Sam Keyibe Johanbe Ne Rawbe

1

Sam ze Hemei changbe

1 Bepibang ge Sam a bam lei, zai Sam ze a Hera dage bam dide lei, zai Sam ze Hera lei. 2 Bepibang gene Pa a Hera dage bam dide lei. 3 Magetaleine Pa gene tewgai bei de lei, tewgai'ndibe leine Pa ga ze tewgaibe made ga lei. 4 Pa ge keringbe bam dide lei, zai chi keringbe zene ziemmena hang kebabe chang dide lei. 5 Kemuibe ge chi kebabe ze lerbagai de lei, zai kemuibe ne chi kebabe ze nai lak lei. 6 Hera ne langgaibe mihangkat bam lei, pe ji Johanbe kacheubepeu zeu. 7 Kebabe ze saki tew lera pa a saki chang ze wangkeu lei. Pe dagene 'nteubename 'nnum'mmi lera hang geu. 8 Pa a kebabe mak, kane kebabe ze sakitew rahang wangkeu de lei. 9 Kebabe kesang ziemmena leine je tewreba ra kedeipeirei ge wangkeu mui de lei. 10 Pa a kedeipeirei ge bam, zai kedeipeirei ze Pa gene tewgai bei de lei, leusede kedeipeirei ne Pechu chimak tadi lei. 11 Pegume dage Pa wangkeu de lei, zai Pegu ziemmename ne Pechu lumak tadi lei. 12 Kane Pechu lugai ze pe ji ze 'nnumka'mmime leine je a Hera name chang ra Pane reze peigai bei de lei. 13 Penui a hejai gene lungkeube mak, zai hemeipum 'nning gene lungkeube du mak, zai ziemmena sui 'nning gene lungkeube du mak, kane Hera gene lei. 14 Chi Sam ze hemei chang di lei, zai anui ruage lung bam de lei, zai Pa pengeudibe Pepeu gene PeNa hangkat gap lungkeube Na pengeudibe gumze; ka'nggiabe benai Samsang ne pui ze anui ngau lu de lei. 15 Johanbe ne Pechu sakitewgai lei, acheu sa ze, "Aipaupeu a Pe rasam I ne saliabepeu ze, "Achai ge wang rabepeu a asua du di lei, asua ge Pa bam rai di daseu", kacheu lei. 16 Pedage ka'nggiabe puigit bambe zene ka'nggiabe peireige, ka'nggiabe anui 'nteubena ngau lu de lei. 17 Mosiabe gene hingde pei bei de lei; kane ka'nggiabe benai samsang a Isua Khrista gene wangkeu lei. 18 Hera je madaugede migede ngau mak lei, PeNa hangkat gap bambe Hera Na, Pepeu gage bambepeu je pechu chi ra pei bei de lei.

Baptistewbepeu Johanbe Samsabe

19 Judame Jerusalem gene tingkume benai Levi zatme je pedage langgai bei ze, "Nang chau lau"? ze sam 'nneu bei dege Johanbe ne aigumze sakitew lei. 20 'Nkim mak ze pane. "I a Khrista mak lei", ze ranglia 'nchichiak gai bei de lei. 21 Dadege penui ne pechu, "Acheu zaine nang chau lau?" "Nang Elijahbe mei?", kacheu lei. "Pane, "I a mak lei", kacheu lei. "Nang kemeu'mpeu mei?" ze ka'nneu lei. "Mak lei", ze kak lei. 22 Dadege penui ne pechu, "Nang chau lau? Anui je langgaime suage kak chi lera rang lau, ning runne nang tedeu ge nang 'ndaitew lei lau?" ze kanneu lei. 23 Pane I a henamkangge mihangkat acheu ze ka'nrungbe kau ze de lei. "'Tingwang puidi tew'nzei lau'ze kemeu'mpeu Isaiabe rie rangbe gum zeu", kacheu lei. 24 Zai penui je Pharisaime ne langgai lei. 25 Zai penui ne pechu, "Nang Khrista du mak, zai Elijahbe du mak di zaine a, 'ndaitew bei ze nang baptistew lau?" ze kanneu lei. 26 Johanbe ne penui je kak ze, "I a hedui ne baptistew lei, kane ningnui ruage mihangkat ningnui chimakbepeu sap la lei, 27 Pa ze achai ge wang rabepeu ze de lei Pe pichupria hei ra du I a bui me lei", kacheu lei. 28 Aibe ramme leine Johanbe baptistewbe bam Jordan geugiam Bethani keloa ge wangchang de lei.

Hera Melipoine

29 Zai bechaibe mai ge Johanbe Isua pe tailam'mbe wangbe ngau lu, acheu saze, "Pe le lau Hera Milipoine kedeirei gu hemui pungtuabepeu! 30 "Achai ge mihangkat wang rabepeu, asua du dibibepeu I sua nedu Pa bam rai dida seu", I kacheube peu ze a, aipau Peu ze de lei', 31 Pechu je a I chimak lei, kane Israelme dage Pechu lia rahang ge hedui ne baptistew ze I wangkeu de lei", kacheu lei. 32 Zai Johanbe ne sakitew ze, Tinggim'mbene herui depeine gumze wangkeu ze, Pepeireige bam bambe I ngau de lei. 33 Pechu je I chimak, kane hedui ne baptistew ra achu langgaibepeu ne rang ze, 'Herui wangkeu ze Pepeireige bam bambe nang ngaubepeu ze chipau Peu ne Herui Kanchibe ne baptistew gu lei", ze acheu bei de lei. 34 Zai I a ngau lu da, zai aize Hera Na de leibe sakitew lu de lei", kacheu lei.

Isua gu Keneme Railangme

35 Bechaibe mai gedu, Johanbe pa keneme hangna benai sap ze bambe luage, 36 I sua tat patbe pa ngau lu acheuze, "Hera Melipoine je pe le lau", kacheu lei. 37 Zai pa keneme hangna pa samsabe seu luze, Isua ehai penai sui tat tide lei. 38 Dadege Isua 'nreiwang dege Pechai penai suitatbe ngau lu, "Ningnai 'ndaikau peu lau?" Kacheu lei. Zai penai ne Pesuage, "Rabbi gau, (chize Geteiliabepeu gau, kacheube lei) Nang 'ndaige bam lau? kacheu lei. 39 Zai Pane penai je, "Wang ze pe le lau", kacheu lei. Penai wang ze Pa bambe bam ngau lu de lei. Zai chipau mai a Pedage penai 'nnai bam de lei, hegi kunta medai gum chang di dadegeu. 40 Johanbe samsabe seu lu ze Isua ehai suitatbe hangna ze, hangkat a, Andriwbe, Simon Peterbe kinapeu lei. 41 Zai railangbe ge pesipeu Simonbe je Pa peu wang lu, pesuage, "Messiah" (chize sakakelibe ne "Khrista," "'Nnuk kai'ndibepeu;' kacheube lei) je anui ngau dau lu de lei, kacheu lei. 42 Pechu ze pane Isua dage 'ngnguawang de lei, zai Isua ne pechu pegai lu, acheuze, "Nang Johanbe na Simonbe de zei lau", ningchu ze Kephabe (chize 'Peterbe', 'Nchukang', kacheube lei) ze ku gu lei", kacheu lei.

Isua Phillipbe benai Nathanaelbe je Kube

43 Bechaibe mai dege Isua Galili ram'mbe tat ra sam kamgai de lei. Zai Phillipbe je hedau lu, pechu, "Achai sui lau!" acheu bei de lei. 44 Phillipbe a, Bethsaida'mpeu lei, chize Andriwbe benai Peterbe keloa lei. 45 Phillipbe ne Nathanaelbe je hedau lu, pechu, "Mosiabe ne hingde leisi ge zai kemeume ne pe rasam rawgai 'ndibepeu, Nazareth'mpeu Isua, Josephbe Na je anui hedau lu de lei", kacheu lei. 46 Nathanaelbe ne pechu, "Nazareth keloa gene ma keyibe pat chi dui semei? kacheu lei. Zai Phillipbe ne pechu, "Wang ze pe le lau", acheu bei lei. 47 Isua ne Nathanaelbe Pedage wangbe ngau luze, acheu saze, "Pe le lau Israel'mpeu singbe peu pa ge ningching kesiabe made ga lei", kacheu lei. 48 Zai Nathanaelbe ne Pechu, "Ndaigumze Nang achu chi lu lau?" ze kacheu lei. Isua ne pechu, "Phillipbe ne ningchu kugai makbe suage nang 'mbeuchibang kangge bambe luage, ningchu I ngau lu de lei", kacheu lei. 49 Dadege Nathanaelbe ne Pesuage, "Rabbi gau, Nang a Hera Na lei; Israelme Wangpeu ze Nang de lei", kacheu lei. 50 Zai Isua ne Pechu, "Mbeuchibang kangge nang bambe luage ningchu I ngau lu de lei, ze I ne ningchu acheu beibe ne nang 'nnumka'mmi mei? Aibe ramme sua a makedabe ramme nang ngau gu lei", kacheu lei. 51 Zai Pane pechu, "Pelingsing ze ningnui je I rang lei, tinggim latliabe, zai Hera gu Angelme ne ziemmena Na peireige wangkeube benai chube ningnui ngau gu lei", kacheu lei.

2

Kana keloa ge Kahegiabe

1 Zai pakechumbe mai ge Galili ram, Kana keloa ge kahegiabe bamge Isua pui du chige bam lei. 2 Zai Isua benai Pa keneme du kahegiabe ge wang ra kugai bei lei. 3 Zai wain 'nggadi dege Isua pui ne Pesuage, "Penui dage wain gadi de lei", kacheu lei. 4 Dadege Isua ne pechu, "'Mpuimi gau, nang Achu 'ndaikau tau la lau? Ating wangchang merei lei", kacheu lei. 5 Zai Pe pui ne basame je, "Ningnui je kerangbe tew lau", kacheu lei. 6 Chige 'nchu ringsongbung seruk bam lei, bung kat ge hedui litar hai kat ria kai gut lei, aibe ramme ze a Judame sege hui 'nchirabe ta hang ge kai lei. 7 Zai Isua ne penui je, "ringsongbung ramme ge hedui kaipui gai lau", kacheu lei. Dadege ringsongbung ramme ge 'nsamrap ze penui ne hedui kaipui gai bei de lei. 8 Zai Pane penui je, "Chuna a gesa tuakpat lu, kahelube ge pesuitewbepeu dage teimie be lau", acheu bei lei. Dadege penui ne teimie chang bei de lei. 9 Zai kahelube ge pesuitewbepeu ne hedui ne chuna wain changdibe 'ndaugai lu, 'ndai'nggene chize wang meibe pa chimak ze (sede basame hedui tuakme a chi lu de lei) Pane kahegiabepeu je kuwang lu, 10 Pesuage, "Ziemmename leine ne keraibe ge wain keyibe ka'nggua lei, zai ziemmena ramme sak kai lu dege, wain tamdibe ne ka'nggua de lei, kane Nang a chuna ria chang ze wain keyibe rui gai larei ze lau", kacheu lei. 11 Ai dak ningdaulakbe keraibe ze Isua ne Galili ram Kana keloa ge tewgai bei ze, Pa pengeudibe tewlia de lei, zai Pa keneme Pechu 'nnum'mmi dide lei. 12 Aipau chang dege Kapernaum keloa'mbe Pepui Pekiname zai Pa keneme benai Pa tatti de lei. Zai chige beting keduine penui bam gai de lei.

Isua Temple'mbe Tatbe

13 Zai Judame gu Tat'ntua Hengi nadi dege, Isua Jerusalem'mbe hang dide lei. 14 Temple lungge, 'Nraitumsei ramme, Meli ramme zai Depeine kezuame ramme benai rangkang hiakme zai penui helikahedatme ramme je ngau lei. 15 Zai heria kitlube ne kegit ze, meli ramme 'nraitumsei ramme je temple gene pane guatua 'ndi lei, zai rangkang hiakme gu rangkang ramme suktua, zai penui gu leisira ramme chuikau 'ndi de lei. 16 Zai depeine zuame dage, "Aibe ramme aigene teitat te lau; Apeu kige helikahedatbe ki ningnui tewgai se lau", kacheu lei. 17 Zai acheuze rawgai'ndibe sam, "Ning ki hang I 'nning kahekuibe ne Achu tew'ngga kam gu lei", kacheube ze Pa keneme 'nningdau dide lei. 18 Dadege Judame ne Pesuage, "Aipau ramme Nang tewgai'ndibe reze anui je 'ndaikau gu dak Nang tewlia lau?" ka'nneu lei. 19 Zai Isua ne penui je kakze, "Aipau temple ze tew'nsia gai be lau, langchumne lung gene I teichu dai gu lei", kacheu lei. 20 Dadege Judame ne, "Aipau temple ze kum hedaiseruk tewgai'ndibe ze langchumne lung gene 'ndaigumze Nang tew kam dai chi ra lau?" kacheu lei. 21 Kane Pane kacheube a Pepum gu temple ze rang lei. 22 Zai ehai dime rua gene Pechu zuchu kadaibe changge aipau sam Pa sabe ze Pa keneme 'nningdau dide lei; zai rawgaidiakbe leisi sam benai Isua ne sagai'ndibe sam ze penui 'nnum'mmi dide lei.

Isua ne Ziemmena Kebambe Tak Chibe

23 Jerusalem ge Tat'Ntua Hengi ting Pa bambe luage dak ningdaulakbe ramme Pa tewgaibe penui ngau lu dege, mina misonggame ne Pe ji je 'nnum'mmi dide lei. 24 Kane Isua a penui je Pe lung gesang ne 'nnumtew mak lei, mina 'nteubena je Pa chi lu dadegeu. 25 Ziemmename rua gene mimigene saki tewgai ha ra Pe hang ge a 'nnang mak lei, ziemmena lungge 'ndaikau bam meibe ze Pa chi lu dadegeu.

3

Isua benai Nikodimasbe

1 Pharisaime ruage mihangkat pe ji Nikodimasbe, pa a Judame gu pemuitewbepeu mihangkat lei. 2 Aipau peu ze muizeu ge Isua dage wang lu ze, Pesuage, "Rabbi gau, Nang a Hera dagene wangbe Geteiliabepeu leibe anui chi lei. Nang ne dak ningdaulakbe ramme tewgaibe ze mide tew chilak lei, pedage Hera bam mak zai ai", kacheu lei. 3 Zai Isua ne pechu kak ze, "Pelingsing, pelingsing ze ningchu I rang lei, migede lungkeu rechi dai mak ehai a, Hera ram pa ngau lak lei", kacheu lei. 4 Dadege Nikodimasbe ne Pesuage, "Ziemmena geching chaine 'ndaigumze pechu lungkeu dai ra lau, pepui gu henarak lungge gut luze lungkeu dai chi dui mei?" kacheu lei. 5 Isua ne kak ze, "Pelingsing, pelingsing ze ningchu I rang lei, ziemmena je hedui benai herui gene lungkeu dai mak ehai a Hera ram pa gut lak lei. 6 Hemeipum gene lungkeube ze a hemei lei, zai herui gene lungkeube ze a herui lei. 7 Nang lungkeu dai rechi himchang ra lei, ningchu I kacheube ze 'nningdaulak se lau. 8 Tingkai a gui nei neibe ge gui lei, kane 'ndai'nggene wang mei, zai 'ndai'nggene gui tat ra meibe nang chilak lei, chigum herui gene lungkeube mina leine dage chang lei", kacheu lei. 9 Zai Nikodimasbe ne Pesuage, "'Ndaigumze aibe ramme chang eni ra lau", ze kacheu lei. 10 Dadege Isua ne pechu kak ze, "Nang Israelme gu geteiliabepeu chang lu, ze aibe ramme nang chidesi mak semei? 11 Pelingsing pelingsing ne ningchu I rang lei, anui gechibe ze anui a sa lei. Zai anui ngaulubeze sakitew gai lei, kane anui sakitewgaibe ze ningnui ne lunei mak lei. 12 Kedeirei gu ma ma ramme sagai'ndibe ze ningnui 'nnum mak zai a 'ndaigumze tinggim gu ma ma ramme sagai beibe ningnui 'nnum ra lau? 13 Ziemmena tinggim gene wangkeubepeu runne zangno, mide tinggim ge keuchu gaibe kau ga lei. 14 Zai henamkang ge Mosiabe ne heneu teigetuachu gai gumze, ziemmena Na je du teigetuachu himchang gu lei. 15 Hangkatte hangkatte Pechu 'nnumka'mmibe kau ze a keringbe betunmakbe ngau gu lei". 16 Hera ne kedeipeirei ze hung gesang di dadege Pe Na hangkat gap bambe peigai lei, mimigede Pechu 'nnumka'mmibe kau a 'ngga ramak, kane keringbe betunmakbe ngau gu lei. 17 Kedeipeirei ze tew'nkui ra hang Hera ne Pe Na je kedeipeirei ge langgai mak lei, kane Pe zegene kedeipeirei ze tew'nring rahang ne lei. 18 Pechu ze 'nnumka'mmibe kau je a tew'nkuigaibe ga lei, Pechu je 'nnum'mmi makbe kau je a tew'nkui gai 'ntua'ndi de lei, Hera Na hangkat gap bambepeu ji je pa 'nnum'mmi makbe zegeneu. 19 Zai tew'nkuigairabe ze a aize de lei, kedeipeireige kebabe wangkeu bei ze, ziemmename ne kebabe je sua kemuibe ze hung di lei, penui tatewbe ramme siabe zegeneu. 20 Hangkatte hangkatte takesiabe ramme tewbe kau a, kebabe ze ngaugailak lei, zai kebabe gedu pa wang mak lei. Chimak chaine a pe ta ramme ralia gu daseu. 21 Kane pelingtewbe kau a kebabe ge wang lei, chidezaine pa tatewbe leine ze Hera ge pa tew leibe ngau'nchichiak lerahang geu.

Isua benai Johanbe

22 Aipau chang ge Isua benai Pe gu keneme Judia ram'mbe tat ti lei, chige penui dage Pa 'nnai bam lei, zai baptistewgai de lei. 23 Zai Johanbe du Salim taihia, Ainon ge baptistew bam lei, chige hedui kie bei dadegeu; zai ziemmename wang ze penui je baptistewgai bei de lei. 24 Johanbe je kebangbe kige kai mak kerei dadegeu 25 Zai Johanbe gu keneme benai Juda'mpeu hangkat kak ge huika'nchibe se tedeu ge samtube bam de lei. 26 Zai Johanbe dage penui wang lu, pesuage, "Rabbi gau, Jordan giam ge ning dage bambepeu, Pe rasam nang ne sakitew gaibe ze pe le lau, Pa aige baptistew ze lamui lei, zai ziemmename leine Pedage zuawang la lei", kacheu lei. 27 Johanbe ne kak ze, "Tinggim 'mbene Pechu peibe mak chaine a ziemmena a made ngaulak lei. 28 I a Khrista mak lei,kane Pesuage achu langgai bei de lei, I kacheube ze ningnui runne sakitew chidui lei. 29 Kahegiabepui je lubepeu a kahegiabepeu lei, kahegiabepeu meripeu, pe taige sap ze, zai pe kua 'nking ze kahegiabepeu kua seu gailube gene pe sui'nta kadesang lei; chidaze asuigut ze a chuna 'nsangsiak de lei. 30 Pa a dibi himchang gu, kane I a chei bibi sing gu lei", kacheu lei.

Tinggim gene Wangkeube Peu

31 Kehu'mbene wangkeubepeu a 'nteubena sua a hu lei, kedeirei gu mina a kedeirei gu chang lei, zai kedeirei rasam sa lei; tinggim gene wangkeubepeu a 'nteubena sua a hu lei. 32 Pa ngaulube zai seu lube ze Pa sakitew lei. Leusede Pa sakitewgaibe ze mide lunei mak lei; 33 Pa sakitewgaibe ze luneibe kau a Hera a gesang leibe chigai ha lei. 34 Hera ne langgai beibe kau a Hera gu sam ramme sa lei, Hera a peria 'ndeu luze Pegu Herui pei mak daseu. 35 Pepeu ne PeNa je hung lei, zai magetaleine Pe bage pei kamgai 'nde lei. 36 Pe Na je 'nnumka'mmibe kau a keringbe betunmakbe Pe dage bam lei, Pe Na kua pheu makbe kau a keringbe ngau ramak lei, kane Hera lumpum pepeireige bam bam lei.

4

Isua benai Samaria'mpui Ka'mpaube

1 Isua a Johanbe sua du Pegu keneme hang tewgai 'nkie, zai baptistew ka'nkie leibe Pharisaime ne seulube sam Heguangpeu chi lu dege, 2 (Isua gimsing ne baptistewbe a tew mak, kane Pegu keneme runne tew lei), 3 Judia ram sau nan ze, Galili ram'mbe Pa tat dai dide lei. 4 Zai Samaria ram Pa tatpela himchang ra chang lei. 5 Dadege Samaria ram namdi kat, Sukhar kacheube Jakobbe ne pena Josephbe hang kedei peigaibe bam taihia ge Pa tatchang de lei. 6 Chige hedui depin dekua bam lei, zai tebei tewbe zegene Isua leidi dege, dekuaki taige Pa 'ntaugai de lei, tingna kunta kereu kena hi gum dide lei. 7 Zai chige Samaria'mpui mihangkat hedui tuak ra wangkeu lei, Isua ne pechu, "Isak ra pei lau", kacheu lei. 8 (Pegu keneme a mateu ra lui rahang namdi'mbe tatti dadegeu). 9 Zai Samaria'mpui ne Pechu, "'Ndaigumze Nang Juda'mpeu ne I Samaria'mpui dagene hedui sak ra ke lau?" Kacheu lei. (Judame a Samariame benai made henga mak daseu). 10 Zai Isua ne pechu kak ze, "Hera gu kela peibe benai sak ra Achu pei lau, ze ning dage kacheube peu ze nang chi lu laizai a Pedagene nang ke gu, zai Pane ningchu keringbe hedui pei gu de lei", acheu bei lei. 11 Chi 'mpuimi ne Pesuage, "Apau gau, Ning dage tuak rabe made ga, zai dekuaki du chuk ze 'ndai'nggene Nang chi keringbe hedui ngau lau? 12 Anui peu Jakobbe sua a Nang di mei? Pane anui je aipau dekua ze pei da, zai aigene pa benai pename, zai pegu kaurui ramme du sak lei", kacheu lei. 13 Zai Isua ne pechu, "Hangkatte hangkatte aipau dui sakbe kau a herei dai gu lei. 14 Kane mimigede I peirabe hedui sakbe kau a matew tew sede herei dai ramak, kane pechu I peibe hedui ze pelung ge hedui depin chang ze keringbe betunmak ze lua bam gu lei", kacheu lei. 15 Chi 'mpuimi ne Pesuage, "Apau gau, aipau dui ze achu pei lau, I herei dai mak ra, zai aigene hedui tuak ra I wang dai mak rahang geu", kacheu lei. 16 Isua ne pechu, "Tat ze ning napeu je ku lu, aige wang dai lau", ze acheu bei lei. 17 Chi 'mpuimi ne Pechu kak ze, "Anapeu ga lei", kacheu lei, zai Isua ne pechu, "Anapeu ga lei', nang kacheube ze gesang lei", 18 Ning napeu hang mengeu bam de da, zai chuna nang ngualungbepeu du ning napeu mak lei, zai nang sabe ze gesang de lei", kacheu lei. 19 Zai chi 'mpuimine Pesuage, "Apau gau, Nang a kemeu'mpeu leibe I chi lu de lei. 20 Anui paume a aipau deiloa ge kakelum de lei, zai ningnui ne rang ze ziemmename kelum sing rabe bam a Jerusalem de lei", acheu bei lei. 21 Isua ne pechu, "Mpuimi gau, Achu 'nnum'mmi le lau, panehi wang mui de lei, chize aipau deiloa gene du mak, zai Jerusalem gene du mak, kane Pepeu je ningnui kelumrabe hi de lei. 22 Ningnui a ningnui chimakbe ze kakelum lei, zai anui a anui chilube ze kakelum lei, tewka'nringbe a Judame dagene pat daseu. 23 Kane paenhi wangbe ze chuna hi de lei, kakelumbe kagesangme zene Pepeu je Herui benai samsang ne kelum gu lei, chigumbe kau ne Pechu kelum ra Pepeu ne peu daseu, 24 Hera a Herui lei, zai Pechu kakelumme a herui benai samsang ne Pechu kelum himchang ra lei", kacheu lei. 25 Chi 'mpuimi ne Pesuage, "Messiah Khrista kacheubepeu ze wangkeu mui de leibe I chi lei, Pa wangkeu dezaine mapelane anui je Pa ranglia gu lei", kacheu lei. 26 Isua ne pechu, "I ningchu ka'mpaubepeu ze Pa ze de lei", kacheu lei. 27 Chipau luage Pegu keneme wang lu, 'mpuimi je Pa ka'mpaube ze penui lulu bam de lei, kane mide, "Nang 'ndaikau lunei lau?" ze acheu mak lei. 28 Dadege chi 'mpuimi pegu heduibung sau nan ze, namdi'mbe tat tide lei, zai ziemmename suage acheuze, 29 "Wang ze atatew leine rangliabepeu je pegai ni lau! Aipaupeu ze Khrista de mei?" kacheu lei. 30 Zai namdi gene penui hela pat lu, Pe tailam wang de lei. 31 Acheu lage keneme ne Pechu kiam ze, "Rabbi gau, mateu zu lau", kacheu lei. 32 Kane Pane penui je, "Ningnui chimakbe teseu I teurabe la lei", kacheu lei. 33 Dadege kaneme ne kat kat je 'mpau ze, "Pegu teseu hang migene teiwang bei semei?" kacheu lei. 34 Isua ne penui je, "Agu hetak a Achu langgaibepeu sui'nning tew ra, zai Pe ta ze tewpuigaibe ze de lei. 35 Ningnui ne, keu medai de zaihe helu gatrabe ting chang du lei, ze acheu mak ti lau? Ningnui je I rang lei, 'ngngangchu ze helu ramme pegai ni lau, gat rahang helu ramme mei'nzin la de lei, 36 Gatrabepeu a pehi ngau gu, zai keringbe betunmakbe hang perachi kaigekua gai lei. Chigumze ka'nrukbepeu benai kegatbepeu penai hangna ne ngua hesui 'ntagai gu lei. 37 Aigeze aipau sam hangkatne 'nruk, zai kedabe peu ze ne gat lei'* kacheube ze gesang chang lei. 38 Ningnui ne tatew gai ha makbe ze gat ra I ne ningnui je langgai bei de lei; miramme ne tatewgai'ndibe ze ningnui gatra gutme ze de lei, kacheu lei. 39 Chipau namdi gene Samariame misongga ze chi 'mpuimi ne, "I tatew gai 'ndibe leine ze Pane ranglia bei de lei", acheu ze sakitew gai beibe ne Pechu 'nnum'mmi dide lei. 40 Chigum ze Samariame ne Pedage wang ze penui dage 'nnai bam ra Pechu kiam bei ze, chige langnane Pa ka'nnai lei. 41 Zai Pe sam zegene ziemmena misoangga ze Pechu 'nnum'mmi 'nkie sua dide lei. 42 Zai penui ne chi 'mpuimi je, "Chuna a ning sam sabe zegene anui 'nnumka'mmibe mak ze, anui karunne seu lu daseu, zai aize kedeipeireige tewka'nringbepeu lei ze anui chilu de lei", ze kacheu lei.

Isua ne Pesuitewbepeu hangkat na je Tewka'mmibe

43 Zai langna ne chang dege, Galili ram'mbe Pa tat tide lei. 44 Isua gimsing ne kemeu'mpeu a pe ram sing ge a pengeu ga lei, ze sakitewgai bei daseu. 45 Zai Galili ram ge Pa wangchang dege, Galili ramme ne Jerusalem ge (Tat'tua) hengi tingge Patatewgai 'ndibe leine penui ngau lu, Pechu ka'ncha de lei, penui du kahengibe ge tat dadegeu. 46 Zai Galili ram ge, Kana keloa, chige hedui ne wain chang ra Pa tewgaibe keloa ge, Pa wang kadai de lei, zai Kapernaum keloa ge, saibe hangkat pena 'nra ze bam lei. 47 Zai chi saibe ne Isua Judia ram gene Galili ge wangkeu la de leibe sam seu lu dege Pedage wang ze, Pa wangkeu ze pena je tew'mmigai ra Pechu kiam de lei, pena ehai ra tew bam di dadegeu. 48 Chidadege Isua ne pechu, "Dak benai taningdaulakbe ramme ningnui ngau mak chaine a matew tew sede ningnui a 'nnum'mmi ra mak lei!" acheu bei lei. 49 Zai chi saibe ne Pesuage, "Apau gau, ana ehai makbe suage wangkeu zu lau", kacheu lei. 50 Isua ne pechu, "Tat zu lau, ning na ring gu lei", acheu bei lei. Chipaupeu ze Isua pechu rang beibe sam ze 'nnum'mmi luze tat tide lei. 51 Zai pa acheu tat dai lage, pegu kebangme ne pechu suidau ra pat ti ze, pena ze ring la lei ze pechu paugai de lei. 52 Dadege pane penui je, pena yibi ze chu daidibe hi ze neu bei dege, penui ne pesuage, 'nzimai kunta kat hi gumbe ge pa ka'nrabe saudi de lei", kacheu lei. 53 Isua ne pechu ning na ring gu lei, kacheube lua sing ge ze de lei, ze pepeu chi dide lei, zai pa benai pe kibaume leine ze 'nnum'mmi dide lei. 54 Judia ram gene Galili ge Pa wangkeu lube chang ge ai ze taningdaulakbe Pa kenabe Isua ne tewgai bei de lei.

5

Dekuaki taige Tewka'mmibe Ta

1 Aipau changge Judame gu kahengibe kat bam ze, Isua Jerusalem 'mbe hang di lei. 2 Zai Jerusalem lung ge Meli kere kemui taihiage dekuaki kat, Hebrai kua ge Bethzatha, kacheube bam lei. Chige kemuiki kegup mengeu la lei. 3 Zai chi kegup ramme lungge teukeneume bau, pemikchitme, pepichuakanime, pepumpikatlamchaime, misongga ze, chige hedui tew'ngngai rabe hang kua ze bam lei. 4 Luage dege, Tingwang gu Angel'mpeu ne dekuaki lungge wangkeu ze, chi dekuaki hedui ze tew'ngngai gai gai lei; zai mimigede chi tew 'ngngaigaibe changge gutraibepeu a teukeneube zat 'ndaigumbe meibe du tew'mmi bei de lei. 5 Zai chige mihangkat kum himreu ze desat ria 'nra di ze bam lei. 6 Isua ne pa chige jeibe ngau lu, zai chige pa bam te desangdibe chilu dege, pechu, "Ningchu tew'mmi gai ra nang lunei mei?" ze kacheu lei. 7 Zai ka'nrabepeu ne Pechu, "Apau gau, hedui ze tew'ngngai gaibe changge dekuaki ge achu kairabe kau mide ga lei, I tat ra tew dege kedabepeu ne asua tat rai di di lei", ze kak lei. 8 Isua ne pechu, "Chu ze ning jei pua lu tat chu lau", acheu bei lei. 9 Zai luakatne chipau peu je tew'mmigai bei de lei, pe jei pua lu tat tide lei. 10 Chipau mai ze 'ntak bambe mai lei, chidaze Judame ne, tew'mmigaibe peu du ze "Namai a 'ntak bambe mai lei, ning jei pua ra hingde ne ningchu lun mak lei", kacheu lei. 11 Kane pane penui je kak ze, "Achu tewka'mmibepeu ne asuage, "Ning jei pua lu tat zu lau, ze ranggai bei lei", kacheu lei. 12 Penui ne 'nneu ze, "Ning jei pua lu tat zu lau, kacheubepeu ze chau lau"? kacheu'lei. 13 Kane yidibepeu ne, chau meibe chi ta de lei. Chige baudime bam beibe ne Isua a tat'mbia di daseu. 14 Bechang dege Isua ne pechu temple lungge ngau dau lu, pechu, "pe le lau, nang yi dide lei, hemui tew dai ta lau! Ning pereige kesiabe made pei wang ta lau", acheu bei lei. 15 Chipau peu tat tide lei, zai pechu tew'mmi beibe peu a Isua lei, ze Judame suage ranglia bei de lei. 16 Aipau zegene Judame ne Isua je deisa de lei, aibe ramme 'ntakbambe mai gene Pa tewbe zegeneu. 17 Kane Isua ne penui je kak ze, "Apeu a chuna ria chang ze tatew lamui lei, I du tew bam gu lei", acheu bei lei. 18 Aipau zegene Judame ne Pechu deichat nera peu ran bibi bam dide lei. 'Ntakbambe mai rei makbe runne mak ze, Hera a Pepeu lei, zai Pa a Hera benai ka'nsam lei ze acheu beibe zegeneu.

Pe Na ne Reze Teibe

19 Isua ne penui je, "Pelingsing, pelingsing ze ningnui je I rang lei, Pe Na Pe runne sui ne made tew chilak lei. Pepeu tatew 'ndaikau meibe ngaube runne Pa du tew zangno, Pepeu ne tewgaibe leine ze, chigum Pe Na zedu tew daseu. 20 Pepeu ne Pe Na je hung dadege Pa tewgaibe leine Pe Na je teilia kam bei lei, zai ningnui 'nningdaulak ze bam rahang ge aisua takedibe ramme Pane Pechu teilia gu rei lei. 21 Pepeu ne chaidime je zuchugai, zai penui je keringbe pei gumze, chize Pe Na ne du Pane luneime je keringbe pei gu lei. 22 pepeu a mizedu samram mak lei, kane samrambe leine Pe Na dage peigai 'nde lei. 23 Chidezaine 'nteubena ne Pe Na je hengeutew gu, Pepeu je penui hengeutew ka'nsang gum zeu, Pe Na je hengeutew makbe kau a, Pepeu Pechu langgaibepeu je hengeutew mak lei. 24 Pelingsing, pelingsing ze ningnui je I rang lei, A sam geseube kau, zai Achu langgaibepeu je 'nnumka'mmibe kau a, pedage keringbe betumakbe bam lei, zai samrambe kang ge pa bam ramak lei, kane kechaibe gene zuapat ze keringbe chang de lei. 25 "Pelingsing, pelingsing ze ningnui je I rang lei, panehi wang mui de lei, chize chuna de lei, chidezaine chaidime ne Hera Na kua seu gu lei. Zai keseume a ring gu lei. 26 Pepeu gimsing ge keringbe bam gumze Pe Na gimsing gedu keringbe bam ra Pane pei bei daseu. 27 Zai Pa ziemmena Na changbe zegene Pechu samram ra reze peigai bei de lei. 28 Aize 'nningdaulak bam se lau, panehi wang mui de lei, chidezaine heraw ge bamme leine Pe kua seu gu, 29 Zai chu gu lei, tayibe tewme a keringbe chukadaibe ge chu gu, zai ta kesiabe tewme a samramrabe (tew'nkuigaibe) chukadaibe ge chu gu lei.

Isua je Sakitewbe

30 "A karunne a made tew chilak lei, I keseube lui I samram lei. Zai Agu samrambe a peling lei, A sui'nning tew ra I peu mak, kane Achu langgaibepeu sui'nning tew ra I peu daseu. 31 A karunne Achu sakitew dizai a I sakitewgaibe ze peling ramak lei. 32 Achu sakitewbepeu kedabe la lei, zai Pane Achu sakitewgaibe ze gesang leibe I chi lei. 33 Johanbe dage ningnui langgai de lei, zai pane samsang ze sakitewgai bei lei. 34 Ziemmena dagene sakitewgaibe I ngau mak lei; kane ningnui je tew'nringgai rahang ge aize I rang lei. 35 Pa (Johanbe) a hemibung getaube lerba ze bambe kau lei. Zai ting kat hang ge a pa'mbige ningnui suiyi'nta ze bam nei de lei. 36 Kane Achu sakitewgaibe I ngaube a, Johanbe sakitewbe sua a di lei, Pepeu ne ta ramme I tew'nsang gai ra Achu peibe ze, ai I tew bambe ta ramme gimsing zene Pepeu ne achu langgai leibe sakitew gai de lei. 37 Zai Pepeu Achu langgaibepeu sing ne Achu sakitew gai lei. Pe kua ningnui a madau gedu seu mak, zai Pe lui du ningnui a madau gedu ngau mak lei. 38 Zai Pe sam du ningnui lung ge bam mak lei. Achu langgaibepeu je ningnui 'nnum'mmi mak daseu. 39 Rawgaidiakbe leisi Kanchibe ramme je ningnui peu lei, chige zene keringbe betunmakbe ningnui ngau ra 'nnumtewbe zegeneu; zai chi rawgaidiakbe leisi sam ramme zene Achu sakitew lei. 40 Acheu leusedu, keringbe ningnui ngau ra hang Adage ningnui wang neimak lei. 41 Ziemmename dagene pengeudibe I a 'ncha mak lei. 42 Kane Hera kehungbe ningnui lung ge ga leibe I chi lei. 43 Apeu ji gene I wangkeu da, zai ningnui ne Achu 'ncha mak lei, kedabepeu ne pe ji sing gene wangkeu bei laizaine a pechu du ningnui 'ncha gu lei. 44 Ningnui kat kat dagene heng'eutewbe ka'nchame, 'ndaigumze ningnui 'nnum'mmi chi lera lau? Chi hengeutewbe Hera dagene runne wangkeube je ningnui peu mak zeu. 45 I ne ningnui je Pepeu suage kesia'ndam gai gu lei, ze ningnui 'nnumgai se lau; chi Mosiabe ningnui ka'nnumbe kaibepeu zene ningnui je kesia'ndamgai lei. 46 Mosiabe je ningnui 'nnum dizai a Achu zedu ningnui 'nnum gu lei. A rasam pane rawgai daseu. 47 Kane pa rawbe sam ramme ningnui 'nnum mak dizaine a, 'ndaigumze A sam ramme ningnui 'nnum ra lau", kacheu lei.

6

Isua ne Mina changmengeume je Keibe

1 Chipau chang dege Isua Galili sungkling katlam giam Tiberias sungkling kacheu'mbe kapat ti lei. 2 Zai baudime misongga ze Pe ehai suitat tide lei. Keteu keneume peireige taningdaulakbe ramme Pa tewgaibe penui ngaulube zegeneu. 3 Isua kedeiloa'mbe hang lu, chige Pegu keneme je ngua kantau lei. 4 Zai Judame gu Tat'ntua Hengi ze na dide lei, 5 Zai Pa 'ngngangchu gap dege Pe tailam baudime misongga wangbe ngau lu, Isua ne Phillipbe dage, "Aime bau teu rabe hang ge 'ndai'nggene anui tingku lu ra lau"? kacheu lei. 6 Aize pechu kedak rahang ge Pane rang de lei, Pe karunne Pa teurabe chi lu dadegeu. 7 Phillipbe ne Pechu kak ze, penui 'nteubena kechei cheine teu gai rahang tingku dinari haina mi runne a cham lei", acheu bei lei. 8 Pegu keneme ruage mihangkat Andriwbe, Simon Peterbe kinapeu ne Isua suage, 9 "Aige 'mpeumi napoine hangkat la lei, pedage barlimeu tingku mengeu, zai heka kena bam lei, kane mina aikieme hang ge a aine 'ndaikau chang ra lau?" kacheu lei. 10 Isua ne, "Ziemmena ramme je 'ntau gai ra ngua teleu lau", kacheu lei. Zai chige timpei ramme misoangga bambe ge mina ramme ka'ntau de lei. Pumsang riak changmengeu gum lei. 11 Dadege Isua ne tingku ramme lu lu, Pe suiyibe sam paugai lu dege, ka'ntaume je 'nzigai bei de lei, chigumze heka ramme du penui teu dui dui gum pei bei de lei. 12 Zai penui teu'nggeu lu dege, Pane, pegu keneme je, "padesuine ramme kansakbe ruiwang kam lau made pei 'ngga mak rahang geu", kacheu lei. 13 Chigumze barli tingku mengeu penui ne teu kansakbe padesuine ruiwang'ndui gai dege 'ntui kereu ze kena pui lu lei. 14 Ziemmena ramme Isua taningdaulakbe tewgaibe penui ngau lu dege, "Kedeipeireige wangkeurabepeu kemeu'mpeu ze aipaupeu sing de lei", kacheu lei. 15 Pechu nim ra, zai 'nehi chine Pechu Heguang hang tewgai ra, penui wangrabe Isua chilu dege, Pe runne kedeiloa kehu 'mbe Pa tat dai dide lei.

Isua Hedui peireige Tatbe

16 Zai tingnaimik hegi dege, Pa keneme sungkling'mbe wangkeu lu, 17 'Nnei ge gut'lu, Kapernaum giam 'mbe kapat tide lei, chize mui dide lei, zai Isua a penui dage wangchang mak kerei lei. 18 Tingkai gechibe guiwang beibe zegene sungkling ge hedui kagesuak de lei. 19 Zai mei kechum mei, nu mei medai mei gumze hedui peirei ge 'nnei gene penui tat kai dege, sungkling peireige Isua tat ze 'nnei'mbe wangbe ngau lu penui hing de lei. 20 Kane Pane penui je, "I lei, hing se lau", kacheu lei. 21 Chidadege penui suiyi ze 'nnei ge Pechu t'eigut ra tew lei, zai luakatne penui tatrabe bam ge 'nnei chang dide lei.

Baudime ne Isua je Peube

22 Bechaibe mai dege sungkling katlam giam baudime bamkuame ne 'nnei kat runne bambe ngau lu, zai Isua a Pa keneme ruage chi 'nnei ge gut mak tadize, kane Pegu keneme runne tat tide leibe penui chi lu de lei. 23 Kane Heguangpeu Pe suiyibe sam paugailube chang ge penui tingku teube bam ge Tiberias'mbene kedabe 'nnei ramme wangchang de lei. 24 Dadege baudime Isua benai Pa keneme chige bam mak leibe chi lu dege 'nnei ramme ge gut lu Kapernaum'mbe Isua je peu tat tide lei.

Isua, Keringbe Tingku

25 Sungkling katlam giam 'mbene Isua je penui ngaudau lu de lei, penui ne Isua je, "Rabbi gau, 'ndaitewbe luane Nang aige pat ti lau"? ze kacheu lei. 26 Isua ne penui je kak ze, "Pelingsing, pelingsing ze ningnui je I rang lei, taningdualakbe ramme ningnui ngaulube zegene Achu ning nui a peu mak lei, kane tingku ramme ningnui teu'nggeugitlube zegene lei. 27 Hetak 'ngga dairabe hang ge ningnui tatew se lau, kane keringbe betunmakbe bam bam derabe hang ge tatew lau, chize ziemmena Na ne ningnui je pei gu lei. Hera Pepeu ne Pe peireige Pa ka'nchatbe kai'ndi daseu", kacheu lei. 28 Dadege penui ne Pechu, "Hera gu ta anui tewrabe ze 'ndaikau anui tew ra lau", kacheu lei. 29 Isua ne penui je kak ze, "Hera gu ta a aize de lei, Pane langgaibepeu je ningnui 'nnum'mmi ra de lei", kacheu lei. 30 Dadege penui Pechu'' Acheu zaine anui ngau lu Ningchu 'nnum'mmi lerahang ge taningdaulakbe 'ndaikau Nang tewgai lau? 31 Anui peume a henamkang ge mana ze teu lu de lei, "Tinggim'mbene penui teu ra Pane pei bei lei", ze acheu rawgai'ndibe gum zeu. 32 Dadege Isua ne penui je, "Pelingsing, pelingsing ze ningnui je I rang lei, tinggim'mbene tingku ningnui je peigaibe ze Mosiabe ne mak lei, Apeu ne tingim'mbene tingku gesang ningnui je pei lei. 33 Hera gu tingku a tinggim'mbene wangkeu ze, kedeipeirei je Pa keringbe pei bei daseu", kacheu lei. 34 Dadege penui ne Pesuage, "Heguang gau, aipau tingku anui je pei bam lau", kacheu lei. 35 Zai Isua ne penui je, "I keringbe tingku lei, Adage wangbe kau a mateu teu sede 'nzei dai ramak lei, zei Achu 'nnumka'mmibe kau a mateu teu sede herei dai ramak lei. 36 Kane ningnui je I rang lei, Achu ningnui ngau lu da, kane 'nnum'mmi mak lei. 37 Apeu ne Achu peigaibe leine Adage wang gu, zai Adage wangbe kau je a mateu teu sedu pechu I kelitua ramak lei. 38 A sui'nning tew ra tinggim'mbene I wangkeu mak lei, kane Achu langgaibepeu 'nning tew ra wangkeu daseu. 39 Zai Achu langgaibepeu 'nning a aize de lei, Achu peigai'ndibe leine made tew'ngga ramak lei, kane nalangbe mai ge teichu dai gu lei. 40 Hangkatte hangkatte Pe Na je ngau lu 'nnumka'mmibe kau a keringbe betunmakbe ngau sing gu, zai I ne nalangbe mai ge pechu zuchu dai gu lei, aize Apeu 'nning daseu", kacheu lei. 41 Dadege Judame ne Pechu katelum lei, "tinggim'mbene wangkeube tingku I lei'' Pa acheu sa beibe zegeneu. 42 Penui ne acheuze, aize Isua Josephbe na Pepeu benai Pepui je anui chimak ti lau? 'Ndaigumze Pa, I a tinggim'mbene wangkeu lei ze Pa kacheu lau?" ze penui kacheu lei. 43 Isua ne penui je, "Ningnui karai runne telum se lau. 44 Pepeu Achu langgaibepeu ne 'nrupwang mak ehai a mide Adage wang chilak lei. Zai I ne nalangbe mai ge pechu zuchu gai dai gu lei. 45 Kemeume ne rawgai'ndibe gumze, 'Penui 'nteubena je Hera gu gene geteigai kam gu lei'. Hangkatte hangkatte Pepeu kua seu, zai Pedagene geteilube kau Adage wang lei. 46 Migede Pepeu je ngau lube kau ga lei, Hera dagene Patbepeu runne Zangno Pa Pepeu je ngau lu de lei. 47 Pelingsing, pelingsing ze ningnui je I rang lei, 'nnumka'mmibe kau a pedage keringbe betunmakbe bam lei. 48 I keringbe tingku lei. 49 Ningnui peume a henamkangge Manna ze teu da, zai penui ehai dide lei. 50 Aize tinggim'mbene wangkeube tingku ze I lei, ziemmena ne chize teu lu ehai mak rahang geu. 51 Tinggim'mbene wangkeube tingku keringbe I lei. Migede aipau tingku teu dizai a betingbeta pa ring gu lei, zai kadeipeirei ringrabe tingku I peirabe a, Apum ji lei", kacheu lei. 52 Dadege Judame penui karai tu ze, "'Ndaigumze aipaupeu ne Pepum ji anui teu ra pei chi ra lau?" Kacheu lei. 53 Zai Isua ne penui je, "Pelingsing, pelingsing ze ningnui je I ranglei, ziemmena Na pumji ningnui teu, zai Pe jai ningnui sak lemak ehai ne a, ningnui ge keringbe ga lei. 54 Apumji teube kau, zai sakbe kau a, pedage keringbe betunmakbe bam lei, zai nalangbe mai ge I ne pechu teichu dai gu lei. 55 Apumji a hetak gesang, zai A jai a gesakbe gesang lei. 56 Mimigede Apumji teu, zai A jai sakbe kau a Adage bam bam lei, zai I du pedage bam bam lei. 57 Pepeu keringbepeu ne Achu langgai lei, zai Pepeu zegene I ring gumze, Achu geteube kau a A zegene pa ring gu lei. 58 Aize tinggim'mbene wangkeube tingku lei, ningnui peume chi tingku ze penui teu lu, chaidibe gum mak ze mimigede aipau tingku teube kau a betingbeta ring bam gu lei", kacheu lei. 59 Kapernaum keloa kanduibe kige Pa geteiliabe luage aize Pa sa lei. 60 Zai Pegu keneme misongga ze, chize seu lu dege, "Aipau sam a chukbe kau lei, chaune chize seu chi ra lau", ze penui kacheu lei. 61 Kane Isua Pe karunne ne Pegu keneme ne aipau sam ze katelum leibe chi lu dege, Pane penui je, "Aipau sam ne ningnui lung tew kahezam mei? 62 Acheu dizaine a, ziemmena Na Pa tingte bambe bam ge Pa chube ningnui ngau ra zai a, ningnui 'ndaikau sa ra lau? 63 Herui ne keringbe peigai lei, hemeipum a matauhang ga lei, ningnui dage I sagai'ndibe sam ramme a herui benai keringbe lei. 64 Kane ningnui ruage hanggesame a 'nnum'mmi mak lei", kacheu lei. Isua a bepibang gene chaume ne Pechu 'nnum'mmi mak mei, zai chaune Pechu zua ra meibe Pa chi lu dadegeu. 65 Zai Pane, "Aipau zegene ningnui je I rang bei dezei lau, Pepeu ne Pechu pei bemak ehai a, mide Adage wang chilak lei zeu", kacheu lei. 66 Aipau chang dege Pa keneme misongga ze Pechu ngua tadi ze tat ti de lei. 67 Isua ne kereu ze kename je, "Ningnui du tat ra nei mei?" kacheu lei. 68 Simon Peterbe ne Pesuage, "Awang gau, chau dage anui tat ra lau? Ning dage keringbe betunmakbe sam la dezei lau', 69 Zai Nang a Hera gu Kanchibepeu leibe anui 'nnum'mmi zai chi lu de lei", ze kak lei. 70 Isua ne penui je kakze, "Ningnui hangkereu ze kename je I ne kelanggai mak ti lau? Kane ningnui ruage mihangkat a diabolbe ze de lei", kacheu lei. 71 Aize Judasbe Iskariot'mpeu, Simonbe na hangkereu ze kename ruage mihangkat du Pa rang lei, chipau peu ne Isua je zua ra chang daseu.

7

Isua benai Pe kiname

1 Chipau changge Isua Galili ram'mbe tat ti lei, Judame ne Pechu deichat ra tew beibe zegene Judia ram lung ge tatrua nei mak lei. 2 Zai Judame gu Hetiam liambe Hengi na dide lei. 3 Zai Pe kiname ne Pechu, "Aipau bam sau nan ze Judia ram'mbe tat tu lau, Ning gu keneme ne Nang tatewbe ngau lerahang geu. 4 Pechu chiba dera peube kau a mide 'nkim tatew mak lei, aibe ramme Nang tew lei zaine a, Ning gim sing ne kedeime dage teilia be lau", kacheu lei. 5 Pe kiname nedu Pechu 'nnum'mmi mak ti daseu. 6 Dadege Isua ne penui je, "Ating a wangchang mak kerei lei, kane ningnui ting a aige bam la lei. 7 Kedeipeirei ne ningnui je ngaugai lak chilak lei, kane kedeipeirei ne Achu a ngaugailak lei, I ne kedeipeirei tatew ramme a sia lei ze sakitew beibe zegeneu. 8 Kahengibe ge ningnui runne tat tu lau, aipau kahengibe ge I a tat ramak kerei lei, Ating a chang mak kerei daseu", kacheu lei. 9 Pane acheu sagai luze, Galili ram ge Pa a 'nnai gai di gerei lei.

Isua Hetiamliambe ngi ge

10 Kane Pe kiname kahengibe ge hangdibe chang ge, Pa du hang dide lei. 'Ndulang ze tat mak ze, 'nkimne tatti lei. 11 Zai kahengibe ge Judame ne Pechu peu ze, "Pa 'ndaige la lau?" ze penui kacheu lei. 12 Zai baudime ruage Pa tedeu ge sam telum ze, hanggesame ne, "Pa a ziemmena keyibe kau lei", acheu, zai kedame ne "Mak lei, Pane baudime je nguale tat kanze lei", kacheu lei. 13 Kane Judame je hingbe zegene mide Pe rasam 'ndulang ze saba mak lei. 14 Zai hengi prige Isua temple lung ge gut lu ze geteilia de lei. 15 Dadege Judame ne chize 'nningdaulak tize, "Aipau peu ze getei 'nrik mak ze 'ndaigumze Pedage gechibe bam lau?" ze penui kacheu lei. 16 Isua ne penui je kakze, "I geteiliabe sam a Agu mak lei, kane Achu langgaibepeu gu lei. 17 Mimigede Pa 'nning tew ra neibe kau a I geteiliabe sam ze Hera dagene pat mei, nune A sui sui ne sabe sam meibe pa chi gu de lei. 18 Mimige perunne gu reze ne sam sabe kau a perunne ngeu hang peu lei, kane pechu langgaibepeu ngeudibe peube kau a kapelingbe kau lei, zai pedage ka'nkuibe made ga lei. 19 Mosiabe ne ningnui je hingde pei gai mak semei? Kane ningnui ruage mide hingde rei mak lei, 'ndaitewze ningnui Achu deichat nera peu lau?" kacheu lei. 20 Zai baudime ne Pechu kakze, "Ning dage herasiabe bam ze lau; chaune Ningchu deichat ra peu lau?" kacheu lei. 21 Isua ne penui je, "Ta kat I tew beibe zegene ningnui 'nningdau lak lei. 22 Mosiabe ne ningnui je rumkagetanbe pei da, (chize Mosiabe dagene patbe mak ze, kane ningnui paume dagene pal lei) zai 'ntakbambe mai ge ziemmena je ningnui ne rumkagetanbe tew lei. 23 Mosiabe gu hingde ze tewpang mak rahang ge 'ntakbambe mai gedu ziemmena rumgetan dizai a 'ntakbambe mai ge ziemmena pumlui ze I tew'mmi 'nchichiak beibe zegene A peireige ningnui lumpum mei? 24 Kengaube ramme gene samram se lau, kane samrambe ge peling ne samram lau", kacheu lei.

Pa ze Messiah de mei?

25 Chidaze Jerusalem ge bamme hanggesamene, "Penui deichat nera peube peu ze aipau peu mak te lau? 26 Pe le lau, aige 'ndulang ze pa sam sa la lei, zai Pechu penui ma lei du mak zeu', Aipau peu ze Khrista de leibe rezeteime chising lu de mei? 27 Kane aipau peu ze 'ndai'nggene wang meibe anui a chi lei, kane Khrista wangkeu dezaine Pa 'ndai'nggene pat meibe mide chi ramak lei", kacheu lei. 28 Zai temple lungge Isua ne geteiliabe luage, Pa 'nrung ze, "Ningnui ne Achu chi zai I 'ndai'nggene wangkeu meibe du ningnui chi lu de mei? Kane I a A sui sui ne wangkeube mak lei; Achu langgaibepeu a gesang lei; zai Pechu ningnui a chimak lei, 29 I a Pechu chi lei, Pedagene I pat daseu, zai Pane Achu langgai bei de lei", kacheu lei. 30 Chidadege Pechu nim ra penui peu de lei, kane panehi wangchang makbe zegene mide Pechu deigai mak tadi lei. 31 Acheu leusede mina misonggame ne Pechu 'nnum'mmi dide lei. Penui acheu ze, "Chi Khrista wangkeu dezaine, aipau peu ne dak ningdaulakbe ramme tewgai'ndibe sua kie ze tewlia gu mei?" kacheu lei. 32 Pharisaime je baudime ne Pe rasam aigumze sa katelumbe seu lu dege, tingkugechingme benai Pharisaime ne pechu nim ra sipaime hetui puame je langgai bei de lei. 33 Dadege Isua ne penui je, "Beting keduine hang ge ningnui dage I bam gai gu rei lei, chidezaine Achu langgaibepeu dage I tat gu lei. 34 Ningnui Achu peu gu, kane ningnui Achu ngau ra mak lei; I bambe bam ge ningnui wang chilak lei", kacheu lei. 35 Dadege Judame ne penui karai ge, "Aipau peu ze 'ndai'nggene tat tera mei, Pechu anui ngau mak rahang geu? Grikme ruage heti tiruame dage pa tat ze Grikme je Pa geteilia ra Pa ka'nning semei? 36 Ningnui Achu peu gu, kane ningnui Achu ngau ramak lei, zai I bam be bam ge ningnui wang chilak lei; kacheube ze 'ndaikau gu rimba lau? kacheu lei.

Keringbe peibe Geuki ramme

37 Kahengibe nalangbe mai zai ngidi mai ge, Isua sapchu lu, sa ze, 'Hangkatte hangkatte herei zai a pei Adage wang sak lau, 38 Mimigede Achu ze 'nnumka'mmibe kau a rawgaidiakbe leisi ge rangbe luigumze hedui keringbe geuki ramme pelung gene lua gu lei", kacheu lei. 39 Aipau sam ze Pechu ze 'nnumka'mmime ne herui ngau rabe ze rang lei, chuna ria chang ze herui ze peigai mak kerei lei, Isua je hengeutew'ndi mak kerei dadegeu.

Baudime ruage Pebau Pangpatbe

40 Aipau sam ramme penui seu lu dege, baudime ruage hanggesame ne, "Aipau peu a kemeu'mpeu gesangbe kau lei", kacheu lei. 41 Kedame ne, "Aipau peu a Khrista lei", kacheu lei. Kane hanggesame ne, "Galili ram gene Khrista pat ra semei? 42 Khrista a Davidbe dagene piakeu ze Davidbe bambe keloa Bethlehem gene wangkeu gu lei, ze rawgaidiakbe leisi gene rang mak ti lau?" kacheu lei. 43 Chidadege Pe zegene baudime ruage Pebau pangpat tide lei. 44 Hanggesame ne Pechu nim ra lunei de lei, kane mide Pepeireige deigai mak tadi lei. Judame pesuitewme ne 'Nnum'mmi makbe 45 Zai sipaime ne tingkugechingme benai Pharisaime lam'mbe wang dai lu, zai chime zene sipaime je, "'Ndaitew bei ze Pechu ningnui 'ngngua wang mak lau"? Kacheu lei. 46 Sipaime ne kak ze, "Madau du aipau peu sam sa gumze mide sa mak lei", kacheu lei. 47 Zai Pharisaime ne penui je kak ze, "Ningnui je du kelutew 'ndi de mei? 48 Reze teime benai Pharisaime ruage mige Pechu 'nnumka'mmibe kau la de mei? 49 Kane ai baudime hingde chimakme ze desat kai'nde lei", kacheu lei. 50 Zai penui ruage mihangkat Nikodimasbe 'ndage Isua dage wangbepeu zene penui je, 51 "Pe rasam benai Pa 'ndaikau tatew meibe ze 'nking lu, chimakbe sua'nkage ziemmena ze anui gu hingde gene samram mei?" 52 Penui ne pechu, "Nang du Galili'mpeu se mei? peu gai ni lau, Galili ram gene kemeu'mpeu pat gu leibe Nang ngau ramak lei", kacheu lei. 53 Dadege penui hangkat kat neze penui ki'mbe tat kam dide lei.

8

'Mpuimi kahemabe luage Nimbe

1 Kane Isua a Olive loa'mbe tat ti lei. 2 Hechua sun ge temple ge Pa gut kadai lei, zai mina 'nteubena Pedage zuawang de lei, Pa 'ntau lu, penui je geteilia bei lei. 3 Zai leisirawme benai Pharisaime ne 'mpuimi hangkat kahemabe luage nimlube pui je ngua wang lu, sungngangkeli ge pechu tei'nsap kai lu, 4 Penui ne Isua je, "Geteiliabepeu gau, aipau pui ze pa kahemabe tatewbe luage nim lu de lei. 5 Hingde ge Mosiabe ne chigumbe kau je a tingchu ne tua chat ra hukum pei gai lei, aipau pui gim ge Nang 'ndaigum ka'nning lau?" kacheu lei. 6 Aize Pechu kedak ra penui sa lei, Pepeireige penui ne kesia'ndam gai rahang geu. Isua keikeu lu, Pe bakerang ne kedeige ma rawgai lei. 7 Zai penui ne Pechu samneu ze bam bei dege, Pa sapchu lu penui je, "Ningnui ruage hemui gabe kau ne aipau pui je tingchu ne pei tuagai rai lau", acheu bei lei. 8 Zai Pa keikeu dai lu, Pe ba kerang ne kedeige ma rawgai kadai de lei. 9 Kane chipau sam penui seu lu dege, chinglangbepeu ne tat rai chu ze, hangkat katne penui tat kam dide lei. Isua benai 'mpuimi Pesuage sap bambe du runne saugai 'ndi lei. 10 Zai Isua 'ngngangchu lu, chipau pui je, "'Mpuimi gau, mide ningchu tew'nkui gai mak semei? penui 'ndai 'ngge la lau?" kacheu lei. 11 Chi 'mpuimi ne, "Awang gau, mide ga de lei", kacheu lei. Zai Isua ne, "I du ningchu tew'nkui gai mak lei, tat tu lau, hemuitew dai ta lau", acheu bei lei.

Isua kedeipeirei Kebabe lei

12 Dadege Isua ne penui je sam sa dai ze, "I a kedeipeirei kebabe lei, Achai suibe kau a kemuibe ge tat ramak lei. Kane keringbe gu kebabe p? ngau gu lei'' kacheu lei. 13 Chidadege Pharisaime ne Pechu, "Ning ka runne Ningchu sakitew zeu, Nang sakitewgaibe ze gesang mak lei", kacheu lei. 14 Zai Isua ne penui je, "Aka runne Achu sakitew sedu, I saki tewgaibe a gesang lei, I 'ndai'nggene wang meibe, zai I 'ndai'ngge tat ra meibe ze I a chi lu daseu; kane ningnui a I 'ndai'nggene wang mei, zai I 'ndai'ngge tat ra meibe chi mak lei. 15 Ningnui a hemeipumse lui gene samram lei, I a mizede samram mak lei. 16 I a samram leu sedu Agu samrambe a gesang lei, Arunne ne I samram me lei; kane I benai Achu langgaibepeu ne samram daseu. 17 Ningnui gu hingde ge mina hangna gu saki a gesang lei ze rawgai lei. 18 I a Akarunne ne Achu sakitew, zai Pepeu Achu langgaibepeu ne Achu sakitew lei", kacheu lei. 19 Chidadege penui ne Pesuage, "Ning peu 'ndai'ngge la lau?" kacheu lei. Zai Isua ne penui je kak ze, "Ningnui Achu zedu, zai Apeu zedu chimak lei; ningnui Achu chi lu laizai a, Apeu zedu ningnui chi gu lei", kacheu lei. 20 Temple ge Pa geteiliabe luage, miha kaikanduibe bam gene aipau sam ramme Pa sa de lei; kane mide Pechu nei mak tadi lei, panehi wangchang mak kerei dadegeu. I Tatbe ge Ningnui Tat chilak lei. 21 Dadege Pane penui je rang dai ze, "I tat tu, zai Achu ningnui peu gu, zai ningnui a ningnui hemui gene ehai gu lei, I tat kaibe ge ningnui a wang chilak lei", kacheu lei. 22 Zai Judame ne, "Pe karunne Pechu deichat nera de mei, I tatbe ge ningnui a wang chilak lei, Pa kacheu dadegeu?" kacheu lei. 23 Pane penui je, "Ningnui a 'nkang'mbe ne pat lei, I a kehu 'mbe ne wangkeu lei, ningnui a ai kedeipeirei gu lei, I a ai kedeipeirei gu mak lei. 24 Ningnui gu hemui ramme ge ningnui a ehai gu lei, ze ningnui je I rang bei de lei, Pa (Khrista) ze I ze de leibe ze ningnui 'nnum'mmi mak tizaine a ningnui gu hemui ge ningnui ehai gu daseu", kacheu lei. 25 Penui ne Pesuage, "Nang chau lau?" kacheu lei. Isua ne penui je, "'Ndaitew bei ze ningnui je I 'mpau bam ra lau? 26 Ningnui rasam ge mama ramme misongga I sa ra, zai samram ra la lei; kane Achu langgaibepeu a gesangbe kau lei, zai Pedagene I seu lube leine ze kedeipeireige I sarua ra de lei. 27 Pepeu rasam penui dage Pa salia gai bei de leibe penui a chi 'mmi mak lei. 28 Chidadege Isua ne penui je, "ziemmena Na je ningnui teigetuachu gai dezaine, Pa ze I de leibe ningnui chi chang gu lei. Zai arunne gu reze ne I a made tewmak lei. Apeu ne Achu geteilia gai 'ndibe gumze chize I sa lei. 29 Zai Achu langgaibepeu ze Adage bam lei. Pane A karunne bam ra saugai mak lei. Panehi 'nsang ne ge Pe suiyi ra I tewgaibe zegeneu, "kacheu lei. 30 Zai Pa sam sa lage, mina misonggame ne Pechu 'nnum'mmi dide lei.

Lungzeunetewme benai Kebangme

31 Dadege Isua ne Judame Pechu 'nnumka'mmime dage, "A sam ge ningnui bam bam dizaine a A keneme gesang changgu lei. 32 Zai samsang ze ningnui chi gu, zai chi samsang ne ningnui je lungzeune tewgai gu lei", kacheu lei. 33 Penui ne Pesuage, "Anui a Abrahambe chaname lei, madau gede anui a kebang tew bam me lei. 'Ndaigumze nang ne ningnui je lungzeune tewgai gu lei, ze Nang sa lau?" ze kak lei. 34 Isua ne penui je kak ze, "Pelingsing, pelingsing ze ningnui je I rang lei, mimigede hemuitewbe kau a hemui gu kebang lei. 35 Kebang a heki ge betingbeta bam bam mak lei, kane Pe Na 'mpeumi a betingbeta bam bam lei. 36 Chidaze Pe Na ne ningnui je lungzeune tew ra tewgai bei zai a ningnui lungzeune tew sing gu lei. 37 Ningnui a Abrahambe chaname lei, I chi lei; kane Achu deichat ra ningnui peu lei, ningnui lung ge A sam hang bam gabe zegeneu. 38 Apeu dage I ngaulube I sa lei, zai ningnui peu dagene ningnui seulube ze ningnui sa lei", kacheu lei: 39 PenuinePesuage, "Abrahambe a anui peu lei", kacheu lei. Zai Isua ne penui suage, "Abrahambe chaname ningnui chang dizdi a, Abrahambe tewbe ningnui du tew gu lei. 40 Kane chuna ge Achu deichat nera ningnui a peu lei. Hera dagene samsang I seulube ningnui je I ranggaibepeu ze I de lei. Aize a Abrahambe ne tew mak lei. 41 Ningnui a ningnui peu tewgaibe ta ramme tew lei", kacheu lei. Zai penui ne Pesuage, "Anui a hangleutewbe gene lungkeube mak lei, anui peu a kat runne lei, chize a Hera lei", kacheu lei. 42 Isua ne penui je, "Hera a ningnui peu lei dizaine a ningnui Achu hung gu, Hera dagene pat ze I wangkeu dazeu, A sui ne I wangkeube mak; kane Pane Achu langgai bei lei. 43 'Ndaitewze I sam sabe ze ningnui 'nning chimak lau? Asam ningnui seu chilakbe zegeneu. 44 Ningnui a ningnui peu Diabolbe gu lei, zai ningnui peu luneibe ramme tew ra ningnui ka'nning lei, pa a bepibang gene kegibepeu de lei. Zai sam ge pa a sap mak lei, pedage samsang gabe zegeneu. Karasa ne pa sam sabe ze, chize pa telungtak lui gene pa sam sa lei, pa a karasa sabekau dazeu, zai pa a karasa leine gu peu lei. 45 Kane samsang I ranglia beibe zegene ningnui Achu 'nnum'mmi mak lei. 46 Ningnui ruage chaune Achu hemui hang tew'nkui gai lau? I ne samsang ranglia zai a 'ndaitew ze ningnui Achu 'nnum'mmi mak lau? 47 Hera gu mina a Hera sam ramme ka'nking lei, ningnui 'nking makbe patedeu a, Hera gu mina ningnui chang makbe zegeneu", kacheu lei.

Isua benai Abrahambe

48 Zai Judame ne Pesuage, "Nang a Samaria'mpeu zai herasiabe je ka'ngnguabe kau lei, ze anui kacheube ze tau mak ti lau?" kacheu lei. 49 Isua ne penui je kakze, "Adage herasiabe ga lei, kane Apeu du hengeutew lei, zai ningnui a Achu hengeutew mak lei. 50 Kane A runne A ngeudi ra I peu mak lei, chize peubepeu mihangkat la lei. Zai Pane samrambepeu chang gu lei. 51 Pelingsing, pelingsing ze ningnui je I rang lei, "Mimigede A sam teika'mmibe kau a mateu teu sede kechaibe pa ngau ramak lei", kacheu lei. 52 Zai Judame ne Pesuage, "Chuna Ning dage herasiabe bam leibe anui chi dide lei Kemeume ehai gum Abrahambe a ehai dida, acheu leusedu Nang ne, "Mimigede A sam ze teika'mmibe kau a mateu teu sedu kechaibe ze pa 'ndautau ramak lei, acheu bei lei, 53 Anui peu Abrahambe chaidibepeu sua Nang dibi mei? Zai kemeume du ehai kam da, Ning ka runne Ningchu chau hang riamgai lau?" kacheu lei. 54 Isua ne kak ze, "A karunne A ngeutew'ndi zai a, A ngeudibe ze matau hang ga lei, Apeu ne A ngeutewka'ndi lei, zai chipau Peu duze ningnui Rapeu leibe ningnui sabepeu zeu. 55 Kane ningnui a Pechu chimak lei, I Pechu chi lei, Pechu I chimak lei ze acheu dizai a, ningnui gumze I karasa sabe kau chang gu, kane I a Pechu chi zai Pe sam ze I reika'mmi lei. 56 Ningnui peu Abrahambe Ating ze ngau ra pe suiyi'nta ze bam de lei, zai chize pa ngau lu pe suiyi de lei", kacheu lei. 57 Dadege Judame ne Pesuage, "Nang a kum rengeu du chang mak kerei da, Abrahambe ze Nang ngau de mei?" kacheu lei. 58 Isua ne penui je, "Pelingsing, pelingsing ze ningnui je I rang lei, Abrahambe bam makbe suage I a bam lei", kacheu lei. 59 Chidadege a Pechu tua ra tingchu penui lu de lei, kane Isua ne Pe karunne tew'mbia ze temple gene zuapat tide lei.

9

Lungkeube gene Pemikchitbepeu je Isua ne Tewka'mmibe

1 Zai Isua acheu ze tatpat lage, mihangkat lungkeube gene pemik chitbepeu je Pa ngau de lei. 2 Zai Pa keneme ne Pechu 'nneu ze, "Rabbi gau, chaune hemui tew bei ze pa pemikchit ze lungkeu lau? Aipau peu ne mei, nune pepui pepeu ne lau", ze kacheu lei. 3 Isua ne kak ze, "Aipaupeu ne hemuitewbe gene mak, zai pepui pepeu ne du mak lei, kane Hera tatewbe ramme teilia gai rahang ge lei. 4 Tingbabe luage Achu langgaibepeu ta ramme anui tew himchang ra lei, mui wang dezaine mide tatew chilak te lei. 5 Kedeipeireige I bam tane, I a kedeipeirei gu kebabe lei", kacheu lei. 6 Chize Pa sagai lu dege, kedeige 'nehai 'ntui gai lu, 'nchaine timdeu tew lu, chipaupeu mik kenalam ge timdeu ze kenei gai de lei. 7 Pechu acheu sa ze, "Tat ze Siloam dekuaki gene hui ne lau", acheu bei lei. (Siloam kacheube ze 'Langgai'ndibe' kacheu be lei). Zai Pa tat ze hui lu, zai pemik ne ngau chi dai lu ze wang kadai de lei. 8 Pe ramname benai tingtege pa maketeubepeu chang ze penui ngaulume ne, "Aipaupeu ze tingtege 'ntau lu maketeubepeu mak ti lau?" ze kacheu lei. 9 Hanggesame ne, "Pa de lei, acheu; zai kedame ne "mak lei, kane pechu kanzuabe kau lei", kacheu lei. Pane "I ze de lei", kacheu lei. 10 Zai penui ne pechu, "Acheu zaine 'ndaigumze ning mik Iat kai bei lau?" kacheu lei. 11 Pane kak ze, "Mihangkat, Isua kacheubepeu ne, timdeu tew lu, amik kena ge kenei gai lu, achu tat ze Siloam dekuaki gene hui ne lau, kacheu lei' chigumze I tat ze huigai lu, zai amik ne ngau kadai de lei", kacheu lei. 12 Penui ne pechu, "Pa 'ndaige la lau?" kacheu lei. Zai pane, "I a chime lei", acheu bei lei.

Pharisaime ne Tewka'mmibe deuge Samkakedibe

13 Tingte ge pemikchitbepeu je Pharisaime dage penui ne 'ngnguawang de lei. 14 Isua ne timdeu tew lu pe mik ngau ra tew gaibe mai ze 'ntakbambe mai de lei. 15 Dadege Pharisaime ne, 'ndaigumze pe mik ngau dai lu meibe rasam pechu 'nneu kadai de lei. Zai pane penui je, "Pane amik ge timdeu keneigai bei ze, zai I huigai bei ze 'ngau lu lei;' kacheu lei. 16 Dadege Pharisaime hanggesame ne, "Aipau Peu a Hera dagene patbe kau mak lei, 'ntakbambe mai ze Pa rei mak daseu", kacheu lei. Kane kedame ne, "'Ndaigumze hemui kau ne aigum dak ningdaulakbe ramme tew chi ra lau?" kacheu lei. Zai penui ruage pebau pat tide lei. 17 Chidadege penui ne pemikchitbepeu je, "Pane ning mik kena lat beibe zegene Pechu nang 'ndaikau tew lei lau?", kacheu lei. Zai pane, "Pa a kemeu'mpeu lei", acheu bei lei. 18 Judame a pa pemikchittibe ze ngau dai lu de leibe 'nnum'mmi mak tadi lei, pe mikchitbe ze ngau dailubepeu pui benai pepeu je kugai mak tane 'nnum'mmi mak tadi lei. 19 Zai penui ne penai je, "Aize ningnai na lungkeube gene pe mikchit lei ze ningnai kacheube peu de mei? 'Ndaigumbe ne pa chuna ngau kadai lau? ze ka'nneu lei. 20 Pepui benai pepeu ne kak ze, "Aize anai na, zai pe mikchit ze pechu lungkeu de leibe anui chi lei. 21 Kane 'ndaigumze pa ngau kadai meibe anui chi mak lei, zai chaune pe mik kena lat kai kadai meibe du anui a chimak lei, pechu neu lau, pa pesuitewdibe kau da, pe karunne ne pa sa gu lei", acheu bei lei. 22 Pepui benai pepeu ne Judame du hingbe zegene aize sa de lei, Judame ne, mimigede Pa a Khrista lei ze ka'nchabe kau la zai a, chipau peu du a kanduibe kigene tuapat gu lei ze penui lung hezuagai'ndi daseu. 23 Chidadege pepui benai pepeu ne, "Pa a pesuitew de lei, pechu 'nneu le lau", kacheu lei. 24 Chidaze pe mikchitbepeu je pakenabe ge penui ku dai lu, pechu ze, "Hera je toa lau, aipau Peu a hemui kau leibe anui chi lei", kacheu lei. 25 Dadege pane kak ze, "Pa a hemui kau meibe I a chi mak, kat I chibe a I amikchit ti ze chuna a I ngau dai lu de lei", kacheu lei. 26 Penui ne pechu, "Ningchu Pa 'ndaikau tewgai lau? 'Ndaigumze ning mik kena ze Pa lat kai bei lau?'' kacheu lei. 27 Pane penui je kakze, "Ningnui je I rang bei ze ningnui 'nking mak tadi zei lau, 'ndaitewze ningnui 'nking dai nei lau? ningnui du Pegu keneme tew nei mei?" kacheu lei. 28 Zai penui ne pechu 'nru gete ze, "Nang Pa kene'mpeu de lei, kane anui a Mosiabe gu keneme lei. 29 Hera ne Mosiabe dagene sam salia leibe anui chi, kane aipau peu dage a Pa 'ndai'nggene pat meibe anui chi mak lei", kacheu lei. 30 Zai chipau peu ne kak ze, "Aize 'nningdaulak desang lei, Pa 'ndai'nggene pat meibe ningnui chi mak, leusede Pane amik lat kai bei de lei. 31 Hera a hemuime kua 'nking mak leibe anui chi, kane hangkatte hangkatte Hera ze kelum, zai Pe sui'nningtew dizaine a chigumbe kau du ze a Hera ne ka'nking lei. 32 Kedeipeirei bepibang gene seuze, migede lungkeube gene pemikchitbepeu mik latkai beibe ze madaugedeseu 'nrei mak lei", kacheu lei. 33 - 34 Penui ne pechu kak ze, "Hemui desangdibe ge ningchu lungkeu gai da, nang ne anui je geteilia ra semei?" kacheu lei. Zai penui ne pechu hela'mbe kelitua'ndi de lei.

Herui lam ge Pemikchitbe

35 Isua ne chipau peu duze, penui ne hela'mbe kelitua 'nde leibe seu lu, zai pechu ngaudau lu ze, Isua ne pechu, "Ziemmena Na je nang 'nnum'mmi mei?" kacheu lei. 36 Chipau peu ne kak ze, "Awang gau, chipau Peu ze chau lau, Pechu ze I 'nnum'mmi rahang geu?" kacheu lei. 37 Isua ne pechu, "Nang ne Pechu ngau lu, zai ningchu ka'mpaube peu ze de lei", kacheu lei. 38 Zai pane, "Awang gau, I 'nnum'mmi lei", kacheu lei, zai Pechu pa kakelum de lei. 39 Isua ne, "Samram gai be rahang ge kedeipeireige I wangkeu de lei, ngau makme zene ngau chi ra, zai kengaume ne penui mikchit rahang geu", kacheu lei. 40 Zai Pharisaime hanggesame chige bamme ne chipau sam seu lu, Pesuage, "Anui du mimikchitme semei?" kacheu lei. 41 Isua ne penui je, "Ningnui mikchit ze bam dizai a, hemui gene ningnui a 'nkui ramak; kane chuna ningnui ne anui je ngau lei, kacheube gene ningnui mau ze bam larei lei", kacheu lei.

10

Melireibepeu gu Sam'nda

1 Isua ne "Pelingsing, pelingsing ze ningnui je I rang lei, meli relung kemuiki gene gut makbe kau, kane kedabe 'mpui gene keuchu ze gutbe kau a, makahegabe kau zai hegasutteube kau lei. 2 Kane mimigede kemui kigene gutbe kau a, pa melireibepeu lei. 3 Kemuiki reibepeu ne pechu 'nkam latkai bei zai meli ramme ne pe kua seu lei, zai hela'mbe pane penui je 'ngnguapat lei. 4 Pegu meli ramme leine kumpat lu, dege, penui. sua'mbe Pane raitat lei, pe kua penui chi dadegeu. 5 Hesang'mpeu (pelui chimakbe kau) duze mateu teu sede pechai penui sui ramak lei; kane pedagene penui pak tu lei. 6 Aipau sam 'nda ne Isua ne penui je kagetei lei; kane Pa 'ndai kau sa meibe penui a 'nning chi mak lei. Isua a Melireibepeu Keyibe lei 7 Chidaze Isua ne penui je rang dai ze, "pelingsing, pelingsing ze ningnui je I rang lei, I a meli kemuiki lei. 8 A suage wangme leine a makahegame benai hegasutteume kam lei, kane meli ramme ne penui kua 'nking mak tadi lei. 9 I a kemuiki lei, hangkatte hangkatte adagene gutbe kau je a tew'nring gai gu lei, zai pa gut pa pat ze deteu ra ngau gu lei. 10 Makahegabe kau a, mahega ra, zai deichat ra zai tew'nsia ra runne wang lei' I a penui keringbe ngau ra, zai misongga ze ngau lera I wangkeu lei. 11 la melireibepeu keyibe lei. Zai melireibepeu keyibepeu ne meli ramme hang ge Pa keringbe peigai lei. 12 Melireibepeu makbe kau, reikadekibepeu a, meli ramme pegu mak dadege, henei wangbe pa ngau lu, meli ramme je saugai nan ze pak ti lei, zai henei ne meli ramme je 'nki bei, zai tewtimrarip gai bei lei. 13 Pa a reikadekibepeu dadege pak titi lei, zai meli ramme ze made 'nning tinggeu mak lei. 14 I a melireibepeu keyibe lei! Agu ramme a I chi, zai Agu ramme ne Achu chi lei. 15 Pepeu ne Achu chi gumze I du Pepeu je chi lei; zai meli ramme hang ge I keringbe peigai lei. 16 Zai meli kedabe ramme aipau relung ge bam makbe ramme Agu lamui lei, chibe ramme je du I 'ngnguawang himchang gu lei, zai chibe ramme ne A kua 'nking gu lei. Chidezaine melidung kat, melireibepeu kat bam gu lei. 17 Aipau deu hang ge Pepeu ne Achu hung lei, I lu dai lerahang gene I keringbe peigai beibe zegeneu. 18 Mide chize Adagene lutat ramak lei; kane A sui'nning ne chize I peigai lei, chize I peigai ra Adage reze teibe la lei, zai chi ze I lu dai ra du Adage reze teibe la lei; Aipau hingde ze Apeu dagene I ngau lu de lei", kacheu lei. 19 Judame ruage aipau sam ramme zene pebau pat kadai de lei. 20 Penui ruage misoanggame ne, Pedage herasiabe la lei, zai Pa mie di de lei, 'ndaitewze Pechu ka'nking lau?" kacheu lei. 21 Zai kedame ne, "Aipau sam sabe ramme ze a Pedagene herasiabe bambepeu gu mak lei, herasiabe ne pemikchitbepeu mik latpat chi dui semei?" kacheu lei.

Isua je 'Nchamakbe

22 Zai Jerusalem ge Depat'nchigaibe ngi bam de lei, chipau ting ze heta ting lei. 23 Zai Isua temple lung ge, Solomonbe kegup ge tatrua bam lei 24 Dadege Judame ne Pechu sapgua'ndui luze, Pesuage, "'Ndaite ge ma'nning chimak ze bam ra anui je Nang tewgai ra lau? Nang Khrista lei dizai a anui je ranglia'nchichiak kai lau", kacheu lei. 25 Isua ne penui je kak ze, "Ningnui je I ranglia bei de lei, kane ningnui a 'nnum'mmi mak lei. Apeu ji gene ta ramme I tewgaibe ze chibe ramme zene Achu sakitew gai lei. 26 Kane ningnui a 'nnum 'mmi mak lei, ningnui a Agu meliramme mak dadegeu. 27 Agu meli ramme a A kua ka'nking lei, zai I ne penui je chi lei, zai penui Achai sui lei. 28 Zai I ne penui je keringbe betunmakbe peigai lei, zai mateu teu sede penui ga dai ramak, zai mine de A ba gene chime je sutpat ramak lei. 29 Apeu chime ze Achu peigaibepeu a 'nteubena sua a dibi lei. Zai minede Apeu ba gene chime je sutpat chilak te lei. 30 I benai Pepeu a kat lei", kacheu lei. 31 Judame ne pechu tua ra tingchu tei kadai de lei. 32 Zai Isua ne penui je kak ze, "Pepeu dage ta keyibe ramme misongga ze ningnui je I teilia bei de lei, chipau ta ruage 'ndaibe ta ze tingchu ne Achu tuarabe lau? Kacheu lei. 33 Judame ne Pechu kak ze, "Takeyibe tewbe zegene Ningchu tingchu ne anui tua ramak lei, kane Hera je sakahebabe zegene lei, Nang a ziemmena da, kane Ning karunne ne Ningchu Hera hang ge tewgai lu zeu", kacheu lei. 34 Isua ne penui je kak ze, "Ningnui gu hingde gej. I ne rang ze, ningnui a hera ramme lei', acheu ze rawgai mak ti lau? 35 Penui dage Hera sam wangchang beibe ne penui je hera ramme ku dizai a (zai rawgaidiakbe leisi ze tew'nsia chilak lei), 36 Pepeu ne tew'nchigai luze kedeipeireige langgaibepeu je, 'Nang a Hera je sakaheba lei' ze ningnui rang dui semei? "I a Hera Na lei", ze I kacheube zegeneu. 37 Apeu gu ta ramme I tewmak zai a, ningnui Achu 'nnum'mmi se lau, 38 Kane chibe ramme I tew dizai a, Achu ningnui 'nnum'mmi mak sede, ta ramme ze 'num 'mmi le lau, chidezaine Pepeu ze Adage bam, zai I a Pepeu ge bam leibe ningnui chi lu, 'nning chi lerahang geu", kacheu lei. 39 Zai Pechu nim ra penui tew kadai de lei, kane penui ba gene Pa 'mbia tat tide lei. 40 Dadege Isua Jordan geuki kapat ze Johanbe ne railangbe ge baptis tewbe bam'mbe tat dai luze chige Pa bam bam di lei. 41 Zai misonggame ne Pedage wang luze penui ne sa ze, "Johanbe a dakningdaulakbe tewgaibe made ga, kane Johanbe ne aipau Peu deu ge kerangbe leine ze gesang de lei", kacheu lei. 42 Zai chige misonggame ne Pa ge 'nnum'mmi dide lei.

11

Lazarabe Chaibe

1 Zai mihangkat Bethani kelo'mpeu, Lazarabe 'nra ze bam lei. Bethani a Marile benai pesipui Marthale keloa lei. 2 Chi Marile zene Heguangpeu je hetaudui perimyibe ne 'nnuk kai lu, pe peitam ne pepi nuigaibepui kinapeu Lazarabe'nra ze bam lei. 3 Chidadege pesipui kena ne Pedage, "Heguang gau, pe le lau, Nang ne kehungbepeu ze 'nra ze la lei", ze sam 'mput kai bei de lei. 4 Zai Isua ne chize seu lu dege, "Ai kanrabe ne ehai ramak lei, kane Hera ngeudirabe hang lei, chidezaine Hera Na je chize ne hengeutew'ndirabe hanggeu", kacheu lei. 5 Isua ne Marthale zai pe kinapui benai Lazarabe ze hung de lei. 6 Chidadege, pa a kanra leibe Pa seu lu dege Pa bambe bam ge lang nane 'nnai'ntebi gai di lei. 7 Chipau chang dege Pane keneme je, "Judai ram anui tat dai kei lei", kacheu lei. 8 Keneme ne Pesuage, "Rabbi gau, Judame ne chuna chuna gene Ningchu tingchu ne tua ra peu bam ze, chige Nang tat dai ra mei?" kacheu lei. 9 Isua ne kak ze, "Naikat lung ge kunta kereu ze kena bam mak semei? Hangkatte hangkatte tingbabe luage tatrua zai a ma 'nsui ramak, kedeipeirei kebabe pa ngaube zegeneu. 10 Kane hangkatte hangkatte muizeu ge tatrua dizai a ma ka'nsui lei, zai kau gu, pedage kebabe bam makbe zegeneu", acheu bei lei. 11 Acheuze Pa sa gai lu, zai bechang ge Pane penui je, "Anui kangpeu Lazarabe a jei de lei, kane kejeibe gene pechu 'nkiachu gai ra I tat gu lei", kacheu lei. 12 Dadege keneme ne Pesuage, "Heguang gau, pa jeikeu dizai a yi dai du lei", kacheu lei. 13 Isua a pa chaidibe rasam sa lei, kane penui a, kejeibe ge gesaube du Pa a rang lau gu lei ze 'nning gai di lei. 14 Chidaze Isua ne penui je rang'nchichiak kai ze, "Lazarabe a ehai de lei; 15 Zai ningnui zegene chige I bam makbe ze A suiyi lei, chidezaine ningnui 'nnum'mmi lerahang geu, kane pedage anui tat kei lei", kacheu lei. 16 Dadege Thomasbe, 'Mpaplungbepeu ze kubepeu, (Didumas) ne pe kangme keneme je, "Anui du pa benai ngua ehai ra tat kei lei", kacheu lei.

Isua a Ringchukadaibe benai Keringbe lei

17 Zai Isua wangchang dege, Lazarabe a heraw ge langmedaine bam dide leibe Pa chi lu de lei. 18 Bethani keloa a Jerusalem gene na lei, mei kena gum lei. 19 Zai Judame ruagene misonggame ne Marthale benai Marile dage penai kinapeu deu gene penai lung tew hegei gai ra wang de lei. 20 Dadege Marthale ne Isua wang la de leibe seu lu dege, pa tat ze Pechu suidau de lei, kane Marile a kilung ge 'ntau bam lei. 21 Zai Marthale ne Isua suage, "Awang gau, aige Nang bam bei laizai a akinapeu ehai ramak lei. 22 Kane chuna du Hera dage Nang gekebe leine ze Hera ne Ningchu pei gu leibe I chi lei", kacheu lei. 23 Isua ne pechu, "Ning kinapeu chu dai gu lei", acheu bei lei. 24 Marthale ne Pesuage, "Nalangbe mai ge ringchu kadaibe ge pa chu dai gu leibe I chi lei", kacheu lei. 25 Isua ne pechu, "I ringchukadaibe benai keringbe lei, Achu 'nnumka'mmibe kau a pa ehai di sedu ring gu lei. 26 Zai mimigede ring ze Achu 'nnumka'mmibe kau a mateu teu sede ehai ramak lei. Aize nang 'nnum'mmi mei?" kacheu lei. 27 Pane Pesuage, "Eu lei, Awang gau, Nang a Khrista, Hera Na, kedeipeireige wangkeu rabepeu leibe I 'nnum'mmi lei", kacheu lei.

Isua Hapbe

28 Zai Pa acheu sagai lu dege tatpat lu, pekinapui Marile je kugai lu, reine ze Pedage acheuze sa ze, "Geteiliabepeu aige lamui lei, zai Pane ningchu ku lei", kacheu lei. 29 Zai pa chize seu lu dege, keluaze pa chu lu, Pe tailam'mbe tat ti lei. 30 Isua a keloa lung ge gut mak kerei lei; kane Marthale ne Pechu suidaube bam ge Pa bam di gerei lei. 31 Dadege kilung ge pelung tewhegei gai ze, 'ngngua bamme Judame ne, Marile chu kelua ze pattibe ngau lu dege heraw ge hap kai ra pa tat lau gu leibe 'nninggai luze pechai penui suitat ti lei. 32 Chidadege Marile ne Isua bambe bam ge wangchang lu, zai Pechu ngau lu dege, Pe pikang ge keikeu lu, Pesuage, "Awang gau, aige Nang bam laizaine a akinapeu ehai ra mak lei", kacheu lei. 33 Zai pa hap bambe zai pa benai kewangme Judame du ngua puihapbe Isua ngau lu dege, Pa herui ge deitau ze Pe lunghereu dide lei. 34 Zai Pane, "'Ndai'ngge ningnui pechu 'njei gai lau?" kacheu lei, penui ne Pechu, "Heguang gau, wang ze pe le lau", kacheu lei. 35 Isua hap tide lei. 36 Dadege Judame ne, "Ni 'ndaizeuge pechu pa hung mei!" kacheu lei. 37 Kane penui ruage hanggesame ne pemikchitbepeu mik latlubepeu ne aipau peu je ehai mak ra tewchilak semei?" kacheu lei.

Lazarabe je Tew'nringgaibe

38 Dadege Isua ne Pe lung ge huaipun gai dai ze, heraw ge wangchang de lei. Chi heraw ze 'nchugup lei, zai pepeireige 'nchu kang 'mbei gai lei. 39 Isua ne "Chi 'nchukang ze lutua ne lau" kacheu lei. Zai chi chaidibepeu sipui, Marthale ne Pesuage, "Awang gau, chuna a nam du de lei, pa chaidibe langmedaine daseu", kacheu lei. 40 Isua ne pechu, "Nang ne 'nnum'mmi zai a Hera ngeudibe nang ngau gu leibe ningchu I ranggai mak ti lau?" kacheu lei. 41 Dadege penui ne tingchukang lutua'ndi lei, zai Isua Pema'ngngangchu lu, "Apeu gau, Nang ne Achu 'nking beibe zegene Ning dage A suiyibe sam paugai lei. 42 Nang ne A sam 'nking 'nsui bam leibe I chi lei, kane A taige baudime sapbe zegene aize I rang lei, chidezaine Nang ne Achu langgai bei de leibe penui 'nnum'mmi lerahang geu", kacheu lei. 43 Zai acheu sagai lu dege, Pe rankai 'nrung ze, "Lazarabai, zuapat lau", kacheu lei. 44 Chaidibepeu ze pepi peba ramme ze kechaipai ne dum lu ze pat de lei, zai peju du miju nuibepai ne dum'ndi de lei, zai Isua ne penui je, "Pechu heipat kai be lau, pei tat chu lau", kacheu lei.

Isua peireige Kelutewbe

45 Chidaze, Judame ruage misongga ze Marile dage wangme, Pa tatewgai'ndibe penui ngau luze, Pa ge 'nnum'mmi dide lei; 46 Kane penui ruage hanggesame ne Pharisaime dage tat lu ze, Isua tatewgai 'ndibe ze salia de lei. 47 Chigumze tingkugechingme benai Pharisaime ne Sanhedrinme je kuwang 'ndui gai lu, acheuze, "Anui 'ndaikautew ra lau? Aipau Peu ne dak ningdaulakbe ramme misongga ze tew daseu, 48 Aigumze Pa tew tat bam ra anui ne lun bei zai a, mina leine ne Pechu 'nnum'mmi gu, zai Romme ne wang ze anui gu kanchibe bam benai anui zat je tew'ngga 'ndu lei", kacheu lei. 49 Zai penui ruage mihangkat, Kaiaphasbe, chipau kum ge tingkudilangbe tewbepeu ne, penui je, "Ningnui a made chimak lei; 50 Anui zat kelei ge mihangkat ehai gai ra ningnui hang ge yi gu leibe ningnui a 'nning chi mak lei, zai pedei zat leine je tew'ngga mak rahang geu", kacheu lei. 51 Aize Pe sui'nning gene sabe mak lei, kane chipau kum ge tingkudilangbepeu changbe ne pedei zat hang ge Isua chaigai rabe ze pa rangka'ntua lei. 52 Zai pedei zat hang runne mak lei, kane Hera name kedeipeirei ge ratattime kat chang ra tewgai rabe ze rang lei. 53 Chigumze chipau mai gene seu ze Pechu deichat ra penui kahedei de lei. 54 Chidadege Isua ne Judame ruage 'ndulang ze tatrua tadi lei, kane henam tingkangbe bam taige keloa kat Ephraim kacheube ge Pa tat tide lei; zai chige keneme benai bam bam di lei. 55 Zai Judame Tat'ntua Hengi na dide ge misonggame ne penui karunne ze tew'nehigai ra Tat'ntua Hengi suage penam gene Jerusalem 'mbe hang di lei. 56 Isua je penui peurua ze temple lungge penui sapbe luage penui karai kat kat je 'mpau ze, "Ningnui 'ndaikau 'nninggai lau? Kahengibe ge Pa wang mak ra semei?" kacheu lei. 57 Tingku gechingme benai Pharisaime ne mimigede Pa 'ndaige la meibe gechibe kau lazai a, penui je chichanggai ra hukum peigai de lei, chidezaine penui ne Pechu nim lerahang geu.

12

Bethani keloa ge Isua je 'Nnukkaibe

1 Dadege Tat'ntua Hengi rabe lang seruk ne suage Isua ne kechaibe gene kuakchugai beibepeu Lazarabe bambe Bethani keloa ge chang de lei. 2 Chige Pe hang muiteseu penui kateleu lei, Marthale ne ma ka'nggua lei; kane Lazarabe a pechu 'ngnguateume ruage hangkat chang lei. 3 Marile ne hingbang cha gene hetaudui perimyibe tewlube pemi hungbe pehitpi lulu ze Isua pi ka'nnuk te lei, zai pe peitam ne Pepi nui de lei, chi hetaudui rim ne kilung ze nampuigit tide lei. 4 Kane Judasbe Iskarios'mpeu keneme ruage mihangkat (Pechu kelutewrabe peu) ne acheuze, 5 "'Ndaitewze aipau taudui perimyibe ze dinari haichum ne zua lu ze, kelaksiame je peigai mak lau?" ze kacheu lei. 6 Aize pa sabe a, kelaksiame je pa 'nningkatinggeube ne mak ze, kane pa a kahegabe kau changbe zegene lei, zai pane rangkang rak tei dadege chige (rangkang) kaibe ze pane lu ka'nsui lei. 7 Dadege Isua ne, "Perunne pe sui pei tew lau, Achu bairabe mai hang ge kenuigaibe pei chang de lau, 8 Kelaksiame a pehi'nsang ne ningnui ruage bam bam da, kane Achu ze a pehi'nsang nege ningnui ngau ramak lei", kacheu lei.

Lazarabe peireige Kelutewbe

9 Judame, baudime ne Pa chige la leibe chi lu dege, Isua je runne mak ze, kane Lazarabe, Pane chaidime ruagene kuakchu gai beibepeu je du ngau lera penui zuawang de lei. 10 Chidadege tingkugechingme ne Lazarabe jedu deichat nera penui pezeu peu de lei. 11 Pe zegene Judame misongga ze tat tide lei, Isua je penui 'nnum'mmi beibe zege neu.

Dui ze Jerusalem ge Gutbe

12 Bechaibe mai dege baudime misongga ze kahengibe ge wang lume Isua Jerusalem ge wang mui de leibe penui seu lu de lei. 13 Chigumze 'nchangbang kei ramme penui tei lu, Pechu suidau ra penui wang de lei, acheu 'nrung ze, "Hosanna, Tingwang ji gene wangkeubepeu je toa bam lau, Israelme Wangpeu zeu", kacheu lei. 14 Isua hekunmerangne ngau lube peireige chua de lei. 15 Hing se lau, Zion na'mpuimi gau, pe le lau, Ning wangpeu hekunmerangne ching chua ze wangkeu mui de lei", kacheube sam rawgai'ndibe gumzeu. 16 Pa keneme ne aibe ramme kerai'nkagene chidesi mak lei, kane Isua je hengeutew'ndi gai beibe chang ne, aize Pe rasam rawgai'ndibe benai Pe peireige tewgai'ndi de leibe penui 'nningdau dai dide lei. 17 Lazarabe je heraw gene kiipat, zai chaidime ruagene pechu kuakchu gai beibe luage, Pedage baudime bamme ne aize sakitew gai bei de lei. 18 Baudime ne Pechu suidau ra patbe a, aipau dak ningdaulakbe ze Pane tewbe zegene lei. 19 Chidadege Pharisaime ne penui karai saze, "Ningnui made tew chilak .leibe ningnui ngau de mei? Pe le lau, kedeipeirei ne Pe ehai suitat te lei", kacheu lei.

Grikme hanggesame ne Isua je Peube

20 Zai kahengibe ge kelum ra tattime ruage Grikme hanggesame bam lei, 21 Chime zene Galili ram ge Bethsaida keloa'mpeu Phillipbe dage wang ze, "Apau gau, Isua je anui ngau nei lei", kacheu lei. 22 Phillipbe ne tat ze Andriwbe dage salia bei lei. Zai Andriwbe benai Phillipbe ne tat ze Isua suage salia bei lei. 23 Zai Isua ne penai je kak ze, ziemmena Na je hengeutew'ndirabe panehi wangchang de lei. 24 Pelingsing, pelingsing ze ningnui je I rang lei, cheupum kedeige keugai ze chaigai mak chaine a, kat runne bam bam lei, kane chize chaigai dizaine pechi misoangga ze 'nchipat lei. 25 Pa keringbe je hungbe kau a, pa keringbe gagai gu, zai ai kedeireige pa keringbe ngaugailakbe kau a, pa keringbe betunmakbe hang ge tei gai gu lei. 26 Mimigede A gua'nggua dizai a, pa A ehai sui himchang ra lei, I bambe bam ge Aguaka'ngguabepeu du bam gu lei, mimigede A gua'nggua dizai a, Pepeu ne pechu hengeutew gu lei.

Isua Pa chairabe Saliabe

27 "Chuna a Alung hereu de lei, zai I 'ndaikau sa ra lau? Apeu gau, aipau hi gene Achu tew'nring gai lau ze, I acheu ra semei? mak lei, aipau tauka'nnangbe zegene aipau hi ria ge I bam chang de lei. 28 Dadege tinggim'mbene hekua wangkeu ze, Chize I ne tew'ndigai 'nde lei, zai tew'ndi gai dai gu lei", kacheu lei. 29 Dadege baudime chige sapme zai chize seulume, tingcheibe kua de lei, kacheu lei. Zai kedame ne, "Angel'mpeu ne Pechu ka'mpau de lei", kacheu lei. 30 Isua ne kak ze, "Aipau kua ze A hang ge pat mak ze, ningnui hang gene pat de lei", kacheu lei. 31 Ai kedeipeireige samrambe a chuna de lei. Zai ai kedeipeireige pesuitewbepeu ze kelituarabe hi zedu chuna de lei. 32 Zai I a kedei gene Achu teigetuachu dezaine, ziemmename leine je Adage 'nrupwang gu lei", kacheu lei. 33 Aipau sam ze Pa 'ndaigumbe chit ne ehai ra meibe teilia ra sa de lei. 34 Dadege baudime ne Pechu kak ze, "Khrista a betingbeta bam bam gu lei, ze hingde leisi gene anui a chi lei, 'ndaigumze Nang ne ziemmena Na je teigetuachu gu lei, ze acheu dui lau? Chi ziemmena Na ze chau lau?" Kacheu lei. 35 Isua ne penui je, "Ningnui ruage kebabe ze pehi keduine larei lei, ningnui dage kebabe bambe luage tat lau, chimak ehai a kemuibe ne ningnui je dui gu lei; kemuibe ge tatbe kau a pa 'ndaige tat mei be chimak lei. 36 Ningnui dage kebabe bambe luage kebabe je 'nnum 'mmi le lau, kebabe name ningnui chang lerahang geu", kacheu lei.

Baudime ne 'nnum'mmimakbe

Aibe ramme Isua sagai lu dege, tatcham luze penui ruagene Pa 'mbia di lei. 37 Penui ruage dak ningdaulakbe ramme misongga ze Pane tewgai bei sede, Pechu penui 'nnum'mmi mak tadi lei. 38 Chige kemeu 'mpeu Isaiahbe ne aigumze sam sabe ze, "Tingwang gau anui 'nsa chaune 'nnum'mmi di lau? Zai Tingwang ba chau dage liagai bei lau?" kacheube ze tewpui lerahang geu. 39 Chipau zegene penui 'nnum'mmi mak tadi lei. Isaiahbe ne acheu rang dai ze, 40 "Pane penui mik tewchit nan, zai penui lung tew'nchi gai bei de lei, Chimak ehai a penui mik ne penui ngau du da, zai penui lung ne 'nning chi du da, zai I ne penui je tew'mmi gai ra, penui 'nreiwang gu daseu'' kacheu lei. 41 Aibe ramme Isaiahbe ne rang de lei, pengeudibe pa ngaulube zegene Pe rasam pa sa de lei. 42 Acheu leusedu pesuitewme ruagene misonggame ne 'nnum'mmi dide lei, kane Pharisaime je penui hingbe zegene penui salia mak tadi lei, chimak chaine a penui je kanduibe ki gene tuapat'ndu dazeu. 43 Hera ne penui je getoabe sua a, ziemmename ne penui je getoabe penui hung di daseu.

Isua sam ramme ne samramrabe

44 Kane Isua 'nrung ze, "Achu 'nnumka'mmibe kau a, Achu 'nnumka'mmi mak ze, kane Achu langgaibepeu je 'nnumka'mmi lei. 45 Zai Achu ngaube kau a, Achu langgaibepeu je ngau lei. 46 Kedeirei kebabe hang ge I wangkeu de lei, chidezaine mimigede Achu 'nnumka'mmibe kau a kemuibe ge pa bam mak rahang geu. 47 Mimigede I sam sabe ramme seu lu, chize tei'mmi makbe kau a, I ne pechu samram mak lei, kedeipeirei je samramgai ra I wangkeu mak dazeu; kane kedei peirei je tew'nring gai berahang ge wangkeu lei. 48 Achu ze tuapat nan ze, zai I sam sabe ramme 'ncha makbe kau a, pechu samram rahang kat lamui lei, chi sam I sagai'ndibe zene nalangbe mai ge pechu samram gu lei. 49 A karunne gu reze ne sam I sagai mak daseu' kane Achu langgaibepeu gimsing ne I 'ndaikau sara, zai 'ndaikau ranggai ra meibe Pane Achu hingde pei bei de lei. 50 Zai Pegu hingde ze a, keringbe betunmakbe leibe I chi lei. Chidadege I daikau sa meibe Pepeu ne Achu kerangbe lui I a sa sa lei", kacheu lei.

13

Isua ne Pa Keneme Pi Huibe

1 Zai Tat'ntua Hengi suage, Isua ai kedeipeirei sau nan ze Pepeu dage tat ra pehi wangchang de leibe chi lu dege, kedeipeireige Pegume bamme je pa hung ze, betun ria chang ze Pa hungde lei. 2 Zai mui teseu teube luage, Diabolbe ne Simonbe na Judas Iskariot'mpeu lung ge Pechu zua ra, kai gai bei de lei. 3 Isua Pepeu ne magetaleine ze Pe bage peigai 'nde leibe, zai Pa a Hera dagene wangkeu, zai Hera dage tat ji gu de leibe Pa chi lu dege, 4 Mui teseu teube gene Pa chu lu, Pe pai kai nan ze, miju nuibe pai tei lu Pe kia ge 'nkanggai de lei. 5 Zai hegei'ntui ge hedui ruigai lu Pa keneme pi ramme hui ze, Pe kia ge miju nuibe pai ka'nkangbe ne penui pi ramme Pa nui chu dide lei. 6 Peterbe dage Pa wang dege Peterbe ne Pesuage, "Awang gau, Nang ne api hui ra semei?" kacheu lei. 7 Isua ne pechu kak ze, "I 'ndaikau tatew meibe chuna a nang chi mak lei, kane bechang dezaine nang chi gu lei", kacheu lei. 8 Peterbe ne Pesuage, "Mateu teu sede Nang ne api hui ramak lei", kacheu lei. Isua ne pechu kak ze, "I ne ningchu hui mak ehai a, Adage ning dam hang made ga lei", acheu bei lei. 9 Simon Peterbe ne Pesuage, "Awang gau, api runne mak ze, kane aba zai apei du hui gai lau", kacheu lei. 10 Isua ne pechu, "Hedui pialube kau a pechu hui dai ra 'nnang ta de lei pe pi runne zangno, hui'nchichiak 'nde lei, zai ningnui a 'nehi lei, kane ningnui 'nteubena a mak lei", kacheu lei. 11 Chaune Pechu zua ra meibe Pa chi lu dadege, chipau zegene, "Ningnui nteubena a 'nehi mak lei", kacheu lei. 12 Penui pi ramme Pane hui Iu dege, Pe pai lulu, Pe bam ge 'ntau gai dai lu, ze, Pane penui je, "Ningnui peireige 'ndaikau I tewgai meibe ningnui chi mei? 13 Ningnui ne Achu Geteiliabepeu zai Heguang ze kube ze gesang de lei; I a chize daseu. 14 Chidaze I ningnui Wangpeu benai Geteiliabepeu ne ningnui pi hui dizai a, ningnui du kat kat pi hui sing ra lei. 15 I ne ningnui je tew ra teiliabe peigai 'ndi daze I ningnui peireige tewgaibe gumze ningnui du tew sing ra lei. 16 Pelingsing, pelingsing ne ningnui je I rang lei, kebang a pepau sua a di mak lei, zai langgai 'ndibepeu du, langgaibepeu sua a di mak lei. 17 Aibe ramme ze ningnui chi lu ze tew dizai a, ningnui lung sui temi gu lei. 18 Ningnui 'nteubena rasam I sa mak lei, I ne kelanggailume je I chi lei, kane 'Agu tingku teu bepeu ne pepimesui a Pepeireige hua gai 'nde lei', ze rawgaidiakbe sam tewpui gai rahang geu. 19 Aize wang chang mak ge chuna ningnui je I ranglia lei, chi wangchang dezaine Pa ze I de leibe ningnui 'nnum'mmi lerahang geu. 20 Pelingsing ze ningnui je I rang lei, mimigede I ne langgaibepeu je kanchabe kau a, Achu ka'ncha lei, zai Achu ka'nchabe kau a, Achu langgaibepeu je ka'ncha lei", kacheu lei.

Isua ne Pechu zua ra rangka'ntuabe

21 Aibe ramme Isua ne sagai lu dege, Pe lunghereu dize acheuze sakitewgai de lei, "Pelingsing, pelingsing ze ningnui je I rang lei, ningnui ruage mihangkat ne Achu zua gu lei", kacheu lei. 22 Chau du Pa rang meibe keneme 'nning chilak ze penui kat kat je pe bam de lei. 23 Pa keneme ruage mihangkat, Isua kehungbepeu, Isua gage 'mbei ze bam lei. 24 Dadege Simon Peterbe ne chipau peu du dak ne tewlia ze, "Pa chau du rang meibe neu lau", kacheu lei. 25 Zai Isua gage 'mbei 'nna bi lu Pesuage, Awang gau, chau ne lau? Kacheu lei. 26 Isua ne kak ze, "Ai tingkuliap I sum lu I peibepeu ze de lei", kacheu lei. Zai chi tingkuliap pa sumgai lu dege Simonbe na Judasbe Iskariot'mpeu je pei bei de lei. 27 Zai chipau tingkuliap lulube chang ge, Satanbe pe lungge gut tide lei. Zai Isua ne pechu, "Nang 'ndaikau tew ra meibe tewgai kelua ju lau", kacheu lei. 28 Kane chipau leisira ge 'ngnguateume ne, 'ndaitew ra chipau sam pa sa meibe ze mide chi mak lei. 29 Hanggesame ne Judasbe rangkang rak teibe zegene Isua pechu, "Hengi rabe hang ma ka'nnangbe ramme lui ju lau", nune kelaksiame hang ge pane ma peirabe hang mei ze penui a 'nnumgai de lei.

Hingde Karchibe

30 Dadege aipau tingkuliap teulube chang dege, kelua ze pa zua pat tide lei, chize muizeu de lei. 31 Pa tat ti dege Isua ne, "Chuna ge ziemmena Na ngeutew'ndi de lei, zai Pa ge Hera ngeutew'ndi de lei. 32 Zai Page Hera ngeutew 'ndi dizaine a, Hera ne Pe Na Pegimsingbe ngeu tew'ndi gai gu, zai Pechu hengeutew'nnua gai gu lei. 33 Hename nung gau, ningnui dage beting keduine I bam gai gu rei lei, ningnui ne Achu peu gu, zai 'I tat kaibe ge ningnui a wang chilak lei', ze Judame dage I sagai 'ndibe gumze, ningnui jedu chuna I rang de lei. 34 Hingde karchibe ningnui je I pei lei, kat kat je hung lau, ningnui je I hunggai 'ndibe gumze, ningnui du kat kat je hung lau, 35 Aigene mina 'nteubena ne ningnui a Agu keneme leibe chi gu lei, ningnui kat kat hang ge kehungbe bam dizaine ai", kacheu lei.

Peterbe ne Pechu 'Nkimrabe ze Isua ne Rangka'ntuabe

36 Simon Peterbe ne Pesuage, "Awang gau, Nang 'ndai'ngge tat ra lau?" kacheu lei. Isua ne kak ze, I tat kairabe ge nang chuna a Achai sui chilak kerei lei, kane bechang dezai ne nang Achai sui gu lei", acheu bei lei. 37 Peterbe ne Pesuage, Awang gau, 'ndaitew bei ze chuna I Ning ehai sui chilak ra lau? Ning hang ge I keringbe peigai gu lei", kacheu lei. 38 Isua ne kak ze, "Nang keringbe ze A hangge nang peigai ra de mei? Pelingsing, pelingsing ze ningchu I rang lei, luachum nang Achu 'nkim mak tane a 'nruire kua ra mak lei.

14

Isua a Pepeu lam tatbe 'Mpui lei

1 "Ningnui lung pei tewhereu se lau, Hera je 'nnum'mmi zai Achu jedu 'nnum'mmi lau. 2 Apeu kige hekisiam misongga la lei, chimak laizaine a, ning bam hang teleu ra I tat tu lei, ze ningnui je I acheu ra semei? 3 Zai I tat ze ningnui bam hang teleu lu dezaine I wangkeu dai gu, zai ningnui je Adage ngua bam gu, I bambe ge ningnui du bam rahang geu. 4 Zai I 'ndai'ngge tat ra meibe 'mpui ningnui chi lei", kacheu lei. 5 Thomasbe ne Pesuage, "Awang gau, Nang 'ndai'ngge tat ra meibe anui a chi mak lei, 'ndaigumze 'mpui anui chi lera lau?" kacheu lei. 6 Isua ne pechu, "I a 'mpui zai samsang zai keringbe lei. Adagene mak zai a, mide Pepeu dage wang lak lei. 7 Achu ningnui chi lu: laizaine a, Apeu je du ningnui chi gu lei, chuna gene seuze Pechu ningnui chi zai ngau lu de lei", kacheu lei. 8 Phillipbe ne Pesuage, "Awang gau, anui je Pepeu teilia lau, dezai anui lungwangchang gu lei", kacheu lei. 9 Isua ne pechu, "Phillipbai, aitege ningnui dage I bam bei sedu nang Achu chimak kerei mei? Achu ngaulube kau a Pepeu je ngau lu de lei. Anui je Pepeu teilia lau ze 'ndaigum nang acheu chi ra lau? 10 I Pepeu ge bam, zai Pepeu I ge bam leibe nang 'nnum'mmi mak mei? Ningnui dage I sam sabe ramme A runne gu reze ne I sabe mak lei, kane Pepeu Adage bambepeu ne Pe ta ramme tew lei. 11 I Pepeu ge bam zai Pepeu I ge bambe Achu 'nnum'mmi le lau, chimak tizaine a, ta ramme zegene Achu 'nnum'mmi le lau. 12 Pelingsing, pelingsing ze ningnui je I rang lei, Achu 'nnumka'mmibe kau a I tewbe ta ramme pa du tew gu lei, zai.aisua dibe ta ramme pa tew gu lei, Apeu dage I tatbe zegeneu. 13 A ji gene ningnui gekebe leine ze, I tewgai gu, chidezai Pe Na ge Pepeu ngeutew'ndi ze bam lerahang geu. 14 A ji gene ningnui mama leine ke dezaine I tewgai gu lei.

Herui Kanchibe ngau ra Samhatkaibe

15 "Ningnui ne Achu hung zai a, I samdegaibe ramme ningnui tei gu lei. 16 Zai I ne Pepeu dage kegai gu, zai Pane ningnui je nguageteigaibepeu kedabe pei gu lei, ningnui dage betingbeta bam bam rahang geu. 17 Chize kagesangbe gu Herui lei, pechu je a kedeirei ne lu chilak lei, kedeipeirei ne Pechu ngau mak zai chi makbe zegeneu, ningnui Pechu chi lei, Pa a ningnui dage bam zai ningnui lung ge bam gu lei. 18 Ningnui je I saugaidiak ra mak lei, ningnui dage I wang dai gu lei. 19 Matege makze kedeipeirei ne Achu ngau dai ramak lei, kane ningnui a Achu ngau gu lei, I ringbe zegene ningnui du ring gu lei. 20 Chipau mai ge a, I Apeu ge bam, zai ningnui Adage bam, zai I ningnui dage bam leibe ningnui chi gu lei. 21 Agu samdegaibe ramme Pedage bam, zai teika'mmibe kau a, Achu kehungbepeu lei, zai Achu je hungbe kau a, Apeu ne pechu hung gu de lei, zai Pechu I hung gu, zai Agimsing ne pedage lia gu lei", kacheu lei. 22 Judasbe (Iskariot'mpeu makse) ne Pesuage, "Awang gau, 'ndaigumze Ning gimsing ne anui dage lia ze, kedeipeirei dage Nang lia mak ra lau?" kacheu lei. 23 Isua ne kak ze, "Migene Achu hung zai a, A sam ze pa tei'mmi gu, zai Apeu ne pechu hung gu lei, zai pedage Anai wang gu, zai pedage Anai bam rabe bam tew gu lei. 24 Achu hung makbe kau a, A sam ramme tei'mmi mak lei; zai chi sam ningnui seube a, Agu mak lei, kane Apeu Achu langgaibepeu gu lei. 25 "Ningnui dage I bambe luage, aibe ramme ningnui dage I sagai de lei. 26 Kane chi 'ngnguageteigaibepeu Herui Kanchibe ze A ji gene Pepeu ne langgairabepeu zene magetaleine ningnui je geteiliagai gu lei, zai I ne ningnui je sagai'ndibe leine ze ningnui 'nningdau ra Pane tewgai gu lei. 27 Deseyibe ningnui je I saugaidiak lei, Agu deseyibe ze ningnui dage I pei lei, kedeipeireine peibe gumze I a pei mak lei, ningnui lung pei tewhereu se lau, zai hing de hing se lau. 28 "I tat tu lei zai ningnui dage I wang gu lei", kacheube ze ningnui seulu de lei. Ningnui ne Achu hung dizai a, ningnui suiyi'nta du de lei, Pepeu dage I tatbe zegeneu; Pepeu a A sua a dibi daseu. 29 Chuna chi wangchang mak ge ningnui jei rang de lei, chi wangchang dezaine ningnui nei le rahang. 30 I ningnui suage sam misongga sa bam tadu de lei, ai kedeirei wangpeu wang mui daseu. Pa a Apeireige made tewchilak lei. 31 Kane Pepeu ne samdegaibe luigumze I a tew lei, chidezaine kedeipeirei ne Pepeu je I hung leibe chi lerahang geu. Chu lau, aigene anui tat chu ke lei.

15

Isua Grepchiria kagesangbe 1 "I a grepchiria gesang lei, zai Apeu a mere kateleubepeu lei. 2 Adage bekei bambe bechi 'nehi makbe leine a Pane lutua lei, zai bekei bechi 'nchipatbe leine a, Pane teleuka'mmi lei, bechi misongga 'nchipat lerahang geu. 3 Ningnui dage sam I sagai'ndibe zene ningnui je tew'nchilu de lei. 4 I ge bam bam lau, zai I du ningnui ge bam bam gu lei, bekei a grepchiria ge bam mak tizaine a, perunne ne bechi 'nchilak gumze, ningnui du I ge bam mak tizaine a, ningnui bechi 'nehi ramak lei. 5 I a grepchiria lei, zai ningnui a, bekei ramme lei, I ge bam bambe kau, zai pa ge I bam bambe kau ze a, bechi misongga 'nchipat lei, I 'ngga zai a ningnui made tewchilak daseu. 6 Ziemmena I ge bam makbe kau a, bekei du gumze pechu tuapat 'ndu, zai heguigai du lei, zai chibe ramme a tei'ndui lu, hemi ge tuagai ze ru nan tadi lei. 7 Ningnui I ge bam bam zai a, zai A sam ramme ningnui ge bam bam dizai a, ningnui kenei neibe ke lau, chize ningnui hang tew gai gu lei. 8 Aizene Apeu ngeu tew ka'ndi lei, ningnui bechi misongga 'nchipat gu dezai ningnui A keneme leibe teilia gu lei. 9 Apeu ne Achu hung bei gumze, I du ningnui je hung de lei, I kehungbe ge bam bam lau. 10 Agu samde ramme ningnui tei zai a, I kehungbe ge ningnui bam bam gu, I ne Apeu gu samde ramme tei luze Pa kehungbe ge bam bam gum zeu. 11 A suigut ningnui ge bam ra, zai ningnui suigut puigit rahang ge aibe ramme ningnui dage I sagai de lei. 12 "Aize Agu samde lei, ningnui je I hung bei gumze ningnui kat kat je hung lau. 13 Ziemmena pekangme hang ge pa keringbe peigaibe kehungbe aisua kedibe mide ga lei. 14 I samdegaibe ningnui tew dizai a, ningnui Akangme lei. 15 Ningnui je kebang ze I ku tadu de lei, kebang a pepau 'ndaikau tew meibe chimak daseu, kane ningnui je Akangme ze I ku de lei, Apeu dage I seulube leine ze ningnui chi ra I ranglia gai bei daseu. 16 Ningnui ne Achu kakelang mak lei, kane I ne ningnui je kakelang lei, zai sumgai bei de lei, ningnui tat ze bechi'nchipat ra, zai ningnui chi du bam bam dera hang geu; chidezaine Pepeu dage A ji gene ningnui gekebe leine ze Pane chize ningnui je pei bu lei. 17 Aize ningnui je samdegai lei, kat kat je hung lau.

Kedeipeirei ne Ngaugailakbe

18 Kedeipeirei ne ningnui je ngaugailak dizaine a, ningnui je ngaugailak makbe suage Achu ngaugailak tide leibe chi le lau. 19 Ningnui kedeipeirei gu dizaine a, kedeipeirei ne pegume je hung gu, kane ningnui a kedeipeirei gu mak lei. Zai I ne kedeipeirei gene ningnui je kelangpat 'ndibe zegene kedeipeirei ne ningnui je ngaugailak lei. 20 Kebang a pepau sua a di mak lei; ze ningnui da ge I sagai 'ndibe sam ze, chi bam lau. Penui ne Achu deisa dizai a, ningnui jedu penui deisa gu lei. A sam penui tei dizai a, ningnui sam du penui tei gu lei. 21 Kane aibe ramme ze A zegene penui ningnui je tew gu lei, Achu lang gaibepeu je penui chi makbe zegeneu. 22 I wangkeu ze penui dage sam sagai mak lai zaine a, penui gu hemui ga gu lei, kane chuna a penui gu hemui sa'mbia dai ra patedeu ga de lei. 23 Achu ngaugailakbe kau a, Apeu jedu ngaugailak lei. 24 Mide tew makbe ta ramme penui ruage I ne tewgai mak lai zaine a, penui dage hemui ga gu lei, kane chuna a I benai Apeu je penui ngau lu, Anai je penui ngaugailak de lei. 25 Aize penui gu hingde ge rawgai 'ndibe, 'patedeu made ga ze, penui Achu ngaugailak de lei', kacheube sam ze tewpui gai rahang geneu. 26 Kane chi Nguageteigaibepeu Pepeu dagene I langgai rabepeu, kagesangbe Herui, Pepeu dagene patrabepeu ze wang dezaine, Pane achu sakitewgai gu lei. 27 Zai ningnui leize sakitewme de lei, bepibang gene Adage ningnui bambe zegeneu.

16

1 "Ningnui je ngualetat mak rahang ge aibe ramme ningnui je I salia gai de lei. 2 Ningnui je kanduibe ki ramme gene penui tuapat gu lei. Gesangsing ze, panehi wangchang gu, mimigede ningnui je deichat dezaine, pa a Hera guaka'nggua leibe pa 'nninggai gu lei. 3 Zai penui aize tew gu, pepeu jedu, zai Achu jedu penui chimakbe zegene penui aize tew gu lei. 4 Kane aibe ramme ningnui je I salia bei de lei, chi penui hang panehi wangchang dezaine ningnui je I salia bei de leibe ningnui 'nningdau gu lei.

Herui Kanchibe Ta

"Bepibang gene aibe ramme ningnui je I salia mak lei, ningnui dage I bambe zegeneu. 5 Kane chuna a Achu langgaibepeu dage I tat tu lei; leusede ningnui ruage mine de, 'ndai'ngge Nang tat ra lau? ze 'nneu mak; 6 Kane aibe ramme ningnui je I salia beibe zegene lungkahereube ne ningnui lungge pui dide lei. 7 Acheu leusede samsang ningnui je I salia lei, I tatrimnarabe ze ningnui hang ge kegiebe lei, I tatrimna mak dizai a, chi Nguageteiliabepeu ze ningnui dage wang ramak daseu; kane I tat zai a I ne ningnui dage Pechu langgai gu lei. 8 Zai Pa wangkeu dezaine kedeireime je hemui, katelingbe, zai samrambe tedeu ge chi ra Patewgai gu lei. 9 Kahemuibe ze a, penui I ge 'nnum'mmi makbe zegene lei. 10 Zai katelingbe tedeu ze a, Pepeu dage I tat tu lei, zai ningnui ne Achu ngau tadu lei. 11 Zai samrambe deu ze a, ai kedeirei wangpeu duze samramgai 'ndibe zegeneu. 12 Ningnui suage mama ramme I sa ra misongga larei lei, kane chuna a chibe ramme ningnui tei kam chilak rei lei, 13 Chi kagesangbe Herui wangkeu dezaine, kagesangbe leine ge ningnui je 'ngnguagai gu lei. Perunne gu reze ne Pa a samram mak, kane Pa seu seube sam ze Pa sa gu, zai mama wangchang rabe ramme ze ningnui dage Pa saba gai gu daseu. 14 Pane A ngeutew'ndi gu lei, chipau zegene Agu ze pa lulu ningnui dage saba gai gu daseu. 15 Pepeu dage kebambe leine ze Agu lei, chipau zegene Agu ze Pa lulu chize ningnui dage sabagai gu lei ze I ranglia de lei.

Misuisiabe benai Misuiyibe

16 "Matege makse ningnui Achu ngau tadu lei, zai matege makse ningnui Achu ngau dai gu lei", kacheu lei, 17 Dadege Pa keneme hanggesame ne, kat kat ze, "Aize anui dage Pa 'ndaikau sa lau, matege makse ningnui Achu ngau tadu lei, zai matege makse ningnui Achu ngau dai gu lei, zai Apeu dage I tatbe zegeneu kacheube sam zeu?" kacheu lei. 18 Penui ne matege makse, Pa kacheube ze 'ndaikau lau, Pa 'ndaikau sa meibe parimba anui chimak zeu", kacheu lei. 19 Isua penui ne Pechu neurabe chi lu ze, Pane penui je, "I ne matege makse ningnui Achu ngau tadu lei, zai matege makse ningnui Achu ngau dai gu lei, kacheube parimba 'ndaikau meibe ningnui ruage kat kat je ningnui sam neu mei?" kacheu lei. 20 "Pelingsing, pelingsing ze ningnui je I rang lei, ningnui a hap ze heu gu lei, kane kedeirei a pesuiyi'nta gu lei, ningnui lung hereu gu lei, kane ningnui lung kahereube ze ningnui suiyibe chang dai gu lei. 21 'Mpuimi a hena lungkeurabe ting ge a, pelung hereu kanze lei, panehi wangchangbe zegeneu, kane chi hena lungkeu lu dezaine pa kahereube ze pa chitadi tai lei, kedeipeirei ge hena lungkeu bei dadege pesuiyi de lei. 22 Chigumze ningnui chuna a ningnui lung kahereu de lei, kane ningnui je I ngau dai gu, ningnui lung suiyi'nta gu lei, zai ningnui suigut ze ningnui dagene mide lutat ramak lei. 23 Chipau mai ge a, A rasam ningnui made sam neu ramak lei. Pelingsing, pelingsing ze ningnui je I rang lei, Pepeu dage ningnui gekebe leine ze A ji gene ningnui je Pa pei gu lei. 24 Chuna ria chang ze A ji gene ningnui made ke mak lei; ke lau, dezai ningnui hang ngau gu lei, chidezaine ningnui suigut puigit rahang geu.

Kedeipeirei je Keduibe

25 "Sam teikakedabe tak ('mpui) ramme zene aibe ramme ze ningnui je I salia gai de lei, panehi wang mui da, chidezaine sam teikakedabe 'mpui gene I sa dai ramak, kane Pepeu rasam ningnui je I salia 'nehi chiak gai gu lei. 26 Chipau mai ge a A ji gene ningnui ke gu lei, zai I ne ningnui je Pepeu dage ningnui hang kelum gai gu lei, ze I acheu mak lei. 27 Pepeu gimsing ne ningnui je hung daseu. Ningnui ne Achu hung bei, zai I Pepeu dagene wangkeu leibe ningnui 'nnumka'mmibe zegeneu. 28 I a Pepeu dagene pat ze, kedeipeirei ge wangkeu lei, zai kedeipeirei sau dai nan ze Pepeu dage I tat tu lei", kacheu lei. 29 Pa keneme ne, "Ni chuna a sam teikakedabe 'mpui gene sam sa tadi ze, 'nchichiakbe ne Nang sam sa de lei. 30 Nang a magetaleine chi leibe chuna a anui du chi de lei, zai minede Ningchu sam neu ra 'nnang ta de lei, ai zene Nang a Hera dagene wangkeu leibe anui a 'nnum'mmi de lei", kacheu lei. 31 Isua ne penui je kak ze, "Chuna ne ningnui 'nnumka'mmi semei? "Panehi wangchang mui de lei, wang du wangchang de lei, ningnui je tewtimrarip kai dezaine penui kilam lam tat kam du, zai Achu du runne saugai diak gu lei, leusede A karunne mak lei, Pepeu Adage bam daseu. 32 Aibe ramme ningnui je I salia bei de lei, Adage ningnui deseyibe bam lerahang geu, kedeipeireige ningnui kahereube bam lei, kane ningnui suiyi'ntaza ze bam lau, kedeipeirei ze I ne ngam lu de lei", kacheu lei.

17

Isua ne Pa Keneme hang Kakelumbe

1 Aipau sam Isua sagai lu dege, tinggim 'ngngangpe lu, acheu ze, "Apeu gau, panehi wangchang de lei, Ning Na ngeutew'ndigai lau, Pe Na ne Ning ngeutew'ndigai rahang geu. 2 Nang ne Pechu ziemmena leine peireige reze peigai beibe luigumze Nang ne Pechu peigaime leine je keringbe betunmakbe peigai berahang geu. 3 Zai keringbe betunmakbe aize lei, Nang Hera kagesangbe kat runne bambe, zai Nang langgaibepeu Isua Khrista je penui gechibe zeu. 4 Kedeireige I ne Ning ngeutew'ndigai 'nde "lei, Nang ne achu tatew ra peigai'ndibe I tewpui 'nsang siak lu zeu. 5 Apeu gau, kedei 'ndamgai mak 'nkage Ning dage I A ngeudibe ze chuna ria Ning masuage Achu Nangne suang gai zu lau. 6 "Kedeipeirei gene nang ne Achu peigaime dage Ning ji ze I teilia bei de lei. Penui a Ning gume lei, zai penui je a Nang ne Achu peigai 'nde lei, zai penui Ning sam tei lu la de lei. 7 Magetaleine Nang ne Achu peigai beibe leine Ning dagene pat leibe chuna a penui chi Iu de lei. 8 Nang ne Achu sam peibe ramme ze penui dage I pei bei daseu. Zai penui ne chibe ramme lu tei lu, zai gesangsing ze I a Ning dagene wangkeu leibe penui gesangsing ne chi lu de lei, zai Nang ne Achu langgaibe ze penui 'nnum'mmi lu de lei. 9 "Penui hang ge I kakelum lei, kedeipeirei hang ge I a kelum mak lei, kane Nang ne Achu peigaime hang I kakelum lei. Penui a Ning gume daseu. 10 Agu magetaleine ze Ning gu lei, zai Ning gu ze Agu kam lei, zai penui ge Achu hengeutew'ndi ze la lei. 11 Zai chuna a kedeipeirei ge I bam tadu de lei, kane penui a kedeipeireige bam lei, zai I a Ning lam wang lamui lei. Apeu Kanchibepeu gau, Nang ne Achu pei beime Ning ji gene penui je rei'mmi le lau, Anai kat chang gumze penui du pumkat chang lerahang geu. 12 Penui dage I bambe luage Nang ne Achu pei beime je Ning ji gene I reika'mmi de lei, penui je I ne hekatkai ze, penui ruage mide ga mak lei. Chai'ngga derabe Na kat runne zangno, rawgaidiakbe leisi sam ze tewpui gai be rahang geu. 13 Kane chuna ge I Ning lam wang lei, zai aibe ramme kedeipeireige I sagai lei, A suigut penui ge tewpuigit kai berahang geu. 14 Ning sam penui je I pei bei de lei, zai kedeipeirei ne penui je ngaugailak de lei, penui a kedeipeirei gu makbe zegeneu, I du kedeipeirei gu mak gum zeu. 15 Nang ne penui je kedeipeirei gene lupat nera I a ke mak lei, kane Nang ne kesiabepeu dagene penui je rei'mmi rabe hang gene lei. 16 Penui a kedeipeirei gu mak lei, I kedeipeirei gu makbe gumzeu. 17 Samsang ne penui je tew'nehigai lau, Ning sam a samsang lei. 18 Kedeipeirei ge Nang ne Achu langgaibe gumze I du kedeipeireige penui du langgai bei de lei. 19 Penui deu hang gene Arunne Achu tew'nehigai ze, penui jedu samsang ge tew'nehigai berahang geu. 20 "Aime hang runne I kakelum mak lei, kane penui sam zegene Achu 'nnumka'mmime hang gedu I kakelum lei. 21 Penui 'nteubena pumkat chang lerahang, Apeu, Nang ne Adage bam, zai I Ning dage bam gumze, penui du Anai dage bam ra, chidezai Nang ne Achu langgai bei de leibe kedeipeireime ne 'nnum'mmi lerahang. 22 Chi pengeudibe Nang ne Achu pei beibe ze penui dage I pei bei de lei, Anai kat chang gumze penui du pumkat chang lerahang geu. 23 I penui ge bam, zai Nang I ge bam ze, penui du pumkat chang sing lerahang, chidezaine Nang ne Achu langgai beibe benai Achu Nang hung gumze penui jedu Nang hung de leibe kedeipeirei ne chi lerahang geu. 24 Apeu gau, nang ne Achu peime je I bambe bam ge penui du bam ra, I lunei lei, kedei 'ndamgai mak'ngka ge Nang kehungbe ne chi pengeudibe Nang Achu peigai'ndibe ze, penui ngau desi lerahang geu. 25 Apeu katelingbepeu gau, kedeipeirei ne Ningchu chimak lei; kane I a Ningchu chi lei, zai Nang ne Achu langgai leibe, aime a chi lei. 26 Ning ji ze penui dage I ralia bei de lei, zai I ralia bam gu lei. Chi kehungbe Nang Achu hung beibe ze penui dage bam lera, zai I du penui ge bam lerahang geu".

18

Isua je Nimbe

1 Isua ne aipau sam ramme sagai lu dege, Pa keneme je 'ngngua lu, Kidron geuki kapat ti lei, chige mere kat bam ze, zai Pa benai Pegu keneme chige gut ti lei. 2 Zai Judasbe Pechu zuateubepeu du chipau bam chi lei, Isua benai pegu keneme a chige tat kansui daseu. 3 Chidadege Judasbe ne sipaime bau kat, zai tingkugechingme benai Pharisaime dagene hekatkaime hanggesame je ngua lu, hemiburtg, zai keleu, zai hereipua ramme tei lu, chige tat ti lei. 4 Dadege Isua Pe peireige mama wangchangrabe ramme leine chi lu ze pat lu, penui je, "Chau je ningnui peu lau?" kacheu lei. 5 Penui ne kak ze, Pesuage, "Nazareth'mpeu Isua je lei", kacheu lei. Isua ne penui je, "pa ze I de lei", kacheu lei. Judasbe Pechu zuateubepeu du penui ruage sap bam lei. 6 Pane Penui je, "Pa ze I de lei" acheu bei dege 'nchai'ngngin ze kedeikang ge penui kaugai di lei. 7 Dadege Pane penui je neu dai ze, "Chau je ningnui peu lau?" kacheu lei. Penui ne, "Nazareth'mpeu Isua je lei", kacheu lei. 8 Isua ne kak ze, "Pa ze I de lei, ze ningnui je I rang bei de zei lau; chidaze Achu ningnui peu dizaine a, aime ze 'mpat kai be lau", acheu bei lei. 9 Aize Pane "Nang ne Achu pei beime je mide I tew'ngga mak lei", kacheube sam ze tewpuigai rahang geu. 10 Dadege Peterbe ne, pedage hiazutke bambe tukpat lu, tingkudilang bepeu gu kebang je bi bei ze, pa hezat'mbia kun bitak 'ndi lei. Chi kebangpeu ji a, Malkhasbe lei. 11 Isua ne Peterbe je, "Ning gu hiazutke bechup ge kai ne lau, Pepeu ne Achu hepiak peibe ze I sak mak tara semei?" kacheu lei.

Annasbe suage Isua Sapbe

12 Dadege sipaime bau, zai pemuiteubepeu benai Judame ruage ka'ngguame ne Isua je nim lu, Pechu pi de lei. 13 Railangbe ge Annasbe lam'mbe penui ne Pechu 'ngngua tat tide lei. Pa a Kaiaphasbe pau (penau peu) dadegeu, Kaiaphasbe a chipau kum ge tingkudilangbe tew de lei. 14 Kaiaphasbe ne Judame je pezat kelei ge mihangkat ne chaigai ra yi de lei, ze nguageteitewbepeu de lei.

Peterbe ne Isua je Ka'nkimbe

15 Zai Simon Peterbe benai kene'mpeu kedabepeu ne Isua ehai suitat ti lei. Chi kene'mpeu kedabepeu lui a, tingkudilangbepeu ne chi dadege, tingkudilangbepeu kisiam ge Isua je 'ngngua lu gut ti lei. 16 Peterbe a hela'mbe kemuiki hiage sap de lei, zai chi kene'mpeu kedabepeu tingkudilangbepeu ne chibepeu ne tat ze, kemuiki reibepui je 'mpaugai lu, Peterbe je kilung ge 'ngnguagut tide lei. 17 Zai kemuiki reibepui heleu'mpui ne Peterbe je, "Nang du aipau peu gu keneme ruage mihangkat mak ti lau?" kacheu lei. Pane, "I a mak lei", acheu bei lei. 18 Kahegei dadege kebangme benai ka'ngguame ne mechingkang hegei ne hemitew lu, chige sap ze hemi gum bam lei.

Tingkudilangbepeu ne Isua je Samneube

19 Dadege tingkudilangbepeu ne Isua je Pa keneme tedeu benai Pa geteiliabe sam deuge samneu de lei. 20 Isua ne pesuage, "Kedeipeirei suage 'ndulang ze I sam sa de lei, panehi'nsangne ge, kanduibeki ramme ge zai temple lung gedu geteilia ze bam, chigeze Judame 'nteubena wang kandui de lei. 'Nkim ne I a made samak lei. 21 Ndaitew bei ze nang Achu kanneu lau? Achu seulume je penui je I 'ndaikau sa meibe neu le lau, I 'ndaikau sa meibe penui chi lei", kacheu lei. 22 Aize Pa sagai lu dege, chige sap bamme ka'ngguame ruagene mihangkat peba ne Isua je gepei ze, acheuze, "Aigumbe tak zene tingku dilangbepeu suage Nang kak semei?" kacheu lei. 23 Isua ne pechu, "I samaube lazai a, chi kemaube peireige sakitew gai ha lau; kane I sa kezei dizai a, 'ndaitew bei ze nang Achu kagepei lau?" kacheu lei. 24 Dadege Pechu pibe lui gene Annasbe ne tingkudilangbepeu Kaiaphasbe dage langgai bei de lei.

Peterbe ne Isua ze 'nkim kadaibe

25 Simon Peterbe a hemigum ze sap bam lei, zai penui ne Pechu "Pegu keneme ruage nang du mihangkat mak ti lau?" kacheu lei. Pa chize 'nkim ze, "I a mak lei" kacheu lei. 26 Tingkudilangbepeu gu kebangme ruage mihangkat Peterbe ne pe kun bitak'ndibepeu kidung'mpeu ne, "Kere ge Pa benai ningchu I ngau mak semei?" kacheu lei. 27 Dadege Peterbe ne chize 'nkim kadai de lei, zai luakatne 'nrui re kua dide lei.

Pilatbe suage Isua Sapbe

28 Dadege Isua je Kaiaphasbe ki gene heguang kisiam di'mbe penui ne 'ngngua tat tide lei, chize hechusaun de lei, penui je deiheba mak zai Tat'ntua Hengi kuak penui puateu chi lerahang ge penui a heguang kisiam dibe lung ge gut mak tadi lei. 29 Chidadege, Pilatbe pat lu, "Aipaupeu peirei ge ningnui 'ndaikau gu kesiabe 'ndamgaibe ningnui teiwang lau?" kacheu lei. 30 Penui ne kak ze pesuage, "Aipau Peu ze takesiabe tewbe kau mak tizaine a, ning masuage Pechu anui bala gai ramak te zei lau", kacheu lei. 31 Dadege Pilatbe ne penui je, "Ningnui ne Pechu tei lu, ningnui gu hingde luigumze samram zu lau", acheu bei lei; zai Judame ne pesuage, "Anui ne mimigeze du deichat nera anui gu hingde ne lunmak lei", kacheu lei. 32 Aize Pa 'ndaigumbe chit ne ehai ra meibe teilia rahang ge Isua ne sagai 'ndibe sam ze tewpui gai rahang geu. 33 Chidadege Pilatbe ze heguang kisiam dibe ge gut dai lu, Isua je, ku lu Pesuage, "Nang Judame Wangpeu mei?" kacheu lei. 34 Isua ne kak ze, "Aize ning karunne samsabe mei, nune miramme ne A rasam ning suage salia bei lau?" kacheu lei. 35 Pilatbe ne kak ze, "I a Juda'mpeu semei? Ning zatme benai tingkugechingme ne Ningchu adage peigai 'nde lei, Nang 'ndaikautew gai bei lau?" kacheu lei. 36 Isua ne kak ze, "I kaheguangbe a ai kedeipeirei gu mak lei, I kaheguangbe ze ai kedeipeirei gu dizaine a, A guaka'ngguame ne 'nggi gu, chidezaine Judame bage Achu peigai mak rahang geu;kaneI kaheguangbe ze a ai kedeipeirei gu gene mak lei", kacheu lei. 37 Dadege Pilatbe ne Pesuage, "Acheuzaine Nang a heguangpeu ze de mei?" kacheu lei. Isua ne kak ze, "I a Heguang lei ze nang ne sa de zei lau, aipau hang gene Achu lungkeugai zai aipau deu hang gene kedeipeireige I wangkeu de lei, samsang ze sakitewgai berahang; samsang gu mina leine Akua ka'nking lei", kacheu lei. 38 Pilatbe ne Pesuage, "Samsang ze 'ndaikau lau?" kacheu lei.

Isua je Chairabe hang Samramgaibe

Aipau sam pa sagai lu dege, Judame lam pa pat dai lu penui je, "Pedage hetuhera made I a ngaupat mak lei, 39 Kane Tat'ntua Hengi ge mina hangkat je I 'mpat kai ra ningnui se ge lamui lei, chidaze Judame Wangpeu je ningnui hang ge 'mpat kai ra ningnui lunei mei?" kacheu lei. 40 Dadege penui 'nrung dai ze, "Aipau Peu a mak lei, kane Barabbasbe je 'mpat kai lau", kacheu lei. Barabbasbe a hegasutteubepeu lei.

19

1 Dadege, Pilatbe ne Isua je tei lu, Pechu kakegit te lei. 2 Zai sipaime ne hetu peichup hi lu, Pe pei ge kai ze, pai giebe ne Pechu ba kerubit kai de lei. 3 Zai Pe tailam wang ze acheu ze, "Judame wangpeu, kelum", kacheu lei. Zai penui ba ne pechu kagepei lei, 4 Zai Pilatbe pat dai lu, penui je, "Pe le lau ningnui dage Pechu I'ngnguapat kai lei, Pedage hetuhera made I ngau mak leibe ningnui chi rahang geu", kacheu lei. 5 Dadege Isua hetu peichup kai lu, zai pai geibe ba lu, zuapat ti lei. Pilatbe ne penui je, "Ni aipau Peu je pe le lau", kacheu lei. 6 Tingkugechingme benai tamuipuame ne Pechu ngau lu dege, penui 'nrung ze, "Pechu giagai lau, Pechu giagai lau!" ze kacheu lei. Pilatbe ne penui je, "Ningnui ne Pechu tei lu, Pechu giagai be lau. I a Pedage hetuhera made ngau mak daseu", acheu bei lei. 7 Judame ne Pesuage, "Anui gu hingde la lei, zai chipau hingde gezene, Pa ehai himchang ra lei, Pe karunne Pechu Hera Na hang tewbe zegeneu", acheu bei lei. 8 Pilatbe chipau sam ramme seu lu dege, pa hing'nteu di de lei, 9 Heguang kisiam dibe ge pa gut lu, Isua suage, "Nang 'ndai'nggene wang lau?" kacheu lei. Kane Isua made kak mak tadi lei. 10 Chidadege Pilatbe ne Pesuage, "Nang achu 'mpau mak ra mei? Ningchu 'mpat kai rabe reze adage lamui, zai Ningchu heling ge giagairabe reze du adage lamui leibe Nang chi mak mei?" kacheu lei. 11 Isua ne pechu kak ze, "Kehu'mbene ningchu peibe la lei mak zai a, Apeireige ning gu reze made ga lei, chidaze ning bage Achu peigaibepeu gu hemui a di'nkeu lei", kacheu lei. 12 Chipau sam seu lu dege, Pilatbe ne pechu 'mpat kai 'nderabe 'mpui peu de lei, kane Judame ne 'nrung ze, "Aipau Peu du nang 'mpat kai dizaine a, nang a Kaisarbe kangpeu mak lei, mimigede pekarunne pechu heguang hang tewgaibe kau a, Kaisarbe je pa saka'nsia lei", acheu bei lei. 13 Aipau sam ramme Pilatbe seu lu dege, Isua je 'ngngua pat lu, tingchutau, Hebrai kuage Gabatha, kacheube bam ge tingchutau samrambe bamrak ge pa 'ntaukeu di lei. 14 Chipau mai a Tat'ntua Hengi hang tatew kagekambe mai tingna'nding hi gum de lei. Pane Judame je, "Ni ningnui Wangpeu je!" kacheu lei. 15 Dadege penui 'nrung ze, "Pechu lu ne zu lau, Pechu lulu ze, giagai be zu lau", kacheu lei. Pilatbe ne penui je, "Ningnui Wangpeu je heling ge I giagai ra demei?" kacheu lei. Tingkugechingme ne kak ze, "Anui wangpeu kedabe ga lei, Kaisarbe runne zangno", kacheu lei. 16 Dadege pane Pechu heling ge giagai rahang penui bage pei bei de lei.

Isua Je Giagaibe

17 Dadege penui ne Isua je tei lu, zai Pegu heling ze perunne pua lu, Hebrai kuage Golgotha, kacheube timpeikuak bam'mbe Pa zuapat tide lei. 18 Chige ze penui ne Pechu heling ge giagai de lei, zai Pa benai kedame mina hangna, Pe hia'mbe hangkat kat, zai Isua je sungngangkeli ge giagai de lei. 19 Zai Pilatbe zene du sampei raw lu chize heling ge dagai lei. "Nazareth 'mpeu Isua Judame Wangpeu", ze rawgai lei. 20 Dadege Judame misonggame ne chipau sampei kia de lei. Isua je helingge giagaibe bam ze namdi taige bam dadegeu, chi sampei ze Hebrai kua, Latin kua, benai Grik kua ge rawgai de lei. 21 Dadege Judame gu tingkugechingme ne Pilatbe suage, Judame Wangpeu lei ze raw gai se lau. Kane "Aipaupeu ne rang ze, I a Judame Wangpeu lei ze raw gai lau", kacheu lei. 22 Pilatbe ne kak ze, "I 'ndaikau rawgai 'ndi meibe ze rawgai'ndi de lei", kacheu lei. 23 Dadege sipaime ne Isua je giagai lu dege, Pe pai ramme lulu dam medai tewgai de lei, sipai hangkat ge dam kat kat hang, zai Pa mechua tebe du penui lu de lei, kane chi mechua tebe a paherui ga ze dak 'nzutpelaritbe kau lei. 24 Dadege penui karai kat kat je, "Aize anui hitri mak ra lei, kane chau hang meibe hedachak kei lei", kacheu lei. "Apai ramme penui karai ge 'nzigai lu, zai A mechua ramme zai A mechuatebe hang ge penui hedachak de lei", beze tewpuigai rahang geu, chidaze sipaime ne aize tewgai de lei. 25 Kane Isua gu heling taige a, Pepui zai Pepui kinapui Klopasbe nau Marile zai Marile Magdala 'mpui benui sap bam lei. 26 Zai Pepui benai Pa kehungbe kene'mpeu je Isua ne ngau lu dege, pepui je, '"Mpuimi gau, pe le lau, pa ze ningna lei", kacheu lei. 27 Dadege chi kene'mpeu dage Pane, "Pe le lau, chize ningpui lei", kacheu lei. Chipau luage kene'mpeu ne pekilam'mbe Marile je 'ngngua tat tide lei.

Isua Chaibe

28 Chipau changge Isua magetaleine ze chuna a tew'nsang gai bei de leibe chi lu ze, zai rawgaidiakbe sam ze tewpuigai rahang ge, "I herei de lei", kacheu lei. 29 Zai chige heli kat wain hiabe puigit ze dung bam lei, chigumze sponj(machup) chipau wain kehiabe ge sumpuigit kai lu tingkungtang tui ge kai luze Pe mui ge penui kai de lei. 30 Zai Isua chipau wain kehiabe sak kai lu dege, "Tew'nsang kam de lei", kacheu lei, zai Pe pei kei'nkumgai lu ze, Pa Herui peipat 'ndide lei.

Isua lapge Hengeu ne Reibe

31 Chipau mai a tatewkagekambe mai bei dadege, 'ntakbambe mai ge heling ge kechaipum ramme bam mak rahang ge Judame ne Pilatbe dage chaidime pi ramme tewbat lu ze, kechaipum ramme tei tat terahang ge ke bei de lei. 32 Chidadege sipaime wang lu, Pechu helingge 'ngngua giagaime, keraibepeu benai kedabepeu pi ramme tewbat kai bei de lei. 33 Kane Isua tailam'mbe penui wang dege, Pa a ehai dide leibe ngau lu dege, Pe pi kena ze tewbat mak tadi lei. 34 Kane sipaime ruage mihangkat ne, Pe lapge hengeu ne reigai bei ze, zai luakatne hejai benai hedui luapat de lei. 35 Chize ngaulubepeu ne sakitew de lei, zai pa sakitewgaibe ze gesang lei, zai Pa a samsang sa leibe I chi lei, ningnui du 'nnum'mmi lerahang geu. 36 "Pera katte tewbat ramak lei", kacheube rawgai'ndibe leisi sam ramme tewpui gai ra aibe ramme wangchang daseu. 37 Zai rawgaidiakbe leisi kedabe ne, "Penui ne reigai 'ndibepeu je penui pe gu lei", kacheu lei.

Isua Je Baibe

38 Chipau changge Arimathaia'mpeu Josephbe, Isua kene'mpeu Judame du pa hingbe zegene reine ze Isua pum teitat terahang Pilatbe dagene ke lei, zai Pilatbe ne pechu lun bei de lei. Chidadege pa wang lu, kechaipum ze teitat tide lei. 39 Zai Nikodemasbe du, kerai'ngi ge Pedage muizeu ge wanggaibepeu ze wang lu, myrrh benai aloes perimyibe hit himreu gum teiwang de lei. 40 Dadege Isua pum penai lulu, Judame kechai baibe se luigumze maperimyibe benai paibetachiambe ne dumgai de lei. 41 Zai Pechu giagaibe bam ge mere kat bam lei, zai chi mere ge heraw karchibe kat chige madaude ziemmena je baigai makbe bam lei. 42 Iudame 'ntakbam ra tatewkagekambe mai zegene, zai chi heraw je na dadege chige Isua je penui baisai de lei.

20

Heraw Perua

1 Tenit gu tingnaimikpui railangbe tingchua sun ba'nzangrabe luage Marile Magdala 'mpui heraw ge wang de lei, zai heraw gene tingchu kang lutua'ndibe pa ngau de lei. 2 Chidadege pa pak tat ze, Simon Peterbe benai kene'mpeu kedabe, Isua ne hungbepeu dage wang ze, penai suage, "Heguangpeu je heraw gene penui ne tei tat te lei, 'ndai'ngge Pechu penui ne kai'ndi mei, anui a chimak lei", kacheu lei. 3 Dadege Peterbe benai kene'mpeu kedabepeu pat lu, heraw'mbe penai tat tide lei. 4 Penai pak wang de lei, kane kene'mpeu kedabepeu ne Peterbe je Pak'nzu lu, herawge wangchang rai dide lei. 5 Zai heraw lung ge pa keikeu pegai ze, pai betachiambe ramme chige bambe pa ngau de lei. Kane heraw lungge pa a gut mak tadi lei. 6 Dadege Simon Peterbe pechai suiwang lu, heraw lung ge gut tide lei, zai pai betachiambe ramme chige pa ngau de lei. 7 Zai mizu nuibepai Pe peige kaibe ze a pai betachiambe ramme ruage bam mak ze, kane kedabe bam ge perunne 'nzui chamchei laleu lei. 8 Dadege kene'mpeu kedabe, herawge wangchang raibe peu du heraw lung ge gut de lei, zai pa ngau lu, 'nnum'mmi dide lei. 9 Kechaime ruagene Pa chu dai himchang gu leibe, rawgaidiakbe leisi sam penui chidesi mak kerei dadegeu. 10 Dadege kene'mpeu hangna penai kilam'mbe helatwang dai dide lei.

Marile Magdala'mpui je Isua Liabe

11 Kane Marile a, heraw hela'mbe sap lu, hap bam lei, zai pa hap ze keikeu lu, heraw lungge pegai lei. 12 Zai tinggim keneme hangna penai pai'ngngupchup ze Isua pum 'nzeigaibe bamge, hangkat Pe pei'mbia, zai hangkat Pe pi'mbia kantaube pa ngau lei. 13 Penai ne pechu, "Mpuimi gau, nang 'ndaitew ze hap bam lau?" kacheu lei. Zai pane penai je, "Awang je penui ne tei tattibe zegene lei, zai penui ne Pechu 'ndai'ngge kai'ndi meibe I chimakbe zegene lei", kacheu lei. 14 Aize sagai lu, pa 'nreiwang dege, Isua sap bambe pa ngau de lei, kane chize Isua leibe pa chimak tadi lei. 15 Isua ne, '"Mpuimi gau, 'ndaitewze hap bam lau? Chau je nang peu lau?" kacheu lei. Pechu je a mere reibepeu hang 'nning gai lu, pesuage, "Apau gau, nang ne aigene Pechu tei tat ti zaine a, Pechu nang 'ndai'ngge kai'ndi meibe achu ranglia lau, dezaine I ne Pechu teitat rahang geu", kacheu lei. 16 Isua ne pechu, "Marileu", kacheu lei. Zai pa 'nreiwang lu, Hebrai kua ne Pesuage, "Rabboni!" (chize Geteiliabepeu gau) kacheube lei. 17 Isua ne pechu, "Achu tui se lau, Pepeu dage I keuchu mak kerei daseu, kane Apuiname dage tat ze, "Apeu zai ningnui Peu, Arapeu zai ningnui Rapeu dage I keuchu gu de leibe saliagai be lau", kacheu lei. 18 Zai Marile Magadala 'mpui tat lu ze, keneme suage, "Awangpeu je I ngau lu de lei", ze paugai de lei; zai aibe ramme Pane pechu salia gai de lei ze penui je pa ranglia bei de lei.

Isua Pa keneme je Liabe

19 Chipau mai ge tenit gu tingnaimikpui railangbe mai hegi dege, Judame je hingbe zegene, keneme bambe bamge 'nkam ramme kainam nan ze bambe ge Isua wang lu, penui ruage sap kai lu, penui je, "Ningnui dage deseyibe pei bam lau", kacheu lei. 20 Aipau sam sagai lu dege, Pe ba kena, zai Pe lap ze penui dage Pa teilia bei de lei. 21 Dadege Isua ne penui je rang dai ze, "Ningnui dage deseyibe pei bam lau, Pepeu ne Achu langgaibe gumze I du ningnui je langpat lei", kacheu lei. 22 Aipau sam Pa sagai lu dege, penui peireige Pe chui 'mmutkai lu, penui je rang ze, "Herui Kanchibe ngau le zu lau, 23 Ningnui ne chau gu hemui ramme lun bei mei, chibe ramme lun bei de lei, ningnui ne chau gu hemui ramme kakebang mei, chibe ramme kebang bam gu lei", acheu bei lei.

Isua benai Thomasbe

24 Kane Thomasbe hangkereu ze kename ruage mihangkat 'Mpaplungbepeu ze kubepeu a Isua penui dage wangbe luage pa bam mak lei. 25 Chidadege keneme kedame ne pechu, "Heguangpeu je anui ngau lu de lei", kacheu lei. Kane pane penui je, "Pe ba kena ge perektu zam I ngau mak, zai perektu zam ge a ba kerang ne dei tau mak, zai Pe lap ge pezam aba ne deitau mak dizaine a 'nnum'mmi ramak lei, kacheu lei. 26 Langdesatne chang ge Pa keneme kilung ge bam'ndui kadaibe ge, penui ruage Thomasbe du bam lei; 'nkam ramme kainam nan ze bam lei; kane Isua wang ze, penui ruage sap lu, penui je, "Ningnui dage deseyibe pei bam lau", kacheu lei. 27 Zai Thomasbe dage Pane, "Ning ba kerang aige deitaugai lau, zai A ba kena pegai lau, zai ning ba kena getua pat ze A lap ge pezam deigai lau, keneibe ga ze bam se lau, kane 'nnum'mmi dezu lau", kacheu lei. 28 Zai Thomasbe ne Pesuage, "Awangpeu zai Arapeu gau," kacheu lei. 29 Isua ne pechu," Achu nang ngau lube zegene nang 'nnum'mmi dide mei? ngau mak ze 'nnumka'mmime penui helungtemi gu lei", kacheu lei. 30 Zai Isua ne keneme masuage, aipau leisi lungge rawgai makbe dak kedabe ramme misongga tewlia bei de lei. 31 Kane Isua a Khrista lei, Pa a Hera Na leibe ningnui 'nnum'mmi lerahang ge, zai 'nnum'mmi lu, Pe ji ge ningnui keringbe ngau lerahang ge aibe ramme rawgaidiak lei.

21

Keneme hangsename dage Isua Liabe

1 Chipau chang dege Tiberias sungkling taige keneme dage perunne Isua lia kadai de lei, zai aigumze Pa lia de lei. 2 Simon Peterbe zai 'Mpaplungbepeu Thomasbe, zai Nathanaelbe, Galili ram Kana keloa'mpeu, zai Zebedibe name benai Pa keneme kedame hangna bam kat ge penui bam lei. 3 Simon Peterbe ne penui je, "Heka nim ra I a tat tu lei", kacheu lei. Zai penui pechu, "Anui du ning dage tat gu lei", kacheu lei. Penui pat lu, 'nnei ge chu dide lei. Kane chipau mai muizeu ge penui made nimpat mak lei. 4 Kane tingbapat gap dege, Isua depuloa ge sap laleu de lei, leusede Isua leibe keneme a chi mak tadi lei. 5 Dadege Isua ne penui je, "Hename nung gau, ningnui heka made nim mak semei?" kacheu lei. Penui ne kak ze pesuage, "Ga lei", kacheu lei. 6 Zai Pane penui je, "Nnei hezat'mbia chiak tuagai lau, dezai ningnui gesa chui gu lei", kacheu lei. Dadege penui tua gai ze, heka misoangga chuibe zegene chiak ze penui zupat lak tide lei. 7 Chi kene'mpeu Isua ne hungbepeu zene, Peterbe suage, "Chize Heguangpeu de lei", kacheu lei. Heguangpeu leibe Simon Peterbe seu lu dege, pa mechua kai de lei. Pa a tatew ze pepumrua bam didadegeu. Zai sungkling ge 'nsiam gai de lei. 8 Kane keneme kedame a 'nnei gene pat ze, chiak ze heka ramme ne puigit bambe ze zu kakereu de lei, 'nnegiam gene deu mak se sau haina gumbe ge penui bam daseu. 9 'Nnegiam penui pat chang dege, chige meching hegeine hemitewbe zai pepeireige heka bambe zai tingku du penui ngau de lei. 10 Isua ne penui je, "Ningnui heka chuna nimlube gene gesa teiwang lau", kacheu lei. 11 Zai Simon Peterbe ne 'nnei ge chu lu, chiak ze 'nnegiam 'mbe zupat de lei. Chige heka kedibe ramme puigit ze, haikat ze rengeu je kechum bam lei, zai chige misoangga kie ze bam bei sedu chiak a rimak tadi lei. 12 Isua ne penui je, "Wang ze hechua teseu teu zu lau", kacheu lei. Zai keneme ruagene mide Pechu, "Nang chau lau?" ze 'nneu kiaku tadi lei. Heguangpeu leibe penui chi lu zeu. 13 Zai Isua wang lu, tingku lulu ze, penui je pei de lei, zai chigum heka zedu pei de lei. 14 Chaidime ruagene Pechu kuakchu dailube changge keneme dage Isua liagaibe aize lua pakechumbe de lei.

Isua benai Peterbe

15 Hechua teseu penui teu lu dege, Isua ne Simon Peterbe je, "Johanbe na Simonbai, aibe ramme du sua a nang Achu hung mei?" kacheu lei. Pane Pesuage, "Eu lei, Awang gau, I Ningchu hung leibe Nang chi lei", kacheu lei. zai pane pechu, "Agu melipoine ramme je gui lau", kacheu lei. 16 Zai Pane pechu pakenabe ge, "Johanbe na Simonbai, nang Achu hung mei?" kacheu lei. Pane Pesuage, "Eu lei, Awang gau, I Ningchu hung leibe Nang chi lei", kacheu lei. Zai Pane, pechu, "Agu meli ramme je rei lau", kacheu lei. 17 Pane lua pakechumbe ge pechu, "Johanbe na Simonbai, nang Achu hung mei? acheu kadai lei. Pane Pechu lua pakechumbe ge "Nang Achu hung mei?" acheu beibe zegene Peterbe pelung hereu dide lei. Zai pane Pesuage, "Awang gau, Nang getaleine chikam lei. Zai I Ningchu hung leibe Nang chi lei", acheu bei lei. Isua ne pechu, "Agu meli ramme je gui lau, 18 Pelingsing, pelingsing ze ningchu I rang lei, nang hena'ngkage ning karunne ning pai 'ngkang lu, nang tat neineibe ge tatrua da, kane nang ching dezaine ning ba kena nang getuapat gu, zai miramme ne nang tat nei makbe bam ge ningchu pua tat gu lei", acheu bei lei. 19 ('Ndaigumbe chit gene ehai ze pa Hera ngeutew'ndi ra meibe teilia ra Pa aize sa de lei) zai aipau chang dege, Pane pechu, "Achai sui lau", kacheu lei.

Isua benai Kene'mpeu Kedabepeu

20 Peterbe 'nrei wang dege, Isua ne hungbe kenempeu mui teseu teube luage, Isua gage 'mbei lu sa ze, "Awang gau, chau ne Ningchu zua ra lau?" kacheubepeu penai ehai suitat bambe ngau de lei. 21 Peterbe ne chipaupeu je ngau lu dege, Isua suage, "Awang gau, aipaupeu deuge 'ndaigum ra lau", kacheu lei. 22 Isua ne pechu, "I wangkeu dai mak tane pa bam kua bam ra, I ne nei zai a chize nang 'ndaitew ra lau? Nang a Achai sui \au" acheu bei lei. 23 Chidadege mipuiname ruage, chipau kene'mpeu a, ehai ramak leibe sam ratat tide lei. Kane pa ehai ramak leibe Isua ne pechu salia mak lei. Kane I wangkeu dai mak tane pa bam kua ra I ne nei zai a, chize nang 'ndaikautew ra lau? ze kacheu zangno. 24 Aipau kene'mpeu zene, aibe ramme sakitew gai ze, zai pane aibe ramme rawgai de lei; zai pa sakitewgaibe sam a gesang leibe anui chi lei. 25 Zai Isua ne ta kedabe ramme tewgaibe misongga la lei' chibe ramme ze kat kat ne ze rawgai kam ra dizaine a, leisi rawrabe ramme kedeipeirei ge kairabe bam ga gu lei ze I 'nnumgai lei.