. 14 Hriat thiamna thinlung neitu chuan hriatna a zawng a, Mi a ka erawh chu dâwtin a inhrai ṭhîn. 15 Hrehawm tuartu tân chuan ni zawng zawng hi a ṭha lo vek a, Thinlung hlim mi erawh chuan ruai a ṭheh reng mai a ni. 16 LALPA hlauhna nêna tlêm tê neih chu, Tam tak neiha buaina tawh ai chuan a ṭha zâwk. 17 Hmangaihna awmnaa anhnah chawa rin chu, Huatna awmnaa bâwngpa châwm thau ei aiin a ṭha zâwk. 18 Mi thinchhia chuan inhauna a chawk tho va, Mi thluak nêm erawh chuan inhauna a tireh. 19 Mi thatchhe kawng chu hlîng pal ang a ni a, Mi tluang kawng chu lamliana siam a ni. 20 Fapa fing chuan pa hlim a siam a, Mi â erawh chuan a nu a ngainêp ṭhîn. 21 Finna nei lote chuan âtna hi an hlimna a ni a. Thil hre thiam mi erawh chuan a kawng a tingîl ṭhîn. 22 Remruat lâwk lova thiltih chu a kal sual ṭhîn a, Remhria an tam erawh chuan a hlawhtling ṭhîn. 23 A hun taka chhânna dik hriat hi A va lâwmawm êm! 24 Mi fing tân chuan nunna kawng hi a chung lamah a kal a, Hnuai lama Seol chu a kalsan theih nân. 25 LALPAN mi chapo in chu a kar phawng ang a, Hmeithai hmun erawh chu a tinghet ang. 26 Remruatna ṭha lo chu LALPA tân thil tenawm a ni a, Mi thianghlim thu erawh chu a benglût a ni. 27 Mi duhâm chuan ama chhûngkua a tibuai ṭhîn a, Tham hawtu erawh chu a hmuingîl ang. 28 Mi fel thinlung chuan ngun takin a chhâng a, Mi suaksual ka erawh chuan thil ṭha lo a chhâk chhuak ṭhîn. 29 LALPA chu mi suaksual lakah chuan a hla a, Mi fel ṭawngṭai erawh chu a ngaithla ṭhîn. 30 Hlim hmêlin mi a tilâwm a, Chanchin lâwmawmin mi a tiharh. 31 Nunna zilhhauna pawm ṭhîn chu Mi fing zîngah a tel ang. 32 Thununna duh lo chuan a thlarau a ngainêp a, Zilhhauna pawm erawh chuan hriat thiamna a chang ang. 33 LALPA ṭihna chu finna zirtîrtu a ni a, Inngaihtlâwmna chu chawimawia awmna a ni.
1 Rilru lo ruahman lâwkna chu mihring chan a ni a, Lei chhânna erawh chu LALPA aṭangin a ni. 2 Mi ama ngaihin a kawng zawng zawng a thianghlim a; Nimahsela, LALPAN rilrute a bûk ṭhîn. 3 I hnate chu LALPA kawltîr rawh; Tichuan, i thil ruahmante chu tihnghehin a awm ang. 4 LALPAN thil zawng zawng hi chhan nei ṭheuhvin a siam a, A ni tak e, mi suaksualte pawh hi ni ṭha lo atân. 5 Thinlunga chapo apiangte chu LALPA tâna tenawm an ni; Inthurual mah se, hrem lohvin chhuah an ni lo vang. 6 Zahngaihna leh thutakin khawlohna chu tlen fai a ni a, LALPA ṭihnain miin sual a kalsan ṭhîn. 7 Mi, a awm dânin LALPA a tihlâwm chuan, A hmêlma nên lam inremin a awmtîr ṭhîn. 8 Fel lo taka deh chhuah tam tak ai chuan, Fel taka deh chhuah tlêm tê a ṭha zâwk. 9 Mihring rilruin a kawng a ruahman a, A ke pên erawh chu LALPAN a hruai ṭhîn. 10 Lal kaah chuan Pathian thu tihtlûk a awm a; A kâ chuan a rêl sual lo vang. 11 Bûkna leh tehna dik hi LALPA ta a ni a, Ip rih zâwngte chu a ngaihtuah ṭhîn. 12 Suahsualna thil tih hi lalte tân tenawm a ni, Lalṭhutthlêng chu felnaa tihngheh a ni si a. 13 Kâ fel chu lal lâwmna a ni a, Thu dik sawi chu a ngaina ṭhîn. 14 Lal thinurna chu thihna zualko ang a ni a, Mi fing erawh chuan a nem dai ang. 15 Lal hmêl êngah chuan nunna a awm a, A duhsakna chu ruahtui tla hnuhnûng chhûm ang a ni. 16 Rangkachak ai chuan finna neih hi a va ṭha nasa zâwk êm! A ni, tangkarua ai chuan hriat thiamna chu thlan zâwk tûr a ni. 17 Mi tluangte lamlian chu sual kalsan a ni; A kawng vêng ṭha chuan a nunna a humhim a ni. 18 Chapona chu boralna hmaah a kal a, Rilru intivei chu tlûkna hmaah. 19 Mi chapote nêna râllâk thil insem ai chuan, Mi retheite nêna rilru thuhnuairawlh nih a ṭha zâwk. 20 Thu chîk taka dâwn mi chuan thil ṭha a dawng ang a, LALPA ring apiang chu an nihlawh ang. 21 Rilrua fing chu mi remhria tih an ni ang a, Ṭawngkam thlumna chuan thiamna a tipung. 22 Hriat thiamna hi a neitu tân chuan nunna tuikhur a ni a, Mi âte tân erawh chuan thununna chu an âtna a ni. 23 Mi fing thinlung chuan a ka a zirtîr ṭhîn a, A hmuiah thiamna a belhchhah ṭhîn. 24 Thu pai nuam chu khawithlâr ang a ni a, Nunna tân a thlum a, ruh tân hrisêlna a ni. 25 Mi ngaiha kawng dik ni âwm taka lang, A tâwp chu thihna kawng ni si a awm. 26 Hnathawk mi chu ei tûr avângin a rim a, A rilṭâm reh nân a thawk rim ṭhîn. 27 Mi tlâktlai lo chuan pawi khawih tûr a ngaihtuah chhuak a, A kaah mei sa tak a awm. 28 Ṭawng chaltlai mi chuan inhauna a theh darh a, Sêsêa thu sawi hmangin ṭhian bulte a tiṭhen ṭhîn. 29 Mi nunrâwngin ṭhenawmte a hruai sual ṭhîn a, Kawng ṭha lovah a hruai ṭhîn. 30 A mit maimitchhîng chuan thil ṭha lo suangtuah nân a ti a ni a, A heh pettu chuan thil ṭha lo a thlen ṭhîn. 31 Lu ṭuak chu ropuina lallukhum a ni a, Felna kawngah hmuh a ni ang. 32 Mi thinnel chu mi chak aiin a ṭha zâwk a, A rilru thunun hneh chu khaw latu aiin. 33 Mal chungah ṭhum an vâwr a, Thil lo chhuak erawh chu LALPA tih a ni.
1 Insual bur bura ruaiṭhehna in ai chuan, Inrem taka chaw ṭhing bâr khat eina a ṭha zâwk. 2 Chhiahhlawh fing taka che chuan fapa, mualphona thlentu chungah chuan ro a rêl ang a, Unau ro zîngah chanvo a nei ang. 3 Tihthianghlimna bêl chu tangkaraw tân a ni a, rawh tuina chu rangkachak tân a ni a, Thinlung erawh chu LALPAN a fiah ṭhîn. 4 Thil ṭha lo titu chuan mi suaksual kamchâng a bengkhawn ṭhîn a, Mi dawthei chuan pawi khawih hmang lei lamah beng a chhi ṭhîn. 5 Mi rethei hmusittu chuan a Siamtu a ngainêp a ni a, Mi vânduaina diriamtu chu hrem lohvin a awm lo vang. 6 Tu leh fate hi upate lallukhum an ni a, Fanaute ropuina chu an pate hi an ni. 7 Thusawi ropui leh mi â a inmawi lo va, Hmui dawthei leh lal fa a inmawi lo lehzual. 8 A dawngtu mitah chuan thilpêk chu lunghlu ang a ni a, A hawina lam apiangah a hlawhtling ṭhîn. 9 Bawhchhiatna thuptu chuan inhmangaihna a zawng a, Thil sawi sawi hmang chuan ṭhian bulte a tiṭhen ṭhîn. 10 Mi â vawi za vuak aiin Mi fingah chuan vawi khat zilhhauna pawh a lût thûk zâwk. 11 Mi ṭha lo chuan helna ngawt a zawng ṭhîn a; Chuvângin, a chungah zualko nun chhia tirh a ni ang. 12 Mi â ât lai tawh ai chuan Savawm, a no lâksak daih hmachhawn a duhawm zâwk. 13 Ṭhatna suala thungrûltu chu Thil ṭha lovin a in a chhuahsan lo vang. 14 Inhnial hi tuikhuah hnâm tîr ang a ni a; Chuvângin, insualna a awm ṭan hmain inhnial bâng rawh. 15 Mi suaksual thiamtu leh mi fel thiam lotu chu, LALPA tân angkhat rengin an tenawm ve ve. 16 Hriat thiamna nei si lo mi â kutah chuan, Engah nge finna leina tûr man a awm ni? 17 Ṭhian chuan eng lai pawhin a hmangaih reng a, Mangan ni atân unauva piang a ni. 18 Hriatna nei lo mi chuan a kut a bêng a, A ṭhenawmte hmaah mawhphurtuah a insiam ṭhîn. 19 Insual ngaina mi chuan bawhchhiatna a ngaina ṭhîn a, A in hungna kawngkhâr tisâng chuan boralna a zawng ṭhîn. 20 Rilru luhlul nei mi chuan thil ṭha a hmu ṭhîn lo va, Tin, lei bengtlalo neitu chu pawi khawihnaah a lût ṭhîn. 21 Mi â hringtu chuan ama lungngaihna a thlen ṭhîn a, Mi â pa chuan lâwmna a nei lo. 22 Thinlung hlim hi damdawi ṭha tak a ni a, Thinlung lungchhia erawh chuan ruh a tiro ṭhîn. 23 Mi suaksual chuan rorêlna kawngte tikikawi tûrin, Mi kut ata thamna a la ṭhîn. 24 Finna chu hriat thiamna neitu hmaah a awm ṭhîn a, Mi â mit erawh chu kâwlkilah a awm ṭhîn. 25 Fapa â chu a pa tilungngaitu a ni a, A hringtunu tân a khâ a ni. 26 Mi fel hrem a ṭha lo va, Mi ṭha an ṭhatna avânga vuak a ṭha hek lo. 27 A thusawia insûm ṭhîn chuan finna a nei a, Rilru dam mi chuan hriat thiamna a nei. 28 Mi â pawh a ngawih reng chuan mi finga chhiar a ni a, A hmui a chîp chuan mi remhriaa ngaih a ni.
1 Inkulh hrang mi chuan mahni duh zâwng a zawng ṭhîn a, Finna dik zawng zawng a tai ṭhîn. 2 Mi â chuan hriatnaah lâwmna a nei lo, Ama rilruin a tihlan chauh lo chu. 3 Suahsualna a lo awmin hmuhsitna pawh a lo awm ṭhîn, Mualphona a lo awmin zilhhauna. 4 Mi â kâa thu chu tui thûk tak ang, Finna lui, lui luang ang a ni. 5 Mi suaksual duhsak a ṭha lo va, Rorêlnaa mi fel hnâwl a ṭha hek lo. 6 Mi â hmui chuan inhauna a thlen a, A kâ chuan vuakna a ko. 7 Mi â kâ chu a boralna a ni a, A hmui chu a nunna thang a ni. 8 Sêsêa thu sawi hmang mi thu chu chaw tui tak ang a ni a, Pum chhûngril berah a lût ṭhîn. 9 A hnathawha mi dâwngdah pawh Tiboraltua unaupa a ni. 10 LALPA hming chu kulhpui a ni a, Mi fel chu a tlân lût ṭhîn a, a him ṭhîn. 11 Mi hausa chuan a sum chu a kulhpui a ni a, A suangtuah dânah chuan kulh sâng tak a ni. 12 Mihring rilru chapona chu boralna hmaah a kal a, Inngaihtlâwmna chu chawimawina hmaah. 13 Ngaihthlâk ahmaa chhân chu A tân âtthlâk nihna leh mualphona a ni. 14 Mi rilru nei chuan a chak lohna chu a tuar zo vang a; Mahse, rilru hliam chu tun nge tuar thei ang? 15 Remhre thinlung chuan hriatna a dawng ṭhîn a, Mi fing beng chuan hriatna a zawng ṭhîn. 16 Mi a thilpêkin kawng a tihkuaksak a, Mi ropuite hmaah a hruai lût ṭhîn. 17 A thiamna thu sawi hmasatu chu felin a lang ṭhîn a; Mahse, a ṭhenawmte an lo kal a, an rawn tilang ṭhîn. 18 Ṭhumvâwrin inhauna a tibâng a, Mi chakte a tiṭhen ṭhîn. 19 I unau pui la, kulhpui angin a hum ang che; In inhau erawh chuan, a inkhâr hnan ang che. 20 Miin a pumpui chu a kâ rahin a tikhat ang a, A kâa thil hâwngin a titlai ang. 21 Lei thiltihtheihnaah chuan thihna leh nunna a awm a, A ngainatute chuan chumia rah chu an ei ang. 22 Nupui hmu chuan thil ṭha a hmu a ni, LALPA duhsakna a chang ṭhîn. 23 Mi rethei chuan a thlêmin an thlêm a, Mi hausa erawh chu rura takin an ṭawng ṭhîn. 24 Ṭhian tam tak siam chuan mahni intihchhiatna a siam a ni a; Amaherawhchu, unau aia nghet zâwk ṭhian an awm ṭhîn.
1 Mi, a hmuia tihmawh, â bawk si ai chuan Mi rethei, rilru ṭha tak pua awm chu a ṭha zâwk. 2 Hriatna lova duhna ngawt pawh hi a ṭha lo va, Ke chhep rang ringawt chu a kal sual ṭhîn. 3 Mi a âtnain a kawng a tihchhiatsak ṭhîn a, A rilru LALPA chungah a vui ṭhîn. 4 Sumin ṭhian tam tak a neih belhtîr a, Mi rethei erawh chu a ṭhianten an thlauhthla ang. 5 Hretu der chu hrem lohvin a awm lo vang a, Dâwt sawi chu a chhuak lo vang. 6 Mi tam takin mi thilphal duhsakna an ngên ang a; Thil pe ṭhîntu lakah chuan mi tin mai hi ṭhian an ni. 7 Mi rethei chu a unaute zawng zawng chuan an vai huat ṭhîn a, Ṭhian maite chu a lakah an va hla lehzual dâwn êm! Thuin a ûm a; nimahsela, an kal daih tawh. 8 Finna dawngtu chuan ama nunna a hmangaih ṭhîn a, Hriatna vawngtu chuan thil ṭha a hmu ang. 9 Hretu der chu hrem lohvin a awm lo vang a, Dâwt sawi chu a boral ang. 10 Nunkhaw nawm chu mi â nên a inhmeh lo va, Chhiahhlawhin lal fate chunga rorêl chu a inhmeh lo lehzual. 11 A ngaihruat thiamnain mi a thin a tihnelsak ṭhîn a, Bawhchhiatna hai der chu a ropuina a ni. 12 Lal thinrim chu sakeibaknei rûm ang a ni a, A duhsakna erawh chu hlobet chunga dai ang a ni. 13 Fapa â chu a pa vânduaina a ni a, Nupui ân ṭhinna chu eng lai pawha ruah far reng ang a ni. 14 In leh sum leh pai chu pate laka ro luah a ni a, Nupui remhria erawh chu LALPA laka mi a ni. 15 Dâwngdahna chuan tui taka mutnaah a hruai lût a, Mi thatchhia chuan rilṭâm a tuar ang. 16 Thupêk vawng ṭha chuan a nunna a vawng ṭha a ni a, A awm dâna fîmkhur lo erawh chu a thi ang. 17 Mi rethei khawngaih chuan LALPA a pûktîr a ni a, A thil tihṭhat chu a rûl ang. 18 Beiseiawm a la nih laiin i fapa chu thunun la, Boral mai tûrah ngai suh. 19 Thinur ti nasa mi chuan hrem a tuar ang, I chhanchhuah pawhin, chhanchhuah leh ṭhin a ngai ang. 20 A tâwp a tâwpa i lo fin theih nân zilhna pawm la, Thununna pawisa rawh. 21 Mihring thinlungah suangtuahna tam tak a awm a; LALPA remruat erawh chu a pângngai reng ang. 22 Mi a duhthusâm chu a ngilneih dân tehna a ni a, Mi dawthei ai chuan mi rethei a duhawm zâwk. 23 LALPA ṭihna chuan nunna a thlen a, A nei apiang chu lungawi takin an awm ang a, Thil ṭha lovin a tlâkbuak lo vang. 24 Mi thatchhia chuan a kut thlêngah a hnim a, A kâ han thlen leh takngial pawh a peih lo. 25 Hmuhsit chîng mi chu vua la; Tichuan, mi mâwlin remhriat a zir ang a; Ngaihthiamna nei chu zilh la, a hre thiam ang. 26 Pate tiretheia, nute hnawt chhuak chu, Fapa, mualphona thlena, hmingchhiatna thlentu a ni. 27 Ka fapa, thil tidik lo tûra Finna zirtîrna thu ngaihthlâk chu bâng rawh. 28 Thuhretu tlâktlai lo chuan rorêlna a hmusit a ni a, Mi suaksual kâ chuan khawlohna a lem. 29 Rorêlna chu hmuhsit chîngte tâna buatsaih a ni a, Vuakna chu mi âte hnungzâng atân.
1 Uain hi nuihzatbûra mi siamtu a ni a, Zupui hi insual bûng bûngna a ni; Chumi buma awmte chu an fing lo a ni. 2 Lal vauna chu sakeibaknei rûm ang a ni a, Tu pawh a thin tiur chu mahni nunna chunga thil tisual an ni ṭhîn. 3 Intihbuaina ata lo inthiarfihlîm hi thil duhawm a ni a, Mi â apiangte chu an insual ṭhîn. 4 Mi dâwngdah chuan thlasik avângin lei a let peih lo va; Chu vâng chuan buh seng laiin kut a dawh ang a, Eng mah a nei lo vang. 5 Remruatna chu mihring thinlungah tui thûk tak ang a ni a; Nimahsela, hriat thiamna nei chuan a phawrh chhuak ang. 6 Rinawm tak niin an insawi ṭheuh va, Rinawm tak tak tu nge hmu thei ang? 7 Mi fel, ama remruat thiama awm mi fate chu an nihlawh e. 8 Rorêlnaa lal ṭhu chuan, A mitin thil ṭha lo zawng zawng a tibo ṭhîn. 9 “Ka thinlung ka tithianghlim a, Ka sual lakah ka thianghlim,” tu nge ti thei? 10 Bûkna dang dang te, tehna dang dang te hi, LALPA mit hmuhah angkhat rengin thil tenawm a ni ve ve. 11 Naupang takngial pawh a thiltihin a intilang ṭhîn, A thiltih chu a thianghlim leh a dik emawin. 12 Hriatna beng leh hmuhna mit hi LALPA siam ve ve a ni. 13 Mut thlahlel suh, i lo pachhe dah ang e; I mit meng la; tichuan, chhang kham khawp i nei dâwn nia. 14 “Eng mah a nih loh hi, eng mah a nih loh hi,” thil leitu chuan a ti ṭhîn a, A kal hnu chuan a chhuang leh viau si ṭhîn. 15 Rangkachak te a awm a, lunghlu sen te pawh a tam a; Hriatna hmui erawh chu lungmawi hlu tak a ni. 16 Hnam dang tâna mawhphurtua inpe silhfên chu la la, Hnam dang tâna inpe chu hrêngah hmang rawh. 17 Bumna chhang chu miin tui a ti a; Mahse, a hnuah a ka chu lungtêin a khat ang. 18 Mi râwnin i thiltum chu bûk la, Fel taka rêlin hmêlma bei rawh. 19 Mi kamtam tei vêl ruai chuan thurûkte a tilang ṭhîn a; Chuvângin, a kâ zau taka âng chu pâwl suh. 20 A nu emaw, a pa emaw ânchhe lawhtu chu, Thimtham lai berah a khâwnvâr tihmihsak a ni ang. 21 Sum hi a tîrah deh chhuah thuai theih mah sela, A tâwpah malsâwm a ni kher lo vang. 22 “Sual chu ka thungrûl teh mai ang,” ti suh la, LALPA ngaichâng rih la, ani chuan a chhanhim ang che. 23 Bûkna dang dang hi LALPA mit hmuhah thil tenawm a ni a, Khîn dik lo hi a ṭha lo a ni. 24 Mihring kawngte chu LALPA ruat a ni a, Engtin nge mihringin a kawng an hriat theih ang? 25 Pathian tân thil pe tûrin intiam thut suh, I inchhîr leh dah ang e. 26 Lal fing chuan mi suaksualte a zâp kiang a, An chungah sisêp a ruai ṭhîn. 27 Mihring rilru chu LALPA khâwnvâr a ni a, Pumpui chhûngril lam zawng zawng pawh a ên chhuak ṭhîn. 28 Zangaihna leh thutakin lal a vawng ṭha a, A ṭhutthlêng chu zahngaihnaa tundinin a awm. 29 Tlangvâlte ropuina chu an chakna a ni a, Putarte mawina chu an lu ṭuak a ni. 30 Pem khawpa vuakna chuan thil ṭha lo a tlêng fai a, Vuakna chuan pumpui chhûngril lamte pawh a fan.
1 Lal thinlung chu LALPA kutah a awm a, tui luanna kawng angin, A duh duhnaah a tikawi ṭhîn. 2 Mi tin awm dân hi mahni mitah chuan a dik tih a ni a; Nimahsela, LALPAN thinlung a bûk ṭhîn. 3 Inthawina aiin dik tak leh fel taka rorêl chu LALPA tân a pawmawm zâwk. 4 Mi indah chung leh rilru chapo te, Mi suaksual khâwnvâr te hi sual a ni. 5 Mi taima ngaihtuahna chuan neihnunna lam chauh a pan a, Mi thatchhia erawh chuan tlâkchhamna lam chauh a pan a ni. 6 Lei dawthei hmanga sum deh chhuah chu, Chhûm thli chhêm lên chhêm lên ang a ni; A zawngtu chu thihna zawng a ni. 7 Mi suaksualte nunrâwnna chuan anmahni a hnâwl bo vang, Rorêlna fel an duh loh avângin. 8 Thiam lohna phurtu kawng chu a kawi êm êm mai a, Mi thianghlim erawh chu a thiltih a ngîl a ni. 9 Hmeichhe inhau hmang tak nêna in zau taka awm ai chuan, In chung chhîp kila awm a ṭha zâwk. 10 Mi suaksual rilru chuan thil ṭha lo a duh a, A ṭhenawmten a mitah duhsakna an hmu lo. 11 Hmuhsit chîng mite hrema an awmin mi mâwlte chuan an fin phah a; Tin, mi fing chu zirtîra a awmin hriatna a dawng ṭhîn. 12 Mi fel chuan mi suaksual chhûngkuate a ngaihtuah ṭhîn a, Mi suaksualte an chhiatna tûra thehthang bo an nihzia te. 13 Mi rethei au thâwma beng chhu ngawng chu, Ani pawh a au vang a; nimahsela, ngaihthlâksak a ni bîk lo vang. 14 A rûka thilpêkin thinur a tireh a, Âng chunga thilpêkin thinrim nasa tak. 15 Rorêl fel hi mi fel lâwmna a ni a, Khawlohna titu tân erawh chuan boralna a ni. 16 Hriatna kawng ata kal bo chu Mitthi awm khâwm zîngah a châwl ang. 17 Nawmsakna thlahlel chu mi rethei a ni ang a, Uain leh hriak ngaina mi chu a hausa lo vang. 18 Mi suaksual chu mi fel tlanna an ni ang a, Mi bum hmang chu mi dik tak tlanna. 19 Hmeichhe ân hmang leh phunchiar nêna awm ai chuan Thlalêr rama awm a ṭha zâwk. 20 Mi fing awmnaah chuan ro leh hriak hlu tak a awm a, Mi â erawh chuan an dawlh mai ṭhîn. 21 Felna leh zahngaihna zuitute chuan Nunna te, felna te, chawimawina te an hmu ang. 22 Mi fing chu mi chak khawpuiah a lâwn a, Chumia an rin pui ber chakna chu a lâk thlâksak ṭhîn. 23 Tu pawh a kâ leh a lei vêng ṭha chuan Manganna lakah a nunna a vêng ṭha a ni. 24 Mi chapo leh mi intivei chu a hming pawh Hmusittua a ni; Inngaih ropui chaponain thil a ti ṭhîn. 25 Mi dâwngdah duhthusâm chuan amah a tihlum ṭhîn, A kutin hnathawh a duh loh avângin. 26 Nilênga duhâm taka awh nei an awm a; Mi fel erawh chuan a pe a, eng mah a sûm lo. 27 Mi suaksual inthawina chu thil tenawm a ni a, Rilru sual nêna a rawn lâk chu a va tenawm lehzual dâwn êm! 28 Hretu der chu a boral ang a; Nimahsela, hretu dik chuan tu ma dodâl lohvin thu a sawi ang. 29 Mi suaksualin a hmêl a tiruh a, Mi fel erawh chuan a kawng a rêl fel ṭhîn. 30 LALPA kalh zâwnga hlawhtling finna te, hriatna te, Remruatna te a awm lo. 31 Sakawr chu indo ni atân buatsaih a ni a, Hnehna erawh chu LALPA ta a ni.
Thufing sawmthum lâwr khâwm
1 Sum tam tak aiin hmingṭhat hi thlan zâwk tûr a ni a, Tangka leh rangkachak aiin duhsakna a ngainatawm. 2 Mi hausa leh mi rethei an awm za a, An vaia siamtu chu LALPA a ni. 3 Mi hmanghria chuan thil ṭha lo chu a hmuhin a biru ṭhîn a; Mi mâwl erawh chuan a tâwn mai ṭhîn a, a tuar phah ṭhîn. 4 Inngaihtlâwmna leh LALPA ṭih man chu Sum te, chawimawina te, nunna te a ni. 5 Mi bengtla lo kawngah chuan hlîng te, thang te a awm a, A nunna vawng ṭha chuan a hlat daih ang. 6 Naupang chu a kalna âwm kawngah chuan zirtîr ula, A upat hun pawhin a thlah lo vang. 7 Mi hausain mi rethei ro an rêlsak a; Tin, pûktu chu a pûktîrtu chhiahhlawh a ni. 8 Khawlohna tuhtu chuan vânduaina a ât ang a, A thinurna talhtum chu a hlawhchham ang. 9 Mi thilphal chu malsâwmin a awm ang, A chhang mi rethei a pêk ṭhin avângin. 10 Hmuhsit chîng mi chu paih chhuak ula, inhnialna chu a kiang ang, A ni, insualna te, inrunluihna te a reh ang. 11 Thinlung thianghlimna ngaina chuan A ṭawngkam chhuak mawi avângin lal chu a ṭhian a ni ang. 12 LALPA mit chuan hriatna nei mi chu a vawng ṭha ṭhîn a, Mi vervêk thu erawh chu a paihthlâksak ṭhîn. 13 Mi thatchhia chuan, “Pâwnah sakeibaknei a awm a, Kawtthlêrah ka tualthi ang,” a ti. 14 Hmeichhe sual kâ chu khuarkhurum thûk tak a ni a, LALPA huat zâwngte chu chutah chuan an tla ang. 15 Naupang thinlungah chuan âtna a bet tlat a; Mahse, thununna tiangin hla takah a hnawt kiang ang. 16 A hlâwkna tûra mi rethei hnehchhiah leh, Mi hausa tlawntu chuan tlâkranna mai a thlen ang. 17 I beng chhi la, mi fing thu ngaithla rawh; Tin, i thinlung chu ka finna dawn nân hmang rawh. 18 I thinlung chhûnga i vawna, I kâa i tihngheh bawk chuan thil duhawm tak a ni. 19 I rinna chu LALPA chunga a awm theih nân, Vawiinah hian i hnên ngeiah ka hriattîr che a ni. 20-21 Thutak nghehzia hriattîr che leh, A rawn petu che hnêna thutak chu i lêtpui theih nân, Remruat dân leh hriatna ṭha tak ka ziaksak che a ni lâwm ni? 22 Mi rethei chu rawk suh, a rethei si a, Kulh kawngkaah mi lungngaite hnehchhiah hek suh; 23 LALPAN an thu a sawipui dâwn si a, Anmahni rawktute nunna chu a rawk dâwn a ni. 24 Thinrim hmang mi chu ṭhian suh la, Mi thinchhia chu kawp suh; 25 A tih dân i zir ang a, I nunna atân thang i tawng dah ang e. 26 Intiamkamte zîngah tel suh la, Leiba atân intiamkamtute zîngah pawh. 27 Eng mah pêk tûr i neih si loh chuan Engah nge i khum chu a lâksak loh vang che? 28 In pi leh puten hmakhawsânga Ramri an lo kham chu sawn suh u. 29 Mi a hnathawha taima i hmu ṭhîn em? Lal hmaah te a awm ang a, Mi narân hmaah chuan a awm lo vang.
1 Rorêltute nêna chaw eia in ṭhut dunin I hmaa mi chu ngun takin en rawh. 2 I ril a ṭâm hle chuan Insûm deuh vang che. 3 Bumna chaw mai a nih hre reng la, A tuina ngawt chu ît suh. 4 Intihausa tûrin intihah suh la, Nangma finna rin bâng rawh. 5 Thil awm lo chungah i mit i nghat dâwn em ni? Sum chuan thla a insiam ngei ngei a, Mupui vân lama thlâwk ṭhîn ang hian. 6 Mi fîr chhang chu ei suh la, A thil tuihnaite ît hek suh. 7 A suangtuah ang chiah zêlin a ni a awm ni, “Ei rawh, in rawh,” a ti ang chia; Mahse, a rilru chuan ngaimawhna che a nei lo. 8 I chaw bâr chu i luak chhuak ang a, I thu thlum tak chu i chân ang. 9 Mi â beng hriatah chuan thu sawi suh, I thufingte chu a ngainêp dâwn si a. 10 Hmakhawsânga ramri lo kham chu sawn suh la, Pa nei lote lovah inrawlh suh. 11 Anmahni tlantu chu a chak a, I chungah an thu a sawipui dawn si a. 12 Zirtîrna lamah i rilru nghat la, I beng chu hriatna thu lamah. 13 Naupang thunun tîm suh, Tiangin vaw mah la, a thi dâwn si lo va. 14 Tiangin i vua ang a; Tichuan, Seol ata a nunna i chhanchhuak ang. 15 Ka fapa, i rilru a fin chuan Ka thinlung a lawm tak tak ang. 16 A ni, i kain thil dik a sawiin Ka rilru a hlim ang. 17 I thinlungin mi sual awt suh se; Nilêngin LALPA ṭihin awm zâwk rawh. 18 Lâwmman a awm ngei dâwn si a, I beisei chu tihbovin a awm lo vang. 19 Ka fapa, ngaithla la, fing la, Kawngah chuan i thinlung hruai rawh. 20 Uain heh mite zîngah leh Sa heh mite zîngah tel suh; 21 Zu rui mite leh sa heh mite chu an lo rethei dâwn si a, Nguinain puan chhia a sintîr ang. 22 I pa, a hringtu che thu chu pawm la, I nu chu a lo tarin hmusit suh. 23 Thu dik chu lei la, hralh leh tawh suh; A ni, finna te, zirtîrna te, hriat thiamna te nên. 24 Mi fel pa chu nasa takin a hlim ang a, Fa fing hringtu chuan a chungah lâwmna a nei ang. 25 I nu leh pa chu hlim takin awm sela, A hringtu che chu hlim takin awm rawh se. 26 Ka fapa, i thinlung mi pe la, Ka awm dânte hian i mit tlung rawh se. 27 Nawhchizuar chu khuarkhurum thûk tak a ni a, Hmeichhe sual chu khuarkhurum zîm a ni; 28 A ni, rûkru angin mi an châng a, Mihring zîngah vervêkna an tipung ṭhîn. 29 Tute nge chungpik ṭhîna, tute nge lungngai ṭhîna, tute nge inhau ṭhîn? Tute nge thubuai nei ṭhîna, tute nge a vâng awm lova hliam tuar ṭhîna, Tute nge mit sen rêm rûm ṭhîn le? 30 Zu hmuna awm reng ṭhînte, Zu chawhpawlh in ṭhînte an ni. 31 Uain a sen kâk laiin en suh, Nova a zia a lan lai te, A luan thlâk zaih zaih lai tein; 32 A tâwpah chuan rûl angin a chu a, Rûl tûr ṭha mi angin mi a chu ṭhîn. 33 I mitin thil mak takte a hmu ang a, I thinlungin thu chaltlai takte a chhâk chhuak ang. 34 A ni, mi tuifinriat lai taka mu ang emaw, Lawng puanzârna chhîpa mu ang emaw i ni ang. 35 “Mi vua a, a na si lo, Mi vêl a, ka hre lo, Eng tikah nge ka lo harh ang aw? Ka in leh bawk ṭhîn ang,” i ti ang.
Thufing dang
1 Mi sualte awt suh la, An zînga tel châk hek suh. 2 An thinlungin hnehchhiahna an zir a, An hmuiin pawi khawih lam thu mawlh an sawi ṭhîn a ni. 3 Finnain in chu sak a ni a, Hriat thiamnain tihngheh a ni. 4 Tin, hriatna avângin pindan chu Sum hlu tak leh duhawm taka tihkhahin a awm. 5 Chakna aiin finna a ṭha a, Âwmkhauh aiin hriat thiamna. 6 Beih hmain ngun taka râl rêl a ṭha, Rem i hriat poh leh i chak zâwk ang. 7 Mi â tân finna chu a sâng lutuk a, Kulh kawngkaah a ka a âng lo. 8 Thil ṭha lo ti tûra remruat ṭhîn chu Miten pawi khawih hmang an ti ang. 9 Mi â ngaihtuahna chu sual a ni a; Tin, mi hmuhsit chîng mi chu mihring tân tenawm an ni. 10 Mangan nia i chauh mai chuan I chakna a beitham a ni. 11 Thi tûra hruaite chu chhanchhuak la, Thah mai tûrte chu chhanchhuak thuai rawh. 12 “Ngai teh, hei chu ka hre lo,” i tih mai chuan, Thinlung bûktu chuan a ngaihtuah dâwn lâwm ni? I nunna vawngtu chuan a hre dâwn lâwm ni? Mi tin an thiltih ang zêlin a rûl dâwn lâwm ni? 13 Ka fapa, khawizu in rawh, a ṭha si a, Khawithlâr i kâa tui tak chu. 14 Tichuan, i nunna atân finna chu chutiang a ni tih i hria ang a; Tin, i hmuh chuan lâwmman a awm ang a, I beisei chu tihbo a ni lo vang. 15 Aw, mi suaksualpa, mi felte awmna chu châng suh; A awmna chu tihchhiatsak suh. 16 Mi fel chu vawi sarih tlu mah sela, A tho leh zêl ṭhîn; Mi suaksual erawh chu chhiatnain a tiboral ṭhîn. 17 I hmêlma a tlûkin lâwm suh la, Tihtlâwma a awmin i rilru lâwm suh se; 18 Chuti lo chuan, LALPAN a hmu ang a, a lâwm lo vang a, A laka a thinrim a lamlêt dah ang e. 19 Thil ṭha lo titute avângin intilungngai duh suh la, Mi suaksual awt hek suh. 20 Mi sual tân chuan lâwmman a awm dâwn si lo va, Mi suaksual khâwnvâr chu tihmih a ni dâwn si a. 21 Ka fapa, LALPA leh lal chu ṭih la, Rilru danglam pu mite chu pâwl suh; 22 An chhiatna a lo thleng thut ang a, An boral kumte chu tun nge hria? 23 Hêngte pawh hi mi fing thusawi a ni, Rorêlnaa mi zah zâwng neih hi a ṭha lo a ni. 24 Mi suaksual hnêna, “I fel e,” titu chu Mi tinin ânchhia an lawh ang a, Hnam tinin an hua ang. 25 A zilhhautute erawh chu an hlim ang a, An chungah malsâwmna ṭha tak a lo thleng ang. 26 Dik taka chhângtu chu Ṭhian ṭha a ni. 27 Pâwn lam thil buatsaih la, Lo lamah inpeih diam la, Chumi zawhah i in sa rawh. 28 A vâng awm lovin i ṭhenawmte chungchâng thu-ah hretu ni suh la, I kain bum bawk suh. 29 “Ka chunga a tih angin a chungah ka ti ang a, A thawh dân ang zêlin ka pe ang,” ti suh. 30 Mi thatchhe lovah ka kal a, Hriatna nei lo mi grêp huanah nên; 31 Ngai teh, hlîngin a hnim phui chûk mai a, A chhûng zawng zawng chu ṭaiṭênin a phui chûk mai a, A hungna lungpalte chu a chim vek a. 32 Tichuan, ka en reng a, ngun takin ka ngaihtuah ta a, A mi zirtîr chu ka hmu a, ka pawm ta a. 33 I duh chuan mu hlek la, chhîng hlek rawh, Kut kuangkuahin châwl hlek teh; 34 I mut hlânin i rethei hman ang a, Tlâkchhamnain sipai angin a nang thut ang che.
Solomona thufing dangte
1 Hêng pawh hi Solomona thufing, Juda lal Hezekia miten an ziak chhâwn chu a ni. 2 Thil thup hi Pathian ropuina a ni a, Lal ropuina erawh chu thil zawn chhuah a ni. 3 Vân hi a sâng êm a, lei hi a thûk êm a, Lalte rilru pawh hi chhui chhuah rual a ni lo. 4 Tangkaraw êkchhia paih la, A chhertuin thil mawi a chher thei ang. 5 Lal hma ata mi suaksual chu sawn bo ula, A lalṭhutthlêng chu felnaa tihngheh a ni ang. 6 Lal hmaah chawimawina chuh suh la, Mi ropuite hmunah ding suh. 7 I hmuh tawh ṭhin mi lian hmaa tihhnuai i nih ai chuan, “Ṭhutphah ṭha deuhvah lo ṭhu rawh khai,” I hnêna han tih chu a ṭha zâwk si a. 8 Inbei tûrin hmanhmawh takin kal suh, A tâwpah i ṭhenawmten an tihmualpho hun chein, A tihngaihna i hre lo mai dah ang e. 9 I thubuai chu i ṭhenawmpa nên sawi dûn ula, Mi dang thurûk chu puang suh. 10 A hretu chuan a hau vang chia, I hmingchhiatna a reh lo dah ang e. 11 A âwm tak thu sawi hi Tangkaraw bâwma rangkachak thei ang a ni. 12 Thu awih bengah chuan Zilhtu fing chu, rangkachak bengbeh leh Rangkachak ṭha mi ṭhi ang a ni. 13 A tîrtute tâna palai rinawm tak chu, Buh seng laia vûr vâwt ang a ni, A pute nunna a tihharh ṭhin avângin. 14 A pêk loh pui pea insawia uangthuang chu, Ruahtui pai lo chhûm leh thli ang a ni. 15 Dawhtheihnain rorêltu thlêm thlûkin a awm a, Thu nêm chuan ruhte a titliak ṭhîn. 16 Khawizu i hmu ṭhîn em? A tâwk lekin in rawh; Chuti lo chuan, i ti lutuk ang a, i luak leh dah ang e. 17 I ṭhenawm in tlawh cheh lutuk suh, A ning ang chia, a haw dah ang che. 18 Mahni ṭhenawm chungchânga dâwt sawi chîng chu, Tuboh te, khandaih te, thal hriam tak te a ni. 19 Mangan laia mi rinawm lo rin chu, Ha bal leh ke ruh pelh ang a ni. 20 Mi lungngai hnêna hla satu chu, Khaw vawh nia sihfên hlih leh pema chingal leih ang a ni. 21 I hmêlma a ril a ṭâm chuan ei tûr pe rawh, A tui a hâl chuan in tûr pe rawh. 22 I tizak êm êm ang a; Tin, LALPAN a rûl ang che. 23 Hmâr thliin ruah a rawn thlen a, Chutiang bawkin mi rêl hmang leiin thinur hmêl. 24 Hmeichhe ân hmang tak nêna in zau taka awm ai chuan, In chung chhîp kila awm a ṭha zâwk. 25 Ram hla taka chanchin chu Mi tuihâl tak tâna tui vâwt ang a ni. 26 Mi fel, mi suaksual kawng kiantu chu, Tuikhur hnuchhawn hnu leh tuihna tihkhawloh ang a ni. 27 Khawizu in tam hi a ṭha lo va; Chutiang bawkin miin mahni ropuina an zawng hi ropuina a ni lo ve. 28 Mahni rilru thunun zo lo mi chu Khawpui chim, kulh nei lo ang a ni.
1 Nipuia vûr tla leh buh seng laia ruah sûr a inhmeh lo angin, Mi â tân chawimawina hi a inhmeh lo a ni. 2 Chawngzawng thlâwk thlâwk leh vamûr lêng lai angin, Vâng awm lova ânchhe lawh chu engmahlo a ni. 3 Vuakna hrui chu sakawr tân a ni a, thîrbarh chu sabengtung tân a ni a, Tiang chu mi a hnungzâng tân a ni. 4 Mi â chu a ât dân angin chhâng suh, Amah ang i lo ni hlauh dah ang e. 5 Mi â chu a ât dân azirin chhâng rawh; Chuti lo chuan, mi fingah a inngai mai dah ang e. 6 Mi â thu chahtu chuan ama ke a tan a ni a, Ama chhiatna a in a ni. 7 Kebai kete chu a thên a thên a, Chutiang chuan tehkhin thu chu mi âte kaah chuan a ni ṭhîn. 8 Mi â chawimawi chu Lung intiang khâwm chunga lunghlu ip ang a ni. 9 Mi âte kâa tehkhin thu chu, Zu rui mi kuta hlîng chhun ang a ni. 10 Mi â leh mi veivâkte ruai ṭhîntu chu, Thal kah thiam, mi hliam ṭhîntu ang hi a ni. 11 Mi â a âtzia tilang nawn leh ṭhîn chu, Ui a luak hnu ei leh ṭhîn ang hi a ni. 12 Mahni ngaiha fing inti i hmu ṭhîn em? Chu mi ai chuan mi âah beisei tûr a tam zâwk. 13 Mi thatchhia chuan, “Kawngah sakeibaknei a awm, Kawtthlêrah sakeibaknei a awm,” a ti ṭhîn. 14 Kawpzaa kawngkhâr a her vêl angin, Mi thatchhia chu a khumah a her vêl ṭhîn. 15 Mi thatchhia chuan thlêngah a kut a hnim a; A kaa thlen leh pawh a peih ṭhîn lo. 16 Mi pasarih thil chhût thiam ai pawhin, Mi thatchhia chu ama ngaihin a fing zâwk. 17 A inrawlh vena tûr pawh awm hauh si lova kal paha mi sual mai chu Ui kal lai a benga lo mantu ang a ni. 18-19 Ṭhenawmte buma, “Ka fiamthu a ni lâwm ni?” titu chu Mi â, meichher te, thal te, thihna tea mi tihṭhaihtu ang a ni. 20 Thing a ral avângin mei chu a thi a, Sêsêa thu sawitu awm lohnaah chuan inhauna a reh ṭhîn. 21 Meiling chu meihawl tivâmtu leh thing chu mei tialhtu a ni angin, Ân hmang mi chu insualna tialhtu a ni. 22 Sêsêa thu sawi hmangte thu chu chaw tui tak ang a ni a, Pumpui chhûngrilah a lût ṭhîn. 23 Thu sawi tlawr hmui leh thinlung sual chu, Hlumbêl, tangkaraw tuiêka luan ang a ni. 24 Mi huat hmang a kâin a thup a, A thinlungah erawh chuan bumna a vawng ṭhîn. 25 Ṭha taka thu a sawi pawhin ring suh, A thinlungah thil tenawm pasarih a pai si a. 26 A huatna chu bumnain thup mah sela, A suahsualna chu tlâng hriatah tihlan a ni ang. 27 Khuarkhurum lai apiang chu, a chhûngah chuan an tla ang a, Tu pawh lung lum chu ama chungah a lo lum lêt leh ang. 28 Lei dawthei chuan ama hliamte chu a haw ṭhîn a, Fak derna kâ chuan thil a tichhe ṭhîn.
1 A tûk lama thil lo awm tûr chhuang suh, Chumi ni chuan eng nge a rawn chhuahpui dâwn i hre si lo. 2 Nangma kaa infak lovin mi dangin fak zâwk che sela; Nangma hmui ni lo, hmêlhriat loh mi hmuiin. 3 Lung hi a rit hle a, ṭiauvaivut pawh hi a khîn hle a; Nimahsela, mi âin mi an tihbuaina chu, Chumi pahnih ai pawh chuan a rit zâwk. 4 Thinurna chu a râwng a, thinrimna chu a so va; Mahse, îtsîkna chu tu nge tuar zo awm? 5 Hmangaihna inthup ai chuan A langa zilhhauna a ṭha zâwk. 6 Ṭhian min hliamna chu a tak a, Hmêlma min fawhna erawh chu a der a ni. 7 Mi puar tân chuan khawithlâr pawh a tenawm a, Mi rilṭâm tân erawh chuan thil khâ zawng zawng pawh a tui a ni. 8 Mi a hmun vah bosan chu, Sava a bu thlawh bosan ang a ni. 9 Hriak leh rimtuiin rilru a tihlim ṭhîn angin, Thinlung taka ṭhian remruatpuina chuan a tihlim ṭhîn a ni. 10 Nangma ṭhian ngei leh i pa ṭhian chu thlauhthla suh; I vânduai niin i unaupa inah kal suh; Lamhla taka unau aiin lamhnaia ṭhenawmte chu an ṭha zâwk. 11 Ka fapa, fing la, ka thinlung tilâwm rawh; Mi sawichhetute ka chhân theih nân. 12 Mi fing chuan thil ṭha lo a hmu a, a biru ṭhîn a, Mi mâwl erawh chuan a tâwn ṭhîn a, a tuar phah ṭhîn. 13 Hnam dang tân mawhphurtua inpe silhfên chu la la, Ram dang hmeichhe tâna mawhphurtua inpe chu hrêngah hmang rawh. 14 Zîng taka thova, ring taka a ṭhian malsâwmtu chu, A tân ânchhiaa ngaih a ni ang. 15 Khawchêng leh hmeichhe ân hmang chu, Angkhat an ni; 16 Chutiang nu khap beh tum chu, Thli hup beh leh hriak hûm beh tum ang a ni. 17 Thîrin thîr a tihriam a, Chutiang bawkin miin a mihringpui a tihriam. 18 Tu pawh theipui kûng nei chuan a rah a ei ang a, Tu pawh a pu rawngbâwl chu chawimawi a ni ang. 19 Tuia hmêl ngai ngai a lang angin, Mihring thinlung chu mihringah a lang. 20 Seol leh Abaddon-in tâwk tih lêm a nei lo angin, Mihring mitin tâwk tih rêng a nei lo. 21 Tihthianghlimna bêl chu tangkaraw tân a ni a, rawh tuina mei chu rangkachak tân a ni a, Mihring chu a thil fak zâwngah fiah a ni. 22 Mi â chu buh nên sumah sukin dêng mah ula, A âtna chuan a thlah lo vang. 23 I berâm rualte awm dân chu hriat tumin taihmâk chhuah la, I ran rualte chu vêng ṭha rawh; 24 Sum leh paite chu chatuan atân a ni lo va; Lallukhum chuan chhuan zawng zawng a daih em ni? 25 Hlobet chu an ât a, hlobet no dep a lo lang a; Tlânga hlobet an la khâwm a. 26 Berâmte chu i silhfên atân a ni a, Kêlte chu lo man atân; 27 I khawpkham tûr kêlhnutê a awm ang a, In chhûngkuaa ei atân, in nulate châwmna te nên.
1 Mi suaksualte chu tu ma ûm lohvin an tlânchhia a, Mi felte erawh chu sakeibaknei angin an huai. 2 Ramin a bawhchhiat chuan puipate an inthlâk zut ṭhîn a; Mi thil ngaih dân thiam leh hriatna neite erawh chu ram chuan a din rei phah ang. 3 Pachhiate hnehchhiahtu mi rethei chu, Ei tûr eng mah hnutchhiah lova lên bo vektu ruah ang a ni. 4 Dân hawisantute chuan mi suaksual an fak ṭhîn a, Dân zâwmtute erawh chuan an kalh ṭhîn. 5 Mi ṭha lo chuan rorêl an hre thiam ṭhîn lo va; LALPA zawngtute erawh chuan engkim an hre thiam ṭhîn. 6 Mi hausa awm dân dik lova awm ai chuan, Mi rethei awm dân dik taka awm chu a ṭha zâwk. 7 Tu pawh dân zâwmtu chu fapa fing a ni a, Mi virte ṭhian erawh chuan a pa mualphona a thlen ṭhîn. 8 A pung ûma a sum tipungtu chuan, Mi rethei lainattu tân a khâwlsak a ni. 9 Dân ngaithla duh lova hnuchhawntu chu, A ṭawngṭaina pawh tenawm a ni. 10 Mi ṭha kawng ṭha lova kal botîrtu chu Ama hum laihah ngei a tla ang a, Mi ṭha famkimte erawh chuan thil ṭha an rochung ang. 11 Mi hausa chu ama ngaihin a fing a; Nimahsela, mi rethei thil ngaih dân thiamte chuan an lailang ang. 12 Mi fel hlawhtlinnaah chuan ropuina nasa tak a awm a; Mi sual an dinchan erawh chuan mite an biru ṭhîn. 13 Bawhchhiatna zêptute chu an hmuingîl lo vang a, Zêp lova inpuanga hawisantute chuan zahngaihna an hmu ang. 14 LALPA ṭih mi chu a eng a thâwl a, Thinlung tikhauhtu erawh chu vânduainaah a tlu lût ang. 15 Mi rethei chunga rorêltu suaksual chu, Sakeibaknei rûm ang leh savawm pâwng vâk ruai ang a ni. 16 Thil ngaih dân thiam lo hotu chu mi hnehchhiahtu a ni ṭhîn a, Awhna hawtu erawh chuan a dam chhûng a tisei ang. 17 Mi thisen phurtu chu Khuarkhurumah a tlân lût ang a; Tu mahin hum suh se. 18 Tu pawh dik taka awm chu chhanchhuahin a awm ang a, Dik lo taka awm erawh chu a tlu thuai ang. 19 A lei lettu chuan chhang a ngah ang a, Mi lêlo zuitu erawh chu a pachhe hle ang. 20 Mi rinawm chuan malsâwmna a ngah ang a, Hausak thuai tum erawh chu hrem lohvin a chhuak lo vang. 21 Mi thlei bîk neih hi a ṭha lo va, Miin chhang them avângin an bawhchhe tûr a ni hek lo. 22 Mi fîr chuan sum a ûm a, A chungah tlâkchhamna a lo thleng dâwn tih a hre lo. 23 Leia mi fak dertu ai chuan, Mi zilhtu chuan a hnua fak a hlawh tam zâwk ang. 24 A nu emaw, a pa emaw rawka, “Bawhchhiatna a ni lo ve,” titu chu, Tiboraltu ṭhian a ni. 25 Mi rilru duhâm chuan inbeihna a chawk chhuak a, LALPAa rinna nghattu erawh chu tihthauvin a awm ang. 26 Mahni rilru ring maitu chu mi â a ni a, Fing taka chetla mi erawh chu chhanchhuah a ni ang. 27 Mi rethei thil petu chuan a tlachham lo vang a, Maimitchhînsantu erawh chuan ânchhia nasa tak a dawng ang. 28 Mi suaksual an dinchanin mite an biru a, An boralin mi fel an pung ṭhîn.
1 Zilhhau fo pawha a ring tikhawng tlat chu, Vawilehkhatah tihtliahin a awm ang a, tihdamna a awm lo vang. 2 Mi fel an lo pun hian mite an lâwm ṭhîn a, Mi sualin rorêlna an chanin mite an rûm ṭhîn. 3 Finna ngainatu chuan a pa lâwmna a thlen a, Nawhchizuar pâwltu chuan a sum a tirîral ṭhîn. 4 Dik taka lalin ro a rêl chuan ram a phuisui a, Thamna a lâk chuan ram a chhe ṭhîn. 5 A ṭhenawm fak dertu chuan A ke tân lên a zam a ni. 6 Mi ṭha lote bawhchhiatnaah chuan thang a awm a, Mi fel erawh chu a zai a, a hlim. 7 Mi fel chuan mi rethei thu a hriatsak a, Mi suaksual erawh chuan hriatna tûrin ngaihthiamna a nei lo. 8 Hmusittu chuan khawpui a tialh a, Mi fing erawh chuan thinurna a tikiang ṭhîn. 9 Mi fingin mi â a hnial chuan, A thinur emaw, a nui emaw, inremna a awm lo rêng rêng ang. 10 Thisen chhuah châk mite chuan mi ṭha famkim an hua a, Mi dik takte erawh chuan a nunna humhim an tum ṭhîn. 11 Mi â chuan a thinur thu zawng zawng a sawi chhuak a, Mi fing erawh chuan an thup a, An ngawihpui ṭhîn. 12 Rorêltuin dâwt thu a ngaihsân chuan, A chhiahhlawh zawng zawng an sual ṭhîn. 13 Mi rethei leh hnehchhiahtu an awm dûn a, LALPAN an mit a tihvârsak ve ve a. 14 Mi retheite rinawm taka rorêlsaktu lal chu, A lalṭhutthlêng chu kumkhuaa tihngheh a ni ang. 15 Tiang leh zilhhaunain a tifing a, Naupang thlahthlam erawh chuan a nu zahna a thlen ṭhîn. 16 Mi sual an lo punin bawhchhiatna pawh a pung ṭhîn a, Mi fel erawh chuan an tlûkna chu a la hmu ang. 17 I fapa chu thunun fel la, chawlhna a pe ang chia, A ni, i rilru lâwmna a thlensak ang che. 18 Inlârna a awm loh chuan mipui an tladah ṭhîn a, Dân zâwmtu erawh chu a nihlawh ṭhîn. 19 Chhiahhlawh chu thu maia thunun mi a ni lo, Hre mah sela engah mah a ngai lo vang. 20 Thu sawi thuai thuai mi i hmu ṭhîn em? Chu mi ai chuan mi âah beisei tûr a awm tam zâwk. 21 A naupan têt aṭanga chhiahhlawh duat chuan, A tâwpah in ro pawh a chuh ang. 22 Mi thinurin insualna a chawk chhuak a, Mi thinrimin bawhchhiatna a ngah ṭhîn. 23 Mi a chaponain a titlâwm ang a, Mi rilru inngaitlâwm chuan chawimawi a hlawh ang. 24 Rûkru kawppuitu chuan ama nunna a hua a ni; Chhechham ri a hria a, eng mah a sawi si lo. 25 Mi dang ngaih dân pawisak luat a hlauhawm a, LALPAa innghah erawh chu a him. 26 Mi tam takin rorêltute duhsak hlawh an tum a; Mahse, mihring chunga rorêlna chu LALPA hnên aṭanga lo chhuak a ni. 27 Mi fel lo chu mi fel ngaihin tenawm a ni a, Tin, dik taka awm mi chu mi suaksual tân tenawm a ni.
Agura Thufing
1 Jakea fapa Agura thute: Thufing chu. Miin Ethiela hnênah, Ethiela leh Ukala hnênah heti hian a ti, 2 Mi ahluanah ka mâwl ber a, Mihringin hriat thiamna an neih hi ka nei lo. 3 Finna ka zir lo va, Mi Thianghlima hriatna ka nei hek lo. 4 Tu nge ni vâna chho tawha, Lo chhuk leha chu? Tu nge ni a kuta thli hûm khâwmtu chu? Tu nge ni a puana tui fûntu chu? Tu nge ni kâwlkil zawng zawngte tinghet? Tu nge ni a hming, tu nge ni a fapaa hming pawh i hria em? 5 LALPA thu zawng zawng chu fiah a ni tawh, Amah ringtu zawng zawng tân ani chu phaw a ni. 6 A thute chu belhchhah suh; Chuti lo chuan, a lailang ang chia, Dawthei i lo ni dah ang e.
Thufing dangte
7 Thil pahnih ka dîl chia, Ka thih hmain rem ti lul ang che. 8 Thil lawilo leh dâwtte chu mi tihsawnsak daih ang che; Pachhiatna emaw, neihnunna emaw mi pe suh la, Ka tâna mamawh chawin mi châwm rawh; 9 Chuti lo chuan, ka tlaipuar ang a, ka phat ang chia, “LALPA chu tu nge ni?” ka ti dah ang e; A nih loh vêk leh ka lo rethei ang a, rûk ka ru ang a, Ka Pathian hming ka tihliau dah ang e. 10 Chhiahhlawh chu a pu hnênah rêl suh, Ânchhia a lawh ang chia, Thiam loh i hlawh dah ang e. 11 An pate ânchhia lawha, An nute malsâwm lo chhuan an awm. 12 Mahni ngaiha thianghlim inti chhuan an awm a; Nimahsela, an bawlhhlawhna tlen fai a ni si lo. 13 Ṭha inti êm êmte an awm a, Ṭha an va inti tehrêng êm! 14 An hâ chu khandaih ang, an ha hnuai lam chemtê ang chuan an awm a, Leilung ata mi rethei leh mihring zîng ata mi renchhamte ei zo tûrin. 15 “Mi pe rawh, mi pe rawh,” tia au fanu pahnih nei saihlît a awm a. Thil pathum, kham lêm nei lo a awm a, E, thil pali a ni, “A tâwk e,” ti ngai lote: 16 Thlân leh chhûl ching, Tui khawpkham lo leilung leh, “A tâwk e,” ti ngai lo mei. 17 A pa hmusittu leh A nu thu awih ngainêptu mit chu Phai choâkin an kher chhuak ang a, Mupuinoten an ei ang. 18 Thil pathum ka tâna mak lutuk a awm a, E, thil pali a ni ka hriat loh chu: 19 Boruaka mupui kawng, Lung chunga rûl kawng, Tuifinriata lawng kawng, Mipain nula a panna kawngte. 20 Chutiang chu a ni, hmeichhe uire hmang kawng chu; A ei a, a hmui a hru fai a, “Thil sual eng mah ka ti lo,” a ti ṭhîn. 21 Thil pathum avângin leilung a khûr ṭhîn, Thil pali a ni, tuar theih lohte: 22 Chhiahhlawh chu lal a lo niha, Mi â chu buh leh saa a lo tlaia, 23 Hmeichhe huatthlala takin pasal a lo neiha, Chhiahhlawh nulain a pi ro a luahin. 24 Thil tê tham tê pali lei chungah hian a awm a; Mahse, an fing hle reuh mai: 25 Fanghmîr hi chak lo tak an ni a: Nimahsela, ṭhâlah an chaw tûr an khâwl khâwm ṭhîn; 26 Sazupui hi chhiaṭha tak an ni a; Nimahsela, lungpuiahte an awmna an siam ṭhîn; 27 Khaute hian lal an nei lo va; Nimahsela, a rualin an kal ṭhîn; 28 Daidêpte hi an kein an inham tâng ṭhîn a; Nimahsela, lal inah an awm ṭhîn. 29 Thil pathum an awm dâna ropui tak an awm a, E, pali a ni, an awm dâna ropui tak chu: 30 Sakeibaknei chu ramsa zîngah a chak ber a, Eng mahin a tilêt zo lo va; 31 Uisathiam; kêlpa pawh; Lal, tu mah amah beitu awm lo chu. 32 Nangmah inchawisâng tûra thil âthlâk tak i lo tih tawh emaw, Thil ṭha lo i lo ngaihtuah tawh emaw a nih chuan, I kâ hup rawh. 33 Hnutetui chawhin hnutekhal a rawn tichhuak ang leh, Hnâr sâwra thi a lo chhuak angin, Tihthinur luihnain inhauna a hring ṭhîn.
Lal tâna thurâwn
1 Lal Lemuela thute, thufing, a nu zirtîrte chu. 2 Ka fapa, aw ka rîla rah, Aw, ka chhechham fapa, lo ngaithla teh. 3 I chakna chu hmeichhia pe suh la, Lal tichhe ṭhîn hnênah i nunnate pawh. 4 Aw Lemuel, lalin uain in tûr a ni lo va, Rorêltuten, “Khawiah nge rakzû?” an ti tûr a ni hek lo. 5 An in chuan dân an theihnghilh ang a, Mi retheite chungah ro an rêl dik lo dah ang e. 6 Boral dâwn ṭêpte chu rakzu pe ula, Mi lungngai chu uain pe rawh u. 7 In sela, a pachhiatna chu theihnghilh sela, A hrehawmzia chu hre reng lo rawh se. 8 Ṭawngtheilote tân i kâ âng la, Hnuchhawnho zawng zawng chungchâng thu-ah te. 9 I kâ âng la, fel takin rorêl la, Mi rethei leh renchhamte chungah rorêl rawh.
Nupui fel
10 Hmeichhe khawsak ṭha tu nge hmu thei ang? A man chu lunghlu sen mi aiin a sâng zâwk daih si a. 11 A pasal thinlung chuan a ring a, Chhawrna a hmai lo vang. 12 A dam chhûngin Chhe lam ni lovin, ṭha lam hlîrin thil a tihsak ṭhîn. 13 Berâm hmul leh la a zawng a, A kutin lungawi takin a thawk ṭhîn. 14 Sumdâwng lawng ang a ni a, Ram hla tak ata ei tûr a la ṭhîn. 15 Khawvâr hmain a tho va, A chhûngte ei tûr a pe ṭhîn a, A chhiahhlawh nulate hnênah an tih tûrte a hrilh ṭhîn. 16 Huan tûr a ngaihtuah a, a lei a, Ama kutkawih ngeiin grêp huan a siam ṭhîn. 17 Chaknain a kâwng a hrêng a, A bânte a tichak ṭhîn. 18 A sumdâwnna a hlâwk tih a hria a, Zânah pawh a khâwnvâr a mit ngai lo. 19 A kutin hmui kut a chelh a, A kutin hmuithal a vuan a. 20 A kut mi rethei lamah a phar a, A ni, renchhamte thlengin a ban phâk a. 21 A chhûngte vûr a hlauhsak lo va; A chhûngte zawng zawng chu puan senlâr sinin an awm si a. 22 Chhuatphah puan mawi a insiam a, A silhfên chu lazai sîn mi leh puan senduk a ni. 23 Kulh kawngkaa an ram upate nên an ṭhut hovin, A pasal chu a hriat a ni. 24 Lazai sîn silhfên a siam a, a zuar ṭhîn a, Sumdâwngte hnênah kâwnghrênte a thawn ṭhîn. 25 A silhfên chu chakna leh ropuina a ni a, Hun lo la thleng tûr atân pawh a nui a. 26 Finnain a kâ a âng a, A kaah chuan ngilneihna thu a awm. 27 An chhûng khawsak dân a en ṭha a, Dâwngdahna chhang a ei lo. 28 A fate chu an tho va, “Engthâwli” an ti a; A pasal pawhin a fak a: 29 “Hmeichhe tam tak khawsak ṭha an awm a; Mahse, nang chuan i khûm vek a ni,” tiin. 30 Duhsakna hi bumna a ni a, hmêlṭhatna chu engmahlo a ni; LALPA ṭihtu hmeichhia erawh chu fak a ni ang. 31 A kutkawih chhuah chu pe la, A thiltihin kulh kawngkaah chuan fak rawh se.
Nun hi engmahlo mai a ni
1 Jerusalem lal, Davida fapa, Thuhriltu thute chu. 2 Thuhriltu chuan, “Engmahlo mai mai, Thil zawng zawng hi engmahlo mai a lo ni,” a ti a. 3 Mihringin a hnathawh, ni hnuaia a thawhah chuan hlâwkna eng nge a hmuh? 4 Chhuan khat an liam a, chhuan dang an lo chhuak a, Lei hi erawh chu a awm reng mai. 5 Ni pawh chu a lo chhuak a, tin, a tla leh a, A chhuahna tûr lam panin a hmanhmawh ṭhîn. 6 Thli chu chhim zâwngin a tleh a, hmâr hawiin a lo lêt leh a; A tleh vêl a tleh vêl a; tin, a bial ngaiah a kîr leh ṭhîn a. 7 Lui zawng zawngte chu tuipuiah an luang lût a; Mahse, tuipui chu a khat chuang lo; Luite chu an luanna ṭhin lamah chuan an luang reng a. 8 Thil zawng zawng hi ninawm mai mai a ni; sawiin a siak lo ve: Mit chu a thil hmuhah a tlai lo va, Beng pawhin a thil hriat a kham hek lo. 9 Thil lo awm tawh chu lo awm tûr rênga kha a ni a, Thil tih tâkate chu tih tûr rêng kha a ni: Ni hnuaiah hian thil thar rêng rêng a awm lo ve. 10 Miin, “En rawh, hei hi a thar a ni,” a tih theih rêng rêng a awm em ni? Kan awm hma daiha lo awm tawh rêng a ni. 11 Tûn hma thil tu mân an hre reng lo va. Nakinah pawh tûnlai thil hi an hre reng lo vang.
Thuhriltu thil tawn
12 Kei, thuhriltu hi Jerusalem-a Israel-te lal ka ni tawh. 13 Tin, vân hnuaia thiltih tâk zawng zawng chungchâng chu finna hmangin fiah leh hmuchhuak tûrin ka rilru ka lo hmang ta a: Pathianin mihring fate hnêna buaipui tûra a lo pêk hi hna hrehawm tak a ni. 14 Ni hnuaia thiltih tâk zawng zawngte chu ka hmu ta a; tin, ngai rawh, thil zawng zawng hi engmahlo leh thil lothlâwn mai a lo ni. 15 A kawi tawh kha chu tihngîl theih a ni lo va, A awm lo chu chhiar rual a ni lo. 16 “Ka hmaa Jerusalem-a awmte zawng zawng aia nasain finna ka nei alâwm maw! Ka rilru pawhin finna leh hriatna a nei nasa rêng a ni,” ka inti a. 17 Tin, ka rilru hi finna hre tûr leh âtna leh fin lohna hre tûr pawhin ka hmang a. Hei pawh hi thil lothlâwn mai a lo ni tih ka lo hre ta. 18 Finna a nasat poh leh buaina a tam a, Hriatna a pun poh leh manganna a pung.
1 Ka rilruin, “Khawi nge! Nuamsip bâwl ka han chîng teh ang, a nuam teh rêng emaw!” ka ti a; mahse, hei pawh hi eng a lo ni lo. 2 Nuih hi a âtthâkzia ka chhar chhuak a, hlimhlawp lah eng ruai a ni lo. 3 Vân hnuai mihring fate dam chhûng tawi tê hman ral dân ṭha ber a ni law maw tiin, finna zawngin uaina intihhlima nuam tâwl ka tum ta a. 4 Hna nasa tak ka thawk a; inte ka insak a, grêp huante ka insiam a, 5 huante leh ngaw nuamte ka insiam a, tah chuan theikûng zawng zawngte ka phun a. 6 Ngawa thing ṭhang laite châwm nân dîlte ka siam a. 7 Chhiahhlawhpate leh chhiahhlawhnute ka lei a, ka ina piang chhiahhlawhte ka nei bawk a; bâwng rualte leh berâm rualte pawh ka nei ṭeuh va, ka hmaa Jerusalem-a lo awmte zawng zawng aia nasain. 8 Tangkarua leh rangkachakte leh lalte ro leh ram bial ro ṭha bîkte ka la khâwm a; hmeichhe zai mi leh mipa zai mite ka siam a, mipa fate lâwm zawng hmei tam tak nên. 9 Chutichuan, ka lo ropui a, ka hmaa Jerusalem-a awmte zawng zawng chu ka khûm a; ka finna pawh a ngai reng a ni. 10 Tin, ka mit îtzâwng apiang chu ka hlah lo va, ka thinlung pawh eng lâwmnaah mah ka sûm lo; ka thawh rimna zawng zawng avângin ka thinlung a lâwm si a; chu chu ka thawh rimna zawng zawnga ka lâwmman a ni. 11 Tichuan, ka kutchhuak zawng zawngte leh ka thawh rimnaa ka thiltih zawng zawngte ka han en hian, ngai teh, thil zawng zawng hi engmahlo leh thil lothlâwn mai a lo ni a, ni hnuaiah hian hlâwkna rêng rêng a lo awm lo ve! 12 Tichuan, fin emaw, ât emaw, tlawktlaw emaw eng nge lêm chuang tih ka ngaihtuah a; lal pawhin a hmaa lalte tih tawh bâk eng nge a tih theih chuan? 13 Thim aiin êng a ṭha angin, ât ai chuan fin a ṭha; 14 mi fing chuan a kalna a hria a, mi â chuan a hre lo va; mahse, khawrêl thuhmun an zaa chungah a thleng tho tih ka hria. 15 Tin, ka rilruah chuan, “Mi a chunga thleng ang bawk chu ka chungah pawh a thleng dâwn a, eng atân nge ka fin bîk le?” ka inti a. Tichuan, ka rilruah chuan, “Hei pawh hi engmahlo mai a lo ni,” ka ti a. 16 Mi fing pawh, mi â pawh, kumkhuaa hriat rengna chu a awm si lo; ni lo la thleng tûrahte chuan an vaia theihnghilh daih an ni dâwn si a. Mi â ang bawka mi fing pawh a thih tûrzia mai chu! 17 Tichuan, nun hi ka hua a ni; ni hnuaia thiltih rêng rêng hi mi tilungngaitu vek a nih avângin: thil zawng zawng hi engmahlo leh thil lothlâwn mai a lo ni si a. 18 Tichuan, ni hnuaia ka thawh rimna zawng zawnga ka thiltihte chu ka haw ta, ka hnua lo awm tûra tân chuan ka hnutchhiah tûr a ni mai si a; mi fing a nih leh mi â a nih pawh tu nge hria ang? 19 Mahse, ka thawh rimna zawng zawnga ka thiltihte chungah leh ni hnuaia finna hmanga ka thawh rim rah zawng zawng neitu a ni mai dâwn si a. Hei pawh hi engmahlo mai a lo ni. 20 Chutichuan, ka han hawi vêl a, ni hnuaia ka thawh rimna zawng zawnga ka thawh tâkte chungchângah chuan ka thinlung bei ka tidawng ta. 21 Mi, finna leh hriatna leh thiamnate nêna thawk rimtu chuan, thawk ve hauh lo mi hnênah a rochun atân a hnutchhiah mai tûr a ni. Hei pawh hi engmahlo leh thil ṭha lo tak a ni. 22 Miin a thawh hahna zawng zawngah leh rilru rim taka ni hnuaia a thawhnaah chuan eng nge a hmuh? 23 A dam lai ni zawng zawngte chu tuarna hlîr a ni a, a hnathawhte lah vuivaina mai a ni si a; zânah pawh a rilru a hahdam chuang hek lo. Hei pawh hi engmahlo mai a lo ni. 24 Mihring tân chuan ei leh in te leh a thawh rimnaa a rilru tihnawm te aliama ṭha a lo awm lo. Hei pawh hi Pathian kuta mi a ni tih ka lo hre ta. 25 Amah lovin tu nge ei leh bâr leh intinuam thei awm ang? 26 Amah tilungnitu hnênah chuan finna te, hriatna te, lâwmna te a pe si a; mi sualte erawh chu, Pathian tilungnitu hnêna la pêk chhâwn tûr lâk khâwm leh chhêk khâwm hna a pe zâwk a ni. Hei pawh hi engmahlo leh thil lothlâwn mai a lo ni.
Engkim mahni hun têah
1 Engkim tân hian hun ruat a awm a, vân hnuaia thiltih zawng zawng tân hun remchâng a awm: 2 Pian hun a awm a, thih hun a awm; Phun hun a awm a, thil phun phawi hun a awm; 3 Tihhlum hun a awm a, tihdam hun a awm; Ṭhiat hun a awm a, siam leh hun a awm; 4 Ṭah hun a awm a, nuih hun a awm; Sûn hun a awm a, lâm hun a awm. 5 Lung paih darh hun a awm a, lung lâk khâwm hun a awm; Pawm hun a awm a, pawm loh hun a awm; 6 Zawn hun a awm a, tihbo hun a awm; Vawn ṭhat hun a awm a, paih bo hun a awm; 7 Tihthlêr hun a awm a, ṭhui hun a awm; Ngawih hun a awm a, ṭawng hun a awm; 8 Hmangaih hun a awm a, huat hun a awm; Indo hun a awm a, muan hun a awm a ni. 9 Hnathawktuin a thawh rimna ata eng hlâwkna nge a hmuh? 10 Pathianin mihring fate hnêna buaipui tûra hna a lo pêk chu ka hmu ta. 11 Engkim hi an hun ṭheuhvah chuan mawi takin a siam a; mihring rilruah chuan chatuan a dah bawk a; mahse, chuti pawhin anni chuan Pathianin a tîr ata a tâwp thlenga thil a tih chu an hmuchhuak thei chuang lo. 12 Hlim taka awma, an nun chhûnga thil ṭha an tih aliama an tâna ṭha zâwk eng mah ka hre lo. 13 Tichuan, mi tin ei leh in leh an thawh rimna zawng zawnga hlim taka an awm chu Pathian thilpêk a ni. 14 Pathianin a tih apiang chu a awm hlen ang tih ka hria. Eng mah belh theih a ni lo vang a, lâk ṭhen theih pawh a ni hek lo vang. Mihringin amah an ṭih theih nân Pathianin chutiang chuan a ti a ni. 15 Thil awm mêkte hi lo awm tawh sa kha a ni a; thil lo awm tûrte chu lo awm tawh sa bawk kha a ni; Pathian chuan a bo tawhte kha a rawn la kîr leh zêl a ni.
Khawvêla hleih neihna tamzia
16 Tin, chu lo pawh chu, ni hnuaiah rorêlna hmuna suahsualna awm leh dikna hmuna suahsualna awm chu ka hmu bawk a. 17 Ka rilruah chuan, “Pathianin mi fel leh mi suaksualte ro pawh a rêl ang, thil tinrêng atân hun a awm si a,” ka ti a. 18 “Mihring fate chungthuah chuan, ramsa mai an ni tih an inhriat theih nân Pathianin anmahni a fiah a ni,” ka ti rilru a. 19 Mihring fate chunga khawrêl leh ramsate chunga khawrêl chu thuhmun a ni si a, khawrêl thuhmun an chungah a tla a ni, pakhat a thih ang bawkin a dang pawh kha a thi a; an zain thâwk dân thuhmunin an thaw a, mihring chu ramsa aiin a chungnung lêm lo; thil zawng zawng hi engmahlo mai a lo ni si. 20 An zain hmun khatah an kal vek a; an zain vaivuta mi an ni vek a, an zain vaivutah an chang leh vek a ni. 21 Mihring fate thlarau chu chung lamah a chho emaw, ramsa thlarau chu hnuai lamah leiah a chhuk emaw tih tu nge hria? 22 Chu vâng chuan mihring chu a thiltihah a lâwm aliama ṭha eng mah a awm lo, tih ka hmu a ni; chu chu a chanvo a ni mai; a hnua thil lo awmte hmu tûrin tuin nge rawn hruai kîr leh hlei ang?
1 Tin, ka han thlîr leh a, ni hnuaia inhnehchhiahna zawng zawngte chu ka hmu a; tin, en teh, hnehchhiaha awmte mittui te chu, thlamuantu an nei lo va; anmahni hnehchhiahtute chuan thiltihtheihna an nei a, anni zawngin thlamuantu rêng an nei lo. 2 Chuvângin, mi nung la damte aiin mitthi thi tawhte chu awhawm ka ti zâwk; 3 tin, anmahni ve ve ai pawhin lo la piang lo, ni hnuaia thiltih ṭha lo la hmu lo nih chu a ṭha zâwk. 4 Tin, thawh rimna zawng zawng leh themthiamna tinrêngte hi ṭhenawm elrelna avânga lo awm a ni tih ka hre ta. Hei pawh hi engmahlo leh thil lothlâwn mai a ni. 5 “Mi â chuan a kut a kuangkuah a, a inṭâm hlum ṭhîn,” tih a ni a. 6 A dik thei e, hahdama vei khat neih pawh hi buai phîlîa thawka vei hnih neih ai chuan a ṭha. 7 Tin, ka han thlîr leh a, ni hnuaiah chuan engmahlo a ni ka hmuh ni. 8 Mi pakhat, mi mal tak a awm a, fapa emaw, unaupa emaw pawh a nei hek lo; mahse, tâwpintai awm lovin a thawk rim a, a hausaknate pawh a mit tlaina khawp a ni hek lo; mahni nawmsakna chân khawpa tu tâna thawk rim ka ni nge pawh a inti ngai hek lo. Hei pawh hi engmahlo mai a lo ni a, thil hrehawm tak a ni bawk. 9 Pahnih chu pakhat ai chuan an ṭha zâwk, an thawh chhuah ṭhat avângin. 10 An tlûk pawhin pakhat chuan a ṭhian chu a khai ding dâwn si a; mahni chauhva awm kha erawh chu a chung a pik e, a tlûk chuan khaidingtu tûr a nei si lo. 11 Chu lo pawh, pahnih chu an mut dun chuan an innghêng lum thei a, pakhat erawh chu amah maiin engtin nge a lum theih ang? 12 Tin, amah maia awm kha chu miin hneh thei mah sela, pahnih chuan an lo dodâl zo dâwn a ni; hrui thum hrual chu a chat lawk lawk ngai lo ve. 13 Lal putar â tawh, thurâwn dawngsawng duh lo ai chuan tleirâwl rethei leh fing chu a ṭha zâwk. 14 Tân in ata chu lal tûrin a lo chhuak a ni si a; a ni, ama ram meuhvah pawh retheia piang ni mah sela. 15 Ni hnuaia lêng mi nung zawng zawngte chu lal aiawh tûr tleirâwl lampangah vek ka hmu a. 16 Lalin chhiar sên loh chungah ro a rêl thei e; mahse, a hnuah chuan tu mah a chungah an lâwm lo. Hei pawh hi engmahlo leh thil lothlâwn a lo ni ngei mai!
Thu tiam thuai thuai suh
1 Pathian ina i kal laiin i ke vêng ṭha rawh; mi âte inthawina ai chuan ngaithla tûra rawn hnaih hi a ṭha zâwk si a: thil ṭha lo an tih an hre si lo. 2 I ka chu hmanhmawh suh se, Pathian hmaa thu eng pawh chhâk chhuak tûrin i thinlung pawh hmanhmawh suh se, Pathian chu vâna awm a ni a, nang chu leia awm i ni si a; chu vâng chuan i thu pawh tlêm rawh se. 3 Buaina tam tak chu mangphan a ni nge nge si a, thu tuitam vak lah chu mi a aw chhuak a ni mai. 4 Pathian hnêna thu i tiam chuan ngaihthah suh; mi â chu a lâwm si lo. I tiam chu hlen ngei rawh. 5 Thu tiama hlen si loh ai chuan tiam loh law law i tân a ṭha zâwk. 6 I ka chuan tihsualtîr che suh se; vântirhkoh hmaah pawh, “Tiam sual palh a nih kha,” ti hek suh. Eng atân nge i awka chhuakah Pathian a thinur ang a, i kutchhuak thilte a tihboral ang le? 7 Mumang a tam poh leh thu lawilo a tam a ni si a. Pathian chu ṭih zâwk rawh.
Nun hian awmzia a nei lêm lo ve
8 Ram bialah rethei hnehchhiahna te, pâwngnêknain rorêlna leh diknate a tibo a ni tih i hmuh pawhin mak ti suh; hotu sâng chu a sâng lehzualin a mit sîr ru reng si a, anni aia sâng lehzualte pawh an awm zêl a ni. 9 Tin, lei hlâwkna chu mi zawng zawng tân a ni a, lal pawh thlawhhma ring mi bawk a ni. 10 Tangka sum ngainatu chuan tangka sumah duhtâwk a hmu lo vang a, hausak ngainatu chuan duhtâwk a hlêp hek lo vang. Hei pawh hi engmahlo mai a lo ni. 11 Sum leh pai a lo pun chuan eitute pawh an pung a, a neitu tân a mita hmuh mai loh chu eng nge a sâwtna? 12 Thawk rim chu a ei tlêm emaw, a ei tam emaw, a mut a tui ṭhîn a, mi hausa chuan a thil ngah chu a muthilh loh phah zâwk ang. 13 Ni hnuaia thil pawi tak ka hmuh chu, mahni tâna sum khâwla, 14 a sum khâwl chu peipun tuma, chhe ta hlauh si, a fa hnutchhiah tûr pawh nei ta lo hi a ni. 15 A nu pum ata a lo chhuaha saruaka a lo kal ang bawk khân a kal leh ang a, a thawh rim rah eng mah a chhawm lo vang. 16 Hei pawh hi thil ṭha lo tak mai a ni, a lo kal lam ang chiah bawka a kal leh tûr hi. Boruak atân maia a thawh rim hi eng nge a hlâwkna? 17 A dam chhûng ni zawng zawngah thim hnuaiah a ei a, a lungni lo êm êm a, natna tuar leh thinur takin a awm bawk a. 18 Ngai rawh, thil ṭha leh mawi nia ka hmuh chu, miin a ei a, a in a, a thawh rimna Pathianin a pêk, a dam chhûng ni zawng zawnga ni hnuaia a thawh ṭhinnaa thil ṭhate chu nuam ti taka a hman chu a ni; chu chu a chanvo a ni mai. 19 Mi tu hnênah pawh Pathianin hausakna leh sum leh pai a pêka, chumi chu chên tûrin theihna te, a chanvo pawm theihna te, a thawh rimna nuam tih theihna te a pêk hi, hêng hi Pathian thilpêk a ni. 20 A dam chhûng nite chu a hre mang dâwn si lo va, a thinlung lâwmnaah chuan Pathianin a chhân avângin.
1 Thil ṭha lo, ni hnuaia ka hmuh chu, mihring tâna rit tak a ni: 2 mi, Pathianin hausakna te, sum leh pai te, zahawmna te a pêk chu a rilruin a châk zawng zawng chu eng mah chham lovin a awm a; mahse, Pathianin chu mi chu chên tûrin theihna a pe lo va, mi dangin a chên ta zâwk a. Hei hi engmahlo mai a lo ni a, hrehawmna kulmût tak a ni. 3 Miin fa za pawh hring sela, kum tam tak damin, a dam chhûng nite chu tam hle mah se, a dam laia thil ṭha chên lova, phûm pawh a hlawh si loh chuan, ani ai chuan thi saa pian pawh ṭha ka ti zâwk. 4 Ani chu chhuak thlâwn mai a ni a, thimah a lût a, a hming chu thimin a chhilh bo ta a. 5 Ni hmu lovin, eng mah a hre lo na a, mi dang ai khân a nihlawh zâwk a ni. 6 A ni, kum sâng lêt hnih pawh dam sela, thil ṭha a hmuh si loh chuan thuhmun an ni mai lâwm ni? 7 Mihring thawh rimna zawng zawng chu a hrawk tân a ni mai a; mahse, a châk a daih chuang lo. 8 Mi fing chuan mi â aiin sâwtna eng nge a hmuh chuan bîk? A nih loh leh, mi rethei, mi nungdamte hmaa lên thiam chuan eng nge a hmuh? 9 Châkna chavai mai mai ai chuan mita hmuh sa ngei chu a ṭha zâwk. Hei pawh hi engmahlo leh thil lothlâwn mai a lo ni. 10 Thil lo awm apiang hi hming vuah tawh a ni a, mihring nihna pawh hi hriat sa a ni; amah aia ropui zâwk chu a dodâl thei lo. 11 Thu a tam poh leh engmahlo a tam mai a ni a, mihring tân eng nge a ṭhatna? 12 Mi, a nun lothlâwn ni rei lo tê, hlimthla ral leh mai tûr anga a nun chhûng hian a tâna ṭha ber tûr chu tu nge hria ang? Ni hnuaiah hian mi, a hnua thil lo awm tûr chu tu nge hrilh thei ang?
Dam chhûng thu chhuina
1 A ṭha zawk e hming ṭha, hriak to aiin, Pian ni aiin thih ni. 2 Lusûn ina kal a ṭha e, Ruaiṭheh ina kal ai chuan; Chu chu mi zawng zawng tâwpna a ni si; Nungdamin thinlungah an vei chu. 3 A ṭha zâwk e lungngaih, nuihza aiin; Hmêla lungngaih lo lang zârah Thinlung a lo ṭha si. 4 Mi fingte thinlung a châm reng lusûn inah, Mi âte thinlung erawh hlimhlawp inah. 5 Mi fing zilhna ngaihthlâk a ṭha, Mi âte hla ngaihthlâk ai chuan. 6 Bêl chhuan hnuaia hlîng alh ri ang Mi â nui ri chu a ni si. Hei pawh hi engmahlo mai a lo ni. 7 Hnehchhiahna hian mi fing a tiâ a, Thamna hian rilru a tichhia. 8 Thil tâwpna chu a ṭha zâwk ṭhîn, a ṭanna aiin, Rilrua chhel hi a ṭha zâwk, rilrua chapo aiin. 9 I rilruah thinur hmanhmawh suh, Mi âte ṭânglaiah a châm ṭhîn, thinurna hi. 10 Nang chuan zâwt suh, hmânlai nite ṭhat zâwkzia, tûnlai aiin; Hemi i zawh hi, fin vâng a ni si lo. 11 Finna a ṭha, ro luah tlukin, Ni hmutute tân lah hlâwkna a ni. 12 Finna hi himna a ni si, Tangka sum himna a ni bawk; Hriatna ṭangkaizia erawh chu, A neitu nun chu finnain a tiharh ṭhîn. 13 Pathian hnathawh hi ngaihtuah teh, A tihkawih tawh chu tu nge tingîl thei ang? 14 Ṭhat niah chuan lâwm langin, Chhiat niah chuan ngaihtuah rawh: Pathian chuan pakhata pawh chu A dang ang bawka a siam a ni si a, Mihring chuan a hnu lam tûr a hriat chhuah loh nân. 15 Ka nun engmahlovah hian engkim ka lo hmu ta a: mi fel a fel chunga borala awma, mi suaksual thil ṭha lo ti chunga dam rei phian si angte hi. 16 Kherkhiap lutuk suh la, intifing lutuk hek suh; engah nge mahni i intihchhiat ang? 17 Suaksual lutuk suh la, â hek suh; i hun lo takah engah nge i thih ang? 18 Hei hi i chelh tlat a ṭha a, chu pawh chu thlah hlek suh; Pathian ṭihtu chuan a chhuahsan vek si ṭhîn a. 19 Khawpuia rorêltu sâwm aiin finna chuan mi fing chu a tichak zâwk. 20 Thil ṭha titu, thil sual ti hauh lo khawpa mi fel chu lei chungah hian an awm lo takzet a ni. 21 Mi thusawi nazawng chu bengkhawn suh, i chhiahhlawh ânchhe lawh che i hre dah ang e; 22 nang ngei pawhin mi dangte ânchhia i lawh ṭhîn tih i thinlung ngeiin a hre fo si a. 23 Hêng zawng zawng hi finnain ka chian tawh a ni. “Ka la fing ang chu,” ka ti ṭhîn a; mahse, a teuh lo mai. 24 Thil awmzia tak chu, hla tak, thûk tak, thûk êm êm a lo ni a, tuin nge hmuchhuak thei ang? 25 Finna leh thil awmzia hre tûr te, hmuchhuak tûr te, zawng tûr tein ka rilruin ka hawi vêl a, suahsualna hi âtna, âtna hi bâwrâwna a lo ni tih ka hria. 26 Tin, thihna aia kha zawk thil ka lo hriat chu, hmeichhia a thinlung, thang leh lên ang nia, a kuta a vawn lah kawl bun ang mai ni chu a ni; tu pawh Pathian tilâwmtu chu a lakah a him ang a, mi sual erawh chu a man ngei ang. 27 Thuhriltu chuan heti hian a ti: “Ngai teh, thu dik hre tûra ka han ngaihtuah khâwma ka hriat chhuah chu hei hi a ni, chu chu ka rilruin a zawn ṭhin, ka hmuh theih loh chu a ni a. 28 Mipa sângkhat zîngah chuan pakhat ka hmu thei a, hmeichhe zîngah phei chuan ka hmu lo. 29 Ngai teh, hei hi ka hriat chhuah tâk chu a ni: Pathianin tluang taka nung tûrin mihringte a siam a, anni erawh chuan an tikhirhkhân zo vek a ni,” tih hi.
1 Mi fing ang hi tu nge awm? Thil hrilhfiahna pawh tu nge hria? Finna chuan a hmêl a tiêng a, A hmêl pûm chhuak pawh a dang ta.
Lal thu awih rawh
2 Pathian hmaa i thutiam avâng chuan lal thupêk pawisa tûrin ka ti a che. 3 A hma ata chhuah hmanhmawh suh la, thil ṭha lo tilui suh, a duh duha ti ṭhîn a ni si a. 4 Lal thu chu thutâwp a nih avângin tu nge a hnênah, “Eng nge i tih ni?” ti thei ang? 5 Thupêk pawm apiang chuan eng mah a tuar lo vang a, mi fing rilru chuan nîngkhâwng a hria a ni. 6 Thil tinrêng hian nîngkhâwng a nei si ṭhîn a, mihring buaina chu a tân nasa hle mah se. 7 Thil lo awm tûr chu a hre si lo va, a lo awm dân tûr chu tu nge hrilh thei ang le? 8 Mi thlarau chelh theihna leh thih ni chunga thuneihna nei tu mah an awm lo; indo chhûngin chawlh a awm lo va, suahsualnain a neitute a chhanchhuak hek lo vang. 9 Ni hnuaia thiltih zawng zawng kim takin ka ngaihtuah a, hei zawng hi ka chhinchhiah a ni: mi, mi dang chungah pawi khawpin a intilal ṭhîn a.
Mi ṭha leh sual
10 Tin, mi suaksualte an phûm ka hmu ṭhîn a, thlânah an liam a; thil dik tite pawh hmun thianghlim ata an kal bo va, khawpuiah chuan hriat zui an ni lo. Hei pawh hi engmahlo mai a lo ni. 11 Thil sual tih chungah hremna hlen nghâl mai a nih ṭhin loh avângin, mihring fate thinlung chu thil sual ti tûrin a lo ngampa ṭhîn a ni. 12 Mi sual chu vawi za pawh thil sual tiin dam rei bawk mah sela, a tluang lo vang; a ni tihsei ni mah sela, hlimthla ang lek a ni ang, Pathian ṭihna a neih loh avângin. 13 Pathian ṭihtute erawh chu, amah ngei an ṭih avângin an tluang ang tih chiang takin ka hria. 14 Lei chungah hian engmahlo a lo awm a lo awm a, mi felte chuan mi suaksualte tawn âwm tak an tawng a; mi suaksualte lahin mi felte tawn âwm tak an tawng lawi si a. Hei pawh hi engmahlo mai a lo ni ka ti a ni. 15 Tichuan, ni hnuaiah hian ei leh in leh nuam taka awm aliama thil ṭha eng mah mihringin a neih loh avângin nawmna hi ṭha ka ti mai e; chu chu ni hnuaia a dam chhûng ni Pathianin a pêk zawng zawnga a thawh rimnaahte chuan a tel zêl dawn si a. 16 Finna hre tûr leh lei chunga thiltih tâk zawng zawng hre tûra chhûn leh zân, mu lo chhîng lova ka rilru ka han hman chuan, 17 Pathian thiltih zawng zawng, ni hnuaia tih tâkte chu miin a hmuchhuak thei lo tih ka hmu ta a. Miin zawng eng ang mah sela, a hmuchhuak lo vang; mi fingin hriat inring teh mah se, a hmuchhuak thei bawk hek lo vang.
1 Hêng zawng zawng dap chhuak tûr hian ka vei êm êm ṭhîn a: mi fel leh mi fing leh an thiltihte chu Pathian kuta awm a lo ni a. Hmangaihna a ni nge huatna tih mihringin an hre lo, an hmabâk a ni vek si. 2 Mi zawng zawng chungah thil thuhmun a thleng a ni: khawrêl thuhmun chu mi fel leh mi suaksual te, mi ṭha te, mi thianghlim leh thianghlim lo te, inthawi mi leh inthawi lo mite chungah pawh, mi ṭha ang bawkin mi sual pawh, chhechham hmang ang bawkin chhechham duh lo mi pawh. 3 Hei hi a ni, ni hnuaia thiltih zawng zawnga thil ṭha lo chu: mi zawng zawng chunga khawrêl thuhmun thleng hi. Mihring fate thinlung lah chu suala khat a ni a; an dam chhûngin an thinlungah âtna a awm a, chutih hnuah chuan mitthi hnênah an kal a. 4 Mi nungdamte zînga la telte tân chuan beiseina a la awm a; sakeibaknei thi ai chuan ui nung takngial pawh a ṭha zâwk si. 5 Mi nungdamte chuan an la thi dâwn tih an hre si a, mitthi erawh chuan eng mah an hre lo va, lâwmman an nei tawh ngai lo va, hriat reng pawh an hlawh tawh hek lo. 6 An hmangaihna te, an huatna te, an îtsîkna te a boral daih tawh a ni, ni hnuaia thiltihahte hian chanvo rêng an nei tawh ngai hek lo. 7 Kal la, lâwm takin i chaw ei la, thinlung hlimin i uain in rawh; Pathianin i thiltihte chu a pawm tawh si a. 8 I silhfênte chu vâr reng sela, i lû pawh hram ngai suh se. 9 Ni hnuaia a pêk che i hun engmahlo chhûng zawng chuan i nupui, i hmangaih hnênah chuan nun nuam takin awm rawh; chu chu dam chhûnga i chanvo leh ni hnuaia i thawh rimnaa i chanvo chu a ni si a. 10 I kutin tih tûr a hmuh apiang chu theihtâwpin ti rawh; thlân i kalna tûrah chuan thiltih tûr emaw, remruat tûr emaw, hriatna emaw, finna emaw a awm si lo va. 11 Ka han thlîr leh a, ni hnuaia intlânsiaknaah mi chak chu a hlawhtling chuang lo va, indonaah mi huai a hlawhtling chuang hek lo; mi fingin ei tûr a hmu bîk lo va, mi nikhaw hria an hausa chuang hek lo va, mi themthiamin duhsak an hlawh chuang hek lo, mi zawng zawng chungah hun leh khawrêl ang angin a thleng mai zâwk tih ka hmu a. 12 Mihringin ama hun pawh a hre si lo va; sangha, lên hlauhawma man leh sava, thanga âwk ang maiin, mihring fate pawh an chunga lo thleng phutin hun ṭha lovah an âwk ṭhîn a ni. 13 Ni hnuaiah chuan hetiang finna hi ka hmu bawk a, ka tân ropui hlein a lang. 14 Khawpui tê tak tê, a chhûnga mi tlêm tê awmna chu a awm a; lal ropui takin a rawn bei a, a hual a, hual dai nasa tak a theu hnan a; 15 tin, chu khuaah chuan mi rethei fing tak a awm a, a finnain khawpui chu a chhanchhuak ta a; mahse, tu mahin chu mi rethei chu an hre reng lo. 16 Mi rethei finna chu hmuhsita awmin, a thu pawh ngaihthlâk ni lo mah sela, kei chuan, “Chakna aiin finna a ṭha zâwk,” ka ti tho a ni. 17 Mi fingte thusawi zawi tê pawh, mi âte zînga rorêltu au vak aiin a hriat ṭhat theih zâwk. 18 Finna chu indona hriamhrei aiin a ṭha zâwk a; mahse, mi sual pakhatin thil ṭha tam tak a tichhe ṭhîn.
1 Tho thiin a tichhia, Rimtui siamtu hriak rim; Chutiangin finna leh zahawmna pawh Âtna tlêm têin a chhilh bo. 2 Mi fing thinlung a hawi, a ding lamah, Mi a thinlung erawh a vei lamah. 3 A ni tak e, mi â chu tual a lên laiin A hriatnain a tlin lo va, Mi tin hnênah, “A â a ni,” a ti zêl ṭhîn. 4 Rorêltu thin thawk mah sela, nangma chungah, I hmun kalsan suh ang che; Lungnih lohnate a tireh, zâwldawhnain. 5 Ni hnuaia ka hmuh ṭhin thil ṭha lo a awm, Rorêltua lo chhuak thiltih dik lo ang: 6 Mi â hmun sângahte daha, Mi hausa hmun hniama an ṭhut te hi. 7 Chhiahhlawh ka hmu, sakawr chungah, Hotu a kal kêin, chhiahhlawh angin. 8 Hum laitu chu a hum laihah a tla ang; Hungna tâwn tlangtu a chu ang, rûlin. 9 Lung lai chhuaktu a inhliam ang; Thing ektu tân hlauhthâwn a awm. 10 Thîr a bila, miin a tah hriam loh chuan Tharum a ngai lehzual ang; Mahse, a sâwt ber mai, finna, hlawhtlin nân. 11 A chuk mai chuan rûlin, dawi ât hmain, Dawi ât thiam sâwtna a awm hlei nêm. 12 Mi fing kamchhuak thu zawng a hlu, Mi a hmui erawh chuan amah a dawlh zo vang; 13 A kamchhuak thu bul chu âtna a ni sa a, A kamchhuak tâwpna chu âtna pawi khawih chi a ni. 14 Thu a tuitam ṭhîn, mi â chuan. Miin a hre lo, thil lo awm tûr chu; Tu nge hrilh thei, mi hnu lama thil lo awm tûr? 15 Thawh rimnain a intichau ṭhîn, mi â chu, Khawpui kalkawng pawh a hre lo! 16 I chung a pik e, nang ram, lal naupang leh Hotute, zînga ruaiṭheh ṭhîn neitu! 17 I nihlawh e, nang ram, lal chu lal chi fapa leh Hotute, ruih nân ni lo, chakna tûra hun dik taka ei ṭhîn neitu! 18 Zawmthâwt vângin a sawp in chung, Kut dâwngdah vângin a far. 19 Ruai siam a ni, hlimhlawp atân, Uain chu nun tihnawm nân; Tangkain engkim a si thlu. 20 Lalber chu lawh suh la, ânchhia, i rilru pawhin; Ânchhia lawh suh, mi hausa chu, i khumlaizâwlah pawh; Chunglêng savaten i aw chu an pu darh ang a, Thla neiten chûng chu an hril mai ang.
Mi fing tih dân
1 I chhang paih la, tui chungah chuan, I hmu leh dâwn si, ni rei hnuah. 2 Chan tûr pe la, mi pasarih, pariat hnênah, I hre si lo, lei chungah hian thil ṭha lo lo tla tûr chu. 3 Tui a pai chuan chhûmin, a intiruak ṭhîn, lei chungah; Thing a tlûk chuan chhim hawi emaw, hmâr hawi emaw, A awm ngei ang thing chu, a tlûk hmunah. 4 Thli pawisatuin chi a tuh lâwng, Chhûm enthlatuin a seng hek lo vang. 5 Thli kalkawng chu i hre lo va, Hmeichhe pum chhûnga nau ruh ṭhan dân pawh i hre hek lo, Chutiang bawkin Pathian engkim titu thiltih chu i hre lo. 6 Zîngah i chi tuh la, tlaiah i kut sûm suh; I hre si lo, a ṭhang ṭha tûr khawii nge, Hei hi nge, kha kha nge, an ṭha ve ve dâwn. 7 A nuam ngei mai tak e, êng chu, Mit tân pawh ni hmuh a ṭha e; 8 A ni, mi kum tam tak a dam chuanin, Hêng zawngah hian lâwm rawh se; Amaherawhchu, hre reng sela thimna nite, An tam hle mai dâwn si a. Thil lo thleng zawng zawng hi engmahlo mai a lo ni.
Ṭhalaite hnêna thurâwn
9 Ṭhalaite u, in ṭhat lai chên ula, In la naupan viau lai hian hlim rawh u; In thinlung duh zâwng chu zâwm ula, In mitin a hmuh châk zâwng nên chuan; Amaherawhchu, chûngah chuan Pathianin in chungah Ro a rêl dâwn tih hre reng ang che u. 10 Eng mah engto nei suh ula, In pang tinatu awm hek suh se, In ṭhat lai hun a rei dâwn lo.
1 I vânglai hian i Siamtu hre reng rawh - Ni ṭha lote a lo thlen hma leh, “Lâwmna rêng rêng ka nei lo ve,” I tihna tûr kumte a lo hnaih hma hian: 2 Ni te, êng te, thla te, arsite a thim hma leh Ruah hnua chhûm a lo kîr leh hma hian; 3 In vêngtu chu a lo khurha, Mi chakte chu an kaikûna, An tlêm avânga râwt sawmtu nute an bâna, Tukverha dâk nute chu an thima, 4 Kawtthlêra kawngte a inkhâr ni chuan, Râwt sawmna ri a lo chuaia, Sava thâwmah mi a thawha, Zai nu zawng zawngte an lo zuai lai hian; 5 A ni, a sâng chu an hlau va, Kawngah hlauhawm a awm a, Vaiumkhal thing a pâr a, Khau chu hnawksak a ni a, Chakna a bo va, mi chu a chatuan in lamah a hâwngin, Lusûnte chu kawtthlêrah an vâk vêl si a; 6 Tangkaraw zai chu a chaha, Rangkachak berhbu chu a keha, Hlumbêl chu tuikhurah a keha, Tawlailîr chu tuikhuah bulah a tliah hma hian. 7 Vaivut chu a awm angin leiah a chang leh a, Thlarau chu a petu Pathian hnênah a kîr leh a ni. 8 Thuhriltu chuan, “Engmahlo mai mai, Thil zawng zawng hi engmahlo mai a lo ni,” a ti a.
Thu khai khâwmna
9 Tin, a fing chauh pawh ni lovin, Thuhriltu chuan mite hriatna a zirtîr a; a ni, thufing tawi tam tak a ngaihtuah a, a zawng chhuak a, a rem fel a. 10 Thuhriltu chuan thu pawm tlâk hmu tûrin a zawng a, tlang taka ziak, thutak thute chu. 11 Mi fing thu chu berâmputen ran khalh nâna an hman tiang zum ang a ni a, thufing lâwr khâwm chu thîr kilhna khen bûr tlat anga nghet a ni. 12 Chu chauh pawh ni lovin, hêngah hian, ka fapa, zilhin awm ta che. Lehkhabu tam tak siam hi tâwpintai a awm lo ve, nasa taka zir pawh hi tisa chauhna mai a ni. 13 Hêng thu zawng zawng khaikhâwmna hi i ngaithla teh ang: Pathian ṭih la, a thupêkte vawng rawh; hei hi mihring zawng zawng tih tûr chu a ni mai. 14 Pathian chuan thiltih zawng zawng chungah ro a la rêl dâwn si a, thil inthup engkim, a chhia emaw, a ṭha emawte pawh, tih hi.
1 Hla thlan khâwmte, Solomona phuah chu.
Hla pakhatna
Nula
2 Min fâwp rawh se, a hmuia fawhnate chuan, Uain hnehin a ṭha si, i hmangaihna. 3 I hriak hnawih mi chuan a nei, rim ṭha tak mai; Rimtui bun chhuah ang a ni e, i hming zawng; Chu vâng chuan an hmangaih che, nulaten. 4 Min zai langin, i hniakhnung kan ûm ang che. Min hruai lût ta, lal chuan a pindan chhûngah. Nangma tâwnah kan hlimin kan lâwm ang a, Kan hril zêl ang, i hmangaihna, uain hnehin. An ngaina takzet che a ni e. 5 Ka hâng na a, ka nalh a nia, Aw Jerusalem fanute u, Kedar puan inte leh Solomona puanzârte angin. 6 Ka han deuh avângin mi iai suh u, Ni sâin min em vâng a ni e. Ka nu fapate ka chungah thinurin Grêp huan vêngah mi siam ta a, Mahni huan erawh ka vêng si lo. 7 Min hrilh rawh, aw nang ka hmangaih chuan, I ran rual khawiah nge i châwma, Chhûn laia i chawlhtîr ṭhinna chu. Engah nge kei ka vah ka vah ang, I ṭhiante ran rual sîrah chuan?
Tlangvâl
8 I hriat loh chuan, aw nang hmeichhia alaia mawi ber, Ran rual hniakhnungah chuan kal ta la, I kêltête châwm la, berâmpute puan in sîrah chuan. 9 Ka khaikhin thîn che, aw ka hmangaih, Pharaoa tawlailîr sakawrlâ nên chuan. 10 A nalh mang e, i biang, bahsam phiar mawi nên, I nghâwnga lunghlu hruite nên chuan. 11 Rangkachak ṭhi hrui kan siam ang che, Tangkaraw bel mawi neiin.
Nula
12 Ṭhutna hmuna lalber awm laiin Ka nard rimtui chu a lêng chhuak e. 13 Ka duh tak chu ka tân murra têl a ni, Ka ṭânglaia châm ang hi. 14 Ka duh tak chu ka tân henna pâr bâwr ang, En-gedi grêp huana mi chu. 15 Ngai teh, i mawi e, ka hmangaih, ngai teh, i mawi e; I mit ṭhuro ang mai a ni e. 16 Ngai teh, i mawi e, ka duh tak, a ni, lungtiawi! Kan khum pawh a hring reng e. 17 Kan in khanchhukte chu sidar thing, Kan inchhunte fâr thing lo ni e.
1 Ka lo ni e, Saron rose pâr leh phaizâwla lili.
Tlangvâl
2 Hling zînga lili ang hi Ka hmangaih chu a ni, lanute zîngah.
Nula
3 Ngaw hnuai thing zînga apple thing ang Ka duh tak chu a ni, tlangvâlte zîngah. A hlimah chuan ka ṭhu, nuam takin, A rah chu ka tân a thlum ngei e. 4 Ruai ṭheh inah chuan kei mi hruai a, Ka chunga a puan zâr chu hmangaihna. 5 Grêp thei chhanga mi tungnungin Mi tiharh teh u, apple theiin, Hmangaihnaah ka uai zo ta e. 6 A kut vei lam chu lukhamin, A kut ding lamin mi pawm teh se! 7 Ka ngên tlat che u, aw Jerusalem fanute, Saza leh ramzukpui chhâlin, Hmangaihna chu chawk thova tiharh lo tûrin; Amahin a duh hma chuan.
Hla pahnihna
Nula
8 Ka duh tak aw chu, ngai rawh, a lo kal e, Tlângah zuang ṭumin mualah a tualchai e. 9 Ka duh tak chuan a ang, saza emaw zuktuai emaw. Ngai rawh, a ding reng kan bang phênah, A rawn bih kha tukverhahte chuan, Zâwngdaikalh âwngah a inlan e. 10 Ka duh tak chuan heti hian mi ti a:
Tlangvâl
“Tho la, ka hmangaih, ka enchimloh, lo kal ta che, 11 En teh, thlasik a ral a, Ruahtui a kangin a kiang ta si; 12 Leian pangpârte an lo lang a, Sîrva zai vâwr hun a lo thleng a, ṭhuva awrâwl hriat a ni ta, kan ramah hian; 13 Theipui kûngin rah a chhuah a. Grêp hruite an lo pâr vul, An rimtuinate lêng chhuakin. Tho la, ka hmangaih, ka enchimloh, lo kal ta che. 14 Aw ka ṭhuva, lungpui keh kâra mi, Khâm chhawrdawha awm, I hmêl min hmuhtîr la, i aw min hriattîr ta che; I aw a mawi a, i hmêl lah a duhawm si. 15 Min mansak ula, sihalte, sihalnotête, Grêp huan tichhetute chu, Kan grêp huante a pâr vul mêk si,” tiin.
Nula
16 Ka duh tak chu ka ta a ni, kei pawh a ta ka ni e. A ran rual tlattîr ṭhîn kha, lili pâr zîngah. 17 Ni a nêma hlim a her bo hma loh chuan, Ka duh tak, Bether tlâng saza, zuktuai ang chang rawh.
1 Zânan laikhum chungah ka dâwn ṭhîn, ka hmangaih chu; Ka zawng ruai e, ka tawng si lo ve. 2 Ka tho vang a, khawpui daikâwm ka vêl ang, Kawtthlêrah leh mual laiahte chuan; Ka zawng zêl dâwn e, ka hmangaih chu. Ka zawng ruai e, ka tawng si lo ve. 3 Khawpui vênga kal hualtuten mi hmu a; “Ka hmangaih chu in hmu emaw?” ka ti a. 4 Anmahni ka pelh hnu lawkah chuan, Ka hmu ta e, ka hmangaih chu. Ka vuan ta a, ka kaltîr leh tawh rua lo, Ka nu inah, mi paitu pindan chhûngah, Amah ka hruai luh hma loh zawng. 5 Ka ngên tlat che u, aw Jerusalem fanute, Saza leh ramzukpui chhâlin, Hmangaihna chu chawk thova tiharh lo tûrin, Amahin a duh hma chuan.
Hla pathumna
Nula
6 Eng nge ni hei, meikhu ding ang thlalêr ata lo kal hi, Murra leh beraw rimtui nam rum rum, Sumdâwngtu paudar tinrêng rim chenin? 7 Ngai rawh, Solomona zâwnna tawlai chu, Râlhrât sawmrukin an din hual e, Israel râlhrât zînga mite chuan. 8 An zain khandaih an vawng, do thiam an ni; Mi tinin khandaih an pai, an khêl chungah, Zântianga hlauhawm vâng hian. 9 Lal Solomonan zâwn bâwm a tân a insiam, Lebanon tlâng thing hmanrua ngeiin; 10 A bante a siam a, tangkaruain, A nghenchhan chu rangkachakin, A ṭhutthlêng chu puan sendukin; A chhûng lam chu an rem, duhawm takin, Jerusalem fanute chuan. 11 Kal chhuak ula, aw Zion fanute u, Lal Solomona chu en ru; A khumtîr kha, a nun lallukhum, A nupui neih ni, a thinlung lâwmna niah chuan.
Tlangvâl
1 Ngai teh, i mawi e, ka hmangaih, ngai teh, i mawi e; Ṭhuro an iang e, i mitten, i hmai khuhna phênah chuan. I sam chu kêl rual, Gilead tlâng panga bawk ang a ni. 2 I hâte chu berâmpui rual hmul meh hlim, Bual zawh hlim ang chu a ni, An zaa kawppui nei ṭheuhvin, Nei lo rêng an awm lo, an zîngah. 3 I hmuiten an iang e, sâpsen zai, I kâ pawh a duhawm ngei e. I biangten pawmgranet phel an iang e, I hmai khuhna phênah chuan. 4 I nghâwngin a iang e, Davida kulhbîng sâng, Râlthuam dah nâna siam chu, Phaw sângkhat an bâng e, tah chuan, Râlhrâtte phaw ṭheuh ngei chu. 5 I hnute pahnih hian a ang, no pahnih, Sazain phîr a neih, lili pâr zînga tlate chu. 6 Ni a nêma, hlim a her bo hma loh chuan, Ka kal nâng e, murra tlâng leh Beraw mual lamah chuanin. 7 I mawi zo ngei e, ka hmangaih, Nangmahah demawm a awm lo ve. 8 Lebanon aṭangin lo kal ang che, ka ṭhiannu, ka hnênah, Lebanon aṭangin ka hnênah. Amana chhîpah chuan rawn chuan la; Senir leh Hermon chhîp aṭang chuan, Sakeibaknei pûk aṭang chuanin, Keitête tlâng aṭang pawhin. 9 Ka thinlung i hneh zo ta, ka laina, ka ṭhiannu, Ka thinlung i hneh zo ta, i mit sîr zai vawi khatin, I nghâwng thlun pakhat nên chuan. 10 A mawi mang e, i hmangaihna, ka laina, ka ṭhiannu! Uain hnehin i hmangaihna a ṭhat zâwkzia mai tak chu! Rimtui zawng zawng hnehin a tui zâwk i hriak rim zawng. 11 Aw ka ṭhiannu, i hmuiah a far e, khuaipui zû; I ṭawngkamah khawizû, hnutetui; I silhfên rim Lebanon rim ang. 12 Huan humhalh tlat a ni, ka laina, ka ṭhiannu chu, Tuihna humhalh tlat, tuikhur hauh tlat. 13 Pawmgranet hmun ang a ni, i duhawmzia, Rah ṭha ber ber chhuak ṭhîn te, 14 Henna leh nard nên, nard leh safron nên, Fu rimtui leh thakthîng, beraw thing chi tinrêngte nên, Murra leh aloe rimtui ropui zawng nên pawh. 15 Nang chu huan tuikhur, tui nung chhunchhuah chu i ni, Luite lo luang Lebanon tlângan.
Nula
16 Harh la, aw hmâr thli, lo kal rawh, nang chhim thli, Ka huan hi rawn chhêm ula, a rimtui lêng chhuak rawh se. Ka duh tak chu a huanah lo lût sela, A rah ṭha ber ber chu ei rawh se.
Tlangvâl
1 Ka huanah chuan ka lo lût a, ka laina, ka ṭhiannu; Ka murra ka rimtuite nên ka lâwr khâwm a, Ka khawizu chu a thlâr chawpin ka ei a, Ka uain ka in a, hnutetui nên.
Nulaho
Ei rawh u, aw ṭhiante u, in rawh u; A ni, in ṭeuh mai rawh u, aw ka duh takte u.
Hla palina
Nula
2 Ka muhîl reng, ka thinlung erawh chu a harh, Chu, ka duh takin a rawn kik chu!
Tlangvâl
“Min hawn rawh, ka laina, ka hmangaih, Ka ṭhuro, ka sawisêl bo, ka lu a huh zo si a, daiin, Ka sam chhâwllêng, zân dai farte chuan,” tiin.
Nula
3 Ka kawr ka hlîp ta, engah nge ka hâk ang? Ka ke ka sil ta, engah nge ka tihbawlhhlawh ang? 4 Ka duh tak chuan a rawn zen, kawngkhâr âwngah, Amah ka ngai êm e - lungrilah. 5 Ka duh tak kawng hawn tûrin ka tho; Tin, ka kut chu a far a, murra-in, Murra a luang ka zungṭangahte, Kawng kalh hûmna chungah chuan. 6 Ka duh tak tân chuan ka hawng ta a; Mahse, ka duh tak lâm ang lêt e. A ṭawng ka thlâin a tuar zo lo. Ka zawng ruai e, ka tawng si lo ve, Ka au chiam a, mi chhâng si lo va. 7 Khawpui vênga kal hualtuten mi hmu a, Mi vua a, mi hliam ta a, Kulh vêngtuten an hlîp e, ka silhpuan. 8 Ka ngên tlat che u, aw Jerusalem fanute u, Ka duh tak chu in hmuh chuanin Hmangaihnaah ka uai zo tih rawn hrilh r’u.
Nulaho
9 Mi aiin i duh tak chu eng nge a nih bîk le, Aw hmeichhia alaia mawi ber? Mi aiin i duh tak chu eng nge a nih bîk, Chuti êma min ngen le?
Nula
10 Ka duh tak chu a ṭha sen siar a, Sângsâwm zîngah a chungnung ber e. 11 A luin a iang e, rangkachak thianghlim, A sam kir chu dum zên e, lianâk iangin. 12 A mitte chu luite tui kam ṭhuro ang, Hnutetuia inbuala fel taka ṭhu chu. 13 A biangte chu hlo rimtui hmun, rimtui chhuah ṭhîn ang a ni. A hmuite chu lili pâr ang, murra tuiin a far e. 14 A kutzungte rangkachak tlâwn, topaz lung phûm ṭhiau ang. A sakruang chu saingho, sapphir-a chei ang a ni. 15 A ke châwn chu lung vâr tlâwn, rangkachak nghahchhana hûn ang. A lan dânin Lebanon tlângpui iang e, Sidar thing ṭha chungnung ang. 16 A kam a thlum ber mai, a ni, a duhawm famkim. Hei hi ka duh tak chu a ni, hei hi ka ṭhian a ni, Aw Jerusalem fanute u!
Nulaho
1 I duh tak chu khawiah nge a kal tâk, Aw hmeichhia alaia mawi ber? Khawi lamah nge i duh tak lâm ang a lêt, Keinin kan zawnpui theih nân che?
Nula
2 Ka duh tak chu a chhuk ta, a huan hlo rimtui hmunah chuan, Huanah a ran rual tlattîr leh A lili pâr lâwr tûrin. 3 Ka duh tak ta chu ka ni a, ka duh tak chu ka ta a ni. A ran rual tlattîr ṭhîn kha, lili pâr zîngah.
Hla pangana
Tlangvâl
4 I mawi mang e, aw ka duh tak, Tirza iangin, I duhawm e, Jerusalem khawpui ang; Puanzâr khai pheisen rual ang, ka zuam lo che. 5 I mit la tawh la, ka lakan hian, Min hmin tawh êm mai si hi. I bahsamin a iang kêlchal hmul, I sam chu kêl rual, Gilead tlâng panga bawk ang a ni. 6 I hate chu berâmpui rual bual zawh hlim ang chu a ni; An zaa kawppui nei ṭheuhvin, Nei lo rêng an awm lo, an zîngah. 7 I biangten pawmgranet phel an iang e, I hmai khuhna phênah chuan. 8 Lalnu sawmruk leh hmei sawmriat an awm a, Nula chhiar sên loh nên. 9 Ka ṭhuro zawng pakhat a ni, ka sawisêl bovi chu, A nu fanu neih chhun tê, a hringtunu en chim loh chu. Hmeichhiaten amah an hmu a, nihlawh an ti; A ni, lalnu leh hmeite pawhin an fak ṭhîn. 10 Tu a ni nge zîng êng mawi ang lo lang kha, Chhawrthlapui ianga mawi leh tûrni ianga chianga, Puanzâr khai pheisen rual ang, ka zuam loh chu? 11 Thei pil sak hmunah ka zuk kal a, Ruama thil chawrno en tûr leh Grêp a kuhmûm emaw, pawmgranet a pâr emaw en tûrin. 12 Ammi-nadib tawlailîrahte Ka hriat loh hlânin mi lo dah, ka châkna chuan.
Nulaho
13 Kîr rawh, kîr rawh, aw nang Sulam mi; Kîr rawh, kîr rawh, kan thlîr theih nân che.
Nula
Engah nge Sulam mi i thlîr le, Mahanaim lâma lâm ang êmin?
Tlangvâl
1 Pheikhawk bun chunga i pên mawizia, Aw mi ropui fanu! I mal mûmin lunghlu iang e, Thawktu themthiam tak kutchhuak chu. 2 I laibu lah berhbu hûn, Uain pawlh sa, kiam ngai lo ang hian. I pum chuan a iang e, buh vûm, Lili pâr hmuna chhûn chu. 3 I hnute pahnih hian a ang, no pahnih, Sazain phîr a neih kha. 4 I nghâwngin a iang a ni, saingho kulhbîng sâng, I mitten Hesbon-a dîlte, Bath-rabbim luhna kianga mi ang e. I hnârin a iang a ni, Lebanon kulhbîng, Damaska lam hawi chu. 5 I thlungluin a iang Karmel tlâng, I bahsam pawh a dum ziar e; A thlai mawi lalin a tuar zo lo. 6 I mawizia leh lung i tihawizia, Aw hmangaih, lâwmnate zîngah! 7 I tlâwntlai hian tûm thing a iang e, I hnutêten a rah bâwr a ang. 8 “Tûm thingah chuan ka lâwn chho vang a, A rah ka khawih ang,” ka lo ti a. I hnutêin grêp bâwr ang se, I thaw rimin apple ang bawk se, 9 I kam uain ṭha mi ang mai chu.
Nula
Ka duh tak tân luang thla dêl dêl se, Muhîlte hmuiah luang lût rawh se. 10 Ka duh tak ta chu ka ni a, Keima lamah a thinlai a châm reng e. 11 Haw teh, ka duh tak, ramah chhuak ila, Thingtlâng khuaahte i riak teh ang. 12 Zîngah grêp huanah kal ila, I en dûn ang grêp, kuhmûmin a vul emaw, Pawmgranet pawh a pâr emaw. Tah chuan ka hlân ang che, ka hmangaihna. 13 Zâwlaidi hlovin rimtui a chhuah a, Kan kawngka bulah thei ṭha tinrêng A awm rui e, a hlui leh thar, I tân ka khêkkhal, aw ka duh tak.
1 Aw ka nuṭa, ka nu hnutê hne ve ni teh la chuan, Pâwna ka hmuh che pawhin ka fâwp ang chia; Tu mân min dem lo vang. 2 Ka hruai ang chia, ka nu inah ka hruai lût ang chia, Anin mi lo zirtîr tûr. In tûr rimtui ka intîr ang chia, Ka pawmgranet tui ngei chu. 3 A kut vei lam chu lukhamin A kut ding lamin mi pawm teh se! 4 Ka ngên tlat che u, aw Jerusalem fanute u, Hmangaihna chu chawk thova tiharh lo tûrin, Amahin a duh hma chuan.
Hla parukna
Nulaho
5 Tu nge ni hei, thlalêr ata lo chhova, A duh taka rinchhani hi?
Nula
Apple thing hnuaiah ka tiharh chia. I nun a veinaah che khân, Tah chuan a hringtu che chuan a vei che kha. 6 Min dah ta che, i ṭângah valṭhi angin, I bânah bânbun iangin; Thihna angin a chak si, hmangaihna hi, Thîkna chu Seol angin a nunrâwng; A alh chhuak chu meialh chhuak a lo ni a, Meialh nasa tak mai chu. 7 Tui tam takin a tidai thei lo, hmangaihna zawng, Tuilianin a chîm pil thei hek lo. Miin a in ro zawng zawng hmangaihna atan a pêk zawh chuan Hmuhsitin a awm ngei ang.
Nula nuṭate
8 Farnu tê tak tê chu kan nei a, A la um khêl lo, a hnutê pawh. Eng nge kan tih ang, kan farnu tân, Ama tân biahthu an hlan ni chuan? 9 Amah chu kulh bang lo ni se, Tangkaraw kulhbîng kan siamsak ang; Amah chu kawngka lo ni sela, Sidar thing phelin kan tuam leh ang.
Nula
10 Ka ni alâwm, kulh bang, Ka hnutêin a ang, kulhbîng sângte; A mit hmuhah chuan muanna neitu ka lo ni.
Tlangvâl
11 Solomonan a nei grêp huan, Baal-hamon-ah; Huanpute hnênah chuan grêp huan chu a kawltîr a. Mi tinin thei man tangkaraw sângkhat lâk tûr an nei ṭheuh. 12 Ka grêp huan chu ka ta liau liau, keima tân ngei a ni; Aw Solomon, nang chuan sâng i nei a, Huanpute chuan zahnih. 13 Nang, huanahte chêng ṭhînnu, ṭhiante chuan i aw an ngaithla a - Min ngaihthlâktîr ve ta che.
Nula
14 Hmanhmawh ta che, ka duh tak, Rimtui tlânga saza emaw, zuktuai emaw ang chang rawh.
1 Amoza fapa Isaian Juda-ho lal Uzia te, Jothama te, Ahaza te, Hezekia te lal laia, Juda-ho leh Jerusalem chungchâng thua inlârna a hmuh chu.
Pathianin a mite a dem
2 Aw vânte u, ngaithla ula; aw leilung, beng chhi rawh; LALPA chuan thu a sawi e: “Fanaute ka châwmin ka tiseilian a, ka chungah an hel ta si a. 3 Bâwngpain a neitu a hria a, sabengtung pawhin a pu chaw pêkna a hre bawk a; Israel-ho erawh chuan an hre si lo va, ka mite chuan an ngaihtuah lo ve,” tiin. 4 A, hnam sual, khawlohnaa khat, thil ṭha lo tih chîng, hnam nikhualo an ni. LALPA chu an kalsan a, Israel-ho Mi Thianghlima chu an hmusit a, intihrangin an hnungtawlh ta. 5 Engati nge in hel zual deuh deuhva, vuaka in la awm cheu ni le? Lu chu a pumin a nâ a, thinlung pawh chu a pumin a chau ta. 6 Kephah hnuai aṭanga lu thleng zakin dam lai rêng rêng a awm lo; pem te, vuak duk chur te, pân hnai la te hlîr a ni; chûng chu an hmet ping lo va, an tuam hek lo va, sahriak an hnawih hek lo. 7 In ram chu a ṭiau zo va, in khuate chu meiin a kâng zo va; in ram chu ram dang miten in mit hmuhah an ei zo va, ram dang mite tihchhiat angin a chhe zo ta. 8 Zion fanu chu grêp huana vênbûk ang leh, fanghma huana thlâm ang leh, khawpui hual vêl anga hnutchhiahin a awm ta. 9 Sipaihote LALPA chuan tihboral bâng tlêm tê min lo zuahsak suh sela chuan, Sodom ang khân kan awm daih tawh ang a, Gomorra ang mai khân kan awm tawh ang. 10 Sodom rorêltute u, LALPA thu hi hre rawh u; Gomorra mite u, kan Pathian dân thu-ah hian beng chhi rawh u. 11 LALPA chuan, “In inthawina zozai hi ka tân eng nge a ṭangkaina awm? Berâmpa hâlrala hlante leh ran châwm thaute thau chu ka hnê ta; bâwngpate leh berâmnote leh kêlpate thisenah pawh ka lâwm lo ve. 12 Ka hmaa inlan tûra in lo kal hian, ka biak in hung chhûng kawtlai rah hi tuin nge phût che u ni? 13 Thil pêk mai maite chu rawn keng tawh suh u; englo rimtui chu ka tân thil tenawm tak a ni. Thla thar te, Chawlhni te, inkhâwmpuia insâwm khâwm te mai mai chu ka ngaithei tawp lo mai; khawlohna a ni, inkhâwm ropui tak pawh hi. 14 In thla tharte leh in hun bi nei kûtte chu ka rilru chuan a hua a ni; ka tân thil hnawksak tak a ni, tuar ka ning tawh e. 15 Tichuan, in kut in phar hunah pawh in lakah ka mit ka hup tawh ang a; a ni, vawi tam tak in ṭawngṭai hunah pawh ka ngaithla tawh lo vang. In kutte chu thisenin a khat si a. 16 Insil ula, intifai rawh u; ka mit hmuh phâk lohvah in thiltihte hi a sualna chu dah bo rawh u; sual tih hi bâng tawh ula, 17 thil ṭha tih zir tawh rawh u; rorêlna fel zawng ula, hnehchhiahna tuarte chu ṭanpui ula; pa nei lote chu rorêlsak ula, hmeithaite chu sawipui rawh u,” a tih hi. 18 LALPA chuan, “Hawh teh u, i ngaihtuah tlâng teh ang u! In sualte chu senlâr angin awm tawh mah sela, vûr angin a vâr ang; senduk angin sen tawh mah sela, berâm hmul angin a awm ang. 19 Tihnuam tak leh thu awih taka in awm chuan, in rama thil ṭhate hi in ei ang; 20 nimahsela, in duh lohva in hel chuan, khandaihin a ei zo vang che u,” a ti a; LALPA ka chuan chu chu a sawi tawh a ni.
Khawpui sual
21 Engtizia nge khawpui rinawm tak chu nawhchizuarah a lo chan tâk le aw! Rorêl felnaa khatnu a nih ṭhin vei nên! Amahah chuan felna a awm ṭhîn a, tûnah erawh chuan tualthattute an awm tâk zâwk hi. 22 I tangkarua chu a êkchhiaah a lo chang ta a, i uain chu tui nên pawlh a ni ta. 23 I mi liante chu hel hmang, rûkrute ṭhian an ni a; mi tinin tham an duh a, lâwmman an ûm ṭhîn. Pa nei lote ro an rêlsak ṭhîn lo va, hmeithaite thu lah an hnênah a thleng ngai hek lo. 24 Chuvângin, LALPA, Sipaihote LALPA, Israel-ho Mi Chaka chuan heti hian a sawi a: “A! Mi dotute hi ka tifikiang mai ang a, ka hmêlmate chungah phuba ka la ang. 25 I chungah ka kut ka thlâk leh ang a, i êkchhia chu fai takin ka tibo vang a, i suan zawng zawng chu ka la bo vek ang. 26 I chhûnga rorêltute chu a tîra an awm ang khân ka awmtîr leh ang a, i chhûnga remruattute chu a hmasa bera an awm ang khân ka awmtîr leh bawk ang. Chumi hnuah chuan ‘Felna Khawpui, Khawpui Rinawm Tak’ an la ti ang che.” 27 Zion chu rorêlna fela chhanchhuah a ni tawh ang a, a chhûnga mi hawi kîr lehte pawh felnaa chhanchhuah an ni ang. 28 Nimahsela, bawhchhetute leh mi sualte tihchhiatna chu a awm rual ang a, LALPA kalsantute pawh tihboralin an awm ang. 29 “In sasaw duh takte chu in zahpui tawhin, in huan thlante avâng chuan zak takin in awm dâwn a ni. 30 Sasua a hnah uai tawh leh huan tui hmu lo ang mai hi in ni dâwn si a. 31 Tin, mi chak tak chu zîza ṭawm ang a ni tawh ang a, a hnathawh chu meisî ang a ni ang; tichuan, an kâng dûn ang a, tu mân an timit lo vang,” tiin.
Kumkhuaa inremna
1 Amoza fapa Isaian Juda-ho leh Jerusalem chungchâng thu a hmuh chu. 2 Ni hnuhnûngahte chuan heti hi a ni ang a, LALPA in awmna tlâng chu tlâng lian chungahte chuan tihnghehin a awm ang a, tlâng tête chungah chuan chawisânin a awm bawk ang; chutah chuan hnam tinrêngte chu an kal nguah nguah ang. 3 Tin, chi tam takte chu an kal ang a, “Lo haw ula, LALPA tlângah, Jakoba Pathian inah chuan i chho vang u; tichuan, anin a kawng chanchinte chu min zirtîr ang a, a kalkawngahte chuan kan kal ang,” an ti ang. Zion aṭang chuan dân thu chu a lo chhuak dâwn si a, LALPA thu chu Jerusalem aṭangin a lo chhuak dâwn a ni. 4 Ani chuan hnam tin kârah ro a rêl ang a, chi tam tak pawh a zilhhau vang; an khandaihte chu leilehna hmâwr zumahte an chher ang a, an feite chu theikung ah chhumna chem kawmahte an chher ang; hnam dangin hnam dang chungah khandaih an lek tawh lo vang a, indo dân pawh an zir tawh hek lo vang.
Chapo tihchhiat tûr
5 Aw Jakoba chhûngte u, lo haw ula, LALPA êngah i lêng ang u. 6 Khawchhak lam tih dân te, Philistia dawite an chîng a, ram dang mite tih dânte an zawm tâk avângin i mi Jakoba chhûngte chu i kalsan ta a. 7 An ram chu tangkarua leh rangkachakin a khat a, an sumte chu chhiar sên rual a ni lo; an ram chu sakawrin a khat a, an tawlailîrte chu chhiar sên rual a ni hek lo. 8 An ram chu milemin a khat a; anmahni kuta thawh chhuah, anmahni zungṭangtea siam chu an be ṭhîn. 9 Mite chu an kûn a, an tlâwm bawk a; nimahsela, anni chu ngaidam suh ang che. 10 LALPA hlauhawmna leh a mawina ropuina pumpelh tûrin lungpui kârah te chuan lût ula, vaivutah biru rawh u. 11 Mihring induhnate chu tihtlâwmin a awm ang a, mite chapona chu tihhniamin a awm ang, chumi niah chuan LALPA chauh chu chawisânin a awm ang. 12 Sipaihote LALPA ni chu inngaisâng leh chapo zawng zawng chungah leh chawisâna awm zawng zawng chungah chuan a la awm dâwn si a; tichuan, tihtlâwmin an awm ang; 13 Lebanon tlânga sidar thing sâng tak leh chawisâna awmte zawng zawng chungah te, Basan rama sasua zawng zawng chungah te, 14 tlâng lian sâng tak chungah te, tlâng tê chawisâna awm zawng zawng chungah te, 15 in sâng, sâng tak zawng zawng chungah te, kulh tlângpui bang nei zawng zawng chungah te, 16 Tarsis lawng lian zawng zawng chungah te, thil lem duhawm zawng zawng chungah te pawh a la awm ang. 17 Mihring induhnate chu tihhniamin a awm ang a, mite chapona chu tihtlâwmin a awm ang; chumi niah chuan LALPA chauh chu chawisânin a awm ang. 18 Tin, milemte chu an boral daih ang. 19 Tin, lei hi nasa tak taka tinghîng tûra a thawh hunah, LALPA hlauhawmna lak aṭang leh a mawina ropuina lak aṭang chuan, mite chu lungpui pûkahte leh lei kuaahte chuan an lût ang. 20 Chumi niah chuan miten an tangkaraw milemte leh an rangkachak milem te, biak tûra an siamte chu, buikelek hnênahte leh bâk hnênahte chuan an paih ang a; 21 lei hi nasa taka tinghîng tûra a thawh hunah, LALPA hlauhawmna lak aṭang leh a mawina ropuina lak aṭang chuan, lungpui pûkahte leh khâm lungpui khi-ahte chuan an lût ang. 22 An hnâr chauhva thaw awm mihring rin hi bânsan tawh rawh u; eng kawngah nge rin tlâk an nih tehlul ni?
Jerusalem mumal nei lo tûr
1 Ngai teh u, LALPA, sipaihote LALPA chuan, Jerusalem hnên ata leh Juda-ho hnên ata chu an rin pui leh an rin ber, an rin pui chaw zawng zawng leh an rin ber tui zawng zawng chu an lâksak mêk a nih hi; 2 mi chak leh indo thiamte nên, rorêltu leh, zâwlnei leh, aienthiam leh upate nên; 3 sawmnga hotu leh, mi zahawm leh, remruattu leh, themthiam leh aikaihthiamte nên. 4 Tichuan, an mi liantea awm tûrin naupangte ka pe ang a, nausênten an chungah ro an rêl ang. 5 Tichuan, mite chu hnehchhiahin an awm ang, mi tin inhnehchhiahin an awm ang a, mi tin mahni ṭhenawmte nên inhnehchhiahin an awm ang; naupang chu upa chungah chapo takin an awm ang a, mi chhe tê pawh mi zahawm chungah chapo takin an awm bawk ang. 6 Miin a unau a pa inah chelhin, “Nang chuan silhfên i nei a, kan rorêltuah awm la, he chhiatna hi i kutah awm rawh se,” a tih hunah, 7 chumi hunah chuan ani chuan a aw a chhuah ang a, “Kei zawng siamṭhatuah ka awm dâwn lo ve, ka inah ei tûr a awm si lo va, silhfên a awm hek lo; mite rorêltuah mi siam lo vang,” tiin. 8 A ropuina hmusita an ṭawng leh thiltihte chu LALPA do zâwng a nih avângin Jerusalem chu a chhe zo va. Juda-ho chu an tlu zo ta a ni. 9 An hmêl lan dânin anmahni a hêk chawp a, an sualna chu Sodom ang maiin an lantîr a; an zêp lo. An nunna chung chu a pik e! Thil ṭha lovin an inthungrûl chawp si a. 10 Mi fel thu-ah chuan, “An la ṭha dâwn,” ti rawh u, an thiltih rahte chu an ei dawn si a. 11 Mi sual chung chu a pik e! An la chhe dâwn a ni, an kuta thiltih thungrulhna chu an hnênah pêk a la ni dâwn si a. 12 Ka mite zawng anmahni hnehchhiahtute hi naupangte an ni a, hmeichhiaten an chungah ro an rêl ta. Aw ka mite u, in hruaitute chuan an hruai sual che u a, in kalna kawngte chu an tichhe ṭhîn.
LALPAN a mite ro a rêl
13 LALPA chu sawipui tûrin a lo ding chhuak a, mite ro rêl tûrin a lo ding ta a. 14 LALPA chuan a mite upaho chungah leh an mi lianho chungah ro a rêl ang; LALPA, sipaihote LALPA chuan, “Nangmahniho hi in ni, grêp huan ei zotute chu; mi retheite laka sum lâk chu in inahte a ni a awm ni. 15 Engtizia nge ka mite chu in nem sâwra, retheite hmai chu in râwt sawm ni?” a ti a.
Jerusalem hmeichhe intiveiho chhiatna tûr
16 Chu lo pawh chu LALPA chuan, “Zion fanute chu chapo taka an awma, dâk âwr âwr leh mi melh hraw hrawa an kala, an kal chu ti awh awha an kala, an kete an pên rîk chhawng chhawng avângin, 17 LALPA chuan Zion fanute chhîpah chuan pân khir a awmtîr ang a, LALPA chuan an zahmawhte pawh a tilang ang,” a ti a. 18 Chumi niah chuan LALPAN an incheimawinate chu a lâksak ang, kebun te, lên lukhum te, nghâwngkawl te chu; 19 bengbeh uai diah diah te, bânbun te, inkhuhna puan te chu; 20 lu cherna te, kebun khaidiat te, kâwnghrên te, rimtui bâwm te, invênna te chu; 21 hming nemna zungbun te, hnâr vuah te chu; 22 kût ni thuamhnaw te, kawrfual te, puan sîn te, iptê te chu; 23 dârthlalang te, puan zai sîn te, diar te, intuam mawina puan te chu. 24 Tin, heti hi a ni ang a, mawsawla rimtui tak aiah thil ṭawih a awm ang a; kâwnghrên aiah hruizên a awm ang a; sam hniar siau aiah lu kawlhna a awm ang a; puan mawi tak aiah saiip puan ven a awm ang a; hmêlṭhat aiah thîr linga deh chhiatna a awm ang. 25 I mite chu khandaiha tihtlûkin an awm ang a, i mi chak takte chu indonaah an tlu ang. 26 A kulh kawngkhârte chu an âwm inchûmin an ṭap ang a; ani chu a ruak ang a, leiah a ṭhu ang.
Jerusalem din leh a ni ang
1 Tin, chumi niah chuan hmeichhe pasarihin mipa pakhat an chelh ang a, “Keimahni chaw kan ei ang a, keimahni silhfênte kan inbel ang e; i hming chauh min puttîr la; kan hmingchhia hi min chhilhsak rawh,” tiin an sawi ang. 2 Chumi niah chuan LALPA pêng chu mawi tak leh ropui takin a awm ang a, Israel-ho la damte tân chuan leia rahte chu ṭha tak leh mawi takin a awm ang. 3-4 Tin, heti hi a ni ang a, LALPAN rorêlna thlarau leh kanna thlarauva Zion fanute bawlhhlawhna chu a sil fai hnu leh, Jerusalem thisen chu a chhûng ata a tlen fai hnu chuan, Zion-a la awm leh Jerusalem-a la awmte chu thianghlim an ti ang, Jerusalem-a la damte zînga hming ziak zawng zawngte chu. 5 Tin, LALPAN Zion tlânga awmna zawng zawng chungah leh, a inkhâwmpuite chungah chuan chhûnah chhûm leh meikhu, zânah meialh êng a siamsak ang. Ropuina zawng zawng chungah chuan englo zâr a awm dâwn si a. 6 Chhûnah ni sa hliahtu atân leh, thlipui leh ruahpui lakah inhumhimna leh, bihrûkna hmun atân bâwktê a ni ang.
Grêp huan hla
1 Ka duh taka thu, grêp huan chungchâng thu chu, ka duh taka tân hlain ka sa teh ang. Ka duh taka chuan tlâng lei ṭha tak maiah grêp huan a nei a; 2 a vêlin lei a lai khuar a, a lungte chu a chhar fai a, grêp hrui ṭha ber mi a phun a, a laiah chuan in sâng a sa a, chutah chuan grêp sâwrna khur pawh a lai a; tin, grêp raha rah tûrin a beisei a; nimahsela, grêp suak maiin a lo rah ta zawk a. 3 Tûnah hian, aw Jerusalem-a awmte leh Juda mite u, khawngaih takin kei leh ka grêp kâra thu hi min ngaihtuahsak teh u khai. 4 Ka grêp huanah hian ka tih tawh ang lo liam kha chuan, a chungah eng nge tih leh chuan tûr lo la awm ta ni le? Eng vângin nge, grêp raha rah tûra ka beisei nên khân, grêp suaka a lo rah mai kha ni le? 5 Tûnah hian ngai teh u, ka grêp huan chunga ka tih tûr chu ka hrilh ang che u: a hlîng pal chu ka la bo vang a, ei zawhin a awm ang; a lung pal chu ka tichim ang a, rah behin a awm ang. 6 Ka tiram vek ang a; sah novin a awm lo vang a, laih phutin a awm hek lo vang; buar leh hnimhlîngneite a ṭo zâwk ang. Chhûmte pawh a chunga ruah rêng rêng sûrtîr lo tûrin thu ka pe bawk ang. 7 Sipaihote LALPA grêp huan chu Israela chhûngte hi an ni a, Juda mite hi a kûng duhawm tak chu an ni si a. Rorêlna fel a beisei a; nimahsela, ngai teh, hnehchhiahna a lo awm ta zâwk a; felna a beisei a; nimahsela, ngai teh, mangang au thâwm a lo awm ta zâwk a ni.
Suahsualna tinrêng hrem tûr
8 Ram lailiah anmahni chauh an awm theihna tûra, mi tel vena hmun rêng rêng awm lo khawp hiala in leh in inzawmtîr zêl leh, lo leh lo inzawmtîr zêl ṭhîntute chung chu a pik e! 9 Sipaihote LALPA chuan ka bengah heti hian a ti, “Tihtakzetin in tam tak, lian tak tak, mawi pui puite chu, luahtu awm lovin a la ram ang. 10 Grêp huan ṭîn sâwm hmunah bath khat chauh a la haw dâwn a, buh chi homer khat tuhin ephah khat chauh a la haw dâwn si a,” tiin. 11 Zu um tûra zîng tak taka thova, uainin a tihruih bûng hma lohva zân rei tak tak thlenga awm ṭhînte chu an chung a pik e! 12 ṭingṭang leh perhkhuangte, khuangtê leh phênglâwngte, uain nên an ruaiṭhehnaahte chuan an awm ṭhîn a; nimahsela, LALPA hnathawh chu an ngaisâng ṭhîn lo va, a kut thiltih chu an ngaihtuah ngai hek lo. 13 Chuvângin, ka mite chu hriatna an neih loh avângin sala hruaiin an awm ta a; an mi zahawmte chu an ril a ṭâm a, an mipuite chu tuihâlin an dangro zo ta. 14 Chuvângin, Seol chuan a duhna chu a lo tizau va, a kâ chu teh rual loh khawpin a âng ta a; an ropuina te, an mipui te, an ropui bûng bûngna te, an zînga lâwm taka awmte nên chuan an lût thla ta duah duah a. 15 Mi tête chu tihkûnin an awm a, mi liante chu tihtlâwmin an awm a, chapo mitte chu tihhniamin a awm ta. 16 Sipaihote LALPA erawh chu rorêlnaa chawisânin a awm ta zâwk a, Pathian, Mi Thianghlim chu felnaa tihthianghlimin a awm ta. 17 Tin, berâmnote chu an tlatna hmuna an tla angin an tla dial dial ang a, mi thau pui pui hmun rama thilte chu vâkvaihoten an ei ang. 18 Bumna hruihruala khawlohna hnûka, tawlailîr hruizêna sualna hnûk chu an chung a pik e! 19 “Kan hmuhna tûrin ti thuai sela, a thiltih tûr chu ti rang rawh se; kan hriat theihna tûrin Israel-ho Mi Thianghlima remruat chu lo hnaiin lo thleng rawh se,” ti ṭhîntute chu. 20 Thil ṭha lo chu thil ṭha tia, thil ṭha chu thil ṭha lo ti ṭhîna, êng chu thima ngaia, thim chu ênga ngai ṭhîna, thil thlum chu thil khâa ngaia, thil khâ chu thil thluma ngai ṭhîntute chu an chung a pik e! 21 Mahni ngaiha fingte leh mahni mit hmuha bengvârte chu an chung a pik e! 22 Uain in kawnga mi chak tak, zu chawhpawlh kawnga thahrui nei mite chu an chung a pik e! 23 Tham ei avânga mi sual thiam chantîr ṭhîna, mi fel felna lâksak ṭhîntute chu. 24 Chuvângin, meialhin buhpâwl a kâng ral duak duak ṭhîn ang leh, hnim ro chu meialha a tlu zawih zawih ṭhîn angin an zung chu ṭawihna angin a awm ang a, an pâr chu vaivut angin a chho chuai chuai ang; sipaihote LALPA dân chu an duh lohva, Israel-ho Mi Thianghlim thu chu an ngaihnêp avângin. 25 Chuvângin, LALPA thin chu a mite chungah a thawk a, a kut chu an chungah a lek a, a vua a; tichuan, tlângte chu a khûr dur dur a, an ruangte chu kawtthlêr laiahte chuan bawlhhlawh ang maiin a awm rem rum a. Chuti kauva a tih pawh chuan a thinur chu a la reh si lo va, a kut chu a la lek ta cheu va. 26 Hnam tin hla taka mite tân chhinchhiahna a târ chhuak ang a, kâwlkil ata ko tûrin a faifûk ang; tichuan, ngai teh, anniho chu rang takin an lo kal thuai ang. 27 An zîngah tu mah an hah lo vang a, an inchhuih hek lo vang; tu mah an muthlu lo vang a, an muhîl hek lo vang; an kâwnghrên chu phelh dulin a awm hek lo vang a, an pheikhawk chilhna chu a chat hek lo vang; 28 an thalte chu zum tak a ni a, an thal ngul zawng zawngte chu kawih sain a awm ṭhup a; an sakawr tinte chu meilung ang maia ngaih a ni ang a, an tawlailîr kête chu ṭhâwngaleivir ang maia ngaih a ni bawk ang. 29 An thâwm ri hum hum chu sakeibaknei hâhum ang mai a ni ang a, sakeibaknei vânglaite hâhum ang maiin an ri hum hum ang; a ni, an ri hum hum ang a, an sa seh tûr chu an seh ang a, him takin an kal bopui ang a, chhanchhuaktu tûr tu mah an awm lo vang. 30 Chumi niah chuan tuifinriat ri hum hum angin an chungah an ri hum hum ang. Tichuan, miin ram chu an han thlîr chuan, ngai teh, thim leh manganna hlîr a ni a, êng lah chu, chumia chhûmahte chuan tihthimin a awm a.
Zâwlnei ni tûrin Pathianin Isaia a ko
1 Lal Uzia a thih kum khân LALPA chu lalṭhutphah sâng tak chawisâna a ṭhu ka hmu a, a silhfên hmâwr fual chuan biak in chu a tikhat ta vek a. 2 A kiangah chuan seraf-te an ding a, thla paruk an nei ṭheuh va: an thla pahnihin an hmai an khuh a, pahnihin an kephahte an khuh a, pahnihin an thlâwk a. 3 Tin, “Sipaihote LALPA chu a thianghlim e, a thianghlim e, a thianghlim e; lei pum pui chu a ropuinain a khat,” tiin an inau tawn an inau tawn ṭhîn a. 4 Tichuan, a autu au thâwmah chuan a kawngka bul lungphûm lamin a nghîng ta dur dur a, in chu meikhuin a khat ta a. 5 Chu veleh, kei chuan, “Hmui bawlhhlawh pu mi ka niha, hmui bawlhhlawh pu mite zînga awm ka nih avângin ka chung a va pik êm! Ka boral ta a nih hi; ka mitin Lal, sipaihote LALPA chu a hmu ta si a,” ka ti a. 6 Chutichuan, seraf pakhat, maichâm ata chaicheha a cheh, meiling kengin ka hnênah a lo thlâwk a, 7 ka ka a han dep a, “Ngai rawh, hei hian i hmui a tawk ta; tichuan, i khawlohna lâk bo a ni ta a, i sual pawh tlen fai a ni ta,” a ti a. 8 Tin, “Tu nge ka tirh ang a, tu nge kan tân kal ang?” tiin LALPA aw chu ka hria a. 9 Tichuan, keiin, “Kei heta hi ka awm, mi tîr ta che,” ka ti a. Tin, ani chuan, “Kal la, he chite hi hrilh rawh: ‘Bengin a hriat zawng hria ula, a ngaihna erawh chu hre suh u; a hmuh chu hmu ula, hriat erawh chu hre suh u,’ tiin. 10 He chite thinlung hi tithau la, an bengte tingawng la, an mitte maimitchhîntîr rawh; chuti lo chuan, an mitin an hmu ang a, an bengin an hria ang a, an thinlungin an hre bawk ang a, an hawi kîr leh ang a, tihdamin an awm dah ang e,” a ti a. 11 Tin, kei chuan, “LALPA, eng chen nge ni ang?” ka ti a. Tin, ani chuan a chhâng a, “Khawpuite mihring awm awm lova a rama, inte urtu awm lova ram chu a ṭiau veka, 12 LALPAN mite chu hla taka a sawna, ram chhûngah hmun kalsan hnu tam tak a awm hma loh chuan. 13 Tin, a chhûngah chuan sâwm zîngah pakhat pawh la awm sela, ei zawhin an awm leh nghâl ang; nimahsela, ṭhîl leh sasua kih hnua a bul a la awm reng ṭhîn angin, chi thianghlim chu a bul la awm reng chu a ni,” tiin.
Lal Ahaza hnêna thu thlen
1 Tin, Uzia fa Jothama fapa Ahaza lal lai chuan heti hi a ni a, Suria lal Rezina leh Israel lal Remalia fapa Peka chu Jerusalem rûn tûrin an chho va; nimahsela, an hneh thei lo. 2 Tin, Davida chhûngte chu, “Suria chu Ephraim nên an ṭang dûn ta,” tiin an hrilh a. Tichuan, a thinlung leh a khua leh tuite thinlung chu, ramhnuai thingte thliin a tinghîng suau suau ang hian tihnghînin a lo awm ta a. 3 Chutichuan, LALPA chuan Isaia hnênah, “Nang leh i fapa Sear-jasuba chu, dîl chhakta zâwk tuilâkna tâwpah, Puansutu Phûl lamlianah chuan, Ahaza hmuak tûrin kal chhuak tawh ula; 4 a hnênah, ‘Fîmkhur la, awm hle hle rawh; meichher bung khu mai mai pahnih, Suria lal Rezina leh Remalia fapaa thinurna nasa tak chu hlau suh la, i thinlung chu zâm suh se. 5-6 “Juda chu han beiin han tibuai ila, chutah chuan kan tân luhna tûr siamin, a lai takah Tabeela fapa chu lalah i ṭhuttîr ang u,” tiin, Suria leh Ephraim leh Remalia fapa chuan an phiar che avângin, 7 LALPA PATHIAN chuan heti hian a ti a: “An thu phiar chu a puitling lo vang a, a hlawhtling hek lo vang. 8 Suria lu chu Damaska a ni a, Damaska lu chu Rezina lek a ni si a. Kum sawmruk leh kum nga ral hmain Ephraim chu chi tih tlâk lohva awm tûrin tihchhiat vekin a awm ang. 9 Ephraim lu chu Samari a ni a, Samari lu chu Remalia fapa lek a ni si a. In rin duh loh chuan tihnghehin in awm ṭhuai lo vang,” tiin,’ ti rawh,” a ti a.
Chhinchhiahna atân Immanuela
10 Tin, LALPA chuan Ahaza a be leh a, 11 “LALPA i Pathian hnênah chhinchhiahna dîl rawh; Seol thûk tak ata emaw, vân sâng tak ata emaw,” a ti a. 12 Ahaza erawh chuan, “Ka dîl lo vang, LALPA pawh ka fiah hek lo vang!” a ti a. 13 Tin, ani chuan, “Aw Davida chhûngte u, tûnah ngaithla teh u; mihring tihhah hi thil tê tak têah in ruat a ni maw, ka Pathian lam pawh tihhah in duh zêl ni? 14 Chuvângin, LALPA ngei chuan chhinchhiahna a pe ang che u: ngai teh u, nula thianghlim pakhat a rai ang a, fapa a hring ang a, a hmingah Immanuela a sa ang. 15 Ani chuan thil ṭha lo lam duh loh nachâng a hriat hunah leh, thil ṭha lam duh nachâng a hriat hunah chuan bâwnghnute khal leh khawizu a ei ṭhîn ang. 16 Naupang chu thil ṭha lo lam duh loh nachâng leh, thil ṭha lam duh nachâng a hriat hma pawhin lal pahnih i huatate ram chu a ṭiau dâwn a ni,” a ti a. 17 Ephraim chuan Juda a ṭhen ni ata la thleng ngai lo nite chu LALPA chuan i chungah leh, i khua leh tuite chungah leh, i pa chhûngte chungah chuan a thlentîr ang, Assuria lal ngei chu. 18 “Chumi niah chuan heti hi a ni ang a, LALPA chu Aigupta lui tâwp rêttea tho awm leh, Assuria rama khuai awm chu, ko tûrin a faifûk ang. 19 Tichuan, an lo kal ang a, an zain kawr chhe rek rukah te, lungpui pûkah te, hnimhlîngnei zawng zawngah te, ran tlatna hmun zawng zawngah te an fu ang. 20 “Chumi niah chuan LALPAN bakmehchem hawh, Luipui piah rama Assuria lal awm chu hmangin, lu leh ke hmul chu a ziat fai ang a; khabe hmul pawh a ziat bo vek ang. 21 “Tichuan, chumi niah chuan heti hi a ni ang a, mi pakhatin bâwngla pakhat leh berâm pahnih chauh a vulh ang; 22 nimahsela, heti hi a ni ang a, hnutetui tam tak an la pêk dâwn avângin hnutetui khal a ei ṭhîn ang; ram chhûnga la awm apiangin hnutetui khal leh khawizu an ei ṭheuh dâwn si a. 23 “Tin, chumi niah chuan heti hi a ni ang a, hmun tin, grêp hrui sâng, tangkaraw sâng man awmna apiangte chu buar leh hnimhlîngnei hmun mai a ni tawh ang. 24 Ram zawng zawng chu buar leh hnimhlîngnei hlîr a lo nih tâk avângin, chutah chuan thal leh thal ngul kengin an kal ang. 25 Tin, tlâng, bâwngtuthlawha laih tawh zawng zawngah chuan, buar leh hnimhlîngnei hlauh avângin i kal lo vang a; bâwngchalte tlattîrna leh berâm chîl mai mai atân a ni tawh zâwk ang,” a ti a.
Isaia fapa, mipui tân chhinchhiahna
1 Tin, LALPA chuan ka hnênah, “Lehkha ziakna phêk hlai tak la la, mihring kawlawmin a chungah ‘Maher-salal-has-baza tân’ tiin ziak rawh; 2 tichuan, hretu rinawm, puithiam Uria leh Jeberekia fapa Zakaria chu hriatpuitu atân ka siam ang,” a ti a. 3 Tin, zâwlneinu hnênah chuan ka kal a; tichuan, ani chuan nau a pai a, fapa a hring ta a. Chutichuan, LALPAN ka hnênah, “A hmingah Maher-salal-has-baza sa rawh. 4 Naupang chuan, ‘Ka nu,’ ‘Ka pa,’ tih nachâng a hriat hmain Damaska hausaknate leh Samari laka râllâk sumte chu Assuria lal hmaah an kal bopui dâwn si a,” a ti a.
Assuria lal a lo kal
5 LALPA chuan ka hnênah a sawi leh a, 6 “Hêng chite hian Silo-a tui dam taka luang dêl dêlte chu an duh loh avâng leh, Rezina leh Remalia fapa chunga an lâwm avângin, 7 ngai teh, LALPA chuan Luipui tui, khauh tak leh tam tak (Assuria lal leh a ropuina zawng zawng) chu an chungah a luantîr ang; tichuan, a kuang zawng zawng chu a lo liam dûl dûlin, a kam zawng zawngah pawh a liam dûl dûl ang. 8 Juda-ho ram thlengin a tuam lût dûl dûl ang a, a liamin a luang tlang dûl dûl ang a, nghâwng pawh a chîm phâk hial ang; tin, a thla zâr chuan, aw Immanuel, i ram vâng lam zawng zawng hi a awh vek ang. 9 “Chi tinte u, buai ta nuai nuai che u, kehsawmin in awm dâwn nia; ram hla taka mi zawng zawngte u, beng chhi rawh u. Inrâlthuam rawh u, kehsawmin in awm dâwn nia; inrâlthuam rawh u, kehsawmin in awm dâwn nia. 10 Inrâwn khâwm rawh u, eng mah a ni hlei lo vang e; thu sawi rawh u, a puitling hlei lo vang e, Pathian kan hnênah a awm si a,” tiin.
LALPAN tih loh tûr zâwlnei a hrilh
11 LALPA chuan kut chak takin heti hian ka hnênah a sawi a, he chite kawngah hian ka kal ve lohna tûrin mi thunun a nih hi: 12 “He chite hian, ‘Phiar an nei e,’ an tih ṭhin nazawng chu, ‘Phiar an nei e,’ ti ve suh u; an ṭih pawh chu ṭih ve lovin, hlau ve hek suh u. 13 Sipaihote LALPA, amah ngei chu in tithianghlim tûr a ni; amah chu in ṭiha ni sela, amah chu in hlauhva ni rawh se. 14 Tin, ani chu hmun thianghlim a ni ang a; Israela chhûng hnihte tân erawh chuan tlûkna lung leh dâlna lungpui a ni zâwk ang a, Jerusalem-a awmte tân thang leh fal a ni bawk ang. 15 Tichuan, mi tam takin chu chu an chhuihin an tlu ang a, tihkehin an awm ang a, an âwk ang a, manin an awm ang,” tiin.
Mitthi thlûk chîn loh tûr
16 Hriattîrna thu zial hi phuar la, dân thu hi ka zirtîrte zîngah nemin chhinchhiah rawh. 17 Tin, kei chuan Jakoba chhûngte laka a hmai thuptu LALPA chu ka nghâk ang a, amah chu ka thlîr reng ang. 18 Ngai teh, kei leh LALPA mi pêk naupangte hi, Israel-ho zîngah hian sipaihote LALPA, Zion tlânga awm laka chhinchhiahna atânte leh thil mak atânte kan ni a. 19 Tin, miin, “Ramhuai aienthiam zâwl leh dawithiam hrâm chuap chuap leh phun nuah nuahte chu râwn rawh u,” an tih hunah che u chuan heti hian chhâng rawh u: “Miten an Pathian chu an râwn zâwk tûr a ni lâwm ni? Mi nungte tân chuan mitthi an râwn tûr em ni? 20 Dân Thu leh Hriattîrna Thu chu râwn tûr a ni,” tiin. Chumi thu ang zêla an sawi loh chuan an tân khua rêng rêng a vâr ṭhuai dâwn lo a ni. 21 Mangang tak leh rilṭâm chungin ram chu an fang ang a; tin, heti hi a ni ang a, an ril a ṭâm hun chuan an thin chu a ur êm êm ang a, an lal leh an Pathian chu ânchhia an lawh bawrh bawrh ang a, an vanvadâk vak vak ang. 22 Tin, lei lam an en ang a, manganna leh thimna, thlaphân nguina chu an hmu ang; tichuan, thim chhah mupah hnawh bovin an awm ang.
Lal lo chhuak tûr
1 Nimahsela, thlaphânga awm tawhi tân chuan nguina rêng rêng a awm tawh lo vang. Hmânlai chuan Zebulun ram leh Naphtali ram chu hmuhsitawmin a awmtîr a; nimahsela, hun hnuhnûngah chuan ropui takin a awmtîr ta, dîl kamah, Jordan râlah, hnam tin Galili chu. 2 Mi, thim hnuaia kalte chuan êng nasa tak an hmu ta; thihna hlim rama awmte chungah ngei chuan êng chu a lo êng ta. 3 Hnam chu i titam ta a, an hlimna pawh i tipung ta; buh seng laia hlim angin i hmaah an hlim ta a, miin râllâk sum an sema an hlim ang maiin. 4 A ritphurhna nghâwngkawl leh a kokia zâwn fung, a hnehchhiahtu talhtum chu, Midian-ho hneh ni ang khân i tihtliahsak ta si a. 5 Indona hmuna mi râlthuama an inthuamna zawng zawngte leh an silhfên thisen kai hniang hnuangte chu hâla tuah ral tûr lek a ni si a. 6 Kan tân Naupang a lo piang a, Fapa pêkin kan awm ta a; rorêlna chu a kokiah a chuang ang a: a hmingah chuan Maka, Remruattua, Pathian Chaka, Chatuan Pa, Remna Lal, an ti dâwn si a. 7 A ram a zau zêl ang a, a ramah remnain tâwpintai a nei lo vang; Davida lalṭhutthlêngah a ṭhu ang a, dik tak leh fel taka rorêlin a rawn tinghet ang, tûn aṭanga kumkhuain. Sipaihote LALPA ṭhahnemngaihna chuan chûng chu a ti ang.
LALPAN Israel-te a hrem dâwn
8 LALPA chuan Jakob-ho ramah thu a thawn a, Israel-ho chungah a tla ta a. 9 Tichuan, mi zawng zawng, Ephraim-ho leh Samari-a awm, chapo tak leh rilrua uangthuang taka, 10 “Leirawhchante chu chim mah sela, lung chang chherin kan rem mai ang; theipui thingte chu sah chhumin awm mah sela, sidar thingtein kan thlâk mai ang,” titute chuan an la hria ang. 11 Chuvângin, LALPA chuan Rezina dotute chu amah do tûrin a chawisâng ang a; 12 a hmêlma, a hma lama Suria-hote, a hnung lama Philistia-hote chu a chawk tho vang; tichuan, kâ ângin Israel-ho chu an ei zo vang. Chuti kauva a tih pawh chuan a thinur chu a la reh si lo va, a kut chu a la lek ta cheu va. 13 Nimahsela, mite chuan anmahni vawtu lam chu an hawi chuang si lo va, sipaihote LALPA chu an zawng chuang hek lo. 14 Chuvângin, LALPA chuan Israel-ho aṭang chuan a lu leh a mei, tûmkau leh phûngladin ang maiin ni khat thilah a chhawk vek ang. 15 Upa leh mi zahawmte chu a lu chu an ni a; dâwt zirtîr ṭhîn zâwlneite chu a mei chu an ni. 16 Hêng mite hruaitute hian an hruai sual ṭhîn a ni; an hruaiate chu tihboralin an awm ṭhîn. 17 Chuvângin, LALPA chu an tlangvâlhote chungah a lâwm lo vang a, an fahrahte leh hmeithaite chu a khawngaih hek lo vang; an zain Pathian zah lo mi leh thil ṭha lo titute an ni ṭheuh va, kâ zawng zawng chuan thu lawilo a sawi ṭheuh si a. Chuti kauva a tih pawh chuan a thinur chu a la reh si lo va, a kut chu a la lek ta cheu va. 18 Suahsualna chu mei angin a alh hluah hluah si ṭhîn a; buar leh hnimhlîngneite chu a kâng ral ṭhîn, a ni, ramhnuai thing bit zîngahte chuan a kâng hluah hluah a, a khu chho ngut ngut ṭhîn. 19 Sipaihote LALPA thinur avângin ram chu a kâng chhia a, mite pawh chu meia tuah tûr thing ang an ni a; tu mân mahni unau pawh an zuah lo. 20 Tichuan, miin an ding lama mi an chuh ang a, an ril a la ṭâm cheu vang; an vei lama mi an ei ang a, an tlai chuang lo vang; mi tinin mahni bân tî an ei ṭheuh vang. 21 Manase-hovin Ephraim-ho an ei ang a, Ephraim-hovin Manase-ho an ei ang; tin, an pahnih chuan Juda-ho an do dûn ang. Chuti kauva a tih pawh chuan a thinur chu a la reh si lo va, a kut chu a la lek ta cheu va.
1 Dân chimawm tak siama, thupêk khirh tak ngaihtuah chhuaktute u, in chung a pik e! 2 Hetiang hian mi khawngaihthlâkte dik takin in rêlsak duh lo va, retheite ṭhat vena tûr in dang tlat a, hmeithaite in ei a, fahrahte in rawk a. 3 Tichuan, an kan niah che u leh hla tak aṭanga ṭiauna lo thleng tûrah chuan eng nge in tih tâk ang le? Ṭanpui dîlin tu hnênah nge in tlân tâk ang le? In ropuina chu khawiah nge in hnutchhiah tâk ang le? 4 Salho hnuaiahte an kûn ang a, thahho hnuaiahte an tlu ang, chu chauh chu an chan a ni tawh ang. Chuti kauva a tih pawh chuan a thinur chu a la reh si lo va, a kut chu a la lek ta cheu va.
Pathian hmanrua Assuria lal
5 Hawh Assuria mi, ka thinurna talhtum, ka lungnih lohna kengtu tiang! 6 Râllâk la tûr leh, thil lâksak la tûr leh, kawtthlêr chirhdiak anga rap tûrin ani chu Pathian zah lo hnam do tûrin ka tîr ang a, ka thinurna mite bei tûrin thu ka pe ang. 7 Nimahsela, ani chuan chutiang chu a tum a ni lo va, chutiang chu a rilru pawhin a ngaihtuah hek lo; hnam tam namênlova tam tihchhiat leh tihboral a ni a rilrûk zâwk ni. 8 “Ka mi lian zawng zawngte hi lal vek an ni lâwm ni? 9 Kalno khua chu Karkhemis khua ang mai a ni tawh lâwm ni? Hamath khua chu Arpad khua ang mai a ni tawh lâwm ni? Samari khua chu Damaska khua ang mai a ni tawh lâwm ni? 10 Ka kut hian milemho ram, Jerusalem khua leh Samari khuaa mi aia milem siam chawp ṭha zâwk neitu pawh, a zawng chhuak ta si a, 11 Samari khua leh a milemte chunga ka tih ang khân, Jerusalem khua leh a milemte chungah pawh hian ka ti ve lo vang em ni?” a ti si a. 12 Chumi avâng chuan heti hi a ni ang a, LALPA chuan Zion tlâng leh Jerusalem khaw chunga a hnathawh tûr zawng zawng a thawh zawh hunah chuan, Assuria lal rilru uangthuang rah leh a mit chapo ropuina chu ka la hrem ang. 13 Ani chuan, “Ka kut chaknain ka ti ta a ni, ka finna nên hian, ka bengvâr si a; chi tin ramrîte lah chu ka sawn a, an rote lah ka chhuhsak a, lalṭhutphaha ṭhute lah chu mi huai tak tih angin ka hnûk thla ta a. 14 Ka kut hian chi tin hausaknate lah chu sava bu angin a zawng chhuak a; miin sava tui a pui rauhsan hnute an la angin leilung luah zawng zawng hi ka la vek ta a ni; thla zâp emaw, kâ âng emaw, hrâm emaw rêng rêng pawh an awm lo,” a ti vei si a. 15 Hreipui hian thil cheh nâna hmangtu chu a uankhum dâwn em ni? Thingzaina hian a hrûttu chu a hnuaichhiah dâwn em ni? Talhtumin a lektute chu a lek vêl zâwk ang leh, tiangin thing ni si lo a lek zâwk ang mai hi a ni. 16 Chuvângin, LALPA, sipaihote LALPA chuan a mi thaute zîngah chuan chêrna a tîr ang a; a ropuina hnuaiah chuan mei alh lai mêk ang hian mei chhêmin a awm ang. 17 Tin, Israel-ho Êntu chu mei atân a ni ang a, an Mi Thianghlima chu meialh atân a ni bawk ang; chu chuan ni khat thilah a hnimhlîngneite leh a buarte chu a tikângin a tiboral ang. 18 A ramngaw leh a lei ṭha hmun ropuina pawh chu, thlarau leh taksa lamin a tiboral ang; tichuan, chhinchhiahna kengtu a chauh hun lai ang a ni ang. 19 A ram ngawa thing la awm chhunte chu naupang ziak tham leka tlêm a ni tawh ang.
Tlêm tê chauh lo kîr tûr
20 Tin, chumi niah chuan heti hi a ni ang a, Israel-ho la awm chhunte leh Jakoba chhûngte zînga a la damte chuan, anmahni thattu chu an ring leh tawh lo vang a; LALPA, Israel-ho Mi Thianghlima chu tihtakzetin an ring tawh zâwk ang. 21 A la awm chhun, Jakob-ho la awm chhunte chu, Pathian chak tak hnênah chuan an la kîr leh ang. 22 I mi Israel-ho chu tuifinriat ṭiauvaivut zâtin awm mah sela, a la awm chhunte chauh chu an kîr leh dâwn si a; rorêlna dik takin a tihchhiat vek tûr an ni. 23 LALPA, sipaihote LALPA chuan tâwpna, tâwpna thleng ngei tûra ruat tlat chu, lei chung zawng zawng lailiah chuan a la siam dâwn si a.
LALPAN Assuria a hrem ang
24 Chuvângin, LALPA, sipaihote LALPA chuan heti hian a ti, “Aw ka mi, Zion-a awmte u, Aigupta rama an tih ang khân talhtuma vua che uin a tiang chu in chungah lek mah sela, Assuria mi chu hlau suh u. 25 Rei lo tê achinah chuan lungnih lohna chu hrîk thlâkin a awm tawh ang a, ka thinurna pawh anmahni tihboralnain hrîk thlâkin a awm tawh ang. 26 Oreb lungpuia Midian-ho an thah lai ang khân, sipaihote LALPA chuan amah bei tûrin vuakna chu a chawk tho vang a; a tiang chu tuifinriat chung lamah a awm ang a, Aigupta rama a lek ang khân a lek ang. 27 Chumi niah chuan heti hi a ni ang a, a ritphurh chu i koki ata lâk bovin a awm ang a, a nghâwngkawl chu i nghâwng ata lâk bovin a awm bawk ang, hriak thih avâng chuan nghâwngkawl chu tihchhiatin a awm tawh ang,” tiin.
Rûntuten an rawn bei
28 Aiath khua a thleng ta, Migron khua a kal tlang ta; Mikmas khuaah a bungrua a dah ta. 29 Kâwnah an liam ta; Geba khuaah an riak ta. Rama khawho chu an khûr an khûr ta; Saula Gibea khawho chu an tlân bo ta. 30 Aw Galim khaw fanu, i awin ring takin au rawh! Aw Laisa khua, ngaithla rawh! Aw Anathoth, i va khawngaihthlâk êm! 31 Madmena khawho tlân bovin an awm ta; Gebim khuaa awmte chu tlân bo tumin an inhâwr khâwm luai luai e. 32 Vawiin ngei hian Nob khuaah a châm dâwn; Zion fanu tlâng, Jerusalem mual pâwng chu, a kut a thin khum e. 33 Ngai teh, LALPA, sipaihote LALPA chuan thil râpthlâk takin a zârte chu a sât thla ang a; sâng tak takte chu kihin a awm ang a, a lawr bîkte pawh chu râwt hniamin a awm ang. 34 Thîrin ramhnuai thing bit takte chu a kit ang a, Lebanon sidar thingte chu mi ropui kihin a tlu dur dur ang.
Inngeihna ram
1 Jesaia bul aṭangin chawrno a lo chhuak ang a, a zung aṭangtea puak chhuak chu a rah ang. 2 LALPA thlarau - finna leh hriat theihna thlarau, remruatna leh chakna thlarau, hriatna leh LALPA ṭihna thlarau chu - a chungah a fu ang. 3 A lâwmna chu LALPA ṭihnaah a ni ang, a mita a hmuh angin ro a rêl lo vang a, a benga a hriat angin a zilhhau hek lo vang; 4 retheite chu fel takin ro a rêlsak zâwk ang a, leia mi thuhnuairawlhte tân chuan thlei bîk nei lovin a zilhhausak bawk ang; a ka talhtumin lei hi a vua ang a, a hmuia thawin mi suaksualte chu a that ang. 5 Felna hi a taihrên a ni ang a, rinawmna hi a kawnghrên a ni ang. 6 Chinghnia chu berâmno nên an awm dûn tawh ang a, keitê chu kêlno nên an bawk dûn tawh ang; bâwngno leh sakeibaknei vânglai leh ran châwm thaute chu an awm ho tawh ang a; naupang têin a hruai duah duah ang. 7 Sebâwng leh savawm an tla ang a; an notête chu an bawk za dial dial tawh ang; tin, sakeibaknei chuan bâwngpa angin buhpâwl a ei tawh ang. 8 Nau hnute hne lai chu rûlrial kaw kotlângah a tualchai ang a, nau hnute hnêk bâng tawh chuan rûlmuk tawmkûk kotlângah a kut a nghat ang. 9 Ka tlâng thianghlimah rêng rêng chuan intihnat a awm tawh lo vang a, intihchhiat a awm tawh hek lo vang, tuite hian tuifinriat a khuh reng angin, leilung hi LALPA hriatnain a khat zo vek dâwn a ni.
Sala hruaite lo kîr leh tûr
10 Tin, chumi niah chuan heti hi a ni ang a, Jesaia zung, mi tin chhinchhiahna atâna ding chu, amah ngei chu hnam tinin an râwn ang a; a chawlhna hmun chu a ropui ang. 11 Chumi niah chuan heti hi a ni ang a, LALPA chuan a miteho thi bâng la awm chhun, Assuria ram ata te, Aigupta ram ata te, Pathros ram ata te, Kus ram ata te, Elam ram ata te, Sinar ram ata te, Hamath khua ata te, tuifinriat thliarkâr atate la leh tûrin a vawi hnihnaah chuan a kut a la phar leh ang. 12 Tin, hnam tin tân chhinchhiahna a târ chhuak ang a, Israel hnawh chhuahhote chu a hruai khâwm ang a, Juda darhhote chu kâwlkil li ata a hruai khâwm ang. 13 Tichuan, Ephraim-ho îtsîkna chu a bo tawh ang a, Juda-ho tibuaitute chu tihboralin an awm tawh ang; Ephraim-hovin Juda-ho an îtsîk tawh lo vang a, Juda-ho pawhin Ephraim-ho chu an tibuai tawh lo vang. 14 Tichuan, anniho chu thlang lamah Philistia-ho kokîah chuan zuk thlâwkin an zuk fu ang a; khawchhak fate chu an rawk za ang; Edom leh Moab-ho chungah chuan an kut an thlâk ang a; Amona thlahte chuan an thu an awih tawh ang. 15 Tin, LALPA chuan Aigupta tuifinriat tengsâwl chu a tichhe vek ang a; Luipui pawh chu a thli lum huam huam chuan a kut a thin khum ang a, luitê pasariha siam khawpin a vua ang a, mite chu kephah pawh huh lovin a kal kaitîr ang. 16 Tichuan, Aigupta ram ata an chhoh nia Israel-ho tâna lamlian a lo awm ang khân, a miteho thi bâng la awm chhunte tân chuan Assuria ram aṭangin lamlian a lo awm ang.
Lâwm thu sawina hla
1 Chumi niah chuan heti hian i la sawi ang, “Aw LALPA, lâwm thu ka hrilh ang che; ka chungah lo thinur ta mah la, i thinur chu a reh ta a, nangin mi thlamuan ta a nih hi. 2 Ngai teh, Pathian chu mi chhandamtu a ni a, ka ring ang a, hlauvin ka awm lo vang; ‘LALPA JEHOVA chu ka chakna leh ka hla a ni si a; mi chhandamtu a lo ni ta bawk a,’ ” tiin. 3 Chuvângin, chhandamna tuikhur ata te chu hlim takin tui in la chawi ang. 4 Tin, chumi niah chuan heti hian in la sawi ang, “LALPA hnênah chuan lâwm thu hril ula, a hming lam ula, a thiltihte chu mi tin zîngah hriattîr ula, a hming chu chawimawiin a awm tih sawi rawh u. 5 LALPA chawimawiin hla sa rawh u, ani chuan thil ṭha berte chu a lo ti tawh si a; chu chu leilung luah zawng zawngah hian hriatin awm rawh se. 6 Zion-a awmte u, ring takin au ula, au tuar tuar rawh u, Israel-ho Mi Thianghlima in zînga awm chu a ropui si a,” tiin.
Pathianin Babulon a hrem dâwn
1 Babulon khaw phur rit, Amoza fapa Isaian a hmuh chu: 2 Mi lianho kawngkâahte chuan an luh theihna tûrin, tlâng kawlh vulah chuan chhinchhiahna târ chhuak ula, ring takin anni chu au ula, kutin zaizir rawh u. 3 Keimah ngeiin ka mi ruatho chu thu ka pe ta, a ni, ka mi chak tak, ka mi induh taka hlimte chu, ka thinur hrithlatu atân ka ko ta. 4 Chu! Tlânga mipui au thâwm, mipui tam tak thâwm ang mai chu! Chu! Hnam tin rama mi awm khâwmho sa mur mur thâwm chu! Sipaihote LALPA chuan râl bei tûrin sipaiho a pun hlawm a nih chu. 5 Anniho, LALPA leh a lungnih lohna hriamhreite chu, ram hla tak ata, kâwlkil tâwp rêt aṭangin, ram zawng zawng hi tichhe tûrin an lo kal a ni. 6 Chiau vak vak rawh u, LALPA ni chu a hnai tawh si a; Engkimtitheia aṭangin chhiatna a lo thleng dâwn e. 7 Chuvângin, kut zawng zawng a chak lo vang a, mihring thinlung tinrêng pawh a tui ral ang a, 8 an hlau vang. Natna leh lungnih lohnate chuan a man hlawm ang a; hmeichhe nau vei ang maiin an nâ ang; mak intitawnin an awm hlawm ang; an hmêlte chu meialh hmêl ang mai a ni ang. 9 Ngai teh, ram tiṭiau tûr leh chuta mi sualte chu a chhûng ata tiboral tûrin, LALPA ni chu nasa takin, thinrimna leh thinurna nasa tak nên a lo thleng dâwn e. 10 Vân arsite leh a chhohreivûngte chuan an êng an chhuah lo vang a; ni chu a chhuah laia tihthimin a awm ang a, thla pawhin a êng chu a êntîr dâwn tawh lo a ni. 11 Tin, khawvêl hi an sualna avângin ka hrem ang a, mi suaksualte chu an khawlohna avângin ka hrem bawk ang; tin, mi chapo ṭawng chaltlai chu ka tireh ang a, mi hlauhawm chapona chu ka tihniam bawk ang. 12 Mi hi rangkachak thianghlim ai pawha vâng zâwkin ka siam ang a, mihring ngei hi Ophir rangkachak thianghlim ai pawha vâng zâwkin ka siam ang. 13 Chutichuan, vân khi ka tikhûr ang a, sipaihote LALPA thinrim avângin, a thinurna nasa tak niah chuan, lei pawh hi a awmna hmun sawn dâwrh khawpa tihnghînin a awm ang. 14 Tin, heti hi a ni ang a, sakhi ûm nek ang leh berâm tu ma khalh khâwm loh angin, mi tinin mahni chipuite lam ṭheuh an hawi ang a, mi tin mahni ram lamah ṭheuh an tlân bo vang. 15 Tu pawh an hmuh apiang chhun tlangin an awm ang a, tu pawh an man apiang khandaiha tihthlûkin an awm ang. 16 An nausênte pawh an mit hmuhah sawm dep khawpa lei vuak nâna hmanin an awm ang a; an inte chu rawkin a awm ang a, an nupuite chu pâwngsual tâwkin an awm bawk ang. 17 Ngai teh, Media-ho anmahni bei tûrin ka chawk tho vang a, chûngho chuan tangkarua an ngaihsak lo vang a, rangkachakah pawh an lâwm lo vang. 18 An thal ngulte chuan tlangvâlte chu a tisawm ang a, mi rîla rah khawngaihna rêng rêng an nei lo vang a; an mit chuan naupangte a zuah lo vang. 19 Tin, Babulon, ram tin ropuina, Kaldai-ho chhuan thil mawi tak chu, Pathianin Sodom leh Gomorra a tihboral lai ang khân a la awm ang. 20 Eng tikah mah chutah chuan mi an awm tawh lo vang a, chhuan awm chhûng zawng zawng chuan a chhûngah awm an awm hek lo vang; Arab miten chutah chuan an puan in an zâr lo vang a, berâm vêngtuten chutah chuan an berâm rualte an bawhtîr hek lo vang. 21 Thlalêra ramsate chutah chuan an bawk ang a, an inte chu thil nung ngui taktein a khat ang a; sava nghâwngseite chutah chuan an chêng ang a, sathârte chutah chuan an tualchai tawh zâwk ang. 22 Tin, chinghniate chu an kulhbîngah chuan an hrâm ang a, sihalte pawh an lal in nuam tak takahte chuan an hrâm bawk ang. A hrem hun tûr chu a thleng dâwn tawh a, a nite pawh tihseiin a awm lo vang.
Sal tâng kîr leh
1 LALPA chuan Jakob-ho a khawngaih ang a, Israel-ho chu thlangin anmahni ram ngeiah a la awmtîr dâwn si a. Ram dang mite chuan anmahni an zawm ang a, Jakoba chhûngte chu an vuan tlat ang. 2 Tin, mi tin chuan anmahni an hruai ang a, an hmun tûr chu an thlen ang a, Israela chhûngte chuan LALPA ramah chuan anni chu bawihpaahte leh bawihnuahte an la nei ang a; anmahni sala neitute chu salah an la man ang a, anmahni tiduhdahtute chungah chuan ro an la rêl ang.
Babulon lal mitthi khuaah
3 Tin, i lungngaihna ata te, i buaina ata te, hnathawh hautak zet an thawhtîrna che ata te LALPAN a chawlhtîr che niah chuan heti hi a ni ang a, 4 he tihelna thu hi Babulon lal au khumin i la sawi ang: “Engtizia nge hnehchhiahtu chu a va reh ta êm! Engtizia nge rangkachak khawpui chu a va reh ta êm! 5 LALPA chuan mi suaksual tiang a titliak ta, rorêltute lal tiang chu; 6 mi dang chunga râwngrâ taka inleka, an tlâwm tawhte tihduhdah bâng ngai lote. 7 Leilung pum pui hi a châwl a, a reh rawih rawih a; hla an sa chhuak phut a. 8 A ni, i chung thu avângin fârte chu an hlim a, Lebanon tlânga sidar thingte nên, ‘Tihtlâwma i awm achin chu kit thlutu tûr rêng rêng kan hnênah an lo chho ngai ta lo,’ tiin. 9 Hnuai lam ata Seol chu i lo thleng hmuak tûr chein, nangmah avângin a buai mur mur a ni; mitthi, leia puipa zawng zawng chu nangmah avângin a chawk tho va; hnam tin lal zawng zawng chu an lalṭhutphah ata a kai tho ta. 10 Chûng zawng zawng chuan nangmah biain, i hnênah heti hian an sawi ang: ‘Nang pawh keimahni angin i chak lo ve ta elo? Keimahni awm angin i awm ta elo? 11 I ropui bûng bûngna chu Seol-a hruai thlâk a ni ta, i perhkhuang ri bur burte nên; changpât chu i hnuaiah an phah a, englo lungte chuan an khuh ta che a nih hi,’ tiin. 12 “Aw vârparh, zîng lam fapa, engtizia nge vân ata i tlâk tâk chu le! Hnam tin titlâwmtu, engtizia nge leia sah thlâka i awm tâk chu le! 13 I rilruah chuan, ‘Vânah ka chho vang a, Pathian arsite chung lamah khian ka lalṭhutphah ka chawisâng ang; inkhâwmna tlâng, hmâr tâwp rêta awmah chuan ka ṭhu ang a; 14 chhûm aia sâng zâwkahte khian ka chho vang a, Chungnungbera ang maiin ka awm ang,’ i tih ṭhin vei nên khân. 15 Nimahsela, Seol-ah, khuarkhurum tâwp rêtahte chuan hruai thlâkin i awm dâwn si. 16 A hmu che apiangin an en ngun ang chia, ‘He mi hi maw lei tikhûra, ram tin tinghînga, 17 khawvêl thlalêr anga siama, a khaw awmte tiborala, a salte an in lama kal tûra chhuah ngai lova chu?’ tiin i chanchin an la chhût ang. 18 Hnam tin lal zawng zawng, an zain, mahni in ṭheuhvah ropui takin an muhîl a. 19 Nang erawh chu a zung puak chhuak tenawm tak leh, râl thah, khandaiha chhun tlang, khuarkhuruma lungte zînga chhukho silhfên angin i thlân in aṭanga hla takah paih chhuahin i awm tâk zâwk hi, ruang rah beh ang maiin. 20 I ram i tihchhiata, i khua leh i tuite i thah avângin an zîngah phûmin i awm ve lo vang; thil ṭha lo titute thlahte hming chu kumkhuain an lam lo vang. 21 An thawha, leilung an neiha, lei chung hi khuaa an tihkhah loh nân, an pute sualna avângin a fate thah zai rêl rawh u,” tiin. 22 Tin, “Anmahni bei tûrin ka tho vang,” sipaihote LALPAN a ti, “Babulon aṭanga hming leh a la awm chhunte leh, fapa leh fapaa fapa chu ka tiboral ang,” LALPAN a ti. 23 “Sakuh tân rovah ka siam bawk ang a, dîlahte pawh ka siam ang; tihboralna hmunphiahin ka phiat bawk ang,” sipaihote LALPAN a ti.
Pathianin Assuria a tichhia ang
24 Sipaihote LALPA chuan hetianga sawiin chhia a chham ta, “Matheilovin ka ngaihtuah ang tak hian a lo thleng ang a, ka ruat ang tak hian a awm bawk ang: 25 ka ramah chuan Assuria mi chu ka tichhia ang a, ka tlângahte chuan ka chîl nek ang, tih ang hian. Chumi hunah chuan a nghâwngkawl bahtîr chu anmahni aṭang chuan a bo tawh ang a, an rit phurhtîr chu anmahni kokî aṭang chuan a bo tawh bawk ang. 26 Chu chu a ni, lei chung zawng zawnga thuruat chu ni, chu bawk chu a ni, hnam tinrêng chunga kut phar chu ni. 27 Sipaihote LALPA chuan a ruat tawh si a, tuin nge sûtsak ang? A kut chu pharin a awm tawh a, tuin nge lâk kîrtîr ang?” tiin.
Pathianin Philistia mite a tichhia ang
28 Lal Ahaza thih kumah khân he phurrit hi a lo awm ta. 29 Aw, Philistia ram pum pui, nangmah vuakna tiang a tliah tâk avângin lâwm suh; rûl zung aṭang chuan rûlmuk a chhuak dâwn si a, a rah chu rûl alh thlâwk thei a la ni ang. 30 Mi rethei fa tîrte chu an tla dial dial tawh ang a, mi, pachhiate chu him takin an bawk tawh ang; nanga zung erawh chu ṭâmin ka tithi ang a, i ta la awm chhunte chu thahin an awm ang. 31 Aw kawngkhâr, chiau vak vak rawh; aw khawpui, au rawh; aw Philistia, i pumin i tui ral zo ta; hmâr lam aṭangin meikhu a lo chhuak si a, an hun ruatahte chuan hnufual rêng an awm ngai lo a ni. 32 Philistia hnam palaite chu engtin nge kan chhân ang le? “LALPAN Zion chu a din a, a mite zînga retheite chu amahah an tlu lût ang,” tiin a ni ang chu.
Pathianin Moab a tichhia ang
1 Moab ram phurrit chu. Zan khatah Moab rama Ar khua chu tihchhiatin a awm a, engmahlova siamin a awm ta si a; zan khatah Moab rama Kir khua chu tihchhiatin a awm a, engmahlova siamin a awm ta si a. 2 Bajith-ah leh Dibon-ah, hmun sângahte chuan ṭap tûrin a chho ta a. Moab-ho chuan Nebo leh Medeba chu an ṭah khum vak vak a; an lu zawng zawng a kawlh vek a, khabe hmul tinrêng pawh mehin a awm ta vek a. 3 An kawtthlêrahte chuan saiip puan an veng a; an in chungahte leh an mual zau laiahte chuan mi tin chu nasa taka ṭapin an chiau vak vak a. 4 Tin, Hesbon-ho pawh an au va, Eleale-ho nên an aw chu Jahaz khua lam pawhin an lo hria a; chuvângin, Moab-ho râlthuama inthuamte chu ring takin an au va; an nunna chu an kawchhûngah chuan a khûr a. 5 Moab-ho avângin ka thinlung chu a au va; an mi ṭhate chu Zoar khuaah leh Eglath-selisija-ah an tlân a. Luhith chhovah chuan ṭap chungin an kal chho a ni; Horonaim kawngah chuan chhiatna auvin an au chhuak a ni. 6 Nimrim tuite chu a kang ang a, hlobet chu a vuai zo dawn si a; hlobet chawrno chu a râwp a, thil hring rêng rêng a awm ta si lo. 7 Chuvângin, an sum la neih chhunte leh an dah ṭhatte chu tuipuisuthlah Lui râlah chuan an kal bopui ang. 8 Au thâwm chu Moab ramri vêlahte chuan a thang si a; a chiau vak vak thâwm chu Eglaim khaw lamah a thang a, a chiau vak vak thâwm chu Beer-elim khaw lamah a thang a ni. 9 Dimon tuite chu thisenin a bual zo vek si a; Dimon chungah chuan thil nasa lehzual ka thlentîr dâwn si a, Moab-ho zînga tlân chhuakte leh, chu rama la awm chhunte hnênah chuan sakeibaknei ka tîr ang.
Moab tân a beidawnthlâk
1 Ram rorêltu tân berâmnote chu Sela khua thlalêr lama awm aṭang chuan, Zion fanu tlângah chuan thawn rawh u. 2 Tichuan, Moab fanute chu sava, a bu ata rau darh thlâwk thlâwkte angin, Arnon lui kaiahte an awm dâwn nia. 3 Rem min ruatsak la, ro min rêlsak rawh; i hlim chu chhûnlaiah zân angin siam la; hnawh chhuahte chu bihrûktîr rawh, tlân bo chu mantîr suh. 4 Moab zînga mi hnawh chhuaha awmte chu i hnênah awm rawh se; an tân tichhetu hmêl lakah chuan bihrûkna hmun ni rawh. Hlêprutu chu engmahlova siamin a awm ta si a, tihchhiatna a reh ta a, hnehchhiahtute chu ram aṭang hian tihboralin an awm ta. 5 Tichuan, lalṭhutphah chu khawngaihnaa tihnghehin a awm ang a; chumi chungah, Davida puan inah chuan mi pakhat, rorêlin, rorêlna fel zawngin, thil fel rang taka ti nghâlin tihtakzetin a ṭhu ang. 6 Moab-ho chapona thu, an chapo êm êm a ni tih kan lo hria a; an ṭawng chaltlaizia leh, an chapozia leh, an thinurzia thu chu; an uannate chu eng mah a ni lo. 7 Chuvângin, Moab-ho chu Moab-ho chungah an chiau vak vak ang a, mi tin an chiau vak vak ang. Kir-hareseth grêp rêp hlâwm chu lungchhe vânkaiin in la ṭah chhan ang. 8 Hesbon lote chu a chul zo ta si a, Sibma grêp hrui nên; hnam tin lalte chuan a kûng ṭha mite chu an titliak pheng phung a, Jazer khaw thleng thlengin a zâm hlawm a, thlalêrah a zâm lût a; a pêngte chu a zâm darh sung a, tuipui chu a zâm kai ta a. 9 Chuvângin, Sibma grêp hrui chu Jazer ṭahin ka ṭah ang a; aw Hesbon leh Eleale, ka mittuiin ka leih ang che; i nipui rahte chungah leh i buh seng chungah chuan inbei au thâwm chu a tla ta si a. 10 Lâwmna chu lâksakin a awm ta, lo ṭha tak aṭangte chuan hlimna chu lâksakin a awm ta bawk a; grêp huanahte chuan hla sak rêng rêng a awm tawh lo vang a, thâwm hlimawm rêng rêng a awm tawh hek lo vang; grêp sâwrna khurahte chuan rap sâwrtu rêng rêngin uain an rap chhuak tawh lo vang; grêp seng au chu ka tireh ta. 11 Chuvângin, ka rîlte hi Moab khawngaih avângin ṭingṭang angin a ri a, ka kawchhûng chu Kir-heres khawngaih avângin ṭingṭang angin a ri bawk a. 12 Tin, heti hi a ni ang a, Moab chu a inlan hunah, hmun sângah intihaha, ṭawngṭai tûra a hmun thianghlima a lo kal hunah chuan a hlawhtling lo vang. 13 Chûng chu Moab chungchâng thu LALPAN tûn hma lama a sawi kha a ni. 14 Tûnah erawh chuan LALPAN, “Inhlawhfa kum chhiara kum thum chhûngin Moab ropuina chu, a mipui tam takte chawpin, hmuhsitawma awmtîrin a awm ang a; a la awm chhunte chu tlêm tê takmeuh, sawi tham loh an ni ang,” tiin a sawi ta.
Pathianin Suria leh Israel a hrem dâwn
1 Damaska khaw phurrit chu. “Ngai teh, Damaska chu khawpui ni tawh lo tûrin lâk bo a ni ta; tichuan, in chim khâwm mai a ni tawh ang. 2 Aroer khuate chu tlânsanin a awm ta; berâm rualte awmna tûr a ni mai ang, chûng chu an bawk ang a, tu mân an tihlau lo vang. 3 Ephraim lakah kulhpui chu a bo vang a, Damaska lakah ram chu a bo vang, Suria rama la awm chhunte pawh an bo vang, Israela thlahte ropuina ang lekin an awm ang,” sipaihote LALPAN a ti a. 4 “Chumi niah chuan heti hi a ni ang a, Jakoba ropuina chu tihchêrin a awm ang a, a tisa thauna chu a lo chêr tawh ang. 5 Tichuan, buh sengtupan buh a lâka, a vuite chu kuta a hlep ang mai hi a ni ang a; a ni, Rephaim ruamah miin buh vui hmaihte chu an chhar ang mai hi a ni ang. 6 “Nimahsela, olive thing vuak hnua a ziding sâng ber chhîpah rah pahnih pathum emaw, thing rah tak zâr sei berah te pali panga emaw a awm ṭhîn ang hian, chutah chuan hmaih chhar tûr a la awm ang,” LALPA, Israel-ho Pathian chuan a ti a. 7 Chumi niah chuan miin an Siamtu lam an en tawh ang a, an mitte chuan Israel-ho Mi Thianghlima chu a thlîr tawh ang. 8 Maichâm, anmahni kutchhuak lamte chu, an en tawh lo vang a, anmahni kuta siam, Aseri-te emaw, ni lemte emaw an zah tawh hek lo vang. 9 Chumi niah chuan an khaw nghet takte chu ngawbing leh tlâng chhîpa hmun tlânsan hnu, Israela thlahte hmaa an tlânsan hnu ang kha a ni ang; tichuan, hmun tihṭiau a ni tawh ang. 10 Pathian, i chhandamtu i theihnghilh a, i chakna lungpui chu i hre reng si lo; chuvângin, kûng mawi tak takte i phun ṭhîn a, a chhûngah chuan ṭang danglamte i vit bûr fur ṭhîn a; 11 i phun niin i ping vêl ṭhîn a, zîngah chuan i thil chi chu i tipâr ṭhîn; nimahsela, rah lawh chu lungngaihna leh natna nasa tak niah chuan a bo ṭhîn.
Hmêlma hnamte tihchhiat an ni
12 A, mipui tam tak ri dur dur, tuifinriat ri dur dur anga ri dur durte leh, hnam tin ri hum hum, tui nasa tak ri hum hum anga ri hum humte chu aw! 13 Hnam tin chu tui tam tak ri hum hum angin an ri hum hum ang: nimahsela, ani chuan a zilhhau vang a; tichuan, hla takah an tlân bo vang a, tlânga buhsi thli len ang leh vaivut thlipui len vir mup mup angin ûmin an awm ang. 14 Tlai lamah chuan, ngai teh, thil râpthlâk tak a awm a; tin, khawvâr hmain an awm ta lo. Chu chu râllâka min lâksaktute chan a ni a, min rûksaktute pual a ni bawk a.
Ethiopia hrem a ni dâwn
1 A, thla zâp ri hum hum ram, Ethiopia rama luite râla awm, 2 tuipuiah, tui chunga luang lawngahte palaiho tîrtu chu! Zualko chak takte u, hnam sâng thlerh thlawrh, mâm tak hnênah, an chhuah ṭan achin tûn thlenga mi hlauhawm takte hnênah chuan kal rawh u; chu hnam chuan ram an sem ṭhîn a, an rap thlu bawk ṭhîn, an ram chu luite chuan a sem darh a ni. 3 Khawvêla awm zawng zawng leh leilung luahte u, tlângahte chhinchhiahna an târ chhuah hunah en rawh u; tawtawrâwt an ham hunah ngaithla rawh u. 4 LALPAN ka hnênah heti hian a sawi a ni: “Ka awm hle hle ang a, ka awmnaah hian ka thlîr reng ang; ni sat laia khaw lum thiang vel vul ang leh buh seng khaw lum laia daifîm chhûm ang hian,” tiin. 5 Grêp lawh hun hmaa a pâr a rêma, a pâr chu grêp puama a lo chan hunah chuan, a pêng tê tê chu theikûng ah chhumna chemtein a ât chhum dâwn si a, a pêng zâm darhte chu a la bovin a sât chhum bawk ang. 6 Chûng chu tlânga sava kohamte tân leh, leia sate tân chuan hnutchhiahin an awm hlawm ang; tichuan, sava kohamte chuan anni chu nipui chhûngin an ei ang a, leia sa zawng zawng chuan thlasik chhûngin an ei ang. 7 Chumi hunah chuan, sipaihote LALPA hming awmna hmun, Zion tlângah chuan, sipaihote LALPA hnêna pêk atân mi sâng thlerh thlawrh, mâm takte hnên ata, an chhuah ṭan achin tûn thlenga mi hlauhawm takte hnên ata chu, lâwmman an rawn sin ang; chu hnam chuan ram an sem ṭhîn a, an rap thlu bawk ṭhîn, an ram chu luite chuan a sem darh a ni.
Pathianin Aigupta a hrem dâwn
1 Aigupta ram phurrit chu. Ngai teh, LALPA chu chhûm chak tak chunga chuangin Aigupta ram a lo thleng ta e; Aigupta ram milemte chu a hmaah chuan an khûr zawih zawih ang a, Aigupta-ho thinlung chu an kawchhûngah a tui ral mai ang. 2 “Tin, Aigupta mite chu Aigupta mite vêk bei tûrin ka chawk tho vang; tichuan, mi tinin mahni unau beiin, mi tinin mahni ṭhenawm beiin, an inkâp ang; khua leh khua an inbei ang a, ram leh ram an inbei ang. 3 Tichuan, Aigupta-ho thlarau chu an kawchhûngah chuan engmahlova siamin a awm ang a; an remruat chu ka tichhia ang; tichuan, milemte leh, aikaihthiamte leh, ramhuai aienthiam zâwlte leh, dawithiamte chu an râwn ang. 4 Tin, Aigupta mite chu hotu nunchhe tak kutah ka hlân ang a; tichuan, lal kawlh takin an chungah ro a rêl tawh ang,” LALPA, sipaihote LALPA chuan a ti. 5 Tin, tuipui tuite chu a kang ang a, lui chu a luang bovin a lo kangchat tawh ang. 6 Luite chu a rimchhia ang a; Aigupta ram tui luangte chu a kâm telh telh ang a, a kangchat mai ang; phairuangte leh tui hnimte chu a vuai zo vang. 7 Nile lui kianga, Nile lui kam ngeia ran tlatna phûlte leh, Nile lui kianga thil chîn zawng zawngte chu a lo ro vang a, len bovin a awm ang a, a awm tawh lo vang. 8 Sangha mantute pawh chu an ṭap ang a, Nile luia nghakuai khai ṭhîn zawng zawngte chuan âwm an inchûm ang a, tuia lênkhang zâr ṭhînte chu an chau tawh ang. 9 Chu lo pawh chu zîza zai sîn dek mite leh puan ngo tah mite chu an mualpho vang. 10 Tin, a lung bante chu tihsawmin a awm ang a, inhlawhfa ṭhîn zawng zawngte chu an rilruin an lungngai ang. 11 Zoan khuaa mi liante chu an â ngawt mai; Pharaoa remruattu fing berte remruat chu sa remruat ang mai a lo ni ta; Pharaoa hnênah, “Mi fing fapa, hmasâng lalho fapa ka ni,” engtiziaa ti ṭhîn nge in nih? 12 Khawiah nge i mi fingte chu le? Anni chuan hrilh nghâl che rawh se; Aigupta ram chunga thil thleng tûr, sipaihote LALPA ruatte chu hre rawh se. 13 Zoan khuaa mi liante chu mi â an lo ni ta a, Noph khuaa mi liante chu bumin an awm ta; Aigupta hnamho kila lungte chuan Aigupta-ho chu an vah botîr ta. 14 LALPA chuan Aigupta-ho zîngah luhlulna thlarau a awmtîr ta; tichuan, zu rui mi chu a luakah a pai thlawk thlawk ang hian, Aigupta-ho chu an hnathawh tinrêngah a kal kawitîr ta. 15 Aigupta-ho tân luiin emaw, meiin emaw, tûm kauvin emaw, phûngladinin emaw thawhsak theih a awm tawh hek lo vang.
Aigupta-in LALPA an la be dâwn
16 Chumi niah chuan Aigupta-ho chu hmeichheho ang an ni ang a, sipaihote LALPAN an chunga a kut a thin avângin hlauvin an khûr ang. 17 Juda rama awmho chu Aigupta-ho tân chuan râpthlâk tak an lo ni tawh ang a, an hming an lamna apiangte chuan an hlau vang, an chunga thleng tûr sipaihote LALPA thuruat avâng chuan. 18 Chumi niah chuan Kanaan-ho ṭawnga ṭawng leh, sipaihote LALPA hnêna chhechhama thu tiam ṭhînte chu, Aigupta ram chhûngah khaw panga a awm ang a; pakhat chu Boralna Khua an ti ang. 19 Chumi niah chuan Aigupta ram laiah chuan LALPA tân maichâm a awm ang a, a ramrîah chuan LALPA tân lungphun a awm ang. 20 Chu chu Aigupta rama sipaihote LALPA tân chuan chhinchhiahna leh hriatna a ni ang; hnehchhiahtute avângin LALPA an la au dâwn si a; tichuan, anin chhandamtu leh humhimtu a tîr ang a, ani chuan anniho chu a chhanchhuak ang. 21 Tichuan, LALPA chu Aigupta-ho hriat a ni tawh ang a, Aigupta mite chuan chumi niah chuan LALPA chu an hre tawh ang; a ni, inthawina leh thilpêkin chibai an bûk ang a, LALPA hnênah chuan thu an tiam ang a, an hlen bawk ang. 22 Tin, LALPA chuan Aigupta-ho chu a vua ang; a vua ang a, a tidam bawk ang; tichuan, LALPA hnênah an kîr leh ang a, ani chu anmahni ngen thlûkin a awm ang a, anmahni a tidam ang. 23 Chumi niah chuan Aigupta ram aṭangin Assuria ram thlengin lamlian a awm ang a; tichuan, Assuria mite chu Aigupta ramah an kal ang a, Aigupta mite chu Assuria ramah an kal bawk ang; Aigupta mite chuan Assuria mite nên Pathian chibai an bûk tlâng tawh ang. 24 Chumi niah chuan Israel-ho chu Aigupta-ho leh Assuria-ho pathumtu an ni ang a, lei lailîah hian malsâwmna an ni ang; 25 sipaihote LALPA chuan, “Ka mi Aigupta-hote leh ka kutchhuak Assuria-hote leh ka rochan Israel-hote chu malsâwmin awm rawh se,” tiin mal a sâwm si a.
Saruaka zâwlnei kal - Israel tân chhinchhiahna
1 Assuria lal Sargona tirhin Tartana chu Asdod khuaa a lo kala, Asdod khua a beiha, a lâk kum khân, 2 chumi lai chuan LALPAN Amoza fapa Isaia kâ chuan, “Kal la, i kâwnga saiip puan kha phelh la, i kêa i pheikhawk kha dah rawh,” tiin a sawi a. Tichuan, chutiang chuan a ti a, saruak leh pheikhawk bun lovin a kal a kal ta a. 3 Tin, LALPA chuan, “Ka chhiahhlawh Isaia hi, Aigupta-ho chungah leh Ethiopia-ho chungah chhinchhiahna leh thil mak atân kum thum chhûnga saruak leh pheikhawk bun lova a kal ang hian, 4 Assuria lal chuan Aigupta-ho mante leh Ethiopia-ho salte chu, a pui a pangin, saruak leh pheikhawk bun lo leh mawng langin Aigupta-ho mualphona tûrin a hruai bo vang. 5 Tichuan, an beisei ber Ethiopia-ho leh an ropuina ber Aigupta-ho avâng chuan, mangang tak leh mualpho takin an awm tawh ang. 6 Tichuan, chumi niah chuan he tuifinriat kama mi hian, ‘Ngai teh, kan beisei ber, Assuria lal laka min chhanhim tûra min puitu atâna kan tlânna chu, heti hi a ni ta si a; keini hi engtin nge kan tlân chhuah ang?’ an la ti ang,” a ti.
Babulon chhiat tûr thu
1 Tuipui thlalêr phurrit chu. Chhim rama ṭhâwngaleivir a kal tlang angin thlalêr aṭangin, ram hlauhawm tak aṭang chuan a lo kal e. 2 Inlârna khirhkhân tak ka hnênah hriattîr a ni tawh; vervêk taka titu chuan vervêk takin a ti a, rawktu chuan a rawk a. Aw Elam-ho, kal chho rawh u; aw Media-ho, hual rawh u; an rûmna zawng zawng chu ka tireh vek tawh e. 3 Chuvângin, ka kâwngte hi natna nasa takin a khat a, hmeichhe nau vei natna anga natnain mi man ta; benga hre thei lo khawpin na ka tuar a, khaw hmu thei lo khawpin ka mangang a. 4 Ka thinlung hi a thaw hlawp hlawp a, thil râpthlâk takin mi tihlau va; tlai nêm ka nghahhlelh ṭhin kha ka tân khurhnaah a chang ta. 5 Dawhkân chu an buatsaih a, râlvêngtu chu an vêntîr a, an ei a, an in a. Mi liante u, tho ula, phaw kha hriak hnawih rawh u. 6 LALPA chuan ka hnênah heti hian a sawi a ni: “Kal la, râlvengtu vêntîr rawh; ani chuan a thil hmuh chu sawi rawh se. 7 Sipai pâwl te, sakawr chung chuang, a kawp zêla kal te, sabengtung pâwl te, sanghâwngsei pâwl te a hmuh hunah chuan ngun takin a ngaithla kiau vang,” tiin. 8 Tin, ani chu sakeibaknei angin a au va, “Aw LALPA, chhûnah chuan râlvên bûk chungah hian ka ding fo va, zankhua khuain ka vênnaah hian mi awmtîr fo va. 9 En teh, hetah hian mihring pâwl, sakawr chung chuang, a kawp zêla kal an lo kal e,” tiin. Tin, amah vêk chuan, “Babulon khua chu a tlâwm ta, a tlâwm ta! An pathianho milem siam chawpte zawng zawng chu leiah tihkeh sawmin a awm ta,” tiin a chhâng a. 10 Aw ka buh vuak sa, ka hruiha buh, sipaihote LALPA, Israel-ho Pathian laka ka hriat chu ka hrilh che u a nih hi.
Edom phurrit
11 Duma phurrit chu. Miin Seir tlâng aṭangin mi au va, “Râlvêngtu, zân hi eng ti nge ni tawh? Râlvêngtu, zân hi eng ti nge ni tawh?” tiin. 12 Râlvêngtu chuan, “Zîng a lo ni dâwn ta e, zân pawh. In zawh duh chuan zâwt rawh u; hawi leh ula, lo kal rawh u,” a ti a.
Arabia phurrit
13 Arabia ram chunga phurrit chu. Aw Dedan-ho khualzin pâwl tinte u, Arabia rama ramhnuaiah in riak ang. 14 Tuihâl hnênah chuan tui an rawn la a, Tema rama awmte chuan an chawin tlân bote chu an hmuak a. 15 Khandaihte lakah, khandaih phawi sa lakah leh, thal ngul kawih sa lakah leh indona nasa tak lak ata tlân bo an ni si a. 16 LALPA chuan heti hian ka hnênah a sawi si a: “Inhlawhfa kum chhiara kum khat chhûngin Kedar-ho ropuina zawng zawng chu a bo zo vang a, 17 thal kâp mi, Kedara thlahte zînga mi chak tak la awm chhun chu, tlêm tê an ni ang; LALPA, Israel-ho Pathian chuan chu chu a sawi tawh si a,” tiin.
Jerusalem phurrit
1 Inlârna ruam phurrit chu. Eng in ti nge ni le, in chungahte in lâwn vek ni? 2 Aw, au thâwma khat, khawpui sa mur mur, khaw hlim tak, i chhûnga an thahte chu khandaiha thah an ni lo va, inkahnaa thi an ni hek lo. 3 I rorêltu zawng zawng chu an tlân bo za a, thal kâp mite phuarin an awm a; i ta an hmuh zawng zawng chu phuar khâwmin an awm a, hla tak aṭanga rawn tlân bote chu. 4 Chuvângin, kei chuan, “Mi en lovin, lehlam en rawh u, ka ṭap vak vak dâwn e; ka miteho fanu râllâka an lâk thu-ah chuan mi hnêm duh harsa suh u,” ka ti a. 5 Inlârna ruamah hian buaina te, manganna te, rah behna te, LALPA, sipaihote LALPA hnên ata a lo thleng a. Kulh bang tihchim a ni a, tlângahte mangangin an au va. 6 Tichuan, Elam-ho chuan thal bâwm an keng a, mihring chuanna tawlailîrte leh sakawr chung chuang mite nên; Kir-ho chuan phaw tuamna chu an phelh a. 7 Tin, heti hi a ni a, i ruam ṭha berte chu tawlailîrtein a khat ta a, sakawr chung chuang mite chu kulh kawngkhâr bulah an tlim hmur a. 8 Tin, Juda-ho khuhna chu a la bo va; tichuan, chumi niah chuan ngawpui ina râlthuamna chu in en ta a. 9 Davida khaw kulhpui chhe laite in en bawk a, a tam tih in hria a; tin, dîl thlangta zâwk tuite chu in luan khâwmtîr a. 10 Tin, Jerusalem inte in chhiar a, kulhpui bang siam ṭhat nân inte chu in ṭhiat a. 11 Dîl hlui tui awmna tûrin kulhpui pahnih kârah chuan tui tlin khâwmna in siam a; nimahsela, chûng titu lam chu in en si lo va, hmasânga lo siamtu chu in ngaihsak hek lo. 12 Chumi niah chuan LALPA, sipaihote LALPA chuan, ṭap tûr leh âwm inchûm tûr leh lu tikawlh tûr leh saiip puan veng tûrin a ko va. 13 Nimahsela, ngai teh, hlimna leh lâwmna te, bâwng talhna leh berâm talhna te, sa eina leh uain inna te a awm ta zâwk a. “I eiin i in ang u, naktûkah chuan kan thi dâwn si a,” an ti a. 14 Tichuan, sipaihote LALPA chu ka bengah a inhriattîr a, “Matheilovin he sualna hi in thih hma loh zawng in lakah tlen fai a ni tawh lo vang, LALPA, sipaihote LALPA chuan a ti,” tiin.
Sum enkawltu Sebna hnêna thu thleng
15 LALPA, sipaihote LALPA chuan heti hian a ti, “Kal la, he sum enkawltu tehchai hnênah hian, Sebna, lal in chunga hotua awm hnên ngeiah chuan, kal rawh. 16 Tin, a hnênah heti hian sawi rawh: ‘Hetah hian eng nge i tih? Hetah hian tute nge i neiha, thlân hetah i ker kuak tehchai ni? Ama tân sâng taka thlân a ker kuaka, ama tân lungpuia awmna a siam tehchai hi! 17 Ngai teh, LALPA chuan mi chakin a paih angin a paihin a paih vak ang che; a ni, a fûnin a fûn tlat ang che. 18 Ani chuan matheilovin bâwl hlûm angin a tivir ang chia, ram zau takah a vawrh lût ang che; chutah chuan i thi ang a, chutah bawk chuan, nang, mahni lal in chhûng timualphotupa, i ropuina tawlailîrte chu a awm ang. 19 I hnathawhna ata a hnawt chhuak ang chia, ani chuan i hotu nihna ata chu a hnûk thla ang che. 20 “ ‘Tin, chumi niah chuan heti hi a ni ang a, ka chhiahhlawh Eliakima, Hilkia fapa chu ka ko vang a; 21 ani chu i kawrfual hi ka hâktîr ang a, i kâwnghrên hian ka tichak ang a, i rorêlna hi a kutah ka kawltîr ang; tichuan, ani chu Jerusalem-a awmte tân leh Juda chhûngte tân pa a ni ang. 22 Tin, Davida chhûngte chabi chu a kokîah ka dah ang a; ani chuan a hawng ang a, tu mân an khâr lo vang; a khâr ang a, tu mân an hawng lo vang. 23 Tin, ani chu, kilhna hi hmun nghet taka an kilh tlat angin ka tinghet tlat ang a; tichuan, ani chu a pa chhûngte tân lalṭhutphah ropui tak a ni ang. 24 Tin, amahah chuan a pa chhûngte ropuina zawng zawng chu an la bâng vek ang, a fate leh a thlahte bungbêl tê tinrêng, berhbu bungbêl aṭanga tui dahna bungbêl zawng zawng thlengin. 25 Chumi niah chuan, kilhna, hmun nghet taka kilh tlat awm chuan a la dâwl lo vang; sah thlâka awmin, a tla tawh ang a, a chunga thil rit awm chu tihboralin a awm tawh ang; LALPAN chu chu a sawi tawh si a, sipaihote LALPA chuan a ti,’ ” tiin.
Phoiniki ram phurrit
1 Tura khaw phurrit chu. Tarsis lawng liante u, chiau vak vak rawh u; in rêng rêng awm lo khawpa Tura chu tihchhiata a awm tâk hi; chu chu Kupra ram aṭangin in lo hria a. 2 Tuipui kama chêngte u, ngawi rawh u, Sidon khaw sumdâwngte u, 3 tuipui chunga kalin Aigupta ram Nile lui buh in chaw a, ram tinah in hralh a, in hlêp chu in sum hnâr ber a ni. 4 Aw Zidon, zak rawh; tuifinriat, tuifinriat kulhpui chuan thu a sawi ta si a, “Nau ka vei ngai lo va, ka hring ngai hek lo; tlangvâl lah ka châwm ngai hek lo va, nula pawh ka tiseilian ngai hek lo,” tiin. 5 Thuthang chu Aigupta ram a thlen hun chuan Tura thuthang chu nasa takin an vei ang. 6 Tarsis-ah va kai ula; thliarkâra awmte u, chiau vak vak rawh u. 7 Hei hi maw in khaw hlim tak, a hlunzia murakeka mi tawh, a kêin hla taka awm tûra a hruai ṭhina chu? 8 Lallukhum khumtîrtu khua Tura chungah hian tuin nge hei hi thleng tûrin ruat? Chuta sumdâwngtute chu mi liante an ni a, chuta sumdâwng mite chu leia mi zahawmte an ni si a. 9 Sipaihote LALPA chuan chapote ropuina tihtlâwm leh khawvêl mi zahawmte tihmualpho a tum tlat a ni. 10 Aw Tarsis fanu, Nile lui angin i ramah chuan luang liam rawh; i kâwng hrênna rêng rêng a awm tawh loh hi. 11 Tuifinriat chungah a kut a phar a, ramte chu a tinghîng a; LALPA chuan Kanaan ram chungchâng thu-ah thu a pe a, a kulhbîngte tichhe tûrin. 12 Tin, ani chuan, “Aw Zidon fanu nula, mi hnehchhiah, i hlim leh tawh lo vang. Tho la, Kittim ramah kai rawh; chutah pawh chuan chawlhna rêng rêng i hmu chuang lo vang,” a ti a. 13 En teh, Kaldai-ho ram hi, hêng mite hi an awm tawh lo; Assuria mi chuan thlalêra ramsate tân a ruat tawh a ni. An in sângte chu an sa a, chuta lal inte chu an tiboral a, in chhiaah a siam ta. 14 Tarsis lawng liante u, chiau vak vak rawh u; in kulhbîng chu tihchhiatin a awm tâk hi. 15 Tin, chumi niah chuan heti hi a ni ang a, Tura khua chu, lal pakhat kum chhiara kum sawmsarih chhûng chu theihnghilhin a awm ang. Kum sawmsarih ral hnuah chuan, nawhchizuar hlaa an sawi angin Tura khaw chungah chuan a la thleng ang, 16 “Nang nawhchizuar, mite theihnghilh tawh hnu, ṭingṭang la la, tual fang rawh; ṭingṭang kai la, hla tam tak sa rawh, hriata i awm leh theihna tûrin,” tih ang khân. 17 Tin, kum sawmsarih a ral hnu chuan LALPA chuan Tura khua chu a tlawh ang a, a sumdâwnna a chhunzawm leh ang; khawvêl ram tinah a inzuar leh ang. 18 Tin, a sum deh chhuah leh a hlawh chu LALPA hmaa awmte tân a ni dâwn si a, hnianghnâra an eiah leh, silhfên ropui tak an neih theih nân.
LALPAN khawvêl a hrem dâwn
1 Ngai teh, LALPA chuan lei hi a tiruakin, a tiram dâwn a, a khaikhup ang a, a awmate chu a tidarh dâwn. 2 Tin, vântlâng chunga tih angin puithiam chungah pawh tih a ni ang; bawihpa chunga a awm angin a pu chungah pawh a awm ang; bawihnu chunga a awm angin a pi chungah pawh a awm ang; leitu chunga a awm angin hralhtu chungah pawh a awm ang; pûktîrtu chunga a awm angin pûktu chungah pawh a awm ang; a pung ûma pûktîrtu chunga a awm angin a hnêna a pung petu chungah pawh a awm ang. 3 Lei hi tihruah fai kêlh leh tihchhiat fai kêlhin a awm ang; chu thu chu LALPAN a sawi tawh si a. 4 Lei hi a ṭapin a chuai e, khawvêl hi a chauvin a chuai e, leia mi chungnungte chu an chau ve. 5 Lei hi a awmnate hnuaiah chuan a bawlhhlawh zo ta; dânte chu an bawhchhiata, thuruat chu an tihdanglama, kumkhaw thuthlung chu an bawhchhiat avângin. 6 Chuvângin, ânchhe lawhnain lei hi a ei zo va, a awmate chu thiam loh chantîrin an awm ta; chuvângin, leia awmte chu an kâng hlum a, mi tlêm tê chauh an la awm. 7 Uain thar chu a ṭap e, grêp hrui chu a chau ve, thinlunga hlim zawng zawngte chu an rûm e. 8 Khuangtête hlimna chu a reh e, lâwm taka awmte thâwm chu a tâwp e, ṭingṭang hlim ri chu a reh e. 9 Hla sa chungin uain an in lo vang; zû chu a intute tân kha tak a ni ang. 10 Buaina khawpui chu tihchimin a awm ta; tu mah rêng rêng an luh loh nân in tin khârin a awm ta. 11 Uain avângin kawtthlêrahte chuan ṭap thâwm a awm a; hlimna zawng zawng tihthimin a awm a, he ram hlimna hi a bo ta. 12 Khawpuiah chuan ṭiauna hnutchhiahin a awm a, a kulh kawngkhâr chu vuak chhiatin a awm ta. 13 Lei lailîa mi tin zîngah hetiang hian a la awm dâwn si a, olive thing vuak hnua rah a la awm ṭhîn ang leh, grêp lawh hnua grêp hmaih lawh tûr a la awm ṭhîn ang mai hian. 14 Chûngte chuan an aw an chhuah ang a, an au vang; LALPA ropuina avângin tuifinriat aṭangin ring takin an au ve. 15 Chumi avâng chuan LALPA chu khawchhak lamah chawimawi rawh u, LALPA, Israel-ho Pathian hming ngei chu, tuifinriat kam ruamahte chuan chawimawi rawh u. 16 Kâwlkil tâwpa hla sakte kan hria, “Mi felte hnênah ropuina awm rawh se,” tih hla hi. Nimahsela, kei chuan, “Ka chêr tawlh tawlh a, ka chêr tawlh tawlh a, ka chung a pik e! Vervêk taka titute chuan vervêk takin an ti a; a ni, vervêk taka titute chuan vervêk tak takin an ti,” ka ti a. 17 Aw leia awm, hlauhawmna te, khuarkhurum te, thang te chu i chungah a awm e. 18 Tichuan, heti hi a ni ang a, hlauhawm thâwm aṭanga tlâna chu, khuarkhurumah a tla ang a; khuarkhurum chhûng ata chhuak chhova chu, thangah a âwk ang; chung lama tukverhte chu hawnin a awm si a, leilung nghahchhante chu a nghîng bawk a ni. 19 Lei hi a keh chhe vek a, lei hi tihralin a awm zo va, lei hi nasa takin a nghîng a. 20 Lei hi zu rui mi angin a pai thlawk thlawk ang a, bâwkte sâwi angin a sâwi luai luai ang; a bawhchhiatna chu a chungah rit takin a awm ang a; tichuan, a tlu ang a, a tho leh tawh lo vang. 21 Tin, chumi niah chuan heti hi a ni ang a, LALPA chuan chung lama mi chungnungho pâwl lian tak chu a hrem ang, leia lei lalte nên. 22 Tin, mi tângho khuarkhuruma hruai khâwma an awm angin chûngho chu hruai khâwmin an awm ang a, tân inah khungin an awm ang a, ni rei tak hnuah chuan hremin an awm ang. 23 Chumi hunah chuan thla khi zak takin a awm ang a, ni khi mualpho takin a awm ang; sipaihote LALPA chu Zion tlângah leh, Jerusalem khuaah leh, a upaho hmaah chuan ropui takin lalah a awm dâwn si a.
Fakna hla
1 Aw LALPA, nang chu ka Pathian i ni a; ka chawimawi ang chia, i hming ka fak ang; thil mak tak, hmasânga remruatte chu, rinawm tak leh thutakin i ti si a. 2 Khawpui pawh lei pâwngah i chantîr a; khua kulhpui nei pawh khaw chhiaah i chantîr a; ram dang mite lal in pawh khua lovah i chantîr si a; eng tikah mah sakin a awm leh tawh lo vang. 3 Chuvângin, mi chak takte chuan an chawimawi ang chia, hnam hlauhawm takte khawpui chuan an hlau vang che. 4 Mi hlauhawmte thaw chu thlipuiin bang a nam sawk sawk anga a lo awm laite hian, nang chu mi rethei tân kulhbîng, pachhe mangan lai atân kulhbîng, thlipui lakah inhumhimna, ni sa hliahna i ni si ṭhîn a. 5 Hmun rova khaw lum chu i tireh ṭhîn ang hian, ram dang mite thâwm chu i tireh ang; khaw lum chu chhûm hliaha tihreha a awm ṭhîn ang hian, mi hlauhawmho hla sa chu tihrehin a awm ang.
Pathianin ruai ropui a buatsaih
6 Tin, he tlângah hian sipaihote LALPA chuan mi tinrêngte tân thil thautein ruai a ṭheh ang, uain te a fê nêna inchiah reng, thil thau takte thlînga khat, uainte a fê nêna inchiah reng ṭha taka thlit fai chu. 7 Tin, mi tinrêng an vawm khuhna pâwn lam leh, hnam tinrêng an khuhna chu he tlângah hian a tichhia ang. 8 Thihna chu a lem hlen ta; LALPA PATHIAN chuan mi zawng zawng hmai ata chu mittuite a hru fai ang a; a mite hmingchhiatna chu leilung luah zawng zawng ata a la bo vang; LALPAN chu chu a sawi tawh si a. 9 Tin, chumi niah chuan, “Ngai teh u, hei hi kan Pathian a nih hi; ani hi kan nghâk reng a; tichuan, min chhandam ang. Hei hi LALPA chu a nih hi; ani hi kan nghâk reng a, a chhandamnaah chuan kan lâwmin kan hlim ang,” an ti ang. 10 He tlângah hian LALPA kut chu a innghat ang a, Moab chu, buhpâwl hi êkdûr thlia rah beha a awm ṭhîn ang hian, ama hmunah rah behin a awm dâwn si a. 11 Tichuan, tui hleuhtun tui hleuh tûra a vai ang hian, chumi zîngah chuan a kutte a vai ang; tin, a chapona chu a kut vervêkna chawpin LALPAN a dah hniam ang. 12 Tin, i kulh bangte in sâng kulhpui chu a tichimin, a dah hniamin, leiah, vaivut thleng rawk khawpin a titlu ta.
Pathianin a mite a hnehtîr dâwn
1 Chumi niah chuan Juda-ho ramah he hla hi an sa ang: “Khawpui nghet tak kan nei a; ani chuan chhandamna chu kulh bangte leh kulhpuite tân a ruat ang. 2 Hnam fel, thutak zâwmtu chu a luh theihna tûrin kulh kawngkhârte chu hawng rawh u. 3 I chunga rilru nghattu chu, nangmah a rin che avângin thlamuang tak maia awm tûrin i vêng ang. 4 LALPA chu kumkhuain ring rawh u, LALPA JEHOVA-ah chuan kumkhaw Lungpui a awm si a. 5 Ani chuan sâng taka awmte chu a titlâwm ta si a, khawpui sâng tak chu; chu chu a dah hniam a, lei thleng rawkin a dah hniam a, vaivut thleng rawkin a titlu a. 6 Kê chuan a rap bet ang; retheite kê leh pachhiate pên ngei chuan,” tih hi. 7 Mi fel kawng chu dikna a ni a; nang thinlung dik tak pu chuan mi fel kawng chu i tirual ṭhîn. 8 A ni, aw LALPA, i rorêlna kawngah chuan kan nghâk reng chia; kan nunna duh zâwng chu i hming lam leh nangmah hriat rengna lam hi a ni. 9 Ka nunnain zânah ka duh chia; a ni, ka kawchhûnga ka thlarau awm hian zîng takah ka zawng ang che; i rorêlnate chu leia a lo awm apiangin khawvêla awmte chuan felna chu an zir ṭhîn si a. 10 Mi suaksual chu duhsakin awm mah sela, felna a zir chuang hlei lawng e; dikna ramah chuan dik lo takin a ti ang a, LALPA ropuina a hmu chuang lo vang. 11 LALPA, i bân i phar a, an hmu si lo; i mite tâna i ṭhahnemngaihna chu hmu se, an zak ang; a ni, nangmah dotute chu meiin a kâng ral ang. 12 LALPA, nangin remna min ruatsak ang; nangin kan hna zawng zawng pawh min thawhsak si a. 13 Aw LALPA, kan Pathian, nangmah chang ni lovin, lal dangte pawhin kan chungah thu an nei tawh ṭhîn a; nimahsela, nangma ṭanpui ngeiin i hming hi kan lam tawh ang. 14 Anni chu an thi ta a, an nung tawh lo vang; an ral ta a, an tho tawh lo vang; chuvângin, nangin anni chu i hremin i tichhia a, an hriat rengna zawng zawng pawh i tiboral ta. 15 He hnam hi i tipung ta a, aw LALPA, he hnam hi i tipung ta; nang chu chawimawiin i awm ta; he ram hi a ramri zawng zawng i tizau ta. 16 LALPA, an mangan laiin an zawng ruai ṭhîn chia, i hremna chu an chunga a tlâk laiin an ṭawngṭai mawlh mawlh a. 17 Hmeichhe nau pai, hrin hun hnai tawh chu a na ṭhîn a, nau vei nâa a chiau vawng vawng ṭhîn ang hian, aw LALPA, keini pawh i hmaah kan awm ṭhin kha. 18 Nau kan pai a, kan nâ a, thlî ang lek kan hrin kha; leiah hian chhanchhuahna kawng rêng kan tikaw lo va, khawvêla awmho lah an tlu hek lo. 19 I mitthite chu an nung leh ang a; ka mi ruangte chu an tho leh ang. Vaivuta awmte u, harh ula, hlim takin zai rawh u; i daifîm chu thlaite daifîm ang a ni a, lei hian mitthite chu a paih chhuak dâwn si a.
Thiam loh channa
20 Hawh u, ka mite u, in pindan chhûngahte lût ula, in kawngte chu inkhâr khum rawh u; lungnih lohna hi a kian hma loh chu, mit khap kâr lek pawh ni se, biru rawh u. 21 Ngai teh u, LALPA chu an sualna avânga leia awmte hrem tûrin a awmna ata a lo chhuak dâwn a ni; lei pawh hian a thisente chu a tilang ang a, mi an thahte chu a khuh tawh lo vang.
Tundin lehna
1 Chumi niah chuan LALPA chuan, a khandaih hriam ṭha tak lian pui, rinawm tak chuan leviathan rûlpui chak tak leh leviathan rûlpui chhawknghawlh nghut chu a hrem ang a, tuipuia dragon awm chu a that bawk ang. 2 Chumi niah chuan, grêp huan mawi tak chawimawiin hla sa rawh u. 3 Kei LALPA hi a vêngtu ka ni; mitkhapkâr tinin tui ka leih ang a, tu mân an khawih loh nân a chhûn a zânin ka vêng ang. 4 Ka thin a rim tawh lo va. Buar leh hnimhlîngneite lo awm mah se ka thlo vang a, hmun khatah ka hâl ral ang. 5 Kei min rem duh chuan ka ângchhûngah lo tlu lût se, mi rem rawh se. 6 Hun lo la thleng tûrah chuan Jakob-ho chuan zung an kai ang a; Israel-ho chu an kuhmûmin an pâr ang; tichuan, lei chung hi rahin a tikhat ang. 7 Amah vawtute a vuak ang takin amah chu a vaw ve em ni? A nih loh leh, ama thahte thahna ang takin amah chu thahin a awm em ni? 8 Amah chu i kal botîr laiin a tâwk lekin amah chu i hnial a; khawchhak thli tleh niah chuan a thaw na tak chuan amah chu a lên sawn ta. 9 Chuvângin, hei hian Jakob-ho khawlohna chu tlen fai a ni ang a, hei hi an sual kal bopuina rah hlîr a ni; Aseri-te leh ni lemte chu tho tawh lo tûr khawpin, maichâm lung zawng zawng chu, tlak lung den phel rem rum ang maia an siam hi. 10 Khua, kulhpui nei chu a khawhar a, awmna, mi hnuchhawn leh kalsan hnu a ni ta si a, thlalêr ang maiin; chutah chuan bâwngno a tla ang a, chutah bawk chuan a bawk ang a, a ṭangte chu a ei ang. 11 A zârte chu a vuai hun chuan thliahin a awm ang; hmeichheho an lo kal ang a, an hâl mai ang; hriat theihna rêng rêng nei lo mite an ni si a; chuvângin, an siamtu chuan anni chu a khawngaih lo vang a, anmahni dintu chuan anni chu a duh rêng rêng a duhsak lo vang. 12 Tin, chumi niah chuan heti hi a ni ang a, LALPA chuan, lui a kuang khata luang dûl dûl aṭangin, Aigupta luitê thlengin a rah a vaw thla ang a; tichuan, aw Israela thlahte u, a mal mala chhiarin in awm ang. 13 Tin, chumi niah chuan heti hi a ni ang a, tawtawrâwt lian pui an hâm ang a; tichuan, Assuria rama boral lek lekhote leh, Aigupta rama hnawh chhuahho awmte chu an lo kal ang a; Jerusalem khuaa tlâng thianghlimah chuan LALPA chu chibai an bûk ang.
Hmâr lam ram fîmkhur tûr
1 Ephraim-ho zu ruih hmangte chapona lallukhum chung leh, an mawina ropui pangpâr chuai mêk, uain chiah hneha awmho ruam ṭha takin a khum chung chu a pik e! 2 Ngai teh, LALPA chuan mi chak thiltithei tak a nei a; ani chuan rial nasa tak tla dur dur, thlipui thil tichhe rem rum ang leh, tuilian nasa tak liam zur zur ang maiin leiah a paih chawrh ang. 3 Ephraim-ho zu ruih hmangte chapona lallukhum chu rah behin a awm ang a; 4 an mawina ropui pangpâr chuai mêk, ruam ṭha takin a khum chu, nipui hmaa theipui hmin hmasa ber, a entuin a hmuha, a kuta a awm veleha a ei zawh mai ṭhin ang chu an ni ang. 5 Chumi niah chuan sipaihote LALPA chu, a mi la awm chhunte tân ropuina lallukhum leh mawina lukhum te, 6 rorêl tûra ṭhua tân rorêlna thlarau te, kulh kawngkhâr bula rawn beiho dang kîrtute tân chakna te a ni ang.
Juda zâwlnei ruiho leh Isaia
7 Nimahsela, chûngte pawh chu uain avângin an thle an thle a, zu avângin an pai an pai a; puithiamte leh zâwlneite chu zu avângin an thle an thle a, uain lem zawhin an awm a, zu avângin an pai an pai a; inlârna thu-ah an thle an thle ṭhîn a, rorêlna thu-ah an pai an pai ṭhîn. 8 Hmun fai rêng rêng awm lo khawpin dawhkân zawng zawng chu luak leh thil bawlhhlawhin a khat a ni. 9 “Hriatna lam chu tu hi nge a zirtîr dâwn tehchai? Thuchah chu tu hi nge a hriattîr dâwn tehchai? Hnute hnêk bâng hlimte leh hnute hnêktîr tawh lohte hi em ni? 10 Thununna thu chunga thununna thu chherchhuana, thununna thu chunga thununna thu chherchhuana; dân chunga dân chherchhuana, dân chunga dân chherchhuana; hetah tlêm tê, sawtah tlêm tê,” tih hlîr a ni si a. 11 A ni; nimahsela, hmui danglam pu mi hmangin, ṭawng hrangin hêng mite hnênah hian thu a sawi tawh zâwk ang: 12 “Hei hi a ni, chawlhna chu ni, hahte chu chawlhtîr rawh u! Hei hi a ni, intihharhna chu ni,” a tihate chu; nimahsela, an ngaithla duh si lo. 13 Chuvângin, an kala, zangthala an tlûka, an keh sawma, thanga an awha, mana an awm theihna tûrin, LALPA thu chu anniho tân chuan, “Thununna thu chunga thununna thu chherchhuana, thununna thu chunga thununna thu chherchhuana; dân chunga dân chherchhuana, dân chunga dân chherchhuana; hetah tlêm tê, sawtah tlêm tê,” tih hlîr a ni mai ang.
Zion tân a kila lung
14 Chumi avâng chuan, mi hmuhsit hmang mite u, he mite, Jerusalem khuaa awmho rorêlsaktute u, LALPA thu hi hre rawh u: 15 “Thihna lakah thu kan thlung ta, Seol nên thu kan intiam ta; vuakna tuilian liam chu a luan tlang hunah pawh keini thleng chuan a luang lo vang; dâwt thute kan inhumhim nân kan hmang a, dâwt hnuaiah kan biru ta si a,” in tih avângin; 16 chu vâng chuan LALPA PATHIAN chuan heti hian a sawi: “Ngai teh, lung, lung fiah hnu, a kila lung hlu tak phûm nghet tak chu, Zion-ah chuan lungphûm atân ka rem hi; a ringtu chu a hmanhmawh lo vang. 17 Rorêlna fel chu a tihngîlna hruiah ka hmang ang a, felna chu dâr mûm khaiah ka hmang ang; rial chuan inhumhimna dâwt thute chu a chhu bo vek ang a, tuite chuan bihrûkna chu a chîm pil ang. 18 Tin, thihna laka in thu thlun chu phelhin a awm ang a, Seol nêna in thu intiam pawh chu a ding chhuak lo vang; vuakna tuilian liam chu a luan tlang hunah, chumi hunah chuan a rah behin in awm ang. 19 A luan tlang apiangin a la zêl ang che u; a tûk a tûk tin, a chhûn a zânin a luang tlang dâwn si a; thuchah awmze hriat chu thil râpthlâk hlîr a ni ang,” tiin. 20 Khum chu thluan nân a tawi lutuk si a, puanthuah chu inkhuh nân a tê lutuk bawk si. 21 A hna, a hna danglam chu, a thawh theih nân leh, a thiltih, a thiltih danglam chu, a hlen theih nân, LALPA chu Perazim tlânga a tho ang khân a tho dâwn si a, Gibeon ruama a thinur ang khân a thinur dâwn a ni. 22 Chutichuan, mi hmuhsit hmangtute ni tawh suh u; chuti lo chuan, in kawl bunte chu rinawm takin an siam dah ang e; tâwpna, tâwpna thleng ngei tûra ruat tlat chu, lei pum pui chunga a thlen tûr thu LALPA, sipaihote LALPA hnên aṭang chuan ka hre si a.
Pathian finna
23 Beng chhi ula, ka aw hi hre rawh u; ngaithla ula, ka thusawi hi hre rawh u. 24 Leilettu chuan chi theh nân lei a let reng ngai em ni? A lei tlangte chu a tikehin a tisawm reng ngai em ni? 25 A chung chu a chawh rual zawhin mohuri te chu a theh darh lo vem ni? Zîra te pawh a theh lo vem ni? Buh te pawh a tlarin, barli te pawh a hmun ruatah, vai buhtun te pawh a vau hrûlah a tuh ṭhîn lo vem ni? 26 A Pathian chuan ani chu fel takin a thununin a zîrtîr ṭhîn si a. 27 Mohuri chu buh chîlna khâwl hriamin an chîl ngai si lo va, zîra chungah chuan tawlailîr ke chu an lirhtîr ngai hek lo; mohuri chu tiangin an vua a, zîra chu talhtumin an vaw zâwk ṭhîn a ni. 28 Chhang siamna buh chu râwt sawmin a awm ṭhîn a, kumkhuain a vaw reng dâwn si lo; a tawlailîr ke leh a sakawrte chuan tidarh mah sela, a râwt sawmtîr ngai lo. 29 Chûng pawh chu sipaihote LALPA, inrâwnna kawnga mi mak tak leh, finna kawnga mi ṭha tak lakah chuan a chhuak a ni.
Jerusalem chan tûr
1 E! Ariel, Ariel, Davida awmhmun khuarna khua! Kumah kum belh rawh u; kûtte chu lo thleng leh rawh se. 2 Chumi hunah chuan Ariel hi ka timangang ang a; tichuan, sûnna leh ṭahna a awm ang; tin, ani chu ka tân Ariel ang a ni ang. 3 Tin, nangmah beih tumin i vêlah ka ep ang chia, kulh siamin ka hual vêl bawk ang chia, bei tûr chein hual vêlna kulhbîngte ka siam ang. 4 Tichuan, tihtlûkin i awm ang a, lei hnuai aṭangin thu i sawi ang a, i ṭawng chu vaivut zîngah zawi têin a ri chhuak ang; i aw chu ramhuai aienthiam zâwl aw ang lekin lei hnuai aṭangin a chhuak ang a, i ṭawng chu vaivut zîng aṭangin a lo chhuak se se ang. 5 Nimahsela, nangmah dotu mipuite chu vaivut dip tak angin an awm ang a, mi hlauhawmho mipuite chu buhsi boral ṭhînte ang hian an awm bawk ang; a ni, chu chu mitkhapkâr lekah a lo awm thut ang. 6 Khawpui ri te, lîr nghîng te, ri nasa tak te, ṭhâwngaleivir te, thlipui te, thil kan ral hmang meialh tein anni chu sipaihote LALPA hremin an awm ang. 7 Tichuan, Ariel dotu hnam zawng zawng mipuiho, amah leh a kulhbîng beitute zawng zawng leh amah timangangtu zawng zawngte chu, mumang ang lek an ni ang, zâna inlârna ang lek hi. 8 Mi, rilṭâmin mumang a neihin chaw a lo ei ṭhîn a; nimahsela, a han harh a, a kua chu a lo la ruak ang hi a ni ang; a nih loh leh, mi, tuihâlin mumang a neihin tui a lo in ṭhîn a; nimahsela, a han harh a, a lo la chauvin tui a la châk ang hi an ni ang: Zion tlâng beitu, hnam zawng zawng mipuiho chu chutiang chu an ni ang.
Zilhna pawisa lo
9 Ding reng ula, mak ti rawh u, nuam leng ula, mitdelin awm rawh u! An rui a, nimahsela uain vâng a ni lo; an pai an pai a, nimahsela zu vâng a ni lo. 10 LALPA chuan mut duhna thlarau chu in chungah a leih bua a, in mit, zâwlneite chu, a maimitchhîntîr a; in lu, hmutheitute chu, a khuh ta si a. 11 Tichuan, inlârna rêng rêng in tân lehkhabu châr tlat thu ang a ni ta, chu chu miten lehkha thiam mi hnênah, “Khawngaih takin hei hi chhiar rawh,” tiin an pe ṭhîn a. Tin, ani chuan, “Ka chhiar thei lo, châr tlat a nih hi,” a ti ṭhîn a. 12 Tichuan, lehkhabu chu lehkha thiam lo mi hnênah, “Khawngaih takin hei hi chhiar rawh,” tiin a pe ṭhîn a; tin, ani chuan, “Lehkha ka thiam lo,” a ti ṭhîn.
Nakin hnu atân beisei tûr
13 Tin, LALPA chuan, “He mite hian mi rawn hnaih a, an ka leh an hmuiin mi chawimawi ṭhîn tak a; nimahsela, an thinlung chu ka hlatah an sawn a, an mi ṭihna chu mihring thupêk an inzirtîr mai chu a ni; 14 chuvângin, ngai teh, he mite zîngah hian thil mak ka ti leh nghâl ang, thil mak, thil mak tak mai chu; tichuan, an mi fingte finna chu a boral tawh ang a, an mi bengvârte hriatna chu thupin a awm tawh ang,” a ti a. 15 An remruat chu LALPA laka thup tûra thûk taka zawngtute chu an chung a pik e! An thiltihte chu thim hnuaiah a awm a, “Tuin nge min hmu ang? Tuin nge hriat pawh min hria ang?” an ti a. 16 Thilte hi in tiletling vek ṭhîn e a! Bêlvawtu chu bellei ang leka ngaihin a awm dâwn em ni, thil siam chuan a siamtu chu, “Ani mi siam ka ni hlei nêm,” a tih ni? A nih loh leh thil dintu chu a thil din chuan, “Hriatna rêng a nei lo,” a tih ni? 17 Rei lo tê chinah a ni lâwm ni Lebanon chu lei ṭha tak hmuna chantîrin a awm dâwna, lei ṭha tak hmun chu ramngawa ngaihin a awm dâwn? 18 Chumi niah chuan bengngawngte chuan lehkhabu thute chu an bengin an hre tawh ang a, mitdel mitte chuan thim hnuai leh thim zîng aṭangin a hmu tawh ang. 19 Thuhnuairawlhte pawh chuan LALPA-ah chuan an hlimna chu an tipung tawh ang a, mihring zînga retheite chu Israel-ho Mi Thianghlimaah chuan an lâwm tawh ang. 20 Mi hlauhawm chu engmahlova siamin a awm tawh a, hmusittu chu a reh tawh a, khawlohna nghâkhleltute zawng zawng chu tihboralin an awm tawh si a; 21 chûngte chuan mi chu thupawi thua thil tisualtuah an siam ṭhîn a, kulh kawngkaah zilhtu awh nân thang an kam ṭhîn a, mi fel chu thil engmahlo maiin an pumpelhtîr ṭhîn. 22 Chuvângin, LALPA, Abrahama tlantu chuan Jakoba chhûngte chungchâng thu-ah heti hian a ti: “Jakob-ho chu tûnah chuan an mualpho tawh lo vang a, an hmai chu a dâng tawh hek lo vang. 23 An fa, ka kutchhuakte chu, an zîngah an hmuhin ka hming chu an tithianghlim tawh zawk ang; a ni, Jakob-ho Mi Thianghlima chu an tithianghlim ang a, Israel-ho Pathian chu an ṭih tawh ang. 24 Thlarauva vâk bote pawh chuan an lo hre thiam tawh ang a, mi phunnawite chuan thu zirtîr chu an zir tawh ang,” tiin.
Aigupta nêna thuthlung rin tlâk loh
1 LALPA chuan, “Fa hel hmangho chu an chung a pik e! Chûngho chuan mi an râwn a, kei erawh chu mi râwn si lo va, an sual chunga sual an belhchhahna tûrin khuhnain an khuh a, ka thlarau thuin erawh chuan an khuh si lo va. 2 Pharaoa chaknaa intichak tûr leh, Aigupta hlim ring tûrin, ka kâ zâwt si lovin Aigupta rama chhuk tumin an kal a. 3 Chuvângin, Pharaoa chakna chu in mualphona a ni tawh ang a, Aigupta hlim in lo ring hi in zahna a ni tawh ang. 4 A mi liante chu Zoan khuaah an awm a, a palaite chuan Hanes khua an thleng ta si a. 5 An tân hnemhnânna rêng nei lo mi, ṭanpui ni lova, hnemhnânna nei mi ni hek lova, zah leh hmingchhiatna ni zâwkte chu, an zain an la zahpui ang,” a ti a. 6 Chhim rama sate phurrit chu. Manganna leh thlaphânna ram, sakeibakneinu leh sakebakneipa, rûlmuk leh rûl alh thlâwk thei chhuahna chu, an sum chu sabengtungno chungah te, an rote chu sanghâwngsei zângpâwngah te phurhtîrin, an tâna hnemhnânna nei lo mite hnênah pêk tûrin an kal tlâng dual dual a. 7 Aigupta chuan sâwt lo tak leh ṭangkai lo takin a ṭanpui ṭhîn si a; chu vâng chuan a ni, ani chu “Rahab ṭhu hle hle-i” ka vuah ni.
Mi luhlulte
8 Tûnah kal la, chûng chu an hmaa lehkha ziakna phêkah ziak la, lehkhabuah pawh ziak rawh, tûn hnua kumkhaw tlaitluan atân a nih theih nân. 9 Chûngho chu mi hel hmang te, fa dawthei te, fa, LALPA dân ngaithla duh lo te an ni si a; 10 hmutheitute hnêna, “Hmu suh u”, zâwlneite hnêna, “Thil dikte min hrilh lâwk suh u, thil nuam lam kan hnênah sawi rawh u, bumna thu hrilh lâwk rawh u; 11 kawng lovah kal rawh u, kawng sîrah pêng rawh u, Israel-ho Mi Thianghlima chu kan hma ata hi tibo rawh u,” ti ṭhîntute chu. 12 Chumi avâng chuan Israel-ho Mi Thianghlima chuan heti hian a sawi a: “He thu hi in hmuhsit avâng leh, hnehchhiahna leh luhlulna in rina, a chunga in innghah avângin, 13 he khawlohna hi nangni tân chuan lung bang sâng tak chhe lai, chim lek lek, pâwng pûr, vawilehkhata mitkhapkâr lova chhe rup tûr ang hi a ni ang. 14 Tichuan, bêlvawtu bêl an tikeh sawm ang hian, zuah awm hlek lova keh sawmin a them zîngah lampei, thuka mei lâkna tûr emaw, tuikhura tui thâlna tûr emaw pawh awm lo khawpin, a tikeh sawm ang,” tiin. 15 LALPA PATHIAN, Israel-ho Mi Thianghlima chuan heti hian a sawi tawh si a: “Kîr leha châwla awmin, chhandamin in awm ang a, muang taka awmnaah leh ring taka awmnaah hian in chakna a awm ang,” tiin; nimahsela, in duh si lo. 16 “Ni lo, sakawr chung chuangin kan tlân dur dur ang,” in ti zâwk si a; chuvângin, in tlân dur dur ngei ang: “Thil chak tak chungah kan chuang ang,” in ti a; chuvângin, a ûmtu tûr che u chu chak tak an ni ang. 17 Mi pakhat hrâwkin mi sângkhat an tlân dur dur ang a, mi panga hrâwkin in tlân dur dur ang, a tâwpah chuan tlâng chhîpa pholêng târ ang leh, mual chunga chhinchhiahna awm anga hnutchhiahin in la awm mai ang. 18 Chuvângin, LALPA chuan a khawngaih theihna tûr che uin a nghâk ang a, a lainat theihna tûr che uin chawimawiin a awm ang. LALPA chu rorêl felna Pathian a ni si a; amah nghâktute zawng zawng chu an eng a thâwl e.
Pathianin a mite mal a sâwm ang
19 Mite chu Jerusalem-a Zion-ah chuan an awm dâwn si a; in ṭap leh tawh lo vang. In au thâwmah chuan ani chuan a khawngaih ngei ngei ang che u a; a hriat veleh a chhâng ang che u. 20 LALPA chuan manganna chaw leh hrehawmna tui pe che u mah sela, in zirtîrtute chu biruin an awm tawh lo vang a, in mitin in zirtîrtute chu a hmu zâwk tawh ang. 21 Ding lama in pên veleh emaw, vei lama in pên veleh emaw, in bengin in hnung lama thu, “Hei hi kawng a nih hi, tah hian kal rawh u,” tiin a hre zêl ang. 22 Tin, in tangkaraw milem siam tangkaraw tîa cheina leh, in rangkachak milem chhûn rangkachak tuia luanna chu in tibawrhbâng ang. Thil bawlhhlawh angin in paih tawh ang a, chûngho hnênah chuan, “Kal bo daih rawh,” in ti ang. 23 Tichuan, ani chuan in buh chi leia in tuh tûr tân chuan ruahtui chu a pe ang a, leia thil ṭote pawh chu chawah a pe ang; chu chu ṭha tak, hlâwk tak a ni ang. Chumi niah chuan in rante chu ran tlatna hmun zau takahte chuan an tla ang. 24 Bâwngpa leh sabengtungno lei lettute chuan chaw al, suahdûr leh sisêpa tihfai sa an ei bawk ang. 25 Inthahna nasa tak nia ralvên in sângte chu a chim ni chuan, tlâng sâng tinah leh mual pâwng sâng tinah chuan luipuite leh luite tui luangte a lo awm ang. 26 Chu lo pawh chu LALPA chuan a mite sil chu a tuama, an sahna pem chu a tihdam niah chuan, thla êng chu ni êng tlukin a awm tawh ang a, ni êng chu a leh sarihin, ni sarih chhûng êng tlukin a awm tawh ang.
Pathianin Assuria a hrem ang
27 Ngai teh, LALPA hming chu, a thinurnaa alh hluah hluahin meikhu chhah mup chho ngut ngut zîngah chuan, hla tak aṭangin a lo kal e; a hmuite chu lungnih lohnain a khat a, a lei chu thil kan ral hmang mei ang a ni. 28 A thaw chu, boralna thlangraa hnam tin thlei tûrin lui, nghâwng thleng zeta a kuang liam dûl dûl ang a ni; tin, mi tin kaah chuan hruai sualtîrna hnuh dinna hrui a awm ang. 29 Tin, zâna kût thianghlima an kût laia hla an sa angin hla in sa ang; LALPA tlânga Israel-ho Lungpui hnên thleng tûra phênglâwng nên an kal laia thinlung hlimna an nei angin, thinlung hlimna pawh in nei ang. 30 Tin, LALPA chuan a aw ropui tak chu a hriattîr tawh ang a, a thinurna nasa tak leh thil kan ral hmang meialhin, thlipui leh ruahpui leh rialin, a kut thlâk dân chu a entîr tawh ang. 31 LALPA aw avâng chuan Assuria mi, talhtuma mi vaw ṭhîntu chu, tihkeh sawmin a awm dâwn tawh si a. 32 Ani chu tiang ruat saa LALPAN a vuak apiangin khuangtête leh ṭingṭangte nên a vua ang a; a tiang leka inbeihnaahte chuan anmahni a bei ang. 33 Topheth khuar zau tak leh thûk tak, thing chheh khah, lal hâlna tûr an buatsaih daih tawh a; a tikâng tûrin LALPA chuan kât lui anga luang mei a thaw chhuak ang.
Pathianin Jerusalem a hum ang
1 Aigupta rama ṭanpuina zawng tûra zuk kala, sakawrte chunga rinna nghata, a tam avânga tawlailîrte leh an chak êm avânga sakawr chung chuang mite ringa, Israel-ho Mi Thianghlima lam en si lova, LALPA pawh râwn si lote chu an chung a pik e! 2 Râwn lo mah sela ani pawh fing tak asin, thil ṭha lo a rawn thlentîr ang a, a thute chu a lamlêt lo vang; thil ṭha lo titute chhûngkua bei tûrin a tho zâwk ang a, thil tisualtute ṭanpuina do tûrin a tho bawk ang. 3 Aigupta mite chu Pathian an ni lo va, mihring mai an ni a; an sakawrte chu thlarau a ni lo va, tisa mai a ni. LALPAN a kut a phar hunah chuan a ṭanpuitu chu a pai thlawk thlawk ang a, a ṭanpuia pawh chu a tlu ang a, an za chuan an boral tlâng ang. 4 LALPA chuan heti hian ka hnênah a sawi si a: “Sakeibaknei leh sakeibaknei vânglaiin a sa a hauh lai chuan, berâm vêngtu tam tak a bei tûrin koh chhuahin awm mah sela, an aw chu a hlau dâwn lo va, an bengchhen avângin a tîm chuang dâwn hek lo ang hian, sipaihote LALPA chu Zion tlângah leh a mual pâwngah bei tûrin a lo chhuk dâwn a ni. 5 Savate an bu chunga an thlâwk an thlâwk ang hian sipaihote LALPA chuan Jerusalem khua chu a vêng ang; a vêngin a chhanchhuak ang a, a kal hlênin a humhim ang. 6 “Aw Israela thlahte u, nasa taka in helsan tâka lam chu hawi leh tawh rawh u. 7 Chumi niah chuan mi tinin mahni tangkaraw milem leh mahni rangkachak milem - sualna atâna nangmahni kuta in insiam chawpte chu an la paih bo dâwn si a. 8 “Chumi hunah chuan Assuria chu mihring khandaiha tihthlûk ni lovin, khandaih tihthlûkin a awm ang a, khandaih, mihringte ta ni lovin amah chu a ei zo vang. Tin, khandaih lak ata a tlânchhia ang a, a tlangvâlte chu salah an man ang. 9 Tin, a lungpui chu thil râpthlâk avângin a boral ang a, a mi liante chu chhinchhiahna avângin an mangang ang,” tiin, LALPA, a mei Zion-a awma leh, a rawh tuina mei Jerusalem-a awma chuan a ti.
Dik taka rêl ṭhîn lal lo awm tûr
1 Ngai teh, fel taka rorêl tûr lal a lo awm ang a, dik taka ti ṭhîn hotute an lo chhuak bawk ang. 2 Thlipui laka bîkna hmun ang leh thli hrâng laka inhumhimna ang a ni ang; thlalêra lui luang ang leh ram rova lungpui lian tak hlim ang mai chu. 3 An mit chuan chiang takin a hmu ang a, an beng pawhin fiah takin a hre tawh ang. 4 Rilrua hmanhmawh chuan hriat thiam a zir ang a, dangâwkte pawh nâl takin an ṭawng thei ang. 5 Mi sual chuan tu ma zah a kai lo vang a, mi duhâm chuan ngaihsân a hlawh hek lo vang. 6 Mi sual chuan thu â a chhâk chhuak a, suahsual dân tûr a suangtuah a, a thiltih leh a kam chhuakte chu LALPA elsênzâwng hlîr a ni; rilṭâmte ei tûr a lâksak a, tuihâlte in tûr a tihbuaksak ṭhîn. 7 Mi duhâm chu khawlo tak a ni; retheite chu dâwta tichhe tûrin thil sual a phiar chhuak a, pachhiate chu an diknaah pawh a dang tlat ṭhîn. 8 Mi ṭha erawh chuan dik takin thil a ti a, thu dik a ṭan tlat ṭhîn.
Hremna leh tundin lehna
9 Hmeichhe nuam tâwlte u, tho ula, ka thu hi ngaithla teh u; fanu ngaihsamte u, ka thusawiah hian beng chhi rawh u. 10 Hmeichhe ngaihsamte u, kum khat leh ni eng zât emaw chinah chuan in mangang tawh ang; grêp lawh tûr lah a awm dâwn si lo va, grêp lawh khâwm tûrah chuan eng mah a haw dâwn hek lo. 11 Hmeichhe awm mai maite u, khûr rawh u; mi ngaihsamte u, mangang takin awm rawh u; inhlîp ula, saruakah insiam ula, in kâwngahte chuan saiip puan veng rawh u. 12 Lo duhawmte avâng leh grêp hrui rah duh mi avâng chuan an âwm an chûm an chûm ang. 13 Ka mite ramah hian hnimhlîngneite leh buarte chu a tla ang, a ni, khawpui hlim taka hlimna in zawng zawng chungahte chuan. 14 Lal in chu kalsanin a awm dâwn si a, mi tamna khawpui chu chhuahsanin a awm ang; a mual pâwng leh a râlvên bûk chu kumkhaw pûkah te, ramsabengtung lâwmna te, ran rual tlatna hmun te a ni a; 15 chung lam aṭangin a thlarau a rawn pe leh ang a, thlalêr chu lei ṭha tak hmunah a chang ang a, lei ṭha tak hmun chu ramngawa ngaiha a awm hun chuan. 16 Rorêl felna chu thlalêrah chuan a chêng ang a, felna chu lei ṭha tak hmunah chuan a awm ang. 17 Tin, felna hnathawh chu remna a ni ang a, felnaa thil chhuak chu kumkhuaa muang taka awmna leh ring tlata awmna a ni a. 18 Tichuan, ka mite chu râlmuanga awmnaah leh, in nghet takahte leh chawlhna hmun muanawm takahte chuan an awm tawh ang. 19 Nimahsela, ramngaw chu tithlu tûrin rial a tla dur dur ang a; khawpui chu tihtlâwm dêrin a awm ang. 20 Tui luanna zawng zawng kama chi theh ṭhîna, bâwngpa leh sabengtung thlah ṭhîntute u, in eng a thâwl e.
Ṭanpui dîlna ṭawngṭai
1 Nang rawk tâwk ngai si lova rawktu, vervêk taka tih tâwk ngai si lova vervêk taka titu, i chung a pik e! Mi rawk i bân hunah rawk i la tâwk ve ang a; vervêk taka i tih zawh hunah i chungah vervêk takin an ti ang. 2 Aw LALPA, min khawngaih ang che; kan nghah reng che hi. Tûk tin kan bân lo ni la, mangan hunah chuan min chhandamtu lo ni bawk ang che. 3 Sa mur mur thâwmah chuan mi tin an tlân bo ta a; nang i thawh meuh chuan hnam tin tihdarhin an awm ta. 4 In sum râllâka lâk tûr chu pangangin thil a thiar khâwm sup sup ang hian thiar khâwmin a awm ang a; khaukhuapte an zuang sup sup ang hian anniho chu sum chungah an zuang sup sup ang. 5 LALPA chu châwisanin a awm ta, chung lamah khian a awm si a: ani chuan Zion chu rorêl felna leh felnain a tikhat ta. 6 I dam chhûng chuan awm nghehna a awm ang a, chhandamna te, finna te, hriatnate a awm ṭeuh vang; LALPA ṭihna chu a ro a ni. 7 En teh, an pasalṭhate chu pâwn lamah an au va, remna palaite chu an ṭap zawih zawih a. 8 Lamliante chu a ṭhing ṭhiap ṭhuap a, mi zin veivâk an awm ta lo. Ani chuan thuthlung chu a bawhchhia a, khuate chu a hmusit a, mihring a ngaihsak ta lo. 9 Ram chu a ṭapin a chau va, Lebanon chu a zakin a vuai a; Saron chu thlalêr ang a ni ta, Basan leh Karmel chuan an hnahte an thing thla a. 10 LALPA chuan, “Tûnah chuan ka tho vang a, tûnah chuan chawisânin ka awm tawh ang. 11 Hnim ro in pai ang a, buhpâwl in hring ang; in thaw chu nangmahni kâng ral tûr mei a ni. 12 Mi tinrêngte chu chinai lung rawh ang, hnimhlîngnei sâm hnu meia an paih ang chu an ni ang,” a ti a. 13 Hla taka awmte u, ka thiltih hi bengin lo hre rawh u, hnai tea awmte u, ka thiltihtheihzia hi hre rawh u. 14 Zion-a mi sual awmte chuan an hlau va; Pathian zah lo mite chu khurhnain a man ta a. “Kan ral hmang mei, kumkhuaa alh chu, kan zîngah tu nge tuar thei awm ang?” an ti a. 15 Fel taka awma dik taka sawi ṭhîntu, hnehchhiahnate hlâwkpuina rêng rêng lungtena, tham la duh lova kut thinsana, thisen chhuah thu ngaithla duh lova beng hupa, sualna rêng rêng en duh lova maimitchhîng ṭhîna chu: 16 chu mi chu chung lamah a awm ang a; a kulhbîng sâng chu lungpui kulhbîngte chu a ni ang a; a chaw chu a hnênah pêk a ni ang a, a tuite chu a awm ngei ngei ang. 17 I mite chuan lal chu a mawinaah chuan an la hmu ang a, ram parh zau tak an la thlîr ang. 18 “A chhiartu kha khawiah nge a awm tâk? Chhiah chawi bûktu kha khawiah nge a awm tâk? Ralvên in sângte chhiartu kha khawiah nge a awm tâk?” tiin i thinlungin thil râpthlâk tak kha i ngaihtuah ang. 19 Mi kawlh tak, ṭawng ril tak i hriat theih lohva ṭawng mite, ṭawng hrang i hriat thiam lohva ṭawngte chu i hmu tawh lo vang. 20 Kan kûtna khawpui Zion chu en teh; i mitte chuan Jerusalem chu awmna muanawm tak, puan in eng tik maha sawn lo tûr, a kaih marna khen eng tik maha phawi lo tûr, a kaihna hrui rêng rêng chat lo tûr ang chu a hmu ang. 21 Chutah chuan LALPA, lui zau tak tak leh lui tête awm thliah thluahna hmun chu, ropui takin kan hnênah a awm zâwk ang; chûng tui chungah chuan indona lawng lian pui karfung nei mi rêng rêng a kal lo vang a, lawng lian ropui tak pawhin a kal pêl hek lo vang. 22 LALPA chu kan Rorêltu a ni a, LALPA chu dân min petu a ni a, LALPA chu kan Lal a ni; ani chuan min chhandam ang. 23 I hruite chu tihdulin a awm a, an puanzâr ngul bul chu an tinghet thei lo va, puanzâr chu an zâr thei lo. Chumi lai tak chuan râllâk sum tam tak chu semin a awm a, kebaite pawhin râllâk sum an la ta a. 24 Chumi khuaa awm chuan, “Ka damlo ve,” a ti lo vang a, a chhûnga mi awmte chu an sual ngaihdam a ni ang.
Pathianin a hmêlmate a hrem dâwn
1 Hnam tinte u, benga hre tûrin lo hnai rawh u; mi tinte u, ngaithla rawh u! Lei leh a chhûnga awm zawng zawngte chuan bengin hre rawh se, khawvêl leh a chhûng ata chhuak zawng zawngte nên. 2 LALPA chuan hnam tinrêng chungah chuan lungnih lohna a neiin, an sipaiho zawng zawng chungah chuan thinrimna a nei si a; anni chu a tiboral vek a, thahah a pe ta a. 3 An zînga thahate chu paih chhuahin an awm ang a, an ruang rimchhia chu a chho vut vut ang a, tlângte chu an thisena tihtuiin a awm ang. 4 Vâna awmho zawng zawngte khi tihralin an awm ang a, vân khi lehkhabu zial mi an zial angin zialin a awm ang a; a awmho zawng zawngte khi, grêp hrui ata a hnah a vuai a, a tla ṭhîn ang leh, theipui kûng ata a hnah vuai a tla ṭhîn ang hian, an vuai zovin an tla vek ang. 5 Ka khandaih chuan vânah tlai takin a in ta si a: ngai teh, chu chu, rorêl tûrin, Edom-ho chungah leh ka ânchhe lawh mite chungah chuan a chhuk ang. 6 LALPA khandaih chu thisenin a tlai a, thaunaa tihthauvin a awm ta, berâmnote leh kêlte thisenin, berâmpa kal thautein: LALPA chuan Bozra khuaah chuan inthawina a nei a, Edom ramah chuan thahna nasa tak a nei bawk si a, 7 Selepate pawh chu an ruala sah thûkin an awm ang a, bâwngpate, bâwngchalte nên; an ram chuan thisen a rui ang a, an vaivut chu thaunaa tihthauvin a awm ang. 8 LALPA phuba lâk ni a ni tawh si a, Zion avânga inbeihna thua thungrulhna kum chu. 9 Edom lui tuite chu lawng hnaia chantîrin a awm ang a, a vaivut chu kâta chantîrin a awm bawk ang a, a ram chu lawng hnai kâng hluah hluahah a chang ang. 10 A chhûn a zânin tihmihin a awm lo vang a; a meikhu chu kumkhuain a chho ngut ngut ang. Chhuan awm chhûng zawng zawng chuan chhiain a awm reng ang a; kumkhua pawhin tu mân an pal lo vang. 11 Tuivalawng leh sakuhin chumi ram chu an nei zâwk ang a, chingpirinu leh choâk chutah chuan an awm ang. LALPAN a tichhe vek ang a, hmun ruakah chuan a sahal a khai ang. 12 An mi ṭhate chu ram awp tûrin an ko vang a; nimahsela, chutah chuan koh tûr tu mah an awm lo vang a; an mi lian zawng zawng chu engmahlo an ni ang. 13 An lal inahte chuan hnimhlîngneite a ṭo vang a, an kulhpui chhûngahte chuan ṭaiṭên leh buarte a ṭo vang; sihalte awmnaah leh savanghâwngseite tân tuallai a ni ang. 14 Tin, thlalêra ramsate chu chinghniate nên an intâwk ang a, sathâr chuan a ṭhian a ko vang a; a ni, zân thil hlauhawm pui chuan chuta chuan awmhmun a khuar ang a, ama tân chawlh hmun tûr a hmu ang. 15 Chutah chuan rûlthal chuan bu a chhep ang a, a tui ang a, a keu vang a, a awp khâwm ang; a ni, chutah chuan mute chu kawppui nei ṭheuhvin an awm khâwm ang. 16 LALPA lehkhabuah zawng ula, chhiar rawh u: chûng zîngah chuan pakhat mah kim lo a awm lo vang a, pakhat mah kawppui nei lo a awm lo vang. Ka kâ ngeiin thu a pe a, a thlarau ngeiin chûng chu a hruai khâwm ta hlawm si a. 17 Ani chuan an tân ṭhum a vâwrsak a, a kutin hruia tehin ram chu a semsak hlawm a; kumkhuain an nei ang a, chhuan awm chhûng zawng zawngin chutah chuan an awm ang.
Lamlian thianghlim
1 Thlalêr leh ram pilril chu a lâwm ang a, ram ro chu a hlimin phûl pangpâr angin a pâr ang; 2 a pâr vul chûk ang a, lâwm tak leh hla sain a hlim ang. Lebanon ropuina chu a hnênah pêk a ni ang, Karmel leh Saron mawina nên. LALPA ropuina an hmu ang, kan Pathian mawina nên. 3 Kut chak lote chu tichak ula, khûp zâwite chu tinghet rawh u. 4 Thinlung dawihte hnênah chuan, “Chak takin awm ula, hlau suh u! Ngai teh u, in Pathian chu phuba lâkna nên a lo kal ang, Pathian thungrulhna nên chuan; a lo kal ang a, a chhandam ang che u,” ti rawh u. 5 Chumi hunah chuan mitdelte mit chu tihmenin a awm ang a, bengngawngte beng chu tihvârin a awm ang. 6 Chumi hunah chuan kebaite chu sakhi angin an zuang ang a, ṭawngtheilote lei chu hlim takin a zai ang. Thlalêrah chuan tuite a lo chik chhuak luah luah dâwn si a, ram rovah chuan luite tui a lo chik chhuak luah luah bawk ang. 7 ṭiau dip sa tak hmun chu dîlah a chang ang a, lei tuihâl tak chu tuihnaahte a chang ang; sihalte chênna, an mutnaah chuan, hlobet, phairuang leh phûngladin nên a awm ang. 8 Chutah chuan lamlian a awm ang, kawng nên, chu chu “Thianghlimna Kawng” an ti ang; mi bawlhhlawhte chu chutah chuan an kal lo vang a; amaherawhchu, hêng mite tân hian a ni zâwk ang: mi zin veivâkte, a ni, mi âte pawh, chutah chuan an bo lo vang. 9 Sakeibaknei rêng rêng chutah chuan a awm lo vang a, sa koham rêng rêng chutah chuan a chho hek lo vang, chutah chuan hmuh tûr pawh a awm lo vang; tlante erawh chu chutah chuan an kal zâwk ang. 10 Tin, LALPA tlante chu an kîr leh ang a, hla sa chungin Zion chu an thleng ang a; chatuana lâwmna an lu chungah a awm tawh ang. Hlimna leh lâwmna an hmu ang a, lungngaihna leh rûmna chu a bo tawh ang.
Assuria-in Jerusalem a vau
1 Tin, Hezekia lal kum sâwm leh kum lina kumah chuan heti hi a ni a, Assuria ram lal Senakeriba chu Juda rama khua kulhpui nei zawng zawng bei tûrin a han chho va, a la ta a. 2 Tin, Assuria lal chuan Rabsakea chu sipaiho tam tak hruaiin, Lakis khua aṭangin Jerusalem khuaa Lal Hezekia hnênah chuan a tîr a. Tin, dîl chhakta zâwk tuilâkna kianga puan sutu phûl lamlianah chuan a ding a. 3 Chutichuan, lal chhûngte chunga hotua awm Hilkia fapa Eliakima te, lehkhaziaktu Sebna te, chanchin ziaktu Asapha fapa Joa te chu a hnênah an lo chhuak a. 4 Tin, Rabsakean an hnênah, “Hezekia hnênah heti hian sawi rawh u, ‘Lal ropui tak Assuria lal chuan heti hian a ti: I rinna i nghahna hi eng nge ni le? 5 Indona atân chuan i remruat leh i chakna hi thu mai mai a ni ka ti. Tu nge i rin a, ka chunga i hel tâk ni le? 6 Ngai teh, he luang sâwp tiang, Aigupta-ho hi i ring a nih hi; chumi chu miin a rinchhan chuan a kutah a chhun lût ngawt ang; Aigupta lal Pharaoa chu amah ringtu zawng zawng chungah chuan chutiang chu a ni ṭhîn. 7 A nih loh leh, ka hnênah, “LALPA kan Pathian chu a ni kan rin ni,” i tih chuan, ani chu Hezekian Juda-ho hnênah leh Jerusalem-ho hnênah, “He maichâm hmaah chauh hian in be tûr a ni,” tiin, a hmun sângte leh a maichâmte a lâk bosaka kha a ni lâwm ni?’ 8 Chutichuan, khawngaih takin, ka pu Assuria lal hnênah chuan thu tiam rawh; tichuan, keiin sakawr sânghnih ka pe ang che, nangin a chunga chuang tûrte i hmuh theih dâwn phawt chuan. 9 Engtin nge tawlailîrte leh sakawr chung chuang mite lam thu-ah Aigupta-ho chunga i rinna nghatin, ka pu chhiahhlawh tê berte zînga hotu pakhat pawh hi i dan zawh dâwn le? 10 Tin, he ram hi tichhe tûra bei tûrin LALPA tel lova lo chho em ka nih? LALPAN ka hnênah, ‘Chu ram chu bei tûrin chho la, tichhe rawh,’ mi ti a ni, tiin,” a ti a. 11 Tin, Eliakima leh Sebna leh Joa-te chuan Rabsakea hnênah, “Khawngaih takin i chhiahhlawhte hi Suria ṭawngin min be tawh rawh, chu chu kan hre thei si a; kulh bang chunga mite beng hriatah Juda ṭawngin min be tawh suh,” an ti a. 12 Nimahsela, Rabsakea chuan, “Ka pu chuan i pu hnên chauhvah leh i hnên chauhvah hêng thu hi sawi tûrin mi tîr em ni? Kulh bang chhûnga ṭhuho, nangmahni nêna mahni êk la ei tûr leh mahni zun la in tûrte hnênah hian mi tîr zâwk a ni lâwm ni?” a ti a. 13 Tin, Rabsakea chu a ding a, Juda ṭawngin aw ring takin a au va, “Lal ropui tak Assuria lal thute hi ngaithla rawh u. 14 Lal chuan heti hian a ti, ‘Hezekia bumin awm duh suh u, ani chuan a chhanhim thei dâwn si lo che u a; 15 Hezekian, “LALPA chuan matheilovin min chhanhim ang; he khawpui hi Assuria lal kutah pêkin a awm lo vang,” tiin sawi mah sela, LALPA chu Hezekia sawi avângin ring duh chuang hek suh u.’ 16-17 Hezekia thu ngaithla suh u; Assuria lal chuan heti hian a sawi si a: ‘Min rem ula, ka hnênah hian lo chhuak rawh u; tin, ka lo kala, nangmahni ram anga buh leh uain awmna ram, chhang leh grêp huante awmna rama ka kalpui hma loh che u chuan, mi tinin mahni grêp hruia mi leh mi tinin mahni theipui kûnga mi ei ṭheuh ula, mi tinin mahni tuikhur tui in ṭheuh rawh u. 18 “LALPAN min chhanhim ang,” tia Hezekian a thlêm tâk dah che uin, fîmkhur rawh u. Hnam tin pathian zînga mi rêng rêngin an ram chu Assuria lal lakah an chhanhim ta em ni? 19 Hamath leh Arpad-ho pathiante kha khawiah nge an awm tâk? Sepharvaim-ho pathiante kha khawiah nge an awm tâk? Samari khua kha ka lakah an chhanhim ta em ni? 20 Chûng ram pathian zawng zawng zînga mi chuan tute nge an ram ka lakah chhanhim ni? LALPA chuan Jerusalem khua hi ka lakah a chhanhim tehchai ang maw?’ tiin,” a ti a. 21 Anni erawh chu an ngawi reng a, thu pakhat mahin an chhâng lo; lal thupêk chu, “Ani chu chhâng suh u,” tih a ni si a. 22 Chutichuan, lal chhûngte chunga hotua awm Hilkia fapa Eliakima te, lehkhaziaktu Sebna te, chanchin ziaktu Asapha fapa Joa te chu silhfên pawh thlêr inbelin Hezekia hnênah chuan an lo thleng a, Rabsakea thusawite chu an hrilh ta a.
Lalin Isaia a râwn
1 Tin, heti hi a ni a, Lal Hezekia chuan chu chu a hriat veleh a silhfênte chu a pawt thlêr a, saiip puan a inbel a, LALPA inah chuan a lût ta a. 2 Tin, a chhûngte chunga hotua awm Eliakima leh, lehkhaziaktu Sebna leh, puithiamho upate chu saiip puan inbelin Amoza fapa zâwlnei Isaia hnênah a tîr a. 3 Tin, anni chuan a hnênah, “Hezekian heti hian a ti, ‘Vawiin ni hi manganna leh hmuhsitna ni a ni; nautê chu an pian a hun tawh si a, anmahni hring tûrin chakna a awm tawh si lo. 4 Rabsakea, a pu Assuria lalin Pathian nung sawichhe tûra a tirha thusawite chu, LALPA i Pathian chuan a bengin a la hria a ni thei e; tichuan, a thusawi, LALPA i Pathianin a benga a hriatahte chuan a la zilhhau vang. Chumi avâng chuan a la awm chhunte tân chuan i ṭawngṭaina chu hlân chho rawh,’ a ti e,” an ti a. 5 Chutichuan, Lal Hezekia chhiahhlawhte chu Isaia hnênah an lo kal a. 6 Tin, Isaian an hnênah, “In pu hnênah heti hian in sawi tûr a ni, ‘LALPA chuan heti hian a ti, “I thu hriat, Assuria lal chhiahhlawhten min sawichhiatnate kha hlau suh. 7 Ngai teh, a kawchhûngah chuan thlarau eng emaw ka awmtîr ang a; tichuan, thuthang a hria ang a, ama ramah a haw leh ang; tichuan, ama ram ngeiah chuan khandaiha tihtlûkin ka awmtîr ang,” a ti e,’ tiin,” a ti a.
Assuria-hovin an rawn vau leh
8 Chutichuan, Rabsakea chu a kîr leh a, Assuria lal chuan Libna khua a lo bei lai a va hmu a; Lakis khua ata chu a kal chhuak tih a hre tawh reng si a. 9 Tin, Assuria lal Senakeriba chuan Tirhaka, Ethiopia ram lal chungchâng thu, “Nangmah bei tûrin a chhuak ta,” tiin mi sawi a hria a. Tichuan, chu chu a hriat veleh Hezekia hnênah palaite a tîr a: 10 “Heti hian Juda-ho lal Hezekia hnênah in sawi tûr a ni: ‘I rin Pathian chuan, Jerusalem khua Assuria lal kutah pêk a ni lo vang, tiin bum che suh se. 11 Ngai teh, Assuria lalten ram zawng zawng tichhe vekin an chunga an thiltihte kha i bengin i hria e; tichuan, nang tehlul hi chhanhimin i awm dâwn bîk em ni? 12 Hnam tin pathiante chuan Gozan-ho te, Haran-ho te, Rezeph-ho te, Eden fa Tel-asar khuaa awm te, min thlahtuten an tihboralte kha an chhanhim em ni? 13 Hamath lal te, Arpad lal te, Sepharvaim khawpui lal te, Hena lal te, Iva lal te kha khawiah nge an awm tâk?’ tiin,” a ti a. 14 Tin, Hezekia chuan palaite kut ata lehkha chu a hmu a, a han chhiar a; tichuan, Hezekia chu LALPA inah chuan a han lût a, LALPA hmaah chuan a phah ta a. 15 Tin, Hezekia chu LALPA hnênah a ṭawngṭai a, 16 “Aw sipaihote LALPA, Israel-ho Pathian, cherub chunga ṭhua, nang hi, nang chauh hi, leilung luah ram zawng zawng Pathian chu i ni; nang chuan lei leh vân hi i siam a ni. 17 Aw LALPA, i beng rawn dawh la, ngaithla teh; aw LALPA, i mit meng la, en teh; Pathian nung sawichhe tûra mite tîrtu Senakeriba thu zawng zawng hi ngaithla teh. 18 LALPA, Assuria lalten ram zawng zawng leh an lei chu an tichhe ngei tak a, 19 an pathiante chu meiah an paih bawk a; chûngte chu pathian an ni lo rêng a ni, mihring kuta siam, thing leh lung an ni zâwk. Chuvângin, an tiboral a ni. 20 Chuvângin, aw LALPA kan Pathian, nang hi, nang chauh hi, LALPA i ni tih leilung luah ram zawng zawng hian an hriat theih nân a lakah min chhandam ang che,” tiin.
Lal hnêna Isaia thuthlen
21 Chumi lai chuan Amoza fapa Isaia chuan Hezekia hnênah mi a tîr a, heti hian a ti a, “LALPA, Israel-ho Pathian chuan heti hian a ti a ni: ‘Assuria lal Senakeriba chhiatna tûr lama ka hnêna i ṭawngṭai avângin, 22 hei hi a chungchâng thu LALPAN a sawi chu a ni: Zion fanu nula chuan a hmusit chia, a nuihsan che; Jerusalem fanu chuan a lu a thin khum che. 23 Tu nge i tihhmingchhiata i sawichhiat ni? Tu chungah nge i aw i tihpâwra i mit i tihsân? Israel-ho Mi Thianghlima chung ngeiah. 24 I chhiahhlawhte hmangin LALPA chu i tihmingchhia a, “Ka tawlailîr tam tak nên tlâng hmun zo, Lebanon ram rilahte hian ka lo thleng chho ta a; a sidar thing sâng takte leh a fâr thing ṭha mite hi ka kit ang a; a hmun zo hla ber, a lei ṭha hmun ramngawah chuan ka lût ang. 25 Tuichhunchhuah ka lai a, tui ka in ṭhîn a, ka kephah hnuai hian Aigupta lui zawng zawng chu ka tikang vek ang,” i ti a. 26 Keiman hmânlai ata chûng chu ka tih a ni a, hmasâng ata chûng chu ka siam a ni tih i hre lo vem ni? Kulhpui nei khuate tichim tûrin ka ti che a ni. 27 Chuvângin, a chhûnga awmte chu an chak mang lo va, an hlau va, an lo mualpho tâk kha; phûl hlobet ang leh, hnim hring ang leh, in chunga hlobet ang leh, lo buh ṭhat hma ang lek an nih kha. 28 Kei erawh chuan i ṭhut te, i chhuah te, i luh te, ka chunga i thinurziate hi ka hria asin. 29 Ka chunga i thinur avâng leh, i ṭawng chaltlaizia chu ka bengah a lo luh chhoh tâk avâng hian, ka hnârvuah chu i hnârah ka vuah ang a, ka thîrbarh chu i hmuiah ka vuah bawk ang a, i lo kalna kawng ngeiah khân ka kîrtîr leh ang che, tih hi,’ tiin. 30 Tin, hei hi i tân chhinchhiahna tûr chu a ni ang: kuminah hian buhhli in ring ang a; nakkumah pawh chumi hli bawk chu in ring ang; tin, a kum thumnaah chuan buh tuh ula, ât ula, grêp huante siam ula, a rah ei rawh u. 31 Tin, Juda chhûngte zînga la dam chhunte chu a chhuk zâwnga zung kaia, a chho zâwnga rahin a awm leh ang. 32 Jerusalem aṭangin a la awm chhunte chu an chhuak ang a, Zion tlâng aṭangin a la dam tûrte chu an chhuak bawk ang. Sipaihote LALPA ṭhahnemngaihna chuan chûng chu a ti ang. 33 Chuvângin, LALPA chuan Assuria lal chungchâng thu-ah heti hian a ti, ‘Ani chuan he khawpui hi a lo thleng lo vang a, hetah hian thal a kâp hek lo vang, phaw nên a kiangah a lo kal hek lo vang a, a beihna tûrin lei kulh a siam hek lo vang. 34 A lo kalna kawngah, chumiah ngei chuan a kîr leh ang a, he khawpui hi a lo thleng lo vang, LALPAN a ti. 35 Keimah avâng leh ka chhiahhlawh Davida avângin he khawpui hi chhanhim tûrin ka hum dâwn a ni,’ tiin,” a ti a. 36 Tichuan, LALPA vântirhkoh chu a va chhuak a, Assuria-ho riahhmunah chuan mi nuai khat leh sîngriat leh sângnga a tihlum a; tin, zîng taka mi an han thawh chuan, ngai teh, mitthi ruang hlîr a lo ni a. 37 Chutichuan, Assuria lal Senakeriba chu a chhuak a, a kal bo va, a inah a haw a, Ninevi khuaah chuan a awm ta reng a. 38 Tin, heti hi a ni a, a pathian Nisroka inah chuan pathian a biak laiin a fapa Adrammeleka leh Sarezera-te chuan khandaihin an sât hlum a; tichuan, an tlân bo va, Ararat ramah an lût a. Tichuan, a fapa Esar-haddona chuan a aiawhin ro a rêl ta a.
Hezekia damloh thu leh a dam leh thu
1 Chûng lai chuan Hezekia chu thih ngamin a na a. Tichuan, Amoza fapa zâwlnei Isaia chu a hnênah a lo kal a, a hnênah, “LALPA chuan heti hian a ti, ‘I chhûngte khawsak dân tûr rêlsak rawh; dam chhuak lovin i thi ngei dâwn si a,’ tiin,” a ti a. 2 Chutichuan, Hezekia chu bang lam hawiin a let a, LALPA hnênah a ṭawngṭai a, 3 “Aw LALPA, i hmaah thutak leh thinlung ṭha famkim pua ka awm ṭhinzia leh, i mit hmuha thil ṭha ka tih ṭhinzia kha khawngaih takin hre reng ang che,” a ti a. Tin, Hezekia chu a ṭap ta zawih zawih a. 4 Chutichuan, LALPA thu chu Isaia hnênah a lo thleng a, 5 “Kal la, Hezekia hnênah sawi rawh, ‘LALPA, i pu Davida Pathian chuan heti hian a ti, “I ṭawngṭaina kha ka hria a, i mittuite pawh ka hmu a; ngai teh, i dam chhûng nite hi kum sâwm leh kum ngain ka tisei ang. 6 Tin, nang leh he khawpui hi Assuria lal lakah ka chhanhim ang a, he khawpui hi ka hum ang.” ’ 7 Tin, LALPAN a thil sawi hi a ti ngei dâwn tih, hei hi i tân LALPA laka chhinchhiahna tûr chu a ni ang: 8 ngai teh, Lal Ahaza dâr chin tehnaa ni hlim saw, rahka sâwmin ka tikîr ang,” a ti a. Chutichuan, ni hlim chu rahka sâwm a kîr leh ta a. 9 Juda lal Hezekia damlo, a dam leh hnua a lehkha ziak chu: 10 “Ka dam chhûng nite chhûnlai takah hian thlân kawngkâahte ka lût dâwn a; Ka dam chhûng kum la bâk tûrte chu chhuhin ka awm ta,” ka ti a. 11 “LALPA, LALPA ngei chu, mi nung ramah hian ka hmu dâwn tawh lo va; Khawvêla awmte zîngah hian mihring ka hmu leh dâwn tawh lo a nih hi. 12 Ka awmna hi sawnin a awm a, berâm vêngtu puan in angin ka hnên ata lâk bovin a awm ta; Puan tahtun a puan a zial angin ka nunna hi ka zial a. Ani chuan thembu aṭangin mi chep chhum hmawk dâwn a; Nangin ni khat leh zan khat thil thu-ah mi titâwp mai dâwn a nih hi ka ti a. 13 Zîng thlengin ka ngawi hrâm hrâm a; sakeibaknei angin ka ruh zawng zawng a titliak vek a; Nangin ni khat leh zan khat thil thu-ah mi titâwp mai dâwn a nih hi. 14 Vamûr emaw, kânghlai emaw angin ka hrâm ka hrâm a; ṭhûro angin ka rûm ka rûm a; chung lam thlîr nân ka mit a vai zo ta. Aw LALPA, hnehchhiaha ka awm hi; nang chuan a bul mi tumsak ang che. 15 Eng nge ka sawi ang aw? Ani chuan mi bia a, ani vêk chuan a ti ta nghâl a. Ka nunna thawpikna avâng khân ka dam chhûng kum zawng zawngah chuan zawi têin ka kal dêm dêm tawh ang. 16 Aw LALPA, hetiang thil avâng hian mihringte hi an nung ṭhîn a; Chûngah chauh chuan ka thlarau nunna chu a awm ṭhîn; Chumi avâng chuan mi tidam lehin mi tinung leh ang che. 17 Ngai teh, ka thlamuanna tûrin a ni, thawpikna nasa tak ka neih kha ni; Nimahsela, nang chuan, ka nunna i hmangaih avângin, chhiatna khuarkhurum ata chu i chhanhim ta, Ka sualte zawng zawng kha i hnung lamah chuan i paih vek si a. 18 Thlân hian a fak thei si lo che a; thihna hian a chawimawi thei hek lo che; Khuarkhuruma chhukte chuan i thutak chu an beisei thei lo a ni. 19 Mi nungin, mi nungin, anni ngei chuan, vawiina ka tih ang hian an fak ang che; Pa chuan fate hnênah i thutak chu a hriattîr ang. 20 LALPA chu mi chhandam tûrin a inpeih reng a ni; Chuvângin, kan dam chhûng zawng zawngin, LALPA inah chuan Ka hlate hi ṭingṭangte nên kan sa ang.” 21 Isaia chuan, “Theipui rah hlâwm khat la sela, damdawi a bela bel mi atân a khawihlîah bel rawh se; tichuan, a dam ang,” a lo ti tawh a ni. 22 Hezekia pawh chuan, “LALPA inah ka chho leh ang tih hriatna eng chhinchhiahna nge lo awm ang?” a lo ti tawh a ni.
Babulon ata lal damlo rawn entute
1 Chumi lai chuan Baladana fapa Babulon lal Merodak-baladana chuan lehkhate leh lâwmman Hezekia hnênah a thawn a, a nâ tih leh a dam leh ta tih a lo hriat avângin. 2 Tichuan, Hezekia chu an chungah a lâwm a, an hnênah a thil hlu dahna in - tangkarua te, rangkachak te, englo rimtui te, hriak hlu tak te, a râlthuam dahna in chhûng zawng zawng te, a ro ṭha zawng zawng chu a entîr a. A ina mi leh a ram chhûnga mi Hezekian an hnêna a entîr loh thil rêng rêng a awm lo. 3 Chumi lai chuan zâwlnei Isaia chu Lal Hezekia hnênah a lo kal a, a hnênah, “Nichina mite khân eng nge an sawi? Khawi aṭangin nge i hnênah an lo kal?” a ti a. Tin, Hezekia chuan, “Ram hla tak ata, Babulon aṭangin ka hnênah an lo kal a ni,” a ti a. 4 Tichuan, ani chuan, “I inah hian eng nge an en kha?” a ti a. Tin, Hezekia chuan, “Ka in chhûnga awm zawng zawng chu an en vek; ka ro ṭha zînga mi ka entîr loh eng mah a awm lo,” tiin a chhâng a. 5 Tichuan, Isaian Hezekia hnênah chuan, “Sipaihote LALPA thu hi hre rawh: 6 ‘Ngai teh, i in chhûnga awm zawng zawng leh vawiin thlenga i puten an khâwl khâwmte chu Babulon khuaah kalpuiin a awm vek ang; eng mah rêng rêng hnutchhiahin a awm lo vang; chutiang nite chu a la thleng dâwn,’ LALPAN a ti. 7 ‘Tin, i fapa, i rîla rah, i hrin tûrte ngei zînga mi chu, an kal bopui ang; anni chu Babulon lal inah chuan mi tilrehah an la awm ang,’ a ti,” a ti a. 8 Tichuan, Hezekian Isaia hnênah chuan, “LALPA thu i sawi hi a ṭha e,” a ti a. Amah vêk chuan, “Ka dam chhûng hian remna leh thutak a awm dâwn si a,” a ti bawk a.
Thlamuanna thu
1 “Thlamuan rawh u, ka mite hi thlamuan rawh u!” in Pathianin a ti. 2 “Jerusalem-ho hnênah thlamuan lam zâwngin thu sawi ula, an indona chu a kin a, an sualna chu ngaihdam a ni a, an thil tihsual zawng zawng aiah LALPA kut ata a leh hnihin an hmu ta tih hril rawh u.” 3 Chu! Autu râwl chuan, “Thlalêrah LALPA kawng buatsaih ula, ram rovah kan Pathian tân lamlian tingîl rawh u. 4 Kawr tin tihsân a ni vek ang a, tlâng tin mual tin tihhniam a ni bawk ang; kawng kawite tihngîl a ni ang a, a bumboh laite tihrual a ni bawk ang; 5 LALPA ropuina chu tihlan a ni ang a, mi zawng zawngin chu chu an hmu vek ang; LALPA ka chuan a sawi tawh si a,” a ti. 6 Chu! Aw chuan, “Au rawh,” a tih chu. Tin, mi chuan, “Eng thu sawiin nge ka au vang?” a ti a. “ ‘Mi zawng zawng hlobet ang an ni a, an ropuina zawng zawng pawh phûl pangpâr ang a ni. 7 LALPA thaw chuan a chhêm avângin hlobet chu a vuai a, a pâr chu a chuai ṭhîn; mite chu hlobet ang chauh an ni. 8 Hlobet chu a vuai a, a pâr chu a chuai ṭhîn; kan Pathian thu erawh chu chatuanin a awm reng ang,’ tiin,” a ti a. 9 Aw Zion hnêna chanchin ṭha hriltu, tlâng sâng takah khian han chho rawh; aw Jerusalem hnêna chanchin ṭha hriltu, ring takin i aw chhuah rawh; chhuah rawh, hlau suh; Juda khuate hnênah chuan, “En teh u, in Pathian hi!” ti rawh. 10 En teh u, LALPA PATHIAN chu mi chak tak angin a lo kal dâwn hi, a bân chuan a aiah ro a rêl ang; en teh u, a lâwmman chu a hnênah a awm hi, a rulhna chu a hmaah a awm bawk a. 11 Ani chuan berâm vêngtu angin a berâm rual chu a châwm ang a, berâmnote chu a bânin a pawm khâwm ang a, a ângchhûnga dahin a kalpui ang a, no hruai laite chu zawi têin a hruai dial dial ang.
Israel-te Pathian tehkhin rual loh
12 Tuin nge tuite chu a kutphah khuar leka teha, vân khi khâp leka teha, leia vaivut hi tehkhâwng pakhat leka thun veka, tlângte chu khîn leka bûka, mualpâwngte chu bûkna leka bûk kha le? 13 Tuin nge LALPA thlarau chu thil tih dân tûr kawhhmuh le? A nih loh leh tu nge a remruatsaktu nia amah zirtîr le? 14 Ani chuan tu nge a râwna, tuin nge amah chu hriattîra, rorêlna kawng entîra, hriatna zirtîra, hriatthiamna kawng entîr ngai le? 15 Ngai teh, hnam tin chu bâlṭîna tui far khat ang lek an ni a, bûknaa thil dip bâng kai ang leka ruat an ni; ngai teh, ani chuan thliarkârte chu thil tê tak tê angin a la nelh nelh mai ṭhîn. 16 Lebanon meuh pawh tuah tham a ni lo va, a rama rante pawh hâl rala inthawina tham an ni hek lo. 17 Hnam tinrêngte chu a hmaah chuan engmahlo ang an ni a; ani ngaih chuan engmahlo aia tlêm zâwk, boruak mai an ni a. 18 Pathian chu tu nên nge in tehkhin dâwn le? A nih loh leh, eng lem nge amah nên in tehkhin dâwn le? 19 Milem siam chawp hi hna thawk mi chuan a chhûng a, rangkachak chher mi chuan rangkachakin a luan a, chu mi tân chuan tangkaraw khaidiatte a chhûnsak ṭhîn. 20 Chutiang thilpêk pe zo lova rethei lutuk chuan thing mawih lo tûr a thlang ṭhîn; milem siam chawp, nghîng lo tûr, a tâna dinsaktu tûr themthiam mi a zawng ṭhîn. 21 In rilruin in hre ngai lo vem ni? In bengin in hre ngai lo vem ni? A tîr aṭang khân an hrilh lo che u em ni? Leilung pian tirh aṭang khân in hre thiam lo vem ni? 22 Ani chu leilung kualkhungna chunga ṭhua chu a ni, a mit hmuhah chuan lei chunga awmho chu khaute ang lek an ni a; ani chu vân khi puan in chung anga kai pharha, puan in awmna tûra zâra, 23 mi liante engmahlova siam ṭhîna chu a ni; ani chuan leia rorêltute chu engmahlovah a siam ṭhîn. 24 A ni, a phun an ni lo; a ni, a tuh an ni lo; a ni, an kûng chuan leiah zung a kai lo; chu lo pawh chu ani chuan anniho chu a chhêm a, an vuai a, ṭhâwngaleivirin buhsi a lâk bo angin a la bo ṭhîn. 25 “Tu nên nge mi tehkhina, tu tluk lekah nge mi ruat dâwn?” Mi Thianghlima chuan a ti. 26 Chung lamah khian in mitte lên chho ula, khîngte khi tu siam nge ni en rawh u; ani chuan sipaihote khi indawt zêlin a hruai chhuak ṭhîn a, an hmingin a ko ṭheuh ṭhîn a; a chakna ropui êm avâng leh, thiltihtheihna lama a chak avângin pakhat mah kim lo an awm ngai lo. 27 Engati nge aw Jakob-ho, hetianga in tih ni, engati nge aw Israel-ho, hetianga in sawi ni: “Ka kawng hi LALPA laka thup a ni a, ro mi rêlna hi ka Pathian laka lâk bo a ni ta,” tih hi? 28 In rilruin in hre ngai lo vem ni? In bengin in hre ngai lo vem ni? Kumkhaw Pathian, LALPA, kâwlkil Siamtu chu, a chauh ngai lohva, a hah ngai hek lohzia hi; a hriat thiamzia chu zawn chhuah rual a ni lo. 29 Chau hnênahte chuan thiltihtheihna a pe ṭhîn a, chakna rêng nei lote chu a tichak ṭhîn. 30 Tleirâwlte meuh pawh an chauvin an hah ang a, tlangvâlte pawh an tlu dêr ang; 31 LALPA nghâktute erawh chuan an chakna chu an siam ṭha leh ang a; mupuite angin thlain an thlâwk chho vang a, hah lovin an tlân ang a, chau lovin kein an kal ang.
Pathianin Israel-te a ṭawng thlamuan
1 Aw thliarkârte u, ka hmaah ngawi ṭhiap rawh u; mi tin chuan an chakna tithar leh sela, lo hnai hlawm sela, chumi hnuah chuan sawi rawh se; rorêl tûrin i inhnaih tlâng teh ang u. 2 Khawchhak ata mi pakhat, felna avânga a ke bula a kohva chu tuin nge kai harh? Ani chuan hnam tin a hmaah a pe a, lalho chungah ro a rêltîr a; anni chu vaivut angin a khandaih hnênah a pe a, buhsi thli chhêm lên angin a thalngul hnênah a pe bawk a. 3 Ani chuan anniho chu a ûm a, him takin a kal zêl a; a kea a la kal ngai lohna kawngah chuan. 4 A tîr ata chhuan zawng zawng kovin, tuin nge thawka, ti zo? Kei LALPA, a hmasa ber leh a hnuhnûng bera hnêna awm hi, a titu chu ka ni. 5 Thliarkârte chuan an hmu a, an hlau va, kâwlkilte chu an khûr a; an rawn hnaih a, an lo kal a. 6 Mi tinin mahni ṭhiante an ṭanpui a; mi tinin an unaute hnênah, “Thlamuang takin awm rawh,” an ti ṭheuh va. 7 Chutichuan, a chârna lam thu-ah chuan, “A ṭha e,” tiin, themthiam mi chuan rangkachak chher mi a fuih a, tubohva dêng mâm mi chuan dolung dêng mi a fuih bawk a; tin, a nghîn lohna tûrin kilhnatein a kilh tlat a. 8 “Nimahsela, nangni Israel-ho, ka chhiahhlawh, Jakob-ho, ka mi thlan, ka ṭhian Abrahama thlahte u, 9 nangni leilung tâwpna ata ka mi hruai, a kil ata ka mi koh, ‘Ka chhiahhlawhte in ni, paih thla lovin ka thlang zâwk che u,’ ka tihate u, 10 hlau suh u, kei in hnênah ka awm si a; mangang suh u, kei in Pathian ka ni si a. Ka tichak ang che u a, a ni, ka ṭanpui ang che u; ka felna kut ding lamin ka chelh reng ang che u. 11 Ngai teh, in chunga lungni lo zawng zawng chu mualpho tak leh zak takin an awm ang; nangmahni hnialtute chu engmahlo ang an ni ang a, an boral ang. 12 Nangmahni hnialtute chu in zawng ang a, in hmu si lo vang. Nangmahni dotute chu engmahlo ang an ni ang a, thil awm lo ang mai an ni ang. 13 Kei LALPA in Pathian hian, ‘Hlau suh u, ka ṭanpui dâwn a che u,’ tiin in kut ding lam chu ka chelh dâwn si a. 14 Nang Jakob changpât leh Israel mite u, hlau suh u, ka ṭanpui ang che u,” LALPAN a ti, nangmahni tlantu che u chu Israel-ho Mi Thianghlima chu a ni. 15 Ngai teh, buh chîlna khâwl thar tak, hriam tak, ha nei miah ka siam ang che u; tlângte chu chîlin in vaw sawm ang a, mual pâwngte chu buhsi angin in siam ang. 16 In zâp ang a, thliin a chhêm lêng ang a, ṭhâwngaleivirin a tidarh ang; tin, nangni chu LALPA-ah chuan in lâwm ang a, Israel-ho Mi Thianghlima chu in la chhuang ang. 17 Mi rethei leh pachhiate chuan tui an zawng ṭhîn a, a awm si lo va, an lei chu tuihâlin a ro vek ṭhîn; kei LALPA hian anni chu ka chhâng ang a, kei Israel-ho Pathian hian anni chu ka kalsan lo vang. 18 Tlâng sâng kawlh vel vulah chuan luite ka luan chhuahtîr ang a, ruam laiahte chuan tuihnate ka chhuahtîr bawk ang; thlalêr chu dîlah ka siam ang a, ram ro chu tuihnaah ka siam bawk ang. 19 Thlalêrah chuan sidar thing te, thingrî te, lenhmui te, hriak thing te ka phun ang a; ram rovah chuan fâr te, phân te, tufâr te ka phun za vek ang; 20 LALPA kut chuan chûng chu a ti a ni tih leh, Israel-ho Mi Thianghlima chuan a siam a ni tih an hmuha, an hriata, an ngaihtuaha, an hriat thiam tlânna tûrin. 21 “In thu chu rawn sawi rawh u,” LALPAN a ti; “Pathian in intihna chhan berte chu lantîr rawh u,” Jakob-ho Lalin a ti. 22 “Chûng chu lantîr sela, thil lo la thleng tûr chu kan hnênah sawi rawh se; kan ngaihtuah theihna tûr leh a tâwpna tûr kan hriat theihna tûrin, tûn hma thilte chu eng nge a nih sawi rawh u; a nih loh leh, thil lo la thleng tûrte chu hriattîr rawh u. 23 Pathiante in ni tih kan hriat theihna tûrin tûn hnua thil lo la thleng tûrte chu sawi rawh u le; a ni, kan manganna tûr leh kan en tlânna tûrin, thil ṭha emaw, thil ṭha lo emaw ti rawh u le. 24 Ngai teh u, eng mah in lo nih loh hi, in thiltih pawh eng mah a ni hek lo; nangmahni thlangtute chu mi tenawm tak an ni. 25 “Hmâr lam ata mi pakhat ka kai harh a, ani chu a lo thleng ta, ni chhuahna ata ka hming lamtu chu; ani chuan lung chârna sawisak angin rorêltute a sawisa ang a, bêlvawtuin hlum a rap ban angin a rap bawk ang. 26 Kan hriat theihna tûrin tuin nge a tîr aṭang khân sawi ngai? A ni, ‘Ani hi a dik e,’ kan tih theihna tûrin tuin nge sawi lâwk ngai? A ni, sawi rêng rêng an awm lo, a ni, hriattîr rêng rêng an awm lo, a ni, in thusawite hi hria rêng rêng an awm lo. 27 Keiin Zion hnênah chuan, ‘En teh, anni saw en teh,’ ka ti hmasa ang a; Jerusalem hnênah chuan chanchin ṭha rawn thlentu pakhat ka pe ang. 28 Tin, ka han en pawhin mi rêng rêng an awm lo va; anmahni ka han zawh pawhin, an zînga remruattu, thu pakhat pawh chhâng thei tu mah rêng rêng an awm lo. 29 En teh u, an za hian, an hnathawhte chu engmahlo a ni a, thil awm lo rêng rêng a ni; an milem chhûnte chu thli leh boruak chauh a ni.
LALPA chhiahhlawh
1 “Ka chhiahhlawh, ka chelh reng, ka thlan, ka rilruin a lawm êm êma hi en teh u; a chungah ka thlarau ka dah ta; Jentailte hnêna pêk tûrin rorêlna thu a la chhuak ang. 2 A au lo vang a, aw a chhuah hek lo vang a, kawtthlerah a aw chu a hriattîr hek lo vang. 3 Luang sâwp a titliak fithla lo vang a, la khu pawh a timit lo vang; rorêlna chu thutakin a kengkawh ang. 4 Leiah hian rorêlna a awmtîr hma loh chuan ani chu a chau lo vang a, a beidawng hek lo vang; tin, thliarkârte chuan a dân thu chu an nghâk reng dâwn.” 5 Pathian, LALPA, vân siamtu leh kai pharhtu, lei leh a chhûng ata chhuak zawng zawng tizautu, a chunga mite hnêna thâwkna petu leh a chunga kalte hnêna thlarau petu chuan heti hian a ti: 6-7 “Kei LALPA hian felnain ka ko a che, i kut ka chelh ang a, ka humhim ang chia, mitdelte mit tivâr tûr leh, mi tângte rip chhûng ata hruai chhuak tûr leh, thim zînga ṭhute tân in ata hruai chhuak tûrin, mite thuthlung atân leh Jentailte tiêngtu atân ka ruat ang che. 8 LALPA chu ka ni, chu chu ka hming a ni; ka ropuina hi mi dang hnênah ka pe lo vang a, fak ka hlawhna hi milem siam chawpte hnênah ka pe hek lo vang. 9 Ngai teh u, tûn hma thilte chu a lo thleng ta, thil tharte ka sawi a nih hi; a ṭiah hmain a chanchin ka hrilh che u a nih hi.” 10 Tuifinriata zuk kalte leh, a chhûnga awm zawng zawngte leh, thliarkârte leh a chunga awm zawng zawngte u, LALPA chawimawiin hla thar sa ula, kâwlkil aṭang pawhin amah fakna hla sa rawh u. 11 Thlalêr leh a khawpuite chuan an aw chhuah rawh se, Kedar-ho awmna khuate chuan. Sela khuaa awmte chu hlim takin zai sela, tlâng chhîp aṭangte chuan au rawh se. 12 LALPA chu tiropui sela, thliarkârahte chuan a fakna thu hril rawh se. 13 LALPA chu mi chak tak angin a chhuak ang a, indo mi angin thinurna a chawk tho vang; a au vang a, a ni, ring takin a au vang; amah dotute chungah chuan chak takin a che ang.
Pathianin a mite puih a tiam
14 “Rei tak ka ngawi reng tawh a; ka awm hle hlein ka insûm hrâm hrâm ṭhîn. Tûnah erawh chuan hmeichhe nau vei angin ka au tuar tuar ang a; ka thaw huam huamin ka thaw hlawp hlawp bawk ang. 15 “Tlângte leh mual pâwngte chu ka tichhia ang a, a hnim zawng zawngte chu ka tiro vek ang; luite chu thliarkârahte ka siam ang a, dîlte chu ka tikang ang. 16 Mitdelte chu an hriat ngai loh kawngah ka rawn hruai ang a; an hriat ngai loh kalkawngahte chuan ka hruai ang. An hmaah chuan thim chu êngah ka siam ang a, kawng kawi laite chu ka tingîl bawk ang. Chûng thil chu ka ti ang a, anni pawh ka thlahthlam lo vang. 17 Milem siam chawpte ringa, milem chhûnte hnêna, ‘Kan pathiante in ni,’ titute chu hawi kirtîrin an awm ang a, nasa takin an mualpho vang.
Israel-ten an hre thei lo
18 “Bengngawngte u, bengin hre rawh u; mitdelte u, in hmuh theih nân en rawh u. 19 Ka chhiahhlawh lo chu tu mit nge del? A nih loh leh, ka tirhkoh tirh angin tu beng nge ngawng? Mi remtu angin tu mit nge dela, LALPA chhiahhlawh angin tu mit nge del? 20 Thil tam tak i hmu a; nimahsela, i rilruah i vawng reng ṭhîn lo; a bengte chu a âwng a; nimahsela, a hre ṭhîn lo.” 21 Dân chu a felna avânga tihlena tihzahawm chu LALPA chuan ṭha a ti a. 22 Nimahsela, hêng mite hian rawk leh suam an tâwk a, humah an tla a, tân inah an tâng bo va; sal atân man an ni a, chhantu tu mah an awm lo. 23 In zîngah hian chûngah chuan tu nge bengchhi tûr awm che u? Hun lo la thleng tûr atân ngaithlaa hre tûr tu nge awm che u? 24 Tuin nge Jakob-ho râllâka lâk tûra pea, Israel-ho rûkrute hnênah pe ni? LALPA, a chunga thil kan tihsualna chuan a pêk a ni lâwm ni? A kawngahte an kal duh si lo va, a dân thu lah an awih hek lo. 25 Chuvângin, a thinur nasa tak chu an chungah a leih a, indo râpthlâk an chungah a thlentîr a, chu chuan anmahni chu a kâng a.
Pathianin a mite chhan a tiam
1 Tûnah erawh chuan, aw Jakob-hote u, LALPA, nangmahni siamtu leh, aw Israel-hote u, nangmahni dintu chuan heti hian a ti: “Hlau suh u, ka tlan tawh che u hi; in hmingin ka ko che u a, ka ta in ni asin. 2 Tuite in dai kai lai pawhin kei in hnênah ka awm ang a; luite in dai kai lai pawhin a chîm pil lo vang che u. Meia in kal tlang lai pawhin in kâng lo vang a, meialhin a tialh hek lo vang che u. 3 Kei hi LALPA in Pathian, Israel-ho Mi Thianghlima, nangmahni chhandamtu ka ni si a; nangmahni tlanna atân Aigupta ram ka pe a, Ethiopia leh Seba ramte chu nangmahni aiah ka pe. 4 Ka ngaiha hlu tak in niha, mi zahawm tak in nih bawka, ka hmangaih bawk che u avângin, nangmahni aiah mite ka pe ang a, in nunna aiah mi tin ka pe ang. 5 Hlau suh u, in hnênah ka awm si a; in thlahte chu khawchhak lam aṭangin ka rawn hruai ang a, khawthlang lam aṭangin ka hruai khâwm ang che u; 6 hmâr lam hnênah chuan, ‘Thlah rawh u,’ ka ti ang a; chhim lam hnênah chuan, ‘Hrêng reng suh u,’ ka ti ang. Ka fapate chu hla tak aṭangin rawn hruai ula, ka fanute chu kâwlkil aṭangin rawn hruai rawh u; 7 ka hming pu apiangte leh ka ropuina tûra ka siam apiangte chu; anmahni chu ka din a, a ni, anmahni chu ka siam a ni.”
Israel, Pathian hriatpuitute
8 Mit nei si mitdelte leh, beng nei si bengngawngte chu hruai chhuak rawh u. 9 Hnam tinrêng inkhâwm sela, mi tin awm khâwm rawh se. An zîngah tuin nge hei hi sawi theia, tûn hma thilte mi hriattîr thei? Thiam chantîra an awm theihna tûrin an thuhretute chu rawn hruai rawh se; a nih loh leh, bengin hria sela, “Thutak a ni,” ti rawh se. 10 “Mi hriata, mi rina, amah chu ka ni tih in hriat theihna tûrin, nangni hi mi hriatpuitute in ni, ka chhiahhlawh, ka thlana pawh chu,” LALPAN a ti: “Ka awm hma chuan Pathian rêng rêng din an awm lo va, ka awm hnuah pawh an awm hek lo vang. 11 Kei, keimah ngei hi, LALPA chu ka ni; keimah lo chu chhandamtu rêng rêng an awm lo. 12 Keimahin ka sawi a, ka chhandam a, ka hriattîr a, in zîngah khân ram dang pathian rêng rêng an awm loh kha; chuvângin, nangni hi ka thu mi hriatpuitute in ni,” LALPAN a ti; tin, “Kei hi Pathian chu ka ni. 13 A ni, ni awm achinah khân kei hi amah chu ka ni; tichuan, ka kut ata chhanchhuak thei tu mah rêng rêng an awm lo; hna ka thawk ang a, tuin nge chu chu sût ang?” tiin.
Babulon aṭanga tlan chhuah
14 LALPA, nangmahni tlantu, Israel-ho Mi Thianghlima chuan heti hian a ti: “Nangmahni avângin Babulon khuaah chuan sipaiho ka tîr a; tichuan, an zain, Kaldai-hote chu, an lâwmna lawngpuiahte chuan tlân bo mi hruaiin ka hruai chhuk ang. 15 Kei hi LALPA, in Mi Thianghlima, Israel-ho Siamtu, in Lal chu ka ni,” tiin. 16 Tuipuia kawng siama, tui tam tak zînga lamlian sialtu, 17 sipai rual ropui tak, tawlailîrte leh sakawrte hruaia, tho leh hauh lo tûra titlu rem rumtu, khâwnvâr phita tihmih anga tichimittu LALPA chuan heti hian a ti: 18 “Tûn hma thilte chu hre reng suh ula, hmasâng thilte chu ngaihtuah hek suh u. 19 Ngai teh u, thil thar ka ti dâwn e; tûn apang hian a ṭiak ang; chu chu in hre dâwn lâwm ni? Thlalêrah meuh pawh kawng ka siam ang a, ram rovah chuan luite ka siam bawk ang. 20-21 Ka mi, ka thlante, mi fakna tilangtu tûra ka tâna ka mi siamte chu in tûr ka pêk theih nân, thlalêrah chuan tuite ka awmtîr avâng leh, ram rovah chuan luite ka awmtîr avângin ramsate pawhin mi chawimawi ang, sihalte, sava nghâwngseite lamin.
Israel-te sualna
22 “Nimahsela, aw Jakob-ho, nangni zawngin mi ko si lo va, aw Israel-ho, nangni zawngin mi ning zâwk a nih hi. 23 Hâlrala in thil hlan ran tête chu mi rawn lâk ngai lo va; in inthawina lamte chuan mi chawimawi ngai hek lo. Thil hlanin rawng ka bâwltîr ngai lo che u a, berawin ka tihah ngai hek lo che u. 24 Fu rêng rêng tangkain mi leisak ngai lo va, in inthawinate thauvin mi titlai ngai hek lo; in sualna phurh hnate mi thawhtîr zâwk a, in khawlohnatein nangnin mi tihah ta a ni. 25 Kei, keimah ngei hi, keimah leh keimah avâng ngawta in bawhchhiatnate thai bo ṭhîntu chu ka ni; in sualnate pawh ka hre reng lo vang. 26 Mi hriatpui rawh u; i ngaihtuah tlâng ang u; thiam chantîra in awm theih nân in thu chu sawi rawh u. 27 In pu hmasa ber khân thil a tisual a, in palaite pawhin ka lakah an bawhchhia a. 28 Chuvângin, hmun thianghlima mi liante chu ka tibawrhbâng ang a; tichuan, Jakob-ho chu ânchhe dawngah ka siam ang a, Israel-ho chu hau bûrah ka siam bawk ang.
LALPA chauh hi Pathian a ni
1 “Tûnah erawh chuan, aw Jakob-ho ka chhiahhlawhte u, aw Israel-ho ka thlante u, ngaithla rawh u. 2 LALPA, nangmahni siamtu, chhûl aṭanga nangmahni dintu, nangmahni ṭanpuitu tûr chuan heti hian a ti: ‘Aw Jakob-ho ka chhiahhlawhte u, nangni Jesurun-ho ka thlante u, hlau suh u. 3 Ram rovah chuan tui ka leih ang a, lei chârah chuan lui ka luantîr bawk dâwn a ni; in thlahte chungah ka thlarau ka leih ang a, in fate chungah ka malsâwmna ka leih bawk ang; 4 tichuan, anni chu, tuipuisuthlahte tui luanna kianga a ṭo ang hian, hlobet zîngah chuan an ṭo vang. 5 Mi pakhatin, LALPA ta ka ni, a ti ang a; mi dangin Jakoba hming a invuah ang a; mi dangin a kutah, LALPA ta, tia ziakin, Israel hming chu a chi hmingah a hmang ang,’ tiin,” a ti a. 6 “LALPA, Israel-ho Lal, an tlantu sipaihote LALPA chuan heti hian a ti: ‘Kei hi Hmasabera chu ka ni a, Hnuhnûngbera pawh ka ni; keimah lo chu Pathian rêng an awm lo. 7 Hmasânga mite ka din achinah khân keima tih angin tuin nge ko vanga, tuin nge chûng chu sawi anga, tuin nge ka aiah indawt zêlin tilang ang le? Thil lo thleng tûrte leh lo la awm tûrte chu sawi rawh se. 8 Hlau suh ula, ṭih hek suh u: hmânah khân in hnênah ka sawi tawhin ka hriattîr tawh che u a ni lâwm ni? Tichuan, nangni hi mi hriatpuitute in ni. Keimah lo hi Pathian rêng rêng an awm em? A ni, Lungpui rêng rêng a awm lo; pakhat mah a awm ka hre lo.’ ”
Milem biak demna
9 Milem siam chawp siamtute chu an zain boruak mai an ni a, an thil duh zâwngte chu a ṭangkai lo vang; an mualpho dâwn tih anmahni hriatpuitute pawhin an hmu thei lo va, an hre thei hek lo. 10 Tuin nge pathian din tehlul le? A nih loh leh, tuin nge eng maha ṭangkai hlei lo milem siam chawp chhûng tehlul le? 11 Ngai teh, a pâwlpui zawng zawng chu an mualpho vang a; hnathawk mite pawh mihring ve bawk an ni: an zain inkhâwm vek sela, ding rawh se; an hlau vang a, an mualpho tlâng ang. 12 Thîrdêngin hreipui a chher ṭhîn a, meilingah a thawlh a, tubohtein a dêng a, a bân chak tak chuan a chher thîn: a ni, a ril a lo ṭâm a, a tha chu a lo zawi ṭhîn; tui rêng rêng a in lo va, a chau ṭhîn. 13 Thingrem siamtuin hrui a pawt mar a, pensilin a rîruat a; nawhmâmnatein a rîruang a din a, bial siamnain a rîruat a, mihring ruangâm angin a din a, ina awm atân mihring mawina angin a din ṭhîn. 14 Sidar thingte a tân a kit a, ṭhîl leh sasua a la a, ngaw thing zînga mi pakhat chu a puala awm tûrin a tinghet a; fâr kûng a phun a, ruahin a châwm ṭhîn. 15 Chumi hnuah chuan mi tân meia tuahah a ni tawh ang; chuta mi chu a la a, a intilum ṭhîn; a ni, meiah a chhêm a, chhang a ur ṭhîn; a ni, pathian a siam a, a be ṭhîn; chu thing chuan milem a siam chawp a, chu chu bawkkhupin chibai a bûk ṭhîn. 16 Chu thing chu a ṭhen meiah a tuah a; a ṭhen chu sa ei nân a hmang a; sa a rawh a, a tlai ṭhîn: a ni, mei lum a ai a, “Chhei! Ka lum ta, mei hmêl ka hmu ta le,” a ti a. 17 A bâng chu pathianah a siam a, a siam chawp milem ngeiah chuan; chu chu bawkkhupa chibai bûkin a bia a, a hnênah a ṭawngṭai a, “Mi chhanhim rawh, ka pathian i ni si!” a ti ṭhîn. 18 An hre lo va, an ngaihtuah hek lo; ani chuan an hmuh theih lohna tûrin a maimitchhîntîr a, an hriat thiam lohna tûrin an thinlung pawh a khârsak ta si a. 19 Tichuan, tu mân an hre chhuak leh lo va, “Ṭhenkhat chu meiah ka tuah si a; a ni, a vâmah pawh chhang ka hem nghe nghe a; sa pawh ka rawh a, ka ei si a; a bâng chu thil tenawmah ka siam dâwn em ni? Thingtum hmaah kûnin chibai ka bûk dâwn em ni?” ti tûrin anmahniah chuan hriatna leh hriat thiamna a awm hek lo. 20 Vut chauh a ei ṭhîn a; a thinlung buma awm chuan a nunna a inchhanhim theih lohna tûr leh, “Ka kut ding lamah hian dâwt a awm lo vem ni?” a tih theih lohna tûrin amah chu a pêntîr ta.
LALPA, Siamtu leh Chhandamtu
21 “Aw Jakob-hote u, chûng thilte chu hre reng rawh u, Israel-hote u, hre reng bawk rawh u, ka chhiahhlawh in ni si a; keiin ka din che u a, ka chhiahhlawh in ni; aw Israel-hote u, ka theihnghilhin in awm lo vang. 22 In bawhchhiatnate chu chhûm chhah mup tihbo angin ka tibo ta a, in sualnate chu chhûm tihbo angin ka tibo ta bawk a. Ka hnênah lo kîr leh rawh u, ka tlan tawh si che u a,” tiin. 23 Aw vânte u, hlim takin zai rawh u, LALPAN chu chu a ti ta si a; lei hnuai lamte u, au rawh u; tlângte u, aw ramhnuai leh a chhûnga thing awm tinrêngte u, hla sa chhuak phut rawh u; LALPA chuan Jakob-ho a tlan tawh a, Israel-hovah chuan a inchawimawi dâwn si a. 24 LALPA, nangmahni tlantu, chhûl aṭanga nangmahni dintu chuan heti hian a ti: “Kei hi LALPA, thil zawng zawng siamtu, mahni chauhva vân kai pharhtu, lei tizautu chu ka ni; tu nge ka hnênah awm? 25 Kei hi dawtheiho chhinchhiahna engmahlova siama, aienthiamte mi âa siamtu, mi fingte hawi kîrtîra, an hriatna âtthlâka siamtu, 26 mahni chhiahhlawh thu tingheta, mahni palaite remruat hlensaktu, Jerusalem chungchâng thua, ‘Chutah chuan mi an awm leh ang,’ titu leh, Juda ram khaw chungchâng thua, ‘Siamin a awm leh hlawm ang a, a chhe laite chu ka siam ṭha leh ang,’ titu, 27 tui thûk tak hnêna, ‘Kang chat rawh, i luite pawh ka tikang bawk dâwn,’ titu, 28 Kura chungchâng thua, ‘Ani chu ka berâm vêngtu a ni a, Jerusalem chungchâng thua, “Siamin a awm leh ang,” tih leh, Pathian biak in hnêna, “I lungphûm chu remin a awm leh ang,” ti hial khawpin ka duh zâwng zawng zawng chu a ti ang,’ titu ka ni,” tiin.
LALPA mi ruat Kura
1 “LALPA chuan a hriak thih Kura, hnamte chu a hmaah tudawl tûr leh, lalho kâwnghrênte phelhsak tûr leh, a hmaa kawngkhârte hawnsak tûr leh, kulh kawngkhârte khâr lova awmtîr tûra a kut ding lam ka chelha hnênah chuan, heti hian a ti: 2 ‘Kei i hmaah ka kal ang a, a bumboh laite chu ka tirual ang; dâr kawngkhârte chu ka tichhe rem rum ang a, a kalhna thîr tlâwnte chu ka tibung ang. 3 LALPA, i hminga kotu che, Israel-ho Pathian ngei chu ka ni tih i hriat theih nân thim zînga rote chu ka pe ang chia, hmun fianrialtea sum thuhrûkte pawh ka pe ang che. 4 Jakob-ho ka chhiahhlawhte leh Israel-ho ka thlante avâng chuan i hmingin ka ko che a ni; mi hre ngai lo mah la, hming ka saksak ang che. 5-6 Kei hi LALPA chu ka ni, a dang rêng rêng an awm lo; keimah lo chu Pathian rêng rêng an awm lo. Keimah lo chu a dang rêng rêng an awm lo tih ni chhuahna lam aṭang leh thlang lam aṭanga an hriat theihna tûrin, mi hre ngai lo mah la, i tai ka hrênsak ang che. Kei hi LALPA chu ka ni, a dang rêng rêng an awm lo. 7 Eng ka siam ṭhîn a, thim pawh ka siam ṭhîn a ni; remna ka siam ṭhîn a, sualna pawh ka siam ṭhîn a ni; kei hi LALPA, chûng thil zawng zawng ti ṭhîntu chu ka ni,’ tiin. 8 “Vânte u, chung lam aṭang khân far thlâktîr rawh u, vân dumte khân felna rawn leih thla rawh se; chhandamna an chawr chhuahtîr theih nân lei hi inhawng sela, felna nên ṭo duntîr rawh se. Kei, LALPA hian chu chu ka siam a ni.
Thil siam leh khawvêl thil thleng Lal
9 “Mahni Siamtu hnialtu chu a chung a pik e! Leia lampei zînga lampei mai mai chu! Hlum chuan a vawtu hnênah, ‘Eng nge i siam ni?’ a ti dâwn em ni? A nih loh leh, i hnathawh chuan, ‘A kutin thiam rêng a nei lo,’ a ti dâwn em ni? 10 A pa hnêna, ‘Eng nge i hrin ni?’ titu leh, a nu hnêna, ‘Eng nge i hrin dâwn ni?’ titu chu an chung a pik e!” 11 LALPA, Israel-ho Mi Thianghlima, anmahni Siamtu chuan heti hian a ti: “Thil lo la thleng tûr thu chu mi zâwt ula; ka fapate thu-ah leh ka kut hnathawh thu-ah hian thu min pe rawh u. 12 Lei hi ka siam a, a chunga mihring awm hi ka siam bawk a. Keiman ka kut ngei hian vân ka kai pharh a, a sipaihote chu thu ka pe bawk a ni. 13 Kura chu felna neiin ka kai harh a, a kawng zawng zawng chu ka tingîl ang; ani chuan ka khawpui chu a siam leh ang a, an tlanna man duh vâng ni lovin, lâwmman duh vâng ni hek lovin, ka salte chu a chhuahtîr ang, sipaihote LALPAN a ti,” tiin. 14 LALPA chuan heti hian a ti: “Aigupta thawk rimho leh Ethiopia sumdâwng mi leh Seba-ho mi sâng takte chu in hnên lamah an lo kal ang a, in taah an awm tawh ang; nangmahni an zui ang che u, khaidiat bunin a ni an lo kal dâwn ni; tichuan, bawkkhupin chibai an bûk ang che u a, ‘Pathian chu nangmahniah a awm ngei mai, a dang rêng rêng an awm lo; pathian dang rêng rêng an awm lo,’ tiin in hnênah khawngaihna an dîl ang,” tiin. 15 Aw Israel-ho Pathian, Chhandamtu, Pathian inthup ṭhîna chu i ni ngei mai. 16 Mualpho takin an awm ang, a ni, an zain zak takin an awm ang; milem siamtute chu zahnaah chuan an lût tlâng ang. 17 Israel-ho erawh chu kumkhaw chhandamnaa LALPA chhandamin an awm ang; chatuan thleng pawhin in mualphovin in zak hek lo vang. 18 LALPA, vân siamtu chuan (ani chu Pathian, leilung hi dina siamtu chu a ni; ani chuan leilung hi a tinghet a, engmahlovah a siam lo va, mihring awm nân a din zâwk a ni) heti hian a ti si a: “Kei hi LALPA chu ka ni, a dang rêng rêng an awm lo. 19 A rûkin ram thim hmunah thu ka sawi ngai lo va; Jakoba thlahte hnênah, ‘Engmahlovah mi zawng rawh u,’ ka ti ngai hek lo; kei LALPA hian felna thu ka sawi ṭhîn a, thu dik tak ka hril ṭhîn.
Khawvêl lal leh Babulon milimte
20 “Inkhâwm ula, lo kal rawh u; hnam tin zînga hremna pumpelhhote u, lo hnai tlâng rawh u. An thing milem siam chawp keng ṭhîna, mi chhanhim thei hlei lo pathian hnêna ṭawngṭai ṭhîntute chuan hriatna rêng rêng an nei lo. 21 Sawi ula, rawn tichhuak rawh u; a ni, inberâwn hlawm rawh se. Hmasâng ata tuin nge hriattîr? Hmânlai ata tuin nge sawi? Kei LALPA hian ka tih a ni lâwm ni? Keimah lo chu Pathian dang rêng rêng an awm lo; Pathian fel leh chhandamtu ka ni; keimah lo chu a dang rêng rêng an awm lo. 22 Kâwlkila mi zawng zawngte u, ka lam lo hawi ula, chhandamin awm rawh u; kei hi Pathian ka ni si a, a dang rêng rêng an awm lo. 23 ‘Khûp tinrêng chu ka hmaah an ṭhingṭhi tawh ang a, lei tinrêng pawhin ka hnênah chhechhamin thu an tiam tawh ang,’ tiin mahni leh mahni inchhâlin chhia ka chham ta, thu chu felna hlîrin ka kâ aṭangin a chhuak tawh a, a lo lêt leh tawh lo vang. 24 Miin, ‘LALPAah chauh felna leh chakna a awm,’ tiin ka hnênah an la sawi ang. Ama hnên ngeiah mi an lo kal ang a, a chunga lungni lo zawng zawngte chu mualpho takin an awm tawh ang. 25 Israela thlahte zawng zawng chu LALPAAH chuan a ni, thiam chantîra an awma, LALPA chu an chhuan dâwn ni,” tiin.
1 Bela chu a lo kûn reng a, Neboa chu a lo intihniam reng a; an milemte chu sa chungah leh ran chungah an hlâng a: in thil vah vêlpui ṭhinte chu phurah lek siam a ni a, sa chau tâna phurritah lek siam a ni. 2 An lo intihniam rengin, an lo kûn dûn reng a; phurrit chu an chhanhim thei lo va, anmahni ngei pawh chu sala hruaiin an awm ta zâwk a. 3 “Aw Jakoba chhûngte leh, Israela chhûngte zînga a la awm chhun zawng zawng, pum aṭanga ka puaka, chhûl aṭanga ka kawm tawhte u, ka thu ngaithla rawh u: 4 in tarkûn thleng pawhin amaha chu ka ni ang a, in lua kêlsam a ṭo vek thleng pawhin ka pawm ang che u. Keiman ka siam a, keimah vêkin ka pua ang; a ni, kei chuan ka pawm ang a, ka chhanhim ang. 5 “Thuhmuna ngaih kan nihna tûrin tu nên nge mi tehkhina, tu tlukah nge mi siama, tu nên nge mi tehkhin dâwn? 6 Iptêa mi rangkachak bun chhuak ṭhîna, tangkaraw bûknaa bûk ṭhînate chuan rangkachak chhertu an ruai a, ani chuan pathianah a siam ṭhîn a; tichuan, an bawkkhup a, a ni, chibai an bûk ṭhîn a. 7 An kokiah an pu a, an kalpui a, a hmun tûrah chuan an dah ṭhîn a, a ding ta reng a; a awmna ata chu a sawn tawh lo vang. A ni, miin ani chu an au vang a; nimahsela, a chhâng thei si lo vang a, an manganna ata a chhanchhuak thei hek lo vang. 8 “Aw bawhchhetute u, chu chu hre reng ula, intimipa ula, hre chhuak leh rawh u. 9 Tûn hma thilte chu hre reng rawh u; kei hi Pathian ka ni a, a dang rêng rêng an awm si lo; kei hi Pathian ka ni, keimah ang rêng rêng an awm lo; 10 keiin a tâwp tûr chu a tîr aṭang rêngin ka sawi ṭhîn a, thil la tih lohte chu hmasâng aṭang rêngin ka sawi ṭhîn; ‘Ka remruat chu a ding chhuak ang a, ka duh zâwng zawng zawng chu ka ti vek ang,’ ka ti a: 11 Khawchhak lam ata sava koham tak, ram hla tak ata ka mi ruat chu ka ko va; a ni, ka sawi tawh a, ka hlen bawk ang; ka tum tawh a, ka ti bawk ang. 12 “Rilru uangthuang, felna hlata awmte u, ka thu ngaithla rawh u; 13 ka felna chu ka rawn la hnai a, hla takah a awm lo vang, ka chhandamna pawhin rei a rial lo vang; tichuan, ka ropuina Israel-ho tân chhandamna chu Zion-ah chuan ka dah ang.
Babulon chunga rorêlna
1 “Aw Babulon fanu nula, chhuk la, vaivutah ṭhu rawh; aw Kaldai fanu, lalṭhutphah tel lovin leiah ṭhu rawh. Awm no leh nuamsa an ti dâwn tawh si lo che a. 2 Buh râwt sawmna lungte la la, chhangphut siam rawh. I inkhuhna puan kha dah la, i fên fual kha hlîp la, i ke kha hawng la, luite dai kai rawh. 3 I saruak chu khuh lohvin a awm ang a, a ni, i zahmawh chu a lang ang; phuba ka la ang a, mi tu mah ka ren lo vang.” 4 Min tlantu chu, a hming sipaihote LALPA a ni, Israel-hote Mi Thianghlima chu. 5 “Aw Kaldai fanu, ngawi rengin ṭhu la, thim hnuaiah lût rawh, ‘Ram tin lalnu’ an ti dâwn tawh lo che a ni. 6 Ka mite chungah ka thinur a, ka rochan chu ka tibawrhbâng a; i kutah ka pe chia, nang chuan an chungah khawngaihna rêng rêng i lantîr lo va; tarho chungah lam pawh i nghâwngkawl rit tak chu i nghat ta chawrh a. 7 Tin, ‘Kei hi kumkhuain lalnuah ka awm ang,’ i ti a; chutichuan, chûng thilte chu i rilruin i ngaihtuah lo va, a tâwpna tûr lah chu i hre reng hek lo. 8 “Chutichuan, nang nun khaw nawm bâwla, ngaihsam taka awma, mahni rilrua, ‘Keimah ka ni, keimah lo chu mi dang rêng rêng an awm lo; hmeithaiah ka ṭhu lo vang a, fate chân thu ka hre hek lo vang,’ titu, hei hi hre rawh: 9 hêng thil pahnih, fate chânna leh hmeithaina hian ni khat thil thu-ah, mitkhapkâr lovah a tlâkbuak zâwk dâwn che a ni. I dawi hmanna chu tam hlein, i invênna chu tam rei rui mah sela, chûng chu nasa tak maiin i chungah a lo thleng dâwn a ni. 10 I suahsualna chu i ring a, ‘Tu mân min hmu lo ve,’ i ti vei si a; i finna leh i hriatna chuan a tikhawlo chia; ‘Keimah ka ni, keimah lo chu mi dang rêng rêng an awm lo,’ i rilruin i ti bawk a. 11 Chuvângin, thil ṭha lo i chungah a lo thleng ang a; a vên dân i thiam lo vang. Vânduaina pawhin a tlâkbuak ang chia; chu chu i tibo thei lo vang. ṭiauna pawh vawilehkhatah i chungah a lo thleng thut ang a, chu chu i hre lâwk lo vang. 12 I invênna leh i dawi hmanna, i naupan têt ata i intihhah ṭhinnate chu dinpui ta che; i sâwtpui theih dâwn phawta, i hnehpui theih dâwn phawt chuan. 13 I remruat a tam êm avângin i hah ta a nih hi; tûnah chuan vân semtute, arsi thlîrtute, thla kipa thu hrilh lâwktute chu ding sela, i chunga thil lo la thleng tûrte lakah chuan chhanhim che rawh se. 14 Ngai teh, buhpâwl ang mai a ni ang a, meiin a kâng ang; meialh thiltihtheihna lakah chuan an inchhanhim lo vang; intihlumna tûr meihawl ang a ni lo vang a, ai tûr mei ang pawh a ni hek lo vang. 15 Chutiang chuan i intihhah ṭhinna thilte chu i tân a awm dâwn a ni; i naupan têt ata i laka sumdâwngtute chu mahni kawng ṭheuhvah an vâk bo vang a; chhanhimtu tûr che tu mah rêng rêng an awm lo vang.
Thil lo awm zêl tûr lal chu Pathian hi a ni
1 “Aw Jakoba chhûng, Israela hming ṭâwma, Juda tuite laka chhuaka, thutakah ni si lova, felnaah ni si hek lova, LALPA hming chhâla chhechhama, Israel-ho Pathian hming lam ṭhîntute u, hei hi ngaithla rawh u 2 (Khawpui thianghlima mi an inti si ṭhîn a, Israel-ho Pathian chungah rinna an nghat bawk a ni; a hming chu sipaihote LALPA a ni): 3 Tûn hma thilte chu hmasâng aṭangin ka sawi a; a ni, ka kâ aṭangin a chhuak a, ka hriattîr a; vawilehkhatah ka hlen thut a, a lo thleng a. 4 Mi luhlul in niha, in nghâwng chu thîr thâ a niha, in chal chu dâr a nih ka hriat avângin, 5 hmasâng aṭangin in hnênah ka sawi a; a lo thlen hma pawhin in hnênah ka hriattîr che u kha; chuti lo chuan, ‘Ka milem chuan a tih a ni, ka milem siam chawp leh milem chhûn chuan thu a pêk a ni,’ in ti dah ang e. 6 In hriat kha; hêng zawng zawng hi en rawh u; nangmahnin in sawi dâwn tawh lâwm ni? Tûn achinah thil thar ka hriattîr dâwn a che u, thil inthup in hriat ngai lohte chu. 7 Chûng chu hmâsâng aṭanga siam ni lovin, tûna siam a ni a; vawiin ni hma khân in bengin in hre ngai lo; chuti lo chuan, ‘Ngai teh, chûng chu kan hre reng alâwm,’ in ti dah ang e. 8 A ni, in bengin in hre ngai lo va; a ni, in rilruin in hre ngai hek lo; a ni, hmasâng aṭang rêngin in beng chu hawnin a awm ngai lo. Vervêk tak takin in ti ṭhîn tih leh, chhûl aṭang rêngin bawhchhetu an ti ṭhîn che u tih ka hre si a. 9 Ka tihboral lohna tûr che uin ka hming avângin ka thinur chu ka khêk rih ang a, fak ka hlawh nân in chungah ka insûm ang. 10 Ngai teh u, ka tithianghlim che u a ni; nimahsela, tangkaraw tihthianghlim angin a ni lo; hrehawmna rawh tuina meiah chuan ka fiah che u a ni. 11 Keimah leh keimah avâng ngawtin a ni ka tih dâwn ni; ka hming hi engah nge tihchhiatin a awm ang? Ka ropuina hi mi dang hnênah ka pe lo vang. 12 “Aw Jakob-ho leh ka koh Israel-hote u, ka thu ngaithla rawh u: kei hi Amaha chu ka ni; a hmasa ber chu ka ni a, a hnuhnûng ber ka ni bawk. 13 A ni, ka kut hian leilung nghahchhan chu a phûm a, ka kut ding lam hian vânte khi a kai pharh a; ka koh veleh an ding ho ṭhîn. 14 Nangniho zawng zawng hi, inkhâwm ula, ngaithla rawh u; an zîngah chuan tuin nge hêng thil hi sawi ngai? LALPA chuan amah chu a hmangaih a; ani chuan Babulon chungah a duh zâwng a ti ang a, a bân chu Kaldai-ho chungah lekin a awm ang. 15 Kei, keimah ngei hian thu ka sawi ta; a ni, amah chu ka ko va, ka hruai a, a kawng chu a titluang zêl ang. 16 Nangniho hian mi rawn hnaih ula, hei hi ngaithla rawh u: a tîr aṭang khân a rûkin thu ka sawi ngai lo va; a awm tirh aṭang khân chutah chuan ka awm. Tûnah hian LALPA Pathian leh a thlarau chuan kei hi min tîr ta a.”
A mite tâna LALPA thiltum
17 LALPA, nangmahni tlantu, Israel-ho Mi Thianghlima chuan heti hian a ti: “Kei hi LALPA in Pathian, in ṭhatna tûra nangmahni zirtîrtu, in kalna tûr kawnga hruaitu che u chu ka ni. 18 Aw, nangni hian ka thupêkte chu lo ngaithla ta ula chu aw! In chunga remna chu lui ang maia awmin, in felna chu tuifinriat fâwnte ang maiin a awm tûr! 19 In thlahte pawh ṭiauvaivut zâta awmin, in rîla rahte pawh ṭiauvut mal tê tê zâtin an awm tûr; an hming chu ka hma ata thai bovin a awm lo vang a, tihboralin a awm hek lo vang,” tiin. 20 Babulon ata chhuak ula, Kaldai-ho chu tlân bosan rawh u! Hei hi hla sa thâwmin hriattîr ula, hrilh ula, kâwlkil thleng pawhin tiri ula, “LALPA chuan a chhiahhlawh Jakob-ho chu a tlan ta!” ti rawh u. 21 Thlalêrahte a hruai lai khân an tuihâl lo va: lungpui aṭangin an tân tui a luan chhuahtîr a; lungpui chu a tiphel a, tui a lo chhuak ta dur dur a. 22 LALPA chuan, “Mi suaksualte tân chuan muanna rêng rêng a awm lo,” a ti a.
Israel, hnam dangte êntu tûr
1 “Aw thliarkârte u, ka thu ngaithla ula, hla tak ata mi tinte u, ngaithla bawk rawh u: LALPA chuan chhûl aṭang rêngin mi ko va; ka nu pum chhûng aṭang rêngin ka hming a lo sawi tawh a. 2 Ka kâ hi khandaih hriam tak angin a siam a, a kutah chuan mi thukru a; thal nawh tlêt varah mi siam a, a thal bâwmah chuan mi khung tlat a. 3 Tin, ka hnênah, ‘Nang chu ka chhiahhlawh i ni a, Israela, chawimawia ka awmna tûra chu i ni,’ a ti a. 4 Kei erawh chuan, ‘A thlâwn maiin ka thawk rim a, engmahlovah leh boruak maiah ka tha ka sêng a; nimahsela, matheilovin ka chunga rorêlna tûr chu LALPA hnênah a ni a awm ni, mi rulhna tûr pawh chu ka Pathian hnênah a ni a awm ni,’ ka ti a. 5 “Tin, tûnah chuan LALPA, Jakob-ho a hnêna hruai leh nân leh, Israel-ho a hnêna hruai khâwma an awm nân, a chhiahhlawha awm tûra chhûl aṭanga mi dintu chuan a sawi a (LALPA mit hmuhin mi zahawm ka ni si a, ka Pathian chu ka chakna a lo ni ta bawk a): 6 a ni, ani chuan, ‘Jakob-ho hnamte tundin nân leh Israel-ho zînga humhimate chu awmtîr leh nâna ka chhiahhlawha i awm hi thil tê tak tê a la ni; Jentailte tiêngtuah ka ruat bawk ang che, kâwlkil thlenga ka chhandamtua i awm theihna tûrin,’” a ti a. 7 LALPA, Israel-ho tlantu leh an Mi Thianghlima chuan, mite hmusita, hnamho ten riauva, rorêltute chhiahhlawh hnênah chuan heti hian a ti: “LALPA rinawma, Israel-ho Mi Thianghlima, nangmah thlangtu avâng khân lalten an hmu ang a, an tho vang; mi liante pawhin chibai an bûk ang,” tiin.
Jerusalem tundin leh
8-9 LALPA chuan heti hian a ti, “Hun lâwmawmah ka ngaithla chia, chhandamna niah ka ṭanpui che; mi tângte hnênah, ‘Chhuak rawh u,’ thima awmte hnênah, ‘Lo lang rawh u,’ tia, ram tungding tûr leh, rochan ram ṭiau tawh hnute anniho chu luahtîr tûrin ka humhim chein, mite thuthlung atân ka ruat ang che. Kawngahte chuan an ei zêl ang a, tlâng sâng kawlh vel vul zawng zawngahte chuan an tlatna hmun chu a awm ang. 10 An rilṭâmin an tuihâl lo vang a, lumin a tihrehawmin niin a em hek lo vang; anmahni khawngaihtu chuan a hruai dâwn si a, tuihna kiang ngeiahte chuan a hruai dâwn a ni. 11 Tichuan, ka tlâng zawng zawng chu kawngah ka siam ang a, ka lamliante chu tihsânin a awm bawk ang. 12 En teh, sâwngte saw hla tak aṭangin an lo kal dâwn saw; en teh, sâwngte saw hmâr lam aṭang te, thlang lam aṭang tein an lo kal dâwn saw; sâwngte saw Sinim ram aṭangin an lo kal dâwn saw.” 13 Aw vânte u, hlim takin zai rawh u; aw leilung, hlim takin awm rawh; aw tlângte u, hla sa chhuak phut rawh u! LALPA chuan a mite chu a thlamuan si a, mi, hrehawm tuarte pawh chu a khawngaih dâwn a ni. 14 Nimahsela, Zion chuan, “Jehovan mi kalsan a, LALPAN mi theihnghilh ta,” a ti a. 15 “Hmeichhiain a fapa, a rîla rah chu, khawngaih lohna tûrin a fa, a hnute hne lai chu a theihnghilh thei em ni? Thei e, chûngte chuan an theihnghilh a ni thei e; nimahsela, kei chuan ka theihnghilh lo vang che. 16 En teh, ka kutphahahte hian ka ziak che hi; i kulh bangte chu ka hmaah a awm reng a ni. 17 I fate chu an hmanhmawh ang a; nangmah tiboraltute leh nangmah tichhetute chuan an kal bosan ang che. 18 “Dâk la, i mit lên vêl la, en rawh; hêng zawng zawng hi an inkhâwm a, i hnênah an lo kal a nih hi. Ka nunna chhâlin. ‘Nang chuan cheimawina inbel angin hêngho hi i inbelin, mo a inhrêng angin hêngho hian i inhrêng ngei ang,’ ” LALPAN a ti. 19 “I hmun chhia leh ṭiau hnute leh i ram tihboral hnu thu-ah zawng, tûnah chuan a awmate tân i tê lutuk ngei ngei dâwn tawh si a, nangmah lemtute kha hla takah an awm dâwn tawh a ni. 20 I fa hloh hnua i fa neih lehte chuan, ‘Hmun hi ka tân a tê lutuk a; ka awmna tûrin hmun mi pe rawh,’ tiin i beng hriatah an la sawi ang. 21 Tichuan, nangin i rilruin, ‘Hêngho hi tuin nge mi hrinsak ni le, ka fate ka hloh va, mahni maia sala vâk vâk ka ni si a? Tichuan, hêngho hi tuin nge tiseilian ni le? Ngai teh, keimah chauhva hnutchhiahin ka awm si a; hêngho hi khawiah nge an lo awm ni le?’ i ti ang,” tiin. 22 LALPA PATHIAN chuan heti hian a ti: “Ngai teh, hnam tin tân ka kut ka pharin, mi tin tân ka chhinchhiahna ka târ chhuak ang; tichuan, i fapate chu a pawma pawmin i hnênah an rawn hruai ang a, i fanute pawh an kokia chhuanga rawn hruaiin an awm ang. 23 Lalte chu i fate pawmtupa an ni ang a, an lalnute pawh chu i fate pawmtunu an ni ang; anni chuan hmaia lei siin chibai an bûk ang chia, i kea vaivut chu an liak ang; tichuan, kei hi LALPA ka ni tih i hre mai ang, mi nghâktute chu mualphovin an awm lo vang.” 24 Râllâkte chu mi chak tak lakah chhuhsaka awmin, mi hlauhawm salte chu chhanchhuahin an awm dâwn em ni? 25 LALPA chuan heti hian a ti: “Dâwn e a! Mi chak tak salte meuh pawh chhanchhuahin an awm ang a; mi hlauhawm râllâkte chu chhuhsakin an awm ang; nangmah dotu chu ka do dâwn si a, i fate pawh ka chhandam dâwn a ni. 26 Tin, nangmah hnehchhiahtute chu anmahni sa ka eitîr ang a, uain thlum rui angin anmahni thisenin an rui ang. Tichuan, mi zawng zawngin, kei LALPA hi nangmah chhandamtu leh nangmah tlantu, Jakob-ho Mi Chaka chu ka ni tih an hria ang,” tiin.
1 LALPA chuan heti hian a ti: “In nu mâkna lehkha, ka mâkna chu khawiah nge a awm ni? A nih loh leh, ka leibatnate a tu bera hnênah nge ka hralh che u ni? Ngai teh u, in khawlohnate avângin a ni, hralha in awma, in bawhchhiatnate avângin a ni, in nu pawh kha mâka a awm ni. 2 Eng vângin nge ka lo kal khân mi rêng rêng an awm loh le? Eng vângin nge ka koh khân mi chhâng tûr rêng rêng an awm loh le? Ka kut hi tlan thei lo tûrin tihtawiin a awm rêng rêng em ni? A nih loh leh, chhanhim tûrin thiltihtheihna rêng rêng ka nei lo vem ni? Ngai teh u, ka zilhhau chauh pawhin tuipui ka tikang ṭhîn a, luipuite chu ram rovah ka siam ṭhîn: tui rêng rêng a awm loh avângin a sanghate chu a uih a, tuihâlin an thi ṭhîn. 3 Vân khi thimin ka tuam ṭhîn a, saiip puana khuhna tûrin ka siam ṭhîn,” tiin.
LALPA chhiahhlawh thlan thu awihna
4 “Mi hah tak chu thua ka tihhahdam thiam nân LALPA PATHIAN chuan zirtîrte lei mi pe a; ani chuan a tûk a tûk tin a kai harh a, zirtîrten an hriat anga hre tûrin ka beng hi ka kai harh ṭhîn. 5 LALPA PATHIAN chuan ka beng mi tih-âwngsak a, kei chu ka hel lo va, ka hawi kîr hek lo. 6 Ka hnungzâng hi vawtute hnênah ka dawh a, ka biangte hi hmul pawttute hnênah ka dawh bawk a; mualphonaah leh chilah ka hmai ka hup lo. 7 LALPA PATHIAN chuan mi ṭanpui dâwn si a; chuvângin, ka zak ngai lo va; chuvângin, meilung ang tlatin ka hawi ṭhîn a, ka mualpho lo vang tih ka hria. 8 Thiam mi chantîrtu chu a hnai e; tuin nge mi do vang? I ding ve ve ang. Mi dotu chu tu nge ni? Mi rawn hnaih rawh se. 9 Ngai teh, LALPA PATHIAN chuan mi ṭanpui ang; tuin nge thiam loh mi chantîr ang? Ngai teh, chûng zawng zawngte chu silhfên angin a la hlui ang a, thîmin a ei chhe vek ang. 10 “In zîngah LALPA ṭiha, a chhiahhlawh thu awih chu tu nge ni? Thima lênga, êng rêng rêng nei lova chuan LALPA hming chu ring sela, a Pathian chungah innghat rawh se. 11 Mei chhêma, thingthûtea inhrêng ṭhîn zawng zawngte u, ngai teh u; in meialhah leh in thingthu hâlte zîngah chuan lêng rawh u. Hei hi ka kut aṭanga in la hmuh tûr chu a ni: lungngai taka in la mutna tûr chu.
Jerusalem ṭawng thlamuanna
1 “Felna ûmtute u, LALPA zawngtute u, ka thu ngaithla rawh u: nangmahni chherna lungpui lam leh, khuarkhuruma nangmahni laih chhuahna khur lam kha en rawh u. 2 In pu Abrahama lam leh nangmahni hringtu Sari lam en rawh u; ani chu pakhat chauh a nih lai khân ka ko va, mal ka sâwm a, mi tam takah ka siam tâk kha. 3 LALPA chuan Zion chu a thlamuan ta si a; a hmun chhe tawhte zawng zawng chu a thlamuan a, a thlalêr chu Eden angin a siam a, a ram ro chu LALPA huan angin a siam bawk a; chutah chuan lâwmna leh hlimna te, lâwm thu sawina leh hla sa thâwm te a awm ang. 4 “Aw ka mite u, ka thu hi ngaithla ula; aw ka hnamte u, ka thu-ah hian beng lo chhi rawh u: keimah aṭangin dân thu a lo chhuak dâwn si a, mi tin ênna tûrin ka rorêlna chu ka chawlhtîr ang. 5 Ka felna chu a hnai e, ka chhandamna chu a chhuak tawh a, ka bânte hian mi tin ro a rêlsak ang, thliarkârte chuan mi nghâk ang a, ka bân hi an ring ang. 6 Vân lamahte khian in mit lên chho ula, hnuai lama leilung chu en rawh u. Vân khi meikhu angin a la zâm ral ang a, leilung hi silhfên angin a la hlui ang, a chhûnga awmte chu chutiang bawkin an la thi ang; ka chhandamna erawh chu kumkhuain a awm ang a, ka felna pawh tihbovin a awm lo vang. 7 “Felna hretu, ka dân thu thinlunga pai mite u, ka thu ngaithla rawh u; mihringte sawichhiatna hlau suh ula, an hauna che u avângin mangang hek suh u. 8 Thîmin silhfên a ei chhe vek angin, anni chu a ei chhe vek dâwn si a, sûlrûlin sahmul a ei angin anni chu a ei dâwn a ni; ka felna erawh chu kumkhuain a awm ang a, ka chhandamna chu chhuan zawng zawng thlengin a awm ang.” 9 Aw LALPA bân, harh la, harh la, chakna inbel rawh; hmânlai, hmasâng chhuante awm laia i harh ang khân harh rawh. Nang hi Rahab sât sawmtu, dragon chhuntu kha i ni lâwm ni? 10 Nang hi tuifinriat, tui thûk zau tak tui tikangtu, tuifinriat mawng thûk chu tlante kal kaina tûr kawnga siamsaktu i ni lâwm ni? 11 Tin, LALPA tlante chu an kîr leh ang a, hla sa chungin Zion chu an thleng ang a, chatuana lâwmna an lu chungahte a awm tawh ang. Lâwmna leh hlimna an hmu ang a; lungngaihna leh rûmna chu a bo tawh ang. 12 “Nangmahni thlamuantu che u ka ni a; mihring thi leh mai tûr, hlobet ang lek hi engati nge in hlauh le? 13 Kei LALPA hi nangmahni siamtu ka ni a, vânte khi kai pharha, leilung nghahchhan siamtu ka nih in theihnghilh ta elo? Engtizia nge nangmahni hnehchhiah duhtute thinur hlau rêng rênga in la awm fo le? 14 Sal hruai bo chu rang taka chhuahin a awm ang a; khuarkhurumah a thi lo vang a, chaw a tlachham hek lo vang. 15 Kei LALPA i Pathian, a fâwnte chu ri hum hum khawpa tuifinriat chawk lettu chu ka ni si a: ka hming chu sipaihote LALPA a ni. 16 Tin, vân khi ka kaih pharh theiha, leilung nghahchhante ka phûm theiha, Zion-ho hnênah, ‘Ka mite in ni e,’ ka tih theih nân ka thute chu i kâah ka dah a, ka kutin ka hûm che a ni.”
Jerusalem tuarna tâwp tûr
17 Aw Jerusalem, LALPA kut ata a thinrimna nova mi in nu, harh la, harh la, tho rawh; nang chuan pai paina no berhbua mi i in a, i in fai kêlh a. 18 A fapa hrin zawng zîngah chuan amah hruaitu tûr tu mah an awm lo va; a fapa châwm len zawng zawng zîngah chuan a kuta chelh tu mah an awm hek lo. 19 Hêng thil pahnih hian a tlâkbuak tâk che hi; tuin nge ṭahpui dâwn che aw? Ṭiauna leh chhiatna te, ṭâm leh khandaihte hian; engtin nge ka thlamuan ang che aw? 20 I fapate chu an chau va, sathâr lêna a âwk angin thlêr lu lam zawng zawngah chuan an mu phung a; LALPA thinrimna leh i Pathian zilhhaunain an khat hlawm a ni. 21 Chuvângin, nang tihretheih leh uain rui ni si lova mi rui, hei hi hre rawh: 22 i LALPA Jehova, i Pathian, a mite thu sawipui ṭhîntu chuan heti hian a ti, “Ngai teh, pai paina no, ka thinrimna no berhbu ngei chu, i kut ata ka la chhuak ta; i in leh tawh lo vang. 23 Nangmah tiretheitute kutah ka dah ang; anni chuan i nunna hnênah, ‘Kan zawh tûr chein bawkkhup rawh,’ an tih kha; tichuan, nangin zawhtute hnênah chuan i hnungzâng chu lei ang leh kawtthlêr angin i dawh kha,” tiin.
Pathianin Jerusalem a chhan dâwn
1 Aw Zion, harh la, harh la, i chakna inbel rawh; aw Jerusalem, khawpui thianghlim, i silhfên mawi takte chu inbel rawh. Tûn achinah chuan serh tan loh leh mi bawlhhlawh chu i chhûngah an lût tawh dâwn si lo. 2 Aw Jerusalem, vaivut i kai kha inthing rawh; tho la, ṭhu rawh! Aw Zion fanu, sala awm, i nghâwng phuarnate kha phelh rawh. 3 LALPA chuan heti hian a ti si a: “Engmahlo atan hralh in ni a; tichuan, tangka lova tlan in ni tawh ang,” tiin. 4 LALPA PATHIAN chuan heti hian a ti si a: “Ka mite chu a tîrah chuan Aigupta rama awm tûrin an chhuk a; tin, Assuria miten enga khaw lawilovin an hnehchhiah hlawm a. 5 Chutichuan, tûnah hetah hian eng nge ka tih dâwn? Ka mite hi engmahlova hruai bovin an awm si a,” LALPAN a ti, “An chunga rorêltute chu an ṭê tuar tuar a,” LALPAN a ti, “Ka hming hi nilênga sawichhiatin a awm a. 6 Chuvângin, ka mite chuan ka hming an hria ang; chuvângin, chumi niah chuan a sawitu chu ka ni tih an hria ang: ‘Ngai teh, keimah hi ka ni,’” tiin. 7 Tlângahte chanchin ṭha thlena, remna thu tlângaupuia, thil ṭha chanchin ṭha thlena, chhandamna thu tlangaupuia, Zion hnêna, “I Pathian chu lalah a ṭhu,” titu ke chu a va mawi êm! 8 Chu! I râl vêngtute aw chu! Aw an chhuaha, hlim takin an zai ho chu; LALPA chu Zion-ah a lo kîr leh hunah chuan inhmatawnin an hmu dâwn si a. 9 Jerusalem hmun chhe tawhte u, hlim chhuak phut ula, hlim takin zai ho rawh u, LALPA chuan a mite chu a thlamuan ta si a, Jerusalem chu a tlan ta a ni. 10 LALPA chuan hnam tinrêngte mit hmuhah a bân thianghlim chu a hlîm ta; tichuan, kâwlkila mi zawng zawngin kan Pathian chhandamna chu an hmu ang. 11 Chhuak rawh u, chhuak rawh u, chuta ṭang chuan chhuak rawh u, thil bawlhhlawh rêng rêng dek suh u; a chhûng ata kal chhuak rawh u; LALPA bungbêl kengtute u, thianghlim takin awm rawh u. 12 Hmanhmawh takin in kal chhuak dâwn si lo va, tlânchhiain in kal dâwn hek lo; LALPA chuan in hma a hruai ang a, Israel-ho Pathian chu in hnudâltu a ni dâwn si a.
LALPA chhiahhlawh tuartu
13 Ngai teh, ka chhiahhlawh chuan fing takin a ti ang; chawimawi leh chawisânin a awm ang a, sâng tak maiin a awm ang. 14 A hmêl chu mihring hmêl ai maha tihchhiat a ni a, a pianhmang pawh mihring pianhmang aia tihchhiat a ni bawk, mi tam takin mak an tih ang bawkin; 15 hnam tam takin mak an ti a, lalho pawh mak tiin an dang reng ang; an hmuh ngai loh an hmuin an hriat ngai loh an hria ang.
1 Kan thusawi tuin nge ring? LALPA kut chu tu hnênah nge a lan? 2 A hmaah chuan thil ṭiak no tak angin ani chu a chawr chhuak si a, lei ro aṭanga zung angin a puak chhuak bawk a ni. Pianhmang ṭhatna leh hmêl mawina rêng rêng a nei lo va; amah kan hmuhin amah kan duhna tûrin mawina rêng rêng a awm lo. 3 Ani chu mihringte hmuhsit leh duh lohvin a awm a; lungngaihnate nei mi leh natna hre mi a ni. Miten an hmai an huhsana ang chuan ani chu hmuhsitin a awm a; keini lah chuan ani chu kan ngaisâng si lo. 4 Ani chuan kan natnate phurin, kan lungngaihnate pawh a phur ngei a; nimahsela, keini chuan lungngaihna tlâkbuakah, Pathian vuakah, tihretheihah kan ngai si a. 5 Nimahsela, ani chu kan bawhchhiatnate avângin hliamin a awm a, kan khawlohnate avângin vuak thitlinin a awm a; kan thlamuanna tûra thununna chu a chungah a tla a, a vuakna vualtea tihdamin kan awm ta. 6 Kan za hian berâm angin kan vâk bo va; mahni kawng kawngah kan pêng ṭheuh va; LALPA chuan ani chungah chuan kan zaa khawlohna chu a nghat ta a. 7 Ani chu hnehchhiahin a awm a; nimahsela, a inngaitlâwm a, a ka pawh a âng lo; berâmno talh tûra an hruaia ang leh, berâm a hmul mêttu hmaa ngawi renga awma ang maiin; a ni, a ka a âng lo. 8 Hnehchhiahna leh rorêlnaa lâk bovin a awm a; a dam rualpuite lek phei chuan tuin nge mi nung ram ata tihborala a awm chu ngaihtuah tehlul ni? Ka mite bawhchhiatna avângin lungngaihna tlâkbuakin a awm a ni. 9 Tin, thil râwng taka ti ngai lovin, a kaah tihderna rêng rêng awm ngai lo mah sela, a thlân chu mi sualte hnên lamah an ruatsak a, a thih hnu chuan mi hausa hnên lamah a awm a. 10 Nimahsela, LALPAN ani chu vuak thitlin a duh rêng a ni; a tina ta ngei a. A nunna chu sual tân thilhlana i hman tikah, a chi thlah chu a hmu tawh ang a, a dam chhûng nite chu a tisei ang a, LALPA duh zâwng chu a kutah hlawhtlingin a awm ang. 11 A nunna thawh rim rah chu a hmu ang a, a lungawi tawh ang. Ka chhiahhlawh fel tak chuan a hriatnain mi tam tak chu thiam a chantîr ang a, an khawlohnate chu a phurhsak ang. 12 Chuvângin, ani chu mi liante chanvo ang ka sem ve ang a, ani chuan râllâk sumte chu mi chakte a sem ve ang; a nunna chu thi khawp hiala a leih buaka, bawhchhetute zînga chhiar tela a awm avângin; nimahsela, mi tam tak sualna chu a phur a, bawhchhetute tân chuan a ṭawngṭaisak a.
LALPAN Israel a hmangaihzia
1 “Aw ching, nang, fa hring ngai lo, hlim takin zai rawh; nang, nau vei ngai lo, hla sa chhuak phutin, au chhuak rawh! Pasal nei mi fate ai chuan khawharnu fate an tam zâwk si,” LALPAN a ti. 2 “I puan in hmun chu zauh rawh, i awmnate puan in chung chu kai pharh rawh se; ren suh; i hruite chu tisei la, i kaih marna khente chu tinghet rawh. 3 Ding lam leh vei lamah i darh zau dâwn si a; tichuan, i chi thlahte chuan hnam tin an rochung ang a, khawpui ṭiau hnuahte chuan mi an awmtîr leh ang. 4 Hlau suh, i mualpho dâwn si lo; zak hek suh, mualphovin i awm dâwn si lo; i tleirâwl lai mualphona chu i theihnghilh tawhin, i hmeithaina hmingchhiatna chu i hre reng dâwn tawh si lo. 5 Nangmah Siamtu chu i pasal a ni si a, a hming chu sipaihote LALPA a ni; Israel-ho Mi Thianghlima chu nangmah tlantu a ni a, ani chu khawvêl zawng zawng Pathian a ni. 6 “Nupui mâk, rilrua lungngai tak, tlangvâl laia nupui tawh, paih hnu koh leh angin LALPAN a ko che a nih hi,” i Pathianin a ti. 7 “Mitkhapkâr lek ka ma chia; nimahsela, khawngaihna nasa takin ka hruai leh ang che. 8 Ka thinur liamin mitkhapkâr i lakah ka hmai ka thup a; nimahsela, kumkhaw ngilneihnain ka khawngaih ang che,” LALPA, nangmah tlantu chuan a ti. 9 “Chu chu ka tân Nova tuite ang kha a ni si a; ‘Nova tuite chuan lei a chîm pil leh tawh lo vang,’ tia chhia ka chham ang khân, ‘I chungah ka thinur tawh lo vang a, ka zilhhau tawh hek lo vang che,’ tiin chhia ka chham ta a ni. 10 Tlâng liante chu an kal bo vang a, tlâng tête chu sawnin an awm bawk ang; ka ngilneihna erawh hi chu i lak ata a kal bo lo vang a, ka remna thuthlung chu sawnin a awm hek lo vang,” LALPA, a khawngaihtu che chuan a ti.
Jerusalem thar
11 “Aw nang tihretheih, tuifâwn vawrh vawrh, thlamuanna nei lo, ngai teh, i lungrem chu lung ṭha miin ka rem ang a, i lungphûmte chu sapphir lungtein ka rem bawk ang. 12 I chhîp zumte chu rubi lungin, i kawngkhârte chu karbankul lungin, i kulh zawng zawng chu lungmawitein ka siam ang. 13 Tin, i fate zawng zawng chu LALPA zirtîrin an awm ang a, i fate thlamuanna chu nasa tak a ni ang. 14 Felnaa tihnghehin i awm ang a; hnehchhiahna ata hla takah i awm ang a, i hlau dâwn lo a ni; thil râpthlâk ata hla takah i awm bawk ang a, a hnaih dâwn lo che a ni. 15 Ngai teh, bei tûr chein an la pung khâwm a ni thei e; nimahsela, ka thu a ni lo vang; nangmah bei tûra pung apiangte chu nangmah avângin an tlu ang. 16 Ngai teh, kei chuan thîrdêng, pûm zâpa a hnathawhna tûr hriam chher ṭhîntu chu ka siam a; keimah vêkin tichhe tûrin tichhetu ka siam bawk a ni. 17 “Nangmah beihna tûra hriam chher rêng rêng a sâwt lo vang; lei tinrêng thupawia nangmah rawn khingtute chu thiam loh i chantîr ang. Chu chu LALPA chhiahhlawhte rochan chu a ni a, an felna chu ka hnên ata a ni,” LALPAN a ti.
Khawngaihna dawng tûra LALPA sâwmna
1 “Hawh u, tuihâl apiangte u, tuiahte hian lo kal rawh u; tangka nei lote pawh, lo kal ula, lei ula, ei rawh u. A ni, lo kal ula, uain leh hnutetui tangka pe lovin, a man pawh pe lovin lei rawh u. 2 Chaw ni si lovah eng vângin nge tangka in sên? Puar leh fânna ni si lovah eng vângin nge in tha in sên? Ka thu ngun takin ngaithla ula, thil ṭha chu ei rawh u, in nunna chu thil thauvah chuan hlim rawh se. 3 In beng rawn dawh ula, ka hnênah lo kal rawh u. Ngaithla ula, in nunna chu a nung ang; tin, in hnênah kumkhaw thu ka thlung ang, Davida hnêna khawngaihna tiam tlatte chu. 4 Ngai teh, ani chu mi tin tân hretuah ka ruat a, mi tin tân hruaitu leh hotuah ka ruat a ni. 5 Ngai teh, i hriat ngai loh hnam chu i ko vang a, nangmah hre ngai lo hnam chu i hnênah an lo tlân ang, LALPA i Pathian avâng leh Israel-ho Mi Thianghlima avâng chuan; ani chuan a chawimawi si chia.” 6 Hmuh awla a awm lai hian LALPA chu zawng ula, a hnaih lai hian ko rawh u. 7 Mi suaksual chuan a awm dân chu bânsan sela, mi fel lo chuan a ngaihtuahte chu bânsan bawk rawh se; LALPA hnênah kîr leh rawh se; tichuan, anin a lo khawngaih ang; kan Pathian hnênah kîr leh rawh se, anin a ngaidam nasa khawp dâwn si a. 8 “Ka ngaihtuahte hi i ngaihtuahte a ni si lo va, i awm dânte chu ka awm dân a ni hek lo,” LALPAN a ti. 9 “Vân khi lei aia a sâng zâwk angin, ka awm dânte hi in awm dânte aiin a sâng zâwk si a, ka ngaihtuahte pawh hi in ngaihtuahte aiin a sâng zâwk bawk a ni. 10 Ruah leh vûr chu vân aṭangin a sûr ṭhîn a, khi lamah khian a kîr leh ngai lo va, lei hi a châwm zâwk a, thil a ṭotîrin a chawrtîr a, buh chi thehtu hnênah buh chi a pe a, eitu hnênah ei tûr a pe ṭhîn; 11 chutiang bawkin ka kâ aṭanga ka thu chhuak chu a awm ang: eng mah tih nei lovin ka hnênah a kîr leh lo vang a, ka duh ang chu a tizo zâwk ang a, thil ti tûra ka tirhnaah chuan a hlawhtling bawk ang. 12 Hlim taka chhuakin, thlamuang taka hruai chhuahin in awm dâwn si a; tlâng liante leh tlâng tête chuan in hmaah hla an sa chhuak phut ang a, phûl thing zawng zawngte chuan an kut an bêng bawk ang. 13 Hnimhlîngnei aiah fâr a ṭo zâwk ang a, buar aiah lenhmui a ṭo zâwk ang; chu chu LALPA tân hmingṭhatna tûr leh kumkhaw chhinchhiahna, tihborala awm lo tûr a ni ang.”
Mi zawng zawng Pathian mi an la ni dâwn
1 LALPA chuan heti hian a ti: “Dik takin ro rêl ula, fel takin ti rawh u, ka chhandamna chu a lo thleng dâwn dâwnin, ka felna chu a lo lang dâwn dâwn ta si a. 2 Chutiang ti mi leh, chumi pawm tlattu mihring fapa chu, a eng a thâwl e; Chawlhni bawhchhe lova serh ṭhîntu leh, thil ṭha lo rêng rêng ti lo tûra a kut vêng ṭha ṭhîntu chu.” 3 Tin, ram dang mi, LALPA zawmtu chuan, “LALPAN a mite lakah mi tihrang ngei ang,” ti suh se; mi tilreh chuan, “Thing ro mai ka nih hi,” ti hek suh se. 4 “Ka Chawlhnite serha, ka lâwm zâwng thilte thlanga, ka thuthlung pawm tlattu mi tilrehte chungchâng thu-ah chuan LALPAN heti hian a ti si a: 5 ‘An hnênah ka in chhûngah leh ka kulh chhûngahte chuan, fanu leh fapa neite ai mah chuan hriat rengna ṭha zâwk leh hming ṭha zâwk ka pe ang; an hnênah kumkhaw hming, tihboral tawh loh tûr ka pe ang,’ tiin. 6 Ram dang mite pawh, Chawlhni bawhchhe lova serh ṭhîn leh, ka thuthlung pawm tlat apiang, LALPA rawng bâwl tûr leh, LALPA hming ngaina tûr leh, a chhiahhlawhahte awm tûra LALPA zawm apiangte chu; 7 anni ngei chu ka tlâng thianghlimah chuan ka hruai ang a, ka ṭawngṭaina inah ka tihlim ang; hâlrala an thil hlante leh an inthawinate chu ka maichâmah chuan lawmin a awm ang; ka in chu mi tinrêng tân ṭawngṭaina in an ti dâwn si a,” tiin. 8 LALPA PATHIAN, Israel hnawh chhuahhote hruai khâwmtu chuan, “Hruai khâwm sate bâkah mi dang pawh ka la hruai khâwm ang,” a ti a.
Israel hruaitute a dem
9 Ramsa zawng zawngte u, a ni, ramhnuaia sa awm zawng zawngte u, ei tûrin lo kal rawh u. 10 A râlvêngtute chu an mit a del a, hriatna nei lo hlîr an ni a; ui aw nei lo hlîr an ni a, an bauh thei lo; mumang neia, mu renga, mut duh mi an ni a. 11 A ni, uite chu duhâm tak an ni a, tâwk tih lêm an nei ngai lo; chûng chu berâm vêngtu thil hre thei lote an ni; mahni kawng kawng, mahni hlâwkna lam ṭheuh an hawi hlawm, an zavai maiin. 12 “Lo kal rawh u, uain ka la ang a; tichuan, zuin kan inthun khat dâwn nia; naktûk chu vawiin ang hi a ni leh ang a, ni ropui nasa deuh mai a ni ang,” an ti ṭheuh va.
Israel milem biak demna
1 Mi ṭha an thi a, tu mân pawi an ti lo; Pathian ngaihsak mite pawh an thi a, tu mân chhiatna thleng tûr laka lâk bo an ni tih an ngaihtuah lo. 2 Mi fel chu a thi a, thil ṭha lovin a khawih phâk lo va, dik taka ti ṭhînte chu thlamuang takin an khumah an mu siai siai ṭhîn. 3 “Nimahsela, nangni dawithiamnu fapa, uire leh nawhchizuar thlahte u, hetah lo hnai rawh u. 4-5 Tu nge nuihza siam nân in hman ṭhin le? Tu nge in chhiat khuma, lei in chhuah khum ṭhin le? Nangni sasaw zînga, thing buk hnuai tina intizauthauva, ruam chhûngtea lung khi bulahte naupang that ṭhînte u, bawhchhiatna fa, dâwt theihna thlahte in ni lâwm ni? 6 Luikawr ruam lung mâm zîngah chuan i chanvo a awm a; chûng, chûngte ngei chu i chanpual chu a ni; chûngte tân ngei chuan thilhlanin mi i leih a, thilpêk i hlan kha. Chûng thilah chuan tihlungawiin ka awm dâwn em ni? 7 Tlâng sâng zo tak chungah chuan i khum chu i dah a; Moleka hnênah i kal a. 8 Tin, kawngkhârte leh kawngkabiang phênahte chuan i hriat rengna chu i tung a; ka lakah ni lovin mi dang lakah i inhlîp a, i han chho si a, i khum i zauh va, an hnênah thu i thlung a; an khum chu i hmuhnaah chuan i hmangaih a. 9 Tin, hriak nên lal hnênah i kal a, i rimtuite chu i ti nasa zual a, i palaite chu hla takah i tîr a, Seol thleng rawkin i intihhniam kha. 10 I kalna kawng sei avâng khân i hah a; nimahsela, ‘Beiseina rêng rêng a awm lo,’ i ti si lo va. I chakna tihharhna i hmu a; chuvângin, i chauh tâk loh kha. 11 Tu nge i hlauhva i ṭiha, dâwt i sawi ṭhina, kei mi hriat tâk lohva, i rilrua i ngaihtuah tâk loh le? Rei tak ka ngawi reng lo vem ni? Hlauh pawh mi hlauh loh hi. 12 I felna thu hi ka sawi ang; i thiltihte zawng i tân eng mah a hnemhnâng lo vang. 13 I au hunah chuan i milim lâk khâwmte chuan chhanhim che rawh se; nimahsela, anniho chu thliin a la ang a, thawin a lên bo vek ang. Kei mi ringtu erawh chuan ram hi a nei ang a, ka tlâng thianghlim hi a luah ang.”
Pathianin ṭanpuia tihdam a tiam
14 Tin, ani chuan, “Chhûng pâwng rawh u, chhûng pâwng rawh u, kawng buatsaih rawh u, ka mite kawng ata tlûkna tûr chu paih rawh u,” a ti ang. 15 Mi chungnung, chawisân, chatuana awm, a hming Thianghlima chuan heti hian a ti si a: “Kei hmun chungnung leh thianghlimah ka awm a, mi thuhnuairawlhte rilru tiharh tûr leh inchhîr ngawih ngawihte thinlung tiharh tûrin, mi, rilrua inchhîr ngawih ngawiha thuhnuairawlh tak hnênah pawh ka awm a ni. 16 Kumkhuain ka do dâwn si lo va, ka thinur fo dâwn hek lo; chutichuan, mi rilru ka hmaah a chau vang a, nunna ka siamte pawh chu an chau bawk ang. 17 A duhâma a khawlohna avângin ka thin a ur a, ka vua a, ka hmai ka hup a, ka thin a ur a ni; ani lah chu a thinlung awm dân pângngaiah luhlul takin a awm zêl a. 18 A awm dânte chu ka hmu a, amah chu ka tidam ang; ka hruai bawk ang a, amah leh a sûnpuitute hnênah thlamuannate ka pe leh ang. 19 Kei chuan hmui rah ka siam ṭhîn a: ‘Remna, remna, hla taka awm hnênah leh hnai taka awm hnênah chuan awm rawh se,’” LALPAN a ti, “Ani chu ka tidam ang.” 20 Mi suaksualte erawh chu tuifinriat fâwn fâwn ṭhîn ang chu an ni; an awm hle hle thei si lo va, a tuite chuan bawlhhlawh leh chirhdiak a vawrh chhuak ṭhîn. 21 Ka Pathian chuan, “Mi suaksualte tân chuan muanna rêng rêng a awm lo,” a ti a.
Chaw nghei dân dik
1 “Ring takin au rawh, inren suh, tawtawrâwt angin i aw chhuah tuar tuar la, ka mite hnênah an bawhchhiatna chu hrilh la, Jakoba chhûngte hnênah an sualnate hrilh bawk rawh. 2 Anni chuan zawn zawng ni tin mi zawng ṭhîn a, ka kawng thute hriat zawng an châk ṭhîn; fel taka ti leh an Pathian rorêlna bânsan ngai lo hnam angin ka hnênah rorêlna fel tak mi dîl ṭhîn a, Pathian rawn hnaih pawh an châk ṭhîn a ni. 3 “ ‘Eng vângin nge chaw kan ngheia, i hmuh si loh? Eng vângin nge kan intihretheiha, i hriat si loh?’ an ti ṭhîn. Ngai teh u, in chaw nghei ni chuan nangmahni nawmsak in bâwl a, in hnathawktute zawng zawng in hnehchhiah ṭhîn. 4 Ngai teh u, innghirnghona leh inhnialna tûr leh, suahsualna kuttuma inchûm tûrin a ni, chaw in nghei ṭhin ni. In aw hi chung lama hriattîr tlâkin chumi ni chuan chaw in nghei ngai lo. 5 Chutiang chu chaw ngheina ka duh zâwnga chu em ni? Mi a intihretheihna tûr ni a ni em ni? Phûngladin anga a lu kûn tûr leh, a hnuaia saiip puan phaha vut phul tûr em ni? Chûng chu chaw ngheina leh LALPA tâna ni lawm tlâk i ti dâwn em ni? 6 Hei hi chaw ngheina ka duh zâwnga chu a ni lâwm ni: nghâwngkawl hruite hlihsak leh, hnehchhiahho chhuahtîr leh, nghâwngkawl tinrêng tihtliahsak hi? 7 Mahni chaw rilṭâmte hnêna sem leh, rethei hnawh chhuahho mahni ina hruai hi a ni lâwm ni? Mi saruak hmuha puan vawm leh, mahni tisa ang pu laka bihrûk loh hi a ni lâwm ni? 8 “Chumi hunah chuan i êng chu zîng ni chhuak angin a lo chhuak ang a, i damna tûr chu a lo chawr chhuak thuai ang; i felna chuan i hma a hruai ang a, LALPA ropuina chu i hnudâltu a ni ang. 9 Chumi hunah chuan i ko vang a, LALPAN a chhâng ang; i au vang a, anin, ‘Heta hi ka awm,’ a ti ang. In zîng ata nghâwngkawl te, zungṭanga mi kawh te, sual taka ṭawng te hi i tihbova, 10 rilṭâmte tân i inphala, tihretheihte i tihtlai bawk chuan, i êng chu thim zîngah a êng chhuak ang a, i thim mupna chu chhûn ang a ni tawh ang. 11 Tin, LALPA chuan a hruai zel ang chia, hmun rovah pawh a titlai ang chia, i ruhte pawh a tichak bawk ang; tin, huan tuia châwm ang leh, tuihna kang ngai lo ang i ni tawh ang. 12 Tichuan, i laka lo la chhuak tûrte chuan hmun hlui chhe tawhte chu an rem leh ang a; chhuan tam tak lungphûmahte chuan i rem chho leh ang; tichuan, nang chu, ‘A chhe lai siamṭhatu,’ ‘Mi awmna tûra kawngte siamṭhatu,’ an ti ang che.
Chawlhni serh lâwmman
13 “Chawlhni bawhchhe lo tûra, ka ni thianghlima i duh zâwng ti lo tûra i kephah chu i hawi kîrtîra, Chawlhni lâwmawm i tiha, LALPA ni thianghlim chu zahawm i tiha, mahni kawng zawng lova, mahni nawmsak bâwl lova, mahni thu sawi lova i chawimawi chuan, 14 LALPA chungah chuan i lâwm ang a; leilung hmun sângahte chuan ka chuantîr ang chia, i pu Jakoba rochun thilin ka châwm ang che.” LALPA kâ chuan chu chu a sawi tawh a ni.
Zâwlneiin mite sual a dem
1 Ngai teh u, LALPA kut chu chhandam thei lo tûrin tihtawiin a awm lo va; a beng chu hre thei lo tûrin a ngawng hek lo. 2 In khawlohnate chu nangni leh in Pathian kâra tlain a tiṭhen zâwk che u a, benga a hriat duh lohna tûrin in sualnate chuan a hmai chu a hliahsak bawk che u a ni. 3 In kutte chu thisena tihbawlhhlawhin a awm a, in kutzungṭangte lah khawlohnaa tihbawlhhlawhin a awm si a; in hmuite chuan dâwt a sawi a, in lei chu suahsualna thu sawiin a phun nuah nuah ṭhîn. 4 Tu mân dik takin thupawi an sawi lo va, tu mân thu tak takin thu an sawipui ngai lo. Boruak mai mai hi an ring a, dâwt an sawi ṭhîn a; thil sual tih duhna an pai a, khawlohna an hring ṭhîn. 5 Rûlmuk tuite an awp keu va, maimawm rîl puan an tah ṭhîn; an tui eitute chu an thi ṭhîn a, tihkeha awmah chuan rûl a lo chhuak ṭhîn. 6 An maimawm rîl puan chu silhfênahte a chang lo vang a, an thiltihte chu an inbel hek lo vang; an thiltihte chu khawlohna thiltihte a ni a, thil râwng taka tihna chu an kutah a awm bawk a. 7 An kete chu thil ṭha lo lamah a tlân ṭhîn a, pawisawi lo thisen chhuah tûrin an hmanhmawh ṭhîn; an ngaihtuahte chu khawlohna ngaihtuahnate a ni ṭhîn a; ṭiauna leh chhiatna chu an kawngahte a awm ṭhîn. 8 Thlamuanna kawng an hre lo va, an kalnaahte chuan dikna rêng rêng a awm ngai lo; an tân kawng kawite an siam a; chuta kal apiang chuan thlamuanna an hre ngai lo.
Mipuiten an sual an puang
9 Chuvângin, rorêlna chu keimahni aṭanga hla takah a awm ṭhîn a, felna chuan min ûm phâk ngai hek lo; êng kan nghâk ṭhîn a; nimahsela, ngai teh, thim a lo ni ṭhîn; ênna kan nghâk ṭhîn a; nimahsela, thim mupah bawk kan kal ṭhîn. 10 Mitdel angin bang kan dap dun dun ṭhîn a, a ni, mit nei lote angin kan dap dun dun ṭhîn; thimhlim ang maiin chhûnah kan inchhuih ṭhîn a; mi chakte zîngah chuan mitthi ang mai kan ni. 11 Savawmte angin kan zain kan hûk dur dur ṭhîn a, ṭhurote angin nasa takin kan rûm nghuat nghuat ṭhîn; rorêlna kan nghâk ṭhîn a; nimahsela, a awm hauh si lo va; chhandamna kan nghâk ṭhîn a; nimahsela, keimahni aṭangin hla takah a awm ṭhîn. 12 Kan bawhchhiatnate hi i hmaah a pung ta si a, kan sualnate hian min hêk ṭhîn a ni; kan bawhchhiatnate hi kan hnênah a awm reng si a, kan khawlohnate zawng kan hria a ni: 13 kan bawhchhiat te, LALPA kan phatsan te, kan Pathian zui zêl lova kan hawisan te, hnehchhiah thu leh hel thu kan sawi te, dâwt thu kan paia, thinlung ata kan sawi chhuah ṭhinte hi. 14 Tichuan, rorêlna chuan hnung lam min hawisan a, felna chuan hla takah min dinsan ta; thutak chu kawtthlêrah a tlu reng si a, dikna chu a lût thei lo a ni. 15 A ni, thutak a awm ta lo va; thil ṭha lo bânsantu chu râllâkah a insiam ṭhîn; tichuan, LALPAN chu chu a hmu a, rorêlna rêng rêng awm ta lo chuan a tilungni ta lo va.
LALPA a mite chhan tûrin a inbuatsaih
16 Tin, mi rêng rêng an awm lo tih a hria a, dîlsaktu rêng rêng an awm lo chu mak a ti a; chuvângin, ama bân ngei chuan chhandamna a insiam a; ama felna ngei chuan a inchelh ding ta a. 17 Tin, felna chu âwmphawah a ha a, chhandamna lukhum a khum a; tin, inthuamnaah chuan phuba lâkna silhfênte chu a inbel a, kawrfualah chuan ṭhahnemngaihna a ha a. 18 An thiltihte angin, an thiltihte ang ngeiin ani chuan a thungrûl ang, amah dotute chu thinrimnain, a hmêlmate chu thungrulhnain a thungrûl ang a, thliarkârte chu thungrulhnain a thungrûl ang. 19 Chutichuan, LALPA hming chu thlang lam aṭangin an ṭih ang a, a ropuina chu ni chhuahna aṭangin an ṭih bawk ang; ani chu tui lian thut, LALPA thawa chhêm luan vut vut angin a lo kal dâwn si a. 20 “Zion-ah chuan tlantu a lo kal ang a, Jakob-ho zînga bawhchhiatna hawisantute hnênah pawh a lo kal ang,” LALPAN a ti. 21 “Kei zawng, hei hi a ni, an hnêna ka thuthlun chu ni,” LALPAN a ti: “Ka thlarau i chunga awm leh, ka thu i kâa ka dahte chuan, tûn achinah chatuan thleng pawhin i ka chu an chhuahsan lo vang a, i thlahte ka chu an chhuahsan hek lo vang a, i thlahte thlah lehchhâwng ka pawh tûn aṭanga kumkhuain an chhuahsan hek lo vang,” LALPAN a ti.
Jerusalem la ropui tûrzia
1 Tho la, êng rawh; i êng chu a lo thleng a, LALPA ropuina chu i chungah a lo chhuah tâk hi. 2 Ngai teh, thimin leilung hi a khuh dâwn si a, thim chhah mupin mite a khuh bawk dâwn a ni; nimahsela, LALPA chu i chungah a lo chhuak ang a, a ropuina chu i chungah a la lang ang. 3 Tichuan, hnam tin i êng lamah an lo kal ang a, lalte pawh i lo chhuah ênna lamah an lo kal bawk ang. 4 “Dâk la, i mit lên vêl la, en rawh: an zain an inkhâwm a, i hnênah an lo kal a nih hi; i fapate chu hla tak aṭangin an lo kal ang a, i fanute chu an rawn pawm ang. 5 Chumi hnuah chuan i hmu ang a, i êng tawh ang a, i thinlung chu a khûr ang a, tihzauvin a awm ang; tuifinriata sumdâwnna tam tak mai chuan i hnên lam a pan dâwn avâng leh, hnam tin sum chuan i hnên a lo thlen dâwn avângin. 6 “Sanghâwngsei tam tak mai chuan an tuam dûl dûl ang che, Midian leh Epha rama sanghâwngsei tuaite chuan; chûng zawng zawng chu Seba ram aṭangin an lo kal ang; rangkachak leh beraw an rawn phur ang a, LALPA fakna thu an hriattîr ang. 7 Kedar-ho ran rual zawng zawng chu i hnênah an lo kal khâwm ang a, Nebaioth-ho berâmpate chuan i rawng an bâwl ang; ka maichâmah chuan lâwmin an chho vang a, ka ropuina in chu ka chawimawi ang. 8 “Chhûm anga thlâwkte leh, ṭhûro anmahni tukverh pana thlâwk noh noh anga thlâwkte saw tute nge ni? 9 Ani chuan a chawimawi che avângin, LALPA i Pathian hming atân leh Israel-ho Mi Thianghlima tân chuan i fapate an tangkarua leh rangkachak nên hla tak aṭanga hruai tûrin, matheilovin thliarkârte chuan mi nghâk ang a, Tarsis lawng liante chuan hmasak ber an chuh ang. 10 Tin, ram dang mite chuan i kulh bangte chu an rem chho leh ang a, an lalte pawhin i rawng an bâwl tawh ang; ka thinrim chuan ka vua chia; nimahsela, ka duhsaknain ka khawngaih si che a nih hi. 11 I kawngkhârte pawh hawnin a awm reng ang a, a chhûn a zânin an khâr lo vang; miten hnam tin sum chu i hnênah an rawn lâka, an lalte pawh an rawn hruai ve theih nân. 12 I rawng bâwl duh lo hnam leh ram chu a boral dâwn si a; a ni, chûng hnamte chu tihchhiat hlauhvin an awm ang. 13 Ka hmun thianghlim cheimawi tûrin Lebanon ropuina chu i hnênah a lo kal ang, fâr te, phân te, tufâr te chu an lo kal tlâng ang; tichuan, ka ke rahna hmun chu ka tiropui ang. 14 Tin, nangmah tiretheituteho fapate chu kûnin i hnênah an lo kal ang a, nangmah hmusittute zawng zawng chu chibai bûkin i kephah hnuaiah an kûn ang; nang chu, ‘LALPA khawpui’, ‘Israel-ho Mi Thianghlima Zion’ an ti ang che. 15 Tu ma tlawh ngai loh khawpa kalsan leh huata i awm aiah kumkhaw chhuan ber, chhuan tam tak lâwmnaah ka siam ang che. 16 Tin, hnam tin hnutetui i fâwp ang a, lalho hnute pawh i hne ang; kei LALPA hi nangmah chhandamtu leh nangmah tlantu, Jakob-ho Mi Chaka chu ka ni tih i la hre bawk ang. 17 Dâr aiah rangkachak ka rawn la ang a, thîr aiah pawh tangkarua ka rawn la ang, thing aiah pawh dâr, lung aiah pawh thîr. Thlamuanna chu i hotuah ka ruat bawk ang a, felna chu nangmah phûttuah ka ruat ang. 18 Râwng taka thiltih thâwm chu i ramah hriat a ni tawh lo vang a, ṭiauna leh chhiatna thâwm pawh i ramri chhûngah hriat a ni tawh lo vang; i kulh chu ‘Chhandamna’ i ti zâwk ang a, i kawngkhârte pawh ‘Fakna’ i ti bawk ang. 19 “Ni khi chhûnah nangmah êntu a ni tawh lo vang a, thla pawh khian ênna tûrin a tiêng hek lo vang che; LALPA erawh chu i tân kumkhaw êntuah a awm ang a, i Pathian chu i ropuina atân a awm bawk ang. 20 I ni chu a tla tawh lo vang a, i thla pawh chu a ral tawh hek lo vang; LALPA chu i kumkhaw êntu a ni dâwn tawh si a, i lusûn nite chu a tâwp dâwn tawh a ni. 21 I mite pawh an zain mi fel an ni ang a, i ram hi an luah kumkhua ang; chawimawia ka awm theihna tûrin anni chu a zung puak chhuak ka phun, ka kutchhuak chu an ni ang. 22 In zînga hnam tê ber pawh hnam ropui tak an la ni ang a, hnam tlêm tê pawh hnam chak tak an la ni ang. Kei LALPA hian a hun takah ka thlentîr thuai ang.
Chhandamna chanchin ṭha
1 “Thuhnuairawlhte hnêna chanchin ṭha hril tûra LALPAN hriak mi thih avângin, LALPA PATHIAN thlarau chu ka chungah a awm; ani chuan, thinlung lungchhiate tuam tûr te, salte hnêna chhuahna thu leh mi tângte hnêna tân in hawnna thu sawi tûr te, 2 LALPA lungawi kum thu leh kan Pathian phuba lâk ni thu sawi tûr te, lungngai zawng zawng thlamuan tûr te, 3 vut aiah pangpâr ṭhi hrui te, lungngaih aiah hlimna hriak te, nguina thlarau aiah fakna silhfên te an hnêna pêkah, Zion-a lungngaia awmte tân ruat tûr tein mi tîr a ni; ani chu chawimawia a awmna tûrin, felna thing, LALPA phunte, tih an nih theih nân.” 4 Tin, hmun hlui chhe tawhte chu an rem leh ang a, tûn hmaa khaw lo ṭiau tawhte chu an din ṭha leh ang a, khawpui chhe tawh, chhuan tam tak ṭiaunate chu an siam ṭha leh ang. 5 Tin, ram dang mite chuan in ran rualte chu dingin an tlattîr ang a, hriat ngai loh mite chu in leilettuahte leh in grêp hrui enkawltuahte an awm ang. 6 Nangni erawh chu “LALPA puithiamte” tia vuahin in awm ang a, miten “Kan Pathian rawngbâwltute” an ti ang che u. Hnam tin sum in ei ang a, an ropuina chu in inchhuan phah ang. 7 In mualpho aiah a leh hnih in hmu ang a, in zah aiah in chanvovah hlimin in zai ang; chutichuan, in ramah chuan a leh hnih in luah ang a; kumkhaw hlimna in hnênah a awm ang. 8 Kei LALPA hian rorêlna fel ka ngaina si ṭhîn a ni; tichuan, anmahni ka rulhna chu tihtakmeuhvin an hnênah ka pe ang a, an hnênah kumkhaw thu ka thlung bawk ang. 9 An thlahte chu hnam tin zîngah hriat an ni ang a, an fate chu mi tin zîngah hriat an ni bawk ang. Anmahni hmu apiangin LALPA malsâwm chi an ni tih an hria ang. 10 LALPA-ah chuan nasa takin ka hlim ang a, ka nunna hi ka Pathianah chuan lâwm takin a awm ang; mo neitu chu pangpâr ṭhi hruia a inchei ṭhîn ang leh, mo chu a incheinatea a inchei ṭhîn ang hian, ani chuan chhandamna silhfênte mi bel a, felna kawrfualin mi tuam ta si a. 11 Leilungin a thil chawr a chhuahtîr ang leh, huanin a chhûnga thil chînte a chawrtîr ang hian, LALPA Pathian chuan felna leh fakna chu hnam tinrêng hmaah a chawrtîr dâwn si a.
1 A felna chu ênna anga a chhuaha, amah chhandamna chu khâwnvâr alh anga a chhuah hma loh chuan, Zion avângin ka ngawi reng lo vang a, Jerusalem avângin ka awm hle hle lo vang. 2 Hnam tinin i felna chu an hmu ang a, lal zawng zawngin i ropuina chu an hmu bawk ang; hming thar, LALPA kâin a vuah tûr chuan an ko vang che. 3 LALPA kuta mawina lallukhum leh i Pathian kuta ropuina lukhum i ni bawk ang. 4 “Mâk” an ti leh tawh lo vang che; i ram pawh chu “Tihṭiau” an ti leh tawh hek lo vang; “Duhlai” an ti tawh zâwk ang chia, i ram pawh chu “Pawmlai” an ti bawk ang; LALPA i chungah a lâwm si a, i ram pawhin pasal a nei dâwn a ni. 5 Tlangvâlin nula nupuia an nei ṭhîn ang hian i fapaten nupuiah an nei ang che; mo neitu chu mo chungah a lâwm angin, i Pathian chu i chungah a lâwm ang. 6-7 Aw Jerusalem, i kulh chungah râlvêngtute ka vêntîr a; a chhûn a zânin eng tikah mah an ngawi lo vang. Jerusalem hi a tihngheha, leiah hian fakawma a siam hma loh chuan, nangni LALPA hriatpuitua awmte u, awm hle hle hlek suh ula, amah pawh chu awm hle hletîr hlek suh u. 8-9 LALPAN, “I buh chu nangmah dotute chawah a pe leh tawh hauh lo vang a, ram dang miten i thawh chhuah uain chu an in tawh lo vang; a sengtute chuan an ei tawh zâwk ang a, LALPA chu an fak ang; a lotute chuan ka hmun thianghlim hung chhûng kawtlaiah chuan an in tawh ang,” tiin, a kut ding lam leh a bân chak tak chhâlin chhia a chham ta. 10 Chhuak ula, kulh kawngkaahte chhuak rawh u! Mite tân kawng buatsaih ula; chhûng pâwng ula, lamlian chu chhûng pâwng rawh u! Lungte chu chhar fai ula; mite tân chhinchhiahna târ chhuak rawh u. 11 Ngai teh u, LALPAN kâwlkil thlengin heti hian a hriattîr a ni: “Zion fanu hnênah heti hian sawi rawh u, ‘En teh, nangmah chhandamna a lo thlen dâwn hi; en teh, a lâwmman chu a hnênah a awm hi, a rulhna chu a hmaah a awm bawk a,’ ” tiin. 12 Tichuan, anni chu - Mi thianghlimho, LALPA tlante, an ti ang a; nang chu - Zawn chhuah, Kalsan loh khawpui, an ti ang che.
LALPAN hnam dang a hneh zo
1 Edom ram aṭanga lo kal, Bozra khua aṭanga silhfên tihsen sin saw tu nge ni? A puan sina ropui tak, nasa taka chakna nêna lo kal saw? “Keimah, fel taka thu sawia, chhandam kawnga mi chak taka kha ka ni.” 2 Eng vângin nge i puan sin kha a sena, i silhfênte pawh kha grêp sâwrna khura rap sâwrtu silhfên anga a awm ni? 3 “Keimah chauhvin grêp sâwrna khurah ka rap sâwr a, mipui zîng aṭangin mi pakhat mah ka hnênah an awm ve lo. Anni chu ka thinurin ka rap a, ka thinrimin ka chîl a; an nunna thisen chu ka silhfênahte hian thehin a awm a, ka puan zawng zawng hi ka tibawlhhlawh ta a. 4 Phuba lâk ni chu ka thinlungah a awm a, ka mi tlante kum chu a lo thleng ta bawk si a. 5 Ka han en a, ṭanpuitu tûr rêng rêng an awm lo va, chelh dingtu rêng rêng an awm lo chu mak ka ti a; chuvângin, keima bân ngei hian chhandamna mi thlen a, ka thinrimna chuan mi chelh ding ta a. 6 Mi tin chu thinrimin ka rap bet a, ka thinrimin ka tirui a, an nunna thisen chu leiah ka leih baw ta.”
Israel chunga LALPA ṭhatna
7 LALPAN thil engkima min vûr avângin, LALPA ngilneihzia thute leh LALPA fakna thute ka sawi ang; a khawngaihnate leh a ngilneihna a nasat avângin, Israela chhûngte laka a ṭhatna nasa taka an chunga a vûr thu pawh kha ka sawi bawk ang. 8 Ani chuan, “Ka mite, fa a dera ti lo tûrte an ni ngei mai,” a ti si a; chutichuan, anmahni chhandamtuah a lo awm ta a. 9 An manganna zawng zawngah chuan ani chu a mangang ve ṭhîn a, vântirhkoh, a hmaa awm chuan anni chu a chhanhim bawk ṭhîn; a hmangaihna leh a khawngaihnain a tlan ta hlawm a; hmasâng ni zawng zawngah chuan anmahni a puain anmahni a pawm ṭhîn. 10 Nimahsela, an hel a, a Thlarau Thianghlim chu an tilungngai ta a; chuvângin, anmahni dotua awm tûra tihlamlêtin a awm a, amah ngei chuan anni chu a bei ta a. 11 Chumi lai chuan a mite chuan Mosia hmasâng nite chu an hre reng a, heti hian an ti: “Tuifinriat aṭanga a berâm rual vêngtute nêna anmahni hruai chhotu kha khawiah nge? A Thlarau Thianghlim an zînga dahtu kha khawiah nge? 12 A bân ropui tak Mosia ding lama kaltîrtu kha khawiah nge? Kumkhaw hming insiam nâna an hmaa tui tiṭhentu kha khawiah nge? 13 An inchhuih lohna tûra tui thûk taka, thlalêra sakawr hruai anga anmahniho hruaia kaitu kha khawiah nge?” 14 Ruama ran chhukte angin LALPA thlarau chuan anniho chu a chawlhtîr a; chutiang chuan, hming ropui tak i insiam nân i mite chu i hruai kha.
Khawngaih leh ṭanpui dîla ṭawngṭai
15 Vân aṭang khân rawn thlîr thla la, i thianghlimna leh i ropuina awmna aṭang khân rawn en teh. I ṭhahnemngaihna leh i chaknate kha khawiah nge? I thinlunga i ngaihna leh i lainatnate kha ka lakah tihrehin a awm ta. 16 Abrahaman min hre lovin, Israela pawhin min ngaihsak lo mah sela, nang chu kan Pa i ni si a; nang chu, aw LALPA, kan Pa i ni a, i hming chu chatuan ata keimahni min tlantu a ni. 17 Aw LALPA, nangin eng vângin nge i kawng aṭangtea min vah botîr ṭhina, nangmah ṭih lo tûra kan thinlung min tihkhauhsak ṭhin le? I chhiahhlawh, i ro luah hnamte avâng hian lo kîr leh rawh. 18 I mi thianghlimte chuan rei lo te chauh an nei a; min dotute chuan i hmun thianghlim chu an rap chhe ta. 19 An chunga ro i rêl ngai lohte ang, i hming pu ngai lote ang chu kan lo ni ta.
1-2 Aw, hnam tin i hmaa an khurhna tûrin nangmah dotute hnêna i hming hriattîr nân, meiin thing nawi a tialha, mei chuan tuite a tiso ang hian tlângte chu i hmaa an luan thlâk dûl dûl nân, vân kha tithlêrin lo chhuk teh hrâm la aw! 3 Kan beisei loh thil râpthlâk i tih lai khân i lo chhuk a, tlângte chu i hmaah an luan thlâk dûl dûl kha. 4 Hmasâng ata tawh miten, nangmah chauh lo chu, anmahni nghâktu atâna thawhsak ṭhîntu Pathian an hre ngai si lo va, bengin an hre ngai hek lo va, mitin an hmu ngai hek lo. 5 Nang chuan hlim taka awma, fel taka titu, i kawngtea nangmah hre reng ṭhîntute chu i hmuak ṭhîn a; ngai teh, nang i thinur a, keinin thil kan tisual a; chûngahte chuan rei tak kan lo awm tawh si a, chhandamin kan awm thei ang em le? 6 Mi bawlhhlawh angin kan lo awm ta vek si a, kan felna zawng zawng pawh silhfên bawlhhlawh ang a ni; kan zain hnah angin kan vuai ṭhîn a, kan khawlohnate hian thli angin min lên bo ṭhîn. 7 I hming lama nangmah chelh tûra mahni intiharh tu mah rêng rêng an awm lo; kan lakah hian i hmai i thup ta si a, kan khawlohnate hmangin min tiboral ta a ni. 8 Tûnah erawh chuan, aw LALPA, nang chu kan Pa i ni a; keini hi bellei kan ni a, nang chu min vawtu i ni; tichuan, kan za hian i kutchhuak kan ni. 9 Aw LALPA, thinur nasa lutuk suh la, kan khawlohnate pawh kumkhua chuan hre reng hek suh ang che; ngai teh, khawngaih takin min en la, kan za hian i mite kan nih hi. 10 I khawpui thianghlimte chu thlalêrah a lo chana, Zion chu thlalêrah a lo chana, Jerusalem chu hmun tihṭiauvah a lo chan tâk hi. 11 Kan in thianghlim leh kan in mawi tak, kan puten an lo fak ṭhinna che chu meia hâl a ni a; kan thil duhawmte zawng zawng lah chu tihchhiatin a awm ta vek si a. 12 Aw LALPA, chûng thilahte chuan i insûm thei dâwn em ni? I ngawi rengin, min tirethei nasa reng dâwn em ni?
Pathianin helho a hremna
1 “Mi lam ngai lote zawnin ka awm a, mi zawng ngai lote hmuhin ka awm a. Ka hming pu lo hnam hnênah chuan, ‘Mi en rawh u, mi en rawh u,’ ka ti a. 2 Mi hel hmangte tân nilêngin ka bânte ka phar ṭhîn, chûngho chu anmahni ngaihtuahte ang zêla kawng ṭha lova kal ṭhînte, 3 huanahte inthawia, leirawhchan chungahte englo rimtui hâla, ka hmaichhan ngeia mi tithinur ṭhînte, 4 thlân zîngahte ṭhua, hmun fianrialtea riak ṭhînte, vawksa eia, an bêltea thil tenawm tuihâng âwm ṭhînte, 5 ‘Nangmah chauhvin ding rawh, mi rawn hnaih suh, nang ai chuan ka thianghlim zâwk hi,’ ti ṭhînte chu an ni. Chûngho chu ka hnâra mei khu awm, nilênga mei nung reng ṭhîn chu a ni. 6 Ngai teh u, ka hmaah ziakin a awm: ka ngawi reng lo vang a, ka thungrûl zâwk ang, a ni, an ângchhûngah nangmahni khawlohna leh in pute khawlohnate chu ka thungrûl ve ve ang,” LALPAN a ti; 7 “Chûngho chuan tlâng lian chungahte englo rimtui hâlin tlâng tê chungahte ka hming an sawichhe ṭhîn; chuvângin, an hnathawh chu a hmasa berin an ângchhûngah ka tehsak ang.” 8 LALPA chuan heti hian a ti: “Grêp bâwrah uain thar an hmu a, miin, ‘Tichhe suh, khatah khân malsâwmna a awm si,’ an ti ang khân, ka chhiahhlawhte avângin ka ti ve ang, an zaa ka tihchhiat vek loh nân. 9 Jakoba aṭangin chi pakhat ka tichhuak ang a, Juda aṭangin ka tlângte luahtu tûr ka tichhuak ang; ka mi thlante chuan chu chu an luah ang a, ka chhiahhlawhte chu chutah chuan an awm ang. 10 Ka mi, mi zawngtute tân chuan, saron chu berâm rualho huang a ni ang a, Akor ruam chu bâwng rualho bawhna hmun tûr a ni ang. 11 Nimahsela, nangni LALPA kalsana, ka tlâng thianghlim theihnghilha, Vânneihna Siamtua tân dawhkân buatsaiha, Chantâwka Khawrêlsaktui tân uain chawhpawlh sa chhûng khat ṭhînte u, 12 ka koh lai che u khân mi in chhân duh lohva, thu ka sawi lai khân benga in hriat duh lohva, ka mit hmuha thil sual chu in tih zâwka, ka thil lawm loh zâwng chu in thlan avângin, khandaihin in chan tâwka khawrel chu ka siamsak ang che u a, in zain thahnaah chuan in kûn vek ang.” 13 Chuvângin, LALPA PATHIAN chuan heti hian a ti: “Ngai teh u, ka chhiahhlawhte chuan an ei ang a, nangni erawh chu rilṭâmin in awm ang; ngai teh u, ka chhiahhlawhte chu an hlim ang a, nangni erawh chu in zak ang; 14 ngai teh u, ka chhiahhlawhte chu thinlunga an lâwm avângin hlim takin an zai ang a, nangni erawh chu thinlunga in lungngaih avângin in ṭap ang a, thlarauva in vui avângin in chiau vak vak ang. 15 In hming chu chhechham nân ka mi thlante hnênah in hnutchhiah ang a, LALPA PATHIAN chuan a tihlum ang che u; tin, a chhiahhlawhte chu hming dangin a ko tawh ang; 16 chutichuan, leiah hian mahni mal insâwm chawptu chu thutak Pathianah chuan mal a insâwm ang a; leiah hian chhechhamtu chuan thutak Pathian chhâlin chhia a chham ang; tûn hma mangannate chu theihnghilha a awm tâk avâng leh ka mit laka thupa a awm tâk avângin.
Thil siam thar
17 “Ngai teh u, vân tharte leh lei thar ka siam a nih hi; tûn hma thilte chu hriat rengin a awm tawh lo vang a, rilruah pawh a lût tawh hek lo vang. 18 Nimahsela, ka thil siamah chuan kumkhuain lâwmin hlim rawh u; ngai teh u, Jerusalem chu hlimnaah ka siam a, a mite chu lâwmnaah ka siam a nih hi. 19 Jerusalem chungah chuan ka hlim ang a, ka mite chungah pawh ka lâwm ang; a chhûngah chuan ṭap thâwm chu hriat a ni tawh lo vang a, chiau thâwm pawh hriat a ni tawh hek lo vang. 20 Chuta ṭanga chhuak chu nausên ni rei lo tê dam an awm lo vang a, putar a dam chhûng nite tlingtla lo an awm hek lo vang; naupang chu kum za mi niin a thi dâwn si a, mi sual kum za chauh dam chu ânchhe dawng a ni dâwn a ni. 21 Inte an sa ang a, chûngah chuan an chêng ang; grêp huante an siam ang a, a rah an ei bawk ang. 22 Mi dang awmna tûrin in an sa tawh lo vang a, mi dang eiah grêp huan an siam tawh lo vang. Thing dam chhûng nite ang hian ka mite dam chhûng nite chu a awm dâwn si a, ka mi thlante chu an thawh chhuah chungah chuan rei tak an lâwm dâwn a ni. 23 A thlâwnin an thawk rim lo vang a, vânduaina mai tûrin fa an hring hek lo vang; LALPA malsâwm mi thlahte an ni si a, an fate chu an hnênah an awm ang. 24 Heti hi a ni ang a, annin mi koh hma pawhin ka chhâng ang a; thu an la sawi lai mêk pawhin ka bengin ka hria ang. 25 Chinghnia leh berâmno chu an tla dûn tawh ang a, sakeibaknei chuan bâwngpa angin buhpâwl a ei tawh ang a, vaivut chu rûl chaw a ni ang. Ka tlâng thianghlim rêng rêngah chuan an tina tawh lo vang a, an tichhe tawh hek lo vang,” LALPAN a ti.
Hnam tin chungah LALPAN ro a rêl
1 LALPA chuan heti hian a ti: “Vân ka ṭhutphah a ni a, lei ka ke nghahchhan a ni. In eng ang nge mi saksak ang? Khawii hmun nge ka chawlhna tûr chu? 2 Hêng thil engkim hi ka kutin ka siam a ni a; chutichuan, hêng thil engkim hi a lo awm ta a ni,” LALPAN a ti. “Amaherawhchu, mi, rethei taka awm, rilrua inchhîr ngawih ngawih, ka thua khûr ṭhîna lam hi ka en zâwk ang. 3 Bâwngpa talhtu chu mihring thattu ang a ni a; berâmnova inthawi chu ui nghâwng titliaktu ang a ni a; thilpêk hlântu chu vawk thisen hlântu ang a ni a; beraw hâltu chu milem malsâwmtu ang a ni. Mahni kawng kawng an thlang ta a, an thil tenawmahte chuan an rilru a lâwm ṭhîn; 4 ka koh lai khân tu mân mi chhân lohva, thu ka sawi lai khân benga an hriat lohva, ka mit hmuha thil sual chu an tih zâwka, ka thil lawm loh zâwng chu an thlan avângin, kei pawhin anmahni bumna tûrte chu ka thlansak ang a, an hlauh zâwngte chu an chungah ka thlentîr ang,” tiin. 5 A thua khûr ṭhînte u, LALPA thu hi hre rawh u: “In unau, nangmahni hawtu leh ka hming avânga nangmahni hnawt chhuaktute chuan, ‘In lâwmna kan hmuh theih nân LALPA chu tihropuiin awm rawh se,’ an ti a; nimahsela, an zak tawh zâwk ang.” 6 Chu! Khawpuia sa mur mur thâwm chu! Biak ina thâwm a nih chu! A hmêlmate thungrûltu LALPA thâwm a nih chu! 7 “Ani chuan vei hman lovin nau a nei a; na hre hman lovin mipa naupang a hring a. 8 Chutiang chu tuin nge hre ngai? Chutiangte chu tuin nge hmu ngai? Ni khatah ram a piang thut dâwn em ni? Vawilehkhatah hnam hrinin a awm thut dâwm em ni? Zion chuan nau a vei veleh a fate chu a hring ta pang si a. 9 Pian hun thlentîr siin ka hrintîr dâwn lo vem ni?” LALPAN a ti. “Kei hrintîr ṭhîntu hian fa ka neihtîr phal dâwn lo vem ni?” i Pathianin a ti. 10 “Jerusalem hmangaihtu zawng zawngte u, Jerusalem chu hlimpui ula, lâwmpui rawh u; amah sûntu zawng zawngte u, lâwm avângin hlimpui rawh u; 11 in hnêka, thlamuanna hnutêahte chuan in tlai theih nân leh, in hnêk dâka, a ropuina tam takah chuan in lâwm theih nân,” tih hi. 12 LALPA chuan heti hian a ti si: “Ngai teh u, remna chu luipui ang maiin a hnên thlengin ka luantîr ang a, hnam tin ropuina chu luitê a kuang liam dûl dûl ang maiin a hnên thlengin ka luantîr bawk ang; tichuan, chu chu in hne ang, a hmathlâk ang che u a, a mal chungah chuan a ṭumtîr ang che u. 13 Mi, a nuin a thlamuan angin ka thlamuan ang che u; tichuan, Jerusalem-ah chuan thlamuanin in awm dâwn nia.” 14 Tin, chu chu in hmu ang a, in thinlung chu a hlim ang a, in ruhte pawh hlobet hring dup angin a duah hluah hluah ang; LALPA kut chu a chhiahhlawhte lamah a awm tih an hria ang a, a hmêlmate chungah a lungni lo vang. 15 Ngai teh u, a thinur chu thinrimnaa hrithla tûr leh, a zilhhauna chu meialhtea hrithla tûrin, LALPA chu mei nên a lo kal dâwn si a, a tawlailîrte chu ṭhâwngaleivir ang mai a ni ang. 16 Meiin a ni, LALPAN a ngaihtuah dâwn ni; khandaihin a ni, mi zawng zawng a ngaihtuah dâwn ni: LALPA tihhlumte chu tam tak an ni ang. 17 “Huanahte inthawi tuma inzui dum dum tûra intithianghlim leh inthian fai ṭhînte, vawksa leh thil tenawm leh chaichîmsa eite chu an boral tlâng ang,” LALPAN a ti. 18 “An thiltihte leh an ngaihtuahte chu ka hre si a. Hnam tinrêng leh ṭawng tinrêng ka hruai khâwm hun a lo thleng dâwn; tichuan, an lo kal ang a, ka ropuina an hmu ang. 19 An zîngah chuan chhinchhiahna ka awmtîr ang a; tichuan, an zînga hremna pumpelh apiangte chu hnam tin hnênah - Tarsis te, Pul te, thal ngul kuaiho Lud hnênah te, Tubal leh Javan-ho hnênah te, thliarkâr hla tak, ka hmingthan la hre ngai lova, ka ropuina la hmu ngai lohote hnênah chuan - ka tîr ang; tichuan, hnam tin zîngah ka ropuina thu an sawi ang. 20 Tichuan, Israela thlahten an thilhlan chu bungbêl thianghlim taka LALPA ina an rawn la lût ṭhîn ang hian, LALPA hnêna thilhlan atân hnam tinrêng zîng ata in unaute zawng zawng chu sakawr chungah te, tawlailîrah te, zâwnnaah te, sabengtung chungah te, sanghâwngsei chungah te, Jerusalem ka tlâng thianghlimah chuan an rawn hruai ang,” LALPAN a ti. 21 “Tin, chûng zînga mi pawh chu puithiam atânte leh Levia mi atânte ka la ang,” LALPAN a ti. 22 “Vân tharte leh lei thar ka la siam tûr chu ka hmaah a awm reng dâwn angin, in thlahte leh in hming chu a awm reng bawk dâwn a ni,” LALPAN a ti. 23 “Tin, heti hi a ni ang a, thla thar aṭanga thla thar dang thlengin, Chawlhni aṭanga Chawlhni dang thlengin mi zawng zawng ka hmaah chibai mi bûk tûrin an lo kal zut zut ang,” LALPAN a ti. 24 “Tin, an kal chhuak ang a, ka laka bawhchhetute ruang chu an en ang: an lungte chu a thiin, an mei chu tihmihin a awm dâwn si lo; mi zawng zawng tân thil tenawm tak an ni ang.”
Jeremia
1 Benjamin rama Anathoth khuaa puithiamte zînga mi Hilkia fapa Jeremia thute; 2 Juda lal, Amona fapa Josia hun lai, a lal kum sâwm leh kum thumnaah chuan a hnênah LALPA thu a lo thleng a. 3 Juda lal Josia fapa Jehoiakima lal lai pawhin a lo thleng a; Juda lal Josia fapa Zedekia kum sâwm leh kum khatna tâwp, Jerusalem sala hruai thla ngana thleng khân.
Jeremia koh thu
4 Tin, LALPA thu chu ka hnênah a lo thleng a: 5 “Pum chhûnga ka siam hma chein ka hria che a, Chhûl ata i chhuah hma pawhin ka serh hrang che a, hnamte hnêna zâwlneiah ka ruat tawh a che,” tiin. 6 Tin, kei chuan, “E, LALPA PATHIAN, ngai teh, thu ka sawi thiam lo, ka naupang si,” ka ti a. 7 LALPA erawh chuan ka hnênah heti hian a ti a: “ ‘Ka naupang,’ ti suh, Ka tirhna che apiang hnênah i kal ang a, Thu ka pêk che apiang i sawi tûr a ni. 8 Anmahni avângin hlau suh la, Chhanchhuak tûr chein i hnênah ka awm e,” Tih hi LALPA thuchhuak a ni. 9 Tichuan, LALPA chuan a han ban a, ka kâ a khawih a; tin, LALPA chuan ka hnênah: “Ngai rawh, i kâah ka thute ka dah ta. 10 En teh, hnamte leh lalram chungah te, Pawt chhuak tûr te, ṭhiat tûr te, tichhe tûr te, Paih thla tûr te, siam ṭha tûr leh din tûrin Hemi niah hian ka dah che a ni,” a ti a.
Inlârna pahnih
11 Chu lo pawh LALPA thu ka hnênah a lo thleng a, “Jeremia, eng nge i hmuh?” a ti a. Tin, kei chuan, “Vaiumkhal thing ṭang ka hmu,” ka ti a. 12 Tin, LALPA chuan ka hnênah, “I hmu fuh hle mai; ka thu hlen tûrin ka inrâlring reng a ni,” a ti a. 13 Tin, LALPA thu chu a vawi hnihnaah ka hnênah a lo thleng leh a, “Eng nge i hmuh?” tiin. Tin, kei chuan, “Bêl so bawrh bawrh, a rawng hmâr lam hawi ka hmu,” ka ti a. 14 Tichuan, LALPA chuan ka hnênah heti hian a ti a: “Rama chêng zawng zawngte chungah hmâr lam ata thil ṭha lo a lo chhuak ang. 15 Ngai teh, hmâr lam lalram hnam zawng zawng ka ko dâwn si a,” tih hi LALPA thuchhuak a ni; “An lo kal ang a, Jerusalem kawngka luhnaah te, a vêl kulh bang zawng zawng bulah te leh, Juda khawpui zawng zawngah te an lalṭhutthlêng an hûng ṭheuh vang. 16 Mi kalsan a, pathian dangte hnênah rimtui an hâl a, anmahni kutchhuak ngei an bia a; hêng an suahsualna zawng zawng chungchânga ka thurêlte chu ka puang ang. 17 Chuvângin, puan veng la, tho la, thu ka pêk zawng zawng che chu an hnênah va sawi rawh. An hmaah zâm suh ang che; chuti lo chuan, an hmaah ka tizâm ang che. 18 Ngai rawh, hemi niah hian a ram pum puite, Juda lalte, a hotute, a puithiamte leh chumi rama mi lakah chuan, khawpui kulh nei leh thîr ban leh ngên bangah ka siam che hi. 19 An bei ang chia; mahse, an hneh lo vang che. Chhanchhuak tûr chein i hnênah ka awm si a,” tih hi LALPA thuchhuak a ni.
Israel - LALPA duat
1 Tin, LALPA thu chu ka hnênah a lo thleng a, heti hian a ti: 2 “Kal la, Jerusalem beng hriatah au rawh, LALPA chuan heti hian a ti: ‘I tleirâwl laia i ngilneihzia te, Inhual laia mi hmangaihziate kha ka hre reng e; Tuk loh ram, thlalêra mi zuizia kha. 3 Israel chu LALPA tâna serh hran, a rah pung hmasa a ni, Amah ei raltu apiangin thiam loh an chang ang a, An chungah chhiatna a lo thleng ang,’ ” Tih hi LALPA thuchhuak a ni. 4 Aw Jakoba chhûngte leh Israel chhûng zawng zawngte u, LALPA thu hi ngaithla rawh u. 5 LALPA chuan heti hian a ti: “In thlahtuten keimahah fel lohna eng nge an hmuh, Ka laka hla takah an lên bova, Engmahlo mai an ûma, an lo uanthuan tâk ni? 6 ‘LALPA - Aigupta ram ata min hruai chhuaka, Thlalêr, ram ro, khuarkhurum hmun, Thihna hlim leh ram ro hmun, Tu ma kal tlang ngai lohna, Tu ma awm lohna hmuna Min hruai tlangtu kha khawiah nge?’ an ti hek lo. 7 Ram ṭha takah, a rah leh ṭhatna ei tûrin, Ka hruai lût che u a; Mahse, in han luh chuan Ka ram in tibawlhhlawh a, Ka rochan chu thil tenawmah in siam. 8 Puithiamte pawhin, ‘LALPA chu khawiah nge?’ an ti lo va, Dân hmangtuten mi hre hek lo; Rorêltute ka lakah an hel a; Zâwlneiten Baala hmingin thu an sawi a, Thil sâwt lo tûrte an ûm a. 9 Tichuan, ka khing ang che u a, In fate fa lehte pawh ka la khing fo vang,” Tih hi LALPA thuchhuak a ni. 10 “Kittim thliarkârah va kal ula, en rawh u, Kedar-ah mî tîr ula, ngun takin ngaihtuah rawh u, Hetiang thil a awm ngai emaw hriat nân. 11 Hnam dangte chuan an pathian an thlâk ngai em ni, Pathian tak ni hlei lo pawh? Ka mite erawh chuan an ropuina chu, Thil sâwt lo takin an thlâk ta zâwk a. 12 Aw vânte u, mak ti ula, Râp che u sela, ṭiau vek rawh u,” Tih hi LALPA thuchhuak a ni. 13 “Ka miten thil pahnih an tisual si: Kei, nunna tuikhur hi mi kalsan a, Tuikhuah an ker a, tuikhuah khi, tui tling thei lo tûr chu. 14 Israel chu chhiahhlawh em ni? Vânlunga piang em ni? Engati nge hnehchhiaha a awm tâk ni? 15 Sakeibaknei vânglaite chuan rûm khumin, A chungah aw an chhuah a; A ram chu an tichhe zo ta; A khawpuite pawh luahtu nei lovin a kâng fai ta. 16 Noph mi leh Tahpanes mite pawhin, I chhîp an tikawlh zo ta. 17 LALPA i Pathian chuan kawnga a hruai lai chea I tlân bosan avângin, Chu chu i chunga i thlentîr a ni lâwm ni? 18 Nile tuite in tûra Aigupta kawng i zawh hi, Eng nge i tân hlâwk dâwn ni? Luipui tui in tûra Assuria kawng i zawh pawh hi, Eng nge i tân hlâwk dâwn ni? 19 I suahsualna chuan a tuartîr ang chia, I hnungtawlh ṭhinna chuan a zilhhau vang che; Mi ṭihna nei lova LALPA i Pathian i kalsan hi, Thil sual tak leh kha tak a ni tih hi Lo hre chhuak la, hmu fiah tawh rawh,” tih hi LALPA, sipaihote LALPA thuchhuak a ni.
Israel-ten LALPA chibai an bûk duh lo
20 “Hmân ata tawh i nghâwngkawl titliakin, I hruite pawh i tichat tawh si a, ‘I rawng ka bâwl tawh lo vang,’ i ti a, Tlâng sâng tinahte, thingbuk hnuai apiangahte, Kûnin i hur thil i ti a. 21 Chi dik tak hmangin grêp ṭha tak ka phun che a, Engtiziaa inleta, ka tân grêp suaka lo chang ta nge i nih? 22 Chingalin insilin sahbawn tam tak hmang mah la, I khawlohna chu ka mit hmuhah a lang tho a ni,” Tih hi LALPA PATHIAN thuchhuak a ni. 23 “ ‘Ka intibawlhhlawh hlei nêm, Baala-te pawh ka zui hek lo,’ Engtin nge i tih theih le? Kawr ruama i awm dânte en la, I thiltih tâkte chu hre rawh; Sanghâwngseilâ hur lai ang riai i nih kha. 24 Ramsabengtung thlalêra awm ṭhîn, a hur laia hnâr lên ruai ang; A châkna chu tuin nge dâl zo vang? A zawngtu chu intihah duh suh se, A hunah chuan an hmu mai ang. 25 I kêah pheikhawk bun lovin awm suh la, I dang pawh ro suh se; Nang erawh chuan, ‘Beisei a bo zo ta, Awze mite ka ngai a, anmahni ka ûm ang,’ i ti a.
Israel-te chuan hrem an phu
26 “Rûkru an phâwka a zak angin, Israel chhûngte chu an zak ta. Anmahnite, an lalte, an hotute, An puithiamte, an zâwlneite pawh. 27 Thing bul hnênah, ‘Ka pa i ni,’ tia, Lung bul hnêna, ‘Mi hringtu i ni,’ titute chu. Hmachhawn lovin an tukkhum chhah mi chhawn ta zâwk a. An mangan hunah erawh chuan, ‘Tho la, min chhandam ta che,’ an ti ang. 28 I pathian, i siamte kha khawiah nge an awm tâk ni? Anni chu tho zâwk sela, i mangan laiin an chhandam thei mahna che; Aw Juda, i pathiante chu i khawpuite zât lai an ni alâwm. 29 Engah nge ka chungah in vui fo le? In zain ka chungah thil in tisual si,” Tih hi LALPA thuchhuak a ni. 30 “In fate ka vua, a sâwt lo, An ṭhat phah chuang hek lo. Sakeibaknei koham ang maiin, Nangmahni khandaih chuan in zâwlneite a ei ral a. 31 “Aw ṭhangtharte u, LALPA thu hi hre rawh u! “Israel tân thlaler ram ang ka ni em ni? Thim chhah mup ram ka ni em ni? Ka mite chuan engah nge, ‘Kan chhuak fel ta, I hnênah kan lêt leh lo vang,’ an tih ni? 32 Nula chuan a incheimawinate a theihnghilh theiin, Mo thar chuan a inthuamna a theihnghilh thei em ni? Ka mite erawh chuan ni chhiar sên loh chhûng Min theihnghilh ta. 33 Ngaizâwngtu hmuh theihna tûrin i awm dân i va uluk ve! Hmeichhe sual hnênahte pawh i awm dân i zirtîr tâk hi. 34 I pawnfênahte pawh mi rethei pawi khawih lote Nunna thisen a kai a. Mi in an rawk lai kut man pawh ni si lo. 35 Chu achhapah nangmah chuan, ‘Thiam ka chang e, ka lakah a thinurna a dai,’ I la ti leh ta lai a, Ngai rawh, ‘Ka sual lo ve,’ i tih avângin, I chung thu ka rêl ang. 36 I awm dân thlâk zung zungin, Engah nge i vah vêl ṭhin? Assuria i zahpui ang bawk khân, Aigupta pawh i la zahpui ang. 37 I kutte khumin an hnên ata i la chhuak leh ang, LALPAN i rinnate chu a paihthla si a, Anmahniah chuan i hmuingîl lo vang.
Israel rinawm lo
1 “Miin nupui ma sela, Amah kalsanin pasal dang pawm se, Ani chuan a lo pawm leh ang em? A ram chuan a bawlhhlawh phah hial dâwn lâwm ni? Nang erawh chu tlangvâl tam tak hnênah i hur bo va, Chuti chung chuan ka hnênah i lo kîr leh ang maw?” Tih hi LALPA thuchhuak a ni. 2 “Tlâng kawlh vul lamah i mitte lên chho la, en rawh, An mutpui lohna hmun che khawiah nge? Thlalêra Arabia mi ang maiin Anmahni nghâkin kawng sîrahte i ṭhu reng ṭhîn; I hurnate leh i suahsualnatein Ram chu i tibawlhhlawh zo ta. 3 Chumi avâng chuan ruah chu sûrtîr a ni lo va, Ruah hnuhnûng pawh a sûr hek lo. Mi hur chal putin i pu a, I zak duh hauh si lo va. 4 ‘Ka Pa, ka tleirâwl laia mi hruaitu i ni,’ tiin, Mi au hlim hlawl a ni lo vem ni? 5 ‘A thin a ur kumkhua dâwn em ni? A tâwp thlengin em ni a ur dâwn?’ Ngai rawh, chutiang chuan i ṭawng ngei a; Mahse, a sual thei ang berin thil i ti a.”
Israel leh Juda-ten an sim tûr a ni
6 Chu lo pawh chu Josia lal laiin LALPAN ka hnênah heti hian a ti a: “Hnungtawlh hmang Israel thiltih kha i hmu em? Tlâng sâng tinahte chhova, thing buk tin hnuaiahte a hurna thil a tihte kha? 7 Tin, kei chuan hêng thil zawng zawng a tih hnuah hian ka hnênah a la kîr leh êm ang chu, ka ti a; mahse, a lo kîr chuang lo va. Tin, a laizâwnnu, bum hmang Juda chuan a hmu ve ta a. 8 Tin, ani chuan hnungtawlh hmang Israel chu a uire avâng ngeia ka mâka, mâkna lehkha ka pêk a hmuh pawhin a laizâwnnu, bum hmang Juda chuan a hlau chuang lo va, chutih ahnêkin a va kal a, hurna thil a va ti ve a. 9 Tin, a hur nawmnah mai mai avângin ram chu a tibawlhhlawh zo ta a; thing bul, lung bul hnênah a uire ta a. 10 Chuti chung pawhin a laizâwnnu, bum hmang Juda chu thinlung taka lo kîr lovin a der maiin a lo kîr a,” tih hi LALPA thuchhuak a ni. 11 Tin, LALPAN ka hnênah heti hian a ti a: “Hnungtawlh ṭhîn Israel chu a laizâwnnu, bum hmang Juda ai chuan fel zâwkin a intilang a. 12 Kal la, hêng thu hi hmâr lamah va puang rawh: ‘Hnungtawlh hmang Israel, lo kîr rawh,’ Tih hi LALPA thuchhuak a ni; ‘Thinrim hmêl puin ka en lo vang che u, Zahngai thei tak ka ni si a,’ Tih hi LALPA thuchhuak a ni, ‘Ka thinur kumkhua lo vang. 13 LALPA i Pathian chunga i helna te, Thing buk hnuaia awze mite hnêna i inphalraina te, Ka ṭawngka chhuak i awih lohnatea I khawlohnaah chuan thupha chawi rawh,’ Tih hi LALPA thuchhuak a ni. 14 Aw hnungtawlh hmang fate u, lo kîr rawh u,” Tih hi LALPA thuchhuak a ni. Kîlkawitu che u ka ni si a, In zîng ata khawpuia mi pakhat, Chhûngkuaa mi pahnih ka la ang che u a, Zion-ah ka hruai ang che u. 15 “Ka lungdum zâwng tak berâmpute ka pe ang che u a, annin hriatna leh hriat thiamnatein an châwm ang che u. 16 Tin, in lo tama, rama in lo pun hunah, chûng niahte chuan annin, ‘LALPA thuthlung bâwm,’ an ti tawh ngai lo vang; an rilruah a lût lo vang a, hriat pawh an hre reng hek lo vang; an thlahlel tawh lo vang a, an siam leh tawh hek lo vang. 17 Chumi hnuah chuan Jerusalem chu LALPA Lalṭhutthlêng an vuah ang a, chutah chuan hnam zawng zawngte chu LALPA hmingin Jerusalem-ah an lo kal khâwm ang. An thinlung sual khauhna ang chuan an kal tawh lo vang. 18 Chûng niahte chuan Juda chhûngte chu Israel chhûngte nên an awm ho vang a, hmâr lam ram aṭangin, in thlahtute hnêna ro luah tûra ka pêk ramah chuan an lo chhuak ho vang.
Pathian miten milem an bia
19 “Kei erawh chuan, ‘Hnam tam takte zînga ro luah tûr ṭha ber, Ram nuam tak mai pe chein, Fanaute zînga dah che ka duhzia mai chu! “Ka Pa,” tia mi lama, Mi zuina ata i pên bo loh ka lo ring a.’ 20 Nupui bum hmangin a pasal a uiresan angin, Aw Israel chhûngte u, mi bum ta a nih hi,” Tih hi LALPA thuchhuak a ni. 21 Tlâng kawlh vul chungah thâwm a awm e, Israel fate ṭap leh thil ngên thâwm chu, LALPA Pathian an theihnghilha, An awm dân an tihkhawloh zawh tâk avângin. 22 “Aw hnungtawlh hmang fate u, lo kîr ula, In hnungtawlh ṭhinnate chu ka tidam ang e.” “En teh, i hnênah kan lo kal a nih hi, Nang chu LALPA kan Pathian i ni si a. 23 Tlângte hi a sâwt lo va, Tlâng chunga thâwm ri hum hum te hi; Israel chhandamna chu LALPA kan Pathian ngeiah hian a ni a awm ni. 24 “Mahse, chu thil tenawm tak chuan kan tleirâwl lai ata kan thlahtuten tha an sênna chu a ei ral ta; an berâm rualte, an ran rualte, an fanute, an fapate chenin. 25 Zakin i mu ang u khai, kan mualphonain min khuh rawh se; LALPA kan Pathian chungah thil kan tisual a, keini leh kan thlahtuten kan tleirâwl lai ata, vawiin ni thlengin LALPA kan Pathian ṭawngka kan awih loh avângin.”
Sim tûra sâwmna
1 “Aw Israel, i inlamlêt chuan, ka hnênah ngei i lo lêt tûr a ni,” Tih hi LALPA thuchhuak a ni. “I tenawmnate ka mit hmuh lohva i dah bova, 2 Tihtakzeta, thurêl dik tak hmanga, fel taka, ‘LALPA a nuna a nun chhûng chu,’ tia chhia i chham chuan, Hnamte chu amahah chuan engthâwl an inti ang a, Amah chu an chhuang tawh ang.” 3 Juda mite leh Jerusalem hnênah LALPA in Pathian chuan heti hian a ti e: “In lei khêk chu let ula, Hlîng zîngahte chi theh suh u. 4 Nangni Judai rama mi leh Jerusalem-a chêngte u, LALPA tân in serh tan ula, in thinlung serh tan rawh u; Chuti lo chu, in thil sual tihte avângin, Ka thinurna chu mei angin a chhuak ang a, Tu ma ṭhelh theih lohvin a kâng dah ang e.
Juda chu an rawn rûn ṭêp a ni
5 Judai ramah hril ula, Jerusalem-ah puang rawh u: Ram pumah chuan tawtawrâwt hâm ula, Ring takin au rawh u; ‘Rawn inkhâwm ula, kulh nei khawpuiahte i lût ang u,’ ti ru. 6 Zion lamah puanzâr khai ula, Himna zawngin tlân ula, muang suh u, Hmâr ata thil ṭha lo ka rawn thlen dâwn, Chhiatna nasa tak mai chu.” 7 Ngaw hnuai pik ata sakeibaknei a chhuak e, Hnamte tichhetu tûr chu; A hmun ata a chhuak ta, a lo kal mêk e, I ram tichhe tûr leh, I khawpuite luahtu nei lo khawpa tiram tûrin. 8 Chumi avâng chuan saiip puan fêng ula, ṭap ula, chiau vawng vawng rawh u; Kan laka LALPA thinurna nasa tak mai chu A la kiang si lo va. 9 “Chumi niah chuan heti hi a lo ni ang,” Tih hi LALPA thuchhuak a ni: “Lal thinlung a zâm zo vang a, Hotute thinlung pawh; Puithiamte chu an hrilhhai ang a; Zâwlneite chuan mak an ti êm êm ang.”
A mite vânga Jeremia manganna
10 Tin, kei chuan, “A, LALPA PATHIAN, He mite leh Jerusalem hi nasa takin i bum a nih hi, ‘Muanna in nei ang,’ i ti a, Khandaihin nunna a chhun tâk zâwk si hi,” ka ti a. 11 Chutih hunah chuan he mite leh Jerusalem hnênah, “Thlalêr tlâng kawlh vul ata thli lum tak, ka fanu, ka mite zâp fai tûr ni lo, thliar fai tûr ni hek lo, 12 thli na lutuk ka thuin a lo thleng dâwn a ni; tûnah pawh an chung thu rêltu hi keimah ka ni,” tih a ni ang. 13 “Ngai teh, a lo chho vang, chhûmpui angin, A tawlailîr ṭhâwngaleivir ang maite chu; A sakawrte chu mupui aiin an chak zâwk, Kan chung a va pik êm! Kan ral thûm a nih hi.” 14 Aw Jerusalem, suahsualna ata i thinlung tlêng fai la, Chhandama i awm theihna tûrin; Eng chen nge i ngaihtuahna sual chu i pai dâwn? 15 Dan ram ata aw a lo chhuak a, Ephraim tlâng aṭangin thil ṭha lo a puang e. 16 “Hnamte chu hrilh ula, Jerusalem-ah puang rawh u, Ngai teh, ram hla tak ata beitute an lo thleng, Judai khawpuite chungah an chhuah e. 17 Thlawhhma vêngtute ang maiin a vêlin an hual a, Ka chunga a hel avângin,” Tih hi LALPA thuchhuak a ni. 18 “I awm dân leh i thiltihte chuan, Hêng hi i chungah a thlen a nih hi, Hei hi i chhiatna tûr chu a ni, A na êm êm a, i thinlung a chhun a ni.” 19 Ka thin a nâ, ka thin a nâ, Ka thinlung ngeiah a nâ, Ka chhûngah ka thinlung a buai zo ta, Ka awm hle hle thei lo, Aw ka nunna, tawtawrâwt ri, Indona hawhaw i hriat avângin. 20 Chhiatna chungah chhiatna a thleng ta, Ram pum pui chu rawkin a awm ta, Ka puan inte chu an tichhe phut a, Ka puanzârte pawh mit khap kâr lovah. 21 Eng chen nge indona puanzâr ka hmuh anga, Tawtawrâwt ri ka hriat ang? 22 “Ka mite chu an â êm a, mi hre si lo va, Naupang â tak, hriatna nei lo ang mai an ni, Thil sual tih an thiam a, Thil ṭha tih dân erawh chu an thiam si lo.”
Chhiatna lo thleng tûr Jeremian a hmu lâwk
23 Leilung hi ka han en a, ngai teh, Eng mah awm lo leh ruakin a awm; Vânte pawhin êng an nei lo. 24 Tlângte ka en a, ngai teh, a nghîng a, Mual zawng zawng pawh an phe hlawk hlawk a. 25 Ka han en a, ngai teh, mihring an awm lo va, Chunglêng sava zawng zawng pawh an thlâwk bo zo ta. 26 Ka han en a, ngai teh, Thlawhhma ṭhate chu thlalêr a chang ta, Khawpui zawng zawng pawh a chim zo ta, LALPA leh a thinurna nasa tak hmaah chuan. 27 LALPA chuan heti hian a ti a ni: “Ram pum pui a ṭiau ang a; mahse, ka titâwp hlen lo vang. 28 Chumi avâng chuan lei chuan a sûn ang a, Chung lam vânte pawh a thim a. Thu ka sawi tawh a, ka tum tawh a, Ka inchhîr lo va, ka inlamlêt dâwn hek lo.” 29 Sakawr chunga chuang leh thal ngul hmangtute thâwmah, Khawpui pum pui chu an tlânchhia a. Ngawah an lût a, lungpui hmunahte an lâwn a. Khaw tin mai an rauhsan a, Luahtu pakhat mah awm lovin. 30 Tin, nang, rawka i awm hun chuan engtin nge i tih ang? Puan senlâra inthuamin, Incheina rangkachaka incheiin, I mitte hnawih dur mah la, I intimawi thlâwn mai mai a ni; I tlangvâlte chuan an hmusit tho chia, I nun lâk an tum a ni. 31 Hmeichhe nau vei au thâwm ang ka hria a, Fa tîr hringtu na tuar lai, Zion fanu thaw huam huam ri chu; A kutte phara, “Ka chung a va pik êm! Tualthattute vângin ka nun a chau zo ta,” ti chu.
Jerusalem sualna
1 “Jerusalem khawlaiahte tlân vêl ula, En ula, chhinchhiah ula, a mualzâwlte zawng ula, Mi pakhat tal fel taka tia, thutak zawng reng in hmuh theih chuan, Jerusalem chu ka ngaidam ang. 2 ‘LALPA a nuna a nun chhûng chu,’ ti mah sela, Dâwtin chhia an chham mai a ni.” 3 Aw LALPA, thutak chu i hmuh duh zâwng a ni lâwm ni? Anni chu i vua a; mahse, an lungngai chuang lo; Anni chu i tiral a, i thununna chu an pawm duh chuang lo. Lungpui aia changin an hmêl an tichang ta, An inlamlêt duh miau lo. 4 Tin, kei chuan, “Hêng hi mi chhia an ni a, an â bawk a. LALPA dân, an Pathian thurêl chu an hre lo. 5 Mi liante hnênah ka va kal ang a, Ka va bia ang a, Anni chuan LALPA dân leh an Pathian thurêlte chu an hriat kha,” ka ti a. Mahse, hêng mite hian thu khat vuain, Nghâwngkawl an titliak a, phuarna hruite chu an tichat ta a. 6 Chuvângin, ngaw hnuaia sakeibakneiin anmahni a seh ang a, Thlalêr chinghniain anmahni a ei ral ang; Keitê chuan an khawpuite a châng a. Chuta lo chhuak apiang chu a pawt sawm ang, An bawhchhiatnate a tama, An hnungtawlhnate a nasat avângin. 7 “Engtin nge ka ngaihdam theih ang che? I fate chuan mi kalsan a, Pathian ni hlei lote chhâlin chhia an chham a, Tlai deuhva ka hrai hnuah an uire a, Nawhchizuar inahte an vir huai huai a. 8 Zîng lama sakawr hrai puar ang mai an ni a, Mi tin mahni ṭhenawmpa nupui îtin an hrâm a. 9 Hêng thilte avâng hian ka hrem lo vang maw?” Tih hi LALPA thuchhuak a ni. “Hetiang hnam chungah hian, Phuba ka inlâksak lo vang em ni? 10 A palahte chuan lâwn lût ula, tichhe rawh u; Amaherawhchu, tichhe zo vek suh u, A zârte chu la bo ula, LALPA ta a ni si lo va. 11 Israel chhûngte leh Juda chhûngte chuan, Ka chungah vervêk takin an ti si a,” Tih hi LALPA thuchhuak a ni.
LALPAN Israel a hnâwl
12 LALPA chu dawtheia ngaiin, “Eng mah a ti thei hlei lâwng e. Chhiatna kan chungah a lo thleng lo vang, ṭâm emaw, khandaih emaw kan tuar hek lo vang. 13 Zâwlneite pawh puarpawlêng mai an ni ang a, Anmahniah thu chu a awm si lo; An chungah chutiang chu tih a ni ang,” an ti a. 14 Chuvângin, LALPA, sipaihote Pathian chuan heti hian a ti: “Chutiang thu chu in sawi avângin, ngai rawh, I kâa ka thute chu meiah ka chantîr ang a, Hêng mipuite hi thingah; tin, a kâng zo vang. 15 Ngai rawh u, aw Israel chhûngte u, Hla tak ata hnam i hnênah ka rawn hruai ang,” Tih hi LALPA thuchhuak a ni. “Hnam chak tak mai, hnam upa tawh tak, An ṭawng i hriat loh, an thusawi i hriat theih loh hnamte chu. 16 An thal bâwm chu thlân inhawng a ni a, An zain mi chak tak an ni vek a. 17 I buh seng sa leh i ei tûr an ei zo vek ang; I fanute, i fapate ei tûr ngei chu. I ran rualte, i berâm rualte an ei ang a, I grêp hruite, i theipui kûngte an ei ang a, I kulh nei khawpui, i rinpui ber ṭhinte ngei kha. Khandaihin an tichhe vek ang. 18 “Mahse, chûng niahte pawh chuan ka tichimit hlen lo vang che u,” tih hi LALPA thuchhuak a ni. 19 “Tin, heti hi a ni ang a, ‘Engah nge LALPA kan Pathianin hêng thil zawng zawng hi kan chungah a tih ni?’ i miten an tih hunah chuan, ‘Mi kalsana, in ramah pathian dangte rawng an bâwl angin, in ram lovah, awze mite rawng in bâwl ang,’ an hnênah i ti tûr a ni.”
Pathianin a mite fîmkhur tûrin a hrilh
20 Jakoba chhûngte zîngah hei hi sawi chhuak ula, Judai ramah puang rawh u. 21 “Aw hriat thiamna nei lo, mi âte u, Mit neia hmu si lote u, beng neia hre si lote u, He hi ngaithla rawh u: 22 Mi ṭih lo maw, tih hi LALPA thuchhuak a ni. Ka hmaah hian in khûr lo vang maw? Kei hi tuipui kuam chin atâna ṭiaupho, Kumkhuaa a liam lohna tûra daidanna, Tuipui fâwn invawrh vêl mah se, a liam chuan theih lohva, Ri hum hum mah se, a pelh theih loh tûr siamtu chu ka nih hi. 23 Mahse, he mite hian thinlung luhlul leh hel hmang an pu a, An hel a, an tlân bo ta a. 24 An thinlung pawhin, ‘LALPA kan Pathian, a hun taka Ruah hmasa leh ruah hnuhnûng sûrtîrtu, Buh seng hun bi min ruatsaktu chu i ṭih ang u,’ an ti hek lo. 25 Hêng thilte hi in khawlohnate chuan a tibo va, In sualnate chuan thil ṭha a chântîr che u a ni. 26 ‘Ka mite zîngah mi suaksual an awm si a, Sava vehtuin a chân angin an châng reng a, Thang an kam a, mite an âwk a. 27 Bâwm savaa khat ang maiin, An inte chu bumnain a khat a; Chuvângin, an lo lian a, an hausak phah ta a. 28 An lo thau va, an lo hnûm a; A ni, an suahsualna thiltihte chuan chin tâwk a nei lo; Pa nei lote hmuingîlna tûrin an lamah an ṭang lo va. 29 Hêng thil avângte hian ka hrem lo vang em ni?’ Tih hi LALPA thuchhuak a ni. Hetiang hnam chungah hian ka nunna chuan Phuba a la dâwn lo vem ni?” 30 Chu ramah chuan thil mak tak leh râpthlâk tak a lo awm ta: 31 Zâwlneite chuan dâwt thu an hril a, Puithiamte chuan an thu thuin ro an rêl a; Ka mite chuan chutiang tih chu an duh a ni. A tâwpah chuan engtin nge in tih tâk ang le?
Hmêlmaten Jerusalem an hual
1 “Benjamina fate u, Jerusalem chhûng ata In himna tûrin tlân bo ula; Tekoa-ah tawtawrâwt hâm ula Beth-hakkerem-ah hriattîrna chhuah rawh u. Hmâr lam ata chhiatna a lo thawk e, Tihchhiatna nasa tak mai chu. 2 Zion fanu hmelṭha tak leh no tak chu Ka tibo vang. 3 Berâmpute, an berâm rualte nên a hnên an lo thleng ang a, A vêlah an puan inte an kaih ang a, Mahni hmun ṭheuhvah an tla ang.” 4 “Amah do tûrin inpuahchah rawh u, Tho ula, chhûn laiah i bei ang u, Kan tân a va pawi em! Ni a lo her ta a, Tlai lam hlim a lo sâng ta. 5 Tho ula, zânah i bei mai ang u khai! A in ṭha ṭhate i tichhia ang u.” 6 Sipaihote LALPA chuan heti hian a ti: “A thingte kit ula, Jerusalem beih nân mual pâwng siam rawh u, Khawpui hrem tûr chu hei hi a ni. A chhûngah chuan hnehchhiahna hlîr a ni. 7 Tuichhunchhuahin tui a tichhuak ang maiin A suahsualna chu a tichhuak ṭhîn, A chhûngah chuan pâwngnêkna leh inrawkna a awm tih hriat a ni a, Ka hmaah chuan natna leh inhliamnate a awm reng. 8 Ka rilruin a hransan daih hma che hian Aw Jerusalem, fîmkhur hle rawh, Chuti lo chuan, luahtu nei lo rama siam chein, Thlalêrah ka siam hlauh dah ang che.”
Israel-te an hel
9 Sipaihote LALPA chuan heti hian a ti: “Israel awm chhunte chu grêp angin lo fai vek ula, Grêp lotu angin a zârte chu vai nawn rawh u.” 10 An ngaihthlâk theih nân tu nge ka biak anga, Tu nge ka hriattîr ang? Ngai teh, beng lam serh tan loh an ni a, an ngaithla thei lo; Ngai teh, LALPA thu chu an tân thil hmuhsitawm a ni a, Lâwmna rêng an nei ta lo. 11 Chu vâng chuan LALPA thinurnain ka khat a, Insûm hi ka ning ta. “Khawlaia naupang chungah hrithla la, Tlangvâl awm khâwmte chungah pawh, A nupui rualin pasal pawh lâk a ni ang a, Upate leh tarchhiate pawh. 12 An inte chu mi dang hnênah pêk a ni ang a, An thlawhhmate leh an nupuite nên; Chumi rama chêngte chungah chuan ka kut ka lek dâwn si a,” Tih hi LALPA thuchhuak a ni. 13 “A tê ber aṭangin a lian ber thleng pawhin, Mi tin duhâmnain an khat si a; Zâwlneite leh puithiamte meuh pawh, Mi tin dik lo takin an che a ni. 14 Ka mite hliamte chu ngaihsam takin, ‘A ṭha alâwm, a ṭha alâwm!’ tiin an thawi a, A ṭha hauh si lo va. 15 Thil tenawm an tih pawhin an zak em ni? Hnai lo ve! An zak tawp lo va, an hmai pawh a sen hek lo. Chuvângin, tlute zîngah chuan an tlu ve ang; Anni ka hrem hunah chuan paihthlâkin an awm ang,” LALPAN a ti.
Israel-ten Pathian duh zâwng an hnâwl
16 LALPA chuan heti hian a ti: “Kalkawngahte ding ula, en rawh u, Kawng ṭha awmna kawng hlunte chu zâwt rawh u, Tah chuan kal ula, In thlarau tân chawlhna in hmu ang. Anni erawh chuan, ‘Tah chuan kan kal lo vang,’ an ti a. 17 Tin, in tân râlvêngtute ka ruat a, ‘Tawtawrâwt ri chu ngaithla rawh u,’ tiin. Anni erawh chuan, ‘Kan ngaithla lo vang,’ an ti a. 18 Chuvângin, aw, hnamte u, ngaithla ula, Aw, pung khâwmhote u, an chunga lo thleng tûr chu hre rawh u. 19 Aw, leilung, ngaithla rawh! Ngai teh, he mite chungah hian chhiatna ka rawn thlen dâwn - An ngaihtuahna rahte ngei chu; Ka thute an ngaihthlâk loh avângin; Ka dânte lah chu an paihthla dêr a. 20 Eng atân nge Seba ata beraw te, Ram hla tak ata fu te ka hnên a lo thlen ṭhin le? In hâlral inthawinate chu lawm tlâk a ni lo va, In inthawinate chuan mi tilâwm hek lo.” 21 Chuvângin, LALPAN heti hian a ti: “Hêng mite hnênah hian tlûknate ka dah ang a, Tah chuan pate chu an fapate nên an tlu za ang a, ṭhenawm leh a ṭhian pawh an boral ang.”
Hmâr lam aṭanga rûntu
22 Tin, LALPA chuan heti hian a ti: “Ngai rawh u, hmâr lam ram ata mite an lo kal e, Lei hmun tâwp ata hnam ropui tak mai an lo thawk chhuak e. 23 Thal ngul leh fei an keng a, Nunrâwng tak, zahngaihna rêng rêng nei lo an ni, An thâwm chu tuipui ri hum hum ang a ni a; Sakawr chungahte an chuang a, Mi tin râl tu mi anga inthuamin, Aw, Zion fanu, an rawn bei dâwn a che.” 24 An thangva kan hria a, kan kutte a zâwi zo ta, Nâ chuan min man ta, Hmeichhe nau vei nâ ang mai chu. 25 Ramah kal chhuak suh ula, Kalkawngah pawh kal hek suh u, Tah chuan hmêlma khandaih a awm si a, Kil tinah râl a ṭi e. 26 Aw, ka mi, ka fanu, saiip puan fêng la, Vut zîngah tâl rawh; Fapa mal sûn angin sûn la, ṭap vak vak teh, Tichhetu kan chungah a lo thleng thut dâwn si. 27 “Ka mite zîngah chhintuah leh fiahtuah ka siam chia, An awm dân i hriata, i fiah theih nân. 28 An zain hel hmang, luhlul tak, Sawichhiat hmanga vâk vêl, Dâr leh thîr ang an ni a, Chhe takin an che a. 29 Pûmin a chhêm huau huau va, Meiah chuan suan chu a tui ral a, Tihthianghlim tumna chu a thlâwn mai a ni, Mi sualte paih bo an ni si lo. 30 Mite chuan tangkaraw êkchhia an vuah ang, LALPAN anmahni a hnâwl avângin.”
Tempulah Jeremian thu a sawi
1 LALPA hnên ata Jeremia hnêna thu lo thleng chu: 2 “LALPA in kawngkâah chuan ding la, chutah chuan he thu hi puang la, heti hian ti rawh: ‘Nangni Juda mi zawng zawng, LALPA be tûra hêng kawngkâa lûtte chuan LALPA thu hi ngaithla rawh u!’” 3 Sipaihote LALPA, Israel Pathian chuan heti hian a ti: “In awm dân leh in thiltihte chu siam ṭha ula, he hmunah hian ka chêntîr ang che u. 4 ‘Hei hi LALPA in, LALPA in, LALPA in a nih hi,’ tih dâwt thute hi ring suh u. 5 “In awm dân leh in thiltihte chu in siam ṭhat takmeuhva, mi leh a ṭhenawm kâra thu dik taka in rêlsaka, 6 hnam dang mite, pa nei lote, hmeithaite in hnehchhiah lohva, he hmunah hian mi fel thisen in chhuah lohva, in ṭhat lohna tûra pathian dangte in zui hek loh chuan, 7 he ram, hmasâng ata in thlahtute hnêna ka pêkah hian kumkhuain ka chêntîr ang che u. 8 Ngai rawh u, dâwt thu, sâwtna awm hlei lo chu in ring zâwk a. 9 Rûkruin, tualthatin, uirêin, dâwta chhia chhamin Baala hnênah rimtui hâlin, pathian dang, in hriat ngai lohte zuiin, 10 he in, keima hming ngei vuahah hian ka hmaah lo dingin, hêng thil tenawm zawng zawngte hi ti zêl chungin, ‘Chhanchhuah ka ni ta,’ in ti dâwn em ni? 11 He in, ka hming ngei vuah hi, in mit hmuhah suam hmangte pûk ang em ni? Ngai teh u, kei, keimah ngei hian ka hmu alâwm,” tih hi LALPA thuchhuak a ni. 12 “A tîra ka hming ka chêntîrna, ka hmun Silo-ah chuan kal teh u, ka mi Israel-te suahsualna avânga ka thiltih chu va en rawh u. 13 Tûnah hian hêng thil zawng zawngte hi in tiha, zîng tak taka thova in hnêna thu ka sawi ka sawite hi in ngaihthlâk lohva, ka lam che ua in chhân loh avâng hian, 14 Silo chunga ka tih ang khân he in, ka hming vuah, nangmahni leh in thlahtute hnêna ka hmun pêk, in rin ṭhin chungah hian ka ti dâwn a ni. 15 In unau zawng zawng, Ephraim chi pum pui meuh pawh ka paih chhuak ang khân, ka mit hmuh ata ka paih chhuak ang che u,” tih hi LALPA thuchhuak a ni.
Mipui luhlulzia
16 “Chuvângin, hêng mite tân hian ṭawngṭai suh la, au chhuakin ṭawngṭai suh la, ka hnênah dîlsak hek suh; ka ngaithla dâwn si lo che a. 17 Juda khawpuiahte leh Jerusalem kawtlaiahte an thiltih chu i hmu lo vem ni? 18 Naupangten thing an fawm a, an paten mei an chhêm a, hmeichhiaten vân lalnu hnêna hlan tûr chhang an hmet a, pathian dangte tân in tûr thilhlan an hûng chhuak a, mi tihthinrimna mai tûrin. 19 Keimah em ni mi tihthinrim? Anmahni zahna tûrin anmahni a ni zâwk lâwm ni?” tih hi LALPA thuchhuak a ni. 20 Chuvângin, LALPA PATHIAN chuan heti hian a ti: “Ngai teh u, he hmun chungah te, mi leh sa chungah te, rama thing leh lei rah chungah te ka thinrimna leh thinurna chu ka hrithla ang; a kâng ang a, a mit lo vang.” 21 Sipaihote LALPA, Israel Pathian chuan heti hian a ti: “In inthawinaahte chuan hâlral inthawinate belh ula, sa ei rawh u. 22 Hâlral thilhlante emaw, inthawinate emaw chungchângah chuan in thlahtute hnênah thu ka sawi lo va, Aigupta ram ata ka hruai chhuah lai pawh khân thu ka pe hek lo. 23 ‘Ka aw ngaithla ula, in Pathian ka ni ang a, nangni pawh ka mite in ni ang; in ṭhat theihna tûrin in awm dân tûr ka hrilh zawng zawng che u hi zâwm rawh u,’ tiin thu ka pe zâwk a ni. 24 Mahse, an ngaithla lo va, beng an dawh hek lo; an thinlung sual chhu chhêtin anmahni thu thuin an awm ta zâwk a, hma lam pan aiin an hnungtawlh ta zâwk a ni. 25 In thlahtute Aigupta ram ata an chhuah ni aṭanga vawiin ni thleng hian ka rawngbâwltu, zâwlnei zawng zawngte zîng tak taka thovin in hnênah ka tîr ni tin ṭhîn a. 26 Mahse, mi ngaithla chuang lo va, beng an dawh hek lo. An rilru an tikhauh va, an thlahtute aiin an sual ta zâwk a. 27 “Tin, hêng thu zawng zawngte hi an hnênah i sawi tûr a ni; mahse, an ngaithla lo vang che. Anmahni i ko vang a, an chhâng lo vang che. 28 An hnênah, ‘He hnam hi LALPA an Pathian aw ngaithla lova, thununna dawng lo hnam an nih hi,’ i ti ang a. Thu dik a boral ta, an kâ ata paih bo a ni ta. 29 ‘I sam tan la, paih bo la, hmun sâng kawlhahte ṭap chhuak rawh; LALPAN a thinurna dawngtu chhuanhote chu paihthlain a hnuchhawn ta si a.’
Hinom ruama thil sual tak tak an tihte
30 “Juda fate chuan ka mit hmuhah thil sual an ti si a,” tih hi LALPA thuchhuak a ni. “Ka hming vuah inah chuan tibawlhhlawh tûrin an thil tenawmte chu an dah ta. 31 An fanute, an fapate hâl tûrin Ben-hinom ruamah chuan Topheth bâwlhmunte an siam a; chûng chu ka thupêk a ni lo va, ka rilruah pawh a lût ngai hek lo. 32 Chuvângin, ngai teh u, nite chu a lo thleng dâwn,” tih hi LALPA thuchhuak a ni. “Chu ruam chu ‘Topheth’ vuah a ni tawh lo vang a, ‘Ben-hinom ruam’ vuah a ni hek lo vang; ‘Insâmna ruam’ vuah a ni tawh zâwk ang; Topheth-ah chuan an phûm ang a, phûmna tûr hmun dang a awm tawh loh avângin. 33 Mite ruang chu chunglêng savate leh ramsate chaw a ni ang. Tu mân an hnawt bo lo vang. 34 Tin, Juda khawpuiahte leh Jerusalem khawlaiahte chuan hlim thâwmte leh lâwm rite, moneitu awte, mo awte pawh ka tireh ang. Ram chu tihchhiat a ni dâwn si a.
1 “Chumi hunah chuan Juda lalho ruhte, a hotute ruhte, puithiamho ruhte, zâwlneiho ruhte, Jerusalem-a chêngho ruhte chu an thlân ata an la chhuak ang a, 2 ni te, thla te, vâna awm zawng zawng - an hmangaiha, a rawng an bâwla, an zuia, an zawna, chibai an bûkate hmaah chuan an pho chhuak ang. Lâk khâwm an ni tawh lo vang a, phûm an ni hek lo vang; lei chunga êkdûr mai tûr an ni ang. 3 Hemi chhûngkaw sual tak la awm chhun zawng zawng, ka hnawh darhna hmuna la châmbângte chuan nun aiin thih an thlang zâwk ang,” tih hi sipaihote LALPA thuchhuak a ni.
Sual leh hremna
4 “Chu lo pawh chu an hnênah heti hian i sawi tûr a ni: LALPA chuan heti hian a ti: Mi an tlûkin an tho leh lo vang em ni? Mi a pên bovin a lo kîr leh lo vang em ni? 5 Engati nge he Jerusalem mite hi, Kumkhuaa hnungtawlh tûra an tawlhthlûk tâk le? Bumna an vuan tlat, kîr leh an duh lo. 6 Ka beng chhiin ka ngaithla a, Tu mân thu dik an sawi lo. Tu mân, ‘Eng nge ka tih tâk?’ tiin an suahsualna an sim hek lo; Mi tinin mahni kawng an hawi ta ṭheuh va, Indona hmuna sakawr lîm buan buan ang maiin. 7 A ni, vâna vacha chuan a hunbite a hria a, ṭhuro te, vamûr te, kânghlai te chu a hun takah an lo thleng ṭhîn a. Ka mite erawh chuan LALPA thuruat an hre lo. 8 Engtin nge, ‘Mi fing kan ni, LALPA dân chu kan hnênah a awm,’ in tih ni? Ngai teh u, lehkhaziaktute kawlawm dawthei chuan, Dâwtah an chantîr zâwk a ni. 9 Mi fingte chu an zakin an zâm ang a, Manin an awm ang. Ngai teh u, LALPA thu chu an paihthla a, Anmahniah eng finna nge awm le? 10 Chuvângin, an nupuite chu mi dangte hnênah ka pe ang a, An lote pawh a la neitu tûrte hnênah; Mi tin, a tê ber aṭanga a ropui ber thlengin Awh hmang an ni a. Zâwlnei aṭanga puithiam thleng pawhin, Mi tinin bum an hmang si. 11 Ka fanu, ka mite hliam chu ngaihsam takin, ‘A ṭha alâwm, a ṭha alâwm!’ tiin an thawi a, A ṭha hauh si lo va. 12 Thil tenawm an tih hi an zak em le? Hnai lo ve! An zak hauh lo va, an hmêl pawh a sen hek lo. Chuvangin, tlute zîngah an tlu ve ang a, Anmahni hrem hunah chuan paihthlâkin an awm ang,” Tih hi LALPA thuchhuak a ni. 13 “Anmahni ka tiboral vek ang,” Tih hi LALPA thuchhuak a ni: “Grêp hruite a rah lo vang a, Theipui kûngte a rah hek lo vang; A hnah pawh a vuai ang a, Anmahni chîm botu tûrte ka ruat tawh a ni.” 14 “Engati nge kan la ṭhut reng le? Pung khâwm ula, khawpui kulh neiahte lût ula, Chutah chuan i boral dial ang u. LALPA chunga kan sual tâk avângin LALPA kan Pathian chuan tûr tui min intîrin, Boralnaah min dah a ni. 15 Muanna kan zawng a, ṭhatna eng mah a lo thleng lo; Tihdamna hun tûr pawh, ngai teh, thlaphânna mai! 16 An sakawr hnâr tum ri chu Dan aṭangin hriat a ni a, An sakawr chak hrâm thâwmah chuan ram pum pui chu a khûr a; An lo thleng a, a chhûnga awm zawng, An ei zo vek ta, khawpui leh a chhûnga chêngte nên.” 17 “Ngai teh u, in zîngah rûlpui ka tîr ang a, Rûl tûr nei, khawi ngam rual lohte chu, Chûng chuan a chû ang che u,” Tih hi LALPA thuchhuak a ni.
A mite vânga Jeremia lungngaihna
18 Aw lungngaihnaah hian inthlamuan thei tak ila aw! Chhûngrilah chuan ka thinlung a chau zo ta. 19 Ngai teh u, ram hla tak ata, Ka fanu, ka mite ṭap thâwm chu: “Zion-ah chuan LALPA a awm lâwm ni? A chhûngah a LALPA a awm na nge?” “A milim siam chawpte leh hnam dang milemtein, Engah nge mi tihthinur ni?” 20 “Buh seng hun a liam ta, Nipui a tâwp ta, chhandamin kan la awm lo!” 21 Ka mite, ka fanu natnaah chuan ka na ve si, Ka sûn a, thlaphânnain mi vuan ta. 22 Gilead-ah thinghnai damdawi a awm lâwm ni le? Chutah chuan tidamtu a awm na nge? Engati nge ka mite, ka fanu a hrisêl theih loh?
1 Ka lu hi tui ni se, ka mit hi mittui hnâr ni teh se aw! Ka mi, ka fanu thahte tân chhûn zânin ka ṭap tûr! 2 Thlalêrah khualbûk nei thei ila aw! Ka mite kalsanin, awm bosan teh ila; Uire hmang mi an ni vek si a, Bum hmang awm khâwm mai an ni. 3 “An lei chu thal ngul angin dâwtah an hmang a. Ramah an ṭhang lian, thutakah ṭhang lovin. Sual lamah an ṭhang zêl a, kei mi hre lovin,” Tih hi LALPA thuchhuak a ni. 4 “Mahni ṭhenawm lakah fîmkhur ṭheuh ula, In unaute rêng ring suh u; Unaute chu bum hmang an ni si; ṭhenawmte pawh rêl hmang an ni. 5 Mahni ṭhenawm ṭheuh an bum ang, Thu dik lah an sawi lo vang; An lei dâwt sawi an zirtîr a, Khawlohna thawkin an hah ṭhîn. 6 Bum hmang zîngah i chêng a, An bumna avângin kei min hre duh lo,” Tih hi LALPA thuchhuak a ni. 7 Chuvângin, sipaihote LALPAN heti hian a ti: “Ngai teh u, anni chu ka titui ang a, ka fiah ang; Ka mi, ka fanu avâng chuan eng dang nge ka tih tâk ang le? 8 An lei chu thihna thal a ni a, bum thu a sawi ṭhîn; Miin kâin a ṭhenawm hnênah rem thu sawi mah se, A thinlungah amah chu a châng khiau ṭhîn. 9 Hêng thiltihte avâng hian ka hrem lo vang em ni?” Tih hi LALPA thuchhuak a ni. “Hnam hetiang lakah hian phuba ka la lo vang maw? 10 Tlângte tân ka ṭap ang a, ka chiau vawng vawng ang, Thlalêr hlobet hmunte ka sûn ang a, Tu ma kal tawh lohna tûra a kan zawh tâk avângin, Ran thâwm miten an hre tawh lo vang a, Chunglêng savate leh ramsate pawh an tlânchhia a, an kal bo tawh. 11 Tin, Jerusalem chu thil chhe awm khâwm maiah ka siam dâwn, Sihalte chênna hmun a ni ang; Juda khawpuite chu luahtu awm lovin ka tiram ang.” 12 Hei hi hre thiam tûr mi fing chu tu nge ni? Puang tûra LALPA thusawi lo dawngtu chu tu nge ni? Eng vângin nge ram chu a chhiat zawha, tu ma kal lohna tûra thlalêr anga a kan tâk ni? 13 Tin, LALPA chuan, “Ka dân, an hmaa ka dah, an kalsan a, ka ṭawngka chhuak an awih lo va, an zâwm hek lo va, 14 an thinlung khauh zâwma, an thlahtuten an zirtîr Baala-te chu an zui tâk zâwk avângin,” a ti a; 15 sipaihote LALPA, Israel Pathian chuan heti hian a ti: “Ngai teh u, anni, hêng mite ngei hi saiin ka hrai ang a, tui khâ ka intîr bawk ang. 16 Hnam, anmahni leh an thlahtute pawhin an hriat ngai lohte zîngah ka tidarh ang. Ka tihboral vek hma chu khandaih ka ûmtîr ang.”
Jerusalem mite ṭanpui dîlin an au
17 Sipaihote LALPA chuan heti hian a ti: “Ngaihtuah ula, hmeichhe ṭap mite lo kal tûrin ko rawh u; Hmeichhe themthiamte chu lo kal tûrin ko bawk rawh u. 18 Rawn hmanhmawh sela, min rawn ṭah khum teh se, Kan mittui a luana, kan mitahte tui a puh theih nân. 19 Zion ata ṭap thâwm hriat a ni si a: ‘Kan chhiat nasatzia tak chu! Kan hrilhhai êm êm a, Kan ram kan kalsan avâng leh, Kan chênnate an paihthlâk tâk avângin.’” 20 Aw nangni hmeichhiate u, LALPA thu chu ngaithla ula, A kamchhuak thu in bengah lût sela; In fanute ṭah zirtîr ula, Mi tinin a ṭhenawmnu hnênah sûnna hla. 21 Kan tukverhahte thihna lâwn lûtin, Kan lal inahte a lût tawh si a; Pâwn aṭangin naupang tibo tûr leh, Khawlai ata tlangvâl tibo tûrin. 22 “LALPA thuchhuak chuan heti hian a ti: ‘Mi ruangte chu tâmlakah êkdûr angin an tlu ang a, Buh sengtu buh hmaih ang maiin; Tu mân an khâwm tawh lo vang,’” ti rawh. 23 LALPA chuan heti hian a ti: “Mi fing chuan a finna chhuang suh sela, mi chak chuan a chakna chhuang hek suh sela, mi hausa chuan a sum leh pai chhuang hek suh se. 24 A chhuang apiang erawh chuan hei hi chhuang rawh se, kei LALPA hi, ngilneihna te, rêl dikna te, felna te he leia hmang ṭhîntu chu ka ni tih mi hriata, a hriat thiamna chu. Hêng thilte hi ka lâwm zâwng a ni si,” tih hi LALPA thuchhuak a ni. 25 “Ngai teh u, nite chu a lo thleng e,” tih hi LALPA thuchhuak a ni, “Serh tan ni si, tan loh ang maite chu ka hrem ang; 26 Aigupta te, Juda te, Edom te, Amon fate leh Moab te leh thlalêra chêng, baksam ziat kâwnghote; hnam zawng zawng chu serh tan lohte an ni si a, Israel chhûngte zawng zawng pawh thinlunga serh tan loh an ni.”
Milem biak leh biak dân dik
1 Aw, Israel chhûngte u, in hnêna LALPA thusawi hi ngaithla rawh u, 2 LALPA chuan heti hian a ti: “Hnamte awm dân zir suh la, Vâna chhinchhiahnate vângin zâm hek suh u; 3 Mite dânte chu engmahlo mai a ni si a; Ramhnuaiah thing an kit a, Hreipuia mi themthiam kutin an chei a. 4 Tangkarua leh rangkachakin an chei a, A chêt loh nân thîr kilhna leh tubohvin an kilh a. 5 Leipuia sava hlauh tûr milim mai an ni a, An ṭawng thei lo; Mahniin an kal theih loh avângin, Put sawn an ngai ṭhîn; Anni chu hlau suh u, Thil chhia an ti thei lo va, Thil ṭha an ti thei hek lo.” 6 Aw LALPA, nang ang tu mah an awm lo ve, I ropui a, i hming chaknain a thang lian e. 7 Aw hnamte lal, tuin nge ṭih lo vang che? Chu chu i phu rêng si a. Hnamte mi fing zawng zawng zingah te, An ram rêng rêng zîngah pawh, Nang ang rêng an awm lo ve. 8 Anni zawng mi mâwl leh mi â an ni a; Milim zirtîrna chu thing mai a ni. 9 Tarsis ata tangkaraw chher an rawn la a, Uphaz ata rangkachak pawh, Mi themthiam siam, rangkachak chhertu kutchhuak; An silhfênan dumpâwl leh senduk, Mi themthiam kutchhuak vek an ni e. 10 LALPA erawh chu Pathian tak a ni; Pathian nung leh chatuana Lal a ni e. A thinurin lei a nghîng a, Hnamten a thinrimna an tuar lo. 11 An hnênah hetiang hian in ti tûr a ni: “Pathiante, lei leh vân siamtu ni hlei lote chu lei ata an boral ang a, vân hnuai aṭangin an bo vek ang.”
Pathian fakna hla
12 A thiltihtheihnain lei a siam a, A finnain khawvêl a din a, A remhriatnain vân a tipharh a. 13 A aw a chhuah chuan vânah tui a ri hum hum a: “Kâwlkil ata chhûm a chhohtîr a, Ruah sûr nân kâwl a phêttîr a, A ro bâwm ata thli a tlehtîr a.” 14 Mi tin an mâwl a, hriatna an nei lo; Rangkachak chhertu pawhin a lem chher chu a zahpui a; A milim chhûn chu dâwt mai a ni si, Anmahniah thaw pawh a awm lo. 15 Engmahlo mai an ni, bumna hna mai, An hremna hunah an bo mai ang. 16 Jakoba chanvo zawng hetiang a ni lo, Thil zawng zawng bul a ni si; Israel hi a ro luah hnam a ni a, A hming chu sipaihote LALPA a ni.
Sala an tân tûr thu
17 Aw nang, huala awm mêk chuan, I puanthuah lei ata la khâwm rawh. 18 LALPA chuan heti hian a ti a ni: “Ngai rawh u, tûnah rama chêngte ka thing chhuak ang, An hriat thamin ka tihrehawm ang.” 19 Ka nâ avângin ka chung a pik e, Ka hliam hi a nâ a ni. Mahse, “Hei zet hi hrehawmna chu a ni, Ka tuar mai tûr a ni,” ka ti. 20 Ka puan in a chhe ta, ka hrui zawng zawng a chat vek a; Ka hnên ata ka fate an chhuak a, an awm ta lo. Ka puan in zâr tûr an awm tawh lo, Ka puanzâr tungding tûrte. 21 Berâm vêngtute chu an mâwl a, LALPA râwn nachâng an hre lo; Chu vâng chuan an hmuingîl lo va, An berâm rualte an darh zo. 22 Ngai rawh u, thâwm chu a lo thleng, Hmâr lam ata buaina nasa tak mai, Juda khawpuite tiṭiauva, Sihal chênna hmuna chantîr tûrin. 23 Aw LALPA, mihring awm dân chu, Mahni thu mai a ni lo tih ka hre ta; Tungchhova kal mihringah hian, A pheikhai hruai tûr a awm lo. 24 Aw LALPA, mi thunun la, a tâwk chauhvin, Thinur lovin; chuti lo chu, mi tibo dah ang e. 25 Awze mi, nang hre ngai lote chungah leh, I hming lam ngai lote chungah I thinurna hrithla ang che; Jakoba chu an ei zo va, A ni, an ei zo va, an ei ral a, A chênna ram pawh an tiram a.
Jeremia leh thuthlung
1 Jeremia hnêna LALPA thu lo thleng chu: 2 “He thuthlung thute hi ngaithla ula, Juda mite leh Jerusalem-a chêngte hnênah sawi rawh u. 3 Tin, nang chuan an hnênah, LALPA, Israel Pathian chuan heti hian a ti: ‘He thuthlung thute ngaithla lotu chu ânchhe dawngin awm rawh se; 4 chu chu in thlahtute, Aigupta ram, thîr rawh tuina ata ka hruai chhuah nia, “Ka ṭawngka chhuak awih ula, thu ka pêk zawng zawngte chu ti rawh u,” tia ka thupêk chu a ni; “Tichuan, ka mite in ni ang a, kei chu in Pathian ka ni ang,” 5 in thlahtute hnêna khawizû leh hnutetuia luang ram, chhechhama pêk ka tiam kha ka hlen theih nân, vawiina a awm ang hian,’ ti rawh,” a ti a. Tin, kei chuan, “Amen, aw LALPA,” tiin ka chhâng a. 6 Tin, LALPA chuan ka hnênah, “Juda khawpuiahte leh Jerusalem khawlaiahte hêng thu zawng zawng hi puang la, ‘He thuthlung thute hi ngaithla ula, zâwm rawh u. 7 In thlahtute Aigupta ram ata ka hruai chhuah ni ata tûn thlengin, “Ka ṭawngka chhuak awih rawh u,” tiin ka hriattîr ṭhîn a. 8 Mahse, an awih lo va, beng an dawh hek lo, mi tin mahni thinlung sual ang zêlin an awm ta zâwk a. Chuvângin, hêng thuthlung thu, ti tûra thu ka pêk, an tih loh zawng zawng hi an chungah ka rawn thlen ta a ni,’” a ti a. 9 Tin, LALPA chuan ka hnênah, “Juda mite leh Jerusalem-a chêngte zîngah phiarrûkna a awm. 10 An thlahtu, ka thu ngaithla duh lotute khawlohna lamah chuan an lêt leh a; pathian dangte rawng bâwl tûrin an kal a; Israel chhûngte leh Juda chhûngte chuan an thlahtute hnêna ka thuthlung siam chu an bawhchhe ta,” a ti a. 11 Chuvângin, LALPA chuan heti hian a ti: “Ngai teh u, an chungah thil ṭha lo, an pumpelh tawp loh tûr chu ka rawn thlen ang; mi au vang a; mahse, ka chhâng lo vang. 12 Tin, Juda khawpuite leh Jerusalem-a chêngte chuan pathian, an hnêna rimtui an hâl ṭhinnate chu an au vang a; mahse, an buai hunah chuan chûng chuan an chhanhim tawp lo vang. 13 Aw Juda, i pathiante chu i khawpui zât an ni si; thil zahthlâk tak, Baala hnêna rimtui hâlna tûr maichâm meuh pawh Jerusalem kawtthlêr zât ngawtin in lo din ta a. 14 Chuvângin, hêng mite hi ṭawngṭaisak suh la, an tân dîlna emaw, aw emaw chhuah hek suh; an buai huna mi auh chu ka ngaithla dâwn si lo va. 15 “Mi tam tak nên thil tenawm tak ti chungin, Ka duh tak chuan ka inah pual eng nge a neih? Thu intiam te leh sa serh chuan Chhiatna a pumpelhtîr thei dâwn che u em ni? In sualnaa awm reng chungin in hlim thei dâwn em ni? 16 LALPA chuan i hmingah, Olive thing hring, rah ṭha mawi pui, a ti chia, Ri huau huauvin a chungah mei a chhêm a, A zârte pawh a tliak zo ta. 17 “Sipaihote LALPA, nangmah phuntu che chuan, Israel chhûngte leh Juda chhûngte sualna, Baala hnêna rimtui hlâna, mi tihthinrimna thil anmahni tâna an thawh chhuah chunga thil ṭha lo tûr thu chu i chungah a puang chhuak ta.”
Jeremia thah an tum
18 LALPA chuan mi hriattîr a, ka hre ta: Tichuan, nang ngeiin an thiltihte mi kawhhmuh ta. 19 Kei erawh chu berâmno nunnêm tak, Talh tûra hruai ang mai ka ni; “Thing chu a rah chawpin i tichhia ang u khai, Mi nung ram ata ani chu i tibo daih ang u, A hming rêng rêng hriat a nih tawh loh nân,” Tia ka chunga an thil phiar chu ka lo hre hauh lo. 20 Mahse, aw sipaihote LALPA, dik taka rêl ṭhîntu, Chhûngril lam leh thinlung fiah ṭhîntu, An chunga i phuba lâk chu mi hmuhtîr ang che, Ka chungchâng thu hi i hnênah ka kawltîr si a. 21 “Chu vâng chuan sipaihote LALPA chuan Anathoth mi, i nunna zawngtu, ‘Kan kuta i thih loh nân LALPA hmingin thu sawi suh,’ titute chungchângah chuan heti hian a ti: 22 ‘Ngai rawh u, anmahni ka hrem ang a, tlangvâlte chu khandaihin an thi ang a, an fanute, an fapate chu ṭâmin an thi ang; 23 thi bâng rêng an awm lo vang; Anathoth mite chungah chuan thil ṭha lo ka thlen dâwn si a, an hremna kum tûr ngei chu.’”
Jeremian LALPA hnênah vui thu a sawi
1 Aw LALPA, i hnênah ka phunnawi pawhin, Nang zawng i dik ṭhîn; Mahse, ka vuina thu chu ka sawi tho dâwn. Engati nge mi suaksualte kawng chu a hmuingîl ṭhin ni? Engati nge bum hmang tawh phawtte chu nuamsa taka an awm ṭhin le? 2 Anni chu i phun a, a ni, zung an kai ta a; An ṭhang a, a ni, rah an chhuah ta. An hmuiah chuan i hnai a, An chhûngrilah zawng i hla si. 3 Aw LALPA, kei erawh chu mi hria a; Mi hmu a, i lamah ka thinlung i fiah ṭhîn. Anni chu berâm talh tûr ang maiin hnûk chhuak la, An talhna ni tûr chu ruat ang che. 4 Ram chuan eng chen nge a sûn anga, Ram pum pui thlaite chu an vuai ang? A chêngate suahsualna avângin Ramsate chu an ral zo va, savate pawh; “Kan hun hnuhnûng chu a hmu lo vang,” an tih avângin. 5 “Kea kal mite chu i tlânsiakpuia, an tihchauh tawh che chuan, Engtin nge sakawrte i tlânsiakpui theih ang? Muanna ramah him takin awm mah la, Jordan ramngawah chuan engtin nge i tih ang? 6 I unaute, i pa chhûngkua ngeite chuan, Anni ngei chuan an bum tawh si chia; Anni chuan ûm chein ring takin an au chia, Thu ṭha tak sawi mah se, awih rêng rêng suh.
A mite vânga LALPA lungngaihna
7 Ka in leh lo kalsanin ka ro luah tûr ka paih bo ta; Ka nunnain a ngaih taki chu, A hmêlmate hnênah ka pe ta. 8 Ka ro luah tûr chu ramhnuaia sakeibaknei ang a lo ni ta; Ka lakah a râwl a chhuah a; Chuvângin, ka hua a ni. 9 Ka ro luah tûr chu ka tân sa hel ei sava ṭial a ni em ni? Sa hel ei vaten a vêlin an bei em ni? Ramsa zawng va khâwm ula, Ei tûrin rawn hruai rawh u. 10 Berâmpu tam takte chuan ka grêp huan an tichhia a, Ka chan chu an rap bet a, Ka chanvo nuam tak mai chu Thlalêr ram ṭiau an chantîr ta. 11 Ram ṭiauvah an siam ta a, A ṭiau va, ka hnênah a vui a ni, A ram pum pui a ṭiau va; Mahse, tu mân an ngaihsak lo. 12 Thlalêra tlâng kawlh zawng zawngahte, Tichhetute an lo thleng ta a; Ram tâwp lehlam aṭanga lehlam thlengin LALPA khandaih chuan a ei zo ta si a; Muanna nei rêng an awm ta lo. 13 Buh chi an tuh a, hlîng an seng a; An intihah hnêp a, hlâwkna awm si lovin. LALPA thinur nasa tak avângin In rah chhuahte chu in zahpui ang.”
Israel ṭhenawmte chungchânga LALPA thu
14 “Ka mi Israel-te hnêna ro luah tûra ka pêk khawih chhetu, ka ṭhenawm sualte zawng zawng chungchângah chuan LALPA chuan hetiangin a ti: ngai rawh u, an ram ata ka pawt chhuak ang a, an zîng ata Juda chhûngte ka pawt chhuak ang. 15 Tin, heti hi a ni ang a, ka pawh chhuah hnuah anmahni ka khawngaih leh ang a, mi tin anmahni ro luah tûr leh mi tin anmahni ram ngeia awm tûrin ka rawn hruai haw leh ang. 16 Tin, heti hi a ni ang a, Baala hnêna ka mite chhechham an zirtîr ang bawka, ka hminga, ‘LALPA a nuna a nun chhûng chu,’ tia chhe chham an zira, ka mite awm dân ngun taka an zir chuan ka mite zîngah ka din ang. 17 Mahse, an ngaihthlâk loh chuan chumi hnam chu a pawhin ka pawt chhuak ang a, ka tichhe zo vang,” tih hi LALPA thuchhuak a ni.
Hrênpuan zai sîn
1 LALPA chuan ka hnênah heti hian a ti a: “Hrênpuan zai sîn lei la, tihuh lovin hrêng rawh,” tiin. 2 Tichuan, LALPA thu ang zêlin hrên chu ka lei a, ka hrêng ta a. 3 Tin, LALPA thu chu ka hnênah a lo thleng leh a, 4 “Hrênpuan i lei, i hrên kha la la, tho la, Euphrates lui pan la, chuta lung keh kârah chuan thukru rawh,” tiin. 5 Tichuan, LALPA thu mi pêk angin ka kal a, Euphrates lui bulah chuan ka thukru ta a. 6 Tin, ni tam tak hnuah chuan LALPAN ka hnênah, “Tho la, Euphrates lui pan la, hrênpuan ka thuhrûktîr che kha la chhuak rawh,” a ti a. 7 Tichuan, Euphrates lui lamah chuan ka kal ta a, ka han hai a, hrênpuan chu ka thuhrûkna ata ka han phawrh chhuak a. Ngai teh, hrênpuan chu a lo mawih vek a; eng atân mah a tlâktlai ta lo. 8 Tin, LALPA thu chu ka hnênah a lo thleng a: 9 “LALPA chuan heti hian a ti: ‘Hetiang bawk hian Juda chapopui leh Jerusalem chhuantawlawl chu ka tichhe dâwn a ni. 10 He hnam sual, ka thute ngaithla duh lova, anmahni rilru ngawltâwt zai zuia, pathian dangte rawng bâwl leh be tûra ûm zâwktute hi he hrênpuan, eng atân maha tlâktlailo ang hi an ni ang. 11 Hrênpuan chu mi kâwnga a bet reng ang hian, Israel chhûngkaw pum pui leh Juda chhûngkaw pum pui hi, ka mite leh ka hmingthanna leh ka mawina leh ka ropuina an lo nih theih nân, ka hnêna bet reng tûra ka siam an ni si a; mahse, an bengkhawn lo.’
Uain peng
12 “Tin, he thu hi an hnênah i sawi tûr a ni: ‘LALPA, Israel Pathian chuan heti hian a ti: Peng tinrêng mai uainin a khat ang,’ tiin. Tin, annin i hnênah, ‘Peng tinrêng mai uainin a khat ang tih chu kan hre lo vem ni?’ an ti ang a. 13 Tin, nangin an hnênah, ‘LALPA chuan heti hian a ti: Ngai rawh u, he rama chêng zawng zawng, Davida ṭhutthlênga thu lalte, puithiamte, zâwlneite leh Jerusalem-a chêng zawng zawngte chu zu ruihnain ka tikhat ang! 14 Anmahni chu ka insuttîr ang a, pate an fate nên,’ tih hi LALPA thuchhuak a ni: ‘Anmahni ka tihboral lohna khawp zawngin anni chu ka khawngaihin ka zuahin ka lainat lo vang.’ ”
Chapo loh tûr
15 Ngaithla ula, beng dawh rawh u; Chapo suh u, LALPA chuan thu a thlah tawh a ni. 16 LALPA in Pathian chu chawimawi ula, Thimna a thlentîr hma leh, Thimin tlângte a tuama in kete a phêt hma hian. Eng in beisei lai takin thimah a chantîr a, Thim chhah takah a siam dâwn a ni. 17 Mahse, in ngaihthlâk loh chuan In chapona avângin fianrialah ka ṭap ka ṭap ang; Ka mittui pawh nasa takin a luang reng ang, LALPA berâm rual chu sala kaih an nih avângin. 18 Lal leh a nu hnênah te chuan, “Ṭhu hniam rawh u, in lukhumte a tla ta si, In lallukhum ropui ngei chu,” ti rawh. 19 Chhim khawpuite chu a ping zo ve, tu ma hawn rual lohvin; Juda zawng zawng salah an tâng, A pum puiin an tâng zo ve. 20 In mit lên ula, en rawh u, hmâr lam ata lo thawkte saw. Berâm rual i neih kha khaw nge, I berâm rual duhawm tak kha? 21 Nangman ṭhiana i siamte kha i chunga an dah hun chuan Engtin nge i tih ang? Hmeichhe nau vei ang mai hian Nâ i ti hle dâwn lâwm ni? 22 “Eng vângin nge hêng hi ka chungah a lo thlen?” I ti rilru a nih chuan, i khawlohna avâng asin ni, I fênfual hlîm a niha i saruak a lan ni. 23 Ethiopia mi hângin a vun a tidanglamin, keitêin a zia a thup thei em ni? Chuti a nih chuan nangni thil sual tih chîng ṭhînte pawhin Thil ṭha in ti thei ang chu! 24 “Thlalêr thlîin buhsî a lên ang maiin Anmahni ka tidarh ang. 25 Hei hi i chanvo, i puala ka ruatsak che chu a ni, Mi theihnghilha, dâwt i rinchhan avângin,” Tih hi LALPA thuchhuak a ni. 26 “Tichuan, keimah ngeiin i fenfual chu I hmai khuh hialin ka hlîmsak ang chia, I zahmawh a lang ang. 27 Tâmlaka tlângah te i uirena te, i hur au thâwm te, i inphalrai nasatzia te, Chûng i thiltih tenawmte chu ka hmu ta. Aw Jerusalem, i chung a pik e! Tihthianghlim i nih hma chu eng chen nge ni dâwn?”
Khawkhêng râpthlâk
1 Khawkhêng chungchânga Jeremia hnêna LALPA thu lo thleng chu: 2 “Juda chuan a sûn a, a kulh kawngkate a ngui; Leiah an puan dur khumin an kûn e, Jerusalem ṭap thâwm a chho. 3 A mi ṭhaten an chhiahhlawhte tui an chawitîr a, Tuikhuah an pan a, tui an hmu lo, An tuibêl ruakin an kîr a; An zâm a, an hrilhhai a, an lû an khuh. 4 Lei lah a khî, ram puma ruah tui awm loh vângin. Leilettute chu an zâm a, an lû an khuh a. 5 A ni, zukpui pawhin phulah no a hring a, A tlânsan e, hnim hring a awm loh vângin. 6 Ramsabengtungte chu mual pâwng chârah an ding a, Lei thlâk hlawiin an thaw hlawp hlawp a: Peh tûr awm loh vângin an mit a thim rum rum.” 7 Kan khawlohna chuan min hêk mah se, I hming vângin aw LALPA, rawn thawk ang che; Kan tlûknate a tam si a, I chungah ngei thil kan tisual a. 8 Aw nang Israel-ho Nghahfâk, mangan laia Chhandamtu, Engati nge he ramah hian mikhual ang maia, Zan khat riaka zin ang leka i awm le? 9 Engati nge mi chi-ai ang mai leh pasalṭha, chhandam thei si lo ang maia i awm le? Mahse, nang chu, aw LALPA, kan zîngah i la awm a, I hming kan pu a; min kalsan suh ang che! 10 LALPA chuan he mite chungchângah hian heti hian a ti: “Vah bo hi an duh ṭhîn a, an ke pên an sûmkâr lo; Tichuan, LALPAN anni chu a pawm lo va, An khawlohna chu a hre reng tawh ang a, An sualte avângin a hrem ang.” 11 LALPA chuan ka hnênah, “He mite ṭhatna tûr hi dîlsak suh. 12 Chaw nghei mah sela, an au chu ka ngaithla lo vang a, hâlral leh buhbâl thilhlan hlân mah sela, ka pawm lo vang; khandaih te, ṭâm te, hripui tein anmahni ka tiboral zâwk ang,” a ti a. 13 Tin kei chuan, “E, LALPA PATHIAN, ngai teh, an hnênah zâwlneiten, ‘Khandaih in tâwk lo vang a, ṭâm in tuar hek lo vang, he hmunah hian muan chiahna ka pe zâwk dâwn che u a ni,’ an ti ṭhîn asin,” ka ti a. 14 Tin, LALPA chuan ka hnênah, “Zâwlneite chuan ka hmingin dâwt an hril ṭhîn a nih chu; anni chu ka tîr lo va, thu ka chah lo va, ka be bawk hek lo. An thil hmuh hleih lohte, ṭhumvâwr tlâktlailo te leh an rilru dawhâna te an hrilh che u a ni,” a ti a. 15 Chu vâng chuan LALPA chuan heti hian a ti: “Ka tirh hleih lohva, ka hming chhâla, ‘He ramah hian ṭâm leh khandaih a thleng lo vang,’ tia hriltu zâwlneite chu khandaih leh ṭâmin an boral ang. 16 Tin, an thuhril lo dawngsawngtu hnam pawh hi ṭâm leh khandaih avângin, Jerusalem kawtthlêrah chuan paih chhuah an ni ang a, anmahni leh an nupuite, an fanute, an fapate nên, phûmtu rêng an nei lo vang. An suahsualna chu an chungah ka leih dâwn si a. 17 “Tin, an hnênah he thu hi i sawi tûr a ni: ‘A chhûn a zânin ka mittui luang rawh se, Hul rêng rêng suh se; Ka mi, ka fanu nula thianghlim chuan hliampui a tuar e, Kut thlâk na tak chu. 18 Daia ka chhuah leh, eheu, khandaiha thahte! Khawpuia ka luh leh, eheu, ṭâmpui mitthi! Ram tinah zâwlneite leh puithiamte an vâkvai hlawm a, A ngaihna rêng rêng an hre lo,’ tiin.”
Miten LALPA an ṭahawh
19 Juda chu i paihthla dêr em ni? Zion chu i lungten ta elo? Kan tân tihdamna awm lo lêkin engtizia nge min tuartîr le? Muanna kan zawng a, ṭhatna eng mah a lo thleng lo; Tihdamna hun tûr pawh, ngai teh, thlaphânna mai. 20 Aw LALPA, kan suahsualzia kan pha lo ve, Kan pute khawlohna nên, i chungah kan tisual ta si a. 21 I hming avângin min hmusit suh la, I lalṭhutthlêng ropui tihminghliau suh la; Kan hnêna i thuthlung hre reng la, bawh bo suh ang che. 22 Hnam dang pathiante zîngah ruah sûrtîr thei an awm em? A nih leh, vânin ruahpui a thlen thei em ni? Aw LALPA kan Pathian, chu mi chu nang i ni lâwm ni? Hêng thil zawng zawng hi i tih a ni si a, Kan nghahfâk ber nang i ni e.
Juda ram mite tuar tûr
1 Tin, LALPA chuan ka hnênah heti hian a ti a: “Mosia leh Samuela chu ka hmaah lo ding mah se, ka thinlungin he mite lam hi a hawi chuang lo vang. Ka hmuh phâk lohvah hnawt chhuak la, kal bo rawh se! 2 Tin, ‘Khawiah nge kan kal ang?’ tia an zawh che chuan an hnênah heti hian i ti tûr a ni: ‘Heti hian LALPA chuan a ti: “Thihna pual chu thihnaah; khandaih pual chu khandaihah; ṭâmpui pual chu ṭampuiah; sal tânna pual chu sal tânnaah.” ’ 3 “Thil chi li ka ruatsak ang,” tih hi LALPA thuchhuak a ni, “Tihlum tûrin khandaih, pet sawm tûrin ui, ei zo leh tiral tûrin chunglêng sava leh ramsa kawlhte. 4 Juda lal, Hezekia fapa Manasean Jerusalem-a a thiltih avângin, lei lalram zawng zawngte zînga vawrh lân vawrh lânah ka siam ang. 5 “Tuin nge khawngaih ang che, aw Jerusalem? Tuin nge lungngaihpui ang che? I awm dân zâwt tûrin tu nge lo pêng ang le? 6 Nangin mi paihthla a, i hnungtawlh zêl a ni,” Tih hi LALPA thuchhuak a ni. “Chutichuan, dimdawi che hi ka ning a, I chungah ka kut ka lek a, ka tiboral che a ni. 7 Ram puma kulh kawngkâahte chuan ṭawm thennain anmahni ka thian a. Fa lu hlohvin ka siam a, ka mite ka tiboral a; An awm dân an lamlêt loh avângin. 8 Tuipui kama ṭiauvaivut aia tamin an hmeithaite ka tipung a, Chhûn laiah râlkai tawhte chungah tichhetu ka thlen a, Manganna leh thil râpthlâk ka tlâktîr thut a. 9 Lu sarih hringtu chu a chau va, a zal dêr a; Chhûn a nih laiin a ni a liam ta a, A mualphovin a hming a chhia a. Tin, a la awmte chu an hmêlmate kutah Khandaiha thah tûrin ka pe ang,” tih hi LALPA thuchhuak a ni.
Pathian hnênah Jeremia a phunnawi
10 Ka nu, ram pum puia nghirnghotu leh hnialkalhtua mi lo hring hi ka chung a va pik êm! Ka pûktîr lo va, ka pûksak hek lo; mahse, an zain ânchhia mi lawh tho si. 11 LALPA chuan, “Tihtakmeuhvah chuan thil ṭha atân ka tinghet ang che; tihtakmeuhvah chuan chhiatna ni leh hrehawm niah hmêlma chu i hnênah kut ka dawhtîr ang,” a ti a. 12 “Miin thîr, hmâr lama thîr leh ngên chu a titliak thei dâwn em ni? 13 I sualna zawng zawng avâng hian i sum leh pai leh i ro thilte chu, man lovin râllâk atân ka pe ang, i ram tluanin. 14 Ram i hriat ngai lohvah chuan i hmêlmate rawng ka bâwltîr ang che. Ka thinrim avângin mei i chunga mût tûr chu a alh chhuak ta si a,” a ti a. 15 Nangin i hria e, aw LALPA; Mi hre reng la, mi kan ang che, Mi tiduhdahtute chungah phuba mi lâksak ang che. I dimdawina hi keiin boral phah lo ila; Nangmah avânga hmingchhiat hlawh ka ni tih hria ang che. 16 I thute chu tihlan a ni a, ka ei a, I thute chu ka tân lâwmna leh ka thinlung hlimna a ni; Aw LALPA, sipaihote Pathian, i hming kan pu ta si a. 17 Nuamsip bâwltuteho zîngah ka tel lo va, ka hlimpui hek lo; Nangma kut vângin a fâlin ka ṭhu a, Lungnih lohnain mi tikhat si a. 18 Engati nge ka nâ a reh theih lohva, Ka hliam a dam theih loh, tihdam duh lo ang mai hian? Ka lakah kawrte bum hmang tui kang ṭhîn ang hi a ni dâwn em ni? 19 Chutichuan, LALPA chuan heti hian a ti: “I inlamlêt chuan ngai ka awhtîr ang chia, Ka hmaah i ding leh ang; Thil tlâktlailo ata thil hlu hlîr i sawi chhuah chuan, Keima kam châng i ni ang. Anni chuan i lam lo hawi sela, Nang erawh chuan an lam i hawi tûr a ni lo. 20 He mite lakah hi chuan ngên kulh bangah ka siam ang chia; An bei ang chia; mahse, an hneh lo vang che, Chhandam tûr leh chhanchhuak tûr chein I hnênah ka awm si a,” tih hi LALPA thuchhuak a ni. 21 “Mi suaksualte kut ata ka chhanchhuak ang chia, Mi nunrâwngte hûm beh ata ka tichhuak ang che.”
Jeremia awm dân tûr LALPAN a kawhhmuh
1 LALPA thu chu ka hnênah a lo thleng a: 2 “Nupui i nei tûr a ni lo va, he hmunah hian fanu fapate pawh i nei tûr a ni hek lo,” tiin. 3 Fanu, fapa he hmuna piangte leh he rama nu leh pa anmahni hringtute chungchângah chuan LALPAN heti hian a ti a ni: 4 “Hripuiin an thi ang a, tu ma phûm loh leh tu ma sûn lohvin an awm ang; lei chung êkdûr ang mai an ni ang. Khandaih te, ṭâm tein an boral ang a, an ruangte chu chunglêng savate leh ramsate chaw a ni ang.” 5 LALPA chuan heti hian a ti a ni: “Khawhar inah lût suh la, sûn tûrin kal suh la, anmahni ṭah suh; he mite lak ata hi ka thlamuanna ka hlîp tawh si a, ngilneihna leh lainatnate nên,” tih hi LALPA thuchhuak a ni. 6 “He ramah hian mi lian leh mi tête an thi ang a; phûm an ni lo vang a, tu mân an sûn lo vang a, an inzaiin an inziah kâwn phah lo vang. 7 Lusûnte chu an mitthi ngai thlamuan tûrin tu mân ei tûr an hlui lo vang a, an nu emaw, an pa emaw avâng pawhin hnemna no in tûr tu mân an hûn lo vang. 8 Tin, ei leh ina an zînga ṭhu tûrin ruaiṭhehna inah i lût tûr a ni lo.” 9 Sipaihote LALPA, Israel Pathian chuan heti hian a ti si a: “Ngai teh u, in mit hmuhah, in dam chhûng hian mo aw te, moneitu aw te, hlim thâwm te, lâwm ri te he hmunah hian ka tireh ang. 10 “Hêng thu zawng zawng hi he mite hnêna i hrilh hunah annin, ‘Eng vângin nge LALPAN kan chungah heti taka thil ṭha lo a rawn sawi chhuah ni? Eng nge kan khawlohna? LALPA kan Pathian chunga kan thil tihsual chu eng nge ni?’ an tih che chuan, 11 heti hian i ti dâwn nia: ‘In puten min kalsan vâng a ni, pathian dangte an zui a, an rawng an bâwl a, an bia a, min kalsan a, ka dân an zâwm lo va; 12 tin, nangnin in pute aia hleihluakin in ti a, ngai rawh u, mi tinin mahni rilru ngawltâwt chhuahin sual in zui a, kei min ngaithla lo va; 13 chuvângin, he ram ata hi nangni leh in pute pawhin in hriat ngai loh ramah chuan ka hnawt chhuak ang che u; tah chuan a chhûn a zânin pathian dangte rawng in bâwl ang, ka khawngaih dâwn si lo che u a,’ tih hi LALPA thuchhuak a ni.
Sal tâng kîr
14 “Tichuan, ngai teh u, nite a lo thleng dâwn e,” LALPA thuchhuak chuan a ti; “ ‘Israel fate Aigupta ram ata hruai chhuaktu a nuna a nun chhûng chu,’ ti tawh lovin, 15 ‘Hmâr lam ram leh a ûm darhna ram zawng zawng ata Israel fate hruai chhuaktu, LALPA a nuna a nun chhûng chu’ an ti tawh zâwk ang. An pute hnêna ka pêk, anmahni ram ngeiah chuan ka hruai kîr leh dâwn si a.
Hremna lo awm tûr
16 “Ngai teh u, sangha man mi tam tak ka chah ang a, anmahni an man ang a; chumi hnuah chuan ram vâk mi tam tak ka chah chhuak ang a, an pêl chhuak ang a, tlâng lian leh te leh lungpui keh kâra mite pawh. 17 An awm dân zawng zawngahte chuan ka mit a fu reng si a; ka lakah thupin an awm lo va, an khawlohna te pawh ka mit lakah thuhrûk a ni hek lo. 18 Tichuan, an thil tenawm ruangtein ka ram an tihbawlhhlawh leh, an tenawmnaa ka rochun ram an tihkhah avângin, an khawlohna leh an sualna chu a lêt hnihin ka thungrûl ang,” tih hi LALPA thuchhuak a ni.
LALPA kuta innghah
19 Aw LALPA, ka chakna leh ka kulhpui, Mangan nia ka inhumhimna, Kâwlkil aṭangin hnamte an lo kal ang a, “Kan pute chuan dâwt te, thil tlâktlailo te, Hlâwkna nei hlei lote chauh lo chu eng mah an rochung lo ve. 20 Miin pathiante a insiamsak thei em ni? Chûng chu pathian an ni hlei nêm,” an ti ang. 21 “Chuvângin, ngai teh u, tûn ṭum hian anni chu ka hriattîr teh phawt ang; ka kut leh ka thiltihtheihna ka hriattîr ang a, ka hming hi LALPA a ni tih an hria ang.
Juda sualna leh a hremna
1 “Juda sualna chu thîr kawlawm leh lunghlu hriam hmâwr zumin ziak a ni; an thinlung phêkah kerin a awm a, an maichâm kîah te pawh; 2 thing hring bul leh mual pâwngahte chuan, an faten an maichâmte leh an Aseri-te chu an hre reng si a. 3 Aw nang ka tlâng, rama mi, ram dung tluana i sualna avâng hian i sum leh i ro zawng zawngte, i bâwlhmunte nên râllâkah ka pe ang. 4 I chanpual ka pêk che kha i chân ang a, i ram hriat ngai lohvah chuan i hmêlmate rawng ka bâwltîr ang che, ka thinurna mei, kumkhuaa kâng tûr chu in chhêm alh ta si a.”
Thufing hrang hrang
5 LALPA chuan heti hian a ti: “Mihring rinchhana, mihring bân chakna ringa, LALPA hawisanna thinlung neitu chu Anchhe dawngin awm rawh se. 6 Thlalêra hnimbuk ro ri re ang an ni a, Thil ṭha chhuak tûr rêng a hmu lo vang. Thlalêr ram ro, chi leilung, tu ma luah lohvah chuan a chêng zâwk ang. 7 LALPA ringtu, a rinchhan LALPA ni erawh chu a eng a thâwl e. 8 Tui kianga thing phun, lui kama zung kai, Khaw lum lo thleng pawh hlau lo, A hnahte hring reng si, Khawkhen kum pawisa lo, Rah chhuah ṭhulh chuang si lo ang hi a ni ang. 9 Thinlung hi thil zawng zawng aiin Bum hmang ber, chhe lailet dêr a ni a; Tuin nge hre thiam thei ang? 10 Kei LALPA hi mi tin an awm dân ang zêl leh An thiltih rah ang zêla pe tûra Rilru en chhuaktu, thinlung fiahtu ka ni. 11 Mi, kut tling lova lo hausa chu Varung, mahni tui ni lote awp keu ang a ni a, A la dam laiin amah an hransan ang a, A tâwpah chuan mi â a lo ni mai ang.” 12 Kan hmun thianghlim awmna chu Lalṭhutphah ropui tak, a tîr ata chawisâna awm chu a ni. 13 Aw LALPA, Israel Nghahfâk, Nangmah kalsantu zawng zawng chu an mualpho vang. “Kei mi hawisantute chu lei vaivuta ziak ang lek an ni ang; LALPA, nunna tuikhur chu, an kalsan ta si a.”
LALPA puihna Jeremian a dîl
14 Aw LALPA, mi tidam la; tichuan, ka dam ang a; Mi chhanhim la; tichuan, ka him ang, Ka fak fo ṭhin chu i ni si a. 15 Ngai teh, ka hnênah, “LALPA thu chu khawiah nge? Lo thleng ang hmiang!” an ti ṭhîn a. 16 Thil ṭha lo thlen tûrin ka nawr lo chia, Chhiatna ni lah ka duh hek lo tih i hria; Ka kâa thu chhuak chu i hre vek si a. 17 Ka tân ṭihbaiawm ni suh ang che; Mangan nia ka inhumhimna i ni. 18 Mi tiduhdahtute chu mualpho sela, Kei erawh chu mualpho lo ila; Anni chu zâm sela, kei erawh chu zâm lo ila; Mangan ni an chungah thlen la, Nasa takin tiboral ang che!
Chawlhni serh chungchâng
19 LALPA chuan ka hnênah heti hian a ti: “Kulh kawngka lûn ber, Juda lalte luh leh chhuahna leh, Jerusalem kulh kawngka zawng zawngahte chuan va ding la; 20 tin, an hnênah, ‘Nangni Juda lalte, Juda zawng zawngte, Jerusalem-a chêng zawng zawng hêng kawngkâa lût ṭhînte u, LALPA thu hi ngaithla rawh u. 21 LALPA chuan heti hian a ti e: In nun hi fîmkhurpui hle teh u, Chawlhniin phurh nei suh ula, Jerusalem kulh kawngkâah luhpui hek suh u. 22 Tin, Chawlhniah in in ata eng mah in phur chhuak tûr a ni lo va, hna rêng rêng in thawk tûr a ni hek lo; in pute hnêna ka thupêk angin Chawlhni chu in serh thianghlim zâwk tûr a ni. 23 Anni zawngin an ngaithla lo va, beng an dawh lo va; thununna chu an hriata an dawn loh nân an intiluhlul ta zâwk a ni. 24 “ ‘Tin, LALPA thuchhuak chuan heti hian a ti: Pawisa taka mi ngaihthlâka, Chawlhnia he khawpui kawngkâa thil in phurh luh lohva, hna rêng thawk lova Chawlhni in serh thianghlim zâwk chuan, 25 he khawpui kulh kawngkâah hian lalte leh hotute, Davida ṭhutthlênga ṭhu tûrte chu tawlailîrte leh sakawrahte chuangin an lo lût ang a, anmahni leh an mi liante, Juda mite leh Jerusalem-a chêngte nên; tichuan, he khawpuiah hian mi an chêng hlen tawh ang. 26 “ ‘Juda khawpui leh Jerusalem chhehvêl aṭang te, Benjamin ram aṭang te, Sefela ram aṭang te, tlâng ram aṭang leh Chhim ram aṭang tein an lo kal ang a, hâlral thilhlan leh inthawinate, buhbâl thilhlan leh rimtuite, lâwmna inthawinate LALPA inah chuan an rawn la ang. 27 Mahse, Chawlhni serh thianghlim tûr leh, Chawlhnia phurh neih loh leh Jerusalem kulh kawngkâa luhpui loh tûr thua min ngaihthlâk loh chuan, a kulh kawngkâahte chuan mei ka chhuah ang a, Jerusalem lal inte chu a kâng zo vang a, a mit lo vang.’ ”
Bêlvawtu inah Jeremia a kal
1 LALPA lak ata Jeremia hnêna thu lo thleng chuan, 2 “Tho la, bêlvawtu inah chuan zuk kal la, chutah chuan ka thute ka hriattîr ang che,” a ti a. 3 Tichuan, bêlvawtu inah chuan ka zuk kal ta a, a bêl siamna khâwlah chuan a lo thawk a. 4 Hluma bêl a siam lai chu a lo ṭhat loh chuan, bêlvawtu chuan ṭha a tih angin bêl dangah a din leh mai ṭhîn a. 5 Tichuan, LALPA thu chu ka hnênah a lo thleng leh a: 6 “Aw Israel chhûngte u, he bêlvawtu tih ang hian ka ti thei lo che u em ni?” tih hi LALPA thuchhuak a ni. Ngai teh u, bêlvawtu kuta hlum ang mai hian ka kutah in awm a ni, aw Israel chhûngte u. 7 Eng tikah pawh hnam emaw, ram emaw chungchâng thu-ah, “Ka pawt chhuak ang a, ka ṭhiat ang a, ka tichhia ang,” tiin lo sawi pawh ni ila, 8 chu hnam chuan a chung thu ka sawi avânga a thil ṭha lo a hawisan chuan, a chunga thil ṭha lo tih ka tum chu ka lamlêt ang. 9 Tin, eng tikah pawh hnam emaw, ram emaw chungchâng thu-ah, “Ka siam ang a, ka din ang,” tiin lo sawi pawh ni ila, 10 ka ṭawngka chhuak ngaithla lova ka mit hmuha thil tha lo a tih chuan, a tâna thil ṭha tih ka tum chu ka lamlêt bawk ang. 11 “Chuvângin, Juda mite leh Jerusalem-a chêngte hnênah chuan, ‘LALPAN heti hian a ti: Ngai teh u, in chungah thil ṭha lo ka suangtuah a, ka phiar mêk che u a ni, mi tinin an awm dân ṭha lo hawisan sela, in awm dân leh in thiltihte siam ṭha rawh u,’ ” va ti phawt rawh. 12 “Nimahsela, anni zawngin, ‘A âwm lo ve! Mahni remruat ang angin kan awm ang a, mi tin mahni rilru ngawltâwt sual ang zêlin kan che ang,’ ” an ti ṭhîn a ni.
Miten LALPA an hnâwl
13 Chuvângin, LALPA chuan heti hian a ti: “Hnam dangte zâwt teh mah u, hetiang rêng tu nge hre ngai? Nula Israel chuan thil ṭihbaiawm tak a tih tâk hi. 14 Lebanon vûr chuan a tlâng chhîp a kiansan ngai em ni? Kâwlvalênchham tui dai a luang kang ngai em ni? 15 Ka mite erawh chuan mi theihnghilh a, Engmahlo mai hnênah rimtui an hâl a; Chûng chuan an hmasâng kawngah a petektîr, Kawngpui ni lo ṭumkawng lam an zawh a, 16 An tiṭiau zo ta e - a ram chu, Kumkhuaa chek khum tûrin. Veivâk apiangin mak tiin an lu an thing. 17 Khawchhak thlipui angin hmêlma hmaah ka theh darh ang, An vânduai niah chuan ka hmêl ni lo, Ka tukkhum ka entîr ang.” 18 Tin, anni chuan, “Hawh u, Jeremia hi i phiar ang u, puithiam lak ata dân a reh dâwn si lo va, mi fing lak ata thurâwn a reh hek lo vang a, zâwlnei lak ata thu a reh bawk hek lo vang. Hawh u, i sawichhe bawrh bawrh ang u khai, a thu rêng rêng i ngaihsak miah lo vang u,” an ti a. 19 Mi ngaihsak la, aw LALPA, Mi dodâltute thu hi bengvâr ang che. 20 Sual hi thil ṭha rulhna em ni ngai? Anni zawngin ka nunna atân hum an hiat si. An laka i thinurna tikiang tûr leh An tâna thil ṭha sawi tûra I hmaa ka din ṭhin kha hre reng ang che. 21 Tichuan, an fate chu ṭâmpui mitthi tawhtîr la, Khandaih chakna tawntîr rawh; An nupuite fa lu hlohvin hmeithai rawh se. An mipate hripuiin thi sela, An tlangvâlte pawh indonaah khandaihin. 22 Rûntute an hnên i thlentîr phutin, An in ata ṭap thâwm thang rawh se. Mi man tûrin hum an hiat si a, Ka ke awh nân thang an kam si a. 23 Mahse, nangin aw LALPA, Mi that tûra an mi phiarna zawng zawng i hria e. An khawlohna ngaidam suh la, I mit hmuhan an sualna thai bo hek suh ang che. I hmaah chuan tlu hlawm sela, I thinur niah chuan ti nek ang che.
Bêl keh
1 LALPA chuan heti hian a ti: “Kal la, bêlvawtu hlum bêl va lei rawh; tin, mipuiho upate leh puithiam zînga upate hruai la; 2 Harsith kawngkhâr luhna bula Ben-hinom ruamah chuan kal la, chutah chuan i hnêna thu ka hrilh tûr che hi puang ang che. 3 Heti hian ti ang che: ‘Juda lalte leh Jerusalem-a chêngte u, LALPA thu hi hre rawh u. Israel-te Pathian, sipaihote LALPA chuan heti hian a ti: “Ngai teh u, he hmunah hian a hria apiang beng tikhawrh hial khawpa thil ṭha lo ka rawn thlen dâwn. 4 Mite chuan mi kalsan a, he hmun hi an tibawlhhlawh a, anmahni leh an pate leh Juda lalte pawhin an la hriat ngai hleih loh, pathian dangte hnênah rimtui an hâl avâng leh, he hmun hi mi thiam thisena an tihkhah avâng leh, 5 Baala hnêna hâlral thilhlan atâna an fate an hâlna tûr, Baala hmun sângte an din avângin; chu chu ka thupêk a ni lo va, ka sawi hek lo va, ka rilruah pawh a awm ngai lo. 6 Chuvângin, ngai teh, nite chu a lo thleng dâwn,” ’ ” LALPA thuchhuak chuan a ti, “ ‘ “Chûng niahte chuan he hmun hi Topheth vuah a ni tawh lo vang a, Ben-hinom ruam vuah a ni tawh hek lo vang; Insâmna Ruam tih a ni tawh zâwk ang. 7 Tin, hemi hmunah hian Juda leh Jerusalem thiltumte chu ka tilothlâwn ang a; tin, anni chu khandaihin an hmêlmate hmaah leh an nunna lâk tumtute kutah ka titlu ang; an ruangte chu chunglêng savate leh leia ramsate chaw atân ka pe ang. 8 Tin, he khawpui hi mak tihah leh chek khuman ka siam ang a, a kal apiangin a chhiat tawhte avâng chuan mak an ti ang a, an chek khum bawk ang. 9 An fanute leh an fapate sa ka eitîr ang a; tin, an hmêlmate leh an nunna lâk tumtuten an huala an tihmangan hunah chuan tu pawhin an ṭhenawmte sa an ei ang.” ’ 10 “Tin, i kalpuite mit hmuhah bêl chu i tikeh ang a, 11 an hnênah heti hian ti ang che, ‘Sipaihote LALPA chuan heti hian a ti: “Hetiang bawk hian he mite leh he khua hi ka tikeh ang; bêlvawtu bêl miin a tihkeha, siam ṭhat leh rual a ni lo ang hian; tin, Topheth-ah an phûm ang, phûmna tûr hmun dang a awm loh avângin. 12 Chuti tak chuan he hmun hi ka ti ang,” tih hi LALPA thuchhuak a ni: “Tin, chutiang bawkin he khua hi Topheth anga siam hialin a chhûnga chêngte chungah pawh ka ti ang: 13 Jerusalem inte leh Juda lalho inte, in tin mai a chunga vân lam thilte hnêna rimtui hâl tawhna zawng zawng leh, pathian dangte hnêna in tûr thilhlan leih chhuah tawhna zawng zawngte chu, Topheth hmun ang maia tihbawlhhlawh a ni ang.” ’ ” 14 Tin, Jeremia chu, LALPAN thu sawi tûra a tirhna hmun Topheth aṭang chuan a lo kal a; tin, LALPA in hung chhûngah chuan a ding a, mipui zawng zawng hnênah chuan heti hian a ti a: 15 “Israel-te Pathian, sipaihote LALPA chuan heti hian a ti: ‘Ngai teh u, thil ṭha lo ka sawi zawng zawng kha he khawpui leh a khaw dang zawng zawngah hian ka rawn thlen dâwn a ni, ka thu ngaithla lo tûra an thinlung an tihkhauh avângin?’ ”
Puithiam Pasura leh Jeremia inbeihna
1 Tin, Imera fapa, LALPA ina hotupa ber, puithiam Pasura chuan Jeremian chûng thute chu a sawi tih a lo hria a. 2 Tichuan, Pasura chuan zâwlnei Jeremia chu a vua a, LALPA ina Benjamina Kawngkhâr chhaktaa kawlah chuan a tântîr a. 3 A tûkah chuan Pasuran Jeremia chu a phelhin, Jeremia chuan a hnênah, “LALPA chuan i hmingah Pasura a vuah lo ve, Magor-Misabiba a vuah zâwk a che. 4 LALPA chuan heti hian a ti si a: ‘Ngai rawh, nangma tân leh i ṭhiante zawng zawng tân ṭihkhaiah ka siam ang che; anni chu an hmêlmate khandaihin an tlu ang a, nang lah chuan i mitin i en ngawt ang. Juda-ho zawng zawng chu Babulon lal kutah ka pe vek ang a, ani chuan Babulon-ah salah a hruai ang a, khandaihin a that ang. 5 Chu achhapah, khawpui hausakna zawng zawng te, a thawh chhuah zawng zawng te, a thil roh zawng zawng te leh Juda lalte ro zawng zawng chu an hmêlmate kutah ka pe ang a, anni chuan an rawk ang a, an man ang a, Babulon-ah an hruai ang. 6 Tin, nang Pasur, i in chhûnga awm zawng zawngte nên salah in tâng ang a; Babulon-ah chuan i kal ve ang a, chutah chuan i thi ang a, chutah chuan phûmin i awm ang a, nang leh i ṭhian, dâwt thu i lo hrilh ṭhinte zawng zawng nên hian,’” a ti a.
LALPA hnêna Jeremia phunnawina
7 Aw LALPA, nangin mi lo bum a, bumin ka awm ta a nih hi; Nang chu kei aiin i chak a, mi hneh a. Nilêngin nuihzabûr ka ni ta, mi tu pawhin mi nuihzat hi. 8 Thu ka sawi apiangin ka au chhuak a, “Inpâwngnêkna leh inramna!” tiin ka au va; LALPA thu chu ka tân chuan, nilênga dem leh hmuhsit hlawhna chauh a ni. 9 “Ani chu ka lam lo vang a, A hmingin thu ka sawi tawh hek lo vang,” ti mah ila, Ka ruh chhûnga mei kâng inkhung ta ang mai hian Ka thinlung chhûngah chuan a awm si ṭhîn; Ka pai hle hle zo lo va, ka chelh ngang lo a ni. 10 Mi tam takte phun ru ka hria: “Kil tinah hlauhawm a awm! Hêk ula, i hêk tlâng ang u,” tiin. Ka ṭhenrual, ka tlûk châng rengtute chuan, “Bumin a awm ang a, kan hneh ang; A chungah kan phuba kan la ang,” an ti a. 11 Mahse, LALPA chu mi huaisen hlauhawm tak angin ka hnênah a awm a. Mi tiduhdahtute chu an tlu ang a, mi hneh lo vang. Mualpho takin an awm ang a, an hlawhtlin dâwn loh avângin. An kumkhaw hmingchhiatna chu theihnghilhin a awm lo vang. 12 Aw, sipaihote LALPA, mi felte fiahtu, Thinlung leh rilru hmu tlang ṭhîntu, An chunga i phuba lâk chu mi hmuhtîr teh; Ka chungchâng thu hi ka kawltîr ta si che a. 13 LALPA hnênah chuan hla sa ula, LALPA chu fak rawh u; Thil sual titute kut ata ṭanpui ngaite nunna chu a hum si a. 14 Ka pian chhuah ni chu ânchhe dawngin awm rawh se! Ka nuin mi hrin ni chu malsâwmin awm suh se! 15 Ka pa hnêna, “Fapa i nei ta e!” Tih thu rawn thlena, Rawn tilâwmtu chu Anchhe dawngin awm rawh se. 16 Chu mi chu, LALPAN khawngaih hlek lova A tihram khuate angin awm rawh se. Zîng lamah chuan au thâwm hria sela, Chhûn a lo nih chuan râlkhêl thâwm; 17 Chhûl chhûnga mi tihhlum loh avâng khân; Chuti ni se, ka nu chu ka thlân a ni mai tûr a, A chhûl chuan mi pai kumkhua mai tûr. 18 Engah kher nge chhûl ata ka lo chhuah le, Thawk rim leh lungngaia awm tûra, Mualpho rêng rênga ka dam chhûng nite hmang tûr hian?
Jerusalem tlâwm tûr thu hrilh lâwkna
1 Lal Zedekian Malkia fapa Pasura leh Maaseia fapa puithiam Zephania-te chu Jeremia hnênah a tîr a, 2 “Babulon lal, Nebukadnezzara chuan min do ta si a, LALPA chuan a thiltih ropui tak a tih ṭhin ang khân min pui duh mialin, a kîrtîr leh mai law maw tih LALPA min lo zawh sak teh se,” tia sawi tûrin. Chuta Jeremia hnêna LALPA thu lo thleng chu hei hi a ni. 3 Tin, Jeremia chuan an hnênah, “Zedekia hnênah chuan hetiangin va sawi rawh u: 4 ‘Israel-te Pathian, LALPA chuan heti hian a ti: “Ngai rawh, Babulon lal leh Kaldai mi, kulh pâwna hualtu che i dona râlthuam hriamhrei chu ka dang bet ang a; tin, he khawpui chhûngah hian anni chu ka hruai khâwm ang. 5 Keimah ngei pawhin thinrim leh lungni lo tak leh thinur takin, bân pharin bân tha chak hmangin ka do vang che. 6 Hemi khuaa chêng mihringte leh rante hi ka tihlum ang a, hripuiin an thi ang. 7 Chumi hnuah chuan,” LALPA thuchhuak chuan a ti, “Juda lal Zedekia leh a ṭhuihruaite leh mi dang, he khuaa hri leh khandaih leh ṭâma thi lote chu, Babulon lal Nebukadnezzara kutah leh an hmêlmate kutah leh anmahni thah tumtute kutah chuan ka pe ang. Khandaih hriamin a that ang a, a khawngaih hauh lo vang a, a zuah hek lo vang, a lainat bawk hek lo vang.” ’ 8 Tin, hêng mipuite hnênah hian heti hian va sawi rawh, ‘LALPA chuan heti hian a ti: “Ngai rawh u, thihna kawng leh nunna kawng ka dahsak che u hi. 9 He khawpui chhûnga awm chu khandaihin emaw, ṭâmin emaw, hrîin emaw an thi ang; Kaldai a hualtu che u hnêna chhuaka inpete erawh chu an nung ang, an nunna chu indo lâwmman atân a ni ang. 10 He khawpui ṭhatna tûr ni lo, a chhiatna tûr ka tum tlat tawh a ni; Babulon lal kutah pêk a ni ang a, ani chuan meiin a hâl ang,” tih hi LALPA thuchhuak a ni.’
Juda lal chhûngkaw chunga rorêlna lo thleng tûr
11 “Juda lal chhûngte chungchâng thu-ah chuan, ‘LALPA thu hi ngaithla rawh u, 12 aw Davida chhûngte u! LALPA chuan heti hian a ti: Zîngah chuan dik takin ro rêl ula, Tiduhdahtu kut ata rawk tuara chu chhanchhuak ula; Chuti lo chu, ka thinurna mei angin a chhuak ang a, Tu ma ṭhelh rual lohvin a kâng ang e, In thil sual tih avâng hian. 13 Ngai teh u, ruam zâwla chêngte u, Nangni ruam zâwl lungpuia chênga, “Tute nge kan awmnaah lo lût ang?” titute u, Ka khing dâwn che u a ni, LALPA thuchhuak chuan a ti. 14 In thiltih rah ang zêlin ka hrem ang che u a, A ramngawah chuan mei ka chhuah ang a, A vêl zawng zawng chu a kâng ral ang,’ ” LALPA thuchhuak chuan a ti.
Juda lal chhûng hnêna Jeremia thuchah
1 LALPA chuan heti hian a ti; “Juda lal inah zu kal la, he thu hi zu sawi rawh. 2 ‘Aw Juda lal, Davida ṭhutphah chunga ṭhu, nang leh i ṭhuihruaite leh i mi, hêng kawngkhâra lûtte nên hian, LALPA thu hi ngaithla rawh u, ti la: 3 LALPA chuan heti hian a ti: “Dik tak leh fel takin rorêl ula, tiduhdahtu kut ata rawk tuara chu chhanchhuak ula; tin, mikhual te, pa nei lo te leh hmeithai chungah te dik lohna emaw, pâwngnêkna emaw chîng suh u; he hmunah hian mi thiam thisen pawh chhuah hek suh u. 4 He thu hi zâwm ngei ni ula chuan, Davida ṭhutphah chunga lalte chu tawlailîrte leh sakawrte chunga chuangin, anmahni leh an ṭhuihruaite leh an mite chu he in kawngkhârahte hian an lût ngei ang. 5 Amaherawhchu, hêng thute hi in ngaihthlâk loh chuan he in hi a ram ang, tiin, mahni inchhâlin chhia ka chham a ni,” ’ ” tih hi LALPA thuchhuak a ni. 6 LALPA chuan Juda lal chhûngkaw chungchâng thu hetiangin a sawi a: “Nang chu ka tân Gilead ang, Lebanon tlâng chhîp ang i ni; Mahsela, thlalêr ka chantîr ang chia, Luahtu awm lo khawpui ang mai hian. 7 Nangmah tiboral tûrte, hriamhrei nei ṭheuhvin, Ka buatsaih ang a; I sidar thing thlante an kit ang a, Meiah an tuah ang. 8 “Tin, hnam dang tam takten he khawpui hi an pal tlang ang a, mi tinin mahni ṭhenawmte hnênah, ‘LALPA chuan he khawpui ropui tak hi eng vânga heti taka ti ta nge maw ni chu le?’ an ti ang. 9 ‘An Pathian, LALPA thuthlung chu an hawisana, pathian dangte an biaka, an rawng an bâwl vâng a ni,’ ” tiin an chhâng ang.
Jehoahaza chung thua Jeremia thuken
10 Thi ta chu ṭah suh ula, sûn hek suh u; Kal bo taa erawh chu nasa takin ṭah rawh u, A lo kîr leh dâwn tawh si lo va, A pianna ram hi a hmuh leh dâwn tawh loh avângin. 11 Juda lal Saluma, Josia fapa, a pa Josia aia rorêltu, he hmun ata kal chhuak ta chungchâng thu chu LALPAN heti hian a sawi: “Hetah hian a lo kîr leh tawh lo vang. 12 Sala an hruaina hmunah, chutah ngei chuan a thi ang a, he ram hi a hmu leh tawh lo vang.
Jehoiakima chung thua Jeremia thuken
13 “Fel lohnaa in saa, Dik lohnaa a pindan chungnungte siamtu, A thlâwna mahni ṭhenawmte tha chhawra, Hlawh pe duh lotu chung chu a pik e; 14 ‘In ropui tak ka insak ang a, Pindan chungnung zau takte neiin, Tukverhte ka hawng ang a, Sidar thingin ka thuah chhuak ang a, Rawng sen ka hnawih ang,’ titu chung chu. 15 Sidar thinga rual i khûm avângin, Lalah i inngai maw? I pa khân a eiin a in a, Dik takin ro a rêl a ni lo vem ni? Chu chu a tân a ṭha a ni. 16 Mi rethei leh tlachhamte chu a rêlsak a, Chu chu a ṭha a ni. Hei hi mi hriat dân tûr chu a ni lo vem ni?” Tih hi LALPA thuchhuak a ni. 17 “Nimahsela, i duhâmna atân te, Mi thiam thisen chhuah nân te, Hnehchhiah nân leh pâwngnêk nân chauh I mit leh i rilru i pu a ni.” 18 Chu vâng chuan Juda-te lal Jehoiakima, Josia fapa chung thu chu LALPA chuan heti hian a sawi a: “ ‘Aw ka unaupa!’ tiin emaw, ‘Aw ka farnu!’ tiin emaw An ṭah hek lo vang a. ‘Aw lalpa!’ tiin emaw, ‘Aw ropui ber!’ tiin emaw An sûn hek lo vang. 19 Jerusalem kulh pâwn lama theh chhuaha, paihin, Sabengtung phûma phûmin a awm ang.
Jerusalem mite hnêna Jeremia thuken
20 Lebanon-ah chho la, au rawh, Basan-ah i aw chhuah la, Abarim aṭangin au rawh, I hmangaitu zawng zawng an boral ta si a. 21 I hlawhtlinin i hnênah thu ka sawi a, Nang lah chuan, ‘Ka ngaithla lo vang,’ i ti a, Ka âwkâ i ngaihthlâk loh hi, I tleirâwl aṭangin hei hi i awm dân a ni. 22 Thlîin i berâmpute zawng zawng a châwm ang a, I hmangaitute salah an tâng a, Nang pawh i sualna zawng zawng avângin, Mualpho tak leh mangang takin i la awm ngei ang. 23 Aw Lebanon tlânga chêng, Sidar thing zînga bu khuartu, Natna i chunga a lo thlena i han khawngaihthlâk tûrzia mai chu! Hmeichhe nau vei na ang mai hian. 24 “A nuna ka nun chhûng chu,” tih hi LALPA thuchhuak a ni, “Juda lal Konia, Jehoiakima fapa chu ka kut ding lama nemna zungbun ni mah la, chuta ta chu ka phawi ngei ang che. 25 Tin, thah tûra zawngtu che kutah, Babulon lal Nebukadnezzara kutah leh Kaldai-ho kutah ngei chuan ka pe ang che. 26 I pianna ni lo ram dangah nang leh i nu a hringtu che hi ka paih chhuak ang che u a, chutah chuan in thi ang. 27 A rilrua kîr leh an châk êm êmna ramah chuan an kîr leh tawh hek lo vang. 28 “He Konia hi bêl keh sawm, hmuhsitawm a ni lâwm ni? Bêl a chhûnga duh zâwng awm lohna chu a ni lâwm ni? Engah nge amah leh a thlahte chu theh chhuaha, Ram an hriat ngai lohvah chuan paih chhuaha an awm? 29 Aw, leilung, leilung, leilung, LALPA thu hi ngaithla rawh! 30 LALPA chuan heti hian a ti: ‘He mi hi fa nei lo, A dam chhûnga hlawhtling lo tûr mi a ni, A thlahte tu mah hlawhtlinga, Davida ṭhutphah chunga ṭhu tûr leh Judai rama rorêl leh tûr an awm dâwn si lo,’ ” Tiin ziak rawh u.
Lal beisei tûr
1 “Ka ran tlatna hmuna berâm tiborala tidarhtuho berâmpute chu an chung a pik e,” tih hi LALPA thuchhuak a ni. 2 Chuvângin, LALPA, Israel-te Pathian chuan ka mite vêngtu berâmpuho chungchâng thu-ah chuan heti hian a ti: “Ka ran rualte chu in tidarh a, in ûm bo va, in kan lo va. Ngai rawh u, in thil tihsual avâng hian ka rawn kan dâwn che u a ni,” tih hi LALPA thuchhuak a ni. 3 “Tin, ka ran rual la awm chhunte chu, ka ûm darhna ram zawng zawng ata ka hruai khâwm leh ang a, an huang chhûngah ka khalh khâwm ang a, rah duh tak an ni ang a, an pung ang. 4 Anmahni ngaihsak tûr an tân berâmpu ka dah ang a, an hlau tawh lo vang a, an mangang tawh hek lo vang a, a tua mah bo an awm tawh bawk hek lo vang,” tih hi LALPA thuchhuak a ni. 5 “Ngai teh u, Davida tân zâr fel ka chhuahsak hun tûr chu a lo thleng dâwn,” tih hi LALPA thuchhuak a ni; “Ani chu lalah a ṭhu ang a, fing takin a ti ang a, ram pumah dikna leh felna a hlen ang. 6 A hun chhûngin Juda chu chhandam a ni ang a, Israel chu him takin a awm ang. Tin, hei hi a hming an la vuah tûr chu a ni, ‘LALPA chu kan felna a ni,’ tih hi. 7 “Tichuan, ngai teh u, a hun a thleng dâwn,” LALPA thuchhuak chuan a ti. “ ‘Israel mite Aigupta ram ata hruai chhuaktu LALPA chu a nuna a nun chhûng chu,’ ti tawh lovin, 8 ‘Hmâr lam ram leh a ûm darhna ram zawng zawng ata Israel chhûngte thlahho hruai chhuaka, hruai kîr lehtu LALPA chu a nuna a nun chhûng chu,’ an ti tawh zâwk ang. Tin, anmahni ram ngeiah an chêng ang.”
Zâwlneiho chungchânga Jeremia thuken
9 Zâwlneite chungchâng thu chu, Lungrilah ka lung a va chhe êm! Ka ruh zawng zawngte chu a khûr a, Zu rui ang mai ka ni, Zuin a fan hneh mi ang mai hian, LALPA vâng leh a thu thianghlim vângin. 10 Ram chu uirehovin a khat a, Anchhia avângin ram chuan a sûn a, Thlalêr hnim hring hmunte chu a ro zo ta. An kawng chu a sual a, An chakna chu a dik lo. 11 “Zâwlneite leh puithiamte chuan Pathian an pawisa lo va; Ka in chhûng ngeiah pawh an sualna ka hmu,” LALPA thuchhuak chuan a ti. 12 “Chuvângin, an tân an kalna kawng chu, Zân thim kawng nâl ang hi a ni ang a, Tah chuan ûmin an awm ang a, an tawlhthlu ang, An chungah thil ṭha lo ka rawn thlen dâwn si a, Anmahni hremna hun chu,” LALPA thuchhuak chuan a ti. 13 “Samari zâwlneite chungah tenawm ka hmu, Baala chhâlin thu an sawi a, Israel-te an hruai bo va. 14 Jerusalem zâwlneiho chungah pawh Thil râpthlâk tak ka hmu, An uire a, dâwtin an khawsa a, Thil sual titute kut chu an tichak a, Tu mahin an sual sim an tum loh phah a; Ka tân chuan Sodom khuaa mite ang an lo ni vek a, A khaw chhûnga mite zawng zawng pawh Gomorra khuaa mite ang mai.” 15 Chuvângin, zâwlneiho chungchâng thu-ah chuan Sipaihote LALPA chuan heti hian a ti: “Ngai rawh u, saiin ka châwm ang a, Thil khâ ka intîr ang a; Jerusalem-a zâwlneite hnên aṭang chuan Ram pumah Pathian pawisak lohna a chhuak si a.” 16 Sipaihote LALPA chuan heti hian a ti: “Zâwlnei in hnêna thu sawitute thu chu ngaithla suh u; engmahlo an zirtîr che u a, LALPA kâ ata ni lo anmahni rilru suangtuahte an sawi ṭhîn. 17 LALPA thu hmusittute hnênah chuan, ‘I tân a ṭha ang,’ an ti châmchî a; tin, mahni duh zâwng ti lui tlattute hnênah chuan, ‘Thil ṭha lo eng mah i chungah a lo thleng lo vang,’ an ti a. 18 “LALPA remruatnaah tu nge tel ngaia, A thu dawnga hre tûr tu nge awm? A nih leh a thu chu tu nge ngaihvena ngaithla awm? 19 Ngai teh u, LALPA thlipui chu, Thinurna chu a chhuak ta, A ni, ṭhâwngaleivir thlipui chu; Mi sualte lu chu a nuai ang. 20 LALPA thinrimna chu a kîr mai lo vang, A rilrua a tum tlat tawhte chu A hlena, a tih zawh zet hma chuan; Ni hnuhnûngahte chuan in la hre fiah ang. 21 Zâwlneite chu ka tirh lohvin an tlân a, An hnêna thu ka sawi loh pawhin thu an sawi a. 22 Ka remruatnaah chuan awm ve ni sela, Ka thu hi ka mite hnênah an puang tûr a, An thiltih dik loh ata an hawi kîrtîr tûr. 23 “Hla taka awm Pathian ni lovin, hnai tea awm Pathian em ni ka nih?” tih hi LALPA thuchhuak a ni. 24 “Hmun biruah ka hmuh theih loh tûra biru thei an awm dâwn em ni?” tih hi LALPA thuchhuak a ni. “Lei leh vânah hian ka khat a ni lâwm ni?” tih hi LALPA thuchhuak a ni. 25 “ ‘Mumangah ka mang e, mumangah ka mang e,’ tia ka hminga dâwt sawitu zâwlneiho thusawi chu ka hria a ni. 26 Zâwlnei dâwt sawi ṭhîn, mahni thinlung inbum chawpa thusawi ṭhînte thinlungah chuan hei hi eng chen nge a awm dâwn? 27 Anni chuan an vêngte hnênah an mumang hrilhin ka mite ka hming theihnghilhtîr an tum a, an paten Baala avânga ka hming an theihnghilh ta ang khân, 28 zâwlnei mumang nei chuan a mang chu sawi rawh se, ka thu neitu chuan ka thu chu dik takin sawi rawh se. Buhpâwl leh buhfang chuan eng nge inanna an neih?” tih hi LALPA thuchhuak a ni. 29 “Ka thu chu mei ang, tuboh, lung chhut sawmna ang a ni lo vem ni?” tih hi LALPA thuchhuak a ni. 30 “Chuvângin, ngai rawh u, zâwlneiho, ka thu inrûksak tawn ṭhînte chu ka do a ni,” tih hi LALPA thuchhuak a ni. 31 “Ngai teh u, zâwlnei mahni dang tinâla, ‘LALPAN a ti,’ ti ṭhînte chu ka do a ni,” tih hi LALPA thuchhuak a ni. 32 “Ngai teh u, mumang dâwt mai mai sawia, hrila, an dâwt thute leh an uanthuanna thu lawilote avânga ka mite hruai botu zâwlneite chu ka do a ni,” LALPA thuchhuak chuan a ti. “Ka tîr si lo va, thu ka pe hek lo va, he mipuite hi an tihnemhnâng hek lo vang,” tih hi LALPA thuchhuak a ni.
LALPA tâna ninawm
33 “Hêng mipuite zînga mi tuin emaw, zâwlnei tuin emaw, puithiam tuin emaw, ‘LALPA phurrit chu eng nge ni?’ tia an zawh che chuan heti hian i chhâng dâwn nia, ‘Nangmahni hi phurrit chu in ni, ka paih bo dâwn che u,’ tih hi LALPA thuchhuak a ni. 34 Zâwlnei emaw, puithiam emaw, mi tuin emaw ‘LALPA phurrit’ ti an awm chuan, chu mi leh a chhûngte chu ka hrem ang. 35 Tichuan, mi tu pawhin a ṭhenawmpa hnênah leh tu pawhin a unaupa hnênah, ‘LALPA chuan engtin nge a chhân? LALPA chuan eng nge a sawi?’ tiin in inzâwt ang. 36 LALPA phurrit chu in lam tawh lo vang a, mi tu pawh ama thusawi chu a tân phurrit a ni dâwn si a. Pathian nung, sipaihote LALPA, kan Pathian thu chu in kailek zo ta si a. 37 Zâwlnei hnênah chuan, ‘LALPA chuan engtin nge a chhân che? LALPA chuan eng nge a sawi?’ ti ang che. 38 Tin, ‘LALPA phurrit chu’ in tih vaih chuan, LALPA chuan heti hian a ti: ‘ “LALPA phurrit chu!” in ti tûr a ni lo,’ tia ka tirh chea, ‘LALPA phurrit chu!’ tia thu in sawi avângin; 39 tichuan, ngai rawh u, ka pawt dâwk ngei ang che u, ka kiang hnai ata ka paih bo vang che u, nangni leh he khawpui, in hnênah leh in pate hnêna ka lo pêk tawh nên hian. 40 Tin, kumkhaw dem chhiatna leh mualpho rengna, theihnghilh rual loh chu, in chungah ka rawn thlen ang.”
Theipui rah bâwm
1 Tin, LALPA chuan mi entîr a, ngai teh, theipui bâwm hnih LALPA biak in hmaah a lo inhûng a, Babulon lal Nebukadnezzaran Juda-te lal Jekonia, Jehoiakima fapa leh Juda hotute, mi themthiamte leh thîrdêngte nêna Jerusalem aṭanga Babulon sala a hruai hnu khân. 2 Bâwm khatah chuan theipui ṭha tak, theipui hmin hmasa ang mai a awm a; bâwm dangah erawh chuan theipui chhe tak, ei tlâk loh khawpa chhia a awm a. 3 Tin, LALPA chuan ka hnênah, “Eng nge i hmuh, Jeremia?” a ti a. Kei chuan, “Theipui, theipui ṭha, ṭha tak mai leh a chhia, ei tlâk loh khawpa chhia,” ka ti a. 4 Tin, LALPA thu chu ka hnênah a lo thleng a: 5 “LALPA, Israel-te Pathian chuan heti hian a ti: ‘Juda sal tângte, Kaldai-ho rama an ṭhatna tûra ka tirh chhuahte chu, hêng theipui ṭha ang hian ka en dâwn a ni. 6 An ṭhat nân an chungah ka mit ka fûktîr ang a, he ramah hian ka hruai kîr leh ang; anmahni ka din ang a, ka ṭhiat lo vang; ka phun ang a, ka pawt lo vang. 7 Tin, LALPA ka ni tih min hriat nân thinlung ka pe ang; ka mite an ni ang a, an Pathian ka ni ang; an thinlung zawng zawng nên ka hnênah an lo kîr dâwn si a. 8 “ ‘Theipui chhia, ei tlâk loh khawpa chhia ang hian Juda-te lal Zedekia leh a hotute leh Jerusalem-a châmbâng, he rama la awmte leh Aigupta rama chêngte chu ka hawisan ngei ngei ang. 9 Hrehawm taka lei chung ram zawng zawng zînga vawrh lân vawrh lân tûrin, ka hnawh bona zawng zawnga sawichhiat leh tehkhin leh hauh leh ânchhe lawh ni tûrin ka hluihlâwn ang. 10 Anmahni leh an pate hnêna ka pêk ram ata hi lem zawh an nih thlengin an zîngah khandaih te, ṭâm te, hri te ka tîr ang,’ ” tiin.
Hmâr lam ata hmêlma
1 Juda-te lal Jehoiakima, Josia fapa kum linaa Juda mite zawng zawng chungchânga Jeremia hnêna thu lo thleng chu: chumi hun chu Babulon lal Nebukadnezzara kum khatna a ni a, 2 chu thu chu zâwlnei Jeremian Juda mi zawng zawng leh, Jerusalem-a awm zawngte hnêna a sawi chu a ni. 3 “Kum sawmhnih leh kum thum chhûng ngawt, Juda-te lal Josia, Amona fapa kum sâwm leh kum thumna aṭanga tûn thlengin, LALPA thu chu a lo thleng ṭhîn a; zîng tak taka thovin in hnênah ka sawi ka sawi a; mahse, in ngaithla lo va. 4 Tin, LALPAN in hnênah a rawngbâwltu zâwlneite zawng zawng a tîr a, zîng tak taka thovin a tîr a; mahse, in ngaithla lo va, hre tûrin in beng in dawh hek lo; 5 chûng zâwlneite chuan, ‘Mi tin mahni sual kawng ata lo kîr ula, LALPAN in hnênah leh in pate hnêna hmânlai aṭanga kumkhua atâna a pêk che u ramah hian chêng rawh u. 6 Pathian dangte hnêna an rawngbâwl tûr leh chibai bûk tûr leh, in kut hnathawha ka thin tiur tûrin kal suh u; tichuan, ka tina lo vang che u,’ an ti ṭhîn a. 7 Mahse, in tâna ṭha lo tûra in kut hnathawha mi tithinur tûrin mi ngaithla lo,” LALPAN a ti. 8 “Chuvângin, sipaihote LALPA chuan heti hian a ti: ‘Ka thu in ngaihthlâk loh avângin, 9 ngai teh u, hmâr lam hnam zawng zawng chu ka chah ang,’ LALPA thuchhuak chuan a ti. ‘Ka rawngbâwltu, Babulon lal Nebukadnezzara pawh ka chah ang a, anni chu he ram leh a chhûnga awmte leh, hêng vêla hnam awm zawng zawngte bei tûrin ka rawn hruai ang a; ka tiboral dêr ang a, mak tihah leh chek khumah leh ṭiau reng atân ka siam ang. 10 Tin, an hnên ata hlimna thâwm leh lâwmna thâwm te, moneitu aw leh mo aw te, buh râwt thâwm ri leh khâwnvâr êng te ka la bo vang. 11 He ram pum pui hi a chhia ang a, a ram ang; tin, hêng hnamte hian Babulon lal rawng kum sawmsarih an bâwl ang. 12 Tin, kum sawmsarih a ral hunah Babulon lal leh chu hnam chu, Kaldai-ho ram chu, an sualna avângin ka hrem ang a; kumkhuain ka tiṭiau vang,’ LALPA thuchhuak chuan a ti. 13 Chu ram chungah chuan ka thu an chunga ka sawi zawng zawng, Jeremian hnam zawng zawng chunga a sawi, he lehkhabua ziak zawng zawng hi ka thlentîr ang. 14 Hnam hrang hrangte leh lal ropui tak takte chuan an zînga an mi duh an thing dâwn si a; an thiltih ang zêl leh an kut hnathawh ang zêlin ka thungrûl dâwn a ni.”
Hnam dangte chunga Pathian rorêlna
15 LALPA, Israel-te Pathian chuan ka hnênah heti hian a ti: “Ka kuta he thinurna uain no hi la la, ka tirhna tûr che hnam zawng chu intîr rawh. 16 An in ang a, an pai thlawk thlawk ang a, an â ang, an hnêna ka tirh tûr khandaih avâng chuan,” tiin. 17 Tin, LALPA kuta no chu ka la a, LALPAN mi tirhna hnam zawng chu ka intîr a; 18 chûng chu hêngte hi an ni: Jerusalem leh Judai khawpui te, chuta lalte leh hotute chu, ṭiauna te, mak tihah te, chek khumah te, ânchhiaah te chang tûrin, tûna an awm dân ang hian; 19 Aigupta lal Pharaoa leh a chhiahhlawhte, a hotute leh a mi zawng zawngte; 20 hnam dang pawlhtu zawng zawng te; Uz rama lal zawng te; Philistia rama lal zawng zawng, Askelon leh Gaza leh Ekron leh Asdod-a la awm chhun lalte chu; 21 Edom leh Moab leh Amon thlahte; 22 Tura lal zawng zawngte leh Zidon lal zawng zawng leh tuipui kam lalte; 23 Dedan leh Tema leh Buz leh an bak sam mêt zawng zawngte; 24 Arabia lal zawng zawngte, thlalêra chêng hnam inchawhpawlhho lal zawng zawngte; 25 Zimri lal zawng zawngte, Elam lal zawng zawngte, Media lal zawng zawngte; 26 hmâr lam lal zawng zawngte, a hla leh a hnaia mi a indawt zêlin; lei chunga awm khawvêl lalram zawng zawngte chu; tin, an in hnuah chuan Sesak lalin a in ang. 27 “Tin, an hnênah, ‘Sipaihote LALPA, Israel-te Pathian chuan heti hian a ti: “In ula, rui ula, lua ula, tlu ula, tho leh suh u, khandaih in zînga ka tirh tûr avâng chuan,” ti ang che.’ 28 “Tin, i kuta no chu in tûra an lâk duh loh chuan an hnênah heti hian ti ang che: ‘Sipaihote LALPA chuan heti hian a ti: “In in ngei ang! 29 Hei, ka hming vuah khawpuiah thil ṭha lo ka ti ṭan a, nangni hrem loh tawpin in awm ang maw? Hrem lohvin in awm lo vang, leilunga chêng zawng zawngte chungah khandaih ka lek dâwn si a,” tih hi sipaihote LALPA thuchhuak a ni.’ 30 “Chuvângin, an chungah hêng hi sawi la, an hnênah heti hian ti rawh: ‘LALPA chu hmun sâng aṭangin a rûm ang, A chênna thianghlim aṭangin a râwl a chhuah ang; A huang chhûngah nasa takin a rûm ang. Grêp sâwrtute angin a au vang, Leilung luah zawng zawngte chungah chuan. 31 Leilung tâwp thlengin thâwm a thangkhâwk ang a, LALPA chuan hnamte a khing a, tîsa zawng zawng chungah ro a rêl dâwn, Mi suaksual chu khandaih hnênah a pe ang,’ ” LALPA thuchhuak chuan a ti. 32 Sipaihote LALPA chuan heti hian a ti: “Ngai teh, thil ṭha lo chuan hnam tin a rawn hrût dâwn e, Thlipui na tak mai lei hmun tâwp aṭangin a lo thawk dâwn. 33 “Chumi nia LALPA thahte chuan lei tâwp aṭangin lei tâwp thlengin an dâp ang a; sûn loh leh khâwm loh leh phûm lohvin an awm ang a; lei chunga êkdûr mai an ni ang. 34 Berâmpute u, chiau vak vak ula, ṭap rawh u! Nangni berâm rual zînga puipate u, tâl tawp tawp rawh u! Thaha in awm ni leh in darhsarh nite a lo thleng takzet a nih hi; Bêl duhawm angin in tlu ang. 35 Berâmpute chuan tlân bona kawng an nei lo vang a, Berâm rual zînga puipate pawhin pumpelhna kawng an nei lo vang. 36 Berâmpute ṭap thâwm chu, Berâm rual zînga puipate chiau ri nên, LALPAN an tlat hmun a tihram mêk avângin. 37 Huang muanawmte chu tihreh ṭhiapin an awm ta e, LALPA thinrimna nasa tak avângin. 38 A tawmna a chhuahsan ta, sakeibaknei ang maiin. An ram chu a chhe zo ta si a, Hnehchhiahna râwng tak avâng Leh a thinrimna nasa tak avângin.”
Rorêltute hmaah Jeremia an dintîr
1 Juda lal Josia fapa Jehoiakima lal ṭan tirhin he thu hi LALPA hnên ata a lo thleng a, 2 “LALPA chuan heti hian a ti: LALPA in hung chhûngah ding la, Juda khawpui zawng zawng, Pathian be tûra LALPA ina lo kalte hnênah chuan, an hnêna sawi tûr thu ka pêk zawng zawng chu pakhat mah zêp lovin sawi vek rawh. 3 Mi tinin an awm dân sual kalsanin an ngaithla mial mahna, an thil tihsual avânga an chunga thil ṭha lo tih ka tum chu ka lamlêt theih nân. 4 “Tin, nangin an hnênah, ‘LALPA chuan heti hian a ti: “Mi ngaihthlâk lohva, ka dân in hmaa ka dah in zawm lohva, 5 zîng taka thova tîrin, in hnêna ka tirh ka rawngbâwltu zâwlnei thu in bengkhawn loh chuan (in lo bengkhawn tawh si lo va), 6 he in hi Silo angin ka siam ang a, lei chunga hnam zawng zawngte ânchhia dawng tûrin ka siam ang,” ’ ti ang che.” 7 Tin, puithiamte, zâwlneite leh mipui zawng zawngte chuan LALPA ina Jeremian hêng thu a sawi hi an ngaithla a. 8 Tin, heti hi a ni a, mipui zawng zawngte hnêna sawi tûra LALPAN thu a pêk zawng zawng chu a sawi zawhin, puithiamte, zâwlneite leh mipui zawng zawng chuan amah chu an man ta a. “I thi mawlh ang! 9 Engah nge LALPA hming chhâla, ‘He in hi Silo ang a ni ang a, he khawpui hi luahtu awm lovin a ṭiau vang,’ tia i sawi ni?” an ti a. Tichuan, LALPA inah chuan mipui zawng zawng chuan Jeremia chu an bâwr ta huai huai a. 10 Tin, Juda hotute chuan hêng thu hi an hriatin, lal in aṭangin LALPA in luhna kawngka tharah an ṭhu a. 11 Tin, puithiamte leh zâwlneite chuan hotute leh mipui zawng zawngte hnênah chuan, “He mi hi thi tlâk a ni! Khawpui chhiat tûr thu, in benga in hriat angin a sawi lâwk si a,” an ti a. 12 Tin, hotute leh mipui zawng zawngte hnênah chuan Jeremia chuan, “In thu ngaihthlâk tâk zawng zawng ang khân, he in leh he khawpui chhiat tûr thu hi sawi tûrin LALPAN mi tîr a ni. 13 Chuvângin, tûnah hian in awm dân leh in chêt dân siam ṭha ula, LALPA in Pathian thu chu awih rawh u; tichuan, LALPA chuan in chunga thil ṭha lo lo thleng tûr a puan tawh chu a lamlêt thei ang. 14 Kei erawh chu hei, in kuta ka awm hi. Dik leh ṭha in tih ang angin mi ti rawh u. 15 Mi tihhlum chuan, nangmahni leh he khawpui leh khua leh tuite chungah, mi thiam thisen in thlen ngei dâwn a ni tih hre mai rawh u; dik takin in benga hêng thu zawng zawng hi sawi tûrin LALPAN in hnênah mi tîr zuk nia,” a ti a. 16 Tichuan, hotute leh mipuite chuan puithiamte leh zâwlneite hnênah chuan, “He mi hi thi tûr a ni lo ve, LALPA kan Pathian hminga kan hnêna thu sawi a nih hi,” an ti a. 17 Tin, chumi rama upa tute emaw an lo ding a, mipui awm khâwmte hnênah chuan, 18 “Mika, Moreseth mi chuan Juda lal Hezekia lal lai khân thu a sawi a; tin, Juda mi zawng zawngte hnênah chuan, ‘Sipaihote LALPA chuan heti hian a sawi: “Zion chu lo anga leh a ni ang a, Jerusalem chu thil chhe awm khâwm a ni ang, A in tlâng chu ramngaw hmun sâng ang a ni ang,” a ti a.’ 19 “Juda lal Hezekia leh Juda-te zawng zawng khân amah an tihlum em ni? LALPA hlauvin LALPA duhsakna chu an ngên a, LALPA chuan an chunga thil ṭha lo thleng tûr a puan chu a lamlêt ta a ni lo vem ni? Keini zawngin kan chungah thil ṭha lo kan thlen dâwn a nih hi.” 20 Tin, mi dang, LALPA hminga thu sawi Kiriath-jearim-a mi Semaia fapa Uria kha a awm bawk a, Jeremia thusawi zawng zawng ang bawkin he ram leh khawpui chhiat tûr thu hi a sawi a. 21 Lal Jehoiakima leh a mi ropuite zawng zawng leh hotute zawng zawngin an hriatin, lal chuan tihhlum a tum a; mahse, Urian a hriatin a hlau va, a tlân bo va, Aigupta ramah a kal ta a. 22 Lal Jehoiakima chuan Aigupta ramah mi a tîr a, Akbora fapa Elnathana leh mi dangte. 23 Aigupta ram aṭangin Uria chu an hruai chhuak a, lal Jehoiakima hnênah an rawn hruai a, ani chuan khandaihin a that a, a ruang chu vântlâng thlânah an paih lût a. 24 Mahse, Saphana fapa Ahikama chuan, mipui hnêna tihhlum tûra an pêk loh nân Jeremia chu a ṭan a.
Jeremian bâwng nghâwngkawl a bât
1 Juda lal Josia fapa Zedekia lal ṭan tirhin, LALPA hnên ata he thu hi a lo thleng a. 2 LALPA chuan ka hnênah heti hian a ti: “Nghâwngkawlte leh a hruite siam la, i nghâwngah bât rawh. 3 Tin, Edom lal te, Moab lal te, Amon mite lal te, Tura lal te, Zidon lal te hnênah, Juda lal Zedekia hnêna mi tirh Jerusalem-a lo kalte kutah thawn rawh. 4 Hêng thu hi an pute hnênah sawitîr rawh: Heti hian Israel Pathian, sipaihote LALPA chuan a ti: ‘Hetiang hian in pute hnênah in sawi tûr a ni: 5 Ka thiltihtheihna ropui tak leh ka bân pharin lei te, mihring te leh lei chunga sa te ka siam vek a, pêk âwm ka tihte hnênah chuan ka pe a. 6 Tûnah pawh ka rawngbâwltu Babulon lal Nebukadnezzara kutah he ram zawng zawng hi ka pe tawh a ni; ramsate pawh ama rawng bâwl tûrin ka pe bawk a ni. 7 A tlûkchhiat hun a thlen hma chuan, hnam zawng zawngin amah leh a fapate leh a fapaa fapate rawng an bâwl ang, chumi hnuah erawh chuan hnam tam takte leh lal ropui takte chuan amah chu bawihah an siam ang. 8 “ ‘Tin, heti hi a ni ang a, Babulon lal Nebukadnezzara nghâwngkawl bât duh lo leh a rawngbâwl duh lo hnam leh lalna ram chu, khandaih leh ṭâm leh hripuiin, ama kuta ka tihboral vek hma zawng anmahni ka hrem zêl ang. 9 Nangni erawh chuan in zâwlnei te, in aienthiam te, in mumang te, in chhamphual thiam te, in dawithiam te, in hnêna, “Babulon lal rawng in bâwl lo vang,” tia sawitute chu ngaithla suh u. 10 In ram aṭanga hla taka hruai bova in awm theih nân, in hnênah dâwt thu an sawi lâwk a ni; ka hnawh chhuah che ua in boral phahna tûrin. 11 Amaherawhchu, Babulon lal nghâwngkawl bâta, a rawng bâwl duh hnam chu an ram ngaiah ka awmtîr ang a, lei an let ang a, chutah chuan an chêng reng ang,’ ” tih hi LALPA thuchhuak a ni. 12 Tin, Juda lal Zedekia hnênah hêng thu zawng zawng ang zêl hian ka sawi a: “Babulon lal nghâwngkawl bât ula, amah leh a mite rawng bâwl ula, in nung dâwn nia. 13 Babulon lal rawngbâwl duh lo hnam chungchâng LALPAN a sawi tawh ang khân engah nge khandaih te, ṭâm te, hripuitea nang leh i mite chu in thih ang le? 14 Tin, zâwlnei, in hnêna, ‘Babulon lal rawngbâwl suh u,’ titute thu chu ngaithla suh u, in hnênah dâwt thu an sawi mai a ni si a. 15 ‘Ka tirh an ni si lo va, ka hming chhâlin dâwt thu an sawi zâwk ṭhîn, nangni leh in hnêna thusawitu zâwlneite chu ka hnawh chhuaha, in boral theih nân,’ ” LALPA chuan a ti. 16 Puithiamte leh hêng mipuite zawng zawng hnênah pawh hian ka sawi bawk a: “LALPA chuan heti hian a sawi a ni: Zâwlnei in hnêna thusawitu, ‘Ngai rawh u, Babulon aṭangin LALPA in hlum bêlte chu rawn thlen a ni thuai dâwn e,’ titute thu chu ngaithla suh u, in hnênah dâwt an sawi a ni si a. 17 Anmahni ngaithla hauh suh u; Babulon lal rawngbâwl ula, in nung dâwn nia. Engah nge he khawpui hi a chhiat ang le? 18 Mahse, zâwlnei an niha, LALPA thu an hnêna awm a nih meuh chuan, LALPA in leh Juda lal in leh Jerusalem-a bungbêl hnutchhiaha la awmte chu, Babulon-ah thlen a nih loh nân sipaihote LALPA hnênah ngên ang hmiang. 19 Sipaihote LALPA chuan, ban sâng te, dâr tuizêm te, a nghahchhante leh he khawpuia bungbêl hnutchhiaha awm chhunte, 20 Babulon lal Nebukadnezzaran Juda lal, Jehoiakima fapa, Jekonia leh Juda leh Jerusalem-a mi ṭha zawng zawng, Jerusalem aṭanga Babulon sala a hruai ṭuma a lâk bâng chungchâng thu heti hian a sawi a, 21 a ni, sipaihote LALPA, Israel Pathian chuan LALPA in leh Juda lal in leh Jerusalem-a bungbêl hnutchhiaha la awm chungchâng thu a sawi a ni: 22 ‘Babulon-ah lâk bo an ni ang a, anmahni ka rawn kan hma loh chuan chutah chuan an awm reng ang; tin, ka la leh ang a, he hmunah hian ka dah kîr leh ang,’ ” tih hi LALPA thuchhuak a ni.
Jeremia leh zâwlnei Hanania
1 Tin, heti hi a lo ni a, chumi kum vêk, Juda lal Zedekia lal ṭan tirh lam, a kum lina, thla nganaah chuan zâwlnei Hanania, Azura fapa, Gibeon mi chuan puithiamte leh mipui zawng zawng hmaah LALPA inah chuan mi bia a, ka hnênah, 2 “Sipaihote LALPA, Israel Pathian chuan heti hian a ti: ‘Babulon lal nghâwngkawl chu ka titliak ta. 3 Kum hnih pumhlûm chhûngin LALPA in bungbêl Babulon lal Nebukadnezzaran hemi hmun ata a lâka, Babulon thlenga a kalpui zawng zawng kha, he hmun ngeiah hian ka rawn thlen leh vek ang. 4 He hmunah hian Juda lal Jehoiakima fapa, Jekonia leh Babulon-a kal Juda sal zawng zawng chu ka hruai kîr leh ang; Babulon lal nghâwngkawl chu ka titliak dâwn si a,’ tih hi LALPA thuchhuak a ni,” tiin. 5 Tin, zâwlnei Jeremia chuan puithiamte leh LALPA ina ding mipui zawng zawng hmaah chuan zâwlnei Hanania hnênah, 6 zâwlnei Jeremia ngei chuan, “Amen! LALPA chuan chutiangin ti tak rawh se; LALPA ina bungbêlte leh sal tânnaa mi zawng zawng, Babulon ata hemi hmuna rawn thlen tûra i sawi chu LALPA chuan ti ngei rawh se. 7 Amaherawhchu, mipui zawng zawng leh nangma benga ka thusawi hi ngaithla rawh khai. 8 Keimah leh nangma hmaah hmasâng zâwlneite chuan, ram tam takte chungah leh lalna ram ropui takte chungah indona te, thil ṭha lo te, leh hripui thu te an sawi ṭhîn a. 9 Zâwlnei, muanna thu sawitu thusawi chu a lo thlen hunah, chu zâwlnei chu LALPA chuan a tîr ngei a ni tih a hriat mai ang chu,” a ti a. 10 Tin, zâwlnei Hanania chuan nghâwngkawl, zâwlnei Jeremian a bah chu a la a, a titliak a. 11 Tin, mipui zawng zawng hmaah Hanania chuan, “Heti hian LALPA chuan a ti: ‘Hetiang ngei hian Babulon lal Nebukadnezzara nghâwngkawl chu, kum hnih pumhlûm chhûng ngeiin hnamte zawng zawng nghâwng ata ka titliak ang,’ tiin,” a ti a. Tin, zâwlnei Jeremia chuan a kalsan ta a. 12 Tin, zâwlnei Hanania chuan zâwlnei Jeremia nghâwng ata nghâwngkawl a tihtliah hnuah chuan Jeremia hnênah LALPA thu a lo thleng a, 13 “Kal la, Hanania hnênah heti hian va ti rawh, ‘Heti hian LALPA chuan a ti: “Thing nghâwngkawl chu i titliak a, a aiah thîr nghâwngkawl i siamsak zâwk a nih hi.” 14 Heti hian Israel Pathian, sipaihote LALPA chuan a ti si a: “Babulon lal Nebukadnezzara rawng an bâwl theih nân, hêng hnam zawng zawng hi thîr nghâwngkawl bahtîr a ni; ama rawng an bâwl ang. Ramhnuaia ramsate pawh amah ka pe bawk a ni,” ’ ” tiin. 15 Tin, zâwlnei Jeremia chuan zâwlnei Hanania hnênah, “Ngai rawh, Hanani, LALPAN a tîr awzâwng lo che; hêng mite hi dâwt i rintîr mai a nih zâwk hi. 16 Chuvângin, heti hian LALPA chuan a ti: ‘Ngai teh, lei chung ata hi ka tibo daih ang che. LALPA laka helna thu i sawi avângin kumin ngeiah hian i thi ang,’ ” a ti a. 17 Tichuan, chumi kum vêk, thla sarihnaah chuan zâwlnei Hanania chu a thi ta a.
Babulon rama Juda-te hnêna Jeremia lehkhathawn
1 Tin, zâwlnei Jeremian Jerusalem aṭanga sal tâng upate, puithiamte, zâwlneite, mi dangte, Nebukadnezzaran Jerusalem aṭanga Babulon-a a hruai tâk, la dam chhunte hnêna a lehkhathawn thu chu hêng hi a ni. 2 (Lal Jekonia te, lalnu te, mi tilreh te, Juda leh Jerusalem hotu te, mi themthiam te, thîrdêngten Jerusalem an chhuahsan hnu khân.) 3 Saphana fapa Elasa leh Hilkia fapa Gemaria-te kutah a thawn a ni (chûngte chu Juda lal Zedekian Babulon ramah Babulon lal Nebukadnezzara hnêna a tirhte chu an ni): 4 Israel Pathian, sipaihote LALPA chuan sal tâng zawng zawng, Jerusalem aṭanga Babulon sala ka hruaitîr tâkteho hnênah heti hian a ti: 5 “Inte sa ula, chutah chuan chêng ula; huante siam ula, a rahte ei ula; 6 nupuite nei ula, fanute, fapate hring ula; in fapate tân nupui neihsak ula, in fanute pasal neihtîr ula, fanu fapa an hrin theih nân; chutah chuan lo pung ula, kiam lam pan suh u. 7 Sala ka tântîrna che u khawpui ṭhatna tûr zawng ula, LALPA hnênah dîlsak rawh u; ama ṭhatna chuan nangni pawhin ṭhatna in hmu dâwn si a.” 8 Israel Pathian, sipaihote LALPA chuan heti hian a ti: “In zîngah zâwlneite leh aienthiamte chuan bum che u suh sela, an mumang an man pawh chu ngaithla hek suh u. 9 Ka hming chhâlin dâwt thu in hnênah an sawi a ni e; keima tirh an ni lo ve,” tih hi LALPA thuchhuak a ni. 10 LALPA chuan heti hian a ti si a: “Babulon tân kum sawmsarih chu a kin veleh ka rawn kan ang che u a, in hnêna ka thutiam ṭha tak chu ka hlen ang a, he hmunah hian ka kîrtîr leh ang che u. 11 Nangni lama ka rilru putzia chu ka inhre si a, in hun hnuhnûng tâwpah chuan beiseina pe tûr che uin, thil ṭha lo ni lovin, ṭhatna ka ngaihtuah asin. 12 Tin, min lam ang a, ka hnênah in rawn ṭawngṭai ang a, ka ngaithla ang che u. 13 Min zawng ang a, in thinlung zawng zawnga min zawn hunah min hmu ang. 14 Nangmahni hmuhin ka awm ang,” LALPA thuchhuak chuan a ti, “In awm dân ka let ang a, hnam zawng zawng zînga ka tihdarhna che u hmun ata ka hruai khâwm leh ang che u,” tih hi LALPA thuchhuak a ni, “Sala ka mantîrna che u hmun ngeiah khân ka rawn thlen leh ang che u.” 15 “LALPA chuan Babulon ramah pawh hian zâwlnei min dinsak a,” in ti si a. 16 LALPA chuan Davida ṭhutphaha lal chungchâng thu leh, he khawpuia chêng mipui zawng zawng, sala hruai tel loh, in unaute chungchâng thu-ah chuan heti hian a ti si a: 17 Sipaihote LALPA chuan heti hian a ti: “Ngai rawh u, an chungah chuan khandaih te, ṭâm te, hripui te ka rawn thlen ang a, theipui hût, a chhiat êm êm avânga ei tlâk tawp loh ang maiin ka siam ang. 18 Tin, khandaih te, ṭâm te, hripui tein ka ûm zui ang a, lei chunga lalna ram zawng zawngte zîngah thil râpthlâk takah ka siam ang a, anmahni ka tihdarhna hnam zawng zawngte zîngah chuan ânchhe dawngah, mak tih huai huaiah, chek khum tlawk tlawka sawichhiat ni tûrin ka siam ang. 19 Zîng takah thovin ka rawngbâwltu, zâwlneite hmanga ka thu in hnêna ka rawn thlen chu an pawisak loh avângin,” LALPA thuchhuak chuan a ti: “In ngaithla duh si lo,” tih hi LALPA thuchhuak a ni. 20 Chuvângin, nangni Jerusalem aṭanga Babulon-a ka tirh, sal tâng zawng zawngte u, LALPA thu chu ngaithla rawh u. 21 Israel Pathian, sipaihote LALPA chuan Kolaia fapa Ahaba leh Maaseia fapa Zedekia, ka hming chhâla in hnêna dâwt thu sawitute chungchâng thu-ah chuan heti hian a ti: “Ngai rawh u, Babulon lal Nebukadnezzara kutah ka mantîr dâwn e; in mit hmuh ngeiah a that ang. 22 Anmahni thu-ah chuan Babulon rama Juda sal tâng zawng zawng chuan, ‘Babulon lalin meia a rawh Zedekia leh Ahaba ang mai khân LALPAN i chungah ti rawh se,’ tih hi ânchhe lawh fungah an chîn phah ang. 23 Israel ramah chuan thil âtthlâk tak an tiha, an ṭhenawm nupuite an uirea, ka hming chhâlin ka thupêk lohva dâwt thu an sawi avângin; kei a hretu leh a hriatpuitu ka ni e,” tih hi LALPA thuchhuak a ni.
Semaia hnêna Jeremia lehkha
24 Nehelam mi, Semaia chungchang thu-ah chuan nangin heti hian i sawi tûr a ni, 25 “Israel Pathian, sipaihote LALPA chuan heti hian a sawi a: Jerusalem mipui zawng zawng hnênah te, Maaseia fapa zâwlnei Zephania leh zâwlnei zawng zawng hnênah te, nangma hming ngeiin lehkha i thawn a, 26 ‘LALPA chuan puithiam Jehoiada aiah puithiamah a siam che a, LALPA in vêngtu in ni a, mi â zâwlnei inti apiangte chu kawlte, thîrkawlte i buntîr tûr a ni a. 27 Tichuan, engah nge Anathoth khuaa mi Jeremia, in hnêna zâwlnei inti chu in zilh loh? 28 Babulon ramah kan hnênah: Sal tân hun tûr chu a rei dâwn a. Chuvângin, inte sa ula, chutah chuan chêng ula; huante siam ula, a rahte ei rawh u, tih thu min thawn a ni,’ ” tiin. 29 Puithiam Zephania chuan chumi lehkha chu zâwlnei Jeremia hriatah a chhiar a: 30 Jeremia hnênah LALPA thu a lo thleng a: 31 “Sal tângho zawng zawng hnênah chuan Nehelam mi Semaia chungchâng thu-ah chuan LALPAN heti hian a ti: ‘Ka tirh hauh lohvin Semaian in hnênah thu a sawi a, dâwt thu a rintîr che a; 32 chuvângin, LALPAN heti hian a ti: Ngai rawh u, Nehelam mi Semaia leh a thlahte chu ka hrem ang a, hêng mite zîngah mi pakhat mah a nei lo vang a, ka mite tâna thil ṭha ka tih tûr chu a hmu hek lo vang; LALPA chungah helna thu a sawi avângin, tih hi LALPA thuchhuak a ni,’ tiin thawn rawh,” a ti a.
A mite hnêna LALPA thutiam
1 Jeremia hnêna LALPA thu lo thleng chu, 2 “LALPA, Israel-te Pathian chuan heti hian a ti: ‘I hnêna ka thusawi tâk zawng zawng kha lehkhabuah ziak rawh. 3 Ngai rawh, ka mi Israel leh Juda-te ka hruai kîr nite chu a lo thleng mêk e; ram, an thlahtute hnêna ka pêkah chuan ka hruai kîr ang a, an luah tawh ang,’ tih hi LALPA thuchhuak a ni,” LALPAN a ti. 4 Tin, Juda leh Israel chungchâng thua LALPA thusawite chu hêngte hi a ni. 5 “LALPA chuan heti hian a ti a ni: ‘Thlaphâng thâwm kan hria, hlauva au thâwm, Muanna ni lovin. 6 Zâwt vêl ula, en vêl teh u, mipain nau an vei ngai em? Engati nge hmeichhe nau vei ang renga, Mipate hian an tai an dawm ṭheuhva, An hmêlte a lo dân zawh tâk? 7 Ehei! Chumi ni chu a ropui mang e, Chu ang rêng chu a awm lo. Jakoba manganna ni a ni ngei mai; Mahse, chhanchhuahin a awm tho vang. 8 “ ‘Tin, chumi niah chuan heti hi a ni ang a, a nghâwngkawl bah chu ka titliak ang a, a hrui chu ka tichat ang; awze mite chuan amah chu rawngbâwltuah an hmang ngai tawh lo vang. 9 LALPA an Pathian leh an lal atâna ka tundin tûr Davida rawng an bâwl zâwk ang. 10 “ ‘Chuvângin, aw ka rawngbâwltu Jakob, Hlau hauh suh, aw Israel, zâm hek suh,’ Tih hi LALPA thuchhuak a ni. ‘Ngai rawh, hla tak ata ka chhanchhuak ang chia, An sal tânna ata i thlahte ngei chu. Tin, Jakoba chu a kîr leh ang a, Tu mân an tihlau tawh ngai lo vang. 11 Chhan tûr chein i hnênah ka awm reng si a, Ka tihdarhna che hnam zawng zawng chu, Ka titâwp ang a, nang erawh chu titâwp lovin. A tâwk lekin ka hrem ang chia, Hrem loh chuan i chhuak tawp lo vang,’ Tih hi LALPA thuchhuak a ni. 12 LALPA chuan heti hian a ti si a, ‘I hliam chu tihdam rual a ni lo va, I pân chu a nasa a ni. 13 Ṭanpui tûr che an awm lo va, I damna tûr damdawi a awm hek lo. 14 A ngainatu che chuan an theihnghilh tawh chia; An ngaihsak tawh lo che; Hmêlma hliamin ka hliam ta chia, Dîm lo tawpin ka hrem chia, I khawlohna a nasa a, I thil tihsualte a pun avângin. 15 Engah nge i hliam vânga i ṭah? I nâ chu tihdam rual a ni lo ve. I khawlohna a nasa a, I thil tihsualte a pun vângin, Hêng thil hi i chungah ka ti a nih hi. 16 Amaherawhchu, a eiraltu che zawng zawng chu, Ei ralin an awm ang a; I hmêlma zawng zawng chu mi tin mai, Sala hruaiin an awm ang; A rawktu che chu rawkin an awm ang a, Râllâka latu zawng zawng che chu râllâk atân ka pe ang. 17 Ka tihrisêl leh ang chia, I hliam zawng zawng chu ka tidam ang,’ LALPA thuchhuak chuan a ti; ‘Hnawh chhuah an vuah chia, “Tu ma ngaihsak loh Zion a nih hi,” ’ an tih che avângin. 18 LALPA chuan heti hian a ti: ‘Ngai rawh, Jakoba puan in, sala tângte chu, ka hruai kîr ang, A chênna hmunte ka khawngaih ang; A khawpui chu a awmna mual ngaiah chuan sak a ni ang a, A lal in chu a awm dân pângngaiin a ding leh ang. 19 Lâwm thu sawina leh hlim thâwmte chu, Chûng aṭang chuan a lo chhuak ang. A mi chu ka tipung ang a, an tlêm tham lo vang; Anni chu ka tiropui ang a, an tênau lo vang. 20 An fate pawh tûn hma angin an awm ang a, Ka hmaah an pung khâwmin an nghet ang a; Anmahni hnehchhiahtute tawh phawt chu ka hrem zêl ang. 21 An hotu chu anmahni mi ngei a ni ang a, An rorêltu chu anmahni zînga lo chhuak ngei a ni ang; Amah chu mi rawn hnaih tûrin ka ti ang a, Ani chuan mi rawn hnaih ang; Mahni thuin tu nge mi rawn hnaih ngam hlei ang?’ Tih hi LALPA thuchhuak a ni. 22 ‘Tin, ka mite in ni ang a, Kei in Pathian ka ni ang.’ ” 23 Ngai rawh u, LALPA thlipui, a thinurna thlipui na tak mai chu a chhuak ta! Mi suaksualte lû chu a nuai nek ang. 24 A thinlung tumnate a hlena a tih zawh hma loh chuan, LALPA thinurna hlauhawm tak mai chu a lamlêt lo vang. Ni hnuhnûngahte chuan in la hre thiam ang.
Israel-te kîr leh tûr thu
1 “Chumi hunah chuan kei hi Israel chhûngkua zawng zawngte Pathian ka ni ang a, anni pawh ka mite an ni ang,” tih hi LALPA thuchhuak a ni. 2 LALPA chuan heti hian a ti: “Khandaiha thah bângte chuan, Thlalêr ramah khawngaih an hlawh; Israel-te ka chawlh hahdamtîr lai khân.” 3 Hmânah ka hnêna LALPA lo lang chuan heti hian a ti: “A ni, hmangaih tâwp lovin ka hmangaih chia; Chuvângin, lainatnain ka hruai haw che. 4 Ka din thar ang che, aw nula thianghlim Israel! Din ngheh i lo ni leh ang a, Khuangte nên i inchei leh ang a, Hlim lai lâmna hmunahte chuan i tel ang. 5 Grêp huante Samari tlâng dung tluanin i siam ang a, Chuta chêngte chuan an chîng ang a, A rahte chu an chên ang. 6 Ephraim tlâng ramahte chuan, Vêngtute au ni a thleng dâwn e, ‘Tho ru, Zion-ah i kal ang u, LALPA kan Pathian hnênah chuan,’ ” tiin. 7 LALPA chuan heti hian a ti e: “Jakoba tân hlimin zai ula, Hnam ropui ber tân au chhuak rawh u; Puang ula, chawimawi ula, ‘LALPA, Israel la awm chhun, i mite hi, Chhandam ang che,’ ti rawh u. 8 Ngai rawh u, hmâr ram ata ka rawn hruai ang, Kâwlkil tâwp ata ka khâwm chhuak ang, Mitdel te, kebai te, hmeichhe nau pai te, vei mêk te nên, Mipui tam tak an lo thleng khâwm ang. 9 Mittui nên an lo kal ang a, thlamuang takin ka hruai haw ang, Tui luang lamahte ka lêntîr ang a, An petek lohna tûr kawng tluangah te chuan; Israel tân Pa ka ni si a, Ephraima chu ka fa tîr a ni. 10 Aw hnamte u, LALPA thu chu ngaithla ula, Tui kam ram hla takahte puang ula, ‘Israel tidarhtu chuan a la hruai khâwm leh ang a, Berâmpuin a berâmte a vil angin a vil ang,’ tiin. 11 Jakoba chu LALPAN a tlan chhuak a, A aia chak lakah a chhanchhuak si a. 12 Zion chhîpah zaiin an lo kal ang a, LALPA ṭhatnaah chuan an lâwm ang a, Buh te, uain te, hriak te, Berâm leh ran rual note chungahte an lâwm ang; An nunna chu huan tui châwm ang a ni ang a, Kumkhuain an lungngai tawh hauh lo vang. 13 Tin, nula thianghlimte chu lâmin an hlim ang a, Tlangvâlte pawh, a tar a zûrte pawh an hlim ang. An lusûnna lâwmah ka chantîrin ka thlamuan ang a, An lungngaihna ata ka tilâwm ang. 14 Puithiamte nunna chu thauvin ka titlai ang a, Ka ṭhatnain ka mite pawh an tlai ang,” Tih hi LALPA thuchhuak a ni.
Israel tâna LALPA khawngaihna
15 LALPA chuan heti hian a ti: “Rama khuaah thâwm an hria Mitthi ngaia ṭap tlawk tlawk, Rakilin a fate a ṭah a, A fate an awm tawh loh avângin Thlamuan theih a ni lo.” 16 LALPA chuan heti hian a ti: “Ṭap lo tûrin i aw chu sûm la, I mittui hul rawh se; I thiltihin lâwmman a nei dâwn e,” Tih hi LALPA thuchhuak a ni, “Râl ram aṭangin an lo lêt ang. 17 I hun tâwp lam chu nghahfâkawm tak a ni ang, Mahni ram ngeiah i fate chu an lo kîr leh ang,” Tih hi LALPA thuchhuak a ni. 18 “Ephraima inṭah chu ka hre lul mai: ‘Nangin mi hrem a, bâwngpatuai sâwi loh ang maiin Sâwi ka ni a; Mi lêttîr la, ka lêt ang e, LALPA ka Pathian i ni si a. 19 Mi lêttîr hnu chuan ka inchhîr teh a, Mi thunun hnuah ka mal ka bêng a; Ka zak a, a ni, ka tleirâwl lai hmingchhiat tuarin Ka kimki a ni,’ a ti a. 20 Ephraima chu ka fapa duh tak, Ka nau ngaihnat tak a nih vâng em ni, Amah ka thunun apianga ka thinlungah a chên tlat ṭhin hi? Tichuan, ka thinlungin a lainat ṭhîn a, A chungah zah ka ngai ngei dâwn a ni,” Tih hi LALPA thuchhuak a ni. 21 “Kawng chhinchhiahnate insiam la, I tân kawng kawhhmuhnate phun rawh; I chhuahvahna lam kawng, Kawngpui lam ngei chu chhinchhiah tlat rawh. Aw nula thianghlim Israel, lo kîr leh rawh, Hêng i khawpui lamahte ngei hian. 22 Aw, nang fanu lepchiah, Eng chen nge i vah rawlaih dâwn le? LALPA chuan leiah hian thil thar a siam tâk hi - Hmeichhiain mipa a hum ta zâwk.”
Pathian mite la hamṭhat tûrzia
23 Israel Pathian, sipaihote LALPA chuan heti hian a ti: “An sal tânna ata ka hruai kîr hunah chuan, Judai ram leh a khawpuiahte chuan hetiang ṭawngkam hi an hmang leh ang: ‘Aw, felna chênna hmun, aw tlâng thianghlim, LALPA chuan malsâwm che rawh se!’ tih hi. 24 Chutah Juda-ho leh an khawpuia mi zawng zawngte chu an chêng za ang a, lo nei mite leh ran vulhtute nên. 25 Mi chaute chu ka titlai ta a, mi lungngai apiangte pawh ka tiharh tawh si a.” 26 Tichuan, ka han harh a, ka han hawi vêl a, mang ṭha tak chu a lo ni e. 27 “Ngai teh, nite chu a lo thleng dâwn e, Israel chhûngte leh Juda chhûngteah chuan mihring chi leh ran chi ka tuh ang,” tih hi LALPA thuchhuak a ni. 28 “Tin, heti hi a ni ang a, anmahni pawt chhuaka, tisawm leh paih thlaa, tiborala, tihrehawm tûra ka châng ang khân, anmahni din ṭha tûr leh tungding tûrin ka enthla thung ang,” tih hi LALPA thuchhuak a ni. 29 “Chûng niahte chuan, ‘Paten grêp thûr an ei a, an fate ha a ṭim e,’ an ti tawh ngai lo vang. 30 Mi tinin mahni khawlohna an thihpui zâwk ang a, grêp thûr ei tawh phawt ha ngei chu a ṭim ang. 31 Ngai teh, nite chu a lo thleng dâwn,” tih hi LALPA thuchhuak a ni: “Chûng niahte chuan Israel chhûngte leh Juda chhûngte hnênah chuan thuthlung thar ka siam ang. 32 An thlahtute Aigupta ram aṭanga hruai chhuak tûra an kut ka chelh nia ka thuthlun ang kha ni lovin, an tân hotu ka ni chungin chu ka thuthlung chu an bawhchhia a,” tih hi LALPA thuchhuak a ni. 33 “Chûng ni hnua Israel chhûngte hnêna thu ka thlun tûr erawh chu hei hi a ni,” tih hi LALPA thuchhuak a ni: “An chhûngrilahte ka thupêk ka dah ang a, an thinlungah ka ziak bawk ang a, kei hi an Pathian ka ni ang a, anni chu ka mite an ni ang; 34 tu mahin, ‘LALPA hre rawh,’ tiin mahni ṭhenawm leh mahni unau an zirtîr dâwn tawh lo va; a tê ber aṭangin a lian ber thlengin an zain mi hre ṭheuh dâwn si a,” tih hi LALPA thuchhuak a ni. “An bawhchhiatna chu ka ngaidam ang a, an sualna pawh ka hre reng dâwn tawh si lo,” tiin. 35 Heti hian LALPA, chhûn tiêng tûra ni petu, thla leh arsite tâna dânte ruatsaka, zân tiêng tûra petu, tui fâwnte ri hum hum tûra tuipui chawkthotu chuan a ti a ni: a hming chu sipaihote LALPA a ni. 36 “Hêng dân ruatte hi ka hma ata a bo chauhvin Israel thlahte chu ka hma ata hnam nih an bâng hlen ve ang,” tih hi LALPA thuchhuak a ni. 37 LALPA chuan heti hian a ti: “Chung lam vân khi teh theih a niha, lei nghahchhante hi zawn chhuah theih a nih chauhvin, Israel thlahte chu an thiltih tâkte avângin ka paih bo ve ang,” tih hi LALPA thuchhuak a ni. 38 “Ngai rawh, nite chu a lo thleng mêk e, Hananela kulhbîng sâng aṭangin kulh kil kawngka thlengin LALPA tân khawpui chu din a ni a,” tih hi LALPA thuchhuak a ni. 39 “A tehna hrui chu Gareb tlâng thlengin ngîl takin a kal riah ang a, Goah lamah a kawi ang. 40 Mitthi ruang leh vut paihna ruam pum pui leh tâmlak zawng zawng, Kidron luikawr thlengin, chhak lampanga sakawr kawngka kil thleng chu LALPA tân serh tûr a ni; chu chu eng tikah mah tihdarh leh ṭhiat chhiat a ni tawh lo vang.”
Jeremian ram a lei
1 Juda lal Zedekia kum sâwmna, Nebukadnezzara kum sâwm leh kum riatnaa Jeremia hnêna LALPA thu lo thleng chu. 2 Chumi lai chuan Babulon lal sipai rual chuan Jerusalem an hual a; tin, zâwlnei Jeremia chu Juda lal in vêngtu hung chhûngah a tâng a ni. 3 Juda lal Zedekia chuan, “Engah nge, ‘LALPA chuan heti hian a ti: “Ngai rawh, hemi khawpui hi Babulon lal kutah ka pe ang a, a la ang; 4 Juda lal Zedekia pawh Kaldai mite kut ata a chhuak lo vang a, Babulon lal kuta mantîrin a awm ngei zawk ang a, inhmachhawnin an inbia ang a, a mit ngeiin a hmêl a hmu ang; 5 tin, Zedekia chu Babulon ramah a hruai ang a, amah ka tlawh hma loh chuan chutah chuan a awm reng ang; Kaldaite chu do mah ula in hlawhtling lo vang,” tih hi LALPA thuchhuak a ni,’ tia i sawi ni?” tiin a tântîr a ni. 6 Tin, Jeremia chuan, “LALPA thu chu ka hnênah a lo thleng a: 7 Ngai rawh, i pami Saluma fapa Hanamela chu, ‘Anathoth khuaa ka lo chu i tân lei rawh; ro khâwm thei i nih avângin mi leisak tûr a ni e,’ tiin i hnênah a lo kal ang,” tiin. 8 Tichuan, ka pami fapa Hanamela chu LALPA thu ang zêlin vêngtu hung chhûngah chuan ka hnênah a lo kal a, ka hnênah, “Benjamin rama Anathoth khuaa ka lo chu mi leisak ta che, ro khâwm thei i nih avângin i tlan tûr a ni, i tân lei mai rawh,” a ti a. Tichuan, hei hi LALPA thu kha a ni tih ka hre ta a. 9 Tin, ka pami fapa Hanamela, Anathoth khuaa mi lo chu ka lei ta a, tangka chu ka han bûksak a, tangkarua sekel sâwm leh pasarih zet a ni. 10 Tin, lehkha ka ziak a, ka châr a, hretute ka ko va, tangka chu bûknaah ka khai a. 11 Tin, inleina lehkha, inlei dân leh a awmzia ziakna, châr leh châr lohte chu ka la a. 12 Tin, ka pami fapa Hanamela mit hmuhah leh hretu leinaa hming chuang vete mit hmuhah leh, vêngtu hung chhûnga Juda ṭhu zawng zawng hmaah chuan, Maaseia fapa Neria fapa Baruka chu thu ka pe a. 13 Tin, Baruka chu an hmaah thu ka pe a, 14 “Israel Pathian, sipaihote LALPA chuan heti hian a ti: Hêng lehkha, leina lehkha, châr leh châr lohte hi la la, hlum bêlah dah la, a awm rei theih nân. 15 Israel Pathian, sipaihote LALPA chuan heti hian a ti si a: ‘He ramah hian inte, lote, grêp huante miten an la lei leh ang,’ ” tiin.
Jeremia ṭawngṭaina
16 Tin, Neria fapa Baruka hnêna leina lehkha ka hlan hnuah chuan LALPA hnênah ka ṭawngṭai a, 17 “Aw LALPA PATHIAN, ngai rawh, i thiltihtheihna nasa leh i kut pharin lei leh vân i siam a; i tân thiltih harsa lutuk a awm rêng rêng lo. 18 Sâng tam takte hnêna khawngaihna vûr ṭhîntu, leh pate khawlohna an hnua an fate chunga thungrûltu, Pathian ropui leh thiltithei, a hming sipaihote LALPA, 19 remruat thiam tak, thiltithei tak, mihring fate awm dân zawng zawng hmu chiangtu, mi tin an awm dân leh an thiltih ang zêla rûltu; 20 Aigupta rama chhinchhiahna leh thil mak titu, vawiin thlenga Israel-ah leh mi dang zînga ti zêltu, vawiin ang renga mahni hming tilangtu, 21 i mi Israel-te Aigupta ram ata chhinchhiahna te, thil mak te, kut chak leh bân phar leh thil râpthlâk nasa taka hruai chhuaktu, 22 he khawizû leh hnutetui luang ram an thlahtute hnêna chhechhama pêk tiama petu chu i ni. 23 An lo lût a, an luah vek a; mahse, i awkâ an awih lo va, i dân an zâwm hek lo. Tih tûra i pêk rêng rêng an ti lo va; chuvângin, hêng thil ṭha lo zawng zawng hi an chungah i thlentîr a nih hi. 24 En teh, khawpui lâkna tûr lei chhûn pâwnte a lo awm tâk hi! Khandaih te, ṭâm te, hripui te avângin khawpui pawh chu a beitu Kaldaite kutah pêk a ni ta. I sawi tawh chu a lo thleng ta; en teh, i hmuh tâk hi. 25 Aw, LALPA PATHIAN, nangin ka hnênah, ‘Lo chu tangkain lei la, thuhretute ko rawh,’ i ti a, khawpui erawh zawng Kaldaite kutah pêk a ni ta a ni,” tiin. 26 Tin, LALPA thu Jeremia hnênah a lo thleng a, 27 “Ngai rawh, kei LALPA hi tîsa nei zawng zawngte Pathian ka ni a, ka tân harsa lutuk a awm em ni?” tiin. 28 “Chuvângin, LALPA chuan heti hian a ti: ‘Ngai rawh, he khawpui hi Kaldaite kutah leh Babulon lal Nebukadnezzara kutah ka pe ang a, a la ang. 29 Tin, hemi khawpui beitu Kaldaite hi an lo kal ang a, he khawpui hi an hâl ang a, a kâng ang, mi tithinur tûra Baala hnêna rimtui hlanna, pathian dangte hnêna in tûr hlan leih chhuahna in chung nei in zawng zawngte nên. 30 Israel fate leh Juda fate chuan an tleirâwl têt ata ka mit hmuhah thil ṭha lo hlîr an ti si a. Israel fate chuan an kut hnathawhte chuan mi tithinur mai a ni,’ tih hi LALPA thuchhuak a ni. 31 ‘He khawpui hi an sak tirh ata tûn thlengin mi tithinurtu leh mi tithinrimtu a ni reng si a, ka hma ata ka tihbo daihna tûrin; 32 Israel fate leh Juda fate mi tithinur tûra an thil ṭha lo tih tâkte zawng zawng avângin, anmahni, an lalte, an hotute, an puithiamte, an zâwlneite, Juda mite Jerusalem luahtu zawng zawngte nên. 33 Ka lam hawi lovin an tukkhum chhah mi chhawn a, ngun taka beiin zirtîr tawh mah ila, zirtîrna chu dawngsawng tûrin an bengkhawn si lo. 34 Ka hming chuanna in chu tibawrhbâng tûrin an thil tenawmte an dah zâwk a. 35 Tin, Ben-hinom ruama mi Baala biakna hmun sângte chu an din a, an fanute, an fapate Moleka hnêna meia an paihna tûrin Juda-ho thil sual tihtîr tûra he tenawmna an tih hi ka thupêk a ni hauh lo va, ka rilruah pawh a lût ngai hek lo.’
Beisei tûr tiam
36 “Chuvângin, tûnah zawng LALPA, Israel Pathian chuan he khawpui, ‘Khandaih te, ṭâm te, hripui tein Babulon lal kutah pêk a ni tawh,’ in tih ṭhin thu-ah chuan heti hian a ti: 37 ‘Ngai teh, ka thinrimna te, ka lungnih lohna te, ka thinurna nasa tak tea anmahni ka hnawh bona ram zawng zawng ata ka hruai khâwm ang a, he hmunah hian ka rawn thlen ang a, him takin ka awmtîr tawh ang. 38 Tin, ka mite an ni ang a, kei an Pathian ka ni ang. 39 Kumkhuaa mi ṭih hlen theih nân thinlung hmun khat leh awm dân hmun khat ka siamsak ang, anmahni leh an hnua an fate ṭhatna tûrin. 40 Tin, an hnênah kumkhaw thuthlung ka siam ang a, anmahni hawisan lovin, an ṭhatna ka ti fo vang; mi hransan loh nân an thinlungahte chuan mi ṭihna ka dah ang. 41 A ni, an ṭhatna tih chu ka lâwm zâwng a ni ang a, ka thinlung zawng zawngin he ramah hian ka phun nghet ngei ang.’ 42 LALPA chuan heti hian a ti a ni: ‘He mite chunga thil ṭha lo nasa tak ka thlen ang ngei khân, anmahni hnêna thil ṭha ka tiam zawng zawngte chu ka thlen ngei ang. 43 “Ram ṭiau, Kaldaite kuta pêk tawh, mi leh sa awm tawh lo,” in tih ramah hian lote an inlei leh dâwn a ni. 44 Benjamina ramah te, Jerusalem khawpui vêl hmunah te, Judai ram khawpuiah te, tlâng ram khawpuiah te, phai ram khawpuiah te leh chhim lam khawpuiahte chuan miten tangkain lo an lei ang a, leina lehkha an ziak ang a, an châr ang a, hretute an ko vang; an awm dân ka lamlêt dâwn si a,’ tih hi LALPA thuchhuak a ni.”
Beisei tûr tiam dangte
1 Tin, Jeremia hnênah, vêngtu hung chhûnga a la awm laiin, LALPA thu chu vawi hnihnaah a lo thleng leh a, 2 “Thiltitu LALPA, nghet tûra siamtu LALPA (LALPA chu a hming a ni) chuan heti hian a ti: 3 ‘Mi au la, ka chhâng ang che, thil ropui leh inthup i hriat ngai loh chu ka entîr ang che.’ 4 Israel Pathian, LALPA chuan he khawpui inte leh Juda lal inte, khandaih leh lei chhûn pâwnte laka vênna siam tûra an ṭhiat chhiat chungchâng thu-ah chuan heti hian a ti: 5 ‘Kaldai-ho bei tûrin an lo kal a, ka thinur leh thinrimnaa ka thah ruangte chuan an tikhat zâwk dâwn, an sualna zawng zawng avângin he khawpui lakah hian ka hmêl ka lo thup tawh si a. 6 Ngai rawh, damna leh hrisêlna ka rawn thlen ang; ka tidam ang a, muanna leh himna nghet tak ka hmuhtîr ang. 7 Tin, Juda awm dân leh Israel awm dân ka lamlêt ang a, a tîra ka din ang khân ka din leh ang. 8 Tin, an khawlohna, ka chunga an thil tihsualna lak ata ka tlêng fai ang a, an khawlohna, ka chunga an thil tihsualna leh ka chunga an bawhchhiatnate zawng zawng chu ka ngaidam ang. 9 Tin, he khawpui hi leia hnam zawng zawng, an tâna ka tihṭhat zawng zawng hmutute hmaah chuan ka tân hlimna te, chawimawina te, ropuina te a ni ang a; ṭhatna leh muanna an chunga ka thlen zawng zawng avângin hlauvin an khûr ang.’ 10 LALPA chuan heti hian a ti: ‘He hmun, “Juda khawpui meuh pawh mi leh sa awm tawh lova ṭiau, Jerusalem kawtthlêr mi leh sa leh luahtu awm lova ram tawh” an tihah hian, 11 hlimna aw te, moneitu aw te, mo aw te, “Sipaihote LALPA hnênah chuan lâwm thu hril rawh u, LALPA chu a ṭha si a, a ngilneihna chu kumkhuain a awm dâwn si,” titute aw leh, LALPA ina lâwmna inthawina rawn kengtute aw chu an la hre leh ang. A tîra a awm dân angin ram chu ka awmtîr ang,’ tih hi LALPA thuchhuak a ni. 12 “Sipaihote LALPA chuan heti hian a ti: ‘He hmun, mi leh sa awm lo khawpa ṭiau tawh leh a khawpui zawng zawngah hian, berâmpu an berâm rual bawhtîrtute chênna hmun a la awm leh ang. 13 Tlâng ram khawpuiah te, phai ram khawpuiah te, chhim lam khawpuiah te, Benjamina ramah te, Jerusalem vêl hmunah te, Juda khawpuiah te, an chhiartu kut hnuaiah chuan berâmte an kal zung zung ang,’ tih hi LALPA thuchhuak a ni. 14 “ ‘Ngai rawh, nite chu a lo thleng mêk e,’ tih hi LALPA thuchhuak a ni, ‘Israel chhûngte chungchângah leh Juda chhûngte chungchânga thu ṭha tak ka lo sawi tawh chu ka hlen ang. 15 Chûng niahte leh chumi hunah chuan felna Chawrno Juda hnênah ka chhuahtîr ang, chu ramah chuan dik tak leh fel takin ro a rêl ang. 16 Chûng niahte chuan Juda chu chhanhimin a awm ang a, Jerusalem chu him takin a awm ang: tin, a hming put tûr chu hei hi a ni ang: LALPA chu kan felna, tih hi.’ 17 “LALPA chuan heti hian a ti a ni: ‘Davida chuan Israel chhûngte lalṭhutthlênga ṭhu tûr mi a hmai ngai lo vang; 18 puithiam, Levia chite pawhin ka hmaa hâlral inthawi hlân tûr leh, buhbâl thil hlân tûr leh, inthawi zêl tûrin mi an hmai hek lo vang.’ ” 19 Tin, LALPA thu chu Jeremia hnênah a lo thleng a: 20 “LALPA chuan heti hian a ti: ‘Ka chhûn ruat leh ka zân ruat thu hi in phelh theiha, chhûn leh zân hi an hun taka awm lo tûra in tih theih chuan, 21 ka rawngbâwltu Davida hnêna ka thuthlung pawh, a lalṭhutthlênga ṭhu tûr fapa a neih loh nân tihchhiat a ni ve chauh vang; Levia chite, puithiamte, ka rawngbâwltute hnêna mi pawh. 22 Vâna awmho chhiar sên loh leh tuipuia ṭiau chhiar sên loh ang maiin, ka rawngbâwltu Davida thlah leh Levia chi rawng mi bâwlsaktute chu ka tipung ang.’ ” 23 LALPA thu chu Jeremia hnênah a lo thleng a: 24 “ ‘Chhûngkaw hnih LALPAN a thlante chu a paih bo ta,’ tia he miten an sawi chu i ngaihtuah ngai lo vem ni? An mit hmuha hnam tih tham an nih loh nân hetiangin ka mite chu an hmusit a ni. 25 LALPA chuan heti hian a ti: ‘Ka chhûn leh zân thuruat chu a din hlen lohva, lei leh vân awm dânte hi ka ruat lo a nih chuan, 26 Jakoba thlahte leh ka rawngbâwltu Davida thlahte chu ka paih bo vang, Abrahama te, Isaaka te, Jakoba thlahte chunga rorêltuah a thlah ka la bo vang. An awm dânte ka lamlêtsakin, an chungah khawngaihna ka nei dâwn si a.’ ”
Zedekia tâna thuken
1 Babulon lal Nebukadnezzara te, a sipai rual zawng zawng te, ama thuhnuaia lei lalna ram zawng zawngte leh mipui zawng zawngten, Jerusalem leh a khawpui zawng zawngte an beih laia LALPA hnên ata Jeremia hnêna thu lo thleng chu: 2 “Israel Pathian, LALPA chuan heti hian a ti: Juda lal Zedekia va bia la, heti hian hrilh rawh, ‘LALPA chuan heti hian a ti: Ngai rawh, he khawpui hi Babulon lal kutah ka pe ang a, meiin a hâl ang. 3 A kut ata i chhuak tawp lo vang; man i ni ang a, a kutah an pe ang che; i mit ngeiin Babulon lal chu i hmu ang a, ṭawngka ngeiin in inbia ang a, Babulon ramah i kal ngei ang. 4 “ ‘Amaherawhchu, aw Juda lal Zedekia, LALPA thu hi ngaithla zêl teh! I chungchâng thu-ah chuan LALPA chuan heti hian a ti: Khandaihin i thi lo vang a, 5 muang takin a nia i thih ang; i hmaa lal hmasa, i thlahtute rimtui an hâlsak ang khân nang pawh an hâlsak ang che; an sûn ang chia, “Ehei, ka pu!” tiin. Thu ka thlah tawh hi, tih hi LALPA thuchhuak a ni,’ ” tiin. 6 Tin, zâwlnei Jeremia chuan hêng thu zawng zawng hi Jerusalem-a Juda lal Zedekia hnênah a sawi a, 7 Babulon lal sipai rualte chuan Jerusalem leh Juda khawpui la awm zawng zawng, Lakis leh Azeka an beih lai chuan; Juda khawpui zînga kulh neite chu hêngte chauh hi an ni tawh si a.
Bawih chhuaha hnûk kîr leh
8-9 Lal Zedekian Jerusalem-a awm mipui zawng zawngte hnênah, “Mi tinin an chhiahhlawhnu te, an chhiahhlawhpa te, Hebrai nu emaw, Hebrai pa emaw an nih chuan, an chhuah tûr a ni; a unaupa Hebrai mi rawngbâwlsakin tu mah an awm tûr a ni lo,” tia zalênna thu a puana thuthlung a siam hnua LALPA hnên ata Jeremia hnêna thu lo thleng chu: 10 mi tinin rawngbâwltunu emaw, rawngbâwltupa emaw a chhuah tûr a ni a, anmahni rawngbâwlsakin tu mah an awm tûr a ni lo, tih thuthlung pawmtu hotu zawng zawng leh mipui zawng zawngte chuan thuthlung chu an awih a, an chhuahtîr ta ngei a; 11 amaherawhchu, chumi hnuah chuan an inlamlêt a, an rawngbâwltunu leh an rawngbâwltupa an chhuahtîr tawhte chu an hnûk kîr a, an thuhnuaiah rawngbâwltuah an dah leh a. 12 Chuvângin, Jeremia hnênah LALPA thu chu a lo thleng leh a; 13 “LALPA, Israel Pathian chuan heti hian a ti: ‘Aigupta ram, bawih tânna ram ata ka hruai chhuah ni khân in thlahtute hnênah thuthlung ka siam a. 14 “Mi tinin a unaupa, Hebrai mi, a hnêna hralh tawh, kum ruk a rawng lo bâwl tawh chu, a kum sarihna tâwpah chuan a chhuah tûr a ni,” tiin. In thlahtute erawh chuan min ngaithla lo va, an beng an dawh hek lo. 15 Tûnah nangnin, in lo inlamlêt a, mi tinin a ṭhenawmpa hnêna zalênna thu puangin ka mit hmuhah thil dik chu in lo ti ta a; ka hming vuah inah chuan ka hmaah thuthlung in lo siam ta a. 16 Mahse, in inlamlêt leh a, ka hming in tibawrhbângin, an duh ang taka in chhuah tawh hnu, in chhiahhlawhnu leh in chhiahhlawhpa chu in hruai kîr leh a, in thuhnuaiah rawngbâwltuah leh chhiahhlawhah te in dah leh a.’ 17 Chuvângin, LALPA chuan heti hian a ti: ‘Mi tinin mahni unau leh mahni ṭhenawm hnêna zalênna thu puang tûrin ka thu in ngaithla lo va; ngai rawh u, keiin in hnênah zalênna thu ka puang e,’ tih hi LALPA thuchhuak a ni: ‘Khandaih te, hripui te, ṭâm tein a ni ang; leia lalramte zawng zawng zîngah vawrh lân vawrh lân tûrin ka siam ang che u. 18 Tin, ka thuthlung bawhchhiate, ka hmaa bâwngno zai phel kâra kal tlang meuhva thu tiama hlen lotu: 19 Juda hotute leh Jerusalem hotute, mi tilrehte, puithiamte, mipui zawng zawng, bâwngno zai phel kâra kalte chu; 20 an hmêlmate leh an nunna zawngtute kutah ka pe ang. An ruangte chu chunglêng savate leh leia ramsate chaw atân mai a ni ang. 21 Tin, Juda lal Zedekia leh a hote chu an hmêlmate leh an nunna zawngtute leh Babulon lal sipai rual, nangmahni kalsan tawhte kutah ka pe ang. 22 Ngai rawh u, hemi khawpuia lo kîr leh tûrin thu ka pe ang a,’ tih hi LALPA thuchhuak a ni, ‘Tichuan, an bei ang a, an la ang a, meiin an hâl ang; tin, luahtu awm lovin Juda khawpuite chu ka tiṭiau vek ang,’” tiin.
Jeremia leh Rekaba thlahte
1 Juda lal Josia fapa Jehoiakima lal laia LALPA hnên ata Jeremia hnêna thu lo thleng chuan, 2 “Rekaba chhûngte hnênah kalin va bia la, LALPA ina pindan pakhatah hruai lût la, uain in tûr pe rawh,” a ti a. 3 Tin, Habazinia fapa, Jeremia fapa, Jaazania leh a unaute, a fapa zawng zawngte, Rekaba chhûngte zawng zawng nên ka hruai a; 4 tin, Pathian mi Igdalia fapa Hanana fate pindan, LALPA inah chuan ka hruai lût a; chu pindan chu hotute pindan bul kawngka vêngtu Saluma fapa Maaseia pindan chunga awm a ni. 5 Tichuan, Rekaba thlahte paho hmaah chuan berhbute, note uaina khat ka hûng a, an hnênah, “Uain hi in rawh u,” ka ti a. 6 Anni erawh chuan, “Uain chu kan in tawp lo vang; kan thlahtu Rekaba fapa Jonadaba chuan, ‘Nangmahni leh in thlahte pawhin kumkhuain uain in in tûr a ni lo. 7 Inte in sain, thlai chi in tuhin, grêp huante in siamin in nei tûr a ni hek lo; in dam chhûng niahte chuan puan inahte in chêng zawk tûr a ni, in awmna ramah chuan in dam rei theih nân,’ tiin thu min pe a ni. 8 Tichuan, kan thlahtu Rekaba fapa Jonadaban awkaa thu min chah zawng zawng, kan dam chhûnga keimahni leh kan nupuite, kan fapate leh kan fanuten uain in loh tûr te, 9 kan chênna in sak loh tûr te, grêp huan emaw, lo emaw, thlai chi emaw neih loh tûr chenin kan zâwm a ni. 10 Puan inahte chuan kan chêng zâwk a, kan thlahtu Jonadaba thupêk zawng zawng chu awihin kan zâwm vek a ni. 11 Tin, heti hi a lo ni a, Babulon lal Nebukadnezzaran ram a rawn beih lai khân keini chuan, ‘Hawh u, Kaldai sipai rualte leh Suria sipai rualte hlauh avângin Jerusalem-ah i kal ang u,’ kan ti a; tichuan, Jerusalem-ah hian kan lo chêng ta mai a ni,” an ti a. 12 Tin, LALPA thu chu Jeremia hnênah a lo thleng a, 13 “Israel Pathian, sipaihote LALPA chuan heti hian a ti: ‘Judai rama mite leh Jerusalem-a mi chêngte hnênah va sawi la, “Ka thute ngaithla tûrin zirtîrna chu in dawngsawng lo vang maw?” tih hi LALPA thuchhuak a ni. 14 Rekaba fapa Jonadaba thu, a fapate hnêna a pêk, uain in loh tûr chu an zâwm a, vawiin thlengin eng mah an in lo va, an thlahtu thupêk chu an zâwm êm êm a ni. Kei erawh chuan zîng tak taka thovin in hnênah thu ka sawi a, mi ngaithla lo va. 15 Ka rawngbâwltu zâwlneite chu zîng tak taka thovin in hnênah ka tîr a, “Mi tin in awm dân sual aṭangin lo kîr vek ula, in thiltihte chu siam ṭha ula, pathian dangte chu an rawngbâwl tûrin zui suh u; chutichuan, nangni leh in thlahtute hnêna ram ka pêkah chuan in chêng ang,” tiin; mahse, in beng in dawh lo va, mi ngaithla hek lo. 16 Rekaba fapa Jonadaba thlahte chuan an thlahtu thupêk an zâwm a, he mite erawh hi chuan mi ngaithla si lo va.’ 17 Chuvângin, LALPA, Israel Pathian, sipaihote Pathian chuan heti hian a ti: ‘Ngai rawh u, Juda leh Jerusalem-a chêng zawng zawngte chungah chuan, thil ṭha lo an chunga lo thleng tûr ka sawi chhuah tawhte kha ka rawn thlen ang; an hnênah thu ka sawi a, an ngaithla si lo va, anmahni ka auh leh min chhâng hek lo,’ ” tiin. 18 Tin, Jeremia chuan Rekaba thlahte hnênah, “Sipaihote LALPA, Israel Pathian chuan heti hian a ti: ‘In thlahtu Jonadaba thupêk in zawma, a thuchhuak zawng zawng in zawma, a thupêk zawng zawng ang zêla in tih avângin, 19 “Rekaba fapa Jonadaba chuan kumkhuain ka hmaa ding tûr mi a hmai ngai lo vang,” ’ tiin,” sipaihote LALPA, Israel Pathian chuan a ti.
Tempulah Barukan Jeremia lehkhabu a chhiar
1 Tin, heti hi a ni a, Juda lal Josia fapa Jehoiakima lal kum linaah, he thu hi LALPA hnên ata Jeremia hnênah a lo thleng a: 2 “Lehkhabu zial la la, chutah chuan i hnêna ka thusawi zawng zawng, Israel chung thu te, Juda chung thu te, hnam zawng zawng chung thu te, i hnêna thu ka sawi ni ata, Josia hun lai ata vawiin thlenga thu chu ziak rawh. 3 Juda chhûngte chuan an chunga thil ṭha lo tih ka tum zawng zawng chu, an ngaihthlâkin mi tinin an awm dân sual an lamlêt thei mahna, an khawlohna leh an sualna ka ngaihdam theih nân,” a ti a. 4 Tin, Jeremia chuan Neria fapa Baruka a ko va; tin, Baruka chuan LALPA thu zawng zawng, a hnêna a lo sawi tawh chu Jeremia ṭawngka ata lehkhabu zialah chuan a ziak a. 5 Tin, Jeremia chuan Baruka hnênah, “Khuahkhirh ka ni a, LALPA inah chuan ka kal thei lo va; 6 chuvângin, nang kal la, LALPA thu ka ṭawngka ata lehkhabu ziala i ziak kha chaw nghei niah, LALPA ina mipuite beng hriatah va chhiar chhuak rawh; an khawpui ata lo chhuak Juda-te zawng zawng beng hriatah pawh i chhiar chhuak bawk tûr a ni. 7 Mi tinin an awm dân sual an lamlêtin, LALPA hmaah khawngaih an dîlna chu an thlen thei mahna, he mite chunga thinrimna leh thinurna LALPAN a puan tawh chu a nasa êm êm si a,” tiin thu a pe a. 8 Tichuan, Neria fapa Baruka chuan zâwlnei Jeremia thupêk zawng zawng ang zêl chuan, LALPA inah LALPA thu lehkhabua mi chu a chhiar ta a. 9 Tin, heti hi a ni a, Juda lal Josia fapa Jehoiakima lal kum ngana, thla kuanaah chuan, Jerusalem-a mi zawng zawngte leh Judai khawpui ata Jerusalem-a lo kal zawng zawngte chuan chaw nghei thu an puang ta a. 10 Tin, Baruka chuan LALPA Kawngka Thar luhnaah, hung chhûng chungnung zâwka ziaktu Saphana fapa Gemaria pindan, LALPA ina miah chuan Jeremia thu lehkhabua mi chu, mi zawng zawng beng hriatah a chhiar a.
Hotute hnênah pawh a chhiar
11 Tin, Saphana fapa Gemaria fapa Mikaia chuan lehkhabua mi LALPA thu zawng zawng chu a lo hriat chuan, 12 lal inah a chhuk a, ziaktu pindanah chuan a lût a; tin, ngai teh, tah chuan hotu zawng zawng chu an lo ṭhu a - ziaktu Elisama te, Semaia fapa Delaia te, Akbora fapa Elnathana te, Saphana fapa Gemaria te, Hanania fapa Zedekia te leh hotu zawng zawngte chu. 13 Tin, Mikaia chuan mite beng hriata Barukan lehkhabua mi a chhiar thu a lo hriat zawng zawngte chu a hrilh a. 14 Tin, hotu zawng zawngte chuan Kusia fapa Selemia fapa Nethania fapa, Jehudia chu Baruka hnênah an tîr a, a hnênah, “Mite beng hriata i lo chhiar lehkhabu chu kengin lo kal rawh,” ti tûrin. Tichuan, Neria fapa Baruka chu lehkhabu zial kengin an hnênah a lo kal a. 15 Tin, a hnênah, “Ṭhu la, kan beng hriat ngeiah chhiar rawh le,” an ti a; tichuan, Baruka chuan an beng hriatah a chhiar ta a. 16 Tin, heti hi a lo ni a, chûng thute chu an hriat chuan hlauvin an inen hlawm a, Baruka hnênah chuan, “Hêng thu zawng zawng hi lal kan hrilh ngei ngei ang,” an ti a. 17 Tin, Baruka chu, “Hêng thu zawng zawng hi a ka ata engtiziaa ziak nge i nih min hrilh teh khai,” tiin an zâwt a. 18 Tin, Baruka chuan, “Hêng thu zawng zawng hi a ṭawngkain mi hrilh a, lehkhatuiin lehkhabuah chuan ka ziak mai a ni,” tiin a chhâng a. 19 Tin, hotute chuan Baruka hnênah, “Kal la, Jeremia nên chuan biru rawh u; tu mân in awmna hre suh se,” an ti a.
Lalin a lehkha zial chu a hâl
20 Tin, hung chhûngah lal hnênah an lût a; lehkhabu zial erawh chu ziaktu Elisama pindanah an dah a, a thu zawng zawngte chu ṭawngkain lal an hrilh a. 21 Tichuan, lal chuan lehkhabu zial chu la tûrin Jehudia a tîr a, ziaktu Elisama pindan aṭang chuan a rawn la a. Tin, Jehudia chuan lal leh lal bula ding hotu zawng zawngte beng hriatah a chhiar a. 22 Thla kuana a ni a, lal chu a thlasik inah chuan a ṭhu a, a hmaah chuan meihawl thuka vâm a awm a. 23 Tin, heti hi a ni a, Jehudia chuan thlep thum emaw, thlep li emaw a han chhiar chuan lal chuan a chemtein a zai bung a, thuk meiah chuan a zial bu pum kâng ral vek tûrin a theh lût zêl a. 24 Tin, lal leh a rawngbâwltu, hêng thu zawng zawng ngaithlatu tu mahin an hlau lo va, an silhfên an pawt thlêr hek lo. 25 Chu chang ni lovin, Elnathana leh Delaia leh Gemaria-te chuan lehkhabu zial chu hâl lo tûrin lal hnênah an ngên a; mahse, a ngaithla duh lo. 26 Tin, lal chuan lal fapa Jerameela leh Azriela fapa Seraia leh Abdeela fapa Selemia-te chu ziaktu Baruka leh zâwlnei Jeremia-te man tûrin thu a pe a; mahse, LALPA chuan anni chu a thukru a.
Jeremian a ziak ṭha leh
27 Tin, lehkhabu zial leh Jeremia ka ata Barukan a ziak zawng zawng thute lalin a hâl ral hnuah chuan, LALPA thu chu Jeremia hnênah a lo thleng a, 28 “Lehkhabu zial dang la la, lehkhabu zial hmasaa thu zawng zawng, Juda lal Jehoiakiman a hâl ral tâkte chu ziak leh vek rawh. 29 Tin, Juda lal Jehoiakima chungchâng thu-ah chuan heti hian ti ang che: ‘LALPA chuan heti hian a ti: “Babulon lal a lo kal ngei ang a, he ram hi a tichhiain, heta ta mi leh sa a tiboral vek ang,” tia ziakna chu, “Engah nge chutiang thu i ziak?” tiin lehkhabu ziak chu i lo hâl ral ta a. 30 Chuvângin, Juda lal Jehoiakima chungthuah chuan LALPA chuan heti hian a ti: Davida ṭhutphahah chuan mi ṭhu tûr a nei lo vang; a ruang pawh chu chhûn ni saah leh zân vûr hnuaiah paih chhuah a ni ang. 31 Tin, an khawlohna avângin amah leh a thlahte leh a rawngbâwltute ka hrem ang; tin, anmahni leh Jerusalem-a chêngte leh Juda mite chungah chuan an chunga ka puan tawh, an ngaihthlâk loh thil ṭha lo zawng zawngte chu ka rawn thlen ang,’ ” tiin. 32 Tichuan, Jeremia chuan lehkhabu zial dang a la a, ziaktu Baruka, Neria fapa chu a pe a, ani chuan chutah chuan Jeremia kâ ata lehkhabu ziak tawh zawng zawng, Juda lal Jehoiakiman meia a hâl ral tâk thute chu a ziak a; chumi bâkah a anpui thu tam tak a belh bawk a.
Zedekian Jeremia a ngenna
1 Tin, Josia fapa Zedekia, Babulon lal Nebukadnezzaran Judai ram lala a siam chu, Jehoiakima fapa Konia aiah a lo lal ta a. 2 Mahse, amah leh a rawngbâwltute leh a rama mite chuan, LALPA thu zâwlnei Jeremia kaa sawi chu an ngaithla lo va. 3 Tin, Lal Zedekia chuan Selemia fapa Jehukala leh Maaseia fapa puithiam Zephania chu zâwlnei Jeremia hnênah, “LALPA kan Pathian hnênah mi tawngṭaisak rawh,” ti tûrin a tîr a. 4 Tin, Jeremia chu mipuite zîngah a duh duhin a la lêng thei a, tân inah an la dah si lo va. 5 Tin, Pharaoa sipai rualte chu Aigupta aṭangin an lo chhuak tawh a; tin, Kaldai-ho, Jerusalem hualtute chuan an chanchin an hriatin Jerusalem chu an kîrsan ta a. 6 Tichuan, LALPA thu chu zâwlnei Jeremia hnênah a lo thleng a, 7 “LALPA, Israel Pathian chuan heti hian a ti: ‘Juda lal, mi râwn tûra tîrtu hnênah chuan, “Ngai rawh, Pharaoa sipai rual, nangmahni ṭanpui tûra lo kalte chu anmahni ram Aigupta-ah an kîr leh ang. 8 Kaldaite erawh chu an lo kal ang a, he khawpui hi an bei ang a, an la ang a, meiin an hâl ang.” ’ 9 LALPA chuan heti hian a ti: ‘ “Kaldaite chuan min kalsan ngei ang,” tiin mahni inbum suh u; an kal dâwn si lo. 10 Nangmahni beitu Kaldai sipai rual zawng zawng hi sawisa nek mah ula, an zînga mi hliam awm chhunte chauh pawhin mahni puan in aṭanga lo thovin, he khawpui hi meiin an hâl tho vang,’ tiin i sawi tûr a ni,” tiin.
Jeremia an man a, an tântîr
11 Tin, heti hi a ni a, Pharaoa sipai rualte hlauva Kaldai sipai rualten Jerusalem an kalsan lai chuan, 12 Jeremia chuan mite zînga a chanvo la tûrin, Benjamin rama lût tûrin Jerusalem a chhuahsan a. 13 Tin, Benjamina Kawngka a thlen chuan vêngtu hotu, Hanania fapa Selemia fapa, a hming Irija a lo awm a; chu chuan, “Kaldaite hnênah i inpe a ni!” tiin zâwlnei Jeremia chu a lo man a. 14 Tin, Jeremia chuan, “Dâwt a ni! Kaldaite hnênah ka inpe lo ve,” a ti a; mahse, a ngaithla lo va. Tichuan, Irija chuan Jeremia chu a man a, hotute hnênah a hruai a. 15 Tin, hotute chu Jeremia chungah an thinur êm êm a, an vua a, ziaktu Jonathana inah an tântîr a; chu chu tân in atân an hman a ni si a. 16 Tin, Jeremia chu lei hnuai ripa a luha, ni tam tak a awm hnuin, 17 Lal Zedekia chuan a ko chhuak a; tin, lal chuan a inah a rûk têin a zâwt a, a hnênah, “LALPA hnên ata thu eng emaw tal a awm em?” a ti a. Tin, Jeremia chuan, “Awm e,” a ti a. A hnênah, “Babulon lal kutah mantîrin i awm ang,” a ti bawk a. 18 Tin, Jeremian Lal Zedekia hnênah chuan, “Nangmah emaw, i rawngbâwltu emaw, hêng mite chungah hian eng thil nge ka tihsuala mi mantîr ni? 19 I hnêna, ‘Babulon lal chu nangmah leh he ram do tûrin a lo kal lo vang,’ tia thu sawitu i zâwlneite chu khawiah nge an awm tâk? 20 Aw ka pu, lalber, ngaithla rawh, ka ngên a che; ka dîlna hi lo pawm ta che, ka ngên a che; ziaktu Jonathana inah chuan mi kîrtîr lul suh, chutah chuan ka thi dah ang e,” a ti a. 21 Tin, Lal Zedekia chuan thu a pe a; tin, Jeremia chu vêngtu hung chhûngah chuan a tântîr a, chhang siamtute kawtthlêr ata ni tin chhang hlâwm khat, khawpuia chhang a awm chhûng chu a pe a; chutiang chuan Jeremia chu vêngtu hung chhûngah chuan a awm reng a.
Jeremia tâng chhanchhuah
1 Tin, Matana fapa Sephatia leh Pasura fapa Gedalia leh Selemia fapa Jukala leh Malkia fapa Pasura-te chuan, mipui zawng zawng hnêna Jeremian, 2 “LALPA chuan heti hian a ti: ‘Hemi khawpuia awm rengte chu khandaih te, ṭâm te, hripui tein an thi ang a; Kaldaite hnêna inpete erawh chu an nung ang a; a nunna chu a inchhanhim ang a, a nung ang.’ 3 LALPA chuan heti hian a ti: ‘He khawpui hi Babulon lal sipai rualte kutah pêk a ni ngei ang a, a la ang,’ ” tia a sawi chu an ngaithla a. 4 Tin, hotute chuan lal hnênah, “He mi hi tihhlum ni rawh se, kan ngên a che; ani chuan an hnêna hetiang thute sawiin, he khawpuia râl tu mi la awmte leh mipui zawng zawngte thâ a tiṭhum zo si a. He mi hian mipuite ṭhatna a zawng lo va, an chhiatna a zawng zâwk a ni,” an ti a. 5 Tin, Lal Zedekia chuan, “Ngai rawh u, ani chu in kuta awm alâwm. Lal hi in duh loh zâwng ti thei a ni hlei nêm,” a ti a. 6 Tin, Jeremia chu an hruai a, vêngtu hung chhûnga awm lal fapa Malkia lei hnuai ripah chuan an paih lût a. Jeremia chu hruiin an thlâk thla a, chumi lei hnuai ripah chuan chirhdiak chauh lo chu tui a awm lo va; Jeremia chu chirhdiakah chuan a tla a. 7 Tin, Ethiopia mi, mi tilreh, lal ina awm ṭhîn Ebed-meleka chuan Jeremia chu lei hnuai ripah an dah tih a lo hria a; chutih lai chuan lal chu Benjamina Kawngkaah a ṭhu a; 8 Ebed-meleka chu lal in ata a chhuak a, lal hnênah chuan, 9 “Ka pu, lalber, hêng miten zâwlnei Jeremia lei hnuai ripa an paih thla hi thil sual nasa tak an ti a ni, rilṭâm avângin a awmna hmunah chuan a thi mai dâwn alâwm; khawpuiah chuan chhang a awm tawh lo,” a ti a. 10 Tin, lal chuan Ethiopia mi Ebed-meleka chu thu a pe a, “Heta ṭangin mi sawmthum hruai la, lei hnuai rip ata chu a thih hmain zâwlnei Jeremia chu la chhuak rawh u,” tiin. 11 Tichuan, Ebed-meleka chuan mite chu a hruai a, lal tangka in hnuaiah chuan an lût a, kawr hlui paih te leh silhfên chhia te an la chhuak a, lei hnuai ripah chuan Jeremia hnênah hruiin an thlâk a. 12 Tin, Ethiopia mi Ebed-meleka chuan Jeremia hnênah, “Hêng kawr hlui te leh silhfên chhia te hi i zakhnuaiah hrui hian hrên hnan rawh,” a ti a. Jeremia chuan chutiang chuan a ti a. 13 Tin, Jeremia chu lei hnuai rip ata chu hruiin an khai chhuak ta a; tin, Jeremia chu vêngtu hung chhûngah chuan a awm ta reng a.
Zedekian Jeremia a râwn
14 Tin, Lal Zedekia chuan Jeremia chu a ko va, LALPA ina luhna pathumnaah chuan a hnênah a hruai lût a; tin, lal chuan Jeremia hnênah, “Thil ka zâwt ang chia; ka lakah eng mah thup suh ang che,” a ti a. 15 Jeremia chuan Zedekia hnênah, “Ka hrilh che chuan mi tihlum ngei dâwn lâwm ni? Thu ka râwn che chuan mi ngaithla dawn si lo,” a ti a. 16 Tin, Lal Zedekia chuan Jeremia hnênah, “LALPA, he ka nunna siamtu hi a nuna a nun chhûng zawng ka tihlum tawp lo vang chia, i nunna zawngtute kutah chuan ka pe hek lo vang che,” tiin a rûk têin chhia a chham a. 17 Tichuan, Jeremia chuan Zedekia hnênah, “LALPA, sipaihote Pathian, Israel Pathian chuan heti hian a ti: ‘Babulon lal hotute hnêna i inpêk chuan in nunna chu i vawng him ang a, hemi khawpui pawh hi a kâng lo vang, nang leh i chhûngte pawh in nung ang. 18 Babulon lal hotute hnêna i inpek loh erawh chuan he khawpui hi Kaldai kutah pêk a ni ang a, an hâl ang a, an kut ata i chhuak tawp lo vang,’ ” a ti a. 19 Tin, lal Zedekia chuan Jeremia hnênah, “Kaldai mite hnêna inpe tawh Juda-ten min mantîrin min nuihzatbûr mai ang tih ka hlau a ni,” a ti a. 20 Jeremia erawh chuan, “An mantîr lo vang che; i hnêna ka sawi LALPA aw hi awih mai rawh. Tichuan, i tân a ṭha ang a, i nung bawk ang. 21 Inpêk i duh loh erawh chuan hei hi LALPA thu mi kawhhmuh chu a ni: 22 ‘Ngai rawh, Juda lal ina hmeichhe la awm zawng zawngte chu Babulon lal hotute hnênah hruaiin an awm ang a, chûng hmeichhiate chuan, “I ṭhian ṭha ṭhaten an bum chia, an hneh ta che; i ke chu chirhdiaka a tân veleh an hawisan che,” an ti ang. 23 I nupuite, i fanaute chu Kaldai mite hnênah an hruai vek ang a, an kut ata i chhuak lo vang a, Babulon lal kutah manin i awm zâwk ang a, nangmah avângin he khawpui hi a kâng ang,’ ” a ti a. 24 Tin, Zedekia chuan Jeremia hnênah, “Hêng thute hi tu mân hre suh se; tichuan, i thi lo vang. 25 Nimahsela, hotuten ka biak che hi an hriata, i hnêna an lo kala, i hnêna, ‘Lal hnêna i sawi chu min hrilh rawh; kan lakah eng mah zêp suh la, kan tihlum lo vang che; nangma hnêna lal thu sawite pawh,’ an tih chuan, 26 nang chuan an hnênah, ‘Jonathana ina mi kîrtîr lova, chuta va thi lo tûrin lal hnênah dîlna ka theh lût mai a ni,’ i ti dâwn nia,” a ti a. 27 Tin, hotu zawng zawng chu Jeremia hnêna lo kalin, an zâwt ta ngei a, lalin thu a pêk zawng zawng ang zêlin anni chu a hrilh a. Tichuan, an biak chu an bâng ta a; a thu chu hriat phâk a ni si lo va. 28 Tichuan, Jeremia chu Jerusalem lâk ni thlengin vêngtu hung chhûngah a awm ta reng a.
Jerusalem tlâwm thu
1 Tin, Juda lal Zedekia lal kum kuana, thla sâwmnaah chuan, Babulon lal Nebukadnezzara leh a sipai zawng zawng chuan Jerusalem an bei a, an hual a. 2 Zedekia lal kum sâwm leh pakhatna, thla lina, chumi thla ni kuanaah chuan khawpui kulh chu an su tlang a. 3 Tin, heti hi a ni a, Jerusalem an lâk chuan Babulon lal hotute zawng zawng chu an lo lût a, kawngka laitaah chuan an ṭhu a: Nergal-sarezera te, Samgar-neboa te, Sarsekima te, Rabsaria te, Nergal-sarezera te, Rabmaga te leh Babulon lal hotu dang zawng zawng nên. 4 Tin, heti hi a lo ni a, Juda lal Zedekia leh râl tu mi zawng zawng chuan anni chu an hmuhin an tlânchhia a, khawpui ata zânah lal huan kawng lamah kulh bang pahnih kâr kawngkaah an tlân chhuak a, ani chu Araba kawng lamah a chhuak a; 5 mahse, Kaldai-ho sipai rual chuan ani chu an ûm a, Jeriko phaizâwlah Zedekia chu an ûm phâk ta a; tin, an man hnu chuan Babulon lal Nebukadnezzara hnênah, Hamath rama Ribla khuaah chuan an hruai a; tin, amah chuan a chungthu chu a rêl a. 6 Tin, Babulon lal chuan Ribla khuaah chuan ama mit hmuh ngeiah chuan Zedekia fapate chu a that a, Babulon lal chuan Juda mi ṭha zawng zawng a that bawk a. 7 Chu lo pawh chu Zedekia mit a kher chhuahsak a, kawl a buntîr a, Babulon-ah a hruai ta a. 8 Tin, Kaldai-hote chuan lal in leh mi dang in zawng zawng an hâl a, Jerusalem kulh bangte pawh an tichhia a. 9 Tin, vêngtu hotu Nebuzaradana chuan, khawpuia mipui la awm leh a hnêna mahnia inpete leh mipui la awm chhunte chu Babulon-ah salah a hruai a; 10 mahse, vêngtu hotu Nebuzaradana chuan Juda ram mi rethei, eng mah nei lote chu a hnutchhiah a, grêp huan leh lote a pe nghâl a.
Jeremia man ve loh tûr
11 Tin, Babulon lal Nebukadnezzara chuan Jeremia chungchâng thu-ah chuan vêngtu hotu Nebuzaradana hnênah, 12 “Ani hi hruai la, ṭha takin ti la, tina rêng rêng suh, i hnêna a sawi ang zêlin ti zâwk rawh,” tiin thu a pe a. 13 Tin, vêngtu hotu Nebuzaradana chuan Nebusazbana te, Rabsaria te, Nergal-sarezera te, Rabmaga te leh Babulon lal sipai hotu deuh deuhte a chah vek a; 14 anni chuan Jeremia chu vêngtu hung chhûng ata an ko chhuak a, Saphana fapa Ahikama fapa Gedalia hnênah a ina hâwn tûrin an kawltîr ta a; tichuan, mite zîngah chuan a khawsa ta a.
Ebed-meleka a him dâwn
15 Tin, LALPA thu chu, vêngtu hung chhûnga khârkhipa a awm lai chuan Jeremia hnênah a lo thleng a, 16 “Ethiopia mi Ebed-meleka hnênah, ‘Sipaihote LALPA, Israel Pathian chuan heti hian a ti: “Ngai rawh, a ṭhatna tûr ni lovin, he khawpui chhiatna tûr zâwkin ka thute ka rawn thlen ang a, chumi ni ngei chuan i hmaah hlen a ni ang. 17 Chumi niah chuan nang erawh chu ka chhanchhuak ang che,” tih hi LALPA thuchhuak a ni, “I mi hlauhte kutah pêk i ni lo vang. 18 Ka chhanhim ngei dâwn si chia, khandaihin i tlu lo vang a, i nun chu chhanhim a ni ang, kei mi rin avângin,” tih hi LALPA thuchhuak a ni,’ tiin va sawi rawh,” a ti a.
Gedalia hnênah Jeremia a khawsa
1 Judai leh Jerusalem sal zawng zawng, Babulon sala an hruaite zînga Jeremia khaidiat vuan chunga a hruai laia vêngtu hotu, Nebuzaradanan Rama aṭanga a chhuahtîr hnua LALPA hnên ata Jeremia hnêna thu lo thleng chu. 2 Tin, vêngtu hotu chuan Jeremia chu a hruai a, a hnênah, “LALPA i Pathian chuan he hmuna thil ṭha lo lo thleng tûr hi a lo puang tawh a. 3 Tin, LALPA chuan a rawn thlentîr ta ngei a, a sawi ang zêlin a ti ta a; LALPA chungah thil in tisual a, a ṭawngka in awih loh avângin he thil hi in chungah a lo thleng a nih hi. 4 Tûnah chuan, ngai rawh, vawiin ni hian i kuta khaidiat bun chu ka phelhsak a che. Babulon-a ka hnêna lo kal i duh leh lo kal la, i duh loh leh lo kal lo mai rawh; en teh, ram zawng zawng i hmaa a awm hi, kal rem i tih leh ṭha i tihna apiangah kal ang che,” a ti a. 5 A la kîr hmain ani chuan, “Juda khawpuite chunga awptua Babulon lalin a siam Saphana fapa Ahikama fapa, Gedalia hnênah kîr la, mite zîngah a hnênah awm rawh. A nih loh leh kal rem i tihna apiangah kal mai rawh,” a ti a. Tichuan, vêngtu hotu chuan ei tûr leh thilpêk a pe a, a kaltîr ta a. 6 Tin, Jeremia chu Ahikama fapa Gedalia hnênah Mizpa khuaah a kal a, a hnênah a rama mi la awm chhunte zîngah chuan a awm ve ta a.
Juda ram awptu Gedalia
7 Tin, sipai pâwl hotu zawng zawng ram laka awmte, anmahni leh an hote chuan, Babulon lalin Ahikama fapa Gedalia chu chumi rama mipate, hmeichhiate, naupangte leh mi rethei berte, Babulon sala hruai loh zawng zawng chu a kawltîr tih an lo hriat chuan, 8 Mizpa khuaah Gedalia hnênah an lo kal a - Nethania fapa Ismaela te, Karea fa Johanana leh Jonathana te, Tanhumetha fapa Seraia te, Netophath khuaa mi Ephaia fapate leh Maakath khuaa mi fapa Jezania te leh an hote chu. 9 Tin, Saphana fapa Ahikama fapa, Gedalia chuan anmahni leh an hote hnênah, “Kaldaite rawng bâwl chu hlau suh u; ramah hian awm hle hle ula, Babulon lal rawng bâwl ula, in tân a ṭha mai ang. 10 Kei zawng Mizpa khuaah hian ka awm ang a, Kaldai mi ka hnêna lo kal tûrte hmaah chuan nangmahni aiawhin ka ding ang; nangni erawh chuan uain te, nipui thei te, hriak te la khâwm ula, in bêlah te dah ula, khawpui in lâk tâkahte chuan chêng rawh u,” tiin chhia a chham a. 11 Chutiang bawkin Juda mi zawng zawng, Moab rama chêngte, Amon mite zînga chêngte leh Edom rama chêngte leh ram danga awmte chuan, Babulon lalin Juda mi ṭhenkhat a hnutchhiaha, an chungah Saphana fapa Ahikama fapa, Gedalia a dah tih an hriatin, 12 Juda mi zawng zawng an hnawh darhna ram zawng zawng aṭangin an lo kîr a, Judai rama Mizpa khuaah Gedalia hnênah an lo thleng a, uain leh nipui thei an la khâwm ta ṭeuh mai a.
Gedalia thah thu
13 Chu lo pawh chu Karea fapa Johanana leh sipai pâwlte hotu, ram laka awm zawng zawng chu Mizpa khuaah Gedalia hnênah an lo kal a, 14 a hnênah, “Amon mite lal Baalisa chuan i nunna la tûrin Nethania fapa Ismaela a tîr tih i hria em?” an ti a. Ahikama fapa Gedalia erawh chuan a awih lo va. 15 Tin, Karea fapa Johanana chuan Mizpa khuaa Gedalia hnênah, “Mi kaltîr teh khai, Nethania fapa Ismaela chu ka va that mai ang e, tu mân an hre lo vang. Juda mi i hnêna awm khâwm zawng zawng an darh veka, Juda mi awm chhunte boralna ti tûrin engah nge i nunna a lâk ang?” tiin a rûk têin a sawi a. 16 Ahikama fapa Gedalia erawh chuan Karea fapa Johanana hnênah chuan, “He thil hi i ti tûr a ni lo; Ismaela i sawi dân hi a dik lo ve,” a ti a.
1 Tin, heti hi a ni a, thla sarihnaah chuan Elisama fapa Nethania fapa Ismaela, lal chia mi, lal khâwnbâwlte zînga pakhat chu, mi sâwm hruaiin Mizpa khuaah Ahikama fapa Gedalia hnênah a lo kal a; tin, Mizpa khuaah chuan chaw an ei ho va. 2 Tin, Nethania fapa Ismaela chu a mi hruai sâwmte nên chuan an tho va, Saphana fapa Ahikama fapa, Babulon lalin ram awptua a siam Gedalia chu khandaihin an that ta a. 3 Tin, a hnêna Juda mi awm zawng zawng, Mizpa khuaa Gedalia hnêna awmte leh Kaldai râl tu mi awm vete chu Ismaela chuan a that bawk a. 4 Tin, Gedalia a thah hnu ni hnihnaah chuan heti hi a ni a, tu mân an hriat hmain, 5 Sekem aṭang te, Silo aṭang te, Samaria aṭang tein mi sawmriat, an khabe hmul mêta, an silhfênte thlêra, mahni inzaiin, chhang hlante leh rimtuite kengin LALPA inah hlân tûrin an lo kal a. 6 Tin, Nethania fapa Ismaela chu Mizpa khua aṭangin anmahni hmuak tûrin a chhuak a, kawng tluanin a ṭap zêl a; tin, heti hi a ni a, anmahni a han hmuh chuan an hnênah, “Ahikama fapa Gedalia hnênah lo kal rawh u,” a ti a. 7 Tin, heti hi a ni a, khawpui chhûng an han thlen chuan Nethania fapa Ismaela leh a mi hruaite chuan anni chu an that a, khuarkhurumah an paih ta a. 8 An zînga mi sâwm erawh chuan Ismaela hnênah, “Min that suh, ramah chuan buh te, buhban te, hriak te, khawizûte kan thukru ṭeuh si a,” an ti a. Tichuan, anmahni chu a zuah a, an unaute zîngah chuan a that tel ta lo va. 9 Tin, khuarkhurum, Ismaelan Gedalia ruala a mi thahte ruang a paihna chu, Lal Asan Israel lal Baasa a hlauh avânga a siam a ni. Nethania fapa Ismaela chuan chu chu ruangtein a tikhat a. 10 Tin, Ismaela chuan Mizpa khuaa mi nung awm chhun, lal fanute, Ahikama fapa Gedalia hnêna vêngtu hotu Nebuzaradanan a kawltîr, Mizpa khuaa la awm zawng zawng nên chuan salah a hruai ta vek a; Nethania fapa Ismaela chuan chûngte chu sala hruaiin Amon mite ram panin a chhuak a. 11 Amaherawhchu, Karea fapa Johanana leh a hnêna awm sipai pâwl hotu zawng zawng chuan, Nethania fapa Ismaela thil ṭha lo tih zawng zawng chu an lo hriatin, 12 mi zawng zawng an hruai chhuak a, Nethania fapa Ismaela bei tûrin an kal a, tui tam tak awmna hmun Gibeon-ah chuan an va hmu a. 13 Tin, heti hi a ni a, Ismaela hnêna mi zawng zawng chu, Karea fapa Johanana leh a hnêna sipai pâwl hotu zawng zawng an hmuh chuan, an lâwm ta êm êm mai a. 14 Tichuan, Ismaelan Mizpa khua aṭanga sala a hruai zawng zawng chu an hawi a, an kîr a, Karea fapa Johanana hnênah an kal ta duak a. 15 Nethania fapa Ismaela erawh chu mi pariat nên Johanana lakah an tlân chhuak hrâm a, Amon mite hnênah an kal ta a. 16 Tin, Karea fapa Johanana leh a hnêna sipai pâwl hotu zawng zawng chuan, Nethania fapa Ismaelan Ahikama fapa Gedalia a thah hnua, Mizpa khua aṭanga Nethania fapa Ismaela laka Johananan a chhanchhuah tawh, mi la awm chhun zawng zawng - indo mite, hmeichhiate, naupangte, mi tilrehte, Gibeon aṭanga a hruai lehte chu an hruai ta vek a. 17 Tin, an chhuak a, Kaldai-ho avânga Aigupta ramah tlân luh tumin Bethlehem khaw bula Geruth Chimham-ah chuan an châwl a. 18 Nethania fapa Ismaelan Ahikama fapa Gedalia, Babulon lalin chu ram awptua a siam chu a thah avângin, anni chu an hlau ta êm êm si a.
Ṭawngṭaisak tûrin mipuiten Jeremia an ngên
1 Tin, sipai pâwl hotute leh Karea fapa Johanana leh Hosaia fapa Jezania leh mipui zawng zawng, a tê ber aṭanga a lian ber thlengin an lo hnai a, 2 zâwlnei Jeremia hnênah, “I hmaah kan dîlna pawm ni sela, hêng mi la awm chhun zawng zawng tân ngei hian i Pathian hnênah min ṭawngṭaisak tûrin kan ngên a che; min hmuh ang ngei hian mi tam tak zîng ata tlêm tê chauh hnutchhiahin kan awm ta si a, 3 LALPA i Pathianin kan kalna tûr kawng leh kan tih tûr thil min kawhhmuh theihna tûrin,” an ti a. 4 Tin, zâwlnei Jeremia chuan an hnênah, “In thu chu ka hria e. Ngai rawh u, in thu ang zêlin LALPA in Pathian hnênah chuan ka dîl ang e; tin, heti hi a ni ang a, LALPAN a chhânna che u apiang ka hrilh zêl ang che u, in lakah eng mah ka zêp lo vang,” a ti a. 5 Tin, anni chuan Jeremia hnênah, “LALPA i Pathianin kan hnêna a tirhna che thu zawng zawng ang zêla kan tih loh chuan, kan lakah LALPA chu thu hretu dik leh rinawm ni rawh se. 6 A chhia emaw, a ṭha emaw, kan tirhna che LALPA kan Pathian ṭawngka chhuak chu kan awih ngei ngei ang; LALPA kan Pathian ṭawngka chhuak kan awih chuan kan tân ṭhat theihna tûr a ni,” an ti a.
Jeremia ṭawngṭai LALPA chhânna
7 Tin, heti hi a ni a, ni sâwm hnuah LALPA thu chu Jeremia hnênah a lo thleng a. 8 Tichuan, Karea fapa Johanana leh a hnêna sipai pâwl hotu awm zawng zawng leh sipai zawng zawng, a tê ber aṭanga a lian ber thlengin a ko va, 9 an hnênah, “LALPA in Pathian, a hmaa in dîlna thlen tûra in mi tirhna khân heti hian a ti e: 10 ‘He ramah hian in awm reng chuan ka tungding ang che u a, ka ṭhiat lo vang che u, ka phun ang che u a, ka pawt phawi lo vang che u, in chunga thil ṭha lo ka thlente chu ka sim tawh si a. 11 Babulon lal in hlauh ṭhina chu hlau tawh suh u, amah chu hlau suh u,’ tih hi LALPA thuchhuak a ni; a kut ata chhandam tûr leh chhanchhuak tûr che uin in hnênah ka awm si a. 12 Tin, in chungah zah a ngaih theih nân zahngaihna ka phal ang che u a, in ram ngeiah ka kîrtîr ang che u. 13 Amaherawhchu, ‘He ramah hian kan awm lo vang,’ tia LALPA in Pathian aw chu in awih lohva, 14 ‘Hnai lo ve, Aigupta ramah kan kal zâwk ang a, tah chuan indona rêng rêng kan tawk lo vang a, tawtawrâwt ri pawh kan hre lo vang a, chaw tlâkchham a awm hek lo vang, tah chuan kan chêng zâwk ang,’ in tih chuan, 15 aw Juda awm chhunte u, LALPA thu chu hre rawh u khai. Sipaihote LALPA, Israel Pathian chuan heti hian a ti: ‘Aigupta rama lût tûr leh chuta chêng tûra in hawi lui a nih chuan, 16 heti hi a lo ni ang a, khandaih, in hlauh ngeia khân Aigupta ramah chuan a nang ang che u a, ṭâm, in hlauh ṭhina pawh khân Aigupta ramah chuan a ûmzui zêl ang che u, tah chuan in thi ang. 17 Aigupta rama chêng tûra hawi luite zawng zawng chu chutiang chuan an awm ang a, khandaih te, ṭâm te, hri tein an thi ang, thil ṭha lo an chunga ka thlen tûr lakah chuan tu mah an chhuakin an him lo vang.’ 18 “Sipaihote LALPA, Israel Pathian chuan heti hian a ti a ni: ‘Jerusalem-a chêngte chunga ka thinurna ka leih ang bawkin, Aigupta ram in luh hunah chuan in chungah ka thinrimna ka leih bawk ang. Anchhe dawng leh mak tih huai huai, mi kamchhe tleuhna, sawichhiat in ni ang a, he hmun hi in hmu leh tawh rêng rêng lo vang.’ 19 Aw, Juda awm chhunte u, LALPA chuan in chungchâng a sawi tawh hi, ‘Aigupta ramah chuan lût suh u!’ Vawiinah hian ka hriat chiantîr che u tih hre mawlh rawh u. 20 In nunna chân phah tûrin in inbum a ni mai; LALPA in Pathian hnênah chuan, ‘LALPA kan Pathian hnênah chuan min ṭawngṭaisak la, LALPA kan Pathianin a tih apiang chu min hrilh la, kan ti zêl ang e,’ tiin mi tîr kha a ni a. 21 Vawiinah hian in hnênah ka puang ta a nih hi; mahse, in hnêna a mi tirhna engah mah LALPA in Pathian awka chu in awih si lo va. 22 Chuvângin, tûnah zawng hre rawh u, chên in châkna hmun ngeiah chuan khandaih te, ṭâm te, hri tein in thi ngei dâwn a ni, tiin,” a ti a.
Aigupta ramah Jeremia an hruai
1 Tin, heti hi a ni a, Jeremian mipuite zawng zawng hnêna LALPA an Pathian thu zawng zawng, LALPA Pathianin sawi tûra an hnêna a tirhna thu, hêng thu zawng zawngte ngei hi a sawi tâwpah chuan, 2 Hosaia fapa Azaria leh Karea fapa Johanana leh mi intivei zawng zawng chuan Jeremia chu an bia a, a hnênah, “Dâwt i sawi a ni! LALPA kan Pathianin, ‘Aigupta rama chêng tûrin in kal tûr a ni lo,’ tia sawi tûrin a tîr hlei nêm che. 3 Kaldaite kutah mantîra kan awma min thah theihna tûr leh, Babulon sala min hruai theihna tûrin, Neria fapa Baruka chuan min bei tûrin a tîr che a nih zâwk hi,” an ti a. 4 Chutichuan, Karea fapa Johanana leh sipai pâwl hotu zawng leh mipui zawng zawng chuan, Judai rama chêng tûrin LALPA ṭawngka chu an awih ta lo va. 5 Tichuan, Karea fapa Johanana leh sipai pâwl hotu zawng zawng chuan Juda awm chhun zawng zawng, Judai rama chêng tûra hnawh darha an awmna hnamte zîng ata lo kîr - 6 mipate, hmeichhiate, naupangte, lal fanute leh mi tin, vêngtu hotu Nebuzaradanan Saphana fapa Ahikama fapa, Gedalia leh a hnêna an hnutchhiahte chu, zâwlnei Jeremia leh Neria fapa Baruka te pawh, an hruai ta vek zâwk a. 7 Tichuan, Aigupta ram chu an thleng ta a, LALPA ṭawngka chu an awih si lo va; tin, Tahpanes khua ngei chu an thleng a. 8 Tin, Tahpanes-ah chuan Jeremia hnênah LALPA thu a lo thleng a, 9 “Lung lian pui pui la la, Tahpanes-a Pharaoa in luhna bula leirawhchan siamnaa hlum chawh diaknaah chuan, Juda-te mit hmuh ngeiin phûm rawh. 10 Tin, an hnênah chuan, ‘Sipaihote LALPA, Israel Pathian chuan heti hian a ti: “Ngai rawh u, ka rawngbâwltu Babulon lal Nebukadnezzara chu ka chah chhuak ang a, ani chuan hêng lung ka phûm rûk chungah hian a lalṭhutthlêng a hûng ang; ani chuan an chungah chuan a lal puan in a zâr ang. 11 Tin, a lo kal ang a, Aigupta ram chu a rawn nghaisa ang, thihna pual chu thihnaah, sal tânna pual chu sal tânnaah, khandaih pual chu khandaihah. 12 Aigupta mite pathian inah te chuan mei a chhuah ang a, a kâng ang a, salah a hruai ang; berâmpuin puan a inbel angin Aigupta ram chu a inbel ang; chuta ṭangin râlmuangin a chhuak ang a, 13 Aigupta rama Beth-semes lung ban sâng pui puite chu a tichim ang a, Aigupta pathian inte chu meiin a hâl ang,” a ti,’ ti rawh,” a ti a.
Aigupta rama Israel awmte hnêna LALPA thu
1 Aigupta rama Juda awm zawng zawng, Migdol khua te, Tahpanes khua te, Noph khua te leh Pathros rama chêngte chungchânga Jeremia hnêna thu lo thleng chu: 2 “Sipaihote LALPA, Israel Pathian chuan heti hian a ti: ‘Jerusalem leh Juda khawpuite zawng zawng chunga thil ṭha lo ka rawn thlen zawng zawng chu in hmu tawh a; tin, ngai teh u, tûnah hian a lo ram ta mai a ni a, tu mah an chêng ta lo; 3 anni pawhin, nangni pawhin, in thlahtute pawhin pathian dang an la hriat ngai hleih lohte rawng bâwl tûr leh an hnêna rimtui hâlin, mi tithinur tûra an suahsualna an tih tâk avângin. 4 Chuti pawhin in hnênah chuan ka rawngbâwltu zâwlneite zawng zawng, zîng tak taka thovin ka tîr a, an hnênah, “Aw, he thil tenawm, ka huat zâwng tak hi chu ti tawh suh u,” tiin. 5 Mahse, an ngaithla chuang lo va, an suahsualna hawisana pathian dangte hnênah rimtui hâl loh tûr thu chu an bengkhawn hek lo. 6 Chuvângin, ka thinurna leh ka thinrimna chu Juda khawpuiahte leh Jerusalem kawtthlêrahte ka leihin a alh ta a, vawiina a awm ang hian a ram a, a ṭiau ta a nih hi.’ 7 Chuvângin, tûnah zawng LALPA, sipaihote Pathian, Israel Pathian chuan, ‘In zîng ata a hmei a pa, nausênte leh hnute hne laite Juda zîng ata tu mah zuah lova râwt bo vek tûrin engati nge he thil ṭha lo tak hi in nunna chung ngeia in tih ni? 8 In va chênna Aigupta ram pathiante hnênah rimtui hâlin khawvêl hnam zawng zawng zînga ânchhe dawng leh sawichhiat in nih theihna tûr leh, râwt bo in nih theihna tûrin in kut kawih ngeiin mi tithinur a ni. 9 In thlahtute suahsualna te, Juda lalho suahsualna te, an mipuite suahsualna te, nangmahni ngei suahsualna te leh in nupuite suahsualna, Judai ram leh Jerusalem kawtthlêra an tih tâkte chu in theihnghilh ta em ni? 10 Vawiin thleng pawh hian an la inchhîr chuang lo va, in thlahtute leh nangmahni hmaa ka târ lan ka dân leh ka dân siamte chu in zawh lo va, in ṭih hek lo.’ 11 “Chuvângin, sipaihote LALPA, Israel Pathian chuan heti hian a ti: ‘Ngai rawh u, in chhiatna tûrin Juda zawng zawng râwt bo vek tûrin ka hmachhawn ang che u. 12 Tin, Juda awm chhun, Aigupta rama chên tuma hawi luite chu ka man ang a, an chimit vek ang; Aigupta ramah chuan an tlu ang a, khandaih leh ṭâmtea tihboralin an awm ang; a tê ber aṭanga a lian ber thlengin khandaih leh ṭâmin an thi ang, ânchhe dawng leh mak tih huai huai leh mi kamchhe tleuhna leh sawichhiat an ni ang. 13 Jerusalem ka hrem ang bawkin Aigupta rama chêngte chu khandaih te, ṭâm te leh hripuitein ka hrem dâwn si a. 14 Chutichuan, Aigupta rama chêng tûra kal Juda awm chhunte chu Judai ram, an awm nâna kîr leh an châk êm êmna ramah chuan kîr tûrin, pakhat mah nungdamin an chhuak lo vang, a rûka tlân chhuakte chauh lo chu tu mah an kîr lo vang.’ ” 15 Tichuan, mi zawng zawng, an nupuiten pathian dangte hnênah rimtui an hâl tih hriate leh, hmeichhia chuta dingte mipui tam tak, Aigupta rama chêng mipui zawng zawng chuan, Pathros-ah chuan Jeremia chu an chhâng a, heti hian an ti a: 16 “LALPA hminga kan hnêna i thusawite kha zawng kan ngaihthlâksak lo vang che. 17 Keini leh min thlahtute, kan lalte leh kan hotuten Juda khawpuiahte leh Jerusalem kawtthlêrahte an lo tih tawh ṭhin ang khân, vân lalnu hnêna rimtui hâlte leh a hnêna in tûr thilhlan bun chhuah te, kan ṭawngka chhuak apiang ang zêl khân kan ti ngei ngei ang; chutih lai chuan kan hmuingîl a, ei leh bâr tûr a tam a, chhiatna rêng kan hmu hlei nêm. 18 Vân lalnu hnêna thil hâl leh a hnêna in tûr thilhlan bun chhuahte kan bân chinah hian engkim kan tlachham ta zâwk a, khandaih leh ṭâmtea tihboralin kan awm ta a ni,” tiin. 19 Tin, hmeichhiate chuan, “Vân lalnu hnêna rimtui kan hâl lai leh, a hnêna in tûr thilhlan kan bun chhuah laite khân, kan pasalte remtih lohvin em ni a biak nân chhang kan siama, a hnênah in tûr thilhlante kan bun chhuah kha?” an ti a. 20 Tichuan, Jeremia chuan mipui zawng zawng - a hmei a pa, amah chhângtu zawng zawng hnên ngeiah chuan, 21 “Juda khawpuiahte leh Jerusalem kawtthlêrahte, nangni leh in thlahtute, in lalte leh in hotute, leh rama mipuite rêng rêngin rimtui an hâlte chu LALPAN a hre rengin, a rilruah a khung lo vem ni? 22 In thil sual tih avâng leh in thil tenawm tihte avângin LALPAN a tuar peih ta lo a nih kha; chumi avâng chuan in ram chu tuna a awm ang hian ram chhia, mak tih huai huai, ânchhe dawng, luahtu awm lo a lo nih tâk hi. 23 Rimtui in hâl a, LALPA chungah in sual a, LALPA ṭawngka chhuakte chu in awih lo va, a dân emaw, a dân siamte emaw, a thu hriattîrte emaw in zawm hek loh avângin, he thil ṭha lo hi tûna a awm ang hian in chungah a lo thleng a nih hi,” a ti. 24 Chu lo pawh Jeremia chuan mipui zawng zawng leh hmeichhia zawng zawng hnênah, “Aigupta rama Juda zawng zawngte u, LALPA thu hi hre rawh u! 25 Sipaihote LALPA, Israel Pathian chuan heti hian a ti: ‘Nangni leh in nupuite chuan, “Vân lalnu hnênah rimtui hâl leh in tûr thil hlan bun chhuahte chu, kan lo tiam tawh ang zêlin kan ti ngei ang,” tiin in kain in sawi tawh a, in kutin in puitlin tawh bawk a. In thutiamte chu tinghet ula, in thu tumte chu hlen law law rawh u.’ 26 Chuvângin, nangni Juda, Aigupta rama chêng zawng zawngte u, LALPA thu hi ngaithla rawh u: ‘Ngai rawh u, “LALPA PATHIAN a nuna a nun chhûng chu,” tiin, Aigupta ram pum puia chêng, Juda mi tu kaah mah ka hming a ri tawh ngai lo vang, tiin ka hming ropui chhâlin chhia ka chham a ni, tih hi LALPA thuchhuak a ni. 27 Ngai rawh u, an ṭhatna tûr ni lovin, an chhiatna tûrin anmahni ka châng reng a ni. Tichuan, Juda mi, Aigupta rama awm zawng zawng chu khandaih te, ṭâmtea tihralin an awm ang, an boral vek hma loh chuan. 28 Tin, khandaih tihral bâng tlêm tê chu Aigupta ram ata chhuakin Judai ramah an lût ang; tin, Juda mi awm chhun zawng zawng, Aigupta rama chêng tûra kal tate chuan tu thu nge ding zâwk dâwn, ka thu nge an thu, an hria ang. 29 Tin, hei hi in tân chhinchhiahna a ni ang: ka thu hi in chungah thil ṭha lo lam atân a ding ngei dâwn tih in hriat theih nân, he hmunah hian ka hrem dâwn che u a ni,’ tih hi LALPA thuchhuak a ni. 30 LALPA chuan heti hian a ti: ‘Ngai rawh u, Pharao-hophra, Aigupta lal chu a hmêlma, a nunna zawngtute kutah ka mantîr ang, Juda lal Zedekia, a hmêlma, a nunna zawngtu Babulon lal Nebukadnezzara kuta ka pêk ang bawk khân,’ ” a ti a.
Baruka hnêna Pathian thutiam
1 Juda lal Jehoiakima, Josia fapa kum linaah Jeremia ka ata hêng thute lehkhabua a ziak laia, Neria fapa Baruka hnêna zâwlnei Jeremia thusawi chu: 2 “LALPA, Israel Pathian chuan, aw Baruk, i hnênah heti hian a ti: 3 ‘Nangin, “Ka chung a va pik ta êm! LALPA chuan ka tuarnaah lungngaihna mi belhchhah ta si a. Ka rûm hi ka chauhpui a, hahdamna rêng ka hmu zo lo,” ’ i ti a. 4 A hnênah chuan heti hian i sawi tûr a ni: ‘LALPA chuan heti hian a ti: “Ngai rawh, ka sak tawh chu ka ṭhiat leh ang a, ka phun tawh chu ka pawt chhuak leh ang, ram pum pui mai chu. 5 Tin, mahni tân thil ropui i zawng em ni? Zawng lo mai rawh; tîsa zawng zawng chungah thil ṭha lo ka rawn thlen dâwn si a,” tih hi LALPA thuchhuak a ni. “Mahse, i nun zawng i kalna apiangah ka zuahsak hrâm ang che,” ’ ” tiin.
Karkhemis-ah Aigupta hneh a ni
1 Hnamte chungchânga zâwlnei Jeremia hnêna LALPA thu lo thleng chu: 2 Aigupta thu: Euphrates lui kama Karkhemis khuaa awm, Juda lal Jehoiakima, Josia fapa kum linaa Nebukadnezzaran a nghaisak Aigupta lal Pharao-nekoa sipai rual chungchâng thu: 3 “Phaw bial te, phaw sâwl te peih ula, râl tâwn rawh u! 4 Sakawr thuam ula, sakawr chuang mite u, chuang rawh u! Dâr lukhum khumin ding nghet ula, Fei tât hriamin thîr kawr ha rawh u! 5 Engtizia nge! An zâm ta, tukkhum an chhawn, An râl tu mite chu an tlâwm a; bak lêngin an tlânchhia, Hnung lam hawi lo lêkin, Kil tinah râl a ṭi,” Tih hi LALPA thuchhuak a ni. 6 “Mi zuanzâng an tlân bo thei lo, Râl tu mi an chhuak chuang hek lo; Saw hmâr Euphrates lui kamah sâwn an pai a, an tlu zo ta. 7 Nile lui anga lo lian hi tu nge ni? Luipui tui fâwn vêl ang mai hi? 8 Aigupta chu Nile lui angin a lian a, Luipui tui fâwn vêl ang maiin; ‘Ka lian ang a, lei chung ka dâp ang, Khawpuite leh a luahtute ka tichhia ang,’ a ti a. 9 Aw sakawrte u, tâwn zêl ula, Aw tawlailîrte u, che vak rawh u! Râl tu mite chuan hma tâwn se, Ethiopia mi leh Put mi, phaw chawitute, Lub mi thal ngul hmang thiamte nên. 10 Chumi ni chu a ni, LALPA, Sipaihote LALPA ni chu, Phuba lâk ni, a hmêlmate chunga phuba a lâkna ni chu. Khandaih chuan a ei zo vang a, a hnê hlui ang, An thisen chu tlai takin a in ang; Sipaihote LALPA chuan hmâr lam ramah Euphrates lui kamah inthawi nân mi tam tak a hlân ta. 11 Aw, Aigupta fanu thianghlim, Gilead-ah chho la, thing hnai hnawih mi han la rawh; Damdawi tam tak i hmang thlâwn ta; I tân damna rêng a awm lo ve. 12 Hnamte chuan i mualphona chu an hria a, I ṭap chuan lei pum a khat e; Râl tu mi leh râl tu mi an insu a, Leiah an tlu dûn reng mai,” tiin.
Nebukadnezzara lo kal tûr thu
13 Nebukadnezzara, Babulon lal a lo kala, Aigupta ram a rawn nghaisak tûrzia thu LALPAN zâwlnei Jeremia hnêna a sawi chu: 14 “Aigupta ramah chuan hril ula, Migdol-ah puang rawh u; Noph-ah leh Tahpanes-ah chuan puang ula; ‘Ding nghetin inrâlring rawh u, I vêla mi khandaihin a ei zo tawh si a,’ tiin sawi rawh u. 15 Engati nge i mi chakte hnâwl bo an nih? An ding zo lo, LALPAN a paih thlâk vângin. 16 Mi tam takte chu a petektîr a, A ni, an insu tlu rem rum a, ‘Hnehchhiahna khandaih tlânsanin Hawh u, i kîr ang u, kan pianna ramah, Kan mite hnênah chuan,’ an ti a. 17 ‘Aigupta lal Pharaoa hi thâwm chang lian mai, A hun tak chu a pumpelh a,’ tiin Tah chuan an au va. 18 ‘A nuna ka nun chhûng hi chuan,’ Tih hi Lalber, a hming sipaihote LALPA thuchhuak a ni e, ‘Tlângte zînga Tabor tlâng angin, Tuipui bula Karmel tlâng angin a lo kal ngei ang. 19 Aw nang, fanu, Aigupta rama chêng, Sal tâng tûrin insiam mai rawh; Noph khua chu a ṭiau dâwn si a, Chêng tûr awm lovin a kâng ral ang. 20 Aigupta chu bâwnglâ nalh tak a ni; Mahse, hmâr ata ei chhetu tûr lo thawkin a lo kal e. 21 An zînga sipai rawih laite chu bâwngtuai châwm thau ang mai an ni. Tukkhum an chhawn a, an tlânchhia, ding lovin, An chungah an chhiatna ni a thleng ta a ni, an hremna hun tûr chu. 22 Rûlpui tleng ang maiin thâwm a nei a, A hmêlmate chu a rualin an lo kal a, Thing kittute angin hrei nên an rawn bei a. 23 A ram ngawpui fan chhuah zawh loh chu An rawn ṭhiat ang, Khau puang aiin an tam zâwk si a, Chhiar sên rual an ni lo. 24 Aigupta fanu chu a mualpho vang, Hmâr lama mi kutah mantîrin a awm ang.’ ” 25 Sipaihote LALPA, Israel Pathian chuan heti hian a ti: “Ngai rawh u, No khuaa Amona leh Pharaoa, Aigupta leh a pathiante, a lalte, Pharaoa ngei leh amah ringtute chu ka hrem ang. 26 An nunna zawngtute kutah leh Babulon lal Nebukadnezzara leh a rawngbâwltute kutah chuan ka mantîr ang. Chumi hnuah chuan luahin a awm ang, hmasâng nite ang bawkin,” tih hi LALPA thuchhuak a ni. 27 “Aw Jakob, ka rawngbâwltu, hlau suh la, Aw Israel, zâm hek suh, Ngai rawh, hla tak ata ka chhanchhuak dâwn si chia, I thlahte pawh an sal tânna ram ata chu. Tin, Jakoba chu a lo kîr ang a, Muang takin a awm hle hle ang a, Tu mân an tihlau tawh lo vang. 28 Aw Jakob, ka rawngbâwltu, hlau suh, Ka awmpui che hi,” tih hi LALPA thuchhuak a ni, “Ka hnawh darhna che hnam zawng zawng chu ka titâwp ang a, Nang erawh chu ka titâwp hlen lo vang che. Dik takin ka hrem ang chia, Hrem loh chuan ka chhuah lo vang che.”
Philistia mite hnêna LALPA thu
1 Pharaoan Gaza a suasam hmaa, Philistia mite chungchânga zâwlnei Jeremia hnêna LALPA thu lo thleng chu: 2 LALPA chuan heti hian a ti: “A kuang khatin a luang liam ang; Ram chu a chîm ang a, a chhûnga awm zawng zawng nên, Khawpui leh a chhûnga chêngte pawh chu; Mite an ṭap ang a, rama mi zawng zawng an chiau vawng vawng ang. 3 A sakawr chak phei khâwng ri-ah, A indo tawlailîr ri dur durah, A tawlailîr nghawr thâwmah te, Pate an zâm a, an fate hawi lo lêkin. 4 Philistia mi zawng zawng rawkna ni, Tura leh Sidon ata ṭanpuitu awm chhunte sah chhumna ni avângin, LALPA chuan tuipui kam Kaptor-a la awm chhun, Philistia mite chu a tichhe dâwn si a. 5 Gaza mite lu a lo kâwng ta, Askelon chu a chimit ta a, A ram phaia la chêng chhunte chu; Eng chen nge i inzai dâwn? 6 Aw LALPA khandaih, i awm hle hle hma eng chen nge? I paiah inkhungin châwl la, awm hle hle rawh. 7 LALPAN tih tûr a pêk si che chuan, Engtin nge i awm hle hle theih ang? Askelon leh tuipui kam chunga che tûrin, A ruat miau si che chuan.”
Moab tihchhiat tûr
1 Moab chungchâng thu: sipaihote LALPA, Israel Pathian chuan heti hian a ti: “Nebo chung a pik e! Tihṭiauvin a awm ta! Kiriathaim chu tihmualphovin a awm ta, lâk sawn a ni a. Misgap chu tihmualpho leh tihchhiatin a awm ta. 2 Moab hmingthanna a bo ta. Hesbon-ah a chhiatna tûr rêlin, ‘Hawh u, hnam a nihna ata i tibo vang u,’ an ti a. Aw Madmen khua, nang pawh tihreh dêr i ni ang a, Khandaihin a ûm dâwn a che. 3 Horonaim aṭanga au thâwm: ‘Rawkrâl leh tihchhiatna nasa tak mai chu!’ 4 Moab a boral e; A fanaute ṭap thâwm hriat tûr a awm e; 5 Luhith Chhovah ṭapin an chho va, Horonaim chhukah boralna au thâwm manganthlâk an hria. 6 Tlân bo ula, in nun humhim rawh u, Thlalêr ramsabengtung angin awm rawh u. 7 I kutkawih leh i sum leh pai i rin vângin, Nang pawh manin i awm dâwn a ni; Kemos chu sala hruai a ni ang a, A puithiamte leh a hotute nên. 8 Khaw tinah tichhetu a lo thleng ang, Khaw pakhat mahin a pumpelh lo vang; Phai ram pawh chu a boral ang, Phaizâwl pawh tihchhiat a ni ang, LALPAN a sawi tawh ang ngei khân. 9 A thlawh bo theih nân Moab chu thla pe ula, A khuate chu a ram ang a, luahtu awm lovin. 10 Thlahdah taka LALPA hna thawktu chu ânchhe dawngin awm sela, Thisen chhuah tûra a khandaih hmang duh lotu chu ânchhe dawngin awm rawh se. 11 A tleirâwl lai ata Moab chu a nuamsa a; Ngâ ngul khawpin a tling reng a, Bêl danga ruah chhuah pawh a tâwk lo va, Sala hruaiin a awm ngai hek lo. A tui ngaia tui rengin, a rim pawh a dang chuang lo ve. 12 “Chu vâng chuan ngai rawh u, ni chu a lo thleng e, a bun chhuaktu tûr chu ka rawn tîr ang a; tin, annin an bun chhuak ang,” tih hi LALPA thuchhuak a ni: “A bêlte chu a tiruak ang a, a bûrte chu a tisawm ang. 13 Israel chhûngten an rin pui ber Bethel an zahpui angin, Moab chuan Kemos a zahpui tawh ang. 14 “ ‘Pasalṭha leh râl tu mi huaisen kan ni e,’ Engtiziaa ti nge in nih? 15 Moab chu tihramin a awm a, A khawpui chu meikhuah a chang zo ta, A vâl rual ṭha zawng an tlu hlum zo,” Tih hi Lalber, a hming sipaihote LALPA thuchhuak a ni e. 16 “Moab chhiatna chu a lo thleng mêk a, A tuarna tûr a ṭuah ṭêp a ni. 17 Nangni a vêla mi zawngten amah sûnin, A hming hria zawng zawng pawhin, ‘Tiang khauh leh tiang ropui a tliah tâk le!’ ti rawh u. 18 Aw nang fanu, Dibon-a chêng, i ropuina chhuksan la, Tuihâlin ṭhu rawh; Moab rawktu chuan a bei chia, I kulhte chu a tichhe ta si a. 19 Aw Aroer-a chêngnu, kawng bulah ding la, en thlîthlai rawh, Tlânchhepa leh relhrunu zâwt la, ‘Eng nge ni ta le?’ tiin. 20 Moab tihmualpho a ni ta, a lo sawprawp ta si. Chiau vak vakin ṭap rawh u! Moab tihram a ni ta, Tih Arnon-ah puang rawh u. 21 “Ram zâwl chungah rorêlna a lo thleng ta, Holon-ah te, Jahzah-ah te, Mephaath-ah te, 22 leh Dibon-ah te, Nebo-ah te, Beth-diblathaim-ah te, 23 leh Kiriathaim-ah te, Beth-gamul-ah te, Beth-meon-ah te, 24 leh Kerioth-ah te, Bozra-ah te, Moab rama khua zawng zawng, a hla leh a hnaiahte pawh. 25 Moab ki chu râwt chhum a ni a, a bân chu tihtliah a ni ta,” tih hi LALPA thuchhuak a ni.
Moab a tlâwm dêr dâwn
26 “Amah chu tirui rawh u, LALPA chungah a intilian si a. Moab chu ama luakah a tâl ang a, nuihzatbûrin a awm bawk ang. 27 Israel chu i tân nuihzatbûr a ni tawh lâwm ni kha? Rûkhmang zîngahte a tel em ni? Ama chungchâng i sawi apiangin i lu i thing si a. 28 “Moab-a chêngte u, Khawpuite tlânsan ula, khâm kârah chêng rawh u, ṭhuro, pûk kotlânga bu khuar ṭhîn angin awm ru. 29 Moab chapona chu kan lo hre ta, a chapo nangei mai, A indahsânzia te, a chapozia te, a chaltlaizia te leh A thinlung induhzia te chu. 30 A thinurna chu eng mah a ni lo tih ka hria; A uanthuannate chuan eng mah a thawk kaw lo,” Tih hi LALPA thuchhuak a ni. 31 Tichuan, Moab chungchângah ka chiau vak vak ang a, A ni, Moab pum pui tân ka ṭap ang; Kir-heres mite sûn an ni ang. 32 Jazer ṭah aia nasain ka ṭah ang che, Aw Sibma grêp kûng! I pêngte chu tuipui chungah an zâr duai a, Jazer tuipui pawh a thleng ta hial e. I nipui thei leh grêp rahte chu tichhetuin a bâwm e. 33 Hlimna leh lâwmna a bo zo ve, Thei hmun leh Moab ram ata; Uain sâwr khura ka uain ka tikin ta a, Tu mân hlima auvin an chîl tawh lo vang, Au thâwm chu hlim thâwm a ni tawh lo vang. 34 “Hesbon leh Eleale-ah an au va, Jahaz thleng thlengin aw an chhuah a, Zoar aṭanga Horonaim thleng, Eglath-selis thleng pawhin; Nimrim tuikhurte a ṭhing ṭhup ang. 35 Chu lovah pawh, Moab bâwlhmun thil hlântu leh a pathiante tâna rimtui hâltu chu ka tibo vang,” LALPA thuchhuak chuan a ti. 36 “Tichuan, phênglâwng angin ka thinlung chu Moab tân a ri a, Kir-heres mite tân thil tum rîk angin ka thinlung a ri a; chuvângin, hnianghnâra thil a dawn tawhte kha a rîral zo ta a. 37 “Lu tinrêng ziah kâwn a ni a, khabe hmul tinrêng meh a ni; kut zawng zawng zai a ni a, kâwngahte saiip puan a awm hlawm a. 38 Moab in chung zawng zawngah te, kawtthlêrah te, hmun tinah ṭahna a awm a; Moab chu bêl ṭangkai tawh lo angin ka tikeh zo ta a ni,” tih hi LALPA thuchhuak a ni. 39 “A va chhe tawh êm! An chiau nasatzia chu! Moab chu mualphovin a lehhawi tâk chu! Tichuan, Moab chu a vêla mite zawng zawng tân nuihzatbûr leh râpthlâk a lo ni ta.”
Moab tân pumpelh theih a ni lo
40 LALPA chuan heti hian a ti a ni: “Ngai rawh, mu angin a thlâwk dâwn, Moab chungah a thla a zâr ang. 41 Kerioth chu lâk a ni a, a kulhte chu an ṭhâwng thut a; Chumi nia Moab pasalṭhate thinlung chu, Hmeichhe nau vei thinlung ang mai a ni ang. 42 Moab a boral ang, hnam a tling tawh lo vang; LALPA a chungtlâk zâwk avângin. 43 Hlauhna, khuarkhurum leh thangte, Aw Moab luahtu, i chungah a thleng e,” Tih hi LALPA thuchhuak a ni. 44 “Hlauhna tlânsantu chu khuarkhurumah a tla ang, Khuarkhuruma chhuak chu thangah a âwk ang. A hremna kum ka rawn thlen dâwn si, A chungah, Moab chung ngeiah chuan,” Tih hi LALPA thuchhuak a ni. 45 “Hesbon hlimah tlânchheho chu chau dêrin an ding ang. Hesbon aṭangin mei a chhuak a, Sihon zîng aṭangin meialh, Moab bek sam a kâng zo va, Sa mur murho chhîp samte nên. 46 I chung a pik e, aw Moab! Kemos mite an ral ta; I fapate sala hruaiin, i fanute salah an tâng ta. 47 Mahse, ni hnuhnûngahte chuan Moab awm dân chu ka lamlêt ang,” Tih hi LALPA thuchhuak a ni. Heti chen hi Moab chung thu a ni e.
Amon-ho chunga LALPA rorêl
1 Amon fate thu. LALPA chuan heti hian a ti: “Israelan fate a nei lo vem ni? Rokhâwmtu a nei na nge? Engati nge Gad chu Milkoman a luah tâka, A mite a khawpuiahte an chên tâk? 2 Chuvângin, ngai rawh u, nite a lo thleng e,” Tih hi LALPA thuchhuak a ni. “Indo thâwm ri ka hriattîr ang, Amon fate, Raba khuaah; Thil ram awm khâwm mai a lo ni ang a, A fanute chu meiin a kâng ang. Tichuan, Israel chuan amah neitu chu a nei thung ang,” LALPAN a ti. 3 “Aw Hesbon, chiau vak vak la, Ai chu an rawk zo tawh si; Raba fate u, ṭap rawh u, Ṭap ula, hungna chhûngahte tlân vêl rawh u. Milkoma chu sala hruaiin a awm dâwn si, A puithiam leh a mi liante nên. 4 Engah nge i ruam ṭhate i chhuan, aw rinawm lonu? A neih ṭha ṭhate ringa, ‘Tu nge mi bei ang?’ ti ṭhîntu, 5 Ngai rawh, hlauhna i chungah ka rawn thlen dâwn, I vêla mi zawng zawng lak ata,” Tih hi LALPA, sipaihote PATHIAN thuchhuak a ni: “Mi tin hnawh chhuah in ni vek ang; Tu mân tlânchheho chu an khâwm lo vang. 6 Chumi hnuah erawh chuan Amon fate awm dân ka lamlêttîr ang,” tih hi LALPA thuchhuak a ni. 7 Edom thu. Sipaihote LALPA chuan heti hian a ti: “Teman-ah finna a awm tawh na nge? Remhre remhriatna a bo zo ta em ni? An finna a bo zo vem ni? 8 Aw Dedan-a chêngte u, tlânchhia ula, lehhawi ula, Pil bo daih rawh u! Esauva chhiatna a chungah ka rawn thlen dâwn e, Amah ka hrem hunah chuan. 9 Grêp lotute chu i hnênah an lo kalin, hmaih an nei dâwn lâwm ni? Zâna rûkrute chuan duh tâwk an ngah hma chu An rawk zêl dâwn lo vem ni? 10 Esauva chu ka tisaruak ta a; A khuh rûk ṭhinte chu ka hawng ta, A biru thei tawh lo vang. A thlahte tihchhiat an ni a, A unaute, a ṭhenawmte nên, A ral thûm ta. 11 I nau, pa nei lohote chu ngaihsak suh, Keiin ka hum ang, I hmeithaiten mi ring rawh se.” 12 LALPA chuan heti hian a ti: “No in lo tûrte pawhin an in tlat chuan, nang hrem loh tawpin i chhuak dâwn em ni? Hrem lohvin i chhuak lo vang, i in mawlh ang. 13 LALPA chuan mahni inchhâlin chhia ka chham ta si a, Bozra chu mak tih huai huai, sawichhiat, tihram, ânchhe dawng a ni ang a, a khua zawng zawng pawh a ram hlen ang.” 14 LALPA hnên ata thupuan ka lo hre ta, Hnamte hnênah tirhkoh tirh a ni: “Inpun khâwm ula, amah bei ula, Indo puahchah rawh u! 15 Ngai rawh, hnamte zîngah ka titê ta si chia, Mihringte hmuhsitin. 16 I intihrâpthlâkna kha i thinlung chapo bumna che a ni, Aw nang khâm lung kâra tlâng chhîpa chêng ṭhîn! Mu angin, sâng takah i bu chhep mah la, Chumi aṭang chuan ka la thla tho vang che,” Tih hi LALPA thuchhuak a ni. 17 “Tin, Edom chu mak tih huai huai a lo ni ang a, mi veivâk apiangin mak an ti ang a, a chhiat nasat vâng chuan an chek khum ang. 18 Sodom leh Gomorra leh a vêla khawpuite tihchhiata a awm ang bawkin, tu mah an chêng tawh lo vang a, mihring fa tu mah chutah chuan an awm ngai tawh lo vang,” LALPAN a ti. 19 “Ngai rawh u, Jordan ramngaw aṭanga sakeibaknei, ran thlahna hmunah a lo chho vang a; a lak aṭangin anmahni ka tlân botîr nghâl ang a, a chunga thu nei tûrin ka duh apiang ka ruat ang. Keimah ang hi tu nge awm ni? Tuin nge hunbi mi thliahsak ang? Berâmpu tu nge ka hmaa ding tûr chu?” 20 Chu vâng chuan Edom chunga LALPA thurâwn leh Teman mite chunga a thil ruat, tih a tum tâkte chu ngaithla rawh u: ran rual notête ngei chu hnuh bovin an awm ang a; an chênna chu a tiṭiau vang. 21 An tlûkchhiatna thâwmah chuan lei hi a khûr a; an ṭap thâwm chu Tuipui Senah pawh hriat a ni ang. 22 Ngai rawh u, mupui angin a lo thlâwk chho vang a, Bozra chungah chuan a thla a zâr ang; chumi ni chuan Edom mi huaisente thinlung pawh chu hmeichhe nau vei thinlung ang mai a ni ang.
Damaska chunga LALPA rorêl
23 Damaska thu. “Hamath chu a zak ta, Arpad nên, Thu ṭha lo an hre ta si a, an rîral ta; Tuipui fâwn awm hle hle thei lo angin an buai a. 24 Damaska a rawih zo ta; Tlânchhiat a tum a, khurhin a nang ta. Lungngaihna leh nâin a vuan ta, hmeichhe nau vei ang maiin. 25 Khawpui hmingthang leh hlim chu a va ṭhing ta êm! 26 Tichuan, chumi niah chuan a tlangvâl rualte chu kawtlaiah an tlu ang a, A râl tu mi zawng zawng an boral ang,” Tih hi sipaihote LALPA thuchhuak a ni. 27 “Tin, Damaska kulh bangah mei ka chhuah ang a, Benhadada lal inte chu a kâng zo vang.”
Kedar-ho leh Hazor khaw chungchânga Pathian rorêl
28 Kedar leh Hazor ramte Babulon lal Nebukadnezzaran a suasam thu. LALPA chuan heti hian a ti: “Tho ula, Kedar bei ula, khawchhak fate chu sawisa rawh u! 29 An puan inte, an ran rualte an lâksak ang. An puanzârte, an bungbêl zawng zawngte, An sanghâwngseite chu an kal bopui ang; ‘Kil tinah hlauhawm a awm!’ Tiin miten an au khum ang. 30 Tlânchhia ula, vâk bo daih rawh u! Pil bo daih rawh u, aw Hazor-a chêngte u,” Tih hi LALPA thuchhuak a ni. “Babulon lal Nebukadnezzara chuan A phiar che u, in chungah tih tum a nei ta e. 31 Tho ula, thlamuang taka awm, Mahnia khawsa, kulh kawngkhâr pawh nei lo, Kalhna thîr tlâwn pawh nei lo hnam chu bei rawh u,” Tih hi LALPA thuchhuak a ni. 32 “An sanghâwngseite chu râlin an la ang a, An sebâwng rual nâwlpui chu an kawi ang; Baksam ziat kâwnghote chu kil tinah ka tidarh ang, An chhiatna tûr chu kil tin aṭangin ka rawn thlen ang,” Tih hi LALPA thuchhuak a ni. 33 “Tin, Hazor chu sihal chên hmun a ni ang a, A ram kumkhua ang; Tah chuan tu mah an chêng tawh lo vang a, Mihring fate rêng rêng an khawsa tawh lo vang.”
Elam chunga LALPA rorêl
34 Juda lal Zedekia lal ṭan tirha Elam chungchânga LALPA thu, zâwlnei Jeremia hnêna lo thleng chu: 35 “Sipaihote LALPA chuan heti hian a ti: ‘Ngai rawh u, Elam thal ngul, an chakna bul ber chu, Ka titliak ang; 36 Kâwlkil li ata thli palite ka rawn thlen ang, Elam chungah chuan; Ka tidarh ang, kâwlkil tinah chuan; Elam hnawh chhuah mite thlen lohna hnam rêng a awm lo vang. 37 An hmêlma, an nun zawngtute hmaah chuan, Elam-ho chu ka tizâm zo vang. An chungah chhiatna ka rawn thlen ang, Ka thinur nasa tak mai chu,’ Tih hi LALPA thuchhuak a ni. ‘Anmahni chu khandaih ka ûmtîr ang, Ka tihral vek hma loh chu. 38 An lalte leh an hotute tiralin, Elam-ah chuan ka lalṭhutthlêng ka hûng ang,’ Tih hi LALPA thuchhuak a ni. 39 ‘Mahse, ni hnuhnûngahte chuan heti hi a ni ang, Elam awm dân ka lamlêttîr ang,’ Tih hi LALPA thuchhuak a ni e.”
Babulon tlâwm tûr thu
1 Babulon chungchâng, Kaldai mite ram chungchânga zâwlnei Jeremia kaa LALPA thusawi chu: 2 “Hnam tin zîngah chuan hril ula, puang rawh u, Puanzâr khai ula, puang ula, thup suh u, ‘Babulon lâk a ni ta, Bela chu a mualpho ta, Merodaka chu a zâm zo ta, a limte chu a mualpho va, A milim chu a chhe zo ta.’ 3 “Hmâr aṭangin ani chu hnam pakhatin a rawn bei a, chu chuan a ram chu a tiṭiau vang a, tah chuan tu mah an chêng tawh lo vang; an tlânchhia a, an bo zo ta, mi leh sate pawh.
Israel-te kîr leh tûr thu
4 “Chûng niahte leh chumi hunah chuan Israel fate chu an lo kal ang a, anmahni leh Juda fate nên; ṭap chungin an lo kal ang a, LALPA an Pathian chu an zawng ang,” tih hi LALPA thuchhuak a ni. 5 “Zion lam hawiin an pênna tûr an zâwt ang a, ‘Hawh u, chatuan thuthlung theihnghilh tawh loh tûrah chuan LALPA chu rawn vuan rawh u khai,’ an ti ang. 6 “Ka mite chu berâm bo an ni a; an vêngtute chuan an hruai bo va, tlângahte chuan an kal botîr a, tlângahte, mual dungahte an kal a, an huang an theihnghilh zo ta. 7 A hmu apiangin an ei zêl a, an hmêlmate chuan, ‘Kan thiam loh a ni lo, LALPA, dikna khurpui, an thlahtute nghahfâk LALPA meuh chungah thil an tihsual vâng a ni,’ an ti a. 8 Babulon chhûng ata tlân chhuak ula, Kaldaite ram ata kal chhuak ula, kêl rual zînga kêlchalte angin awm rawh u. 9 Ngai teh u, Babulon rawn bei tûrin hmâr ram ata hnam rual ropui tak pung khâwm chu ka chawk tho vang a, amah do tûrin an insingsa ang; chuta ṭang chuan lâk an ni ang. An thalte chu râl tuk thiam tak hlawhchham ngai lo ang an ni ang. 10 Tin, Kaldai chu rawk a ni ang a, a rawktute chu an tlai êm êm ang,” tih hi LALPA thuchhuak a ni.
Babulon chhiat tûr thu
11 “Lâwm mah ula, hlim mah ula, Aw ka rochan rawktute u, Hnim no zînga bâwngla tla ngelh ngelh ang leh, Sakawrpa hrâm ngher ngher ang ni mah ula, 12 In nu chu a la zak êm êm ang a, A hringtu che u chu a la mualpho vang. Ngai rawh u, hnamte zînga hnuaihnung ber, Thlalêr ram, ram ro, ram ruak a ni ang. 13 LALPA thinurna avângin luahin a awm lo vang, A ram vek zâwk ang; Babulon-a kal apiang chu a râp ang a, A chhiatna zawng zawng avâng chuan an chek ang. 14 Thal ngul kengtu zawng zawngte u, Babulon hual vêlin intlar ula, Kâp ula, thalte chu ren suh u, LALPA chungah an sual ta si a. 15 A vêlin hawhaw ula; Amahin a inpe ta, A kulhte chu a tlu ta a, A bangte chu a chim ta, LALPA phuba lâkna a ni si a; A chungah phuba la ula, A tih ang zêlin a chungah ti rawh u. 16 Babulon ata chi thehtu râwt bo ula, Buh seng laia favah chawitu nên, Hnehchhiahna khandaih hlauvin, Mahni mite lam an pan ṭheuh vang a, Mahni ram ṭheuhvah an tlân ang.
Israel chhuah tûr thu
17 “Israel chu berâm darhsarh a ni a; sakeibakneiten an ûm bo va; Assuria lal chuan amah a ei zet a, a tâwpah Babulon lal Nebukadnezzara chuan a ruhte a ṭhial sawm ta a.” 18 Chuvângin, sipaihote LALPA, Israel Pathian chuan heti hian a ti: “Ngai rawh u, Assuria lal ka hrem ang bawkin Babulon lal leh a ram chu ka hrem ang. 19 Tin, Israel chu a tlatnaah ka hruai leh ang a, Karmel leh Basan-ah chuan a tla ang a, Ephraim tlângah leh Gilead-ah chuan amah chu a tlai ang. 20 Chûng niahte leh chutih hunah chuan Israel khawlohnate chu an zawng ang a, hmuh tûr a awm lo vang; Juda thil tihsualte pawh hmuh tûr a awm hek lo vang; awm chhun atân ka zuahte chu ka ngaidam dâwn si a,” tih hi LALPA thuchhuak a ni.
Babulon chunga LALPA rorêl
21 “Merathaim ram bei rawh u, A ram leh Pekod luahtute ngei chu: That ula, an kuangbâng chenin râwt bo vek ula, Thu ka pêk ang zêlin ti ang che u,” Tih hi LALPA thuchhuak a ni. 22 “Chu ramah chuan râl thâwm a awm, Chhiatna nasa tak thâwm nên. 23 Khawvêl pum pui tuboh chu a phelin, A va keh sawm nasa êm! Hnamte zîngah Babulon chu a va ram nasa ta êm! 24 Aw Babulon, i tân thang ka kam e, Hre lovin i âwk ta a nih hi; Hmuh chhuah leh manin i awm ta, LALPA i beih avângin. 25 LALPA chuan a râlthuam bâwm a hawng ta, A thinurna hriamhreite chu a la chhuak ta, LALPA, sipaihote LALPA chuan Kaldaite ramah tih tûr a nei. 26 Ramri tâwpkhâwk aṭangin rawn bei ula, A thil dah khâwmna inte chu hawng vek ula, Theh khâwm ula, tichhe vek rawh u, A eng mah rêng zuah lovin. 27 A bâwngpatuaite chu tihlum vek ula, Talhin awm vek rawh se. An chung a va pik êm! An ni a lo thleng ta si, Anmahni hremna ni ngei chu. 28 “LALPA kan Pathian phuba lâk, a biak in phuba lâkna ngei chu, Zion-a hril tûra Babulon aṭanga tlân chhuak leh tlân bote thâwm chu! 29 “Babulon bei tûrin thal kah thiam, thal ngul hmangtu zawng zawng chu ko khâwm rawh u; a vêlin bûk khuar ula, tu mah chhuak suh se. A thiltih ang zêlin thungrûl rawh u, a tih tâk ang zawng zawng chu a chungah ti rawh u; LALPA, Israel Mi Thianghlima chu a cho ngam si a. 30 Chuvângin, a tlangvâlte chu a khawlaiahte an tlu ang a, râl tu mi zawng zawng chu chumi niah chuan an boral ang,” tih hi LALPA thuchhuak a ni. 31 “Ngai rawh, nang mi chapo, ka do che a ni!” LALPA, sipaihote LALPA chuan a ti. “I ni a lo thleng ta, i hremna tûr ni chu. 32 Tin, mi chapo chu a petekin a tlu ang a, Tu mân an kai tho lo vang, Tin, a khawpuiahte chuan mei ka chhuah ang a, A vêla awm zawng zawngte chu a kâng fai vek ang.” 33 Sipaihote LALPA chuan heti hian a ti: “Israel fate leh Juda fate chu hnehchhiahin an awm ta a; sala hruaitute zawng zawng chuan an vuan tlat a, an chhuah duh hauh lo. 34 An tlantu erawh chu a chak a ni; a hming chu sipaihote LALPA a ni. Ani chu an lamah a ṭang ang a, Babulon-a chêngte chu tibuaiin, khawvêlah muanna a thlen theih nân. 35 “Kaldai mite chungah khandaih a lêng e, Babulon-a chêngte, a hotute leh a mi fingte chungah pawh,” Tih hi LALPA thuchhuak a ni. 36 “Mi dawtheite chungah khandaih, Mi â an lo chang ang! A râl tu mi chungah khandaih, An zâm zo vang. 37 An sakawrte leh tawlailîrte chungah khandaih, A chhûnga mi inpawlhsawp zawng zawng chungah pawh, Hmeichhia ang mai an lo ni ang. A ro thil chungah khandaih, Rawkin an awm mai ang. 38 A tuite kangin a ro zo va. Milimte ram a ni si a, Milimte chu an âtchilh a. 39 “Chuvângin, thlalêr ram sakawlhte, chinghniate nên chutah chuan an chêng ang a, vanghâwngseite pawh chutah chuan an chêng ang; luahin a awm ngai tawh lo vang; chhuan zawng zawng thleng pawhin luahin a awm lo vang. 40 Pathianin Sodom leh Gomorra leh a khaw ṭhenawmte a tihchhiat ang hrim khân; tah chuan tu mah an chêng tawh lo vang a, mihring fa tu mahin an tlawh tawh lo vang,” LALPA thuchhuak chuan a ti. 41 “Ngai rawh u, hmâr lam ram ata mite an lo kal e. Lei hmun tâwp ata hnam ropui tak leh lal tam tak an lo thawk e. 42 Thal ngul leh fei an keng a, Nunrâwng tak, zahngaihna rêng rêng nei lo an ni. An thâwm chu tuipui ri hum hum ang a ni a; Sakawr chungah te an chuang a, Mi tin râl tu mi anga inthuamin, Aw, Babulon fanu, an rawn bei dâwn che. 43 An thâwm hriain Babulon lal kut a zâwi ta; Hmeichhe nau vei lai natna ang, Natna nasa takin a vuan ta. 44 “Ngai rawh u, Jordan ramngaw aṭanga sakeibaknei, ran thlahna hmuna lo chho angin a lo chho vang a; a lak aṭangin anmahni ka tlân botîr nghâl ang a; a chunga thunei tûrin ka duh apiang ka ruat ang. Keimah ang hi tu nge awm ni? Tuin nge hunbi mi thliahsak ang? Berâmpu tu nge ka hmaa ding tûr? 45 Chuvângin, Babulon chungah LALPA thurâwn, Kaldai mite chunga a thil ruat chu ngaithla rawh u. Ran rual note ngei chu hnuh bovin an awm ang a, ran thlahna hmuna mite a râp ang. 46 Babulon lâk thâwmah lei a nghîng a, a ṭap thâwm chu hnamte zîngah hriat a ni ang.”
Babulon chunga phuba
1 LALPA chuan heti hian a ti: “Ngai teh, Babulon chungah leh Kaldai mite chungah, Tichhetu thlipui ka tîr dâwn e; 2 Sisêp zâptute ka tîr dâwn, Babulon chungah, Amah zâpin a ram an zâp fai ang, Chhiatna niah chuan hualin an bei dâwn si. 3 Thal ngul hmangtuin thal ngul kuai lovin, Thîr kawr hain din pawh ding suh se, A tlangvâl rual pakhat pawh zuah lovin, A sipai zawng zawng nuai bo rawh u. 4 Kaldai ramah thahin an tlu ang a, A khawlaiahte chuan chhun tlang an ni ang. 5 Israel leh Juda chu an Pathian, sipaihote LALPA chuan A hnuchhawn si lo va, An ram chu Israel Mi Thianghlima chunga Sualnain a khat na a.” 6 Tlân bo ula, Babulon khaw chhûng ata, Mi tinin mahni nun chhanhim rawh se! A khawlohna boral phah suh u, LALPA phuba lâk hun chu a ni si a. Ani chuan a thungrûl ngei dâwn a ni. 7 Babulon chu LALPA kuta rangkachak no, Lei pum tihruihna chu a ni a, Hnamten a uain chu an in a; Chuvângin, hnamte lung a mâwl zo ta. 8 Babulon chu a tlu thut a, a boral ta. Amah chu ṭah vak vak rawh u, Tihdam theih âwm a nih chuan Thinghnai damdawi hnawih mi lâksak rawh u. 9 Babulon chu tihdam ka tum a, A dam chuang si lo, Amah kalsanin mahni ram ṭheuhvah i kal ang u, A thiam lohnain vân a tawng a, Vân dum thlenga chawi kân a ni. 10 LALPA chuan ka dikna a puang ta; Hawh u, Zion-ah i puang ang u, LALPA kan Pathian thiltih chu. 11 Thalte chu tât hriam ula, phâwte chelh rawh u, Media lalte rilru chu LALPAN a chawk tho ta. A thiltum chu Babulon tihchhiat thu a ni si, Chu chu LALPA phuba lâkna a ni si a, A biak in phuba ngei chu. 12 Babulon kulh bulah indo puanzâr târ rawh u, Vênna tichakin, râlvêngtu dah rawh u, Lambunnate siam ula, Babulon mite chungchâng thua LALPAN a sawi kha, a rêlin a tizo ta si. 13 Aw, nang tui tam hmuna chêng mi, Sum leh pai ngah êm êmtu, I tâwpna chu a thleng ta, I nunna hrui a chat ta e. 14 Sipaihote LALPA chuan mahni inchhâlin chhia a chham ta: “Khau ang maiin mihringin ka tikhat ngei ngei ang che. Nasa takin an hawhaw khum ang che.”
Pathian fakna hla
15 A thiltihtheihnain lei a siam a, A finnain khawvêl a din a, A remhriatnain vân a tiparh a. 16 A aw a chhuah chuan, Vâna tui a ri hum hum a: “Kâwlkil ata chhûm a chhohtîr a; Ruah sûr nân kâwl a phêttîr a; A ro bâwm ata thlî a tlehtîr a.” 17 Mi tin an mâwl, hriatna lovin; Rangkachak chhertute chu an milem chherin a tizak a; A milim chhûn chu dâwt mai a ni si, Anmahniah thaw pawh a awm lo. 18 Engmahlo mai an ni, bumna hna mai, Hrem an nih hunah an bo mai ang. 19 Jakoba chanvo zawng hetiang a ni lo, Thil zawng zawng bul a ni si: Israel hi a ro luah hnam a ni a. A hming chu sipaihote LALPA a ni.
LALPA talhtum
20 “Nang chu ka râl do hreipui leh hriamhrei i ni ṭhîn a: Nangmah hmangin hnamte chu ka tisawm a; Nangmah hmangin lalna ramte chu ka tibo va; 21 Nangmah hmangin sakawr leh a chung chuang ka tisawm a; Nangmah hmangin tawlailîr leh a chunga chuang ka tisawm a; 22 Nangmah hmangin hmeichhia leh mipa ka tisawm a; Nangmah hmangin putar leh tleirâwl ka tisawm a; Nangmah hmangin nula leh tlangvâl ka tisawm a; 23 Nangmah hmangin berâmpu leh berâm rual ka tisawm a; Nangmah hmangin lo neitu leh bâwngpa tuak ka tisawm a; Nangmah hmangin ram awptute leh puitute ka tisawm ṭhîn a nih kha.
Babulon hremna
24 “Nangma mit hmuh ngeiah Zion chunga an thil ṭha lo tih zawng zawng chu, Babulon leh Kaldai mite chungah ka thungrûl ang,” tih hi LALPA thuchhuak a ni. 25 “Ngai rawh, lei pum pui tichhetu, Aw, tichhetu tlâng lian, ka do che a ni,” Tih hi LALPA thuchhuak a ni. “I chungah ka kut ka lek ang a, Khâm sâng ata ka lum thla ang che, Tlâng kâng rêm tawhah ka siam ang che. 26 I hnên ata a kila lung tûr leh lungphum tûr Lâk chhuah a ni tawh lo vang; Kumkhuain i ṭiau zâwk ang,” Tih hi LALPA thuchhuak a ni. 27 Chumi ramah indo puanzâr târ ula, Hnamte zîngah tawtawrâwt hâm rawh u! Amah do tûr hnamte buatsaih ula: Ararat te, Minni te, Askenaz ram te, Amah bei tûrin ko khâwm rawh u. Amah bei tûrin sipai hotu ruat ula, Khau puang ang maiin sakawrte pun khâwm rawh u. 28 Amah do tûr hnamte buatsaih ru, Media lalte, awptute, leh a puitute, A thuneihna ram zawng zawng nên. 29 Chu ram chu na tuarin a khûr a, Babulon ram, luahtu awm lova tiṭiau tûrin, Babulon chunga LALPA thiltum chu a ding reng a ni. 30 Babulon râl tu mite chu an ralbâng ta, An kulhpuiah an tawm reng e; An pachanna a dai a, hmeichhia ang mai an lo ni ta; An chênna hmunte a kâng zo va, A daidanna thîr tlâwn a tliak. 31 Zualko tlân chuan mi dang pawh a tâwk a, Mi tirh chuan mi dang a tâwk bawk a, Babulon lal hnênah a khawpui chu Kil tinan an man ta tih hrilh tûrin; 32 Lui kainate chu an man a, Phairuangte an hâl fai a, Indo mite pawh an zâm zo ta. 33 Sipaihote LALPA, Israel Pathian chuan heti hian a ti: “Babulon fanu chu hruihzâwl rah bel lai ang a ni a, Rei lo teah buh chîl hun a chungah a lo thleng ang.” 34 “Mi ei zo ta, Babulon lal Nebukadnezzaran, Mi ṭhial sawm a, bêl ruak maiah mi siam ta; Rûlpui angin mi dawlh ta, Ka sa tui tuiin a pum a tikhat a, Mi paih chhuak leh ta a. 35 Kei leh ka tisa chunga pâwngnêk thiltih hi, Babulon chungah awm rawh se,” Zion-a chêngten an ti ang; “Ka thisen chu Kaldai mite chungah awm rawh se!” Jerusalem-in a ti ang.
LALPAN Israel-te a pui dâwn
36 Chuvângin, LALPAN heti hian a ti: “Ngai rawh, i lamah ka ṭang ang a, I phuba ka lâksak ang che. A tuipui ka tikang ang a, A tuikhur pawh ka tirochâr ang. 37 Tin, Babulon chu chhe vawm khâwm mai, Sihal chênna hmun, Mak tih huai huai leh chek khum, Luahtu awm lo hmun a lo ni ang. 38 Sakeibaknei vânglai angin an hûk dum dum ang a, Sakeibakneino angin an hrâm tuar tuar ang. 39 An ruih lungpuam hunin ruai ka ṭhehsak ang a; Ka tirui ang, nikhaw hre lo dêrin, ṭhangharh lo tawp tûra an mut hlen theih nân,” Tih hi LALPA thuchhuak a ni. 40 Ka hruai thla ang, berâmno talh tûr angin, Berâmpate, kêlpate ang maiin.
Babulon chan tûr
41 “Sesak chu lâk a nih tâk chu! Lei pum pui chawimawi ṭhin chu manin a awm tâk hi! Hnamte zînga Babulon a ṭiau tâk chu! 42 Babulon chu tuipuiin a chîm ta; A fâwn nasa tak chuan a khuh zo ta. 43 A khawpuite chu a ṭiau zo va, Ram ro thlalêr, mihring rêng chên lohna, Mihring fa tu ma tlawh loh ram a lo chang ta. 44 Babulon-a Bela chu ka hrem ang, A lem tawh hnu chu a kâ ata ka phawrh chhuak ang; Hnamte chu a hnênah an inhâwr khâwm tawh lo vang. A ni, Babulon kulhpui chu a chim ang. 45 Ka mite u, a chhûng ata lo chhuak ula, LALPA thinur hlauhawm tak ata, Mi tin mahni inchhanhim rawh u. 46 In thinlung chau suh sela, Chu rama thuthang chu hlau hek suh u; Kum khatah thuthang a lo thleng ang a, Kum dangah thuthang a lo thleng leh dâwn si a, Lal leh lal inbeiin ramah pâwngnêkna a awm ang. 47 Chuvângin, ngai rawh u, nite a lo thleng e, Babulon milem chher chawpte chunga Ro ka rêla, a ram pum pui a zahna tûr ni chu; Tin, a chhûngah a mi thahte chu an tlu ang. 48 Hmâr lam ata rûntute an lo thlena, Babulon chu an rawn tihchhiat hunah, Lei leh vân leh a chhûnga awm zawng zawng chu hlimin an zai ang,” Tih hi LALPA thuchhuak a ni. 49 Babulon chuan Israel mi thahte a tlûktîr angin, Babulon-ah chuan ram tina mi thahte an tlu ang.
Babulon-a awm Israel-te hnêna Pathian thu
50 Nangni khandaih pumpelhtute u, kal ula, ding mai mai suh u! Hla tak aṭangin LALPA hre reng ula, In rilruah chuan Jerusalem lût rawh se. 51 Sawichhiatna thu kan hriat avângin kan zak a, Kan hmuihmai a lo buai zo ta, LALPA ina hmun thianghlimahte chuan Awze mite an lo lût ta si a. 52 “Chuvângin, ngai rawh u, nite a lo thleng e,” Tih hi LALPA thuchhuak a ni, “An milem chher chawpte chunga Ro ka rêlna tûr leh, A ram pum pui chunga mi hliamte rûmna ni tûr chu. 53 Babulon chu vân tawngin sâng mah se, A kulh sângte chu tinghet mah se, A chungah ka hnên ata tichhetute chu an lo thleng tho vang,” Tih hi LALPA thuchhuak a ni.
Babulon chhiat tûr thu
54 Babulon aṭanga ṭap thâwm leh Kaldai ram aṭanga chhiatna nasa tak thâwm chu. 55 LALPAN Babulon chu a rûn a, An thâwm nasa tak mai chu a tihrehsak a. An che vêl thâwm chu tui tam tak ri hum hum ang a ni, An hawhaw dur dur a. 56 A chungah rûntu a lo thleng, Babulon ngei chungah, a mi chakte manin an awm a, An thal ngulte a tliak sawm ta; LALPA chu thungrûltu Pathian a ni si a, A thungrûl ngei ngei ang. 57 “Tin, a hotute leh a mi fingte, A awptute leh a puitute Leh mi chakte chu ka tirui ang; An mu hlen ang a, an ṭhangharh lo vang,” Tih hi Lalber, a hming sipaihote LALPA thuchhuak chu a ni. 58 Sipaihote LALPA chuan heti hian a ti: “Babulon lal kulh bang chhah takte chu a chim vek ang a, A kawngka sâng takte chu a kâng vek ang; A mite chuan a thlâwnin an thawk a, Hnamte chu mei atân mai an intihah a lo ni.”
Jeremia thu Babulon-ah an thawn
59 Juda lal Zedekia lal kum linaa Babulon-a a kal laia a hnêna kal ve Seraia, Maaseia fapa Neria fapa hnêna zâwlnei Jeremia thupêk chu. Seraia chu lal in chhûng hotu ber a ni a. 60 Tin, Jeremia chuan Babulon chunga chhiatna lo thleng tûr zawng zawng, Babulon chungchânga hêng thuziak zawng zawng hi lehkhabuah a ziak a. 61 Tin, Jeremia chuan Seraia hnênah, “Babulon i thlen hunah chuan hêng thu zawng zawng hi chhiar ngei la, 62 ‘Aw LALPA, he hmun chungchângah hian tu mah, mi leh sa pawh, chên lohna tûra râwt bova awmin, kumkhuaa ram zâwk tûrin thu i sawi tawh a,’ ti ang che. 63 Tin, heti hi a lo ni ang a, he lehkhabu hi i chhiar zawhah lung nên ṭâwn belhbawmin Euphrates luiah paih lût la, 64 ‘Babulon chu hetiang mai hian a pil ang, a chunga chhiatna ka rawn thlen tûr avângin a tho leh tawh lo vang; an chau êm êm ang,’ tiin i sawi tûr a ni,” a ti a. Heti zawng hi Jeremia thu chu a ni.
Jerusalem chhia
1 Zedekia chu a lal ṭan tirhin kum sawmhnih leh kum khat mi a ni a; Jerusalem-ah kum sâwm leh kum khat a lal a; a nu hming chu Hamutali a ni a, Libna khuaa Jeremia fanu a ni. 2 Tin, Jehoiakima tih ang zêlin LALPA mit hmuha thil sual chu a ti a. 3 LALPA a thinur êm êm avângin Jerusalem leh Judai ramah chuan a hma ata a paih chhuahna khawpin thil a lo thleng ta a; tichuan, Zedekia chu Babulon lal chungah a hel ta a. 4 Tin, ro a rêl kum kuanaah chuan heti hi a ni a, thla sâwmna, chumi thla ni sâwm niah chuan, Babulon lal Nebukadnezzara leh a sipai rual zawng zawng chu Jerusalem do tûrin an lo kal a, bûk an khuar hnan ta a; a vêlin kulhte an siam ta a. 5 Chutichuan, Lal Zedekia kum sâwm leh kum khatna thlengin khawpui chu hualin a awm ta a. 6 Thla lina, chumi thla ni kuanaah chuan khawpuia ṭâm chu a nasa ta hle mai a, ram mipuite tân ei tûr rêng rêng a awm ta lo va. 7 Chutichuan, khawpui kulh bang an tipawp a, indo mi zawng zawng chu an tlân bo va, lal huana bang pahnih inkâra kawngkaa chhuakin, zânah khawpui ata an tlân chhuak a (Kaldai mite chu khawpui vêlin an awm a ni a). Araba kawngah chuan an kal a. 8 Mahse, Kaldai sipaite chuan lal chu an ûm a, Jeriko phaiah Zedekia chu an ûm phâk ta a, a sipai rual zawng zawng chu a hnên ata an darh vek a. 9 Tichuan, Zedekia chu an man a, Babulon lal hnênah Hamath rama Ribla khuaah an kalpui a; tin, anin a chung thu a rêl a. 10 Tin, Babulon lal chuan Zedekia fapate chu a mit hmuh ngeiah a that a; Ribla-ah chuan Juda hotu zawng zawng pawh a that bawk a. 11 Tin, Zedekia chu a mit a kher chhuahsak a; Babulon lal chuan kawl a buntîr a, Babulon-ah a kalpui a, a thih ni thlengin tân inah a dah ta a.
Tempul tihchhiat a ni
12 Tin, Babulon lal Nebukadnezzara kum sâwm leh kum kuana, thla ngana, chumi thla ni sâwmnaah chuan lal vêngtu pâwl hotu, Babulon lal hmaa ding ṭhîn, Nebuzaradana chu Jerusalem-ah a lo lût a. 13 Tin, LALPA in leh lal in a hâl a, Jerusalem-a in zawng zawng nên, in ropui tinrêngte chu meiin a hâl a. 14 Tin, Kaldai sipai rual zawng zawng, lal vêngtu pâwl hotu hnêna awmte chuan Jerusalem kulhte chu a vêlin an tichim ta vek a. 15 Tichuan, vêngtu pâwl hotu Nebuzaradana chuan mipui zînga rethei pâwl berte, khawpuia hnutchhiahte, Babulon lal hnêna inpe tawhte leh mi themthiam la awm chhun zawng zawng nên salah a hruai ta vek a. 16 Mahse, vêngtu pâwl hotu Nebuzaradana chuan rama mi rethei ber ṭhenkhatte chu, grêp huan enkawltu leh vêngtu atân a hnutchhiah a. 17 Tin, LALPA ina dâr bante leh LALPA ina dâr tuizêm leh a nghahchhante chu Kaldai mite chuan an tikeh sawm a, dâr zawng zawng chu Babulon-ah an la ta a. 18 Bêl te pawh, vutlawh te, khâwnvâr tihmihna te, maihûn te, thîrfian te, dâr bungbêl zawng zawng an hman ṭhinte chu an la vek a. 19 Note pawh, meivâp dahnate, maihûnte, bêlte, khâwnvâr dahnate, thîrfiante leh berhbute, rangkachaka siam chu rangkachakin, tangkaruaa siam chu tangkaruain vêngtu pâwl hotu chuan a la vek a ni. 20 Ban pahnih, dâra siam bâwngpa sâwm leh pahnih, tuizêm nghahchhan, Lal Solomonan LALPA in atâna a siam chu, hêng bungbêl zawng zawng dâr hi teh rual a ni lo. 21 Tin, bante chu, ban pakhat sân lam chu, tawng sâwm leh tawng riat a ni a, tawng sâwm leh tawng hnihin a vêl zo chauh a ni; a chhah lam chu zung za bêng a ni a, a kawrawng a. 22 Tin, a chungah chuan dâr lu bâwk a awm a, a lu bâwk sân lam chu tawng nga a ni a, a lu bâwk vêl mai chuan dâr hlîra chei mawi leh pawmgranet a ni a; ban pahnih pawh chuan hetiang bawk hian pawmgranet a nei a. 23 Tin, a pangah chuan pawmgranet sawmkua leh paruk a awm a, a vêla a cheimawina pawmgranet zawng zawng chu za a ni.
Judai rama mite Babulon-ah hruai an ni
24 Tin, vêngtu pâwl hotu chuan puithiam lal Seraia leh puithiam pahnihna, Zephania leh kawngkhâr vêngtu pathumte chu a man a; 25 tin, indo mite chunga hotua ruat leh mi pasarih, lal hmêl hmu ṭhîn, khawpuia awmte leh sipai hotu ziaktu, rama mite hming vawngtu leh ram mipui zînga mi sawmruk, khawpuia lo awmte chu khawpui ata a hruai chhuak a. 26 Tin, Nebuzaradana, vêngtu pâwl hotu chuan anmahni a hruai a, Babulon lal hnênah chuan Ribla-ah a rawn thlen a. 27 Tin, Babulon lal chuan Hamath rama Ribla-ah chuan anmahni a nghaisa a, a tihlum ta hlawm a. Chutichuan, Juda hnam chu an ram ata sala hruai bovin an awm ta a. 28 Hêng hi Nebukadnezzaran mipui sala a hruaite chu an ni: kum sarihnaah chuan Juda sângthum leh sawmhnih leh pathum; 29 Nebukadnezzara kum sâwm leh kum riatnaah chuan Jerusalem aṭangin mi zariat leh sawmthum leh pahnih salah a hruai a; 30 Nebukadnezzara kum sawmhnih leh kum thumnaah chuan Nebuzaradana, vêngtu pâwl hotu chuan Juda mi zasarih leh sawmli leh panga salah a hruai a. An zavai chuan sângli leh zaruk an ni. 31 Tin, Juda lal Jehoiakina kum sawmthum leh kum sarihna, a thla sâwm leh thla hnihna, chumi thla ni sawmhnih leh ni nga ni tak chuan heti hi a lo ni a, Babulon lal Evil-merodaka chuan a rorêl kum khatnaah chuan Juda lal Jehoiakina chu a lû a chawikânsak a, tân in ata chu a hruai chhuak a; 32 a hnênah chuan ṭha takin a ṭawng a, Babulon-a a hnêna awm lalho ṭhutthlêng aia sângin a lalṭhutthlêng chu a hûnsak a. 33 Tin, a tân in silhfênte chu a thlâktîr a, a dam chhûng ni zawng zawng chuan a hmaah a eiin a bâr ṭhîn ta a. 34 Tin, a châwm nân chuan a dam chhûng ni zawng zawng, a thih ni thlengin, a ni tin chanvo chu Babulon lalin a pe ṭhîn a ni.
Jerusalem lungngaihna
1 Mipuia khat ṭhîn khawpui kha khawhara a ṭhut tâk chu! Hnamte zînga ropui ṭhîn kha, hmeithai ang a lo ni ta a! Ram bialte zînga lian ber ṭhîn kha, chhiah khua a lo chang ta a. 2 Zânah lungchhe vânkaiin a ṭap a, a biangah mittui a luang e; A nei nêm maw, thlamuantu tûr, a ngainatu zawng zîngah; A ṭhiante zawng zawngin an bum a, a hmêlma an chang zo ve. 3 Juda chu sal tân khur a lût ta a, hrehawm leh sala chhawr tuarin; A chêng ta e ânpai zîngah, chawlhna rêng a tawng lo ve; A ûmtu zawngten an nangchîng, a chêp lai takin. 4 Zion khawpui kawngte chu a ngui ruai, kûtpui urhsûn kal awm loh vângin; A kulh kawngka zawng zawng a ram zo, a puithiamte an rûm a. A nulaten an tuar a, ani lahin na a ti êm êm. 5 A hnehchhiahtute chu hotuah an chang zo ve, a hmêlmate an hlawhtling, LALPAN a tuartîr tâk hi, a bawhchhiat tam avângin; Hnehchhiahtu hmaah a hraichawite sal tân khur an lût ta e. 6 Tin, Zion fanu chu a mawina zawngin a bosan ta e, A hotute zukchal tlat hmun nei lo ang an chang zo ta; Umtu hmaan an tlân e, tha leh zungzâm rêng nei lovin. 7 A hrehawm mangan niah Jerusalem chuan a hre reng a, A hmasâng thil hlu zawng zawngte; Hnehchhiahtu kuta a mite an tlûk laiin ani chu tu mah rêngin an pui lo, Hnehchhiahtuten an en a, a chim chu an diriam a. 8 Jerusalem a sual ta êm, chu vâng chuan thil thianghlim lo a lo chang ta; A zahtu zawngten an hmusit, a saruak an hmuh vângin; A ni, lungngaiin a ni a rûm a, lehlam a hawi. 9 A puan hmâwrah bawlhhlawh a kai; a hun tâwp tûr a ngaihtuah lo; Chu vâng chuan mak takin a tlâwm, thlamuantu rêng a nei lo ve. “En teh, aw LALPA, ka hrehawmna hi, hmêlma a intiropui si!” 10 Hnehchhiahtu chuan a kut a lek a, a thil hlu zawng zawng chungah chuan; A hmun thianghlimah chuan ânpaiho an lût a hmu e, Inkhâwmna hmuna luh i khapteho kha. 11 A mite zawng zawng an rûm e, ei tûr zawngin; An thil hlu zawng zawng an pe zo, nun tihharhna chaw atân. “Aw LALPA, ngai la, en teh, hmuhsitawm ka nih tâk hi.” 12 “In tân engmahlo mai em ni, kawnga veivâk zawng zawngte u? Ngai ula, en teh mah u, ka chunga thleng ka lungngaihna ang lungngaihna a awm em ni? A thinrim nasat nia LALPAN min tihhrehawmna hi. 13 Chung lam ata mei a tîr a, ka ruh chhûngah a luhtîr a; Ka ke tân lên a zâr a, mi tikîr a; Rilru bo rum rumin chau takin mi siam a. 14 “Ka bawhchhiatna hi phurrit atân têl khâwm a ni a, Ama kut ngeia têl khâwm a ni; Mi phurhtîr ta a, ka tha a tichau zo ta; Ka do zawh lohte kutah min pe a, LALPA ngei chuan. 15 “LALPAN ka mi chakte chu engmahlovan a siam, kan zîngah; Keima chungah pung khâwm a ko ve, ka vâl rual tiral tûrin; Grêp sâwrna khur iangin LALPAN a chîl, Juda fanu thianghlim chu. 16 “Hêng vâng hian ka ṭap a, ka chhîngmit tui ang luang e; Thlamuantu, min tiharhtu tûr awmna kâr hlat vângin; Ka hraichawite awmkhua a har ngei, hmêlmain a hneh vângin.” 17 Zion-in a kut a phar vêl, thlamuantu tûr awm lo ve; LALPAN Jakob-ho chungchângah a vêla awm zawng zawng hnehchhiahtu ni tûrin a rêl ta; Jerusalem chu an zîngah thil thianghlim lo a lo chang e. 18 “LALPA chu a fel a ni e, a thupêk chungah ka hel si; Mipui zawng zawngte u, ngaithla ula, ka lungngaihna hi en teh u; Ka nula thianghlim leh vâl rual sal tân khur an lût ta e. 19 Mi ngainatute ka ko va, anni chuan mi bum ta zâwk a; Ka puithiam leh ka upate khawpuiah an boral ta; An nun tihharhna tûr chaw an zawn laiin. 20 “Aw LALPA, ngai teh, ka hrehawmzia mai hi, ka kawchhûng a buai zo ta; Ka thinlung a vai, ka chhûngah, sual takin ka hel ta si. Kawtthlêrah khandaihin a sûntîr a, in chhûngah pawh thihna ang a ni. 21 “Ka rûm an hria, mi thlamuan tûr rêng an awm lo ve. Ka hmêlma zawngten ka buaina hi an hria e, I thiltih tâk hi an lâwm a ni. Ni i ruat tawh chu i thlentîr a, anni chu keimah ang ni ve rawh se. 22 “An sualna zawng zawng i hmaah lo thleng rawh se; Ka bawhchhiatnate avânga ka chunga i tih ang hian an chungah ti ve ang che; Ka rûmna a tam ta si a, ka thinlung a chau ta.”
LALPAN Jerusalem a hremna
1 LALPAN a thinrimin Zion fanu chhûmin a khuh tâk chu! Vân ata leiah a paih thla e, Israel mawina chu; A ke nghahchhan a hre reng lo, a thinrim niah chuanin. 2 LALPA chuan a lem zo va, Jakob-ho chênna zawng zawng a zuah lo ve; A thinurin a nam thlu a, Juda fanu kulh nghette chu; Lei thleng rawka tichimin a titlâwm e, ram leh a hotute chu. 3 Israel kî zawng zawng chu thinrim takin a tan chhum a; Hmêlma hmaan a kut ding lam a hnûk kîr e, Meialh a vêl kâng faitu angin Jakob-ho zîngah a alh chhuak e. 4 Hmêlma angin thal ngul a kuai, hnehchhiahtu angin a kut ding lam a dintîr a; Zion fanu puan inah mit latu ṭha zawng a that zo va; Mei angin a thinur a leih bua a. 5 LALPA chu hmêlma ang a lo ni ta, Israel a lem zo ta; A in ropui zawng zawng a lem zo, a kulh nghette a tichhia! A tipung ta lusûn, ṭah hla, Juda fanu zîngah chuan. 6 A bûk chu a tichim ta, huan bûk ang maiin, A kûtpuite hmun a tichhia a; LALPA chuan Zion-ah kûtpui leh Chawlhni a hlamchhiahtîr a, Lungawi lo takin lal leh puithiamte chu a hnâwl a. 7 LALPAN a maichâm a paih bo va, a hmun thianghlim a lungten; Hmêlma kutah a pe ta e, a in ropuite kulh chu; Kûtpui ni ang maiin LALPA inah an au dur dur a. 8 LALPA chuan Zion fanu kulh chu tihchim a tum ta a, Tehnain a chhinchhiah a, tihchhiat nân a kut a sûm lo ve; Kulh hmatâwng leh kulhte chu lu a sûntîr a, an ngui dûn e. 9 A kulh kawngkâte leiah an pil, a thîr tlâwn a tichhe bung rum e; A lalber leh a hotute ânpaiho zîngah an awm e, dân chu a awm ta lo; A zâwlneite lahin LALPA ata inlârna rêng an hmu lo. 10 Zion fanu upate chu leiah an ṭhu, ngawi rengin; An luah vaivut an phul a, saiip puan an sin a; Jerusalem nula lei siin an kaikûn e. 11 Ka mit ka ṭah chhe zo va, ka kawchhûng a buai zo ta; Ka thinlung a inleih bua leiah, ka mipui fanu boral vângin; Nautê leh hnute hne laite chu khawpui tualah an chauh avângin. 12 An nute hnênah chuan, “Khawiah nge buh leh uain?” tiin, Hliam ang maiin khawpui tualah an thidang a; An nute ângchhûngah an nun a chuai ral e. 13 Eng nge ka hriattîr ang chia, eng nge ka tehkhin ang che, aw Jerusalem fanu? Eng ang nge i ni ka tih ang, ka han thlamuan theih nân che, aw Zion fanu thianghlim? I chhiatna hi a zau ve tuipui angin; Tu nge tidam thei ang che? 14 I zâwlneiten i tân inlârna lawilo leh âtthlâk an hmu a, Din ṭha leh tûr chein i khawlohnate an tilang lo va; I tân thu lawilo leh bumnaa khat an hmu zâwk a ni. 15 Kawnga veivâk zawng zawngten an kut an ben khum che a, Jerusalem fanu an sî khumin an lu an thin khum a: “He khawpui hi maw mawina famkim, lei pum pui hlimna an tih chu?” tiin. 16 I hmêlma zawng zawngten an ân khum che; An sî khum a, an ha ṭhialin: “Kan lem zo ta! He ni hi kan thlîr ṭhin ngei kha a ni, Kan dawng ta a, kan hmu ta e,” an ti. 17 LALPAN a tum chu a tizo va, Hmâna a ruat angin a thu a hlen ta; A paihthla e, lainat lovin; Hmêlma chu i chungah a lâwmtîr e, Nangmah hnehchhiahtute kî chu a chawisâng ta. 18 LALPA hnênah an thinlung a au ta a! “Aw Zion fanu kulhpui! Mittui a chhûn a zânin luang zur zur rawh se; Nang châwl suh la, i mittui pawh hân suh se. 19 “Tho la, zânah vên ṭan tirhan au chhuak rawh, I thinlung chu tui angin leih chhuak ang che LALPA hmaan; Ama lamah i kut phar la, i fanau kawtthlêr tawntirh tina rilṭâma chaute nunna atân. 20 “En la, aw LALPA, ngai teh, hetianga i tih tâkate hi! Hmeichhiaten an rîla rah, fanau an duat laite chu an ei tûr em ni? Puithiam leh zâwlnei LALPA hmun thianghlimah chuan thahin an awm tûr em ni? 21 “Tleirâwl leh putar kawtthlêr laian an thal phung e, Ka nula leh vâl rual khandaih avângin an tlu; Nangin i thinrim niah chuan i that ta, I sâm buan e lainat lovin. 22 Kûtpui ni angin ka râp zâwngte kil tin ata i ko va, LALPA thinrim niah chuan tlân chhuak leh zuah rêng an awm lo ve; Ka chawi leh ka kaih tlei tâkte chu ka hmêlmain a tiboral ta.”
Hremna, simna leh beisei tûr
1 A thinurna talhtum hnuaia tihhrehawmna hretu ka ni a. 2 Thimah mi khalh lûtin mi kaltîr a, êngah ni lovin; 3 Keima chungah nilêngin a kut a thlâk a thlâk ngei mai. 4 Ka tîsa leh vun a tisâwng a, ka ruhte a titliak a. 5 Ka lakah dai a theu va, khâkna leh hrehawmnain mi hung; 6 Hmun thimah mi chêntîr a, thi daih tawhte angin. 7 Ka chhuah theih loh nân mi hung vêl a; ka khaidiat a tirit a. 8 A ni, ṭanpui ka ngena ka au pawhin ka dîlna a khâr hnan a. 9 Lungchherin ka kalkawngte a hnawh a, ka kawngte a tikawi a. 10 Ka lakah savawm mî châng ang, sakeibaknei tawm ru khiau ang mai a ni. 11 Ka kawngte mi hruai kawisak a, mi pawt sawm a, khawhar takin mi siam a. 12 A thal ngul a kuai a, a kah tumah mi dah a. 13 A bâwma thalfungte chu ka kawchhûngah a kâp lût a. 14 Ka mite zawng zawng tân nuihzatbûr ka lo ni ta, nilênga an hla nên. 15 Ani chuan thil khâin mi tikhat a, saiin mi tihnê a. 16 Lung ṭhîlah ka hâte mi tauh baltîr a, vaivutah mi vahtîr a. 17 Nangin muanna ata ka nunna i sawn daih a, thawvenna chu eng a nih pawh ka hre ta lo. 18 Tin, “Ka ropuina leh LALPA laka ka beisei chu a bo zo ta,” ka ti ta a ni. 19 Ka tuarna leh ka vahvaihna, sai leh mît khâte chu hre reng ang che. 20 Ka nunna hian chûngte chu a hre reng zêl a, ka chhûngah hian a kun reng a ni. 21 Hei hi ka han hre chhuak leh ta a, chu vâng chuan beiseina ka nei ta. 22 Tihborala ka awm lo hi LALPA zahngaihna a lo ni, A lainatnate chu a kang ngai loh avângin. 23 A thar zêl ṭhîn tûk tinin, i rinawmna a ropui e. 24 “LALPA chu ka chanpual a ni,” ka nunnain a ti a, “Chuvângin, amah chu ka beisei ang!” 25 LALPA chu amah nghâktute tân a ṭha a, amah zawngtu tân chuan. 26 LALPA chhandamna beiseia nghah veng veng chu a ṭha a ni. 27 Mi, a tleirâwl laia nghâwngkawl bah chu a ṭha a ni. 28 A bahtîr tawh avângin amahin ṭhu sela, ngawi reng rawh se. 29 A kâ vaivutah dah sela, beisei a la awm dah law maw. 30 A bêngtu hnênah a biang dawh sela, sawichhiatin khat rawh se. 31 LALPA chuan kumkhuain a paih bo dâwn si lo va; 32 Tilungngai mah sela, a zahngaihna nasa tak avângin a la khawngaih dâwn a ni. 33 Mihring fate tihhrehawm leh tihvui hi a duh zâwng a ni si lo. 34 Lei sal tâng zawng zawng rah beh te, 35 Chungnungbera hmaihmaa mi dikna hnâwl te, 36 Mi thu tihkhawlohsak te hi LALPA remtih zâwng a ni lo. 37 LALPAN thu a pêk loh chuan thusawi tithleng theitu chu tu a ni nge? 38 Thil ṭha leh ṭha lo hi Chungnungbera kâ aṭanga chhuak a ni lo vem ni? 39 A sual hremnaah engati nge mi nung a phunnawi reng? 40 Kan kawngte chu fiahin en ngun ila, LALPA lam i hawi ang u. 41 Kan thinlung chu kan kutte nên vâna Pathian lamah chuan i chawikâng ang u. 42 Kan bawhchhia a, kan hel a, nangin min ngaidam lo ve. 43 Thinrimnain in inkhuh a, min ûm a, khawngaih lovin i that a. 44 Chhûmin i inkhuh a; chutichuan, ṭawngṭaina a kal tlang thei lo. 45 Mipuite zîngah hian bawlhhlawh leh hnâwmhnawkah min siam ta a. 46 Kan hmêlmate zawng zawng chuan kan chungah an kâ an âng zau va. 47 Hlauhna leh khuarkhurumin mi nang a, chhiatna leh boralna nên. 48 Ka mipui fanu boral avângin ka mit chu lui tui angin a luang ta e. 49 Ka mit chu chhum lo chat lovin, hân chuang lovin a luang chhuak ang a, 50 LALPAN vân aṭanga mi zuk ena mi hmuh thlengin; 51 Ka khawpui fanute zawng zawng avângin ka mitin ka rilru a tilungngai e. 52 Chhan awm lova mi dotute chuan sava angin mi ûm a; 53 Nung chungin khuarkhurumah mi theh thla ta a, Ka chungah lung an thlâk a. 54 Tuiin mi chîm pil a, “Ka boral ta!” ka ti a. 55 Khuarkhurum hnuaihnung ber aṭang chuan, aw LALPA, i hming ka lam a. 56 Ka aw chu nangin i hria a, ka thâwk laa ka au thâwmah i beng hup suh ang che. 57 Nang ka auh che niah khân i lo hnai a, “Hlau suh!” i ti a. 58 Aw LALPA, ka thiamna thu mi sawisak a, ka nunna i tlan a. 59 Aw LALPA, ka chunga thil dik lote hi i hmu a, ka thu mi rêlsak ang che. 60 An phuba lâkna zawng zawng leh an mi phiarna zawng zawngte chu i hmu a. 61 Aw LALPA, an mi sawichhiatna leh mi phiarna zawng zawngte chu i hria e. 62 Mi beitute hmui leh ngaihtuahnate chu nilêngin ka chungah a awm a. 63 An ṭhu leh an dingte hi en teh; an hla ka ni mai. 64 Aw LALPA, an kut hnathawhte ang zêlin nang chuan i thungrûl ang. 65 Thinlung sak i neihtîr ang a, i ânchhia an chungah a tla ang. 66 Thinrimin i ûm ang a, LALPA vân hnuai ata chu i tiboral ang.
A chhiat hnua Jerusalem
1 Rangkachak chu a va thîm ta êm! Rangkachak thianghlim ber chu a va danglam êm! Hmun thianghlim lungte chu kawtthlêr tawntirh tinah paih darh a ni ta. 2 Zion fapa hlu tak, rangkachak ṭha mi nêna tehkhin theihte chu Hlum bêl, bêlvawtu kutchhuak ang maia ngaih lah ni ta! 3 Sihalte mahin an notê an hnutê an pe, an hnêktîr a; Ka mipui fanu erawh chu a nun a lo chhia, thlalêra vanghâwngsei ang maiin. 4 Nau hnute hne lai lei chu tuihâl vângin a dangah a bet a; Naupangte chuan chaw an ngên a, tu mah rêngin an pe lo. 5 Chaw ṭha ei ṭhînte chu kawtthlêrah an boral a; Puan senduk sina sei liante chuan êk dûrte an kuah a. 6 Ka mipui fanu khawlohna chu Sodom sualna aiin a nasa a, Kut rêng pawha khawih lohva mit khap kâr lova tihchhiata kha. 7 A mi liante chu vûr aia thianghlim an ni a, hnutetui aia vâr an ni; Taksaah chuan rubi aiin an sâr zâwk a, an mawizia chu sapphir ang a ni. 8 An lan dân chu lungalhthei aiin a dum zâwk a, kawtthlêrahte chuan hriat an ni lo; An vun chu an ruhahte a bet a, hmawlh angin a ro va. 9 An ṭha zâwk e khandaiha thi, rilṭâma thi ai zawngin, An râwp ral a, lova thlai tharte tlachhamin. 10 Lainattu hmeichhiate kut chuan mahni fate an chhûm a; Ka mipui fanu tihchhiatnaah chuan an chawah an chang ta e. 11 LALPAN a thinur a hlen ta, a thinrim hlauhawm a leih chhuak; Zion-ah mei a tialh a, lungphûmte lamin a kâng zo. 12 Lei lalte chuan an ring lo va, khawvêla chêng zawng zawng pawhin; Hnehchhiahtu leh hmêlma Jerusalem kulh kawngkaa an luh theih tûr chu. 13 Hei hi a zâwlneite thil tihsual leh a puithiamte khawloh vâng a ni, A chhûnga mi dik thisen chhuahtu chu. 14 Mitdelin kawtthlêrahte an vâkvai a, thisenin an bawlhhlawh a; Miten an silhfênte an khawih theih loh hial khawpin. 15 “Kal bo rawh u, thianghlim lote u! Kal bo rawh u, kal bo rawh u! Dek suh u!” tiin miten an au va, Tlânchhia leh vâkvai an lo ni ta a, Miten hnamte zîngah, “Hetah an chêng tawh lo vang,” an ti a. 16 LALPA ngei chuan a theh darh a, a ngaihsak tawh lo vang; Puithiamten zah an hlawh lo va, upaten duhsak an hlawh hek lo. 17 Ṭanpuina thlâwn thlîrin kan mit a vai zo va; Chhandam thei lo hnam chu nghah zawng kan nghâk a ni. 18 Miin kan hnu an chhui, khawlai kan lêng thei lo ve; Kan tâwp a hnai, kan ni a kim; kan tâwpna a thleng ta si. 19 Min ûmtute chu vân mupuite aiin an chak zâwk; Tlângahte chuan min ûm a, thlalêrahte chuan min châng a, 20 Kan hnâra thâw, LALPA hriak thiha chu an khurah manin a awm ta; “Hnamte zîngah a zâr hnuaiah kan chêng ve ang,” kan tih ṭhina kha. 21 Aw Edom fanu, Uz rama chêng chu hlimin lâwm rawh se. No chu i hnên pawh a lo thleng ang a, i rui ang a, Saruakin i insiam ang. 22 Aw Zion fanu, i khawlohna hremna chu a kim ta e; Salah a hrêng tawh lo vang che, Aw Edom fanu, i khawlohna chu a rawn hrem dâwn a; I sualte chu a hmuchhuak ang!
Khawngaih dîla ṭawngṭaina
1 Aw LALPA, kan chunga lo thleng chu hre reng ang che; Ngai la, kan mualphona hi en teh! 2 Kan ro luahte chu hnam dang mite hnêna pêk a ni zo ta a, Kan inte chu hmêlhriat loh mite hnênah. 3 Fahrahte leh pa nei lote kan ni ta a, Kan nute chu hmeithai ang mai an ni ta. 4 Kan tuisik te man neiin kan in ta a, Kan thingtuahte pawh kan hnênah hralh a ni ta. 5 Nghâwnga manin kan awm a; kan chau va, chawlh rêng kan nei lo. 6 Aigupta leh Assuria hnênah kut kan dawh a; Khamkhawp chaw hmu tûrin. 7 Kan pate zawng an sual a, an awm ta lo va; An khawlohnate kan phur a ni. 8 Bawihte chu kan chungah an lal a; An kut ata min chhanchhuak tûr tu mah an awm lo. 9 Nun chân hlauhawm khawpin kan chaw kan ei ṭhîn; Thlalêra khandaih avâng chuan. 10 Kan vunte chu thuk ang maiin a sa a; ṭâm kâng sâ avângin. 11 Zion-ah hmeichhiate chu an pâwngsual a, nulate chu Juda khawpuiahte. 12 Lal fate an kutin an khai a, upate hmêl an zah lo. 13 Tlângvâlte buh her khâwl an hertîr a; Naupangte thingtuah têl hnuaiah an pai chawn chawn a. 14 Upaten kulh kawngka an kalsan a, tlangvâlten an hla sak. 15 Kan thinlung hlimna a chuai ta; kan lâm lusûnah a chang ta. 16 Kan lu ata lallukhum a tla ta; Kan chung a pik e, kan tisual ta si. 17 Hemi avâng hian kan thinlung a chau va, Hêng avâng hian kan mit a thim; 18 Zion tlâng chu a ṭiau tâk avângin, Sihalte a chhûngah an lêng. 19 Nang chu LALPA, kumkhuain i lal a; I lalṭhutthlêng chu chhuan zawng zawng thlengin. 20 Eng vângin nge kumkhuaa min theihnghilha, Chu leh chen min kalsan le? 21 Aw LALPA, nangin i lam min hawitîr la; tichuan, kan lo hawi ang; Hmasâng angin kan nite tithar ang che, 22 Nangin min paih thla dêra, Kan chungah i thin a ur nasa hle a nih loh chuan!
Pathian Lalṭhutthlêng
1 Kum sawmthumna, thla lina, ni nganaah chuan, kei Ezekiela, puithiam Buzia fapa chu Babulon rama Kebar lui kama Juda sal tângte zîngah ka awm a, vân a lo inhawng a, Pathian inlârna ka hmu a. 2 Lal Jehoiakina sala a tân kum ngana a ni. 3 Babulon rama Kebar lui kamah chuan LALPA thusawi ka hria a, a thiltihtheihna chuan mi tuam a. 4 Tin, ka han en a, hmâr lam ata thlipui nasa tak lo thawk ka hmu a. Chhûmpui nasa tak aṭang hian kâwl hi a lo phe zawr zawr a, a kiang vêlte chu a êng pup mai a. Kâwl a phêtnaah chuan êng eng emaw, dâr tle mi ang hi a awm a. 5 Thlipui lai takah chuan thil nung pali ang, mihring ruangâm pu ka hmu a, 6 hmai pali leh thla pali an nei ṭheuh va. 7 An ke an thluang a, bâwng tin ang an nei a, dâr tle mi angin an êng a. 8 Hmai pali leh thla pali bâkah chuan mihring kut ang pali an nei ṭheuh va, an thla hnuaiah zêl a awm a. 9 Thil nungte chuan an thla pahnih an zâr pharh ṭheuh chuan an thla hmâwrte chu a intawk pha a. Kil li neiin an ding a, an chêt sawn pawhin an zain an taksa her chuang lovin an che sawn ṭhîn a ni. 10 Thil nung palite chuan hmai pali an nei ṭheuh va, an hma lamah mihring hmêl an pu a; ding lamah sakeibaknei hmêl ang, vei lamah bâwngpa hmêl ang, hnung lamah mupui hmêl ang. 11 Thil nung paliten an thla pahnih ṭheuh chu a hmâwr intawk phain an zâr ṭheuh va, a dangte chu an taksa hrûlah an khup a. 12 Thil nungte chuan khawi lam pawh an hawi sa vek a ni, inher lovin thlarauvin a duhna lam apiangah an kal ho thei. 13 Thil nungte zîngah chuan, êng eng emaw, meichher alh deuh ang mai hi a awm a, eng lai pawhin a che a. Mei chu a alh êng pup a, kâwlphe angin a êng chhuak zuai zuai a. 14 Thil nungte chu kâwlphe angin an vir tawn zawk zawk a. 15 Thil nung palite chu ka en reng lai chuan, tawlailîr ke pali thil nung pali zâwn ṭheuhva awm, leia innghat ka hmu bawk a. 16 Tawlailîr ke palite chu inang vek a ni a, lunghlu angin an êng ṭheuh va, tawlailîr ke pakhat chhûnga tawlailîr ke dang awm ang a ni. 17 Inher lovin khawi lam hawi pawhin an che sawn thei a ni. 18 Tawlailîr ke bial tlângte chu kual kung mai, râpthlâk tak a ni a, mitin a khat a. 19 Thil nungte chu an kal sawn apiangin tawlailîrte pawh chuan an zui ve zêl a. 20 Thil nungte chu thlarau duhna lam lamah an kal a, tawlailîrte pawhin thil nungte tih ang chiahin an ti ve a, thil nungte thlarau chu tawlailîr keahte a awm si a. 21 Tichuan, thil nungte chu an kalin emaw, an dinin emaw, boruaka chawikân an nihin emaw, tawlailîrte pawh chutiang bawk chuan an awm ṭhîn, thil nungte thlarau chu tawlailîr keahte chuan a awm si a. 22 Tin, thil nungte lu chung chu thil eng emaw, krustal lung tle mia siam ang hian a khuh kulh mai a. 23 Chu thil awm kulh hnuaiah chuan thil nungte chu an ding a; an dawta mite lamah chuan an thla pahnih an zâr a, an thla pahnih dangin an taksa an khuh a. 24 An thlawh laia an thla zâp ri chu ka hria a, tuifinriat fâwn ri ang leh sipai rual thâwm anga mipui ri mur mur thâwm leh Engkimtithei Pathian aw ang a ni. An thlawh loh chuan an thlate an khup a. 25 An thlawh loh lai pawhin an lu chung zâwn chung lama thil awm aṭang khân thil ri hum hum a awm tho va. 26 Tin, an lu chunga vân dum chungah khân lalṭhutthlêng ang tak, sapphir lung ang maia lang hi a awm a; tin, lalṭhutthlêng ang tak chungah chuan mihring ang taka lang hi a awm a. 27 Tin, a kâwng achin chung lam chu ṭhihna puak sur ang maiin ka hmu a, a kâwng ni âwm achin hnuai lam chu mei ang mai hi niin ka hmu a, a êng vêl pup mai a. 28 Ruah sûr nia chhûm chunga chhimbâl lan dân ang mai hi a vêla êng lan dân chu a ni a. Hei hi LALPA ropuina lan dân chu a ni. Tin, ka hmuhin bawkkhupin ka tlu a, thusawitu aw chu ka hria a.
Zâwlnei ni tûra Ezekiela koh
1 Tin, ka hnênah, “Mihring fapa, i kein ding rawh, i hnênah thu ka sawi dâwn e,” a ti a. 2 Tin, ka hnêna thu a sawi lai chuan thlarau chu keimahah a lo lût a, ka kein mi dintîr a; tin, mi betu chu ka ngaithla ta a. 3 Tin, ka hnênah, “Mihring fapa, Israel fate hnênah, hel hmang hnam, ka chunga hel ṭhînte hnênah chuan ka tîr a che: anmahni leh an thlahtute pawhin vawiin thleng hian ka chungah an bawhchhe ṭhîn a ni. 4 Chhuan luhlul leh tihmawhte an ni a, an hnênah ka tirh che hi; tin, an hnênah chuan, ‘LALPA PATHIAN chuan heti hian a ti,’ i ti tûr a ni. 5 Tin, annin an ngaithla emaw, an ngaithla lo emaw (hel hmang an ni si a), an zîngah zâwlnei a awm tih an hre reng tûr a ni. 6 Tin, nang, mihring fapa, anmahni hlau suh la, an thu-ah pawh zâm hek suh, i hnênah chuan lênhlîng leh hnimhlîngneite awmin, khawmualkaikuang zînga chêng ni mah la; hel hmang mi ni mah sela, an thu chu hlau suh la, an lan dânah zâm hek suh. 7 Tin, an ngaithla emaw, ngaithla lo emaw, an hnênah ka thu i sawi tûr a ni; hel hmang tak an ni si a. 8 Amaherawhchu, nang mihring fapa, i hnêna ka sawi hi ngaithla rawh; mi hel hmangte angin hel hmang ni ve suh, i kâ âng la, ka pêk che chu ei rawh,” a ti a. 9 Tin, ka han en a, ngai teh, kutin mi rawn ban a; tin, ngai teh, kutah chuan lehkhabu zial a awm a. 10 Ka hmaah a han pharh a, a chhûng lam leh a pâwn lama ziak a ni a; ṭahna te, lusûnna te, chungpikna te ziakin a awm a.
1 Tin, ka hnênah, “Mihring fapa, i hmuh kha ei rawh; lehkhabu zial hi ei la, Israela chhûngte hnênah chuan thu va sawi rawh,” a ti a. 2 Chutichuan, ka kâ ka âng a, lehkhabu zial chu mi eitîr ta a. 3 Tin, ani chuan ka hnênah, “Mihring fapa, i pumah pai la, he lehkhabu zial ka pêk che hian i kawchhûng tikhat rawh,” a ti a. Tichuan, ka ei ta a, a thlumzia chu ka kâah chuan khawizu ang mai a ni a. 4 Tin, ani chuan ka hnênah, “Mihring fapa, kal la, Israel chhûngte hnênah chuan ka thute hi hmangin va sawi rawh. 5 ṭawng hrang leh ṭawng harsate hnênah tirh i ni lo va, Israel chhûngte hnênah tirh i ni zâwk si a. 6 Hnam ropui tak, an ṭawng i hriat loh, ṭawng harsa pui pui hmangtute zîngah pawh tîr che ila chuan i thu an ngaithla ang. 7 Mahse, Israel chhûngte chuan an ngaithla lo vang che, kei mi ngaithla dâwn si lo va, Israel chhûngte zawng luhlul tak leh tihmawh takte an ni si a. 8 Tûnah hian luhlul tak leh deh khirh takin anmahni ang maiin ka siam ang che. 9 Lung chang tak, meilung aia changa deh khirhin ka siam a che, hlau suh la, an mitmelhah zâm hek suh, hel hmang mi ni mah sela,” a ti a. 10 Chu lo chu ka hnênah, “Mihring fapa, i hnêna ka thu sawi tûr zawng zawng chu i bengin ngaithla la, i thinlungah khung rawh. 11 Tin, kal la, i chipui sal tângte hnên va thleng la; an ngaithla emaw, ngaithla lo emaw, ‘Hetiang hi LALPA thuchhuak chu a ni e,’ tiin sawi la, hrilh rawh,” a ti a. 12 Tichuan, thlarauvin mi chawi kâng ta a, ka hnung lamah chuan thâwm ri sung sung hi ka hria a, “A hmun aṭang hian LALPA ropuina chu malsâwmin awm rawh se,” tiin. 13 Tin, thil nungte thla intawk ri te, an bula tawlailîr ri te, thâwm ri sung sung te chu ka hria a. 14 Chutichuan, thlarauvin mi chawi kâng a, mi la bo ta a; thinrim tak leh hreh tak chungin ka kal ta a, LALPA kut chu ka chungah a chak si a. 15 Tichuan, Tel-abib-a sal tângho, Kebar luia chêngte hnên chu ka lo thleng a, an ṭhutnaah chuan ka ṭhu a; mak ti takin tah chuan ni sarih ka ṭhu ta a.
LALPAN râl vêngtuah Ezekiela a siam
16 Tin, ni sarih tâwpah chuan heti hi a ni a, LALPA thu chu ka hnênah a lo thleng a, 17 “Mihring fapa, Israel chhûngte vêngtuah ka ruat che a ni; tichuan, ka kâa thu i hria angin keima aiah i vaukhâng tûr a ni. 18 Mi suaksual hnêna ka thu, ‘I thi ngei tûr a ni,’ ka tiha, chu mi suaksual chu a nunna hum tûra a sualna kawng kalsan tûra vauna i neih lohva, vaukhânna thu i hrilh bawk si lohva, chu mi suaksual chu a khawlohnaah a thih chuan, a thisen mawh chu i lakah ka phût ngei ang. 19 Amaherawhchu, chu mi suaksual chu i vauva, a suahsualna a kalsan lohva, a sualna kawng a hawisan bawk loh chuan a khawlohnaah a thi ang a, nang erawh chuan i nun i chhanhim a ni zâwk ang. 20 Tin, mi fel chuan a felna hawisana khawlohna a tiha, a hmaa tlûkna ka lo dah chuanin, a thi ang; vaukhânna i neih loh avângin ama sualah a thi ang a, a thil fel tih tawhte chu hriat reng a ni lo vang; a thisen mawh erawh chu i lakah ka phût ang. 21 Nimahsela, mi fel chu sual lo tûra i vaukhâna a sual loh chuan, vauna a pawisak avângin a nung ang; nang pawhin i nun i humhim ang,” a ti a.
Ezekiela ṭawng theih loh thu
22 Tin, tah chuan LALPA kut chu ka chungah a awm a, ka hnênah, “Tho la, phaizâwlah kal la, tah chuan ka bia ang che,” a ti a. Tichuan, ka tho va, phaizâwlah chuan ka kal ta a. 23 Tin, ngai teh, tah chuan LALPA ropuina chu, ropuina, Kebar luia ka hmuh ang mai khân a lo ding a, kei chu bawkkhupin ka tlu ta a. 24 Tichuan, thlarau chu keimahah a lo lût a, ka kein mi dintîr a, mi bia a, “Kal la, i inah inkhâr khung rawh. 25 Nang zawng e, mihring fapa, hruizênin an hlîng ang chia, an phuar ang che, an zîngah i lêng chhuak tawh lo vang. 26 I lei chu i dangah ka behtîr ang a, i ṭawng tawh lo vang a, anmahni zilhtu i ni tawh lo vang, hel hmang chhûng an ni si a. 27 Mahsela, i hnêna thu ka sawi hunah chuan i kâ ka ântîr ang chia, an hnênah chuan LALPA PATHIAN chuan heti hian a ti a ni: ‘A ngaithlain ngaithla sela, a ngaithla lovin ngaithla lo mai rawh se, hel hmang chhûng an ni si a, a ti e,’ tiin i sawi tûr a ni.
Jerusalem hual - lem changin a entîr
1 “Nang mihring fapa, leirawhchan phêk la la, i hmaah dah la, chumiah chuan khawpui, Jerusalem khawpui lem ziak rawh. 2 A vêla hualin kulh siam hnan la, mual pâwng siam hnan rawh, sipai riahbûkte siam hnan la, kulh sut chhiatnate a vêlin siam hnan rawh. 3 Tin, nangin thîr phêk la la, nangmah leh khawpui inkârah chuan thîr bang atân chhawng rawh; chu lam chu hmachhawn la, hualin a awm ang a, nangman i hual tûr a ni. Hei hi Israel chhûngte tân entîr lâwkna a ni ang. 4 “Tin, nang chu vei lam delhin mu la, i chungah Israel chhûngte khawlohna nghat rawh. 5 An khawlohna tuarin ni zathum leh ni sawmkaw chhûng mu rawh. Kum khat hrem an tuar aiah ni khat zêl i tuar dâwn a ni. 6 Chumi zawhah inlet la, i ding lam delhin mu leh rawh; Juda chhûngte khawlohna chu ni sawmli i tuar leh tûr a ni, hrem an tuar tûr kum khat zêlah ni khat. 7 Bân hlîm têl tâwlin Jerusalem hual lam kha hawi la, a chung thu sawi chhuak rawh. 8 Tin, ngai teh, hruizênin ka hlîng che a, i hual ni i tlingtlâk hma loh chuan khawi lamah mah i inher tûr a ni lo ve. 9 Buh te, barli te, bê te, dailuah te, buhtun te, vaibuhtun te la la, bêl pakhatah dah la, chhangah siam rawh; i pangkhing delha i mut chhûng zawng, ni zathum leh sawmkaw chhûng chuan chu chu i ei tûr a ni. 10 I chaw ei tûr chu teh vek tûr a ni a, ni khatah sekel sawmhnih a ni tûr a ni; hunbi nei takin i ei tûr a ni. 11 Tin, tui te pawh teh vekin i in tûr a ni a, hin khat hmun ruka ṭhena hmun khat a ni tûr a ni; hunbi nei takin i in tûr a ni. 12 Tin, an mit hmuh ngeiah mihring êk rovin i ur ang a, barli chhang eiin i ei tûr a ni,” a ti a. 13 Tin, LALPA chuan, “Hetiang chaw bawlhhlawh hi Israel fate chuan ka hnawh bona tûr hnamte zîngah chuan an ei ang,” a ti a. 14 Tah chuan kei chuan, “A! LALPA PATHIAN, ngawi teh, ka nun chu tihbawlhhlawh a ni ngai lo va, ka tleirâwl tirh ata tûn thleng pawhin, amaha thi emaw, ramsa seh emaw chu ka la ei ngai si lo va, sa tenawm ka kâah a lût ngai bawk hek lo,” ka ti a. 15 Tah chuan ani chuan ka hnênah, “Hei le, mihring êk aiah bâwng êk ka pe chia, i ei tûr chu hêng hian i siam tûr a ni,” a ti a. 16 Chu lo pawh chu ka hnênah, ani chuan, “Mihring fapa, ngai teh, Jerusalem-ah chuan chaw, nunna bul chu ka tichhia ang a, an chaw chu teh vekin fîmkhur takin an ei ang; tui pawh teh vekin lunghnûr takin an in ang; 17 chaw te, tui te an tlâkchhama, an inlungtena, an khawlohnaa an rîral zawh nân.
Ezekielan a hmul a mêt
1 “Tin, nang mihring fapa, khandaih hriam tak la la, i lu leh i khabe hmul meh nân lu mêttu bakmeh chemah hmang rawh; tin, bûkna la la, sam chu ṭhen ang che. 2 Hmun thuma ṭhena hmun khat chu huala a awm chhûng nite a kim hunah chuan khawpui laia meiah i rawh tûr a ni a, hmun thuma ṭhena hmun khat leh chu i la ang a, a vêlah khandaihin i sât sawm tûr a ni; tin, hmun thuma ṭhena hmun khat dang chu thli len tûrin i theh darh tûr a ni a, keiin khandaihin ka ûm zui ang. 3 Tin, tlêm tê chu i la ang a, i kawrfual hmâwrah i bâwk tûr a ni. 4 Tin, hênga mi hi i la ang a, meiah chuan i theh lût tûr a ni a, a kâng ang; chumi aṭang chuan Israel chhûngte zawng zawngah mei a lo chhuak ang,” a ti a. 5 LALPA PATHIAN chuan heti hian a ti a ni: “Hei hi Jerusalem khua a ni: hnamte zîngah chuan ka dah a, a vêlah ramte a awm a. 6 Tin, hnamte aia nasa zâwka suahsualna tiin ka thurêl chungah a hel a, a vêla ramte aia nasain ka dân siam chungahte pawh a hel a ni. Ka thurêlte chu an paihthla si a, ka dân siamte ang pawhin an awm hek lo. 7 Chuvângin, LALPA PATHIAN chuan heti hian a ti a ni: ‘In vêla hnamte aia buai hmang zâwkin in awm a, ka dân siam anga in awm lohva, ka thurêlte in vawn lohva, hnamte tâna ka thuruatte in tih hek loh avângin,’ 8 LALPA PATHIAN chuan heti hian a ti a ni: ‘Ngai rawh u, kei meuh pawh hian ka dodâl che u a ni, hnamte mit hmuh ngeiin in zîngah rorêlna ka hlen dâwn e; 9 tin, in tenawmna zawng zawngte avângin thil ka la tih ngai loh, tih pawh ka tih leh ngai tawh loh tûr chu i chungah ka ti dâwn e. 10 Chutichuan, paten i chhûngah an fate an ei ang a, fate pawhin an pate an ei ang; nangma mi la awm chhun zawng zawng chu ka tidarhsarh vek ang.’ 11 Chutichuan, hei hi LALPA PATHIAN thuchhuak a ni: ‘I bawlhhlawhna leh i tenawmnatein ka biak in i tihbawlhhlawh avângin, a nuna ka nun chhûng chu, ka suat ang che u a, ka mitin a hmaih hlek lo vang che u a, ka khawngaih hlek lo vang che u. 12 “ ‘Hmun thuma ṭhena hmun khat chu hriin emaw, ṭâmin emaw in zîngah an thi ang; hmun thuma ṭhena hmun khat chu i vêlah khandaihin an thi ang; hmun thuma ṭhena hmun khat dang chu ka tidarhsarh vek ang a, khandaihin ka ûm zui ang. 13 Hetiang hian ka thinurna ka hlen ang a, an chungah ka thinrimna ka hrithla ang a, ka ngaih a ṭha tawh ang; tin, kei LALPA hian an chunga ka thinurna ka hrîkthlâk hunah chuan, dichim takin ka sawi tawh tih an hre chhuak ang. 14 Chu lovah chuan, i vêla hnamte zîngah leh veivâk zawng zawngte mit hmuhah chuan, khaw ram leh hmuhsitawmah ka siam ang che. 15 Chutichuan, thinur tak leh thinrim êm êma nasa taka zilha, i chunga thurêlte ka hlen hunah, i vêla hnamte mit hmuhah chuan chêksawlhna leh tihelna leh vaukhânna leh thil râpthlâk i ni ang. Kei LALPA hian ka sawi tawh hi. 16 An chungah ṭâmna thalfang ṭha lo tak, boralna tûr, nangmahni boralna tûr chu ka rawn tlâktîr ang; in chungah ṭâm ka tizual ang a, in chaw, nunna bul chu ka tichhia ang. 17 Tin, in hnênah ṭâmna leh ramsa kawlhte ka rawn tîr ang a, fanau chânin an siam ang che. Hripui leh thisen chhuahna in zîngah a lêng ang; tin, in lakah khandaih ka rawn lek ang. Kei LALPA hian ka sawi tawh hi,’ ” tiin.
LALPAN milem biak a sawisêl
1 Tin, LALPA thu chu ka hnênah a lo thleng a, 2 “Mihring fapa, Israel tlâng lamte chu hawi la, an hnênah thu sawi la, 3 ‘Israel tlângte u, LALPA PATHIAN thu hi ngaithla rawh u: LALPA PATHIAN chuan tlângte leh mualte hnênah leh, ruamte leh kawrte hnênah chuan heti hian a ti a ni: “Ngai rawh u, kei, keimah ngei hian in lakah khandaih ka rawn lek ang a, in bâwlhmunte chu ka tichhe vek dâwn a ni. 4 In maichâmte chu a ram ang a, in ni pathian lemte chu a keh sawm ang; tin, in mi thah ruangte chu in milimte bulah ka paih ang. 5 Tin, Israel fate ruang chu an milim bulahte chuan ka dah ang a, in ruhte chu in maichâm vêlah chuan ka theh darh ang. 6 In chênna hmun zawng zawngahte chuan khawpuite chu a chhia ang a, bâwlhmunte chu a ram ang; in maichâmte tihchhiat leh tihram a nih theih nân leh in milimte a keh sawma, a bo theih nân leh in ni pathian lemte chu râwt thlûka an awma, in hnathawhte chu a boral theih nân. 7 Tin, mi thahte chu in zîngah an tlu ang a; tichuan, LALPA ka ni tih in hria ang. 8 “ ‘ “Amaherawhchu, ram tina in darhsarh hunah chuan hnamte zînga khandaih pumpelhte an la awm dâwn avângin, a ṭhen chu ka la zuah cheu vang. 9 Tin, in zîng ata chhuakte chuan sala an hruaina hnamte zîngah chuan min hre reng ang a, an uirêna thinlung ka lâk bo tawh leh an mit, an milim lama uirête chu ka tihchhiatsakziate an hria ang; tin, an tenawmnatea thil sual, anmahni hmuh ngeia an lo tih tâk thu-ahte chuan an inten tawh ang. 10 Tin, LALPA chu ka ni tih an hria ang a, hêng thil ṭha lo hi an hnênah ka ti dâwn a, a thlâwn maiin ka sawi lo tih an hria ang,” ’ tiin,” a ti a. 11 LALPA PATHIAN chuan heti hian a ti a: “I kut bêngin i kê per la, ‘E hei! Israel chhûngte tenawmna sual avânga maw! Khandaihin, ṭâmin, hripuiin an tlu dâwn si a. 12 Hla taka awm chu hripuiin an thi ang a, a hnaia awm chu khandaihin an tlu ang a, a bâng, huala awmte chu ṭâmin an thi tho vang; hetiang hian ka thinrimna nasa tak chu an chungah ka hrithla dâwn a ni. 13 Tin, tlâng sângah te, tlâng chhîp zawng zawngahte leh, thing hring apiang hnuaiah leh, sasaw buk tin hnuaia an milimte hnêna rimtui an hlanna hmunah, an maichâm vêla an milimte bula an mitthi ruangte a awm hunah chuan, kei hi LALPA ka ni tih an hria ang. 14 Tin, an chungah ka kut ka lek ang a, thlalêr aṭanga Dibla lama an chênna hmun zawng zawngah ram chu ka tiramin ka tichhia ang. Tichuan, kei hi LALPA ka ni tih an hria ang,’ ” tiin.
Israel tân tâwpna a hnai
1 LALPA thu chu ka hnênah a lo thleng leh a, 2 “Nang mihring fapa, LALPA PATHIAN chuan Israel ram hnênah chuan heti hian a ti a ni: ‘Tâwpna, tâwpna chu ram kil liah a lo thleng e. 3 Tûn hi i tân tâwpna a ni, i chungah ka thinurna ka rawn thlen ang a, i awm dân ang zêlin ro ka rêl ang chia, i tenawmna zawng zawng chu i chungah ka rawn thlen ang. 4 Tin, ka mitin a hmaih lo vang chia, ka khawngaih hek lo vang che; i awm dânte chu i chungah ka rawn thlen zâwk ang a, i tenawmnate chu i chungah a awm ang; tin, LALPA chu ka ni tih in hria ang,’ ” tiin. 5 LALPA PATHIAN chuan heti hian a ti a: “Thil ṭha lo, thil ṭha lo takzet, ngai teh, a lo thleng e. 6 Tâwpna a lo thleng e, tâwpna a lo thleng e, i chungah a lo tho ta, ngai rawh, a lo thleng e. 7 Aw ram luahtu, i chhiatna tûr i chungah a lo thleng e, hun chu a lo thleng a, ni chu a hnai ta; buaina ni, lâwma tlâng chunga auna ni ni lo. 8 Tûnah hian ka thinrimna chu i chungah ka rawn leih thuai dâwn e, i chungah ka thinurna chu ka hrithla ang; i awm dân ang zêlin ro ka rêl ang che; i tenawmnate zawng zawng chu i chungah ka rawn thlen ang. 9 Tin, ka mitin a hmaih lo vang a, ka khawngaih hek lo vang: i awm dân ang zêlin i chungah ka rawn thlen ang a, i tenawmnate pawh chu in zîngah a awm ang. Tichuan, kei LALPA hi hrem thei ka ni tih in hria ang. 10 Ngai rawh, ni chu, ngai rawh, a lo thleng e, i chhiatna tûr chu a chhuak ta, tiang chu a pâr ta, chapona chu a kuhmûm ta. 11 Pâwngnêkna chu suahsualna tiangah a chang ta a ni; a tua mah an awm tawh lo vang a, an thâwm emaw, an hausakna emaw pawh; tu mahin an ui hek lo vang. 12 Hun chu a lo thleng ta a, ni chu a lo hnai zêl e. Leitu chu hlim suh sela, hralhtu chu lungngai hek suh se; thinurna chu an zavaia chungah a thleng si a. 13 Hralhtu chuan, la dam mah sela, a thil hralh chu a hmu leh tawh dâwn si lo va; inlârna chu an zavaia chung thu tûr a ni a, tu mah an kîr lo vang, tu mah an nun khawlohnaah hian an nung khawchhuak hek lo vang. 14 Tawtawrâwt chu an hâm a, engkim a inpeih tawh a; mahse, indonaah chuan tu mah an kal lo; ka thinurna chu an zavaia chungah a awm si a.
Israel sual hremna
15 “Pâwnah khandaih, a chhûngah hripui leh ṭâm. Rama awm chu khandaihin a thi ang a, khawpuia awm chu ṭâm leh hripuiin a ei zo vang. 16 Amaherawhchu, a tlân chhuakte chu, an chhuak na ang a, tlângahte chuan chul ram ṭhûro ang maiin an awm ang; an vaiin khawhar takin, mahni khawlohna ṭheuhvah. 17 Kut zawng zawngte chu a zâwi ang a, khûp zawng zawngte chu tui angin a nêm ang. 18 Saiip puan an fêng ang a, râpnain anmahni a tuam ang a, hmêl zawng zawngah zahna a lang ang a, an lû zawng zawng a kâwng fai vek ang. 19 An tangkarua leh an rangkachakte chuan LALPA thinurna niah chuan a chhanchhuak thei lo vang a, an nun a titlai lo vang a, an pum a tipuar hek lo vang, an khawlohna tlûkna a nih tawh ṭhin avângin. 20 An incheina mawina chu an chapopui a, an tenawmna milemah leh an bawlhhlawhna thilah an chantîr chauh zâwk a ni; chumi avâng chuan an tân thil tenawmah ka lo siam ta a ni. 21 Tin, râllâk atân hnam dang kutah ka pe ang a, leia mi suaksualte hnênah râllâk atân ka pe bawk ang a, annin an lo tibawlhhlawh ang. 22 Anmahni chu ka hawisan ang a, ka hmun serh chu an tibawlhhlawh ang; rûk hmangte an lût ang a, an tibawlhhlawh ang. 23 “Khaidiat chu siam rawh u, ram chu thisen chhuah hmang rorêlnain a khat a, khawpui chu pâwngnêknain a khat si a. 24 Chuvângin, hnam dang sual berte ka rawn hruai lût ang a, an inte an neihsak ang; an chakna, an uanpui chu ka titâwp ang a, an hmun serhte chu tihbawlhhlawhin a awm ang. 25 Manganna a lo thleng a, muanna an zawng a, a awm miah si lo. 26 Chhiatna chungah chhiat lehzualna, thuthang chungah thuthang a lo awm ang a, zâwlnei lakah inlârna an zawng ang a; mahse, dânte chu puithiam lakah a bo vang a, upate lakah thurâwn a awm hek lo vang. 27 Lal chu a lungngai ang a, hotu chu beidawnna silhfênin a inthuam ang a, vântlâng kutte pawh a khûr ang. An hnênah chuan an awm dân athuin ka ti ang a, an thiltih ang zêlin ro ka rêlsak ang; tin, LALPA chu ka ni tih an hre tawh ang,” a ti a.
Jerusalem-ah milem an bia
1 Tin, kum rukna, thla rukna, chumi thla ni nga niah chuan heti hi a ni a, ka inah ka ṭhuta, Juda upate ka hmaa an ṭhut lai chuan LALPA PATHIAN kut chu ka chungah a lo awm a. 2 Tichuan, ka han en a, ngai teh, mi, mei anga lang hi a lo awm a; a kâwng achin hnuai lam ni âwma lang chu mei a ni a; a kâwng achin chung lam chu ṭhihna zia ang, êng tak a ni. 3 Tin, kut ang hian a rawn zen chhuak a, ka chal samah mi man ta a, thlarau chuan lei leh vân kârah mi chawi kâng ta daih mai a, Pathian inlârnain Jerusalem-ah mi hruai a. Jerusalem hmâr lam hung chhûngnung kawngka khârna bulah chuan mi thlen ta a; tah chuan thîkna lim ṭhuthmun a awm a, chu chuan a thîktîr ṭhîn a. 4 Tin, ngai rawh, phaizâwla ka hmuh ang zêl khân chutah chuan Israel Pathian ropuina chu a awm. 5 Tichuan, ani chuan ka hnênah, “Mihring fapa, hmâr lam hawiin i mit han lên teh le,” a ti a. Chutichuan, hmâr lam hawia ka mit ka han lên chuan, ngai teh, maichâm kawngka hmâr lam luhnaah chuan he thîkna lim hi a lo awm a. 6 Tin, ani chuan ka hnênah, “Mihring fapa, an thiltih kha i hmu em? Israel chhûngten thil tenawm nasa tak, heta an tih ngei, ka in thianghlim ata hla taka ka kal bo nân an tih kha? Mahse, thil dang tenawm zaw mah i la hmu leh ang,” a ti a. 7 Tin, hung chhûng luhnaah chuan mi hruai a; tin, ka han en a, bangah hian âwng zuk lo awm a! 8 Tichuan, ka hnênah, “Mihring fapa, bang kha han ker teh,” a ti a. Tin, ka han ker tâkah chuan kawngkhâr a lo awm reng mai a. 9 Tin, ani chuan ka hnênah, “Lût la, heta sual tenawm tak an tih hi en teh,” a ti a. 10 Tichuan, ka lût a, ka hmu a, ngai rawh, thil nung chi tinrêng lem te, ramsa tenawm lem te, Israel chhûngte milim zawng zawngte chu bangah chuan a vêlin a lo chuang a. 11 Tin, an hmaah chuan Israel chhûng upate zînga mi sawmsarihte chu an ding a, an laiah chuan Saphana fapa Jaazania a ding a, mi tin chuan berhbu an keng ṭheuh va; tin, rimtui khu rim chu a chho ta mup mup a. 12 Tichuan, ka hnênah, “Mihring fapa, Israel chhûngkuaa upate thim hnuaia thiltih chu i hmu em, mi tinin milim pindana an tih chu? ‘LALPA chuan min hmu lo va, LALPA chuan ram chu a kalsan tawh alâwm,’ an ti si a. 13 An thiltih tenawm nasa lehzual dang pawh i la hmu leh ang,” ka hnênah chuan a ti bawk a. 14 Tichuan, LALPA in hmâr lampang luhna kawngkhârah mi hruai a; tin, ngai teh, tah chuan hmeichhiate chu Tammuz ngaia ṭapin an ṭhu a. 15 Tin, ani chuan ka hnênah, “Aw mihring fapa, hei hi i hmu em? Hei aia tenawm nasa hi i la hmu ang,” a ti a. 16 Tin, LALPA in hung chhûngnung zâwkah chuan mi hruai lût a; ngai teh, LALPA in thianghlim kawngkhârah chuan, hulhliap leh maichâm inkârah hian, mi sawmhnih leh panga LALPA in thianghlim lam hnuchhawna, an hmaite khawchhak lam hawiin an lo awm a, khawchhak lama ni chu zuk lo bia a! 17 Tichuan, ani chuan ka hnênah, “Hei hi i hmu em, aw mihring fapa? An thil tenawm tih, heta an tiha hi Juda chhûngte tân thil tênau em ni? Ram chu pâwngnêknain an tikhat a, mi tithinur leh ta nghâl si a, an hnâr chu chhâwlin an hup a. 18 Chuvângin, kei pawhin thinur takin ka ti dâwn a ni: ka mitin a hmaih lo vang a, ka khawngaih hek lo vang; aw ring takin ka bengah rawn au mah sela, ka ngaithla lo vang,” a ti a.
Jerusalem chu hrem a ni
1 Tichuan, ka beng hriatah chuan, “Khawpui enkawltute chu mi tin tihboralna hriamhrei kengin lo hnai rawh se,” tiin ring takin a au va. 2 Tin, ngai rawh, hmâr lam kawngka chungnung kalna aṭang chuan mi paruk an lo kal a, mi tinin tihhlumna hriamhrei chu an keng ṭheuh va; tin, an laia mi pakhat puanzaisîn sin chuan lehkhatui bûr a pai a. Tin, an lût ta a, dâr maichâm bulah chuan an ding ta a. 3 Tin, Israel-te Pathian ropuina chu a awmna cherub aṭang chuan, chu in kawngka bulah chuan a chho va; tin, puanzaisîn sin, lehkhatui bûr paitu kha a au va. 4 Tin, LALPA chuan a hnênah, “Khawpui chu fang la, Jerusalem chu fang chhuak rawh: a chhûnga thil tenawm tih tawhte avânga thawpika ṭap ṭhînte chu an chalah chhinchhiah ang che,” a ti a. 5 Tin, mi dangte hnênah chuan ka hriat ngeiin, “A hnungah sâwn khawpui chu fang chhuak ula, kut thlâk rawh u, in mitin hmuh hmaih suh sela, khawngaih hek suh u. 6 Putar te, tlangvâl te, nula te, naupangte leh nute that fai vek rawh u. Chhinchhiahna neite erawh chu rawn hnaih suh u; ka hmun thianghlimah ṭan rawh u,” a ti a. Tichuan, biak in kawta upahovah chuan an ṭan ta a. 7 Tin, ani chuan ka hnênah, “In chu tibawrhbâng ula, a hung chhûng te chu mi ruangin tikhat ula, chhuak rawh u,” a ti a. Tin, an chhuak ta a, khawpuiah chuan an che ta a. 8 Tin, heti hi a ni a, khawpuia an chêt lai chuan kei chu hnutchhiahin ka lo awm a, ka tlu bawkkhup a, “Aw LALPA PATHIAN, Jerusalem chunga i thinur leihbuakah hian Israel la awm chhunte pawh i tiboral vek dâwn em ni?” tiin ka au va. 9 Tichuan, ani chuan ka hnênah, “Israel leh Juda chhûngte khawlohna chu a nasa êm a ni. Ram chu thisenin a khat a, khawpui chu hlemhle rorêlnain a khat a: ‘LALPAN ram chu a kalsan tawh a, LALPAN eng mah a hmu hlei nêm!’ an ti si a. 10 “Kei pawh hian ka hmuh hmaih lo vang a, ka khawngaih hek lo vang; an sual mawh chu a bûrin ka khumtîr ang,” a ti a. 11 Tin, ngai teh, puanzaisîn sina lehkhatui bûr pai khân thu chu a thlen a, “I thu mi pêk ang khân ka ti zo ta,” a ti a.
Pathian ropuinain Tempul a chhuahsan
1 Tichuan, ka han en a, ngai teh, cherub-ho lu chunga vân dum awmah khian sapphir lung ni âwm tak, lalṭhutthlêng ang taka lang hi a lo lang a. 2 Tin, ani chuan puanzaisîn sin hnênah khân, “Cherub hnuaia tawlailîr virte keah sâwn va lût la, cherub-ho inkâra meivâm saw i kut khinghnih khatin va lâwk la, khawpui chungah theh darh rawh,” a ti a. Tin, ka hmuh lai ngeiin a kal ta a. 3 Tin, mi a luh lai khân cherub-ho chu in pui ding lampangah an ding a; tin, hung chhûngnung chu chhûmin a khat ta a. 4 Tin, LALPA ropuina chu cherub-ho aṭang chuan a chho va, biak in kawngka chungah chuan a han ding ta a, in chu chhûmin a khat a, hung chhûng chu LALPA ropuina êng chuan a khat ta a. 5 Tin, cherub-ho thla zâp ri te chu hung chhûng pâwnta zâwkah te pawh chuan Pathian Engkimtitheian mi a biak laia a aw ang maiin a hriat a. 6 Tin, heti hi a ni a, puanzaisîn sin hnêna, “Cherub-ho inkâra tawlailîr vir kâr ata mei va la rawh,” tia thu a pêkin, ani chu a va lut a, tawlaitîr ke bulah chuan a ding ta a. 7 Tin, cherub chuan cherub-ho inkâr aṭang chuan cherub-ho inkâra mei awm chu a han ban a, a la a, puanzaisîn sin kutah chuan a pe a, ani chuan a lo la a, a chhuak ta a. 8 Tin, cherub-ho thla hnuaiah chuan mihring kut ang mai hi a lo lang a. 9 Tin, ka han en a, ngai teh, cherub-ho sîrah chuan tawlailîr ke pali, cherub pakhat kiangah tawlailîr ke pakhat, cherub dang kiangah tawlailîr ke dang ka hmu a; tin, tawlailîr ke lan dân chu Tarsis lung zia ang hi a ni a. 10 Tin, an lanziaah chuan an paliin angkhat an ni a, tawlailîr ke pakhat chhûnga tawlailîr ke dang awm ang mai hi a ni a. 11 An kal chuan sîr liah an kal thei a, an kal pawhin an her ngai lo; amaherawhchu, a hmasa hawi lam apiang an zui a ni, an kalin an her chuang lo. 12 Tin, an taksa pum chu, an hnung te, an kut te, an thlate leh tawlailîr kete pawh kha, a vêlin mitin a khat a, an palia tawlailîr kete pawh kha. 13 A tawlailîr kete kha chu ka beng hriat ngeiah, “Tawlailîr ke vir” tih a ni. 14 Tin, mi tinin hmêl pali ṭheuh an nei a, hmêl pakhat chu cherub hmêl a ni a, pahnihna chu mihring hmêl a ni a, pathumna chu sakeibaknei hmêl, palina chu mupui hmêl a ni a. 15 Tin, cherub-ho chu an chho ta a; hei hi Kebar lui kama thil nung ka hmuh chu a ni. 16 Tin, cherub-ho an kal chuan tawlailîr kête chu an kiangah a kal ve a; tin, cherub-ho khân lei ata chho tûra an thlate an zâr chuan tawlailîr kête chuan a hransan ngai lo va. 17 An din chuan hêngte hi an ding ve a, an chhoh chuan hêngte hi an chho ve ṭhîn a, thil nung thlarau chu anmahniah a awm si a. 18 Tin, LALPA ropuina chu in pui kawngka chung aṭang chuan a chhuak a, cherub-ho chungah chuan a ding ta a. 19 Tin, cherub-ho chuan an thla an zâr a, an chhuahin ka mit hmuh ngeiah lei ata an chho va, tawlailîr kete chu an kiangah a awm zêl a; tin, LALPA in luhna chhak lam kawngkhâr bulah chuan an ding ta a, Israel Pathian ropuina chu an chungah a awm a. 20 Hei hi Kebar luia Israel Pathian hnuaia ka thil nung hmuh chu a ni; cherub-ho an ni tih ka hria. 21 Mi tinin hmêl hrang pali leh thla pali an nei ṭheuh va, an thla hnuaiah chuan mihring kut ang mai hi a awm a. 22 Tin, an hmêl lam thu-ah chuan Kebar luia ka hmuh hmêlte ang bawk kha an lan dân leh anmahni ngeite pawh an ni a; tin, an hmazâwng zêlin an kal ṭheuh va.
Jerusalem thiam loh chang
1 Tin, thlarauvin mi chawi kâng a, LALPA in chhak lam luhna, khawchhak chhawngah chuan mi thlen a; tin, ngai teh, luhna kawngkhâr bulah chuan mi sawmhnih leh panga an lo awm a; an zîngah chuan Azura fapa Jaazania leh Benaia fapa Pelatia, mipui hotute chu ka hmu a. 2 Tin, ani chuan ka hnênah “Mihring fapa, hêng hi khawlohna phiar chhuaktute an ni a, he khawpuiah hian sual rawt chhuaktute an ni; 3 ‘In sak hun a la ni lo ve; he khawpui hi saso bêl a ni a, keini hi sa chu kan ni,’ titute chu. 4 Chuvângin, thu sawi la, aw mihring fapa, an chungah thu sawi rawh,” a ti a. 5 Tin, LALPA thlarau chu ka chungah a lo thleng a, ani chuan ka hnênah, “Sawi rawh, ‘LALPA chuan heti hian a ti e: “Hetiangin in ti ṭhîn a, aw Israel chhûngte u, in rilrua thil lo thlengte chu ka hre fai vek si a. 6 He khawpuiah hian in thlahte chu in tipung tulh tulh a, a kawtthlêrte chu in mi thahin in tikhat ta a.” 7 “ ‘Chuvângin, LALPA PATHIAN chuan heti hian a ti a ni: “I mi thah, a laia in dahte chu a sa chu a ni a; he khawpui hi a saso bêl chu a ni; mahse, a lai ata sawn chhuahin in awm ang. 8 Khandaih chu in hlau va, in chungah khandaih ka rawn thlen ang,” LALPA PATHIAN chuan a ti a ni: 9 “A lai ata ka tichhuak ang che u a, hnam dangte kutah ka mantîr ang che u a, in chung thu an rêl ang. 10 Khandaihin in thi ang a, Israel ramri lamah chuan in chung thu ka rêl ang; tichuan, kei hi LALPA chu ka ni tih in hre tawh ang. 11 He khawpui hi in saso bêl a ni lo vang a, nangni lah a chhûnga sa in ni hek lo vang; Israel ramri lamah chuan in chung thu ka rêl ang a, 12 LALPA chu ka ni tih in hre tawh ang; ka dân siam chu in zawh lo va, ka thuchhuak pawh in zâwm hek lo; in vêla hnamte tih dân chu in zâwm ta zâwk a,” a ti e,’ ” tiin. 13 Tin, heti hi a ni a, thu ka han sawi chuan Benaia fapa Pelatia chu a lo thi ta mai a. Tichuan, ka tlu bawkkhup a, aw ring takin ka au va, “A, LALPA PATHIAN! Israel awm chhunte chimihna i siam dâwn em ni?” ka ti a.
Sal tângte hnêna Pathian thutiam
14 Tin, LALPA thu chu ka hnênah a lo thleng a, 15 “Mihring fapa, i unaute, i chi leh kuangte ngei leh Israel chhûngte zawng zawng, an zain, Jerusalem luahtuten, ‘LALPA lak ata kal daih rawh u, he ram hi kan ta tûra pêk a ni tawh e,’ an tihate kha an ni a. 16 Chuvângin, ‘LALPA PATHIAN chuan heti hian a ti a ni: “Hla takah hnamte zîngah ka sawn bo va, ram tam takah ka tidarh na a, rei lo te chhûngin an lo thlenna ramah chuan an tân hmun thianghlim ka ni ang,” ’ a ti a. 17 Chuvângin, ‘LALPA chuan heti hian a ti a ni: Hnam dangte lak ata chu ka hruai khâwm leh ang che u a, in darhna ram ata ka khâwm chhuak leh ang che u a, Israel ram chu ka pe ang che u.’ 18 Tin, chutah chuan an lo kal ang a, thil bawlhhlawh zawng zawng leh thil tenawm zawng zawngte chu chuta ta chu an la bo vang. 19 Tin, thinlung hmun khat ka siamsak ang che u a, rilru thar ka pe ang che u. Tin, an tîsa ata thinlung sak chu ka la bo vang a, thinlung nêm an hnênah ka pe ang; 20 ka dân siamte an zawma, ka thuruatte an vawna, an tih theih nân. Tichuan, ka mite an ni ang a, kei pawh an Pathian ka ni ang. 21 An bawlhhlawhna leh an tenawmna rilru, thinlunga la zâwmte erawh chu, an sual mawh chu a bûrin ka khumtîr ang,” LALPAN a ti.
Pathian ropuinain Jerusalem a chhuahsan
22 Tichuan, cherub-ho chuan an thlate an zâr a, an kiangah chuan tawlailîr kête a awm a; tin, Israel-te Pathian ropuina chu an chungah a awm a. 23 Tin, LALPA ropuina chu khawpui lai aṭangin a chho va, khawpui chhak lampanga tlâng sângah chuan a han ding ta a. 24 Tin, thlarau chuan mi chawi kâng ta a, inlârnaah chuan Pathian thlarauvin Kaldai rama sal tângte hnênah chuan mi thlen a. Chutichuan, ka inlârna hmuh chuan mi chhohsan ta a. 25 Tichuan, sal tângteho hnênah chuan LALPA thil mi entîr zawng zawng chu ka sawi ta a.
Ezekielan sal tâng tûr lem a chang
1 LALPA thu chu ka hnênah a lo thleng leh a, 2 “Mihring fapa, hel hmang chhûng, hmuhna tûr mit neia hmu si lo, hriatna tûr beng neia hre si lo zîngah i awm a ni, hel hmang chhûng an ni rêng si a. 3 Chuvângin, nang mihring fapa, sal tânnaa kal tûr angin i bungruate têl fel la, chhûn êngah an mit hmuh ngeiah kal chhuak rawh; an hmuh ngeiah i hmun ata hmun dangah i kal chhuak tûr a ni. Hel hmang chhûng an ni na a, an inngaihtuah phah mahna. 4 Tin, i bungrua chu chhûn êngah an mit hmuh ngeiah sal tâng kal tûr bungraw lâkin i la chhuak ang a, nangmah ngei pawh an mit hmuhah ram danga thawn bo tûr kalin i kal tûr a ni. 5 An mit hmuh ngeiah kulh bang chu tipawp la, tah chuan la chhuak rawh. 6 An mit hmuh ngeiah i kovah i pu ang a, thimah i kal chhuak tûr a ni; lei i hmuh loh nân i hmai i khuh tûr a ni; Israel chhûngte tân entîr lâwknaah ka siam che a ni si a,” a ti a. 7 Tin, thu mi pêk ang chuan ka ti a; ka bungrua chu sal tâng tûr bungrua angin chhûn êngah ka la chhuak a, ka kutin bang chu tlaiah ka tipawp a, thimah ka la chhuak a, an mit hmuh ngeiah ka pu a. 8 Tin, zîngah chuan LALPA thu ka hnênah a lo thleng a, 9 “Mihring fapa, Israel chhûng, hel hmang chhûngte chuan i hnênah, ‘Eng nge i tih le?’ an ti che a ni lo vem ni? 10 An hnênah chuan, ‘LALPA PATHIAN chuan heti hian a ti: “He thupuan hi Jerusalem hotute leh Israel chhûngkaw pum pui an awmna mite chung thu tûr a ni.” 11 In tân entîr lâwkna ka nih hi. Ka tih ang tak hian an chungah tih a ni ang; thawn bovin, sal tâng tûrin an la kal ang,’ ti rawh. 12 Tin, an zînga hotu awm chuan thim hnuaiah a kovin a pu ang a, a kal chhuak ang. An lâk chhuah nân bang chu an tipawp ang a, a mitin ram chu a hmuh tawh loh avângin a hmai a khuh tûr a ni. 13 Amah chu ka lênin ka khuh ang a, ka thanga âwk a ni ang. Kaldai rama Babulon-ah chuan ka rawn hruai ang a, tah chuan a thi dâwn na a, hmuh chu a hmu lo vang. 14 Amah pui tûra a kianga awm ṭhînte leh a vêngtute zawng zawng chu ram tinah ka tidarh ang a, khandaih phawiin ka ûm ang. 15 Tin, hnamte zînga ka hnawh darha, ram tina ka tihdarh hunah chuan LALPA chu ka ni tih an hria ang. 16 Amaherawhchu, khandaih te, ṭâm te, hripui te lakah chuan mi tlêm tê ka zuah ang; chûngte chuan an lo kalna rama hnamte hnênah chuan an tenawmna zawng zawng chu an puan nân; tin, kei hi LALPA chu ka ni tih an hria ang,” a ti a.
Ezekiela khûr, chhinchhiahna a ni
17 Tin, LALPA thu chu ka hnênah a lo thleng leh a, 18 “Mihring fapa, i chaw chu khûr hlawk hlawk chungin ei la, i tui chu manganga khûr chungin in rawh; 19 tin, rama mite hnênah chuan, ‘LALPA PATHIAN chuan, Jerusalem-a chêngte chungchângah leh Israel ram chungchângah chuan heti hian a ti a ni: “An chawte chu ren takin an ei ang a, an tui chu mangang takin an in ang a, a ram chu a chhûnga chêngte pâwngnêkna avângin a chhûnga thil awm zawng zawng lakah chuan tihramin a awm dâwn si a. 20 Tin, mi chênna khawpuite chu a ram ang a, a ram chu thlalêrah a chang ang; tichuan, LALPA chu ka ni tih an hria ang,” ’ tiin sawi rawh,” a ti a.
An thufing neih leh an chan a inmil lo
21 Tin, LALPA thu chu ka hnênah a lo thleng a, 22 “Mihring fapa, Israel rama he thufing tawi in neih hi eng tihna nge ni - ‘Nikhua a lo reiin inlârna apiang a thlâwn leh mai ṭhîn,’ in tih hi? 23 Chuvângin, ‘LALPA PATHIAN chuan heti hian a ti a ni: “He thufing tawi hi ka tibâng ang a, Israel ramah thufing tawiah an hmang tawh ngai lo vang; ni chu a hnai tawh a, inlârna tin thlen dik ni tûr chu,” tiin an hnênah sawi zâwk rawh. 24 Israel chhûngte zîngah inlârna lothlâwn rêng rêng leh, ṭhumvâwr ṭha lama sawisak derna rêng rêng a awm tawh lo vang. 25 LALPA chu ka ni si a, ka sawi ang a, ka thusawi chu hlen nghâl a ni ang a, khêk a ni lo vang. Aw hel hmang chhûngte u, in dam lai ngei hian thu ka sawi dâwn a, ka hlen dâwn si a,’ tih hi LALPA PATHIAN thuchhuak a ni,” a ti a. 26 LALPA thu chu ka hnênah a lo thleng leh a, 27 “Mihring fapa, ngai rawh, Israel chhûngtea mi chuan, ‘Inlârna a hmuhte chu nakina mi tûr a ni a, a sawi lâwkte pawh hla taka mi tûr a ni,’ an ti a ni. 28 Chuvângin, an hnênah chuan, ‘LALPA PATHIAN chuan heti hian a ti a ni: “Ka thu eng mah hi khêk a ni lo vang a, ka thusawi apiang chu hlenin a awm zêl zâwk ang,” tih hi LALPA PATHIAN thuchhuak a ni,’ tiin hrilh rawh,” a ti a.
Zâwlnei der chungchânga thuhril
1 Tin, LALPA thu chu ka hnênah a lo thleng leh a, 2 “Mihring fapa, Israel zâwlnei, mahni thinlung mai ata sawi hmangte chungah chuan thu sawi la, ‘LALPA thu chu ngai rawh u!’ ” 3 LALPA PATHIAN chuan heti hian a ti a ni: “Zawlnei â, mahni ngaih dân zuia eng mah hmu si lote chu an chung a pik e! 4 Aw Israel, i zâwlneite chu khaw ram sihal ang chauh an ni ta. 5 LALPA nia indonaa ding zo tûrin a râlṭi lai in tâwn ngam lo va, Israel chhûngte humhalhnaah in ṭangkai hek lo. 6 ‘LALPA thuchhuak a ni!’ titu chuan engmahlo mai leh sawi lâwkna lem mai an chang a, LALPA tirh an ni lo rêng rêng a ni; an thu chu ni ngei tûr angin mite an rintîr a. 7 Inlârna lothlâwn mai in hmuin thu sawi lâwk dik lo in sawi a ni lâwm ni? ‘LALPA thuchhuak a ni,’ in la ti lehnghâl si a, kei chuan ka sawi tawp si lo va.” 8 Chuvângin, LALPA PATHIAN chuan heti hian a ti a ni: “Engmahlo mai in sawia, dâwt mai in hmuh avângin, ngai rawh u, ka dodâl che u a ni, tih hi LALPA thuchhuak a ni. 9 Tin, ka kut hian engmahlo hmutute leh dâwt sawi lâwktute a dodâl ang a, ka mite inrâwn khâwmnaah an tel lo vang a, Israel chhûngte hming ziaknaah ziakin an awm hek lo vang; tichuan, LALPA PATHIAN chu ka ni tih in hria ang. 10 “Muanna awm si lova, ‘A muanawm e!’ tia ka mite an hruai bo avâng leh, mi bang siama hawlrivâp an hnawih mai avângin, 11 hawlrivâp hnawihtute hnênah chuan, ‘A tla leh mai ang, ruahpui a lo sûr ang a, nangni rial lian puite u, in lo tla ang a, thli nasa takin a tichhia ang,’ ti rawh. 12 Tin, ngai rawh u, bang chu a chim hnu chuan, ‘In hawlrivâp hnawih chu khawiah nge?’ an ti dâwn lo che u em ni?” 13 Chuvângin, LALPA PATHIAN chuan heti hian a ti a ni: “Ka thinurin thlipui nasa takin ka tichhe vek ang, ka thinurin ruahpui a lo sûr ang a, ka thinurin rial nasa tak a tiral tûrin a lo tla ang. 14 Tichuan, hawlrivâp in hnawih vâr bang kha ka tichim ang a, lei thlengin a sawp ang a; chutichuan, a lungphûmte pawh a lang hial ang; a chim ang a, bang chimah chuan tihboralin in awm ang; tichuan, LALPA ka ni tih in hria ang. 15 Hetiang hian bang chungah leh hawlrivâp hnawihtute chungah ka thinur ka hrithla ang; tin, ‘Bang chu a awm tawh lo va, a beltute pawh an awm tawh hek lo,’ ka la ti ang che u. 16 Chu chu Israel zâwlnei, Jerusalem chung thu sawia, muanna awm si lova muanna hmuhsaktute ngei kha, an awm ta lo,” tih hi LALPA PATHIAN thuchhuak a ni.
Hmeichhe aien thiam chungchâng hrilh lâwkna
17 “Tin, nang mihring fapa, i mite fanute, an thinlung maia sawitute chu hmachhawn la, anmahni kalhin thu sawi rawh, 18 ‘LALPA PATHIAN chuan heti hian a ti a ni: “Hmeichhia, mite bâna thil buntîr leh, mi nunnate man beh nâna mi lian mite lu khuhna ṭhuitute chu an chung a pik e! Mahni nunna tûrin ka mite nunna in man ang maw? 19 Barli tlêm tê leh chhang them hmu tûra thi lo tûr tithi tûr leh, nung lo tûr tinung tûrin in dâwt sawi ka miten an awih avângin, ka mite zîngah ka hming in tibawrhbâng a ni.” 20 Chuvângin, LALPA PATHIAN chuan heti hian a ti a ni: “Ngai rawh u, mi nunna sava anga man tûra in thil buntîrte chu ka hua a ni; in bânte chu ka pawt chhum vek ang a, in mi man tûrate nunna chu ka chhuah vek ang; sava anga in man tûrate nunna ngei chu. 21 In lu khuhnate pawh chu ka pawt thlêr ang a, ka mite chu in kut ata ka chhuah ang a, in man theih tûrin in kutah an awm tawh lo vang; tichuan, LALPA chu ka ni tih in hria ang. 22 Ka tihlungngaih ni lovin, mi fel thinlung chu dâwtin in tina a; mi suaksual chu nungdama a awmna tûra a sualna kawng ata a inlamlêt lohna tûrin a kut in tichak a; 23 chuvângin, engmahlo mai, thusawi lâwk dik lo emaw chu in hmu tawh rêng rêng lo vang; tin, ka mite chu in kut ata ka chhanchhuak ang a, LALPA chu ka ni tih in hria ang,” a ti,’ tiin sawi rawh,” a ti a.
Pathianin milem biak a dem
1 Tichuan, Israel upa ṭhenkhatte chu ka hnênah an lo kal a, ka hmaah an ṭhu a. 2 Tin, LALPA thu chu ka hnênah a lo thleng a, 3 “Mihring fapa, hêng mite hian an milemte chu an thinlungah an la lût a, an hmaah an khawlohna tlûkna chu an dah a ni; kei mi râwn tûr an ni teh rêng em ni? 4 Chuvângin, anmahni bia la, ‘LALPA PATHIAN chuan heti hian a ti a ni: “Israel chhûngkuaa mi tin an thinlunga an milim la lûta, an hmaa an khawlohna tlûkna daha, zâwlnei hnêna lo kal apiang, kei LALPA hian an milim tamzia ang zêlin ka chhâng ang; 5 Israel chhûngte chu an milim avânga min lo hransan tâk avângin an thinlung takah ka man theih nân.” ’ 6 “Chuvângin, Israel chhûngte hnênah chuan, ‘LALPA PATHIAN chuan heti hian a ti a ni: “Lo kîr ula, in milimte lakah chuan lo kîr ula, in tenawmna zawng zawng chu hawisan rawh u. 7 Israel chhûng zînga mi tu pawh emaw, mikhual Israel rama chêng ve emaw, ka laka intihranga, an thinlunga milim la lûta, an hmaa khawlohna tlûkna dah chunga an chungchânga mi râwn tûra zâwlnei hnêna kal chu, kei LALPA ngei hian ka chhâng mai ang. 8 Chu mi chu ka hmachhawn ang a, mi mak tih atân kumkhaw tlaitluana hrilhfâk tûrin ka mite zîng ata ka tibo daih ang; tichuan, kei hi LALPA chu ka ni tih in hria ang. 9 Tin, zâwlnei chuan buma awmin thu sawi sela, kei LALPA hian zâwlnei chu ka bum a ni a, a chungah ka kut ka lek ang a, ka mi Israel-te zîng ata ka tiboral ang. 10 Tin, an khawlohna chu an phur ang; zâwlnei khawlohna chu amah râwntute khawlohna ang mai a ni ang; 11 Israel chhûngte chu ka laka an bo tawh lohva, an bawhchhiatnate zawng zawnga an intihbawlhhlawh tawh loh nân, ka mite an nih tawh zâwka, an Pathian ka nih theih nân,” LALPA PATHIAN chuan a ti a ni,’ tiin sawi rawh,” a ti a.
Nova, Daniela leh Joba
12 Tin, LALPA thu chu ka hnênah a lo thleng a, 13 “Mihring fapa, ram miten bawhchhiatna thil tia, ka chunga thil tisuala, keiin ka kut ka leka, an chaw, nunna bul chu ka tihchhiata, an chunga ṭâm ka thlentîra, mi leh sate ka rawn tihbo chuan, 14 hêng mi pathum - Nova, Daniela leh Joba-te meuh pawh hi lo awm ta ang sela, an felnain anmahni nunna chauh an chhanhim ang,” tih hi LALPA Pathian thuchhuak a ni. 15 “Ram sakawlhte an ram ka fan chhuahtîra, ram chu an tihchhiata, a lo ṭiauva, ramsa avânga tu mah kal tlang tûr an awm loh chuan, 16 hêng mi pathumte hi awm mah sela, a nuna ka nun chhûng chu,” tih hi LALPA PATHIAN thuchhuak a ni, “An fanute, an fapate an chhanhim chuang lo vang; anmahni chauh chu chhanhimin an awm ang a, ram chu a chhe tho vang. 17 “A nih leh, chu ramah chuan khandaih ka rawn leka, ‘Khandaih, che rawh,’ ka tih chuan mi leh sa chu ka râwt bo a ni ang a, 18 hêng mi pathumte hi awm mah sela, a nuna ka nun chhûng chu,” tih hi LALPA PATHIAN thuchhuak a ni a, “An fanute, an fapate an chhanhim chuang lo vang a, anmahni nunna chauh chhanhimin a awm ang. 19 A nih leh, chu ramah chuan hripui ka rawn lêntîra, mi leh sa tibo tûra thisen chhuaha ka thinurna chu ram chunga ka rawn leih chuan, 20 Nova, Daniela leh Joba-te meuh pawh hi lo awm mah sela, a nuna ka nun chhûng chu,” tih hi LALPA PATHIAN thuchhuak a ni, “An fanu emaw, an fapa emaw an chhanhim lo vang a, an felnain anmahni nunna ngei a chhanhim chauh vang.” 21 LALPA PATHIAN chuan heti hian a ti si a: “Jerusalem chunga ka rorêlna na tak pali - khandaih te, ṭâm te, ramsa kawlh te, hripui te, mi leh sa râwt bo vek tûra ka rawn thlen kim hunah chuan engtia nasa tak ni ang maw? 22 Amaherawhchu, ngai teh, chutah chuan awm chhun hruai chhuah tûrte chu hnutchhiahin an awm ang a, fanute leh fapate pawh: ngai teh u, in hnênah an lo chhuak ang a, an awm dân leh an thiltihte in hmu ang a; tin, Jerusalem chunga thil ṭha lo ka rawn thlen thu-ah chuan thlamuanin in awm ang a, a chunga ka rawn thlen tâk zawng zawng thu-ah pawh. 23 An awm dân leh an thiltihte in hmuh hunah chuan an thlamuan ang che u; a chunga ka thiltih tâk zawng zawng chu tih chhan nei lovin ka ti lo tih in hria ang, tih hi LALPA PATHIAN thuchhuak a ni,” tiin.
Grêp hrui tehkhin thu
1 Tin, LALPA thu chu ka hnênah a lo thleng a, 2 “Mihring fapa, ngaw hnuaia thing zînga grêp hrui chu Thing dang aiin eng nge a nih le? 3 A thing chu thil siam nâna hman a ni em? Bungbêl târ nân pawh tuin nge hmang ngai le? 4 Ngai rawh, meiah paih luh a ni ṭhîn a, fawhkaian; Meiin a kâng ral, a hmâwr tuakah, A kâng zo mai ṭhîn, a laiah chuan. A nei rêng em ni, ṭangkaina? 5 Ngai teh, a ṭangkai lo, a him lai mahin; A va ṭangkai dâwn lo ve, a kan hnuin. 6 Chuvângin, LALPA PATHIAN chuan hetiang hian a ti: ‘Ramhnuai thing zînga grêp hruite, Fawhkai atân meiah ka tuah mai ang chuan, Jerusalem luahtute chu ka siam ang; 7 Anmahni chu ka hmachhawn ang a, Chhuak teh mah sela, mei ata chu, A kâng zo tho vang e, meiah chuan. LALPA chu ka ni tih an hria ang, Anmahni ka hmachhawn hunah chuan. 8 Ka tichhe ngei dâwn e, an ram chu, Khawlohna an tih tâk avângin,’ Tih hi LALPA thuchhuak a ni e,” tiin.
Rinawm lo Jerusalem chu
1 LALPA thu chu ka hnênah a lo thleng leh a, 2 “Mihring fapa, Jerusalem chu a tenawmnate hriat chhuahtîr la, a hnênah, 3 ‘LALPA PATHIAN chuan Jerusalem hnênah chuan heti hian a ti a ni: I chhuahna ram leh i pianna ram chu Kanaan mite ram a ni a, i pa chu Amor mi a ni a, i nu chu Hit mi a ni. 4 Tin, i pianna thu-ah chuan i pian niin i laihrui ah a ni lo va, tifai tûr chein tuia bual i ni hek lo; chi hnawih i tâwk lo va, tuam lum i ni hek lo. 5 Lainat tûr chea i chunga hêng hi ti tûrin tu mit mahin a khawngaih lo che a; tâmlakah paih chhuah i ni ta zâwk a, i pian ni ata kha lungten i ni si a. 6 “ ‘Tin, i kianga ka lo kalin thisena tâlin ka hmu chia, i hnênah chuan, “Thisenah awm mah la, nung rawh,” ka ti chia, a ni, ka ti che a ni, “Thisenah awm mah la, nung rawh.” 7 Ram thil kuhmûm angin ka tiṭhang lian chia; tin, i ṭhang lian a, khua i mawi ta; i hnute a lo um a, i sam a lo ṭha a; ruak leh saruak mai i la ni tho va. 8 Tin, i kianga ka lo kala ka en chein, ngaih la tham i lo ni ta a, ka puan ka zâwn chia, i saruak chu ka khuh tawh a che. A ni, i hnênah chhia ka chham a, thuthlungah ka luhpui ta chia, ka ta i ni ta e,’ tih hi LALPA PATHIAN thuchhuak a ni. 9 “Tichuan, tuiin ka bual tawh chia, a ni, i thisen chu ka sil faisak var chia, hriak ka hnawih ta che a ni. 10 Puan cheiin ka thuam chia, savun ṭha mi pheikhawk ka buntîr chia, puanzaisînin ka tuam chia, maimaw puan ka khumtîr che a ni. 11 Cheimawinain ka chei chia, i kutah bânbun te, i nghâwngah rangkachak khaidiat te, 12 i hnârah hnârvuah te, i bengah bengbeh te, i luah lallukhum mawi tak tein ka chei chia. 13 Tichuan, rangkachak leh tangkaruaa cheimawi i ni ta a, i silhfênte chu puan zai sîn tak leh maimaw puan leh puan ṭhui mawi a ni a; i ei chu chhangphut dip leh khawizû leh hriak a ni. I mawi êm mai, lalnu pawh i tling ta. 14 I mawina chu hnamte zîngah a thang chhuak a, ka ropuinaa thuamin i famkim ta, tih hi LALPA PATHIAN thuchhuak a ni. 15 “Mahse, i mawina chu i ring lutuk a, i hmingthanna chu i hur phah a, mi veivâk nazawng hnênah i hurna chu i tlângphal a, a tua pawh. 16 I silhfênte hlîpin bâwlhmunte i cheimawi a, tah chuan i inphalrai a, hetiang hi a awm leh tawh ngai lo vang. 17 Ka rangkachak leh ka tangkaraw bungbêl mawi tak tak ka pêk che kha i la a, mipa lem siam nân i hmang a, i hurpui ta a. 18 I silhfên ṭhui mawite chu i la a, anmahni i tuam a, ka hriakte leh ka rimtuite chu an hmaah i hûng a. 19 Ka chhang pêk che pawh kha chhangphut ṭha leh hriak leh khawizû, ka châwmna ṭhinte che kha rimtui atân an hmaah i hlui a; heti hi a lo ni ta, tih hi LALPA PATHIAN thuchhuak a ni. 20 Chu lovah pawh i fanu i fapa, mi hrinsakte chu an hnênah inthawi nâna hman ral atân i pe a. I hurna hi thil namên a ni em ni? 21 Ka fate i that a, meipuia paih lûta an hnêna i hlante hi? 22 I tenawmna leh i hurna zawng zawngah chuan, i naupan laia saruaka i awm leh i thisena i tâl mai mai laite kha i hre ta lo va.
Jerusalem nawhchizuar
23 “Tin, hêng i suahsualna zawng zawng hnuah pawh heti hi a lo ni a (‘I chung a pik e! A pik e!’ LALPA PATHIAN chuan a ti a ni), 24 hmun langsârte i insiam a, kawtthlêr tinah hmun sângte chu i tân i sa a. 25 Kawtthlêr lû apiangah hmun langsârte chu i sa a, i mawina chu tenawmnaah i siam a, veivâk apiang hnênah i inhlîm lang a, i hurna chu a zual ṭhîn a ni. 26 Aigupta mi, i ṭhenawm, mi râwva tak mai nên chuan inngaihna sual i ti ta bawk a; mi tithinur tûrin i hurna chu a tizual ta a ni. 27 “Chuvângin, ngai rawh, i chungah ka kut ka lek a, i chaw pângngai chu ka tikiam a, nangmah hawtu Philistia fanu, i hur dân zahpui êm êm ṭhîntu hnênah chuan duh duha a tihah ka pe tawh che a. 28 Assuria mite hnênah pawh i hur bo va, tâwk tih lêm nei hek lo che; a ni, an hnênah i inphalrai a, i la kham chuang hek lo. 29 Kanaan ramah, Kaldai mite hnêna i hurna i la tizual ta cheu va, i la kham chuang lo fo. 30 “I thinlung chu a khawlo ta mang e - i chêtziaah hmeichhe luhlul sual tak mai thil i ti a, tih hi LALPA PATHIAN thuchhuak a ni. 31 Kawtthlêr lû apianga chânna bûk i siamah te, kawtthlêr tina hmun langsâr i siamah te hian hlawh i ûm loh avângin nawhchizuar mai pawh i ni lo ve. 32 Nupui uirê, pasalte aia mi hrante duh zâwktunu! 33 Nawhchizuar hnênah chuan thil an pe ṭhîn a, nang erawh chuan i pe zâwk ṭhîn - a duhtu che hnênah, ram tin ata an lo kala, an mutpui theih nân che i tlawn zâwk ṭhîn a ni. 34 Tin, i hur thua tu mân an pan lo che hi mi hur dang laka i danglamna chu a ni; nangmahin a man i pe zâwk a, tu mahin man an pêk loh che hi i danglamna chu a ni.
Jerusalem chunga Pathian rorêl
35 “Chuvângin, aw mi hurnu, LALPA thu chu ngai rawh! 36 LALPA PATHIAN chuan heti hian a ti a ni: ‘I tenawmna leih chhuah a niha, i ngaihte nên in inpâwlna lama i saruakna tihlan a nih avâng leh, i tenawmna milim zawng zawng avâng leh, an hnêna i pêk i fate thisen avângin, 37 ngai rawh, nangmah ngaitu i nuamtâwlpuite zawng zawng leh, i lo ngaih tâk zawng zawngte leh i huat zâwng zawng zawngte chu ka ko khâwm ang; i vêlah ka hruai khâwm ang a, i saruakna zawng zawng an hmuh theih nân an hnênah i saruakna chu ka tilang ang. 38 Tin, hmeichhia, pasal ṭhena mahni fa thisen chhuah chung thu an rêl angin i chung thu ka rêl ang che; thinurna leh thîkna chu i chungah ka rawn thlen ang. 39 An kutah ka pe ang chia, i hmun langsârte chu an titlu ang a, i hmun sângte an tisawp ang; i silhfênte an hlîp ang a, i lunghlute an chhuhsak ang chia, saruak leh ruakin an kalsan ang che. 40 “ ‘I lakah vântlâng an pun ang a, lungin an dêng ang chia, khandaihin an chhun tlang ang che. 41 I inte chu meiin an hâl ang a, hmeichhe tam tak mit hmuhah i chungah rorêlna an hlen ang; i hur hi ka tireh ang a, hlawh pawh i pe tawh lo vang. 42 Tichuan, ka thinurna i chungah ka hrithla zo vang a, ka thîkna che chu a reh tawh ang a, ka ngawi hle hle ang a, ka thinur tawh ngai lo vang. 43 I tleirâwl lai nite chu i hriat reng lohva, hêng thilahte hian mi tihvui tâk zâwk avângin ngai rawh, i chêtzia ang angin i chungah ka thlen ang,’ tih hi LALPA PATHIAN thuchhuak a ni; tin, i tenawmna zawng zawng belhchhahin he hurna hi i ti tawh lo vang.
Nu siar nu siar
44 “Ngai rawh, thufing tawi hmang apiangin he thufing tawi hi an hmang ang, ‘A fanuin a nu a chhûn,’ tih hi. 45 I nu, mahni pasal leh fate lungtentu fanu kha i ni a, inlaizâwnna lamah chuan, mahni pasal leh fate lungtentute laizâwn i ni; i nu chu Hit mi a ni a, i pa lah Amor mi a ni. 46 I laizâwn, i u chu Samaria, i vei lama chêng ṭhîn kha amah leh a fanute nên an ni; i laizâwn, i nau lah chu, i ding lama chêng ṭhîn kha Sodom leh a fanute an ni. 47 Mahse, anmahni awm dân chu i zawh lo va, an tenawmna ang i ti lo na a, i awm dân zawng zawnga i khawloh zâwkzia ngaihtuahin chûng chu eng mah tham a ni lo. 48 A nuna ka nun chhûng chu,” tih hi LALPA PATHIAN thuchhuak a ni, “Nang leh i faten an tih ang hi i laizâwn Sodom leh a fanute pawhin an ti hauh lo. 49 I laizâwn Sodom khawlohna chu hêng hi a ni: chapona te, ei puar lutuk te, amah leh a fanute nuamtâwlna mai mai te a ni a, mi retheite leh tlachhamte chu a pui chuang hek lo. 50 Tin, mi chapo tak an ni a, ka hmaa thil tenawm ti tawh an ni; tichuan, ṭha ka tih angin ka tibo hlawm tawh a ni. 51 Samaria lah chuan i sual chanve pawh a ti lo; anmahni aia thil tenawm i tih nasat zâwk avângin i laizâwnte chu i tilang fel ta zâwk a ni. 52 I laizâwnte dik zâwka i lantîr avângin nang ngeiin i mualphona chu i phur tûr a ni; anmahni aiin thil tenawm nasa zâwk te i ti a, i sualnate avângin anni chu nang aiin an fel zâwk a ni; a ni, i laizâwnte fel zâwka i lantîrnaah hian nang chuan kimkîin mualphona i chang tûr a ni. 53 Tin, an awm dân, Sodom leh a fanu awm dân te, Samaria leh a fanu awm dân te, anmahni rualin nangma awm dân ngei pawh ka let ang; 54 an tân thlamuanna i lo nih ṭhinnaa i thiltih tâk zawng zawng avânga i zah theih nân. 55 Tin, i laizâwn, Sodom leh a fanute, Samaria leh a fanute chu an awm dân hmasa angin an awm leh ang a; nang leh i fanute pawh in awm dân hmasa angin in awm leh ang. 56 I suahsualna hmuhchhuah a nih hmaa i intihropui niahte khân, i laizâwn Sodom chu i kamchhe tleuhna a ni ṭhîn lo vem ni? 57 Tûnah zawng Suria fanu leh a vêla mi zawng zawng, Philistia fanute i vêla tinawmnahtu che khân an sawichhiat tâk vak che hi. 58 I hurna leh i tenawmna i pu zêl a ni,” tih hi LALPA thuchhuak a ni.
Thuthlung hlun
59 Tichuan, LALPA PATHIAN chuan heti hian a ti: “Thuthlung bawhchhiain thutiam i pawisak lohzia ang zêlin i chungah ka ti ve dâwn a ni. 60 Nimahsela, i naupan laia i hnêna ka thuthlung chu ka hre reng ang a, i hnênah kumkhaw thuthlung ka siam ang. 61 Tichuan, i laizâwnte, i u leh i naute i pawm hunah chuan i awm dân te i lo hre chhuak ang a, i inzahpui ang; anni chu i fanu atân ka pe chia, i thuthlung avâng erawh chuan ni lovin. 62 I hnênah ka thuthlung ka tinghet ang a, LALPA ka ni tih in hre tawh ang. 63 I thiltih zawng zawngte ka ngaihdam vek hunah che chuan, i hriat renga i zah avânga kimkia i kâ i ân ngai tawh loh nân,” tih hi LALPA PATHIAN thuchhuak a ni.
Mupui leh grêp hrui tehkhin thu
1 Tin, LALPA thu chu ka hnênah a lo thleng a, 2 “Mihring fapa, Israel chhûngte hnênah chuan thu kherkhiap siam chhuak la, tehkhin thuin sawi rawh. 3 ‘LALPA PATHIAN chuan heti hian a ti a ni, ti rawh: “Mupui lian tak, thla hlai pui, thla ki sei tak, ṭial buai, hmul bit tak Lebanon tlângah a thlâwk a, sidar thing zîk a la a, 4 a ṭang zîk no ber chu a thliak a, mi veivahna ramah a thlawhpui a, sumdâwnna khawpuiah chuan a phun ta a. 5 Chumi ram thlai chi chu a la bawk a, lei ṭhaah chuan a kui ṭiak a, tui tam tak kamah chuan a phun ta a, tuipuisuthlah angin a phun a. 6 Tin, a ṭhang a, grêp hrui ṭawi tak a lo ni ta a; a zârte chu a lo zâm lêt a, a zungte chu a hnuaiah a awm a; tichuan, grêp kûng a lo ni a, pêngte a rawn chhuah a, a ṭang chu a lo chawr ta a. 7 “ ‘ “Mupui lian tak dang a awm bawk a, thla hlai pui leh hmul bit tak a nei ve a; tin, ngai rawh, he grêp kûng hi ama lamah khân a zung a zâm a; a phunna hmun aṭang khân ama lamah pêngte a chawr chhuak ta a, amah chu tuiin a châwm theih nân. 8 Pêngte a chhuaha, grêp ṭha tak a nih theih nân tui tam tak kama lei ṭhaa phun a ni.” ’ 9 LALPA PATHIAN chuan heti hian a ti a ni: ‘A puitling hlen dâwn em? A vuai mai theih nân a rahte sât thlain, a zung chawpin a pawt chhuak dâwn lâwm ni? A hnah chawr thar zawng zawng pawhin a vuai phah ang; a zung chawpa pawt chhuak tûrin thiltihtheihna nasa tak emaw, mipui tam tak emaw a ngai chuang dâwn em ni? 10 A ni, ngai rawh, phun mah ni sela, a puitling hlen dâwn em ni? Khawchhak thlîin a rawn nuai hunah chuan a vuai zo mai dâwn lâwm ni? A ṭona hmun ngeiah chuan a vuai mai ang,’ ti rawh,” a ti a.
Tehkhin thu hrilhfiahna
11 Tin, LALPA thu chu ka hnênah a lo thleng leh a, 12 “Hel hmang chhûngte hnênah chuan sawi rawh: he thil awmzia hi an hre lo vem ni? Hrilh rawh, ‘Ngai rawh u, Babulon lal chu Jerusalem-ah a lo kal a, an lal leh hotute chu a man a, ama hnênah Babulon-ah a hruai a, 13 an lal thlah pakhat a man a, thuthlung a siampui a, thu a tiam luihtîr a, rama mi liante chu a hruai bo vek a; 14 a lalna ram a tlâwma, amaha a din chhuah theih tawh loh nân, a thuthlung vuan chung chauhva a din theihna tûrin. 15 Mahse, sakawrte leh mi tam tak rawn tîr tûra dîl tûrin Aigupta ramah palai tîrin a chungah a hel ta a. A hlawhtling ang em? Chutiang titu chu a inchhanchhuak ang em? Thuthlung chu bawhchhe siin a chhuak tho vang em? 16 A nuna ka nun chhûng chu,’ tih hi LALPA PATHIAN thuchhuak a ni; ‘Lalber, lala siamtu chênna ngeiah chuan - a chhechhamte hmusit leha, a thuthlungte bawhchhetu chu, ama hnên ngeiah Babulon-ah chuan a thi ang. 17 Indonaa mi tam tak tihhlum tûra mual pâwngte leh kulhte an siam hunah pawh, Pharaoa sipai rual leh pâwl ropui tak pawhin eng mah an tihsak thei lo vang. 18 Thuthlung bawhchhiain chhechham chu an hmusit ta si a; thu a intiam hnuah hêng thil zawng zawng hi a ti leh ta si a le, a chhuak awzâwng lo vang.’ ” 19 Chuvângin, LALPA PATHIAN chuan heti hian a ti a ni: “Ka chhechham a hmusit a, ka thuthlung a bawhchhia a, a nuna ka nun chhûng chu, ama chungah ka ṭuan ngei ngei ang. 20 Lênin ka khuh ang a, ka thangah chuan a âwk ang a, Babulon-ah ka rawn hruai ang a, tah chuan a bawhchhiatna, ka chung ngeia a bawhchhiatnate avâng chuan amah ka bei ang. 21 Tin, a pâwl zawng zawnga tlânchheho zawng zawng chu khandaihin an thi ang a, a la bângte chu kâwlkil tinah an darh ang; tin, kei LALPA hian ka sawi tawh tih in hre chhuak ang.”
Pathian thutiam beisei tûr
22 LALPA PATHIAN chuan heti hian a ti a ni: “Sidar sâng tak zîk chu kei hian ka la ang a, ka phun ang; A ziding bera zîk no chu ka thliak ang a, Tlâng sâng langsâr takah ka phun ang. 23 Israel sânna tlângah chuan ka phun ang a, Zârte a rawn chhuah ang a, a lo rah ang a, Sidar ropui tak a ni ang; A hnuaiah chuan chunglêng sava chi tinrêng an chêng ang a. A zâr hlimah te chuan an awm ang. 24 Tin, ram thing zawng zawngte chuan, Kei LALPA hian thing sângte ka tihniam a, Thing hniamte chu ka tisâng a, Thing hringte ka tiro va, Thing rote ka tiduah a ni, tih an hria ang; Kei LALPA hian ka sawi tawh a, ka ti tawh bawk a ni,” a ti a.
1 Tin, LALPA thu chu ka hnênah a lo thleng leh a, 2 “Israel ram chungchângah he thufing tawi an hman hi eng tihna nge, ‘Paten grêp thûr an ei a, an fate ha a ṭim e,’ tih hi? 3 A nuna ka nun chhûng chu, Israel-ah he thufing tawi hi hman leh tih in nei tawh lo vang,” tih hi LALPA PATHIAN thuchhuak a ni. 4 “Ngai rawh u, nunna zawng zawng ka ta vek a ni, pa nunna ka ta a ni ang bawkin fapa nunna pawh ka ta a ni; thil tisualtu apiang an thi ang. 5 Mahse, mi chu a fela, thiang leh dik chauh a tiha, 6 bâwlhmunahte ei lova, Israel chhûngte milim lam hawi hek lova, a ṭhenawm nupui chunga thil tenawm ti hek lova, hmeichhe fel lo lai hnaih hek lova, 7 tu ma chunga thil tisual lova, leibatu thil dahkham pe kîr zâwka, tu mah rawk lova, riltâm hnêna ei tûr pea, saruak puan silhtîra, 8 a pung ûm tûra pûktîr lova, a pung pawh la hek lova, thil sual ti tûra a kut sûma, mi leh mi inkâra rorêlna dik taka titlua, 9 ka dân siamte zawha, dik taka tia, ka rorêlnate a vawn chuan - mi fel a ni a, a nung ngei ang!” tih hi LALPA PATHIAN thuchhuak a ni. 10 Mahse, fapa rûk hmang a hrina, thisen chhuahtu a niha, hetiang rêng rêng hi a tiha, 11 a tih tûr zâwk chu a tih lohva, bâwlhmunahte a ei zâwka, a ṭhenawm nupui a tihbawrhbâna, 12 rethei leh tlachhamte a tihduhdaha, a rawka, a dahkham a pêk kîr lohva, milimte lam a hawia, thil tenawm a tiha, 13 a pung ûma a pêka, a pung a lâk bawk chuan - a nung ang em? A nung tawp lo vang! Hêng thil tenawm zawng zawng hi a ti miau si a, a thi ngei ngei ang, ama thisen mawh chu a phur tûr a ni. 14 “Tin, ngai rawh, fapa lo hring ve sela, a pa thil sual tih tawh zawng zawng kha a hmuha, a hlauhva, chutiang a tih ve lohva, 15 bâwlhmuna a ei lohva, Israel chhûngte milim lam hawi lova, a ṭhenawm nupui a tihbawrhbân lohva, 16 tu ma chunga thil a tihsual lohva, dahkham eng mah la lova, tu mah rawk lova, riltâmte ei tûr pe zâwka, saruakte puan a silhtîra, 17 rethei laka a kut a sûma, a no leh a pung la lova, ka thupêkte hmanga ka dân siamte zawhtu a nih chuan, a pa khawlohna avângin a thi lo vang a, a nung ngei zâwk tûr a ni. 18 A pa erawh zawng râwng taka mi a hnehchhiaha, a unaupa rawkrâla beia, a mite zînga thil ṭha lo chu a tih avângin, ngai rawh, a khawlohna avângin a thi tûr a ni. 19 Mahse, ‘Engah nge fapa chuan a pa khawlohna a tuar loh vang?’ in ti ṭhîn. Fapa chuan dân chu zâwma thil fel a tiha, ka dân siamte zawng zawng chu a vawna, a tih bawk chuan a nung ngei tûr alâwm. 20 Thil tisualtu chu a thi tûr a ni. Fapa chuan a pa khawlohna chu a tuar lo vang a, pa pawhin fapa khawlohna chu a tuar hek lo vang; mi fel felna chu amahin a têl ang a, mi sual sualna chu amahin a phur ang. 21 Amaherawhchu, mi sual chuan a thil sual tih zawng zawngte a hawisana, ka dân siamte a vawna, dân chu zâwma thil fel a tih chuan a nung ngei ang, a thi lo vang. 22 Bawhchhiatna a lo tih tawh rêng rêng kha chu hriatsak reng a ni tawh lo vang; a lo tih tawh a felna avângin a nung ang. 23 “Mi sual thihnaah hian lâwmna rêng ka nei em ni? A kawngte chu a hawisana, a nunna zâwk lo chu?” tih hi LALPA PATHIAN thuchhuak a ni. 24 Amaherawhchu, mi fel chuan a felna kawng a hawisana, khawlohnate a tiha, mi sualte tih ang zêla thil tenawmte a tihin a nung dâwn em ni? A thil fel tih eng mah kha hriat reng a ni tawh lo vang a, a bawhchhiatna a bawhchhiatah leh thil sual a tihnaah khân, chumi ngeiah chuan a thi ang. 25 “Mahse, ‘LALPA tih dân hi a inang fo lo ve,’ in ti ṭhîn a. Israel chhûngte u, ngai rawh u khai, ka tih dân a inang fo lo vem ni? In tih dân chu a inang lo fo zâwk a ni lâwm ni? 26 Mi fel chuan a felnate a hawisana, khawlohnate a tih chuan, tah chuan a thi ang a, khawlohna a tihah chuan a thi ang. 27 Chu lo pawh chu, mi sualin a sualna a lo tih tawhte chu a hawisana, dân chu a zawma, thil fel a tih chuan a nunna a chhanhim ang. 28 A inngaihtuaha, a bawhchhiatna a lo tih tawh zawng zawng chu a hawisan avângin a nung ngei ang, a thi lo vang. 29 Mahse, Israel chhûngte chuan, ‘LALPA tih dân chu a inang fo lo ve,’ an ti a. Aw Israel chhûngte u, ka tih dânte hi a inang fo a ni zâwk lâwm ni? Nangni tih dânte erawh chu a inang lo fo zâwk a ni lâwm ni? 30 Chuvângin, aw Israel chhûngte u, mi tin, nangmahni tih dân ang zêlin ro ka rêl ang che u,” tih hi LALPA PATHIAN thuchhuak a ni. “Inlamlêt ula, in bawhchhiatna zawng zawngte chu hawisan rawh u; tichuan, khawlohna chu in tlûkchhiatna a ni dâwn lo nia. 31 In bawhchhiatna zawng zawng, in lo bawhchhiat tawhte chu paih bo vek ula, thinlung thar leh rilru thar insiam rawh u. Engah nge in thih ang le, aw Israel chhûngte u? 32 Mî thihnaah chuan lâwmna ka nei hauh si lo va,” tih hi LALPA PATHIAN thuchhuak a ni. “Chuvângin, inlamlêt ula, nung rawh u.”
Sûnna hla
1 “Chu lovah pawh chuan Israel hotute chungchângah sûnna hla phuah la, 2 I nu eng nge a nih le? Sakeibakneipui a ni; A no a châwm a, a bawk, sakeibaknei vânglaite zîngah. 3 A châwm tlei e, a no pakhat, sakeibaknei vânglai a lo ni ta e; A lo thiam e, sa seh, mihring a hmang chhûnrâwlah. 4 Hnamten hriain, an dang thla e - an khur thûkah; Thir kawl an bun, Aigupta ram an thlen e. 5 A chûninun a nghâk thlâwn, bei lo dawng e; A siam leh e, a hraichawi dang, sakeibaknei vânglaian. 6 A lêng vêl e, sakeibakneite zîngah, Sakeibaknei vânglai a lo ni ta e; A lo thiam e, sa seh, mihring a hmang chhûnrâwlah. 7 A hrâwng vêl a, lal inte, khawpui a tiram e; A râwl lian vângin a chhe zo, ram leh a chhûnga awm zawng zawng. 8 Hnam tin khuavêl lo pungin an bei chiam a, Lên hrui an zâr, an dang thla e, an khur thûkah. 9 Thîr kawl bunin bâwmah an khung, Babulon lal an hlân e. An rawn thlen ta kulhpui chhûngah, A thâwm daih nân - Israel tlâng lianah. 10 I chûninun grêp huana tui châwm grêp a iang e, Siktui thiang châwm, rah ṭha chhuak a zâr luai e. 11 A lal tiangah a ṭang zâr khauh lo chhuakin, Zâr dang zawng laiah a sâng ber a, A bukpui khûmin a chung lûr e. 12 Mahse, an thliak, thinlai rimin, An paih, chhimhlei tualah, Chhaktiang thlîin a nuai, a ṭîl, a rahte, A zâr khauh pawh a tliak thla, a uai zo ta, Senmeiin kâng ral ta e. 13 A kûngpui zawng an phun ta, thlalêr ram tui lovah, 14 A zâr ata senmei lo chhuakin a man e, A rahte zawng pawh a ei zo ta; Tichuan, zâr lêm a awm tawh lo lal tiang tûrah pawh.” Hei hi sûnna hla a ni e, sûn nâna hman tûr a ni.
Pathian tum mihringin a dâl
1 Tin, heti hi a ni a, kum sarihna, thla ngana, chumi thla ni sawm niah chuan Israel upa tute emaw LALPA râwn tûrin an lo kal a, ka hmaah an ṭhu a. 2 Tin, LALPA thu chu ka hnênah a lo thleng a, 3 “Mihring fapa, Israel upate chu bia la, an hnênah, ‘LALPA PATHIAN chuan heti hian a ti a ni: “Mi râwn tûra lo kal em in nih? A nuna ka nun chhûng chu, nangni râwnin ka awm lo vang,” tih hi LALPA PATHIAN thuchhuak a ni,’ ti rawh. 4 I chachhuah dâwn lâwm ni? Mihring fapa, chachhuah ta che. An pate tenawmnate chu hriattîr rawh; 5 tin, an hnênah, ‘LALPA PATHIAN chuan heti hian a ti a ni: Israel-ho ka thlan nia Jakoba chhûng ka thlante hnênah kut phar meuhva Aigupta rama an hnêna ka inhriattîra, an hnêna ka kut ka phara, “Kei hi LALPA in Pathian chu ka ni e,” tia, 6 chûng nia Aigupta ram ata hruai chhuaka, an tâna ka ram hual, hnutetui leh khawizua luang ram, ram zawng zawnga mawi bera hruai lût tûra ka kut ka phar niah chuan, 7 an hnênah, “Mi tinin in mita hmuh thil tenawm chu paih bo ula, Aigupta rama milimte chuan intibawlhhlawh suh u, kei hi LALPA in Pathian chu ka ni e,” tiin ka sawi a. 8 Mahse, ka chungah an hel a, min ngaihsak rêng rêng lo va, mi tinin an mita hmuh thil tenawmte pawh chu an paih bo lo va, Aigupta milimte chu an hawisan hek lo. Tah chuan an chunga ka thinurna hrithla tûrin, Aigupta ram chhûngah ngei chuan ka thinurna ka leih nâng emaw, ka ti a. 9 Mahse, keima hming humhalh nân ka bei ta zâwk a, an awmna hnamte mit hmuhah Aigupta ram ata hruai chhuakin an hnênah ka inhriattîr a, chûng hnamte mit hmuhah chuan ka hming sawichhiata a awm loh nân. 10 Chutichuan, Aigupta ram chhuahsan tûrin ka ti a, thlalêrah ka hruai lût ta a. 11 “ ‘Tin, ka dân siamte chu anmahni ka pe a, ka thurêlte chu ka entîr a, chu chu miin an zawm chuan an nunna tûr a ni. 12 Chu bâkah, kei leh anmahni inkâra chhinchhiah nân ka Chawlhnite chu anmahni ka pe bawk a, kei hi LALPA, anmahni serh hrangtu ka ni tih an hriat theih nân. 13 Mahse, Israel chhûngte chu thlalêrah khân ka chungah an hel a, ka dân siamte chu an zawh lo va, ka thurêlte miin a tiha a nunna tûr chu an paihthla a, ka Chawlhnite pawh nasa takin an bawhchhia a; tichuan, thlalêrah chuan anmahni tiboral tûrin ka thinrimna chu an chungah ka leih nâng emaw, ka ti a. 14 Ka hruai chhuah lai hretute hnam ngei mit hmuhah tihchhiata a awm loh nân, ka hming humhalhin ka bei ta zâwk a ni. 15 Chutichuan, thlalêrah khân ka ram pêk, hnutetui leh khawizua luang ram, ram zawng zawnga mawi berah chuan ka hruai lût lo vang, bân phar meuhvin ka ti a; 16 ka thurêlte an paihthlâka, ka dân siamte an zawh lohva, ka Chawlhnite an bawhchhiat avângin; an thinlung chuan an milimte a âwn tlat si a. 17 Mahse, tiboral lo tûrin ka mitin a hmuh hmaih ta a, thlalêrah pawh khân ka tiboral vek ta lo mai a ni. 18 “ ‘Tin, thlalêrah chuan an fate hnênah, “In pate dân siam chu zâwm lo ula, an thurêlte zâwm lo ula, an milimte chuan intibawrhbâng hek suh u; 19 kei hi LALPA in Pathian chu ka ni a, ka dân siamte zawh ula, ka thurêlte vawng ula, zâwm rawh u. 20 Ka Chawlhnite serh ula, kei leh nangni inkâra chhinchhiahna a ni ang a, LALPA in Pathian chu ka ni tih in hriat theihna a ni dâwn nia,” ka ti a. 21 Mahse, an fate chu ka chungah an hel a, ka dân siamte chu an zawh lo va, ka thurêlte, miin a tiha a nunna tûr chu, zâwm tûrin an vawng hek lo; ka Chawlhnite chu an bawhchhe ta a; thlalêrah khân ka thinurna hrithla tûrin an chungah ka thinrimna ka leih nâng emaw, ka ti a. 22 Mahse, ka kut ka sûm a, ka hruai chhuah lai hretute hnam ngei mit hmuha tihchhiata an awm loh nân, ka hming humhalhin ka bei ta zâwk a ni. 23 Chu lo pawh chu, hnamte zîngah anmahni ka tidarh ang a, ram tinah ka tiṭaiṭâm ang, thlalêrah khân kut phar meuhvin ka lo ti a. 24 Ka thurêlte an zawm lohva, ka dân siamte an paihthlâka, ka Chawlhnite an bawhchhiata, an pate milim lam an hawi zâwk avângin. 25 Chu lo pawh, dân siam ṭha lo chu ka pe a, an nun lohna tûra thurêlte nên; 26 an thil dawn, chhûl keutu zawng zawng meia an paihnaah chuan anmahni ka tibawlhhlawh a, ka tikhawhar a, a tâwpah LALPA chu ka ni tih an hriatna tûrin. 27 “ ‘Chuvângin, mihring fapa, Israel-ho hnênah thu sawi la, an hnênah, LALPA PATHIAN chuan heti hian a ti a ni: In pate chuan hêngah hian mi la sawichhe cheu a ni; ka chunga bawhchhiatna thil an tihahte hian. 28 Kut phar meuhva anmahni ka tiam ramah hian ka rawn hruai luhin, tlâng sâng leh thing buk lian an hmuh apiangah an inthawinate an hlân a, an thil hlan thinurthlâk tak maite chu an pe a. An rimtuite an siam a, an in tûr thilhlante chu an bun chhuak si a. 29 Tichuan, keiin an hnênah, “Bâwlhmun in kal fonate hi eng in tihna nge ni?” ka ti a; chutichuan, a hming atân vawiin thleng hian Bama tih a ni ta a ni e,’ ti rawh. 30 Tichuan, Israel chhûngte hnênah chuan sawi la, ‘LALPA PATHIAN chuan heti hian a ti a ni: “In pate ang zêlin mahni in intibawlhhlawhin an tenawmna kawngahte chuan in hur bo a ni maw? 31 In thil dawn in hlânin, in fate meiah in paih a, vawiin thleng hian in milim zawng zawng chuan in intibawlhhlawh a ni lâwm ni? Nangni râwn tûr em ka nih, aw Israel chhûngte u? A nuna ka nun chhûng chu nangni râwnin ka awm lo vang,” tih hi LALPA PATHIAN thuchhuak a ni. 32 Kan vêla hnam dang awze mite anga thingbul lungbul be tûr kan ni, in rilruin in ti na a, in ni tawp lo vang.’
Pathianin a hrem a, a ngaidam bawk
33 “A nuna ka nun chhûng chu, kut thahrui chak takin, bân phar chung leh thinrim chhuahin in chungah ka lal ngei ngei ang,” tih hi LALPA PATHIAN thuchhuak a ni. 34 “Hnamte zîng ata ka hruai chhuak ang che u a, tihdarha in awmna ram ata chu kut chak tak leh bân phar leh thinrim chhuahin ka hruai khâwm ang che u. 35 Awze mite thlalêr ramah chuan ka hruai lût ang che u a, inhmachhawnin kan inbei ang. 36 Aigupta ram thlalêra in pate ka beih ang takin nangni pawh ka bei ang che u,” tih hi LALPA PATHIAN thuchhuak a ni. 37 “Tin, tiang hnuaiah ka luhtîr ang che u a, thuthlung khuahkhirhna hnuaiah ka hruai lût ang che u; 38 tin, in zîng ata mi helte leh ka chunga bawhchhetute chu ka thian fai ang a, an awmna ram aṭangin ka hruai chhuak ang a; mahse, Israel ramah chuan an lût tawp lo vang. Tichuan, LALPA chu ka ni tih an hria ang. 39 “Nangni pawhin, aw Israel chhûngte u,” LALPA PATHIAN chuan heti hian a ti a ni: “Ka thu in ngaihthlâk dâwn loh chuan tûn hnuah pawh in milim rawng chu bâwl ṭheuh mai ta che u; mahse, ka hming thianghlim chu in thilpêkte leh in milimtein in tibawlhhlawh tawh lo vang. 40 Ka tlâng thianghlim, Israel sânna tlângah chuan, tah chuan Israel chhûngte zawng zawng chuan an zavaiin, chu ramah chuan ka rawng an bâwl ang; tah chuan anmahni ka lâwm tawh ang a, tah chuan in thilhlante, in thilpêk ṭha ṭhate, in thil serh zawng zawngte ka duh tawh ang. 41 Hnamte zîng ata ka lâk chhuah hun che u leh, ram tina in darhna ata ka hruai khâwm hunah che u chuan, rimtui atân ka pawm tawh ang che u a, hnamte mit hmuhah chuan nangmahniah hian ka thianghlimzia a lang tawh ang,” LALPA PATHIAN chuan a ti a ni. 42 “Tin, Israel ram, kut phar meuhva in pate pêk ka tiam ramah ka hruai luh hunah che u chuan LALPA ka ni tih in hria ang. 43 Tin, tah chuan in awm dânte leh in thiltih, in intihbawlhhlawhna zawng zawngte chu in hre tawh ang a; tichuan, in thil ṭha lo tih zawng zawngte avâng khân nangmahni mit hmuh ngeiah in inten tawh ang. 44 Tin, in awm dân ṭha lote ang ni lova, in thiltih khawlote ang ni hek lova, ka hming humhalh tûra ka tihpuitlin che u hunah chuan, aw Israel chhûngte u, LALPA chu ka ni tih in hre tawh ang, tih hi LALPA PATHIAN thuchhuak a ni,” tiin.
Chhim lama mei chhuak
45 Tin, LALPA thu chu ka hnênah a lo thleng a, 46 “Mihring fapa, chhim lam hmachhawn la, chhim lam hawiin i thu thlah la, chhim lam ngawpui lamah thu sawi la, 47 chhim lam ngawpui hnênah chuan, ‘LALPA thu hi ngai rawh, LALPA PATHIAN chuan heti hian a ti a ni: “Ngai rawh, nangmahah mei ka chhêm ang a, nangmaha thing hring zawng zawng chu a kâng zo vang a, thing ro apiang pawh; meialh hluah hluah chu a rêm lo vang a, chhim aṭanga hmâr thlengin, eptu zawng zawngte chu a ût ang. 48 Tin, mi zawng zawngin kei LALPA hi mei chhuahtu ka ni tih an hmu ang a, a mit lo vang,” a ti e,’ ti rawh,” a ti a. 49 Tichuan, kei chuan, “A! LALPA PATHIAN, ‘Tehkhin thu sawitu mai alâwm,’ mi ti ang asin,” ka ti a.
LALPA khandaih
1 Tin, LALPA thu chu ka hnênah a lo thleng a, 2 “Mihring fapa, Jerusalem hmachhawn la, a hmun serhte lam hawiin i thu thlah la, Israel ram chungah thu sawi ang che; 3 Israel ram hnênah chuan, ‘Heti hian LALPA chuan a ti a ni: “Ngai teh, ka do che a ni, ka khandaih chu a pai ata ka phawi ang a, in zînga mi fel leh fel lo angkhatin ka râwt ang. 4 Tichuan, in zînga mi fel leh fel lo ka râwt dâwn avâng chuan ka khandaih chu a pai ata a chhuak ang a, chhim lam ata hmâr lam thlengin mihring zawng zawng a râwt ang. 5 Tin, mi zawng zawngin, kei LALPA hian ka khandaih a pai ata ka phawi a ni tih an hria ang a, a inkhung leh tawh ngai lo vang.” ’ 6 Chuvângin, nang mihring fapa, rûm vawng vawng la, lungchhe takin an mit hmuhah rûm rawh. 7 Tin, ‘Engati nge i rûm?’ an tih che chuan, ‘Thu eng emaw avângin a lo thleng dâwn si a; tin, thinlung tinrêng a tuiral ang a, kut zawng zawng a zâwi ang a, rilru tinrêng a chau vang a, khûp zawng zawng chu tui angin a zâwi ang a, ngai rawh, a lo thleng e, a hlen ang, tih hi LALPA PATHIAN thuchhuak a ni,’ ti rawh,” a ti a. 8 Tin, LALPA thu chu ka hnênah a lo thleng leh a, 9 “Mihring fapa, thu sawi la, ‘Hetiang hian LALPA chuan a ti a ni: “ ‘Khandaih, khandaih, tah hriam a ni ta a, Tihtlêt a ni ta! 10 Mi sah nân tah hriam a ni ta, Tihtlêt a ni, kâwlphe angin! Kan la hlim cheu dâwn em ni? Ka faa tiangin a chhîng zo ve, thing tin. 11 Tihtlêt a ni, vai vêl atân, A ni, khandaih tah hriam tihtlêt a ni, Thattu kuta chuang tûrin. 12 Mihring fapa, ṭap la, chiau vawng vawng rawh, ka mite chunga thleng tûr a ni si; Israel mi lian zawng zawng chungah ngei chuan. Pêk an ni e, ka mite nên, chemsen hnuaiah; Chuvângin, mangang rawh, i mal bêngin. 13 Fiahna a awm si a, engtin nge ni ang - Mi dang chhîngtu tiang chu awm suh sela?’ ” Tih hi LALPA PATHIAN thuchhuak a ni e. 14 “Chuvângin, nang, mihring fapa, kut bêng hialin thu sawi rawh; Thih theihna chemsen lên zual la, a lêt thumin, A hual vêl e, mi ropui, thahna chemsen chuan. 15 Thinlung tuiral, an tlûkna a pun nân e, Chemsen tle tak kawngka tinah ka riah e, A! Kâwlphe iangin a tle, thihna chemsen. 16 Invilikin che vak ang che, ding lamah, Invilikin vei lamah pawh vai zêl la, I hma zâwn apiangah pawh. 17 Kei pawhin kut ka lo bêng ang a, Ka hlen ngei ang, ka thinurna, Kei LALPAN hei hi ka sawi tawh e, a ti, ti rawh,” a ti a.
Babulon lal khandaih
18 Tin, LALPA thu chu ka hnênah a lo thleng leh a, 19 “Mihring fapa, Babulon lal khandaih lo thlen theihna tûrin kawng pahnih lo siam rawh; chûng kawng hnihte chu ram pakhat aṭangin a lo chhuak tûr a ni. Kawng kawhhmuhna siam la, khawpui luhna kawtchhuahah chuan siam rawh. 20 Kawng chu Amon mite khua Raba-a khandaih lo thlenna tûrin ruat la, Judai ram laia Jerusalem kulhah pawh. 21 Aien tûrin Babulon lal chu kawng pêngah chuan a ding a, kawng hnih infinna takah chuan; thalte chu a thing rawk rawk a, teraphim a râwn a, sa thin chu a en a. 22 A aiennaah chuan a kut ding lamah Jerusalem a lo chuang ta a, kulh sut chhiatna te, râl bei hawhawa au te, kawngka zâwna kulh sut chhiatna te, mual pâwng chhûn te, kulh siamte nên. 23 Aien thlâwn mai ang a ni a; mahse, mana an awmna tûra an khawlohna hriat chhuahna tûr chauh a ni. 24 “Chuvângin, LALPA PATHIAN chuan heti hian a ti a ni: ‘In khawlohna hriat rengna tûra in siam tâk avângin in bawhchhiatnate a lang a; tichuan, in thiltih zawng zawngah in sualnate a lang reng a, hriat chhuah in lo nih tâk avângin kuta man in la ni ang. 25 Tin, nang Israel hotu, mi sual thi tûra hliam pa, i sualna hremna tâwpkhâwk ni a lo thleng e; 26 LALPA PATHIAN chuan heti hian a ti: “Hotu lukhum chu paihsak ula, lallukhum chu paihsak rawh u; hei hi a ngaiin a awm lo vang. Mi tlâwmte chawisâng ula, mi liante chu titlâwm rawh u. 27 Ka letling ang, ka letling ang, ka letling ang. Hei pawh hi a ngaiin a awm lo vang, a neitu tak tûr a lo kal hma zawng amah chu ka pe ang.” ’
Amon-hote leh khandaih
28 “Tin, nang mihring fapa, thu hril la, heti hian ti rawh: ‘LALPA PATHIAN chuan Amon fate chungchângah leh an sawichhiatna thu-ah heti hian a ti: “Khandaih, khandaih phawi a ni ta, mi thah nân leh tihral nân kâwlphe anga tihtlêt a ni ta. 29 Inlârna der an hmuhsak chia, dâwtin ai an ensak chia, khandaih chu mi sual thi tûra hliam, an sualna ni tâwpkhâwk lo thleng tûrte nghâwngah i rawlh dâwn, an tihah che hian an daw a ni. 30 A paiah khung rawh, i pian i mûrna ram ngeiah i thu ka rêl ang. 31 I chungah ka thinurna ka leih ang a, ka thinrimna mei i chungah ka chhêm ang, mi nun chhe tak, tihboral thiam tak kutah ka mantîr ang che. 32 Meia tuah tûr i ni ang a, ram laiah chuan i thisen a bua ang a, hriat reng i ni tawh lo vang, kei LALPA hian ka sawi tawh si a,” a ti,’ ti rawh,” a ti a.
Jerusalem thiltih râpthlâk
1 Tin, LALPA thu chu ka hnênah a lo thleng a, 2 “Tin, nang, mihring fapa, thisen chhuah hmang khawpui chu i khing dâwn em? I khing dâwn em? A tenawmna zawng zawng chu hriattîr rawh khai! 3 Tin, an hnênah chuan, ‘LALPA PATHIAN chuan heti hian a ti a ni: Khawpui, a hun lo thlenna tûra ama chhûnga thisen chhuahtu leh, mahni intibawlhhlawh tûra milim siamtu chu! 4 I thisen chhuahnaah khân thiam loh i phur a, i milim siamah khân i intibawlhhlawh a ni; i hunte i tihnai a, i kumte a thleng ṭêp a; chuvângin, hnamte hnênah chuan sawichhiatah leh ram zawng zawng chêksawlh atân ka siam che a ni. 5 I bula mi leh i hlata mite chuan an chêksawlh ang che, nang, hmingchhiat phur leh buainaa khat mi! 6 Ngai rawh, Israel hotute mi tinin an thiltihtheihna ang zêla thisen chhuah mai tûrin mangmahah an awm a ni. 7 Nangmahah chuan miin nu leh pate an hmusit a, nangmahah chuan mikhualte an hnehchhiah a, nangmahah chuan fahrahte leh hmeithaite an hnuaichhiah a. 8 Ka thil serhte i hmusit a, ka Chawlhnite i bawhchhia a. 9 “ ‘Nangmahah chuan thisen chhuah tûra mi hêk hmangte an awm a, nangmahah chuan bâwlhmuna eite an awm a, nangmahah chuan hurna an chîng a. 10 Nangmahah chuan an pate saruakna hlîmsak an awm a, nangmahah chuan hmeichhe fel lo lai mutpui an awm a. 11 Tin, miin a ṭhenawm nupui chungah thil tenawm a ti a, mi dangin hur takin a mo a tibawlhhlawh a, mi dangin nangmahah chuan a farnu, a pa fanu ngei a tlâwm a. 12 Nangmahah chuan thisen chhuah tûrin thamna an la a, a no leh a pung i la a; i ṭhenawm chu hnehchhiahin duhâm takin i hlêprûksak ṭhîn a; kei ngei pawh hi mi theihnghilh a, tih hi LALPA PATHIAN thuchhuak a ni. 13 “ ‘Chuvângin, ngai rawh, i lo hlêprûkna thu-ah te, nangmaha thisen chhuak thu-ah te kut ka ben khum ang che. 14 Nangmah ka beih niah che chuan i thinlungin a tuar zovin i kut a chak thei dâwn em ni? Kei LALPA ngei hian ka sawi tawh a, ka ti bawk ang. 15 Tin, hnam tin zîngah chuan ka tidarh ang chia, ram tinah ka tiṭaiṭâm ang che; nangmah aṭangin i bawlhhlawhnate ka tiral vek ang. 16 Hnamte mit hmuhah chuan mahni intibawlhhlawh i ni ang; tin, LALPA chu ka ni tih i lo hria ang, a ti,’ ti rawh,” a ti a.
Pathian rawh thianghlimna thuk
17 Tin, LALPA thu chu ka hnênah a lo thleng a, 18 “Mihring fapa, Israel chhûngte chu ka tân êkchhia mai an lo ni ta a; an zain rawh tuina mei laiah chuan dâr te, rângva te, thîr te, suan te an ni a, tangkaraw êkchhia mai a ni ta. 19 Chuvângin, LALPA PATHIAN chuan heti hian a ti a ni: ‘Ekchhia mai in lo nih tâk avângin, ngai rawh u, Jerusalem laiah ka khâwm che u a ni. 20 Tangkarua te, dâr te, thîr te, suan te, rângva te rawh tuina meia an dah khâwma, titui tûra a chunga mei an chhêm angin ka thinurna leh ka thinrimnaah chuan ka khâwm ang che u a, tah chuan ka dah ang che u a, ka titui ang che u. 21 A ni, ka khâwm ang che u a, in chungah ka thinurna mei ka chhêm ang a, a laiah chuan in tui zo vang. 22 Rawh tuina mei laiah tangkarua a tui angin nangni pawh, chumi laiah chuan in tui zo vang a, kei LALPA hian in chungah ka thinurna ka leih a ni tih in hre tawh ang,’ ” a ti a.
Israel hruaitute sualna
23 Tin, LALPA thu chu ka hnênah a lo thleng a, 24 “Mihring fapa, a hnênah chuan sawi la, ‘Ram tlen fai loh i ni e, thinurna nia ruahtui chang lo. 25 Sakeibakneiin rûmin a sa seh a zawng ang maiin nangmahah chuan zâwlnei phiarnate a awm a ni; mi nunnate an ei zo va, rote leh thil hlute an lâksak a, a laiah chuan hmeithai tam tak an siam a. 26 A puithiamte pawhin nasa takin ka dân an bawhchhia a, ka thil serhte an tibawlhhlawh a ni, thil serh leh thil narân rêng rêng an thlei lo va, mite lah thil thianghlim leh thianghlim lo an thleitîr chuang hek lo; ka Chawlhnite chu an haider a, chu vâng chuan, an zîngah chuan tihhmingchhiatin ka awm a. 27 A laia hotute chu chinghne koham ei tûr zawng ang mai an ni a, thisen chhuaha mi nunnate tiboralin hlemhle taka an hlêp theih nân. 28 Tin, a zâwlneite chuan hawlrivâpin bang an bel a, inlârna dawha mai mai an hmu a, dâwtin ai an ensak a, LALPAN eng mah a sawi lo chung pawhin, “LALPA PATHIAN chuan heti hian a ti,” an ti ṭhîn a. 29 Rama mipuite chuan hnehchhiah an hmang a, rawk an chîng a, a ni, mi rethei leh tlachhamte chu an hnuaichhiah a, dik lo takin mikhualte an hnehchhiah ṭhîn. 30 Ram chu ka tihchhiat loh nân an zîng ata dai theu tûr leh, ram chhana ka hmaa ṭang tûr mi ka zawng a, ka hmu si lo va. 31 Chuvângin, an chungah ka thinrimna chu ka leihbaw ta a, ka thinurnain meiin ka hâl ral ta hlawm a ni; an awm dân ngei chu an chungah ka rawn thlen a ni, tih hi LALPA PATHIAN thuchhuak a ni,’ ti rawh,” a ti a.
1 Tin, LALPA thu chu ka hnênah a lo thleng a, 2 “Mihring fapa, hmeichhe pahnih, nu pakhat fa an awm a. 3 Aigupta ramah an hur bo va, an tleirâwl têta hur an ni a; chutah chuan an hnute an dek a, an tleirâwl hnute chu an hmehsak hrep a. 4 Pakhat a upa zâwk hming chu Oholai a ni a, a laizâwn chu Oholibai a ni a; ka ta an lo ni ta a, fapate, fanute an hring a. Tin, an hmingah chuan Oholai chu Samaria a ni a, Oholibai chu Jerusalem a ni. 5 Tin, Oholai chu ka ta a nih hnuin a hur bo leh ta a, a ngaihzâwng, a ṭhenawm, Assuria chu a hak hiam a; 6 awptute, rorêltute, tlangvâl îtawm tak hlîr, sakawr chung chuang mi, puansenduka inthuamte chu. 7 Hêng Assuria tlangvâl ṭhate zawng zawng lakah hian an inphalrai a; tin, a hak hiamate milim zawng zawng chuan a intibawlhhlawh leh ta nghâl a. 8 A tleirâwl têt ata a hnutê an dehsak ṭhin leh, an mutpui ṭhin avângin Aigupta aṭang khân a hur a bâng chuang hek lo, anni pawhin an hurna chu a chungah an tlingtla a. 9 A ngaihzâwngte, Assuria, a hak hiamte kut ngeiah ka mantîr a ni. 10 Hêngte hian a saruakna chu an hlîm lansak a, a fanu leh a fapate an lâksak a, ani pawh chu khandaihin an that a, hmeichhiate zîngah insawiṭhaihna ber a lo ni ta, a chunga rêl ang chu an hlen ta. 11 “Tin, a laizâwn Oholibai chuan hei hi a hmu a; mahse, a u ai mahin a ngaihzâwng haknaah chuan a zual zâwkin, a hurna pawh chu a u hurna aiin a zual sauh bawk a. 12 Assuria mi, a ṭhenawm ram awptu leh rorêltu tlangvâl îtawm tak hlîr, sakawr chung chuang mi, mawi taka incheite chu a hak hiam a. 13 Tihbawlhhlawhin a awm tih ka hmu a, an pahnihin kawng thuhmun an zawh mai a ni. 14 Tin, a hurnate chu a tizualkai a, mipa lem banga chuang, Kaldai mite thla, senlâr taka chei, 15 a kâwnga kâwnghrên hrêng, diar mawi tak khim, an vaia lal hmêl pu tak, Kaldai ram, an pianna rama Babulon mite ang takte chu a hmuh avângin. 16 Tin, anmahni a hmuh veleh a hak hiam a, an hnênah Kaldai thlengin mi a tîr a. 17 Tin, Babulon mite chu a hnênah, inngaihna khumah an lo kal a, an hurnain an tibawlhhlawh a, an intitenawm zo ta a, anmahni chu a ngei êm êm a. 18 Chutichuan, a hurna a tilang a, a saruak a hlîm lang a, a laizâwnnuin mi ngei ang maiin ani pawh chuan mi ngei ta a. 19 Mahse, a tleirâwl laia Aigupta rama a hur lai a hriat reng avângin a hur zual ta deuh deuh va. 20 Tin, a uirêtu, a tîsa sabengtung tîsa ang mai, a thil chhuak sakawrte thil chhuak ang mai chu a hak êm êm a. 21 Hetiang hian i tleirâwl lai hurna, Aigupta miten i tleirâwl lai hnutê an dehsak hrep lai che kha i hre chhuak leh ta a ni.
A laizâwn chunga Pathian rorêl
22 “Chuvângin, aw Oholiba, hetiang hian LALPA PATHIAN chuan a ti a ni: ‘Ngai rawh, a ngaitu che, i rilruin a ngei hle tawhte kha ka pun ang a, kil tin ata ka hruai khâwm ang. 23 Babulon mite leh Kaldai mi zawng zawngte, Pekod te, Soa te, Koa te leh an hnêna Assuria mi zawng zawng nên; tlangvâl îtawm tak takte, awptute, rorêltute, an zain mi liante leh hmingthangte, an zain sakawr chung chuangin an lo kal ang. 24 Tin, hriamhreite, indona tawlailîrte, tawlailîrte leh mipui pung khâwmin an rawn bei ang che; phaw lian leh phaw tê, dâr lukhumte nên i vêlin an hual ang che; tin, an hnênah rorêlna ka kawltîr ang a, an thurêl ang zêlin i chungah an hlen ang. 25 Tin, i chungah ka thîkthu ka thlen ang a, thinrim takin an bei ang che, i hnârte leh i bengte an hlep ang a, a la damte chu khandaihin an thi ang a, i fanu leh i fapate an lâksak ang chia, a la damte chu meiin a kâng hlum ang. 26 I silhfênte an hlihsak bawk ang chia, i incheina mawi tak takte chu an la bo vang. 27 I hurna leh Aigupta ram aṭanga i nawhchizawrhna chu an tihbânsak ang chia; chutichuan, an lamah i mit i lên tawh lo vang a, Aigupta ram chu i hre reng tawh hek lo vang.’ 28 LALPA PATHIAN chuan heti hian a ti si a: ‘Ngai rawh, i huat tak, i rilrua i mi ngeizâwng takte kut ngeiah chuan ka mantîr ang che. 29 Huat tak têin an hua ang chia, i thawh rim rah zawng zawng an lâksak ang chia, saruakin, a lâwng maiin an hnutchhiah ang che; i nawhchizawrh saruakna, i hurna leh i nawhchizawrhna ngei chu tihlanin a awm ang. 30 Hêng thilte hi i chungah a lo thleng ang, hnam dangte ûma i hur bova, an milimtea i intihbawlhhlawh avângin. 31 I laizâwnnu kawng i zawh ve a; chuvângin, a no chu i kutah ka pe ang che.’ 32 “LALPA PATHIAN chuan heti hian a ti a ni: ‘I laizâwnnu no tung lian pui mai chu i in ang a, Nuihsan leh chêksawlhin i awm ang; a dawng hnem nasa a ni! 33 Ruihna leh lungngaihnain i khat ang a, Mak tihna leh chhiatna no, I laizâwnnu Samaria no nên chuan i in fai kêlh ang a; 34 I in ang a, a no pawh chu i fâwp fai vek ang, I hnutête i ham thlêr ang; Keiin ka sawi tawh si a,’ tih hi, LALPA PATHIAN thuchhuak a ni. 35 “Chuvângin, LALPA PATHIAN chuan heti hian a ti a ni: ‘Mi theihnghilha mi hnuchhawn avângin i hurna leh i nawhchizawrhna mawh chu i phur mai tûr a ni.’ ”
An pahnih chunga Pathian rorêl
36 Chu lo pawh chu LALPAN ka hnênah a sawi leh a: “Mihring fapa, Oholai leh Oholibai chu i khing dâwn em? An tenawmnate chu an hnênah puang ang the. 37 An uire ta si a, thisen chu an kutah a kai a, an milim hnênah chuan an uire ta a ni; an fapate ka tâna an hrin chu an hnêna kâng ral tûrin meiah an paih a. 38 Chu lovah pawh chuan, ka hnênah hei hi an ti a ni; anni vêkin ka hmun thianghlim chu an tibawlhhlawh a, ka Chawlhnite pawh an bawhchhia a ni. 39 An milimte tâna an fate an thah hnuah, anni vêk chu ka hmun thianghlim tibawlhhlawh tûrin an lût si ṭhîn a; tin, ngai rawh, hetiang hian ka in chhûngah ngei an ti ṭhîn a ni. 40 Tin, chu lo pawh chu, hla taka mi lo kal tûrin in chah a, mi in tîr a, ngai rawh, an lo kal a, anmahni elin i inbual fai a, i mit i hnawih a, cheimawina dangte i inbel a. 41 Khum ropui takah i lo ṭhu a, a hmaah dawhkân i buatsaih a, ka rimtui leh ka hriakte tah chuan i hlui ṭhîn a ni. 42 “Tin, tah chuan mipui nuamtâwl thâwm hriat a ni a, mi narân chang lo pawh thlalêr aṭangin zu ruite an rawn hruai a, an pahnihin bânbunte an bun a, lukhum mawite an khum a. 43 Tin, kei chuan, ‘Uire tar hnu hi an pâwl duh dâwnin anin a peih dâwn em ni aw?’ ka ti a. 44 Tin, nawhchizuar hnêna an kalin a hnênah an lût ta tho va; tichuan, hmeichhe hur Oholai leh Oholibai hnênah chuan an lût ta a ni. 45 Mahse, mi felte chuan uirenute leh thisen chhuah chîng hmeichhiate ro an rêl angin an rêlsak ang, uirenute an niha, an kutahte thisen a kai avângin. 46 LALPA PATHIAN chuan hetiangin a ti si a: An chungah mipui ka pun ang a, ka rawktîr ang a, ka sawisaktîr hrep ang. 47 Pung khâwmho chuan lungin an dêng ang a, an khandaihin an sât hlum ang a, an fanute, an fapate an that ang a, an inte an hâlsak ang. 48 Hetiang hian hurna chu ram ata ka tibo vang a, hmeichhia zawng zawngin in hurna hi chîn tawp loh tûr a ni tih in hriat nân. 49 Tin, in chungah in hurna chu an thungrûl ang a, in milim sualnate chu in tuar ang; tin, kei hi LALPA PATHIAN ka ni tih in hria ang,” a ti a.
Bêl tuiêk
1 Kum kuana, thla sâwmna, chumi thla, ni sâwm niah chuan LALPA thu chu ka hnênah a lo thleng leh a, 2 “Mihring fapa, ni hming, vawiin ni hming ngei hi ziak rawh; hemi ni ngei hian Babulon lal chuan Jerusalem a rawn bei ṭan a. 3 Tin, hel hmang chhûng hnênah chuan tehkhin thu sawi la, an hnênah, ‘LALPA PATHIAN chuan heti hian a ti a ni: Saso bêl chhuang la, chhuang reng la, a chhûngah tui chhûng la, 4 sa hrangte thlâk la, a sa ṭha zawng zawng te, a bawp te, a dâr te, a ruhkawl ṭha deuh deuhtein tikhat rawh. 5 Ran rualte zînga a ṭha ṭha la la, a hnuaiah thingfâk rawlh ṭeuh la, so bawrh bawrh se; a ni, a ruhkawlte chu mun ni rawh se. 6 Chuvângin, LALPA PATHIAN chuan heti hian a ti a ni: “Thisen chhuah hmang khawpui, saso bêl a chhûng kâng khir, a khir la reh ngai lo chu a chung a pik e! Thlang chuang lovin, a sa hrang khat khatin thur rawh u. 7 A thisen chhuah chu ama chhûngah a awm si a, vaivuta vûr theih nâna leia leihbuak tâk aruangin lungpui ro chungah a leih ta zâwk a. 8 Phuba la tûra thinurna a lo thawh theih nân vur lovin a thisen chhuah chu lungpui ro chungah ka leih a ni.” 9 “ ‘Chuvângin, LALPA PATHIAN chuan heti hian a ti a ni: “Thisen chhuah hmang khawpui chu a chung a pik e! Keimah ngeiin ka chhep hluah ang. 10 Thing chhep ṭeuh ula, mei tuah sa ula, sa te chu chhûm hmin kawi ula, sa tui chu ngâ takin, a ruhte pawh kâng ral rawh se. 11 Tichuan, bêl chu a ruakin meivâm chungah chhuan ni reng sela, a lo sa ang a, a dâr chu a lo ling ang a, a bawlhhlawhna chu a lo tui ral ang a, a kâng khir chu a kan ral theih nân. 12 Ning khawpa beih pawhin a kâng khir chu a fai chuang lo va, mei pawhin a kâng fai hek lo. 13 I bawlhhlawhna chu hurna a ni a, ka thian chia, i fai chuan loh avângin, i chungah ka thinurna ka hrîkthlâk vek hma loh chuan, eng tikah mah i bawlhhlawhna ata chu tlen fai i ni tawh lo vang. 14 Kei LALPA hian ka sawi tawh a ni, a lo thleng ngei ang, keiin ka ti dâwn si a, ka hnungtawlh lo vang a, ka zuah hek lo vang a, ka inlamlêt hek lo vang; i awm dânte leh i thiltih ang zêlin ro ka rêlsak ang che,” tih hi LALPA PATHIAN thuchhuak a ni,’ ti rawh,” a ti a.
Zâwlnei Ezekiela nupui thih
15 Tin, LALPA thu chu ka hnênah a lo thleng leh a, 16 “Mihring fapa, ngai teh, thâwklehkhatah i mit tlaina ber chu ka lâksak ang chia, i sûn tûr a ni lo va, i ṭap tûr a ni hek lo, i mittui pawh a tla tûr a ni lo. 17 A rûk têin rûm la, mitthi sûnna rêng rêng chu nei suh ang che; i diar khim la, i pheikhawk bun la, i hmui hup suh la, mite chaw pawh ei suh ang che,” a ti a. 18 Chutichuan, zîng lamah chuan mipuite hnênah thu ka sawi a, tlai lamah chuan ka nupui a thi ta mai a; tin, a tûk zîng lamah chuan thu mi pêk ang chuan ka ti a. 19 Tin, mite chuan ka hnênah, “Hetiang i thiltihte hi kan tân eng nge a nih min hrilh dâwn lâwm ni?” an ti a. 20 Tichuan, kei chuan an hnênah, “LALPA thu ka hnênah a lo thleng a, 21 Israel chhûngte hnênah chuan sawi la, ‘LALPA PATHIAN chuan heti hian a ti a ni: Ngai rawh u, ka hmun thianghlim, in chakna chhuan ber, in mit tlaina ber, in ngainat zâwng tak chu ka tibawlhhlawh dâwn a ni; tin, in fanute, in fapate, hnung lama in kalsante chu khandaihin an tlu ang. 22 Ka tih ang chiah hian in ti ve dâwn a ni; in hmui in hup lo vang a, mite chaw in ei hek lo vang. 23 In diarte in khim ang a, in pheikhawk pawh in bun ang; in sûn lo vang a, in ṭap hek lo vang; in khawlohnaahte chuan in thâmral ang a, in inṭah tawn ang. 24 Hetiangin Ezekiela hi in tân entîrna a ni ang a, a tih zia ang zêlin in ti tûr a ni; hei hi a lo thlen hunah chuan LALPA PATHIAN chu ka ni tih in hria ang,’ a ti a ni,” ka ti a. 25 “ ‘Tin, LALPA chuan, “Nang mihring fapa, an hnên ata an chakna te, an ropui lâwmna te, an mit tlaina ber te, an lungkham ber te, an fanu leh an fapate ka lâk bosak niah chuan, 26 chumi ni ngeiah chuan a tlân chhuak chu i hnênah a lo kal ang a, a rawn hriattîr dâwn lo che em ni? 27 Chumi niah chuan tlân chhuak hnênah thu i sawi ang a, i ngawi bo mai lo vang a; tichuan, an tân entîrna i ni ang a; tin, LALPA chu ka ni tih an hria ang,” ’ ” a ti a.
Amon chungchâng hrilh lâwkna
1 Tin, LALPA thu chu ka hnênah a lo thleng a, 2 “Mihring fapa, Amon fate chu hmachhawn la, an chungchâng thu sawi rawh. 3 Tin, Amon fate hnênah chuan, ‘LALPA PATHIAN thu hi ngaithla rawh u, LALPA PATHIAN chuan heti hian a ti a ni: Ka hmun thianghlim chu tihbawlhhlawha a awma, Israel ram tihchhiata a awma, Juda chhûngte chu sala hruaia an awm lai khân, “Ihi!” i lo tih avângin, 4 ngai rawh, khawchhak lam mite hnênah an neih atân ka pe dâwn che a ni; nangmahah chuan bûk an sual ang a, bu an khuar ang; i thei rahte an ei ang a, i hnutetuite an in ang. 5 Raba khua chu sanghâwngsei inah ka siam ang a, Amon fate hmun chu ran rual bawh hmunah ka siam ang; tichuan, LALPA chu ka ni tih an hria ang. 6 LALPA PATHIAN chuan heti hian a ti si a: Israel ram chungah i kut i bena, i ke i pera, rilru zawng zawnga a chhiatna chunga i lâwm avângin, 7 ngai rawh, i chungah ka kut ka lek a, hnamte hnênah râllâk atân ka mantîr dâwn che a ni; mite lak ata ka râwt ang chia, chûng ram ata chu ka tiboral daih ang che, ka tichhia ang chia; tichuan, LALPA chu ka ni tih i hria ang,’ tiin.
Moab chungchâng hrilh lâwkna
8 “LALPA PATHIAN chuan heti hian a ti a ni: Moab leh Seir chuan, ‘Ngai rawh, Juda chhûngte chu hnam dang ang mai an ni e,’ an tih avângin, 9 Moab ramri vênna khawpuite chu râl ka beihtîr a, khawpui ropui ber Beth-jesimoth te, Baal-meon te, Kiriathaim te pawh, 10 khawchhak lam fate neih atân Amon fate nên ka pe ang a, Amon fate chu hnamte zînga hriat reng an nih tawh loh nân. 11 Moab ram chungah thurêl chu ka hlen ang a; tichuan, LALPA chu ka ni tih an hria ang,” tiin.
Edom chungchâng hrilh lâwkna
12 “LALPA PATHIAN chuan heti hian a ti a: ‘Edom chuan Juda chhûngte chungah phuba lain nasa takin thil a lo tisual a ni, ama thu maia an chunga phuba a lâk avângin. 13 Chuvângin, LALPA PATHIAN chuan heti hian a ti e: Edom chungah ka kut ka lek ang a, a lak ata mi leh sate ka râwt bo vek ang; Teman aṭangin ka tiṭiau ang a, Dedan thlengin khandaihin an thi ang. 14 Tin, ka mi Israel-te kutin ka phuba lâkna chu ka thlen ang a, Edom chungah chuan ka thinurna ang zêl leh ka thinrimna ang zêlin an ti ang a, ka phuba lâkna chu an lo hria ang,’ ” tih hi LALPA PATHIAN thuchhuak a ni.
Philistia chungchâng hrilh lâwkna
15 “LALPA PATHIAN chuan heti hian a ti a ni: ‘Philistia miten phuba laa, kumkhaw inhmêlmâknain, mi tihboral duhna rilru chhia pua phuba an lâk avângin, 16 LALPA PATHIAN chuan heti hian a ti a ni, “Ngai rawh, Philistia mite chungah chuan ka kut ka lek ang a, Kereth khaw mite chu ka râwt vek ang a, tui kama mi la awm chhunte chu ka tiboral vek ang. 17 Tin, thinur taka zilhhauvin an chungah phuba ka la ang a, chutia an chunga ka phuba lâkna ka thlen hunah chuan LALPA chu ka ni tih an hre tawh ang,” ’ ” a ti a.
Tura chungchâng hrilh lâwkna
1 Tin, kum sâwm leh kum khatna thla ni hmasa berah chuan heti hi a ni a, LALPA thu chu ka hnênah a lo thleng a, 2 “Mihring fapa, Tura chuan Jerusalem chungthuah, ‘Ihi! Hnamte kawngkhâr chu a chhe ta, ka lamah a inhawng a, a lo tlâkran tâk vek avângin kei ka changtlung tawh ang,’ a tih avângin, 3 LALPA PATHIAN chuan heti hian a ti a ni: Ngai rawh, aw Tura, ka do che a ni; tuifinriatin a fâwn a vawrh chhoh ang maiin i chunga lo kal tûrin hnam tam takte ka rawn tîr ang. 4 Tin, Tura kulhte chu an tichhia ang a, kulhbîng sângte chu an tichim ang; an lak ata lei zawng zawng ka ziat fai lêng ang a, lungpui ro maiah ka siam ang. 5 Tuipui laia lên pho rona hmun a ni mai ang, keiman ka sawi tawh si a, tih hi LALPA PATHIAN thuchhuak a ni; tichuan, hnamte tân râllâk a ni mai ang. 6 Tin, a fanu rama awmte chu khandaiha tihhlum an ni ang a; tichuan, LALPA chu ka ni tih an hria ang. 7 “LALPA PATHIAN chuan heti hian a ti si a: Ngai rawh, Tura chungah chuan Babulon lal Nebukadnezzara, lalte lal chu hmâr lam aṭangin, sakawrte nên, sakawr chung chuang mite nên, a pâwl leh mipui tam tak mai nên ka rawn hruai dâwn a ni. 8 “ ‘I fanute an that ang, ramah, khandaihin; Kulh a siam ang, nangmah dan nân, Nangmah do nân a siam ang, mual pâwngte, I chungah ka phawsial a sîr ang. 9 Kulh sut chhiatna a siam, i kulh ṭhiat nân, I kulhbîng sâng a tichim ang, hreipuiin. 10 A sakawr tam avângin a khuh ang che, vaivutin, Khawpui chhiata mite an lût ṭhîn angin, I kawngka an luh ve hunah chuan, I kulhpui a nghîng ang- Sakawr chung chuangte thâwm leh indo tawlailîr thâwmah. 11 Sakawr rual kein a chîl chhia ang, i kawtthlêr zawng, I mite a that zo vang, khandaihin, I chakna bang sâng suar ang a chim ang. 12 I ro thil râllâkin an la ang, I bungrua zawng zawng an rawk zo vang, I kulh bang suar ang a tichim ang, I rûn in nuam an tichhe zo vang, I thing, lung, hlumte an paih ang, tuipui laiah. 13 Ka tibâng zo vang, i zai thâwmte, I ṭingṭang ri pawh a dai hlen ang. 14 Lungpui ro maiah ka siam ang che. Lên pho ronaah i lo chang ang, Din i ni leh tawh lo vang, Keimah LALPA hian ka sawi tawh si, Tih hi LALPA PATHIAN thuchhuak a ni e. 15 “ ‘LALPA PATHIAN chuan Tura khaw hnênah heti hian a sawi a: I chhûngah chuan inthahnate a awm hun a, mi hliamte an rûm hunah chuan i tlu thâwmah chuan tuipui kam ramte a nghîng dâwn lo vem ni? 16 Tuipui chunga hotute zawng zawng chu an ṭhutthlêng ata an chhuk ang a, an puan ropuite an dah ang a, an chei mawite an hlîp tawh ang; khurhnain an inthuam zâwk ang a, leiah an ṭhu ang a, an khûr an khûr ang a, mak an ti ang che. 17 Tin, nangmah sûnna hla an phuah ang a, i hnênah - “ ‘Khawpui hmingthang, tuipui chunga chak, Tui thiam mite hlîr chên ṭhinna chu, Amah leh a chhûnga chêngte zawng zawng, Mi veivâkten an ṭih ṭhin che nên, I chhiatna chu a va nasa êm! 18 I tlûkna niah an nghîng, thliarkârte, Tuipui thliarkâr an zâm ang, i bo niah,’ an ti ang,” tiin. 19 LALPA PATHIAN chuan heti hian a ti si a: “Khawpui ram, tu ma luah loh khawpui anga ka siam hunah che chuan, tui thûk takah ka tipil ang chia, tui nasa takin a chîm ang che; 20 hmasâng mi, khur thûka kal tawhte hnênah ka tîr thla ang chia, lei hnuai lamah, hmâna ṭiau tawh khur thûka kal tawhte hnênah ka chêntîr ang chia, tu mahin an luah loh nân che leh mi nungte zînga ropuina i hmuh tawh hauh loh nân. 21 Ka tiboral daih ang chia, i awm tawh lo vang, miten zawng che mah sela, an hmu tawp lo vang che,” tih hi LALPA PATHIAN thuchhuak a ni.
Tura sûnna hla
1 LALPA thu chu ka hnênah a lo thleng a, 2 “Nang, mihring fapa, Tura khaw sûnna hla phuah la, 3 Tura khaw hnênah chuan - Aw nang, tuipui kama chêng ṭhîn, Tuipui kam ram tam takte hnêna sumdâwngtu, LALPA PATHIAN chuan heti hian a ti che a ni: Aw nang Tura, ‘Ka mawi famkim’ i ti maw! 4 I ramin tuipui lai chu a chhun e, I siamtuten an timawi chungchuang ngei che; 5 I thing hmanrua Senir fârin an siam e, I lawng ngul atân an la, Lebanon thingril. 6 Basan sasua i vaichaah an siam e, Saingho chhûngphûm i lawng chhuatah Tufâr thing, Tuipui ram Kittim ata chu. 7 I lawng puanzâr Aigupta nêmte puan ṭial, Nangmah chhinchhiah nân a lo chuang e, I tân hliapzâr dumpâwl, senduk, Elisa tui kam ram ata chu. 8 I lawng kartu Zidon, Arvad mi an ni, I lawng khalhtute zawng chu, aw Tura, I mi fingte an ni e. 9 Gebal upa leh mi themthiam, I lawng tuahremtu an lo ni e, Tuipui lawng zawng leh a miten, Nangmah dâwrin an pan che. 10 I râl tu mi i sipai rual, Persia, Lud, Put an ni; An sialphâw leh an dâr lukhum an bâng a, Nangmah cheimawitu an lo ni e. 11 I sipai rual Arvad mi nên an chuang, i kulhpui chungah, I kulhbîng Gammad-ho râl vêngin, An sialphaw an bâng e, i kulhpui vêlin, Nangmah cheimawitu an lo ni e. 12 I ngah vângin, sum leh pai ro thil tinrêng, Tarsis chu dâwrtu che a lo ni a, I bungrua leiin a hlân che Tangkarua, thîr, rângva leh suante pawh. 13 Javan, Tubal, Mesek, nang dâwrtu che hian, Sal leh dâr bungbêlin an dâwr che, i bungraw neih nân. 14 Beth-togarma chuan sakawr, indo sakawr leh sabengtung hlânin I bungrua an lei ṭhîn. 15 Dedan mite i dâwrtute an ni a, Tui kam hmun tin i sumdâwn hmun a lo ni, Saingho leh eboni an hlân che - dawvânkai nân. 16 Bungrua i ngah avângin, Edom chu i dâwrtu a lo ni a, Emerald lung, puansenduk, puan cheimawi, Puanzaisîn, ṭhival, rubi lungtein an dâwr che. 17 Juda leh Israel-te pawh a dâwrtu che an ni a, Minith buh leh Pannag, khawizû, Hriak leh thing hnaiin an dâwr che. 18 I ngah vângin sum leh pai ro thil tinrêng, Damaska i dâwrtu a lo ni a, Helbon uain leh berâm hmul vârin an dâwr che. 19 Uzal uain chu rawn lain an lei, i bungruate, Thîr tle tak, thakthîng leh fûte i sumdâwnna. 20 Sakawr chung phah puantein Dedan chuan a dâwr che a. 21 Arabia leh Kedar lalte nangmah dâwrtute an ni vek, Berâmnote, berâmpate, kêlpatein an dâwr che. 22 Seba leh Raama sumdâwngtute chu a dâwrtu che an lo ni; Rimtui ṭha berte, lunghlu chi tin leh rangkachaktein an dâwr che. 23 Haran, Kanne leh Eden, Seba, Assuria leh Kilmad sumdâwngtute chu A dâwrtu che an ni a. 24 Chûngte chu an ni, dâwrtu che, Silhfên ṭha mi, puan dumpâwl leh puan cheimawi, Chhuatphah ze mawi nên, Hruihrual nghet taka cherin, Hêng hian an dâwr che. 25 Tarsis lawngte chu i bungraw phur dual dualtute an ni, I lo mukin tuipui chungah i lo ropui ta. 26 I lawng khalhtun tuipui fâwnah a khalh lût chia, Khawchhak thlîin a nuai ral che, tuipui laiah. 27 I sum leh pai, i bungruate, i sumdâwn thil, I lawng mite, lawng khalhtu, tuah remtute, I hlân vêltu leh râl tu mite, nangmaha awm, I chhûnga awm zawng zawngte nên, In pil bo vang, tuipui laiah, i chhiat niin. 28 I lawng khalhtute au thâwmah, I vêla mite an khûr e. 29 Lawng kar ngul vuantute zawng zawng, lawng mite leh, Tuipuia khalhtute zawng zawng chhukin, An ding, vau kamah. 30 I chungthuah an aw hriat thamin an chhuah ang, Lungchhe takin an ṭap ang a, An lûah vaivutte phulin, an tâl ang, vut zîngah. 31 Nangmah vânga inziat kâwngin, an fêng ang, saiip puan, Lungchhe vânkaia ṭapin an sûn ang che, nasa takin. 32 Nangmah sûnin an chham ang, an ṭah hla, Tu nge Tura ang awm le - Tuipui laia dairial chang ta hi? 33 I bungruate tuipuia chhuakin, Mi tam tak a hrai tlai ṭhîn, Lei lalte zawng i tihausa, I sum leh pai tam, i bungruain. 34 Tuipui thûkah i chhiat ni khân, I sumdâwn thil, i mi zawng zawng, Rial ang an ral ta, nangmah nênin. 35 Tui kam mi zawng zawngin râpthlâk an ti che, An lalte lah hlauvin an thlabâr, An sakhmêl pawh a dang zo ve. 36 Mite zînga sumdâwngtuten an chek khum che, Mi tân ṭihkhaiah i lo chang ta, I lang leh tawh ngai lo vang le, Tiin an ṭah khum che.”
Tura lal chungchâng hrilh lâwkna
1 LALPA Pathian thu chu ka hnênah a lo thleng leh a, 2 “Mihring fapa, Tura hotu hnênah chuan sawi la, ‘LALPA PATHIAN chuan heti hian a ti: I rilru a chapo va - Pathian ka ni a, tuipui laia pathian ṭhuthmunah ka ṭhu - i ti a; mahse, mihring mai i ni a, pathian i ni lo va, pathian rilru ang puah inngai mah la. 3 Daniela aiin i fing zâwk a, i lakah thurûk rêng rêng a awm thei lo va, 4 i fin leh i remhriatnain i lo intihausa a, i ro bâwmah tangkarua leh rangkachak i khung a, 5 i finna nasa tak leh i sumdâwnnain sum i tipung a, i hausak êm avângin i rilru a lo chapo ta a; 6 chuvângin, LALPA PATHIAN chuan heti hian a ti: Pathian rilru ang pua i inngaih avângin, 7 ngai rawh, awze mi, hnam ṭihbaiawm tak i hnênah ka rawn tîr dâwn a ni; i finna rah mawi chungah an khandaih an vilik ang a, i ropuina an tikhawlo vang. 8 Khur thûkah an tîr lût ang chia, tuipui laia an thahte thihin i thi ang. 9 A thattu che hmaah chuan, “Pathian ka ni,” i la ti cheu dâwn em ni? A hliamtu che kutah chuan pathian i ni lo va, mihring mai i ni zâwk. 10 Awze mite kutah serh tan loh thihin i thi ang; ka ṭawng tawh si a,’ tih hi LALPA PATHIAN thuchhuak a ni.”
Tura lal tlâwm tûr thu
11 Chu lo pawh chu LALPA thu chu ka hnênah a lo thleng a, 12 “Mihring fapa, Tura lal sûnna hla phuah la, a hnênah, ‘Heti hian LALPA PATHIAN-in a ti: “Ṭha famkim tak, finnaa khat, mawina tinrêng! 13 Pathian huan Eden-ah i chêng; Lunghlu tinrêng i inbel a, Sardion, topaz lung leh diamond, Berul, onuks, jaspi, sapphir, smarakdin, karbankul, A phûm nghehna leh a ziak mawina rangkachaka siamte, Nangmah siam nia buatsaih tawhte chu. 14 Nang chu vêngtu cherub hriak thih i ni; Pathian tlâng thianghlimah ka awmtîr chia, Mei vâm iang lung zîngah i lêng. 15 I ṭha famkim, siama i awm ni ata, nangmaha khawlohna a awm hma rêng zawng. 16 I sumdâwnna a pung tual tual, A tikhat che, pâwngnêkin, Sualah i lo tlu e, Pathian tlâng hnâwmhnean ka hnâwl che, Vêngtu cherub-in a hnawt chhuak che, Mei vâm iang lung zîng ata. 17 I mawina vânga lo chapovin, I ropuinain i finna tikhawlovin, Leiah ka paih chia, Lalte hmaah mualah ka pho che, ennawmah. 18 I sumdâwn fel lohnateah, i khawlohna avângin, I hmun thianghlimte i tibawrhbâng a; Chuvângin, mei ka chhuah, i chhûng ata, A kâng ral che, leiah vaivutah ka chantîr che; A hmu ṭhîn che zawng zawng hmuhan. 19 Mite zînga a hria apiang che mak tihan. Ṭihkhaiah i lo chang ta, I awm ngai rêng rêng tawh lo vang le,” ’ ” tiin.
Sidon chungchâng hrilh lâwkna
20 Tin, LALPA thu chu ka hnênah a lo thleng a, 21 “Mihring fapa, Sidon hmachhawn la, a chung thu sawi rawh. 22 ‘Heti hian LALPA PATHIAN chuan a ti: “Ka dodâl che a ni, aw Sidon; Ka tilang ang, ka ropuina, nangmahah; LALPA ka nihzia an hria ang a, Amahah ro ka rêl hunah chuan, Ka entîr ngei ang, ka thianghlimna. 23 A kawtthlêrah thisen leh hripui ka thlen ang, A chhûngah hliam an tlu ang a, Hmun tin kil tin ata chemsenin; Tin, LALPA ka ni tih an hria ang.
Israel chu a hamṭha ang
24 “ ‘ “Tichuan, Israel chhûngte tân chhuntu tûr hnimhlîngnei a awm lo vang a, a vêla anmahni hmusittute zîngah tinatu tûr hlîng a awm tawh lo vang; tin, kei hi LALPA PATHIAN ka ni tih an hria ang.” 25 “ ‘Heti hian LALPA PATHIAN chuan a ti a ni: “Israel chhûngte chu an darhna ram mite zîng ata ka hruai khâwm leh hunah, hnamte mit hmuhah anmahniah ka thianghlimna ka entîr hunah chuan, Jakoba hnêna ka pêk, an ram ngeiah chuan an chêng tawh ang. 26 Tichuan, him takin an awm tawh ang; a ni, inte an sa ang a, grêp huante an siam ang a, him takin an awm ang, an vêla hmusittu zawng zawngte chunga ro ka rêl hunah chuan, kei hi LALPA an Pathian chu ka ni tih an hria ang,” ’ ” tiin.
Aigupta chungchâng hrilh lâwkna
1 Kum sâwmna, thla sâwmna, chumi thla ni sâwm leh ni hnihnaah chuan LALPA thu ka hnênah a lo thleng a, 2 “Mihring fapa, Aigupta lal Pharaoa hmachhawn la, a chungah leh Aigupta mi zawng zawng chungah thu sawi rawh. 3 Sawi la, ‘LALPA PATHIAN chuan heti hian a ti a ni: Ngai rawh, Aigupta lal Pharaoa, luipuite laia awlepui ropui tak, Ka luipui hi ka ta a ni, keimah ngeia tân ka siam a ni,’ titu, ka do che a ni. 4 I khabeahte nghakuaiin ka man ang chia, luipuia sanghate chu i phuhlipah ka tibet ang a, luipui lai ata i phuhlipah sangha zawng zawngte nên chuan ka pawt chhuak ang che. 5 Tin, thlalêrah ka paih ang chia, nang leh i luipuia sangha zawng zawngte pawh; tâmlakah i tla ang a, i ruang hlâwm a ni lo vang a, phûm i ni hek lo vang; ram sakawlhte leh chunglêng savate hnênah chaw atân ka pe ang che. 6 Israel chhûngte tân luang tiang mai an lo nih tâk avângin, Aigupta rama chêng zawng zawngte chuan kei hi LALPA ka ni tih an hria ang. 7 Kutin an vawn chein i lo tliak a, an kokîah i chhun thlêr a; an rinchhan chia, i tliak a, an kâwngte chu a sai dawt dawt a. 8 “Chuvângin, LALPA PATHIAN chuan heti hian a ti: Ngai rawh, i chungah khandaih ka rawn thlen ang a, i lak ata mi leh sa ka râwt bo vek ang. 9 Tin, Aigupta ram chu ram ṭiau leh khaw ram a ni mai ang a, kei hi LALPA ka ni tih an hria ang, ‘Luipui hi ka ta a ni a, ka siam a ni,’ a tih avângin. 10 Chuvângin, ka do chia, i luipui pawh; Suene kulh aṭangin Ethiopia ramri thlengin Aigupta ram chu ram ṭiau leh khaw ramah ka siam ang. 11 Mihring kein a chîl ngai lo vang a, sate pawh an kal ngai hek lo vang; kum sawmli chhûng pawhin luahin a awm hek lo vang. 12 Tin, Aigupta ram chu ram ṭiaute zînga pakhatah ka siam ang a, a khawpuite chu khawpui ramte zîngah kum sawmli a ṭiau vang; Aigupta mite chu hnamte zîngah ka tidarh ang a, ram tinah ka tidarh ang. 13 “LALPA PATHIAN chuan heti hian a ti si a: ‘Kum sawmli hnuah chuan an darhna mite lakah chuan Aigupta mite chu ka khâwm leh ang. 14 Aigupta mite awm dân ka let ang a, an pianna ram, Pathros ramah ka kîrtîr ang; tin, tah chuan tlâwm takin an lal ang. 15 Lalna ram tlâwm ber a ni ang, hnamte zîngah a intilal tawh hek lo vang; hnam dang chunga thu a neih tawh loh nân anmahni ka titê dâwn a ni. 16 An lam hawi apiangin an khawlohna an hriat chhuah ṭhin avângin, Israel-te rin pui an ni tawh lo vang; tin, LALPA PATHIAN chu ka ni tih an hria ang, a ti,’ ti rawh,” tiin.
Lal Nebukadnezzaran Aigupta a la ang
17 Tin, heti hi a ni a, kum sawmhnih leh kum sarihna, thla khatna, chumi thla ni khat niah chuan LALPA thu chu ka hnênah a lo thleng a, 18 “Mihring fapa, Babulon lal Nebukadnezzara chuan Tura chungah hna ropui tak thawk tûrin a sipai rual chu a ti a, mi tin chhîpte chuan a kawlh phah a, mi kokîin a pilh phah bawk a; mahse, amah leh a sipai rualte pawhin an hnathawhah chuan Tura lakah hlâwkna eng mah an hmu chuang lo. 19 Chuvângin, LALPA PATHIAN chuan heti hian a ti a ni: ‘Ngai rawh, Aigupta ram chu Babulon lal Nebukadnezzara hnênah ka pe dâwn a, a thil ngah rei ruite chu a la bo vang a, a rawk ang a, râllâkah a lâksak ang; chu chu a sipai rualte hlawh chu a ni mai ang. 20 Ka rawng an bâwl avângin Aigupta ram hi an hlawhah ka pe a ni,’ LALPA PATHIAN chuan a ti a ni. 21 Chumi niah chuan Israel chhûngte tân kî ka chawr chhuahtîr ang a, an zîngah chuan i kâ ka ântîr ang; tichuan, LALPA chu ka ni tih an hria ang,” tiin.
LALPAN Aigupta a hrem ang
1 LALPA thu chu ka hnênah a lo thleng leh a, 2 “Mihring fapa, thu sawi la, LALPA PATHIAN chuan heti hian a ti a ni: ‘Chiau vak vak rawh u, Ehei, chu ni tak chu!’ 3 Ni a hnai e, LALPA ni chu a hnai e, Chhûm zîn ni, awze mite chhiatna tûr. 4 A lo thleng dâwn, chemsen, Aigupta chungah, Thinlai natna, Ethiopia chungah; Aigupta-ah mi thah an tlûkin, A ngah rei ruite lâksakin, a nghahchhan suar ang chim e. 5 Ethiopia, Put leh Lud, hnam tin lêng za chu, Kub leh ram fa tel vete zawng zawng, An tlu ang, chemsenin. 6 “LALPA chuan heti hian a ti: Aigupta tung dingtute pawh kha an tlu ang, a chakna chhuan ṭhin pawh chu a tlâwm ang; Migdol aṭangin Suene thlengin khandaihin an tlu vek ang, LALPA PATHIAN chuan a ti a ni. 7 Ram tihṭiau tawhte zînga pakhat a ni ang a, a khawpuite pawh chu khawpui ram tawhte zînga mi a ni mai ang. 8 Aigupta ramah mei ka chhuah a, a puitute zawng zawng ka tihchhiat hunah chuan LALPA chu ka ni tih an hria ang. 9 Chumi niah chuan Ethiopia mi inring lohote tizâm tûrin ka hnên ata mi tirh lawngin an kal ang a; tin, Aigupta ni ang bawkin thinlung manganna tak an chungah a thleng ve ang; ngai rawh, a lo thleng mêk e! 10 “LALPA PATHIAN chuan heti hian a ti a ni: Babulon lal Nebukadnezzara kutin Aigupta thil ngah rei ruite chu ka tibo vang. 11 Ram tichhe tûrin amah leh a hote, hnamte zînga ṭihbaiawm takte chu hruai thlen an ni ang, Aigupta chungah an khandaih an lek ang a, ram chu mi ruangin an tikhat ang. 12 Tin, luipuite chu ka tikang ang a, ram chu mi sualte hnênah ka hralh ang; a ram leh a chhûnga awm zawng zawng chu awze mite kutin ka tiṭiau vang. Kei LALPA hian ka sawi tawh a ni. 13 “LALPA PATHIAN chuan heti hian a ti a ni: Milimte chu ka tichhia ang a, Noph khua ata milimte ka tibo vang, Aigupta-ah hotu rêng rêng an awm tawh lo vang; tin, Aigupta ramah chuan hlauhna ka awmtîr ang. 14 “Pathros chu ka tiṭiau vang a, Zoan-ah chuan mei ka chhuah ang a, No khuaah chuan ka hlen ang. 15 Tin, Aigupta kulh Sin khaw chungah ka thinrim ka hrithla ang a, No khuaa mipuite chu ka râwt bo vang. 16 Tin, Aigupta-ah chuan mei ka chhuah ang a, Sin khua chu mangang takin a awm ang a, No khua pawh a chim vek ang; Noph khua chuan chhûnah hmêlma a nei fo vang. 17 Aven leh Pi-beseth khaw tlangvâlte chu khandaihin an tlu ang a, chûng khuate chu sala hruaiin an awm ang. 18 Aigupta nghâwngkawl ka tihtliaha, a chakna a chapopui ṭhin ka tihtâwp hunah chuan, Tehaphnehes khuaah chuan ni a thim ang; amah zawng chhûmin a hliah ang a, a fanute chu sala hruaiin an awm ang. 19 Hetiang hian Aigupta ramah thu ka hlen ang; tichuan, kei hi LALPA ka ni tih an hria ang,” tiin. 20 Tin, heti hi a ni a, kum sâwm leh kum khatna, thla khatna, chumi thla ni sarih niah chuan LALPA thu chu ka hnênah a lo thleng a, 21 “Mihring fapa, Aigupta lal Pharaoa bân chu ka titliak a; tin, ngai rawh, khandaih keng tûra a chak leh nân damdawi hnawih leh tuam a hlawh lo. 22 Chuvângin, LALPA PATHIAN chuan heti hian a ti a ni: ‘Ngai rawh, Aigupta lal Pharaoa chu ka do a ni; a bân ṭha lam leh a tliak tawh hnu lam pawh chu ka titliak ang a; tin, a kut ata khandaih chu ka titla ang. 23 Tin, Aigupta mite chu hnamte zîngah ka tidarh ang a, ram tinah ka tiphirsî vek ang. 24 Tin, Babulon lal bânte chu ka tichak ang a, a kutah khandaih ka kentîr ang a; Pharaoa bânte erawh chu ka titliak ang a, a hmaah chuan thihpui khawp hliam rûmin a rûm ang. 25 Tin, Babulon lal bânte chu ka tichak ang a, Pharaoa bânte erawh chu a uai thla ang; tin, Babulon lal kutah ka khandaih ka kentîr a, Aigupta lal chunga a lek hunah chuan kei hi LALPA ka ni tih an hria ang. 26 Tin, Aigupta mite chu hnamte zîngah ka tidarh ang a, ram tinah ka tiphirsî vek ang a; tin, LALPA chu ka ni tih an hria ang,’ ” tiin.
Aigupta chu sidar thing nên tehkhin a ni
1 Tin, heti hi a ni a, kum sâwm leh kum khatna, thla thumna, chumi thla ni khat niah chuan LALPA thu chu ka hnênah a lo thleng a, 2 “Mihring fapa, Aigupta lal Pharaoa leh a khua leh a mite hnênah sawi la: ‘Ropuinaah tu nge i an le? 3 Ngai rawh, Lebanon zâr mawi leh Buk, hlim chhah, sâng mawi, A zîk chhûm kâra lêng i iang e. 4 Siktui thiang châwm, lipui siama ṭhang tual tual, A phunna luiten an luan vêl a, Ram thing tin châwm nân a luantîr e. 5 Chutin ram thing zawng hnehin a sâng zual e, A zâr a ṭhang, a ṭang a sei, Tui tam tak châwm, hnianghnârin. 6 Bu an khuar e, a zârah, chunglêngten, A zâr hnuaiah sa tinrêngin no an nei, A hlim hnuaiah hnam ropui zawng an chêng e. 7 Chutin a mawi, a ropuina, a zâr sei zêlin, A zung tân tui zawng a hnianghnâr e. 8 Pathian huana sidar thingten an chhîng lo ve, A zâr fâr thingin a iang zo lo, A ṭang pawh thingsiain a iang hek lo, A mawinaah Pathian thing a chhîng zo ve. 9 A ṭang titamin ka siam mawi a, Pathian huana Eden thing zawngten an îtsîk e,’ tiin. 10 “Chuvângin, LALPA PATHIAN chuan heti hian a ti a ni: ‘A lo sân êm êma, chhûmte zînga a zîk a lêna, a thinlungin a sânzia chu a chapopui avângin, 11 hnamte zînga mi chak tak kutah ka mantîr ang; a suahsualzia ang zêlin a hrem ang a, ka hnawt chhuak ang. 12 Tin, awze mi hnamte zînga ṭihbaiawm takte chuan an kit ang a, an hluihlâwn ang: tlângahte, ruamahte a ṭang a tla rem rum ang a, chu ram tuiluankawr zawng zawngahte a zârte chu a tliak rem rum ang; khawvêl mi zawng zawngte chu a hlim ata an chhuak ang a, amah chu an kalsan ang. 13 A chhiatnaah chuan chunglêng sava zawng zawngte an chêng ang a, a ṭang chungahte chuan ramsate an awm ang. 14 Hêng hi tuia châwm thing zawng zawng an intihsân lohva, an zîk chhûm kâra lêng lova, tuia châwm thing rêng rêngin an sânzia an chhuan hek lohna tûr a ni; lei hmun hnuaihnung bera khuarkhuruma chhuk ta mihring fate zînga kal tûrin, thihnaa mantîr an ni vek tawh si a.’ 15 “LALPA PATHIAN chuan heti hian a ti a ni: ‘Seol-a a chhuk niah chuan tui thûk tak chu amah ka sûntîr a, a luite ka chawlhtîr a, tui tam takte chu an luang lo va; Lebanon amah ka sûntîr bawk a, ram thing zawng zawngte amah avângin an chau zo ta. 16 Hnamte pawh a tlu thâwmah chuan ka tikhûr a, khuarkhuruma chhuk tawhte hnêna Seol-a ka paihthlâk ni chuan; Eden thing zawng zawngte, Lebanon-a thing ṭha ṭhate, tuia châwm zawng zawngte chu lei hnuaihnung berah chuan thlamuanin an awm ta. 17 Khandaiha thahte hnênah chuan Seol-ah an chhuk ta bawk a; a ni, hnamte zînga a hlim hnuaia chêng ṭhîn, a kutkete ngei pawh chu. 18 Eden thingte zîngah ropuina leh lennaah tu nge nang ang awm? Mahse, Eden thingte nên chuan lei hmun hnuaihnung berah paihthlâk i ni ang; khandaiha thah, serh tan lohte zîngah i mu tûr a ni. Hei hi Pharaoa leh a khua leh tuite chu an ni,’ tih hi LALPA PATHIAN thuchhuak a ni.”
1 Tin, heti hi a ni a, kum sâwm leh kum hnihna, thla sâwm leh thla hnihna, chumi thla ni khat niah chuan LALPA thu chu ka hnênah a lo thleng a, 2 “Mihring fapa, Aigupta lal Pharaoa sûnna hla phuah la, a hnênah: Hnamte zînga sakeibaknei vânglai anpui chu! Tuipui awlepui i iang zâwk e; I hnâra tuite tiphuanin, i kein i chawk nû, I luite i tibawlhhlawh zo ta. 3 LALPA PATHIAN chuan heti hian a ti: Ka lênin ka khuh ang chia, mi tam tak nên, Ka lênin an man ngei ang che. 4 Ka hluihlâwn ang chia, khawmualah, Ka paih ang che, tâmlakah; Chunglêng zawng zawng ka ko khâwm ang, i chungah, Ka titlai ang lei pum pui ramsa, nangmahin. 5 Tlâng tinah i sa ka hlui ang a, I ruangin ruamte a khat ang. 6 I chênna ram tlâng thlengin ka bual ang, i thisenin. Kawr tin a khat bawk ang, nangmahin. 7 Ka tihchimih hunah che chuan, Vân ka khuhin arsi ka tithim ang, Ni ka hliah bo vang, chhûmin, Thlain a êng a chhuah lo vang. 8 Vân êng zawng ka tithim ang, i chungah, I ramah thim ka lêntîr ang, Tih hi LALPA PATHIAN thuchhuak a ni,” ti rawh. 9 I hriat loh rama hnamte zînga i chhiatna ka thlen hunah chuan mi tam takte thinlung ka tichi-ai ang. 10 A ni, mi tam tak nangmahah mak tiin ka siam ang a, an hmaa ka khandaih ka vilik hunah chuan, nangmah avângin an lalte pawhin râpthlâk an tiin an hlau êm êm ang; i tlûk niah chuan mi tinin an nun chân hlauvin an khûr an khûr ang. 11 LALPA PATHIAN chuan heti hian a ti si a: Babulon lal khandaih i chungah a lo thleng dâwn. 12 I mite ka tlûktîr ang, râlhrât mite khandaih, Hnamte zînga ṭihbaiawm berte an ni, An tichhia ang. Aigupta mite ropuina, A mipui zawngte an boral ang. 13 Tui tam tak kam ramsa zawng a tiboral ang, Mî kete chuan a pal nu tawh lo vang a, Ramsa kete pawhin a pal nu tawh hek lo vang. 14 Chutin tui ka tifîm ang a, Ka luantîr ang, luite chu, hriak angin, Tih hi LALPA PATHIAN thuchhuak a ni. 15 Aigupta ram ka tihṭiau chhiata, A nghahna zawng zawngah saruakin, A chhûnga chêngte ka râwt bo hunah chuan, Kei hi LALPA ka ni tih an hre ngei ang. 16 “Hei hi an ṭah hla tûr chu a ni; hnam tin fanuten hei hian ṭapin Aigupta leh a mi zawng zawngte an sûn ang,” tih hi LALPA PATHIAN thuchhuak a ni.
Aigupta lal chu awlê nên tehkhin a ni
17 Tin, heti hi a ni a, kum sâwm leh kum hnihna, chumi thla ni sâwm leh panga niah chuan LALPA thu chu ka hnênah a lo thleng a, 18 “Mihring fapa, Aigupta mipuite chu ṭah vak vak la, amah leh hnam hmingthang tak fanute chu, khuarkhuruma chhuk tawhte hnênah, lei hnuaihnung lamah chuan paih thla rawh. 19 “Mawinaah tu nge i khûm le? Chhuk la, serh tan lohte zîngah chuan zâl rawh. 20 “Khandaiha thah tawhte zîngah chuan an tlu ang a, khandaih hnênah pêk an ni tawh a, amah leh a mi zawng zawngte chu hnûk bo rawh u. 21 Seol-a awm râlhrât mi chak takte chuan amah leh a ṭanpuitute an bia ang; an chhuak a, an mu reng a, khandaiha thah, serh tan lohte chu. 22 Chutah chuan Assur leh a hote zawng zawng an awm a, an thlânte chu ama vêlah a awm a, an zain thah, khandaiha tlu vek an ni. 23 An thlânte chu khuarkhurum thûk berah a awm a, a thlân vêlah chuan a hote an awm a; an zain khandaiha thah vek an ni a, mi nung ram tirâlṭitute an ni. 24 “Chutah chuan Elam leh a thlân vêlah a hote an awm a, an zain thah, khandaiha tlu, lei hnuaihnunga serh tan lohva chhuk, mi nung ram tirâlṭitute, an mualphona khuarkhuruma chhukpuitute an ni a. 25 Mi thahte zîngah amah leh a hote mutna an siamsak a, an thlânte chu ama vêlah a awm a, an zain serh tan loh, khandaiha thah an ni; an hlauhawmna chu mi nung ram râlṭitna a ni ṭhîn a, khuarkhuruma chhuk tate nên chuan an mualphona an phur a, mi thahte zîngah chuan an awmtîr a. 26 “Chutah chuan Mesek leh Tubal, an hote nên an awm a, an thlânte chu ama vêlah a awm a, an zain serh tan loh, khandaiha thah an ni a; an hlauhawmnain mi nung ram a tirâlṭi ṭhîn si a. 27 Serh tan loh, mi chak tlute, indo hriamhrei nêna Seol-a chhuk tate, an khandaih lukhama, an ruhte chunga an phawte awm hnênah chuan an mu lo vang; anni zawng mi nung rama mi chak tirâlṭitute an ni si a. 28 Nang chu serh tan lohte zîngah bung rem rumin i awm ang a, khandaiha thite hnênah i mu ang. 29 Chutah chuan Edom, a lalte leh a hotute zawng zawng an awm a; an chak teh na a, khandaiha thahte zîngah an zalh a ni; serh tan loh, khuarkhuruma chhuk tawhte hnênah an mu a. 30 Chutah chuan hmâr lam hotute, an vaiin, Sidon mi zawng zawng, thahte zînga chhuk tawhte chu an awm a, an chaknain mi a tirâlṭi ṭhîn na a, an zak a, serh tan lohvin, khandaiha thahte zîngah an mu a, khuarkhuruma chhuk tawhte nên chuan an mualpho tlâng ta a ni. 31 “Pharaoa chuan a lo hmu ang a, a mite zawng zawng chu a thlamuan phah ang, Pharaoa leh a sipai rual zawng zawng, khandaiha thahte ngei pawh chu, tih hi LALPA PATHIAN thuchhuak a ni. 32 Mi nung ramah chuan râlṭitna ka lêntîr a, serh tan loh, khandaiha thahte zîngah a mu ang, Pharaoa leh a mi zawng zawngte ngei chu, tih hi LALPA PATHIAN thuchhuak a ni.”
Pathianin Ezekiela chu râl vêngtuah a siam
1 Tin, LALPA thu chu ka hnênah a lo thleng a, 2 “Mihring fapa, i hnam fate hnênah chuan thu sawi la, an hnênah, ‘Ram chunga khandaih chu ka rawn thlen chuan, ram mite chuan an zîng ata mi pakhat an thlan chhuaha, enthlatua an dah chuan, 3 anin ram chunga khandaih lo thleng a hmuh chuan tawtawrâwt a hâm ang a, mipuite chu a inrâlrintîr ang; 4 tichuan, tu pawh tawtawrâwt ri hriaa pawisa lotu chu, khandaih lo thlengin boral phah ta mah sela, a thisen mawh chu amah ngeiin a phur tûr a ni. 5 Tawtawrâwt ri a hriata a pawisak loh avângin a thisen mawh chu a phur mai tûr a ni. A lo pawisak erawh chuan a nun a humhim dâwn a ni. 6 Amaherawhchu, enthlatu chuan khandaih lo thleng chu a hmuha, a tawtawrâwt a ham lohva, mipuite chu an inrâlrin lohva, khandaih chu a lo thlena, an zînga mi tu emawin a boral phah chuan, a khawlohnain a boral a ni ang a, a thisen phuba chu enthlatu lakah ka la ang,’ ti rawh. 7 Chutiang chuan nang, mihring fapa, Israel chhûngte tân enthlatuah ka siam che a ni; chuvângin, ka kaa thu chhuak hi ngaithla la, ka hnên ata inrâlrinna tûr thu chu an hnênah hrilh rawh. 8 Mi suaksual hnênah chuan, ‘Aw mi suaksualpa, i thi ngei tûr a ni,’ ka tihin, mi suaksual chu a awm dân kalsan tûra i hrilh loh chuan, mi suaksual chu a khawlohnaah a thi ang a, a thisen phuba erawh chu i lakah ka la ang. 9 Amaherawhchu, mi sual chu a awm dân kalsan tûra i hrilha, a awm dân a kalsan si loh chuan, a khawlohnaah a thi ang a, nang erawh chuan i nun i humhim a ni ang.
Mahni mawhphurhna
10 “Tin, mihring fapa, nangin Israel chhûngte hnênah thu sawi la, ‘Hetiang hian in ti a, kan bawhchhiatnate leh kan sualnate chuan min delh a, chûng avâng chuan ka rîral a ni, engtin nge kan nun theih rêng ang?’ in ti a. 11 An hnênah chuan, ‘A nuna ka nun chhûng chu, mi suaksual thihnaah hian lâwmna rêng ka nei lo va, mi suaksualin a awm dân a kalsana, a nun hi ka lawm zâwng a ni zâwk. In awm dân ṭha lo aṭang chuan kîr ru, kîr ru! Aw, Israel chhûngte u, engah nge in thih ang le, tih hi LALPA PATHIAN thuchhuak a ni,’ tiin sawi rawh. 12 Tin, nang, mihring fapa, i hnam fate hnênah chuan sawi la, ‘Mi fel felna chuan a bawhchhiatna niah chuan amah chu a chhanhim lo vang a, mi suaksual sualna pawhin a suahsualna a hawisan niah chuan a titlu lo vang a, mi fel lah chu a sualna niah chuan a felnain a nung thei bîk hek lo vang.’ 13 Mi fel hnênah chuan, ‘I nung ngei ang,’ tih ka sawiin, a felna ringa thil a tihsual chuan a thil fel tih pakhat mah hriat reng a ni lo vang; a thil lo tihsualnaah chuan a thi zâwk ang. 14 Tin, mi sual hnênah, ‘I thi ngei ang,’ ka tih leh thungin, a sualnate a hawisana a thiang leh a dik a lo tiha, 15 mi sual chuan mi dahkhamte a pêk kîra, a thil rûkte a pêk leha, nunna dânte a zawha, khawlohna eng mah a tih loh chuan a nung ngei ang a, a thi lo vang. 16 Sualna a lo tih tâk eng mah kha hriat reng a ni tawh lo vang a, a thiang leh a dik chu a lo ti tawh a, a nung ngei ang. 17 Mahse, i hnam fate chuan, ‘LALPA thiltih dân hi a rual lo ve,’ an tihin, anmahni tih dân a fel lo zâwk a ni si a. 18 Mi fel chuan a felna a hawisana, thil sual a lo tih chuan, chumi avâng chuan a thi mai ang. 19 Tin, mi sualin a sualna a hawisana, a thiang leh a dik chu a tih chuan, chumi zârah chuan a nung ang. 20 Mahse, ‘LALPA tih dân hi a rual lo ve,’ in ti a. Aw, Israel chhûngte u, mi tin mahni tih dân ang zêlin ka rêlsak ang che u,” a ti a.
Jerusalem chhiat thu lo thleng
21 Tin, heti hi a ni a, kan sal tân kum sâwm leh kum hnihna, thla sâwmna, chumi thla ni nga niah chuan Jerusalem ata tlân chhuak mi pakhat ka hnênah a lo kal a, “Khawpui chu hneh a ni ta,” a rawn ti a. 22 Tin, chu mi tlân chhuak chu a lo kal hma tlai lamah chuan LALPA chuan ka chungah a kut a nghat a, zîng lama ka hnêna a lo kal chuan ka kâ mi lo ântîr hman a; tichuan, ka kâ chu ka âng a, ṭawng thei lovin ka awm ta lo.
Mipui sualna
23 Tin, LALPA thu chu ka hnênah a lo thleng a, 24 “Mihring fapa, Israel rama hmun ram tawh hnua awmte chuan, ‘Abrahama chu pakhat a ni a, ram chu a luah a, keini erawh chu tam tak kan ni a; ram chu rochun tûra pêk a ni tawh ang chu,’ tiin a sawi a. 25 Chuvângin, an hnênah chuan, ‘LALPA PATHIAN chuan heti hian a ti: “Sa thisen in ei a, in milimte lamah in mitte in lên chho va, thisen in chhuah a, nangnin ram chu in chang ang maw? 26 In khandaih in ring a, thil tenawm in ti a, mi tinin ṭhenawmpa nupui in tikhawlo va, nangnin ram chu in chang ang maw?”’ 27 Hetiang hian an hnênah i sawi tûr a ni, ‘LALPA PATHIAN chuan heti hian a ti a ni: “A nuna ka nun chhûng chu, hmun ram tawh hnua awmte chu khandaihin an tlu ngei ngei ang a, tâmlaka awmte chu sakawlh hnênahte ei zawh atân ka pe ang a, kulh nghet leh pûka awmte chu hripuiin an thi ang. 28 Tin, ram pawh chu ka tichhiain, râpthlâk takah ka siam ang a, a thiltihtheihna, a chapopui chu a kin tawh ang; Israel tlângte chu thlalêrah a chang ang a, tu mah an veivâk tawh lo vang. 29 Thil tenawm an tih avânga ram chu ka tihchhiata, râpthlâk taka ka siam hunah chuan kei hi LALPA ka ni tih an hria ang.”’
Zâwlnei thu a la thleng ngei dâwn
30 “Tin, nang, mihring fapa, bang bulah kawngkâahte i hnam fate chuan an sawi huai huai ang chia, mi tinin an unaute hnênah, ‘Hawh teh u khai! LALPA hnên ata thuchhuak i ngaithla ang u,’ an ti ang. 31 Tin, a hlawp hlawpin i hnênah an lo kal ang a, ka mite ang maiin i hmaah an ṭhu ang a, i thu an ngaithla ang a; mahse, an zâwm chuang lo vang; an kain hmangaihna nasa tak an tilang ang a, an thinlung erawh chuan hlêpna lam a pan ang. 32 Tin, ngai teh, nang chu an tân chuan hmangaihna hla, mawi taka sak leh tum ang i ni ang; i thute chu ngaithla mahse, an zâwm chuang lo vang. 33 Hei hi a lo thlen hunah (ngai rawh, a lo thleng mêk e), an zîngah zâwlnei a awm tih an hre dâwn nia, a ti e, ti rawh,” a ti a.
Israel berâmpute
1 Tin, LALPA thu chu ka hnênah a lo thleng a, 2 “Mihring fapa, Israel berâmpute hnenah thu sawi rawh; thu sawi la, an hnênah, ‘Berâmpute hnên ngeiah chuan, heti hian LALPA PATHIAN-in a ti a ni: “Israel berâmpu, mahni inchâwm maite chu an chung a pik e! Berâmpute chuan berâm chu an châwm lo vang em ni? 3 A thaute chu in ei a, a hmulin in inthuam a, a thau thaute chu in talh a, berâmte chu in châwm si lo. 4 Natna tuarte in tichak lo va, damlote in tidam lo va, ruh tliakte in tuam lo va, hnawh bote in hruai kîr lo va, bote in zawng hek lo; khauh tak leh na takin in thunun ta zâwk a. 5 Berâmpute an awm loh avângin tihdarhin an awm a, an darh a, ram sakawlhte chaw mai an lo ni ta a. 6 Ka berâmte chu tlâng tin leh mual tinah an vâk bo va; a ni, ka berâmte chu lei chung zawng zawngah an lo darh ta; ngaihsaktu leh zawngtu rêng an awm lo, tiin sawi rawh,” a ti a. 7 “ ‘Chuvângin, berâmpute u, LALPA thu hi ngaithla rawh u, 8 “A nuna ka nun chhûng chu,” tih hi LALPA PATHIAN thuchhuak a ni, “Berâmpu an awm lohva, berâmputen ka berâmte an zawn lohva, berâmputen ka berâmte an châwm lohva, anmahni an inchâwm zâwk avângin ka berâmte chu ram sakawlhte chaw mai an lo ni a, ka berâmte chu sa seh mai an lo ni ta ngei a.” 9 Chuvângin, nangni berâmpute u, LALPA thu hi ngaithla rawh u. 10 Heti hian LALPA PATHIAN chuan a ti a ni: “Ngai rawh u, berâmpute chu ka do a ni; an kut ata ka berâmte ka chhuh ang a, ka berâmte an enkawlna ka titâwp ang a, berâmpute pawh anmahni an inchâwm tawh hek lo vang; an ângchhûng ata ka berâmte ka la chhuak ang a, an tân ei tûr an nih tawh loh nân,” tiin.
Berâmpu ṭha
11 “ ‘Heti hian LALPA PATHIAN chuan a ti si a: “Ngai rawh u, kei, keimah ngei hian ka berâmte ka zawng ang a, ka zawng chhuak ang. 12 Berâmpuin a berâm darhte zînga a berâm rualte a zawn lai angin ka berâmte ka zawng chhuak ang; khawdur ni leh thim hnuaia an darhna zawng zawng ata ka zawng chhuak ang. 13 Tin, mite zîng ata ka la chhuak ang a, ram tin ata ka khâwm ang a, an ram ngeiah ka hruai lût ang; Israel tlângahte, tuikawr ruamahte, mi chênna hmun zawng zawngahte ka tlattîr ang. 14 Hlobet ṭha tak hmunahte ka tlattîr ang a, an huang chu Israel tlâng sângahte a awm ang. Huang ṭha tak chhûngah an bawk ang a, Israel tlâng chunga hlobet dâwng hmunahte an tla ang. 15 Keimah ngeiin ka berâmte chu ka châwm ang a, ka bawhtîr hle hle ang,” tih hi LALPA PATHIAN thuchhuak a ni. 16 “Bote chu ka zawng ang a, hnawh bote chu ka hruai kîr ang a, ruh tliakte chu ka tuam ang a, damlote chu ka tichak ang; a thau leh a chakte chu ka tibo vang a, dik takin ka châwm ang.” 17 Tin, nangni thu-ah zawng, aw ka berâm rualte u, heti hian LALPA PATHIAN chuan a ti a ni: “Ngai rawh u, ka berâmte kâr thu ka rêlsak ang a, berâmpate, kêlpate pawh. 18 Ran tlatna hmun ṭha tak chunga tlat chu in tân thil tênau anga langin, in tlatna neih chhun chu in chîl chhe mai mai zâwk a ni maw? Tin, tui fîm takte chu in in zawhin in pal nu mai mai a ni maw? 19 Ka berâmte erawh chuan in rah hnu an ei a, in pal nut hnu an in a ni.” 20 “ ‘Chuvângin, heti hian LALPA PATHIAN chuan an hnênah a ti a ni: “Ngai rawh u, kei, keimah ngei hian ran chêrte leh ran thaute kâr thu ka rêlsak ang. 21 A chak lote chu in dâr leh in pangtein in nêk a, in kîtein in pir a, in tidarh a; 22 chuvângin, ka berâmte chu ka chhanhim ang a, sa seh mai an ni tawh lo vang a, berâmte kâr thu ka rêlsak ang. 23 Tin, an chungah berâmpu pakhat ka dah ang a, ka rawngbâwltu Davida ngei chu; ani chuan anni chu a châwm ang; ani chu an vêngtu a ni ang a, anni chu a châwm ang. 24 Tin, kei LALPA hi an Pathian ka ni ang a, ka rawngbâwltu Davida chu an chunga hotu a ni ang; kei LALPA ngei hian ka sawi tawh a ni. 25 Tin, anmahni nêna remna thuthlung ka siam ang a, sakawlhte chu ram ata ka tibo vang; tin, thlalêrahte pawh him takin an chêng ang a, ngaw hnuaiahte an muhîl chiah chiah ang. 26 Anmahni leh ka tlâng vêl hmunte chu mal ka sâwm ang a, a hun têah ruah ka sûrtîr ang a, malsâwm ruahte a sûr ang. 27 Tin, rama thing chuan rah a chhuah ang a, leiin a hlâwkna a chhuah ang a, an ramah chuan him takin an awm ang; an nghâwngkawlte ka tihtliaha, bâwiha siamtute kut ata ka chhanchhuah hunah chuan kei hi LALPA ka ni tih an hria ang. 28 Hnam dangte sahmîm tipuar mai an ni tawh lo vang a, rama sakawlhte ei ral mai an ni tawh hek lo vang; him takin an awm tawh zâwk ang a, tu mân an tihlau ngai tawh lo vang. 29 Thil phun hmingthang tak ka siamsak ang a, chu ramah chuan ṭâmin a tiral tawh lo vang a, hnam dangte hmuhsitna an tuar tawh hek lo vang. 30 Tin, kei LALPA an Pathian hi an hnênah ka awm tih an hriain, anni Israel chhûngte pawh ka mite an ni tih an hria ang,” tih hi LALPA PATHIAN thuchhuak a ni.’ 31 ‘Nangni ka berâmte, ka ran tlatna hmuna berâmte chu mihring in ni a; tin, kei hi in Pathian ka ni,’ tih hi LALPA PATHIAN thuchhuak a ni,” tiin.
Pathianin Edom a hremna
1 Tin, LALPA thu chu ka hnênah a lo thleng leh a, 2 “Mihring fapa, Seir tlâng hmachhawn la, a hnênah thu sawi la, 3 a hnênah, ‘LALPA PATHIAN chuan heti hian a ti a ni: “Ngai rawh, aw Seir tlâng, ka do che a ni; i chungah ka kut ka lek ang a, thlalêrah, râpthlâk takah ka siam ang che. 4 I khawpuite chu ka tiram ang a, thlalêrah i chang ang; tin, LALPA chu ka ni tih hi i hria ang. 5 An bawhchhiatna hremna hnuhnûng bera an chhiat nia Israela chhûngte chu khandaih thiltihtheihnaa i hlana, i tai reng avângin, 6 a nuna ka nun chhûng chu, thisen atân ka buatsaih ang chia, thisenin a ûm ang che; thisen i huat loh avângin thisen chuan a ûm ang che,” ’ tih hi LALPA PATHIAN thuchhuak a ni. 7 Hetiang hian Seir tlâng chu râpthlâk taka siamin thlalêrah ka siam ang; a chunga mi veivâk ṭhînte chu ka titâwp vek ang. 8 A tlângte chu ama mi thahtein ka tikhat ang; i tlângahte, i kawr leh i tuikawr ruamahte khandaiha thahte chu an tlu rem rum ang. 9 Thlalêrah ka siam hlen ang chia, i khawpuite chu luahin a awm lo vang; tin, kei hi LALPA ka ni tih in hria ang. 10 ‘LALPA chu a awm reng na a, hêng hnam pahnihte leh ram pahnihte hi ka ta a ni a, ka nei mai ang,’ i tih avângin, 11 a nuna ka nun chhûng chu,” tih hi LALPA PATHIAN thuchhuak a ni, “I thinrimna ang zêl leh i huatna avânga îtsîkna i tihlan ang zêlin ka che dâwn a ni; i chung thu ka rêl hunah chuan an zîngah ka intilang ang. 12 ‘Thlalêra siamin an awm ta a, ka hnênah pêkin an awm ta,’ tia Israel tlângte i sawichhiatna zawng zawng chu kei LALPA hian ka hre vek tih i la hria ang. 13 Ka chungah i kaa intilianin ka chungah thu i tuitam a, ka hre vek mai. 14 Heti hian LALPA PATHIAN chuan a ti a ni: ‘Lei pum pui lâwm nân thlalêrah ka siam ang che. 15 Israel-te rochun thlalêra a chan avânga i lâwm ang bawkin i chungah ka ti ang; aw Seir tlâng leh Edom zawng zawng, a pumin thlalêrah a chang ang! Tichuan, LALPA chu ka ni tih an hria ang.’
Pathianin Israel mal a sâwm
1 “Tin, nang mihring fapa, Israel tlângte hnênah thu sawi la, Nangni Israel tlângte u, LALPA thu hi ngaithla rawh u, 2 LALPA PATHIAN chuan heti hian a ti a ni: I chungah i hmêlmate chuan, ‘Chei! Hmasâng bâwlhmun zawng zawngte chu kan ta a ni ta,’ an tih avângin, 3 thu sawi la, LALPA PATHIAN chuan heti hian a ti a ni: Hnam la awm chhunte ta tûra kil tina an ei chia, thlalêra an siam che avâng leh, mi kamtamte tîtî leh sawichhiata an awmtîr che u avângin, 4 nangni Israel tlângte u, LALPA PATHIAN thu hi ngaithla rawh u, LALPA PATHIAN chuan tlângte, mualte, tuikawrte, ruamte leh hmun lo ram tawhte, khawpui ram tawh, a vêla hnam la awm chhunte sahmîm tipuar mai leh nuihzatbûrte hnênah heti hian a ti a ni; 5 chuvângin, LALPA PATHIAN chuan heti hian a ti a ni: Hnam la awm chhun leh Edom zawng zawng, rilru lâwm taka ka ram neih lo inruat chawpa, mi hmusit taka râllâka siam tumtute chungah chuan thinur êm êmin thu ka sawi ngei a ni. 6 Chuvângin, Israel ram chungchâng thu-ah chuan thu sawi la, tlângte, mualte, tuikawrte leh ruamte hnênah chuan, LALPA PATHIAN chuan heti hian a ti a ni: Ngai rawh u, hnam dangte chêksawlhna in tuar avângin thinur tak leh thinrim takin thu ka sawi a ni. 7 Chuvângin, LALPA PATHIAN chuan heti hian a ti a ni: I vêla hnamte chuan anmahni mualphona an phur ngei ang, tiin ka kut ka lek e. 8 “Nangni erawh chuan, aw Israel tlângte u, zâr in chhuah ang a, ka mi Israel-te tân rah in chhuah ang; an lo kal mai dâwn si a. 9 Ngai rawh u, in lama ṭang ka ni si a, in lam ka hawi ang a, rih dûrin in awm ang a, chi tuhin in awm bawk ang. 10 In chungah mihring ka tipung ang a, Israel chhûngte zawng zawng, an vai pawhin; hmun ramte chu siam ṭhatin a awm ang a, khawpuite chu luahin a awm ang. 11 In chungah mi leh sa ka tipung ang a, an pungin an hmuingîl ang; in awm dân hmasa ang khân ka luahtîr ang che u a, a tîra in awm dân ai maha ṭhain ka siam ang che u; tichuan, kei hi LALPA ka ni tih in hria ang. 12 A ni, in chungah mi ka lêntîr ang a, ka mi Israel-te ngei chu; an luah ang chia, an rochan i ni ang a, tûn achinah an fate i chântîr ngai tawh lo vang. 13 Heti hian LALPA PATHIAN chuan a ti a ni: Nang mihringte ei raltu, i mite chân ṭhîntu i ni an tih ṭhin che avângin, 14 mihringte i ei ral tawh lo vang a, i mite pawh i chân ngai tawh hek lo vang, tih hi LALPA PATHIAN thuchhuak a ni. 15 Awze mite hmuhsitna ka tuartîr tawh lo vang chia, mite sawichhiat i tuar ngai tawh hek lo vang a, i mite i chân ngai tawh hek lo vang, tih hi LALPA PATHIAN thuchhuak a ni, ti rawh,” a ti a.
Israel tân nun thar
16 Tin, LALPA thu chu ka hnênah a lo thleng leh a, 17 “Mihring fapa, Israel chhûngte chu anmahni rama an chên lai khân an awm dân leh an thiltihtein an tibawlhhlawh a; ka hmaa an awm dân chu hmeichhe fel loh laia a thianghlim lohna ang mai a ni a. 18 Chuvângin, ram chungah thisen an chhuaha, an milimtea an tihbawlhhlawh avângin an chungah ka thinrimna chu ka hri thla a. 19 Hnamte zîngah ka tidarh a, ram tinah an darhsarh ta a; an awm dân leh an thiltihte ang zêlin an chung thu ka rêlsak a. 20 An va kalna hnamte hnên an thlenin ka hming thianghlim an tibawrhbâng a, miten, ‘Hêngte hi LALPA mite an ni a, ram ata an lo chhuak a nih hi,’ an lo tih ṭhinah hian. 21 Mahse, Israel chhûngten an va kalna hnamte zînga an tihbawrhbân, ka hming thianghlim chu ka lainat a ni. 22 Chuvângin, Israel chhûngte hnênah, LALPA PATHIAN chuan heti hian a ti a ni: Aw, Israel chhûngte u, nangmahni ka lainat avâng ni lovin, in va kalna hnamte zînga in tihbawrhbân, ka hming thianghlim ka lainat avâng zâwkin hei hi ka ti a ni. 23 Ka hming ropui tak, hnamte zînga bawrhbâng, an zînga nangmahni ngeiin in tihbawrhbân chu ka tithianghlim dâwn a ni; tichuan, an mit hmuha nangmahnia tihthianghlima ka awm hunah chuan LALPA ka ni tih an hria ang, tih hi LALPA PATHIAN thuchhuak a ni. 24 “Hnamte zîng ata ka hruai chhuak ang che u a, ram zawng zawng ata ka khâwm ang che u a, in ram ngeiah ka hruai lût dâwn si che u a. 25 Tin, in chungah tui fîm ka theh ang a, in lo thianghlim ang a, in bawlhhlawhna zawng zawng leh in milimte lak ata ka tlêng fai ang che u. 26 Thinlung thar ka pe ang che u a, in chhûngah thlarau thar ka dah ang; in tisa ata thinlung, lung anga sak chu ka la bo vang a, thinlung, tisa anga nêm ka pe zâwk ang che u. 27 Tin, in chhûngah ka thlarau ka dah ang a, ka dân siamah ka lêntîr ang che u a, ka thupêkte chu in vawng ang a, in zâwm ang. 28 In pute hnêna ram ka pêkah chuan in chêng ang; tin, nangni chu ka mite in ni ang a, kei in Pathian ka ni ang. 29 In bawlhhlawhna zawng zawng ata ka chhanchhuak ang che u a; tin, buh chu thu ka pe ang a, ka tipung ang a, in chungah ṭâm a tla tawh lo vang. 30 Thingrahte ka tipung ang a, thlawhhma ka tihlâwk ang a, ṭâm avânga hnamte zînga mualphona in tuar tawh lo vang. 31 Tichuan, in dân sualte, in thiltih ṭha lote chu in lo hre tawh ṭhîn ang a, in tenawmna leh in khawlohna avâng chuan nangmahni mit hmuh ngeiah in ten tawh ang. 32 Nangmahni vânga hei hi ti ka ni lo tih lo hre mai rawh u, tih hi LALPA PATHIAN thuchhuak a ni. Aw, Israel chhûngte u, in awm dân avâng chuan zak ula, kimki rawh u. 33 LALPA PATHIAN chuan heti hian a ti a ni: In khawlohna zawng zawng ata ka tlen fai che u niah chuan, khawpuite chu ka luahtîr leh ang che u a, hmun ram tawhte chu ka siam ṭha leh ang. 34 “Tin, ram lo chhe tawhte chu an let ang, tûn hmain mi veivâkte mit hmuha chhe tawh hnu ni mah sela. 35 Tin, ‘He ram chhe tawh hnu hi Eden huan ang mai a lo ni leh ta; khawpui chhiaa, lo ram tawhte chu luah leh kulh neiin a awm leh ta,’ an la ti ang. 36 Tin, in vêla hnam la awmte chuan kei LALPA hian hmun chhiate chu ka siam ṭha leh a, ram lo chhe tawh chu ka tiduah leh ta tih an hria ang. Kei LALPA hi ka ṭawng tawh a, ka ti ngei ang. 37 “Tin, LALPA PATHIAN chuan heti hian a ti a ni: Chu lovah pawh hei hi Israel chhûngte chu ka la dîltîr ang: ran rual ang maia an mite tipung tûrin. 38 Inthawina tûr ran rual, kût vângthlaa Jerusalem ran rualte ang maiin; chutiangin khawpui ram tawh hnu chu mipui tam takin a la khat ang; tichuan, kei hi LALPA chu ka ni tih an hria ang,” a ti a.
Ruh ro awm ṭeuhna ruam
1 Tin, LALPA kut chu ka chungah a awm a, LALPA thlarau chuan mi hruai chhuak a, ruam lai takah mi dah a; chu ruam chu ruh hlîrin a khat a. 2 Tin, an zîngah chuan mi hruai vêl ta a; tin, ruamah chuan a lo awm rem rum mai a! Tin, ngai teh, a ro vek a ni. 3 Tin, ka hnênah, “Mihring fapa, hêng ruhte hi a nung thei ang em?” a ti a. Tin, kei chuan, “Aw LALPA PATHIAN, nangin i hre zâwk ang,” ka ti a. 4 Tin, ani chuan ka hnênah, “Hêng ruhte hnênah hian thu sawi la, an hnênah, ‘Aw, nangni ruh rote u, LALPA thu hi ngai rawh u. 5 Hêng ruhte hnênah hian LALPA PATHIAN chuan heti hian a ti a ni: “Ngai rawh u, nangmahniah thaw ka luhtîr ang a, in nung ang. 6 Tin, nangmahniah thahrui ka dah ang a, tisain ka tuam ang che u a, vunin ka khuh ang che u; tin, in chhûngah thaw ka awmtîr ang a, in nung ang. Tichuan, kei hi LALPA chu ka ni tih in hria ang,” ’ ti rawh,” a ti a. 7 Tichuan, thu mi pêk ang chuan ka sawi ta a; tin, ka han sawi chuan thâwm a lo awm a, ngai teh, a ri ta rum rum a, ruhte chu mahni zawmpui ṭheuhvah a inchuktuah khâwm ta a. 8 Tin, ka han en chuan, ngai teh, anmahniah thahrui a lo awm a, tisain a tuam a, vunin a khuh ta a; thaw erawh chu anmahniah a la awm lo. 9 Tichuan, ani chuan ka hnênah, “Thli hnênah thu sawi la, mihring fapa, sawi ngei la, thli hnênah chuan, ‘LALPA PATHIAN chuan heti hian a ti a ni: “Aw, thaw, kâwlkil li aṭangin lo kal la, hêng mi thahte chungah hian thaw rawh, an nun theih nân,” ’ ti rawh,” a ti a. 10 Chutichuan, thu mi pêk ang chuan ka sawi a, thaw chu anmahniah a lo lût a, an nung ta a, mahni ke ṭheuhvin an ding a, sipai rual ropui tak an lo ni ta a. 11 Tichuan, ka hnênah, “Mihring fapa, hêng ruhte hi Israel chhûngkaw pum pui an ni a. Ngai teh, anni chuan, ‘Kan ruhte a ro zovin, kan beisei a bo zo ta a, râwt bovin kan awm ta,’ an ti ṭhîn a. 12 Chuvângin, thu sawi la, an hnênah, ‘LALPA PATHIAN chuan heti hian a ti a ni: “Ngai rawh u, in thlânte ka hawng ang a, aw, ka mite u, in thlân ata ka chhuahtîr ang che u; tin, Israel ramah chuan ka hruai lût ang che u. 13 Tin, in thlânte ka hawna, in thlân ata ka chhuahtîr che u hunah chuan, aw, ka mite u, LALPA chu ka ni tih in hria ang. 14 Nangmahniah ka Thlarau ka dah ang a, in nung ang a, in ram ngeiah ka dah ang che u. Tichuan, kei, LALPA hian ka sawi tawh a, ka ti ngei bawk a ni tih in hria ang,” ’ tih hi LALPA thuchhuak a ni,” a ti a.
Juda leh Israel chu ram khat, lal khat neiin an awm ang
15 Tin, LALPA thu chu ka hnênah a lo thleng leh a, 16 “Nang, mihring fapa, tiang pakhat la la, chutah chuan, ‘Juda leh a pâwlpui Israel fate tan,’ tih ziak rawh; tiang dang pawh la la, chutah chuan, ‘Josefa, Ephraima tiang leh a pâwlpui Israel chhûngte zawng zawng tan,’ tih ziak bawk rawh. 17 Tin, tiangte chu zawm la, i kutah pakhat a nih theih nân. 18 ‘Hêng hi eng tihna nge ni, min kawhhmuh dâwn lâwm ni?’ i hnam faten an tih che chuan, 19 an hnênah, ‘LALPA PATHIAN chuan heti hian a ti a ni: “Ngai rawh u, Josefa tiang, Ephraima leh a pâwlpui Israel chite kuta mi chu ka la ang a, chûng chu Juda tiang nên ka zawm ang a, pakhatah ka siam ang a, ka kutah pakhat a lo ni ang,’ ” i ti dâwn nia. 20 Tiang, i ziakte ngei kha an mit hmuh ngeiah i kutah a awm ang. 21 “Tin, an hnênah, ‘LALPA PATHIAN chuan heti hian a ti a ni: “Ngai rawh u, Israel-te chu hnam, an va kalnate zîng ata ka hruai ang a, kil tin ata ka khâwm ang a, an ramah chuan ka hruai lût ang. 22 Tin, chu ram, Israel tlângahte chuan hnam pakhatah ka siam ang a, lal pakhat chu an zaa lal a ni ang; tin, hnam pahnih an ni tawh lo vang a, lalna ram hnihah ṭhen a ni ngai tawh hek lo vang. 23 An milimte, an thil tenawmte, an bawhchhiatnatein an intibawlhhlawh ngai tawh hek lo vang; an tlûka an sual ṭhinna zawng zawng ata ka chhanchhuak ang a, ka tlêng fai ang. Tichuan, ka mite an ni ang a, kei an Pathian ka ni ang. 24 Ka rawngbâwltu Davida chu an chunga lal a ni ang a, an zaa chungah berâmpu pakhat a awm ang; ka thupêkte an awih ang a, ka dân siamte an zâwm ang a, an hmang ang. 25 Ka rawngbâwltu Jakoba hnêna ka ram pêk, in pute lo chên ṭhinnaah chuan an chêng ang; chutah chuan kumkhuain an chêng ang a, anmahni leh an fate, an fate fate pawh; ka rawngbâwltu Davida chu kumkhuain an hotu a ni ang. 26 Chu lo pawh chu anmahni hnênah remna thuthlung ka siam ang a, an tân kumkhaw thuthlung a ni ang a, an hnênah ka pe ang a, anni chu ka tipung ang a, an zîngah chuan kumkhuain ka biakbûk ka dintîr ang. 27 Ka bâwktê pawh an hnênah a awm ang a, an Pathian ka ni ang a, anni chu ka mite an ni ang. 28 Tin, an zîngah kumkhua atân ka biakbûk a din hunah chuan kei hi LALPA, Israel tithianghlimtu chu ka ni tih an hria ang,” ’ ti rawh,” tiin.
Goga, Pathian hmanrua
1 Tin, LALPA thu chu ka hnênah a lo thleng a, 2 “Mihring fapa, Magog rama mi, Ros leh Mesek leh Tubal hotu ber Goga hmachhawn la, a chungah thu sawi la, 3 LALPA PATHIAN chuan heti hian a ti a ni: Ngai rawh, aw Goga, Ros leh Mesek leh Tubal hotu ber, ka do che a ni; 4 ka lehhawitîr ang chia, i khabeah nghakuaiin ka kuai ang chia, ka khai chhuak ang che; i sipai rual zawng zawngte, sakawr leh a chung chuang mite, râlthuam famkima inthuam zawng zawngte, pâwl ropui tak, phaw lian leh phaw tê hmanga khandaih keng ṭheuhte nên chuan. 5 Persia, Kus, Put-te nên, an vaia phaw leh thîr lukhum neite chu; 6 Gomer leh a sipai rual zawng zawngte; Togarma chhûngte, hmâr tâwpa mi leh a sipai rual zawng zawngte, i hnêna mi tam takte nên pawh. 7 Inrâlring la, a ni, lo inpeih rawh, nang leh i hnêna awm khâwm, i pâwlpui zawng zawngte nên; tin, an vêngtu lo ni ang che. 8 Ni tam tak hnuah chuan koh khâwm i ni ang a, kum hnuhnûngahte chuan khandaih laka chhanchhuah, hnam tam takte lak ata lâk khâwmte awmna ram, Israel tlâng chhe reng ṭhînte chu i rawn bei ang; hnamte zîng ata hruai chhuaha, tûna an vaia thlamuang taka an awmna ram chu. 9 Tin, i chho vang a, thlipui ang maiin a lo thleng ang a, chhûmin ram a tuam mup mup ang mai hi i ni ang, nang leh i hnêna sipai rual zawng zawng leh i hnêna mi tam takte chu. 10 “Tin, heti hian LALPA PATHIAN chuan a ti a ni: Chumi niah chuan heti hi a ni ang a, i rilruah thil a lo lût ang a, thil ṭha lo i suangtuah ang; 11 tichuan, ‘Kulh nei lo khuate ram chu ka rûn ang a, mi him taka awm hle hle, an zaa kulh lova chêng, kulh kawngkhâr leh a kalhna thîr nei lohote chu ka bei ang,’ i ti rilru ang. 12 Râllâk sum leh bungruate la tûr leh hmun chhe hnu luah lehtute leh, hnamte zîng ata hruai khâwm tawh ran rual leh bungruate ngaha, lei lailuma chêngte chungah i kut lek i tum ang. 13 Seba leh Dedan leh Tarsis sumdâwngte leh an sakeibaknei vânglai zawng zawngte chuan i hnênah, ‘Râllâk la tûrin i lo kal em ni? Mi rawk tûrin i pâwlte chu i rawn khâwm a ni maw? Tangkarua te, rangkachak te, ran rual leh bungruate, nasa tak chhuhsaka la bo tûr i ni maw, an ti ang che,’ tiin. 14 “Chuvângin, mihring fapa, thu sawi la, Goga hnênah chuan, LALPA PATHIAN chuan heti hian a ti a ni: Chumi ni, ka mi Israel-te him taka an awm hun tûr chu i hre lo maw? 15 Hmâr lam ram tâwp rêt, i hmun aṭang chuan i lo kal ang, nang leh i hnêna mi tam tak, sakawr chung chuang ṭheuh, pâwl ropui tak, sipai rual nasa tak mai chu. 16 Chhûmin ram a tuam mup mup ang mai hian ka mi Israel-te chungah i lo kal ang; heti hi a ni ang a, ni hnuhnûngahte chuan ka ram do tûrin ka hruai ang chia, hnamte chuan mi hria ang, aw Goga, an mit hmuha nangmaha tihthianghlima ka awm hunah chuan. 17 Tin, LALPA PATHIAN chuan heti hian a ti a ni: Hmasânga ka rawngbâwltu Israel zâwlnei, chûng laia kum tam tak chhûnga thu lo sawi ṭhîntuten, anmahni bei tûra ka rawn hruai tûr thu an sawi ṭhina kha i ni em, ti rawh,” tiin.
Pathianin Goga a hrem
18 “Tin, chumi niah chuan heti hi a ni ang a, Israel ram bei tûra Goga a lo kal hunah chuan ka thinrimna chu ka hnâr khu chhuah hluah hluah ang, tih hi LALPA PATHIAN thuchhuak a ni. 19 Ka thin a rima ka thin a ur lai takin, ‘Chumi niah chuan Israel ramah lîr nasa takin a nghîng ngei ang; 20 chutichuan, tuipui sanghate, chunglêng savate, ramsate, lei chunga vâk rannung zawng zawng, lei chunga mihring zawng zawngte ka hmaah an khûr ang a, tlângte tihhniamin a awm ang a, kulh bang tin leiah a tlu ang,’ tiin ka sawi a nih hi. 21 Ka tlâng zawng zawngahte amah beihna tûrin khandaih ka lam ang, mi tin khandaih chuan a unaupa a do vang,” tih hi LALPA PATHIAN thuchhuak a ni. 22 “Tin, thisen chhuah leh hripuiin amah ka bei ang; amah leh a sipai rualte leh a hnêna mi tam takte chungah chuan, ruahpuivânâwn leh rial nasa tak leh mei leh kâtte ka sûrtîr ang. 23 Tin, ka ropuizia leh ka thianghlimzia ka tilang ang a; tin, hnam tam takte mit hmuhah ka intilang ang. Tichuan, kei hi LALPA ka ni tih an hria ang.”
Goga tlâwm tûr thu
1 “Tin, nang, mihring fapa, Goga chungah thu sawi la, ‘LALPA PATHIAN chuan heti hian a ti a ni: “Ngai rawh, aw Goga, Ros leh Mesek leh Tubal hotu ber, ka do che a ni; 2 ka lehhawitîr ang chia, ka hruai zêl ang chia, hmâr tâwp rêt ata ka hruai chhuak ang chia, Israel tlângahte chuan ka thlen ang che. 3 Tichuan, i kut vei lam ata i thal ngul chu ka titliak ang a, i kut ding lam ata i thalte chu ka tithla ang. 4 Israel tlângahte chuan i tlu ang a, nang leh i sipai rual zawng zawng leh i hnêna mipui awmte nên; sava, sa hel ei chi tinrêngte hnên leh ram sakawlhte hnênah ei zawh atân ka pe ang che. 5 Tâmlakah i tlu ang; keiin ka sawi tawh si a,” tih hi LALPA PATHIAN thuchhuak a ni,’ ti rawh. 6 Magog leh tui kam rama him taka chêng ṭhînte chungah chuan mei ka chhuah ang. Tichuan, kei hi LALPA ka ni tih an hria ang. 7 Tin, ka mi Israel-te zîngah chuan ka hming thianghlim tihbawrhbân leh chu ka phal tawh hek lo vang. Tichuan, hnamte chuan kei hi LALPA, Israel Mi Thianghlima chu ka ni tih an hria ang. 8 “Ngai rawh u, a lo thleng e! Hlenin a awm ngei ang,” tih hi LALPA PATHIAN thuchhuak a ni. “Hemi ni hi a ni, ka lo sawi tawh kha. 9 Tichuan, Israel khawpuia chêngte chu an chhuak ang a, hriamhreite chu an tuah ang a, a kâng ral ang; phaw lian leh phaw tête, thal leh a ngulte, fei leh tiang zumte chu kum sarih chhûng an tuah ang. 10 Ram thing an phur lo vang a, ngaw thingte an kit hek lo vang, hriamhreite chu thingtuah atân an hmang dâwn si a; râllâka latute chu râllâka lâk an ni ve ang a, a rawktute chu an rawk ve thung ang,” tih hi LALPA PATHIAN thuchhuak a ni.
Goga phûm thu
11 “Tin, chumi niah chuan heti hi a ni ang a, Goga tân Israel ramah phûmna hmun ka ruat ang a, tuipui chhak, Abarim ruam ngei chu; chu chuan khualzinte chu a dang ang, Goga leh a hote chu an phûm dâwn avângin. Tichuan, chu ruam chu Hamon-gog ruam an vuah ang. 12 Tin, Israel chhûngte chuan an ram thian faiin thla sarih chhûng an phûm ang. 13 A ni, rama mi zawng zawngin an phûm ang, chawimawia ka awm ni chu an tân hmingthanna a ni ang,” tih hi LALPA PATHIAN thuchhuak a ni. 14 “Tin, an ram then fai nân, ruang phûm lohte zawng chhuaka phûm tûrin hnaa nei tûr mi an ruat hran ang, thla sarih tâwp hnuah an zawng ṭan ang. 15 Ram fangtute chuan an fanin, mihring ruhte an hmuh chuan chhinchhiahna an siam ang a, Hamon-gog ruama phûmtuten an phûm hma chu. 16 Tin, Hamona chu khawpui hming a ni ang. Chutiang chuan ram an thian fai ang.” 17 “Tin, nang, mihring fapa, LALPA PATHIAN chuan heti hian a ti a ni: ‘Sava chi tinrêngte leh sa tinrêngte hnênah thu sawi la, “Pung khâwm ula, lo kal rawh u, sa in eia thisen in in theih nân Israel tlânga inthawina ropui tak, in tâna ka siam vêlah chuan rawn inkhâwm rawh u. 18 Mi ropui sate in ei ang a, leia hotute thisen in in ang a, berâmpate, berâmnote, kêlte, Basan rama bâwngpa châwm thau zawng zawngte thisen nên. 19 In tâna inthawina ruai ka ṭheh thau chu puar ṭeuhvin in ei ang a, a thisen chu rui khawpin in in ang. 20 Tichuan, sakawrte, tawlailîr hnûk mite, mi ropuite leh râl tu mi zawngtein ka chawhluiah in tlai ang,” tih hi LALPA PATHIAN thuchhuak a ni.
Israel tundin leh
21 “ ‘Tichuan, hnamte zîngah chuan ka ropuina ka dah ang a, hnam zawng zawngte chuan ka thurêl tihtlûk tawhte leh, an chunga ka kutthlâkte chu an hmu ang. 22 Chumi ni achinah chuan Israel chhûngten kei hi LALPA an Pathian chu ka ni tih an hre tawh ang. 23 Tin, hnamte chuan Israel chhûngte chu an khawlohna avângin an tâng a ni tih an hria ang; ka laka an rinawm loh êm avângin anmahni lakah ka hmêl ka thup a; tichuan, an hmêlmate kutah ka pe a, khandaihin an tlu ta vek a. 24 An thianghlim lohna ang zêl leh an bawhchhiatna ang zêlin an chungah ka ti ve a, an lakah ka hmêl ka thup a ni.’ ” 25 “Chuvângin, LALPA PATHIAN chuan heti hian a ti a ni: ‘Tûnah chuan Jakob-ho awm dân ka let ang a, Israel chhûngkaw pum pui chungah zah ka ngai ang, ka hming thianghlim chu ka humhalh tlat ang. 26 Tu mah tihlautu awm lova an rama him taka an chên hunah pawh an bawhchhiatna zawng zawng, ka chunga an bawhchhiatte leh an mualphona chu an phur ang. 27 Mite zîng ata ka hruai chhuah leha, an hmêlmate ram ata dah khâwma, anmahnia hnam tam takte mit hmuha tihthianghlima ka awm hunah chuan, 28 hnamte zînga sala ka tântîra, an ram ngeia ka hruai khâwm leh dânah kei hi LALPA an Pathian ka ni tih an hria ang; chutah chuan an zînga pakhat mah ka hnutchhiah lo vang. 29 An lakah ka hmêl ka thup tawh lo vang, Israel chhûngte chungah ka thlarau ka leih tawh si a,’ tih hi LALPA PATHIAN thuchhuak a ni,” tiin.
Ezekiela chu Jerusalem-ah hruai a ni
1 Kan sal tân kum sawmhnih leh pangana, chumi kum bul thla ni sâwmna, khawpui chhiat hnu kum sâwm leh palina, chumi ni ngeiah chuan LALPA kut chu ka chungah a lo awm a, chutah chuan mi hruai a. 2 Pathian inlârnaah chuan Israel ramah mi hruai a, tlâng sâng takah mi dah a, chumi chhim lamah chuan khawpui din tawh ang mai a awm a. 3 Chutah chuan mi hruai a, ngai teh, mi pakhat a lo awm a, a hmêl lan dân chu dâr ang mai a ni a, la zai leh tehna tiang a keng a, kawngkaah chuan a ding a. 4 Tin, mi chuan ka hnênah, “Mihring fapa, i mit khân en la, i beng chhi la, ka entîr tûr che lamah i rilru nghat tlat tawh; chu ka thil entîr tûr che atân chuan hetah hian rawn hruai i ni si a. I hmuh zawng zawngte chu Israel chhûngte hnênah chuan puang ang che,” a ti a.
Khawchhak lam kawngka
5 Tin, ngai teh, in vêlah chuan kulh bang a lo awm a; tin, mi chuan tehna tiang, tawng ruka sei a keng a, a tawng khat chu tawng khat leh kutphah bêng ṭheuh a ni; tin, kulh bang chhah lam chu a teh a, tiang tlûk khat a ni a, a sân lam pawh tiang tlûk khat a ni bawk. 6 Tichuan, chhak lam chhawng kawngka inah a lo kal a, a rahkaah chuan a chho va; tin, kawngka in luhna pindan chu a teh a, tiang tlûk khata zau a ni. 7 Tin, vênna pindante chu a dung lam tiang tlûk khat, a vâng lam tiang tlûk khat ṭheuh a ni; vênna pindan inkâr chu tawng nga ṭheuh a ni a; tin, in pui lam kawngka in, sumhmun lama kawngka in, luhna pindan chu tiang tlûk khat a ni a. 8 In pui lam sumhmun pawh chu a teh a, tawng riat a ni. 9 A bangpêngte chu tawng hnih ṭheuh a ni a, kawngka sumhmun chu in pui lamah a ni. 10 Tin, chhak lam kawngka ina vênna pindante chu lehlam lehlamah pathum ve ve a ni a, a pathum chuan a intiat vek a ni; tin, bangpêngte pawh kha a lehlam lehlama mi chu a intiat a ni. 11 Tin, kawngka in luhna vâng lam chu a teh a, tawng sâwm a ni a; kawngka in kal tlangna vâng lam chu tawng sâwm leh pathum a ni. 12 Tin, vênna pindan hmaah chuan daidanna lehlam lehlamah tawng khata chhah ve ve a awm a; tichuan, vênna pindante chu lehlam lehlamah tawng ruk ve ve a ni. 13 Tin, kawngka in chu a teh a, vênna pindan pakhat chung aṭanga a lehlam chung thleng chuan tawng sawmhnih leh tawng ngaa zau a ni, kawngkhâr leh kawngkhâr inzawm ṭheuhvin. 14 Tin, sumhmun pawh chu a teh a, tawng sawmruk a ni a; kawngka in sumhmun pâwn chu hung chhûng chu a ni a. 15 Tin, kawngka in pâwnta ber aṭanga kawngka in sumhmun chhûngril ber thleng chuan tawng sawmnga a ni. 16 Tin, kawngka in chhûng lamah chuan a vêlin pindanahte chuan tukverh hawn theih loh a awm a, a inkâra banahte pawh; a sumhmunahte pawh, a chhûng lamah pawh a vêlin tukverh a awm a, a banahte chuan tûm thing lem a awm ṭheuh bawk a.
Hung pâwn zâwk
17 Tin, hung chhûng pâwnta zâwkah chuan mi hruai a; tin, ngai teh, pindante a awm a, hung chhûng chu a vêlin lung rem a ni a; tin, lungremah chuan pindan sawmthum a awm a. 18 Tin, lungrem chu kawngka in aṭanga rem a ni a, kawngka in chen bawk tûra rem a ni a, chu chu lungrem hnuaihnung zâwk a ni. 19 Tichuan, kawngka in hnuai zâwk zâwn aṭang chuan hung chhûngnung zâwk pâwn lam thleng chuan a teh a, a zauzia chu tawng za a ni, a chhak lam leh a hmâr lam pawh.
Hmâr lam kawngka
20 Tin, hung chhûng pâwnta zâwk kawngka in hmâr lampanga mi chu a dung leh a vâng pawh a teh a. 21 Tin, vênna pindante chu lehlam lehlamah pathum ve ve a awm a, a bangpêngte leh a kawngka in sumhmunte pawh a hmasa ang vek a ni; a dung chu tawng sawmnga a ni a, a vâng chu tawng sawmhnih leh tawng nga. 22 A tukverhte, a sumhmuntea tûm thing lemte chu chhak lam kawngka ina mi ang vek a ni; rahka pasarih a awm chho va, a sumhmun chu a chhûng lamah a awm a. 23 Hung chhûngnung zâwk luhna tûr kawngka in chu kawngka in dang zâwnah khân a awm zêl a, hmâr lamah leh chhak lamah pawh; tin, kawngka in leh kawngka in inkâr chu a teh a, tawng za a ni.
Chhim lam kawngka
24 Tin, chhim lamah mi hruai leh a; tin, ngai teh, chhim lam kawngka in chu a lo awm a; tin, a teh dân pângngaiin a bangpêngte leh a sumhmun chu a teh a. 25 Chutah chuan a dangte ang bawkin a vêlin tukverhte a awm a, a sumhmunah pawh; a dung chu tawng sawmnga a ni a, a vâng lam chu tawng sawmhnih a ni. 26 Tin, rahka pasarih a awm chho va, sumhmun chu a chhûng lamah a awm a; tin, lehlam lehlamah bangpêngahte chuan tûm thing lem a awm zêl a. 27 Tin, chhim lamah chuan hung chhûngnung luhna tûr kawngka in a awm a, chhim lam kawngka inte inkâr chu a teh a, tawng za a ni.
Hung chhûngril zâwk chhim lam kawngka
28 Tin, chhim lam kawngka ina hung chhûngnung zâwkah chuan mi hruai lût a, tehna pângngaiin chhim lam kawngka in chu a teh a; 29 vênna pindante, a bangpêngte, sumhmunte chu tehna ngai vekin; chutah chuan tukverhte a awm a, a sumhmunah pawh a vêlin; a dung lam tawng sawmnga a ni a, a vâng lam tawng sawmhnih leh tawng nga. 30 Tin, a vêlah chuan sumhmunte a awm a, a dung lam tawng sawmhnih leh tawng nga, a vâng lam tawng nga a ni. 31 A sumhmunte chuan hung chhûng pâwnta zâwk lam a hawi a; a bangpêngahte chuan tûm thing lem a awm a; a chhohna chuan rahka pariat a nei a.
Hung chhûngril zâwk khawchhak lam kawngka
32 Tin, chhak lamah chuan hung chhûngnung zâwkah mi hruai a, a tehna pângngaiin kawngka in chu a teh a; 33 a vênna pindante, a bangpêngte, a sumhmunte tehna ngai vekin; chutah chuan tukverhte a awm a, sumhmunah pawh a vêlin; a dung lam chu tawng sawmnga a ni a, a vâng lam chu tawng sawmhnih leh tawng nga. 34 A sumhmunte chuan hung chhûng pâwnta zâwk lam a hawi a, a bangpêngahte chuan lehlam lehlamah tûm thing lem a awm a; a chhohna chuan rahka pariat a nei a.
Hung chhûngril zâwk hmâr lam kawngka
35 Tin, hmâr lam kawngka inah chuan mi hruai leh a, a tehna pângngaiin a teh a: 36 a vênna pindante, a bangpêngte, a sumhmunte. Chutah chuan a vêlin tukverhte a awm a; a dung lam tawng sawmnga a ni a, a vang lam tawng sawmhnih leh tawng nga. 37 A bangpêngte chu hung chhûng pâwnta zâwk lamah a awm a; a bangpêngahte chuan tûm kûng lem a inziak a, a chhohna chuan rahka pariat a nei a.
Hmâr lam kawngka bula in awmte
38 Kawngka in sumhmun aṭanga luh theihin pindan a awm a, chutah chuan hâlral inthawina tûr an sil ṭhîn a. 39 Kawngka in sumhmun lehlam lehlamah chuan dawhkân pahnih ve ve a awm a; hâlral inthawina te, sual vânga inthawina te, thiam loh vânga thil hlante talhna tûrin. 40 Hmâr lam kawngka in luh chhohna pâwn lam sîr khatah chuan dawhkân pahnih a awm a; tin, kawngka in sumhmun lehlamah pawh chuan dawhkân pahnih a awm bawk a. 41 Tichuan, kawngka in sîr lehlampangah chuan dawhkân pali a awm a, a lehlampangah dawhkân pali a awm bawk a; inthawina talhna ṭhin chu dawhkân pariat a ni a. 42 Tin, hâlral inthawina atân dawhkân pali, lung chhera siam, a dung lam tawng khat leh a chanve, a vâng lam tawng khat leh a chanve, a sân lam tawng khat a awm a; chutah chuan hâlral inthawina leh thil hlan talhna tûr hriamhreite an dah ṭhîn a. 43 Tin, a chhûng lamah chuan a vêlin thil kawm, kutphah bênga sei an vuah a, dawhkân chungahte chuan thil hlante sa a awm a. 44 Tin, hung chhûngnung zâwkah chuan mi hruai lût a; tin, ngai teh, hung chhûngnung zâwkah chuan pindan pahnih a la awm a, pakhat chu hmâr lam kawngka in bulah, chhim lam hawiin a awm a, pakhat chu chhim lam kawngka in bulah hmâr lam hawiin a awm a. 45 Tin, ani chuan ka hnênah, “He pindan chhim lam hawi hi, a in vawngtu puithiamte awmna a ni a; 46 pindan hmâr lam hawi chu maichâm vawngtu puithiamte awmna a ni; hêngte hi Zadoka fate, Levia fate zînga a rawngbâwl tûra LALPA rawn hnaih ṭhîntute chu an ni,” a ti a.
Hung chhûngril zâwk leh Tempul
47 Tin, hung chhûng chu a teh a, a dung lam tawng za, a vâng lam tawng za, inbial vêl a ni; tin, maichâm chu kawtlai takah chuan a awm a. 48 Tin, a in pui sumhmunah chuan mi hruai ta a, sumhmun bangpêngte chu a teh ṭheuh va, a lehlam lehlamah tawng ngaa chhah ve ve a awm a, a luhna chu tawng sâwm leh tawng lia zau a ni, a sîr tuaka kawngka bangpêngte chu tawng thum ve ve a ni. 49 A sumhmun chu a dung lam tawng sawmhnih, a vâng lam tawng sâwm leh tawng hnih a ni a, luh chhohnaah chuan rahka sâwm a awm a, bangpêng bulah a lehlam lehlamah chuan ban lian a awm a.
1 Tin, biak inah chuan mi hruai lût a, a bangpêngte chu a teh a, a sîr tuakah tawng ruka chhah ve ve a awm a, chu chu biakbûk vâng lam chen a ni. 2 Tin, a luhna chu tawng sâwma zau a ni a, a sîr tuakah bangpêngte chu tawng nga ve ve a ni a; tin, a chhûng chu a dung tawng sawmli, a vâng tawng sawmhnih a ni a. 3 Tin, pindan chhûngnungah chuan a lût a, a luhna bangpêngte chu tawng hniha chhah ve ve a ni a, a luhna chu tawng ruka zau a ni a, a luhna bangpêngte chu tawng sarih ve ve a ni a. 4 Tin, pindan chhûngnung chu a teh a, a chhûngpui bâkah a dung lam chu tawng sawmhnih a ni a, a vâng lam pawh tawng sawmhnih a ni; tin, ka hnênah, “Hei hi hmun serh ber chu a ni,” a ti a.
Tempul bang rinchhan pindan
5 Tin, a in pui bang chu a teh a, tawng ruka chhah a ni a; tin, a sîr tinah chuan pindan tawng lia zau ṭheuh a awm a. 6 A vêla a sîr pindante tâna bang an siam chu rinchhanin, a in pui chu rinchhan lovin, in pui bang nghêng lovin chu lam chu a nghêng zâwk a. 7 Tin, a sîr pindante chu a lo sâng deuh deuhvin a zau deuh deuh zêl a; a bangte chu a zuih chhoh zêl avângin, a in vêlin a chhûngpui kha a hnaih deuh deuh zêl a ni. Tichuan, pindan hnuai ber aṭanga a chung ber thlenga kal tûrin a laita chu kal tlang tûr a ni. 8 Tin, in pui vêlah chuan lungrem pâwng awmin ka hmu a, sîr pindan lungphûm chu tehna tiang, tawng ruk zet chena sâng a ni. 9 Sir pindan pâwn bang chu tawng ngaa chhah a ni; sîr pindan pâwn bang bâkah chuan tawng nga a la âwl a. 10 In pui lungrem pâwng leh hung chhûng pindante inkâr chu a vêlin tawng sawmhniha zau a ni a. 11 Sîr pindan kawngkhârte chu hmun âwl lama hawn a ni a, pakhat chu hmâr lam hawi a ni a, pakhat chu chhim lam hawi a ni; a vêla hmun âwl chu tawng ngaa zau a ni.
Khawthlang lama in
12 Tin, thlang lama in pui kawmchâr hmun âwl piaha in chu tawng sawmsariha zau a ni; chu in bang chu a vêlin tawng ngaa chhah vek a ni a, a dung chu tawng sawmkua a ni.
Tempul huam chhûng zau lam
13 Tin, in pui chu a tehin tawng zaa sei a ni; in pui kawmchâr hmun âwl leh chumi in bang chhah lam chhiar telin tawng za a ni bawk; 14 a in pui kawt hmun âwl chu tawng zaa zau a ni. 15 Tin, in pui kawmchâr hmun âwl piaha in dung lam chu a teh a, a sîr tawna bangte huamin tawng za a ni.
Tempul ruangâm
16 Tin, a chhûngpui te, hmun serh ber te, pâwn lam sumhmun te chu thingphelin an thuah a, a pathum chuan a vêlin hawn theih loh tukverh leh chhawrvêl a nei a, a in pui chu luhna kawngka thlengin a chhuat aṭanga tukverh thlenga a puma thingphela thuah a ni a (tukverh pawh chu thuah a ni bawk). 17 Kawngka lu chung te, pindan serh ber te leh a pâwn lam nên, bang zawng zawng chu a chhûng lam leh a pâwn lam teh vekin. 18 Chûng chu cherub lemte leh tûm thing lemtea chei a ni a, cherub leh cherub inkârah tûm thing a awm zêl a; tin, cherub chuan hmai pahnih an nei ṭheuh va: 19 mihring hmêl ang chuan lehlama tûm thing lam chu a hawi a, sakeibakneituai hmêl ang chuan lehlama tûm thing lam chu a hawi bawk a. Hêng hi in pum pui vêlah chuan an ziak a ni. 20 A chhuat aṭangin kawngka chung thlengin cherub leh tûm thing lema chei vek a ni; in pui bang chu chuti vek chu a ni.
Thinga siam maichâm
21 Chhûngpui kawngkabiangte chu a inbial a ni a, Hmun Thianghlim Ber hmaa mi nên a inang a. 22 Chutah chuan thinga siam maichâm a awm a, tawng thuma sâng, tawng hniha sei, tawng hniha zau a ni. A kil te, a mawng te leh a pang te chu thinga siam vek a ni; tin, ani chuan ka hnênah, “Hei hi LALPA hmaa dawhkân chu a nih hi,” a ti a.
Kawngkhârte
23 A chhûngpui leh Hmun Thianghlim Ber chuan kawngkhâr pahnih ve ve a nei a. 24 Kawngkhâr chuan phel hnih a nei ve ve a, a phel khat chu a thlep thei ṭheuh a ni; kawngkhâr pakhatah phel hnih, a dangah phel hnih bawk. 25 Banga an ziak ang bawk khân chhûngpui kawngkhârahte chuan cherub leh tûm thing lem an ziak ṭheuh bawk a; sumhmun pâwnah chuan thingphel chhah tak tak an zâr a. 26 Tin, sumhmun bang tuakahte leh thingphel zârahte chuan, tukverh hawn theih loh leh tûm thing lem chu a awm bawk a, a in pui sîr pindan leh thingphel zâr chu chutiang bawk chu a ni.
Tempul bula in pahnih
1 Tin, hung chhûngnung zâwk hmâr lampangah chuan mi hruai chhuak a; hmun âwl zâwn hmâr lam kulh ban eptu pindanah chuan mi hruai lût a. 2 Tin, hmâr lampanga pindante chu tawng zaa sei, tawng sawmngaa zau a ni a. 3 Hung chhûngnung zâwk hmun âwl tawng sawmhnih lam hawi leh, hung pâwnta zâwk lungrem lam epin chhawrvêl chhâwng thum a awm ve ve a. 4 Pindante inkârah chuan tawng sâwma zau, tawng zaa sei kal tlangna a awm a, a kawngkhârte chuan hmâr lam a hawi a. 5 Pindan chungnungte chu a zîm zâwk a, in chhâwng hnuai zâwk leh a laitate ai chuan a chhawrvêlte chuan a la hek zâwk si a. 6 Chhâwng thumin sak a ni a, hung chhûng bante ang chuan ban a nei si lo va; tichuan, a laita ai chuan a chungnung ber chu a chêp a, a laita pawh chu a hnuaihnung ber ai chuan a chêp bawk a. 7 Tin, pindan sîr pâwn lamah chuan, hung chhûng pâwnta zâwk lam epah bang tawng sawmngaa sei a awm a. 8 Hung chhûng pâwnta zâwka pindante chu tawng sawmngaa sei a ni si a; tin, in pui hrûla mi chu tawng zaa sei a ni. 9 Tin, chûng pindan hnuaiahte chuan chhak lampangah, hung chhûng pâwnta zâwk aṭanga luhna a awm a, pâwn lam bang inṭannaah chuan. 10 Chhim lamah pawh chuan hmun âwl zâwna kulh bang epah chuan pindante a awm leh a, 11 a hmaa kalna pawh chu hmâr lam pindante kalna ang bawk a ni, a dung leh a vângte pawh, a chhuahna te, a rem vêl dân te, a kawngkhârten chhim lam a hawi tih chauh lo chu thuhmun vek a ni. 12 Chûng pindante luh nân chuan kal tlangna tâwp chhak lam bang bulah chuan kawngkhâr a awm a. 13 Tin, ani chuan ka hnênah, “Chhim lam leh hmâr lam pindan, hmun âwl rawn chhawngtute hi pindan serh an ni a, LALPA rawn hnaihtu puithiamhoten thil serh berte an eia, thil serh berte an dah khâwma, ei tûr hlanna te, sual vânga inthawina te, thiam loh vânga inthawina te an hlanna tûr a ni; a hmun chu hmun serh a ni si a. 14 Chuta puithiamte an luh phawt chuan, hmun serh aṭangin hung chhûng pâwnta zâwkah chuan an chhuak tûr a ni lo; chutah chuan an rawngbâwlna silhfênte chu an dah zâwk ang, silhfên serh a ni si a; silhfên dang inbel chauhvin vântlâng zîngah an che thei ang,” a ti a.
Tempul ram zau zâwng
15 In pui chhûngnung zâwk a teh zawh chuan, chhak lam hawi kawngkaah chuan mi hruai chhuak a, a vêlin a teh ta a. 16 Tehna tiang chuan chhak lampang chu a teh a, tawng zanga a ni a; a tehna tianga tehin. 17 Hmâr lampang a rawn teh leh thung a, tawng zanga a ni a, a tehna tianga tehin. 18 Chhim lampang a teh leh a, tehna tianga tehin tawng zanga bawk a ni. 19 Tin, thlang lam a rawn teh leh a, a tehna tianga tehin tawng zanga bawk a ni. 20 A sîr li chuan a teh a; a dung lam tawng zanga, a vâng lam tawng zanga a ni a, a vêlin kulh bang nei a ni a, chu chu hmun serh leh serh loh daidanna tûra siam a ni.
Tempulah LALPA a kîr leh
1 Tichuan, kawngkaah mi hruai a, chhak lam kawngkaah chuan. 2 Tin, ngai teh, Israel Pathian ropuina chu chhak lam aṭangin a lo thleng a. A thâwm chu tui tam tak ri ang a ni a, lei chu a ropuinain a ên vek a. 3 Inlârna ka hmuha a lan dân chu, khawpui tichhe tûra a lo kal leh Kebar lui kama inlârna ka hmuh ang bawk a ni a; tin, bawkkhupin ka tlu ta a. 4 Tin, khawchhak lam hawi kawngkaah chuan a in pui chhûngah LALPA ropuina a lo lût a; 5 tin, Thlarau chuan mi chawi kâng a, hung chhûngnung zâwkah chuan mi hruai lût a; tin, ngai teh, LALPA ropuina chuan a in chu a tikhat ta vek a. 6 Tin, mi pakhat ka kianga a din laiin mi tuin emaw mi biain ka hria a. 7 Ka hnênah, “Mihring fapa, hei hi ka lalṭhutthlêng awmna hmun, ka kephah nghahna, Israel fate zînga kumkhuaa ka chênna tûr hmun a nih hi. Ka hming thianghlim chu Israela chhûngten anmahniin emaw, an lalten emaw, an hurna leh an lalte ruang phûm nân hmangin an tibawrhbâng tawh lo vang. 8 An kawngka chu ka kawngka bul taka siamin, an kawngkabiang chu ka kawngkabiang hrûla dahin, anmahni leh keima inkârah bang chauh awmtîrin an thiltih tenawmte chuan ka hming thianghlim chu an tibawrhbâng a; chuvângin, ka thinurnain anmahni chu ka tiboral ta a ni. 9 Tûn aṭang hian an hurnate, an lal ruangte chu ka lak aṭanga hla takah dah bo sela; tin, an zîngah kumkhuain ka chêng ang. 10 “Tin, nang mihring fapa, a in pui lem chu Israel chhûngte hnênah entîr rawh, an thil tihsual chu an zahpui theih nân, a ruahman dân pawh lo teh rawh se. 11 Tin, an thiltih zawng zawngte an zahpui chuan a in pui awm dân te, a chhuahna te, a luhna te, a rîruang te, a hman dân te, a vawn dân te entîr la, an mit hmuh ngeiah ziak rawh; a dân pum pui leh a hman dân zawng zawng an vawna, an zawm theih nân. 12 Hei hi a in pui tâna dân tûr chu a ni: tlâng chhîp chung zâwl vêl zawng zawng chu hmun serh theihtâwp tûr a ni; ngai teh, hei hi in pui tâna dân chu a ni e.
Maichâm
13 “Tin, tawnga tehin hei hi maichâm len lam chu a ni (tawng khat tih chu tawng khat leh kutphah bêng a ni), a nghahchhan chu tawng khata sâng, tawng khata hlai, a tlâng chu a vêla khâp khata pâwng zêl a ni a. 14 Tin, maichâm sân lam chu hetiang hi a ni: leia a nghahchhan aṭanga a chhawrdawh hnuaihnung zâwk chu tawng hnih a ni a, a zau lam tawng khat; a chhawrdawh tê zâwk aṭanga a chhawrdawh lian zâwk chu tawng li a ni a, tawng khata zau a ni. 15 A maichâm chung zâwl chu tawng lia sâng a ni leh a, maichâm chung zâwl aṭang chuan ki pali a ding a. 16 Maichâm chung zâwl chu a dung leh a vâng tawng sâwm leh tawng hnih ve ve a ni a, a inbial a ni. 17 A chhawrdawh chu a dung leh a vâng tawng sawm leh tawng li ve ve a ni a, a inbial a, a tlâng chu tawng chanve a ni; a nghahchhan chu a vêlin tawng khat a ni; a kailâwn chuan khawchhak a hawi a ni,” a ti a.
Maichâm hlan
18 Tin, ka hnênah, “Mihring fapa, LALPA PATHIAN chuan heti hian a ti a ni: ‘An siam zawh huna maichâm hman dân tûr chu hetiang hi a ni: hâlral inthawina tûr te, thisen thehna tûr te a ni. 19 Levia chi puithiam Zadoka thlaha mi, rawng mi bâwl tûra mi rawn hnaih ṭhîntu hnênah chuan, sual vânga inthawina atân bâwngpatuai i pe tûr a ni,’ tih hi LALPA PATHIAN thuchhuak a ni. 20 ‘A thisen chu i la ang a, maichâm kî palite leh a chhawrdawh kil lite a tlâng vêlin i luan ang a; chutiang chuan maichâm chu i tlêngin i thian dâwn nia. 21 Sual vânga inthawina bâwngpatuai chu i la ang a, hmun thianghlim pâwn lama, chumi atâna in ruatah chuan hâl tûr a ni. 22 Tin, a ni hnihnaah chuan kêlchal, hmêlhem lo, sual vânga inthawina atân hlan tûr a ni; tichuan, maichâm chu bâwngpatuaia an then ang bawk khân then tûr a ni. 23 Maichâm then chu in tih zawh hunah bâwngpatuai hmêlhem lo leh, berâmchal hmêlhem lo, a rual zînga mi i hlân dâwn nia. 24 LALPA hmaah i hlân ang a, puithiam chuan chi a phul ang a, LALPA hnênah hâl ral atân a hlân ang. 25 Ni sarih chhûng chu ni tin sual vânga inthawina atân kêlchal i hmang tûr a ni; bâwngpatuai leh berâmchal, a rual zînga mi, hmêlhem lo an hmang bawk tûr a ni. 26 Maichâm then leh tlen faina chuan ni sarih a awh ang a; tichuan, maichâm chu serh a ni tawh ang. 27 Tin, chûng nite an tlingtlâk zawh chuan, a ni riat ni aṭangin puithiamten in hâlral inthawinate leh remna inthawinate an maichâmah an hlân ang a; tin, ka lo pawm ang che u,’ tih hi LALPA PATHIAN thuchhuak a ni,” a ti a.
Khawchhak lam kawngka hman dân tûr
1 Tin, hmun thianghlim kawngka pâwnta zâwk, khawchhak lam hawi lamah chuan mi hruai lêt a, khâr a lo ni a. 2 Tin, LALPA chuan ka hnênah, “He kawngka hi a inkhâr reng ang; a inhawng lo vang a, tu mah an lût hek lo vang! LALPA, Israel Pathian chu a lo luh tawh avângin a inkhâr reng dâwn a ni. 3 Lal erawh zawng LALPA hmaa chaw ei tûrin chutah chuan a ṭhu chauh vang; sumhmun kawngkaah a lût ang a, chumiah vêk chuan a chhuak leh ang,” a ti a.
Tempul chhûnga luh theih dân tûrte
4 Tin, hmâr lam hawi kawngkaah chuan in pui kawtah mi hruai a; tin, ka han en a, ngai teh, LALPA in chu LALPA ropuinain a khat vek mai a; tin, bawkkhupin ka tlu ta a. 5 Tin, LALPA chuan ka hnênah, “Mihring fapa, LALPA in hman dân leh a dân zawng zawng i hnêna ka sawi chungchângah chuan i beng chhi la, i mit lên la, i rilruah chhinchhiah ṭha tê rawh khai! A in pui luh dân te, a hmun thianghlim ata chhuah dân te chu i rilruah chhinchhiah ngun ang che. 6-7 Tin, hel hmang, Israel chhûngte ngei hnênah chuan heti hian i sawi tûr a ni: LALPA PATHIAN chuan heti hian a ti a ni: Aw, nangni Israel chhûngte u, in tenawmna zawng zawng belhchhah tûra awze mi, thinlung leh tîsa serh tan loh - ka chhang te, thau te, thisen te in hlan laia ka hmun thianghlim, ka in ngei tibawrhbâng tûra in hruai luha, ka thuthlung in bawhchhiatah khân in tenawmna zawng zawng chu lo tâwp tawh rawh se. 8 Tin, ka thil serhte nangnin in vawng lo va, hêng awze mite hi ka hmun thianghlimah in aia vawngtuah in ruat ta zâwk a. 9 LALPA PATHIAN chuan heti hian a ti a ni: Awze mi tu mah, thinlung leh tîsa serh tan loh chu, Israel fate zînga chêng pawh ni se, ka hmun thianghlimah an lût tûr a ni lo.
Levia chi puithiama ngaih loh tûrte
10 “Levia chi, Israel-te milim ûma an vah bo laia ka laka hla taka kal tawhte erawh chuan an khawlohna an phur ang. 11 Ka hmun thianghlimah chuan rawngbâwltuah an ṭang ang a, in pui kawngkhârte an vêng ang a, in pui chhûngah chuan rawng an bâwl ang; hâlral inthawinate leh mipui tâna inthawinate an talh ang a, mipui rawngbâwlsak tûrin an hmaah an ding ang. 12 An milimte hmaah an rawng an bâwlsak a, Israel chhûngte tân khawlohnaa tlûkna an nih ṭhin avângin an chungah ka kut ka lek a, an khawlohna chu an phur ngei ang, tih hi LALPA PATHIAN thuchhuak a ni. 13 Tichuan, ka hnênah puithiam hna thawk tûrin min rawn hnaih ngai lo vang a, ka thil serhte, thil serh berte an rawn hnaih ngai hek lo vang; an mualphona leh an thil tenawm tih tâkte chu an phur zâwk ang. 14 A in pui enkawltuahte ka siam ang a, rawngbâwlna zawng zawng leh tih tûr awm apiangte ti tûrin.
Puithiamho
15 “Puithiam Levia chi, Zadoka fa, ka laka Israel fate an vah bo laia ka hmun thianghlim vawngtute erawh chuan ka rawngbâwl tûrin min rawn hnaih chauh vang; thau leh thisen hlân tûrin ka hmaah an ding ang, tih hi LALPA PATHIAN thuchhuak a ni. 16 Ka hmun thianghlimah chuan an lût ang a, rawng mi bâwlsak tûrin ka dawhkân an rawn hnaih ang a, mi enkawltuah an ṭang ang. 17 Tin, hung chhûngnung zâwk kawngkaahte an luhin kawrfual zai sînin an inthuam ang a; hung chhûngnung zâwk leh in chhûng lama rawng an bâwl chhûngin sahmul puan an inbel tûr a ni lo. 18 “Diar zai sîn an khim ang a, puan zai sîn kekawr an ha ang a, thlan tisa thei rêng rêng chu an inbel tûr a ni lo. 19 Tin, hung chhûng pâwnta zâwk, vântlâng hnêna an lo chhuah chuan an rawngbâwlna silhfênte chu an hlîp ang a, pindan serhah chuan an dah ang a, silhfên dang an inbel ang; mipuite chu an silhfênin mi serhah a siam ve loh nân. 20 An lute an ziat kawlh tûr a ni lo va, an sam an zuah sei tûr a ni hek lo, an mêt chauh tûr a ni. 21 Puithiam chuan hung chhûngnung zâwk an luh chuan uain an in tûr a ni lo. 22 Hmeithai emaw, mâk hnu emaw nupuiah an nei tûr a ni hek lo; Israel chhûngte chi, nula thianghlim emaw, puithiam thihsan hmeithai emaw an nei zâwk tûr a ni. 23 Ka mite chu thil serh leh serh loh danglamzia an zirtîr tûr a ni a, thil thiang leh thiang lo an thliar hrantîr tûr a ni. 24 Thubuaite pawh an rêl tûr a ni a, ka rêl dân ang zêlin an rêl ang. Ka kûtni vângthla zawng zawngah chuan ka dânte leh ka dân siamte an zâwm tûr a ni a; ka Chawlhnite pawh an serh tûr a ni. 25 Mahni intibawrhbâng tûrin mi ruang an hnaih tûr a ni lo; amaherawhchu, nu emaw, pa emaw, fanu emaw, fapa emaw, unaupa emaw, farnu pasal nei lo emaw tân chuan an intibawrhbâng thei ang. 26 Tin, a inthen fai hnuah a tân ni sarih chhiarsak leh tûr a ni. 27 Hung chhûngnung zâwka hmun thianghlima rawngbâwl tûra hmun thianghlima a luh niah chuan, sual vânga inthawina ama tân a hlân tûr a ni, tih hi LALPA PATHIAN thuchhuak a ni. 28 “Ro chan eng mah a nei lo vang; a ro chan chu keimah ka ni ang. Israel-ah chan eng mah in pe tûr a ni lo, an chan chu keimah hi ka ni. 29 Ei tûr hlan te, sual vânga thil hlan te, thiam loh vânga thil hlan te an ei ang a, Israel zînga thil serh apiang chu an ta tûr a ni. 30 Rah hmasate zînga a ṭha ber apiang te, in thil hlan tinrênga a ṭha ber, in thil hlan zawng zawnga mi chu puithiamte ta tûr a ni; in ina malsâwmna a châm hlen theihna tûrin, chhangphut hmeh hlâwm ṭha ber chu puithiam hnênah in pe tûr a ni. 31 Puithiam chuan sa tlaw rêng rêng - sava emaw, ramsa emaw, kut tuar emaw, amaha thi emaw an ei tûr a ni lo.
Ram aṭanga haw LALPA chanpual tûr
1 “Chu lovah chuan ro chan tûra ram in sem hunah chuan ram bung serh, LALPA hnênah ram zuat in hlân tûr a ni; a dung lam chu tawng sînghnih leh sângnga, a vâng lam chu tawng sînghnih, a pumin ram serh a ni tûr a ni. 2 Hemiah hian hmun serh atân a dung leh a vâng tawng zanga ve ve, inbial a ni ang a; tin, a vêlin tawng zangaa zau hmun âwl a awm tûr a ni. 3 Tin, hemi teh sa aṭang hian a dung tawng sînghnih leh sângnga leh a vâng tawng sîngkhat i teh chhuak ang a, chumiah chuan hmun thianghlim serh ber chu a awm tûr a ni. 4 Ram bung serh chu puithiam, hmun thianghlima rawngbâwltu, a rawngbâwl tûra LALPA hnaih ṭhîntute tân a ni ang a, an in hmun atân leh hmun thianghlim atâna ram serh a ni tûr a ni. 5 Hmun dang, a dung tawng sînghnih leh sângnga, a vâng tawng sîngkhat, Levia chi in puia rawngbâwltute pualah, an chênna khawpui atân a awm tûr a ni. 6 Ram bung serh hlan tawh hrûlah chuan khawpui chan, a vâng tawng zanga leh a dung tawng sînghnih leh sângnga in ruat tûr a ni a, chu chu Israel chhûngkaw pum pui tân a ni ang.
Lal chan tûr ram
7 “Lal chan chu ram serh hlan tawh leh khawpui chan sîr tuak ve ve, ram serh hlan tawh hma lam leh khawpui chan hma lamah, thlang lama mi thlang lam hawiin, chhak lama mi chhak lam hawiin a awm tûr a ni; a dung chu thlang lam ramri aṭanga chhak lam ramri thlengin, ram bung dang chen bawk a ni. 8 Chu chu Israel rama ama chanpual a ni tûr a ni; tin, ka lalte chuan ka mite an hnehchhiah tawh lo vang a, Israel chhûngte chu an hnam hran zia ang zêlin ram an pe zâwk ang.”
Thil hlan dân tûr
9 “LALPA PATHIAN chuan heti hian a ti: ‘Aw, Israel lalte u, tâwk tawh rawh se! Pâwngnêkna leh inramna chu bânsan daih ula, fel taka rêl leh dik taka tih chîng tawh ula, ka mite hnawh chhuah ṭhin chu bânsan tawh rawh u,’ tih hi LALPA PATHIAN thuchhuak a ni. 10 Bûkna leh bûk lung dik tak hman ṭheuh tûr a ni. Epha pawh, bath pawh a dik tûr a ni. 11 Epha leh bath hi a intluk chiah tûr a ni. Homer aṭanga teh tûr, hetiangin: epha sâwmin bath sâwm a tluk a, chu chu homer khat a ni. 12 In bûk lung chu hetiang tûr hi a ni: gera sawmhnih leh sekel khat a intluk ang a, sekel sawmruk chu mina khat a ni ang. 13 “Hei hi thilhlan in hlan tûr a ni ang; buh homer khat zêlah epha hmun ruka ṭhena hmun khat leh, barli homer khat zêlah epha hmun ruka ṭhena hmun khat in pe tûr a ni. 14 Hriak hlan dân tûr chu kor khat zêlah bath hmun sâwma ṭhena hmun khat; kor chu bath sâwm a ni, homer tluk bawk a ni; homer khat chu bath sâwm a ni si a. 15 Israel ran tlatna hmun ṭha ata berâm rual zînga mi zahnih zêlah a no pakhat, ei tûr hlan atân te, hâlral inthawina atân te, remna thilhlan atân te, anmahni then faina siamna tûrin an hlân tûr a ni,” tih hi LALPA PATHIAN thuchhuak a ni. 16 “Rama mi zawng zawngte chuan Israel lal hnênah he thilhlan hi an pe ang. 17 Tin, kûtah te, thla tharah te, Chawlhniah te, Israel kûtni vângthla zawng zawngah hâlral inthawina te, ei tûr hlan te, in tûr hlan te lal chuan a ngaihtuah ang a; sual vânga inthawina te, ei tûr hlan te, hâlral inthawina te, remna thilhlante chu Israel chhûngte inthen fai nân anin a tumsak tûr a ni.”
Kût hman tûrte
18 LALPA PATHIAN chuan heti hian a ti a ni: “Thla khatna, chumi thla ni khat niah chuan bâwngpatuai hmêlhem lo i hmang ang a, hmun thianghlim chu i thian fai tûr a ni. 19 Tin, puithiam chuan sual vânga inthawina thisen chu a la ang a, in pui kawngkabiangah te leh maichâm chhawrdawh kil liahte leh, hung chhûngnung zâwk kawngka in bangpêngahte a tât ang. 20 Tin, chumi thla ni sarih niah chuan tihpalh emaw, hriat lohna avâng emawa thil tisualtute tân pawh chutiang bawk chuan i ti ang a, chutiang chuan in pui thenna i siam tûr a ni. 21 Thla khatna, chumi thla ni sâwm leh ni li niah chuan kalhlên kût in serh ang; tin, ni sarih chhûng chu chhang dawidim telh loh in ei ang. 22 Chumi niah chuan lalin amah leh a rama mi zawng zawng tân, sual vânga inthawi nân bâwngpatuai a tum ang. 23 Kûtni ni sarih chhûng zawng chuan, bâwngpatuai hmêlhem lo pasarih leh berâmpa pasarih zêl LALPA tân hâlral inthawina tûrin a tum ang, sual vânga inthawina tûrin ni tin kêlpa pakhat nên. 24 Tin, chhang hlan atân bâwngpa pakhat zêlah epha khat, berâmpa pakhat zêlah epha khat, leh epha khat zêlah hriak hin khat a tum tûr a ni. 25 Thla sarihna, chumi thla ni sâwm leh ni nga nia kûtah chuan ni sarih chhûng chu chutiang bawk chuan a ti ang a, sual vânga inthawina te, hâlral inthawina te, chhang hlan te leh hriakte tum vekin,” a ti a.
Kût hmana lal tih tûr
1 Heti hian LALPA PATHIAN chuan a ti a ni: “Hung chhûngnung zâwk kawngka chhak lam hawi chu hnathawh ni, ni ruk chhûng chu a inkhâr ang a, Chawlhniah leh thla thar niah erawh chuan a inhawng tûr a ni. 2 Lal chu kawngka in sumhmunah a lût ang a, kawngka in bangpêng bulah a ding ang a, puithiamte chuan a hâlral inthawina leh remna thilhlante chu an buatsaihsak ang a, luhna kawngka in pindanah chuan Pathian a bia ang; tichuan, a chhuak ang a, kawng erawh chu tlai lam thlengin khâr loh tûr a ni. 3 Vântlâng erawh chuan Chawlhni leh thla tharahte chuan chu kawngka in luhna bulahte chuan LALPA hmaah Pathian chibai an bûk ang. 4 Chawlhnia lalin LALPA hnêna hâlral inthawina a hlan tûr chu, berâmno hmêlhem lo paruk leh berâmpa hmêlhem lo pakhat a ni ang a; 5 tin, berâmpa pakhat zêlah chhang hlan epha khat, berâmnotêah chuan a pêk theih ang ang leh, epha khatah hriak hin khat zêl a ni ang. 6 Thla thar niah chuan bâwngpatuai hmêlhem lo pakhat, berâmno paruk leh berâmpa pakhat a ni ang a, hmêlhem lo an ni vek tûr a ni. 7 Chhang hlan a buatsaih ang a, bâwngpatuaiah epha khat, berâmpaah epha khat, berâmnotêah a theih ang ang, leh epha khat zêlah hriak hin khat a ni tûr a ni. 8 Tin, lal chu a luh lamin kawngka in sumhmunah a lut ang a, chutah vêk chuan a chhuak leh tûr a ni. 9 Vântlângte erawh chu kûtni vângthlaa LALPA hmaa an lo kal chuan, Pathian chibai bûk tûra hmâr lam kawngka ina lo lût chu chhim lam kawngka inah an chhuak ang a, chhim lam kawngka ina lo lût chu hmâr lam kawngka inah an chhuak thung ang; an luhna kawngka inah chuan an kîr tûr a ni lo va, a hma lamah an kal zêl zâwk tûr a ni. 10 Tin, an luh chuan lal chu an zîngah a lût ve tûr a ni. 11 Tin, kûtnite leh kûtpuiahte chuan chhang hlan chu bâwngpatuai pakhatah epha khat, berâmpa pakhatah epha khat, berâmnotêah a pêk theih ang ang, epha khatah hriak hin khat zêl a ni tûr a ni. 12 “Tin, lalin duh thua thilhlan a hlan dâwn chuan hâlral inthawina emaw, remna thilhlan emaw LALPA hnêna duh thua thilhlan anga a hlan dâwn chuan, khawchhak lam hawi kawng chu a hawnsak ang a, Chawlhnia tih ang bawkin hâlral inthawinate leh remna thilhlante chu a buatsaih ang; tichuan, a chhuak ang a, a chhuah hnuah kawng chu an khâr ang.
Ni tin thil hlan tûr
13 “Ni tinin LALPA hnêna hâlral inthawi nân berâmno kum khat mi, hmêlhem lo i hmang ang a, tûk tinin i hmang tûr a ni. 14 Tin, tûk tinin chhang hlan i buatsaih ang a, epha hmun ruka ṭhena hmun khat leh hriak hin khat hmun thuma ṭhena hmun khat, chhangphut dip tak tihhnâwn nân. Chu chu kumkhuaa LALPA hnêna chhang hlan dân tûr a ni. 15 Hetiang hian hâlral thil hlân fo tûrin berâmnotê te, chhang hlan te, hriak te tûk tinin an buatsaih tûr a ni,” tiin.
Lalin ram a pêk
16 LALPA PATHIAN chuan heti hian a ti a ni: “Lalin a fapate, tu hnênah pawh, ro chan eng pawh a pêk chuan a fapate ta a ni ang a, an ro luah a ni mai. 17 Mahse, a ro chana mi chu a rawngbâwltu tu emaw hnêna a pêk chuan, bawih chhuahna kum thlengin a nei ang a, chutah chuan lal hnênah a pe kîr tûr a ni; ama ro pângngai erawh chu a fapate ta tûr a ni ang. 18 Chu lovah pawh, lalin mite ro chan a chhuhsak tûr a ni lo va, an in leh lo ata a hnawt chhuak tûr a ni hek lo; ama ta ngeia mi chu a fapate hnênah ro chan a pe tûr a ni, mahni in leh lo ata mite an vah darh loh nân,” a ti a.
Tempul chaw chhum in
19 Tin, kawngka in sîra puithiamte tâna pindan serh hmâr lam hawiah chuan mi hruai lût a; tin, ngai teh, a kawmchâr khawthlang lampangah chuan hmun a lo awm a. 20 Tin, ani chuan ka hnênah, “Hei hi puithiamten thiam loh vânga thil hlan leh sual vânga thil hlan an chhumna hmun, chhang hlan an urna hmun a nih hi; hung chhûng pâwnta zâwkah an ken chhuaha, mite chu mi serha an siam loh nân,” a ti a. 21 Tin, hung pâwnta zâwkah chuan mi hruai chhuak a, hung chhûng kil hrûlah chuan mi kaltîr a; tin, ngai teh, a hung chhûng kil ṭheuhvah chuan hung a awm leh a. 22 Hung chhûng kil liah chuan hung, bang nei, a dung tawng sawmli, a vâng tawng sawmthum a lo awm a; chûng a kila mi palite chu a intiat vek a ni. 23 Chûng hmun li chhûng lamah chuan a vêlin lung an rem tlar a, chumi tlar hnuaiah chuan a vêlin chhumna tûr thuk a awm a. 24 Tin, ka hnênah, “Hêngte hi chhumna in, in pui rawngbâwltuten mite inthawina sa an chhumna tûrte chu a nih hi,” a ti a.
Tempul aṭanga lui luang chhuak
1 Tichuan, in pui kawngkhârah chuan mi hruai lêt a; tin, ngai teh, in pui kawngka bul hnuai aṭang chuan chhak lam hawiin tui a lo luang chhuak a, in pui chu chhak lam hawi a ni si a; tin, tui chu maichâm chhim lam in pui sîr ding lam hnuai aṭangin a lo luang thla a. 2 Tin, hmâr lam hawi kawngka inah chuan mi hruai chhuak a, pâwnah chuan chhak lam hawi kawngka in pâwnta zâwk thlengin mi hruai a; tin, ngai teh, ding lampangah chuan tui a lo luang chhuak a. 3 Chu mi chuan tehna hrui kenga chhak lam hawia kalin tawng sângkhat a teh a; tin, tui chu mi dai kaitîr a, kheimit thleng a ni a. 4 Tawng sângkhat a teh leh a, tui chu mi dai kaitîr leh a, tui chu khûp thleng a ni a. Tawng sângkhat a teh leh a, mi dai kaitîr leh a, tui chu kâwng thleng a ni a. 5 Tawng sângkhat a teh leh a; tin, ka dai kai rual loh, luipui a lo ni ta a; tui chu a lo sâng zêl a, a daia dai kai rual loh, a hleuhva hleuh tham luipui a lo ni ta a. 6 Tin, ka hnênah, “Mihring fapa, hei hi i hmu em?” a ti a. Tin, luikam hrût tûrin mi hruai kîr leh ta a. 7 Tin, ka han kîr leh chuan, ngai teh, vaukam tluan chuan vaukam tawnin thing tam tak a lo awm a. 8 Tin, ani chuan ka hnênah, “He tui khawchhak ram lama luang hi Araba ramah a luang lût ang a, tuipui tui al chu tui thianghlimah a chantîr ang. 9 Tin, heti hi a lo ni ang a, luite chu an luanna apiangah rannung tinrêngin an dam phah ang a, sanghate an awm huai huai ang; tuipui tui a thianghlimna tûr leh a luanna apiangah rannungten an nun phahna tûrin hêng lui hi a lo luang a ni si a. 10 Tin, heti hi a ni ang a, a kamah chuan sangha mantute an ding ang; En-gedi aṭanga En-eglaim thlengin lên denna hmun a ni ang. A sangha chu an chi ang zêlin, tuipui lian sangha ang maiin an tam êm êm ang. 11 Chirhdûp leh dûmte erawh chu an thianghlim ve lo vang a, chi khur atân hnutchhiah a ni ang.
An ramri tûr
12 “A lui kamah chuan a kam tuakin theikûng tinrêng a ṭo vang a, chûngte chu a hnah a vuai ngai lovin a rah lo ngai hek lo vang; hmun thianghlim aṭanga lui lo luang chhuak châwm a nih avângin thla kipin a rah ang. A rah chu ei atân a ni ang a, a hnah chu tihdam nân a ni ang.” 13 LALPA PATHIAN chuan heti hian a ti a ni: “Hei hi Israel hnam sâwm leh hnam hnih zînga ram inṭhen dân tûr chu a ni e. Josefan chan hnih a chang ang. 14 Inang rengin in chang tûr a ni; in thlahtute hnêna pêk tûra chhia ka chham tawh kha, he ram hi in ram chanah a tlu dâwn a ni. 15 Hei hi a ram pum ri tûr a ni: hmâr lamah chuan Tuipui lian aṭangin Hethlon kaltlangin Hamath luhna ruamah Zedad a thleng a; 16 Berotha te, Damaska leh Hamath inrina laia awm Sibraim te, Hauran ramri bula awm Hazer-hattikon thlengin. 17 Chutichuan, ramri chu Tuipui lian aṭangin Damaska ramri bula Hazar-enan thlengin a ni ang a, hmâr lamah chuan Hamath ramriin a ri ang. Hei hi hmâr lam ramri chu a ni. 18 Tin, chhak lamah chuan Hauran leh Damaska inkârah Gilead leh Israel ram inkâra Jordan lui dung a zawh ang; hmâr lam ramri aṭangin khawchhak tuipuiah Tamar a thleng ang. Hei hi chhak lam ramri a ni tûr a ni. 19 Chhim lamah chuan Tamar aṭangin Meriba-kadesh tuite thlengin Aigupta lui zawhin Tuipui lian a thleng ang. Hei hi chhim lam ramri tûr a ni. 20 Thlang lamah chuan Tuipui lianin a ri ang a, chhim lam ramri aṭangin Hamath luhna ruam zâwn thlengin. Heti hi thlang lam ramri a ni tûr a ni. 21 Chutichuan, he ram hi Israel hnam athuin in zîngah in sem ang. 22 Tin, heti hi a ni ang a, in ram chan tûr leh in zînga hnam dang chêng, nupui fanau nei tawhte ram chan tûr chu in sem tûr a ni. Anni chu Israel faa piang rêng ang an ni tûr a ni a, Israel hnamte zîngah nangmahni angin chan an nei tûr a ni. 23 Tin, heti hi a ni ang a, tu hnam zîngah pawh hnam dang lo khawsa sela, chutah chuan a ram chan tûr in ruatsak tûr a ni,” tih hi LALPA Pathian thuchhuak a ni.
Hnam tin ram chan tûr
1 “Hêng hi an hnam hmingte chu a ni: hmâr lam ramri Tuipui lian aṭanga Hethlon kaltlangin Hamath luhna ruamah, Damaska ramria Hamath kiang hmâr lampang Hazar-enan thlengin, chhak leh thlang zâwngin chan khat chu Dan-ho chan a ni a. 2 Dan-ho chan nêna inriin chhak leh thlang zâwngin chan khat chu Aser-ho chan a ni a. 3 Aser-ho chan nêna inriin chhak leh thlang zâwngin chan khat chu Naphtali-ho chan a ni a. 4 Naphtali-ho chan nêna inriin chhak leh thlang zâwngin chan khat chu Manase-ho chan a ni a. 5 Manase-ho chan nêna inriin chhak leh thlang zâwngin chan khat chu Ephraim-ho chan a ni a. 6 Ephraim-ho chan nêna inriin chhak leh thlang zâwngin chan khat chu Reuben-ho chan a ni a. 7 Reuben-ho chan nêna inriin chhak leh thlang zâwngin chan khat chu Juda-ho chan a ni.
Ram lai taka ram inṭâwm
8 “Juda-ho chan nêna inriin chhak leh thlang zâwngin, ram zuat in hlan tûr chu a vâng tawng sînghnih leh sângnga a ni ang a, a dung chu chhak leh thlang zâwngin chan dang ang bawk a ni a, a laia hmun serh awmin. 9 Ram zuat LALPA hnêna in hlan tûr chu a dung tawng sînghnih leh sângnga, a vâng tawng sînghnih a ni tûr a ni. 10 Heti ang hian puithiamte tân ram serh zuat tûr a ni ang: hmâr lam zâwngin a dung tawng sînghnih leh sângnga leh, thlang lam zâwngin a vâng tawng sîngkhat leh, chhak lam zâwngin a vâng tawng sîngkhat, chhim lam zâwngin a dung tawng sînghnih leh sângnga a ni tûr a ni, a laia LALPA hmun serh awmin. 11 Puithiam serh tawh, Zadoka fa ka thu vawngtute tân a ni ang. Chûngte chu Israel fate an vah bo laia, Levia chite an vâk bo ve ta mai anga vâk bo ve lote kha an ni a. 12 Tin, ram zuat pum pui ata an tâna zuat bîk, hmun serh ber a ni ang a, Levia chi chan nêna inriin. 13 Puithiam chan zûl zêlah chuan Levia chiten chan an nei ang a, a dung tawng sînghnih leh sângnga, a vâng tawng sîngkhat a ni ang. 14 Tin, an hralh tûr a ni lo va, an thleng tûr a ni hek lo; a ram ṭha ṭha pawh mi dang hnênah pêk tûr a ni lo, LALPA tâna serh a ni si a. 15 A vâng tawng sînghnih leh sângnga bâka tawng sângnga chu vântlâng chan, khawpui dinna tûr, chênna in tûr leh daifêm atânte a ni ang; khawpui chu a lai takah a awm ang. 16 Tin, a teh vêl dân chu hetiangin a ni ang: a hmâr lampang tawng sângli leh zanga, a chhim lampang tawng sângli leh zanga, a chhak lampang tawng sângli leh zanga, a thlang lampang tawng sângli leh zanga. 17 A khawpui chuan daifêm a nei ang a, hmâr lampang chuan tawng zahnih leh sawmnga, chhim lampang tawng zahnih leh sawmnga, chhak lampang tawng zahnih leh sawmnga, thlang lampang tawng zahnih leh sawmnga. 18 A dung lam la chuang ram zuat serh tawh hrûla mi chu chhak lamah tawng sîngkhat, thlang lamah tawng sîngkhat a ni ang. Ram zuat serh tawh hrûl zêl a ni tûr a ni a; tin, chuta thil chhuakte chu khawpuia hnathawktute ei tûr a ni ang. 19 “Khawpuia hnathawktu Israel hnam zawng zawnga mite chuan a lei an let ang. 20 Ram zuat pum pui chu a dung tawng sînghnih leh sângnga, a vâng tawng sînghnih leh sângnga a ni ang. Ram zuat serh tawh, kil li bial, khawpui chan nên in hlân tûr a ni. 21 A bâk ram zuat serh tawh leh khawpui chan sîr tuak ve ve chu lal chan a ni ang a, chhak lam zâwngin ram zuat tawng sînghnih leh sângnga bâk leh, thlang lam zâwngin tawng sînghnih leh sângnga bâk, ram bung dangte hrûl zêl chu lal chan a ni ang; tichuan, ram zuat serh tawh leh in pui hmun serh chu a lai takah a awm ang. 22 Tin, Levi-ho chan leh khawpui chan chu lal chante inkârah a awm ang a, lal chan chu Juda-ho chan leh Benjamin-ho chan nên a inri ang.
Hnam tin ram chan tûr
23 “Hnam la awmte chungchâng thu-ah chuan, chhak leh thlang zâwngin chan khat chu Benjamin-ho chan a ni a; 24 Benjamin-ho chan nêna inriin chhak leh thlang zâwngin chan khat chu Simeon-ho chan a ni a; 25 Simeon-ho nêna inriin chhak leh thlang zâwngin chan khat chu Isakar-ho chan a ni a; 26 Isakar-ho chan nêna inriin chhak leh thlang zâwngin chan khat chu Zebulun-ho chan a ni a; 27 Zebulun-ho chan nêna inriin chhak leh thlang zâwngin chan khat chu Gad-ho chan a ni a; 28 Gad-ho chan chhim lampang ramri chuan, Tamar aṭangin Meriba-kadesh tuite thlengin Aigupta lui zawhin Tuipui lian a thleng ang. 29 Hei hi Israel hnamte ro chan tûra ram insem dân tûr leh an ram bung hrangte chu a ni,” tih hi LALPA PATHIAN thuchhuak a ni.
Jerusalem kawngka
30 “Hêngte hi khawpui ata chhuahnate chu a ni. Hmâr lampang tawng sângli leh zangaah chuan kawngka pathum, 31 khawpui kawngkate chu Israel hnam hming ang zêla vuah tûr a ni a; hmâr lama kawngka pathum chu: Reubena tân kawngka pakhat, Juda tân kawngka pakhat, Levia tân kawngka pakhat a ni ang a; 32 chhak lampang tawng sângli leh zangaah chuan kawngka pathum: Josefa tân kawngka pakhat, Benjamina tân kawngka pakhat, Dana tân kawngka pakhat a ni ang a; 33 chhim lampang tawng sângli leh zangaah chuan kawngka pathum: Simeona tân kawngka pakhat, Isakara tân kawngka pakhat, Zebuluna tân kawngka pakhat a ni ang a; 34 thlang lampang tawng sângli leh zangaah chuan kawngka pathum: Gada tân kawngka pakhat, Asera tân kawngka pakhat, Naphtalia tân kawngka pakhat a ni ang. 35 A vêlin tawng sîngkhat leh sângriat a ni ang a, chumi ni aṭang chuan khawpui hming chu, ‘LALPA AWMNA HMUN’ tih a ni tûr a ni.”
Lal Nebukadnezzara ina tlangvâl pathum
1 Juda lal Jehoiakima rorêl kum thumnaah chuan Babulon lal Nebukadnezzara Jerusalem-ah a lo kal a, a hual a. 2 Tin, LALPA chuan Juda lal Jehoiakima chu a kutah a pe a, Pathian in bungbêl ṭhenkhatte nên; tin, ani chuan Sinar rama a pathian inah a kalpui ta a; tin, bungbêlte chu a pathian sum inah a rawn thlen a. 3-4 Tin, lal chuan Israel fate zînga mi, lal thlahte leh mi ṭha fate, tleirâwl demna awm lo, hmêlṭha tak, finna tinrênga remhria, hriatna lama bengvâr, thil bul chhût thiam, lal ina chetla thiam rawn hruai lût tûr leh, Kaldai ṭawng leh thil thiam zirtîr tûrin, a mi tilrehte hotu Aspenaza chu a hrilh a. 5 Tin, lal chuan lal chaw tui hmêl ata leh a uain in ṭhin ata chu an ni tin chan tûr a ruatsak a, chutianga kum thum châwma, chumi tâwpa lal hmaa an din theih nân. 6 Tin, hêng zîngah hian Juda fate zînga mi, Daniela te, Hanania te, Misaela te, Azaria te an tel a. 7 Tin, tilrehte hotu chuan an hming a sa hlawm a; Daniela chu Beltesazzara a vuah a, Hanania chu Sadraka, Misaela chu Mesaka, Azaria chu Abednegoa. 8 Mahse, Daniela chuan a rilruin lal chaw leh a uain in ṭhinte chuan intihbawlhhlawh loh a tum tlat a; chutichuan, a intihbawlhhlawh loh nân tilrehte hotu chu a dîl a. 9 Tichuan, Pathianin Daniela chu tilrehte hotu laka duhsakna leh khawngaihna chu a dawntîr a. 10 Tin, tilrehte hotu chuan Daniela hnênah, “In ei tûr leh in in tûr ruattu ka lalpa, lalber chu ka hlau a ni; in hmêl hi tleirâwl, in rualpuite aia chhe zâwkin an rawn hmu ang asin! Chuti a nih chuan lalber lakah ka lu hi hlauhpuiawmin in siam dâwn a ni alâwm,” a ti a. 11 Tin, tilrehte hotuin Daniela te, Hanania te, Misaela te, Azaria te enkawltua a siam hnênah chuan Danielan, 12 “Ka ngên a che, i chhiahhlawhte hi ni sâwm min fiah rawh, ei tûr thlai leh in tûr tuisik min pe mai rawh se. 13 Tin, i hmaa kan lan dânte leh lal chaw tui hmêl ei tleirâwlte lan dân chu tehkhin ni sela; tin, i hmuh dân angin i chhiahhlawhte chungah hian ti ang che,” a ti a. 14 Tichuan, he thu hi a remtihsak a, anni chu ni sâwm a fiah ta a. 15 Tin, ni sâwm tâwpah chuan lal chaw tui hmêl eitu tleirâwlte zawng zawng ai chuan an hmêl a lang mawi zâwkin an lo thau zâwk mah a. 16 Tichuan, enkawltu chuan an ei tûr leh an uain in tûr chu a la bo va, thlai a pe ta zâwk a. 17 Tichuan, hêng tleirâwl palite hi chu thiamna leh finna zawng zawngah hriatna leh bengvârna Pathianin a pe a, Daniela chuan inlârna leh mumang zawng zawng a hre thiam ta a. 18 Tin, lalin anmahni rawn hruai luhna tûra a ni ruat tâwpah chuan tilrehte hotu chuan anniho chu Nebukadnezzara hmaah chuan a rawn hruai lût a. 19 Tin, lal chuan a lo be hlawm a, anniho zîngah chuan Daniela te, Hanania te, Misaela te, Azaria te ang rêng rêng an awm lo va; chuvângin, lal hmaah chuan an ding ta a. 20 Tin, finna leh hriat thiamna thu tinrêng lalin a han zawh chuan a ram pum puia dawivaihthiam leh aikaihthiam zawng zawngte ai chuan a lêt sâwmin an ṭha zâwk tih a hre ta a. 21 Tin, Daniela chuan Lal Kura kum khatna thlengin a thawk ta zêl a.
Lal Nebukadnezzara mumang
1 Tin, Nebukadnezzara rorêl kum hnihnaah chuan Nebukadnezzara chuan mumang a nei a; a rilru a lo buai zo ta a, a muhîl thei ta lo va. 2 Tichuan, lal chuan a mumang chu amah hrilh tûrin dawivaihthiamte, aikaihthiamte, dawithiamte, Kaldai mite koh thu a pe a. Tichuan, an lo kal a, lal hmaah chuan an ding a. 3 Tin, lal chuan an hnênah, “Mumang ka nei a, chu mumang chu hre tûrin ka rilru a buai zo ta a,” a ti a. 4 Kaldai mite chuan Suria ṭawngin lal hnênah chuan, “Aw lalber, kumkhuain dam ang che! I mumang chu i chhiahhlawhte hi hrilh la; tin, a hrilhfiahna chu kan entîr dâwn che nia,” an ti a. 5 Lal chuan Kaldai mite chu a chhâng a, an hnênah, “Ka hnên aṭangin thu chu a chhuak tawh alâwm: mumang leh a hrilhfiahna chu ka hnênah in tihlan loh nâ chuan sah sawm in ni ang a, in inte pawh hnâwmhnawkah siam a ni mai ang. 6 Mumang leh a hrilhfiahna in tihlan erawh chuan ka hnên ata thilpêk leh lâwmman leh chawimawina ropui tak in hmu ang; chuvângin, mumang leh a hrilhfiahna chu mi entîr rawh u,” a ti a. 7 Anni chuan an chhâng leh a, “Lal chuan chu mumang chu a chhiahhlawhte hi min hrilh sela; tin, a hrilhfiahna chu kan entîr ang e,” an ti a. 8 Lal chuan a chhâng a, “Hun in tisei lui mai mai dâwn a ni tih chiang takin ka hria; 9 ka hnên aṭangin thu chu a chhuak tawh tih in hria e: ka hnêna mumang chu in tihlan loh nâ chuan in tân dân khat chauh a awm! Dâwt sawi kuala, ka hmaa sawi tûr dâwt thu leh thu tlâktlailo in buatsaih a nih hi. Chutichuan, mumang chu mi hrilh ula, a hrilhfiahna pawh chu mi entîr thei tih ka hria ang,” a ti a. 10 Kaldai mite chuan lal chu an chhâng a, “Lal thil phût hi entîr thei tûr mi pakhat mah lei chungah hian an awm lo ve; lal te, hotu te, rorêltu te tu mah rêngin hetiang thil hi dawivaihthiam emaw, aikaihthiam emaw, Kaldai mi emaw an la zâwt ngai si lo. 11 Tin, lal thil phût hi thil khirh tak a ni a, tîsaa khawsa lo pathiante tih chauh lo chu entîr thei tûr tu mah an awm lo ve,” an ti a. 12 Chu vâng chuan lal chu a thinrim êm êm a, a kawlh ta hle mai a, Babulon mi fing zawng zawng chu tihboral vek tûr thu a pe ta a. 13 Chutichuan, thupêk chu a chhuak ta a, mi finghote chu tihhlum tûr an ni ta a; tin, Daniela leh a ṭhiante pawh tihhlum tûrin an zawng a.
Pathianin Daniela hnênah mumang awmzia a hrilh
14 Tin, Daniela chuan Babulon mi fingte tihlum tûra kal chhuak Arioka, lal vêngtu pâwl hotu chu remhre tak leh fing takin a chhâng a; 15 lal vêngtu pâwl hotu Arioka hnênah chuan, “Engtizia nge lal thupêk chu chuti êma a hmanhmawh le?” tiin a chhâng a. Tin, Arioka chuan Daniela chu a hrilh ta a. 16 Tin, Daniela chu a lût a, lal chu a hrilhfiahna a entîr theih nân hun pe tûrin a ngên a. 17 Tichuan, Daniela chu a inah a hâwng a, chu thil chu a ṭhian Hanania te, Misaela te, Azaria te a hrilh a; 18 Babulon mi fing dangte zînga Daniela leh a ṭhiante chu an boral ve loh nâna, he thu inthup chungchângah hian vân Pathian khawngaihna an dîlna tûrin. 19 Tin, chu thu inthup chu zân inlârnaah Daniela hnênah a lang ta a. Tin, Daniela chuan vân Pathian chu a fak a. 20 Daniela chuan, “Pathian hming chu kumkhaw tlaitluanin fakin awm rawh se; Finna leh hunbite a tidanglam a. 21 Hunte leh hunbite a tidanglam a; Lalte a sawn bo va, lalte a tungding a. Mi fing hnênah finna a pe a, Hre thiamtu hnênah hriatna a pe a. 22 Thil thûk leh thil inthupte a tilang a; Thima awm pawh a hria a, a hnênah chuan êng a chêng a. 23 Aw ka thlahtute Pathian, finna leh theihna mi petu, I lak ata kan thil dîl tûna mi hriattîrtu chu Lâwm thu ka hrilhin ka fak a che; Lal thil phût chu min hriattîr tawh si a,” tiin a sawi a.
Danielan lal hnênah mumang chu a sawi a, a hrilhfiah
24 Chutichuan, Daniela chu Babulon mi fingte tiboral tûra lalin a ruat Arioka hnênah chuan a va kal a, a hnênah chuan, “Babulon mi fingte chu tiboral suh; lal hmaah chuan mi hruai la, lal hnênah chuan a hrilhfiahna ka entîr ang e,” a va ti a. 25 Tin, Arioka chuan Daniela chu hmanhmawh takin lal hmaah a hruai ta a, a hnênah, “Juda sal fate zîngah lal hnêna a hrilhfiahna hriattîrtu tûr mi pakhat ka hmu ta,” a ti a. 26 Lal chuan Daniela, a hming Beltesazzara hnênah chuan, “Mumang ka neih leh a hrilhfiahna chu ka hnênah mi hriattîr thei em ni?” a lo ti a. 27 Daniela chuan lal chu a chhâng a, a hnênah, “Thil inthup, lalin hriat a duh chu, mi fingte, aikaihthiamte, dawivaihthiamte, aisânthiamte chuan lal hnênah an entîr thei lo va; 28 mahse, thil inthupte puangtu Pathian chu vânah a awm a, Lal Nebukadnezzara hi tûn hnua thil lo la awm tûrte chu a hriattîr a nih hi. I mumang leh i khumlaizâwla i lua inlârnate chu hêng hi a ni: 29 aw lalber, nang chuan i khumlaizâwlah chuan tûn hnua thil lo awm tûrte i ngaihtuah a, thil inthupte puang ṭhîntu chuan tûn hnua thil lo la awm tûrte chu a hriattîr che a ni. 30 Tin, kei hian mi dangte aia finna ka neih bîk avânga he thil inthup hi ka hnêna puan a ni lo va, lal hnênah a hrilhfiahna hriattîr tûrin a ni zâwk e, i thinlunga i ngaihtuahte chu i hriat theih nân. 31 “Aw lalber, i han dâk chhuak a, ngai teh, milim ropui tak a lo awm a. Chu milim hrawl pui, tle êm êm mai chu i hmaah a ding a; a lan dân pawh ṭihbaiawm tak a ni. 32 Chu milim chu a lu rangkachak thianghlim tak a ni a, a âwm leh a bânte chu tangkarua, a pum leh a malpuite dâr, 33 a kête thîr, a kephah chu a ṭhen thîr, a ṭhen bellei a ni a. 34 Nang chuan i thlîr reng laiin lung, kut lova laih chhuah chuan milim chu a kephah thir leh belleiah chuan a rawn delh a, a tikeh sawm ta vek a. 35 Tichuan, thîr te, bellei te, dâr te, tangkarua te, rangkachak te chu a rualin a keh sawm ta vek a, nipui lai hruih zâwla buhsî ang mai an lo ni ta a; tin, thliin anmahni a lên bo va, an awmna hmun rêng hriat a ni ta lo va. Tin, milim delhtu lung chu tlâng lian takah a lo chang a, lei pum hi a khat ta a. 36 “Hei hi mumang chu a ni a; tin, a hrilhfiahna chu lal hmaah hian kan han sawi leh ang e. 37 Aw lalber, nang hi lalte lal, vân Pathianin ram te, thiltihtheihna te, chakna te, ropuina te a pêka chu i ni a; 38 chuvângin, khawiah pawh mihring fate awmna apiangah ramsa te, chunglêng sava te i kutah a pe a, an zaa chungah rorêl tûrin a siam chia; rangkachak lu chu nang hi i ni. 39 Tin, i hnuah hian ram dang, nang aia tênau zâwk a lo ding ang; tin, dâr, ram thumna, lei chung zawng zawnga rorêl tûr chu a awm leh ang. 40 Tin, ram lina chu thîr anga khauh a ni ang; thîr chuan a tikeh sawmin thil zawng zawng a hneh ṭhîn ang hian; tin, thîrin thil zawng zawng a tikeh ang bawkin ani chuan a tikeh sawmin a râwt dip ang. 41 Tin, a kephah leh a zungṭangte chu, a ṭhen bêlvawtu hlum, a ṭhen thîr nia i hmuh ang ngei khân ram inṭhen a ni ang a; mahse, amahah chuan thîr khauhna chu a awm tho vang, thîr leh hlum nêm inpawlh i hmuh ang ngei khân. 42 Tin, a kezungṭang a ṭhen thîr, a ṭhen hlum a ni ang bawk khân ram chu a ṭhenah chuan a chak ang a, a ṭhenah chuan a chhe awl ang. 43 Tin, thîr leh hlum nêm inpawlh i hmuh ang ngei khân anni chu mihring chiin an inpawlh ang a; mahse, thîr leh hlum a inpawlh tak tak thei lo ang bawkin an inzawm reng lo vang. 44 Tin, chûng lalte niah chuan vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang. 45 Tlâng ata lung, kut lova laih chhuahin thîr te, dâr te, hlum te, tangkarua te, rangkachak te a tikeh sawm i hmuh ang ngei khân, Pathian ropui tak chuan lal hnênah hian tûn hnua thil lo awm tûr chu a puang a ni e. Mumang chu a tak ngei a, a hrilhfiahna pawh a dik ngei a ni,” a ti a.
Lalin Daniela lâwmman a pe
46 Tichuan, Lal Nebukadnezzara chu a bawkkhup a, Daniela chu chibai a bûk a, a hnênah chuan thilhlan leh rimtuite rawn hlân tûrin thu a pe a. 47 Lal chuan Daniela chu a chhâng a, a hnênah, “He thil inthup i puan theihziaah hian Pathian chu pathiante Pathian, lalte Lal, thil inthup puangtu a lo ni ngei mai e,” a ti a. 48 Tichuan, lal chuan Daniela chu a siam lian a, thilpêk ropui tam tak a pe a, Babulon ram bial pum puia rorêl tûr leh Babulon mi fingte zawng zawng chunga hotu ber ni tûrin a siam a. 49 Tin, Daniela dîl angin lal chuan Sadraka te, Mesaka te, Abednegoa te chu Babulon bial chungchânga hotuah a dah a; Daniela erawh chu lalber rorêlnaah chuan a awm ta a.
Lalin rangkachak milim be tûrin mi zawng zawng thu a pe
1 Lal Nebukadnezzara chuan rangkachak milim, a sân lam tawng sawmruk, a hlai lam tawng ruk a siam a, Babulon biala Dura phaizâwlah a dintîr a. 2 Tin, Lal Nebukadnezzara chuan thuneitute, aiawhtute, awptute, rorêltute, sum enkawltute, remruattute, dânhremite leh ram bial rorêltu zawng zawng chu Lal Nebukadnezzara milim din hlannaa lo tel tûr chuan a chah khâwm a. 3 Tin, thuneitute, aiawhtute, awptute, rorêltute, sum enkawltute, remruattute, dânhremite leh ram bial rorêltu zawng zawng chu Lal Nebukadnezzara milim din serhnaah chuan an rawn inkhâwm a, Lal Nebukadnezzara milim din hmaah chuan an ding hlawm a. 4 Tin, ring takin tlângau a lo au va, “Aw, mi tinte u, hnam tinte u, ṭawng tinte u, 5 tawtawrâwt te, phênglâwng te, ṭingṭang te, sakbut te, ṭingṭangpui te, baja te leh ri thei chi zawng zawng in hriat hunah, Lal Nebukadnezzara rangkachak milim din chu bawkkhupa chibai bûk tûrin thu pêk in ni e; 6 tin, tu pawh bawkkhupa chibai bûk lo chu chumi lai la la chuan rawh tuina meipuia paih luh tûr an ni ang,” tiin. 7 Chu vâng chuan chumi laia mipui zawng zawngin tawtawrâwt te, phênglâwng te, ṭingṭang te, sakbut te, ṭingṭangpui te leh ri thei chi zawng zawng an han hriat chuan mi tinte, hnam tinte, ṭawng tinte zawng zawng chuan Lal Nebukadnezzara rangkachak milim din chu bawkkhupin chibai an bûk ta a.
Daniela ṭhiante pathum thu awih lovah puh an ni
8 Tin, chumi lai chuan Kaldai mi ṭhenkhatte an lo hnai a, Juda mite chu an rawn hêk a. 9 Lal Nebukadnezzara hnênah chuan, “Aw lalber, kumkhuain dam ang che. 10 Nangin, aw lalber, mi tu pawh tawtawrâwt te, phênglâwng te, ṭingṭang te, sakbut te, ṭingṭangpui te, baja te leh ri thei chi zawng zawng hria apiang chuan bawkkhupin rangkachak milim chibai an bûk tûr a ni; 11 tin, tu pawh bawkkhupa chibai bûk lo apiang rawh tuina meipuia paih luh an ni ang, tiin thupêk i siam a. 12 Juda mi ṭhenkhat Babulon ram bial chungchânga hotua i siam Sadraka te, Mesaka te, Abednegoa te kha an awm a, hêng mite hian, aw lalber, an pawisa lo che a ni. I pathiante rawng an bâwl lo va, rangkachak milim i din chu chibai an bûk hek lo,” tiin an sawi a. 13 Tichuan, Nebukadnezzara chuan thinur leh thintâwt takin Sadraka te, Mesaka te, Abednegoa te chu rawn hruai tûr thu a pe a. Tin, hêng mite hi lal hmaah chuan an rawn hruai a. 14 Nebukadnezzara chuan a chhâl a, an hnênah, “Aw Sadrak, Mesak, Abednego, ka pathian rawng bâwl lova, ka rangkachak milim din chibai bûk loh hi in tum rêng em ni? 15 Tûnah hian tawtawrâwt te, phênglâwng te, ṭingṭang te, sakbut te, ṭingṭangpui te, baja te leh ri thei chi zawng zawng in hriat hunah bawkkhupa ka milim siam chibai bûk tûr in nih tawh chuan a ṭha e! Chibai in bûk loh erawh chuan, chumi lai la la chuan rawh tuina meipuia paih luh in ni ang. Ka kut ata chhanchhuak tûr che u pathian chu tu a ni nge?” a ti a. 16 Sadraka te, Mesaka te, Abednegoa te chuan lal chu an chhâng a, a hnênah, “Aw Nebukadnezzar, he thu-ah hian kan chhân che pawh a ngai lo ve. 17 Kan Pathian, a rawng kan bâwl ṭhina chuan rawh tuina meipui ata min chhanchhuak thei si a, i kut ata pawh, aw lalber, min chhanchhuak mai ang. 18 Chuti lo pawh ni sela, aw lalber, i pathiante rawng chu kan bâwl dâwn lo va, i rangkachak milim din pawh chu chibai kan bûk hek lo vang tih hi hria ang che,” an ti a.
An ṭhianzaho chuan thi tûra tih an ni
19 Tichuan, Nebukadnezzara chu a thin a tâwt ta êm êm a, Sadraka te Mesaka te, Abednegoa te lakah chuan a hmêl lan dân a dang zo ta a; rawh tuina mei chu a sat dân pângngai lêt sariha tisa tûrin thu a pe a. 20 Tin, a sipai rual zînga mi chak ṭhenkhatte chu Sadraka te, Mesaka te, Abednegoa te phuar tûr leh rawh tuina meipuia theh lût tûrin thu a pe a. 21 Tichuan, hêng mite hi an kawrfualte, an kawrhnuaite, an diarte leh an silhfên dangte chawpa phuarin rawh tuina meipuia theh luh an ni ta a. 22 Tichuan, lal thupêk chu a hmanhmawh êm avâng leh rawh tuina mei chu a sat khawp avângin Sadraka te, Mesaka te, Abednegoa te chawi kângtute chu meialh chuan a tihlum ta hlawm a. 23 Tin, hêng mi pathum - Sadraka te, Mesaka te, Abednegoa te hi phuar chungin rawh tuina meipui laiah chuan an tlu reng a. 24 Tichuan, Lal Nebukadnezzara chuan mak a ti a, hmanhmawh takin a tho va, a remruatpuitute hnênah chuan, “Mi pathumte kha phuarin meiah kan theh lût a ni lâwm ni kha?” tiin a sawi a. Lal chu an chhâng a, a hnênah, “Aw lalber, theh lût e,” an ti a. 25 Ani chuan, “En teh u, mi pali, phelha mei laia vei veia, na hauh lovin ka hmu a; a palina lan dân phei chu pathiante fapa ang a ni,” a ti a.
Mi pathumte chu chhuaha, kaisântîr an ni
26 Tichuan, Nebukadnezzara chu rawh tuina meipui kawngkaah chuan a va kal hnai a, “Sadrak, Mesak, Abednego, nangni Chungnungbera Pathian bawihte u, lo chhuak ula, hetah lo kal rawh u,” tiin a han bia a. Tichuan, Sadraka te, Mesaka te, Abednegoa te chu mei zîng ata chu an lo chhuak ta a. 27 Tin, thuneitute, aiawhtute, awptute leh lal remruatpuitute rawn inkhâwm chuan, hêng mite taksa chungah hian meiin thiltihtheihna a nei lo va, an sam pawh a kâng kir lo va, an kawrfualte a danglam lo va, mei rim rêng rêng pawh an nam hek lo tih an hmu a. 28 Lal Nebukadnezzara chuan thu a sawi a, “Sadraka te, Mesaka te, Abednegoa te Pathian chu fakin awm rawh se; ani chuan a vântirhkoh a rawn tîr a, a chhiahhlawh, amah ringtute chu a chhanchhuak a, chûng mite chuan an Pathian chauh lo chu pathian dang rêng rawng an bâwl lohva, chibai an bûk loh nân, lal thupêk tidanglamin an taksa an hlân ngam a. 29 Chuvângin, mi tin, hnam tin, ṭawng tin, Sadraka te, Mesaka te, Abednegoa te Pathian chunga thu ṭha lo sawi apiang chu sah sawm an ni ang a, an inte chu hnâwmhnawkah siam a ni mai ang tih thupêk ka siam e; hetiang taka chhanchhuak thei pathian dang rêng rêng an awm si lo,” a ti a. 30 Tichuan, lal chuan Sadraka te, Mesaka te, Abednegoa te chu Babulon bialah chuan a tilian ta a.
Nebukadnezzara mumang pahnihna
1 Lal Nebukadnezzara chuan mi tinte, hnam tinte, ṭawng tinte zawng zawng, lei pum puia chêngte hnênah chuan: in chungah remna tihpunin awm rawh se. 2 Chungnung ber Pathianin ka hnêna thil entîrnate, thil mak a tih tâkte hi tihlan ṭha ka ti e. 3 A thil entîrnate chu a ropuiin, a thiltih makte chu a va nasa êm! A ram chu ram hlun a ni a, a rorêlna chu chhuan awm chhûng zawng zawng a ni ang. 4 Kei, Nebukadnezzara hi ka inah nuamsa tak leh ka in ropuiah neinung takin ka awm a. 5 Mumang ka hlauh zâwng tak ka nei a; ka khumlaizâwla ka suangtuahna leh ka lua inlârna chuan mi tibuai a. 6 Chu vâng chuan Babulon mi fing zawng zawngte chu ka mumang hrihfiahna mi hriattîr theih nân, ka hmaa rawn hruai tûrin thu ka pe a. 7 Tichuan, dawivaihthiamte, aikaihthiamte, Kaldai mite, aisânthiamte chu an lo kal a; tin, ka mumang chu ka hrilh a; mahse, a hrilhfiahna rêng chu min hriattîr lo va. 8 Mahse, a tâwp berah chuan Daniela, ka pathian hming ang pu, a hming Beltesazzara, amaha pathian thianghlimte thlarau awm chu ka hmaah a lo kal a; tin, ka mumang chu ka hrilh a, 9 “Aw Beltesazzar, dawivaihthiamte hotu, nangmahah chuan pathian thianghlimte thlarau a awm tih leh, thurûk rêng rêngin a tibuai lo che tih ka hriat avângin, ka mumanga ka hmuh inlârna leh a hrilhfiahna chu mi hrilh teh khai. 10 “Ka khumlaizâwla ka lua inlârnate chu hetiang hi a ni: ka han dâk chhuak a, ngai teh, lei lai takah thing a lo awm a, a sânzia chu a nasa khawp mai a. 11 Thing chu a ṭhang a, a ṭanṭha a, a sân lam chuan vân a tawng a, kâwlkil aṭangin a lang thei vek a. 12 A hnahte chu a mawiin a rahte a tam a, amahah chuan nung zawng zawng tân ei tûr a awm a; ramsate chuan a hlim an bêl a, chunglêng savate chu a zârahte an chêng a, tîsa pu zawng zawng chu ama châwm an ni. 13 “Ka khumlaizâwla ka lua inlârnaah chuan ka han en a, ngai teh, vân aṭangin vêngtu, mi thianghlim chu a lo chhuk a, 14 ring takin, ‘Thing chu kit la, a zârte chu hlawi la, a hnahte thing thla la, a rahte tidarh rawh; a hnuai ata ramsate chu kal bo sela, a zâr ata chunglêng savate pawh thlâwk bo rawh se. 15 Amaherawhchu, ram hlobet ṭo zîngah, leia a bulbâwr chu, thîr leh dâra ṭâwnin zuah la; tin, vân daiin huh sela, a chan tûr chu ramsate nêna hlobet zînga awm ni rawh se. 16 A rilru chu mihring rilru aṭanga tihdanglam ni se, a hnênah ramsa rilru pêk ni rawh se; a chungah hun sarih ral rawh se. 17 He thutlûkna hi vêngtute thupêka tih a ni a, thil phût hi mi thianghlimte thua tih a ni, Chungnungbera chuan mihringte lalna ram chungah thu a nei a, a duhsak apiang a pe a, mi hnuaihnung berte pawh a luahtîr ṭhîn a ni tih mi nungin an hriat nân a ni,’ tiin a au va. 18 He mumang hi kei, Lal Nebukadnezzaran ka nei a; tin, nang aw Beltesazzar, a hrilhfiahna chu puang rawh. Ka rama mi fing zawng zawng chuan a hrilhfiahna chu mi hriattîr thei si lo va; nang erawh chuan i thei e, nangmahah chuan pathian thianghlimte thlarau chu a awm si a,” tiin.
Danielan mumang a hrilhfiah
19 Tichuan, Daniela, a hming Beltesazzara chu a han chîai hle rih a, a ngaihtuahte chuan a tibuai a. Lal chuan a hnênah, “Beltesazzar, mumang emaw, a hrilhfiahna emaw pawhin tibuai che suh se,” tiin a sawi a. Beltesazzara chuan a hnênah, “Ka lalpa, mumang chu a hawtu che tân ni sela, a hrilhfiahna pawh chu i hmêlmate tân ni rawh se. 20 Thing i hmuh, lo ṭhanga, lo ṭanṭhaa, vân lo tawnga, kâwlkil aṭanga lang thei vek leh, 21 a hnahte mawia, a rahte tama, nung zawng zawng tâna ei tûr awm leh a hnuaia ramsate chênga, a zârte chunglêng savate chênna lo ni chu, 22 aw lalber, nangmah i ni a; i ṭhang a, i chak a, i ropuina chu a ṭhang a, vân a tawng a, i rorêlnate chu kâwlkil thleng a ni si a. 23 Tin, vân aṭanga vêngtu mi thianghlim lo chhuka, ‘Thing chu kit la, tiboral rawh; amaherawhchu, ram hlobet ṭo zîngah, leia a bulbâwr chu thîr leh dâra ṭâwnin zuah la; tin, vân daiin huh sela, a chan tûr chu ramsate nêna awm ni rawh se, a chunga hun sarih a ral thlengin,’ rawn ti lalin a hmu a; 24 tin, a hrilhfiahna chu hei hi a ni, aw lalber, Chungnungbera thupêk, lalber ka lalpa chunga lo thleng chu a ni e: 25 mihring zîng ata hnawh chhuah i ni ang a, i chênna chu ramsate zîngah a ni ang a, sebâwng anga hlobet eitîr i ni ang a, vân daiin i huh ang a, i chungah hun sarih a ral ang; Chungnungbera chuan mihringte lalna ram chungah thu a nei a, a duhsak apiang a pe ṭhîn a ni tih i hriat hma loh chuan. 26 Tin, a bulbâwr zuah tûra thu an lo pêk ang khân, vânin thu a nei tih i hriat hnuah chuan i ram chu i ta a ni tlat ang. 27 Chu vâng chuan, aw lalber, ka thurâwn che hi pawm tlâkah ngai la, i sualna chu felnain thlâk la, i suahsualnate chu mi rethei chunga zahngaihnain thlâk rawh, i nunkhaw nawmna hi a sei thei deuh mahna,” tiin a chhâng a. 28 Hêng zawng zawng hi Lal Nebukadnezzara chungah chuan a lo thleng a ni. 29 Thla sâwm leh thla hnih tâwpah chuan Babulon lal in chungah lal chu a vei a vei a. 30 Lal chuan, “He Babulon ropui hi keima chakna ngeia lal chênna hmun atân leh ka ropuina mawina tûra ka siam chu a ni lo vem ni?” tiin a sawi a. 31 Chu thu chu lal kaa a chhuah lai mêkin vân aṭangin aw a lo chhuak a: “Aw Lal Nebukadnezzar, i hnênah thu a lo thleng e: lalna ram chuan a hransan ta che a ni! 32 Mihring zîng ata hnawh chhuah i ni ang a, i chênna chu ramsate zîngah a ni ang; sebâwng anga hlobet eitîr i ni ang a, i chungah hun sarih a ral ang; Chungnungbera chuan mihringte lalna ram chungah thu a nei a, a duhsak apiang hnênah a pe ṭhîn a ni tih i hriat hma loh chuan,” tiin. 33 Chumi lai la la chuan chu thil chu Nebukadnezzara chungah a lo thleng ta nghâl a; mihring zîng ata hnawh chhuahin a awm ta a, sebâwng angin hlobet a ei a; a taksa chu vân daia huhin a awm a, a samte mupui hmul anga a ṭhan leh, a tinte sava tin ang mai a nih thlengin.
Nebukadnezzaran Pathian a fak
34 Tin, chûng ni tâwpah chuan kei, Nebukadnezzara chuan vân lamah ka mit ka lên chho va, ka hriatna chu ka hnênah a lo kîr leh ta a. Chungnungbera chu mal ka sâwm a, nung renga chu ka fak a, ka zah a, a rorêlna chu chatuan rorêlna a ni a, a ram chu chhuan awm chhûng zawng zawng a ni si a. 35 Leilung luahtu zawng zawngte hi engmahlova ngaih an ni a; vân sipai rualte zîngah leh leilung luahtute zîngah chuan a thu thuin a ti a. Tu mahin a kut chu an chawlhtîr thei lo va, a hnênah, “Eng nge i tih?” pawh an ti thei hek lo. 36 Chutih lai vêk chuan ka hriatna chu ka hnênah a lo kîr leh ta a; tin, ka ram ropuina tûrin ka ropuina leh mawina chu ka hnênah a lo kîr leh a. Ka remruatpuite leh ka mi ropuite chuan min rawn pan leh a, ka ramah chuan tihnghehin ka awm a, ropuina nasa tak mai ka hnênah belhchhah a ni ta a. 37 Tichuan, kei Nebukadnezzara hian vân Lal chu ka fak a, ka chawisâng a, ka zah a; a thiltih zawng zawng chu a dikin a kawngte chu a fel si a. Chapova lêngte chu a tihniam thei a ni.
Belsazzara ruai
1 Lal Belsazzara chuan a mi ropui sângkhatte tân ruai ropui tak a ṭheh a, sâng hmaah chuan uain a in a. 2 Belsazzara chuan uain a in deuh chinah chuan rangkachak leh tangkaraw bungbêl, a pa Nebukadnezzaran Jerusalem-a biak in ata a lâk chhuah chu rawn la tûrin thu a pe a; lal leh a mi ropuite leh a nupuite leh a hmeiten uain an inna atân. 3 Tichuan, rangkachak bungbêl, Jerusalem-a Pathian biak in ata lâk chhuahte chu an rawn la a; tin lal leh a mi ropuite, a nupuite, a hmeite chuan in nân an hmang ta a. 4 Uain chu an in a, rangkachak te, tangkarua te, dâr te, thîr te, thing te, lungtea siam pathiante chu an chawimawi ta dur dur a. 5 Chumi lai tak chuan mihring kutzungṭang hi a lo chhuak a, lal in bang chulh, khâwnvâr dahna ep lamah chuan a rawn ziak ta a; tin, lal chuan a ziaktu kut tumbung chu a hmu a. 6 Tichuan, lal chu a hmêl a dâng a, a rilrute chu a buai zo va, a kâwngruh chuktuahte a zâwi zo va, a khûpte a inkhâwng hlawk hlawk ta mai a. 7 Lal chu, “Aikaihthiamte, Kaldai mite, aisânthiamte rawn hruai tûr,” tiin a au vak a. Tin, lal chuan Babulon mi fingte hnênah chuan, “Tu pawh he ziak hi chhiara a hrilhfiahna mi entîr chu puansenduk sintîr a ni ang a, a nghâwngah rangkachak khaidiat awrhtîr a ni bawk ang a, rama rorêltu pathumte zînga pakhat a ni ang,” tiin a sawi a. 8 Tichuan, lal mi fing zawng zawng chu an lo lût a; mahse, ziak chu an chhiar thei lo va, a hrilhfiahna lah lal an hriattîr thei hek lo. 9 Tin, Lal Belsazzara chu a mangang êm êm mai a, a hmêl a dâng a, a mi ropuite chu an mangang bawk a. 10 Lal leh a mi ropuite au thâwm avâng chuan lalnu chu ruaiṭhehna inah chuan a lo lût a. Lalnu chuan, “Aw lalber, kumkhuain dam ang che! I rilru chu buai suh sela, i hmêl pawh dâng hek suh se. 11 I ramah hian mi pakhat, amaha pathian thianghlimte thlarau awm chu a awm a; i pa hun laiahte pawh ênna te, hriat thiamna te, finna te, pathian finna ang mai amahah chuan a awm tih hriat a ni tawh a; aw lalber, i pa Lal Nebukadnezzara, i pa ngei chuan dawivaihthiamte, aikaihthiamte, Kaldai mite, aisânthiamte hotuah a siam a; 12 amahah chuan rilru ṭha fawr bîk te, hriatna te, hriat thiamna te, mumang hrilhfiahna te, thu har tihfiahna te, dawi sût thiamna te chu Daniela, lalin Beltesazzara a vuahah chuan a awm tih hriat a ni tawh ṭhîn a. Tûnah Daniela chu koh ni sela, a hrilhfiahna chu a entîr mai ang,” tiin a sawi a.
Danielan thu inziak a hrilhfiah
13 Tichuan, Daniela chu lal hmaah an rawn hruai lût a. Lal chuan Daniela hnênah, “Daniela, Juda sal tâng fate zînga mi, ka pa lalberin Judai ram ata a rawn hruaia chu i ni em? 14 Nangmahah chuan pathiante thlarau a awm a, ênna te, hriat thiamna te, finna ṭha fawr bîk te nangmahah chuan a awm tih hriat a ni, tiin i thu ka lo hria a. 15 Tin, tûnah hian he ziak hi chhiar tûr leh a hrilhfiahna mi hriattîr tûrin mi fingte, aikaihthiamte ka hmaah an rawn hruai lût tawh a; mahse, chu thil hrilhfiahna chu mi entîr thei lo. 16 Nang erawh chuan mi hrilhfiah thei a, dawi i sût thiam a ni tih ka lo hria che a; tûnah i theih chuan ziak hi chhiar la, a hrilhfiahna mi hriattîr la, puansenduk sintîr i ni ang a, i nghâwng vêlin rangkachak khaidiat awrhtîr i ni ang a, rama rorêltu pathumte zînga pakhat i ni ang,” tiin a sawi a. 17 Tin, Daniela chuan a chhâng a, lal hmaah chuan, “I thilpêk chu nangma tân ni sela, i lâwmman chu mi dang hnênah pe ang che; mahse, ziak hi lal ka chhiarsak ang a, a hrilhfiahna chu ka hriattîr ang e. 18 Aw lalber, Pathian Chungnungbera chuan i pa Nebukadnezzara chu ram te, lenna te, ropuina te, lalna te a pe a; 19 lenna a hnêna a pêk avâng chuan mi tinte, hnam tinte, ṭawng tinte chuan an hlau va, a hmaah chuan an khûr ṭhîn a; a duh apiang a that a, a duh apiang a nun a; a duh apiang a chawisâng a, a duh apiang a titlâwm ṭhîn a. 20 Mahse, a thinlung a lo dâk sâng a, a rilru a lo sak a, chapo takin a che ta a; a lalthutthlêng ata tihtlâwm a ni a, a ropuina chu an lâksak ta a; 21 tin, mihring fate zîng ata hnawh chhuahin a awm a, a rilru chu ramsa anga siam a ni a, a chênna chu ramsabengtungte zîngah a ni ta a; sebâwng angin hlobetin an châwm a, a taksa chu vân daia huhin a awm a, Pathian, Chungnungbera chuan mihringte lalna ram chungah thu a nei a, a duhsak apiang a luahtîr ṭhîn a ni tih a hriat hma loh chuan. 22 Tin, nang a fapa, aw Belsazzar, hêng zawng zawng hi i hre na a, i rilru i tihniam lo va, 23 vân LALPA chungah chuan i inchawisâng ta zâwk a; a ina bungbêlte chu i hmaah an rawn la a, nang leh i mi ropuite, i nupuite leh i hmeite nên uain in nân in hmang a; tin, tangkarua te, rangkachak te, dâr te, thîr te, thing te, lungtea siam pathian, hmu thei lo, ngaithla thei lo, hre thei lote chu i chawimawi a; tin, Pathian, i nunna leh i kawng zawng zawng a kuta kawltu chu i zah lo va; 24 tichuan, a hnên aṭangin kut tumbung chu tirh a ni ta a, he ziak hi a lo inziak ta a nih hi. 25 “Tin, hei hi thu ziaka chu a ni e: MENE, MENE, TEKEL, UPHARSIN. 26 Tin, hei hi a hrilhfiahna chu a ni. MENE: Pathianin i ram chu a chhût zo ta a, a tâwp a thlen ta. 27 “TEKEL: Bûkin i awm a, i tling ta lo. 28 PERES: I ram chu ṭhenin a awm a, Media leh Persia hnênah pêk a ni ta,” a ti a. 29 Tichuan, Belsazzara chuan thu a pe a, Daniela chu puansenduk an sintîr a, a nghâwng vêlin rangkachak khaidiat an awrhtîr a, a ramah chuan rorêltu pathumte zînga pakhat a ni tûr a ni, tiin an puang ta a. 30 Chumi zânah chuan Kaldai lal Belsazzara chu thah a ni a. 31 Tin, Daria, Media mi chuan ram chu a chang ta a, amah chu kum sawmruk leh kum hnih vêla upa a ni.
Sakeibaknei pûkah Daniela an thlâk
1 Daria chuan ram awp tûra thuneitu za leh sawmhnih, ram pum puia dah darh chu ṭha a ti a; 2 tin, an chungah chuan hotu pathum a ruat leh a, an zînga pakhat chu Daniela a ni a; hêng thuneitute hian an hnêna chanchin an thlen chhâwn zêla, Darian chhiatna rêng a neih loh nân. 3 Tin, he Daniela hi rilru ṭha fawr bîk pu a nih avângin hotu dangte leh thuneitute aiin a lang bîk hle a; lal pawhin ram pum pui chunga dah a rilrûk a. 4 Tichuan, hotute leh thuneitute chuan ram chung thu-ah chuan Daniela chungah remchâng an zawng ta a; mahse, remchâng rêng an hmu thei lo va, dik lohna an hmu thei hek lo; a rinawm êm êm si avângin amahah chuan tihsual emaw, dik lohna emaw hmuh tûr a awm si lo va. 5 Tichuan, hêng mite hian, “A Pathian dân thu-ah a chunga remchâng kan hmuh nghâl loh chuan, he Daniela chungah hian remchâng kan hmu dâwn lo ve,” an ti a. 6 Tichuan, hotute leh thuneitute chu lal hnênah chuan an inhâwr khâwm a, hetiang hian an sawi a: “Lal Daria, kumkhuain dam ang che. 7 Ram hotute, aiawhtute leh thuneitute, remruattu leh awptute zawng zawng chu ni sawmthum chhûnga aw lalber, nangma hnênah chauh lo chuan, pathian emaw, mihring emaw hnêna dîlna nei apiang chu sakeibaknei pûka paih tûr, tiin lal hian dân siamin khap tlat sela, tih an remti tlâng a. 8 Tûnah hian, aw lalber, khapna chu tinghet la, Media leh Persia dân danglam ngai lo ang zêlin, thu ziak hi danglam leh tawh hlek lo tûrin hming ziak hnan ang che,” tiin. 9 Chutichuan, Lal Daria chuan thu ziak leh khapnaah chuan hming a ziak ta a. 10 Tin, Daniela chuan thu ziak chu hming ziak hnan a ni tih a hriat veleh a inah a lût a (a pindana a tukverhte chu Jerusalem lam hawia hawn a ni a), a hmaa a tih dân ang bawkin ni khatah vawi thum a ṭhingṭhi a, a ṭawngṭai a, a Pathian hnênah lâwm thu a hrilh a. 11 Tichuan, hêng mite hi an inkhâwm a, Danielan a Pathian hnênah dîlna leh ngenna a hlân ṭhîn tih an hmuchhuak ta a. 12 Tin, lal chu an rawn hnaih a, a hmaah chuan lal khapna thu kha an sawi a. “Ni sawmthum chhûnga aw lalber, nangma hnênah chauh lo chuan pathian emaw, mihring emaw hnêna dîlna nei apiang chu sakeibaknei pûkah paih an ni ang, tia khapnaah khân hming i ziak lâwm ni kha?” an ti a. Lal chuan, “Chu thil chu a nghet e, Media leh Persia dân danglam ngai lo ang zêlin,” tiin a chhâng a. 13 Tichuan, lal chu an chhâng a, “Daniela, Juda sal tâng fate zînga mi khân, aw lalber, a pawisa lo chia, khapna hming i ziak hnan pawh kha a pawisa hek lo; ni khatah vawi thum dîlna a nei zâwk a ni,” an ti a. 14 Tin, lal chuan hêng thu hi a hriat chuan pawi a ti êm êm a, Daniela chu chhanchhuah a rilrûk tlat a, chhanchhuak tûrin ni tlâk thlengin a bei a. 15 Tin, hêng mite hi lal hnênah chuan an rawn inhâwr khâwm leh a, lal hnênah chuan, “Aw lalber, Media leh Persia dânin khapna emaw, dân emaw, lalberin a tihngheh tawh chu a danglam ngai lo tih hria ang che,” an ti a. 16 Tichuan, lal chuan thu a pe ta a. Daniela chu an rawn hruai a, sakeibaknei pûkah chuan an paih ta a. Lal chuan Daniela hnênah, “I Pathian, a rawng i bâwl fo ṭhina khân a chhanhim ang che,” tiin a sawi a. 17 Tin, lung an rawn la a, pûk kawngka chu an khâr a; tin, lal chuan Daniela chung thu hi a danglam tawh hlek loh nân ama zungbun ngei leh a mi ropuite zungbuna nemin a chhinchhiah a. 18 Tin, lal chu a inah chuan a kal a, chaw ngheiin a zankhua a; a hmaah chuan thil ri theite an rawn la hek lo va, mutmu pawh a tuah thei hek lo. 19 Tichuan, a tûk zîng takah chuan lal chu a tho va, hmanhmawh takin sakeibaknei pûk lamah chuan a kal ta a. 20 Tin, Daniela awmna pûk a rawn hnaih chuan ṭah awin a au va. Lalber chuan Daniela hnênah, “Aw Daniel, Pathian nung chhiahhlawh, i Pathian, a rawng i bâwl fo ṭhina chuan sakeibaknei lak ata a chhanchhuak thei che em?” a ti a. 21 Daniela chuan lal hnênah, “Aw lalber, kumkhuain dam ang che! 22 Ka Pathian chuan a vântirhkoh a rawn tîr a, sakeibaknei kâte a tichîp a, eng mah mi tina lo ve; a mit hmuhah chuan sawisêl bovin ka awm a; tin, i chungah pawh aw lalber, pawi eng mah ka khawih lo ve,” a ti a. 23 Tichuan, lal chu a lâwm ta êm êm a, Daniela chu pûk ata lâk chhuah tûr thu a pe ta a. Chutichuan, Daniela chu pûk ata an la chhuak a, na lai rêng rêng amahah a awm lo va, a Pathian a rin tlat avângin. 24 Tin, lal chuan thu a pe a, Daniela hêktute chu an rawn hruai a, sakeibaknei pûkah chuan an paih lût ta a, anniho leh an fate leh an nupuite nên; sakeibakneite chuan anni chu an ching nawk nawk a, an ruhte chu an titliak sawm vek a, pûk mawng pawh an thleng hman lo. 25 Tichuan, Lal Daria chuan mi tinte, hnam tinte, ṭawng tinte zawng zawng, lei pum puia chêngte hnênah chuan lehkha a ziak a, “In chungah remna tihpunin awm rawh se. 26 Ka ram awp zawng zawngah hian miten Daniela Pathian chu hlauvin khûr rawh se, tiin thupêk ka siam e. Ani chu Pathian nung a ni a, a nghet kumkhua a, a ram chu tihchhiat rual a ni lo vang a, awp pawh a tâwp thleng zakin a awp dâwn si a. 27 Ani chuan a chhanhim a, a chhanchhuak a, lei leh vânah hian chhinchhiahnate leh thil makte a ti a; ani hi sakeibaknei thiltihtheihna lak ata Daniela chhanchhuaktu chu a ni,” tiin. 28 Chutichuan, he Daniela hi Daria rorêl lai leh Persia mi Kura rorêl lai chuan a hmuingîl ta hle a.
Inlârnaah Danielan sakawlh pali a hmu
1 Babulon lal Belsazzara kum khatnaah chuan, Danielan mumang a neiin a khumlaizâwla a lua inlârnate chu a hmu a. Tichuan, a mumang chu a ziak a, a tlângpuiin a sawi a. 2 Daniela chuan a sawi a: “Zânah inlârnaah chuan hmuh ka nei a, ngai teh, kâwlkil lia thli hi tuipui ropui tak chungah a lo tleh a. 3 Tin, tuipuiah chuan sa ropui tak tak pali, inang lo tak tak hi an lo chhuak a. 4 A pakhatna chu sakeibaknei ang a ni a, mupui thla a nei a. A thlate chu thlawn a niha, lei ata chawi kân a niha, mihring anga ke pahniha ding tûra siam a niha, mihring thinlung pêk a nih thlengin ka en reng a. 5 Tin, ngai teh, sa dang, a pahnihna chu savawm ang a ni a, a khing lehlamin a ding a, a kaah chuan nâkruh pathum a awm a, a seh kawh a, a hnênah chuan, ‘Tho la, tîsa ei ṭeuh rawh,’ tiin an hrilh a. 6 Chumi hnuah chuan ka en a, ngai teh, a dang, keitê ang, a hnunga sava thla pali nei a lo awm a, chu sa chuan lu pali a nei a; tin, a hnênah chuan rorêlna pêk a ni a. 7 Chumi hnuah chuan, zân inlârnaahte chuan ngai teh, sa palina, ṭihbaiawm leh hlauhawm tak, chak tak mai ka hmu a; thîr ha ropui tak a nei a; a ei buan buan a, a pawt sawm a, a bângnawite chu a kein a rap bet a. A hmaa sa dangte lakah kha chuan danglam tak a ni; ki sâwm a nei a. 8 Kîte chu ka ngaihtuah a; tin, ngai teh, an zîng aṭang chuan ki dang pakhat, tê tak tê a lo chawr chhuak a; a hmaah chuan ki hmasa pathumte chu a bul rêtah an thlawn ta a: tin, ngai teh, he kîah hian mitte, mihring mit ang mai hi a awm a; tin, kâ pawh a awm a, thil nasa takte a sawi a.
Inlârnaa Hmâkhawsânga
9 “Lalṭhutthlêngte an han hûn chhuaha, mi pakhat, Hmâkhawsânga a ṭhut thlengin ka en reng a; a silhfênte chu vûr anga vâr a ni a, a sam chu sahmul thianghlim tak ang a ni. A lalṭhutthlêng chu meialh a ni a, chumi tawlailîr chu mei kâng mêk ang a ni a. 10 “A hma aṭang chuan mei lui a lo chhuakin a luang a. A sânga sângin rawng an bâwlsak a, a hmaah chuan sîng hmun sîng an ding a: rorêlna a lo awm ta a, lehkhabute chu keu a ni a. 11 Chumi lai chuan kîin thu nasa tak a sawi thâwm avâng chuan ka han en a, sa chu tihhluma, a taksa tihchhiata, meia hâl tûra pêk a nih thlengin ka en reng a. 12 Tin, sa dangte thu kha chu, an rorêlna lâksakin an awm a, an nunna erawh chu hunbi khat leh hun khat chhûng atân zuah a ni. 13 Zân inlârnaahte chuan, ngai teh, vân chhûmte nêna lo kal, mi pakhat, mihring fapa ang hi ka hmu a, Hmâkhawsânga hnênah chuan a lo kal a, a hmaah chuan ani chu an rawn hruai hnai a. 14 Tin, rorêlna te, ropuina te, ram te a hnêna pêk a ni a, mi tin te, hnam tin te leh ṭawng tinte zawng zawng chuan a rawng an bâwl nân. A rorêlna chu rorêlna hlun, ral ngai lo tûr a ni a, a ram chu tihchhiat rual a ni lo vang.
Inlârna awmzia
15 “Kei Daniela hi, ka taksa chhûngah hian ka rilru a lungngai a, ka lua inlârnate chuan mi tibuai a ni. 16 A lo dingte zînga pakhat chu ka han hnaih a, hêng zawng zawng chungchânga thutak chu ka zâwt a. Chutichuan, mi hrilh a, a thil hrilhfiahnate pawh chu mi hriattîr ta a: 17 ‘Hêng sa ropui tak tak palite hi, lal pali lei ata lo chhuak tûrte chu an ni a. 18 Mahse, Chungnungbera mi thianghlimte chuan ram chu an chang ang a, kumkhuain, kumkhaw tlaitluanin.’ 19 “Tichuan, sa palina, a dangte laka danglam bîk tak, ṭihbaiawm tak, a hâte thîr nia, a tinte dâr nia, ei buan buana, pawt sawma, a bângnawi a ke hnuaia rap bettu chungchângah chuan thutak hriat ka châk ta a; 20 a lua ki sâwm leh ki dang lo chhuaka, a hmaa pathum tlu ta chungchâng te; kha kî, mitte neia, thil nasa tak sawitu, kâ pawh neia, a lan dân pawh a ṭhiante aia ropui bîk tak te nên khân. 21 Tin, ka en reng a; chu kî ngei chuan mi thianghlimte chu a do va, a hneh a; 22 Hmâkhawsânga a lo kala, rorêlna chu Chungnungbera mi thianghlimte hnênah pêk a niha, mi thianghlimten ram an chan hun a lo thlen hma loh chuan a hneh a. 23 Hetiang hian a ti a: ‘Sa palina chu lei chung ram palina, ram dang zawng zawng laka danglam bîk, lei pum pui ei buan buana, chîla, pawt sawm tûr chu a ni ang. 24 “ ‘Ki sâwmte thu chu, hemi ram ata hi lal sâwm an lo chhuak dâwn a ni. An hnuah chuan pakhat a lo chhuak ang a, a hmaa mite lakah chuan a danglam ang a, lal pathumte chu a titlu ang. 25 Chungnungbera kalhin thu a sawi ang a, Chungnungbera mi thianghlimte a tichau vang; hunte leh dân chu tihdanglam a tum ang a, hun khat leh hunte leh hun chanve chhûng chu a kuta pêk an ni ang. 26 Mahse, rorêlna a lo awm ang a, a thuneihna chu tihrala tihchhiat hlen tûrin an la bo vang. 27 Tichuan, ram leh rorêlna leh vân pum pui hnuaia ramte ropuina chu Chungnungbera mi thianghlimte hnênah chuan pêk a ni ang. A ram chu ram hlun a ni a, awp ram zawng zawngin a rawng an bâwl ang a, a thu an awih ang.’ 28 Hei hi thil tâwpna chu a ni. Kei Daniela hi ka ngaihtuahnate chuan mi tibuai a, ka hmêl a dâng a; mahse, ka rilruin thu chu ka vawng reng a ni.”
Berâmchal leh kêl
1 Lal Belsazzara rorêl kum thumnaah chuan ka hnênah, kei Daniela hnên ngeiah hian inlârna a lo lang a, a tîra ka hnêna lo lang hnuah khân. 2 Inlârnaah chuan hmuh ka nei a; hetiang hi a ni a, ka hmuh lai chuan Elam biala Susan lal inah ka lo awm a; tin, inlârnaah chuan hmuh ka nei a, Ulai lui kamah ka lo awm a. 3 Tichuan, ka mit ka han lên chho va, ka han en a, ngai teh, lui bulah chuan berâmpa, ki pahnih nei hi a ding a; tin, ki pahnihte chu a sâng dûn hle a; mahse, pakhat chu a dang ai chuan a sâng zâwk a, a sâng zâwka chu a lo chawr hnuhnûng a. 4 Berâmpa chuan thlang lam leh hmâr lam leh chhim lam phînin ka hmu a; a hmaah chuan sa rêng rêng ding thei an awm lo va, a kut ata chhanchhuak thei an awm hek lo; a duh ang angin a che a, amah a intilian a. 5 Tin, ka ngaihtuah mêk laiin, ngai teh, khawthlang lam aṭangin lei pum pui chungah hian kêlpa a lo thawk a, lei pawh a khawih lo; tin, kêl chuan a mit inkârah ki langsâr tak a nei a. 6 Tin, berâmpa, ki pahnih nei, lei bula ding ka hmuh kha a rawn pan a, a chak theihtâwpin a zuan a. 7 Tin, berâmpa chu a fin rawkin ka hmu a, a chungah a thinur êm êm a, berâmpa chu a tauh va, a ki pahnih chu a tihtliahsak a, amah khing tûrin berâmpaah chuan chakna rêng rêng a awm ta lo; leiah a theh thlu a, a rap bet a, berâmpa chu a kut ata chhanchhuak thei rêng rêng an awm lo. 8 Tin, kêlpa chu a intilian ta vak mai a; a chak lai tak chuan a ki ropui chu a tliak ta a, a aiah chuan ki langsâr tak pali, kâwlkil li hawiin an lo chhuak a. 9 Tin, an zînga pakhatah chuan ki tê tak tê a lo pêng chhuak a, chhim lamah te, chhak lamah te, ram ropui lamah te nasa takin a lo ṭhang lian ta a. 10 Tin, vâna awmho tawng hialin a lo ṭhang lian a, chûng awmho ṭhenkhatte leh arsi ṭhenkhatte chu leiah a paih thla a, a rap bet ta hlawm a. 11 A ni, chûng awmho lal thleng hialin a intilian a, hâlral thilhlan awm fo chu a lâk bosak a, a hmun thianghlim awmna chu tihchhiatin a awm a. 12 Tin, chûng awmho chu hâlral thilhlan awm fo chawp chuan bawhchhiatna avângin a hnênah pêk a ni a; tin, thutak chu leiah a paih thla a, chutiangin a ti a, a hlawhtling hle. 13 Tin, mi thianghlim ṭawng ka hria a; tin, mi thianghlim dangin tu emaw lo ṭawnga hnênah khân, “Hâlral thilhlan awm fo te, tiṭiautu bawhchhiatna te, hmun thianghlim leh awmho chu rah beh tûra pêk an nih te chungchânga inlârna chu engtia rei nge ni dawn?” a ti a. 14 Tin, ka hnênah, “Zîng leh tlai sânghnih leh zathum thlengin; tichuan, hmun thianghlim chu then fai a ni ang,” a ti a.
Gabrielan inlârna a hrilhfiah
15 Tin, heti hi a ni a, kei Daniela ngei hian inlârna chu ka hmuhin a awmzia hriat ka tum a; tin, ngai teh, ka hmaah chuan mihring anga lang hi a lo ding a. 16 Tin, Ulai kam tuak inkârah chuan mihring aw, “Gabriel, inlârna chu he mi hi hriat thiamtîr rawh,” tia han ko hi ka hria a. 17 Chutichuan, ka dinna chu a rawn hnaih a; tin, a lo kal chuan ka hlau êm a, bawkkhupin ka tlu a; mahse, ani chuan ka hnênah, “Aw mihring fapa, hre thiam ang che, inlârna chu tâwpna huna mi tûr a ni si a,” a ti a. 18 Tin, mi biak lai chuan bawkkhupin ka lo muhîl dêr a; mahse, mi han khawih a, mi dintîr a. 19 Ani chuan, “Ngai rawh, thinurna hun hnuhnûng lama thil lo awm tûr chu ka hriattîr ang che; tâwpna hun ruata mi a ni si a. 20 Berâmpa, ki pahnih nei i hmuh kha Media leh Persia lal an ni a. 21 “Tin, kêlpa hmul chhur mai chu Grik lal a ni: tin, a mit inkâra ki ropui chu lal hmasa ber a ni. 22 Tin, kha kî, tliaka a hmuna pali lo chhuak kha chu, chu hnam aṭang chuan ram pali a lo ding chhuak dâwn tihna a ni a, a thiltihtheihna nên erawh chuan ni lovin. 23 Tin, an lalna hun hnuhnûng lama bawhchhetuten an vâwrtâwp an thlen hunah chuan, lal hmêl hlauhawm tak, thu khirhkhân thiam mi a lo chhuak ang. 24 Tin, a thuneihna a chak êm êm ang a, ama thiltihtheihna ngei avâng erawh chu ni lovin; mak takin a tichhia ang a, a hlawhtling ang a, chutiangin a ti ang; tin, mi chakte leh mi thianghlimte chu a tichhia ang a. 25 Tin, a thiltih dâwn avângin vervêkna a kutah a tihlawhtling ang; a thinlungah amah a intilian ang a, ngaihṭha taka an awm laiin tam tak a tichhia ang. Lalte Lal a khing ang a; mahse, kut lova tihtliahin a awm ang. 26 Tin, zîng lam leh tlai lam inlârna, sawi tawha kha, a dik a ni; mahse, inlârna chu ngawihpui rawh, ni tam tak hnua mi tûr a ni si a,” a ti a. 27 Tin, kei Daniela chu ka chau va, ni eng emaw zât ka damlo va; tin, ka tho va, lal hna chu ka thawk leh ta a. Tin, inlârna chu mak ka ti êm êm mai a; mahse, tu mân an hre thiam lo.
A mite tân Daniela a ṭawngṭai
1 Ahasuera fapa Daria, Media chia mi, Kaldai ram chunga lala siam kum khatna, 2 a rorêl kum khatnaah chuan, kei Daniela hian lehkhabuahte chuan zâwlnei Jeremia hnêna LALPA thu lo thleng, Jerusalem chhiatna hlen a tiam hun chhûng kum zât chu ka lo hre thiam ta a, kum sawmsarih chu. 3 Tin, chaw ngheiin, saiip puan te, vaivut te nên ṭawngṭaina leh dîlna zawngin LALPA Pathian lam chu ka hawi a. 4 Tin, LALPA ka Pathian hnênah chuan ka ṭawngṭai a, ka inpuang a, “Aw LALPA, Pathian ropui tak leh ṭihawm tak, nangmah hmangaiha, i thupêkte zâwm ṭhîntu hnêna thuthlung leh zahngaihna nei ṭhîntu. 5 “I thupêk leh rorêlnate laka kal pêngin kan sual ta, dik lo tak leh suaksual takin kan ti ta a, kan hel ta. 6 Kan lalte, hotute leh pate leh ram mipui zawng zawngte hnêna i hminga thusawitu, i chhiahhlawh zâwlneite chu kan ngaithla hek lo. 7 Aw LALPA, felna chu i chan a ni a, keini chan erawh chu zahna mai a ni, tûnlai ang hian; Judai-a mite, Jerusalem-a chêngte, Israel-ho zawng zawng, lamhnaia mi leh lamhlaa mi, an bawhchhiatna, i chunga an bawhchhiatnate avânga ram tina i hnawh darhte lah chuti bawk. 8 Aw LALPA, i chunga kan lo sual tâk avângin keini chan zawng zahna mai a ni, kan lalte, kan hotute, kan pate chan pawh. 9 Zahngaihna leh ngaihdamna chu LALPA kan Pathian chuan a nei, a chungah hel ta mah ila. 10 A chhiahhlawh zâwlneite hmanga kan hmaa a dah, a dânte zâwmin LALPA kan Pathian aw chu kan awih hek lo. 11 A ni, Israel-ho zawng zawngin i aw awih lo tûra kal pêngin i dân an bawhchhe ta a ni. Chu vâng chuan ânchhia chu kan chungah leihin a awm ta a, Pathian chhiahhlawh Mosia dâna ziak chhechham thu nên; a chungah kan sual ta si a. 12 Tin, a thu kan chunga a sawi leh kan rorêltu, ro min rêltute chunga a sawi kha kan chunga thil ṭha lo nasa tak thlentîrin a tikim ta a; Jerusalem chunga tih tâk ang chu vân hnuai pum puiah pawh tihin a awm ngai lo. 13 Mosia dâna ziak angin hêng thil ṭha lo zawng zawngte hi kan chungah a lo thleng a ni; mahse, kan khawlohnate chu kan hawisana, i thu dik hriat thiamna te kan neih nân LALPA kan Pathian lungawina chu kan zawng si lo. 14 Chuvângin, LALPA chuan thil ṭha lo chu a en reng a, kan chungah a rawn thlentîr ta a ni; LALPA kan Pathian chu a thiltih a tih zawng zawngah hian a fel si a, a aw kan awih ta lo a ni. 15 “Tin, tûnah hian, aw LALPA kan Pathian, Aigupta ram ata kut chaka i mite hruai chhuaktu leh hmingthanna, tûn thlenga hmingṭhatna insiamtu, kan sual ta a, suaksual takin kan ti ta e. 16 Aw LALPA, ka ngên a che, i felna zawng zawng avângin i thinurna leh i thinrimna chu i khawpui Jerusalem, i tlâng thianghlim aṭang chuan kîr sela; kan sualte avâng leh kan pate khawlohna avângin, Jerusalem leh i mite hi kan vêla mi zawng zawngte zîngah sawichhiat a lo ni ta. 17 Chuvângin, aw kan Pathian, tûnah hian i chhiahhlawh ṭawngṭaina leh dîlnate hi ngaithla la, LALPA avângin i hmun thianghlim ram tawh chungah chuan i hmêl tieng ang che. 18 Aw ka Pathian, i beng dawh la, ngaithla teh; i mit meng la, kan ṭiau dânte leh khawpui i hming vuaha awm hi en teh; kan dîlnate chu kan felnate avângin i hmaah kan hlân a ni si lo va, i zahngaihna ropui tak avângin a ni zâwk e. 19 Aw LALPA, ngaithla teh; aw LALPA, ngaidam rawh; aw LALPA, ngaithla la, thawk ang che; rial suh ang che, aw ka Pathian, nangmah avâng ngeiin i khawpui leh i mite i hming vuaha an awm avângin,” tiin.
Gabrielan hrilh lâwkna a hrilhfiah
20 Tin, keima sual leh ka mi Israel-te sual thupha chawia, ṭawngṭaia, thu sawia, LALPA ka Pathian hmaa ka Pathian tlâng thianghlim atâna dîlna ka hlan lai mêkin, 21 a ni, ṭawngṭaia ka ṭawng lai ngei chuan, mi, Gabriela, a tîra inlârnaa ka hmuh khân, tlai lam thilhlan hun lai angah hian chak taka thlâwkin mi rawn pan a. 22 Tin, hriat thiamna mi neihtîr a, mi bia a, ka hnênah, “Aw Daniel, hriat thiamna fing tak neihtîr tûr chein ka lo chhuak a nih hi. 23 I dîl tirhah khân thupêk a chhuak tawh a, hrilh tûr chein ka lo kal a ni, duhawm tak i ni si a; chu vâng chuan thil chu ngaihtuah la, inlârna chu hre thiam rawh: 24 “Bawhchhiatna tikin tûr te, sualna titâwp tûr te, khawlohna thian fai tûr te, chatuan felna la lût tûr te, inlârna leh thu hrilhlâwk nêna chhinchhiah tûr te, hmun thianghlim ber chu hriak thih tûr tein i mite leh i khawpui thianghlim tân hapta sawmsarih ruat a ni e. 25 Chuvângin, Jerusalem tung ding leh sa ṭha tûra thupêk a chhuah aṭanga Hriakthiha, lal a lo awm thlengin hapta sarih a ni ang tih hre fiah thiam ang che; tin, hapta sawmruk leh pahnihah kawtthlêr leh lei rût te nên siam a ni ang, hun buaithlâk takahte pawh. 26 Tin, hapta sawmruk leh pahnih hnuah chuan Hriakthiha chu tihbo a ni ang a, eng mah a nei tawh lo vang; tin, lal lo kal tûra mite chuan khawpui leh hmun thianghlim chu an tichhia ang. A tâwpna chu tui lian nên a ni ang a, a tâwpna thleng pawhin indona a awm ang, chhiatnate chu a inruat sa a ni. 27 Tin, hapta khat atân mi tam tak hnênah thuthlung nghet tak a siam ang a; hapta chanveah chuan inthawinate leh thilhlante a tibâng ang; tin, tiṭiautu chu tenawmna thla chunga chuangin a lo kal ang a, tâwpna, lo thleng ngei tûra ruat sa thlen thlengin chuan thinurna chu tiṭiautu chungah chuan leihbuak a ni ang,” a ti a.
Tigris lui kamah Danielan inlârna a hmu
1 Persia lal Kura kum thumnaah chuan, Daniela, a hming Beltesazzara an vuah hnênah chuan thil a lo lang a. Chu thil chu a dik a ni a, chu chu indona ropui tak a ni; tichuan, thil chu a hre thiam a, inlârna hriat theihna a nei a ni. 2 Chûng niahte chuan kei Daniela chu hapta thum pumhlûm lusûn angin ka awm a. 3 Chaw tuihnai rêng rêng ka ei lo va, sa emaw, uain emaw pawh ka kaah a lût hek lo, hapta thum pumhlûm a kim hma chu hriak pawh ka inthih hek lo. 4 Tin, thla khatna, ni sawmhnih leh ni li nia lui ropui tak Hiddekel kama ka awm lai chuan, 5 ka mit ka han lên chho va; ngai teh, mi, puanzaisîna inthuam, a kâwnga Uphaz rangkachak thianghlima inhrêng hi a lo awm a! 6 A taksa pawh berul lung ang a ni a, a hmêl chu kâwlphe lan dân ang, a mitte chu mei khâwnvâr ang, a bânte leh a kephahte chu dâr tle mi ang, a ṭawng thâwm chu mipui thâwm ang a ni. 7 Chu inlârna chu kei Daniela chauh hian ka hmu a, ka hnêna awmte chuan inlârna chu an hmu ve lo va; mahse, nasa takin an lo khûr a, an biru bo ta a. 8 Chutichuan, keimah chauh ka awm ta a, inlârna ropui tak chu ka hmu a, thahrui rêng ka nei ta lo va; ka hmêl mawina pawh a chuai zo va, thahrui rêng ka nei ta lo. 9 Mahse, a ṭawng ri chu ka hria a; a ṭawng ri ka han hriat chuan bawkkhupin hmai lei siin ka muhîl ta dêr a. 10 Tin, ngai teh, kut hian mi han khawih a, chu chuan mi bawhvahtîr a. 11 Tin, ka hnênah, “Aw Daniel, nang mi duhawm tak, i hnêna ka thusawi hi hre thiam la, ding ngîl rawh; tûnah hian i hnêna rawn tirh ka ni si a,” a ti a; tin, he thu hi ka hnêna a sawi zawh chuan khûr chungin ka ding a. 12 Tin, ani chuan ka hnênah, “Hlau suh Daniel, i Pathian hmaa inngaitlâwm tûr leh hre thiam tûra i thinlung i pêk tirh ni aṭang khân i thute chu ngaihthlâk a ni a, i thute avâng chuan ka lo kal a ni. 13 Mahse, Persia ram hotu chuan ni sawmhnih leh ni khat mi dodâl a; amaherawhchu, ngai teh, Mikaela, hotu lian chu min pui tûrin a lo kal a; tichuan, Persia lal hnênah chuan ka han awm ta a. 14 Nakin lama i mite chunga thil lo thleng tûrte hriat thiamtîr tûr chein tûnah hian ka lo kal a ni, Inlârna chu ni tam tak hnuah a la ni dâwn si a,” a ti a. 15 Tin, hêng thute ka hnêna a sawi hnu chuan kei chu ka kaikûn a, ka ṭawng thei ta lo va. 16 Tin, ngai teh, mi pakhat, mihring fapate ang taka lang hian ka hmui a rawn khawih a; tichuan, ka kâ ka âng ta a, ka hmaa lo dinga hnênah chuan, “Aw ka lalpa, inlârna avâng chuan ka lungngaihnate chuan mi delh a, thahrui rêng ka nei lo va. 17 He ka lalpa chhiahhlawh hian he ka lalpa hi engtin nge a biak theih ang? Kei lah chuan thahrui rêng ka nei si lo, thâwk pawh ka la thei hek lo,” ka ti a. 18 Tichuan, mihring ang taka lang chuan mi han khawih leh a, mi tichak ta a. 19 Tin, ka hnênah, “Aw mi duhawm tak, hlau suh; thlamuang takin awm rawh; chak la, a ni, chak rawh,” a ti a. Tin, ka hnêna thu a sawi lai chuan ka lo chak ta a, “Ka lalpan thu sawi rawh se, nangin mi tichak tawh si a,” ka ti a. 20 Tichuan, ani chuan, “I hnêna ka lo kal chhan hi i hria em? Tûnah chuan Persia ram hotu bei tûrin ka kîr dâwn a ni; tin, ka thawh chhuah hunah chuan, ngai teh, Grik ram hotu a lo kal ang. 21 Mahse, thu dik ziaknaa ziak chu ka hrilh ang che: hêngah hian in hotu Mikaela chauh lo chu tu mah mi ṭan tûr an awm lo ve.
1 “Tin, kei chu, Media mi Daria kum khatnaah khân amah tinghet tûr leh tichak tûrin ka ding a.
Aigupta ram leh Suria ram
2 “Tin, tûnah hian thu dik chu ka entîr ang che. Ngai teh, Persia ramah chuan lal pathum an lo la chhuak ang a, a palina chu a dang zawng ai khân a hausa zâwk hle ang; a hausakna avânga a intihchak hunah chuan Grik ram do tûrin mi zawng zawng a chawk tho vang. 3 Tin, lal chak tak, thuneihna ropui taka rorêl tûr chu a lo chhuak ang a, a thu thuin a ti ang. 4 Tin, a lo chhuah hun chuan a ram chu phel darh a ni ang a, kâwlkil liah semin a awm ang, a thlahte hnênah ni lovin, a thuneihnaa a rêl ṭhin ang zêl ni hek lovin; a ram chu he mite ni lo, mi dang tân chhuhsakin a awm zâwk dâwn a ni. 5 “Tichuan, chhim lam lal chu a chak ang a; a hotute zînga pakhat erawh chu amah aiin a chak zâwk ang a, thuneihna a nei ang a, a thuneihna chu thuneihna ropui tak a ni ang. 6 Tin, kumte tâwpah chuan an inzawm ang a; chhim lam lal fanu chu hmâr lam lal hnênah inremna siam tûrin a lo kal ang; mahse, a chakna chu a nei rei lo vang a, ani pawh kha a ding hek lo vang a, a chakna pawh; lal fanu chu pêk bovin a awm zâwk ang a, a rawn hruaitute leh a hringtu, chutih laia amah tichaktu nên. 7 Mahse, a zung aṭanga chawr no ata chu mi pakhat ama hmunah a ding ang a, chu chu sipai rual nên a lo kal ang a, hmâr lam lal kulhah chuan a lût ang a, anmahni a bei ang a, a hneh ang. 8 Tin, an pathiante, an lim chhûnte nên, an tangkarua leh rangkachak bungbêl ṭha tak takte nên, Aigupta ramah a kalpui vek ang a; tin, kum eng emaw ti chu hmâr lam lal lakah a châwl rih ang. 9 Tin, chhim lam lalramah chuan hmâr lam lal chu a lo lût ang a; mahse, ama ramah a kîr leh ang. 10 “Tin, a fapaten an do vang a, sipai rual nasa tak an ko khâwm ang a, an lo kal ang a, an chîm hneh ang a, an pal tlang ang; tin, an lo kîr ang a, an do vang a, a kulh ngei pawh. 11 Tin, chhim lam lal chu a thinur êm êm ang a, a lo chhuakin amah a bei ang - hmâr lam lal ngei chu; tin, mipui tam tak nên a chhuak ang a, mi tam tak a kutah pêk a ni ang. 12 Tin, mi tam tak chu hruai bo an ni ang a, a thinlung a sâng ang a, sîng laite chu a titlu ang a; mahse, a ding hlen lo vang. 13 Tin, hmâr lam lal chu a lo thawk leh ang a, mipui a hmaa mi aia tam zâwk nên a chhuak ang a; tin, hun tâwp kum tâwp ngeiah chuan sipai rual nasa tak leh thuam nasa tak nên a rawn pan ang. 14 “Tin, chûng hunahte chuan mi tam tak, chhim lam lal do tûrin an ding ang. I chite zînga pâwngnêk mite pawh inlârna chu tithleng tûrin an inlek ang a; mahse, an tlu ang. 15 Chutichuan, hmâr lam lal chu a lo kal ang a, mual pâwng a siam ang a, khawpui kulh nghet nei chu a la ang; tin, chhim lam chakna chuan a dâl zo lo vang, a mi thlante pawhin; dâl zo tûr chakna rêng a awm lo vang. 16 Tichuan, a rawn dotu chuan a duh ang angin a ti ang a, a hmaah tu mah an ding lo vang. Tin, ani chu ram ropuiah chuan a ding ang a, a kutah chhiatna a awm ang. 17 Tin, a ram pum pui chakna nêna lo kal a tum ang a, inremna a siam ang a, chutiangin a ti ang; tin, a tihkhawloh tûrin a hnênah hmeichhe fanu a pe ang a; mahse, a hlawhtling lo vang a, a hlâwkpui hek lo vang. 18 Hemi hnuah hi chuan thliarkâr lam a hawi ang a, tam tak a la ang. Mahse, hotu pakhat chuan sawichhiatna a chhâk chhuah chu a tibâng ang a; a ni, a sawichhiatna chu ama chung vêkah a lêttîr ang. 19 Tichuan, ama ram ngei kulhte lam chu a hawi leh ang a; mahse, a petekin a tlu ang a, hmuh zawh a ni tawh lo vang. 20 Tichuan, ama hmunah chuan mi pakhat, ram ropuinaa chhiahkhawntu kal tlangtîrtu tûr chu a lo ding chhuak ang; mahse, ni rei lo teah thinurna vâng ni lovin, indona vâng pawh ni hek lovin, tihboralin a awm ang.
Suria lal sual
21 “Tin, a hmunah chuan mi hmuhsitawm, ram chawimawina a pêk loh chu a lo ding chhuak ang; mahse, ram muan laiin a lo kal ang a, ṭawngkam thiamin ram chu a chang ang. 22 Tin, a hmaa mi chu tui lian chaknaa hrût bovin an awm ang a, keh sawmin an awm ang; a ni, thuthlung hotu chenin. 23 Tin, a hnêna thuthlung siam hnuah chuan hlemhle takin a che ang; a lo ding chhuak ang a, mipui tlêm tête nân pawh a lo chak dâwn a ni. 24 Muan hun laiin ram bial ṭha ber berah a lo thawk ang a, a pate leh a pa pate tih ngai loh chu a ti ang: mite zîngah chuan râllâk leh râllâk thilte, sumte a vawrh darh ang; a ni, kulh nghet chungahte chuan a phiarrûkte chu a phiar rih ang. 25 Tin, a thiltihtheihna leh a huaina chu, sipai rual nasa tak nên chhim lam lal chungah a chawk tho vang a; tin, chhim lam lal chuan sipai rual nasa tak leh chak tak nên a lo do vang a; mahse, a ding zo lo vang, a chungah chuan phiarrûk eng eng emaw an lo phiar dâwn si a. 26 A ni, a chaw tui hmêl eitute ngei chuan amah an tiboral ang a, a sipai rualte chu hnâwl bovin an awm ang a, tam tak chu thahin an awm ang. 27 Tin, hêng lalte hi zawng an thinlunga pawi khawih hmang an ni ve ve ang a, dawhkân hmun khatah dâwt an sawi ang; mahse, a hlawhtling lo vang, a tâwp chu hun ruatah chuan a ni dâwn si a. 28 Tichuan, sum tam tak nên ama ramah a kîr leh ang a, a thinlung chu thuthlung thianghlim dovin a awm ang; chutiangin a ti ang a, ama ram ngeiah a kîr leh ang. 29 “Hun ruatah chuan a lo lêt leh ang a, chhim lamah a kal ang a; mahse, a hnuhnûng zâwkah hi chuan a hmasa ang chu a ni lo vang. 30 Kittim lawngte chuan amah an rawn do dâwn a ni; chutichuan, a lungni lo vang a, a kîr ang a, thuthlung thianghlim chungah chuan a thinur ang a, chutiangin a ti ang; a ni, a kîr leh ang a, thuthlung thianghlim hawisantute chu a lâwm ang. 31 Tin, sipaite chuan an beihsak ang a, hmun thianghlimte an tibawlhhlawh ang a, kulh ngei pawh chu; tin, hâlral thilhlan awm fo chu a tibo vang a, ṭiauna tenawmna chu an dintîr zâwk ang. 32 Tin, thuthlung chunga suaksual taka titute chu ṭawngkam thiamin a tikhawlo vang; mahse, mi an Pathian hretute kha chu an nghet ang a, thil nasa tak an ti ang. 33 Tin, mi zînga a fingate chuan mi tam tak an zirtîr ang a; mahse, khandaih te, meialh te, sal tânna te leh rawkrâl tein ni tam tak an tlu ang. 34 Tin, an tlûk pawhin puihna tlêm têa dawmin an awm ang a; mahse, mi tam takin fak derin anmahni an fin ang. 35 Tin, a fingate zînga ṭhenkhatte chuan, anmahni tifai tûr leh tithianghlim tûr leh tivâr tûrin an tlûk phah ang, tâwpna hun thleng pawhin; hun ruatah a la nih fo avângin. 36 “Tin, lal chuan a duh ang angin a ti ang: amah a inchawisâng ang a, pathian tinrêng chungah a intilian ang a, pathiante Pathian kalhin thil mak takte a sawi ang a, thinurna hrîkthlâk zawh a nih hma chu a hlawhtling ang; ruat sa chu tih ngei tûr a ni si a. 37 A thlahtute pathiante chu a pawisa lo vang a, hmeichhiate ngainat pathiante leh pathian dang rêng rêng pawh a pawisa hek lo vang; mi zawng zawng chungah a intilian dâwn si a. 38 Mahse, chumi aiah chuan kulhte pathian chu a chawimawi ang a, pathian, a pate pawhin an hriat ngai loh kha rangkachak nên, tangkarua nên, lunghlute leh thil duhawmte nên a chawimawi ang. 39 Tin, pathian dang tak ṭanpuinain kulh nghet tak takte chu a bei ang a, tu pawh a pawm apiang chu a tiropui ang; tam tak chungah ro a rêltîr ang a, ram chu man neiin a sem ang. 40 Tin, tâwpna hunah chuan chhim lam lalin amah a rawn nawr ang a; tin, hmâr lam lal chuan tawlailîr nên, sakawr chung chuang mi leh lawng tam tak nên, ṭhâwngaleivir ang maiin amah a lo bei ang; ramte chu a lût ang a, a chîm hneh ang a, a pal tlang ang. 41 Ram ropui pawh chu a lût ang a, tam tak chu tihtlûk a ni ang; mahse, a kut ata hêng hi chu chhanchhuah an ni ang - Edom leh Moab leh Amon mi ṭha ṭhate. 42 Ramte chungah pawh a kut a lek ang a, Aigupta ram pawhin a pumpelh lo vang. 43 Tichuan, rangkachak leh tangkaraw dah khâwmte chungah leh Aigupta ram thil hlute zawng zawng chungah thu a nei ang; tin, Libua mite leh Ethiopia mite chu a kaihzavêng an ni ang. 44 Mahse, chhak lam leh hmâr lam aṭanga thuthangin amah a tibuai ang; tichuan, mi tam tak tiboral tûr leh timang tûrin thinur takin a chhuak ang. 45 Tin, tuipui leh tlâng thianghlim ropui tak inkârah chuan a lal puan in chu a hûng ang a; mahse, a tâwpna a thleng a ni ang a, tu mahin an pui lo vang.
Hun tâwp hun
1 “Tin, chumi hunah chuan i mipui fate ṭan ṭhîntu, hotu ropui tak Mikaela chu a ding ang a; tin, buaina hun, hnam awm tirh ata chumi hun thleng pawha la awm ngai lo chu a lo awm ang; tin, chumi hunah chuan i mite chu chhanchhuahin an awm ang, mi tin lehkhabua hming chuang apiangte chu. 2 Tin, an zînga tam tak lei vaivuta muhîl tawhte chu an lo ṭhangharh ang a, ṭhenkhat chu chatuan nunnaah, ṭhenkhat zahna leh chatuan hmuhsitawmnaah. 3 Tin, a fingate chu vân êng angin an êng ang a, mi tam tak felnaa hawi kîrtîrtute chu arsi angin kumkhaw tlaitluanin an êng ang. 4 Mahse, nang aw Daniel, thu chu thup la, lehkhabu chu châr tlat rawh, tâwpna hun thlengin; mi tam tak an tlân vêl ang a, hriatnate a pung dâwn a ni,” a ti a. 5 Tin, kei Daniela chuan ka han en a, ngai teh, mi dang pahnih an lo ding a, pakhat chu lui kam ko he lamah, a dang chu lui kam ko lehlamah. 6 Tin, tuin emaw, mi, puanzaisîna inthuam, luipui tui chunga awm hnênah chuan, “Hêng thil mak tâwpna hi eng chen nge ni ang?” a ti a. 7 Tin, mi puanzaisîna inthuam, luipui tui chunga awm chuan a kut ding lam leh a kut vei lam vân lama phar chhuakin, “Hun khat leh hunte leh hun chanve chhûng a ni ang; mi thianghlimte thiltihtheihna chu an tihkeh sawm zawh hunah hêng thil zawng zawng hi a kin ang,” tia nung kumkhuaa chhâlin chhia a chham ka hria a. 8 Hriat chu ka hria a, a ngaihna erawh chu ka hre lo; tichuan, kei chuan, “Aw ka lalpa, hêng thil tâwpna hi eng nge ni ang?” ka ti a. 9 Tin, ani chuan, “Daniel, kal mai rawh, thu chu thup leh châr ṭhat a ni ta e, tâwpna hun thlengin. 10 Mi tam tak chu an intithianghlimin an intivâr ang a, an lo ṭha ang; mahse, mi suaksualte chuan sual takin an ti ang a, mi suaksual tu mahin a ngaihna an hre lo vang a; mi fingte erawh chuan a ngaihna an hria ang. 11 Tin, hâlral thilhlan awm fote lâk bo a nihna, ṭiauna tenawm dintîr a nih hun aṭang chuan, ni sângkhat leh zahnih leh sawmkua a ni ang. 12 Nghâk hrâm hrâma, ni sângkhat leh zathum leh sawmthum leh panga thleng zo chu a eng a thâwl e. 13 Mahse, nang chu tâwpna thleng chuan kal rawh; nite tâwpnaah chuan i châwl ang a, i chan tâwkah chuan i awm ang,” a ti a.
1 Juda-ho lal Uzia te, Jothama te, Ahaza te, Hezekia te lal lai leh Israel-ho lal Jeroboama, Joasa fapa lal laia Beeria fapa Hosea hnêna LALPA thu lo thleng chu.
Hosea nupui fanaute
2 LALPAN Hosea hminga Israel-te hnêna thu a sawi ṭan lai khân hetiangin Hosea hnênah a sawi: “Kal la, nupuiah nawhchizuar nei la, nawhchizuar lakah fa hring rawh; hetiang hian ka mite chuan mi kalsan a, mi uirêsan ta a ni,” tiin. 3 Tichuan, a kal a, Diblaima fanu Gomeri chu a nei ta a; tin, nau a pai a, fapa a hrinsak ta a. 4 Tin, LALPA chuan a hnênah, “A hmingah Jezreela sa rawh; rei rial lovin Jezreel thisen phuba chu Jehua chhûngte chungah ka la ang a, Israela chhûngte ram chu ka tikin ang. 5 Tin, chumi niah chuan heti hi a ni ang a, Jezreel ruamah Israel-ho thal ngul chu ka titliak ang,” a ti a. 6 Tin, nau a pai leh a, fanu a hring a. Tin, LALPA chuan a hnênah, “A hmingah Lo-ruhamai sa rawh; Israela chhûngte chu ka lainat ngai dâwn tawh lo, ka ngaidam ṭhuai dâwn tawh si lo va. 7 Juda chhûngte erawh chu ka lainat ang a, thal ngul emaw, khandaih emaw, indona emaw, sakawr emaw, sakawr chung chuang mi emawa anmahni chhandam lovin, LALPA an Pathian chuan ka chhandam ang,” a ti a. 8 Tin, Lo-ruhamai chu hnute hnêk a bântîr a; tin, nau a pai leh a, fapa a hring a. 9 Tin, LALPA chuan heti hian a ti a: “A hmingah Lo-ammia sa rawh: nangni hi ka mite in ni si lo va; tin, kei hi in Pathian ka ni dâwn lo.”
Israel tundin leh tûr thu
10 Amaherawhchu, Israel fate chu tuifinriat ṭiauvaivut, teh rual loh leh chhiar rual loh zât an ni ang a; tin, heti hi a ni ang a, an hnêna, “Ka mite in ni lo,” tihna hmunah chuan, “Pathian nung fate in ni e,” tih a ni ang. 11 Tin, Juda fate leh Israel fate chu an pung khâwm ang a, an lû tûr an ruat ang a, chu ram aṭang chuan an kal chho vang; Jezreel ni chu a ropui dâwn si a.
1 In unaupate hnênah chuan, “Ammia,” ti ula, in farnute hnênah chuan, “Ruhamai,” ti rawh u.
Uirenu Gomeri - Uirenu Israel
2 “In nu hi bei rawh u, bei rawh u; Ani hi ka nupui a ni si lo va, Kei pawh a pasal ka ni lo! A hmêl ata a nawhchizawrh chîn hi paih thla sela, A ṭânglai ata a uire chîn hi paih thla rawh se; 3 Chuti lo chuan, ka tisaruak ang a, A pian nia a awm angin ka awmtîr ang a, Thlalêr angin ka siam ang a, Ram ro angin ka awmtîr ang a, Tuihâlin ka tihlum ang. 4 A fate pawh ka lainat lo vang, Nawhchizuar fate an ni si a. 5 An nu chuan nawhchi a zuar ṭhîn a, Anmahni paitu chu zahpuiawm takin a awm. ‘Ka chaw te, ka tui te, ka sahmul te, Ka la te, ka hriak te leh ka in tûr te mi petu, Ka ngaihzâwngte ka ûm ang,’ a ti a ni. 6 Chuvângin, ngai teh, i kawng chu hlîngin ka ping ang a, Amah dâlin dai ka theu vang a, A kawngte a hmu lo vang. 7 Tin, a ngaihzâwngte chu a ûm ang a, a ûm phâk lo vang; Anmahni a zawng ang a, a hmu lo vang; Tichuan, ‘Ka pasal hmasa hnênah ka kîr teh ang, Tûn ai hian hmân kha ka tân a ṭha zâwk si,’ a ti ang. 8 Buh te, uain thar te, hriak te, Tangkarua ka tihpunsak te hi, Rangkachak, Baala tâna an hman te nên, Keima pêk a ni tih a hre si lo. 9 Chuvângin, ka buh chu a seng hunah, Ka uain pawh chu a sâwr hunah ka la kîr leh ang, Ka sahmul leh ka la, a saruak khuhna tûr chu ka lâksak ang. 10 Chutichuan, a ngaihzâwngte mit hmuhah A saruak zahmawh ka tilang ang, Ka kut ata tu mân an chhanchhuak lo vang. 11 A hlimna zawng zawng, a kût te, a thla thar te, A Chawlhnite leh a puipun hun zawng zawngte Ka tireh bawk ang. 12 A grêp hrui leh a theipui kûng, ‘Hêng hi ka ngaihzâwngte pêk ka hlawh chu a ni,’ A tih ṭhinate chu ka tiram ang. Ramhnuaiah ka siam ang a, ramsaten an ei ang. 13 Rimtui a hâlsak ṭhin Baala nite chu a chungah ka thungrûl ang. Chûng lai chuan a bengbehte leh a incheimawinate a inbel a, A ngaihzâwngte a pan a, kei mi theihnghilh a ni,” Tih hi LALPA thuchhuak a ni.
LALPAN a mite a hmangaih
14 “Chuvângin, ngai teh, ka thlêm ang a, thlalêrah ka hruai ang a, Ngaihawm takin amah ka bia ang. 15 Tin, chuta chinah chuan a grêp huante chu a hnênah ka pe ang, Akor ruam pawh beiseina kawngka atân; Chutah chuan a tleirâwl lai nite leh Aigupta ram aṭanga a lo chhuah ni ang khân A chhâng ang.” 16 LALPA thuchhuak chuan heti hian a ti: “Chumi niah chuan heti hi a ni ang, ‘Ishi’ mi ti ang a, ‘Baali’ mi ti tawh lo vang. 17 A ka ata Baala hmingte hi ka tihbosak dâwn si a, An hming hi lam a ni rêng rêng tawh lo vang. 18 Chumi niah chuan ramsate, chunglêng savate, Leia rannungte nêna thuthlung an tân ka siam ang a; Thal ngul te, khandaih te, indona te hi, Lei ata ka tiboral ang a, him takin ka awm hotîr ang. 19 Kumkhuain ka tân ka hual tlat ang che; Felna te, rorêlna te, khawngaihna te, lainatna tein, Ka tân ka hual ang che; 20 Rinawmnain ka tân ka hual ang che; Tichuan, LALPA chu in hre tawh ang. 21 Chumi niah chuan heti hi a ni ang a, Ka bia ang,” LALPA thuchhuak chuan a ti. “Vânte ka bia ang a; tin, annin lei an bia ang a; 22 Tin, lei chuan buh te, uain thar te, hriak te a bia ang; Tin, annin Jezreel an bia ang. 23 Tin, ani chu ka tân leiah ka chîng ang a; Lainatdawnglovi chu ka lainat ang a, Kaminilova chu, ‘Ka mi i ni,’ ka ti ang a, Tin, anin, ‘Ka Pathian i ni!’ a ti ang.”
Hosea leh uirenu
1 Tin, LALPA chuan ka hnênah, “Kal leh ta la, hmeichhia, mi dang duh lai, uirenu chu va hmangaih rawh, Israela thlahte chu pathian dang hnên lam hawiin grêp chhang ngaina mah se, LALPAN a hmangaih reng ang bawk hian,” a ti a. 2 Chutichuan, tangkaraw sâwm leh panga leh barli homer khat leh homer chanvein amah chu ka lei a. 3 Tin, a hnênah, “Ni tam tak chhûng chu ka tân i awm tûr a ni; nawhchi i zuar tûr a ni lo va, tu ma nupui i ni tûr a ni lo. Chutiang bawk chuan kei pawh i lakah ka awm ang,” ka ti a. 4 Israela thlahte chu ni tam tak lalber leh mi lian leh lungphun serh leh puithiam kawr emaw, milimte emaw nei lovin an awm dâwn si a. 5 Chumi hunah chuan Israela thlahte chu an inlamlêt ang a, LALPA an Pathian leh an lalber Davida chu an zawng ang a; ni hnuhnûngahte chuan LALPA leh a ṭhatna chu khûr chungin an pan ang.
Israel-te chunga LALPA vuina
1 Israela thlahte u, LALPA thu chu ngaithla teh u; LALPA chuan ram luahtute beihna tûr a nei si a: “He ramah hian thutak leh khawngaihna leh Pathian hriatna a awm lo ve. 2 Chhechham te, inbum te, inthah te, rûkrûk te, Uirê chîn te a punlun a, thisen a inphaman reng a ni. 3 Chuvângin, ram chuan a sûn ang a, A chhûnga chêng tinrêng an chau vang, Ramsate, chunglêng savate nên; A ni, tuifinriata sanghate chenin lâk bo an ni ang.
LALPAN puithiamho a sawisêl
4 Amaherawhchu, tu mah inbei suh sela, Tu mah inzilhhau hek suh se; I mite chu puithiam beitute ang an ni si a. 5 Chhûnah i tlu ang a, nangmah nên zâwlnei pawh zânah a tlu ang a; I nu pawh ka tiboral ang. 6 Ka mite chu hriatna tlâkchham avângin tihboral an ni a, Hriatna i hnar avângin kei pawhin ka puithiam i nihna ata ka hnar tawh ang che. I Pathian dân i theihnghilh vei a, Kei pawh hian i fate ka theihnghilh ve ang. 7 An pun poh leh ka chungah an sual tulh tulh vei a, An ropuina chu mualphonaah ka chantîr ang. 8 Ka mite sualna azârah an intihausa a, An khawlohnaah chuan an thinlung an nghat a, 9 A mipui a puithiamin angkhata hrem an ni ang a, An kawngte avâng chuan anmahni ka hrem ang a, An thiltihte ka thungrûl ang. 10 An ei tak nâng a, an tlai si lo vang; Nawhchizawrh an chîng nâng a, an pung lo vang, LALPA pawisakna an neih loh avângin.
LALPAN hnam dang pathian biak a sawisêl
11 Nawhchizawrh te, uain te, uain tharte chuan Thinlung a la bo ṭhîn. 12 Ka mite chuan an thing milimte an râwn a, An tiang chuan a hrilh ṭhîn; Nawhchizawrhna rilru chuan a hruai bo va, An Pathian lak ata an hur bo ta si a. 13 Tlâng chhîpahte chuan an inthawi a, Mualahte chuan rimtui an hâl a, Sasua leh beraw leh hlai hnuaiahte chuan - A hlim a nawm avângin; Chuvângin, in fanute chuan nawhchizawrh an chîng a. In famote chuan uire an chîng a ni. 14 In fanuten nawhchi an zawrha, In famote an uirein ka hrem lo vang: Anmahni ngei pawh nawhchizuarte nên an kal hrang a, Maichâm nawhchizuarte nên an inthawi ho si a; Hre thiam lo mipuite chu an tluchhia ang. 15 Aw Israel, nang chuan nawhchizawrh chîng ta mah la, Juda zawngin chîng ve lul suh se. Gilgal-ah lo kal suh ula, Beth-aven-ah chho hek suh ula, ‘LALPA a nun chhûng chu,’ tiin chhia chham hek suh u. 16 Bâwngla luhlul ang maiin Israel-ho chu an luhlul a; Tûnah chuan LALPAN berâmno angin phûlah a châwm thei ang em ni? 17 Ephraima chuan milem a zawmpui ta a, A awm awmin awm rawh se. 18 An zu in chu an ṭiak a, an inphalrai ta ṭhîn a; A rorêltute chuan thil zahpuiawm tih an ngaina êm êm a ni. 19 Thliin a lâk hunah an inthawinate avângin an la zak ang.
1 “Aw nangni puithiamte u, hei hi hria ula, Nangni Israel chhûngte u, ngaithla ula, Aw lalber chhûngte u, beng chhi rawh u! Rorêlna chu in tân a ni si a; Mizpa-a thang leh Tabor tlânga lên zâr in nih avângin. 2 Mi helte chuan tihhlum an uar êm êm a, Kei erawh chu an vaia zilhhautu ka ni. 3 Ephraima ka hria a, Israel chu ka lakah thup a ni lo; Tûnah hian aw Ephraim, nawhchizawrh i chîn avângin Israel chu tihbawrhbân a ni.
Milem be lo tûra fîmkhur
4 An Pathian lama hawi kîr tûrin An thiltih ṭhinte chu an bânsan lo va, Nawhchizawrh rilru an zîngah a awm si a, LALPA chu an hre lo a ni. 5 Israel chhuantawlawl chuan a hmaichhanah a hriattîr a, Chutichuan, Israel leh Ephraim chu an khawlohnaah an tlu ang a, Juda pawh an hnênah a tlu ve ang. 6 An berâm rualte leh an sebâwng rualte nên LALPA zawng tûrin an kal ang a; Nimahsela, ani chu an hmu lo vang; An lak aṭangin a inla fihlîm tawh a ni, 7 LALPA chungah vervêk takin an ti a ni, Hnam dang fate an hring si a. Thla thar chuan an lote nên lama boralna a thlen ang.
Juda leh Israel indona
8 Gibea khuaah tawtawrâwt tum ula, Rama khuaah berâmpa ki hâm rawh u; Beth-aven-ah au tuar tuar rawh u, ‘Aw Benjamin, i hnung lam kha!’ tiin. 9 Ephraim chu hremna niah chuan tihṭiau a ni ang; Thil lo ni ngei tûr chu Israel chite zîngah ka hriattîr tawh a ni. 10 Juda mi liante chu ramri sawntute ang an ni a: An chungah ka thinurna chu tuiangin ka leih bua ang. 11 Ephraim chuan rah beh a chîng a, Dikna a palzût a, engmahlo a ûm ruai a. 12 Chuvângin, Ephraim tân chuan sûlrûl ang ka ni a, Juda chhûngkaw tân chuan mawihna ang ka ni. 13 Ephraim chuan a natna a hmu a, Juda chuan a hliam a hmu a. Tah chuan Ephraim chu Assuria hnênah a kal a, Lalber Jareba hnênah chuan mi a tîr a; Nimahsela, ani chuan a tidam thei lo che u a, In hliam chu a tihdamsak thei hek lo che u. 14 Ephraim tân chuan sakeibaknei ang, Juda tân chuan sakeibaknei vânglai ang ka ni dâwn si a; Keimah, keimah ngeiin ka hai thlêr ang a, Ka kal ang a, ka kal bopui ang a, Chhanchhuaktu tu mah an awm lo vang. 15 An thiam lohna an inhriat hun hunah ka hmunah ka kîr ang a; Tichuan, ka hmêl an zawng ang a, An tuarnaah chuan min zawng ruai ruai dâwn a ni.”
A tak thleng lova mipui simna
1 “Hawh u, LALPA hnênah i kîr ang u; Min lo pawt sawm tawh na a, min tidam leh dâwn si a; Min lo vaw tawh na a, min tuam leh dâwn si a. 2 Ni hnih chinah min tinung ang a; Ni thum niah min kaitho vang a, a hmaah kan awm ang. 3 LALPA hriatna chu i ûm zêl ang khai, i hria ang u; Zîng anga khêl lovin a thawk chhuak ngei ṭhîn a ni: Kan hnênah ruah angin, ruah hnuhnûng, lei tihuhtu ang maiin a lo thleng ang.” 4 “Aw Ephraim, engtin nge ka tih ang che? Aw Juda, engtin nge ka tih ang che? Min hmangaihna chu zîng ṭiauchhûm leh dai ral ta thuai ṭhîn ang hi a ni si a. 5 Chuvângin, zâwlneite hmangin anmahni ka râwt a, Ka kâa thutein anmahni ka tihlum a ni; I chunga ka rorêlnate chu i tân kâwlphe êng zuai zuai ang a ni. 6 Inthawina duh lovin khawngaihna ka duh si a; Hâlral thilhlante ai chuan Pathian hriatna ka duh zâwk a ni. 7 Nimahsela, Adama angin thuthlung chu an bawhchhia a, Chutah chuan vervêk takin ka chungah an ti a ni. 8 Gilead chu khawlohna titute khawpui a ni a, Thisen a kai pheng phung a ni. 9 Suam hmang rualin mi an châng ṭhîn angin, Puithiam pâwlte chuan Sekem kawngah mi an that ṭhîn; A ni, thil sual an ti ta a ni. 10 Israela chhûngkuaah chuan thil râpthlâk tak ka hmu, Ephraim-ah chuan nawhchizawrhna a awm a, Israel chu a bawrhbâng a ni. 11 Ka mite chu an sal tânna ata ka hruai kîr hunah chuan, Aw Juda, i tân pawh rah seng tûr ruat a ni.
1 “Israel tihdam ka tumin Ephraim khawlohna a lo lang a, Samari suahsualna nên. Bum an chîng a, Chhûng lamah rûkru a lo lût a, Pâwn lamah suam hmang rualin an suam si a. 2 An suahsualna zawng zawng ka hre reng tih An thinlungin an ngaihtuah lo; Tûnah chuan an thiltihte ngeiin a chîm vêl tlat tawh a. Ka hmaihmaah an awm a ni.
Lal ina inphiarna thu
3 An suahsualnain lalber a tilâwm a, An dâwt thuin mi liante an tilâwm bawk a. 4 An vaiin uire an ni a; Chhang siamtuin thuk a ur lum, Chhangphut a hmeh diak a thawh hmaa, Mei chhawm a chawlhsan rih ang hi an ni. 5 Kan lalber niah chuan mi liante chu uain rû takin an intirui a; Ani chuan hmusittute rualin a kut a phar a. 6 A rûka an chân laiin an thinlung chu thuk ang maiin an siam tawh si a; An thinur chu zankhuain a dai a, Zîngah chuan meialh angin a alh a. 7 Thuk ang maiin an sa vek a, an rorêltute an tiboral a; An lalber apiangte chu an tlu a, An zîngah tu mah mi au an awm lo.
Israel leh hnam dangte
8 Ephraim lah chu hnam dangte zîngah a intelh a; Ephraim chu chhang leh loh a ni. 9 Mikhualte chuan a chakna an ei zawhsak a, Ani chuan a hre lo. Hmul ṭuakin a bâwm nual tawh a, Ani chuan a hre lo. 10 Israel ropuina chuan a hmaihmaah a hriattîr ṭhîn a; Nimahsela, hêng zawng zawngah pawh hian LALPA an Pathian lam chu an hawi lo va, Ani chu an zawng hek lo. 11 Ephraim chu ṭhuro lungmâwl, hriat thiamna nei lo ang a lo ni a; Aigupta lam an au thûl a, Assuria lamah an kal thûl a. 12 An kal laiin an chungah ka lên ka vawrh ang a, Chunglêng sava manin ka man ang a, An inkhâwmhovin an hriat tawh angin anmahni ka hrem ang. 13 Ka hnên ata an kal bo tâk avângin an chung a pik e! Ka chungah an hel tâk avângin An chungah boralna a thleng e! Kei chuan ka chhandam duh a, Anni erawh chuan dâwt mi sawi khum a. 14 An thinlung takin mi au lo va, An khumlaizâwlah an chiau mai mai zâwk a ni. Buh leh uain thar atân an inkhâwm a, ka chungah chuan an hel si a. 15 Kei chuan ka hruai chhuak a, ka tichak a; Mahse, ka chungah thil ṭha lo an suangtuah a ni. 16 An hawi kîr a, Chungnungbera hnênah ni lovin; Thal ngul rul ang an ni a. An mi liante chu an ṭawng chaltlai avângin khandaihin an tlu ang. Hei hi Aigupta rama nuihzatbûr an nihna a ni ang.
LALPAN milem an biak vângin Israel-te a hnâwl
1 “Tawtawrâwt chu i hmuiah chuktuah rawh. LALPA chhûngte chungah mupui angin a lo kal e, Ka thuthlung an bawhchhiata, Ka dân an helsan avângin. 2 ‘Ka Pathian, keini Israel-ho chuan kan hria a che,’ Tiin ka hnênah an au vang. 3 Israel-ho chuan thil ṭha an hnâwl a, Hmêlmaten an ûm ang. 4 Ka tih ni lovin anmahni lal an siam a; Ka hriat lohvin hotute an siam a; An boralna tûrin an tangkarua leh rangkachakin milim an insiam a. 5 Aw Samaria, i sebâwngno lim chu a hnâwl e! An chungah ka thinur êm êm a ni. Eng tikah tak thianghlim leh ang maw? 6 Israel themthiamte milem siam chu, Pathian a ni lo. A ni, Samaria sebâwngno lim chu tihkeh sawm vek a ni ang; 7 Thli an chîng a, thli chhia an seng dâwn si a. Kûng ding a nei lo va, zîk chuan rah a chhuah lo vang; Chhuah pawh ni sela, mikhualten an ei zo vang. 8 Israel-ho chu lem zawhin an awm a ni; Bêl, a chhûnga lâwmna awm lo angin tûnah hian hnam dang zîngah an awm e. 9 Ramsabengtung mal tla angin Assuria ramah an chho si a; Ephraim chuan ngaihzâwngte a tlawn e. 10 A ni, hnam dangte tlawn ruai mah se, Ka khâwm ang a, Lal leh hotu hriak an thih ṭhin ka tihbânsak rih ang. 11 Ephraim chuan maichâm a tipung hi an thiltih sualna lek a ni a, An tân maichâm rêng rêng chu sualna mai a ni. 12 Ka dân chu ka ziaksak rei rui a; Mahse, thil dang takah an ngai a ni. 13 Ka tâna thilhlan inthawinate zawng! Sa an hlân a, an ei a; chûng chu LALPAN a pawm lo. Tichuan, an khawlohna a hre reng a, an sual a hrem a, Anni chu Aigupta ramah an kîr leh ang. 14 Israel chuan a Siamtu a theihnghilh a, In ropuite a sa a; Juda chuan khawpui kulhte a tipung a; Mahse, a khawpuiahte chuan mei ka tîr ang a, A in ropuite chu a kâng zo vang.”
Hosean Israel hremna tûr a puang
1 Aw Israel, hnam dangte angin hlim so bûng bûng khawpin lâwm suh; I Pathian chu nawhchi i zawrhsan a, Hruih zâwl tina a man chu i ngaina si a. 2 Hruih leh grêp sâwrna khurte chuan anmahni a titlai lo vang a, Uain thar tûr a hlawhchham ang. 3 LALPA ramah chuan an chêng lo vang a, Ephraim chu Aigupta lamah a kîr zâwk ang a, Assuria ramah chaw thiang lo an ei ang. 4 LALPA hnênah uain chu an bun chhuak lo vang a, An thilhlante chu a tân lâwmawm a ni hek lo vang; An chhang chu lusûnte chaw ang a ni ang a, A ei apiang an bawrhbâng ang; An chhang chu an nunna atân mai a ni ang a, LALPA inah a lo lût lo vang. 5 Inkhâwmpui urhsûn niah leh LALPA kût niah chuan Eng nge in tih tâk ang le? 6 Ngai teh u, chhiatna a lo thleng ang a, an darh ang a, Aigupta chuan anni chu a lo khâwm zâwk ang a, Memphis chuan a lo phûm ang. An tangkaraw thil duhawmte chu kângṭhaiin a bâwm ang a, An puan inahte chuan hnimhlîngnei a awm ang. 7 Hremna nite chu a lo thleng a, Thungrulhna nite chu a lo thleng e; Israel chuan chu chu a hria ang! I khawlohna chu a tamin intaina chu a nasat avângin, Zâwlnei chu a â a, thlarau nei mi chu mi â a ni. 8 Ephraim râlvêngtu chu ka Pathian hnêna awm a ni a; Zâwlnei lah chu a kawng tluanin thangkamtu thang a awm a, A Pathian inah pawh intaina a awm. 9 Gibea khuaa awm lai nite ang khân Nasa takin anmahni an intikhawlo va. An khawlohna chu a hre reng ang a, An sualnate chu a thungrûl ang.
Israel sualna leh a rah
10 Israel chu thlalêra grêp rah ang maiin ka hmu a. In pate chu theipui, hun hmasaa a hmin hmasa angin ka hmu; Mahse, anni chu Baal-peor hmunah an lo kal a, Thil zahthlâk takah chuan an inpumpêk ta a, An ngainat tak milemte ang bawk chuan an tenawm a ni. 11 Ephraim lah chu, an ropuina chu sava angin a thlâwk bo vang a: Nau hring te, nau pai te, rai te an awm lo vang. 12 An fate puitlin mah sela mipa rêng rêng awm lo tûrin Ka sûntîr tho vang. A ni, anmahni ka hawisan hunah chuan An chung a va pik zual dâwn êm! 13 Tura ka hmuh ang bawkin Ephraima chu hmun nuam taka dahin a awm a: Mahse, Ephraima chuan a fate chu thattu hnênah a la hruai chhuak ang. 14 Aw LALPA, neihtîr rawh: Eng nge i neihtîr ang le? Chhûl nau chhiat ṭhîn leh hnute vuaite chu neihtîr ang che.
Israel chunga LALPA rorêl
15 An suahsualna zawng zawng chu Gilgal-ah an ti ṭan a, Chutah chuan anni chu ka haw si a. An thiltih suaksual avângte chuan ka in ata ka hnawt chhuak ang; Anniho hi ka hmangaih tawh lo vang. An hotu zawng zawngte chu hel hmang an ni. 16 Ephraim chu vuakin a awm a, an zung chu a ro zo va; Rah an chhuah lo vang. A ni, chhuah mah sela, an chhûl rah duhawm tak chu Ka that tho tho vang. 17 Ka Pathian chuan anni chu a paih bo vang, Amah an bengkhawn loh avângin; Tichuan, hnam dangte zînga vâkvaiin an awm ang.
Zâwlneiin Israel-te chanchin a sawi
1 Israel chu grêp hrui duah tak, rah ngah tak a ni. A rah tam hu ang zêlin a maichâmte a tipung a; A ram ṭhatzia ang zêlin lungserh phun ṭha tak a siam a. 2 Rilru pahnih an nei a, Tûnah chuan thiam loh changin an awm tawh ang. An maichâmte chu LALPAN a vaw chim ang a, An lungserh phunte chu a tichhia ang. 3 “Lal taktak kan nei lo ve, LALPA chu kan ṭih si lo va. Chu lal chuan eng nge min tihsak theih ang?” tiin, Tûnah chuan an sawi tawh ngei ang. 4 Thuthlung an siamna lamah dâwta chhechhamin Thu lawilo an sawi a. Chuvângin, leileh dûra hnim tûr nei a ṭo angin, Rorêlna a pung a ni. 5 Samari rama chêngte chu Beth-aven sebâwngno avâng chuan thlaphângin an awm ang. A lak ata a bo tâk avângin chuta mite chu an lungngai ang a, Chumia puithiamho a ropuina chunga la lâwm ṭhînte pawh. 6 Amah ngei pawh chu Lal Jareba hnêna pêk tûrin Assuria ramah kal bopui a ni ang. Ephraima chuan zah a hmu ang a, Israel chuan ama thurawt ngei chu a zahpui ang. 7 Samari ram lah chu, tui chunga thingṭang nawi ang mai hian A lal chu tihboral a ni a. 8 Israel sualna Aven hmun sângte pawh chu tihchhiat a ni ang. An maichâmahte chuan hlîng leh hnimhlîngnei a lo ṭo vang a; Tlâng hnênahte chuan, “Min khuh rawh,” an ti ang a, Mual hnênahte chuan, “Min delh rawh,” an ti ang.
LALPAN Israel chunga a rorêl a puang
9 “Aw Israel, Gibea ni aṭang tawh khân i sual a ni; Chutah in la chhunzawm a. Khawlohna fate chunga dona chuan Gibea ngeiah chuan a ûm phâk hlawm lo vang maw? 10 Ka duh hunah chuan anmahni ka hrîng ang a; Tin, an bawhchhiat thuah hnih avânga hrem an nih hunah chuan, An chungah mipuite chu an pung khâwm ang. 11 Tin, Ephraima chu bâwngla zirtîr tawh, Buh chîl châk tak a ni a; Mahse, kei ngei hian a nghâwng mawi takah chuan Nghâwngkawl ka bahtîr tawh ang a, Ephraima chungah mi ka chuantîr ang a, Juda pawh chuan lei a let ang a, Jakoba chuan a lei tlangte chu a tisawm ang. 12 Mahni tân felna tuh ula, Khawngaihna seng rawh u; In lei khêkte let rawh u, LALPA zawn hun a ni si a, A lo kala malsâwmna a vûr hma che u chuan. 13 Mahse, suahsualna in tuh a, Khawlohna in seng a: In dâwt sawi rah in nei a ni. 14 Chu vâng chuan i mite zîngah buai mum mumna a lo chhuak ang a, Salmana chuan indo nia Beth-arbel a tihchhiat ang khân, I kulh zawng zawngte chu tihchhiat a ni ang; Nu chu a fate nên paih sawmin an awm a ni. 15 Nangni Bethel mite u, In sual nasa tak avângin Chûng thil chu in chungah a lo thleng dâwn. Israel lal pawh khawfîngchah hmain a boral ang.
A mi hel hmangte Pathianin a hmangaih
1 “Israel hnam chu a naupan lai ata tawh ka hmangaih a, Aigupta ram ata ka fapa atân ka ko chhuak a ni. 2 Koh an nihin an hla sauh va, Baal-ho hnênah an inthawi zâwk ṭhîn a, Milem siam chawpte hnênah rimtui an hâl a ni. 3 Kei erawh chuan Ephraim chu bâna dawmin kal ka zirtîr a, Anmahni ka tihtîr a ni tih erawh chu an hre lo. 4 Mihring hruihrual, hmangaihna hruite chuan anmahni ka kai a, An tân chuan an khabea kawl hlihsaktute ang chu ka ni. Duat takin an hmaah ei tûr ka hlui a. 5 Aigupta ramah ka tîr leh tawh lo vang a; Mahse, an inlamlêt duh loh avângin, Assuria chu an lal a ni ang. 6 A khawpuiahte chuan khandaih a invilik ang a, A kulhte chu a tiboral ang a, A tiral ang, anmahni thu lo râwn avâng ngeiin. 7 Ka mite chuan mi hawisan an tum reng a. An nghâwngkawl rit tak avângin Chungnungbera an au vang a; Mahse, tu mân an chawi kânsak lo vang. 8 Aw Ephraim, engtin nge ka thlauhthlâk theih ang che? Aw Israel, engtin nge ka thlah theih ang che? Engtin nge Adma angin ka siam theih ang che? Engtin nge Zeboiim angin ka awmtîr theih ang che? Ka chhûngah ka thinlung a inlumlet a, Ka khawngaihnate chu a inchhêm vâm ta zâwk a. 9 Ka thinrimna nasa tak chu ka hlen lo vang a, Ephraima chu tihboral ka tin leh tawh lo vang. Kei chu mihring ni lovin Pathian ka ni si a, Nangmaha awm Mi Thianghlima chu; Khawpui chu ka rawn luhkhung lo vang. 10 LALPA chu an zui ang a, Sakeibaknei anga rûm ngei tûra chu. A ni, a rûm ngei ang a; Tin, khawthlang lam aṭangin a fate chu An lo tlân dual dual ang. 11 Aigupta aṭang chuan chawngzawng angin, Assuria aṭang chuan ṭhûro angin, thla zâp siau siauvin an lo kal ang. Tin, an in lum ka luahtîr ang,” tih hi LALPA thuchhuak a ni. 12 Ephraima chuan dâwt thuin mi hual a, Israel chhûngte chuan bumnain; Mahse, Juda chuan Pathian thu a awih a, Mi Thianghlima lakah a rinawm a ni.
Israel leh Juda-ten thiam loh an chang
1 Ephraima chuan thli rinrâwlah a neih a, Khawchhak thli chu a zui ṭhîn a; Dâwt thu leh ṭiavaina thu a tipung tial tial a, Assuria nên thu an thlung a, Aigupta lamah hriak a phur lût a ni. 2 LALPA chuan Juda chungah pawh lungawi lohna tûr a nei bawk a, Jakoba chu a awm dân ang zia zêlin a hrem ang a; A thiltih ang zia zêlin a thungrûl ang. 3 Chhûlah pawh khân a unaupa chu a keartuiah a rawn man a, A lo puitlinin Pathian a bei a; 4 A ni, vântirhkoh a bei a, a hneh ta a; A ṭap a, duhsakna a ngên a. Bethel hmunah chuan amah a hmu ta a, Tah chuan ka hnênah thu a sawi a, 5 LALPA ngei, sipaihote Pathian chu. LALPA tih chu a chhinchhiahna a ni. 6 Chutichuan, nang chuan i Pathian hnên lam hawi la; Khawngaihna leh rorêlna hmang la, I Pathianah chuan innghat fo rawh.
An sual vânga hrem tûr
7 Kanaan-ho angin Israel chuan bûkna dik lo a lek a; Bum mawlh a châk ṭhîn a ni. 8 Ephraima chuan, “Ka hausa takzet ta mai, Ka intimuk takmeuh ta a ni; Ka hnathawh zawng zawngahte lah chuan, Keimahah khawlohna thil sual an hmuh tûr a awm miah lo,” a ti a. 9 Mahse, kei hi Aigupta ram aṭang tawh khân, LALPA i Pathian chu ka ni a; Kût hun lai ang khân puan inah ka la chêntîr leh ang che. 10 Zâwlneite hnênah pawh thu ka sawi ṭhîn a, Inlârnate ka tipung a; Zâwlneite hmangin ka vau lâwk a. 11 Gilead chu khawlohna a ni lo vem ni? Engmahlo mai an ni alâwm; Gilgal-ah chuan sebâwngpa an hlân ṭhîn a; A ni, an maichâmte chu leileh rih khawh thlûra Lung theh khâwm ang mai a ni. 12 Jakoba chu Aram ramah a tlân bo va; Israela chuan nupui man a tuak a, Nupui man atân chuan berâm a vêng a ni. 13 Zâwlnei hmangin Israela chu Aigupta ram aṭangin LALPAN a hruai chhuak a, Zâwlnei vêk hmang chuan a humhim bawk a. 14 Ephraima lah chuan a tithinrim nasa êm êm mai a; Chuvângin, a thisen chhuah chu ama chungah a tla a, A sawichhiatna chu ama chungah LALPAN a tlâktîr ang.
Israel-te chhiatna
1 Ephraiman thu a sawi chuan khurhna khawp a tling hial ṭhîn, Israel mite zîngah ngaih ropui a ni miau va; Baala hnêna a tlûk chinah erawh chuan a thi ta a ni. 2 Tûnah te hian an sual zual ta deuh deuh va, An tangkaruain milim chhûn an insiam chawp a, Anmahni ngaih dân ang zia zêla milim chu; Chûng zawng zawng chu themthiamte kutchhuak a ni chungin, “Inthawina hlântu apiangte chuan Bâwngnote chu fâwp rawh se!” an ti ṭhîn. 3 Chuvângin, zîng ṭiauchhûm ang leh, Dai hma taka bo leh mai ṭhîn ang te, Hruiha buhsî, ṭhâwngaleivirin a lâk bo ang te, Meikhu chhuahnaa meikhu ang te an ni ang. 4 Kei erawh hi chu Aigupta ram aṭang tawha LALPA i Pathian chu ka ni a; Kei tih loh chu Pathian dang i hre ngai lo va, Kei lo hi chu chhandamtu dang an awm lo. 5 Thlalêr ram ro nasa taka kâwm ṭhîntu che kha ka ni a. 6 An ei tûr dawnah chuan an tlai a; An tlai chu an thinlungin a chapo phah a; Tichuan, min theihnghilh ta a ni. 7 Chuvângin, an tân sakeibaknei ang ka ni a, Keitê angin kawnglakah anmahni ka châng ang. 8 Savawmno chân angin anmahni ka bei ang a, An lung tuamtute ka hai thlêr vek ang a, Chumi hmunah chuan sakeibaknei angin Anmahni ka ei zo vang; Ramsate chuan an phih darh zo dâwn a nih chu. 9 Aw Israel, nangmah puitu mi do hi i chhiatna a ni e. 10 I khawpui zawng zawnga chhanhim theitu tûr che I lal chu tûnah khawiah nge a awm le? “Lal leh hotute mi pe rawh,” i tihate, I rorêltute chu khawiah nge? 11 Ka thinrimin lal ka pe che a, Ka thinurin ka la bo leh ta a ni. 12 Ephraima khawlohna chu khâwl khâwm a ni a, A sualna chu chhêk khâwm a ni. 13 Hmeichhe nau vei lungngaihna ang chu a chungah a lo thleng ang: Amah chu fapa fing lo tak a ni e, A hun takah nau lo chhuahna hmunah a awm si lo. 14 Seol kut ata anni chu ka tlan ang em ni? Thihna ata ka chhanchhuak dâwn em ni? Aw thihna, i hripuite chu khawiah nge? Aw Seol, i tihchhiatna chu khawiah nge? Ka khawngaih dâwn hauh lo, Sim mah se, ka bengkhawn lo vang. 15 A unaute zînga a hmuingîl ber ni mah se, Khawchhak thli a lo thawk ang a, Thlalêr aṭanga LALPA thaw ngei chu a lo kal mêk a ni; A tuihna te chu a kang ang a, A tuikhur te chu a ro zo vang; Bungbêl ṭha zawng zawng, a ro chu a tichhe vek ang. 16 Samaria a ṭiau vang, A Pathian chungah a hel si a; Khandaiha tihtlûkin an awm ang a, An nausênte chu paih sawm an ni ang a, An hmeichhia, nau pai laite chu tai thlêr an ni ang.
Israel tân Hosean a dîl
1 Aw Israel, LALPA i Pathian lamah chuan kîr leh rawh, I khawlohna avâng ngeiin i tlûk tâk hi. 2 Thu keng chungin LALPA lamah kîr leh la, A hnênah chuan heti hian sawi rawh: “Khawlohna zawng zawng chu la bo la, A ṭha apiang chu pawm ang che; Tichuan, kan hmui rahte chu Bâwngpa aiah kan rawn hlân ang e. 3 Assuria chuan min chhandam lo vang a, Sakawr chungahte kan chuang lo vang; Kan kutchhuakte hnênah chuan, ‘Kan pathiante in ni e,’ kan ti tawh hek lo vang, Fahrahte chuan nangmahah Khawngaihna an hmu ṭhîn si a.”
LALPAN Israel tân nun thar a tiam
4 “An hnungtawlhna hi ka tidam ang a, An lak aṭanga ka thinrimna chu a kian tâk avângin, Anni chu ka hmangaih hrim hrim dâwn a ni. 5 Israel lakah chuan daifîm ang ka ni ang a; Ani chu lili angin a lo vul ang a, Lebanon tlâng thing zung angin a zung a thlâk darh ang. 6 A zârte chu a ṭawi luih ang a; A mawizia chu olive thing ang mai a ni ang a, Lebanon sidar angin a rimtui ang. 7 A hlima chêngte chu an lo kîr ang a; Buh angin an nung thar ang a, Grêp hrui angin an lo duah ang. Lebanon uain angin an hming a thang ang. 8 Ephraima chuan milemte nên inzâwlna eng nge a neih tawh ang? Kei hi a ṭawngṭaina chhângtu ka ni a, A tung dingtu pawh ka ni; Kei chu fâr thing hring dup ang ka ni a, I rah ṭhate chu keima laka mi a ni e.”
Thu tlângkawmna
9 Tu nge finga hêng hi hre thiam thei ang? Tu nge fingvâra hre thei ang? LALPA kawngte chu a dik a, Mi dikte chuan an zawh dâwn si a; Bawhchhetute erawh chu chutah chuan An inchhuih thlu dâwn a ni.
Thlai tihchhiat vângin mipui an rûm
1 Pethuela fapa Joela hnêna LALPA thu lo thleng chu. 2 Putarte u, hei hi hre rawh u, he rama awm zawng zawngte u, beng chhi rawh u. Hei hi in hun lai leh in pute hun lai pawhin a awm tawh ngai em ni? 3 Chu chu in fate hrilh ula, in fate chuan an fate hrilh sela, an fa lehte chuan chhuan dang hrilh zêl rawh se. 4 Thingngêt pangangin a ei bân apiang chu khaukhuapin a ei a; khaukhuapin a ei bân apiang chu thingngêtin a ei a, thingngêtin a ei bân apiang chu pangangin a ei zo va. 5 Ruite u, harh ula, ṭap rawh u; uain in zawng zawngte u, a uain thlum avâng chuan chiau vak vak rawh u; in kâ ata lâk bo a ni tawh si a. 6 Hnam chak tak, chhiar sên loh ka ramah an lo chhuak ta si a, an ha chu sakeibaknei ha ang a ni a, sakeibaknei lian tak hapui ang an nei bawk a. 7 Ka grêp hrui a tichhia a, ka theipui thing pil a hîk a; a hîk fai vek a, a paih bo va; a ṭangte chu a filh vâr vek a. 8 Nulain saiip puan fênga a ṭhat lai pasal a sûn angin ṭap vak rawh u. 9 Chhangphut hlan te, in tûr hlante chu LALPA in ata tihbo a ni a; puithiam, LALPA rawngbâwltute chu an lungngai a. 10 Lo chu tihchhiat a ni a, ram chu a lungngai a; buh chu tihchhiat a ni a, uain thar chu a kang a, hriak chu a chau va. 11 Aw, nangni lo neitute u, zak ula; aw nangni, grêp hrui enkawltute u, buh leh buhsanghar avângin chiau vak vak rawh u; lova buh seng tûr chu a boral ta si a. 12 Grêp hrui chu a vuai a, theipui kûng chu a chau va; pawmgranet thei kûng te, tûm te leh apple thei kûng te, lova thing zawng zawngte pawh chu a chuai ta a; mihring fate zînga lâwmna chu a vuai ral ta si a. 13 Nangni puithiamte u, saiip puan veng ula, ṭap rawh u; nangni, maichâm rawngbâwltute u, chiau vak vak rawh u; nangni ka Pathian rawngbâwltute u, lo kal ula, saiip puan sinin zankhuain mu rawh u; in Pathian in aṭang chuan chhangphut hlan leh in tûr hlan chu khap a ni si a. 14 Chaw nghei hun serh thianghlim ula, inkhâwmpui urhsûn siam ula, LALPA in Pathian inah chuan putarte leh he rama chêng zawng zawngte chu hruai khâwm ula, LALPA chu au rawh u. 15 Chu ni chu a chung a pik e! LALPA ni chu a hnai si a, Engkimtitheia laka boralna a lo thleng ang. 16 Kan mit hmuhah ei tûr tihbo a ni lo vem ni, a ni, kan hlimna leh kan lâwmna chu kan Pathian in ata tihbo a ni lo vem ni? 17 Chite chu lei tlang hnuaiahte chuan a ṭawih a, zêmte chu a ram a; buh inte chu ṭhiatin a awm a, a buh a vuai ta si a. 18 Rante chu an va rûm nasa êm! Bâwng rualte chu an mangang a, hlobet hring hmun an neih loh avângin; a ni, berâm rualte chu an ṭiau va. 19 Aw, LALPA, ka au va che; mei chuan thlalêr ram hlobet hmun chu a kâng fai ta a, meialh chuan ram thing zawng zawng chu a kâng fai ta si a. 20 A ni, ramsate chu nangmah ngaiin an thaw huam huam a; luitête chu a kangchat a, mei chuan thlalêr ram hlobet hmun chu a kâng fai ta si a.
Khau rual - LALPA ni tehkhinna
1 Zion-ah chuan tawtawrâwt hâm ula, ka tlâng thianghlimah chuan inrâlrinna puang rawh! He ram chhûnga mi zawng zawngte chu khûr rawh se; LALPA ni chu a lo thleng dâwn a, a hnai tawh hle si a: 2 thimna leh khaw durna ni, chhûm zîng leh thim chhah mup thlenna ni a ni ang a. Khawfîngchatin tlângte a tuam angin mi hrâng rual tam tak, la hmuh ngai loh, eng tik maha hmuh leh tawh ngai loh tûr an lo thawk ang. 3 An hma lam leh hnung lam chu a kâng fai zêl a; an hmabâk ram chu Eden huan ang ni mah se an pelh hnu chuan thlalêr ram ro a ni zêl, eng mah zuah an nei lo. 4 An lan dân chu sakawr lan dân ang a ni; sakawr chuang mi angin an tlân a. 5 Indona tawlailîr ri angin tlâng chungah an kai ri sup sup a, pâwl kâng alh hluah hluah ang leh indonaa mipui chak tak inpeih sa angin. 6 An hmaah mipuite chu an thlaphâng a; an hmêlte chu a lo dâng vek a. 7 Mi chak tak angin an tlân a, indo mi angin bangah an lâwn a; mahni zâwn ṭheuhvah an kal a, an tlar dân an tibuai lo. 8 An innêk lo va, mahni kawngah an kal ṭheuh va; hriamhreite an su tlang a, an kal pêng lo. 9 Khawpui chungah an zuang a; kulh chungah an tlân a; in chhûngahte an lâwn chho va, rûkru angin tukverhahte an lût a. 10 An hmaah lei a khûr a, vânte a nghîng a; ni leh thla chu a thim a, arsiten an êng an thup a. 11 LALPA chuan a sipai rualte hmaah a aw a chhuah a; a riahbûkte chu a ropui hle si a; a thu hlentu a chak si a; LALPA ni chu a ropuiin a râpthlâk êm êm si a; tuin nge tuar thei ang?
Sim tûra ngenna
12 LALPA chuan, “Chuti chung pawhin tûnah in thinlung zawng zawngin, chaw ngheiin, ṭapin, lungngaiin ka lam lo hawi rawh u,” a ti. 13 In puan ni lovin in thinlung thlêr ula, LALPA in Pathian lam chu hawi rawh u; ani chu khawngaih thei tak leh lainatnaa khat, thinnel leh ngilneihna ngah, chhiatna thlentîr lo tûra inlamlêt ṭhîn a ni si. 14 LALPA in Pathian hnênah chhangphut hlan leh in tûr hlanahte pawh chuan a kîrin, rilru inlamlêtin, malsâwmna hnutchhiahin a awm lo vang tih tuin nge hria? 15 Zion-ah chuan tawtawrâwt hâm ula, chaw nghei hun serh thianghlim ula, inkhâwmpui urhsûn tak ko rawh u; 16 mipui khâwm ula, inkhâwmho chu tithianghlim ula, putarte, naupangte, hnute hne laite khâwm ula; mo neitu chu a pindan aṭangin lo chhuak sela, mo pawh a pindan chhûngril ata lo chhuak rawh se. 17 Puithiam, LALPA rawngbâwltute chu hulhliap leh maichâm inkârah chuan ṭap sela, “Aw LALPA, i mite zuah la, i rochante hi sawichhiata awm hnamten an chunga ro an rêlsak tûrin pe suh. ‘An Pathian chu khawiah nge a awm tâk?’ tiin an mipuite zîngah chuan engah nge an tih ang?” ti rawh se.
Pathianin ram a tidam leh
18 Tichuan, LALPA chuan a ram tan thahnem a ngai a, a mite chu a khawngaih a. 19 LALPA chuan a mite hnênah, “Ngai ula, in hnênah buh te, uain te, hriak te ka rawn thlen ang a, chûng chuan in tlai ang a; hnamte zîngah chuan sawichhiatin ka awmtîr tawh hauh lo vang che u. 20 Amaherawhchu, in hnên ata hmâr lam aṭanga lo kal mi hrâng rual chu ka ûm bo vek ang a, ram ro leh ṭiauvah ka kal botîr ang, a hmasa pâwl chhak lam tuipuiah, a hnuhnûng pâwl thlang lam tuifinriatah; a lo uih chhuak ang a, rimchhe takin a lo nam ang, thil râpthlâk tak a tih tâk avângin,” tiin a chhâng a. 21 Aw, ram, hlau suh la; hlimin lâwm rawh, LALPA chuan thil ropui takte a ti ta si a! 22 Ramsate u, hlau suh u; thlalêr hlobet hmun a lo chawr a, thing chu a lo rah a, theipui kûng leh grêp hruite chu a lo duah si a. 23 Nangni, Zion fate u, lâwm rawh u, LALPA in Pathianah chuan hlim rawh u; ruah hmasa chu tâwk chiahin a pe si che u a, in tân ruah a sûrtîr a, thla khatnaa ruah hmasa leh ruah hnuhnûng chu. 24 Hruihte chu buhin a khat ang a, uain leh hriak khurte chu a khat liam ang a. 25 “In zînga ka sipai rual tam tak ka tirh, khaukhuap te, thingngêt te, pangang te, thingngêt pangangten an ei zawh kumte kha ka rûl leh ang che u. 26 Tam tak in ei ang a, in tlai ang a, mak taka ngaihtuah ṭhîntu che u LALPA in Pathian hming chu in fak ang; ka mite chu an mualpho ngai rêng rêng lo vang. 27 Tin, Israel-te zîngah ka awm tih leh, LALPA in Pathian ka ni a, tu mah dang an awm lo tih in hria ang. Ka mite chu an mualpho ngai reng reng lo vang.
LALPA ni
28 “Chumi hnuah chuan heti hi a ni ang a, mi zawng zawng chungah ka thlarau ka leih ang a; in fapate, in fanuten ka thu an hril ang a, in putarten mumangah an mang ang a, in tlangvâlten inlârnate an hmu ang. 29 Chûng niahte chuan ka bawihpate, ka bawihnute chungah pawh ka thlarau ka leih ang. 30 Vânah leh leiah thil makte ka hmuhtîr ang a, thisen te, mei te, meikhu ding te nên. 31 Ni thimah a chang ang a, thla thisenah a chang ang, LALPA ni ropui tak leh râpthlâk tak chu a lo thlen hmain. 32 Tin, heti hi a ni ang a, tu pawh LALPA hming lam apiang chu chhanhim an ni ang. LALPAN a sawi ang khân, tlân chhuakte chu Zion tlângah leh Jerusalem khuaah an awm ang a, a la awm chhunte zîngah chuan LALPAN a kohte chu an awm ang.
Pathianin hnam tin ro a rêl ang
1 “Ngai teh u, chûng niahte leh chumi hun, Juda leh Jerusalem tun din leh hunah chuan, 2 hnam zawng zawng ka khâwm ang a, Jehosaphata ruamah ka hruai thla ang. Ka mi, ka ro chan Israel chunga an thiltih avângin an chung thu ka rêl ang; ram dangah ka mite an tidarh a, ka ram an ṭhen darh bawk si a. 3 ṭhum vâwrin ka mite an insem a; naupangte chu a hmei a pain nawhchizuar leh uain lei nân an hralh a. 4 Nangni Tura leh Sidon, nangni Philistia ramte u, ka chungah phuba lâk in tum em ni? Ka chunga phuba lâk in tum a nih zawngin rang takin in chungah phuba ka la lêt ve ang. 5 Ka tangkarua leh ka rangkachak in la a, ka thil ṭha tak duhawmte in biak in chhûngahte in keng lût ta vei a. 6 Juda fate leh Jerusalem fate pawh an ramri aṭanga hla takah in sawn bo theih nân, Grik fapate hnênah in hralh ta mai si a. 7 Ngai teh u, in hralhna hmun aṭang khân chawk thovin ka chhuahtîr ang a, in thungrulhna chu in lu chung ngeiah ka thungrûl ve ang. 8 In fapate, in fanute chu Juda fate kutah ka hralh ang, anni chuan hla takah Seba mite hnênah anmahni an hralh ang a; LALPA chuan a ti ta a ni.” 9 Hei hi hnamte zîngah puang ula: “Indona buatsaih ula! Mi chakte chawk tho ula; indo mi zawng zawngte lo hnai sela, lo chho rawh se. 10 In leilehna hmâwr zumte chu khandaihah chher ula, in thei kûng ah chhumna chemtête chu feiah chher rawh u; mi chak lo pawhin, ‘Ka chak a ni,’ ti rawh se. 11 A vêla hnam zawng zawngte u, hmanhmawh ula, lo kal ula, pung khâwm rawh u. Aw, LALPA, chutah chuan i mi chak takte kal chhuktîr rawh. 12 Hnamte chu inchawk tho sela, Jehosaphata ruamah chuan lo kal chho rawh se; chutah chuan a vêla hnam zawng zawng chunga rorêl tûrin ka ṭhu dâwn a ni. 13 An sual êm mai a, buh seng angin ât ula, a khah hma chu a khura grêp rah sâwr angin rap sâwr rawh u. 14 Mi sâng tam takte chu Jehosaphata ruamah an awm khâwm ta; chutah chuan a ni LALPA ni a lo thlen dâwn. 15 Ni leh thlate an thim a, arsiten an êng an thup a. Pathianin a mite mal a sâwm ang. 16 Tin, LALPA chu Zion tlâng aṭangin a rûm hum hum ang a, Jerusalem khua aṭangin a aw a chhuah ang a; vânte leh lei an nghîng ang a; nimahsela, LALPA chu a mite tân inhumhimna a ni ang a, Israela thlahte tân kulhbîng a ni ang. 17 Chutichuan, LALPA in Pathian, ka tlâng thianghlim Zion-a chêng ka ni tih in hria ang. Tichuan, Jerusalem khua chu a thianghlim ang a, mikhual tu mah an kal tlang leh tawh hauh lo vang.” 18 “Chumi niah chuan heti hi a ni ang a, tlâng sângte chuan uain thlum a fartîr ang a, tlângte chu hnutetuiin a luang ang a, Judai ram luitê zawng zawng chu tuiin a luang ang a; LALPA in aṭangin tuikhur a lo chik chhuak ang a, Sitim kawr ruam a tihnâwng ang. 19 Juda fate chunga râwng taka tia an ramah mi thiam thisen an chhuah avângin, Aigupta ram chu a ram ang a, Edom ram chu thlalêr ram ro a ni ang. 20 Judai ram erawh chu kumkhuain a awm reng ang a, Jerusalem khua pawh an luah reng tawh ang. 21 Tin, an thisen ka tlen fai loh chu ka tlêng fai ang; LALPA chu Zion-ah a chêng reng si a.”
1 Juda lal Uzia lal lai leh Israel lal Joasa fapa Jeroboama lal laiin, lîrnghîn hma kum hnihah khânin, Tekoa-ah ran rual vêngtute zînga mi Amosa thu, Israel chungchâng a hmuh chu. 2 Tin, ani chuan, “LALPA chu Zion tlâng aṭangin a rûm hum hum ang a, Jerusalem khua aṭangin a aw a chhuah ang a; berâm vêngtute ran tlatna hmunte chu an lungngai ang a, Karmel tlâng chhîp chu a vuai ang,” a ti a.
Israel ṭhenawmte chunga Pathian rorêlna
Suria
3 LALPAN heti hian a ti: “Damaska khaw bawhchhiatna pathum avângin, a ni, pali avângin, a hremna chu ka tireh lo vang; Gilead ram chu buh râwtna thîrte chuan an râwt avângin. 4 Nimahsela, Hazaela inah mei ka tîr ang a, Benhadada lal inte a kâng zo vang. 5 Tin, Damaska khaw kawngkhâr thîr chu ka titliak ang a, Aven ruam ata a luahtute leh Eden in ata lal tiang kengtu chu ka tibo vang a; tin, Suria ram mite chu Kir ramah salah an awm ang,” LALPAN a ti a.
Philistia
6 LALPA chuan heti hian a ti: “Gaza khaw bawhchhiatna pathum avângin, a ni, pali avângin, a hremna chu ka tireh lo vang; Edom hnêna pêk tûrin mi zawng zawng sala an hruai avângin. 7 Nimahsela, Gaza khaw kulh chungah mei ka tîr ang a, a lal inte chu a kâng zo vang. 8 Tin, Asdod khua ata a luahtu leh Askelon khua ata lal tiang kengtu ka tiboral ang a; tin, Ekron khaw chungah ka kut ka lek ang a; tin, Philistia mi la awmte chu an boral ang,” LALPA PATHIAN chuan a ti.
Tura
9 LALPAN heti hian a ti: “Tura khaw bawhchhiatna pathum avângin, a ni, pali avângin, a hremna chu ka tireh lo vang; Edom hnênah mi zawng zawng chu an pêka, inunauna thu an thlun chu an hriat reng loh avângin. 10 Nimahsela, Tura khaw kulh chungah mei ka tîr ang a, a lal inte chu a kâng zo vang,” a ti a.
Edom
11 LALPAN heti hian a ti: “Edom bawhchhiatna pathum avângin, a ni, pali avângin, a hremna chu ka tireh lo vang; a unau chu khandaihin a ûma, a khawngaihna zawng zawng a paih bova, a thinurna chuan a pawh thlêr fo ṭhina, kumkhuain a thinrimna chu a vawn reng avângin. 12 Nimahsela, Teman hmun chungah mei ka tîr ang a, Bozra khaw lal inte chu a kâng zo vang,” a ti a.
Amon
13 LALPAN heti hian a ti: “Amon fate bawhchhiatna pathum avângin, a ni, pali avângin, a hremna chu ka tireh lo vang; an ram an tihzau theih nân Gilead khaw hmeichhe nau paite an tai thlêr avângin. 14 Nimahsela, Raba khaw kulh chungah mei ka chhêm alh ang a; tin, indo nia au nên, ṭhâwngaleivir nia thlipui nên, a lal inte chu a kâng zo vang; 15 an lal chu salah an man ang a, a mi liante nên a rualin,” LALPA chuan a ti.
Moab
1 LALPAN heti hian a ti: “Moab bawhchhiatna pathum avângin, a ni, pali avângin, a hremna chu ka tireh lo vang; Edom lal ruhte chu chinai ang hiala a hâl avângin. 2 Nimahsela, Moab chungah mei ka tîr ang a, Kerioth khaw lal inte a kâng zo vang a; tin, Moab chu buai leh au leh tawtawrâwt riin a thi ang. 3 Chumi zîng ata rorêltu chu ka tibo vang a, a mi liante zawng zawng chu, amah nên ka that ang,” LALPA chuan a ti.
Juda
4 LALPA chuan heti hian a ti: “Juda bawhchhiatna pathum avângin, a ni, pali avângin, a hremna chu ka tireh lo vang; LALPA dân chu an hnara, a thupêkte an vawn lohva, an pate biak ṭhin pathian lemte khân a hruai bo avângin. 5 Nimahsela, Juda chungah mei ka tîr ang a, Jerusalem khaw lal inte chu a kâng zo vang.”
Israel chunga Pathian rorêl
6 LALPA chuan heti hian a ti: “Israel bawhchhiatna pathum avângin, a ni, pali avângin, a hremna chu ka tireh lo vang; tangkaruaa mi fel an hralh avâng leh pheikhawk bun khata tlachham an hralh avângin. 7 Mi retheite lu chunga vaivut takngial pawh an ît a, pachhiate an rûksak a, pa leh a fapa chuan nula pakhat an zen ṭâwm a, ka hming thianghlim an tibawlhhlawh a ni. 8 Maichâm awmna apiangah puan dahkham chungah an mu ṭhîn a, an pathian inah chuan mi an chawitîr mante chuan uain an in ṭhîn a. 9 “Nimahsela, anmahni hmaah Amor-ho, sidar thing anga sâng leh sasua anga chak pawh kha ka tiboral a; a chung lam ata a rah leh a hnuai lam ata a zung pawh ka tibo va. 10 Tin, Amor-ho ram nei tûrin Aigupta ram aṭangin ka hruai chhuak che u a, thlalêrah kum sawmli chhûngin ka hruai che a. 11 Tin, zâwlnei ni tûrin in fapate zînga mi leh, Nazarit te ni tûrin in tlangvâlte zînga mi ka siam a. Aw, Israel fate u, chutiangin a ni lo vem ni?” LALPA thuchhuak chuan a ti. 12 “Nimahsela, Nazarit mite hnênah uain in tûr in pe a, zâwlneite hnênah, ‘Thu hril suh u,’ tiin thu in pe a. 13 Ngai teh u, buhphala khat tawlailîr chilh angin in hmunah ka nem ang che u. 14 Tin, mi tlân chakte chakna a bo vang a, mi chakin tha a so thei hek lo vang a, mi chak tak pawh a inhum thei lo vang; 15 thal ngul hmangtu pawh a ding thei hek lo vang a, kal chak thei mi pawh a inhum thei lo vang a, sakawr chung chuang mi pawh a inhum thei hek lo vang. 16 Chumi niah chuan mi thiltithei tak zînga mi huaisen pawh chu saruakin a tlân bo vang,” LALPA thuchhuak chuan a ti.
1 Aw, Israel fate u, Aigupta ram aṭanga ka hruai chhuah chhûngkuate u, LALPAN hetia a sawisêlna che u thu hi ngaithla rawh u: 2 “Nangni chauh hi khawvêla chhûngkua zawng zawnga ka hriat in ni a; chuvângin, in khawlohna zawng zawngahte chuan ka hrem ang che u,” tiin zâwlnei hna. 3 An inrem chauh loh chuan mi pahnih an kal dûn ang em ni? 4 Sakeibakneiin ngawah sa a man lai loh chuan a rûm ngai em ni? Sakeibaknei vânglaiin eng mah a man loh chuan, a pûk ata a rûm ang em ni? 5 A tân chah a awm loh chuan, sava chu lei chunga thangah a âwk thei em ni? Thang chu eng mah âwk lovin lei aṭangin a per ang em ni? 6 Khawpuiah mi hlauh lohvin tawtawrâwt an hâm ang em ni? LALPAN a tirh loh chuan khawpuiah chhiatna a lo awm ang em ni? 7 Dik takin LALPA PATHIAN chuan a rawngbâwltu, a zâwlneite hnênah a thurûk hrilh lovin eng mah a ti lo vang. 8 Sakeibaknei a rûm a, tuin nge hlau lo vang? LALPA PATHIAN chuan thu a sawi a, tuin nge hril lo thei ang?
Samari chhiat tûr thu
9 “Asdod khaw lal inahte leh Aigupta ram lal inahte chuan hril ulangin, ‘Samari tlâng chungahte inkhâwm ulangin; tin, chuta buaina lian tak awmte leh chumi zînga hnehchhiahna awmte chu en rawh u,’ tiin. 10 Pâwngnêk leh tharum thawha an chhuhsakte chu an lal inahte an chhêk khâwm a, dik taka tih an tum hauh lo,” LALPA thuchhuak chuan a ti. 11 Chuvângin, LALPA PATHIAN chuan, “An hmêlmaten an ram chu an rawn hual ang a, an kulhte an tichim ang a, an lal inte pawh an tichhia ang,” a ti a. 12 LALPA chuan heti hian a ti a: “Berâmpuin sakeibaknei kâ ata a berâm ke pahnih emaw, beng them emaw a chhanchhuak angin, chutiangin Samari khuaa khum kilah leh, khum maimaw puan phan lukham chunga Israel fa awmte chu an chhanchhuak ang,” a ti a. 13 Engkimtithei Pathian, LALPA PATHIAN thuchhuak chuan heti hian a ti: “Ngaithla ula, Jakoba chhûngte hriattîr rawh u. 14 An bawhchhiatna avânga Israel ka hrem ni chuan, Bethel khuaa maichâmte ka tichim ang a, a kîte a tliak vek ang a, leiah a tla ang. 15 Tin, thlasik in leh nipui in ka vaw chhia ang a; saingho inte chu a boral ang a, in ropui zawng zawng pawh tihchhiat a ni ang.”
1 Nangni Samari tlânga chêng nuho, Basan sebâwng châwm thau angte u, retheite hnehchhiaha, tlachhamte nêka, pasalte hnêna, “Rawn la ula, i in ang u,” titute u, he thu hi hre rawh u. 2 LALPA PATHIAN chuan ama thianghlimna chhâlin chhia a chham a: “Ngai teh u, thîr kawmin a lâk bo che ua, in zînga awm chhun nghakuaiin a lâk bo che u ni a lo thleng ang. 3 Tin, bang pawpahte in kal chhuak ang a, mi tin ngîl takin an kal ang; Harmon hmunah in inpaih ang,” LALPA thuchhuak chuan a ti.
Israel-ten an hre thei lo
4 “Bethel-ah chuan lo kal ula, bawhchhe rawh u; Gilgal-ah chuan lo kal ula, bawhchhiatna tipung rawh u; tin, in inthawinate chu tûk tin rawn la ula, in sâwma pakhatte chu ni thum dan zêlah rawn la rawh u; 5 tin, dawidim telh lâwm thu hrilh inthawina chu hlân ula, mahni duh zâwnga hlannate chu hril ula, puang rawh u; aw Israel fate u, hei hi in duh zâwng tak a ni si,” LALPA PATHIAN chuan a ti a. 6 “Tin, kei pawhin in khawpui zawng zawngahte ṭâmna leh in hmun zawng zawngahte tlâkchhamna ka pe che u a; chuti pawhin ka hnênah in lo kîr lo va,” LALPA thuchhuak chuan a ti. 7 “Tin, buh lâk hun tûr thla thum a la nih laiin in chunga ruah sûr tûr pawh ka chelh a. Khawpui pakhat chunga ka sûrtîrin, khawpui dang chungah ka sûrtîr lo va. Hmun khat chungah a sûr ṭhîn a, a sûr lohna hmun chu a ro ṭhîn. 8 Chutichuan, khawpui pahnih emaw, pathum emaw chu khawpui pakhatah tui in tûrin an vâk a, an khawp lo va; chuti pawhin ka hnênah in lo kîr lo,” LALPA thuchhuak chuan a ti. 9 “Rona leh hmuarnain ka hrem che u a: in huante, in grêp huante, in theipui kûngte, in olive thingte zozai chu thingngêt pangang chuan a ei zo vek tawh a ni a; chuti pawhin ka hnênah in lo kîr lo,” LALPA thuchhuak chuan a ti. 10 “Aigupta ram angin in zîngah hripui ka tîr a; khandaihin in tlangvâlte chu ka that tawh a, in sakawrte ka hruai bo tawh a ni; tin, in sipai hmun rimchhia chu in hnâra nam khawpin ka awmtîr a; chuti pawhin ka hnênah in lo kîr lo,” LALPA thuchhuak chuan a ti. 11 “Sodom leh Gomorra khua chu Pathianin a tihchim lai angin, in zîngah mi ṭhenkhat ka tichim a, thing kâng ul lâk chhuah ang in ni a; chuti pawhin ka hnênah in lo kîr lo,” LALPA thuchhuak chuan a ti. 12 “Chuvângin, aw Israel, i chungah hetiang hian ka ti ang: i chungah hei hi ka tih dâwn avângin, aw Israel, i Pathian tâwk tûrin inpeih rawh.” 13 Ngai teh, tlângte din chhuaka, thli siama, mihring hnênah chuan a ngaihtuahna eng nge ni tih sawi chhuahsaka, zîng chu tithima, lei hmun sângte chîltu chu a hming LALPA, sipaihote Pathian chu a ni si a.
Sim tûra ngenna
1 Aw, Israel chite u, he thu nangmahni sûn nâna ka sawi hi hre rawh u: 2 nula thianghlim Israel chu a tlu tawh a; a ding leh tawh lo vang. A ram chungah paih thlâk a ni tawh a ni; amah tungding tûrin tu mah an awm lo. 3 LALPA PATHIAN chuan heti hian a ti si a: “Israel chite hnênah chuan, khawpui, sâng chhuahna khân za a hnutchhiah ang a, khawpui, za chhuahna khân sâwm a hnutchhiah ang.” 4 LALPA chuan Israel chite hnênah chuan heti hian a ti si a, “Mi zawng ula, in nung ang; 5 nimahsela, Bethel khua zawng suh ula, Gilgal-ah lût hek suh ula, Beersheba khuaah kai suh u; Gilgal khua chu matheilovin salah an man dâwn si a, Bethel khua chu a lothlâwn ang. 6 LALPA chu zawng ula, in nung ang; chuti lo chuan, Josefa inah mei angin a chhuak ang a, a kâng zo vang a, Bethel khuaah timit tûr tu mah an awm lo vang; 7 rorêlna sai thinga chantîra, felna chu leia paih thlate u!” 8 Siruk leh chhohreivûng siamtu leh, thihna daihlim zînga chantîrtu leh chhûn chu zân thima siamtu, tuifinriat tuite kova, lei chunga luantîrtu chu, amah chu zawng ulangin; a hming chu LALPA a ni; 9 kulh chungah boralna lo thleng khawpa mi chakte chunga boralna thlentu chu. 10 Kulh kawngkaa dik taka rorêltu chu an hua a, thu dik tak sawitu chu. 11 Chuvângin, mi retheite rap betin buh in lâk luihsak a, lung chher chuan inte in sa a; nimahsela, a chhûngah in chêng lo vang; grêp huan nuamte in siam a; nimahsela, a uain in in lo vang. 12 In bawhchhiatnate tamzia leh in sualnate nasatzia ka hre si a; mi felte tiduhdaha, thamna laa, kulh kawngkaa tlachhamte chanpual ngei pawh pe phal lote u. 13 Chutichuan, mi fing chu chutiang hunah chuan a ngawi reng a, hun ṭha lo a nih avângin. 14 In nun theih nân ṭhat lohna zawng lovin, ṭhatna zawng ula; tin, in sawi angin LALPA, sipaihote Pathian chu in hnênah a awm ang. 15 Sualna chu hua ula, ṭhatna ngaina ula, kawngkaah rorêlna chu tungding nghet rawh u. Josef-ho mi la awm chhunte chungah chuan LALPA, sipaihote Pathian chuan khawngaihna a nei dah law maw! 16 Chuvângin, LALPA, sipaihote Pathian, LALPA chuan heti hian a ti: “Kawtlai zau zawng zawngah ṭah vak vakna a awm ang a; kawtthlêr zawng zawngah, ‘A va pawi êm!’ an ti ang a; lungngai tûrin lo neitute leh ṭap vak vak tûrin sûn thiamte an ko vang. 17 Tin, grêp huan zawng zawngah an ṭap vak vak ang, in zîngah ka kal tlang dâwn si a,” LALPAN a ti a. 18 LALPA ni duhte u, in chung a pik e! Engati nge LALPA ni chu in duh? Eng ni lovin thim a ni zâwk e. 19 Sakeibaknei kalsana savawm tâwk mi ang leh, ina lûta, bang chunga kut nghata, rûlin a chuk ang a ni. 20 LALPA ni chu êng ni lovin thim a ni dâwn lo vem ni? Thim chhah leh êng rêng rêng pawh nei lovin? 21 “In kûtte ka huain ka hmusit a, in inkhâwmpui urhsûnahte chuan ka lâwm hek lo vang. 22 A ni, in hâlral thilhlan leh in buhhlan mi hlân mah ula ka pawm lo vang a, in ran thau remhlante pawh ka ngaihsak hek lo vang. 23 I ṭingṭang ri mawi chu ka ngaithla lo vang; chuvângin, ka lakah i hla bengchheng chu la bo rawh. 24 Nimahsela, rorêlna dik chu lui angin luang sela, felna chu luipui kang ngai lo angin luang rawh se. 25 Aw, Israela chhûnghote u, kum sawmli chhûngin thlalêrah khân inthawinate leh thilhlante ka hnênah in rawn la em ni? 26 A ni, in lalber Sikkuth leh in Kaiuan milimte, in arsi pathian, mahni tâna in siam chu, in la ang a. 27 Chutichuan, Damaska khaw piah lamah salah ka kaltîr ang che u,” sipaihote LALPA PATHIAN chuan a ti.
Israel chhiat tûr thu
1 Zion tlânga nuam lutuka awmte leh, Samari tlânga him taka awmte leh hnam lian ber mi ropuite, an hnêna Israela chhûngho an kalnate chung chu a pik e! 2 Kalne khuaah kal ula, en rawh u; tin, chuta ṭangin Hamath khaw ropuiah chuan kal ula; tin, Philistia ram Gath khuaah chuan kal chhuk ula. Hêng ramte ai hian an ṭha zâwk em? In ram aiin an ram a zau zâwk em? 3 Nangni ni ṭha lo hla taka dah leh nunrâwng ṭhutna hnaihtîrte u, 4 saingho khuma mua, an ṭhutthlêngsei chungahte zi mara, berâm rual zînga berâmnote leh sebâwng awmna zîng ata sebâwngtuaite eia, 5 ṭingṭanga dâwngdahna hlate saa, Davida anga mahni tâna hla thlûk hmanruate siama, 6 berhbu liana uain ina, hriak ṭha bera inhnawihte chu; nimahsela, Josef-ho hrehawmna avângin an lungngai lo. 7 Chutichuan, tûna sala kal hmasate nên salah an kal ang a, zi marte hlim bûng bûngna chu a bo vang. 8 LALPA, sipaihote Pathian chuan, LALPA PATHIAN chuan amah leh amah inchhâlin chhia a chham a: “Jakoba chapona chu ka ten a, a lal inte ka hua a; chuvângin, khua leh a chhûnga awm zawng zawngte chu ka mantîr dâwn a ni.” 9 Tin, heti hi a lo ni ang a, in pakhatah mi sâwm an la awm chuan an thi ang a. 10 Tin, mi pakhat pami a hâltu ngei pawhin a la a, in chhûng ata a ruh la chhuak tûrin, in chhûngnung bera awm hnênah, “I hnênah tu pawh an la awm em?” a tiha, anin, “Awm lo,” a tih chuan, anin, “Ngawi tlat rawh; LALPA hming chu kan lam tûr a ni si lo va,” a ti ang a. 11 Ngai teh u, LALPA chuan thu a pe si a; tin, in lian chu a chim rem rum ang a, in tê pawh chu a khi chat rel rul ang a. 12 Sakawrte chu lungpui chungah an tlân ang em ni? Chutah miin sebâwngin lei an let ang em ni? Nangnin rorêlna chu thihna hlovah leh felna chu sai thinga in chantîr hi, 13 nangni thil thlâwn chunga lâwma, “Keimahni chaknain a ni lâwm ni kîte kan lâk?” tite u. 14 “En teh u, aw Israela chhûngte u, nangmahni do tûrin hnam ka din chhuahtîr ang a; tin, Hamath khaw kawtchhuah aṭangin Araba lui thlengin an tiduhdah ang che u,” LALPA, sipaihote Pathian thuchhuak chuan a ti si a.
Inlârnaa khau rual
1 LALPA PATHIAN chuan inlârna mi hmuhtîr a. Chutah chuan khaukhuap rual tam tak a siamte chu ka hmu a. Hei hi lal chanpual buh an chhûn hnua buh ṭiah leh ṭan tirh lai takin a ni a. 2 Tin, heti hi a lo ni a, chumi rama hlobet chu an ei zawh hnuin, “Aw LALPA PATHIAN, ngaidam rawh, ka ngên a che! Jakoba chu engtin nge a din theih ang? Amah a tê si a,” ka ti a. 3 He thu-ah hian LALPA chu a inlamlêt a: LALPA chuan, “Chu chu a thleng lo vang,” a ti a.
Mei hmuh thu
4 LALPA chuan inlârna mi hmuhtîr leh a, a mite hrem nân mei a ko lai ka hmu a; mei chuan tui thûk tak chu a kâng vek a, ram pawh a kâng dâwn a. 5 Tin, keiin, “Aw LALPA PATHIAN, bâng rawh, ka ngên a che. Jakoba chu engtin nge a din theih ang? Amah a tê si a,” ka ti a. 6 He thu-ah hian LALPA chu a inlamlêt a: LALPA chuan, “Hêngte pawh hi a lo thleng lo vang,” a ti a. 7 Hetiangin mi entîr leh a; chutah chuan, LALPA chu bang ngîl taka rem kianga a ding ka hmu a, a kutah enremna a awm a. 8 Tin, ka hnênah LALPA chuan, “Amosa, eng nge i hmuh?” a ti a. Tin, keiin, “Enremna,” ka ti a. Tin, LALPA chuan, “Ngai teh, ka mi Israel-te zîngah enremna ka dah ang a; anmahni ka pêl leh tawh lo vang. 9 Tin, Isaaka hmun sângte chu a ram ang a, Israel hmun thianghlimte chu tihchhiat a ni ang; tin, Jeroboama chhûngte chu khandaihin ka do vang.”
Amosa leh Amazia
10 Tin, Bethel khaw puithiam Amazia chuan Israel lal Jeroboama hnênah, “Amosa chuan Israela chhûngte zîngah a phiar che a. Ram chuan a thu zawng zawng chu a tuar thei lo. 11 Amosa chuan heti hian a ti si a, ‘Jeroboama chu khandaihin a thi ang a, matheilovin a ram aṭangin Israel chu salah a hruai chhuak ang,’” tiin thu a thawn a. 12 Tin, Amosa hnênah Amazia chuan, “Aw, nang zâwlnei, kal la, Judai ramah tlân bo la, chutah chuan chaw ei la, thu hril rawh. 13 Nimahsela, Bethel khuaah thu hril leh tawh suh; lal hmun thianghlim leh lal in a nih avângin,” a ti bawk a. 14 Tin, Amazia hnênah Amosa chuan, “Zâwlnei ka ni lo va, zâwlnei fapa pawh ka ni hek lo; ran rual vêngtu leh theipui thing enkawltu ka ni zâwk e. 15 Tin, LALPA chuan berâm rual vênna ata chu mi la a, LALPA chuan ka hnênah, ‘Kal la, ka mi Israel-te hnênah thu hril rawh,’ min ti a. 16 Chutichuan, tûnah LALPA thu chu hre rawh. ‘Nangin Israel kalhin thu hril suh la, Isaaka chhûngte kalhin i thu thlah suh la,’ i ti a; 17 chuvângin, LALPA chuan heti hian, ‘I nupui chu khawpuiah nawhchizuar a ni ang a, i fapate, i fanute chu khandaihin an tlu ang, i ram chu tehna hruiin an sem ang a; tin, nangmah ngei chu ram thiang lo chhûngah chuan i thi ang a, matheilovin Israel chu a ram ata salah an hruai bo vang,’ a ti a ni,” tiin a chhâng a.
Inlârnaa nipui thei bâwm
1 LALPA PATHIAN chuan inlârna mi hmuhtîr leh a, nipui thei bâwm ka hmu a. 2 Tin, anin, “Amosa, eng nge i hmuh?” a ti a. Keiin, “Nipui thei bâwm,” ka ti a. Tin, LALPA chuan ka hnênah, “Ka mi Israel-te tâwpna tûr a ṭuah ta, ka hêl tawh lo vang,” a ti a. 3 LALPA Pathian thuchhuak chuan, “Chumi niah chuan biak in hlate chu lusûn hlaah a chang ang; mitthi ruang a tam ang a, hmun tinah ngawi rengin an paih chhuak ang,” a ti.
Israel-te chunga thil ṭha lo thleng tûr
4 Hei hi ngaithla rawh u, aw tlachhamte ei zo duha, ram mi rethei tibo duhte u, 5 “Buh kan zawrh theih nân thla thar chu eng tikah nge a ral ang a, chhangphut buh kan hralh theih nân Chawlhni chu eng tikah nge a ral ang?” titu, epha titêa sekel tirita, dik lo taka bumna bûk hmanga, 6 tangkaruaa mi rethei leia, mi tlachhamte chu pheikhawk bun khata leia, “Buhsî kan hralh theih nân,” titute u, 7 LALPA chuan Jakoba ropuina chhâlin chhia a chham a, “Matheilovin an hnathawh rêng rêng ka theihnghilh hauh lo vang,” tiin. 8 Hemi avâng hian ram chu a khûrin a chhûnga awm apiangte chu an lungngai dâwn lo vem ni? A ni, Lui ang chuan a lo lian vek ang a; Aigupta ram lui angin a lo buaiin a kâm ang a. 9 Tin, LALPA Pathian thuchhuak chuan, “Chumi niah chuan heti hi a ni ang a, chhûn laiah ni ka tlâktîr ang a, ni sat laiin lei chu ka tithim ang a. 10 In ruaiṭhehte chu lungngaihnaah leh in hla zawng zawngte chu ṭahnaah ka chantîr ang a; kâwng zawng zawng saiip puan ka ventîr ang a, lu tin chhîpah kawlhna ka rawn thlen ang; tin, fapa mal neih chhun tân lungngaihna ang leh, a tâwpna chu khâkna ni angin ka siam ang.” 11 LALPA PATHIAN thuchhuak chuan, “Ngai teh u, nite chu a lo thleng mêk a ni; chûng niahte chuan ramah chuan ṭâm ka tîr ang a, chaw ṭâmna ni lovin, tui ṭâmna ni hek lovin, LALPA thu hriatna ṭâmna zâwk chu. 12 Tin, tuifinriat aṭangin tuifinriatah leh hmâr aṭangin chhakah pawh an vâkvai ang a; LALPA thu chu zawng tûrin kil tinah an tlân ang a, an hmu lo vang. 13 Chumi niah chuan nula leh tlangvâl ṭhalaite meuh pawh tuihâlin an thidang ang a. 14 Samari pathian lim chhâla chhechhama, ‘Dan pathian hmingin,’ titu emaw, ‘Beersheba pathian hmingin,’ titu emaw pawh chu an tlu ang a, an tho leh tawh lo vang.”
Hremna
1 Maichâm bula dingin LALPA chu ka hmu a; tin, anin, “Kawngka bulte a nghîn theih nân a chhîp bâwkte chu vua la, a vaia lu chungah tikeh sawm vek rawh. Tin, a thi bângte chu khandaihin ka that ang a; pakhat mah an tlân bo lo vang a, pakhat mahin an pumpelh hek lo vang. 2 Mitthi khaw thlengin lai tlang mah sela, chuta ta chu ka kutin ka la chhuak ang; vânah lâwn mah sela, chuta ta chu ka hnûk thla ang. 3 Karmel tlâng chhîpah biru mah sela, ka zawng ang a, chuta ta chu anmahni ka la thla ang; tin, tuifinriat mawngah ka mit hmuh lohvah biru mah sela, chuta awm rûl chu thu ka pe ang a, anmahni a chu ang. 4 An hmêlmaten sala an hruai chu thu ka pe ang a, khandaihin an sât hlum ang, ṭanpui ahnêkin anniho tihhlum hi ka tum a ni.” 5 Ram chu tawka, titui raltu chu LALPA, sipaihote PATHIAN chu a ni si a; tin, chuta awm zawng zawngte chu an lungngai ang; tin, Lui angin a lo lian ang a, Aigupta Lui angin a lo kâm leh ang. 6 Vâna a pindante siama, lei chunga a pindan kual siama, tuifinriat tuite kova, lei chunga leih bawtu, a hming chu LALPA a ni. 7 LALPA thuchhuak chuan, “Aw Israel fate u, ka lakah Ethiopia fate ang tho in ni lo vem ni? Aigupta ram ata Israel leh, Kaptor ram ata Philistia mite leh, Kir ram ata Suria mite ka hruai chhuak lo vem ni?” a ti a. 8 LALPA thuchhuak chuan, “Ngai teh u, LALPA PATHIAN mit chu ram sual chungah a fu a; tin, lei chung ata ka tibo vang a; amaherawhchu, Jakoba chhûngte chu ka tichhe vek lo vang,” a ti a. 9 “Ngai teh u, thu ka pe dâwn si a; tin, chhihrîa buh an hrî angin, Israela chhûngte chu hnam zawng zawng zîngah ka hrî ang a; nimahsela, fang tê ber pawh lei chungah a tla lo vang. 10 Ka mite zînga mi sual zawng zawng, ‘Chhiatna chuan min ûm phâk lo vang a, min hmachhawn hek lo vang,’ titute chu khandaihin an thi ang,” a ti a.
Israel tundin lehna
11 Hêng thil titu LALPA thuchhuak chuan heti hian a ti: “Chumi niah chuan Davida bâwkte chim chu ka tungding ang a, a pawpte chu ka thawm ang a, a chhiate chu ka rem chho vang a, hmânlaia a awm ang khân ka sa ang; 12 Edom hmuna la awmte leh ka hminga koh hnam zawng zawngte chu an neih theih nân,” a ti a. 13 LALPA thuchhuak chuan, “Ngai teh u, nite chu a lo thleng mêk a ni; chûng niahte chuan lei lettu leh buh âttu leh grêp chîltu chuan chi thehtu chu a ûm phâk ang a; tin, tlâng sâng chuan uain thlum a fartîr ang a, tlâng zawng zawng an tui ang. 14 Tin, ka mi Israel-te chu sal ata ka hruai kîr leh ang a, khaw ramte chu an siam leh ang a, an luah ang; tin, grêp huante an siam ang a, a uain chu an in ang; huante pawh an siam ang a, a rah chu an ei ang. 15 Tin, an ramah anmahni ka phun ang a, an hnêna ka pêk an ram ata chu pawh chhuahin an awm leh tawh lo vang,” LALPA i Pathian chuan a ti.
1 Obadia inlârna hmuh chu. LALPA PATHIAN chuan Edom chungchângah heti hian a ti:
LALPAN Edom a hrem dâwn
LALPA hnên ata thu kan hria a; hnamte zîngah palai tirh a ni, “Tho ula, indonaah amah do tûrin i thawk ang u,” tiin. 2 “Ngai teh, hnamte zîngah ka titê tawh che a ni; nasa taka hmuhsitin i awm ta. 3 Aw nang, lungpui keh kâra chênga, hmun sâng luahtu, ‘Tuin nge leiah mi tithla ang?’ ti rilrutu, i thinlung chaponain a bum ta che a ni. 4 Mu angin sâng takah thlâwk chho mah la, i bu chu arsi zînga chheh pawh ni mah sela, chuta ta chu ka la thla ang che,” LALPAN a ti. 5 “I hnênah rûkrute, phil hmangte zânah lo kal sela (tihboral i va ni dâwn nasa êm!), an duhtâwkin an ru lo vang em ni? I hnênah grêp seng khâwmtute lo kal sela, grêp seng tûr ṭhenkhat an hnutchhiah lo vang em ni? 6 Esauva thilte zawn chhuah a nih tâk chu! A ro bâwm thuhrûkte dap chhuah a nih tâk chu! 7 I lama ṭanghote zawng zawngin ramri hial an rawn thlen che a; mi inrem taka i awmpuite khân an bum che a, an hneh tawh che a ni. I chhang eitute khân i hnuaiah thang an kam a; amahah chuan hriat thiamna rêng a awm lo a ni. 8 Chumi niah chuan Edom ata mi fingte ka tiboralin, Esauva tlâng ata hriat thiamna ka tiboral lo vang em ni?” LALPAN a ti. 9 Aw Teman, Esauva tlâng ata mi tin thah borala an awm vekna tûrin, i mi chakte chu nasa takin an zâm ang.
Edom hrem chhan
10 “I unaupa Jakoba chunga i pâwngnêkna avângin zahnain a khuh ang che a, kumkhuaa tihboralin i awm ang. 11 Lehlama i din nia, mikhualten a sum an lâk bo nia, hnam dang mite a kulh kawngkhâra an lo luha, Jerusalem chunga ṭhum an vâwr lai khân, nang pawh anmahni zînga tel angin i awm kha. 12 Amaherawhchu, i unaupa a chhiat laia a chhiatna ni chu thlîr suh la, Juda fate chungah an boral niin lâwm suh la; hrehawm niin chapo takin ṭawng hek suh. 13 Ka mite an vânduai niin an kulh kawngkâah lût suh; a ni, an vânduai niin an tuarnate thlîr suh la, an vânduai niin an sum leh paite chungah in kutte nghat hek suh u. 14 A mi ṭhenkhat tlân chhuakte that tûrin kawng ṭhuamah ding suh la; hrehawm nia a mi la awm chhunte chu mantîr suh.
Pathianin hnam tin ro a rel ang
15 “Hnam zawng zawng chungah LALPA ni chu a hnai si a; i lo tih tawh ang bawkin i chungah tih a ni ang; i tih dân chu i lu chung ngeiah a lo lêt ang. 16 Ka tlâng thianghlima in in tâk ang khân, hnam zawng zawngte chuan an in fo dâwn si a; a ni, an in ang a, an lem ang a, piang lo ang maiin an awm ang.
Isreal-te hnehna
17 Zion tlângah erawh chuan tlân chhuakte chu an awm ang a, a thianghlim ang; tin, Jakoba chhûngte chuan ro chante chu an chang ang. 18 Jakoba chhûngte chu mei an ni ang a, Josefa chhûngte chu meialh an ni ang; Esauva chhûngte chu buhpâwl an ni ang a; anmahni zîngah an alh ang a, an kâng ral vek ang, Esauva chhûngte chu a bâng rêng an awm lo vang,” LALPA chuan a ti ta si a. 19 Chhim lam mite chuan Esauva tlâng chu an chang ang a, ram phaia mite chuan Philistia ram an chang ang: Ephraima lo leh Samaria lo chu an chang ang: Benjamina chuan Gilead ram a chang ang. 20 Kanaan mite zînga he Israela thlah sal tâng mipuite hian Zarephath ram thlengin an chang ang a; Sepharad rama Jerusalem khaw mi sal tângte chuan Chhim lam khawpuite chu an chang ang. 21 Zion tlângah chuan Esauva tlâng rêlsak tûra chhanchhuaktute chu an chho vang a; tin, ram chu LALPA ta a ni ang.
Jonan LALPA thu a awih lo
1 Amittaia fapa Jona hnênah LALPA thu a lo thleng a. 2 “Tho la, Ninevi khua, khawpui ropui takah chuan kal la, a chung thu tlângaupui rawh; an suahsualna chu ka hmaah a lo thleng chho ta si a,” tiin. 3 Nimahsela, Jona chu LALPA hma ata Tarsis-ah tlân bo tûrin a tho ta a; tin, Jopa khuaah a kal chhuk a, Tarsis pan tûr lawng a hmu a; tichuan, a kal man chu a pe a, LALPA hma ata chu Tarsis pan tûrte nêna kal tûrin lawngah chuan a lût thla ta a. 4 Nimahsela, LALPA chuan thli na tak mai tuifinriatah chuan a tîr a, tuifinriatah chuan thlipui nasa tak a tleh ta a; tichuan, lawng chu keh dâwn ang maiin a awm ta a. 5 Tin, lawng mite chuan an hlau va, mi tinin mahni pathian an au ṭheuh va; lawng chu an tân a zân nân lawng chhûnga bungruate chu tuifinriatah chuan an paih chhuak ta a. Jona erawh chu lawng chhûngril berah a lo lût thla hman tawh a; a mu a, a lo muhîl dêr a. 6 Chutichuan, lawng hotu chu a hnênah a lo kal a, “Aw nang muhîl, engtizia nge ni? Tho la, i Pathian ko rawh; i Pathian chuan kan boral loh nân min ngaihtuah mahna,” a ti a. 7 Tin, “Hawh u, he thil ṭha lo kan chunga lo awm hi tu vâng nge ni tih kan hriat theih nân, ṭhum i vâwr ang u,” tiin an inbe hlawm a. Tichuan, ṭhum an vâwr a, ṭhum vâwr chu Jona chungah a tlu ta a. 8 Tichuan, a hnênah chuan, “He thil ṭha lo kan chunga awm hi tu vâng nge ni, min hrilh rawh, kan ngên a che! I hnathawh eng nge ni? Khawi aṭanga lo kal nge i nih? Khawii rama mi nge i nih? Eng hnam mi nge i nih?” an ti a. 9 Ani chuan an hnênah, “Hebrai mi ka ni a; tuifinriat leh khawmual siamtu LALPA, vân Pathian chu ka hlau a ni,” a ti a. 10 Tin, mite chuan an hlau nasa ta êm êm a, a hnênah chuan, “Hei le, eng nge i lo tih ni?” an ti a; a hrilh tawh avângin, mite chuan LALPA hma ata a tlân bo a ni tih an hre si a. 11 Tichuan, a hnênah chuan, “Kan tân tuifinriat hi a fâwn loh nân i chungah eng nge kan tih ang?” an ti a, tuifinriat chu a fâwn nasa telh telh si a. 12 Tin, ani chuan an hnênah, “Min la kâng ula, tuifinriatah hian min theh chhuak rawh u; chutichuan, tuifinriat hi in tân a fâwn tawh lo vang; keimah avângin in chungah he thlipui na tak hi a tleh a ni tih ka hre si a,” a ti a. 13 Nimahsela, mite chuan khawmuala kîr tûrin an kar vak vak a; amaherawhchu, an thei lo va, tuifinriat chu an chungah a fâwn nasa telh telh si a. 14 Chu vâng chuan LALPA chu an au va, “Aw LALPA, he mi nunna avâng hian min tiboral suh la, mi thiam thisen mawh kan chunga nghat lul lo tûrin kan ngên a che; aw LALPA, nangin i duh anga i tih a ni si a,” an ti a. 15 Chutichuan, Jona chu an la kâng a, tuifinriatah chuan an theh chhuak ta a; tin, tuifinriat fâwn phûl bulh bulh chu a reh ta a. 16 Tichuan, mite chuan LALPA chu nasa takin an hlau ta a; LALPA hnênah chuan inthawina an hlân a, thute an tiam ta a. 17 Tin, LALPA chuan Jona lem tûrin sangha lian tak a lo ruat tawh a; chu sangha kawchhûngah chuan Jona chu ni thum leh zan thum a awm a.
Jona ṭawngṭaina
1 Tin, Jona chu sangha kawchhûng aṭang chuan LALPA a Pathian hnênah a ṭawngṭai a. 2 Heti hian a ti a: “Ka hrehawmna avângin LALPA chu ka ko va, Anin mi chhâng a; Seol kawchhûng aṭangin ka au va, Nangin ka aw i hria a. 3 Thûk takah, tuifinriat chhûngrilah chuan nangin mi paih lût a, Tui tam tak chu ka vêlin a awm a; I tuifâwn leh i tui inchhawk zawng zawngte chuan mi vûr zêl a. 4 Tin, ‘I mit hmuh ata paih chhuah ka ni a; Nimahsela, i biak in thianghlim lam ka hawi leh ang,’ ka ti a. 5 Tuite chuan ka nunna chenin mi hual vêl a; Tui thûk chu ka vêlin a awm a; Hnimte chuan ka lu a tuam vêl a ni. 6 Tlâng bul tâwp rêtahte chuan ka kal chhuk a; Lei chuan kumkhua atân a kalhnate chuan mi khâr khum a; Amaherawhchu, nangin, aw LALPA ka Pathian, khuarkhurum ata chu ka nunna i la chhuak a ni. 7 Ka nunna ka kawchhûnga a chauh lai chuan, LALPA chu ka hre reng a; Ka ṭawngṭaina chu i biak in thianghlimah i hnên a lo thleng a ni. 8 Thil lawilo dâwt mai mai ngaihsaktute chuan, Anmahni ngilneihna chu an hawisan a ni. 9 Kei erawh chuan lâwm thu sawina aw nên i hnênah inthawina ka hlân ang a; Thu ka tiam tawh chu ka hlen ang. Chhandamna chu LALPA ta a ni,” tiin. 10 Tin, LALPA chuan sangha chu a bia a, Jona chu khawmualah a law chhuak ta a.
Jonan LALPA thu a awih
1 Tin, LALPA thu chu Jona hnênah a lo thleng nawn leh a, 2 “Tho la, Ninevi khua, khawpui ropui takah chuan kal la, thusawi tûr ka tuk che hi va tlângaupui rawh,” tiin. 3 Tichuan, Jona chu a tho va, LALPA thu ang chuan Ninevi khuaah a kal ta a. Ninevi chu khawpui ropui tak, a zau zâwng ni thum kal a ni. 4 Jona chu ni khat kal chin khawpui chhûngah chuan a han lût ṭan phawt a, “Tûn achin ni sawmliah Ninevi hi tihboral a ni dâwn e,” tiin a au va. 5 Ninevi mite chuan Pathian an ring ta a; chaw nghei tûr tiin an puang a, an zînga a lian ber aṭanga a tê ber thlengin saiip puan an sin ta a. 6 Chûng thu chu Ninevi khaw lalber beng a lo thleng a, a lalṭhutphah aṭang chuan a tho va, a lal puan chu a hlîp thla a, saiip puan a sin a, vutah a ṭhu ta a. 7 Lalber leh a mi liante thupêkin lalber chuan Ninevi khaw chhûngah thu a puangin a chhuah a, “Mihring emaw, ran emaw, bâwng rual emaw, berâm rual emawte chuan eng mah tem suh se; ei tûr eiin tui pawh in suh se. 8 Mihring leh rante chuan saiip puan sin zâwk sela, nasa takin Pathian au rawh se; a ni, mi tinin mahni kawng ṭha lo leh an kuta pâwngnêkna chu hawisan rawh se. 9 Kan boral loh nân Pathian chu kîrin, rilru lamlêtin, a thinrimna nasa tak aṭang chuan a inlamlêt lo vang tih tuin nge hria?” tiin. 10 Tichuan, Pathianin an thiltihte chu enin, an kawng ṭha lo chu an hawisan tih a hmu a; an hnêna a sawi tawh, tih a tum thil ṭha lo chu Pathian chuan a lamlêt a, a ti ta lo a ni.
Jona thinurna leh Pathian khawngaih theihzia
1 Amaherawhchu, chu chuan Jona a tilungni lo ta êm êm a, a thinrim a. 2 LALPA hnênah chuan a ṭawngṭai a, “Aw LALPA, ka ngên a che, hei hi kan rama ka la awm laia ka sawi kha a ni lo vem ni? Hei vâng hian Tarsis lamah ka tlân bo thuai a nih kha: nang zawng khawngaihna leh lainatnaa khat, thinnel, zahngai thei leh thil ṭha lo thlen lo tûra inlamlêt ṭhîn Pathian i ni tih ka hre si a. 3 Chu vâng chuan, aw LALPA, tûnah ka nunna hi mi lâksak tûrin ka ngên a che; keia tân hian dam aiin thih a ṭha zâwk si a,” a ti a. 4 Tin, LALPA chuan, “I thinrim hi i tidik em ni?” a ti a. 5 Tichuan, Jona chu khawpui ata chu a kal chhuak a, khawpui chhak lampangah chuan a ṭhu a, chutah chuan chhâwlbûk a sa a, khawpui chunga thil lo thleng tûr chu hmuh tumin a hnuai hlimah chuan a ṭhu ta reng a. 6 Tin, LALPA Pathian chuan ûm a lo ruat a, chu chu Jona chungah a zâmtîr a, a hrehawmna ata chhanchhuak tûra a lu zâr hliahtu atân. Chutichuan, Jona chu ûm avâng chuan a lâwm ta êm êm a. 7 Amaherawhchu, Pathianin a tûk khawfîngchah laiin sûlrûl a lo ruat a, chu chuan ûm chu a kher a, a lo vuai ta a. 8 Tin, heti hi a ni a, ni a lo chhuah chuan Pathianin khawchhak thli lum a lo ruat a; tin, ni chuan Jona lu chu a em a, a thidang a, a tân chuan thih a dîl ta a, “Keia tân hian dam aiin thih a ṭha zâwk e,” a ti a. 9 Tin, Pathian chuan Jona hnênah, “Um chungchâng thua i thinrim hi i tidik em ni?” a ti a. Ani chuan, “Thih phah khawp hiala ka thinrim hi ka tidik a ni,” a ti a. 10 Tin, LALPA chuan, “I hahpui loh, i ṭhantîr pawh ni hek lo, zan khat thila lo awma, zan khat thila boral leh ûm hi i lainat a. 11 Ninevi khua, khawpui ropui tak, a chhûnga mi nuai khat leh sînghnih aia tam, an ding leh vei pawh thliar thei lote leh ran rual tam tak awmna hi ka khawngaih lo vang em ni?” a ti a.
Mika hun
1 Juda lal Jothama te, Ahaza te, Hezekia te lal laia Moreseth mi Mika hnêna LALPA thu lo thleng, Samari khua leh Jerusalem khaw chungchâng thua a hmuh chu.
Samari leh Jerusalem tân ṭahna
2 Nangni hnam zawng zawngte u, in vaiin hria ula; aw leilung leh a chhûnga awm zawng zawngte u, ngaithla rawh u; LALPA PATHIAN, LALPA chu a biak in thianghlim aṭangin, nangmahni kalhin in chung thu hretu ni rawh se. 3 Ngai teh u, LALPA chu a hmun aṭangin a lo chhuak a, a lo chhuk ang a, lei hmun sângte chu a chîl dâwn si a. 4 Mei bula khawihnûn ang leh hmun awiha tui khawh thla ang maiin, tlângte chu a hnuaiah chuan an tui ang a, kawrte chu a khi chat ang. 5 Hei zawng zawng hi Jakob-ho bawhchhiatna avâng leh Israela chhûngte sualna avâng a ni. Jakob-ho bawhchhiatna chu eng nge ni? Samari a ni lo vem ni? Juda hmun sângte chu eng nge ni? Jerusalem a ni lo vem ni? 6 Chuvângin, Samari chu phûla thil chhe awm khâwm angin ka siam ang a, grêp huan hmun ang maiin; tin, chumi hmuna lungte chu kawr ruam lamah ka lum thla ang a, a lungphûmte chu ka tilang ang. 7 A milem siam chawp zawng zawng chu tihkeh sawm vek a ni ang a, a nawhchizawrh hlawhte chu meia hâl vek a ni ang; nawhchizawrh mana a lâk khâwm a ni a, nawhchizuar manah an pe leh ang. 8 Hemi avâng hian ka ṭap ang a, ka chiau vak vak ang a, inhlîp leh saruakin ka awm ang; sihalte angin ka au vang a, vanghâwngseite angin ka rûm ang. 9 A hliamte chu tihdam theih a ni lo. Judai ram a thleng ta hial si a; ka mite kawngka, Jerusalem meuh pawh a thleng a ni.
Hmêlmain Jerusalem a thleng
10 Gath khuaah hril suh ula, ṭap hlek suh u; Bethle-Aphra khuaa mite u, vaivutah tâl rawh u. 11 Aw Saphir mi, saruak leh zak takin kal bo rawh; Zaanan mi chu a lo chhuak lo. Beth-ezel ṭahna chuan a dinchan khalh ang che u. 12 Maroth mi chuan chan ṭha chan a nghâkhlel hliah hliah mai, LALPA hnên aṭangin thil ṭha lo chu Jerusalem kawngka bul thlenga a lo thlen thlâk avângin. 13 Aw Lakis mi, tawlailîr chu sakawr chakah chuan bel rawh; ani hi Zion fanu sualna bul a ni, Israel-ho bawhchhiatnate chu nangmahah hian a awm a lo ni si a. 14 Chuvângin, Moreseth-gath hnênah chuan inthlahna thilpêk i pe tûr a ni; Akzib inte chu Israel ram lalte tân bumna a ni ang. 15 Aw Maresa mi, nangmah neitu tûr i hnênah ka la rawn hruai ang; Israel ropuina chuan Adulam a va thleng ang. 16 Inziat kawlh la, i fa duh takte avâng chuan inmêt kawlh rawh; mulukawlh angin intikawlh nasa zual rawh, i hnên ata sala hruaiin an awm ta si a.
Rethei tiduhdahtute chan tûr
1 An khumlaizâwla khawlohna suangtuahtute leh thil ṭha lo ngaihtuah chhuaktute chu an chung a pik e! Zîngah khua a lo vârin an tum ang ngei chuan an ti ta rêng a. 2 Mi lote an awt a, an lâksak a; inte an awt a, an la mai bawk a; mi leh an chhûngte, mi leh an ro chenin an hnuaichhiah a ni. 3 Chuvângin, LALPAN heti hian a ti: “Ngai teh, he chhûngkaw chungah hian thil ṭha lo ka suangtuah a ni, chumi aṭang chuan in nghâwng in la sawn lo vang a, chapo takin in kal tawh hek lo vang; hun ṭha lo a ni dâwn si a. 4 Chumi niah chuan nangmahni demin tehkhin thu an siam ang a, ṭah hla lungchhiatthlâka chhamin, ‘Rawkin kan awm zo ta a nih hi! Ka mite chan a tidanglam a; ka hnên ata a tisawn ta a nih hi! Hel hmangte hnênah kan lo a sem darh ta a ni,’ an ti ang.” 5 Chuvângin, LALPA mite inkhâwmho zîngah chuan ṭhum vâwra hruia tehsaktu tu mah i nei lo vang. 6 “Thu hril suh u,” tiin an sawi ṭhîn. Hêng mite hnênah hian thu an hril lo vang; sawichhiatna chu a kiang lo vang. 7 Aw Jakoba chhûngte u, “LALPA thlarau chu hnawh chêpin a awm em ni? Hêng hi a thiltih a ni em, tih tûr em ni? Dik taka awm ṭhîn chungah chuan ka thute hian thil ṭha a ti lo vem ni? 8 Nimahsela, ka mite chu tlaikhawhnuah hmêlma angin an lo ding chhuak a ni: indo duh lova râlmuang taka mi veivâkte chu an silhfên kawrfualte in hlihsak a. 9 Ka mi hmeichhiate chu an in nuam tak ata in hnawt chhuak a; an naupang tête aṭangin ka ropuina chu in la bo hlen a ni. 10 Tho ula, kal bo rawh u, hetah himna a awm lo; in khawlohna avângin tihchhiat vek a ni dâwn. 11 ‘Uain leh zu a luang ang,’ tia dâwt sawi zâwlnei vâk vêlte chu hêng mite zâwlnei ni âwm lek hi an ni. 12 “Aw Jakob-ho, in vaiin ka ko khâwm ngei ang che u a, Israel mi la awm chhunte chu ka hruai khâwm ngei ang; Bozra khaw berâm angin ka dah khâwm ang a, ran rual an hlobet hmuna awm ang maiin; mipui an nih avâng chuan an sa mur mur ang. 13 Su tlangtu chu an hmaah a kal a; an su tlang a, kawngkhâr thlengin an kal zêl a, chumiah chuan an kal chhuak a ni; tin, an lal chu an hmaah a kal a, LALPA chuan an hma a hruai a.”
Mikan Israel hruaitute dik lohna a puang
1 “Aw nangni, Jakob-ho hotute leh Israel chhûngkaw rorêltute u, ngaithla ula, ka ngên a che u,” ka ti a ni: “Rorêl dân chu in hre tûr a ni lâwm ni? 2 Thil ṭha in hua a, thil ṭha lo in ngaina a, ka mite chu an vun in hihsak a, an ruh ata tîsa in sâwk thla a; 3 ka mite sa in ei bawk a, an vun an hlai thla a, an ruh an tihtliahsak a; a ni, bêla chhum tûr angin an chan sawm a, sa so bêl chhûnga sa chan sawm ang maiin.” 4 Chutih hunah chuan LALPA an au vang a; nimahsela, anmahni a chhâng lo vang. A ni, chumi hunah chuan an thiltiha an tih ṭhat lohzia ang zêlin an lakah a hmai a thup ang. 5 Pêk tûr neite hnênan, “Muanna,” tia auva, pêk tûr nei lote, “Indona a awm dâwn,” tia tihṭhaihtu zâwlneite chuan ka mite an bum a, an chungchâng thu LALPAN heti hian a sawi: 6 “Inlârna in hmuh loh nân in hnênah zân a lo thleng ang a; ai in en theih lohna khawpin in hnênah thimna a lo awm ang; zâwlneite tân chuan ni a liam ang a, chhûn pawh an chungah chuan khaw thim a ni ang. 7 Hmutheitute chu an zak ang a, aienthiamte chu an mualpho vang; a ni, an vaiin an hmui an hup ang; Pathian chhânna a awm si lo va.” 8 Nimahsela, Jakob-ho hnênah an bawhchhiatna hriattîr tûr leh, Israel-ho hnênah an sualna hriattîr tûrin, LALPA thlarau avânga thiltihtheihna te, rorêlna te leh chakna te chuan ka khat takmeuh a ni. 9 Nangni Jakob-ho chhûngkaw hotute leh Israel chhûngkaw rorêltu, rorêlna dik tena, dikna tinrêng tiletlingtute u, hei hi ngaithla ula, ka ngên a che u. 10 Zion chu thisenin an sa a, Jerusalem chu khawlohnain. 11 Chumia hotute chuan thamna beiseiin ro an rêl a, chumia puithiamte chuan hlawh beiseiin an zirtîr a, chumia zâwlneite chuan tangka beiseiin ai an en a ni. Chuti chung pawhin, “LALPA chu kan zîngah a awm lo vem ni? Thil ṭha lo kan chungah a lo thleng lo vang,” tiin LALPA chungah an innghat a ni. 12 Chuvângin, Zion chu nangmahni avâng chuan lo anga leh a ni ang a, Jerusalem chu thil chhe awm khâwm a ni ang a, biak in awmna tlâng chu ramhnuai hmun sâng ang a ni ang.
LALPA rorêl hun remna
1 Nimahsela, ni hnuhnûngahte chuan heti hi a ni ang a, LALPA ina awmna tlâng chu tlâng lian chungahte chuan tihnghehin a awm ang a, tlâng tête chungah chuan chawisânin a awm bawk ang; chutah chuan chi tinrêngte chu an kal nguah nguah ang. 2 Tin, hnam tam takte chu an kal ang a, “Lo haw ula, LALPA tlângah, Jakoba Pathian inah chuan i chho vang u; tichuan, anin a kawng chanchinte chu min zirtîr ang a, a kalkawngahte chuan kan kal ang,” an ti ang; Zion aṭang chuan dân thu a lo chhuak dâwn si a, LALPA thu chu Jerusalem aṭangin a lo chhuak dâwn a ni. 3 Tin, ani chuan chi tam tak kârah ro a rêl ang a, hla taka hnam chak tak pawh a zilhhau vang; tin, an khandaihte chu leilehna hmâwr zumahte an chher ang a, an feite chu thei kûng ah chhumna chemkawmahte an chher ang; hnam dangin hnam dang chungah khandaih an lek tawh lo vang a, indo dân pawh an zir tawh hek lo vang. 4 Mi tinte chu an grêp hrui hnuaiah leh an theipui kûng hnuaiah an ṭhu zâwk ang a, tu mân an tihlau lo vang; sipaihote LALPA kâ chuan a sawi tawh si a. 5 Hnam tinin mahni pathian ṭheuh an bia ang a, keini pawhin LALPA kan Pathian chu kumkhuain kan bia ang.
Sal tânna ata Israel-te kîr leh tûr thu
6 LALPAN heti hian a ti: “Chumi niah chuan kebai ka khâwm ang a, ûm bova awm leh ka tihhrehawma awm chu ka khâwm ang; 7 kebai chu a thi bângah ka siam ang a, hla taka hnawh bo chu hnam chak takah ka siam ang; tûn achinah chuan Zion tlângah kumkhuain LALPA chuan an chungah ro a rêl ang. 8 Aw nang, ran rual kulh, Zion fanu awmna tlâng, i hnênah a lo thleng ang; a ni, lalna hmasa chu a lo thleng ang, Jerusalem fanu lalna chu.” 9 Engati nge i ṭah vak vak ni? I chhûngah lalber a awm lo vem ni, i remruattu a boral ta em ni, hmeichhe nau vei anga natnain a man tâk che? 10 Aw Zion fanu, hmeichhe nau vei nau hring tûr angin nâ tuar la, vei rawh; tûnah khawpui aṭangin i kal chhuak ang a, ramah i chêng ang a, Babulon thleng pawhin i kal dâwn si a; chutah chhanchhuahin i awm ang a, chutah chuan i hmêlmate kut ata LALPA chuan a chhanchhuak ang che. 11 Tûnah hnam tam tak nangmah dovin an inkhâwm a, “Tihbawrhbânin awm sela, kan mit hian Zion chunga a châk zâwng chu hmu rawh se,” an ti a. 12 Mahse, LALPA ngaihtuahnate chu an hre lo va, a remruat chu an hre thiam hek lo; hruiha buhphal dah khâwm angin anmahni a khâwm ta si a. 13 “Aw Zion fanu, tho la, chîl rawh; i ki chu thîr angin ka siam ang a, i kephah bâwrte chu dâr angin ka siam dâwn si a; tin, chi tam tak chu i vaw sawm ang; an thil hlêp chu LALPA tân i serh hrang ang a, an sum chu lei pum LALPA tân i serh hrang ang.”
Bethlehem aṭangin Pathianin rorêltu pêk a tiam
1 Sipai rualte u, inpun khâwm rawh u, min hual a, Israel hruaitu chu a biangah tiangin an vuak hi. 2 Nimahsela, nang Bethlehem Ephratha, Juda rama sâng tam tak zîngah tê hle mah la, i lak aṭang hian Israel-ho rorêltu tûr chu ka tân a lo chhuak ang a; a lo chhuahna chu hmasâng ata, chatuan aṭangin a ni. 3 Chuvângin, nau veitu chuan a hrin hma loh chuan anmahni a hawisan ang; tichuan, a unau la awm chhunte chu Israela thlahte hnênah an kîr leh ang. 4 Ani chu a ding ang a, LALPA chaknain a ran rual chu a châwm ang, LALPA a Pathian hming ropuina ngei chuan; tin, anni chu him takin an awm reng ang a, ani chu khawvêl tâwp thlengin a ropui dâwn si a. 5 Tin, he mi hi kan inremna a ni ang.
Chhanchhuahna leh hremna
Assuria mi chu kan rama a lo kala, kan lal inte a rawn rah hunah chuan, amah do tûrin berâmpu pasarih leh mi ropui pariat kan indâwk chhuak ang. 6 Assuria ram chu khandaihin an tichhia ang a, Nimroda ram chu a luhnaah chuan an tichhe bawk ang; tin, ani chuan kan rama Assuria mi a lo kala, kan ram chin a rawn rah hunah, ama lakah chuan min chhanchhuak ang. 7 Jakob-ho mi la awm chhunte chu chi tam takte zîngah, LALPA aṭanga dai tla ang leh hlobet chunga ruah sûr angin an awm ang; chu chuan mihring a nghâk lo va, mihring fapate a ngaichâng hek lo. 8 Jakob-ho mi la awm chhunte chu hnamte zîngah leh chi tam takte zîngah chuan, ramhnuai sate zînga sakeibaknei ang leh berâm rual zînga sakeibaknei vânglai angin a awm ang; ani chuan a kal tlang phawt chuan a rap bet a, a pawt sawm a, chhantu tûr pawh tu mah an awm lo. 9 I kut chu nangmah dotute chungah lekin awm sela, i hmêlma zawng zawngte chu tihboralin awm rawh se. 10 “Chumi niah chuan heti hi a ni ang,” LALPAN a ti, “I lak ata i sakawrte ka tiboral ang a, i tawlailîrte ka tichhia ang. 11 I ram khawpuite chu ka tiboral ang a, i kulhbîng zawng zawngte chu ka tichim ang. 12 I kut ata dawithiamnate ka tiboral ang a, aienthiamte i nei tawh lo vang. 13 I lak ata i milem siam chawpte leh i lungphunte chu ka tiboral ang a, i kutchhuak thil chu i be tawh lo vang. 14 I lak ata i Aseri-te chu ka pawt chhuak ang a, i khawpuite chu ka tichhia ang. 15 Tin, thu ngaithla lo hnamte chungah chuan thinurna leh thinrimnain phuba lâkna ka tipuitling ang.”
Israel laka LALPA thupawi neih
1 LALPA thusawi chu tûnah ngaithla rawh u: “Tho la, tlâng lian hmaahte chuan khing la, tlâng tête chuan i aw ngaithla rawh se. 2 Aw tlâng liante u, LALPA khinna chu ngaithla ula, nangni leilung nghahchhan hlunte u, ngaithla rawh u; LALPA chu a mite nên an inkhing a, Israel-ho chu a thlêm ang. 3 Aw ka mite u, in chungah eng nge ka tih tâk? Eng kawngin nge ka tihhah che u? Mi han khing teh u. 4 Aigupta ram aṭang chuan ka hruai chhuak che u a, bawih ata chu ka tlan chhuak che u a; in hmaah Mosia te, Arona te leh Miriami te ka rawn tirh kha. 5 Aw ka mite u, LALPA thiltih fel chu in hriat theih nân, Moab lal Balaka thu rawt leh Beora fapa Balaaman a chhân dân, Sitim aṭanga Gilgal thlenga thil awmziate kha tûnah hre reng rawh u.”
LALPAN eng nge a phût?
6 Eng nên nge LALPA hmaah chuan ka lo kal anga, Pathian chungnung hmaah ka kûn ang? Hâlral thilhlante, bâwngno kum khat mite nên a hmaah chuan ka lo kal dâwn em ni? 7 LALPA chu berâmpa sâng tam tak emaw, hriak lui sîngte emawah a lungni dâwn em ni? Ka bawhchhiatna avângin ka fa tîr chu ka pein, ka thlarau sualna avângin ka taksa rah chu ka pe dâwn em ni? 8 Aw mihring, ṭha chu a entîr tawh che a ni; LALPAN a phût che chu eng nge ni? Dik taka tih leh khawngaihna ngainat leh, i Pathian nêna thuhnuairawlh taka lên dun a ni lo vem ni? 9 LALPA chuan khawpui chu a au a ni, finna nei mi chuan i hming a ṭih ang: “Talhtum leh a buatsaihtu chu hre rawh u. 10 Mi suaksual inah chuan suahsualna ro bâwmte chu a la awmin, tehna dawrâwm tenawm tak chu a awm cheu vem? 11 Bûkna dik lote leh ip rih dân dawhâte nên chuan thianghlim ka ni dâwn em ni? 12 Chuta mi hausate chu pâwngnêknain an khat si a, chuta chêngte chuan dâwt an sawi a, an ka chhûnga an lei chu bum hmang a ni. 13 Chuvângin, kei pawhin na taka hliamin ka vaw ta che a, i sualnate avângin ka tiṭiau ta che a ni. 14 I ei ang a, i tlai lo vang; i ril a la ṭâm tho vang. Thil i dah ṭha ang a, i hum thei chuang lo vang; i hum chhun pawh indonaah a chhia ang. 15 I chîng ang a; mahse, i seng lo vang; olive rahte chu i rap sâwr ang a; mahse, a hriak chu i thih lo vang; grêp rap sâwr mah la, a uain chu i in lo vang. 16 Omria thuruatte chu vawn reng a ni si a, Ahaba chhûngkaw thiltih zawng zawngte nên; an remruatahte chuan in kal a ni; tichuan, hmun ṭiauvah ka siam tawh dâwn che a ni a, a chhûnga chêngte hi nuihzatbûr atân; tin, ka mite hmingchhiatna chu i phur ang.”
Israel suahsualna
1 Ka chung a va pik êm! Nipui thei an seng khâwm hun laia awm ang leh, grêp lawh hun laia grêp hmaih lawh tûr ang ka ni si a; rah bâwr ei tûr a awm lo; ka nunnain theipui hmin hmasa a châk a ni. 2 Pathian ngaihsak mi chu lei ata a boral a, mihring zîngah mi dik tak rêng an awm lo. Thisen chhuah tûrin an châng vek a; mi tinin mahni unau chu lênin an veh a ni. 3 Thil ṭha lo tih nân an kut chu a themthiam a, hotuten phût an nei a, rorêltuten thamna an ngiat a, mi lianten an duhsâm sual an hrilh a, an thurual tlâng a. 4 An zînga mi ṭha ber chu buar ang a ni a; mi dik ber pawh chu hnimhlîngnei aiin a chhe zâwk; i vêngtute ni, fana i awm ni ngei chu a lo thleng e; chu chu an manganna ni a ni ang. 5 ṭhian ring suh ula, hruaituah chuan rinna nghat suh u; i ângchhûnga awmi lak aṭang chuan i ka kawngkhârte chu vêng ṭha rawh. 6 Fapain pa hming a tichhia a, fanu chuan a nu a do va, movin a pi a do bawk a; mihring hmêlmate chu ama chhûngte ngei an ni.
LALPAN chhandamna a rawn thlen
7 Kei erawh chuan LALPA lam ka en ang a, ka chhandamna Pathian chu ka nghâk ang; ka Pathian chuan mi ngaithla dâwn a ni. 8 Aw ka hmêlma, mi diriam mai suh! Ka tlûk hun chuan ka tho leh ang; thima ka ṭhut pawhin LALPA chu ka tân êng a ni ang. 9 LALPA chungah thil ka tihsual tâk avângin, a lungnih loh êm êmna chu ka phur ang, ka chung thu mi sawipuia, ka tân rorêlna chu a hlen hma loh chuan. Engah mi hruai chhuak ang a; tin, a felna chu ka hmu ang. 10 Tichuan, ka hmêlma, ka hnêna, “Khawiah nge LALPA i Pathian chu?” titu chuan chu chu a hmu ang a, mualphonain ani chu a khuh ang. Ka mitte hian amah chu a en ang a; tûnah chuan kawtthlêr chirhdiak anga rah beh a ni tawh ang. 11 I kulh bangte siamna ni tûr chu! Chumi niah chuan thuruat chu hla tak thlenga tihzau a ni ang. 12 Chumi niah chuan Assuria ram leh Aigupta leh Lui thleng hial aṭang te, tuifinriat leh tuifinriat inkâr aṭang te leh tlâng leh tlâng inkâr aṭang te chuan i hnênah an lo kal ang. 13 Chuti chung pawh chuan ram chu, a chhûnga chêngte avâng leh an thiltih rah avâng chuan tihṭiau a ni ang.
Israel tân LALPA ngilneihna
14 Karmel tlâng kâra ramhnuaia khawhar taka awm i ro chan berâm rual, i mite chu i talhtum hmangin châwm la; hmâsâng ang khân Basan leh Gilead-ah châwmin awm hlawm rawh se. 15 “Aigupta ram aṭanga i kal chhuah lai ang khân an hnênah thil mak takte ka entîr ang.” 16 Hnam tinin chu chu an hmu ang a, an thiltihtheihna zawng zawng chu an zahpui ang; an hmui an hup ang a, an bengte a ngawng ang. 17 Rûl angin vaivut an liak ang a; leia bawkvâka kalte angin an awmna kua aṭang chuan khûr chungin an lo kal ang. LALPA kan Pathian hnênah chuan ṭih chungin an lo kal ang a, nangmah avângin an hlau vang. 18 Nang anga khawlohna ngaidamtu leh a ro chan la awm chhun bawhchhiatna kal pêltu Pathian tu nge awm? A thinrimna chu kumkhuain a vawng reng lo, khawngaihnaah a lâwm êm êm ṭhin avângin. 19 A hawi kîr leh ang a, kan chungah khawngaihna a nei ang a, kan khawlohnate chu a ke hnuaiah a rap bet ang. Nangin an sualna zawng zawngte chu tuifinriat mawng thûk takahte chuan i paih lût ang. 20 Hmâsânga kan pute hnêna chhia i chham tawh, Jakoba hnêna thutak leh Abrahama hnêna khawngaihna chu i hlen ang.
Ninevi chunga LALPA thinurna
1 Ninevi khaw phurrit chu. Elkos mi Nahuma inlârna hmuh bu chu. 2 LALPA chu thîkthuchhia Pathian leh phuba lâk hmang a ni; LALPA chuan phuba a la a, thinurnain a khat a ni; LALPA chuan a dotute chungah phuba a la a, a hmêlmate tân chuan thinurna a khâwl khâwm a ni. 3 LALPA chu a thin a nel a, nasa taka thiltithei a ni a, mi sual chu thiam a chantîr rêng rêng lo vang. LALPA chuan ṭhâwngaleivirah leh thlipuiah a kawng a nei a, chhûmte chu a kea vaivut a ni. 4 Tuifinriat chu a zilhhau va, a tikang chat a, lui zawng zawngte pawh a tikang zo va. Basan ram leh Karmel tlâng a ro zo va, Lebanon tlâng pangpâr chu a chuai a. 5 Tlâng liante chu amah avângin an nghîng a, tlâng tête chu an tui ral a; a hmaah chuan lei hi a khûr a, a ni, khawvêl leh a chhûnga awm zawng zawngte nên chuan. 6 A lungnih lohna hmaah chuan tu nge ding thei anga, a thinrimna nasa takah chuan tu nge awm thei ang? A thinrimna chu mei anga leih buak a ni a, lungpuite chu a tikeh sawm vek a ni. 7 LALPA chu a ṭha a, mangan nia kulh nghet a ni; amaha an rinna nghattute chu a hria. 8 Amah dotute erawh chu tui lian nasa tak hmangin a tiboral vek ang a, a hmêlmate chu khawthimah a ûm lût ang. 9 LALPA kalhin eng nge in suangtuah? Tâwp dêrna a thlentîr dâwn a ni, phuba lâk nawn a ngai lo vang. 10 An uain in chuan chiah huh hnêp mah sela, hlîng bawn ang leh buhpâwl ro ang maia tihboral vek an ni ang. 11 Nangmaha chhuak mi pakhat, LALPA kalha thil sual ngaihtuahtu, suahsualna thu râwntu a awm. 12 LALPA chuan heti hian a ti: “An chak theihtâwpin chak mah sela, tam pawh tam tak ni mah sela, chuti chung pawhin sâm thlûkin an awm ang a, an boral ang. Lo tihrehawm tawh che mah ila, ka tihrehawm leh tawh lo vang che. 13 Tûnah chuan i hnên ata a nghâwngkawl chu ka titliak ang, nangmah phuarna hruite chu ka tichat vek ang.” 14 LALPA chuan i chungchâng thu-ah thu a pe a: “I hming pu tûr thlah i nei lo vang. I pathianho in ata milem siam chawp leh milem chhûnte chu ka tiboral ang a; i thlân ka siam ang, i sual si a.” 15 Tlângahte chanchin ṭha thlena, remna thu tlângaupuitu ke chu en teh! Aw Juda, i kûtte chu serh la, i thutiamte chu hlen rawh. Mi suaksual chuan a palzût leh dâwn tawh si lo che a; tihboral dêr a ni ta e.
Ninevi chhiat thu
1 Tikeh sawmtu chu i hmaihmaah a lo chhuak e. Kulhbîng chu enkawl la, kawng chu vêng rawh; i kâwng tikhauh la, i thiltihtheihna chu chak takin siam ṭha rawh. 2 Israel-ho ropuina angin Jakob-ho ropuina chu LALPA chuan a tungding leh si a; tiruaktute chuan anmahni an tiruak zo tawh a, an grêp pêngte an tichhe tawh si a. 3 A mi chakte phaw chu thisen a ni a, mi huaisente chu a senlârin an inthuam a. A inbuatsaihna niah chuan tawlailîrte chu kahpathîr tlein a tle zawr zawr a, feite chu râpthlâk takin a phe zawk zawk a ni. 4 Tawlailîrte chu kawtthlêrah an tlân bur bur a, lamlian zauvahte chuan an insu sawk sawk a; meichher angin an lang a, kâwlphe angin an tlân thuak thuak a ni. 5 A mi liante chu a ko chhuak a, an kal rual chu an petek a; kulh bang lam pan chuan an hmanhmawh a, thil phen tûr an siam a. 6 Lui kawngkhârte chu hawn a ni a, lal in chu tihralin a awm a. 7 Tin, Huzzabi chu an hlîp a, an kal bopui a, a bawihnute chuan an âwm chûmin ṭhuro hrâm ang maiin an ṭah a. 8 Hmasâng ata Ninevi chu dîl ang a ni a, a sah ta hum hum a. “Ding rawh u, ding rawh u,” tiin an au va; mahse, tu mah an hawi kîr lo. 9 Tangkaraw sumte chu lâksak ula, rangkachak sumte chu lâksak rawh u! Thil chhêk khâwm leh bungraw ṭha zawng zawng ropuizia chuan tâwpintai a nei si lo. 10 Tihruahin a awm a, a ruak dêr a, a ram a ni! Thinlung chu a tituiral a, khûpte chu a inkhâwng a, kâwng zawng zawng a na ngawih ngawih a, an zavaia hmêl a dâng zo vek a ni. 11 Tu ma tihṭit lohva an awmna, sakeibakneipa te, sakeibakneipui te, sakeibakneino te an kal vêlna, sakeibaknei bu zâwl leh sakeibakneinoten an eina hmun chu khawiah nge? 12 Sakeibakneipa chuan a note kham khawp a pawt sawm a, sakeibakneipuite tân a seh hlum a, a pûkte chu sa sehin a tikhat a, a bu zâwlte chu saruang pawh sawmin. 13 Sipaihote LALPA chuan, “Ngai teh, ka do che a ni; i tawlailîrte chu ka hâl khu hluah hluah ang a, i sakeibakneinote chu khandaihin a tiboral ang; tin, leia i sa seh hi ka tikin ang a, i palaite aw chu hriat a ni tawh lo vang,” a ti a.
1 Thisen chhuah hmang khawpui chu a chung a pik e! Dâwt leh inrawknain a khat vek a; an sa seh chu a chatlak lo. 2 Vuakna vai rîk te, tawlailîr ke innghawr ri te, sakawr zuang te, tawlailîr tlân hlawk hlawk te nên; 3 sakawr chung chuang mi sakawra chuang te, khandaih tle zawk zawk te, fei tle zawr zawr te nên; mi thah awm rem rum te, ruang awm rei rui te nên; ruangin kin tih rêng a nei lo, an ruangte chu an chhuih a; 4 chûng chu nawhchizuar hmêlṭha, dawithiamnu, a uirena avânga hnam hralha, a dawi chînna avânga chhûngkaw hralhtu uirena nasa tak avânga lo awm a ni. 5 Sipaihote LALPA chuan heti hian a ti: “Ngai teh, ka do che a ni; i hmai lamah i puan ka hlîm ang a; i saruakna chu hnamte hnênah leh i mualphona chu lalramte hnênah ka entîr ang. 6 Bawlhhlawh tenawm takin ka theh ang che a, zahthlâk takin ka siam ang che a, ennawm atân ka dah ang che. 7 Tin, heti hi a ni ang a, a hmu apiang che chu i lakah an tlân bo vang a, ‘Ninevi khua chu a lo ram ta a ni! Tuin nge sûn ang?’ Khawi ata nge i tân thlamuantute ka zawn tâk ang?” an ti ang. 8 Nile lui luan hual No-amon, a kulh atân tuipui hmanga, a in hung nâna dîl hmang aiin i chak zâwk em ni? 9 Ethiopia leh Aigupta chu a chakna a ni a, chu chu tâwp chin nei lo a ni; Put leh Lubim chu nangmah ṭanpuitute an ni. 10 Chuti chung pawh chuan lâk bovin a awm a, salah a tâng a; kawtthlêr tin tâwpah a naupang tête chu an paih sawmsak a; a mi ṭhate tân ṭhum an vâwr a, a mi lian zawng zawngte chu khaidiatin phuar an ni. 11 Nang pawh i rui bawk ang a, thuhrûkin i awm ang; hmêlma avângin kulh nghet i zawng bawk ang. 12 I kulh zawng zawngte chu theipui kûng, rah hmin hmasa pu ang an ni ang a; an nghîn phawt chuan eitu kaah an tla lût ṭhîn. 13 Ngai teh, i chhûnga i mipuite chu hmeichhia an ni a! I hmêlmate tân i ram kawngka chu a inhawng huai a; i in kalhna thîr tlâwnte chu meiin a kâng ral a ni. 14 Hual vêla i awm chhûng atân tui chawi la, i kulhte tinghet rawh; hlum awmnaah chuan kal la, lung chârna chu chîl la, lei rawh channa thuk chu tinghet rawh. 15 Chutah chuan meiin a kâng ral ang che a, khandaihin a sât hlum ang che a, thingngêt angin a tiboral ang che. Thingngêt angin intitam la, khaukhuap angin intitam rawh. 16 I sumdâwngtute chu vân arsi aia tamin i tipung a: thingngêtin a thla a zâra, a thlâwk bo ang hian an bo zo ta. 17 I mi, lallukhum khumte chu khaukhuap ang an ni a, i sipai hotute chu khaw vawh nia pala khau rual fu khâwm ang an ni; amaherawhchu, ni a lo chhuak a, an thlâwk bo va, an awmna hmun rêng hriat a ni lo. 18 Aw Assuria lal, i berâm vêngtute chu an muthlu e; i mi liante chu an châwl a. I mipuite chu tlângahte an darh zo va, hruai khâwmtu tu mah an awm lo. 19 I na damna tûr a awm lo va, i hliam chu a nasa hle a ni. I thâwm hria apiangin kut an ben khum che; i suahsualnain a chîm fo loh tu nge awm?
Habakukan a vui thu a sawi
1 Zâwlnei Habakukan phurrit a hmuh chu. 2 Aw LALPA, eng chen nge ka au vang a, Mi ngaihthlâk loh vang? Inpâwngnêkna thu i hnênah ka au chhuahpui a, Nangin i chhanhim si lo va. 3 Engati nge khawlohnate min entîra, Thiltih dik lo takte hi i en reng? Inrawkna leh inpâwngnêknate Ka hmaah an awm reng si a; Inhauhna leh innghirnghonate a lo chhuak a ni. 4 Chuvângin, dân thu chuan kori a tu hlei thei lo va, Rorêlna thu a chhuak ngai hek lo. Mi felte chu mi suaksualte chuan an hual vêl a; Chuvângin, rorêlna chu dik lo takin a chhuak ṭhîn a ni.
LALPA chhânna
5 “Hnamte chu en ula, thlîr reng ula, Nasa takin mak ti rawh u; In dam chhûng hian thil kawng khat ka tih hi, Chu thiltih chu miin hrilh che u mah sela In awih tawp lo vang. 6 Ngai rawh u, Kaldai mi hnam kawlhsen tak leh Thu dâwn tawi tak, chênna hmun an ta lo pawh neih tuma Lei vâng pal tlang ṭhîntute chu Ka chawk tho a nia. 7 An hlauhawmin an râpthlâk êm êm a ni, An rorêlna leh an ropuina chu Anmahni aṭanga chhuak bawk a ni. 8 An sakawrte pawh keitê aiin an ṭuan ṭha zâwk a, Tlai lam chinghniate ai pawhin an hlauhawm zâwk a ni; An sakawr chung chuanghote chu an ṭum vêl awt awt mai a; A ni, an sakawr chung chuanghote chu hla tak ata lo kal an ni; Mupui sa pan ang maiin an ding vung vung a. 9 Pâwngnêk tumin an lo kal hlawm a, Châk takin hma lam an hawi tlat a ni; ṭiauvaivut ang maia tam salte an man hlawm ṭhîn. 10 A ni, lalte pawh an chêksawlh a, Mi liante chu an nuihzatbûr a; Kulh nghet zawng zawngte pawh an tham lo, Lei an chhûng pâwng a, an la mai ṭhîn si a. 11 Thli ang maiin an rawn nuai a, An kal tlang pur pur a; Amaherawhchu, an chakna chu pathiana an neih avângin Thiam loh an chang a ni.”
Habakuka a phun leh
12 Aw LALPA, ka Pathian, ka Mi Thianghlim, Chatuan mi i ni lo vem ni? I thi ngai lo. Aw LALPA, nangin anni chu rorêl nân i thlang ta a; Aw Lungpui, nangin anni chu thunun nân i din chhuak a ni. 13 Nang, thil sual hmu thei lo khawpa mit thianghlima, Inhnehchhiahna en thei lo chuan, Engati nge vervêk taka titute chu i en theiha, Mi suaksualten an aia mi fel an ei zawh laia i ngawih renga, 14 Mihring hi tuifinriata sanghate leh rannung, An chunga rorêltu nei bîk lote anga i siam ni? 15 Nghakuaiin a khai chhuak vek a, A lênin a man hlawm a, A lênkhang chuan a fûn khâwm a. Chuvângin, a hlimin a lâwm a ni. 16 Chutih avâng chuan a lên hnênah inthawina a hlân a, A lênkhang hnênah rimtui a hâl a; Anmahni avânga a chanvo a lo lena, Ei tûr a neih tam tâk avângin. 17 Chuvângin, a lên chu tiruak leh ṭhînin, Hnamte thah a hnial lo fo dâwn em ni?
1 Tin, ka vênnaah ka ding ang a, kulh chungah ka chuang ang a, ka vui thu-ah khân ka hnênah eng nge a sawi dâwna, keiin engtin nge ka chhân dâwn tih hmu tûrin ka thlîr ang.
LALPA chhânna
2 Tin, LALPA chuan heti hian mi chhâng a: “Inlârna chu ziak la, a chhiartuin tlân paha A chhiar theih khawpa chiangin Lungphêk chungah ziak rawh. 3 Inlârna hi hun ruat chhûng atân mai a ni nghe nghe si a; A kin ni chu a hnai tial tial a, a thlâwn lo vang. Rei deuh mah se, nghâk rawh; A lo thlen ngei dâwn avângin a tlai chuang lo vang. 4 En teh, a chapo mang e, a rilru a va ngîl lo êm! Mi fel erawh chu a rinnain a nung ang.
Mi dik lote tuar tûr
5 A ni, chu lovah pawh, uain heh chu bum hmang, Mi chapo, in lam ngawrh lo mi a ni a; A châkna chu Seol angin a hawng zau va, Thihna ang a ni a, tihtlai theih a ni lo; A hnênah hnam tin a hruai khâwm a, Mi zawng zawng a chhêk khâwm a ni. 6 Hêng zawng zawngte hian a chungah tihelna thu, Deuna thu fing tawi - ‘A ta si lova intipunga, Dahkham thila intimuk chu a chung a pik e! Eng chen nge a chîn ang aw!’ tiin an sawi lo vang em ni? 7 Nangmah eitu tûr che an ding chhuak phutin, A tihrehawmtu tûr che an harh ang a, An tân râllâk mai i la ni dâwn lâwm ni? 8 Hnam tam tak i rawk tawh avângin, Hnam dang zawng zawngte pawhin an rawk ve thung ang che; Mite thisen avâng leh ram chungahte, Khawpui leh a chhûnga chêng zawng zawngte hnêna I pâwngtihna avâng khân. 9 Mi sual kut ata a him theihna tûra Bû sâng taka chhep tûrin, A in atana hlâwkna bawlhhlawh chîngtu chu A chung a pik e! 10 Mi tam takte tiboralin i in atân mualphona I phiar a lo ni a, I nunna chungah thil i tisual a ni. 11 Lung chu bang ata a au vang a, Thing hmanrua aṭangin khanchhukin a chhâwn ang. 12 Thisena khawpui dina, khawlohnaa khawpui siamtu chu a chung a pik e! 13 Ngai teh u, miten mei kan mai atâna an thawka, Hnamte engmahlo atâna an intihah hi Sipaihote LALPA tih a ni lo vem ni? 14 Tuifinriat chu tuiin a khat vek angin, LALPA ropuizia hriatnain lei hi a khat vek dâwn si a. 15 A ṭhenawm hnêna zu in tûr petu chu a chung a pik e, Nang, an saruak i hmuh theih nâna i tûr chawhpawlha tiruitu chu! 16 Ropuina aiah zahnain i intitlai a, Nang pawhin in la, saruakin awm ve mai rawh; LALPA kut ding lam no chu i hnênah a lo lêt ang a, I ropuina chungah bawlhhlawh zahpuiawm tak a awm ang. 17 Lebanon tlâng i suasamna chuan a chhilh ang chia, Sate boralna chuan a tihlau vang che; Mihring thisen avâng leh ram te, khawpui te leh A chhûnga chêngte i suasam tawh avângin. 18 Milim chher chawp hi eng nge a sâwta, A siamtuin a siam ni? Milim chhûn chawp, dâwt zirtîrtu mai, A siamtuin ama kutchhuak a rin leh chawp si, Milim ṭawng thei hlei lo han siam hi eng nge a sâwtna? 19 Thing hnênah, ‘Harh rawh,’ tia, Lung ṭawng thei lo hnênah, ‘Tho rawh,’ titu chu A chung a pik e! Hei hian a zirtîr dâwn em ni? En teh, rangkachak leh tangkaruaa luan a ni a; A chhûngah thaw rêng a awm tawp lo a ni. 20 LALPA erawh chu a in thianghlimah a awm a; Leia mi zawng zawngte chu a hmaah chuan ngawi ṭhiap rawh se.”
Habakuka ṭawngṭaina
1 Sigionoth thlûk dâna zâwlnei Habakuka ṭawngṭaina. 2 Aw LALPA, i chanchin an hril ka lo hria a, ka hlau va; Aw LALPA, hêng kum chhûng hian i hna tharthawh leh la, Hêng kum chhûngte hian tilâr ang che; Thinurnaah chuan zahngaihna telh ṭhîn ang che. 3 Teman ram aṭangin Pathian a lo kal a, Mi Thianghlima chu Paran tlâng aṭangin. (Selah) A ropuinain vânte khi a tuam a, A faknain lei a khat a. 4 A tlêtzia chu êng ang mai a ni a; A kut aṭangin êng zâm a lo chhuak a, Chutah chuan a thiltihtheihna inthupin a awm a. 5 Hripui chu a hmatâwngah a ṭang a, A hnungah chuan ṭêk a tla rum rum a. 6 A ding a, lei chu a tinghîng dur dur a; A hawi vêl a, hnamte chu a tithlabâr a; Tlâng hlunte chu a tidarh a, Kumkhaw mualte pawh an kimkî a; A kawngte chu chatuan ata a ni. 7 Kusan puan inte chu hrehawm tuarin ka hmu a, Midian ram puanzârte chu an khûr a! 8 LALPA chu luite chungah chuan a lungni lo ta a ni maw? Luite chungah chuan i thinrimin, Tuipui chungah i thinur a ni maw, I sakawr, i chhandamna tawlailîr chungah i chuan tâk? 9 Peih diam a ni e, i thal ngul, Hnamte tân chhechham a nghet e. (Selah) I vaw phel ta, lei chu, luiin. 10 Tlâng lianten an hmu chia, an hlau, Tuifâwnte pawhin mual an liam ta. Tui thûk takin awrâwl a chhuah a, Sâng takah a bân a phar ta. 11 Tûrni, chhawrthlapui an ding reng, mahni hmunah, I thal lêng chhuak êngah te leh, I fei tle zawr zawr êngah chuan. 12 Thinurin ram i chîl chhuak a, Thinrimin hnamte i pal ta. 13 I mite chhandam nân i chhuak, I hriak thiha chhandam nân chuan; Mi sual in a chung hlîp zovin, Nghahchhan lang râwtin i suasam. (Selah) 14 A rûk tea rethei ei rala lâwmte, ṭhâwngaleivir ang lo thawk e, mi tihdarh nân; An tiang ngeiin i chhun ta a, a indo thiamte lu-ah chuan. 15 I sakawrin tuipui i zawh, Tuifâwn nasa tak mai chu. 16 Ka hriatin ka khûr, tirilan, A awah ka khâ a inkhâwng; Ka ruh a muatin, ka khûr a, mahni hmunah; Mahse, sipai rual pui ang buaina ni Mipui chunga a lo thlen hunin Ka nghîng lo vang. 17 Theipui thing pâr vul dâwn lovin, Grêp hrui rah dâwn hek suh sêng; Olive thing pawh rah lovin, Lovin ei tûr chhuah dâwn lo sêng; Huang ata ran rual tibovin, Ran inah ran awm lo mah sêng; 18 Ka lâwm zêl ang, LALPA-ah chuan, Ka chhandamna Pathianah chuan ka lâwm cheu dâwn. 19 LALPA Jehova, ka chakna, Ka ke a siam, sakhi ke ang, Ka hmun sângah mi lêntîr ang. Hla hruaitu tân, ka ṭingṭanga sak mi.
LALPA rorêlna
1 Juda-te lal Amona fapa Josia lal laia LALPA thu Zephania, Kusia fapa, Gedalia fapa, Amaria fapa, Hezekia fapa hnêna lo thleng chu. 2 “Lei chung ata thil zawng zawng ka tiral vek ang,” tih hi LALPA thuchhuak a ni. 3 “Mihring leh sate ka tiral ang a; Chunglêng savate leh tuipui sanghate ka tiral ang a; Mi sualte chu ka titlu ang a; Lei chung ata mihring ka tibo daih ang,” tih hi LALPA thuchhuak a ni. 4 “Juda-te leh Jerusalem luahtute zawng zawng chungah Ka kut ka lek ang a; he hmun aṭang hian Baala la awm chhunte, Kemarim hming chu puithiamho chawpin, 5 In chung chhîpa vân lam thilho hnêna kûn ṭhînte, LALPA hnêna chhechhama Malkama chhâla chham bawka kûn ṭhînte, 6 LALPA hawisantute leh LALPA zawng lova, Amah râwn lotute chu ka tibo daih ang. 7 LALPA PATHIAN hmaah chuan ngawi reng rawh, LALPA ni chu a hnaih tâk avângin. LALPA chuan inthawina a buatsaih tawh a, A mi sâwmte pawh a tithianghlim tawh si a. 8 Tin, LALPA inthawina niah chuan heti hi a ni ang a, Hotute leh lal fapate leh hnam dang silhfêna Inthuamte zawng zawng chu ka hrem ang. 9 Tin, chumi niah chuan kawngka zuankahlên zawng zawng, An hotute inpâwngnêkna leh bumnaa tikhattute chu ka hrem ang. 10 Chumi niah chuan, Sangha Kawngka aṭanga au thâwm te, Miseneh aṭanga chiau vak vak te, tlâng aṭanga ri hum hum te a awm ang,” tih hi LALPA thuchhuak a ni. 11 “Maktesh mite u, Kanaan mi zawng zawng an boral avângin chiau vak vak rawh u! Tangkaraw phurtute zawng zawng an boral vek tawh a ni. 12 Tin, chumi hunah chuan heti hi a ni ang a, Khâwnvâr chhiin Jerusalem ka zawng chhuak ang a; Uain mawng nawi anga awm mai maia, an rilrua, ‘LALPA chuan a chhia a ṭha tih a nei ngai nêm,’ titute chu ka hrem ang. 13 Tin, an sumte chu râllâkah a la chang ang a, An inte chu a ram ang; a ni, inte an sa ang a; mahse, an luah lo vang; Grêp huante an siam ang a; mahse, a uain chu an in lo vang.” 14 LALPA ni ropui tak chu a hnai e, a hnaiin a thleng thuai dâwn a ni. LALPA ni thâwm chu râpthlâk tak a ni; Chutah chuan mi chak chu a chiau vak vak ang. 15 Chumi ni chu thinurna ni a ni a, Mangan leh hrehawm ni, chhiatna leh ṭiauna ni, Thimna leh khaw dur ni, chhûm leh thim chhah mup ni a ni a, 16 Kulha hung khawpuite chungah leh khaw kil kulh sângte chungah chuan, tawtawrâwt leh râl bei thâwm rîkna ni a ni a. 17 “Tin, mihringte chungah hrehawmna ka rawn thlen ang a, Mitdel ang maiin an kal ang, LALPA chungah an sual avângin; An thisen chu vaivut angin ka leih bua ang a, An tisate pawh êkdûr ang maiin.” 18 LALPA thinurna niah chuan an rangkachak emaw, An tangkarua emaw pawhin anmahni a chhanchhuak thei lo vang a; Ram pum pui hi a thîkna meiah chuan a kâng bo vek ang. Rama chêngte zawng zawng a tibo dâwn a, A ni, tihbona râpthlâk tak a siam dâwn si a.
Sim tûra ngenna
1-2 Aw hnam zah nachâng hre lote u, Thuruat a lo chhuah hma leh, ni chu favai ang maia a ral hma leh, LALPA thinrimna hlauhawm tak chu in chunga a lo thlen hma leh, LALPA thinrimna ni chu in chunga a lo thlen hma hian, Tlân khâwm rawh u, a ni, tlân khâwm huai huai rawh u. 3 Nangni leia mi thuhnuairawlh zawng zawng, a thu awihtute u, LALPA chu zawng rawh u; Felna zawng ula, thuhnuairawlh tum rawh u; LALPA thinrimna niah chuan thuhrûkin in awm thei mahna.
Israel ram vêla hnam dang chhiat tûr thu
4 Gaza khua chu kalsanin a awm ang a, Askelon khua chu tihṭiauvin a awm dâwn si a; Chhûn laiah Asdod khua an hnawt chhuak ang a, Ekron khua chu pawh chhuahin a awm ang. 5 Tuipui kama chêng Kereth hnamte chu an chung a pik e! Aw Kanaan, Philistia mite ram, LALPA thu chu i chungah a lo thleng a ni: “Luahtu awm lo khawpin ka tiboral ang che.” 6 Tin, tuipui kam te chu hnim hring hmun a ni ang a, Berâmpute bûk khuarna leh berâmte huang a ni ang. 7 Tichuan, tuipui kam chu Juda chhûngtea la awm chhunte tân a ni ang a; Chûngah chuan an berâm rualte chu an tla ang a, Tlai lamah chuan Askelon khaw inahte an riak ang; LALPA an Pathian chuan a rawn tlawh ang a, An sal tânna chu a lehlinsak ang. 8 “Moab deuna leh Amon fate au khumna, ka mite an deuna leh An ramria an intihropuina chu ka hre tawh a. 9 Chutichuan, a nuna ka nun chhûng chu, Moab chu Sodom ang a ni ang a, Amon fate chu Gomorra ang an ni ngei ngei ang; Kângṭhai hmun leh chi khur leh kumkhaw luah loh a ni ang. Ka mi la bângte chuan anni chu râllâkah an la ang a, Ka hnam la awm chhunte chuan an luah ang,” tih hi sipaihote LALPA, Israel-te Pathian thuchhuak a ni. 10 Chu chu an chapona aiah an nei dâwn a ni, Sipaihote LALPA mite chungah an intihlena, an chêksawlh avângin. 11 An tân LALPA chu ṭihbaiawm tak a ni ang a, Lei pathiante chu a ṭâm vek dâwn si a; Tin, miten amah chibai an bûk ang, Mi tinin mahni hmun ṭheuhvah, hnamte awmna zawng zawngah chuan. 12 “Nangni Ethiopia mite pawh ka khandaiha thahin in awm ang.” 13 Tin, hmâr lam ram chungah a kut a lek ang a, Assuria ram a tiboral ang a, Ninevi khua a tiṭiau vang a, thlalêr angin a tiro vang. 14 Tin, a chhûngah chuan sa rual chi tin, ramsate zawng zawng an mu ang. Tuivalawng leh sakuhte pawh a ban chhîp bâwkahte an chêng ang a; Tukverhahte zai an vâwr ang; Kawngka bulahte chuan chhiatna a awm ang; Sidar thinga siamte pawh phoruang a chang ta si a. 15 Hei hi khawpui hlim thei tak, mahni inring tak, a thinlunga, “Keimah, ka chuang ka liam hi tu mah an awm lo,” intirilru chu a ni. Sate muthmun mai atân a va ram nasa ta êm! A kal pêl apiangin an chek khum ang a, an kut an thin khum ang.
Jerusalem sualna leh chhandamna
1 Hel hmang leh bawlhhlawh, hnehchhiah hmang khawpui chu a chung a pik e! 2 Aw chu a awih lo va, zilhna a pawm lo va; LALPA chu a ring lo va, a Pathian lam a hnaih duh lo. 3 A chhûnga a hotute chu sakeibaknei rûm lai an ni a; A rorêltute chu tlai lam chinghnia an ni a, A tûk thlenga ṭhial tûr eng mah an zuah lo. 4 A zâwlneite chu pawlawh leh bum hmangte an ni a: A puithiamten hmun thianghlim chu an tibawlhhlawh a, Dân chu an bawhchhe nasa a ni. 5 A chhûnga LALPA chu a fel a; khawlohna a ti lo vang; Tûk tin a rorêlna chu a tilang a, a pelh ngai lo va; Mahse, mi fel lo chuan zah nachâng rêng a hre lo. 6 “Hnamte chu ka tibo daih a, an kulhte a ram a; An kawtthlêrte chu tu ma kal tlang loh nân ka tiram a; An khawpuite chu a chhe ta; Chutichuan, tu mah an awm ta lo va, luahtu rêng an awm tawh lo. 7 ‘Nangin mi hlau phawt la, zilhna hi lo pawm la; Tichuan, ama chungchânga ka ruat zawng zawngte ang khân, A awmna chu tihbo daih a ni lo vang,’ ka ti a. Mahse, zîngah an tho va, an thiltih zawng zawng an tikhawlo vek a. 8 Chuvângin, râllâk la tûra ka thawh ni thlengin mi nghâk rawh u,” tih hi LALPA thuchhuak a ni: “Ka thiltum chu, an chunga ka thinurna, Ka thinurna hlauhawm tak mai chu leih tûra Lalna ramte inkhâwmtîra, hnamte koh khâwm hi a ni a; Lei zawng zawng hi ka thîkna meiah a la kâng fai dâwn si a. 9 Chutih hunah chuan mipuite chu hmui thianghlim ka puttîr leh ang, LALPA hming chu an zaa an lama, thu khat vuaa a rawng an bâwl tlân theih nân, 10 Ethiopia lui piah lam aṭangin ka hnêna dîltute, ka mi darhte fanu chuan ka thilhlan an rawn la ang. 11 Chumi niah chuan ka chunga i bawhchhiatna thiltih avângte chuan i zak tawh lo vang, Chumi hunah chuan i chhûng ata i mi, chapona hlimpuitute chu ka la bo vang a, Ka tlâng thianghlimah hian chapo hmangin i awm tawh lo vang. 12 I chhûng ata mi retheite leh Tihduhdah tuarte chu ka zuah ang a, LALPA hming chu an ring ang. 13 Israel mi la awm chhunte chuan khawlohna an ti lo vang a, Dâwt an sawi hek lo vang; An kaah pawh bumna ṭawng a awm hek lo vang; An eiin an mu ang a, tu mahin an tihlau tawh lo vang.”
Lâwmna hla
14 Aw Zion fanu, zai rawh; aw Israel, au vak vak rawh; Aw Jerusalem fanu, i thinlung zawng zawngin lâwm la, hlim rawh. 15 LALPAN i chungchâng rêlnate chu a la bo ta a, I hmêlma a paih chhuak ta. Israel Lalber, LALPA pawh chu i hnênah a awm e; Thil ṭha lo i hlau ngai tawh lo vang. 16 Chumi niah chuan Jerusalem hnênah, “Hlau suh, aw Zion, I kut pawh zawi suh se,” an ti ang. 17 “LALPA i Pathian chu i hnênah a awm e, Chhandamtu tûr mi chak tak chu; Lâwmin i chungah a hlim ang a, a hmangaihna a tithar ang a, Hla sain i chungah a lâwm ang. 18 Nangmaha mi, inkhâwmpuia tel pha lova lungngaite chu Ka hruai khâwm ang, nangmah avânga sawichhiatna phurrit phurtute chu. 19 Ngai rawh, chumi hunah chuan nghaisatu zawng zawng che kha ka ngaihtuah ang; Tin, kebai chu ka chhandam ang a, Hnawh bova awm chu ka hruai khâwm ang; Tin, lei chung zawng zawnga an lo mualphona chu, Fakna leh hmingthannaah ka chantîr ang. 20 Chumi hunah chuan ka hruai lût ang che u a, Chumi hunah chuan ka hruai khâwm ang che u; In hmuh ngeia in sal tânna ka lamlêt hunah chuan, Lei chunga mi zawng zawng zîngah Hmingthanna leh fakna ka siamsak dâwn si che u a,” LALPAN a ti.
Tempul sa ṭha tûra LALPA thupêk
1 Lal Daria lal kum hnihna, a thla rukna, chumi thla ni hmasa berah chuan, zâwlnei Hagaia kuta LALPA thu chu: Sealtiela fapa Judai ram awptu Zerubabela hnênah leh Jehozadaka fapa puithiam lalber Josua hnênah a lo thleng a, heti hian a ti: 2 “Sipaihote LALPA chuan heti hian a ti, ‘Hêng mite hian, “LALPA in sak hun tûr chu a lo la thleng lo ve,” an ti e,’ ” tiin. 3 Tin, zâwlnei Hagaia kutah LALPA thu a lo thleng a; 4 “He in hi a ram reng laia nangni, in chungthuah neitea in chên hi a hun em ni?” tiin. 5 Tûnah zawng sipaihote LALPA chuan heti hian a ti: “In kawngte chu chhût ngun rawh u. 6 Tam tak in chîng a, tlêm tê in seng si; in ei a, in tlai si lo; in in a, in kham si lo; in sin a, in lum chuang si lo; inhlawhfa chuan ip pawpa thlâk atân mai a hlawh a ni.” 7 Sipaihote LALPA chuan heti hian a ti: “In kawngte chu chhût ngun rawh u. 8 Tlângah kal chho ula, thing han la ula, in chu sa rawh u; chu chu ka lâwm ang a, chawimawiin ka awm ang,” LALPAN a ti. 9 “Hmuh ṭeuh in beisei a, ngai teh u, tlêm tê a lo ni; inah in rawn thlen a, ka lo chhêm bo va. Eng vâng nge ni?” tih hi sipaihote LALPA thuchhuak a ni. “Nangni mahni in lam pan ṭheuhva in tlân haw thuai ṭhina, ka in chu a ram dêr avâng a ni. 10 Chu vâng chuan vânin daifîm tla tûr a hrênsak che u a, lei chuan a rah a hrênsak bawk che u a ni. 11 Lei chungah te, tlâng chungah te, buh chungah te, uain chungah te, hriak chungah te, lei aṭanga thil lo chhuak chungah te, mihring chungah te, ran chungah te, kuta thawh chhuah zawng zawng chungah te khua ka tikhêng a ni e.”
Miten LALPA thupêk an zâwm
12 Tichuan, Sealtiela fapa Zerubabela leh Jehozadaka fapa puithiam lalber Josua leh mi la awm chhun zawng zawngte chuan, LALPA an Pathian aw leh LALPA an Pathianin a tirh anga zâwlnei Hagaia thu chu an bengkhawn ta a; mite chuan LALPA chu a hmaihmaah chuan an ṭih ta a. 13 Tichuan, mite hnêna LALPA thuchah hmang chuan LALPA tirhkoh Hagaia chuan a sawi a, “In hnênah ka awm a ni, tih hi LALPA thuchhuak a ni,” tiin. 14 Tin, LALPA chuan Sealtiela fapa, Judai ram awptu Zerubabela rilru leh Jehozadaka fapa, puithiam lalber Josua rilru leh mi la awm chhun zawng zawngte rilru chu a chawk tho ta a; tichuan, an lo kal a, sipaihote LALPA an Pathian inah chuan hna an thawk ta a; 15 Lal Daria lal kum hnihna, a thla rukna, chumi thla ni sawmhnih leh ni linaah chuan.
Tempul chu a hlui aiin a ropui zâwk tûr a ni
1 Thla sarihna, chumi thla ni sawmhnih leh ni khatnaah zâwlnei Hagaia kutah LALPA thu a lo thleng a: 2 “Sealtiela fapa, Judai ram awptu Zerubabela hnênah leh Jehozadaka fapa, puithiam lalber Josua hnênah leh mi la awm chhunte hnênah chuan heti hian sawi ta che: 3 ‘He in hi a hmaa a ropui lai hmu in zîngah tu nge la awm? Tûnah hian eng angin nge in hmuh le? In mit hmuhah eng tham mah a ni lo lâwm ni? 4 Aw Zerubabel, tûnah chuan huai takin awm rawh,’ tih hi LALPA thuchhuak a ni; ‘Aw puithiam lalber Josua, Jehozadaka fapa, nang pawh chak takin awm rawh; tin, nangni he rama mi zawng zawngte u, chak takin awm bawk rawh u,’ tih hi LALPA thuchhuak a ni; ‘Thaw rawh u, in hnênah ka awm si a,’ tih hi sipaihote LALPA thuchhuak a ni: 5 ‘Aigupta ram aṭanga in lo chhuah laia thu ka thlunpui che u ang khân in zîngah ka thlarau a la chêng reng a ni, hlau suh u.’ 6 Sipaihote LALPA chuan heti hian a ti si a, ‘Vawi khat chu vân leh lei leh tuifinriat leh khawmualte hi rei lo te ka la tinghîng leh ang. 7 Hnam tinrêng ka tinghîng ang a, hnam tinrêng thil duh zâwngte chu a lo thleng ang a, he in hi ropuinain ka tikhat ang,’ sipaihote LALPA chuan a ti. 8 ‘Tangkarua hi ka ta a ni a, rangkachak hi ka ta a ni,’ tih hi sipaihote LALPA thuchhuak a ni. 9 ‘He in hnuhnûng zâwk ropuina hi a hmasa ai khân a nasa zâwk ang,’ sipaihote LALPA chuan a ti. ‘Tin, he hmunah hian remna ka thlen ang,’ tih hi sipaihote LALPA thuchhuak a ni.”
Zâwlneiin puithiamte thu a zâwt
10 Daria lal kum hnihna, thla kuana, ni sawmhnih leh ni linaah chuan zâwlnei Hagaia kutah LALPA thu hetiang hian a lo thleng a. 11 Sipaihote LALPA chuan heti hian a ti: “Puithiamte chu heti hian dân zâwt teh, 12 Tuin emaw a kawrfual hmâwrah sa thianghlim fûn sela, a kawrfual hmâwr chuan chhang emaw, thil chhum kawi emaw, uain emaw, hriak emaw, ei tûr rêng rêng emaw lo khawih ta sela, a thianghlim ang em?” tiin. Puithiamte chuan, “Thianghlim lo vang,” tiin an chhâng a. 13 Tin, Hagaia chuan, “Mitthi ruang khawih avânga mi bawrhbângin hêng thil a enga pawh hi lo khawih ta sela, a bawrhbâng ang em?” a ti a. Puithiamte chuan, “Bawrhbâng ang,” tiin an chhâng a. 14 Tin, Hagaia chuan heti hian a chhâng ta a: “He mite hi chutiang tak chu an ni a, he hnam hi chutiang tak chuan ka hmaah an awm, tih hi LALPA thuchhuak a ni; an kutchhuak tinrêng pawh chutiang bawk chu a ni a, chuta an thil hlan pawh chu a thianghlim lo a ni.
LALPAN malsâwm a tiam
15 “Tûn aṭangin nakin hnu thlengin LALPA biak inah lung in chherchhuan hma, tûn hma lam kha ngaihtuah ang che u: 16 khâng hun lai zawng zawng khân, buh tehkhâwng sawmhnih tling âwm tak chhûn khâwmnaa mi a lo kalin, sâwm chauh a lo tling a; uain sâwrna hmuna bûr sawmnga thâl chhuah tuma a lo kalin, sawmhnih chauh a lo tling ṭhîn. 17 In thawh chhuah zawng zawngah rona te, ngêtna te leh rial tein ka hrem che u a; nimahsela, ka lam in hawi chuang lo, tih hi LALPA thuchhuak a ni. 18 He thla kuana, ni sawmhnih leh ni lina, vawiin aṭang hian nakin hnu thlengin, tûn hma lam kha ngaihtuah ang che u, LALPA biak in lung phûm ni aṭang khân ngaihtuah rawh u. 19 A chi chu buh inah a la awm em ni? Grêp hrui te, theipui kûng te, pawmgranet te leh olive thing te chu a la rah lo; vawiin aṭang hian mal ka sâwm ang che u.”
Zerubabela hnêna LALPA thutiam
20 Tin, LALPA thu chu, chumi thla, ni sawmhnih leh ni linaah chuan Hagaia hnênah a lo thleng nawn leh a: 21 “Hetiang hian Judai ram awptu Zerubabela hnênah chuan sawi rawh: ‘Kei chuan lei leh vân ka la tinghîng ang; ram lalṭhutphahte chu ka paih thla ang a, hnamte ram chakna chu ka tichhia ang; 22 tawlailîrte leh a chunga chuangte chu ka titlu ang a, sakawrte leh a chunga chuangte chu; mi tin mahni unaute khandaihin an tlu ang. 23 Chumi niah chuan, aw Zerubabel ka chhiahhlawh, Sealtiela fapa, ka chelh ang che,’ sipaihote LALPA thuchhuak chuan a ti, ‘Tin, hming nemna zungbun angah ka siam bawk ang che, ka lo thlang tawh si che a,’ sipaihote LALPA thuchhuak chuan a ti,” tiin.
LALPAN a mite a lam hawi tûrin a sâwm
1 Daria lal kum hnihna, thla riatnaah chuan Idova fa, Barakia fapa zâwlnei Zakaria hnênah chuan LALPA thu a lo thleng a: 2 “LALPA chu in pate chungah khân a lungni lo êm êm a ni. 3 Chuvângin, heti hian an hnênah va sawi rawh: Sipaihote LALPA chuan heti hian a ti e, Ka lam lo hawi ula, kei pawh in lam ka lo hawi ang, Tih hi sipaihote LALPA thuchhuak a ni. 4 Zâwlnei hmasaten, Sipaihote LALPA chuan, In awm dân sual kha tûnah rawn hawisan ula, In thil tihsual chu rawn hawisan rawh u, a ti e, Tia in pate an hrilh pawha ngaithla lova, Bengkhawn lote ang khân awm suh u,” Tih hi LALPA thuchhuak a ni. 5 “In pate chu khawiah nge? Zâwlneite pawh chu an nung kumkhua ta em ni? 6 Ka thu leh ka thuruatte, ka chhiahhlawh zâwlneite hnêna Ka pêk khân, in pate chu a nang ta mai pawh a ni lâwm ni? Tichuan, an inlamlêt a, ‘Sipaihote LALPA chuan, Kan chungchânga tih a tum ṭhin angin Kan awm dân ang zêl leh kan thiltih ang zêlin, Kan lakah a ti ta a ni,’ an tih kha,” tiin.
Inlârnaa zâwlnei sakawr hmuh
7 Daria kum hnihna, thla sâwm leh thla khatna, chu chu Sebat thla a ni a, ni sawmhnih leh ni linaah chuan Idova fa Barakia fapa, zâwlnei Zakaria hnênah chuan LALPA thu a lo thleng a; 8 zânah chuan sakawr sen chunga mi pakhat chuang ka hmu a, ruama lenhmui thing zîngah hian a ding a; tin, a hnungah chuan sakawr, a sen te, a buang te, a vârte an awm a. 9 Tah chuan kei chuan, “Aw ka lalpa, hêng hi eng nge ni?” ka ti a. Vântirhkoh mi betu chuan ka hnênah, “Hêng hi eng nge an nih keiman ka entîr ang che,” a ti a. 10 Tin, mi, lenhmui thing zînga ding khân a chhâng a, “Hêng hi LALPAN lei zawng zawng fang chhuak tûra a tirhte chu an nih hi,” a ti a. 11 Tin, anni chuan LALPA vântirhkoh lenhmui thing zînga ding chu an chhâng a, “Lei zawng zawng chu kan fang chhuak tawh a, ngai rawh, lei chu a awm hle hle a, a awm mai mai a ni,” an ti a. 12 Chutah LALPA vântirhkoh chuan a chhâng a, “Aw sipaihote LALPA, Jerusalem leh Juda khawpui chunga he kum sawmsarih i thinurnate hi eng chen nge i khawngaih loh vang le?” a ti a. 13 Tin, LALPA chuan, vântirhkoh, thu ṭha tak, thu thlamuanawm taka mi betu chu a chhâng ta a. 14 Chutichuan, vântirhkoh mi betu chuan ka hnênah, “Heti hian va au rawh,” a ti a: “Sipaihote LALPA chuan heti hian a ti a ni: ‘Jerusalem leh Zion hi vei takmeuhvin ka vei a. 15 Tin, hnam nuam leng mai maite lakah chuan ka lungni lo êm êm a ni; Ka lungni lo deuh chauh a ni na a, Anmahni tâna thil ṭha lo chu an tizual ta a ni.’ 16 Chuvângin, LALPA chuan heti hian a ti a ni: ‘Zahngaihna nên Jerusalem lam ka hawi leh mêk a, Tah chuan ka in chu sak a ni ang,’ Tih hi sipaihote LALPA thuchhuak a ni; ‘Tin, Jerusalem chungah chuan tehna zamin a la awm ang,’ tiin. 17 Heti hian sipaihote LALPA chuan a ti e: ‘Ka khawpuite chu hmuingîlna avângin an vul leh ang a, LALPA chuan Zion chu a thlamuan leh ang a, Jerusalem chu a thlang leh ang,’ Tiin va au leh rawh,” a ti a.
Inlârnaa kî hmuh thu
18 Tin, ka mit ka lên chho va, ka han en a, kî pali ka hmu a. 19 Vântirhkoh mi betu hnênah chuan, “Hêng hi eng nge ni?” ka ti a. Tin, ani chuan, “Hêng hi Juda te, Israel te, Jerusalem te tidarhtu kî an nih hi,” tiin mi chhâng a. 20 Tin, LALPA chuan thirdêng pali mi entîr a. 21 Tichuan, kei chuan, “Hêng hi eng rawn ti tûr nge an nih?” ka ti a. Ani chuan, “Sâwng saw tu mah dâk chhuak ngam rêng awm tawh lo khawpa Juda-te tidarhtu kî chu an ni a; mahse, hêng hi anmahni tizâm tûr leh, Juda ram tidarh tûra an laka an ki rawn hmangtu hnamte kî chu paih thla tûra lo kal an nih hi,” tiin a sawi a.
Tehna hrui keng
1 Tin, ka mit ka lên chho va, ka han en a, mi pakhat, a kuta tehna keng hi ka hmu a. 2 Tichuan, kei chuan, “Khawiah nge i kal dâwn?” ka ti a. Ani chuan ka hnênah, “Jerusalem hi a vâng eng tia nge a niha, a dung eng chen nge a nih hre tûra teh tûrin,” a ti a. 3 Tin, ngai teh, vântirhkoh mi betu kha a kal chhuak ta a; tin, vântirhkoh dang amah tâwk tûrin a lo chhuak bawk a, 4 a hnênah, “Tlân la, he tlangvâl hnênah hian, ‘Jerusalem hi a mi tam vâng leh ran rual tam vângin Khaw hungna nei lo anga luahin a awm dâwn a ni. 5 Kei hi a vêlah mei kulh ka ni ang a, A laia ropui chu ka ni dâwn bawk si a,’ Tih hi LALPA thuchhuak a ni,” tiin hrilh rawh.
Sal tângte haw leh tûr thu
6 “Hawh teh u, hawh teh u, hmâr ram ata tlân chhuak rawh u,” Tih hi LALPA thuchhuak a ni. “Vân thli pali ang maiin ka tidarh tawh si che u a,” Tih hi LALPA thuchhuak a ni. 7 “Hawh teh, Zion, Babulon fanu zînga la chêng, relh bo rawh.” 8 Sipaihote LALPA chuan heti hian a ti si a: “A ropuina chuan nangmahni rawktu che u hnamte hnênah min tîr a ni; Nangmahni khawihtu che u chuan a mitnautê an khawih a ni mai. 9 Ngai rawh u, ka kut ka thin khum dâwn si a, Anmahni rawngbâwltute râllâk an ni mai ang. Tichuan, sipaihote LALPA chuan mi tîr a ni tih in la hre dâwn a ni. 10 Zion fanu, hlimin zai rawh! Ngai rawh, ka lo kal e, I hnênah ka chêng dâwn si a,” tih hi LALPA thuchhuak a ni. 11 “Chumi niah chuan hnam tam takin LALPA chu an rawn zawm ang a, ka mite an ni ang; Tin, i hnênah chuan ka chêng ang a, Tichuan, sipaihote LALPA chuan i hnênah mi tîr a ni, tih i hre tawh ang. 12 Tin, LALPA chuan ram thianghlima a chanvo atân Juda chu a rochung ang a, Jerusalem chu a la thlang ang. 13 Mi zawng zawngte u, LALPA hmaah chuan ngawi ṭhiap rawh u; Ani chu a hmun thianghlim ata a lo tho tawh si a, Tiin va sawi rawh,” a ti a.
Inlârnaa puithiam lalber hmun
1 Tin, puithiam lalber Josua, LALPA vântirhkoh hmaa ding leh a dodâltu tûr Setana ama ding lampanga ding chu mi entîr a. 2 Tin, LALPA chuan Setana hnênah, “Aw Setan, LALPA chuan hau che rawh se! A ni, LALPA, Jerusalem thlangtu chuan hau che rawh se! He mi hi thingthu, mei ata phih chhuah chu a ni lo vem ni?” a ti a. 3 Tichuan, Josua chu silhfên bawlhhlawh taka inthuamin vântirhkoh hmaah chuan a lo ding a. 4 Tin, a hmaa dingte chu a han bia a, “A silhfên bawlhhlawh kha hlihsak rawh u,” tiin. Tin, ama hnênah chuan, “Ngai teh, i khawlohnate chu ka tihbosak ta chia; tichuan, silhfên hlu takin ka thuam ang che,” a ti a. 5 Tin, kei chuan, “Lukhum mawi tak khumtîr rawh se,” ka han ti a. Tichuan, lukhum mawi fe chu an khumtîr ta a, silhfênin an thuam a; tin, LALPA vântirhkoh chu a kiangah a ding a. 6 Tin, LALPA vântirhkoh chuan Josua hnênah, 7 “Sipaihote LALPA chuan heti hian a ti a ni: ‘Ka kawngte zawh zêla, ka thu tukte i tih chuan, Ka in chhûng ro i rêl ang a, Ka rorêl hmunte chu i vawng bawk ang a, Hêng dinghote zîngah hian tel ve theihna tûr ka pe ang che. 8 Tûnah ngai teh, aw Josua, puithiam lalber, Nang leh i ṭhiante i hmaa ṭhute nên ngai rawh u, Thil ṭha thleng entîr lâwkna an ni si a; Ngai teh u, ka chhiahhlawh Chawrno chu ka rawn chhuah dâwn si a. 9 Ngai teh mah u, Josua hmaa ka lung dah chu; Lung pakhatah chuan mit pasarih a awm a ni. Ngai teh u, a chungah chuan thil ziakte ka ziak ang a, Chu ram khawlohnate chu ni khat thilah ka la bo vek mai ang,’ Tih hi sipaihote LALPA thuchhuak a ni. 10 ‘Chumi niah chuan mi tinin grêp hrui hnuaiah te leh, Theipui hnuaiah te mahni ṭhenawmte in sâwm ṭheuh tawh ang,’ Tih hi sipaihote LALPA thuchhuak a ni,” tiin a tiam ta a.
Khâwnvâr dahna a hmu
1 Tin, vântirhkoh mi betu kha a lo kal leh a, mi muhîl lai tihharh ang mai hian mi rawn tiharh a. 2 Ka hnênah chuan, “Eng nge i hmuh le?” a ti a. Tin, kei chuan, “Rangkachak khâwnvâr dahna, a chhîpa berhbu leh chumia khâwnvâr pasarihte nên; tin, a chhîpa khâwnvâr dâwt pasarihte nei ṭheuhte leh 3 olive thing pahnih, berhbu ding lama pakhat, vei lama pakhat awm ka hmu,” ka ti a. 4 Tin, vântirhkoh mi betu hnênah chuan, “Hêng hi eng nge ni, ka pu?” ka han ti leh ve a. 5 Tin, vântirhkoh mi betu chuan mi chhâng a, ka hnênah, “Hêng hi eng nge an nih i hre lo maw?” a ti a. Kei chuan, “Hre lo, ka pu,” ka ti a.
Zerubabela hnêna Pathian thutiam
6 Chutah ani chuan ka hnênah, “Hêng hi Jerubabela hnêna LALPA thu chu a ni a: ‘Chakna ni lovin, thiltihtheihna ni hek lovin, Ka thlarau zâwkin le,’ tiin sipaihote LALPA chuan a ti e. 7 ‘Tu nge i nih, aw tlâng lianpui?’ Jerubabela hmaah chuan phaizâwlah i chang mai ang; Ani chuan a lung pawimawh ber chu A tâna malsâwmna nên, hlimna au aw nên a rawn thlen ang,” Tiin mi chhâng ta a. 8 Chu lo pawh chu LALPA thu ka hnênah a lo thleng leh a: 9 “Jerubabela kut chuan he in lungphûmte hi a phûm ta a, Ama kut bawkin a puitlin ang a; Tichuan, sipaihote LALPA chuan in hnênah mi tîr a ni tih in hre tawh ang. 10 Thil tênau hun te hi tuin nge hmusit ni? Hlim takin an awm ang a, Jerubabela kuta dâr mûm khai chu an hmu dâwn si a; Hêng pasarihte ngei hi LALPA mit chu an ni bawk a, Lei pum pui chungah hian an vâk vêl ṭhîn,” tiin. 11 Tin, kei chuan ka chhâng a, a hnênah, “Heng olive thing pahnih, khâwnvâr dahna ding lam leh vei lama mi hi eng nge ni?” ka ti a. 12 Tin, ka han chhâng nawn leh a, a hnênah, “Rangkachak dâwt pahnih kianga hêng olive zâr pahnih rangkachak hriak lo chhuahnate hi eng nge ni?” ka ti a. 13 Tin, ani chuan mi chhâng a, “Hêng hi eng nge ni dâwn tih i hre lo maw?” min ti a. Tin, kei chuan, “Hre lo ve, ka pu,” ka ti a. 14 Tin, anin, “Hêng fapa pahnih, hriak ngah takte hi, lei pum pui LALPA kianga dingte chu an nih hi,” a ti a.
Inlârnaa lehkhabu zial thlâwk lai
1 Tah chuan ka mit ka han lên chho leh a, ka han en a, lehkhabu zial thlâwk duai duai hi ka hmu a. 2 Tin, ani chuan ka hnênah, “Eng nge i hmuh le?” a ti a. Kei chuan ka chhâng a, “Lehkhabu zial thlâwk duai duai ka hmu; a dung chu tawng sawmhnih a ni a, a vâng chu tawng sâwm a ni,” ka ti a. 3 Tin, ani chuan ka hnênah, “Hei hi ram pum pui chunga ânchhe kal chhuak chu a nih hi; a pang khing khat thu ang zêlin rûkru apiang chu then fai an ni dâwn si a; a lehlam thu ang zêlin chhechham apiang pawh then fai an ni bawk ang. 4 ‘Ka kal chhuahtîr ang a, rûkru inah leh ka hming chhâla dik lo taka chhechhamtu inah te chuan a lût ang a, an in chhûngah chuan a awm reng ang a, a thingphel te, a lungte chawpin a tiral vek ang,’ tih hi sipaihote LALPA thuchhuak a ni,” a ti a.
Bâwm chhûnga hmeichhia
5 Tin, vântirhkoh mi betu chu a kal chhuak a, ka hnênah, “Tûnah i mit han lên chho la, kal chhuak ta kha eng nge ni en teh,” mi ti a. 6 Tin, kei chuan, “Eng nge ni?” ka han ti a. Ani chuan, “Hei hi a ni bâwm kal chhuak ta kha,” a ti a. Amah vêkin, “Hei hi ram pum puia an khawlohna chu a ni,” a ti a. 7 Suan talent khata rita chhin chu a hawng a, bâwm chhûngah chuan hmeichhe pakhat a ṭhu a. 8 Tin, ani chuan, “Hei hi Suaksuali chu a ni,” a ti a, bâwm chhûngah chuan a nem lût a; tin, suan rit tak chuan a chhîn ta a. 9 Tah chuan ka mit chu ka han lên chho va, ka han en a, hmeichhe pahnih lo kal chhuak ka hmu a, an thlaah chuan thli a awm a; thla chu vacha thla ang hi an nei a ni. Tin, bâwm chu lei leh vân kârah an chawi kâng ta a. 10 Tin, kei chuan vântirhkoh mi betu hnênah chuan, “Bâwm chu hêng mite hian khawi lamah nge an kalpui dâwn?” ka ti a. 11 Ani chuan ka hnênah, “Sinar rama a tâna in sakna tûr lamah chuan; tin, in chu peih a nih hun chuan chutah chuan ama hmun ngeiah an dah ang,” a ti a.
Tawlailîr pali
1 Tin, kei chuan ka mit ka han lên chho leh a, ka han en a, tlâng pahnih kâra sakawrtawlailîr pali lo chhuak hi ka hmu a, tlângte chu dâr hlâwm an ni a. 2 Tawlailîr pakhatnaa mi chu sakawr sen an ni a, tawlailîr pahnihnaa mi chu sakawr dum an ni a, 3 tawlailîr pathumnaa mi chu sakawr vâr an ni a, tawlailîr palinaa mi chu sakawr hmârsai, chak tak si hi an ni a. 4 Tah chuan ka chhâng a, vântirhkoh mi betu hnênah chuan, “Hêng hi eng nge ni, ka pu?” ka ti a. 5 Tin, vântirhkoh chuan ka hnênah, “Hêng hi vân thli pali, leilung zawng zawng LALPA hmaa ding ṭhîn, kal chhuakte chu an nih hi. 6 Sakawr dum awmna tawlailîr chu hmâr lamah a kal chhuak a, a vâr awmna chuan a dawt a; tin, a hmârsai awmna chu chhim ram lamah a kal chhuak a,” a ti a. 7 Tin, a sente chu an han ding chhuak a, kal chhuaha, leilung awm dân endik an nghâkhlel hle a. Chutah, vântirhkoh chuan, “Kal ta ula, leilung awm dân va endik rawh u,” a ti a. Chutichuan, lei chung zawng zawngah an vâk vêl ta a ni. 8 Tichuan, ka hnênah, “Ngai rawh, hmâr lama kalte khân hmâr ramah chuan ka rilru an tihahdam a ni,” tiin mi au va.
Puithiam lalber Josua lallukhum khumtîr
9 Tin, LALPA thu chu ka hnênah a lo thleng a. 10 Sal tâng Heldaia te, Tobija te, Jedaia te laka thil chu la la, chumi ni vêkah chuan lo kal la, Babulon aṭanga an rawn pan Zephania fapa Josia inah chuan lût rawh. 11 A ni, an lak ata tangkarua leh rangkachakte la la, lallukhumte siam la, Jehozadaka fapa Josua, puithiam lal lûah chuan khumtîr rawh; 12 tin, a hnênah chuan, “Heti hian sipaihote LALPA chuan a ti a ni: Ngai rawh, mi a hming Chawrno chu, Ama hmun ata a lo ṭo chhuak ang a, LALPA biak in chu a rawn sa ang; 13 LALPA biak in ngei chu a rawn sa dâwn a ni; Ropuina chu a khum ang a, A lalṭhutthlênga ṭhuin ro a rêl ang; A lalṭhutthlêngah chuan puithiam a ni ang a, Remna ro chu an pahniha kârah a awm ang.” 14 “Tin, lallukhumte chu Helema te, Tobija te, Jedaia te, Zephania fapa Hena te tân LALPA inah hriat rengna tûr a ni ang. 15 Tin, hla taka awmte kha an kal ang a, LALPA in chu an rawn sa ve ang a, sipaihote LALPA chuan in hnênah mi tîr a ni tih in la hre dâwn a ni. Tin, LALPA in Pathian aw chu ngun taka in bengkhawn ṭhin chuan, hêng thu hi a lo la thleng ngei ang a ti, tiin sawi rawh,” a ti a.
LALPAN ti tak tak lova chaw nghei a dem
1 Tin, heti hi a ni a, Lal Daria kum lina, thla kuana, Kislev ni li ni takah chuan Zakaria hnênah LALPA thu chu a lo thleng a. 2 Tin, Bethel mite chuan Sarezera leh Regemeleka leh an mite an rawn tîr a, LALPA khawngaihna chu an ngên a, 3 sipaihote LALPA ina puithiamte hnênah leh zâwlneite hnênah chuan an sawi a: “Tûn hma kum tam fea ka lo tih tawh ṭhin angin mahni intihrangin thla nganaah chuan ka ṭap ṭhîn em ni ang?” tiin. 4 Tah chuan sipaihote LALPA thu chu ka hnênah a lo thleng a, 5 “Rama mi zawng zawngte leh puithiamte hnênah chuan, ‘Hêng kum sawmsarih chhûng meuh pawha thla ngana leh thla sarihnaa chaw in ngheia in lungngaih ṭhinte khân, ka hminga, keima hming meuhva chaw nghei em in nih? 6 Tin, in eia, in in pawhin nangmahni tân in ei a, in in mai a ni lâwm ni? 7 Jerusalem leh a vêla khawpuite miin an luah khaha an hmuingîl êm êm lai leh, chhim lam leh ram phaite pawh miin an luah khah laia zâwlnei hmasate hmanga LALPA thusawite kha, in lo hre tawh lâwm ni?’ tiin sawi rawh,” a ti a.
Sal tân chu thu awih loh vâng a ni
8 Tin, LALPA thu chu Zakaria hnênah a lo thleng a, 9 “Sipaihote LALPA chuan heti hian a sawi a ni: ‘Rorêlna dik takin titlu ula, Mi tinin an unaute chungah zahngaihna leh Khawngaihna chhuah rawh se. 10 Hmeithai emaw, fahrah emaw, ram dang mi emaw, Mi rethei emaw hnehchhiah hek suh u. Tu mah rêngin in thinlungah In unaute tâna ṭha lo tûr chu suangtuah suh u,’ tiin. 11 Mahse, an ngaithla duh lo va, An tukkhumchhah an chhawn a, An hriat loh nân an beng an chhu chhêt a. 12 A ni, sipaihote LALPA chuan Zâwlnei hmasate kuta a thuthawn leh dân thute chu An ngaihthlâk loh nân An thinlungte chu lung chang tak angin an tisak ta a; Chuvângin, sipaihote LALPA lak ata Thinurna nasa tak a lo thleng ta a ni. 13 Tin, heti hi a lo ni a, anmahni a auh an ngaithla duh lo va, ‘Chutiang bawkin an auvin ka ngaithla bîk lo vang,’ Sipaihote LALPA chuan a ti a. 14 An mi hriat ngai loh zîngah ṭhâwngaleivirin anmahni ka tidarh zâwk dâwn a ni. Chutiangin an hnuah chuan ram chu tihchhiat a ni tawh ang a, Tu mah an veivâk tawh lo vang; Ram nuam tak chu an tichhe dâwn si a.”
LALPAN Jerusalem tundin leh a tiam
1 Tin, sipaihote LALPA thu chu ka hnênah a lo thleng leh a, 2 “Heti hian sipaihote LALPA chuan a ti a ni: ‘Zion chu vei takmeuhvin ka vei a ni, A chunga thinur khawpin a nia ka thîk ni,’ tiin. 3 LALPA chuan heti hian a ti: ‘Zion lam ka lo hawi leh ta a, Jerusalem laiah ka chêng ang. Jerusalem chu Thudik Khawpui tih a ni tawh ang a, Sipaihote LALPA tlâng chu Tlâng Thianghlim tih a ni bawk ang.’ 4 Sipaihote LALPA chuan heti hian a ti a ni: ‘Jerusalem kawtthlêrahte chuan pitarte leh putarte, An kum tam avânga tiang hawl boh boh tawhte pawh chu an la chêng ang. 5 Tin, kawtthlêra infiamin, khawpui kawtthlêrte chu Hmeichhe naupang leh mipa naupangin An la khat nuaih nuaih ang.’ 6 Sipaihote LALPA chuan heti hian a ti a ni: ‘Chûng niahte chuan hêng mi la awm chhunte Mithmuhah hian a mak a nih chuan, Keia mit hmuhah a mak ve kher dâwn em ni?’ Tih hi sipaihote LALPA thuchhuak a ni. 7 Sipaihote LALPA chuan heti hian a ti a ni: ‘Ngai rawh u, ka mite chu chhak lam ram ata te, Thlang lam ram ata te ka chhanchhuak ang a; 8 Tin, ka rawn hruai ang a, Jerusalem chhûngah an chêng ang; Thu dik leh felnaah ka mite an ni ang a, Kei pawh an Pathian ka ni ang.’ 9 Sipaihote LALPA chuan heti hian a ti a ni: ‘Tempul ngei chu sak a nih theih nâna Sipaihote LALPA in lungphûm phûm nia Zâwlneite kâa thuchhuak, nangni tûna ngaithlatu hian In kutte tikhauh rawh u. 10 Tûn hmate khân mihring tân inhlawhna a awm lo va, Ran rawihna tûr pawh a awm hek lo; Hmêlma avângin a lût a chhuak tân Muanna eng mah a awm hek lo; Mi zawng zawng an ṭhenawmte nên ka indotîr a ni si a. 11 Tûnah erawh chuan, hêng mi la awm chhunte hnênah hian Tûn hma ang chu ka ni tawh lo vang,’ Tih hi sipaihote LALPA thuchhuak a ni. 12 ‘Remna chi a awm dâwn tawh si a, Grêp hruite chuan rah a chhuah ang a, Leiin hlâwkna a chhuah bawk ang a, Vânin daifîm a tlâktîr ang; Hêng mi la awm chhunte hi chûng chu ka rochuntîr dâwn a ni. 13 Tin, heti hi a ni ang a, Hnam dangte zînga ânchhe dawng in nih ṭhin avângin, Aw Juda chhûngte leh Israel chhûngte u, Ka chhanchhuak ang che u a, Malsâwmin in la awm ang. Hlau suh ula, In kut erawh chu khauh rawh se.’ 14 Hetiang hian sipaihote LALPA chuan a ti si a: ‘In thlahtuten mi tihthinur laia In chunga thil ṭha lo tih ka ngaihtuah khân, Ka inlamlêt lo va; 15 Tûnah hi chuan Jerusalem leh Juda chhûngte tân, Thil ṭha ka ngaihtuah leh thung dâwn a ni. Hlau suh u,’ sipaihote LALPA chuan a ti. 16 Hêng hi in thiltih tûr chu a ni ang: Mi tinin mahni ṭhenawm hnênah thu dik tak sawi ṭheuh ula, In kawngka bulah thu dik leh remna ro rêl rawh u. 17 Tu mah rêngin in thinlungah in ṭhenawmte tâna ṭha lo tûr chu suangtuah suh ula, Dâwta chhechham chu pawm suh u. Hêng zawng zawng hi ka thil huatte chu an ni,” Tih hi sipaihote LALPA thuchhuak a ni si a. 18 Tin, sipaihote LALPA thu chu ka hnênah a lo thleng a, 19 “Heti hian sipaihote LALPA chuan a ti a ni: ‘Thla lina chaw nghei leh, thla ngana chaw nghei leh, thla sarihna chaw nghei leh thla sâwmna chaw ngheite chu Juda chhûngte tân chuan hlimna leh lâwmna, ruai hlimawm takah a chang ang a; chuvângin, thu dik leh remna chu ngaina rawh u,’ a ti a. 20 “Hetiangin sipaihote LALPA chuan a ti a ni: ‘Heti hi a la ni ang a, Mipuite leh khawpui tam taka mite chu an lo kal ang: 21 Tin, khawpui pakhat luahtute chu hmun dangah an kal ang a, “Hawh u, LALPA duhsakna ngên tûrin i kal thuai ang u khai, Sipaihote LALPA chu i zawng ang u. Kei pawh ka kal ve ang,” an ti ang a. 22 A ni, LALPA zawng tûr leh LALPA duhsakna ngên tûrin, Mipui tam tak leh hnam chak takte chu Jerusalem-ah an lo kal ang,’ a ti a. 23 Sipaihote LALPA chuan heti hian a ti a ni: ‘Chûng niahte chuan heti hi a la ni ang a, Mi sâwm, hnam ze tinrêng aṭanga lo chhuakte chuan, Juda mi pakhat fênfualah an vuanin an chelh ang a, “I hnênah Pathian a awm tih kan hriat avângin I hnênah kan kal ve dâwn e,” ’ an ti ang,” a ti a.
Ṭhenawm hnamte hremna tûr
1 Hadrak ram laka LALPA thu phurrit leh Damaska chunga innghat tûr chu: LALPA mit chu mite chungah leh Israel hnam zawng zawng chungah a fu si a. 2 Chumi rîtu Hamath khaw chungah pawh, Tura leh Sidon pawh, an fin êm avângin. 3 Tin, Tura chuan kulhpui a insiam a, Tangkaruate chu vaivut ang maiin a chhêk a, Rangkachak ṭha mi chu kawtthlêra chirhdiak ang maiin A chhêk a ni. 4 Ngai rawh u, LALPA chuan a titlaran ang a, Tuipuia a chakna a tichhia ang a, Meia hâl faiin a awm ang. 5 Askelon chuan a hmu ang a, a hlau vang; Gaza pawhin a hmu ang a, nâ a ti êm êm ang; Tin, Ekron chu a beiseina avâng chuan a zak ang. Lalber chu Gaza ata a boral ang a, Askelon chu luahin a awm lo vang. 6 Asdod-ah chuan falakho an chêng ang a, Philistia mite chapona chu ka tiboral ang. 7 An kâ ata an thisen ka la bo vang a, An ha kâr aṭangin an tenawmna ka la bo vang. Tin, anni pawh kan Pathian tâna awm chhun an ni ang a, Judai ramah chuan hotute pawh an la ni ang a, Ekron mite chu Jebus mite ang an la ni ang. 8 Tin, ka in chu sipai rual lakah ka vêng ang a, Tu mah an kal tlangin an lêt vêl lo vang. Hnehchhiahtu tu mah an kal tlang tawh ngai lo vang, Ka mitin ka hmu tawh si a.
Lal lo kal tûr
9 Aw Zion fanu, nasa takin hlim la; Aw Jerusalem fanu, au chhuak rawh! Ngai rawh, i Lal i hnênah a lo kal e; Mi fel a ni a, hnehtu a ni; Inngaitlâwm takin sabengtung chungah a chuang a, Sabengtungno chung ngeiah. 10 Tin, Ephraim lak ata tawlailîr leh Jerusalem lak ata sakawr chu ka tiboral ang a; Indona thal ngul chu ka tan ang. Hnamte hnênah chuan remna thu a sawi ang a, A rorêlna chu tuipui ata tuipui thlengin, Luipui aṭanga kâwlkil thlengin a ni ang.
Pathianin a mite a tungding leh
11 Nangma thu-ah pawh, i thuthlung thisen avângin, Khuarkhurum tui awm lohna ata i mi tângte chu Ka rawn tîr chhuak ang. 12 Beiseina nei mi tângte u, kulhpuiah chuan kîr ula, Vawiin ngeiah hian a leh hnihin Ka pe dâwn che u tih ka puang a ni. 13 Juda chu ka thal ngul atân ka kuai a, Thal ngulah chuan Ephraim ka vuah ta a ni. Aw Zion, Grik fate lakah i fate chu ka chawk tho vang a, Mi chak tak khandaih angah ka siam ang che. 14 Tin, LALPA chu an chungah a lang ang a, A thal chu kâwlphe angin a chhuak ang. Tin, LALPA PATHIAN chuan tawtawrâwt a hâm ang a, Chhim lam ṭhâwngaleivir nên a kal ang. 15 Sipaihote LALPA chuan anmahni a hum ang a; Anni chuan an hmêlmate chu an ei zo vang a, Virvawm lungte pawh chu an rap bet tawh ang. An in ang a, uain rui ang maiin an bengchheng ang. Berhbu khat ang maiin an khat ang a, Maichâm kil ang maiin. 16 Tin, LALPA an Pathian chuan a ran rualte angin Chûng niah chuan anmahni a chhanhim ang; Lallukhuma lunghlute angin he ram chungah hian a chawisâng dâwn si a. 17 A ṭhatna te chu a nasain, a mawina te chu a va nasa êm! Buhbâlte chuan tlangvâlte a tihlawhtling ang a, Uain thar chuan nulate a tihlawhtling dâwn si a.
LALPAN a mite a chhanchhuak dâwn
1 Ruah hnuhnûng hunah hian LALPA chu ruah dîl rawh u; LALPA, kâwl tiphetu ngei chu. Tin, anin lova hlobet tinrêngte tân Ruahpuivânâwn a sûrtîr ang. 2 Milem pathian chuan engmahlo mai a sawi a, Aisânthiamte thil hmuh chu dâwt a ni si a; Mumang dik lote an sawi a, Mi an thlamuan thlâwn a; Chuvângin, berâm rual angin mahni kawng kawng an hawi a, Berâmpu a awm loh avângin hrehawm an tuar a. 3 “Berâmpute chungah chuan ka thin a rim êm êm a, Kêlpate chu ka hrem ang. Sipaihote LALPA chuan a ran rual, Juda chhûngte chu a rawn kan ang a, Indonaa sakawr ṭha tak angin a siam dâwn si a. 4 A lak ata a kila lung te, puan in kilhna thîr te, indona thal ngul te, Rorêltu te an lo chhuak ho dâwn a ni. 5 Tin, mi chak tak ang an lo ni ang a, Indona kawtthlêr chirhdiakah chuan an hmêlmate an rap bet ang. LALPA chu an hnêna a awm avângin an bei nasa mai ang a, Sakawr chung chuangte chu an timualpho dâwn a ni. 6 Tin, Juda chhûngte chu ka tichak ang a, Josefa chhûngte chu ka chhanhim ang. Ka hruai kîr leh ang, anni chu ka lainat si a. Tin, ka paih thlâk loh ang mai an la ni ang a; Kei hi LALPA an Pathian chu ka ni si a, Anmahni ka ngaithla tawh ang. 7 Tin, Ephraim mite chu mi chak tak ang an ni ang a, Uain tihlâwm angin an thinlung a lâwm ang. A ni, an fate chuan an hmu ang a, an hlim ang a; LALPA-ah chuan an thinlung a lâwm ang. 8 Ka faifûk ang a, anmahni ka ko khâwm ang, Anni chu ka tlan tawh si a; An lo pun tawh ang ngeiin an pung zêl ang. 9 Ram dang dangah ka phun darh a, Ram hla takah pawh min hre reng ang; Tin, an fate nên an awm ang a, an lo kîr leh ang. 10 Aigupta ram ata pawh ka rawn hruai kîr leh ang a, Assuria ram aṭangin ka khâwm chhuak ang. Tin, Gilead ram leh Lebanon-ah chuan ka rawn hruai lût ang a, An tân hmun a awm sêng lo hial ang. 11 Tin, tihduhdahna tuipui chu a kal tlang ang a, Tuifâwnte chu a vua ang a: Nile luipui thûkte chu a kang ang. Assuria chapona chu tihtlâwm a ni ang a, Aigupta ram lal tiang chu a bo daih ang. 12 Tin, LALPA-ah chuan anmahni ka tichak ang a, Ama hmingin an chhukin an chho vang,” Tih chu LALPA thuchhuak a ni.
Mi râwngho chhiat tûr thu
1 I kawngte hawng rawh, aw Lebanon, I sidarte meiin a kan fai theih nân. 2 Aw fâr thing, chiau vak vak rawh, Sidar chu a tlûk tawh avângin, A ṭha ṭhate chu tihchhiat a ni tawh si a. Basan sasuate u, chiau vak vak rawh u, Ngaw dur puite pawh an ṭhiat zo tawh si a. 3 Berâmpute chiau thâwm te tak chu! An ropuina te a chhe zo ta si. Sakeibaknei hâhum thâwm te tak pawh chu! Jordan ropuina chu a chuai ta si. 4 LALPA ka Pathian chuan heti hian a sawi a ni: “Ran rual talh tûrte chu enkawl rawh. 5 A neitute chuan an talh ṭhîn a, Thiam lovah an inruat si lo; Anmahni hralhtute chuan, ‘LALPA chu fakin awm rawh se, Ka lo hausa ta si a,’ an ti a; Anmahni vêngtute ngei pawhin an khawngaih lo. 6 Ram luahtute chu ka khawngaih dâwn tawh si lo va,” Tih chu LALPA thuchhuak a ni. “Tin, ngai rawh u, mi tin mai chu A ṭhenawmpa kutah leh a lalber kutah ka pe ang. Ram chu an suasam ang a, An kut ata ka chhanchhuak lo vang.”
Berâmpu pahnih
7 Chutichuan, ran rual talh tûrte chu ka enkawl a, ran rual zînga a rethei ngei chu. Tin, tiang pahnih ka la a: pakhat chu “Duhsak” ka vuah a, a dang chu “Pumkhatna” ka vuah a; tin, ran rual chu ka châwm a. 8 Tin, thla khat chhûngin berâmpu pathumte chu ka tiboral a. Ka nunna hian anmahni ka ning tawh êm si a; anni nunna pawhin mi haw bawk a. 9 Tin, keiin, “Ka châwm lo vang che u. A thi thi chu thi mai sela, tihboral tûr tûr chu tihboral ni rawh se; tin, a bâng zawngte chu an tisa inei hlawm rawh se,” ka ti a. 10 Ka thuthlung, mipuite hnêna ka thlun chu ka phelh theihna tûrin ka tiang Duhsak chu ka la a, ka tan bung hmawk a. 11 Tin, chumi niah chuan phelhin a awm ta a, ran rual zînga a rethei, mi pawisatute chuan LALPA thu a ni tih an hre ta a. 12 Tin, an hnênah chuan, “Ṭha in tih chuan ka hlawh chu mi pe ula, in tih loh chuan mi pe suh u,” ka ti a; chutichuan, ka hlawh atân chêng sawmthum an bûk chhuak ta a. 13 Tin, LALPA chuan ka hnênah, “Ka man atâna ṭha âwm tâwk an chhiar chu bêlvawtu pe mai rawh,” a ti a. Tin, chêng sawmthum chu ka la a, LALPA inah, bêlvawtu hnênah chuan ka pe ta mai a ni. 14 Chutichuan, Juda leh Israel-te inkâra inunauna chu ka tihchah theih nân ka tiang dang Pumkhatna ngei chu ka la a, ka tan chhum ta a. 15 Tin, LALPA chuan ka hnênah, “Berâmpu tlâktlailo hriamhrei chu va la leh cheu vang che. 16 “Ngai rawh, ramah chuan berâmpu ka din chhuahtîr ang a, Chu chuan tihbo tûrte chu a ngaihsak lo vang a, A notête chu a zawng hek lo vang; Hliam tuarte chu a tidam lo vang a, A hrisêlte pawh chu a châwm hek lo vang; A thau sate chu a ei zâwkin, An tinkâwmte nên lam a thlawn vek zâwk ang. 17 “Berâmpu tlâktlailo, ran rual kalsantu chung chu a pik e! Khandaih chu a bânah leh a mit ding lamah a tla ang! A bân chu a ro zo vek ang a, A mit ding lam chu a del hmiah ang,” a ti a.
Jerusalem la chhanchhuah tûr a ni
1 Israel chung thua LALPA thu phurrit chu. LALPA, vân tipharhtu, leilung nghahchhan phûmtu, Mihring chhûnga thlarau siamtu thuchhuak chu heti hi a ni: 2 Ngai rawh u, Jerusalem chu a vêla mipui zawng zawngte tân Ruihna novah ka siam ang a, Jerusalem ang bawkin Judai ram pawh an hual ve ang. 3 Chumi niah chuan heti hi a ni ang a, Jerusalem chu mipui zawng zawng tân Lung rit takah ka siam ang; Chumi tihsawn tumtu zawng zawng chu na takin an inhliam ang a, Leia hnam zawng zawng chu amah bei tûrin an pung khâwm ang. 4 Chumi niah chuan sakawr tin mai chu ka ṭhâwng ang a, A chunga chuangte chu âtnain ka hrem ang, Tih chu LALPA thuchhuak a ni. Tin, Juda chhûngte chungah chuan ka mit ka meng ang a, Mipui sakawrte chu mitdelnain ka hrem ang. 5 Tin, Juda hotute chuan, “Jerusalem luahtute chu, Sipaihote LALPA an Pathian chu An chakna an ni,” an ti rilru ang. 6 Chumi niah chuan Juda hotute chu Thing zînga meivâm angin ka siam ang a, Buhphal zînga meichher angin ka siam ang; Tin, a vêla mipuite chu a kâng fai ang - ding lam leh vei lamah; Tin, Jerusalem chu ama hmun ngei, Jerusalem-ah chuan a ding leh ang. 7 Davida chhûngte ropuina leh Jerusalem luahtute ropuina chu, Juda khûma tihlena a awm loh nân LALPA chuan Juda puan inte chu A chhanchhuak hmasa ber bawk ang. 8 Chumi niah chuan LALPA chuan Jerusalem luahtute chu a hum ang a; Chumi niah chuan an zînga mi chhiaṭhate pawh chu Davida ang an lo ni ang; Tin, Davida chhûngte chu Pathian ang an lo ni ang a, An hmaa LALPA vântirhkoh ang chu an lo ni ang. 9 Tin, chumi niah chuan heti hi a ni ang a, Jerusalem beitu hnamte chu tihboralna ka zawng ang. 10 Tin, Davida chhûngte chungah leh Jerusalem luahtute Chungah chuan, khawngaihna leh dîlna thlarau ka leih ang a; Tin, an chhuna chu mi rawn en ang. Tin, miin a fapa neih chhun a sûn angin a sûn ang a, Miin a fa tîr chunga a tuar angin an tuar ang. 11 Chumi niah chuan Jerusalem-ah sûnna nasa tak a awm ang a, Megido ruama Hadad-rimmon hmuna sûnna ang mai kha. 12 Tin, ram chuan a sûn ang, chhûngkua kuain a hrangin; Davida thlah chhûngkua pawh a hrangin, an nupuite a hrangin; Nathana thlah chhûngkua a hrangin, an nupuite a hrangin; 13 Levia thlah chhûngkua a hrangin, an nupuite a hrangin; Simeia chhûngte a hrangin, an nupuite a hrangin; 14 Chhûngkaw dang zawng zawng pawh, Chhûngkaw tinrêng a hrangin, an nupuite a hrang ṭheuhvin.
Jerusalem leh a chhehvêl hnamte
1 Chumi niah chuan sual leh bawlhhlawhna tlen fai nân, Davida chhûngte leh Jerusalem luahtute hnênah tuikhur hawnin a awm ang. 2 Tin, chumi niah chuan sipaihote LALPA thuchhuak chu heti hi a ni ang: Ram ata milem hmingte chu ka tibo vang a, Hriat rengin an awm tawh lo vang. Tin, ram ata zâwlneite leh thlarau bawlhhlawh chu Ka chhuah botîr ang. 3 Tin, heti hi a ni ang a, tu pawhin thu a la hril cheu chuan A nu leh a pa amah hringtute khân a hnênah, I nung lo vang, LALPA hmingin dâwt i sawi si a, an ti ang. Tin, a nu leh a pa, amah hringtute khân, thu a sawi laiin Amah chu an chhun tlang ang. 4 Chumi niah chuan heti hi a lo ni ang a, zâwlneiin thu a hrilin, An inlârna hmuh apiang chu a zahpui tawh ang; Mi bum nân kawrfual hmulte an ha hek lo vang a, 5 Zâwlnei ka ni lo va, hlo thlo mi ka ni e, Ka tleirâwl tirh ata bawiha siam ka ni si a, a ti zâwk ang. 6 Tin, mi tuin emaw a hnênah, “I bân inkâra hliamte hi eng nge ni?” a ti ang a, Tin, anin, “Hêngte hi chu, ka ṭhiante ina ka hliam a nih hi,” Tiin a chhâng ang.
Pathian berâmpu tihhlum tûr
7 Aw khandaih, ka berâmpu leh ka kawppuipa chungah chuan Harh rawh, tih chu sipaihote LALPA thuchhuak a ni. Berâmpu chu vua la, berâm rual an darh ang; A note chungah chuan ka kut ka lek ang. 8 Tin, heti hi a ni ang a, ram zawng zawngah Hmun hnih zêl tihchhiat a ni ang a, a thi ang; Hmun thumna erawh chu hnutchhiah a ni ang. 9 Tin, hmun thumna chu meiin ka fiah ang, Tangkaraw tihthianghlim angin anmahni ka tithianghlim ang a, Rangkachak fiaha a awm angin anmahni ka fiah ang. Ka hming an lam ang a, anmahni ka ngaithla ang. Tin, “Anni chu ka mite an ni,” ka ti ang a, Annin, “LALPA chu kan Pathian a ni,” an ti ang, Tih chu LALPA thuchhuak a ni.
Jerusalem leh hnam dangte
1 Ngai teh, LALPA ni chu a lo thleng dâwn e, Chutah chuan in râllâkte in zîng ngeiah sem darh a ni ang. 2 Jerusalem do tûrin hnam zawng zawng ka khâwm dâwn si a; Khawpui chu lâk a ni ang a, inte pawh chu rawk a ni ang a, Hmeichhiate chu nghaisak an ni ang. Khawpui zâtve chu sala hruai chhuahin an awm ang a, Mipui la awm chhunte chu khawpui ata tihbo an ni lo vang. 3 Chutih hnuah chuan LALPA chu a chhuak ang a, Indona nia a beih ṭhin angin chûng hnamte chu a do vang. 4 Tin, chumi niah chuan Olive tlâng chhak lama, Jerusalem rawn chhawngah chuan a ke a nghat ang a. Tin, Olive tlâng chu chhak leh thlang zâwngin, A laiah a phel ang a, ruam nasa tak a awm ang; Tin, tlâng tiave chu hmâr lamah a insawn ang a, A tiave chu chhim lamah. 5 Tin, ka tlâng kâr ruamah te chuan in tlân bo vang a, Tlâng kâr ruam chuan Azel hmun a thleng dâwn si a; A ni, in tlân bo vang, Juda lal Uzia lal laia Lîrnghînga in tlân bo ang khân. Tin, LALPA ka Pathian chu a lo kal ang a, A mi thianghlim zawng zawngte pawh i hnênah an lo kal ang. 6 Tin, chumi niah chuan heti hi a ni ang a, A êng lutuk lo vang a, a thim lutuk lo vang; 7 Mahse, chumi ni chu LALPA chauhvin a hria. Chhûn ni lo, zan ni lo; tlai lamah erawh chuan êng a lo awm ang. 8 Tin, chumi niah chuan heti hi a ni ang a, Jerusalem aṭangin tui nung a lo chhuak ang a, A zâtve chhak lam tuipuiah, a zâtve thlang lam tuipuiah; Nipuiah leh thlasikah pawh chuti chu a ni ang. 9 Tin, lei chung zawng zawngah LALPA chu Lalber a lo ni ang. Chumi niah chuan LALPA chu pakhat a ni ang a, A hming pawh pakhat a ni ang a. 10 Ram zawng zawng chu Geba aṭanga Jerusalem chhim Rimon thlengin Araba ang a lo ni ang. Tin, Jerusalem chu chawisânin a awm ang a, Benjamina Kawngka an tih aṭanga kawngka pakhatna thlengin, A kil kawngka thleng chuan; Tin, Hananela in sâng aṭanga lalber uain sâwr khur thlengin A hmun chuan a awh ang. 11 Tin, tah chuan mite an chêng ang; Anchhia rêng rêng a awm tawh lo vang a, Jerusalem chu him takin a awm zâwk dâwn a ni. 12 Tin, Jerusalem dotu mipui zawng zawng chunga LALPAN hripui a lêntîr tûr chu hei hi a ni: An kea an ding reng chungin an tîsa chu a ral ang a, An mitkhur chhûnga an mitte pawh chu a ral ang a, An ka chhûnga an lei pawh a ral ang. 13 Tin, chumi niah chuan heti hi a ni ang a, LALPA hnên ata buaina nasa tak an zîngah a awm ang a, Mi tinin a ṭhenawm kut a chelh ang a, A ṭhenawm kut chungah a kut a lek bawk ang; 14 Tin, Juda pawhin Jerusalem chu a bei ang; A vêla hnam zawng zawng sum leh pai, Rangkachak te, tangkarua te, silhfên te chu, Tam tak mai lâk khâwm a ni ang. 15 Tin, chutiang bawkin sakawr hri te, sabengtung hri te, Sanghâwngsei hri te, sabengtung tê chi hri te a lo awm ang a; Tin, chûng bûka ran awm zawng zawngte vei chu Hripui ang bawk kha a ni ang. 16 Tin, heti hi a ni ang a, Hnam zawng zawng, Jerusalem rawn dotu hnutchhiaha la awmte chu, Kum tin bâwkte kût hmang tûr leh Lalber, sipaihote LALPA chibai bûk tûrin an chho ṭhîn ang. 17 Tin, lei chunga chhûngkua zawng zawng, Lalber, sipaihote LALPA chibai bûk tûra Jerusalem-a chho lo apiangte chungah chuan ruah a sûr lo vang. 18 Tin, Aigupta ram chhûngkua, kal chho lova, Kal ta lote chungah chuan a sûr bîk hek lo vang a, Bâwkte kût hmang tûra kal chho lo hnamte LALPAN a hremna chi hripui chu a thleng ang. 19 Hei hi Aigupta ram hremna leh Bâwkte kût hmang tûra Kal chho lo hnamte hremna chu a ni ang. 20 Chumi niah chuan sakawr ṭhi-ah te pawh LALPA TANA THIANGHLIM tih a chuang ang. Tin, LALPA ina bungbêl zawngte chu, Maichâm hmaa maihûn ang hial an lo ni ang. 21 Ni e, Jerusalem leh Juda bungbêl zawng zawng chu, Sipaihote LALPA tâna thianghlim an lo ni tawh ang. Tin, inthawi zawng zawngte chuan an rawn la ang a, Chhum nân an hmang ang. Chumi niah chuan sipaihote LALPA inah chuan Kanaan mi rêng rêng an awm tawh lo vang.
LALPAN Israel-te a hmangaih
1 Israel-ho hnêna LALPA thuchhuak, Malakia kuta ziak chu. 2 LALPA chuan, “Ka hmangaih che u a ni,” a ti a. Nangni erawh chuan, “Engah khân nge min hmangaih ni?” in ti a. “Esauva chu Jakoba unaupa a ni lo vem ni?” tih hi LALPA thuchhuak a ni: “Jakoba chu ka hmangaih a; 3 Esauva erawh chu ka hua a, A tlângte chu hmun ṭiauvah ka siam a, A ro chan chu thlalêr sihalte ka pe a.” 4 Edom-ho chuan, “Tihchhiatin kan awm na a, Kan lo kîr leh ang a, hmun ramte chu kan din leh ang,” ti mah sela, Sipaihote LALPA chuan heti hian a ti: “Annin an din leh nâng a, keiin ka ṭhiat leh ang; Tin, mite chuan anni chu, Suahsualna Ram leh kumkhuaa LALPA thinrim êm êmnateho, an ti ang. 5 In mit ngeiin in hmu ang a, ‘Israel ramri pêlin LALPA chu chawimawiin awm rawh se,’ nangmahni ngeiin in la ti ang.
LALPAN puithiamte a hau
6 Fapa chuan a pa a chawimawi ṭhîn a, bâwih chuan a pu. Kei hi pa ka nih chuan mi chawimawina chu khawiah nge? Kei hi in pu ka nih chuan mi ṭihna chu khawiah nge? Aw puithiam, ka hming hmusittute u,” sipaihote LALPA chuan a ti che u a ni. “Nangni erawh chuan, ‘Engah khân nge i hming kan hmuhsit ni?’ in ti a. 7 Ka maichâmah chuan chhang bawlhhlawh in hlân alâwm. Nangnin, ‘Engah khân nge kan tihbawlhhlawh che?’ in ti a. LALPA dawhkân hi hmuhsitawm a ni in tih ṭhinah hian a ni. 8 Inthawi nân a mitdel in hlanin sualna a awm lo maw? A kebai leh a silawng in hlanin sualna a awm hek lo maw? In ram awptu pawh pe teh u; a lâwm dâwn che u em ni? A nih leh, a lo ngaisâng ang che u maw?” sipaihote LALPA chuan a ti. 9 “Tûnah hian min khawngaih theih nân Pathian tihlungawina zawng rawh u khai - Hetiang hi in kutkawih ngei a ni si a - A lo ngaisâng dâwn che u em ni?” sipaihote LALPA chuan a ti. 10 “Ka maichâmah chuan a thlâwn maia mei in tihalh loh nân In zîngah mi, kawngkhâr khâr tûr awm teh sela aw! In chungah lâwmna rêng ka nei lo va, In kut ata thilhlan chu ka pawm hek lo vang,” sipaihote LALPA chuan a ti. 11 “Ni chhuahna aṭanga a tlâkna thleng pawhin Jentailte zîngah ka hming chu a ropui si a; Hmun tinah ka hming atân rimtui hlan a ni, thilhlan thianghlim nên; Jentailte zîngah ka hming a ropui si a,” sipaihote LALPA chuan a ti. 12 “Nangni erawh chu, ‘LALPA dawhkân chu a bawlhhlawh a ni; A rah, a chaw ngei chu a hmuhsitawm,’ in tihah khân a ni, A tibawrhbângtu in nih hi. 13 Tin, ngai teh u, ‘A va ninawm êm!’ in ti bawk a, In hnâr in tum khum a,” sipaihote LALPA chuan a ti: “Hnehchhuha in thil lâk te, a kebai te, a silawng te in rawn la a; Chutiangin thilhlan chu in rawn la a! Chûng chu in kut ata ka pawm dâwn em ni?” LALPA chuan a ti. 14 “A ran ruala a pa awm renga, thu pawh tiama, LALPA hnêna a hmêlhem hlâna bumtu chu ânchhe dawng a ni; Kei chu Lal ropui tak ka ni si a, ka hming pawh Jentailte zîngah A ṭihawm a ni,” sipaihote LALPA chuan a ti.
1 “Khai le, puithiamte u, he thupêk hi nangmahni tân a ni e. 2 Ka hming tiropui tûra in ngaihthlâk lohva, thinlunga in vawn loh chuan, In chungah ânchhia ka rawn thlentîr ang,” sipaihote LALPA chuan a ti, “In malsâwmna dawnte chu ânchhia ka lawh ang. A ni, in zîngah thinlunga vawng in awm loh avângin Anchhia ka lawh tawh reng a ni. 3 Ngai teh u, nangmahni vângin in chite chu ka zilhhau va, In hmaiahte chuan êk ka tât pherh ang, in kûtna êk ngei chu; Chumi nên chuan lâk bo in ni ang. 4 Levia hnêna ka thuthlung hi a din zêl theih nân, He thupêk hi in hnênah ka rawn chhuah a ni tih in hria ang,” Sipaihote LALPA chuan a ti. 5 “Ka thuthlung chu a hnênah a awm a; nunna leh thlamuanna ka pe a, ṭih pawh mi ṭih a ni, ka hming chu hlauh namênin a hlau lo va. 6 “Thutak dân chu a kâah a awm a, thu sual a hmuiah a awm lo. Thlamuang tak leh ngîl takin ka hmaah a lêng ṭhîn a, Mi tam tak an khawlohna ata a inlamlêttîr a ni. 7 Puithiam hmuite chuan hriatna a vawng tûr a ni si a, A ka aṭangin dân chu an zawng ṭhîn tûr a ni; Ani chu sipaihote LALPA tirhkoh a ni si a. 8 Nangni erawh zawng kawng ata chu in lo pêng ta a; Dânah chuan mi tam tak in petektîr a; Levia thuthlung chu in tichhia a ni,” sipaihote LALPA chuan a ti. 9 “Chuvângin, kei pawhin, ka kawngte zawh tu mah in awm lohva, Dân thua mi thlei bîk in neih zâwk ang zêl hian, Mi zawng zawng hmaah hmuhsitawm leh tlâwmin ka siam che u a ni.”
Pathian laka rinawm lo mite
10 Kan vaiin Pa hmun kan ni lo vem ni? Pathian pakhat siam pawh kan ni lo vem ni? Engati nge kan pate thuthlung tibawrhbânga, Unau leh unau kan inbum ṭhin? 11 Juda chuan bum a hmang a, Israel ram leh Jerusalem khuaah Thil tenawm tih a ni a; LALPAN a hmangaih ṭhin hmun thianghlim chu, Juda chuan a tibawrhbâng ta si a: Ram dang pathian fanu a nei ta a ni. 12 Hetiang ti chu, tua pawh, Jakoba puan in ata LALPAN a tifihlîm vek ang, Sipaihote LALPA hnêna thil hlântu chenin. 13 Tin, hei pawh hi in ti leh pek a: mittui leh ṭahna leh rûmnain LALPA maichâm chu in chhilh hneh khawp a, Thilhlan a ngaihsak rêng rêng tawh lo va, In kuta mi chu lâwmawmah a ngai hek lo. 14 Nangni chuan, “Eng vâng nge ni le?” in la han ti a. Nang leh i nupui tawn tirh inkâra thuhretu chu LALPA a ni a, i kawppui leh i thuthlung nupui a ni nachungin, A chungah bumna thil i tih ṭhin vâng a ni. 15 Nunna chi neiin, pumkhatah a siam lo vem ni? Engah nge pumkhata a siam? Chithlah, Pathian ngaihsak a zawng a ni. Tichuan, in nunna chu vêng ṭha ula, Tu mân mahni nupui tawn tirh chu bum suh se. 16 “Inmâk hi ka haw si a,” LALPA, Israel-ho Pathian chuan a ti; “Mahni silhfên hnehchhiahnaa khuhtu nên,” sipaihote LALPA chuan a ti. Tichuan, in nunna chu vêng ṭha ula, inbum suh u.
Rorêlna ni a lo hnai e
17 In thutein LALPA chu in tihah ta. Nangni erawh chuan, “Engah khân nge kan tihhah?” in ti a. “Thil sual titu apiang LALPA mit hmuhah mi ṭha an ni a, An chungah pawh ani chu a lâwm ṭhîn,” in tihah te, “Rorêl felna Pathian chu khawiah nge?” in tihahte hian a ni.
1 “Ngai teh u, ka tirhkoh ka rawn tîr a, Ka hmaah kawng a buatsaih ang. Tin, in zawn LALPA chu a biak inah a lo kal phut ang; Ngai teh u, thuthlung tirhkoh in lawm êm êm chu a lo kal e,” Sipaihote LALPA chuan a ti. 2 “Amaherawhchu, a lo kal ni chu tu nge tuar zo vang? A lo lan hunah chuan tu nge ding thei ang? Ani chu rawh tuina mei ang leh puan sutute sahbawn ang a ni si a. 3 “Tangkaraw rawh tuitu leh tithianghlimtu angin a ṭhu ang a, Levia fate a tithianghlim ang a, Rangkachak leh tangkarua angin anmahni a tifai ang a; LALPA tân chuan felnaa thil hlântute an ni ang. 4 Chutichuan, hmasâng nite leh hmasâng kumte angin, Judai ram leh Jerusalem thilhlan chu LALPA tân duhawm tak a ni leh ang. 5 Rorêl tûrin ka rawn hnaih dâwn a che u; Dawithiamte, uirête, dâwta chhechhamtute chungah leh, Hmeithai leh fahrah leh inhlawhfa hlawh tikhawlova hnehchhiahtute leh, Hnam dang lo sât thlatute - mi ṭih lotute chungah chuan, Thuhretu ṭuanṭha tak ka ni ang,” sipaihote LALPA chuan a ti.
Sâwma pakhat pêk
6 “Kei LALPA hi ka danglam si lo; chuvângin, nangni, Aw Jakoba fate u, tihboral in ni lo ve. 7 In pute hun ata tawh ka thuruatte in kal pênsan a, Zawm pawh in zâwm ngai lo. Ka hnênah lo kîr ula; Tichuan, in hnênah ka lo kîr ang,” sipaihote LALPA chuan a ti. “Nangni erawh chuan, ‘Engahte hian nge kan kîr ang?’ in ti a. 8 Mihringin Pathian ta chu a rûksak tûr em ni? Mahse, nangni chuan min rûksak ṭhîn. Nangni erawh chuan, ‘Engahte hian nge kan rûksak che?’ in ti a, Sâwma pakhat leh thilhlanahte hian. 9 Anchhia lawh in ni ta; nangni he hnam pum pui hian Kei hi min rûksak si ṭhîn a. 10 Ka inah ei tûr a awm theih nân, sâwma pakhat zawng zawng chu Thawhlâwm inah rawn la rawh u; Vân tukverhte chu hawnsak che uin, Malsâwmna dawn sên loh khawp hial Ka vûr dâwn che u nge dâwn lo che u, mi han fiah teh rêng u,” Sipaihote LALPA chuan a ti. 11 “Eiraltu chu ka khapsak ang che u a; Tichuan, in lei rahte chu a tihchhiatsak tawh lo vang che u a, Huana in grêp rah chu a hlam tla ral tawh hek lo vang,” Sipaihote LALPA chuan a ti. 12 “Tin, hnam zawng zawngin engthâwl an ti ang che u a, Ram duhawm tak in la nih dâwn avângin,” Sipaihote LALPA chuan a ti.
Pathianin khawngaih a tiam
13 “Ka chunga in thute chu a paukhauh hle,” LALPA chuan a ti. “Nangni erawh chuan, ‘Engah khân nge i chungah Chutiang thu kan sawi?’ in ti a. 14 ‘Pathian rawngbâwl hi a thlâwn a ni; a thuchah kan zawm leh Sipaihote LALPA hmaa intilunghnûr taka kan lêng ṭhîn hi sâwtna eng nge awm? 15 Tin, mi chapote chu an eng a thâwl e kan ti a, Thil suaksual titute chu an dingchang bawk a; Pathian an fiah a, chhanhim an ni bawk ṭhîn,’ ” in ti a ni. 16 Tichuan, LALPA ṭihtute chu an inbe tlâng a, LALPA chuan a lo ngaithla a, a lo hria a; LALPA ṭihtute leh a hming ngaihsaktute tân, Hriat rengna lehkhabu chu a hmaah ziak a ni ta a. 17 “Ro chuam ka siam niah chuan ka ta an ni ang,” Sipaihote LALPA chuan a ti; “Tin, miin a fapa, a rawngbâwlsaktu chu a zuat angin anni chu ka zuat ang.” 18 Tichuan, in inlamlêt ang a, mi fel leh mi suaksual, Pathian rawngbâwltu leh bâwl lotu chu in thliar thei tawh ang.
LALPA ni a lo thleng dâwn
1 “Ngai teh u, ni chu a lo thleng e, Rawhtuina mei angin a kâng a ni; Mi chapo zawng zawngte leh sual titu zawng zawngte chu Buhpâwl an ni ang a, chu ni lo thleng chuan anmahni a kâng ang; Zung leh zâr chenin a zuah lo vang,” sipaihote LALPA chuan a ti. 2 “Nangni ka hming ṭihtute tân erawh chuan Felna ni, a thlaa tihdamna nên a lo chhuak ang a, In kal chhuak ang a, bâwngnote hrên lai Thaukhawh angin in tualchai ang. 3 Mi suaksualte chu in rap bet ang a; Ni ka ruatah chuan in kephah hnuaia meivâp an ni dâwn si a,” Sipaihote LALPA chuan a ti. 4 “Ka chhiahhlawh Mosia dân, Horeb tlânga a hnêna ka thupêk, Israel mi zawng zawng tâna thuruatte leh Rorêlnate kha hre reng rawh u. 5 Ngai teh u, LALPA ni ropui leh râpthlâk tak a lo thlen hmain, Zâwlnei Elija chu in hnênah ka rawn tîr ang. 6 Ani chuan pa leh fate inkârah Inrem lehna a thlentîr ang; Chuti a nih loh chuan, ka lo kal ang a, Anchhiain lei hi ka nghaisa dah ang e.”
The New Testament of our Lord and Saviour Jesus Christ
Isua Krista thlahtute
1 Abrahama thlah, Davida thlah, Isua Krista thlahtute inthlah dân chanchin chu: 2 Abrahaman Isaaka a hring a; Isaakan Jakoba a hring a; Jakoban Juda leh a unaute a hring a; 3 Judan Tamari lakah Pharesa leh Zera a hring a; Pharesan Eroma a hring a; Eroman Arama a hring a; 4 Araman Aminadaba a hring a; Aminadaban Nasona a hring a; Nasonan Salmona a hring a; 5 Salmonan Rahabi lakah Boaza a hring a; Boazan Ruthi lakah Obeda a hring a; Obedan Jesaia a hring a; 6 Jesaian Lal Davida a hring a. Tin, Davidan Uria nupui lakah Solomona a hring a; 7 Solomonan Rehoboama a hring a; Rehoboaman Abia a hring a; Abian Asa a hring a; 8 Asan Jehosaphata a hring a; Jehosaphatan Jehorama a hring a; Jehoraman Uzia a hring a; 9 Uzian Jothama a hring a; Jothaman Ahaza a hring a; Ahazan Hezekia a hring a; 10 Hezekian Manasea a hring a; Manasean Amona a hring a; Amonan Josia a hring a; 11 Babulon lama sala an hruai lai vêl khân Josian Jekonia leh a unaute a hring a. 12 Tin, Babulon lama sala an hruai hnuin Jekonian Salathiela a hring a; Sealtielan Zerubabela a hring a; 13 Zerubabelan Abiuda a hring a; Abiudan Eliakima a hring a; Eliakiman Azora a hring a; 14 Azoran Zadoka a hring a; Zadokan Akima a hring a; Akiman Eliuda a hring a; 15 Eliudan Eleazara a hring a; Eleazaran Matthana a hring a; Matthanan Jakoba a hring a; 16 Jakoban Josefa, Mari pasal chu a hring a; chu mi Mari lakah chuan Isua, Krista an tih hi a lo piang ta a. 17 Chutichuan, chhuan zawng zawng chu, Abrahama aṭangin Davida thlengin chhuan sâwm leh chhuan li a ni a; Davida aṭangin Babulon lama sala an hruai thlengin chhuan sâwm leh chhuan li a ni a; Babulon lama sala an hruai aṭangin Krista thlengin chhuan sâwm leh chhuan li a ni a.
Isua Krista pian thu
18 Tin, Isua Krista lo pian dân chu hetiang a ni: A nu Mari chu Josefa nên an inhual laiin, an inpâwl hmain Thlarau Thianghlimin a raitîr tih an lo hre ta a. 19 Tichuan, a pasal tûr Josefa chu mi fel tak a ni a, tlângthantîr a duh lo va, a rûkin bânsan a tum a. 20 Nimahsela, chûng thu chu a ngaihtuah laiin ngai teh, a mangah Lalpa vântirhkoh a hnênah a lo inlâr a, “Josef, nang Davida fapa, i nupui hual Mari chu neih hlau suh; a nau pai chu Thlarau Thianghlim laka mi a ni asin. 21 Fapa a hring ang a, a hmingah Isua i sa ang; ani chuan a mite an thil tihsual lakah a chhandam dâwn si a,” a ti a. 22-23 Tin, Lalpan zâwlnei kaah, “Ngai teh, nula thianghlim chu a rai ang a, Fapa a hring ang a. A hmingah Emmanuela an sa ang,” tia a sawi kha a lo thlen theihna tûrin chûng zawng zawng chu a lo awm a ni. (Emmanuela chu “Kan hnêna Pathian awm” tihna a ni.) 24 Tichuan, Josefa chu a muhîl a tho va, Lalpa vântirhkohvin a hnêna thu a pêk ang chuan a ti a, a nupui hual chu a nei ta a; 25 nimahsela, fapa a hrin hma loh zawng a pâwl lo; tin, a hmingah Isua a sa ta a.
Khawchhak mi fingte
1 Tin, Lal Heroda a lal laia, Judai rama Bethlehem khuaa Isua a lo pianin, ngai teh, khawchhak lam ata mi fingte Jerusalem khuaah an lo kal a, 2 “Khawiah nge Juda-te lal lo piang chu? Khawchhak lamah a arsi kan hmu a, amah chibai bûk tûrin kan lo kal a ni,” an ti a. 3 Tin, Lal Heroda chuan chu chu a hriat veleh a mangang ta a, Jerusalem-a mi zawng zawng pawh an mangang ve a. 4 Tichuan, puithiam lalte leh lehkhaziaktute zawng zawng a ko khâwm a, Krista pianna tûr chu a zâwt a. 5 Tin, anni chuan a hnênah, “Judai rama Bethlehem khuaah; heti hian zâwlneiin a ziak kha: 6 ‘Nang, Bethlehem, Judai rama mi, Judai khawpuite zîngah i tê ber tawp lo! I chhûng aṭangin awptu a lo chhuak dâwn si a, Ka mi Israel-hote vêngtu tûr chu,’ tih hi,” an ti a. 7 Chumi hnuah chuan Herodan a rûkin mi fingte chu a ko va, dîlchhût takin arsi lan lai chu a zâwt chhuak a. 8 Tin, anni chu Bethlehem khuaah a kaltîr a, “Kal ta ula, naute thu chu dîlchhût takin zâwt chhuak rawh u; tin, kei pawhin amah chu chibai ka rawn bûk ve theih nân, in hmuh veleh mi rawn hrilh ang che u,” a ti a. 9 Tin, lal thu chu an hria a, an kal ta a; tin, ngai teh, khawchhak lama arsi an hmuh kha, naute awmna chung zâwn a thlena a din hma loh zawng an hmaah a kal zêl a. 10 Tin, arsi chu an hmuhin an hlim nasa êm êm a. 11 Tin, in chhûngah an va lût a, a nu Mari hnêna nautê chu an hmu a, an bawkkhup a, chibai an bûk a; tin, an ro bâwmte an hawng a, a hnênah chuan lawmna rangkachak te, beraw te, murra te an pe a. 12 Tin, Heroda hnênah kîr leh lo tûrin an manga hrilha an awm avângin, anmahni khaw lamah kawng dangah an haw ta a.
Aigupta rama tlân thu
13 Tin, an hâwn hnuin ngai teh, Lalpa vântirhkoh Josefa hnênah a mangah a inlâr a, “Tho la, nautê leh a nu hruai la, Aigupta ramah tlân bo rawh, ka hrilh leh hma loh che zawng chutah chuan awm reng ang che; Herodan nautê tiboral tûrin a zawng dâwn a ni,” a ti a. 14 Tichuan, a tho va, a zân a zânin nautê leh a nu chu a hruai a, Aigupta ramah a kal ta a; 15 tin, Heroda thih hma loh zawng chutah chuan a awm reng a: Lalpan zâwlnei kaah, “Ka fapa chu Aigupta ram ata ka ko chhuak a,” tia a sawi kha a lo thlen theih nân.
Nausên suat thu
16 Chutih lai chuan Heroda chu mi fingte tihder a nih a inhriat veleh a thinur êm êm a, mi a tîr a, a hun lai tak thu dîlchhût taka mi fingte a zawh chhuah ang khân, Bethlehem khua leh a vêl zawng zawnga mipa naupang kum hnih achin hnuai lam chu an zain a that ta vek a. 17,18 Chutih lai chuan zâwlnei Jeremian, “Rama khuaah thâwm an hria, Ṭap te, mitthi ngaia chiau vawng vawng te; Rakili chuan a fate a ṭah a, An awm tawh loh avângin a thlamuan theih loh,” tia a sawi kha a lo thleng ta.
Aigupta ram ata kîr leh thu
19 Nimahsela, Heroda chu a thih hnuin ngai teh, Lalpa vântirhkoh chu Aigupta ramah Josefa hnênah a mangah a inlâr a, 20 “Tho la, nautê leh a nu hruai la, Israel ramah kal rawh: naute thah tumte kha an thi tawh e,” a ti a. 21 Tichuan, a tho va, nautê leh a nu chu a hruai a, Israel ramah a lût ta a. 22 Nimahsela, Arkelausa chu a pa Heroda aiawhin Judai ramah a lal tih a hriatin chuta kal chu a hlau ta a; tin, a manga hrilha a awm avângin Galili lamah a kal ta daih a, 23 khaw pakhat Nazareth an tihah chuan a va awm ta a: “Ani chu ‘Nazareth mi’ an ti ang,” tia zâwlneite kaa an sawi kha a lo thlen theih nân.
Baptistu Johana thuhril
1 Tin, chûng lai chuan Baptistu Johana chuan, 2 “Sim rawh u! Vânram chu a hnai tawh e,” tiin Judai thlalêrah thu hrilin a lo kal a. 3 (Amah chu a ni, zâwlnei Isaian, “Thlalêra mi au râwl chuan, ‘Lalpa lamlian sial ula, A kawngte tingîl rawh u,’ a ti,” tia a sawia kha.) 4 Tin, chu mi Johana chuan sanghâwngsei hmul puan a sin a, a kâwng chu savun kâwnghrênin a hrêng a; a chaw chu khaukhuap leh khawizu a ni. 5 Chumi lai chuan Jerusalem khuaa mi te, Judai rama mi zawng zawng te, Jordan lui dung vêla mi zawng zawng te chu an chhuak a, a hnên lamah an kal a, 6 an sualte thupha chawiin Jordan luiah chuan a hnênah baptisma an chang ta hlawm a. 7 Nimahsela, Pharisaite leh Saddukaite tam tak a baptisma chang tûra lo kal a hmuh veleh an hnênah, “Rûl thlahte u! Thinur lo thleng tûr hi tlânsan tûrin tuin nge zilh che u? 8 Chutichuan, sim hming pu tlâkin rah rawh u: 9 ‘Abrahama kan thlahtu a ni alâwm,’ tiin inngaihtuah suh u; Pathianin hêng lungte hi Abrahama thlahahte a dintîr thei e, ka tih che u hi. 10 Tûn apangin thingbul tinah hreipui an dah ta; chutichuan, thing tin rah ṭhaa rah lo apiang an kit a, meiah an paih ṭhîn. 11 Kei zawngin in simna tûrin tuiin ka baptis ṭhîn che u a; nimahsela, ka hnunga lo kal tûr chu keimah aiin a ropui zâwk a, a pheikhawk keng tlâk pawh ka ni lo ve. Ani chuan Thlarau Thianghlim leh meiin a baptis ang che u; 12 a kutin a sisêp a keng a, a hruih a zâp fai hliau ang a, zêmah chuan a buh a khung ang, a sî erawh chu mei mit thei lovin a hâl ral ang,” a ti a.
Isua baptisma chan thu
13 Chumi lai chuan a hnêna baptisma chang tûrin, Galili ram aṭangin Jordan luiah Johana hnênah Isua a lo kal a. 14 Johana erawh chuan, “I mi baptis ka ṭûl zâwk si a, ka hnênah i lo kal zâwk a ni maw?” tiin khap a tum a. 15 Nimahsela, Isuan a hnênah, “Tûnah remti hrâm rawh, hetianga felna zawng zawng hlen chhuah hi kan tân a mawi a ni,” tiin a chhâng a. Tichuan, rem a ti ta a. 16 Tin, Isua chu baptisma a chan veleh tui ata a chhuak ta nghâl a; tin, ngai teh, a tân vân a lo inhawng a, Pathian Thlarau chu ṭhuro anga lo chhukin, a chunga lo fu a hmu a. 17 Tin, ngai teh, vân aṭangin awin, “Hei hi ka Fapa duh tak, ka lawm êm êma chu a ni,” a ti a.
Isua thlêma a awm thu
1 Chumi zawhah chuan Isua chu Diabola thlêma awm tûrin thlalêrah Thlarau hruai luhin a awm ta a. 2 Tin, ni sawmli leh zan sawmli a nghei hnuin a ril a lo ṭâm ta a. 3 Tin, thlêmtu chu a lo kal a, a hnênah, “Pathian Fapa i nih chuan hêng lung hi chhanga chang tûrin thu pe rawh,” a ti a. 4 Nimahsela, ani chuan, “ ‘Mihring hi chhang chauhvin an nung lo vang a, Pathian kaa thu tin chhuakin an nung zâwk ang,’ tih ziak a ni,” tiin a chhâng a. 5 Chumi zawhah chuan Diabolan khaw thianghlimah chuan a hruai lût a, Pathian biak in chhîp zumah chuan a dah a; 6 tin, a hnênah, “Pathian Fapa i nih chuan tla thla rawh; ‘I chungthu-ah zawng a vântirhkohte chu thu a pe ang a, An kutin an dâwm ang chia; Chuti lo chuan, i kein lung i chhuih hlauh dah ang e,’ tih ziak a ni si a,” a ti a. 7 Isuan a hnênah,“ ‘Lalpa i Pathian fiah suh,’ tih ziak a ni ve bawk e,” a ti a. 8 Tin, Diabola chuan tlâng sâng takah a hruai leh a, khawvêl ram zawng zawng leh a ropuina chu a entîr a. 9 Tin, a hnênah, “Bawkkhupin chibai mi bûk la, hêng zawng zawng hi ka pe vek ang che,” a ti a. 10 Chu veleh Isuan a hnênah, “Setan, kal bo daih rawh! ‘Lalpa i Pathian chibai bûk la, ama rawng chauh bâwl rawh,’ tih ziak a ni,” a ti a. 11 Chumi hnuah chuan Diabola chuan a kalsan ta a. Tin, ngai teh, vântirhkohten a rawng an rawn bâwlsak ta a.
Isuan Galili ramah rawngbâwl a ṭan
12 Tin, Johana an man tih Isuan a hriat veleh Galili ramah a kal ta daih a; 13 tin, Nazareth khua a kalsan a, Kapernaum khuaah a awm ta reng a (chu chu Zebulon leh Naphtali biala, dîl kama awm a ni): 14,15 Zâwlnei Isaia kâah, “Dîl kamah, Jordan râlah, Zebulon ram leh Naphtali ram, Jentailte Galili chu! 16 Thim hnuaia ṭhute chuan êng nasa tak an hmu a, Thihna hmun leh a hlima ṭhute chungah chuan, Eng a lo chhuak ta a,” tia a sawi kha a lo thlen theih nân. 17 Chuta chinah chuan Isuan, “Sim rawh u! Vânram chu a hnai tawh e,” tiin a hril ṭan ta a.
Sangha mantu pali koh thu
18 Tin, Galili dîl kama a lên pahin, unau pahnih Simona (Petera an tih chu), a unau Andria nên, dîlah chuan lên dêngin a hmu a; sangha mantu an ni rêng a. 19 Tin, ani chuan an hnênah, “Mi zui rawh u; tichuan, mihring mantuah ka siam ang che u,” a ti a. 20 Tin, lênte chu kalsanin an zui ta nghâl a. 21 Tin, chuta ṭang chuan a kal zêl a, unau dang pahnih, Zebedaia fapa Jakoba leh a unau Johana chu, an pa Zebedaia hnênah lawngah an lênte siam ṭhain a hmu a; tin, anni chu a ko ta a. 22 Tichuan, lawng leh an pa chu an kalsan a, an zui ta nghâl a.
Mi tam tak tihdam
23 Tin, Isuan an inkhâwmna inahte zirtîrin, Ram Chanchin Ṭha chu hrilin, mite zînga natna tinrêng leh chak lohna tinrêng tidamin, Galili ram zawng zawng a fang vêl a. 24 Tin, Suria ram zawng zawngah a chanchin a thang ta a; tichuan, mi damlo zawng zawng, damlohna leh natna tinrêng tuarte, ramhuai man te, thlaemât te, zeng te a hnênah an rawn hruai a; a lo tidam hlawm a. 25 Galili ram aṭang te, Dekapoli khua aṭang te, Jerusalem khua aṭang te, Judai ram aṭang te, Jordan râl aṭang te chuan mipui tam takin amah an zui bawk a.
Tlâng chunga thusawi
1 Tichuan, mipuite chu a hmuhin tlângah a kal chho va; tin, a ṭhu a, a zirtîrte a hnênah an lo kal a; 2 tin, thu a sawi a, anmahni a zirtîr a.
Engthâwlna thu
3 “Rilrua retheite chu an eng a thâwl e; vânram an ta a ni si a. 4 Lungngaite chu an eng a thâwl e; thlamuanin an la awm dâwn si a. 5 Thuhnuairawlhte chu an eng a thâwl e; lei hi an la rochung dâwn si a. 6 Felnaa rilṭâma tuihâlte chu an eng a thâwl e; an la tlai dâwn si a. 7 Mi khawngaih thei takte chu an eng a thâwl e; khawngaih an la hlawh dâwn si a. 8 Thinlunga thianghlimte chu an eng a thâwl e; Pathian an la hmu dâwn si a. 9 Remna siamtute chu an eng a thâwl e; Pathian faa vuahin an la awm dâwn si a. 10 Felna avânga tihduhdah tuar hnute chu an êng a thâwl e; vânram an ta a ni si a. 11 “Miin keimah avânga an hau che ua, an tihduhdah che ua, dâwta sual tinrênga an hêk hunah che u, in eng a la thâwl ang. 12 Lâwm ulangin, nasa takin hlim rawh u; vânah in lâwmman a awm hnem si a; chutiang bawkin in hmaa zâwlnei awmte pawh an tihduhdah ṭhin kha.
Chi leh êng
13 “Lei chi in ni e; nimahsela, chi hi a dâk tawh chuan engin nge an tihal leh ang? Chuta chinah chuan paih chhuaha, mihringte rah mai mai chauhvah lo chuan, eng atân mah a tlâktlai lo. 14 “Khawvêl êng in ni e. Tlâng chhîpa khaw awm chu thuhrûk theih a ni lo. 15 Miin khâwnvâr hâlin hrai hnuaiah an dah ngai lo, a dahnaah an dah zâwk ṭhîn; tichuan, in chhûnga mi zawng zawng a ên ṭhîn. 16 Chutiang bawkin in êng chu mi mit hmuhin êng rawh se; chutichuan, in thiltih ṭhatte an hmu ang a, in Pa vâna mi an chawimawi thei ang.
Dân chungchâng
17 “Dân thu emaw, zâwlneite thu emaw tiboral tûra lo kal ka nih ring suh u; tiboral tûra lo kal ka ni lo va, tifamkim tûra lo kal ka ni zâwk. 18 Tihtakmeuhvin ka hrilh a che u, lei leh vân hi a boral hma loh chuan dân thua mi chhunhan tê tak tê emaw, thai han tê tak tê emaw, pakhat mah a boral tawp lo vang, a zaa a thlen kim hma loh zawng. 19 Chutichuan, tu pawh hêng thupêk tê ber zîngah hian pakhat pawh bawhchhiaa, chutiang ti ve tûra mite zirtîr apiang chu, vânramah chuan mi tê ber an ti ang; amaherawhchu, tu pawh zâwma, zirtîr ve apiang chu, vânramah chuan mi lian an ti ang. 20 In felnain lehkhaziaktute leh Pharisaite felna hi a khûm loh chuan, vânramah in lût tawp lo vang tih ka hrilh che u a nih hi.
Thurin chungchâng
21 “Hmânlaia mite hnênah chuan, ‘Tualthah tûr a ni lo,’ an tih leh, ‘Tu pawh tualthat apiang chu a chungthu rêl a ni ang,’ tih a nih in hria a. 22 Kei erawh chuan ka hrilh a che u, tu pawh a unau chunga thinur apiang chu, a chungthu rêl a ni ang a; tu pawh a unau, ‘mi chhawihpa,’ ti apiang chu, rorêlna sânga a chungthu rêl a ni ang; tin, tu pawh, ‘mi âpa,’ ti apiang chu, Gehenna meia kal tlâk a ni ang tih ka hrilh a che u. 23 Chutichuan, maichâm bula thilpêk i hlan lai ngeia, i unauvin i chungah lungnih lohna a nei tih i hriat chhuah leh chuan, 24 chuta maichâm hmaah chuan i thilpêk chu hnutchhiah la, kal langin, i unau chu rem zet la, chumi hnuah chuan i thilpêk chu rawn hlân rawh. 25 I khingpui chu kalkawnga in kal dun laiin rem thuai rawh; chuti lo chuan, i khingpui chuan rorêltu a mantîr ang chia, rorêltu chuan tiangkengtu hnênah chuan a pe ang chia, tân inah an khung hlauh dah ang che. 26 Tihtakmeuhvin ka hrilh a che, pawisa tê pawh i tlâk kim hma loh chuan, chuta ta chu i chhuak lo hul hual ang. Uire chungchâng 27 “ ‘I uire tûr a ni lo,’ an ti tih in hre tawh. 28 Kei erawh chuan, tu pawh ngaih châka hmeichhia melh apiang chu, a thinlungah a uire tawh reng a ni tih ka hrilh a che u. 29 Tin, i mit ding lamin a tihtlûk che chuan, kher chhuak la, paih daih rawh; i taksa a puma Gehenna-a paih ai chuan, i taksa pêng pakhat boral chu i tân a ṭha zâwk a ni. 30 Tin, i kut ding lamin a tihtlûk che chuan, tan la, paih daih rawh; i taksa a puma Gehenna-a kal ai chuan, i taksa pêng pakhat boral chu i tân a ṭha zâwk a ni.
Inmâk chungchâng
31 “ ‘Tu pawh nupui ma apiang chuan inmâkna lehkha a hnênah pe rawh se,’ an ti bawk a. 32 Kei erawh chuan, tu pawh tlangvâl ngaih vâng ni lova nupui ma apiang chuan, amah chu a uiretîr a ni; tin, tu pawh mâk hnu nei apiang chu a uire a ni tih ka hrilh a che u.
Chhechham chungchâng
33 “Hmânlaia mite hnênah, ‘Dâwtah chhia chham suh la, Lalpa hnênah i chhechhamte chu hlen zâwk rawh,’ an ti tih in hre tawh bawk a. 34 Kei erawh chuan ka hrilh a che u, chhia rêng rêng chham suh u; vân chhâlin chham suh u, chu chu Pathian lalṭhutphah a ni si a; 35 lei chhâlin chham hek suh u, chu chu a ke nghahchhan a ni si a; Jerusalem chhâlin chham hek suh u, chu chu Lal ropui tak khawpui a ni si a. 36 I lu chhâlin i chham tûr a ni hek lo, samzai pakhat pawh i tivârin i tidum thei si lo va. 37 Nimahsela, in thusawi chu ‘a ni’ chu ni, ‘a ni lo’ chu ni lo ngawt rawh se; chûng aia chuang aliam chu sual laka chhuak a ni.
Phuba lâk chungchâng
38 “ ‘Mit aiah mit, ha aiah ha,’ an ti tih in hre tawh. 39 Kei erawh chuan ka hrilh a che u, mi sual dodâl suh u; i biang ding lama bêngtu hnênah chuan a lehlam pawh dawh rawh. 40 Tin, tu pawhin i lakah thupawi siamin, i kawr lâk a tum chuan, i puan pawh lâktîr nghâl rawh. 41 Tin, mêl khat kala phût luitu apiang che hnênah chuan mêl hnih kal rawh. 42 A dîltu che hnênah pe la, i laka pûk duhtu chu hawisan suh.
Hmêlma hmangaih tûr
43 “ ‘I vêngte hmangaih la, i hmêlma haw rawh,’ an ti tih in hre tawh. 44 Kei erawh chuan ka hrilh a che u, in hmêlmate chu hmangaih ula, a tiduhdahtu che u chu ṭawngṭaisak rawh u, 45 in Pa vâna mi fate in nih theih nân; ani chuan mi sualte leh mi ṭhate chungah chuan a ni a chhuahtîr ṭhîn a, mi felte leh mi fel lote chungah pawh ruah a sûrtîr ṭhîn a ni. 46 In hmangaitute chauh in hmangaih hian lâwmman eng nge in hmuh ang? Chhiahkhawntute pawhin chutiangin an ti ve lâwm ni? 47 Tin, in unaute chauh chibai in bûk hian eng nge in tih hnem chuan bîk? Jentailte pawhin chutiangin an ti ve lâwm ni? 48 Chutichuan, in Pa vâna mi a ṭha famkim angin in ṭha famkim tûr a ni.
Mi hnêna thil pêk
1 “In thil ṭha tihte mi hmuh atân, mihring mit hmuha ti lo tûrin fîmkhur rawh u; chuti lo chuan, in Pa vâna mi hnênah chuan lâwmman in nei lo vang. 2 “Chutichuan, mi hnêna englo i pêkin, mi vervêkten mi fak an hlawh theihna tûra inkhâwmna inah te, kawtthlêrah te an tih ṭhin ang hian, i hmaah tawtawrâwt hamtîr suh. Tihtakmeuhvin ka hrilh a che u, an lâwmman chu an hmu zo tawh. 3 Nang erawh chuan mi hnêna englo i pêkin, i kut ding lamin a tih chu i kut vei lamin hre suh se, 4 i englo pêk chu a rûkin a awm theih nân; chutichuan, i Pa a rûka hmu ṭhîntu chuan a rûl ang che.
Ṭawngṭai chungchâng
5 “Tin, in ṭawngṭaiin, mi vervêkte angin in ti tûr a ni lo; miin an hmuh theihna tûrin inkhâwmna inah te, kawtthlêr pêng takah te, ding chunga ṭawngṭai an ngaina si ṭhîn a. Tihtakmeuhvin ka hrilh a che u, an lâwmman chu an hmu zo tawh. 6 Nang erawh chu i ṭawngṭaiin, i pindan chhûngrilah lût la, i kawng khâr la, i Pa a rûka awm hnênah chuan ṭawngṭai rawh; tichuan, i Pa a rûka hmu ṭhîntu chuan a rûl ang che. 7 “Tin, in ṭawngṭaiin, Jentailte angin sawi nawn mai mai suh u; an ṭawng tam avângin hriain an ring a ni. 8 Chutichuan, anmahni angin awm suh u; amah in dîl hmain in Pa chuan engte nge in mamawh tih a hre reng si a. 9 “Chutichuan, nangni chu hetiang hian ṭawngṭai rawh u: “ ‘Kan Pa, vâna mi, I hming zahawm rawh se. 10 I ram lo thleng rawh se. I duh zâwng vâna an tih angin leia min ti rawh se. 11 Vawiinah hian kan ei khawpin chaw min pe ang che. 12 Kan batte hi min ngaidam ang che, Keini pawhin kan englo bate kan ngaihdam tâk ang khân. 13 Sual tûra thlêmnaah min hruai lût suh la, Mi sual lakah chuan min chhandam zâwk ang che,’ tiin. 14 “Mi an bawhchhiatte in ngaihdam chuan, in Pa vâna miin a ngaidam ve ang che u. 15 Nimahsela, mite in ngaihdam si loh chuan, in Pain in bawhchhiatte a ngaidam bîk lo vang.
Chaw nghei dân tûr
16 “Chaw in nghei hun pawhin, mi vervêkte angin ngui hmêl pu suh u; anni zawngin mi mit hmuha chaw ngheia an lan theihna tûrin an hmêl an tipawr si ṭhîn a. Tihtakmeuhvin ka hrilh a che u, an lâwmman chu an hmu zo tawh. 17 Nang erawh chuan chaw i nghei hunin sahriak thih la, i hmai phih rawh; 18 chutichuan, i Pa a rûka awm mit hmuhah chauh lo chuan, mihring mit hmuhah chaw ngheiin i lang lo vang; tichuan, i Pa a rûka hmu ṭhîntu chuan a rûl ang che.
Vâna ro khâwl
19 “Leia sûlrûl leh tuiêkin a ei chhiatnaah, rûkruten an reh pawha an rûknaah hian, in tân rote khâwl khâwm suh u; 20 vânah, sûlrûl leh tuiêkin a ei chhiat lohnaah, rûkruten an reh pawha an rûk hek lohnaah chuan, in tân rote khâwl khâwm zâwk rawh u; 21 i ro awmna apiangah i rilru pawh a awm ang.
Taksa khâwnvâr
22 “Taksa khâwnvâr chu mit hi a ni; chutichuan, i mit a fîm chuan i taksa a pumin a êng chhuak ang. 23 I mit a chhiat erawh chuan i taksa a pumin a thim zo vek ang. Chutichuan, i chhûnga êng chu thim ni sela, thim chu a va nasa dâwn êm!
Pathian leh sum
24 “Tu mân hotu pahnih rawng an bâwl kawp thei lo: pakhat huain pakhat an duh ang; a nih loh leh, pakhat ṭanin pakhat an hmusit ang. Pathian leh sum rawng in bâwl kawp thei lo ve.
Lungkham luat a sâwt lo
25 “Chuvângin, ka hrilh a che u, ‘Eng nge ka ei anga, eng nge ka in ang aw?’ tiin in nunna thu leh, ‘Eng nge ka silhin ka fên ang aw?’ tiin in taksa thu lungkham suh u. Ei tûr aiin nunna a thupui zâwk lo vem ni? Silhfên aiin taksa pawh a thupui zâwk lo vem ni? 26 Chunglêng savate hi en rawh u; buh an tuh lo va, an ât hek lo, buh inah an seng lût hek lo; nimahsela, in Pa vâna mi chuan a châwm si a. Nangni chu anni ai chuan nasa takin in hlu zâwk lo vem ni? 27 Tin, nangni zîngah lungkham avângin tuin nge mahni dung lam tawng khata tisâng chuang thei? 28 Tin, silhfên thu engah nge in lungkham ni? Ram tûktinpâr ṭhanzia hi ṭha takin ngaihtuah rawh u; hna an thawk lo, la pawh an kai hek lo; 29 nimahsela, ka hrilh a che u, Solomona meuh pawh a ropuina zawng zawnga a inthuam khân, hêng tûktinpâr pakhat tluk pawh hian cheiin a awm lo. 30 Chutichuan, ram hnim, vawiin anga nung, a tûka thuka tuah leh mai tûr mah Pathianin chuti kauva a chei chuan, aw nangni rin tlêmte u, silhfên a pe zâwk êm êm dâwn lo che u em ni? 31 Chutichuan, ‘Eng nge kan ei ang?’ emaw, ‘Eng nge kan in ang?’ emaw, ‘Eng sinin nge kan awm ang?’ tih emaw lungkham suh u, 32 Jentailten chûng zawng zawng chu an zawng ṭhîn a ni. Chûng zawng zawng chu in mamawh tih in Pa vâna min a hre reng a ni. 33 A ram leh a felna chu zawng hmasa zâwk rawh u; tichuan, chûng zawng zawng chu a pêk belhchhah dâwn che u nia. 34 Chutichuan, a tûk atân lungkham suh u, a tûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni.
Mi dang sawisêl
1 “Sawisêl suh u, sawisêla in awm loh nân. 2 In sawisêl ang bawkin an sawisêl ang che ua, in tehna ngai bawkin an tehsak leh ang che u. 3 Tin, engati nge mahni mita khanchhuk awm chu ngaihtuah si lovin, i unau mita hmawlh tê tak tê awm chu i hmuh ni? 4 Engtin nge i unau hnênah, ‘I mit ata hmawlh tê tak tê kha mi lâk chhuahtîr rawh,’ i tih theih ang? Ngai teh, nangma mit ngeiah khanchhuk a awm reng si a. 5 Mi vervêk! I mit ata khanchhuk kha la chhuak hmasa rawh; chutichuan, i unau mit ata hmawlh tê tak tê lâk chhuah tûr chu fiah takin i hmu ang. 6 “Ui hnênahte thil thianghlim chu pe suh u; vawk hmaahte in tuikeplungte paih hek suh u, an chîl chhe hlauh ang a; hawiin an tai thlêr dah ang che u.
Dîl ula, zawng ula, kik rawh u
7 “Dîl rawh u, tichuan, an pe ang che u; zawng rawh u, tichuan, in hmu ang; kik rawh u, tichuan, an hawnsak ang che u; 8 tu pawh a dîl apiang chuan an hmu ṭhîn a; tu pawh a zawng chuan an hmu ṭhîn a; tu pawh a kik chu an hawnsak dâwn a ni. 9 A nih leh, nangniho hi tu pawh in fapain chhangpêr dîl che u sela, tuin nge lung pe ang che u? 10 A nih leh, sangha dîl che u sela, tuin nge rûl pe ang che u? 11 Chutichuan, nangni mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu thil ṭha a pe zâwk êm êm dâwn lo vem ni? 12 “Chutichuan, thil engkim miin in chunga an tiha in duh tûr ang apiang chu, mi chungah pawh ti ve rawh u; chu chu dân thu leh zâwlneite thu a ni rêng si a.
Kawngka zîm
13 “Kawngka zîmah chuan lût rawh u: boralnaa kalna kawngka chu a zau va, a kawng pawh a zau bawk a, chumi lama lût chu tam pawh an tam hle a ni; 14 nunnaa kalna kawngka chu a zîm a, a kawng pawh a chêp bawk a, a hmutute pawh tlêm tê an ni.
Thing rah ṭha leh ṭha lo
15 “Zâwlnei derte lakah fîmkhur rawh u; chûng chu berâm vun sinin in hnênah an lo kal ṭhîn a, an chhûng lamah erawh chuan chinghne koham takte an ni si a. 16 Anmahni chu an rahah in hre mai ang. Hruihlîngnei kûngah grêp rah an lo ngai em ni? Lênhlîngah pawh theipui an lo ngai em ni? 17 Chutiang bawkin thing ṭha apiang a rah ṭha ṭhîn a; thing chhia erawh chu a rah chhe ṭhîn. 18 Thing ṭha a rah chhe thei lo va, thing chhia lah a rah ṭha thei hek lo. 19 Thing tin rah ṭha lo apiang chu an kit a, meiah an paih ṭhin. 20 Chuvângin, anmahni chu an rahah in hre mai ang.
Ka hre ngai lo a che u
21 “ ‘Lalpa, Lalpa’ mi ti nazawng chu vânramah an lût lo vang a; ka Pa vâna mi duh zâwng titu erawh chu an lût ang. 22 Chumi niah chuan mi tam takin, ‘Lalpa, Lalpa, i hmingin thute kan sawiin, i hmingin ramhuaite kan hnawt chhuakin, i hmingin thil mak tam tak kan ti ṭhîn lo vem ni?’ an la ti ang. 23 Chumi hunah chuan, ‘Nangni thil sual tite u, ka hre ngai lo a che u, ka hnên ata kal bo rawh u,’ tiin anni chu ka la hrilh ang.
In nghet leh nghet lo
24 “Chutichuan, mi tin hêng ka thu hi hriaa zâwm apiang chu, mi fing, lungpui chunga in satu nên tehkhin tûr a ni. 25 Ruahte a lo sûr a, tuite a lo lian a, thlite a lo tleh a, chu in chu a rawn nam sawk sawk a; nimahsela, a chim lo va; lungpui chunga rem tlat a nih avângin. 26 Tin, mi tin, hêng ka thu hi hriaa zâwm lo apiang chu, mi â, ṭiauvut chung maia in satu nên tehkhin tûr a ni. 27 Ruahte a lo sûr a, tuite a lo lian a, thlite a lo tleh a, chu in chu a rawn nam sawk sawk a; a chim ta a; a sawp chu nasa tak a ni,” a ti a.
Isua thuneihna
28 Tin, heti hi a ni a, Isuan chûng thu chu a sawi zawh veleh, mipuiten a thu zirtîr chu mak an ti hle a; 29 lehkhaziaktute ang lova thuneihna nei âwm taka anmahni a zirtîr avângin.
Phâr tihdam
1 Tin, tlâng ata chu a lo chhuk hnuin mipui tam takin amah an zui ta a. 2 Tin, ngai teh, a hnênah phâr a lo kal a, “Lalpa, i duh chuan mi tithianghlim thei e,” tiin chibai a bûk a. 3 Tin, Isuan a han ban a, a dek a, “Ka duh e, lo thianghlim tawh ang che,” a ti a. Tin, chawplehchilhin a phâr chu a lo thianghlim ta nghâl a. 4 Tin, Isuan a hnênah, “Tu mah hrilh lo tûrin fîmkhur ang che; amaherawhchu, puithiam hnênah va inentîr la, Mosian thilpêk tûr a ruat kha hlân rawh, an hriat fiahna tûrin,” a ti a.
Sipai za hotu nau tihdam
5 Tin, Kapernaum khuaa a luhin, a hnênah sipai za hotu a lo kal a, 6 “Lalpa, ka naupang zengin inah a mu reng a, nasa taka tihnatin a awm a ni,” tiin a ngên chiam a. 7 Tin, ani chuan a hnênah, “Ka lo kal ang a, ka tidam ang,” a ti a. 8 Tin, sipai za hotu chuan, “Lalpa, ka in chhûng i luhna tlâk a ni lo ve; thu chauh sawi la, ka naupang a dam mai ang. 9 Kei pawh mi thua awm ka ni a, ka hnuaiah sipaite an awm a; chu mi chu, ‘Kal rawh,’ ka tih leh a kal ṭhîn; mi dang hnênah pawh, ‘Lo haw rawh,’ ka tih leh a lo haw ṭhîn; ka bawih hnênah pawh, ‘Hei hi ti rawh,’ ka tih leh a ti ṭhîn,” tiin a chhâng a. 10 Tin, Isuan chûng thu chu a hriatin mak a ti hle a, a zuitute hnênah chuan, “Tihtakmeuhvin ka hrilh a che u, Israel-te zîngah pawh heti êma rinna nasa hi ka hmu lo. 11 Ka hrilh a che u, chhak leh thlang aṭangin mi tam tak an lo kal ang a, vânramah chuan Abrahama te, Isaaka te, Jakoba te hnênah an ṭhu ang a; 12 ram fate erawh chu pâwn thimah chuan hnawh chhuahin an awm ang a; chutah chuan ṭah leh ha ṭhial chu a awm ang,” a ti a. 13 Tin, Isuan sipai za hotu hnênah chuan, “Kal tawh rawh, i rin angin i chungah lo thleng rawh se,” a ti a. Tichuan, naupang chu chumi dâr ngeiah chuan a lo dam ta a.
Petera pizawn leh mi tam tak tihdam
14 Tin, Isua chu Petera ina a luhin, a nupuia nu chu khawsika mu a hmu a. 15 Tichuan, a kut chu a dehsak a, a khawsik chu a reh ta a; tin, a tho va, a rawng a bâwlsak ta a. 16 Tin, khua a lo tlai lam chuan, a hnênah ramhuai mante tam tak an rawn hruai a; tin, thuin ramhuaite chu a hnawt chhuak a, damlo zawng zawngte chu a tidam bawk a: 17 Zâwlnei Isaian, “Amah ngeiin kan chak lohnate a la a, kan nâte a phur a,” tia a sawi chu a lo thlen theihna tûrin.
Isua zui tumte
18 Tin, Isuan mipui tam tak a vêla a hmuhin, râl lehlama kal tûrin thu a pe a. 19 Tin, lehkhaziaktu pakhat a lo kal a, a hnênah, “Zirtîrtu, i kalna apiangah ka zui ang che,” a ti a. 20 Tin, Isuan a hnênah, “Sihalten kua an nei a, chunglêng savate pawhin bu an nei a, Mihring Fapa erawh hi chuan a lu nghahna a nei lo,” a ti a. 21 Tin, a zirtîrte zînga mi dangin a hnênah, “Lalpa, ka pa mi vuitîr zet rawh,” a ti a. 22 Nimahsela, ani chuan a hnênah, “Mi zui rawh; mitthiin anmahni mitthi chu vui rawh se,” a ti a.
Thlipui hau reh
23 Tin, lawngah a chuang a, zirtîrte chuan an zui a. 24 Tin, ngai teh, dîl chu nasa takin a lo fâwn ta a; chutichuan, tuifâwnin lawng chu a vûr hlup hlup mai a; ani erawh chu a muhîl a. 25 Tin, a hnênah an lo kal a, an kaitho va, “Lalpa, min chhanhim rawh, kan boral dâwn hi le,” an ti a. 26 Tin, ani chuan an hnênah, “Rin tlêmte u, engah nge in hlauh?” a ti a. Chumi hnuah chuan a tho va, thlite leh dîl chu a hau va; tin, a lo reh ta ṭhuap mai a. 27 Tin, mite chuan mak an ti hle a, “He mi hi mi eng nge a nih, thli leh dîl lam pawhin a thu an awih hi?” an ti a.
Gadarin ramhuaizâwl pahnih tihdam
28 Tin, râl lehlam, Gadarin mite ram chu a thlenin, ramhuai man pahnih, thlân aṭanga lo chhuakin an rawn tâwk a, an kawlh êm êm a; chutichuan, chumi kawngah chuan tu mah an kal thei lo va. 29 Tin, ngai teh, anni chuan, “Pathian Fapa, keini leh nang eng nge kan inzâwlna? Hun tiam thlen hmain min nghaisa tûrin hetah i lo kal em ni?” tiin an au va. 30 Tin, an awmna aṭanga hla feah vawk rual tam tak an tla a. 31 Tin, ramhuaite chuan, “Min hnawh chhuah chuan vawk rual kawchhûngahte sâwn min kaltîr ang che,” tiin a hnênah an ngên a. 32 Tin, ani chuan an hnênah, “Kal ta che u,” a ti a. Tichuan, an lo chhuak a, vawk kawchhûngahte chuan an va lût a; tin, ngai teh, vawk rual zawng zawng chu khâmah an tlân chhuk chiam a, dîlah an tlân lût a, tuiah chuan an boral ta a. 33 Tin, a vulhtute chu an tlân a, khuaah chuan an kal a, engkim an hrilh ta a, ramhuai mante chunga thil lo thlengte pawh chu. 34 Tin, ngai teh, a khuain Isua hmuak tûrin an lo chhuak a; tin, amah an hmuh veleh an ram ata chhuak tûrin an ngên chiam a.
Zeng tihdam
1 Tin, Isua chu lawngah a chuang a, dîl chu a kân a, a awmna khua chu a thleng a. 2 Tin, ngai teh, zeng pakhat khuma mu chungin a hnênah an rawn zâwn a. Tin, Isuan an rinzia a hmuhin, zeng hnênah chuan, “Ka fa, thlamuang takin awm rawh; i sualte ngaihdam a ni tawh,” a ti a. 3 Tin, ngai teh, lehkhaziaktu ṭhenkhatte chuan an rilruin, “He mi hian Pathian a sawichhia a nih hi,” an ti a. 4 Tin, Isuan an ngaihtuahte chu a lo hria a, “Engah nge in thinlunga sual in ngaihtuah ni? 5 ‘I sualte ngaihdam a ni tawh,’ tih leh, ‘Tho la, kein kal tawh rawh,’ tih hi a eng nge sawi awl zâwk ni? 6 Eng pawh ni sela, khawvêlah Mihring Fapa hian sual ngaihdam theihna a nei tih in hriat nân,” a ti a, (zeng hnênah chuan) “Tho la, i khum la la, i inah kal rawh,” a ti a. 7 Tin, a tho va, a inah a haw ta a. 8 Tin, mipuite chuan chu chu an hmuhin an hlau va, mihringte hnêna chutiang thuneihna petu Pathian chu an fak a.
Matthaia koh thu
9 Tin, Isua chu chuta ṭangin a kal zêl a, chhiah chawina hmuna ṭhu mi pakhat, a hming Matthaia a hmu a; tin, a hnênah, “Mi rawn zui rawh,” a ti a. Tichuan, a tho va, a zui ta a. 10 Tin, heti hi a ni a, inah chuan chaw a kîl laiin, ngai teh, chhiahkhawntute leh mi sualte tam tak an lo kal a, Isua leh a zirtîrte chu an kîlpui hlawm a. 11 Tin, Pharisaite chuan chu chu an hmuhin a zirtîrte hnênah chuan, “Engati nge in zirtîrtuin chhiahkhawntute leh mi sualte hnêna a ei le?” an ti a. 12 Nimahsela, Isuan chu chu a hriat veleh, “Mi chakte chuan dâktawr an ngai lo va, mi bawrhsâwmte zâwkin an ngai a ni. 13 Chutichuan, ‘Inthawina duh lovin khawngaihna ka duh e,’ tih hi a awmzia va zir rawh u; mi fel takte lam tûra lo kal ka ni lo va, mi sualte zâwk lam tûra lo kal ka ni asin,” a ti a.
Chaw nghei chungchâng
14 Chumi lai chuan Johana zirtîrte chu a hnênah an lo kal a, “Engati nge keini leh Pharisaite hian chaw kan nghei zut ṭhina, i zirtîrte lêmin an nghei si loh?” an ti a. 15 Tin, Isuan an hnênah, “Mo hruaitute hnênah a pasal tûr chu a awm chhûng zawng, mo hruaitute chuan an sûn thei em ni? Nimahsela, a pasal tûr chu an hnên ata hruai bo nite a la thleng ang a, chumi hunah erawh chuan chaw an la nghei ang. 16 Tin, tu mân puan hlui puan la thlâk mar loh themin an bel ngai lo; a bel phuina tûr chuan puan chu a kai thlêr zâwk ang a, a lo thlêr nasa lehzual dâwn si a. 17 Tu mân uain thar savun uain peng hluiahte an thun ngai hek lo; chuti lo chuan, savun pengte chu a puak keh a, uain chu a bua a, savun pengte pawh chu a lo chhe ṭhîn; uain thar chu savun uain peng tharahte an thun zâwk ṭhîn a ni; tichuan, ṭha takin a awm ve ve ṭhîn,” a ti a.
Jaira fanu leh hmeichhe thi pût tihdam
18 Chûng thu chu an hnêna a sawi lai takin, ngai teh, hotu pakhat a lo kal a, chibai a bûk a, “Ka fanu tûnah tak hian a thi a; nimahsela, lo kal la, a chungah i kut nghat la, a lo nung leh mai ang,” a ti a. 19 Tichuan, Isua chu a tho va, a zui ta a, zirtîrte pawhin an zui ve a. 20 Tin, ngai teh, hmeichhe pakhat, kum sâwm leh kum hnih thi pûta damlo hi a hnungah a lo kal a, a puan hmâwr a dek a; 21 “A puan hmâwr chauh pawh dek ila, tihdamin ka awm mai ang,” tih a rilrûk a ni. 22 Tin, Isua a hawi a, amah chu a hmu a, “Ka fanu, thlamuang takin awm rawh; i rinna hi i dampui a ni e,” a ti a. Tichuan, hmeichhia chu chumi dâr achinah chuan a lo dam ta a. 23 Tin, Isua chu hotu inah chuan a lût a, phênglâwng tumte leh mipui bengchheng mur murte a va hmuh chuan, 24 “Chhuak rawh u; naupang chu a thi lo ve, a muhîl a ni zâwk asin,” a ti a. Tin, anni chuan amah chu an nuihsan ta mai a. 25 Nimahsela, mipui chu an hnawh chhuah hnu chuan a lût a, a kutah a chelh a, naupang chu a lo tho ta a. 26 Tin, chu chanchin chu chûng ram zawng zawngah chuan a lo thang chhuak ta a.
Mitdel pahnih tihdam
27 Tin, Isua chu chuta ṭang chuan a kal zêl a, mitdel pahnihin, “Davida fapa, min khawngaih rawh,” tia auvin an zui a. 28 Tin, ina a luh chuan mitdelte chu a hnênah an lo kal a; tin, Isuan an hnênah, “Hei hi ti theiin mi ring em?” a ti a. Anni chuan a hnênah, “Ring e, Lalpa,” an ti a. 29 Tin, ani chuan an mit a dek a, “In rin angin in chungah thleng rawh se,” a ti a. 30 Tichuan, an mit chu a lo vâr ta a. Tin, Isuan an hnênah, “Tu ma hriat loh tûrin fîmkhur rawh u,” a ti tlat a. 31 Nimahsela, anni chu an chhuak a, chumi ram zawng zawngah chuan a chanchin an tithang ta a.
Ṭawngtheilo tihdam
32 Tin, an chhuah lai takin, ngai teh, ṭawngtheilo, ramhuai man pakhat a hnênah an rawn hruai a. 33 Tin, ramhuai chu a hnawh chhuah veleh ṭawngtheilo chu a lo ṭawng ta a. Tin, mipuite chuan mak an ti hle a, “Israel-te zîngah hetiang hi an hmu ngai lo,” an ti a. 34 Pharisaite erawh chuan, “Ramhuai lal avângin a ni ramhuaite a hnawh chhuah ṭhin ni,” an ti a.
Isuan mipui a lainat
35 Tin, Isua chuan an inkhâwmna inahte zirtîrin, Ram Chanchin Ṭha chu hrilin, damlohna tinrêng leh natna tinrêngte tidamin, khaw lian leh khaw tête zawng zawng a fang zêl a. 36 Chutichuan, mipuite chu a hmuhin, vêngtu nei lo berâmte anga hrehawm leh darha an awm avângin a khawngaih ta êm êm a. 37 Tichuan, a zirtîrte hnênah chuan, “Buh seng tûr a tam hle si a; nimahsela, a thawktute an tlêm; 38 chutichuan, a buh seng tûra thawktu tûrte tîr tûrin buh Neitupa hnênah chuan ngên rawh u,” a ti a.
Zirtîr sâwm leh pahnih
1 Tin, a zirtîr sâwm leh pahnihte chu a ko va, anmahni hnawh chhuah theihna tûrin ramhuai bawlhhlawhte chunga thuneihna a pe a; damlohna tinrêng leh natna tinrêng tihdam theihna tûrin thuneihna a pe bawk a. 2 Tin, tirhkoh sâwm leh pahnihte hming chu hêng hi a ni: a hmasa berah chuan Simona (Petera an tih) leh a unau Andria te; Zebedaia fapa Jakoba leh a unau Johana te; 3 Philipa leh Bartholomaia te; Thoma leh chhiahkhawntu Matthaia te; Alphaia fapa Jakoba leh Thaddaia te; 4 Kanaan-a mi Simona leh a mantîrtu Juda Iskariota-te hi.
Sâwm leh pahnih tirh chhuah
5 Chûng sâwm leh pahnihte chu Isuan a tîr chhuak a, an hnênah heti hian thu a pe a: “Jentailte kawngah kal suh ula, Samari mite khua rêng rêngah pawh lût suh ang che u; 6 amaherawhchu, Israel hnam berâm bote hnênah chuan kal zâwk ang che u. 7 Tin, in kalin, ‘Vânram chu a lo hnai ta,’ tiin hril zêl ang che u. 8 Damlote tidam ula, mitthite kaitho ula, phârte tithianghlim ula, ramhuaite hnawt chhuak ang che u; a thlâwnin in hmu a, a thlâwnin pe ang che u. 9 In kâwnghrênahte chuan rangkachak emaw, tangkarua emaw, dâr emaw keng suh ula; 10 zinna atân iptê emaw, kawr pahnih emaw, pheikhawk emaw, tiang emaw keng hek suh u; hnathawktu chu a ei tûr hmu tlâk a ni si a. 11 “Tin, khaw lianah emaw, khaw têah emaw in luhna apiangah, a thleng tlâk mi tûr che u zawng chhuak ula, in chhuah leh hma loh chuan chutah chuan thleng reng ang che u. 12 Tin, inah chuan in luh dâwnin chibai bûk ang che u. 13 Tin, ina mite chu chibai bûk tlâk an nih chuan, in thlamuanna thu chu an chungah lo thleng rawh se; an tlâk loh erawh chuan, in thlamuanna thu chu in chungah lo kîr leh rawh se. 14 Tin, tu pawh lâwm lo che ua, in thu pawh ngaithla lo apiang, chu in ata emaw, chu khua ata emaw in chhuah hun chuan, in kephaha vaivut chu thing thla ang che u. 15 Tihtakmeuhvin ka hrilh a che u, ngaihtuah niah chuan, chumi khuate ai chuan Sodom leh Gomorra ram tuar tûr chu a ziaawm zâwk ang.
Tihduhdahna lo awm tûr
16 “Ngai teh u, chinghne zînga berâm awm angin ka tirh che u hi; chutichuan, rûl anga finga, ṭhuro anga pawikhawih lovin awm ang che u. 17 Nimahsela, mihring lakah chuan fîmkhur rawh u; rorêltuhote an mantîr dâwn si che u a, inkhâwmna inahte an vua ang che u a; 18 a ni, keimah avângin hotute leh lalte hmaah, anmahni leh Jentailte hriattîrna tûrin an la hruai ang che u. 19 Nimahsela, an mantîr hunah che u chuan, ‘Engtin nge, eng thu nge ka sawi ang?’ tiin lungkham suh ang che u; in sawi tûr chu a hun takah chuan a hriattîr dâwn si che u a. 20 A sawitu chu nangni in ni dâwn si lo va, in Pa Thlarauvin nangmahniah a sawi zâwk dâwn a ni. 21 “Tin, tihhlum tûrin unaupa leh unaupa an inmantîr ang a, pa pawhin a fa a mantîr bawk ang; fate pawhin an nu leh an pate an do vang a, an tihhlumtîr bawk ang. 22 Keima hming avângin mi zawng zawng huat in ni ang; nimahsela, a tâwp thlenga tuar peih apiang, chu mi ngei chu chhandamin a awm ang. 23 “Chutichuan, he khuaah hian an tihduhdah hunah che u, khaw dangah tlânsan ang che u; tihtakmeuhvin ka hrilh a che u, Mihring Fapa a lo kal hmain Israel khuate chu in fang chhuak lo vang. 24 “Zirtîr a zirtîrtu chungah a awm lo; bawih pawh a pu chungah a awm hek lo. 25 Zirtîr chu a zirtîrtu anga lo awm leh, bawih chu a pu anga lo awm chu a tâwk e. In neitupa mah ‘Beelzebula’ an tih chuan, a chhûngte chu an va ti nasa dâwn êm!
Tu nge hlauh tûr
26 “Chutichuan, anmahni chu hlau suh ang che u; lang lo tûra thuhrûk eng mah a awm si lo, hriat loh tûra zêp pawh eng mah a awm hek lo. 27 Thima ka hrilh che u hi êngah sawi ang che u; beng bula in hriat hi in chunga chuangin tlângaupui ang che u. 28 “Tin, taksa tihluma thlarau tihlum thei lotute chu hlau suh ula; Gehenna-a thlarau leh taksa tiboral theitu chu hlau zâwk ang che u. 29 Chawngzawng pahnih dâr tangka pakhatah an hralh ṭhîn lo vem ni? Nimahsela, an zînga pakhat mah in Pa lovin leiah a tla lo vang. 30 In samzaite lam pawh hi chhiar vek a ni asin. 31 Chuvângin, hlau suh u; chawngzawng tam tak aiin in hlu zâwk si a.
Isua ṭan leh phat
32 “Chutichuan, mite hmaa mi ṭan apiang, ka Pa vâna mi hmaah ka ṭan ve ang. 33 Nimahsela, tu pawh mite hmaa mi phat apiang, ka Pa vâna mi hmaah ka phat ve ang.
Remna aiah khandaih lên tûr thu
34 “Khawvêlah hian rem lêntîr tûra lo kal emaw min ti suh u; rem lêntîr tûra lo kal ka ni lo va, khandaih lêntîr tûra lo kal ka ni zâwk. 35 Mi a pa dotîr tûrin, fanu a nu dotîr tûrin, mo a pi dotîr tûrin lo kal ka ni asin. 36 Mi a hmêlmate chu ama chhûngte zînga mi ngei an ni ang. 37 Tu pawh a nu emaw, a pa emaw keimah aia hmangaih zâwk chu ka mi ni tlâk a ni lo; tu pawh a fanu emaw, a fapa emaw keimah aia hmangaih zâwk pawh ka mi ni tlâk a ni lo. 38 Tu pawh a kraws pua mi zui lo chu ka mi ni tlâk a ni lo. 39 Tu pawh a nunna hmu chuan a chân ang a; keimah avânga a nunna chân chuan a hmu ang.
Lâwmman hmuh tûr
40 “Tu pawh a lâwm che u chu mi lâwm an ni a, tu pawh mi lâwm chu mi tîrtu lâwm an ni. 41 Tu pawh zâwlnei chu zâwlnei a nih avânga lâwm chuan zâwlnei lâwmman an hmu ang a; tu pawh mi fel chu mi fel a nih avânga lâwm chuan mi fel lâwmman an hmu ang. 42 Tin, tu pawh hêng mi tê tak zînga pakhat hnênah hian, zirtîr a nih avânga tui vâwt no khat chauh pawh pe apiang chuan, tihtakmeuhvin ka hrilh a che u, an lâwmman chu an chân tawp lo vang,” a ti a.
Baptistu Johana mi tirhte
1 Tin, heti hi a ni a, Isuan a zirtîr sâwm leh pahnihte chu thu a pêk zawh veleh, chuta ṭang chuan an khuaahte zirtîr leh thu hril tûrin a kal ta a. 2-3 Tin, Johanan Krista thiltihte chu tân inah chuan a lo hriatin, a hnênah, “Lo kal tûra chu i ni nge, mi dang kan la ngai ang?” tiin a zirtîrte a palaitîr a. 4 Tin, Isuan an hnênah, “Kal leh ta ulang, thil in hmuh leh in hriat hi Johana hnênah va hrilh rawh u; 5 mitdelte an mit a lo vâr ta, kebaite kein an lo kal ta, phârte an lo thianghlim ta, bengngawngte pawh an beng a lo vâr ta, mitthite pawh kaihthawhin an awm ta, pachhiate pawhin Chanchin ṭha hril an dawng ta. 6 Tin, tu pawh ka chunga lungnih lohna hmu lo chu an eng a thâwl e,” tiin a lo chhâng a. 7 Chûng mite chu an hâwn veleh, Isuan mipui hnênah chuan Johana thu a sawi ta a, “Eng en tûrin nge thlalêra in kal chhuah kha? Luang, thli chhêm nghîn maw? 8 A nih loh leh, eng en tûr berin nge in kal chhuah kha? Puan nêm sin maw? Ngai rawh u, puan nêm sinte chu lal inahte asin an awm. 9 A nih loh leh eng vâng berin nge in kal chhuah kha? Zâwlnei en tûrin maw? A nih ngei kha, ka ti a che u, zâwlnei ai pawha ropui zâwk, 10 “ ‘En teh, ka tirhkoh i hmaan ka tîr a ni, Ani chuan i hmaah i kawng a siam ang!’ tia a chanchin an ziak kha he mi hi a ni. 11 Tihtakmeuhvin ka ti a che u, hmeichhe hrin zîngah Baptistu Johana aia ropui zâwk an la chhuak ngai lo; nimahsela, vânrama mi tê deuh pawh ani ai chuan an ropui zâwk si a. 12 Baptistu Johana awm achin tûn thlengin vânram chuan beih vakna a tâwk ṭhîn a, a bei vakte chuan an pâwng lâk ṭhîn. 13 Zâwlneite zawng zawng leh dân thu chuan, Johana a lo awm thleng khân an hril lâwk ṭhîn a ni. 14 In awih duh zawngin, chu chu Elija, lo kal tûra chu a ni. 15 Tu pawh hriatna tûra beng nei chuan hre rawh se. 16 “Nimahsela, tûnlai chhuante hi eng nên nge ka tehkhin ang? Naupang, dâwr hmunahte ṭhua, an ṭhiante auva, 17 “ ‘Phênglâwng kan tumsak che u a, in lâm si lo va; Kan ṭap vak a, âwm in inchûm si lo,’ tiate ang hi an ni. 18 “Johana chu a lo kal a, a eiin a in lo va, ‘Ramhuai a zâwl a nih hi,’ an ti a. 19 Mihring Fapa a lo kal a, a eiin a in a, ‘En teh u, chaw heh mi, uain heh mi, chhiahkhawntute leh mi sualte ṭhian saw!’ an ti si a. Nimahsela, Finna chu a thiltih aṭangin a dikzia a lang a ni.”
Ring duh lo khuate
20 Tin, an sim loh avângin, a thil mak tih tamna ber khuate chu a hau ta a; 21 “Korazin, i chung a pik e! Bethsaida, i chung a pik e! Nangmahnia thil mak tak tihte kha Tura leh Sidon khuaa tih ni sela, saiip puan sina vut zînga ṭhuin an sim tawh ang. 22 Nimahsela, ka ti a che u, ngaihtuah niah chuan nangni tuar ai chuan Tura leh Sidon khaw tuar tûr chu a ziaawm zâwk ang. 23 Tin, nang Kapernaum, vân thlengin chawimawi i ni dâwn em ni? Mitthi khaw thlengin i zuk kal dâwn asin; nangmaha thil mak tak tihte kha Sodom khuaa tih ni sela, tûn thlengin a la awm reng ang. 24 Nimahsela, ka ti a che u, ngaihtuah niah chuan, i tuar ai chuan Sodom ram tuar tûr chu a ziaawm zâwk ang,” a ti a.
Lo kal ula, ka chawlhtîr ang che u
25 Chumi lai chuan Isuan a bia a, “Aw ka Pa, lei leh vân Lalpa, nangin mi fing leh mi bengvârte hnênah hêng thu hi i zêpa, nausênte hnêna i puan avâng hian ka fak a che. 26 A ni, ka Pa, chutiang tih chu i ngaihin a ṭha a ni. 27 Ka Pain thil engkim mi kawltîr tawh; Pa lo chuan tu mahin Fapa hi an hre lo; Fapa leh an hnêna Fapain a puan duhnate chauh lo chuan tu mân Pa chu an hre hek lo. 28 “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. 29 Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi; tichuan, in thlarau tân chawlhna in hmu ang. 30 Ka nghâwngkawl chu a nuam a, ka phur pawh a zâng a ni,” a ti a.
Chawlhnia buhvui thliah
1 Chumi lai chuan Isua chu Chawlhniah buh hmunahte a kal tlang a; a zirtîrte chu an ril a ṭâm a, buhvuite an thliak a, an ei ta a. 2 Tin, Pharisaiten chu chu an hmuhin, a hnênah, “En teh, i zirtîrten Chawlhniah tih thiang lo chu an tih hi,” an ti a. 3 Ani erawh chuan an hnênah, “Davida a rilṭâm laia a ṭhiante nêna an thiltih kha in chhiar lo vem ni? 4 Khatia Pathian ina a luha, amah leh a ṭhiante ei thian loh, puithiamte chauh ei thian chhangdah chu an ei thu kha? 5 A nih leh, Chawlhnia Pathian biak ina puithiam awmte chuan, Chawlhni an bawrh pawhin an thiam zêl tih dân thu-ah chuan in chhiar lo vem ni? 6 Eng pawh ni sela, Pathian biak in aia ropui zâwk hetah a awm tih ka hrilh a che u. 7 Nimahsela, ‘Inthawina duh lovin khawngaihna ka duh e,’ tih hi a awmzia lo hre tawh ni ula chu, mi thiamte chu thiam loh in chantîr lo tûr. 8 Mihring Fapa hi Chawlhni Lal a ni si a,” a ti a.
Kutzeng tihdam
9 Tin, chuta ṭang chuan a kal a, an inkhâwmna inah a va lût a. 10 Tin, ngai teh, mi pakhat kutzeng a lo awm a. Tin, an hêk theih nân, “Chawlhniin tihdam a thiang em?” tiin Isua an zâwt a. 11 Tin, ani chuan an hnênah, “Nangni zîngah tu pawhin berâm pakhat nei ula, chu chu Chawlhniah khuarkhurumah tla ang sela, tu nge chelhin kai chhuak lo vang che u? 12 Berâm pakhat ai chuan mihring pakhat chu a va hlu zâwk êm! Chuvângin, Chawlhniah tihṭhat a thiang e,” a ti a. 13 Chu veleh, chu mi hnênah chuan, “I kut phar rawh,” a ti a. Tichuan, a phar a, a lehlam angin a dam ta viah a.
Pathian chhiahhlawh thlan
14 Chutichuan, Pharisaite chu an chhuak a, amah an tihboral theih dân tûr ngaihtuahin an inrâwn a. 15 Nimahsela, Isuan chu chu a hriatin chuta ṭang chuan a kal bo ta a. Tin, mi tam takin amah an zui a, an zain a lo tidam vek a, 16 a chanchin puan loh tûr an hnênah a ti tlat a: 17,18 Zâwlnei Isaian, “En teh, ka chhiahhlawh, ka thlan, Ka duh tak, ka rilruin a lawm êm êma hi; A chungah ka thlarau ka dah ang a, Tichuan, Jentailte hnênah rorêlna thu a hril ang. 19 A hnial lo vang a, a au hek lo vang a, Kawtthlêrahte pawh tu mân a aw an hre hek lo vang. 20 Hneh tûra rorêlna a tirh chhuah hma loh zawng Luang sâwp a titliak fithla lo vang a, La khu pawh a timit lo vang. 21 Ama hming chu Jentailte chuan an beisei chhan ang,” tia a sawi kha a lo thlen theihna tûrin.
Isua leh Beelzebula
22 Chumi lai chuan, mitdel ṭawngtheilo ramhuai man pakhat a hnênah an rawn hruai a; tin, ani chuan a lo tidam a; chutichuan, ṭawngtheilo chu a lo ṭawng theiin, a lo hmu thei ta a. 23 Tin, mipuiho zawng zawng chuan mak an ti hle a, “He mi hi Davida fapa chu a ni lâwm ni?” an ti a. 24 Nimahsela, Pharisaiten chu chu an hriat veleh, “He mi hian ramhuai lal Beelzebula avâng lo chuan ramhuaite a hnawt chhuak lo vang,” an ti a. 25 Tin, Isuan an ngaihtuahte chu a lo hria a, an hnênah, “Khawii ram pawh mahni indo apiang an boral ṭhîn; khawii khua pawh, chhûngkhat pawh, mahni indo apiang an ding khawchhuak lo vang. 26 Tin, Setanan Setana vêk a hnawh chhuah chuan mahni indo a ni ang asin; a ram chu engtin nge a din chhuah ang le? 27 Tin, kei Beelzebula avânga ramhuaite hnawt chhuak ṭhîn ka lo nih chuan, in faten tu vângin nge an lo hnawh chhuah ṭhin le? Chuvângin, anni chu nangmahni ngaihtuahtu tûrte an ni ang. 28 Amaherawhchu, kei hian Pathian Thlarau avânga ramhuaite hnawt chhuak ṭhîn ka nih chuan, Pathian ram in hnênah a lo thleng tawh a ni ang. 29 Chuti a nih si loh chuan, miin mi chak chu a phuar hmasak zet loh chuan, engtin nge mi chak ina lûtin a sum a lâksak theih ang? Chumi hnuah erawh chuan a in chu a ramsak mai ang. 30 Tu pawh ka lama ṭang lo chu mi do an ni; tu pawh mi lâk khâwmpui lo chuan an tidarh a ni. 31 “Chuvângin, ka ti a che u, mi an sualna tinrêngah leh Pathian an sawichhiatna tinrêngah chuan ngaihdamsak an ni ang a; Thlarau meuh sawichhiatna erawh chu ngaihdamsak a ni lo vang. 32 Tin, tu pawh Mihring Fapa sawisêl apiang chu, an sawisêlna chu ngaihdamsak a ni ang a; tu pawh Thlarau Thianghlim meuh sawisêl apiang erawh chu, an sawisêlna chu tûn dam chhûngah pawh, hun lo la thleng tûrah pawh ngaihdamsak a ni lo vang.
Thing leh a rah
33 “Thing chu a ṭha, a rah pawh a ṭha, in tih loh vêk leh, thing chu a chhia, a rah pawh a chhia, ti law law rawh u; thing chu a rahah a hriat si a. 34 Rûl thlahte u, nangnin sual reng chungin engtin nge thu ṭha in sawi theih ang? Thinlunga khat liam chu kain a sawi ṭhîn asin. 35 Mi ṭha chuan a ro bâwm ṭha ata thil ṭhate a theh chhuak ṭhîn a, mi sual chuan a ro bâwm chhia ata thil chhiate a theh chhuak ṭhîn. 36 Tin, ka hrilh a che u, miten thu lawilo an sawi apiang, chûng thu chu rorêl niah chuan an sawi fiah a la ṭûl ang. 37 I thu chuan thiam a chantîr ang chia, i thu vêk chuan thiam loh a chantîr bawk dâwn che asin,” a ti a.
Chhinchhiahna an phût
38 Chumi lai chuan lehkhaziaktute leh Pharisaite zînga mi tuten emaw an bia a, a hnênah, “Zirtîrtu, i hnên ata chhinchhiahna hmuh kan duh e,” an ti a. 39 Ani erawh chuan an hnênah, “Chhuan sual tak leh uire hmang takte chuan chhinchhiahna an zawng a; nimahsela, zâwlnei Jona chhinchhiahna chauh lo chu an hnênah chhinchhiahna rêng rêng pêk a ni lo vang: 40 Jona chu ni thum leh zan thum nghapui kawchhûnga a awm ang khân, Mihring Fapa hi ni thum leh zan thum lei kawchhûngah a awm bawk dâwn a ni. 41 Ninevi khuaa mite chu ngaihtuah hunah chuan, tûnlai chhuante hnênah hian an ding ve ang a, thiam loh an chantîr ang, Jona thuhril avângin an sim si a; ngai teh u, Jona aia ropui zâwk hetah hian a awm asin. 42 Chhim lam lalnu kha ngaihtuah hunah chuan, tûnlai chhuante hnênah hian a tho ve ang a, thiam loh a chantîr ang; Solomona fin ngaithla tûr mahin kâwlkil ata a lo kal si a; ngai teh u, Solomona aia ropui zâwk hetah hian a awm asin.
Ramhuai bawlhhlawh kîr leh
43 “Tin, ramhuai bawlhhlawh chu mi kawchhûng ata a chhuahin, chawlhna zawngin tui awm lohna hmunahte a vâk a vâk a, a hmu ṭhîn si lo va. 44 Tin, ‘Ka chhuahna inah khân ka kîr leh mai ang,’ a ti a; tin, a va thlen chuan, in chu ruaka, phiah faia, chei mawiin a hmu a. 45 Chu veleh a va kal a, amah aia sual zâwk ramhuai dang pasarih a hruai a, chutah chuan an lût a, an awm reng ṭhîn a; chu mihringa awmze hnuhnûng chu a hmasa aiin a lo ṭha lo zâwk ṭhîn a ni. Chutiang bawkin tûnlai chhuan sual takte chungah hian a la awm ang,” tiin a chhâng a.
Isua nu leh unaute
46 Mipuite hnêna thu a la sawi lai chuan, ngai teh, a nu leh a unaute chu amah biak tumin pâwnah an ding a. 47 Tin, mi pakhatin a hnênah, “Ngai teh, i nu leh i unaute biak tum chein pâwnah sâwn an ding reng e,” a ti a. 48 Ani erawh chuan a hrilhtu hnênah chuan, “Ka nu chu tu nge ni? Ka unaute pawh chu tute nge ni?” tiin a chhâng a. 49 Tin, a zirtîrte lamah a kut a phar a, “En teh u, ka nu leh ka unaute hi! 50 Tu pawh ka Pa vâna mi duh zâwng ti apiang chu ka unau te, ka farnu te, ka nu te an ni asin,” a ti a.
Buh chi thehtu tehkhin thu
1 Chumi ni chuan Isua chu in ata a kal chhuak a, dîl kamah chuan a ṭhu a. 2 Tin, a hnênah mipui tam tak an rawn inkhâwm a; chutichuan, lawngah a chuang a, a ṭhu a; mipui zawng zawng chu ṭiauphovah an ding a. 3 Tin, tehkhin thuin thu tam tak an hnênah a sawi a: “Ngai teh u, buh chi thehtu buh chi thehin a feh a; 4 tin, a theh laiin a ṭhen kawngdungah a tla a, savaten an rawn tlân zo ta a. 5 Tin, a ṭhen pialtlêp lei pan hmunah a tla a; lei a chhah loh avângin a ṭo ta nghâl a. 6 Nimahsela, ni a lo tlângsân deuhvin em vuaiin a lo awm a, zung a neih loh avângin a râwp ta mai a. 7 Tin, a ṭhen hnimhlîngnei zîngah a tla a, hnim chu a lo ṭo sâng a, a dîp ral ta a. 8 Tin, a ṭhen leiṭhaah a tla a, ṭhenkhat a leh za te, ṭhenkhat a leh sawmruk te, ṭhenkhat a leh sawmthum tein a lo rah ta a. 9 Tu pawh beng nei chuan hre rawh se,” a ti a.
Tehkhin thu hman chhan
10 Tin, zirtîrte chu an lo kal a, a hnênah, “Engati nge an hnênah tehkhin thuin i sawi?” an ti a. 11 Tin, ani chuan a chhâng a, an hnênah, “Vânram thurûk chu nangni hriat zawng phal a ni a, anni hriat erawh chu phal a ni lo. 12 Tu pawh a nei apiang an pêk belhchhah ang a, an nei ṭeuh vang; nimahsela, tu pawh a nei lo apiang chu, an neih chhun pawh an lâksak ang. 13 Chutih avâng chuan tehkhin thuin an hnênah ka sawi a ni; hmu mah sela an hmuh ṭhin lohva, bengin hre mah sela an hriat ṭhin lohva, a ngaihna pawh an hriat ṭhin loh avângin. 14 “Tin, Isaia thu sawi lâwk kha an chungah a lo thleng a nih hi: Beng zawngin in hre na ang a, a ngaihna erawh chu in hre tawp lo vang; Hmuh zawng in hmu na ang a, Hriat erawh chu in hre tawp lo vang; 15 He chite thinlung hi a lo chawlawl ta a, An bengte a lo ngawng deuh va, An maimitchhîng bawk a; ‘Chuti lo chuan, kan mitin kan hmu ang a, Kan bengin kan hria ang a, Kan thinlungin kan hre bawk ang a, Kan hawi kîr leh ang a, Anin min tidam hlauh dah ang e,’ an ti a, a tih kha. 16 “Nangni mit erawh chu a vânnei a ni, a hmuh ṭhin avângin; in beng pawh a vânnei a ni, a hriat ṭhin avângin. 17 Tihtakmeuhvin ka hrilh a che u, zâwlnei tam takte leh mi fel tam takte pawhin in thil hmuhte hi hmuh an châk a; nimahsela, an hmu si lo; in thil hriatte pawh hi hriat an châk a; nimahsela, an hre si lo.
Buh chi thehtu tehkhin thu hrilhfiahna
18 “Chutichuan, buh chi thehtu tehkhin thu chu hre rawh u. 19 Tu pawhin ram thu chu benga a lo hriata, a ngaihna a hriat si loh chuanin, mi sual chu a lo kal a, a thinlunga theh sa chu a chhuhsak ṭhîn. Chu mi chu kawngdunga theh chu a ni. 20 Tin, pialtlêp hmuna theh chu, thu chu hriaa lâwm taka pawm nghâl ṭhîn hi a ni; 21 nimahsela, amahah chuan zung a awm lo va, rei lo tê chauh a awm a; tin, thu avâng chuan hrehawmna emaw, tihduhdahna emaw a lo awm veleh a tlu nghâl mai ṭhîn. 22 Tin, hnimhlîngnei zînga theh chu, thu hretu a ni a; nimahsela, khawvêl lungkhamna leh hausakna bumna chuan thu chu a dîp a, rah lovin a lo awm ṭhîn. 23 Tin, leiṭhaa theh chu, thu chu benga hriaa a ngaihna hre bawk hi a ni; chu mi chu a rah ngei a, ṭhenkhat a leh za te, ṭhenkhat a leh sawmruk te, ṭhenkhat a leh sawmthum tein a pung ṭhîn,” a ti a.
Buh lem tehkhin thu
24 Tehkhin thu dang an hnênah a sawi leh a: “Vânram chu, mi a lova chi ṭha thehtu nên chuan tehkhin a ni; 25 nimahsela, mi an muthilh hlânin a hmêlma a lo kal a, buh zîngah chuan buh lem a theh a, a kal bo leh ta a. 26 Tin, buh chu a lo ṭo va, a lo vui chuan buh lem chu a lo lang ve ta a. 27 Tin, in neitu bawihte chu an lo kal a, a hnênah chuan, ‘Ka pu, i lovah chi ṭha i theh lo vem ni? Buh lem saw khawi ata lo awm nge ni le?’ an ti a. 28 Tin, ani chuan an hnênah, ‘Chu chu hmêlmain a lo ti ta a nih chu,’ a ti a. Tin, bawihte chuan a hnênah, ‘A nih leh chûng chu va la khâwm mai ila rem i ti em?’ an ti a. 29 Ani erawh chuan, ‘Remti lo ve; buh lem chu in lâk khâwm zâwngin buh chu in pawt tel hlauh dah ang e. 30 Buh seng thlengin ṭo za rawh se; tin, buh seng hunah chuan buh âttute hnênah, buh lem chu la khâwm hmasa zet ula, hâl tûrin têl rawh u; buh erawh chu ka buh inah seng lût rawh u, ka la ti ang e,’ a ti a,” a ti a.
Anṭam chi tehkhin thu
31 Tehkhin thu dang an hnênah a sawi leh a: “Vânram chu anṭam chi fang khat miin a lâka, a lova a theh ang chu a ni a; 32 chu chu chi zawng zawng aiin a tê ber a; nimahsela, a lo ṭo sân hunah chuan thlaite ai chuan a lian zâwk a, thing a lo ni ṭhîn a; chutichuan, chunglêng savate chu an lo kal a, a zârahte chuan an riak ṭhîn a,” a ti a.
Dawidim tehkhin thu
33 Tehkhin thu dang an hnênah a sawi leh a: “Vânram chu, dawidim hmeichhiain a lâka, chhangphut tehkhâwng thum zîngah a zaa a thawh vek thlenga a phûma ang chu a ni,” a ti a.
Isuan tehkhin thu a hmang
34 Chûng zawng chu Isuan tehkhin thuin mipuite hnênah a sawi a, tehkhin thu lovin an hnênah eng mah a sawi lo: 35 zâwlneiin, “Tehkhin thuin ka kâ ka âng ang a, Leilung pian tirh ata thil inthup chu Ka sawi chhuak ang,” tia a sawi kha a lo thlen theihna tûrin.
Buh lem tehkhin thu hrilhfiahna
36 Chumi lai chuan mipuite chu a kalsan a, inah chuan a lût ta a; tin, a zirtîrte chu a hnênah an lo kal a, “Lova buh lem tehkhin thu kha min hrilhfiah rawh,” an ti a. 37 Tin, ani chuan a chhâng a, “Chi ṭha thehtu chu Mihring Fapa hi a ni a; 38 lo chu khawvêl hi a ni a; chi ṭhate chu ram fate an ni a; buh lemte chu mi sual fate an ni a; 39 hmêlma, a thehtu chu Diabola a ni a; buh seng chu khawvêl tâwpna tûr a ni; buh âttute chu vântirhkohte an ni. 40 Chutichuan, buh lemte chu an la khâwm a, meiin an hâl ang hian khawvêl tâwpnaah chuan a la awm ang. 41 Mihring Fapa hian a vântirhkohte chu a tîr chhuak ang a, a ram ata tihsualtîrtute leh thil tisualtute zawng zawng chu an thiar chhuak ang a, 42 rawh tuina meiah chuan an paih ang; chutah chuan ṭah leh ha ṭhial chu a awm ang. 43 Chumi hunah chuan mi felte chu an Pa ramah chuan ni angin an êng tawh ang. Beng nei chuan hre rawh se.
Ro phûm rûk tehkhin thu
44 “Vânram chu lova ro phûm rûk ang a ni; chu chu miin a hmu a, a thukru a; a lâwm avângin a neih zawng zawng chu a va hralh a, chu lo chu a lei ta a.
Tuikeplung tehkhin thu
45 “Tin, vânram chu sumdâwng mi, tuikeplung ṭha tak zawngtu ang chu a ni leh a; 46 tin, ani chuan tuikeplung hlu tak pakhat a hmu a, a neih zawng zawng chu a va hralh a, a lei ta a.
Lênkhang tehkhin thu
47 “Tin, vânram chu lênkhang, tuifinriata dena, chi tinrêng fûn khâwmna ang chu a ni leh pek a. 48 Chu chu a khah veleh a kamah an hnûk chhuak a; tin, an ṭhu a, a ṭha zawng chu bâwmah an la khâwm a, a chhia erawh chu an paih a. 49 Khawvêl tâwp hunah chuan chutiang bawkin a awm ang; vântirhkohte chu an lo chhuak ang a, mi fel zîng ata mi sualte chu an hlîr ang a, 50 rawh tuina meiah chuan an paih ang; chutah chuan ṭah leh ha ṭhial chu a awm ang,” a ti a.
Ro hlui leh thar
51 Isua vêkin an hnênah, “Chûng zawng zawng chu in hria em?” a ti a. Anni chuan a hnênah, “Hria e,” an ti a. 52 Tin, ani chuan an hnênah, “Chuti a nih chuan, lehkhaziaktu vânram kawng zirtîra awm apiang chu, in neitu, a ro bâwm ata thil tharte leh thil hluite phawrh chhuak ṭhîntu ang chu a ni,” a ti a.
Nazareth khuaah Isua a hnawng
53 Tin, heti hi a ni a, Isua chu chûng tehkhin thute a sawi zawh veleh chuan chuta ṭang chuan a kal ta a. 54 Tin, a awmna khaw lam chu a thleng a, an inkhâwmna inah chuan anmahni a zirtîr ta a; chutichuan, mak an ti hle a, “He mi hian he finna leh hêng thil mak tih theihnate hi khawi ata nge a hmuh? 55 He mi hi thingrem siamtu fapa kha a ni lo vem ni? A nu chu Mari an tih hi a ni lo vem ni? A unaute pawh Jakoba, Josefa, Simona, Juda an tihte chu an ni lo vem ni? 56 A farnute pawh kan hnêna awm an ni vek lo vem ni? He mi hian khawi ata tehlul nge hêng zawng zawng hi a hmuh ni?” an ti a. 57 Tichuan, a chungah an lungni ta lo va. Nimahsela, Isuan an hnênah, “Zâwlnei chu ama khaw lamah leh ama inah chauh lo chuan chawimawi lohvin a awm ngai lo,” a ti a. 58 Tin, an rin loh avângin chutah chuan thil mak tam a ti lo.
Baptistu Johana thih thu
1 Chumi lai tak chuan Lal Heroda chuan Isua chanchin chu a lo hria a, 2 a chhiahhlawhte hnênah, “Chu chu Baptistu Johana kha a nih chu; mitthi zîng ata a tholeh ta zuk nia; chuvângin, chûng thiltihtheihnate chuan amahah a thawk a nih chu,” a ti a. 3 (Heroda chuan a unau Philipa nupui Herodi avângin Johana chu a man a, a phuar a, tân inah a lo khung tawh a ni; 4 Johana chuan a hnênah, “Ani i neih hi a thiang lo ve,” a tihsak avângin. 5 Tin, Johana chu tihhlum a tumin mipui a hlau va, zâwlneia an ruat avângin. 6 Nimahsela, Heroda pian champhaphâk ni chu a lo thlenin Herodi fanu chu a laiah a lâm a, Heroda chu a tilâwm ta a. 7 Chumi avâng chuan a dîl apiang pe tûrin chhechhamin a tiam ta a. 8 Tin, ani chuan a nu fuihin, “Hetah hian thlêngin Baptistu Johana lu mi pe rawh,” a ti a. 9 Tin, lal chu a lungngai ta a; nimahsela, a thutiamte leh a chaw kîlpuite avâng chuan pêk tûr thu a pe a; 10 tichuan, mi a tîr a, tân ina Johana lu chu a tantîr a. 11 Tin, a lu chu thlêngin an rawn la a, hmeichhe naupang hnênah chuan an pe a; ani chuan a nu hnênah a kalpui ta a. 12 Tin, zirtîrte chuan a ruang chu an va hlâwm a, an phûm a; tin, Isua an va hrilh a.) 13 Tin, Isuan chu chu a hriatin, chuta ta chu lawngin thlalêr hmunah a kal hrang ta a. Nimahsela, mipuite chuan an hriat veleh khua aṭangte chuan kea kalin an zui ta a. 14 Tichuan, ani chu vaukama a chhuah chuan mipui tam tak a hmu a, a khawngaih êm êm a, an damlote a tidam a.
Mipui sângnga hrai
15 Tin, tlai lam a lo nihin zirtîrte chu a hnênah an lo kal a, “Hei hi thlalêr hmun a ni a, khua pawh a lo tlai ta si a; khuaahte kalin an tân ei tûr an lei theihna tûrin mipuite hi kaltîr ta che,” an ti a. 16 Isua erawh chuan an hnênah, “An kal bo a ngai lo ve; nangmahnin ei tûr pe rawh u,” a ti a. 17 Tin, anni chuan a hnênah, “Hetah chhangpêr panga leh sangha pahnih chauh kan nei a ni,” an ti a. 18 Tin, ani chuan, “Hetah ka hnênah han la rawh u,” a ti a. 19 Tin, hlobet chunga ṭhu tûrin mipuite chu thu a pe a, chhangpêr panga leh sangha pahnih chu a la a, vân lam enin mal a sâwm a, a phel a, chhangpêrte chu zirtîrte hnênah a pe a; tin, zirtîrte chuan mipuite hnênah an pe a. 20 Tin, an vaiin an ei a, an puar ta hlawm a; an ei bângnawi pawh chu bâwmrâng sâwm leh pahnih an rût khat a. 21 A eitute chu, hmeichhia leh naupang tiam lovin, patling hlîr pawh sângnga lai an ni a.
Tui chunga kea kal
22 Tin, mipuite chu a ṭîntîr vêl chhûngin, a kal hmaa râl lehlama lo kal hmasa tûrin zirtîrte chu lawngah a chuan luihtîr ta nghâl a. 23 Tin, mipuite chu a ṭîntîr hnuin, ṭawngtai tûrin tlângah chuan a han kal hrang a; tin, tlai lam a lo nihin chutah chuan amah chauhvin a awm ta a. 24 Lawng erawh chu dîl lai takah a awm tawh a; thliin a ni lo zâwnga a nem avângin tuifâwnin a vawrh a vawrh ta a. 25 Tin, khawfîng chah dawn laiin, dîl chungah kea kalin an hnên lam a rawn pan a. 26 Tin, zirtîrte chuan amah chu dîl chunga kea a kal an han hmuh chuan, “Hmuithla a nih saw!” tiin an thlaphâng a, hlauvin an au ta vak mai a. 27 Nimahsela, Isuan anmahni a be ta nghâl a, “Thlamuang takin awm rawh u; keimah ka ni alâwm; hlau suh u,” a ti a. 28 Tin, Peteran a chhâng a, “Lalpa, nang i nih chuan tui chunga i hnêna lo kal thu mi pe rawh,” a ti a. 29 Tin, ani chuan, “Lo kal ta che,” a ti a. Petera chu lawng ata a chhuk a, Isua hnên lam panin tui chungah chuan kein a kal a. 30 Nimahsela, thli tleh chu a hmuhin a hlau va, a pil dâwn ta mai a, “Lalpa, min chhandam rawh,” tiin a au ta a. 31 Tin, Isuan a ban ta nghâl a, amah chu a chelh a, a hnênah, “Nang, rin tlêm, engah nge i rinhlelh le?” a ti a. 32 Tin, lawnga an chuan chuan thli chu a bâng ta mai a. 33 Tin, lawnga awmte chuan, “Pathian Fapa i lo nih takzet hi,” tiin amah chibai an bûk a.
Gennesaret rama damlote tihdam
34 Tin, râl lehlam an kai chuan Gennesaret ram khawmual an thleng ta a. 35 Tin, chumi hmuna mite chuan amah an hriat veleh, chumi kiang vêl ram zawng zawngah chuan mi an tîr a, damlo zawng zawng chu a hnênah an rawn hruai a; 36 tin, a puan hmâwr tal deh theih an dîl chiam a; tin, a dek apiang chu an lo dam ta zêl a.
Upate thurochhiah
1 Chumi lai chuan, Jerusalem khua aṭangin Pharisaite leh lehkhaziaktute Isua hnênah an lo kal a, 2 “Engati nge i zirtîrten upate thurochhiah chu an bawhchhiat ṭhin? Chhang an eiin an kut an sil ngai si lo va,” an ti a. 3 Tin, ani chuan an hnênah, “Nangni pawhin engati nge in thurochhiah avânga Pathian thupêk in bawhchhiat ni? 4 Pathianin, ‘I nu leh i pa chawimawi rawh,’ ‘Tu pawh a nu emaw, a pa emaw sawichhia apiang chu thi mawlh rawh se,’ a ti si a. 5 Nangni erawh chuan, ‘Tu pawh a nu emaw, a pa emaw hnêna, “I mi chhawrna tûr hi Pathian hnêna pêk a ni tawh,” ti apiang chuan, 6 a nu leh a pa a chawimawi tûr a ni lo ve,’ in ti ṭhîn a. Tichuan, in thurochhiah avângin Pathian thu chu in bawh bo ta a nih hi. 7 Vervêkte u, Isaia hian in chungchâng thu a lo hril lâwk dik zet mai, 8 ‘He miteho hian an kâin min chawimawi a, An thinlung erawh chuan min hlat si a. 9 Eng pawh ni sela, an zirtîrnaah mihring thupêk an zirtîr avângin An mi biak ṭhin hi a thlâwn mai a ni,’ tiin,” a ti a, a chhâng a.
Mihring tibawlhhlawhtu
10 Tin, mipui chu a ko va, an hnênah, “Ngaithla ula, lo ngai thiam rawh u: 11 kâa lût chu mihring tibawlhhlawhtu a ni lo va; kâa chhuak chu, chu ngei chu mihring tibawlhhlawhtu a ni zâwk e,” a ti a. 12 Chumi lai chuan a zirtîrte an lo kal a, a hnênah, “Pharisaiten kha thu kha an hriata an lungnih loh kha i hria em?” an ti a. 13 Ani erawh chuan, “Kûng zawng zawng ka Pa vâna mi phun loh chu pawh chhuahin a awm ang. 14 Anni chu pawisa suh u; hruaitu mitdel an ni. Tichuan, mitdelin mitdel vêk a hruai chuan khuarkhurumah an tla dûn ang,” a ti a, a chhâng a. 15 Tin, Peteran a hnênah, “Tehkhin thu kha min hrilhfiah ta che,” tiin a chhâng a. 16 Tin, ani chuan, “Tûn thlengin nangni pawh hriatna nei lovin in la awm cheu maw? 17 Kâa lût apiang chu pumah a tla thla a, dailênnaa paih chhuahin a awm tih in hre lâwm ni? 18 Kâa chhuakte erawh chu thinlung aṭanga lo chhuak a ni; chûng ngei chuan mihring a tibawlhhlawh ṭhîn a ni. 19 Thinlung aṭang hian ngaihtuahna sual te, tualthahna te, uirêna te, inngaihna te, rûkrûkna te, hêkna te, sawichhiatna te a lo chhuak si ṭhîn a; 20 Chûng chu mihring tibawlhhlawhtu a ni; kut sil lova chaw ei erawh chuan mi a tibawlhhlawh lo ve,” a ti a.
Kanaan hmeichhe rinna
21 Tin, Isua chu chuta ta chu a chhuak a, Tura leh Sidon bialah a kal ta a. 22 Tin, ngai teh, chûng ram ata chu Kanaan hmeichhe pakhat a lo chhuak a, “Lalpa, Davida Fapa, mi khawngaih rawh; ka fanu ramhuaiin a man tlat a ni,” tiin a au va. 23 Ani erawh chuan kam khat mahin a chhâng lo. Tin, a zirtîrte chuan, “Kan hnungah a au a au si a, kaltîr mai ta che,” tiin an rawn ngên a. 24 Ani erawh chuan, “Israel hnam berâm bo hnênah lo chuan tirh ka ni lo ve,” a ti a, a chhâng a. 25 Nimahsela, hmeichhia chu a lo kal a, “Lalpa, mi pui rawh a!” tiin chibai a bûk a. 26 Tin, ani chuan, “Fate chhang lâksaka, uite hnêna paih chu a mawi lo ve,” a ti a, a chhâng a. 27 Ani chuan, “Lalpa, nih zawng a ni a; nimahsela, uite pawhin an pu dawhkân ata chhang nawi tla chu an ei ṭhîn alâwm,” a ti a. 28 Chu veleh Isua chuan a hnênah, “Hmeichhia, i rin a nasa êm mai; i duh ang takin i chungah awm rawh se” a ti a, a chhâng a. Tichuan, a fanu chu chumi achinah chuan a lo dam ta mai a.
Isuan mi tam tak a tidam
29 Tin, Isua chu chuta ta chu a kal a, Galili dîl kiang a thleng a; tin, tlângah chuan a chho va, chutah chuan a ṭhu ta a. 30 Tin, mipui tam tak, kebai te, mitdel te, ṭawngtheilo te, piangsual te rawn hruaiin a hnênah an lo kal a, a ke bulah an dah a; tin, a tidam ta hlawm a. 31 Chutichuan, mipui chuan ṭawngtheilote chu lo ṭawnga, piangsualte chu lo ṭhaa, kebaite chu kea kala, mitdelte chu hmu theia an hmuhin mak an ti hle a; tichuan, Israel-te Pathian chu an fak ta a.
Mipui sângli hrai
32 Tin, Isuan a zirtîrte chu a ko va, “Mipuiho hi tûnah ni thum ka hnênah an awm tawh a, ei tûr eng mah an neih loh avângin ka khawngaih êm êm a ni; chaw ngheiin ka kaltîr duh lo ve; chuti lo chuan, kawnglakah an chau dah ang e,” a ti a. 33 Tin, zirtîrte chuan a hnênah, “Mipui heti zozai puarna khawp chhangpêr chuti zozai thlalêrah khawi ata nge kan hmuh ang?” an ti a. 34 Tin, Isuan an hnênah, “Chhangpêr eng zât nge in neih?” a ti a. Tin, anni chuan “Pêr sarih, nghatê tlêm tê nên,” an ti a. 35 Tin, ani chuan leia ṭhu tûrin mipui chu thu a pe a. 36 Tin, chhangpêr pasarih leh sanghate chu a la a, lâwm thu a sawi a, a phel a, zirtîrte hnênah a pe a; tin, zirtîrte chuan mipuite hnênah an pe a. 37 Tin, an vaiin an ei a, an puar ta hlawm a; an ei bângnawi pawh chu bâwm sarih an rût khat a. 38 A eitute chu, hmeichhia leh naupang tiam lovin, patling hlîr pawh sângli an ni a. 39 Tin, mipuite chu a ṭintîr hnuin lawngah a chuang a, Magadan ram a lo thleng a.
Chhinchhiahna phût
1 Tin, Pharisaite leh Saddukaite an lo kal a, amah fiah nân vân ata chhinchhiahna anmahni entîr tûrin an dîl a. 2 Nimahsela, ani chuan an hnênah, “Tlai lam a lo nihin, ‘Khua a ṭha dâwn a ni ang, kâwl a sen êm mai,’ in ti ṭhîn a. 3 Tin, zîngah chuan, ‘Vawiin chu khua a chhe dâwn a ni ang, kâwl a sen a, khua a dûr êm mai,’ in ti ṭhîn a. Vân awmzia in hre fiah thiam si a; nimahsela, hun chhinchhiahnate hi in hre fiah thei lo. 4 Chhuan sual tak leh uire hmang takte chuan chhinchhiahna an zawng a; nimahsela, Jona chhinchhiahna chauh lo chu an hnênah chhinchhiahna rêng rêng pêk a ni lo vang,” a ti a, a chhâng a. Tin, anni a kalsan a, a kal ta daih a.
Pharisai leh Saddukai dawidim
5 Tin, zirtîrte chu râl lehlam an thlen chuan chhang an lo ken theihnghilh a. 6 Tin, Isuan an hnênah, “Pharisaite leh Saddukaite dawidim lakah chuan invêng ula, fîmkhur rawh u,” a ti a. 7 Tin, anni chu, “Chhang kan keng hauh lo,” tiin an inngaihtuah a. 8 Tin, Isuan chu chu a hria a, “Rin tlêmte u, engati nge chhang in neih loh avânga in inngaihtuah ni? 9 Tûnah pawh in rilruin in la hre lo fo maw? Mi sângnga chhangpêr pangaa hrai leh, in bâwmrâng ruh khah zât kha in hre reng lâwm ni? 10 Mi sângli chhangpêr pasariha hraia in bâwm ruh khah zât pawh kha? 11 Chhang thu in hnênah ka sawi lo tih engtizia nge in hriat loh? Pharisaite leh Saddukaite dawidim lakah erawh chuan fîmkhur rawh u,” a ti a. 12 Chu veleh chhang dawidim lakah fîmkhur tûrin a tîr lo va, Pharisaite leh Saddukaite zirtîrna laka fîmkhur tûrin anmahni a tîr zâwk tih an lo hre ta a.
Peteran Isua nihna a sawi
13 Tin, Isua chu Kaisara Philippi bial a lo thlen chuan, a zirtîrte hnênah, “Miten Mihring Fapa hi tu nge a ni an tih?” tiin a zâwt a. 14 Tin, anni chuan, “Ṭhenkhatin, ‘Baptistu Johana a ni,’ an ti a; ṭhenkhatin, ‘Elija a ni,’ an ti; ṭhenkhatin ‘Jeremia emaw, zâwlnei tua emaw a ni,’ an ti,” an ti a. 15 Ani chuan an hnênah, “A nih leh, nangnin tu nge a ni mi tih?” a ti a. 16 Tin, Simon Peteran, “Krista, Pathian nung Fapa chu i ni,” a ti a, a chhâng a. 17 Tin, Isuan a hnênah, “Simon Bar-jona, i eng a thâwl e; tisa leh thisenin a hriattîr che a ni si lo va, ka Pa vâna miin a hriattîr zâwk che a ni. 18 Tin, nang Petera i ni tih ka hrilh bawk a che; he lungpui chungah hian ka kohhranho ka rem chho vang a, Mitthi Khaw kulh kawngkhârte chuan chu chu an ngam lo vang. 19 Vânram chabite ka pe ang chia, lei chungah eng pawh i phuar apiang vânah phuar a ni ang a; lei chungah eng pawh i phelh apiang vânah phelh a ni ang,” a ti a, a chhâng a. 20 Chumi zawhah Krista a ni tih tu mah hrilh lo tûrin zirtîrte chu a ti tlat a.
A tuar leh thih tûr thu Isuan a sawi
21 Chumi achinah chuan Isuan Jerusalem khuaa a kal tûrzia te, upate, puithiam lalte, lehkhaziaktute laka thil tam tak a tuar tûrzia te, tihhluma a awm tûrzia te, ni thum nia kaihthawha a awm tûrzia te chu a zirtîrte a hriattîr ṭan ta a. 22 Tin, Petera chuan ani chu a hruai hrang a, “Lalpa, Pathianin khawngaih che rawh se; chûng chu i chungah a thleng tawp lo vang,” tiin a zilh ta a. 23 Ani erawh chu a hawi a, Petera hnênah chuan, “Setan, ka hnungah kal rawh; ka tân tlûkna i ni e; Pathian thilte ngaihtuah lovin, mihring thilte i ngaihtuah zâwk a nih hi,” a ti a. 24 Tin, Isuan a zirtîrte hnênah, “Tu pawhin mi zui a duh chuan, mahni hrehawm pawisa lovin, a kraws puin mi zui rawh se. 25 Tu pawh a nun humhim duh apiangin a chân ang a; tu pawh keimah avânga a nun chân apiangin a humhim ang. 26 Miin khawvêl hi a pumin nei sela, a nun chân si sela, a tân eng nge sâwt ang? A nih loh leh, miin a nun aiah eng nge a pêk ang? 27 Mihring Fapa hi a vântirhkohte nên, a Pa ropuinaa inthuamin a lo kal dâwn si a; chumi hunah chuan mi tin an thiltih ang zêlin a rûl ṭheuh vang. 28 Tihtakmeuhvin ka ti a che u, heta dingho a ṭhente hi, Mihring Fapa a rama lo kal an hmuh hma loh chuan, thihna tem tawp lo tûr an awm,” a ti a.
Hmêl danglam
1 Tin, ni ruk achinah chuan Isuan Petera te, Jakoba te, a unau Johana te a hruai a, a hrangin tlâng sâng takah a kal chhohpui a; 2 an hmaah chuan a hmêl awmzia chu a lo danglam ta a; a hmai chu ni angin a lo êng a, a silhfênte chu êng angin a lo vâr ta a. 3 Tin, ngai teh, Mosia leh Elija chu amah nên inbiain an hnênah an inlâr a. 4 Tin, Peteran Isua a bia a, “Lalpa, kan tân heta awm hi a ṭha; i duh chuan hetah hian bâwktê pathum ka khawh ang; i tân pakhat, Mosia tân pakhat, Elija tân pakhat,” a ti a. 5 A la sawi lai mêkin, ngai teh, chhûm vâr takin anmahni a rawn hliah ta a; tin, ngai teh, chhûm aṭang chuan awin, “Hei hi ka Fapa duh tak, ka lawm êm êma chu a ni; ama thu ngai rawh u,” a rawn ti a. 6 Tin, zirtîrte chuan chu chu an hriatin an tlu bawkkhup a, an hlau ta êm êm a. 7 Tin, Isuan anni chu a rawn dek a, “Tho ula, hlau suh u,” a ti a. 8 Tin, an dâk chhuak a, Isua chauh lo chu tu mah an hmu ta lo va. 9 Tin, tlâng ata chu an chhuk laiin, Isuan an hnênah, “Mihring Fapa hi mitthi zîng ata a thawhleh hma loh zawng, in thil hmuh kha tu mah hrilh suh u,” tiin thu a pe ta a. 10 Tin, a zirtîrte chuan a hnênah, “Lehkhaziaktuten, ‘Elija a lo kal hmasa tûr a ni,’ engtiziaa ti nge an nih le?” tiin an zâwt a. 11 Tin, ani chuan, “Elija chu a lo kal dâwn rêng a ni, engkim a siam ṭha bawk ang. 12 Nimahsela, ka hrilh a che u, Elija chu a lo kal tawh reng a ni, amah chu an hre lo va, a chungah an duh duhin an ti ta zâwk a. Chutiang bawkin Mihring Fapa pawh hian an lakah a tuar ve dâwn a ni,” a ti a, a chhâng a. 13 Chu veleh, zirtîrte chuan Baptistu Johana thu an hnênah a sawi a ni tih an lo hre ta a.
Ramhuai pai naupang tihdam
14 Tin, mipui hnên an lo thlenin, mi pakhat a hnênah a lo kal a, a hmaah ṭhingṭhiin, 15 “Lalpa, ka fapa saw khawngaih ang che, thlaemât a ni a, a tuar nasa êm mai; vawi tam tak meiah a tlu ṭhîn a, vawi tam tak tuiah a tlu bawk ṭhîn a ni. 16 Tin, i zirtîrte hnênah ka rawn hruai a, an tidam thei si lo va,” a ti a. 17 Tin, Isuan, “Chhuan rinna nei lova tihmawhte u, eng chen nge in hnênah ka awm ang a, eng chen nge ka ngaihtheih ang che u? Amah chu ka hnênah hian rawn hruai rawh u,” a ti a, a chhâng a. 18 Tin, Isuan ramhuai chu a hau va, a chhûng ata a chhuak ta a; chumi dâr achinah chuan naupang chu a lo dam ta a. 19 Chumi hnuah chuan zirtîrte chu a hrangin Isua hnênah an lo kal a, “Engati nge keinin kan hnawh chhuah theih loh?” an ti a. 20 Tin, ani chuan an hnênah, “In rin tlêm avângin. Tihtakmeuhvin ka hrilh a che u, anṭam mu fang khat ang rinna in neih chuan, he tlâng hnênah hian, ‘Heta ṭangin sawtah sâwn va insawn rawh,’ in ti ang a, a insawn mai ang; in tân tih theih loh rêng eng mah a awm lo vang,” a ti a.
A thih tûr thu Isuan a sawi leh
22 Tin, Galili rama an rawn inkhâwm laiin, Isuan an hnênah, “Mihring Fapa hi mihringte kutah mantîrin a awm dâwn a ni; 23 tin, an tihlum ang a, ni thum niah kaihthawhin a awm ang,” a ti a. Tichuan, an lungngai ta êm êm a.
Tempul chhiah pêk thu
24 Tin, Kapernaum khua chu an thlenin, Pathian biak in tangka khawntute chu Petera hnênah an lo kal a, “In zirtîrtuin biak in tangka chu a pe ve ṭhîn lâwm ni?” an ti a. 25 Ani chuan, “Pe ve ṭhîn e,” a ti a. Tin, ina a va luh chuan Isuan a hnênah, “Simon, engtin nge i ngaih? Leia lalten chhiah emaw, sum neih man emaw, tu lakah nge an lâk ṭhin? An fate lakah nge mi hrang lakah?” tiin a lo sawi khalh a. 26 Tin, Peteran, “Mi hrang lakah,” a tih veleh, Isuan a hnênah, “Chuti a nih si chuan fate chu an âwl a ni ang chu. 27 Nimahsela, nang, dîlah va kal la, nghakuai chiah la, sangha lo chhuak hmasa chu man rawh; tin, a kâ i keu veleh chêng hnih i hmu mai ang; chu chu la la, kei leh nanga tân an hnênah pe rawh; chuti lo chuan, anni chu kan tilungni lo dah ang e,” a ti a.
Tu nge ropui ber
1 Chumi lai tak chuan zirtîrte chu Isua hnênah an lo kal a, “Vânramah tu nge ropui ber ang le?” an ti a. 2 Tin, ani chuan naupang tê a ko va, an zîngah a dintîr a, 3 “Tihtakmeuhvin ka ti a che u, in inlamlêta, naupang tê ang in lo nih loh chuan vânramah in lût tawp lo vang. 4 Chutichuan, tu pawh he naupang tê anga inngaitlâwm apiang, chu mi chu vânramah chuan a ropui ber ang. 5 Tin, tu pawh ka hming avânga hetiang naupang tê pakhat lâwm apiang chu, keimah mi lâwm an ni ang. 6 Amaherawhchu, tu pawh hêng mi ringtu mi tête zînga pakhat pawh titlu apiang chu, an nghâwngah buh râwt sawmna lung lian pui awrhtîrin, tuifinriat thûk laiah thlâk daih sela an tân a sâwt zâwk ang.
Sual ti tûra thlêmna
7 “Tlûknate avângin khawvêl chung a pik e! Tlûknate chu lo awm tûr rêng zawng a ni a; nimahsela, tlûkna awmtîrtu chung chu a pik e! 8 Tin, i kutin emaw, i kein emaw a tihtlûk che chuan, tan la, paih daih rawh; kut pahnih emaw, ke pahnih emaw neia kumkhaw meia paih ai chuan, piangsualin emaw, kebaiin emaw nunnaa luh i tân a ṭha zâwk e. 9 Tin, i mitin a tihtlûk che chuan, kher chhuak la, paih daih rawh; mit khing hnih neia Gehenna meia paih ai chuan, mit khing khat neia nunnaa luh i tân a ṭha zâwk e.
Berâm bo tehkhin thu
10 “Hêng mi tête zînga pakhat pawh hi hmusit lo tûrin fîmkhur rawh u; an vântirhkohten vânah ka Pa vâna mi hmêl chu an hmu fo ṭhîn tih ka hrilh che u hi. 12 “Engtin nge in ngaih? Mi tu pawhin berâm za nei sela, an zînga pakhat vâk bo sela, sawmkua leh pakuate chu hnutchhiaha tlânga han kalin, a bo chu a zawng lo vang em ni? 13 Tihtakmeuhvin ka hrilh a che u, a hmuh leh hlauh chuan, sawmkua leh pakua vâk bo lote chungah ai chuan a chungah a lâwm zâwk ang. 14 Chutiang bawkin hêng mi tête zînga pakhat boral pawh hi, in Pa vâna mi duh zâwng a ni lo ve.
Unau chunga thil tisual
15 “Tin, i unauvin i chungah thil tisual sela, kal la, amah leh nangmah chauhva hriatah a sualnaah chuan zilh ang che; a ngaihthlâk che chuan i unau chu i hneh a ni tawh ang. 16 A ngaihthlâk loh che erawh chuan, mi dang pakhat emaw, pahnih emaw i hnênah hruai ang che; chutichuan, thu tinrêng chu hretu pahnih emaw, pathum emaw kâa tihngheha a awm theih nân. 17 Tin, anni pawh chu a ngaihthlâk duh loh chuan, kohhranho hnênah thlen ang che; tin, kohhranho pawh a ngaihthlâk duh loh chuan, ani chu i tân Jentail leh chhiahkhawntu ang ni rawh se. 18 Tihtakmeuhvin ka hrilh a che u, lei chungah eng pawh in phuar apiang vânah phuar a ni ang a; lei chungah eng pawh in phelh apiang vânah phelh a ni ang. 19 Tihtakmeuhvin ka hrilh leh a che u, lei chungah hian in zînga mi pahnih, an thil dîl kawnga an thurual chuan, ka Pa vâna mi tihsakin an awm ang. 20 Mi pahnih emaw, pathum emaw ka hminga an inkhâwmna apiangah chuan, an zîngah ka awm si ṭhîn a,” a ti a.
Ngaidam ve duh lo chhiahhlawh tehkhin thu
21 Chumi lai chuan Petera a lo kal a, a hnênah, “Lalpa, ka unauvin ka chungah thil tisual sela, vawi eng zât nge ka ngaihdam ang? Vawi sarih thlengin em ni ang?” a ti a. 22 Isuan a hnênah, “ ‘Vawi sarih thlengin,’ ka ti lo a che, ‘Vawi sarih hmun sawmsarih thlengin,’ ka ti zâwk che a ni. 23 “Chumi avâng chuan, vânram chu, lalber tu emaw a bawihte hnêna sum chanchin tihfel tum nên chuan tehkhin a ni. 24 Tin, a han tihfel ṭan chuan mi pakhat talent sîngkhat ba a hnênah an rawn hruai a. 25 Tin, pêk tûr a neih loh avângin a pu chuan amah nên, a nupui nên, a fate nên, a neih zawng zawng nên hralha rulh tûr thu a pe a. 26 Chutichuan, bawih chuan, ‘Ka pu, ka chungah zahngai rih la, a zain ka pe vek ang che,’ tiin bawkkhupin chibai a bûk a. 27 Tichuan, chu bawiha pu chuan a khawngaih ta êm êm a, a thlah a, a bat chu a ngaidam ta a. 28 Nimahsela, chu bawih chu a kal chhuak a, a bawihpuite zînga pakhat, a duli za ba a va hmu a; tin, a man a, ‘I bat kha mi pe rawh,’ tiin a hrawkah a rêk a. 29 Chutichuan, a bawihpui chu a bawkkhup a, ‘Ka chungah zahngai rih la, ka la pe ang che,’ tiin a ngên chiam a. 30 Nimahsela, a duh lo va; a bat chu a tlâk hma loh zawng tân inah a va khung ta a. 31 Chutichuan, a bawihpuite chuan a thiltih chu an hmuhin an lungngai êm êm a, a thiltih zawng zawng chu an pu an va hrilh ta a. 32 Chu veleh a pu chuan ani chu a ko va, a hnênah, ‘Bawih sual, mi dîl chiam avâng khân i bat zawng zawng kha ka ngaidam che a ni a; 33 ka khawngaih che ang khân nang pawhin i bawihpui chu i khawngaih ve tûr a ni lâwm ni?’ a ti a. 34 Tin, a pu chu a thinur ta a, a bat zawng zawng a tlâk hma loh zawng nghaisatute hnênah a pe ta a. 35 Mi tinin thinlung taka in unaute in ngaihdam loh chuan, ka Pa vâna mi pawhin chutiang bawkin in chungah a ti ve ang,” a ti a.
Inmâk thua Isua zirtîrna
1 Tin, heti hi a ni a, Isua chu chûng thu a sawi zawh veleh chuan, Galili ram ata a chhuak a, Jordan lui râla Judai ramah chuan a va kal a; 2 tin, mipui tam takin an zui a; chutah chuan anmahni chu a tidam ta a. 3 Tin, Pharisaite a hnênah an lo kal a, amah fiah nân, “Eng vâng pawhin miin a nupui mâk a thiang em?” an ti a. 4 Tin, ani chuan, “A tîr ata an siamtu khân hmeichhia leh mipaa a siam leh, 5 ‘Hemi avâng hian mipain a nu leh a pa a kalsan ang a, a nupui a vuan ang; tichuan, an pahnih chuan tisa pumkhat an lo ni tawh ang,’ a ti tih in chhiar lo vem ni? 6 Chutichuan, pahnih an ni tawh lo va, tisa pumkhat an ni tawh zâwk a ni. Chuvângin, Pathianin a zawm tawh chu mihringin ṭhen suh se,” a ti a, a chhâng a. 7 Anni chuan a hnênah, “A nih leh, engati nge Mosian inmâkna lehkha pêka mâk tûr thu a pêk si?” an ti a. 8 Ani chuan an hnênah, “Mosian in thinlung khauh avângin asin in nupuite mâk a phal ni; nimahsela, a tîr ata chutiang a ni si lo. 9 Kei chuan ka ti a che u, ‘Tu pawh tlangvâl ngaih vâng ni lova nupui maa mi dang nei apiang chu a uire a ni; mâk hnu nei apiang pawh a uire a ni,’ ” a ti a. 10 Zirtîrte chuan a hnênah, “Nupui kawngah mipa thu chutiang a nih si chuan, inneih hi a ṭha lo ve,” an ti a. 11 Ani erawh chuan an hnênah, “Chu thu chu mi nazawngin an pawm thei lo ve, a pêkate chauh lo chuan. 12 Mi tilreh, an nu pum chhûng ata chutianga piang rêngte an awm a; mi tilreh, mihring kuta rehte an awm bawk a; mi tilreh, vânram avânga tilreha insiam chawpte an awm bawk a. Tu pawh a pawm thei apiangin pawm rawh se,” a ti a.
Isuan naupangte mal a sâwm
13 Chumi lai chuan an chunga a kut a nghaha a ṭawngṭaisak tûrin, a hnênah naupang tête an rawn hruai a; tin, zirtîrte chuan an lo hau va. 14 Isua erawh chuan, “Naupang tête ka hnênah han kaltîr ula, hnar suh u; vânram chu hetiang mite ta a ni si a,” a ti a. 15 Tin, an chungah a kut a nghat a, chuta ta chu a kal ta a.
Tlangvâl hausa
16 Tin, mi pakhat a hnênah a lo kal a, “Zirtîrtu, chatuana nunna ka neih theih nân thil ṭha eng nge ka tih ang?” a ti a. 17 Tin, ani chuan a hnênah, “Thil ṭha thu engah nge mi zawh? ṭha chu pakhat chauh a awm; eng pawh ni sela, nunnaa luh i duh chuan thupêkte chu zâwm rawh,” a ti a. 18 Tin, ani chuan a hnênah, “A eng ber hi maw?” a ti a. Tin, Isuan, “ ‘Tual i that tûr a ni lo’, ‘I uire tûr a ni lo’, ‘I ru tûr a ni lo’, ‘Dâwtin i hêk tûr a ni lo’, 19 ‘I nu leh i pa chawimawi rawh,’ tihte leh, ‘Nangmah i inhmangaih angin i vêngte i hmangaih tûr a ni,’ tih hi,” a ti a. 20 Tlangvâl chuan a hnênah, “Chûng thu zawng zawng chu ka zâwm ṭhîn; eng nge ka la bâk?” a ti a. 21 Isuan a hnênah, “Ṭha famkima awm i duh chuan, kal la, i neih chu hralh la, pachhiate hnênah pe rawh; chutichuan, vânah ro i nei ang; tin, lo kal la, mi zui ang che,” a ti a. 22 Tlangvâl erawh chuan chu thu chu a hriatin, lungngai takin a kal bo ta a; sum tam tak nei mi a nih avângin. 23 Tin, Isuan a zirtîrte hnênah chuan, “Tihtakmeuhvin ka hrilh a che u, mi hausa tân vânrama luh chu harsa tak a ni. 24 Tin, ka hrilh leh a che u, mi hausa Pathian rama luh aiin, sanghâwngsei hriau benga luh tlang a awl zâwk,” a ti a. 25 Tin, zirtîrten chu chu an hriat chuan mak an ti nasa êm êm a, “Tu nge chhandam ni thei ang le?” an ti a. 26 Tin, Isuan anni chu a en a, an hnênah, “Chu chu mihring tân tih rual a ni lo va; Pathian nên erawh chuan engkim tih theih a ni,” a ti a. 27 Tin, Peteran a hnênah, “Ngai teh, keinin engkim kalsanin kan zui ta chia; eng nge kan hmuh ang le?” a ti a, a zâwt a. 28 Tin, Isuan a hnênah, “Tihtakmeuhvin ka hrilh a che u, Siamtharnaah chuan, Mihring Fapa a ropuina ṭhutphaha a ṭhut hunah, nangni mi zuituteho hi, Israel hnam sâwm leh hnam hnihte chu ngaihtuahin, lalṭhutphah sâwm leh pahnihah in la ṭhu ve ang. 29 Tin, mi tin, inte emaw, unaute emaw, farnute emaw, pa emaw, nu emaw, fate emaw, ramte emaw ka hming avânga kalsan apiang chuan a leh za an hmu ang a, chatuana nunna an la chang bawk ang. 30 Nimahsela, mi tam tak, hmasa bera awmte chu hnuhnûng berah an la awm ang a; hnuhnûng berte pawh hmasa berah an la awm ang.
Grêp huana inhlawhfate
1 “Vânram chu, in neitupa a grêp huana hnathawktute ruai tûra zînga chhuaka ang chu a ni si a. 2 Tin, ani chuan hnathawktute nên chuan ni khata duli hlawha an inrem veleh, a grêp huanah chuan a tîr ta hlawm a. 3 Tin, fehrehsân lai vêlin a va chhuak a, mi dang, dâwr hmuna ding mai maite a hmu a; 4 tin, an hnênah, ‘Nangni pawh grêp huanah va kal ve tawh u, a mawi tâwk apiang ka pe ang che u,’ a ti a. Tichuan, an kal ta a. 5 Tin, chawfâk hun lai vêlah leh behliang mun hun lai vêlah chuan a va chhuak leh a, chutiang bawk chuan a ti leh a. 6 Tin, pahmei zanriah chhum hun lai vêlah chuan a va chhuak a, mi dang dingte a hmu a; tin, an hnênah, ‘Engati nge nilêngin heta in din mai mai ni?’ a ti a. 7 Anni chuan a hnênah, ‘Tu mân min rawih loh avângin,’ an ti a. Ani chuan an hnênah, ‘Nangni pawh grêp huanah va kal ve tawh u,’ a ti a. 8 “Tin, khua a lo tlai lam chuan, grêp huan neitupa chuan a sum enkawltu hnênah, ‘Hnathawktute kha ko la, a hnuhnûng bera ṭanin a hmasa ber thlengin an hlawh pe rawh,’ a ti a. 9 Tin, pahmei zanriah chhum hun lai vêla a rawihte chu an lo kal chuan, duli an hmu ṭheuh va. 10 Tin, a hmasa berte chu an lo kal chuan, hmuh tam deuh an inring a; nimahsela, anni pawh chuan duli bawk an hmu ṭheuh va. 11,12 Tin, an han dawn chuan, ‘Hêng hnuhnûng berte hian dârkâr khat chauh an thawk a, keini chhûn hrehawm leh thawsa tuartute tlukin i siam si,’ tiin in neitupa chungah chuan an phunnawi ta a. 13 “Ani erawh chuan, an zînga mi pakhat hnênah, ‘ṭhiana, i chungah eng mah ka tisual hlei nêm: duli hlawhah kan inrem lo vem ni? 14 I ta kha la la, kal mai rawh; nangmah ka pêk che ang bawk kha he hnuhnûng ber hnênah hian ka pe duh a ni. 15 Ka ta na na na chu ka duh duha ka tih a thiang lo vem ni? A nih loh leh kei ka ṭhat avângin nangin i îtsîk em ni?’ tiin a chhâng a. 16 Chutiangin, hnuhnûng berte chu a hmasa berte an la ni ang a, hmasa berte pawh chu a hnuhnûng berte an la ni ang,” a ti a.
A thih tûr thu a sawi vawi thumna
17 Tin, Isua Jerusalem khuaa a han chhoh laiin, zirtîr sâwm leh pahnihte chu a hruai hrang a, kalkawngah chuan an hnênah, 18 “Ngai teh u, Jerusalem khuaa kan chhoh dâwn hi; Mihring Fapa hi puithiam lalte leh lehkhaziaktute kutah mantîrin a awm dâwn a ni; tin, anni chuan thi tûrin a chungah thu an titlu ang a, 19 nuihza siam nâna hman tûr leh, vuak tûr leh, krawsa khen beh tûrin Jentailte hnênah an pe ang; tin, ni thum niah kaihthawhin a awm ang,” a ti a.
Zebedaia nupuiin a fate tân thil a dîl
20 Chumi lai chuan Zebedaia fapate nu chu a fapate hruaiin a hnênah a lo kal a, chibai a bûk a, thil eng emaw a dîl a. 21 Tin, ani chuan a hnênah, “Eng nge i duh?” a ti a. Tin, anin a hnênah, “Hêng ka fapate pahnih hi i ramah, i ding lamah pakhat, i vei lamah pakhat an ṭhut theihna tûrin thu pe ang che,” a ti a. 22 Isua erawh chuan, “In dîl chu in hre lo a ni. Ka no in tûr chu in in thei em ni?” a ti a, a chhâng a. Annin a hnênah, “Thei e,” an ti a. 23 Ani chuan an hnênah, “Ka no chu in in ngei ang; nimahsela, ka ding lam leh vei lama ṭhut tûr thu chu keia pêk tûr a ni lo va, ka Pa buatsaihsakate tân a ni zâwk ang,” a ti a. 24 Tin, sâwmte chuan chu chu an lo hriatin unau pahnihte chungah chuan an thinur ta a. 25 Isua erawh chuan anniho chu a ko va, “Jentailte chunga rorêltute chu an chungah an lal êm êm ṭhîn a, an mi liante chuan an chungah thu an nei êm êm bawk ṭhîn tih in hria. 26 Nimahsela, nangni zîngah zawng chutiang a ni lo vang; tu pawh in zînga mi lian nih duh apiang chu in rawngbâwltuah a awm zâwk tûr a ni; 27 tu pawh in zînga hmasa ber nih duh apiang chu in chhiahhlawhah a awm bawk tûr a ni; 28 Mihring Fapa hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe tûr zâwka a lo kal ang khân,” a ti a.
Mitdel pahnih tihdam
29 Tin, Jeriko khua ata an chhuah laiin mipui tam takin amah chu an zui a. 30 Tin, ngai teh, mitdel pahnih kawng sîra ṭhu chuan Isua a kal tih an hriat veleh, “Lalpa, Davida Fapa, min khawngaih rawh,” tiin an au va. 31 Tin, mipui chuan ngawi tûrin an hau va; nimahsela, anni chuan, “Lalpa, Davida Fapa, min khawngaih rawh,” tiin an au lehzual a. 32 Tin, Isua a ding a, anmahni a ko va, “In chungah engtia ka tih nge in duh?” a ti a. 33 Anni chuan a hnênah, “Mit vâr kan duh,” an ti a. 34 Tichuan, Isuan a khawngaih êm êm a, an mit a dek a; tichuan, an hmu thei ta nghâl a, amah chu an zui ta a.
Ropui taka Jerusalem luh thu
1 Tin, Jerusalem khua an thlen dâwnin, Bethphage khua, Olive tlâng chu an thlen chuan, Isuan zirtîrte pahnih a tîr a, 2 an hnênah, “In hma zâwn khuaah sâwn va kal ta ula, sabengtung thlun, a kianga a no nên, in hmu mai ang; phelh ula, ka hnênah han kai rawh u. 3 Tin, tu pawhin in hnênah eng pawh an sawi chuan, ‘Lalpan a duh a ni,’ in ti ang a; tin, ani chuan a rawn tîr nghâl mai ang,” a ti a. 4-5 “ ‘En teh, i Lal chu, thuhnuairawlh takin, Sabengtung chungah - sabengtungno chung ngeia chuangin I hnênah a lo kal dâwn e,’ tiin Zion fanu chu hrilh rawh,” tia zâwlnei kâa a sawi kha a lo thlen theihna tûrin, chûng chu a lo awm ta a ni. 6 Tichuan, zirtîrte chu an va kal a, Isuan an hnêna thu a pêk ang ngei chuan an va ti a, 7 sabengtung leh a no chu an rawn kai a, a chungah chuan an puante an phah a, ani chuan a chuan chhan ta a. 8 Tin, mipui zînga a tam zâwkin kalkawngah chuan an puante an phah a; mi dangin thinga mi chhâwl an sât a, kalkawngah an phah bawk a. 9 Tin, mipui a hma lama kalte leh a zuite chuan, “Davida fapa hnênah Hosanna! Lalpa hminga lo kal chu fakin awm rawh se, Chungnung berah khian Hosanna!” tiin an au va. 10 Tin, Jerusalem khuaa a lo luh chuan, a khuain, “He mi hi tu nge ni?” tiin, an phu ta mur mur a. 11 Tin, mipuiho chuan, “He mi hi zâwlnei Isua, Galili rama Nazareth khuaa mi chu a ni,” an ti a.
Tempulah Isua a lût
12 Tin, Isua chu Pathian biak inah chuan a va lût a, biak ina englo zuartute leh leitute zawng zawng chu a hnawt chhuak a, tangka thlengtuho dawhkânte leh, ṭhuro zuarho ṭhutphahte pawh chu a nam thlûksak a; 13 an hnênah, “ ‘Ka in chu ṭawngtaina in an ti ang,’ tih ziak a ni; nangni erawh chuan suam hmangte pûkah in siam zâwk ṭhin a ni,” a ti a. 14 Tin, Pathian biak inah chuan mitdelte leh kebaite a hnênah an lo kal a; anmahni chu a tidam a. 15 Nimahsela, puithiam lalte leh lehkhaziaktuten a thil mak tihte leh biak ina, “Davida fapa Hosanna!” tia naupang aute chu an hmuhin an lungni lo êm êm a, 16 a hnênah, “Hêngho thusawi hi i hria em?” an ti a. Tin, Isuan an hnênah, “Hria e; ‘Nausênte leh hnute hne laite kâa chhuak chuan Fakna i tiṭha famkim ta,’ tih hi in chhiar ngai lo vem ni?” a ti a. 17 Tin, anni chu a kalsan a, khawpui ata chu a chhuak a, Bethani-ah a kal a; chutah chuan a riak ta a.
Theipui ânchhe lawh thu
18 Tin, zîngah khawpui lama a kîr leh laiin a ril a lo ṭâm ta a. 19 Tin, kawng sîrah chuan theipui kûng a hmu a, a va pan a, a hnah chauh lo chu eng mah a hmu lo va. Tin, a hnênah, “Kumkhuain lo rah tawh suh ang che,” a ti a. Tin, theipui chu a vuai ta nghâl mai a. 20 Tin, zirtîrte chuan chu chu an hmuhin, “Engtizia nge theipui hi a vuai tâk nghâl mai?” tiin, mak an ti hle a. 21 Tin, Isuan an hnênah, “Tihtakmeuhvin ka hrilh a che u, rinna in neiha, in rinhlelh loh chuan, theipui chunga tih ang chang hi in ti lo vang a, he tlâng hnênah pawh hian, ‘Lo insawn la, tuifinriatah lo inpaih rawh,’ in tih chuan, in tih ang chuan a lo awm ang. 22 Tin, engkim, ring chunga ṭawngṭaia in dîl apiang chu in hmu ang,” a ti a, a chhâng a.
Isuan khawi ata nge thuneihna a neih
23 Tin, Pathian biak ina a luh hnua a zirtîr lai chuan, puithiam lalte leh vântlâng upate chu a hnênah an lo kal a, a hnênah, “Tu thuin nge hêng thil hi i tih? Tuin nge thu pe che?” an ti a. 24 Tin, Isuan an hnênah, “Kei pawhin thu kam khat ka zâwt ve ang che u, chu chu min hrilh chuan, tu thuin nge hêng thil hi ka tih ka hrilh ve ang che u. 25 Johana baptisma kha khawia mi thu nge ni? Vâna mi thu nge mihring thu?” a ti a, a chhâng a. Tin, an inngaihtuah a, “ ‘Vâna mi thu,’ kan tih chuan, ‘Engah nge a thu in awih loh le?’ min ti si ang a. 26 Tin, ‘Mihring thu,’ kan tih chuan, mipui chu kan hlau si; mi zawng zawngin Johana chu zâwlneiah an ruat si a,” an ti a. 27 Tichuan, Isua an chhâng a, “Kan hre lo,” an ti a. Ani pawh chuan an hnênah, “Kei pawhin tu thuin nge hêng thil hi ka tih ka hrilh bîk lo vang che u.
Fapa pahnih tehkhin thu
28 “Nimahsela, nangnin engtin nge in ngaih? Mi tu emawin fapa pahnih a nei a. Pakhat hnênah chuan a va kal a, ‘Ka fa, vawiinah grêp huanah va thawk rawh,’ a ti a. 29 Ani chuan, ‘Ka duh lo,’ a ti a, a chhâng a; nimahsela, nakinah a rilru chu a lo inlamlêt a, a kal ta a. 30 Tin, pakhat hnênah pawh chuan a va kal a, chutiang bawk chuan a va ti a. Tin, ani chuan, ‘Lalpa, ka kal ang e,’ a ti a, a chhâng a; nimahsela, a kal ta si lo va. 31 Chu mite pahnihah chuan a tu zâwk chuan nge an pa duh zâwng ti le?” a ti a. Anni chuan, “A hmasa zâwk chuan,” an ti a. Isuan an hnênah, “Tihtakmeuhvin ka hrilh a che u, chhiahkhawntute leh nawhchizuarte chuan Pathian ramah an luh khalh dâwn che u a nih hi. 32 Johana chu felna kawngah chuan in hnênah a lo kal a, amah chu in ring si lo va; chhiahkhawntute leh nawhchizuarte erawh chuan amah chu an ring a; nangnin chu chu in hmuh hnu pawhin, amah chu in rin theihna tûrin in inlamlêt chuang si lo va.
Grêp huan thlawh hlawhtute tehkhin thu
33 “Tehkhin thu dang ngaithla rawh u: Mi tu emaw, in neitu a awm a, chu mi chuan grêp huan a siam a, palin a hung vêl a, grêp sâwrna khur a lai a, in sâng a sa a; tin, lo enkawltute hnênah thlawhhlawh tûrin a pe a, ram dangah a kal ta a. 34 Tin, a rah lawh a hun dâwn chuan, a rah la tûrin lo enkawltute hnênah a bawihte a tîr a. 35 Tin, lo enkawltute chuan a bawihte chu an lo man a, pakhat an vua a, pakhat an tihlum a, pakhat lungin an dêng a. 36 Tin, bawih dang, a hmasa pâwl aia tam zâwk a tîr leh a; anniho chungah pawh an hmaa mite an tih ang bawkin an lo ti leh a. 37 Chumi hnuah erawh chuan, ‘Ka fapa hi chu an zah ang,’ tiin, a fapa chu an hnênah a tîr a. 38 Nimahsela, lo enkawltute chuan a fapa chu an lo hmuh veleh, ‘He mi hi ro luahtu tûr chu a ni; i that ang u khai! A ro luah tûr hi i neihsak ang u,’ an ti a. 39 Tichuan, ani chu an man a, grêp huan ata chu an theh chhuak a, an tihlum ta a. 40 Chutichuan, grêp huan neitupa chu a lo kal hunin, chûng lo enkawltute chungah chuan engtin nge a rawn tih ang le?” a ti a. 41 Anni chuan a hnênah, “Chûng mi sualte chu hrehawm takin a tiboral ang a, grêp huan chu lo enkawltu dang, a lawh hun apianga a rahte chu a hnêna pe zêltu tûrte hnênah, thlawhhlawh tûrin a pe ang,” an ti a. 42 Isuan an hnênah, “Pathian lehkhaa, ‘In satute lung duh loh kha, Chu ngei chu a kila lung ṭangkai ber a lo ni ta. Chu chu Lalpa tih a ni a, Kan mit hmuhah a mak a ni,’ tih hi in chhiar ngai lo vem ni? 43 Chumi avâng chuan, ‘Pathian ram chu in hnên ata lâksak a ni ang a, a rah chhuah tûr hnam hnênah pêk a ni ang,’ tih ka hrilh a che u. 44 Tin, chumi lung chunga tlu chu a keh sawm ang a; a delh phei chu a râwt dip ang,” a ti a. 45 Tin, puithiam lalte leh Pharisaite chuan a tehkhin thute chu an hriatin, anmahni chungthu a sawi tih an hre ta a. 46 Tin, amah chu man an tum a; nimahsela, mipuite chu an hlau si a, zâwlneia an ruat avângin.
Lawi chaw ruai tehkhin thu
1 Tin, Isuan anmahni a bia a, an hnênah tehkhin thuin a sawi leh a, 2 “Vânram chu lal tu emaw, a fapa tâna lawi chaw siam nên chuan tehkhin a ni. 3 Tin, lawi chaw eia a sâwmte chu ko tûrin a bawihte a tîr a; nimahsela, an lo kal duh lo va. 4 Tin, ani chuan, ‘Ka sâwmte hnênah, “Ngai teh u, ka ruai chu ka peih ta; ka sebâwngpate leh ka ran châwm thaute ka talh a, engkim peih a ni ta e; lawi chaw ei tûrin lo kal tawh rawh u,” ti rawh u,’ tiin bawih dangte a tîr leh a. 5 Nimahsela, an lo ngaihsak lo va, an kal ta mai a, pakhat chu a lovah a kal a, pakhat chu a sumdâwnnaah; 6 mi dangte chuan a bawihte chu an man a, zahthlâk takin an siam a, an tihlum ta mai a. 7 Chutichuan, lal chu a thinur ta a; a sipaihote a tîr a, chûng tualthattute chu a tiboral a, an khua pawh a hâlsak ta a. 8 “Tin, a bawihte hnênah chuan, ‘Lawi chaw peih a ni ta, ka sâwmte erawh kha chu ei tlâk an ni lo. 9 Chutichuan, kawng pêng ṭhuamahte kal ula, mi in hmuh apiang lawi chaw ei tûrin sâwm rawh u,’ a ti a. 10 Tichuan, chûng bawihte chu an chhuak a, kawngahte chuan an va kal a, an hmuh apiang, mi sual leh mi ṭhate pawh an hruai khâwm ta vek a; tichuan, lawi chaw pindan chu mi sâwmtein an lo khat ta a. 11 “Nimahsela, lal chu mi sâwmte en tûra a lo luh chuan, inneihna puan sin lo mi pakhat chutah chuan a hmu a; 12 tichuan, a hnênah, ‘ṭhiana, engtizia nge ni inneihna puan sin lovin hetah i lo luh le?’ a ti a. Tin, ani chu a ngawi reng a. 13 Tin, lal chuan a bawihte hnênah, ‘A kut leh a ke phuar ula, pâwn lam thimah paih chhuak rawh u; chutah chuan ṭah leh ha ṭhial a awm ang,’ a ti a. 14 “Sâwmte chu tam tak an ni a, thlante erawh chu tlêm tê an ni,” a ti a.
Chhiah pêk leh pêk loh thu
15 Chumi lai chuan Pharisaite chuan a thusawia an man theihna zia tûr an va inrâwn a. 16 Tin, an zirtîrte, Heroda pâwla mite nên, a hnênah an tîr a, chu mite chuan, “Zirtîrtu, mi dik tak i ni a, tihtakzetin Pathian kawng thu i zirtîr ṭhîn a, pawisak chuan tu mah i nei lo tih kan hria e; tu mah thlei bîk i nei si lo va. 17 Chutichuan, engtin nge i ngaih min hrilh teh khai? Kaisara hnêna chhiah chawi hi a thiang nge thiang lo?” an ti a. 18 Nimahsela, Isuan an sualzia chu a lo hria a, “Vervêkte u, engah nge min fiah? 19 Chhiah tangka chu min entîr rawh u,” a ti a. Tin, a hnênah duli an rawn la a. 20 Tin, ani chuan an hnênah, “Hei hi tu lem leh tu hming nge ni?” a ti a. 21 Anni chuan a hnênah, “Kaisara,” an ti a. Tin, ani chuan an hnênah, “A nih ahnu, Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a. 22 Chûng thu chu an hriatin mak an ti hle a, amah chu an kalsan a, an kal ta daih a.
Mitthi thawhleh chungchâng
23 Chumi ni vêk chuan Saddukaiho, thawhlehna a awm lo tite chu a hnênah an lo kal a; a hnênah, 24 “Zirtîrtu, Mosian, ‘Mi, fa nei lovin thi sela, a unaupain a nupui chu neiin a unaupa tân chi a thlahsak tûr a ni,’ a ti a. 25 Aw le, kan zîngah sal sarih an awm a; a upa berin nupui a nei a, a thi a; tin, chi a thlah loh avângin a nupui chu a unaupa rochun tûrin a hnutchhiah a; 26 chutiang bawkin a pahnihna chuan a ti a, a pathumna chuan a ti bawk a, a pasarihna thlengin an ti ṭheuh va. 27 Tin, an zaa an thih hnuah chuan hmeichhia pawh chu a thi ta a. 28 Chutichuan, thawhleh hunah chuan an pasarih zîngah chuan tu nupui ber nge ni ang? An zain an nei ṭheuh si a?” tiin an zâwt a. 29 Isuan an hnênah, “Pathian Lehkha Thu leh Pathian thiltihtheihna in hriat loh avângin in ngai sual ṭhîn a ni. 30 Thawhlehnaah chuan nupui pasal an innei dâwn tawh lo va, vâna vântirhkohte ang an ni dâwn zâwk asin. 31,32 Tin, mitthi thawhlehna thu chu, Pathianin, ‘Kei Abrahama Pathian, Isaaka Pathian, Jakoba Pathian ka ni,’ tia in hnêna a sawi kha in chhiar lo vem ni? Pathian chu mitthi Pathian a ni lo va, mi nung Pathian a ni zâwk,” a ti a, a chhâng a. 33 Tin, mipuite chuan chu chu an hriatin a thu zirtîr chu mak an ti hle a.
Thupêk ropui
34 Pharisaite erawh chu, Isuan Saddukaite a hnial dang tih an hriatin an inkhâwm ta a. 35,36 Tin, an zînga mi pakhat, dân hretuin, “Zirtîrtu, dân thu-ah eng thupêk hi nge ropui ber?” tiin amah fiah nân thu a zâwt a. 37 Tin, ani chuan a hnênah, “ ‘Lalpa i Pathian chu i thinlung zawng zawngin, i thlarau zawng zawngin, i rilru zawng zawngin i hmangaih tûr a ni,’ tih hi. 38 Chu chu thupêk ropui leh pawimawh ber a ni. 39 Tin, a dawttu, a anpui chu hei hi a ni, ‘Nangmah i inhmangaih angin i vêngte pawh i hmangaih tûr a ni,’ tih hi. 40 Chûng thupêk pahnihah chuan dân thu leh zâwlneite thu zawng zawng a inkhai khâwm vek a ni,” a ti a.
Messia chungchâng inzawh fiahna
41 Tin, Pharisaite chu an inkhâwm lai chuan, Isuan anmahni chu thu a zâwt a, 42 “Krista chu engtin nge in ngaih? Tu fapa nge ni?” a ti a. Anni chuan a hnênah, “Davida fapa,” an ti a. 43,44 Ani chuan an hnênah, “Davidan, ‘Lalpa chuan, ka Lalpa hnênah, I hmêlmate i kephah hnuaia ka dah hma loh zawng Ka ding lamah ṭhu rawh, a ti,’ tiin, engtiziain nge Thlarauvin ani chu ‘Lalpa’ a tih le? 45 Davidan ani chu ‘Lalpa’ a tih si chuan, engtin nge a fapa a nih theih?” a ti a. 46 Tin, tu mân kam khat mahin an chhâng thei lo va, chumi ni achin chu tu mân thu dang rêng rêng an zâwt ngam tawh hek lo.
Pharisaite leh dânhremite lakah fîmkhur tûr
1 Tin, Isuan mipuite leh a zirtîrte hnênah thu a sawi a, 2 “Lehkhaziaktute leh Pharisaite chu Mosia ṭhutphahah chuan an ṭhu ṭhîn a; 3 chuvângin, an hrilh apiang che u chu ti ula, zâwm zêl ang che u; an thiltih ang erawh chu ti ve suh ang che u, sawi zawng an sawi ṭhîn a, an ti si ṭhîn lo a ni. 4 Phur rit hrehawm takte an siam a, mite an bel ṭhîn a, anmahni erawh chuan an kutzungṭang pawhin an tisawn duh lo. 5 An thiltih zawng zawng chu mihring hmuh atân a ni an tih zâwk ṭhin ni, an thil bun leh khimte chu an tihlai a, an puan hmâwrfêm an tibuk ṭhîn a, 6 ruaiṭhehnaah hmun ṭha ber te, inkhâwmna inah ṭhutphah ṭha ber te, 7 dâwr hmuna chibai bûk te, miten ‘Rabbi’ an tih te an ngaina si ṭhîn a. 8 “Nangni erawh chu ‘Rabbi’ tihin awm suh u; in zirtîrtu chu pakhat chauh a ni a, nangni zawng zawng chu unau in ni si a. 9 Tin, lei chungah hian tu mah ‘Ka pa’ ti suh u; in Pa chu pakhat chauh a ni, vâna mi khi. 10 ‘Hruaitute’ tihin awm hek suh u, in hruaitu chu pakhat chauh a ni, Krista chu. 11 In zînga ropui ber chu in rawngbâwltuah a awm zâwk tûr a ni. 12 Tu pawh inngaihlu apiang an tlâwm ang a, tu pawh inngaitlâwm apiang chawimawiin an awm ang.
An vervêkna Isuan a dem
13 “Nimahsela, nangni lehkhaziaktu leh Pharisai vervêkte u, in chung a pik e! Vânram kawng chu mite in khârsak si ṭhîn; nangni lah in lût si lo va, mi lût tûrte pawh luh in phal ṭhîn hek lo. 15 Nangni lehkhaziaktu leh Pharisai vervêkte u, in chung a pik e! Saphun pakhat pawh siam tûrin tuifinriat leh khawmual in kal hual si a; tin, chutianga a lo awm veleh ani chu nangmahni leh hnihin Gehenna fapaah in siam ṭhîn. 16 “Nangni, hruaitu mitdel, ‘Tu pawh Pathian biak in chhâla chhechham apiang, chu chu eng mah a ni lo; tu pawh Pathian biak ina rangkachak chhâla chhechham apiang erawh chuan hlen tûr a ni,’ tite u, in chung a pik e! 17 Nangni mi â, mitdelte u! A eng nge ropui zâwk, rangkachak nge Pathian biak in, rangkachak tithianghlimtu chu? 18 Tin, ‘Tu pawh maichâm chhâla chhechham apiang, eng mah a ni lo; a chunga thilpêk awm chhâla chhechham apiang erawh chuan hlen tûr a ni,’ in ti. 19 Nangni mitdelte u! A eng nge ropui zâwk, thilpêk nge maichâm, thilpêk tithianghlimtu chu? 20 Chutichuan, tu pawh maichâm chhâla chhechham apiang chuan, maichâm leh a chunga awm zawng zawng chhâlin chhia a chham ṭhîn. 21 Tu pawh Pathian biak in chhâla chhechham apiang chuan, Pathian biak in leh a chhûnga awm chu chhâlin chhia a chham ṭhîn. 22 Tu pawh vân chhâla chhechham apiang chuan, Pathian ṭhutphah leh a chunga ṭhu chhâlin chhia a chham ṭhîn a ni. 23 “Nangni lehkhaziaktu leh Pharisai vervêkte u, in chung a pik e! Pudina te, mohuri te, zira te chu sâwmah pakhat in pe ṭhîn a, dân thu pawimawh zâwk - felna te, khawngaihna te, rinawmna te chu - in ngaihthah si ṭhîn; nimahsela, chûng chu asin in tih tûr ni, a dangte chu tih ṭhulh chuang lovin. 24 Nangni hruaitu mitdel, thosi thli faia sanghâwngsei lem si ṭhînte u! 25 “Lehkhaziaktu leh Pharisai vervêkte u, in chung a pik e! No leh thlêng pâwn lam in sil fai a, a chhûng erawh chu hlêprûkna leh insûm lohnain a khat si a. 26 Nang Pharisai mitdel, no leh thlêng chhûng lam chu sil fai hmasa rawh, a pâwn lam pawh a lo fai theihna tûrin. 27 “Lehkhaziaktu leh Pharisai vervêkte u, in chung a pik e! Thlân hnawih vâr, pâwn lam mawi taka lang, a chhûng lam erawh chu mitthi ruhte leh bawlhhlawh tinrênga khat angte chu in ni asin. 28 Nangni pawh chutiang takin, pâwn lamah chuan mihring mit hmuhin fel takin in lang ṭhîn a, in chhûng lamah erawh chuan vervêkna leh sualnain in khat si a.
Hrem an nih tûr hrilh lâwkna
29 “Nangni lehkhaziaktu leh Pharisai vervêkte u, in chung a pik e! Zâwlneiho thlân inte in sa a, mi fel thlânte pawh in chei mawi a, 30 ‘Kan pute dam lai khân lo awm ve mah ila, zâwlneite thisen an chhuahnaah chuan kan tel ve lo vang,’ in ti ṭhîn. 31 Chutichuan, zâwlneiho thattute fa in ni tih in inhriattîr a ni. 32 In pute tehkhâwng chu tikhat nghâl mai rawh u. 33 Rûlte u, rûl thlahte u, Gehenna rorêlna chu engtin nge in pumpelh theih ang? 34 “Ngai teh u, chumi avâng chuan in hnênah zâwlneite, mi fingte, lehkhaziaktute ka rawn tîr dâwn; ṭhenkhat in tihlum ang a, krawsah in khêng bet ang, ṭhenkhat in inkhâwmna inahte savun hruiin in vua ang a, khaw tinah in tiduhdah zui zêl ang; 35 chutichuan, Abela, mi fel tak thisen aṭangin, Pathian biak in leh maichâm inkâra, Berekia fapa Zakaria in thaha thisen thleng khân, lei chunga mi fel thisen an chhuah zawng zawng chu nangmahni chungah a lo la thleng thei ang. 36 Tihtakmeuhvin ka hrilh a che u, chûng zawng zawng chu tûnlai chhuante chungah hian a lo la thleng ang.
Isuan Jerusalem a vei
37 “Aw Jerusalem, Jerusalem, zâwlneiho thattu! I hnêna an rawn tirhte lunga lo dêng hlumtu, arpuiin a notê a thla hnuaia a awp khâwm angin i fate vawi eng zât nge awp khâwm ka tum kha! Nimahsela, in duh si lo. 38 En teh u, in in chu a ruaka hnutchhiah che uin a awm ta. 39 Ka hrilh a che u, ‘Lalpa hminga lo kal chu fakin awm rawh se,’ in tih hma loh chuan, tûn achinah mi hmu leh dâwn tawh lo a nih hi,” a ti a.
Tempul chhiat tûr thu
1 Tin, Isua chu Pathian biak in ata a chhuak a, a kal dâwn a. Tin, a zirtîrte chu Pathian biak inte entîr tûrin a hnênah an lo kal a. 2 Ani erawh chuan an hnênah, “Hêng zawng zawng hi in hmu maw? Tihtakmeuhvin ka hrilh a che u, tihchim lohva lung intiang rêng rêng hetah a awm lo vang,” a ti a, a chhâng a.
Harsatna leh tihduhdahna
3 Tin, Olive tlângah chuan a ṭhut laiin zirtîrte chu anmahni chauhvin a hnênah an kal a, “Chûng chu eng tikah nge a lo awm ang? I lo kal lehna leh khawvêl tâwpna chhinchhiahna chu eng nge ni ang, min hrilh rawh,” an ti a. 4 Tin, Isuan a chhâng a, an hnênah, “Tu mân an tihder loh nân che u fîmkhur rawh u. 5 Mi tam tak, ‘Krista chu ka ni,’ tiin keima hming chhâlin an lo kal ang a, mi tam tak an tihder dâwn si a. 6 Tin, indo thu leh indo thuthang in la hria ang; in mangan loh nân fîmkhur rawh u; chûng chu a lo thleng tûr rêng a ni; nimahsela, tâwpna chu a la ni rih lo vang. 7 Hnam hrang leh hnam hrang an indo vang a, ram hrang leh ram hrang an indo vang a; hmun hrang hrangah ṭâmte a tla ang a, lîrte a nghîng ang. 8 Chûng zawng zawng chu nau vei ṭan tirhna a ni. 9 “Chumi hunah chuan hrehawm tuar tûrin an mantîr ang che u a, an tihlum ang che u; ka hming avângin hnam zawng zawng huat in ni ang. 10 Chumi hunah chuan mi tam tak an tlu ang a, an inmantîr tawn ang a, an inhaw tawn ang. 11 Zâwlnei der tam tak pawh an lo chhuak ang a, mi tam tak an tihder ang. 12 Tin, sual a la pun dâwn avângin mi tam zâwk hmangaihna chu a la dai ang. 13 Nimahsela, a tâwp thlenga tuar peih apiang, chu mi ngei chu chhandamin a awm ang. 14 Tin, he Ram Chanchin Ṭha hi hnam zawng zawng hriattîrna tûrin khawvêl zawng zawngah hrilin a awm ang a; chumi zawhah chuan tâwpna chu a lo thleng ang.
Râpthlâk eltiang
15 “Chutichuan, tiṭiautu tenawm, zâwlnei Daniela sawia kha, hmun thianghlima dinga in hmuh hunah chuan (a chhiar apiangin a awmzia hre rawh se) 16 Judai rama awmte chu tlângahte tlân bo rawh se; 17 in chunga awm chu a ina englo chuh tûrin chhuk suh se; 18 tin, lova awm chu a puan chuh tûrin kîr leh suh se. 19 Chûng niah chuan raite leh nauno pawmte chung chu a pik ang. 20 Tin, in tlân bo hun tûr chu thlasikah emaw, Chawlhniah emaw a lo thlen loh nân ṭawngṭai rawh u; 21 chumi hunah chuan hrehawm nasa tak a awm dâwn si a; chutianga nasa rêng rêng chu leilung pian tirh ata tûn thlengin a la awm ngai lo va, awm pawh eng tikah mah a lo awm leh tawh hek lo vang. 22 Tin, chûng nite chu tihtawi ni suh sela, mihring rêng rêng damin an chhuak lo vang; nimahsela, thlante avâng chuan chûng nite chu tihtawi a ni ang. 23 “Chutih hunah chuan tu pawhin in hnênah, ‘En teh, Krista chu heta hi a awm,’ emaw, ‘Heta hi’ emaw, an tih chuan awih suh ang che u. 24 Krista derte leh zâwlnei derte an lo chhuak dâwn si a, chûng chuan thei ang sela, thlante meuh pawh an tihder theih nân chhinchhiahna leh thil mak ropui takte an ti ang. 25 Ngai teh u, ka hrilh lâwk tawh che u hi. 26 Chutichuan, in hnênah, ‘Ngai teh u, thlalêrah a awm,’ an tih che u chuan, kal chhuak suh u; ‘Pindan chhûngrilahte a awm,’ an tih che u chuan, awih duh suh u. 27 Kâwl, chhak lamah a lo phe chhuak a, thlang lam thleng pawhin a lang ṭhîn a, Mihring Fapa lo kal lehna chu chutiang chu a ni dâwn si a. 28 “Khawiah pawh saruang awmna apiangah mulukawlhte pawh an awm khâwm ang.
Mihring Fapa lo kal lehna
29 “Nimahsela, chûng ni hrehawm hnu lawkah chuan ni tihthimin a awm ang a, thla a êng tawh lo vang a, vân aṭangin arsite a lo tla ang a, vân thiltihtheihnate chu tihnghîn a ni ang; 30 chutih hunah chuan Mihring Fapa chhinchhiahna chu vânah a lang ang. Chumi hunah chuan leia chi tinin an âwmte an inchûm ang a, Mihring Fapa hi thiltihtheihna leh ropuina nasa tak nên, vân chhûm chunga lo kal an hmu ang. 31 Tin, a vântirhkohte chu, tawtawrâwt ri nasa tak nên a tîr chhuak ang. Anni chuan a thlante chu kâwl kil li ata - vân tâwp aṭanga a tâwp lehlam thlengin - an lâwr khâwm ang.
Theipui kûng aṭanga zir tûr
32 “Tichuan, theipui kûngah hian a tehkhin thu zîr rawh u: a ṭang a lo nova, a hnah a lo chawr chuan nipui a thaw dâwn tih in hre ṭhin; 33 chutiang bawkin, nangni pawhin chûng zawng zawng chu in hmuh hun chuan, amah chu a lo hnai tawh a, kawngka bul ngeiah a awm tih hria ang che u. 34 Tihtakmeuhvin ka hrilh a che u, chûng zawng zawng chu a thlen kim hma loh zawng tûnlai chhuante hi an ral lo vang. 35 Lei leh vân a ral ang a, ka thu erawh chu a ral lo vang.
A hun leh ni tu ma hriat loh
36 “Nimahsela, chumi ni leh a hun thu chu Pa chauh lo chuan tu mân, vâna vântirhkohte pawhin, Fapa pawhin an hre lo. 37 Tin, Nova dam lai ang bawk kha, Mihring Fapa lo kal lehna chu a ni ang. 38 Chûng ni, tuilêt hmate chuan, Nova lawnga a luh ni thlengin an eiin an bâr a, nupui pasal an innei ṭhîn; 39 tui a lo lêta, an zaa a lâk bo vek hma loh chuan eng mah an hre lo va; Mihring Fapa lo kal lehna chu chutiang bawk chu a ni ang. 40 Chumi hunah chuan lovah mi pahnih an awm ang a; pakhat chu kal bopuiin a awm ang a, pakhat chu hnutchhiahin a awm ang. 41 Hmeichhe pahnih buh râwt sawmnaah buh râwt sawmin an awm ang a; pakhat chu kal bopuiin a awm ang a, pakhat chu hnutchhiahin a awm ang. 42 “Chutichuan, ngaihven rawh u, eng niah nge in Lalpa a lo kal dâwn in hre si lo. 43 Nimahsela, hei hi hre rawh u, rûkru a lo kal hun tûr in neituin hria sela, a vêng ang a, a in a reh pawhtîr lo vang. 44 Chuvângin, nangni pawh inring rengin awm rawh u, in rin loh hunah Mihring Fapa a lo kal dâwn si a.
Chhiahhlawh rinawm leh rinawm lo
45 “Bawih rinawm, fing tak, a puin a hun apianga an chaw chan tûr semsak tûra a chhûngte chunga hotua a siama chu tu ber nge ni ang le? 46 A pu a lo kal huna bawih chutiang tia a rawn hmuha chu a eng a thâwl ang. 47 Tihtakmeuhvin ka hrilh a che u, a neih zawng zawng chungah hotuah a siam ang. 48 Amaherawhchu, bawih sual chuan a rilruin, ‘Ka pu a lo kal lawk dâwn lo ve,’ tiin, 49 a bawihpuite lo vêl ta sela, mi ruite hnênah eiin bâr sela, 50 chu bawiha pu chu a rin loh niah, a hriat loh laiin a lo kal ang a, 51 bung hnihah a rawn chhuah ang a, mi vervêkte chan ang a chantîr ang; chutah chuan ṭah leh ha ṭhial chu a awm ang.
Nula sâwm tehkhin thu
1 “Chumi hunah chuan, vânram chu nula thianghlim sâwm, an khâwnvâr kenga mo neitu hmuak tûra chhuakte nên chuan tehkhin a ni tawh ang. 2 An zînga mi panga an â a, panga an fing. 3 A âte chuan an khâwnvârte an kenin, a tui an keng tel si lo va; 4 a fingte erawh chuan an khâwnvârte an keng a, an ûmte chuan a tui an keng tel bawk a. 5 Tin, mo neitu chu a lo kal har avângin an zain an muthlu a, an lo muhîl ta a. 6 Tin, zanlai takah chuan, ‘Ngai teh u, mo neitu chu a lo kal e! A hmuak tûrin lo chhuak ru khai!’ tiin au thâwm a lo awm ta a. 7 Chu veleh chuan nula thianghlimho chu an tho vek a, an khâwnvârte chu an buatsaih a. 8 Tin, a âte chuan a fingte hnênah, ‘In khâwnvârtui kha min pe ve rawh u; kan khâwnvârte a thi dâwn e,’ an ti a. 9 Nimahsela, a fingte chuan, ‘Keini leh nangni tân a daih lo vang e; a zuartute hnênah kal ula, lei ve zâwk rawh u,’ tiin an chhâng a. 10 Tin, lei tûra an kal bo hlân chuan mo neitu chu a lo thleng ta a; tichuan, a peihte chu amah nên lawi chaw eiin an lût a; tin, kawng chu an khâr ta a. 11 Chumi hnuah chuan nula thianghlim dangte pawh chu an lo thleng a, ‘Ka pu, ka pu, min hawnsak rawh!’ an ti a. 12 Ani erawh chuan, ‘Tihtakmeuhvin ka hrilh a che u, ka hre lo che u a ni,’ a ti a, a chhâng a. 13 “Chutichuan, ngaihven rawh u, a ni leh a hun chu in hre si lo va.
Chhiahhlawh pathum leh talent tehkhin thu
14 “Mi, ram danga kal dâwna, ama bawihte kova, a sumte an hnêna kawltîr ang chu a ni si a. 15 Bawih pakhat hnênah talent nga a pe a, bawih dang hnênah talent hnih a pe a, bawih dang hnênah talent khat a pe a; an tih theih tâwk tûr ang zêl ṭheuhvin a pe a; tichuan, a kal ta a. 16 Tin, talent nga dawngtu chu chûng chuan a va sumdâwng ta nghâl a, talent nga dang a dek chhuak ta a. 17 Chutiang bawkin talent hnih dawngtua pawh chuan talent hnih dang a dek chhuak ta a. 18 Talent khat dawngtu erawh chu a va kal a, lei a lai a, a pu tangka chu a thukru ta zâwk a. 19 “Tin, rei tak hnuah chûng bawihho pu chu a lo haw a, an hnênah a sum chanchin a tifel a. 20 Tichuan, talent nga dawngtu chu a lo kal a, talent nga dang a rawn keng a, ‘Ka pu, nangin talent nga mi kawltîr kha; en teh, talent nga dang ka dek chhuak e,’ a ti a. 21 A pu chuan a hnênah, ‘Bawih ṭha leh rinawm, i tiṭha e; tlêm te chungah i rinawm a, tam tak chungah ka awmtîr ang che; i pu lâwmnaah lût rawh,’ a ti a. 22 Tin, talent hnih dawngtu pawh chu a lo kal a, ‘Ka pu, nangin talent hnih mi kawltîr kha; en teh, talent hnih dang ka dek chhuak e,’ a ti a. 23 A pu chuan a hnênah, ‘Bawih ṭha leh rinawm, i ti ṭha e; tlêm te chungah i rinawm a, tam tak chungah ka awmtîr ang che; i pu lâwmnaah lût rawh,’ a ti a. 24 “Tin, talent khat dawngtu pawh chu a lo kal a, ‘Ka pu, mi ti kher kher i ni tih ka hria a che; i tuh lohnaah pawh i ât ṭhîn a, i tihdarh lohnaah pawh i seng ṭhîn a ni; 25 tichuan, ka hlau va, ka va kal a, i talent kha leiah ka thukru a; en teh, i ta ngai kha i hmuh leh hi,’ a ti a. 26 A pu chuan a hnênah, ‘Bawih sual leh zawmthawpa, ka tuh lohnaah pawh ka âta, ka tihdarh lohnaah pawh ka seng ṭhîn tih i hria maw? 27 Chuti a nih ahnu, ka tangka chu sumdâwngtute hnênah lo dah tawh tûr i ni; chutichuan, ka lo haw hian ka ta hi a pung nên ka hmu leh tûr a ni. 28 Tichuan, a talent khat kha lâksak ula, talent sâwm neitu hnênah pe rawh u. 29 Tu pawh a nei apiang an pêk belhchhah ang a, a lo ngah ang; tu pawh a nei lo apiang erawh chu a neih chhun pawh an lâksak ang. 30 Tin, bawih ṭhahnem lo kha pâwn lam thimah chuan paih chhuak rawh u; chutah chuan ṭah leh ha ṭhial chu a awm ang,’ a ti a, a chhâng a.
Khawvêl tâwpa rorêlna
31 “Amaherawhchu, Mihring Fapa hi chu, a vântirhkohte zawng zawng nên, a ropuinaa inthuama a lo kal hunah chuan, a ropuina ṭhutphahah a ṭhu ang a; 32 a hmaah chuan hnam tin an inkhâwm ang a; berâm vêngtuin kêl zîng ata a berâmte a hlîr angin anniho chu a hlîr ang a; 33 berâmte chu a ding lamah a dah ang a, kêlte erawh chu a vei lamah a dah ang. 34 “Chumi hunah chuan Lalber chuan a ding lama mite hnênah chuan, ‘Ka Pa voh bîkte u, lo kal ula, khawvêl siam ṭan tirh ata in tâna ram buatsaih chu chang rawh u; 35 ka ril a ṭâmin nangnin ei tûr mi pe a; ka tui a hâlin in tûr mi pe a; mikhual ka nihin mi thleng a; 36 saruak ka nihin puan mi sintîr a; ka damlohvin mi kan a; tân ina ka awmin ka hnênah in lo kal si a,’ a la ti ang. 37 “Chumi hunah chuan mi felte chuan, ‘Lalpa, eng tikah nge riltâmin kan hmuh chia, ei tûr kan pêk che? Tuihâlin kan hmuh chia, in tûr kan pêk che? 38 Eng tikah nge mikhuala kan hmuh chia, kan thlen che? Saruaka kan hmuh chia, puan kan sintîr che? 39 Eng tikah nge damlovin emaw, tân inah emaw kan hmuh chia, i hnêna kan lo kal?’ tiin an la chhâng ang. 40 Tin, Lalber chuan an hnênah, ‘Tihtakmeuhvin ka hrilh a che u, hêng ka unau tê berte zînga mi pakhat chunga in tih chu ka chunga ti in ni,’ tiin a la chhâng ang. 41 “Chumi zawhah chuan, a vei lama mite hnênah pawh chuan, ‘Ânchhe dawngte u, kumkhaw mei, Diabola leh a tirhkohte tân an buatsaihah chuan mi kal bosan rawh u; 42 ka ril a ṭâmin nangnin ei tûr mi pe lo va; ka tui a hâlin in tûr mi pe lo va; 43 mikhual ka nihin mi thleng lo va; saruak ka nihin puan mi sintîr lo va; damlo leh tân ina ka awmin mi kan si lo,’ a la ti ang. 44 Chumi hunah chuan anni pawhin, ‘Lalpa, eng tikah nge rilṭâmin emaw, tuihâlin emaw, mikhualin emaw, saruakin emaw, damlovin emaw, tân inah emaw kan hmuh chia, rawng kan bâwlsak loh che?’ tiin an la chhâng ang. 45 Tin, ani chuan an hnênah, ‘Tihtakmeuhvin ka hrilh a che u, hêng mi tê berte zînga mi pakhat chunga in tih loh chu ka chunga ti lo in ni,’ tiin a la chhâng ang. 46 “Tin, chûng chu kumkhaw hremnaah an kal ang a; mi felte erawh chu kumkhaw nunnaah an kal ang,” a ti a.
Isua an phiar
1 Tin, heti hi a ni a, Isuan chûng thu zawng zawng chu a sawi zawh chuan a zirtîrte hnênah, 2 “Ni hnih achinah kalhlên kût a lo awm dâwn tih in hria a, Mihring Fapa hi khen beh tûrin an mantîr dâwn a ni,” a ti a. 3 Chumi lai chuan, puithiam lalber Kaiapha an tiha in hual chhûng kawtlaiah chuan puithiam lalte leh vântlâng upate chu an inkhâwm a; 4 Isua chu ngamthlêma mana, an tihhlum theihna tûrin an inrâwn a. 5 Nimahsela, “Kût chhûng chuan ni suh se; chuti lo chuan, vântlâng zîngah buaina a lo awm dah ang e,” an ti a.
Bethani-ah Isua hriak thih
6 Tin, Isua chu Bethani khuaah, phâr Simona ina a awm laiin, 7 hmeichhe pakhat alabasta bâwma hriak rimtui to tak kengin a hnênah a lo kal a, a chaw kîl laiin a luah a leih a. 8 Nimahsela, zirtîrte chuan chu chu an hmuhin an thinur a, “Eng atân nge hetia a tihboral mai mai ni? 9 He hriak hi man tam taka hralha, mi retheite hnênah pêk theih a ni si a,” an ti a. 10 Isua erawh chuan chu chu a hriatin an hnênah, “Hmeichhia hi engah nge in tihbuai ni? Ka chungah hian thil ṭha tak a ti a ni. 11 Mi retheite chu kumkhuaa in hnêna awm an ni alâwm, kei erawh chu kumkhuaa in hnêna awm tûr ka ni lo. 12 He hriak rimtui ka taksaa a leih hi, phûm tûra mi buatsaih tûrin a ti a nih hi. 13 Tihtakmeuhvin ka hrilh a che u, khawvêl zawng zawngah, khawiah pawh he Chanchin Ṭha hi an hrilna apiangah, he hmeichhe thiltih pawh hi amah hriat rengna tûrin an sawi ve zêl ang,” a ti a.
Judan Isua mantîr a remti
14 Chumi hnuah chuan sâwm leh pahnihte zînga mi pakhat, Juda Iskariota an tiha chu puithiam lalte hnênah a kal a. 15 “Amah chu ka mantîr ang che u a, eng nge mi pêk ang?” a ti a. Tin, tangka sawmthum an bûksak ta a. 16 Chumi chinah chuan mantîrna remchâng a zawng ta a.
A zirtîrte nên kalhlên kût chaw
17 Tin, chhang dawidim telh loh ni, ni hmasa berah chuan zirtîrte chu Isua hnênah an lo kal a, “Kalhlên kût chaw eina tûrin khawiah nge buatsaihsak che ila i duh?” an ti a. 18 Tin, ani chuan, “Khawpuiah tu emaw hnênah kal ula, a hnênah, ‘Zirtîrtu chuan, “Ka hun a hnai ta a; ka zirtîrte nên Kalhlên Kût i inah kan kût ang e,” a ti e,’ va ti ang che u,” a ti a. 19 Tin, Isuan an hnêna a tih angin zirtîrte chuan an ti a; kalhlên kût chaw chu an buatsaih ta a. 20 Tin, khua a lo tlai lam chuan zirtîr sâwm leh pahnihte nên chaw an kîl a; 21 tin, an ei laiin ani chuan, “Tihtakmeuhvin ka hrilh a che u, in zînga mi pakhat hian mi mantîr ang,” a ti a. 22 Tin, an lungngai ta êm êm a, a hnênah, “Lalpa, keimah em ni?” an ti ta ṭheuh va. 23 Tin, ani chuan, “Thlêng mi zenpuitu ngei chuan mi mantîr ang. 24 Mihring Fapa hi a chanchin an ziak ang tak khân a kal dâwn a ni; nimahsela, Mihring Fapa mantîrtu tûr mihring chung chu a pik e! Chu mihring chu piang suh sela a tân a ṭha zâwk ang,” tiin a chhâng a. 25 Tin, a mantîrtu tûr Juda chuan a chhâng a, “Rabbi, keimah em ni?” a ti a. Ani chuan a hnênah, “Ni e,” a ti a.
Lalpa Zanriah
26 Tin, an ei laiin Isuan chhang a la a, mal a sâwmsak a, a phel a; tin, zirtîrte hnênah chuan a pe a, “La ula, ei rawh u; hei hi ka taksa a ni,” a ti a. 27 Tin, no a la a, lâwm thu a sawi a, an hnênah a pe a, “In zain in rawh u; 28 hei hi ka thisen, sualte ngaihdam nâna mi tam tak tâna chhuak tûr, thuthlunna chu a ni. 29 Nimahsela, ka hrilh a che u, ka Pa ramah nangmahni nêna a thar ka in ni a thlen hma loh zawng, tûn achinah grêp hrui raha mi hi ka in leh tawh lo vang,” a ti a. 30 Tin, hla an sak zawhin an chhuak a, Olive tlângah chuan an kal ta a.
Peteran Isua a phat tûr thu
31 Tin, Isuan an hnênah, “Zâninah hian in zain ka chungthuah lungni lovin in awm vek ang; ‘Berâm vêngtu chu ka vua ang a, berâm rual chu an darh ang,’ tih ziak a ni si a. 32 Nimahsela, ka thawhleh hnuah Galili ramah in hmaah ka kal ang,” a ti a. 33 Petera erawh chuan a hnênah, “An zain i chungthuah lungni lovin awm mah sela, kei zawng lungni lovin ka awm tawp lo vang,” tiin a chhâng a. 34 Isuan a hnênah, “Tihtakmeuhvin ka hrilh a che, zâninah hian âr a khuan hmain nangin vawi thum mi phat ang,” a ti a. 35 Peteran a hnênah, “I thihnaah chuan thi ve dâwn mah ila, ka phat tawp lo vang che,” a ti a. Chutiang bawk chuan zirtîrte zawng zawng chuan an ti ta ṭheuh va.
Gethsemane huana Isua ṭawngṭai
36 Chumi zawhah chuan, Isua chu anniho nên hmun pakhat Gethsemane an tih chu an thleng a; tin, ani chuan a zirtîrte hnênah, “Sawta ka va ṭawngṭai chhûng zawng hetah hian lo ṭhu rawh u,” a ti a. 37 Tin, Petera leh Zebedaia fapate pahnih chu a hruai a, a lungngaiin a lo mangang ta êm êm a. 38 Tin, an hnênah, “Ka rilru a lungngai êm êm a, thihna khawp hial a ni; hetah hian awm ula, mi vênpui rawh u,” a ti a. 39 Tin, tlêmin hma lamah a va kal hlek a, a bawkkhup a, “Aw ka Pa, a theih chuan he no hian mi pêl lul rawh se; nimahsela, keima thu ni lovin, nangma thu thu ni zâwk rawh se,” tiin a ṭawngṭai a. 40 Tin, zirtîrte hnênah chuan a lo kal a, anni chu muhîlin a rawn hmu a; tichuan Petera hnênah, “E khai! Nangin dârkâr khat pawh mi vênpui thei lo a ni maw? 41 Thlêmnaa in luh loh nân inring rengin ṭawngṭai rawh u; thlarau zawngin a peih a, tisa erawh chu a chak lo a ni,” a ti a. 42 Tin, vawi hnihnaah a va kal a, a ṭawngṭai leh a, “Aw ka Pa, ka in lohva hei hian mi pelh theih lul loh chuan, nangma thu thu ni rawh se,” a ti a. 43 Tin, a lo kal leh a, anniho chu muhîlin a rawn hmu leh a, an mut a chhuak hle si a. 44 Tin, a kalsan leh a, a vawi thumnaah a thusawi ngai sawiin a ṭawngṭai leh a. 45 Chumi zawhah chuan zirtîrte hnênah a lo kal leh a, an hnênah, “Tûnah zawng muhîl ula, châwl tawh rawh u! Ngai teh u, a hun chu a lo thleng ta a, Mihring Fapa hi mi sualte kutah an mantîr dâwn hi. 46 Tho ula, i kal ang u; en teh u, mi mantîrtu tûr chu a lo hnaih tâk hi,” a ti a.
Isua an man
47 Tin, a la sawi lai mêkin Juda, sâwm leh pahnihte zînga mi pakhat chu a lo thleng ta a, ama rual chuan puithiam lalte leh lehkhaziaktute leh upate hnên ata mipui tam tak, khandaih leh talhtum kengin an lo thleng bawk a. 48 Tin, a mantîrtu tûr chuan chhinchhiahna tûr a lo hrilh lâwk diam a, “Ka fawh apiang chu amah a ni ang, man ang che u,” tiin. 49 Tichuan, Isua chu a va pan ta nghâl a, “Chibai, Rabbi!” tiin a fâwp ta ngawih ngawih a. 50 Tin, Isuan a hnênah, “Ṭhiana, i rawn kal chhan chu ti rawh,” a ti a. Chu veleh Isua chu an chelh a, an man ta a. 51 Tin, ngai teh, Isua hote zînga pakhat chuan a kutin a ban a, a khandaih a phawi a, puithiam lalber bawih chu a sât a, a beng a sah thlâksak a. 52 Tin, Isuan a hnênah, “I khandaih kha a dahnaah dah leh rawh, khandaih ruaitu zawng zawng chu khandaih vêkah an thi dâwn si a. 53 Tûnah pawh vântirhkoh sângruk hmun sâwm leh hmun hnih aia tam zâwk mi rawn tirhsak tûrin ka Pa hnênah ngên thei lovin mi ring em ni le? 54 Nimahsela, ngên ang ila, engtin nge Pathian Lehkha Thu - hetianga a lo awm tûr thu hi - a thlen theih ang le?” a ti a. 55 Chumi lai tak chuan Isuan mipuite hnênah chuan, “Khandaihte, talhtumte kengin, suam hmang man tûr ang maiin min man tûrin in lo chhuak a ni maw? Pathian biak inah ni tin zirtîrin ka ṭhu ṭhîn a, min man si lo va. 56 Nimahsela, zâwlnei lehkha thute chu a lo thlen theihna tûrin hêng zawng zawng hi a lo awm ta a nih hi,” a ti a. Chumi lai chuan zirtîrte zawng zawng chuan amah chu an thlahthlam a, an tlân bo ta vek a.
Sanhedrin hmaah Isua an hruai
57 Tin, Isua mantute chuan puithiam lalber Kaiapha ina lehkhaziaktute leh upate awm khâwmnaah chuan ani chu an hruai ta a. 58 Nimahsela, Peteran hla tak aṭangin amah chu a zui a, Puithiam Lalber in hual chhûng kawtlai thlengin; tin, a va lût a, a tâwpna hmu tûrin chhiahhlawhte zîngah a ṭhu ve a. 59 Tin, amah an tihhlum theihna tûrin, puithiam lalte leh rorêltuho zawng zawng chuan Isua hêkna an zawng a; 60 hretu der tam tak lo kal mah sela, an hmu si lo. Nakinah erawh chuan mi pahnih an lo kal a, 61 “He mi hian, ‘Pathian biak in hi ṭhiata, ni thum chhûnga sa leh thei ka ni,’ a ti e,” an ti a. 62 Tichuan, puithiam lalber chu a ding chhuak a, a hnênah, “Eng mahin i chhâng lo maw? Hêng hian an hêkna che hi engtizia nge ni?” a ti a. 63 Isua erawh chu a ngawi reng a. Tin, puithiam lalber chuan a hnênah, “Pathian nung chhâlin thu ka pe a che, Krista, Pathian Fapa chu i ni emaw, min hrilh rawh,” a ti a. 64 Isuan a hnênah “Ni e. Nimahsela, ka hrilh a che, tûn hnuah Mihring Fapa hi thiltihtheihna ding lama ṭhua, vân chhûm chunga lo kal in la hmu dâwn a ni,” a ti a. 65 Tin, puithiam lalber chuan a silhfênte a pawt thlêr a, “Pathian a sawichhe ta: hretu dang engah nge kan ngaih tawh ang? Ngai teh u, Pathian a sawichhiatzia chu tûnah in hre tawh e. 66 Engtin nge in ngaih?” a ti a. Anni chuan, “Thi tlâk a ni,” tiin an chhâng a. 67,68 Tin, a hmaiah chil an chhâk a, an hnek a; ṭhenkhat chuan, “Nang Krista, tuin nge bêng che? Min hrilh rawh,” tiin an bêng a.
Peteran Isua a phat
69 Tin, Petera chu pâwnah, in hual chhûng kawtlaiah chuan a ṭhu a; tin, nula pakhat a hnênah a lo kal a, “Nang pawh Isua, Galili rama mi hnêna awm kha i nih hi,” a ti a. 70 Ani erawh chuan, “I thusawi chu ka hre hauh lo mai,” tiin an zaa hmaah a pha a. 71 Tin, sumhmuna a va chhuah veleh nula dangin ani chu a hmu a, chuta awmte hnênah chuan, “He mi pawh hi Isua, Nazareth mi hnêna awm kha a nih hi,” a ti a. 72 Tin, “Chu mihring chu ka hre lo,” tiin, chhechhamin a pha leh a. 73 Tin, rei lo tê achinah a kianga dingte chuan Petera hnênah, “Nang pawh an zînga mi i ni ngei mai, i ṭawngah a hriat alâwm,” an ti a. 74 Tin, ani chuan, “Chu mihring chu ka hre lo,” tiin, ânchhia inlawhin chhia a chham ta a. Tin, âr a khuang ta nghâl a. 75 Tin, Petera chuan Isuan, “Âr a khuan hmain nangin vawi thum mi phat ang,” a tih thu kha a lo hre leh ta a. Tin, a chhuak a, a ṭap ta zawih zawih a.
Isua Pilata hnênah an hruai
1 Tin, zîng a lo nih chuan, puithiam lalte leh vântlâng upate zawng zawng chu Isua tihlum tûrin a chungthuah an inrâwn a; 2 tin, an phuar a, an hruai a, ram awptu Pilata hnênah an pe ta a.
Juda thih thu
3 Tin, Juda, a mantîrtu khân Isua chu thiam loh an chantîr tih a hriat veleh a inchhîr a, tangka sawmthum kha puithiam lalte leh upate hnênah chuan a rawn la leh a, 4 “Mi thiam thisen ka mantîr kha thil ka lo tisual a ni,” a ti a. Anni erawh chuan, “Chu chu kan tân eng nge pawi ang? Nangin i tih tihin ti rawh,” an tihsan a. 5 Tin, ani chuan tangka chu hmun thianghlimah chuan a paih lût a, a kal bo va; a va inâwk hlum ta a. 6 Tin, puithiam lalte chuan tangkate chu an la a, “Hei hi thawhlâwm bâwma dah a thiang lo ve, thisen man a ni si a,” an ti a. 7 Tichuan, an inrâwn a, mikhualte phûmna tûrin Bêlvawtu Hmun chu an lei ta a. 8 (Chu vâng chuan a ni, chumi hmun chu tûn thlenga “Thisen Hmun” an tih tâk ni.) 9-10 Chumi lai chuan zâwlnei Jeremian, “Tin, tangka sawmthum, An chhiara man, Israel thlah, tuten emaw an chhiara man chu, An la a, Lalpan min tiam angin Bêlvawtu hmun man atân an pe a,” tia a sawi kha a lo thleng ta a ni.
Pilatan Isua a chhâl
11 Tin, Isua chu ram awptu hmaah chuan a ding a. Tin, ram awptu chuan, “Juda-te lal i ni em?” tiin a zâwt a. Tin, Isuan a hnênah, “Ni e,” a ti a. 12 Tin, puithiam lalte leh upaten an hêk laiin eng mahin a chhâng lo va. 13 Tichuan, Pilatan a hnênah, “An hêkna zozai che hi i hre lo vem ni?” a ti a. 14 Tin, kam khat mahin a chhâng lo va; chutichuan, ram awptu chuan mak a ti hle a.
Isua thi tûra tih a ni
15 Tin, ram awptuin kût niah chuan mi tâng pakhat, an duh apiang, mipuite chu a chhuahsak ṭhîn a. 16 Tin, chumi lai chuan mi tâng hmingthang tak, Barabba an tih chu an nei a. 17 Chutichuan, an rawn inkhâwm chuan Pilatan an hnênah, “Tu nge chhuahsak che u ila in duh? Barabba nge Isua, Krista an tiha chu?” a ti a. 18 (Itsîkna avângin ani chu an mantîr tih a hre si a.) 19 Tin, rorêlna ṭhutphahah chuan a ṭhut laiin a nupuiin, “Kha mi fel tak chungah khân eng mah ti suh; vawiinah hian amah avângin mumangah thil tam tak ka tuar a ni,” tiin a chah a. 20 Tin, puithiam lalte leh upaten Barabba dîla Isua tiboral tûrin mipuite chu an thlêm a. 21 Ram awptu erawh chuan anniho chu a bia a, “Anni pahnih chu a tu zâwk nge chhuahsak che u ila in duh?” a ti leh a. Tin, anni chuan, “Barabba,” an ti a. 22 Pilatan an hnênah, “Isua, Krista an tih hi engtin nge ka tih tâk ang le?” a ti a. An zain, “Ani chu krawsah khen behtîr rawh,” an ti a. 23 Tin, ani chuan, “Engah maw? Eng nge a tihsual ni?” a ti a. Nimahsela, anniho chu, “Krawsah khen behtîr rawh,” tiin an au chiam a. 24 Tichuan, Pilata chuan eng mah a ti thei lo va, a buai deuh deuh zâwk dawn tih a hriatin tui a la a, mipuiho hmaah chuan a kut a sil a, “He mi fel thisenah hian ka thiang e; nangnin in tih tihin ti rawh u,” a ti a. 25 Tin, vântlâng zawng zawng chuan, “A thisen chu keimahni chungah leh kan fate chungah awm rawh se,” tiin an chhâng a. 26 Chumi zawhah chuan Barabba chu a chhuahsak a; Isua erawh chu a vua a, krawsa khen beh tûrin a pe ta a.
Sipaiten Isua nuihza siam nân an hmang
27 Chumi zawhah chuan, ram awptu sipaite chuan Isua chu lal inah an hruai lût a, an pâwla mi zawng zawng a hnênah an ko khâwm a. 28 Tichuan, a puante an hlihsak a, puan sen an sintîr a. 29 Tin, hlînglukhum an phiar a, an khumtîr a, a kut ding lamin luang an kentîr a; a hmaah an ṭhingṭhi a, “Chibai, Juda-te lal!” tiin nuihza siam nân an hmang a. 30 Tin, amah chu chil an chhâk a, luang chu an lâksak a, a luah chuan an vua a. 31 Tin, nuihza siam nân an hman zawhin puan chu an hlihsak a, ama puante chu an sintîr leh a, krawsa khen beh tûrin an hruai ta a.
Isua krawsa khen beh thu
32 Tin, an kal chhuah laiin, Kurini khuaa mi, a hming Simona an hmu a; chu mi chu a kraws pu tûrin an man a. 33 Tin, Golgotha an tih hmun an lo thlenin (chu chu “Luruh hmun” tihna a ni) 34 uain thûr, englo khâ nêna pawlh, a in tûrin an pe a; nimahsela, a tem veleh a in duh ta lo va. 35 Tin, krawsa an khen beh zawhin ṭhum vâwrin a silhfênte chu an insem a. 36 Tin, chutah chuan an ṭhu a, an vêng a; 37 a hêkna, “He mi hi Isua, Juda-te Lal a ni,” tia ziak, a lu chungah an bel a. 38 Tin, a rual chuan suam hmang pahnih an khêng bet ve a, a ding lamah pakhat, a vei lamah pakhat. 39,40 Tin, mi vei apiangte chuan an lu thingin, “Nang, Pathian biak in ṭhiata ni thuma sa lehtu, intidam rawh; Pathian Fapa i nih chuan kraws ata kha lo chhuk ta che,” tiin an tiel a. 41 Chutiang bawkin puithiam lalte chuan lehkhaziaktute nên tielin, 42 “Mi dang mah a tidam ṭhîn a, mahni a intidam thei si lo. Israel lal a ni alâwm, tûnah hian kraws ata chu lo chhuk ang hmiang; tichuan, amah chu kan ring ang. 43 Pathian a ring alâwm, amah hi a duh chuan tûnah hian chhandam rawh se; ‘Pathian Fapa ka ni,’ a ti si a,” an ti a, 44 Suam hmang an khen beh vete pawh chuan chutiang bawk chuan an tiel a.
Isua a thi
45 Tin, chawfâk hun achin behliang mun hun thlengin khawvêl a lo thim ta vek a. 46 Tin, behliang mun hun lai vêl chuan Isua chu aw ring takin, “Eloi, eloi, lama sabakthani?” tiin a au chhuak a (chu chu, “Ka Pathian, ka Pathian, engah nge mi kalsan?” tihna a ni). 47 Tin, a kianga ding ṭhenkhatte chuan chu chu an hriatin, “He mi hian Elija a ko a ni,” an ti a. 48 Tin, an zînga mi pakhat chu a tlân ta nghâl a, sponj a la a, uain thûrin a chiah khat a, tiangah a târ a, a han intîr a. 49 Tin, mi dangte chuan, “Awm rawh se; amah la thla tûrin Elija a lo kal emaw i en ang u,” an ti a. 50 Tin, Isua chu aw ring takin a au leh a, a thlarau a thlah ta a. 51 Tin, ngai teh, Pathian biak in puanzâr chu a chung lam aṭangin a hnuai lam thlengin a lo thlêr chhuak ta a; tin, lîrte a lo nghîng a, lungpuite a lo khi chat a; 52 thlânte a lo inhawng a; mi thianghlim muhîl tawhte taksa tam tak pawh kaihthawhin an awm ta a; 53 chûngte chu, a thawhleh hnuah chuan thlân ata lo chhuakin khaw thianghlimah chuan an lût a, mi tam tak hnênah an inlâr ta a. 54 Tin, sipai za hotu leh a hnêna Isua vênga awm vete chuan, lîrnghîng leh thil awmziate chu an hmuhin an hlau ta êm êm a, “He mi hi Pathian Fapa a ni ngei mai,” an ti a. 55 Tin, chutah chuan hmeichhe tam tak, a rawngbâwlsak chung zêla Galili ram aṭanga Isua rawn zuitute chu an awm a, hla takah an thlîr a; 56 chûng zîngah chuan Mari Magdalini te, Mari, Jakoba leh Josea nu te, Zebedaia fapate nu te an tel a.
Isua an phûm
57 Tin, tlai lam a lo nih chuan mi hausa, a hming Josefa, Arimathai khuaa mi a lo kal a, amah ngei pawh chu Isua zirtîr a ni a; 58 chu mi chu Pilata hnênah a va kal a, Isua ruang chu a dîl a. Tin, Pilatan pe tûrin thu a pe a. 59 Tichuan, Josefa chuan ruang chu a la a, puan zai sîn fai takin a tuam a, 60 ama thlân thar, lung a ker kuakah chuan a zalh a; thlân kawngkaah chuan lung lian tak a lum a, a kal ta a. 61 Tin, chutah chuan Mari Magdalini leh Mari dang chu an awm a, thlân hma zâwnah chuan an ṭhu a.
Thlân vêngtu tûr
62 Tin, a tûkah chuan (chu chu Inrinni zawh tûk a ni) puithiam lalte leh Pharisaite chu Pilata hnênah an awm khâwm huai huai a, 63 “Ka pu, chu tihdertu chuan a dam lai khân, ‘Ni thum chinah ka tholeh ang,’ a ti tih kan hre reng a. 64 Chutichuan, thlân chu ni thum ni thlenga vêng ṭha tûrin thu pe rawh; chuti lo chuan a zirtîrten amah chu an va ru hlauh ang a, vântlâng hnênah, ‘Mitthi zîng ata a tholeh ta a ni,’ an ti dah ang e; tichuan, tihderna hnuhnûng zâwk chu a hmasa ai khân a ṭha lo lehzual ang,” an ti a. 65 Pilatan an hnênah, “Vêngtu sipaite in nei alâwm; kal ula, in theih ang angin vên ṭhattîr ta che u,” a ti a. 66 Chutichuan, vêngtu sipaite nên an va kal a, thlân chu an vên ṭhattîr a, lung chu an chhinchhiah a.
Thawhlehna
1 Tin, Chawlhni tlai takah, ni sarih ni hmasa ber tûra khua a vâr dâwnin, Mari Magdalini leh Mari dang chu thlân en tûrin an kal a. 2 Tin, ngai teh, lîr nasa takin a lo nghîng a; Lalpa vântirhkoh vân ata a lo chhuk a, lung chu a rawn lum sawn a, a chungah a ṭhu ta a. 3 A hmêl awmzia chu kâwlphe ang a ni a, a silhfên chu vûr angin a vâr a; 4 amah an hlauh avângin vêngtute chu an khûr a, mitthi ang maiin an lo awm ta a. 5 Tin, vântirhkoh chuan hmeichhiate chu a bia a, an hnênah, “Nangni chuan hlau suh u. Isua, an khen beha kha in zawng tih ka hria e. 6 Hetah a awm tawh lo ve; a sawi ang ngeiin a thawhleh tawh kha. A mutna hmun hi rawn en teh mah u. 7 Tin, kal thuai ula, a zirtîrte hnênah, ‘Mitthi zîng ata a tholeh ta a ni; ngai teh u, Galili ramah in hmaah a kal e; chutah chuan amah chu in hmu ang,’ tiin hrilh rawh u. Ngai teh u, ka hrilh tawh che u hi,” a ti a. 8 Tin, hlau leh lâwm êm êm chungin thlân aṭang chuan an kal thuai thuai a, a zirtîrte hrilh tûrin an tlân ta a. 9 Tin, ngai teh, Isuan anni chu a tâwk a, “Chibai u,” a ti a. Tichuan, anni chuan a kephahte chu an va vuan a, chibai an bûk a. 10 Tin, Isuan an hnênah, “Hlau suh u, kal ta ula, Galili rama kal tûrin ka unaute va hrilh rawh u; chutah chuan min hmu ang,” a ti a.
Thlân vêngtute thusawi
11 Tin, an va kal lai chuan vêngtu sipai ṭhenkhat chu khawpuiah an va lût a, thil awmzia zawng zawng chu puithiam lalte hnênah an va hrilh a. 12 Tin, upate nên an inkhâwma, an inrâwn zawhin sipaite hnênah chuan tangka tam tak an pe a, 13 “ ‘Zânah, kan muthilh hlânin a zirtîrte an lo kal a, amah chu an ru ta a ni,’ ti ang che u. 14 Tin, ram awptuin chu chu a lo hriat chuan amah chu kan thlêm ang a, lungkham lovin kan siam ang che u,” an ti a. 15 Chutichuan, tangka chu an la a, an hrilh ang zêl chuan an ti ta a; tichuan, tûn thlengin chumi thu chu Juda-te zîngah an la sawi huai huai a ni.
A zirtîrte hnênah Isua a inlâr
16 Nimahsela, zirtîr sâwm leh pakhatte chu Galili ramah, Isuan tlâng a ruatsakah chuan an kal a. 17 Tin, amah an hmuh chuan chibai an bûk a; ṭhenkhat erawh chuan an ringhlel a. 18 Tichuan, Isua chu an hnênah a lo kal a, anniho chu a bia a, “Lei leh vâna thuneihna zawng zawng ka hnênah pêk a ni tawh. 19 Chutichuan, kal ula, hnam tina mi zirtîrahte siam ula, Pa leh Fapa leh Thlarau Thianghlim hmingah chuan baptis ula, 20 thu ka pêk zawng zawng che u pawm tûrin zirtîr rawh u. Tin, ngai teh u, kei kumkhuain, khawvêl tâwp thleng pawhin, in hnênah ka awm zêl ang,” a ti a.
Baptistu Johana thuhril
1 Pathian Fapa Isua Krista Chanchin Ṭha thlen ṭan tirhna chu. 2 Zâwlnei Isaia lehkhabuah, “Ngai teh, ka tirhkoh i hmaah ka tîr a, Ani chuan i kawng a siam ang.” 3 “Thlalêra mi au râwl chuan, ‘Lalpa lamlian sial ula, A kawngte tingîl rawh u,’ a ti,” tia ziak ang khân, 4 Johana, thlalêra baptistu kha, thil tihsual ngaihdam nân simna baptisma thu hrilin a lo chhuak a. 5 Tin, Judai rama mi zawng zawng leh Jerusalem khuaa mi zawng zawngte an chhuak a, a hnên lamah an kal a, an sualte thupha chawiin Jordan luiah chuan a hnênah baptisma an chang ta hlawm a. 6 Tin, Johana chu sanghâwngsei hmul puanin a inthuam a, a kâwng chu savun kâwnghrênin a hrêng a, a chaw chu khaukhuap leh ram khawizu a ni. 7 Tin, “Ka hnungah keimah aia ropui zâwk a lo kal mêk a ni; kûna a pheikhawk hrui phelh tlâk pawh ka ni lo ve. 8 Kei zawngin tuiin ka baptis ṭhîn che u a; ani erawh chuan Thlarau Thianghlimin a baptis ang che u,” tiin a hril a.
Isua baptisma chan leh thlêmna
9 Tin, chûng niahte chuan heti hi a lo ni a, Isua chu Galili rama Nazareth khua aṭangin a lo kal a, Jordan luiah chuan Johana hnênah baptisma a chang ta a. 10 Chu veleh tui ata a chhuahin, vân inhawnga Thlarau ṭhuro anga a chunga lo chhuk a hmu a. 11 Tin, “Nang, ka Fapa duh tak i ni a, i chungah ka lâwm êm êm a ni,” tiin vân aṭangin aw a lo chhuak a. 12 Tin, Thlarau chuan ani chu thlalêrah a tîr chhuak ta nghâl a. 13 Tichuan, Setana thlêm chungin thlalêrah chuan ni sawmli a awm a, ramsa zîngahte a awm a; vântirhkohte chuan a rawng an bâwlsak a.
Sangha mantu pali koh thu
14 Tin, Johana an man hnuin, Isua chu Pathian Chanchin Ṭha hrilin Galili ramah a lo kal a, 15 “Hun chu a lo thleng ta a, Pathian ram pawh a lo hnai ta; sim ula, Chanchin Ṭha hi ring rawh u,” a ti zêl a. 16 Tin, Galili dîl kam chu a hrût laiin, Simona leh Simona unau Andria chu dîlah chuan lên dêngin a hmu a; sangha mantu an ni rêng a. 17 Tin, Isuan an hnênah, “Mi zui rawh u; tichuan, mihring mantuah ka siam ang che u,” a ti a. 18 Tin, lênte chu kalsanin an zui ta nghâl a. 19 Tin, thui lo tê a kalin, Zebedaia fapa Jakoba leh a unau Johana chu a hmu a, chu mite chu lên siam ṭhain lawngah bawk an awm a. 20 Tin, ani chuan anni chu a ko ta nghâl a; tichuan, an pa Zebedaia chu inhlawhfa an rawihte hnênah chuan lawngah an kalsan a, an zui ta a.
Ramhuai man mi pakhat tihdam
21 Tin, Kapernaum khuaah an va lût a; tin, Chawlhniah chuan inkhâwmna inah a lût a, a zirtîr ta nghâl a. 22 A thu zirtîr chu mak an ti hle a; lehkhaziaktute ang lova, thuneihna nei âwm taka anmahni a zirtîr avângin. 23 Tin, an inkhâwmna inah chuan ramhuai bawlhhlawh pai mi pakhat a lo awm a; 24 ani chu, “Nazareth Isu, keini leh nang eng nge kan inzâwlna awm? Min tiboral tûrin i lo kal em ni? Nang ka hria a che, Pathian mi thianghlim i ni e,” tiin a au chhuak ta nghâl a. 25 Tin, Isuan a hau va, “Ngawi la, a chhûng ata lo chhuak rawh,” a ti a. 26 Tin, ramhuai bawlhhlawh chu amah sawisaa ring taka auvin, a chhûng ata a lo chhuak ta a. 27 Tin, an zain mak an ti êm êm a; chutichuan, “Hei hi eng nge ni le? Zirtîrna thar a nih hi le! Ramhuai bawlhhlawhte pawh thunei takin thu a pe a, a thu an awih zêl hi le,” tiin an inhnial a. 28 Tin, Galili ram vêl zawng zawnga ram tinah a chanchin chu a thang ta nghâl a.
Petera pizawn leh mi tam tak tihdam
29 Tin, inkhâwmna in ata chu an chhuahin, Jakoba leh Johana nên Simona leh Andria inah chuan an lût ta nghâl a. 30 Tin, Simona nupuia nu chu khawsikin a nâ a, a lo mu a; tichuan, a chanchin chu Isua an hrilh ta nghâl a; 31 tin, ani chuan a kut a va chelh a, a kaitho ta a; tichuan, a khawsik chu a reh a, an rawng a bâwlsak ta a. 32 Tin, tlai lamah ni a tlâk hnu chuan, damlo zawng zawng leh ramhuai mante a hnênah an rawn hruai a. 33 A khuain kawngkhâr bulah chuan an lo awm khâwm ta mup a. 34 Tin, mi tam tak nat tinrênga nâte chu a tidam a, ramhuai tam tak a hnawt chhuak bawk a; ramhuaite chuan amah chu an hriat avângin an ṭawng a phal lo.
Isuan Galili ram a fang
35 Tin, zîngah khawvâr hma daihin a tho va, a chhuak a, thlalêr hmunah a va kal a, chutah chuan a ṭawngṭai a. 36 Tin, Simona leh a ṭhiante chuan an va zawng a; 37 tin, ani chu an va hmuh chuan a hnênah, “Mi zawng zawngin an zawng che asin le,” an ti a. 38 Tin, ani chuan an hnênah, “Hêng lai vêla khaw dangahte huan i kal ang u, chûngahte pawh chuan thu ka hril theihna tûrin; chu chu ka lo kal chhan a ni si a,” a ti a. 39 Tichuan, thu hrila ramhuaite hnawt chhuak zêlin, Galili ram zawng zawnga an inkhâwmna inahte a lût zêl a.
Phâr tihdam
40 Tin, a hnênah phâr a lo kal a, “I duh chuan mi tithianghlim thei e,” tiin a hmaah ṭhingṭhiin a ngên chiam a. 41 Tin, ani chuan a lo khawngaih êm êm a, a han ban a, a dek a, “Ka duh e, lo thianghlim tawh ang che,” a ti a. 42 Tichuan, chawplehchilhin a phâr chu a lo reh ta nghâl a, a lo thianghlim ta a. 43,44 Tin, Isua chuan, “Tu ma hnêna eng mah sawi lo tûrin fîmkhur ang che; amaherawhchu, puithiam hnênah va inentîr la, i inthen nân Mosian thil a ruatte kha hlân rawh, an hriat fiahna tûrin,” a ti tlat a, a kaltîr ta nghâl a. 45 Nimahsela, ani chu a chhuak a, chu mi chanchin chu nasa taka tlângaupuiin a puang darh ta a; chutichuan, Isua chu a langin khuaah a lût thei ta lo va, thlalêr hmunahte a awm ta zâwk a; tin, hmun tin ata a hnênah an lo kal ṭhîn a.
Zeng tihdam
1 Tin, ni eng emaw zât hnuah Kapernaum khuaa a luh lehin, inah chuan a awm tih thu a lo thang ta a. 2 Tichuan, kawngka bulah pawh awmna rêng awm lo khawp hialin mi tam tak an lo awm khâwm ta a; tin, an hnênah thu a hril ta a. 3 Tin, zeng pakhat, mi paliina zâwn a hnênah an rawn hruai a. 4 Tin, mipui avânga a kiang hnaia an lo kal theih loh avângin, a awmna in chung chu an ṭhiat a; tin, an reh pawh zawhin, a âwngphah chu a chunga mi zeng mu chawp chuan an zuk thlâk a. 5 Tichuan, Isuan an rinzia chu a lo hmuhin zeng hnênah chuan, “Ka fa, i sualte ngaihdam a ni tawh e,” a ti a. 6 Tin, lehkhaziaktu ṭhenkhatte chu chutah chuan an ṭhu a, 7 “He mi hian engati nge hetiang thu hi a sawi ni? Pathian a sawichhia a nih hi; mi pakhat, Pathian chauh lo chuan, tuin nge sualte ngaidam thei ni?” tiin an thinlungin an ngaihtuah a. 8 Tin, Isuan an rilruin chutiangin an ngaihtuah tih a rilruin a lo hre ta nghâl a, an hnênah, “Chûng thu chu engati nge in thinlunga in ngaihtuah ni? 9 Zeng hnênah hian, ‘I sualte ngaihdam a ni tawh,’ tih leh, ‘Tho la, i âwngphah la la, kein kal tawh rawh,’ tih hi a eng nge sawi awl zâwk? 10 Eng pawh ni sela, khawvêlah Mihring Fapain sual ngaihdam theihna a nei tih in hriat nân, (zeng hnênah chuan) 11 ‘Tho la, i âwngphah la la, i inah kal rawh,’ ka ti a che,” a ti a. 12 Tichuan, ani chu a tho va, a âwngphah chu a la ta nghâl a, an zaa hmuhah chuan a kal chhuak ta a; chutichuan, an zain mak an ti hle a, “Hetiang rêng rêng hi kan la hmu ngai lo,” tiin Pathian an fak ta a.
Levia koh thu
13 Tin, a chhuak leh a, dîl kamah chuan a kal ta a; tin, mipui zawng zawng chu a hnênah an va kal a, a lo zirtîr ta a. 14 Tin, a kal pahin Levia, Alphaia fapa chu chhiah chawina hmuna ṭhu a hmu a, a hnênah, “Mi rawn zui rawh,” a ti a. Tin, a tho va, a zui ta a. 15 Tin, heti hi a ni a, Isua chuan Levia inah chuan chaw a kîl a, chhiahkhawntute leh mi sual tam takin Isua leh a zirtîrte chu an kîlpui hlawm a: an tam hle si a, amah chu an zui ve bawk ṭhîn a. 16 Tin, Pharisaite zînga lehkhaziaktute chuan, Isuan mi sual leh chhiahkhawntute a kîlpui an hmuhin, a zirtîrte hnênah chuan, “Engtizia nge chhiahkhawntute leh mi sualte hnênah a eia a in le?” an ti a. 17 Tin, Isuan chu chu a lo hria a, an hnênah chuan, “Mi chakte chuan dâktawr an ngai lo va, mi bawrhsâwmte zâwkin an ngai a ni; mi fel takte lam tûra lo kal ka ni lo va, mi sualte zâwk lam tûra lo kal ka ni,” a ti a.
Chaw nghei chungchâng zawhna
18 Tin, Johana zirtîrte leh Pharisaite chuan chaw an nghei a; tin, mi an lo kal a, Isua hnênah chuan, “Engati nge Johana zirtîrte leh Pharisai zirtîrten chaw an nghei ṭhina, i zirtîrte lêmin an nghei ve ṭhin loh?” an ti a. 19 Isuan an hnênah, “Mo hruaitute hnênah a pasal tûr chu a awm chhûng zawng, mo hruaitute chuan chaw an nghei thei em ni? A pasal tûr chu an hnêna a awm chhûng zawng an nghei thei lo vang. 20 Nimahsela, a pasal tûr chu an hnên ata hruai bo nite a la thleng ang a, chumi niah erawh chuan an la nghei ang. 21 “Tu mân puan hlui, puan la thlâk mar loh themin an bel ngai lo; bel ang sela, a bel phuina tûr chuan a kai ṭet zâwk ang a, a thar chuan a hlui chu a kai ṭêt ang a, a lo thlêr nasa lehzual ang. 22 Tin, tu mân uain thar, savun uain peng hluiahte an thun ngai lo; thun ang sela, uain chuan savun pengte chu a tâwn puak ang a, uain leh savun pengte chu a boral ve ve ang; uain thar chu savun uain peng tharahte an thun zâwk ṭhîn a ni,” a ti a.
Sabbath chungchâng zawhna
23 Tin, heti hi a ni a, Isua chu Chawlhniah chuan buh hmunahte a kal tlang a; tin, a zirtîrte chuan an kal pahin buhvuite chu an thliak a. 24 Tin, Pharisaite chuan a hnênah, “En teh, engati nge Chawlhnia tih thiang lo chu an tih ni?” an ti a. 25 Tin, ani chuan an hnênah, “Davida leh a ṭhiante an tlâkchhama, an rilṭâm laia a thiltih kha in chhiar lo vem ni? 26 Khatia Abiathara puithiam lalber a nih laia, Pathian ina a luha, puithiamte chauh lo chuan ei thian loh chhangdah chu a eia, a ṭhiante hnêna a pêk ve thu kha?” a ti a. 27 Tin, amah vêkin an hnênah chuan, “Chawlhni hi mihring tâna siam a ni a, mihring hi Chawlhni tâna siam a ni lo; 28 chutichuan, Mihring Fapa hi Chawlhni chungah lam pawh hian lal a ni,” a ti a.
Kutzeng tihdam
1 Tin, inkhâwmna inah chuan a lût leh a; chutah chuan mi pakhat kutzeng a lo awm a. 2 Tin, amah an hêk theih nân Chawlhniah a tihdam dâwn leh dâwn loh an mitmei a. 3 Tin, anin kutzeng hnênah chuan, “Lo ding chhuak rawh,” a ti a. 4 Tin, an hnênah chuan, “Chawlhniah hian tihṭhat nge thiang tihchhiat? Chhandam nge thiang tihhlum?” tiin a zâwt a. Nimahsela, an ngawi ta reng a. 5 Tin, an thinlung sak chu pawi ti êm êmin, thinur chunga anmahni a en vêl hnuin, chu mi hnênah chuan, “I kut phar rawh,” a ti a. Tin, a han phar chhuak a, a kut chu a dam ta a. 6 Tin, Pharisaite chu an chhuak a, amah an tihhlum theihna zia tûr ngaihtuahin Heroda pâwla mite nên chuan an inrâwn ta nghâl a.
Dîl kama mipui
7 Tin, Isua chu a zirtîrte nên dîl lamah chuan an kal bo va; tin, Galili ram aṭangin mipui tam takin an zui ta a. 8 Tin, a thiltih ropuizia chu an hriatin Judai ram aṭang te, Jerusalem khua aṭang te, Idumai ram aṭang te, Jordan râl aṭang te, Tura leh Sidon khaw vêl aṭang tein mipui tam tak a hnênah an lo kal ve a. 9 Tin, mipui avâng chuan a tân lawnglêng lo ruatsak tûrin a zirtîrte a hrilh a, “Chuti lo chuan, mi nêk huai huai dah ang e,” a ti a. 10 Mi tam tak a tidam tawh si a; chutichuan, na nei apiangin amah an deh theihna tûrin an bawh huai huai a. 11 Ramhuai bawlhhlawhte pawhin amah chu an hmuh apiangin a hmaah bawkkhupin, “Nang Pathian Fapa chu i ni,” tiin an au ṭhîn a. 12 Tin, ani chuan a chanchin chu puan loh tûr an hnênah a ti tlat zêl a.
Tirhkoh sâwm leh pahnih
13 Tin, tlângah chuan a han kal a, amahin a duh zâwng apiangte chu a ko va; tin, anni chu a hnênah an han kal a. 14,15 Tin, a hnêna an awm theih nân leh, thu hril tûr leh ramhuaite hnawh chhuahna thu nei tûra a tirh chhuah theih nân, sâwm leh pahnih a ruat a. 16 Chûngte chu Simona, Petera a vuah te, 17 Zebedaia fapa Jakoba leh Jakoba unau Johana-te (chu mite chu “Boanergea” a vuah a, chu chu “Khawpuiri Fate”tihna a ni), 18 Andria te, Philipa te, Bartholomaia te, Matthaia te, Thoma te, Alphaia fapa Jakoba te, Thaddaia te, Kanaan-a mi Simona te, 19 a mantîrtu Juda Iskariota te an ni.
Isua leh Beelzebula
20 Tin, inah a va lût a. Tin, mipui chu an lo kal khâwm leh a; chutichuan, chhang takngial pawh an ei thei ta lo va. 21 Tin, a chhûngte chuan chu chu an hriatin, “A â a nih chu le,” tiin amah man tumin an thawk a. 22 Tin, lehkhaziaktute Jerusalem khua aṭanga lo chhukte chuan, “Beelzebula a zâwl a nih hi,” an ti a. “Ramhuai lal avângin alâwm ramhuaite a hnawh chhuah ṭhin ni,” an ti bawk a. 23 Tin, Isua chuan lehkhaziaktute chu a ko va, tehkhin thuin an hnênah, “Setanan Setana vêk engtin nge a hnawh chhuah theih? 24 Ram pawh mahni a indo chuan, chumi ram chu a ding chhuak thei lo vang. 25 Chhûngkhat pawh mahni an indo chuan, chu mite chhûng chu an ding chhuak thei lo vang. 26 Setana pawh mahni indova a inkhin si chuan a ding chhuak thei lo vang a, a boral mai zâwk ang. 27 Tu mân mi chak ina lûtin a sum chu an lâksak thei ṭhîn lo, mi chak chu an phuar hmasak zet loh chuan; chumi hnuah erawh chuan a in chu an ramsak mai ang. 28 Tihtakmeuhvin ka hrilh a che u, mihring fate hi an sualna zawng zawngah leh Pathian an sawichhiatna kawng engah pawh, an sawichhiatnaahte chuan ngaihdam an ni ang; 29 tu pawh Thlarau Thianghlim meuh sawichhia erawh chuan eng tikah mah ngaihdamna a hmu lo vang a, chatuan sualna kawngah chuan thiam lohvin a awm zâwk ang,” a ti a. 30 (“Ramhuai bawlhhlawh a zâwl a ni,” an tih avâng khân chu chu a sawi a ni.)
Isua nu leh unaute
31 Tin, a nu leh a unaute chu an lo kal a, pâwnah an ding a, amah kovah mi an tîr a. 32 Tin, a vêlah chuan mipui an lo ṭhu hlawm a; tin, a hnênah chuan, “Ngai teh, pâwnah sâwn i nu leh i unauten an zawng a che,” an ti a. 33 Tin, ani chuan a hnênah, “Ka nu leh ka unaute chu tute nge ni?” tiin a chhâng a. 34 Tin, a kiang vêla ṭhute chu a han en vêl a, “En teh u, ka nu leh ka unaute hi! 35 Tu pawh Pathian duh zâwng ti apiang chu, chu mite ngei chu ka unaute, ka farnute, ka nute an ni asin,” a ti a.
Buh chi thehtu tehkhin thu
1 Tin, dîl kamah chuan a zirtîr leh ta a. Tin, mipui tam tak mai a hnênah an rawn inkhâwm a; chutichuan, dîlah chuan lawngah a chuang a, a ṭhu a; mipuiho zawng zawng chu dîl kama khawmualah chuan an awm a. 2 Tin, tehkhin thuin thu tam tak a zirtîr a; a zirtîrnaah chuan an hnênah, 3 “Ngaithla ula, en teh u; buh chi thehtu buh chi thehin a feh a; 4 tin, heti hi a lo ni a, a theh laiin a ṭhen kalkawng dungah a tla a, savaten an rawn tlân zo ta a. 5 Tin, a ṭhen pialtlêp chung lei pan hmunah a tla a; lei a chhah loh avangin a ṭo ta nghâl a; 6 nimahsela, ni a lo tlângsân deuhvin em vuaiin a lo awm a, zung a neih loh avângin a râwp ta mai a. 7 Tin, a ṭhen hnimhlîngnei zîngah a tla a, hnim chu a lo ṭo sâng a, a dîp ral ta a, rah rêng rêng a rah ta lo va. 8 Tin, a ṭhen lei ṭhaah a tla a, a ṭo va, a ṭhang lian a, a rah ta a; sawmthum te, sawmruk te, za tein a pung ta hlawm a,” a ti a. 9 Tin, amah vêkin, “Tu pawh hriatna tûra beng nei chuan hre rawh se,” a ti a.
Tehkhin thu a sawi chhan
10 Tin, fianriala a awm laiin sâwm leh pahnihte leh a ṭhuihruai dangte chuan tehkhin thute chu an zâwt fiah a. 11 Tin, ani chuan an hnênah, “Pathian ram thurûk chu nangni hriat zawng phal a ni a, pâwna mite tân erawh chuan engkim tehkhin thua tih a ni; 12 chutichuan, ‘Hmuh zawng an hmu thei na a, hriat erawh chu an hriat theih lohna tûr leh, beng zawngin an hre thei na a, a ngaihna erawh chu an hriat theih lohna tûrin; chuti lo chuan, an hawi kîr leh ang a, ngaihdam an lo ni hlauh dah ang e,’ ” a ti a.
Buh chi thehtu tehkhin thu hrilhfiahna
13 Tin, amah vêkin an hnênah chuan, “He tehkhin thu hi in hre thei lo maw? Chuti a nih chuan, engtin nge tehkhin thu dang zawng zawngte chu in hriat hleih ang? 14 Buh chi thehtu chuan thu chu a theh a ni. 15 Tin, kawng dunga thu thehnate chu hêng hi an ni: thu an hriat veleh Setana chuan an rilrua thu theh chu a lâksak nghâl ṭhîn. 16 Tin, chutiang bawkin pialtlêp chunga theh chu hêng hi an ni: thu an hriat veleh lâwm taka pawm nghâlte hi; 17 nimahsela, anmahniah chuan zung rêng an nei lo va, rei lo tê chauh an awm a; chumi hnuah chuan thu avânga hrehawmna emaw, tihduhdahna emaw a lo awm veleh an tlu nghâl mai ṭhîn. 18 Tin, mi dangte chu hnimhlîngnei zînga theh chu an ni a; chûngte chuan thu chu an hre tawh a; 19 nimahsela, khawvêl lungkhamnate, hausakna bumnate, thil dang châknate chu a lo luhin, thu chu a dîp a, rah lovin a lo awm ṭhîn. 20 Tin, lei ṭhaa theh chu hêng hi an ni: thu chu hriaa, pawma, a leh sawmthum te, a leh sawmruk te, a leh za tea rahte hi an ni,” a ti a.
Khova khuh khâwnvâr
21 Tin, amah vêkin an hnênah chuan, “Khâwnvâr chu a dahnaa dah lova, hrai hnuaiah emaw, khum hnuaiah emaw dah tûrin an rawn la ngai em ni? 22 Puan loh tûra zêp eng mah a awm lo va, lang lo tûra thuhrûk eng mah a awm hek lo. 23 Tu pawhin hriatna tûra beng an neih chuan hre rawh se,” a ti a. 24 Tin, amah vêkin an hnênah chuan, “In ngaihthlâk chu eng nge a nih fîmkhur rawh u; in tehna ngai bawkin an tehsak ang che u a, an pe tam zâwk mah ang che u. 25 Tu pawh a nei chu an pêk belhchhah ang a; tu pawh a nei lo chu a neih chhun pawh an lâksak ang,” a ti a.
Chi lo ṭiak tehkhin thu
26 Tin, amah vêkin, “Pathian ram chu hetiang hi a ni; miin leiah hian chi theh sela, 27 zânah muhîlin chhûnah tho ṭhîn sela, chi chu, a zia a hriat lohvin lo ṭiakin lo ṭhang sela; chutiang chu a ni. 28 Lei hian amahin rah a rawn chhuah ṭhîn; a tîr berah a kûng, chumi hnuah chuan a vui; tin, chumi hnu lehah a vuiah chuan buh fang pum chu. 29 Nimahsela, rah chu a lo hmin hunin, buh lâk a lo hun tâk avângin favah chu a phawrh nghâl ṭhîn,” a ti a.
Anṭam chi tehkhin thu
30 Tin, amah vêkin, “Pathian ram chu engtin nge kan tehkhin ang? A nih loh leh, eng tehkhin thuin nge kan tehkhin ang? 31 Anṭam chi fang khat leia an thehin, leia chi zawng zawng aiin tê ber mah sela, 32 a theh hnuah erawh chuan a lo ṭiak a, thlai zawng zawng aiin a lo lian ta zâwk a, zâr lian tak takte a lo nei a; chutichuan, chunglêng savate chu a bukah chuan an riak thei ṭhîn; chutiang chu a ni,” a ti a. 33 Tin, chutiang tehkhin thu tam tak chuan an hriat theih tâwk tâwkin thu chu an hnênah a sawi ṭhîn a. 34 Nimahsela, tehkhin thu lovin an hnênah thu a sawi ngai lo; a zirtîrte hnênah erawh chuan fianrialah engkim a hrilhfiah ṭhîn a ni.
Thlipui hau reh
35 Tin, chumi ni vêkah chuan, khua a lo tlai lamin ani chuan an hnênah, “Râl lehlamah sâwn i kai ang u,” a ti a. 36 Tichuan, mipuite chu kalsanin, amah chu a awm pângngai ang chuan lawngah chuan an kalpui ta nghâl a. Lawng dangte pawh a hnênah a awm a. 37 Tin, thlipui nasa tak a lo tleh a, tuifâwnte chu lawngah chuan a fâwn lût hlawp hlawp a; chutichuan, lawng chu a lo khat dâwn ta mai a. 38 Tin, ani chu lukham chu khama muhîlin, lawng mei lamah chuan a awm a. Tin, an kaitho va, a hnênah chuan, “Zirtîrtu, kan boral hi pawi i ti lo vem ni?” an ti a. 39 Tin, ani chu a lo harh a, thli chu a hau va, dîl hnênah pawh chuan, “Ngawi la, awm hle hle rawh!” a ti a. Tin, thli chu a bâng a, a lo reh ta ṭhuap mai a. 40 Tin, ani chuan an hnênah, “Engati nge chuti êma in hlauh ni le? Rinna rêng in la nei lo a ni maw?” a ti a. 41 Tin, hlauh namênin an hlau ta lo va, “He mi hi tu nge ni le, thli leh dîl lam pawhin a thu an awih hi?” an ti hlawm a.
Gerasin ramhuaizâwl tihdam
1 Tin, dîl râl, Gerasin mite ram chu an lo thleng a. 2 Tin, lawng ata a chhuah hnu chuan mi pakhat, ramhuai bawlhhlawh pai, thlân aṭanga lo chhuakin a rawn tâwk ta nghâl a; 3 chu mi chuan thlânahte chuan awmna a nei ṭhîn a, tu mahin khaidiat pawhin an phuar thei tawh lo va; 4 kawlte leh khaidiatte pawhin an phuar fo tawh si a; nimahsela, khaidiatte chu a pawt chat a, kawlte pawh chu a tisawm ṭhîn a; tu mahin an tidawl zo hek lo. 5 A chhûn a zânin thlânahte leh tlângahte chuan a au a au ṭhîn a, lungte pawhin a inzai fo ṭhîn. 6 Tin, hla tak aṭangin Isua chu a hmuh veleh a tlân a, chibai a va bûk a; 7 tin, aw ring taka auvin, “Isu, Pathian Chungnungbera Fapa, kei leh nang eng nge kan inzâwlna awm? Mi nghaisa lul lo tûrin Pathian hmingin ka ngên chiam a che,” a ti a. 8 (Isua chuan a hnênah, “Nang, ramhuai bawlhhlawhpa, mihring chhûng ata hi chhuak rawh,” a lo ti tawh si a.) 9 Tin, ani chuan, “I hming eng nge ni?” tiin a zâwt a. Tin, anin a hnênah, “Ka hming chu Nuaia a ni, tam tak kan ni si a,” a ti a. 10 Tin, chumi ram ata chu anmahni tîr chhuak lo tûrin Isua hnênah a ngên ta chiam a. 11 Tin, chuta tlâng pangah chuan vawk rual tam tak an tla a. 12 Tin, ramhuai bawlhhlawhte chuan, “Vawk kawchhûngahte sâwn min luhtîr rawh, anmahnia kan luh theih nân,” tiin a hnênah an ngên a. 13 Tin, ani chuan thu a pe a. Tichuan, ramhuai bawlhhlawhte chu an chhuak a, vawk kawchhûngahte chuan an lût a; tichuan, vawk rual chu (sânghnih lai an ni a) khâmah an tlân chhuk chiam a, dîlah an tlân lût ta a; tin, dîlah chuan tui hâkin an thi ta a. 14 Tin, a vulhtute chu an tlân a, khuaah leh lovahte chuan an sawi a. Tin, “Eng nge lo ni ta?” tia en tûrin an lo kal hlawm a. 15 Tin, Isua hnên an lo thleng a, ramhuai man, Nuaia mana kha, puan sina, rilru pângngai pua ṭhu an rawn hmu a; tichuan, an hlau ta a. 16 Tin, a hretute chuan ramhuai mana chunga thil thlenzia leh, vawk chanchinte chu chûnghote chu an lo hrilh a. 17 Tin, chûnghote chuan ani chu an ram ata chhuak tûrin an ngên ta a. 18 Tin, lawnga a chuan dâwn lai takin, ramhuai man hnua khân Isua hnêna awm reng a ngên a. 19 Nimahsela, Isuan a phal lo va, a hnênah, “I inah i ṭhiante hnênah haw la, Lalpan i tân thil a tihsak che hi a ropuizia leh a khawngaihzia che hi va hrilh rawh,” a ti ta zâwk a. 20 Tichuan, a kal a, Dekapoli khuaahte chuan Isuan a tân thil a tihsak ropuizia chu a tlângaupui ta a; tin, mi zawng zawng chuan mak an ti hle a.
Jaira fanu leh hmeichhe thi pût tihdam
21 Tin, Isua chu lawnga râl lehlama a lo kai leh chuan, mipui tam tak a hnênah an lo kal khâwm a; tin, ani chu dîl kamah a awm a. 22 Tin, inkhâwmna in hotute zînga mi pakhat, a hming Jaira chu a lo kal a; Isua a hmuh veleh a ke bulah a bawkkhup a, 23 “Ka fanu naupang tê a thi lek lek a; a lo harha a lo dam theih nân, lo kala a chunga i kut nghat tûrin ka ngên a che,” tiin a ngên chiam a. 24 Tichuan, Isua chu a hnênah a va kal a; tin, mipui tam takin an zui a, an nêk huai huai a. 25 Tin, hmeichhe pakhat, kum sâwm leh kum hnih thi pûtin a damlo va, 26 dâktawr tam tak lakah nasa takin a tuar tawh a, a neih zawng zawng pawh a dek ral zo tawh a, ṭhathnem ahnêkin a lo zual zâwk mah a. 27 Chu mi chuan Isua chanchin thute chu a lo hria a, a hnunga mipui zîngah chuan a lo kal a, a puan chu a dek a. 28 “A puan chauh pawh dek ila, tihdamin ka awm mai ang,” tih a rilrûk a ni. 29 Tin, chawplehchilhin a thi pût chu a lo reh ta nghâl a, a nâ chu tihdam a ni tih a taksaah a inhre ta a. 30 Tin, Isua chuan a chhûng ata thiltihtheihna chhuak ṭhîn chu a chhuak tih a lo hria a, mipui zîngah chuan a hawi vêl ta nghâl a, “Tu nge ka puante dek kha?” a ti a. 31 Tin, a zirtîrte chuan a hnênah, “Mipuiin an nêk huai huai che hi i hmu si a, ‘Tu nge mi dek?’ engtiziaa ti nge i nih le?” an ti a. 32 Tin, ani chuan chu mi titu chu hmuh tumin a en vêl a. 33 Chutichuan, hmeichhia chuan a chunga thil a tihsak chu hriain, hlau leh khûr chungin a lo kal a, a hmaah a bawkkhup a, a hnênah thu dik tak a hrilh ta vek a. 34 Tin, ani chuan a hnênah, “Ka fanu, i rinna hi i dampui a ni e, thlamuang takin kal la, i natna ata chu lo dam hlen tawh ang che,” a ti a. 35 A la ṭawng lai mêkin inkhâwmna in hotu in ata chu mi an lo kal a, “I fanu a thi ta; engah nge zirtîrtu hi i la tihhah cheu dâwn?” an ti a. 36 Isua erawh chuan an thusawi chu bengkhawn lovin, inkhâwmna in hotu hnênah chuan, “Hlau suh, ring mai rawh,” a ti a. 37 Tin, Petera te, Jakoba te, Jakoba unau Johana te chauh lo chu tu mah amah zui ve a phal ta lo va. 38 Tin, inkhâwmna in hotu in chu a va thleng a, Isua chuan an lo buai mur mur leh an lo ṭap tuar tuara, an lo chiau vak vak chu a hmu a. 39 Tin, a va luh chuan an hnênah, “Engati nge in bengchhena in ṭah ni? Naupang chu a thi lo ve, a muhîl a ni zâwk,” a ti a. 40 Tin, anni chuan an nuihsan ta mai a. Ani erawh chuan an zain a hnawt chhuak a, naupang nu leh pa leh a hnêna awmte chu a hruai a, naupang awmnaah chuan a va lût a. 41 Tin, naupang kut chu a chelh a, a hnênah chuan, “Talitha Kumi!” a ti a (chu chu, “Chêmtê, tho rawh, ka ti a che,” tihna a ni). 42 Tin, hmeichhe naupang chu a lo tho va, a kal thei ta nghâl a; amah chu kum sâwm leh kum hnih mi a ni tawh rêng a. Tin, anni chuan mak tih namênin mak an ti lo va. 43 Tin, anin an hnênah, “Hei hi tu mân hre suh se,” a ti tlat a; tin, ei tûr pêk tûr thu a pe a.
Nazareth khuaah Isua a hnawng
1 Tin, chuta ta chu a chhuak a, a awmna khaw lam chu a thleng ta a; a zirtîrte chuan an zui zêl a. 2 Tin, Chawlhni a lo ni a, inkhâwmna inah a zirtîr ta a; tin, mi tam tak a thu hriate chuan, “He mi hian hêng thute hi khawi ata nge a hriat ni? He mi hnêna finna pêk hi eng finna nge ni? A kutin heti kauva thil mak a tih hi engtizia nge ni? 3 He mi hi Mari fapa, Jakoba te, Josea te, Juda te, Simona te unaupa, thingrem siamtu kha a ni lo vem ni? A farnute pawh hetah kan hnêna awm an ni lo vem ni?” an ti a, mak an ti hle a. Tichuan, a chungah an lungni ta lo va. 4 Tin, Isuan an hnênah, “Zâwlnei chu ama khaw lamah te, ama laichîn zîngah te, ama inah te chauh lo chuan chawimawi lohvin a awm ngai lo,” a ti a. 5 Tin, mi damlo tlêm te chunga kut nghata a tihdam chauh lo chu, chutah chuan thil mak rêng a ti thei lo va. 6 An rin loh avângin mak a ti hle a. Tin, zirtîr chung zêlin khuate chu a fang vêl a.
Sâwmpahnihte tirh chhuah
7 Tin, sâwm leh pahnihte chu a ko va, pahnih zêlin a tîr chhuak ta a; ramhuai bawlhhlawhte chunga thuneihna a pe bawk a. 8 Tin, an zinna atân tiang chauh lo chu eng mah - chhang pawh, iptê pawh, an kâwnghrêna tangka pawh - ken loh tûr a ti tlat a; 9 pheikhawk erawh chu bun tûr a ti a; “Kawr pahnih ha suh u,” a ti bawk a. 10 Tin, amah vêkin an hnênah, “Khawiah pawh in thlenna inah chuan, chuta ta in chhuah hma loh chu thleng reng ang che u. 11 Tin, khawii khua pawhin an lawm loh che ua, in thu an ngaihthlâk lohna apiangah, chuta ṭanga in chhuah hun chuan, anmahni hriattîrna tûrin, in kephah hnuaia vaivut kai chu thing thla ang che u,” a ti a. 12 Tichuan, an kal chhuak a, simna tûr thu an hril a; 13 ramhuai tam tak an hnawt chhuak a; Tin damlo tam tak chu hriak an hnawih a, an tidam bawk a.
Baptistu Johana thih thu
14 Tin, Lal Heroda chuan a lo hria a, a hming chu a lo thang ta si a; “Baptistu Johana kha mitthi zîng ata a lo tholeh ta a; chuvângin, chûng thiltihtheihnate chuan amahah a thawk a nih chu,” a ti a. 15 Mi dang erawh chuan, “Elija a nih chu,” an ti a; mi dangin, “Zâwlnei a nih chu, zâwlneite zînga pakhat ang kha,” an ti a. 16 Heroda erawh chuan a lo hriatin, “Johana, a lu ka tana ngei kha, a lo tholeh ta a nih chu,” a ti a. 17 Heroda ngei chuan a unau Philipa nupui Herodi avângin mi a tîr chhuak a, Johana chu a mantîr a, tân inah phuar chungin a lo khung tawh si a; Herodi chu nupuiah a lo nei tawh si a; 18 Johana chuan Heroda hnênah, “I unau nupui i neihsak hi a thiang lo a ni,” a lo ti tawh bawk a ni. 19 Chuvângin, Herodi chuan amah chu a hal riau va, tihhlum a châk a; nimahsela, a thei si lo va. 20 Herodan Johana chu mi fel leh thianghlim tak a ni tih a hriat avângin amah chu a hlau va, a humhim tlat si a; a thu a ngaihthlâk chuan a mangang hle ṭhîn a; nimahsela, lâwm takin a ngaithla si ṭhîn. 21 Tin, Herodan a pian champhaphâk niah chuan a mi ropuite, sipai hotu lianhote, Galili rama mi lianhote tâna zâna ruai a ṭheh laiin hun remchâng a lo awm ta a. 22 Herodi fanu ngei chu a lo lût a, a lâm a, Heroda leh a chaw kîlpuite chu a tilâwm ta a; tichuan, lal chuan hmeichhe naupang hnênah chuan, “I duh apiang mi dîl rawh, ka pe ang che,” a ti a. 23 “Eng pawh mi dîl apiang chu, ka ram chanve hial pawh ka pe ang che,” tiin a hnênah chhia a chham bawk a. 24 Tin, ani chu a chhuak a, a nu hnênah chuan, “Eng nge ka dîl ang?” a va ti a. Tin, ani chuan, “Baptistu Johana lu le,” a lo ti a. 25 Tin, ani chu hmanhmawh takin lal hnênah chuan a va lût ta nghâl a, “Thlêngin Baptistu Johana lu i mi pêk nghâl ka duh a ni,” tiin a dîl a. 26 Tin, lal chu a lungngai ta êm êm mai a; nimahsela, a chhechhamte leh a chaw kîlpuite avâng chuan a lo hnial duh lo va. 27 Tin, lal chuan a vêngtu sipai pakhat a tîr ta nghâl a, a lu rawn lâk tûr thu a pe a. Tin, ani chuan tân inah chuan a lu a va tan a, 28 a lu chu thlêngin a rawn la a, hmeichhe naupang hnênah chuan a pe a; tin, hmeichhe naupang chuan a nu hnênah a pe a. 29 Tin, a zirtîrte chuan an hriat veleh a ruang chu an va hlâwm a, thlânah an zalh ta a.
Mipui sângnga hrai
30 Tin, tirhkohte chu Isua hnênah an rawn inkhâwm a, engkim, an thiltih apiang leh an zirtîr apiang an hrilh a. 31 Tin, ani chuan an hnênah, “Nangmahniho ngawtin thlalêr hmunah a hrangin lo kal ula, châwl rih rawh u,” a ti a. (Mi tam tak an insûl zut zut a, chaw takngial pawh an ei hman si lo va.) 32 Tichuan, thlalêr hmun panin lawngin an va kal hrang ta a. 33 Tin, miten an kal lai chu an hmu a, mi tam takin anmahni chu an hria a, khaw tin ata chutah chuan kein an tlân khâwm a, an lo lehkhalh ta a. 34 Tichuan, ani chu vaukama a chhuah chuan mipui tam tak a hmu a, vêngtu nei lo berâmte ang an nih avângin a khawngaih ta êm êm a, thu tam tak a zirtîr ta a. 35 Tin, khua chu a lo tlai ta hle a, zirtîrte chu a hnênah an lo kal a, “Hei hi thlalêr hmun a ni a, khua pawh a tlai tawh si a; 36 anniho hi kan kiang vêl lovah leh khuaahte kalin, an ei tûr eng emaw tal an lei theih nân kaltîr ta che,” an ti a. 37 Ani erawh chuan an hnênah, “Nangmahnin ei tûr pe rawh u,” tiin a chhâng a. Tin, anni chuan a hnênah, “Chhang duli zahnih man va leiin ei tûr kan pe em ni ang?” an ti a. 38 Tin, ani chuan an hnênah, “Chhângpêr eng zât nge in neih, han en teh u,” a ti a. Tin, an neih chin an hriat veleh, “Panga, sangha pahnih nên,” an ti a. 39 Tin, ani chuan an vaiin hlobet hring chungah chuan, a pâwl zêla ṭhuttîr tûrin an hnênah thu a pe a. 40 Tin, a tlarin za te, sawmnga te zêlin an ṭhu ta hlawm a. 41 Tin, ani chuan chhangpêr panga leh sangha pahnih chu a la a, vân lam enin mal a sâwm a, chhangpêrte chu a phel a, an hmaa hlui tûrin a zirtîrte hnênah chuan a pe a; sangha pahnih pawh chu mi zawng zawng zîngah a sem bawk a. 42 Tin, an vaiin an ei a, an puar ta hlawm a. 43 Tin, chhang nawi leh sangha nawite chu bâwmrâng sâwm leh pahnih an rût khat a. 44 Chhangpêr eitute chu patling hlîr pawh sângnga an ni.
Tui chunga kal
45 Tin, amah ngeiin mipui chu a ṭîntîr vêl chhûngin, râl lehlama Bethsaida khuaa lo kal hmasa tûrin a zirtîrte chu lawngah a chuan luihtîr ta nghâl a. 46 Tin, anni chu a ṭîntîr hnu chuan ṭawngṭai tûrin tlângah chuan a kal ta a. 47 Tin, khua a lo tlai lamin, lawng chu dîl lai takah chuan a lo awm a, ani chu amah chauhvin khawmualah chuan a awm a. 48 Tin, an lawng karah chuan an mangangin a hmu a (thliin a ni lo lamah a nem si a) khawfîngchah dâwn lai vêlin dîl chungah kea kalin an lam a rawn pan a; anmahni kal pelh a tum a. 49 Nimahsela, anni chuan amah chu dîl chunga kea a kal an han hmuh chuan hmuithla emaw an ti a, an au ta vak mai a, 50 an vaiin amah an hmu a, an thlaphâng hle a. Nimahsela, ani chuan anmahni a be ta nghâl a, an hnênah, “Thlamuang takin awm rawh u; keimah ka ni alâwm, hlau suh u,” a ti a. 51 Tin, lawngah chuan an hnênah a chuang chho ve ta a, thli chu a bâng ta mai a. Tin, mak chu an ti rilru hle a; 52 chhang thu chu a ngaihna an hrethiam si lo va, an thinlung a sak si a.
Gennesaret rama damlo tihdam
53 Tin, râl lehlam an kai chuan Gennesaret ram khawmual an thleng a, vaukamah chuan lawng chu an thlung a. 54 Tin, lawng ata an chhuah hnu chuan miten ani chu an lo hre ta nghâl a, 55 chumi ram vêl zawng zawngah chuan an tlân ta sup sup a, a awm tih an hriatna apiangah, damlote an âwngphaha mu chungin an zâwn vêl ta ruai a. 56 Tin, khaw têah te, khaw lianah te, lovah te, khawiah pawh a luhna apiangah damlote chu dâwr hmunahte an muttîr hlawm a, a puan hmâwr tal deh theih an dîl chiam a; tin, amah dek apiang chu an dam ta zêl a.
Upate thurochhiah
1 Tin, Pharisaite leh lehkhaziaktute zînga mi tute emaw, Jerusalem khua aṭanga lo kalte chu a hnênah an rawn inkhâwm a. 2 Chûnghote chuan a zirtîr ṭhenkhatte kut bawlhhlawha chhang an ei an lo hmu tawh a (“Bawlhhlawh” tih hi “sil loh” tihna a ni.) 3 (Pharisaite leh Juda-ho zawng zawng chuan upate thurochhiah chu an pawm tlat avângin, an kut ngun taka an sil loh chuan an ei ngai si lo va. 4 Tin, dâwr hmun aṭanga an hâwn pawhin an inbual loh chuan an ei ngai lo. Tin, thu dang tam tak pawm tlat tûra an dawn chhâwnte chu a awm, no te, bêl te, dâr bêl te sil angte hi.) 5 Chutichuan, Pharisaite leh lehkhaziaktute chuan, “Engati nge i zirtîrten, upa thurochhiah ang zêla awm lova, kut bawlhhlawhin chhang an ei ṭhin ni?” tiin an zâwt a. 6 Tin, ani chuan an hnênah, “Isaia hian nangni mi vervêkte thu hi a lo hril lâwk dik zet mai, ‘He miteho hian an kâin mi chawimawi a, An thinlung erawh chuan mi hlat si a. 7 Eng pawh ni sela, an zirtîrnaa mihring thupêkte an zirtîr avângin, An mi biak ṭhin hi a thlâwn mai a ni,’ tih ziak ang hian. 8 Pathian thupêkte chu thlahthlamin mihring thurochhiah chu in vuan tlat a nih hi,” a ti a. 9 Tin, amah vêkin an hnênah, “Nangmahni thurochhiahte chu in pawm theihna tûrin Pathian thupêkte in duh lo hi rem in hre zet mai e! 10 Mosian, ‘I nu leh i pa chawimawi rawh,’ ‘Tu pawh a nu emaw, a pa emaw sawichhia apiang chu thi mawlh rawh se,’ a ti si a. 11 Nangni erawh chuan heti hian in ti ṭhîn, ‘Miin a nu emaw, a pa emaw hnênah, “I mi chhawrna tûr hi Korban a ni tawh,” a tih chuan (chu chu “Pathian hnêna pêk” tihna a ni a), 12 a nu tân emaw, a pa tân emaw eng mah tihsak in phal tawh ṭhîn lo; 13 mi hnêna in thurochhiah pêk chhâwn hian Pathian thu hi in bawh bo ṭhîn a ni; chutiang thil chu tam tak in ti ṭhîn,’ ” a ti a.
Mihring tibawlhhlawhtu
14 Tin, mipuite chu a ko leh a, an hnênah, “In zain ka thu hi ngaithla ṭheuh ula, lo ngai thiam rawh u; 15 mihring pâwn lam ata a kawchhûnga lûta amah tibawlhhlawh thei eng mah a awm lo; mihring kawchhûng ata lo chhuakte chu mihring tibawlhhlawhtu a ni zâwk e,” a ti a. 17 Tin, mipuihote chu ina a luhsan hnuin, a zirtîrte chuan tehkhin thu chu amah an zâwt fiah ta a. 18,19 Tin, ani chuan an hnênah, “Nangni pawh chuti êma hriatna nei lo in ni maw? Eng pawh pâwn lam ata mihring kawchhûnga lût apiang, a thinlung chhûnga lût lovin, a pum chhûnga lûta dailênnaa a chhuah zâwk avângin, amah chu a tibawlhhlawh thei lo tih in hre lâwm ni?” a ti a. (Chu chu ei tûr tinrêng ei a thiang a tihna a ni.) 20 Tin, amah vêkin, “Mihring kawchhûng ata lo chhuak chuan, chu ngei chuan mihring a tibawlhhlawh ṭhîn a ni. 21 Kawchhûnga mi, mihring thinlung aṭangte chuan ngaihtuahna sualte a lo chhuak si ṭhîn: inngaihna te, rûkrûkna te, tualthahna te, 22 uirêna te, awhna te, sualna te, bumna te, hurna te, îtsîkna te, sawichhiatna te, chapona te, âtna te hi; 23 chûng thil sual zawng zawng chu kawchhûng aṭangin a lo chhuak a, mihring chu a tibawlhhlawh ṭhîn,” a ti a.
Grik nu pakhat rinna
24 Tin, a tho va, chuta ṭang chuan Tura leh Sidon bialah a kal ta a; tin, inah a lût a, tu ma hriat a duh lo va; nimahsela, a inthup thei si lo. 25 Chutichuan, hmeichhe pakhat, fanu naupang tê, ramhuai bawlhhlawh pai nei chuan a chanchin a lo hria a, a ke bulah a va bawkkhup ta nghâl a. 26 Hmeichhia chu Grik mi a ni a, pianna lamah chuan Suro-Phoiniki mi a ni a. Ani chuan a fanu kawchhûng ata ramhuai hnawt chhuak tûrin a ngên a. 27 Tin, ani chuan a hnênah, “Fate chu lo puar hmasa rawh se; fate chhang lâksaka uite hnêna paih chu a mawi lo ve,” a ti a. 28 Ani chuan a hnênah, “Lalpa, nih zawng a ni a; nimahsela, dawhkân hnuaia uite pawhin fate chhang nawite chu an ei ṭhîn alâwm,” tiin a chhâng a. 29 Tin, ani chuan a hnênah, “I thusawi avâng chuan kal tawh le; ramhuai chu i fanu kawchhûng ata a chhuak tawh e,” a ti a. 30 Tin, a inah chuan a va hâwng a, a fa chu ramhuaiin lo chhuahsan tawh a, khuma mu a va hmu ta a.
Bengngawng ṭawngtheilo tihdam
31 Tin, Tura ram aṭangin a chhuak leh a, Sidon khua tlawhin Dekapoli ram kal tlang zêlin Galili dîl chu a thleng ta a. 32 Tin, mi pakhat, bengngawng, ṭawng pawh ṭawng fiah thei lo hi a hnênah an rawn hruai a, a chunga a kut nghat tûrin an ngên a. 33 Tin, ani chuan mipui zîng ata amah chauh chu a hruai hrang a, a kutzungṭangte chuan a beng kuate a khawih a; tin, chil a chhâk a, a lei a dehsak a; 34 tin, vân lam enin a thaw huai a, a hnênah, “Ephatha,” a ti a. (Chu chu “Lo inhawng rawh” tihna a ni.) 35 Tichuan, a bengte chu a lo inhawng a, a lei phuarna pawh chu a lo inphelh a, fiah takin a ṭawng thei ta a. 36 Tin, ani chuan an hnênah tu mah hrilh loh tûr a ti tlat a; nimahsela, a khap nasat poh leh an tlângaupui zual zâwk mah ṭhîn a. 37 “Ani chuan engkim ṭha takin a ti a; bengngawngte a tihvârsak a, ṭawngtheilote pawh a tiṭawng ṭhîn,” an ti a, mak an ti nasa êm êm a.
Mipui sângli hrai
1 Chûng niahte chuan mipui tam tak an lo awm leh a, ei tûr eng mah an neih loh lai chuan ani chuan a zirtîrte chu a ko va, an hnênah, 2 “Mipuiho hi tûnah ni thum ka hnênah an awm tawh a, ei tûr eng mah an neih loh avângin ka khawngaih êm êm a ni; 3 chaw ngheia an ina ka hâwntîr chuan kawng lakah an chau dâwn si a; ṭhenkhatte phei chu an lo kalna a hla hle si a,” a ti a. 4 Tin, a zirtîrte chuan, “Miin he thlalêrah hian khawia chhangin nge hêngho hi an tihtlai theih ang?” tiin amah an chhâng a. 5 Tin, ani chuan, “Chhangpêr eng zât nge in neih?” tiin anni chu a zâwt a. Tin, anni chuan, “Pêr sarih,” an ti a. 6 Tin, mipuiho chu leia ṭhu tûrin thu a pe a; tin, chhangpêr pasarih chu a la a, lâwmthu a sawi zawhin a phel a, an hmaa hlui tûrin a zirtîrte hnênah a pe a; tin, mipuihote hmaah chuan an hlui ta a. 7 Nghate tlêm tê an nei bawk a; tin, ani chuan mal a sâwmsak a, chûngte pawh chu an hmaa hlui tûrin thu a pe a. 8 Tichuan, an ei a, an puar ta hlawm a; an ei bâng nawi pawh chu bâwm sarih an rût khat a. 9 Anni chu sângli lai an ni a; tin, ani chuan anni chu a ṭîntîr ta a.
Pharisaiten chhinchhiahna an phût
10 Tin, ani chu a zirtîrte hnênah lawngah chuan a chuang ta nghâl a, Dalmanutha ram chu a thleng ta a. 11 Tin, Pharisaite an lo chhuak a, amah fiah nân a lakah vân ata chhinchhiahna zawngin ani chu an hnial ta a. 12 Tin, ani chu a rilruin nasa takin a rûm a, “Engati nge tûnlai chhuante hian chhinchhiahna an zawn? Tihtakmeuhvin ka hrilh a che u, tûnlai chhuante hnênah hian chhinchhiahna rêng rêng pêk a ni lo vang,” a ti a. 13 Tin, anni chu a kalsan a, lawngah chuan a chuang leh a, râl lehlamah a kal ta a.
Pharisaite leh Heroda dawidim
14 Tin, a zirtîrte chuan chhang an ken theihnghilh a, chhang tlang khat chauh lo chu lawngah chuan chhang dang rêng an nei si lo va. 15 Tin, ani chuan an hnênah, “Pharisaite dawidim leh Heroda dawidim lakah chuan invêng ula, fîmkhur rawh u,” a ti tlat a. 16 Tin, anni chuan, “Chhang kan nei hauh lo,” tiin an inngaihtuah a. 17 Tin, Isuan chu chu a lo hria a, an hnênah, “Engati nge chhang in neih loh avânga in inngaihtuah ni? Tûnah pawh in rilruin in la hre lo fo maw? A ngaihna pawh in la hre lo maw? In thinlung chu in tisak ta em ni? 18 Mit nei siin in hmu lo vem ni? Beng nei siin in hre lo vem ni? In hre reng lo vem ni? 19 Sângnga zînga chhangpêr panga ka phel lai khân a nawi kha bâwmrâng eng zât nge in ruh khah?” a ti a. Tin, anni chuan a hnênah, “Sâwm leh pahnih,” an ti a. 20 “Tin, sângli zînga pasarih ka phel lai khân, a nawi kha bâwm eng zât nge in ruh khah?” a ti a. Tin, anni chuan a hnênah, “Bâwm sarih,” an ti a. 21 Tin, ani chuan an hnênah, “Tûnah pawh a ngaihna in la hre lo fo maw?” a ti a.
Bethsaida-a mitdel tihdam
22 Tin, Bethsaida khua chu an lo thleng a. Tin, a hnênah mitdel an rawn hruai a, amah dek tûrin an ngên a. 23 Tin, ani chuan mitdel kut chu a chelh a, khua ata a kai chhuak a; tin, a mitah chil a chhâk a, a chunga a kut a nghah zawhin, “Khua i hmu thei em?” tiin a zâwt a. 24 Tin, a han dâk chhuak a, “Mihring ka hmu a, thing kal ang maiin ka hmu si,” a ti a. 25 Tin, a mitah chuan a kut a nghat leh a; tin, ani chuan a en reng a, a lo dam ta mai a, engkim fiah takin a hmu thei ta a. 26 Tin, Isua chuan, “Khuaah pawh hian lût suh ang che,” tiin a inah a hâwntîr ta a.
Isua nihna Peteran a sawi
27 Tin, Isua leh a zirtîrte chu an kal chhuak a, Philipa Kaisari khawperahte chuan an kal a; tin, kal pahin a zirtîrte hnênah, “Miten tu nge a ni mi tih?” tiin a zâwt a. 28 Tin, anni chuan, “ ‘Baptistu Johana a ni,’ an ti chia; mi dangin ‘Elija a ni,’ an ti chia; ṭhenkhat erawh chuan, ‘Zâwlnei tua emaw a ni,’ an ti che,” tiin an hrilh a. 29 Tin, ani chuan an hnênah, “A nih leh, nangnin tu nge a ni mi tih?” tiin a zâwt a. Petera chuan a hnênah, “Krista chu i ni,” tiin a chhâng a. 30 Tin, ani chuan a chanchin tu mah hrilh loh tûr a ti tlat a.
A tuar leh thih tûr Isuan a puang
31 Tin, Mihring Fapa chuan thil tam tak a tuar tûr te, upate, puithiam lalte, lehkhaziaktute duh lohva a awm tûr te, tihhluma a awm tûr te, ni thum china a thawhleh tûr te chu anmahni a zirtîr ṭan ta a. 32 Chûng thu chu chiang takin a sawi a ni. Tin, Petera chuan ani chu a hruai hrang a, a zilh ta a. 33 Ani erawh chu a lehhawi a, a zirtîrte chu a en a, “Setan, ka hnungah kal rawh, Pathian thilte ngaihtuah lovin mihring thilte i ngaihtuah zâwk a nih hi,” tiin Petera chu a zilh ta a. 34 Tin, mipuiho chu a zirtîrte nên a ko va, an hnênah, “Tu pawhin mi zui a duh chuan, mahni hrehawm pawisa lovin, a kraws puin mi zui rawh se. 35 Tu pawh a nun humhim duh apiangin a chân ang a; tu pawh keimah avâng leh Chanchin Ṭha avânga a nun chân apiangin a humhim ang. 36 Miin khawvêl hi a pumin nei sela, a nun chân si sela, a tân eng nge sâwt ang? 37 Miin a nun aiah eng nge a pêk theih ang? 38 Tu pawh tûnlai chhuan uire leh thil tihsual hmangte zînga keimah leh ka thu zahpui apiang, Mihring Fapa hian, vântirhkoh thianghlimte nêna a Pa ropuinaa inthuama a lo kal hunah chuan, chu mi chu a rawn zahpui ve thung ang,” a ti a.
1 Tin, amah vêkin an hnênah, “Tihtakmeuhvin ka ti a che u, heta dingho a ṭhente hi, Pathian ram, thiltihtheihna nêna lo thleng an hmuh hma loh chuan thihna tem tawp lo tûr an awm,” a ti a.
Hmêl danglam
2 Tin, ni ruk achinah chuan Isuan Petera te, Jakoba te, Johana te chu a hruai a, a hrangin tlâng sâng takah anmahni chauh a kal chhohpui a; an hmaah chuan a hmêl awmzia chu a lo danglam ta a. 3 Tichuan, a silhfênte chu leia puan sutu rêng rêngin an sûk vâr theih loh khawp hiala vâr hlakin a lo tle ta sur a. 4 Tin, Elija leh Mosia chu an hnênah an rawn inlâr a, Isua nên an inbe ho va. 5 Tin, Petera chuan Isua a bia a, “Rabbi, kan tân heta awm hi a ṭha e; bâwktê pathum kan khawh ang e, i tân pakhat, Mosia tân pakhat, Elija tân pakhat,” a ti a. 6 (An hlauh êm avângin sawi tûr ahleih pawh an hre si lo va.) 7 Tin, anmahni hliahin chhûm a lo zîng ta a; tin, chhûmah chuan aw a lo chhuak a, “Hei hi ka Fapa duh tak a ni, ama thu ngai rawh u,” a ti a. 8 Tin, an han en vêl thuai a, anmahni hnêna Isua chauh lo chu tu mah an hmu ta lo va. 9 Tin, tlâng ata chu an chhuk laiin, Mihring Fapa mitthi zîng ata a thawhleh hnuah chauh lo chuan, an thil hmuhte chu tu mah hrilh loh tûr a ti tlat a. 10 Tichuan, chu thu chu an vawng reng a, “Mitthi zîng ata thawhleh chu eng tihna nge ni ang?” tiin an inzâwt ṭhîn a. 11 Tin, annin a hnênah, “Engtiziaa lehkhaziaktuten, ‘Elija a lo kal hmasa tûr a ni,’ ti nge an nih?” tiin an zâwt a. 12 Tin, ani chuan an hnênah, “Elija chu a lo kal hmasa dâwn rêng a, engkim a siam ṭha dâwn a ni; thil tam tak tuarin mi hmuhsitin a awm tûr a ni tih, Mihring Fapa chanchin engtiziaa ziak nge an nih? 13 Nimahsela, ka hrilh a che u, Elija chu a lo kal tawh reng a ni; tin, a chanchin an ziak ang ngei khân, a chungah an duh duhin an ti tawh rêng bawk a,” a ti a.
Ramhuai pai naupang tihdam
14 Tin, zirtîrte hnên a zuk thlenin, an vêla mipui tam tak leh lehkhaziaktuten an lo hnial lai a zuk hmu a. 15 Tin, mipui zawng zawng chuan amah an hmuh veleh chuan mak an ti hle a, a hnênah an tlân nghâl a, chibai an va bûk hlawm a. 16 Tin, ani chuan an hnênah, “Anniho nên hian eng thu-ah nge in inhnial?” tiin a zâwt a. 17 Tin, mipui zînga mi pakhatin a hnênah, “Zirtîrtu, ka fapa, ramhuai ṭawngtheilo pai chu i hnênah ka rawn hruai a; 18 a manna apiangah a titlu vak ṭhîn a; tichuan, a chilphuante a tla a, a hate a ṭhial a, a chêr telh telh ṭhîn a; tichuan, i zirtîrte hi hnawt chhuak tûrin ka ti a, an thei si lo va,” tiin a chhâng a. 19 Tin, ani chuan an hnênah, “Chhuan rinna nei lote u, eng chen nge in hnêna ka awm anga, eng chen nge ka ngaihtheih ang che u? Amah chu ka hnênah rawn hruai rawh u,” tiin a chhâng a. 20 Tin, amah chu Isua hnênah an rawn hruai a; tin, ramhuai chuan ani chu a hmuh veleh naupang chu nasa takin a sawisa ta nghâl a; tichuan, leiah a tlu a, chilphuan tla zawih zawihin a tâl ta âwrh âwrh a. 21 Tin, ani chuan a pa hnênah, “Hetianga a lo awm ṭanna hi eng chen nge ni tawh?” tiin a zâwt a. Ani chuan, “A naupan lai ata tawh a ni; 22 tichuan, amah tiboral tûrin vawi tam tak meiah te, tuiah te pawh a nam thlu tawh a; nimahsela, nangin eng emaw ti tala i tih theih chuan mi khawngaih la, mi pui ang che,” a ti a. 23 Tin, Isuan a hnênah, “I theih chuan â maw! Ringtu tân chuan engkim tih theih a ni asin,” a ti a. 24 Tichuan, naupang pa chuan, “Ka ring e, ka rinhlelhnaah hian mi pui ang che,” tiin a au chhuak ta nghâl a. 25 Tin, Isuan mipui lo tlân khâwm mêk a hmuhin ramhuai bawlhhlawh chu a hau va, a hnênah, “Nang ramhuai ṭawngtheilo leh bengngawng, thu ka pe a che, a chhûng ata lo chhuak la, lût leh tawh suh,” a ti a. 26 Tichuan, a au chhuak a, nasa taka a sawisak zawhin a lo chhuak ta a; tin, naupang chu thi ang maiin a lo awm ta a; chutichuan, mi tam zâwk chuan, “A thi a ni,” an ti a. 27 Isua erawh chuan a kut a chelh a, a kaitho va; tin, a lo tho ta mai a. 28 Tin, Isua chu ina a va luh chuan a zirtîrten, “Engati nge keinin kan hnawh chhuah theih loh le?” tiin fianrialah an zâwt a. 29 Tin, ani chuan an hnênah, “Hetiang hi ṭawngṭai chauh lo chuan engtin mah a chhuak thei lo,” a ti a.
A thih tûr thu Isuan a sawi nawn
30 Tin, chuta ta chu an kal chhuak a, Galili ram chu an kal tlang a, tu ma hriat a duh lo va. 31 A zirtîrte hnênah, “Mihring Fapa hi mihringte kuta mantîrin a awm tûr a ni a, an tihlum bawk ang a; tin, an tihhlum hnu ni thum achinah a tholeh ang,” tiin a lo sawi tawh si a. 32 Nimahsela, a thusawi chu a ngaihna an hre lo va, amah lah chu an zâwt ngam si lo va.
Tu nge ropui ber
33 Tin, Kapernaum khua chu an lo thleng a; tin, in chhûngah chuan an awm laiin an hnênah, “Kawngah khân eng thu-ah nge in inhnial le?” tiin a zâwt a. 34 Nimahsela, kawngah chuan, “Kan zîngah tu nge ropui ber ang?” tia an lo inhnial tawh avângin an ngawi ta reng a. 35 Tin, ani chu a ṭhu a, sâwm leh pahnihte chu a ko va, an hnênah, “Tu pawhin hmasa ber nih a duh chuan, mi zawng zawng aia hnuhnûng berah a awm tûr a ni a, mi zawng zawng rawngbâwltuah a awm bawk tûr a ni,” a ti a. 36 Tin, naupang tê a kai a, an zîngah a dintîr a; tin, a kuangkuah a, an hnênah, 37 “Tu pawh ka hming avânga hetiang naupang tê pakhat pawh lâwm apiang chu, keimah mi lâwm an ni ang; tu pawh kei mi lâwm apiang chu, kei mi lâwm an ni lo vang a, mi tîrtu lâwm an ni zâwk ang,” a ti a.
Mi dodâl lo chu ka lama ṭang a ni
38 Johana chuan a hnênah, “Zirtîrtu, tu emaw i hminga ramhuaite hnawt chhuak kan hmu a; min zui ve loh avângin kan khap ta asin le,” a ti a. 39 Isua erawh chuan, “Khap tawh suh u; tu mah ka hminga thil mak ti sia mi sawichhe nghâl thei an awm lo a ni. 40 Tu pawh min dodâl lo chu kan lama ṭang an ni si a. 41 Tu pawh Krista mi in nih avânga tui no khat in tûr pe apiang che u chu, tihtakmeuhvin ka hrilh a che u, a lâwmman tûr chu a chân tawp lo vang.
Sual ti tûra thlêmna
42 “Tin, tu pawh hêng mi ringtu mi tête zînga pakhat pawh titlu apiang chu, an nghâwngah buh râwt sawmna lung lian pui awrhtîrin tuifinriatah thlâk sela, an tân a ṭha zâwk tûr a ni. 43 Tin, i kutin a tihtlûk che chuan tan mai rawh; kut pahnih neia Gehenna-a mei mit thei lova kal ai chuan, piangsuala nunnaa luh i tân a ṭha zâwk e. 45 Tin, i kein a tihtlûk che chuan tan mai rawh; ke pahnih neia Gehenna-a paih ai chuan, kebaia nunnaa luh i tân a ṭha zâwk e. 47,48 Tin, i mitin a tihtlûk che chuan kher chhuak mai rawh; mit khing hnih neia Gehenna, an lung thih ngai lohna leh mei mih ngai lohnaa paih ai chuan, mit khing khat neia Pathian rama luh i tân a ṭha zâwk e. 49 Mi tin meia alin an awm dâwn si a. 50 Chi hi a ṭha e; nimahsela, chi pawh hi a dâk tawh chuan engin nge an tihal leh ang? Nangmahni ngeiah chi nei ula, inngeih rawh u,” a ti a.
Inmâk chungchâng zirtîrna
1 Tin, a tho va, chuta ṭang chuan Judai ramah leh Jordan râlah a kal ta a; tin, mipuihote chu a hnênah an rawn inkhâwm leh a; tichuan, a tih dân pângngaiin a lo zirtîr leh a. 2 Tin, Pharisai ṭhenkhat a hnênah an lo kal a, amah fiah nân, “Miin nupui mâk a thiang em?” tiin an zâwt a. 3 Tin, ani chuan an hnênah, “Mosian engtin nge thu a pêk che u?” tiin a chhâng a. 4 Tin, anni chuan, “Mosia chuan inmâkna lehkha ziakin mâk a phal ṭhîn a ni,” an ti a. 5 Nimahsela, Isuan an hnênah, “In thinlung khauh avângin asin chu thupêk chu a ziaksak che u ni. 6 Nimahsela, leilung pian tirh aṭang chuan, ‘Anni chu hmeichhia leh mipaah a siam a ni.’ 7 Chumi avâng chuan, ‘Mipain a nu leh a pa a kalsan ang a, a nupui a vuan ang; 8 tichuan, an pahnih chuan tisa pumkhat an lo ni tawh ang;’ chutichuan, pahnih an ni tawh lo va, tisa pumkhat an ni tawh zâwk a ni. 9 Chutichuan, Pathianin a zawm tawh chu mihringin ṭhen suh se,” a ti a. 10 Tin, inah chuan a zirtîrte chuan chûng thu chu amah an zâwt leh a. 11 Tin, ani chuan an hnênah, “Tu pawh a nupui maa mi dang nei apiang chuan a nupui chu a uiresan a ni; 12 ani pawh chuan a pasal a ṭhen a, mi dang a neih chuan a uire a ni bawk,” a ti a.
Isuan naupang tête mal a sâwm
13 Tin, a deh atân a hnênah naupang tête an rawn hruai a; tin, zirtîrte chuan an lo hau va. 14 Nimahsela, Isuan chu chu a hmuhin a lungni lo êm êm a, zirtîrteho hnênah chuan, “Naupang tête ka hnênah han kaltîr ula, hnar suh u; Pathian ram chu hetiang mite ta a ni si a. 15 Tihtakmeuhvin ka hrilh a che u, tu pawh Pathian ram chu naupang têin a lawm anga lâwm lo apiang, a chhûngah an lût tawp lo vang,” a ti a. 16 Tin, anmahni chu a kuangkuah a, an chungah a kut nghatin mal a sâwmsak ta a.
Chatuan nun zawng mi hausa
17 Tin, kal tûra a chhuah laiin mi pakhat a lamah a lo tlân a, a hmaah a ṭhingthi a, a hnênah, “Zirtîrtu ṭha, chatuana nunna ka chan theih nân engtin nge ka tih ang?” tiin a zâwt a. 18 Tin, Isuan a hnênah, “Engati nge ṭha mi tih? Mi pakhat chauh lo chu tu mah ṭha an awm lo, chu chu Pathian a ni. 19 Thupêkte chu i hria alâwm ‘Tualthat suh,’ ‘Uire suh,’ ‘Ru suh,’ ‘Dâwtin hêk suh,’ ‘Bum suh,’ ‘I nu leh i pa chawimawi rawh,’ tihte hi,” a ti a. 20 Tin, ani chuan a hnênah, “Zirtîrtu, chûng thu zawng zawng chu ka naupan têt ata ka zâwm ṭhîn,” a ti a. 21 Tin, Isuan amah chu a en a, a hmangaih ta a, a hnênah, “Kawng khat i la bâk e; kal la, i neih apiang hralh la, pachhiate hnênah pe rawh; chutichuan, vânah ro i nei ang; tin, lo kal la, mi zui ang che,” a ti a. 22 Amaherawhchu, chûng thu chungah chuan a hmêl a lo dur ta khup a, lungngai takin a kal bo ta a; sum tam tak nei a nih avângin. 23 Tin, Isuan a en vêl a, a zirtîrte hnênah chuan, “Sum ngahte chu Pathian rama luh a va harsa dâwn êm!” a ti a. 24 Tin, a zirtîrte chuan a thusawi chu mak an ti hle a. Isua erawh chuan a chhâng leh a, an hnênah, “Naute u, sum ringte tân Pathian rama luh a va harsa ṭhîn êm! 25 Mi hausa Pathian rama luh aiin, sanghâwngsei hriau benga luh tlang a awl zâwk,” a ti a. 26 Tin, anni chuan mak an ti nasa êm êm a, a hnênah, “A nih leh, tu nge chhandam ni thei ang le?” an ti a. 27 Isuan anni chu a en a, “Chu chu mihring tân tih rual a ni lo va, Pathian tân erawh chuan tih rual loh a ni lo; Pathian nên engkim tih theih a ni si a,” a ti a. 28 Peteran a hnênah, “Ngai teh, keinin engkim kalsanin kan zui ta chia,” tiin a han sawi ṭan a. 29 Isua chuan, “Tihtakmeuhvin ka hrilh a che u, tu pawh keimah avâng leh Chanchin Ṭha avânga in emaw, unaupate emaw, farnute emaw, nu emaw, pa emaw, fate emaw, ramte emaw kalsan tawh phawt chu, 30 tûn dam chhûng la la hian inte, unaupate, farnute, nute, fate, ramte a leh zain, tihduhdahnate nên hmu lo tûr tu mah an awm lo; hun lo la thleng tûra chatuana nunna nên. 31 Nimahsela, mi tam tak hmasa bera awmte chu hnuhnûng berah an la awm ang a, hnuhnûng berte pawh hmasa berah an la awm ang,” a ti a.
A thih tûr thu a sawi vawi thumna
32 Tin, Jerusalem khuaa chho tûrin kawngah an awm a, Isua chuan an hma a hruai a; anni chuan mak an ti hle a; a rawn zuitute chuan an hlau va. Tin, ani chuan sâwm leh pahnihte chu a hruai hrang leh a, 33 “Ngai teh u, Jerusalem khuaah kan chhoh dâwn hi; Mihring Fapa hi puithiam lalte leh lehkhaziaktute hnênah mantîrin a awm dâwn a ni; tin, anni chuan thi tûrin a chungah thu an titlu ang a, Jentailte hnênah an pe ang. 34 Tin, anni chuan nuihza siam nân an hmang ang a, chil an chhâk ang a, an vua ang a, an tihlum ang; tin, ni thum chinah a tholeh ang,” tiin, a chunga thil lo thleng tûrte chu an hnênah a hrilh ta a.
Jakoba leh Johana thil dîl
35 Tin, Zebedaia fapa Jakoba leh Johana chuan ani chu an rawn hnaih a, a hnênah, “Zirtîrtu, i hnêna kan dîl tûr apiang che chu i mi tihsak kan duh e,” an ti a. 36 Tin, ani chuan an hnênah, “In tân eng nge tihsak che u ila in duh le?” a ti a. 37 Tin, anni chuan a hnênah, “I ropuinaah chuan, i ding lamah pakhat, i vei lamah pakhat min ṭhuttîr ang che,” an ti a. 38 Isua erawh chuan an hnênah, “In dîl chu in hre lo a ni. Ka no in tûr chu in in thei em ni? Ka baptisma chan tûr pawh in chang thei em ni?” a ti a. 39 Tin, anni chuan a hnênah, “Thei e,” an ti a. Tin, Isuan an hnênah, “Ka no in tûr chu in in ang a, ka baptisma chan tûr pawh chu in chang ve ang; 40 nimahsela, ka ding lamah emaw, ka vei lamah emawa ṭhut tûr thu chu keia pêk tûr a ni lo va, an buatsaihsakate tân a ni zâwk ang,” a ti a. 41 Tin, sâwmte chuan chu chu an lo hriatin Jakoba leh Johana chungah chuan an lungni ta lo êm êm a. 42 Isua erawh chuan anniho chu a ko va, an hnênah, “Jentailte chunga rorêltua an ruatte chu an chungah an lal êm êm ṭhîn a, an mi liante chuan an chungah thu an nei êm êm bawk ṭhîn tih in hria. 43 Nimahsela, nangni zîngah zawng chutiang a ni lo vang; tu pawh in zînga mi lian nih duh apiang chu in rawngbâwltuah a awm zâwk tûr a ni. 44 Tu pawh in zînga hmasa ber nih duh apiang chu mi zawng zawng chhiahhlawhah a awm bawk tûr a ni. 45 Mihring Fapa meuh pawh rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe zâwk tûrin a lo kal a ni si,” a ti a.
Mitdel Bartimaia tihdam
46 Tin, Jeriko khua an lo thleng a; tin, Isua chu Jeriko aṭang chuan a zirtîrte leh mipui tam tak nên a chhuah laiin, kutdawh mitdel, Timaia fapa Bartimaia chu kawng sîrah a lo ṭhu a. 47 Tin, Nazareth Isua a ni tih a hriat veleh, “Isu, Davida Fapa, mi khawngaih rawh,” tiin a au ta a. 48 Tin, mi tam takin ngawi tûrin an hau va; nimahsela, ani chu, “Davida Fapa, mi khawngaih rawh,” tiin a au zual sauh va. 49 Tin, Isua chu a ding a, “Amah chu han ko teh u,” a ti a. Tin, mitdel chu an ko va, a hnênah chuan, “Thlamuang takin awm la, tho rawh; a ko va che,” an ti a. 50 Tin, ani chuan a puan a paih a, a zuang tho va, Isua hnênah chuan a kal ta a. 51 Tin, Isuan amah chu a lo bia a, “I chungah engtia ka tih nge i duh?” a ti a. Tin, mitdel chuan a hnênah, “Rabboni, hmuh theih ka duh,” a ti a. 52 Tin, Isuan a hnênah, “Kal tawh rawh, i rinna hi i dampui a ni e,” a ti a. Tichuan, a hmu thei ta nghâl a, kalkawngah chuan Isua a zui ta a.
Ropui taka Jerusalem luh thu
1 Tin, Jerusalem khua an thlen dâwna, Olive tlânga Bethphage leh Bethani khaw kiang an thlenin, a zirtîrte zînga mi pahnih a tîr a, 2 an hnênah, “In hma zâwn khuaah sâwn va kal ta ula; tin, in luh tirhin sabengtungno thlun, tu ma la chuan ngai lohna in va hmu mai ang; chu chu phelh ula, han kai rawh u. 3 Tin, tu pawhin, ‘Kha kha engah nge in tih?’ an tih che u chuan, ‘Lalpa in a duh a ni; hetah a rawn dahtîr leh thuai ang e,’ ti ang che u,” a ti a. 4 Tin, an kal ta a, kawtthlêrah kawngkhâr pâwn lama sabengtungno thlun an va hmu a; tin, chu chu an phelh ta a. 5 Tin, chuta ding tute emaw chuan an hnênah, “Sabengtungno kha engah nge in phelh?” an ti a. 6 Tin, anni chuan Isua sawi ang tak khân an hnênah an sawi a; tichuan, an kal an phal ta a. 7 Tin, sabengtungno chu Isua hnênah an rawn kai a, a chungah chuan an puante an phah a; tichuan, a chungah a chuang ta a. 8 Tin, mi tam takin kalkawngah chuan an puan an phah a; mi dangin lova mi chhâwl sâtin an phah bawk a. 9 Tin, a hma lama kalte leh a hnung lama rawn zuite chuan, “Hosanna! Lalpa hminga lo kal chu fakin awm rawh se, 10 Ram lo thleng tûr, kan pa Davida ram chu chawimawiin awm rawh se. Chungnung berah khian Hosanna!” tiin an au va. 11 Tin, Jerusalem khuaa Pathian biak inah chuan a va lût a; tin, engkim a en vêl zawh chuan tlai lam a lo ni ta a, a chhuak a, sâwm leh pahnihte nên Bethani-ah an kal ta a.
Theipui hau hlum
12 Tin, a tûkah chuan Bethani aṭanga a chhuah hnuin a ril a lo ṭâm ta a. 13 Tin, theipui kûng hnah nei hla takah a han hmu a, “A rah ka hmu dah law maw,” tiin a va kal a; tin, a va thlen chuan a hnah chauh lo chu eng mah a hmu lo va, theipui rah hun a ni lo rêng a. 14 Tichuan, Isuan thing chu a bia a, “Tûn achinah kumkhuain i lakah tu mân rah ei tawh suh se,” a ti a. A zirtîrte chuan chu chu an hria a.
Isuan Tempul a tlawh
15 Tin, Jerusalem khua chu an thleng a, Pathian biak inah chuan a va lût a, biak ina englo zuartute leh leitute chu a hnawt chhuak ta a, tangka thlengtuho dawhkânte leh ṭhuro zuarho ṭhutphahte pawh chu a nam thlûksak bawk a; 16 tin, Pathian biak inah chuan tu mahin bungrua an ken tlang a phal ta lo bawk a. 17 Tin, an hnênah chuan, “ ‘Ka in chu hnam tin tân ṭawngṭaina in an ti ang,’ tih ziak a ni lo vem ni? Nangni erawh chuan suam hmangte pûkah in siam zâwk hi,” tiin a zirtîr ta a. 18 Tin, puithiam lalte leh lehkhaziaktute chuan chu chu an hria a, amah an hlauh avângin a tihboralna tûrzia an zawng a; mipui zawng zawng chuan a zirtîrna chu mak an ti hle si a. 19 Tin, tlai lam apiangah khawpui ata chu a kal chhuak ṭhîn a.
Theipui kûng a ro ta
20 Tin, zînga an kal pahin theipui kûng chu a zung thlenga thi zo vekin an hmu ta a. 21 Tichuan, Peteran a lo hre chhuak leh a, a hnênah chuan, “Rabbi, en teh, theipui kûng ânchhia i lawh kha a thi zo ta!” a ti a. 22 Tin, Isuan an hnênah, “Pathian ring rawh u. 23 Tihtakmeuhvin ka hrilh a che u, tu pawh he tlâng hnênah hian, ‘Lo insawn la, tuifinriatah lo inpaih rawh,’ tia, a rilrua ringhlel lova a sawi chu a lo thleng ngei ang tih ring apiangin an sawi ang apiang chu an hmu ang. 24 Chuvângin, ka ti a che u, engkim in ṭawngṭaia in dîl apiang chu hmu tawhah inngai ula; tichuan, in hmu ang. 25 Tin, ṭawngṭaia in din hun apiangin, tu chungah pawh thupawi eng emaw in neih chuan ngaidam rawh u; in Pa vâna mi pawhin in bawhchhiatnate chu a ngaihdam theihna tûr che uin,” a ti a, a chhâng a.
Isua thuneihna chungchâng
27 Tin, Jerusalem khua chu an thleng leh a; tin, Pathian biak ina a lên laiin puithiam lalho te, lehkhaziaktuho te, upaho te chu a hnênah an lo kal a, 28 a hnênah chuan, “Tu thuin nge hêng thil hi i tih? Hêng thil hi ti tûrin tuin nge thu pe che?” an ti a. 29 Tin, Isuan an hnênah, “Kei pawhin thu kam khat ka zâwt ve ang che u; mi chhâng ula; tichuan, tu thuin nge hêng thil hi ka tih ka hrilh ang che u. 30 Johana baptisma kha vâna mi thu nge, mihring thu? Mi chhâng rawh u,” a ti a. 31 Tin, an inngaihtuah a, “ ‘Vâna mi thu,’ kan tih chuan, ‘Engah nge a thu in awih loh le?’ min ti si ang a, 32 ‘Mihring thu,’ kan ti emaw chu ni ang?” an ti a. Nimahsela, mipui chu an hlau va; mi zawng zawngin Johana chu zâwlnei tak takah an ruat hlawm si a. 33 Tichuan, Isua an chhâng a, “Kan hre lo,” an ti a. Tin, Isuan an hnênah, “Kei pawhin tu thuin nge hêng thil hi ka tih ka hrilh bîk lo vang che u,” a ti a.
Grep huan thlawh hlawhtute tehkhin thu
1 Tin, tehkhin thuin an hnênah a sawi ta a: “Tuin emaw grêp huan a siam a, palin a hung vêl a, grêp sâwrna tûr khur a lai a, in sâng a sa a, lo enkawltute hnênah thlawh hlawh tûrin a pe a, ram dangah a kal ta a. 2 Tin, a lawh hun chuan huana rah chu a chan ai lo enkawltute hnên ata la tûrin lo enkawltute hnênah chuan bawih pakhat a tîr a. 3 Tin, chu mi chu an lo man a, an vêl a, kutruakin an kaltîr leh ta a. 4 Tin, bawih dang an hnênah a tîr leh a; chu pawh chu lungin an dêng a, a luah an lo tipem a, zahthlâk takin an lo sawisa a. 5 Tin, bawih dang a tîr leh pek a; chu mi chu an lo tihlum a. Bawih dang tam tak pawh - ṭhenkhat an vêl a, ṭhenkhat an lo tihlum a. 6 Tin, pakhat, fapa duh tak a la nei a; ‘Ka fapa hi chu an zah ang,’ tiin ani chu a hnuhnûng berah an hnênah a tîr a. 7 Nimahsela, chûng lo enkawltute chuan, ‘He mi hi ro luahtu tûr a ni; i that ang u khai! Tichuan, a ro luah tûr hi kan ta a ni mai ang,’ an ti a. 8 Tichuan, ani chu an lo man a, an tihlum a, grêp huan ata chu an theh chhuak ta a. 9 Chutichuan, huan neitupa chuan engtin nge a rawn tih ang? Lo enkawltute chu a rawn tiboral ang a, huan chu mi dangte a pe ang. 10 He Pathian Lehkha thu hi in chhiar lâwm ni? ‘In satute lung duh loh kha, Chu ngei chu a kila lung ṭangkai ber a lo ni ta. 11 Chu chu Lalpa tih a ni a, Kan mit hmuhah a mak a ni,’ tih hi,” a ti a. 12 Tin, amah chu man an tum ta a; nimahsela, mipui chu an hlau va; chu tehkhin thu chu anmahni demin a sawi tih an hre si a. Tichuan, amah chu an kalsan a, an kal bo ta a.
Chhiah pêk thu
13 Tin, a thusawia man tûrin Pharisaite leh Heroda pâwla mi tute emaw a hnênah an tîr a. 14 Tichuan, anni chu an lo thlen chuan a hnênah, “Zirtîrtu, mi dik tak i ni a, pawisak chuan tu mah i nei lo tih kan hria, tu mah thlei bîk lovin, tihtakzetin Pathian kawng thu i zirtîr ṭhîn a ni: Kaisara hnêna chhiah chawi hi a thiang nge thiang lo? 15 Kan pe ang nge pe lo vang?” an ti a. Ani erawh chuan an vêrvêkzia chu hriain, an hnênah, “Engah nge mi fiah? Duli mi han lâk ula, ka lo en ang e,” a ti a. 16 Tin, an rawn la a. Tin, ani chuan an hnênah, “Hei hi tu lem leh tu hming nge ni?” a ti a. Tin, anni chuan, “Kaisara,” an ti a. 17 Tin, Isuan an hnênah, “Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a. Tichuan, mak an ti nasa êm êm a.
Mitthi thawhleh thu
18 Tin, Suddukaiho, thawhlehna a awm lo tite chu a hnênah an lo kal a; a hnênah, 19 “Zirtîrtu, Mosian, ‘Tu pawh a unaupain fa nei lovin a nupui thihsan sela, a unaupa chuan a nupui chu a rochungin a unaupa tân chi a thlahsak tûr a ni,’ tiin min ziaksak a ni. 20 Aw le, sal sarih an awm a; a upa berin nupui a nei a, chi thlah lovin a thi a. 21 Tichuan, a pahnihna chuan a rochung a, chi thlah lovin a thi leh bawk a; a pathumna chuan chutiang bawkin. 22 Tichuan, sal sarihte chu chi rêng rêng thlah lovin an thi zêl a. A hnuhnûng berah hmeichhia pawh chu a thi ta a. 23 Thawhleh hunah chuan a tu bera nupui nge ni ang? An pasarih chuan nupuiah an nei ṭheuh si a,” tiin an zâwt a. 24 Isuan an hnênah, “Hemi avâng hian a ni lâwm ni in ngaih sual ṭhin, Pathian Lehkha Thu leh Pathian thiltihtheihna in hriat loh avâng hian? 25 Mitthi zîng ata an thawhlehin nupui pasal an innei dâwn tawh lo va, vâna vântirhkohte ang an ni dâwn tawh zâwk a ni. 26 Tin, mitthite kaihthawha an awm tûr thu chu, Mosia lehkhabua hnimbuk thu-ah khân, Pathianin, ‘Kei Abrahama Pathian, Isaaka Pathian, Jakoba Pathian ka ni,’ tia a biakzia kha in chhiar lo vem ni? 27 Ani chu mitthi Pathian a ni lo va, mi nung Pathian a ni zâwk; in ngai sual nasa hle a ni,” a ti a.
Thupêk ropui ber
28 Tin, lehkhaziaktute zînga mi pakhat a lo kal a, an inhnial chu a lo ngaithla a, Isuan anniho chu ṭha takin a chhâng tih a hria a, a hnênah, “Thupêk zawng zawngah eng hi nge ropui ber?” tiin a zâwt a. 29 Isuan, “A ropui ber chu hei hi a ni: ‘Israel-hote u, ngai teh u, Lalpa kan Pathian chu Lalpa pakhat chauh a ni a; 30 Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tûr a ni,’ tih hi. 31 A dawttu chu hei hi a ni: ‘Nangmah i inhmangaih angin i vêngte pawh i hmangaih tûr a ni,’ tih hi. Hêng aia thupêk ropui zâwk rêng rêng hi a awm lo,” tiin a chhâng a. 32 Tin, lehkhaziaktu chuan a hnênah, “A ni tak e, zirtîrtu, amah chu pakhat chauh a ni a, amah lo chu tu mah dang an awm lo va, 33 amah chu thinlung zawng zawnga, hriatna zawng zawnga, chakna zawng zawnga hmangaiha, mahni inhmangaih anga vêngte hmangaih hi pumhâl thilpêk leh inthawina zawng zawng aiin a ṭha zâwk êm êm tih hi i sawi dik zet mai,” a ti a. 34 Tin, fing takin a chhâng tih Isuan a hriatin, a hnênah chuan, “Pathian ram i hlat lo ve,” a ti a. Chumi chinah chuan tu mân thu rêng rêng an zâwt ngam ta lo va.
Messia chungchâng an zâwt fiah
35 Tin, Isuan Pathian biak inah chuan a zirtîr laiin anmahni a bia a, “Krista chu Davida fapa a ni tih lehkhaziaktuten engtiziaa sawi ṭhîn nge an nih? 36 Davida ngeiin, Thlarau Thianghlimin, Lalpa chuan ka Lalpa hnênah, ‘I hmêlmate i ke nghahchhana ka siam hma loh zawng Ka ding lamah ṭhu rawh,’ a ti, a ti a. 37 Davida ngei chuan ani chu ‘Lalpa’ a ti si a, khawiah nge a fapa a nih ang?” a ti a.
Lehkhaziaktute laka fîmkhur tûr
Tin, vântlângho chuan lâwm takin a thu an ngaithla a. 38 Tin, a zirtîrnaah chuan, “Lehkhaziaktute lakah fîmkhur rawh u; anni chuan kawrfual haa lên an duh ṭhîn a, dâwr hmunah chibai bûk te, 39 inkhâwmna inah ṭhutphah tha ber te, ruaiṭhehnaah hmun ṭha ber te an ngiat ṭhîn a; 40 hmeithai sum an ei a, tlâng bum nân rei tak an ṭawngṭai ṭhîn; chûngho chuan thiam loh an chang nasa lehzual ang,” a ti a.
Hmeithai rethei thawhlâwm
41 Tin, thawhlâwm bâwm zâwnah chuan a ṭhu a, thawhlâwm bâwma mipuiho tangka thlâk zia chu a en a; mi hausa tam takin tam tak tak an thlâk a. 42 Tin, hmeithai rethei tê a lo kal a, dâr tangka dere pahnih a thlâk a (chu chu pawisa pakhat hu a ni.) 43 Tin, Isua chuan a zirtîrte chu a ko va, an hnênah, “Tihtakmeuhvin ka hrilh a che u, thawhlâwm bâwma thlâktu zawng zawng ai hian he hmeithai rethei tê hian a thlâk tam zâwk. 44 Hêng zawng zawng hian an neih liama mi an thlâk a ni; ani erawh hi chuan a duh lai tak, a neih chhun tak, a intunnunna tûr zawng zawng chu a thlâk vek a ni,” a ti a.
Tempul chhiat tûr thu sawi lâwkna
1 Tin, Pathian biak in ata chu a kal chhuah laiin a zirtîrte zînga mi pakhatin a hnênah, “Zirtîrtu, en teh, a lung leh a inte hi a ropui teh a nia!” a ti a. 2 Tin, Isuan a hnênah, “Hêng in ropui tak hi i hmu maw? Tihchim lohva lung intiang rêng rêng hetah a awm lo vang,” a ti a.
Harsatna leh tihduhdahna
3 Tin, Olive tlânga Pathian biak in zâwna a ṭhut laiin Petera te, Jakoba te, Johana te, Andria te chuan a hnênah, 4 “Chûng chu eng tikah nge a lo awm ang? Chûng zawng zawng chu a thlen dâwn hunah chhinchhiahna eng nge awm ang, min hrilh rawh,” tiin an zâwt ru a. 5 Tin, Isuan an hnênah, “Tu mân an tihder loh nân che u fîmkhur rawh u. 6 Mi tam tak, ‘Krista chu ka ni,’ tiin keima hming chhâlin an lo kal ang a, mi tam tak an tihder ang. 7 Tin, indo thu leh indo thuthangte in hriat hunin mangang suh ang che u; chûng chu a lo thleng tûr rêng a ni; nimahsela, tâwpna chu a la ni rih lo vang. 8 Hnam hrang leh hnam hrang an indo vang a, ram hrang leh ram hrang an indo vang a; hmun hrang hrangah lîrte a nghîng ang a, ṭâmte a tla ang; chûng chu nau vei ṭan tirhna a ni. 9 “Nimahsela, fîmkhur rawh u; rorêltute an mantîr dâwn che u a; inkhâwmna inahte an vua ang che u a; keimah avângin hotute leh lalte hmaah anmahni hriattîrna tûrin in la ding bawk ang. 10 Tin, Chanchin Ṭha hi hnam zawng zawng hnêna hril hmasak tûr a ni. 11 Tin, an hruai che ua, an mantîr hunah che u chuan, ‘Eng nge ka sawi ang?’ tiin ngaihtuah lâwk suh u; a hun takah chuan a hriattîr che u apiang, chu ngei chu sawi zâwk rawh u; a sawitu chu nangni in ni dâwn si lo va, Thlarau Thianghlim a ni zâwk ang. 12 Tin, tihhlum tûrin unaupa leh unaupa an inmantîr ang a, pa pawhin a fa a mantîr bawk ang; fate pawhin an nu leh an pate an do vang a, an tihhlumtîr bawk ang. 13 Keima hming avângin mi zawng zawng huat in ni ang; nimahsela, a tâwp thlenga tuar peih apiang, chu mi ngei chu chhandamin a awm ang.
Râpthlâk eltiang
14 “Nimahsela, tiṭiautu tenawm chu a din lohna tûra ding in hmuh hunah (a chhiar apiangin a awmzia hre rawh se), chumi hunah chuan Judai rama awmte chu tlângahte tlân bo rawh se; 15 tin, in chunga awm chu chhuk suh se, a ina englo chuh tûrin lût hek suh se; 16 tin, lova awm chu a puan chuh tûrin kîr leh suh se. 17 Chûng ni chuan raite leh nauno pawmte chung chu a pik ang. 18 Tin, chûng chu thlasika a lo thlen loh nân ṭawngṭai rawh u. 19 Chûng ni chu hrehawmna ni a ni dâwn si a, chutianga nasa rêng rêng chu, Pathian siam leilung pian tirh ata tûn thlengin a la awm ngai lo va, eng tikah mah a awm leh tawh hek lo vang. 20 Tin, Lalpan chûng nite chu titawi suh sela, mihring rêng rêng damin an chhuak lo vang; nimahsela, mi thlan, a ruatate avâng chuan nite chu a titawi a ni. 21 “Tin, chutih hunah chuan tu pawhin in hnênah, ‘En teh u! Krista chu heta hi a awm,’ emaw, ‘En teh u, sawta saw!’ emaw an tih chuan awih suh ang che u; 22 Krista derte leh zâwlnei derte an lo chhuak dâwn si a, chûng chuan chhinchhiahna leh thil makte an ti ang, thei ang sela, thlante meuh pawh an tihder theih nân. 23 Nangni erawh chu fîmkhur rawh u, ngai teh u, engkim ka hrilh lâwk tawh che u hi.
Mihring Fapa lo kal tûr thu
24 “Nimahsela, chûng nia, chûng hrehawmna hnuah chuan, ni tihthimin a awm ang a, thla a êng tawh lo vang a, 25 vân aṭangin arsite a lo tla ang a, vâna thiltihtheihna awmte chu tihnghîn a ni ang. 26 Chutih hunah chuan Mihring Fapa hi, thiltihtheihna nasa tak leh ropuina nasa tak nên, chhûm zînga lo kal an hmu ang. 27 Chumi hunah chuan vântirhkohte chu a tîr chhuak ang a, a thlante chu kâwlkil li ata - lei tâwp aṭanga vân tâwp thlengin - a lâwr khâwm ang.
Theipui kûng aṭanga zir tûr
28 “Tichuan, theipui kûngah hian a tehkhin thu zir rawh u: a ṭang a lo nova, a hnah a lo chawr chuan nipui a thaw dâwn tih in hre ṭhîn; 29 chutiang bawkin nangni pawhin chûng chu a lo thleng in hmuh hun chuan, amah chu a lo hnai tawh a, kawngka bul ngeiah a awm tih hria ang che u. 30 Tihtakmeuhvin ka hrilh a che u, chûng zawng zawng chu a thlen hma loh zawng tûnlai chhuante hi an ral lo vang. 31 Lei leh vân a ral ang a, ka thu erawh chu a ral lo vang.
A hun leh dâr tu ma hriat loh
32 “Nimahsela, chumi ni leh a dâr thu chu Pa chauh lo chuan tu mân, vâna vântirhkohte pawhin, Fapa pawhin an hre lo. 33 “Fîmkhur ula, inring renga awmin ṭawngṭai rawh u; a hun chu in hre si lo va. 34 Mi, a in kalsana, a bawihte chu thuneihtîra, an hnathawh tûr pe ṭheuhva, kawngkhâr vêngtu pawh inrin tûr thu pe zeta, ram hla taka zin ta daih ang a ni. 35 Chutichuan, inring rengin awm rawh u; in neitupa lo haw hun tûr chu tlai lamah nge, zânah nge, ârkhuanah nge, zîngah nge a nih dâwn in hre si lo; 36 chuti lo chuan, a lo haw phutin, muhîlin a rawn hmu hlauh dah ang che u. 37 Tin, in hnêna ka sawi hi mi zawng zawng hnêna sawi ka ni. Inring rengin awm rawh u,” a ti ta a.
Isua an phiar
1 Tin, ni hnih chinah chuan kalhlên kût leh chhang dawidim telh loh kût a awm dâwn a; puithiam lalte leh lehkhaziaktute chuan amah chu ngamthlêma mana, an tihhlum theihna tûrzia an zawng an zawng a; 2 nimahsela, “Kût chhûng chuan ni suh se; chuti lo chuan, vântlâng zîngah buaina a lo awm hlauh dah ang e,” an ti a.
Bethani-ah Isua hriak thih
3 Tin, Bethani khuaa phâr Simona inah a awm laia chaw a kîl laiin, hmeichhe pakhat alabasta bâwma spiknard hriak rimtui to tak kengin a lo kal a, a bâwm chu a tikeh a, a luah a leih a. 4 Nimahsela, ṭhenkhat chu an thinur ta hlawm a, “Eng atân nge hriak rimtui hi a tihboral mai mai ni? 5 He hriak hi duli zathum aia tam zâwka hralha, mi retheite hnêna pêk theih a ni si a,” an ti a. Tichuan, a chungah chuan an phunnawi ta a. 6 Isua erawh chuan, “Eng mah tih suh u; engah nge in tihbuai ni? Ka chungah hian thil ṭha tak a ti a ni. 7 Mi retheite chu kumkhuaa in hnêna awm an ni a, in duh hun apiangah anni chu in khawngaih thei si a; kei erawh chu kumkhuaa in hnêna awm tûr ka ni lo. 8 A tih theih tâwk a ti a ni; ka taksa hi phûm tûrin a lo hnawih lâwk a nih hi. 9 Tichuan, tihtakmeuhvin ka hrilh a che u, khawvêl zawng zawngah, khawiah pawh Chanchin Ṭha an hrilna apiangah, he hmeichhe thiltih pawh hi amah hriat rengna tûrin an sawi ve zêl ang,” a ti a.
Judan Isua mantîr a remti
10 Tin, Juda Iskariota, sâwm leh pahnihte zînga mi pakhat khân, Isua chu an hnêna a mantîr theih nân puithiam lalte hnênah a va kal a. 11 Tin, anni chuan an hriat veleh an lâwm hle a, a hnênah tangka pêk an tiam ta a. Tichuan, a mantîrna tûrzia remchâng a zawng ta a.
Zirtîrte nên kalhlên kût chaw a ei
12 Tin, chhang dawidim telh loh ni, ni hmasa ber, kalhlên kûtna berâmno an talh ṭhinna niah chuan a zirtîrten a hnênah, “Kalhlên kût chaw i ei theihna tûrin khawiah nge va buatsaih ila i duh?” an ti a. 13 Tichuan, a zirtîrte zînga mi pahnih a tîr a, an hnênah, “Khawpuiah va lût ula, chutah chuan mipa bêla tui puin a tâwk ang che u; amah chu zui ang che u. 14 Tin, a luhna apiangah, chu in neitupa hnênah chuan, ‘Zirtîrtu chuan, “Ka zirtîrteho nên kalhlên kût chaw kan eina tûr, ka mikhual pindan chu khawiah nge?” a ti e,’ ti ang che u. 15 Tichuan, amah ngei chuan pindan chungnung zau tak, bungraw awm sa peih diam a entîr ang che u; chutah chuan kan tân buatsaih ang che u,” a ti a. 16 Tin, zirtîrte chu an chhuak ta a, khawpuiah chuan an va lût a, an hnêna a sawi ang takin an hmu a; tin, kalhlên kût chaw chu an buatsaih ta a. 17 Tin, khua a lo tlai lam chuan ani chu sâwm leh pahnihte nên an va kal ta a. 18 Tin, an kîla an ei laiin Isuan, “Tihtakmeuhvin ka hrilh a che u, in zînga mi pakhat, ka hnêna ei ve ngei hian mi mantîr ang,” a ti a. 19 Tin, an lungngai ta hle a, a mal malin a hnênah, “Keimah em ni?” an ti ta ṭheuh va. 20 Tin, ani chuan an hnênah, “Sâwm leh pahnihte zînga mi pakhat, thlênga mi chiahpuitu hi a ni. 21 Mihring Fapa hi a chanchin an ziak ang tak khân a kal dâwn a ni; nimahsela, Mihring Fapa mantîrtu tûr mihring chung chu a pik e! Chu mihring chu piang suh sela a tân a ṭha zâwk ang,” a ti a.
Lalpa Zanriah
22 Tin, an ei laiin Isuan chhang a la a, mal a sâwmsak zawhin a phel a, an hnênah a pe a, “La rawh u; hei hi ka taksa a ni,” a ti a. 23 Tin, no a la a, lâwm thu a sawi zawhin an hnênah a pe a; tichuan, an zain an in ta ṭheuh va. 24 Tin, ani chuan an hnênah, “Hei hi ka thisen, mi tam tak tâna chhuak tûr, thuthlunna chu a ni. 25 Tihtakmeuhvin ka hrilh a che u, Pathian rama a thar ka in ni a thlen hma loh zawng, grêp hrui raha mi ka in leh tawh lo vang,” a ti a. 26 Tin, hla an sak zawhin an chhuak a, Olive tlângah chuan an kal ta a.
Peteran Isua a phat tûr hrilh lâwkna
27 Tin, Isuan an hnênah, “In zain lungni lovin in la awm vek ang, ‘Berâm vêngtu chu ka vua ang a, berâmte chu an darh ang,’ tih ziak a ni si a. 28 Nimahsela, ka thawhleh hnuah Galili ramah in hmaah ka kal ang,” a ti a. 29 Petera erawh chuan a hnênah, “An zain lungni lovin awm mah sela, kei zawng ka awm lo vang,” a ti a. 30 Tin, Isuan a hnênah, “Tihtakmeuhvin ka hrilh a che, vawiinah, zânin la laah hian, âr vawi hnih a khuan hmain nangin vawi thum mi phat ang,” a ti a. 31 Ani erawh chuan nasa takin, “I thihnaah chuan thi ve dâwn mah ila, ka phat tawp lo vang che,” a ti chiam a. Tin, chutiang bawk chuan an ti ta ṭheuh va.
Gethsemane huana Isua ṭawngṭai
32 Tin, Gethsemane an tih hmun chu an thleng a; tin, ani chuan a zirtîrte hnênah, “Ka ṭawngṭai chhûng zawng hetah hian lo ṭhu rawh u,” a ti a. 33 Tin, Petera te, Jakoba te, Johana te chu a hruai a, nasa takin a thlaphângin a lo mangang ta êm êm a. 34 Tichuan, an hnênah, “Ka rilru a lungngai êm êm a, thihna khawp hial a ni; hetah hian awm ula, inring reng rawh u,” a ti a. 35 Tin, tlêmin hma lamah a va kal hlek a, leiah a bawkkhup a, theih ni sela, chumi hun chuan amah pêl tûrin a ṭawngṭai a. 36 “Abba! (Ka Pa!) Engkim i ti thei a; he no hi ka hnên ata la sawn rawh; nimahsela, keia thu ni lovin, nangma thu thu ni zâwk rawh se,” a ti a. 37 Tin, a lo kal a, anniho chu muhîlin a rawn hmu a; tichuan, Petera hnênah, “Simon, i muhîl a ni maw? Dârkâr khat pawh inring rengin i awm thei lo maw? 38 Thlêmnaa in luh loh nân inring rengin ṭawngṭai rawh u. Thlarau zawngin a peih a, tisa erawh chu a chak lo a ni,” a ti a. 39 Tin, a va kal leh a, a thusawi ngai sawiin a ṭawngṭai leh a. 40 Tin, a lo lêt leh chuan anniho chu muhîlin a rawn hmu leh a, an mut a chhuak hle si a, chhân ngaihna pawh an hre lo va. 41 Tin, a lo kal vawi thumnaah chuan an hnênah, “Tûnah zawng muhîl ula, châwl tawh rawh u! A tâwk tawh e; a hun chu a lo thleng ta; ngai teh u, Mihring Fapa hi mi sualte kutah an mantîr dâwn hi. 42 Tho ula, i kal ang u; en teh u, mi mantîrtu tûr chu a lo hnaih tâk hi,” a ti a.
Isua an man
43 Tin, a la sawi lai mêkin Juda, sâwm leh pahnihte zînga mi pakhat chu, a lo thleng ta nghâl a, ama rual chuan puithiam lalte leh lehkhaziaktute leh upate hnên ata mipuiho, khandaih leh talhtum kengin an lo thleng bawk a. 44 Tin, a mantîrtu tûr chuan, “Ka fawh apiang chu amah a ni ang; man ula, fel takin hruai bo ang che u,” tiin chhinchhiahna tûr a lo hrilh lâwk tawh diam a. 45 Tichuan, a thlen veleh amah a va pan ta nghâl a, “Rabbi!” tiin a fâwp ta ngawih ngawih a. 46 Tin, ani chu an chelh a, an man ta a. 47 Tin, a kianga dingte zînga mi tuin emaw a khandaih a phawi a, puithiam lalber bawih chu a sât a, a beng a sah thlâksak a. 48 Tin, Isuan anniho chu a bia a, an hnênah, “Khandaihte, talhtumte kengin, suam hmang man tûr ang rengin mi man tûrin in lo chhuak a ni maw? 49 Pathian biak inah ni tin zirtîrin in hnênah ka awm ṭhîn a, mi man si lo. Nimahsela, Pathian Lehkha thu chu a lo thlen theihna tûr a nih hi,” a ti a. 50 Tin, an zain amah chu an thlahthlam a, an tlân bo ta vek a. 51 Tin, tlangvâl tuin emaw, puan zai sîn chauh inbelin amah chu a zui a; tin, ani chu an lo man a; 52 nimahsela, a puan zai sîn chu a kalsan a, saruakin a tlân bo ta a.
Sanhedrin hmaah Isua
53 Tin, Isua chu puithiam lalber hnênah an hruai a; tin, ama rual chuan puithiam lalte, upate, lehkhaziaktute zawng zawng an lo kal khâwm a. 54 Tin, Peteran hla tak aṭangin amah chu a zui a, puithiam lalber in hual chhûng kawtlai thlengin; tin, chhiahhlawhte zîngah mei lum aiin a ṭhu ve a. 55 Tin, Isua an tihhlum theihna tûrin, puithiam lalte leh rorêltuteho zawng zawng chuan amah hêkna an zawng a; an hmu si lo va. 56 Mi tam takin dâwtin an hêk a; nimahsela, an hêkna thu chu a inhmu thei si lo. 57 Tin, tute emaw an ding a, dâwtin an hêk a. 58 “He mi hian, ‘He Pathian biak in kuta sak hi ka ṭhiat ang a, ni thum chhûngin biak in dang, kuta sak loh mi, ka sa ang,’ a tih kan hria,” an ti a. 59 Nimahsela, chuti pawh chuan an hêkna thu chu a inhmu thei chuang lo. 60 Tin, puithiam lalber chu a laiah a ding chhuak a, Isua hnênah, “Eng mahin i chhâng lo maw? Hêng hian an hêkna che hi engtizia nge ni?” tiin a zâwt a. 61 Ani erawh chu a ngawi reng a, eng mahin a chhâng lo. Puithiam Lalber chuan a hnênah, “Krista, Engthâwla Fapa chu i ni em?” tiin a zâwt leh a. 62 Tin, Isuan, “Ni e; Mihring Fapa hi thiltihtheihna ding lama ṭhua, vân chhûm zînga lo kal in la hmu dâwn a ni,” a ti a. 63 Tin puithiam lalber chuan a silhfênte a pawt thlêr a, “Hretu dang engah nge kan ngaih tawh ang? 64 Pathian a sawichhiatzia in hre tawh a; engtin nge in ngaih?” a ti a. Tin, an zain ani chu thi tlâkah an ruat hlawm a. 65 Tin, a ṭhenin amah chu chil an chhâk ta pang a, a hmai an tuam a, an hnek a, a hnênah, “Sawi rawh,” an ti a. Tin, chhiahhlawhte chuan an chelh pahin an bêng sawk sawk a.
Peteran Isua a phat
66 Tin, Petera chu hnuai lama in hual chhûng kawtlaiah chuan a awm laiin, puithiam lalber rawngbâwltu nula zînga pakhat a lo kal a; 67 Petera mei lum ai chu a hmu a, a en a, “Nang pawh hi Isua, Nazareth mi hnêna awm kha i nih hi,” a ti a. 68 Ani erawh chuan, “I thusawi chu ka hre hauh lo mai, a ngaihna rêng pawh ka hre hek lo,” tiin a pha a. Tin, sumhmunah chuan a va chhuak a; tichuan, âr a khuang ta a. 69 Tin, nula chuan a hmu a, a kianga dingte hnênah chuan, “He mi hi an zînga mi a ni,” a ti leh ta a. 70 Nimahsela, a pha leh a. Tin, rei lo tê achinah a kianga dingte chuan Petera hnênah, “An zînga mi i ni ngei mai, Galili rama mi i ni si a,” an ti a. 71 Ani erawh chuan, “Chu mihring in sawia chu ka hre lo,” tiin ânchhia inlawhin chhia a chham ta a. 72 Tin, âr khuan vawi hnihna chu a khuang ta nghâl a. Tin, Petera chuan, Isuan a hnêna, “Ar vawi hnih a khuan hmain nangin vawi thum mi phat ang,” a tih thu kha a lo hre chhuak leh ta a. Tin, chu chu a ngaihtuahin a ṭap ta a.
Pilata hmaah Isua an hruai
1 Tin, zîng a lo nih veleh, puithiamte chu upate leh lehkhaziaktute leh rorêltuho zawng zawng nên an inrâwn a, Isua chu an phuar a, an hruai a, Pilata hnênah an pe ta nghâl a. 2 Tin, Pilata chuan a hnênah, “Juda-te lal i ni em?” tiin a zâwt a. Tin, ani chuan a hnênah, “Ni e,” tiin a chhâng a. 3 Tin, puithiamte chuan kawng tam takin an hêk a. 4 Tichuan, Pilatan a zâwt leh a, a hnênah, “Eng mahin i chhâng lo maw? Ngai rawh, an hêkna che zozai hi!” a ti a. 5 Isua erawh chuan eng mahin a chhâng ta lo va; chutichuan, Pilata chuan mak a ti hle a.
Isua thi tûra tih a ni
6 Tin, Pilata chuan kût niah mi tâng pakhat an ngen apiang a chhuahsak ṭhîn a. 7 Tin, mi pakhat Barabba an tih chu helte zîngah phuarin a lum reng a, chûng chuan helnaah chuan tual an that a ni. 8 Tin, mipuiho chu an han chho va, an tân a tihsak ṭhin anga ti tûrin an ngên ta a. 9 Tin, Pilatan a chhâng a, an hnênah, “Juda-te lal hi chhuahsak che u ila in duh em?” a ti a. 10 (Puithiam lalten îtsîkna avângin an rawn hruai tih a hre si a.) 11 Nimahsela, puithiam lalte chuan mipuiho chu Barabba chhuahsak zâwk dîl tûrin an fuihpawrh a. 12 Pilata chuan an hnênah, “Juda-te lal in tiha hi engtin nge ka tih tâk ang le?” tiin a chhâng leh a. 13 Tin, anniho chu, “Krawsah khêng bet rawh,” tiin an au leh a. 14 Tin, Pilata chuan an hnênah, “Engah maw? Eng nge a tihsual ni?” a ti a. Nimahsela, anniho chu, “Krawsah khêng bet rawh,” tiin an au chiam a. 15 Tichuan, Pilata chuan mipuiho chu tihlungawi a duh a, Barabba chu a chhuahsak ta a; tin, Isua chu a vuak zawhin krawsa khen beh tûrin a pe ta a.
Sipaiten nuihza siam nân Isua an hmang
16 Tin, sipaite chuan in hual chhûng kawtlai, Praitorian an tihah chuan amah chu an hruai lût a, an pâwla mi zawng zawng an ko khâwm a. 17 Tichuan, puan senduk an sintîr a, hlînglukhum an phiar a, an khumtîr a. 18 Tin, “Chibai, Juda-te lal!” tiin chibai an bûk ta a. 19 Tin, a luah chuan luangin an vua a, chil an chhâk a, ṭhingṭhiin chibai an bûk a. 20 Tin, nuihza siam nân an hman zawhin puan senduk chu an hlîp a, ama puan an sintîr leh a, krawsa khen beh tûrin an hruai chhuak ta a. 21 Tin, mi veivâk pakhat, ram lam ata lo kal, a kraws pu tûrin an man a - Simona, Kurini khuaa mi, Aleksandra leh Rufa pa chu.
Isua an khêng bet
22 Tin, Isua chu Golgotha hmunah an hruai a (chu chu “Luruh hmun” tihna a ni). 23 Tin, uain, murra nêna pawlh an pe a; nimahsela, a la duh lo va. 24 Tin, krawsah an khêng bet a, an chan ṭheuh tûr hriat nân ṭhum vâwrin a silhfênte chu an insem a. 25 Tin, Isua an khen beh chu fehrehsân lai a ni a. 26 Tin, a hêkna lehkha a chung lamah an ziak a, “JUDA-TE LAL” tiin. 27 Tin, ama rual chuan suam hmang pahnih an khêng bet ve a; a ding lamah pakhat, a vei lamah pakhat. 29 Tin, mi vei apiangte chuan an lu thingin, “Ehei! Nang Pathian biak in ṭhiata ni thuma sa lehtu, 30 intidam la, kraws ata kha lo chhuk ta che,” tiin an tiel a. 31 Chutiang bawkin puithiam lalte chuan, lehkhaziaktute nên anmahni zîngah tielin, “Mi dang mah a tidam ṭhîn a, mahni a intidam thei si lo. 32 Kan hmuha kan rin theih nân, Krista, Israel lal chu, tûnah hian kraws ata chu lo chhuk ang hmiang,” an ti a. Tin, ama ruala khen beh vete chuan ani chu an hau va.
Isua a thi
33 Tin, chawfâk hun a lo nih chuan, behliang mun hun thlengin khawvêl a lo thim ta vek a. 34 Tin, behliang mun hun lai chuan Isua chu aw ring takin, “Eloi, Eloi, lama sabakthani?” tiin a au chhuak a (chu chu “Ka Pathian, ka Pathian, engah nge mi kalsan?” tihna a ni). 35 Tin, a kianga ding ṭhenkhatte chuan chu chu an hriatin, “Ngai teh u, Elija a ko a ni,” an ti a. 36 Tin, mi pakhat a tlân a, sponj uain thûra chiah khatin, tiangah a târ a, a han intîr a, “Awm rawh se, amah la thla tûrin Elija a lo kal emaw i en ang u,” a ti a. 37 Tin, Isua chu aw ring takin a au va, a thlarau a thlah ta a. 38 Tin, Pathian biak in puanzâr chu, a chung lam aṭangin a hnuai lam thlengin a lo thlêr chhuak ta a. 39 Tin, a hma zâwna sipai za hotu ding chuan a thlarau chutianga a thlah a hmuh chuan, “He mi hi Pathian Fapa a ni ngei mai,” a ti a. 40 Tin, hmeichhiate pawh hla taka thlîrin an awm a; chûng zîngah chuan Mari Magdalini te, Mari, Jakoba te leh Josea nu te, Salomi te an tel a, 41 (chûng chu Galili rama a awm laia amah zuia a rawng bâwlsak ṭhînte chu an ni) hmeichhe dang tam tak, Jerusalem khuaa ama ruala chho vete chu an tel bawk a.
Isua phûm thu
42 Tin, khua a lo tlai lam chuan Inrinni a nih avângin (chu chu Chawlhni hmaa ni hi a ni) 43 Josefa, Arimathai khuaa mi, rorêltu zahawm, Pathian ram beisei mi ve bawk chu a lo kal a, huai takin Pilata hnênah a lût a, Isua ruang chu a dîl ta a. 44 Tichuan, Pilata chuan chutia a thi ta thuai chu mak a ti hle a, sipai za hotu chu kovin, a thihna a rei tawh em tih a zâwt a. 45 Tin, sipai za hotu kâ aṭanga a hriat chuan, a ruang chu Josefa hnênah a pe a. 46 Tin, Josefa chuan puan zai sîn a lei a, amah chu a la thla a, puan zai sîn chuan a tuam a, thlân, lung ker kuakah a zalh a, thlân kawngkaah chuan lung a lum ta a. 47 Tin, Mari Magdalini leh Josea nu Mari chuan an zalhna chu an hmu reng a.
Isua thawhleh thu
1 Tin, Chawlhni chu a lo ral chuan Mari Magdalini te; Mari, Jakoba nu te; Salomi te chuan amah hnawih tûra an va kal theih nân englo rimtui an lei a. 2 Tin, ni sarih ni hmasa berah, zîng takah, ni chhuah hnuin thlân chu an va thleng a. 3 Tin, “Thlân kawngka ata lung chu tuin nge min lum sawnsak ang aw?” an tih lai mêkin, 4 an han dâk a, lung chu lum sawn sain an hmu ta a, a lian hle si a. 5 Tin, thlân chhûngah chuan an lût a, tlangvâl pakhat puan vâr sin, ding lampanga ṭhu an hmu a; an mangang ta a. 6 Tichuan, ani chuan an hnênah, “Mangang suh u; Isua, Nazareth mi an khen beh kha in zawng a ni âwm a, a tholeh ta; hetah a awm tawh lo; en teh u, an zalhna hi! 7 Nimahsela, kal ula, a zirtîrte leh Petera hnênah chuan, ‘Galili ramah in hmaah a kal dâwn a; in hnêna a sawi ang ngei khân chutah chuan in hmu ang,’ tiin hrilh rawh u,” a ti a. 8 Tichuan, an lo khurha, an lo mangan tâk avângin an chhuak a, thlân aṭang chuan an tlân ta vang vang a; an hlauh avângin tu ma hnênah eng mah an sawi lo.
Mari Magdalini hnênah Isua a inlâr
9 Tin, ni sarih ni hmasa ber zînga a thawhleh chuan Mari Magdalini, a kawchhûng ata ramhuai pasarih a hnawh chhuaha hnênah khân a inlâr hmasa ber a. 10 Tin, ani chu Isua awmpui ṭhinte hnênah a va kal a, mitthi ngaia an ṭap lai chu a hrilh ta a. 11 Nimahsela, anni chuan a nung leha, hmuh pawh a hmu tih an hre na a, an awih si lo.
Zirtîr pahnih hnênah Isua a inlâr
12 Tin, chumi hnuah chuan an zînga mi pahnih ram lam pana an kal laiin, hmêl danglam puin an hnênah a inlâr leh a. 13 Tin, anni chuan zirtîr dangte an va hrilh a, anni thu pawh chu an awih chuang lo.
Sâwmpakhatte hnênah Isua a inlâr
14 Tin, chumi hnu lehah chuan, chaw an kîl laiin sâwm leh pakhatte hnên ngeiah a inlâr a, a thawhleh hnua a hmutute thu chu an awih loh avângin, an rin loh leh an thinlung sak kawngah chuan a zilhhau ta a. 15 Tin, an hnênah, “Khawvêl zawng zawngah kal ula, thil siam zawng zawng hnênah chuan Chanchin Ṭha hi hril rawh u. 16 A ringa baptisma chang chu chhandamin an awm ang a; a ring lo erawh chu thiam loh changin an awm ang. 17 Tin, hêng chhinchhiahnate hian ringtute chu a zui zêl ang: a hmingin ramhuaite an hnawt chhuak ang a; ṭawng thartein an ṭawng ang a; 18 rûlte kutin an la ang a; thihna tûr eng pawh in mah sela eng mah an ti lo vang a; damlote chungah an kut an nghat ang a, an dam zêl ang,” a ti a.
Isua vâna hruai
19 Chutichuan, Lal Isua chu, an hnêna thu a sawi zawh chuan vâna hruai chhohvin a awm a. Pathian ding lamah a han ṭhu ta a. 20 Tichuan, anni chu an kal chhuak a, ram tinah thu an hril ta a, Lalpan anmahni a thawhpui a, a zuitu chhinchhiahnate chuan thu chu a tinghet zêl a. Amen.
Thuhmahruai
1-2 Kha thil kan zînga lo thleng, a tîr ata a hmutute leh thu rawngbâwltuten keimahni min hrilh ang khân, mi tam takin ziak an tum ta a; 3 chuvângin, Theophil ṭha ber, a bul ata engkim fel takin ka chhui a, indawt zêlin i tân ziak ila a ṭha ang, ka ti a ni; 4 hmâna thu an zirtîr che kha dik tak a ni tih i hriat theih nân. Baptistu Johana pian tûr thu 5 Judai ram lal Heroda a dam laiin, Abija pâwla mi a hming Zakaria, puithiam pakhat a awm a; chu mi chuan Arona thlah zînga mi nupuiah a nei a, a hming chu Elizabeti a ni. 6 An pahnihin Pathian mit hmuhin fel takin an awm a, sawisêl bovin, Lalpa thupêk leh a dân zawng zawng zâwmin an awm ṭhîn. 7 Nimahsela, Elizabeti a chin avângin fa an nei lo, an pahnihin upa tak an ni si a. 8 Tin, heti hi a ni a, a pâwlte tih dân ang zêla Pathian hmaa puithiama a chêt laiin, 9 puithiam dân angin Lalpa biak ina luh leh englo rimtui hâl a chang a. 10 Tin, englo rimtui hâl hun laiin mipui chu an zain pâwnah an ṭawngṭai a. 11 Tin, Lalpa vântirhkoh pakhat, englo rimtui hâlna maichâm ding lama dingin a hnênah a inlâr a. 12 Tin, Zakarian a hmuh veleh a mangang a, hlauh pawh a hlau va. 13 Nimahsela, vântirhkoh chuan a hnênah, “Zakari, hlau suh, i dîl kha a hria asin, i nupui Elizabetin fapa a hrinsak ang che, a hmingah Johana i sa tûr a ni. 14 Tin, nang i hlimin i lâwm ang a; amah a pianin mi tam tak an lâwm bawk ang. 15 Lalpa ngaihin mi lian a ni ang a, uain leh zu rêng reng a in lo vang; a nu pum chhûng aṭang rêngin Thlarau Thianghlimin a lo khat ang. 16 Israela thlahte tam tak Lalpa an Pathian hnên lamah a hawitîr leh ang. 17 Tin, pate thinlung chu fate lama hawitîr tûr te, mi tihmawhte chu mi fel tak finna lama hawitîr tûr te, Lalpa tâna mi lo inpeih tûr tea buatsaih tûrin, Elija rilru leh a thiltihtheihna puin Lalpa hmaah a kal ang,” a ti a. 18 Tin, Zakarian vântirhkoh hnênah chuan, “Chu chu engtin nge ka hriat ang? Kei putar ka ni a, ka nupui pawh pitar a ni si a,” a ti a. 19 Tin, vântirhkoh chuan a chhâng a, a hnênah, “Gabriela, Pathian hmaa ding ṭhîn ka ni a; a be tûr che leh, chûng thu ṭha chu hrilh tûr chein rawn tirh ka ni. 20 Ngai rawh, ka thusawite a hun taka lo thleng tûr chu i awih loh avângin, chûng thil chu a lo thlen hma loh zawng i ngawi reng ang a, ṭawng pawh i ṭawng thei lo vang,” a ti a. 21 Tin, vântlângho chuan Zakaria chu an lo nghâk a, Pathian biak in chhûnga a awm rei avâng chuan mak an ti hle a. 22 Tin, a lo chhuah chuan an hnênah thu a sawi thei ta lo va; tichuan, biak inah thlarau inlâr a hmu a ni tih an hre ta a; tin, an hnênah a zaizir fo va, ṭawng thei lovin a awm ta reng a. 23 Tin, heti hi a ni a, a rawngbâwlna hun ni bi chu a kim veleh a inah a haw ta a. 24,25 Tin, chumi hnuah chuan a nupui Elizabeti chu a lo rai ta a, “Mi hnêna ka hmingchhia chhilh nân Lalpan duhsak takin heti hian mi tihsak ta,” tiin thla nga a biru a.
Isua pian tûr thu
26 Tin, a thla ruknaah chuan Pathianin vântirhkoh Gabriela chu Galili rama khaw pakhat, Nazareth an tihah chuan nula thianghlim pakhat hnênah a tîr a, 27 chu nula chu Davida thlaha mi, a hming Josefa nupui hual a ni a; nula hming chu Mari a ni. 28 Tin, vântirhkoh chu a hnênah a lût a, “Chibai, voh bîk! Lalpa i hnênah a awm,” a ti a. 29 Tin, chumi thu avâng chuan a mangang ta êm êm a, “Engtiziaa chibai mi bûk nge ni ang?” tiin a inngaihtuah a. 30 Tin, vântirhkoh chuan a hnênah, “Mari, hlau suh; Pathian ngaihsak zâwng i ni e. 31 Ngai rawh, i rai ang a, fapa i hring ang a, a hmingah chuan ISUA i sa tûr a ni. 32 Ani chu mi lian a la ni ang a, Chungnungbera Fapa an la ti ang; Lalpa Pathianin a hnênah a thlahtu Davida lalṭhutphah chu a pe ang a; 33 Jakoba thlahte chungah chatuanin a lal ang a, a ramin kin ni a nei lo vang,” a ti a. 34 Tin, Marin vântirhkoh hnênah chuan, “Chûng chu engtin nge ni ang? Mipa ka nei si lo,” a ti a. 35 Tin, vântirhkoh chuan a chhâng a, a hnênah, “Thlarau Thianghlim i chungah a lo thleng ang a, Chungnungbera thiltihtheihnain a hliahkhuh ang che; chuvângin, mi thianghlim lo piang tûr pawh chu Pathian Fapa an ti ang. 36 Tin, ngai teh, i laichînnu Elizabeti pawhin a tar hnuin mipa a pai ta; a ching an tih ṭhin kha, tûn thla hi a thla rukna a ni tawh. 37 Pathian thuchhuak rêng rêng thiltithei lovin a awm lo vang,” a ti a. 38 Tin, Marin “Ngai teh, Lalpa bawihnu ka ni, i thu ang zêlin ka chungah thleng rawh se,” a ti a. Tin, vântirhkoh chuan a kalsan ta a.
Marin Elizabeti a tlawh
39 Chûng lai chuan Mari chu a tho va, thingtlângah, Judai rama khaw pakhatah chuan a kal ta thuai a; 40 tin, Zakaria inah a lût a, Elizabeti chu chibai a bûk a. 41 Tin, heti hi a ni a, Elizabetin Mari chibai bûk chu a hriat veleh, a pum chhûnga nautê chu a che a; tin, Elizabeti chu Thlarau Thianghlimin a lo khat ta a; 42 tin, aw ring takin a au va, “Nang chu hmeichhia azawnga engthâwl i ni, i rîla rah pawh a engthâwl a ni. 43 Ka Lalpa nu, ka hnêna i lo kal hi engtizia nge ni le? 44 Ngai teh, i chibai bûk thâwm ka benga a luh veleh, a lâwm avângin nautê ka pum chhûngah a che a ni. 45 A ring nu pawh a eng a thâwl a ni, a hnêna Lalpan thu a sawi kha a thleng dâwn si a,” a ti a.
Mari hla
46 Tin, Marin, “Ka nunin Lalpa a chawimawi e, 47 Ka thlarau pawh mi chhandamtu Pathian chungah a lâwm ta êm êm a. 48 A bawihnu hnam tlâwmzia a hmu a, a khawngaih a; Ngai rawh, tûn achinah ṭhangthar zawng zawngin nihlawh mi ti dâwn a ni. 49 Mi chak khân ka chungah thil ropui tak mi tihsak a, A hming pawh a thianghlim a ni. 50 A ṭihtute chu ṭhangthar thlengin a khawngaih zêl ṭhîn. 51 A bânin a tha chakzia a entîr a, Mi chapote chu an inngaihtuahnain a tidarh ta a. 52 An ṭhutphaha lal ṭhute chu a hnûk thla a, Hnam tlâwmte chu a chawimawi ta a. 53 Rilṭâmte chu thil ṭha takin a tipuar a, Hausate chu kutruakin a kal botîr ta a. 54 Kan thlahtute hnêna a sawi ang khân, 55 Abrahama leh a thlahte chu chatuana a khawngaih tûrzia hriat reng nân, A chhiahhlawh Israel-te chu a chhawmdâwl ta a,” a ti a. 56 Tin, Mari chu thla thum lai a hnênah a awm a; tin, a in lamah a haw leh ta a.
Baptistu Johana pian thu
57 Tin, Elizabeti nau hrin chu a lo hun ta a; tichuan, fapa a rawn hring a. 58 Tin, a vêngte leh a laichînte chuan Lalpan a khawngaih êm êm tih an lo hria a, an lawmpui a. 59 Tin, heti hi a ni a, a ni riat niah chuan nausên serh tan tûrin an lo kal a; a hmingah a pa hming vêk Zakaria bawk sak an tum a. 60 Tin, a nuin, “Ni lo ve, ani zawng Johana sak zâwk tûr a ni,” a ti a, a chhâng a. 61 Tin, annin a hnênah, “I laichînte zîngah he hming pu hi tu mah an awm hlei nêm,” an ti a. 62 Tin, a pa hnênah chuan zaizirin, “A hmingah eng nge sa ila i duh?” an ti a. 63 Tin, lehkha ziakna phêk a dîl a, “A hming Johana a ni e,” tiin a ziak a. Tin, an zain mak an ti hle a. 64 Tin, chawplehchilhin a kâ leh a lei chu a lo inphelh a, Pathian fakin a lo ṭawng chhuak ta nghâl a. 65 Tin, an vêla awm zawng zawng chuan an hlau ta a. Tin, chûng thu chu Judai ram thingtlâng zawng zawngah a thang vêl ta a. 66 Tin, a hria apiangin an rilruah lungkhamah an nei a, “Chu nausên chu engtin tak la awm ang maw?” an ti a; Lalpa kutin amah a ṭanpui si a.
Zakaria hrilh lâwkna
67 Tin, a pa Zakaria chu Thlarau Thianghlimin a lo khat a, a sawi lâwk a: 68 “Lalpa, Israela Pathian chu fakin awm rawh se, A mite chu a rawn tlawh a, tlanna a siamsak a. 69 A chhiahhlawh Davida chhûngte zîngah chuan Chhandamna ropui tak min siamsak ta si a. 70 (Leilung pian tirh ata a zâwlnei thianghlimte kâa a sawi ang khân) 71 Kan dote lakah leh min hawtute zawng zawng laka chhandamna chu; 72 Kan thlahtute khawngaih nân leh A thuthlung thianghlim hriat reng nân. 73 Kan thlahtu Abrahama hnênah chhia a chham kha, 74,75 Kan dote lakah kan hima, Kan dam chhûng zawng a mit hmuha thianghlim leh fel taka awma, Hlau lova a rawng min bâwltîr tûr thu kha. 76 “A ni, Taitê, nang hi Chungnungbera zâwlnei an ti ang che; A kawngte siam tûrin Lalpa hmaah i kal dâwn si a; 77 Kan Pathian thinlunga khawngaihna avângin 78 An sualte ngaihdam nân, A mite hnênah chhandamna thu hriattîr tûrin. Chumi avâng chuan chung lam aṭangin ni chhuakin min rawn tlawh ang, 79 Thim zîngah leh thihna hlima ṭhute ên tûr leh Thlamuanna kawnga kan ke pêntîr tûrin,” a ti a. 80 Tin, nausên chu a lo ṭhang lian deuh deuh va, a rilru lam a lo nghet ta telh telh a, Israel-te hnêna a rawn inlâr hma loh zawng thlalêrah a awm reng a.
Isua pian thu
1 Tin, chûng lai chuan heti hi a ni a, Kaisara Augustan khawvêl zawng zawng hming ziak tûr thu a pe a. 2 (Chu chu Suria ramah Kurinia chu ram awptu a nih laia hming ziak hmasa ber chu a ni.) 3 Tichuan, mi zawng zawng chu an hming ziak tûrin anmahni khua ṭheuhvah an kal a. 4,5 Tin, Josefa pawh, Davida chhûngte leh a thlah a nih avângin, Galili rama Nazareth khua aṭangin Mari, a nupui hual, rai ṭeuh chung nên chuan hming ziak tûrin, Judai rama Davida khua Bethlehem an tihah chuan an kal ta a. 6 Tin, heti hi a ni a, chuta an awm lai chuan a hrin a lo hun ta a. 7 Tin, a fa tîrah mipa a hring a; puanin a tuam a, khualbûka an len ve tâk loh avângin ran chaw pêkna thlêngah a muttîr a. Berâmpute leh vântirhkohte 8 Tin, chumi ram vêkah chuan berâm vêngtute an awm a, zânah an berâmho an vêng a, phûlah an riahchilh a. 9 Tin, Lalpa vântirhkoh pakhat an kiangah a lo ding a, Lalpa ropuinain an vêl chu a rawn chhun êng a; tichuan, an hlau ta êm êm a. 10 Tin, vântirhkoh chuan an hnênah, “Hlau suh ulang, ngai rawh u, mi tin ta tûr chanchin ṭha lâwmawm êm êm ka rawn thlen che u a ni. 11 Vawiinah hian in tân Davida khuaah Chhandamtu a piang ta, Lal Krista chu. 12 Tin, hei hi in tân chhinchhiahna tûr a ni; nausên puana tuam, ran chaw pêkna thlênga mu in hmu ang,” a ti a. 13 Tin, thâwklehkhatah vântirhkoh hnênah chuan vâna miho mipui an lo awm ta chiam a, Pathian an fak a, 14 “Chungnung berah Pathian ropui takin awm rawh se, Lei chunga a lawm êm êm mihringte hnênah rem thu lêng rawh se,” an ti a. 15 Tin, heti hi a ni a, vântirhkohte chuan vâna an kalsan veleh berâm vêngtute chuan, “Tûnah Bethlehem khaw thlengin kal ila, Lalpan thu min hrilh lo thleng chu i en ang u,” an ti a. 16 Tichuan, an kal thuai thuai a, Mari nên, Josefa nên, ran chaw pêkna thlênga nausên mu nên chuan an hmu a. 17 Tin, an va hmuh chuan nausên chanchin thu vântirhkohvin a hrilh kha an sawi vêl a. 18 Tin, a hria apiang chuan berâm vêngtute thusawi chu mak an ti hle a. 19 Mari erawh chuan thusawi zawng zawng chu a rilruin a ngaihtuah a, a vawng reng a. 20 Tin, berâm vêngtute chuan vântirhkoh hrilh ang ngeia engkim an hmuha an hriat avângin, Pathian chawimawi leh fak chung zêlin an kîr leh ta a.
Isua hming sak
21 Tin, a serh tanna tûr ni riat a lo tlin chuan, a hmingah chuan, chhûla a awm hma rênga vântirhkohvin a sak tawh sa, ISUA an sa a.
Tempulah Isua an hruai
22-24 Tin, Mosia dân anga an inthen ni a lo thlen chuan, ani chu (Lalpa dân thua, “Mipa fa chhûl keu apiang chu Lalpa tâna ruat an ti ang,” tia ziak ang khân) Lalpa hnêna hlân tûr leh, Lalpa dân thua ziak angin ṭhuro tuak khat emaw, pârvano pahnih emaw talh tûrin Jerusalem khuaah an han hruai a. 25 Tin, ngai teh, Jerusalem khuaah chuan mi pakhat, a hming Sumeona a awm; chu mi chu mi fel tak leh Pathian ngaihsak tak a ni a, Israel-te thlamuantu tûr chu a nghâk reng a, a chungah Thlarau Thianghlim a awm a. 26 Tin, Lalpa Krista chu a hmuh hma loh chuan a thi lo vang tih Thlarau Thianghlimin a lo hriattîr tawh rêng a. 27 Tin, Thlarau hriattîrin Pathian biak inah chuan a va lût a; nausên Isua chu a nu leh a pain, dân pângngai anga a chunga tihsak tûra an rawn hruai luh lai chuan, 28 ani chuan a lo kuangkuah a, Pathian a fak a, 29 “Lalpa, tûnah i thu ang zêlin, I bawih hi thlamuang takin I kaltîr dâwn a; 30 I chhandamna mi tin hmuha i siam kha, 31 ka mitin a hmu ta e; 32 Jentailte hnêna i êng puang chhuak tûr leh I mi Israel-te ropuina tûr chu,” a ti a. 33 Tin, nausên thu a sawi chu a nu leh a pa chuan mak an ti hle a. 34 Tin, Sumeona chuan anni chu mal a sâwm a, a nu Mari hnênah, “Ngai rawh, he naupang hi Israel zînga mi tam tak tiral tûr leh din chhuahtîr tûra ruat a ni, miin an hnial tûr chhinchhiahna nên- 35 a ni, nanga thinlung pawh ngûnhnâmin a la chhun tlang ang, mi tam takin an thinlunga an ngaihtuahte chu a lan nân,” a ti a. 36 Tin, mi pakhat, a hming Anni, zâwlnei, Phanuela fanu, Asera hnama mi a awm a, (ani chu tar tak a ni a, a tawn tirh pasal hnênah kum sarih a awm a; 37 tin, kum sawmriat leh kum li zet a hmeithai a,) ani chuan Pathian biak in kalsan lovin, a chhûn a zânin chaw ngheitea ṭawngṭaiin Pathian a be ṭhîn. 38 Tin, chumi lai tak chuan ani chu a lo kal a, Pathian hnênah lâwm thu a sawi a, Jerusalem khaw tlan beisei apiangte hnênah chuan Isua chanchin a sawi bawk a.
Nazareth khuaah an haw
39 Tin, Lalpa dân ang zêla thil zawng zawng an tih zawhin, Galili rama anmahni khua Nazareth-ah chuan an haw leh ta a. 40 Tin, nausên chu a lo sei lian deuh deuh va, a lo chak telh telh a, finin a khat ta a, Pathian khawngaihna a chungah a awm bawk a.
Tempulah naupang Isua
41 Tin, kum tinin, kalhlên kût hunin a nu leh a pa chu Jerusalem khuaah chuan an kal ṭhîn a. 42 Tin, ani chu kum sâwm leh kum hnih a nihin kût dân pângngaiin an han kal a; 43 tin, an ṭiaka, an haw laiin naupang Isua chuan Jerusalem khuaah a awmsan a; a nu leh a pa chuan an hre si lo va. 44 Chutichuan, an pâwl zîngah a awm emaw an ti a, ni khat an kal hman a, an laichînte leh an hmêlhriatte zîngah an zawng a. 45 Tin, an hmuh loh avângin zawng chung zêlin Jerusalem khuaah an kîr leh ta a. 46 Tin, heti hi a ni a, ni thum chinah chuan Pathian biak inah, zirtîrtute zînga ṭhua an thu lo ngaithlaa lo zawtin an hmu ta a. 47 Tin, a thu hria apiang chuan a hriatzia leh a chhânzia chu mak an ti hle a. 48 Tin, a nu leh a pa chuan amah chu an hmuhin mak an ti hle a; tichuan, a nuin a hnênah, “Ka fapa, engati nge hetia min tih? Ngai teh, i pa leh keiin thlaphâng takin kan zawng che a ni,” a ti a. 49 Tin, ani chuan an hnênah, “Engah nge mi zawn ni? Ka Pa ina ka awm tûr in hre lo vem ni?” a ti a. 50 Tin, an hnêna a thusawi chu a ngaihna an hre lo va. 51 Tin, an hnênah a kal thla a, Nazareth khua chu a zu thleng a, an thu zâwmin a awm a. Tin, a nu chuan chûng thil zawng zawng chu a rilruah a vawng reng a. 52 Tin, Isua chu a fing deuh deuh va, a lo lian telh telh a, Pathian leh mihring duhsakin a awm deuh deuh va.
Baptistu Johana thuhril
1 Tin, Tiberia Kaisara a lal achin kum sâwm leh kum nga kumah (Pontia Pilata chu Judai ram awptu a ni a. Heroda chu Galili ram lal a ni a, a unau Philipa chu Iturea leh Trakonitis ram lal a ni a, Lusania chu Abilene ram lal a ni a, 2 Ana leh Kaiapha chu puithiam lalberte an ni a), thlalêrah Zakaria fapa Johana hnênah chuan Pathian thu a lo thleng a. 3 Tin, ani chu Jordan lui kam vêl ram tinah a kal a, thil tihsual ngaihdam nân simna baptisma thu a hril zêl a; 4 Zâwlnei Isaia thu buah: “Thlalêra mi au râwl chuan, ‘Lalpa lamlian sial ula, A kawngte tingîl rawh u, 5 Kawr tin chhûn khah a ni vek ang a, Tlâng tin mual tin tihhniam a ni bawk ang; Kawng kawite a lo ngîl ang a, Kawng bumbohte a lo rual bawk ang; 6 Tin, mi zawng zawngin Pathian chhandamna chu an hmu ang,’ a ti,” tih ziak ang khân. 7 Tin, ani chuan baptisma chang tûra a hnêna mipui lo chhuakte hnênah chuan, “Rûl thlahte u, thinur lo thleng tûr hi tlânsan tûrin tuin nge zilh che u? 8 Chutichuan, sim hming pu tlâkin rah rawh u, ‘Abrahama kan thlahtu a ni alâwm,’ in rilruin ti mai suh ang che u; Pathianin hêng lungte hi Abrahama thlahahte a dintîr thei e, ka tih che u hi. 9 Tûn apangin thingbul tinah hreipui an dah ta; chutichuan, thing tin rah ṭhaa rah lo apiang an kit a, meiah an paih ṭhîn,” a ti a. 10 Tin, mipuite chuan a hnênah, “Eng nge kan tih tûr le?” an ti a, an zâwt a. 11 Tin, ani chuan an hnênah, “Tu pawh kawr pahnih nei chuan a nei lo hnênah pe rawh se; tu pawh ei nei chuan chutiang bawkin ti rawh se,” a ti a, a chhâng a. 12 Tin, chhiahkhawntute pawh baptisma chang tûrin an lo kal a, a hnênah, “Zirtîrtu, eng nge kan tih tûr?” an ti a. 13 Tin, ani chuan an hnênah, “An rêlsak ang che u aliam chu va phût suh u,” a ti a. 14 Tin, sipaite pawhin a hnênah, “Keini pawhin eng nge kan tih tûr?” an ti a, an zâwt a. Tin, ani chuan an hnênah, “Tu mah tiduhdahin va hêk suh u; in hlawh tâwk apiangah lungawi rawh u,” a ti a. 15 Tin, miten an beisei a, mi zawng zawngin Johana chungthu an thinlungah, “Krista a lo ni mial dah law maw?” tia an ngaihtuah laiin, 16 Johana chuan a chhâng a, an zaa hnênah, “Kei zawngin tuiin ka baptis ṭhîn che u a; nimahsela, keimah aia ropui zâwk a lo kal dâwn e, a pheikhawk hrui phelh tlâk pawh ka ni lo ve; ani chuan Thlarau Thianghlim leh meiin a baptis ang che u. 17 A kutin a sisêp a keng a, a hruih zah fai hliauna tûr leh a zêma a buh khungna tûrin; a si erawh chu mei mit thei lovin a hâl ral ang,” a ti a. 18 Tin, fuihna thu dang tam takin mite hnênah Chanchin Ṭha a hril ṭhîn a. 19 Nimahsela, Lal Heroda chu a nau nupui Herodi chungthuah leh a thil tihsual zawng zawng chungah chuan Johanan a zilhhau avângin, 20 a thil tihsual zawng zawng belhchhahin Johana chu tân inah a khung ta a.
Isuan baptisma a chang
21 Tin, heti hi a ni a, mi zawng zawngin baptisma an chan zawhin Isua pawhin baptisma a chang a, a ṭawngṭai a, vân a lo inhawng a. 22 Thlarau Thianghlim chu taksa puin ṭhuro angin a lo chhuk a, a chungah a fu ta a; tin, vân aṭangin aw a lo chhuak a, “Nang, ka fapa duh tak i ni; i chungah ka lâwm êm êm e,” a ti a.
Isua thlahtute
23 Tin, Isuan a zirtîr ṭan tirh lai khân amah chu kum sawmthum lai a ni tawh a, mi ngaih chuan Josefa fapa a ni a, chu mi chu Helia fa a ni a, 24 chu mi chu Matthata fa a ni a, chu mi chu Levia fa a ni a, chu mi chu Melkia fa a ni a, chu mi chu Janna fa a ni a, chu mi chu Josefa fa a ni a, 25 chu mi chu Mattathia fa a ni a, chu mi chu Amosa fa a ni a, chu mi chu Nahuma fa a ni a, chu mi chu Eslia fa a ni a, chu mi chu Naggaia fa a ni a, 26 chu mi chu Maatha fa a ni a, chu mi chu Mattathia fa a ni a, chu mi chu Semeia fa a ni a, chu mi chu Joseka fa a ni a, chu mi chu Joda fa a ni a, 27 chu mi chu Joana fa a ni a, chu mi chu Hrisa fa a ni a, chu mi chu Zerubabela fa a ni a, chu mi chu Salathiela fa a ni a, chu mi chu Neria fa a ni a, 28 chu mi chu Melkia fa a ni a, chu mi chu Addia fa a ni a, chu mi chu Kosama fa a ni a, chu mi chu Elmadama fa a ni a, chu mi chu Era fa a ni a, 29 chu mi chu Isua fa a ni a, chu mi chu Eliezera fa a ni a, chu mi chu Jorima fa a ni a, chu mi chu Matthata fa a ni a, chu mi chu Levia fa a ni a, 30 chu mi chu Sumeona fa a ni a, chu mi chu Juda fa a ni a, chu mi chu Josefa fa a ni a, chu mi chu Jonama fa a ni a, chu mi chu Eliakima fa a ni a, 31 chu mi chu Melea fa a ni a, chu mi chu Menna fa a ni a, chu mi chu Mattatha fa a ni a, chu mi chu Nathana fa a ni a, chu mi chu Davida fa a ni a, 32 chu mi chu Jesaia fa a ni a, chu mi chu Obeda fa a ni a, chu mi chu Boaza fa a ni a, chu mi chu Salmona fa a ni a, chu mi chu Nasona fa a ni a, 33 chu mi chu Aminadaba fa a ni a, chu mi chu Arama fa a ni a, chu mi chu Esroma fa a ni a, chu mi chu Pharesa fa a ni a, chu mi chu Juda fa a ni a, 34 chu mi chu Jakoba fa a ni a, chu mi chu Isaaka fa a ni a, chu mi chu Abrahama fa a ni a, chu mi chu Tera fa a ni a, chu mi chu Nahora fa a ni a, 35 chu mi chu Seruga fa a ni a, chu mi chu Reuva fa a ni a, chu mi chu Pelega fa a ni a, chu mi chu Ebera fa a ni a, chu mi chu Sela fa a ni a, 36 chu mi chu Kainana fa a ni a, chu mi chu Arpaksada fa a ni a, chu mi chu Sema fa a ni a, chu mi chu Nova fa a ni a, chu mi chu Lameka fa a ni a, 37 chu mi chu Methusela fa a ni a, chu mi chu Enoka fa a ni a, chu mi chu Jareda fa a ni a, chu mi chu Mahalalela fa a ni a, chu mi chu Kainana fa a ni a, 38 chu mi chu Enosa fa a ni a, chu mi chu Setha fa a ni a, chu mi chu Adama fa a ni a, chu mi chu Pathian fa a ni.
Isua thlêmna tawh thu
1-2 Tin, Isua chu Thlarau Thianghlimin a khat a, Jordan lui aṭangin a kîr leh a, Diabola thlêm chungin thlalêrah ni sawmli Thlarau hruaiin a awm a. 3 Tin, chûng ni chuan eng mah a ei lo; tin, a tâwpah chuan a ril a lo ṭâm ta a. Tin, Diabola chuan a hnênah, “Pathian Fapa i nih chuan he lung hi chhanga chang tûrin thu pe rawh,” a ti a. 4 Tin, Isuan a hnênah, “ ‘Mihring hi chhang chauhvin an nung lo vang,’ tih ziak a ni,” a ti a, a chhâng a. 5 Tin, a hruai chho va, mit khap kâr lovah khawvêl ram zawng zawng a entîr a. 6 Tin, Diabola chuan a hnênah, “Hêng zawng zawng chunga thuneihna leh a ropuina hi ka pe ang che; ka hnêna pêk a ni tawh si a, ka duh apiang hnênah ka pe bawk ṭhîn a ni. 7 Chutichuan, chibai mi bûk la, a zain i ta a ni vek ang,” a ti a. 8 Tin, Isuan a hnênah, “ ‘Lalpa i Pathian chibai bûk la, ama rawng chauh bâwl rawh,’ tih ziak a ni,” a ti a, a chhâng a. 9 Tin, Diabola chuan Jerusalem khuaah a hruai a, Pathian biak in chhîp zumah chuan a dah a; tin, a hnênah, “Pathian Fapa i nih chuan heta ṭang hian tla thla rawh; 10 ‘Nangmah humhim tûr chein, I chungthuah zawng A vântirhkohte chu thu a pe ang,’ tih leh, 11 ‘An kutin an dâwm ang chia; Chuti lo chuan, i kein lung i chhuih hlauh dah ang e,’ tih ziak a ni si a,” a ti a. 12 Tin, Isuan a hnênah, “ ‘Lalpa i Pathian fiah suh,’ tih a ni e,” tiin a chhâng a. 13 Tin, Diabola chuan a thlêmna tûr tinrênga a thlêm zawh chuan, a remchân hun atân a kalsan ta a.
Galili ramah Isuan rawngbâwl a ṭan
14 Tin, Isua chu Thlarau thiltihtheihna puin Galili ramah a haw leh ta a; tin, a chanchin chu, chumi vêl ram tinah chuan a thang ta a. 15 Tin, an inkhâwmna inahte a zirtîr zêl a, mi zawng zawng fakin a awm a.
Nazareth khuaah Isua a hnawng
16 Tin, a seilenna khua Nazareth chu a lo thleng a; tin, Chawlhnia a tih dân pângngaiin inkhâwmna inah a lût a, chhiar tûrin a ding a. 17 Tin, zâwlnei Isaia lehkhabu chu a hnênah an pe a. Tin, lehkhabu zial chu a phelh a, he thu ziakna lai hi a chhar a, 18 “Riangvaite hnênah Chanchin Ṭha hril tûra mi ruat avângin Lalpa Thlarau chu ka chungah a awm; Ani chuan salte hnêna chhuahna thu leh, Mitdelte hnêna mitvâr neih lehna thu sawi tûr te, Tihduhdah tuarte chhuahtîrna tûr te, 19 Lalpa lungawi kum thu sawi tûr tein, Mi tîr a ni,” tih hi. 20 Tin, lehkhabu chu a zial a, rawngbâwltu a pe leh a, a ṭhu ta a. Tin, inkhâwmna ina mi zawng zawng mit chu a chungah a fu a. 21 Tin, an hnênah, “He Pathian Lehkha Thu hi vawiinah hian in hriatah a lo thleng ta,” tiin a sawi ṭan a, 22 Tin, an zain amah an fak a, a kam chhuak khawngaih thute chu mak an ti hle a. Tin, “He mi hi Josefa fapa a ni lo vem ni?” an ti a. 23 Tin, ani chuan an hnênah, “Nangnin he tehkhin thu hi, ‘Dâktawr, nangmah intidam rawh,’ ‘Kapernaum khuaa i thiltih kan lo hriat apiang kha, hetah nangma khaw lamah pawh hian ti rawh,’ tiin mi la hrilh dâwn ngei nâk hi,” a ti a. 24 Tin, amah vêkin, “Tihtakmeuhvin ka hrilh a che u, zâwlnei tu mah mahni khaw lama miin an lâwm ngai lo. 25 Chutichuan, dik takin ka ti a che u, Elija dam laia kum thum leh thla ruk vân a pina, khawvêla ṭâm nasa tak a lo tlâk khân, Israel ramah hmeithai tam tak an awm a; 26 nimahsela, an zînga tu hnênah mah Elija tirh a ni lo va, Sidon ram lama Sarepta khuaa hmeichhe pakhat hmeithai hnênah chauh tirh a nih zâwk kha. 27 Tin, zâwlnei Elisa dam lai pawh khân Israel ramah phâr tam tak an awm a; nimahsela, an zîngah tu mah tihthianghlimin an awm lo va, Naamana, Suria rama mi chauh tihthianghlima a awm tâk zâwk kha,” a ti a. 28 Tin, inkhâwmna ina mi zawng zawng chuan chûng thu chu an hriat veleh, an lo thinur êm êm a, 29 an tho hlawm a, khua ata chu an nam chhuak a, paih thlâk tûrin an khaw awmna khâm kovah chuan an hruai ta a. 30 Nimahsela, ani chu an kârah a kal tlang a, a kal ta zêl mai a.
Ramhuai pai mi pakhat
31 Tin, Galili rama khaw pakhat, Kapernaum-ah chuan a zuk kal ta a. Tin, Chawlhniah mite a zirtîr a; 32 tin, thunei taka a sawi avângin a thu zirtîr chu mak an ti hle a. 33 Tin, inkhâwmna inah chuan ramhuai bawlhhlawh thlarau pai mi pakhat a lo awm a; ani chu aw ring takin, 34 “A! Nazareth Isu, keini leh nang eng nge kan inzâwlna awm? Min tiboral tûrin i lo kal em ni? Nang ka hria a che, Pathian Mi Thianghlima i ni e,” tiin a au chhuak a. 35 Tin, Isuan a hau va, “Ngawi la, a chhûng ata lo chhuak rawh,” a ti a. Tin, ramhuai chuan a laiah a titlu zet a, tina lovin a chhûng ata chu a lo chhuak ta a. 36 Tin, an zain mak an ti hle a, “Hei hi eng thu nge ni le? Thunei tak leh thiltithei takin ramhuai bawlhhlawhte thu a pe a, an chhuah hi,” tiin an inbia a. 37 Tin, chumi vêl ram khaw tinah a chanchin a thang ta a.
Simona pizawn leh mi tam tak tihdam
38 Tin, a tho va, inkhâwmna in ata chu a chhuak a, Simona inah a lût ta a. Tin, Simona nupuia nu chu nasa takin a khua a lo sik a; tichuan, a tân an lo ngensak a. 39 Tin, a kiangah a ding a, khawsik chu a hau va, a reh ta a; tin, a tho ta nghâl a, an rawng a bâwlsak ta a. 40 Tin, ni tlâk dâwn laiin natna hrang hranga nâ, damlo nei apiangin a hnênah an rawn hruai a; tin, an zaa chungah chuan a kut a nghat ṭheuh va, a tidam ta zêl a. 41 Tin, ramhuaite pawh, “Pathian Fapa i ni,” tia auvin mi tam tak kawchhûng ata an lo chhuak a. Tin, anmahni a hau va, Krista a ni tih an hriat avângin an ṭawng a phal lo.
Inkhâwmna inahte Isuan thu a sawi
42 Tin, khawvâr veleh a chhuak a, thlalêr hmunah a kal a; tin, mipuite chuan an zawng a, a hnênah an lo kal a, anmahni a kalsan loh nân chelh an tum a. 43 Nimahsela, ani chuan an hnênah, “Khaw dangahte pawh Pathian ram Chanchin Ṭha ka hril tûr a ni, chumi avâng chuan tirh ka ni si a,” a ti a. 44 Tichuan, Galili rama inkhâwmna inahte thu a hril a.
Lawng aṭangin a zirtîr
1 Tin, heti hi a ni a, mipuiin Pathian thu an ngaihthlâka amah an bâwr huai huai laiin, ani chu Gennesaret dîl kamah chuan a ding a; 2 tin, dîl kamah chuan lawng pahnih awm a hmu a; nimahsela, sangha mantute chu an chhuak a, an lênte an su a. 3 Tichuan, lawng pakhat, Simona ta zâwkah chuan a chuang a, a hnênah vaukam ata tlêma tawlh luh deuh a dîl a. Tin, a ṭhu a, lawng aṭang chuan mipuite chu a zirtîr ta a.
Isua thu awihin Simonan sangha tam tak a man
4 Tin, thusawi a bân chuan Simona hnênah, “Li thûk lam pan la, sangha man tûrin in lênte dêng rawh,” a ti a. 5 Tin, Simonan a hnênah, “Zirtîrtu, rim takin zankhuain kan bei a, eng mah kan man lo va; nimahsela, i thuin lênte ka dêng leh ang e,” a ti a, a chhâng a. 6 Tin, an han den chuan sangha tam tak an khuh a, an lênte chu a chat pheuh pheuh va. 7 Tin, lawng danga an pâwlpui awmte chu anmahni rawn pui tûrin kutin an hui a. Tin, an lo kal a, lawng pahnih chu pil lek lek khawpin an chhûng khat ve ve a.
Zirtîr koh hmasak berte
8 Tin, Simon Peteran chu chu a hmuh chuan Isua khûp kiangah a bawkkhup a, “Lalpa, mi kalsan rawh, mi sual ka nih hi,” a ti a. 9 An sangha man chu ani leh a ṭhianten mak an ti hle si a. 10 Simona pâwl vêk Zebedaia fapa Jakoba leh Johana pawhin mak an ti hle bawk a. Tin, Isuan Simona hnênah, “Hlau suh, tûn hnuah zawng mihring i man tawh ang,” a ti a. 11 Tin, an lawngte chu vaukamah an dah a, engkim kalsanin amah chu an zui ta a.
Phâr tihdam
12 Tin, heti hi a ni a, khaw pakhata a awm laiin ngai teh, mi pakhat phâr bawm hi a awm a, ani chuan Isua a lo hmu a, lei siin a bawkkhup a, “Lalpa, i duh chuan mi tithianghlim thei e,” a ti a, a ngên chiam a. 13 Tin, ani chuan a han ban a, a dek a, “Ka duh e, lo thianghlim tawh ang che,” a ti a. Tin, chawplehchilhin a phâr chu a lo reh ta nghâl a. 14 Tin, a hnênah, “Tu mah hrilh suh; amaherawhchu, puithiam va inentîr la, i inthen nân Mosia ruat angin hlân rawh, mite hriattîrna tûrin,” a ti tlat a. 15 Nimahsela, a chanchin thu chu a thang lehzual sauh va; mipui tam tak a thu hriat duh leh an nate tihdam duhin an rawn inkhâwm chiam a. 16 Nimahsela, ani chu thlalêrahte a kal hrang a, a ṭawngṭai ṭhîn a.
Zeng tihdam
17 Tin, heti hi a ni a, chûng lai chuan ni khat chu a zirtîr a. Tin, a kiangah Pharisaite leh dân zirtîrtute ṭhuin an awm a, chûngte chu Galili leh Judai ram khaw tin aṭang leh Jerusalem khua aṭanga lo chhuak an ni a; tin, mi tihdam nân Lalpa thiltihtheihna chu a hnênah a awm. 18 Tin, ngai teh, khum chawpin zeng pakhat an rawn zâwn a; a hmaa dah tûrin zâwn luh an tum a. 19 Tin, mipui avâng chuan zâwn luhna rêng an hmu lo va, in chungah an lâwn chho va, in chung aṭangin, a lai takah, Isua hmaah a khum chawpin an puh thlâktîr a. 20 Tin, an rinzia chu a lo hmuhin a hnênah chuan, “Mihring, i sualte ngaihdam a ni tawh e,” a ti a. 21 Tin, lehkhaziaktute leh Pharisaite chuan, “Pathian sawichhia hi tu nge maw a nih le? Pathian chauh lo chuan tuin nge sualte ngaidam thei ni?” tiin an ngaihtuah a. 22 Chutichuan, Isuan an ngaihtuah chu a hria a, an hnênah chuan, “In thinlungah eng nge in ngaihtuah? 23 ‘I sualte ngaihdam a ni tawh,’ tih leh, ‘Tho la, kein kal tawh rawh,’ tih hi a eng nge sawi awl zâwk ni? 24 Eng pawh ni sela, khawvêlah Mihring Fapa hian sual ngaihdam theihna a nei tih in hriat nân,” a ti a, (zeng hnênah chuan) “Tho la, i khum la la, i inah kal rawh ka ti a che,” a ti a. 25 Tichuan, an mit hmuhah a tho ta nghâl a, a mutna chu a la a, Pathian fak chung zêlin a inah a haw ta a. 26 Tin, an zain mak an ti hle a, Pathian an fak a, “Vawiinah chuan thil mak tak kan hmu a ni,” an ti a, an hlau êm êm a.
Levia koh thu
27 Tin, chûng zawhah chuan a chhuak a, chhiah chawina hmuna ṭhu, chhiahkhawntu pakhat, a hming Levia a hmu a; tin, a hnênah, “Mi rawn zui rawh,” a ti a. 28 Tichuan, engkim a kalsan a, a tho va, a zui ta a. 29 Tin, Levia chuan a inah Isua tân ruai ropui tak a ṭheh a; tichuan, chhiahkhawntute leh mi dangte nên, mi tam takin anmahni an kîlpui hlawm a. 30 Tin, Pharisaite, an lehkhaziaktute nên chuan a zirtîrte chungah an phunnawi a, “Engati nge chhiahkhawntute leh mi sualte hnêna in eia, in in le?” an ti a. 31 Tin, Isuan an hnênah, “Mi hrisêlte chuan dâktawr an ngai lo va, mi bawrhsâwmte zâwkin an ngai a ni. 32 Mi fel takte lam tûra lo kal ka ni lo va, mi sualte lama simtîr tûra lo kal ka ni zâwk,” a ti a, a chhâng a.
Chaw nghei chungchâng zawhna
33 Tin, annin a hnênah, “Johana zirtîrten chaw an nghei fo va, an ṭawngṭai ṭhîn; Pharisai zirtîrte pawhin chutiang bawkin an ti thîn; nimahsela, i zirtîrte hian an eiin an in ṭhin,” an ti a. 34 Isuan an hnênah, “Mo hruaitute hnêna a pasal tûr chu a awm chhûng zawng, mo hruaitute chu in ngheitîr thei ṭhîn em ni? 35 Nimahsela, a pasal tûr chu an hnên ata hruai bo nite a la thleng ang a, chumi niah erawh chuan an la nghei ang,” a ti a. 36 Tin, an hnênah tehkhin thu pawh a sawi a: “Tu mân puan thar pawt thlain puan hluiah an bel ngai lo; bel ang sela, a thar chuan a tiṭet ang a, a thar them leh a hlui chu a inpâwl bawk hek lo vang. 37 Tin, tu mân uain thar savun uain peng hluiahte an thun ngai lo, thun ang sela, uain thar chuan savun pengte chu a tâwn puak ang a, a bua ang a, savun pengte pawh chu a lo chhia ang. 38 Uain thar chu savun uain peng tharahte an thun zâwk tûr a ni. 39 Tin, tu mân uain rei in zawhin a thar an duh ngai lo; ‘A rei a tha zâwk,’ an ti si a,” a ti a.
Sabbath chungchâng zawh fiahna
1 Tin, heti hi a ni a, Chawlhni vawi khat chu buh hmunahte an kal tlang a; a zirtîrte chuan buhvuite chu an thliak a, an kutphahin an nuai a, an ei a. 2 Tin, Pharisai tute emaw chuan, “Engati nge Chawlhnia tih thiang lo chu in tih ni?” an ti a. 3 Tin, Isuan a chhâng a, “Davida a rilṭâm laia a ṭhiante nêna an thiltih kha, khâng angte pawh kha in chhiar lo vem ni? 4 Khatia Pathian ina a luha, puithiamte chauh lo chuan ei thian loh chhangdah chu a lâka, a eia, a ṭhiante hnêna a pêk ve thu kha,” a ti a. 5 Tin, amah vêkin an hnênah chuan, “Mihring Fapa hi Chawlhni Lal a ni,” a ti a.
Kutzeng tihdam
6 Tin, heti hi a ni a, Chawlhni dangah chuan inkhâwmna inah a lût a, a zirtîr a; tin, chutah chuan mi pakhat kut ding lam zeng a lo awm a. 7 Tin, lehkhaziaktute leh Pharisaite chuan a hêkna tûr an hmuh theih nân, Chawlhnia a tihdam dâwn leh dâwn loh an mitmei a. 8 Nimahsela, anin an rilru chu a hria a, kutzeng hnênah chuan, “Tho la, a laiah ding chhuak rawh,” a ti a. Tin, a tho va, a ding chhuak ta a. 9 Tin, Isuan an hnênah, “Chawlhniah hian tihṭhat nge thiang tihchhiat? Chhandam nge thiang tihhlum? Ka zâwt a che u,” a ti a. 10 Tin, an za chuan a en vêl a, a hnênah, “I kut phar rawh,” a ti a. Tin, a phar a, a kut chu a dam ta a. 11 Chutichuan, an thin tâwtin an puak keh lek lek a, Isua chunga an tih zia tûrah an inrâwn ta a.
Isua zirtîr sâwmpahnihte
12 Tin, chûng lai chuan heti hi a ni a, a chhuak a, ṭawngṭai tûrin tlângah a kal a, Pathian hnênah a ṭawngṭai zankhua a. 13 Tin, khawvâr veleh a zirtîrte chu a ko va; an zîng ata sâwm leh pahnih a thlang a, an hmingah pawh tirhkoh a vuah a; 14 chûngte chu Simona (Petera a vuah bawk kha) leh a unau Andria te, Jakoba leh Johana te, Philipa leh Bartholomaia te, 15 Matthaia leh Thoma te, Alphaia fapa Jakoba te, Simona, Zelota an vuah te, 16 Jakoba fapa Juda te, mi vervêk Juda Iskariota te an ni.
Zirtîr leh tihdam hna
17 Tin, an rualin a kal chhuk a, hmun zâwlah a ding a, a zirtîrte mipui nasa tak nên, Judai ram zawng zawng ata leh Jerusalem khua ata leh, Tura leh Sidon khaw lama tuifinriat kam ata mi tam tak nên, chûngho chu a thu ngai duh leh an nate intihdam duhin an lo kal a ni; 18 tichuan, ramhuai bawlhhlawh sawisakte pawh an lo dam ta a. 19 Tin, a hnên ata thiltihtheihna a chhuaha, mi tin a tihdam avângin mipui zawng zawng chuan amah deh an tum a.
Engthâwlna leh lungngaihna
20 Tin, a dâk chhuak a, a zirtîrte chu a en a. “Nangni retheite u, in eng a thâwl e; Pathian ram in ta a ni si a. 21 Nangni tûna rilṭâmte u, in eng a thâwl e; In la tlai dâwn si a. Nangni tûna ṭapte u, in eng a thawl e; In la nui dâwn si a. 22 “Mihring Fapa avânga miten an huat che ua, an tuithlâr che ua, an hau che ua, in hming a ṭha lo tia an paih bo dêr hunah in eng a la thâwl ang. 23 Chumi niah chuan lâwm ulang, hlimin zuang rawh u; ngai teh u, vânah in lâwmman a awm hnem si a; chutiang bawkin an thlahtuten zâwlneite chungah an tih ṭhin kha. 24 “Amaherawhchu, nangni mi hausate u, in chung a pik e; in thlamuanna in hmu tawh si a. 25 “Nangni tûna tlai puarte u, in chung a pik e; in ril a la ṭâm dâwn si a. Nangni tûna nuite u, in chung a pik e; lungngaiin in la ṭap dâwn si a. 26 “Mi zawng zawngin an fak hunah che u, in chung a la pik ang, chutiang bawkin an thlahtuten zâwlnei derte chunga an tih kha.
Hmêlmate hmangaih
27 “Ka thu ngaitute u, ka hrilh a che u, in hmêlmate chu hmangaih ula, a hua che u chu an ṭhatna tûr ti ula, 28 ânchhe lawhtu che u chu malsâwmsak ula, a sawisatu che u chu ṭawngṭaisak rawh u. 29 “Biang lehlama bêngtu che chu lehlam pawh dawh rawh; tin, i puan lâksaktua hnênah chuan i kawr lâk pawh hnial suh. 30 “A dîltu apiang che hnênah pe rawh; tin, i sum lâksaktu che hnênah chuan dîl leh tawh suh. 31 “Tin, miin in chunga an tiha in duh tûr ang zêlin, mi chungah pawh ti ve rawh u. 32 “Tin, in hmangaitute chauh in hmangaih hian, lawm eng nge in hlawh ang? Mi sualte pawhin an hmangaitute chu an hmangaih ṭhîn asin. 33 Tin, in chunga ṭhate chungah chauh in ṭhat hian, lawm eng nge in hlawh ang? Mi sualte pawhin chutiang bawkin an ti ṭhîn asin. 34 Tin, hmuh leh beiseina hnên chauhva thil in pûktîr hian, lawm eng nge in hlawh ang? Mi sualte pawhin a ngai vêka hmu leh tûrin mi sualte hnênah an pûktîr ṭhîn. 35 Amaherawhchu, in hmêlmate hmangaih ula, an ṭhatna tûr ti ula, pûktîr rawh u, beidawng hauh lovin; tichuan, in lâwmman a tam ang a, Chungnungbera fate in ni bawk ang; ani chuan mi lâwm nachâng hre lote leh mi sualte a khawngaih ṭhîn. 36 In Pain mi a khawngaih angin mi khawngaih ve rawh u.
Mi dang sawisêl
37 “Sawisêl suh u; chutichuan, sawisêlin in awm lo vang; tu mah thiam lovah ruat suh u; chutichuan, thiam lohvin in awm lo vang; ngaidam rawh u; chutichuan, ngaihdamin in awm ang; 38 pe rawh u; chutichuan, pêkin in awm ang; ṭhahnemngai taka teha, beng muka, sâwi muka, liam zawih zawihin in malchungah an pe ang che u. In tehna ngai bawkin an tehsak leh dâwn si che u a,” a ti a. 39 Tin, an hnênah tehkhin thu a sawi a, “Mitdelin mitdel vêk a hruai thei ang em? An pahnihin khuarkhurumah an tla dûn lo vang em? 40 Zirtîr chu a zirtîrtu chungah a awm lo; nimahsela, mi tin an zir zawhin an zirtîrtu angin an awm ang. 41 “Tin, engati nge mahni mita khanchhuk awm chu ngaihtuah si lovin, i unau mita hmawlh tê tak tê awm chu i hmuh ni? 42 Mahni mita khanchhuk awm chu hmu si lovin, i unau hnênah, ‘Unau, i mita hmawlh tê tak tê awm kha mi lâk chhuahtîr rawh,’ engtin nge i tih theih le? Mi vervêk! I mit ata khanchhuk kha la chhuak hmasa rawh; chutichuan, i unau mit ata hmawlh tê tak tê lâk chhuah tûr chu fiah takin i hmu ang.
Thing leh a rah
43 “Thing ṭha rêng rêng rah chhiaa rah a awm lo; thing chhia lah rah ṭhaa rah a awm hek lo. 44 Thing tin anmahni rah ṭheuhvah a hriat a ni. Miin hruihlîngnei kûngah theipui an lo ngai lo, nghardai kûngah grêp rah an lo ngai bawk hek lo. 45 Mi ṭha chuan a thinlung ro bâwm ṭha ata thil ṭhate a theh chhuak ṭhîn a; mi sual chuan a thinlung ro bâwm chhia ata thil chhiate a theh chhuak ṭhîn; thinlunga khat liam chu a kâin a sawi ṭhîn a ni si a.
In satu chi hnih
46 “Tin, nangnin eng atân nge, ka thu zâwm si lova, ‘Lalpa, Lalpa,’ mi tih ṭhin? 47 Mi tin ka hnêna lo kala, ka thu hriaa zâwm apiang chu tu ang nge an nih ka hriattîr ang che u: 48 in satu, thûk taka laia, lungpui chunga lungphûm rema ang chu an ni; tin, tui a lo lenin, tuizangkhauhvin chu mi in chu a khawh a, a tinghîng thei lo va, a sak ngun avângin. 49 Amaherawhchu, hriaa zâwm lo chu, lung phûm lova, lei chung maia in satu ang chu a ni; tin, tuizangkhauhvin chu chu a khawh a, a chim ta nghâl a; chu in sawp chu nasa tak a ni,” a ti a.
Sipai za hotu bawih tihdam
1 Tin, mite beng hriata a thu zawng zawng a sawi zawhin, Kapernaum khuaah a lût a. 2 Tin, sipai za hotu tu emaw a bawih duh tak a damlo va, a thi lek lek a. 3 Tichuan, Isua chanchin a hriat veleh, a bawih rawn tidam tûra ngên chiam tûrin a hnênah Juda-ho upate a tîr a. 4 Tin, anni chu Isua hnênah an va thleng a, ṭhahnemngai takin an ngên chiam a, “Ani hi hei hi i tihsak tlâk a ni e; 5 kan hnamte a hmangaih a, kan inkhâwmna in pawh aman min saksak a ni,” an ti a. 6 Tichuan, Isua chu an hnênah a kal ta a. Tin, in a thlen dâwn hnaihin, sipai za hotu chuan a hnênah a ṭhiante a tîr a, “Lalpa, lo kal harsa suh, ka in chhûng i luhna tlâk a ni lo ve; 7 chuvângin, i hnêna lo kal tlâk pawh niin ka inring lo va; thu chauh sawi la, ka naupang a dam mai ang. 8 Kei pawh mi thua awm ka ni a, ka hnuaiah sipaite an awm a; chu mi kha mi chu, ‘Kal rawh,’ ka tih leh a kal ṭhîn; mi dang hnênah pawh, ‘Lo haw rawh,’ ka tih leh a lo haw ṭhîn; ka bawih hnênah pawh, ‘Hei hi ti rawh,’ ka tih leh a ti ṭhîn,” a ti a. 9 Tin, Isuan chûng thu chu a hriatin amah chu mak a ti hle a, a hawi a, mipui a zuitute hnênah chuan, “Ka hrilh a che u, Israel-te zîngah pawh heti êma rinna nasa hi ka hmu lo,” a ti a. 10 Tin, a mi tirhte chu inah an haw leh a, bawih chu damin an hmu ta a.
Hmeithai fapa kaihthawh
11 Tin, rei lo têan khaw pakhat Nain an tihah chuan a kal a; a zirtîrte leh mipui tam tak a hnênah an kal ve a. 12 Tin, kulh kawngkhâr kiang a thlenin, ngai teh, mitthi an rawn zâwn chhuak a, a nu fapa neih chhun a ni a, a nu chu hmeithai a ni si a; an khuate tam tak chu a hnênah an awm a. 13 Tin, Lalpa chuan hmeithai chu a hmuh veleh a khawngaih êm êm a, “Ṭap suh,” a ti a. 14 Tin, a va hnaih a, hlâng chu a khawih a; tichuan, a zâwntute chu an ding ta a. Tin, “Râwlthar, tho rawh, ka ti a che,” a ti a. 15 Tin, mitthi chu a lo ṭhu chhuak a, a rawn ṭawng ta a. Tin, Isua chuan a nu hnênah a pe ta a. 16 Tin, mi zawng zawngin an hlau va, Pathian an fak a, “Kan zîngah zâwlnei ropui tak a lo awm ta a ni,” an ti a, “Pathianin a mite a rawn tlawh ta a ni,” an ti bawk a. 17 Tin, chumi chungchâng thu chu, Judai ram zawng zawngah leh a kiang vêl ram tinah a thang chhuak ta a.
Baptistu Johana mi tirhte
18 Tin, Johana zirtîrte chuan chûng thu zawng zawng chu Johana an hrilh a. 19 Tichuan, Johanan a zirtîrte pahnih a ko va, Lalpa hnênah chuan a tîr a, “Lo kal tûra chu i ni nge, mi dang kan la ngai ang?” tiin. 20 Tin, mite chu a hnênah an lo thlen chuan, “Baptistu Johanan, ‘Lo kal tûra chu i ni nge, mi dang kan la ngai ang?’ tiin i hnênah min tîr a ni,” an ti a. 21 Tin, chûng lai tak chuan Isuan nate, hripui veite, ramhuai mante tam tak a tidam a, mitdel tam takte pawh an mit a tivâr a. 22 Tin, an hnênah, “Kal leh ta ulang, thil in hmuh leh in hriat hi Johana va hrilh rawh u; mitdelte an mit a lo vâr ta, kebaite kein an lo kal ta, phârte an lo thianghlim ta, bengngawngte pawh an beng a lo vâr ta, mitthite kaihthawhin an awm ta, pachhiaten Chanchin Ṭha hrilh an dawng ta. 23 Tin, tu pawh ka chunga lungnih lohna hmu lo chu an eng a thâwl e,” a ti a, a chhâng a. 24 Tin, Johana tirhkohte chu an hâwn hnuin, Isuan mipui hnênah chuan Johana thu a sawi ta a, “Eng en tûrin nge thlalêra in kal chhuah kha? Luang, thli chhêm nghîn maw? 25 A nih loh leh, eng en tûr berin nge in kal chhuah kha? Puan nêm sin maw? Ngai rawh u, puan ropui sin leh mi nuamsate chu lal inahte asin an awm. 26 A nih loh leh, eng en tûr berin nge in kal chhuah kha? Zâwlnei maw? A nih ngei kha, ka ti a che u, zâwlnei ai pawha ropui zâwk - 27 ‘En teh, ka tirhkoh i hmaan ka tîr a ni, Ani chuan i hmaah i kawng a siam ang,’ tih, a chanchin an ziaka kha, he mi hi a ni. 28 Hmeichhe hrin zîngah Johana aia ropui zâwk an awm lo; nimahsela, Pathian rama mi tê deuh pawh ani ai chuan an ropui zâwk, ka ti a che u,” a ti a. 29 Tin, mi zawng zawngin an hriatin, chhiahkhawntute nên, Johana baptisma lo chang tawh an ni a, Pathian an thiam a. 30 Pharisaite leh dânhretute erawh chu a hnêna baptisma lo chang tawh an ni ve lo va, anmahni tân Pathianin rem a ruatsak kha an duh lo. 31 Chutichuan, Isua vêkin, “Tûnlai chhuante hi eng nên nge ka tehkhin ang le? Eng ang nge nih pawh an nih? 32 Naupang, dâwr hmuna ṭhua, ‘Phênglâwng kan tumsak che u a, in lâm si lo va; kan ṭap vak a, in ṭap si lo va,’ tia inauvate ang hi an ni. 33 Baptistu Johana chu a lo kal a, chhang a ei lo va, uain pawh a in lo va, nangnin, ‘Ramhuai a zâwl a nih hi,’ in ti a. 34 Mihring Fapa a lo kal a, a eiin a in a, nangnin, ‘En teh u, chaw heh mi, uain heh mi, chhiahkhawntute leh mi sualte ṭhian saw!’ in ti si a. 35 Nimahsela, finna chu a rah aṭangin a dikzia a lang a ni,” a ti a.
Pharisai Simonan chaw eiah Isua a sâwm
36 Tin Pharisaite zînga mi pakhatin a hnêna chaw eiah a sâwm a. Tin, Pharisai inah chuan a lût a, chaw a kîl a. 37 Tin, ngai teh, chumi khuaa hmeichhe sual pakhat awm chuan Pharisai inah chaw kîlin a ṭhu tih a hriat veleh, alabasta bâwmin hriak rimtui a rawn keng a, 38 a hnungah a kephah bulah chuan ṭap chungin a ding a, a mittuiin a kephah a lo far huh a, a samin a hru a, a kephah chu a fâwp ngawih ngawih a, hriak rimtui chuan a chulh a. 39 Tin, a sâwmtu Pharisai chuan chu chu a hmuh chuan a rilruin, “He mi hi zâwlnei a nih chuan a dektu hmeichhia hi tu nge a nih, mi eng ang nge a nih hriat âwm tak lah ni, mi sual a ni si a,” a ti a. 40 Tin, Isuan a hnênah, “Simon, i hnênah thu kam khat sawi tûr ka nei,” a ti a, a chhâng a. Tin, ani chuan, “Sawi ta che, Zirtîrtu,” a ti a. 41 Tin, Isuan, “Tangka pûktîrtu tuin emaw leiba pahnih a nei a: pakhatin duli zanga a ba a, pakhatin sawmnga. 42 Tin, rulhna an nei lo va, a ngaihhna- thiam ve ve a. Chutichuan, chu mite chuan a tuin nge ani chu hmangaih zâwk ang?” a ti a. 43 Simona chuan, “A ngaihhnathiam zual zâwka chuan niin ka ring,” a ti a, a chhâng a. Tin, anin a hnênah, “I ti dik e,” a ti a. 44 Tin, hmeichhe lam chu a hawi a, Simona hnênah chuan, “He hmeichhia hi i hmu em? I inah ka lo lût a, nangin ka kephah silna tûr tui mi pe lo va, ani erawh hi chuan a mittuiin ka kephah a tihuh a, a samin a hru a ni. 45 Nangin fawh rêng rêng mi fâwp lo; ani erawh hi chuan ka lo luh tirh ata ka kephah fawh a bâng lo. 46 Nangin ka lu-ah hriak mi thih lo; ani erawh hi chuan ka kephahah hriak rimtui a chulh. 47 Chuvângin, ka ti a che, a sual tam tak kha ngaihdamin a awm ta; ani pawhin a hmangaih ta êm êm a nih hi; amaherawhchu, ngaihdam tlêm chuan tlêmin a hmangaih ṭhîn,” a ti a. 48 Tin, hmeichhe hnênah chuan, “I sualte ngaihdam a ni ta,” a ti a. 49 Tin, a chaw kîlpuite chuan, “Sualte pawh ngaidam hi tu nge maw ni le?” an ti a. 50 Tin, anin hmeichhe hnênah chuan, “I rinna hi chhandam i nih phah a ni; thlamuang takin kal rawh,” a ti a.
Isua zuitu hmeichhiate
1 Tin, heti hi a ni a, nakin deuhvah chuan Isuan thuhril leh Pathian ram Chanchin Ṭha thlen chungin, khaw lian leh khaw tête a fang zêl a, a hnênah sâwm leh pahnihte chu an awm a, 2 hmeichhia tute emaw ramhuaizâwl dam lehte leh na dam lehte nên. Chûng hmeichhiate chu Mari, a kawchhûng ata ramhuai pasarih chhuak, Magdalini an tih te; 3 Heroda sum enkawltu Chuza nupui Joani te, Susani te, mi dang tam takte nên an ni; chûngte chuan mahni neihin a rawng an bâwlsak ṭhîn.
Buh chi thehtu tehkhin thu
4 Tin, mipui tam tak an rawn inkhâwm a, khaw tina mi a hnêna an lo kalin, tehkhin thuin thu a sawi a: 5 “Buh chi thehtu a buh chi thehin a feh a; tin, a theh laiin a ṭhen kalkawng dungah a tla a, miin an rap a, chunglêng savaten an tlân zo ta a. 6 Tin, a ṭhen pialtlêp chungah a tla a; tin, a ṭiah veleh a hnâwn loh avângin a râwp ta mai a. 7 Tin, a ṭhen hnimhlîngnei zîngah a tla a, hnim chuan a ṭo rualpui a, a dîp ral ta a. 8 Tin, a ṭhen lei ṭhaah a tla a, a lo ṭo va, a leh zain a rah ta a,” a ti a. Tin, chûng thu chu a sawi laiin a au va, “Tu pawh hriatna tûra beng nei chuan hre rawh se,” a ti a.
Tehkhin thu sawi chhan
9 Tin, a zirtîrte chuan a hnênah, “He tehkhin thu hi eng tihna nge ni?” tiin an zâwt a. 10 Tin, ani chuan, “Pathian ram thurûkte chu nangni hriat zawng phal a ni a, mi dang hnênah erawh chuan tehkhin thu chauhvin sawi a ni; hmu mah sela, hmu lo an nih theih nân, bengin hre mah sela, a ngaihna an hriat theih loh nân.
Buh chi thehtu tehkhin thu hrilhfiahna
11 “Tehkhin thu kha hei hi a ni: buh chi chu Pathian thu a ni. 12 Tin, kawng dunga mi chu thu hre tawhte hi an ni; tin, Diabola chu a lo kal a, an awih lohva, chhandam an nih theih loh nân an rilru ata chu a lâksak ṭhîn. 13 Tin, pialtlêp chunga mi chu hêng mi hi an ni: an hriat veleh thu chu lâwm taka pawmte hi; nimahsela, zung rêng an nei lo, rei lo tê chauh an awih a, thlêm an nih hunin an bânsan leh ṭhîn. 14 Tin, hnimhlîngnei zînga tla chu hêng mi hi an ni: an hriat hnuin an kal a, dam chhûng khawsak lungkhamnate, hausaknate, nawmsaknate chuan a dîp a, an rah puitling ṭhîn lo a ni. 15 Lei ṭhaa mi erawh chu hêng mi hi an ni: rilru fel leh ṭhain thu an hria a, an vawng reng a, chhel takin an rah ṭhîn.
Kho hnuaia khâwnvâr
16 “Tu mân khâwnvâr hâlin bêlin an khuh lo, khum hnuaiah pawh an dah lo; a lût apiangin a êng an hmuh theih nân a dahnaah an dah zâwk ṭhîn a ni. 17 Puan loh tûra zêp eng mah a awm lo va, hriat loh tûr leh lang lo tûra thuhrûk eng mah a awm hek lo. 18 Chutichuan, eng angin nge in hriat fîmkhur rawh u: tu pawh a nei apiang an pêk belhchhah ang a; tu pawh a nei lo apiang, neia an inruat chhun pawh an lâksak ang,” a ti a.
Isua nu leh unaute
19 Tin, a nu leh a unaute chuan Isua lam an rawn pan a; nimahsela, mipui avâng chuan a kiang an thleng thei si lo. 20 Tin, “I nu leh i unaute nangmah hmuh tumin pâwnah sâwn an ding reng e,” tiin an hrilh a. 21 Tin, ani chuan an hnênah, “Hêng Pathian thu hriaa awihte hi ka nu leh ka unaute an ni e,” a ti a, a chhâng a.
Thlipui hau reh
22 Tin, heti hi a ni a, chûng lai chuan ni khat chu lawngah a chuang a, a zirtîrte nên; tin, an hnênah, “Dîl râl lehlamah sâwn i kai ang u,” a ti a. Tichuan, lawng chu an phelh a, an kal ta a. 23 Tin, an kal laiin Isua chu a lo muhîl ta a; tin, dîlah chuan thlipui a lo tleh chhuk phut a, an lawng chu tuiin a khat dâwn a, hlauhthâwnawm takin an awm ta a. 24 Tin, a hnênah an va kal a, an kaitho va, “Zirtîrtu, Zirtîrtu, kan boral dâwn hi le,” an ti a. Tin, ani chu a lo harh a, thli leh tuifâwn chu a hau ta a; tin, a bâng a, a reh ta mai a. 25 Tin, an hnênah “Khawiah nge in rinna?” a ti a. Tin, an hlau va, mak an ti hle a, “He mi hi tu nge ni le? Thli leh tui lam pawh thu a pe a, an awih hi?” an ti hlawm a.
Gerasin ramhuaizâwl tihdam
26 Tin, Galili ram zâwna Gerasin mite ram chu an thleng a. 27 Tin, khawmuala a chhuahin, khuaa mi ramhuai man tuin emaw a rawn tâwk a; chu mi chu rei tak puan rêng rêng sin lovin a awm a, inah rêng pawh a awm lo va, thlânahte a awm zâwk ṭhîn a. 28 Tin, Isua a hmuh veleh a au va, a hmaah a bawkkhup a, aw ring takin, “Isu, Pathian Chungnungbera Fapa, kei leh nang eng nge kan inzâwlna awm? Mi nghaisa lul suh ang che, ka ngên a che,” a ti a. 29 (Isuan ramhuai bawlhhlawh chu, chu mi kawchhûng ata chu chhuak tûrin thu a lo pe tawh si a. Chu mi chu ramhuai chuan a man fo ṭhîn a ni; miten khaidiat leh kawl an buntîr a, an vêng reng ṭhîn a; nimahsela, a phuarnate a tichat a, ramhuaiin thlalêrahte a hnawt chhuak ṭhîn.) 30 Tin, Isuan, “I hming eng nge ni?” tiin a zâwt a. Tin, ani chuan, “Nuaia,” a ti a (a kawchhûnga ramhuai tam tak an luh avângin). 31 Tin, leilâwta kal thu an hnêna pe lo tûrin Isua hnênah an ngên a. 32 Tin, chutah chuan tlângah vawk rual tam tak an tla a; tin, a hnênah vawk kawchhûnga luh an dîl a. Tin, ani chuan thu a pe a. 33 Tin, ramhuaite chu chu mi kawchhûng ata chu an chhuak a, vawk kawchhûngah chuan an lût ta a; tin, vawk rual chu khâmah an tlân chhuk chiam a, dîlah an tlân lût a, tui hâkin an thi ta a. 34 Tin, a vulhtute chuan chu thil awmzia chu an hmu a, an tlân a, khuaah leh lovahte chuan an sawi a. 35 Tin, “Eng nge lo ni ta?” tia en tûrin an chhuak hlawm a; tin, Isua hnên an lo thleng a, ramhuai chhuahsan hnua chu puan sina rilru pângngai puin, Isua ke bula ṭhu an rawn hmu a; tichuan, an hlau ta a. 36 Tin, a hretute chuan ramhuai man a tihdamzia thu chu chûngho chu an lo hrilh a. 37 Tin, a vêl Gerasin rama mi zawng zawng chuan an hlauh êm avângin, ani chu an hnên ata kal bo tûrin an ngên a; tin, lawngah a chuang a, a kîr leh ta a. 38 Tin, ramhuai chhuahsan hnua erawh kha chuan Isua hnêna awm reng a ngên a. 39 Nimahsela, Isuan, “I inah haw la, Pathianin i tân thil a tihsak che hi a ropuizia va hrilh rawh,” tiin a kaltîr ta a. Tichuan, a kal a, khawpui chhûng zawng zawngah chuan, Isuan a tân thil a tihsak ropuizia chu a tlângaupui a.
Jaira fanu leh hmeichhe thi pût tihdam
40 Tin, Isua a lo kîr leh chuan mipuiin amah an lâwm a; amah lo nghâk reng an ni hlawm si a. 41 Tin, ngai teh, mi pakhat a hming Jaira, inkhâwmna in hotu chu a lo kal a, Isua ke bulah a bawkkhup a, a ina kalah a ngên a; 42 fanu mal kum sâwm leh kum hnih emaw lai tûr a nei a, chu mi chu thichhâwnga a lum reng avângin. Tin, Isua a kal laiin mipuihovin an nêk huai huai a. 43 Tin, hmeichhe pakhat, kum sâwm leh kum hnih thi pûtin a damlo va, a sum neih zawng zawng chu dâktawrte lakah a dek ral zo tawh a; tu mahin an tidam thei tawh si lo va; 44 chu mi chu a hnungah a lo kal a, a puan hmâwr a dek a; chawplehchilhin a thi pût chu a lo reh ta nghâl a. 45 Tin, Isuan, “Mi dek kha tu nge ni?” a ti a. Tin, “Kei chu ka ni lo,” an ti ṭheuh va. Petera leh a ṭhianten, “Zirtîrtu, mipuiin an nêk huai huai chia, an chîl huai huai che alâwm,” an ti a. 46 Nimahsela, Isuan, “Tuin emaw zawng mi dek a ni, thiltihtheihna ka chhûng ata a chhuak tih ka hre nghe nghe asin,” a ti a. 47 Tin, hmeichhia chuan a inthup theih loh a hria a, khûr chungin a lo kal a, a hmaah a bawkkhup a, a deh chhan leh chawplehchilha a dam tâk nghâlzia chu mi zawng zawng hmuhah chuan a sawi ta a. 48 Tin, ani chuan a hnênah, “Ka fanu, i rinna hi i dampui a ni e; thlamuang takin kal rawh,” a ti a. 49 A la ṭawng lai mêkin, inkhâwmna in hotu in ata chu mi pakhat a lo kal a, “I fanu a thi ta, Zirtîrtu hi tihah duh suh,” a rawn ti a. 50 Isua erawh chuan chu thu a hriat chuan, “Hlau suh, ring mai rawh; chutichuan, a dam leh ang,” a ti a, a chhâng a. 51 Tin, in chu a va thlen chuan Petera te, Johana te, Jakoba te, naupang nu leh pate chauh lo chu tu mah luh ve a phal lo va. 52 Tin, an zain an lo ṭap tuar tuar a, an âwm an chûm an chûm a; chutichuan, ani chuan, “Ṭap suh u, a thi lo ve, a muhîl a ni zâwk,” a ti a. 53 Tin, a thi tawh rengin an hre si a, an nuihsan ta mai a. 54 Isua erawh chuan a kut a chelh a, “Chêmtê, tho rawh,” a ti a, a ko va. 55 Tin, a thlarau chu a lo kîr leh a, a tho ta nghâl a; tin, englo ei tûr pêk thu a pe a. 56 Tin, a nu leh a pa chuan mak an ti hle a; nimahsela, ani chuan a thiltih chu tu mah hrilh lo tûrin a ti tlat a.
Sâwmpahnihte tirh chhuah
1 Tin, Isuan sâwm leh pahnihte chu a ko khâwm a, ramhuai zawng zawng chunga thiltihtheihna leh thuneihna leh nate tihdam theihna a pe a. 2 Tichuan, Pathian ram thu hril tûr leh damlote tidam tûrin a tîr chhuak ta a. 3 Tin, an hnênah, “Zinna atân tiang emaw, iptê emaw, chhang emaw, tangka emaw eng mah keng suh u; kawr pahnih pawh nei suh u. 4 Tin, in thlenna in apiangah thleng reng zêl ang che u, chu mi in aṭang chuan chhuak ang che u. 5 Tin, a lâwm lo che u apiang chu, chumi khua ata in chhuah hun chuan, anmahni hriattîrna tûrin, in kephaha vaivut chu thing thla ang che u,” a ti a. 6 Tichuan, an kal ta a, khua an fang zêl a, ram tinah Chanchin Ṭha an hril a, mi an tidam zêl a.
Heroda a inngaihtuah buai
7 Tin, Lal Herodan a thiltih zawng zawng chu a lo hre ta a; ṭhenkhatin, “Johana kha a nung leh ta a nih hi,” an tiha, 8 ṭhenkhatin, “Elija a rawn inlâr ta a nih hi,” an tih avângin a mangang ta a. 9 Tin, Herodan, “Johana chu a lu ka tan tawh kha; nimahsela, heti kauva a thu ka hriat ṭhina hi tu nge ni?” a ti a. Tin, amah chu hmuh a tum ta a.
Mipui sângnga hrai
10 Tin, tirhkohte chu an lo hâwn lehin, a hnênah an thiltihte an hrilh a. Tin, ani chu anmahni hruaiin, Bethsaida khua an tihah chuan a kal hrang ta a. 11 Nimahsela, mipuiho chuan an hria a, an zui zêl a; tin, ani chuan anni chu a lo lâwm a, Pathian ram thu a hrilh a, tihdam ngai apiang a tidam a. 12 Tin, khua chu a lo tlai dâwn ta a; tin, sâwm leh pahnihte chu an lo kal a, a hnênah, “Kan kiang vêl khuaahte leh lovahte kalin, thlen in leh ei tûr an hmuh theihna tûrin mipui hi kaltîr ta che; hei, thlalêr hmuna awm kan ni si a,” an ti a. 13 Ani erawh chuan an hnênah, “Nangmahnin ei tûr pe rawh u,” a ti a. Tin, anni chuan, “Hêng mi zawng zawng tân hian ei tûr kan va leisak loh chuan, chhangpêr panga leh sangha pahnih chauh lo chu eng mah kan nei lo,” an ti a. 14 (Patling hlîr pawh sângnga emaw lai an ni si a.) Tin, a zirtîrte hnênah, “A pâwl pâwlin ṭhuttîr rawh u, sawmnga vêl zêlin,” a ti a. 15 Chutiang chuan an ti a, an ṭhuttîr ta vek a. 16 Tin, chhangpêr panga leh sangha pahnih chu a la a, vân lam enin mal a sâwm a, a phel a, mipui hmaa hlui tûrin a zirtîrte hnênah chuan a pe a. 17 Tin, an ei a, an puar ta vek a; tin, an ei bângnawi chu bâwmrâng sâwm leh pahnih an rût khat a.
Peteran Isua nihna a sawi
18 Tin, heti hi a ni a, Isua amah chauhva a ṭawngṭai laiin a zirtîrte chu a hnênah an awm a; an hnênah, “Mipuiten tu nge a ni mi tih?” tiin a zâwt a. 19 Tin, anni chuan, “ ‘Baptistu Johana a ni,’ an ti chia; nimahsela, ṭhenkhat erawh chuan, ‘Elija a ni,’ an ti chia; ṭhenkhatin, ‘Hmânlai zâwlnei tua emaw a tholeh ta a ni,’ an ti che,” tiin an chhâng a. 20 Tin, ani chuan an hnênah, “ A nih leh, nangnin tu nge a ni mi tih?” a ti a. Tin, Peteran, “Pathian Krista chu,” tiin a chhâng a.
A tuar leh thih tûr thu Isuan a sawi lâwk
21 Tin, chumi thu chu tu mah hrilh loh tûr ti tlatin thu a pe a; 22 “Mihring Fapa hian thil tam tak a tuar tûr a ni a, upate, puithiam lalte, lehkhaziaktute duh lohvin a awm tûr a ni a, thahin a awm tûr a ni a, ni thum niah kaihthawhin a awm bawk tûr a ni,” a ti a. 23 Tin, amah vêkin mi zawng zawng hnênah, “Tu pawhin mi zui a duh chuan, mahni hrehawm pawisa lovin, ni tin a kraws puin mi zui rawh se. 24 Tu pawh a nun humhim duh apiangin a chân ang a; tu pawh keimah avânga a nun chân apiangin, chu mi ngei chuan a humhim ang. 25 Miin khawvêl hi a pumin nei sela, intiboralin emaw intichhe si sela, a tân eng nge sâwt ang? 26 Tu pawh keimah leh ka thu zahpui apiang, Mihring Fapa hian ama ropuina nên, a Pa ropuina nên, a vântirhkoh thianghlimte ropuina nên a lo kal hunah chuan, chu mi chu a rawn zahpui ang. 27 Dik takin ka hrilh a che u, heta dingho a ṭhente hi, Pathian ram an hmuh hma loh chuan thihna tem tawp lo tûr an awm,” a ti a.
Hmêl danglam
28 Tin, heti hi a ni a, chûng thusawi achin ni riat emaw laiah, Isuan Petera te, Johana te, Jakoba te chu a hruai a, ṭawngṭai tûrin tlângah a kal chho va. 29 Tin, a ṭawngṭai laiin a hmêl awmzia chu a lo danglam a, a silhfênte chu a lo vâr a, mi ênkhalh theiin a lo awm ta a. 30 Tin, ngai teh, mi pahnih amah nên an inbia a, chu mite chu Mosia leh Elija an ni a; 31 ropuinaa inthuamin an inlâr a, Jerusalem khuaa a thih tleitlâkna tûr thu an sawi a. 32 Petera leh a ṭhiante erawh chu an muthlu a; tin, an harh veleh a ropuizia leh a hnêna mi pahnih ding chu an hmu ta a. 33 Tin, heti hi a ni a, chu mite chuan Isua an ṭhen dâwn laiin, Peteran Isua hnênah, “Zirtîrtu, kan tân heta awm hi a ṭha e; bâwktê pathum kan khawh ang e; i tân pakhat, Mosia tân pakhat, Elija tân pakhat,” a ti a - a thusawi pawh hre lovin. 34 Tin, chûng thu chu a sawi laiin chhûm a lo zîng a, anmahni a hliah ta a; chhûmah chuan an luh laiin an hlau va. 35 Tin, chhûmah chuan aw a lo chhuak a, “Hei hi ka Fapa, ka thlana chu a ni, ama thu ngai rawh u,” a ti a. 36 Tin, aw chu a reh veleh Isua chu amah chauhvin an hmu ta a. Tin, an ngawi reng a, chûng lai vêl chuan an thil hmuh chu tu mah eng mah an hrilh lo.
Ramhuaizâwl naupang tihdam
37 Tin, heti hi a ni a, a tûkah tlâng ata chu an chhuk hnu chuan, mipui tam takin amah chu an lo hmuak a. 38 Tin, ngai teh, mipui zîngah chuan mi pakhat a au va, “Zirtîrtu, ka fapa en tûrin ka ngên a che, ka fapa neih chhun a ni si a. 39 Ngai teh, ramhuaiin a man ṭhîn a, a au chhuak thut ṭhîn; tichuan, a chilphuante tla khawpin a sawisa ṭhîn a, nasa taka tihthitlinin a kalsan ṭâwk ṭhîn. 40 Tin, i zirtîrte hnênah hnawt chhuak tûrin ka ngên a; an thei si lo va,” a ti a. 41 Tin, Isuan, “Ṭhangthar rinna nei lova tihmawhte u, eng chen nge in hnênah ka awm anga, ka ngaihtheih ang che u? I fapa chu hetah rawn hruai rawh,” a ti a, a chhâng a. 42 Tin, a lo kal laiin ramhuai chuan a titlu vak a, nasa takin a sawisa ta a. Nimahsela, Isuan ramhuai bawlhhlawh chu a hau va, naupang chu a tidam a, a pa hnênah chuan a kaltîr leh ta a. 43 Tin, mi zawng zawng chuan Pathian ropuizia chu mak an ti hle a.
A thih tûr thu a sawi nawn
Chutichuan, mi zawng zawngin a thiltih zawng zawng chu mak an tih lai chuan Isuan a zirtîrte hnênah, 44 “Hêng thu hi in bengah lût rawh se: Mihring Fapa hi mihringte kutah mantîrin a awm dâwn si a,” a ti a. 45 Nimahsela, a thusawi chu a ngaihna an hre lo va, an hriat theih loh nân a inthup a ni, a thusawi chu amah lah an zâwt ngam si lo va.
Tu nge ropui ber?
46 Tin, “Kan zîngah tu nge ropui ber ang?” tiin an lo inhnial a. 47 Tichuan, Isuan an rilrua an ngaihtuah chu a hria a, naupang tê a kai a, a sîrah a dintîr a, 48 an hnênah, “Tu pawh ka hming avânga he naupang tê hi lâwm apiang chu keimah mi lâwm an ni ang; tu pawh kei mi lâwm apiang chu mi tîrtu lâwm an ni ang; in zavaia zînga tê ber hi a ni ropui ni,” a ti a.
Dodâl lo che u chu in lama ṭang an ni
49 Tin, Johana chuan, “Zirtîrtu, tu emaw i hminga ramhuaite hnawt chhuak kan hmu a, kan zuinaah che a tel ve loh avângin kan khap ta asin le,” a ti a. 50 Isua erawh chuan a hnênah, “Khap tawh suh u; tu pawh nangni dodâl lo chu in lama ṭang an ni si a,” a ti a.
Samari khuain Isua an lâwm lo
51 Tin, heti hi a ni a, amah hruai chhoh a hun dâwnin, Jerusalem khuaa kal tumin a hawi tlat a, 52 a hmaah a zirtîrte a tlântîr a; tin, an kal a, amah lo buatsaihsak tûrin Samari mite khaw pakhatah an lût a. 53 Tin, a mitmei chu Jerusalem khaw lam pana a lan avângin amah an lo lâwm lo. 54 Tichuan, a zirtîr Jakoba leh Johana chuan chu chu an hriat veleh, “Lalpa, hêngho kan vek nân hian vân ata mei ko thla ila rem i ti em?” an ti a. 55 Ani erawh chu a lehhawi a, a kamkhat a. 56 Tin, khaw dangah an kal ta a.
Isua zui duhtute
57 Tin, kalkawnga an kal laiin tuin emaw a hnênah, “I kalna apiangah ka zui ang che,” a ti a. 58 Tin, Isuan a hnênah, “Sihalten kua an nei a, chunglêng savate pawhin bu an nei a, Mihring Fapa erawh hi chuan a lu nghahna a nei lo,” a ti a. 59 Tin, mi dang hnênah, “Mi zui rawh,” a ti a. Nimahsela, ani chuan, “Lalpa, ka pa mi vuitîr zet rawh,” a ti a. 60 Isua erawh chuan a hnênah, “Mitthiin anmahni mitthi chu vui rawh se; nang chuan Pathian ram thu va hril darh zâwk rawh,” a ti a. 61 Tin, mi dang pawhin, “Lalpa, ka zui ang che; amaherawhchu, ka ina mite ṭawng ṭhain mi thlahtîr zet rawh,” a ti a. 62 Tin, Isuan a hnênah, “Tu pawh leilehnaa kut nghata hnung lam en chu, Pathian ram mi ni tlâk a ni lo ve,” a ti a.
Sawmsarihte tirh chhuah
1 Tin, chumi zawhah chuan Lalpan mi dang sawmsarih a ruat a, a kalna tûr khaw tinah leh hmun tinah, a hmaah pahnih zêlin a tîr a. 2 Tin, an hnênah, “Buh seng tûr a tam hle a; nimahsela, a thawktute an tlêm; chutichuan, a buh seng tûra thawktu tûrte tîr tûrin buh Neitupa hnênah chuan ngên rawh u. 3 “Kal rawh u; ngai teh u, chinghne zînga berâmno awm angin ka tirh che u hi. 4 Tangka ip te, iptê te, pheikhawk te keng suh ula, kalkawngah tu mah chibai bûk suh u. 5 Tin, in luhna in apiangah a hmasa berin, ‘He inah hian thlamuanna thleng rawh se,’ ti ang che u. 6 Tin, chutah chuan thlamuanna fa a awm chuan, in thlamuanna thu chu a chungah a awm reng ang; a awm loh erawh chuan in chungah a lo kîr leh ang. 7 Chumi inah chuan awm reng ula, an pêk apiang che u eiin bâr ang che u; hnathawktu chu hlawh hmu tlâk a ni a. In tinah kal lâwr suh ang che u. 8 “Tin, khua in luhna apiangah an lawm che u chuan, an hlui apiang che u chu ei ang che u; 9 an khuaa damlo awmte pawh tidam ula, an hnênah, ‘Pathian ram in kiangah a lo thleng ta,’ ti ang che u. 10 Khua in luhna apiangah an lawm loh che u erawh chuan, an kawtthlêrahte kal chhuak ula, 11 ‘In khaw vaivut kan kephaha kai pawh hi in chungah kan tah fai hi; nimahsela, Pathian ram in kiangah a lo thleng ta tih hi hre rawh u,’ ti ang che u. 12 Ka ti a che u, chumi niah chuan chumi khuate tuar tûr ai chuan Sodom khaw tuar tûr chu a zia a awm zâwk ang.
Ring duh lo khuate
13 “Korazin, i chung a pik e! Bethsaida, i chung a pik e! Nangmahnia thil mak tak tihte kha Tura leh Sidon khuaa tih ni sela, saiip puan sina vut zînga ṭhuin an sim daih tawh ang. 14 Nimahsela, ngaihtuah niah chuan nangni tuar tûr ai chuan Tura leh Sidon khaw tuar tûr chu a ziaawm zâwk ang. 15 Tin, nang Kapernaum, vân thlengin chawimawi i ni dâwn em ni? Mitthi khaw thlenga nam thlâk asin i nih dâwn. 16 “Tu pawh nangni thu ngai chu keima thu ngai a ni e; tu pawh a duh lo che u chu kei mi duh lo a ni e; tu pawh kei mi duh lo chu mi tîrtu duh lo a ni e,” a ti a.
Sawmsarihte lo kîr leh thu
17 Tin, sawmsarihte chu lâwm takin an lo hâwng a, “Lalpa, ramhuaite pawh i hming avângin kan thu thuin an awm,” an ti a. 18 Tin, ani chuan an hnênah, “Ṭêk anga Setana vân aṭanga a lo tla kha ka hmu asin. 19 Ngai teh u, rûlte, khawmualkaikuangte rah theihna thu ka pe che u a; eng mahin a tina tawp lo vang che u. 20 Nimahsela, ramhuaite in thu thua an awm avâng hian lâwm suh u; vâna in hming ziak a nih avângin lâwm zâwk rawh u,” a ti a.
Isua a lâwm
21 Tin, chumi lai tak chuan Isua chu Thlarau Thianghlimah a lâwm êm êm a, “Aw ka Pa, lei leh vân Lalpa, nangin mi fing leh mi bengvârte hnênah hêng thu hi i zêpa, nausênte hnêna i puan avâng hian ka fak a che; a ni, ka Pa, chutiang tih chu i ngaihin a ṭha a ni. 22 Ka Pain engkim mi kawltîr tawh, Fapa chu tu nge a nih, Pa lo chuan tu mân an hre lo; Pa pawh chu tu nge a nih, Fapa leh an hnêna Fapain a puan duhnate chauh lo chuan tu mân an hre lo,” a ti a. 23 Tin, zirtîrte lam a hawi a, a rûkin, “In thil hmuhte hi a hmuhna mitte chu a vânnei e! 24 Ka ti a che u, zâwlnei tam tak leh lal tam takte pawhin in thil hmuhte hi hmuh an châk ṭhîn a; nimahsela, an hmu si lo; benga in hriatte pawh hi hriat an châk ṭhîn a; nimahsela, an hre si lo a ni,” a ti a.
Samari mi ṭha tehkhin thu
25 Tin, ngai teh, dân hretu tu emaw a ding a, amah fiah nân, “Zirtîrtu, chatuana nun neihna tûrin engtin nge ka tih ang?” a ti a. 26 Tin, ani chuan a hnênah, “Dân lehkhabuah eng nge inziak ni? Chutah chuan eng nge i chhiar ṭhin?” a ti a. 27 Tin, ani chuan, “ ‘Lalpa i Pathian chu i thinlung zawng zawngin, i thlarau zawng zawngin, i chakna zawng zawngin, i rilru zawng zawngin i hmangaih tûr a ni,’ ‘Nangmah i inhmangaih angin i vêngte pawh i hmangaih tûr a ni,’ tih hi,” a ti a, a chhâng a. 28 Tin, ani chuan a hnênah, “I chhâng dik zet mai e; chutiang chuan ti la, i nung ang,” a ti a. 29 Ani erawh chuan thiam inchantîr a tum a, Isua hnênah, “A nih leh, ka vêngte chu tute nge ni?” a ti a. 30 Isuan a chhâng a, “Tu emaw Jerusalem khua aṭangin Jeriko khuaah a zuk kal dâwn a, suam hmangte a tâwk hlauh va, chu mite chuan a silhfên an hlihsak vek a, an vaw nek a, thi lek lekin an kalsan ta a. 31 Tin, puithiam tu emaw chumi kawngah chuan a zuk kal kher a, a hmuh veleh kawng sîr lehlamah a hêl ta mai a. 32 Tin, chutiang bawkin Levia chi mi pakhat pawhin, chumi hmun chu a lo thleng a, a hmuh veleh kawngsîr lehlamah a hêl ve ta mai a. 33 Amaherawhchu, Samari rama mi tu emaw a zin kalin a awmna chu a lo thleng a, a hmuh veleh a khawngaih êm êm a, 34 a hnênah a va kal a, a pemahte chuan hriak leh uain a leih a, a tuam a, ama sa chungah a chuantîr a, khualbûkah a kalpui a, a enkawl ta a. 35 Tin, a tûkah chuan duli pahnih a phawrh a, khualbûk vêngtu hnênah a pe a, ‘Lo enkawl la, hemi bâka i sên zawng chu ka lo kîr leh hunah ka rawn rûl leh ang che,’ a ti a. 36 “Chu mite pathum zîngah chuan, suam hmangho tâwka vêngte chu tu ber nge nia i rin?” a ti a. 37 Tin, ani chuan, “A khawngaihtu chu,” a ti a. Tin, Isuan a hnênah, “Nang pawh chu ang bawk chuan va ti ve rawh,” a ti a.
Isuan Marthi leh Mari a tlawh
38 Tin, an zin pahin khaw engah emaw a lût a; tin, hmeichhe pakhat a hming Marthiin a lo thleng a. 39 Chu mi chuan laizâwn pakhat a nei a, a hming chu Mari a ni a, chu mi chu Lalpa ke bulah a ṭhu a, a thu a ngaithla a. 40 Marthi erawh chu rawngbâwl ngawtin a buai hle a; tichuan, a hnênah a lo kal a, “Lalpa, ka laizâwnnun keimah chauh rawngbâwl tûra mi thlahthlam hi pawi i ti lo vem ni? Mi pui tûrin ti rawh khai,” a ti a. 41 Tin, Lalpan, “Marthi, Marthi, thil tam tak i ngaihtuah a, i buai a nih hi; 42 thil pakhat chauh a pawimawh e: Marin chan ṭha chu a thlang a, chu chu lâk sak tûr a ni lo ve,” a ti a, a chhâng a.
Ṭawngṭai chungchâng zirtîrna
1 Tin, heti hi a ni a, Isua khawii hmunah emaw a ṭawngṭai a, a ṭawngṭai zawh chuan a zirtîr pakhatin a hnênah, “Lalpa, ṭawngṭai dân Johanan a zirtîrte a zirtîr ang khân min zirtîr ve ta che,” a ti a. 2 Tin, ani chuan an hnênah, “In ṭawngṭai chuan heti hian ti ang che u, ‘Kan Pa, I hming zahawm rawh se. I ram lo thleng rawh se. 3 Ni tin kan ei khawpin chaw min pe ang che. 4 Kan sualte min ngaidam ang che, Keini pawhin kan englo bâte zawng zawng kan ngaidam ṭhîn a ni. Thlêmnaah min hruai lût suh ang che,’ ” a ti a. 5 Tin, amah vêkin an hnênah, “In zîngan tuin emaw ṭhian nei sela, zanlaiah a hnêna kalin, ‘ṭhiana, chhangpêr pathum mi pûktîr rawh; 6 ka ṭhian zinin mi rawn tlawh a, a hmaa hlui tûr eng mah ka nei si lo,’ ti sela; 7 in chhûnga miin, ‘Mi tibuai suh; tûnah zawng kawng khâr a ni a, ka fate pawh ka hnênah khumah an mu tawh a; thovin ka va pe thei lo va che,’ tiin chhâng sela; 8 ka ti a che u, a ṭhian a nih avângin thovin a va pe lo na a, a dîl ngut ngut avângin thovin a duh zât apiang a va pe ang. 9 “Chutichuan, ka ti a che u, dîl rawh u; tichuan, an pe ang che u; zawng rawh u; tichuan in hmu ang; kik rawh u; tichuan, an hawnsak ang che u. 10 Tu pawh a dîl apiang chuan an hmu ṭhîn a, tu pawh a zawng chuan an hmu ṭhîn a, tu pawh a kik chu an hawnsak dâwn a ni. 11 Nangniho zînga pa hi, a fapain chhangpêr dîl sela, tu nge lung pe ang? A nih leh, sangha dîl sela, tu nge sangha aiah rûl pe ang? 12 A nih leh, artui dîl sela, khawmualkaikuang a pe ang em ni? 13 Chutichuan, nangni mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu Thlarau Thianghlim a va pe dâwn êm!” a ti a.
Isua leh Beelzebula
14 Tin, Isuan ramhuai ṭawngtheilo pakhat a hnawt chhuak a. Tin, heti hi a ni a, ramhuai chu a chhuah veleh ṭawngtheilova chu a lo ṭawng ta a; tichuan, mipui chuan mak an ti hle a. 15 Nimahsela, a ṭhen chuan, “Ramhuai lal Beelzebula avângin alâwm ramhuaite a hnawh chhuah ṭhin ni,” an ti a. 16 Tin, a ṭhenin amah fiah nân vân ata chhinchhiahna an dîl a. 17 Ani erawh chuan an ngaihtuahte chu a lo hria a, an hnênah, “Khawii ram pawh mahni indo apiang an boral ṭhîn; chhûngkhat pawh mahni indo chu an boral ṭhîn. 18 Setana pawh mahni a indo chuan, a ram engtin nge a din chhuah ang? ‘Beelzebula avângin ramhuaite a hnawt chhuak,’ mi ti si a. 19 Tin, kei hi Beelzebula avânga ramhuaite hnawt chhuak ṭhîn ka lo nih chuan, in faten tu vângin nge an lo hnawh chhuah ṭhin le? Chuvângin, anni chu nangmahni ngaihtuahtu tûrte an ni ang. 20 Amaherawhchu, kei hian Pathian kutzung avânga ramhuaite hnawt chhuak ṭhîn ka nih chuan, Pathian ram in hnênah a lo thleng tawh a ni ang. 21 “Mi chak chuan hriam famkim kenga a in a vên chhûng zawng, a sum chu him takin a awm reng ṭhîn; 22 nimahsela, a aia chak zâwkin a rawn beiha, a hneh hun chuan a inrinna râlthuam famkim chu a chhuhsak a, a sum a lâksak chu a sem darh ṭhîn. 23 Tu pawh ka lama ṭang lo chu mi do a ni; tu pawh mi lâk khâwmpui lo chuan a tidarh a ni.
Ramhuai bawlhhlawh kîr leh
24 “Ramhuai bawlhhlawh chu, mi kawchhûng ata a chhuahin, chawlhna zawngin tui awm lohna hmunahte a vâk a vâk ṭhîn a; tin, chawlhna rêng rêng a hmu lo va, ‘Ka chhuahna inah khân ka kîr leh mai ang,’ a ti a; 25 tin, a va thlen chuan phiah faia chei mawiin a hmu a. 26 Chu veleh a va kal a, amah aia sual zâwk ramhuai dang pasarih a rawn hruai a, chutah chuan an lût a, an awm reng ṭhîn a; chu mihringa awmze hnuhnûng chu a hmasa aiin a lo ṭha lo zâwk ṭhîn a ni,” a ti a.
Hlimna dik tak
27 Tin, heti hi a ni a, chûng thute chu a sawi laiin, mipui zîngan hmeichhia tu emaw a lo au chhuak a, a hnênah, “I paina pum chu a hamṭha e, i hnute hnêk pawh,” a ti a. 28 Ani erawh chuan, “A ni; nimahsela Pathian thu hriaa zâwmte hi mi hamṭha an ni zâwk e,” a ti a.
Chhinchhiahna phût
29 Tin, mipuite chu a hnêna an rawn inkhâwm laiin Isuan, “Tûnlai chhuante hi chhuan sual an ni; chhinchhiahna an zawng a; nimahsela, Jona chhinchhiahna chauh lo chu an hnênah chhinchhiahna rêng rêng pêk a ni lo vang. 30 Jona chu Ninevi khuaa mite tân chhinchhiahna a lo ni ang khân, Mihring Fapa pawh tûnlai chhuante tân hian chhinchhiahna a la ni ang. 31 “Chhim lam lalnu kha, ngaihtuah hunah chuan tûnlai chhuante hnênah hian a tho ve ang a, thiam loh a chantîr ang; Solomona fin ngaithla tûr mahin kâwlkil ata a lo kal si a; ngai teh u, Solomona aia ropui zâwk hetah hian a awm asin. 32 “Ninevi khuaa mite chu, ngaihtuah hunah chuan, tûnlai chhuante hnênah hian an ding ve ang a, thiam loh an chantîr ang, Jona thuhril avângin an sim si a; ngai teh u, Jona aia ropui zâwk hetah hian a awm asin.
Taksa khâwnvâr
33 “Tu mân khâwnvâr an hâlin in hnuai pûkah an dah ngai lo, hrai hnuaiah an dah ngai hek lo, mi lûtte chuan a êng an hmuh theih nân, a dahnaah chuan an dah zâwk ṭhîn a ni. 34 “I taksa khâwnvâr chu i mit a ni; i mit a fîm chuan i taksa pawh a pumin a êng chhuak ṭhîn; a chhiat erawh chuan i taksa pawh a thim zo vek ṭhîn. 35 Chutichuan, i chhûnga êng awm chu thim a lo ni dah law maw, fîmkhur rawh. 36 Chutichuan, taksa hi khawi lai mah thim lova a puma a ên chhuah chuan, khâwnvâr êng nasa takin a ên che angin a êng chhuak vek ang,” a ti a.
Pharisaite leh lehkhaziaktute a dem
37 Tin, a sawi laiin Pharisai pakhatin amah chu a hnêna chaw eiah a sâwm a; tichuan, a lût a, chaw a kîl a. 38 Tin, Pharisai chuan a chaw kîl chu a hmuhin, chaw ei hmaa kut a sil lo chu mak a ti hle a. 39 Tin, Lalpa chuan a hnênah, “Nangni Pharisaite chuan no leh thlêng pâwn lam chu in sil fai ṭhîn tak a; in kawchhûng lam erawh chu hlêprûk leh sualin a khat si a. 40 Mi âte u, pâwn lam siamtuin chhûng lam pawh a siam lo vem ni? 41 Nimahsela, a chhûnga thil awm chu mi rethei hnêna pêk atân hmang rawh u; tichuan, ngai teh u, in tân engkim a thianghlim tawh a ni. 42 “Nangni Pharisaite u, in chung a pik e! Pudina te, pârdi te, thlai tinrêng te sâwma pakhat in pe ṭhîn a, felna leh Pathian hmangaihna chu in ngaihthah si ṭhîn; nimahsela, chûng chu asin in tih tûr ni, a dangte chu tih ṭhulh chuang lovin. 43 Nangni Pharisaite u, in chung a pik e! Inkhâwmna inah ṭhutphah tha berte leh, dâwr hmuna chibai bûkte in ngaina si ṭhîn a. 44 In chung a pik e! Thlân tih hriat loh, a chunga hre lova mi an kal ṭhinna ang chu in ni e,” a ti a. 45 Tin, dân hretu pakhatin a hnênah, “Zirtîrtu, hêng thu i sawi hi keini pawh min hau i nih hi,” a ti a, a chhâng a. 46 Tin, ani chuan, “Dân hretute u, nangni pawh in chung a pik e! Thil phurh hrehawm takte mite in bel ṭhîn a, nangni chuan phurte chu in kutzungṭang pakhat pawhin in khawih ngai si lo. 47 In chung a pik e! Zâwlneiho thlân inte in sa ṭhîn a, in thlahtute thah an ni si a. 48 Chutichuan, in thlahtute thiltihte chu in hriatpuiin in remtihpui a ni; annin an that a, nangnin an thlân inte in sa si a. 49 Chuvângin, Pathian finna pawhin, ‘An hnênah zâwlneite leh tirhkohte ka tîr ang a, a ṭhen an that ang a, a ṭhen an tiduhdah ang; 50,51 chutichuan, Abela thisen chhuah achin Zakaria, maichâm leh biak in inkâra thia thisen chhuak thleng khân, zâwlnei zawng zawng thisen leilung pian tirh ata chhuak chu, tûnlai chhuante chungah hian phuba an la thei ang,’ a tih kha. A ni, ka hrilh a che u, tûnlai chhuante chungah hian phuba an la ang. 52 Nangni dân hretute u, in chung a pik e! Finna chabi chu in kal bopui a; nangni lah in lût si lo va, mi lût tûrte pawh in khap si a,” a ti a. 53 Tin, chuta ta a chhuah chuan, lehkhaziaktute leh Pharisaite chuan amah chu an tai ta rân a, thu tinrêng an sawi luihtîr a, 54 a ṭawng sual hlauhva man tumin an châng reng a.
Vervêkte laka fîmkhur tûr
1 Chutih chhûnga mipui sâng tam tak, inrap nûlh nûlh khawp hial an rawn inkhâwm chuan, Isuan a hmasa berin a zirtîrte hnênah, “Pharisaite dawidim, vervêkna lakah chuan fîmkhur rawh u.
Tu nge ṭih tûr
2 “Lang lo tûra thuhrûk eng mah a awm lo va, hriat loh tûra zêp rûk eng mah a awm hek lo. 3 Chuvângin, thima in sawi apiang kha êngah an la hria ang a; pindan chhûngrila beng bula in thusawi kha, in chunga chuangin an la tlângaupui ang. 4 Tin, ka ṭhiante u, ka hrilh a che u, taksa tihluma, chumi hnua eng mah dang ti leh thei tawh lote chu hlau suh ang che u. 5 Amaherawhchu, tu nge in hlauh tûr ka hrilh lâwk ang che u: a tihhlum hnu pawha Gehenna-a paih theihna thu neia chu hlau rawh u; a ni, ka hrilh a che u, amah mawlh chu hlau rawh u. 6 Chawngzawng panga dâr tangka pahnihin an hralh ṭhîn lo vem ni? Nimahsela, an zînga pakhat mah Pathianin a hmaih ngai si lo. 7 In samzaite lam pawh hi chhiar vek a ni asin. Hlau suh u; chawngzawng tam tak aiin in hlu zâwk a ni.
Isua pawm leh hnâwl
8 “Tin, ka hrilh a che u, mite hmaa mi ṭan apiang, Pathian vântirhkohte hmaah Mihring Fapain a ṭan ve ang. 9 Nimahsela, mite hmaa mi phat chu, Pathian vântirhkohte hmaah phat a ni ve ang. 10 Tin, Mihring Fapa sawisêl apiang chu, an sawisêlna chu ngaihdamsak a ni ang; Thlarau Thianghlim meuh sawichhia erawh chu, a sawichhiatna chu ngaihdamsak a ni lo vang. 11 “Tin, inkhâwmna ina mite, lalte, hotute hmaa an hruai hunah che u chuan, ‘Engtin nge, eng thuin nge ka chhân ang, eng thu nge ka sawi ang?’ tiin lungkham suh ang che u; 12 chutih hun takah chuan eng nge in sawi tûr rem, Thlarau Thianghlimin a hrilh ang che u,” a ti a.
Mi hausa â tehkhin thu
13 Mipui zînga tu emawin Isua hnênah, “Zirtîrtu, ka u hnênah ro mi sem ve tûrin hrilh rawh,” a ti a. 14 Nimahsela, ani chuan a hnênah, “Mihring, nangni chungah tuin nge rorêltuah leh sum semtuah mi siam?” a ti a. 15 Tin, an hnênah, “Fîmkhur ula, awhna rêng rêng lakah chuan invêng rawh u; sum ngah hi mihring dam chhan a ni lo ve,” a ti a. 16 Tin, an hnênah tehkhin thu a sawi a: “Mi hausa tu emaw a lo a hlâwk êm êm a; 17 tichuan, a inngaihtuah a, ‘Engtin nge ka tih ang aw? Ka buh leh bâl dah khâwmna ka nei si lo va,’ a ti a. 18 Tin, ‘Heti hian ka ti teh ang: ka buh inte ka ṭhiat ang a, a aia lianin ka sa ang a; chutah chuan ka buh leh ka sum zawng zawng ka dah khâwm ang. 19 Tin, ka thlarau hnênah, “Thlarau, kum tam tak chhûng atân sum tam tak i khâwl hi; châwl la, eiin bâr la, hlim takin awm rawh,” ka ti ang,’ a ti a. 20 Nimahsela, Pathianin a hnênah, ‘Mi â, zâninah hian i thlarau an lâksak dâwn che a ni; i thil deh chhuahte kha tu ta nge ni ta ang le?’ a ti a. 21 Mahni tâna sum khâwla, Pathian lama ngah si lo chu, chuti chu a ni ṭhîn,” a ti a.
Pathian ring rawh u
22 Tin, a zirtîrte hnênah, “Chuvângin, ka hrilh a che u, ‘Eng nge ka ei ang aw?’ tiin in nunna thu leh, ‘Eng nge ka silhin ka fên ang aw?’ tiin in taksa thu lungkham suh u. 23 Ei tûr aiin nunna a thupui zâwk a ni, silhfên ai pawhin taksa a thupui zâwk a ni. 24 Choâkte hi ngaihtuah rawh u, buh an tuh lo va, an ât hek lo; zêm te, buh in te pawh an nei lo; nimahsela, Pathianin a châwm si a; nangni chu savate ai chuan in hlut zâwkzia mai chu! 25 Tin, nangni zîngah lungkham avângin tuin nge mahni dung lam tawng khata tisâng chuang thei? 26 Hemi tê mah ti thei lo che ua, engati nge thil dang in lungkham ṭhin? 27 “Tûktinpâr ṭhan zia hi ngaihtuah rawh u; hna an thawk lo, la pawh an kai hek lo; nimahsela, ka hrilh a che u, Solomona meuh pawh a ropuina zawng zawnga a inthuam khân, hêng tûktinpâr pakhat tluk pawh hian cheiin a awm lo. 28 Chutichuan, ram hnim, vawiin anga nung, a tûka thuka tuah leh mai tûr mah Pathianin chuti kauva a chei chuan, aw, nangni rin tlêmte u, chumi ai chuan silhfên a va pe dâwn che u êm! 29 “Tin, in ei tûr te, in in tûr te zawng suh u; tuilairap angin awm pawh awm suh u. 30 Khawvêla hnam tinin chûng thil zawng zawng chu an zawng ṭhîn a ni; chûng chu in mamawh tih in Pain a hre reng si a. 31 Ama ram zawng zâwk rawh u; tichuan, chûng thil pawh chu a pêk belhchhah dâwn che u nia. 32 Pâwl tlêmte u, hlau suh u; ram pêk che u hi in Pa lâwm zâwng tak a ni.
Vâna ro khâwl khâwm
33 “In neih apiang hralh ula, mi retheite hnênah pe rawh u; vânah rûkru kal lohnaah, sûlrûl ei chhiat lohnaah chuan tangka ip hlui thei lo te, sum ral thei lo te insiam rawh u. 34 In ro awmna apiangah in rilru pawh a awm dâwn si a.
Chhiahhlawh inring reng
35 “Puan veng rengin, in khâwnvâr pawh alh rengin awm ula; 36 miin an pu lawi chaw ei, a lo haw huna kawngkhâr a rawn kik veleha lo hawn thei nghâl tûra an lo nghâk reng ang hian awm rawh u. 37 An pu a lo kal hunah bawih lo nghâk reng a hmuhate chu an eng a thâwl ang; tihtakmeuhvin ka hrilh a che u, ani chuan a puan a rawn veng ang a, anmahni chu chaw kîlin a ṭhuttîr ang a, an rawng a rawn bâwl ang. 38 Zanlaiah emaw, thawh hunah emaw a lo kala, chutianga a rawn hmuh chuan chûng bawihte chu an eng a thâwl ang. 39 Amaherawhchu, hei hi hre rawh u, rûkru a lo kal hun tûr in neituin hria sela, a vêng ang a, a in a reh pawhtîr lo vang. 40 Nangni pawh inring rengin awm rawh u, in rin loh hunah Mihring Fapa a lo kal dâwn si a,” a ti a.
Chhiahhlawh rinawm leh rinawm lo
41 Tin, Peteran, “Lalpa, he tehkhin thu hi keimahni chauh nge min hrilh, mi zawng zawng?” a ti a. 42 Tin, Lalpan, “Sum enkawltu rinawm, fing tak, a puin a hun apianga an chaw chan tûr semsak tûrin, a chhûngte chunga hotua a siam tûr chu tu ber nge ni ang le? 43 A pu a lo kal hunah bawih chutiang tia a rawn hmuha chu a eng a thâwl ang. 44 Dik takin ka hrilh a che u, a neih zawng zawng chunga hotuah a siam ang. 45 Amaherawhchu, chu bawih chuan a rilruin, ‘Ka pu a lo kal lawk dâwn lo ve,’ tiin bawihnute, bawihpate lo vêl sela, eiin bârin lo rui ta sela; 46 chu bawiha pu chu a rin loh niah, a hriat loh laiin a lo kal ang a, bung hnihah a rawn chhuah ang a, mi rinawm lote chan ang a chantîr ang. 47 Bawih, a pu duh zâwng hre reng chunga lo inring si lova, a pu duh zâwng ang pawha ti lo chu vawi tam tak an vua ang. 48 Amaherawhchu, hre lo chunga vuakna khawp thil ti chu vawi tlêm tê an vua ang. Tu pawh tam tak an pêka hnênah chuan tam tak an phût ang, tu pawh tam tak an kawltîra hnênah chuan tam deuh an phût ang.
Isua vânga inṭhenna
49 “Khawvêlah mei thlâk thla tûra lo kal ka ni; tûnah pawh kâng tawh pang sela ka va ti êm! 50 Nimahsela, baptisma chan tûr ka nei, chumi tleitlâk hma loh chu ka thaw a va ipik êm! 51 Khawvêla rem lêntîra lo kal emaw mi ti elo? Hnai lo ve, ka hrilh a che u, do lentîr tûra lo kal zâwk ka ni; 52 tûn hnuah chuan chhûng khatah mi panga an indo vang, pathumin pahnih, pahnihin pathum. 53 An indo vang a, pain a fapa, fapain a pa; nuin a fanu, fanuin a nu; piin a mo, movin a pi,” a ti a.
Hun awmzia hriat tûr
54 Tin, mipui hnênah pawh chuan, “Thlang lama chhûm chhuak in hmuh chuan, ‘Ruah a sûr dâwn,’ in ti nghâl ṭhîn a; tin, a lo ni ngei ṭhîn. 55 Tin, chhim thli tleh in hriat chuan, ‘Thaw a sa dâwn e,’ in ti ṭhîn a; tin, a lo ni ngei ṭhîn. 56 Nangni vervêkte u, khawvêl leh vân awmzia pawh in hre fiah thiam si a, engati nge tûnlai thil hi in hriat fiah thiam loh hi? 57 Engati nge nangmahnin a fel chu in ngaihtuah loh?
I khingpui nên inrem rawh
58 “Tin, rorêltu hmaa i khingpui nên in kal hunin, kal pahin a lakah fihlîmna mawlh zawng hrâm rawh; chuti lo chuan, rorêltu chuan mi man hotu a mantîr ang chia, mi man hotu chuan tân inah a khung hlauh dah ang che. 59 Ka hrilh a che, dâr tangka derê tê pawh i tlâk kim hma loh chuan chuta ta chu i chhuak lo hul hual ang,” a ti a.
In sim loh chuan in thi ang
1 Tin, chutih lai tak chuan tute emaw an lo awm a, chu mite chuan Galili rama mi, Pilatan an thisen an pathian biakna sa talhte zînga a telhsakate chanchin chu Isua an hrilh a. 2 Tin, ani chuan an hnênah, “Chu Galili rama mite chu, chutiang thil an tuar avâng chuan, Galili rama mi zawng zawng aiin mi sual bîk niin in ring em ni? 3 Ni suh e, ka hrilh a che u, nangni pawh in sim loh chuan chutiang bawkin in boral vek ang. 4 Tin, Siloam in sângin mi sâwm leh pariat a delh hlumte pawh kha, Jerusalem khuaa awmte zawng zawng aiin mi sual bîk niin in ring em ni? 5 Ni suh e, ka hrilh a che u, nangni pawh in sim loh chuan chutiang bawkin in boral vek ang,” a ti a, a chhâng a.
Theipui rah thei lo tehkhin thu
6 Tin, he tehkhin thu hi a sawi a: “Tuin emaw a grêp huanah theipui kûng pakhat a nei a; tin, a kûngah chuan a rah a rawn zawng a, pakhat mah a hmu lo va. 7 Tichuan, grêp hrui enkawltu hnênah, ‘Ngai rawh, kum thum chhûng hian he theipui kûngah hian a rah ka va zawng ṭhîn a, pakhat mah ka hmu si lo; kit rawh; engati nge hmun pawh awha a awm reng ni?’ a ti a. 8 Tin, ani chuan a hnênah, ‘Ka pu, kumin tal hi awm sela, a vêlin ka lai ang a, leiṭha ka vûr rih ang e; 9 chumi hnua a rah chuan a ṭha ang a, a rah loh erawh chuan kit mai ang che,’ a ti a,” a ti a.
Ramhuai man hmeichhia Chawlhnia tihdam
10 Tin, Chawlhniah ani chuan inkhâwmna in pakhatah a zirtîr a. 11 Tin, ngai teh, kum sâwm leh kum riat, ramhuai man, chak loh vei hmeichhe pakhat a awm; chu mi chu a kûn reng a, amah chuan a ding ngîl thei tawp lo va. 12 Tin, Isuan a hmuh veleh a ko va, a hnênah, “Hmeichhia, i chak lohna chuan a thlah ta a che,” a ti a. 13 Tin, a chungah a kut a nghat a; tichuan, thawklehkhatan a ngîl ta nghâl a, Pathian a fak ta a. 14 Tin, Isuan Chawlhnia mi a tihdam avângin inkhâwmna in hotu chu a thinur a, mipui chu a bia a, an hnênah, “Mihring hnathawhna tûr ni ruk a awm alâwm; chumi chhûng chuan lo kal ula, intidam rawh u, Chawlhnia lo kal lovin,” a ti a. 15 Lalpa erawh chuan a hnênah, “Nangni vervêkte u, Chawlhniah mahni sebâwng emaw, sabengtung emaw a chaw eina ata phelhin, tui in tûrin in hruai chhuak ṭheuh ṭhîn a ni lo vem ni? 16 He hmeichhia hi Abrahama fanu a ni si a, ngai teh u, Setanan kum sâwm leh kum riat a man reng hi, Chawlhniah pawh hemi phuar hi han phelhsak lohzia em ni?” a ti a, a chhâng a. 17 Chûng thu a sawi lai chuan a hmêlmate zawng zawng chu an zak ta a; mipui erawh chu a thil ropui tih zawng zawng avâng chuan an lâwm vek a.
Anṭam chi tehkhin thu
18 Chutichuan, ani chuan, “Pathian ram chu eng ang nge ni? Eng nên nge teh pawh ka tehkhin ang? 19 Anṭam chi fang khat miin a lâka, a huana a theha ang chu a ni; chu chu a lo ṭo va, thing a lo ni a, chunglêng savate chu a zârahte chuan an riak a,” a ti a.
Dawidim tehkhin thu
20 Tin, “Pathian ram chu eng nên nge ka tehkhin ang?” a ti leh a. 21 “Dawidim hmeichhiain a lâka, chhangphut tehkhâwng thum zîngah, a zaa a thawh vek thlenga a phûma ang chu a ni,” a ti a. 22 Tin, ani chuan zirtîr chung zêla Jerusalem khaw lam panin, khaw lian leh khaw tête a tlawh zêl a.
Kawngka zîm
23 Tin, tuin emaw a hnênah, “Chhandamte chu tlêm tê em an nih?” a ti a. 24 Tin, ani chuan an hnênah, “Kawngka zîmah chuan luh tum hrâm rawh u; ka hrilh a che u, mi tam takin luh an tum ang a, an lût thei si lo vang. 25 In neitu a thawha, kawng a khâr hnu chuan nangnin pâwna dingin, ‘Lalpa, kawng min hawnsak rawh,’ tia, kawngkhâr in rawn kik hunah, anin, ‘Khawii lama mi nge in nih ka hre lo a che u,’ tiin a chhâng ang che u a; 26 chutih hunah chuan nangnin, ‘I hmuhah pawh kan eiin kan bâr tawh kha, kan kawtthlêrahte pawh i zirtîr ṭhin kha,’ in la ti ang. 27 Tin, anin, ‘Ka hrilh a che u, khawii lama mi nge in nih ka hre lo; nangni thil sual ti zawng zawngte u, ka hnên ata kal bo vek rawh u,’ a la ti ang. 28 “Abrahama te, Isaaka te, Jakoba te, zâwlnei zawng zawngte chu Pathian ram chhûnga awm in hmuha, nangni pâwna hnawh chhuah in nih in inhriat hunah, chutah chuan ṭah leh ha ṭhial chu a awm ang. 29 Tin, chhak leh thlang, chhim leh hmâr aṭangin an lo kal ang a, Pathian ramah an lo ṭhu ang. 30 Tin, ngai teh u, hnuhnûng berte pawh hmasa bera awm tûr an awm a, hmasa berte pawh hnuhnûng bera awm tûr an awm,” a ti a.
Isuan Jerusalem a manganpui
31 Chutih lai tak chuan Pharisai tute emaw an lo kal a, a hnênah, “Chhuak la, heta ta hi kal bo rawh; Herodan tihhlum che a duh êm êm a ni,” an ti a. 32 Tin, ani chuan an hnênah, “Chu sihal hnênah chuan he thu hi va sawi rawh u: ‘Ngai rawh, vawiinah nên, naktûkah nên ramhuaite ka hnawt chhuak ang a, nâte pawh ka tidam ang a, a tûk lehah ka zo vang.’ 33 Eng pawh ni rawh se, vawiinah nên, naktûkah nên, a tûk lehah nên ka kal zêl tûr a ni; Jerusalem khaw pâwn lamah zâwlnei thih theih a ni lo ve,” a ti a. 34 “Aw Jerusalem, Jerusalem! zâwlneiho thattu, i hnêna an rawn tirhte lunga lo dêng hlumtu! Arpuiin mahni notê a thla hnuaia a awp khâwm angin, i fate vawi eng zât nge awp khâwm ka tum kha! Nimahsela, in duh si lo. 35 En teh u, in in chu a ruaka hnutchhiah che uin a awm ta. Ka hrilh a che u, ‘Lalpa hminga lo kal chu a eng a thâwl e,’ in tih hma loh chuan mi hmu leh tawh lo vang,” a ti a.
Damlo vûng tihdam
1 Tin, heti hi a ni a, Chawlhniah Pharisai hotu pakhat ina chaw ei tûra a kal chu an enthla reng a. 2 Tin, ngai teh, a hmaah chuan damlo vûng mi tu emaw a awm a. 3 Tichuan, Isuan dân hretute leh Pharisaite chu a bia a, an hnênah, “Chawlhniin tihdam a thiang nge thiang lo?” a ti a. 4 Anni erawh chu an ngawi reng a. Tin, ani chuan damlo chu a chelh a, a tidam a, a kaltîr ta a. 5 Tin, an hnênah, “Nangni zîngan in sabengtung emaw, sebâwng emaw tuichhunchhuahah tla sela, Chawlhni pawhin tu nge hnûk chhuak nghâl lo vang che u?” a ti a. 6 Chûng thu chu an chhâng thei lo leh bawk a.
Inngaihtlâwmna leh inphalna
7 Tin, an mi sâwmten ṭhutphah ṭha ber an thlan ṭhinzia a hmu a, an hnênah tehkhin thu a sawi ta a: 8 “Lawi chaw ei tûrin tuin emaw a sâwm hunah che chuan, ṭhutphah ṭha berah ṭhu suh ang che; chuti lo chuan, i aia mi ṭha zâwk a lo sâwm hlauh ang a; 9 tichuan, a sâwmtu che chuan, ‘He mi ṭhutna tûr hi kian rawh,’ a rawn ti ang chia; tin, nang zak takin ṭhutphah ṭha lo berah i ṭhu leh si ang. 10 An sâwm hunah che chuan, ṭhutphah ṭha lo berah ṭhu zâwk ang che; chutichuan, a sâwmtu che a lo kal hunah i hnênah, ‘ṭhiana, ṭhutphah ṭha deuhvah ṭhu rawh,’ a ti thei ang che. Chutichuan, i chaw kîlpuite mit hmuhah chuan chawimawiin i awm ang. 11 Inngaihlu apiang an tlâwm ang a; inngaitlâwm chu chawimawiin an awm ang,” a ti a. 12 Tin, a sâwmtu hnênah pawh chuan, “Chhûnah emaw, zânah emaw ruai i ṭheh hunin i ṭhiante, i unaute, i laichînte, i vêng hausate chu sâwm suh ang che; chuti lo chuan, an sâwm ve leh ang chia, an rûl leh kher ang che. 13 Ruai i ṭheh hun chuan pachhiate, piangsualte, kebaite, mitdelte sâwm zâwk ang che; 14 tichuan, chûng ang chuan rulhna tûr che an neih loh avângin i eng a thâwl ang; mi felte thawhleh hunah rulh leh i ni dâwn si a,” a ti a.
Ruai ropui tehkhin
15 Tin, a chaw kîlpui tuin emaw chûng thu chu a hria a, a hnênah, “Pathian rama chaw ei tûr chu an eng a thâwl e,” a ti a. 16 Tin, ani chuan a hnênah, “Mi tuin emaw zânah ruai ropui tak a ṭheh a, mi tam tak a sâwm a; 17 tin, a ei hun chuan a mi sâwmte hnênah, ‘Lo kal rawh u, tûnah engkim peih a ni ta e,’ ti tûrin a bawih a tîr a. 18 Tin, an zain thu khat vuain chhuanlam an nei vek a. A hmasa berin a hnênah, ‘Lo ka lei ta a, a enin ka kal a ṭûl a ni; mi khawngaih la, mi han phatsak ang che,’ a ti a. 19 Tin, mi dangin, ‘Sebâwng tuak nga ka lei ta a, a chhia a ṭha fiahin ka kal dâwn a; mi khawngaih la, mi han phatsak ang che,’ a ti a. 20 Tin, mi dangin, ‘Nupui ka nei ta a; chuvângin, ka kal thei lo,’ a ti a. 21 Tin, bawih chuan a pu hnênah chûng thu chu a va hrilh a. Tin, in neitu chu a thinur a, a bawih hnênah chuan, ‘Chhuak la, kawthlêrahte, kâwmkârahte kal thuai thuai la, pachhiate, piangsualte, mitdelte, kebaite hetah rawn hruai lût rawh,’ a ti a. 22 Tin, bawih chuan, ‘Ka pu, i thu mi pêk ang khân ka ti tawh a; nimahsela, hmun a la chuang ta fo,’ a ti a. 23 Tin, a pu chuan bawih hnênah chuan, ‘Chhuak la, lamlianahte, daiahte kal la, ka in khah nân mi han thlêm lût hrâm rawh. 24 Ka hrilh a che, mi ka sâwmte khân pakhat mahin ka ruaiṭheh an ei lo vang,’ a ti a,” a ti a.
Isua zuitu nih man
25 Tin, mipui tam tak a hnênah an kal ve a; tichuan, ani chu a hawi a, an hnênah, 26 “Tu pawh ka hnêna lo kal chuan, a pa te, a nu te, a nupui te, a fa te, a unau te, a farnu te, ama nun nên lam pawh a huat loh chuan ka zirtîr a ni thei lo vang. 27 Tu pawh mahni kraws pua mi zui lo apiang chu ka zirtîr a ni thei lo vang. 28 “Nangni zîngah tu pawhin in sâng sak tum ula, a tîrah ṭhuin, sak zawhna khawp sum in neih leh neih loh hre tûrin, a man tûr chin tu nge chhût lo vang che u? 29,30 Chuti lo chuan, lung phûm tawh zeta a sak zawh theih loh chuan, a en apiangin, ‘He mi hian in a rel ting a, a sa zo thei si lo,’ tiin an nuihsan dah ang e. 31 “Tin, lal tuin nge lal dang do tûra a kal dâwnin, a tîrah ṭhuin, mi sînghnih nêna amah do tûra lo kal chu, mi sîngkhat nên a tawh ngam dâwn leh dâwn loh mi râwn lo vang? 32 Chuti a nih loh vêk leh, lal dang chu hla taka a la awm laiin, inremna lam thutiam dîl tûrin palai a tîr ang. 33 Chutiang bawkin nangni zîngah hian tu pawh, a neih zawng zawng kalsan lo apiang chu ka zirtîr a ni thei lo vang.
Hman tlâk tawh loh chi
34 “Chi hi a ṭha e; nimahsela, chi pawh a dâk tawh chuan engin nge an tihal leh ang? 35 Lei tân a ṭha lo vang a, êk dûr tân pawh a ṭha hek lo vang; miin an paih chhuak ṭhîn. Tu pawh hriatna tûra beng nei chuan hre rawh se,” a ti a.
Berâm bo
1 Tin, chhiahkhawntute leh mi sual zawng zawngin a thu hre tûrin a kiang an rawn pan a. 2 Tin, Pharisaite leh lehkhaziaktute chu, “He mi hian mi sualte a pâwl a, an hnênahte chaw a ei ve ṭhîn,” tiin an phunnawi ve ve a. 3 Tichuan, anin an hnênah he tehkhin thu hi a sawi a; 4 “Nangni zîngah tu pawhin berâm za nei ula, an zînga pakhat hloh ang ula, thlalêrah sawmkua leh pakuate chu hnutchhiahin, a bo chu in hmuh leh hma loh zawng tu nge zawng lo vang che u? 5 Tin, in hmuh leh chuan lâwm takin in kokiah in pu ṭhîn. 6 Tin, in in thlen veleh in ṭhiante leh in vêngte in ko khâwm a, an hnênah, ‘Mi lâwmpui rawh u, ka berâm bo kha ka hmu leh ta e,’ in ti ṭhîn. 7 Ka hrilh a che u, chutiang bawkin mi fel sawmkua leh pakua sim chuan tûr nei lote chungah ai chuan, mi sual pakhat sim chungah hian vâna mi an lâwm zâwk ang.
Duli bo
8 “Tin, hmeichhia tu pawh duli sâwm neiin pakhat hloh ang sela, khâwnvâr hâla in phiatin, a hmuh leh hma loh zawng tu nge ngun takin zawng lo vang? 9 Tin, a hmuh leh chuan a ṭhiante leh a vêngte a ko khâwm a, ‘Mi lâwmpui rawh u, ka duli hloh kha ka hmu leh ta e,’ a ti ṭhîn. 10 Ka hrilh a che u, chutiang bawkin Pathian vântirhkohte hmaah chuan, mi sual pakhat sim chungah an lâwm ṭhîn a ni.
Fapa tlân bo
11 “Tin, mi tuin emaw fapa pahnih a nei a; 12 tin, a naupang zâwk chuan a pa hnênah, ‘Ka pa, ro ka chan ai mi pe rawh,’ a ti a. Tichuan, a sum chu an hnênah a sem ta a. 13 Tin, ni rei lo tê chinah a fapa naupang zâwk chuan a chan ai zawng zawng chu a la khâwm vek a, khaw lamhla takah a kal ta a, chutah chuan nuam lutukin a awm a, a sum chu a khawh ral ta mai mai a. 14 Tin, a deh ral zawh veleh, chu khaw lamah chuan ṭâm nasa tak mai a lo tla a; ei tûr a lo tlachham ta a. 15 Tichuan, chumi khaw lam mi, mi pakhat a va bêl a; chu mi chuan vâwk chaw pe tûrin a lo lamah a tîr a. 16 Tin, englo kâwm vawkin an eite chuan intihpuar a duh êm êm a; tu mân eng mah an pe si lo. 17 “Tin, a inhriat chhuah veleh, ‘Ka pa hnêna inhlawhfate chaw ei sên lohva nei an tam vei nên, kei lah chu hetah rilṭâmin ka thi dâwn si a! 18 Ka tho vang a, ka pa hnênah ka kal ang a, a hnênah, “Ka pa, vâna mi chungah leh nangma mit hmuhin thil ka tisual e; 19 i fapaa vuah tlâk ka ni ta lo ve; i hnêna inhlawhfa pakhat angin mi siam ve rawh,” ka ti ang,’ a ti a. 20 “Tichuan, a tho va, a pa hnênah a kal ta a. Chutichuan, hla taka a la awm laiin a pain a lo hmu a, a khawngaih êm êm a, a tlân a, a ir a chuktuah a, a fâwp ngawih ngawih a. 21 Tin, a hnênah a fapain, ‘Ka pa, vâna mi chungah leh nangma mit hmuhin thil ka tisual e; i fapaa vuah tlâk ka ni ta lo ve,’ a ti a. 22 Nimahsela, a pa chuan a bawihte hnênah, ‘Puan ṭha ber kha han la thuai ula, han sintîr rawh u; a kutah zungbun te, a kephahah pheikhawk te buntîr rawh u; 23 sebâwngno thau tak kha han la ula, talh rawh u, hlim takin i ei ang u; 24 he ka fapa hi a thi a, a lo nung leh ta a nih hi; a bo va, kan hmu leh ta a nih hi,’ a ti a. Tichuan, hlim takin an awm ṭan ta a. 25 “Tin, a fapa upa zâwk chu lovah a awm a; tin, in a lo thlen dâwn chuan englo tum ri leh lâm thâwm a hre ta a. 26 Tichuan, chhiahhlawh pakhat a ko va, ‘Chu eng nge ni ta?’ tiin a zâwt a. 27 Tin, ani chuan a hnênah, ‘I nau a lo hâwng a, him taka a hmuh leh avângin i pain sebâwngno thau tak kha a talh a ni,’ a ti a. 28 Tin, a thinur a, a lût duh ta lo va; tin, a pa chu a lo chhuak a, a thlêm a. 29 Nimahsela, ani chuan a pa hnênah, ‘Ngai rawh, kumkhaw hei leh chen hi ka châwm chia, i thu lah hi ka awih lo ngai si lo va; ka ṭhiante nêna hlimna ka siamna tûrin kêltê pawh mi pe ngai si lo va; 30 nimahsela, hei i fapa, nawhchizuarte hnêna i sum ei ral vektu hi a lo haw veleh a tân sebâwngno thau tak kha i lo talh vei a,’ a ti a, a chhâng a. 31 “Tin, ani chuan a hnênah, ‘Ka fapa, ka hnêna awm reng i ni alâwm, ka neih zawng zawng hi i ta a ni e. 32 Hlim tak leh lâwm taka awm tûr a ni rêng alâwm; he i nau hi a thi a, a lo nung leh ta a; a bo va, kan hmu leh ta a ni si a,’ a ti a,” a ti a.
Sum enkawltu fing
1 Tin, Isuan a zirtîrte hnênah he thu pawh hi a sawi a: “Mi hausa tuin emaw sum enkawltu a nei a; chu mi chuan a sum a khawh ralsak mai mai kawngah a hnênah an hêk a. 2 Tichuan, ani chuan amah chu a ko va, a hnênah, ‘I chungchâng thu ka hriat hi engtizia nge ni? I sum enkawl chanchin mi ziah vek rawh; tûn achinah sum enkawltuah i ṭang thei tawh lo vang,’ a ti a. 3 Tin, sum enkawltu chuan a rilruin, ‘Ka puin sum enkawltu aṭanga mi bân dâwn hi engtin nge ka tih ang aw? Lei laih ka peih si lo va, kutdawh lah chu ka zak si a. 4 Sum enkawla mi bân huna an ina mi awmtîr nân ka tih zia tûr ka hre ta,’ a ti a. 5 Tichuan, a pu sum batute chu a ko ṭheuh va, a hmasa ber hnênah chuan, ‘Ka pu lakah eng zât nge i bat?’ a ti a. 6 Ani chuan, ‘Hriak tehkhâwng za,’ a ti a. Tin, ani chuan a hnênah, ‘I lehkha la la, ṭhu thuai la, sawmnga ziak rawh,’ a ti a. 7 Tin, mi dang hnênah, ‘Nang eng zât nge i bat?’ a ti a. Ani chuan, ‘Buh tehkhâwng za,’ a ti a. Tin, ani chuan a hnênah, ‘I lehkha la la, sawmriat ziak rawh,’ a ti a. 8 Tin, a pu chuan sum enkawltu fel lo chu a remhriat avângin a fak ta a; êng fate aiin he khawvêl fate hi an tûnlai kawngah chuan an fing zâwk a ni. 9 “Ka hrilh a che u. Sum lemin in tân ṭhiante siam rawh u; sum a boral huna chatuana awmnaah chuan an awmtîr nân che u. 10 Tu pawh tlêm te chunga rinawm chu tam tak chungah pawh a rinawm ṭhîn; tu pawh tlêm te chunga rinawm lo chu, tam tak chungah pawh a rinawm lo ṭhîn a ni. 11 Sum lem chungah mah in rinawm loh chuan, tuin nge sum tak chu kawltîr ang che u? 12 Mi dang ta chungah mah in rinawm tawh loh chuan, nangmahni ta chu tuin nge pe ang che u? 13 Chhiahhlawh tu mahin hotu pahnih rawng an bâwl kawp thei lo; pakhat huain pakhat an duh ang, a nih loh leh, pakhat ṭanin pakhat an hmusit ang. Pathian leh sum rawng in bâwl kawp thei lo ve,” a ti a.
Isua thusawi ṭhenkhat
14 Tin, Pharisai, tangka ngaihlute chuan chûng thu zawng zawng chu an hria a, an nuihsan a. 15 Tichuan, ani chuan an hnênah, “Mi mit hmuha intifel mai in ni e; nimahsela, Pathianin in rilru a hre si a; mihring zînga an chawimawi chu Pathian mit hmuhin tenawm tak a ni si. 16 Dân leh zâwlneite thu chu Johana lo awm thleng khân a awm a; chumi achinah chuan Pathian ram Chanchin Ṭha hi an hril a, mi tin an lût lui ṭheuh va. 17 Nimahsela, dân thu chhunhan tê tak tê bo ai pawhin, vân leh khawvêl boral a awl zâwk e. 18 “Tu pawh nupui maa, nupui dang nei apiang a uire a ni; tu pawh mi nupui mâk nei apiang a uire a ni.
Mi hausa leh Lazara
19 “Tin, mi hausa tu emaw a awm a, puan senduk leh puan zai sîn tak a sin a, ni tin nuamsa takin a awm ṭhîn; 20 tin, a hming Lazara, kutdawh pakhat, pân bawm khah lûk, a kawngkhâr bulah an muttîr ṭhîn a, 21 mi hausa dawhkâna ei nawi tla chu ei a duh a; uite lah chuan a pânte an lo liahsak ṭhîn a. 22 Tin, heti hi a ni a, kutdawh chu a thi a, vântirhkohten an kalpui a, Abrahama ângchhûngah an dah a. Mi hausa pawh chu a thi a, phûmin a awm ta a. 23 Tin, mitthi khuaah chuan na tak tuar rêng rêngin a awm a, a han vanvadâk a, hla taka Abrahama, a ângchhûnga Lazara awm nên a hmu ta a. 24 Tin, a au va, ‘Ka pa Abraham, mi khawngaih la, Lazara kha han tîr rawh, a kutzung hmâwr tuiah chiah sela, ka lei tihdaihna tûrin; he meialhah hian ka na êm êm a ni,’ a ti a. 25 “Nimahsela, Abrahama chuan, ‘Ka fapa, nangin i dam lai khân thil ṭha i chang a, chutiang bawkin Lazaran thil ṭha lo a chan kha hre ta che; nimahsela, tûnah ani zawng hetah thlamuang takin a awm a, nang zawng i nâ a nih kha. 26 Chu lo rêngah pawh, heta ṭanga nangni hnêna kal tumte chu an kal theih lohna tûr leh, tu mah khata ṭanga keini hnêna an lo kai theih lohna tûrin, keini leh nangni inkârah hian leikak nasa tak an siam tlat a ni,’ a ti a. 27 “Tin, ani chuan, ‘A nih leh ka pa, ani chu ka pa ina kaltîr tûr talin ka ngên a che; 28 pianpui mipa panga ka nei si a; he ka awmnaah hian an lo kal ve dah ang e, ṭhahnemngai takin hrilh teh se,’ a ti a. 29 Abrahama erawh chuan, ‘Mosia leh zâwlneite an nei alâwm; chu mite thu chu ngai rawh se,’ a ti a. 30 Tin, ani chuan, ‘Ka pa Abraham, ni lo ve; mitthi zînga mi meuh an hnênah kal zâwk sela an sim ang,’ a ti a. 31 Tin, ani chuan a hnênah, ‘Mosia leh zâwlneite thu an ngaih loh chuan, mitthi zînga mi tholeh mah sela an awih chuang lo vang,’ a ti a,” a ti a.
Sual
1 Tin, Isuan a zirtîrte hnênah, “Tlûknate hi awm lo thei a ni lo; nimahsela, tlûkna awmtîrtu chung chu a pik e! 2 Hêng mi tête zînga pakhat pawh tihtlûk ai chuan, a titlutu tûr nghâwngah chuan buh râwt sawmna lung awrhtîrin, tuifinriatah thlâk sela, a tân a ṭha zâwk ang. 3 “Fîmkhur rawh u: i unauvin thil a tihsual chuan zilh rawh; a inchhîr chuan ngaidam rawh. 4 Ni khatah i chungah vawi sarih thil tisualin, vawi sarih, ‘Ka inchhîr e,’ tia i lama a lo hawi leh chuan i ngaidam tûr a ni,” a ti a.
Rinna
5 Tin, tirhkohte chuan Lalpa hnênah, “Kan rin tiphui deuh vang che,” an ti a. 6 Tin, Lalpa chuan, “Anṭam mu fang khat ang rin in neih chuan, he thingtheihmu kûng hnênah hian, ‘Lo inphawi la, tuifinriatah lo inphun rawh,’ in ti ang a, in thu a awih mai ang.
Chhiahhlawh tih tûr
7 “Nimahsela, nangni zîngah tu pawhin lei letin emaw, berâm vêngin emaw bawih nei ula, a lo sûl hâwn veleh, ‘Chaw rawn kîl nghâl rawh,’ tu nge lo ti ang che u? 8 ‘Ka ei tûr mi siamsak la, puan veng la, ka ei ka bâr zawh hma loh chu ka rawng mi bâwl rawh; chumi hnuah chuan nangin i eiin i bâr ang chu,’ tu nge lo ti zâwk lo vang che u? 9 In thu anga a tih avângin in bawih hnênah lâwm thu in hrilh ngai em ni? 10 Chutiang bawkin nangni pawhin, in hnêna thupêk zawng zawng anga in tih hnuin, ‘Bawih ṭhahnem lo kan ni e; kan tih tûr rêng a ni kan tih ni,’ ti rawh u,” a ti a.
Phâr sâwm tihdam
11 Tin, heti hi a ni a, Jerusalem khuaa an kal dâwnin, Samari leh Galili ram chu a kal pêl a. 12 Tin, khaw engah emaw a luh dâwnin, mi, phâr hlîr sâwmin an tâwk a; chu mite chu hla takah an ding a; 13 tin, aw ring takin, “Isu, Zirtîrtu, min khawngaih rawh,” an ti a. 14 Tin, ani chuan anmahni chu a han hmuh chuan an hnênah, “Puithiamte hnênah va inentîr tawh u,” a ti a. Tin, heti hi a ni a, an kal lai chuan an lo thiang ta hlawm a. 15 Tin, an zînga pakhat chu a dam ta tih a inhriat veleh, aw ring taka Pathian fak chungin a kîr leh ta a; 16 tin, a ke bulah a bawkkhup a, lâwm thu a sawi a; chu mi chu Samari mi a ni nghe nghe a. 17 Tichuan, Isuan a chhâng a, “Mi sâwm kha in lo thiang ta a ni lâwm ni? Pakuate kha khawiah nge? 18 He awze mi chauh lo hi Pathian fak tûra lo kîr leh an awm na nge?” a ti a. 19 Tin, a hnênah, “Tho la, kal rawh; i rinna hi i dampui a nih hi,” a ti a.
Pathian ram thlen tûr thu
20 Tin, Pharisaiten Pathian ram lo thlen hun tûr an zawh avângin an hnênah, “Pathian ram chu hmuh theihin a lo thleng lo ve; 21 ‘En teh u, heta hi!’ emaw, ‘Sawta saw!’ emaw an ti hek lo vang; ngai teh u, Pathian ram chu in zîngah a awm a ni,” a ti a, a chhâng a. 22 Tin, zirtîrte hnênah chuan, “Mihring Fapa dam lai nite hi, ni khat tal hi in hmuh duh nite a la awm ang; nimahsela, in hmu tawh si lo vang. 23 Tin, in hnênah, ‘En teh u, sawta saw!’ ‘En teh u, heta hi!’ an ti ang che u; kal chhuak suh ula, anni chu zui hek suh u; 24 vân hnuai lehlama kâwl a phêta, vân hnuai lehlam thlenga a êng ṭhîn ang hian, Mihring Fapa hi a lo kal niin a awm dâwn si a. 25 Nimahsela, chumi hma chuan thil tam tak a tuar ang a, tûnlai chhuante duh lohvin a awm bawk ang. 26 “Nova dam laia thil awmzia ang khân, Mihring Fapa a lo kal leh nite chuan a awm bawk ang. 27 Nova lawnga a luha, tui a lo lêta, an zaa a tihhlum tâk vek ni kha a thlen hma loh zawng, an eiin an bâr a, nupui pasal an innei ṭhîn a. 28 “Chutiang bawkin Lota dam laiin a lo awm; an eiin an bâr a, an leiin an hralh a, an chîngin an sa ṭhîn a. 29 Nimahsela, Sodom khua ata Lota a chhuah ni chuan, vân aṭangin mei leh kât a sûr a, an zain a tihlum ta vek a. 30 Chutiang bawkin Mihring Fapa hi a rawn inlâr ni chuan a awm ang. 31 Chumi niah chuan tu pawh a sum in chhûnga awma, amah in chunga awm chu, chuh tûrin chhuk suh se; lova awm chu hâwng bawk suh se. 32 Lota nupui hre reng rawh u. 33 “Tu pawh a nun humhimna zawng apiangin a chân ang a, tu pawh a nun chân apiangin a humhim ang. 34 “Ka hrilh a che u, chumi zânah chuan khum pakhatah mi pahnih an awm ang a, pakhat chu kal bopuiin a awm ang a, pakhat chu hnutchhiahin a awm ang. 35 Hmeichhe pahnih buh râwt sawmin an awm ang a, pakhat chu kal bopuiin a awm ang a, pakhat chu hnutchhiahin a awm ang,” a ti a. 37 Tin, anni chuan a hnênah, “Lalpa, khawiah maw?” an ti a, an chhâng a. Tin, ani chuan an hnênah, “Saruang awmna apiangah mulukawlhte pawh an awm ang,” a ti a.
Hmeithai leh rorêltu
1 Tin, beidawng lovin an ṭawngṭai fo tûr a ni tih hriattîrna tûrin, an hnênah tehkhin thu a sawi a: 2 “Khaw engah emaw rorêltu pakhat a awm a, chu mi chuan Pathian a hlau lo va, mihring lah a ngaihsak hek lo; 3 tin, chumi khuaah chuan hmeithai pakhat a awm a; ani chu, ‘Ka khingpui chungah phuba mi lâksak rawh,’ tiin a hnênah a kal fo va. 4 Tin, ani chuan rei fe a duh lo va; nimahsela, nakinah chuan a rilruin, ‘Pathian hlau lovin mihring ngaihsak lo mah ila, 5 he hmeithai hian mi tihbuai avângin a phuba ka lâksak teh mai ang; chuti lo chuan, a lo kal fo hian mi la tihah hrep dah ang e,’ a ti a,” a ti a. 6 Tin, Lalpa vêkin, “Rorêltu fel lo thusawi chu hre rawh u. 7 An chungah zaidawh rih mah sela, a mi thlan, a chhûn a zâna amah kotute phuba chu Pathianin a lâksak lo vang em ni? 8 Ka hrilh a che u, an phuba a lâksak thuai ang. Nimahsela, Mihring Fapa hi a lo kal hun chuan, khawvêlah hian rinna a rawn hmu ang em ni?” a ti a. Pharisai leh chhiahkhawntu ṭawngṭai 9 Tin, mi fel tak nih inringa, mi dang zawng zawng hmusit ṭhîn tute emaw hnênah chuan he tehkhin thu pawh hi a sawi a: 10 “Mi pahnih Pathian biak inah ṭawngṭai tûrin an han kal a; pakhat chu Pharisai a ni a, pakhat chu chhiahkhawntu a ni. 11 Pharisai chu a ding a, amah chauhvin heti hian a ṭawngṭai a: ‘Pathian, mi dang anga hlêprute, fel lote, uirête ka nih loh avâng leh he chhiahkhawntu ang pawh hi ka nih loh avângin i chungah ka lâwm e. 12 Chawlhkâr khat apiangah vawi hnih chaw ka nghei ṭhîn a; ka neih apiang sâwmah pakhat ka pe ṭhîn,’ a ti a. 13 Chhiahkhawntu erawh chu hla takah a ding a, vân lam pawh a dâk ngam lo va, ‘Pathian, kei mi sual hi mi khawngaih rawh,’ tiin a âwm a inchûm a inchûm ta zâwk a. 14 “Ka hrilh a che u, a hmasa aiin chu mi zâwk chu thiam changin a inah a kal chhuk ta a. Inngaihlu apiang an tlâwm ang a, inngaitlâwm chu chawimawiin an awm ang,” a ti a.
Isuan naupangte mal a sâwm
15 Tin, a deh atân a hnênah an nausênte pawh an rawn hruai a; zirtîrte erawh chuan chu chu an hmuh veleh an lo hau va. 16 Nimahsela, Isuan anni chu a ko va, “Naupang tête ka hnênah han kaltîr ula, hnar suh u; Pathian ram chu hetiang mite ta a ni si a. 17 Tihtakmeuhvin ka hrilh a che u, tu pawh Pathian ram chu naupang têin a lawm anga lâwm lo apiang a chhûngah an lût tawp lo vang,” a ti a.
Mi hausa pakhat
18 Tin, hotu tuin emaw a hnênah, “Zirtîrtu ṭha, chatuana nunna chang tûrin engtin nge ka tih ang?” tiin a zâwt a. 19 Tin, Isuan a hnênah, “Engati nge ṭha mi tih? Mi pakhat chauh lo chu tu mah ṭha an awm lo, chu chu Pathian a ni. 20 Thupêkte chu i hria alâwm - ‘Uirê suh, Tualthat suh, Ru suh, Dâwtin hêk suh, I nu leh i pa chawimawi rawh,’ tihte hi,” a ti a. 21 Tin, ani chuan, “Chûng thu zawng zawng chu ka naupan têt ata ka zâwm zêl ṭhîn,” a ti a. 22 Tin, Isuan chu chu a hriatin a hnênah, “Tunah pawh kawng khat i la bâk e; i neih zawng zawng hralh la, pachhiate hnênah sem rawh; chutichuan, vânah ro i nei ang; tin, lo kal la, mi zui ang che,” a ti a. 23 Ani erawh chuan chûng thu chu a hriatin a lungngai ta êm êm a, a hausak êm avângin. 24 Tichuan, Isuan amah chu a en a, “Sum ngahte chu Pathian rama luh a va harsa dâwn êm! 25 Mi hausa Pathian rama luh aiin, sanghâwngsei hriau benga luh tlang a awl zâwk a ni,” a ti a. 26 Tin, chu thu hriate chuan, “A nih leh, tu nge chhandam ni thei ang le?” an ti a. 27 Ani erawh chuan, “Mihring tih rual loh hi Pathian tih theih a ni,” a ti a. 28 Tin, Peteran, “Ngai teh, keinin kan in leh lo kalsanin kan zui ta chia,” a ti a. 29 Tin, ani chuan an hnênah, “Tihtakmeuhvin ka hrilh a che u, tu pawh Pathian ram avânga in emaw, nupui emaw, unaute emaw, nu leh pa emaw, fate emaw kalsan tawh phawt chu, 30 tûn dam chhûng la la hian a aia tam zâwk hmu lo tûr tu mah an awm lo, hun lo la thleng tûra chatuana nunna nên,” a ti a.
A thih tûr thu Isuan a sawi vawi thumna
31 Tin, sâwm leh pahnihte chu a hnênah a hruai hrang a, an hnênah, “Ngai teh u, Jerusalem khuaa kan chhoh dâwn hi; zâwlneite thu ziak zawng zawng kha Mihring Fapa chungah hian a thleng ang. 32 Jentailte hnênah an pe ang a, nuihza siam nân an hmang ang a, zahthlâk takin an siam ang a, chil an chhâk ang; 33 tin, an vua ang a, an tihlum ang; tin, ni thum niah a tholeh ang,” a ti a. 34 Tin, chûng thu rêng rêng chu a ngaihna an hre lo va; thusawi chu an lakah thupin a awm a, eng sawi nge a nih pawh an hre lo va.
Mitdel kutdawh tihdam
35 Tin, heti hi a ni a, Jeriko khua a thlen dâwnin, mitdel tu emaw kawng sîrah kutdawhin a lo ṭhu a; 36 chu mi chuan mipui kal thâwm a hria a, engtizia nge ni ta tih a zâwt a. 37 Tin, anni chuan Nazareth Isua a kal a ni tih an hrilh a. 38 Tichuan, ani chu, “Isu, Davida Fapa, mi khawngaih rawh,” tiin a au ta a. 39 Tin, a hmasate chuan ngawi tûrin an hau va; nimahsela, ani chu, “Davida Fapa, mi khawngaih rawh,” tiin a au zual sauh va. 40 Tichuan, Isua chu a ding a, a hnêna han hruai tûrin thu a pe a; tin, a kiang a lo thlen chuan, 41 “I chungah engtia ka tih nge i duh?” a ti a, a lo zâwt a. Tin, ani chuan, “Lalpa, hmuh theih ka duh,” a ti a. 42 Tin, Isuan a hnênah, “Hmu thei tawh ang che, i rinna hi i dampui a ni e,” a ti a. 43 Tin, thâwklehkhatan a hmu thei ta nghâl a, Pathian fak chung zêlin amah chu a zui ta a; tin, mi zawng zawng chuan chu chu an hmuhin Pathian an fak a.
Isua leh Zakaia
1 Tin, Isua chu Jeriko khuaah a lût a, a chhûnpelh dâwn a. 2 Tin, ngai teh, mi pakhat a hming Zakaia a awm a; chu mi chu chhiahkhawn hotu a ni a, amah pawh a hausa hle a. 3 Tin, Isua chu mi eng ang nge a nih hmuh a tum a; mipui avângin, amah lah a tawi si a, a hmu thei lo va. 4 Tichuan, a tlân khalh a, a en tûrin theipui kûngah a lâwn a; chumi kawng chu a rawn zawh tûr a ni si a. 5 Tin, Isua chu chumi hmun a thlen chuan a dâk a, a hnênah, “Zakai, lo chhuk thuai rawh; vawiinah i inah ka thleng tûr a ni,” a ti a. 6 Tin, hmanhmawh takin a chhuk a, hlim takin amah chu a thleng ta a. 7 Tin, chu chu an hmuh veleh an zain, “Mi sual hnêna thleng tûrin a luh tâk saw,” an ti a, an phunnawi a. 8 Tin, Zakaia chu a ding a, Lalpa hnênah chuan, “Ngai teh, Lalpa, ka sum zâtve pachhiate hnênah ka pe ang a; tin, tu lakah pawh thil eng pawh lo hlêpru ila, a leh liin ka rûl leh ang,” a ti a. 9 Tin, Isuan Zakaia chungthu a sawi a, “Vawiinah he inah hian chhandamna a lo thleng ta, ani pawh Abrahama fapa a ni si a. 10 Boralte zawnga chhandam tûrin Mihring Fapa hi a lo kal a ni rêng a ni,” a ti a.
Rangkachak talent tehkhin thu
11 Tin, chûng thute chu an ngaihthlâk laiin, Jerusalem khua a hnaih tâk avâng leh, Pathian ram lo lang nghâl tûr nia an rin avângin tehkhin thu a sawi tel a. 12 Chutichuan, hêng thu hi a sawi a: “Mi ṭha tu emaw ram awpna thu laa lo kîr leh tûrin khaw lamhla takah a kal a. 13 A kal dâwnin a bawihte sâwm a ko va, an hnênah rangkachak tangka sâwm a pe a, an hnênah, ‘Ka lo thlen leh hma loh zawng hei hian lo sumdâwng rawh u,’ a ti a. 14 Nimahsela, a khuaten an hua a, ‘He mi hi kan lal atân kan duh lo ve,’ ti tûrin a hnungah palai an tlântîr ve a. 15 “Tin, heti hi a ni a, ram awpna thu chu a lâka, a lo kîr leh chuan a bawih, tangka a pêkate chu, an peipun chin hriat nân a kohtîr a. 16 Tin, a hmasa ber chu a lo kal a, ‘Ka pu, i rangkachak tangka kha sâwmin a pung e,’ a ti a. 17 Tin, ani chuan a hnênah, ‘Bawih ṭha, i ti ṭha e; tlêm te chunga i rinawm avângin khaw sâwm chungah hotuah awm rawh,’ a ti a. 18 Tin, a dawttu chu a lo kal a, ‘Ka pu, i rangkachak tangka kha pangain a pung e,’ a ti a. 19 Tin, ani chuan ani hnênah pawh chuan, ‘Nang pawh khaw panga chungah hotuah awm rawh,’ a ti a. 20 “Tin, mi dang a lo kal a, ‘Ka pu, en teh, hei i rangkachak tangka kha! Thlan hrûkna puanin ka vawng reng a ni; 21 mi vîn tak i nih avângin ka hlau che a ni; i dah loh pawh i la ṭhîn a, i tuh loh pawh i ât ṭhîn si a,’ a ti a. 22 “Tin, ani chuan a hnênah, ‘Bâwih sual, i ṭawngka chhuak ngeiin ka thiam loh vang che. Mi vîn tak ka niha, ka dah loh pawh ka lâk ṭhina, ka tuh loh pawh ka ah ṭhin i hria maw? 23 A nih ahnu, engati nge ka tangka hi sumdâwng ina i dah loh? Tichuan, ka hâwnin a pung nên ka ṭhîng tûr a ni,’ a ti a. 24 Tin, a kianga dingte hnênah, ‘A rangkachak tangka kha lâksak ula, rangkachak tangka sâwm neitu hnênah pe rawh u,’ a ti a. 25 Tin, anni chuan a hnênah, ‘Ka pu, ani zawngin rangkachak tangka sâwm a nei alâwm,’ an ti a. 26 ‘Ka ti a che u, a nei apiang an pêk belhchhah ang a, a nei lo chu a neih chhun pawh an lâksak ang. 27 Nimahsela, hêng mi dotute, an lal atâna mi duh lote hi, rawn hruai ula, ka hmaah that rawh u,’ a ti a,” a ti a.
Ropui taka Jerusalem-a luh
28 Tin, chutiang thu a sawi zawh chuan Jerusalem khaw lam pan chhovin hma a hruai a. 29 Tin, heti hi a ni a, Bethphage leh Bethani khaw kiang, Olive tlâng an tih chu, a thlen chuan zirtîrte zînga mi pahnih a tîr a, 30 “In hma zâwn khuaah sâwn va kal ta ula; chutah chuan in luh tirhin sabengtungno thlun, tu ma la chuan ngai lohna in va hmu ang; chu chu phelh ula, han kai rawh u. 31 Tin, tu pawhin, ‘Engah nge in phelh?’ tia an zawh che u chuan, heti hian sawi ang che u, ‘Lalpan a duh a ni,’ tiin,” a ti a. 32 Tin, a tirhte chu an kal ta a, an hnêna a sawi ang ngeiin an va hmu a. 33 Tin, sabengtungno chu an phelh lai chuan a neituten an hnênah, “Sabengtungno kha engah nge in phelh?” an ti a. 34 Tin, anni chuan, “Lalpan a duh a ni,” an ti a. 35 Tichuan, Isua hnênah an rawn kai ta a; tin, sabengtungno chungah chuan an puante an phah a, a chungah Isua an chuantîr a. 36 Tin, a kalna tûr kawngah chuan an puante an phah zêl a. 37,38 Tin, an thlen dâwn hnaihin, Olive tlâng liam dâwnah chuan, zirtîr mipui zawng zawng chu a thil mak tih zawng zawng an hmuh avângin an lâwm a, aw ring takin, “Lalpa hminga Lal lo kal chu fakin awm rawh se, vânah rem thu lêng sela, chungnung berah khian ropuina awm rawh se!” tiin Pathian an fak ta a. 39 Tin, mipui zînga Pharisai ṭhenkhatin a hnênah, “Zirtîrtu, i zirtîrte hi zilh rawh,” an ti a. 40 Ani erawh chuan, “Ka hrilh a che u, hêngte hi an ngawih reng chuan lungtê tal an au chhuak tûr a ni,” a ti a, a chhâng a.
Isuan Jerusalem a ṭah
41 Tin, a thlen dâwn ruaiin khua chu a hmu ta a, a ṭah chhan a, 42 “Aw, nang lul hian tûn chhûng hian thlamuanna tûr thu hi lo hre teh hrâm la! Nimahsela, tûnah zawng i hmuh loh nân a inthup tawh si a. 43,44 I râlten i vêlin lei kulh an siam ang a, an hual ang chia, i vêlin chhuah theih lohvin an awm chhan ang chia, i chhûnga i fanaute, nangmah nên leiah an paih vak ang che, i chhûnga lung intiang rêng rêng an zuah lo vang; an fan lai che i hriat loh avângin chutiang nite chu i chungah a lo la thleng ang,” tiin.
Isuan Tempul a tlawh
45 Tin, Pathian biak inah chuan a va lût a, englo zuartute chu a hnawt chhuak ta a; 46 an hnênah, “ ‘Ka in chu ṭawngṭaina in a ni ang,’ tih ziak a ni; nangni erawh chuan suam hmangte pûkah in siam zâwk hi,” a ti a. 47 Tin, ni tin Pathian biak inah chuan a zirtîr ṭhîn a. Tin, puithiam lalte leh lehkhaziaktute leh vântlâng zînga hotu deuhte chuan amah tihboral an tum a; 48 nimahsela, miten a thu an ngaihthlâk kham theih loh avângin, a tih dân tûr an hre thei lo a ni.
Isua thuneihna chungchâng
1 Tin, ni khat chu heti hi a ni a, Pathian biak inah mite a zirtîra, Chanchin Ṭha a hril laiin, puithiam lalte leh lehkhaziaktute chu, upate nên a hnênah an lo kal thut a; 2 tin, a hnênah, “Tu thuin nge hêng thil hi i tih? Tuin nge thu pe che? Min hrilh rawh,” tiin an zâwt a. 3 Tin, ani chuan an hnênah, “Kei pawhin thu kam khat ka zâwt ve ang che u; mi hrilh rawh u. 4 Johana baptisma kha vâna mi thu nge mihring thu?” a ti a, a chhâng a. 5 Tin, an inngaihtuah a, “ ‘Vâna mi thu,’ kan tih chuan, ‘Engah nge a thu in awih loh?’ min ti si ang a. 6 Tin, ‘Mihring thu,’ kan tih chuan mi zawng zawngin lungin min dêng ang; Johana chu zâwlnei a nih an ring si a,” an ti a. 7 Tichuan, an chhâng a, “Khawi lam zâwk thu nge ni kan hre lo,” an ti a. 8 Tin, Isuan an hnênah, “Kei pawhin tu thuin nge hêng thil hi ka tih ka hrilh bîk lo vang che u,” a ti a.
Grêp huan thlawh hlawhtute tehkhin thu
9 Tin, vântlâng hnênah he tehkhin thu hi a sawi ta a: “Tuin emaw grêp huan a siam a, lo enkawltute hnênah thlawh hlawh tûrin a pe a, rei tak thang tûrin ram dangah a kal ta a. 10 Tin, a lawh hun chuan, huana rah chu a chan ai an lo pêk tûrin, lo enkawltute hnênah chuan bawih pakhat a tîr a; nimahsela, lo enkawltute chuan an lo vêl a, kutruakin an kaltîr leh ta a. 11 Tin, bawih dang a tîr leh a; chu pawh chu an lo vêl leh bawk a, zahthlâk takin an siam a, kutruak vêkin an kaltîr leh ta a. 12 Tin, a pathumna a tîr leh pek a; chu mi pawh chu an lo tisil a, an paih chhuak ta a. 13 “Tin, grêp huan neitupa chuan, ‘Engtin nge ka tih ang aw? Ka fapa duh tak ka tîr mai ang, ani hi an lo zah mahna,’ a ti a. 14 Nimahsela, lo enkawltute chuan ani chu an lo hmuh veleh, ‘He mi hi ro luahtu tûr chu a ni; i that ang u; chutichuan, a ro chu kan tân a ni ang,’ tiin an inrâwn a. 15 Tichuan, grêp huan ata chu an theh chhuak a, an tihlum ta a. Chutichuan, grêp huan neitupa chuan an chungah engtin nge a rawn tih ang? 16 Lo enkawltute chu a rawn tiboral ang a, huan chu mi dangte a pe ang,” a ti a. Tin, chu chu an hriatin, “Chûng êm chu thleng suh se!” an ti a. 17 Nimahsela, ani chuan anniho chu a en a, “He thu an ziak hi eng nge ni le? ‘In satute lung duh loh kha, Chu ngei chu a kila lung ṭangkai ber a lo ni ta,’ tih hi. 18 Tu pawh chumi lung chunga tlu apiang an keh sawm ang; a delh lek phei chu a râwt dip ang,” a ti a.
Chhiah pêk leh pêk loh thu
19 Tin, chutih lai tak chuan lehkhaziaktute leh puithiam lalten man an tum a; nimahsela, mipui chu an hlau va; chu tehkhin thu chu anmahni demin a sawi tih an hre si a. 20 Tin, amah chu ram awptu rorêlna leh thuneihnaa thlen atân, a thusawi sual la tûrin an châng reng a, enthlatu, mi ṭha anga awm derte chu an tîr a. 21 Anni chuan a hnênah, “Zirtîrtu, dik takin thu i sawiin i zirtîr a, tu mah thlei bîk lovin tihtakzetin Pathian kawng thu i zirtîr ṭhîn tih kan hria e; 22 Kaisara hnêna chhiah kan chawi a thiang nge thiang lo?” tiin an zâwt a. 23 Nimahsela, ani chuan an ngamthlêm a ni tih a hria a, 24 an hnênah, “Duli mi entîr rawh u,” a ti a. “Tu lem leh tu hming nge chuang hi?” a ti a. Tin, anni chuan, “Kaisara,” an ti a. 25 Tin, ani chuan an hnênah, “A nih ahnu, Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a. 26 Tichuan, mipui hmaa a thu sawi sual lâk tûr an hmu lo va; a chhânna chu mak an ti hle a, an ngawi reng a.
Thawhlehna thu
27 Tin, Saddukai, thawhlehna a awm lo tite zînga mi tute emaw a hnênah an lo kal a; 28 a hnênah, “Zirtîrtu, Mosian, ‘Tu pawh a unaupain nupui nei sela, fa nei lovin thi sela, a unaupain a nupui rochungin, a unaupa tân chi a thlahsak tûr a ni,’ tih min ziaksak a ni. 29 Aw le, sal sarih an awm a; a upa berin nupui a nei a, fa nei lovin a thi a. 30 A pahnihna chuan a rochung a; 31 a pathumna chuan a rochung leh a; chutiang ṭheuhvin pasarihte chu fa nei lovin an thi zêl a. 32 Chumi hnuah chuan hmeichhia pawh chu a thi ta a. 33 Chutichuan, thawhleh hunah chuan a tu bera nupui nge ni ang? An pasarih chuan nupuiah an nei ṭheuh si a,” tiin an zâwt a. 34 Tin, Isuan an hnênah, “He khawvêl mite hi nupui pasal an innei ṭhîn; 35 nimahsela, chûng huna tel tlâkah leh mitthi zîng ata thawhlehnaa tel tlâka ruat apiangte chu nupui pasal an innei dâwn tawh lo ve; 36 thih pawh an thi leh thei dâwn tawh lo a ni, vântirhkohte tlukin an awm dâwn si a; thawhlehna fate an nih avângin Pathian fate an ni ang. 37 Mitthi kaihthawha an awm tûr thu, Mosia pawhin Hnimbuk thu-ah Lalpa chu, ‘Abrahama Pathian, Isaaka Pathian, Jakoba Pathian,’ a tih lai khân a hriattîr kha. 38 Ani chu mitthi Pathian a ni lo va, mi nung Pathian a ni zâwk e; ani ngaih chuan mi zawng zawng an nung vek si a,” a ti a. 39 Lehkhaziaktu tuten emaw, “Zirtîrtu, i sawi dik zet mai,” an ti a, an chhâng a. 40 Thu dang an zâwt ngam tawh si lo.
Messia chungchâng zawh fiahna
41 Tin, ani chuan an hnênah, “Krista chu Davida fapa a ni tih engtiziaa sawi ṭhîn nge an nih? 42-43 Fakna Hla Buah Davida ngeiin, ‘Lalpa chuan ka Lalpa hnênah, “I hmêlmate i ke nghahchhana ka siam hma loh zawng Ka ding lamah ṭhu rawh,” a ti,’ a ti a. 44 Chutichuan, Davidan ani chu ‘Lalpa’ a ti si a, engtin nge a fapa a nih theih le?” a ti a.
Lehkhaziaktute laka fîmkhur tûr
45 Tin, mi zawng zawng hriatin a zirtîrte hnênah, 46 “Lehkhaziaktute lakah fîmkhur rawh u; anni chuan kawrfual haa lên an duh ṭhîn a, dâwr hmunah chibai bûkte, inkhâwmna inah ṭhutphah ṭha berte, ruaiṭhehnaah hmun ṭha berte an ngaina ṭhîn a. 47 Hmeithai sum an ei a, tlâng bum nân rei tak an ṭawngṭai ṭhîn; chûngho chuan thiam loh an chang nasa lehzual ang,” a ti a.
Hmeithai rethei thawhlâwm
1 Tin, a dâk chhuak a, mi hausaten thawhlâwm bâwma an thawhlâwm thlâk lai a hmu a. 2 Tin, hmeithai rethei tê tu emaw dâr tangka dere pahnih rawn thlâk a hmu bawk a. 3 Tichuan, “Tihtakzetin ka hrilh a che u. Hêng zawng zawng ai hian he hmeithai rethei tê hian a thlâk tam zâwk; 4 hêng zawng zawng hian an neih liama mi thawhlâwmah an thlâk a ni; ani erawh hi chuan a duh lai tak, a intunnunna tûra a neih chhun tê a thlâk vek a ni,” a ti a.
Tempul chhiat tûr sawi lâwkna
5 Tin, tuten emaw Pathian biak in thu, lung ṭha tak leh thilpêk khâwma an chei mawizia chu an sawi laiin, ani chuan, 6 “Hêng in thil hmuh hi, tihchim lohva lung intiang rêng rêng hetah a awm lo vang; chutiang ni chu a la thleng ang,” a ti a.
Harsatna leh tihduhdahna
7 Tin, anni chuan a hnênah, “Zirtîrtu, chûng chu eng tikah nge a lo awm ang le? Chûng chu a lo thlen dâwn hunah chhinchhiahna eng nge awm ang?” tiin an zâwt a. 8 Tin, ani chuan, “An tihder loh nân che u fîmkhur rawh u. Mi tam tak, ‘Krista chu ka ni,’ ‘A hun a thleng dâwn ta e,’ tiin keima hming chhâlin an lo kal ang; chu mite chu zui suh u. 9 Tin, indo thu leh buai thu in hriat hunin hlau suh ang che u; chûng chu a thleng hmasa tûr rêng a ni, tâwpna erawh chu a thleng nghâl rih lo vang,” a ti a. 10 Tin, an hnênah, “Hnam hrang leh hnam hrang an indo vang a, ram hrang leh ram hrang an indo vang a; 11 lîr nasa takin a nghîng a nghîng ang a; hmun hrang hrangah ṭâmte a tla ang a, hrite a lêng bawk ang a; vân aṭangin thil hlauhawmte leh chhinchhiahna nasa takte a lo awm ang. 12 Nimahsela, chûng thil zawng zawng thlen hma chuan an man ang che u a, inkhâwmna inah leh tân inah hruaiin an tiduhdah ang che u a, keima hming avângin lalte leh hotute hmaah an hruai ang che u. 13 In thiam channa a la ni hlei hlei ang. 14 Chutichuan, chhânna tûr ngaihtuah lâwk lo tûrin in rilruah intinghet rawh u; 15 in hmêlma zawng zawngin an dodâla an hnial theih lohna tûr kâ leh finna ka pe dâwn si che u a. 16 Tin, in nu leh in pate, in unaute, in laichînte, in ṭhiante pawhin an mantîr ang che u; a ṭhen an tihhlumtîr ang che u. 17 Keima hming avângin mi zawng zawng huat in ni ang. 18 Nimahsela, in samzai khat pawh a boral lo vang. 19 In chhelin in nun in chhanhim ang.
Jerusalem chhiat tûr thu
20 “Nimahsela, sipaihoten Jerusalem khua an hual in hmuh hunah, a boral dâwn tih hria ang che u. 21 Chutih hunah chuan Judai rama awmte chu tlângahte tlân bo rawh se; a chhûnga awmte chuan chhuahsan rawh se; rama awmte chu a chhûngah lût suh se. 22 Chûng ni chu phuba lâk ni a ni e, thu an ziak zawng zawng a lo thlen theihna tûrin. 23 Chûng niah chuan raite leh nauno pawmte chung a pik ang, khawvêlah hian hrehawm nasa tak a thlen dâwn avâng leh, he chite chungah hian thinurna a thlen dâwn avângin. 24 Tin, khandaihah an thi ang a, hnam tin hnênah sala hruaiin an awm ang; tin, Jentailte ni a kin hma loh zawng Jerusalem khua chu Jentailte rah behin a awm ang.
Mihring Fapa lo kal tûr thu
25 “Tin, niah te, thlaah te, arsiah te chhinchhiahna a awm ang a; tuifinriat rûm leh a fâwn avângin, leiah pawh hnam tin hrehawmna leh manganna a thleng ang; 26 thlabâr avâng leh khawvêla thil lo thleng tûr chu ngaihtuah avângin mite an thidang ang; vân thiltihtheihnate chu a nghîng dâwn si a. 27 Chutih hunah chuan Mihring Fapa hi, thiltihtheihna leh ropuina nasa tak nên, chhûm zînga lo kal an hmu ang. 28 Tin, chûng thil chu a lo thlen tirhin, en chho ula, dâk chhuak rawh u; in tlanna tûr chu a hnaih tâk avângin,” a ti a.
Theipui kûng aṭanga zir tûr
29 Tin, an hnênah tehkhin thu a sawi a: “Theipui kûng leh thing zawng zawng en rawh u; 30 a chawrno veleh chu chu in hmu a, nipui a lo thaw dâwn tih mahniin in hre ṭhîn. 31 Chutiang bawkin nangni pawhin chûng chu a lo thleng in hmuh hun chuan, Pathian ram a lo hnai tawh tih hria ang che u. 32 Tihtakmeuhvin ka hrilh a che u, thil zawng zawng a thlen kim hma loh zawng tûnlai chhuante hi an ral lo vang. 33 Lei leh vân a ral ang a, ka thu erawh chu a ral lo vang.
Inrin reng a ṭûl
34 “Amaherawhchu, fîmkhur rawh u; chuti lo chuan, ei puar lutuk nên, zu ruih nên, dam chhûng khawsak ngaihtuah nên, in rilru a khat lutuk hlauh ang a, chumi ni chuan thang âwk angin thâwklehkhatan in chungah a lo thleng phut ang. 35 Chutiang tak chuan lei chung zawng zawnga awmte chungah chuan a thleng ṭheuh dâwn a ni. 36 Chutichuan, chûng thil lo thleng tûr zawng zawng chu pumpelh tlâkah leh Mihring Fapa hmaa ding tlâka ruat in nih theihna tûrin, eng lai pawhin ṭawngṭai chungin ngaihven rawh u,” a ti a. 37 Tin, ni tin Pathian biak inah a zirtîr ṭhîn a; zan tin a chhuak a, Olive tlâng an tihah chuan a riak ṭhîn a. 38 Tin, zîngah a thu ngaithla tûrin mi zawng zawng Pathian biak inah a hnênah an lo kal ṭhîn.
Isua an phiar
1 Tin, chhang dawidim telh loh kût, kalhlên kût an tih chu, a hnai ta a. 2 Tin, puithiam lal leh lehkhaziaktute chuan a tihhlumna zia an zawng a, vântlâng an hlau si a.
Judan Isua mantîr a remti
3 Tin, sâwm leh pahnihte zînga tel, Juda Iskariota an tiha chhûngah chuan Setana a lût a. 4 Tichuan, ani chu a va kal a, an hnêna a mantîr theihna tûrzia puithiam lalte leh hotute chu a va râwn a. 5 Tin, anni chu an lâwm hle a, a hnênah tangka pêk an tiam ta a. 6 Tin, ani chuan a remti a, mipui awm loh hlâna mantîrna remchâng a zawng ta a.
Kalhlên kût chaw ei tûrin Isua a kal
7 Tin, chhang dawidim telh loh ni, kalhlên kût, berâmno talhna tûr ni chu a lo thleng ta a. 8 Tichuan, Isuan Petera leh Johana chu, “Kalhlên kût chaw kan ei tûrin min va buatsaihsak rawh u,” tiin a tîr a. 9 Tin, anni chuan a hnênah, “Khawiah nge va buatsaih ila i duh?” an ti a. 10 Tin, ani chuan an hnênah, “Ngai teh u, khawpuia in luhin, mipa, bêla tui puin a tâwk ang che u a; a luhna inah zui lût ang che u. 11 Tin, in neitupa hnênah chuan, ‘Zirtîrtuin, ka zirtîrteho nên kalhlên kût chaw kan eina tûr, mikhual pindan chu khawiah nge? a ti a che,’ ti ang che u. 12 Tichuan, ani chuan pindan chungnung zau tak, bungraw awm sa, a entîr ang che u; chutah chuan buatsaih ang che u,” a ti a. 13 Tin, an kal ta a, an hnêna a sawi ang takin an hmu a; tin, kalhlên kût chaw chu an buatsaih ta a.
Lalpa Zanriah
14 Tin, a ei a lo hun chuan ani chuan chaw a kîl a, tirhkohte chuan an kîlpui ve a. 15 Tin, an hnênah, “Ka thil tuar hmain he kalhlên kût chaw hi eipui che u ka duh êm êm a ni. 16 Ka hrilh a che u, hei hi Pathian rama a tak tak a nih hma loh zawng, ka ei leh tawh dâwn lo a ni,” a ti a. 17 Tin, no a la a, lâwm thu a sawi zawhin, “Hei hi la ula, insem rawh u; 18 ka hrilh a che u, tûn achinah Pathian ram a lo thlen hma loh zawng, grêp hrui rah tui hi ka in leh tawh dâwn lo a ni,” a ti a. 19 Tin, chhang a la a, lâwm thu a sawi zawhin a phel a, an hnênah a pe a, “Hei hi ka taksa, in aia pêk tûra chu a ni; mi hriat reng nân hei hi ti ṭhîn rawh u,” a ti a. 20 Tin, zanriah ei zawhin chutiang bawkin no chu a la a, “He no hi ka thisena thuthlung thar chu a ni, in aia chhuak tûra chu. 21 “Nimahsela, ngai teh u, mi mantîrtu tûra kut chu ka hnênah dawhkân chungah a awm si a. 22 Mihring Fapa hi an ruat angin a kal dâwn a ni; nimahsela, a mantîrtu tûr mihring chung chu a pik e!” a ti a. 23 Tin, annin, “Kan zîngah chutiang thil ti tûr chu tu nge ni ang le?” tiin an inzâwt ta a.
Tu nge ropui ber
24 Tin, an zîngah tu ber nge ropui bera a ruat tih thu-ah inhnialna a lo chhuak a. 25 Tin, ani chuan an hnênah, “Jentailho lalte chu an chungah an lal ṭhîn a; an chunga thuneitute chu, ‘Nu leh pa,’ an ti ṭhîn. 26 Nimahsela, nangni zawng chutiang in ni lo vang; in zînga ropui ber chu nau zâwk angin awm sela, lal ber chu rawngbâwltu angin awm zâwk rawh se. 27 Tu nge ropui zâwk, chaw kîltu nge rawngbâwltu? Chaw kîltu a ni lo vem ni? Nimahsela, kei zawng in zîngah rawngbâwltu angin ka awm hi. 28 “Thlêmna ka tawh chhûng zawng nangni mi awmpuitu in ni a; 29,30 tichuan, ka rama ka dawhkâna in eia in bâr theihna tûrin, ka Pain ram mi ruatsak angin ram ka ruatsak che u a ni; tichuan, Israel hnam sâwm leh hnam hnih rorêlsakin lalṭhutphahah in la ṭhu ang.
Peteran Isua a phat tûr hrilh lâwkna
31 “Simon, Simon, ngai teh, Setanan buh thlei anga a thlei theihna tûr che uin, nangniho hi a dîl che u asin; 32 nimahsela, i rin a bo loh nân ka ṭawngṭaisak che a ni; i hawi kîr leh hunah nangin i unaute tinghet ang che,” a ti a. 33 Tin, ani chuan a hnênah, “Lalpa, i hnênah chuan tân inah leh thihnaah pawh kal ve ka huam asin,” a ti a. 34 Tin, ani chuan, “Peter, ka hrilh a che, vawi thum mi phat hma loh zawng vawiinah hian âr a khuang lo vang,” a ti a.
Tangka ip, iptê leh khandaih
35 Tin, an hnênah, “Tangka ip lova, iptê lova, pheikhawk lova ka tirh chhuah che u khân thil rêng rêng in tlachham em?” a ti a. Tin, anni chuan, “Chham lo,” an ti a. 36 Tin, ani chuan an hnênah, “Tûnah erawh chuan tu pawh tangka ip nei chuan keng rawh se, iptê nên; tu pawh khandaih nei lo chuan a puan hralh sela, lei rawh se. 37 Ka hrilh a che u, ‘Ani chu mi sual zîngah an chhiar tel ta,’ tih ziak kha ka chungah a lo thleng tûr a ni; ka chungchâng thute kha a thleng zo dâwn ta e,” a ti a. 38 Tin, anni chuan, “Lalpa, en teh, hei khandaih pahnih a awm,” an ti a. Ani chuan an hnênah, “A tâwk e,” a ti a.
Olive tlângah Isua a ṭawngṭai
39 Tin, ani chu a chhuak a, a dân pângngaiin Olive tlângah chuan a kal ta a; zirtîrte pawhin an zui a. 40 Tin, a hmun chu a va thlen chuan an hnênah, “Thlêmnaa in luh loh nân ṭawngṭai rawh u,” a ti a. 41 Tin, lung den phâk chinah emaw a va kal hrang ta a; tin, a ṭhingṭhi a, a ṭawngṭai a, 42 “Ka Pa, rem i tih chuan he no hi ka hnên ata la sawn rawh; nimahsela, keia thu ni lovin, nangma thu thu ni zâwk rawh se,” a ti a. 43 Tin, vân aṭangin vântirhkoh pakhat, a tiharh tûrin a hnênah a rawn inlâr a. 44 Tin, a thlaphâng êm êm a, ṭhahnemngai lehzualin a ṭawngṭai a; a thlan chu thi far lian tak angin leiah a far a. 45 Tin, a ṭawngṭai zawha a thawhin zirtîrte hnênah chuan a lo kal a, an lungngaih avânga an lo muhîl a hmu a; 46 tin, an hnênah, “Engati nge in muthilh? Thlêmnaa in luh loh nân tho ula, ṭawngṭai rawh u,” a ti a.
Isua an man
47 Tin, a la sawi lai mêkin, ngai teh, mipui an lo kal a, sâwm leh pahnihte zînga tel Juda an tih chuan an hma a rawn hruai a; tin, fawh tumin Isua a rawn pan a. 48 Nimahsela, Isua chuan a hnênah, “Juda, Mihring Fapa hi fâwpin i mantîr dâwn em ni?” a ti a. 49 Tin, a vêla mite chuan thil lo thleng tûr chu an hriatin, “Lalpa, khandaihin kan sât ang em?” an ti a. 50 Tin, an zînga tuin emaw puithiam lalber bawih chu a sât a, a beng ding lam a sah thlâksak a. 51 Isua erawh chuan, “A tâwk e,” a ti a. Tin, a beng chu a dek a, a tidam ta a. 52 Tin, Isuan a hnêna lo kal puithiam lalte, Pathian biak in hotute leh upate hnênah chuan, “Khandaihte, talhtumte kengin, suam hmang man tûr ang rengin in lo chhuak a ni maw? 53 Pathian biak ina in hnêna ni tin ka awm laite khân, mi man tumin mi ban si lo va; nimahsela, tûn hi in chêt hun a ni e, thim thuneihna nên,” a ti a. 54 Tin, an man a, an hruai a, puithiam lalber inah chuan an hruai lût ta a.
Peteran Isua a phat
Tin, Peteran hla tak aṭangin a zui a. 55 Tin, in hual chhûng kawtlaiah mei an chhêm a, an ṭhu khâwm a, Petera chu an zîngah a va ṭhu ve a. 56 Tin, mei ênga a ṭhut laiin nula tuin emaw a hmu a, a melh reng a, “He mi pawh hi a hnêna awm kha a nih hi,” a ti a. 57 Ani erawh chuan, “Hmeichhia, ani chu ka hre lo ve,” tiin a pha a. 58 Tin, nakin deuhvah mi dangin a rawn hmu leh a, “Nang pawh an zînga mi i nih hi,” a ti a. Petera erawh chuan, “Mihring, ka ni lo ve,” a ti a. 59 Tin, dârkâr khat lai chinah chuan mi dangin, “He mi pawh hi a hnêna awm kha a ni ngei mai; Galili rama mi a ni alâwm,” a ti tlat a. 60 Tin, Peteran, “Mihring, i thusawi chu ka hre lo ve,” a ti a. Tin, thâwklehkhatan, a ṭawng lai tak chuan âr a khuang ta nghâl a. 61 Tin, Lalpa chu a hawi a, Petera chu a en a. Tin, Petera chuan Lalpan, “Vawiinah hian âr a khuan hmain vawi thum mi phat ang,” a hnênah a tih thu kha a lo hre chhuak leh ta a. 62 Tin, a chhuak a, a ṭap ta zawih zawih a.
Isua an nuihzat a, an vua
63 Tin, Isua chu a chelhtuten nuihza siam nân an hmang a, an vua a. 64 Tin, a mit an tuam a, “Sawi rawh, tu nge vua che?” tiin an zâwt ṭhîn a. 65 Tin, thu dang tam tak pawhin an sawichhiain an hau va.
Sanhedrin hmaah Isua an hruai
66 Tin, khawvâr veleh vântlâng upaho, puithiam lalte leh lehkhaziaktute chu an rawn inkhâwm a, an rorêlnaah chuan an hruai a, 67 “Krista i nih zet chuan min hrilh rawh,” an ti a. Tin, ani chuan an hnênah, “Hrilh che u mah ila in awih lo vang; 68 zâwt che u mah ila in chhâng lo vang. 69 Nimahsela, tûn achinah chuan Mihring Fapa hi Pathian thiltihtheihna ding lamah a ṭhu tawh ang,” a ti a. 70 Tin, an zain, “Nang hi Pathian Fapa chu i ni em ni le?” an ti a. Tin, ani chuan an hnênah, “Ni e,” a ti a. 71 Tin, anni chuan, “Eng hriatna dang nge kan ngaih tawh ang? Keimahni ngeiin ama ka chhuak kan hre tawh alâwm,” an ti a.
Pilata hmaah Isua
1 Tin, pung khâwmho zawng zawng chu an tho va, Isua chu Pilata hnênah an hruai ta a. 2 Tin, “He mi hian kan chite a tikhawlo va, Kaisara hnênah chhiah chawi a khap a, Krista, lal, a intih kan hria e,” tiin an hêk ta a. 3 Tin, Pilatan a hnênah, “Juda-te lal i ni em?” tiin a zâwt a. Tin, ani chuan a hnênah, “Ni e,” a ti a, a chhâng a. 4 Tin, Pilatan puithiam lalte leh mipuite hnênah chuan, “He mi chungah hian eng mah sual ka hmu lo ve,” a ti a. 5 Nimahsela, anni chuan, “Galili ramah a ṭan a, hemi hmun thleng hian, Judai ram khaw tinah zirtîrin mi zawng zawng a chawk hnawk ṭhîn a ni,” tiin an bei lehzual sauh va.
Heroda hnênah Isua an hruai
6 Tin, Pilatan chu chu a hriatin, chu mi chu Galili rama mi a nih leh nih loh a zâwt a. 7 Tichuan, Heroda biala mi a ni tih a hriat veleh Heroda hnênah a tîr ta a; chûng lai chuan ani pawh chu Jerusalem khuaah a awm bawk a. 8 Tin, Herodan Isua a hmuh chuan a lâwm êm êm a; a chanchin a hriat avângin, hmân ata tawh hmuh a duh hle rêng a, a thil mak tih eng emaw tal hmuh pawh a beisei a. 9 Tin, thu tam tak a zâwt a; nimahsela, a eng mah chu a chhâng si lo. 10 Tin, puithiam lalte leh lehkhaziaktute chuan dingin nasa takin an hêk chiam a. 11 Tin, Heroda leh a sipaite chuan Isua an hmusit a, nuihza siam nân an hmang a; tin, puan ropui tak sintîrin Pilata hnênah a tîr leh ta a. 12 Tin, chumi ni tak chuan Heroda leh Pilata chu an inngeih ta a; chumi hma zawng chuan an intai ṭhîn a ni.
Thi tûrin Isua an ti
13 Tin, Pilatan puithiam lalte, hotute, mi zawng zawngte a ko khâwm a, 14 an hnênah, “ ‘Mite a tikhawlo,’ tiin he mi hi ka hnênah in rawn hruai kha a ni a; tin, ngai rawh u, in hmaah ka chhuahchhâl a, in hêkna thu-ah khân he mi chungah hian eng mah sual ka hmu lo a ni; 15 Heroda pawhin a hmu hek lo; kan hnênah a rawn tîr leh ta mai a nih hi; ngai rawh u, thihna khawp meuhvin eng mah a ti lo ve. 16 Chutichuan, ka vêl ang a, ka chhuah mai dâwn a ni,” a ti a. 18 Nimahsela, rual takin an au va, “He mi hi chu tiboral la, Barabba kha min chhuahsak zâwk rawh,” an ti a. 19 (Chu mi chu khawpuia helna eng emaw avâng leh, tual a thah avânga tân ina tâng a ni.) 20 Pilata erawh chuan Isua chu chhuah a duh a, an hnênah thu a sawi leh a. 21 Nimahsela, an au va, “Krawsah khêng bet rawh, krawsah khêng bet rawh,” an ti a. 22 Tin, ani chuan a vawi thumnaah an hnênah, “Engah maw? He mi hian eng nge a tihsual ni? Thihna khawp meuh a chungah eng mah ka hmu lo; chutichuan, ka vêl ang a, ka chhuah mai dâwn a ni,” a ti a. 23 Anni erawh chuan aw ring takin krawsa khêng bet tûrin an ngên lui hrâm a. Tin, an aw chuan a vau dai ta a. 24 Tin, Pilata chuan an ngen anga ti tûrin thu a titlu ta a. 25 Helna leh tualthah avânga tân ina tâng an dîl kha a chhuah a; Isua erawh chu an duh duha tihah a pe ta a.
Krawsah Isua an khêng bet
26 Tin, an hruai bo laiin Simona, Kurini khuaa mi, ram lam ata lo kal an man a, Isua hnung lama pu tûrin a chungah kraws chu an nghat a. 27 Tin, mi narân leh hmeichhia, âwm chûma ṭap ṭap, mipui tam takin an zui a. 28 Isua erawh chuan an lam a hawi a, “Jerusalem fanute u, min ṭah suh u, nangmahni leh in fate tân ṭap rawh u. 29 Ngai teh u, a ni a lo la thleng ang, chûng niah chuan, ‘Hmeichhe chingte, nau pai ngai lohna pumte, nau hnêk ngai loh hnutête chu a eng a thâwl e,’ an la ti ang. 30 Chutih hunah chuan miten tlâng hnênahte, ‘Min delh rawh,’ an la ti ang a; mual hnênahte, ‘Min khuh rawh,’ an la ti ang. 31 Thing hring maha hetiang an tih chuan, a rovah chuan eng ti takin ti ang maw?” a ti a. 32 Tin, a hnênah mi dang pahnih, mi sual, tihhlum tûrin an hruai ve a. 33 Tin, Luruh an tih hmun chu an thlenin, chutah chuan krawsah an khêng bet a, mi sualte nên, a ding lamah pakhat, a vei lamah pakhat. 34 Tin, Isuan, “Ka Pa, anni hi ngaidam rawh; an thiltih hi an hre lo a nih hi,” a ti a. Tin, a silhfênte chu an insemin ṭhum an vâwr a. 35 Tin, vântlângho chuan dingin an thlîr a. Tin, hotute pawhin, “Mi dang mah a tidam ṭhîn alâwm; Pathian thlan Krista a nih takzet chuan amah pawh intidam ang hmiang,” tiin an tiel a. 36 Tin, sipaite pawhin amah chu nuihza siam nân an hmang a, a hnênah an lo kal a, zu thûr an pe a, 37 “Juda-te lal i nih zet chuan, intidam rawh,” an ti a. 38 Tin, a chung lamah chuan, “He Mi hi Juda-te Lal a ni,” tiin lehkha a awm. 39 Tin, an mi sual khai pakhat chuan Isua a hau va, “Krista chu i ni lo vem ni? Intidam la, keini pawh min tidam ta che,” a ti a. 40 Nimahsela, pakhat chuan chhân pahin a zilhhau va, “Pathian meuh pawh i hlau na nge? Thuhmun rengin an hrem che hi. 41 Keini zawng hrem zia rêng kan ni; kan thiltih man chauh hmu kan nih hi; he mi hi zawngin eng mah a tisual si lo,” a ti a. 42 Tin, “Isu, i ram i thlen hunah mi hre reng ang che,” a ti a. 43 Tin, ani chuan a hnênah, “Tihtakmeuhvin ka hrilh a che, vawiinah hian ka hnênah Paradis-ah i awm ve ang,” a ti a.
Isua a thi ta
44 Tin, chawfâk hun lai a lo ni a, chumi achin behliang mun hun thlengin khawvêl a lo thim ta vek a, 45 ni êng a reh ta a; tin, Pathian biak in puanzâr chu a laiah a lo thlêr ta a. 46 Tin, Isua aw ring takin a au va, “Ka Pa, i kutah ka thlarau ka kawltîr e,” a ti a. Tin, chu chu a tih zawhin a thlarau a thlah ta a. 47 Tin, sipai za hotu chuan thil awmzia chu a hmuhin, “He mi hi matheilovin mi fel tak a ni phawt mai,” tiin Pathian a fak ta a. 48 Tin, chu ennawm chu thlîr tûra mipui rawn inkhâwm zawng zawngte chuan, thil awmziate chu an hmuhin, an âwmte chûm chûmin an haw leh ta a. 49 Tin, a hmêlhriatte zawng zawng leh hmeichhia, Galili ram aṭanga rawn zuitute chu, chûng thil chu thlîrin hla takah an ding a.
Isua phûm thu
50 Tin, ngai teh, mi pakhat a hming Josefa, rorêltu, mi ṭha tak, fel tak a awm, 51 (an rorêl leh an thiltih pawh kha a remti lo rêng a ni) Juda-te khua Arimathai-a mi a ni a, Pathian ram a beisei ṭhîn a. 52 Chu mi chu Pilata hnênah a kal a, Isua ruang a dîl a. 53 Tin, a la thla a, puan zai sînin a tuam a, thlân, lung ker kuak, tu mah la zalh ngai lohnaah a zalh a. 54 Tin, chumi ni chu Inrinni a ni a, Chawlhni a ni lek lek tawh si a. 55 Tin, hmeichhia, Galili ram aṭanga a hnêna lo kalte khân an zui zêl a, thlân leh a ruang zalh zia chu an hmu a. 56 Tin, an haw leh a, englo rimtuite leh hriak rimtuite an siam a.
Thawhlehna
1 Tin, Chawlhni chuan thupêk angin an châwl ta a; ni sarih ni hmasa berah erawh chuan vârṭianah, englo rimtui an siamte chu kengin thlânah chuan an va kal a. 2 Tin, thlân ata lung chu lum sawnin an hmu a; 3 tin, an lût a, Lal Isua ruang chu an hmu si lo. 4 Tin, heti hi a ni a, chûng avânga an mangan lai chuan ngai teh, mi pahnih, puan mi ên khalh thei sin an kiangah an lo ding a; 5 tin, an hlauhva an hmaia lei an sîk laiin anni chuan an hnênah, “Engati nge mitthi zînga mi nung in zawn? 6 Hetah a awm tawh lo ve, a tholeh ta; Galili rama a awm laia in hnêna a thusawi kha hre leh rawh u, 7 ‘Mihring Fapa hi mi sualte kuta mantîrin a awm ang a, krawsah an khêng bet ang a, ni thum niah a tholeh tûr a ni,’ a tih kha,” an ti a. 8 Tin, a thu chu an lo hre leh ta a, 9 thlân ata chu an haw leh a, sâwm leh pakhatte leh mi dang zawng zawngte hnênah chuan chûng thil zawng zawng chu an hrilh a. 10 (Chûng hmeichhiate chu Magdalini Mari te, Joani te, Jakoba nu Mari te an ni a; an hnêna hmeichhe dangte pawhin tirhkohte hnênah chuan chûng thu chu an hrilh bawk a.) 11 Nimahsela, chûng thu chu thu mai maiah an ruat a, an awihsak lo va. 12 Nimahsela, Petera chu a tho va, thlân lamah chuan a tlân ta a; tin, a kûn a, a bih a, puan zai sîn awmte chauh chu a hmu a; tichuan, thil awmzia chu mak ti takin a in lamah a haw ta a.
Emmau khaw pana kalte
13 Tin, ngai teh, chumi ni tak chuan an zînga mi pahnih chu, khaw pakhat Emmau an tihah an kal dâwn a, chumi khua chu Jerusalem khua aṭangin fîng sawmruk a ni a. 14 Tin, thil lo thleng zawng zawng chu an sawi dûn zêl a. 15 Tin, heti hi a ni a, an sawia an inhnial lai chuan Isua ngeiin a rawn pan a, an hnênah a kal ve ta a. 16 Nimahsela, amah chu an hriat theih loh nân, an mit chu tihvaihin a awm a. 17 Tin, an hnênah, “Kal paha in sawi dun kha eng thu nge ni?” a ti a. Tin, ngui takin an ding ta a. 18 Tin, a hming Kleopa zâwkin a hnênah, “Jerusalem khuaah nangmah chauhvin em ni i chên, tunlaia thil awmzia hi i hriat loh ni?” a ti a, a chhâng a. 19 Tin, ani chuan an hnênah, “Eng thil maw?” a ti a. Tin, anni chuan a hnênah, “Nazareth Isua, Pathian leh mi zawng zawng mit hmuha a thu-ah leh a thiltiha zâwlnei hmingthang tak chanchin thu; 20 puithiam lalte leh kan hotuten thah thu pêk tûrin an hruaia, krawsa an khen beh zia thute pawh kha. 21 Keinin Israel-te tlantu tûr kha a nih kan beisei tehlul nên. Eng pawh ni sela, chûng thil thlenna chin chu vawiin nên ni thum a ni tawh. 22 Chûng lo pawh chu kan pâwlte hmeichhia tute emaw, zîngah a thlânah an va kal a, min rawn timangang a; 23 a ruang hmu si lovin, ‘Pathian vântirhkohte inlâr kan hmu a, chu mite chuan a nung leh tih an sawi e,’ an rawn ti a. 24 Tin, kan awmpui zînga tute emaw thlânah chuan an kal a, hmeichhiate sawi ang ngeiin an hmu a; nimahsela, amah chu an hmu si lo va,” an ti a. 25 Tin, ani chuan an hnênah, “Mi âte u, zâwlneite thusawi zawng zawng awih kawnga ngawngte u! 26 Kristan chûng thil chu tuarin a ropuinaah a lût tûr a ni rêng lo vem ni?” a ti a. 27 Tin, Mosia leh zâwlneite zawng zawng lehkhaah a ṭan a, Pathian Lehkha zawng zawnga ama chanchin ziak apiang chu anmahni a hrilhfiah zêl a. 28 Tin, an kalna tûr khua chu an thleng dâwn ta a; tin, ani chu hla deuhva kal tum angin a awm a. 29 Tin, kâin an chelh a, “Kan hnênah awm ta che; khua a tlai dâwn ta a, ni pawh a tlâk dâwn tawh hi,” an ti a. Tichuan, an hnêna awm tûrin a lût ta a. 30 Tin, heti hi a ni a, an hnênah chaw kîla a ṭhutin chhang a la a, mal a sâwm a, a phel a, an hnênah a pe a. 31 Tin, an mit a lo vâr a, a hmêl an lo hre ta a; tin, ani chu a ral ta mai a. 32 Tin, anni chuan, “Kalkawnga min biak laia Pathian Lehkha Thute min hrilhfiah lai khân, kan thinlung a harh huai rêng lâwm ni kha?” an ti a. 33 Tin, chumi lai tak chuan an tho va, Jerusalem khuaah an kîr leh a, sâwm leh pakhatte leh an ṭhiante awm khâwm chu an hmu a, 34 “Lalpa chu a lo tholeh takzet a ni, Simona hnênah pawh a inlâr ta,” an lo ti a. 35 Tin, anni pawhin kalkawnga thil lo thleng leh, chhang a phela, a hmêl an lo hriat tâkziate chu an hrilh ve bawk a.
A zirtîrte hnênah Isua a inlâr
36 Tin, chûng thu chu an sawi laiin amah ngei chu an zîngah a lo ding a, an hnênah, “In chungah thlamuanna awm rawh se,” a ti a. 37 Nimahsela, râpthlâk an ti êm êm a, an hlau va, thlarau hmu-ah an inruat a. 38 Tin, ani chuan an hnênah, “Engati nge in mangan? Engah nge in rilruah rinhlelhna a lo awm? 39 Ka kutte, ka kephahte hi en rawh u, hei keimah ngei kha ka nih hi! Mi dek ula, en rawh u; mi hmuh ang hian thlarauvin tisa leh ruh a nei lo ve,” a ti a. 40 Tin, chu chu a sawi zawhin a kutte, a kephahte chu an hnênah a entîr a. 41 Tin, an lâwm luattuk avânga an la awih loh cheuva mak an tih chhûngin an hnênah, “Hetah englo ei tûr in nei em?” a ti a. 42 Tin, sangha rawh hrang khat an pe a. 43 Tin, a la a, an hmaah chuan a ei ta a. 44 Tin, an hnênah, “Hêng hi ka thu kha a ni, Mosia Dânahte, Zâwlnei Lehkhabuahte, Fakna Hla Buahte, ka chanchin ziak apiang a lo thlen tûrzia in hnêna ka awm laia ka hrilh ṭhin che u kha,” a ti a. 45 Tichuan, Pathian Lehkha Thu hriat nân an thinlung a tifing ta a; 46 tin, an hnênah, “Hetiangin ziak a ni, ‘Krista chuan hrehawm a tuar ang a, ni thum niah mitthi zîng ata a tholeh ang a, 47 ama hmingin simna thu leh sual ngaihhnathiamna thu Jerusalem khuaa ṭanin, hnam tin hnênah an hril ang,’ tiin. 48 Chûng thil zawng zawng chu a hretu in ni e. 49 Tin, ngai teh u, ka Pa thil tiam chu in chungah ka rawn tîr dâwn e; nimahsela, chung lam ata thiltihtheihnaa an thuam hma loh che u zawng, khawpuiah hian awm reng rawh u,” a ti a.
Isua vâna hruai chhoh
50 Tin, Bethani dai kiang thlengin anni chu a hruai chhuak a; tin, a bân a phar a, mal a sâwmsak a. 51 Tin, heti hi a ni a, mal a sâwmsak lai takin anni chu a ṭhen a, vâna hruai chhohvin a awm ta a. 52 Tin, chibai an bûk a, lâwm êm êmin Jerusalem khuaah an kîr leh ta a; 53 tin, Pathian biak inah chuan Pathian fakin an awm fo ṭhîn a.
Nunna thu
1 A tîrin Thu a awm, Thu chu Pathian hnênah a awm, Thu chu Pathian a ni. 2 Chu mi chu a tîrin Pathian hnênah a awm. 3 Engkim a zain ama siam a ni; thil siam zawng zawng hi ama siam loh eng mah a awm lo. 4 Amahah chuan nunna a awm; chu nunna chu mihringte ênna a ni a. 5 Êng chu thim zîngah a lo êng a; thimin chu chu a hre lo. 6 Pathian tirh mi pakhat a lo awm a, a hming chu Johana a ni. 7 Chu mi chu hriattîr tûrin a lo kal a, êng thu chu hriattîr tûrin; amah avânga mi zawng zawngin an rinna tûrin. 8 Ani chu êng chu a ni lo, êng thu chu hriattîr tûra lo kal a ni zâwk e. 9 Êng tak, mi tin tiêng ṭhîn kha a awm a, khawvêlah a lo kal mêk a ni. 10 Ani chu khawvêlah a awm, khawvêl ama siam a ni, khawvêlin amah a hre si lo. 11 Ama mite hnênah a lo kal a, ama miten an lo lâwm si lo. 12 Nimahsela, amah lâwm apiang chu, an hnênah Pathian fate nih theihna tûr a pe, a hming ringtute chu; 13 chûng mite chu thisen hrin an ni lo va, tisa duh zâwnga hrin an ni hek lo, mipa duh zâwng pawha hrin an ni hek lo, Pathian hrin an ni zâwk e. 14 Tin, Thu chu tisaah a lo chang a, kan zîngah a awm ta a (Pa fa mal neih ropui angin a ropuizia kan hmu), khawngaih leh thutakin a khat. 15 Johanan a thu a hriattîr a, a au va, “ ‘Ka hnunga mi zui tûr khân mi lehkhalh tawh a ni, ka hmaa awm tawh reng a nih avângin,’ tia a thu ka sawi kha amah hi a ni,” a ti a. 16 A famkimna kan chang ṭheuh, khawngaih chunga khawngaih lehchhâwnna nên. 17 Dân thu Mosian a pe, khawngaihna leh thutak Isua Krista avângin a lo awm. 18 Tu mân eng lai mahin Pathian an hmu lo, a Fapa mal neih, Pa ângchhûnga awm ngei khân a chanchin a hril tawh a ni.
Baptistu Johana thuhril
19 Tin, Juda-ten, “Tu nge i nih?” tia zâwt tûra Jerusalem khua ata a hnêna puithiamte leh Levia chia mite an tirh lai khân, hêng hi Johana thu lo hriattîr chu a ni; 20 ṭang lovin a inpuang a, “Krista chu ka ni lo ve,” tiin a inpuang a. 21 Tin, anni chuan a hnênah, “Tu nge i nih le? Elija i ni em?” an ti a, an zâwt a. Tin, ani chuan, “Ka ni lo ve,” a ti a. “Zâwlnei kha i ni em?” an ti a. Tin, ani chuan, “Ni lo ve,” a ti a, a chhâng a. 22 Tin, anni chuan a hnênah, “A nih leh, tu nge i nih? Min tîrtute kan chhân theih nân min hrilh ta che. I chanchin rêng eng nge i sawi dâwn?” an ti a. 23 Tin, ani chuan, “ ‘Lalpa kalkawng tirual rawh u,’ tia thlalêra autu aw ka ni, zâwlnei Isaia sawi ang khân,” a ti a. 24 An mi tirhate chu Pharisaite hnêna mi an ni a. 25 Tin, anni chuan a hnênah, “Krista tal, Elija tal, zâwlnei tal chu i nih si loh chuan engati nge i baptis ṭhin le?” an ti a, an zâwt leh a. 26 Tin, Johanan an hnênah, “Keiin tuiin ka baptis ṭhîn, in zîngah mi pakhat in hriat loh a ding a ni, 27 ani chu ka hnua lo kal tûr chu a ni a, a pheikhawk hrui phelh tlâk pawh ka ni lo ve,” a ti a, a chhâng a. 28 Chûng thil chu Jordan râla Bethani khuaah, Johana baptisnaah khân an ti a ni.
Pathian Berâmno
29 Tin, a tûkah chuan Johanan Isua a hnênah lo kal dâwnin a hmu a. Tin, a sawi a, “En teh u, Pathian Berâmno, khawvêl sual kalpuitu tûr saw! 30 Saw mi saw a ni, ‘Mi pakhat mi lehkhalh khân mi zui dâwn, ka hmaa awm sa rêng a ni,’ ka tiha kha. 31 Amah chu ka lo hre si lo; nimahsela, Israel-ten amah an hriat theih nân, tuia baptis-in ka lo kal a ni,” a ti a. 32 Tin, Johanan a thu a hriattîr a, a sawi a, “Thlarau chu ṭhuro angin vân aṭanga chhuk ka hmu a, a chungah a fu reng a. 33 Amah chu ka hre si lo va; nimahsela, tuia baptis tûra mi tîrtu khân ka hnênah, ‘Tu chungah pawh Thlarau zuk fua, a chunga awm reng i hmuh apiang, amah chu Thlarau Thianghlima baptistu tûr chu a ni ang,’ mi ti a. 34 Chu chu ka hmu tawh a, he mi hi Pathian Fapa a ni tih ka hriattîr tawh,” a ti a.
Isua zirtîr hmasate
35 Tin, a tûk lehah Johana a ding a, zirtîrte pahnih nên; 36 tin, Isua veivâk lai a en a, “En teh u, Pathian Berâmno saw,” a ti a. 37 Tin, a zirtîrte pahnih chuan a thusawi chu an hria a, Isua an zui ta a. 38 Tin, Isua chu a hawi a, an rawn zui a hmu a, an hnênah, “Eng nge in zawn?” a ti a. Tin, anni chuan, “Rabbi (Chu chu Zirtîrtu tihna a ni), khawiah nge i awm?” an ti a. 39 Anin an hnênah, “Lo kal ula, in hmu ang,” a ti a. Chutichuan, an kal a, a awmna chu an hmu a, chumi ni chuan a hnênah an awm reng a; zanriah chhum hun lai a ni a. 40 Johana thusawi chu hriaa Isua zuitute pahnih chu, a pakhat zâwk chu Andria, Simon Petera unau a ni. 41 Ani chuan a hmasa berin ama unau Simona a hmu a, a hnênah, “Messia kan hmu ta,” a ti a (chu chu Krista tihna a ni). 42 Tichuan, Isua hnênah a rawn hruai a. Isuan ani chu a lo en a, “Johana fapa Simona i ni, Kipha an vuah ang che,” a ti a (chu chu Petera tihna a ni).
Philipa leh Nathanaela koh
43 Tin, a tûkah chuan Isua chuan Galili rama kal a tum a, Philipa a hmu a, a hnênah, “Mi zui rawh,” a ti a. 44 Philipa chu Bethsaida khuaa mi a ni, chu chu Andria leh Petera awmna khua bawk a ni. 45 Philipa chuan Nathanaela a hmu a, a hnênah, “A chanchin Mosian Dân Lehkhabua a ziak leh zâwlneiten an ziak kha, amah chu kan hmu ta, Nazareth Isua, Josefa fapa chu,” a ti a. 46 Tin, Nathanaela chuan a hnênah, “Nazareth khuaah thil ṭha a chhuak thei em ni?” a ti a. Philipa chuan a hnênah, “Lo kal la, en rawh,” a ti a. 47 Isuan Nathanaela a hnêna lo kal dâwnin a hmu a, a chanchin a lo sawi a, “En teh u, Israel mi tak, ngamthlêmna rêng nei lo saw,” a ti a. 48 Nathanaela chuan a hnênah, “Nangin engtin nge mi hriat?” a ti a. Isuan a hnênah, “Philipan a koh hma chea, theipui bula i awm lai khân ka hmu che asin,” a ti a, a chhâng a. 49 Nathanaelan a hnênah, “Rabbi, Pathian Fapa i ni, Israel-te Lalber i nih hi,” tiin a chhâng a. 50 Isuan a hnênah, “ ‘Theipui bulah ka hmu che asin,’ i hnêna ka tih avângin i ring a ni maw? Hêng aia thil ropui zâwk hi i la hmu ang,” a ti a, a chhâng a. 51 Tin, Isua vêkin a hnênah, “Tihtakmeuhvin, tihtakmeuhvin ka hrilh a che u, vân inhawngah, Pathian vântirhkohte Mihring Fapa chungah hian chhuk leh chho in la hmu ang,” a ti a.
Kana khuaa inneihna
1 Tin, ni thum niah Galili rama Kana khuaah lawi chaw a awm a, chutah chuan Isua nu a awm. 2 Isua leh a zirtîrte pawh lawi chaw eiah an sâwm a. 3 Tin, uainin a daih ta lo va, Isua nu chuan a hnênah, “Uain an tlachham ta e,” a ti a. 4 Tin, Isuan a hnênah, “Hmeichhia, nanga mi lo hriatsak tûr eng nge awm? Ka hun a la thleng lo ve,” a ti a. 5 Tin, a nu chuan rawngbâwltute hnênah, “In hnêna a sawi apiang chu ti zêl ang che u,” a ti a. 6 Tin, Juda-te sil fai dân angin lung tuibêl paruk, bûk sawmli hmun hnih emaw, hmun thum emaw leng ṭheuh, chutah chuan an hûng a. 7 Tin, Isuan an hnênah, “Tuibêlahte tui tikhat rawh u,” a ti a. Tin, a rawng rualin an tikhat ṭheuh va. 8 Tin, an hnênah, “Tûnah thâl ula, ruaiṭheh fatu hnênah kalpui rawh u,” a ti a. Tin, an kalpui ta a. 9 Tin, ruaiṭheh fatu chuan tui uaina lo chang ta chu a tem a, a chhuahna chin a hre lo va (tui thâl rawngbâwltute erawh chuan an hria a), nupui nei tûra chu a ko ta a, 10 a hnênah, “Mi tinin a tîrah uain ṭha an dah chhuak ṭhîn; tin, a tam deuh an in hnuin a ṭha lo deuh chu an dah chhuak ṭhîn; nang zawngin tûn thlengin uain ṭha i la vawn hi,” a ti a. 11 Isuan he a chhinchhiahna tih ṭan tirhna hi Galili rama Kana khuaah chuan a ti a, a ropuizia a lantîr ta a; tin, a zirtîrte chuan ani chu an ring a. 12 Tin, chumi hnuah chuan Kapernaum khuaah a zuk kal a, amah leh a nu nên, a unaute nên, a zirtîrte nên; chutah chuan ni rei lo tê an awm a.
Isuan tempul a tlawh
13 Tin, Juda-te kalhlên kût a hnai tawh a, Isua chu Jerusalem khuaah a han kal a. 14 Tin, Pathian biak ina sebâwngte, berâmte, ṭhuro zuartuho leh tangka thlengtuho ṭhu a hmu a. 15 Tin, hruihrualin vuakna a siam a, berâm leh sebâwng chu a zain Pathian biak in aṭang chuan a hnawt chhuak a, tangka thlengtute tangka chu a leihbua a, an dawhkânte a nam thlûksak bawk a; 16 tin, ṭhuro zuartute hnênah chuan, “Hêng thil hi heta ṭangin kalpui rawh u, ka Pa in sumdâwnna inah siam suh u,” a ti a. 17 (Tin, “I ina ka ṭhahnemngaihnain mi ei zo vang,” tih ziak a ni tih a zirtîrte chuan an hre leh ta a.) 18 Chutichuan, Juda-ten a hnênah, “Hêng thil i tih hi chhinchhiahna eng nge min hmuhtîr theih?” an ti a, an chhâng a. 19 Isuan an hnênah, “He in hi tichhia ulang, ni thum chhûngin ka tungding leh ang,” a ti a, a chhâng a. 20 Tin, Juda-te chuan, “He in hi kum sawmli leh kum ruk sak a ni; nangin ni thum chhûngin i tung ding ang maw?” an ti a. 21 (Nimahsela, a taksa in thu sawi a lo ni zâwk si. 22 Chuvângin, mitthi zîng ata a thawhlehin, chumi thu chu a sawi tawh tih a zirtîrten an hre leh ta a; tin, Pathian Lehkha Thu leh Isua thusawi chu an ring ta a.)
Isuan mihring thinlung a hria
23 Tin, kalhlên kûta Jerusalem khuaa a awm lai chuan a thil mak tihte an hmu a, mi tam takin a hming an ring ta a. 24 Nimahsela, Isua chu an lakah a ngampa lo, mi zawng zawng a hriata, 25 mihring thu tu ma hrilh fiah a ngaih loh avângin; amahin mihring chhûnga awm apiang chu a hre si a.
Isua leh Nikodema
1 Tin, Pharisaite zînga mi, a hming Nikodema, Juda-te hotu pakhat a awm: 2 chu mi chu zânah Isua hnênah a lo kal a, a hnênah, “Rabbi, Pathian hnên ata zirtîrtua lo kal i ni tih kan hria; Pathian an chunga a awm loh chuan, hêng thil mak i tih ang hi tu mân an ti thei lo vang,” a ti a. 3 Tin, Isuan a chhâng a, a hnênah, “Tihtakmeuhvin, tihtakmeuhvin ka hrilh a che, mi tu pawh an pianthar loh chuan Pathian ram an hmu thei lo vang,” a ti a. 4 Nikodeman a hnênah, “Mi a tar hnuin engtin nge a pian theih ang? A nu pumah vawi hnih lûtin a piang thei em ni?” a ti a. 5 Isuan a chhâng a, “Tihtakmeuhvin, tihtakmeuhvin ka hrilh a che, mi tu pawh tuiah leh thlarauva an pian loh chuan Pathian ramah an lût thei lo vang. 6 Tisaa piang apiang tisa a ni; Thlarauva piang apiang thlarau a ni. 7 I piangthar tûr ka tih che hi mak ti suh. 8 Thli khawiah pawh a duh duhin a tleh ṭhîn, a ri i hria e; nimahsela, khawi aṭanga lo kal nge, khawiah nge a kal dâwn tih pawh i hre si lo; tu pawh Thlarauva piang chu chutiangin an awm,” a ti a. 9 Tin, Nikodeman a chhâng a, a hnênah, “Chûng thil chu engtin nge a awm theih ang?” a ti a. 10 Isuan a chhâng a, a hnênah, “Israel-te zirtîrtu i ni si a, chûng chu i hre lo maw? 11 Tihtakmeuhvin, tihtakmeuhvin ka hrilh a che, keinin kan hriat chu kan sawi ṭhîn, kan hmuh chu kan hriattîr ṭhîn; nimahsela, kan thu hriattîr in awih si ṭhîn lo. 12 Khawvêla thil ka hrilh che u mah awih lo che u a, vâna thil hrilh che u ila engtin nge in awih ang? 13 Vânah tu mah an lâwn ngai lo, vân aṭanga lo chhuka chauh lo hi chu, Mihring Fapa, vâna awm hi. 14 “Tin, Mosian thlalêrah rûl a khai kân ang khân Mihring Fapa hi khai kânin a awm bawk tûr a ni; 15 tu pawh amah ring apiangin amah avânga chatuana nunna an neihna tûrin. 16 Pathianin khawvêl a hmangaih êm êm a; chutichuan, a Fapa mal neih chhun a pe a, amah chu tu pawh a ring apiang an boral lohva, chatuana nunna an neih zâwk nân. 17 Khawvêl thiam loh chantîr tûrin Pathianin a Fa khawvêlah a tîr lo, khawvêl amah avânga an dam theihna tûrin a tîr a ni zâwk e. 18 “Tu pawh amah ring chu thiam lohvin an awm lo vang; tu pawh ring lo chu tûn apangin thiam lohvin an awm, Pathian Fapa mal neih hming an rin loh avângin. 19 Hei hi thiam lohna a ni, êng khawvêlah a lo kal a; nimahsela, miten êng aiin thim an duh zâwk, an thiltihte a sual avângin. 20 Tu pawh thil sual ti apiangin êng an haw ṭhîn, êngah pawh an lo kal lo; chuti lo chuan, an thiltihte a lang ang. 21 Amaherawhchu, tu pawh thil dik ti apiang an thiltihte Pathian avânga ti an ni tih a lan nân, êngah an lo kal ṭhîn,” a ti a.
Isua leh Baptistu Johana
22 Chûng hnuah chuan Isua chu a zirtîrte nên Judai ramah an kal a, chutah chuan Isua an hnênah a awm reng a, a baptis ṭhîn a, 23 Johana pawhin Ainon-ah, Salim khaw kiangah a baptis bawk a, chutah chuan tui a tam avângin; tin, mi an lo kal a, baptisma an chang hlawm a. 24 Chutih lai chuan Johana chu tân inah an la khung si lo va. 25 Tin, Johana zirtîrte leh Juda pakhat, sil fai thu-ah an lo inhnial a. 26 Tin, Johana hnênah an lo kal a, a hnênah, “Rabbi, Jordan râla i hnêna awm, a thu mi i hriattîr khân ngai teh, kha mi khân mi a baptis a, mi zawng zawng a hnênah an lo kal a ni,” an ti a. 27 Johanan a chhâng a, “Mihringin eng mah an nei thei lo, vâna mi pêk a nih loh chuan. 28 ‘Kei, Krista ka ni lo ve, a hmaa mi tirh ka ni,’ ka tih kha, nangni ngei mi hriatpuitu in ni. 29 Mo neitu chu a pasal chu a ni; nimahsela, moneitu ṭhian, a thu lo ngaichâng rengtu chuan moneitu aw a hriat chuan a lâwm êm êm ṭhîn; hei, ka lâwmna a thleng ta a nih hi. 30 Ani chu tlatlum tûr a ni, kei erawh chu lâng tûr ka ni.
Vân aṭanga lo chhuk
31 “Chung lam aṭanga lo kal chu mi zawng zawng aia chungnung ber a ni; leia piang chu leia mi a ni a, lei thu a sawi ṭhîn, vân aṭanga lo kal chu mi zawng zawng aia chungnung ber a ni. 32 A hmuh leh a hriat apiang a hriattîr ṭhîn a ni; tu mân a thu hriattîr an awih lo. 33 A thu hriattîr awih chuanin, ‘Pathian chu mi dik tak a ni,’ tiin, a hming nemin a ziak. 34 Pathian tirh chuan Pathian thu a sawi ṭhîn; ani chuan teh kherin Thlarau a pe si lo. 35 Pain Fapa a hmangaih a, a kutah engkim a pe tawh. 36 Tu pawh Fapa ring apiangin chatuana nunna an nei tawh; nimahsela, tu pawh Fapa thu awih lo apiangin nunna an nei lo vang a, Pathian thinur an chungah a awm reng zâwk a ni,” a ti a.
Isua leh Samari hmeichhia
1 Tin, Isuan Johana aiin zirtîr tam zâwk a siam leh a baptis thu Pharisaiten an hria tih Lalpa chuan a hriat veleh 2 (nimahsela, Isua meuh chuan a baptis lo, a zirtîrten an baptis zâwk ṭhîn), 3 Judai ram chu a kalsan a, Galili ramah a kîr leh ta a. 4 Tichuan, Samari ram a kal tlang tûr a ni. 5 Chutichuan, Samari ram khaw pakhat Sukar an tih chu a lo thleng a, Jakoban a fa Josefa hnêna hmun a pêk kiang kha; 6 Jakoba tuichhunchhuah pawh kha chutah chuan a awm. Chutichuan, Isua chu a kal hah avângin tuichhunchhuah sîrah chuan a ṭhu chawt a: chawfâk hun lai a ni a. 7 Tin, Samari hmeichhe pakhat tui chawiin a lo kal a. Isuan a hnênah, “In tûr mi pe rawh,” a ti a. 8 (A zirtîrte lah chu ei tûr leiin khuaah an kal tawh si a.) 9 Chutichuan, Samari hmeichhia chuan a hnênah, “Nang Juda mi i ni a, kei Samari hmeichhia ka ni si a, engtizia nge ka hnêna in tûr mi dîl?” a ti a. (Juda-ten Samari mite chu engah mah an hmang ngai si lo.) 10 Tin, Isuan a chhâng a, a hnênah, “Pathian thilpêk leh, ‘In tûr mi pe rawh,’ i hnêna titu hi hria la chu, nangin a hnênah i dîl zâwk tûr a ni a; tin, anin tui nung a pe tawh tûr che a ni,” a ti a. 11 Tin, hmeichhia chuan a hnênah, “Ka pu, khaina eng mah i nei si lo va, tuichhunchhuah a thûk vei nên, khawi ata nge tui nung chu i hmuh? 12 Kan pu Jakoba aiin i ropui zâwk em ni? Ani chuan he tuichhunchhuah hi min pe a, amah pawhin a in a, a fapate, a rante nên,” a ti a. 13 Tin, Isuan a chhâng a, a hnênah, “Tu pawh he tui in apiang an tuihâl leh ang; 14 tu pawh an hnêna ka pêk tûr tui in apiang erawh chu kumkhuain an tuihâl lo vang, keiin an hnêna tui ka pêk tûr chu an kawchhûngah tui hna a lo awm ang a, chatuana nun thlengin a chik chho vang,” a ti a. 15 Tin, hmeichhia chuan a hnênah, “Ka pu, chu tui chu mi pe rawh, ka tuihâl loh nân leh, hêng thleng thlenga tui chawi tûra ka lo kal ṭhin loh nân,” a ti a. 16 Tin, Isuan a hnênah, “I pasal va ko la, hetah lo haw leh ang che,” a ti a. 17 Tin, hmeichhia chuan a hnênah, “Pasal ka nei hlei nêm,” a ti a, a chhâng a. Isuan a hnênah, “ ‘Pasal ka nei hlei nêm,’ i tih hi i tidik e; 18 pasal panga i nei tawh, tûna mi i neih hi i pasal a ni lo rêng a ni, he thu hi i tidik e,” a ti a. 19 Hmeichhia chuan a hnênah, “Ka pu, zâwlnei i ni tih ka hre ta. 20 Keini thlahtute chuan he tlângah hian Pathian chibai an bûk ṭhîn; nimahsela, nangni zawngin, ‘Mihringin Pathian chibai an bûkna tûr hmun chu Jerusalem khuaah a awm,’ in ti ṭhîn,” a ti a. 21 Tin, Isuan a hnênah, “Hmeichhia, ka thu awih rawh, he tlângah kher lo pawh, Jerusalem khuaah kher lo pawh, Pa chibai in bûk hun a thleng dâwn ta. 22 Nangnin in hriat loh chibai in bûk ṭhîn; keini zawngin kan hriata chu chibai kan bûk ṭhîn. Chhanhimna Juda-te hnên ata a lo chhuak dâwn si a. 23 Chutichuan, a hun a thleng dâwn ta, tûnah pawh a thleng tawh mêk, chumi hunah chuan Pathian chibai bûktu tak takten thlarau leh tihtakzetin Pa chibai an bûk ang, Pain chutiang mi chu a chibai bûktu tûrin a zawng a ni. 24 Pathian chu Thlarau a ni; a chibai bûktuten thlarau leh tihtakzetin chibai an bûk tûr a ni,” a ti a. 25 Tin, hmeichhia chuan a hnênah, “Messia, Krista an tih chu a lo kal dâwn tih ka hria, ani chu a lo kal hunah engkim min la hrilh ang,” a ti a. 26 Tin, Isuan a hnênah, “Keimah a betu che hi amah chu ka ni asin,” a ti a. 27 Tin, chutih lai chuan a zirtîrte chu an lo kal a, hmeichhia a bia chu mak an ti hle a; nimahsela, tu mân, “Eng nge i zawn? Engati nge hmeichhia i biak?” pawh an ti lo. 28 Tin, hmeichhia chuan a tuibêl a kalsan a, khuaah a kal a, mite hnênah, 29 “Ka thiltih apiang mi hrilh zêltu mi pakhat a awm a, lo kal ula, en teh u; Krista a ni thei âwm em?” a ti a. 30 Tin, anni chu khua ata chu an lo chhuak a, a hnên lam an pan ta a. 31 Chumi hlân chuan zirtîrte chuan a hnênah, “Rabbi, ei rawh,” an ti chiam a. 32 Nimahsela, ani chuan an hnênah, “Chaw in hriat loh ei tûr ka nei e,” a ti a. 33 Tin, zirtîrte chu an inbia a, “A ei tûr miin an rawn kensak em ni chu le?” an ti a. 34 Tin, Isuan an hnênah a sawi a, “Mi tîrtu duh zâwng tih leh a hna thawh zawh tûr hi ka chaw a ni. 35 Nangnin, ‘Buh sengna tûr thla li a la awm,’ in ti lâwm ni? Ngai rawh u, ka hrilh a che u, dâk ulang, lote en rawh u, tûn apangin seng tûrin a êng a ni. 36 A âttuin hlawh a hmu ṭhîn a, chatuana nun thlenga awm tûrin rah a seng ṭhîn, a tuhtu leh a âttu an lâwm dun theih nân. 37 ‘Pakhatin a tuh ṭhîn a, mi dangin a ât ṭhîn,’ tih thu hi chumiah chuan a dik hle a ni. 38 In thawh rim loh ât tûrin ka tirh che u kha; mi dangin an thawk a, nangnin an thawh sa chu in chhunzawm a ni,” a ti a. 39 Tin, hmeichhia chuan, “Ka thiltih apiang mi hrilh zêl,” tia a hriattîr thu avâng khân, chumi khuaa awm Samari mi tam takin Isua an ring ta a. 40 Chutichuan, Samari mite chu Isua hnênah an lo kal a, an hnêna awmah an ngên chiam a; tichuan, chutah chuan ni hnih a châm a. 41 Tin, mi dang tam takin ama thu avângin an ring ve ta a; 42 tin, anni chuan hmeichhe hnênah chuan, “Tûnah zet chuan i thusawi avânga ring kan ni ta lo; keimahni ngeiin a thu kan hria a, he mi hi khawvêl Chhandamtu a ni ngei tih kan hre ta,” an ti a.
Upa pakhat fa tihdam
43 Ni hnih hnuah chuta ṭang chuan a chhuak a, Galili ramah a kal ta a. 44 Isua ngeiin, zâwlnei chu ama khaw lamah chuan chawimawiin a awm ngai lo tih a hriattîr si ṭhîn a. 45 Chutichuan, Galili ram a lo thlenin Galili rama miten an lo lâwm a, Jerusalem khuaa kût laia a thiltih zawng zawng an hmuh avâng khân; anni pawh chu kûtnaah chuan an kal ve si a. 46 Tin, Galili rama Kana khua, tui uaina a chantîrna kha a lo thleng leh a. Tin, upa tu emaw a awm a, a fapa Kapernaum khuaah a damlo va. 47 Tin, Isua chu Judai ram ata Galili ramah a lo kal tih a hriat veleh a hnênah a han kal a, a fapa zuk tidam tûrin a ngên chiam a, a thi lek lek si a. 48 Tin, Isuan a hnênah, “Chhinchhiahnate leh thil makte in hmuh loh chuan in ring tawp lo vang,” a ti a. 49 Tin, upa chuan a hnênah, “Ka pu, ka fa thih hmain lo chhuk ta che,” a ti a. 50 Tin, Isuan a hnênah, “Haw leh ta mai rawh, i fapa chu a dam tawh e,” a ti a. Tin, chu mi chuan Isuan a hnêna thu a sawi chu a ring a, a kal ta a. 51 Tin, a kal chhuk lai mêkin a bawihten an lo hmuak a, “I fapa chu a dam ta,” an lo ti a. 52 Tin, ani chuan an hnênah a dam tirh lai a zâwt a. Tin, anni chuan a hnênah, “Niminah, ni her chauhvin a khawsik a reh ta a ni,” an ti a. 53 Chutichuan, a pa chuan, Isuan a hnênah, “I fapa chu a dam tawh e,” a tih lai tak a ni tih a hre ta a; tin, amah leh a chhûngten an zain an ring ta a. 54 Chu chu Isuan a chhinchhiahna tih a vawi hnihna a ni, Judai ram ata Galili rama a lo kalin.
Bethesda dîla damlo tihdam
1 Chûng thil hnuah chuan Juda-te kût pakhat a awm a; Isua chu Jerusalem khuaah a han kal a. 2 Tin, Jerusalem-ah chuan Berâm Kawngkhâr kiangah dîl a awm a, chu chu Hebrai tawngin Bethesda an ti a, hulhliap panga a nei nghe nghe a. 3 Chûngah chuan damlo te, mitdel te, kebai te, zeng te tam tak an mu hlawm a. 5 Tin, chutah chuan kum sawmthum leh kum riat nâ mi tu emaw a awm a. 6 Tin, Isuan a mu chu a hmu a, chutiang chuan rei tak a awm tawh tih a hria a, a hnênah, “Tihdam i duh em?” a ti a. 7 Tin, damlo chuan, “Ka pu, tui a fâwnin dîla mi dahtu ka nei lo va, ka kal chhûngin mi dangin mi pên thlâk khalh ṭhîn,” a ti a, a chhâng a. 8 Tin, Isuan a hnênah, “Tho la, i âwngphah la la, kein kal tawh rawh,” a ti a. 9 Tin, thâwklehkhatan chu mi chu a dam ta nghâl a, a âwngphah chu a la a, a kal ta a. Chumi ni chu Chawlhni a ni a. 10 Chutichuan, Juda-ten a dam taa hnênah chuan, “Chawlhni a nih hi, i âwngphah i lâk a thiang lo ve,” an ti a. 11 Tin, ani chuan an hnênah, “Mi tidamtu ngeiin ka hnênah, ‘I âwngphah la la, kein kal tawh rawh,’ mi ti a ni,” a ti a, a chhâng a. 12 Tin, anni chuan a hnênah, “ ‘I âwngphah la la, kein kal tawh rawh,’ i hnêna titu chu tu nge ni?” an ti a, an zâwt a. 13 Nimahsela, a dama chuan tu nge a nih a hre lo va, chutah chuan mipui an awm avângin Isua a kal bo ta si a. 14 Nakinah chuan Isuan ani chu Pathian biak inah a hmu a, a hnênah, “Ngai rawh, i dam tâk hi, thil tisual leh tawh suh; chuti lo chuan, thil ṭha lo lehzual i chungah a lo awm dah ang e,” a ti a. 15 Tin, chu mi chu a va kal a, Juda-te hnênah chuan a tidamtu chu Isua a ni tih a hrilh a. 16 Chutichuan, Chawlhnia chûng thilte chu a tih avângin Juda-ten Isua an tiduhdah ta a. 17 Nimahsela, Isuan anni chu a bia a, an hnênah, “Ka Pain tûn thleng pawhin hna a thawk reng a, kei pawhin ka thawk ve a ni,” a ti a. 18 Chutichuan, Juda-ten tihhlum an tum lehzual a, Chawlhni a bawhchhiat avâng chauh pawh a ni lo va, Pathian ama Paah a vuaha, Pathian tluka a insiam avâng pawhin a ni.
Fapa thuneihna
19 Tin, Isuan an hnênah, “Tihtakmeuhvin, tihtakmeuhvin ka hrilh a che u, Fapain mahniin eng mah a ti thei lo, Pa thiltih a hmuh chauh lo chu; thil a tih ang apiang chu Fapa pawhin a ti ve ṭhîn. 20 Pain Fapa a hmangaih a, a thiltih apiang a hnênah a entîr ṭhîn; hêng aia thiltih ropui zawk hi a hnênah a la entîr ang, mak in tih atân. 21 Pain mitthite a kaitho va, a tinung ṭhîn angin, Fapa pawhin a duh apiang a tinung ṭhîn. 22 Pain tu ma thu a rêlsak ngai lo, thu zawng zawng Fapa a rêltîr ta zâwk; 23 mi zawng zawngin Pa an zah angin, Fapa pawh an zahna tûrin. Tu pawh Fapa zah lo chu, Pa a tîrtu pawh chu zah lo a ni. 24 “Tihtakmeuhvin, tihtakmeuhvin ka hrilh a che u, tu pawh ka thu hriaa mi tîrtu ring chuan chatuana nunna a nei tawh, thiam lohvin a awm lo va, thihna ata a chhuak a, nunaah a lût ta zâwk a ni. 25 Tihtakmeuhvin, tihtakmeuhvin ka hrilh a che u, a hun a thleng dâwn ta, tûnah pawh a thleng tawh mêk, chutih hunah chuan mitthiten Pathian Fapa aw an hria ang a, a hria apiang an nung ang. 26 Pain mahnia nun a nei ang bawkin, Fapa pawh mahnia nun neiin a siam; 27 tin, Mihring Fapa a nih avângin a hnênah rorêl tûr thu a pe. 28 “Hêng hi mak ti suh u, a hun a thleng dâwn ta, chutih hunah chuan thlâna awm zawng zawngin a aw an hria ang a, an chhuak vek ang; 29 thil ṭha titute chu nunna changin an tholeh ang a, thil sual titute chu thiam loh changin an tholeh ang.
Isua thuhretute
30 “Keimahin eng mah ka ti thei lo: benga ka hriat ang zêlin ro ka rêl ṭhîn; ka rorêl chu dik tak a ni, keima thu thuin awm ka tum lo va, mi tîrtu thu thu zâwka awm ka tum ṭhin avângin. 31 Mahni chanchin hriattîr ila, ka thu hriattîr a dik lo vang. 32 Ka chanchin hriattîrtu chu mi dang a ni; ani chuan ka chanchin a hriattîr chu a dik tih ka hria. 33 “Nangnin Johana hnênah mi in tîr a; tin, ani chuan thutak chanchin a lo hriattîr kha. 34 Thuhriattîr ka pawm erawh chu mihring thu a ni lo; nimahsela, in damna tûrin hêng thu hi ka sawi a nih hi. 35 Chu Johana chu khâwnvâr alh tak leh êng tak chu a ni, a êngah chuan hlim rih in duh kha. 36 “Nimahsela, hriattîrna ka neih hi Johana hriattîrna thu ai khân a ropui zâwk a ni: Pain thiltih zawh tûra mi pêk, ka thiltih ngei hian Pain mi tîr tih ka chanchin a hriattîr a ni. 37 Pa mi tîrtu pawh chuan ka chanchin a hriattîr tawh. Nangnin eng tikah mah a aw in hre ngai lo va, a hmêl pawh in hmu ngai hek lo. 38 A thu pawh in rilruah in pai reng lo, a tirha hi in rin loh avângin. 39 Pathian Lehkha in chhiar ngun ṭhîn, a chhûngah chatuana nunna awma in rin avângin; chûng Lehkha chu ka chanchin hriattîrtu chu a ni si a. 40 Nimahsela, nunna nei tûrin ka hnênah in lo kal duh si lo. 41 “Mihring chawimawina ka zawng lo. 42 Nimahsela, nangni ka hria a che u, Pathian hmangaihna in rilruah in nei lo ve. 43 Ka Pa hmingin ka lo kal a nih hi, nangnin mi lâwm si lo; mi dang mahni hmingin lo kal sela, ani chu in lâwm ang. 44 Nangni inchawimawi tawn lâwmte u, engtin nge in rin theih ang? Pathian tak chauhva chhuak chawimawina chu in zawng si lo. 45 Keiin Pa hnêna ka hêk che u ring suh u; nangmahni hêktu chu pakhat a awm, in rin Mosia hi. 46 Mosia in rin chuan kei pawh mi ring tawh tûr in ni; ani chuan keima chanchin asin a ziak ni. 47 Nimahsela, a thuziak chu in rin si loh chuan, engtin nge ka thu in rin ang?” a ti a.
Mipui sângnga hrai
1 Chûng thil hnuah chuan, Isua chu Galili dîl, Tiberia dîl an tih râl lehlamah chuan a kal ta a. 2 Tin, damlote chunga chhinchhiahna a tihte chu an hmuh avângin, mipui tam takin amah an zui a. 3 Tin, Isua chu tlângah chuan a kal chho va, chutah chuan a zîrtîrte hnênah a ṭhu a. 4 Tin, kalhlên kût (Juda-te kût chu) a hnai tawh a. 5 Tin, Isua chu a dâk a, mipui tam takin a hnên lam rawn panin a hmu a, Philipa hnênah, “Hêngho ei tûr chhang khawi ata nge kan lei ang?” a ti a. 6 Chûng thu chu amah fiah nân a sawi a ni, a tih tûr chu amahin a hre reng si a. 7 Tin, Philipa chuan a hnênah, “Mi tinin tlêm têa an chan ṭheuh tûr pawh, duli zahnih man chhangin a daih lo vang,” a ti a, a chhâng a. 8 Tin, a zirtîrte zînga pakhat, Simon Petera unau Andria chuan a hnênah, 9 “Barli chhangpêr panga leh sangha pahnih nei mipa naupang pakhat hetah a awm; nimahsela, mi hêng zozai zîngah hian chûng chu eng tham nge ni ang?” a ti a. 10 Tin, Isuan, “Mite chu ṭhuttîr rawh u,” a ti a. Tin, chumi hmunah chuan hlobet tam tak a awm. Chutichuan, patlingte chu an ṭhu a, an tam lam chu sângnga lai an ni a. 11 Tin, Isuan chhangpêrte chu a la a, lâwm thu a sawi zawhin a ṭhuhote hnênah chuan a sem a, chutiang bawkin sânghate pawh chu an duh tâwkin a sem bawk a. 12 Tin, an kham hnuin, a zirtîrte hnênah chuan, “Eng mah bo lo tûrin a bângnawite chhar rawh u,” a ti a. 13 Chutichuan, an chhar a, barli chhangpêr panga eitute ei bângnawite chuan bâwmrâng sâwm leh pahnih an tikhat a. 14 Tin, mite chuan chhinchhiahna a tih chu an hmuh veleh, “He mi hi zâwlnei, khawvêla lo kal tûr kha a lo nih ngei hi,” an ti a. 15 Chutichuan, amah chu lala siam tûra man luih tumin an lo kal dâwn tih Isuan a hria a, tlângah amah chauhvin a kal hrang leh ta a.
Tui chunga kal
16 Tin, khua a lo tlai lam chuan a zirtîrte chu dîlah chuan an zuk kal a; 17 lawngah an chuang a, dîlah chuan Kapernaum khua an pan a. Tin, khua a thim ta a, Isua lah chu an hnên a la thleng si lo. 18 Thlipui nasa tak a tleh avângin tui a fâwn sâng telh telh si a. 19 Tin, fîng sawmhnih leh fîng nga emaw, fîng sawmthum emaw an kar chuan Isua chu dîl chungah chuan kea kala lawng rawn hnaihin an hmu a, an hlau va. 20 Nimahsela, ani chuan an hnênah, “Keimah ka ni alâwm, hlau suh u,” a ti a. 21 Chutichuan, lawngah chuan chuantîr an duh ta a; tin, chawplehchilhin lawng chuan an pan khawmual chu a thleng ta nghâl a. Mipuiin Isua an zawng 22 A tûkah chuan dîl râl lehlama mipui dingte chuan, lawng pakhat lo chu lawng dang a awm lo va, Isua chu a zirtîrte hnênah lawngah chuan a chuang ve lo va, a zirtîrte chu anmahni chauhvin an kal tih an hria a. 23 (Nimahsela, Lalpan lâwm thu a sawi hnua chhang an eina hmun kiangah khân, Tiberia khua aṭangin lawng tête a lo thleng si a.) 24 Chutichuan, mipui chuan Isua leh a zirtîrte chu an awm ta lo tih an hriatin, anni pawh lawng têahte chuan an chuang a, Isua zawngin Kapernaum khua an lo thleng a.
Isua-nunna chhang
25 Tin, dîl râla an rawn hmuhin a hnênah, “Rabbi, eng tikah nge he lam i lo thlen?” an ti a. 26 Tin, Isuan an hnênah, “Tihtakmeuhvin, tihtakmeuhvin ka hrilh a che u, chhinchhiahnate in hmuh avanga mi zawng in ni lo va, chhangpêr in ei puar avâng khân a nih zâwk hi. 27 Chaw dangral mai ûmin phe phe suh u; chatuana nun thlenga awm reng tûr chaw, Mihring Fapain a pêk tûr che u chu, ûmin phe zâwk rawh u; Pa Pathian chuan ani chu a chhinchhiah tawh si a,” a ti a, a chhâng a. 28 Tin, anni chuan a hnênah, “Pathian hna kan thawh theih nân thil eng nge kan tih tûr?” an ti a. 29 Tin, Isuan an hnênah, “Pathian hnathawh chu hei hi a ni, a mi tirh hi ring ula,” a ti a, a chhâng a. 30 Tin, anni chuan a hnênah, “Chhinchhiahna eng nge i tih ang, kan hmuha kan rin theihna tûr chein? Thil eng nge i tih ang? 31 Kan thlahtuten thlalêrah manna kha an ei ṭhîn, ‘Vân aṭang chuan an hnênah chhang ei tûr a pe,’ tih ziak angin,” an ti a. 32 Tin, Isuan an hnênah, “Tihtakmeuhvin, tihtakmeuhvin ka hrilh a che u, vân aṭanga chhang in hmuh kha Mosia pêk che u a ni lo; ka Pa erawh chuan vân aṭangin chhang tak a pe che u a nih hi. 33 Pathian chhang chu vân aṭanga lo chhuka, khawvêl hnêna nun petu hi a ni,” a ti a. 34 Tin, anni chuan a hnênah, “Lalpa, chu chhang chu kumkhuain min pe rawh,” an ti a. 35 Tin, Isuan an hnênah, “Kei hi nunna chhang chu ka ni; tu pawh ka hnêna lo kal chu a ril a ṭâm lo vang, tu pawh mi ring chu eng tikah mah a tuihâl lo vang. 36 Nimahsela, nangnin mi hmuh pawhin mi ring si lo tih ka hrilh che u kha. 37 Pain mi pêk zawng zawng ka hnênah an lo kal vek ang; tu pawh ka hnêna lo kal chu ka hnawt chhuak tawp lo vang. 38 Mahni duh zâwng ti tûra vân aṭanga lo chhuk ka ni lo va, mi tîrtu duh zâwng ti tûra lo chhuk ka ni zâwk e. 39 Hei hi mi tîrtu duh zâwng chu a ni, anin mi pêk zawng zawng eng mah hloh lo ila, ni kin niah chuan kaitho zâwk ila. 40 Tin, hei hi ka Pa duh zâwng a ni, tu pawh Fa hmua, ring apiangin chatuana nunna nei sela; tin, keiin ni kin niah chuan ani chu ka kaitho vang,” a ti a. 41 Tin, “Vân aṭanga chhang lo chhuk chu ka ni,” a tih avângin Juda-te chu a chungah an phunnawi a. 42 “He mi hi Josefa fa, Isua a ni lo vem ni, a nu leh pa pawh kan hriat hi? ‘Vân aṭanga lo chhuk ka ni,’ eng ti tiha ti nge ni le?” an ti a. 43 Tin, Isuan an hnênah, “Phun phunnawi suh u. 44 Pa mi tîrtuin a hîp loh chuan tu mah ka hnênah an lo kal thei lo vang; tin, keiin ni kin niah chuan a lo kala chu ka kai tho vang. 45 Zâwlneite lehkhabuah, ‘Pathian zirtîrin an awm vek ang,’ tih ziak a ni. Mi tin Pa thu hriaa zir apiang chu ka hnênah an lo kal ṭhîn. 46 Tu mahin Pa an hmu ngai ka ti lo, Pathian hnêna lo chhuaka chauh lo chuan; ani chuan Pa chu a hmu. 47 Tihtakmeuhvin, tihtakmeuhvin ka hrilh a che u, tu pawh a ring chuan chatuana nunna an nei tawh a ni. 48 Kei hi nunna chhang ka ni. 49 In thlahtuten thlalêrah manna kha an ei na a, an thi a. 50 Hei hi vân aṭanga chhang lo chhuk chu a ni, miin a eia a thih loh nân. 51 Kei hi vân aṭanga chhang nung lo chhuk chu ka ni, tu pawhin he chhang hi a ei chuan chatuanin a nung reng ang; a ni, khawvêl nun nâna ka pêk tûr chhang chu ka tisa hi a ni,” a ti a. 52 Chutichuan, Juda-te chu an inhnial a, “He mi hian engtin nge a tisa ei tûrin min pêk theih ang?” an ti a. 53 Tin, Isuan an hnênah, “Tihtakmeuhvin, tihtakmeuhvin ka hrilh a che u, Mihring Fapa tisa in eia, a thisen in in bawk loh chuan, nangmahniin nunna nei hek lo che u. 54 Tu pawh ka tisa eia ka thisen in chuan chatuana nunna a nei tawh; tin, ni kin niah chuan ani chu ka kaitho vang. 55 Ka tisa hi chaw tak a ni a, ka thisen hi in tûr tak a ni si a. 56 Tu pawh ka tisa eia ka thisen in chu, keimahah a awm reng ṭhîn, kei pawh amahah ka awm reng ṭhîn. 57 Pa nung chuan mi tîr a, Pa zâra nung ka ni ang bawkin, tu pawh mi ei chu keima zârah a ni pawh a nung ang. 58 Hei hi vân aṭanga chhang lo chhuk chu a ni; chi thlahtuten chhang an ei a, an thi ang kha a ni lo, tu pawh hemi chhang hi ei chu chatuanin a nung reng ang,” a ti a. 59 Chûng thu chu inkhâwmna inah a sawi a, Kapernaum khuaa a zirtîr lai khân.
Chatuan nunna thu
60 Chutichuan, a zirtîrte a ṭhen tam takin chu chu an hriatin, “Hei hi thu khirh tak a ni, tu nge dawngsawng thei ang?” an ti a. 61 Chutichuan, chumi thu-ah chuan a zirtîrte an phunnawi tih Isuan a rilruin a hria a, an hnênah, “He thu hian a tilungni lo che u elo? 62 Mihring Fapa hi hmâna a awmna ngaia lâwn chhova in hmuh chuan, engtin nge in tih ang le? 63 Tinungtu chu thlarau a ni, tisa chu eng mahah a tlâktlai lo; in hnêna thu ka sawite hi thlarau a ni, nunna pawh a ni. 64 Nimahsela, in zîngah a ṭhen ring lo in awm e,” a ti a. (Isuan amah ring lotute leh a mantîrtu tûr chu a tîr ata a hre reng si.) 65 Tin, amah vêk chuan, “Chu vâng chuan a ni, in hnênah, ‘Pain a puih loh chuan tu mah ka hnênah an lo kal thei lo vang,’ ka tih kha ni,” a ti a. 66 Chu veleh a zirtîrte zînga tam tak an kal bo va, amah an pâwl leh ta lo va. 67 Chutichuan, Isuan sâwm leh pahnihte hnênah chuan, “Nangni pawhin kal bo in duh ve em?” a ti a. 68 Tin, Simon Peteran a hnênah, “Lalpa, tu hnênah nge kan kal ang? Nangin chatuana nunna thu i nei alâwm. 69 Nang Pathian Mi Thianghlima chu i ni tih kan awih ta a, hriat pawh kan hria e,” a ti a, a chhâng a. 70 Tin, Isuan an hnênah, “Nangni sâwm leh pahnihte hi keima thlan in ni lâwm ni? In zînga mi pakhat Diabola a ni lehnghâl vei nên,” a ti a. 71 (Iskariot Simona fapa Juda, sâwm leh pahnihte zînga tel vea thu kha a sawi a ni, ani chu a mantîrtu tûr a ni si a.)
Isua leh a unaute
1 Chumi zawhah chuan Isuan Galili ram a fang a; Juda-ten amah tihhlum an tum avângin Judai ram chu a fang duh lo va. 2 Tin, Juda-te bâwkte kût chu a hnai tawh a. 3 Chutichuan, a unauten a hnênah, “Heta ṭang hian Judai ramah va kal rawh, i zirtîrte pawhin i thiltih hi an hmuh theih nân. 4 Tu mân a rûkin thil eng mah an ti lo, mahni hmingthan duh siin. Hêng thilte hi i tih takzet chuan khawvêl hnênah inentîr rawh,” an ti a. 5 (A unaute pawh chuan amah an ring si lo va.) 6 Tin, Isuan an hnênah, “Ka hun a la thleng lo; nangni hun erawh chu kumkhuain a thleng reng a ni. 7 Khawvêlin nangni an haw thei lo a che u, kei erawh chu mi haw ṭhîn, an thiltihte a sual tih ka hrilhfiah ṭhin avângin. 8 Nangni kûtnaah han kal rawh u, kei zawng tûn kûtah hian ka han kal dâwn rih lo ve, ka hun a la thlen loh avângin,” a ti a. 9 Tin, chûng thu chu an hnênah a sawi a, Galili ramah a la awm reng a.
Kûtnaah Isua a kal ve
10 Nimahsela, a unaute chu kûtnaa an chhoh tâk hnu chuan, ani pawh vântlâng hriat lohvin, a rûk angin a han kal ve a. 11 Tin, Juda-ten kûtnaah chuan ani chu an zawng a, “Khawiah nge a awm?” an ti a. 12 Tin, a chungah mipuite zînga mi chu an phun ru sup sup a, a ṭhenin, “Mi ṭha a ni e,” an ti a; ṭhenkhatin, “Hnai lo ve, mipui a bum zâwk ṭhîn a ni,” an ti a. 13 Nimahsela, Juda-te an hlauh avângin tu mân a chungchâng thu an sawi lang lo. 14 Tin, kût vânglai takin Isua chu Pathian biak inah a han kal a, a zirtîr a. 15 Tin, Juda-ten, “He mi hian zir ngai lovin engtin nge lehkha a thiam?” an ti a, mak an ti hle a. 16 Tin, Isuan anni chu a chhâng a, “Ka thu zirtîr hi ka ta a ni lo va, mi tîrtu ta a ni zâwk. 17 Tu pawh ama duh zâwng tih duh chuan, ka thu zirtîr hi Pathian tihchhuah nge keima phuah chawpa ka sawi a hria ang. 18 Tu pawh mahni phuah chawp thu sawi chu, mahni mawina zawng a ni; a tîrtu mawina zawng erawh chu, chu mi chu mi takzet a ni, amahah chuan dik lohna rêng a awm lo. 19 Mosian dân chu in hnênah a pe lo che u em ni? Nimahsela, in zîngah tu mahin dân chu in zâwm si lo. Nangnin engati nge min tihhlum in tum?” a ti a. 20 Tin, mipui chuan, “Ramhuai zâwl i nih hi; tuin nge tihhlum tum che?” an ti a, an chhâng a. 21 Tin, Isuan a chhâng a, an hnênah, “Thil pakhat ka tih kha nangni zawng zawngin mak in tih hi. 22 Hemi avâng hian a ni, Mosian serh tan thu kha a pêk che ua (Mosia tihchhuah a ni si lo va, thlahtute tihchhuah a ni zâwk si a), Chawlhni pawha mi serh in tan ṭhin ni. 23 Mosia dân bawhchhiat loh nân, Chawlhniah pawh mipain a serh a tantîr si chuan, keiin Chawlhnia mi ka tihdam tâk viah avângin ka chungah in thinur bîk maw? 24 A lan angin ngaihtuah suh ula, fel takin ngaihtuah zâwk rawh u,” a ti a.
Messia a ni thei ang em?
25 Tin, Jerusalem khuaa mi ṭhenkhatin, “He mi hi tihhlum an tuma chu a ni lâwm ni? 26 En teh u, a langin thu a sawi a, a hnênah eng mah an sawi si lo. Amah hi Krista a ni tih hotuten an hre ta takzet em maw ni aw? 27 He mi hi a pianna chin lam kan hre si a, Krista erawh chu a lo thlen hunah chuan a pianna chin tu mân an hre lo vang,” an ti a. 28 Chu vâng chuan, Isua chu Pathian biak ina a zirtîr pahin a au va, “Nangnin mi hria e, ka pianna chin pawh in hria e; nimahsela, mahni thua lo kal ka ni lo, mi tîrtu hi mi takzet a ni, ani chu in hre si lo. 29 Kei erawh chuan ani chu ka hria; a hnên aṭanga lo chhuak ka ni a, ani chuan mi tîr a ni si a,” a ti a. 30 Chutichuan, ani chu man an tum a; nimahsela, a hun a la thlen loh avângin tu mân an khawih si lo. 31 Mipui zînga tam tak erawh chuan ani chu an ring a, “Krista chu a lo thlen hunah, he mi tih aia tam zâwk thil mak a rawn ti ang em ni?” an ti a.
Isua man tûrin mi an tîr
32 Tin, Pharisaiten a chunga mipui phun rûkna thute chu an hria a; tichuan, puithiam lalte leh Pharisaiten amah man tûrin tiang kengtute an tîr ta a. 33 Tin, Isuan, “Rei lo tê in hnênah ka awm rih zet ang a, mi tîrtu hnênah ka kal ang. 34 Nangnin mi zawng ang a, mi hmu si lo vang; ka awmnaah pawh in lo kal thei lo vang,” a ti a. 35 Tin, Juda-te chu an inbia a, “Kan hmuh loh tûrin he mi hi khawiah nge a kal dâwn? Grik-te zînga Pêm darhho hnêna kalin Grik-te chu a zirtîr dâwn em ni ang? 36 ‘Nangnin mi zawng ang a, mi hmu si lo vang a; ka awmnaah pawh in lo kal thei lo vang,’ a tih hi eng a tihna nge ni ang?” an ti a.
Tui nung lui
37 Tin, kût ṭiak dâwn ni, ni ropui berah chuan Isua a ding a, a au va, “Tu pawh a tuihâl chuan ka hnênah lo kal sela, in rawh se. 38 Tu pawh mi ring chu, Pathian Lehkha sawi angin, tui nung luite a pumah a lo luang chhuak ang,” a ti a. 39 (Chûng thu chu amah ringtuten Thlarau an la neih tûr thu a sawina a ni; Thlarau chu pêk a la ni rih lo, Isua chu chawimawia a la awm loh avângin.)
Mipui zîngah inṭhenna
40 Chutichuan, mipui zînga ṭhenkhatin chûng thu chu an hriatin, “Hei hi zâwlnei chu a nih tak hi,” an ti a. 41 Ṭhenkhatin, “Hei hi Krista chu a ni,” an ti a. Ṭhenkhat erawh chuan, “Khawnge Krista chu Galili rama a lo chhuah tehlul ang? 42 Krista chu Davida thlahte zîngah, Davida awmna khua Bethlehem aṭanga chhuak tûr a ni tih Pathian Lehkhain a sawi lo vem ni?” an ti a. 43 Chutichuan, amah avângin mipui chu an inṭhen a, an inkhing ta a. 44 Ṭhenkhat chuan man an duh a; nimahsela, tu mân an khawih si lo.
Juda hotute rin loh thu
45 Tin, tiang kengtute chu puithiam lalte leh Pharisaite hnênah an lo kal leh a; tin, anni chuan an hnênah, “Engati nge in rawn hruai loh?” an lo ti a. 46 Tiang kengtute chuan, “Sawtiang rêngin miin thu an sawi ngai lo,” an ti a, an chhâng a 47 Tin, Pharisaite chuan an hnênah, “Nangni pawh bumin in awm ve ta elo? 48 Hotute leh Pharisaite zînga mi rêng rêng amah ring an awm tawh em ni? 49 Hêng dân hre lo mipuite tehchai hi ânchhe dawng an ni asin,” an ti a, an chhâng a. 50 Nikodema, hmâna Isua hnêna lo kal kha, an zînga tel ve a ni a, an hnênah, 51 “Ama kâ ngeia a thu hriat leh a thiltih hriat hmain, kan dânin mi thiam loh a chantîr ngai em ni?” a ti a. 52 Anni chuan a hnênah, “Nang pawh chu Galili mi i ni ve elo? Zawng la, Galili ramah chuan zâwlnei tu mah chhuak tûr an awm lo tih hre ta che,” an ti a, an chhâng a. 53 Tin, mi tin mahni in ṭheuhvah an kal ta a.
Uire lai an man hmeichhe pakhat
1 Isua erawh chu Olive tlângah a kal ta zâwk a. 2 Tin, zîngah Pathian biak inah a lût leh a, mi zawng zawng a hnênah an lo kal a; tin, ani chu a ṭhu a, anmahni a zirtîr a. 3 Tin, lehkhaziaktute leh Pharisaiten hmeichhe pakhat a uire lai an man an rawn hruai a; tin, a laiah an dintîr a, 4 Isua hnênah, “Zirtîrtu, he hmeichhia hi a uire lai an man a ni, a uire lai takin. 5 Dân lehkhabuah Mosian hetiang mi hi lunga den hlum thu min pe a; nangin engtin nge i ngaih?” an ti a. 6 Chu thu chu amah fiah nân an ti a, a hêkna tûr an hmuh theih nân. Chutichuan, Isua a kûn a, a kutzungin leiah a ziak a. 7 Tin, an zawh sek sek avângin ani chu a tho va, an hnênah, “In zînga sual nei lo apiangin amah chu lungin deng hmasa rawh se,” a ti a. 8 Tin, a kûn leh a, a kutzungin leiah a ziak leh a. 9 Tin, anni chuan a thusawi chu an hriatin, upa berin a ṭan a, a tâwp thlengin, pakhat khatin an relh chhuak ta zêl a; chutichuan, Isua chauh a awm ta a, hmeichhia, a laia a awmna ngaia awm nên khân. 10 Tin, Isua chu a tho va, a hnênah, “Hmeichhia, khawiah nge an awm tâk? Tu mân thiam loh an chantîr na che nge?” a ti a. 11 Tin, ani chuan, “Lalpa, tu mân mi chantîr lo ve,” a ti a. Tin, Isuan, “Kei pawhin thiam loh ka chantîr lo va che; kal la, tûn hnuah tisual leh tawh suh,” a ti a.
Isua - khawvêl êng
12 Tin, Isuan an hnênah thu a sawi leh a, “Kei khawvêl êntu ka ni; tu pawh mi zui chu thimah a lêng tawp lo vang a, nunna êng a nei zâwk ang,” a ti a. 13 Chutichuan, Pharisaiten a hnênah, “Mahni thu hriattîr i ni, i thu hriattîr a dik lo ve,” an ti a. 14 Isuan an hnênah, “Mahni thu hriattîr mah ila, ka thu hriattîr hi a dik a ni; keiin ka lo chhuahna leh ka kalna tûr chin pawh ka hria e; nangni zawngin ka lo chhuahna leh ka kalna tûr chin pawh in hre si lo. 15 Nangnin tisa angin in sawisêl ṭhîn; kei zawngin tu mah ka sawisêl lo. 16 A ni, sawisêl mah ila ka sawisêlna a dik ang; keimah chang ka ni lo va, kei leh Pa mi tîrtu kan ni zâwk si a. 17 A ni, in Dân Lehkhabuah pawh, ‘Mi pahnih thu a dik,’ tih ziak a ni bawk alâwm. 18 Kei hi mahni thu hriattîrtu ka ni, Pa mi tîrtu chuan ka thu a hriattîr bawk,” a ti a, a chhâng a. 19 Tin, anni chuan a hnênah, “I Pa khawiah nge?” an ti a. Isuan, “Nangnin kei mi hre lo, ka Pa pawh in hre lo; kei mi hriat chuan ka Pa pawh in hria ang,” tiin a chhâng a. 20 Chûng thu chu Pathian biak inah a zirtîr pahin, thawhlâwm dahna hmunah a sawi a; tu mân amah an man si lo, a hun a la thlen loh avângin.
Ka kalnaah in kal ve thei lo vang
21 Tin, ani chuan an hnênah, “Ka kal bo dâwn hi, nangnin mi zawng ang a, in sual nei rengin in thi ang; ka kalna tûrah in lo kal thei lo vang,” a ti leh a. 22 Tin, Juda-ten, “ ‘Ka kalna tûrah in lo kal thei lo vang,’ a tih hi, a intihlum dâwn em ni?” an ti a. 23 Tin, ani chuan an hnênah, “Nangni hnuai lama chhuak in ni; kei zawng chung lama chhuak ka ni; nangni he khawvêla chhuak hi in ni; kei zawng he khawvêla chhuak hi ka ni lo. 24 Chuvângin, in hnênah, ‘In sual nei rengin in thi ang,’ ka tih kha; ani chu ka ni tih in awih loh chuan in sual nei rengin in thi mawlh ang,” a ti a. 25 Tin, anni chuan a hnênah, “Tu nge maw i nih le?” an ti a. Isuan an hnênah, “A tîr ata in hnêna ka sawi ṭhin kha. 26 Nangni chungchâng thu-ah hian thil tam tak sawi tûr leh ngaihtuah tûr ka nei; eng pawh ni rawh se, mi tîrtu chu mi dik tak a ni; a hnên aṭanga thu ka hriat apiang khawvêl hnênah ka hrilh hi,” a ti a. 27 Pa thu an hnênah a sawi tih an hre si lo. 28 Chutichuan, Isua vêkin, “Nangnin Mihring Fapa hi in khai kân hnuah, ani chu ka ni tih leh, keiin mahni thuin thil eng mah ka ti lo va, Pain mi hrilh ang zêlin hêng thu hi ka sawi zâwk a ni tih in lo la hria ang. 29 Mi tîrtu chu ka hnênah a awm a, mi thlahthlam lo ve; a thil lâwm zâwng apiang ka tih fo avângin,” a ti a. 30 Tin, chûng thu chu a sawi laiin mi tam takin amah chu an ring ta a. 31 Chutichuan, Isuan amah ringtu Juda-te hnênah chuan, “Ka thua in awm reng chuan ka zirtîrte in ni tak tak ang.
Bawih leh bawih lo
32 “Tin, thutak in hria ang a, thutak chuan bawih a bân ang che u,” a ti a. 33 Tin, anni chuan a hnênah, “Abrahama thlahte kan ni asin, tûn thlengin tu ma bawihah kan awm ngai lo, ‘Bawih a bân ang che u,’ eng ti tiha i ti nge ni?” an ti a, an chhâng a. 34 Tin, Isuan an hnênah, “Tihtakmeuhvin, tihtakmeuhvin ka hrilh a che u, tu pawh thil tisual apiang, sual bawih a ni. 35 Bawih chu kumkhuain inah a awm reng lo; fapa erawh chu kumkhuain a awm reng ṭhîn. 36 Chutichuan, Fapain bawih a bân che u chuan in chhuak takmeuh vang. 37 Abrahama thlahte in ni tih ka hria e; ni mah ula, mi thah in tum si, ka thuin in rilrua awmna a neih loh avangin. 38 Keiin ka Pa hnêna thil ka hmuh chu ka sawi ṭhîn; nangni pawhin in pa hnêna thil in hriat chu in ti ṭhîn,” a ti a. 39 Tin, anni chuan a hnênah, “Kan pa Abrahama a ni,” an ti a, an chhâng a. Tin, Isuan an hnênah, “Abrahama fate in nih chuan Abrahama thil in ti ang chu. 40 Nimahsela, tûnah mi thah in tum si. Pathian hnêna thutak ka hriat hrilhtu che u ka ni asin; Abrahama zawngin hetiangin a ti lo ve. 41 Nangni zawngin in pa thil chu in ti ṭhîn,” a ti a. Tin, anni chuan a hnênah, “Inuirea hrin kan ni lo ve, Pa pakhat chauh kan nei, Pathian chu,” an ti a. 42 Isuan an hnênah, “Pathian in Pa a nih chuan nangnin mi hmangaih ang chu; Pathian hnên aṭanga lo chhuak leh a hnên ata lo kal ka ni si a; keima thua lo kal ka ni hek lo, aman mi tîr zâwk a ni. 43 Engati nge ka ṭawng awmzia in hriat loh? Ka thu in dawnsawn theih loh vâng a ni. 44 Nangni zawng in pa Diabola aṭanga chhuak in ni a, in pa duh zâwng tih in duh a ni. Ani chu a tîr ata tualthat a ni, thutakah a awm lo, a chhûngah thutak rêng a awm loh avângin. Dâwt thu a sawiin ama tihchhuah a sawi a ni ṭhîn; dawthei a ni si, dâwt pa pawh a ni. 45 Thutak ka sawi avângin nangnin mi ring lo a ni. 46 In zîngah tuin nge sual kawngah thiam loh mi chantîr thei awm? Thutak ka sawi pawhin nangnin engati nge mi rin loh? 47 Pathian hnên aṭanga chhuak chuan Pathian thu a pawm ṭhîn; hemi avâng hian in pawm lo a ni, Pathian hnên aṭanga chhuak in nih loh avângin,” a ti a.
Isua leh Abrahama
48 Tin, Juda-te chuan a hnênah, “Samari mi, ramhuaizâwl i ni kan tih kha kan tidik zet lo vem ni?” an ti a, an chhâng a. 49 Isuan, “Ramhuaizâwl ka ni lo ve; ka Pa ka chawimawi a ni zâwk e, nangnin ka hming in tihchhiat hi. 50 Nimahsela, mahni mawina zawng ka ni lo; a zawngtu leh a ngaihtuahtu mi pakhat a awm a ni. 51 Tihtakmeuhvin, tihtakmeuhvin ka hrilh a che u, miin ka thu a zawm chuan kumkhuain thih ni hmêl a hmu lo vang,” a ti a. 52 Tin, Juda-ten a hnênah, “Ramhuaizâwl i ni tih tûnah kan hre ta. Abrahama a thi tawh, zâwlneite nên, nangin, ‘Miin ka thu a zawm chuan kumkhuain thihna a tem lo vang,’ i ti si a. 53 Kan thlahtu Abrahama aiin i ropui zâwk em ni? Ani pawh a thi tawh, zâwlneite pawh an thi tawh; tu-ah nge i insiam ni?” an ti a. 54 Tin, Isuan, “Mahni inchawimawi ila ka mawi engah mah a ni lo: ‘Kan Pathian,’ in tih ka Pa chu mi chawimawitu a ni; 55 nangnin amah in hre si lo; kei erawh chuan amah ka hria; ‘Amah ka hre lo,’ ti ila, nangmahni anga dawthei bawk ka ni ang; chutichuan, amah ka hria a, a thu pawh ka zâwm ṭhîn. 56 In thlahtu Abrahama kha, ka ni hmu tûr a nih avângin a hlim êm êm ṭhîn; tin, a hmu ngei a, a lâwm hle a,” a ti a, a chhâng a. 57 Tin, Juda-te chuan a hnênah, “Nang kum sawmnga pawh la ni lo pui che, Abrahama i hmu em ni?” an ti a. 58 Isuan an hnênah, “Tihtakmeuhvin, tihtakmeuhvin ka hrilh a che u, Abrahama awm hma pawhin ka awm,” a ti a. 59 Chutichuan, a den nân lung an chhar a; nimahsela, Isua chu a biru a, Pathian biak in ata chu a chhuak ta a.
Pian tirh ata mitdel tihdam
1 Tin, Isuan a kal pahin a pian tirh ata mitdel pakhat a hmu a. 2 Tin, a zirtîrten a hnênah, “Rabbi, mitdel saa a pian hi tuin nge thil tisual, he mi hian nge a nu leh a pain?” an ti a, an zâwt a. 3 Isuan, “He mi hian a tisual lo, a nu leh a pain an tisual hek lo; Pathian hnathawh a chunga a lanna tûr a nih zâwk hi. 4 Chhûn a nih laiin mi tîrtu hna kan thawk tûr a ni; zân a nih dâwn tâk hi, chumi hunah chuan tu mân hna an thawk thei lo vang. 5 Khawvêla ka awm chhûngin khawvêl êntu ka ni,” a ti a, a chhâng a. 6 Chutianga a sawi zawh chuan leiah chil a chhâk a, chil chuan hlum a siam a, hlum chu a mitah a hnawih a, 7 tin, a hnênah, “Siloam dîlah va sil rawh,” a ti a (Siloam chu “Tirh” tihna a ni). Tichuan, a va kal a, a sil a, mitvârin a lo haw leh ta a. 8 Chutichuan, a vêngte leh hmâna a kutdawh hmu ṭhînten, “He mi hi ṭhu chunga kutdawh ṭhîna kha a ni lo vem ni?” an ti a. 9 Mi dangin, “Ani kha a nih hi,” an ti a. Mi dangin, “A ni lo ve, a anpui a nih zâwk hi,” an ti a. Ani chuan, “Kha kha ka ni,” a ti a. 10 Tin, anni chuan a hnênah, “I mit engtin nge a lo vâr le?” an ti a. 11 Ani chuan, “Isua an tih khân hlum a siam a, ka mitah a hnawih a, ‘Siloam dîlah va kal la, sil rawh,’ mi ti a; chutichuan, ka va kal a, ka sil a, mitvârna ka hmu ta a nih hi,” a ti a. 12 Tin, anni chuan a hnênah, “Ani chu khawiah nge a awm?” an ti a, “Ka hre lo,” a ti a.
Pharisaiten tihdam thu an chhui
13 Tin, chumi hmaa mitdela chu Pharisaite hnênah an hruai a. 14 Tin, Isuan hlum a siama, a mit a tihvâr ni kha Chawlhni a ni a. 15 Chutichuan, Pharisaiten a mit a lo vâr tâk dânzia an zâwt leh a. Ani chuan an hnênah, “Ka mitah hlum a dah a, ka sil a, ka hmu thei ta mai a ni,” a ti a. 16 Tin, Pharisai ṭhenkhatin, “Chu mi chu, Chawlhni a puithu loh avângin Pathian hnên aṭanga chhuak a ni lo vang,” an ti a. ṭhenkhat erawh chuan, “Mi sualin engtin nge hetiang thil mak a tih theih ang?” an ti a. Chutichuan, an inṭhen a, an inkhing ta a. 17 Tin, mitdel hnênah chuan, “I mit a tihvâr kha, nang eng angin nge amah chu i ngaih?” an ti leh a. Tin, ani chuan, “Zâwlnei a ni,” a ti a. 18 Nimahsela, Juda-ten a mit lo vâr taa nu leh pa chu an koh hma loh chuan, mitdel a ni ṭhîn a, a mit a lo vâr ta tih, a chungchâng thu chu an awih lo va. 19 Tin, a nu leh a pa hnênah, “He mi hi in fapa, mitdel saa piang a ni in tih kha a ni em? Engtin nge tûnah a hmuh theih tâk le?” tiin an zâwt a. 20 Tin, a nu leh a pa chuan, “Hei hi kan fapa a ni tih kan hria, mitdel sain a piang tih pawh kan hria; 21 nimahsela, engtin nge tûnah hian a lo hmuh theih tâk hi kan hre lo, a mit tivârtu pawh kan hre hek lo; amah zâwt rawh u; patling a ni alâwm; ama thu chu aman sawi ang hmiang,” an ti a, an chhâng a. 22 Juda-te an hlauh avângin a nu leh a pa chuan chûng thu chu an sawi a ni; Juda-ten, chûng hma pawh chuan tu pawhin, “Ani chu Krista a ni,” tia a ṭan chuan inkhâwmna in a hnawng ang tih an remti tlâng si a. 23 Chu vâng chuan a ni, a nu leh a pa chuan, “Patling a ni alâwm, amah zâwt rawh u,” an tih ni. 24 Chutichuan, mitdel chu an ko nawn leh a, a hnênah, “Pathian fak rawh, kha mi kha zawng mi sual a ni tih kan hria e,” an ti a. 25 Tin, ani chuan, “Mi sual a ni nge ni lo ka hre lo; kawng khat ka hria, tûn hma khân ka mit a del a, tûnah ka hmuh theih tâk hi,” a ti a, a chhâng a. 26 Tin, anni chuan a hnênah, “I chungah engtin nge a tih? I mit engtin nge a tihvâr?” an ti a. 27 Tin, ani chuan an hnênah, “Nichinah khân ka hrilh che u kha, in hre duh si lo; engati nge in hriat leh duh tâk ni? Nangni pawh a zirtîrte nih ve in duh elo?” tiin a chhâng a. 28 Tin, anni chuan an hau va, “Nang hi ama zirtîr i ni a, keini zawng Mosia zirtîrte kan ni asin. 29 Pathianin Mosia a bia tih kan hria, he mi tehchai hi khawi aṭanga lo chhuak nge a nih kan hre hrep lo ve,” an ti a. 30 Tin, chu mi chuan an hnênah, “Chu tak chu a ni a makna chu, khawi aṭanga lo chhuak nge a nih in hriat lohva, ka mit a tihvâr miau si hi. 31 Pathianin mi sual thu a ngaithla ṭhîn lo tih kan hria; nimahsela, tu pawhin Pathian a ngaihsaka, a duh zâwng a tih chuan Pathianin ani chu a ngaithla ṭhîn. 32 Khawvêl awm tirh ata tu mân mitdel saa piang mit an tivâr leh tih an hre ngai lo. 33 He mi hi Pathian hnên aṭanga chhuak a nih loh chuan eng mah a ti thei lo vang,” a ti a, a chhâng a. 34 Tin, anni chuan a hnênah, “Nang sual lailet dêra piang i ni alâwm, nangin min hrilh vei em ni?” an ti a, an chhâng a. Tichuan, ani chu an hnawt chhuak ta a.
Thlarau mitdelna
35 Tin, an hnawt chhuak tih Isuan a lo hria a; tin, a zawng chhuak a, “Pathian Fapa i ring em?” a ti a. 36 Tin, ani chuan, “Ka pu, ani chu tu nge ni, ka rin theih nân?” a ti a, a chhâng a. 37 Isuan a hnênah, “Ani chu i hmu tawh reng alâwm, a betu mêk che hi a ni asin,” a ti a. 38 Tin, ani chuan, “Lalpa, ka ring e,” a ti a, chibai a bûk a. 39 Tin, Isuan, “Rorêl tûrin he khawvêlah hian lo kal ka ni, mitdelte chu an mit a lo vârna tûr leh, mitvârte chu an mit a lo delna tûrin,” a ti a. 40 Tin, a hnêna Pharisai awmte chuan chûng thu chu an hria a, a hnênah, “Keini pawh hi mitdel kan ni ve elo?” an ti a. 41 Tin, Isuan an hnênah, “Mitdel in nih chuan sual in nei lo vang; nimahsela, ‘Kan hmu thei e,’ tûnah in ti si a; chuvângin, in sual a awm reng a ni.
Berâm vêngtu tehkhin thu
1 “Tihtakmeuhvin, tihtakmeuhvin ka hrilh a che u, tu pawh berâm huanga kawngkhâra lût lova, dang lama lâwn lût chu, chu mi chu englo rûk hmang leh suam hmang a ni e. 2 Tu pawh kawngkhâra lût erawh chu berâm vêngtu a ni. 3 Kawngkhâr vêngtuin ani chu a lo hawnsak ṭhîn a; berâmten a aw an hre ṭhîn a; ama berâmte chu an hmingah a ko ṭheuh va, a hruai chhuak ṭhîn. 4 A ta zawng zawng a chhuahtîr veleh an hma a hruai a, berâmte chuan amah an zui ṭhîn a, a aw an hre si a. 5 Mi dang zawng an zui lo vang a, an tlân bosan zâwk ang; mi dangte aw zawng an hriat loh avângin,” a ti a. 6 Chu tehkhin thu chu Isuan an hnênah a sawi a; nimahsela, eng thu nge an hnênah a sawi tih an hre si lo.
Isua - Berâmpu ṭha
7 Chutichuan, Isuan an hnênah a sawi leh a, “Tihtakmeuhvin, tihtakmeuhvin ka hrilh a che u, kei hi berâm kawngkhâr chu ka ni. 8 Ka hmaa lo kal zawng zawngte kha rûk hmangte, suam hmangte an ni vek a; nimahsela, berâmte chuan an thu an awih lo. 9 Kei kawngkhâr chu ka ni; tu pawh keimahah a luh chuan humhimin a awm ang a, a lûtin a chhuak ang a, ei tûr a hmu bawk ang. 10 Rûk hmang chu ru tûr leh tihlum tûr leh tichhe tûr lo chuan a lo kal lo; kei zawng nun an neih nân, tam taka an neih nân lo kal ka ni. 11 Kei berâm vêngtu ṭha ka ni; berâm vêngtu ṭhain berâmte tân a nun a pe ṭhîn. 12 Inhlawhfa, berâm vêngtu tak ni lova, berâmte a ta ni lova chuan, chinghne lo kal a hmuhin berâmte a tlânsan ṭhîn; tin, chinghnia chuan berâmte a seh a, a tidarh ṭhîn; 13 inhlawhfa a ni a, berâmte a ngaihsak loh avângin a tlân bo ṭhîn a ni. 14,15 Kei zawng berâm vêngtu ṭha ka ni; Pain mi hriat leh keiin Pa ka hriat ang hian ka ta ka hria a, ka ta pawhin mi hria a ni; tin, beramte tân chuan ka nun ka pe. 16 Tin, he berâm huanga mi lo hi berâm dang ka nei; anni pawh ka la rawn hruai tûr a ni, ka aw pawh an hria ang; chutichuan, pâwl khatin an awm ang a, a vêngtu pakhat nên. 17 “Hemi avâng hian Pain mi hmangaih a ni, lâk leh tûra ka nun ka pêk dâwn avâng hian. 18 Tu mân mi lâksak lo vang, keima thu thuin ka pe zâwk dâwn a ni. Pe thei ka ni, la leh thei pawh ka ni. He thupêk hi ka Pa hnên aṭanga ka hmuh a ni,” a ti a. 19 Chûng thu avâng chuan Juda-te chu an inṭhen a, an inkhing leh a. 20 A ṭhen tam takin, “Ramhuai a zâwl a, a â a nih hi; engati nge a thu in ngaihthlâk?” an ti a. 21 A ṭhenin, “Hêng thu hi ramhuaizâwl thusawi a ni lo ve. Ramhuaiin mitdel mit a tivâr thei em ni?” an ti a.
Isua a hnawng
22 Tin, Jerusalem khuaa inpumpêk kût lai a ni a, chu chu thlasik lai a ni. 23 Tin, Isua chu Pathian biak inah, Solomona hulhliapah a vei a vei a. 24 Tin, Juda-te chu a vêlah an lo kal a, a hnênah, “Eng chen nge tuilairapin min siam dâwn? Krista i nih chuan fiah takin min hrilh rawh,” an ti a. 25 Isuan an hnênah, “Ka hrilh tawh che u kha, in awih si lo; ka Pa hminga thil ka tih hi, hêng hian ka chanchin a hriattîr a nih hi. 26 Nimahsela, in awih si lo, ka berâm zînga mi in nih loh avângin. 27 Ka berâmten ka aw an hre ṭhîn, kei pawhin anni chu ka hria, anni chuan min zui ṭhîn; 28 an hnênah chatuana nunna ka pe a; kumkhuain an boral lo vang a, tu mân ka kut ata mi chhuhsak hek lo vang. 29 Anni mi petu ka Pa chu, mi zawng zawng aia ropui ber a ni a; tu mân Pa kut ata chu an chhuhsak thei lo vang. 30 Kei leh Pa chu pumkhat kan ni,” tiin a chhâng a. 31 Tin, Juda-te chuan a denna tûrin lung an chhar leh a. 32 Tin, Isuan anni chu a bia a, “Pa hnêna chhuak hnathawh ṭha tam tak ka entîr che u a, khâng hnathawhte zîngah khân, hna eng vâng khân nge lunga mi den dâwn hi?” a ti a. 33 Juda-te chuan a hnênah, “Hna ṭha chungah lungin kan den dâwn loh che hi; Pathian i sawichhiat chungah leh, nang, mihring ni sia, Pathiana i insiam vâng zâwk hian a ni,” tiin an chhâng a. 34 Isuan an hnênah, “In dân lehkhabuah, ‘Pathiante in ni ka ti,’ tih ziak a ni lo vem ni? 35 Pathian thu thlennate mah pathianho an tih chuan (Pathian Lehkha Thu bân theih a ni si lo va), 36 Pain a ruata, khawvêla a tirha chungah hian, ‘Pathian Fapa ka ni,’ ka tih avângin, ‘Pathian i sawichhia,’ in ti a ni maw? 37 Ka Pa hna thawk ka nih loh chuan mi ring suh u. 38 Amaherawhchu, thawk ka nih chuan kei mi ring lo mah ula, hnathawhte tal hi ring rawh u; Pa keimahah a awm tih leh, kei Paah ka awm tih in hriata in rin nân,” a ti a, a chhâng a. 39 Chutichuan, ani chu man an tum leh a; nimahsela, an kut ata chu a chhuak a, 40 Jordan lui râlah, Johanan a tîra mi a baptis-na lamah khân a kal bo leh a, chutah chuan a awm ta reng a. 41 Tin, mi tam tak a hnênah an lo kal a, “Johanan chhinchhiahna eng mah zawng a ti lo va; nimahsela, Johanan he mi chungchâng thu a sawi apiang kha a lo dik hle hi,” an ti a. 42 Tin, chutah chuan mi tam takin amah an ring ta a.
Lazara a thi
1 Tin, mi pakhat, Mari leh a laizâwn Marthi awmna khua Bethani-a mi Lazara, damlo a awm a. 2 (Mari, hriak rimtui Lalpa hnawiha, a sama a ke hrutu kha, kha mi nuṭa Lazara kha a ni, damlo chu.) 3 Tin, a farnuten Isua hnênah, “Lalpa, ngai teh, i hmangaih kha a damlo ve,” tiin mi an tîr a. 4 Tin, Isuan chu chu a hria a, “He nâ hi thihna tûr a ni lo, Pathian mawi nân a ni zâwk e, Pathian Fapa chu hemi avâng hian a la mawina tûrin,” a ti a. 5 Tin, Isuan Marthi te, a laizâwn te, Lazara te chu a hmangaih a. 6 Amaherawhchu, a damlo tih a hriatin a awmna ngaiah ni hnih a la awm ta cheu va. 7 Tin, chumi hnuah chuan a zirtîrte hnênah, “Judai ramah i kal leh ang u,” a ti a. 8 Tin, zirtîrte chuan a hnênah, “Rabbi, hmân lawkah khân Juda-ten lunga den an tum che kha; chuti pawhin chutah chuan i kal leh bawk dâwn em ni?” an ti a. 9 Tin, Isuan, “Chhûnah dârkâr sâwm leh pahnih a awm lo vem ni? Mi chhûna a lên chuan a pai ngai lo, he khawvêl êng hi a hmuh avângin. 10 Amaherawhchu, mi zâna a lên chuan a pai ṭhîn, amahah chuan êng a awm loh avângin,” a ti a, chhâng a. 11 Chûng thu chu a sawi a; tin, chumi hnuah chuan an hnênah, “Kan ṭhian Lazara chu a muhîl ta a; a muhîl kai harh tûrin ka kal dâwn a ni,” a ti a. 12 Chutichuan, zirtîrte chuan a hnênah, “Lalpa, a muthilh tawh chuan a dam leh ang chu,” an ti a. 13 (Isua chuan a thih thu a sawi a ni a; nimahsela, anni chuan a chawlh chhûnga a muthilh thu a sawi em maw an ti a.) 14 Chutichuan, Isuan fiah takin an hnênah a sawi a, “Lazara a thi a ni. 15 Chuta ka awm lo chu ka lâwm a ni, nangmahni avângin, in rin theih nân; nimahsela, a hnênah i kal ang u,” a ti a. 16 Tin, Thoma, Phîra an tih chuan a zirtîrpuite hnênah, “A thihnaa thi ve tûrin i kal ang u,” a ti a.
Isua - thawhlehna leh nunna
17 Chutichuan, Isuan a thlenin thlânah ni li a lo awm tawh tih a hria a. 18 Bethani khua chu Jerusalem khaw kiang a ni a, fîng sâwm leh fîng nga laia hla a ni; 19 tichuan, an nuṭa thih chunga tithlamuang tûrin Juda-ho tam tak Marthi leh Mari hnênah an lo kal a. 20 Tin, Marthi chuan Isua a lo kal dâwn tih a hriat veleh a va hmuak a; Mari erawh chu inah a la ṭhu reng a. 21 Tin, Marthi chuan Isua hnênah, “Lalpa, heta awm ni la chu ka nuṭa a thi lo tûr. 22 Tûnah pawh Pathian hnêna i ngen apiang Pathianin a pe ang che tih ka hria e,” a ti a. 23 Isuan a hnênah, “I nuṭa a tholeh ang,” a ti a. 24 Marthi chuan a hnênah, “Ni kin nia thawhlehnaah chuan a tholeh ang tih ka hria e,” a ti a. 25 Tin, Isuan a hnênah, “Kei hi thawhlehna leh nunna chu ka ni; tu pawh mi ring chu thi mah sela a nung reng ang; 26 nung apiangin mi ring chu kumkhuain an thi lo vang. Chu thu chu i ring em?” a ti a. 27 Ani chuan a hnênah, “Ring e, Lalpa; Krista, Pathian Fapa, khawvêla lo kal tûra chu i ni tih ka ring e,” a ti a.
Isua a ṭap
28 Tin, chu thu chu a sawi zawh veleh a kal a, a laizâwn Mari chu a rûkin a va ko va, “Zirtîrtu hetah a awm a, a ko va che,” a ti a. 29 Tin, ani chuan chu chu a hriat veleh a tho thuai a, a hnênah a va kal a. 30 (Isua chu khuaah a la lût lo va, Marthiin a va hmuah laia a awmna ngaiah a la awm a.) 31 Tin, in chhûnga a thlamuantu, a awmpui Juda-te chuan Mari a tho thuaia, a chhuak an hmuh veleh, thlânah ṭap tûrin a kal dâwn emaw an ti a, an zui a. 32 Tin, Mari chuan Isua awmna chu a va thleng a, a hmuh veleh a ke bulah a bawkkhup a, a hnênah, “Lalpa, heta awm ni la chu, ka nuṭa a thi lo tûr,” a ti a. 33 Tin, Isuan Mari ṭap leh a rawn zuitu Juda-te ṭap chu a hmu a, a rilruin a rûm a, a lungngai a. 34 “Ani chu khawiah nge in zalh?” a ti a. Anni chuan a hnênah, “Lalpa, lo kal la, en teh,” an ti a. 35 Isua chu a ṭap ta a. 36 Tin, Juda-te chuan, “En teh u, Lazara hi a va lo hmangaih êm ve le!” an ti a. 37 Nimahsela, ṭhenkhat chuan, “He mi, mitdel mit tivârtu hian he mi pawh hi a thih lohtîr thei lo vem ni?” an ti a.
Lazara a lo nung leh ta
38 Tin, Isua chu a rilruin a rûm leh a, thlân chu a thleng ta a. Chu thlân chu pûk a ni a, a kawngkaah chuan lung pakhat a awm. 39 Isuan, “Lung hi chawi sawn rawh u,” a ti a. A thia farnu Marthi chuan a hnênah, “Lalpa, tûnah zawng a uih tawh ang; a thihna ni li a ni tawh si a,” a ti a. 40 Isuan a hnênah, “ ‘I rin chuan Pathian ropuizia i hmu ang,’ ka ti lo che em ni?” a ti a. 41 Chutichuan, lung chu an chawi sawn a. Tin, Isua chu a vanvadâk a, “Ka Pa, ka thu i ngaihthlâk avângin i chungah ka lâwm e. 42 Kumkhuain ka thu i ngaithla ṭhîn tih ka hre reng a ni; nimahsela, mipui din vêl avângin chu chu ka ti a ni, nangin mi tîr tih an rin theih nân,” a ti a. 43 Tin, chutia a ṭawng zawh veleh chuan aw ring takin, “Lazar, lo chhuak rawh,” a ti a, a au va. 44 Tin, mitthi chu a kut a ke thlân puana tuam chungin a lo chhuak ta a, a hmai pawh inhrûkna puana tuam a ni a. Isuan an hnênah, “Phelh ula, kaltîr rawh u,” a ti a.
Isua an phiar
45 Chu vâng chuan Mari lênpuitu, Isua thiltih hmutu Juda-te zînga tam takin Isua an ring ta a. 46 Nimahsela, a ṭhen Pharisaite hnênah an va kal a, an hnênah Isua thiltihte chu an hrilh a. 47 Chutichuan, puithiam lalte leh Pharisaite chuan rorêltuho an ko khâwm a, “Engtin nge kan tih ang? He mi hian thil mak tam tak a ti si a. 48 Hetianga kan thlahthlam chuan mi zawng zawngin amah an ring ang a; tin, Rom-a mite an lo kal ang a, kan hmun leh kan chite hi min lâksak ang,” an ti a. 49 Tin, an zînga mi pakhat Kaiapha, chumi kuma puithiam lalber chuan an hnênah, “Nangnin eng mah in hre hauh lo, 50 kan chi zawng zawng boral lohna tûrin, mi zawng zawng aia mi pakhat thih in tân a ṭha tih in ngaihtuah bawk lo,” a ti a. 51 (Chu thu chu ama phuah chawpin a sawi lo, chumi kum chuan puithiam lalber a ni a, an chite aia Isua a thih tûr a sawi lâwk a ni zâwk e. 52 Chumi chite ai chauh chuan a ni lo, Pathian fa khawvêla darhte zawng zawng pâwl khata a hruai khâwmna tûr pawhin a ni bawk.) 53 Chutichuan, chumi ni achin chu amah tihlum tûrin an inrâwn ṭhîn a. 54 Chuvângin, Isua chu Juda-te zîngah a langin a lêng leh ta lo va, chuta ṭang chuan thlalêr dep lama khaw pakhat, Ephraim an tihah chuan a va kal ta zâwk a; chutah chuan zirtîrte nên chuan an awm ta reng a. 55 Tin, Juda-te kalhlên kût chu a hnai tawh a, mi tam tak chu inthian tûrin, ram ata kalhlên kût hmain Jerusalem khuaah an han kal a. 56 Chutichuan, Isua an zawng a, Pathian biak inah ding chungin an inbia a, “Eng nge in rin? Kûtnaah a lo kal lo vang maw?” an inti a. 57 Puithiam lalte leh Pharisaiten amah chu an man theih nân, tu pawhin a awmna an hriat chuan puan tûr a ni tih thu an pe tawh si a.
Bethani khuaa Isua hriak thih
1 Tin, kalhlên kûtna tûr ni ruk a la awmin, Isuan mitthi zîng ata a kaihthawh Lazara awmna Bethani khua kha a lo thleng a. 2 Tin, chutah chuan ama tân zân ruai an ṭheh a; Marthiin rawng a bâwl a, Lazara erawh chu a chawhlui kîlpuitu pakhat a ni. 3 Tin, Marin bûk zâtve spiknard hriak rimtui to tak a rawn keng a, Isua kete chu a chulh a, a samin a kete chu a hru a; tichuan, chu hriak rim chuan in chu a khat ta rum rum a. 4 Nimahsela, Iskariot Juda, a zirtîr pakhat, a mantîrtu tûr chuan, 5 “He hriak rimtui hi engati nge duli zathuma hralhin, mi retheite hnêna an pêk zâwk loh?” a ti a. 6 (Mi retheite a ngaihsak vânga chu thu chu sawi a ni lo; rûkru a ni a, tangka ip a kawl a, a chhûnga dah chu a lâk ṭhin vâng zâwk a ni.) 7 Tin, Isuan, “Mi phûm ni atân khêk rawh se. 8 Mi retheite chu kumkhuain in hnêna awm an ni alâwm; kei erawh chu kumkhuaa in hnêna awm tûr ka ni lo,” a ti a.
Lazara an phiar
9 Chutah chuan Isua a awm tih Juda hnamchawmten an lo hria ta a; tin, an lo kal a, Isua chauh rawn kal chhan an ni lo va, mitthi zîng ata a kaihthawh Lazara pawh kha hmuh duh fâwm an ni bawk. 10 Tin, puithiam lalte chu Lazara pawh tihlum tûrin an inrâwn a; 11 amah avânga Juda-te tam takin an pakaisana, Isua an rin ṭhin avângin.
Ropui taka Jerusalem luh thu
12 A tûkah chuan kûtnaa lo kal mipui tam takin, Isua chu Jerusalem khuaah a lo kal dâwn tih an hriatin, 13 tûmkaute an keng a, a hmuak tûrin an va chhuak a, “Hosanna, Lalpa hminga Israel Lal lo kal chu fakin awm rawh se,” tiin an au va. 14 Tin, Isuan sabengtungno a hmu a, a chungah a chuang a, 15 “Hlau suh, Zion fanu; En teh, i Lal chu, Sabengtungno chunga chuangin, A lo kal dâwn e,” tih ziak ang khân. 16 Chûng chu a tîrin a zirtîrten an hre lo va; nimahsela, Isua chawimawia a awm hnuah chuan, a chanchinah chûng thu chu ziak a ni tih leh, a chungah chûng thil chu an lo ti ngei tih an lo hre ta a. 17 Tin, Lazara thlân ata a koh chhuaha, mitthi zîng ata a kaihthawh laia a hnêna mipui awmte khân a thu chu an hriattîr ta zêl a. 18 Chumi avâng chuan a ni, mipuite pawh chuan amah chu an va hmuah ni, chu thil mak chu a ti tih an hre si a. 19 Chutichuan, Pharisaite chuan, “Hre rawh u, eng mah in tih theih loh hi; en rawh u, khawvêlin amah an zui tâk hi,” an ti a.
Grik miten Isua hmuh an tum
20 Tin, kûtnaa Pathian chibai bûk tûra han kalte zîngah Grik tute emaw an awm a; 21 tin, chûngte chu Galili rama Bethsaida khuaa mi Philipa hnênah chuan an lo kal a, a hnênah, “Ka pu, Isua hmuh kan duh e,” an ti a, an ngên a. 22 Philipa chuan Andria a rawn hrilh a, Andria leh Philipa chuan Isua an rawn hrilh a. 23 Tin, Isuan a chhâng a, an hnênah, “Mihring Fapa chawimawia a awm hun chu a thleng tawh. 24 Tihtakmeuhvin, tihtakmeuhvin ka hrilh a che u, buh fang leia a tlâk lohva, a thih loh chuan a mal chauhvin a awm reng ṭhîn; a thih erawh chuan tam takin a rah ṭhîn. 25 Tu pawh a nun thlahlel chuan a hloh ṭhîn; tu pawh he khawvêlah hian a nun ngaitlâwm chuan chatuana nunna tûr a vawng reng ang. 26 Tu pawhin ka rawng a bâwl chuan mi zui rawh se; ka awmnaah ka rawngbâwltu pawh a awm ang; tu pawhin ka rawng a bâwl chuan ani chu Pain a chawimawi ang.
Isuan a thih tûr thu a sawi
27 “Tûnah ka rilru a mangang e; eng nge ka sawi ang aw? ‘Ka Pa, hemi hun lakah hian mi chhandam rawh,’ ka ti ang em ni? Eng pawh ni sela, hemi tûr hi, hemi hun thleng hian ka awm chhan a ni. 28 Ka Pa, i hming chawimawi rawh,” a ti a. Chutichuan, vân aṭangin aw a lo chhuak a, “Ka chawimawi tawh, ka chawimawi leh bawk ang,” a ti a. 29 Tin, mipui a kianga dingte chuan chu chu an hria a, “Khawpui a ri a ni,” an ti a; mi dangten, “Vântirhkohvin amah a bia a ni,” an ti a. 30 Isuan a chhâng a, “Chu aw chu ka tâna lo chhuak a ni lo, nangmahni tân a ni zâwk e. 31 Tûnah he khawvêl hi ngaihtuah lai a ni; tûnah he khawvêl lal hi paih chhuah a ni ang. 32 Tin, kei lei ata khai kânin ka awm chuan, mi zawng zawng keima hnênah ka hîp ang,” a ti a. 33 Chu thu chu a thihzia tûr hriattîr nân a sawi a ni. 34 Tin, mipui chuan a hnênah, “Krista chu chatuanin a awm reng dâwn tih dân lehkhabuah kan hria e; nangin, ‘Mihring Fapa khai kânin a awm tûr a ni,’ eng ti tiha ti nge i nih? Chu Mihring Fapa chu tu nge ni?” an ti a, an chhâng a. 35 Tin, Isuan an hnênah, “Êng hi rei lo tê in zîngah a la awm rih e. Êng in neih chhûng hian lêng rawh u, thimin a nan loh nân che u; tu pawh thima lêng chuan a kalna chin a hre ṭhîn lo. 36 Êng in neih chhûng hian êng hi ring rawh u, êng fate in lo nih theih nân,” a ti a. Chûng thu chu Isuan a sawi a; tin, a kal a, an hmuh loh tûrin a biru ta a.
Miten an ring duh lo
37 An hmaah chutiang thil mak tam tak chu ti mah sela, amah an ring si lo: 38 “Lalpa, kan thusawi tuin nge ring? Lal kut pawh tu hnênah nge a lan?” tih, zâwlnei Isaia thusawi kha a thlen nân. 39 Hemi avâng hian a ni an rin theih loh, Isaian, 40 “Aman an mit a tidel a, An thinlung a tiâ a; Chuti lo chuan, an mitin an hmu ang a, An thinlungin an hre dah ang a; Tin, an hawi kîr leh dah ang a, Keiin anni chu ka tidam dah ang e,” tih a sawi leh avâng hian. 41 Isaian a ropuizia a hmuh leh a chanchin thu a sawi avângin chûng thu chu a sawi a ni. 42 Nimahsela, hotute zînga tam takin Isua an ring ta a; amaherawhchu, Pharisaite avângin an inpuang lo; chuti lo chuan, inkhâwmna in hnawngin an awm ang; 43 Pathian hnêna ropuina ai chuan mihring hnêna ropuina an duh zâwk si a.
Isua thu - thiam loh chantîrtu
44 Tin, Isua chu a au va, “Tu pawh mi ring chu kei mi ring a ni lo, mi tîrtu ring a ni zâwk e. 45 Tu pawh mi hmu chu mi tîrtu hmu a ni. 46 Êntua khawvêla lo kal ka nih hi, tu pawh mi ring apiang thima an awm reng loh nân. 47 Tu pawh ka thusawi hriain, awih lo mah sela, keiin thiam loh ka chantîr lo; khawvêl thiam loh chantîr tûra lo kal ka ni lo va, khawvêl chhanhim tûra lo kal ka ni zâwk si a. 48 Tu pawh mi duh lova, ka thusawite vawng lo chuan thiam loh chantîrtu pakhat a nei a ni; ka thusawi kha, khami thu ngei khân ni kin niah chuan amah chu thiam loh a la chantîr ang. 49 Keima phuah chawpin ka sawi si lo; Pa mi tîrtu chuan ka sawi tûr leh ka hril tûr hi thu mi pe zâwk a ni. 50 Ama thupêk chu chatuana nunna a ni tih ka hria; chu vâng chuan thu ka sawi hi, Pa mi hrilh ang zêlin ka sawi a ni,” a ti a.
Isuan a zirtîrte ke a sil
1 Tin, kalhlên kût hmain Isuan he khawvêl hi chhuahsana, Pa hnêna a kal hun a thleng tawh tih a hria a, ama mi, khawvêla awm a hmangaih ṭhinte chu, a tâwp thleng pawhin a hmangaih reng a. 2 Tin, zanriah ei laiin (chumi hma pawhin Diabolan Simona fapa Iskariot Juda chu, Isua mantîr a rilrûktîr a), 3 Isuan, Pain a kutah thil engkim a vawntîr te, Pathian hnên aṭanga lo chhuak a nih te, Pathian hnêna a kal dâwn te hre reng chungin, 4 a zanriah kîl lai chu a tho va, a puante a dah a, inhrûkna puan a la a, a veng a. 5 Tichuan, maihûnah tui a bun a, zirtîrte ke a sil ta a, inhrûkna puan a ven chuan a hru zêl a. 6 Chutichuan, Simon Petera hnênah a lo kal a. Ani chuan, “Lalpa, nang êmin ka ke i sil dâwn em ni?” a ti a. 7 Isuan a hnênah, “Ka thiltih hi tûnah i hre lo; nimahsela, nakinah i la hria ang,” a ti a, a chhâng a. 8 Peteran a hnênah, “Ka ke i sil tawp lo vang,” a ti a. Isuan a hnênah, “Ka sil loh che chuan ka hnênah eng mah chan i nei lo vang,” a ti a. 9 Simon Peteran a hnênah, “Lalpa, chuti a nih chuan ka ke chauh ni lovin, ka kut leh ka lu pawh le,” a ti a. 10 Isuan a hnênah, “Inbual tawh chu a ke lo chu sil a ngai lo, a fai var alâwm; nangni in fai e, in za erawh chuan a ni lo,” a ti a. 11 (A mantîrtu tûr chu a hre si a; chuvângin, “In za chuan in fai lo,” a ti a ni.) 12 Chutianga an ke a sila, a puante a lâka, a ṭhut leh hnu chuan an hnênah, “In chunga ka thiltih hi eng tihna nge ni in hria em? 13 Nangnin Zirtîrtu leh Lalpa min ti ṭhîn; in tidik e, ka ni ngei rêng a. 14 Kei Lalpa leh Zirtîrtu mahin in ke ka sil chuan, nangni pawhin in ke in insilsak tûr a ni. 15 In chunga ka tih ang hian nangni pawhin in tih vena tûrin ka tihhmuh che u a ni si a. 16 Tihtakmeuhvin, tihtakmeuhvin ka hrilh a che u, bawih a pu aiin a ropui lo; tirhkoh pawh a tîrtu aiin a ropui hek lo. 17 Chûng thil chu in hriat chuan ti ula in eng a thâwl ang. 18 “In zaa thu ka sawi lo ve; ka thlante chu ka hria; nimahsela, chu chu, ‘Ka chhang eituin a keartui ka chungah a lek ta,’ tih Pathian Lehkha Thu kha a lo thlen theihna tûr a ni. 19 Tûnah a lo thlen hmain ka hrilh che u hi, a lo thlen hunah kei hi amah kha ka ni tih in rin theihna tûrin. 20 Tihtakmeuhvin, tihtakmeuhvin ka hrilh a che u, tu pawh ka tirh apiang lâwm chu, keimah mi lâwm a ni; tu pawh kei mi lâwm chu mi tîrtu lâwm a ni,” a ti a.
Mantîr a nih tûr a hrilh lâwk
21 Isuan chutianga a sawi zawh chuan a rilruin a mangang a, “Tihtakmeuhvin, tihtakmeuhvin ka hrilh a che u, in zînga mi pakhatin mi mantîr ang,” tiin a hriattîr ta a. 22 Tin, zirtîrte chuan a tih bîk an hre lo va, an inen hlawm a. 23 Tin, a zirtîrte zînga mi pakhat, Isuan a hmangaiha chu, dawhkân sîrah Isua ângchhûngah bawkin a awm a. 24 Tin, Simon Peteran chu mi hnênah chuan, “Tu thu ber nge a sawi, mi hrilh teh,” tiin a zaizir a. 25 Tin, ani chu a awmna ngaiah a awm a, Isua âwm nghêngin a lo thle phei a, a hnênah, “Lalpa, tu ber nge ni?” a ti a. 26 Tin, Isuan, “Chhang them ka chiahsaka, ka pêka chu a ni ang,” a ti a, a chhâng a. Chutichuan, chhang them chu a chiah hnuin a la a, Iskariot Simona fapa Juda hnênah chuan a pe a. 27 Tin, chhang them chu a pêk hnu chuan a chhûngah Setana a lût ta nghâl a. Chutichuan, Isuan a hnênah, “I tih tûr chu ti thuai rawh,” a ti a. 28 (Tin, dawhkân sîra mite chuan tu mân engtiziaa ti nge a nih an hre lo. 29 ṭhenkhatin, Juda chuan tangka ip a vawn avângin, Isuan, “Kût atân thil kan châkkhai apiang lei rawh,” a ti emaw, “Mi retheite hnênah englo pêk tûr,” a ti emaw an ti a ni.) 30 Tin, ani chuan chhang them chu a la a, a chhuak ta nghâl a; chumi lai chu zân a ni a.
Thupêk thar
31 Chutichuan, a chhuah hnuin Isuan a sawi a, “Tûnah chuan Mihring Fapa chawimawiin a awm ta, amah avângin Pathian pawh chawimawiin a awm a ni. 32 Pathianin amahah chuan ani chu a chawimawi ang, a chawimawi nghâl ang. 33 Naute u, rei lo tê in hnênah ka la awm rih e. Nangnin mi zawng ang; tin, Juda-te hnênah, ‘Ka kalna tûrah in lo kal thei lo vang,’ tih ka sawi ang khân, tûnah chuti bawkin in hnênah ka sawi hi. 34 “Thupêk thar ka pêk che u hi, inhmangaih ula; keiin ka hmangaih che u ang hian nangni pawh inhmangaih ula. 35 In inhmangaih chuan mi zawng zawngin ka zirtîrte in ni tih chumiah chuan an hria ang,” a ti a.
Peteran Isua a phat tûr hrilh lâwkna
36 Simon Peteran a hnênah, “Lalpa, khawiah nge i kal dâwn?” a ti a. Isuan, “Ka kalna tûrah nangin tûnah mi zui thei lo vang; nakinah erawh chuan mi zui ang,” a ti a, a chhâng a. 37 Peteran a hnênah, “Lalpa, engati nge tûnah pawh ka zui theih loh vang che? Nangmah avângin ka nun ka paih ang,” a ti a. 38 Isuan, “Keimah avângin i nun i paih ang maw? Tihtakmeuhvin, tihtakmeuhvin ka hrilh a che, nangin vawi thum mi phat hma loh chuan âr a khuang lo vang.
Isua - Pa hnên thlenna kawng
1 “In thinlung mangang suh se; Pathian in ring e, kei pawh mi ring ve rawh u. 2 Ka Pa inah awmna tam tak a awm a, a awm loh chuan ka hrilh tawh tûr che u a ni; in tân hmun siamin ka kal dâwn hi. 3 Tin, in tân hmun ka han siam chuan, ka lo kîr leh ang a, ka hnênah ka la ang che u; ka awmnaah nangni pawh in awm theih nân. 4 Ka kalna tûr a kawng chin in hria e,” a ti a. 5 Thoman a hnênah, “Lalpa, i kalna tûr chin kan hre lo asin; a kawng engtin nge kan hriat ang?” a ti a. 6 Isuan a hnênah, “Keimah hi kawng leh thutak leh nunna ka ni; keimaha kal lo chu tu mah Pa hnênah an thleng ngai lo. 7 Kei mi hria ni ula, ka Pa pawh in hre tawh tûr; tûn achinah amah in hria e, amah in hmu tawh bawk,” a ti a. 8 Philipan a hnênah, “Lalpa, Pa chu keini min hmuhtîr ta che; chutichuan, kan tân a tâwk ang,” a ti a. 9 Isuan a hnênah, “Philip, hei leh chen hi in hnênah ka awm a, chuti pawhin mi hre lo maw? Tu pawh mi hmu chu Pa hmu a ni. ‘Pa chu keini min hmuhtîr rawh,’ eng ti tiha ti nge i nih? 10 Kei Paa ka awm leh Pa keimahah a awm tih i awih lo vem ni? In hnêna thu ka sawi hi keima phuah chawpin ka sawi lo; Pa keimahah a awm reng a, a thil a ti zâwk ṭhîn a ni. 11 Kei Paa ka awm leh Pa keimahah a awm tih mi ring rawh u; a nih loh leh, thiltih avâng tal hian mi ring rawh u. 12 Tihtakmeuhvin, tihtakmeuhvin ka hrilh a che u, tu pawh mi ring chuan thil ka tihte hi a ti ve ang; hêng aia thil ropui zâwk pawh hi a la ti ang, Pa hnênah ka kal dâwn avângin. 13 Tin, ka hmingin eng pawh in dîl apiang chu ka ti zêl ang, Pa chu Fapa avânga chawimawia a awm theih nân. 14 Nangnin ka hmingin eng pawh mi dîl chuan, chu chu ka ti zêl ang.
Thlamuantu pêk tûr
15 “Nangnin mi hmangaih chuan ka thupêkte chu in zâwm ang. 16 Tin, Pa ka dîl ang a, ani chuan Thlamuantu dang a pe ang che u, chatuana in hnêna awm tûrin; 17 chu chu Thlarau dik tak a ni; khawvêlin chumi chu an nei thei lo, amah an hmuh lohva an hriat hek loh avângin; nangnin ani chu in hria e, in hnênah a awm reng si a, nangmahniah chuan a awm dâwn a ni. 18 Fahrahin ka kalsan lo vang che u; in hnênah ka lo kal leh ang. 19 Rei lo deuh chinah khawvêlin mi hmu leh tawh lo vang; nimahsela, nangni zawngin mi hmu ang; keimah ka nun avângin nangni pawh in nung ve ang. 20 Chumi niah chuan kei ka Paa ka awm te, nangni keimaha in awm te, kei nangmahnia ka awm te in hria ang. 21 Tu pawh ka thupêkte neia zâwm chu mi hmangaihtu a ni; tu pawh mi hmangaih chu ka Pain a hmangaih ang, kei pawhin ani chu ka hmangaih ang a, a hnênah ka inlâr ang,” a ti a. 22 Tin, Juda (Iskariota lo zâwk) chuan a hnênah, “Lalpa, keini hnênah i inlâr ang a, khawvêl hnêna i inlâr si lo tûr chu, engati nge?” a ti a. 23 Isuan a chhâng a, a hnênah, “Miin mi hmangaih chuan ka thu a zâwm ang a; ka Pain ani chu a hmangaih ang a, a hnênah kan lo kal ang a, a hnênah kan awm reng ang. 24 Tu pawh mi hmangaih lo chuan ka thu a zâwm lo; thu in hriatte hi ka ta a ni lo, Pa mi tîrtu ta a ni zâwk e. 25 In hnêna ka la awm chhûng hian hêng thu hi ka hrilh che u hi. 26 Tin, Thlamuantu, Thlarau Thianghlim, Pain ka hminga a rawn tirh tûr khân, chu mi chuan engkim a zirtîr ang che u a, in hnêna ka sawi zawng zawng a hriat chhuahtîr leh ang che u. 27 “Thlamuanna ka hnutchhiah a che u; keima thlamuanna ka pe a che u; khawvêlin a pêk angin ka pêk loh che u hi. In thinlung mangang suh se, hlauh pawh hlau suh se. 28 ‘Ka kal bo dâwn a, in hnênah ka lo kal leh ang,’ ka tihzia che u kha in hre tawh e. Nangnin mi hmangaih ni ulang, Pa hnêna ka kal dâwn avângin in lâwm tûr a ni; Pa chu keimah aiin a ropui zâwk si a. 29 Tûnah a lo thlen hma hian ka hrilh tawh che u hi, a lo thlen huna in rin nân. 30 In hnênah thu ka sawi leh tawh mang lo vang, khawvêl lal a lo kal dâwn si a, ani chuan keimahah eng mah rêng a nei lo; 31 nimahsela, keiin Pa ka hmangaih leh, Pain thu mi pêk ang zêlin thil ka ti tih, khawvêlin an hriatna tûr a nih hi. Tho rawh u, heta ta hi i chhuak ang u.
Isua hi Grêp tak hrui a ni
1 “Kei grêp hrui tak tak ka ni, ka Pa a huan enkawltu a ni. 2 Ka zawmpui pêng rah lo apiang a paih ṭhîn a; a rah apiang a tithianghlim ṭhîn, a rah tam lehzual nân. 3 In hnêna ka thusawi avâng chuan tûnah pawh in thianghlim tawh pang a ni. 4 Keimahah awm reng rawh u, kei pawh nangmahniah ka awm reng ang. Pêng chu grêp hruia a awm reng loh chuan amahin a rah thei lo ang bawkin, nangni pawh keimaha in awm reng loh chuan in rah thei lo vang. 5 Kei grêp hrui chu ka ni, nangni a pêngte chu in ni; tu pawh keimaha awm renga, kei pawh amaha ka awm rengna chu, chu mi chu tam takin a rah ṭhîn; keimah lovin eng mah in ti thei si lo. 6 Mi keimaha a awm reng loh chuan, pêng anga paih chhuahin a awm a, a vuai ṭhîn; tin, an fawm a, meiah an paih a, a kâng ṭhîn. 7 Nangni keimaha in awm renga, ka thu nangmahnia a awm reng bawk chuan, in duh apiang dîl rawh u, in tân tihin a awm zêl ang. 8 Hemi avângin ka Pa chu chawimawiin a awm ṭhîn, tam taka in rah hian; chutichuan, ka zirtîrte in ni ang. 9 “Pain mi hmangaih ang bawkin kei pawhin ka hmangaih che u hi; ka hmangaihin awm reng rawh u. 10 Nangnin ka thupêkte in zawm chuan, ka hmangaihin in awm reng ang; keiin ka Pa thupêkte ka zâwm a, a hmangaihin ka awm reng ang bawk hian. 11 Ka lâwm nangmahnia a awm reng nân leh, in lâwm a kim nân hêng thu hi in hnênah ka sawi hi. 12 Hei hi ka thupêk a ni, keiin ka hmangaih che u ang bawkin nangni inhmangaih ula. 13 Mihringin a ṭhian aia a nun a paih aliama hmangaihna nasa zâwk tu mân an nei lo. 14 Thu ka pêk apiang che u in tih chuan ka ṭhiante in ni ang. 15 Bawih ka ti leh tawh lo vang che u; a pu thiltih bawihin a hre si lo; ṭhiante ka ti tawh zâwk ang che u; Pa hnêna thil ka hriat zawng zawng in hnênah ka puang tawh si a. 16 Nangnin mi thlang lo, keiman ka thlang zâwk che u a, va rah tûr leh in rah awm reng tûrin ka ruat bawk a che u; ka hminga Pa hnêna in dîl apiang a pêkna tûr che uin. 17 “In inhmangaih theih nân hêng thu hi ka pe a che u.
Khawvêl huat kai
18 “Khawvêlin a huat che u chuan, a huat hma che u pawhin keimah mi hua tih in hria e. 19 Nangni khawvêla mi ni ula, khawvêlin amaha mi a hmangaih tûr; khawvêla mi in ni si lo va, khawvêla mi ka thlan chhuah zâwk che u avâng hian khawvêlin a hua che u a ni e. 20 ‘Bawih a pu aiin a ropui lo,’ tih thu ka hrilh tawh che u kha hre reng rawh u. Annin kei mi tihduhdah tawh chuan nangni pawh an tiduhdah ang che u; ka thu an zawm tawh chuan nangni thu pawh an zâwm ang. 21 Nimahsela, hêng thil zawng zawng hi ka hming avângin in chungah an ti ang, mi tîrtu an hriat loh avângin. 22 Kei lo kalin an hnênah thu sawi suh ila, sual an nei lo tûr; tûnah erawh zawng an sual chhuanlam tûr an nei ta lo a ni. 23 Tu pawh kei mi hua chuan ka Pa pawh a hua a ni. 24 Thil, mi dang tu ma tih ngai lohte an zîngah ti suh ila, sual an nei lo tûr; tûnah erawh zawng annin kei leh ka Pa, kan pahnihin min hmu tawh a, huat pawh min haw tawh a ni. 25 Eng pawh ni rawh se, an Dân Lehkhabua, ‘Annin enga khaw lawilovin mi hua,’ tih thuziak kha a lo thlenna tûrin an ti a nih hi. 26 “Tin, Pa hnên ata Thlamuantu in hnêna ka tirh tûr, Paa chhuak Thlarau dik tak chu a lo thlen hunah, ani chuan ka thu a hriattîr ang; 27 nangni pawhin in hriattîr bawk ang, a tîr ata ka hnêna in awm avângin.
1 “Tihlungnihlohva in awm lohna tûrin hêng hi in hnênah ka sawi tawh hi. 2 Inkhâwmna inahte an hnawntîr ang che u a; a ni, tu pawh a tihlum tûr che u apiangin Pathian chungah thil ṭha tiin an inhria ang, chutiang hun chu a thleng dâwn. 3 Chûng thil chu an ti ang, Pa leh kei min hriat loh avângin.
Thlarau Thianghlim hnathawh
4 “Hêng thu hi in hnênah ka sawi tawh hi, a hun a lo thlen hunah ka hrilh tawh che u tih in hriat lehna tûrin. Hêng thil hi a tîr ata ka la hrilh lo rêng che u a ni, in hnêna ka la awm avângin. 5 Tûnah erawh zawng mi tîrtu hnênah ka kal dâwn a ni; nangniho zînga tu mân, ‘Khawiah nge i kal dâwn?’ tiin mi zâwt si lo. 6 Hêng thu hi in hnêna ka sawi avângin, in thinlung chu lungngaiin a khat thlu hial ta zâwk a. 7 “Nimahsela, thu dik tak ka hrilh a che u; ka kal in tân a ṭha e; ka kal loh chuan Thlamuantu chu in hnênah a lo kal dâwn si lo; ka kal erawh chuan in hnênah ka rawn tîr ang. 8 Ani chu a lo thlen chuan sual thu-ah te, fel thu-ah te, rorêl thu-ah te khawvêl an thiam loh a hriattîr ang: 9 sual thu-ah te thiam loh an chang ang, kei mi rin loh avâng hian; 10 fel thu-ah te thiam loh an chang ang, Pa hnênah ka kal dâwna, nangnin mi hmuh leh dâwn tawh loh avâng hian; 11 rorêl thu-ah te thiam loh an chang ang, he khawvêl lal hi thiam lohva a tlûk tawh avâng hian. 12 “In hnênah thu sawi tûr tam tak ka la nei cheu va; nimahsela, tûnah zawng in tlin rih lo vang. 13 Nimahsela, amah, Thlarau dik tak chu a lo thlen hun chuan, thutak zawng zawngah chuan a hruai lût ang che u: ama phuah chawpin thu a sawi dâwn si lo; thu a dawn apiang chu a hril zâwk ang; thil lo thleng tûrte pawh a hriattîr ang che u. 14 Ani chuan kei mi chawimawi ang; ka taa mi a la ang a, in hnênah a hriattîr dâwn si che u a. 15 Pain thil a neih zawng zawng ka ta a ni; chuvângin, ‘Ka taa mi a la ang a, in hnênah a hriattîr ang che u,’ ka tih hi.
Lâwmna tûr leh lungngaihna tûr
16 “Rei lo teah nangnin kei mi hmu lo vang a; rei lo teah bawk nangnin kei mi hmu leh ang,” a ti a. 17 Tin, a zirtîrte ṭhenkhatin, “Kan hnêna a thusawi hi eng nge ni, ‘Rei lo teah nangnin kei mi hmu lo vang a, rei lo teah bawk nangnin kei mi hmu leh ang,’ a tih leh, ‘Pa hnêna ka kal dâwn avângin,’ a tih hi?” an ti a. 18 Tin, anmahni vêk chuan, “Hei, ‘Rei lo te’ a tih hi eng tihna nge ni? A thusawi hi a ngaihna kan hre lo,” an ti a. 19 Tin, amah zawh an duh tih Isuan a hria a, an hnênah, “ ‘Rei lo teah nangnin kei mi hmu lo vang a, rei lo teah bawk nangnin kei mi hmu leh ang,’ tia ka thusawi hi in inzâwt maw? 20 Tihtakmeuhvin, tihtakmeuhvin ka hrilh a che u, nangni in mittui a tla ang a, in ṭap vak bawk ang a, khawvêl erawh chu an lâwm ang; nangni in lungngai ang a; nimahsela, in lungngaih chu lâwmah a chang ang. 21 Hmeichhiain nau a veiin a lungngai ṭhîn, a hun a thlen tawh avângin; nimahsela, nau a hrin veleh a thlaphân chu a hre leh tawh ṭhîn lo, khawvêla mihring lo piang chu a lawm avângin. 22 Tin, tûnah nangni in lungngai e; nimahsela, ka hmu leh ang che u a, in thinlung a lâwm ang a, in lâwm chu tu mân an lâksak lo vang che u. 23 Chumi niah chuan nangnin eng mah kei mi zâwt lo vang. “Tihtakmeuhvin, tihtakmeuhvin ka hrilh a che u, Pa hnênah eng pawh in dîl chuan, keima hmingin a pe ang che u. 24 Tûn thlengin ka hmingin eng mah in la dîl lo; dîl rawh u; tichuan, in hmu ang, in lâwm a kimna tûrin.
Khawvêl ka hneh ta
25 “Chûng thu chu a thawiin in hnênah ka sawi tawh; a hun a thleng dâwn, chumi hunah chuan in hnênah a thawiin ka sawi leh tawh lo vang a, fiah takin Pa chanchin ka hrilh zâwk ang che u. 26 Chumi niah chuan keima hmingin thil in dîl ang; ‘Pa hnênah keiin ka ngensak ang che u,’ ka ti lo a che u; 27 Pa ngeiin a hmangaih si che u a, nangnin kei mi hmangaiha, Paa chhuak ka ni tih mi rin avângin. 28 Kei Pa hnên ata lo chhuaka, khawvêla lo kal ka ni; khawvêl kalsana Pa hnêna hâwng leh tûr ka ni,” a ti a. 29 Tin, zirtîrten, “Ngai teh, tûnah zawng fiah takin thu i sawi a, a thawi rêng rêngin i sawi tâk loh hi. 30 Nangin engkim i hria a, tu ma zawh che i ngai lo tih tûnah kan hre ta; hemi avâng hian Pathian hnên ata lo chhuak i ni tih kan awih e,” a ti a. 31 Tin, Isuan a chhâng a, an hnênah, “Tûnah chuan in awih ta maw? 32 Ngai rawh u, a hun a thleng dâwn, a ni, a thleng tawh mêk, chumi hunah chuan mahni in ṭheuhvah in darh vek ang a, keimah chauhvin mi thlahthlam ang; nimahsela, Pa ka hnênah a awm avângin mahni chauhvin ka awm si lo. 33 Hêng thu hi in hnênah ka sawi tawh hi, keimahah hian in thlamuanna tûrin. Khawvêlah hian hrehawmin in awm ṭhîn; nimahsela, thlamuang takin awm rawh u, keiin khawvêl ka ngam ta,” a ti a.
Puithiam Lal ṭawngtaina
1 Chûng thu chu Isuan a sawi a; tin, vanvadâkin, “Ka Pa, a hun a thleng ta; i Fapa chawimawi rawh, Fapain a chawimawi nân che; 2 khatia mi zawng zawng chunga thuneia i siam khân, a hnêna i pêk apiangte chu chatuana nunna a pêk theih nân. 3 Hei hi chatuana nunna a ni, nang Pathian tak chauh leh i tirh Isua Krista hriat hi. 4 Nangin thil tih tûr mi pêk kha ka ti zo va, khawvêlah ka chawimawi tawh a che. 5 Aw ka Pa, khawvêl awm hmaa i hnêna mawina ka neih khân, tûnah nangma hnên ngeiah mi chawimawi rawh. 6 “Nangin khawvêl zînga chhuak mite kei mi pêk hnênah khân i hming ka tilang ta; anni chu i ta an nih kha, nangin anni chu kei mi pe a ni; anni chuan i thu an zâwm ta a. 7 Nangin thil kei mi pêk apiang, i hnên aṭanga chhuak a ni tih tûnah an hre ta. 8 Nangin thu mi pêkte kha an hnênah ka pe tawh si a; chûng chu an vawng a, i hnên aṭanga chhuak ka ni tih dik takin an hre ta a, nangin mi tîr tih pawh an awih ta. 9 “An tân ka ngensak hi; khawvêl tâna ngensak ka ni lo, nangin mi pêkteho tân zâwk a ni; i ta an ni si a. 10 Thil zawng zawng ka ta apiang i ta a ni e, i ta chu ka ta a ni e; anmahni avângin chawimawiin ka awm ṭhîn. 11 Tin, kei zawng khawvêlah ka awm tawh lo vang, hêngho erawh hi chu khawvêlah an awm ang, kei i hnênah ka lo haw dâwn ta. Ka Pa thianghlim, nangin kei mi pêkteho hi i hmingin hum rawh, pumkhat an nih theih nân, keimahni ang bawk hian. 12 “An hnêna ka awm chhûng khân nangin kei mi pêkteho hi i hmingin ka hum ṭhîn; anni chu ka vêng a, an zîngah pakhat mah an boral lo, boral fapa lo kha chu; Lehkha Thu kha a lo thlenna tûrin. 13 Nimahsela, tûnah i hnênah ka lo haw dâwn ta; khawvêlah hêng thu hi ka sawi a ni, ka lâwm anmahnia an neih kimna tûrin. 14 I thu an hnênah ka pe ta e; tin, khawvêlin anni chu an hua a, khawvêla mi an nih loh avângin, kei khawvêla mi ka ni lo ang bawk hian. 15 “Nangin anni chu khawvêl ata i lâk chhuah tûra ngên ka ni lo va, mi sual lakah chuan i hum tûr ka ti zâwk a ni. 16 Anni chu khawvêla mi an ni lo, kei khawvêla mi ka ni lo ang bawk hian. 17 Anni chu thutakin tithianghlim rawh, i thu chu thutak a ni. 18 Nangin khawvêla kei mi tîr ang khân, kei pawhin anni chu khawvêlah ka tirh hi. 19 Anmahni avângin ka intithianghlim a ni, anni pawh thutaka an thianghlimna tûrin. 20 “Hênghote tân chauh hian ngensak ka ni lo, an thu avânga kei mi la ring tûrte tân pawh ngensak ka ni bawk e; 21 an zaa pumkhat an nihna tûrin; ka Pa, nang keimaha i awm leh, kei nangmaha ka awm ang bawk hian, anni pawh keimahnia an awmna tûrin; nangin kei mi tîr tih khawvêlin an awih theihna tûrin. 22 Tin, nangin ropuina mi pêk kha keiin anmahni ka pe ta; anni chu pumkhat an nihna tûrin, keini pumkhat kan ni ang bawk hian; 23 kei anmahniah, nang keimahah, anni pumkhata an awma, an famkim theihna tûrin; nangin kei mi tîr tih leh, mi hmangaih angin anni hi i hmangaih tih, khawvêlin an hriat theihna tûrin. 24 Ka Pa, nangin kei mi pêkte hi ka awmnaa ka hnêna awmah ka duh; nangin mi pêk ka ropuina kha an hmuhna tûrin; leilung pian hma pawhin nangin mi hmangaih tawh si a. 25 Aw ka Pa fel tak, khawvêl zawngin an hre lo chia, kei erawh chuan ka hriat che kha; hêngho pawh hian nangin kei mi tîr tih an hriat kha. 26 Tin, an hnênah i hming ka hriattîr a, ka hriattîr leh fo vang; nangin kei mi hmangaihna kha anmahniah a awma, kei pawh anmahniah ka awm theihna tûrin,” a ti a.
Isua an man
1 Isuan chûng thu chu a sawi zawhin a zirtîrte nên an chhuak a, Kidron luikawr an kân a; chutah chuan huan a awm a, chumiah chuan an lût a, amah leh a zirtîrte nên. 2 Tin, a mantîrtu Juda pawh chuan chumi hmun chu a hria; Isua chu a zirtîrte hnênah chutah chuan a lêng fo si a. 3 Chutichuan, Juda chuan sipai pâwl nên, puithiam lalte leh Pharisaite hnêna awm tiang kengtute nên a hruai a, khâwnvârte, meichherte, hriamte kengin chutah chuan an lo kal a. 4 Isuan a chunga thil thleng tûr zawng zawng chu a hre reng a, a va chhuak a, an hnênah, “Tu nge in zawn?” a ti a. 5 Anni chuan a hnênah, “Nazareth Isua,” an ti a, an chhâng a. Isuan an hnênah, “Keimah hi ka ni,” a ti a. Tin, a mantîrtu Juda pawh chu an zîngah a ding a. 6 Tin, “Keimah hi ka ni,” a tih veleh an hnungtawlh a, leiah an tlu hlawm a. 7 Tin, ani chuan an hnênah, “Tu nge in zawn?” a ti a, a zâwt leh a. Tin, anni chuan, “Nazareth Isua,” an ti a. 8 Tin, Isuan, “Keimah hi ka ni tih ka hrilh che u alâwm; nangnin kei mi zawng in nih chuan hêngho hi thlah ṭha rawh u,” a ti a, a chhâng a. 9 (A thusawi, “Nangin kei mi pêkteho pakhat mah ka hloh ral lo,” a tih kha a thlen nân.) 10 Tin, Simon Peteran khandaih a vawng a, a phawi a, puithiam lalber bawih a sât a, a beng ding lam a sah thlâksak a. (Bawih hming chu Malka a ni a.) 11 Nimahsela, Isuan Petera hnênah, “Khandaih kha a paiah khung rawh; Pain no mi pêk hi ka in lo vang em ni?” a ti a.
Ana hmaah Isua an hruai
12 Chutichuan, sipai pâwl nên, an hotu lalber nên, Juda-te tiang kengtute nên chuan Isua an man a, an phuar a, 13 Ana hnênah an hruai hmasa a, Kaiapha puzawn a nih avângin. Kaiapha chu, chumi kum chuan puithiam lalber a ni a. 14 Kaiapha chu, “Mi zawng zawng aia mi pakhat thih a ṭha,” tia Juda-te rawtpuitu kha a ni.
Peteran Isua a phat
15 Tin, Simon Petera chuan Isua a zui a, zirtîr dang pakhat nên. Chu zirtîr chu puithiam lalber hmêlhriat a ni a, puithiam lalber in hual chhûng kawtlaiah Isua hnênah a lût ve a; 16 nimahsela, Petera chu pâwnah kawngkhâr bulah a ding reng a. Chutichuan, zirtîr dang, puithiam lalber hmêlhriata chu a va chhuak a, kawngkhâr vêngtu chu a bia a, Petera chu a hruai lût a. 17 Tin, kawngkhâr vêngtu nula chuan Petera hnênah, “Nang pawh he mi zirtîrte zînga tel ve i ni em?” a ti a. Ani chuan, “Ka ni lo,” a ti a. 18 Tin, bawihte leh tiang kengtute chu chutah chuan an ding hlawm a, a vawh avângin meihawlin mei an chhêm a, a lum an ai a; Petera pawh an hnênah a tel a, ding chungin mei lum a ai ve a.
Puithiam lalberin Isua a chhâl
19 Tin, puithiam lalber chuan Isua chu a zirtîrte chanchin leh a thu zirtîr a zâwt a. 20 Isuan a chhâng a, a hnênah, “Khawvêl hnênah vântlâng hriatin thu ka sawi ṭhin kha; inkhâwmna in leh Pathian biak in, Juda zawng zawng awm khâwmnaahte chuan ka zirtîr fo ṭhin kha, a rûkin eng mah ka sawi lo. 21 Engati nge kei mi zawh? An hnêna ka thusawizia chu ka thu hretute zâwt rawh; ngai rawh, chûng chuan ka thusawi chu an hria alâwm,” a ti a. 22 Chu chu a sawi veleh a kianga ding tiang kengtu pakhatin Isua chu a bêng a, “Puithiam lalber heti hian i chhâng maw?” a ti a. 23 Isuan a hnênah, “Thu sual sawi ka nih chuan ka sualna mi hriattîr rawh; nimahsela, thu ṭha ka sawi pawhin engah nge mi ben?” a ti a, a chhâng a. 24 Tin, Ana chuan phuar chungin puithiam lalber Kaiapha hnênah a tîr a.
Peteran Isua a phat leh
25 Tin, Simon Petera chuan dingin mei lum a ai a. Tin, “Nang pawh a zirtîr zînga tel ve i ni em?” an ti a. Ani chuan, “Ka ni lo,” tiin a pha a. 26 Tin, puithiam lalber bawih pakhat, Petera beng sah thlâka laichîn chuan, “A hnênah huanah khân ka hmu lo che em ni?” a ti a. 27 Tichuan, Petera chu a pha leh a; tin, âr a khuang ta nghâl a.
Pilata hmaah Isua a ding
28 Tin, Isua chu Kaiapha in aṭang chuan lal inah an hruai leh a; zîng a ni a; tin, anni zawng lal inah an lût lo, an luh zawngin an bawlhhlawh ang a, kalhlên kût chaw an ei thei lo vang. 29 Tin, Pilata chu an hnênah a va chhuak a, an hnênah, “He mi chungah hian thupawi eng nge in neih?” a ti a. 30 Anni chuan a hnênah, “He mi hi mi sual ni suh sela i hnênah kan rawn hruai lo vang,” an ti a, an chhâng a. 31 Tin, Pilata chuan an hnênah, “Nangnin hruai ulangin, in dân angin a thu rêl rawh u,” a ti a. Juda-te chuan a hnênah, “Keini thuin mi tu mah tihhlum dân a awm lo,” an ti a. 32 (A thih tûr thu Isuan a sawi anga a thlen nân.) 33 Chutichuan, Pilata chu a inah a lût leh a, Isua a ko va, a hnênah, “Juda-te Lal i ni em?” a ti a. 34 Isuan, “Hei hi nangma rilru puak chhuaka i sawi nge, mi dangin an hrilh che, ka chungchâng thu hi?” a ti a, a chhâng a. 35 Pilatan, “Kei Juda ka ni em ni? Nangma chite leh puithiam lalten ka hnênah an rawn hruai che a nih hi; thil eng nge i tih?” a ti a, a chhâng a. 36 Isuan, “Ka ram chu he khawvêla mi hi a ni lo; ka ram chu he khawvêla mi hi ni sela, ka ṭhuihruaiten an bei ang, Juda-te hnêna pêka ka awm loh nân; nimahsela, ka ram zawng heta mi hi a ni lo,” a ti a, a chhâng a. 37 Tin, Pilatan a hnênah, “Chu! Lal i ni elo?” a ti a. Isuan, “Ni e, lal ka ni asin. Thutak hriattîr hi ka pian chhan leh khawvêla ka rawn kal chhan a ni. Tu pawh thutaka mi apiangin ka thu an pawm ṭhîn,” a ti a. 38 Pilatan a hnênah, “Thutak eng nge ni?” a ti a.
Isua tihhlum tûra rêl a ni
Tin, chu thu chu a sawi zawh veleh Juda-te hnênah a va chhuak leh a, an hnênah, “Eng mah a sualna ka hmu lo. 39 Nimahsela, kalhlên kûtah mi pakhat ka chhuahsakna tûr che u dân in nei; chutichuan, Juda-te Lal hi chhuahsak che u ila in duh em?” a ti a. 40 Tin, anni chu an au leh a, “He mi hi chu ni suh se, Barabba kha ni zâwk rawh se,” an ti a. Barabba chu suam hmang a ni.
1 Tin, chutih lai chuan Pilatan Isua chu a hruai a, a vua a. 2 Tin, sipaite chuan hlînglukhum an phiar a, an khumtîr a, puansenduk an sintîr bawk a; 3 tin, a kiangah an lo kal a, “Chibai! Juda-te Lal!” an ti a, an bêng a. 4 Tin, Pilata chu a chhuak leh a, an hnênah, “En teh u, eng mah a sualna ka hmu lo tih in hriat nân, in hnênah ka rawn hruai chhuah hi,” a ti a. 5 Tin, Isua chu hlînglukhum khum leh puansenduk sin chungin a lo chhuak a. Tin, Pilatan an hnênah, “En teh u, mihringa hi!” a ti a. 6 Tin, puithiam lalte leh tiang kengtute chuan amah an hmuh veleh an au va, “Krawsah khêng bet rawh, krawsah khêng bet rawh,” an ti a. Pilatan an hnênah, “Nangnin kalpui ula, krawsah khêng bet rawh u; kei zawngin eng mah a sualna ka hmu si lo,” a ti a. 7 Juda-te chuan a hnênah, “Kan dân kawng khat a awm, chumi dân ang zêlin Pathian Fapaa a insiam avângin a thi tûr a ni,” an ti a, an chhâng a. 8 Tin, Pilatan chu thu chu a hriatin a hlau lehzual a; 9 a inah a lût leh a, Isua hnênah, “Khawi lama mi nge i nih?” a ti a. Nimahsela, Isuan a chhâng lo. 10 Tin, Pilatan a hnênah, “Nangin kei mi be lo vei maw? Thlah thei che ka ni, krawsa khêng bet thei che ka ni tih i hre lo vem ni?” a ti a. 11 Isuan, “Chung lam aṭanga pêk i nih loh chuan, ka chungah hian tih theih rêng rêng i nei lo vang; chuvângin, i hnêna mi petu khân sual a phur zual a ni,” a ti a. 12 Chumi achin chu Pilatan thlah a tum a; nimahsela, Juda-te chu an au va, “He mi hi i thlah chuan Kaisara ṭhian i ni lo vang; tu pawh lala insiam apiang Kaisara do an ni,” an ti a. 13 Tin, Pilatan chûng thu chu a hriat veleh Isua chu a hruai chhuak a, a hming Lungrem - Hebrai ṭawng erawh chuan Gabbatha an ti, chumi hmunah chuan rorêlna ṭhutphahah a ṭhu a. 14 (Tin, chumi ni chu kalhlên kût Inrinni a ni a, tûkṭhuan ei hun lai a ni.) Tin, ani chuan Juda-te hnênah, “En teh u, in Lal hi!” a ti a. 15 Tin, anni chu an au va, “Tiboral rawh, tiboral rawh, krawsah khêng bet rawh,” an ti a. Pilatan an hnênah, “In Lal hi krawsah ka khêng bet ang maw?” a ti a. Puithiam lalte chuan, “Kaisara lo chu lal dang kan nei lo,” an ti a, an chhâng a. 16 Chutichuan, Pilata chuan krawsa khen beh tûrin amah chu an hnênah a pe ta a.
Isua krawsa khen beh
Chutichuan, Isua chu an hruai ta a. 17 Tin, ani chuan mahni tâna kraws puin, “Luruh hmun,” an tih, Hebrai ṭawnga Golgotha an tih chu, chumi hmun thleng chuan a va chhuak a; 18 chutah chuan krawsah an khêng bet a, mi dang pahnih nên, a sîr tuakah pakhat ve vein, a laiah Isua. 19 Tin, Pilatan lehkha a ziak a, kraws lêr lamah a bel a. “Nazareth Isua - Juda-te Lal” tiin ziak a ni. 20 Tin, chu lehkha chu Juda-te a ṭhen tam takin an chhiar a; Isua krawsa an khen behna hmun chu khawpui kiang a ni a; Hebrai ṭawng te, Rom ṭawng te, Grik ṭawng tein ziak a ni si a. 21 Chutichuan, Juda-te puithiam lalte chuan Pilata hnênah, “ ‘Juda-te Lal’ tiin ziak suh; ‘Juda-te Lal ka ni a ti,’ tiin ziak zâwk rawh,” an ti a. 22 Pilatan, “Ka ziak kha ka ziak zo tawh,” a ti a, a chhâng a. 23 Tin, sipaiten Isua chu krawsa an khen beh zawh chuan a silhfênte an la a, phel liah an siam a, sipaiten phel khatin an chang ṭheuh va; a kawr an la bawk a. Kawr chu ṭhui loh kawr a ni a, a nghâwng ata a pumin tah vek a ni; 24 chuvângin, anni chuan, “I pawt thlêr suh ang u, tu ta ber tûr nge ṭhum i vâwr zâwk ang u,” an ti a. (Pathian Lehkha Thu, “Ka silhfênte an insem a, Ka kawr atân ṭhum an vâwr a,” tih a thlenna tûrin.) Chûng thil chu sipaiten an ti a. 25 Tin, Isua kraws kiangah a nu leh a nu laizâwn, Mari, Klopa nupui leh Mari Magdalini an ding a. 26 Tin, Isuan a nu leh a zirtîr a hmangaih kha a kianga ding a hmu a, a nu hnênah, “Hmeichhia, en teh, i fapa kha!” a ti a. 27 Tin, zirtîr hnênah chuan, “En teh, i nu kha!” a ti a. Tin, chuta chin chu, chu zirtîr chuan ama inah ani chu a hruai ta a.
Isua a thi
28 Chumi hnuah chuan Isuan thil engkim tûnah a kim tawh tih a hria a, Pathian Lehkha Thu kha a thlen nân, “Ka tui a hâl e,” a ti a. 29 Chutah chuan bêl pakhat uain thûra khat an hûng a; chutichuan, sponj pakhat chu uain thûra chiah khatin, husop tiangah an târ a, a hmuiah an han thlen a. 30 Tin, Isuan uain thûr chu a lo in zawh chuan, “A kin ta,” a ti a. Tin, a lu a kûn a, a thlarau a thlah ta a.
Isua nâka chhun
31 Tin, Inrinni a nih avângin ruangte chu Chawlhnia krawsa a awm reng loh nân, (chu Chawlhni chu ni ropui a ni si a) Juda-ten Pilata hnênah an kete tihtliaha an ruang kalpuiah an ngên a. 32 Tin, sipaite chu an lo kal a, a hnêna krawsa an khen beh mi tawn tirh leh mi pakhat chu an kete an titliak a; 33 nimahsela, Isua kiangah an lo kal a, a thi tawh reng tih an hria a, a kete an titliak ve lo va. 34 Nimahsela sipaite zînga mi pakhatin a nâkah feiin a chhun a; tichuan, thisen leh tui a lo chhuak ta nghâl a. 35 A hmutu chuan a hriattîr tawh, (a thu hriattîr a dik a ni; a sawi dik tih a inhria) nangni pawhin in rinna tûrin. 36 Pathian Lehkha Thu, “A ruh pakhat mah tihtliah a ni lo vang,” tih thlenna tûrin chûng thil chu a lo awm ta. 37 Tin, Pathian Lehkha Thu dangin, “An chhuna chu an la en ang,” a ti bawk a.
Isua phûm
38 Tin, chumi hnuah chuan Josefa, Arimathai khuaa mi, Isua zirtîr, nimahsela, Juda-te a hlauh avânga a rûka awm chuan Isua ruang chu kalpui atân Pilata hnênah a dîl a; tin, Pilatan a phal a. Chutichuan, a lo kal a, a ruang chu a kalpui ta a. 39 Tin, Nikodema, a tîra zâna a hnêna lo kal kha, murra leh aloe inpawlh sa bûk sawmnga lai sinin a lo kal ve a. 40 Tin, Isua ruang chu an la a, Juda-te inphûm dân angin englo rimtuite nên chuan puan zai sînin an tuam a. 41 Tin, krawsa an khen behna hmunah chuan huan pakhat a awm a; huanah chuan tu mah la zalh ngai lohna thlân thar pakhat a awm. 42 Tin, Juda-te Inrinni a nih avângin, thlân chu an kiang lawk a ni si a, chutah chuan Isua chu an zalh ta a.
Thlân ruak
1 Tin, ni sarih ni hmasa berah, zîngah, khua a la thim laiin, Mari Magdalini chu thlânah chuan a va kal a, lung chu thlân ata lâk sawnin a hmu a. 2 Chutichuan, a tlân a, Simon Petera leh zirtîr dang, Isuan a hmangaiha hnênah chuan a lo kal a, an hnênah, “Thlân ata kha Lalpa chu an kal bopui ta, an dahna chin ka hre si lo,” a ti a. 3 Chutichuan, Petera chu a chhuak a, zirtîr dang nên chuan; tin, thlân lam an pan a. 4 Tin, an tlân dûn a; zirtîr dang chuan Petera chu a tlân khalh a, thlân chu a thleng hmasa a. 5 Tin, a kûn a, a bih a, puan zai sînte chu awm rengin a hmu a; nimahsela, a chhûngah a lût lo. 6 Tin, Simon Petera pawhin a hnungah a rawn ûm thleng a, thlân chhûngah a lût a; puan zai sînte chu awm reng leh, 7 a lua inhrûkna puan awm chu, puan zai sinte zînga awm lovin, zial sain hmun hranga awm a hmu a. 8 Chutichuan, zirtîr dang, thlân thleng hmasaa pawh chu a lût ve a, a hmu a, a awih a. 9 Mitthi zîng ata a tholeh tûr a ni tih Pathian Lehkha Thu kha an la hre si lo. 10 Chutichuan, zirtîrte chu anmahni inah an haw leh ta a.
Mari Magdalini hnênah Isua a inlâr
11 Nimahsela, Mari chu pâwnah thlân kiangah ṭap chungin a ding a; tichuan, ṭap chungin a kûn a, thlân chhûng chu a bih a; 12 tin, vântirhkoh pahnih puan vâr sinin, Isua ruang zalhna hmunah chuan, pakhat a lu lamah, pakhat a ke lamah ṭhu a hmu a. 13 Tin, anni chuan a hnênah, “Hmeichhia, engati nge i ṭah?” an ti a. Ani chuan an hnênah, “Ka Lalpa an kal bopui a, an dahna chin ka hriat loh avângin,” a ti a. 14 Tin, chutia a sawi veleh a hnung lam a hawi a, Isua ding a hmu a, Isua a ni tih a hre si lo va. 15 Isuan a hnênah, “Hmeichhia, engati nge i ṭah? Tu nge i zawn?” a ti a. Ani chuan huan enkawltu emaw a ti a, a hnênah, “Ka pu, amah heta ta i kalpui a nih chuan i dahna chin mi hrilh ang che; chutichuan, ka la ang,” a ti a. 16 Isuan a hnênah, “Mari,” a ti a. Ani chu a hawi a, a hnênah Hebrai ṭawngin, “Rabboni,” a ti a (chu chu Zirtîrtu tihna a ni a). 17 Tin, Isuan a hnênah, “Mi vuan suh; tûn thleng pawhin Pa hnênah ka la lâwn chho lo a ni; amaherawhchu, ka unaute hnênah va kal la, an hnênah, ‘Ka Pa, in Pa, ka Pathian, in Pathian hnênah ka lâwn chho dâwn, a ti e,’ ti rawh,” a ti a. 18 Mari Magdalini chu a va kal a, zirtîrte hnênah, “Lalpa chu ka hmu ta,” a ti a, a hnêna thu a sawiziate pawh chu a hrilh a.
A zirtîrte hnênah Isua a inlâr
19 Tin, chumi ni, ni sarih ni hmasa berah, khua a lo tlai lamin, Juda-te hlauh avânga zirtîrte awmna kawngkhârte chu an khâr hnu chuan, an zîngah Isua a lo ding a, an hnênah, “In chungah thlamuanna awm rawh se,” a ti a. 20 Tin, chu chu a sawi zawh chuan a kut leh a nâk an hnênah a entîr a. Tin, Lalpa chu an hmuh chuan zirtîrte chu an lâwm ta a. 21 Tin, Isuan an hnênah, “In chungah thlamuanna awm rawh se; Pain kei mi tîr ang bawkin ka tirh che u hi,” a ti leh a. 22 Tin, chûng thu chu a sawi zawhin an chungah a thaw a, an hnênah “Thlarau Thianghlim nei rawh u; tu sual pawl in ngaihdam apiang ngaihdam a ni ang; 23 tu sual pawh in ngaihdam loh apiang ngaihdam loh a ni ang,” a ti a.
Isua leh Thoma
24 Tin, Isua a lo kal lai khân sâwm leh pahnihte zînga tel ve Thoma, Phîra an tih chu, an hnênah a awm ve lo va. 25 Chutichuan, zirtîr dangte chuan a hnênah, “Lalpa chu kan hmu ta,” an ti a. Nimahsela, ani chuan an hnênah, “A kuta thîr khenna serte kha ka hmuha, thîr khenna serahte chuan ka kutzung ka khawih luha, a nâka ka zen meuh loh chuan ka ring lo vang,” a ti a. 26 Tin, ni riat hnuah a zirtîrte chu in chhûngah an awm leh a, Thoma pawh an hnênah a awm ve a. Tin, Isua a lo kal a, kawngte chu khâr a ni si a, an zîngah a lo ding ta a, an hnênah, “In chungah thlamuanna awm rawh se,” a ti a. 27 Tin, Thoma hnênah chuan, “I kutzungin han khawih la, ka kutte en rawh; i kut han ban la, ka nâkah zen rawh; ring lovin awm suh la, ring rawh,” a ti a. 28 Thoman a hnênah, “Ka Lalpa leh ka Pathian i ni,” a ti a, a chhâng a. 29 Isuan a hnênah, “Nang chuan mi hmuh avângin i ring a ni; hmu lova ring apiangte chu an eng a thâwl e,” a ti a.
He lehkhabu ziak chhan
30 Tin, Isuan zirtîrte hmaah chuan chhinchhiahna dang tam tak a ti ṭeuh va, chûng chu he lehkhabuah hian ziak a ni lo; 31 nimahsela, hêng hi Isua chu Krista, Pathian Fapa a ni tih in rinna tûr leh, in rina, a hminga nun in neihna tûrin ziak a ni.
Zirtîr pasarih hnênah Isua a inlâr
1 Chumi hnuah chuan Tiberia dîlah Isua chu a zirtîrte hnênah a inlâr leh a; heti hian a inlâr: 2 Simon Petera te, Thoma (Phîra an tih) te, Galili rama Kana khuaa mi Nathanaela te, Zebedaia fapa pahnihte leh a zirtîr dang pahnihte an awm khâwm a. 3 Simon Petera chuan an hnênah, “Sangha manin ka kal dâwn e,” a ti a. Anni chuan a hnênah, “Keini pawh i hnênah kan kal ve ang,” an ti a. Tin, an kal chhuak a, lawngah an chuang a; chumi zân chuan eng mah an man lo. 4 Tin, khawfîngchahin Isua chu ṭiauphovah a lo ding a; nimahsela, zirtîrte chuan Isua a ni tih an hre si lo. 5 Tin, Isuan an hnênah, “Naute u, ei tûr engilo in nei em?” a ti a. Anni chuan a hnênah, “Nei lo,” an ti a, an chhâng a. 6 Tin, ani chuan an hnênah, “Lawng sîr ding lamah khân lên dêng ulang, in hmu ang,” a ti a. Tin, an dêng a, sangha tam avângin an hnûk chhuak zo ta lo va. 7 Chutichuan, zirtîr Isuan a hmangaiha khân, Petera hnênah, “Lalpa a nih saw,” a ti a. Chutichuan, Lalpa a ni tih Simon Peteran a hriat veleh a kawr a veng a (saruaka awm a ni si a), dîlah a zuang thla ta a. 8 Nimahsela, zirtîr dangte chuan lawng tê tak tê chuan lên, sangha chawpa hnûk chungin an rawn pan a (khawmual aṭangin an hla si lo va, tawng zahnih emaw lek a ni a). 9 Tin, khawmuala an chhuah veleh, chutah chuan meihawla mei chhêm an hmu a, a chunga sangha leh chhangpêr rawh nên. 10 Tin, Isuan an hnênah, “Tûnah in sangha man kha a ṭhen han la rawh u,” a ti a. 11 Chutichuan, Simon Petera chu a va chuang a, lên chu sangha lian pui puia khatin khawmualah a hnûk chhuak a, za leh sawmnga leh pathum a ni; chuti zozai chu awm mah sela, lên chu a ṭet si lo. 12 Tin, Isuan an hnênah, “Tûkṭhuan lo ei rawh u,” a ti a. Tin, zirtîrte zînga tu mahin a hnênah, “Tu nge i nih?” tiin an zâwt ngam lo, Lalpa a ni tih an hre reng a. 13 Tin, Isua a lo kal a, chhangpêr chu a la a, an hnênah a pe a, sanghate pawh chu chutiangin a pe bawk a. 14 Chu chu Isua mitthi zîng ata a thawhleh hnua a zirtîrte hnêna a inlâr vawi thumna a ni.
Isua leh Petera
15 Tin, tûkṭhuan an ei zawhin, Isuan Simon Petera hnênah chuan, “Simon, Johana fapa, hêngte ai hian nangin kei mi hmangaih zâwk em?” a ti a. Ani chuan a hnênah, “Aw, Lalpa; ka ngaina che tih i hria e,” a ti a. Ani chuan a hnênah, “Ka berâmnote châwm rawh,” a ti a. 16 Tin, a vawi hnihnaah a hnênah, “Simon, Johana fapa, nangin kei mi hmangaih em?” a ti leh a. Ani chuan a hnênah, “Aw, Lalpa; ka ngaina che tih i hria e,” a ti leh a. Ani chuan a hnênah, “Ka berâmte enkawl rawh,” a ti a. 17 Tin, a vawi thumnaah chuan a hnênah, “Simon, Johana fapa, nangin kei mi ngaina em?” a ti a. Tin, a vawi thumnaah, “Nangin mi ngaina em?” a hnêna a tih avâng chuan Petera chu a lungngai a, a hnênah, “Lalpa, engkim i hria a, ka ngaina che tih i hria e,” a ti a. Isuan a hnênah, “Ka berâmte châwm rawh. 18 Tihtakmeuhvin, tihtakmeuhvin ka hrilh a che, i naupan lai khân i taiah i inhrêng a, i duhna apiangah i kal ṭhîn a; nimahsela, i upat hunah chuan i kutte i phar ang a, mi dangin an hrênsak ang chia, i duh lohna lamah an kai ang che,” a ti a. 19 (Chûng thu chu engtianga thiin nge Pathian a la chawimawi ang tih hriattîr nân a sawi a ni.) Tin, chu chu a sawi zawhin a hnênah, “Mi zui rawh,” a ti a.
Isua leh zirtîr dang
20 Tin, Petera chu a hawi a, Isuan zirtîr a hmangaih, zanriah ei laia a âwm nghênga lo thle pheia, “A mantîrtu tûr che chu tu ber nge ni?” titua khân a rawn zui a hmu a. 21 Tin, Peteran ani chu a hmu a, Isua hnênah, “Lalpa, he mi hian eng nge a tih ang?” a ti a. 22 Isuan a hnênah, “Ka lo kal leh thlenga awm rengah phei duh ila, chu chu enga i hman tûr nge ni? Nangin mi zui mai rawh,” a ti a. 23 Chutichuan, chu zirtîr chu thi lo tûrin a thu chu unaute zîngah chuan a thang ta a; nimahsela, Isuan a thi lo vang tih a hnênah a sawi si lo, “Ka lo kal leh thlenga awm rengah phei duh ila, chu chu enga i hman tûr nge ni?” a ti mai a ni si a. 24 Chu zirtîr chu hêng thu hriattîrtu leh ziaktu hi a ni; a thu hriattîr hi dik tak a ni tih kan hria e.
Tlipna
25 Tin, hêng lo hi Isua thiltih a dang tam tak a la awm, chûng chu ziak fai vek ni dâwn sela, lehkhabu ziak tûr zawng zawng chu khawvêlah pawh hian lengin ka ring lo.
1 Theophil, hmâna lehkhaah khân, Isua thiltih leh a zirtîr ṭan tirh zawng zawng thu kha ka ziak a ni; 2 Thlarau Thianghlim ṭanpuia a tirhkoh thlante hnêna thu a tiam zawha vâna hruai chhohva a awm tâk ni thlenga thu kha. 3 Chu tirhkohte hnênah chuan hrehawm chu a tuar hnuin hriatna tam takin nungin a inentîr a, ni sawmli zet an hnênah a inlâr a, Pathian ram thu a sawi ṭhîn. 4 Tin, an awm khâwm a pâwl ve a, “Jerusalem khua kalsan suh u, Pa thil tiam ka sawi in hriat kha lo nghâk rawh u,” a ti tlat a. 5 “Johana khân tuiin a baptis ṭhîn a; nimahsela, ni rei lo têan Thlarau Thianghlimin baptisma in chang ang,” a ti a.
Isua vânah hruai chhoh a ni
6 Tin, anni chuan an rawn inkhâwmin a hnênah, “Lalpa, tûnah em ni Israel-te hnênah ram i pêk leh dâwn?” an ti a, an zâwt a. 7 Tin, ani chuan an hnênah, “Pain a hun leh a ni, ama thu thua awma a ruat chu, nangni lo hriat tûr a ni lo ve. 8 Nimahsela, Thlarau Thianghlim chu in chunga a lo thlen hunah thiltihtheihna in la nei ang; tichuan, Jerusalem khuaah te, Judai leh Samari ram khaw tinah te, kâwlkil thleng pawhin ka thuhretute in ni ang,” a ti a. 9 Tin, chûng thu chu a sawi zawhin an hmuh reng chungin vâna hruai chhohvin a awm a; tin, chhûmin an hmuh phâk lohvah a hruai bo ta a. 10 Tin, a chhoh laia vân lam an en reng laiin mi pahnih, puan vâr sinin an kiangah an lo ding a; 11 chu mite chuan, “Galili rama mite u, engati nge vân lam ena in din reng? He Isua, in hnên ata vâna hruai chhohva a awm hi, vâna a chho in hmu ang bawk hian amah ngei hi a lo kal leh ang,” an ti a.
Juda aiawhtu tûr thlan
12 Tin, Olivet tlâng an tih ata chu Jerusalem khuaah an kîr leh ta a; chumi tlâng chu Jerusalem khaw kiang a ni a, Chawlhnia kalna tâwk chauh a ni. 13 Tin, an luhin, an awmna pindan chungnungah chuan an chho va, Petera leh Johana nên, Jakoba leh Andria nên, Philipa leh Thoma nên, Bartholomaia leh Matthaia nên, Alphaia fapa Jakoba leh Simona, Zelot pâwla mi leh Jakoba fa Juda nên an ni. 14 Chûngho zawng zawng chu hmeichhia tute emaw leh Isua nu Mari nên, Isua unaute nên, rilru hmun khata ṭhahnemngai taka ṭawngṭaiin an awm reng a. 15 Tin, chûng ni chuan unaute zîngah Petera a ding a, an za chuan za leh sawmhnih lai an ni a, 16 “Unaute u, Thlarau Thianghlimin Davida kaa, Isua mantute hruaitu Juda thu a sawi lâwk kha, kha Pathian Lehkha Thu kha lo thleng rêng tûr a ni. 17 Ani chu kan zînga chhiar tel a ni a, hêng rawngbâwlnaah hian chan pawh a nei ve si a. 18 (Tin, chu mi chuan a sual manin hmun pakhat a lei a, bawkkhupin a tla a, a laiah a puak keh a, a rîl zawng zawng a chhuak vek a. 19 Tin, chûng thu chu Jerusalem khuaa awmte zawng zawngin an lo hria a; chutichuan, chu hmun chu anmahni ṭawngin ‘Akeldama’ an ti a, chu chu ‘Thisen Hmun’ tihna a ni.) 20 “Fakna Hla Buah hêng thu hi ziak a ni: ‘A awmna tihramin awm rawh se, A chhûngah tu mah awm suh se,’ tih leh, ‘A hotu nihna chu mi dangin chang rawh se,’ tih hi. 21,22 “Chutichuan, Lal Isua, kan zînga lût ṭhîn, chhuak ṭhîna a awm chhûng zawnga, Johana baptisma achin, kan hnên ata vâna hruai chhohva a awm ni thleng khân, hêng min pâwl ṭhînte zîngah hian mi pakhat, a thawhlehna min hriatpuitu atân a awm tûr a ni,” a ti a. 23 Tin, mi pahnih an ruat a, pakhat chu Josefa, Barsaba an tiha chu (a hming dang Justa an ti bawk a); tin, pakhat chu Matthia a ni a. 24,25 Tin, an ṭawngṭai a, “Nang, Lalpa, mihring zawng zawng rilru hretu, Juda chuan ama awmnaa kal tûrin hêng rawngbâwl leh tirhkoh hna a tlâwmsan hi, a ai awh tûrin he mite pahnih hi, a tu zâwk nge i thlan min hriattîr ang che,” an ti a. 26 Tin, ai an ensak a, an ai en chu Matthia chungah a lo tlu a; tichuan, ani chu tirhkoh sâwm leh pakhatte zîngah chuan chhiar tel a ni ta a.
Thlarau Thianghlim thlen thu
1 Tin, Pentikos ni a lo thlenin, an zain hmun khatah an awm khâwm vek a. 2 Tin, thâwklehkhatan vân ata ri, thlipui tleh angin a lo thleng ta phut a; tin, chu chuan an ṭhutna in chu a tikhat ta vek a. 3 Tin, leite amaha insem darhin, mei angin an hnênah a lo inlâr ta a. Tin, an chungah a chuang ṭheuh va, 4 an zain Thlarau Thianghlimin an khat ta vek a, Thlarauvin a ṭawngtîr ang zêlin ṭawng dangin an lo ṭawng ta a. 5 Tin, vân hnuaia hnam tin zîng ata Pathian ngaihsak Juda-te Jerusalem khuaah an châm a. 6 Tin, chu ri chu an hriat veleh mipui an rawn inkhâwm a, mi tinin an ṭawng chu mahni ṭawng ṭheuhva an lo hriat avângin an rilruin an lo buai a. 7 Tin, an za chuan an mangang a, mak an ti hle a, “En teh u, hênga ṭawngte zawng zawng hi Galili rama mi an ni lo vem ni? 8 Engtin nge kan zaa kan ṭawng pianpui anga kan hriat ṭheuh? 9 ṭhenkhat Parthai hnam te, Medai hnam te, Elamitai hnam te kan ni a; ṭhenkhat Mesopotamia rama awm te, Judai rama awm te, Kappadokia rama awm te, Ponto rama awm te, Asia rama awm te, 10 Phrugia rama awm te, Pamphulia rama awm te, Aigupta rama awm te, Kurini khaw kiang vêla Libua rama awm te kan ni a; ṭhenkhat Rom khaw khual, Juda-te leh an saphunte nên kan ni a; 11 ṭhenkhat Kret thliarkâra mi leh Arab rama mi kan ni si a; nimahsela, Pathian thiltih ropuite an sawi, mahni ṭawng ṭheuhvin kan hriat si hi!” an ti a. 12 Tin, an za chuan mak an ti hle mai a, a ngaihna an hre lo va, “Hêng hi engtizia nge ni?” an ti a. 13 Ṭhenkhatin an nuihsan a. “Uain thar an rui a nih hi,” an ti a.
Petera thuhril
14 Nimahsela, Petera chu sâwm leh pakhatte nên an ding za a, ani chuan aw ring takin an hnênah a sawi a, “Nangni Judai rama mite u, nangni Jerusalem khuaa awm zawng zawngte u, hêng hi hria ula, ka thu pawh ngai rawh u. 15 Hêngho hi in rin angin an rui lo ve, fehrehsân lai chauh a nih hi. 16 Hêng hi zâwlnei Joelan a sawi kha a ni zâwk: 17 ‘Pathianin, “Ni hnuhnûngahte chuan heti hi a ni ang a, Mi zawng zawng chungah ka Thlarau ka leih ang a; Tichuan, in fapate, in fanuten ka thu an hril ang a; In tlangvâlten inlârnate an hmu ang a, In putarten mumangah an mang ang a. 18 A ni, chûng niahte chuan ka bawihpate, ka bawihnute chungah pawh, Ka Thlarau ka leih ang a, ka thu an hril ang. 19 Tin, chung lam vânah thil mak te, Hnuai lam leiah chhinchhiahna te ka hmuhtîr ang a; Thisen te, mei te, meikhu hu te nên: 20 Ni thimah a chang ang a, Thla thisenah a chang ang a, Lalpa ni ropui tak leh hmingthang tak chu A lo thlen hmain; 21 Tin, heti hi a ni ang a, Tu pawh Lalpa hming lam apiang chu an him ang,” a ti e,’ a tih kha. 22 “Nangni Israel mite u, hêng thu hi hre rawh u: Nazareth Isua, Pathianin amah hmangin in zîngah thil ropui te, thil mak tak te, chhinchhiahna te a tih khânin a hriat chiantîr che u kha; nangni ngeiin chûng chu in hre si a; 23 kha mi kha Pathian rêl tlat leh hriat lâwk angin an mantîr a, nangnin mi sualte kutin krawsah in khêng bet a, in tihlum ta a. 24 Kha mi kha Pathianin thihna phuarnate chu a phelhsak a, a kaitho ta a; amah chu thihna chelh hlen rual a nih loh avângin. 25 Tin, Davida chuan a thu a sawi a, ‘Ka hmaah kumkhuain Lalpa chu ka hmu ṭhîn a. Ka mangan loh nân ka ding lamah a awm a ni; 26 Chuvângin, ka thinlung a hlim a, Ka lei pawh a lâwm a; Chuvângin, ka tisa pawh beisei takin a awm bawk ang. 27 Ka thlarau chu mitthi khuaah i hnutchhiah lo vang a, I mi thianghlim ṭawih ral i phal hek lo vang a, 28 Nangin nunna kawngte mi hriattîr a, Nangin i hmêlin lâwmin mi tikhat ang,’ tiin. 29 “Unaute u, chi thlahtu Davida thu hi hlau lovin in hnênah ka sawi thei e; ani zawng a thi a, phûm pawh an phûm tawh alâwm, a thlân pawh tûn thlengin kan hnênah a la awm reng a. 30 Ani chu zâwlnei a ni a, Pathianin a ṭhâlbea mi, tu emaw a ṭhutphah chungah a ṭhuttîr dâwn tih chhechhamin a sawi tih a hria a; 31 tichuan, chûng chu a lo hriat lâwk reng avângin, Krista thawhleh tûr thu a sawi a ni, ‘Mitthi khuaa hnutchhiahin a awm hek lo, a ruang pawh a ṭawih hek lo,’ tiin. 32 Chu Isua chu Pathianin a kaitho leh ta rêng a ni, chu chu a hretu kan zain kan ni e. 33 Pathian kut ding lamah chawimawiin a awm a, Thlarau Thianghlim tiam chu Pa hnên ata a hmu a, in hmuh leh in hriat hi a han leih a nih hi. 34 Davida zawng vânah a lâwn chho lo a ni, amah ngeiin, ‘Jehovan ka Lalpa hnênah, “Ka ding lamah ṭhu reng rawh, 35 I hmêlmate i kephah nghahchhana Ka siam hma loh zawng,” a ti e,’ a ti zâwk a nih kha. 36 “Chutichuan, Isua in khen beha ngei kha, Pathianin Lal leh Krista ni fâwmin a siam ta tih, Israel hnam tinin hre mawlh rawh se,” a ti a. 37 Tin, chûng thu chu an hriatin an thinlunga chhun ang an lo ni ta a, Petera leh tirhkoh dangte hnênah chuan, “Unaute u, engtin nge kan tih tâk ang?” an ti a. 38 Tin, Petera chuan an hnênah, “Sim ula, in sual ngaihdam nân Isua Krista hmingin baptisma chang ṭheuh rawh u; tichuan, Thlarau Thianghlim pêk hi in hmu ang. 39 A tiam kha nangni tân pawh, in fate tân pawh, hla taka mi zawng zawng tân pawh, Lalpa kan Pathianin a hnêna a koh apiangte tân a ni e,” a ti a. 40 Tin, thu dang tam takin a hrilhfiah a; “Tûnlai ṭhangthar bengtlalote lakah hian intihim rawh u,” tiin a fuih a. 41 Tin, a thu zâwm apiangin baptisma an chang ta a; chumi niah chuan mi sângthum laia belhchhahin an awm a.
Ringtute khawsak dân
42 Tin, tirhkohte zirtîrin, inpâwlin, chhang phelin, ṭawngṭaiin ṭhahnemngai takin an awm reng a. 43 Tin, mi tinin an hlau ta a; tirhkohte chuan thil mak leh chhinchhiahna tam tak an ti a. 44 Tin, a ring apiang chuan engkim an inṭâwm hlawm a, 45 an rote, an sumte an hralh a, an châkkhai daih lek ṭheuhvin an zaa hnênah chuan an sem ṭhîn a. 46 Tin, ni tin rilru hmun khatin Pathian biak inah chuan ṭhahnemngai takin an awm ṭhîn a, an in lamahte pawh chhang an phel a, hlim tak leh lungawi takin an chaw an ei ṭhîn a. 47 Pathian an fak a, mi zawng zawng lawm zâwngin an awm ṭhîn. Tin, a chhandam mêk apiangte chu Lalpan ni tin an hnênah a teltîr zêl ṭhîn.
Kebai tihdam
1 Tin, Petera leh Johana chu behliang mun hunin, ṭawngṭai hun lai chuan, Pathian biak ina lût tûrin an chho va. 2 Tin, patling tu emaw a pian tirh ata kebai an rawn zâwn a, chu mi chu biak ina lûtte hnêna kutdawh tûrin biak in kawngkhâr, “Mawi” an tih bulah chuan ni tin an muttîr ṭhîn a ni a; 3 chu mi chuan Petera leh Johana Pathian biak ina lût tûr chu a hmu a, kut a dawh a. 4 Tin, Peteran ani chu a en reng a, Johana pawhin; tin, Peteran, “Min han en rawh,” a ti a. 5 Tin, ani chuan an lakah eng emaw hmuh a beisei a, a han en a. 6 Nimahsela, Peteran, “Tangka leh rangkachak eng mah ka nei lo; nimahsela, ka neih chhun ka pe ang che: Nazareth Isua Krista hmingin kein kal tawh rawh,” a ti a. 7 Tin, a kut ding lam a chelh a, a kai tho ta a; tin, thâwklehkhatan a kete leh a kheimit ruhte chu a lo chak ta nghâl a. 8 Tin, ani chu a zuang tho va, a ding a, kein a kal ṭan ta a. Tin, kea kal kal leh, zuang zuang leh, Pathian fak chung zêlin biak inah chuan a lût ve ta a. 9 Tin, kea a kal leh Pathian a fak chu mi zawng zawngin an hmu a; 10 biak in kawngkhâr “Mawi” bula kutdawha ṭhu ṭhîn kha a ni tih an hria a; a chunga thil thleng chu mak an ti êm êm a, an buai hle mai a.
Tempula Petera thuhril
11 Tin, ani chuan Petera leh Johana chu a chelh reng laiin, mi zawng zawngin mak an ti êm êm a, hulhliap, Solomona ta an tihah chuan an hnênah an lo tlân khâwm a. 12 Tin, Peteran chu chu a hmuhin, mite chu a bia a, “Nangni Israel mite u, hêng hi engati nge mak in tih? Keimahni thiltihtheihna leh Pathian kan ngaihsak avânga ani hi kan kaltîr ang êm chuan engati nge min en reng? 13 Abrahama te, Isaaka te, Jakoba te Pathian, min thlahtute Pathian chuan a Chhiahhlawh Isua a chawimawi ta a nih hi; ani chu in mantîr a, Pilatan chhuah a tum pawhin a hmaah in lo duh loh kha. 14 Mi Thianghlim leh Fel tak kha in duh lo va, tualthattu kha in hnêna pêk in ngên ta zâwk a. 15 Nunna Siamtu chu in that a; nimahsela, Pathianin ani chu mitthi zîng ata a kai tho leh a; chu chu a hretute kan ni e. 16 Tin, ama hming rin avângin, a hming chuan he mi in hmuh leh in hriat ṭhin hi a tichak ta a ni; a ni, amah avânga rinna lo awm hian in zaa mit hmuhah a tidam ta viah a nih hi. 17 “Nimahsela, unaute u, in hotute pawhin an ât avânga an tih ang khân, in ât avângin hêng hi in ti a ni tih ka hria e. 18 Nimahsela, Pathianin zâwlnei zawng zawng kaan, a Krista chuan hrehawm a tuar tûr thu a hriattîr lâwk kha, khati khân a thlentîr ta a ni. 19 Chuvângin, in sualte thai bo a nih theih nân sim ula, hawi kîr leh rawh u; chutichuan, Lalpa hnên ata harh hunte a lo la thleng thei ang a, 20 Krista Isua, in tâna a ruat pawh kha, a rawn tîr thei ang. 21 Amaherawhchu, engkim siam ṭhat hun a thlen hma loh zawng vânin ani chu a kawl rih tûr a ni; chu mi siam ṭhat tûr thu chu Pathianin leilung pian tirh ata a zâwlnei thianghlim awmte kain a sawi tawh kha, 22 Mosia ngeiin, ‘Lal Pathianin keimah mi siam ang hian in unaute zîngan zâwlnei pakhat a siamsak ang che u; ani chuan thu zawng zawng in hnêna a sawi apiang chu in ngaihthlâksak ang; 23 tin, mi tu pawh, chu zâwlnei thu chu ngaihthlâksak lo apiang mi zîng ata tihboral daih an ni ang,’ a tih kha. 24 A ni, Samuela awm achin zâwlnei zawng zawng, an hnunga mite nên, thu sawi apiang khân, tûnlai chanchin hi an hril lâwk bawk ṭhîn. 25 Nangni hi zâwlneite leh thuthlung fate in ni asin; Pathianin Abrahama hnênah, ‘I thlah avângin khawvêla hnam tin an thawveng ang,’ tiin, in thlahtute hnênah a tiam kha. 26 Pathianin a Chhiahhlawh chu a ruat a, in sualte hawisantîr ṭheuhvin malsâwmsak tûr che uin, nangmahni hnênah a rawn tîr hmasa ber a nih hi,” a ti a.
Sanhedrin hmaah Petera leh Johana
1 Tin, Petera leh Johanan mite hnêna thu an sawi lai chuan puithiamho te, biak in hotu te, Saddukaiho te chu an hnênah an lo thleng phut a, 2 mi an zirtîr leh Isua avânga mitthi zîng ata thawhleh thu an hrilh avângin an lungni lo êm êm a. 3 Tin, an man a, tlai lam a nih avângin a tûk thlengin tân inah an khung ta a. 4 Nimahsela, thu ngaithlahote zînga tam takin an awih a; an tam lam chu patling hlîr pawh sângnga lai an tling a. 5 Tin, a tûkah chuan an hotu te, upa te, lehkhaziaktu te, 6 Puithiam lalber Ana te, Kaiapha te, Johana te, Aleksandra te, puithiam lalber chi zawng zawngte pawh, Jerusalem khuaah an awm khâwm a. 7 Tin, Petera leh Johana chu a laiah an dintîr a, “Eng tih theihnain nge, tu hmingin nge hêng hi in tih?” an ti a, an zâwt a. 8 Tichuan, Petera chu Thlarau Thianghlimin a khat a, an hnênah, “Mi zawng zawng hotute u, upate u, 9 mi chak lo tihṭhat thu-ah, ‘He mi hi eng vângin nge a lo dam tâk?’ tiin vawiinah hian min chhuahchhalh chuan, 10 nangni zawng zawngin hre rawh u, Israel mi zawng zawng pawhin hre rawh se: Nazareth Isua Krista, krawsa in khen beh, Pathianin mitthi zîng ata a kaihthawh leh kha, ama hming ngeiin he mi hi hetah in hmaah damin a ding ta a nih hi. 11 Nangni in satute u, in lung paih, a kila lung ṭangkai ber lo ni ta kha amah hi a ni e. 12 Mi dang tu ma hnênah chhandamna a awm lo; vân hnuaia mihring sak zîngan, min chhandam tûr hming dang rêng a awm lo,” a ti a. 13 Tin, Petera leh Johana huaizia chu an hmuhin, lehkha thiam lo leh mâwl tak an ni tih an hriatin mak an ti hle a; Isua hnênah an awm tawh tih an hre ta a. 14 Tin, mi an tihdama chu an hnêna ding an hmu a, eng mah an sawisêl thei si lo. 15 Chutichuan, an rorêlna ata an kal hrantîr hnuin an inrâwn a, 16 “Hêng mite hi engtin nge kan tih ang? Thil mak thang tak an ti tih Jerusalem khuaa awm zawng zawngin fiah takin an hriat tâk hi; keini pawhin kan hnial thei si lo. 17 Nimahsela, mi hnêna a puan lehzual theih loh nân, tûn achinah tu hnênah mah he hminga thu an sawi lohna tûrin i vau ang u,” an ti a. 18 Tichuan, anni chu an ko va, Isua hminga thusawi tawp loh tûr leh zirtîr tawp loh tûr an ti tlat a. 19 Nimahsela, Petera leh Johanan an hnênah, “Pathian mit hmuhin Pathian thu zawm aiin nangni thu zawm a dik zâwk emaw chu, ngaihtuah rawh u. 20 Keini zawng thil kan hmuh leh kan hriatte kha sawi lovin kan awm thei lo,” an ti a. 21 Tin, anni chuan an vau lehzual a, an chhuah ta a, mipui avângin hremna remchâng an hmu lo; an thiltih avâng khân mi zawng zawngin Pathian an chawimawi si a. 22 Thil maka an tihdama chu kum sawmli aia tam zâwk mah a ni si a.
Ringtute an ṭawngṭai
23 Tin, Petera leh Johana chu an chhuahin, anmahni pâwlte hnênah an va kal a, puithiam lalte leh upaten an hnêna an sawi apiang chu an hrilh vek a. 24 Chutichuan, a ngaithlatute chuan a rualin aw ring takin Pathian hnênah, “Lalpa, nang vân te, lei te, tuifinriat te, a chhûnga awmte zawng zawng Siamtu i ni; 25 nangin Thlarau Thianghlimin, min thlahtu i chhiahhlawh Davida kain hêng thu hi i sawi a ni: ‘Jentailte engati nge an thinur kha? Hnam tinin engati nge thil sâwt lo an ngaihtuah? 26 Khawvêl lalten an ep huai huai a, Hotute pawh an pung khâwm a, Lalpa leh a Krista chungah chuan,’ tiin. 27 “He khuaah hian i Chhiahhlawh thianghlim, i hriak thih Isua chungah khân, Heroda leh Pontia Pilata nên, Jentailte leh Israel mite nên an pung khâwm takzet a ni, 28 i kut leh i rilruin lo thleng tûra a ruat lâwk apiang kha ti tûrin. 29 Tichuan, tûnah Lalpa, an mi vauziate hi ngai teh; i bawihte hi huai takin i thu hriltîr la, 30 mite tidam tûrin nangin i kut phar ang che; i chhiahhlawh thianghlim Isua hming avângin, chhinchhiahna leh thil mak takte tihtîr bawk ang che,” an ti a. 31 Tin, an ṭawngṭai zawhin an awm khâwmna chu a lo nghîng a, an zain Thlarau Thianghlimin an lo khat a, huai takin Pathian thu an hril ta a.
Ringtuten an neih an inṭâwm
32 Tin, a ringtu mipuite chu rilru hmun khat leh ngaihtuah hmun khatin an awm a: an zînga pakhat mahin an sum neih, “Ka ta bîk a ni,” an ti lo; thil zawng zawng an inṭâwm zâwk ṭhîn. 33 Tin, tirhkohte chuan awihawm takin Lal Isua thawhleh thu an hriattîr ṭhîn a; an zaa chungah khawngaihna nasa tak a awm a. 34 Tin, an zîngah pawh tlachham tu mah an awm lo; ramte, inte nei apiangin an hralh a, an thil hralhte chu a man an rawn keng a, 35 tirhkohte ke bulah an dah ṭhîn a; an châkkhai daih tâwk ṭheuhvin an sem ṭheuh ṭhîn a. 36 Tin, Josefa, tirhkohten Barnaba an tiha chu (chu mi hming awmzia chu, “Thlamuanna Fa” tihna a ni a), Levia chi, Kupra thliarkâra mi a ni a, 37 a lo neih chu hralhin a man a rawn keng a, tirhkohte ke bulah a dah ta a.
Anania leh Saphiri
1 Nimahsela, mi pakhat a hming Anania, a nupui Saphiri nên an awm a; Anania chuan ram a hralh a, 2 a nupui hriatin a man a ṭhen a zêp ta a; tin, a ṭhen a rawn keng a, tirhkohte ke bulah chuan a dah a. 3 Nimahsela, Peteran, “Anani, Thlarau Thianghlim bum tûr leh, ram man a ṭhen zêp tûrin engati nge Setanan i thinlung a tihkhah le? 4 A awm chhûng zawng khân i ta a ni reng lo vem ni? I hralh hnu pawh khân i thu thuin a awm lo vem ni? Engati nge hêng thu hi i rilrua i ngaihtuah? Mihring bum i ni lo ve, Pathian bum i ni zâwk e,” a ti a. 5 Tin, Anania chuan chûng thu chu a hriat veleh a tlu a, a thi ta a; tin, a hria apiangin an hlau ta êm êm a. 6 Tin, tlangvâlhote chu an tho va, an tuam a, an zâwn chhuak a, an phûm ta a. 7 Tin, dârkâr thum lai emaw chinah chuan a nupui chu, thil awmzia chu hre lovin a lo lût a. 8 Tin, Peteran a hnênah, “Mi hrilh rawh, ram chu heti zât chauhvin maw in hralh?” a ti a. Tin, ani chuan, “Aw, heti zât chauh hian a ni,” a ti a. 9 Tin, Peteran a hnênah, “Engati nge Lalpa Thlarau fiah nân in inthurual ni? Ngai teh, i pasal phûmtute kephah chu kawngka bulah a lo awm ta, nang pawh an zâwn chhuak ang che!” a ti a. 10 Tin, thâwklehkhatan a ke bulah chuan a tlu ta nghâl a, a thi ve ta a; tin, tlangvâlhote chu an lo lût a, ani chu thiin an rawn hmu a, an zâwn chhuak a, a pasal kiangah chuan an phûm ta a. 11 Tin, kohhranhote zawng zawng leh chûng thu hria apiangte chuan an hlau ta êm êm a.
Chhinchhiahna leh thil mak
12 Tin, mi zîngah Pathianin tirhkohte kutin chhinchhiahna leh thil mak tam tak a ti ṭhîn. Tin, anniho chu an zain rilru hmun khatin Solomona Hulhliapah chuan an inkhâwm ṭhîn a. 13 Mi dang erawh chu tu mah an zîngah an tel ve ngam ta lo va; nimahsela, miin anniho chu an fak si ṭhîn. 14 Tin, a ring tharho hmeichhia leh mipa tam takin Lalpa hnênah chuan an rawn belhchhah lehzual ṭhîn a; 15 chutichuan, damlote pawh kawtthlêrahte an zâwn chhuak a, khumahte, âwngphahahte an muttîr a, Petera kal pahin a hlim talin a ṭhen a zâr a hliah theih nân an ti a. 16 Tin, Jerusalem khaw kiang vêl khua ata mipuite pawh chu dam lote, ramhuai bawlhhlawh sawisakte rawn hruaiin an lo kal khâwm a; chûngte pawh chu an lo dam ta ṭheuh va.
Tirhkohte an tiduhdah
17 Tin, puithiam lalber leh a ṭhiante zawng zawng an lo thawk a (chûng a ṭhiante chu Saddukai pâwl an ni a), an îtsîk êm êm a, 18 tirhkohte chu an man a, vântlang tân inah an khung ta a. 19 Nimahsela, zânah Lalpa vântirhkoh pakhatin kawngkhârte chu a rawn hawng a, a hruai chhuak a, 20 “Pathian biak inah va ding ula, mi hnênah hêng Nunna thu zawng zawng hi va sawi rawh u,” a ti a. 21 Tin, chu thu chu an hriatin, khawvâr hun lai vêlin, Pathian biak inah chuan an va lût a, an zirtîr ta a. Nimahsela, puithiam lalber leh a ṭhiante chu an lo kal a, rorêltuho leh Israel thlahte upaho zawng zawng an ko khâwm a, tirhkohte chu rawn hruaitîr tûrin tân inah chuan mi an tîr a. 22 Nimahsela, tiang kengtute chu an va kal a, tân inah chuan anni chu an hmu si lo; tichuan, an kîr leh a, 23 “Tân in chu him taka inkhârin, a vêngtute pawh kawngkhâr bulah dingin kan hmu si a; nimahsela, kan han hawng a, a chhûngah tu mah kan hmu si lo!” tiin an hrilh a. 24 Tin, Pathian biak in hotu leh puithiam lalten chûng thu chu an hriatin, “Hêng hi eng ti takin puang ang maw?” tiin, an thu-ah chuan an mangang ta êm êm a. 25 Tin, mi pakhat a lo kal a, an hnênah, “Ngai teh u, tân ina mi in khungte khân Pathian biak inah dingin mi an zirtîr ka ti!” tiin a rawn hrilh a. 26 Tichuan, hotu chu tiang kengtute nên chuan an va kal a, vântlâng an hlauh avângin tlang takin an rawn hruai a; chuti lo chuan, lunga den an hlau va. 27 Tin, an rawn hruai thlen chuan, rorêltuho hmaah chuan an dintîr a. Tin, puithiam lalber chuan an hnênah, 28 “He hming hian zirtîr loh tûr kan tih tlat tawh che u kha; hre rawh u, in thu zirtîrin Jerusalem khua in tihkhah vek tawh hi, chu mi tihhlum bul chu tumtîr min tum a nih hi le,” tiin a chhâl a. 29 Nimahsela, Petera leh tirhkohte chuan, “Mihring thu aiin Pathian thu kan zâwm zâwk tûr a ni. 30 Nangnin Isua thingah khai kângin in tihhlum kha, min thlahtute Pathianin a kai tho leh ta a ni. 31 Amah ngei kha Pathianin Lalah leh Chhandamtua awm atân a ding lamah a chawimawi ta a, Israel-te sual simtîr tûr leh ngaidam tûrin. 32 Chûng thu chu a hretute kan nih hi; Thlarau Thianghlim, Pathianin a thu zâwm apiangte hnêna a pêk kha, hretu a ni ve bawk a,” an ti a, an chhâng a. 33 Tin, anni chuan chûng thu chu an hriatin an thin a khei ta êm êm a, tihhlum an tum ta a. 34 Nimahsela, rorêltute zîngah chuan a hming Gamaliela, Pharisai, Dân hretu, mi zawng zawng zînga hmingthang tak mi pakhat chu a ding a, chu mite chu chhuahtîr rih tûr thu a pe a. 35 Tin, rorêltute hnênah chuan, “Nangni Israel mite u, he mite chunga in thiltih tum hi fîmkhur rawh u. 36 Tûn hma pawh khân, Theoda, ‘Mi lian ka ni,’ tiin a lo awm a; chu mi hnênah chuan mi tam tak, zali lai an lo pakai a; ani chu tihhlumin a awm ta a; a thu zâwm apiang an zain an darh ta vek a, eng mah an ni tawh lo. 37 Chu mi awm hnuah chuan hming ziak lai khân, Galili rama mi Juda kha a lo awm leh a; a hnênah mi ṭhenkhat a hîp leh a; nimahsela, ani pawh chu a thi ta a, a thu zâwm apiangte chu an zain an darh ta vek mai a. 38 Chuvângin, tûnah ka ti a che u, hêng mite hi tawk suh ula, awm mai rawh se; hêng an thiltih tum leh an thiltih hi, mihring tihchhuah mai a nih chuan a boral ang; 39 amaherawhchu, Pathian tihchhuah a nih chuan anmahni in tiboral thei lo vang; chuti lo chuan, Pathian do in lo ni hlauh dah ang e,” a ti a. 40 Tin, a sawi chu rem an ti ta a; tichuan, tirhkohte chu an ko va, an vêl a; an velh zawhin, Isua hminga thu sawi loh tûr ti tlatin an thlah ta a. 41 Chutichuan, rorêltute zîng ata an kal chhuak a, chu Hming avâng chuan mualpho tuar tlâka ruat an nih avângin an lâwm hle a. 42 Tin, ni tin Pathian biak inah leh anmahni inahte, “Isua chu Krista a ni,” tiin, zirtîr leh hril an bâng chuang lo.
Upa pasarih thlan
1 Tin, chûng laia zirtîrho an pun an pun lai chuan, an ni tin thil semah anmahni hmeithaite an ngaihsak ṭhin loh avângin Grik Juda-te chu Hebraite chungah an lo phunnawi ta a. 2 Tin, sâwm leh pahnihte chuan zirtîr mipuite chu an ko va, “Pathian thu hril bânsanin, dawhkânahte rawng kan bâwl chuan a ṭha lo vang. 3 Chutichuan, unaute u, in zîngah Thlarau leh fina khat, mi hmingṭha hlîr pasarih thlang rawh u, anni chu hêng thil rêltu atân hian kan siam ang; 4 keini erawh chu ṭawngṭai leh thu rawngbâwlin kan awm leh tlat zêl ang,” an ti a. 5 Chûng thu chuan mipui zawng zawng chu a tilâwm a; tichuan, Stephana, rinna leh Thlarau Thianghlima khat nên, Philipa nên, Prokora nên, Nikanora nên, Timona nên, Parmena nên, Nikola, Juda-te saphun Antiokei khuaa mi nên an thlang a; 6 chûng mite chu tirhkohte hmaah an dintîr a; tin, anni chuan an ṭawngṭai a, an chungah an kut an nghat a. 7 Tin, Pathian thu chu a lo darh a; Jerusalem khuaah chuan zirtîrteho an pung nasa ta êm êm a; puithiamte zîngah pawh mi tam takin chu rinna chu an awih ta a.
Stephana an man
8 Tin, Stephana chu ngilneihna leh thiltihtheihnain a khat a, mi zîngah thil mak leh chhinchhiahna ropui tak a ti ṭhîn a. 9 Nimahsela, Sal Chhuakho te, Kurini khuaa mi te, Aleksandria khuaa mi te inkhâwmna an tiha mi, mi ṭhenkhat leh Kilikia rama mi te, Asia rama mi te inkhâwmnaa mi, mi ṭhenkhat chu an lo thawk a, Stephana chu an rawn hnial a. 10 Nimahsela, a finna leh a sawipuitu Thlarau chu an let thla thei ta lo va. 11 Tin, mite an tham a, chûng mite chuan, “Mosia leh Pathian a sawichhiat kan hria,” an ti a. 12 Tin, mite, upate, lehkhaziaktute an fuihpawrh a, Stephana chu an bei a, an man a, rorêltute hnênah an hruai a; 13 tin, hretu derte an siam a, chûng mite chuan, “He mi hian he in Thianghlim leh Dân hi a sawichhe fo ṭhîn a; 14 he Nazareth Isua hian he in hi a ṭhiat ang a, Mosia Dân min pêkte kha a tidanglam dâwn tih a sawi kan hria,” an ti a. 15 Tin, rorêltuho ṭhute zawng zawng chuan Stephana chu an en reng a, a hmêl chu vântirhkoh hmêl angin an hmu a.
Stephana thusawi
1 Tin, puithiam lalber chuan, “Hêng thu hi a dik em?” a ti a. 2 Tin, Stephana chuan, “Unaute u, pate u, ngai teh u, min thlahtu Abrahama, Haran khuaa a awm hmaa Mesopotamia rama a awm lai khân, Ropuina Pathian chu a hnênah a rawn inlâr a, 3 a hnênah, ‘I khaw lam leh i chiteho zîng ata chhuak la, ram ka la entîr tûr che lamah kal rawh,’ a ti a. 4 Tin, ani chu Kaldai-ho ram ata a kal chhuak a, Haran khuaah a va awm ta a; tin, a pa a thih hnuin, chuta ṭangin hei, tûna in awmna khaw lamah hian Pathianin a pêm luhtîr a. 5 Tin, hetah hi chuan eng mah hmun luah tûr, a ke nghahna tham pawh a pe lo va; nimahsela, amah leh a hnua a thlahte thlenga ro tûrin pêk a tiam a, fa a la neih hma pawhin. 6 “Tin, Pathianin hetiang hian a sawi: ‘A thlahte mi ram lamah kum zali an thang ang a, miin bawihah an siam ang a, an tiduhdah bawk ang,’ tiin. 7 Tin, Pathianin, ‘A bawihtu tûrte hnam chu keimahin ka la ngaihtuah ang a; tin, chumi zawhah chuan an lo chhuak ang a, hemi hmunah hian ka rawng an la bâwl ang,’ a ti bawk a. 8 Tin, Pathianin a hnênah serh tan thu kha a thlung a; chutichuan, Abrahama chuan Isaaka a hring a, a ni riat niah a serh a tan a; tin, Isaaka chuan Jakoba a hring a; tin, Jakoba chuan chi thlahtu sâwm leh pahnihte kha a hring a. 9 “Tin, chi thlahtute khân Josefa an îtsîk a, Aigupta ram lamah an hralh a; nimahsela, Pathian a hnênah a awm a, 10 a hrehawm tuar zawng zawngah a chhanchhuak zêl a, Aigupta ram lal Pharaoa pawh a khawngaihtîr a, mi fing tak a ni tih a hriattîr bawk a; tichuan, ani chuan Aigupta ram leh a ina mi zawng zawng chungah hotuah a siam ta a. 11 “Tin, Aigupta leh Kanaan ram zawng zawngah chuan ṭâm a lo tla a, hrehawm nasa tak a lo thleng ta a; min thlahtute chuan ei tûr rêng rêng an hmu ta lo va. 12 Nimahsela, Jakoba chuan Aigupta ramah buh a awm tih a hriat veleh, min thlahtute chu a tîr chhuak a; chu chu an kal ṭan tirhna ber a ni. 13 Tin, an kal vawi hnihnaah chuan Josefa chu a unaute hnênah chuan a inhriattîr a; tin, Josefa unaute chu Pharaoa an hriattîr ta a. 14 Tin, Josefa chuan a pa Jakoba leh a unau zawng zawng a kohtîr a; anmahni chu sawmsarih leh panga an ni a. 15 Tichuan, Jakoba chu Aigupta ramah a zuk kal a; tin, ani leh min thlahtute chu an thi ta a, 16 Sukem khua an zâwn thleng a, Abrahaman Sukem khuaa Hamora fapate laka thlân, tangkaruaa a leiah khân an zalh ta a. 17 “Tin, Pathianin Abrahama hnêna thu a tiam kha a hun chu a lo thlen dâwnin, mite chu Aigupta ramah chuan an lo pung a, an lo tam ta deuh deuh va, 18 Josefa hre lo lal dang a lo awm thleng khân. 19 Chu mi chuan kan chite a ngamthlêm a, min thlahtute chu a tiduhdah a, an nausênte nung lo tûrin a paih chhuahtîr ṭhîn a. 20 Chumi lai chuan Mosia a lo piang a, a hmêl a ṭha êm êm mai a; a pa inah thla thum an châwm a; 21 tin, an paih chhuahin Pharaoa fanuin a la a, ama fa atân a châwm ta a. 22 “Tin, Mosia chu Aigupta rama mite finna zawng zawng an zirtîr a, a thu-ah leh a thiltihah a ropui êm êm a. 23 Tin, ani chuan kum sawmli a lo tlin chuan a unau, Israela thlahte chu kan a tum a. 24 Tin, an zînga mi pakhat tihretheih tuar lai a hmu a, a chhan a, tihduhdah tuartu phuba chu a la a, Aigupta mi chu a tihlum ta a. 25 Mosia chuan ama kutin Pathianin anmahni a chhanhim tih a unauten an hria emaw a ti a; nimahsela, an hre si lo. 26 Tin, a tûkah an zînga mi pahnih an insual laiin an hnênah a lo thleng a, ‘Pute u, unau in ni alâwm; engati nge dik lo taka in intih?’ tiin rem a tum a. 27 Nimahsela, a ṭhenawm chunga kawhmawh bâwltu zâwk chuan Mosia chu a nam kiang a, ‘Kan chungah hotuah leh rorêltuah tuin nge siam che? 28 Nimina Aigupta mi i tihhlum ang khân mi tihhlum i tum a ni maw?’ a ti a. 29 Tin, chumi thu avâng chuan Mosia chu a tlân bo va. Midian ramah a thang reng a, chutah chuan fapa pahnih a nei a. 30 “Tin, kum sawmli a vei hnuin Sinai tlâng thlalêrah, hnimbukah, meialh zîngah vântirhkoh pakhat a hnênah a lo inlâr a. 31 Tin, Mosian a hmuh chuan a thil hmuh chu mak a ti êm a; tin, en tûra a va hnaih laiin Lalpa awin, 32 ‘Kei, i thlahtute Pathian ka nih hi, Abrahama Pathian, Isaaka Pathian, Jakoba Pathian chu,’ a lo ti a. Tichuan, Mosia chu a khûr a, a en ngam ta lo va. 33 Tin, Lalpa chuan a hnênah, ‘I kephah ata i pheikhawk kha phelh rawh; i dinna hmun kha lei thianghlim a ni e. 34 Aigupta rama ka mi awmte chu an hrehawmzia ka hmu reng asin, an rûm pawh ka hre reng a, anmahni chhanhim tûrin ka lo chhuk ta a ni. Hawh teh, Aigupta ramah ka tîr ang che,’ a ti a. 35 “Chu Mosia, ‘Hotu leh rorêltuah tuin nge siam che?’ tia an hnar chu, hnimbuka vântirhkoh a hnêna inlâr khân a pui a, Pathianin amah ngei chu hotu leh chhanhimtu ni fâwm tûrin a tîr a ni. 36 Ani chuan Aigupta ramah te, Tuifinriat Senah te, thlalêrah te chuan kum sawmli chhûngin thil mak leh chhinchhiahnate a hmuhtîr zêl a, anmahni a hruai chhuak ta a. 37 “Israela thlahte hnêna, ‘Pathianin keimah mi siam ang hian, in unaute zînga mi zâwlnei pakhat a siamsak ang che u,’ titu kha a ni, chu Mosia chu. 38 Chu mi chu thlalêra mipui pung khâwm zînga Sinai tlânga a betu vântirhkoh hnênah leh min thlahtute hnêna awm kha a ni; chu mi chu min pêk chhâwn tûra thu nungte latu kha a ni; 39,40 min thlahtute chuan a thu an zâwm duh lo va, an hnar a, Arona hnênah, ‘Kan hma hruai tûrin pathiante min siamsak rawh; he Mosia, Aigupta ram ata min hruai chhuaktu lah hi a chanchin kan hre ta si lo va,’ tiin an rilrute chu Aigupta ram lamah a lêt leh ta a. 41 Tin, chûng lai chuan sebâwngno lem an siam a, a lem chu ran talhin an bia a, anmahni kutchhuak chungah chuan an hlim ta a. 42 Chutichuan, Pathianin a hawisan a, vâna arsiho chibai an bûk theihna tûrin anmahni a ensan ta a; zâwlnei lehkhabua, ‘Israel chite u, thlalêrah khân kum sawmli chhûngin, Sa talh leh ran talhin kei mi bia em ni? 43 Moloka puan in leh pathian Rephana arsi pawh chu, Chibai bûk tûrin a lem in siamte kha, In zâwn zâwk ṭhîn a; Chuvângin, Babulon khaw piah lamah Ka hruai bo vang che u,’ tih ziak ang khân. 44 “A lem a hmuh anga siam tûra Mosia hrilhtuin a ruat ang khân, min thlahtuten thlalêrah khân hriattîrna puan in chu an nei a. 45 Chu bawk chu min thlahtute thlah leh pawhin an nei chhâwng zêl a, Pathianin min thlahtute hmaa Jentail a hnawh chhuahteho ram an luah lai khân, Josua luh rualin an luhpui a; Davida lo awm thleng khân chutah chuan a awm ta reng a. 46 Chu Davida chu Pathian mit hmuhin duhsak tlâkin a awm a, Jakoba Pathian tân awmna siamsak a dîl a. 47 Nimahsela, Solomonan in chu a saksak ta zâwk a ni. 48 Nimahsela, Chungnungbera chu kuta sak inahte a awm ngai lo; zâwlnei chuan: 49 ‘Lalpan, “Vân ka ṭhutphah a ni a, Lei ka kephah nghahchhan a ni: In eng angin nge mi saksak ang? Ka chawlhna hmun pawh eng nge ni? 50 Keima kutin hêng thil engkim hi ka siam lo vem ni?” a ti e,’ tia a sawi ang khân. 51 “Mi tihmawh, thinlung leh beng tan lohte u, kumkhuain Thlarau Thianghlim in dodâl fo ve; in thlahtute tih ang zêl khân in ti ṭhîn. 52 In thlahtuten zâwlneite zîngah tu nge an tihduhdah loh ni? Mi Fel tak lo kal tûr thu hril lâwktute kha an tihlum a; chu Mi Takzet chu mantîrtu leh thattute nangmahni hi tûnah in ni asin. 53 Dân, vântirhkohte pêk chhâwn kha, hmu zeta zâwm si lote u!” a ti a.
Stephana lungin an dêng hlum
54 Tin, chûng thu chu an hriatin an thin a khei ta a, Stephana chungah chuan an ha an ṭhial a. 55 Nimahsela, ani chu Thlarau Thianghlima khat a ni a, vân lam a en tlat a, Pathian ropuizia leh Pathian ding lama Isua ding a hmu a; 56 “Ngai teh u, vân inhawngte ka hmu a, Pathian ding lama Mihring Fapa ding pawh ka hmu,” a ti a. 57 Chutichuan, anni chu aw ring takin an au va, an beng an hup a, rual takin an bei chiam a, 58 khua ata chu an hnawt chhuak a, lungin an dêng a, a hretute chuan tlangvâl pakhat, a hming Saula ke bulah chuan an puante an dah hlawm a. 59 Chutichuan, Stephanan, “Lal Isu, ka thlarau la ang che,” tia Lalpa a koh laiin lungin an dêng ruih ruih a. 60 Tin, a ṭhingṭhi a, aw ring takin a au va, “Lalpa, hei an thil tihsual hi an chungah mawh phurhtîr suh ang che,” a ti a. Tin, chu thu chu a sawi zawh veleh a muhîl ta a. Saula pawh chuan a thih chu a remti a.
Saulan kohhran a tiduhdah
1 Tin, chumi ni aṭang chuan Jerusalem khuaa kohhran awmte chu nasa takin an tiduhdah ṭan ta a; tichuan, tirhkohte chauh lo chu Judai leh Samari ram khaw tinah an darh ta vek a. 2 Tin, Pathian ngaihsak tuten emaw Stephana chu an phûm a, nasa takin an ṭah a. 3 Saula erawh chuan kohhranhote a tiduhdah êm êm a, in tinah a lût a, a hmei a pain a hnûk chhuak a, tân inah a khung ṭhîn.
Samari khuaa Chanchin Ṭha hril
4 Tin, a darhte chu khaw tinah an kal a, thu chu an hril zêl a. 5 Tin, Philipa chu Samari khuaah a zuk kal a, an hnênah Krista thu a tlângaupui a. 6,7 Tin, ramhuai bawlhhlawhte chu, mi tam tak an manate kawchhûng ata aw ring taka auva an chhuah avâng leh, zeng leh kebai tam takte pawh an lo dam tâk avângin, mipuiten a thu an hriata a thil mak tihte an hmuhin, Philipa thusawi chu rilru hmun khatin an ngaihsak a. 8 Tin, chumi khuaah chuan nasa takin an lâwm ta a. 9 Tin, a hming Simona, mi pakhat a awm a; ani chuan, “Mi lian ka ni,” tiin, hmânah chumi khuaah chuan dawi hmangin, Samari khuaa mite mak ti takin a siam ṭhîn a; 10 mi zawng zawng chuan, mi chhe ber aṭangin lal ber thlengin, “He mi hi Pathian thiltihtheihna, Ropui, an tih kha a nih hi,” tiin, a thu an ngaihsak hlawm ṭhîn a. 11 A dawi hmangin rei tak mak ti taka a siam ṭhin avângin a thu an ngaihsak ṭhîn a ni. 12 Nimahsela, anni chuan Pathian ram Chanchin Ṭha leh Isua Krista hminga Chanchin Ṭha Philipa hril chu an awih veleh a hmei a pain baptisma an chang ta a. 13 Tin, Simona meuh pawhin a awih ve ta a; tin, baptisma a chan zawhin Philipa hnênah a awm reng a, chhinchhiahna leh thil mak nasa tak tihte a hmu a, mak a ti hle mai ṭhîn a. 14 Tin, Jerusalem khuaa tirhkoh awmte khân, Samari khuaa miten Pathian thu an awih tih an hriatin, an hnênah Petera leh Johana chu an tîr a; 15 chu mite chu an zuk thlen chuan Thlarau Thianghlim an hmuh theih nân an ṭawngṭaisak a. 16 Chumi hma chuan an zîngah tu ma chungah a la thleng lo; Lal Isua hmingin baptisma an chang chauh a la ni. 17 Tin, tirhkohte chuan an chungah an kut an nghat a, Thlarau Thianghlim an chang ta a. 18,19 Tin, tirhkohte kut nghah avângin Thlarau Thianghlim pêk a ni tih Simonan a hmuhin, “Hetiang thuneihna hi mi pe ve rawh u, tu chungah pawh kut ka nghahna apiangin Thlarau Thianghlim an hmuh ve nân,” tiin an hnênah tangka pêk a tum ta a. 20 Nimahsela, Peteran a hnênah, “I tangka hi i boral rualin boral ve rawh se, Pathian thilpêk tangka suma lei i tum avângin. 21 Hêng thu-ah hian i tel ve lo ve, chan pawh i nei hek lo; i rilru Pathian ngaihin a fel lo ve. 22 Chuvângin, i sual hi sim la, Lalpa hnênah ṭawngṭai rawh; chutichuan, i rilrua i ngaihtuah hi a ngaidam mahna che. 23 Awhna sual nasa tak phuarin i awm tih ka hria e,” a ti a. 24 Tin, Simonan, “In thil sawi hi eng mah ka chunga a thlen loh nân, nangnin Lalpa hnênah mi ṭawngṭaisak rawh u,” a ti a, a chhâng a. 25 Chutichuan, anni chuan Lalpa thu chu an hriattîra an sawi zawhin, Jerusalem khuaah an haw leh a; Samari rama mite khaw tam tak hnênah Chanchin Ṭha chu an hril zêl a.
Philipa leh Ethiopia mi tilreh
26 Tin, Lalpa vântirhkoh pakhatin Philipa chu a bia a, “Tho la, chhim lama Jerusalem khua aṭanga Gaza khaw zuk chhun kawngah khân kal rawh; chumi kawng chu thlalêrah a kal tlang a ni,” a ti a. 27 Tichuan, a tho va, a kal ta a. Tin, ngai teh, Ethiopia rama mi pakhat, Ethiopia lalnu Kandaki hnuaia mi tilreh, lal tak, a ro zawng zawng enkawltu, Jerusalem khuaah Pathian be tûrin a han kal a; 28 a haw lam chuan a tawlailîra ṭhu chungin zâwlnei Isaia lehkhabu a chhiar zêl a. 29 Tin, Thlarau chuan Philipa hnênah, “Saw tawlailîr saw va hnaih la, va pâwl rawh,” a ti a. 30 Tin, Philipa chu mi tilreh hnênah chuan a va tlân a, zâwlnei Isaia lehkhabu a chhiar tih a hria a, “I chhiar kha a awmzia i hria em?” a ti a. 31 Tin, ani chuan, “Tu ma mi hrilhfiah lohvin engtin nge ka hriat theih ang?” a ti a. Tin, a hnêna ṭhu chhuak tûrin Philipa chu a sâwm ta a. 32 Tin, Pathian Lehkha a chhiar lai chu hei hi a ni: “Talh tûrin berâm angin ani chu an hruai a; Berâmno a hmul mêttu hmaa a ngawi reng angin, Ani pawhin a kâ a âng lo; 33 A tlâwm laiin a chungah thu rêl an phal lo; A thlahte chanchin tuin nge la hril ang? Khawvêl aṭangin a nun an lâksak si a,” tih hi. 34 Tin, mi tilreh chuan Philipa chu a bia a, a hnênah, “Zâwlneiin hêng thu hi tu thu nge a sawi, ama thu nge mi dang thu? Ka zâwt a che,” a ti a. 35 Tin, Philipa chuan a sawi a, chu Pathian Lehkha thu chu a bulah a ṭan a, a hnênah Isua thu a hrilh a. 36 Tin, kalkawnga an kal laiin tui awmna an thleng a; tin, mi tilreh chuan, “En teh, heta hi tui a awm, baptisma channa tûr engin nge mi dâl kher?” a ti a. 38 Tin, tawlailîr chu a dintîr a, an pahnihin, Philipa leh mi tilreh chu tuiah chuan an zuk kal dûn a; tin, Philipa chuan ani chu a baptis ta a. 39 Tin, tui ata an chhuah chhoh veleh, Lalpa Thlarau chuan Philipa chu a la bo ta a; tin, mi tilreh chuan ani chu a hmu leh ta lo, hlim taka a kal tâk zêl avângin. 40 Nimahsela, Philipa chu miin Azota khuaah an hmu leh ta a; tin, a kal tlang a, Kaisari khaw thlengin khaw tinah Chanchin Ṭha chu a hril zêl a.
Saula pianthar thu
1 Saula erawh chuan Lalpa zirtîrho a vau thu leh thah a tum thu a la chhâk chhuak ta cheu va. puithiam lalber hnênah a kal a, 2 Damaska khuaa inkhâwmna in zawng zawnga mite hnêna pêk tûrin lehkhate a dîl a, Kawnga mi chu tu pawh a hmuh chuan hmeichhia pawh, mipa pawh, Jerusalem khuaah phuar chunga a hruai theihna tûrin. 3 Tin, a kal laiin, Damaska khua a thlen dâwnin, thâwklehkhatan êng, vân ata a vêlin a lo êng ta phut a; 4 tin, leiah a tlu a, a hnênah, “Saula, Saula, nangin engati nge mi tihduhdah?” tiin aw a hria a. 5 Tin, ani chuan “Lalpa, tu nge i nih?” a ti a. Tin, Lalpa chuan, “Isua, i tihduhdah hi ka ni e; 6 nimahsela, tho la, khuaah lût rawh; tichuan, i tih tûr an lo hrilh ang che,” a ti a. 7 Tin, a hnêna kal vete chu dang rengin an ding a, aw zawng an hre na a, tu mah an hmu si lo va. 8 Tin, Saula chu lei ata chu a tho va; tin, a han meng a, eng mah a hmu thei ta lo va; tichuan, a kutah an kai a, Damaska khuaah an hruai lût a. 9 Tin, ni thum khaw hmu lovin a awm a, eng mah a eiin a in lo va. 10 Tin, Damaska khuaah chuan a hming Anania, zirtîr pakhat a awm. Tin, Lalpa chuan mumang angin a hnênah, “Anani,” a ti a. Tin, ani chuan, “En teh, Lalpa, heta hi ka awm,” a ti a. 11 Tin, Lalpa chuan a hnênah, “Tho la, kawtthlêr, ‘Ngîl’ an tihah chuan kal la, Juda inah, Tarsa khuaa mi, a hming Saula zâwt chhuak rawh; ngai teh, a ṭawngṭai mêk a ni; 12 a hming Anania mi pakhat, lûta a mit tivâr tûrin a chungah kut nghatin a hmu tawh e,” a ti a. 13 Tin, Anania chuan, “Lalpa, chu mi chuan Jerusalem khuaa i mi thianghlimte chunga a tihsual tamzia thu mi tam tak kaah ka hria a ni; 14 tin, hetah pawh i hming lam apiang phuarna tûrin, puithiam lalte hnên ata thu a hmu reng asin,” a ti a, a chhâng a. 15 Nimahsela, Lalpa chuan a hnênah, “Kal mai rawh; Jentailte, lalte, Israela thlahte hnêna ka hming put luh nâna ka bêl ruat a ni alâwm; 16 keimah avângin hrehawm engtia nasa nge a tuar tûr tih amah ka la hriattîr dâwn a ni,” a ti a. 17 Tin, Anania chu a va kal a, inah chuan a va lût a; tin, a chungah a kut a nghat a, “Ka nau Saul, i mit vârna tûr leh, Thlarau Thianghlim khata i awm theih nân, Lalpa, i lo kalna kawnga i hnêna inlâr Isua khân mi rawn tîr a ni,” a ti a. 18 Tin, thâwklehkhatan a mit ata phuhlip ang a tla ta nghal a, a mit a vâr leh ta a; tin, a tho va, baptisma a chang ta a. 19 Tin, chaw a ei a, a lo harh leh ta a.
Damaska khuaah Saulan thu a hril
Tin, Damaska khuaa zirtîrho awmte hnênah chuan ni eng emaw zât a awm a. 20 Inkhâwmna inahte chuan Isua chu Pathian Fapa a nihzia thu a tlângaupui ta nghâl a. 21 Tin, a thu hretu zawng zawng chuan mak an ti hle a, “He mi hi Jerusalem khuaa he hming lamtute tiduhdah ṭhîn kha a ni lo vem ni? Chûng mite chu puithiam lalte hnêna phuar chunga hruai a rawn kal chhan a nih kha,” an ti a. 22 Saula erawh chu a lo chak lehzual a, chu mi chu Krista a ni takzet tih a hrilhfiah a, Damaska khuaa Juda awmte chu a tidang hiau ṭhîn a. 23 Tin, ni rei tak hnuah chuan Saula tihlum tûrin Juda-te chu an inrâwn a; 24 nimahsela, Saula chuan an phiar thu chu a lo hre ta a. Tin, tihhlum tumin kulh kawngka tinah chuan a chhûn a zânin an châng ṭhîn a. 25 Nimahsela, a zirtîrten ani chu an hruai a, zânah kulh tukverhah bâwmin an thlâk thla ta a.
Jerusalem khuaah Saula a kal
26 Tin, Saula chuan Jerusalem khua a thlen veleh zirtîrhote chu pâwl a tum a; anni erawh chuan an zain ani chu an hlau va, zirtîr a ni ve tih an ring lo va. 27 Barnaba erawh chuan ani chu a hruai a, tirhkohte hnênah chuan a rawn kalpui a, kalkawngah Lalpa a hmuha a biakzia te, Damaska khuaa Isua hminga huai taka thu a hrilzia te pawh chu an hnênah a sawi ta a. 28 Chutichuan, Saula chu Jerusalem khuaah chuan, an hnênah lût ṭhîn, chhuak ṭhînin a awm ta a, 29 Lalpa hmingin huai takin thu a hril ṭhîn a. Tin, Grik Juda-te hnênah thu a sawi a, a hnial a; anni erawh chuan ani chu tihhlum an tum a. 30 Tin, unaute chuan chu chu an hriatin Kaisari khuaah an hruai chhuk a, Tarsa khuaah an tîr ta daih a. 31 Chutichuan, kohhranhote chu Judai ram vêlah te, Galili ram vêlah te, Samari ram vêlah te chuan an nghet deuh deuh va, muang takin an awm ta a; tin, Lalpa ṭih dêkin, Thlarau Thianghlim thlamuanin an awm a, an lo pung ta telh telh a.
Ludda leh Joppa khuaah Petera a kal
32 Tin, Peteran khua vêl a fan pahin Ludda khuaa mi thianghlim awmte hnênah a zuk kal bawk a. 33 Chutah chuan mi pakhat a hming Ainia, a zen avânga kum riat khuma mu reng a hmu a. 34 Tin, Petera chuan a hnênah, “Ainia, Isua Krista chuan a tidam a che; tho la, i âwngphah zial rawh,” a ti a. Tichuan, a tho ta nghâl a. 35 Tin, Ludda khua leh Saron phaia awmte zawng zawng chuan Ainia chu an hmu a, Lalpa lam an hawi ta hlawm a. 36 Tin, Joppa khuaah a hming Tabithi, zirtîr pakhat a awm a (A Grik hming chu Dorki a ni a, “sazukla” tihna a ni). Chu hmeichhia chuan thil tihṭhat leh thilpêk a ngah hle a. 37 Tin, chûng lai chuan a damlo va, a thi ta a; tin, an bual fai a, pindan chungnungah an zalh a. 38 Tin, Ludda khua chu Joppa khaw kiang a nih avângin, zirtîrteho chuan chutah chuan Petera a awm tih an hria a, “Rei rial lovin kan hnênah lo kal ang che,” tia ngên chiam tûrin a hnênah mi pahnih an tîr a. 39 Tin, Petera chu a tho va, an hnênah a kal ve ta a. Tin, a thlen veleh pindan chungnungah chuan an hruai a; hmeithai zawng zawng chu a kianga dingin, Dorki an hnêna a awm laia a kawr siam te, a puan siamte entîr chungin an ṭap hlawm a. 40 Nimahsela, Petera chuan an zain a chhuahtîr vek a, a ṭhingṭhi a, a ṭawngṭai ta a; tin, a ruang lam a hawi a, “Tabith, tho rawh,” a ti a. Tichuan, a mit a han meng a, Petera chu a hmuh veleh a ṭhu ta hlawl a. 41 Tin, Petera chuan a kut a pe a, a kai tho ta a; tin, mi thianghlimte leh hmeithaite chu a ko va, damin a kawhhmuh a. 42 Tin, chu chu Joppa khua zawng zawng chuan an hre ta vek a; mi tam takin Lalpa chu an ring ta a. 43 Tin, Petera chu Joppa khuaa Simona, savun siamtu inah ni tam tak a châm a.
Petera leh Kornelia
1 Tin, Kaisari khuaah a hming Kornelia mi pakhat a awm a, Itali pâwl an tih, chumi pâwla sipai za hotu a ni a, 2 Pathian ngaihsak mi a ni a, a chhûngte zawng zawng nên Pathian an tih ṭhîn a, mite hnênah thil tam tak a pe ṭhîn a, Pathian hnênah pawh a ṭawngṭai fo va. 3 Chu mi chuan behliang mun hun lai vêlah, mumang angin fiah takin Pathian vântirhkoh pakhat a hnêna lûta, “Korneli,” tiin a hmu a. 4 Tin, Kornelia chuan ani chu a lo en reng a, a hlau va, “Lalpa, eng nge ni?” a ti a. Tin, ani chuan a hnênah, “I ṭawngṭainate leh i thilpêk thute kha hriat reng tûrin Pathian hmaah a thleng chho ta a. 5 Tûnah Joppa khuaah mite tîr la, mi pakhat Simona, Petera an tiha chu, han hruaitîr rawh; 6 savun siamtu Simona hnênah a thleng a ni, a in chu tuifinriat kamah a awm,” a ti a. 7 Tin, vântirhkoh a betu chu a kal veleh, Kornelia chuan a chhiahhlawhte zînga mi pahnih leh a rawngbâwl fote zînga Pathian ngaihsak sipai pakhat a ko va; 8 tin, thu zawng zawng chu an hnênah a hrilh zawhin Joppa khuaah chuan a tîr ta a. 9 Tin, a tûkah chuan, an kal laia khaw kiang an thlen dâwnin, Petera chu ṭawngṭai tûrin, chawfâk hun laiin in chungah a lâwn chho va; 10 tin, a ril a lo ṭâm a, chaw ei a duh ta a; nimahsela, ei tûr an siam lai chuan englovin a zêl ta a. 11 Tin, vân inhawngin englo bâwm, puan lian tak ang, a kil lia hlina leia uai thlain a hmu a; 12 chumi chhûngah chuan fuliafa leh rannung leh chunglêng sava tinrêngte an awm a. 13 Tin, a hnênah awin, “Peter, tho rawh; talh la, ei rawh,” a rawn ti a. 14 Nimahsela, Petera chuan, “Lalpa, ni lo ve; thiang lo leh bawlhhlawh eng mah rêng ka ei ngai lo ve,” a ti a. 15 Tin, aw chuan a vawi hnihnaah, “Pathianin a tihthianghlim tawh chu nangin thiang lo ti suh,” a ti a. 16 Chutiang hlîr chuan vawi thum a lo awm a; tin, bâwm chu vâna khai chhohvin a awm leh ta nghâl a. 17 Tin, Petera chuan mumang anga a hmuh chu a ngaihna hre lova a mangan laiin, Kornelia mi tirhte chuan Simona in chu an lo zâwt chhuak tawh a, kawngkhâr bulah an lo ding a, 18 an au va, Simona, Petera an tiha chu, chutah chuan a thlen leh thlen loh an zâwt a. 19 Tin, Petera chuan a mumang ang thu chu a ngaihtuah laiin Thlarauvin a hnênah, “Ngai teh, mi pathumin an zawng a che. 20 Chutichuan, tho la, chhuk la, eng mah ringhlel lovin anmahni zui rawh; anni chu ka tirh an ni e,” a ti a. 21 Chutichuan, Petera chu, chu mite hnênah chuan a chhuk a, an hnênah, “In zawn hi ka ni e; eng nge in rawn kal chhan?” a ti a. 22 Tin, anni chuan, “Vântirhkoh thianghlim pakhatin Kornelia, sipai za hotu, mi fel tak, Pathian ṭih, Juda hnam zawng zawng zînga mi hmingṭha hnênah chuan i thusawi a hriat nân, a inah nangmah ko tûr chein a hrilh a ni,” an ti a. 23 Chutichuan, mite chu a ko lût a, a riahtîr ta a. Tin, a tûkah chuan Petera chu a tho va, an hnênah a kal a, Joppa khuaa mi unau tute emaw pawh a hnênah an kal ve a, 24 Tin, a tûk lehah Kaisari khuaah chuan an lût ta a. Tin, Kornelia chuan a laichînte leh a ṭhian duh berte ko khâwmin, anni chu a lo nghâk reng a. 25 Tin, Petera chu a luh dâwn lai takin Kornelia chuan a lo hmuak a, a ke bulah a bawkkhup a, Pathian chibai bûk angin a bûk a. 26 Nimahsela, Petera chuan ani chu a kai tho va, “Ding rawh, kei pawh mihring ka ni alâwm,” a ti a. 27 Tin, a hnênah thu sawi chungin a lût a, mi tam tak awm khâwm chu a va hmu a. 28 Tin, an hnênah, “Juda miin hnam dang pâwl leh an hnêna kal a thian lohzia nangnin in hria e; nimahsela, tu mah thiang lo leh bawlhhlawh ka ti tûr a ni lo tih Pathianin mi hriattîr a ni. 29 Chuvângin, mi rawn koh veleh khân hnial lovin ka lo kal ta a nih hi. Tichuan, ka zâwt a che u, eng nge mi rawn koh chhan le?” a ti a. 30 Tin, Kornelia chuan, “Ni li a ni ta, tûn hun ang thleng hian ka inah, behliang mun hun ṭawngṭainaah ka ṭawngṭai a; tin, ngai teh, mi pakhat puan êng tak sinin ka hmaah a lo ding a, 31 ‘Korneli, i ṭawngṭaina kha hriatin a awm ta, mi hnêna i thilpêkte pawh kha Pathianin a hre reng a. 32 Chuvângin, Joppa khuaah mi tîr la, Simona, Petera an tiha chu, i hnênah ko rawh; ani chu tuifinriat kamah savun siamtu Simona inah a thleng a ni,’ a ti a. 33 Chuvângin, i hnênah mi ka rawn tîr ta nghâl a ni; i lo kal hi a ṭha e. Chutichuan, Lalpan thu a pêk apiang che hre tûrin, tûnah Pathian mit hmuhin kan zain hetah kan awm a nih hi,” a ti a.
Petera thusawi
34 Tin, Petera chuan a sawi a: “Pathianin mi duhsak bîk a nei lo tih dik takin ka hria e; 35 nimahsela, hnam tin zîngah tu pawh amah ṭiha, fel taka ti apiang a lâwm zâwng mi an ni ṭhîn. 36 Ani chuan thlamuanna Chanchin Ṭha Isua Krista kaa hrilin, Israela thlahte hnênah thu a thawn a (Isua chu mi zawng zawng Lal a ni a), 37 Johanan a tlângaupui ṭhin baptisma zawhah khân, thu, Galili ram aṭanga lo thang ṭana, Judai ram zawng zawnga thang chhuak kha, nangnin in hre bawk alâwm; 38 Nazareth Isua chungchâng thu kha, khatia Pathianin ani chu Thlarau Thianghlim leh thiltihtheihnaa a vûrzia kha; ani chuan mi chunga tiṭha leh, Diabola tihduhdah zawng zawng tidamin a fang vêl ṭhîn a, a hnênah Pathian a awm avângin. 39 Juda-te ramah leh Jerusalem khuaa a thiltih zawng zawng hretute kan ni e; ani chu thinglêrah khaiin an tihlum ta a. 40 Pathianin ani chu ni thum niah a kaitho leh a, fiah takin a entîr a; 41 amaherawhchu, mi zawng zawng hnênah a ni lo, Pathianin hretua a ruat lâwkate hnênah chauh a ni, keimahni, mitthi zîng ata a thawhleh hnua a hnêna eia bârte hnênah hian. 42 Ani chu mitthite leh mi nungte chunga Rorêltua Pathian ruat chu a ni tih, mi hnêna tlângaupui leh hriattîr tûrin Pathianin thu min pe a ni. 43 Tu pawh amah chu ring apiang, a hming avângin sualte ngaihhnathiamin an awm ang tih, hêng a chanchin hi zâwlnei zawng zawngin an hriattîr ṭhin kha,” a ti a.
Jentailten Thlarau Thianghlim an dawng
44 Tin, Peteran chûng thu a sawi lai tak chuan, thuhretu zawng zawng chungah chuan Thlarau Thianghlim a lo thleng ta a. 45 Tin, serh tanho zînga ringtute, Petera rawn zui apiang chuan, Thlarau Thianghlim pêk chu Jentailte chungah pawh leih a nih avângin mak an ti hle a; 46 ṭawng hriat lohtea thu sawiin Pathian fakin an hre si a. Tin, Peteran a bia a, 47 “Hêng mite, keimahni anga Thlarau Thianghlim hmu ve hi, baptisma an chan loh nân miin tui hman an khap thei em ni?” a ti a. 48 Tichuan, Isua Krista hminga baptisma chan tûr thu a pe a. Chûng zawhah chuan ni eng emaw zât châmah an ngên a.
Jerusalem Kohhran hnêna Petera thuthlen
1 Tin, Judai rama tirhkoh leh unau awmte chuan, Jentailte pawhin Pathian thu an zâwm tih an hre ta a. 2 Tichuan, Petera chu Jerusalem khua a thlen chhoh veleh serh tanhoten a hnênah, 3 “Serh tan lote inah i lût a, an hnênah i ei vei a,” an ti a, an kalh a. 4 Nimahsela, Petera chuan a bul aṭangin indawt zaihin an hnênah a hrilhfiah a: 5 “Joppa khuaah ṭawngṭaiin ka awm a; tin, englovin mi zêl a, mumang angin englo bâwm, puan lian tak ang, a kil lia hlina vân ata uai thla ka hmu a; ka kiangah ngei mi rawn hnaih a; 6 tin, chu chu ka en reng a, ka ngaihtuah a, leia mi fuliafate, ramsate, rannungte leh chunglêng savate ka hmu a. 7 Tin, awin, ‘Peter, tho rawh; talh la, ei rawh,’ mi tiin ka hre bawk a. 8 Nimahsela, keiin, ‘Lalpa, ni lo ve; thiang lo leh bawlhhlawh eng mah rêng ka kaah a lût ngai lo,’ ka ti a. 9 Nimahsela, vân ata aw chuan a vawi hnihnaah, ‘Pathianin a tihthianghlim tawh chu nangin thiang lo ti suh,’ tiin mi chhâng a. 10 Chutiang hlîr chuan vawi thum a lo awm a; tin, engkim chu vânah khai chhohvin a awm leh ta a. 11 Tin, ngai teh u, mi pathum Kaisari khua ata ka hnênah an rawn tîr a, kan awmna kawtah chuan an lo ding reng tawh a. 12 “Tin, Thlarauvin tu mah thlei bîk lova anmahni zui tûrin mi tîr a. Hêng unau paruk pawh hian mi zui ve a, mi inah chuan kan lût a; 13 tin, ani chuan kan hnênah, a ina vântirhkoh ding a hmuhzia leh, vântirhkoh chuan a hnênah, ‘Joppa khuaah mi tîr la, Simona, Petera an tiha chu han hruaitîr rawh; 14 ani chuan thu a hrilh ang chia, chumi thu chuan nang leh i chhûngte chu chhandamin in awm ang,’ a tihzia pawh min hrilh a. 15 Tin, thu ka sawi tirhin, Thlarau Thianghlim kan chunga a lo thlen tirh lai ang bawk khân an chungah a lo thleng ta a. 16 Tin, Lalpa thu, ‘Johanan tuiin mi a baptis ṭhin kha; amaherawhchu, nangni zawng Thlarau Thianghlimin baptisma in la chang ang,’ a tihziate kha ka lo hre chhuak leh ta a. 17 Chutichuan, Lalpa Isua Krista an rin veleh, Pathianin thilthlâwnpêk min pêk ang kha an hnêna a pêk ve ahnuin, kei tehlul hi Pathian hnial rual em ka nih?” a ti a. 18 Chûng thu chu an hriatin an ngawi ta a, “Chuti a nih chuan Pathianin Jentailte pawh nung atân sim a phal ta a nih tak chu,” tiin Pathian an fak ta a.
Antiokei khuaa kohhran
19 Tin, Stephana avânga an tihduhdaha darhte kha, Phoiniki ram te, Kupra thliarkâr te, Antiokei khua te thlengin an kal a, Juda-te hnênah chauh lo chuan tu hnênah mah thu chu an hril lo zêl a. 20 Nimahsela, an zînga a ṭhen chu Kupra thliarkâr leh Kurini khuaa mite an ni a, chûng mite chuan Antiokei khua chu an thlenin Grik-te hnênah pawh thu an sawi a, Lalpa Isua Chanchin Ṭha chu an hrilh ve ta a. 21 Tin, Lalpa kutin anmahni a ṭanpui a; mi tam takin an ring a. Lalpa lam chu an hawi ta hlawm a. 22 Tin, an chanchin thu chu Jerusalem khuaa kohhran awmte bengah chuan a lo lût ta a; chutichuan, Antiokei khaw thleng chuan Barnaba chu an tîr chhuak ta a. 23 Tin, ani chu a va thleng a. Pathian khawngaihzia chu a hmuh chuan a lâwm hle a, ṭhahnemngai taka Lalpa vuan reng tûrin an zain a fuih ta a. 24 Barnaba chu mi ṭha tak a ni a, Thlarau Thianghlim leh rinnaa khat a ni. Tin, mi tam takin Lalpa hnênah an tel belhchhah ta a. 25 Tin, Barnaba chu Saula zawng tûrin Tarsa khuaah a kal a; 26 tin, a hmuh chuan Antiokei khuaah chuan a rawn hruai a. Tin, kum khat zet kohhrante inkhâwmnaah chuan an tel ve ṭhîn a, mi tam tak an zirtîr bawk ṭhîn a. Antiokei khuaah chuan a ni zirtîrteho chu “Kristian” an tih hmasak ber ni. 27 Tin, chûng lai chuan zâwlnei tute emaw, Jerusalem khua aṭangin Antiokei khuaah chuan an zuk kal a. 28 Tin, an zînga mi pakhat, a hming Agaba chu a ding a, khawvêl zawng zawngah ṭâm nasa tak a tla dâwn tih Thlarau hrilhin a hriattîr a; chu ṭâm chu Klaudia lal laiin a lo thleng ta a. 29 Tichuan, zirtîrteho chuan an theih tâwk ṭheuhvin, Judai rama unau awmte hnênah chuan chhawmdâwlna tûr thawn an tum a; 30 chu chu an ti ta ngei a, Barnaba leh Saula kutah chuan upate hnênah an thawn ta a.
Tihduhdahna kal zêl
1 Tin, chutih lai vêl chuan, Lal Herodan kohhrante zînga tute emaw tihduhdah tumin a kut a lek ta a. 2 Tin, Jakoba, Johana unau chu, khandaihin a sât hlum a. 3 Chu chuan Juda-te a tilâwm tih a hriatin Petera pawh chu man a tum lehzêl a (Chûng nite chu chhang dawidim telh loh ni a ni). 4 Tin, a man hnuah chuan tân inah a khung a, sipai pâwl li, pali ṭheuh zêlin a vên chhâwktîr a; kalhlên kût zawhah mi zawng zawng hnênah hruai chhuah a tum a. 5 Chuvângin, Petera chu tân inah chuan a awmtîr rih a; nimahsela, kohhranhovin ama tân ṭhahnemngai takin Pathian hnênah an ṭawngṭaisak ṭhîn a.
Lung in aṭangin Petera a chhuak
6 Tin, Heroda chuan a hruai chhuah dâwnin, chumi zân takah chuan Petera chu sipai pahnih inkârah khaidiat pahnih bunin a muhîl a; a vêngtute pawh kawngkhâr bulah an awm a, tân in chu an vêng a. 7 Tin, ngai teh, Lalpa vântirhkoh pakhat a kiangah a lo ding a, ripah chuan êng eng emaw a lo êng a; tin, Petera nâkah a bêng harh a, “Tho thuai rawh,” a ti a. Tin, a khaidiatte chu a kut ata a tla ta a. 8 Tin, vântirhkoh chuan a hnênah, “Puan veng la, i pheikhawk bun rawh,” a ti a. Tin, ani chuan chutiangin a ti a. Tin, vântirhkoh chuan a hnênah, “I puan bât ṭha la, mi zui rawh,” a ti a. 9 Tin, Petera chu a chhuak a, a zui ta a; vântirhkoh chêtzia chu a tak a ni tih a hre lo va, mumanga a hmuh emaw a ti zâwk a. 10 Tin, vêngtu tawntirh leh a dawttu an pelh hnu chuan, pâwn chhuahna tûr thîr kawngkhâr chu an va thleng a, chu chu an tân a inhawng chawp ta a; tin, an chhuak a, kawtthlêr pakhat an pêl a; tin, vântirhkoh chuan a kalsan ta nghâl a. 11 Tin, Petera chuan a harh veleh, “Lalpan a vântirhkoh a tîr chhuak a, Heroda kuta mi leh Juda mite beiseina zawng zawng ata mi chhandam tih tûnah dik takin ka hre ta,” a ti a. 12 Tin, a inngaihtuah zawhin, Johana, Marka an tih, chu mi nu Mari inah chuan a va kal a; chutah chuan ṭawngṭaiin mi tam tak an lo awm khâwm a. 13 Tin, sumhmun kawngkhâr a kik veleh a hming Rodi, nula pakhat, chhâng tûrin a va kal a. 14 Tin, Petera aw a hriat veleh, a lâwm avângin kawng chu hawng lovin a tlân lût leh ta zâwk a, kawngkhâr bulah Petera a ding tih a va hrilh a. 15 Nimahsela, anni chuan a hnênah, “I â ta a nih hi,” an lo ti a. Ani erawh chu, “Tihtakzet a ni,” tiin a ṭang ṭâlh a. Tin, anni chuan, “A vântirhkoh a nih chu,” an ti a. 16 Nimahsela, Petera chuan a kik reng a; tin, an han hawn chuan amah chu an hmu a, mak an ti hle a. 17 Chutichuan, ani chuan an ngawihna tûrin kutin a zâp a, Pathianin tân in ata amah a hruai chhuahziate chu a hrilh ta a. Tin, “Hêng thu hi Jakoba leh unaute va hrilh rawh u,” a ti a. Tin, a chhuak a, hmun dangah a kal ta a. 18 Tin, ni a chhuah veleh sipaihote chu, “Petera kha khawiah nge a awm tâk?” tiin buai namênin an buai ta lo va. 19 Tin, Heroda chuan a zawng a, a hmu si lo va, a vêngtute chu a chhuahchhâl a, tihhlum tûrin thu a pe ta a. Tin, Heroda chu Judai ram ata Kaisari khuaah a zuk kal a, chutah chuan a awm ta reng a.
Heroda thih thu
20 Tin, Tura leh Sidon khuaa mite chungah chuan a lungni lo êm êm a; tin, anni chuan Blasta, lal khum vêngtu chu ṭhianah an siam a, thu khat vuain a hnênah an lo kal a, an khaw lamin lal khaw lama pûr chaw ṭhîn an nih avângin rem an ngên a. 21 Tin, a ni tiam niin Heroda chuan lal puan a sin a, lalṭhutphahah a ṭhu a, an hnênah thu a sawi a. 22 Tin, mi zawng zawng chuan, “Pathian aw a nih hi, mihring aw a ni lo ve,” an ti a, an au ṭhîn a. 23 Tin, ani chuan Pathian hnênah chawimawina chu a pêk loh avângin, Lalpa vântirhkohvin chawplehchilhin a man a, rûlhûtin a ei a, a thi ta a. 24 Pathian thu erawh chu a darh a, a pung ta zêl a. 25 Tin, Barnaba leh Saula chuan rawng chu an bâwl zawhin, Jerusalem khua ata chu an kîr leh ta a, Johana, Marka an tiha chu an hnênah an hruai a.
Barnaba leh Saula zin tûra tirh an ni
1 Tin, Antiokei khuaa kohhranho awmte zîngah chuan thuhriltute leh zirtîrtute an awm; chûng chu Barnaba te, Sumeona, Nigera an tih te, Kurini khuaa mi Lukia te, Lal Heroda unau tûr Manaina te, Saula te an ni. 2 Tin, Lalpa rawng an bâwla, chaw an nghei laiin Thlarau Thianghlimin, “Barnaba leh Saula hi anmahni ka ruat chhan ti tûrin mi tihhransak rawh u,” a ti a. 3 Chutichuan, chaw an ngheia an ṭawngṭai zawh chuan an chungah kut an nghat a, an kaltîr ta a.
Kupra thliarkâr an thleng
4 Chutichuan, Thlarau Thianghlim tirh chhuahin an kal a, Selukai khuaah an chhuk a, chuta ṭangin Kupra thliarkârah lawngin an kal a. 5 Tin, Salamis khuaa an awm laiin, Juda inkhâwmna inahte Pathian thu an hril ṭhîn a; Johana pawh kha an rawng bâwl tûrin an hruai ve a. 6 Tin, thliarkâr chu Paphos khaw thlengin an fang chhuak a, dawithiam, zâwlnei der, Juda mi pakhat an hmu a, a hming chu Barisua a ni a. 7 Chu mi chu lal aiawhtu, Serjia Paula, mi fing tak hnêna awm a ni a. Chu lal aiawhtu chuan Barnaba leh Saula chu a ko va, Pathian thu hriat a tum a. 8 Nimahsela, Eluma (Barisua hming dang, a awmzia hi Dawithiam a ni a) chuan lal aiawhtu chu rin lohtîr tumin anni chu a lo dodâl a. 9 Chutichuan, Saula (Paula an tih bawk) chu Thlarau Thianghlimin a khat a, ani chu a en reng a, 10 “Nang mi bum leh huatthlalâk tinrênga khatpa, nang Diabola fapa, nang fel tinrêng malmâkpa, Lalpa kawng fel takte hi tihchhiat i bâng lo vang maw? 11 Hre rawh, tûnah Lalpa kut i chungah a tla a nih hi, i mit a lo del ang a, khaw êng i hmu rih lo vang,” a ti a. Tichuan, chhûm leh thimin amah chu a bawh ta nghâl a, kuta kaitu tûr zawngin a vâk a vâk ta a. 12 Tin, lal aiawhtu chuan chu thiltih chu a hmu a, Lalpa zirtîr thu chu mak a ti hle a, a ring ta a.
Pisidia rama Antiokei khua an thleng
13 Tin, Paula chu a hote nên chuan Paphos khua aṭang chuan lawngin an kal a, Pamphulia rama Perga khua an thleng a; tin, Johana khân anni chu a kalsan a, Jerusalem khuaah a kîr leh ta a. 14 Nimahsela, anni chu Perga khua ata an kal zêl a, Pisidia rama Antiokei khua an thleng a; tin, Chawlhniah inkhâwmna inah an lût a, an ṭhu a. 15 Tin, Dân Lehkhabu leh Zâwlneite Lehkhabu chhiar zawhin, inkhâwmna in hotuten an hnênah mi an tîr a, “Unaute u, mite fuihna thu eng emaw in neih chuan sawi rawh u,” an ti a. 16 Tin, Paula chu a ding a, kutin a zâp a, “Israel mite leh Pathian ṭihtute u, ngai teh u. 17 Hêng Israel chite Pathian hian min thlahtute a thlang a, Aigupta rama an thang lai khân a chawimawi a, chungnung kutin chuta ṭang chuan a hruai chhuak ta a. 18 Tin, kum sawmli lai thlalêrah khân an thiltihte chu a en thei reng a. 19 Tin, Kanaan rama hnam sarih a tihtlâwm hnu khân, an ram chu luah tûrin a pe zêl a, 20 kum zali leh sawmnga chhûng zawng khân. Chûng hnuah chuan rorêltute a pe ṭhîn a, zâwlnei Samuela thleng khân. 21 “Tin, chumi hnuah chuan lal an dîl a; tichuan, Pathianin Saula, Kisa fa, Benjamin chia mi kha an hnênah a pe a, kum sawmli chhûng atân. 22 Tin, ani chu a sawn bo hnu khân an lal atân Davida a siam ta a; Pathianin chumi thu chu hriattîrin, ‘Davida, Jesaia fa, ka thinlung ang pu mi ka chhar ta, ani chuan ka duh zâwng ang apiang a ti ang,’ a ti a. 23 “Chu mi thlahte zîngah chuan Pathianin, thutiam ang zêlin, Israel-ho hnênah Chhandamtu Isua a rawn thlen a; 24 a lo kal hmain Johanan simna baptisma thu, Israel mi zawng zawng hnênah a lo hrilh tê tê a. 25 Tin, Johanan a rawngbâwlna a zawh dâwn lai khân, ‘Nangnin tu-ah nge mi ruat? Ani chu ka ni lo ve. Nimahsela, ngai teh u, ka hnuah mi tu emaw a lo kal dâwn a ni, kei hi zawng a kephaha pheikhawk phelh tlâk pawh ka ni lo ve,’ a ti a. 26 “Unaute u, Abrahama thlaha fate u, in zînga Pathian ṭih zawng zawngte u, keimahniho hnênah hian hêng chhandamna thu hi min rawn thawn chhuak a nih hi. 27 Jerusalem khuaa awmten an hotute nên, ani chu an hriat loh avâng leh zâwlneite thu, Chawlhni apianga chhiar ṭhin kha, an hriat hek loh avângin, ani chu thiam loh chantîrin, chumi thu chu an hlen ta a. 28 A thihna khawp meuh a chungah eng mah an hmuh loh pawhin, Pilata hnênah tihhlum an ngên a. 29 Tin, a thu zâwlneiten an ziak lâwk zawng zawng kha a hlen zawhin, thing ata chu an la thla a, thlânah an zalh ta a. 30 Nimahsela, Pathianin mitthi zîng ata a kaitho leh ta a; 31 tin, Galili ram ata Jerusalem khuaa ama ruala chho vete hnênah chuan ni rei tak chhûng a inlâr ṭhîn a; chûng mite chu tûnah hian mi hnênah a thuhretute an ni e. 32 Keini pawhin thlahtute hnêna thutiam kha, a chanchin lâwmawm kan rawn hrilh che u hi. 33 Khatia Pathianin Isua a kaihthawhah khân, kan fate hnênah hian chûng chu a hlen a ni; Sam pahnihnaah, ‘Ka Fapa i ni e, vawiinah hian ka hring a che,’ tih ziak ang bawk khân. 34 Ṭawihna hmuna kal leh lo tûrin, Pathianin ani chu mitthi zîng ata a kaihthawh tûrzia thu chu heti hian a sawi, ‘Davida hnêna khawngaihna ka tiam tlatte kha nangmah ka pe ang che,’ tiin. 35 Chuvângin, hla dangah, ‘I Mi Thianghlima chu ṭawih ral i phal lo vang,’ a ti bawk a. 36 Davida zawng, Pathian rorêlsak angin a dam rualpuite rawng a bâwl zawhah khân a muhîl a, a thlahtute hnênah an zalh a, a ṭawih ral tawh alâwm; 37 Pathian kaihthawh erawh kha chu a ṭawih ral loh kha. 38 “Chutichuan, unaute u, hre rawh u; amah avâng chuan sual ngaihhnathiamna thu in hnênah hrilh a nih hi; 39 tu pawh a ring apiang engkimah ama thiam chantîrin an awm, chûngah chuan Mosia dânin thiam chantîrin in awm thei lo ve. 40 Chuvângin, fîmkhur rawh u; chuti lo chuan, zâwlneite lehkhabua an sawi kha in chungah a lo thleng dah ang e, 41 ‘Hmusittute u, en rawh u, Mak ti ula, boral rawh u; In dam chhûng hian thil kawng khat ka tih hi, Chu thil chu miin hrilh che u mah sela, In awih tawp lo vang,’ tih kha,” a ti a. 42 Tin, an chhuahin Chawlhni lehah chûng thu chu sawi leh tûrin an ngên a. 43 Tin, inkhâwmhote chu an ṭîn veleh, Juda-te leh an saphun Pathian ngaihsak zînga mi tam takin Paula leh Barnaba chu an zui zêl a; anni chuan an lo bia a, Pathian khawngaihnaah chuan awm reng tûrin an fuih a. 44 Tin, Chawlhni lehah chuan a khua thawin Pathian thu ngaithla tûrin an rawn inkhâwm a. 45 Nimahsela, Juda-ten mipuite chu an hmuh veleh an îtsîk êm êm mai a; Paula thusawi chu an hnialkalh a, an sâwt hle a. 46 Tin, Paula leh Barnaba chuan huai takin an sawi chhuak a, “Pathian thu hi nangmahni hnênah sawi hmasak tûr rêng a ni; nimahsela, in hnar kîr a, chatuana nung tlâk lova in inruat tâk ahnuin, hre rawh u, Jentailte lam kan hawi ta ve ang. 47 “Chutiang chuan Lalpan thu min pe a ni, ‘Jentailte tiêngtuah ka ruat a che, Kâwlkil thlenga Chhandamtua i awm theihna tûrin,’ tih ziak ang khan,” an ti a. 48 Tin, Jentailte chuan chûng thu chu an hriatin an lâwm a, Pathian chu an chawimawi a; tin, chatuana nung tûra ruat apiang chuan an ring ta a. 49 Tin, Lalpa thu chu chumi ram khua vêlah chuan a darh ta a. 50 Nimahsela, Juda-te chuan hmeichhe zahawm, Pathian ngaihsakte leh khuaa upahote chu an fuih a, Paula leh Barnaba chu an tihduhdahtîr a, an ram ata an hnawt chhuak ta a. 51 Tin, anni chuan an chungah an kephaha vaivut an thing thla a, Ikonion khua an thleng a. 52 Tin, zirtîrhote chu lâwmna leh Thlarau Thianghlimin an khat hlawm a.
Ikonion khuaah
1 Tin, Ikonion khuaah chuan Juda-te inkhâwmna inah an lût dûn a, thu an sawi ṭhîn a; chutichuan, Juda leh Grik tam tak pawhin an ring ta hial a. 2 Nimahsela, ring duh lo Juda-ten Jentailte an fuihpawrh a, unaute chu an huattîr a. 3 Chuvângin, Lalpaah huai taka thu sawiin chutah chuan rei fe an awm a, ani chuan chhinchhiahna leh thil makte an kuta tihtîrin, a khawngaih thu a hriattîr ṭhîn a. 4 Nimahsela, khuaa mipuite chu an inkhing ta a; a ṭhenin Juda-te chu an ṭan a, a ṭhenin tirhkohte chu an ṭan a. 5 Tin, Jentailte, Juda-te, an hotute nên chuan tirhkohte chu zahthlâk taka siam leh lunga den tuma an beih dâwn laiin, 6 anni chuan an lo hria a, Lukaoni ram vêkah chuan Lustra leh Derbe khuaahte leh a vêl ramahte an tlân bo va; 7 chûngah chuan Chanchin Ṭha an hril zêl a.
Lustra leh Derbe khuaah
8 Tin, Lustra khuaah chuan ke zeng tu emaw a ṭhu ṭhîn a, a pian tirh ata kebai rêng a ni a, kein a kal ngai lo va. 9 Chu mi chuan Paula thusawi a ngaithla a; tin, Paula chuan ani chu a en reng a, damna tûrin rinna a nei tih a hria a, 10 aw ring takin, “I kein ding ngîl rawh,” a ti a. Tin, ani chu a zuang tho va, kein a kal ta a. 11 Tin, mipuiten Paula thiltih chu an hmuh veleh Lukaoni ṭawngin ring takin, “Pathiante chu mihring angin kan hnênah an lo chhuk ta a nih hi!” an ti a. 12 Tin, Barnaba chu “Jupita” an ti a, Paula chu thusawitu zâwk a nih avângin “Merkuria” an ti a. 13 Tin, Jupita, a biak in dai pâwna awm chu, a puithiamin sebâwngpate leh pangpâr ṭhi hruite kawngkhâr kiangahte a rawn la a, mipuite nên chuan biak nân talh an tum ta a. 14 Nimahsela, tirhkoh Barnaba leh Paula chuan chu chu an hriat veleh an puan an pawt thlêr a, mipui zîngah chuan an zuang lût a, an au va, 15 “Pute u, hêng thil hi engah nge in tih? Keini pawh in nungchang ang pu mihring kan nih hi; hêng thil lawilote hi in hawisana, vân te, lei te, tuifinriat te, a chhûnga awm zawng zawng nêna siamtu Pathian nung hnênah chuan in lo pakaina tûrin Chanchin Ṭha kan rawn thlen che u a nih hi. 16 Chu Pathian chuan hmânlaiin hnam tin mahni kawng ṭheuh zawh a phal ṭhîn a; 17 nimahsela, amah hriattîrna awm lovin a insiam lo; chutin thil a tiṭha ṭhîn a, vân ata ruahte leh kum ṭhat kumte a pe che u a, in rilru ei tûr leh lâwmnain a tihkhah ṭhin che u kha,” an ti a. 18 Tin, chûng thu chuan mipuiten anmahni biak nâna ran an talh tûr chu an khap zo ta hrâm hrâm a. 19 Nimahsela, Antiokei leh Ikonion khuaa Juda tute emaw chutah chuan an lo kal a, mipuite chu an thlêm thlu ta a; tichuan, Paula chu lungin an dêng a, thia an rin avângin khua ata chu an hnûk chhuak ta a. 20 Nimahsela, zirtîrhote chu a vêla an din laiin a lo tho va, khuaah chuan a lût leh ta a. Tin, a tûkah chuan Barnaba nên Derbe khuaah an kal ta a.
Suria ram Antiokei khuaah an kîr leh
21 Tin, chumi khuate hnênah chuan Chanchin Ṭha an hrilh a, zirtîr tam tak an siam hnuin Lustra khuaah te, Ikonion khuaah te, Antiokei khuaah te an kîr leh zêl a, 22 “Hrehawm tam tak tuarin Pathian ramah kan lût tûr a ni rêng a ni,” tiin zirtîrhote rilru an tinghet a, rinnaah chuan awm reng tûrin an fuih zêl a. 23 Tin, kohhran pâwl tinah chuan upate an ruatsak a, chaw nghei chunga an ṭawngṭai zawhin, an rin Lalpa hnênah chuan a kawltîr zêl ṭhîn a. 24 Tin, Pisidia ram chu an fang chhuak a, Pamphulia ram an thleng a. 25 Tin, Perga khuaa thu an hril zawhin Attalia khuaah an zuk kal a; 26 chuta ṭang chuan lawngin an chhuak a, Antiokei khua chu an thleng leh ta a, chu chu an thiltih zawh tâk chu ti tûra unauten Pathian khawngaihna kawltîra an chhuahtîrna kha a ni. 27 Tin, an thlen hnuin kohhranhote chu an ko khâwm a, Pathianin anmahni hmanga thil a tih zawng zawngte leh, Jentailte tâna rinna kawngkhâr a hawnsakziate chu an hrilh a. 28 Tin, zirtîrhote hnênah chuan rei fe an awm ta a.
Jerusalem inkhâwmpui
1 Tin, mi tute emaw Judai ram ata an lo chhuk a, “Mosia dân anga serh in tantîr loh chuan chhandam in ni thei lo vang,” tiin unaute chu an zirtîr a. 2 Chutichuan, Paula leh Barnaba chu anmahni nên inhnial namêna an inhnial lohva, an inkhin tlat avângin, Paula leh Barnaba chu an zînga tute emaw nên, chu thubuai chungah chuan, Jerusalem khuaa tirhkohte leh upate hnênah chho tûrin an ruat a. 3 Chutichuan, kohhrante chuan an han thlah a, anni chuan Jentailte hawi kîr lehzia thu chu hril zêlin, Phoiniki ram leh Samari ram an fang chhuak ta a; tichuan, unaute zawng zawng an tilâwm êm êm a. 4 Tin, Jerusalem khua an han thlen chuan kohhranhote, tirhkohte, upate chuan an lo lâwm a; tin, Pathianin anmahni hmanga thil a tih zawng zawngte chu an hrilh a. 5 Nimahsela, Pharisai pâwla mi, ring ve tute emaw an tho va, “Jentailte chu an serh tan tûr a ni, Mosia dân awih pawh an hnênah tiam kher tûr a ni,” an ti a. 6 Tin, tirhkohte leh upate chu, chumi thu chu ngaihtuah tûrin an inkhâwm a. 7 Tin, an inhnial chiam hnuin Petera a tho va, an hnênah, “Unaute u, Jentailten keima kaa Chanchin Ṭha thu hriaa awih tûra, Pathianin hmâna in zîng ata mi ruatzia kha in hria e. 8 Tin, rilru hretu Pathianin keini min pêk ang bawk khân Thlarau Thianghlim an hnênah pe vein, an chungah a lâwm tih a hriattîr a; 9 tin, keini leh anni thlei bîk lovin rinin an rilru a tithianghlim a. 10 Chutichuan, min thlahtu leh keini zawh tawh loh nghâwngkawl kha, tûnah zirtîrhote chunga nghah tumin engati nge Pathian fin in hnial kalh le? 11 Anmahni rin ang bawk hian keini pawhin Lalpa Isua khawngaihna avânga chhandam tûr niin kan inring si a,” a ti a. 12 Tichuan, mipui zawng zawng chu an ngawi reng a, Barnaba leh Paulan Pathianin anmahni hmanga Jentailte zînga chhinchhiahna leh thil mak a tih thu kha an hrilh chhûng zawng an ngaithla a. 13 Tin, an sawi zawhin Jakoban a sawi ve thung a: “Unaute u, ka thu ngaithla rawh u, 14 Pathianin ama hming pu atân an zîng ata mite la chhuak tûrin, Jentailte a kan ṭan tirh dân chu Sumeona hian a sawi ta a. 15 Tin, chûng thu leh zâwlneite thu hi a inhmeh a ni: 16 ‘Chûng zawhah chuan ka kîr leh ang a, Davida bâwkte chim kha ka siam leh ang a, A chhe lai apiang pawh ka rem chho leh ang; 17 Mi dang, Jentail zawng zawng ka hming mi ṭâwmhote chuan, Lalpa an zawn nân. Chu bâwktê chu ka tungding ang,’ tiin. 18 Khawvêl siam tirh ata hêng thu hriattîr ṭhîntu Lalpa chuan a ti e, tih ziak hi. 19 “Chuvângin, heti hian ka ruat a ni, Jentailte zînga Pathian lam hawite chu tihrehawm lo ila, 20 milem biakna thil bawlhhlawh ei te, inngaih te, sa reh hlum leh thisen eite bânna tûrin an hnênah lehkha thawn zâwk ila ka ti ber a ni. 21 Mosian hmânlai ata tawh khaw tinah a thu tlângaupuitu a nei ṭhîn si a, inkhâwmna inahte Chawlhni apiangin a thu chu chhiar a nih ṭhin kha,” a ti a.
Jentail ringtute tâna lehkhathawn
22 Tin, tirhkohte, upate, kohhran zawng zawngte nên chuan, an pâwla mi thlana, Paula leh Barnaba hnênah Antiokei khuaa kaltîr ṭha an ti a; an thlante hming chu Juda (Barsabba an tih) leh Sila an ni, chu mite chu unaute zînga hotu deuh an ni a. 23 Tin, hetiang hian an ziak a, an kutah an thawn a: “Tirhkohte leh unaute zînga upaten Antiokei khua te, Suria ram te leh Kilikia rama Jentail unau awmte chibai an bûk e. 24 “Kan pâwl zînga mi tuten emaw thu sawiin an tibuai che u a, in rilru an timangang tih kan hria e, an hnênah thu eng mah kan pe si lo va. 25,26 Chuvângin, thu khat vuaa kan inkhâwmin, kan duh tak Barnaba leh Paula, Lalpa Isua Krista hming avânga thih dâwn lote kal rual hian, mi thlante in hnêna rawn kaltîr ve ṭha kan ti a. 27 Chutichuan, Juda leh Sila kan rawn tîr a nih hi, anni pawhin hêng thu bawk hi ṭawngkain an hrilh ang che u. 28 Thlarau Thianghlim leh keinin, hêng thu pawimawh lo hi chu, phurrit zual in chungah nghat lo ila a ṭha kan ti; 29 milem biakna sa ei te, sa thisen ei te, sa reh hlum ei te, inngaih te bâng ula kan ti; hêng hi in bân chuan in tân a ṭha ang. Dam takin awm rawh u,” tiin. 30 Chutichuan, an tirhin an kal a, Antiokei khua chu an zuk thleng a; tin, mipui an ko khâwm a, lehkha chu an pe a. 31 Tin, an chhiar zawhin thlamuanna thu avâng chuan an lo lâwm ta hle a. 32 Tin, Juda leh Sila chu zâwlnei an ni bawk a, thu tam takin unaute chu an thlamuan a, an tinghet a. 33 Tin, chutah chuan rei deuh an awm hnuin, anmahni tîrtute hnêna hâwng leh tûrin, unaute chuan thlamuang takin an chhuahtîr leh ta a. 35 Paula leh Barnaba erawh chu Antiokei khuaah chuan Lalpa thu zirtîr leh hrilin an awm reng a, mi dang tam tak nên.
Paula leh Barnaba an inṭhen
36 Tin, ni eng emaw zât hnuah chuan Paulan Barnaba hnênah, “Tûnah kal leh ila, khaw tina Lalpa thu kan hrilhna apianga unau awmte kha kan zêl ila, an awm dân i en ang,” a ti a. 37 Tin, Barnaban Johana (Marka an tih chu) an hnênah hruai a tum a. 38 Paula erawh chuan ani chu an hnêna hruai ṭha a ti lo, Pamphulia ramah anmahni a kîrsana, hnathawhnaa an hnêna a kal ve tâk loh avâng khân. 39 Tichuan, nasa takin an inhnial ta a; chutichuan, an inṭhen a, Barnaban Marka chu a hnênah a hruai a, Kupra thliarkâr lamah lawngin a kal ta a. 40 Paula erawh chuan Sila a thlang a, unauten Lalpa khawngaihnaa an kawltîr hnuin a kal chhuak ta a. 41 Tin, kohhrante chu tinghet zêlin Suria leh Kilikia ram a fang chhuak ta a.
Timothean Paula leh Sila a zui
1 Tin, Derbe khuaah leh Lustra khuaah chuan a kal bawk a; tin, chutah chuan a hming Timothea, zirtîr pakhat a awm; ani chu ring ve Juda hmeichhe fapa a ni a, a pa erawh chu Grik a ni; 2 Lustra leh Ikonion khuaa unau awmte chuan ani chu an fak ṭhîn a. 3 Paulan ani chu an hnêna kal veah a duh a; tichuan, chumi lama Juda awmte avâng chuan a serh a tansak a, a pa chu Grik a ni tih an hre vek si a. 4 Tin, khaw tina an kal pahin, Jerusalem khuaa tirhkoh leh upa awmte thurêl kha zawm atân unaute hnênah an pe zêl a. 5 Chutichuan, kohhrante chu rinnaah chuan an nghet ta a, ni tin an pung ta deuh deuh va.
Troas khuaah Paulan zêl a hmu
6 Tin, Thlarau Thianghlimin Asia rama thuhril a khap avângin, Phrugia leh Galatia ram chu an fang chhuak ta a; 7 tin, Musia ram kiang an thlenin Bithunia rama luh an tum a; nimahsela, Isua thlarauvin a phal si lo va. 8 Chutichuan, Musia ram chu an pêl a, Troas khuaah an chhuk ta a. 9 Tin, zânah Paulan mumang angin Makedonia rama mi pakhat dingin, “Makedonia ramah lo kai la, min pui rawh,” tia ngên chiamin a hmu a. 10 Tin, chu mang chu a man zawh veleh Makedonia ramah chuan kal kan tum ta nghâl a, an hnêna Chanchin Ṭha hrilah Pathianin min ko tih kan hria a.
Philippi khuaa Ludi pianthar thu
11 Tin, Troas khua ata lawngin kan chhuak a, tluang takin Samothraki khuaah kan kal a, a tûkah chuan Neapoli khuaah kan kal leh a; 12 tin, chuta ṭang chuan Philippi khuaah kan kal a, chumi khua chu Makedonia rama khaw pakhat a ni a, chumi bialah chuan khaw pawimawh ber a ni a, Rom khuaa mi pêmte khua a ni. Chumi khuaah chuan ni tam deuh kan châm a. 13 Tin, Chawlhniah chuan kulh kawngkhâr pâwn lamah, lui kamah, ṭawngṭaina hmun nia kan rinah chuan kan kal a; tin, kan ṭhu a, hmeichhe lo kal khâwmhote hnênah chuan thu kan sawi a. 14 Tin, a hming Ludi, puan senduk zuartu, Thuatira khuaa mi, Pathian betu hmeichhe pakhatin kan thu a hria a; tin, Paula thusawi chu zâwm tûrin Lalpan a thinlung a tivâr ta a. 15 Tin, amah leh a chhûngten baptisma an chan zawhin, “Lalpa ring takzeta mi ruat chuan, ka inah lo thleng rawh u,” tiin min ngên chiam a, min chelh ta a.
Philippi khuaa lung in tân
16 Tin, ṭawngṭaina hmunah chuan kan kal laiin, nula tu emaw ramhuai aienthiam zâwlin min tâwk a, ani chuan a aien avângin a pute chu sum tam tak a hmuhtîr ṭhîn a. 17 Chu mi chuan Paula leh keini min zui a, “Hêng mi chhandamna kawng hrilhtu che u hi, Chungnungber Pathian bawih an nih hi,” tiin a au va. 18 Chutiang chuan ni rei tak a ti ṭhîn a. Chutichuan, Paula chu a lungni ta lo va, a hawi a, ramhuai hnênah chuan, “Isua Krista hmingin a kawchhûng ata chhuah thu ka pe a che,” a ti a. Tin, chutih lai tak chuan a chhuak ta nghâl a. 19 Tin, a pute chuan an sum hmuhna a bo tih an hriatin, Paula leh Sila chu an man a, hotute hmaah dâwr hmunah an hnûk lût a. 20 Tichuan, rorêltute hnênah an hruai a, “Hêng mite hi Juda-te an ni a, kan khua an tibuai êm êm a, 21 dân eng emaw kan lawm leh zawm thiang lote hi an hril ṭhîn a, Rom mi kan ni si a,” an ti a. 22 Chutichuan, mipuite pawh chu tirhkohte bei tûrin an lo thawk ve a, rorêltute chuan an puante an phih hlihsak a, tianga vuak thu an pe a. 23 Tin, vawi tam tak an vuak zawhin tân inah an khung a, a vêngtu hnênah him taka vên tûr an ti tlat a; 24 chuti kauva thu an pêk avâng chuan ani chuan rip chhûngnungah a khung a, an keahte chuan thingkawl a buntîr tlat a. 25 Nimahsela, zanlaiah Paula leh Sila chu Pathian hnênah an ṭawngṭai a, hla an sa a, mi tângten an ngaithla a; 26 tin, thawklehkhatah lîr nasa takin a lo nghîng a; chutichuan, tân in lungphûmte lam chu a nghîng a; tin, kawngkhâr zawng zawng chu a inhawng nghâl a, mi tin kawl bunte chu a lo inphelh ta vek a. 27 Tin, a vêngtu chu a muhîl a lo harh a, tân in kawngkhârte chu inhawngin a hmu a, mi tângte chu an tlan bo emaw a ti a, a khandaih a phawi a, a intihlum dâwn a. 28 Nimahsela, Paula chu aw ring takin a au va, “Eng mah intih suh; kan zain hetah kan la awm vek alâwm,” a ti a. 29 Tin, a vêngtu chuan khâwnvârte a lam a, a zuang lût a, hlauva khûr chungin Paula leh Sila hmaah chuan a bawkkhup a; 30 tin, anni chu a hruai chhuak a, “Pute u, chhandama awm tûrin eng nge ka tih tûr?” a ti a. 31 Tin, anni chuan, “Lalpa Isua ring la; tichuan, chhandamin i awm ang, nang leh i chhûngte nên,” an ti a. 32 Tin, a hnênah leh a ina awm zawng zawng hnênah chuan Lalpa thu an sawi a. 33 Tin, chumi zânah, chumi lai la la chuan a hruai a, an vuakna vualte chu a sil fai a; tin, ani leh a chhûngte zawng zawng chuan baptisma an chang ta nghâl a. 34 Tin, a inah a hruai chho va, ei tûr a hlui a; tin, Pathian an rin avângin, ani chu a chhûngte zawng zawng nên an hlim ta êm êm a. 35 Tin, ni a chhuahin rorêltute chuan, “Kha mite kha chhuah rawh,” tiin mi mantute an tîr a. 36 Tin, tân in vêngtu chuan Paula hnênah an thu a hrilh a, “Rorêltute chuan chhuah tûr che uin mi an rawn tîr a ni; chuvângin, tûnah lo chhuak ula, thlamuang takin kal rawh u,” a ti a. 37 Nimahsela, Paula chuan an hnênah, “Rom mi kan ni si a, kan thiam leh thiam loh hre lovin vântlâng mit hmuhin min vua a, tân inah min khung a; tûnah hian a rûkin min hnawt chhuak dâwn vei a ni maw? A ni tawp lo vang; anmahni ngei lo kal sela, min rawn hruai chhuak rawh se,” a ti a. 38 Chutichuan, mi mantute chuan chûng thu chu rorêltute hnênah chuan an hrilh a. Tin, Rom mi an ni tih an hriat chuan an hlau ta a; 39 tin, an va kal a, an thlêm chiam a, an hruai chhuak a, khua ata chu kal bovah an ngên a. 40 Tin, tân in ata chu an chhuak a, Ludi inah chuan an lût a; tin, unaute chu an hmu a, an thlamuan a, an chhuak ta a.
Thessalonika khuaah
1 Tin, Amphipoli khua leh Apollonia khua an kal pêl a, Thessalonika khua an thleng ta a, chutah chuan Juda-te inkhâwmna in a awm a; 2 tin, Paula chu a dân pângngaiin an hnênah a lût a, Chawlhni vawi thum Pathian Lehkha Thu aṭangin khûn taka chhûtpuiin, 3 Krista chu hrehawm tuar tûr rêng a nihzia te, mitthi zîng ata pawh tholeh tûr rêng a nihzia te chu a hrilhfiah a, a tilang ṭhîn a; “He Isua, a thu ka hrilh che u hi, amah hi Krista chu a ni,” a ti bawk ṭhîn a. 4 Tichuan, an zînga ṭhenkhat chu thlêm thlûkin an awm a, Paula leh Sila chu an pâwl ta a; Pathian ngaihsak Grik mipui tam tak leh hmeichhe puipa tam tak nên. 5 Nimahsela, Juda-ten an huphurh a; dâwr hmuna mi sual thatchhia tute emaw an hnênah an hruai a, mipui an ko khâwm a, khua zawng zawng chu an chawk buai a; Jasona in chu an rawn ṭhâwng a, vântlâng hnêna hruai chhuah tumin. 6 Tin, anni chu an hmu lo va, Jasona leh unau dang tute emaw chu khaw hotute hnênah an hnûk lût a, an au va, “Khawvêl chawk buaitute kha hetah pawh an lo kal a, 7 Jasona hian a lo thleng vei a; hêngho zawng zawng hi, ‘A hming Isua, lal dang a awm,’ tiin, Kaisara thu kalhin an awm ṭhîn a ni,” an ti a. 8 Tin, mipui leh khaw hotute chuan chûng thu chu an han hriat chuan an buai ta a; 9 tin, Jasona leh mi dangte hnên ata chu an aia hrên tûr englo an la a, an chhuah ta a.
Beroia khua an thleng
10 Tin, unaute chuan a zân a zânin Paula leh Sila chu Beroia khuaah an kaltîr ta nghâl a; chuta an va thlen chuan Juda-te inkhâwmna inah an lût a. 11 Chuta mite chu Thessalonika khuaa mite ai chuan an lo ṭha zâwk a; chutichuan, rilru lâwm takin thu chu an pawm a, an thusawi chu a dik leh dik loh hriat nân ni tin Pathian Lehkhaah an zawng ṭhîn a. 12 Chutichuan, chûngho zînga mi tam tak chuan an ring ta a; Grik hmeichhe zahawmte leh mipate pawh duaiin an ring ta lo bawk a. 13 Nimahsela, Thessalonika khuaa Juda-hote chu, Paulan Beroia khuaah Pathian thu a hril tih an hriat veleh, chutah pawh chuan an va kal a, mipui an fuihpawrh a, an tibuai leh ta a. 14 Chutichuan, unaute chuan tuifinriat thlenga kal tûrin Paula chu an tîr chhuak ta nghâl a, Sila leh Timothea erawh chu chutah chuan an la awm reng a. 15 Tin, Paula hruaitute chuan Atheni khaw thlengin an hruai a; tin, Sila leh Timothea chu theihtâwpa a hnêna kal thuaina tûr thuchah sinin an haw ta a.
Atheni khuaah
16 Tin, Paulan Atheni khuaah anni chu a lo nghah lai chuan, khua chu pathian lema khatin a hmu a, a rilruin a helh ta a. 17 Chutichuan, inkhâwmna inah Juda-te leh Jentail Pathian ngaihsakte a hnial ṭhîn a, dâwr hmunah pawh chuta lo awm apiangte chu ni tin a hnial bawk ṭhîn. 18 Tin, Epikuria mi leh Stoik mi zînga mi fing tute emaw pawhin ani chu an rawn hnial a. A ṭhenin, “He mi kamtam hian eng nge sawi a tum?” an ti a. A ṭhenin (Isua thu leh thawhlehna thu a hril avângin) “Ram dang pathiante thu hriltu a ni âwm e,” an ti a. 19 Tin, ani chu an chelh a, Areopagi-ah chuan an rawn hruai a, a hnênah, “He zirtîrna thar i sawi ṭhin hi min hriattîr thei ang em? 20 Thil mak eng emaw kan bengahte i rawn thlen a ni; chutichuan, hêng thil awmzia hi hriat kan duh e,” an ti a. 21 Atheni khuaa mi zawng zawng chu, an khuaa mikhual awmte pawh, an hman châng apiangin thu thar tawh phawt chu sawiin emaw, a ngaithla talin emaw an awm chawt ṭhîn rêng a ni. 22 Tin, Paula chu Areopagi lai takah chuan a ding a, a sawi a. “Nangni Atheni khuaa mite u, engkimah sakhaw ngaihsak mi tak in ni tih ka hria e. 23 Ka lên paha in chibai bûkate ka en laiin maichâm pakhat, a chunga, ‘Hriat Loh Pathian Tân’ tia ziak ka hmu a ni. Chutichuan, hre lova chibai in bûk ṭhina kha, chu mia thu chu ka hrilh che u a nih hi. 24 Pathian, khawvêl leh a chhûnga thil zawng zawng siamtu chu, lei leh vân Lal a nih avângin kuta sak inahte a awm lo va; 25 thil tlachham angin mihring kuta rawngbâwlsakin a awm hek lo, amah ngei chu engkim hnêna nunna te, thâwkna te leh thil zawng zawng petu a ni zâwk e. 26 Tin, lei chung zawng zawnga awm tûrin bul hmun khat vekin hnam tin a siam a, an tân hun bite a ruat a, an awmna rîte pawh a khamsak a, 27 Pathian an zawna, an dap an dapa, an hmuh mial theih nân; nimahsela, ani chuan min hlat lo ṭheuh si a. 28 Amah avângin kan nung, kan che, kan awm a ni si a; in hla phuah thiam tute emaw pawhin, ‘Keini pawh a thlahte kan ni si,’ tia an sawi ang khân. 29 Chutichuan, Pathian thlahte kan nih ahnuin, Pathian pangti chu rangkachak te, tangkarua te, lung te, mihring themthiam leh remruata chher te ang hi emaw tih, kan ring tûr a ni lo ve. 30 Chutichuan, Pathianin kan hriat loh laite a hai der ṭhîn a; nimahsela, tûnah hian ram tina mi zawng zawng sim tûr thu a pe ta a ni, ni a tiam avângin; 31 chumi niah chuan a mi ruata chu, leia mite fel takin a ngaihtuahtîr ang; chu chu Pathianin amah chu mitthi zîng ata kaithovin, mi zawng zawng hnênah a hriattîr tawh a ni,” tiin. 32 Tin, mitthi zîng ata thawhlehna thu chu an hriat veleh a ṭhenin an nuihsan a; a ṭhenin, “He thu hi i hnênah kan la ngaithla leh ang e,” an ti a. 33 Chutichuan, Paula chu an zîng ata a chhuak ta a. 34 Nimahsela, mi tute emaw a hnênah an tel ta tlat a, an ring ta a; chûng zînga ṭhenkhat chu Areopagi-a mi Dionusia leh hmeichhe pakhat, a hming Damari leh an hnêna mi dangte nên chuan an ni.
Korinth khuaah
1 Chûng thil hnuah chuan Paula chu Atheni khua ata chu a chhuak a, Korinth khuaah a kal ta a. 2 Tin, a hming Akuila, Juda pakhat a hmu a, chu mi chu Ponto rama piang a ni a, Klaudian Juda zawng zawng Rom khua ata chhuah thu a pêk avângin, a nupui Priskilli nên Itali ram ata lo kal hlim an ni a. 3 Tin, Paula chu chu mite hnênah chuan a thleng ta a, tin; an hnathawh ang thawk a nih avângin anmahni a hrawn a, an hnênah a thawk ve ṭhîn a; an hnathawh chu puan in siam a ni a. 4 Tin, Chawlhni apiangin inkhâwmna inah khûn takin thu a hril ṭhîn a, Juda-te leh Grik-te chu thlêm thlûk a tum ṭhîn a. 5 Tin, Sila leh Timothea chu Makedonia ram ata chu an lo chhukin, Paula chu thuhril chauhvin a awm ta a. Isua kha Krista chu a ni tih Juda-te hnênah a hrilhfiah ṭhîn a ni. 6 Nimahsela, an dodâla an sâwtin, Paulan a puan a thing a, an hnênah, “In thihna mawh chu nangmahnin phur ang che u; kei zawng ka hul a ni e; tûn achinah Jentailte hnênah ka kal ang,” a ti a. 7 Tin, chuta ta chu a kal a, a hming Tita Justa, mi pakhat inah a lût a, chu mi chuan Pathian a be ṭhîn a; a in pawh chu inkhâwmna in nêna inzawm a ni. 8 Tin, Krispa, inkhâwmna in hotu chuan a chhûngte zawng zawng nên Lalpa an ring a; Korinth khuaa mi tam tak pawhin an hria a, an ring ve a, baptisma an chang ta a. 9 Tin, zânah Lalpan Paula hnênah chuan mumang angin, “Hlau suh la, ngawi lovin thu sawi zêl rawh; 10 kei i hnênah ka awm alâwm, tina tûr chein tu mân i chungah kut an thlâk lo vang; he khuaah hian mi tam tak ka nei si a,” a ti a. 11 Tin, Paula chu chutah chuan, Pathian thu zirtîrin an zîngah kum khat leh thla ruk a awm ta a. 12 Tin, Galliova Akaia rama lal aiawha a awm laiin Juda-ten rual takin Paula an bei a, rorêlna ṭhutphah hmaah an hruai a, 13 “He mi hrep hian Dân lo anga Pathian be tûrin mi a thlêm thlu ṭhîn a ni,” an ti a. 14 Tin, Paula a chhân dâwnin, Galliovan Juda-te hnênah chuan, “Juda-te u, hêng hi thil dik lo thu emaw, thil tihsual emaw tal ni sela, matheilovin ka ngaihsak ang che u a; 15 nimahsela, thute, hmingte, in dân chungthute mai a nih chuan nangmahnin rêl zâwk rawh u; kei zawngin chutiang thu chu ngaihtuah ka duh lo ve,” a ti a. 16 Tin, rorêlna ṭhutphah aṭang chuan anni chu a hnawt bo ta a. 17 Tin, Grik mi zawng zawngin inkhâwmna in hotu Sosthena chu an man a, rorêlna ṭhutphah hmaah chuan an vua a, Galliova chuan chûng an thiltih chu engah mah a ngai lo va.
Antiokei khuaah an hâwng leh
18 Tin, chumi hnuah chuan Paula chu ni rei tak a la châm reng a; chumi zawh chuan unaute chu ṭawng ṭhain a ṭhen a, chuta ta chu Suria ram lamah lawngin a kal ta a, a hnênah Priskilli leh Akuila chu an kal ve bawk a; Paulan thutiam a neih avângin Kenkriai khuaah a lu a mêt zet a. 19 Tin, Ephesi khua chu an thleng a, chutah chuan anni chu a hnutchhiah ta a; ani erawh chu inkhâwmna inah a lût a, Juda-te hnênah khûn takin thu a sawi rih a. 20 Tin, rei deuh châmah an ngên a; nimahsela, a remti lo va, 21 “Pathianin a phal chuan in hnênah ka lo kal leh ang,” tiin ṭawng ṭhain a ṭhen a, Ephesi khua ata chu lawngin a kal ta a. 22 Tin, lawng ata chu Kaisari khuaah a chhuak a, Jerusalem khuaah a han kal a, kohhranhote chu chibai a bûk a; tin, chumi zawhah chuan Antiokei khuaah a zuk kal ta a. 23 Tin, chutah chuan rei ngial a awm hnuin a kal leh a, zirtîrho zawng zawng tinghetin Galatia ram leh Phrugia ram chu a fang chhuak vek a.
Apollova - Ephesi leh Korinth khuaah
24 Tin, Juda pakhat, a hming Apollova, Aleksandria khuaa piang, mi fing tak, Ephesi khuaah chuan a zuk kal a; ani chuan Pathian Lehkha Thute a hre nasa êm êm a. 25 Chu mi chu Lalpa Kawng thu zir tawh a ni a, rilrua ṭhahnemngai tak a nih avângin Isua chanchin chu ngun takin a hril a, a zirtîr ṭhîn a, Johana baptisma thu chauh a hre si a. 26 Tin, inkhâwmna inah huai takin thu a sawi ṭan ta a. Chutichuan, Priskilli leh Akuila chuan a thusawi an hriatin an inah an hruai a, a hnênah Pathian Kawng thu fel lehzualin an hrilhfiah ta a. 27 Tin, ani chuan Akaia rama kal kai a tum veleh unauten an fuih a, amah an lo lawmna tûrin zirtîrhote hnênah lehkha an ziaksak a; tin, a thlen chuan Pathian khawngaihna avânga ringtute chu nasa takin a pui a; 28 vântlâng hriatin Juda-te chu nasa takin a tidang a, Pathian Lehkha Thu hmangin Isua kha Krista chu a ni tih a hriattîr ṭhîn a.
Paula - Ephesi khuaah
1 Tin, Paula chuan khawchhak bial a fang chhuak zet a, Apollova Korinth khuaa a awm hlân khân Ephesi khua chu a thleng a, zirtîrho tute emaw a hmu a; 2 tin, ani chuan an hnênah, “In rin tirh lai khân Thlarau Thianghlim in chang em?” a ti a. Tin, anni chuan a hnênah, “Chang lo, Thlarau Thianghlim a awm tih rêng hriat pawh kan hre lo,” an ti a. 3 Tin, ani chuan, “Eng baptisma-ah nge in chan le?” a ti a. Anni chuan, “Johana baptisma-ah,” an ti a. 4 Tin, Paula chuan, “Johana kha chuan mi hnênah, ‘Mi rawn zuitu tûr (Isua) chu in la ring tûr a ni,’ tiin simna baptisma-in a baptis ṭhîn a nih kha,” a ti a. 5 Tin, chu thu chu an hriat veleh Lalpa Isua hmingin baptisma an chang ta a. 6 Tin, Paulan an chungah a kut a nghat a, Thlarau Thianghlim chu an chungah a lo thleng ta a; tichuan, ṭawng hriat lohtein thu an sawi a, Pathian thu pawh an hril ta a. 7 An za chuan patling sâwm leh pahnih lai an ni. 8 Tin, Paula chu inkhâwmna inah a lût ṭhîn a, thla thum lai huai takin thu a sawi a, Pathian ram kawng thu-ah chuan mi a hnial a, mi a thlêm thlu ṭhîn a. 9 Nimahsela, a ṭhen an tihmawha, an awih duh lohva, mipui hmaah Kawng chu an sawichhiat veleh chuan ani chuan anmahni a kalsan a, zirtîrhote chu a kai hrang a, ni tin Turanna zirtîrna inah mi a hnial ṭhîn a. 10 Chutiang hlîr chuan kum hnih lai a ti a; chutichuan, Asia rama awm zawng zawng, Juda-te leh Grik-te pawhin Lalpa thu chu an hre ta hial a.
Skeva fapate
11 Tin, Pathianin Paula kutin thil mak namên a tihtîr lo va; 12 chutichuan, a taksa ata inhrûkna puante emaw, fênthuahte emaw damlote hnênah an rawn keng a, an nâte a reh ṭhîn a, an kawchhûng ata ramhuaite pawh an chhuak ṭhîn a. 13 Tin, thiam zuara vâk vâk Juda tuten emaw, “Paulan a thu a tlângaupui ṭhin Isua hmingin kan vau a che,” tiin, ramhuai paite chungah Lalpa Isua hming an lam vei ṭhîn a. 14 Tin, Juda mi, puithiam lal pakhat, Skeva chuan chutiang ti ve ṭhîn fapa pasarih a nei a. 15 Nimahsela, ramhuaiin an hnênah, “Isua ka awih e, Paula pawh ka hria e, nangni erawh chu tu nge maw in nih le?” a ti a, a chhâng a. 16 Tin, ramhuai pai chuan a rawn zuan a, an za chuan a hneh a, a ngam ta zâwk a; chutichuan, chumi in ata chu saruak leh inhliamin an tlân chhuak ta hial a. 17 Chutichuan, Ephesi khuaa awm zawng zawng, Juda-te leh Grik-te hnênah pawh chumi thu chu a thang ta a; tichuan, an zain an hlau va, Lalpa Isua hming chu a lian ta a. 18 Tin, ringhote pawh chu a ṭhen tam tak an lo kal a, an thiltihte thupha an chawi a, an inpuang ta a. 19 Dawi hmang tam tak pawhin an lehkhabute an rawn la khâwm a, mi zawng zawng mit hmuhah an hâl ta a; tin, a man an chhût a, chêng sîngnga niin an hria. 20 Chuti kauva nasa chuan Lalpa thu chu a darh a, a hneh ta zêl a.
Ephesi khuaa buaina
21 Tin, chûng zawhah chuan Paulan, Makedonia ram leh Akaia ram chu fan chhuah riha, Jerusalem khuaa kal a rilrûk a, “Chuta ka kal zawh chuan Rom khua ka tlawh bawk tûr a ni,” a ti a. 22 Chutichuan, a rawngbâwltu pahnih, Timothea leh Erasta chu Makedonia ramah a kaltîr zet a, ani erawh chu Asia ramah a awm rih a. 23 Tin, chûng lai vêl chuan Kawng avâng chuan buai namênin mi an buai ta lo va. 24 Mi pakhat, a hming Demetria, tangkarua chhera, tangkaruaa Diani lem siamtu chuan, a siam thiamte hnênah inhlawhfâkna tam tak a pe ṭhîn a; 25 chu mi chuan anni chu a ko khâwm a, an hnathawh ang thawktute nên; tin, an hnênah, “Pute u, he hna hi kan hausakna a ni tih in hria e. 26 Hetah Ephesi khua chauhvah hian ni lovin, Asia ram khua vêl zawng zawng thawah pawh he Paula hian, ‘Kuta siam pathiante hi Pathian an ni lo,’ tiin mi tam tak a thlêm thlu a, a pakaitîr zo tawh a ni tih nangni ngei pawhin in hmuin in hre bawk a; 27 chutichuan, kan hnathawh a lân ang tih a hlauhawm chauh hi a ni lo va, pathiannu ropui tak Diani biak in pawh hi an rawn ngai tlâwm ang a, Asia rama mi zawng zawng leh khawvêla miin an biak ṭhin hi, a ropui tehlul nên, a tlâwm ang tih a hlauhawm bawk a ni,” a ti a. 28 Tin, chûng thu chu an hriat veleh an thinur ta êm êm a, “Ephesi khuaa mi Diani hi ropui tak a ni!” tiin an au va. 29 Tichuan, a khuain an buai ta vek a, Gaia leh Aristarka, Makedonia rama mi, Paula hnungzuitute chu an man a, a rualin ennawm inah an tlânpui chiam a. 30 Tin, Paulan mipui zînga luh a tum chuan zirtîrhoten an phal lo va. 31 Tin, Asia ram hotu berte zînga ṭhenkhat chu Paula ṭhiante an ni a, a hnênah mi an tîr a, ennawm inah chuan lût lui lo tûrin an thlêm chiam a. 32 Tin, awm khâwmhote chu an buai a, mi tam zâwkin an inkhâwm chhan pawh an hre lo va; chuvângin, ṭhenkhat thu pakhatin an au va, ṭhenkhat thu dangin an au va. 33 Tin, mipui zînga ṭhenkhatin Aleksandra chu an thiamna thu sawi dân tûr chu an hrilh a, Juda-ten ani chu mi hma lamah an nam phei a. Tin, Aleksandra chuan a kutin a zâp a, mi zawng zawng hnênah chuan an thiamna thu sawi a tum a. 34 Nimahsela, ani chu Juda mi a ni tih an hriat veleh, dârkâr hnih lai rual takin, “Ephesi khuaa mi Diani hi ropui tak a ni!” ti hlîrin an au an au va. 35 Tin, khaw lehkhaziaktuin mipui chu a tihdaih zawh chuan, “Ephesi khuaa mite u, Diani ropui tak biak in leh vân aṭanga milem tla kha, Ephesi khuaa mite hi a vêngtu in ni tih tu nge hre lo awm ni? 36 Chutichuan, hêng thu hi hnial rual a nih loh ahnu, in ngawi reng tûr a ni, thu dâwn lovin eng mah in ti tûr a ni lo. 37 Hêng mi, heta in rawn hruaite hi biak in suam hmangte an ni lo va, kan pathiannu sawichhetu lah an ni hek lo. 38 Chutichuan, Demetria leh a ṭhian themthiamte pawhin tu lakah pawh thupawi an neih chuan, thupawi sawina inte chu hawn sa a ni alâwm, lal aiawhtute pawh an awm a; inchhâl rawh se. 39 Thil dang pawi nei rêng in nih chuan inkhâwm pângngaiah an rem ang. 40 Vawiina bengchhen avâng hian chhâl hlauhawmin kan awm tâk hi, a bul awm si lovin; chuti chu a ni si a, he inkhâwm chhan hi eng mah kan sawi theih dâwn loh hi,” a ti a. 41 Tin, chûng thu a sawi zawh chuan awm khâwmhote chu a ṭîntîr ta a.
Makedonia leh Akaia ram a pan
1 Tin, bengchheng chu a reh hnuin, Paulan zirtîrhote chu a kohtîr a, a fuih a, ṭawng ṭhain a ṭhen a, Makedonia rama kal tûrin a chhuak ta a. 2 Tin, thu tam taka zirtîrhote chu fuih zêlin chumi ram chu a fang chhuak a, Grik ram a thleng ta a. 3 Tin, chutah chuan thla thum a thang hnuin, Suria ram lamah lawngin a kal dâwn a, Juda-ten amah an phiar avângin Makedonia ramah hâwn tlang a tum leh ta zâwk a. 4 Tin, Purrha fapa Sopatera, Beroia khuaa mi te, Thessalonika khuaa mi Aristarka leh Sekunda te, Derbe khuaa mi Gaia te, Timothea te, Asia rama mi Tukika leh Trophima te chu a hnênah Asia ram thlengin an kal ve a. 5 Chûngho chuan kan hma an hruai a, Troas khuaah chuan min lo nghâk reng a. 6 Keini erawh chu, chhang dawidim telh loh ni zawng zawng hnuah chuan, Philippi khua ata chu lawngin kan chhuak a, ni nga chinah Troas khuaah an hnên kan thleng a; chutah chuan ni sarih kan châm a.
Troas khua Paulan a tlawh leh
7 Tin, ni sarih ni hmasa berah chuan chhang phel tûra kan awm khâwm laiin, Paula chuan a tûka kal a tum avângin an hnênah khûn takin thu a hril a; zanlai thlengin thu a sawi a. 8 Tin, pindan chungnung kan awm khâwmnaah chuan khâwnvâr tam tak a awm a. 9 Tin, a hming Eutuka, tlangvâl pakhat tukverhah chuan a ṭhu a, a lo muthlu a lo muthlu a. Tin, Paulan thu a sawi rei tâk avângin ani chuan a mutchhuak a tuar ta lo va, in chhâwng thumna aṭang chuan a tla ta a, thiin an chhar a. 10 Nimahsela, Paula chu a chhuk a, a chungah a bawh a, a pawm a, “Thlaphâng suh u, a hnuk a la chat lo ve,” a ti a. 11 Tin, Paula chu a chho leh a, chhang chu a phel a, chaw a ei a, rei tak, khawvâr thleng hialin an hnênah thukhawchâng a sawi a, chumi hnuah chuan a kal ta a. 12 Tin, râwlthar chu damin an hruai a, thlamuan namênin an thlamuang ta lo va.
Troas aṭanga Mileti
13 Keini erawh chu lawngah kan lo kal tawh a, Asso khaw pan tûrin lawng chuan kan lo chhuak hmasa a, chutah chuan Paula chu lo chuantîr ve kan tum a; ani chuan kea lo kal a tum avângin chutiang chuan aman a ruat rêng a ni a. 14 Asso khuaa min rawn fin chuan kan chuantîr ta a, Mitulini khua kan thleng a. 15 Tin, chuta ṭang chuan lawngin kan kal leh a, a tûkah chuan Kio thliarkâr zâwn kan thleng a; tin, a tûk lehah Sami thliarkâr kan tlawh a; tin, a tûk lehah chuan Mileti khua kan thleng leh a. 16 Tin, Paula chuan Asia rama awm rei a duh loh avângin, Ephesi khua chu lawngin pelh a tum sa rêng a ni; a theih chuan Jerusalem khuaah Pentikos ni nan a tum a, a kal hmanhmawh a ni.
Ephesi upate Paulan a thlah
17 Tin, Mileti khua aṭang chuan Ephesi khuaah mi a tîr a, kohhran upahote a hnênah a kohtîr a. 18 Tin, a hnên an lo thlen chuan ani chuan an hnênah: “Asia ram ka tlawh tirh ni ata kha in hnêna ka awm chhûng zawng khan, ka awmzia kha in hria e; 19 thuhnuairawlh ber chung leh, Juda-ten mi phiar avânga mittui tla leh, thil hrehawm ka chunga tlate tuar chunga Lalpa rawng ka bâwl ṭhin kha; 20 khati khân a sâwt tûr thu in hnênah eng mah hrilh che u ka tîm loh va, vântlâng zîngah te, in tinah te ka zirtîr ṭhin che ua, 21 Juda-te leh Grik-te hnênah pawh Pathian lama rilru lamlêt thu leh, kan Lalpa Isua Krista lam rin tûr thu ka hriattîr ṭhin kha. 22 Tin, hre rawh u, tûnah hian rilrua kal lo thei lova ka inhriat avângin, Jerusalem khuaah ka kal dâwn hi, chutah chuan ka chunga thil lo thleng tûr chin ka hre lo ve. 23 Thlarau Thianghlimin, ‘Phuarna leh hrehawmnain a hmuak a che,’ tiin khaw tinah mi hriattîr ṭhîn, chûng chauh chu ka hria a ni. 24 Nimahsela, ka tlânsiakna kawng ka hmabâk hlen tûr leh, Pathian khawngaihna Chanchin Ṭha hriattîr tûr, Lalpa Isua hnên aṭanga khami rawngbâwl hna ka hmuh kha thawk zo phawt ila, ka nun pawh thlâkhlelh tlâkah ka ruat lo ve. 25 “Tin, hre rawh u, nangni zawng zawng, Pathian ram thu tlângaupui zêla ka vah ka vah ṭhinnate hian, ka hmêl in hmu leh tawh lo vang tih ka hria e. 26 Chuvângin, mi zawng zawng thisenah ka hul a ni tih vawiinah hian ka hriattîr a che u. 27 Pathian rêl zawng zawng a zain in hnênah hrilh ka tîm loh kha. 28 Pathian kohhranho, ama thisena a leite chu châwm tûrin, nangmahni leh in hote zawng zawng chungah chuan fîmkhur rawh u, Thlarau Thianghlimin an chunga hotuah a siam che u hi. 29 Ka kal hnuin chinghne kawlhte in zîngah an lo lût ang a, pâwlho chu an zuah lo vang tih ka hria e. 30 In zînga mi ngei pawh hi, zirtîrhote in hnêna pakaitîr tûrin, thu hran sawi in lo la awm ang. 31 Chuvângin, ngaihven rawh u, kum thum meuh, mittui tla chunga a chhûn a zâna mi tin zilh ka bân loh kha hre reng rawh u. 32 “Tûnah hian Pathian leh a khawngaihna thu-ah ka kawltîr a che u, chu chuan a siam lian thei che u a, mi rilru thianghlimte zîngah ro chan a neihtîr thei bawk a che u. 33 Tu ma tangkaruate, rangkachakte, silhfênte ka awh ngai loh kha. 34 Hêng kutte hian kei leh ka ṭhiante châkkhai a deh chhuah ṭhin kha, nangni ngeiin in hria e. 35 Engkim ka tih apiangah ka tihhmuh ṭhin che u kha, chutianga thawk rim chung leh, Lalpa Isua thu hre reng chung chuan mi chak lote in ṭanpui tûr a ni; amah ngeiin, ‘Englo lâk aiin pêkin lukhâwng a nei zâwk,’ a tih kha,” a ti a. 36 Tin, chûng thu a sawi zawh chuan a ṭhingṭhi a, an zain a ṭawngṭaipui a. 37 Tin, an za chuan an ṭap zawih zawih a, Paula chu pawmin an fâwp ngawih ngawih a, 38 a hmêl an hmuh leh tawh loh tûr thu a sawi chu an lungngaihna ber a ni. Tin, lawng thleng chuan amah an thlah ta a.
Paula Jerusalem-ah a kal
1 Tin, anni nên chuan kan inṭhen a, lawngin kan chhuak a, chumi hnuah chuan ngîl takin Kaw thliarkâr kan thleng a; tin, a tûkah Rhodi thliarkâr kan thleng leh a, chuta ṭang chuan kan kal zêl a, Patara khua kan thleng a; 2 tin, Phoiniki rama kai tûr lawng pakhat kan hmu a, kan chuang a, kan kal ta zêl a. 3 Tin, Kupra thliarkâr kan hmu a, vei lam chhawnin kan pêl a. Suria ram lamah kan kal zêl a, Tura khuaah chuan khawmualah kan chhuak ta rih a; chutah chuan lawnga bungrua thiar chhuah tûr a ni a. 4 Tin, zirtîrhote kan zawng chhuak a, chutah chuan ni sarih kan châm a; tin, anni chuan Thlarau hrilhin, Paula hnênah Jerusalem khua tlawh loh tûr an ti a. 5 Nimahsela, chûng ni zawhah chuan kan chhuak a, kan kal ta a, unaute chuan an zain, an nupui fanaute nên dai pâwn thlengin min thlah a; tin, tuifinriat kamah chuan kan ṭhingṭhi a, kan ṭawngṭai a. 6 Tin, “Dam takin,” kan inti a, lawngah chuan kan chuang a; anni erawh chu an inah an haw leh ta a. 7 Tin, Tura khua ata lawnga kan chhuah hnu chuan Ptolemai khua kan thleng a, unaute chibai kan bûk a, an hnênah ni khat kan châm a. 8 Tin, a tûkah chuan kan chhuak a, Kaisari khua kan thleng a; tin, Chanchin Ṭha hriltu Philipa inah kan lût a, ani chu pasarihte zînga pakhat a ni a, a hnênah kan châm a. 9 Chu mi chuan fanu pali a nei a, nula thianghlim an ni a, Pathian thu an hril ṭhîn a. 10 Tin, chutah chuan ni tam tak kan châm a, chutih lai chuan Judai ram ata a hming Agaba, zâwlnei pakhat a lo chhuk a. 11 Tin, kan hnênah a lo kal a, Paula kâwnghrên a la a, a kete, a kutte amahin a inphuar a; tin, “ ‘Jerusalem khuaa Juda-te chuan hetiang hian he kâwnghrên neitu hi an phuar ang a, Jentailte kutah an pe bawk ang,’ Thlarau Thianghlimin a ti e,” a ti a. 12 Tin, chûng thu chu kan hriat veleh keini leh chumi khuaa mite chuan, Paula chu Jerusalem khuaa han kal lo tûrin kan ngên chiam a. 13 Paula chuan a chhâng a, “Eng in ti nge ni in ṭah in ṭaha, ka lung in tihchhiat? Lalpa Isua hming avâng chuan Jerusalem khuaa phuar chang ka huam lo va, thih pawh ka huam asin,” a ti a. 14 Tin, thlêm rual a nih loh ahnu chuan, “Lalpa thu thu ni rawh se,” kan ti a, kan bâng ta a. 15 Tin, chumi hnuah chuan kan bungrua kan siam a, Jerusalem khuaah kan han kal a. 16 Kaisari khuaa mi zirtîrho tute emaw kan hnênah an kal ve a, anni chuan a hming Mnasona, zirtîr hmasa pâwl, Kupra thliarkâra mi pakhat, kan thlen in pa tûr chu an hruai ve a.
Paulan Jakoba a tlawh
17 Tin, Jerusalem khua kan thlen chuan unauten hlim takin min lo lâwm a. 18 A tûkah chuan Paula hovin Jakoba hnênah kan lût a; chutah chuan kohhran upate zawng zawng pawh an awm a. 19 Tin, Paula chuan anmahni chibai a bûk zawhin, a rawngbâwlna hmanga Pathianin Jentailte zînga thil a tihtîr apiang chu a kip a kawiin a sawi a. 20 Tin, unaute chuan chûng thu chu an hriatin Pathian an chawimawi a; tin, Paula hnênah chuan, “Unaupa, Juda-te zînga ringtute tamzia i hmu a; an zain Dân chungah ṭhahnem ang ngai bawk a; 21 tin, nangin Jentailte zînga Juda awmte zawng zawng hnênah chuan, an fate serh tan loh tûr leh, dân anga awm loh tûr, tiin Mosia thlauhthlâkna tûr i zirtîr ṭhîn tih, mi kâ aṭangin i thu hi an hria a. 22 Engtin nge ni ta ang le? I lo thleng tih an hre dâwn ngei si a. 23 Chuvângin, i hnêna kan sawi ang hian ti ang che: Thutiam nei mipa pali kan hnênah an awm; 24 chûng mite chu hruai la, an hnênah inthian fai ve la, an lu an meh theih nân an tân sum sêng rawh; chutichuan, mi zawng zawngin mi ka aṭanga i thu an hriat apiang kha, tih tak a ni lo tih an hria ang a, nangmah ngei pawh Dân zâwmin fel takin i awm ve zâwk tih an hre dâwn nia. 25 Jentailte zînga ringtute chungchâng thu zawng, milem biakna thil ei kawngah te, sa thisen ei kawngah te, sa reh hlum ei kawngah te, inngaih kawngah te an inthiarfihlîm tûr a ni, tiin kan rêl a, kan ziak tawh kha,” an ti a. 26 Tin, a tûkah chuan Paulan mipate chu a hruai a, an hnênah a inthian fai ve a, Pathian biak inah chuan a lût a, an tâna sa talh ṭheuh tûr a pêksak hma loh chuan, inthen faina ni an nei rih dâwn tih puithiam hnênah a hrilh lâwk a.
Tempulah Paula an man
27 Tin, ni sarih chu a tlin dâwn ruaiin, Asia rama Juda-te chuan Paula chu Pathian biak inah chuan an hmu a, mipui zawng zawng an fuihpawrh a, ani chu an man a, 28 an au va, “Israel mite u, min pui rawh u! He mi hi ram tinah mi zawng zawng hnênah Juda mi te, Dân te, he in te sawichhetu kha a nih hi; chu lo pawh, Pathian biak inah hian Grik mite pawh a luhpui a, he in thianghlim hi a tibawlhhlawh tawh a ni,” an ti a. 29 (Chumi hmain khuaah chuan Ephesi khuaa mi Trophima chu a hnênah an hmu a, Paulan chu mi chu Pathian biak inah a luhpui an ring a ni.) 30 Tin, a khuain an phu ta mur mur a, mite chu an tlân khâwm a; Paula chu an man a, Pathian biak in ata chu an hnûk chhuak a; kawngte chu an khâr ta nghâl a. 31 Tin, ani chu tihhlum an tum lai chuan, Jerusalem khuaa mi zawng zawng an buai tih thu chu sipai pâwl hotu lal ber hnên a han thleng a, 32 Tin, ani chuan sipaite leh sipai za hotute a hruai ta nghal a, an hnênah a tlân chhuk a; tin, tin, anni chuan hotu lal ber leh sipaite chu an hmuh veleh Paula vuak an bâng ta a. 33 Tin, hotu lal ber chuan a rawn hnaih a, Paula chu a chelh a, khaidiat pahnih buntîr thu a pe a; tu nge a niha, eng nge a tih a zâwt a. 34 Tin, mipui zîngah chuan a ṭhen thu khatin an au va, a ṭhen thu dangin an au va; tin, bengchheng avângin a ngaihna a hre thei lo va, kulhbînga hruai luh thu a pe a. 35 Tin, Paulan kailâwn a thlen laiin, mipuiin an beih nasat avângin sipaiten ani chu an chawi kâng zêl a; 36 mi zawng zawngin, “Tiboral rawh u,” tia auvin an zui huai huai si a.
Paulan a thiam thu a sawi
37 Tin, Paula chu kulhbîngah chuan an hruai luh dâwn laiin, ani chuan sipai hotu lal ber hnênah chuan, “I hnênah thu kam khat ka sawi thei ang em?” a ti a. Tin, ani chuan, “Grik ṭawng i hria elo? 38 Hmâna mite fuihpawrha, mihring phil hmangho sângli thlalêra hruai chhuaktu, Aigupta rama mi kha i ni lo vem ni?” a ti a. 39 Paula erawh chuan, “Juda mi, Kilikia rama Tarsa khuaa mi ka ni, khaw namêna awm ka ni lo; mi khawngaih la, mi zawng zawng hnênah thu mi hrilhtîr rawh,” a ti a. 40 Tin, a remtih veleh Paula chu kailâwnah chuan a ding a, mipui ngawih nân a kutin a zâp a; tin, an ngawih ṭhuap veleh Hebrai ṭawngin an hnênah:
1 “Unaute u, pate u, tûnah in hnênah ka thiamna thu ka hrilh dâwn che u hi ngaithla rawh u,” a ti a. 2 Tin, Hebrai ṭawngin an hnênah thu a sawi tih an hriat veleh an ngawi lehzual a; tin, ani chuan, 3 “Juda mi ka ni a, Kilikia rama Tarsa khuaa piang ka ni; nimahsela, he khuaah hian Gamaliela ke bulah chuan zira sei lian ka ni, min thlahtute Dân awmze khermei tak chu zir ṭhîna awm ka ni, vawiina nangmahni zawng zawng ang tak hian Pathian tâna ṭhahnem bawk ṭhîn ka ni. 4 Tin, he Kawnga mite hi tihlum hial khawpin ka tiduhdah ṭhîn a, a hmei a pain ka phuar a, tân inah ka khungtîr ṭhîn a. 5 Puithiam lalber leh upate zawng zawng pawhin chûng thu chu mi hriatpui thei e, an hnên ata pawh unaute pêk atân lehkha ka hmuh kha; tin, Damaska khuaa awm apiang an hrem atân, phuar chunga Jerusalem khuaa hruai tûrin ka kal kha.
Paulan a pianthar thu a sawi
6 “Tin, ka kal a, Damaska khaw kiang kan thlen chuan chawfâk hun laiin, thâwklehkhatan vân ata êng nasa tak ka vêlan a lo êng ta phut a; 7 tin, leiah ka tlu a, ka hnênah, ‘Saula, Saula, nangin engati nge mi tihduhdah?’ tiin aw ka hria a. 8 Tin, keiin, ‘Lalpa, tu nge i nih?’ tiin ka chhâng a. Tin, ani chuan ka hnênah, ‘Nazareth Isua, i tihduhdah hi ka ni,’ a ti a. 9 Tin, ka ṭhiante chuan êng chu an hmu na a, mi betu aw erawh chu an hre lo. 10 Tin, keiin, ‘Lalpa, eng nge ka tih ang?’ ka ti a. Tin, Lalpa chuan ka hnênah, ‘Tho la, Damaska khuaah lût rawh; thil zawng zawng i tih tûra ruat apiang an hrilh ang che,’ a ti a. 11 Tin, chu êng ropui avâng chuan khua ka hmu thei ta lo va, ka ṭhianten kutin mi kai a, Damaska khuaah ka lût ta a. 12 “Tin, mi pakhat, Anania, Dân kawnga Pathian ngaihsak leh chuta Juda awm zawng zawng hnêna hmingṭha chu, 13 ka hnênah a lo kal a, ka kiangah a ding a, ka hnênah, ‘Ka nau Saul, mit vâr nei rawh,’ mi ti a. Tin, chumi lai tak chuan amah ka han hmu ta a. 14 Tin, ani chuan, ‘Min thlahtute Pathianin a duh zâwng hriaah leh Mi Feltaka chu hmua, a ṭawngkâ hriaah pawh a ruat tawh che a. 15 I hmuh leh i hriat thu-ah khân mi zawng zawng hnênah ama thu hretu i ni ang. 16 Tin, engati nge i la awm reng le? Tho la, ama hming lam chungin baptisma chang la, i sualte tlêng fai ta che,’ mi ti a.
Jentailte hnêna thuhril tûrin Paula koh a ni
17 “Tin, Jerusalem khuaah hian ka hâwn leh hnuin, Pathian biak ina ka ṭawngṭai laiin englovin mi zêl a; 18 tin, ‘Hmanhmawh la, Jerusalem khua ata chhuak rawh; ka chanchin i hril tûr chu an pawm dâwn loh hi,’ a mi tih lai ka hmu a. 19 “Tin, keiin, ‘Lalpa, inkhâwmna in tina a ringtu che apiang tân inah ka khunga, ka vuak ṭhin kha an hre si a; 20 tin, i thu hretu Stephana thisen an chhuah lai khân kei pawh a kiangah ka ding a, ka lo remti a, a tihlumtute puante ka vêng hlawm bawk a ni,’ ka ti a. 21 “Tin, ani chuan, ‘Kal rawh, heta ṭanga hla taka Jentailte hnênah ka tîr zâwk ang che,’ mi ti ta a,” a ti a. 22 Tin, chu thu thleng chuan an ngaithla a; tin, aw ring takin, “Mi hetiang nek hi khawvêl ata tiboral rawh u; nung tui a ni lo ve,” an ti ta a. 23 Tin, an au va, an puante an hlîp a, an paih a, vaivut an vânvawrh a; 24 chutichuan, sipai hotu lal ber chuan Paula chu kulhbîng chhûnga hruai luh thu a pe a, a chungah chuti êma an au chhan chu hriat nân vuak chunga chhâl tûrin a ti a. 25 Tin, savun hruia an phuar belhbawm zawhin, Paulan a kianga ding sipai za hotu hnênah chuan, “Rom mi rêng rêng in vaw thei em ni, thiam loh chantîr hnu pawh ni si lo lehnghâl?” a ti a. 26 Tin, sipai za hotu chuan chu chu a hriat veleh, sipai hotu lal ber hnênah chuan a kal a, “I thiltih tûr hi fîmkhur teh khai! He mi hi Rom mi a lo ni e,” a ti a, a hrilh a. 27 Tin, sipai hotu lal ber chu a lo kal a, a hnênah, “Rom mi i ni maw? Mi hrilh rawh,” a ti a. Tin, ani chuan, “Ni e,” a ti a. 28 Tin, sipai hotu lal ber chuan, “Chumi khaw mi ni tûrin kei zawngin tangka tam tak ka sêng asin,” a ti a, a chhâng a. Tin, Paula chuan, “Kei zawng Rom mi rênga piang ka ni,” a ti a. 29 Tichuan, nghaisa chunga chhâl tumte chuan ani chu an kalsan ta nghâl a; sipai hotu lal ber pawhin Rom mi a ni tih a hriat chuan a hlau va, a phuar avângin a hlau bawk a.
Sanhedrin hmaah Paula a ding
30 Tin, a tûkah chuan Juda-ten eng vângin nge Paula an hêk tih hriat fel tumin, sipai hotu lal ber chuan ani chu a phelh a, puithiam lalte leh rorêltu zawng zawngte inkhâwm tûr thu a pe a, Paula chu a hruai chhuak a, an hmaah a dintîr ta a.
1 Tin, Paula chuan rorêltute chu a en reng a, “Unaute u, vawiin thlengin Pathian mit hmuha ṭha lama ka hriat apiang tiin ka awm ṭhîn e,” a ti a. 2 Tin, puithiam lalber Anania chuan Paula kianga dingte hnênah a kâa bensak tûrin a ti a. 3 Tin, Paula chuan a hnênah, “Nang, lung pal hnawih vâr pa, Pathianin a bêng zâwk ang che; nang, Dân anga mi ngaihtuah tûrin i ṭhu a, Dân lo anga mi ben tûr i ti vei a ni maw?” a ti a. 4 Tin, a kianga miten, “Pathian puithiam lalber i hau vei maw?” an ti a. 5 Tin, Paulan, “Unaute u, puithiam lalber a ni tih ka hre lo a ni: ‘I chipuite hotu chungah thu ṭha lo sawi suh,’ tih pawh ziak a ni si a,” a ti a. 6 Tin, Paulan a ṭhen Saddukaite, a ṭhen Pharisaite an ni tih a lo hriatin rorêltute zîngah chuan a au va, “Unaute u, Pharisai ka ni, Pharisai fapa pawh ka ni; mitthi thawhleh beiseina thu-ah chhuahchhâlin ka awm a nih hi,” a ti a. 7 Tin, chu chu a sawi zawh chuan Pharisaite leh Saddukaite chu an inhnial a, rorêltute chu an inkhing ta a. 8 (Saddukaiten, “Mitthi thawhlehna rêng a awm lo, vântirhkohte, thlaraute pawh a awm hek lo,” an ti ṭhîn; Pharisaite erawh chuan chumi kawng pahnih chu a awm tih an awih si a.) 9 Tichuan, nasa takin an buai ta a; Pharisaite lama mi lehkhaziaktu ṭhenkhat an ding a, an hnial a, “He mi hi eng mah a sualna kan hre lo ve; thlarau pawhin, vântirhkoh pawhin ani hi bia pawh ni sela, eng nge pawi ang?” an ti a. 10 Tin, an inhnial nasat deuh deuh avângin, sipai hotu lal ber chuan Paula chu an pawh sawm a hlau va, sipaite hnênah, zuk kala an zîng ata kulhbînga hruai chho lui tûrin a ti a. 11 Tin, a zânah chuan Lalpa chu Paula kiangah a ding a, “Thlamuang takin awm rawh, Jerusalem khuaa ka thu i hriattîr ang bawk hian Rom khuaah pawh i hriattîr tûr a ni,” a ti a.
Paula thah tumin an phiar
12 Tin, ni a chhuahin Juda-te an ṭang rual a, Paula an thah hma loh zawng eng mah eia bâr lo tûrin chhia an chham a. 13 Chumi thu phiartute chu sawmli aia tam an ni. 14 Tin, anni chu puithiam lalte leh upate hnênah an kal a, “Paula kan thah hma loh zawng eng mah tem lo tûrin chhia kan chham ta vek a ni. 15 Chuvângin, nangnin, rorêltute nên a thu fel lehzuala ngaihtuah tum angin, in hnêna hruai thla tûrin sipai hotu lal ber hnênah pehhêl deuhvin han sawi rawh u; in kiang hnai a thlen hma pawhin, keini amah that tûrin kan inpeih reng e,” an ti a. 16 Nimahsela, Paula farnua fapain an chân thu chu a lo hria a, kulhbîngah chuan a va lût a, Paula chu a va hrilh a. 17 Tin, Paula chuan sipai za hotu pakhat a ko va, “He tlangvâl hi hotu lal ber hnênah chuan hruai rawh; a hnênah thu eng emaw sawi tûr a nei a ni âwm e,” a ti a. 18 Chutichuan, sipai hotu lal ber hnênah chuan a va hruai a, “Paula, mi tâng khân mi ko va, he tlangvâl hi i hnêna rawn hruai tûrin mi tîr a, i hnênah thu eng emaw sawi tûr a nei a ni âwm e,” a ti a. 19 Tin, sipai hotu lal ber chuan a kutah a chelh a, a kal hranpui a, a rûkin, “Eng nge mi hrilh tûr i neih chu?” tiin a zâwt a. 20 Tin, ani chuan, “Paula thu chu fel lehzual deuhva i ngaihtuah tûr angin, naktûkah rorêltute hnêna hruai chhuk tûrin Juda-ten dîl che an remti tlâng a. 21 Nimahsela, an thu lo awih suh ang che; an zînga mi sawmli aia tamin an châng reng a, chûng mite chuan amah an thah hma loh chu eng mah eia bâr lo tûrin chhia an chham a; tûnah hian i thu nghâkin inpeih sain an awm reng a ni,” a ti a. 22 Tin, sipai hotu lal ber chuan tlangvâl chu a kaltîr a, “Hêng thu hi mi lo hriattîr tawh tih tu mah hrilh suh ang che,” a ti tlat a.
Ram awptu Felika hnênah a rûkin Paula an hruai
23 Tin, sipai za hotu pahnih a ko va, “Zân mut reh hunah Kaisari khaw thlenga kal tûrin sipai zahnih nên, sakawr chung chuang mi sawmsarih nên, fei keng mi zahnih nên siam rawh u,” a ti a; 24 tin, ram awptu Felika hnênah chuan him taka an thlentîr theih nân, Paula an chuantîrna tûrin sate lo siam tûr a ti bawk a. 25 Tin, hetiang hian lehkha a ziak a: 26 “Klaudia Lusian Felika, ram awptu ṭha ber chibai a bûk e. 27 “He mi hi Juda-ten an mana, an thah dâwn laiin an hnênah sipaite hruaiin ka kal a, Rom mi a ni tih ka hria a, ka chhanchhuak ta a. 28 Tin, an hêkna chhan hriat ka duh a, an rorêltute hnênah ka hruai chhuk a; 29 chutichuan, an dân thu engahte emaw hêk a ni tih ka hria a; nimahsela, an hêkna thu-ah thihna leh phuarna khawp meuh tûrin eng mah ka hre si lo. 30 Tin, Juda-ten amah an châng tih miin min hriattîr veleh i hnênah ani hi ka rawn tîr ta nghâl a ni, a hêktute pawh a chunga thupawi an neih apiang i hmaa sawi tûrin thu ka pe bawk a,” tiin. 31 Chutichuan, sipaite chuan a thupêk ang chuan Paula chu a zân a zânin an hruai a, Antipatri khua an thlenpui a. 32 Tin, a tûkah chuan sakawr chung chuang mite chu a hnêna kal zêl tûrin an kîrsan a, kulhbîngah chuan an kal leh ta a; 33 tin, anni chuan Kaisari khua chu an thleng a, ram awptu hnênah lehkha chu an pe a, Paula pawh a hmaah an dintîr a. 34 Tin, ram awptu chuan a chhiar zawhin Paula awmna ram a zâwt a. Tin, Kilikia rama mi a ni tih a hriat veleh, 35 “A hêktu che pawh chu an lo thlen hunah i thupawi ka ngaihtuah ang,” a ti a. Tin, Heroda inah vên tûr thu a pe a.
Juda-ten Paula an hêk
1 Tin, ni nga chinah puithiam lalber Anania a lo thleng chhuk a, upa tute emaw nên, a hming Tertulla, thusawi thiam pakhat nên; tin, Paula chunga thupawi chu ram awptu hnênah an sawi a. 2 Tin, Paula chu an koh chhuah hnu chuan Tertulla chuan amah a hêk ṭan a: “Felik ṭha ber, nangma zârah thlamuang êm êmin kan awm avâng leh, i enkawl avânga he chite tân hian sualte khap ṭhatin a awm ṭhin avângin, 3 kumkhuain khawiah pawh lungawi takin kan lâwm ṭhîn. 4 Amaherawhchu, i tân ninawm lutuk nih ka duh lo va, i nunnêmnain thu kam khat erawh chu mi ngaihthlâksak tûrin ka ngên a che. 5 He mi hi mi huatthlala tak, khawvêla Juda-teho zawng zawng chawk buaitu leh Nazareth mite pâwla an tupa ber pakhat a nih kan hria a; 6 Pathian biak in tihbawlhhlawh a tum bawk a; chuvângin, kan man a, 8 nangmah ngeiin chhuahchhâlin kan hêkna thil zawng zawng hi ama lakah i hre thei ang,” a ti a. 9 Tin, Juda-te pawh chuan, “Chûng thu chu chutiang chu a ni,” tiin an ṭanpui ve a.
Felika hmaah Paulan a thiam thu a sawi
10 Tin, ram awptu chuan thu sawi tûra Paula chu kuta a zah veleh Paula chuan, “Nang, kum tam tak he chite rorêlsaktu hi i nih ka hriat avângin, lâwm takin ka thiamna thu ka sawi dâwn hi. 11 Jerusalem khuaah Pathian be tûrin ka han kal achin chu, ni sâwm leh ni hnih lo liam a la ni lo vang tih i la hre thei ang; 12 Pathian biak inah pawh, inkhâwmna inahte pawh, khuaah pawh tu mah ka hnial leh mipui ka fuihpawrh annin min hmu hek lo; 13 tûnah pawh an mi hêkna thu hi i hriatah a bul an chhui chhuak thei hek lo vang. 14 Nimahsela, he thu hi i hnênah ka inpuang ang, ‘pawl hrang’ an tih Kawng dân angin min thlahtute Pathian ka be ṭhîn. Dân leh Zâwlneite Lehkhabua ziak zawng zawng ringin; 15 tin, mi felte leh fel lote thawhlehna a awm ang tih Pathian lamah ka beisei a, hênghote pawh hian chûng chu an awih ve bawk si a; 16 chumi avâng chuan Pathian hnên lamah leh mihring hnênah pawh, rilru sual lo mawlh hi vawn ka tum fo ṭhîn. 17 Tin, kum tam tak hnuah hian, Jerusalem-a ka chipuite hnênah thilpêk tûr leh sa talh tûr rawn kengin ka lo kal a; 18 tin, chûng thil ka pêk lai chuan mipui tel lovin, bengchheng lovin, Pathian biak inah thianghlimin min hmu a. 19 Nimahsela, chutah chuan Asia rama mi Juda tute emaw an awm kha, chûngte chuan ka chungah thu an neih chuan hetah hian i hmaa awmin min hêk tûr a ni. 20 A nih loh leh, hêng mite ngei hian rorêltute hmaa ka din lai khân, ka tihsual eng nge an hmuh sawi rawh se, 21 he thu kam khat avâng hian a nih nghâl loh chuan, an zînga dingin, ‘Mitthi thawhlehna thu-ah vawiinah hian in hmaah chhuahchhalhin ka awm a nih hi,’ ka tih kha,” a ti a, a chhâng a. 22 Tin, Felika chuan Kawng thu chu a lo hre hle tawh a, “Sipai hotu lal ber Lusia chu a lo thlen thlâk hunah in thu ka la rem ang,” tiin thu chu a dah ta rih a. 23 Tin, Paula chu duat deuhva, a ṭhiante rawngbâwlsak khap lova, vêntîr tûrin sipai za hotu hnênah chuan thu a pe a.
Felika leh a nupui Drusilli hmaah Paula a ding
24 Tin, ni eng zât emaw chinah Felika chu a lo kal leh a, a nupui Drusilli, Juda hmeichhia nên, Paula chu a kohtîr a, Krista Isua rinna thu chu a ngaithla a. 25 Tin, Paula chuan felna thu te, insûm thu te, rorêlna lo la awm tûr thu te khûn taka a hrilh laiin Felika chuan hlauhawm a ti êm a, “Kal leh ta rih rawh, hun remchâng ka neih hunah ka ko vang che,” a ti a. 26 Paulan tangka a pêk a beisei bawk a; chuvângin, a ko zing deuh va, a be ṭhîn a ni. 27 Nimahsela, kum hnih a vei hnu chuan Porkia Festan Felika chu a thlâk ta a; tin, Felika chuan Juda-te zîngah hmingṭhat a duh a, Paula chu phuar sain a hnutchhiah ta a.
Paulan Kaisara hnêna thuthlen a phût
1 Chutichuan, Festa chuan ram chu a awp ta a; tin, ni thum chinah Kaisari khua aṭang chuan Jerusalem khuaah a han kal a. 2 Tin, puithiam lalte leh Juda puipate chuan a hnênah Paula chungchâng thu chu a chhe lamin an lo hriattîr a; 3 Jerusalem khuaa han hruaitîr tûrin khawngaihna an lo ngên chiam bawk a; kalkawnga lo châna thah an tum a. 4 Nimahsela, Festa chuan, “Paula chu Kaisari khuaah an vêng reng a ni, kei pawh rei lo têan ka haw dâwn e. 5 Chuvângin, chu mi chuan sualna a neih chuan, in zînga thunei apiangin mi zui thla sela, hêk rawh se,” a ti a, a chhâng a. 6 Tin, an zîngah chuan ni riat emaw, ni sâwm emaw lo liam chu a châm lo va, Kaisari khuaah a haw thla ta a; tin, a tûkah chuan rorêlna ṭhutphahah a ṭhu a, Paula chu rawn hruai tûrin thu a pe a. 7 Tin, ani chu a lo thlen chuan Jerusalem khuaa mi Juda lo chhukte chu a vêlah an ding a, a chungah thupawi tam tak, rit tak tak an sawi an sawi a, a bul erawh chu an chhui chhuak thei si lo va. 8 Tin, Paula chuan a thiamna thu a sawi a, “Juda-te dân chungchângah te, Pathian biak in thu-ah te, Kaisara chungah te pawh thil rêng rêng ka tisual lo ve,” a ti a. 9 Nimahsela, Festa chuan Juda-te zînga hmingṭhat a duh a, Paula hnênah chuan, “Jerusalem khuaa han kala, khitah ka hmaa hêng thu hi rêl i duh em?” a ti a, a chhâng a. 10 Paula erawh chuan, “Kaisara rorêlna ṭhutphah hmaa ro mi rêlsakna tûrah hian ka din hi; Juda-te chungah thil eng mah ka tisual lo, nang pawhin chu chu i hre chiang hle si a. 11 Mi sual ka niha, thihna khawp meuh thil ti ka nih chuan thih pawh ka hnial lo ve; nimahsela, hêngho min hêkna thil hi a bul eng mah a awm loh chuan, tu mahin an hnênah min pe thei lo vang. Kaisara hnênah ka thlen ang,” a ti a. 12 Tin, Festa chuan a rorêlpuite a biakrâwn zawhin, “Kaisara hnênah thlen i tum vei a, Kaisara hnênah i kal mawlh ang chu,” tiin a chhâng a.
Agrippa leh Berniki hmaah Paula a ding
13 Tin, ni eng zât emaw chinah chuan, Lal Agrippa leh Berniki chuan Kaisari khua an lo thleng a, Festa chibai an bûk a. 14 Tin, ni tam tak chutah chuan an châm avângin, Festa chuan Paula thupawi chu lal hnênah chuan a sawi a, “Felika khân mi tâng tu emaw a hnutchhiah a; 15 Jerusalem khuaa ka awm lai khân puithiam lalte leh Juda upaten a chungchâng thu min hrilh a, thiam loh chantîr an ngên a. 16 Tin, keiin an hnênah, ‘An hêka leh a hêktute an inhmatawna, an hêkna kawngah a thiamna thu sawi vena remchâng a hmuh hma loh chuan, mi rêng rêng hrem tûra thlah hi Rom khuaa mi dân a ni lo ve,’ tiin ka chhâng a. 17 Tin, heta an lo thlenin, rei rial lovin a tûkah chuan rorêlna ṭhutphahah ka ṭhu a, chu mi chu han hruai tûrin thu ka pe a. 18 Tin, a hêktute an din laiin, ka rin ang rêngin a chungah sualna thupawi eng mah rêng an sawi si lo va; 19 an sakhaw dânte leh Isua, mi pakhat thi tawh, Paula chuan, ‘A nung leh a ni,’ tiin a sawi a, chutih avâng chuan a chungah thubuaite an nei a lo ni zâwk a. 20 Tin, keiin chûng thute chu ngaihtuah ngaihna rêng ka hre lo va, Jerusalem khuaa kala, khita a chûngthu chu rêlsak a duh leh duh loh ka zâwt a. 21 Nimahsela, Paula chuan lalber rêla khêk a ngên ta zâwk a; chuvângin, Kaisara hnêna ka kaltîr theih hma loh chuan vêng tûrin thu ka pe a,” a ti a. 22 Tin, Agrippa chuan Festa hnênah chuan, “Kei pawh chu mi thusawi chu ngaihthlâk ka lo duh fo rêng a ni,” a ti a. Tin, ani chuan, “Naktûkah a thusawi i ngaithla ang chu,” a ti a. 23 Chutichuan, a tûkah chuan Agrippa leh Berniki chu ropui takin an lo kal a, thusawina inah an lo lût a, sipai hotu liante nên, khuaa mi ṭha deuh deuhte nên; tin, Festa thuin Paula chu an rawn hruai luhtîr a. 24 Tin, Festa chuan, “Lal Agrippa leh heta kan zînga awm zawng zawngte u, he mi in hmuh hi a ni, a chungchâng thua Juda-te zawng zawngin an zain nung tawh lo tûr, tia auva Jerusalem khuaah leh heta min biakna kha. 25 Nimahsela, thihna khawp meuhvin eng mah a ti lo tih ka hria a; tin, amahin Lalber hnêna thlen a tum avângin tirh ka tum a ni; 26 nimahsela, a thu mumal eng mah ka lal hnênah ziak tûr ka hre si lo va. Chuvângin, in hmaah ka rawn hruai chhuah hi, Lal Agripp, nangma hmaa rawn hruai bîk deuh ka ni e, chhuahchhâl zawha eng emaw tal ziak tûr ka hmuh theih nân. 27 Mi tâng lalber hnêna tirha, a chunga an hêkna thu hriat teltîr loh chu âtthlâk niin ka hre si a,” a ti a.
Agrippa hmaah Paulan a thiam thu a sawi
1 Tin, Agrippa chuan Paula hnênah chuan, “I thiamna thu i sawi thei e,” a ti a. Tin, Paula chuan a kut a phar a, a thiamna thu a sawi a; 2 “Lal Agripp, Juda-ten mi hêkna zawng zawnga ka thiamna thu vawiinah hian i hmaa ka sawi dâwn avâng hian lâwmin ka inhria; 3 hei hi ka lâwmna ber a ni, Juda-te zîngah dân leh thubuai zawng zawng kawnga i fin ngawt avângin; chuvângin, muang taka mi ngaihthlâksak tûrin ka ngên a che. 4 A tîra ka naupan lai ata ka chite zîngah leh Jerusalem khuaa ka awm dân kha, Juda zawng zawngin an hria e; 5 a tîr ata ka chanchin an hria e, khatia kan sakhaw pâwl khermei ber dân pangngaia Pharisaia ka awm kha, an duh chuan mi sawipui thei a ni. 6 Tin, Pathianin min thlahtute hnêna thu a tiam kha beisei kawng thu-ah, hetah tûnah rorêlsaka ka din hi; 7 chu thutiam chu kan hnam sâwm leh hnam hnihin, a chhûn a zâna Pathian rawng ṭhahnemngai taka bâwlin hmuh an beisei ṭhîn. Aw lalpa, chumi beisei thu avâng chuan Juda-ten mi hêk a nih hi. 8 “Pathianin mitthite a kaitho tih hi engati nge awihawm lohva in ruat ni? 9 Kei pawhin Nazareth Isua hming kalh lamin thil tam tak ti ila ṭhain ka lo ring ṭhîn a. 10 Chu ang chu Jerusalem khuaah ka ti bawk ṭhîn a; tin, puithiam lalte hnên aṭangin thu ka hmu a, mi thianghlimte zînga mi tam tak tân inahte ka khung bawk ṭhîn a; an tihhlum laiin tihhlum remti lamah ka ṭang bawk ṭhîn. 11 Tin, inkhâwmna in tinah ka hrem fo va, Isua thu sâwttîr ka tum hrâm ṭhîn a; tin, an chungah ka kawlh êm êm a, ram dang khaw thleng pawhin ka tiduhdah ṭhîn.
Paulan a pianthar thu a sawi
12 “Chutiang ti tûr chuan puithiam lalte thu hmu leh, an tirhna lehkha kengin Damaska khuaah ka kal a; 13 tin e, lalpa, ka kal laiin chawfâk hun a ni a, vân ata êng eng emaw, ni êng aia êng zâwk, keimah leh ka kalpuite vêlah êngin ka hmu a. 14 Tin, kan zain leiah kan tlu a, Hebrai ṭawngin, ‘Saula, Saula, nangin engati nge mi tihduhdah? Chhunna tiang khen i tân a na e,’ mi tiin aw ka hria a. 15 “Tin, keiin, ‘Lalpa, tu nge i nih?’ ka ti a. “Tin, Lalpa chuan, ‘Isua, i tihduhdah hi ka ni; 16 nimahsela, tho la, ding rawh; hêng i thil hmuhte leh i hnêna ka la inlârna tûr thilte nên, chumi rawngbâwlah leh hretua siam tûr chein i hnênah ka rawn inlâr a nih hi; 17 mi zawng zawng leh Jentailte kut ata ka chhanhim ang che, an mit tivâr tûrin an hnênah ka tirh che hi; 18 chutichuan, thim chu êng lamah an hawisan ang a, Setana thuneihna chu Pathian lamah an hawisan ang, sual ngaihhnathiamna an hmuh nân leh, min rin avânga thianghlim tawhte zînga ro chan an neih nân,’ a ti a.
Paulan a rawngbâwlna thu a sawi
19 “Chuvângin, Lal Agripp, vâna mi inlâra chu ka hnial lo va, 20 a tîrin Damaska khuaa mite hnênah, chumi hnuah chuan Jerusalem khuaa mite hnênah te, Judai ram tina mite hnênah te, Jentailte hnênah te pawh, sim hming pu tlâka thil tia, sima Pathian lam an hawina tûrin ka hril zâwk ṭhîn a ni. 21 Chûng avâng chuan a ni Juda-ten Pathian biak inah min mana min tihhlum an tum tâk ni. 22 Nimahsela, Pathian hnên aṭanga ṭanpuina ka hmuh avângin, vawiin thlengin mi tête leh mi liante hnêna thu hriattîrin ka la awm reng a, zâwlneite leh Mosian lo thleng tûr an tih thu chauh lo chu thu dang sawi lovin; 23 khatia, ‘Kristan hrehawm a tuar ang a; tin, mitthi zîng ata a thawhleh avângin, mi zawng zawng hnênah leh Jentailte hnênah pawh êng hmuhtîrtu hmasa ber a ni ang,’ an tih thu kha,” a ti a. 24 Tin, chutianga a thiamna thu a sawi lai chuan Festa chuan aw ring takin, “Paula, i â a ni; i zir tamnain a tiâ che a nih hi,” a ti a. 25 Nimahsela, Paula chuan, “Festa ṭha ber, ka â lo asin; thu dik tak leh thu fing tak ka sawi zâwk a nih hi. 26 Hêng thu hi lal hian a hria alâwm, a hnênah pawh hlau lovin ka sawi hi; hêng thil hi eng mah a hnênah zêp a ni lo tih dik takin ka hria e; hêng hi in kila tih a ni si lo. 27 Lal Agripp, zâwlneite thu i awih em? I awih tih ka hria e,” a ti a. 28 Tin, Agrippa chuan Paula hnênah, “Rei lo tê chauh thlêma Kristiana mi siam i tum a nih hi!” a ti a. 29 Tin, Paula chuan, “Rei sela, rei suh sela, nang chauh ka ti lo, vawiina ka thu hretu zawng zawng pawh hi, keimah anga awm atân Pathian hnênah ka dîl a ni, kawlte hi erawh chu bun ve lovin,” a ti a. 30 Tin, lal nên, ram awptu nên, Berniki nên, an hnêna ṭhute nên chuan an tho hlawm a; 31 tin, an kal hrang a, an inbia a, “He mi hian thihna leh kawl bunna khawp meuh thil eng mah a lo tih loh hi,” an ti a. 32 Tin, Agrippan Festa hnênah, “He mi hian Kaisara hnêna thlen lo tiam tawh suh sela chuan a chhuak mai tûr,” a ti a.
Rom khaw panin Paula lawngin a chhuak
1 Tin, Itali rama lawnga kan kal tûr thu an tihtlûk veleh, Paula leh mi tâng dang tute emaw, Augusta pâwla mi sipai za hotu, a hming Julia an kawltîr a. 2 Tin, Adramutteno khaw lawng, Asia ram tuifinriat kama khaw awmte tlawh tûrah chuan kan chuang a, tuifinriatah kan kal ta a; Makedonia rama mi Aristarka, Thessalonika khuaa mi kan hnênah a awm a. 3 Tin, a tûkah Sidon khua kan tlawh a. Tin, Julia chuan Paula a tiṭha hle a, intiharh tûrin a ṭhiante hnênah a lêntîr a. 4 Tin, chuta ṭang chuan tuifinriatah kan kal leh a, thliin a ni lo lamah min nem avângin, Kupra thliarkâr phên thli ûp lamah kan kawi a. 5 Tin, Kilikia ram leh Pamphulia ram dep tuifinriat kan pelh hnuin, Lukia rama Mura khua kan thleng a. 6 Chutah chuan sipai za hotu chuan Aleksandria khaw lawng, Itali ram tlawh tûr chu a hmu a; chumiah chuan min chuantîr a. 7 Tin, ni rei tak zawi zawiin kan kal a, harsa takin Knido khaw zâwn kan thleng hrâm hrâm a, thliin min hnar avângin Salmoni hrûla Kret thliarkâr phên thli ûp lamah kan kawi a; 8 tin, harsa takin vaukam kan hrût a, Litengsâwl Mawi an tih hmun chu kan thleng ta a; chumi kiangah chuan Lasai khua a awm. 9 Tin, ni tam tak a ral tawh avâng leh lawnga kal a hlauhawm tawh avângin, (Chaw nghei ni chu a lo pêl tawh si a) Paula chuan anni chu a zilh a, 10 an hnênah, “Pute u, lawnga tûna kal hian chhiatna leh boralna nasa tak a thleng dâwn tih ka hria e, a sum leh lawng chungah chauh ka ti lo va, keimahni chungah pawh ka ti a ni,” a ti a. 11 Nimahsela, sipai za hotu chuan Paula thusawi ai chuan lawngpu leh lawng neitu thu a awih zâwk a. 12 Tin, thlasik tuar nân litengsâwl chu a rem loh avângin, a tam zâwkin chuta ṭanga tuifinriata kal chhuaha, Phoiniki khua thlen hrâma, chuta thlasik tuar chu an rawtpui a; Phoiniki chu Kret thliarkâra litengsâwl pakhat a ni a, hmârchhak leh chhimchhak chhawng a ni.
Tuipuia thlipui tleh thu
13 Tin, chhim thli chu zawi zawia a lo tleh veleh chuan, an duh zawng an hmu em maw an ti a, thîrchakai chu an khai chhuak a, Kret thliarkâr kam chu an hrût an hrût a. 14 Nimahsela, rei lo te achinah chuan khawmual lam aṭang chuan thli na tak a lo tleh chhuk ta a, chu thli chu Eurakuilo an ti ṭhîn a. 15 Tin, lawng chu a rawn nam fuh a, thli lam a hawi theih loh veleh an thlah ta a, min lên min lên ta mai a. 16 Tin, a hming Kauda, thliarkâr tê tak tê phên thli ûp lamah kan kawi a, harsa takin lawnglêng chu kan hum thei hrâm a; 17 tin, an kaih chhuah hnuin chhanna hruite an hmang a, lawng hnuai lamah an la vêt a, an phuar a; tin, puanzârna engkim an titlu a; chuti lo chuan, litengsâwl Surti an tiha len luh an hlau va; chutichuan, min lên min lên ta a. 18 Tin, a tûkah chuan tuifâwnin min vawrh nek avâng chuan lawnga bungrua chu tuiah an paih ṭan ta a. 19 Tin, a tûk lehah anmahni kut meuhvin lawng bungrua an paih chhuak leh ta a. 20 Tin, ni rei tak, ni pawh, arsi pawh a lang lo va, thlipui namênin min nuai lo va, nun rêng kan beisei tawh lo. 21 Tin, chaw ei lova rei tak an awm hnuin, an zîngah Paula a ding a, “Pute u, Kret thliarkârah khân phelh lovin, ka thu kha awiha hêng chhiat leh boralna hi thlen lo tûr in ni na a le. 22 Nimahsela, tûnah pawh hian thlamuang taka awm tûrin ka fuih a che u; in zîngah tu mahin nunna in hloh dâwn lo ve, lawng erawh hi chu a bo dâwn a ni. 23 A ta ka ni a, a rawng ka bâwl ṭhin Pathian kha, chu mi vântirhkoh pakhat nizân khân ka kiangah a lo ding a, ka hnênah, 24 ‘Paula, hlau suh, Kaisara hmaah i ding tûr a ni; tin, ngai rawh, lawnga i hnêna kal zawng zawngte pawh hi Pathianin a pe a che,’ mi ti a ni. 25 Chuvângin, pute u, thlamuang takin awm rawh u; Pathian ka ring e, mi hrilh ang zêlin a awm dâwn. 26 Nimahsela, thliarkâr engah emaw min lên chhuak tûr a ni,” a ti a. 27 Tin, Adria tuifinriatah thliin lehlam lehlamah min lên min lên a, zan sâwm leh zan li a tlin zân chuan, zanlaiah emaw, lawng mite chuan khawii khawmual emaw thleng dâwnin an inhria a; 28 chutichuan, tui thûk lam an teh a, hlam sawm leh hlam ngain an hria a; tin, rei lo têah an teh leh a, hlam sâwm leh hlam ngain an hria a. 29 Tin, lawng mei lamah thîrchakai pali an thlâk a; chuti lo chuan, lung chhe hmunah min lên chhuak hlauh dah ang e, tih an hlau va; tin, khawvâr hlân an nghâkhlel hle mai a. 30 Tin, lawng mite chuan lawng hnâr lamah thîrchakaite thlâk tûr anga tiderin, lawnglêng chu tuifinriatah an thlâk a, lawng chu tlânsan an tum a. 31 Chutih lai chuan Paula chuan sipai za hotu leh sipaite hnênah chuan, “Hêngho hi lawnga an awm reng loh chuan in him thei lo vang,” a ti a. 32 Tichuan, sipaite chuan lawnglêng hruite chu an zai chat a, an thlah ta a. 33 Tin, khawvâr dâwn lai chuan Paula chuan mi zawng zawng chu chaw eiah a tîr a, “Vawiin hi ni sâwm leh ni li a ni tawh, eng mah ei lovin in nghâk a, in nghei reng a ni. 34 Chuvângin, chaw ei atân ka tîr chiam a che u; in damna tûr a nih hi; in zîngah tu ma samzai pakhat mah a boral lo vang,” a ti a. 35 Tin, chu thu chu a sawi zawhin chhang a la a, mi zawng zawng hmaah Pathian hnênah lâwm thu a sawi ta a; tin, a phel a, a ei ṭan ta a. 36 Tichuan, anni pawh thlamuang takin an awm a, chaw an ei ve ta a. 37 Tin, lawnga mi chu kan zain zahnih leh sawmsarih leh paruk kan ni a. 38 Tin, an ei kham chuan buh chu tuifinriatah an paih a, lawng chu an tizâng deuh va.
Lawng chhiat thu
39 Tin, nî a chhuah chuan khawmual chu khawii lai nge a nih an hre lo va; nimahsela, khawii litengsâwl emaw ṭiaupho nei an hmu a, chumi chungah chuan, an theih chuan lawng chhuahtîr an tum a. 40 Tin, thîrchakai thlunnate chu an zai chat a, tuifinriatah an hnutchhiah a; chumi rual chuan kar herna phuarnate chu an phelh a, hma lam puanzâr chu thli chhêm tûr ziain an hnûk chho va, ṭiaupho chu an pan ta a. 41 Nimahsela, tuizangkhauh pahnih intawhna hmunah kan lût hlauh va, lawng chu lei an suttîr ta a; tichuan, lawng hnâr lam chu a tâng ta tlat a, tihchêt zawh lohvin a awm reng a, a mei lam erawh chu tuifâwn a nasat avângin a keh sawm ṭan ta a. 42 Tin, sipaite chuan mi tângte chu tihhlum an rawt a; chuti lo chuan, tui hleuh kaite an awm ang a, an tlân bo vang tih an hlau va. 43 Nimahsela, sipai za hotu chuan Paula chhanhim a duh a, an thiltum chu a khap a; tui hleuh thiam apiang tuifinriatah zuang thlaa khawmual lo kai hmasa tûr leh, 44 mi dang chu, a ṭhen thingphêk chungah te, a ṭhen lawng bungraw dang chungah te kai tûrin thu a pe a. Chutiang chuan an zain khawmualah him takin an kai ta vek a.
Meliti ram an kai thu
1 Tin, kan kai zawh chuan thliarkâr hming chu Meliti a ni tih kan lo hre ta a. 2 Tin, awze miten khawngaih namênin min khawngaih lo va; ruah a lo sûr avâng leh a vawh avângin mei an chhêm a, kan zain min lo lâwm a. 3 Tin, Paula chuan thing têl khat a fawm a, meiah a tuah a, a sat avângin rûl a lo chhuak a, a kutah a chû a, a bet ta reng a, 4 Tin, awze mite chuan rannung a kuta inkhai reng chu an hmuhin, “He mi hi tualthat a ni phawt e, tuifinriat aṭangin tlân chhuak mah sela Phubalatua chuan a nun a awih tawh lo a nih hi,” an ti a. 5 Nimahsela, ani chuan rannung chu meiah a thing thla a, eng mah a ti lo va. 6 Anni erawh chuan a vûn emaw, thâwklehkhata thia a tlûk nghâl emaw an ring a; rei tak an nghâk a, eng mah a ti lo tih an hriat chuan an rilru an lamlêt a, “Pathian a nih hi,” an ti ta zâwk a. 7 Tin, chumi hmun kiangah chuan chumi thliarkâra lal ber, a hming Publia ram a awm; chu mi chuan min lo lâwm a, ni thum lâwm takin min thleng a. 8 Tin, Publia pa chu khawsik leh santên veiin a lo mu reng a; tin, a hnênah Paula a lût a, a ṭawngṭai a, a chungah a kutte a nghat a, a tidam ta a. 9 Chu chu a tih zawh chuan chumi thliarkâra mi dang na nei apiang chu an lo kal a, an dam ta hlawm a; 10 chu mite chuan nasa takin min chawimawi a; tin, kan kal dâwn chuan kan châkkhai apiang lawngah an dah hlawm a.
Meliti aṭangin Rom an thleng
11 Tin, thla thum chinah, a hming Phîr, Aleksandria khaw lawng, thlasika thliarkâra awm tawh, chumi lawngah chuan kan kal ta a. 12 Tin, Surakus khua kan tlawh a, chutah chuan ni thum kan châm a. 13 Chuta ṭang chuan kan kal kual a, Region khua kan thleng a; tin, ni khat chinah chhim thli a lo tleh a, a tûk lehah Puteoli khua kan thleng leh a; 14 chutah chuan unaute kan hmu a, an hnêna ni sarih châman min ngên a; chutiang chuan Rom khaw lamah kan kal ta zêl a. 15 Tin, unauten kan chanchin an hriat veleh, chuta ṭang chuan Appia Dâwr leh Khualbûk Pathum chinah min hmuak tûrin an lo kal a; Paulan chu mite chu a hmuh chuan Pathian hnênah lâwm thu a sawi a, a muang ta a.
Rom khuaah Paula
16 Tin, Rom khuaa kan luh chuan Paula chu a vêngtu sipai hnênah amah chauhva awm an phal a. 17 Tin, ni thum chinah Paula chuan Juda-te hotu deuh apiang a ko khâwm a; tin, an rawn inkhâwmin an hnênah, “Unaute u, mi zawng zawng leh min thlahtute dân chunga eng mah ka tih loh pawhin, Jerusalem khua aṭangin Rom mite hnênah min tântîr a ni. 18 Tin, anni chuan min chhuahchhâl zawhin, thihna khawp meuh ka chungah eng mah a awm loh avângin thlah min tum a. 19 Nimahsela, Juda-ten chu chu an hnial avângin Kaisara hnêna thlen lo thei ka ni ta lo va; nimahsela, ka chite hêkna neia ti ka ni lo ve. 20 Chûng kawngah chuan nangni hi hmuhah leh biak atân ka ko che u a ni; Israel-te beisei ka ṭâwmpui avânga he khaidiat hi bun ka ni si a,” a ti a. 21 Tin, anni chuan a hnênah, “I chanchin Judai ram ata lehkhatein kan hmu lova, unaute tu mahin heta lo kalin i chungah thupawi eng mah an puang hek lo, sawi pawh an sawi hek lo. 22 Amaherawhchu, he pâwl hi ram tinah sawichhiat an ni si a, nangin engtin nge i ngaih hriat kan duh e,” an ti a. 23 Tin, ni an tiam a, chumi niah chuan a thlen inah a hnênah mi tam tak an lo kal a; zîng aṭanga tlai lam thlengin an hnênah chu thu chu a hrilhfiah a, Pathian ram thu a hriattîr a, Mosia Dân Lehkha thu leh Zâwlneite Lehkhabu thuin Isua lamah anmahni a thlêm a thlêm a. 24 Tin, a ṭhenin a thu sawi chu an ring a, a ṭhenin an ring lo va. 25 Tin, an inngeih ta lo va, Paulan thu kam khat a sawi zawhin an kal chhuak ta a. A thusawi chu hei hi a ni: “Thlarau Thianghlimin zâwlnei Isaia kaan in thlahtute hnêna a sawi kha a dik ngawt mai, 26 ‘He chite hnênah hian va sawi rawh: Beng zawngin in hre na ang a, a ngaihna erawh chu in hre tawp lo vang; Hmuh zawng in hmu na ang a, hriat erawh chu in hre tawp lo vang; 27 He chite thinlung hi a lo chawlawl ta a, An bengte a lo ngawng deuh va, An maimitchhîng bawk a, Chuti lo chuan, kan mitin kan hmu ang a, Kan bengin kan hria ang a, Kan thinlungin kan hre bawk ang a, Kan hawi kîr leh ang a, Anin min tidam hlauh dah ang e,’ an ti a, a tih kha. 28 “Chutichuan, Pathian chhandamna thu hi Jentailte hnêna thawn a ni tih hre rawh u, anni zawngin ngaih pawh an ngaithla ang,” a ti a. 30 Tin, Paula chu kum hnih pumhlûm a in luah hawhah a awm a, a hnêna lût apiang a lâwm ṭhîn a, 31 Pathian ram thu a hrilh a, Lal Isua Krista thu pawh huai takin a zirtîr ṭhîn a, tu mahin amah an khap si lo va.
Chibai bûkna
1 Paula, Isua Krista bawih, tirhkoh ni tûra koh, Pathian Chanchin Ṭha hril tûra tihhrana chuan 2,3 (chu Chanchin Ṭha, a Fapa kan Lalpa Isua Krista thu chu, Pathianin hmânlaiin a Lehkha thianghlimah chuan a zâwlneite kain a tiam tawh a; ani chu tisa lam thu-ah chuan Davida thlaha piang a ni a, 4 thianghlimna thlarau lam thu-ah erawh chuan, mitthi zîng ata a thawhlehna chuan Pathian Fapa a nih nasa takin a hriattîr a; 5 a hming avânga rinna chu hnam tin zînga mi awihtîr tûrin, amah avâng chuan khawngaihna leh tirhkoh nihna kan chang ta; 6 chûng zîngah chuan nangni pawh Isua Krista kohte in ni a), 7 Rom khuaa Pathian duh tak, mi thianghlima awm tûra kohte zawng zawng hnênah: Pathian kan Pa leh Lal Isua Krista hnên ata khawngaihna leh remna in hnênah awm rawh se.
Paulan Rom khua tlawh a châk
8 Khawvêl zawng zawngah in rinna thu a than avângin, in zaa chunga ka lâwmna thu Isua Krista zârah ka Pathian hnênah ka sawi hmasa rih a ni. 9,10 Ka ṭawngṭainaahte chuan bâng lovin in hming ka lam fo va, tûnah tal hian in hnêna ka lo kalna tûrin, Pathian thu thua zin hun remchâng ka hmuh hrâm hrâm theih nân ka dîl ṭhîn tih, a Fapa Chanchin Ṭhaa ka thlarauva a rawng ka bâwl ṭhin Pathian chu a hretu a ni si a. 11 In nghehna tûra thlarau lam thilpêk eng emaw ka pêk theihna tûr che uin hmuh ka châk hle si che u a; 12 chu chu, in rinna leh ka rinnain kan inthlamuan tawn theihna tûr, ka tihna a ni. 13 Tin, unaute u, Jentail dangte hnêna ka thawh rim rah ka hmuh tawh ang bawkin, nangni zîngah pawh rahte ka hmuh theihna tûrin, in hnênah vawi tam tak lo kal ka tum tawh tih in hriat loh ka duh lo va; nimahsela, tûn hma zawng khân dâlin ka awm fo ṭhîn a. 14 Grik mite leh awze mite hnênah bat ka nei; mi fing leh mi fing lote hnênah pawh. 15 Chutichuan, nangni Rom khuaa awmte hnênah pawh Chanchin Ṭha ka theihtâwpa hril tûrin ka inpeih reng a ni.
Chanchin Ṭha thiltihtheihna
16 Chanchin Ṭha chu ka zahpui si lo va; tu pawh a ring apiangte tân chhandamna tûra Pathian thiltihtheihna a ni si a; a tîrah Juda mi tân a ni a; tin, Grik mi tân pawh a lo ni leh a. 17 Chumiah chuan rin lehzual nân, rinnain Pathian felzia chu a lo lang a, “Mi fel chu rinnain a dam ang,” tia ziak ang khân.
Mihring fate sualna
18 Thutak fel lo taka dâltute Pathian ngaihsak lohna leh fel lohna zawng zawng chungah chuan, vân aṭangin Pathian thinur a lo lang a ni; 19 Pathianin a hriattîr tawh avângin, Pathian chanchin hriat tûr mi chu an rilruah hriattîrin a awm si a. 20 A thil hmuh theih loh (a chatuan thiltihtheihna leh a Pathianzia) chu khawvêl siam tirh ata fiah taka hmuhin a awm a, thil siamah chuan a lang a ni; chu vâng chuan, chhuanlam tûr an nei lo; 21 Pathian hre siin Pathian angin an chawimawi lo va; lâwm thu pawh an sawi hek lo; thil lawilo an ngaihtuah ta zâwk a, an thinlung â chu a lo thim ta a. 22 Finga inngaiin mi âah an lo chang a, 23 thi thei lo Pathian ropuina chu thi thei mihring te leh sava te, fuliafa te, rannung te lem angah an chantîr ta a. 24 Chuvângin, an taksa zahthlâk taka insiam tawn tûrin, an thinlung châk zâwng anga thil bawlhhlawh tih phalin Pathianin a hawisan a ni. 25 Pathian thutak chu dâwta chantîrin, a Siamtu biak aiin a siama chu biain a rawng an bâwl ta zâwk si a. A Siamtu chu chatuana fak tlâk a ni. Amen. 26 Chumi avâng chuan Pathianin zahthlâk taka hur phalin a hawisan a; an hmeichhiate meuh pawhin an awm dân pianpui chu dan lo anga awm tûrin an intidanglam si a; 27 mipate pawhin hmeichhe hman dân pângngai bânsana hurin an inît a, mipa leh mipa ṭha lo takin an inti a, an sual man hmuh tûr chu anmahniah an hmu a. 28 Tin, Pathian hriat an duh loh avângin, thil mawi lote ti tûra a duh loh zâwng rilru neih phalin Pathianin a hawisan ta; 29 chutichuan, fel lohna zawng zawng te, sualna zawng zawng te, duhâmna zawng zawng te, suahsualna zawng zawng tein an lo khat a; îtsîkna te, tualthahna te, inhauna te, bumna te, nungchang ṭha lo tein an khat a; sesea thu lâk hmang te, 30 mi rêl hmang te, Pathian huat zâwng te, intivei te, chapo te, mi uang te, thil sual thar tichhuaktu te, nu leh pa thu awih lo te, 31 rilru nei lo te, thutiam bawhchhetu te, hmangaihna pianpui nei lo te, khawngaihna nei lo te an lo ni a; 32 chutianga thil titute chu thi zia rêng an ni tih Pathian ruat chu hre rengin, anmahni changa ti pawh ni lovin, mi dang ti ṭhînte chungah chuan an lâwm bawk ṭhîn.
Pathian rorêlna dik
1 Chuvângin, aw mihring, mi sawisêltu, tu pawh ni mah la, chhuanlam rêng i nei lo ve; mi dang i sawisêlna ngeiah chuan nangmah leh nangmah thiam loh inchantîr i ni asin; nang, sawisêltu pawhin chutiang thilte chu i ti ve ṭhîn si a. 2 Chutiang thil ti ṭhîntute chungah chuan Pathianin a sawisêlna chu thu dik tak lam zêl a ni tih kan hre si a. 3 Aw mihring, chutiang thil ti ṭhînte sawisêltu, nangin chutiang chu i ti ve bawk si a; Pathianin a sawisêlna chu pumpelh i inring em ni? 4 A nih loh leh, Pathian ṭhatnain simna tûrin a hruai ṭhîn che tih hre lovin, a ṭhatna ngahzia leh, a en theihzia leh, a dawhtheihzia te chu i ngainêp em ni? 5 I luhlul leh i thinlung khauh avângin, thinurna leh Pathian rorêlna fel tak lo lanna ni atân chuan i chungah thinurna i khâwl khâwm chawp a ni. 6 Pathian chuan mi tin an thiltih ang zêlin a rêlsak ang; 7 thil ṭha ti fan fana, ropuina leh chawimawina leh boral theih lohna zawngtute hnênah chuan chatuan nunna a pe ang; 8 amaherawhchu, kawhmawh bâwla, thutak zâwm lova, fel lohna zâwm zâwktute chungah chuan thinurna leh thinrimna te, 9 hrehawmna leh lungngaihna nasa takte a awm ang, mihring thil tisual apiangte thlarau chungah a awm ang, Juda mi thlarau chungah a awm hmasa ang a, Grik mi thlarau chungah a awm leh ang; 10 amaherawhchu, thil ṭha titu apiang hnênah chuan ropuina te, chawimawina te, thlamuanna te pêk a ni ang, Juda mi hnênah pêk hmasak a ni ang a, Grik mi hnênah a ni leh ang; 11 Pathianin mi duhsak bîk a nei si lo va. 12 Tu pawh Dân nei lova thil tisual chu, Dân lo bawkin a boral ang; tin, tu pawh Dân neia thil tisual chu, Dâna rorêlin a awm ang. 13-16 Dân hretu maite chu Pathian mit hmuhin mi fel an ni lo va; Pathianin ka Chanchin Ṭha sawi anga mihringte thurûk Isua Krista hmanga a ngaihtuah niah chuan, Dân anga titute chu mi fela chhiarin an awm zâwk ang. Dân nei lo Jentailten mahni thinlung pianpuia Dân thilte chu an tihin, chûng chuan dân nei lo mah sela, anmahni leh anmahni dânah an innei chawp si a, an thinlungah Dân thiltih ziak a ni tih an entîr a, chu chu an chhia leh ṭha hriatnain a hriatpui a, an rilrute chu a inhnial a, thiam loh a chantîr thûl a, thiam a chantîr thûl a.
Juda-te leh Dân
17 Nimahsela, nang Juda hming pu i ni si a, Dân chu i rinchhana, Pathian i chhuana, 18 a duh zâwng i hriata, Dân thua zirtîrin i awm avângin thil ṭha tak chu ṭha i ti a, 19-20 Dânah chuan finna leh thutak awm dân i neih avângin nang ngei, mitdelte hruaitu, thim zînga awmte êntu, mi fing lote tifingtu, nausênte zirtîrtu niah i inring a; 21 chutiang i nih ahnuin, nang, mi dangte zirtîrtu, nangmah i inzirtîr lo maw? Nang, mi rûk ru lo tûra hrilhtu, nangin i ru ṭhîn maw? 22 Nang, mi uirê lo tûra hrilhtu, nangin i uirê ṭhîn maw? Nang, milem hawtu, nangin milem biak ina thilte i ru ṭhîn maw? 23 Nang, Dân chhuangtu, nangin Dân i bawhchhiat avângin Pathian i tihmingchhe ṭhîn a ni maw? 24 An ziak ang ngei khân, Pathian hming chu nangmahni avângin Jentailte zîngah tihchhiatin a awm ta a nih hi. 25 Dân zâwmtu i nih chuan serh tan chu a sâwt takzet a ni; Dân bawhchhetu i nih erawh chuan i serh tan chu tan loh ang mai a lo ni tawh. 26 Chuvângin, serh tan loh miin Dân thuruatte a vawn chuan, a serh tan loh chu tan anga ngaih a ni dâwn lo vem ni? 27 Tin, mahni pianziaa serh tan lohvin Dân chu a zawm kim chuan, nang, lehkha thu leh serh tan Dân bawhchhetu, a sawisêl dâwn lo che em ni? 28 A lang maia Juda mi ni chu Juda mi tak a ni lo va; a langa tisa maia serh tan chu serh tan tak a ni bawk hek lo. 29 Amaherawhchu, a lang mai ni lova Juda mi ni chu Juda mi tak a ni; tin, serh tan tak chu rilru lama tan a ni, lehkha thu maiah ni lovin, thlarauvah a ni; chu mi chuan mihring fak a hlawh lo va, Pathian fak a hlawh zâwk a ni.
1 A nih leh, Juda mi chuan sâwtna eng nge a neih chuan bîk? Serh tan pawh eng nge a sâwtna? 2 Kawng tinah a sâwt hle; Pathian thute an hnênah kawltîrin a awm avâng a ni ber a. 3 Mi ṭhenkhatten rinna nei lo mah sela eng nge maw ti chuang le? An rin lohna chuan Pathian rinawmzia engmahlovah a siam chuang em ni? 4 Hnai lo ve; Pathian chu mi dik tak ni sela, mi tin erawh chu mi dawthei ni zâwk rawh se; “Nangin i thusawiin thiam i chan theiha, Rorêla i awm pawhin i hneh theih nân,” tih ziak ang khân. 5 Nimahsela, kan fel lohna hian Pathian felna chu a tihlan mawi lehzual chuan eng nge kan sawi ang? Pathianin mi a hrem hian mi fel lo a ni em ni? (Mihring dân angin ka sawi a ni.) 6 Hnai lo ve; chuti a nih chuan Pathianin engtin nge khawvêl ro a rêl ang? 7 Nimahsela, ka dâwt thu sawi avânga Pathian thu dikzia amah tiropui khawp hiala a lan lehzual si chuan, engati nge kei pawh mi sual anga thiam loh chantîra ka la awm ni? 8 Engati nge (mi hêka, mi ṭhenkhatin sawi loh pui mi sawitîr angin), “Thil ṭha a lo thlen theih nân thil sual i ti ang u,” tiin kan sawi zâwk loh? Chutiang mite chuan thiam loh an chan chu a fel a ni.
Tu mah fel an awm lo
9 A nih leh anni aiin kan ṭha chuang bîk em ni? Hnai lo ve; Juda-te leh Grik-te chu sual bawiha awm vekah tûn hma lamah pawh kan puh tawh kha; 10 “Tu mah mi fel tak rêng an awm lo, Pakhat mah an awm hauh lo; 11 Tu mah hre thiam rêng an awm lo, Tu mah Pathian zawng rêng an awm lo. 12 A ni lo lamah an pêng ta vek a; Eng maha tlâktlai lovin an lo awm ta vek a. Tu mah thil ṭha ti rêng an awm lo, Pakhat tê mah an awm hauh lo. 13 An hrawk chu thlân inhawng a ni a; An leiin bumna thu an sawi a. An kam chhûngah rûl tûr a awm a. 14 An kâ chu ânchhe lawhna leh thu khâin a khat a. 15 An ke chu thisen chhuah tûrin a pên chak a; 16 An kawngah chuan boralna leh hrehawmna a awm a; 17 Thlamuanna kawng pawh an hre lo. 18 An mit hmuhah Pathian ṭihna rêng a awm lo,” tih ziak ang khân. 19 Dânin eng pawh a sawi apiang chu, Dân thu thua awmte hnênah a sawi a ni tih kan hria a ni, ka tinrêng a chîp theih nân leh khawvêla mi zawng zawng Pathian rorêlin an awm theih nân. 20 Chutichuan, Dân thiltih avângin mi tu mah a mit hmuhin thiam changin an awm lo vang; Dân avângin sual hriat famkimna a lo awm a ni si a.
Rin vânga thiam channa
21 Nimahsela, tûnah Dân leh zâwlneite hriattîr angin Dân lova Pathian felna chu tihlanin a awm ta; 22 chu chu Pathian felna, Isua Krista rin avânga a ring apiangte hnêna tihlana awm chu a ni (danglamna rêng a awm lo va, 23 mi zawng zawngin thil an tisual tawh vek a, Pathian ropuina an chang zo ta lo a ni); 24 chûng ringtute chu, Krista Isuaa tlanna awm avâng chuan, a khawngaihnain a thlâwna thiam chantîrin an awm a; 25 Pathian dawhtheihnaa hmânlai sualte hai dera a awm avâng khân, Pathianin ama felzia entîr nân Krista Isua chu, a thisena, rinna avânga sual thupha chawinaah a ruat a; 26 tûnlaia a felzia entîr nân a ni, amah ngei chu mi fel a nih theihna tûr leh, Isua ring apiang thiam chantîrtu a nih theihna tûrin. 27 Inchhuanna chu khawiah nge a awm ni le? Pâwn lama khâr hnanin a awm ta. Eng dânin nge ni le? Thiltihna dânin em ni? Ni lo ve, rinna dânin a ni zâwk. 28 Chutichuan, Dân thiltih ni lovin, rinnain miin thiam changin kan ruat a ni. 29,30 Pathian chu Juda-te Pathian chauh em ni? Jentailte Pathian pawh a ni ve lo vem ni? Ni ve e. Serh tante chu an rin avânga thiam chantîrtu tûr leh, serh tan lohte chu an rin azâra thiam chantîrtu tûr chu Pathian pakhat chauh a nih si chuan, Jentailte Pathian pawh a ni ve ang chu. 31 A nih leh, rin avângin Dân chu engmahlovah kan siam em ni? Hnai lo ve, Dân chu kan tinghet zâwk a ni.
Entawn atân Abrahama
1 A nih leh, Abrahama, tisa dâna min thlahtu chuan eng nge a hmuh kan tih ang? 2 Abrahaman thiltih avânga thiam a chan si chuan chhuan tûr a nei a ni; Pathian lamah erawh chuan a nei lo ve. 3 Pathian Lehkhain eng nge a sawi ni? “Abrahama chuan Pathian a ring a; tin, chu rinna chu a felnaa ruat a ni,” tiin a sawi a ni. 4 Tin, hnathawktu hlawh chu khawngaihnaa ruat a ni lo va, bata ruat a ni zâwk e. 5 Amaherawhchu, hna thawk lova, Pathian ngaihsak lo, thiam chantîrtu ring zâwka rinna chu, ama felnaa ruat a ni. 6 Mi, a thiltih ngaihtuah lova Pathianin fela a ruata chu mal a sâwmsak thu Davida pawhin: 7 “An bawhchhiatnate ngaihdama awm leh, An sualte khuha awm chu An eng a thâwl e. 8 Lalpan khawlohna neia a ruat loh chu A eng a thâwl e,” tia a sawi ang khân. 9 A nih leh, chu mi engthâwlna chu serh tanho chungah chauh nge a awm, serh tan lohho chungah pawh? “Abrahama rinna chu a felnaa ruat a ni,” kan ti si a. 10 Chu chu engtia ruat nge ni le? A serh tan hnuah nge, a serh tan hmain? A serh tan hnuin a ni lo va, a serh tan hmain a ni zâwk. 11 Chutichuan, serh tan lova a awm laia rinnaa felna a hmu tih hriatna, serh tan chhinchhiahna chu a hmu a; chu felna chu an tâna ruat a nihna tûrin, serh tan lohte zînga ringtu zawng zawng pa a nih theih nân; 12 serh tanho pa pawh a nih theih bawk nân - serh tan mai pa a ni lo va, kan pa Abrahama serh tan lova a awm laia rinna a neih ang nei fâwmte pa a ni zâwk.
Rinna avânga thutiam hlen
13 Dân avângin Abrahama leh a thlahte hnênah chuan khawvêl ro luahtu tûr a ni ang tih thu zawng tiam a ni si lo va, rinnaa felna avângin a ni zâwk e. 14 Dâna mite chu ro luahtute an nih si chuan, rinna engah mah a tlâktlai lo va, thutiam pawh chu eng mah a ni ta lo va; 15 Dân chuan thinurna a siam si ṭhîn a; Dân awm lohnaah erawh chuan bawhchhiatna pawh a awm hek lo. 16,17 Chuvângin, khawngaihnain a nih theih nân rinna avângin a nih hi, thlahte zawng zawng chuan thutiam chu matheilova an hmuhna tûrin, Dân nei mite chauhvin an hmu lo vang a, Abrahama neih ang rinna neite pawhin an hmu bawk ang. Mitthite tinungtu leh, thil awm lote awm anga sawitu, a rin Pathian mit hmuhah chuan Abrahama chu kan zaa pa a ni (“Chi tam takte paah ka siam a che,” tih ziak ang khân). 18 Beiseina âwm a awm loh pawhin ani chuan beisei takin a ring a, chi tam takte pa a lo nih theih nân; “Khiti zât khian i thlahte an la awm ang,” tia hrilh ang khân. 19 Tin, rinna nghet lo chuang lovin, a taksa thi tawh anga awm chu a ngaihtuah a (amah chu kum za lai mi a ni si a), Sari chin pawh a ngaihtuah bawk a; 20 nimahsela, rinna tlachhamin Pathian thutiam chu a ringhlel lo va, Pathian a chawimawi a, 21 a thutiam chu a hlawhtlintîr thei tih a awih hle bawk a, a rinna chu a lo nghet ta zâwk a. 22 Chuvângin, a rinna chu a felnaa ruat a lo ni tawh. 23 Chutichuan, a rinna chu a felnaa ruat a ni tih hi amah vâng chauhva ziak a ni lo va, 24 keimahni vâng pawhin a ni. Isua kan Lalpa mitthi zîng ata kaithotu chu ringtu kan ni a, kan rinna chu felnaa ruat a ni dâwn. 25 Chu Isua chu kan sual avângin mantîrin a awm a, thiam kan channa tûrin kaihthawhin a awm bawk a.
Thiam channa rah
1 Chuvângin, rinna avânga thiam changa awmin, kan Lalpa Isua Krista avângin Pathian nên inremin i awm ang u; 2 amah avâng vêk chuan he khawngaihna kan din nghehnaah hian rinnain kan lût ta a; Pathian ropuina beiseiin lâwmin i awm bawk ang u. 3 Tin, chuti chauh chu ni lovin, kan hrehawmnaah pawh lâwmin i awm ang u, hrehawmna chuan chhelna a siam a, 4 chhelna chuan hriat fiahna a siam a, hriat fiahna chuan beiseina a siam tih kan hre si a; 5 tin, Thlarau Thianghlim kan hnêna min pêk khân Pathian hmangaihna chu kan thinlunga a leih tawh avângin, beiseina chuan a timualpho lo va. 6 Kan la chak loh lai khân a hun têin Krista chu mi sualte ai chuan a lo thi ta si. 7 Mi fel aia thih miin a duh âwm lo hle si a, mi ṭha ai erawh chuan mi tu emaw tal chuan thih a ngam mial mahna. 8 Nimahsela, Pathian chuan a mi hmangaihna chu fak tlâkin a lantîr a, mi sualte kan la nih laia Krista kan aia a thih avâng khân. 9 Chutichuan, a thisena thiam chantîra kan awm tawh hnu hian, amah avângin Pathian thinurna lak ata chu chhandamin kan awm ngei ang. 10 Hmêlma kan nih lai maha a Fapa thihna avânga Pathian nêna lo inrem tawh kan nih si chuan, inrema kan awm tawh hnu hian a nunna avângin chhandamin kan awm ngei ang. 11 Chuti chauh pawh a ni lo va, inremna tûna min hmuhtîrtu, kan Lalpa Isua Krista avâng chuan Pathianah kan lâwm bawk a ni.
Adama leh Krista
12 Chutichuan, mi pakhat avângin khawvêlah sual a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin, thihnain mi zawng zawng a fan chhuak ta a. 13 Dân awm hmain khawvêlah sual a awm tawh si a; dân a awm si loh chuan sual chu suala ngaih a ni lo; 14 nimahsela, Adama awm achin Mosia awm thlengin, Adama bawhchhiatna anga thil tisual lote chungah pawh thihna chuan ro a rêl ṭhîn. Adama chu lo la kal tûra nên tehkhinna a ni. 15 Nimahsela, thilthlâwnpêk chu sualna nên a inang lo bawk. Mi pakhat sual avâng mah khân mi tam tak chu an thih si chuan, Pathian khawngaihna leh mi pakhat, Isua Krista khawngaihna avânga thilpêk chu mi tam tak chungah vûrin a awm ngei ang. 16 Tin, thilpêk chu mi pakhat sual avânga thil lo awm nên a inang hek lo; thiam loh chantîrna rorêlna chu mi pakhat avângin a lo awm a, thiam chantîrna thilthlâwnpêk erawh chu sual tam tak avângin a lo awm ta zâwk si a. 17 Mi pakhat sual avânga thihnain chu mi pakhat avâng maha ro a rêl si chuan, khawngaihna nasa tak leh felna thilpêk hmutute chuan, mi pakhat (Isua Krista) avâng khân nunnaah chuan ro an rêl ngei ang. 18 Chutichuan, sual pakhat avângin thiam loh chantîrna rorêlna chu mi zawng zawng chungah a lo awm a; chutiang bawkin thil fel pakhat tih avângin, nunna hmuh nân thiam chantîrna thilthlâwnpêk chu mi zawng zawng chungah a lo awm. 19 Mi pakhat tihmawh avâng khân mi tam tak chu mi sual an lo ni ta a; chutiang bawkin mi pakhat tihawih avâng khân mi tam tak chu mi fel an lo ni ang. 20 Tin, sual a lan lehzual theih nân Dân a lo awm lehnghâl a. Nimahsela, sual a punna apiangah khawngaihna chu a pung lehzual ṭhîn; 21 sual chuan thihnain ro a rêl ang takin, khawngaihna chuan felnain chatuan nun channa khawp hialin kan Lalpa Isua Krista zâra ro a rêl theih nân.
Sual thihsana Kristaa nun
1 Eng nge kan sawi tâk ang le? Khawngaihna chu a pun lehzual theih nân sualin kan awm reng dâwn em ni? 2 Hnai lo ve. Keini sual kawnga thi tawh sualin engtin nge kan la nun theih cheu vang? 3 Keini zîngah Krista Isuaa baptisma chang apiangte chu a thihnaah baptis-in kan awm tih in hre lo em maw ni? 4 Chuvângin, a thihnaah baptisma kan chanin, a hnêna phûm vein kan awm; Pa ropuinain mitthi zîng ata Krista a kaihthawh ang khân, keini pawh nunna tharin kan awm theih nân. 5 A thihna anpuia amah nên kan inzawm tawh si chuan, a thawhlehna anpui pawhin kan inzawm bawk ang. 6 Hêng hi hria ila: kan mihring hlui chu a hnênah khen behin a awm ve ta, sual pu taksa chu tihborala a awm theih nân, tûn achinah sual bawiha kan awm lohna tûrin. 7 Tu pawh thi tawh chu sual lakah a chhuak tawh si a. 8 Tin, Krista hnêna kan thih ve tawh chuan a hnênah kan nung ve bawk ang tih kan ring a ni; 9 Krista chu mitthi zîng ata kaihthawhin a awm a, a thi leh dâwn tawh lo tih kan hre si a; thihna chuan ama chungah thu a nei tawh lo. 10 A thihna chu sual lam kawngah chatuan atân vawi khat chauh a thi a ni, a nunna erawh chu Pathian lam kawngah a nung a ni. 11 Chutiang bawkin nangni pawh sual lam kawngah thi tawhah inruat ula, Pathian lam kawngah erawh chuan Krista Isuaah nungah inruat rawh u. 12 Chuvângin, in taksa duh zâwng in zawmna tûrin in taksa thi theiah chuan sualnain rorêl suh se. 13 In taksa pêngte pawh fel lohna hriamhrei atân sualna hnênah pe phal hek suh u; amaherawhchu, mitthi zîng ata nung leh angin Pathian hnênah inpe ula, in taksa pêngte pawh chu felna hriamhrei atân Pathian hnênah pe phal zâwk rawh u. 14 Sualnain in chungah thu a nei dâwn tawh si lo, dân rorêla awm in ni lo va, khawngaihna rorêla awm in ni zâwk si a.
Felna bawih
15 Engtin nge ni ang le? Dân rorêla awm kan nih lohva, khawngaihna rorêla awm kan nih zâwk avâng hian kan sual tûr em ni ang? Hnai lo ve. 16 Tu hnênah pawh an thu awih tûra bawiha in luh chuan (thihna khawpa sual bawih emaw, felna khawpa thu awih bawih emaw), a thu in awiha bawih chu in ni tih in hre lo vem ni? 17,18 Amaherawhchu, sual bawihte ni mah ula, zirtîr dân a hnêna in inpêkna chu rilru takzetin in lo awih a; tin, sual lak ata chhuahin in awm a, felna bawihte in lo ni ta a; chuvângin, Pathian hnênah lâwm thu awm rawh se 19 (in tisa chak lohzia avângin mihring dânin thu ka sawi a ni e); in taksa pêngte chu bawlhhlawhna hnênah leh, bawhchhiatna tûrin bawhchhiatna hnênah bawiha in pe phal ang khân, tûnah in taksa pêngte chu thianghlimna tûrin felna hnênah bawihah pe phal rawh u. 20 Sual bawihte in nih lai khân felna lakah in fihlîm a ni. 21 Tûna in thil zahpui tâkahte hian, khâng lai khân rah eng nge in lo hmuh ṭhin le? Khâng thil tâwpna kha thihna a ni ṭhîn asin. 22 Tûnah erawh chuan sual lakah tihfihlîma awma, Pathian bawihte in lo nihin, thianghlimna hmu khawpin in rah in nei asin, chumi tâwpna - chatuana nunna nên. 23 Sual man chu thihna a ni si a; Pathian thilthlâwnpêk erawh chu, kan Lalpa Krista Isua zârah chuan chatuana nunna a ni.
Inneih a tehkhin
1 A nih leh, unaute u, dân chuan mi a dam chhûng zawng a chungah ro a rêl ṭhîn tih in hre lo vem ni? (Dân hre mite hnênah ka sawi a nih hi.) 2 Hmeichhe pasal nei chu a pasal dam chhûng zawng dânin a pasalah phuar belhbawmin a awm ṭhîn; nimahsela, a pasal chu a thih chuan, pasal kawngah dân ata chu thlahin a awm ṭhîn. 3 Chutichuan, a pasal dam chhûnga mi dang a neih chuan, “Uirenu,” an ti ang; a pasal a thih erawh chuan, chu dân ata chu thlahin a awm a; chutichuan, mi dang nei mah sela, uirê a ni lo. 4 Chutichuan, ka unaute u, mi dang (Pathian lama kan rah theihna tûra mitthi zîng ata kaihthawha ngei kha) in neih theih nân, Krista taksa avângin Dân kawngah tihthihin in lo awm ta a. 5 Tisaa kan awm lai khân, Dân avânga duh zâwng sual lo chhuakte chuan kan taksa pêngahte thihna khawpa rah tûrin a thawk ṭhîn. 6 Tûnah erawh chuan min chelhtu lakah thi tawhin, Dân ata thlahin kan awm ta; lehkha ziak hlui ang mai ni lova, thlarau thara rawng kan bâwl theih nân.
Dân leh sual
7 Eng nge kan sawi tâk ang le? Dân chu sual em ni? Hnai lo ve. Nimahsela, Dân avânga hriat ni suh sela chu sual ka hre lo tûr; Dân chuan, “Awt suh,” ti suh sela chu awh hi ka hre lo tûr a ni. 8 Nimahsela, sualnain, thupêk avâng chuan remchân lai hmuin, awhna tinrêng ka chhungah a awmtîr a. Dân lo chuan sualna chu thi a ni. 9 Tin, hmânah khân kei dân lovin ka nung a; nimahsela, thupêk chu a lo awm veleh sual a lo harh a, kei chu ka thi ta a. 10 Tin, nunna tûra thupêk chu thihna tûr a lo ni tih ka lo hre ta a; 11 sualnain thupêk avâng chuan remchân lai hmuin mi bum a, thupêk chu hmangin mi tihlum ta a ni. 12 Chutichuan, Dân chu a thianghlim a ni, thupêk pawh chu a thianghlim a, a fel a, a ṭha a ni. 13 A nih leh, thil ṭha chu ka tân thihna a lo ni em ni? Hnai lo ve. Sualna chu ka tân thihna a lo ni ta zâwk a ni; chutichuan, sualna chu sualna a ni tih a lan theih nân, thil ṭha chu hmangin mi tihlum a ni; sualna chu (thupêk avâng khân) sual nasa tak a lo nih theihna tûrin.
Mihring chhûng lama indona
14 Dân chu thlarau lam thil a ni tih kan hre si a; kei erawh chu tisa lama mi, sual bawiha hralh tawh ka ni. 15 Thil ka tih hi a ngaihna ka hre si lo; ka thiltih ṭhin hi, ka thiltih duh zâwng a ni si lo, ka thil huat zâwng tak chu ka ti zâwk ṭhîn a ni. 16 Ka tih duh loh zâwng chu ka tih si chuan, Dân chu a ṭha tia awih ka ni ang asin. 17 Chutichuan, ka thiltih hi keima tih a ni tawh lo va, sual keimaha awm tih chu a ni zâwk. 18 Keimahah (chu chu ka tisaah tihna a ni) thil ṭha rêng a awm lo tih ka hria; thil ṭha tih duhna chu keimahah a awm na a, thil ṭha tihna erawh chu a awm si lo. 19 ṭhatna, tih ka duh hi ka ti lo va; sualna, tih ka duh loh hi ka ti zâwk si ṭhîn a. 20 Ka duh loh zâwng chu ka tih si chuan, a titu chu kei ka ni tawh lo va, sual keimaha awm chu a ni zâwk e. 21 Chutichuan, he dân hi ka lo hre ta: thil ṭha tih ka duh laiin sualna ka hnênah a lo awm ṭhîn a ni. 22 Ka rilru tak takin Pathian dân chungah ka lâwm si ṭhîn a; 23 nimahsela, ka taksa pêngahte hian dân danglam a awm tih ka hria, chu chuan ka rilru dân a do va, ka taksa pêngtea sualna dân awm hnênah chuan salah mi hruai ṭhîn a. 24 Mi rethei ka va ni tehlul êm! He thihna taksa lakah hian tuin nge mi chhanchhuak ang? 25 Isua Krista, kan Lalpa avângin Pathian hnênah lâwm thu ka sawi a ni. Chutichuan, keimah tak chuan ka rilru chuan Pathian dân rawng ka bâwl ṭhîn a, ka tisa erawh chuan sualna dân rawng ka bâwl ṭhîn.
Thlarauva nun
1 Chutichuan, tûnah zawng Krista Isuaa awmte tân chuan, thiam loh chantîrna rêng a awm tawh lo. 2 Krista Isuaa Nunna Thlarau dân chuan sualna leh thihna dân ata chu mi tichhuak tawh si a. 3 Tisa avânga Dân chu a chak lohva, a tih theih rual loh chu Pathianin ama Fapa ngei, tisa sual ang puin, sual thawi nân rawn tîrin, tisaa sualna awm chu thiam loh a chantîr ta a ni; 4 tisa dân zawh lova Thlarau dân zawh zâwktu keimahniah hian Dân thuruat chu hlena a awm theihna tûrin. 5 Tisa dâna awmte chuan tisa lam thilte an duh ṭhîn; Thlarau dâna awmte erawh chuan Thlarau lam thilte an duh ṭhîn. 6 Tisa lam thilte duh chu thihna a ni si a, Thlarau lam thil duh erawh chu nunna leh thlamuanna a ni; 7 tisa duh zâwng chu Pathian dona a nih avângin. Chu chu Pathian dânin a awm si lo va, awm pawh a awm thei bawk hek lo a ni. 8 Chutichuan, tisaa awmte chuan Pathian an tilâwm thei lo. 9 Nimahsela, Pathian Thlarau nangmahnia a awm takzet chuan, tisaa awm in ni lo va, Thlarauva awm in ni zâwk e. Amaherawhchu, tu pawh Krista Thlarau nei lo chu ama mi a ni lo. 10 Krista chu nangmahnia a awm si chuan, sualna avângin taksa chu a thi a ni, thlarau erawh chu felna avângin nunna a ni. 11 Nimahsela, mitthi zîng ata Isua titholehtua Thlarau chu nangmahnia a awm chuan, mitthi zîng ata Krista Isua titholehtu khân, nangmahnia awm Thlarau zârah chuan in taksa thi theite chu a tinung bawk ang. 12 Chuvângin, unaute u, bat kan nei; tisa dâna awm tûrin tisa lakah erawh chuan a ni lo. 13 Tisa dâna in awm chuan in thi ngei tûr a ni; amaherawhchu, taksa thiltihte Thlarauva in tihhlum ṭhin chuan in nung ang. 14 Pathian Thlarau hruaia awm apiangte chu Pathian fate an ni si a. 15 Hlauva awm leh tûrin bawih nihna thlarau in hmu a ni si lo va; fa nihna thlarau in hmu a ni zâwk e, chu thlarau avâng chuan “Abba! (Ka pa!)” tiin kan au ṭhin hi. 16 Thlarau ngei chuan, keimahni thlarau nên Pathian fate kan ni tih min hriattîr ṭhîn; 17 tin, fate kan nih chuan ro luahtute kan ni a; Pathian ro luahtu, Krista luahpuitute kan ni; a hnêna chawimawia kan awm ve theihna tûra amah kan tuarpui takzet chuan.
Ropuina lo la awm tûr
18 Tûnlaia tuarnate hi nakina kan chunga ropuina tihlan tûr nên chuan tehkhin thamah ka ruat si lo. 19 Thil siam zawng zawngte chuan beisei êm êmin Pathian fate lo lanna chu an nghâkhlel hle si. 20 Thil siam zawng zawngte chu thil lawilo thu thua awmtîrin an awm tawh (an duha awm an ni lo va, a awmtîrtu vâng a ni zâwk e), beiseina neiin; 21 thil siam zawng zawngte ngei pawh chu chhiatna bawih ata tihchhuahin an awm ang a, Pathian fate zalênna ropuiah chuan an lût dâwn si a. 22 Thil siam zawng zawngte chu, tûn thlengin rûm leh nau vei na tuarin an awm hlawm tih kan hre si a. 23 Chu chang a ni lo, keini, Thlarau hmahruai neitute ngei pawh hian, fa kan nihna (kan taksa tlanna) chu nghâkin, keini meuh pawh kan rilruin kan rûm bawk si. 24 Beiseinain a ni chhandamin kan awm ni; nimahsela, hmuh theih reng beiseina hi beiseina a ni lo ve. Miin a hmuh theih reng chu engati nge a la beisei ṭhin? 25 Kan hmuh loh chu kan beisei erawh chuan kan nghâk fan fan ṭhîn a ni. 26 Chutiang bawkin Thlarau chuan kan chak lohnaahte min pui ṭhîn a; engtia ṭawngṭai tûr nge tih kan hre si lo va; nimahsela, Thlarau chuan rûm sawi hleih theih lohvin min ṭawngṭaisak ṭhîn. 27 Tin, Pathian duh zâwng ang zêla mi thianghlimte chu a ṭawngṭaisak ṭhin avângin, rilrute Entu chuan Thlarau duh zâwng chu a hre ṭhîn a ni. 28 Tin, Pathian hmangaihtu, ama ruat anga a kohvate tân chuan, an ṭhatna tûrin engkimin a thawhsak hlawm ṭhîn tih kan hria; 29 a hriat lâwkate chu ama Fapa ang taka awm tûrin a ruat lâwk si a, a Fapa chu unau tam takte zînga fa tîr a lo nih theih nân. 30 Tin, a ruat lâwkate chu a ko bawk a; tin, a kohvate chu thiam a chantîr bawk a; tin, thiam a chantîrate chu a chawimawi bawk a.
Kristaa Pathian hmangaihna
31 Chûng thu-ah chuan eng nge kan sawi ang le? Pathian kan lama a ṭan chuan tuin nge min do thei ang? 32 Ama Fapa ngei pawh zuah lova kan zaa aia petu chuan, thil zawng zawng pawh a thlâwnin min pe tel lo vang em ni? 33 Pathian mi thlante chu tuin nge hêk ang? Thiam chantîrtu kha Pathian a ni si a; 34 tuin nge thiam loh chantîr ang? Thia kha Krista Isua chu a ni si a; a ni, tholeh ta zâwka, Pathian ding lama awma min sawisaktu bawka kha a ni. 35 Krista hmangaihna ata chu tuin nge min ṭhen ang? Hrehawmnain emaw, lungngaihnain emaw, tihduhdahnain emaw, ṭâmin emaw, saruaknain emaw, hlauhawmnain emaw, khandaihin emaw min ṭhen ang em ni? 36 “Nangmah avângin nilêngin thahin kan awm ṭhîn; Berâm talh tûrte anga ngaih kan ni,” tih ziak ang khân. 37 Ṭhen suh e, chûng zawng zawngah chuan, min hmangaihtu avâng chuan ropui taka ngamtu kan ni. 38,39 Thihna te, nunna te, vântirhkoh te, lalna te, thil awm sa te, thil lo la awm tûr te, thiltihtheihna te, sânna te, thûkna te, thil siam dang rêng rêngte pawhin, kan Lalpa Krista Isuaa awm Pathian hmangaihna ata chu min ṭhen thei lo vang tih dik takin ka hre si a.
Pathian hnam thlan Israel
1 Kristaah chuan thu tak tak ka sawi a ni, ka daw lo ve, Thlarau Thianghlim zârah chuan ka chhia leh ṭha hriatna pawh hian mi hriatpui a. 2 Ka thinlungah hian hrehawmna nasa tak leh lungngaihna reh thei lo ka pai asin. 3 Ka unaute, tisa lama ka chipuite aiah hian, kei hi Krista hnên ata tihhran khawpin ânchhe dawngin awm hial ila ka ti si a; 4 Israel mi an ni si a; fa nihna te, ropuina te, thuthlung zawng zawng te, Dân pêkna te, Pathian rawngbâwlna te, thutiam zawng zawng te an ta a ni a; 5 pute chu an ta a ni bawk a, tisa lam thu-ah Krista chu anmahni zîng ata lo chhuak a ni bawk a; ani chu thil zawng zawng chunga awm, chatuana fak tlâk Pathian a ni. Amen. 6 Nimahsela, Pathian thu chu engmahlo anga awm ta a ni lo ve. Israela thlahte chu Israel mi an ni vek lo ve; 7 Abrahama thlahte an nih avângin an zain a fate an ni vek hek lo; “Isaaka-ah hian i thlahte an ti ang,” tih a ni zâwk. 8 Chu chu, tisa fate chu Pathian fate an ni lo va, thutiam fate chu Abrahama thlaha ruat an ni zâwk tihna a ni. 9 Thutiam chu hei hi a ni: “Tûn ang hun hian ka lo kal ang a, Sari chuan fapa a hring ang,” tih hi. 10 Chu chang a ni lo ve, Rebeki pawhin mi pakhat (kan pu Isaaka) laka phîr a pai lai khân - 11 nautê chu an la pian hmaa, chhia leh ṭha an la tih hmain, thiltih vâng ni lovin, a kotu duh vâng ni zâwkin, thlan lam thu-ah Pathian thuruat chu a ngheh theih nân - 12 a hnênah chuan, “A upa zâwkin a naupang zâwk rawng a bâwl ang,” Pathianin a tih kha. 13 “Jakoba ka hmangaih a, Esauva erawh chu ka hua,” tih ziak ang khân. 14 Eng nge kan sawi tâk ang le? Pathianah chuan fel lohna a awm em ni? Hnai lo ve. 15 Ani chuan, “Ka khawngaih apiang chu ka khawngaih ang a, zah ka ngaihna chung apiangah chuan zah ka ngai ang,” tiin Mosia hnêna a sawi si kha. 16 Chuvângin, a duhtu vâng a ni lo va, a tlantu vâng a ni hek lo, a khawngaihtu Pathian vâng a ni zawk e. 17 Pathian Lehkha Thuin Pharaoa hnênah chuan, “Hemi avâng ngawt hian ka tungding chia, nangmahah chuan ka thiltihtheihna ka entîr theihna tûr leh, khawvêl zawng zawnga ka hming a than theih nân,” a ti si a. 18 Chutichuan, Pathianin a duh apiang a khawngaih ṭhîn a, a duh apiang pawh a tiluhlul ṭhîn a ni.
Pathian thinurna leh a khawngaihna
19 Nang chuan ka hnênah, “Engati nge a la dem cheu ni? A duh zâwng tuin nge dodâl ni?” i ti dâwn a ni âwm e. 20 A ni; nimahsela, aw mihring, Pathian hnial veitu chu tu nge maw i nih le? Thil siam chuan a siamtu hnênah, “Engati nge hetianga mi siam?” a ti ang em ni? 21 Bellei tlang khatin bêl pakhat hlu tak leh, bêl dang pakhat hlu lo taka siam tûrin bêlvawtu chuan bellei chungah thu a nei lo vem ni? 22-23 Khawngaihna bêl, ropui tûra a lo buatsaih lâwkate chungah chuan, a khawngaihna ngahzia a entîr theih nan, thinurna bêl boral tlâkte chungah chuan Pathianin a thinur leh a thiltihtheihna lantîr duh mah sela, a dawh hrâm hrâm chuan eng nge pawi ang? 24 (Chu khawngaihna bêlte chu Juda-te zîng ata chauh ni lovin, Jentailte zîng ata pawh kohte kan ni.) 25 Hosea lehkhabuah chuan: “Ka mite ni ngai lo chu ‘Ka mite’ ka ti ang; Tin, hmangaih ngai lohvi chu, ‘Hmangaihi’ ka ti ang. 26 Tin, heti hi a lo ni ang a, an hnênah, ‘Ka mite in ni lo ve,’ a tihna hmunah ngei chuan Pathian nung fate vuahin an awm ang,” tia ziak ang bawk khân. 27 Isaia pawhin Israel mite thu aupuiin, “Israel mite chu tuifinriata ṭiau zâtin tam mah sela, a hrem bâk chauh chu chhandamin an awm ang. 28 Lalpa chuan rang taka ti zo diamin lei chungah a hrem tûr thu a hlen dâwn si a,” a tih kha. 29 Isaia vêkin, “Mipuite Lalpa chuan chi thlahtu min lo zuahsak suh sela chu, Sodom khua angin kan awm tawh ang a, Gomorra khua anga siamin kan awm tawh bawk ang,” tia a lo sawi lâwk ang bawk khân.
Israel-te leh Chanchin Ṭha
30 Eng nge kan sawi tâk ang le? Jentail, felna ûm lote chuan felna an lo phâk tawh a ni - rinna avânga felna chu. 31 Israel, felna dan ûmte erawh chuan felna dân chu an phâk zo ta lo. 32 Eng vâng nge ni? Rinnain an ûm lohva, thiltiha hmuh theih angin an ûm vâng a ni. Tlûkna lungah chuan an tlu si a; 33 “Ngai teh, Zion-ah chuan tlûkna lung leh Dâlna lungpui ka dah a, Tu pawh amah ring apiang chu A mualpho lo vang,” tih ziak ang khân.
1 Unaute u, ka thinlung duh zâwng leh anni tâna Pathian hnêna ka ṭawngṭaina chhan ber hi, chhandama an lo awm theihna tûr a ni. 2 Pathian lamah ṭhahnem an ngai tih ka hriatpui a ni, hre famkim ang erawh chuan an ngai lo. 3 Pathian felna hre lovin, anmahni felna tihngheh tumin Pathian felnaah an intulût si lo. 4 Krista chu a ring apiangte tân felna an hmuh theihna tûra Dân tibângtu a ni si a.
Chhandamna - mi zawng zawng tân
5 Mosia chuan, “Dâna felna zâwm chu, chu felna avâng chuan a nung ang,” tiin a ziak a. 6 Rinnaa felna erawh chuan heti hian a sawi: “In rilruin, ‘Tu nge vânah lâwn ang?’ emaw (chu chu chung lam ata Krista hruai chhuk tûr tihna a ni); 7 ‘Tu nge leilâwtah chhuk ang?’ emaw (chu chu mitthi zîng ata Krista hruai chhoh leh tûr tihna a ni) ti suh u,” tiin. 8 A nih leh eng nge a sawi? “Thu chuan a hnaih a che, i kâ leh i thinlungah pawh a awm,” tiin a sawi a ni; chu chu rinna thu kan hril ṭhin hi a ni; 9 “I kain Isua chu Lalpa a ni tih i ṭana, mitthi zîng ata Pathianin a kaitho tih i thinlunga i rin chuan, chhandamin i awm ang,” tih hi. 10 Miten thinlungin an ring a, felna an hmu ṭhîn a; kain an ṭan a, chhandamna an hmu bawk ṭhîn a ni. 11 Pathian Lehkha Thuin, “Tu pawh amah ring apiang an mualpho lo vang,” a ti a ni. 12 Juda leh Grik mite chu engah mah an danglam chuang si lo va. Lalpa pakhat, an zaa chunga Lalpa a ni a, a lamtu apiangte chungah chuan ṭhatna a ngah si ṭhîn a. 13 “Tu pawh Lalpa hming lam apiangte chu chhandamin an awm ang,” tih a ni a. 14 A nih leh, an rin lohva chu engtin nge an lam ang? A thu an hriat lohva chu engtin nge an rin ang? Thu hriltu awm lovin engtin nge an hriat ang? 15 Tirh an nih loh chuan engtin nge thu an hril ang? “Thil ṭha chanchin lâwmawm thlentute ke chu a va mawi êm!” tih ziak ang khân. 16 Nimahsela, Chanchin Ṭha chu an za chuan an awih vek lo. Isaian, “Lalpa, kan thusawi tuin nge ring?” a ti si a. 17 Chutichuan, rinna chu hriatna avângin a lo awm ṭhîn a; tin, hriatna chu Krista thu avângin a lo awm. 18 A nih leh, an bengin an hre lo vem ni? Hria e le, “An thâwm chu ram tinah a thang a, An thu chu kâwlkil thlengin a thang chhuak ta.” 19 A nih leh, Israel miten an hre lo vem ni? “Chia sawi tham lohte chu hmangin Ka thîktîr ang che u a; Chi fing lote chu hmangin Ka tithinur ang che u,” tiin, Mosian a sawi hmasa ber. 20 Tin, Isaian huai takin, “Mi zawng lote hmuhin ka awm a, Mi lam lote hnênah hriattîrin ka awm,” a ti a. 21 Amaherawhchu, Israel mite thu-ah chuan, “Mi tihmawh leh hnialhrâtte tân Nilêngin ka bânte ka phar ṭhin kha,” a ti a.
Israel-te chunga Pathian khawngaihna
1 A nih leh, Pathianin a mite chu a paih thla em ni? Hnai lo ve. Kei pawh Israel mi, Abrahama thlah, Benjamin hnam ka ni si a. 2 Pathianin a mi hriat lâwkte chu a paih thla lo ve. Pathian Lehkha Thuin Elija thu a sawi hi in hre lo vem ni? Ani chuan Israel mite chungthu Pathian hnênah a thlen a, 3 “Lalpa, i zâwlneite an tihlum a, I maichâmte an tichim a; Keimah chauh ka la awm a, Kei pawh mi tihhlum an tum a ni,” a tih hi. 4 Nimahsela, Pathianin engtin nge a chhân? “Baala hmaa ṭhingṭhi ngai lo mi sângsarih ka tân ka la zuah reng a ni,” tiin a chhâng a. 5 Chutiang bawkin tûnlai pawh hian, khawngaiha thlan ang zia ziain paih thlâk bâk chu an la awm. 6 Khawngaihna vâng a nih chuan thiltih vâng a ni tawh lo vang; chuti a nih loh chuan khawngaihna hi khawngaihna a ni tawh lo vang. 7 Engtin nge ni ta ang le? Israel mite chuan an zawn chu an hmu lo va, thlante erawh chuan an hmu a, a dang zawng zawngte chu an chawlawl zo tawh a. 8 “Pathianin vawiin thlengin an hnênah mutthlûkna thlarau a pe a, hmuh theih lohna mitte, hriat theih lohna bengte nên,” tih ziak ang khân. 9 Tin, Davida chuan, “An dawhkân chu an tân thang leh, fal leh, Tlûkna leh thungrulhna lo ni rawh se; 10 An hmuh theih loh nân an mitte lo thim rawh se, Nangin an hnungzâng kûntîr fo vang che,” a ti a.
Jentailte chhandamna
11 A nih leh, an petek chu an tlûk hlenna tûr em ni? Hnai lo ve. An tlûk avângin Jentailte hnênah chuan chhandamna a lo thleng ta zâwk a ni, Israel mite thîktîr nân. 12 Tichuan, an tlûkna mah khawvêl tihhausakna a niha, an kiamna mah Jentailte hausakna a nih bawk chuan, an famkimna chu an hausakna a va ni lehzual dâwn em! 13,14 Chutichuan, nangni Jentailte hnênah ka sawi a ni. Kei, Jentailte tirhkoh ka nih avângin ka chipuite ka thîktîr theih hrâmna tûr leh, an zînga ṭhenkhatte ka chhandam theihna tûrin ka rawngbâwlna hi ka chawimawi a ni. 15 Anmahni paih thlâkna mah khawvêl ṭhian lehna a nih chuan, anmahni lawm lehna tûr chu thihna ata nun lehna lo chu eng nge ni ang? 16 Tin, chhang hlâwm sawh thlâk hmasak chu a thianghlim chuan, a hlâwm pum chu chutiang bawk chu a ni; tin, a zung chu a thianghlim chuan a zârte chu chutiang bawk chu a ni. 17 Tin, a zâr ṭhenkhatte chu tihtliaha a awmin, nang, olive suak nia, anmahni zînga zawmin i awma, olive thinga ṭhatna zung ṭâwm ve tawh i nih chuan, 18 zâr dangte lakah chuan inchhuang suh. Inchhuang mah la, nang chu a zung châwmtu i ni lo va, a zung chu a châwmtu che a ni zâwk e. 19 Tin, nangin, “Zawma ka awm theih nân zârte tihtliahin an awm tawh alâwm,” i ti ang le. 20 A ni, an rin lohna avângin tihtliahin an awm a, nang chu i rinna avângin i ding a ni. Chapo suh la, hlau zâwk rawh; 21 Pathianin zâr takte chu a zuah si loh chuan nang pawh a zuah bîk lo vang che. 22 Chutichuan, Pathian ṭhatzia leh a ṭihbaiawmzia chu ngaihtuah rawh, a tlute tân chuan a ṭihbaiawm a ni; nanga tân erawh chuan a ṭha a ni, a ṭhatnaa i awm reng chuan; chuti lo chuan, nang pawh sah thlâkin i awm ve ang. 23 Tin, anni pawh chu ring lova an awm reng loh chuan zawmin an awm ang; Pathianin anmahni a zawm leh thei si a. 24 Nang olive suak rêng ata sah chhum mah, pian dân lo anga olive thing ṭhaah zawma i awm chuan, chûng a zâr taktakte chu anmahni olive thing pângngaiah chuan zawm an va ni dâwn nasa êm!
Israel-te tun din lehna
25 Unaute u, he thurûk hi in hriat loh ka duh si lo; chuti lo chuan, in intifing ang; Jentailte famkimna a lo thlen hma chuan Israel mi ṭhenkhatte chungah chawlawlna a lo thleng rih a ni, tih hi; 26 chutichuan, Israel mi zawng zawng chhandamin an awm ang; “Zion aṭangin Chhandamtu chu a lo chhuak ang a, Jakoba hnên ata Pathian ngaihsak lohna a tibo vang. 27 Chu chu an hnêna ka thuthlun tûr chu a ni, An sualte ka lâk bo hunah chuan,” tih ziak ang khân. 28 Chanchin Ṭha lam ngaihtuah chuan nangmahni avângin hmêlma an ni a; thlan thu lam ngaihtuah erawh chuan thlahtute avâng khân duh takte an ni. 29 Pathianin a thilthlâwnpêkah leh a kohnaah chuan a rilru a lamlêt ngai si lo va. 30 Hmânah chuan Pathian thu in awih lo va; nimahsela, tûnah chuan an awih loh avângin khawngaihna in hmu si a. 31 Chutiang bawkin, tûnah chuan Pathianin a khawngaih che u avâng hian, khawngaihna an hmuh ve theihna tûrin anni pawh chuan an awih ta lo a nih hi. 32 Pathianin a khawngaih vek theih nân mi zawng zawng awih lohnaah a khung ta vek si a. 33 Pathian finna leh hriatna ngahzia chu a va thûk êm! A rorêlnate chu hriat theih rual leh, a kawngte chu chhui theih rual a va ni lo êm! 34 Lalpa rilru chu tuin nge hria? Tu nge a remruatsaktuah pawh ṭang tawh? 35 A rulh leh tûr pawhin a hnênah tuin nge thil pe hmasa? 36 Amah aṭang leh, amah avâng leh amaha tân thil zawng zawng hi a lo awm a ni si a; a hnênah chuan chatuanin ropuina chu awm rawh se. Amen.
Kristaa nun thar
1 Chutichuan, unaute u, Pathian khawngaihna avâng hian, inthawina nung leh, thianghlim leh, Pathian lawm tlâk ni tûrin, in taksa chu inhlânah ka ngên a che u; chu chu in rawngbâwlna âwm rêng a ni. 2 He khawvêl dân ang hian awm suh ula; Pathian duh zâwng, a ṭha leh, lawm tlâk leh, ṭhat famkim chu in hriat fiah theih nân, in rilru a thara awmin lo danglam zâwk tawh rawh u. 3 Pathianin mi pêk khawngaihna avâng hian, in zînga tu mah inngaihhlut tâwk aliama inngaihlu lovin, Pathianin mi tin hnêna rinna tâwk a pêk ang zêlin, fel taka ngaihtuah zâwk tûrin ka ti ṭheuh a che u. 4 Taksa pumkhatah pêng tam tak kan nei a, pêng zawng zawng thiltih erawh chu a inang lo va; 5 chutiang bawkin keini tam tak ni mah ila, Kristaah chuan taksa pumkhat kan ni a; a mal malin inpêng tawn ṭheuh kan ni. 6 Khawngaihna min pêk ang zia zêlin thilthlâwnpêk hrang hrang kan nei ṭheuh va, thuhril tûr a nih chuan kan rin tâwk ang zêlin i hril ang u; 7 rawng bâwl tûr a nih chuan rawng i bâwl tlat ang u; zirtîrtu pawhin zirtîr tlat rawh se; 8 zilhtu pawhin zilh tlat rawh se; thil petu chuan ui lovin pe rawh se; rorêltuin taima takin rêl rawh se; mi khawngaihtuin lâwm takin khawngaih rawh se.
Kristiante nun dân tûr
9 Hmangaihna chu vervêkna tel lovin ni rawh se. Sual lam chu hua ula, ṭha lam chu pawm tlat rawh u. 10 Unaute hmangaih kawngah chuan hmangaih takin inlainat tawn ṭheuh rawh u; chawimawi kawngah chuan induhsak tawn ṭheuh ula; 11 taihmâk kawngah chuan thatchhe suh ula; thlarau kawngah chuan ṭhahnemngai ula; Lalpa rawng bâwl ula; 12 beiseina kawngah chuan lâwm ula; hrehawm tuarna kawngah chuan chhel ula, ṭawngṭaina kawngah chuan ṭawngṭai fan fan ula; 13 mi thianghlimte tlâkchhamnaah chhawmdâwl ula; mikhualte lâwmin awm fo ula. 14 A tiduhdahtu che u chu malsâwmsak ula; malsâwm ula, ânchhia chu lawh suh u. 15 Lâwmte chu lâwmpui ula, ṭapte chu ṭahpui rawh u. 16 Ngaihtuah hmun khatin awm tawn ṭheuh rawh u. Inngaihtuah sâng lutuk suh ula, mi tête pâwl zâwk rawh u. Intifing suh u. 17 Tu sual pawh sualin thungrûl suh u. Mi zawng zawng ngaiha thil mawi ngaihtuah lâwk rawh u. 18 A theih phawt chuan nangmahni lam tal, mi zawng zawng nên inremin awm rawh u. 19 Duh takte u, in phuba la suh ula, Pathian thinurna kian zâwk rawh u, “ ‘Phuba rêng rêng keima lâk tûr a ni, keiman ka thungrûl ang,’ Lalpain a ti,” tih ziak a ni si. 20 Chuvângin, i hmêlma a rilṭâm chuan ei tûr pe rawh, a tuihâl chuan in tûr pe rawh: chutiang i tih chuan a lu chungah meiling i chhêk khâwm a ni ang. 21 Sual ngam chein awm suh la, ṭhatnain sual chu ngam zâwk rawh.
Rorêltute thu awih tûr
1 Mi tin an chunga rorêltute thu thuin awm rawh se. Pathian thu lovin tu mah rorêltu an awm si lo; rorêltua awmte hi Pathian ruat an ni. 2 Chuvângin, tu pawh rorêltu hnial chu Pathian ruat dodâl an ni a; a dodâltute chuan anmahni chungah rorêlna an hmu ang. 3 Rorêltute chu thil ṭha titu tân chuan hlauhawm an ni lo va; thil ṭha lo titu tân erawh chuan hlauhawm an ni. A nih leh, rorêltu hlau lova awm i duh em? Thil ṭha ti la, a fak i hlawh ang chu; 4 ani chu i ṭhatna tûra Pathian rawngbâwltu a ni si a. Nimahsela, thil sual i tih chuan hlau rawh, khandaih chu a keng mai mai si lo va; ani chu Pathian rawngbâwltu, thil tisualtu chunga thinura phuba latu a ni si. 5 Chuvângin, thinur hlauh vâng chauh ni lovin, i chhia leh ṭha hriatna avâng pawhin rorêltu thu thuin i awm tûr rêng a ni. 6 Hemi avâng hian chhiah pawh in chawi ṭhîn alâwm; chutiang thil ngei ti fan fan tûrin Pathian rawngbâwltute an ni si a. 7 Mi zawng zawng hnênah pêk tûr apiang pe rawh u; lei man pêkna tûra hnênah chuan lei man pe ula; chhiah chawina tûra hnênah chuan chhiah chawi ula; ṭih tûra chu ṭih ula; pawisak tûra chu pawisa rawh u.
Unau inhmangaihna
8 Inhmangaih tawnna ngawt lo chu tu ma eng mah ba suh u; mahni mihringpui hmangaihtu chuan dân chu a zawh famkim tawh si a. 9 Hêng, “Uire suh, tualthat suh, ru suh, awt suh,” tih leh thupêk dang la awm rêng rêngte hi, “Nangmah i inhmangaih angin i vêngte i hmangaih tûr a ni,” tih hian a khai khâwm vek si a. 10 Hmangaihnain vêngte a tikhawlo ngai lo va; chuvângin, hmangaihna hi dân zawh famkimna a ni.
Krista lo kal lehna a hnai
11 Tûnlai thil awmzia in hriat avâng leh, muhîl thawhharh a hun tawh takzet tih in hriat avângin chu chu ka sawi a ni; tûnah chuan kan rin tirh lai ai khân kan chhandamna chu a hnai ta zâwk si a. 12 Zân hi a ral lek lek tawh a, khua a vâr dâwn ta e; chuvângin, thima thiltih chu paih ila, êng thuamin i inthuam ang u. 13 Chhûna awm angin mawi takin i awm ang u, zu in buai leh zu ruia awm lovin, hur leh inngaih hmanga awm lovin, insual leh inîtsîka awm lovin. 14 Lal Isua Krista chuan inthuam zâwk ulang, in tisa châkna puitlin tûrin eng mah insiam suh u.
I unau sawisêl suh
1 Tin, rinnaa chak lo mi chu a rinhlelhnate sawisêl lovin lâwm rawh u. 2 Mi pakhatin thil engkim ei theiin a inring a, mi chak lo erawh chuan thlai chauh a ei ṭhîn. 3 Engkim ei mi chuan a ei lo mi hmusit suh se; ei lo mi pawhin a ei mi chu sawisêl suh se; Pathianin ani chu a lâwm tawh alâwm. 4 Mi dang chhiahhlawh sawisêltu chu tu nge maw i nih le? A din leh a tlûk chu ama hotu tân a ni. Nimahsela, ani zawng dintîrin a awm ang, Lalpa chuan a dintîr thei si a. 5 Mi pakhatin ni khat hi ni dang aiin a ngaihlu bîk ṭhîn a, mi dangin ni zawng zawng hi inang ṭheuhvin a ngai ṭhîn a ni. Mi tin mahni rilruah inhre chiang rawh se. 6 Ni serhtu chuan Lalpa chawimawi nân a serh ṭhîn a ni. Tin, engkim eitu chuan Pathian hnênah lâwm thu a sawi avângin, Lalpa chawimawi nân a ei ṭhîn; a ei lotu pawh chuan Pathian hnênah lâwm thu a sawi a, Lalpa chawimawi nân a ei lo ṭhîn a ni. 7 Tu mah mahni tâna nung kan ni lo va, tu mah mahni tâna thi kan ni hek lo. 8 Kan nun chuan Lalpa tân kan nung a, kan thih pawhin Lalpa tân kan thi a ni si; chuvângin, kan nun pawhin, kan thih pawhin, Lalpa ta kan ni. 9 Krista thihna leh a lo nun lehna chhan chu, mi nung leh mitthi Lalpa a nih theihna hi a ni si. 10 Nimahsela, nangin engati nge i unau i sawisêl ni? A ni loh leh, nangin engati nge i unau i hmuhsit ni? Pathian rorêlna ṭhutphah hmaah kan vaiin kan la ding dâwn si a; 11 “Lalpa chuan, ‘Mi tinrêng Ka hmaah an kûn ang a, Lei tinrêng pawh Pathian hnênah a inpuang ang, Tiin, chhia ka chham a ni,’ a ti a,” tih ziak a ni si a. 12 Chutichuan, kan zain Pathian hnênah mahni chanchin kan sawi ṭheuh tûr a ni.
I unau titlu suh
13 Chuvângin, i insawisêl tawh suh ang u, tu pawhin mahni unau dâlna emaw, tlûkna emaw siam loh tum zâwk rawh u. 14 Amah ngawtah chuan thiang lo eng mah rêng a awm lo tih, Lalpa Isuaah chuan ka hre êm êm mai; englo thiang lova ngaitu tân erawh chuan, ama tân chuan a thiang lo a ni. 15 I englo ei vânga i unau rilru a nat chuan, hmangaih dân ang i zâwm tawh lo a ni. A thih ai Kristan a thihsaka chu i englo eiin tiboral suh. 16 Chutichuan, in tâna ṭhatna chu sual lama sawiin awm suh se; 17 Pathian ram chu ei leh in lam thu a ni si lo va, felna te, remna te, Thlarau Thianghlima lâwmna te a ni zâwk e. 18 Tu pawh chûng thua Krista rawng bâwl chu, Pathian lawm zâwng leh mihring fakin a awm ṭhîn a ni. 19 Chutichuan, inremna tûr leh intihsâwt tawnna tûr thilte chu i ûm ang u. 20 I englo ei vângin Pathian hnathawh tichhe suh. Thil zawng zawng a thianghlim ngei mai; nimahsela, a englo eiin mi a tihtlûk chuan a eitu tân sualna a ni. 21 I unau tlûkna tûr a nih chuan sa ei loh te, uain in loh te, thil eng pawh tih loh a ṭha a ni. 22 Rinna i neih chu Pathian hmaah nangmah chauhva hriatin nei mai rawh. Mahni ṭha tih kawnga thiam loh inchantîr lo chu a eng a thâwl e. 23 Amaherawhchu, ringhleltuin a ei chuan, rinnaa a ei loh avângin thiam loh a chang a ni; eng pawh rinna lova tih chu sual a ni si a.
Mahni lâwm zâwng ni lovin, mi dang lâwm zâwng zawn tûr
1 Chutichuan, keini mi chakte hian mahni lâwmna zawng lovin, mi chak lote chak lohnate chu kan tuarpui zâwk tûr a ni. 2 Mahni vêngte tihsâwt nân an ṭhatna tûrin tihlâwm i tum ṭheuh vang u; 3 Krista pawh chuan mahni lâwmna a zawng si lo; “Nangmah hautute hauna chu ka chungah a tla ta a,” tih ziak ang khân a ni zâwk. 4 Pathian Lehkha Thua chhelna leh thlamuanna hmua beiseina kan neih theihna tûrin, hmânlaia ziak apiangte chu keimahni min zirtîrna tûrin ziak a ni si a. 5,6 Chutichuan, kan Lalpa Isua Krista Pathian leh a Pa chu, thinlung hmun khat leh inthuruala kan chawimawi theihna tûrin, chhelna leh thlamuanna Pathian chuan, Krista Isua sawi angin rilru hmun khat pu tawnin awmtîr che u rawh se.
Juda-te leh Jentailte tân Chanchin Ṭha
7 Chuvângin, Krista chuan Pathian tihropui nân a lâwm che u ang bawk khân, inlâwm tawn rawh u. 8,9 Hei hi ka sawi chu a ni; thlahtute hnêna thutiamte kha tinghet tûr leh, a khawngaihna avânga Jentailten Pathian an chawimawi theihna tûrin, Pathian thu a dik tih hriattîr nân, Krista chu serh tante rawngbâwltuah a lo awm a. “Chuvângin, Jentailte zîngah chuan, Ka fak ang chia, I hming chawimawina tûrin Hla ka sa ang,” tih ziak ang khân. 10 Tin, “Nangni Jentail zawng zawngte u, A mite nên lâwm rawh u,” a ti leh a. 11 Tin, “Nangni Jentail zawng zawngte u, Lalpa chu fak rawh u; Mi zawng zawng pawhin Amah fak rawh se,” a ti leh a. 12 Tin, Isaian, “Jesaia zungzâm chu a awm ang a, Jentailte lala awm tûrin A lo chhuak tûr chu a awm bawk ang; Ani chu Jentailte chuan an beisei chhan ang,” a ti leh bawk a. 13 Thlarau Thianghlim thiltihtheihna azârah beiseina in ngah theihna tûrin, beiseina Pathian chuan, in rin avângin lâwmna leh remna tinrêngin tikhat che u rawh se.
Paula tirhkoh a nih chhan
14 Tin, ka unaute u, nangmahni chungthu chu, nangmahni ngei ṭhatnain in khat a, finna tinrêng in ngah a, in inzilh tawn thei bawk tih keimah tak pawhin dik takin ka hria. 15,16 Nimahsela, Jentailte zînga Krista Isua rawngbâwltua ka awm theihna tûrin, Pathianin mi pêk khawngaihna avâng hian hriatpui tûr che uin, khawimaw kâr kârah huai deuhvin ka ziak a ni. Ka Jentail hlante chu Thlarau Thianghlim tihthianghlim an niha, lawm tlâk an nih theihna tûrin, Pathian Chanchin Ṭha kawngah puithiam hna ka thawk a ni. 17 Chutichuan, Pathian lam kawngah Krista Isuaah chuan chhuan tûr ka nei a ni. 18,19 Kristan Jentailte awihtîr tûrin thusawi leh thiltihin, chhinchhiahnate leh thil makte, thiltihtheihna leh Thlarau Thianghlim thiltihtheihnaah keimah mi hmanga a thiltihte lo chu eng mah ka sawi ngam si lo va. Jerusalem khua leh a vêl ram aṭangin, Illurikon ram thlengin, Krista Chanchin Ṭha chu ram tinah ka hril kim tawh; keimah mi hmanga a thiltih chu chuti kau chu a ni. 20 A ni, mi dang lungphûm chunga rem chho ka lo nih loh nân, Chanchin Ṭha chu Krista hming lam tawhna hmunah hril lovin, 21 “A chanchin la hrilhna ngai loh mite chuan An hmu ang a, La hre ngai lote chuan An hria ang,” tih ziak ang khân hril ka tum zâwk ṭhîn a ni.
Paulan Rom khua tlawh a tum dân
22 Chu vâng tak pawh chuan a ni in hnêna lo kal ka ṭhulh fo ṭhin ni. 23 Tûnah erawh chuan hêng ram vêlah hian thawhna hmun rêng ka nei ta lo va, kum tam tak chu in hnêna lo kal châkin ka awm tawh bawk a. 24 Spain rama ka kal hun hunah kal pahin hmuh che u ka beisei si a, nangmahni pâwl kham deuh zet ila, chu lama ka kalnaah chuan nangniho mi zuk thlah ka beisei bawk a. 25 Tûnah erawh chuan mi thianghlimho rawngbâwl tûrin Jerusalem khuaah ka kal rih dâwn a ni. 26 Makedonia leh Akaia rama mite chuan lungni takin Jerusalem khuaa mi thianghlimte zînga retheite tân sum an thawh lâwm tawh si a. 27 A ni, lungni takin an ti a, an lakah an ba rêng bawk a ni; Jentailten an thlarau lam thilte an ṭâwmpui si chuan, khawvêl lam thila anmahni chhawmdâwl ve thung a ṭûl rêng a ni. 28 Chuvângin, chu chu ka tiha, rah pawh chu anmahni fel taka ka hmuhtîr zawhin, nangmahni tlawhin Spain ramah ka kal zêl ang. 29 Tin, in hnêna ka lo kal hun chuan, Krista malsâwmna famkim puin ka lo kal ang tih ka hria. 30,31 Unaute u, in mi ṭawngṭaisaknaah chuan Judai rama ringlote laka ka him theih nân leh, Jerusalem khaw tâna chhawmdâwlna ka ken hi mi thianghlimho lâwm zâwng tak a nih theih nân, mi ṭawngṭaipui hrâm tûrin Lalpa Isua Krista leh Thlarau Thianghlim hmangaihnain ka ngên chiam a che u; 32 Pathian remtih anga hlim taka in hnêna ka lo kala, kan harh tlân theihna tûrin. 33 Remna Pathian chu in zaa hnênah awm rawh se. Amen.
Mi mal chibai bûkna
1,2 Kan farnu Phoibi, Kenkriai khuaa kohhranho rawngbâwltu hi, Lalpa hminga mi thianghlimte ang bawka in lo lawmna tûr leh, in puih a ngaihna apianga in puih tûrin hmêlhriattîr che u ka duh a ni. Amah ngei pawh hi mi tam tak puitu a lo ni ṭhîn a, keimah ngei pawh mi pui a ni. 3,4 Priskilli leh Akuila, Krista Isuaa ka hnathawhpui, ka nun chhanhim nâna nghâwng dawhte kha chibai mi bûksak ang che u; kei chang ni lovin, Jentail kohhranho pâwl zawng zawngin anni hnênah chuan lâwm thu an sawi a ni. 5 An ina kohhran inkhâwmho chu chibai mi bûksak bawk ang che u. Ka duh tak Epaineta, Asia rama Krista ring hmasa ber kha, chibai mi bûksak ang che u. 6 Mari, in tâna thawk rim kha chibai mi bûksak ang che u. 7 Ka chipui Andronika leh Junia, ka tânpuite kha chibai mi bûksak ang che u; anni chu tirhkohte zînga hmingthang tak an ni a, kei aia Kristaa awm hmasa zâwk an ni a. 8 Amplia, Lalpaa ka duh tak kha chibai mi bûksak ang che u. 9 Kristaa kan hnathawhpui Urbana leh ka duh tak Stakua kha chibai mi bûksak ang che u. 10 Kristaa mi tak, Apellia kha chibai mi bûksak ang che u. Aristobula chhûngte zînga mite kha chibai mi bûksak ang che u. 11 Ka chipui Herodiona kha chibai mi bûksak ang che u. Narkissa chhûngte zînga mi, Lalpaa awmte kha chibai mi bûksak ang che u. 12 Truphaini leh Truphosi, Lalpaa thawk rim ṭhînte kha chibai mi bûksak ang che u. Duh tak Persi, Lalpaa thawk rim êm êm tawh kha chibai mi bûksak ang che u. 13 Lalpaa thlan Rufa leh a nu, ka nu ve bawk kha chibai mi bûksak ang che u. 14 Asunkrita te, Phlegona te, Hermia te, Patroba te, Herma te, an hnêna unau awmte nên khân chibai mi bûksak ang che u. 15 Philologoa leh Juli nên, Nerea leh a farnu nên, Olumpa nên, an hnêna mi thianghlim awm zawng zawng nên khân chibai mi bûksak ang che u. 16 Fawh thianghlimin chibai inbûk rawh u. Krista kohhranho zawng zawngin chibai an bûk a che u.
Fuihna hnuhnûng
17 Tin, unaute u, zirtîrna thu nangmahni zir loh lama inṭhenna leh tlûkna siamtute chu vêng ṭha tûr leh hawisan tûrin ka ngên a che u. 18 Chutiang mite chuan kan Lalpa Krista rawng an bâwl lo va, anmahni pum rawng an bâwl zâwk ṭhîn a; an kam ṭhat leh an kam thiamin mi fing lote rilru an bum ṭhîn. 19 In awihzia chu mi zawng zawng zîngah a thang chhuak ta si a. Chuvângin, nangmahni chungthuah ka lâwm a ni; amaherawhchu, ṭha lamah chuan in fina, sual lamah in fin loh ka duh a ni. 20 Tin, remna Pathian chuan in kephah hnuaiah Setana chu a rawn rah perhtîr thuai ang che u. Kan Lalpa Isua Krista khawngaihna chu in hnênah awm rawh se. 21 Ka hnathawhpui Timothea leh ka chipui Lukia te, Jasona te, Sosipatera tehovin chibai an bûk a che u. 22 Kei, Tertia, he lehkhaziaktu hian Lalpa hmingin chibai ka bûk a che u. 23 Keimah leh kohhranho zawng zawng thlen in pa Gaia chuan chibai an bûk a che u. Khuaa sum enkawltu Erasta leh unaupa Kuarta chuan chibai an bûk a che u. 25,26 Ka Chanchin Ṭha leh Krista thu hrilh angin, thurûk puanna ang hian (chu thurûk chu chatuan ata a inthup ṭhîn a, tûnah erawh chuan tihlan a ni a, rinna chu an lo awihna tûrin, chatuan Pathian thupêk ang zêlin, Zâwlneite Lehkha Thuin hnam tin hnênah hriattîr a ni tawh), nangni tinghet theitu 27 Pathian finga chauh hnênah chuan, Isua Krista avângin chatuana ropuina awm rawh se. Amen.
Chibai bûkna leh lâwm thu sawina
1 Paula, Pathian duh zâwnga Isua Krista tirhkohva koh leh kan unaupa Sosthena chuan, 2 Korinth khuaa Pathian kohhranho awm, Krista Isuaa tihhran, mi thianghlim ni tûra kohte hnênah, ram tina kan Lalpa (anmahni leh keimahni Lalpa) Isua Krista hming lam zawng zawng hnênah nên: 3 Pathian kan Pa leh Lalpa Isua Krista hnên ata khawngaihna leh remna in hnênah awm rawh se. 4 Krista Isuaa Pathian khawngaihna in hnêna pêk avâng khân in chungthuah Pathian hnênah lâwm thu ka hril fo thîn; 5 engkimah, thusawi tinrêngah leh hriatna tinrêngah amahah chuan tihhausaka in awm thu-ah khân; 6 chutiangin Krista thu ka hriattîr chu nangmahniah tihngheha a awm kha; 7 chutichuan, kan Lalpa Isua Krista inlârna nghâkin, thilpêk rêng rêngah in hlawhtling lo lo ve; 8 ani chuan kan Lalpa Isua Krista niah chuan sawisêl bova in awm nân, a tâwp thlengin a tinghet bawk ang che u. 9 Pathian, a Fapa Isua Krista kan Lalpa pâwlnaa ko lûttu che u kha a rinawm a ni.
Kohhrana inṭhenna
10 Tin, unaute u, in zain thu thuhmun in sawi a, in zînga inṭhenna rêng a awm lohna tûrin, rilru hmun khat leh ngaihtuahna hmun khata fel taka in inzawm tlat zâwkna tûrin, kan Lalpa Isua Krista hmingin ka ngên a che u. 11 Ka unaute u, in chungchâng thu chu, in zîngah inhnialnate a awm tih Kloii chhûngte chuan mi hrilh a ni. 12 Hei hi a ni ka tih chu, mi tinin, “Kei Paula pâwl ka ni,” “Kei zawng Apollova pâwl ka ni,” “Kei zawng Kipha pâwl ka ni,” “Kei zawng Krista pâwl ka ni,” in tih hlawm hi. 13 Krista chu ṭhenin a awm em ni? Paula chu in aia khen behin a awm em ni? A nih loh leh, Paula hminga baptis-in in awm em ni? 14 Krispa leh Gaia lo chu in zînga mi tu mah ka baptis loh che u avângin, Pathian hnênah lâwm thu ka sawi ṭhîn a ni; 15 chuti lo chuan, miin keima hminga baptis in ni emaw an ti dah ang e. 16 Stephana chhûngte erawh chu ka baptis bawk a; chûng lo chu mi dang ka baptis emaw ka hre lo. 17 Krista chuan baptis tûrin mi tîr si lo, Chanchin Ṭha hril tûrin mi tîr zâwk a ni; thu finga hril lovin; chuti lo chuan, Krista kraws chu engmahlovah an chantîr dah ang e.
Krista- Pathian thiltihtheihna leh finna
18 Kraws thu chu boral mêkte tân chuan âtna a ni si a; keini chhandam mêkte tân erawh chuan Pathian thiltihtheihna a ni zâwk e. 19 “Mi fing finna chu ka tiboral ang a, Remhre remhriatna chu ka paih thla ang,” tih ziak a ni si a. 20 Mi fing chu khawiah nge? Lehkhaziaktu chu khawiah nge? He khawvêla hnialtu chu khawiah nge? Pathianin khawvêl finna hi âtthlâk a ni tih a hriattîr lo vem ni? 21 Pathian finnaah chuan, khawvêlin finna hmanga Pathian an hriat theih loh hnuin, thuhril âtthlâk hmanga a ringtute chhandam chu Pathianin ṭha a ti hle si a. 22 Juda-te chuan chhinchhiahnate an phût ṭhîn a, Grik-te chuan finna an zawng bawk ṭhîn a; 23 keini erawh chuan Krista khen beh thu kan hril ṭhîn a nih hi; chu chu Juda-te tân chuan tlûkna, Jentailte tân thu âtthlâk a ni a; 24 nimahsela, Juda-te pawh ni sela, Grik-te pawh ni sela, kohte tân zawng Krista, Pathian thiltihtheihna leh Pathian finna chu a ni. 25 Pathian âtna chu mihring aiin a fing zâwk a, Pathian chak lohna pawh chu mihring aiin a chak zâwk bawk si a. 26 Unaute u, a kohna che u hi ngaihtuah teh u, tisa lama mi fing tam tak te, mi chak tam tak te, mi ṭha tam tak te koh an nih lohzia hi; 27 nimahsela, Pathianin khawvêl thil âte chu a thlang zâwk a, mi fingte chu a tihmualpho theihna tûrin; tin, Pathianin khawvêl thil chak lote chu a thlang a, thil chakte chu a tihmualpho theihna tûrin; 28 tin, khawvêl thil chhia leh thil hmuhsitawmte, thil awm lote nên lam Pathianin a thlang a, thil awmte chu engmahlova a siam theihna tûrin; 29 chutichuan, Pathian hmaah mi tu mah an inchhuang thei lo vang. 30 Nangni erawh chu ama zârah Krista Isuaah chuan in awm a ni; ani chu Pathian hnên ata kan tân finnaah siam a ni, felnaah te, thianghlimnaah te, tlannaah te nên; 31 chutichuan, an ziak ang khân, “A chhuang apiangin Lalpa chhuang rawh se.”
Khen beh Krista thu hril
1 Tin, unaute u, kei zawng Pathian thurûk hrilh che uin in hnêna ka lo kal lai khân, thusawi ropui leh finna ropui nêna lo kal ka ni lo. 2 Isua Krista, amah ngei khen beha a awm thu chauh lo chu in zîngah eng mah rêng hriat ka tum loh kha. 3 Tin, chak lo leh hlauvin, nasa taka khûr chungin in zîngah ka awm a. 4,5 Tin, in rinna chu mihring finnaa innghat lovin, Pathian thiltihtheihnaa innghata a awm theih zâwkna tûrin, ka ṭawngka chhuak leh ka thuhrilte chu thu finga thlêmna thuin a ni lo va, Thlarau leh thiltihtheihna hriattîrin a nih zâwk kha.
Pathian finna
6 Amaherawhchu, puitlingte zîngah chuan thufing zawng kan sawi ṭhîn; nimahsela, he khawvêl thufing hi a ni lo, he khawvêl rorêltu boral tûrte thufing hi a ni hek lo; 7 Pathian thufing thurûk chu kan sawi zâwk ṭhîn a ni, thufing inthup, kan ropuina tûra Pathianin khawvêl awm hmaa a ruat lâwk tawh chu. 8 Chu chu he khawvêl rorêltute rêng rêng hian an hre lo; hria sela chuan ropuina Lalpa chu an khêng bet lo vang. 9 “Mita hmuh ngai loh, benga hriat ngai loh, Mihring rilrua lût ngai lo, Pathianin a hmangaihtute tân A buatsaih apiangte chu,” tih ziak ang zâwk khân. 10 Keini erawh chu chûng chu Pathianin Thlarauvin min hriattîr ta a ni; Thlarau chuan engkim a chhui chhuak si ṭhîn; a ni, Pathian thu ril pawh. 11 Mihring thute chu mihring rilru, a chhûnga awm vêk lo chuan, mihring zîngah tuin nge hria ang? Chutiang bawkin Pathian thute chu Pathian Thlarau vêk lo chuan tu mân an hre lo. 12 Chutichuan, a thlâwna Pathianin thil min pêkte chu kan hriat theihna tûrin, keini zawngin khawvêl thlarau ni lovin, Thlarau, Pathian hnêna mi chu, kan hmu zâwk a ni. 13 Mihring finna zirtîr thua sawi lovin, Thlarau zirtîr thua sawi zâwkin, Thlarau lam thute chu thlarau lam mite hnêna hrilh fiahin, chûng thil min pêk thute pawh chu kan sawi ṭhîn. 14 Khawvêl mi chuan Pathian Thlarau lam thilte chu a lâwm ṭhîn lo, ani ngaih chuan âtthlâk a ni si a; Thlarauva hriat fiah a nih avângin a hre thei lo rêng rêng bawk a ni. 15 Thlarau mi erawh chuan thil engkim a hre fiah ṭhîn a, ani lah chu tu mân an hre fiah si lo. 16 Tuin nge Lalpa rilru hre tawha, amah chu zirtîr thei ang? Keini erawh chuan Krista rilru kan pu a ni.
Pathian bawihte
1 Tin, unaute u, thlarau mite hnêna sawi angin in hnênah thu ka sawi thei lo va, tisa mite hnêna sawi angin ka sawi zâwk kha, Kristaa nausênte hnêna sawi ang maiin. 2 Chaw ni lovin, hnutêin ka châwm che u kha, chaw in la ei theih loh avâng khân; a ni, tûnah pawh in la ei thei ta lo fo a ni, 3 tisa mi in la nih fo avângin. In zîngah inîtsîkna leh inhnialna a awm ṭhin avâng hian tisa mi la niin, mihring angin in la awm a ni lo vem ni? 4 Mi pakhatin, “Paula pâwl ka ni,” mi dangin, “Kei zawng Apollova pâwl ka ni,” in tih chhûng zawng mihring in la ni lo vem ni? 5 Apollova chu eng nge a nih le? Paula pawh chu eng nge a nih? Rawngbâwltu, nangmahni rintîrtu che u chauh an ni asin, chu pawh chu Lalpan a pêk ang ve ve chauh zêlin a ni. 6 Keiin ka phun a, Apollovan tuiin a châwm a; nimahsela, Pathianin a ṭhantîr a ni. 7 Chutichuan, a ṭhantîrtu Pathian chauh lo chu, a phuntu chu eng mah a ni lo va, tuia châwmtu pawh chu eng mah a ni hek lo. 8 Tin, a phuntu leh tuia châwmtu chu pumkhat an ni; nimahsela, anmahni thawh rim ang zêlin mahni lâwmman an hmu ve ve ang. 9 Keini zawng Pathian hnathawhpuite kan ni si a; nangni hi Pathian thlawhhma chu in ni a, Pathian in sak chu in ni bawk a. 10 Pathian khawngaihna mi pêk ang zêlin, in sa hotu ber fing tak angin keiin lungphûm ka rem a, mi dangin a chungah in an sa a. Nimahsela, mi tin a chunga an sakzia tûrah fîmkhur ṭheuh rawh se. 11 Lungphûm rem tawh sa lo chu lungphûm dang tu mân an rem thei tawh si lo va, chu lungphûm chu Isua Krista chu a ni. 12 Tin, lungphûm chungah chuan tu pawhin rangkachakin emaw, tangkaruain emaw, lung man tamin emaw, thingin emaw, hnimin emaw, buhpâwlin emaw in sa sela, 13 mi tin hnathawh chu a lang tawh ang. Ni chuan a tilang dâwn si a, meia a inlâr dâwn avângin; mei ngei chuan mi tin hnathawh chu eng ang nge a nih a fiah tawh ang. 14 Tu hnathawh pawh a chunga a sak chu a awm reng chuan, chu mi chuan lâwmman a hmu ang. 15 Tu hnathawh pawh a kan chuan, chu mi chuan a chân ang; amah tak erawh chu chhandamin a awm ang; amaherawhchu, meia kal tlang ang maiin. 16 Pathian in in nih leh Pathian Thlarau nangmahniah a awm reng tih in hre lo vem ni? 17 Tu pawhin Pathian in chu a tihkhawloh chuan, chu mi chu Pathianin a tikhawlo vang; Pathian in chu a thianghlim si a, chu in chu nangmahni in ni e. 18 Tu mân mahni intihder suh se. In zîngah tu pawh he khawvêlah hian finga a inngaih chuan, a lo fin theihna tûrin mi âah lo chang rawh se. 19 He khawvêl finna hi Pathian ngaih chuan âtna a ni si a. “Ani chuan mi fingte chu anmahni fin vervêknain a âwk ṭhîn,” tih ziak a ni si a; 20 “Lalpa chuan mi fingte ngaihtuahnate chu a thlâwn a ni tih a hria,” tih ziak a ni leh bawk a. 21 Chuvângin, tu mân mihringte chhuang suh se. Engkim hi in ta a ni vek si a; 22 Paula emaw, Apollova emaw, Kipha emaw, khawvêl emaw, nunna emaw, thihna emaw, thil awm sa emaw, thil lo la awm tûr emaw, a zavaiin in ta vek a ni; 23 nangni pawh Krista ta in ni a; Krista pawh chu Pathian ta a ni.
Tirhkohte rawngbâwlna
1 Keiniho hi Krista rawngbâwltuah leh Pathian thurûk enkawltuah miin min ngai rawh se. 2 Hetah hian enkawltu chu mi rinawm nih a ngai bawk a ni. 3 Nimahsela, nangnin mi fiahna leh mihring ngaihtuahnain mi fiahna chu ka tân thil tê tak tê a ni; mahni pawh ka infiah ngai hek lo. 4 Eng mah indemna ka hre si lo va; nimahsela, chu chuan thiam mi chantîr chuang lo; mi fiahtu chu Lalpa a ni zâwk. 5 Chutichuan, a hun hma hian eng mah fiah suh u, Lalpa lo kal hma loh zawng; ani chuan thima thil thuhrûkte chu êngah a rawn la chhuak ang a, thinlunga tumte pawh a tilang bawk ang; chumi hunah chuan, mi tinin Pathian lakah chuan mahni chan tâwkah fak an hlawh ṭheuh tawh ang. 6 Tin, unaute u, thu ziakte chu in khûm lohna tûrin, keimahniah hian in zir theih nân, chûng thute chu in ṭhatna tûrin kei leh Apollovan kan inbel a ni, in zîngah tu mân pakhat chhuangin pakhat in uan khum loh nân. 7 Nang tuin nge tilêm chuang che? I dawn loh chu eng nge i neih ni? I dawn a nih si chuan engati nge dawn ni lo anga i uanpui ni? 8 Tûn apangin in tlai ta a, tûn apangin in hausa ta a, kan tel lovin ro in rêl ta a nih hi le; a ni, rorêl tak tak ula chu ka duh a ni, keini pawhin nangmahni nêna ro kan rêl theih nân. 9 Pathianin keini tirhkohte hi thi tûra ruat sa angin a hnuhnûng berah min târ chhuakah ka ngai a ni; khawvêlte leh vântirhkohte leh mihringte mit hmuha ennawma siamin kan awm hi. 10 Keini zawng Krista avângin mi â kan ni a, nangni erawh chu Kristaah chuan mi fing in ni zâwk e; keini zawng kan chak lo va, nangni erawh chu in chak e; nangni zawng mi chawimawiin in awm a, keini erawh chu mi hmuhsitin kan awm zâwk a ni. 11 Tûn thleng pawh hian kan rilṭâmin kan tuihâl a, silhfên kan khawp lo va, mi kut thak hnawihna kan ni a, awmna bulbâl kan nei lo va; 12 mahni kuta thawkin kan rim hle a; miin min hauvin mal kan sâwmsak ṭhîn a; miin min tihduhdahin kan tuar hrâm hrâm ṭhîn a; 13 miin min hêkin kan thlêm ṭhîn a; tûn thleng pawh hian khawvêl hnâwmhnawk, thil zawng zawng bawlhhlawh angin miin min siam a ni. 14 In zahna tûrin hêng thu hi ka ziak lo va, ka fa duh takte anga zilh tûr che uin ka ziak zâwk a ni. 15 Kristaah chuan zirtîrtu sîngkhat nei mah ula, pa zawng tam tak in nei si lo a ni; keiin Krista Isuaah chuan Chanchin Ṭhain ka hring che u a nih kha. 16 Chutichuan, mi zir tûrin ka ngên a che u. 17 Chumi avâng chuan Timothea, Lalpaa ka fa duh tak leh rinawm chu, in hnênah ka rawn tîr a ni; ani chuan Kristaa ka awm dân, ram tina kohhranho pâwl tina ka zirtîr ṭhin ang hi a hriattîr leh ang che u. 18 Tin, kei in hnêna lo kal tawh lo tûr ang maiin ṭhenkhat in uang a ni. 19 Nimahsela, Lalpan rem a tih chuan rei lo tê chinah in hnênah ka lo kal ang; chutichuan, mi uangte thu chu ni lovin, an thiltihtheihna chu ka hre zâwk tawh ang. 20 Pathian ram chu thu-ah a awm lo va, thiltihtheihnaah a awm zâwk a ni. 21 Eng nge in duh zâwk? Vuakfung nên nge in hnênah ka lo kal anga, hmangaihna leh thuhnuairawlhna rilru puin?
Kohhrana inngaihna bawlhhlawh
1 In zîngah inngaih a awm tih thu a thang vêl chiam a ni; chutiang inngaih chu Jentailte zîngah pawh awm ngai hlei lo, in zînga mi pakhatin a pa nupui a neih kha. 2 Tin, chu thil titu chu in zîng ata hnawh chhuah nâna lungngaih tâk aruangin in uang zâwk si a. 3 Keimah ngei hi, taksain ka tel lo na a, thlarauvah erawh chuan ka tel a, thil chuti kau titu chu tûnah pawh Lalpa Isua hmingin in zînga tel ang takin ka ngaihtuah zo tawh; 4 nangni leh ka thlarau chu kan Lalpa Isua thiltihtheihnaa inkhâwmin, 5 mi chutiang chu, a thlarau Lalpa niah chuan chhandama a awm theih nân, a tisa tiboral tûrin Setana pe ila ka ti a ni. 6 In uan chhan hi a ṭha lo ve. Dawidim tlêm têin chhang hlâwm chu a pumin a fan chhuak ṭhîn tih in hre lo vem ni? 7 Dawidim tel lo in ni ang bawkin, chhang hlâwm thar in lo nih theih nân dawidim hlui chu thian fai rawh u. Kan kalhlên kûtna tûr pawh an talh tawh si a, Krista ngei chu; 8 chuvângin, i kût ang u, dawidim hluia kût lovin, nunchhiat leh sualna dawidima kût hek lovin, takna leh dikna chhang, dawidim telh lohvin i kût zâwk ang u. 9 Ka lehkhathawnah khân inngaih hmangte pâwl lo tûrin in hnênah ka ziak kha; 10 he khawvêla inngaih hmangte emaw, duhâm leh hlêprute emaw, milem betute emaw hi zawng pâwl hauh loh tûr ti ka ni lo ve; chutiang ni sela chuan khawvêl ata kal chhuak ngei tûr in ni dâwn si a. 11 Tûnah erawh chuan tu pawh, unau hming pu siin, inngaih hmang mi emaw, mi duhâm emaw, milem be mi emaw, hauh hmang mi emaw, zu ruih hmang mi emaw, hlêpru mi emaw ni sela, pâwl lo tûrin in hnênah ka ziak a ni; mi chutiang hnênah chuan ei pawh ei lo tûrin. 12 Pâwn lam mite chu keia lo ngaihtuah tûr em ni? Pathianin a ngaihtuah ang chu! 13 In zînga mite chu nangmahni ngaihtuah tûr a ni lâwm ni? Mi sual chu in zîng ata hnawt chhuak rawh u.
Ringtupui nêna thubuai
1 In zîngah tu pawhin mi dang chungah thupawi nei ula, mi thianghlimte hmaa thlen lovin, mi fel lote hmaah in thlen ngam dâwn em ni? 2 A nih leh, mi thianghlimte chuan khawvêl an ngaihtuah dâwn tih in hre lo em ni le? Tin, khawvêl mah hi in ngaihtuaha a awm dâwn chuan, thil tê berte pawh chu ngaihtuah tlâk lo em ni in nih le? 3 Tûn dam chhûng khawsak thute chu sawi loh, vântirhkohte lam pawh kan ngaihtuah dâwn tih in hre lo vem ni? 4 Chutichuan, tûn dam chhûng khawsak thute ngaihtuah tûr in neihin, kohhranho zînga mi hmuhsitawmte chu in ngaihtuahtîr ṭhîn em ni? 5 In zahna tûrin ka sawi a ni. A unaute kâra thu titlu thei mi fing pakhat tal in zîngah in hmu thei lo a ni ang maw, 6 unauvin a unau rorêlnaa a thlen zâwk ṭhin? Ringlote hmaah a ni lehnghâl si. 7 A ni, hei hi in fel zawh zân lohna pakhat chu a ni pang mai, thupawi in neih tawn ṭhin hi. Engati nge dik lo taka tihna chu in tuar zâwk loh? Engati nge tihdâwnna chu in tuar zâwk loh? 8 A ni, nangmahni ngeiin in unaute chungah pawh in tidik lo va, in tidâwng zâwk ṭhîn. 9 A nih leh, mi fel lote chuan Pathian ram an luah lo vang tih in hre lo vem ni le? Bumin awm suh u; inngaih hmangte emaw, milem betute emaw, uirête emaw, mi hurte emaw, mawngkawhurte emaw, 10 rûk hmangte emaw, mi duhâmte emaw, zu ruih hmangte emaw, mi hau hmangte emaw, hlêprute emawin Pathian ram an luah lo vang. 11 Tin, nangni ṭhenkhat chutiang mi in nih ṭhin kha; nimahsela, Lalpa Isua Krista hmingah leh kan Pathian Thlarauvah tlen fai in ni tawh a, tihthianghlim in ni tawh a, thiam chang in ni tawh.
In taksaah Pathian chawimawi rawh u
12 Thil engkim tih ka tân a thiang a; nimahsela, thil engkim tih a ṭha kher lo. Thil engkim tih ka tân a thiang a; nimahsela, eng bawihah mah ka inphal lo. 13 Ei tûrte chu pum tân a ni a, pum chu ei tûrte tân a ni; nimahsela, Pathianin a tiboral ve ve dâwn. Tin, taksa hi inngaih nân a ni lo va, Lalpa tân a ni zâwk e; Lalpa pawh chu taksa tân a ni. 14 Tin, Pathianin Lalpa chu a kaitho va, keini pawh a thiltihtheihnain min kaitho ve bawk ang. 15 In taksa chu Krista pêngte a ni tih in hre lo em ni? Krista pêngte chu lâksakin nawhchizuar pêngahte ka siam dâwn em ni le? Hnai lo ve. 16 A nih leh, nawhchizuar zawm chu amah nên pumkhat an ni tih in hre lo em ni le? “An pahnihin tisa pumkhat an lo ni tawh ang,” a ti si a. 17 Lalpa zawm erawh chu amah nên thlarau pumkhat an ni. 18 Inngaih hi tlânsan rawh u. Mihring thil tihsual tinrêng hi taksa pâwn lamah a ni; mi ngaih hmang erawh chuan ama taksa chungah thil a tisual a ni. 19 A nih leh, in taksa chu, in chhûnga awm Pathian hnên aṭanga in hmuh, Thlarau Thianghlim in a ni tih in hre lo em ni le? Mahni ta pawh in ni lo va, 20 mana lei in ni tawh asin; chuvângin, in taksaah chuan Pathian chawimawi rawh u.
Nupui pasal thu
1 Tin, in thil ziak thute kha chu: mipa tân hmeichhe khawih loh a ṭha a ni. 2 Nimahsela, inngaihnate a awm ṭhin avângin mipain nupui bîk nei ṭheuh sela, hmeichhia pawhin pasal bîk nei ṭheuh rawh se. 3 Pasal chuan a nupui hnênah a chan tûr tâwk chu pe rawh se; chutiang bawkin nupui pawhin a pasal hnênah a chan tûr tâwk chu pe bawk rawh se. 4 Nupui chuan ama taksa chungah thu a nei lo va, a pasal chuan thu a nei zâwk a ni; chutiang bawkin pasal pawhin ama taksa chungah thu a nei lo va, a nupui chuan thu a nei zâwk a ni. 5 Ṭawngṭai tûra in inpêk theih nân rei lo tê atân rem in tih ve ve chauh loh chuan, a tua mah intidâwng suh u, chumi hnu chuan in awm dân pângngaiin awm leh thuai ula; chuti lo chuan, in insûm zawh loh avângin Setanan a thlêm dah ang che u. 6 Nimahsela, he thu hi thu pe lamin ka sawi lo va, phal lam thuin ka sawi zâwk a ni. 7 Nimahsela, mi zawng zawng keimah ang tak hian awm vek sela ka duh a ni. Amaherawhchu, mi tinin Pathian hnên ata thilpêk mahni hmuh zâwng an nei ṭheuh a ni, pakhatin kawng khatin, midangin kawng dangin. 8 Nimahsela, lêngṭûlte leh hmeithaite hnênah chuan heti hian ka ti a ni: keimah ang tak hian awm sela an tân a ṭha ang. 9 Insûm theihna an neih loh erawh chuan innei rawh se; hur aiin inneih chu a ṭha zâwk si. 10 Tin, innei sate hnênah chuan thu ka pe (keima pêk erawh chu ni lovin, Lalpa pêk a ni zâwk): nupui chuan a pasal ṭhen suh se; 11 a ṭhen vêk chuan pasal nei tawh lovin awm law law rawh se, a nih loh leh a pasal nên vêk innei leh rawh se; tin, pasal chuan a nupui ma suh se. 12 Mi dang hnênah erawh chuan Lalpa ni lovin, keimahin ka sawi: unau tu pawhin nupui ringlomi nei sela, ani chuan a hnêna awm reng a lungnih chuan ma suh se. 13 Tin, hmeichhia, pasal ringlomi nei chuan, a pasalin a hnêna awm reng a lungnih chuan ṭhen suh se. 14 Pasal ringlomi chu a nupui zârah tihthianghlimin a awm a, nupui ringlomi pawh chu a pasal zârah tihthianghlimin a awm bawk si a; chuti ni suh sela, in fate chu an thianghlim lo vang; nimahsela, an thianghlim reng e. 15 Nimahsela, a ring lo zâwk chuan ṭhen sela, ṭhen mai rawh se, chutiangah zawng unaupa emaw, farnu emaw hrên an ni tawh lo ve; Pathian erawh chuan inrem taka awm tûrin min ko a ni. 16 Aw nupui, i pasal i chhandam dâwn leh dâwn loh engtin nge i hriat ni? Aw pasal, i nupui i chhandam dâwn leh dâwn loh engtin nge i hriat ni?
Pathian kohna anga nun
17 Eng pawh ni sela, Lalpa chuan mi tin hnêna a sem pângngai ang ṭheuh leh, Pathianin mi tin a kohna pângngai ang ṭheuhvah awm rawh se. Chutiangin kohhran pâwl zawng zawngah ka ruat ṭhîn. 18 Serh tan tawh hnu koh an awm em? Serh tan loh mi lo ni suh se. Serh tan lova awm koh an awm em? Serh tantîr suh se. 19 Pathian thupêkte pawm chauh lo chu serh tan hi eng mah a ni lo va, serh tan loh pawh hi eng mah a ni hek lo. 20 Mi tin kohva an awm laia an chan pângngaiah chuan awm reng ṭheuh rawh se. 21 Bawiha i awm koh i ni em? Chu chu engto duh suh, remchâng a awm erawh chuan chhuah tum mai rawh. 22 Bawiha awm Lalpa kohva chu Lalpa bawih chhuahtîr a ni si a; chutiang bawkin bawih lova awm kohva chu Krista bawih a ni. 23 Mana lei in ni tawh; mihringte bawihah lût suh u. 24 Unaute u, mi tin kohva in awm laia in chan pângngaiah chuan Pathian hnênah awm reng rawh u.
Hnahkhatte leh hmeithaite chungchâng
25 Tin, nula thianghlim lam thu-ah zawng Lalpa thupêk rêng ka nei lo va; nimahsela, rinawma awm tûrin Lalpa hnên ata khawngaihna hmu ka nih avângin, ka ngaihtuah zia ka sawi ang. 26 Chutichuan, tûnlai hrehawm avâng hian hei hi ṭhain ka ring, mi a awm ngaia awm reng hi. 27 Nupuiah phuar belhbawm i ni em? Phelhna zawng suh. Nupuiah phuar belhbawm loh i ni em? Nupui zawng suh. 28 Nimahsela, nupui i neih chuan thil i tisual lo ve, nula thianghlim pawhin pasal a neih chuan thil a tisual hek lo. Amaherawhchu, chutiang mite chuan tîsaah chuan hrehawm an tuar ang; nimahsela, kei zawngin tuar lohtîr che u ka duh a ni. 29-31 Amaherawhchu, unaute u, hei hi ka ti a ni: tûn achinah chuan nupui neite chu nei lo anga an awm theihna tûr leh, ṭapte chu ṭap lo anga an awm theihna tûr leh, lâwmte chu lâwm lo anga an awm theihna tûr leh, leitute chu nei lo anga an awm theihna tûr leh, khawvêl hmangtute chu hmang lutuk lova an awm theihna tûrin hun hi tihtawiin a awm a ni; he khawvêl awm dân hi a boral mêk a nih hi. 32 Nimahsela, lungkham nei lova in awm ka duhsak che u a ni. Nupui nei lo chuan Lalpa tihlâwm theihna zia tûr ngaihtuahin Lalpa lam thil chu a lungkham ṭhîn. 33 Nupui nei erawh chuan a nupui tihlâwm theihna zia tûr ngaihtuahin khawvêl lam thil a lungkham zâwk ṭhîn. 34 Tin, pasal nei leh nula thianghlim chu an inang lo bawk a. Pasal nei lo chuan a taksa leh a thlarauvah chuan thianghlim taka a awm theihna tûrin, Lalpa lam thil chu a lungkham ṭhîn; pasal nei erawh chuan a pasal tihlâwm theihna zia tûr ngaihtuahin, khawvêl lam thil chu a lungkham zâwk ṭhîn. 35 Chûng chu in ṭhatna tûrin ka sawi a ni; khuahkhirh che u ka tum a ni lo va, awm dân mawi tâwka in awm theihna tûr leh, Lalpa rawng chu buai lova in bâwl theihna tûrin ka sawi zâwk a ni. 36 Amaherawhchu, tu pawhin a fanu nula thianghlim a lên reitîr kawngah tidik lova a inrin chuan, ani chu a vânglai a niha, a ṭûl bawk si chuan, a tih duh chu ti rawh se; thil a tisual lo ve, neihtîr rawh se. 37 Nimahsela, rilru nghet tak pua, ṭûl ti lova, ama duh zâwng erawh chu hlen theia, a fa nula thianghlim chu vawn reng a rilrua tum tlattu chuan a tiṭha zâwk ang. 38 Chutichuan, pasal neihtîrtu chuan a tiṭha e; nimahsela, a neihtîr lotu chuan a tiṭha lehzual a ni. 39 Nupui chu a pasal a dam chhûng chuan phuar a ni; nimahsela, a pasal a thih tawh chuan a duh apiang a nei thei ang; amaherawhchu, Lalpaa awm mi a ni tûr a ni. 40 Nimahsela, keia ngaih chuan, a awm ngaia a awm reng chuan a eng a thâwl zâwk ang; kei pawhin Pathian Thlarau chu nei ve bawkin ka inring a ni.
Inthawina sa
1 Tin, milemte laka inthawina thilte thu kha chu: kan zain hriatna kan nei ṭheuh tih kan inhria. Hriatna zawngin mi a uantîr ṭhîn a, hmangaihna erawh chuan mi a siam ṭha ṭhîn. 2 Tu pawhin thil eng emaw hriaa a inrin chuan, a hriat tûr ang chu a la hre lo ve. 3 Amaherawhchu, tu pawhin Pathian a hmangaih chuan, chu mi ngei chu ama hriat a ni. 4 Chutichuan, milemte laka inthawina thil ei kawngah zawng, khawvêlah hian milem rêng rêng chu eng mah a nih lohzia leh, pakhat chauh lo chu Pathian dang rêng rêng an awm lohzia chu kan hria. 5 Vânah emaw, leiah emaw, pathian hming pute awm mah sela (chutiang pathian tam tak leh lalpa tam tak an awm si a), 6 keini tân erawh chuan Pathian pakhat chauh (Pa chu) a awm a, ama hnên aṭangin engkim a chhuak a, keini pawh ama tâna awm kan ni; Lalpa pakhat chauh (Isua Krista chu) a awm bawk a, amah vângin engkim a awm a, keini pawh amah vâng bawka awm kan ni. 7 Amaherawhchu, chu hriatna chu mi zawng zawngah a awm lo; chutichuan, ṭhenkhatin tûn thlengin milem be ṭhang an nih avângin, milem laka inthawina thil ang taka ngaiin an ei ṭhîn; tichuan, an chhia leh ṭha hriatna chu a chak loh avângin an lo bawlhhlawh ṭhîn. 8 Nimahsela, ei tûr hian Pathian mit min tluntîr chuang lo vang; ei mah suh ila kan chhe chuang lo va, ei mah ila kan ṭha chuang hek lo. 9 Nimahsela, fîmkhur rawh u; chuti lo chuan, duh duha in tlat theihna hi eng emaw tiin mi chak lote tân tlûkna a lo ni dah ang e. 10 Nang, hriatna nei mi, tu pawhin milem biakna ina chaw kîla an hmuh si che chuan, anni chu mi chak lo lo ni sela, an chhia leh ṭha hriatna chuan milem laka inthawina thil ei a lo ngam dâwn lâwm ni? 11 Tichuan, i hriatna avâng chuan mi chak lo (unau, a thih ai Kristan a thihsaka) chu a boral dâwn a ni. 12 Unaute chunga chutiang thil in tihsuala, an chhia leh ṭha hriatna chu a chak loh nâk alaia in hliam hlauh hian, Krista chunga thil tisual in ni. 13 Chumi avâng chuan, ei tûr hian ka unau a tihtlûk chuan, ka unau ka tihtlûk lohna tûrin kumkhuain sa rêng rêng ka ei tawh lo vang.
Tirhkoh dinhmun
1 Zalên ka ni lo vem ni? Tirhkoh ka ni lo vem ni? Kan Lalpa Isua ka hmu tawh lo vem ni? Nangniho hi Lalpaa ka hnathawh in ni lo vem ni? 2 Mi dangte tân tirhkoh ni mah suh ila, nangni tân tal zawng ka ni; Lalpaa ka tirhkoh nih chhinchhiahna chu nangmahni hi in ni asin. 3 Mi chhuahchhâltute ka chhânna chu hei hi a ni. 4 Ei leh in tûrin thu kan nei lo vem ni? 5 Tirhkoh dangte leh Lalpa unaute leh Kipha ang khân nupui ring mi hruai vêl tûrin thu kan nei lo vem ni? 6 A nih loh leh, hna thawk lo tûrin kei leh Barnaban thu kan nei lo bîk em ni? 7 Sipai tu nge mahni inchâwma râl kâp ngai ni? Tuin nge a rah ei si lovin, grêp huan siam ngai ni? A nih loh leh, tuin nge ran rual hnutê ei si lovin ran rual enkawl ngai ni? 8 Chûng thu chu mihring ang maiin ka sawi em ni? Dân thu pawhin chûng ngei chu a sawi bawk lo vem ni? 9 Mosia Dân Lehkhabuah chuan, “Sebâwngpain buh a chîl laiin a hmui phuar suh ang che,” tih ziak a ni si a. Pathianin sebâwngpa tân mai em ni a ngaihtuahsak ni? 10 Keimahni tân chauh a sawi a ni lâwm ni? Ni e, keimahni tân a ni an ziak ni; lei lettu chuan beisei neiin leh tûr a ni a, buh vawtu pawh chuan chan neih ve beiseiin vuak tûr a ni si a. 11 Keinin thlarau lam thilte chu in hnêna kan tuh tawh chuan, tîsa lam thilte chu seng mah ila, thil hlâwk tak em ni ang? 12 Mi dang mahin in chunga thuneihna chu an chan chuan, keini hi chang tûr kan ni lehzual lâwm ni? Nimahsela, chu thuneihna chu kan hmang lo: Krista Chanchin Ṭha kan dâl lohna tûrin engkim kan tuar hrâm hrâm zâwk a ni. 13 Thil serh buatsaih vêltute chuan Pathian biak ina mi thil an ei leh, maichâma rawngbâwltute chuan maichâma thilhlanah chanvo an nei tih in hre lo vem ni? 14 Chutiang takin, Lalpa chuan Chanchin Ṭha hriltute chu Chanchin Ṭha chu an ei hmuh nân a ruat a ni. 15 Nimahsela, kei zawngin chûng chu pakhat mah ka hmang lo a ni; ka chunga chutianga in tih nân hêng thu hi ka ziak a ni hek lo; tu pawhin ka chhuan hi engmahlova an siam ai chuan, thi mai ila ka tân a ṭha zâwk si a. 16 Chanchin Ṭha hril mah ila, chhuan tûr rêng rêng ka nei si lo, tih mâkmawh ka chungah a innghat a ni si a; Chanchin Ṭha hril suh ila, ka chung a pik dâwn si a. 17 Chu chu mahni thu thua ka tih chuan lâwmman ka nei a ni; nimahsela, mahni thu thuin a nih si loh chuan, Chanchin Ṭha enkawlna hna mi kawltîr mai a ni ang. 18 Ka lâwmman chu eng nge ni le? Chanchin Ṭhaa ka thuneihna chu ka hman zawh loh nân, Chanchin Ṭha ka hrilin, hlawh lova Chanchin Ṭha rawng ka bâwl theih hi a ni. 19 Tu ma bawih ni mah suh ila, mi tam lehzual ka lâk luh theihna tûrin mi zawng zawng bawihah ka insiam ta. 20 Tichuan, Juda-te ka lâk luh theihna tûrin Juda-te hnênah Juda mi angin ka awm ṭhîn, Dân hnuaia awmte ka lâk luh theihna tûrin Dân hnuaia awmte hnênah Dân hnuaia awm angin ka awm thin, Dân hnuaia awm si lovin. 21 Dân nei lote ka lâk luh theihna tûrin dân nei lote hnênah dân nei lo angin ka awm ṭhîn, Pathian dân awih lo si lovin, Krista dân zâwm siin. 22 Chak lote ka lâk luh theihna tûrin chak lote hnênah chak lo angin ka awm ṭhîn; eng emaw ti tala ṭhenkhat tal ka chhandam theihna tûrin, mi zawng zawng hnênah engkim ka ni tawh. 23 Chanchin Ṭha avângin engkim ka ti ṭhîn, chan ka neih ve theih nân. 24 Intlânsiakhote chu an zain an tlân a; nimahsela, pakhat chauhvin lâwmman a hmu ṭhîn tih in hre lo vem ni? In hmuh theih nân chutiang tak chuan tlân rawh u. 25 Tin, intihsiaknaahte chuan a bei ṭâlh ṭâlh apiang chu engkimah an insûm ṭhîn a ni. Anni zawngin lallukhum chhe thei hmu tûrin an bei a, keini erawh chuan lallukhum chhe thei lo hmu tûrin. 26 Chutichuan, tiam chin lam panin ka tlân ngat ngat a ni, boruak mai hnek lovin mahni ka inhnek zâwk ṭhîn a; 27 chu vâng chuan, ka taksa ka tichhel a, ka thuhnuaiah ka dah tawh a ni; chuti lo chuan, mi dangte hnêna ka tlângaupui hnu pawhin, eng emaw tiin keimah ngei hi paih thlâkin ka awm dah ang e.
Milem laka fîmkhur tûr
1 Unaute u, hêng hi in hriat loh ka duh lo ve, khatia min thlahtute zawng zawng chhûm hnuaia an awm veka, an zaa tuifinriat pawh an kai veka, 2 an zaa chhûmah leh tuifinriatah pawh Mosia bêl tûra baptis-a an awm veka, 3 an zaa thlarau lam chaw hmun khat pawh an ei ṭheuhva, 4 an zaa thlarau lam in tûr hmun khat pawh an in ṭheuh kha; anmahni zuitu thlarau lam lungpuia mi kha an in ṭheuh si a; chu lungpui chu Krista a ni. 5 Nimahsela, an zînga mi tam zâwk chungah chuan Pathian a lungni ta lo va; thlalêrah khân tlu hlumin an awm a. 6 Tin, chûng chu kan tân entîrna a ni, thil sual an châk ang bawk khân kan châk ve loh nân. 7 An zînga ṭhenkhat milem betu an ni ang khân milem betu ni suh u, “Mipui chu ei leh in tûrin an ṭhu hlawm a, infiam tûrin an tho leh a,” tih ziak ang khân. 8 An zînga ṭhenkhatin nula an ngai a, ni khatah sînghnih leh sângthumin an tlûk hlum phah ang khân i inngai hek suh ang u. 9 An zînga ṭhenkhatin Lalpa an fiaha, rûla tihborala an awm phah ang khân Lalpa chu i fiah hek suh ang u. 10 An zînga ṭhenkhat an phunnawi a, tiboraltu tihborala an awm phah ang khân phunnawi hek suh u. 11 Tin, chûng chu entîrna tûrin an chungah a lo thleng a nih kha; keini, hun tâwp lo thlennate hi min zilhna tûrin an ziak a ni bawk a. 12 Chuvângin, dinga inring chu fîmkhur rawh se; chuti lo chuan, a tlu dah ang e. 13 Mihring tuar theih ang chauh lo chu thlêmna rêng rêng in chungah a thleng ngai lo. Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang. 14 Chuvângin, ka duh takte u, milem biak hi tlânsan rawh u. 15 Mi fingte hnêna sawi angin ka sawi a ni; ka thusawi hi ngaihtuah rawh u. 16 Malsâwmna no mal kan sâwmsak ṭhin hi Krista thisen ṭâwmpuina a ni lo vem ni? Chhang kan phel ṭhin hi Krista taksa ṭâwmpuina a ni lo vem ni? 17 Keini mi tam tak hi chhang tlang khat, taksa pumkhat kan nih hi; kan zain chhang tlang khata mi kan chang ṭheuh si. 18 Tisa lama Israel-ho chu en teh u; inthawina sa eitute chuan maichâm chu an ṭâwmpui lo vem ni? 19 Milem leh a hnêna thil hlante chu chaw tak khûka khûkpui tûr ka tihna em ni? Ni suh e. 20 Jentailte inthawina chu Pathian lakah ni lovin, ramhuaiho lakah an inthawi ṭhîn a ni tih ka sawi zâwk a ni; nangni zawngin ramhuaiho in ṭâwmpui ka duhsak lo che u asin. 21 Lalpa no leh ramhuai no in in kawp thei lo vang; Lalpa dawhkâna mi leh ramhuai dawhkâna mi in ei kawp thei hek lo vang. 22 A nih loh leh, Lalpa chu thîk tûrin chawhthawh kan tum a ni maw? Amah aiin kan chak zâwk em ni? 23 Thil engkim tih a thiang a; nimahsela, thil engkim tih a ṭha kher lo. Thil engkim tih a thiang a; nimahsela, thil engkim tihin mi a siam ṭha lo. 24 Tu pawhin mahni ṭhatna tûr zawng lovin, mi dang ṭhatna tûr zawng zâwk rawh se. 25 Sa dâwra an zawrh apiang chu, chhia leh ṭha hriatna avânga eng mah zâwt kher lovin ei mai rawh u; 26 lei leh a chhûnga mi zawng zawng hi Lalpa ta a ni si a. 27 Ringlomi zînga tuin emaw a sâwm che ua, kal in duh si chuan chhia leh ṭha hriatna avânga eng mah zâwt kher lovin, an hlui che u apiang chu ei mai rawh u. 28 Amaherawhchu, tuin emaw, “Hei hi inthawina a ni,” tiin a hrilh che u chuan, a hriattîrtu che u avâng leh chhia leh ṭha hriatna avângin ei suh u, 29 nangma chhia leh ṭha hriatna ka ti lo va, mi dang chhia leh ṭha hriatna chu a ni ka tih zâwk ni. Engah nge mi dang chhia leh ṭha hriatnain ka zalênna a sawisêl ni? 30 Lâwm taka ka chan chuan, a chunga lâwm thu ka sawina chungah hian engah nge sawichhiat ka nih ni? 31 Chutichuan, in ei pawhin, in in pawhin, in tih apiangah pawh Pathian ropuina tûr hlîrin ti rawh u. 32,33 Keiin mahni sâwtna zawng lovin, chhandam an nih theihna tûrin mi tam tak sâwtna zawng zâwkin, mi zawng zawng engkima ka tihlâwm ang tak hian, Juda-te tân pawh, Grik-te tân pawh, Pathian kohhranho tân pawh, an tlûk phahna tûr rêng eng mah ti suh u.
Hmeichhe tân lukhum
1 Mi zirtute ni rawh u, kei pawh Krista zirtu ka ni ang bawk hian. 2 Tin, engkima mi hriat reng avâng leh, thurochhiah ka hrilh che u ang taka in vawn tlat avângin ka fak a che u. 3 Amaherawhchu, mipa tawh phawt lu chu Krista a ni, hmeichhe lu chu mipa a ni, Krista lu chu Pathian a ni tih in hriat ka duh a ni. 4 Mipa, lukhum khum chunga ṭawngṭai emaw, thuhril emaw apiangin an lu chu an timualpho a ni. 5 Amaherawhchu, hmeichhia, lukhum khum lova ṭawngṭai emaw, thu hril emaw apiangin an lu an timualpho a ni; ziah kâwn nên thuhmun reng a ni si a. 6 Hmeichhia lukhum khum lova a awm si chuan, mêt law law rawh se; amaherawhchu, hmeichhe tân lu meh emaw, ziah kâwn emaw a zahthlâk si chuan lukhum khum zâwk rawh se. 7 Mipa zawng Pathian anpui leh ropuina a nih avângin, lukhum khum tûr a ni lo rêng rêng si a; hmeichhia erawh chu mipa ropuina a ni. 8 Mipa hi hmeichhia aṭanga chhuak a ni lo va; hmeichhia erawh chu mipa aṭanga chhuak a ni zâwk a. 9 Mipa hi hmeichhe tâna siam a ni hek lo; hmeichhia erawh chu mipa tâna siam a ni zâwk. 10 Chumi avâng chuan, vântirhkohte avângin hmeichhiain a lu-ah mipa thuneih chhinchhiahna a khum tûr a ni. 11 Nimahsela, Lalpaah chuan hmeichhia hi mipa tel lovin a awm thei lo va, mipa pawh hi hmeichhia lovin a awm thei hek lo. 12 Hmeichhia hi mipa aṭanga chhuak a ni ang bawkin, mipa pawh hi hmeichhe laka piang a ni si a; amaherawhchu, engkim hi Pathian aṭanga chhuak vek a ni. 13 Nangmahni inngaihtuah rawh u, hmeichhiain lukhum khum lova Pathian hnêna ṭawngṭai hi a mawi em ni? 14 Mipa hian sam sei a neih chuan a tân a zahthlâk a ni tih, in thinlung pianpui pawhin a hriattîr lo che u em ni? 15 Hmeichhia erawh chuan sam sei a neih chuan a tân ropuina a ni zâwk; a sam chu a khuhna tûra pêk a ni si a. 16 Eng pawh ni rawh se, hnial an awm a nih pawhin keini zîngah chutiang dân kan nei lo, Pathian kohhranho pawhin an nei hek lo.
Lalpa Zanriah neih dân dik lo
17 Amaherawhchu, he thu ka hrilh che uah hian ka fak thei lo a che u, in ṭhat lehzualna tûr lam ni lovin, in chhiat lehzualna tûr lam zâwka in inkhâwm ṭhin avâng hian. 18 A hmasa berin, kohhranhova in inkhâwmin in zîngah inṭhenna a awm ṭhîn tih mi sawi ka hre si a; rin pawh ka ring deuh bawk a ni. 19 In zînga a taktakte chu an lan theih nân, in zîngah rin hranna pawh a awm bawk tûr rêng a ni. 20 Chutichuan, in inkhâwmin, Lalpa Zanriah ei rual tûr a ni lo, 21 mi tinin in eiin mahni zanriah in ei hmasa si ṭhîn a; tichuan, mi pakhat ril a ṭâm a, mi pakhat a rui si a. 22 Engtizia nge? Ei leh inna tûr in in nei lo vem ni? A nih loh leh, Pathian kohhranho in hmusitin, eng mah nei lote chu in mualpho em ni? In hnênah eng nge ka sawi tâk ang? Ka fak dâwn che u em ni? Hemi kawngah hian ka fak thei lo a che u.
Lalpa Zanriah neih dân tûr
23 Ka thu hrilh chhâwn che u kha Pathian hnên ata ka hmuh asin, khatia, Lalpa Isua chuan mantîra a awm zâna chhang a lâka, 24 lâwm thu a sawi zawha a phela, “Hei hi ka taksa, in aia pêk tûra chu a ni, mi hriat reng nân hei hi ti ṭhîn rawh u,” a tih kha. 25 Chutiang bawka zanriah ei zawha no pawh chu a lâka, “He no hi ka thisena thuthlung thar chu a ni, in in apiangin mi hriat reng nân hei hi ti ṭhîn rawh u,” a tih kha. 26 Chu chhang chu in eia, no chu in in apiangin, a lo kal leh hma loh zawng Lalpa thihna chu in entîr ṭhîn a ni si a. 27 Chuvângin, tu pawh ei tlâk lova chhang chu ei emaw, Lalpa no in emaw apiang chuan, Lalpa taksa leh thisen chungah thiam loh a chang ang. 28 Chutichuan, mi mahni infiah chawp zâwk rawh se, chutiangin chhang chu eiin no chu in rawh se. 29 A ei leh a intu chuan Lalpa taksa chu khûn taka a ngaihtuah si loh chuan, mahni chunga rorêlna tûrin a eiin a in ṭhîn a ni si a. 30 Chuvângin, in zînga mi tam tak in chak lovin in bawrhsâwm a ni, duai pawh in muhîl lo ve. 31 Amaherawhchu, khûn takin mahni inngaihtuah ṭhîn ila chuan rorêlsakin kan awm ṭhîn lo tûr. 32 Nimahsela, rorêlsaka kan awm pawhin, khawvêl nêna thiam loh changa kan awm ve loh nân, Lalpa thununin kan awm ṭhîn a ni. 33 Chuvângin, ka unaute u, ei tûra in inkhâwmin innghâk hlawm ṭhîn rawh u. 34 In inkhâwm chu rorêlna in tuar phah lohna tûrin, tu pawhin a ril a ṭâm chuan a in lamah ei rawh se. Tin, thu dang chu ka lo kal hun hunah ka rawn tifel ang e.
Thlarau thilpêk
1 Tin, unaute u, thlarau lam thilpêk thute chu in hriat loh ka duh lo ve. 2 Jentailte in nih lai khân engtizia pawha an hruai che u ang apiang khân, khâng milem aw nei lote lamah khân hruai bovin in awm tih in hria e. 3 Chuvângin, tu mân Pathian Thlarauva thu sawiin, “Isua chu ânchhe dawng a ni,” an ti ngai lo; tin, tu mân, Thlarau Thianghlimah chauh lo chuan, “Isua chu Lalpa a ni,” an ti thei ngai lo tih ka hriattîr a che u. 4 Tin, thilpêk hrang hrang a awm a, Thlarau erawh chu hmun khat a ni. 5 Rawngbâwl dân hrang hrang pawh a awm a; nimahsela, Lalpa chu hmun khat a ni. 6 Hnathawh dân hrang hrang pawh a awm a, Pathian erawh chu hmun khat a ni - mi zawng zawnga engkim thawktu chu. 7 Nimahsela, sâwt tlânna tûrin Thlarau hriattîrna chu mi tin hnênah pêk ṭheuh a ni. 8 Mi pakhat hnênah Thlarauvah chuan finna thu pêk a ni a; mi dang hnênah chu Thlarau vêk thu chuan hriatna thu pêk a ni a; 9 tin, mi dang hnênah, chu Thlarau vêkah chuan rinna pêk a ni a; mi dang hnênah, Thlarau hmun khatah chuan, tihdam theihna thilpêkte pêk a ni a; 10 mi dang hnênah thil mak tih theihnate pêk a ni a; mi dang hnênah thuhril theihna pêk a ni a; mi dang hnênah thlaraute hriat dik theihna pêk a ni a; tin, mi dang hnênah ṭawng chi hrang hranga thusawi theihnate pêk a ni a; mi dang hnênah ṭawng hriat lohte hrilhfiah theihna pêk a ni si a; 11 nimahsela, chûng zawng zawng chu, Thlarau hmun khat vêk chuan, mi tin hnênah a duh ang zêla sem ṭheuhvin a thawk ṭhîn.
Taksa pumkhata pêng hrang hrang
12 Taksa hi pumkhat a ni a, pêng tam tak a nei a, taksa pêng zawng zawng chu tam mah sela, taksa pumkhat a ni si a; Krista chu chutiang bawk chu a ni. 13 Kan zain, Juda-te emaw, Grik-te emaw, bawih emaw, bawih lo emaw, taksa pumkhata awm tûrin Thlarau pakhat chauhvah baptis-in kan awm ṭheuh si a, Thlarau pakhat chauh min intîr ṭheuh bawk a. 14 Taksa hi pêng khat chauh a ni si lo va, pêng tam tak a ni zâwk. 15 Kephah hian, “Kut ka nih loh avângin taksaa tel ka ni lo ve,” ti sela, chumi avâng chuan taksaa tel lo a ni chuang lo ve. 16 Tin, beng hian, “Mit ka nih loh avângin taksaa tel ka ni lo ve,” ti sela, chumi avâng chuan taksaa tel lo a ni chuang lo ve. 17 Taksa pum pui hi mit ni vek sela, ri hriatna chu khawiah nge a awm ang? A pum puiin ri hriatna ni vek sela, rim hriatna chu khawiah nge a awm ang? 18 Nimahsela, Pathianin pêng tinrêngte hi taksaah hian a duhna apiangah a awmtîr ṭheuh tawh a ni. 19 Chutichuan, chûng zawng zawng chu pêng khat chauh ni sela, taksa hi khawiah nge a awm ang? 20 Amaherawhchu, pêng tam tak an ni zâwk a; nimahsela, taksa pumkhat chauh a ni si a. 21 Tin, mit hian kut hnênah, “Engah mah ka duh lo va che,” a ti thei lo; lu pawh hian kephahte hnênah, “Engah mah ka duh lo va che u,” a ti thei bawk hek lo. 22 A ni, chutih ahnêkin, taksa pêng chak âwm lo zâwka langte hi an pawimawh zâwk êm êm a ni; 23 tichuan, taksa pêng chawimawi tlâk loh zâwka kan ruat ṭhinte hi, chûng ngei chu kan chawimawi nasa zâwk ṭhîn; chutichuan, kan pêng mawi lote hian mawina nasa zâwk an hmu ṭhîn; 24,25 kan pêng mawite erawh hi chuan chutianga tih an ngai lo. Taksaah hian inṭhenna rêng rêng awm lo va, a pêngte hian inang taka an inbuaipui tawn ṭheuh zâwkna tûrin, Pathianin mawina nei lo pêng chu chawimawi nasa zâwkin taksa hi a rem khâwm a ni zâwk. 26 Chutichuan, pêng khatin a tuar chuan pêng zawng zawngin an tuarpui ṭhîn, pêng khat chawimawia a awm chuan pêng zawng zawngin an lawmpui ṭhîn. 27 Chutichuan, nangniho hi Krista taksa chu in ni a, a pêngte in ni ṭheuh bawk a. 28 Tin, Pathianin ṭhenkhat chu kohhranho zîngah a dah a-a pakhatnaah chuan tirhkohte, a pahnihnaah chuan thuhriltute, a pathumnaah chuan zirtîrtute a dah a; chumi hnuah chuan thil mak tihte a awm a; chumi hnuah chuan tihdam theihna thilpêk te, ṭanpui theihna thilpêk te, rorêl thiamna thilpêk te, ṭawng chi hrang hranga thusawi theihna thil pêk te chu a awm leh a. 29 An zain tirhkoh an ni vek em ni? An zain thuhriltu an ni vek em ni? An zain zirtîrtu an ni vek em ni? An zain thil mak titu an ni vek em ni? 30 An zain tihdam theihna thilpêkte an nei vek em ni? An zain ṭawng hriat lohtein thu an sawi vek em ni? An zain thu an hrilhfiah vek em ni? 31 Thilpêk ropui berte chu châk hle zâwk rawh u. Tin, kawng ṭha lehzual ka entîr dâwn a che u.
Hmangaihna
1 Mihring ṭawngte leh vântirhkoh ṭawngtein thu sawi mah ila, hmangaihna ka neih si loh chuan dâr - ri mai mai emaw, dârbenthek - ri mai mai emaw ka lo ni ang. 2 Tin, thuhril theihna neiin, thurûk zawng zawng leh hriatna zawng zawng hre vek mah ila, tlâng sawn theihna khawp hial rinna famkim nei mah ila, hmangaihna ka neih si loh chuan eng mah ka ni lo vang. 3 Tin, mi retheite châwm nân ka sum zawng zawng pe vek mah ila, ka taksa pawh kâng tûrin inpe mah ila, hmangaihna ka neih si loh chuan ka tân eng mah a sâwt lo vang. 4 Hmangaihnain a dawhthei a, ngil a nei bawk ṭhîn; hmangaihnain a îtsîk lo va; hmangaihna a infak lo va, a uang lo va, 5 a che mawi lo lo va, mahni hma a sial lo va, a thinur duh lo va, sual lamah a ngaihtuah lo va; 6 fel lohnaah a lâwm lo va, thutak erawh chu a lawmpui ṭhîn a; 7 engkim a tuar hrâm hrâm a, engkim a ring a, engkim a beisei a, engkim a tuar chhuak ṭhîn. 8 Hmangaihna hi eng tikah mah a reh lo vang; amaherawhchu, thu hrilnate hi awm mah sela tihbân a la ni ang a; ṭawng hriat lohte hi awm mah sela a la bâng ang a; hriatna hi awm mah sela tihbân a la ni ang. 9 A kim lovin kan hria a, a kim lovin thu kan hril bawk ṭhîn a ni. 10 A famkim a lo thlen hunah erawh chuan a kim lo hi tihbân a ni tawh ang. 11 Ka naupan laiin naupang ṭawngin ka ṭawng a, naupang hriatin ka hria a, naupang ngaihtuahin ka ngaihtuah ṭhin; tûna ka lo puitlin hnu hian naupang tih dân chu ka bân tawh. 12 Tûnah zawng dârthlalangah kan hmu riai ruai a ni, chutih hunah erawh chuan inhmatawnin a ni tawh ang; tûnah zawng a kim lovin ka hria, chutih hunah erawh chuan mi hriat kim ṭhin ang hian ka hre kim tawh ang. 13 Chutichuan, hêng pathum - rinna te, beiseina te, hmangaihna te hi a awm reng ang; tin, hêngahte hian a ropui ber chu hmangaihna hi a ni.
Thlarau lam thilpêk chhunzawmna
1 Hmangaihna hi ûm zêl ula; thlarau lam thilpêkte pawh châk cheu rawh u; amaherawhchu, thu in hril theihna tûr lek phei chu châk bîk rawh u. 2 Ṭawng hriat lohva thu sawi chuan mihring hnêna sawi ni lovin, Pathian hnêna sawi a ni zâwk si a, tu mân a thusawi chu an hre si lo; nimahsela, thlarauvah chuan thurûk a sawi a ni. 3 Thuhriltu erawh chuan mihring hnênah siam ṭhatna thu te, fuihna thu te, thlamuanna thu te a sawi zâwk ṭhîn. 4 Ṭawng hriat lohva thu sawi chuan mahni chauh a insiam ṭha ṭhîn, thuhriltu erawh chuan kohhranho a siam ṭha zâwk ṭhîn. 5 Tin, in zain ṭawng hriat lohtea thu in sawi ka duhsak che u a; chu ai mah chuan, thu in hril ka duhsak lehzual che u a ni; kohhranhovin insiamṭhatna an hmuh theihna tûrin, a hrilhfiah leh nghâl loh chuan, thuhriltu chu ṭawng hriat lohtea thusawitu ai chuan a ropui zâwk rêng rêng a ni. 6 Tûnah hian unaute u, ṭawng hriat lohtea thu sawiin in hnênah lo kal ang ila, hriattîrna lam emaw, hriatna lam emaw, thuhrilna lam emaw, zirtîrna lam emaw in hnêna ka sawi si loh chuan, eng nge ka tihsâwtna che u awm ang? 7 Thil nung lo ri theite pawh, phênglâwng emaw, ṭingṭang emaw hi mumal neia a rîk loh chuan, eng hla nge an tuma an kaih, engtin nge a hriat theih ang? 8 Tawtawrâwt hi mumal nei lova a rîk chuan tu nge râl kâp tûrin inbuatsaih ang? 9 Chutiang bawkin nangni pawhin lei hian ṭawng hriat awla in sawi loh chuan, eng thu nge in sawi engtin nge a hriat theih ang? Boruaka ṭawng mai in ni ang asin. 10 Khawvêlah hian ṭawng chi hrang tam tak a awm a ni ang e; nimahsela, awmze nei lo rêng rêng a awm si lo. 11 Amaherawhchu, a ṭawng awmzia chu ka hriat si loh chuan kei hi a sawitu tân awze mi ka ni ang a; a sawitu pawh chu ka tân awze mi a ni bawk ang. 12 Chutichuan, nangni pawhin thlarau lam thilpêkte chunga ṭhahnem in ngaih avâng hian, kohhran siam ṭhatna tûra in ngah theih nân zawng rawh u. 13 Chuvângin, ṭawng hriat lohva thu sawi chuan a hrilhfiah theih nân ṭawngṭai rawh se. 14 Ṭawng hriat lohva ka ṭawngṭai chuan, ka thlarau zawng a ṭawngṭai ngei a, ka hriatna erawh chu a hlâwk chuang lo. 15 Engtin nge ni ta ang le? Thlarauvin ka ṭawngṭai ang a, hriat theih pawhin ka ṭawngṭai bawk ang; thlarauvin hla ka sa ang a, hriat theih pawhin ka sa bawk ang. 16 Chuti lo chuan, thlarauvin malsâwmsak mah la, la hre lote awmnaa awm chuan i lâwm thu sawiah chuan engtin nge “Amen” a tih theih ang, i thusawi chu hre thei lo puiin? 17 Nang zawngin lâwm thu i sawi ṭha zet tak a, mi dang erawh chu a siam ṭha chuang si lo. 18 Nangmahni zawng zawng aiin ṭawng hriat lohva thu ka sawi hnem zâwk avângin Pathian hnênah lâwm thu ka sawi a; 19 nimahsela, kohhranho inkhâwmnaah chuan ṭawng hriat lohva thu sîngkhat sawi aiin, mi dangte ka zirtîr theih nân ka hriat theihnain thu panga chauh sawi ka duh zâwk a ni. 20 Unaute u, rilru lamah naupang suh u; amaherawhchu, sual kawngah zawng nausên ula, rilru lamah erawh chuan puitling rawh u. 21 Dân Lehkhabuah chuan, “ ‘Awze mite ka leh ram danga mite hmuiin hêng mite hnênah hian thu ka sawi ang a; chuti pawhin mi ngaithla chuang lo vang,’ Lalpan a ti,” tih ziak a ni. 22 Chuvângin, ṭawng hriat lohte hi ringtute tân chhinchhiahna a ni lo va, ringlote tân a ni zâwk; thuhril erawh hi chu ringlote tân chhinchhiahna a ni lo va, ringtute tân a ni zâwk. 23 Chuvângin, kohhranho zawng zawng in inkhâwmin, in zaa ṭawng hriat lohtea thu in sawi chuan la hre lote emaw, ringlote emaw lo lût sela, â an ti dâwn lo che u em ni? 24 In zaa thu in hril erawh chuan ringlo emaw, la hre lo emaw lo lût sela, a thiam lohzia in zaa tihlan a ni tawh ang a, in zaa chhuahchhalh a ni tawh ang; 25 a thinlunga thurûkte chu tihlanin a awm tawh ang; chutichuan, bawkkhupin Pathian chibai a bûk ang a, Pathian in zîngah a awm takzet tih a puang ang.
Kohhranah tih dân fel
26 Unaute u, engtin nge ni ta ang le? In rawn inkhâwmin fakna hla emaw, thu zirtîr emaw, hriattîrna thu emaw, ṭawng hriat loh emaw, hrilhfiahna emaw in nei ṭheuh ṭhîn a. Engkim siam ṭhatna tûrin tih ni rawh se. 27 Tu pawhin ṭawng hriat lohva thu an sawi chuan pahnihin emaw, a tam berah pathumin emaw ni sela, inchhâwk zêlin ni bawk rawh se; tin, mi pakhatin hrilhfiah rawh se; 28 hrilhfiahtu an awm loh erawh chuan kohhran inkhâwmah chuan ngawi rengin awm sela, mahni leh Pathian hnênah sawi rawh se. 29 Thuhriltute pawhin pahnihin emaw, pathumin emaw sawi sela, mi dangte chuan ngun takin ngaihtuah rawh se. 30 Amaherawhchu, a kianga ṭhu mi dang hnênah hriattîrna thu pêkin a lo awm chuan, a hmasa chu ngawi mai rawh se. 31 Mi zawng zawngin an zir theihna tûr leh, mi zawng zawng thlamuanga an awm theihna tûrin, in zain pakhat zêlin thu in hril thei si a. 32 Thuhriltute thlaraute chu thuhriltute thu thuin an awm a ni. 33 Pathian chu buaina Pathian a ni lo va, remna Pathian a ni zâwk si a, mi thianghlim kohhranho zawng zawnga a awm ang hian. 34 Kohhranho inkhâwmnaah chuan hmeichheho chu ngawi rengin awm rawh se; anni zawng thu an sawi phal a ni si lo; Dân Lehkhabuin a sawi ang bawk khân, thu zâwmin awm zâwk rawh se. 35 Tin, eng pawh zir an duh chuan in lamah mahni pasal zâwt rawh se; kohhran inkhâwmnaa hmeichhe thusawi hi a zahthlâk si a. 36 Pathian thu hi nangmahni laka chhuak a ni maw? A nih loh leh nangmahni hnên chauhvah a lo thleng a ni maw? 37 Tu pawh thuhriltuah emaw, thlarau miah emaw a inngaih chuan, in hnêna thu ka ziak hi Lalpa thupêk a ni tih lo hre rawh se. 38 Nimahsela, tu pawhin a hriat loh chuan hre lovin awm mai rawh se. 39 Chutichuan, ka unaute u, thuhril hi châk hle ula, ṭawng hriat lohtea thusawi pawh hi khap suh u; 40 nimahsela, engkim mawi tak leh fel taka tih ni rawh se.
Krista thawhlehna
1 Tin, unaute u, Chanchin Ṭha ka hrilh che u kha ka hriattîr leh ang che u a; chu Chanchin Ṭha chu in lawma, chumiah vêk chuan in dina, 2 ka thu hrilh che u kha in ring mai mai a nih lohva, in pawm tlat a nih chuan, chumiah bawk chuan chhandam mêkin in awm a ni. 3 A hmasa berin ka hmuh ve bawk chu ka hrilh chhâwn che u kha; khatia, Krista chu Pathian Lehkha thu ang zêla kan sualte avânga a thiha, 4 an phûma, Pathian Lehkha Thu ang zêla ni thum nia kaihthawha a awma, 5 Kipha hnêna a rawn inlâr te kha; chumi hnuah chuan sâwm leh pahnihte hnênah a inlâr leh a, 6 chumi hnuah chuan unau zanga aia tam hnênah a inlâr leh a, chûng zînga mi tam zâwk chu tûn thlengin an la dam cheuva, ṭhenkhat erawh chu an muhîl ta a; 7 chumi hnuah chuan Jakoba hnênah a inlâr leh a; chumi hnuah chuan tirhkoh zawng zawngte hnênah; 8 tin, a tâwp berah chuan a hun lova piang ang, keima hnênah pawh a inlâr a. 9 Kei zawng tirhkoh zînga tê ber, Pathian kohhranho ka tihduhdah avânga tirhkohva vuah tlâk loh ka ni si a. 10 Nimahsela, Pathian khawngaihna avângin ka nih nih ka ni ta; tin, a khawngaihna mi pêk chu a thlâwnin a awm lo va; chutih ahnêkin anmahni zawng zawng aiin ka thawh rim zâwk kha; nimahsela, keimahin ka thawk lo va, Pathian khawngaihna ka hnêna awm khân a thawk zâwk a ni. 11 Eng pawh ni sela, kei pawhin, anni pawhin, khati khân kan hril ṭhîn a, khati khân nangnin in ring bawk a.
Mitthi thawhlehna
12 Tin, Krista thu, mitthi zîng ata kaihthawhin a awm tih an hril si chuan, engtizia nge in zînga ṭhenkhatin, “Mitthi thawhlehna rêng rêng a awm lo,” in tih ni? 13 Mitthi thawhlehna rêng rêng a awm si loh chuan Krista pawh kha kaihthawhin a awm lo vang; 14 tin, Krista kha kaihthawhin a awm loh chuan kan thuhril hi engmahlo a ni ang a, in rin pawh engmahlo a ni bawk ang. 15 A ni, Krista a kaitho tih Pathian kan hriatpui avâng khân, Pathian lam thu-ah hriatpuitu dawthei kan lo ni bawk ang, mitthite kaihthawha an awm loh chuan amah pawh a kaitho lo vang chu. 16 Mitthite kaihthawhin an awm si loh chuan Krista pawh kha kaihthawhin a awm lo vang; 17 tin, Krista kha kaihthawhin a awm loh chuan in rin chu engmahlo a ni ang a, in sualnaah chuan in la awm fo a ni ang. 18 Chuti a nih chuan Kristaa muhîl tawhte kha an boral ta a ni ang. 19 Tûn dam chhûng chauhva Krista chunga beiseina kan neih chuan, mi zawng zawnga khawngaihthlâk ber kan lo ni ang. 20 Nimahsela, Krista chu mitthi zîng ata kaithawhin a awm takzet a ni, muhîlte thawh hmahruaitu a lo ni ta. 21 Mihring vânga thihna a lo awm avângin, mihring avâng vêkin mitthi thawhlehna a lo awm ta bawk a. 22 Adama-ah chuan mi zawng zawng an thi ṭhîn ang hian, Krista-ah chuan mi zawng zawng tihnunin an awm bawk ang. 23 Nimahsela, mahni hun ṭheuh zêlah; Krista chu thawh hmahruaitu a ni a; chumi hnua a lo kal lehnaah chuan Krista tate chu. 24 Chumi hnuah chuan a tâwp chu a lo la thleng ang; chumi hnuah chuan rorêlna zawng zawngte leh, thuneihna leh thiltihtheihna zawng zawngte a tihbo hnuah, Pathian hnênah, Pa hnên ngeiah chuan ram chu a pe ang; 25 a hmêlma zawng zawng a ke hnuaia a dah hma loh chuan, ani chu lalah a awm tûr rêng a ni si a. 26 Hmêlma hnuhnûng ber tihbova awm tûr chu thihna hi a ni. 27 “Ani chuan a ke hnuaiah engkim a dah si a.” Nimahsela, “A hnuaiah engkim dahin awm,” a tih hian, a hnuaia engkim dahtu chu a tel ve lo tih a lang reng a ni. 28 Tin, a hnuaia engkim dahin a awm hun chuan, Fapa ngei pawh chu a hnuaia engkim dahtu hnuaiah chuan daha a awm bawk ang, Pathian chu engkima engkim a nih theihna tûrin. 29 Chutiang a nih loh chuan mitthi puala baptisma changte chu engtin nge an tih ang? Mitthite chu kaihthawha an awm dâwn hauh loh chuan, eng atân nge anmahni puala baptisma an chan ṭhin le? 30 Eng vângin nge keini pawh hi dârkâr tina hlauhthâwnawma kan awm ṭhin ni? 31 Unaute u, Krista Isua kan Lalpaa ka chhuanna che u chu chhâlin, “Ni tin ka thi ṭhîn,” ka ti a ni. 32 Mihring tih angin Ephesi khuaa sakawlhte kha sual ka nih chuan ka tân eng nge sâwt ang? Mitthi kaihthawha an awm dâwn loh chuan i eiin i in ang u hmiang, naktûkah kan thi dâwn alâwm. 33 Bumin awm suh u; “Ṭhian sualte chuan nungchang ṭha an tikhawlo ṭhîn.” 34 Fel takin harh ula, thil tisual suh u, ṭhenkhat chuan Pathian hriatna rêng in neih loh hi; hei hi in lo zahna tûrin ka sawi a ni.
Tholeh taksa
35 Nimahsela, tuin emaw, “Mitthite chu engtin nge kaihthawhin an awm dâwn? Taksa eng ang puin nge an lo kal dâwn?” a ti a ni ang e. 36 Nang mi â, nangmah ngeiin i tuh ṭhin pawh hi a thih zet loh chuan tihnunin a awm hlei nêm; 37 tin, i tuh ṭhin hi, a taksa la awm tûr chu i tuh lo va, a fang mai i tuh zâwk ṭhîn, buh fang emaw, chi dang fang emaw a ni thei e; 38 nimahsela, Pathianin ama duh ang zêlin taksa a pe ṭhîn, a fang tin hnênah mahni taksa ṭheuh chu. 39 Tisa zawng zawng hi tisa chi khat a ni lo va; mihring tisa a dang a, sa tisa a dang a, sava tisa dang a, sangha tisa a dang a ni. 40 Vân taksate a awm bawk a, lei taksate pawh; nimahsela, vân taksa ropuina chu a dang a, lei taksa ropuina chu a dang a ni. 41 Ni ropuina chu a dang a, thla ropuina chu a dang a, arsite ropuina chu a dang a; arsi leh arsi pawh ropuinaah chuan a inang si lo. 42 Mitthi thawhlehna pawh hi chutiang bawk chu a ni. Ṭawih theia tuhin a awm a; ṭawih thei lova kaihthawhin a awm; 43 chawimawi lohva tuhin a awm a, ropui taka kaihthawhin a awm; chak lova tuhin a awm a, thiltihtheihna neia kaihthawhin a awm; 44 mihring lam taksaa tuhin a awm a, thlarau lam taksaa kaihthawhin a awm. Mihring lam taksa a awm chuan thlarau lam taksa pawh a awm ang. 45 Chutiang bawkin, “Mihring hmasa ber Adama chu mi nung a lo ni,” tih ziak a ni; Adama hnuhnûng zâwk chu nunna petu thlarau a lo ni a. 46 Nimahsela, thlarau lam chu a awm hmasa lo va, mihring lam chu a awm hmasa zâwk; chumi hnuah chuan thlarau lam chu a awm a. 47 Mihring hmasa ber chu leia mi, leia siam a ni a; mihring pahnihna chu vâna mi a ni. 48 Leia siam mi ang kha leia siam mite pawh hi an ni a; vâna mi ang kha vâna mite pawh chu an ni. 49 Tin, leia siam mi anna kha kan put angin, vâna mi anna chu kan pu bawk dâwn a ni. 50 Unaute u, “Tisa leh thisen hian Pathian ram chu a luah thei lo vang a, ṭawih thei hian ṭawih thei lo chu a luah hek lo vang,” tih ka sawi a nih hi. 51,52 Ngai teh u, thurûk ka hrilh dâwn che u hi: kan zain kan muhîl kher lo vang a; nimahsela, kan zain tawtawrâwt hnuhnûng ber rîk hunah chuan rei lo têah, mit khap kâr lovah tihdanglamin kan awm vek tawh ang; tawtawrâwt chu a ri dâwn si a; chutichuan, mitthite chu ṭawih thei lova kaihthawhin an awm ang a, keini pawh tihdanglamin kan awm tawh ang. 53 He ṭawih thei hian ṭawih theih lohna a sin tûr a ni a, he thi thei pawh hian thih theih lohna a sin bawk tûr a ni. 54 Chutichuan, he ṭawih thei hian ṭawih theih lohna a sina, he thi thei hian thih theih lohna a sin hunah, chumi hun ngeiah chuan, “Hnehnain thihna a lem zo ta,” tih thuziak hi a lo thleng ang. 55 Aw thihna, i hnehna chu khawiah nge a awm tâk? Aw thihna, i tûr chu khawiah nge a awm tâk? 56 Thihna tûr chu sual a ni a; sual thiltihtheihna chu dân thu chu a ni. 57 Nimahsela, kan Lalpa Isua Krista zâra hnehna min petu Pathian hnênah chuan lâwm thu awm rawh se. 58 Chuvângin, ka unau duh takte u, nghet takin, tihchêt rual lohvin, Lalpa hna ṭhahnemngai taka thawk fovin awm rawh u, in thawh rimna chu Lalpaah chuan a thlâwn ngai lo tih in hre si a.
Ringtu dangte tâna thilpêk
1 Tin, mi thianghlimte tâna thawhlâwm thu kha zawng, Galatia rama kohhranho pâwl hnênahte thu ka pêk angin nangni pawhin lo ti ve rawh u. 2 Ni sarih ni hmasa berah chuan mi tinin, malsâwmna in hmuh ang zia zêlin dah khâwl ṭheuh ula; ka lo kal huna thawhlâwm khawn rêng rêng a awm loh nân. 3 Tin, in khawngaih thilpêk chu Jerusalem khuaa kalpui tûrin, ka lo thlen hunah tu pawh ṭha in tih apiang lehkhate kengin ka tîr ang. 4 Tin, ka kal vena âwm a nih phei chuan ka hnênah an kal ang.
Paula zin dân tûr
5 Tin, Makedonia ram ka fan chhuah hnu-ah chuan in hnênah ka lo kal ang; Makedonia ram chu ka fang rêng rêng dâwn si a. 6 Nangni hnênah erawh chuan ka châm reng a ni thei e, thlasik chhûng zawng pawh a ni mahna, khawiah pawh ka kalna tûr apiangah nangnin mi thlah theihna tûrin. 7 Tûna kal pah maia hmuh che u ka duh lo va, Lalpan rem a tih chuan in hnênah rei deuh châm ka beisei si a. 8 Nimahsela, Pentikos thlengin Ephesi khuaah hian ka châm reng ang, 9 kawngka zau tak leh sâwt tak ka tân a inhawng si a, dotute tam tak an awm bawk. 10 Tin, Timothea kha a lo thlen chuan, ṭi lova in hnêna a awm nân fîmkhur rawh u; keiin ka thawh ang bawk hian Lalpa hna chu a thawk si a. 11 Chuvângin, tu mân hmusit suh se; ka hnêna a lo kal theih nân thlamuang takin thlah zâwk ang che u; unaute rualin amah lo hmuh ka beisei si a. 12 Kan unau Apollova thu kha chu, unaute ruala in hnêna lo kal tûrin ka ngên chiam a; nimahsela, tûnah zawng lo kal a duh hauh lo va; a remchân hunah erawh chuan a lo kal ang.
Thu hnuhnûng leh chibai bûkna
13 Invêng ula, rinnaah chuan ding nghet ula, intihuai ula, chak takin awm rawh u. 14 In tih apiang chu hmangaiha tih ni vek rawh se. 15 Unaute u, Stephana chhûngte chu Akaia rama awih hmahruaitute an ni a, mi thianghlimte rawngbâwl tûrin an inpe tih in hria e; 16 chutiang mite hnênah leh, hnathawha ṭanpui leh, thawk rim apiangte hnênah chuan intulût tûrin ka ngên a che u. 17 Tin, Stephana te, Fortunata te, Akaika te an lo kal hi ka lâwm a ni, in awm loh pawh lang lova min siam avângin. 18 Anni hian ka rilru leh in rilru an tiharh si a; chutichuan, hetiang mite hi lâwm rawh u. 19 Asia ram kohhrante hian chibai an bûk a che u. Akuila leh Priskilli, an ina kohhran inkhâwmho nên hian Lalpaah chuan chibai tam takin an bûk a che u. 20 Unau zawng zawng hian chibai an bûk a che u. Fawh thianghlimin chibai inbûk ṭheuh rawh u. 21 Kei Paulan keima kut ngeia chibai ka bûkna che u a nih hi. 22 Tu pawhin Lalpa a hmangaih loh chuan ânchhe dawngin awm rawh se. Kan Lalpa chu a lo kal e. 23 Lalpa Isua Krista khawngaihna chu in hnênah awm rawh se. 24 Krista Isua ka hmangaihna hi in zaa hnênah awm rawh se. Amen.
Chibai bûkna
1 Paula, Pathian duh zâwnga Krista Isua tirhkoh leh kan unaupa Timothea chuan, Korinth khuaa Pathian kohhranho awmte hnênah, Akaia ram zawng zawnga mi thianghlim awm zawng zawngte hnênah nên: 2 Pathian kan Pa leh Lalpa Isua Krista hnên ata khawngaihna leh remna in hnênah awm rawh se.
Hrehawm a tuar hnua Paula lâwmna
3 Kan Lalpa Isua Krista Pathian leh Pa, khawngaihnate Pa leh thlamuanna zawng zawng Pathian chu fakin awm rawh se. 4 Pathianin keimahni min thlamuanna ngeiin, hrehawm eng anga awmte pawh chu kan thlamuan ve theihna tûrin, ani chuan kan hrehawmna zawng zawngah min thlamuan ṭhîn. 5 Krista tuarnate chu kan chunga a chuang a liam ang tak hian, kan thlamuanna hi Krista zârah a chuang a liam a ni. 6 Nimahsela, hrehawma kan awm leh, nangmahni thlamuanna tûr leh chhandamna tûr a ni a; thlamuana kan awm leh, nangmahni thlamuan vena tûr a ni a, chu chuan kan hrehawm tuar bawk hi chhel taka in tuarnaah chuan a thawk ṭhîn a ni. 7 Tin, hrehawmna chang vete in nih ang hian, thlamuanna chang vete in ni bawk tih kan hriatin kan beiseisakna che u hi a nghet a ni. 8 Unaute u, Asia rama kan chunga hrehawm thleng thu kha in hriat loh kan duh lo va, khatia, nasa taka, tuar zawh rual lohva, nun rêng pawh beisei lo khawp hiala delh beha kan awm kha. 9 A ni, thih mai chauh hmabâk tawhin kan inhria a, mahni inring lova, Pathian, mitthi kaithotu chu kan rin zâwk theihna tûr a lo ni. 10 Chutianga thihna râpthlâk ata chu Pathianin min chhanchhuak tawh a, min la chhanchhuak leh ang; min la chhanchhuak leh zêl dâwn tih amahah chuan beiseina kan nghat a; 11 mi tam tak zâra thilpêk kan hmuh avângin, mi tam takin kan chunga lâwm thu an sawi theihna tûrin nangni pawhin in mi ṭawngṭaisaknaah chuan min ṭan rualpui ula.
Korinth khaw tlawh a ṭhulh
12 Kan chhuan chu hei hi a ni, kan chhia leh ṭha hriatna thu hriattîr chu, thianghlimna leh Pathian dikna neiin, tisa finnaah ni lovin, Pathian khawngaihna zâwkin khawvêlah hian kan chêt kha, nangmahni lamah kan che ṭha lehzual a. 13,14 In chhiar ṭhina, awih pawh in awiha lo kha chu thu dang rêng rêng in hnênah kan ziak lo; kan Lalpa Isua Niah chuan nangni kan chhuan in ni dâwn ang bâwkin, keini pawh in chhuan kan ni dâwn tih in zînga ṭhenkhatin min awihsak ve tâk ang khân, a tâwp thlengin kan thu chu in awih ka beisei bawk a. 15 Tin, chu rinna chu neiin, khawngaihna leh hnih in hmuh theihna tûrin, in hnênah lo kal hmasa ila, 16 nangmahni tlawh pahin Makedonia ramah kal zêl ila, Makedonia ram aṭangin in hnênah lo lêt leh ila ka ti a; tin, Judai rama ka kalna tûrah chuan nangmahni thlahin awm ila ka ti bawk a. 17 Chutichuan, chutiang ka rilrûk lai khân ka rilru ngheh lohzia lantîr em ni ka nih? A nih loh leh, ka hnênah, “A ni, a ni,” tih leh, “A ni lo, a ni lo,” tih chu awm ve ve tûrin, thiltih ka tum ṭhin chu tisa angin em ni ka tum? 18 Eng pawh ni rawh se, Pathian a rinawm angin, nangmahni lamah kan thu hi, “A ni,” tih leh, “A ni lo,” tih a ni ve ve si lo. 19 Pathian Fapa Isua Krista, a thu kei leh Silvana leh Timothean in zînga kan hrila kha, “A ni,” leh, “A ni lo,” a ni ve ve si lo va, amahah chuan, “A ni,” tih a awm zâwk a ni. 20 Pathian thutiamte chu eng zât pawh ni se, amahah chuan, “A ni,” tih chu a awm si a; chutichuan, amah avâng pawhin “Amen” tih chu a âwm a ni, keimahni avânga Pathian ropuina tûrin. 21 Tin, Kristaa nangmahni nêna min tinghettu leh keini hriak min thihtu chu Pathian a ni; 22 ani chu min chhinchhiahtu leh kan thinlunga zakhamna Thlarau min petu a ni bawk a. 23 Nimahsela, ka thlarau chunga hretu atân Pathian ka ko a ni; nangmahni zuah tûr che uin a ni Korinth khuaa ka lo kal tâk loh ni. 24 In rinna chungah lalna kan nei ka ti lo va, in lâwmna ṭanpuitu kan ni ka ti zâwk a ni; rinnaa ding in ni si a.
1 Nimahsela, keima lam thu-ah zawng hei hi ka lo tum ta tlat a ni, lungngai chung chuan in hnêna lo kal leh tawh lo tûrin. 2 Keiin ka tihlungngaih si che u chuan, ka tihlungngaiha vêk lo chuan tuin nge mi tilâwm ta ang le? 3 Chutichuan, kha ngei kha ka ziak a ni; chuti lo chuan, ka lo kal hunah, ka lâwmna tûrte lakah chuan lungngaihna ka hmu zâwk dah ang e; ka lâwmna chu in zaa lâwmna a nih ka rinsak hlawm si che u a. 4 Mittui tam tak tla chungin, thinlung hrehawm leh thlaphâng êm êma ka ziak a nih kha; chu chu tihlungngaiha in awmna tûr a ni lo va, in chunga hmangaihna nasa lehzual ka neih hi in hriat theih zâwkna tûrin a ni.
Bawhchhetute ngaihdamna
5 Nimahsela, tu pawhin mite a tihlungngaih chuan, keimah chauh mi tilungngai a ni lo va, (ka tih luattuk lohna tûrin) in zain a tilungngai hlek ṭheuh zâwk che u a ni. 6 Chutiang mi tân chuan mi tam takin an hrem chu a tâwk tawh a ni. 7 Chutichuan, hrem leh tawh ahnêkin in ngaidamin in thlamuan zâwk tûr a ni; chuti lo chuan, eng emaw tiin mi chutiang chu a lungngaih lutuknain a lem zo dah ang e. 8 Chumi avâng chuan ama lama in hmangaihna chu tinghet tûrin ka ngên a che u. 9 Hemi avâng pawh hian ka ziak a ni, kawng tinrênga thu in awih leh awih loh ka fiah theihna tûr che uin. 10 Eng kawngah pawh mi in ngaihdam apiang, kei pawhin ka ngaidam ve a; kei pawhin ka ngaihdam tawh sa chu, eng pawh ka lo ngaihdam tawh chuan nangmahni avângin Krista hmaah chuan ka ngaidam a ni; 11 chuti lo chuan, Setanan min dinchan khalh dah ang e; a ngamthlêmna chu kan hai si lo va.
Troas khuaa Paula manganna
12 Tin, Krista Chanchin Ṭha hril tûra Troas khua ka thlen lai khân, Lalpaah chuan kawng mi lo hawnsak na a, 13 ka unaupa Tita chu ka hmuh loh avângin ka thlarau lamah chuanmuanna rêng rêng ka nei chuang lo va; chutichuan, anni chu ṭawng ṭhain ka ṭhen a, ka chhuak a, Makedonia ramah ka kal ta a.
Krista zâra hnehna
14 Nimahsela, Kristaa hnehnaa min hruai fotu leh, keimahni hmanga hmun tina amah hriatna rim hriattîrtu Pathian hnênah chuan lâwm thu awm rawh se. 15 Chhandam mêkahte leh boral mêkahte chuan Pathian tân Krista rimtui kan ni si a; 16 pâwl khatte tân chuan thihna lakah thihna tûr rim kan lo ni a, pâwl khatte tân chuan nunna laka nunna tûr rim kan lo ni a. Chûng ang atân chuan tu nge tling zo vang? 17 Mi tam takin Pathian thu hi mite buma sumdâwn nân an hmang angin keini zawngin kan hmang ve si lo va; tihtakzet zâwkin, Pathian tirh zâwkin, Pathian mit hmuhin Kristaah chuan thu kan sawi ṭhîn a ni.
Thuthlung Thar rawngbâwltute
1 Mahni insawimawi kan ṭan leh dâwn ta maw? A nih loh leh, in hnêna pêk tûr emaw, in hnên ata emaw sawimawina lehkha, mi ṭhenkhat tân a ngai angin kan tân a ngai ve dâwn maw? 2 Nangni hi kan lehkha, kan thinlunga ziak, mi zawng zawng hriat leh chhiar chu in ni e: 3 Krista lehkha, keimahni min ziaktîr, lehkhatuia ziak ni lo, Pathian nung Thlarauva ziak zâwk, lung phêka ziak ni lo, tisa thinlung phêka ziak zâwk chu in ni tih chiang taka lantîr a ni si a. 4 Tin, Pathian lamah chutiang rinna chu Krista zâra kan neih a ni; 5 eng pawh keimahni aṭanga chhuaka ruat tûrin keimahni ngawtin kan tlin kan ti lo va; kan tlin theihna chu Pathian hnên ata a ni zâwk. 6 Amah bawk chuan thuthlung thar rawngbâwltuahte min tlintîr a; a lehkha thu mai rawngbâwltuahte ni lovin, a thlarau rawngbâwltuahte a ni zâwk e; lehkha thu mai chuan a tihlum si ṭhîn a, thlarau erawh chuan a tinung ṭhîn a ni. 7 Mosia hmêl a ropui avângin Israel fate chuan a hmêl an en reng thei lo va (chu ropuina chu a ral ta riai riai a), thihna rawngbâwlna, lunga hawrawpa ziak mah chuti khawpa ropuia a thlen chuan, 8 Thlarau rawngbâwlna chu engti taka ropuiin thleng ang maw! 9 Thiam loh chantîrna rawngbâwlna mah a ropui chuan, felna rawngbâwlna chu ropui lamah chuan a nasa zâwk êm êm tûr a ni. 10 Tihropuia awm tawha chuan hemi lamah zawng ropuina rêng a nei ta si lo, ropuina nasa zâwk chuan a khûm avângin. 11 Ral ta riai riaia mah ropuia a thlen chuan, awm reng tûra chu ropuia tuamin a awm zâwk êm êm tûr a ni. 12 Chutichuan, chutiang beiseina chu kan neih avângin engkim kan sawi chhuak ṭhîn a ni. 13 Mosia tih ang khân kan ti lo ve; ani chuan ral ta riai riaia ral tâwpna chu Israel fate chuan an en reng lohna tûrin, a hmai chu hmai khuhnain a khuh a: 14 an rilru erawh chu tihkhauhvin a awm ta zâwk a; vawiin thleng pawh hian thuthlung hlui chu an chhiarin khuhna pângngai chu hlîm lohvin a awm reng si a, chu khuhna chu Kristaah chuan tihbovin a awm ta a. 15 Nimahsela, vawiin thleng hian Mosia Lehkhabu an chhiar apiangin, an thinlungah chuan khuhna a awm ṭhîn. 16 Nimahsela, an thinlung chu Lalpa lama a hawi tik apiangin, khuhna chu lâk bo a ni tawh ang. 17 Tin, Lalpa chu Thlarau a ni a; Lalpa Thlarau awmna apiangah zalênna a awm ṭhîn. 18 Chutichuan, keini chu kan zain hmai khuh lovin, dârthlalang anga Lalpa chhun ênin, ropuina aṭanga ropui zêlin, chumi anpui ngeia awm tûrin tihdanglamin kan awm ṭhîn, Lalpa (Thlarau) ata chu kan hmuh ang zêlin.
Thlarau lam ro-hlum bêlah
1 Chumi avâng chuan khawngaihna kan hmuh ang zêla he rawngbâwlna hi kan neih avângin kan dawl lo va; 2 thil zahthlâk inthupte chu kan malmâk ta zâwk a, ngamthlêmna thu kan hmang lo va, Pathian thu mi bum nân kan hmang hek lo; thutak hriattîrin Pathian mit hmuhin mi tin chhia leh ṭha hriatna mit kan intluntîr zâwk ṭhîn a ni. 3 Nimahsela, kan Chanchin Ṭha hi khuha a awm chuan, boral mêkahte hian a ni, khuha a awm ni; 4 Krista, Pathian anpui, a ropuizia Chanchin Ṭha êng chuan anmahni a chhun ên theih lohna tûrin, chûngahte chuan he khawvêl pathian hian ringlote rilru a tidel ta a. 5 Mahni thu kan hril si lo va, Krista Isua chu Lalpa a nih kan hril zâwk ṭhîn a, keini pawh Isua avânga in bawih kan nih kan hril bawk ṭhîn. 6 Isua Krista hmêlah chuan Pathian ropuizia hriatna êng chu min pe tûrin, “Thim ata êng a êng chhuak ang,” titu Pathian chuan kan thinlungte hi a chhun êng ta si a. 7 Nimahsela, thiltihtheihna nasatzia chu keimahni hnêna mi ni lovin, Pathian ta a nih theih zâwkna tûrin chu ro chu hlum bêlahte kan vawng a ni. 8 Lehlam lehlama nêksâwrin kan awm a; nimahsela, kan thaw a ipik si lo; mangangin kan awm a; nimahsela, kan bei a dawng si lo; 9 tihduhdahin kan awm a; nimahsela, kalsanin kan awm si lo; vuak thlûkin kan awm a; nimahsela, tihboralin kan awm si lo; 10 kan taksaah hian kumkhuain Isua thihna chu kan pu zêl ṭhîn a, Isua nunna pawh kan taksaah hian a lan theih nân. 11 Keini nungdama la awmte hi Isua avânga thi tûra mantîrin kan awm fo va, Isua nunna pawh kan tisa thi theiah hian a lan theih nân. 12 Chutichuan, keimahniah hian thihnain a thawk ṭhîn a, nangniah erawh chuan nunnain a thawk zâwk ṭhîn a ni. 13 Amaherawhchu, “Ka ring a; chuvângin, thu ka sawi a ni,” tih ziak ang khân, chumi rinna rilru ngei pu chuan keini pawhin kan ring ve a; chuvângin, thu kan sawi bawk a; 14 Lalpa Isua kaithotu chuan keini pawh Isua hnênah min kaitho ve dâwn a, nangmahni nên min dintîr dâwn tih kan hre si a. 15 Engkim nangmahni ṭhatna tûr a ni si a, khawngaihna chu mi tam zâwk zâra tihpuna awmin, Pathian ropuina tûrin lâwm thu nasa tak a sawitîr theih nân.
Rinnaa nun
16 Chumi avângin kan dawl lo va; kan pâwn lam mihring hi lo awngrawp telh telh mah sela, kan chhûng lam mihring chu ni tin siam thar zêlin a awm zâwk a ni. 17 Kan hrehawm nêp tak, tûn mit khap kâr chhûng chauhva awm tûr hian, ropuina nasa tak chatuan atân min siamsak nasa tulh tulh a ni; 18 thil hmuh theihte hi en lovin, thil hmuh theih lohte chu kan en zâwk si a; thil hmuh theihte hi rei lo tê atân a ni a, thil hmuh theih lohte erawh chu chatuan atân a ni si a.
1 Kan awmna leia in hi ṭhiat mah sela, vânah in, kuta sak loh, chatuana awm tûr, Pathian hnên ata in nghet chu kan nei tih kan hre si a. 2 Vân ata kan awmna tûr sin thuah châk êm êmin hemi inah hian kan rûm takmeuh si ṭhîn a; 3 chutianga sinin awm ila saruakin kan awm lo vang. 4 Keini he awmnaa awmte hi rit phurin kan rûm takzet si a; sin lova awm kan duh vâng a ni lo va, sin thuaha awm kan duh vâng a ni zâwk, thi thei hi nunna lem zawhin a awm theih nân. 5 Tin, chumi ngei atâna min buatsaihtu chu Pathian a ni, zakhamna Thlarau min petu kha. 6 Chutichuan, taksaa kan awm chhûng hian Lalpa hnênah kan awm lo tih hriain, kumkhuain muang takin kan awm ṭhîn 7 (hmu theia kal lovin, rinnain kan kal zâwk si a); 8 muang takin kan awm, ka ti, taksaa awm lova Lalpa hnêna awm kan duh zâwk. 9 Chuvângin, awm ila, awm suh ila, ama lâwm zâwng mi nih kan tum tlat ṭhîn a ni. 10 Mi tinin taksaa thiltihte, a chhia a ṭhain, kan tih ang zêla kan hmuh ṭheuh theihna tûrin, Krista rorêlna ṭhutphah hmaah chuan tihlanin kan awm vek tûr a ni si a.
Inremna rawngbâwl hna
11 Chutichuan, Lalpa ṭih nachâng hriain mihringte chu kan thlêm ṭhîn a, Pathian hnênah erawh chuan lantîrin kan awm a; nangmahni chhia leh ṭha hriatnaah pawh lantîra kan awm ka beisei. 12 In hnênah kan insawi mawi leh a ni lo va, thinlung lam ni lova, a lang lam mai chhuangtute chu eng emaw chhânna tûr in neih theihna tûrin, keimahni lamah chhuan chhan siam che uin kan sawi zâwk a ni e. 13 Kan ât leh Pathian tân a ni a; kan fin leh nangni tân a ni si a. 14 Krista hmangaihna chuan min tîr lui a ni; heti hian kan ngaihtuah: mi zawng zawng thih aiin mi pakhat a thi a; chuvângin, mi zawng zawng chu an thi a ni; 15 tin, a nungte chu anmahni tân an nun tawh lohva, an thih aia thia tholeha tân chuan an nun tawh zâwkna tûrin a ni mi zawng zawng thih aiin a thih ni. 16 Chumi avâng chuan tûn achinah hian keini zawngin tisa lamah chuan tu mah kan hre tawh lo vang; tisa lamah Krista chu lo hre tawh mah ila, tûnah zawng kan hre leh tawh lo ve. 17 Chumi avâng chuan tu pawh Kristaa a awm chuan thil siam thar a lo ni a; thil hluite chu a ral ta a; ngai teh u, a lo thar ta. 18 Nimahsela, engkim hi Pathian hnên ata chhuak a ni a; ani chuan Krista avângin amah nên inremin min siam a, inremna rawngbâwl hna min pe a; 19 khatia, Pathianin Kristaah chuan khawvêl hi amah nên inrema a siama, an bawhchhiatnate chu bawhchhiatnaa ruatsak lova, inremna thu min kawltîr kha. 20 Chutichuan, Krista aia palai kan ni a, Pathianin keimahni min hmangin a ngên chiam che u tih theih a ni; “Pathian nên lo inrem rawh u,” tiin Krista aiah kan ngên che u a ni. 21 Amahah chuan Pathian felna kan lo nih theihna tûrin, sual rêng rêng hre lo chu Pathianin keimahni avângin sualah a siam a.
1 Tin, Pathian khawngaihna chu sâwtpui lova in hmuh lohna tûrin, amah thawhpuituten kan ngên chiam a che u. 2 “Hun lâwmawmah ka ngaithla che a, Chhandamna niah ka ṭanpui che,” a ti si a. Ngai teh u, tûn hi hun lâwmawm chu a ni a; ngai teh u, tûn hi chhandamna ni chu a ni. 3 Kan rawngbâwl hna hi an dem lohna tûrin, eng kawngah mah tlûk phahna tûr rêng rêng kan siam lo va; 4 Pathian rawngbâwltute angin engkimah mi mit tlungin kan awm zâwk ṭhîn, nasa taka chhelnaah te, hrehawmnaah te, nêksâwrnaah te, hnawh chêpnaah te, 5 vuaknaah te, lung in tânnaah te, buainaah te, thawh rimnaah te, mutmawhnaah te, chaw ngheinaah te, 6 thianghlimnaah te, hriatnaah te, dawhtheihnaah te, ngilneihnaah te, Thlarau Thianghlimah te, hmangaihna tak takah te, 7 thutak thu-ah te, Pathian thiltihtheihnaah te; ding lam leh vei lama felna hriamhreitein, 8 ropuina leh chawimawi lohnain, hming sawichhiat leh hming sawiṭhatin; tihdertu angin, mi dik tak ni siin; 9 mi hriat tham loh angin, hmingthang tak siin; thi lek lek angin, ngai teh u, kan nung si; thunun angin, tihhlum si lohvin; 10 lungngai angin, nimahsela, lâwm fo siin; rethei angin, nimahsela, mi tam tak tihausa siin; eng mah nei lo angin, nimahsela, engkim ngah siin. 11 Aw, Korinth-a mite u, kan thinlung pawh phawrh vekin in hnênah thu kan sawi a, 12 kan inhawng a, nangni erawh chu in inhawng ve si lo. 13 Tichuan, in chunga kan tih ang bawk khân, nangni pawh kan lakah inhawng ve tûrin fate ngenin kan ngên a che u.
Pathian nung biak in
14 Ringlomite nên rual lo taka nghâwngkawl bât dûnin awm suh u; suahsualna leh felnain eng nge inṭâwmna an neih? A nih loh leh thim leh êngin eng nge inpâwlna an neih? 15 Beliara leh Krista pawhin eng nge inzawmna an neih? A nih loh leh ringlo leh ringtu chuan eng nge chan dun an neih? 16 Milemte leh Pathian biak in pawhin eng nge inremna an neih? Keini zawng Pathian nung biak in kan ni si; Pathianin, “Anmahniah ka awm ang a, Anmahniah ka lêng bawk ang; Tin, an Pathian ka ni ang a, Anni pawh ka mite an ni ang,” a tih ang khân. 17 Chuvângin, “ ‘An zîng ata lo chhuak ula, A hrangin awm rawh u, Thil bawlhhlawh rêng rêng pawh dek suh u.’ Lalpan a ti.” Chutichuan, “ ‘Ka lâwm ang che u a, 18 In tân Pa ka ni ang a, Nangni pawh ka tân fanu fapa in ni ang,’ Lalpa Engkimtitheia chuan a ti.”
1 Chutichuan, duh takte u, chûng thutiam chu kan neih avângin, tisa leh thlarau bawlhhlawhna zawng zawngah i intifai ang u, Pathian ṭih dêk chunga thianghlimna tifamkimin.
Kohhranho simnaah Paula a lâwm
2 In thinlungah hmun min kian rawh u; tu chungah mah kan tisual lo va, tu mah kan tikhawlo lo va, tu mah kan dinchan khalh lo ve. 3 Chu chu thiam loh chantîr tûr che uin ka ti a ni lo ve; thih leh thi tlânga, dam leh dam tlâng tûrin kan thinlungah hian kan vawng che u tih hmân lawkah khân ka sawi kha. 4 Nangni lamah chuan ka ṭawng ngamzia hi a nasa a, ka chhuanzia che u hi a nasa a ni; thlamuannain ka khat a, kan hrehawmna zawng zawngah chuan hlimin ka khat liam a. 5 Makedonia ram kan thlen pawh khân, kan tisain muanna rêng rêng a nei chuang lo va, lehlam lehlamah tihhrehawmin kan awm ta zâwk a; pâwn lamah insualnate a awm a, chhûng lamah hlauhnate a awm a. 6 Nimahsela, inngaitlâwmte thlamuantu Pathian chuan, Tita lo kalna chuan min thlamuan ta a; 7 a lo kalna chauh chuan a ni lo va, in lunglênzia te, in ṭahzia te, ka chunga in ṭhahnemngaihzia te min hrilhin, nangmahnia a thlamuanna pawh chuan min thlamuan ta a ni; chutichuan, ka lâwm lehzual ta a. 8 Ka lehkhathawn khân tilungngai che u mah ila ka inchhîr ta lo; a tîrah erawh kha chuan ka inchhîr a ni, kha lehkhathawn khân a tilungngai che u tih ka hriat avângin; nimahsela, rei lo tê chauh a nih kha. 9 Tûnah chuan ka lâwm a ni, tihlungngaiha in awm vâng a ni lo va, simna tûra in lungngaih vâng a ni zâwk e. Keimahni avânga eng mah in chân lohna tûrin Pathian duh zâwng anga tihlungngaihin in awm si a. 10 Pathian duh zâwnga lungngaihna chuan chhandamna tûra simna a thlen a, chu chu inchhîrawm loh tak a ni a. Khawvêl lungngaihna erawh chuan thihna a thlen zâwk ṭhîn. 11 Ngai teh mah u, Pathian duh zâwnga tihlungngaiha in awmna chuan thil lâk urhsûnna te, pawi khawih ve lo in ni tih lantîr duhna te, sual huatna leh sual hlauhna te, min ngaihna leh ṭhahnemngaihna te, sual titu thunun zêl tûra inpeihna te a neihtîr tâk che u hi. 12 Chutichuan, in hnênah ziak mah ila, a sual titu vâng khân ka ziak lo va, a sual tuartu vâng khân ka ziak hek lo, kan chunga in ṭhahnemngaihzia Pathian mit hmuha in hnêna hriattîra a awm theihna tûrin ka ziak zâwk a ni. 13 Chuvângin, thlamuanin kan awm ta rêng a; keimahni thlamuanna chauh lovah pawh, Tita lâwmna avangin kan lâwm nasa lehzual a, nangni zawng zawngin a rilru in tihharhsak tâk avângin. 14 A hnênah eng kawngah pawh nangmahni chhuang che u mah ila, ka mualpho si lo va; mualpho ahnêkin engkim in hnêna thu tak tak kan sawi ṭhîn ang khân, Tita hmaa kan chhuan chu thu tak tak a lo ni ta ngei a. 15 Tin, in zaa a thu in awihzia te, hlau leh khûr chunga amah in lawmzia te chu hre rengin, a thinlung chu nangmahni lamah a chêng nasa lehzual ta a ni. 16 Kawng tinrêngah in chunga ka muan avângin ka lâwm a ni.
Ringtute thilpêk
1 Tin, unaute u, Makedonia rama kohhranho zînga Pathian khawngaihna pêk chu kan hriattîr dâwn a che u: 2 khatia hrehawma fiahna nasa tak chunga an hlimna liam leh nasa taka an retheihna chu a liam a, an thilphalna nasa taka a chan tâkzia kha. 3,4 Khawngaihna, mi thianghlimte rawngbâwla tel ve chu, nasa taka min dîl chiamin, an theih tâwkin, a ni, an theih tâwk aia liam pawh, anmahni duh thu ngeiin an pe tih ka hriatpui asin. 5 Chu pawh chu kan rin loh ang takin an ti a, Pathian duh zâwngin anmahni ngei Lalpa hnênah leh keini hnênah an inpe hmasa tê tê a ni; 6 Chutichuan, hmâna a lo tih ṭan tawh avâng khân, he khawngaihna pawh hi nangmahnia ti zo nghâl tûrin Tita chu kan ngên ta hial a. 7 Chutichuan, engkim - rinna te, thusawi thiamna te, hriatna te, ṭhahnemngaihna zawng zawng te, min hmangaihnate in ngah ang hian, chu khawngaihna pawh chu in ngah theih nân taihmâk chhuah rawh u. 8 Thu pe lamin ka sawi lo va, mi dang ṭhahnemngaihnain in hmangaihna takzia pawh chu fiah tûrin ka sawi zâwk a ni. 9 Kan Lalpa Isua Krista khawngaihna chu, a retheihna avânga in lo hausak theihna tûrin, hausa mah sela nangmahni avâng ngeiin a lo retheih tâk kha in hre si a. 10 Tichuan, chumiah chuan ka ngaih dân ang a ni ka sawi ni, chu chu in tân a ṭha si a. Kum khat a ni tawh, a ṭan hmasatute in ni a, in ti ṭan chauh pawh ni lovin, duh pawh in duh ṭan ta bawk a. 11 Chutichuan, duh tûrin inpeihna a awm ang khân, in neih ang zêla hlenna pawh a awm theihna tûrin, tûnah zawng ti hlen tawh rawh u. 12 Inpeihna chu a awm phawt chuan, mi a neih loh pui ni lovin, a neih ang zia zêla a pêk chu lawm tlâk a ni si a. 13 Mi dang an rim lohva, nangni in rimna tûrin ka ti a ni lo va, 14 inchawhrual nân, in neih liam chu tûnlai hian an tlâkchham phuhrûkna a lo niha, an neih liam pawh in tlâkchham phuhrûkna a lo la nih ve thung theihna tûrin ka ti zâwk a ni; chutichuan, chawhrualna a lo awm thei ang: 15 “A chhar tam chuan a chuangin a nei lo va, a chhar tlêm chuan a tlachham hek lo,” tih ziak ang khân.
Tita leh a ṭhiante
16 Tin, in chunga ka ṭhahnemngaihna ang Tita thinlunga pe ṭhîntu Pathian hnênah chuan lâwm thu awm rawh se. 17 Ani chuan kan ngenna chu a pawm ngei a; nimahsela, kan ngen avâng chauh ni lovin, amah ngei chu ṭhahnemngai tak a ni a, ama duhthlan ngeiin in hnêna kal tûrin a chhuak dâwn a ni. 18 Tin, a hnênah unaupa kan tîr ve dâwn a, ani chu Chanchin Ṭha kawnga an fak thu kohhranho zawng zawngah a thang chhuak a; 19 chuti chauh pawh a ni lo va, Lalpa ropuina tûr leh kan inpeihzia entîr tûra a rawng kan bâwl he khawngaihna thu-ah hian, kan hnêna khaw fang ve tûra kohhranho ruat ve rêng a ni bawk a. 20 A rawng kan bâwl he thilpêk kawngah hian tu mân min dem lohna tûrin kan fîmkhur a; 21 Lalpa ngaih chauhvah ni lovin, mihring ngaih pawha thil mawi kan ngaihtuah lâwk ṭhîn a ni. 22 Tin, an hnênah kan unaupa kan kaltîr ve dâwn a, ani chu kawng tam takah ṭhahnemngai tak a ni tih vawi tam tak kan fiah tawh a, tûnah phei chuan a rin êm êm che u avângin ṭhahnem a ngai nasa lehzual ta a ni. 23 Tita hi chu ka ṭhian leh nangmahni lama ka hnathawhpui a ni a; tin, kan unaute hi chu kohhranho tirhkoh, Krista ropuina chu an ni. 24 Chumi avâng chuan in hmangaih tih hriatna leh, kan chhuanna che u hriatna chu kohhranho hmaah chuan an hnênah tilang rawh u.
Mi thianghlimte hnêna thilpêk
1 Mi thianghlimte rawngbâwl thu zawng in hnêna ka ziak a ngai lo ve; 2 in inpeihzia chu ka hre si a, chumi kawng thu-ah chuan, “Kum khat a ni tawh, Akaia ram chu inbuatsaihin an awm ta,” tiin, Makedonia rama mite hnênah ka chhuang ṭhîn che u a; chutichuan, in ṭhahnemngaihna chuan an zînga mi tam tak a chawk harh ta a. 3 Nimahsela, chumi kawng thu-ah chuan ka chhuanna che u chu engmahlo a lo nih lohna tûrin unaute hi ka kaltîr dâwn a, ka sawi ang taka inbuatsaihin in lo awm theih nân; 4 chuti lo chuan, Makedonia rama mi tuten emaw mi lo zui hlauhvin, inbuatsaih lova an rawn hmuh che u chuan, keini (nangni kan ti lo) hi kan rinna che u kawngah hian kan mualpho dah ang e. 5 Chuvângin, unaute hi in hnêna lo kal hmasaa, tlang taka thilpêk in tiam tawh kha lo siam lâwk tûra ngen ṭûlin ka ring a ni, chumi ngei chu lâk luih ang lova, tlang taka pêk ang zâwkin peih saa a lo awm nân. 6 Amaherawhchu, chutiang kawngah chuan theh tlêm chuan a ât tlêm ang a, theh tam chuan a ât tam bawk ang. 7 Mi tinin ui chunga pe lovin, pêk loh theih loh anga ngaia pe hek lovin, an thinlunga an tum ang zêlin pe ṭheuh rawh se; Pathian chuan hlim taka petu a ni a hmangaih ni. 8 Tin, Pathianin khawngaihna tinrêng in chungah a vûr thei a ni; chutichuan, nangnin engkimah a tâwk zet nei fovin, hnathawh ṭha tinrêng atân in ngah thei ang: 9 “A sem darh a; Retheite hnênah a pe a, A felna chu kumkhuain a awm reng,” tih ziak ang khân. 10,11 Tin, thilphalna tinrêng, keimahni avânga Pathian hnêna lâwm thu sawina siamtu chu nei tûra engkima tihhausaka awmin, thehtu hnêna chi petu leh ei atâna chhang petu chuan, in theh tûr chi chu a pe che uin, a tihpunsak ang che u a, in felna rahte chu a tihhlâwksak bawk ang che u. 12 He chhawmdâwlna rawngbâwlna hian, mi thianghlimte tlâkchhamnate chu a phuhrûksak chauh pawh a ni si lo va, Pathian hnêna lâwm thu sawina tam taka changin a luang liam bawk a ni. 13 He rawngbâwlna hian a fiahna che u avângin, Krista Chanchin ṭha lama in thurin in zawm avâng leh, anmahni tân leh mi zawng zawng tâna thawhlâwma in thilphal avâng hian, Pathian an tiropui ṭhîn asin. 14 Anmahni ngei pawhin in chunga Pathian khawngaihna nasa tak avângin, in tâna ṭawngṭai chungin an ngai hle che u a ni. 15 A thilpêk sawi hleih theih loh avângin Pathian hnênah lâwm thu awm rawh se.
Paulan a rawngbâwlna a ṭan
1 Tin, kei Paula, in zînga in mit hmuha thuhnuairawlh taka awma, in hnêna awm loh veleha nangmahni lam zuam si ṭhîna ngei hian, Krista zaidamna leh nunnêmnain ka ngên a che u; 2 a ni, in hnêna ka awm hunah ṭhenkhat, tisa anga awma min ruatte chunga huai taka awm ka tum ngamna ang hian ka zuam lohna tûr che uin ka ngên a che u. 3 Tisaah awm mah ila, tisa indo angin kan indo lo va 4 (keini inrâlthuamnate chu tisaa mi a ni si lo va, kulhpui nghet takte ṭhiatna tûra Pathian zârah thil ti thei tak a ni zâwk), 5 hnialnate leh thil sâng tinrêng Pathian hriatna dâl tûra sâng taka siamte chu ṭhiatin, ngaihtuahna tinrêng Krista thu awihna salah kan hruai a; 6 in thu awihzia a famkim hunah chuan, thu awih lohna zawng zawng phuba la tûrin kan inpeih bawk a. 7 In mit hmuha thil awmte chu a ni in en ṭhin ni. Tu pawhin Krista ta nia a inrin chuan, hei hi mahniin ngaihtuah leh rawh se, amah chu Krista ta a ni ang bawkin keini pawh kan nih ve hi. 8 Kan thuneihna (nangmahni ṭhiat nân ni lova, nangmahni siam ṭhat nân zâwka Lalpan min pêk hi) chhuang nasa lehzual mah ila ka mualpho dâwn si lo va; 9 ka lehkhathawnte chuan tihhlauh che u tum anga ka lan loh nân chu chu ka ti a ni. 10 “A lehkhathawnte chu a ritin a khauh va, a taksa lam erawh chu a âwmnêm a, a ṭawng pawh a sitawm a ni,” an ti si a. 11 Chutiang mi chuan hei hi ngaihtuah rawh se, in hnêna kan awm loh laia lehkhathawna thua kan awm angin, in hnêna kan awm hunah pawh thiltihah kan awm bawk ang. 12 Ṭhenkhat mahni insawimawite zîngah chuan kan inchhiar tel ngam lo va, anmahni nên kan intehkhin ngam hek lo; amaherawhchu, anni zawng mahni leh mahni intehin, mahni leh mahni intehkhinin rilru nei lovin an awm. 13 Keini erawh zawng kan tehna tâwk aliamah chuan kan uang lo vang a, Pathianin bial min chantîr a, chu tehna ang zêl chuan kan uang zâwk ang, nangmahni pawh bial hial tûra tehna chu. 14 Bial phâk loh pui bial che u angin kan huam zau lutuk si lo; Krista Chanchin Ṭha hrilin in khaw thleng pawhin kan lo kal kha: 15 kan tehna tâwk liama mi, mi dang thawh rimte chu kan chhuang lo va; in rinna a ṭhan ang zêlin, kan bial chin ang zêlah, in zîngah nasa taka tihlenin kan awm ang tih beiseina kan nei zâwk a. 16 Buatsaih sa kawng thu-ah chuan mi dang bial chhuang lovin, in piah lam ram thleng pawha Chanchin Ṭha kan hril theih nân. 17 Nimahsela, “A chhuang apiangin Lalpa chu chhuang rawh se.” 18 Mahni insawimawi chuan fak a hlawh si lo va, Lalpan a sawimawi chuan fak a hlawh zâwk a ni.
Paula leh tirhkoh derte
1 Ka ât deuhnaah hian nangnin min dawhtheih ka va duh êm! A ni, dawh pawh mi dawhthei ngei chhap e. 2 Pathian thîknain asin ka thîk che u ni; Krista hnênah chuan nula thianghlim anga ka pêk theihna tûr che uin, pasal pakhat ka hualsak si che u a. 3 Nimahsela, rûl chuan a ngamthlêmnain Evi a bum ang khân, Krista lama takna leh thianghlimna ata chu, eng emaw tiin in rilru an tikhawlo dah ang e, tih ka hlauthâwng a ni. 4 Kan hrilh che u ni lo, Isua dang hrila in hnêna lo kal apiang in lo ngaithei a, thlarau in chan ngai loh chu in chang a, chanchin ṭha dang in pawm ngai loh chu in pawm duh zêl mai maw! 5 Chûng tirhkoh lian berte chu eng kawngah mah tluk loh ka inring lo asin. 6 Thusawiah zawng ṭawng hmang thiam mah suh ila, hriatnaah chuan chutiang ka ni lo; a ni, engkimah, mi zawng zawng zîngah, nangmahni lama kan lantîr kha. 7 A nih loh leh, Pathian Chanchin Ṭha a thlâwn ngawta ka hrila, chawisâna in awm theihna tûra ka intihhniam khân thil ka tisual a lo ni maw? 8 In zînga ka thawh lai khân kohhran dangten min chhawmdâwl a, nangmahni pui tûrin anni chu ka tihek a. 9 Tin, in hnêna ka awma, ka tlâkchham lai khân tu mah ka tihautak lo va; unaute chuan Makedonia ram ata an lo kalin ka tlâkchhamna chu min rawn phuhrûksak si a; engkimah nangmahni tihautak lova ka insiam kha, khatiang khân ka insiam zêl ang. 10 Krista thutak keimaha a awm ang hian, Akaia ram lama he ka chhuanna hi tu mân min tihrehsak lo vang. 11 Eng vângin nge? Ka hmangaih loh che u vâng em ni? Pathianin a hria. 12 Nimahsela, remchânna hmu duhte lak ata remchânna chu ka sah chah theihna tûrin, ka tih ṭhin hi ka ti zêl ang; an chhuannaah chuan keimahni awm ang hian an lo awm theih nân. 13 Mi chutiangte chu Krista tirhkohva insiam chawp, tirhkoh derte, hnathawktu mi bum hmangte an ni si a. 14 Chu chu a mak lo ve; Setana meuh pawh êng tirhkohvah a insiam chawp si ṭhîn a. 15 Chuvângin, a rawngbâwltute pawh chu, felna rawngbâwltuah insiam chawp mah sela thil mak a ni lo ve; chûngho tâwpna chu an thiltih ang zêlin a ni ang.
Paulan tirhkoh a nih vânga a tuarnate
16 Ka sawi leh ang, tu mân mi âah min ruat suh se; nimahsela, min ruat vêk chuan, kei pawhin tlêm tala ka chhuan ve theih nân mi â angin min dawh rawh u. 17 Ka sawi hi Lalpa thu angin ka sawi lo va, ka chhuan rinna hian â ang takin ka sawi zâwk a ni. 18 Mi tam takin tisa anga an chhuan avângin kei pawhin ka chhuang ve teh ang. 19 Nangni zawng mi fing in nih avângin mi âte chu lungawi takin in dawh si ṭhîn a. 20 Miin bawihah siam che u sela, ei zo duak che u sela, salah man che u sela, mahni inchawimawi sela, in hmaiah bêng che u sela, in dawh si ṭhîn a. 21 Kan lo chak ta lo angin insitin ka sawi a ni. Nimahsela, tu pawhin eng kawngah pawh an ngam apiang (â takin han sawi ta ila) kei pawhin ka ngam. 22 Hebrai mite an ni maw? Kei pawh ka ni. Israel mite an ni maw? Kei pawh ka ni. Abrahama thlahte an ni maw? Kei pawh ka ni. 23 Krista rawngbâwltute an ni maw? (mi â angin han sawi ta ila) Ka ni zâwk mah; thawh rimnaahte nasa lehzualin, tân ina tânnaahte nasa lehzualin, vuaknaahte hleihluak takin, thihnaahte vawi tam tak. 24 Juda-te lakah vuakna vawi khata vawi sawmli tling lo vawi nga ka tâwk a; 25 vawi thum tianga vuakin ka awm a, vawi khat lunga denin ka awm a, vawi thum lawng chhiatna ka tâwk a, zan khat leh ni khat tuifinriatah ka awm a; 26 khaw fannaahte vawi tam tak, luite laka hlauhawmahte, suam hmangte laka hlauhawmahte, ka chipuite laka hlauhawmahte, Jentailte laka hlauhawmahte, khawpuia hlauhawmahte, thlalêra hlauhawmahte, tuifinriata hlauhawmahte, unau derte zînga hlauhawmahte; 27 thawh hahna leh thawh rimnaahte, mutmawhnaahte vawi tam tak; rilṭâm leh tuihâlnaahte, chaw ngheinaahte, khawsik leh saruaka awmnaahte vawi tam tak. 28 Hêng pâwn lam thil ka sawi bâkah hian kohhranho zawng zawng ka ngaihtuahna, ni tin mi delh rengtu hi a awm bawk a. 29 Mi chak lote ka tuarpui lo ngai em ni? Mi an tlûkin ka vei lo ngai em ni? 30 Chhuang tûr ka nih vêk chuan ka chak lohna lam thilte a ni ka chhuan ang. 31 Lalpa Isua Pathian leh Pa, kumkhuaa engthâwla awma chuan dâwt ka sawi lohzia a hria e. 32 Damaska khuaah khân Lal Areta hnuaia rorêltu chuan min man tûrin Damaska mite khawpui chu a vêntîr a; 33 tin, tukverhah kulh hrûlah chuan bâwmin min thlâk a; tichuan, a kut ata ka relhru hlen ta a.
Inlârna leh hriattîrna
1 Ka chhuang rêng rêng tûr a ni. Ṭhat zawng a ṭha lo va; nimahsela, Lalpa hnên ata inlârna leh hriattîrna thu ka sawi kai teh zêl ang. 2 Kristaa mi pakhat ka hria, chu mi ngei chu kum sâwm leh kum li a ni ta (taksain emaw a awm ka hre lo, taksa lovin emaw a awm ka hre hek lo; Pathianin a hria), vân thumna meuhvah khian lâk chhohvin a awm a. 3 Tin, chu mi ngei chu (taksain emaw a awm, taksa lovin emaw ka hre lo; Pathianin a hria), 4 Paradis-a lâk chhohva a awm leh, thu sawi hleih theih loh, mihring sawi thian lohte chu a hria tih ka hria. 5 Mi chutiang chu ka chhuang ang; nimahsela, ka chak lohna lo chu mahni ka inchhuang lo vang. 6 Chhuang duh mah ila mi â ka ni lo vang, thu tak tak ka sawi dâwn si a; nimahsela, ka insûm ang, chuti lo chuan, tu pawhin mi hmuh ang leh ka laka thu an hriat ang aiin min ngai ropui zâwk dah ang e. 7 Tin, hriattîrnate chu a nasat êm êm avânga ka inngaihhlut lutuk loh nân tisaah hlîng mi pe a ni, Setana tirhkoh, kut thak hnawih nâna mi hmangtu tûr chu; chuti lo chuan, ka inngaihlu lutuk dah ang e. 8 Chumi chungchâng thu-ah chuan mi kiansan theih nân Lalpa chu vawi thum ka dîl a. 9 Tin, ani chuan ka hnênah, “Ka khawngaihna i tân a tâwk e; ka thiltihtheihna hi chak lohnaah asin tihfamkimin a awm ni,” a ti ta a. Chutichuan, Krista thiltihtheihna chu ka chunga a awm theih nân, lâwm êm êmin ka chak lohnate hi ka chhuang tawh zâwk ang. 10 Chuvângin, Krista avângin chak lohnaahte, chhiatnaahte, nêksawrnaahte, tihduhdahnaahte, hnawhchêpnaahte ka lâwm ṭhîn a ni; ka chak loh apiangin a ni ka chak ṭhin ni.
Paulan Korinth Kohhran a veizia
11 Ka lo â ta a nih hi: nangnin â lo thei lovah min siam a ni; kei chu nangmahni min chawimawi tûr ka ni asin, eng mah ni mah suh ila, eng kawngah pawh tirhkoh lian berte chu ka tluk lo si lo. 12 Tirhkoh nih chhinchhiahnate chu chhelna tinrêng neiin, chhinchhiahnate, thil makte, thiltihtheihnatein in zînga tih a nih tak tak kha. 13 Eng kawngah nge ni kohhran dangte aia hnuai zâwka siama in awmna chu? Keimah ngei hian ka tihhautak loh che u kawngah khân a nih nghâl loh chuan. Chumi dik lohnaah chuan min ngaidam rawh u. 14 Ngai teh u, hei hi in hnêna lo kal tûra ka inpeih vawi thumna tûr a ni; tin, ka tihautak lo vang che u, in ta chu zawng ka ni si lo va, nangmahni a ni ka zawn zâwk che u ni; faten nu leh pate tân an khâwl khâwm tûr a ni lo va, nu leh paten fate tân an khâwl khâwm zâwk tûr a ni si a. 15 Tin, kei zawngin in thlarau tân lâwm êm êmin ka hmang ral ang a, inhmang ral vekin ka awm bawk ang. A chuang a liama ka hmangaih che u avâng khân, keiin hmangaihna tlêm zâwk ka dawn phah a ni maw? 16 Amaherawhchu, kei chuan ka tihautak lo che u ni ta sela; nimahsela, mi vervêk rêng rêng lo niin, ngamthlêmin ka man che u a lo ni. 17 In hnêna ka tirhte zîngah khân tu emaw tal hmangin ka hlâwk phah che u em ni? 18 Tita chu ka fuih a, a rualin unaupa chu ka tîr a ni. Tita chuan hlâwk phahna rêng rêng a nei che u em ni? Rilru hmun khat pua lêng dûn kan ni lo vem ni? Hniak thuhmun chiaha lêng dûn kan ni lâwm ni? 19 In hnêna kan thiam thu sawiah min lo ngai reng a ni âwm a. Kristaah chuan Pathian mit hmuhah a ni thu kan sawi ni. Nimahsela, duh takte u, engkim hi nangmahni siam ṭhatna tûr a ni. 20 Ka lo kal hunah eng emaw tiin ka duh anga ka rawn hmuh loh che ua, kei pawh in duh angin mi hmu lo dah ang, tih leh, eng emaw tiin inhauna te, inîtsîkna te, thinurna te, inkhinna te, inrêlna te, sesea thu lâk te, inngaihhlut lutukna te, buaina te a lo awm dah ang, 21 tih leh, ka lo kal hunin ka Pathianin in zîngah mi timualpho leh pekin, tûn hma lama thil tisualtute zînga thil bawlhhlawh tih te, inngaih te, hur te chînga sim si lo mi tam takte chu ka ṭah dah ang e tih ka hlau asin.
Hrilh lâwkna leh chibai bûkna
1 Hei hi in hnêna ka lo kal vawi thumna tûr a ni. Hretute pahnih emaw, pathum emaw kaah chuan thu tinrêng tihnghehin a awm ang. 2,3 Ka sawi lâwk tawh a; tin, Krista, keimaha thu sawi ṭhîntu chu fiahna in zawn avângin, vawi hnihnaa in hnêna ka awm laia ka sawi ang khân, tûnah in hnêna awm lovin tûn hma lama thil tisualtute hnênah leh, mi dang zawng zawng hnênah ka sawi lâwk leh dâwn, “Ka lo kal leh chuan ka zuah lo vang,” tih hi; ani chu nangmahni lamah a chak lo lo va, in zîngah thil ti thei tak a ni zâwk a ni. 4 Ani chu chak lohna avângin khen behin a awm a ni a; nimahsela, Pathian thiltihtheihna avângin a nung ta reng a ni. Keini pawh amahah chuan kan chak lo a ni; nimahsela, nangmahni lama Pathian thiltihtheihna avângin a hnênah kan nung ve ang. 5 Rinnaah chuan in awm emaw, nangmahni ngei inchhin ṭhîn ula; nangmahni ngei infiah ṭhîn rawh u. A nih loh leh, nangmahniah Isua Krista chu a awm tih nangmahni ngeiin in hre fiah lo vem ni? Duh loh in nih nghâl loh chuan. 6 Keini erawh chu duh lohvin kan awm lo tih in la hriain ka ring. 7 Tin, thil rêng rêng in tihsual lohna tûrin Pathian hnênah kan dîl ṭhîn a; chu chu, keini hi duhawma kan lan theihna tûr a ni lo va, nangnin a mawi apiang in tih theih nân a ni zâwk, keini chu duh loh angin awm mah ila. 8 Thutak ṭan tûr lo chuan thutak do tûrin eng mah kan ti thei lo a ni. 9 Keini kan chak loh lai pawha nangni in chak hian kan lâwm ṭhîn asin; hei hi kan dîl bawk ṭhîn, in ṭhat famkimna tûr hi. 10 Chu vâng chuan tichhe tûr ni lova, siam ṭha tûr zâwka Lalpan thuneihna mi pêk ang zêl khân, in hnêna ka awm huna na taka ka zilh loh nân che u, in hnêna ka awm loh lai hian hêng thu hi ka ziak a ni. 11 A tâwp berah chuan unaute u, lâwm takin awm rawh u. Tihṭhat famkimin awm ula; thlamuang takin awm ula; rilru hmun khat pu ula, lungrual takin awm rawh u; tichuan, hmangaihna leh remna Pathian chu in hnênah a awm dâwn zuk nia. 12 Fawh thianghlimin chibai inbûk rawh u. 13 Mi thianghlim zawng zawngte hian chibai an bûk a che u. 14 Lalpa Isua Krista khawngaihna te, Pathian hmangaihna te, Thlarau Thianghlim pâwlna te chu in zaa hnênah awm rawh se.
Chibai bûkna
1 Paula, tirhkoh (mihringte tirh chhuah ni lovin, mihring zârah ni hek lovin, Isua Krista leh mitthi zîng ata a kaithotu Pa Pathian zârah a ni zâwk) leh, 2 ka hnêna unau awm zawng zawngte chuan Galatia rama kohhrante hnênah: 3 Pa Pathian leh kan Lalpa Isua Krista hnên ata khawngaihna leh remna in hnênah awm rawh se; 4 ani chuan kan Pathian leh kan Pa remtih zâwngin, tûnlai khawvêl sual tak lakah hian min chhanchhuah theih nân, kan sualte aiah amah a inpe ta; 5 Pathian hnênah chuan ropuina chatuanin awm rawh se. Amen.
Chanchin Ṭha dang a awm lo
6 Krista khawngaihna zâra a kotu che u kha, chuti thuta chanchin ṭha hrang lama in pakaisan hi mak ka ti a ni; 7 chu chu chanchin ṭha a ni ve si lo; nangmahni tibuaiin, Krista Chanchin Ṭha tihdanglam duh tute emaw an awm mai a ni a. 8 Nimahsela, keimahniin emaw, vân aṭanga lo chhuk vântirhkoh pawhin emaw, Chanchin Ṭha kan hrilh che u lo kha chu chanchin ṭha dang rêng lo hrilh che u sela, ânchhe dawngin awm rawh se. 9 Hmâna kan sawi ang khân tûnah ka sawi leh dâwn a ni, “Chanchin Ṭha in pawma lo kha chu, chanchin ṭha dang tu pawhin hrilh che u sela, ânchhe dawngin awm rawh se.” 10 A nih loh leh, mihring nge ka thlêm Pathian? A nih loh leh, mihring em ni tihlâwm ka tum? Mihring tihlâwm tum ni ila, Krista bawih ka ni lo vang.
Paula tirhkoh a nih dân
11 Chutichuan, unaute u, ka Chanchin Ṭha hril kha mihring lam thu a ni lo tih ka hriattîr a che u. 12 Mihring hnên ata hmu ka ni lo va, mi min zirtîr ka ni hek lo, Isua Krista inlârna avânga hmu ka ni zâwk si a. 13 Juda-te sakhaw biak dânah chuan hmânlaia ka awm dân chu in hre tawh si a, khatia Pathian kohhranho nasa taka tiduhdahin ka tihbuai ṭhin kha. 14 Tin, min thlahtute thurochhiah chunga ṭhahnem ka ngaih nasat bîk avângin, Juda-te sakhaw biak dân kawngah chuan ka chite zînga ka rualpui tam takte ka lehpêl ta a. 15 Tin, ka nu pum chhûng aṭanga mi tihrangtu leh, a khawngaihna avânga mi kotu Pathian chuan, 16 Jentailte zînga a Chanchin Ṭha ka hril theih nân a Fapa chu lungni taka ka hnêna a inlârtîr lai khân, tu mah râwn lovin, 17 tirhkoh ka nih hmaa tirhkoh lo ni tawhte hnênah Jerusalem khuaa han kal hek lovin, Arabia ramah ka kal bo ta nghâl zâwk a; tin, Damaska khuaah ka kîr leh ta a. 18 Tin, kum thum a vei hnuin Kipha kan tûrin Jerusalem khuaah ka han kal a, a hnênah ni sâwm leh ni nga ka châm a. 19 Tirhkoh dangte erawh chu, Lalpa unau Jakoba chauh lo chu tu mah ka hmu lo va. 20 (Ngai teh mah u! In hnêna thu ka ziakte hi Pathian mit hmuhah pawh ka daw lo ve.) 21 Chumi hnuah chuan Suria leh Kilikia ramahte ka lo kal a. 22 Nimahsela, Judai ram kohhranho Kristaa awmte hmêlhriat ka la ni lo ta fo va. 23 “Hmâna min tiduhdahtu khân hmâna rinna thu a tihkhawloh ṭhin kha tûnah a hril ta zâwk a ni,” tih mi sawi chauh an hria a. 24 Tin, keimah avângin Pathian an chawimawi ta a.
Paula leh tirhkoh dangte
1 Tin, kum sâwm leh kum li a vei hnuin, Tita pawh chu hruai vein, Barnaba rualin Jerusalem khuaah ka han kal leh a. 2 Tin, hriattîrna avângin ka han kal a, Jentailte zînga Chanchin Ṭha ka tlângaupui ṭhin hi anmahni ka han hrilh a; nimahsela, mi lian deuhte chu a hrangin ka hrilh a; chuti lo chuan, a thlâwnin ka tlân hlauh dah ang e, a nih loh leh, tlân thlâwn ka lo ni dah ang e. 3 Nimahsela, Tita ka hnêna awm pawh chu Grik mi ni mah sela, serh tan luihsakin a awm ta lo va; 4 chu chu unau der, a rûka an hruai luhte vâng a ni; chûngte chu, bawiha min siam theih nân, Krista Isuaah chuan zalênna kan neih hi enthla tûrin a rûkin an lût a. 5 Nimahsela, Chanchin Ṭha thutak chu in hnêna a awm reng theih nân, dârkâr khat tê pawh intulûtin an thu kan zâwm lo va. 6 Tin, mi lian deuhva an ruatate lakah chuan (eng ang mi pawh ni sela, ka tân eng mah a lêm chuang lo; Pathianin tu mah thlei bîk a nei si lo va), mi lian deuhva an ruatate chuan eng mah min belhchhah chuang si lo va; 7 chutih ahnêkin serh tante Chanchin Ṭha Petera hnêna kawltîra a awm angin, serh tan lohte Chanchin Ṭha ka hnêna kawltîrin a awm tih an hria a. 8 (Serh tante tirhkoh ni tûrin Petera tâna thawhsaktu ngei chuan, Jentailte tirhkoh ni tûrin ka tân pawh mi thawhsak si a.) 9 Khawngaihna mi pêka chu an hriat pawhin Jakoba te, Kipha te, Johana te, bana an ruatate chuan keini Jentailte hnêna kal tûr leh anni zawng serh tante hnêna kal tûrin, kei leh Barnaba chu inpâwlna kut ding lamte min pe ta zâwk mah a. 10 Retheite kan hriat reng chauh an duh, chu tak chu tih ka tum tlat rêng ṭhin a ni.
Antiokei khuaah Paulan Petera a zilhhau
11 Tin, Kipha chu Antiokei khuaa a lo kal laiin demawm taka a awm avângin, a hmaichhan ngeiah ka dodâl a. 12 Mi tute emaw Jakoba hnên ata an lo kal hma chuan, ani chuan Jentailte hnênah chaw a ei ṭhîn a; nimahsela, an lo thlen veleh, serh tan mite chu a hlauh avângin, tel leh ta lovin a intihrang ta si a. 13 Juda dangte pawh an vervêk ve ta hlawm a; chutichuan, Barnaba meuh pawh an vervêknaa hruai bovin a awm ta hial a. 14 Nimahsela, Chanchin Ṭha thutak angin an awm fel lo tih ka hriatin, Kipha hnênah an zaa hmaah, “Nang Juda mi i ni a, Juda anga awm lovin Jentail angin i awm si a. Engtizia nge Jentailte chu Juda-te anga awm luihtîr kher i tum?” ka ti a.
Juda-te pawh Jentailte anga rin vânga chhandam an ni
15 Keini zawng Jentail mi sualte ni lovin, Juda mi rênga piang kan ni a. 16 Nimahsela, Dân thiltihte avângin mi thiam changin a awm lo va, Isua Krista rin avâng chauhvin thiam changin a awm zâwk tih kan hre si a, keini pawhin Dân thiltih avâng ni lovin, Krista rinna avânga thiam changa kan awm theih nân Krista Isua chu kan ring a ni; dân thiltihte avângin mihring rêng rêng thiam changin an awm dâwn si lo. 17 Kristaah thiam changa awm kan tum chung khân keini ngei pawh mi sual kan lo nih hlauh si chuan, Krista chu sual rawngbâwltu a lo ni em ni? Hnai lo ve. 18 Ka thil ṭhiatte kha ka sak leh si chuan bawhchhetu ka nih ka inhriattîr mai a ni ang. 19 Pathian lam kawnga ka lo nun theih nân, kei zawng Dân avângin Dân lam kawngah ka thi tawh si a. 20 Krista hnênah khen behin ka awm ta; nimahsela, ka nung a ni; keimah erawh chu ka ni tawh lo, Krista chu keimahah a nung zâwk a ni; tin, tûnah tisaa ka nung hi rinnaa nung ka ni - Pathian Fapa, mi hmangaiha ka aia inpetu rinnaah chuan. 21 Pathian khawngaihna chu ka bawh bo lo ve; Dân avânga felna a awm si chuan Krista chu a thlâwnin a thi a ni ang.
Dân nge rinna
1 Aw Galatia rama mi âte u, tuin nge dawi che u? In mit hmuh ngeiah Isua Krista chu khen behin chiang taka lantîr a nih tehlul nên. 2 Hei chauh hi in hnên ata lo hriat ka duh: Dân thiltihte avângin nge Thlarau chu in hmuh, in ngaihthlâka in rin avângin? 3 Heti êm hian in â maw? Thlarauva ṭan tawh siin tisain in zo dâwn em ni? 4 Thil chuti zozai chu sâwtpui lovin in tuar em ni? Sâwtpui loh ni tak tak ta ang sela. 5 Tin, in hnêna Thlarau petu che u leh in zînga thil mak titu chuan, Dân thiltihte avângin nge a tih, in ngaihthlâka in rin avângin? 6 Abrahaman Pathian a ring a, tin, chu rinna chu a felnaa ruat a ni ang khân. 7 Chutichuan, hre rawh u, rinnaa awmte, chûng ngei chu Abrahama fate an ni. 8 Tin, Pathian Lehkha Thu chuan, Pathianin rinna avângin Jentailte thiam a chantîr dâwn tih hre lâwkin, “Nangmahah chuan hnam tin malsâwmsakin an awm ang,” tiin, Abrahama hnênah Chanchin Ṭha chu a hrilh lâwk kha. 9 Chutichuan, rinnaa awmte chu mi Abraham rinawma nên malsâwmin an awm ve ṭhîn a ni. 10 Dân thiltiha awm apiangte chu ânchhe hnuaiah an awm si a; “Dân lehkhabua thu ziak zawng zawng anga ti tûra awm reng lo apiang chu, ânchhe dawngin an awm ṭhîn,” tiin ziak a ni si a. 11 Tin, Pathian mit hmuhin tu mah rêng Dân avânga thiam chang an awm lo tih a lang reng a ni. “Mi felte chu rinnain an nung ang,” tih a ni si a; 12 tin, Dân chu rinnaa mi a ni lo, “Chûng anga titu chu chûngah chuan a nung ang,” tih a ni zâwk e. 13 Krista chu kan aia ânchhe dawng lo niin, Dân ânchhe lak ata min tlan chhuak ta (“Thinga khai kân apiang chu ânchhe dawng an ni,” tih ziak a ni si a); 14 chutichuan, Abrahama chunga malsâwmna chu Krista Isuaah chuan Jentailte chungah a lo awm thei ang a; tichuan, rinna avângin Thlarau tiam chu kan hmu thei ang.
Dân leh thutiam
15 Unaute u, mihring angin ka sawi hi, mihring thuthlung pawh ni mah sela, tihngheh tawh hnuin an phelh ngai lo va, belh pawh an belhchhah ngai hek lo. 16 Tin, Abrahama hnênah a ni thu chu tiamin a awm ni, a chi thlah hnênah pawh. Mi tam tak chungthu sawi angin, “Chi thlahte hnênah pawh,” a ti lo va, mi pakhat chungthu sawi angin, “I chi thlah hnênah pawh,” a ti a ni zâwk e, chu chu Krista hi a ni. 17 Tin, heti hian ka ti a ni: thuthlung, Pathian lo tihngheh tawh chu, Dân, kum zali leh kum sawmthum hnua lo awm tawh khân, thutiam chu engmahlova siamin a tibo lo ve. 18 Ro luah tûr chu Dân avâng a nih chuan thutiam avâng a ni tawh si lo vang; nimahsela, Pathianin thutiam avângin a ni, Abrahama hnênah a pêk ni. 19 A nih loh leh, engtiziaa Dân chu awm nge ni le? Bawhchhiatna hi sual a nih tilang fiah tûra thutiam belhchhahna a ni a, Thutiamin Chi Thlah a tih lo kal hmaa hman tûr, vântirhkohte hmanga palai kuta tihngheh a ni. 20 Tin, palai rêng rêng mi pakhat lakah palai a ni ngai lo ve, Pathian erawh chu pakhat a ni.
Bawihte leh fate
21 A nih loh leh, Dân chuan Pathian thutiamte chu a dodâl em ni le? Hnai lo ve, Dân, mi tinung thei rêng pêkin a awm tawh si chuan, felna chu Dân avângin a awm ngei tûr a ni. 22 Nimahsela, Isua Krista rin avânga thil tiam chu a ringtute hnêna pêk a nih theih nân, Pathian Lehkha Thu chuan sual hnuaiah engkim a khârkhip ta vek a. 23 Nimahsela, rinna a lo thlen hma khân, rinna la lang tûr atân khârkhipa, Dân hnuaia vên kan nih kha. 24 Chutichuan, rinna avânga thiam kan chan theihna tûrin, Dân chu Krista hnên lama min kaihruaitu a lo ni a. 25 Nimahsela, tûnah rinna a lo thlen hnu hian, kaihruaitu hnuaiah kan awm tawh lo ve. 26 Krista Isua rin avângin Pathian fate in ni vek si a; 27 in zînga Kristaa baptisma chang apiangte kha Krista chuan in inthuam tawh si a. 28 Chutah chuan Juda mi a awm theih loh va, Grik mi pawh a awm theih hek loh; chutah chuan bawih a awm theih loh va, bawih lo pawh a awm theih hek loh; chutah chuan mipa leh hmeichhia pawh a awm theih loh; Krista Isuaah chuan in zain pumkhat in ni si a. 29 Tin, Krista ta in nih chuan, Abrahama thlah, thutiam anga ro luahtu tûrte in ni.
1 Nimahsela, heti hian ka ti a ni: ro luahtu tûr chu engkim chungah hotu ni mah sela, naupang a la nih chhûng zawng bawih nên engah mah a danglam chuang lo ve; 2 a pa ruat hun chu a lo thlen hma loh chuan, vêngtu leh enkawltute hnuaiah a awm zâwk a ni. 3 Chutiangin keini pawh naupang kan nih lai khân, khawvêl zirtîrna dik lo hnuaiah bawihah kan awm. 4,5 Nimahsela, a hun bi a lo kim khân fa nihna kan hmuh theih nân, Dân hnuaia awmte chu tlan tûrin Pathianin a Fapa, hmeichhe hrin, Dân hnuaia lo piangin a tîr chhuak ta a. 6 Tin, fa in nih avângin Pathianin a Fapa Thlarau chu, “Abba! (Ka pa!)” tia auvin kan thinlungah a rawn tîr a. 7 Chutichuan, bawih i ni tawh lo va, fa i ni zâwk e; tin, fa i nih chuan Pathian zâra ro luahtu tûr i ni.
Paulan Galatia mite a vei
8 Nimahsela, Pathian in hriat loh lai khân, an pianzia rêng pawha Pathian ni hlei lote bawih in ni a. 9 Tûna Pathian in lo hriat hnu hi zâwngin - ni lo, Pathian mi hriat in lo nih hnu hian, tih tûr a ni zâwk e, khawvêl zirtîrna dik lo, eng mah ni hlei lo, a bawiha awm leh in châkate lamah chuan engtiziaa hawi kîr leh nge in nih? 10 Ni te, thla te, hun te, kum te in serh ṭhîn. 11 In tân tha ka sêng thlâwn dah law maw tih ka hlauhsak a che u. 12 Unaute u, ka ngên a che u, keimah angin awm rawh u, kei pawh nangmahni angin ka awm si a. Ka pawi eng mah in khawih lo. 13 Chanchin Ṭha in hnêna ka hril hmasak ṭum kha ka tisa chak lohna avâng a ni tih in hre si a. 14 Tin, ka tisaa in tân thlêmna awm chu in hmusit lo va, in ten hek lo; Pathian vântirhkoh angin, Krista Isua ang maiin mi lawm tâk zâwk kha. 15 Vânnei in intihna kha khawiah nge ni ta le? Tih theih phei chu ni sela, nangnin in mitte kher chhuakin mi pe tawh ang tih ka hriatsak che u asin. 16 Chutichuan, thu dik tak ka hrilh che u avâng hian in hmêlma ka lo ni ta em ni? 17 Ṭha lamah ni hauh si lovin, ṭhahnemngai takin an zawng chhuak ṭhîn che u a; a ni, anmahni in zawn theih nân pâwn lama khâr hnan che u an duh a ni. 18 Thu ṭha lamah erawh chuan eng lai pawhin ṭhahnemngai taka zawna awm fo hi a ṭha a ni, in hnêna ka awm lai chauh ni lovin. 19 Ka naute u, Krista chu nangmahniah siam puitlina a awm hma loh chuan, nau veiin ka vei leh che u hi. 20 A ni, tûnah hian in hnêna awma ka aw tihdanglam ka châk theihzia mai chu! In chungthuah ka mangang si a.
Hagari leh Sari tehkhin thu
21 Dân hnuaia awm duhte u, mi hrilh rawh u, Dân thu chu in ngaithla ṭhîn lâwm ni? 22 Heti hian ziak a ni si a: “Abrahaman fapa pahnih a nei a, pakhat chu bawihnu lakah, pakhat chu bawih lo nu lakah. 23 Nimahsela, bawihnu laka mi chu tisa dân angin a piang a, bawih lo nu laka mi erawh chu thutiam avângin a piang a ni,” tih hi. 24 Chûng thu chu tehkhinna a ni; chûng hmeichhiate chu thuthlung pahnih an ni; pakhat chu Sinai tlânga mi, bawih ni tûra fa hringtu chu; chu chu Hagari a ni. 25 Tin, Hagari hi Arabia rama Sinai tlâng chu a ni a, Jerusalem, tûnlaia awm nên hian angkhat an ni, a fate nên bawihah an awm si a. 26 Chung lam Jerusalem erawh chu bawih a ni lo va, chu ngei chu keini nu a ni. 27 “Nang, ching, fa hring ngai lo, hlim rawh; Nang, nau vei ngai lo, au chhuak rawh; Pasal nei mi ai chuan, khawharnu chuan Fate a nei tam zâwk si,” tih ziak a nih kha. 28 Tichuan, unaute u, keini hi Isaaka ang khân thutiam fate kan ni. 29 Nimahsela, chumi lai chuan tisa dâna lo piang chuan Thlarau dâna lo piang chu a tiduhdah ang khân, tûnah pawh chutiang bawk a ni. 30 Nimahsela, Pathian Lehkha Thuin engtin nge a sawi? “Bawihnu chu a fapa nên hnawt chhuak rawh; bawihnu fapa chuan bawih lo nu fapa chu ro a luahpui dâwn si lo,” a ti. 31 Chutichuan, unaute u, bawihnu laka fate kan ni lo va, bawih lo nu laka fate kan ni zâwk.
In zalênna hum ṭha rawh u
1 Bawih ni lo tûrin Krista chuan min chhuahtîr kha; chutichuan, ding nghet ula, bawih nghâwngkawlah chuan tâng leh tawh suh u. 2 Ngai teh u, kei Paulan in hnêna ka sawi hi, serh in tantîr chuan Krista chu in tân eng mah sâwtna a ni lo vang. 3 A ni, Dân thu zawng zawng zâwm tûra batu an ni tih, serh tantîr apiang hnênah ka hriattîr leh a nih hi. 4 Nangni Dâna thiam chan tumte u, Krista nên in inṭhen ta; khawngaihna chu in tlûksan ta. 5 Keini zawngin Thlarau zârah rinnain felna beiseina kan nghâk si a. 6 Krista Isuaah chuan serh tan eng mah a sâwt lo, serh tan loh pawh eng mah a sâwt hek lo; rinna, hmangaihnaa thawh erawh chu a sâwt a ni. 7 Ṭha takin in tlân ṭhin kha le; thutak chu in zawm loh nân tuin nge dâl ta che u? 8 He thlêmna hi a kotu che u hnên ata a ni lo ve. 9 Dawidim tlêm têin chhang hlâwm chu a pumin a fan chhuak ṭhîn. 10 Rilru danglam in pu lo vang tih Lalpaah chuan ka ring tlat a; tibuaitu che u chu tu pawh ni sela, a chunga rorêlna chu a la tuar ang. 11 Unaute u, kei hian serh tan thu hril ni ila tihduhdah ka ni cheu dâwn em ni? Chuti ni se kraws thu kan hril hian buaina a siam lo tûr. 12 Tibuaitute che u chu intan fithla law law sela ka duh a ni. 13 Nangni unaute u, bawih ni lo tûrin koh in ni si a; nimahsela, in bawih nih lohna chu tisa tâna remchângah hmang suh ula, hmangaihnain rawng inbâwlsak tawn ṭheuh zâwk rawh u. 14 “Nangmah i inhmangaih angin i vêngte i hmangaih tûr a ni,” tih thu kam khatah hian Dân thu zawng zawng chu a famkim tawh a ni si. 15 Nimahsela, in inseha, in inei tawn si chuan, in intihboral tawn loh nân fîmkhur rawh u.
Thlarau rah leh tisa thiltihte
16 Chutichuan, hei hi ka ti a ni: Thlarauvah awm rawh u; tichuan, tisa châkna chu in zâwm dâwn lo nia. 17 Tisa hian Thlarau dona lam a châk ṭhîn, Thlarau pawhin tisa dona lam a châk bawk si ṭhîn; thil tih in tumte chu in tih theih loh nân chûngte chu an inkalh si. 18 Nimahsela, Thlarau hruaia in awm chuan Dân hnuaiah chuan in awm lo ve. 19 Tin, tisa thiltihte chu a lang fiah a ni; chûng chu hêng hi a ni: inngaihna te, bawlhhlawhna te, hurna te, 20 milem biakna te, dawithiamna te, huatna te, inhauna te, thîkna te, thinurna te, inkhinna te, awm hranna te, rin hranna te, 21 îtsîkna te, zu ruihna te, zu hmun hlimna te, chuti angte chu; chûng kawngah chuan tûn hmaa, “Chutiang thil tih hmangte chuan Pathian ram an chang lo vang,” tia ka hrilh lâwk che u ang khân ka hrilh lâwk che u hi. 22 Thlarau rah erawh chu hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, 23 thuhnuairawlhna te, insûmtheihna te a ni zâwk e; chutiang kalh zâwngin Dân thupêk rêng a awm lo ve. 24 Tin, Krista Isua mite chuan tisa chu, a sual ngaihtuahna leh a châknate chawpin an khêng bet ta. 25 Thlarauva nung kan nih chuan Thlarauvah vêk i awm leh bawk ang u. 26 Incho tawna inîtsîk tawnin, i inngaihlu suh ang u.
Rit phurh inchhâwk tawnin
1 Unaute u, mi, sual eng pawh a tih lai phâwkin awm sela, nangni thlarau mite u, “Thlêmna ka tâwk ve dah ang e,” tia invêng ṭha chungin chutiang mi chu thuhnuairawlh takin tungding leh rawh u. 2 In rit phurhte chu inchhâwk tawn rawh u; chutichuan, Krista dân thu chu in zâwm a ni ang. 3 Mi, eng mah ni si lovin, mi lian deuhva a inruat chuan mahni a inbum mai a ni. 4 Mi tinin mahni thiltih fiah ṭheuh zâwk rawh se, chumi hunah chuan mi dang chung ni lovin, mahni chung chauhvah chhuan tûr a nei ang. 5 Mi tinin mahni phur an phur ṭheuh dâwn si a. 6 Tin, thu zirtîr dawngtu chuan thil ṭha zawng zawng zirtîrtu hnênah pe ve rawh se. 7 Bumin awm suh u; Pathian chu hmuhsit zia a ni lo ve; miin a theh apiang, chumi vêk chu a seng bawk dâwn si a; 8 mahni tisa lama thehtu chuan tisaa mi chhiatna a seng ang a; Thlarau lama thehtu erawh chuan Thlarauva mi chatuana nunna a seng dâwn a ni. 9 Tichuan, thil ṭha tih i ning suh ang u; kan inthlahdah loh zawngin a hun takah chuan kan seng dâwn si a. 10 Chutichuan, hun remchâng kan neih ang zêlin mi zawng zawng chungah thil ṭha i ti ang u, rinna chhûngte zînga mi chungah i ti deuh ber ang u. 11 Keima kut ngeiin in hnênah lehkha hraw pui puia ka ziak hi en rawh u. 12 Tisaa hmêl intihmawi duh apiangten serh tana awm tûrin an tîr lui ṭhîn che u a ni; eng mah dang vâng a ni lo va, Krista kraws vânga tihduhdah an tuar loh nân chauh a ni. 13 Serh tante meuh pawh chuan Dân thu an zâwm chuang si lo va, in taksaah chhuan tûr an neih theih nân serh tantîr che u an duh mai a ni. 14 Kei erawh chuan kan Lalpa Isua Krista kraws lo chu ka chhuan loh tûrzia mai chu, chumi zârah chuan khawvêl hi ka tân khen behin a awm ta, kei pawh khawvêl tân khen behin ka awm a ni. 15 Siam thar lehna lo chu serh tan hi eng mah a ni lo va, serh tan loh pawh eng mah a ni hek lo. 16 Tin, chumi dân anga awm apiangte chungah chuan remna leh khawngaihna awm rawh se, Pathian Israel-te chungah pawh. 17 Tûn achinah chuan tu mahin min tibuai tawh suh se; ka taksaah hian Isua chhinchhiahnate ka pu si a. 18 Unaute u, Lalpa Isua Krista khawngaihna in thlarau hnênah awm rawh se. Amen.
Chibai bûkna
1 Paula, Pathian duh zâwnga Krista Isua tirhkoh chuan, mi thianghlim Ephesi khuaa awm, Krista Isuaa mi rinawmte hnênah chuan: 2 Pathian kan Pa leh Lalpa Isua Krista hnên ata khawngaihna leh remna in hnênah awm rawh se.
Kristaa Thlarau lam malsâwmna
3 Kan Lalpa Isua Krista Pathian leh Pa chu fakin awm rawh se. Ani chuan vân hmunahte khian, Kristaah chuan thlarau lam malsâwmsakna tinrêngin mal min sâwm a; 4 hmangaihnaa thianghlim leh sawisêl bovin ama hmaah kan awm theihna tûrin, leilung pian hmain Kristaa min thlan ang khân; 5,6 a khawngaihna ropuizia fak tûrin ama lungduha lâwm zâwng angin, Isua Krista zârah ama tân faa siam tûra min lo ruat lâwk tawh avângin. Chu khawngaihna chu Duhtakaah chuan a thlâwnin min pe a; 7 a thisen avângin amahah chuan kan tlanna kan nei a ni - a khawngaihna ngahzia ang zêla kan bawhchhiatnate ngaihdamna chu. 8 Chu khawngaihna chuan aman fing tak leh remhre takin min vûr a ni, 9,10 a duh zâwng thurûk kan hnêna min hriattîrin; hun bi kim khawsak hunah a lâwm zâwng (engkim - vâna thil awmte, lei chunga thil awmte pawh - Kristaa fâwk khâwm tûr chu) amahin tih a tum ang khân; amah ngeiah chuan a ni. 11 Ama duh zâwnga remruat ang zêla thil engkim titu tum anga ruat lâwk ni tawhin, amahah bawk chuan a ro tûra siam kan ni, 12 keini Krista lo beisei hmasa tawhte hi a ropui fakna kan lo nihna tûrin. 13 Amahah chuan nangni pawh thutak thu (in chhandamna Chanchin Ṭha chu) in ngaihthlâka, rin pawh in rin hnuin, amahah chuan Thlarau Thianghlim tiam chuan chhinchhiahin in awm kha. 14 Chu chu Pathian ropuizia fak nân, ama ta ngei tlan chhuahna tûrin kan ro luahna tûra zakhamna a ni.
Paula ṭawngṭaina
15 Chuvângin, kei pawhin Lalpa Isuaa rinna in zînga awm, mi thianghlim zawng zawng chunga in lantîr bawk ṭhin chu ka lo hriatin, 16,17 kan Lalpa Isua Krista Pathian, ropuina Pa chuan amah hriatna kawngah finna leh hriat chiantîrna thlarau a pêk theihna tûr che uin, ka ṭawngṭainaahte chuan in hming lamin in chunga lâwm thu hrilh ka bâng lo. 18 Chutichuan, in thinlung mitte tihvâra lo awmin, ama kohna beiseina te, mi thianghlimhovah chuan a ro luah tûr ropui ngahzia te, 19-21 mitthi zîng ata a kaihthawh lai leh, lalna te, thuneihna te, thiltihtheihna te, rorêlna zawng zawng te, hemi khawvêlah chauh ni lova, khawvêl lo la awm tûr pawha hming sak tinrêngte chung daihah, vân hmunahte a ding lama a ṭhuttîr laia Kristaa a thawh, a thahrui chakna thawhzia ang zêl khân, keini ringtute lama a thiltihtheihna len nasatzia te hi eng ang nge a nih in hre thei ang. 22 Tin, thil engkim a ke hnuaiah a dah a, amah chu engkim chungah lû atân kohhran hnênah chuan a pe a, 23 kohhran chu a taksa a ni, engkim engkima tikhattu famkimna chu.
Thihna ata nunna
1 Nangni pawh in bawhchhiat leh in sualte avânga thi in nih lai khân a tinung che u a ni; 2 chûngahte chuan hmânah khân he khawvêl dân anga in awm kha, boruaka thuneihna lal, tûna awih lo fate chhûnga thâwk mêktu thlarau dân ang hian. 3 Chûng awih lo fate zîngah chuan keini pawh hmânah chuan tisa leh rilru duh zâwng tiin, kan tisa châknate angin kan awm vek a, mi dangte ang bawkin thinurna faa piang rêng kan nih kha; 4 nimahsela, Pathian chuan khawngaihna a ngahin, a mi hmangaihna nasa tak avâng khân, 5 kan bawhchhiatnate avânga thi kan nih lai meuh pawhin Krista rualin min tinung ve a (khawngaihnaa chhandam in ni ta e), 6 Krista Isuaah chuan ama rual vêka min kaithovin, vân hmunahte ama hnênah min ṭhuttîr ta a; 7 chutichuan, hun lo la thleng tûrahte chuan Krista Isuaah hian kan chungah ngilneiin, a khawngaihna ngah nasatzia chu a entîr thei ang. 8 Rinna avânga khawngaihnaa chhandam in ni si a; nangmahni thawh chhuah a ni lo va, Pathian thilpêk a ni; 9 thiltih avâng a ni lo ve; chuti lo chuan, miin an chhuang dah ang e. 10 Thil ṭha ti atân Krista Isuaah chuan siama awmin, ama kutchhuak kan ni si a; chu thil ṭha tih chu kan awmna tûrin Pathianin a buatsaih lâwk a ni.
Kristaa pumkhata siam
11 Chuvângin, hmâna nangni tisaa Jentail, tisaa kuta siam “Serh tan” an tihten “Serh tan loh” an tihate u, 12 khatih lai khân Krista lovin, Israel-ho khua leh tui nên inmihranin, khawvêlah hian beiseina rêng nei lo leh Pathian lova awmin, tiamna thuthlung lakahte mikhuala in awm kha hre reng rawh u. 13 Tûnah erawh chuan Krista Isuaah, nangni hmâna hla taka awmte kha Krista thisen chuan tihhnaihin in lo awm ta a. 14,15 Amah chu kan inremna a ni si a; ani chuan intaina (thiltih tûrahte thupêk dân awm chu) a tisaa tibovin, pâwl hnihte chu pumkhatah a siam a, an kâr pindanna bang chu a tichim a; chutichuan, amahah chuan pahnihte chu mihring thar pumkhatah siamin inremna a siam thei ang a, 16 kraws zârah, taksa pumkhatah, pahnihte chu Pathian nên a inremtîr thei bawk ang, chumi kraws chuan intaina chu a tihhlum avângin. 17 Tin, a lo kalin, nangni hla taka awm ṭhînte hnênah remna Chanchin Ṭha a hrilh che u a, hnai taka awm ṭhînte hnênah pawh remna Chanchin Ṭha a hrilh bawk a. 18 Ama zâran Thlarau hmun khata Pa hnêna luh theihna kan nei ve ve a ni. 19 Chutichuan, tûnah mikhual leh mi châm mai in ni tawh lo va, mi thianghlimte nên chuan tualkhat leh Pathian chhûngte in ni ta zâwk a ni. 20 Krista Isua ngei chu a kila lung pawimawh ber niin, tirhkohte leh zâwlneite lungphûm chunga sak in ni a; 21 amahah chuan lung rem hrang ṭheuhte rem taka chuktuahin, Lalpaah chuan biak in thianghlimah a chang zêl ṭhîn a; 22 nangni pawh amahah chuan Thlarauva, Pathian awmna tûra rem khâwm in ni.
Jentailte hnêna Paula rawngbâwlna
1 Chu vâng chuan kei Paula, nangni Jentailte avânga Krista Isua mi tâng hian - 2 nangni tân Pathian khawngaih enkawlna hna mi pêk kha in lo hre tawh châwk ang a; 3 khatia, thurûk chu hriattîrnaa hriattîra ka awm kha, hmâna tawi têa ka ziak ang thu kha; 4 khami avâng khân, in chhiarin Krista thurûk ka hriatzia hi in hre thei ang. 5 Chu chu tûnlaia a tirhkoh thianghlimte leh a zâwlnei thianghlimte hnênah Thlarau hriattîra a awm ta ang hian tûn hma lam khân mihring fate hnênah hriattîrin a awm ngai lo; 6 chu chu hei hi a ni, Chanchin Ṭha avâng hian Krista Isuaah chuan Jentailte hi ro luahpui te, taksa pêngpui te, thutiam dawnpui te an nih hi. 7 A thiltihtheihna thawh zia anga a thlâwna pêk Pathian khawngaihna chu mi pêk ang zêlin, chu Chanchin Ṭha rawngbâwltua siam ka ni. 8,9 Jentailte hnêna Krista hausakna chhui chhuah rual lohte chanchin hril tûr leh, thurûk, chatuan aṭanga Pathian, engkim siamtuah inthupa awm enkawlna chu eng nge ni tih mi zawng zawng entîr tûrin, kei, mi thianghlim zawng zawng zawnga tê ber aia tê zâwk hnênah hian chu khawngaihna chu pêk a ni. 10,11 Chutichuan, kan Lalpa Krista Isuaa tih a tum, a chatuan remruat ang zêlin, tûnlaia vân hmunahte khian lalna leh thuneihnate hnênah chuan, Pathian finna tinrêng kohhranho avângin hriattîrin a awm thei ang; 12 chu Krista Isua kan rin avâng chuan amah vêkah chuan nêlna leh ngam taka luh theihna kan nei. 13 Chutichuan, nangmahni vânga ka hrehawm tuarnate avâng hian beidawng lo tûrin ka ngên a che u, chûngte chu in ropuina a ni.
Krista hmangaihna
14-19 Chu vâng chuan Krista chu rinna avânga in thinlunga a chên theih nân, a ropuina ngahzia ang zêlin, a Thlarau zârah mihring chhûngnung lamah chuan thiltihtheihnaa tihchakin a awmtîr theihna tûr che uin, Pa, lei leh vâna chhûngkaw tinrêng hming chawi chhana hmaah chuan ka ṭhingṭhi ṭhîn a; chutichuan, Pathian famkimna tinrêng tluka tihkhaha in awm theih nân, nangni hmangaihnaa zung kai leh nghahchhan neia awmin, mi thianghlim zawng zawng nên chuan a zauzia te, a seizia te, a sânzia te, a thûkzia te hriat chian theihna leh, Krista hmangaihna hriat phâk loh hriat theihna in nei thei ang. 20 Tichuan, keimahnia thawk ṭhîn thiltihtheihna ang zêlin, kan dîl leh kan ngaihtuah zawng zawng aia nasa zâwk ti theitu hnênah ngei chuan, 21 chatuanin, chhuan zawng zawng thlengin, kohhranah leh Krista Isuaah chuan ropuina awm rawh se. Amen.
Taksa pumkhat
1-3 Chutichuan, inngaihtlâwmna leh thuhnuairawlhna zawng zawng neia, hmangaihnaa indawh tawn chunga dawhtheihna neia, remna phuarnaah chuan Thlarau inpumkhatna chu vawng tûra beia, a kohna che u phua awm tûrin, kei, Lalpaa mi tâng hian ka ngên a che u. 4 A koh chhan che u beiseina hmun khata koh in ni ang bawk khân, taksa pakhat leh Thlarau pakhat chauh a awm a; 5 Lalpa pakhat, rinna hmun khat, baptisma hmun khat, 6 engkim Pathian leh Pa pakhat chauh a awm a, engkim chungah a awm a, engkim fang chhuakin a awm a, engkim chhûngah a awm bawk a ni. 7 Nimahsela, a thlâwna Krista thilpêk tehna ang zêlin, khawngaihna chu kan hnênah ṭheuh pêk a ni. 8 Chuvângin, “Chung lama a han chhoh lai khân, Mante chu salah a hruai a, Mihringte hnênah pawh Thilpêkte a pe a,” a tih chu. 9 (Tichuan, “A han chho,” tih hi, lei hmun hnuai berahte a lo chhuk hmasak zet loh chuan engtin nge ni ang le? 10 Lo chhuka chu engkim a tihkhah theih nâna vân zawng zawng chung daiha han chhova vêk bawk kha a ni.) 11-13 Tin, rinna leh Pathian Fapa hriatna kawngah chuan thu khat vuaa, puitlinga, Krista famkimna lenzia tluka kan zaa kan lo awm hma loh zawng, rawngbâwl hna thawk tûra mi thianghlimte tihfamkim nân, Krista taksa siam ṭha tûrin ṭhenkhat chu tirhkoh atân te, ṭhenkhat chu zâwlnei atân te, ṭhenkhat chu Chanchin Ṭha hriltu atân te, ṭhenkhat chu kohhran châwmtu leh zirtîrtu atân te a pe a. 14 Chutichuan, dik lohna ngamthlêmna angin, fing vervêka mihring bum chawpin, zirtîrna thli tinrênga lehlam lehlama vawrh leh len len naupang kan ni tawh lo vang a, 15 hmangaiha thu dik tak sawiin, engkimah amahah kan ṭhang lian thei zâwk ang; amah chu Lu a ni, Krista chu. 16 Amah zârah taksa pumhlûm chuan inzawmna tinrêng thawh avânga rem taka inchuktuah leh inzawm khâwmin, pêng tin thawhzia ang ṭheuhvin hmangaihnaa insiam ṭha tûrin taksa chu a lo tipung ṭhîn a ni.
Kristaa nun thar
17 Chutichuan, Lalpaah chuan hei hi ka sawiin ka hriattîr che u a ni: Jentailte chu rilru lawilo pua an awm angin awm tawh suh ula, 18 hriat lohna anmahniah a awm, chumi hriat lohna avâng chuan Pathian nunna lakah ṭhena lo awmin, an hriatnaah chuan an lo thim a ni, an thinlung a chawlawl avângin. 19 Chûngte chuan inhriat chhuah theihna rêng rêng an neih tawh loh avângin, thil bawlhhlawh tinrêng duhâm taka ti tûrin hurnaah an inpumpêk ta a. 20 Nangni erawh chuan chutiangin Krista chu in zir lo ve; 21 a aw ngaithlaa amahah zirtîra awm in nih tawh phawt chuan, Isuaa thutak awm ang hi: 22 “In hmânlai awm dân kawnga mihring hlui, bumna châkna anga chhe deuh deuh kha hlîp thla ula, 23 in rilru thlarauvah chuan a tharin lo awm ula, 24 mihring thar, thutak felna leh thianghlimnaa Pathian anga siam khân inthuam bawk ula,” tih thu hi. 25 Chutichuan, dâwt sawi bânin, mahni ṭhenawm hnênah thu dik tak sawi ṭheuh rawh u; inpêng tawn ṭheuh kan ni si a. 26 Thinrim ula, sual erawh chu sual suh u; in thinur chu niin tlâkpui suh se; 27 Diabola chu hmun kian hek suh u. 28 Rûk hmang chuan ru tawh suh sela; tlachham hnênah chuan pêk tûr a neih theihna tûrin a kuta thil ṭha thawkin rim zâwk rawh se. 29 Thu ṭha lo rêng in kâan chhuak suh se, a ṭûlzia ang zêla siam ṭha tûrin thu ṭha apiang chhuak zâwk rawh se, a ngaithlatute tân khawngaihna a lo nih theih nân. 30 Tin, Pathian Thlarau Thianghlim chu tilungngai suh u, tlanna ni atân chuan amahah chhinchhiaha in awm kha. 31 Khâkna te, thinurna te, tauhna te, ânna te, sawichhiatna te zawng zawng chu bânsanin awm rawh se, sualna zawng zawng nên. 32 Tin, inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u.
Ênga awmte nun dân tûr
1 Chutichuan, a fa duh takte angin, Pathian awm dân latute ni rawh u. 2 Tin, Kristan a hmangaih che ua, rimtui atân Pathian hnêna thilhlanah leh inthawinaa kan aia a inpêk ang bawk khân, hmangaihnaah awm rawh u. 3 Nimahsela, mi thianghlimte tiha mawi âwm rêngin, inngaih leh bawlhhlawh zawng zawng, duhâmna nên in zîngan lam pawh lamin awm suh se; 4 zahmawh te, thu lawilo sawi te, fiamthu te pawh, chûng chu a mawi lo a ni; chûng tih ai chuan lâwm thu hrilh zâwk rawh u. 5 Inngaih hmang leh mi bawlhhlawh leh mi duhâm rêng rêng chuan (mi duhâm chu milem betu a ni a), Krista leh Pathian ramah chuan chan rêng an nei lo a ni tih in hre hle si a. 6 Tu mân thu lawilo maiin bum che u suh se; chûng thil avâng chuan Pathian thinur chu awih lo fate chungah a thleng si ṭhîn a. 7 Chuvângin, anmahni ṭâwmpui suh ang che u. 8-10 Hmânah khân thim in ni a, tûnah erawh chuan Lalpaah chuan êng in lo nih tâk hi; Lalpa lâwm zâwng eng nge ni tih fiahin, êng fate angin awm rawh u, êng rah chu ṭhatna leh, felna leh thutak zawng zawngah a lang si a. 11 Tin, thim thiltih rah nei ngai lovahte chuan telna rêng nei suh ula, tel ahnêkin a thiam lohzia hriattîr zâwk rawh u; 12 a rûka an thiltih ṭhinte chu a sawi pawh a zahthlâk si a. 13 Amaherawhchu, thil engkim a thiam lohzia hriattîra awm hi, êng tihlan a ni ṭhîn: tihlana awm apiang chu êng a ni si a. 14 Chuvângin, “Nang muhîl, meng la, Mitthi zîng ata tho rawh; Tichuan, Krista chuan A chhun êng ang che,” a tih kha. 15 Chutichuan, mi fing lote anga awm lovin, mi fingte anga awm zâwkin, in awm dânah fîmkhur rawh u; 16 nite hi a ṭhat loh avângin remchânnate lei zêl rawh u. 17 Chumi avâng chuan â duh suh ula, Lalpa duh zâwng eng nge ni tih lo hre zâwk rawh u. 18 Tin, uain ruiin awm suh u, chumiah chuan insûm lohna a awm si a; Thlarauva khatin awm zâwk rawh u. 19 Fakna hlate, Pathian hlate, thlarau lam hlatea inbe tawnin, Lalpa chu in thinlungah hla saksakin, ṭingṭang kaihsak rawh u. 20 Kan Lalpa Isua Krista hmingin, Pathian, Pa ngei hnênah chuan engkim chungah lâwm thu hril fo rawh u. 21 Krista ṭih dêkin intulût tawn ṭheuh rawh u.
Nupa awm dân tûr
22 Nupuite u, Lalpa hnêna in intulût ang hian mahni pasalte hnênah intulût rawh u. 23 Krista chu amah ngei taksa chhandamtu nia, kohhran lu a ni ang bawk hian, pasal chu nupui lu a ni si a. 24 Chutichuan, kohhranho Krista hnêna an intulût ang bawk hian, nupuite chu engkimah an pasalte hnênah intulût rawh se. 25 Pasalte u, in nupuite hmangaih rawh u, Kristan kohhran a hmangaih a, an aia mahni a inpe ang khân; 26 anni chu tuia sila thu chuan tifaiin a tihthianghlim theih nân. 27 Chutichuan, kohhran chu bawlhhlawh kai lo leh, zûr lo leh, chutiang thil rêng pu lovin, thianghlim leh hmêlhem lova awm zâwkin, amah leh amah kohhran ropui takah a inpe chawp thei ang. 28 Chutiang bawkin pasalte pawhin mahni taksate angin mahni nupuite chu an hmangaih tûr a ni, mahni nupui hmangaihtu chu mahni inhmangaih a ni. 29 Tu mân mahni tisa an haw ngai si lo va; an châwmin an duat zâwk ṭhîn a ni. Kristan kohhran a châwma a duat ang hian; 30 a taksa pêngte kan ni si a. 31 Chumi avâng chuan mipain a nu leh pa kalsanin a nupui a vuan ang a; tin, an pahnih chuan tisa pumkhat an lo ni tawh ang. 32 Hei hi thuril thûk tak a ni; kei chuan Krista leh a kohhran thu a sawina niin ka hria. 33 Eng pawh ni se, tu pawhin mahni a inhmangaih angin mahni nupui hmangaih ṭheuh sela, nupui pawhin a pasal hlau thiam rawh se.
Naupangte leh nu leh pa
1 Naupangte u, Lalpaah chuan in nu leh in pate thu zâwm rawh u; chu chu thil dik a ni si a. 2 I nu leh i pa chawimawi rawh (chu chu thupêk tiam nei hmasa ber a ni); 3 chutichuan, i tân a ṭha ang a, leiah hian i dam rei bawk ang. 4 Tin, nangni pate u, in fate tithinur suh ula, Lalpa thununnaah leh zilhnaah chuan enkawl zâwk rawh u.
Bawihte leh an pute
5-8 Bawihte u, Krista thu zâwm angin ṭih dêk leh khûra thinlung sakhat vuain, mihring tilâwmtute mai anga mit rawng bâwl lovin, Krista bawih anga thinlunga Pathian duh zâwng ti zâwkin, mihring rawng bâwl ang mai ni lovin, Lalpa rawng bâwl ang zâwka duh tak chunga rawng bâwlin, bawih ni sela, bawih ni suh sela, mi tinin thil ṭha an tih apiang chu Lalpa hnên ata a ngai vêk an hmu leh ang tih hriain, tisaa in hotute thu zâwm rawh u. 9 Tin, nangni hotute u, chutiang bawkin, anmahni leh nangmahni Hotu chu vânah a awm tih leh, ani chuan mi duhsak bîk a nei lo tih hriain, vau lovin an chungah ti ve rawh u.
Pathian râlthuam famkim
10 A tâwp berah chuan, Lalpaah leh a chakna thahruiah chuan thiltihtheihna neiin lo awm rawh u. 11 Diabola ngamthlêmnate chu in do zawh nân Pathian râlthuam famkimin inthuam rawh u. 12 Kan buante hi tisa leh thisen an ni si lo, lalnate leh, thuneihnate leh, he thim chunga khawvêl rorêltute leh, vân hmunahte thlarau sualho awmte an ni zâwk e. 13 Chuvângin, ni ṭha lovah chuan in do zawhna tûr leh, in tih zawh vek hnu pawha in din theihna tûrin, Pathian râlthuam famkim chu la rawh u. 14 Chutichuan, in kâwng chu thutaka hrêngin, felna âwmphaw chu hain, 15 remna Chanchin Ṭha inbuatsaihna chu in keah bunin ding rawh u; 16 chûng lo pawh chu rinna phaw la ula, chu chuan mi sual thal alh thei zawng zawng chu in timit thei ang. 17 Tin, Chhandamna lukhum leh Thlarau ngûnhnâm (Pathian Thu chu) la ula, 18 ṭawngṭaina leh dîlna tinrêngin eng hun pawha Thlarauva ṭawngṭaiin, chumi kawngah chuan mi thianghlim zawng zawng tân ṭhahnemngai tak leh dîl tlatin ngaihven rawh u; 19 Chanchin Ṭha thurûk huai taka puang tûra ka kâ ka âna, thu sawitîra ka awm theih nân ka tân pawh mi dîlsak rawh u, 20 chumi kawngah chuan ka sawi tûr ang chu huai taka ka sawi theihna tûrin, chumi Chanchin Ṭha palai khaidiat bun ka ni.
Chibai bûkna
21 Nimahsela, nangni pawhin engtin nge ka awm, ka chanchin in hriat theih nân, Tukika, Lalpaa unau duh tak leh rawngbâwltu rinawm tak hian engkim a hriattîr ang che u; 22 hemi vâng tak hian amah chu in hnênah ka rawn tîr a ni, ka chanchin in hriat theihna tûr leh, ani hian in thinlung a tihthlamuan theihna tûrin. 23 Pa, Pathian leh Lalpa Isua Krista hnên ata remna leh rinna tel hmangaihna chu unaute hnênah khân awm rawh se. 24 Kan Lalpa Isua Krista chuai lova hmangaihtute zawng zawng hnênah khawngaihna awm rawh se.
Chibai bûkna
1 Paula leh Timothea, Krista Isua bawihte chuan, Krista Isuaa mi thianghlim, Philippi khuaa awm zawng zawngte hnênah, kohhran hotute leh rawngbâwltute hnênah nên: 2 Pathian kan Pa leh Lalpa Isua Krista hnên ata khawngaihna leh remna in hnênah awm rawh se.
Philippi mite tâna Paula ṭawngṭaina
3-5 Ni hmasa ber aṭang khân tûn thlengin Chanchin Ṭha puan darhnaa in tel ve ṭhin avângin, ka hriat chhuah apiang che uin ka Pathian hnênah lawm thu ka hril ṭhîn, nangmahni zawng zawng ka ṭawngṭaisakna che u apiangah hlim taka dîl fovin. 6 Nangmahnia thil ṭha ti ṭantu khân Isua Krista ni thlengin a tifamkim zêl dawn, chu ngei chu ka ring tlat si a. 7 Nangmahni zawng zawng lamah chutiang rilru put chu keia tân chuan a âwm rêng a ni, ka thinlungah ka vawn che u avângin; ka kawl bunnaah te, Chanchin Ṭha thiamna thu ka sawinaah leh ka tihnghehnaahte pawh, in zain khawngaihna chu mi ṭâwmpuitute in ni si a. 8 Krista Isua lainatna chuan in zavaiin ka ngaihzia mai che u chu, Pathian mi hriatpuitu a ni asin le. 9 Tin, in hmangaihnain hriat famkimna leh bengvârna tinrêng a ngah lehzual nân ka ṭawngtai ṭhîn; 10,11 chutichuan, Pathian ropuina leh fakna tûra Isua Krista zâra felna rah awm chuan lo khatin, Krista ni atân chuan a tak tak leh sawisêl bo in nih theihna tûrin, thil ṭha bîkte chu ṭha in ti thei ang.
Keia tân zawng nun hi Krista a ni
12 Tin, unaute u, ka chunga thil lo thlengte kha Chanchin Ṭha tihdarhna tûr a lo ni ta hlauh zâwk tih in hriat ka duh a ni; 13 chutichuan, ka kawl bunnate hi Praitorian sipai pâwl zawng zawng zîngah leh, mi dang zawng zawng hnênah chuan Krista avâng a ni tih a lang chhuak ta: 14 Lalpaa unau tam zâwkte pawh chuan ka kawl bunte avânga lo ring tlatin, hlau lovin Pathian thuhril kawngah an huai nasa lehzual a ni. 15 ṭhenkhat chuan îtsîkna leh elrelna avângin Krista thu chu an hril ṭhîn a, a ṭhen erawh chuan rilru ṭha tak puin an hril ṭhîn a; 16 chûngte chuan Chanchin Ṭha ṭan tûrin Pathianin hna mi pe a ni tih hriain, hmangaihna avângin an hril ṭhîn. 17 Mi ṭhenkhat zawngin an ti tak tak lo, elrelna avâng chauhvin, kawl ka bun chungchângah hian lungngaihna mi belhchhahsak tûra ti an ni. 18 Eng nge a pawina? A derin emaw, a takin emaw Krista Thu chu hril a ni ta rêng rêng a, chu chuan mi tilâwm tho ve. A ni, ka lâwm zêl ang. 19 Chu chu in mi ṭawngṭaisakna avâng leh Isua Krista Thlarau mi pêk avângin, ka chhandamna a lo ni dâwn tih ka hre si a; 20 engah mah tihmualphovin ka awm dâwn lo va, huai taka ka awm pângngai ang fovin, tûnah pawh nunna avângin emaw, thihna avângin emaw, ka taksaah Krista chawimawiin a awm zâwk dâwn tih ka beiseina leh ka châkna ang zêl hian. 21 Keia tân zawng nun hi Krista a ni si a, thih pawh hlâwkna a ni. 22 Nimahsela, tisaa nun hi ka chan ni sela, chu chu ka hnathawh rah ni ang sela, chutichuan, a eng nge ka thlan zâwk dâwn zawng ka hre lo. 23 A lai laklawhah hian a ngaihna hre lovin ka awm mai a ni; kal chhuaha Krista hnêna awm châkna ka neih avângin, chu chu a ṭha zâwk êm êm si a. 24 Nimahsela, nangmahni avângin tisaa awm reng hi a ṭûl zâwk a ni. 25 Tin, chu chu ka rin tlat avângin ka awm reng dâwn tih ka hria, a ni, rinnaah chuan in lo ṭhan lenna tûrin in zaa hnênah ka awm reng dâwn tih ka hria. 26 Chutichuan, in hnêna ka awm leh dâwn avângin, in mi chhuanna chu Krista Isuaa a nasat lehzual theihna tûrin. 27,28 Eng pawh ni sela, in awm dân chu Krista Chanchin Ṭha nên inmawi phawt rawh se; chutichuan, nangmahni rawn kan che u mah ila, in hnênah awm lo mah ila, thlarau hmun khata ding nghetin, rilru hmun khata Chanchin Ṭha rinna thu ṭana bei tlângin, dotute eng kawngah mah hlau lovin in awm tih in chanchin ka hre thei ang; chu chu anmahni tân boral tûr an nih hriattîrna fiah tak a ni, nangni tân erawh chuan chhandam tûr in nih hriattîrna fiah tak a ni zâwk e, chu pawh chu Pathian laka mi a ni. 29 Krista avânga amah in rin chauh ni lovin, amah avânga in tuar pawh phal a ni si a; 30 indona, keimaha in hmuh ṭhin, tûnah pawh keimahah a awm tih in hriat, chumi ngei chu in neih ve tâk hi.
Krista inngaihtlâwmna leh a ropuina
1 Chutichuan, Kristaah ṭanpuina rêng rêng te, hmangaih thlamuanna rêng rêng te, Thlarau pâwlna rêng rêng te, lainatna leh khawngaihna rêng rêng te a awm chuan, 2 rilru hmun khata awmin, hmangaihna hmun khat neiin, inthuruala rilru hmun khata awmin, ka lâwmna tifamkim rawh u. 3 Elrel leh inngaihhlut avânga eng mah ti lovin, mi tinin inngaitlâwm takin mahni aiin mi dang ṭha zâwkah ruat ṭheuh rawh se; 4 mahni ta ta mai en lovin, mi dang ta pawh en ṭheuh zâwk rawh u. 5 He rilru, Krista Isua pawha awm bawk kha, nangmahniah awm rawh se; 6 ani zawngin Pathian anga awma, Pathian tluka awm chu thil thlâkhlelh hleih theihah a ruat lo va, 7 mihringte anga lo piangin, bawih angah a insiam a, amah leh amah a intitlâwm ta zâwk a. 8 Tin, mihring anga lo awmin a inngaitlâwm a, thi khawp hiala thu zâwmin a lo awm ta a, krawsa thihna ngei chu. 9-11 Chumi avâng chuan Isua hmingin mi tin - vâna mite, leia mite, lei hnuaia mite nên - an ṭhingṭhit nân leh Pa Pathian tihropuina tûrin, “Isua Krista chu Lal a ni,” tiin lei tinrêngin a puan nân, Pathianin ani chu nasa takin a chawimawi ve ta thung a, hming zawng zawnga hming chungnung ber chu a pe ta a. 12 Chutichuan, ka duh takte u, thu in zawm fo ang khân, ka awm chauhva thawk lovin, tûna ka awm loh hlân hian thawk zâwk mahin, hlau leh khûr chungin nangmahni chhandamna thawk chhuak rawh u; 13 ama lâwm zâwng atâna tih tum tûr leh bei tûra nangmahnia thawktu chu Pathian a ni si a.
Êng anga khawvêla ên
14-16 Chhuan bengtlalo leh tihmawhte zînga sual nei lo leh nun tlang, Pathian fa sawisêl bote in nih theihna tûrin, phunnawina leh inhnialnate awm lovin engkim ti rawh u (chûngho zîngah chuan nunna thu hlânin khawvêlah hian tiêngtu angin in lang ṭhîn), chutichuan, a thlâwna tlân ka nih lohva, a thlâwna thawk rim ka nih hek loh avângin Krista niah chuan chhuan tûr ka nei thei ang. 17 A ni, in rinna inthawina leh rawngbâwlna chungah chuan leih buakin awm dâwn mah ila ka lâwm a ni, in zain ka lâwmpui bawk a che u. 18 Chutiang bawkin nangni pawh lâwm ulangin, mi lâwmpui ve rawh u.
Timothea leh Epaphrodita
19 Nimahsela, in chanchin ka hriata ka thlamuan ve theihna tûrin, rei lo tê chinah Timothea hi in hnêna rawn tirh Lalpa Isuaah chuan ka beisei a ni. 20 Hetiang rilru pu, in awmzia tihtakzeta ngaihtuahsaktu tûr che u tu mah ka nei si lo. 21 An zain Isua Krista tân zawng lovin, mahni tân an zawng si ṭhîn. 22 Nimahsela, ani hi chu fiaha a awm tawhzia in hria, fain a pa rawng a bâwl angin, Chanchin Ṭha tihdarh kawngah rawng mi bâwlpui ṭhin kha. 23 Chutichuan, ka chanchin tûr ka hriat veleh ani hi rawn tîr nghâl ila ka ti a ni. 24 Nimahsela, keimah ngei pawh rei lo tê china lo kal Lalpaah chuan ka inring tlat a ni. 25 Nimahsela, Epaphrodita, ka unaupa, ka hnathawhpui, ka sipaipui leh in tirhkoh, ka thil tlâkchhama mi chhawmdâwltu hi in hnêna rawn tirh ṭûlin ka hria. 26 Ani chuan in zain a ngai êm êm si che u a, a nâ tih in lo hriat avângin nasa takin a lungngai bawk a. 27 Thichhâwnga nâ zawng a ni ngei tak a; nimahsela, Pathianin ani chu a khawngaih a; tin, ani chang ni lovin, lungngaih chunga lungngaih lehzualna ka neih loh nân kei mi khawngaih a ni fâwm bawk e. 28 Chutichuan, ani hi in hmuh leh huna in lâwm theihna tûr leh, kei ka lungngaih a ṭhathnem theihna tûrin ka rawn tîr hmanhmawh deuh a ni. 29 Chutichuan, ani hi hlim takin Lalpaah chuan lo lâwm ulangin, hetiang mi hi ngaihlu rawh u; 30 in mi chhawmdâwlna tlin bâk chu chhunzawm nân thih dâwn lova beiin, Krista hna thawhna avângin thichhâwngin a lo awm ta si a.
Thiamchanna dik
1 A tâwp berah chuan ka unaute u, Lalpaah lâwm rawh u. Thu pângngaite in hnêna ziak nawn leh hi keia tân zawng ninawm a ni lo ve, nangni tân a sâwt bawk si a. 2 Ui lakahte chuan fîmkhur rawh u, thil ṭha lo titute lakah chuan fîmkhur rawh u. Innghaisaho lakah chuan fîmkhur rawh u. 3 Keini, Pathian Thlarau zâra Pathian bia leh, Krista Isua chhuang leh, tisa chunga rinna rêng nghat lotute hi serh tanho kan ni zâwk si a. 4 Duh phei ila, kei pawh tisa chunga rinna nghat thei ka ni asin. Mi dang rêng rêngin tisa chunga rinna nghahchhan neia an inruat chuan, kei ka inruat lehzual a ni. 5 Ni riat nia serh tan, Israela thlaha mi, Benjamin chia mi, Hebraite laka Hebrai-a piang ka ni a; Dân lamah chuan Pharisai ka ni a; 6 ṭhahnemngaih lamah chuan kohhranho tiduhdahtu ka ni a; Dân thua felna lamah chuan sawisêl bo ka ni. 7 Nimahsela, ka tâna hlâwkna tûr apiangte chu, chûng chu Krista avângin chânnaah ka ruat ta a ni. 8 A ni takmeuh mai, ka Lalpa Krista Isua hriatna ropui bîkzia avângin thil engkim pawh chânnaah ka ruat a ni; amah vângin thil zawng zawng ka chân ta vek a, chûng chu hnâwmhneah lek ka ngai a, Krista ka hmuh theihna tûr leh, 9 mahni felna (Dâna felna chu) nei lovin, Krista rin avânga felna (rin avânga Pathian laka felna chu) nei zâwkin, amaha awm ka lo nih theihna tûrin; 10 a thihna anpuia thiin, amah nên, a thawhlehna thiltihtheihna nên, a tuarnate ṭâwmpuina nên ka hriat theih nân; 11 mitthi zîng ata thawhlehna chu ka chang thei hrâm mahna, tiin.
Tiam chin lam pan
12 Hmu tawh reng inti ka ni lo va, famkim tawh reng inti pawh ka ni hek lo; “Krista mi man chhan chu ka man thei dah law maw,” tiin, a ûmin ka ûm zâwk a ni. 13 Unaute u, manah ka inngai lo. Amaherawhchu, he thil pakhat hi ka ti ṭhîn - hnung lama thil awmte chu theihnghilha, hma lama thil awmte chu banin, 14 Krista Isuaa Pathian chung lam koh chhan lâwmman hmu tûrin, tiam chin lam chu ka pan ṭâlh ṭâlh a ni. 15 Chutichuan, puitling apiang chutiang rilru puin i awm ang u; tin, eng kawngah pawh rilru danglam pu in lo nih chuan, chu pawh chu Pathianin a la hriattîr ang che u. 16 Eng pawh ni sela, kan thlen chin aṭang khân hma i sâwn zêl ang u. 17 Unaute u, ka awm dân zirtute lo ni hlawm rawh u; tin, entawn tûr keini min nei a, chumi ang zêla awmte chu en ṭha rawh u. 18 Mi tam tak an kal a, chu mite chu Krista kraws hmêlma an ni tih an chanchin ka hrilh fo che u kha, tûnah pawh ṭap chungin ka hrilh che u hi; 19 chûngho tâwpna chu boralna a ni, an Pathian chu an pum a ni, an ropuina pawh chu an mualphona a ni, khawvêl thil an duh ṭhîn a ni. 20 Keini zawng vân khua leh tui kan ni si a, vân aṭanga min chhandamtu Lal Isua Krista lo kal tûr chu nghâkhlel takin kan thlîr a ni. 21 Ani chuan a thawhin, engkim pawh ama thu thuin a awmtîr thei, chumi thawhzia ang zêlin, kan tlâwm lai taksa hi ama taksa ropui anga awm tûrin a siam ṭha leh ang.
1 Chuvângin, ka unau duh tak leh ngaih tak, ka lâwmna leh ka lallukhumte u, chutiang chuan Lalpaah ding nghet tlat rawh u, ka duh takte u.
Fuihna
2 Lalpaah chuan rilru hmun khat pu tûrin Euodii ka ngên a, Suntuki pawh ka ngên bawk a ni. 3 A ni, nang pawh, ka nghâwngkawl bahpui tak tak, ka sâwm bawk a che; khâng hmeichhiate kha ṭanpui rawh. Chanchin Ṭhaah chuan mi beihpui si ṭhîn a, Klemena nên, ka thawhpui dang Nunna Bua hming chuangte nên khân. 4 Lalpaah chuan lâwm fo rawh u; ka ti leh pek ṭhîn ang, lâwm rawh u. 5 In dawhtheihzia mi zawng zawng hriat ni rawh se. Lalpa chu a hnai e. 6 Engah mah mangang suh u; engkimah ṭawngṭai leh dîlin, lâwm thu hril tel zêlin, in duhnate chu Pathian hnênah hriattîrin awm zâwk rawh se. 7 Tichuan, Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u. 8 A tâwp berah chuan unaute u, a dik apiang te, a zahawm apiang te, a fel apiang te, a thianghlim apiang te, a duhawm apiang te, a thang mawi apiang te - ṭhatna rêng a awma, fakna rêng a awm awm phawt chuan - chûng chu ngaihtuah rawh u. 9 In thil zir te, in thil pawm te, in thil hriat te, keimaha in thil hmuhte pawh kha, khâng ang kha ti ṭhîn ang che u; tichuan, Thlamuanna Pathian chuan a awmpui ang che u.
Philippi mite thilpêk avânga Paula lâwm thu
10 Nimahsela, in mi ngaihtuahzia tûn hnua in rawn tihthar leh tâk avâng hian, Lalpaah chuan ka lâwm hle a ni; chutiang kawng chu ngaihtuah kha zawng in ngaihtuah teh meuh va, remchâng erawh chu in hmu lo mai a ni. 11 Ka tlâkchham thu sawi zawng ka ni lo ve; kei zawng eng ang pawhin awm mah ila, lungawi zêl ka chîng tawh si a. 12 Tlâwm taka awm dân ka thiam a, hausaa awm dân pawh ka thiam bawk a; thil tinrêngah leh thil zawng zawngah tlai leh rilṭâma awm dân, hausa leh tlachhama awm dân thurûk chu ka hre chhuak tawh. 13 Mi tichaktuah chuan engkim ka ti thei a ni. 14 Nimahsela, ka mangannaahte hian mi lo manganpui hi in tiṭha e. 15 Tin, nangni Philippi-a mite u, Chanchin Ṭha thlen tirh laia Makedonia ram aṭanga ka kal chhuah lai khân, nangni chauh lo chuan, kohhran pâwl pakhat mahin thilpêk leh dawn kawngah chuan mi ṭanpui lo tih nangni ngeiin in hre bawk a; 16 Thessalonika khuaa ka awm lai pawh khân, ka tlâkchhamna phuhrûk tûrin, vawi khat chang ni lovin, vawi hnih lai in rawn thawn kha. 17 Thilpêk chu ka zawng a ni lo va; rah, nangmahni lama pung tûr chu zawng ka ni zâwk e. 18 Nimahsela, engkim ka nei a, ka ngah a ni; Epaphrodita kuta in thil mi thawnte chu ka lo hmu a, ka phuisui ta. Chûng chu englo rimtui rim, inthawina chhân tlâk, Pathian lâwm zâwng a ni. 19 Tin, ka Pathian chuan Krista Isuaa a ropuina ngahzia ang zêlin, in tlâkchhamna tinrêng pawh a phuhrûksak ang che u. 20 Tin, kan Pathian leh kan Pa hnênah chuan chatuanin ropuina chu awm rawh se. Amen.
Chibai bûkna
21 Krista Isuaa mi thianghlim tinrêng chibai mi bûksak ang che u. Ka hnêna unau awmte hian chibai an bûk a che u. 22 Mi thianghlim zawng zawngten chibai an bûk che u a, Kaisara chhûngte zînga mi hian an bûk deuh ber a che u. 23 Lalpa Isua Krista khawngaihna chu in thlarau hnênah awm rawh se.
Chibai bûkna
1 Paula, Pathian duh zâwnga Krista Isua tirhkoh leh kan unau Timothea chuan, 2 Kolossa khuaa Kristaa mi thianghlimte leh unau rinawmte hnênah chuan: Pathian kan Pa hnên ata khawngaihna leh remna in hnênah awm rawh se.
Kolossa Kristiante avângin Paula a lâwm
3-5 Vânah in tân beiseina an dahsak che u avângin, Krista Isua in rinzia leh mi thianghlim zawng zawngte chunga hmangaihna in neihzia kan lo hriat achin in tâna ṭawngṭai fovin, Pathian, kan Lal Isua Krista Pa hnênah chuan lâwm thu kan hril ṭhîn a. Chumi beiseina chanchin chu, hmânah Chanchin Ṭha thutak thu-ah khân in hre tawh. 6-7 Chumi Chanchin Ṭha chu khawvêl zawng zawngah rahin a pung zêl ang bawk hian, in hnêna a thlen kha. Chutiang bawkin Epaphra, kan bawihpui duh tak laka in zir angin, tihtakzeta Pathian khawngaihna chu in ngaihthlâka in hriat ni achinah khân, nangmahniah pawh rahin a pung zêl ṭhîn a ni. Epaphra hi kan aiawhin Krista rawngbâwltu rinawm tak a ni a, 8 ani hian Thlarauva in hmangaihna chu min hrilh bawk a.
Krista mizia leh a hnathawh
9 Chumi avâng chuan thlarau lam finna leh hriat theihna zawng zawng kawngah ama duh zâwng hriat famkimnaah chuan in lo khah theih nân, kan hriat ni achin chu keini pawhin ṭawngṭai leh dîlsak che u kan bâng lo. 10-12 Chutichuan, hnathawh tinrênga lo rahin, Pathian hriat famkimna kawnga lo sâwt deuh deuhvin, hlim taka chhelna leh dawhtheihna tinrêng nei tûra a ropuina chakzia ang zêla chakna tinrênga lo chakin, Pa, ênga mi thianghlimhote ro chu ṭâwm ve tlâka min rawn siamtu hnênah chuan lâwm thu hrilin, kawng tinrênga amah tilungawi tûrin Lalpa zui tlâkin in awm thei ang. 13 Ani chuan thim thuneihna laka min chhanchhuakin, a Fapa hmangaih taka ramah chuan min kaitîr ta a; 14 amahah chuan kan tlanna kan hmu a ni - kan sualte ngaihdamna chu. 15 Ani chu hmuh theih loh Pathian anpui, thil siam zawng zawnga piang hmasa ber chu a ni a; 16 amahah chuan engkim siam a ni a, vâna awmte, leia awmte nên, hmuh theihte, hmuh theih lohte nên, lalṭhutphahte pawh, rorêlnate pawh, lalnate pawh, thuneihnate pawh; engkim ama siam a ni, ama ta tûr bawka siam a ni; 17 tin, ani hi chu engkim awm hmain a awm rêng a ni, amahah chuan engkim a ding ho bawk a ni. 18 Ani chu taksa (chu chu kohhranho) lu a ni a; engkimah chungnung ber a lo nih theih nân, a bulpui, mitthi zîng ata piang hmasa bera chu a ni. 19,20 Famkimna tinrêng chu amaha awm reng leh, a kraws thisen chuan remna lo siamin, amahah chuan engkim amah nêna inremtîr hi Pa lungnih zâwng tak a ni si a; amah ngeiah chuan leia thil awmte pawh, vâna thil awmte pawh amah nêna inremtîr hi. 21,22 Tin, nangni hmâna in thiltih sualnaah khân ama lakah ṭhenin in lo awm a, in rilruah chuan a hmêlma in lo nih bawk kha; nimahsela, tûnah zawng, a hmaah chuan thianghlim tak leh, hmêlhem lo leh sawisêl bova a dintîrna tûr che uin, a thihnain a tisa taksaah chuan amah nên a inremtîr tawh che u a ni; 23 nghahchhan neia nghet taka awma, Chanchin Ṭha in hriata beiseina aṭanga pêng bo ṭhîn lova, rinnaah hian in awm reng phawt chuan; Chanchin Ṭha chu vân hnuaia thil siam zawng zawngte zînga tlângaupui a nih kha; kei Paula hi chumi rawngbâwltua siam ka ni.
Paulan kohhran rawng a bâwlna
24 Tûna ka tuarsakna che uah hian ka lâwm a, Krista hrehawm tuar bâk chu a taksa avângin ka tisaah hian ka chhunzawm zêl a ni; a taksa chu kohhranho hi an ni. 25 Pathian thu hril kim tûra enkawlna hna Pathianin in tân mi pêk ang zêlin, chûngho rawngbâwltua siam ka ni. 26 Chu Pathian thu chu kumkhua leh chhuan zawng zawng laka thurûk inthup kha a ni a; tûnah erawh chuan a mi thianghlimte hnênah lantîrin a awm ta. 27 Chûng mite hnênah chuan hnam tin tâna a thurûk ropui leh hlu tak chu Pathianin hriattîr a duh rêng a ni; chu thurûk chu Krista, nangmahnia awm ropuina beisei chhan chu a ni; 28 mi tin Kristaah chuan ṭha famkima kan dintîr theihna tûrin, mi tin zilhin, mi tin finna tinrênga zirtîrin, a chanchin kan hril ṭhin hi; 29 chumi ti thei tûr chuan Krista chakna nasa tak keimaha thawk ṭhîn chu hmangin ka bei ṭâlh ṭâlh a, rim takin ka thawk ṭhîn a ni.
1 Nangmahni leh Laodikei khuaa awmte leh, tisaa ka hmêl hmu lo apiangte tân, eng ti kauva nasain nge ka beihsak ṭâlh ṭâlh che u hi in hriat ka duh si a; 2,3 chutichuan, Pathian thurûk (finna leh hriatna ro zawng zawng thuhrûkna Krista chu) an hriat theih nân, hriata rin tlatna lukhâwng zawng zawng chu dawng tûra hmangaihnaa insuih khâwmin, an thinlungte chu thlamuangin a awm thei ang. 4 Tu mân ṭawngkam thiamin an bum loh nân che u, chûng chu ka ti a ni. 5 Tisain in hnênah awm mah suh ila, lâwm taka awmin, in felzia leh Krista in rin nghehzia enin, thlarauvah chuan in hnênah ka awm si a.
Kristaa nun famkim
6,7 Chuvângin, Krista Isua, Lalpa chu in lâwm ang khân, amaha zung kai leh rem chhoh deuh deuhva awmin, an zirtîr che u ang khân in rinnaah chuan nghet taka awmin, lâwm thu sawi lo uarin, amahah chuan awm rawh u. 8 Fîmkhur rawh u; chuti lo chuan, tu pawhin Krista thu ang ni lovin, mihring thurochhiah leh khawvêl a aw b ang zâwkin, an thufing leh bumna mai maiin râllâkin an la dah ang che u. 9 Amahah chuan Pathian famkimna tinrêng chu taksa neiin a awm reng si a. 10 Amahah chuan in famkim ta bawk a; ani chu lalna leh thuneihna zawng zawng lu a ni. 11 Krista serh tannaah chuan tisa taksa hlîp vekin, amah vêkah chuan kuta serh tan ni lova serh tan in nih kha; 12 baptisma-ah chuan a hnêna phûm in lo ni ve tawh si a, chumi vêkah chuan mitthi zîng ata amah kaithotu Pathian hnathawh rin avânga a hnêna kaihthawh in nih ve kha. 13 Tin, nangni in bawhchhiatnate leh in tisaa serh tan lohna avângin thi in lo ni a, nangmahni ngei chu amah nên a tinung che u a nih kha; kan bawhchhiatna zawng zawngte min ngaidam a, 14 batna lehkha thupêka ziak, kan chunga awm, min dodâl ṭhîna chu a thai bo tawh si a: chu ngei chu krawsa khêng betin a la kiang ta a; 15 tin, lalna leh thuneihnate chu hlîp thlain, chu krawsah chuan chûngte chu hnehin, a langin hriattîr nân a hmang ta a. 16 Chutichuan, ei thu-ah emaw, in thu-ah emaw, kût ni thu-ah emaw, thla thar thu-ah emaw, Chawlhni thu-ah emaw tu mân sawisêl che u suh se; 17 chûng chu thil lo thleng tûrte hlim a ni, a tak erawh chu Krista ta a ni. 18 Taksa hi ngaihnêp tûr, vântirhkohte pawh biak tûr, tia inlârna danglam bîk hmua insawi, eng mah ni si lova chapohote chuan thiam loh chantîr che u suh se. 19 Chûnghote chuan Lû, Krista chu an vuan tawh lo a ni. Ama zârah chuan taksa pum pui, bung hrang hrangin inzawm khâwm chu châwmin a awm a, Pathian duh zâwng ang zêlin a ṭhang lian ṭhîn a ni.
Kristaa thih leh nun
20 Khawvêla zirtîrna dik lote chu Kristaah in thihsan tawh si chuan, engtizia nge khawvêl dâna nung ang maia, mihringte zirtîrna, “Tawk suh la, tem hek suh la, deh pawh dek suh,” 21 tih thupêk lakah in intukluh leh tâk mai? 22 Chûng thilte zawng zawng chu ei zawha ral mai thil a ni. 23 Hêng - vântirhkoh biak tûr tih te, taksa ngaihnêp tih te, taksa tihhrehawm tih te hi ṭha âwm tak chuan a lang a; mahse, tisa duh zâwng hneh nân a ṭangkai si lo.
1 Chutichuan, Krista hnênah kaihthawha in awm ve tawh chuan chung lam, Pathian ding lama ṭhu Krista awmnaa thil awmte chu zawng rawh u. 2 Chung lama thil awmahte chuan in rilru nghat tlat rawh u, leia thil awmahte chuan nghat lovin. 3 In thi tawh a, in nunna chu Pathianah chuan Krista hnênah thuhrûkin a awm si a. 4 Krista, kan nunna chu a lo inlâr hunah chuan, nangni pawh ama hnênah ropui zîngah in inlâr ve ang.
Nun hlui leh nun thar
5 Chutichuan, in taksa pêng leia awmte hi tihlum rawh u, inngaihna te, bawlhhlawhna te, hurna te, châkna sual te, duhâmna te hi (duhâmna chu milem biakna a ni si a); 6 chûng thil avâng chuan a ni, Pathian thinur chu awih lo fate chunga a thlen ṭhin ni; 7 nangni pawh hmânah chûng thilahte chuan in nun lai khân, chûngahte chuan in awm ṭhin kha. 8 Tûnah erawh chuan nangni pawhin hêng zawng zawng - tauhna te, thinurna te, huatna te, sawichhiatna te, in kâa chhuak ṭawng zahmawh te hi tibo rawh u. 9 Dâwt inhrilh tawn suh u; mihring hlui chu a thiltihte chawpin in hlîp thla tawh a, 10 mihring thar chuan in inthuam tawh si a, chu mihring thar chu hriat famkimna nei tûrin, a siamtu anpui anga siam tharin a awm mêk a ni; 11 chumiah chuan Grik mi leh Juda mi, serh tan leh tan loh, awze mite, Skuthia mi te, bawih te, bawih lote pawh a awm theih loh; Krista chu engkim ni zâwkin, engkimah a awm bawk a ni. 12 Chutichuan, Pathian mi thlan, mi thianghlim leh duh takte angin, lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te chuan inthuam rawh u, 13 tu pawhin tu chungah pawh thupawi nei ang ula, indawh tawnin inngaidam tawn ula; Lalpan a ngaidam che u ang tak khân ngaidam ve rawh u. 14 Tin, chûng zawng zawng chungah chuan hmangaihna inbel rawh u, chu chu phuar famkimna a ni. 15 Tin, Krista thlamuanna chuan in thinlungah ro rêl rawh se, chutiang ni tûrin taksa pumkhata koh in ni rêng asin; lâwm nachâng hre bawk rawh u. 16 Krista thu chu finna tinrêngin nangmahniah awm ṭeuh rawh se; fakna hla te, Pathian hla te, thlarau lam hla tea inzirtîrin inzilh tawn ula, thinlungah khawngaihna neiin Pathian chu hla saksak rawh u. 17 Tin, in tih apiang chu thusawiah emaw, thiltihah emaw, ama zârah Pa Pathian hnêna lâwm thu hril chungin, Lalpa Isua hmingin ti vek rawh u.
Nun thara inlaichîn dân tûr
18 Nupuite u, Lalpaa a âwm tâwk ang zêlin in pasalte hnênah intulût rawh u. 19 Pasalte u, in nupuite hmangaih ula, an lakah vîn suh u. 20 Naupangte u, engkimah in nu leh in pate thu zâwm rawh u, chu chu Lalpaah chuan a lâwmawm si a. 21 Pate u, in fate tinuar suh u; chuti lo chuan, an bei a dawng dah ang e. 22 Bawihte u, tisaa in hotute thu hi engkimah zâwm rawh u, mihring tilâwmtute mai anga mit rawng bâwl lovin, thinlung sakhat vuaa Lalpa ṭih dêk chungin zâwm zâwk rawh u. 23,24 A rulhna ro luah tûr chu Lalpa hnên ata in hmu dâwn tih hriain, in tih apiang chu mihring tân anga ti lovin, Lalpa tân anga ti zâwkin, châk takin ti rawh u; Lalpa Krista rawng in bâwl a nih hi. 25 Thil dik lo titu chuan a thil dik lo tih man chu a hmu leh ang; mi thlei bîkna rêng a awm si lo va.
1 Hotute u, nangni pawhin vânah Hotu in nei tih hriain, in bawihte chungah a fel leh a mawi tâwk chu ti rawh u.
Fuihna
2 Ṭawngṭai fan fan ula, chumiah chuan lâwm thu hril chungin ngaihven rawh u. 3 Mi phuarna chhan Krista thurûk chu hril tûrin, Pathianin thu atân kawng min tihkuaksak theih nân keini pawh min ṭawngṭaisak rawh u, 4 ka sawi tûr ang taka ka puan theihna tûrin. 5 Remchânna lei zêlin, pâwn lama mite lakah chuan fing takin awm rawh u. 6 Mi tin engtia chhân ṭheuh tûr nge ni tih in hriat theih nân in ṭawngka chhuak chu chia al, khawngaihna tel ni fo rawh se.
Chibai bûkna
7 Lalpaa unau duh tak, rawngbâwltu rinawm, kan bawihpui Tukika hian ka chanchin zawng zawng a hriattîr ang che u. 8 Hemi avâng ngei hian ani chu in hnênah ka rawn tîr a ni, ka chanchin in hriat theihna tûr leh in thinlung a tihthlamuan theihna tûrin; 9 Onesima, unau rinawm leh duh tak, nangmahni zînga mi nên hian. Anni chuan hêng lama thil awmzia zawng zawng hi an hriattîr ang che u. 10 Aristarka, ka tânpuipa hian chibai a bûk a che u; Marka, Barnaba tupa pawhin chibai a bûk a che u (ama chungchâng thu-ah thupêkte in hmuh kha; in hnêna a lo kal chuan lo lâwm rawh u); 11 Isua, Justa an tiha hian chibai a bûk bawk a che u. Chûng chu serh tan mi an ni a; chûng chauh chu Pathian ram thu lamah chuan ka thawhpui, mi thlamuantute an ni. 12 Epaphra, nangmahni zînga mi, Krista Isua bawihpa hian chibai a bûk a che u; ani chuan Pathian duh zâwng apianga puitling leh rin tlatna neia in din theihna tûrin, a ṭawngṭainaahte chuan nangmahni tân a bei fo ṭhîn a ni. 13 Nangmahni tân te, Laodikei khuaa awmho tân te, Hierapoli khuaa awmho tân te ṭhahnem a ngai êm êm tih ka hriatpui asin. 14 Luka, dâktawr duh tak leh Dema hian chibai an bûk a che u. 15 Laodikei khuaa unau awmte kha chibai mi bûksak ang che u; Numphi leh a ina kohhranho kha chibai mi bûksak bawk ang che u. 16 Tin, he lehkhathawn hi in zînga in chhiar hnuin Laodikei kohhranah pawh chhiartîr ve rawh u; nangni pawhin Laodikei khuaa mi kha lo chhiar ve bawk ang che u. 17 Tin, Arkippa hnênah khân, “Rawngbâwlna Lalpaa i hmuh kha hlen tûrin fîmkhur rawh,” ti ang che u. 18 Kei Paulan keima kut ngeia chibai ka bûkna che u a nih hi. Ka kawl bunte hi hre reng rawh u. Khawngaihna in hnênah awm rawh se.
Chibai bûkna
1 Paula leh Silvana leh Timothea chuan, Pa Pathian leh Lalpa Isua Kristaa Thessalonika khuaa kohhran hnênah, Khawngaihna leh remna in hnênah awm rawh se.
Thessalonika mite rinna leh awm dân
2,3 Kan Pathian leh Pa hmaah chuan rinna avânga in thiltihzia te, hmangaih avânga in thawh rimzia te, kan Lalpa Isua Krista beisei avânga in chhelzia te kha theihnghilh lova hre rengin, kan ṭawngṭainaahte chuan in hming lamin, nangmahni zawng zawng avângin Pathian hnênah lâwm thu kan hril fo ṭhîn a ni. 4 Unau, Pathian duh takte u, a thlanzia che u kha kan hria a, 5 khatia kan Chanchin Ṭha chu thu chauhva in hnêna thleng lova, thiltihtheihna leh Thlarau Thianghlim leh nasa taka rin tlatna nên a lo thlen zâwk kha; nangmahni hma sialin in chungah eng ang mi nge kan lo nih tâk kha in hre si a. 6 Tin, thu chu hrehawm tuar chungin, Thlarau Thianghlima lâwmin in lo pawm a, keimahni leh Lalpa zirtute in lo ni a. 7 Chutichuan, Makedonia leh Akaia rama ringtu zawng zawngte tân entawn in lo nih kha. 8 Lalpa thu chu nangmahni aṭangin a thang chhuak ta si a, Makedonia leh Akaia ramah chang ni lovin, hmun tinah pawh Pathian lama in rinzia chu a thang ta a; chutichuan, keinin eng mah rêng sawi a ngai ta lo. 9,10 Kan tlawh che u ṭuma min lawmzia te, Pathian nung leh dik tak rawngbâwl tûr leh a Fapa (mitthi zîng ata a kaihthawh, thinur lo thleng tûr laka min chhanchhuaktu Isua kha) vân ata lo nghâk tûrin, milem hawisana Pathian lam in hawi tâk thute kha an sawi fo ṭhîn a ni.
Thessalonika khuaa Paula rawngbâwlna
1 Unaute u, kan rawn tlawh che u kha a lothlâwn ta lo tih nangmahni ngeiin in hre si a; 2 thlawn ahnêkin, chumi hma chuan in hriat tawh angin, Philippi khuaah chuan hrehawm tuar leh zahthlâk taka siama kan awm hnu khân, buai êm êm chung pawhin Pathian Chanchin Ṭha in hnêna sawi tûrin kan Pathianah chuan kan lo huai tâk zâwk kha. 3 Kan thuhril hi dâwta chhuak a ni lo va, bawlhhlawha chhuak a ni hek lo va, vervêknaa chhuak a ni hek lo; 4 Chanchin Ṭha kawltîra awm tûrin Pathian ṭha tih mi kan nih ang ngeiin, mihring tilâwm tûr ang ni lovin, kan thinlung fiahtu Pathian tilâwm zâwkin thu kan sawi ṭhîn a ni. 5 Eng lai mahin fak derna thu emaw, duhâm khuhna emaw kan hman an hre ngai si lo tih in hriat kha (Pathian min hriatpuitu a ni); 6 Krista tirhkoh ka nih avângin mi tân hautak zet ni thei mah ila, mihring lakah, nangni lakah pawh, mi dangte lakah pawh, chawimawina kan zawn an hre ngai hek lo. 7 Nu nau pawmin a fate a duat angin in zîngah nunnêm takin kan awm zâwk kha. 8 Chutiang bawkin kan duh zâwng tak in lo nih tâk avâng khân, kan duh ngawih ngawih che u a, Pathian Chanchin Ṭha chauh ni lovin, keimahni nun pawh pêk hial che u kan peih kha. 9 Unaute u, kan thawh hahzia leh kan thawh rimzia kha in hre reng e; in zîngah tu mah kan tihhautak lohna tûr che uin a chhûn a zâna thawkin, Pathian Chanchin Ṭha kan hrilh ṭhin che u kha. 10 Nangni ringtute chunga thianghlim tak leh, fel tak leh demawm lo taka kan awmzia kha min hriatpuitute in ni, Pathian nên. 11,12 Ama ram leh ropuinaa ko lûttu che u Pathian mi ni tlâka in awm theihna tûrin, pain ama fate chunga a tih angin, fuih leh thlamuan leh hriattîr che uin, in chung ṭheuhva kan tih zia kha in hre si a. 13 Hemi avâng hian bâng lovin Pathian hnênah lâwm thu kan hril bawk ṭhîn, Pathian thu kan hnên ata in hriat in pawm lai khân, mihring thu pawma in pawm lohva, Pathian thu pawma in pawm zâwk avâng khân; chu chu Pathian thu a ni rêng a, nangni a ringtute chhûnga thawk bawk ṭhîna chu a ni. 14 Unaute u, nangni kha, Judai rama Pathian kohhran, Krista Isuaa awmte zirtu in lo nih kha: anni chuan Juda-te lakah an tuar angin, nangni pawhin nangmahni rama mite lakah in tuar ve bawk si a. 15 Chûng Juda-te chuan Lalpa Isua leh zâwlneite pawh an that a, keini pawh min hnawt chhuak a, Pathian an tilâwm lo va, mi zawng zawng an kalh ṭhîn. 16 Chhandam an nih theihna tûra Jentailte hnêna thuhril min khap si ṭhîn; an sualin a vâwrtâwp a thleng ta a, thinurna chu an chungah a lo tla ta nge nge a ni.
Paulan Thessalonika tlawh leh a châk
17 Nimahsela, unaute u, rei lo tê atân nangmahni nên thinlung lama inṭhen lova, hmêl lam chauhva inṭhena kan awm rih avângin, châk tak chunga in hmêl hmu tûrin kan bei nasa lehzual ṭhîn a ni; 18 in hnêna lo kal kan tum tlat si a, kei Paula ngei pawh hian vawi hnih lai lo kal ka tum nghe nghe tawh a; nimahsela, Setanan min dâl ṭhîn a ni. 19 Kan beiseina emaw, kan hlimna emaw, kan lallukhum chhuan emaw chu eng nge ni le? A lo kal hunah kan Lalpa Isua hmaah chuan nangmahni ngei in ni dâwn lâwm ni? 20 Nangni hi kan chhuan leh kan hlimna in ni asin.
1 Chutichuan, kan tuar zawh tâk loh chinah chuan Atheni khuaah keimahni chauh hnutchhiahin awm ila ṭha kan ti a. 2 Timothea, kan unaupa, Krista Chanchin Ṭha lama Pathian rawngbâwltu hi, tinghet tûr che u leh in rinna kawnga thlamuan tûr che uin kan rawn tîr a ni; 3 hêng hrehawm tuarnate avâng hian tu mah an nghîn lohna tûrin, hêngte hi tuar tûrin ruat kan ni tih nangmahni ngeiin in hre si a. 4 In hnêna kan awm lai khân hrehawm tuar tûr kan ni tih kan hrilh lâwk ngei che u kha; chutiang ngei chuan a thleng tawh a, chu chu in hriat kha. 5 Chumi avâng chuan ka tuar zawh tâk loh hnuin, thlêmtu chuan a thlêm thlu hlauh vang che u a, kan thawh rimna chu a thlâwn dah ang e, tiin, in rinzia ka lo hriat theihna tûrin mi ka rawn tîr a ni. 6 Nimahsela, Timothea chu in hnên aṭangin tûnah kan hnên a lo thlen hian, hmuh che u kan châk ang bawkin, min hmuh châk êm êmin khawngaih takin min hre reng fo tih thu leh, in rinna leh in hmangaihna chanchin lâwmawm tak min rawn hawn a; 7 chumi avâng chuan unaute u, kan manganna leh hrehawmna zawng zawngah, in rinna avângin in chungah thlamuang takin kan awm ta. 8 Tûnah chuan kan nung ta, Lalpaa in din ngheh phawt hi chuan. 9,10 In hmêl kan hmuh theihna tûr leh, in rinna lama in tlâkchhamna kan phuhrûksak theihna tûr che uin, a chhûn a zâna nasa taka ṭawngṭaiin, kan Pathian hmaah in chunga kan hlimna zawng zawng avâng hian, nangmahni lam thu-ah Pathian hnênah eng lâwm thu nge kan hrilh ve thung theih ang le aw? 11 Tichuan, kan Pathian, kan Pa ngei chuan, kan Lalpa Isua pawhin, in hnên lamah min hruai rawh se. 12 Tin, nangmahni lama hmangaihna kan ngah angin, nangmahni lamah inhmangaih tawnna leh, mi zawng zawng lamah hmangaihna chu Lalpa chuan tihpunsakin tihngahsak che u rawh se; 13 chutichuan, kan Lalpa Isua chu a mi thianghlim zawng zawngte nêna a lo kal hunah, kan Pathian leh kan Pa hmaah in thinlungte thianghlimna kawngah sawisêl bovin a tinghet thei ang che u.
Pathian tilâwm nun
1 Chutichuan, unaute u, a tâwp berah chuan in awm dân tûr leh Pathian in tihlâwm dân tûr (tûna in awm dân ang hi) kan hnên ata in lâk ang khân in ngah lehzualna tûrin, Lalpa Isuaah chuan kan ngênin kan fuih che u a ni. 2 Lalpa Isua zârah chuan eng thute nge kan pêk che u kha in hre si a. 3 Pathian duh zâwng, in thianghlimna tûr chu hei hi a ni, inngaih bânsan ula; 4,5 Pathian hre lo Jentailhote anga hur kawngah châk lovin, thianghlim leh chawimawiin mahni bêl vawng thiam ṭheuh ula; 6 chumi kawngah chuan tu mân bawhchhiain a unau chungah thil ṭha lo ti suh se; Lalpa chu chûng ang thil titu zawng zawng chunga phuba latu a nih avângin - keini pawhin kan hrilh lâwkin kan hriattîr tawh che u ang khân. 7 Pathianin bawlhhlawh tûrin min ko si lo va, thianghlimah min ko zâwk a ni. 8 Chuvângin, a pawisa lotu chuan mihring pawisa lo a ni lo va, Pathian, a Thlarau Thianghlim pe ṭhîntu che u chu a pawisa lo a ni zâwk. 9 Amaherawhchu, unaute hmangaih kawng thu chu ziaksak in ngai lo ve, inhmangaih tawn tûrin nangmahni ngei Pathian zirtîrin in awm si a. 10 Makedonia ram puma unau zawng zawng chungah pawh chutiang chuan in ti a, nasa lehzuala ti zêl tûrin kan ngên a che u. 11 Kan hrilh ang ngei che u khân, phîli ruai lovin, mahni hna ṭheuh vuan tlatin, mahni kut ngeiin hna thawk rawh u; 12 tichuan, mite ngaihsân in hlawh ang a, eng mah in tlachham lo vang.
Lalpa lo kal lehna
13 Nimahsela, unaute u, mi dang, beiseina rêng nei lote anga in lungngaih loh nân, muhîlte chanchin in hriat loh kan duh lo ve. 14 Isua a thi a, a tholeh ta tih kan rin si chuan, Isuaa muhîl tawhte chu Pathianin ama rualin a rawn hruai ve bawk ang. 15 Hei hi Lalpa thuin in hnênah kan sawi a ni: keini Lalpa lo kal thlenga nunga lo la awm rengate hian muhîl tawhte chu kan lehkhalh tawp lo vang, tih hi. 16 Lalpa ngei chu au thâwm nên, vântirhkoh chungnung ber aw nên, Pathian tawtawrâwt ri nên, vân aṭangin a lo chhuk dâwn si a; tin, Kristaa thi tawhte chu an tho hmasa ang a; 17 chumi hnuah chuan keini nunga lo la awm rengate hi, boruakah Lalpa hmuak tûrin, anmahni rualin chhûm zîngahte khian lâk chhohvin kan awm ang; chutichuan, kumkhuain Lalpa hnênah kan awm tawh ang. 18 Chuvângin, hêng thu hian inthlamuan tawn rawh u.
Lalpa lo kal dâwn vânga inpeih tûr
1 Amaherawhchu, unaute u, a hun leh a ni kawng thute rêng ziaksak che u in ngai lo ve. 2 Lalpa Ni chu zânah, rûkru angin a lo thleng dâwn tih nangmahni ngeiin chiang takin in hre si a. 3 “Muanna leh himna,” tia an sawi lai takin, hmeichhe nau vei angin, chawplehchilha boralna an chungah a thleng ang a, an pumpelh tawp lo vang. 4 Nimahsela, unaute u, nangni zawng chumi ni chuan rûkru anga a nanna tûr che uin thimah in awm lo ve; 5 êng fate leh ni fate in ni vek si a; zâna mi kan ni lo va, thima mi kan ni hek lo. 6 Chuvângin, mi dangte angin i muhîl suh ang u khai, i mengin i ngaihven zâwk ang u. 7 Muhîlte chu zânah a ni an muthilh ṭhin ni; zu ruite pawh 3 zânah a ni an ruih ṭhin ni. 8 Nimahsela, keini zawng chhûna mi kan nih avâng hian rinna leh hmangaihna âwmphaw chu hain, chhandam beiseina chu lukhuma hmangin i ngaihven zâwk ang u. 9 Pathianin thinurna tuar tûr ni lovin, kan Lalpa Isua Krista zâra chhandamna hmu tûr zâwkin min ruat a ni si a; 10 kan men pawhin, kan muthilh pawhin, amah nêna kan nun tlân theih nân ani chu kan thih aiin a thi a ni. 11 Chuvângin, infuih tawnin, intisâwt tawn ṭheuh rawh u, in tih rêng ṭhin ang hian.
Fuihna leh chibai bûkna
12,13 Nimahsela, unaute u, in zînga thawk rim leh, Lalpaa in hotua awm leh, zilhtute che u chu hre tûr leh, an hnathawh vânga hmangaiha ngaihlu êm êm tûrin kan ngên che u a ni. Inremin awm rawh u. 14 Tin, unaute u, kan ngên a che u, dân ang lova awmte chu zilh ula, rilru tête chu fuih ula, chak lote chu ṭanpui ula, mi zawng zawng lakah dawhthei takin awm rawh u. 15 Tu mân tu sual pawh suala thungrûl lo tûrin fîmkhur rawh u; in thil intihsak tawnna lamah leh, mi zawng zawng chunga in tihsakna lamah pawh, a ṭha apiang ûm fo zâwk rawh u. 16 Lâwm fo ula; 17 bâng lovin ṭawngṭai ula; 18 engkimah lâwm thu hril rawh u; chu chu nangmahni lam thu-ah Krista Isuaah chuan Pathian duh zâwng a ni si a. 19 Thlarau chu timit suh ula; 20 thuhrilte hmusit suh u; 21 engkim fiah zâwk ula; a ṭha apiang pawm tlat ula; 22 sual tinrêng lakah inthiarfihlîm rawh u. 23 Tin, remna Pathian ngei chuan in pumin tithianghlim che u rawh se; tin, in thlarau leh, in rilru leh in taksa chu kan Lalpa Isua Krista lo kal hunah chuan, sawisêl bovin a puma humhimin awm rawh se. 24 A kotu che u chu a rinawm a, tih pawh a ti bawk ang. 25 Unaute u, min ṭawngṭaisak rawh u. 26 Unau zawng zawngte kha fawh thianghlimin chibai mi bûksak rawh u. 27 He lehkha hi unau zawng zawng hnêna chhiar tûrin Lalpa hmingin ka ngên a che u. 28 Kan Lalpa Isua Krista khawngaihna chu in hnênah awm rawh se.
Chibai bûkna
1 Paula leh Silvana leh Timothea chuan, Pathian kan Pa leh Lalpa Isua Kristaa Thessalonika khuaa kohhran hnênah: 2 Pa Pathian leh Lalpa Isua Krista hnên ata khawngaihna leh remna in hnênah awm rawh se.
Krista lo kal huna rorêlna
3 Unaute u, nangmahni chungthuah hian Pathian hnênah lâwm thu hril fo tûr rêng kan ni; chu chu a âwm rêng a ni, in rinna chu nasa taka ṭhang lianin, in zaa in inhmangaih tawn ṭheuhna chu a pung lehzual si a; 4 chutichuan, mi tihduhdahna che u zawng zawngah leh hrehawm in tuarnaahte chuan in chhelzia leh in rinzia avângin, Pathian kohhran zîngah chuan keinin kan chhuang ṭhîn che u a ni; 5 chûng chu Pathian rama mi ni tlâka ruat in ni thei dâwn tih, Pathian rorêl fel tak chhinchhiahna fiah tak a ni, chumi ram avânga tuar in nih hi; 6-8 Lalpa Isua, Pathian hre lo mi leh kan Lalpa Isua Chanchin Ṭha awih lo mite chunga phuba lain, a vântirhkoh chak takte nên, meialh zînga vân aṭanga a inlâr hunah, a tihrehawmtute che u chu hrehawma thungrulh leh, nangni hrehawm tuartute hi keimahni nêna chawlhnaa rulh thung chu, Pathian tân thil fel tak a ni si a. 9,10 Chumi niah chuan a mi thianghlimahte chuan chawimawia awm tûr leh, ringtu zawng zawngahte chuan (kan thu hriattîr che u kha in ring si a) mak tih tûra a lo kal hunah chuan, chûng Pathian hre lo mi leh kan Lalpa Isua Chanchin Ṭha awih lo mite chuan hrem an tuar ang, Lalpa hnên ata leh a chakna ropuina aṭanga chatuana boralna chu. 11 Chutianga chawimawi leh mak tih a nih theih nân, kan Pathianin a kohna che uah chuan koh tlâk nia a ruat theihna tûr che u leh, ṭhat duhna tinrêng leh rinna hnathawh tinrênga a thiltihtheihnaa a hlawhtlintîr theihna tûrin, kan ṭawngṭaisak fo ṭhîn che u a nih hi; 12 chutichuan, kan Pathian leh Lalpa Isua Krista khawngaihna ang zêlin, kan Lalpa Isua hming chu nangmahniah chawimawiin a awm thei ang a, nangni pawh amahah chawimawiin in awm thei ang.
Dân Bawhchhepa
1 Nimahsela, unaute u, kan Lalpa Isua Krista lo kalna leh a hnêna kan han inkhâwmna tûr thu-ah chuan, 2 “Lalpa Ni chu a thleng reng tawh,” tihna thlarau avângin emaw, thu avângin emaw, kan hnên aṭanga lehkhathawn ang avângin emaw, in rilru nghîn thuai lohna tûr leh in buai hek lohna tûrin kan ngên a che u. 3 Tu mân eng mahin tihder che u suh se; tlûksanna chu a lo thlen hmasak zeta, Dân Bawhchhepa, boral fapa chu a lo lan loh chuan chumi ni chu a thleng dâwn si lo va. 4 Ani chuan Pathiana an vuah apiang leh sakhua zawng zawng dovin, an chunga awm tumin a inchawimawi ang; chutichuan, Pathian biak ina ṭhuin Pathian ang hialin a intâr chhuak ang. 5 In hnêna ka lo awm lai khân chûng thu chu ka hrilh ṭhîn che u tih in hre reng lo vem ni? 6 Ama hun tê chauhva a lo lan theihna tûrin engin nge khap tûnah in hria e. 7 Dân bawhchhiatna thurûk chuan tûnah pawh a thawk mêk a ni si a; nimahsela, lâk bova a awm hma loh chuan tûnah hian a khaptu a awm. 8 Chumi lâk bo hunah chuan Dân Bawhchhepa chu a lo lang tawh ang, Lalpa Isuan ani chu a kâa thawin a tihlum ang a, a lo kala inlârnain a tiboral ang. 9 Chu Dân Bawhchhepa chu Setana chakna nên a lo kal ang a, thiltihtheihna tinrêng te, chhinchhiahna tinrêng te, dâwt thil mak tinrêng te nên a lo thawk ang. 10 Boral mêkte tân fel lohna bumna tinrêng nên a ni ang; chhandama an awm theihna tûrin thutak hmangaihna chu an pawm loh vâng a ni. 11 Chu vâng chuan dâwt thu chu an awihna tûrin Pathianin sual hna thawhna an hnênah a thlentîr ang, 12 thutak awih lova fel lohnaa lâwm zâwkte chuan thiam loh an chan vek theih nân.
Chhandam ni tûra thlan in ni
13 Unau, Lalpa duh takte u, Thlarau tihthianghlim leh thutak awiha chhandama awm tûrin a tîr ata Pathianin a thlan che u avângin, in chungthuah hian Pathian hnênah lâwm thu hril fo tûr rêng kan ni. 14 Chutiang atân chuan ani chuan kan Chanchin Ṭha hianin a koh che u kha, kan Lalpa Isua Krista ropuina nei tûrin. 15 Chutichuan, unaute u, ding nghet ula, thurochhiahte chu thusawiin emaw, kan lehkhathawnin emaw kan zirtîr che u kha pawm tlat rawh u. 16 Tichuan, kan Lalpa Isua Krista ngei leh Pathian kan Pa, min hmangaihtu leh khawngaihna avânga chatuana thlamuanna leh beiseina ṭha min petu chuan, 17 in thinlungte chu tithlamuangin, thil tihṭhat leh thusawi ṭhat tinrêngah tinghet rawh se.
Min ṭawngṭaisak rawh u
1-2 A tâwp berah chuan unaute u, Lalpa thu hi nangmahni zînga a awm ang khân, pungin chawimawia a awm theihna tûr leh, mi luhlul leh mi sualte laka kan him theihna tûrin min ṭawngṭaisak rawh u; mi zawng zawng chuan rinna an nei vek si lo va. 3 Amaherawhchu, Lalpa chu a rinawm e, ani chuan a tinghetin, mi sual lakah chuan a hum ang che u. 4 Thu kan pêk apiang che u kha in zâwm ṭhîn a, in la zawm leh zêl pawh Lalpaah chuan kan ring che u a ni. 5 Tin, Lalpa chuan in thinlungte chu Pathian hmangaihnaah leh Krista chhelnaah chuan hruai lût rawh se.
Thatchhe lo tûra zirtîrna
6 Tin, unaute u, kan hnên ata thurochhiah an hmuh anga awm lova, dân lo anga awm unau tinrêngte lakah chuan inthiarfihlîm tûrin kan Lalpa Isua Krista hmingin thu kan pe a che u. 7 Nangmahni ngeiin min zir dân tûr in hre si a; in zîngah dân lo angin kan chêt ngai loh kha; 8 tu kut ata mah a thlâwnin in chhang kan ei ngai hek lo, in zînga tu mah kan tihhautak lohna tûr che uin, a chhun a zâna hah tak leh rim taka thawk chungin kan ei zâwk a ni; 9 kan theih loh vâng a ni lo va, nangnin min zirna tûrin in mi entawn atân kan insiam zâwk a ni. 10 In hnêna kan awm lai pawh khân he thu hi kan pêk che u kha, “Tu pawhin hna a thawh duh loh chuan ei pawh ei suh se,” tih hi. 11 In zînga ṭhenkhat dân lo anga awm ṭhînte chanchin kan hre si a, chûng chuan hna rêng an thawk lo va, an tei mai mai zâwk ṭhîn a ni. 12 Tichuan, chûng angte chu ngawi renga thawk tûr leh, anmahni chhang ei tûrin Lalpa Isua Kristaah chuan thu pein kan fuih a ni. 13 Unaute u, nangni erawh chuan thil ṭha tih ning suh u. 14 Tin, tu pawhin he lehkhathawna kan thu hi a zawm loh chuan, chu mi chu in pâwl hauh loh nân chhinchhiah rawh u, a zah theihna tûrin. 15 Nimahsela, hmêlma angah zawng ruat suh ula, unau angin zilh zâwk rawh u.
Malsâwmna
16 Tin, remna Lalpa ngei chuan kumkhuain kawng tinrêngah remna pe che u rawh se. Lalpa chu in zaa hnênah awm rawh se. 17 Kei Paulan, keima kut ngeia chibai ka bûkna che u a nih hi; hei hi ka lehkhathawn tinrênga chhinchhiahna a ni, hetianga ka ziak hi. 18 Kan Lalpa Isua Krista khawngaihna chu in zaa hnênah awm rawh se.
Chibai bûkna
1 Paula - Pathian, min Chhandamtu leh Krista Isua, kan Beiseina ruat anga Krista Isua tirhkoh chuan, 2 Rinnaa ka fa tak tak Timothea hnênah: Pathian kan Pa leh Krista Isua kan Lalpa hnên ata khawngaihna te, zahngaihna te, remna te lo awm rawh se.
Zirtîrna dik lo laka fîmkhur tûr
3 Makedonia ram ka pan dâwn laia ka ngen che ang khân, tûnah pawh Ephesi khuaa awm reng tûrin ka ngên a che. Chuta mi ṭhenkhat chuan zirtîrna dik lo an theh darh a, ti tawh lo tûrin hrilh rawh. 4 Thawnthu mai mai leh thlahtute hming chhui sên loh chhui bânsan rawh se; chûng chuan rinnaa Pathian lama intihsâwtna thlen lovin, inhnialna mai mai a thlen zâwk si a. 5 Thinlung thianghlim leh chhia leh ṭha hriatna thiang leh rinna dik tak aṭanga lo chhuak, hmangaihna neih theih nân chu chu ti ka ni. 6 Mi ṭhenkhatte an kal kawi avângin chu chu an pênsan a, thu lawilo sawina lamah an kal ta a; 7 an thusawi awmzia leh paukhauh taka an thuhril chanchin chu hre si lovin, Dân zirtîrtute nih an duh ṭhîn a ni. 8 Dân chu a ṭha a ni tih kan hre si, miin a hman ṭhat phawt chuan. 9 Hêng hi hria sela: Dân hi mi fel tak tâna siam a ni lo va, dân pawisa loho leh dân bawhchheho tân te, Pathian ngaihsak loho leh mi sualho tân te, mi thianghlim loho leh Pathian zah loho tân te, pate thattuho leh nute thattuho tân te, mihring thattuho tân te, 10,11 inngaih hmangho tân te, mawngkawhurho tân te, mihring rûk hmangho tân te, dawtheiho tân te, chhechham derho tân te leh, fak tlâk Pathian Chanchin Ṭha ropui zirtîrna dik ka hnêna kawltîr ang ni lova, thil dang rêng awm apiangte tân pawh chuan siam a ni zâwk e.
Khawngaihna avânga lâwm thu
12,13 Mi tichaktu Krista Isua kan Lalpa hnênah chuan lâwm thu ka sawi a ni, hmânah sawichhetu leh tiduhdahtu leh sawisatu ni mah ila, rinawma mi ngaiha, a rawngbâwltua mi ruat tâk avâng hian; nimahsela, ring lo chunga hre lova ti ka nih avângin a ni, zahngaihna ka lo hmuh ni; 14 tin, kan Lalpa khawngaihna chu, rinna leh Krista Isuaa hmangaihnain nasa takin a liam ta. 15 “Krista Isua chu mi sualte chhandam tûrin khawvêlah hian a lo kal,” tih hi a rinawmin a pawm tlâk êm êm a ni; an zînga mi sual ber ka nih hi. 16 Nimahsela, hemi avâng hian a ni zahngaihna ka hmuh ni, Isua Krista chuan mi sual ber keimahah hian a dawhtheihzia zawng zawng a lantîr theih nân; tûn achina chatuana nunna hmu tûra amah la ring tûrte kawhhmuhna tûrin. 17 Lalber, chatuana awm, chhe thei lo, hmuh theih loh, Pathian taka chauh chu, chatuana chawimawi leh ropuiin awm rawh se. Amen. 18 Ka fa Timothe, hmâna i chanchin an hrilh lâwk thute ang khân, chu zilhna thu chu ka kawltîr a che, chûng chuan indona ṭha chu i do theih nân; 19 rinna leh chhia leh ṭha hriatna thiang tak pawm tlatin; mi ṭhenkhatten chûng chu paih thlain rinna kawngah chuan lawng keh angin an keh chhe ta. 20 Chûng zîngah chuan Humenaia leh Alexandra an tel a; Pathian sawichhiat loh an zir theih nân anni chu Setana ka pe a ni.
Ṭawngṭai chungchânga thuchah
1 Chutichuan, a tîr berin thil dîl ṭawngṭaina te, ṭawngṭaina hrim hrim te, ṭawngṭaisakna te, lâwm thu sawina te mi zawng zawng tân siamsak tûrin ka fuih a che; 2 lalte leh thuneitute zawng zawng tân pawh; Pathian ngaihsak leh zahawm taka inrema thlamuanga kan khawsak theih nân. 3 Chu chu min chhandamtu Pathian ngaihin a ṭhain, a lawm tlâk a ni; 4 ani chuan mi zawng zawng chhandama awmah leh thutak hriaah a duh a ni. 5 Pathian pakhat chauh a awm a, Pathian leh mihring inkâra Palai pakhat chauh a awm bawk a, amah chu mihring a ni, Krista Isua, 6 mi zawng zawng tlan nâna inpea chu; chu chu a hun tak zêla hriattîrin a awm tûr a ni; 7 chumi ti tûrin tlângaupuituah leh tirhkohva ruat ka ni (thu tak tak ka sawi a, ka daw lo ve); rinna leh thutaka Jentailte zirtîrtua ruat ka ni. 8 Chutichuan, mipaho chu hmun tinah kut thianghlim pharin, thinrim lo leh inhnial lovin ṭawngṭai sela ka duh a ni. 9 Chutiang bawkin hmeichheho pawh inthlahdah lo leh inbel lutuk lovin, thuam inchawih tâwkin inchei sela, sam phiarin emaw, rangkachakin emaw, tuikeplungin emaw, puan man tam tak taktein emaw inchei lovin; 10 amaherawhchu, (hmeichhia, Pathian ngaihsak intite chu inphu tâwkin) thil tihṭhatin inchei sela ka duh. 11 Hmeichhia chuan thu awih tlatin ngawi rengin zir rawh se. 12 Amaherawhchu, hmeichhiain zirtîr zawng ka phal lo, mipa chunga thuneih ka phal hek lo, ngawi rengin awm zâwk rawh se. 13 Adama chu siam hmasak a ni a, chumi hnuah Evi chu siam a ni a. 14 Tin, Adama chu bumin a awm lo va, hmeichhia erawh chu bumin a awm a, bawhchhiatnaah a tlu ta a. 15 Nimahsela, rinna leh hmangaihna leh thianghlimna neiin, rilru fel tak nêna an awm fo chuan, fa hrin vângin chhandamin an awm ang.
Kohhran hotu
1 “Tu pawh kohhran hotua ṭan duh chuan hnathawh ṭha a duh a ni,” tih hi a dik a ni. 2 Chutichuan, kohhran hotu chu sawisêl bo, nupui pakhat nei, insûm thei, rilru dik tak, mi fel, mi lawm dân thiam, zirtîr thiam, 3 uain ruih hmang lo, mi velh hmang lo, mi nunnêm ni zâwk tûr, kawhmawh bâwl lo, tangka sum ngaina lo, 4 zahawm taka fate kîlkawia mahni in chhûng khawsak rêl fel thiam mi a ni tûr a ni. 5 (Miin ama in chhûng khawsak mah a rêl fel thiam si loh chuan, Pathian kohhran engtin nge a enkawl theih ang?) 6 Ringthar a ni tûr a ni lo; chuti lo chuan, chapovin a awm ang a, Diabola thiam loh channa chu a chang ve dah ang e. 7 Chûng lo pawh chu pâwn lama mite fakin a awm bawk tûr a ni; chuti lo chuan, sawichhiata awmin, Diabola thangah a âwk dah ang e.
Kohhrana rawngbâwltute
8 Chutiang bawkin kohhran rawngbâwltute chu mi zahawm an ni tûr a ni; kamtam te, uain heh te, hlêpna bawlhhlawha duhâm mi te an ni tûr a ni lo; 9 chhia leh ṭha hriatna thiangin rinna thurûk chu pawm mi an ni zâwk tûr a ni. 10 Tin, chûngte pawh chu fiahin awm hmasa rawh se, chumi hnuah sawisêl bo an lo nih chuan kohhran rawngbâwl lam hna thawk rawh se. 11 Chutiang bawkin hmeichhiate pawh mi zahawm an ni tûr a ni, hêktute ni lovin, insûm thei leh engkima rinawm an ni tûr a ni. 12 Kohhran rawngbâwltute chu an fate leh anmahni in chhûng khawsak rêl felin, nupui pakhat nei ni rawh se. 13 Kohhran rawngbâwl lam hna thawk ṭha tawhte chuan dinna ṭha tak leh Krista Isuaa rinna kawngah chuan huaina nasa tak an insiam si ṭhîn a.
Kan sakhaw thurûk
14 Rei lo tê chinah i hnêna lo kal beiseiin hêng thu hi i hnênah ka ziak a ni. 15 Nimahsela, ka la awm rei tâk dahin, Pathian chhûngte zînga mi engtia awm tûr nge an nih i hriat theih nân ka ziak a ni; Pathian chhûngte chu Pathian nung kohhran, thutak ban leh innghahna chu an ni. 16 Tin, Pathian ngaihsakna thurûk chu hnial rual lohvin a ropui a ni: “Tisaa lo langa, Thlarauva thiam changa, Vântirhkohte hmuha, Jentailte zînga tlângaupuia, Khawvêlah hian mite rina, Ropuinaa hruai chhoh tâka chu.”
Pêng bo tûr hrilh lâwkna
1,2 Nimahsela, hun lo la awm tûrah chuan mi ṭhenkhat chuan, mi dawtheite vervêkna avângin hruai bona thlaraute leh ramhuaite zirtîrna thu ngaihsakin, rinna chu an la bânsan ang tih Thlarau chuan chiang takin a sawi a. Chûng mi dawtheite chu anmahni chhia leh ṭha hriatna ngeia thîr linga deh ang an ni a, 3 inneih an khap ṭhîn a, englo ei tûrte (thutak hriaa ringtuten lâwm thu sawia pawm tûra Pathianin a siamte) chu ei loh tûr an ti ṭhîn. 4 Pathian thil siam tinrêng hi a ṭha si a, lâwm thu hrila pawm a nih tawh phawt chuan eng mah duh loh tûr a ni lo; 5 Pathian thu leh ṭawngṭainain tihthianghlim a ni tawh si a.
Krista Isua rawngbâwltu ṭha
6 Chûngte chu unaute i hriattîr chuan, Krista Isua rawngbâwltu ṭha tak, rinna leh zirtîrna ṭha tûn thlenga i la zawm thua châwm i ni ang. 7 Amaherawhchu, Pathian zah lohna leh pitarte thawnthu mai mai chu duh suh. Tin, Pathian ngaihsak tûrin insawizawi rawh: 8 taksa insawizawina hi sâwt zawng a sâwt ve bawk a; Pathian ngaihsakna erawh hi chu, nunna tûna awm sa leh la awm leh tûr pêk tiamna a neih avângin kawng tinrêngah a sâwt a ni. 9 He thu hi a rinawmin a pawm tlâk êm êm a ni. 10 Chutichuan, Pathian nung chu kan rin avângin kan thawk rim a, kan bei hrâm hrâm a ni si a; ani chu mi zawng zawng Chhandamtu a ni a, a ringtute Chhandamtu a ni deuh ber mai. 11 Chûng thu chu pe la, zirtîr rawh. 12 I naupanna tu mahin ngainêp suh se; thusawi kawngah te, chêtze kawngah te, hmangaihna kawngah te, rinna kawngah te, thianghlimna kawngah te ringtute tihhmuhtu ni zâwk ang che. 13 Ka lo kal hma loh zawng chhiar te, thuhril te, zirtîr te bei uar rawh. 14 Nangmaha awm thilpêk, hrilh lâwk anga upahote kut nghata Pathianin a neihtîr che kha thlahthlam suh. 15 Mi zawng zawng hnêna i sâwtna a lan theih nân chûng thilahte chuan taima la, chûngah chuan inhmang zo rawh. 16 Nangmah leh i zirtîrnaah chuan fîmkhur la; chûng thil tiin awm reng rawh; chutiang tiin nangmah leh i thu ngaithlatute chu i chhandam dâwn zuk nia.
Mi dang chunga tih tûr
1 Putar deuhte chu hau suh la, pa angin thlêm zâwk rawh; rawlthar deuhte chu unau angin; 2 pitar deuhte chu nu angin; nula deuhte chu thianghlim takin farnu angin. 3 Hmeithai, hmeithai tak takte chu chawimawi rawh. 4 Nimahsela, hmeithai tu pawhin fate emaw, tûte emaw nei sela, chûngte chuan anmahni in chhûng lamah Pathian ngaihsaka awm leh anmahni hringtute chungah ṭhat ve thung zir zet rawh se; chu chu Pathian lâwm zâwng a ni si a. 5 Hmeithai tak tak, mahni chauhva awm chuan Pathian chungah beiseina a nei tlat a, a chhûn a zânin dîl leh ṭawngṭaiin a awm fo ṭhîn a. 6 Amaherawhchu, hmeithai, mahni nawmna ngawta inpe chu a dam lai pawhin a thi a ni. 7 Sawisêl bova an awm theih nân chûng thu pawh chu pe rawh. 8 Tu pawh mahni chhûngkhat lainate ngaihsak lova, mahni chênpui chhûngte ngei pawh ngaihsak lo chuan rinna an phatsan a ni, ringlomi aiin an sual zâwk. 9,10 Hmeithai chu kum sawmruk achin hnuai lam ni lo, mi pakhat nupui ni tawh, thil ṭha tih kawnga mi faka a awm chuan hmeithaia ziak theih a ni - fate lo châwm tlei tawha, mikhualte lo thleng tawha, mi thianghlimte ke lo sil tawha, mi mangangte lo chhawmdâwl tawha, thil ṭha tinrêng taima taka a lo tih tawh phawt chuan. 11 Hmeithai, la nula deuhte erawh chu ziak duh suh; an châkna avânga Krista lamah an lo ngheh lohvin pasal neih an duh leh mai ṭhîn. 12 An thutiam an bawhchhia a, an thiam lo a ni. 13 Tin, chu lo pawh chu in tinah an lêng lâwr a, thatchhiat pawh an chîng ṭhîn a; thatchhiat chang pawh ni lovin, thu sawi loh tûr sawiin kamtam leh mite thiltih rêlsak an chîng bawk ṭhîn a ni. 14 Chutichuan, hmeithai, la nula deuhte chuan pasal nei sela, fate nei sela, in chhûng khawsak rêl sela, sawisêlna tûr remchâng rêng hmêlma chu hmuhtîr suh sela ka duh a ni. 15 Tûnah pawh mi ṭhenkhat chuan Setana lam panin an pênsan ta si a. 16 Ringtu hmeichhiain hmeithai awmpui nei sela, anni chu amah chuan chhawmdâwl mai rawh se, kohhran chu tihbuaiin awm suh se; hmeithai, belh tûr nei lote chu an chhawmdâwl theih nân. 17 Kohhran upa rorêl ṭhate chu a leh hniha chawimawi tlâka ngaih ni rawh se, thuhril leh zirtîrnaa thawk rimte chu chawimawi tlâka ngaih lehzual ni rawh se. 18 Pathian Lehkha Thu chuan, “Sebâwngpain buh a chîl laiin a hmui phuar suh ang che,” a ti a. “Hnathawktu chu a hlawh hmu tlâk a ni,” a ti bawk a. 19 Kohhran upa an hêkna chu hretu pahnih emaw, pathum emaw kaa mi lo chu pawm suh. 20 Thil tisualtute chu mi zawng zawng hmaah zilhhau rawh, mi dangte pawhin an hlauh ve theih nân. 21 Hêng thu hi hleihluak bîk nei lovin, thlei bîk neia eng mah ti lovin, Pathian leh Krista Isua leh vântirhkoh thlante mit hmuhin zâwm tûrin ṭhahnemngai takin ka hriattîr a che. 22 Tu ma chungah kut nghat thut suh la, mi dang sualnaahte chuan tel hek suh; intithianghlim reng rawh. 23 Tui chauh in mi ni tawh suh la, i pum avâng leh i damloh fo avângin uain tlêm tê hmang ṭhîn ang che. 24 Mi ṭhenkhat sual chu a langsâr a, an tuar nghâl bawk ṭhîn; ṭhenkhat erawh chu a lang lawk lêm lo va. 25 Chutiang bawkin thil ṭha tih lang nghâl a awm a; lang nghâl rih lo mah se, thup hlen theih a ni lo.
1 Pathian hming leh a zirtîrna thu sawichhiata a awm loh nân, bawih nghâwngkawl bât apiangte chuan anmahni pute chu engkimah chawimawi tlâkah ngai rawh se. 2 Tin, ringtu pu neite chuan unau an nih avângin ngainêp suh se; amaherawhchu, sâwtna hmutute chu ringtu leh duh takte an nih avângin, an rawng bâwlsak lehzual rawh se. Chûng thu chu zirtîr la, fuih rawh. 3 Mi tu pawhin zirtîrna dang a zirtîra, thutak (kan Lalpa Isua Krista thu chu) leh Pathian ngaihsak lam zirtîrna a awih loh chuan, 4 ani chu a chapo va, eng mah a hre lo va, hriat ahnêkin inhnial leh thu kalh kawngah chuan a â ta zâwk a ni. Chûng aṭang chuan awhna te, insualna te, sawichhiatna te, ṭha lo lama rinna te, 5 hnialhrâtna te a chhuak ṭhîn a; chutiang hnialhrât mite chu rilru chhe nei leh thutak nei lo mi, Pathian ngaihsak hi hlâwkna emaw titute an ni. 6 Pathian ngaihsakna hi lungawina tel zawngin hlâwkna nasa tak a ni rêng a ni. 7 Khawvêlah hian eng mah kan luhpui si lo va, eng mah kan chhuahpui thei bawk hek lo. 8 Nimahsela, ei tûr leh silh tûr neiin, chûngah chuan kan lungawi ang. 9 Amaherawhchu, hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn, chûng duhnate chuan chhiatna leh boralnaah chuan mite a tipil ṭhîn. 10 Tangka sum ngainat hi sual tinrêng bul a ni si a; chu chu ṭhenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a.
Rinna indona ṭha
11 Nimahsela, nang, Pathian mi, chûng thilte chu tlânsan la, felna te, Pathian ngaihsakna te, rinna te, hmangaihna te, dawhtheihna te, thuhnuairawlhna te ûm zêl rawh. 12 Rinna intihsiakna ṭha chu bei la, chatuan nunna chu vuan rawh; chumi chang tûrin koh i ni a; hretu tam takte mit hmuhah ṭanna ṭha chu i ṭan tawh kha. 13 Pathian, thil engkim tinungtu leh Krista Isua, Pontia Pilata hmaa ṭanna ṭha ṭantu mit hmuhah chuan thu ka pe a che; 14 kan Lal Isua Krista rawn inlâr leh hma loh chuan, thupêk kha thianghlim tak leh sawisêl bova pawm tûrin. 15 Chu inlârna chu a hun takah chuan fak tlâk Thuneitu tak chauh, lalberte Lalber, lalte Lal chuan a entîr ang; 16 amah chauh chuan thih theih lohna a nei a, êng, hnaih theih rual lohvah chuan a awm a, amah chu tu mahin an hmu ngai lo va, hmuh pawh an hmu thei hek lo; ama hnênah chuan chatuana chawimawina leh thiltihtheihna awm rawh se. Amen. 17 Hemi khawvêla hausate hi chapo lo tûr leh, sum rinawm lovah hian an beiseina nghat lova, thil zawng zawng lâwmna tûra tam taka min petu Pathian chungah chuan nghat zâwk tûrin zilh rawh; 18 thil ṭha ti tûrin, thil ṭha tih ngah tûrin, thilphala thawhlâwm peih tûrin, 19 nunna, nunna tak tak chu an vawn theih nân, hun lo thleng tûr atân chuan lungphûm ṭha tak an tâna khâwl khâwm tûrin fuih rawh. 20 Aw Timothe, i hnêna kawltîra awm chu vawng ṭha rawh. Pathian zah lo lam thu sawi mai mai leh, dik lo taka “Finna” an vuah hnialna hi hawisan rawh. 21 Chu chu ṭhenkhatten nei emaw intiin rinna kawng chu an kal kawisan ta a. Khawngaihna i hnênah awm rawh se.
Chibai bûkna
1 Paula, Krista Isuaa nunna awm tiamna thu hril kawnga Pathian duh zâwnga Krista Isua tirhkoh chuan, 2 Ka fa duh tak Timothea hnênah: Pathian kan Pa leh Krista Isua kan Lalpa hnên ata khawngaihna te, zahngaihna te, remna te lo awm rawh se.
Lâwm thu sawina leh fuihna
3,4 Lâwma ka khah theih nân hmuh che ka duh êm êm a, i mittui hre rengin a chhûn a zânin bâng lovin ka ṭawngṭainaahte chuan ka hriatpui ṭhin che avângin Pathian hnênah lâwm thu ka hril a ni, min thlahtute chena chhia leh ṭha hriatna thiang tak neia a rawng ka bâwl ṭhina hnênah chuan; 5 rinna tak tak nangmaha awm chu ka hre reng si a, chu rinna chu a tîrin i pi Loisi-ah chuan a awm a, i nu Euniki-ah chuan a awm bawk a, nangmahah pawh a awm tih dik takin ka hria. 6 Chuvângin, ka kut nghah avânga Pathian thilpêk nangmaha awm kha chhêm alh tûrin ka hriatpui che a ni. 7 Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zâwk si a. 8 Chutichuan, kan Lalpa thu hriattîrna chu zahpui suh la, kei, ama mi tâng pawh hi mi zahpui hek suh ang che. Chanchin Ṭha avânga hrehawm hi Pathian thiltihtheihna ang zia ziain mi tuarpui zâwk ang che. 9 Ani chuan kan thiltih angte ni lovin, ama ruat leh khawngaihna ang zâwkin min chhandam a, kohna thianghlimin min ko bawk a; chu khawngaihna chu leilung pian hmain Krista Isuaah chuan min pêk a ni tawh; 10 nimahsela, min chhandamtu Krista Isua inlârna avâng hian tûnah tihlanin a awm ta. Ani chuan thihna chu a tiboralin, Chanchin Ṭhain nunna leh boral theih lohna a tilang ta; 11 chumi Chanchin Ṭha thu chu hriattîr tûrin, tlângaupuituah leh tirhkohvah leh zirtîrtuah ruat ka ni. 12 Chu vâng chuan a ni hêng thil pawh hi ka tuar ni; nimahsela, ka zak lo ve; ka rina chu ka hria, a hnêna ka kawltîr chu, chumi ni atân chuan a vawng ṭha thei tih dik takin ka hre bawk a. 13 Krista Isuaa awm rinna leh hmangaihna neiin, thu dik dân ka kaa i hriatte kha nei tlat rawh. 14 Thil ṭha i hnêna kawltîra awm kha, kan chhûnga Thlarau Thianghlim awm hian vawng ṭha rawh. 15 Asia rama awm zawng zawngten mi hawisan tih kha i hria a; an zîngah chuan Phugella leh Hermogena an tel a ni. 16 Lalpa chuan Onesiphora chhûngte hnênah zahngaihna pe rawh se, ani chuan mi tiharh fo va, ka khaidiat bun pawh mi zahpui si lo va; 17 Rom khuaa a lo kal lai khân ngun takin mi zawng chhuak ta zâwk a ni. 18 (Chumi niah chuan Lalpa hnênah zahngaihna hmu tûrin Lalpa chuan ani chu ruat rawh se.) Ephesi khuaa rawng a bâwl nasatzia kha i hre hle bawk a ni.
Krista Isua sipai tha
1 Chutichuan, nang ka fa, Krista Isuaa khawngaihna awmah hian thiltihtheihna neiin awm ang che. 2 Tin, hretu tam takte zînga ka kaa thu i hriatte kha, chûng chu mi rinawm, mi dangte zirtîr chhâwng thei tûr angte hnênah chuan kawltîr rawh. 3 Krista Isua sipai ṭha tak angin hrehawm mi tuarpui rawh. 4 Sipaia awm tûra thlangtu chu a tihlâwm theih nân sipai tu mah, indo laiin tûn dam chhûng khawsaknate hian a intihnawk ngai lo va. 5 Tin, intihsiaknaahte pawh chuan miin bei mah sela, dân angin a beih loh chuan khumtîrin a awm ngai lo va. 6 Lo neitu thawk rim chu a rah chang hmasatu a ni tûr a ni. 7 Ka thusawi hi ngaihtuah rawh; Lalpa chuan kawng engkimah hriat theihna a pe dâwn si chia. 8 Isua Krista, Davida thlaha mi, ka Chanchin Ṭha sawi anga mitthi zîng ata tholeha kha hre reng rawh; 9 chu Chanchin Ṭha avâng chuan thil tisualtu angin, phuar khawp hialin hrehawmte ka tuar ṭhîn a ni; nimahsela, Pathian thu chu phuarin a awm si lo. 10 Chuvângin, Krista Isuaa awm chhandamna chu chatuana ropuina nên an hmuh ve theihna tûrin, Thlante avâng chuan engkim ka tuar ṭhîn. 11 He thu hi a rinawm a ni: “A thihnaah kan thih tawh si chuan, A nunnaah kan nung bawk ang. 12 Kan tuar chuan, A rorêlnaah ro kan rêl ang; Amah kan phatsan chuan, Ani pawhin min phatsan ang. 13 Keini rinawm lovin awm mah ila, Ani chu rinawmin a awm reng a ni; Amah leh amah a inphat thei si lo va,” tih hi.
Hnathawktu pawm tlâk
14 Chûng thu chu hriatpui la, thu mai mai chunga an inhnial loh nân Lalpa mit hmuhah ṭhahnemngai takin hriattîr rawh, chu chu engah mah a ṭangkai lo va, a ngaithlatute tân boralna a ni zâwk ṭhîn. 15 Hnathawktu, thutak thu fel taka hmang chu zak tûr a ni lo angin, Pathian ngaiha ṭhaa inentîr tûrin ṭhahnem ngai rawh. 16 Amaherawhchu, Pathian zah lo lam thu sawi mai mai chu hawisan ṭhîn ang che; chutiang mite chu Pathian ngaihsak lohna lamah an nasa lehzual ang a, 17 an thu pawh chuan pân chhe ei angin a ei zêl ang; an zîngah chuan Humenaia leh Phileta an tel a ni; 18 chûng mite chuan, “Thawhlehna chu tûnah pawh a ni tawh daih,” tiin, thutak kawng chu an kal kawisan a, mi ṭhenkhatte rinna an tibo ṭhîn a. 19 Nimahsela, Pathian lungphûm nghet chu a la ding reng a, he chhinchhiahna hi a nei a: “Lalpa chuan ama tate chu a hria,” tih leh, “Lalpa hming lam apiang chuan sual kalsan rawh se,” tih hi. 20 Nimahsela, in ropuiah chuan bungbêl, rangkachak leh tangkaruaa siam chauh a awm lo va, thing leh belleia siamte pawh a awm ṭhîn a; ṭhenkhat ngaihhlut tûr a awm a, ṭhenkhat chu ngaihhlut loh tûr a awm bawk a. 21 Chuvângin, chûng thil laka mi a inthiarfihlîm chuan bungbêl thianghlim, Lalpa hman tlâk, hnathawh ṭha tinrênga inpeih sa, ngaihhlut tûr mi a ni ang. 22 Nimahsela, tleirâwl châknate chu tlânsan la, thinlung thianghlima Lalpa lam apiangte zîngah chuan felna te, rinna te, hmangaihna te, remna te ûm ve rawh. 23 Amaherawhchu, indonate a hring ṭhîn tih hriain, inhnialna âtthlâk leh fing lovahte chuan tel duh suh. 24 Lalpa bawih chuan do tûr a ni si lo va, mi zawng zawng chungah zaidamin, zirtîr thiamin, sual chungah dawhtheiin, 25 do tûra insiamte chu thuhnuairawlh takin a zirtîr zâwk tûr a ni; chutichuan, Pathianin thutak chu an hriat famkim nân a simtîr hlauhvin, 26 Pathian duh zâwng ti atân Lalpa bawihin a manin, Diabola thang ata an chhuak thei mahna.
Ni hnuhnûng
1 Tin, hei hi hre rawh, ni hnuhnûngahte chuan hun khirh takte a lo awm ang. 2 Mi, mahni inhmangaihtu te, tangka ngainatu te, intivei te, chapo te, Pathian sawichhetu te, nu leh pa thu awih lo te, lâwm nachâng hre lo te, thianghlim lo te, 3 hmangaihna pianpui nei lo te, huaikawm bâwl te, hêktu te, insûm thei lo te, mi kawlhsen te, ṭha duh hauh lo te, 4 vervêk te, thuhnu dâwn lo te, inngaihlu te, Pathian hmangaih aia mahni lâwmna mai hmangaih zâwktu te an ni dâwn si; 5 Pathian ngaihsak anna an nei ang a; nimahsela, a thiltihtheihna chu an awih lo vang; chûng ang chu hawisan rawh. 6 Chûng zînga mite chu mi inahte lûta, sual rit phur hmeichhe â deuhte sala man ṭhîntute kha an ni si; chutiang hmeichhiate chu châkna tinrênga hruai bo, 7 zir fo sia thutak hre phâk ngai lote an ni. 8 Tin, Jannia leh Jambrian Mosia an dodal ang khân, chûng mite pawh chuan thutak hi an dodâl ṭhîn; rilru chhe tawh, rinna kawngah chuan Pathian duh loh zâwng mi an ni. 9 Nimahsela, chûng aliam chu an ti lo vang, an âtzia mi zawng zawng hnênah a lo lang dâwn si a, Jannia leh Jambria âtzia a lo lang ang khân.
Fuihna hnuhnûng
10 Nang erawh chuan ka zirtîrna te, ka awm dân te, ka thiltum te, ka rinna te, ka dawhtheihna te, ka hmangaihna te, ka chhelna te, 11 mi min tihduhdahna te, ka tuarna te i hre hle mai; Antiokei khuaah te, Ikonion khuaah te, Lustra khuaah te ka chunga thil thleng leh tihduhdah ka tuarnate kha; chûng zawng zawngah chuan Lalpa chuan mi chhandam ta si a. 12 A ni, tu pawh Krista Isuaa Pathian ngaihsaka awm tum apiang chuan tihduhdahnate an tuar bawk ang. 13 Mi sual leh tihdertute erawh chu mi bum leh buma awmin an sual zual deuh deuh vang. 14,15 Nimahsela, nang zawng, tu hnêna zir nge i nih leh, Krista Isuaa rinna awm avâng chuan, chhandamna hmu khawpa tifing thei che Lehkha Thianghlimte chu i naupan têt ata hre tawh i ni tih inhriain, i thil zir leh i thil hriat chianahte chuan awm reng rawh. 16 Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni; 17 Pathian mi chu hna ṭha tinrêng thawk tûra kim taka inthuamin a famkim theih nân.
1 Pathian mit hmuh leh, mi nung leh mitthi ngaihtuahtu tûr Krista Isua mit hmuhah chuan, a inlârna leh a ram chhâlin, ṭhahnemngai takin ka hriattîr a che. 2 Thu chu hril rawh; a hunah te, a hun lovah te pawh bei zêl rawh; dawhthei taka zirtîr chungin an thiam loh hriattîr la, zilh la, fuih rawh. 3 Zirtîrna dik an ngaih peih loh hun a la thleng dâwn si; an bengte a zat avângin, anmahni duh zâwng angin zirtîrtute an hnênah an khâwm zâwk ang a, 4 an bengte chu thutak lamah an chhu ngawng ang a, thawnthu lam panin an pêng tawh ang. 5 Nang erawh chu engkimah fîmkhur la, hrehawm tuar la, Chanchin Ṭha hriltu lam hna thawk la, i rawngbâwlna kha hlen rawh. 6 Kei zawng tûnah pawh hlanin ka awm mêk a ni si a, ka chhuah hun a thleng tawh e. 7 Intihsiakna ṭha chu ka bei zo tawh a, ka tlânsiakna kawng ka hlen tawh a, rinna chu ka vawng reng tawh a ni; 8 tûnah chuan felna lallukhum chu ka tân dahin a awm tawh a, chu chu Lalpa, ngaihtuahtu fel tak chuan chumi niah chuan mi pe ang; ka hnênah chauh ni lovin, a inlârna ngai apiangte hnênah pawh.
Mi mal chungchânga thuchah
9 Rang takin ka hnênah lo kal hrâm rawh; 10 Dema chuan tûnlai khawvêl hi a ngainat avângin mi kalsan a, Thessalonika khuaah a kal ta si a; Kreska chu Galatia ramah a kal ta a, Tita chu Dalmatia ramah a kal ta bawk a. 11 Luka chauh ka hnênah a awm ta a. Marka kha sâwm la, han hruai ve rawh, ani chu rawngbâwl lamah ka tân a ṭangkai si a. 12 Tukika zawng Ephesi khuaah ka tîr ta. 13 I lo kal hunah Troas khuaah Karpa hnêna kawrfual ka hnutchhiah kha, lehkhabute nên khân rawn keng la, savun lehkha mawlh kha rawn keng ang che. 14 Aleksandra, dâr chhûn thiam kha, ka chungah a sual êm êm ṭhîn a ni; Lalpa chuan a thiltih ang zêlin a thungrûl ang; 15 a lakah khân nang pawh fîmkhur rawh, kan thu a dodâl nasa êm si a. 16 Ka thiamna thu ka sawi hmasak ṭum chuan tu mah rêngin mi ṭanpui lo va, mi thlahthlam ta vek zâwk a ni; a mawh chu phurin awm hlawm suh se. 17 Chanchin Ṭha chu keimah avânga hrilh kimin a awm theih nân leh, Jentail zawng zawng chuan an hriat theih nân Lalpa chuan mi ṭan a, mi tichak ta zâwk a ni; tin, sakeibaknei kaa mi kha chhanchhuahin ka lo awm ta a ni. 18 Lalpa chuan sualna zawng zawng lakah mi chhanchhuak ang a, a vânramah chuan him takin mi thlen ang; amah chu chatuana ropuiin awm rawh se. Amen.
Inthlahna chibai bûkna
19 Priskilli leh Akuila, Onesiphora chhûngte nên khan chibai mi bûksak ang che. 20 Erasta chu Korinth khuaah chuan a awm ta reng a, Trophima erawh chu Mileti khuaah damlovin ka kalsan ta a. 21 Thlasik hmain lo kal hrâm hrâm ang che. Eubula te, Pudea te, Lina te, Klaudi te, unau zawng zawngte nên chibai an bûk a che. 22 Lalpa chu i thlarau hnênah awm rawh se. Khawngaihna in hnênah awm rawh se.
Chibai bûkna
1-2 Paula, Pathian bawih, chatuana nunna beiseia Pathian thlante rinna kawngah leh, Pathian ngaihsak lam thutak hriatna kawnga Isua Krista tirhkoh bawk chuan (Chu chatuana nunna chu Pathian, dâwt sawi thei lova chuan khawvêl awm hmain a tiam a; 3 nimahsela, ama hun takahte chuan a thu chu thuchah chuan a tilang ta, chu thuchah chu Pathian kan Chhandamtu thupêk ang zêla kawltîr ka ni.) 4 Tita, kan rin thuhmun vânga ka fa tak tak hnênah: Pa Pathian leh Krista Isua kan Chhandamtu hnên ata khawngaihna leh remna i hnênah awm rawh se.
Kret thliarkâra Tita hna
5 Hemi avâng hian Kret thliarkârah khân ka hnutchhiah che a ni, thil tihfel bâkte chu i tihfel zêlna tûr leh, thu ka pêk che ang khân khaw tinah upate i ruatna tûrin; 6 tu pawh sawisêl bo, nupui pakhat nei, fate Pathian thu ring, nawmsak bâwl lutuk kawnga sawisêl hlawh lo, dân ang lova awm lo nei an nih tawh phawt chuan. 7 Kohhran hotu chu Pathian sum enkawltu a nih avângin sawisêl bo a ni tûr a ni; mi tihmawh, thin ram, uain ruih hmang, mi velh hmang, hlêpna bawlhhlawha duhâm mi a ni tûr a ni lo va; 8 mi lawm dân thiam, ṭha lam duh, rilru dik tak, mi fel, mi thianghlim, insûmthei mi a ni zâwk tûr a ni a; 9 zirtîrna dik tak kawngah chuan mi a fuih theihna tûr leh, hnialtute chu thiam loh a chantîr theihna tûrin, zirtîrna ang zêl thu rinawm chu pawm tlat mi a ni bawk tûr a ni. 10 Dân ang lova awm, thu sawi mai maite leh tihdertute mi tam tak an awm si a, serh tanho zînga mi an ni deuh ber; 11 chûngho kâ chu huhsak tûr a ni, hlêpna bawlhhlawh duh vânga thu zirtîr loh tûr zirtîrin, mite a chhûng chhûngin an chawk khawlo si ṭhîn a. 12 Anmahni zînga mi, anmahni zâwlnei pakhat ngeiin, “Kret thliarkâra mite chu dawthei te, sakawlh sual te, thatchhe chaw heh te an ni fo mai,” tiin a sawi kha. 13,14 Chu thu hriattîr chu a dik a ni. Chu vâng chuan Juda-ho thawnthute leh thutak hawisan ṭhînte thupêkte chu ngaihsak lovin, rinnaah chuan an dik theihna tûrin na takin zilhhau rawh. 15 Mi thianghlimte tân chuan engkim a thianghlim ṭhîn; nimahsela, mi bawlhhlawh leh ringlote tân chuan eng mah thianghlim rêng a awm ṭhîn lo, an rilru leh an chhia leh ṭha hriatna rêng pawh a bawlhhlawh tawh a. 16 Pathian hria an inti a, tenawm te, thu awih lo te, thil ṭha tinrêng tih kawnga Pathian duh loh zâwng te an ni a, an thiltihin an phatsan si ṭhîn.
Zirtîrna hrisêl
1 Nang erawh chuan zirtîrna dik tak nêna inhmeh thu sawi rawh. 2 Putarte chu insûmthei, zahawm, rilru fel tak, rinna leh hmangaihna leh chhelnaah dik tak ni tûrin fuih rawh. 3-5 Pitarte pawhin Pathian Thu chu sawichhiatin a awm loh nân - la nula deuhte chu an pasalte hmangaih tûr te, an fate hmangaih tûr te, rilru fel taka awm tûr te, thianghlim taka awm tûr te, mahni ina thawktua awm tûr te, ngilneia awm tûr te, mahni pasalte thu thua awm tûr tea an thunun theihna tûrin, an awm dân rênga Pathian zah mite niin, hêktute leh uain heh mite ni lova, ṭha lam zirtîrtute ni tûrin fuih bawk rawh. 6 Chutiang bawkin tlangvâlte chu rilru fel tak pu tûrin fuih rawh. 7,8 Lehlama ṭangte zînga miin kan chungah thu ṭha lo rêng sawi tûr an neih loh avânga an zah theih nân, engkimah thil ṭha tih kawngah tihhmuhtuah intilang la, i zirtîrnaah chuan i takzia te, i zahawmzia te, i thusawi dikzia sawisêl rual loh te chu tilang rawh. 9,10 Bawihte chu, Pathian kan Chhandamtu zirtîrna thu hi engkima an chei mawi theih nân, hnial lovin, kutkem hmang lovin, rinawmna ṭha zawng zawng tilang zâwkin, an pute thu thua awm tûr leh, engkima an lâwm zâwnga awm tûrin fuih rawh. 11 Mi zawng zawng hnênah chhandamna rawn thlenin Pathian khawngaihna a lo lang ta si a; 12-13 beiseina lâwmawm - kan Pathian ropui tak, Chhandamtu Isua Krista ropuina inlârna chu - nghâkin, Pathian ngaihsak lohna leh khawvêl châknate bânsanin, tûnlai khawvêlah hian insûm leh fel tak leh Pathian ngaihsakin kan awm tûr a ni tih min zirtîr a. 14 Ani chuan bawhchhiatna zawng zawng lak ata min tlan theihna tûr leh, chi thlan bîk, thil ṭha tiha ṭhahnemngai, ama tâna a tihthianghlim theihna tûrin kan aiin a inpêk kha. 15 Thunei takin chûng thu chu hrilh la, fuih la, zilh rawh. Tu mân hmusit che suh se.
Thil ṭha tih zêl
1-2 Lalte leh thuneitute laka intulût tûr te, thu awih tûr te, thil ṭha tinrêng tiha inpeih tûr te, tu mah sawichhe lo tûr te, kawhmawh bâwl lo tûr te, mi zawng zawng laka thuhnuairawlhna tinrêng tilanga nunnêm tûr tein anmahni hriat chhuahtîr leh rawh. 3 Keini pawh hmânah khân â tak te, thu awih lo te, buma awm te, châkna leh lâwmna tinrêng rawng bâwl te, sual leh îtsîk hmanga awm te, tenawm te, inhaw tawn te kan ni si a. 4 Nimahsela, Pathian min Chhandamtu ngilneihzia leh, mihring chunga a hmangaihzia chu a lo lan lai khân, 5 thil fel taka tih, keimahni ngeia tihte chu, chumi vâng ni lovin, siam tharna silna leh Thlarau Thianghlim siam ṭhat lehna chuan, a khawngaihna ang zêl zâwkin min chhandam ta. 6 Chu Thlarau Thianghlim chu, Isua Krista min Chhandamtu zârah chuan nasa taka kan chunga a leih kha. 7 Chutichuan, a khawngaihnaa thiam chantîra lo awmin, chatuana nun beiseina ang zêla ro luahtu tûra siamin kan awm thei ang. 8 “Pathian ring tawhte chuan thil ṭha ti zêl tûrin ngaihtuah rawh se,” tih thu hi a rinawm a ni, chûng thu chanchin chu huai taka i hrilh tlat ka duh a ni. Chûng thu chu mihringte tân a ṭhain a sâwt a ni; 9 nimahsela, zawhna âtthlâk te, thlahtute thu chhuina te, inhnialna te, Dân thua insualna te chu hawisan zêl rawh; chûng chu thil sâwt lo leh engmahlo a ni si a. 10 Rin hran nei mi chu vawi hnih khat zilh hnu chuan zilh duh tawh suh; 11 chutiang mi chu a kal pêngin a sual a ni tih in hria e, amah leh amah thiam loh inchantîr a ni si a.
Thuchah hnuhnûng
12 Artema emaw, Tukika emaw i hnêna ka rawn tirh hunah chuan, Nikopoli khuaah ka hnênah lo kal hrâm hrâm ang che; chutah chuan thlasika awm ka tum si a. 13 Zîna, dânhretu leh Apollova chuan eng mah an tlâkchham loh nân, an zinnaah chuan ṭhahnemngai takin puibâwm ang che. 14 Kan mite chu tlâkchham an neih ngai loh nân hna ṭangkai thawka inhmang reng tûrin fuih la, an awm mai mai tûr a ni lo. 15 Ka hnêna awm zawng zawngte hian chibai an bûk a che. Rinnaa min hmangaihtute kha chibai mi bûksak ang che. In zaa hnênah khawngaihna awm rawh se.
Chibai bûkna
1 Paula, Krista Isua mi tâng leh kan unaupa Timothea chuan, kan duh tak leh kan thawh rimpui Philemona hnênah te, 2 kan farnu Aphi hnênah te, kan sipaipui Arkippa hnênah te, i ina kohhran inkhâwmho hnênah te pawh: 3 Pathian kan Pa leh Lalpa Isua Krista hnên ata khawngaihna leh remna in hnênah awm rawh se. 4,5 Lalpa Isua lamah leh mi thianghlim zawng zawng lama hmangaihna leh rinna i neih chu lo hre ṭhînin, ka ṭawngṭainaahte chuan i hming lam fovin, ka Pathian hnênah lâwm thu ka hril ṭhîn; 6 i rinna thawhlâwm chu, nangmahnia awm thil ṭha tinrêng hriat famkimna kawngah chuan Krista lama a lo sâwt theihna tûrin. 7 Unaupa, nangma zâra mi thianghlimte thinlung a lo harh tâk avângin i hmangaihnaah chuan ka hlimin ka thlamuang êm êm ṭhîn asin.
Paulan Onesima a ngensak
8 Chuvângin, a âwm tâwk chu ti tûrin thu pêk che Kristaah ngam êm êm mah ila, 9 hmangaihna avângin (Paula, putar meuh ka ni a, tûnah Krista Isua mi tâng ka lo ni ta na a) a ngenin ka ngên zâwk a che; 10 ka fa Onesima, kawl bun chunga ka hrina tân hian i hnênah ka ngensak e. 11 Ani chu hmânah khân i tân a ṭangkai lo va, tûnah erawh chuan kei leh nanga tân a ṭangkai ta e. 12 Amah tak, ka thinlung ngei hi i hnênah ka rawn tîr kîr leh ta a ni; 13 ani chu Chanchin Ṭhaa kawl ka bunnaah hian, nangmah aia rawng mi bâwlsak theihna tûrin ka hnênah awmtîr reng ka duh hle a ni. 14 Nimahsela, i khawngaihna chu khawngaih luihtîr ang ni lovin, i thu thu ang a nih theih zâwkna tûrin, i thu lovin eng mah tih ka duh lo. 15 Rei lo tê a ṭhen che hi kumkhuaa amah i neih hlenna ai a ni mahna; 16 nimahsela, bawih ang ni tawh lova, bawih aia ṭha, unau duh tak ang zâwk hian; keia tân duh tak a ni bîk a, nanga tân lek phei chuan, tisaah leh Lalpaah chuan a va ni dâwn lehzual êm! 17 Chutichuan, ṭhiana mi ngaih chuan keimah angin amah hi lo lâwm ang che. 18 Tin, i chungah thil eng pawh tisualin emaw, i engilo a bat emaw chuan keima batah ruat ang che; 19 kei Paulan keima kut ngeia ka ziak a nih hi, keiman ka rulhsak ang; ka lakah nangmah ngei pawh i inbat bawkzia chu hrilh che zawng ka ni lo ve. 20 A ni, unaupa, nangmah avângin Lalpaah chuan lâwmna mi neihtîr la; Kristaah chuan ka thinlung tiharh ang che. 21 Ka sawi aia nasa zâwk mahin i ti ang tih ka hriat avângin, i awih ringin i hnênah ka ziak a nih hi. 22 Eng pawh ni sela, chu bâkah thlenna tûr mi lo buatsaihsak bawk ang che; in ṭawngṭainate avângin in hnênah pêk ka ni dâwn tih ka inring si a.
Inthlahna chibai
23 Epaphra, Krista Isuaa ka tânpuipa hian chibai a bûk a che; 24 ka hnathawhpui Marka te, Aristarka te, Dema te, Luka te pawhin chutiang bawkin an bûk a che. 25 Kan Lalpa Isua Krista khawngaihna chu i thlarau hnênah awm rawh se. Amen.
Fapaa Pathian thusawi
1 Pathian, hmasânga thlahtute hnêna bung tam tak leh kawng tinrênga zâwlneitea thu lo sawitu khân, 2 hêng ni tâwpah hian keimahni hnênah a Fapaah chuan thu a sawi ta. Chu mi chu engkim rochungtuah a ruat a, chu mi pawh chuan khawvêlte chu a siam a; 3 ani chu a ropuina êng leh, a tak anpui ngei leh, ama thiltihtheihna thua engkim tungdingtu niin, sualte a tlen fai hnuin chung lama Ropuibera ding lamah khian a han ṭhu a; 4 vântirhkohte aia hming ṭha zâwk a rochun ang ngeiin an aia ropui zâwk a lo ni tawh si a.
Fapa - vântirhkohte aia ropui
5 Vântirhkohte zîngah tu hnênah nge hêng thu hi a sawi ngai le? “Nang zawng ka Fapa i ni e, Vawiin hian ka hring che a ni,” tih leh, “A tân Pa ka ni ang a, Ani chu ka tân Fapa a ni ang,” tih hi. 6 Tin, Fa tîra chu khawvêla a tirh dâwn lai khân, “Pathian vântirhkohte zawng zawng pawhin Amah chibai bûk rawh se,” a ti a. 7 Tin, vântirhkohte chungchâng thu-ah chuan hei hi a sawi a ni: “Ani chuan a vântirhkohte chu Thli-ah a chantîr ṭhîn a, A rawngbâwltute pawh Meialhah a chantîr ṭhîn,” tih hi. 8 Fapa chungchâng thu-ah erawh chuan hei hi a sawi a ni, “Aw Pathian, i lalṭhutphah chu Chatuanin a awm tûr a ni; Dikna lal tiang pawh chu I ram lal tiang chu a ni; 9 Felna chu i ngaina a, Bawhchhiatna chu i huat kha; Chuvângin, Pathian, i Pathian chuan, I ṭhiante ai chuan Hlimna hriak a thih nasat tâk che hi,” tih leh, 10 “Nang, Lalpa, a tîrin Leilung nghahchhan i phûm tawh a, Vânte pawh i kutchhuak a ni; 11 Chûngte chu a la boral ang a, Nang erawh chu awm hlen tûr i ni; Tin, chûng zawng zawngte chu Silhfên angin a la hlui ang a. 12 Puan angin i zial bawk ang a - Silhfên ang maiin; Tichuan, a lo danglam tawh ang; Nang erawh chu i pângngai fo va, I kumte pawh a ral lo vang,” tiin. 13 Nimahsela, vântirhkohte zîngah tu chungchâng thu-ah nge hei hi a sawi ngai ni? “I hmêlmate i kephah nghahchhana Ka siam hma loh zawng Ka ding lamah ṭhu rawh,” tih hi. 14 Anni zawng zawng chu rawngbâwlna thlarau, chhandamna rochungtu tûrte tân rawngbâwl tûra tirh chhuah an ni lo vem ni?
Chhandamna ropui
1 Chuvângin, benga kan hriatte kha ṭhahnemngai takin kan pawisa lehzual tûr a ni; chuti lo chuan, kan tawlh bo hlauh dah ang e. 2 Vântirhkohte hmanga thusawi mah kha a lo ngheha, bawhchhiatna leh thu awih lohna tinrêngte chuan thungrulhna fel tak a hmuh zêl si chuan, 3 heti kauva chhandamna ropui hi thlahthlam ila, engtin nge kan tlân chhuah theih tehlul ang? Chumi chhandamna thu chu a tîra Lalpa hmanga sawi a ni tawh a, a hretute chuan min tihnghehsak a; 4 Pathian pawhin, chhinchhiahnate leh thil makte leh thiltihtheihna tinrêngte nên, ama duh ang zêla Thlarau Thianghlim thil semte nên chuan anni chu a hriatpui a.
Chhandam tûra min hruaitu
5 Khawvêl lo la awm tûr, a chanchin kan sawia chu vântirhkohte hnuaiah zawng a dah lo. 6 Nimahsela, mi tu emaw chuan khawiah emaw hêng thu hi sawiin a hriattîr ta zâwk: “Mihring hi eng nge maw a niha, i hriat reng ṭhin ni? Mihring fapa pawh hi eng nge maw a niha, i kan ṭhin ni? 7 Ani chu vântirhkohte aia hnuaiin i siam rih a; Ropuina leh chawimawina i khumtîr a, I kutchhuak chungahte chuan hotuah i siam bawk a; 8 A ke hnuaiahte engkim i dah a,” tiin. Chutichuan, engkim a hnuaia a dah avângin, a hnuaia dah loh eng mah a nei lo. Amaherawhchu, tûnah zawng engkim a hnuaiah awmin kan la hmu rih lo ve. 9 Nimahsela, Isua, vântirhkohte aia hnuaia siam riha chu, thihna tuar avânga ropuina leh chawimawina khumtîra awmin kan hmu ta zâwk a ni. Pathian khawngaihna zârah thihna chu mi tin a temsakna tûrin. 10 A tân engkim awma, a zâra engkim awm bawka tân chuan, fa tam tak ropuinaa a hruai luh zawngin, an chhandamna siamtu kha tuarnate avânga tihfamkim chu a âwm rêng si a. 11 Tithianghlimtu leh tihthianghlimate chu an zain Mi Pakhata chhuak an ni si a; chuvângin, ani chuan anmahniho chu “unaute” tih a zak lo ve. 12 “Ka unaute hnênah i hming ka hril ang a; Awm khâwm zîngahte chuan Hla sain ka fak ang che,” tiin. 13 Tin, “Amahah ka rinna ka nghat ang,” a ti leh a. Tin, “En teh u, kei leh Pathian mi pêk naupangte hi,” a ti leh pek a. 14 Tichuan, naupangte hi tisa leh thisen changte an nih hlawm avângin, amah ngei pawhin chûng bawk chu a chang ve ta a; thihnain thihna thuneitu (chu chu Diabola a ni) a tihboral theihna tûr leh, 15 thih hlauh vânga dam chhûnga bawiha awm zawng zawngte chu a chhanchhuah theihna tûrin. 16 A ṭanpui ṭhinte chu vântirhkohte an ni hauh si lo va, Abrahama thlahte an ni a ṭanpui zâwk ṭhin chu. 17 Chutichuan, mite tân sual thupha chawina siamsak tûrin, Pathian lam thilahte chuan Puithiam Lalber, mi lainat thei leh rinawm tak a nih theih nân, engkima a unaute anga lo awm chu a tân a ṭûl rêng a ni. 18 Amah ngei chuan thlêmna tâwkin a lo tuar tawh avângin, thlêmna tâwkte chu a ṭanpui thei a ni.
Mosia aia ropui Isua
1 Chutichuan, unau thianghlim, vân kohna chang vete u, kan thurina Tirhkoh leh Puithiam Lalber, Isua chu ngaihtuah rawh u; 2 Pathian chhûngte zawng zawng zîngah Mosia a rinawm ang bawk khân, ani chu ruattu lakah chuan a rinawm a ni. 3 Chhûngkaw puipa chu a chhûngte aiin an chawimawi zâwk ang ngeiin, ani chu Mosia aiin ropui lehzualna hmu tlâka ruat a ni tawh si a. 4 Chhûng tin hian puipa tu emaw tal an nei ṭheuh si a; engkim puipa erawh chu Pathian a ni. 5 Tin, chumi hnua thu la sawi tûrte hriattîr nân, Mosia chu Pathian chhûngte zawng zawng zînga rawngbâwltuah zawng a rinawm ngei a; 6 Krista erawh chu Pathian chhûngte chunga Fapaah a rinawm a ni. A chhûngte chu keimahni kan ni, a tâwp thlengin kan huaina leh kan beisei chhuanna hi nghet taka kan vawn tlat phawt chuan.
Pathian mite tâna chawlhna
7 Chutichuan, Thlarau Thianghlim sawi ang bawkin: “Vawiin hian a aw in hriat chuan, 8 Thlalêra thlêmna nia An tihvui lai ang khân, In thinlung tikhauh suh u; 9 Chutah chuan in thlahtute chuan Mi fiahin mi thlêm a, Kum sawmli chhûnga Ka thiltihte chu an hmu a; 10 Chutichuan, chumi chhuanho chungah chuan ka lungni lo va, ‘An thinlungin an ngai sual fo ṭhîn a, Ka kawngte pawh an hre lo,’ ka ti a, 11 Ka thinura ka chhechham ang khân, Ka chawlhnaah chuan an lût lo vang,” tiin. 12 Unaute u, fîmkhur rawh u; chuti lo chuan, Pathian nung chu bânsan tûrin, in zîngah tu chhûngah pawh rin lohna thinlung sual a lo awm dah ang e. 13 “Vawiin” an tih chhûng hian ni tinin infuih tawn zâwk rawh u; chuti lo chuan, in zînga mi tu pawh hi sual bumnaa tihkhauhvin in awm dah ang e. 14 Krista changtute kan lo ni ta si a, kan rin chhan ṭan tirhna kha a tâwp thlenga nghet taka kan vawn tlat phawt chuan, 15 “Vawiin hian a aw in hriat chuan, An tihvui lai ang khân In thinlung tikhauh suh u,” an tih chhûng zawng hian. 16 A nih leh tute nge ni hre reng sia tivui kha? Aigupta ram aṭanga Mosia hruaia chhuak zawng zawng kha an ni lo vem ni? 17 Tin, tute chungah nge ni kum sawmli chhûnga a lungnih loh kha? Tisualtu, an ruang thlalêra tlu tate chungah khân a ni lo vem ni? 18 Tin, thu awih lote hnênah chauh lo chuan, tu hnênah nge a chawlhnaa lût lo tûra chhechhama a tiam ni? 19 Chutichuan, rin lohna avângin an lût thei ta lo tih kan hria a ni.
1 Chuvângin, i hlau vang u; chuti lo chuan, a chawlhnaa luhna thutiama la awm reng siin, in zîngah tu pawh tling lo angin in lo awm mial dah ang e. 2 An hnêna hril a nih ang bawk khân, Chanchin Ṭha kan hnênah hril a ni ngei si a; nimahsela, an thu ngaihthlâk chuan anmahni a tisâwt si lo, ngaithlatu tak takte nên rinnaa zawmin an awm loh avângin. 3 Keini ring tawhte hi, chu chawlhnaah chuan kan lût mêk a nih hi. “Ka thinura ka chhechham ang khân, Ka chawlhnaah chuan an lût lo vang,” a tih ang khân; leilung pian tirh ata hnate chu thawh zawh a ni tawh na a. 4 Khawii hmunah emaw ni sarih ni thu hetiangin a sawi asin, “Tin, ni sarih niah chuan Pathian chuan a hnathawh zawng zawng a chawlhsan ta a,” tiin. 5 Tin, he hmunah hian, “Ka chawlhnaah chuan an lût lo vang,” a ti leh a. 6 Chutichuan, ṭhenkhat chumi chawlhnaah chuan an la luh tûr thu a la awm avâng leh, hmâna Chanchin Ṭha hril dawngtute chu awih loh vânga an luh tâk loh avângin, 7 rei tak hnu khân Davidaah chuan “vawiin hian” tiin, ni eng emaw a ruat nawn leh a ni, “Vawiin hian a aw in hriat chuan In thinlung tikhauh suh u,” tia a hmaa ka sawi ang khân. 8 Josua chuan anniho chu a chawlhtîr tawh si zawngin, chumi hnuah chuan ni dang thu chu a sawi lo vang. 9 Chutichuan, Pathian mite tân chuan Chawlhnia chawlhna a la awm ta fo va. 10 A chawlhnaa lût tawha chu, Pathianin ama hnathawhte a chawlhsan ang khân, chu mi pawh chuan a hnathawhte chu a chawlhsan ve ta a. 11 Chutichuan, tu mah chumi awih loh entîrna anga awma an tlûk loh nân, chu chawlhnaa lût tûr chuan ṭhahnem i ngai ang u. 12 Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thlîng phel hrang khawp hialin a chhun thei a, thinlunga ngaihtuah leh tumte hi a hre nghâl thei a ni. 13 Thil siam ama mit hmuha lang lo rêng rêng a awm lo; kan chanchin kan thlenna tûra mit hmuhah chuan, engkim saruak leh inhawng sain a awm zâwk a ni.
Isua - Puithiam Lalber ropui tak
14 Tichuan, vânahte kal tlang tawh Puithiam Lalber ropui tak, Isua, Pathian Fapa chu kan neih avângin kan thurin hi i pawm tlat ang u. 15 Puithiam Lalber, kan chak lohnate min hriatpui thei lo nei kan ni si lo; keimahni anga kawng tinrênga thlêmna tâwk tawh, sual erawh chu sual lo, nei kan ni zâwk e. 16 Chutichuan, zahngaihna kan hmuh theihna tûr leh, puih kan ngaih huna ṭanpuina khawngaihna kan hmuh theihna tûrin, khawngaihna lalṭhutphah chu huai takin i hnaih ang u.
1 Puithiam Lalber apiang, sualte avânga thilpêk leh inthawinate an hlan kawp theihna tûra mihring zînga mi lâk hrana lo awmin, Pathian lam thilahte chuan mihringte tân ruat an ni si ṭhîn: 2 chûngte chuan eng mah hre lote leh kawng bote chungah zai an dawh thei ṭhîn a ni, anmahni ngei pawh chak lohna hual vêla an awm ve bawk avângin. 3 Tin, chumi avâng chuan mite tân an hlansak angin, anmahni tân ngei pawh sualte avângin hlân ve lo thei an ni lo. 4 Tin, tu mân chumi chawimawina chu mahni an inbel ngai lo, Arona anga Pathian koh an nih si loh chuan. 5 Chutiang bawkin Krista pawh chu Puithiam Lalbera siam tûrin mahni a intiropui lo ve, “Nang zawng ka Fapa i ni e, Vawiin hian ka hring a che,” tia a hnêna sawitu khân a tiropui ta zâwk a ni; 6 “Nang zawng, Melkisedeka awm dân anga Chatuana Puithiam i ni e,” tia hmun danga a sawi ang bawk khân. 7 Ani chuan a tisa put lai niahte khân, thihna laka amah chhandam theitu hnênah chuan, nasa taka au leh mittui tla chungin ṭawngṭainate leh dîlnate a hlân a, a ṭih dêk ṭhin avângin ngaihthlâkin a awm bawk a; 8 Fapa meuh pawh ni mah sela, a thil tuarahte chuan thu awih a zîr ta a ni; 9 tichuan, tihṭhat famkima lo awmin, a thu awih zawng zawngte tân chatuana chhandamna bulpui a lo ni ta; 10 Melkisedeka awm dân anga Puithiam Lalberah Pathianin a vuah a.
Tlûkna laka fîmkhur tûr
11 Chumi chanchinah chuan thu tam tak sawi tûr kan nei a, hrilhfiah pawh a harsa, in beng a lo chhêt tâk avângin. 12 A hun ngaihtuah zawngin zirtîrtu ni tawh hial âwm in ni na a, Pathian thu bul ber, a aw b te chu zirtîr in ngai leh ta a, chaw rum ni lova hnute la ngai mi ang in lo nih tâk hi. 13 Hnute ring apiang chuan felna thu-ah hian hriatna an nei si lo, nausên an nih avângin. 14 Chaw rum erawh chu puitlingte tân a ni, chûngte chuan an hman fo avângin, chhia leh ṭha fiah tûrin an hriat theihnate chu an sawizawi tawh.
1-2 Chutichuan, Krista thu bul hril tawh lovin puitlin lam i pan ang u; thiltih thi simna te, Pathian lama rinna te, baptisma te leh, kut nghah leh, mitthi thawhlehna leh, chatuana rorêlna kawng lam zirtîrnate lungphûm chu phûm leh tawh lovin. 3 Pathianin rem a tih chuan chu chu kan ti ngei ang. 4 Tin, vawi khat rilru tihvâra, vân thilpêk tema, Thlarau Thianghlim chantîra, 5 Pathian thu ṭha leh hun lo la awm tûra thiltihtheihna tem tawh zeta, 6 tlûksante kawng thu zawng - chu mite chu an simna tûrin siam thar leh rual an ni lo, Pathian Fapa chu anmahni tân khêng bet nawn leha timualpho an nih avângin. 7 Lei, a chunga ruahtui tla ṭhîn lo dawng tawha, a thawhsakate tâna thlai ei tlâk chhuahtu chu Pathianin mal a sâwm ṭhîn. 8 Amaherawhchu, hnimhlîngnei leh buarte a chhuah chuan mâkin a lo awm a, ânchhe dawng thaw a lo ni ṭhîn a, a tâwpah chuan hâl a tâwk ṭhîn. 9 Nimahsela, duh takte u, chutiang thu sawi mah ila, nangni zawngin chutiang thil aia thil ṭha zâwk, chhandamnaa tel thilte chu in tih kan ring a che u. 10 In hnathawh leh a hming chunga hmangaihna in lantîr, mi thianghlimte rawng in lo bâwl, tûn thleng pawha in la bâwl cheu chu theihnghilh tûrin Pathian chu mi fel lo a ni si lo va. 11 Nimahsela, a tâwp thlenga beiseina famkim hmu tûrin, in taihmâk pângngai ang khân taihmâk chhuah ṭheuh fo ula kan ti êm êm mai; 12 chutichuan, in inthlahdah lo vang a, rinna leh nghah peihna vânga thutiamte rochung tawhte zir ho in ni zâwk ang.
Pathian thutiam puitling ngei tûr
13 Pathianin Abrahama hnêna thu a rawn tiam lai khân, amah aia ropui zâwk chhâla chhia a chham theih loh avângin amah leh amah inchhâlin, 14 “Matheilovin mal ka sâwmsak ngei ngei ang chia, tih pawh ka tihpunsak ngei ngei ang che,” tiin chhia a chham ta a. 15 Chutichuan, chhel taka a tuar chhuah hnuin thil tiam chu a hmu ta ngei a. 16 Mihringte hian an aia ropui zâwk chhâlin chhia an chham ṭhîn a ni; an inhnialna tinrêngah pawh tihnghehna tûrin chhechham hi tihtâwpna a ni ṭhîn. 17 Chutichuan, Pathian chuan a thutiam dawngtu tûrte hnênah a thu a thlâk mai mai dâwn lo tih chiang taka tihlan a duh a, chhechhamin a tinghet a. 18 Pathian daw rual lo a nihna thil danglam thei lo pahnih avâng hian, keini inchhanhim nân kan hmaa beiseina dah chu chelh tûra tlânte hian fuihna nasa tak kan neih theihna tûrin. 19 Chu beiseina chu nunna thîrchakaiah kan nei a, rinawm leh nghet tak a ni, puanzâr chhûnga miah pawh chuan a lût a; 20 chutah chuan Isua chu Melkisedeka awm dân anga chatuana Puithiam Lalber lo ni tawhin, kan tân hmahruaituah a lo lût ta a.
Puithiam Melkisedeka
1 Chu Melkisedeka, Salem lal, Pathian Chungnungbera Puithiam, Abrahama, lalho that haw lo hmuaka malsâwmtu, 2 Abrahaman engkimah sâwma pakhat a pêk ve bawka kha, puithiamah a awm reng fo si a. A hming awmzia hrilhfiahin a hmasa berah Felna Lal a ni a, a dawt lehah Salem Lal a ni bawk (chu chu Remna Lal tihna a ni), 3 ani chu pa nei lovin, nu nei lovin, chi thlahtute chanchin nei lovin, awm ṭan ni nei lovin, nun tâwp pawh nei hek lovin, Pathian Fapa anga siam a ni zâwk. 4 Tichuan, chi thlahtu Abrahaman a râllâk ṭha apiang zînga mi sâwma pakhat a pêka chu, chu mihring ropuizia chu ngaihtuah teh u. 5 Levia thlahte zînga puithiam hna chang apiangte chuan, Dân thu angin mite lakah sâwma pakhat lâk tûr thu an hmu ngei a ni, chu chu an unaute lakah a ni, chûngho chu Abrahama ṭhâlbea chhuak ni mah sela; 6 amaherawhchu, an zînga a thlahtute chhui tel ve lohva khân Abrahama lakah sâwma pakhat a la a, thutiamte vawngtu chu mal a sâwm ta bawk a. 7 Nimahsela, hnial rual lohvin a tê zâwk chu ropui zâwka malsâwmsakin a awm ṭhîn. 8 Tin, hetah hian mihring thi ṭhînte hian sâwma pakhat an hmu thîn a, chutah erawh chuan, “a nung reng” tia a thu an hriattîra chuan a hmu a ni. 9 Tin, Levia, sâwma pakhat la ṭhîntu mah hian, Abrahama kutah khân sâwma pakhat a pe tawh, tih theih a ni; 10 Melkisedekan a lo hmuah lai khân a pa ṭhâlbeah a la awm si a. 11 Tichuan, Levia-ho puithiam nihna avânga famkimna hmuh theih a nih chuan (chumi hnuaiah chuan miten Dân thu an lo hmu si a,) Arona awm dân anga ruat lovin, Melkisedeka awm dân anga puithiam dang lo awm hi eng nge a la ngaihna? 12 Puithiam nihna chu a lo danglam tâk avângin Dân thu chu tihdanglam ve a lo ngai rêng a ni. 13 Hêng a thu an sawia hi hnam hrang mi a ni si a, chumi hnam zînga mi chu tu mah maichâmah chuan an che ngai lo. 14 Kan Lalpa chu Juda hnam zînga lo chhuak a ni tih a lang fiah si a, chumi hnam thu-ah chuan Mosian puithiamho kawng thu eng mah a sawi lo.
Melkisedeka ang puithiam
15,16 Tin, Melkisedeka anga puithiam dang, tisa thupêk Dân thu anga siam mi ni lo, nun tâwp nei lo thiltihtheihna anga siam zâwk mi a lo awm dâwn chuan, kan thusawi kha nasa takin a fiah lehzual ang; 17 “Nang zawng, Melkisedeka awm dân anga, Chatuana Puithiam i ni e,” tih hriattîr a ni si a. 18 A chak loh leh a sâwt lohna avângin thupêk awm hmasa chu paihin 19 (Dân thu chuan eng mah a tifamkim si lo), beiseina ṭha zâwk, Pathian kan hnaih ṭhinna hi hruai luhin a lo awm ta hlauh zâwk a ni. 20,21 Tin, chhechham loh a nih loh avângin (anni zawng chhechham lova puithiama siam an ni si a; ani erawh chu, “ ‘Nang zawng chatuana Puithiam i ni e,’ tiin, Lalpan chhia a chham a, a inlamlêt tawh lo vang,” tia a hnêna sawitu kut khân chhechhama Puithiama siam a ni zâwk), 22 chuti bawka nasa chuan, Isua chu thuthlung ṭha zâwk tihnghehpuitu a lo ni ta. 23 Tin, anni zawng thih avânga awm hlen an ṭhulh ṭhin avângin puithiama siam an tam ngei a; 24 ani erawh chu chatuana a awm reng avângin a Puithiam nihna chu thlâk theih rual lohvin a nei ta zâwk a ni. 25 Chutichuan, amaha Pathian hnêna lo kalte chu a tâwpkhâwk thlengin a chhandam thei bawk a ni, anmahni ṭawngṭaisak tûra chatuana a nun reng avângin. 26 Chutiang Puithiam Lalber, mi thianghlim, depdê lo, bawlhhlawh kai lo, mi sualte laka awm hrang, vânte aia chungnung zâwka siam tawha chu, kan tân a âwm rêng si a. 27 Ani chuan chûng puithiam lalberte hlan ang chuan ni tin, mahni sual avânga inthawina hlan hmasak zeta, chumi hnua mite sual avânga hlan a ngai lo ve; chu chu vawi khatah a lo tlingtla ta nghâl si a, amah leh amah a inhlan lai khân. 28 Dân thu chuan mihring, chak lohna neite chu puithiam lalberah a ruat ṭhîn a; chhechham thu, Dân thu hnua lo awm erawh chuan Fapa, chatuan atân tihfamkim tawha chu a ruat zâwk a ni.
Isua - kan Puithiam Lalber
1,2 Tichuan, kan thusawite zîngah hian a pawimawh ber chu hei hi a ni: chutiang Puithiam Lalber, vânahte khian Ropuibera lalṭhutphah ding lama han ṭhua, Hmun Thianghlim leh biakbûk tak tak, mihring sak ni lo, Lalpa sak zâwka rawngbâwltu chu kan nei, tih hi. 3 Puithiam lalber apiang chu thilpêk leh inthawinate hlân tûrin ruat an ni si a; chutichuan, he Puithiam Lalber pawh hian eng emaw tal hlan tûr a neih a ngai a ni. 4 Leiah hian lo awm sela chuan puithiam rêng a ni lo vang, Dân thu ang zêla thilpêk hlântute lo awm sa an awm avângin. 5 Chûngte chuan vân thilte chu a lem leh a hlim rawng an bâwl ṭhîn a, Mosian biakbûk a sak dâwn laia Pathian hrilha a awm ang khân: “Tlânga entawn tûr chu an entîr che ang khân engkim siam tûrin fîmkhur rawh,” a tih kha. 6 Tûnah erawh chuan thuthlung ṭha lehzual palai a nih angzia zêlin, rawngbâwl hna ṭha zâwk a lo chang ta, chu thuthlung chu thutiam ṭha zâwk chungahte siam a ni. 7 Thuthlung hmasa chu sawisêl bo ni se, thlun nawn a ngai lo tûr. 8 Anmahni demin hêng hi a sawi si a: “Ngai teh, nite a lo thleng dâwn e, Lalpan a ti, Chûng niahte chuan Israela chhûngte leh, Juda chhûngte hnênah chuan thuthlung thar ka siam ang; 9 An thlahtute Aigupta ram aṭanga hruai chhuak tûra, An kuta ka chelh nia An hnêna ka thlun ang kha ni lovin; Ka thuthlungah chuan an awm reng si lo va, Tichuan, anni chu ka ngaihsak ta lo a ni, Lalpan a ti. 10 Chûng ni hnuah chuan Israela chhûngte hnêna Thu ka thlun tûr chu hêng hi a ni, Lalpan a ti: An rilruah ka thupêkte ka dah ang a, An thinlungah ka ziak bawk ang a; Tin, an tân Pathian ka ni ang a, Keia tân anni chu ka mite an ni bawk ang; 11 Tin, mi tinin, ‘Lalpa chu hre rawh,’ tiin, Mahni tualkhatpui leh, Mahni unau an zirtîr dâwn tawh lo va; A tê ber aṭangin a lian ber thlengin, An zain mi hre ṭheuh tawh dâwn a ni. 12 An bawhchhiatnaahte zah ka ngai ang a, An sualte pawh ka hre reng dâwn tawh si lo,” tiin. 13 “Thuthlung thar” tiin a sawi avâng khân a hmasa chu a tihlui ta a ni. Tichuan, lo hluia lo upa tawh chu a ral dâwn dâwn a ni.
Pathian chibai bûk dân, leiah leh vânah
1 Tin, thuthlung hmasa pawh khân Pathian rawngbâwl dânte leh hmun thianghlim, he khawvêla hmun thianghlim chu a nei a. 2 Biakbûk an siam a, a tawntirh chu khâwnvâr dahna te, dawhkân te, chhangdah te awmna a ni; chu chu Hmun Thianghlim an ti a ni. 3 Tin, puanzâr pahnihna piahah chuan biakbûk, Hmun Thianghlim Ber an tih chu a awm a; 4 chumiah chuan rangkachak rimtui hâlna bâwm leh thuthlunna bâwm, rangkachak tîa luan chu a awm a, chumi thuthlunna bâwm chhûngah chuan manna awmna rangkachak bêl te, Arona tiang lo chawr te, thuthlunna lung phêkte a awm a; 5 a chung lamah zahngaihna ṭhutphah hliahin, ropuina cherub-te an awm bawk a; chûng thute chu tûnah zawng a kip a kawiin kan sawi thei lo vang. 6 Tin, chûng thilte chu chutianga siam a lo ni a, puithiamhovin Pathian rawng bâwlin, biakbûk tawntirhah chuan an lût fo ṭhîn a; 7 a dawttuah erawh chuan Puithiam Lalber chauh, kum tin vawi khat, thisen keng lo lovin a lût ṭhîn; chu chu mahni tân leh mite sual atân a hlân ṭhîn. 8 Thlarau Thianghlimin hei hi a hriattîr a: Hmun Thianghlima luhna kawng chu a la lang rih lo ve, biakbûk tawntirh chu a la din chhûng chuan, tih hi; 9 chu chu tûnlai tehkhinna hi a ni; chumi ang zêlin thilpêk leh inthawinate pawh an hlân ṭhîn, chûngte chuan chhia leh ṭha hriatna kawngah chuan a betu chu a tifamkim thei lo; 10 chûng chu (ei tûr te, in tûr te, sil tûr hrang hrangte nên) tisa lam dânte chauh, siam ṭhat hun hma atâna ruat chu a ni. 11 Nimahsela, Krista chu thil ṭha, lo awm tûrahte Puithiam Lalbera lo kalin, biakbûk, kuta sak loh (chu chu hêng thil siam zînga mi a ni lo tihna a ni), ropui leh famkim zâwk kal tlangin, 12 kan tân chatuana tlanna hmu tawhin, kêlte leh bâwngnote thisen vâng ni lovin, ama thisen vâng zâwkin Hmun Thianghlimah chuan vawi khatah a lo lût tlingtla ta nghâl a. 13 Kêl leh bâwngpate thisen leh bâwngla vâp, mi bawlhhlawh chunga theh mahin tisa thiang khawpa a tihthianghlim si chuan, 14 Krista, chatuana Thlarau zâra hmêlhem lova Pathian hnêna inhlâna thisen chuan, Pathian Nung rawng bâwl tûrin in chhia leh ṭha hriatna chu, thiltih thite lakah chuan a va tithianghlim nasa dâwn êm! 15 Tin, hemi avâng hian ani chu thuthlung thar palai a ni, thuthlung hmasa hnuaia bawhchhiatnate lak ata tlan nân mi a lo thih tâk avângin, kohvate chuan chatuana ro luah tûr thutiam chu an chang thei ang. 16 Thurochhiah awmna apiangah a chhiahtu thihna awm ve lo thei a ni si lo. 17 Mi an thih hnuin thurochhiahin thu a nei si ṭhîn, a chhiahtu la dam chhûng erawh chuan thu rêng a nei lo. 18 Chutichuan, thuthlung hmasa pawh kha thisen lovin an tinghet lo. 19,20 Dân thu ang zêlin thupêk apiang chu Mosian mi zawng zawng a hrilh hnuin, “Hei hi Pathianin in hnêna a pêk tlat thuthlung thisen a nih hi,” tiin, bâwngnote leh kêlte thisen chu, tui nên, sâpsen nên, husop nên a la a, lehkhabu ngei leh mi zawng zawng pawh chu a theh a ni. 21 Chu lo pawh chu, biakbûk leh rawngbâwlna hmanrua zawng zawng chu chutiang bawkin thisen chuan a theh ta bawk a. 22 Tin, Dân thu zawngin engkim thaw mai hi thisena tihthianghlimin a awm ṭhîn a, thisen chhuah lohvin ngaihdamna rêng a awm lo.
Krista inthawinain sual a tibo
23 Chutichuan, vâna thil awm angte chu chûng chuan tihthianghlimin a awm tûr rêng a ni, vân thil tak takte erawh chu chûng aia inthawina ṭha zâwktein tihthianghlimin a awm tûr a ni. 24 Krista chu kuta sak hmun thianghlim, a tak anpuiah chuan a lût si lo va; tûnah Pathian hmaah kan aia ding tûrin vânah ngei a lût ta zâwk a; 25 nimahsela, puithiam lalber chu kum tinin mahni thisen lo, thisen keng chunga Hmun Thianghlima a lût ṭhîn angin ani chu mahni inhlân fo tûrin a lût hek lo; 26 chuti ni suh sela, leilung pian tirh achin vawi tam tak a tuar tawh tûr a ni; nimahsela, tûnlai hun tâwpah hian inthawi nâna amah leh amah inhlânin, sual tihbo nân vawi khatah a lo lang ta nghâl a ni. 27 Tin, mihring tân vawi khat thih ruat a ni, chumi hnuah chuan rorêlna a awm ang; 28 chutiang bawkin Krista pawh mi tam tak sualte kalpui tûra vawi khat hlana awm tawhin, chhandamna hmu tûra amah lo nghâktute hnênah chuan, sual tel lovin vawi hnihnaah a lo lang leh ang.
1 Dân thu chuan thil ṭha, lo awm tûrte anpui tak nei lovin, a thla chauh a neih avângin, kum tina inthawina pângngai an hlan fote chuanin, a rawn hnaihte chu eng tikah mah an tifamkim thei dâwn si lo. 2 Chuti ni suh sela, a betute chu vawi khata tihthianghlim nghâla awmin, sual inhriatnate an neih loh avângin hlan an bâng tawh daih dâwn lâwm ni? 3 Nimahsela, chûng inthawinaah chuan kum tinin sualte hriat lehna a lo awm fo zâwk ṭhîn. 4 Bâwngpate leh kêlte thisen chuan sualte tibo thei rual a ni si lo. 5 Chutichuan, khawvêla a luh laiin, “Inthawina leh thilhlan i duh lo va, Ka tân taksa mi buatsaihsak zâwk a: 6 Hâlrala pumpêknaahte leh, Sual tâna inthawinaahte chuan Lâwmna rêng i nei lo. 7 Chu veleh chuan keiin, ‘Aw Pathian, ngai teh, (Lehkhabu zialah chuan ka thu ziak a ni a) I duh zâwng ti tûrin ka lo kal e,’ ka ti a,” a ti a. 8 A chhakah hian, “Inthawina te, thilhlan te, hâlrala pumpêkna te, sual tâna inthawina te i duh lo va, chûngah chuan lâwmna i nei hek lo,” a ti a (chûngte chu Dân thu anga hlan a ni a), 9 chu veleh chuan, “Ngai teh, i duh zâwng ti tûrin ka lo kal e,” a lo ti ta a. A pahnihna hi a tundin theihna tûrin a hmasa chu a la bo ta a ni. 10 Chumi duh zâwng chuan, Isua Krista taksa vawi khata hlan nghâl vâng khân tihthianghlimin kan awm ta. 11 Tin, puithiam tinrêngin chu kâwla ni chhuak chhiara rawngbâwlin, sualte eng tik maha tibo thei lo inthawina pângngai hlân fovin an ding ṭhîn; 12 ani erawh hi chu chatuan atân sualte tâna inthawina pakhat chauh a hlan hnuin, Pathian ding lamah a han ṭhu ta zâwk a; 13 chuta chin chu a hmêlmate a kephah nghahchhana siam an nih hma loh zawng a nghâk reng a. 14 Thilhlan pakhat chauhvin tihthianghlim tawhte chu chatuan atân a tifamkim tawh si a. 15,16 Tin, Thlarau Thianghlim pawh chuan min hriattîr bawk a: “Chûng ni hnuah chuan An hnêna thu ka thlun tûr chu hêng hi a ni,” Lalpan a ti; “An thinlungah ka thupêkte ka dah ang a, An rilruah ka ziak bawk ang,” tia a sawi hnu khân, 17 “An sualte leh an bawhchhiatnate, Ka hre reng tawh lo vang,” a ti si a. 18 Tichuan, chutiangte ngaihdamna apiangah chuan sual tân thilhlan a awm tawh lo a ni.
Pathian i hnaih ang u
19,20 Chutichuan, unaute u, kawng min ruatsak, kawng thar leh nungah chuan, puanzâr chu (chu chu a taksa tihna a ni) kal tlangin, Isua thisen avâng chuan Hmun Thianghlimah khân luh kan huam avâng leh, 21 Pathian chhûngte chunga Puithiam ropui tak kan neih avângin, 22 kan thinlunga chhia leh ṭha hriatna ṭha lo chu theh faisaka awma, kan taksa pawh tui fîma buala awmin, rinna famkim neia thinlung takzet puin i hnaih ang u. 23 Kan beisei thurin hi a nghîn lohna tûrin i pawm tlat ang u, thutiamtu chu a rinawm si a. 24 Tin, hmangaih leh thil ṭha tiha inchawk tho tûrin i inngaihtuah tawn ang u; 25 ṭhenkhat tih dân anga kan inkhâwm te bânsan lovin, i infuih tawn zâwk ang u; ni chu lo hnai telh telha in hriatin infuih tawn nasa lehzual sauh rawh u. 26 Thutak hriatna famkim chu kan chan hnua thil kan tihsual luih si chuan, sualte tâna inthawina a awm tawh hauh lo vang a, 27 rorêlna hlauhawm tak lo thleng tûr leh dotute kâng ral tûr thinurna mei kan hmabâk a ni mai. 28 Mosia Dân thu pawisa lo mi chu hretu pahnih pathum emaw thuin, lainatna tel lovin an thi ṭhîn. 29 Pathian Fapa rap beta, thuthlung thisen, amah tihthianghlimna chu thil narâna ruata, khawngaihna Thlarau tivuitu chu, chu mi ai chuan engtia hremna nasa zâwk nge tuar tlâka ruat tûr nia in ngaih? 30 “Phuba rêng rêng keima lâk tûr a ni, keimân ka thungrûl ang,” tih leh, “Lalpa chuan a mite a ngaihtuah ang,” ti lehtu chu kan hre si a. 31 Pathian nung kuta tlûk chu thil râpthlâk tak a ni. 32 Nimahsela, hmâna tihêna in awm hnua, tuarna buai nasa tak in tuar lai nite kha hre leh rawh u; 33 kawng khatah chuan hmuhsit leh hrehawmte pawh tuarin ennawma siamin in awm a, kawng dangah chuan chutianga hmâna awmte chu tuarpuitute in lo ni a. 34 Kawl bunte chu in lainat a, sum ṭha zâwk, awm hlen bawk tûr chu mahniin in nei tih hriain, in sum an lâksakte pawh lâwm takin in lo tuar ta bawk si a. 35 Chutichuan, in rinna lâwmman chu paih bo suh u, lâwmman ropui tak a nei dâwn si a. 36 Pathian duh zâwng in tih hnuin thil tiam chu in hmuh theih nân chhelna in ngai asin. 37 Rei lo tê achinah Lo kal tûra chu a lo kal dâwn si a, Rei a rial tawh lo vang. 38 Nimahsela, ka mi fel chu Rinnain a nung ang; A hnungtawlh erawh chuan, Ka rilruin amahah chuan lâwmna rêng a nei lo vang. 39 Nimahsela, keini zawng boral tûra hnungtawlh pâwla mi kan ni lo va; nunna humhim tûra rinna nei pâwla mi kan ni zâwk.
Rinna
1 Tin, rinna hi thil beiseite awm ngeia hriatna, thil hmuh lohte hriat fiahna a ni. 2 Chumiah chuan upahote khân fak an hlawh si a. 3 Rinnain khawvêlte hi Pathian thua siam fel diam a ni tawh tih kan hria; chutichuan, thil hmuh theihte hi thil lang theitea siam a ni lo. 4 Rinnain Abela chuan Kaina ai chuan inthawina ṭha zâwk Pathian hnênah a hlân a, chumi avâng chuan mi fel a ni tih hriattîrna a hlawh a, Pathianin a thilpêkte kawngah chuan thu a hriattîr a; tin, chumi rinna avâng chuan ani chuan thi tawh hnuin thu a la sawi ta fo a ni. 5 Rinnain Enoka kha thihna hre lo tûra lâk bovin a awm a; tin, Pathianin a lâk bo avângin hmuh theih a ni ta lo va; lâk bova a awm hmain Pathian lâwm zâwng mi a ni tih an hriattîr tawh rêng a. 6 Nimahsela, rinna lovin ama lâwm zâwng mi nih rual a ni lo; Pathian hnêna lo kal chuan, ani chu a awm tih leh, zawngtute hnêna lâwmman pêk hmang a ni tih rin tûr a ni. 7 Rinnain Nova chu thil lo la lang lote kawng thu-ah Pathian hrilha lo awmin, Pathian ṭih dêkin a chhûngte chhandam nân lawng a tu a; chu chuan khawvêl chu thiam loh a chantîr ta a, rinna avânga felna awm chu rochungtu a lo ni ta bawk a. 8 Rinnain Abrahama chu kohva a awm lai khân, a rochun tûr hmuna lût tûrin kal chhuah thu a pawm ta a; tin, a kalna tûr lam pawh hre lovin a kal chhuak ta a. 9 Rinnain ram tiamah khân mi rama châm ang maiin a châm ta reng a, thutiam hmun khat a rochunpui tûr Isaaka leh Jakoba-te nên chuan puan inahte an awm a; 10 khua, lungphûmte nei mi, Pathian rêlbâwl leh siam chu a nghâk reng si a. 11 Rinnain Sari ngei pawhin, a tiamtu chu rinawma a ruat avângin, tar tawh hnuin chi pai theihna a hmu a. 12 Chutichuan, mipa pakhat lakah (ani chu mitthi ang a ni si a) vâna arsite anga tam, tuifinriat kama ṭiauvaivut chhiar sên loh anga tam an lo chhuak ta a. 13 Chûng zawng zawng chu rinna neiin an thi ta a, thil tiamte chu chang lovin; nimahsela, chûng chu hla tak aṭanga hmuin chibai an lo bûk tawh a, leiah hian mikhual leh khualzin mai an ni tih an inhriattîr tawh bawk a. 14 Chutiang thu sawite chuan anmahni ram tûr an zawng tih an tilang si a. 15 Tin, an chhuahna ram chu lungkham sela chuan hâwnna remchâng an hmu tawh ngei tûr a ni. 16 Nimahsela, tûnah zawng ram ṭha lehzual châk an lo ni a, chu chu vâna mi a ni; chutichuan, Pathianin an Pathian tiha awm chu a zak lo ve; an tân khua lam a lo buatsaihsak tawh si a. 17 Rinnain Abrahama chu fiaha a awm khân Isaaka chu a hlân a; 18 “Isaaka-ah hian i thlahte chhui an ni ang,” tih Pathian thutiam dawngtu chuan a fapa mal neih chhun chu a hlân a ni; 19 mitthi pawh Pathian chuan a kaitho thei ang tih a ring a, thi hnu nung leh ang maiin a hmu kîr leh ta rêng a ni. 20 Rinnain Isaaka chuan thil lo la thleng tûrte thu-ah pawh Jakoba leh Esauva chu mal a sâwmsak a. 21 Rinnain Jakoba chuan a thih dâwn lai khân Josefa fate chu mal a sâwm ve ve a; a tiang hmâwr rinchhanin Pathian a be bawk a. 22 Rinnain Josefa chuan a thih a lo hnaih khân Israela thlahte chhuah tûr thu a sawi a; a ruhte kawng thu-ah thu a pe bawk a. 23 Rinnain Mosia a lo pian lai khân, nausên hmêlṭha tak a ni an tih avângin, thla thum chhûng a nu leh a pa thuhrukin a awm a; lal thupêk pawh an hlau lo. 24 Rinnain Mosia chuan, a lo puitlin hnu khân Pharaoa fanua fapaa vuah a duh lo va; 25 rei lo tê atân sual nawmna hlimpui ai chuan, Pathian mite nêna tihduhdah tuar a thlang ta zâwk a; 26 Krista an hmuhsitna chu Aigupta ram rote ai chuan sum ropui zâwkah a ruat a; lâwmman pêk tûr chu a thlîr ṭhin avângin. 27 Rinnain lal thinurna chu hlau lovin Aigupta ram a kalsan a, hmuh theih lohva chu a hmuh avângin a tuar ṭan ṭan a ni. 28 Rinnain kalhlên kût leh thisen theh kha a siam a, fa tîr tiboraltu chuan anmahni a tawh lohna tûrin. 29 Rinnain khawmuala kal angin Tuifinriat Senah khân an kal kai a; Aigupta-hovin chu chu tih an tum ve a, lem zawhin an awm ta a. 30 Rinnain Jeriko khaw kulh kha ni sarih an hual hnuin a chim ta a. 31 Rinnain Rahabi nawhchizuar kha awih loho zîngah chuan a boral ve ta lo, enthlatute chu tlang taka a lawm avângin. 32 Tin, eng nge ka la sawi cheu vang? Gideona thu te, Baraka thu te, Samsona thu te, Jephtha thu te, Davida thu te, Samuela thu te, zâwlneiho thu te hril ila, hunin mi daih dâwn si lo va; 33 chûngte chuan rinnain ramte an la a, thil fel an ti a, thutiamte an chang a, sakeibaknei khate an tihchihsak a, 34 mei thiltihtheihna an timit a, khandaih hriam lam an pumpelh a, chak lohna ata chak taka siamin an awm a, indonaah chuan mi hrât khawkhêng an lo ni a, hnam dang indo pâwlte an tlânchhiattîr a. 35 Hmeichhiaten an mitthite tholeh an hmu a; mi dangte pawh sawisakin an awm a, thawhlehna ṭha lehzual an chan theihna tûrin chhanchhuah an duh lo va; 36 mi dangte pawhin tihnawmnah leh vuakte an tuar a, a ni, chu lo pawh chu, kawl bun leh tân ina khungte an tâwk bawk a; 37 lunga denin an awm a, thingzainaa zai bunin an awm a, thlêmna an tâwk a, khandaiha sah hlumin an awm a; berâm vun leh kêl vun sinin an vâkvai a; rethei takin, hrehawm takin, tihduhdahin an awm a 38 (chûngho tân chuan khawvêl hi awmna tlâk a ni lo); thlalêrah te, tlângah te, pûkah te, khuarkhurumah te an vâk an vâk ṭhîn a. 39 Tin, chûng zawng zawng chuan rinna avânga fak lo hlawh tawhin, thil tiam chu an chang lo va, 40 keini tel lova anni chu tihfamkima an awm loh nân, Pathianin keimahni kawng thu-ah thil eng emaw ṭha lehzual a buatsaih tawh avângin.
Lalpa thununna
1-2 Chutichuan, chhûmpui nasa tak ang thlîrtuten min hual vêl avâng hian, min tihnawk apiang leh sual keimahnia bet tlat chu i dah ve ang u; tin, Isua, kan rinna siamtu leh tifamkimtu lam chu enin, kan hmaa intlânsiakna tûr awmah hian chhel takin i tlân zêl ang u. Ani chuan a hmaa hlimna awm avâng chuan, mualphona chu ngainêpin kraws chu a tuar a, Pathian lalṭhutphah ding lamah khian a han ṭhu ta a. 3 In thlarau lamah in inthlahdaha, in lo hah loh nân, anmahni chunga ṭha lo tûrin mi sualte chutianga hnialkalhna tuartu chu ngaihtuah teh u khai. 4 Sual dovin thisen chhuak khawpin in la ṭang lo va, 5 fuihna thu, fate zilh anga zilhna che u kha, in lo theihnghilh ta e. “Ka fa, Lalpa thununna chu ngainêp suh la, A zilhhauva i awmin inthlahdah hek suh; 6 Lalpa chuan a hmangaih chu a thunun ṭhîn a, Fa a lawm apiang chu a vaw ṭhîn asin ni,” tih hi. 7 In tuar hi nangmahni thunun nân a ni; fate chunga tih angin Pathianin in chungah a ti a nih hi; pa thunun loh fa tu nge awm ngai le? 8 Fa zawng zawng hlawh ṭhin thununna chu hlawh lova in awm erawh chuan, fa tak ni lovin, sâwn in ni a ni ang asin. 9 Chu lo pawh chu min thunun tûrin kan tisa pate kan neih kha, chûngte chu kan zah si a; chumi aia nasa zâwkin, kan nunna tûrin thlaraute Pa thu thuin kan awm dâwn lâwm ni? 10 Anni chuan ni rei lo tê, ṭha an tih ang zêlin min thunun ngei tak a, ani erawh chuan a thianghlimna chu kan chan ve theih nân, kan ṭhatna tûrin min thunun zâwk ṭhîn a ni. 11 Tin, thununna rêng rêng hi tuar lai chuan lâwmawmin a lang lo va, lungchhiatthlâkin a lang zâwk ṭhîn; tuar hnuah erawh chuan, chumia sawizawia awmte tân chuan rah thlamuanawm tak, felna chu a chhuahsak ṭhîn. 12 Chutichuan, kut uai thlate chu char rawh u, khûp zâwite nên; 13 tin, kebai chu tihpelhsawlh lohva, tihdamin a awm zâwk nân, in kete tân kawng ngîlte siam rawh u.
Pathian khawngaihna hnar loh tûr
14 Mi zawng zawng nêna inremna leh thianghlimna ûm rawh u, chumi thianghlimna lovin tu mân Lalpa an hmu lo vang: 15 Fîmkhur rawh u; chuti lo chuan, Pathian khawngaihna ata in bo dah ang e, khâkna zung eng emaw lo chawra tibuai che uin, chu chuan mi tam tak chu tihbawlhhlawhin an awm ang a, 16 inngaih hmang emaw, Esauva anga Pathian zah lo mi emaw an lo awm dah ang e. Ani chuan a fa tîr nihna chu chaw vawi khat eiah a hralh a. 17 Chumi hnuah chuan malsâwmna chu rochun a duh pawhin, mittui tla chungin ṭhahnemngai takin zawng mah sela, rilru inlamlêtna remchâng a hmuh loh avângin paihin a awm ta tih in hre si a. 18,19 Nangni zawng tlâng khawih theih, meia kâng te, chhûm dum te, thim te, thlipui te, tawtawrâwt rîkna te, thusawi thâwm awmna te kha thleng in ni si lo va (chu thâwm hretute chuan thu dang rêng an hnêna sawi tawh lo tûrin an ngên a, 20 “Sa lam pawhin tlâng chu khawih sela, lunga den hlumin a awm tûr a ni,” tih thupêk kha an tuar thei ta si lo va. 21 An thil hmuh pawh chu a hlauhawm êm êm a; chutichuan, Mosian, “Ka hlauvin ka khûr nasa êm êm a,” a tih hial kha). 22 Zion tlâng te, Pathian nung khua, vân Jerusalem te, chhiar sên lohho vântirhkoh inkhâwmpui te, 23 fa tîr vâna hming chuang kohhran hnên te, Pathian, mi zawng zawng ngaihtuahtu hnên te, mi fel tihṭhat famkimho thlarau hnên te, 24 Isua, thuthlung thar palai hnên te, thisen theh, Abela thisen aia thu ṭha zâwk sawitu hnên te thleng in ni zâwk. 25 Thusawitu chu in lo duh lo dah ang e, fîmkhur rawh u. Leia anmahni zilh lâwktu kha an duh loh maha hremna an pumpelh si loh chuan, keini, vân aṭanga min zilh lâwktu hawisantute hian kan pumpelh lo lehzual ang. 26 Chumi lai chuan a aw khân lei hi a tinghîng a; nimahsela, tûnah hian, “Vawi khat chu lei chang ni lovin, vân pawh ka la tinghîng leh ang,” tiin a tiam ta zâwk a. 27 Tin, “Vawi khat chu ka la tinghîng leh ang,” tih hian, thil nghîng lote chu a awm reng theihna tûrin, thil nghîngte chu thil siamte ang maiin sawn bovin a awm dâwn tih a hriattîr a ni. 28 Chutichuan, ram tihnghîn rual loh kan chan avâng hian khawngaihna i nei ang u, chumi zârah chuan zah leh ṭih dêk chungin Pathian lawm zâwng rawng kan bâwl thei dâwn zuk nia; 29 kan Pathian hi mi kan ral hmang mei a ni si a.
Pathian lâwm zawng rawngbâwlna
1 Unau inhmangaihna hi awm zêl rawh se. 2 Mikhualte chungah hmangaih chhuah theihnghilh suh u; chutiang tiin ṭhenkhatten hre lovin vântirhkohte an thleng si a. 3 Phuara awmte chu phuar ni ve angin hre reng ula; hrehawm tuarte chu taksaa awm ve bawk in nih avângin hre reng rawh u. 4 Mi zawng zawng zîngah inneih hi chawimawiin awm sela, khum pawh tihbawlhhlawh lohvin awm rawh se; inngaite leh uirête chu Pathianin a ngaihtuah dâwn si a. 5 In rilru putzia chu tangka ngainatna tel lo ni rawh se; in thil neih chhun chungahte chuan lungawi rawh u; amah ngeiin, “Eng tikah mah ka thlahthlam tawp lo vang chia, kal pawh ka kalsan tawp lo vang che,” a ti si a. 6 Chutichuan, huai takin, “Lalpa chu mi ṭanpuitu a ni, Ka hlau lo vang; Mihringin eng nge mi tih theih ang?” kan ti ṭhîn a ni. 7 In hotu, Pathian thu lo hrilhtute che u chu hre reng ula, an awm dâna thil chhuak chu ngaihtuahin an rin dân zir rawh u. 8 Isua Krista chu niminah nên, vawiinah nên, kumkhua pawhin a pângngaiin a awm fo vang. 9 Zirtîrna tinrêng leh zirtîrna mak tak len bovin awm suh u; thinlung hi khawngaihnaa tihngheha a awm chu a ṭha si a, ei tûrtea tihngheha awm lovin; chutiang kawng lungkhamte chuan chûngah chuan sâwtna an hmu chuang lo. 10 Keini zawngin maichâm kan nei a, chumiah chuan biakbûk rawngbâwltute chuan an ei tûr a ni lo. 11 Ran, a thisen puithiam lalberin Hmun Thianghlima sual tâna hlana a luhpui ṭhina ruangte chu, dai pâwnah an hâl ṭhîn si a. 12 Chutichuan, Isua pawhin, ama thisen ngeia mite chu a tihthianghlim theihna tûrin, kulh kawngkhâr pâwn lamah chuan a lo tuar ta a. 13 Chutichuan, amah an hmuhsitna chu phurin dai pâwnah a hnên lamah i kal chhuak ang u. 14 Hetah hian khaw hmun nghet kan nei si lo va, khaw lo la awm tûr chu kan zawng zâwk a ni. 15 Tichuan, ama zârah chuan faka inthawina hi Pathian hnênah i hlân fo vang u, chu chu a hming ṭanna hmuite rah chu a ni. 16 Nimahsela, thil tihṭhat leh thilphal hi theihnghilh suh u; chutiang inthawina chungah chuan Pathian a lungni êm êm si a. 17 In hotute thu awih ula, an thu thuin awm rawh u; chanchin sawi tûr an nih avângin, lungngai chunga sawi lova, hlim taka an sawi theihna tûrin in thlarau an vênsak ṭhîn che u a ni; lungngai chunga sawi chu in tâna pawi tûr a ni si a. 18 Min ṭawngṭaisak rawh u; engkimah fel taka awm tumin, chhia leh ṭha hriatna thiang tak kan nei tih dik takin kan inhre si a. 19 Tin, rang deuhva in hnêna tirh lehin ka awm theih nân, chu chu ti tûrin ka ngên lehzual sauh che u a ni.
Malsâwmna leh chibai bûkna
20 Tin, remna Pathian, berâm Vêngtu ropui tak, kan Lalpa Isua chatuana thuthlunna thisen zâra mitthi zîng ata hruai chhuak lehtu khân, 21 a mit hmuha a lawm zâwng ang apiang Isua Krista zârah keimahniah thawkin, a duh zâwng ti tûrin thil ṭha tinrêng kawngah tifamkim che u rawh se; Isua Krista hnênah chuan ropuina chatuanin awm rawh se. Amen. 22 Nimahsela, unaute u, ka ngên a che u, fuihna thu hi ngaithei hrâm hrâm rawh u; in hnênah thu tlêm tê ka ziak si a. 23 Kan unaupa Timothea kha an chhuahtîr ta tih lo hre ve rawh u; a lo kal hma deuh chuan amah nên kan rawn hmu ang che u. 24 In hotu zawng zawng leh mi thianghlim zawng zawng kha chibai mi bûksak ang che u. Itali rama mite hian chibai an bûk a che u. 25 In zaa hnênah khawngaihna awm rawh se. Amen.
Chibai bûkna
1 Jakoba, Pathian leh Lalpa Isua Krista bawih chuan Hnam Sâwm leh Hnam Hnih Darhte chu chibai a bûk e.
Rinna leh finna
2,3 Ka unaute u, in rinna fiahna chuan chhelna a siam tih hriain, thlêmna tinrêng in tawh hunin lâwmna hlîrah ngai rawh u. 4 Tin, eng mah tlachham lova in famkima, in puma in him theih nân chhelna chuan thawk famkim rawh se. 5 In zîngah tu pawhin finna a tlâkchham chuan, mi zawng zawng hnêna hau lo leh ui lova pe ṭhîntu Pathian chu dîl rawh se; chutichuan, a hnênah pêk a ni ang. 6 Nimahsela, ringhlel hauh lovin, rinna neiin dîl rawh se; ringhleltu chu tuifinriat fâwn, thli chhêm lên leh vawrh ang a ni si a. 7,8 Chutiang mi, rilru bulbâl nei lo, a thiltih zawng zawnga nghet lo mi chuan Lalpa hnênah eng mah hmuh inring suh se.
Retheihna leh hausakna
9 Unau daikil kâra mi chu chawimawia a awm avângin lâwm rawh se; 10 hausa erawh chu tihtlâwma a awm avângin lâwm rawh se; hlobet pâr angin a la ral mai dâwn si a. 11 Ni a lo chhuaha, thli lum tak a lo tlehin hlobet a tivuai a; tin, a pâr chu a rêm a, a awm dân mawizia chu a boral ṭhîn; chutiang bawkin mi hausa chu a kalnaah chuan a lo vuai dâwn si a.
Fiahna leh thlêmna
12 Thlêmna tuar hrâm hrâmtu chu a eng a thâwl e; fiaha a awm hnuin nunna lallukhum, Lalpan amah hmangaihtute hnêna a tiam chu a hmu dâwn si a. 13 Tu mân thlêmna an tawh laiin, “Pathian thlêm ka ni,” ti suh se; Pathian chu sual thlêm rual a ni lo, amah pawhin tu mah a thlêm ngai lo. 14 Mi tin mahni châknaa hruai bo leh hîpa an awm chuan thlêmna an tâwk a ni zâwk e. 15 Tin, châkna chuan no a pai a, sual a hring ṭhîn a; tin, sual chuan a lo puitlinin thihna a hring ṭhîn. 16 Ka unau duh takte u, bumin awm suh u. 17 Thilpêk ṭha leh thilpêk famkim zawng zawng chu, chung lam aṭangin êngte Pa hnên ata a lo chhuk ṭhîn a ni, amahah chuan danglamna leh herna hlim rêng rêng a awm thei lo. 18 A thil siamte hmahruaitu ang kan lo nih theih nân, ama duh zâwngin thutak lakah chuan min hring a ni.
Thu hriat leh zawm
19 Unau duh takte u, chûng chu in hria e; nimahsela, mi tinin ngaihthlâk chuh sela, thusawi chuh lo sela, thin tinel rawh se; 20 mihring thinurnain Pathian felna chu a siam si lo. 21 Chuvângin, bawlhhlawh zawng zawng leh sual khat liam chu dah bo ula, thu tuh, in thlarau chhandam thei chu, thuhnuairawlh takin pawm rawh u. 22 Nimahsela, thu ngaithlatute mai ni lovin, zâwmtute lo ni zâwk rawh u; chuti lo chu, mahni inbum in lo ni dah ang e. 23 Tu pawh thu ngaithlatu nia zâwmtu ni si lo chu, mi, dârthlalanga a pianpui hmai ngun taka inen ang chu a ni: 24 ngun takin a inen a, a kal bo va, mi eng ang nge a nih a intheihnghilh nghâl si ṭhîn. 25 Amaherawhchu, tu pawh dân famkim, zalênna dân hi biha, chutianga awm renga, ngaithlaa, theihnghilh leh mai ṭhîntu ni lova, zâwma, hna thawk fo ṭhîntu ni zâwk chu, chu mi chu a thiltihah malsâwmin a awm ang. 26 Tu pawh sakhaw ngaihsak nia inringa, a lei vêng ṭha si lova, mahni thinlung inbum zâwk chu, chu mi sakhaw biak dân chu eng mah a ni lo ve. 27 Kan Pathian leh Pa mit hmuha sakhaw biak dân thianghlim leh sual tel lo chu hei hi a ni, fahrah leh hmeithaite an hrehawm laia kan leh, khawvêl bawlhhlawh kai lova insiam ṭhin hi.
Hleih nei lo tûra fuihna
1 Ka unaute u, kan Lalpa Isua Krista, Ropuina Lalpa chu ring chungin, mi thlei bîk nei suh u. 2 In inkhâwmna inah mi, rangkachak zungbun bun, puan mawi tak sin lo lût sela, mi rethei puan chhe tak sin lo lût bawk sela; 3 tin, puan mawi tak sin chu in ngaihsaka, a hnênah chuan, “Nang he hmun ṭhaah hian ṭhu rawh,” in tiha, mi rethei hnênah chuan, “Nang chu sawtah sâwn ding la, a nih loh leh ka ke nghahchhan hrûlah hian ṭhu rawh,” in tih chuan, 4 in rilruah thlei bîk neiin ngaihtuahna sual pua sawisêltute in lo ni dâwn lâwm ni? 5 Ka unau duh takte u, ngai teh u, Pathianin he khawvêl thila retheite hi rinnaa hausa tûr leh, amah hmangaihtute hnêna a tiam ram chu luahtu tûrahte a ruat lo vem ni? 6 Nangni zawngin mi rethei chu in timualpho ta zâwk a ni. Mi hausate chu a tiduhdahtu che u leh rorêlna ina hnûk lût ṭhîntu che u chu an ni lâwm ni? 7 Hming zahawm tak in put hi sawichhetute chu an ni lâwm ni? 8 Nimahsela Pathian Lehkha Thu, “Nangmah i inhmangaih angin i vêngte i hmangaih tûr a ni,” tih lal dân hi in zawm chuan in tiṭha e; 9 amaherawhchu, mi thlei bîk in neih chuan in tisual a ni, Dânin bawhchhetuah a chantîr si che u a. 10 Tu pawhin Dân zâwm kim mah sela, kawng khata a tihsual si chuan, a zaah chuan thiam loh changin a awm tawh a ni. 11 “Uire suh,” titu chuan, “Tualthat suh,” a ti bawk si a. Chutichuan, uire lo mah la, tual i thah si chuan Dân bawhchhetu i ni rêng rêng tawh a ni. 12 Chuvângin, zalênna dâna rorêlsak tûrte angin thu sawi ula, thil ti bawk rawh u. 13 Mi chunga khawngaihna nei lo chu khawngaihna tel lovin rorêlsakin a awm ang; khawngaihna hi rorêlna aiin a chungnung zâwk a ni.
Thiltih tel lo rinna chu thi a ni
14 Ka unaute u, miin, “Rinna ka nei,” ti mah sela, thiltih a neih si loh chuan eng nge sâwt ang? Chutiang rinna chuan amah a chhandam thei ang em ni? 15 Unaupa emaw, unaunu emaw, saruaka awmin an ni tin chaw tlachham sela; 16 tin, in zînga tuin emaw, an hnênah, “Thlamuang takin kal ula, lum tak leh puar takin awm rawh u,” ti ula, taksa tâna thil châkkhai chu in pêk si loh chuan eng nge sâwt ang? 17 Chutiang bawkin rinna chu thiltih nei lovin amah chauhvin a awm chuan thi a ni. 18 A ni, mi tuin emaw, “Nangin rinna i nei a, keiin thiltih ka nei a ni; i rinna chu i thiltih tel lovin mi entîr rawh; tin, keiin ka thiltihin ka rinna ka entîr ang che. 19 Pathian chu pakhat a ni tih i ring a ni maw? I tiṭha e; ramhuaite pawhin an ring a, an khûr ṭhîn asin,” a ti ang. 20 Aw mi lawilopa, thiltih tel lova rinna mai chu eng mah a ni lo tih i hre duh em le? 21 Min thlahtu Abrahama chuan a fapa Isaaka maichâm chunga a hlan lai khân, thiltih avângin thiam a chang a ni lâwm ni? 22 Rinna chuan a thiltih nên a thawk dûn a; tin, thiltih avângin a rinna chu a famkim ta tih i hria e. 23 Pathian Lehkha Thu, “Abrahama chuan Pathian a ring a, chu rinna chu a felnaah ruat a ni,” tih thu kha a lo hlawhtling a; tichuan, Pathian ṭhianah vuahin a awm ta a. 24 Rinna avâng ngawt ni lovin, thiltih avâng zâwkin miin thiam a chang ṭhîn tih in hre ta. 25 Chutiang bawkin Rahabi nawhchizuar pawh khân enthlatute kha a lo lâwm a, kawng danga a hâwntîr lai khân thiltih avângin thiam a chang a ni lâwm ni? 26 Thlarau tel lovin taksa chu thi a ni a, chutiang bawkin thiltih tel lovin rinna pawh chu thi a ni.
Lei hi
1 Ka unaute u, in zînga mi tam tak hi zirtîrtuahte lo awm suh u, zirtîrtuin rorêlna nasa lehzual kan tâwk ang tih kan hre si a. 2 Kan zain thil tam tak kan tisual fo ṭhîn. A thusawia tisual ngai lo mi chu mi puitling a ni a, a taksa pum pawh vêng thei mi a ni. 3 Ngai teh u, kan thu an awih theih nân sakawr kaahte thîrbarh kan barh chuan, an taksa pum pawh kan kai her ṭhîn. 4 Ngai teh u, lawngte pawh hi a lian hle a, thli na tak chhêm lênin a awm ṭhîn na a, a tihertu chuan a kaltîr duhna lam apiangah tihherna tê tak têin a tiher ṭhîn. 5 Chutiang bawkin lei pawh hi taksa pêng tê tak tê a ni a, nasa takin a uang ṭhîn. Ngai teh u, mei tê tak têin thing a va tikâng nasa êm! 6 Tin, lei hi mei a ni; kan taksa pêngte zînga khawlohna hlâwm chu lei hi a ni; chu chuan taksa a pumin a tibawlhhlawh a, pianpui tawlailîr chu a tikâng a, amah chu hremhmun tihkan a ni. 7 Sa chi tinrêng te, sava chi tinrêng te, rannung chi tinrêng te, tuifinriata mi chi tinrêng te hi khawi ngam theih an ni si a, mihringte khawi ngamin an awm bawk a; 8 amaherawhchu, lei hi tu mahin an khawi ngam thei lo a ni; thihna hlova khat, sual awm hle hle thei lo a ni. 9 Chu chuan Lalpa leh Pa kan fak ṭhîn a; chu vêk chuan Pathian anga siam mihringte chu ânchhia kan lawh bawk ṭhîn a ni. 10 Ka hmun khat aṭangin fakna leh ânchhe lawhna a chhuak ṭhîn. Ka unaute u, chûng thil chu chutiang tûr a ni lo ve. 11 Tuikhur hian hna hmun khatah tui tui leh tui tui lo a tichhuak ṭhîn em ni? 12 Ka unaute u, theipui kûngah olive thei a rah thei em ni? A nih loh leh grêp hruiah theipui a rah thei em ni? Chutiang bawkin chi khur hian tui al lo a tichhuak thei hek lo.
Chung lam ata finna
13 In zîngah tu nge finga thu hre thei awm? Thuhnuairawlh tak leh fing takin a thiltihte chu awm dân ṭhatin entîr rawh se. 14 Nimahsela, in thinlungah îtsîkna nasa tak leh inelna in neih chuan, thu dik uan khum suh ula, thu dik dodâlin dâwt sawi hek suh u. 15 Chu finna chu chung lam aṭanga lo chhuk chu a ni lo va, khawvêl leh taksa châkna leh ramhuaia mi a ni zâwk e. 16 Inîtsîkna leh inelna awmnaah chuan buaina leh suahsualna tinrêng a awm ṭhîn. 17 Chung lam aṭanga finna lo chhuak erawh chu a tîrin a thianghlim phawt a, chumi hnuah chuan inrem a duh a, a nunnêm a, a tihnuam a, zahngaihna leh rah ṭhain a khat a, thlei bîk a nei lo va, a vervêk lo a ni. 18 Felna rah chu remna siamtute tân remnain tuh a ni.
Khawvêl nêna inṭhianna
1 In zînga indona leh inhnialnate hi khawi aṭanga lo chhuak nge ni? In taksa pêngahte indona siam ṭhîntu, in duh zâwng aṭangte chuan lo chhuak a ni lo vem ni? 2 In châk a, in nei si lo va; tual in that a, in awt a, in nei thei si lo va: in inhnial a, in indo va; in dîl loh avângin in nei lo va. 3 In dîl a, in dîl dik loh avângin in hmu lo, in nawmsak nân hman in tum si a. 4 Nangni uirete u, khawvêl ṭhian nihna hi Pathian hmêlma nihna a ni tih in hre lo vem ni? Chutichuan, tu pawh khawvêl ṭhian nih duh apiang Pathian hmêlmaah a insiam ṭhîn a ni. 5 A nih loh leh, “Thlarau keimahnia a chêntîr chuan thîk khawp hialin min duh a ni,” tih hi, Pathian Lehkha Thuin engmahlovin sawiin in ring em ni? 6 Nimahsela, khawngaihna tam lehzual a pe ṭhîn; chuvângin, Pathian Lehkha Thuin, “Pathianin mi chapote a dodâl a, inngaitlâwmte erawh chu khawngaihna a pe ṭhîn,” a ti a ni. 7 Chutichuan, Pathian thu thuin awm rawh u; amaherawhchu, Diabola dodâl rawh u; tichuan, a tlân bosan ang che u. 8 Pathian hnaih rawh u; tichuan, anin a hnaih ang che u. Mi sualte u, in kutte sil fai rawh u; rilru bulbâl nei lote u, in thinlung tithianghlim rawh u. 9 Hrehawm ula, lungngai ula, ṭap rawh u; in nuih lungngaihah chang sela, in hlim nguiah chang rawh se. 10 Lalpa mit hmuhin inngaitlâwm rawh u; tichuan, a chawimawi ang che u.
Unau sawisêl loh tûr
11 Unaute u, insawichhe tawn suh u. Tu pawhin a unau a sawichhiatin emaw, a unau a sawisêlin emaw, Dân a sawichhiain Dân a sawisêl a ni; nimahsela, Dân i sawisêl chuan Dân zâwmtu i ni lo va, rorêltu i ni zâwk e. 12 Dân petu leh rorêltu pakhat chauh a awm, chhandam theia tiboral theia chu. Nang ṭhenawmte sawisêltu chu tu nge maw i nih le?
Uang lo tûra zilhna
13 Tûnah ngai teh u khai, nangni, “Vawiinah emaw, naktûkah emaw, chumi khawpuiah chuan kan kal ang a, chutah chuan kum khat kan va thang ang a, kan sumdâwng ang a, hlâwkna kan hmu ang,” titute u, 14 naktûkah chuan eng nge lo awm dâwn in hre si lo. In nunna chu eng nge ni? Chhûm rei lo tê lo langa, ral leh ta mai ṭhîn ang hi in ni si a. 15 Chutichuan, “Lalpan rem a tih chuan kan dam ang a, chumi khami kan ti ang,” in ti tûr hi a ni. 16 Nimahsela, in uannate hi in chhuang zâwk si a, chutiang chhuanna zawng zawng chu sual a ni. 17 Chutichuan, tu pawh thil ṭha tih tûr hriaa ti si lo chu a tân sual a ni.
Mi hausate zilhna
1 Mi hausate u, ngai teh u khai! In chunga hrehawm lo thleng dâwn mêk avâng chuan ṭap ula, chiau vak vak rawh u. 2 In rote a chhe ta a, in puante sûlrûlin a ei zo ta. 3 In rangkachak leh in tangkaruate a tuiêk zo ta; a tuiêk chu in thiam lohzia hriattîrna a ni ang a, in tisa chu mei kan angin a ei ang. Ni hnuhnûngah chuan ro in khâwl khâwm a nih hi. 4 Ngai teh u, in lova buh âta inhlawhfate hlawh, tihdera in pêk loh kha a au va, a âttute mangang au thâwm pawh chu Mipuite Lalpa bengah a lo lût ta a. 5 Khawvêlah hian nuamsa takin in awm a, in inkhawhral mai mai a; inthah niin in thinlung in titlai a. 6 Mi fel chu thiam loh in chantîr a, in that a; ani chuan a dodâl lo a che u.
Chhelna leh ṭawngṭaina
7 Chutichuan, unaute u, Lalpa lo kal hma loh zawng chhel takin awm rawh u. Ngai teh u, lo neitu chuan ruah tui tla hmasa leh hnuhnûng chu a hmuh hma loh chuan chhel takin lei rah hlu tak chu a nghâk ṭhîn. 8 Nangni pawh chhel takin awm rawh u; in thinlung tinghet rawh u; Lalpa lo kalna chu a hnai tawh si a. 9 Unaute u, thiam loh changa in awm loh nân inphun suh u; ngai teh u, Rorêltu chu kawngka bulah a ding reng a ni. 10 Unaute u, Lalpa hminga thu sawitu zâwlneite chu, tuar dân leh chhel dân kawngah chuan entawn atân hmang rawh u. 11 Ngai teh u, tuartute chu engthâwl kan ti a; Joba chhelzia chu in hria a, Lalpan a tâwpa a tihzia pawh kha in hmu bawk a, Lalpa chu khawngaihnain a khahzia leh zah a ngaih theihzia pawh kha. 12 Nimahsela, ka unaute u, eng pawh ti mah ula, chhia chham suh u; vân chhâlin emaw, lei chhâlin emaw, thil dang rêng rêng chhâlin emaw chhia chham suh u; “Ni” in tih chu “Ni” ni sela, “Ni lo” in tih chu “Ni lo” ni rawh se; chuti lo chuan, thiam loh changin in awm ang. 13 In zîngah thil ṭha lo tuar an awm em? Ṭawngṭai rawh se. Hlim an awm em? Fakna hla sa rawh se. 14 In zîngah damlo an awm em? Kohhran upa kohtîr sela, anin Lalpa hminga hriak hnawihin a chungah ṭawngṭai rawh se; 15 tin, rinnaa ṭawngṭaina chuan damlo chu a chhandam ang a, Lalpa chuan ani chu a kaitho vang; tin, thil a lo tihsual tawh chuan ngaihdamsak a ni ang. 16 Chutichuan, tihdama in awm theih nân in sualte thupha chawi tawn ula, inṭawngṭaisak tawn ṭhîn rawh u. Mi fel ṭawngṭaina chuan thil nasa tak a ti ṭhîn. 17 Elija chu keimahni nungchang ang pu mihring bawk a ni a, ani chu ruah sûr loh nân ṭhahnemngai takin a ṭawngṭai a; tin, kum thum leh thla ruk chhûng zawng lei chungah ruah a sûr ta lo va. 18 Tin, a ṭawngṭai leh a, vânin ruah a sûrtîr a, leiin a rahte a rawn chhuahtîr ta a. 19 Ka unaute u, in zînga mi tu pawh thutak aṭang chuan bo sela; tin, tuin emaw hawi kîrtîr sela, 20 mi sual a kawng bona ata hawi kîrtîrtu chuan thihna ata a thlarau a chhandam ang a, sual tam tak a khuhsak bawk ang tih inhre rawh se.
Chibai bûkna
1-2 Petera, Isua Krista tirhkoh chuan Ponto ram te, Galatia ram te, Kappadokia ram te, Asia ram te, Bithunia ram tea Darhho awm, awih tûr leh Isua Krista thisen theh dawng tûra Thlarau tihhrana, Pa Pathian hriat lâwk anga thlante hnênah chuan: In chungah khawngaihna leh remna tihpunin awm rawh se.
Beiseina nung
3 Kan Lalpa Isua Krista Pathian leh Pa chu fakin awm rawh se. Ani chuan a khawngaihna nasa tak ang zêlin, mitthi zîng ata Isua Krista thawhlehna avângin beiseina nung hmu tûrin min hring leh a, 4 rochan chhe thei lo, bawlhhlawh kai lo, chuai thei lo, vâna in tâna khêk chu, hmuhna tûrin; 5 chhandamna, hun hnuhnûnga lang tûra peih sa chu hmu tûrin, rinna avângin Pathian thiltihtheihnaa vên chu in ni. 6 Chumiah chuan nasa takin in hlim a ni, tûnah (a ṭûl chuan) thlêmna tinrêng avângin lungngai rih mah ula; 7 in rinna fiahna, rangkachak meia fiah hnu pawha boral ṭhîn aia hlu zâwk chu, Isua Krista inlâr hunah chuan fakna leh chawimawina leh ropuina tûr a lo nih theih nân. 8 Amah chu hmu ngai lo pawhin in hmangaih a, amah chu tûnah hmu lo mah ula in ring a, lâwm sawi hleih theih loh leh ropui takin in hlim êm êm ṭhîn; 9 in rin chhan - in thlarau chhandamna chu - hmuin. 10,11 In chunga khawngaihna lo thleng tûr thu hril lâwktu zâwlneiten, Krista Thlarau anmahnia awm chuan Krista tuarna tûrte chu a hriat lâwktîr laite khân, eng hun nge ni, eng ang hun nge ni a hriattîr ṭhin tih chhui chhuah tumin, chu chhandamna chanchin chu an zawng a, ngun takin an chhui ṭhîn. 12 Chûng thu chuan mahni rawng inbâwl lovin, nangmahni rawng an bâwl zâwk tih an hnênah hriattîr a ni tawh, chûng thu chu vân aṭanga tirh chhuah Thlarau Thianghlim ṭanpuiin, Chanchin Ṭha hrilhtu che u khân tûnah an hrilh che u a; chûng thil chu vântirhkohten bih an duh ṭhîn a ni.
Nun thianghlim nei tûra sâwmna
13 Chuvângin, in rilru puan vengin ngaihven ula, Isua Krista inlâr hunah chuan khawngaihna a rawn kensak tûr che u chu, beidawng lovin beisei zêl rawh u; 14 fa tihawihte angin, in hriat loh laia in hmânlai châknate anga awm lovin; 15 a kotu che u a thianghlim angin, nangni pawh in chêtzia zawng zawngah lo thianghlim zâwk rawh u; 16 “Nangni in thianghlim tûr a ni, kei ka thianghlim si a,” tih ziak a nih kha. 17 Tin, thlei bîk nei lova mi tin hnathawh ang ṭheuhva ngaihtuah ṭhîntu chu Pa anga in lam chuan, heta in châm chhûng zawng ṭih dêkin awm rawh u. 18,19 In thlahtute pêk chhâwn, in awm dân eng khaw ni lawilo lak ata chu thil chhe thei, tangkarua leh rangkachaka tlan in ni lo va, berâmno hmêlhem lo leh bawlhhlawh kai lo, Krista thisen hlu chuan tlan in ni zâwk tih in hre si a; 20 ani chu leilung pian hmain ruat lâwkin a awm ngei mai; nimahsela, hun hnuhnûngahte hian nangmahni avângin inlârin a awm a; 21 amah avângin mitthi zîng ata kaithotu leh ropuina petu Pathian ringtute in ni a, in rinna leh in beiseina chu Pathianah a awm theih nân. 22 Unaute hmangaih tak tak tûrin, thutak zâwma in thlarau in tihthianghlim tawh avângin, thinlunga ṭhahnemngai takin inhmangaih tawn rawh u; 23 chi chhe thei lakah ni lovin, Pathian thu nung reng leh awm rengah chuan, chi chhe thei lo laka piang thar in ni zâwk si a. 24 “Mi zawng zawng hlobet ang an ni a, An ropuina zawng zawng pawh Hlobet pâr ang a ni. Hlobet chu a vuai a, A pâr chu a tla a; 25 Lalpa thu erawh chu Chatuanin a awm reng a ni,” tih a ni si a. Chu chu a ni Chanchin Ṭha thu an hrilh che u kha.
Lung nung leh hnam thianghlim chu
1 Chutichuan, sualna zawng zawng te, ngamthlêmna zawng zawng te, vervêkna te, îtsîkna te, sawichhiatna zawng zawng te bânsan ula, 2 nausên piang hlimte angin thlarau lam hnutê, eng mah pawlh loh chu châk rawh u, chumiah chuan chhandamna tling khawpa in ṭhan len theih nân; 3 Lalpa chu mi khawngaih thei tak a ni tih in hriat tawh phawt chuan. 4 Amah chu lung nung, mihringte duh loh ngei, Pathian ngaihah erawh chuan thlan leh hlu tak a ni, ama hnênah chuan lo kalin, 5 nangni pawh lung nungte angin thlarau lam ina rem chhohvin in awm, Isua Krista zâra Pathian lâwm zâwng thlarau lam inthawina hlân tûrin puithiam thianghlimho in lo nih nân. 6 Chuvângin, Pathian Lehkha Thuah chuan, “Ngai teh u, Zion-ah chuan a kila lung pawimawh ber, thlan, hlu tak ka rem a ni; Amah ringtu chu a mualpho lo vang,” tih a chuang a ni. 7 Chutichuan, nangni a awihte tân chuan hlu tak a ni, a awih lote tân erawh chuan, “In satuten lung an duh loh kha, Chu ngei chu a kila lung ṭangkai ber a lo ni ta, 8 Tlûkna lung leh dâlna lungpui,” nên. An awih lo va, thu-ah chuan an tlu si ṭhîn a; chutianga ti tûr chuan ruat an ni rêng bawk a. 9 Nimahsela, thim ata chhuaka, a êng mak taka lût tûra kotu che u ṭhatna chu in entîr theih nân, nangni zawng chi thlan, lal puithiamho, hnam thianghlim, Pathian mite ngei in ni si a; 10 hmânlai khân mi rêng in ni lo va, tûnah erawh chuan Pathian mi in ni ta a; hmânlai khân zahngaihna in hmu lo va, tûnah erawh chuan zahngaihna in hmu ta.
Pathian bawihte
11 Duh takte u, mikhual leh khualzin in nih avângin, thlarau do ṭhîntu tisa châknate bânsan tûrin ka ngên a che u; 12 Jentailte zînga in chêtzia chu mawi tak ni rawh se; chutichuan, thil tisualtute anga an sawichhiat che u kawngah chuan, in thil tihṭhat an hmuhte avângin fanin an awm hunah chuan Pathian an chawimawi thei ang. 13 Lalpa avâng chuan mihring ruat apiangte hnênah intulût rawh u, chungnunga awm lalber hnênah emaw, 14 thil tisualtute chunga phuba la tûr leh, thil ṭha titute fak tûra a tirh chhâwn ram awptu hnênah pawh. 15 Hei hi Pathian duh zâwng a ni si, mi âte thusawi fing lo chu thil ṭha tia in tih dân hi; 16 zalên in ni a; nimahsela, in zalênna chu sual khuh nân hmang lovin, Pathian bawiha awm nân hmang zâwk rawh u. 17 Mi zawng zawng chawimawi rawh u. Unaute chu hmangaih rawh u. Pathian ṭih dêk rawh u. Lalber chu chawimawi rawh u.
Krista tuarna entawn tûr
18 Chhiahhlawhte u, ṭih dêk hlîrin in hotute thu thuin awm rawh u; mi ṭha leh mi nunnêmte lakah chauh ni lovin, mi nunrâwngte lakah pawh. 19 Miin Pathian hriatna avângin tuar loh tûr tuarin, lungngaihna a tuar hrâm hrâm chuan, chu chu Pathian lâwm zâwng a ni si. 20 In suala, kut thlâk in tuarin chhel takin tuar mah ula, fak eng nge in hlawh ṭhin? Amaherawhchu, thil in tihṭhata, in tuarin chhel taka in tuar chuan, chu chu Pathian lâwm zâwng a ni. 21 Krista pawh khân a tuarsak che u avângin hetiang ti tûrin koh in ni asin; a hniaka in zuina tûrin entawn tûr a hnutchhiah che u kha. 22 Ani chuan thil rêng a tisual lo va, a kaah ngamthlêmna a awm hek lo; 23 mi hauva a awm laiin a hau ve thung lo va, a tuar laiin a vau lo va; fel taka ngaihtuah ṭhîntua hnênah chuan a inpe zâwk a. 24 Sual lamahte thi tawhin felna lamah kan nun theih nân, amah ngeiin thingah khân a taksain kan sualte a phur a; amah vuakna vualte chuan tihdamin in awm ta a. 25 Berâm bo anga in bo kha; tûnah erawh chuan in thlarau Vêngtu leh Hotu hnênah chuan in kîr leh tâk hi.
Nupa nun dân tûr
1 Chutiang bawkin nangni nupuite u, mahni pasalte thu thuin awm rawh u; chutichuan, an zînga tu pawhin thu chu awih lo mah sela, thu lovin an nupuite chêtziaa hnehin an awm thei ang, 2 ṭih dêk chunga in chêtze thianghlim enin. 3 In incheina chu pâwn lam incheina - sam phiar te, rangkachak ṭhi awrh te, silhfêna inthuam te chu-ni lovin, 4 thinlunga mihring thuhrûk chu, rilru thuhnuairawlh leh nunnêm, silhfên chhe thei lova inthuam ni zâwk rawh se, chu chu Pathian mit hmuhin a hlu êm êm a ni. 5 Chutiangin hmasânga hmeichhe thianghlim Pathian ringtute pawh kha, mahni pasalte thu thua awmin an inchei si ṭhîn a; 6 Sarin Abrahama chu, “Lalpa” tiin a thu a awih ang khân. Eng mah hlau lova thil ṭha in tih tlat chuan Sari fate in ni ang. 7 Chutiang bawkin nangni pasalte u, in nupuite nên in khawsak dânah bêl keh awl zâwk an nih hre thiam ula, khawngaih thilpêk nunna chanpuitu che u an nih hriain chawimawi rawh u; tichuan, in ṭawngṭainate dâl a ni dâwn lo nia.
Felna avânga tuar
8 A tâwp bêrah chuan, in zain rilru hmun khatin awm ula, inlainat tawn ula, unau angin inhmangaih ula, khawngaihna nei ula, thuhnuairawlhin awm rawh u: 9 sual, sualin thungrûl suh ula, hauna, haunain thungrûl hek suh ula, malsâwm hlauh zâwk rawh u. Hemi avângin koh in ni si, malsâwmna chang tûr hian. 10 “Nunna hmangaih duh leh Ni ṭhate hmuh duh chuan Sual lakah a lei vêng ṭha sela, A hmui pawh ngamthlêmna thu sawi lo tûrin Vêng ṭha rawh se. 11 Sual hawisanin Thil ṭha ti rawh se; Remna zawngin Um zêl rawh se. 12 Lalpa mit chu mi felte chungah a fu a, A beng pawh an ṭawngṭaina lamah a chhi si ṭhîn a; Amaherawhchu, Lalpa hmêl chu Thil tisualtute chungah a awm ṭhîn,” tih a ni si a. 13 Thil ṭha lama ṭhahnem in ngaih chuan in pawi khawihtu tûr tu nge awm ang? 14 Nimahsela, felna avânga lo tuar ta ang in nih chuan in eng a thâwl ang. An hlauhawmna chu hlau suh ula, mangang hek suh u; 15 amaherawhchu, in thinlungah Krista chu Lalah ruat rawh u; nangmahnia awm in beisei chhan zâwt apiang che u chhâng tûrin inpeih sa fo vang che u; nimahsela, thuhnuairawlh tak leh ṭih dêk chungin; 16 chhia leh ṭha hriatna thiang tak nei ula; chutichuan, an sawichhiatna che u kawngah chuan, Kristaa in awm dân ṭha tak sawihnâwmtute chu tihmualphovin an awm thei ang. 17 Thil sual tih vânga tuar ai chuan, Pathian remtih zâwng a nih chuan thil ṭha tih vânga tuar hi a ṭha zâwk si a. 18 Pathian hnêna min hruai theih nân, Krista chuan sualte avângin vawi khat a tuar bawk si a, mi fel chuan mi fel lo aiin a tuar a, tisaah chuan tihthihin a awm a, thlarauvah erawh chuan tihnunin a awm ta a; 19 chu chuan tân ina thlarau awmte hnênah chuan thu a zuk tlângaupui a, 20 chu chuan hmâna Nova dam laia, lawng siam chhûng zawnga Pathian dawhtheihnain a nghah lai khân an awih lo va; chu lawngah chuan mi tlêm tê (chu chu mi pariat tihna a ni) tuia chhandamin an awm ta: 21 chumi anpui (baptisma) chuan Isua Krista thawhlehna avângin tûnah a chhandam che u a ni (tisa bawlhhlawh tihfai mai ni lovin, chhia leh ṭha hriatna thianga Pathian lamna hi a ni zâwk e); 22 Isua Krista chu vânah kalin Pathian ding lamah a awm a; vântirhkohho te, thuneihna te, thiltihtheihna te ama thu thua awmtîrin an awm a.
Nun inthlâk
1 Chutichuan, Kristan tisaa a tuar avângin nangni pawh chutiang rilrûknain inthuam ve rawh u; tisaa tuar tawh chuan sual a bânsan tawh si a; 2 chutichuan, tûn hnuah tisaa in la awm chhûng zawngin mihring châkna lamahte awm tawh lovin, Pathian duh zâwng lamah in awm tawh ang. 3 Jentailte duh zâwng tih nân leh hurnaah te, taksa châknaah te, uain hehnaah te, zu hmun hlimnaah te, zu in honaah te, milem biakna tenawm takah te awm nân tûn hma kha a tâwk tawh ang; 4 chûngah chuan anmahni nawmsak bâwl luattuk anga in bâwl ve tâk loh hi mak an ti a, an sawichhe ṭhîn che u a ni; 5 anni chuan mi nung leh mitthite ngaihtuah tûra inpeih sa hnênah chuan an chanchin an la sawi ang. 6 Hemi avâng hian a ni mitthite hnênah pawh chuan Chanchin Ṭha hrilh a nih ni, tisaa awm mihringte anga ngaihtuahin an awm a, thlarau erawha Pathian anga an nun theih nân.
Pathian thilpêk enkawltu ṭha
7 Nimahsela, thil zawng zawng tâwpna chu a hnai tawh a; chuvângin, in ṭawngṭai theih nân rilru fel tak puin fîmkhur rawh u. 8 Eng dang zawng aiin inhmangaih tawn uar rawh u; hmangaihnain sual tam tak a khuh si ṭhîn a. 9 Phunnawi lovin inmikhual tawn ula; 10 mi tinin thilpêk in hmuh ang zêlin Pathian khawngaihna tinrêng enkawltu ṭhate angin, chûng chuan rawng inbâwl tawn ṭheuh rawh u. 11 Mi tu pawhin thu a sawi chuan, Pathian thute angin sawi rawh se; mi tu pawhin rawng a bâwl chuan, Pathianin chakna a pêk ang zêlin bâwl rawh se; chutichuan, Isua Krista avângin Pathian chu thil engkimah chawimawiin a awm thei ang, ropuina leh rorêlna chu chatuana ama ta a ni si a. Amen.
Kristian nih vânga tuar
12 Duh takte u, in zînga fiahna nasa tak lo awm, nangmahni fiahna tûra in chunga lo thleng hi, thil mak in chunga lo thleng angin mak ti suh u. 13 Krista tuarnaahte tuarpuitute in nih avângin lâwm zâwk rawh u; chutichuan, a ropuina a lo lan hunah chuan nangni pawh hlim takin in lâwm thei ang. 14 Krista hming avânga hau in nih chuan in eng a thâwl e; Thlarau ropui tak, Pathian Thlarau chu in chungah a awm si a. 15 Nimahsela, in zîngah tu mân tualthattu a nih vângin emaw, rûkru a nih vângin emaw, thil tisualtu a nih vângin emaw, mi dangte thiltih rêlsaktu a nih vângin emaw tuar suh se. 16 Amaherawhchu, Kristian a nih vângin tuar sela, zak suh se. 17 Rorêlna chu Pathian chhûngteah hian ṭan a hun tawh si a; tin, keimahni maha a ṭan hmasak chuan, Pathian Chanchin Ṭha thu zâwm lote tâwpna chu engtin tak ni ang maw? 18 Tin, mi fel mah chhandam hrâm hrâm a nih chuan, Pathian ngaihsak lo leh mi sual chu engtin tak ni ang maw? 19 Chuvângin, Pathian remtih zâwng anga tuarte chuan, thil ṭha tiin an thlaraute chu Siamtu rinawm tak hnênah kawltîr rawh se.
Pathian berâmte
1 Chutichuan, in zînga kohhran upate chu, kei, in upatpui, Krista tuarnate hretu, ropuina lo lang tûr chang vetu tûr hian ka fuih a che u: 2 in zînga Pathian pâwlho awm chu enkawl rawh u; tih tûr a nih vâng ni lovin, Pathian thu anga châk chung zâwkin; hlêpna bawlhhlawh duh vâng ni hek lovin, rilrua duh tak zâwkin, 3 in chante chungah intilal hek lovin, pâwlho entawnan insiam zâwkin ho rawh u. 4 Tin, Berâm Vêngtu Lalber chu a lo lan hunin, ropuina lallukhum vuai thei lo chu in hmu ang. 5 Chutiang bawkin nangni tleirâwl deuhte u, upate hnênah intulût rawh u. A ni, in zain rawng inbâwl tâwn ṭheuh tûrin thuhnuairawlhnain inthuam rawh u; Pathianin chapote a dodâl a, inngaitlâwmte erawh chu khawngaihna a pe si ṭhîn. 6 Chuvângin, a hun têah chuan a chawimawi theihna tûr che uin, Pathian kut chak tak hnuaiah chuan intihnuai ula, 7 anin a ngaihsak ṭhin che u avângin, in manganna zawng zawng ama chungah nghat vek rawh u. 8 Ngaihven ula, fimkhur rawh u; in khingpui Diabola chu sakeibaknei rûm ṭhîn angin, a ei theih tûr zawngin a phi ruai ṭhîn; 9 in unau khawvêla awmhote chungah chuan chutiang tuarna chu a thleng ve a ni tih hriain, ring nghet taka awmin amah chu do rawh u. 10 Tin, khawngaihna zawng zawng Pathian, a chatuan ropuina chang tûra Kristaa kotu che u ngei chuan rei lo tê in tuar hnuan a siam ṭha famkimin, a tinghetin, a tichak ang che u. 11 Ama hnênah chuan rorêlna chu chatuanin awm rawh se. Amen.
Chibai bûkna
12 Ka unaupa rinawm taka ka ruat Silvana kutah hian nangmahni fuih leh, chu chu Pathian khawngaihna tak tak a ni tih hriattîrin tawi têin in hnênah ka ziak a ni; chûngah chuan ding nghet rawh u. 13 Babulon khuaa awm, nangmahni anga thlan nu hian chibai a bûk a che u; chutiang bawkin ka fapa Marka pawhin chibai a bûk a che u. 14 Hmangaihna fawha fâwpin chibai inbûk rawh u. In zînga Kristaa awm apiangte hnênah chuan remna awm rawh se.
Chibai bûkna
1 Simon Petera, Isua Krista bawih leh tirhkoh chuan, Isua Krista kan Pathian leh Chhandamtu felna avânga rinna hlu tak kan chan ang chang vete hnênah: 2 Pathian leh kan Lalpa Isua hriatnaah chuan, in chungah khawngaihna leh remna tihpunin awm rawh se.
Pathian kohna leh thlanna
3 Ama ropuina leh ṭhatna zâra min kotu, a chanchin hriat avângin a Pathian thiltihtheihnain nunna leh Pathian ngaihsakna lam kawngah chuan thil zawng zawng min pe si a. 4 Chûng zârah chuan a thutiam hlu tak leh ropui nasa takte chu min pe a ni; chutichuan, châkna avânga khawvêla chhiatna lo awm hi tlân chhuahsan tawhin, chûng thutiam hlu tak leh ropui nasa takte avâng chuan, Pathian nungchang in ṭâwmpui ve thei ang. 5 A ni, chumi avâng tak chuan taihmâk tinrêng chhuahin, in rinnaah chuan ṭhatna telh ula, in ṭhatnaah chuan hriatna telh ula, 6 in hriatnaah chuan insûmna telh ula, in insûmnaah chuan chhelna telh ula, in chhelnaah chuan Pathian ngaihsakna telh ula; 7 in Pathian ngaihsaknaah chuan unaute hmangaihna telh ula, in unaute hmangaihnaah chuan hmangaihna telh rawh u. 8 Chûng chu in ta a niha, a pun zêl si chuan, kan Lalpa Isua Krista hriatna kawngah hian thatchhe lo leh rah lo lovin a siam ṭhîn che u a ni. 9 Tu pawh chûng thil nei lo chu mitdel a ni a, hnai têa mi chauh a hmu thei a, a hmânlai sualte tlen faisakna chu a theihnghilh ta si a. 10 Chuvângin, unaute u, a kohna leh a thlanna che u chu tinghet tûrin taihmâk chhuah lehzual rawh u; chûng chu in tih zawngin eng tikah mah in tlu lo vang; 11 chutichuan, Isua Krista kan Lalpa leh Chhandamtu chatuan rama luh theihna chu an pe ngei dâwn si che u a. 12 Chuvângin, chûng thil chu hriain thutak in hnêna awmah chuan in nghet na a, chûng thil chu hriattîr che u ka inpeih fo vang. 13 Tin, he bâwktêa ka awm chhûng zawng hian, nangmahni hriatpuiin chawh harh fo che u hi ṭha ka ti a ni; 14 kan Lalpa Isua Kristan mi hriattîr ang khân, ka bâwktê dah bo hun chu a thleng thuai ang tih ka hre si a. 15 A ni, ka kal chhuah hnuin chûng thil chu in hriat reng theih nân ka bei ang.
Krista ropuina leh zâwlnei thu
16 Kan Lalpa Isua Krista thiltihtheihzia leh a lo kal lehna thu ka hriattîr lai che u khân, thawnthu, fing taka ngaihtuah chhuah maite zâwm kan ni lo va, a ropuina hmutute kan ni zâwk asin. 17 Ani chuan Pa Pathian hnên ata chawimawina leh ropuina a hmu a, chumi lai chuan ropuina nasa tak aṭang chuan hetiang aw hi a hnênah a lo thleng a: “Hei hi ka Fapa duh tak, ka lawm êm êma chu a ni,” tiin. 18 Tin, tlâng thianghlimah chuan a hnêna kan awm lai khân, chu aw chu vân aṭangin a lo chhuak keimahni ngeiin kan hria a ni. 19 Tin, hril lâwkna thu nghet lehzual chu kan nei a ni, khua a lo vâr a, vârparh arsi chu in thinlunga a lo chhuah hma loh zawng, chu chu khâwnvâr, hmun thima êng an ngaihsak anga in ngaihsak chuan in tiṭha ang. 20 Pathian Lehkhaa thu hril lâwk rêng rêng hi mahniin hrilhfiah tûr a ni lo tih hre hmasa phawt ula. 21 Thu hril lâwk rêng rêng hi mihring thua chhuak a ni ngai si lo va, miten Thlarau Thianghlim tirhin Pathian hnên ata an sawi zâwk ṭhîn a ni.
Zâwlnei der leh zirtîrtu der
1 Nimahsela, mite zîngah chuan zâwlnei derte pawh an lo chhuah kha, chutiangin in zîngah pawh zirtîrtu derte an la awm ang, anni chuan anmahni leitu Lalpa meuh chu phatsanin, mi tichhe thei rin hrannate a rûkin an rawn luhpui ang a, mahni chungah chawplehchilha boralna an thlentîr ang. 2 Tin, mi tam takin an hurna lam thiltihte chu an chîng ve ang a, anmahni avângin kawng dik tak chu sawichhiat a ni ang. 3 Tin, sum awh avângin dâwt thuin sumdâwn nân an hmang ang che u; nimahsela, hmâna an chunga thurêl tawh chu a la ding reng a, anmahni tiboraltu tûra pawh a muhîl lo ve. 4 Vântirhkohten thil an tihsual lai khân Pathianin a zuah lo va, hremhmunah a paih a, rorêlsaka khêk tûrin khuarkhurum thimah a khung zâwk si a; 5 tin, amah ngaihsak lote awmna khawvêlah khân tui tilêtin, hmânlai khawvêl chu a zuah lo va; nimahsela, Nova, felna thu hriltu chu, mi dang pasarih nên a chhandam ta a. 6 Tin, Sodom leh Gomorra khuate chu amah ngaihsak lo, la awm tûrte entîrnaah a hmang a, vuta chantîrin, tiboralin thiam loh a chantîr ta a; 7 tin, Lota, mi fel, mi sualte awm dân hur tak avânga lungngai êm êma chu a chhandam ta a 8 (chu mi fel chu an zînga a awmin, a mitin a hmu a, a bengin a hria a, dân lo anga an thiltihte chuan a rilru fel chu ni tin a intina êm êm si ṭhîn a); 9 Lalpa chuan amah ngaihsaktute chu thlêmna ata chhanchhuah dân leh, fel lote chu rorêl ni atân hrem chunga khêk dân a hria; 10 châkna bawlhhlawh kawnga tisa anga awm leh, rorêlsakna hmusittute lek phei chu rorêl ni atân hrem chunga khêk dân a hre lehzual a ni. Âthuai leh tihmawh an ni a, ropuinate an sawichhiat pawhin an khûr ngai lo; 11 vântirhkoh, chakna leh thiltihtheihna nei zâwkte mahin Lalpa hmaah chuan an chungthu rêlsakin an sawichhiat si loh kha. 12 Nimahsela, hêng nungcha, ngaihtuahna nei lo, mana tihboral tûra sa chauhva piangte ang hian, thil an hriat lohte chu sawichhiain, anmahni chhiatnain an chhe ngei ang, 13 thil tihsual mana thil sual tuarin. Chhûna ruaiṭheh buai nuam ti mi an ni a. In hnêna ruai an ṭhehin, anmahni inbumna ruai ṭheh an nih avângin bawlhhlawh kaite leh tihkhawlohnate an ni a; 14 mit uirêa khat, sual bân thei lote an ni a; mi nghet lote an thlêm thlu a; awh hmang thinlung an pu a; ânchhe dawng fate an ni a; 15 Bosora fapa Balaama, thil tihsual hlawh ngainatu kawng chu an zawh tawh avângin kawng dik chu an kalsan a, an vâk bo ta a; 16 nimahsela, ani chu a bawhchhiatna avângin zilhhauvin a awm ta a; sabengtung ṭawng thei lo chu mihring ṭawngin a lo ṭawng a, zâwlnei âtna chu a khap a ni. 17 Chûng chu tuikhur tui awm lo leh chhûm thlipui chhêm lên an ni; chûngte tân chuan thim chhah mup chu ruat a ni tawh. 18 Thu lawilo pâwr tak taka sawiin, suala awmte zîng ata tlân chhuak mêkte chu tisa châknaah hurnain an thlêm thlu si ṭhîn. 19 Anmahni chu chhiatna bawih ni chung rengin, mite chu bawih chhuah thu an tiam ṭhîn a; mi ngamtu apiangin chu mi ngei chuan bawihah a siam ṭhîn a ni. 20 Lalpa leh Chhandamtu Isua Krista an hriat avânga khawvêl bawlhhlawhnate an tlân chhuahsan hnuin, chumi vêkah chuan an tân leha, ngama an awm leh si chuan, an awmze hnuhnûng chu a tîr ai chuan a lo chhe ta zâwk a ni ang. 21 Kawng fel chu hriat hnua thupêk thianghlim an hnêna kawltîr chu hawisan ai chuan, kawng fel chu hre lo sela an tân a ṭha zâwk tûr a ni si a. 22 “Ui ama luak lamah a kîr leh a, vawkpui inbual fai tawh pawh chirhdiakah inbual tûrin a kîr leh a,” tih thufing tawi dik tak ang thu chu an chungah a lo awm ta a ni.
Lalpa lo kal lehna tiam
1 Duh takte u, tûna in hnêna ka ziak hi ka lehkhathawn pahnihna a ni a, a pahnih hian in rilruah ngaihtuahna thianghlim chawk tho tûrin, hêng thilte hi hriat nawntîrna tûr che uin ka ziak a ni. 2 Zâwlnei thianghlimte thu sawi lâwk leh, in tirhkohte kaa Lalpa leh Chhandamtu thupêk chu in hriat rengna tûrin; 3 hei hi hre hmasa ula, ni hnuhnûngahte chuan nuihsantute chu anmahni châkna anga awmin, nuihsan chungin an lo kal ang a, 4 “A lo kal lehna thutiam chu khawiah nge? Siam tirh aṭangin engkim a awm pângngai angin, chi thlahtute muthilh ni ata tawh kha a la awm zêl alâwm,” an la ti ang. 5 Hêng hi an hai der lui si ṭhîn: Pathian thuin hmânlaiin vânte a lo awm a, lei pawh tui ata leh tui zîngah awm khâwmin a lo awm a; 6 chûngah chuan chumi laia khawvêl awm chu tuiin a chîm a, a boral ta, tih hi; 7 nimahsela, tûnah vânte leh leia awmte hi chumi thu avâng vêk chuan, Pathian ngaihsak lo mite rorêl leh boral ni atana dahin hâl tûra khêk a ni. 8 Nimahsela, duh takte u, he thu kam khat hi theihnghilh suh u, Lalpa ngaih chuan ni khat hi kum sângkhat ang a ni a, kum sângkhat pawh ni khat ang a ni, tih hi. 9 Mi ṭhenkhatin muanga an ruat angin Lalpa chu a thutiam kawngah chuan a muang lo ve; tu ma boral duh lova, mi zawng zawng lo sim duhin, nangmahni lamah a dawhthei a ni zâwk e. 10 Nimahsela, Lalpa ni chu rûkru angin a lo thleng ngei ang; chumi niah chuan vânte chu nasa taka riin a boral ang a, thil bulte chu meia em ralin a awm tawh ang a, lei leh a chhûnga hnathawh awmte hi a kâng ral ang. 11,12 Chûng thilte chu chutianga boral vek tûr a ni tih in hriat avângin, Pathian ni lo thlen hun tûr chu beisei leh ṭhahnemngai taka duhin, awm dân thianghlim leh Pathian ngaihsak kawngah chuan mi eng ang nge in nih ang le? Chumi ni a thlen avângin vânte lo kângin a boral ang a, thil bulte pawh chu meia em tuiin a awm tawh ang. 13 Nimahsela, a thutiam ang chuan vân tharte leh lei thar, a chhûnga felna awmte chu kan beisei a ni. 14 Chuvângin, duh takte u, chutiang thilte chu in beisei avângin bawlhhlawh kai lo leh sawisêl bovin, thlamuang taka in awm a hmuh theih nân che u, taihmâk chhuah rawh u. 15 Tin, kan Lalpa dawhtheihzia chu chhandamnaah ruat rawh u; kan unaupa duh tak Paula pawhin a hnêna finna pêk ang zêla in hnêna a ziak ang khân; 16 a lehkhathawn zawng zawngah chuan chûng thu chu sawiin, chutiang bawkin a ziak a ni; chûngah chuan thu hriat har takte a awm a, chûng chu mi fing lo leh mi nghet loten Pathian Lehkha Thu dang an ngai kawi angin an ngai kawi a, mahni leh mahni an intihboral phah ṭhîn. 17 Chutichuan, duh takte u, nangnin chûng thu chu in lo hriat lâwk avângin fîmkhur rawh u; chuti lo chuan, mi sualte dik lohnaa hruai bova awmin, in nghet ṭha lai in tlu dah ang e. 18 Amaherawhchu, kan Lalpa leh Chhandamtu Isua Krista khawngaihna leh hriatnaah chuan lo ṭhang lian rawh u. Tûnah leh chatuan thlengin ama hnênah chuan ropuina awm rawh se. Amen.
Nunna thu
1 Nunna Thu, a tîr ata awm kha, kan bengin kan hriat kha, kan mitin kan hmuh kha, kan en reng a, kan kuta kan dap kha, chumi chanchin chu; 2 (chu mi Nunna chu a lo lang ta a, kan lo hmu a, kan hriattîr bawk a, chu chatuan Nunna, Pa hnêna awm kan hnêna lo lang chu kan hrilh che u a nih hi;) 3 chumi kan hmuh leh kan hriata chu in hnênah kan hrilh ve che u a nih hi, nangni pawhin min pâwl ve theih nân; keini min pâwlna chu Pa leh a Fapa Isua Krista pâwlna a ni tawh reng si a. 4 Tichuan, kan lâwm a famkim theih nân hêng thute hi kan ziak a nih hi.
Pathian chu êng a ni
5 Tin, thuchah a hnên ata kan hriata in hnêna kan hrilh chhâwn tûr che u chu hei hi a ni: Pathian chu êng a ni a, amahah chuan thim rêng rêng a awm lo. 6 Thima awm siin, “Amah ka pâwl,” kan tih chuan dâwt kan sawi a ni, thutak pawh chu kan zâwm lo; 7 amaherawhchu, amah chu êngah a awm angin keini pawh ênga awm kan nih chuan, kan inpâwl tlâng a; tin, a Fapa Isua thisenin kan sual zawng zawng min tlen faisak ṭhîn a ni. 8 “Sual ka nei lo,” kan tih chuan mahni leh mahni kan inbum a, thutak chu keimahniah a awm lo a ni. 9 Kan sualte thupha kan chawi chuan, kan sualte ngaidam tûr leh kan fel lohna zawng zawng tlêng fai tûrin, amah chu a rinawmin a fel a ni. 10 “Thil ka tisual lo,” kan tih chuan amah chu dawtheiah kan siam a, a thu pawh keimahniah a awm lo a ni.
Krista min ṭanpuitu
1 Ka naute u, thil in tihsual loh nân hêng thu hi in hnênah ka ziak a nih hi. Tin, tu pawhin thil a tihsual chuan, Pa hnêna min sawipuitu Isua Krista, mi fel chu kan nei e; 2 ani chu kan sualte thupha chawina a ni; keimahni sual chauh ni lovin, khawvêl zawng zawng sual thupha chawina pawh a ni. 3 Tin, a thupêkte pawm kan nih chuan, chumiah chuan amah kan hria tih kan inhria e. 4 A thupêkte pawm si lova, “Amah ka hria,” titu chu mi dawthei a ni, thutak amahah a awm lo. 5 Tu pawh a thu pawm erawh chu amahah chuan Pathian a hmangaihna a famkim takzet tawh a ni. Amahah kan awm tih hemiah hian kan inhria a ni. 6 “Amahah ka awm reng,” titu chu ama awm ang bawk khân a awm ve tûr a ni.
Thupêk thar
7 Duh takte u, thupêk thar zawng in hnênah ka han ziak lo va; thupêk hlui, a tîr ata in neih kha ka ziak zâwk a ni. Chu thupêk hlui chu in thu hriat tawh hnu kha a ni. 8 Nimahsela, thupêk thar ziak ka ni bawk ang chu (chu chu amahah leh nangmahniah a lang a ni), thim chu a bo mêk avâng leh, êng tak tak chu tûnah a lo ên tâk avâng hian. 9 Mahni unau haw sia, “Êngah ka awm,” titu chu tûn thleng pawhin thimah a la awm reng a ni. 10 Mahni unau hmangaihtu chu êngah chuan a awm reng a, amahah chuan tlûkna rêng a awm lo. 11 Mahni unau hawtu erawh chu thimah a awm a, thimah a vâk bawk a ni; thimin a mit a tihdel tawh avângin a kalna pawh a hre ṭhîn lo. 12 Naute u, ama hming avânga in sualte ngaihdam a nih tâk avângin in hnênah ka ziak a nih hi. 13 Pate u, amah, a tîr ata awm renga chu in hriat avângin in hnênah ka ziak a nih hi. Râwltharte u, mi sual chu in ngam tâk avângin in hnênah ka ziak a nih hi. Naute u, Pa chu in hriat avângin in hnênah ka ziak a nih kha. 14 Pate u, amah, a tîr ata awm renga chu in hriat avangin in hnênah ka ziak a nih kha. Râwltharte u, in chaka, Pathian thu nangmahniah a awm renga, mi sual chu in ngam tâk avângin in hnênah ka ziak a nih kha. 15 Khawvêl hi hmangaih suh ula, khawvêla thil awmte pawh hi hmangaih hek suh u. Mi tu pawhin khawvêl hi a hmangaih chuan, Paa hmangaihna amahah a awm lo. 16 Khawvêla thil awm zawng zawng - tisa châkna te, mit châkna te, dam chhûng ropuina lem te hi Paa chhuak a ni lo va, khawvêla chhuak a ni zâwk si a. 17 Khawvêl hi a châknate chawpin a boral mêk a ni; Pathian duh zâwng titu erawh chu kumkhuain a awm reng ang.
Krista dodâltu
18 Naute u, hun hnuhnûng ber chu a ni ta e, Krista dodâltu a lo kal ang tih in hriat ang khân, tûnah pawh Krista dodâltu tam tak an lo chhuak ta; chu vâng chuan hun hnuhnûng ber a ni ta tih kan hria e. 19 Anni chu kan zîng aṭangin an chhuak a; nimahsela, keimahni mi tak an ni lo ve; keimahni mi tak ni sela kan hnênah an awm ve zêl tûr a ni si a; nimahsela, an zain keimahni mi tak an ni lo vek tih a lan fiah theih nân min chhuahsan ta a ni. 20 Mi Thianghlima hnên ata hriak thihna in dawng a, chu chu in zain in hria e. 21 Thutak chu in hriat loh avângin ka ziak a ni lo, in hriat avâng leh thutakah dâwt eng mah a chhuah ngai loh avângin ka ziak zâwk a ni. 22 Isua chu Krista a ni tih awih lotu aliama dawthei tu nge awm? Krista dodâltu chu Pa leh Fapa awih lotu hi a ni. 23 Tu pawh Fapa awih lo chuan Pa pawh a pawm chuang lo; Fapa awihtu erawh chuan Pa pawh a pawm a ni. 24 Nangni zawngin a tîr ata in hriata kha nangmahniah awmtîr reng rawh u. Chumi a tîr ata in hriata chu nangmahnia a awm reng chuan, nangni pawh Fapaah leh Paah chuan in awm reng ang. 25 Tin, hei hi a ni amah ngeiin thil min tiama kha, chatuana nunna hi. 26 Chûng nangmahni hruai bo tumtute thu chu in hnênah ka ziak a ni. 27 Nangni zawng ama hnên ata hriak thihna in hmuh kha nangmahniah a awm reng a, tu ma zirtîr in ngai lo ve; ama hriak thihna chuan thil zawng zawng thu a zirtîr zâwk che u avâng leh, dik tak a ni a, dâwt pawh a nih loh avângin, chu mi chuan a zirtîr che u ang khân amahah awm reng rawh u. 28 Chutichuan, naute u, amahah awm reng rawh u; tichuan, amah chu lo inlâr mah sela, a lo kalin a hmaah zak lovin, huai takin kan awm thei ang. 29 Amah chu mi fel a ni tih in hriat chuan, mi tu pawh felna ti chu ama hrin a ni tih in hria e.
Pathian fate
1 Ngai teh u, Pain min hmangaihna chu a va nasa êm! “Pathian faahte” min vuah tâk hi; chutiang chu kan ni rêng e. Hemi avâng hian khawvêlin min hre lo a ni, amah chu an hriat loh avângin. 2 Duh takte u, tûnah hian Pathian fate kan ni a, engtin nge kan la awm dâwn tih erawh chu a la lang rih lo ve; amah a lo inlâr chuan amah angin kan awm dâwn tih zawng kan hria, amah chu a awm pângngai ang takin kan hmu dâwn si a. 3 Tu pawh ama chunga chumi beiseina chu nei apiangin, amah a thianghlim angin a intithianghlim ṭhîn. 4 Tu pawh thil tisual apiangin dân pawh a bawhchhe ṭhîn; sual hi dân bawhchhiatna a ni si a. 5 Amah chu sualte la bo tûrin a lo lang tawh tih in hria e; amahah chuan sual eng mah a awm si lo va. 6 Tu pawh amaha awm reng chuan thil a tisual lo; tu pawh thil tisual chuan amah chu a hmu lo va, hriat pawh a hre hek lo. 7 Naute u, tu ma bumin awm suh u; felna titu chu a fel a ni, amah a fel ang bawkin. 8 Thil tisualtu chu Diabola aṭanga chhuak a ni; Diabola chuan a tîr ata thil a tisual si a. Pathian Fapa lo lan chhan ber chu Diabola hnathawhte a tihboral theih nân a ni. 9 Tu pawh Pathian hrin chuan Pathian chi amahah a awm reng avângin thil a tisual ṭhîn lo; Pathian hrin a nih avângin thil a tisual thei hek lo. 10 Hemiah hian Pathian fate leh Diabola fate a hriat a ni; tu pawh felna ti lo chu Pathian aṭanga chhuak a ni lo, a unau hmangaih lova pawh chu Pathian aṭanga chhuak a ni hek lo.
Inhmangaih tawnna
11 Hei hi a tîr ata thuchah in hriat kha a ni si a, kan inhmangaih tawn ṭheuh tûr a ni, tih hi; 12 Kaina, mi sual laka mi, mahni unau thattu ang khân awm lovin. Eng vângin nge a thah tâk le? Ama thiltihte a suala, a unau thiltihte a fel avângin. 13 Unaute u, khawvêlin an huat che u chuan mak ti suh u. 14 Unaute kan hmangaih avângin thihna ata kan chhuak a, nunnaah kan lût tawh tih kan hria e. Tu pawh hmangaihna nei lo apiang thihnaah a la awm reng a ni. 15 Tu pawh a unau hua chu tualthat a ni: tualthattu tu mah chatuana nunna pai rêng rêng an awm lo tih in hre si a. 16 Hemiah hian hmangaihna chu eng nge a nih kan hria, amah chuan kan tân a nunna a pêk tâk avângin; keini pawhin unaute tân kan nunna kan pe ve tûr a ni. 17 Nimahsela, tu pawhin khawvêl sum neiin a unau tlachhamin hmu sela, ani chu lainat si suh sela, Pathian hmangaihna chu amahah engtin nge a awm ang? 18 Naute u, thu chauhvin i hmangaih suh ang u khai, lei chauhvin i hmangaih hek suh ang u, thiltih leh tihtakzetin ni zâwk rawh se.
Pathian hmaa huaisenna
19,20 Chumiah chuan thutaka mi kan ni tih kan inhria ang a, kan rilruin thiam loh min chantîrna kawngah chuan, ama mit hmuh ngeiah kan rilru kan thlêm dai bawk ang; Pathian chu kan rilru aiin a ropui zâwk a, engkim a hre si a. 21 Duh takte u, kan rilruin thiam loh min chantîr loh chuan Pathian lamah kan huai a ni; 22 tichuan, a thupêkte kan zawma, a mit hmuha thil lâwmawm kan tih ṭhin avângin, kan dîl apiang a hnên ata kan hmu zêl ṭhîn a ni. 23 Tin, a thupêk chu hei hi a ni, a Fapa Isua Krista hming ring ila, aman thu min pêk angin inhmangaih tawn bawk ila. 24 A thupêkte zâwm chu amahah a awm reng a, amah pawh chu amahah a awm reng bawk a ni. Tin, hemiah hian amah chu keimahniah a awm reng tih kan hria, Thlarau min pêkah hian.
Pathian Thlarau leh Krista dotu thlarau
1 Duh takte u, thlarau nazawng ring suh u; amaherawhchu, thlaraute chu Pathian laka mi an ni nge ni lo fiah rawh u; thuhriltu der tam tak khawvêlah an lo chhuah tâk avângin. 2 Hemiah hian Pathian Thlarau chu in hria ang: thlarau eng pawh Isua Krista tisaah a lo chang tih ṭan chu Pathian laka mi a ni; 3 thlarau eng pawh Isua ṭan lo chu Pathian laka mi a ni lo ve; chu chu Krista dodâltu thlarau, lo kal tûr in hriata kha a ni e; tûnah pawh khawvêlah a awm tawh reng a ni. 4 Naute u, Pathian ta in ni a, chûng chu in ngam tawh e; nangmahnia awma chu khawvêla awma ai chuan a ropui zâwk avângin. 5 Anni chu khawvêla mi an ni a; chuvangin, khawvêla mi angin an ṭawng a, khawvêlin an thu an ngaithla ṭhîn a ni. 6 Keini chu Pathian laka mi kan ni a, Pathian hretu chuan kan thu a ngaithla ṭhîn a; Pathian laka mi ni lo chuan kan thu a ngaithla ṭhîn lo. Chûngah chuan thlarau dik tak leh thlarau dik lo kan hria a ni.
Pathian chu hmangaihna a ni
7 Duh takte u, i inhmangaih tawn ṭheuh vang u; hmangaihna hi Pathian laka chhuak a ni si a; mi tin hmangaihna nei apiang Pathian hrin an ni tawh a, Pathian an hre bawk a. 8 Hmangaihna nei lo chuan Pathian a hre lo; Pathian chu hmangaihna a ni si a. 9 Hemiah hian Pathian hmangaihna kan chungah a lo lang ta, amah avânga kan nun theihna tûrin Pathianin a Fapa neih chhun khawvêla a rawn tirhah hian. 10 Hemiah hian hmangaihna a awm, keimahnin Pathian kan hmangaih ka ti a ni lo va, amahin min hmangaih a, kan sualte thupha chawina ni tûrin a Fapa a rawn tîr ka ti a ni zâwk e. 11 Duh takte u, Pathianin chuti kauva min hmangaih chuan, keini pawh kan inhmangaih tawn ṭheuh tûr a ni. 12 Tu mân eng lai mahin Pathian an hmu ngai lo. Kan inhmangaih tawn chuan Pathian keimahniah a awm reng ang a, a hmangaihna pawh keimahniah a famkim bawk ang. 13 Amahah kan awm reng tih leh amah chu keimahniah a awm reng tih hemiah hian kan hria, a Thlarau min pêk tawh avâng hian. 14 Tin, Pain Fapa chu khawvêl Chhandamtua awm tûrin a rawn tîr tih kan hmu tawh a, kan hriattîr a ni. 15 Tu pawh, “Isua hi Pathian Fapa a ni,” tia ṭan apiang chu, amahah chuan Pathian a awm reng a, ani pawh chu Pathianah a awm reng bawk a ni. 16 Pathianin keimahnia hmangaihna a neih chu kan hria a, kan ring bawk a ni. Pathian chu hmangaihna a ni; hmangaihnaa awm reng chu Pathianah a awm reng a, Pathian pawh amahah a awm reng a ni. 17 Hemiah hian kan chungah hmangaihna a famkim tawh, rorêl nia hlau lova kan awm theihah hian; ama awm anga khawvêlah hian kan awm avângin. 18 Hmangaihnaah chuan hlauhna rêng a awm lo: hmangaihna famkimin hlauhna a hnawt chhuak zâwk ṭhîn a ni, hlauhnaah chuan hremna a awm si a; a hlautu chu hmangaihnaah a la famkim lo a ni. 19 Aman min hmangaih hmasak avângin kan hmangaih a ni. 20 Miin, “Pathian ka hmangaih e,” tiin a unau haw si sela, amah chu dawthei a ni; a unau a hmuh tawh renga mah a hmangaih loh chuan, Pathian a hmuh ngai lohva chu engtin nge a hmangaih theih ang? 21 Ama hnên ata hemi thupêk hi kan nei, “Tu pawhin Pathian a hmangaih chuan a unau pawh a hmangaih bawk tûr a ni,” tih hi.
Rinna hi khawvêl hnehna
1 Tu pawh Isua hi Krista a ni tih ring chu Pathian hrin a ni; tu pawh a hringtu hmangaih chuan a hrina pawh a hmangaih thîn. 2 Hemiah hian Pathian fate kan hmangaih tih kan hria, Pathian kan hmangaiha, a thupêkte kan zawm hian. 3 Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va. 4 Pathian hrin tawh phawt chuan khawvêl a ngam zêl si a; hei hi a ni khawvêl hneha ngamna chu, kan rinna hi. 5 Isua hi Pathian Fapa a ni tih ringtu chauh lo chuan tuin nge khawvêl ngam ṭhîn le?
Fapa chungchânga thuhretu
6 He mi hi a ni tui leh thisena lo kala chu, Isua Krista hi; tui chauhvah ni lovin, tuiah leh thisenah a ni zâwk e. 7 Hriattîrtu chu Thlarau hi a ni, Thlarau chu thutak a nih avângin. 8 Hriattîrtu chu pathum an awm, Thlarau leh tui leh thisente chu; chûng pathum chu an inthurual a ni. 9 Mihring hriattîrna mah kan pawm chuan, Pathian hriattîrna chu a ropui zâwk si a; Pathian hriattîrna chu hei hi a ni, “Ka Fapa chanchin ka hriattîr tawh,” tih hi. 10 Pathian Fapa ringtu chuan mahniah hriatna a nei a ni; Pathian ring lotu chuan amah chu dawtheiah a insiam a ni, Pathianin a Fapa chanchin a hriattîr a rin loh avângin. 11 Hriattîrna chu hei hi a ni, Pathianin chatuana nunna min pe a, chumi nunna chu a Fapaah a awm a ni. 12 Fapa neitu chuan nunna chu a nei; Pathian Fapa nei lotu chuan nunna chu a nei lo.
Chatuana nunna neih hriatna
13 Chatuana nunna in nei tih in inhriat theih nân, nangni Pathian Fapa hming ringtute hnênah hêng thu hi ka ziak a ni. 14 Hei hi ama chunga kan huaina chu a ni, eng pawh a duh zâwng anga kan dîl chuan anin min ngaihthlâksak ṭhin hi; 15 tichuan, eng pawh kan dîl apiang min ngaihthlâksak tih kan hriat chuan, a hnêna kan thil dîl chu kan hmu tawh tih kan hria a ni. 16 Tu pawhin a unau thihna khawp ni lo sual tiin hmu sela, a dîlsak ang a; tichuan, Pathianin a dîltu hnênah chuan thihna khawp ni lo sual titute tân chuan nunna a pe ang. Thihna khawp sual a awm a; chutiang lamah chuan a dîlsak tûr ka ti a ni lo ve. 17 Fel lohna zawng zawng hi sual a ni; thihna khawp ni lo sual pawh a awm bawk a ni. 18 Tu pawh Pathian hrin chuan thil a tisual lo tih kan hria e; Pathian Hrina khân amah chu a hum reng a, mi sual chuan tawh pawh a tawk thei lo rêng a ni. 19 Tin, Pathian laka mi kan nih leh khawvêl pumhlûm hi mi sual thu thuin a awm tih kan hria e. 20 Tin, Pathian Fapa chu a lo kal a, Mi Diktak chu hre thei tûrin hriat theihna min pe tih kan hre bawk a; tin, keini, a Fapa Isua Kristaa kan awm hian, Mi Diktakah chuan kan awm a ni. Ani chu Pathian dik tak a ni a, chatuana nunna pawh a ni. 21 Naute u, milem lakah inthiarfihlîm rawh u.
Chibai bûkna
1-2 Upa chuan, Hmeichhe ṭha thlan leh a fate hnênah: Thutak, keimahnia awm reng, kumkhua pawha kan hnêna awm tûr avâng hian tihtakzetin ka hmangaih che u a ni; kei chang ka ni lo ve, thutak chu hria apiang pawhin a ni. 3 Pa, Pathian leh Pa Fapa, Isua Krista hnên ata khawngaihna te, zahngaihna te, remna te chu, thutak leh hmangaihnain kan hnênah a awm ang.
Thutak leh hmangaihna
4 Pa hnên ata thupêk kan hmuh ang khân i fa tute emaw thutaka awmin ka hmuh avângin ka lâwm hle a ni. 5 Hmeichhe ṭha, i hnênah thupêk thar ziak ang ni lovin, a tîr ata kan neih ang kha ziak zâwkin, kan inhmangaih tawnna tûrin ka ngên chiam a che. 6 Tin, hei hi hmangaihna a ni, ama thupêk ang zêla kan awm hi. Thupêk, a tîr ata in hriat ang chu hei hi a ni, chumiah chuan in awm tûr chu. 7 Bumtu tam tak - Isua Krista chu tisain a lo kal tih ṭan lotute kha - khawvêlah hian an lo chhuak ta si a. Chutiang mi chu a ni, bumtu leh Krista dodâltu chu. 8 Kan thawh chhuah sate kha in hloh lohva, a man chu a kima in hmuh theih zâwk nân invêng ṭha rawh u. 9 Tu pawh Krista zirtîrna thua awm reng lova, kal pel chuan Pathian a nei lo ve. Chumi zirtîrna thua awm reng erawh chuan, chu mi ngei chuan Pa leh Fapa a nei kawp a ni. 10 Tu pawh chumi zirtîrna thu chu rawn keng lovin in hnênah lo kal sela, in inah thlentîr suh ula, ṭawngkam ṭha pawhin thlah suh u; 11 ṭawngkam ṭhaa thlahtu chu a thil tihsualah chuan a tel ve si a.
Inthlahna chibai
12 In hnênah thu tam tak sawi tûr ka neih avângin lehkha leh lehkhatuiin ziak ka duh lo ve; in lâwm a kim theih nân in hnêna lo kala, inhmatawna inbiak ka beisei zâwk a ni. 13 I laizâwnnu thlana faten chibai an bûk a che.
Chibai bûkna
1 Upa chuan, Duh tak Gaia, tihtakzeta ka hmangaiha hnênah chuan: 2 Duh tak, i thlarau chuan malsâwmna a hmuh angin, engkimah malsâwmna i hmuh leh i dam theih nân ka ṭawngṭai ṭhîn a ni. 3 Unaute lo kalin i takzia (thutaka i awm ṭhinzia chu) mi rawn hriattîr lai khân ka lawm êm êm si a. 4 Ka fate thutakah an awm tih ka hriat aliama lâwmna nasa zâwk rêng ka nei lo ve.
Gaian fak a hlawh
5 Duh tak, unaute chu mikhual ni mah sela, an chunga i tih apiangah rinawm takin i ti ṭhîn a; 6 chûng mite chuan kohhran hmaah i hmangaihna an hriattîr tawh; anni chu an zinnaah chuan Pathian mi ni âwm rênga i puihbawm chuan a ṭha ang. 7 Hming avâng hian Jentailte hnên ata eng mah la lovin an lo thawk chhuak si a. 8 Chutichuan, thutak thawhpuitute kan nih theih nân chutiang mi chu keinin kan lâwm tûr a ni.
Diotrepha leh Demetria
9 Kohhran hnênah khân thu tlêm chu ka ziak tawh; nimahsela, Diotrepha, an zînga chungnun duh ṭhîn khân mi lâwm si lo. 10 Chuvângin, ka lo kal chuan a thiltihte ka hriat chhuahtîr leh ang, kan chungah thu sual sawiin a kamtamzia hi; chu pawh chu tâwk a ti lo va, amah ngeiin unaute a lâwm lo va, a lâwm duhte pawh a khap a, kohhran zîng ata a hnawt chhuak ṭhîn. 11 Duh tak, sual chu zir suh la, ṭha chu zir zâwk ang che. Thil ṭha titu chu Pathian laka mi a ni; thil sual titu chuan Pathian a hmu ngai lo. 12 Demetria chuan mi zawng zawng fak a hlawh a, thutaka fak ngei a hlawh bawk a; a ni, keini pawhin kan fak a ni; kan fakna hi a dik a ni tih i hria e.
Inthlahna chibai
13 I hnênah thu tam tak ziak tûr ka nei a; nimahsela, lehkhatui leh lehkhaziaknain i hnêna ziak ka duh lo va; 14 rei lo tê chinah hmuh che ka beisei zâwk a; tichuan, inhmatawnin kan inbia ang. 15 Thlamuanna i chungah awm rawh se. Kan ṭhianten chibai an bûk a che. An hming lam ṭheuhvin ṭhiante chu chibai mi bûksak ang che.
Chibai bûkna
1 Juda, Isua Krista bawih leh Jakoba unau chuan, Pa Pathian hmangaih, Isua Krista tâna khêk, kohvate hnênah chuan: 2 Khawngaihna te, remna te, hmangaihna te in chungah tihpunin awm rawh se.
Zirtîrtu derte chungchâng
3 Duh takte u, kan chan tlân chhandamna thu in hnêna ziak ka tum hrâm hrâm laiin, mi thianghlimte hnêna rinna vawi khat kawltîr lamah chuan ṭhahnemngai taka beia fuih tûr che uin, in hnênah lehkha ziak a ṭûl tih ka lo hria a. 4 Mi tute emaw a rûka lût an awm si a, hmânlaia he thiam lohna chang tûra ruatate chu; chûng chu Pathian ngaihsak lo mite an ni a, kan Pathian khawngaihna chu hurnaah an chantîr a, kan Hotu leh kan Lalpa neih chhun, Isua Krista chu an awih lo bawk a. 5 Tin, engkim vawi khat hre vek mah ula, Lalpan Aigupta ram aṭanga mite a chhanchhuaha, chumi hnuin a ring lote chu a tihboralzia kha hriat nawntîr che u ka duh a ni. 6 Tin, vântirhkohte anmahni tirhkoh nihna pawm lova, an awmna pângngai kalsan zâwkte chu, ni ropui rorêlna atân thim hnuaiah chatuan phuarnaa phuar chungin a khêk a ni. 7 Sodom leh Gomorra, an kiang vêla khuate nên, chutiang bawkin inngaihnaa inpumpêkin, awm loh lohva an awm avângin chatuana meia hremna tuarin, hriattîr nâna târ chhuahin an awm ang khân. 8 Nimahsela, chûng mite pawh chuan, chutiang bawkin an mumang avângin an tisa chu an tibawlhhlawh a, Lalpa thuneihna chu an pawisa lo va, ropuinate an sawichhia a. 9 Nimahsela, Mikaela, vântirhkoh chungnung ber mah khân Diabola nên an inbeiha, Mosia ruang thua an inhnial lai khân Diabola chungthu rêlsakin a sawichhe ngam lo va, “Lalpan hau zâwk che rawh se,” a ti ta a nih kha. 10 Chûng mite erawh chuan thil an hriat loh apiang an sawichhe ṭhîn a; tin, ngaihtuahna nei lo ramsate neih ang pianpui hriatna an neih an zawm ṭhinte chuan anmahni an intichhe ṭhîn. 11 An chung a pik e! Kaina kawng chu an zawh a, hlawh hmu tûrin Balaama sual kawngah chuan an tlân vak vak a, Kora hnialnaah chuan an boral tâk kha. 12 Chûngte chuan in hnênah ruai an ṭhehin, in hmangaihna ruai ṭhehnaah chuan lungpui tui chîm vekte chu an ni a, hlauh nachâng hre lo berâm vêngtu mahni inchâwmte an ni; chhûm tui pai lo, thli chhêm lênte an ni; favânga thing, rah lo, vawi hnih thi tawh, zung chawpa pawh chhuahte an ni; 13 tuifinriat fâwn invawrh, mahni mualphona phuan chhuakte an ni; arsi vâk vâk, chatuana thim chhah mup khêksakate chu an ni a. 14,15 Tin, chu mite hnênah pawh chuan Enoka, Adama aṭanga pasarihna chuan a hril lâwk a, “Ngai teh u, mi zawng zawng chunga rorêl tûr leh, Pathian ngaihsak lote zawng zawng Pathian ngaihsak lohna hna Pathian ngaihsak lo chunga an thawh zawng zawng kawngah leh, Pathian ngaihsak lo mi sualten a chungah thu khauh tak an sawi zawng zawng kawnga thiam loh chantîr tûrin, Lalpa chu a mi thianghlim sîngkhatte nên a lo kal a ni,” tiin. 16 Chûngte chu phunnawi leh sawisêltute an ni a, anmahni châkna ang zêlin an awm a, an kâte pawhin uan thu pâwr tak a sawi a, hlâwkna duh vângin mi an ngaina ṭhîn a ni.
Zilhna leh fuihna
17 Nimahsela, duh takte u, nangni zawngin kan Lalpa Isua Krista tirhkohten thu an hrilh lâwkte kha hre reng rawh u. 18 “Hun hnuhnûngah chuan Pathian ngaihsak lo lam, anmahni châkna ang zêla awmin, nuihsantute an lo la awm ang,” tih in hnêna an sawiziate kha. 19 Chûng mite chu tisa mi, Thlarau nei lo, pâwl hrangte siamtu chu an ni. 20 Nimahsela, duh takte u, nangni zawngin in rin chhan thianghlim ber chungah chuan nangmahni leh nangmahni inrem chhovin, Thlarau Thianghlimah ṭawngṭaiin, 21 chatuan nunna neihtîrna khawp kan Lalpa Isua Krista khawngaihna chu nghâk chungin, Pathian hmangaihnaah chuan invawng ṭha rawh u. 22 Ṭhenkhat ringhlela awmte chu khawngaih rawh u; 23 ṭhenkhat mei ata la chhuak thuai ula, chhandam rawh u; ṭhenkhat an tisa bawlhhlawh kaina silhfên lam pawh chu tenin, hlau chungin khawngaih rawh u.
Malsâwmna
24 Tichuan, in tlûk loh nâna vêng thei che u leh, a ropuina hma taka nasa zeta hlimin, bawlhhlawh kai lova dah theitu che u, 25 kan Chhandamtu Pathian taka chauh hnênah chuan, kan Lalpa Isua Krista avângin, hun rêng awm hmaah leh tûnah leh chatuan thlengin chawimawina te, ropuina te, rorêlna te, thuneihna te awm rawh se. Amen.
Thuhmahruai
1 Isua Krista thu puan chhuah, Pathianin a bawihte hriattîr atân a hnêna a pêk, thil lo thleng thuai tûr thu chu; tin, chu chu a vântirhkoh hmangin a bawih Johana a rawn hriattîr a; 2 chu Johana chuan Pathian thu leh Isua Krista hriattîrna thu, a thil hmuh zawng zawng thu chu a hriattîr a. 3 He hrilh lâwkna bu thu chhiartu leh ngaithlaa a chhûnga thu ziak pawmtute chu an eng a thâwl e; a hun chu a hnai tawh si a.
Chibai bûkna
4,5 Johana chuan, Asia rama kohhran pasarihte hnênah chuan: Awm mêka leh, awm tawha leh, lo la awm tûra hnên aṭang te, a lalṭhutphah hmaa Thlarau pasarih awmho hnên aṭang te, Isua Krista, thuhretu rinawm tak, mitthi zîng ata piang hmasa bera leh leia lalte rorêltute hnên aṭang te chuan, khawngaihna leh remna in hnênah awm rawh se. Min hmangaiha, a thisenin kan sualte lak ata min tlan chhuaka, 6 khua leh tuiah leh a Pathian leh a Pa lama puithiama min siamtu hnênah, a ni, ama hnên ngeiah ropuina leh rorêlna chu chatuanin awm rawh se. Amen. 7 Ngai teh u, ani chu chhûmte nên a lo kal dâwn e; mit tinrêngin an hmu ang a, a chhuntute ngei pawh khân; khawvêla hnam zawng zawngin amah an ṭah bawk ang. A ni, Amen.
Krista inlârna
8 “Kei Alpha leh Omega ka ni,” Lalpa Pathian, awm mêka leh, awm tawha leh, lo la awm tûra, Engkimtitheia chuan a ti a ni. 9 Kei Johana, in unaupa leh, Isuaa hrehawmna te, khua leh tui te, chhelna te ṭâwmpuitu che u hi, Pathian thu avâng leh Isua hriattîrna thu avângin Patmos thliarkâr an tihah chuan ka awm a. 10 Lalpa niah chuan Thlarauvin ka lo awm a; tin, ka hnung lamah tawtawrâwt ri ang, aw ring takin, 11 “I thil hmuh tûr chu lehkhabuah ziak la, kohhran pasarihte hnênah - Ephesi khuaah te, Smurna khuaah te, Pergamos khuaah te, Thuatira khuaah te, Sardis khuaah te, Philadelphia khuaah te, Laodikei khuaah te chuan thawn rawh,” a tih ka hria a. 12 Tin, mi biakna aw chu hmuh tumin ka han lehhawi ta a. Tin, ka han lehhawi chuan rangkachak khâwnvâr dahna pasarih ka hmu a; 13 khâwnvâr zîngah chuan mi tu emaw mihring fa ang, ke lêr thlenga puan sin, a âwma rangkachak kâwnghrena inhrêng ka hmu bawk a. 14 Tin, a lu leh a sam chu berâm hmul vâr angin a vâr a, vûr ang maiin; a mitte chu meialh ang a ni a; 15 a kephahte chu dâr tle mi ang a ni a, rawh tuina meia rawh thianghlim tawh ang maiin; a aw chu tui tam tak ri ang mai a ni. 16 Tin, a kut ding lam chuan arsi pasarih a keng a; a kâ aṭang chuan khandaih hriam tawn hriam tak a chhuak a; a hmêl chu ni sat vânglai tak ang a ni. 17 Tin, amah chu ka hmuh veleh thi ang dêrin a ke bulah ka tlu ta a. Tin, ani chuan a kut ding lam chu ka chungah nghatin ka hnênah, “Hlau suh ang che; kei Hmasabera leh Hnuhnûngbera leh, 18 Mi Nunga chu ka ni; ka lo thi a; nimahsela, ngai teh, kumkhua atân ka nung leh ta a ni. Thihna leh Mitthi Khaw chabite chu ka nei bawk a. 19 “Chutichuan, i thil hmuh tawhte leh thil awm mêkte leh, tûn hnua thil lo awm tûrte thu chu ziak rawh; 20 ka kut ding lama arsi pasarih awm i hmuhte leh, rangkachak khâwnvâr dahna pasarihte thurûk chu. Arsi pasarih chu kohhran pasarihte tirhkoh an ni a; khâwnvâr pasarih chu kohhran pasarihte chu an ni e.
Ephesi khaw hnêna thuchah
1 “Ephesi khuaa kohhran tirhkoh hnênah chuan heti hian ziak rawh: A kut ding lama arsi pasarih kenga, rangkachak khâwnvâr dahna pasarih zînga vei veia khân hêng thu hi a sawi a ni: 2 I thiltih te, i thawh rimzia leh i chhelzia te, mi sual i ngaihtheih lohzia te ka hria. Tirhkoh ni si lova tirhkoh intite chu i fiah bawk a, dawthei an ni tih i lo hre tawh a; 3 chhelna i nei bawk a, ka hming avângin i tuar tawh a, i chau si lo va. 4 Nimahsela, demna che ka nei a ni, i hmangaihna hmasa ber kha i bân tâk avângin. 5 Chutichuan, i tlûksan tâk chu hre reng la, simin, a tîra i thiltihte kha ti leh rawh; chuti lo chuan, i hnênah ka lo kal ang a, i sim loh zawngin i khâwnvâr dahna kha a hmun ata ka sawn ang. 6 Nimahsela, hei hi i ṭhatna chu a ni, Nikola-ho thiltihte i huat hi; chu chu kei pawhin ka haw ve a ni. 7 Thlarauvin kohhranho hnêna thu a sawi hi beng nei chuan hre rawh se. A hnehtu apiang Pathian Paradis-a Nunna Thinga mi ka eitîr ang, a ti e, tiin.
Smurna khaw hnêna thuchah
8 “Tin, Smurna khuaa kohhran tirhkoh hnênah chuan heti hian ziak rawh: Hmasabera leh Hnuhnûngbera, thia lo nung leh taa khân hêng thu hi a sawi a ni: 9 I hrehawmzia te, i pachhiatzia te (nimahsela, i hausa si a), Juda tak ni lova, Setana inkhâwmna inho ni zâwk sia, Juda intihoten an sawichhiat dân che ka hria. 10 I tuar tûrte hi hlau suh; ngai teh, fiaha in awm theih nân Diabola chuan in zînga mi ṭhenkhat tân inah a khung dâwn che u a ni; tin, ni sâwm hrehawm in tuar ang. Thih thlengin rinawmin lo awm rawh; tichuan, nunna lallukhum ka pe ang che. 11 Thlarauvin kohhranho hnêna thu a sawi hi beng nei chuan hre rawh se. A hnehtu apiang thih hnihna chuan eng mah a tih lo vang, a ti e, tiin.
Pergamos khaw hnêna thuchah
12 “Tin, Pergamos khuaa kohhran tirhkoh hnênah chuan heti hian ziak rawh: Khandaih hriam tawn hriam tak neia khân hêng thu hi a sawi a ni: 13 I awmna, Setana ṭhutphah awmna kha ka hria; tin, ka hming i vawng tlat a, ka thu hretu Antipa, Setana awmnaa in zînga an thah, ka mi rinawm tak awm lai meuh pawh khân mi rinna hi i phatsan lo bawk a. 14 Nimahsela, tlêmin demna che ka nei, khata Balaama zirtîrna thu pawm tute emaw in awmpui avâng khân; ani chuan milem biakna sa an eina tûr leh an inngaihna tûrin, Balaka chu Israela thlahte hmaah tlûkna dah a zirtîr kha. 15 Nang pawhin Nikola-ho zirtîrna thu chutiang bawka pawm tute emaw i awmpui bawk a ni. 16 Chutichuan, sim rawh; chuti lo chuan, i hnênah ka lo kal thuai ang a, ka kâa khandaih chuan anmahni ka rawn do vang. 17 Thlarauvin kohhranho hnêna thu a sawi hi beng nei chuan hre rawh se. A hnehtu apiang hnên ngeiah chuan manna thuhrûk zînga mi ka pe ang a, lung vâr pawh ka pe ang, chumi lunga hming thar ziak nên; chu hming chu a changtu chauh lo chuan tu mân an hre lo, a ti e, tiin.
Thuatira khaw hnêna thuchah
18 “Tin, Thuatira khuaa kohhran tirhkoh hnênah chuan heti hian ziak rawh: Pathian Fapa, mit meialh ang neia, a kephahte dâr tle mi anga khân hêng thu hi a sawi a ni: 19 I thiltih te, i hmangaihzia te, i rinzia te, i rawngbâwlzia te, i chhelzia te ka hria, i thiltih hnuhnûng berte chu a tîra mi ai khân a nasa zâwk tih ka hre bawk. 20 Nimahsela, demna che ka nei, hmeichhia Jezebeli, zâwlneinu intii kha i ngaihtheih avângin; ani chuan ka bawihte chu inngaih leh milem biakna thil ei zirtîrin a hruai bo bawk ṭhîn a ni. 21 Tin, simna tûrin a hnênah hun bi ka tuk a; nimahsela, mi ngaih a chîn chu a sim duh lo. 22 Ngai teh, amah chu khumah ka paih dâwn a ni; a uirêtute pawh chu, a thiltih chînte chu an simsan loh zawngin hrehawm nasa takah ka paih bawk dâwn. 23 A fate chu hriin ka tihlum bawk ang a; tichuan, kei hi rilru leh thinlung entu ka ni tih kohhranho zawng zawng chuan an hria ang; tin, in thiltih ang zêlin ka pe ṭheuh vang che u. 24 Nimahsela, nangni, Thuatira khuaa mi dang awm, chu zirtîrna thu pawm lova, Setana thil thûk an tihte hre lo apiang hnênah chuan, phurrit dang rêng ka bel lo vang che u, ka ti a ni. 25 In neih sa erawh kha chu ka lo kal hma loh chuan vawng tlat rawh u. 26,27 Tichuan, a hnehtu apiang leh a tâwp thlenga ka thiltihte pawmtu apiang, keiin ka Pa laka ka hmuh ang bawk hian, chu mite chu hnam tin chungah thu ka neihtîr ang; tin, anni chuan bêlvawtu bêlte keh sawm depa a awm angin, thîrtiangin an ro a rêlsak ang. 28 Tin, vârparh arsi chu anmahni ka pe ang. 29 Thlarauvin kohhranho hnêna thu a sawi hi beng nei chuan hre rawh se, a ti e, tiin.
Sardis khaw hnêna thuchah
1 “Tin, Sardis khuaa kohhran tirhkoh hnênah chuan heti hian ziak rawh: Pathian Thlarau pasarih leh arsi pasarih neia khân hêng thu hi a sawi a ni: I thiltihte ka hria, thi reng sia nung hming i put hi. 2 Invêng la, i thil la neih thi lek lekte chu tinung leh rawh; i thiltihte rêng ka Pathian mit tlung zovin ka hmu si lo. 3 Chutichuan, i thu dawn leh ngaihthlâkte kha hre reng la, pawm la, sim rawh. I invên loh zawngin rûkru angin ka lo kal ang a, eng hunah nge ka rawn phâwk dâwn che i hre si lo. 4 Nimahsela, Sardis khuaah khân an puante tibawlhhlawh lo hming tlêm tê i nei a ni; anni chu puan vâr sinin ka hnênah an lêng ve ṭhîn ang; chutiang ti tlâk an ni si a. 5 A hnehtu apiang chutiangin puan vârte sintîr an ni ang; tin, Nunna Bu ata an hming chu ka thai bo tawp lo vang a, ka Pa hmaah leh a vântirhkohte hmaah chuan an hming ka ṭan zâwk ang. 6 Thlarauvin kohhranho hnêna thu a sawi hi beng nei chuan hre rawh se, a ti e, tiin.
Philadelphia khaw hnêna thuchah
7 “Tin, Philadelphia khuaa kohhran tirhkoh hnênah chuan heti hian ziak rawh: Mi thianghlima, mi dik taka, Davida chabi neia, tu ma khâr loh tûra hawnga, tu ma hawn loh tûra khâra khân hêng thu hi a sawi a ni: 8 I thiltihte ka hria, chakna tlêm tê chauh i nei a, chuti chung pawhin ka thu i pawm a, ka hming pawh i phat lo va; tu ma khâr theih loh kawngka hawn sa i hmaah ka dah e. 9 Ngai teh, Setana inkhâwmna in ho zînga mi, Juda tak ni lova, dâwt sawia Juda intite zînga mi chu ka tîr dâwn a ni; ngai teh, i ke bulah chibai ka rawn bûktîr ang a, ka hmangaih che tih ka hriattîr bawk ang. 10 Ka chhelna thu i pawm avâng khân, leia awmte fiah tûra khawvêl zawng zawng chunga fiahna hun lo thleng tûr lakah chuan kei pawhin ka humhim ang che. 11 Ka lo kal thuai dâwn e; tu mân i lallukhum chu an lâksak loh nân che, i thil neih sa kha vawng tlat rawh. 12 A hnehtu apiang chu ka Pathian biak inah chuan banah ka siam ang a, chuta ṭang chuan an chhuak tawh lo vang; tin, anmahniah chuan ka Pathian hming nên, ka Pathian khua, Jerusalem Thar, ka Pathian hnêna mi vân aṭanga lo chhuk tûr hming nên, ka hming thar nên ka ziak ang. 13 Thlarauvin kohhranho hnêna thu a sawi hi beng nei chuan hre rawh se, a ti e, tiin.
Laodikei khaw hnêna thuchah
14 “Tin, Laodikei khuaa kohhran tirhkoh hnênah chuan heti hian ziak rawh: Amena - thuhretu rinawm leh dik taka, Pathian thil siam bula khân hêng thu hi a sawi a ni: 15 I thiltihte ka hria, i vawh hek lohva, i lum hek loh hi; i vawh emaw, i lum emaw ka duh a ni. 16 Chutichuan, lum si lova, vâwt si lova, i lum chang chang avângin ka ka ata ka chhâk chhuak dâwn a che. 17 Ka hausa a, sum ka ngah a, eng mah ka tlachham lo ve, i tih avâng leh, nang mi rethei, khawngaihthlâk, pachhia, mitdel, saruak chu i ni tih i inhriat loh avângin; 18 i lo hausak theih nân rangkachak meia tihthianghlim te, puan i sin theih nân leh i saruak zahmawh chu a lan loh nân puan vâr te, i hmuh theih nân i mita hnawihah mit na hlo te ka hnêna mi lei tûrin ka râwn a che. 19 Ka hmangaih apiang ka zilhhauvin ka thunun ṭhîn; chutichuan, ṭhahnemngai la, sim rawh. 20 Ngai teh, kawngkhâr bula dingin ka kik hi; tu pawhin ka aw hriaa kawng a hawn chuan, a hnênah ka lût ang a, a hnênah zanriah ka ei ang a, ani pawhin ka hnênah a ei bawk ang. 21 A hnehtu apiang ka lalṭhutphahah ka hnênah ka ṭhuttîr ang, kei pawhin ka hneha, ka Pa hnênah a lalṭhutphaha ka ṭhu ang khân. 22 Thlarauvin kohhranho hnêna thu a sawi hi beng nei chuan hre rawh se, a ti e, tiin,” a ti a.
Vân mite fakna
1 Chûng thil hnuah chuan ka han en a; tin, ngai teh, vânah kawngkhâr inhawng ka hmu a; tin, aw ka hriat hmasak, tawtawrâwt ri anga mi bia khân, “Hetah lo chho rawh; tichuan, tûn hnua thil lo awm tûrte chu ka entîr ang che,” a ti a. 2 Chawplehchilhin Thlarauvin ka lo awm ta nghâl a; tin, ngai teh, vânah lalṭhutphah a lo inhûng a, chu ṭhutphahah chuan mi pakhat a lo ṭhu bawk a. 3 Tin, a chunga ṭhua chu jaspi leh sardion lung ang maiin a lang a; tin, lalṭhutphah vêlah chuan chhimbâl, ena smaragdin lung ang a zâm a. 4 Tin, lalṭhutphah vêlah chuan lalṭhutphah sawmhnih leh pali a awm a; tin, lalṭhutphahahte chuan upa sawmhnih leh pali puan vâr sina ṭhu ka hmu a; rangkachak lallukhumte an khum a. 5 Tin, lalṭhutphah aṭang chuan kâwlphe te, aw te, khawpui ri te a lo chhuak dur dur a. Tin, lalṭhutphah hmaah chuan meichher pasarih a alh a, chûng chu Pathian Thlarau pasarihte kha an ni a; 6 tin, lalṭhutphah hmaah chuan dârthlalang tuifinriat ang, krustal lung ang mai a awm a; tin, lalṭhutphah laiah leh lalṭhutphah vêlah chuan Thil nung pali, hma lam leh hnung lam mita khat an awm a. 7 Tin, Thil nung pakhatna chu sakeibaknei ang a ni a, Thil nung pahnihna chu sebâwngno ang a ni a, Thil nung pathumna chuan mihring hmel ang a pu a, Thil nung palina chu mupui thlâwk lai ang a ni. 8 Tin, Thil nung pali chu thla paruk ṭheuh nei, an vêl leh an chhûnga mita khat an ni. Tin, “Lalpa Pathian, Engkimtitheia, Awm tawha leh, awm mêka leh, lo la awm tûra chu, A thianghlim e, a thianghlim e, a thianghlim e,” tiin, chhûn leh zân an châwl ngai lo. 9 Tin, Thil nungte chuan lalṭhutphaha ṭhua, chatuana nung renga chu, an tihropuia an chawimawia, lâwm thu an hrilh apiangin, 10-11 upa sawmhnih leh palite chu lalṭhutphaha ṭhua hmaah chuan an bawkkhup ang a, chatuana nung renga chu chibai an bûk ang a, “Nang, kan Lalpa leh kan Pathian, Ropuina te, chawimawina te, thiltihtheihna te chu Hmu tlâk i ni e; Nangin engkim i siam a, I duh avânga awm leh siam An ni bawk si a,” tiin, an lallukhumte chu lalṭhutphah hmaah chuan an dah ang.
Lehkha zial leh Berâmno
1 Tin, lalṭhutphaha ṭhua kut ding lamah chuan lehkhabu, chhûng lam leh pâwn lama ziak, chhinchhiahna pasariha chhinchhiah tlat ka hmu a. 2 Tin, vântirhkoh chak tak, aw ring taka, “Tu nge lehkhabu hi hawnga, a chhinchhiahnate hi phelh tlâk awm?” tia tlângauvin ka hmu bawk a. 3 Chutichuan, vânah te, leiah te, lei hnuaiah te pawh lehkhabu chu hawng thei tu mah an awm lo va, a chhûng lam en thei pawh an awm hek lo. 4 Tin, lehkhabu hawng leh, a chhûng lam pawh en tlâk tu mah an awm loh avângin ka ṭap ta zawih zawih a. 5 Tin, upa zinga pakhat chuan ka hnênah, “Ṭap suh; ngai teh, Sakeibaknei, Juda hnama mi, Davida Bulpui khân lehkhabu chu hawng tûr leh, a chhinchhiahna pasarih phelh tûrin a hneh ta,” a ti a. 6 Tin, lalṭhutphah leh Thil nung palite laiah, upate lai bawkah chuan Berâmno talh tawh hnu ang, ki pasarih leh mit pasarih nei ding ka hmu a, chûng mit pasarihte chu Pathian Thlarau pasarih, lei chung zawng zawnga tirh chhuahte chu an ni. 7 Tin, ani chu a lo kal a, lalṭhutphaha ṭhua kut ding lam ata lehkhabu chu a la ta a. 8 Tin, lehkhabu chu a lâk veleh Thil nung pali leh upa sawmhnih leh palite chu ṭingṭang leh rangkachak berhbu, rimtuia khat keng ṭheuhvin, Berâmno hmaah chuan an bawkkhup ta hlawm a; chûng rimtuite chu mi thianghlimte ṭawngṭaina a ni. 9,10 Tin, “Nang, lehkhabu chu laa, A chhinchhiahnate phelh tlâk i ni e; Talhin i awm tawh a, Chi tina mi te, ṭawng tina mi te, Mi tina mi te, hnam tina mi te, Pathian tân i thisenin i lei a, Kan Pathian tân khua leh tuiah leh, Puithiamahte i siam ta si a; Tin, leiah chuan ro an rêl a,” tiin hla thar an sa a. 11 Tin, ka han en a; tin, lalṭhutphah leh Thil nungte leh upate vêlah chuan vântirhkoh tam tak aw ka hria a; an tam lam chu a sînga sîng hmun sîng tam tak leh, a sânga sâng hmun sâng tam tak an ni; 12 chûngte chuan aw ring takin, “Berâmno talh tawha hi, Thiltihtheihna te, hausakna te, finna te, Chakna te, chawimawina te, ropuina te, Malsâwmna te hmu tlâk a ni e,” an ti a. 13 Tin, vân leh lei chung leh lei hnuai leh tuifinriat chhûnga thil siam tinrêng awmte leh, chûngho chhûnga awm zawng zawngten, “Lalṭhutphaha ṭhua leh, Berâmno hnênah chuan, Malsâwmna te, chawimawina te, Ropuina te, rorêlna te, Chatuanin awm rawh se,” an tih ka hre bawk a. 14 Tin, Thil nung palite chuan, “Amen,” an ti a. Upate pawh chuan bawkkhupin chibai an bûk ta a.
Chhinchhiahna phelh
1 Tin, Berâmno chuan chhinchhiahna pasarih zînga pakhat chu a han phelh lai ka hmu a; tin, Thil nung palite zînga pakhat chuan khawpui ri ang maiin, “Lo kal rawh,” a tih ka hria a. 2 Tichuan, ka han en a; tin, ngai teh, sakawr vâr ka hmu a, a chunga chuang chuan thalngul a keng a; tin, a hnênah chuan lallukhum an pe a; tin, hneh chung leh hneh zêl tûrin a chhuak ta a. 3 Tin, chhinchhiahna pahnihna chu a han phelh veleh Thil nung pahnihna chuan, “Lo kal rawh,” a tih ka hria a. 4 Tichuan, sakawr dang, a sen a lo chhuak leh a; tin, a chunga chuang hnênah chuan lei ata inremna lâksak theihna leh mi inthahtîr theihna an pe a; tin, a hnênah khandaih lian pui an pe bawk a. 5 Tin, chhinchhiahna pathumna chu a han phelh veleh Thil nung pathumna chuan, “Lo kal rawh,” a tih ka hria a. Tichuan, ka han en a, tin, ngai teh, sakawr dum ka hmu a; a chunga chuang chuan bûkna a keng a. 6 Tin, Thil nung palite lai aṭang chuan aw angreng hian, “Duliin buhpui tehkhâwng khat, duliin barli tehkhâwng thum; hriak leh uain erawh chu tichhe suh,” a tih ka hria. 7 Tin, chhinchhiahna palina chu a han phelh veleh Thil nung palina aw chuan, “Lo kal rawh,” a tih ka hria. 8 Tichuan, ka han en a; tin, ngai teh, sakawr dâng ka hmu a; a chunga chuang hming chu Thihnaa a ni; tin, Mitthi Khuaan a rawn zui a. Tin, khandaih te, ṭâm te, hri te, leia sakawlhtea tihlum tûrin chu mite hnênah chuan lei hmun lia ṭhena hmun khat chunga thuneihna an pe a. 9 Tin, chhinchhiahna pangana chu a han phelh veleh, maichâm hnuaiah chuan, Pathian thu avâng leh an pawm hriattîrna thu avânga thahte thlarau chu ka hmu a; 10 tin, anni chuan aw ring takin, “Aw Lalpa, mi thianghlim leh dik tak, eng chen nge rorêl lovin, leia awmte chungah kan thisen chhuahna phuba chu la lova i awm dâwn le?” tiin an au va. 11 Tin, an hnênah chuan puan vâr an pe ṭheuh va; tin, an bawihpuite leh an unaute, anmahni ang bawka thah tûrte chu an thah kim hma loh chuan an la nghâk rih tûr a ni tih an hrilh a. 12 Tin, chhinchhiahna parukna chu a han phelh lai ka en reng a; tin, lîr nasa takin a lo nghîng ta a; tin, ni chu sahmul saiip puan angin a lo dum a, thla pawh chu a pumin thisen angin a lo awm ta a; 13 tin, vâna arsite chu theipui kûng thlipuiin a nuaia, a helte a ṭîl ang maiin leiah a tla ta a. 14 Tin, vân chu lehkhabu zial mi ziala a bo angin a bo ta a; tin, tlâng leh thliarkâr tinrêng chu an awmna ata sawnin an awm ta hlawm a. 15 Tin, leia lal te, mi lian te, sipai hotu ber te, mi hausa te, mi chak te, bawih leh bawih lo tinrêngte chu pûkah leh tlânga lungpuiah chuan an biru a; 16 tin, tlângte leh lungpuite hnênah chuan, “Min delh ula, lalṭhutphaha ṭhua hmêl lakah leh Berâmno thinurna lakah min hliah rawh u; 17 a thinurna ni râpthlâk tak chu a lo thlen tâk hi; tichuan, tu nge ding thei ang i le?” an ti a.
Israel mi nuai khat leh sîngli leh sângli
1 Chumi hnuah chuan khawmualah leh, tuifinriatah leh, thing rêng rêngah chuan thli rêng a tleh loh nân, lei thli pali chu chelhin lei kil lia ding vântirhkoh pali ka hmu a. 2 Tin, vântirhkoh dang, Pathian nung chhinchhiahna kenga ni chhuahnaa chho ka hmu bawk a; tin, ani chuan vântirhkoh pali, khawmual leh tuifinriat tihchhiat theihna pêkate hnênah chuan aw ring takin, 3 “Kan Pathian bawihte chu an chala kan chhinchhiah hma loh zawng khawmual leh, tuifinriat leh, thingte chu tichhe rih suh u,” tiin a au va. 4 Tin, an chhinchhiah zât chu ka lo hria a, Israela thlahte hnam tina mi nuai khat leh sîngli leh sângli an chhinchhiah tawh a ni. 5 Juda hnama mi sîngkhat leh sânghnih, Reubena hnama mi sîngkhat leh sânghnih, Gada hnama mi sîngkhat leh sânghnih, 6 Asera hnama mi sîngkhat leh sânghnih, Naphtalia hnama mi sîngkhat leh sânghnih, Manasea hnama mi sîngkhat leh sânghnih, 7 Simeona hnama mi sîngkhat leh sânghnih, Levia hnama mi sîngkhat leh sânghnih, Isakara hnama mi sîngkhat leh sânghnih, 8 Zebuluna hnama mi sîngkhat leh sânghnih, Josefa hnama mi sîngkhat leh sânghnih, Benjamina hnama mi sîngkhat leh sânghnih, an chhinchhiah tawh.
Hnam tin zînga mipui
9 Chûng hnuah chuan ka han en a; tin, ngai teh, mipui tam tak, tu ma chhiar sên loh, hnam tin zînga mi te, chi tin zînga mi te, mi tin zînga mi te, ṭawng tin zinga mi te puan vâr sina tûmkau kengin, lalṭhutphah hmaah leh Berâmno hmaa ding ka hmu a; 10 tin, chûngte chuan aw ring takin, “Kan Pathian lalṭhutphaha ṭhua hnênah leh, Berâmno hnênah chhandamna,” tiin an au va. 11 Tin, vântirhkoh zawng zawng chu lalṭhutphah leh upate leh Thil nung palite vêlah chuan dingin an awm a; lalṭhutphah hmaah chuan bawkkhupin, 12 “Amen: malsâwmna te, ropuina te, finna te, Lâwm thu sawina te, chawimawina te, Thiltihtheihna te, chakna te, Chatuanin kan Pathian hnênah awm rawh se. Amen,” tiin Pathian chibai an bûk a. 13 Tin, upa zînga pakhat chuan ka hnênah, “Hêng puan vâr sinte hi tute nge nia, khawi aṭanga lo kal nge an nih?” tiin mi bia a. 14 Tin, kei chuan a hnênah, “Ka pu, nangman i hria alâwm,” ka ti a. Tin, anin ka hnênah, “Hêng hi hrehawm nasa tak ata chhuakhote kha an ni a, an puante Berâmno thisena suin an tivâr ta a. 15 Chuvângin, Pathian ṭhutphah hmaah an awm a ni; tin, a chhûn a zânin a biak inah chuan a rawng an bâwl ṭhîn; tin, lalṭhutphaha ṭhua chuan an chungah a puan in chu a zâr ang. 16 An rilṭâm leh tawh lo vang a, an tuihâl leh tawh hek lo vang; niin a em hek lo vang a, lum rêng rêng pawhin a tihrehawm hek lo vang. 17 Berâmno, lalṭhutphah laia awm chu an vêngtu a ni ang a, nunna tuikhurahte a hruai ang; Pathianin an mit ata mittui zawng zawng a hru fai tawh ang,” a ti a.
Chhinchhiahna pasarihna leh rangkachak berhbu
1 Tin, chhinchhiahna pasarihna chu a han phelh veleh, dâr chanve lai vân chu a reh ta ṭhuap a. 2 Tin, Pathian hmaa vântirhkoh pasarih ding ṭhînte chu ka hmu a; tin, an hnênah tawtawrâwt pasarih an pe a. 3 Tin, vântirhkoh dang a lo kal a, rangkachak rimtui hâlna bâwm kengin maichâm kiangah chuan a ding ta a: tin, lalṭhutphah hmaa rangkachak maichâm chunga mi thianghlim zawng zawng ṭawngṭainate belhchhahna tûrin, englo rimtui tam tak a hnênah an pe a. 4 Tin, englo rimtui khu chu vântirhkoh kut ata Pathian hmaah a chho ta a, mi thianghlimho ṭawngṭainate nên chuan. 5 Tin, vântirhkoh chuan englo rimtui hâlna bâwm chu a la a, maichâma meiin a tikhat a, leiah a paih thla ta a; tichuan, khawpui ri te, aw te, kâwlphe te, lîrnghîng te a lo awm ve ta nghâl a.
Tawtawrâwt pasarih
6 Tin, vântirhkoh pasarih, tawtawrâwt pasarih kengte chu hâm tûrin an inbuatsaih ta a. 7 Tin, a hmasa ber chuan a han hâm a; tichuan, rial leh mei, thisen nêna inpawlh a lo awm ta nghâl a, chûng chu leiah paih thlâkin a awm ta a; tichuan, lei hmun thuma ṭhena hmun khat chu a kâng ral ta a, thingte pawh hmun thuma ṭhena hmun khat chu a kâng ral a, hlobet hring zawng zawng pawh a kâng ral ta bawk a. 8 Tin, vântirhkoh pahnihna chuan a han hâm a; tichuan, tlâng lian pui, meia kâng lai ang hi tuifinriatah an paih thla a; tichuan, tuifinriat hmun thuma ṭhena hmun khat chu thisenah a lo chang ta a; 9 tuifinriata thil siam, nunna neite chu hmun thuma ṭhena hmun khat chu an thi ta bawk a; lawngte pawh hmun thuma ṭhena hmun khat chu tihchhiat a ni ta bawk a. 10 Tin, vântirhkoh pathumna chuan a han hâm a; tichuan, arsi lian pui, meichher anga alh hi vân aṭangin a lo tla a, lui hmun thuma ṭhena hmun khat leh tuikhurte chu a delh ta a; 11 chu arsi hming chu sai a ni a; tui hmun thuma ṭhena hmun khat chu saiah a lo chang ta a; tichuan, chu tui chu an in a, mi tam tak an thi a, a lo khâk tâk avângin. 12 Tin, vântirhkoh palina chuan a han hâm a; tichuan, ni hmun thuma ṭhena hmun khat, thla pawh hmun thuma ṭhena hmun khat, arsite pawh hmun thuma ṭhena hmun khat chu tihchhiat a ni ta a; chûngho hmun thuma ṭhena hmun khat chu a thimna tûr leh, chhûn chu hmun thuma ṭhena hmun khat a ên lohna tûrin; zân pawh chutiang bawkin a ni. 13 Tin, ka han en a, mupui, vânlaizâwla thlâwkin aw ring takin, “Vântirhkoh pathum tawtawrâwt la hâm tûr, chumi ri lo la awm tûrte avâng chuan leia awmhote chung a pik e, a pik e, a pik e!” a tih ka hria a.
1 Tin, vântirhkoh pangana chuan a han hâm a; tichuan, arsi, vân aṭanga leia tla sa ka hmu a; tin, leilâwt khuarkhurum chabi chu a hnênah an pe a. 2 Tin, ani chuan leilâwt khuarkhurum chu a hawng a; tichuan, khuarkhurum ata chu meikhu, rawh tuina mei nasa tak khu ang a chhuak chho va; tin, khuarkhuruma meikhu avâng chuan ni leh boruak chu a lo thim ta a. 3 Tin, meikhu zîng aṭang chuan leiah khaute a lo chhuak a; tin, leia khawmualkaikuangten thiltihtheihna an nei ang hian, an hnênah thiltihtheihna an pe a. 4 Tin, an chala Pathian chhinchhiahna nei lo mihringte chauh lo chu, leia hlobet te, thil hring rêng rêng te, thing rêng rêng te pawh tihchhiat loh tûr tih an hrilh a. 5 Tin, an hnênah chuan mihringte chu tihlum êm lova, thla nga tihrehawm zâwk tûrin thu an pe a; an tihhrehawmzia chu khawmualkaikuangin mi a seha a tihrehawm ang hi a ni. 6 Chûng niah chuan miten thihna an zawng ang a, an hmu hauh si lo vang; thih an châk ang a, nimahsela, thihna chuan a tlânsan ang. 7 Tin, khaute pianzia chu sakawr, indona tûra peih sa ang an ni; lallukhum ang mai rangkachak ang an khum a, an hmai pawh mihring hmai ang a ni. 8 Tin, hmeichhe sam ang hi sam an nei a, an hâte pawh chu sakeibaknei hâ ang a ni. 9 Tin, thîr âwmphaw ang hi âwmphaw an nei a; tin, an thla zah ri chu indona tawlailîr ri, sakawr tam tak indo tûra tlân dur dur ri ang a ni. 10 Tin, khawmualkaikuang mei ang hi mei an nei a, sehna pawh; tin, an meiah chuan a ni thla nga chhûnga an mihring tihnat theihna chu a awm ni. 11 Leilâwt tirhkoh chu an chunga lalberah an nei a, Hebrai ṭawngin a hming chu Abaddona a ni a, Grik ṭawng erawh chuan a hming chu Apolluona (Tiboraltua) a ni. 12 Chungpikna hmasa ber chu a reh tawh a; ngai teh, tûn hnuah Chungpikna pahnih a la awm leh ang. 13 Tin, vântirhkoh parukna chuan a han hâm a; tichuan, Pathian hmaa rangkachak maichâm ki aṭangte chuan aw ka hria a, 14 chu aw chuan vântirhkoh parukna, tawtawrâwt keng hnênah chuan, “Euphrates luipuia vântirhkoh pali phuarte kha phelh rawh,” a ti a. 15 Tichuan, chumi dârkâr leh ni leh thla leh kum atân chuan, mihring hmun thuma ṭhena hmun khat tihlum tûra buatsaih tawh vântirhkoh palite chu an phelh ta a. 16 Tin, sipai, sakawr chung chuangho chu an tam lam chu sîng hlîra hmun sînghnih a ni tih an sawi ka hria. 17 Tin, inlârnaah chuan sakawr leh an chunga chuanghote chu hetiangin ka hmu a ni, mei leh huakintho leh kât ang hi âwmphaw an nei a; tin, sakawr lute chu sakeibaknei lu ang hi a ni a, an kâ aṭang chuan mei leh meikhu leh kâtte a chhuak a. 18 Chumi hremna pathum chuan mihring hmun thuma ṭhena hmun khat an tihlum ta a - mei leh meikhu leh kât an kâ aṭanga chhuak khân. 19 Sakawrte thiltihtheihna chu an kâah leh an meiah a ni a awm ni; an meite chu rûl ang a ni si a, lûte an nei bawk a; chu chuan a ni mi an tihnat ṭhin ni. 20 Tin, mihring, chûng hremnaa tihhlum bângte chuan ramhuaite leh rangkachak milem te, tangkaraw milem te, dâr milem te, lung milem te, thing milem te, eng mah hmu thei hlei lo, hre thei hlei lo, kal thei hlei lote chu an biak tawh lohna tûrin an kuta thiltihte chu an sim chuang lo; 21 an tualthahte pawh, an dawi hmante pawh, an inngaihte pawh, an rûkrûkte pawh an sim chuang hek lo.
Vântirhkoh leh lehkha zial
1 Tin, vântirhkoh chak tak dang pakhat, chhûma inthuam, vân aṭanga lo chhuk ka hmu a; a lu-ah chuan chhimbâl chu a zâm a, a hmêl chu ni ang a ni a, a kete chu mei ban ang a ni. 2 Tin, a kut chuan lehkhabu tê tak tê hawn sa a keng a; tin, a ke ding lamin tuifinriat a rap a, a vei lamin khawmual a rap a. 3 Tin, sakeibaknei hahum angin aw ring takin a au ta a; tin, a au zawh chuan khawpui ri pasarihte chuan an aw an chhuah ta a. 4 Tin, khawpui ri pasarihte chuan an aw an chhuah veleh ka ziak dâwn a; tichuan, “Khawpui ri pasarihte thusawi chu zêp tlat la, ziak suh,” tiin vân aṭangin aw ka hre ta a. 5 Tin, vântirhkoh, tuifinriat leh khawmuala ding ka hmuha chuan a kut ding lam chu vân lamah a phar a, 6 chatuana nung renga, vân, a chhûnga thil awmte nên, lei, a chhûnga thil awmte nên, tuifinriat, a chhûnga thil awmte nêna siamtu chu chhâlin, “Hun a awm tawh lo vang; 7 nimahsela, vântirhkoh pasarihna thâwm a awm hunah, a ham dâwn ṭêpin, Pathian thurûk chu a kim tawh ang, a bawih zâwlneite hnêna a chanchin ṭha hrilh ang khân,” a ti a. 8 Tin, vân ata aw ka hriat khân mi be leh a, “Tuifinriat leh khawmuala ding vântirhkoh kuta lehkhabu hawn sa saw va la rawh,” a tih ka hria a. 9 Tin, vântirhkoh hnênah chuan ka va kal a, a hnênah, “Lehkhabu tê tak tê kha mi pe rawh,” ka ti a. Tin, ani chuan ka hnênah, “La la, ei zo vek rawh; tichuan, i pum chu a tikhâ ang a, i kâah erawh chuan khawizu angin a thlum ang,” a ti a. 10 Tin, vântirhkoh kut ata lehkhabu tê tak tê chu ka la a, ka ei zo vek a; tichuan, ka kâah chuan khawizu angin a thlum a; nimahsela, ka ei zawh veleh ka pum chu a kha zo ta a. 11 Tin, ka hnênah, “Mi tam tak te, hnam tam tak te, ṭawng tam tak te, lal tam tak te chungchâng thu i hril leh ang,” an ti a.
Thuhretu pahnih
1 Tin, luang, tiang ang hi mi pe a; tichuan, tuin emaw, “Tho la, Pathian biak in, maichâm nên, a chhûnga betute nên teh rawh. 2 Biak in pâwn lama hung chhûng kawtlai erawh chu teh tel suh, chu chu Jentailte hnêna pêk a ni tawh si a; anni chuan Khaw Thianghlim chu thla sawmli leh thla hnih an rap bet ang. 3 Tin, ka thuhretu pahnihte hnênah chuan thu ka pe ang a; tichuan, saiip puan sinin ni sângkhat leh zahnih leh sawmruk chhûng zawng thu an hril ang,” a ti a. 4 Chûng chu olive thing pahnih leh khâwnvâr dahna pahnih, khawvêl lal hmaa dingte chu an ni. 5 Tin, anni chu tu pawhin tihnat an tum chuan, an kâ aṭangin mei a lo chhuak a, an hmêlmate chu a kâng ral ṭhîn. Tin, tu pawhin anni chu tihnat tum ang sela, chutiang bawka tihhlumin an awm tûr a ni. 6 Chûngte chuan an thuhril chhûng zawng ruah sûr lo tûra vân tihpin theihna an nei; an duh hun apianga thisena chantîr tûrin tuite chungah thu an nei a, khawvêl hi hremna tinrênga hrem tûrin thu an nei bawk a. 7 Tin, an hriattîrna thu chu an hril zawh huna leilâwt aṭanga sakawlh lo chhuak chho tûr chuan anmahni a do vang a, a hneh ang a, a tihlum ang. 8 Tin, an ruang chu khaw ropui kawtthlêrah chuan a awm reng ang a; chu khaw ropui chu thlarau lam thu-ah chuan Sodom leh Aigupta an ti a ni, chutah bawk chuan an Lalpa chu khen behin a awm kha. 9 Tin, mite zînga mi te, chite zînga mi te, ṭawngte zînga mi te, hnamte zînga miten ni thum leh a chanve an ruangte chu an en ang a, an ruangte chu thlâna phûm an phal lo vang. 10 Tin, an thih avângin leia awmte chu an lâwm ang a, hlimna an siam ang a, lâwmna te an inthawn bawk ang; zâwlnei pahnihte chuan leia awmte chu an tihhrehawm ṭhin avângin. 11 Tin, ni thum leh a chanve hnuah chuan Pathian hnên ata nunna thaw chu an chhûngah a lo lût a, an kein an ding ta a; tichuan, a hmutute chuan an hlau ta êm êm a. 12 Tin, an hnênah, “Hetah hian lo chho rawh u,” tia vân aṭanga aw ring tak an hria a. Tichuan, chhûm zîngah chuan vânah an chho ta a; an hmêlmate chuan an hmu reng a. 13 Tin, chumi lai tak chuan lîr nasa takin a lo nghîng a, khua chu hmun sâwma ṭhena hmun khat a chim ta a, lîrnghîngah chuan mi sângsarih an thi a; tin, a bâkte chuan an hlau va, vân Pathian chu an chawimawi ta a. 14 Chungpikna pahnihna chu a reh tawh a; ngai teh, Chungpikna pathumna chu a lo thleng thuai dâwn e.
Tawtawrâwt pasarihna
15 Tin, vântirhkoh pasarihna chuan a han hâm a; tichuan, “Khawvêl ram chu kan Lalpa leh a Krista ram a lo ni ta, ani chuan chatuanin ro a rêl ang,” tiin vânah chuan aw ring takte a lo chhuak ta nghâl a. 16 Tichuan, Pathian hmaa an lalṭhutphaha upa sawmhnih leh pali ṭhute chu an bawkkhup a, 17 “Aw Lalpa Pathian, Engkimtithei, awm mêk leh awm tawh, i thiltihtheihna ropui tak chu laa ro i rêl avângin lâwm thu kan hrilh a che. 18 Hnamte chu an thinur a; tin, i thinur chu a lo thleng ve thung a, mitthi rorêlsak hun leh, i bawih zâwlneite hnênah te, an lâwmman pêk hun leh, lei tichhetute tihchhiat ve thung hun chu a lo thleng bawk a,” tiin Pathian chibai an bûk a. 19 Tin, vâna Pathian biak in chu an hawng a. Tichuan, a biak inah chuan a thuthlunna bâwm chu a lo lang ta a; tin, kâwlphe te, aw te, khawpui ri te, lîrnghîng te, rial nasa tak te a lo awm ta nghâl a.
Hmeichhia leh Dragon
1 Tin, thil mak ropui tak vânah a lo lang ta a; hmeichhia, nîa inthuam, a ke hnuaia thla awm, arsi sâwm leh pahniha siam lallukhum khum a lo awm a; 2 ani chuan nau a pai a; nau vei nâin a sa hrâm a. 3 Tin, thil mak dang vânah a lo lang leh a; ngai teh, dragon sen lian pui, lu sarih leh ki sâwm nei, lallukhum pasarih khum a lo awm a. 4 A mei chuan vân arsi hmun thuma ṭhena hmun khat chu a hnûk a, leiah a paih thla ta a; tin, a hrin huna a nau chu a lem theih nân, dragon chu hmeichhe nau hring tûr hmaah chuan a ding reng a. 5 Tin, fapa, hnam zawng zawng chunga thîrtianga rorêl tûr a hring a; tin, a fa chu Pathian hnênah leh a lalṭhutphahah chuan lâk chhohvin a awm ta a. 6 Tin, hmeichhia chu thlalêra Pathian buatsaih hmun a neihnaah chuan a tlân bo va, chutah chuan ni sângkhat leh zahnih leh sawmruk an châwm theihna tûrin. 7 Tin, vânah chuan indona a lo awm a; Mikaela leh a vântirhkohte chuan dragon chu an do va; dragon leh a tirhkohte pawh chuan an do ve a; 8 nimahsela, an hneh ta lo va, an hmun chu vânah a awm ta bawk hek lo. 9 Tin, dragon lian pui, rûlpui tar, Diabola leh Setana an tih, khawvêl zawng zawng bumtu chu an paih thla ta a; leiah an paih a, a tirhkohte pawh an paih thla tel ve a. 10 Tin, vânah chuan aw ring takin, “Tûnah chuan kan Pathian chhandamna leh thiltihtheihna leh ram chu a lo thleng ta, a Krista thuneihna nên; kan unaute hêktu, kan Pathian hmaa a chhûn a zâna hêk ṭhîntu chu an paih thla ta si a. 11 Nimahsela, Berâmno thisen avâng leh an hriattîrna thu avângin ani chu an hneh a ni; thih ngam khawpin an nunna an ngainêp bawk a. 12 Chuvângin, aw, vânte leh a chhûnga awmte u, lâwm rawh u! Lei leh tuifinriat chung a pik e! Diabola chu hun tlêm tê chauh a nei tih a inhriat avânga thinur êm êma in hnêna a lo chhuk tâk avângin,” a tih ka hria. 13 Tin, dragon chuan leia paih thlâk a ni tih a inhriat veleh, fapa hringtu hmeichhia chu a tiduhdah ta a. 14 Tichuan, thlalêra a hmunah chuan a thlawh luh theih nân, hmeichhia chu mupui lian tak thla khing hnih an pe a, chutah chuan rûlpui hmuh phâk lohvah, hun khat leh hunte leh hun chanve chhûng zawng an châwm ang. 15 Tin, rûlpui chuan tuia a len botîr theih nân, hmeichhe hnungah chuan lui ang mai hian a kâ ata tui a pik chhuak a. 16 Nimahsela, leiin hmeichhia chu a ṭanpui a, lei chuan a kâ a âng a, dragon-in a kâ ata a pik chhuah lui chu a lem zo ta a. 17 Tichuan, dragon chu hmeichhe chungah chuan a lo thinur a, a thlah la awm, Pathian thupêkte zâwma Isua hriattîrna thu pawmte chu do tûrin a kal ta a.
Sakawlh pahnih
1 Tichuan, tuifinriat ṭiauphovah chuan a ding ta a. Tin, sakawlh ki sâwm leh lu sarih nei, tuifinriat aṭanga lo chhuak ka hmu a, a kîahte chuan lallukhum sâwm a awm a, a luahte chuan Pathian sawichhiatna hmingte a awm bawk a. 2 Tin, ka sakawlh hmuh chu keitê ang a ni a, a kete chu savawm ke ang a ni a, a ka chu sakeibaknei ka ang a ni; tin, dragon chuan a hnênah a thiltihtheihna leh a lalṭhutphah leh thuneihna nasa tak a pe a. 3 Tin, a lu pakhat chu thihpui khawp hiala hliam angin ka hmu a; nimahsela, a thihpui khawp hial tûra hliam chu a dam ta a; tichuan, leia mi zawng zawngin sakawlh chu mak an ti a, an zui a. 4 Tin, sakawlh hnênah chuan a thuneihna chu a pêk avângin, dragon chu Pathian chibai bûkin an bûk a; tin, “Sakawlh ang hi tu nge awma, tu nge do thei awm?” tiin sakawlh pawh chu an bûk bawk a. 5 Tin, uanna leh Pathian sawichhiatna kâ a hnênah pêk a ni a, thla sawmli leh pahnih che tûrin thu pêk a ni bawk a. 6 Tichuan, Pathian sawichhiain a kâ a âng ta a, a hming leh a awmna vâna awmhote chu sawichhe tûrin. 7 Tin, mi thianghlimte a do leh a hneh phal a ni a; chi tinrêng te, mi tinrêng te, ṭawng tinrêng te, hnam tinrêng te chunga thuneihna a hnênah pêk a ni bawk a. 8 Tichuan, leia awm zawng zawng, leilung pian tirha talh tawh Berâmno Nunna Bua hming ziak loh apiang chuan, Pathian chibai bûkin an bûk ang. 9 Tu pawhin beng an neih chuan hre rawh se. 10 Tu pawh sala awm tûr chu salah an awm ang, tu pawh khandaiha thi tûr chu khandaiha tihhlum an ni ang. Hetah hian mi thianghlimte chu chhel tak leh rinawm taka an awm a ṭulzia a lang. 11 Tin, sakawlh dang lei aṭanga lo chhuak ka hmu a; berâmno kî ang ki pahnih a nei a, dragon ṭawng angin a ṭawng a. 12 Sakawlh hmasa zâwk thuneihna zawng zawng kha a mit hmuhah a hmang a. Lei leh a chhûnga awm zawng zawng chu sakawlh hmasa zâwk, thihpui khawp hial tûra hliam dam leha chu chibai a bûktîr bawk a. 13 Tin, mihring mit hmuhah vân aṭanga leia mei tlâktîr thei khawp hialin thil mak ropui tak a ti ṭhîn. 14 Leia awmte hnênah sakawlh, khandaiha hliam hnu la dama chawimawi nân amah lem an siam tûr a ni tih sawiin, sakawlh mit hmuha thil mak ti tûra thu a hmuh, chûng thil mak avâng chuan leia awmte chu a bum bawk a. 15 Tin, sakawlh lem chu a ṭawng theihna tûr leh, sakawlh lem chibai bûk lo apiang a tihhlumtîr theih bawkna tûrin, sakawlh lem hnênah chuan thâwkna a pêk phal a ni. 16 Tin, mi zawng zawng a lian a têin, a hausa a retheiin, bawih leh bâwih lo pawh, an kut ding lamah emaw, an chalah emaw chhinchhiahna a neihtîr hlawm a; 17 chhinchhiahna - sakawlh hming emaw, a hming nambar emaw - neite chauh lo chuan tu mân eng mah an lei leh an hralh theih loh nân. 18 Hetah hian fin a ṭulzia a lang. Chhût thiam chuan sakawlh nambar chu chhût rawh se; mihring nambar a ni si a; a zât chu zaruk leh sawmruk leh paruk a ni.
Berâmno leh a mite
1 Tin, ka han en a; tin, ngai teh, Berâmno, Zion tlânga ding leh, an chala a hming leh a Pa hming ziak mi nuai khat leh sîngli leh sângli a hnênah ka hmu a. 2 Tin, vân aṭanga englo ri, tui tam tak ri ang leh khawpui ri nasa tak ang ka hria a; tin, ka ri hriat chu ṭingṭang kaituten an ṭingṭang kaih ri ang a ni a; 3 lalṭhutphah hmaah leh Thil nung pali leh upate hmaah chuan hla thar ni âwm tak hi an sa a; tin, lei ata tlan tawh mi nuai khat leh sîngli leh sângli chauh lo kha chuan, tu mân chu hla chu an zir thei lo. 4 Chûng chu hmeichhe laka intibawlhhlawh lote chu an ni; nula thianghlim ang an ni si a. Chûng chu Berâmno kalna apianga zuitute chu an ni. Chûng chu Pathian tân leh Berâmno tân rah hmasa ber ni tûrin, mihring zîng ata tlan an ni. 5 An kâah dâwt a chhuah rêng miin an hre ngai lo; sawisêl bo an ni si a.
Vântirhkoh pathum thuchah
6 Tin, leia awmte hnênah leh hnam tinrêng te, chi tinrêng te, ṭawng tinrêng te, mi tinrêng te hnêna tlângaupui tûra, chatuana Chanchin Ṭha nei vântirhkoh dang vanlaizâwla thlâwk ka hmu a; 7 tin, ani chuan aw ring takin, “A rorêl hun chu a lo thlen tâk avângin Pathian chu hlau ula, chawimawi rawh u; vân te, lei te, tuifinriat te, tuihna te siamtu chu chibai bûk rawh u,” a ti a. 8 Tin, vântirhkoh dang, a pahnihna chuan, “Babulon khaw ropui, a mi ngaih chîn vânga thinurna uain hnam zawng zawng intîrtu chu a tlâwm ta, a tlâwm ta,” tiin a rawn zui a. 9 Tin, vântirhkoh dang, a pathumna chuan aw ring takin, “Tu pawhin sakawlh leh a lem chibai bûkin, an chalah emaw, an kutah emaw chhinchhiahna an neih chuan, 10 chûng mite ngei chuan Pathian thinurna uain, a thinurna nova eng mah pawlh lova siam chu an in ang a, vântirhkoh thianghlimte mit hmuh leh Berâmno mit hmuhah chuan mei leh kâta nghaisakin an awm bawk ang. 11 Tin, chûng mite nghaisakna meikhu chu chatuanin a chho vang a; sakawlh leh a lem chibai bûktute, a hming chhinchhiahna nei apiangte pawh chuan a chhûn a zânin chawlh rêng an nei lo vang,” tiin anni chu a rawn zui a. 12 Mi thianghlim, Pathian thupêk awihtute leh Isua zuitu rinawmte tân hetah hian chhel a ṭûlzia a lang. 13 Tin, vân aṭangin awin, “Heti hian ziak rawh: ‘Tûn hnuah chuan mitthi, Lalpaa thite chu an eng a thâwl ang; Thlarauvin, “A ni, an thawh rimnate chu an chawlhsan tawh ang; an thiltihte chuan a rawn zui ve dâwn si a,” a ti e,’ ” a tih ka hria.
Khawvêl buh seng
14 Tin, ka han en a; tin, ngai teh, chhûm vâr ka hmu a; tin, chhûm chungah chuan mihring fapa ang tak hi, rangkachak lallukhum khuma favah hriam tak kenga ṭhu ka hmu bawk a. 15 Tin, vântirhkoh dang, Pathian biak in aṭangin a lo chhuak a, chhûm chunga ṭhu hnênah chuan aw ring takin, “I favah kha phawrh la, ât rawh; ah a hun tawh si a; khu, lei buh a ngui tawh khu,” a ti a. 16 Tichuan, chhûm chunga ṭhu chuan a favah chu leiah a thlâk a, lei buh chu an ât ta a. 17 Tin, vântirhkoh dang, vâna Pathian biak in aṭangin a lo chhuak leh a, ani pawh chuan favah hriam tak a keng bawk a. 18 Tin, vântirhkoh dang, mei chunga thuneitu chu maichâm aṭangin a lo chhuak leh a; tin, ani chuan aw ring takin, “I favah hriam tak kha phawrh la, leia grêp hrui rah bâwrte khu zuk ât rawh; grêp rahte khu a hmin ṭuah tawh khu,” tiin favah hriam tak kengtu chu a au va. 19 Tichuan, vântirhkoh chuan a favah chu leiah a thlâk a, leia grêp rah chu a ât a, grêp sâwrna khur zau tak, Pathian thinurna grêp sâwrna khurah chuan a theh lût a. 20 Tin, khaw pâwn lama grêp sâwrna khurah chuan an rap sâwr a; tichuan, grêp sâwrna khur aṭang chuan thisen a lo chhuak a, fîng sângkhat leh zaruka thui, nghâwng thlenga thûk a ni.
Vântirhkoh pasarihna, hremna hnuhnûng ber keng
1 Tin, vânah chhinchhiahna dang, ropui tak leh mak tak ka hmu a, vântirhkoh pasarih hremna pasarih kengte chu; chu chu hremna hnuhnûng berte a ni, chûngah chuan Pathian thinurna chu a kin tawh si a. 2 Tin, dârthlalang mei nêna inpawlh tuifinriat ni âwm tak ka hmu a; sakawlh te, a lem te, a hming nambar te hneha lo chhuakte chu Pathian ṭingṭang kenga, dârthlalang tuifinriat kama ding ka hmu bawk a. 3 Tin, Pathian bawih Mosia hla leh Berâmno hla, “Aw Lal Pathian, Engkimtithei, I thiltihte chu a ropuiin a mak a; Nang, hnam tin Lalber, I kawngte chu a felin a dik a ni. 4 Aw Lalpa, tu nge i hming zah lo vanga, Chawimawi lo vang? Nang chauh i thianghlim si; I thiltih felte chu tihlan a nih tawh avângin, Hnam tinrêngin chibai an rawn bûk ang che,” tih hi an sa a. 5 Chûng hnuah chuan ka han en a; tin, vâna hriattîrna biakbûk pindan chhûngnung chu an hawng a; 6 tichuan, pindan chhûngnung aṭang chuan hremna pasarih keng vântirhkoh pasarihte chu puan thianghlim vâr tak sinin, an âwma rangkachak kâwnghrêna inhrêngin an lo chhuak a. 7 Tin, Thil nung pali zînga pakhat chuan vântirhkoh pasarihte hnênah chuan, Pathian, chatuana nung renga thinurnaa khat rangkachak berhbu pasarih a pe a. 8 Tin, pindan chhûngnung chu Pathian ropuina leh a thiltihtheihna khuin a khat ta a; vântirhkoh pasarihte hremna pasarih chu a reh hma loh zawng, pindan chhûngnungah chuan tu mah an lût thei lo.
Pathian thinurna berhbu
1 Tin, pindan chhûngnung aṭang chuan aw ring takin, vântirhkoh pasarihte hnênah chuan, “Kal ula, Pathian thinurna berhbute chu leiah leih baw rawh u,” a tih ka hria a. 2 Tin, a hmasa ber chu a kal a, a berhbu chu leiah a leih bua a; tichuan, sakawlh chhinchhiahna neite leh a lem chibai bûktute chungah chuan, pânchhia na takah a chang ta a. 3 Tin, a pahnihna chuan a berhbu chu tuifinriatah a leih bua a; tichuan, mitthi thisen angin thisenah a chang ta a; chutichuan, thil nung tinrêng tuifinriata awmte chu an thi ta vek a. 4 Tin, a pathumna chuan a berhbu chu luiahte leh tuikhurahte a leih bua a; tichuan, thisenah a chang ta a. 5 Tin, tui vântirhkoh chuan, “Nang Mi Thianghlim, hetianga ro i rêl avâng hian, nang awm mêk leh awm tawh, i fel e. 6 Anni chuan mi thianghlimte leh zâwlneite thisen an chhuah a, nangin in tûra thisen vêk i pêk thung hi; in tlâk an ni rêng e,” a tih ka hria. 7 Tin, maichâm chuan, “A ni, aw Lalpa Pathian, Engkimtithei, i rorêlte chu a dikin a fel a ni,” a tih ka hria a. 8 Tin, a palina chuan a berhbu chu niah a leih bua a; tichuan, ni chu meia mihring em ût tûrin thiltihtheihna an pe a. 9 Chutichuan, mite chu sa tak em uhin an awm a, chûng hremna chunga thuneitu Pathian hming chu an sawichhia a, amah chawimawi tûrin an sim chuang lo. 10 Tin, a pangana chuan a berhbu chu sakawlh lalṭhutphahah a leih bua a; tichuan, a ram chu a lo thim ta vek a; tin, an nat avângin an lei an seh a, 11 an nâte leh an pânte avângin vân Pathian chu an sawichhia a; an thiltihte chu an sim chuang lo. 12 Tin, a parukna chuan a berhbu chu tuipui, Euphrates-ah chuan a leih bua a; tichuan, ni chhuahna lam aṭanga lal lo kal tûrte tâna kawng chu peih sa a lo nih theih nân, a tui chu a kangchat ta a. 13 Tin, dragon kâ aṭang leh, sakawlh kâ aṭang leh, zâwlnei der kâ aṭang chuan thlarau bawlhhlawh pathum, chungû ni âwm tak lo chhuak ka hmu a; 14 chûng chu ramhuai thlarau, thil mak ti ṭhînte an ni; anni chu Pathian Engkimtitheia ni ropuiah indonaa hruai khâwm tûrin, khawvêl zawng zawnga lalte hnênah an kal a 15 (Ngai teh, rûkru angin ka lo kal dâwn e; inringa puan veng chu a eng a thâwl e; chuti lo chuan, saruakin a lêng ang a, a zahmawh an hmu dah ang e), 16 hmun pakhat, Hebrai ṭawnga Har-magedon an tihah chuan an hruai khâwm ta a. 17 Tin, a pasarihna chuan a berhbu chu boruakah a leih bua a; tichuan, pindan chhûngnung aṭangin Lalṭhutphah ata, “A kin ta,” tiin aw ring tak a lo chhuak a. 18 Tin, kâwlphe te, aw te, khawpui ri te a lo awm ta a; lîr pawh nasa takin a lo nghîng a, leia mihring awm achin chutianga nasa rêng rêng a la awm ngai lo, lîrnghîng chuti kauva nasa leh râpthlâk chu. 19 Tichuan, khaw ropui chu hmun thumah a lo inṭhen a, hnam tin khuate chu a lo chim a; tin, a thinur nasatna uain no chu a hnêna pêk tûrin, Babulon khaw ropui chu Pathian hmaah hriat rengin a lo awm ta a. 20 Tin, thliarkâr tinrêng a bo ta vek a, tlângte pawh a awm ta lo va. 21 Tin, rial lian tak, talent tluk laia rit ṭheuh vân aṭangin mihringte chungah a tla a; tin, mihringte chuan riala hremna avâng chuan Pathian an sawichhe ta a; chu hremna chu a nasa êm êm si a.
Nawhchizuar chunga rorêlna
1 Tin, vântirhkoh pasarih, berhbu pasarih kengte zînga pakhat chuan mi bia a, “Hawh teh, tui tam taka ṭhu nawhchizuar ropui tak hremna chu ka entîr ang che; 2 leia lalte chuan ani chu an ngai ṭhîn a, leia awmte pawh chu a mi ngaih chînna uain chuan hrai ruihin an awm ṭhîn,” a ti a. 3 Chutichuan, ani chuan Thlarauvin thlalêrah mi kalpui a; tin, Pathian sawichhiatna hminga khat, lu sarih leh ki sâwm nei sakawlh sen tak chunga chuang hmeichhia ka hmu a. 4 Chu hmeichhia chuan puan senduk leh senlâr a sin a, rangkachak leh lung man tam leh tuikeplungin a inchei a, rangkachak no, thil tenawm, a mi ngaih chînna thil bawlhhlawha khat a keng a, 5 a chalah chuan thurûk, “Babulon Khaw Ropui, Leia Nawhchizuarte leh Thil Tenawmte Nu,” tia hming ziak a awm a. 6 Tin, chu hmeichhia chu mi thianghlimte thisen leh Isua martarho thisena ruiin ka hmu a. Ka hmuh veleh mak ka ti êm êm mai a. 7 Tichuan, vântirhkoh chuan ka hnênah, “Eng vângin nge mak i tih? Kha hmeichhia leh a phurtu sakawlh, lu sarih leh ki sâwm nei thurûk chu ka hrilh ang che. 8 Sakawlh i hmuh kha a awm tawh zet a, a awm leh ta lo va; tin, leilâwt aṭangin a lo chhuak chho vang a, boralnaah a kal ang. Tin, leia awmte, leilung pian tirh ata Nunna Bua hming ziak lohte chuan sakawlh chu an hmuh hunah, a awm tawh zet a, a awm leh ta lo va, a lo kal leh dâwn chu mak an la ti ang. 9 Hetah hian fin thiam a ṭûlzia a lang. Lu sarihte chu hmeichhe ṭhutna tlâng sarihte chu an ni. 10 Lal pasarih pawh an ni a; pangate chu an tlâwm ta a, pakhat chu a la awm a, pakhat chu a lo la awm rih lo va; a lo awm hunah chuan rei lo tê a awm tûr a ni. 11 Tin, sakawlh, awm tawh zeta, awm leh ta lova ngei pawh kha a pariatna a ni a, pasarihte zînga mi kha a ni nghe nghe a; boralnaah a la kal ang. 12 Tin, ki sâwm i hmuhte kha lal sâwm, ram la nei lote an ni a; dârkâr khat chhûng erawh chu sakawlh nên thuneihna an la chang ang. 13 Chûng chuan thu khat vuain an thiltihtheihna leh thuneihna chu sakawlh an pe ang. 14 Chûng chuan Berâmno chu an do vang a; tin, Berâmno chu hotute Hotu leh lalte Lal a nih avângin anni chu a hneh ang a; tin, a hnêna awm - koh te, thlan te, rinawm te chuan an hneh bawk ang,” a ti a. 15 Tin, amah vêk chuan ka hnênah, “Nawhchizuar ṭhutna tui i hmuhte kha, mi te, mipui te, hnam te, ṭawng te a ni a. 16 Ki sâwm i hmuh leh sakawlh ngei chuan nawhchizuar chu an hua ang a, eng mah nei lo leh saruakin an siam ang a, a sa pawh an ei ang a, meiin an hâl ral ang. 17 Pathian thute chu a thlen hma loh chuan a duh zâwng an tihna tûr leh, thu khat an lo vuakna tûr leh, an ram chu sakawlh hnêna an pêkna tûrin Pathianin an thinlungah a tîr si a. 18 Tin, i hmeichhe hmuh kha khaw ropui, leia lalte chunga rorêltu chu a ni,” a ti a.
Babulon chhiat
1 Chûng hnuah chuan vântirhkoh dang, thuneihna nasa tak neiin vân ata lo chhuk ka hmu a; a ropuinain lei chu a ên ta vek a. 2 Tin, ani chuan aw ring takin, “Babulon khaw ropui chu a tlâwm ta, a tlâwm ta, ramhuaite awmna leh, thlarau bawlhhlawh tinrêng kulhbîng leh sava bawlhhlawh leh tenawm tinrêng kulhbîng a lo ni ta. 3 A mi ngaih chîn vânga thinurna uain chu hnam zawng zawngin an in tawh si a; leia lalte chuan ani chu an ngai ṭhîn a, leia sumdâwngtute chuan a nawmsak bâwl lutukna chu an hausak phah ṭhîn,” tiin a au va. 4 Tin, vân aṭangin aw dangin heti hian a sawi ka hria: “Ka mite u, a sualnaahte in tel lohna tûr leh, a hremnate in hmuh ve lohna tûrin, a chhûng ata chhuak rawh u. 5 A sualnate chuan vân pawh a tawng ta hial a, Pathianin a thiltih fel lote pawh chu a hre reng si a. 6 Anin a pêk ang ngei khân pe thung ula, a thiltih ang zêl chu a leh hnihin thungrûl ula, a chawhpawlhna novah chuan a tân a leh hnihin chawhpawlhsak rawh u. 7 A intihropui leh a intihnawmsak ang zêl khân nghaisain tilungngai thung rawh u; a rilru chuan, ‘Lalnuah ka ṭhu a ni, hmeithai rêng ka ni lo va, lungngaihna ka hmu hauh lo vang,’ a ti si a. 8 Chuvângin, ni khat chauhvah a hremna - thih te, lungngaih te, ṭâm te chu - a lo thleng vek ang; meia hâl ralin a awm bawk ang; a rorêltu Lalpa Pathian chu a chak si a. 9,10 “Tin, leia lal, a ngai ṭhînte leh nawmsak bâwlpui ṭhînte chuan, a kâng khu chu an thlîr hunah chuan, ‘Babulon khaw ropui, khaw nghet chu a chung a pik e, a pik e! Dârkâr khat chauhvah i chungah rorêlna chu a lo thleng ta si,’ tiin, nghaisakna a tuar chu hlauh vânga hla taka dinga, a chunga ṭapin an âwm an inchûm ang. 11 “Tin, leia sumdâwngtute chu a chunga ṭapin an lungngai a, tu mân an sum an lei tâk loh avângin. 12 An sumte chu rangkachak te, tangkarua te, lung man tam te, tuikeplung te, puan zai sîn te, puan senduk te, maimaw puan te, puan senlâr te nên; thing rimtui tinrêng te, saingho bungbêl tinrêng te, thing hlu tak tak leh dâr leh thîr leh sailungvâra siam bungbêl tinrêngte nên; 13 thakthîng te, englo rimtui te, englo rimtui hâl mi te, hriak rimtui te, beraw te, uain te, olive hriak te, chhangphut dip tak te, buh te, sebâwng te, berâm te nên; sakawr te, tawlailîr te, bawih te nên; mihring nunna te nên a ni. 14 Rah i thinlungin a châkte chuan a kal bosan chia, thil tuihnai leh mawi zawng zawng chuan a boralsan chia, tu mân an hmu leh tawh tawp lo vang. 15-17 “Chûng thila sumdâwngtu, amah avânga lo hausate chuan, ‘Khaw ropui, puan zai sîn leh puan senduk leh puan senlâr sina, rangkachak leh lung man tam leh tuikeplunga incheii chu a chung a pik e, a pik e! Dârkâr khat chauhvah sum chuti zozai chu engmahlo a lo nih tâk hi,’ tiin, ṭap leh lungngai chungin a nghaisakna hlauh vângin hla takah an ding ang. “Tin, lawng hotu apiang te, lawnga kal ṭhîn apiang te, lawng mi te, tuifinriata hnathawk apiang te chu hla taka dingin, 18 a kâng khu chu thlîr chungin, ‘He khaw ropui tluk hi khawii khua nge awm ang?’ tiin an au va. 19 Tin, ṭap leh lungngai chungin, ‘A muk avânga tuifinriata lawng neitute hausakna khaw ropui chu a chung a pik e, a pik e! Dârkâr khat chauhvah engmahlo a lo nih tâk hi!’ tia auvin, an lu vaivutin an theh a. 20 “Aw, vân leh nangni mi thianghlimte, tirhkohte, zâwlneite u, lâwm rawh u; ani chuan in chunga ro a rêlna chuan Pathianin a chungah ro a rêl ve tâk hi,” tiin. 21 Tin, vântirhkoh chak tak hian buh râwt sawmna lung lian pui ang hi lung a la a, tuifinriatah a paih thla a, “Babulon khaw ropui chu hetianga nasa hian paih thlâk a ni ang a, tu mân an hmu leh tawh tawp lo vang. 22 Ṭingṭang kaituho te, englo tum thiamho te, phênglâwng tumtuho te, tawtawrâwtpuho te thâwm pawh i chhûngah an hre leh tawh tawp lo vang a; themthiam kawng rêng rênga themthiam te pawh i chhûngah an hmu leh tawh tawp lo vang a; buh râwt sawmna lung ri pawh i chhûngah an hre leh tawh tawp lo vang a; 23 khâwnvâr pawh i chhûngah a êng tawh tawp lo vang a; pasal leh mo thâwm pawh i chhûngah an hre tawh tawp lo vang; i sumdâwngtute chu leia mi liante an ni si a; i dawiin hnam zawng zawng bum an nih kha. 24 A chhûngah zâwlneite, mi thianghlimte, leia thah zawng zawngte thisen chu an hmu a,” a ti a.
1 Chûng hnuah chuan vânah mipui tam tak aw ring tak ni âwm tak hian, “Halleluia! Chhandamna te, ropuina te, thiltihtheihna te kan Pathian ta a ni; 2 a rorêlnate chu a dikin a fel a ni; ani chuan nawhchizuar ropui tak, a mi ngaih chîn vânga lei tikhawlotu chu ro a rêl a, a bawihte thisen chhuak phuba chu a kuta a lâk tâk hi,” a tih ka hria a. 3 Tin, “Halleluia!” an ti leh a. Tin, a khu chu chatuanin a chho vang. 4 Tin, upa sawmhnih leh pali leh Thil nung palite chu an bawkkhup a, “Amen; Halleluia!” tiin, Pathian, lalṭhutphaha ṭhu chu chibai an bûk a. 5 Tin, lalṭhutphah aṭang chuan aw a lo chhuak a, “Nangni a bawih zawng zawng, a zahtu mi lian leh mi tête u, kan Pathian chu fak rawh u,” a ti a.
Berâmno nupui neih ruai
6 Tin, mipui tam tak aw ang leh, tui tam tak ri ang leh, khawpui nasa tak ri angin, “Halleluia! Lalpa kan Pathian Engkimtitheia chuan ro a rêl tâk hi. 7 Hlim takin lâwm ila, amah i chawimawi ang u, Berâmno nupui neih chu a hun ta si a, a nupui pawh a inpeih tawh,” a tih ka hria. 8 Puan zai sîn fai tak, vâr tak sin an phal a, puan zai sîn chu mi thianghlimte thiltih fel a ni si a. 9 Tin, “ ‘Berâmno nupui neihna ruai ṭheha sâwmte chu an eng a thâwl e,’ tiin ziak rawh,” mi ti a. Tin, ka hnênah, “Hêng thu hi Pathian thutak a ni,” a ti a. 10 Tichuan, Pathian chibai bûka bûk tûrin a ke bulah ka bawkkhup a. Tin, ani chuan ka hnênah, “Heti chuan ti suh khai; kei chu nangmah leh i unau, Isua hriattîrna thu pawmte bawihpui ka ni alâwm; Pathian chibai bûk zâwk rawh; Isua hriattîrna thu chu thu hrilhna thlarau a ni si a,” a ti a.
Sakawr vâr chunga chuang
11 Tin, vân inhawng ka hmu a; tin, ngai teh, sakawr vâr leh a chunga chuang, Rinawm-leh-Diktaka an tih chu ka hmu bawk a; ani chuan fel takin ro a rêl a, mi a do ṭhîn. 12 A mitte chu meialh ang a ni a, lallukhum tam tak a khum a; tin, hming ziak, amah chauh lo chuan tu mahin an hriat loh a nei a. 13 Puan thisen kai a sin a; a hmingah chuan, “Pathian - Thua,” an ti a. 14 Tin, vâna sipaihote chuan puan zai sîn vâr tak, fai tak sinin, sakawr vâr chungahte chuangin an zui a. 15 Tin, a kâ aṭang chuan khandaih hriam tak a chhuak a, chu chu hnam tin a sahna tûr a ni; tin, thîrtiangin an ro a rêl ang a; Pathian Engkimtitheia thinur nasatna grêp sâwrna khurah chuan a rap sâwr ang. 16 Tin, a puanah leh a malpuiah chuan, “Lalte Lal leh Hotute Hotu,” tia hming ziak a awm a. 17,18 Tin, nîah khian vântirhkoh ding ka hmu a; tin, ani chuan vanlaizâwla sava thlâwk zawng zawng hnênah chuan aw ring takin, “Lal sa te, sipai hotu sa te, mi chak sa te, sakawr leh a chunga chuang sa te, mi zawng zawng - bawih leh bawih lo, a lian a tê pawh - an sa in ei theihna tûrin, Pathian ruai ropui tak ṭhehnaah chuan rawn inkhâwm rawh u,” tiin a au va. 19 Tin, sakawlh te, leia lalho te, an sipaiho te, sakawr chunga chuang kha do tûr leh a sipaiho do tûra an inkhâwm ka hmu a. 20 Tin, sakawlh chu an man a; zâwlnei der, sakawlh chhinchhiahna nei leh a lem chibai bûktute a bum ṭhinna thil mak a mit hmuha titu kha an man tel a; an pahnih chuan kâta kâng meidîlah chuan a nung chungin an paih a; 21 mi dangte chu sakawr chunga chuang khandaih, a kâ aṭanga chhuak khân sah hlum an ni ta a; sava zawng zawng chu an sate eiin an puar ta vek a.
Kum sâng rorêl
1 Tin, vântirhkoh, leilâwt chabi leh khaidiat lian pui kengin, vân ata lo chhuk ka hmu a. 2 Tin, dragon, rûlpui tar chu (chu chu Diabola leh Setana a ni) a man a, kum sângkhat atân a phuar a, 3 leilâwtah chuan a paih lût a, a khâr khum a, kum sângkhat a vei hma loh chuan hnam tin a bum leh tawh lohna tûrin a châr hnan ta a; chumi hnuah chuan rei lo tê atân chhuah leh rih tûr a ni. 4 Tin, lalṭhutphahte ka hmu a, a chungah mi an ṭhu a, an hnênah chuan rorêlna an pe a; tin, Isua hriattîrna thu avâng leh Pathian thu avânga lu tante thlarau leh, sakawlh leh a lem chibai bûk lova, an chalah emaw, an kutah emaw chhinchhiahna nei lote thlarau chu ka hmu bawk a; chûngho chu an lo nung a, kum sângkhat Krista nên rorêlin an awm a. 5 Mitthi dangte erawh chu kum sângkhat a vei hma loh chuan an la nung rih lo va. Chu chu thawhlehna hmasa ber chu a ni. 6 Thawhlehna hmasa bera telte chu an engthâwlin an thianghlim a ni; chûngho chungah chuan thih hnihna chuan thu rêng a nei lo va, Pathian leh Krista puithiamte an ni ang a, amah nên kum sângkhat rorêlin an awm zâwk ang.
Setana hneh a ni
7 Tin, kum sângkhat a vei hunah chuan, Setana chu a tânna ata chhuahin a awm ang a, 8 lei kil lia hnam te, Goga leh Magoga chu buma indonaa hruai khâwm tûrin a kal chhuak ang; chûngho tamzia chu tuifinriata ṭiauvut ang mai an ni. 9 Tin, lei vâng lam dâpin an kal chho va, mi thianghlimte riahhmun leh khaw duhawm tak chu an hual ta a; tin, vân aṭangin mei a lo tla a, anni chu a kâng ral ta a. 10 Tin, anmahni bumtu Diabola chu sakawlh leh zâwlnei der awmna, mei leh kât dîlah chuan an paih ta a; tichuan, chatuanin a chhûn a zâna nghaisakin an awm ang.
Lalṭhutthlêng vâra rorêl
11 Tin, lalṭhutphah lian pui, vâr tak leh a chunga ṭhu chu ka hmu a, a hma ata chu lei leh vân an tlân bo va, an tân hmun rêng a awm ta lo va. 12 Tin, mitthite chu a lian a têin lalṭhutphah hmaa ding ka hmu a; tin, lehkhabute an hawng a; tin, lehkhabu dang, Nunna Bu chu an hawng bawk a; tin, mitthite chu lehkhabutea ziak an thiltih ang zêla rêlsakin an awm ta a. 13 Tuifinriat chuan a chhûnga mitthi awmte chu a chhuahtîr a, Thihna leh Mitthi Khua chuan an chhûnga mitthi awmte chu an chhuahtîr bawk a; tin, mi tin an thiltih ang zêla rêlsakin an awm ta a. 14 Tin, Thihna leh Mitthi Khuate chu meidîlah an paih a. Chu chu thih hnihna chu a ni - meidîl chu. 15 Tu hming pawh Nunna Bua ziak an hmuh loh chuan meidîlah an paih bawk a.
Vân thar leh lei thar
1 Tin, vân thar leh lei thar ka hmu a; vân hmasa leh lei hmasa chu a boral tawh a, tuifinriat pawh a awm tawh lo a ni. 2 Tin, khaw thianghlim, Jerusalem thar chu, mo, a pasal ela a inchei anga peih diamin, Pathian hnêna mi vân ata lo chhuk ka hmu bawk a. 3 Tin, lalṭhutphah aṭangin aw ring takin, “Ngai teh, Pathian bâwktê chu mihring zîngah a lo awm ta, Ani chu an hnênah a awm ang a, Anni chu a mite an ni ang a, Pathian ngei chu an hnênah a awm ang a, An Pathian a ni bawk ang. 4 An mit ata mittui zawng zawng a hru fai ang a; Thihna a awm leh thei tawh lo vang a, Lungngaih te, ṭah te, nat te pawh A awm leh tawh hek lo vang; Thil hmasate chu a ral ta,” a tih ka hria. 5 Tin, lalṭhutphaha ṭhu chuan, “Ngai teh, thil engkim ka siam thar e,” a ti a. Tin, “Ziak rawh, hêng thu hi a rinawmin a dik si a,” a ti a. 6 Tin, ka hnênah, “A lo thleng ta. Kei Alpha leh Omega, a Bul leh a Tâwp ka ni. Tuihâl apiang hnênah chuan Nunna Tuikhura mi a thlâwnin ka pe ang. 7 Hnehtu apiang chuan chûng chu an luah ang a, kei an Pathian ka ni ang a, anni chu ka fate an ni ang. 8 Amaherawhchu, mi dawih te, ringlo te, tenawm te, tualthat te, inngaih chîng te, dawithiam te, milem bia te, dawthei zawng zawngte chan tûr chu mei leh kâta kâng dîlah chuan a awm ang; chu chu thih hnihna chu a ni,” a ti a.
Jerusalem thar
9 Tin, berhbu pasarih keng, hremna hnuhnûng ber pasarih sin vântirhkoh pasarih zînga pakhat chu a lo kal a; ani chuan, “Hawh teh, mo, Berâmno nupui chu kan entîr ang che,” tiin mi bia a. 10,11 Tin, ani chuan Thlarauvin tlâng lian pui, sâng takah mi kalpui a, Jerusalem khaw thianghlim chu Pathian ropuina neiin, Pathian hnêna mi vân ata lo chhuk mi entîr a. A ênzia chu lung man tam ber ang, jaspi lung ang mai hi a ni a, krustal lung angin a tle a ni; 12 kulh ropui leh sâng tak a nei a; kawngkhâr sâwm leh pahnih a nei a, kawngkhâr bulahte chuan vântirhkoh sâwm leh pahnih an awm a; chûng kawngkhârah chuan hming ziak a awm bawk a, chûng chu Israela thlahte hnam sâwm leh hnam hnih hmingte chu a ni; 13 chhak lampangah kawngkhâr pathum, hmâr lampangah kawngkhâr pathum, chhim lampangah kawngkhâr pathum, thlang lampangah kawngkhâr pathum a awm a. 14 Tin, chu khaw kulh chuan lungphûm sâwm leh pahnih a nei a, chûngah chuan Berâmno tirhkoh sâwm leh pahnihte hming a chuang a. 15 Tin, mi betu chuan khua leh a kawngkhârte leh a kulh chu tehna tûrin rangkachak luang a keng a. 16 Khua chu inbial vêlin a awm a, a dung lam chu a vâng lam chen a ni; khua chu luang chuan a teh a, fing sîngkhat leh sanghnih a ni. A dung lam leh a vâng lam leh a sân lam chu a inang a ni. 17 Tin, a kulh chu a teh leh a, mihring teh dân pângngaiin (chu chu vântirhkoh teh dân pângngai chu a ni) tawng za leh sawmli leh pali a ni. 18 Tin, a kulh chu jaspi lunga siam a ni; khua chu dârthlalang thianghlim ang maia rangkachak thianghlima siam a ni. 19 Chu khaw kulh lungphûmte chu lung man tam chi tinrênga chei mawi a ni. Lungphûm hmasa ber chu jaspi lung a ni a; a pahnihna chu sapphir lung a ni a; a pathumna chu kalkidon lung a ni a; a palina chu smaragdin lung a ni a; 20 a pangana chu sardonuk lung a ni a; a parukna chu sardion lung a ni a; a pasarihna chu kruso lung a ni a; a pariatna chu birul lung a ni a; a pakuana chu topazi lung a ni a; a sâwmna chu krusopra lung a ni a; a sâwm leh pakhatna chu huakintho lung a ni a; a sâwm leh pahnihna chu amethusto lung a ni a. 21 Tin, kawngkhâr sâwm leh pahnih chu tuikeplung sâwm leh pahnih a ni; kawngkhâr zawng zawng chu tuikeplung pakhat ṭheuhva siam a ni; tin, chu khaw kawtlai chu rangkachak thianghlim a ni, dârthlalang en tlang theih ang mai hi. 22 Tin, a chhûngah chuan biak in rêng ka hmu lo va; Lalpa Pathian Engkimtitheia leh Berâmno chu an biak in a ni si a. 23 Tin, chu khua chuan a ên tûrin ni a ngai lo va, thla pawh a ngai hek lo; Pathian ropuina chuan a ên a, an khâwnvâr chu Bêrâmno a ni si a. 24 Tin, hnam tin a êngah chuan an awm ang a; leia lalte chuan an ropuina an la lût ang. 25 Tin, a kawngkate chu chhûnah an khâr tawp lo vang, chutah chuan zân rêng a awm dâwn si lo va. 26 Tin, hnam tin ropuina leh chawimawina an la lût ang a. 27 Tin, thil bawlhhlawh rêng a lût hauh lo vang a, thil tenawm tite leh dâwt hmangte pawh an lût hek lo vang; Berâmno Nunna Bua hming an ziakte chauh an lût ang.
Krista lo kal
1 Tin, ani chuan a khawpui lai taka nunna tui lui, krustal lung anga tle, Pathian leh Berâmno lalṭhutphah aṭanga lo chhuak mi entîr a. 2 Tin, lui kam tuakah chuan Nunna Thing, chi hrang sâwm leh pahniha rah, thla kipa rah a awm a; chu thing hnahte chu hnam tin tihdamna tûr a ni. 3 Tin, ânchhia rêng rêng a awm leh tawh lo vang a, Pathian leh Berâmno lalṭhutphah chu a awm tawh zâwk ang; tichuan, a bawihte chuan a rawng an bâwl ang a, 4 a hmêl an hmu ang a, a hming chu an chalah a chuang bawk ang. 5 Tin, zân a awm leh tawh lo vang a, khâwnvâr êng leh ni êng an ngai lo vang; Lalpa Pathian chuan anmahni a ên dâwn si a; tichuan, chatuanin ro an rêl ang. 6 Tin, ani chuan ka hnênah, “Hêng thu hi a rinawmin a dik a ni; tichuan, Lalpa, zâwlneite thlarau Pathian chuan, thil lo thleng thuai tûrte chu a bawihte hnêna entîr tûrin a vântirhkoh a tîr a ni. 7 Tin, ngai teh, ka lo kal thuai dâwn e. He lehkhabu hrilh lâwkna thu pawm apiang an eng a thâwl e,” a ti a. 8 Tin, kei Johana, hêng thil zawng zawng hmutu leh hretu chu ka ni. Tin, ka hriata ka hmuh chuan, hêng thil mi entîrtu vântirhkoh ke bulah chuan Pathian chibai bûka bûk tûrin ka bawkkhup a. 9 Tin, ani chuan ka hnênah, “Heti chuan ti suh khai; kei chu nangmah leh i unau zâwlneite leh, he lehkhabu thu pawmtute bawihpui ka ni alâwm; Pathian chibai bûk zâwk rawh,” a ti a. 10 Tin, ani chuan ka hnênah, “He lehkhabu hrilh lâwkna thute hi zêp suh; a hun chu a lo thleng dâwn tawh si a. 11 Mi fel lo chu tihfel lohvin awm reng rawh se; mi bawlhhlawh chu tihbawlhhlawhin awm reng rawh se; mi fel chu tihfelin awm reng rawh se; mi thianghlim chu tihthianghlimin awm reng rawh se. 12 “Ngai teh, ka lo kal thuai dâwn e; mi tin an thiltih ang zêla pêk tûrin ka lâwmman ka hnênah a awm a. 13 Kei Alpha leh Omega, a Hmasaber leh a Hnuhnûngber, a Bul leh a Tâwp ka ni. 14 Nunna Thing chungah chuan thu an neih theihna tûr leh, kawngkaah chuan khuaa an luh theihna tûra insu faite chu an eng a thâwl e. 15 Pâwnah chuan ui te, dawithiam te, inngaih chîng te, tualthat te, milem bia te, dâwt ngaina leh dâwt hmang apiangte chu an awm a. 16 “Kei Isua hian kohhrante tân hêng thu hi in hnêna hriattîr tûrin ka vântirhkoh ka rawn tîr a ni. Davida bulpui leh a thlah, arsi êng tak, Vârparh chu ka ni,” a ti a. 17 Thlarau leh mo chuan, “Lo kal rawh,” an ti a. A hria apiangin, “Lo kal rawh,” ti rawh se. Tuihâl apiang lo kal rawh se; a duh apiangin nunna tui hi a thlâwnin la rawh se.
Tlipna
18 He lehkhabu hrilh lâwkna thu hria apiang ka hriattîr e: tu pawhin hêng thu hi a belhchhah chuan, he lehkhabua hremna ziakte hi Pathianin a chungah a belhchhah ve ang; 19 tin, tu pawhin he hrilh lâwkna lehkhabu thua mi thu a lâk bo chuan, he lehkhabua ziak Nunna Thing leh Khaw Thianghlima a chan chu Pathianin a la bo ve ang. 20 Hêng thu hriattîrtu hian, “A ni, ka lo kal thuai dâwn e,” a ti a. Amen. Lo kal ta che, Lalpa Isu. 21 Lalpa Isua khawngaihna chu mi thianghlimte hnênah awm rawh se. Amen.