Nguhlangamaibu Johan
Langkei Nguh
1 Kaodak moyaujineitharna Nguh kiteikei. Nguh kho Muhgha yoa kikei hobaje Muhgha to jetei kikei. 2 Bungia khangia hao Muhgha yoa kiteikei. 3 Ajanjan pendou hao tanko ong kumbei, hobaje hao ayokoje aikei akum. 4 Langkei pendou hao ka pakkei, hobaje langkei kho khunak shousi ngesakbu kikei. 5 Ngesakbuei nakthuh phanga hauta, hobaje nakthuhei kho ladangkei anyetti. 6 Muhgha ka hautibu mut che kiteikei; hao nyen Johan kikei. 7 Hao tanko pendouei mailemtila shanga ngesakbu shangabu nguhchung kunla hao aukabu shanga loukei. 8 Ngesakbu kho hao aying, lausikei hao ngesakbu shangabu nguhchung kunla loukei. 9 Mut pendou ngesaktibou, tuktebu ngesakbu kho kaodak to louko kikei. Hao kaodaka kiteikei, hoba kaodak kho hao tanko longkei, khei yingasikei kaodakei hao ange. 11 Hao jembu chemto loukei, lausikei haoeibu jembu mutliei hao asunglet. 12 Lausikei aoyouei hao sungletkei, khei aoyouei hao to mailemlaje, haoen la Muhgha shousishuong yeila hau kukei. 13 Haoen muteibu hang ka aying, ayingsi phe ei duhbu ka aying, ayingsi mutei mangangbu ka aying, lausikei Muhga ka loukei. 14 Nguh khoei mutia yeikei hobaje sen yoa kikei hoba haoeibu soneikangbu, onou hoba nguhmaiei shenan, Boueibu Jayangshou soneikangbu senei hapbei. 15 Johanei hao shangabu aukabu kunkei hoba ngekkei, 'Ngei aoshanga, Ao ku phaito louata, hao kuto yangbou, aishanga hao kuto shang kiteikei, togo laukei kho hao ki.' 16 Haoeibu atakenbu keisiyang ka senei onoubu jongsak che phainei che sungletkei; 17 aishanga Nguhkhum kho Mosa tanko kukei; onou hoba nguhmai Jisu Khrista tanko loukei. 18 Aoeikei Muhgha hapan achuhkei; lausikei, tuktebu, Bou jungkabou, Muhgha-Jayangshouei ong sen la hao tangkhittia.
Johan Baptikuboueibu nguhiang
19 Ladang Jehudabuei Jerusalem ka Johan to, 'No ao' togo phela ungshedbu si Levibu shuong hautikei, haoeibu aukabu ho kikei: 20 'Ngo Messiah aying.' Kho haoei aeibou hauko theletkei. 21 Haoenei hao to phekei, 'Kholonga ai? No Elijah sai?' 22 Haoei laukei, 'Ngo ji.' 'No Thuseibu sai?' Haoei jongaikei, 'Aying.' Haoenei hao to laukei, 'No ao? Kunei kun hautibou la jongaibu kujan yingkei. Nyi kashangabu ai lenia?' 23 Haoei laukei, Bonyubao lamnyu tangsheitham kumashi, togo yama mut atei ngekbou kho ngo.' 24 Pharisi shuongkei at hautikei, 25 hobaje haoenei hao to phekei, 'No Messiah aying. Elijah aying, Thuseiboukei ayinglonga, kholonga nyi aila baptikuta?' 26 Johanei haoen to jongaikei, 'Ngei deia baptikuta. Kan yoa che loakei, ao kanei ange; 27 ku phaito loulabou kho hao yingkei. Ngo haoeibu nguokluh sengkula amukei. 28 Habu ho Johanei baptikushang Jordan thidang Bethania hauhthukkei.
Muhgha Sanshoushou
29 Nyibounyet haoei Jisu hao jungto louko hapbei, hoba haoei laukei, 'Chuhashi! Kaodak shabu kunlangbou, Muhgha Sanshoushou. 30 Ku phaito mut che loulabu, ao ku thukkabou ki, aiyei hao kuto shang kiteikei togo lenko ngei ao shangabu laukei, kho hao. 31 Ngeikei hao ashenkei, lausikei hao Israel la tangkhitdila shanga ngei deia baptikuko loukei.' 32 Hobaje hai lauko aukabu kukei, 'Ngei khuthuk ka Soushou tukotuk tegu louyenan, hao to pakko hapbei. 33 Ngei hao angeen, lausikei ngo deia baptikula hautibouei kuto laukei, Nyi ao thukto Soushou louyenan pakko hapbei, hao kho Soushou Saopobu a baptikubou ki. 34 Ngei ho hapa, hoba hao kho Muhgha Shou togo nge aukabu kuna.'
Jisueibu shangbou eikshuong
35 Toukei, oyibounyet Johan haoeibu eik mut nyi yoa loan kikei. 36 Jisu paiko kibu to chuhan haoei laukei, 'Chuhashi, Muhgha Sanshoushou.' 37 Haoeibu eik mut nyi ei haoei laubu titkei hobaje haosi Jisu phai sertibei. 38 Jisuei sepeian chuhngeikei, hobaje ladang haoei haosi sembo hapbei, haoei haosi to laukei, 'Kanei ai lamta?' Haosiei hao to laukei, 'Rabi (tetlabu Lenbou), no lanei kita?' 39 Haoei haoen to laukei, 'Kaiya hoba kanei haplabu.' Hibu haoen haukei hoba hao kishang hapbei, haoen khunyet hao yoa kikei. Kho chasem angh lei thunga kiteikei. 40 Johanei laubu titan Jisu phai sembu mut nyi yoa cheje Simon Petereibu na Andria kiteikei. 41 Haoei tongte haojai Simon hapbei hoba hao to laukei, 'Klinei Messiah (tetlabu Makenbou) hapa.' 42 Haoei hao Jisu jungto leibakei. Jisuei hao to chuhkei hoba laukei, 'No Jona shou, Simon' no Kepha (laobu Peter togo sepeikei, teltabu, 'Langnyudak') togo nyenlabu.'
Jisuei Philip si Nathaniel ngabu
43 Nyibounyet Jisu Galil to haumangsuhkei, hobaje haoei Philip hapbei. Jisuei hao to laukei, 'Kit phai semshi.' 44 Philip kho Andria si Peter habu sang Bethsaida ka kiteikei. 45 Philipei Nathaniel hapbei hoba hao to laukei, 'Kunei, Nazareth kabu Joseph shou Jisu, ao shanga Mosa Nguhkhuma hoba thuseibu shuongei dokei, kho mut kho hapa.' 46 Nathanielei hao to laukei, 'Nazareth ka aiche maibu longlep si?' Philipei hao to laukei, 'Louan chuhashi.' 47 Jisuei Nathaniel hao jungto louko hapbei hoba hao shangabu laukei, 'Tuktebu Israelbu, aeibou lanbu mut Che hato chuhashi.' 48 Nathanielej hao to laukei, 'Nyi ngo lai ngekei?' Jisuei jongaikei, 'Philip ei no angajinei, no phuklong che phanga kian, ngei no hapbei.' 49 Nathanielei jongaikei, 'Lenbou, no Muhgha Shou; no Israelbu Choba.' 50 Jisuei jongaikei, 'Ngei no phuklong phanga hapbei togo lenbu shanga nyi mailemta lo? Nyi khubu to yangbou haplabu.' 51 Hobaje haoei hao to laukei, 'Maimaitham nguhmaia ngei kan pendou to lenta, kanei khuthuk ipan haplabu hoba Muhgha khuthuk hangangbu shuong Muteibu Shou thuka angko louyenko haplabu.
Kana sanga chemkanbu
1 Sembounyeta Galil a Kana sanga chemkabu kikei, hobaje Jisueibu nyukei khunei kiteikei. 2 Jisu si hao eikshuong pendou kho chemkanlem to ngakei. 3 Ladang ih khumbei, Jisueibu nyuei hao to laukei, 'Haoenei ih aki.' 4 Jisuei sao to laukei 'Anyu, aila nyi kula kipjim kuta?' Ngeibu jihsiphai asuhkei. 5 Hao nyuei sambu shuong to lenkei, 'Haoei kan la ai ong lenlaje kumashi.' 6 Tou Jehudabu sauhenbu songa kibu tegu, che chenei jephot nyi si sem atbu, lang ka jakenbu ilejak bem lak denan kikei. 7 Jisuei haoen to laukei, 'Ilejak kho dei ei shentishi.' Haoenei khubu kho sopbo shentikei. 8 Kheijinei haoei haoen to laukei, 'Tou at khuenashi, hobaje lembubou jungto jungan haushi.' Hobaje haoenei kho khuenkei. 9 Lem bonyuei, ih la yeitibu dei kho jepan chuhkei, dei khubu sambu shuongei ngeasikei, kho lakabuje haoei ange. Haoei chemkanbou kho ngakei 10 hoba hao to laukei, 'Mut pendouei shang ih maibou kho shomta, hobaje mut juongbouei yungan phaia ong amaishangbou shomta' lausikei nyi tou suhko ih maibu kho phoakei.' 11 Jisuei kho Galil kabu Kana sanga haoeiby shangbou amaaphilabu kumbei, hoba haoeibu soneikangbu lenkei; hobaje hao eikshuongei hao to mailembei. 12 Kho phaia hao, nyu, haonasishuong hoba haoeibu eikshuong Kapernaum to yankei, hoba haoen khunei hapta shijo thungkei.
Jisu lembuchem to haubu
13 Jehudabu Puetbu Lem nyangko kikei hoba Jisu Jerusalem to angkei. 14 Lembuchema haoei masu, sanlon hoba tukotuk yakbu shuong hoba namjeibu tan setan hapbei. 15 Haoei semlabu luhthep kumbei hoba san si masu yoan pendou lembuchem ka shian sattikei. Haoei nam jeibu shuongeibu namnet sakletkukei hoba haoeneibu denshang khokan apbukei. 16 Hobaje tukotuk yakbu shuong to laukei, 'Habu ho haka langashi; Kuboueibu chem namseishang la teyeidi.' 17 'Ka chem mangtakbuei ngo lonlabu' togo Lai ei laubu kho haoeibu eikshuongei tamenkei. 18 Jehudabu shuongei hao to laukei, 'Habu kumsilei kumbu tanko nyi ai amaaphilabu kunla lenta?' 19 Jisuei haoen to jongaikei, 'Ho lembuchem leiluashi hoba chalou sema ngei ho phonlabu.' 20 Kheijinei Jehudabuei laukei, 'Ho lembuchem dangia po saonyito lak lea. Nyi ho chalou sema phonngeilep lo?' 21 Lausikei haoei haoeibu mang lembuchem shangabu lauko kikei. 22 Ladang hao haibu ka langngeikei, haoei ho laukei togo haoeibu eikshuongei tamenkei; hobaje haoenei laishiba nguh, hoba Jisuei laubu nguh to mailembei.
Jisuei mut pendou ngeakei
23 Puetbulem chaloua, Jisu Jerusalema kijinei, haoei kumbu amaaphilabu hapan mut juongei hao to mailembei. 24 Lankei, Jisuei haoen to mangalem, aishanga haoei mut pendou ngekei 25 hobaje mut shangabu aukabu kunla aokei akham, aishanga mut to ai ki kho haoei ngekei.
Jisu si Nikodema
1 Pharisibu che Nikodema nyenbu Jehudabu leiyeibu che, 2 nangnak Jisu jungto loukei, hobaje hao to laukei, 'Lenbou, no Muhgha ka lenbou che tegu loukei togo kunei ngekei, aishanga Muhgha hao yoa ayolonga, aoeikei nyi kumbu amaaphilabu habu ho akumen.' 3 Jisuei jongaikei, 'Maimaitham nguhmaia ngei kala lenta, mutei thukae ka abukngei shongko Muhgha Sangle hapla athuk.' 4 Nikodemaei hao to laukei, 'Mut baushi sinan hao lai kuman bukia?' Haonyueibu shimong to atngeian bukia thuklep lo? 5 Jisuei jongaikei, 'Maimaitham nguhmaia ngei kato lenta, mutei dei hoba Soushou tanko abuklonga, haoei Muhghasangle to atla athukkei. 6 Muteibu mang ka ai bukkei kho phe hobaje Soushou ka ai bukkei kho soushou. 7 Ngei kato, Kan pendou thukae ka bukngeijan, togo laubuei mangtepang.' 8 Yei ei lae soumang suhtaje khi ae souta, hobaje nyi kho langh titta, lausikei ho laka louta hoba laeto hauta kho nyi angekei. Hibu Soushoua bukbu pendou kho tegu ki.' 9 Nikodemaei hao to jongaikei, 'Khubu lai kuman hauhthukia?' 10 Jisuei laukei, 'No Israelbu lenbou che yingan, nyi khubu kho angekei si? 11 Maimaitham nguhmaia ngei kato lenta, Kunei kunei ngebu shanga lauta, hoba kunei hapbu shangabu aukabu kuta; khei yingankei kan aoeikei kuneibu aukabu asungletta. 12 Ngei kaodakbu nguh lensi kanei maialemlonga, ngei khuthukbu nguh lensije kanei lai mailemla? 13 Muteibu Shou, ao khuthuk ka louyenkei, hao to limanje aokei khuthuk to uang. 14,15 Aoyouei mailemta haoen tanei hao to ponpen langkei hapla shanga, Mosaei lai yama pinyu tonenkei kho tegu Muteibu Shoukei tonenjan. 16 Aiyei Muhghaei kaodak to kheinyutham sanoubu ka aoyouei hao to mailemta lihailabu, lausikei ponpen langkei haplabu shanga hao Shou jayangshou kukei. 17 Aishanga khunak shousi la shedbu kutila aying lausikei hao tanko khunak shousi khumenia shanga Muhghaei hao Shou kaodak to yantikei. 18 Aoei hao to mailemta hao la shedbu aku; aoei maialem haola shedbu kuan apa, aiyei lausi haoei Muhgha Jayangshou to maialem. 19 Shedbu kubu kho hai; ngesakbu kho kaodak to loua, lausikei mutei ngesakbu ayingko nakthuhbouje sanoukei, aishanga haoeneibu kumsilei kho amaibu kikei. 20 Amaibu kumbu tanei ngesakbu mangsenta, hobaje haoeibu kumsilei tangkhitsi amaibula togo ngesakbu to alouta; lausikei aoei nguhmai kumta haoeibu klimsilei kho Muhgha to nongan kumbei togo lenenlabu lele ngesakbu to louta.'
Jisu hoba Johan
22 Kho phaia Jisu si hao eikshuong Judea kaodak to loukei; hobaje hao khunei haoen yoa kikei hoba baptikukei. 23 Johaneikei Salim nyangko Enon a baptikuko kikei, aiyei lausi kho kaoena dei juongnyu kikei; 24 hobaje mutshuong louan baptikuko kikei; aishanga Johan thungdang to mojinko kikei. 25 Johaneibu eik si Jehudabu mut che kanglanga sauhenbu hangsilam aoa nguh pekyokei. Haoen Johan jungto loukei hoba hao to laukei, 'Lenbou, chuhashi! Jordan thinei ka yoa ao kikei, aoshangabu nyi aukabu kukei, haoei baptikuta, hoba mut pendou hao jungto hauta.' 27 Johanei jongaikei, 'Khuthuk ka hao la akushongkoje mut che ei aikei sungletia athukkei. 28 Ngo Messiah aying, lausikei ngo hao thedangto hautikei, logo ngei laubu ngeibu aukabu kho kan tanshuong ki. 29 Aoei leiyetnyu ki hao chemkanbou; lausikei chemkanboueibu thangbou, ao titko lota, haokei chemkanboueibu nguh kho titan aeibou olinta. Hibu ngeibu olin soua aoa. 30 Hao yangjan hoba ngo hanjan.'
Khuthuk ka loubou
31 Ao thukae ka louta hao kho pendou thuka ki; ao kaodaka ki hao kaodakbu ki, hobaje haoei kaodak hangalama lauta. Ao khuthuk ka louta hao kho pendou thuka ki. 32 Haoei ai hapbei hoba ai titkei kho shangabu haoei aukabu kuta; lausikei aoeikei haoeibu aukabu asungletta. 33 Aoei haoeibu aukabu sungletta haoei Muhgha kho nguhmai togo chongchinga. 34 Ao Muhghaei hautikei haoei Muhgha nguh lauta, aishanga Muhgha ei Soushou jongsak atakletta. 35 Bouei Shou to sanouta, hobaje ajanjan pendou hao ik to khumpo kua. 36 Aoei Shou to mailemta haoei ponpen langkei ki; aoei Shou to nguha aleta haoei ponpen langkei uhuplabu, lausikei Muhgha mangshat hao thuka ki.
Jisu hoba Samaria sao
1 Johan toje Jisuei bouje juongbou baptikuta hoba eik yeitita togo Pharisibuei tita togo ladang Jisuei ngekei 2,3 haoei Judea apyikei hoba Galil to nyibou ngaikei. Tuktebueije kho Jisuei ayingko hao eikshuongei baptikukei. 4 Hao Samaria nakjung haulabu yingan kikei; 5 hibu hao Samaria a Jakobei hao shou Joseph la kubu Saikhar nyenan sekphai hanbu che nyangko sang che to loukei. 6 Jakobeibu deikhun khunei kikei. Wakouei huan, Jisu deikhun jungatham setkei. Kho chajih aoa kiteikei. 7 Samaria sao che deikhula loukei. Jisuei sao to laukei, 'Kula yungla kubu,' 8 (Hao eikshuong sangnyu to shausiyung jekia angan apan kikei.) 9 Samaria saoei laukei, 'No Jehudabu che yingan ngo Samaria sao che to yunglabu lai kuman hita?' (Aishanga Jehudabu si Samariabu ajep ashauyota.') 10 Jisuei sao to jongaikei, 'Nyi Muhgha jongsak ngean kikei teguje hoba kato, 'Kula yungla kubu togo laubou kho ngea teguje, nyi hao ka hian kikhoulabu, hobaje haoei kala langkeibu dei kukhoulabu. 11 Yaksa khoei hao to laukei, 'Yangbou, nyi khujin aki; hobaje deikhun kho aeibou hauakei; nyi langkeibu dei kho laka khula? 12 Kuneibu pi Jakob, aoei kunla ho deikhun kukei, hobaje hao hoba hao shousi shuong hoba haoeibu shatsinameikei yungkei, no hao to yangbou sai?' 13 Jisuei sao to jongaikei, 'Aoyouei ho dei yunglaje nyibou dei lalabu, 14 lausikei aoei ong ngei kubu dei yunglaje hao ladangkei dei alalabu; lausikei ngei hao la kulabu dei khoei hao to ponpenlangkei dei pakko deikuk la yeilabu.' 15 Yaksa khoei hao to laukei, 'Yangbou, ngo dei alalabu hoba hato deikhula aloulabu lele kula kho dei kubu.' 16 Haoei sao to laukei, 'Hauashi hoba kalao ngashi, hoba hato kaiya.' 17 Yaksa khoei jongaikei, 'Ngei lao aki.' Jisuei hao to laukei, Ngei lao aki togo nyi tukte ong laua; 18 aishanga nyi lao ngao kikei, hobaje no tou aoto ki khoje kalao aying. Khonei nyi nguhmai lena. 19 Yaksa khoei hao to laukei, 'Yangbou, no thuseibu che yingkei togo hapta. 20 Kuneibu pisibouei ho shongh a lembei, hoba kan Jehudabuei mutei lemjan kaoen kho Jerusalem ki togo lauta.' 21 Jisuei sao to laukei, 'Kit to mailemashi, kanei ho shongh a yingasikei Jerusalema yingasikei Bou to alemlabu jihsiphai che louta. 22 Kanei ai ange kho kanei lemta; kunei ai ngekei kho kunei lemta, aishanga khumenbu kho Jehudabu ka ki. 23 Lausikei maimaitham Bou to lembu shuongei soushoua hoba nguhmaia lemlabu jih che lousuhata, hoba kho tou hanei ki; aishanga Bouei hao lembu tan yingia shanga kheibu mutshuong lamta. 24 Muhghaje Soushou, hobaje aoyouei hao lemlaje soushoua hoba nguhmaia lemjan.' 25 Yaksa khoei hao to laukei, 'Messiah' (ao to Makenbou togo lauta)' hao louata togo ngei ngeakei. Ladang hao loulaje, haoei kunla ajanjan pendou lenlabu.' 26 Jisuei sao to laukei, 'Kato aoei joyota kho hao.' 27 Kho jih a hao eikshuong loukei, hoba hao yaksa che to joyoko kibu hapan haoen mangpangkei; lankei, 'Nyi ai mangsuhta?' ayingsi 'Nyi aila sao to joyota?' togo aoeikei alau. 28 Yaksa khoei deikhu jak apyian sangnyu to ungkei hobaje mutshuong to laukei, 29 'Ngei kumbuleibu pendou kula lenbou, louan chuhshi, kho Messiah yingasao?' 30 Haoen sangnyu ka longkei, hoba hao jungto loukei. 31 Kheijineitham hao eikshuongei hao to sukojako laukei, 'Lenbou, no saoashi.' 32 Haoei haoen to laukei, 'Ngei kanei angebu shausiyung kia.' 33 Eikshuong che ei che to laukei, 'Mut atei hao la shausiyung sungbakukei sai?' 34 Jisuei haoen to laukei, 'Ku shausiyung kho ngo hautibouei mangangbu kumla hoba haoeibu kumsilei wantikulabu kho ki. 35 Lit lei kian phaia, toukei youlat jih suhta, togo kanei alauta lo? Ngei kan la lenta, nyek longan sek aeto limchuhashi; haoen latlabu lele nyenakei. 36 Mudunga latboueije mu hapta, hobaje wenbou si latbou ham liko olinyolabu lele, haoei ponpen langkei youman yosheiko kia. 37 Kho tegu, che ei wenta hobaje lubuei latta togo laubu nguhtet kho nguhmai ki. 38 Laonei kan hukotouko akum kho youman latia shanga ngei kan hautikei; lubu shuongei kumaleia, hobaje haoen hubutoubu mai ka kankei benta.' 39 'Haoei ngei kumbuleibu pendou lena,' togo yaksanyuei aukabu kuko lausije kho sangnyu kabu Samariabu juongnyuei hao to mailembei.' 40 Ladang Samariabu hao jungto loukei, haoenei hao to haoen yoa thungshi togo sukeijakei; hobaje hao khunei chalou nyi setkei. 41 Haoeibu nguhei juongnyuei mailembei, 42 hobaje haoenei yaksanyu to laukei, 'Kunei ho nyi lenbu nguhuei mailembei togokei aying, aishanga kunei kun lulokei tita, hoba hao kaodak Khumenbou togo kunei ngea.'
Jisuei yangbu che eibushou maitikubu
43 Chalou nyi kho phaia hao khuka Galil to haukei. 44 Aishanga thuseibu che kho jembu kaoa nyensang aki togo Jisuei haoei lulo aukabu kukei. 45 Ladang hao Galil to loukei, Galilbuei hao olinko sungletkei; haoei Jerusalem Lema kumbuleibu pendou haoenei hapa, aishanga haoenkei Lem to haukei. 46 Hao toukei, haoei dei ka ih yeitishang Galil kabu Kana to nyibou loukei. Khunei choba jungkabu yangbu che kikei, laoboueibu shou Kapernaum a shatko kiteikei. 47 Ladang kho mutei Jisu Judah ka Galil to loua togo titkei, hao hao jungto haukei, hoba louan hao shou hailabu lele ong kibou kho maitikushi togo sukeijakei. 48 Jisuei hao to laukei, 'Kan tan hoei amaaphilabu hoba mangpanglabu uhupshongko kanei maialemlabu.' 49 Choba jungkabu yangbouei hao to laukei, 'Yangbou, ku shou uhaitoua kayena.' 50 Jisuei hao to laukei, 'Hauashi, ka shou langlabu.' Mut khoei Jisuei hao to joyobu nguh to mailembei, hobaje ngaikei. 51 Hao lama yanko kitoua hao sambu shuong hauhyokei hoba hao shou langta togo laukei. 52 Hao lai jih ka maijung longeikei togo haoen ka phekei. Haoenei hao to laukei. 'Miet, changombou angh chenei mangbokei hao apyikei.' 53 Jisuei hao to, 'Kashou langlabu' togo laubu jih khoneitham yingkei togo hao bouei ngekei; hobaje hao hoba hao chemdang khumpoei mailembei. 54 Jisuei hao Judah ka Galil to loujinei kumbu amaaphilabu yoa ho nyiboubu ki.
Thima maitibu
1 Kho phaia khunei Jehudabu lem che kikei, hoba Jisu Jerusalem to angkei. 2 Jerusalema, San Pakhuna, Jehuda nguhyema Bethzatha togo nyenan khunei thim che kia; khonei tip ngao kia. 3 Khunei shatbu juongnyu nyekthubu, sokebu, ayingsi yousi ik phei sibu tan (dei shoueibu haiteiyoko kikei. 4 Aishanga khuthuk hangangbu che jih jih a louyenkei hoba dei kho shoueitikei. Kheijinei dei shoueibu phaia shang atbou mut kho haoeibu shatsinyat pendou ka maiko kikei.) 5 Khunei mut che po khujinto set shatbu yoan kikei. 6 Ladang Jisuei hao khunei lengan hapbei hoba hao khunei jihsiphai lounyu kita togo ngekei, haoei hao to laukei, (No maimang suhtalao?' 7 Shatbou mut khoei hao to jongaikei, 'Yangbou, thim shoueijinei ngo leian atlabu aokei aki; lausikei ngo lamoua kitoua lubu che ong ku thedangto hauta.' 8 Jisuei hao to laukei,' Loenashi, kayepshang peashi hoba paiashi.' 9 Khoyam mut kho maikei, hao yepsang pekei hoba paikei. Kho Nounyet chalou che kiteikei. 10 Hibu Jehudabuei maian kibu mut khuto laukei, 'Ho Nounyet yingkei; kaibu shen pelabu kho kala nguhkhumei asakkuta.' 11 Haoei haoen to jongaikei, 'Ngo maitikubou mutei kuto laukei, "Ka yepshang peashi hoba paiashi." 12 Haoenei hao to phekei, "Ka yepshang peashi hoba paiashi," 'togo kato laubou mut kho ao?' 13 Lausikei maitikubu mut khoei hao ao yingkeije ange. Jisu meimeijung satan kikei aiyei lausi kaoen khunei mutshang juongnyu kikei. 14 Kho phaia Jisuei hao lembuchema hapbei, hoba hao to laukei, 'Chuha, no maian apa, nyi kato hoto amaibu hauhthuktimang asuhlonga, touje shabu teshon.' 15 Mut kho haukei hoba hao maitibou kho Jisu yingakei togo Jehudabu la lenkei. 16 Kho laua Jehudabuei Jisu shieikoela khangkei, aiyei lausi haoei khubu kho Nounyet kumbei. 17 Jisuei haoen to jongaikei, 'Ho jih hanei svihko Kubouei kumtaleita, hoba ngei haoei tegu kumsilei kumta.' 18 Kho aukabua Jehudabuei hao haitila aeiche lambei, aiyei lausi haoei Nounyet ong leilukei aying, lausikei Muhgha to hao jetei yeiko, Muhgha to hao haoeibu Bou togo laukei.
Shoueibu hau
19 Jisuei haoen to laukei, 'Maimaitham nguhmaia ngei kan to lenta, Shouei hao lulo aikei kumla athukkei, haoei Bouei kumbo hapbu kho ong kumla thukkei; aishanga Bouei ai ong kumta, Shoueikei kho kumta. 20 Aishanga Bouei Shou to sanouta hoba haoei kumbuleibu pendou hao la lenta, hobaje kan mangpangyolabu lele haoei hao la khubu to yangbou kumsilei lenlabu. 21 Bouei lai haibu langngeitita hoba haoen la langkei kuta, kho tegu ong Shoueikei haoei pienbu shuong la langkei kuta. 22 Maimaitham Bouei aomat ajemta, lausikei haoei matjembu pendou Shou la kua, 23 khei haoenei Bou to souhatbu tegu, pendouei Shou to souhatlabu. Aoei Shou la soumo akuta, haoei hao hautibou Bou la soumo akuta. 24 Maimaitham nguhmaia ngei kan la lenta, aoei ku nguh titta, hoba ngo hangangbou to mailemta, haoei ponpen langkei ki, hoba matjembu to alouta, lausikei haibu ka langkeibu to hauta. 25 Maimaitham nguhmaia ngei kan la lenta, haian kibu shuongei Muhgha Shou nguh titlabu jihsiphai che louata, hoba kho tou ki, hoba aoyouei kho titlaje lang kilabu. 26 Aishanga Bou la langkei pakshang ki, kho tegu haoei Shou la langkei pakshang yeitila shanga kukei. 27 Kho to liman haoei hao la matjemlabu shanga hau kua, aishanga hao kho Muhgha Shou ki. 28 Khunei mangtepang, aiyei lausi hemanga kibti shuong pendouei haoeibu nguh titlabu jihsiphai che louata, 29 hobaje luonglabu; aoyoueibu kumsilei maian kikei haoen ponpen langkeishang to langngeilabu; shedbu kumbu shuong matjemshang to langngeilabu.
Jisu to aukabu
30 Ngei ku haua ai kumla athukkei; ngei Bouei kuto lenbu tegu matjemta; hobaje ngeibu matjem kho tuktebu ki, aiyei lausi ngei ku mangangbu alamta, lausikei ngei ngo hangangbouei mangangbu lamta. 31 'Ngei ku shangabu aukabu kualonga ngeibu aukabu kho nguhmai aying. 32 Ku shangabu aukabu kubou lubu che kia, hoba haoei ku shangabu laobou aukabu kuta kho nguhmai togo ngei ngekei. 33 Kanei Johan jungto hautikei hoba haoei nguhmai la aukabu kukei. 34 Ngei muteibu aukabua anongta, lausikei kan khumenlabu shanga ngei khubu kho lauta. 35 Hao kho longko kibti ngesakbu wanthung che kikei, hoba kan longche shangabu haoeibu ngesakbua olinyola mangangko kikei. 36 Lausikei ngei laobou aukabu ki kho Johaneibu aukabu to yangbou, aishanga ktimsilei laobou Kubouei kula kumphemtila kukei, khubu kumsilei ngei kumta hoba khubuei Bouei ngo hautikei togo ku shangabu aukabu kuta. 37 Hobaje Bou aoei ngo hangangkei haoeikei ku shangabu aukabu kukei. Kanei iadangkei hao nguh atitkei, ayingsi hao the uhup. 38 Hapeibu nguh kanto athungta, aishanga kanei haoei hautibou Che khuto maialemta. 39 Kanei Laishiba phanta, aiyei lausi kanei khunei ponpen langkei ki togo kanei tamta, lankei ku shangabu aukabu kubou kho khubu ki, 40 hobaje kanei ponpen langkei haplabu shanga kanei ku jungto loula mang uangta. 41 Ngei muteibu soumo to anongta, 42 lausikei kanei mangbona Muhgha to sanoubu aki togo ngei kan ngekei. 43 Ngo kubou nyena louakei, hoba kanei ngo asungletta. Mu at haoeibu jembu nyena lousije kanei hao sungletlabu. 44 Kan che ei che ka nyensang leta, hoba Muhgha Cheong kabu nyensang alamta, kanei lai mailemenla? 45 Bou thedanga ngei kan attilabu togo tetam. Kan attibou khoje Mosa, kanei ao to kaneibu manglem phosapan ki. 46 Kanei Mosa to maileman kikei teguje kanei kuto maileman kikhoulabu, aishanga haoei ku shangabu dokei. 47 Kanei haoei dobu to maialemenlongaje, lai kuman kanei ku nguh to mailemla?'
Jisuei hajar ngao oknyinbu
1 Kho phaia Jisu Galil si thidang to haukei, kho Tiberia si; 2 Khunei noknyuh hao phaia seman kikei, aiyei lausi haoenei haoei mutshuong shatbu maitibu amaaphailabu hapbei. 3 Jisu shongh to angkei hoba khunei hao eikshuong yoa setkei. 4 Puetbu lem, Jehudabu lem kho nyangko kikei. 5 Ladang Jisuei limchuhkei hoba mutshang yang hao jungto louko kibu hapbei, haoei Philip to laukei, 'Habuei shaula shanga senei wentek laka jekla?' 6 Haoei kho hao takteila laukei; aishanga haoei ai kumlabu ki kho haoei ngekei. 7 Philipei hao to jongaikei, 'Mutpem weko hanbang ong shomasikei sempak saoaneibu wentekei haoen asoulabu.' 8 Eikshuong yoa che, Simon Petereibu na Andriaei hao to laukei, 9 'Hanei nashou hanbu che kia, haoei barli wentek ngao hoba ngau penyi kia; lausikei mut khujoche shanga khoei ai kumbula? 10 Jisuei laukei, 'Mutshuong settiashi.' Khunei sang juongnyu kikei. Hibu mutshuong setkei; haoen hajar ngao thung kiteikei. 11 Jisuei wentek kho sungkei, hoba Muhgha la nyensang kuan phaia, mutshuong setan kijinei haoen la shombukei, hoba ngaukei khei kumbei. Mutpem wekoei photko shaukei. 12 Ladang haoen senyuhshembei, haoei hao eikshuong to laukei, 'Ai amaulabu lele jouletbu netshou shuong heshaiashi.' 13 Hibu haoenei khubu yoshaikei, hobaje shaubu shuongei barli wentek ngao ka joutibu khoei kam anthuknyi shenkei. 14 Haoei kumbu amaaphilabu hapbu mutshuongei laukei, 'Maimaitham kaodak to loula kibu Thuseibou kho ho ki.' 15 Hibu Jisuei, haoenei hao lapan choba la yeitilabu togo kibu kho ngean, hao hao mutpem shongh aeto satan apbukei.
Jisuei dei thuka paibu
16 Ladang chasem yeikei hao eikshuong yungnyu to yankei. 17 Haoen long che to atkei hoba Kapernaum to tanko kikei. Kho touje nangnaka hoba Jisu haoen jungto molouko kikei; 18 hobaje dei shoueila khangko kikei, aishanga yungnyua yei yang souko kikei. 19 Haoenei longa mail sem si lei phongan phaia haoenei Jisu dei thuka paiko long junga suhko louko hapbei; hobaje haoen hatkei. 20 Haoei haoen to laukei, 'Ho ngo yingkei; tehut.' 21 Kheijinei haoenei hao long to leiyetmang suhkei, lausikei longche danga long khoei haoen hauko kibu kaoen suhkei.
Mutshuongei Jisu lambu
22 Nyibounyet, yungnyu thi aedanga shaibu noknyuhei, khunei long che ong kiteikei hobaje Jisu hao eikshuong yoto long to tit, lausikei hao eikshuong lansan ong haukei togo tamenkei. 23 Tiberia ka lubu long shuong, laonei haoenei Bonyubaoei nyensang kuan phaia wentek shaukei, kho kaoen nyangko lousuhkei. 24 Hibu, ladang nokyuhei khunei Jisu ayingsi haoeibu eikshuong ongkei uhup, haoenei haoen lulo long to atkei, hobaje Kapernaum to Jisu lamjung loukei.
Jisu langkeibu wentek
25 Ladang haoenei hao yungnyu thinei hapbei, haoenei hao to laukei, 'Lenbou, no ladang hato loukei?' 26 Jisuei haoen to jongaikei, 'Maimaitham nguhmaia ngei kan to lenta, kanei ngo kanei amaaphilabu hapbu shanga aying, lausikei kanei wentek janshauan senyuhshembu ka lamyota. 27 Nyaulabu shausiyung shanga tekumtelei; thalabu hoba ponpen langkei sungbalabu, laobou Muteibu Shouei kanla kulabu ki, kheibu shausiyung shanga kumaleiashi; aishanga Bou Muhghaei hao thuka haoeibu hau tetsita jankua.' 28 Haoenei hao to laukei, 'Kunei Muhgha kumsilei kumlabu lele kunei ai kumla?' 29 Jisuei haoen to jongaikei, 'Muhghu kumsilei kho ho ki, khei haoei ao hautikei kanei hao to mailemjan.' 30 Hibu haoenei hao to laukei, 'Kunei kho haplabu hoba kato mailemlabu lele nyi ai amaaphilabu kumta? Nyi kumlabu kho ai? 31 Laishibaei hai lenan kibu tegu kuneibu pisibousi shuongei yama mana shaukei, "Haoei haoen la khuthuk ka shausiyung kukei." 32 Jisuei haoen to laukei, 'Ngei kan to nguhmaia nguh juong lenta; Mosaei kan la khuthuk ka shausiyung kukei aying; lausikei Kubouei tuktebu shausiyung kan la khuthuk ka kuta. 33 Aishanga Muhgha shausiyung kho laobou khuthuk ka louyenta hoba kaodak la langkei kuta kho ki.' 34 Haoenei hao to laukei,'Yangbou, kunla ponpen kho shausiyung kubu.' 35 Jisuei haoen to laukei.' Ngo langkei shausiyung; ao ku jungto louta hao muhei uheilabti, hoba aoei kuto mailemta hao ladangkei nyibou dei alalabu. 36 Lausikei kanei ngo hapasikei kanei kuto maialemta togo ngei kanto lena. 37 Bouei kula kubu shuong pendou ku jungto loulabu, hobaje ngei ao ku jungto louta hao ngei shian asattilabti, 38 aiyei lausi ngo jembuei mang angbu kumla khuthuk ka loukei aying, lausikei ngo hautibouei mangangbu kumla loukei. 39 Ho ngo hautibouei mangangbu ki, khei haoei kula kubu ka ngei che ongkei amautijan, lausikei thonbu Chaloua haoen pendou langngeitijan. 40 Aishanga aoyouei Shou hapta hoba hao to mailemta haoei ponpen langkei haplabu kho Kubouei mangangbu ki; hobaje ngei hao thonbu Chaloua langngeitilabu.' 41 Hibu Jehudabu shuongei hao shanga nyammyambei aishanga haoei, 'Ngo khuthuk ka loubu shausiyung,' togo laukei. 42 Haoenei laukei, 'Ho Joseph shou Jisu aying lo? Hao bou si haonyu senei angekei lo? Khulonga haoei tou lai kuman, 'Ngo khuthuk ka loukei togo lauta?' 43 Jisuei haoen to jongaikei, 'Kan yoa tenyamnyamyo. 44 Ngo hautibou Bouei asenba longa aokei ku jungto loula athuk; hobaje ngei hao thonbu Chaloua langngeitilabu. 45 Thuseibu le a ho doakei, "Hobaje haoen pendou la Muhghaei lenlabu." Aoyouei Bou to titta hoba hao ka titleta hao ku jungto louta. 46 Mut atei Bou hapa togo ngei alauta, khei Muhgha ka laobou Che khuto limanje; haoei ong Bou hapa. 47 Nguhmaia ngei kan to lenta, aoei mailemta haoei thon akibu langkei ki. 48 Ngo langkei shausiyung. 49 Kaneibu pisibousi shuongei yama mana shaukei, lan haoen haikei. 50 Mutei shaulabu hoba uhailabu shanga ngo khuthuk ka loubu shausiyung. 51 Ngo khuthuk ka louyenbvi lang kibu shausiyung. Atei ho shausiyung shausije hao ponpen lang kilabu; hobaje ngei kulabu shausiyung kho ku phe; kaodakbu langkei shanga ho kuta. 52 Hibu Jehudabuei haoen yoa nguhsak nepyoko laukei, 'Ho mutei lai kuman senla haoeibu phe shaula kula?' 53 Jisuei haoen to laukei, 'Nguhmaia ngei kan to lenta, kanei Muteibu Shou phe ashaulonga hoba hao si ayunglonga kan jembu lulo to langkei aki. 54 Aoei ku phe shauta hoba ku si yungta haoei athonbu langkei ki, hobaje ngei hao thonbu Chaloua langngeitilabu. 55 Aishanga ku phe kho tuktebu shausiyung, hoba ku si kho tuktebu yunglabu. 56 Aoei ku phe shauta hoba ku si yungta hao kuto kita hoba ngo hao to kita. 57 Lang kibu Bouei ngo ailai hautikei, hoba ngo Bouei lang kita, kho tegu aoei ngo shauta haokei ngo tanko lang kilabu. 58 Ho khuthuk ka louyenbu shausiyung; ho pisibousi shuongei shaubu kho tegu aying, aishanga kho shausiyungei haoen alangta; aoei ho shausiyung shauta hao ponpen langkei kilabu.' 59 Haoei ho Kapernauma sinagog a lenjinei laukei.
Thon akibu langkei nguh
60 Haoenei ladang ho titkei, hao eikshuong juongei laukei, 'Nguh hoje sekakei. Aoei ho titenla?' 61 Ho shanga haoeibu eikshuongei nyamnyamta togo Jisuei ngekei, hoba haoen to laukei, 'Hoei kan phaiyetta lo? 62 Kholonga kanei Muteibu Shou hao shangied kishang to angko hapsije lai kumla? 63 Ho langkei kubou soushou ki; pheje jim aki. Ngei kan to lenbu nguh shuongje soushou hoba 'angkei ki. 64 Khei yingasikei kan yoa atje maialembu kia.' Aishanga maialembu aoyou, hoba aoei hao yakshaula khubu kho Jisuei khangla thama ngean kiteikei. 65 Hobaje haoei laukei, 'Bouei akulonga aokei ku jungto loula athuk togo ngei kan to lena.' 66 Kho jih ka jauan hao eik juongnyu sepeijung ngaikei hoba hao yoa apaiko apbei. 67 Kheijinei Jisuei Anthuknyi to laukei, 'Kankei ngaimang suhta sai?' 68 Simon Peter ei hao to jongaikei,' Bonyubao, kun ao jungto sepeila? Nyi thon akibu langkei ki; 69 Hobaje kunei mailema hoba no Muhghaeibu Saopobou ki togo ngeena.' 70 Jisuei haoen to jongaikei, 'Ngei kan Anthuknyi kho apien lo? Lausikei kan yoa cheje huonbou ki.' 71 Haoei Simon Iskariot shou Judas shangabu lauko kiteikei; aishanga hao Anthuknyi yoa che yingasikei, hao yakshaulabu lele kiteikei.
Jisu hoba haonasi shuong
1 Kho phaia Jisu Galil a paikei. Hoei Judea koletkei aishanga Jehudabu shuongei hao haitila lameikei. 2 Tou Jehudabu Tip lem nyangko kikei. 3 Hibu hao nasishuongei hao to laukei, 'Ka eikshuongeikei nyi kumbu kumsilei yangbu haplabu lele ho kaoen apyiashi hoba Judea to hauashi. 4 Aishanga aoei hao puhdaka shentimang suhta, haoei huphanga ai akumta. Nyi khubu kumta longaje no lulo kaodak la haptiashi.' 5 Aishanga hao nasishuongei ongkei hao to maialem. 6 Jisuei haoen to laukei, 'Ku shanga tuktebu jih molousuh; lausikei kan shanga jihsiphai kho ponpen lamleakei. 7 Kaodakei kan mangsenla athuk, lausikei hoei ngo mangsenta, aiyei haoeibu kumsilei shuong amai togo ngei kho shanga aukabu kuta. 8 Lem khuto kan angashi. Ngo kho lem to uangta aishanga ngeibu jih alousuhkei.' 9 Haoei kho lauan phaia hao Galil a thungkei.
Jisu Tip lema yobu
10 Lausikei ladang hao nasishuong lem khuto angkei, kheijinei haokei, puhthea ayingko, huphanga angkei. 11 Jehudabu shuongei hao Lem khunei lampo laukei, 'Hao lan ki?' 12 Noknyuh a hao shanga aeibou nyamnyamyokei, atei laukei, 'Hao mut maibu yingkei,' lubuei laukei, 'Aying, haoei noknyuh ayinglam to leita.' 13 Lausikei Jehudabu to hatla, aoeikei hao shanga puhthea alau. 14 Ladang Lemjibou suhkei, Jisu Lembuchem to angkei hoba lenla khangkei. 15 Jehudabti shuong mangpangkei hoba laukei, 'Ho mutei titletbu akiko lai kuman webu songsito khutetche hapbei?' 16 Jisuei haoen to jongaikei, 'Ngei lenbu kho ku nguh ji, lausikei ngo hautiboueibu ki. 17 Mut atei hao mangangbu kumla mangangsije, ngei laubu ho Muhgha nguh si ayingsi ngei jembu hauei lautaje, kho haoei ngelabti. 18 Aoei haoeibu jembu haua lautaje haoei jembu soneikangbu lamta; lausikei aoei hao hautiboueibu soneikangbu lamta, hao nguhmai; hao to asaopobu aki. 19 Mosaei kan la Nguhkhum aku lo? Khei yingasikei aoeikei Nguhkhum ajungeita. Kanei aila ngo haitila gomeita?' 20 Noknyuhei jongaikei, 'Kato shabu muhgha kia. Aoei no haitila gomeita?' 21 Jisuei haoen to jongaikei, 'Ngei Nounyet kumsilei che kumbei hoba kan tou suhko 22 khoei mangpangta. Mosaei kanla kiplabu phejan kukeikho Mosa ka aying, lausikei pisibousi kalaobou kanei Nounyet mangkei kipta. 23 Mosa Nguhkhum alulimla shanga mut che ei Nounyet mangkei kipta longaje, Nounyet ngei mut che maisho maitikua togo kan kuto mangpokta lo? 24 Tangka chuhbuei mat tejem lausikei kaneibu matjembu kho tangbu yingshi.'
Hao Messiah kho sai?
25 Jerusalem kabu mutshuong atei laukei, 'Ho haoenei haitila gomeibu mut kho aying lo? 26 Lausikei chuhashi, haoei puhthea lauta hoba haoenei hao to ai alauta. Ho Messiah yingkei togo seneibu khuleibu tanei tukte ngebu yinglao ma? 27 Senai ho mut ho lakabuje ngeakei; lausikei ladang Khrista loulaje, aoeikeihao lakabuje angelabu.' 28 Jisuei lembu chema ngekko laukei, 'Kanei ngo ngekei hoba ngo lakabuje kanei ngekei. Lausikei ngo jembu hauei loukei aying, lausikei ngo hautibou kho nguhmai ki, hoba hao kanei angekei. 29 Ngei hao ngekei, aishanga ngo hao ka ki, hoba haoei ngo hautikei.' 30 Haoenei hao lapla haujembei, lausikei aoeikei hao to ik ashat, aiyei lausi haoeibu jihsiphai mosuh. 31 Noknyuh juongei hao to mailembei hoba laukei, 'Ladang Khrista kho loulaje, ho mutei kumbu amaaphilabu to aei haoei kumlep lo?'
Lombu shuong Jisu lapla hautibu
32 Noknyuhei hao shangabu nyamnyamyobti Pharisi shuongei titkei, hobaje ungshedbu shuong si Pharisibu shuongei hao lapla khusabu shuong hautikei. 33 Jisuei laukei, 'Ngo kan yoa longche kilabu hoba ngo hautibou jungto haulabu. 34 Kanei ngo lamlabu, lausikei kanei ngo uhuplabu, hoba ngo lan ki kan loula athuk,' 35 Jehudabu shuongei haoen lulo lauyokei, 'Senei hao uhuplabu lele hao lato haula kumeita? Hao Jehudabu linan Greekbu yoa kibu yoto hauan Greekbu la lenla kumeita sai? 36 "Kanei ngo lamlabu, lausikei kanei ngo unuplabu, hoba ngo lan ki kan loula athuk," togo laubu haoeibu nguh kho ai tetlabu?' Langkei dei shumang 37 Lem thonla, youjemnyet, Jisuei loenan ngekko laukei, 'At dei lasije ku jungto kaiya hoba yungashi. 38 Laishibaei laubu tegu, "Aoei kuto mailemta hao ka langkei dei shumang koulabu." 39 Aoyouei hao to mailembei, haoenei ai Soushou sungletla kiteikei kho shangabu haoei laukei, aiyei lausi Soushou kho mokuko kikei, aishanga Jisu mo sonei akangkei.
Mutshuong yoa janyinbu
40 Ladang noknyuh yoa atei khubu titkei haoenei laukei, 'Maimaitham ho Thuseibou kho ki.' 41 Lubu shuongei laukei, 'Ho Khrista kho ki'; lausikei atei laukei, 'Galil ka Khrista longlep lo? 42 Dawid lilabu ka, hoba Dawid kibu Bethlehem sang ka Khrista kho longlabu, togo Laishibaei alenkei lo?' 43 Hibu noknyuha hao hangshong janyinbu longkei. 44 Haoen ateije hao lapmang suhkei, lausikei aoeikei hao to ik ashat.
Jehudabu khuleibu shuongei maialembu
45 Kheijinei khusabu shuong ungshedbu shuong si Pharisi shuong jungto loukei hoba haoenei haoen to laukei, 'Aila kanei hao aleibd? 46 Khusabu shuongei jongaikei,' Aoeikei ho mutei laubu teguje alaukei.' 47 Pharisi shuongei haoen to jongaikei, 'Kankei ayinglamto leilangtia sai? 48 Seneibu khuleibu ayingsi Pharisibu atei ongkei hao to mailema si? 49 Lausikei ho noknyuh, aoyouei Nguhkhum kho angekei haoenje shedsikhau paua.' 50 Lausikei haoen yoa che, Nikodema, ao Jisu jungto shangied loukei, haoei haoen to laukei, 51 'Shangla mut khoeibu nguh titan achuhko, hoba haoei kumbu alamenko, seneibu Nguhkhumei hao mat jemta sai?' 52 Haoenei hao to jongaikei, 'Nokei Galil ka sai? Laishiba phanashi hobaje Galil ka thuseibu ao alongta togo nyi ngelabu.'
Asangalanbua lapbu sao che
53 Hobaje haoen mutpem weko lulu chem to ngaikei;
1 lausikei Jisuje Oliv Shongh to haukei. 2 Ngeiyang enyu hao lembu chem to nyibou ngaikei. Mut pendou hao jungto loukei; hobaje hao setkei hoba haoen la lenla khangkei. 3 Nguhkhum lenbou shuong si Pharisi shuongei asangalanbua lapbu yaksa che leibakei. Haoenei sao kho haoen si Jisu kanglanga lotikei, 4 hoba hao to laukei, 'Lenbou, ho yaksa ho asangalanbu kumbo kian lapbei. 5 Nguhkhuma Mosaei kheibu yaksa kho langei tetetdijan togo doakei. Nyi ai laula?' 6 Hao attilabu shanga, hao takteiko haoenei kho nguh laukei. Lausikei Jisuei ngomjung atkei hoba ikjishouei kaoa dokei. 7 Ladang haoenei hao to phedang lekei, hao pienan haoen to laukei, 'Kan yoa ao to shabu aki haoei shang sao to langei tetashi.' 8 Nyiboula hao ngomjung atkei hoba kaoa dokei. 9 Ladang haoenei kho titkei haoen jaishoubou ka khangan che che a satkhumbei, hobaje lotian phobu yaksa yoa Jisu mutpem joutikei. 10 Jisuei pienan sao to laukei, 'Yaksa, haoen lan ki? Aoeikei no uatti lo?' 11 Saoei laukei, 'Yangbou, aoeikei uatti.' Hobaje Jisuei laukei, 'Ngeikei no uattita. Ngaiashi; ladangkei nyibou shabu teshon.'
Jisu kaodak ngesakbu
12 Nyiboula Jisuei haoen to joyoko laukei, 'Ngo kaodak ngesakbu. Aoei kuphai semta hao ladangkei nakthuha apailabu, lausikei langkeibu ngesakbu kilabu.' 13 Pharisi shuongei hao to laukei, 'Nyi ka shangabu aukabu kunta; kaibu aukabu kho nguhmai aying.' 14 Jisuei haoen to jongaikei, 'Ngei ku shangabu aukabu kuasikei, ngeibu aukabu kho nguhmai ki, aiyei lausi ngo laka loukei, ayingsi ngo lato hautaje ngei ngeakei. 15 Kanei phe aedang ka matjemta; ngeije aomat ajemta. 16 Ngei mat jemasikei ngeibu matjembu kho nguhmai ki, aishanga ngo mutpem aying. Ngo hautibou Bou ku yoa kia. 17 Mut nyieibu aukabu kho nguhmai ki togo kaneibu Nguhkhuma doakei. 18 Kti shangabu aukabu kubou kho ngo ki, hobaje ngo hautibou Bouei ku shangabu aukabu kuta.' 19 Haoenei hao to laukei, 'Kabou lanei ki?' Jisuei jongaikei, 'Kanei ngokei Boukei angekei. Kanei ngo ngekei teguje, kanei Kuboukei ngelabu.' 20 Haoei habu nguh ho lembu chema lenjinei nam thanshanga laukei. Aoeikei hao alap, aiyei lausi haoeibu jih mosuh.
Ngo haushang to kan ohaulabu
21 Haoei haoen to laukei, 'Ngo satta hoba kanei ngo lamlabu, lausikei kan kaneibu shabua hailabu. Ngo lato hautaje kan khuto alouenlabu.' 22 Jehudabu shuongei laukei, "Ngo laito hautaje kan loula athuk' togo haoei lautabu haoei hao lulo haitilep sai?' 23 Haoei haoen to laukei, 'Kan phang ka; ngoje thuk ka. Kan ho kaodakeibu; ngoje ho kaodakeibu aying. 24 Khoei ong ngei kan kaneibu shabua hailabu togo laukei; aishanga kanei "Ngo hao" togo maialemlonga kan kaneibu shabua hailabu.' 25 Hibu haoenei hao to laukei, 'No ao?' Jisuei haoen to laukei, 'Khangla thama ngei kanla kho ong lentanai. 26 Ngei kan shangabu lenla hoba matjemlabu juongnyu kia; lausikei aoei ngo hautikei hao nguhmai ki, hoba ngei hao ka ai titkei ngei kaodak la lenta.' 27 Haoei haoen to Bou shangabu lauta togo haoenei ange. 28 Jisuei laukei, 'Ladang kanei Muteibu Shou tonenlaje kheijinei "Ngo hao," hoba ngei jembu hauei ai akumta lausikei ngei habu ho Bouei kula lenbu tegu lauta togo kanei ngelabu. 29 Hobaje aoei ngo hautikei hao ku yoa ki. Haoei ku mutpem tipyikei, aishanga ngei ponpendou hao manghaibu kumta.' 30 Haoei habu laujinei juongnyuei hao to mailembei.
Dongebu hoba au
31 Jisuei hao to mailembu Jehudabu shuong to laukei, 'Kan ku nguha lealonga, kan maimaitham ngeibu eikshuong; 32 hobaje kanei nguhmai kho ngelabu hobaje nguhmai khoei kan dongebu yeitilabu.' 33 Haoenei hao to jongaikei, 'Kun Abraham thensilen, hobaje ladangkei aoeibu aulakei alekei. "Kan dongebu yeilabu" togo nyi lai kuman lauta?' 34 Jisuei haoen to jongaikei, 'Nguhmaia ngei kan to lenta, aoei ong shabu shonta hao shabu au. 35 Au kho chema ponpen akita; shouje ponpendou kita. 36 Yingsije Shouei kan do ngedialonga, kan maimaitham do ngebu yinglabu. 37 Kan Abraham thesilen togo ngei ngeakei; lausikei kanei ngo haitila gomeita, aiyei lausi kan to ku nguh athungta. 38 Kubou yoa ngei ai hapbei kho ngei kan to lenta; lausikei kanei kaneibu bou ka ai titkei kho kumta.' 39 Haoenei hao to jongaikei, 'Kuneibu bou Abraham ki.' Jisuei haoen to laukei, 'Kan Abraham shousi yinga teguje kanei Abraham kumsilei kumphoulabu. 40 Lausikei Muhgha ka nguhmai nguh titan kan to lenbou kho ngo, hoba tou kanei ngo haitila gomeita. Abrahamei ho akum. 41 Kanei kaneibu boueibu kumsilei kumta.' Haoenei hao to laukei, 'Kun khongshou aying; Muhgha kho ong kuneibu Bou ki.' 42 Jisuei haoen to laukei, 'Muhgha kaneibu Bou teguje kanei kuto sanoulabu, aishanga ngo Muhgha ka loukei, hoba tou hanei kia. Aishanga ngo ngeibu jembu hauei alou, lausikei haoei ngo hautikei. 43 Aila kanei ngei lenbu ashokenta? Aiyei lausi kanei ngeibu nguhlang titla asomta. 44 Kan kaneibu bou shabu muhgha ka ki, hoba kaneibu bouei mangtakbu kumla kanei mangangta. Hao khangbu ka tham mut haitibou kikei. Hao nguhmaia alo, aishanga hao to nguhmai aki. Ladang haoei amlangbu laulaje haoei jembu mangbon ka lauta, aishanga hao kho yepeibu hoba yepeibu bou ki. 45 Lausikei ngei nguhmai lauta, khoei kanei kuto maialemta. 46 Kan yoa aoei ngeibu shabu lenenla? Ngei nguhmai lausi kanei aila kuto maialemta? 47 Ao Muhgha ka ki haoei Muhgha nguh titta. Kanei atitbu tetlabu kho kan Muhgha ka aying.
Jisu hoba Abraham
48 Jehudabu shuongei hao to jongaikei, 'No Samariabu hoba kato shabu sou kia togo kunei kato tukte alen si?' 49 Jisuei jongaikei, 'Kuto shabu sou aki, lausikei ngei Kubou la soumo kuta hoba kanei kula soumo akuta. 50 Ngei jembu soneikangbu alamta; kho lambou hoba matjembou che kia. 51 Nguhmaia ngei kan to lenta, atei ku nguh jungeialonga haoei ladangkei haibu uhuplabu.' 52 Jehudabu shuongei hao to laukei,' Tou kunei kato shabu sou kia togo ngekei. Abraham hoba thuseibu shuong haikhuma hoba nyi, "Atei ku nguh jungeialonga haoei ladangkei haibu uhuplabu," togo lauta. 53 Kuneibti bou Abraham, ao haia, hao to no yangbou sai? Thuseibu shuongkei haia. Nyi jembu lulo ao togo lauta? 54 Jisuei jongaikei, 'Ngei ngo lulo soneikangalonga, ngeibu soneikangbu ai aying. Ho Kubou, kanei ao to, "Hao kuneibu Muhgha" togo lauta, haoei ngo soneikangtita. 55 Kanei hao angekei, lausikei ngei hao ngeakei; hoba ngei hao angekei laualonga ngokei kan tegu yepeibu yinglabu; lausikei ngei hao ngekei hoba hao nguh jungeita. 56 Kaneibu bou Abrahamei ku chalou hapla olinkei; haoei kho hapbei hoba olinkei.' 57 Jehudabu shuongei hao to laukei, 'No po anjinsem aonkei, hoba nyi Abraham hapbei si?' 58 Jisuei haoen to laukei, 'Nguhmaia ngei kan to lenta, Abraham abukjinei "Ngo" kho kiteikei, hoba hao kho ngo ki.' 59 Haoenei hao to tetla lang hekei, lausikei Jisuei jembu lulo hukei, hoba lembu chem ka satkei.
Jisuei nyekthuan bukbu haptikubu
1 Jisuei hao haujinei bukjineithama nyek thubu mut che hapbei. 2 Haoeibu eikshuongei hao to phekei, 'Lenbou, hao nyek thuan buklabti lele, ho mutei si, haonyu haobouei shabu shonkei?' 3 Jisuei jongaikei, 'Ho haoeibu shabu ayingsi haoeibu nyusiboueibu shabueikei aying; lausikei hao tanko Muhgha kumsilei tangkhittila shanga hao nyek thuan bukkei. 4 Senei changea ngo hautiboueibu kumsilei kumjan. Aoeikei akumaleienlabu lele nangnak louata. 5 Ngo kaodaka ki shongko ngo kaodak ngesakbu.' 6 Haoei khei lauan phaia, haoei kaoa eok thokkei, hobaje eoka thamdak totkei; haoei thamdak kho muteibu nyeka nangkukei, 7 hobaje hao to laukei, 'Hauashi hobaje Siloam shumanga sakashi.' (Siloam nguhtet Hautikei) Hibu haoei hauan sakkei, hobaje nyekei hapbo longeikei. 8 Lepbu shuong hoba nyishou aoyouei hao hishau hiyungbu che togo shenan kikei haoenei laukei, 'Ho mut setan hishau hiyungko kibou kho aying lo?' 9 Atei laukei, 'Hau'; lubu shuongei laukei, 'Ji, lausikei haoei hao phatkei.' Mut khoei haoei lulo laukei, Kho ngo.' 10 Haoenei hao to laukei, 'Kholonga kaibu nyek lai kuman ipbei?' 11 Haoei jongaikei, 'Jisu nyenbu mut che ei thamdak totkei hoba ngeibu nyeka nangkukei, hobaje kuto laukei, "Siloam to hauashi hoba sakashi." Hibu ngo haukei hoba sakkei, hoba hapbei.' 12 Haoenei hao to laukei, 'Hao lanei ki?' Haoei laukei, 'Ngei angekei.'
Pharisibu shuongei maitibu kho phankei
13 Shangied nyek thuan kibu mut kho haoenei Pharisibu jungto leian haukei. 14 Jisuei thamdak totan haoeibu nyek khittikubu kho Nounyet yingan kiteikei. 15 Pharisi shuongei haoei lai kuman hapbei kho hao ka nyiboula phekei. Haoei haoen to laukei, 'Haoei thamdak totan ngeibu nyeka nangkukei hobaje ngei sakkei hoba ngei hapta.' 16 Phairisibu atei laukei, 'Kho ktimbou mut kho Muhgha ka aying, aiyei lausi haoei Nounyet ajungeita.' Atei laukei, 'Mut ao shabu mut che ki haoei lai kuman kheibu sei kumenla?' Hobaje haoen yoa janyinbu longkei. 17 Haoenei nyek thubou to nyiboulakei laukei, 'Haoei kaibu nyek ipbukei lautabu nyikei hao shangabu ai lauta?' Haoei laukei, 'Hao kho thuseibu che ki.' 18 Jehudabuei hao nyek thuan kibu maikei laubu nguhli kho haoeibu nyusibou angaba shongko maialem, 19 hobaje haoenei haosi ka phekei, 'Bukjineitham nyek thuan bukkei togo kanei laubu kasieibu shou kho ho sai? Kholonga haoei tou laibu hapta?' 20 Haoeibu nyusibouei jongaikei, 'Hao kusieibu shou hoba hao nyek thuan bukkei togo kanei ngeakei; 21 lausikei haoei tou lai kuman hapta kunei angekei, ayingsi aoei haoeibu nyek ipbukeije kunei angekei. Hao ka pheshi, hao jaishou yingkei; haoei jembu shanga laulabu.' 22 Haoeibu nyusibouei khei laukei aiyei lausi haoen Jehudabu to hatkei; aiyei Jehudabu shuongei hai yeian kikei, khei mut atei ongkei hao Messiah togo theletalonga hao sinagog ka shian sattilabu. 23 Khoei ong mut khoeibu nyusibouei laukei, 'Hao jaishou yingkei, hao ka pheshi.' 24 Hibu nyiboukei haoenei nyek thuan kiteibou kho ngabakei hoba hao to laukei, 'Nguhmai lenshi. Ho shabu mut che togo kunei ngeakei.' 25 Haoei jongaikei, 'Hao shabu mut che si ai yingkeije ngei angekei; lausikei ngei che ngeakei kho, ngo nyek thuan kiteikei hobaje tou ngei hapta.' 26 Haoenei hao to laukei, 'Haoei kato ai kumbei? Haoei kaibu nyek lai ipbukei?' 27 Haoei haoen to jongaikei, 'Ngei kan to lenan apa, hoba kanei atitku. Kanei aila ho nyibou titmangsuhta? Kankei haoeibu eik la yeimang suhta sai?' 28 Haoenei hao to nyikuko laukei, 'No haoeibu eik; kun Mosaeibu eikshuong. 29 Muhghaei Mosa to joyokei togo kunei ngeakei; lausikei ho mutje hao lakabuje kunei angekei.' 30 Mut khoei haoen to jongaikei, 'Mangpanglabu kho ho ki, khei hao lakabuje kanei angekei, khei yingasikei haoei ku nyek ipbukei! 31 Muhghaei shabu mut to atitkuta togo senei ngeakei, lausikei mut atei Muhgha to hatalonga hoba hao mangangbu kumsije, Muhghaei hao to titkuta. 32 Mut che ei ongkei nyek thuan bukbu mut la nyek khittikukei togo kao pakbu ka jauan ladangkei titan achuh. 33 Kho mut Muhgha ka aying teguje, haoei aikei tekumenkhoulabu.' 34 Haoenei hao to jongaikei, 'Khangbu ka thama no shabua bukkei. Kunto songlenlabu no ao?' Hobaje haoenei hao sinagog ka inletkei.
Soushou nyekthu
35 Haoenei hao inleta togo Jisuei titkei, hoba ladang haoei hao hapbei, haoei laukei, 'Nyi Muteibu Shou to mailemtalao?' 36 Haoei jongaikei, 'Yangbou, ngei hao to mailemlabu lele hao kho ao?' 37 Jisuei hao to laukei, 'Nyi hao hapa, hobaje tou aoei kato joyota, khohao.' 38 Haoei laukei, 'Yangbou, ngei mailemta'; hobaje haoei hao thedanga khupetkei. 39 Jisuei laukei, 'Aoyouei uhupta haoenei haplabu lele, hoba aoyouei hapta haoen nyekthubu yeilabu lele matjemla shanga ngo ho kaodak to loukei.' 40 Hao yoa kibu Pharis shuongei kho titkei hoba laukei. 'Kunkei nyekthubu sai?' Jisuei haoen to laukei, 'Kan nyekthubu teguje kan shabu tekikhoulabu. Lausikei kanei, "Kunei hapta," togo lautabu kaneibu shabu khei ong kia.'
Sanchem matjembu
1 Nguhmaia ngei kan to lenta, ao koukhum tanko sanchemto alotta lausikei lubu lam aeka nguita, hao kokbu hoba yepeibu; 2 lausikei san shuong lombouje koukhum tanko lotta. 3 Hao la koukhum lombouei ipbuta, hobaje san shuongei hao nguh titta; haoei jembueibu sanshuong nyen shenko ngata hoba leian satta. 4 Ladang haoei jembueibu pendou leibata, hao haoen thedanga paita, hobaje sanshuongei hao phai semta aiyei lausi haoenei haoeibu nguh ngekei. 5 Haoenei yenbou phai asemlabu, lausikei hao jungka lang jung satkhumlabu aishanga haoenei yenboueibu nguh kho ashenkei,' 6 Jisuei kho nguhphatbu haoen to laukei, lausikei haoei haoen to ai lautaje haoenei atiten.
Jisu Sanlombu maibu
7 Jisuei nyibou laukei, 'Maimaitham nguhmaia ngei kan to lenta, ngo sanshuong shanga koukhum. 8 Kuto shang loubu shuong pendou kokbu hoba yepeijaueibu, lausikei sanshuongei haoen to atitku. 9 go koukhum; ngo tanko atei lotsije hao khumenlabu, hobaje lotlabu hoba anglabu hoba lamshaushang haplabu. 10 Kokbuje koklangla hoba haitila hoba leilukula shanga ong louta. Mutshuongei langkeibu nahapla shanga ngo loukei, hoba ho apsileko haplabu. 11 Ngo sanlombu maibu. Sanlombu maibuei sanshuong shanga haoeibu langkei phoyikuta. 12 Mulambu mut, ao sanlombu ji ayingsi sanbuboukei aying, ladang sho che louko hapta haoei sanshuong apyita hoba wenjung satta, hobaje shoei haoen taketta hoba lintita. 13 Kho aiyei lausi hao mulambu mut hoba haoei sanshuong shanga atambuta. 14,15 Ngo sanlombu maibu, Bouei ngo lai ngekei, hoba ngei Bou lai ngekei, kho tegu ngei jembueibu ngekei, hobaje jembueibuei ngo ngekei; hobaje sanshuong shanga ngei ku langkei phoyikuta. 16 Ho sanchema ayobu ngeibu san lubu kia. Ngei haoenkei leibajan hobaje haoenei ku nguh to titlabu, hobaje haoen sanlombu che yoa sanshuong che yeilabu. 17 Bouei ngo sanouta, aiyei lausi kho nyibou hapmeilabti lele ngei ku langkei phoyikuta. 18 Aoeikei ho ku ka alangta, lausikei ngei ho ngei lulo phoyikuta. Ngei ho phoyila janbu ki hobaje ngei ho nyibou hapmeila janbu ki. Kubouei kuto ho kumla lenkei. 19 Tokei Jehudabu yoa ho nguh tanko janyinbu longkei. 20 Haoen juongei laukei, 'Hao to shabu sou kia, hoba langet angta. Kanei aila hao nguh titta?'. 21 Lubu shuongei laukei, 'Habu hoje shabu souei lapbu nguh aying. Shabu souei nyekthubu nyek khitdikula thuklep si?'
Jehudabuei Jisu wailetbu
22 Jerusalem a Sauhenbu Lem kikei. Kho puanga; 23 hoba Jisu Solomon chemso phanga lembuchema paiko kikei. 24 Jehudabuei hao kailepbei hoba hao to laukei, 'Nyi kun lalokche phenyemtila? No Messiah yingalonga kunla tou chongchingko lenbu.' 25 Jisuei haoen to jongaikei, 'Ngei kanto lena, hoba kanei maialemta. Ngei ku Bou nyena kumbu kumsileiei ku shangabu aukabu kuta; 26 lausikei kanei maialemta, aiyei lausi kan ngeibu sanshuong aying. 27 Ku sanshuongei ku nguh titta; ngei haoen ngeakei hoba haoenei kuphai semta. 28 Ngei haoen la thonakibu lang: kei kuta haoen ladangkei amaulabu, hoba aoeikei ku ikmangka haoen asolanglabu. 29 Ku Bouei ai kula kuan ki kho pendou to yangbou, hobaje aoeikei Boueibu ik ka haoen sola athukkei. 30 Bou hoba ngo che ong. 31 Jehudabuei hao to tetla nyibou lang hekei. 32 Jisuei haoen to jongaikei, 'Bou ka ngei kan la kumsilei juongnyu lena. Khubu yo ka laobou kumsilei shanga kanei kuto tetla?' 33 Jehudabu shuongei hao to jongaikei, 'Kumsilei maibu shanga kunei kato atetta, lausikei Muhgha nyikubu shanga, hobaje no mut che ong yingan, nyi lulo Muhgha la yeibu shanga.' 34 Jisuei haoen to jongaikei, "Ngei laukei, kan muhgha shuong", togo kaneibu Nguhkhuma adokei lo? 35 Haoen aoyou jungto Muhgha nguh loukei, haoei haoen to muhgha togo ngakei, hobaje Laishiba nguh sungenan apla athukkei. 36 Kholongaje, ngei "Ngo Muhgha Shou" togo laubu shanga, Bouei ao sauhenkei hoba kaodak to hautikei, hao to kanei "Nyi Muhgha nyikuta," togo lauta lo? 37 Ngei Kubou kumsilei akumlongaje kuto mai telemkai; 38 lausikei ngei khubu ktimtalonga, kanei kuto maialemasikei, Bou ku to ki hoba ngo Bou to ki togo kanei tamenlabu hoba ngelabu lele, kumsilei shuong to mailemashi.' 39 Hibu nyiboukei haoenei hao lapla haujembei; lausikei hao haoen ikmang ka satenkei. 40 Hao nyibou Jordan thi aedang Johanei shangla baptikushang to haukei, hoba hao khunei kikei. 41 Mut juong hao jungto loukei. Haoenei laukei, 'Johanei amaaphilabu ai akum, lausikei Johanei ho mut shangabu laubu pendou kho tukte ong kiteikei.' 42 Hobaje juongei hao to khun mailembei.
Lazar haibu
1 Mari si Martha habu sang Bethani kabu Lazar nyenbu shatbu mut che kiteikei. 2 Kho Bonyubao la ponlem onang nangkuan saoeibu khulouei haman apbunyu Mari, saoeibu na Lazar shatko kiteikei. 3 Hibu nounyiei hao jungto hai lauko hautikei, 'Bonyubao, kathangbou kho shatta.' 4 Ladang Jisuei kho titkei haoei laukei, 'Kho shatbu kho haibua thonlabu aying, lausikei ho tanko Muhgha Shou soneikangtila shanga ki.' 5 Jisuei Martha hoba saoeibu na hoba Lazar to sanoukei. 6 Ladang haoei hao shatta togo titkei, haoei toukei hao lan kiteikei khunei chalou nyi thungkei; 7 hobaje kho phaia haoei haoeibu eikshuong to laukei, 'Sen Judea to han ngaiakho.' 8 Eikshuongei hao to laukei, 'Lenbou, tou nyangko ong Jehudabuei kato langei tetla lameikei; no khuto nyibou hautasi?' 9 Jisuei jongaikei, 'Chalou chenei angh anthuknyi akita si? Mut che ei chaloua paialonga, aphaiyetta, aiyei lausi haoei ho kaodak ngesakbu hapta; 10 lausikei mut che ei nangnak paialonga, hao phaiyetta, aiyei lausi ngesakbu kho hao to aki.' 11 Kho lauan phaia haoei laukei, 'Sen thangbou, Lazar nyeket shiakei; lausikei ngo hao lakseptila hauta.' 12 Eikshuongei hao to laukei, 'Bonyubao, hao nyeket shikeilonga, hao mailabu. 13 Jisuei hao haibu shanga lauan kiteikei, lausikei haoei nyishoubu yepbu shanga lauta togo haoenei tambei. 14 Kheijinei Jisuei haoen la shangashatko lenkei, 'Lazar haia, 15 kanei mailemtila ngo khunei akiteibuei, ngo kan shanga olinta. Sen hao jungto hauakho.' 16 Hibu Thoma (laobou nguhtet, Phokshou') ei jambu eikshuong to laukei, 'Hao yoa hailabu lele senkei hauakho.'
Jisu kho langngeibu hoba langkei
17 Ladang Jisu loukei kheijineije Lazar hea khunan phaia chalou leibounyet yingan kikei. 18 Bethani kho Jerusalem nyangko, mail nyi thungei aoan kikei. 19 Jehudabu juong Martha si Mari jungto haosieibu na shanga mang sula louan kiteikei. 20 Ladang Marthaei Jisu louata togo titkei, sao shuokla haukei; lausikei Mari chema setteikei. 21 Kheijinei Marthaei Jisu to laukei, 'Bonyubao, no hanei kiteia teguje kuna tehaikhoulabu. 22 Ngei ngeakei, tou yinga tegukei, nyi Muhgha ka ai ong hilaje, haoei kala kulabu.' 23 Jisuei sao to laukei, 'Kana langngeilabu.' 24 Marthaei Jisu to laukei, 'Thonbu Chaloua langngeilabu jihsiphaia hao nyibou langkeilabu togo ngei ngeakei.' 25 Jisuei sao to laukei, 'Ngo langngeibu hoba langkei ki. Aoei kuto mailemta, hao haiasikei lang kilabu; 26 hobaje ao lang kita hoba kuto mailemta, hao ladangkei uhailabti. Nyi kho mailemtalao?' 27 Saoei hao to laukei, 'Hau, Bonyubao, kaodak to louko kibou, Muhgha Shou, Messiah kho no, togo ngei mailemta.'
Jisuei habbei
28 Saoei kho lauan phaia, sao ngaikei hoba saoeibu na Mari ngalangan, hakphangshoua lenkei, 'Lenbou kho nanei kia, hoba haoei no ngata.' 29 Ladang Mariei kho titkei sao tongte loenkei hoba hao jungto haukei. 30 Kheijinei Jisu sangnyu to molung, lausikei Marthaei hao hauhyoshang kaoena ong kiteikei. 31 Hibu ladang saoeibu mang suko Mari yoa chema setbu Jehudabu shuongei Mari phuhde loenan satan apbu hapbei, haoenei sao hedang to habla hauta togo taman sao phai sembei. 32 Ladang saoei Jisu junga suhlangkei hoba hao hapbei, saoei haoyou junga khupetkei hoba hao to laukei, 'Bonyubao, no hanei kiteikei teguje kuna tehaikhoulabou.' 33 Jisuei sao hoba sao yoa loubu Jehudabu shuongkei habyoko hapbei. Hao to mang leilukei hoba wangkei, 34 hobaje laukei, 'Kanei hao lanei khunkei?' Haoenei hao to laukei, 'Yangbou, louan chuhashi.' 35 Jisuei habbei. 36 Kheijinei Jehudabuei laukei, 'Haoei hao to latetche sanoukei, chuhashi!' 37 Lausikei haoen atei laukei, 'Haoei nyekthubu shuong la nyek ipbukei. Ho mut uhaitila haoei aicheje kumbu yingma lo?'
Lazar langngeitibu
38 Jisu to nyibou mangto shatko hekhun to loukei. Kho langkhun che, hoba lang che ei thangngeian kiteikei. 39 Jisuei laukei, 'Lang kho khokan apashi.' Haibueibu nou Marthaei hao to laukei, 'Bonyubao, touje mangnyaulum hilabu; hao haian chalou lei yinga.' 40 Jisuei sao to laukei, 'Nyi mailemsije nyi Muhgha soneikangbu haplabu togo ngei kala alen lo?' 41 Hibu haoenei lang kho khokan apbei; hobaje Jisuei chuhngeitikei hobaje laukei, 'Abou, nyi kuto titkubu shanga ngei ka nyen sangta. 42 Nyi kuto ponpen titkuta togo ngeikei ngeakei; lausikei hanei kaijempo loan kibu noknyuh laua khei ngo hautibou kho no yingan kikei togo haoenei mailemtila ngei ho laukei,' 43 Kho lauan phaia haoe nguh yangei ngekkei, 'Lazar, longashi.' 44 Haian kibu mut kho haoeibu mangsho nei ei kaian hobaje haoeibu thenyek lemhamnei ei yuklepan longkei. Jisuei haoen to laukei, "Mangsho nei sengkuashi hoba hao litiashi."
Jisu khulimpo huonbu
45 Hibu Jehudabu juong aoyou Mari jungto loukei, haoenei haoei kumbu hapbei, hobaje hao to mailembei, 46 lausikei haoen yoa at Pharisibu jungto haukei hoba Jisuei ai kumbei kho haoen to lenkei. 47 Hibu thukkabu ungshedbou shuong si Pharisibu shuongei Thukkabou Kambu huiletkei hoba laukei, 'Kho mutei amaaphilabu juongnyu kumta. Sen ai kumbo setla? 48 Senei hao khei apyialonga, mut pendouei hao to mailemlabu, hobaje Rombu louan seneibu lembuchem si sen phang ham leilukulabu.' 49 Haoen yo kabu mut che Kaipha nyenbu, ao khupo thukkabou ungshedbou penan kikei, haoei haoen to laukei, 'Kanei ai angekei; 50 sen phangshuong pendou shemphoulabu khantoje mutli shanga mut che haibu kho kan shanga maibou togo kaneije tamankei achuhta.' 51 Haoei ho haoeibu hauei laukei ji, lausikei khupo thukkabou ungshedbou yingbu ka, phangshuong shanga Jisu haijan, 52 hobaje phangshuong shanga ong aying, lausikei haoei aan kibu Muhgha shousi shuong chela yeiko leisheila shangabu haoei ho tetenkei. 53 Hibu khunyet ka jauan Jehudabuei Jisu haitila huonkei. 54 Hibu haoei Jehudabu yoa abongyo, lausikei khuka lamang nyangko kibu kaonyek, Ephraim nyenbu sangnyu to haukei, hoba hao khunei eikshuong yoa kikei. 55 Jehudabu Puetbulem nyangko kikei, hobaje haoen lulo sauhenla shanga kaonyek ka mut juongnyu Puetbulem thedangto Jerusalem to angkei. 56 Haoenei Jisu lameiko kikei hobaje lembuchema loan haoen si haoen hai lauyokei, 'Kanei ai tamta? Hao maimaitham Lem to aloulabu, si ai?' 57 Haoenei hao lapla shanga mut atei ongkei hao lan kije ngealonga, haoei nguhlang kujan, togo thukkabu ungshedbu shuong si Pharisibu shuongei nguhkhum kuan kiteikei.
Jisu la Bethani a onang nangkubu
1 Puetbulem suhla chalou lak kian, Jisu, haoei haibu ka langngeitibou Lazar kishang, Bethani to loukei. 2 Haoenei hao la shausiyung lamlekukei hoba Marthaei nongeikei; hobaje Lazarkei hao yoa shaushanga setbu yoa che kiteikei. 3 Mariei nam juong mubu ponlem onang thungshou che sungjung louan Jisueibu youa nangkukei hobaje saoeibu khulouei haman apbukei. Chemmang pendou onang ponlemei shenkei. 4 Judas Iskariot, haoeibu eik yoa che, aoei hao khumpo kuan apla kiteikei, haoei laukei, 5 'Aila kho ponlem onang kho sempak saongao sem lu yakan shalebu la aku?' 6 Haoei kho shalebu shanga tambubu ka aying, lausikei hao namphot ikjai kikei hoba kokbu yingsije thanbu ka haoei kokshauko kikei. 7 Jisuei laukei, 'Sao khei ong phokushi; saoei ponlem kho ngo khunbu chalou shanga naphoa; 8 aiyei lausi shalebu kan yoa ponpen kia, lausikei kan yoa ngo ponpenje akilabu.'
Lazar khulimpo huonbu takbu
9 Jehudabu mutshang yangei Jisu khunei kia togo titletkei, hobaje haoen hao shanga ong aying lausikei haoei haikhun ka langngeitibu Lazar to chuhlakei togo loukei. 10 Thukkabu ungshedbu shuongei Lazarkei haitila huonkei, 11 aiyei lausi hao hangshong Jehudabu juongei haoen wailetkei hoba
Jisu to mailembei. Jerusalem to thuk hapbo atbu
12 Nounyet Lem to loubu mutshang yangei Jisu Jerusalem to louata togo titkei; 13 hobaje haoenei hekyang pik pakkei hoba hao shuokla haukei. Haoenei hai ngekdang lekei, 'Hosana! Bonyubao nyena ao louata hao hauhlabu yingshi! Israel Choba hauhlabou ki!' 14 Jisuei gadu shoushou che hapbei hoba kho thuka setkei, lai a lenan kibu tegu, 15 'Tehut, Zion nouyang; chuhashi, kaneibu Choba, gadu shoushou chenei setan louata.' 16 Haoeibu eikshuongei shanglaje kho atiten, lausikei ladang Jisu soneikangkei, kheij inei haoenei ho hao shangabu Lai a dobu, hoba mutshuongei hao shanga kheinyu kumbei togo haoenei tamenkei. 17 Haoei Lazar hekhun ka nganko, haibu ka langngeikujinei hao yoa kibu mutshang pendouei aukabu kukei. 18 Noknyuhkei hao shuokla haukei aiyei lausi haoenei haoei kho sei kumbu titkei. 19 Pharisibu shuong che ei che to laukei, 'Kan ai hang aluong togo kanei ngeakei. Chuha, kaodak pendouei haophai sema.!'
Greekbu atei Jisu lambu
20 Lem to lemla loubu shuong yoa Greekbu at yoan kikei. 21 Haoenei Galil kabu Bethsaidabu Philip to hai sukojako phekei, 'Yangbou, kunei Jisu hapmang suhta.' 22 Philip loukei hoba Andria to lenkei. Andria si Philip louan Jisu to lenkei. 23 Jisuei haoen to jongaikei, 'Muteibu Shou Soneikanglabu jih suha. 24 Maimaitham nguhmaia ngei kan to lenta, Youli lang che kaoa shatan akhitlonga, hao lansan kita; lausikei kho khitalonga, khoei mai juongnyu hekta. 25 Aoei haoeibu langkei sanouta, kho mauta, lausikei aoei jembu langkei mangsenta kho phoenlabti hobaje thon akibu langkei haplabu. 26 Mut atei ngo khangensije, haoei kuphai semkai, hoba ngo lanei kilaje khunei ngo khangenboukei kilabu. Mut atei ngo khangensije, Bouei hao to soumo hatlabu.
Jisuei hao hailabu shanga lauta
27 Tou ku soushou to lamta, hoba ngei ai laula? Abou ho jih ka ngo khumenkai togo si? Lausikei ho shangabu ngo ho jih to loukei. 28 Abou, ka nyen soneikangtishi.' Khuthuk ka nguh che loukei, 'Ngei ho soneikangtia, hobaje ngei toukei ho nyibou soneikangtilabu.' 29 Khunei loan kibu noknyuhei kho titkei hoba kho langmak yingkei togo laukei. Atei laukei, 'Khuthuk hangangbu che ei hao to joyoa.' 30 Jisuei laukei, 'Ho nguhlang ku shanga aying, lausikei kan shanga ki. 31 Ho kaodak tou matjemta; ho kaodak songdakbou tou shian sattilabu. 32 Hobaje ngo ladang kaodak ka tonenlaje, ngei mut pendou ku jungto senbalabu. 33 Haoei kho hao aiyei hailabu yingkeije kho lenla shanga lauan kiteikei. 34 Noknyuhei jongaikei, 'Messiahje ponpen kita togo kunei Nguhkhum ka tita; kholonga nyi laibu Muteibu Shou kho tonenlabu togo lauta? Kho Muteibu Shou kho ao?' 35 Jisuei haoen to laukei, Tuisho shanga ngesakbu kho kan yoa kilabu. Nakthuhei alaphettila shanga kan ngesakbu kijinei paiashi; ao nakthuh phanga paita haoei hao lae hautaje angeta. 36 Ladang kanei ngesakbu kita, kan ngesakbu shousi shuong la yeila shanga, ngesakbu to mailemashi.'
Jehudabu maialemenbu mangbon
37 Jisuei kho lauan phaia hao satkei hobaje haoen la hukukei. 37 Haoei haoen thedanga tetsita juongnyu kumasikei haoenei hao to maialem, 38 khoei Isaiah thuseibuei laubu nguh ho loushedla kiteikei, 'Bonyubao, kuneibu ngtihlang aoei mailembei? Hoba ao to Bonyubao hau tangkhitkei?' 39 Haoenei maialemen, aishanga Isaiahei toukei lauakei, 40 'Haoei haoeneibu nyek thutiakei, hoba haoeneibu mangbon ngoutiakei. Haoei kheinyu akum teguje haoenei haoeneibu nyekei haplabu, haoeneibu mangbonei titenlabu, hoba sepeilabu, hoba ngei haoen maitikulabu.' 41 Isaiahei ho laukei aiyei haoei Jisu soneikangbu hapbei hoba hao shanga lauko kikei. 42 Khei yingasikei, leiyeibu yoan juongei hao to mailembei, lausikei sinagog ka shian sattisi amailabti togo Pharisibu to hatbuka haoenei atheku; 43 aishanga haoenei Muhgha nyensang toje muteibu nyensang bouje sanoukei.
Jisueibu nguhei matjembu
44 Jisuei ngekkei, 'Aoei ku to mailemta kuto mailemta aying lausikei ngo hautibou to mailemta; 45 hobaje ngo aoei hapta haoei ngo hautibou hapta. 46 Ngo ngesakbu ki, hobaje kuto mailembuje aokei nakthuha akilabu shanga ngo kaodak to loukei. 47 Mut atei ku nguh titan ajungeilonga ngei haomat ajemta; aishanga ngo kaodak matjemla aying, lausikei kaodak khumenla loukei. 48 Aoei ngo asungletlaje hoba ngeibu nguh asungletta haoei matjem che kia. Ngei laubu nguhlang hoei ong hao thonbu chaloua mat jemlabu; 49 aishanga ngei jembu hauei alau, lausikei ngo hautibou, Bouei, ngei ai laula hoba lenla kho nguhkhum kukei. 50 Haoeibu nguhkhum tetlabu thon akibu langkei togo ngei ngeakei. Bouei kuto ai lautila lenkei ngei kho ong lauta.'
Jisuei haoeibu eikshuong you sakkubu
1 Ho Puetbu Lem thedangto kikei. Jisuei haoeibu langkei ho kaodak ka Bou jungto banglabu jih lousuha togo ngekei. Haoei kaodaka kibu haoeibu tan to sanoukei, hoba haoei haoen thonbua suhko sanoukei. 2 Simon Iskariot shou, Judas ei hao khumpomeiko kuan aplabu togo Sataneije janenan kiteikei. Nyakshaujinei 3 Jisuei, Bouei ajanjan pendou haoeibu ikmanga kuan apa, hoba hao Muhgha ka loukei hoba Muhgha jungto hauta togo ngean, 4 nyakshaushang ka loenkei, haoeibu neisimei sauan phokei, hoba lemhamnei che sungban haoeibu manga shenkei; 5 kheijinei haoei deithunga dei yeikei hoba eikshuongeibu you sakkuan, haoei shenjanga shenan kibu lemhamnei ei haman apbula khangkei. 6 Hao Simon Peter junga suhlangkei. Peterei hao to laukei, 'Bonyubao, nyi ku you sakkula kumta si?' 7 Jisuei hao to jongaikei, 'Ngei ai kumta kho nyi touje angekei; lausikei nyi haphaia titenlabu.' 8 Peterei hao to laukei, 'Nyi kuyou ladangkei asaklabu!' Jisuei hao to jongaikei, 'Ngei no asakkulonga, no ku yoa ai phejan aki.' 9 Simon Peterei hao to laukei, 'Bonyubao, ku you ong ayingko ku ik si ku khukei sakbuma.' 10 Jisuei hao to laukei, 'Aoei mang yua, you to limanje aikei saklabu aki, lausikei hao mang khumpo saopoakei; hoba kan saopoakei, lankei kan pendou thamje ji; aishanga haoei hao khumpo yakshaulabu mut kho ngean kiteikei. 11 Khoei haoei laukei, 'Kan pendouje asaopokei.' 12 Ladang haoei haoeneibu you sakkhumbuan haoeibu neisimei lekei hoba nyibou setkei, haoei haoen to laukei, 'Ngei kan shanga ai kumbei kho kanei titena lo? 13 Kanei kuto Lenbou hoba Bonyubao togo ngata, hoba kanei kho laujana lauta, aishanga ngo kho ki. 14 Kholongaje, ngo kaneibu Bonyubao si Lenbouei kaneibu you sakkukei longa, kaneikei che ei che eibu you sakkujan. 15 Aiyei lausi ngei kan shanga kumbu tegu, kaneikei khei kumjan togo ngei kanla tetsita lena. 16 Maimaitham nguhmaia ngei kan to lenta, au che kho haoeibu bonyu to yangbou ayingsi hautibu kho hautibou to yangbou aying. 17 Kanei ho ngean kanei jungeialonga, kan olinbou. 18 Ngei kan pendou shangabu alauta. Ngei ao pienkeije ngei ngeakei. Lausikei Lai nguh ho naloushed, "Aoei ku shausiyung shauta haoei khupeian kukhu limpei." 19 Ladang ho loushedlaje kheijinei kanei ngo kho hao togo mailemtila shanga, ho uhauthukjinei ngei kanla tou lenteita. 20 Maimaitham ngei kanla lenta, aoei ngei hautibou sungletlaje haoei ngo sungletta, hoba aoei ngo sungletta, haoei ngo hautibou sungletta.'
Jisuei hao hailabu lenteita
21 Jisuei kho lauan phaia hao to mangto shatbu lilitham loukei hoba tangkhitko laukei, 'Maimaitham nguhmaia ngei kan to lenta, kan yo kabu che ei ngo khumpomeiko kuan aplabu.' 22 Eikshuongei che ei che to chuhyo khupbei, aiyei lausi haoen ao to lautaje haoenei ashoken. 23 Haoeibu eikshuong yoa che, Jisuei ao to sanouta, hao kho nongyoan Jisu thena setan kiteikei. 24 Simon Peterei hao to nyek sheman lenko, haoei ao shanga lautaje kho phela shanga laukei. 25 Auan setbu yam, haoei Jisueibu khukua nongngeilangan hao to laukei, 'Bonyubao kho ao?' 26 Jisuei jongaikei, 'Ngei ho wentek phaua haman aola kulaje kho mut yinglabu.' Kheijinei haoei wentek che phaua haman sungenkei hoba Simon Iskariot shou Judas la kukei. 27 Ladang haoei kho shaukei, Satan hao to atkei. Jisuei hao to laukei, 'Nyi ai kumlaje, tongte kumashi.' 28 Haoei aila hao to khei laukeije khun setbu shuong aoeikei ange 29 Senei Lem shanga ai khamtaje jekashi ayingsi, haoei shalebu la aicheje kujan togo lauta lembo ateije tambei. 30 Hibu haoei wentek kho shauan phaia hao wenjung satkei. Kho nangnak kikei. Nguhkhum hanbu 31 Judas satan phaia Jisuei laukei, 'Tou Muteibu Shou soneikanga, hoba hao to Muhgha soneikanga, 32 Muhgha hao to soneikanga longa, Muhghaeikei hao jembu yoa sonei kangtilabu, hobaje haoei kho toutham kumlabu. 33 Ku shousi shuong, touje ngo kan yoa tuisho ong kilabu. Kanei ngo lameilabu, hobaje "Ngo laeto haulaje kanei alouenlabu," togo ngei Jehudabu to laukubu. tegu, toukei ngei kanlakei lenta. 34 Ngei kan la nguhkhum hanbu che kuta: Kanei jenabou si jenabou sanouyoshi; ngei kan to sanoubu tegu jenabouei jenabou to sanoushi. 35 Kan jenabouei jenabou to sanoubu tanko kan ngeibu eikshuong togo pendouei ngelabu.'
Peterei athekuenlabu shanga Jisuei lenteibu
36 Simon Peterei hao to laukei, 'Bonyubao no lato hauta?' Jisuei jongaikei, 'Ngo laeto hautaje nyi tou kuphai semla athukkei, lausikei nyi phaia semenlabu,' 37 Peterei hao to laukei, 'Bonyubao, ngei aiyei kaphai tou asemenla? Ngei ka shanga ku langkei phoyikulabu.' 38 Jisuei jongaikei, 'Nyi ku shanga kaibu langkei phoyikulep si? Maimaitham nguhmaia ngei kato lenta, 'Nyi ngo angekei togo semne alau shongko aunakei akoulabu.'
Jisu Bou Jungto lamnyu
1 Kaneibu mangbon teleilu. Muhgha to mailemashi; kutokei mailemshi. 2 Kubou chema kishang juongnyu kia. Khei aying teguje, ngo kan shanga kishang lamlekula hauta togo lenlep si? 3 Hobaje ngo hauan kan shanga kishang lamlealonga, ngo nyibou longeilabu, hobaje ngo lanei kilaje khunei kankei kilabu lele ngei kan ku jungto leilanglabu. 4 Ngo lato hautaje kanei lam kho ngeakei.' 5 Thomaei hao to laukei, 'Bonyubao, no laeto hautaje kunei angekei; kunei lam kho lai ngekei?' 6 Jisuei hao to laukei, 'Ngo lamnyu, nguhmai hobaje langkei. Ngo atankoje aokei Kubou jungto alouta. 7 Kanei ngo ngea teguje, kanei Kuboukei ngelabu. Tou ka jauan kanei hao ngea hoba hao hapa.' 8 Philipei hao to laukei, 'Bonyubao, kunla Bou lenbu, kholonga kun khoei soua.' 9 Jisuei hao to jongaikei, £Philip, ngo kan pendou yoa halokche kita lausikei kanei ngo angekei lo? Aoei ngo hapa haoei Boukei hapa. Aila kanei, "Kunla Bou lenbu," togo lauta? 10 Ngo Bou to kita hobaje Bou kuto kita togo kanei maialemta lo? Ngei kan pendou to ai lenta ngei ngeibu jembu hauei alauta; ho ku to kibu Bou ki hoba haoeibu jembu kumsilei kumta. 11 Ngo Bou to ki hobaje Bou kuto ki togo kuto mailemkai; khei ayingsikei, kumsilei shanga ongkei mailemshi. 12 Maimaitham nguhmaia ngei kan to lenta, 'Aoei kuto mailemtaje haoeikei ngei kumpo kibu kumsilei kumlabu aishanga ngo Bou jungto hauta; 13 hobaje kanei ku nyena ai ong hilaje, Shou to Bou soneikangtilabu shanga ngei kumlabu. 14 Kanei aiche shanga ongkei ku nyena hialonga ngei kho kumbulabu.
Soushou Saopobu Thekubu
15 Kanei kuto sanoualonga kanei ku nguhkhum jungeilabu; 16 hobaje ngei Bou to hilabu hobaje ponpen kan yoa kilabu lele haoei kan la lubu Thuibou che kulabu, 17 kho nguhmai soushou, ao kaodakei asungletenta, aiyei lausi kaodakei hao ladangkei uhupta ayingsi angeta. Kanei hao ngeakei aishanga hao kan yoa kita hoba kan to ki. 18 'Ngei kan litham upyilabu, ngo kan jungto louata. 19 Longche kian kaodakei ngo touje uhuplabu, lausikei kanei ngo haplabu. Aiyei lausi ngo lang kia, kankei lang kilabu. 20 Khunyet kanei ngo kubou to, khei, kan kuto hoba ngo kan to kita togo kanei ngelabu. 21 Aoei ku nguhkhum ngeta hoba khubu jungeita haoei kuto sanouta; hobaje aoei kuto sanouta hao Kubouei sanoulabu, hobaje ngei hao to sanoulabu hoba ngo lulo hao to tangkhitlabu.' 22 Judas (Iskariot jiko lubu che) ei hao to laukei, 'Bonyubao, ailaibu no kaodak toje tang akhitko, kun to ong tangkhitla?' 23 Jisuei hao to jongaikei, 'Mut atei kuto sanoualonga haoei ku nguh jungeilabu, hobaje ku Bouei hao to sanoulabu, hobaje kusi hao jungto loulabu hoba hao yoa kilabu. 24 Aoei kuto asanouta haoei ku nguh ajungeita; hobaje kanei titbu ho ku nguh ji, lausikei ngo hautibou Boueibu nguh ki. 25 'Ngo kan yoa kijinei ngei habu nguh ho kan to laukua; 26 lausikei Thuibou, Soushou Saopobu ao Bouei ku nyena hautilabu ki, haoei kan la pendou lenlabti hoba ngei kan to laubu pendou tamentilabu. 27 Hakso, ngei kanla bangbu jongsak apyikuta, kaodakei kubou kheibu aying lausikei ngeibu hakso ngei kanla kuta. Kaneibu mangbon teleilu; tehut. 28 Ngei kan to, "Ngo hauan apta, hoba ngo kan jungto nyibou longeilabu," togo laubu kanei tita. Kanei kuto sanousije ngo Bou jungto hautabu kanei olinlabu, aiyei lausi Bou kuto yangbou ki. 29 Ho ladang loushedlaje kheijinei kanei mailemlabu shanga, ho mohauhthukjinei ngei kan to toutham lena. 30 Ngei touje kan to lalok ajoyolabu, aishanga kaodak songdakbou kho louata. Lausikei hao ku thuka ai hau aki; 31 habu pendou kho khei ngei Bou to sanouta hoba ngei Bouei kula nguhkhum kubu tegu kumta togo kaodakei ngelabu shanga ong ki. Meimeiashi, sen haka satakho.
Jisu tuktebu semluh
1 Ngo tuktebu semluh, hobaje ku Bou kho moubou ki. 2 Kuto kibu laobou pheka ong eheklaje haoei kho wapan apta, hobaje aei hektila shanga laobou pheka ong mai heklaje kho sauhenkuta. 3 Ngei kan to laubu nguhei touje kan sauhenakei. 4 Kuto kishi hobaje ngo kan to kikho. Semluh li to akibu phekei lai jembu lulo mai hekla athuk, kho tegu kaneikei kan kuto akilonga mai hekla athuk. 5 Ngo semluh long; kan phek. Ao kuto kian ngo hao to kita, haoei mai juong hekta, aiyei lausi kuka bangan kanei ai akumen. 6 Atei kuto akilonga hao phek tegu apta hoba linta. Khubu phek shuong kho yosheian wan to jinan jikan apta. 7 Kan kuto kialonga hoba ku nguh kan to kialonga, kanei ai ong mangsuhtaje hiashi hobaje ngei kho kanla kumbulabu. 8 Kanei mai juongnyu hekko hoba kan tuktebu ngeibu eikshuong togo lenenbu tanko Kubou soneikangta. 9 Bouei kuto ailai sanoukei kho tegu ngeikei kan to sanoukei. Ngeibu sanoua kishi. 10 Ngei ailai Kuboueibu nguhkhum jungeikei hobaje haoeibu sanoua kikei, kho tegu kanei ku nguhkhum jungeialonga kan ngeibu sanoua kilabu. 11 Ngeibu olinbu kan to kilabu hoba kaneibu olinbu benbusoubti yeila shanga ngei ho kan to lenta. 12 Ho ku nguhkhum ki, khei ngei kan to lai sanoukei kho tegu kan che ei che to sanouyoshi. 13 Mut che ei hao thangbou shuong shanga jembu langkei phoyikulabu to liman lubu sanou yangbu aki. 14 Ngei kan la ai sakkuta kho kanei kumalonga kan ku thangbou shuong ki. 15 Ngei touje kan to sambu togo angata, aishanga haoeibu bonyuei ai kumta kho sambuei angekei; lausikei ngei kan to thangbou shuong togo ngata, aishanga ngei Kubou ka titbu pendou ngei kanla ngedia. 16 Kanei ngo apien. Kanei hauan mai juongnyu, khei sungshonbu mai hektila shanga, ngei kan heenkei; hibu kanei Bou ka ku nyena aishanga ong hilaje kho haoei kanla kulabu. 17 Ngei kan la ho nguhkhum kuta: jenabouei jenabou to sanouyoshi.
Kaodakei mangsenbu
18 'Kaodakei kan mangsenalonga, kan to amangsenjinei thama hoei ngo mangsenkei togo kanei ngeashi. 19 Kan kaodakeibu teguje, kaodakei jembueibu to sanoulabu. Kaodakei kan mangsenta aiyei lausi kan kaodakeibu aying. Ngei kan kaodak ka pienkei. 20 "Au che kho haoeibu bonyu to yangbou aying," togo ngei kan to ai laukei kho tamenashi Haoenei ngo shieikoekei longaje, haoenei kankei shieikoelabu; haoenei ku nguh titalonga, haoenei kaneibu nguh kei titkulabu. 21 Lausikei haoenei khubu pendou ku nyena kan to kumlabu, aiyei lausi haoenei ngo hautibou kho angekei. 22 Ngo louan haoen to ajoyo teguje, haoen shabu teyingkhoulabu; touje haoeneibu shabu shanga haoen satenshang aki. 23 Aoei ngo mangsenta haoei ku Boukei mangsenta. 24 Ngei haoen yoa lubu aoeikei akumbu kumsilei habu akum teguje, haoen shedbu teyingkhoulabu; lausikei haoenei kukum kulei hapa hobaje Kubou kusi ham mangsenkei. 25 Hibu haoeneibu Nguhkhuma doan kibu nguh ho loushedjan, "Ai ayingbua haoenei ngo mangsenkei." 26 'Ladang ngei Bou ka hautibu Thuibou loulaje, Bou ka laobou nguhmai Soushou, haoei ku shanga aukabu kunlabu; 27 kankei ngeibu aukabu shuong ki aiyei lausi kan khangbu ka jaun ku yoa kikei.
1 'Kan aphaiyettila shanga ngei kan la khubu nguh lenkei. 2 Mutshuongei kan sinagog ka shian sattilabu. Maimaitham aoei ong ladang kan haitilaje haoei songle kumsilei kumta togo tamlabu jihsiphai che louata. 3 Haoenei kho ktimlabu aishanga haoenei Bou ayingsi ngokei angekei. 4 Ladang khubu hauhthuklabu jihsiphai lousuhlaje, ngei khubu shanga kanla lena togo kanei tamenla shanga ngei khubu kho kanto lena. Soushou Saopobu kumsilei Ngei khanglaje kan to habu alen, aiyei lausi ngo kan yoa kikei. 5 Lausikei ngo tou ngo hautibou jungto ngaita, hobaje kan aoeiche ongkei, "No lato hauta," togo aphe; 6 Lausikei ngei khubu lenabti mangmauei kaneibu mangbon shena. 7 Khei yingasikei ngei kan to nguhmaia lenta: ho kan mailayangla shanga ngo hauan apjan, aishanga ngo hauan uplonga, kan jungto Thuibou kho aloulabu; lausikei ngo ngaialonga ngei hao kan jungto hautikulabu. 8 Hao ladang loulaje haoei kaodakbula shabu, saopobu hobaje matjembu shanga ngtihtet lenlabu, hobaje mut kho latetche shabu, kho aukabu kulabu. 9 Haoei haoen la kuto maialembu kho shabu togo lenlabu. 10 Haoei ngeibu saopobu aukabu kulabu khola ngo Bou jungto hauta, khola kanei ngo touje uhuplabu. 11 Haoei matjembu kho lousuha togo aukabu kulabu, khola ho kaodakbti songdakbou kho mat jeman apa. 12 Ngei toukei kan to juong lenlabu jouakei, lausikei kanei kho touje anatenlabu; 13 lausikei ladang hao nguhmai Soushou, loulaje haoei kan nguhmai pendou to leilabu, aishanga haoei jembu hauei alaulabu, lausikei haoei ai ong titta haoei laulabu, hobaje haoei kan la loulabu kibu shanga lenlabu. 14 Haoei ngo soneikangtilabu aiyei lausi haoei kanla ai lenlaje kho haoei ngeibu ka lelabu. 15 Boueibu ai ong kho pendou ngeibu; khoei ngei, haoei kanla ai lenlaje kho haoei ngeibu ka lelabu, togo laukei.
Mangshat hoba olinbu
16 'Longche kian kanei ngo touje uhuplabu; toukei longche kian kanei ngo haplabu.' 17 Haoeibu eikshuong atei at to laukei, 'Haoei sen to, "Longche kian phaia kanei ngo uhuplabu; toukei longche kian phaia kanei ngo haplabu" hobaje "Aishanga ngo Bou jungto hauta," togo laubu tetlabu ai?' 18 Hibu haoenei laukei, 'Haoei, "Longche kian phaia," togo laubu kho ai tetlabu? Haoei ai lautaje kunei angekei.' 19 Jisuei haoenei hao to phemang suhbu kho ngeenkei hoba haoen to laukei, 'Kan yoa aishangabu pheyota? Ho ngei, "Longche kian phaia kanei ngo uhuplabu; toukei longche kian phaia kanei ngo haplabu," togo laubu shangabu sai? 20 Maimaitham nguhmaia ngei kan to lenta, kanei habyolabu hobaje manghablabu, lausikei kaodakei olinlabu; kan mangto shatlabu, lausikei kaneibu mangshat kho olinbula yeilabu. 21 Ladang yaksa che ei na bukta, sao to mangmauei shatta aiyei lausi saoeibu jih suha; lausikei ladang saoei na kho buktaje, kaodak to mut che bukbu olinbuei saoei sao khonkubu kho touje atamenta. 22 Kankei tou mangmau kia; lausikei ngei kan nyibou haplabu, hobaje kaneibu mangbon olinlabu, hobaje aoeikei kaneibu olin kan ka asolanglabu. 23 Khtinyet kanei kuto aikei aphelabu. Maimaitham nguhmaia ngei kan to lenta, kanei Bou ka ku nyena aiche ongkei hialonga haoei kan la kho kulabu. 24 Tou suhko kanei ku nyena aikei ihikei; hiashi hoba kanei haplabu, khei yingsije kaneibu olin benbusoubu yeilabu. Kaodak thuka thukenbu 25 'Ngei habu ho kanto nguhtetei ong joyoa. Ngei kan to ho tegubuei alaulabu, lausikei ngei Bou shangabu kan to shangshenko lenlabu jihsiphai che lousuhata. 26 Kho chaloua kanei ku nyena Bou ka phelabu, hobaje ngei kan nyena Bou ka phekulabu togo alauta; 27 aishanga Bouei jembu lulo kan to sanouta, aiyei lausi kanei ngo sanoukei hoba ngo Muhgha ka loukei togo kanei mailembei. 28 Ngo Bou ka loukei, hoba ngo kaodak to loukei; nyiboukei ngei kaodak apyita hoba ngo Bou jungto hauta.' 29 Haoeibi! eikshuongei laukei, 'Chuha! Nyi touje nguhtetei ayingko shangshenko lauta. 30 Nyi pendou ngeakei hoba aoeikei kaka phelabu kumsilei aki togo kunei ngeta; kho tanko no Muhgha ka loukei togo kunei mailemta.' 31 Jisuei haoen to jongaikei, 'Kanei touje mailemta lo? 32 Chuhashi, kan mutpem weko lulu chem to alabu hobaje kanei ku mutpem apyilabu kheibu jihsiphai che loutahoba kho lousuha;. khei yingasikei ngo ku mutpem aying, aiyei lausi Bou kho ku yoa ki. 33 Ku to kanei hakso hapla shanga ngei khubu kho kanto laua. Kaodaka kan khonsak khonku kilabu. Lausikei mang khaiashi, ngei kaodak thukena.
Jisuei hao eikshuong shanga weloukubu
1 Jisuei khubu laukei. Hobaje haoei khuthuk to chuhantikei hoba laukei, 'Abou, jihsiphai lousuha; shouei no soneikangtilabu lele, kashou soneikangtikai; 2 aishanga nyi hao la kubu pendou la thon akibu langkei kulabu lele nyi hao la khunak shousi pendou thuka hau kuan phoakei. 3 No, tuktebu Muhgha che, hoba nyi hautibou Jisu Khrista ngelabu ho thon akibu langkei ki. 4 Nyi kula nongkubu kumsilei wantibu tanko ngei ho kaodaka no soneikangtia. 5 Tou, O Abou, kaodak moyaujinei kiteibu soneikangbuei nyi ngo ka yoa soneikangtikai. 6 Kaodak ka nyi kula kubu mutshuong to ngei ka nyen tangkhittia. Haoen kaibu kiteikei, nyi haoen kula kukei, hobaj e ka nguh titta. 7 Nyi kula kubu ajanjan pendou kaka louta togo haoenei touje ngeta; 8 aiyei lausi nyi kula kubu nguh shuong ngei haoen la kua, hoba haoenei khubu sungleta, ngo kaka loukei togo haoenei tvikte titleta, hobaje nyi ngo hautikei togo haoenei mailema. 9 Ngei haoen shanga welouta; ngei kaodak shanga awelouta, lausikei nyi kula kubu shuong shanga weloukuta, aishanga haoen kaibu ki. 10 Kaibu pendou ngeibu, hobaje ngeibu pendou kaibu ki, hoba ngo haoen to soneikanga. 11 Ngo touje kaodaka aki, lausikei haoen kaodaka kia, hobaje ngo kajungto louata. Saopobu Abou, haoenkei seti tegu che ong yingtila shanga, nyi kula kubu ka nyen hauei haoen hatlepshi. 12 Ngo ladang haoen yoa kikei, nyi kula kubu ka nyen hauei ngei haoen hatlepbei, hoba ngei haoen lombei, hobaje Lai loushedlabu lele, maula tetbu che to liman, haoen aokei amau. 13 Tou ngo kajungto louata, hoba haoenei ngeibu olin benkosouko haplabu lele ngei ho nguh kaodaka lauta. 14 Ngei haoen la kaibu nguh kua, hobaje kaodakei haoen mangsenkei, aiyei lausi ngo lai kaodakeibu aying kho tegu haoenkei kaodakeibu aying. 15 Nyi haoen kaodak ka sunglangashi togo ngei asuajata, lausikei nyi haoen amaibou ka puetashi togo sutajata. 16 Ngo lai kaodakeibu aying kho tegu haoenkei kaodakeibu aying. 17 Haoen nguhmaia sauhenkushi. Kaibu nguh kho nguhmai ki. 18 Nyi ngo kaodak to hautibu tegu, ngeikei haoen kaodak to hautia; 19 hobaje haoenkei nguhmaia sauhenlabu lele, ngei ngo lulo haoen shanga sauhenta. 20 'Ngei habu shuong shanga ong aying lausikei haoeneibu nguh tanko kuto mailembu shuong shangakei welouta. 21 Abou, haoen pendou che ong yeitishi; nyi ngo hautikei togo kaodakei mailemtila, no kuto hoba ngo kato kibti tegu haoenkei seti to kitishi. 22 Seti lai ki kho tegu haoenkei che ong yeitila shanga, nyi laobou soneikangbu kula kua, kho soneikangbu nyi haoen la kua; 23 ngo haoen to hoba no kuto kibu tanko haoen che ong yeilabu, khei yingsije nyi kuto sanoubu tegu haoentokei sanouta togo kaodakei ngelabu; 24 'Abou, haoen nyi kula kukei hoba nyi haoen, ngo lanei kije khunei kitimang suhta, khei yingsije haoenei nyi kula kubu ngeibu soneikangbu haplabu, aiyei lausi kaodak moyaujineithama nyi kuto sanoukei. 25 Saopobu Abou, kaodakei no angeenkei, lausikei ngei no ngeakei, hoba habu mutshuongei nyi ngo hautikei togo ngeakei. 26 Nyi haoen la ka nyen ngedia, toukei ho ngedilabu; hobaje laobou sanouei nyi ngo sanoua kho haoen to kilabu, hoba ngo haoen to kilabu.'
Jisu lapbu
1 Ladang Jisuei khubu nguh laukhumbei, hao haoeibu eikshuong yoa Kidron shumang tanko haukei. Khunei bamang che kikei, khuto hao hoba haoeibu eikshuong haukei. 2 Judas, aoei hao khumpo kuan aplabu kiteikei, haoeikei kho kaoen ngean kikei aiyei lausi Jisuei hanghangko khunei hao eikshuong to hauhyoko kikei. 3 Judas ei thukkabu ungshedbu shuong si Pharisi shuong ka shetenbu sepai si lombu tan che leibakei hobaje wanthung, hantin hoba in si aupu jungan khuto loukei. 4 Jisuei hao la hauhthuklabu pendou ngean, longkei hoba haoen to laukei, 'Kanei ao lamta?' 5 Haoenei hao to jongaikei, 'Nazarethbu Jisu.' Haoei haoen to laukei, 'Ngo hao'. Judas, aoei hao khumpo kuan apbei, hao haoen yoa loan kiteikei. 6 Ladang Jisuei haoen to, 'Ngo hao' togo laukei, haoen phai sukkei hobaje kaoa tuongkei. 7 Hibu haoei haoen ka nyiboula phekei, Kanei ao lameita?' Haoenei laukei, 'Nazarethbu Jisu.' 8 Jisuei jongaikei, 'Ngo hao yingkei togo ngei kan la lena. Kanei ngo lamta longa, habu mut shuong ngaitiashi' 9 ho, 'Nyi kula kubu ka ngei aokei amauti,' togo haoei laubu loushedla yingan kiteikei. 10 Simon Peterei inlou che kiteikei, kho setenkei, hoba thukkabou ungshedbou sambu che to wapbei, hoba haoeibu mae nou shipan apbukei. Kho sambueibu nyen Malka kikei. 11 Jisuei Peter to laukei, 'Kaibu inlou kho mepoua shouashi.' Thung laobou Bouei kula kua, kho ngei ayunglep lo? Jisu Ana thedanga 12 Kheijinei shetenbu sepai shuong, hajar thukkabou hobaje Jehudabu lombu shuongei Jisu lapbei, hoba hao khuhkei 13 hobaje shangla hao Ana jungto leian haukei, aishanga hao kho, khupo thukkabou ungshedbou benbou Kaipha eibtikounyangbou kiteikei. 14 Ho Kaiphaei, mutli shanga mut che haijan togo Jehudabu la huon lenko kikei. 15 Simon Peter si lubu eik che ei Jisu phai sembei. Kho eik kho thukkabou ungshedbouei ngean kikei hoba hao Jisu yoa thukkabou ungshedbou sangchimang to atkei. 16 Lausikei Peterje khonga koukhun junga loan kiteikei. Hibu lubu eik, ao thukkabou ungshedbou to ngeyoan kikei, hao louan koukhun a kibu yaksa to joyokei hobaje Peter leiyetkei. 17 Saoei Peter to laukei, 'Nokei ho muteibu eik yoa che sai?' Haoei laukei, 'Ngoje aying.' 18 Sambu si lombu shuongei khambu ka wankak jikan wan metkei, hoba haoen khunei kham sepbo loan kikei. Peterkei khunei haoen yoa kham sepbo lokei.
Ungshedbouei Jisu ka nguh phebu
19 Thukkabou ungshedbouei Jisu ka haoeibu eikshuong hoba haoeibu lenbu shanga phekei. 20 Jisuei hao to jongaikei, 'Ngei kaodak to tangkhitko laua. Ngei ponpendou Jehudabu pendou yosheishang sinagog si lembu chema lenkei, hoba ngei huphanga ai alau. 21 Kuto aila phcta? Ngei haoen to ai laukeije titbu shuong to pheashi. Ngei ai laukeije haoenei ngekei.' 22 Ladang haoei kho laukei, loan kibu lombou yoa che ei, 'Nyi thukkabou ungshedbou to hai jongaijan si?' togo lauko Jisueibu thenyek to ipbei. 23 Jisuei hao to jongaikei,' Ngei mashukan lauan kisije mashukbu aukabu kuashi; lausikei janbu yingalonga, aila kuto ngumta?' 24 Anaei hao khuhan thukkabou ungshedbou Kaipha jungto litikei.
Peterei nyiboukei Jisu athekuenbu
25 Simon Peter kham sepbo loan/ kikei. Haoenei hao to laukei, 'Nokei haoeibu eikshuong yoa che sai?' Haoei kho athelet: haoei laukei, 'Ngoje aying.' 26 Peterei nou shipan apbubou chempen, thukkabou ungshedboueibu sambu yoa che ei laukei, 'Ngei ho bamanga hao yoa uhupou si?' 27 Toukei Peterei kho athelet, hobaje khoyam aunak koukei.
Jisu Pilat thedanga
28 Haoenei Jisu Kaipha chem ka governor chem to leian haukei. Kho langngelamto yingan kikei. Haoen atot akhonyoko Puetbulem shauenlabu shanga haoen chemmang toje ut. 29 Hibu Pilat haoen jungto khongto angkei hobaje laukei, 'Ho khulimpo kanei ai shedbu sungbata?' 30 Haoenei hao to jongaikei, 'Ho mut ho ashedayautibu mut che teguje, kunei ho kala khumpo tekukhoulabou.' 31 Pilatei haoen to laukei, 'Hao kanei lulo leilangashi, hoba kaneibu nguhkhuma kibu tegu hao mat jemashi. 31 Jehudabuei hao to laukei, 'Kunla aokei haitila asakkukei.' 32 Kho Jisuei hao ai haiei hailabu shanga lenkei kho loushedla yingan kiteikei. 33 Pilat chemmang to ngaikei, Jisu ngakei hoba hao to laukei, 'No Jehudabu Choba sai?' 34 Jisuei jongaikei, 'Nyi ho no lulo lauta si, ayingsi atei ku shangabu kato lenkei?' 35 Pilatei jongaikei, 'No Jehudabu si?' Kaibu jembu phang hoba thukkabu ungshedbou shuongei no kula khumpo kuan apbei. Nyi ai kumbei?' 36 Jisuei jongaikei, 'Ku sangle ho kaodak ka alouta. Ku sangle ho kaodak ka loukei teguje, ngo Jehudabu la khumpo kuan uptila shanga ngeibu sambu shuongei wapyokhoulabu; lausikei ngeibu sangleje ho ka loukei aying. 37 Pilatei hao to laukei, 'Kholonga no choba lo?' Jisuei jon gaikei, 'Ngo choba che togo nyi lauta. Ngo nguhmai shanga aukabu kunla bukkei hoba kho shangabu ngo ho kaodak to loukei togo ngei lauta. Aoyou nguhmaieibu ki haoenei ngeibu nguh tita.' 38 Pilatei hao to laukei, 'Nguhmai kho ai?'
Jisu haitila kubu
Haoei kho lauan phaia hao nyibou Jehudabu jungto angkei haoba haoen to laukei, 'Ngei ho mut to ai shedbu uhupenta; 39 lausikei Puetbulema ngei kan shanga mut che litikula kho kaneibu songa ki. Ngei kan la Jehudabu choba kho litikula kanei mang angasao?' 40 Haoenei ngekyoko laukei, 'Hao aying lausikei Baraba.' Baraba kho kokbu che kikei.
1 Kheijinei Pilatei Jisu leilangan ngumtikei, 2 hobaje sepai shuongei jakei choba khun che yikkei hobaje haoeibu khua hankukei, hobaje haoenei hao la nakthungan sakbu nei che neikukei. 3 Hobaje haoenei hao jungto louan, 'Salangko kishi, Jehudabu Choba!' togo laudang lekei, hobaje haoenei haoeibu thenyek to ipbo lekei. 4 Pilat tangto nyibou angkei hobaje Jehudabu shuong to laukei, 'Chuhashi, ngei hao to ai shedbu achuhenta togo kanei ngela shanga ngei hao kan jungto leian longkuta.' 5 Hibu Jisuei jakeibu khun hanan hoba nakthungan sakbu nei neian longkei. Pilatei haoen to laukei. 'Chuhashi, ho mut yingkei.' 6 Ladang thukkabou ungshedbu hoba lombu shuongei hao hapbei, haoenei, 'Hao peiseia thungashi! Hao peiseia thungashi!' togo ngekkei. Pilatei haoen to laukei, 'Kanei hao leilangan kanei lulo hao peiseia thungashi; aiyei lausi ngei haoto aikei shedbu uhupenta.' 7 Jehudabuei hao to jongaikei, 'Kunei nguhkhum che kia, hoba kho nguhkhum songei hao haijan, aiyei lausi haoei lulo hao Muhgha Shou la yeikei.' 8 Ladang Pilatei kho nguh titkei hao aeibou hatkei, 9 hobaje hao chemmang to atngeikei, hoba Jisu to laukei, 'No laka loukei?' Jisuei hao to ai ajongai. 10 Pilatei hao to laukei, 'Nyi kuto ajoyota si?' No litila kuto hau kia hoba no haitila kuto hau kia togo nyi angekei lo?' 11 Jisuei jongaikei, 'Thukkabu ka kala hau aku teguje no ku thuka ai haukei tekikhoulabu. Hibu aoei ngo kala khumpo kukei, haoeibu shabu yangbou ki.' 12 Kho nguhchunga Pilatei hao litila kumbei. Jehudabu shuongei, 'Nyi kho mut litialongaje no Kaisar thangbou aying. Aoei ong jembu lulo hao choba togo lauta, haoei Kaisar khulimta.' 13 Ladang Pilatei kho titkei haoei Jisu tangto leibakei, hobaje, 'Langshebu, Jehuda nguhyema, 'Gabbatha', togo laubu kaoen matjemshanga hao setkei. 14 Kho Puetbu lem thedangto kiteikei. Haoei Jehudabu shuong to laukei, 'Chuhashi, kaneibu Choba!' 15 Haoenei ngekkei, 'Hao haitiashi, hao haitiashi, hao peiseia thungashi!' Pilatei haoen to laukei, 'Ngei kaneibu Choba peiseia thungla se?' Thukkabu ungshedbu shuongei laukei, 'Kaisar to liman kunei ao Choba aki.' 16 Kheijinei haoei hao peiseia thungla shanga khumpo kukei.
Jisu peiseia thungbu
Hibu haoenei Jisu leilangkei, 17 hobaje haoei haoeibu peisei pean, 'Khulo Kaoen' togo laubou, Jehudabu nguhyemei 'Golgotha' to haukei. 18 Khunei haoenei hao peiseia thungkei, hobaje hao yoa lubu mut nyi Jisu jenyu lean jijinei che che thungkei. 19 Pilatei nguhkung che doan peiseia thipbukei. Dobu kho hai kikei, 'NAZARETHBU JISU, JEHUDABU CHOBA'. 20 Jehudabu juongei kho nguh wekei, aiyei lausi Jisu peisei a thungbu kaoen kho sangnyu nyangko kikei hoba kho Jehuda, Latin hoba Greek nguhyema dokei. 21 Hibu Jehudabu khukabu ungshedbu shuongei hao to laukei, ' "Jehudabu Choba" togo tedo, lausikei, "Haoei ngo Jehudabu Choba togo laukei" togo doashi.' 22 Pilatei jongaikei, 'Ngei ai dokeije doa.' 23 Ladang sepai shuongei Jisu peiseia thungkei, haoenei haoeibu nei sungkei hobaje sepai shuong che bangei benko pern lei la janyinkei. Haoenei mangyuk kei sungkei; kho shimo akiko, thuk ka jemala takbu yingan kiteikei. 24 Khola haoen che ei che to laukei, 'Senei ho tejitnyinkho, lausikei ho aoeibu yinglaje janenla shanga phang pakyokho.' Kho Laishibaei hai laubu loushedla yingan kiteikei. 'Haoenei ngeibu neisimei haoen yoa janyokei hoba ngeibu mangyuk shanga phang leyokei.' Kho tegu sepai shuongei kumbei. 25 Tou Jisueibu nyu, haonyueibu na, Klopa yak Mari hoba Mari Magdalin togo haoeibu peisei junga loan kikei. 26 Jisuei hao nyu hoba haoei sanoubu eik sao nyangko loan hapbei, hobaje haoei sao to laukei, 'Anyu, ka shou to chuhashi.' 27 Haoei kho phaia eik khuto laukei, 'Kanyu to chuhashi.' Kho jih ka jauan eik khoei sao kho hao chem to leian satkei.
Jisu haibu
28 Ajanjan pendou kumphema togo Jisuei ngekei. Laishiba loushedtila haoei laukei, 'Ngo deilata.' 29 Khunei haijepbu dei shenko thung che denan kiteikei. Haoenei od a haijepbu dei shenko haman hisop phodong chenei lonan haken to attikukei. 30 Jisuei haijepbu dei kho shepbei hoba laukei, 'Pendou wana'. Hobaje haoei khu ngomletkei hobaje haoeibu soushou bangtikei.
Jisueibu hip to sepbu
31 Ho chalou Nounyet thedangto kiteikei. Hibu Jehudabu shuongei Pilat to peiseia thungbu mutshuongeibu you kho setnguokkuan mang shuong kho langtila phekei. Kho haoenei Nounyet peiseia mang aphola shanga kumbei, aishanga Nounyet kho chalou yangbu che kiteikei. 32 Hibu sepai shuong louan, Jisu yoa peiseia thungbu shangboueibu you hobaje lubu che khoeibu you togo setnguokkukei. 33 Kho phaia haoen hao jungto loukei, hoba ladang haoenei hao haian apan hapbei, haoenei haoeibu you asetnguokku, 34 lausikei sepai yoa che ei haoeibu hiplang to aupuei sepbei, hobaje khoyam si si dei longkei. 35 Ho, kho hapboueibu aukabu, kaneikei mai nalemla shanga kukei, hobaje haoeibu aukabu kho nguhmai ki. Haoei ngumai lenta togo ngebou mut che kia. 36 Habu kho Laishibaei, 'Haoeibu lo che ongkei anguoklabu' togo lenbu loushedla shanga hauhthukkei. 37 Toukei, lubu Lai ei lauta, 'Haoenei ao to sepbei hao to haoenei chuhlabu.'
Jisu khunbu
38 Kho phaia Arimatheabu Joseph, ao Jisueibu eik che lausikei Jehudabu to hatbu ka huphang kabu che ei Pilat to haoei Jisueibu mang sunglangla shanga phekei; hobaje Pilatei sakkukei. Hibu hao loukei hoba haoeibu mang langkei. 39 Nikodema, ao shangla hao jungto nangnak loukei, haoeikei ponlem hibu jen hoba bunai kheiyobu seret anjinsem thung atsheibu sungbakei. 40 Hibu haosiei Jisueibu mang sungkei hobaje inyaibu nei ei ponlem peisilei yoa shokei, aiyei lausi kho Jehudabu mangap song kiteikei. 41 Hao lanei peiseia thungetkei, khunei bamang che kikei, hobaje bamang khunei aokei khunan achuhbu hekhun hanbu che kiteikei. 42 Haosiei Jisu khunei khunkei, aiyei lausi kho chalou Jehudabu Nounyet thedangto kiteikei hobaje he kho nyangbua kikei.
He kongbu
1 Bale a shangbounyet ete, jijimomo a Mari Magdalin he to loukei hobaje lang kho khuka khoklangan hapbei. 2 Hibu sao langjung Simon Peter si lubu eik ao to Jisuei sanoukei, haosi jungto loukei hobaje haosi to laukei, 'Haoenei Bonyubao hekhun ka sunglanga, hobaje haoenei hao lanei phokeije kunei angekei.' 3 Hibu Peter si lubu eik nyiei apyijung hedang aeto haukei. 4 Ham Iiko langkei; lausikei lubu eik ei Peter leilangkei hoba hea shang suhlangkei. 5 Haoei seman chuhlitikei, hobaje nei inyaibu kho hangletan hapbei, lausikei hao mangto ut. 6 Simon Peterkei hao phaito loukei, hoba he khun to atkei; hobaje haoei nei inyaibu kho hangletan hapbei, 7 hobaje khu kabu nei khoje nei inyaibu yoa aying, lausikei kaoen chenei nopsheian kiteikei. 8 Kheijinei lubu eik, ao shang he a suhlangkei, haokei mangto atkei, hoba hapbei hoba mailembei; 9 aishanga hao haibu ka langngeijan togo laubu Laishiba nguh haoenei motiten. 10 Hibu eikshuong chem to han ngaikei.
Jisu Mari Magdalin la haptibu
11 Mari he koa habbo loan kiteikei. Saoei habbo habbo hemang to semlitikei, 12 hobaje saoei, khuthuk hangangbu nyi, thupaibu helea, Jisu mang phoshang khukhum aenei che hoba che youdanga togo setan hapbei. 13 Haosiei sao to laukei, 'No aila habta?' Saoei haosi to lenkei, 'Haoenei ngeibu Bonyubao mang sunglanga, hobaje haoenei hao lanei khunkeije ngei angekei.' 14 Saoei khei lauan phaia sepeian chuhngeikei hobaje Jisu loan hapbei lausikei saoei kho Jisu togo ange. 15 Jisuei sao to laukei, No ada habta? Nyi ao lamta?' Hao bamang lombou togo taman saoei hao to laukei, 'Yangbou, nyi hao langan kisije, kula lenbu, hobaje ngei hao ngailanglabu.' 16 Jisuei sao to laukei, 'Mari!' Saoei sepeikei hoba hao to Jehuda nguhyema laukei, 'Rabuni!' (kho, Lenbou). 17 Jisuei sao to laukei, 'Kuto tejung, aishanga ngo Bou jungto mo uangkei; lausikei ngeibu jaisinasi shuong jungto hauashi hoba haoen to, "Ngo ku Bou jungto hoba kaneibu Bou jungto, ku Muhgha jungto hoba kaneibu Muhgha jungto angta," togo lenashi.' 18 Mari Magdalin ngaikei hoba eikshuong to lenkei, 'Ngei Bonyubao hapa,' hobaje haoei sao to khubu lenkei togo laukukei.
Jisuei hao eikshuong to longan lenbu
19 Kho bale a shangbounyet, chasem kiteikei, hobaje Jehudabu to hatbu ka eikshuong kishang kou khinngeilangan kikei. Jisu loukei hoba haoen yoa lokei, hobaje haoei haoen to laukei, 'Kan yoa hakso kishi.' 20 Haoei kho lauan phaia haoei haoen la haoeibu ik hobaje haoeibu hilpang lenkei. Eikshuongei Bonyubao hapan olinyokei. 21 Jisuei haoen to nyiboukei laukei, 'Kan yoa hakso kishi. Bouei ngo hautibu tegu, ngeikei kan hautita.' 22 Haoei kho lauan phaia, haoei haoen la metan jinkuko laukei, 'Soushou Saopobu sungletashi. 23 Kanei aoyoueibu shabu amai apbulaje, haoeneibu shabu apa; aoyou la kanei upbulaje haoeneibu shabu nangakei.'
Jisu hoba Thoma
24 Thoma (laobou nguhtet, 'Phokshou'), Anthuknyi yo kabu che Jisu loujinei haoen yoa akitei. 25 Lubu eikshuongei hao to laukei, 'Kunei Bonyubao hapa.' Haoei haoen to laukei, 'Ngei haoeibu ikmanga kojal nali uhuplonga, hoba kojal moa ngeibu ikjishou utti longa, hoba haoeibu hiplangto ngeibu ik tittilonga, ngei maialemlabu.' 26 Chalou set kian phaia nyibou hao eikshuong chemmanga kikei hoba Thomakei haoen yoa kiteikei. Kou khinngeilangan kikei lausikei Jisu lotan haoen yoa lokei hoba laukei, 'Kan yoa hakso kishi,' 27 Nyiboua haoei Thoma to laukei, 'Kaibu ikjishou hato thenashi hoba ku ik to chuhashi; kaibu ik litiashi hoba ku hiplanga phekattikai; maialemenko teki, lausikei mailemkai.' 28 Thomaei hao to jongaikei, 'Ku Bonyubao, ku Muhgha.' 29 Jisuei hao to laukei, 'Nyi ngo hapabu nyi mailemta lo? Aoyouei uhup lausi togokei mailema, haoen olinbou.' Ho le nyekchuh 30 Ho le a adobu amaaphilabu juongnyu Jisuei eikshuong thedanga kumbei; 31 Lausikei Jisu kho Muhgha Shou, Messiah, togo kanei mailemla shanga, hobaje, mailempo kanei hao nyena langkei hapla shanga ho nguh dota.
Jisuei eik nyet la longan lenbu
1 Kho phaia Jisu jembu lulo Tiberia yungnyua longan lenkei. Haoei hao lulo hai longan lenkei. 2 Simon Peter, Thoma (laobou tetlabu, 'Phokshou'), Galil a Kanabu Nathaniel, Zebedi shousi shuong hoba haoeibu eik lubu nyi togo chela kiteikei. 3 Simon Peterei haoen to laukei, 'Ngo ngau lapla kouta.' Haoenei hao to laukei, "Kunkei ka yoto loulabu." Haoen koukei hoba long to atkei, hoba khuyou haoenei ai alap. 4 Japham lamto Jisu yungkoua lokei, lausikei eikshuongei kho hao yingkei togo ange. 5 Jisuei haoen to laukei, 'Nashousi shuong, 'Kanei aiche laplao?' Haoenei hao to jongaikei, 'Alap.' 6 Haoei haoen to laukei, 'Tak kho long mae aedang to tekashi, hobaje kanei shijo laplabu.' Hibu haoenei tekkei hobaje ngau juongnyu minsije touje haoenei tak senenla athukko kikei. 7 Eik, ao to Jisuei sanoukei, haoei Peter to laukei, 'Ho Bonyubao yingkei.' Ladang Simon Peterei kho Bonyubao yingkei togo titkei, haoei nei huombei, aishanga haoei kho hangletan phokei, hoba dei to tomatlangkei; 8 lausikei lubu eikshuongje, tak a ngau shenko minan, senjung haoeneibu longa loukei, aishanga haoen deikou ka yongan eheko, phak anjinsem thung ong kiteikei. 9 Ladang haoenei deikoua suhlangkei haoenei wankak a wan medenan, kho thuka ngau hoba wentek togo phoan hapbei. 10 Jisuei haoen to laukei, 'Kanei tou lapbabu ngau ka at sungba.' 11 Simon Peter long to likei hoba ngau yangbuei shenko kibu tak kho kaomai to senbakei. Khunei ngau saongao to anjinsem to sem kiteikei: khunei ngau juongnyu minasikei tak ajitthet. 12 Jisuei haoen to laukei, 'Kaiya hoba lemjokashi.' Kho Bonyubao yingkei togo ngean, eikshuong yoa aoeikei hao to, 'No ao?' togo phela mang ayangen. 13 Jisu loukei, hoba wentek sungkei hobaje haoen la shonkukei hobaje ngaukei kho tegu ong kumbei. 14 Hao haibu ka langngeian phaia Jisuei khoei semboubu hao eikshuong la longan lenkei. Jisu hoba Peter 15 Ladang haoen lemjok wankei, Jisuei Simon Peter to laukei, 'Jona shou Simon, nyi kuto habu pendou to aei sanouta lao?' Haoei hao to laukei, 'Hau, Bonyubao, ngei no sanouta togo nyi ngekei.' Haoei hao to laukei, Ku san shoushou shuong samashi.' 16 Haoei hao to nyiboukei laukei, 'Jona shou Simon, 'Nyi ngo sanouta lao?' Haoei hao to laukei, 'Hau, Bonyubao, ngei no sanouta togo nyi ngekei.' Haoei hao to laukei, 'Ku sanshuong lomashi.' 17 Haoei hao to semboukei laukei, 'Jona shou, Simon, 'Nyi ngo sanouta lao?' 'Nyi ngo sanoutalao?' togo hao to semboula laubu shanga i er ngangkei; hobaje haoei hao to laukei, 'Bonyubao, nyi pendou ngekei; ngei no sanouta togo nyi ngekei.' Jisuei hao to laukei, 'Ku sanshuong samashi. 18 Maimaitham nguhmaia ngei kato lenta, no heshoudanga nyi lulo neihuom kaikei hoba no haumang suhbu pendou to haukei; lausikei ladang no sinlaje, nyi kaibu ik shinglabu hoba no laeto haumang asuhta khuto no leilanglabu.' 19 Haoei kho ai haibuei Peterei Muhgha soneikangtilabu kikei kho shean lenko laukei. Haoei kho lauan phaia Jisuei hao to laukei, 'Kuphai semashi.'
Jisu hoba lubu eik
20 Peterei sepeian chuhngeikei hoba eik ao to Jisuei sanoukei, hao phainei hapbei. (Ho, nyakshaujinei Jisueibu khukua nongan, 'Bonyubao, no khumpo kuan aplabou kho ao?' togo laobou kho kikei.) 21 Ladang Peterei hao hapbei, haoei Jisu to laukei, 'Bonyubao, hao shangabu lai?' 22 Jisuei hao to laukei, 'Ngei ngo alou shongko hao lang kitimang suha tegukei, ka shanga ai ki? Nyi ku phai semshi.' 23 Hibu kho eik uhailabu lauta togo jaisinasi shuong yoa phinthonkei. Khei yingasikei Jisuei hao to hao uhailabu togo alau, lausikei, 'Ngei ngo aloushongko hao lang kitimang suha tegukei, ka shanga ai ki?' togo laukei. 24 Habu shangabu aukabu kubou hoba khubu dosheibou eik kho hao ki. Haoeibu aukabu tukte togo senei ngekei.
Thon nguh
25 Jisuei kumbuleibu lubukei juongnyu kia; haoen thenei thenko doa teguje, kho dolabu le kho kaodakei mangkei atinlabu togo ngei tamta.