John 1

Jüo thüma meve kevori

1 Süculü jüo tazo, Jüo Jihova züta, mu Jüo sü Jihova zo. 2 Shüdülü Jihova zü tazo. 3 Mhametüko pütho thisü, mhathi kesüko püpo thikemo püridi. 4 Pülü kerhü ba, mu kerhü süo thüma keveo zo. 5 Keveo kezü vamve tayo, kezüno süo seyi mote. 6 Thümapü Jihova pü ketsüsü, püza John. 7 Thüma süo zhopola vori, Keveo zhopo kethila; size thüma metüko püyo melüyi ketola. 8 Püno Keveo mo, vele Keveo zhopo sü ketola ketsü kesüo. 9 Keve kethoo sü thüma metü vamve sü ketola vori. 10 Pü cejüo thisü mu cejülü vori, mu cejüo püsemo. 11 Pütho pücejülü vorizori, püzhüko püse mota. 12 Vele püzü keyikhü metü pü süko khipü Jihova nuneko thiyi keve keku kha tsüsü, püza melü keyiko metü. 13 Menu keyiko uzalü mozori, mori uthiupho medolü mozori, mori thüma medolü rimo vele Jihova medolü. 14 Jüo po uthi meve vori, pü udolü hü, hako püngo, zapozale Poo nu püyo ngokemezhe mu kethopo chupü. 15 John pü zhopo thi vori, se de poti, Hiohi püzo I poketao, Pü asa vori vele pü amhüjü tazo. 16 Püyo kekhrü chupü upo ngokemezhe kengo sari ngoyi. 17 Kekrelamori Moses thezho khapü utsü, vele ngokemezhe mu kejütho Jisu Khrista celü vori. 18 Mipüri Jihova sü ngomo. Süosü Nuo pümelülü kebaozo. Püpü mi mese kesüo.

John jülo kepüo zhopo

19 John zhopo kethi hiohi, thevoko mu Levimiko Jerusalem lü mi ketsüpü pü ketso, “No sopüa?” 20 Pü ukoce potü süzo, pü mela mozo; vele phra sü, I Khrista mole. 21 Uko pü ketso ti, Süsa no sopü? No Elijah me? Pü poti I Elija mole. No saju kepo mime? Pü uko fü kela de, I süri mole. 22 Süsa uko püce poti, No sopü ta? Hako ketsü kesükoce jü püvo posü ketola. No sopüle zide poya? 23 Pü po kesü, I füphrapü rayholü se ketao süle, Niepoo chode thi kemezi yite, side Isaiah popü meta tio. 24 Uko ketsü kesüko sü Pharisee mikozo. 25 Uko pü ketso de püce poti, Mhace no Khrista mo lize dipüla jülo khapü mi tsüya, Elijah ri mo mu Isaiah rimo mori saju kepomi rimo lize? 26 John uko fü kela kesü, I jülü jülo khasüyo, vele mipü neko dolü tha neko pü semo. 27 Pü süozo, pü asalü vori zü, pü amhüjü tazo; pü pheku kepharo ri I phrü shümo. 28 Mha sükosü kethi Jordan khüco Bethany lü John jülo kha sü kebalü thisü.

Jihova Konuo

29 Süsanha Jisu ta püce vori kezü ngo de John poti, Hihe, Jihova Konuo, Cejüo kephoma khi tata ketoo. 30 Thüma hiohi I pü zhopo thi ketao süzo, Asaco vori kezüo amhüjü ketao, kekrelamori pü a mhüjü tazo tila. 31 I pü semo, vele püpü Israel miko mesesü, süla I jülo khapü mitsü tayo. 32 John zhopo kha kesü, I tülü Kemesa Rüpü kiri kezü mekhropü bi mu taki püyo ba yita. 33 I pü semo, vele pü aketsüpü jülo kha mitsü, pü ace poti, No Kemesa Rüpü kiri kezü ngoto, de püyo ba yito, süosü Kemesa Rüpü lü jülo khapü mi tsüto. 34 I süo ngo, süo zhopo khasüyo, hiohi Jihova Nuo zo.

Jisu saji kerathoko

35 Süsanha John pü sajimi kena püzü tha kebace. 36 Jisu chota keba peba, Pesüte, Jihova Konuo hi. 37 Pü sajini mikena pü kepo sesü de Jisu sa meji ta. 38 Jisu regüsü uni pe süri uni püsa meju kezü ngosü, de Jisu uni ketsoti, neni kedipü phuzü ze? Uni püce poti Rabbi (püco kemethao) No dipüce hü ba? 39 Pü uni cepoti, Tavori pete. Uni tavo pü keba thethi pe de püzü bata sünhasü, süce keba mesü ketala. 40 Uni mipü John kepo fü keseo sü Andrew, Simon Peter sazüo. 41 Pü jürao Simon ngoyi de püce poti, hani Messiah sü ngo yite, püco khrista-Greekmi jülü kenhü keyi kedeo. 42 Mu pü püjürao Simon züvo Jisu cesü. Jisu püpesü de poti, no Simon Jonah nu ncüpü Cephas püco ketsü thi tato.

Jisu Philip mu Nathanael ni cü keyi

43 Süsanha Jisu ta Galilee lü ki keto lüta. Cholü Philip zü kesüyi de püce poti, Asa meji yite. 44 Philip no Bethsaida lü kevorimi, Andrew mu Peter ni kehü nadelü. 45 Philip no Nathanael ngoyi, de püce poti, Hako püngo yite Moses thezho lesilü mu saju kepoko thopü kemeta Jisu Nazareth mi, Joseph nu. 46 Nathanael püce poti, Nazareth lü mhakeve hu voriyi veme? Philip püce po de Tavori pete. 47 Jisu Nathanael püce vori kezü ngosü, de poti, Hihe, Israel mi kejo kedipü. 48 Nathanael püce pode, kedi kethice no ase? Jisu püce poti, Philip nkecü mhüjü, no chüdü bo phelü kebace, I nngole. 49 Nathanael püjü kelade poti, no Jihova Nu zole, Rabbi, no Israel mi Kedeo. 50 Jisu püce pode, I chüdü bo phelü nngole si kesüla no melü teme? No süceri zhoku ti ngoto. 51 Püce posa kesü, I nce potü süto, no tüyo khri kesü ngoto hisa, tüyo choyi miko Nuo yo kho mu ki ketha ngoto.

John 2

Cana lü nolü hü kehi

1 Süsa zhosü nha Galilee lü Cana rüna lü nolü pü ba, Jisu nezu sülü ba. 2 Jisu mu pü sajiko ri cüpü nolü lü sü. 3 Uko hezo di ketace Jisu nezu püce poti, uko hezo ba mo tele. 4 Jisu püce pode, Thenopü I nzü dipü thita? Atü vori molu. 5 Püzu choyi kethikoce poti, Pü dipü posü sheri neko süsü thi süte. 6 Süce ketsü leki shurü ba, Jews miko uthi kemesa keti thezholü, pülü lekhu kena sü lüyi keve (gallon mecü mori sümeri). 7 Jisu ukoce poti, jüpü lekiko mele chu süte. Uko lekiko jüpü mele chusü. 8 Pü ukoce poti, chüpü yite, tsühi, side püvo thehü kesü keba kezhoo tsü süte, uko püvo pü tsüsü. 9 Thehü pe keba kezhoo süo kra metha sü, jüo thipü hezo thi kevao, dipüce pü vori sheri pü semo; vele hezo chü keyi thümao seba, thehü kesü keba kezhoo zhosa cüsü. 10 Püce po kesü, thüma kehopü sheri therace hezo keve kha süyo; süsa uko hezo kra uso thi mezü ketasa, süsalü kesuko khasü tayo; vele no tsü ketso hezo keveko khasü bazo. 11 Ungo mhathoko kethi thera Galilee lü Cana rüna lü thisü, zapozale kethi pü mi mengosü, side pü sajiko pü melüyi. 12 Hisalü pü ta Capernaun lü kita, püzu, püsazüko mu püsajiko kezüde pütü hu sülü bata.

Jisu Kereshüce thi mesa kesü

13 Jews mi cukevo nye meno ba ketala Jisu ta Jerusalem lü kho. 14 Kereshücelü metho, tenyü teko, mu therüvü zhu keba ngoyi, mu presa kele kebako sülü bade presa keleba. 15 Pü kero khipü sürü thiyi de pü Kereshücelü metho, teko tenyü, mu therüvüko huva; süsa presa kele keba presako pü lava; side mizko phü melava. 16 Pü therüvü zhu kebako cepoti, mha hiko hice khipü tatate, Apo ce pü hetho Heli thiva hite. 17 Püsajiko usalü vorita thopü kemetako, “Nce rele kelü lünipo amezoyita.” 18 Sülü Jews miko püce poti, No zasi kedipü khapü hako mengo süta, no mha hiko thi kebahi? 19 Kereshüce hio meka kevasa I zhosülü phu mesü vato. 20 Jews miko pode, tütse heda shurü kereshüce hiohi thi, no zhosü lü phu mesüva tola? 21 Vele pü kepono Kereshüce sü püthi püpho poba. 22 Pü rhüla sü ketasa püsajiko usa lüyi pü uko ce po kesüko, uko ketho lesi melüyi, Jisu jü po kesüko. 23 Pü Jerusalem lü kebace cukevo nye lü thüma kekro püza melüyi, pü ungo mhatho thi kesülü. 24 Vele Jisu pütho pü khapü uko tsü sümo, kekrelamori pü thümako metü se kebala. 25 Thüma kehopüri kezhopo phizo mo sheri vezo, kekrelamori püse keba thüma lulu kedipü bashi ti seba tila.

John 3

Nicodemus tüzü Jisu cekevo

1 Pharisee mipü püza Nicodemus lesi de Jews miko kekha tayo. 2 Thüma süo tüzülü ta Jisu ce vori de püce poti, Rabbi, hako se keba no Jihova celü kevori kemetha mipü tazo; mipüri no mha ungo thi kesüko thi keyidi, Jihova püzü ta kemosa. 3 Jisu püfü kelakesü, Kethozo, I nce potü süto, thümapü menu kesala kemosa pü Jihova kede ngo yiho. 4 Nicodemus püce pola kesü, Mipü pethi ketasa kedipü bide menu kesala yi veta? Pü sala püzu valü lüde va kena menu tome? 5 Jisu püce poti, I nce potü süto, thümapü jü mu Rüpülü menu yi kemosa pü Jihova kede balü lü yiho. 6 Uthi upho kemenu sü uthi upho zo, Rüpülü kemenu sü rüpüzo. 7 Nngo hite, I nce kepo No menu kesala moze su zi kesüla. 8 Tükhra pütho pümedora khra votayo, no püfü seto, vele dirapü khra vori sheri no seyomo, mu khra dipüce vota sheri seriho, sübi kehopü sheri Rüpülü kemenu sü bizo. 9 Nicodemus püce pode, Dipü bide sizi tata? 10 Jisu püce poti, No Israel mi kemetha mipü, sizide mha süko se mola? 11 I nce potü süto, hako ha kese kengoko poyo, mu kengo süko zhopo thiyo, neko zhopo süko melü yomo. 12 Mhace I cejülü ju nekoce posü zori neko melü mo lize, I tülü ju neko ce pota tisa neko dipübi melü yiveta? 13 Thüma püri tüyo khomo zolu, vele pü tüyo kiri, thüma Nuo tüyo tayo. 14 Moses nhatsalü tenhi pü kesübi, thüma Nuo ri püsü zoto. 15 Kehopü sheri pü melü keyiko kata hozo, vele kechothe kerhü ngo yito. 16 Jihova cejüo khrüthori zode pü Nu pule-o kha süzo, thüma kehopüri pü melü keyimi shütaho, vele kechothe kerhü ngo yito. 17 Kekrelamori Jihova pü Nu ketsüpü cejüo mejo va ketola mo, vele cejüo po püyo kelayi ketola. 18 Pü melü keyimi sümi mejo vaho, vele melü kemomi tsüri mejo vatazo, kekrelamori pü Jihova khakesü Nuo melü mo ketala. 19 Kemejo süosü hihi, keveo cejülü vorite, thümako kezü unüku keveo ceri, kekrelamori uko mhathoko kesu tila. 20 Kekrelamori mhakesu kethiko keveo retsüyo, mori kevelü vori yomo, umhathoko mengo sümo ketola. 21 Vele ketholü hü ketako keveo ce voriyo, pü mhathoko mengosü ketola, uko mhathoko Jihova medolü thi tila.

Jisu mu John jülo kepüo

22 Hisalü Jisu mu püsajiko ta Judea cejülü vota, pü sülü bade mipü jülompü sü. 23 John sheri Aenon lü Salim kemenoce mipü jülompü ba, süce jü kekro ba tila, uko ta vori de jülo püyi. 24 Kekrelamori John tüpü thejü thi molu süce. 25 John sajiko mu Jews miko dolü mhakebu ta, uthi kemesa keyi zhola. 26 Uko ta John cevode pü ketsoti, Rabbi, pü nzü Jordan khüco ketao no pü zhopo thi kebao, Hihe, thüma metü ta püce vota züle. 27 John ukofü kelakesü, Thümapü utho mhapüri thiyiho, tüyo khapü pütsüsü kemosa. 28 Neko akepo füko seba, süko zhopoko nekozo, A kepo, I Khrista mo, vele pü mhüjülü a ketsü kesüo. 29 Pü zhosapü yi ketio sü zhosao zo, vele pü khrethoko püzüba de püfüko se reni pünü rechü bayo, zhosao fü kesela, hiohi akenü mu thitso süte. 30 Pü zho mama ta mozesu, mu I tsü (ni) mama ta moze su.

Mipü tüyo kekiri

31 Pü mesoyo kiri ketio metüko pi, pü cejülü vori lize cejü zo, cejülü jüko poyo, tüyo kevori yosü metüko pi. 32 Pü se mu ngo tiko posüzo sheri thüma püri melüyi mote. 33 Pü zhopo melü keyimi Jihova sü kethozo ti tha süyo. 34 Kekrelamori Jihova ketsü kesüo Jihova jüko po süyo, Jihova Kemesa Rüpü mede kemo kha pü tsüsü. 35 Po no Nuo khrü, mha metü khapü pübelü süte. 36 Pü Nuo melü keyimi kechothe kehü ngo yite, somi Nuo melü mota sheri kehü ngo yi ho, vele Jihova lekhu püyo ba tayo.

John 4

Jisu mu Samaria pü

1 Hitüce Jisu sekeyi, Phariseeko “Jisu sajiko jülopü miketsü John ceri kroku bate” siti seba keta seyi. 2 Jisu thono jülopü mitsümo vele püsajiko thozo. 3 Pü Judea lü tasü Galelee lü kita. 4 Pü ta Samaria lü vomo suta. 5 Süsa pü ta Samaria nade pülü voyi, süo cüpü Sychar siyo, thethi süo Jacob popü pünu Joseph tsükesü kemenoce ba. 6 Jacob jüfü süce ba. Jisu revü ho tata, süla jüfü khüyo ba; süce keba shurü (baro) ta. 7 Thenomipü sülü jü püto vori, Jisu püce “jüpü apo krayite” zisü. 8 Pü sajiko ta rünalü vo ketico khri tole vota sütüce. 9 Samaria pü püce pode, dipü bide sita, no Jew mipü, apo jüpü nmekra sü no ti, I Samaria mipüpü zotila? Kekrelamori Jews miko Samaria miko züde lütilüle thi yomo. 10 Jisu püfü kelade poti, No mhace Jihova khakesü se lize, sopüno nce kepo “jüpü amekra süte” ziba sheri, no püce mhacho metse, size pü kerhü jü khapü ntsü süto. 11 Thenopü püce poti, Kezhoo no mhapüri khipü jüthu keto bamo, sizomoli jüfü mesü (relü); dipüce no kerhü jü bata? 12 No hapotsa Jacob ce zhokume, pü jüfü hio kha hako tsüsü, pü sheri jü hiokra mu pü nuneko sheri mu pü cüriko sheri kra? 13 Jisu püfü kelade poti, thüma kehopüri jü hio kekrami theri sala tato. 14 Vele I jü khapü tsü kesüo kra keyimi theri taho, vele khapü ketsü jüo kerhü jüfü pü thide rüla sü kechothe kerhülü vo tato. 15 Thenopü püce pode, Kezhoo, jü süo khapü atsü süte, side apo theri samo ketola, hice vori jüpü mo ketola. 16 Jisu püce pode, Tavo nnopu cüpü hice vorite. 17 Thenopü püfü kela kesü, I anopu bamole. Jisu püce poti, No po meve shu süzo, I anopu ba mole sikesüsü. 18 Kekrelamori no nnopu püngu bave, tsühi nzü kebao ri nnopu kethomo, süla no potü süzo. 19 Thenopü püce poti, Kezhoo, akelüce no saju kepomi mipü te thohe. 20 Hapotsaneko cejütu hiolü reshü vori, neko kepono Jerusalem lü thümako kereshü kethi mesü liyo. 21 Jisu thenopü cekepo, Thenopü, melü yite, pütü süo vori bate, neko cejütuyo ri mo mori Jerusalem lü rimo de Poo reshü tato. 22 Neko reshü keta semode reshüyo, hako sede reshüyo, kekrelamori kelakeyi sü Jews miko la. 23 Vele pütü vori bate, tsühi te, reshü ketho kethi miko ketho mu rüpü lü reshü tato; kekrelamori Poo reshü sübi timi phu tayo. 24 Jihova sü Rüpü zo, ketho mu rüpülü pü reshü moze su. 25 Thenopü püce poti, Messiah vori keto I seba, süosü Khrista, pü vori lize mha metüko pü hako ce posü tole siba. 26 Jisu püce poti, I nzü kerethi keba I süo zo. 27 Hizi keba tülü pü metha keyiko tavorita, uko vori ngo keyi pü theno mipü zü kerethi keba la uko ngota, siri mipüri no dipü phuba mori no dipü la thenopü zü kerethi ba? zimo. 28 Thenopü süsa pü lekhu khava de tata, pü cholü ta nadelü vota, de thümako ce posü. 29 Tavorite, de thümapü pete, pü I thi keva aju metüko pü ace po süte, pü Khrista ta motho? 30 Süsa thümako nadelü prari de ta püce vori. 31 Sizi keba tülü pü metha keyiko püpo mhati yite, Kemethao, side poba. 32 Vele pü ukoce poti, I ketico neko se kemo püba. 33 Süla metha keyiko hunehu ce ketsode humi ketico püvo püpo tino pütsü süme? 34 Jisu ukoce poti, A ketico sü apo aketsü kesüo nü thiti, mu süo thitso kesüo zo. 35 Tekhri dasa rece vori yo siti neko poyo mome? I neko ce kepo, Tosü nmhü khrüpü pete, yiko müpü rüve züte. 36 Yi kerümi ri uzhokhro ngo yiyo, useko püvo kechothe kehülü kengu yito, side tsava miri mu kerü miri kezü unü tayo. 37 Poketa jü hio kethozo, mipü so süto, mu kekreo rü yito. 38 I neko ketsüpü rüyi nosü neko sosü kemora, kekremi mhatho kethi lü neko ta mhatho sülü lüzü. 39 Samaritan nade sülü thüma kekro theno süpü kepola pü melüyi, pü zhopo thikesü, pü I thikeva metüpü ace posü. 40 Süla Samaritan miko ta püce vori de püpo uko zü bano chota, süla pü sülü zho kena bata. 41 Thüma kekro melüyi kekrelamori püjü la. 42 Uko thenopü ce poti, Tsühi hako ri pü melüte, nkepola zo mori hakotho püfü seyi ketala, Khrista tazo ti seyite, cejü kelakeyi yozo.

Jisu sala ta Galilee lü kevo

43 Zho kena salü pü ta Galilee lü kita. 44 Kekrelamori Jisu püju kepo, saju kepomi pütho pü rünalü thürho bamo. 45 Pü ta Galilee lü kekice Galileans miko pü züyi, pü Jerusalem lü thenyelü mhathi kesüko ngo tila, kekrelamori uko thenyelü vo tila.

Jisu kezho mipü nu thi kesürho kesü

46 Süla Jisu ta Galilee rüna Cana lü vori, pü jü khipü hezo thi kesülü. Capernaunlü kezhomipü nu mhathi züde thi kesürho sü. 47 Pü Jisu Judea lü tasü Galilee lü vo kezü seyi, süla ta püce vori, de püpo ta püce vono chota, pünu thi kesürho sü ketola, kekrelamori pü sata keto tace ba ketala. 48 Süla Jisu püce po kesü, neko zasi mu ungo mhathoko ngozo kemosa melü yomo, 49 Kezhoo püce pode, Kemethao, anu saketa mhüjü ta kiri zote. 50 Jisu püce pode Tavo tate, nnu rhü yito. Thümao Jisu püce kepo fü melüyi de ta vota. 51 Pü ta cholü ki kezüce, pü choyi miko tavori püzü kesü, de püce po kesü, Nnu rhü yite. 52 Süsa pü ukoce ketsoti, pütü kedipüce pü sürho vorita sheri. Uko püce po kesü, ndo keba thünace (ba püce) kethi dite. 53 Süla püpo sekeyi, pütü sü mesüce Jisu püce kepo, Nnu rhü yito, zisü. Püri mu pücekro metü melüyi. 54 Mhatho hio Jisu ungo mhatho thikesü kenao, Jisu Judea lü ta Galilee lü vo kezüce.

John 5

Jisu Sabbath nha mithi kesürho kesü

1 Hisalü Jews miko thenyepü ba, Jisu ta sülü vo. 2 Jerusalem lü Teko kharü ce rüzapü ba, Hebrew jülü süo cüpü Beth-zatha liyo, süo kü püngu ba. 3 Hilü thüma sürhomo ketami kekro bayo, mhücemi, pheyhomi, lahemi, uko jü rephü kesüri meri bayo. 4 Kekrelamori tüyo choyimi pütü huce kiri de jü kebu süyo tila, jü melü kesürice kehopüri ta sülü lü kerami kethi kehopü thiba zo sheri sürho tayo tila. 5 Thümapü sülü sürho mode tütse sümeri tütha zü tata. 6 Jisu sülü vori de pü tütse kekro sülü züzü keta ngoyi, de püce po kesü, no sürho ta nyü bame? 7 Sürho kemo thümao püce poti, Kezhoo, mipüri jü rephü kesürice apü jülü kesü ba mole, vele I talü ketoce kekremi amhüjü lü tata yole. 8 Jisu püce pode, Tasüte de nzi khipü tatate. 9 Sizisü metha thümao sürho yita, püzi khipü tata; tüsozho sünha Sabbath. 10 Jews miko thüma thi kesürho kesüo ce poti, Tha Sabbath, no nzi khipü tatihi uzhomo. 11 Pü uko fü kelade po kesü, Thümao athi kesürho kesüo ace poti Nzi khipü tatate zisü. 12 Süsa uko pü ketsode, Thüma süo sopüta, npo nzi khipü tata no kesüosü? 13 Sopü püthi kesürho sü sheri pü seyi mota, kekrelamori Jisu thüma krolü ta vo ketala. 14 Kenuco Jisu tavo kereshücelü püngoyi, de püce po kesü, no sürho taile, kephoma thi sahite, sizi kemo sasü hice suku ti vori ta mo ketola. 15 Thümao tata, de pü Jisu le ti pü mice posü, püthi kesürho kesüo. 16 Süla Jews miko Jisu meshu ta, de pü dokhri va keto rhüta, kekrelamori pü Sabbath zhonha mhathoko thi kesüla. 17 Vele Jisu po kesü, Apo tsüri mhatho thizo kebabi, I sheri mhatho thi bayo. 18 Süla Jews miko pü dokhri va keto rhüku sata, pü Sabbath zho varhü ti lebimo vele Jihova pü pü Po le zi ketala, pü khipü Jihova zü ketü le zi keta.

Nuo keku

19 Jisu uko fü kela de po kesü, I nekoce potü süto, Nuo pütho zono mhathi keyi di, vele Poo mhatho ngoba ketila pü thi kebabi Nuo sheri sübi thiba. 20 Kekrelamori Poo Nuo kekhrüla mhatho metüpü pümengo süyo, mu pü mhatho hice zhoku ti sheri pü mengo süto mu neko ngo thi tato. 21 Kekrelamori Poo kesami phü merhülasü, mu süko thi merhü süyo, sübide Nuo sheri pü medomi phü merhü süto. 22 Kekrelamori Poo mipüri mejo yomo, vele sheco metü khapü Nuo melü süte. 23 Thüma metü Nuo rhoti mesü, uko Poo rhoyo tibi. Sopüno Nuo rhomo sheri pü ketsü kesü Poo ri rho yomo. 24 I nekoce potü süto, sopüno ajü reniyi de aketsü kesüo melüyi sheri kerhü ngo yito, kemejolü vota moli pü kesao cupü kerhülü vo tayo. 25 I nekoce potü süto, pütü süo vori tazü, tsühi tazo, kesamiko Jihova Nu fü se tato, püfü keseko rhü yito. 26 Kekrelamori Poo kerhü püzüta, süla pü kerhü khapü Nuo tsüsü, 27 Sheco keku khapü pü tsüsü, kekrelamori pü thüma Nuo tila. 28 Mhahikola nengo hite, kesamiko mhakhrelü püfü se keto tüpü vorizü. 29 Uko tasürito, mhakeve thi ketami rhülasü kerhülü votato, mu mhakesu kethi miko rhülasü mejo kevalü vo tato.

Jisu zhopoko

30 I atho ala mhapüri thi keyidi, I sekeyi la sheco thiyo, mu asheco kethozo (mezizo), kekrelamori I atho amedo phu yomo, vele a ketsü kesü Poo medo phuyo. 31 Mhace atho azhopo thiyo lize azhopo kethomo. 32 Mipüba azhopo kethi, pü zhopo ketho zole ti I seba. 33 Neko John ketsüsü, mu pü zhopo kethozo. 34 Vele akehüju thüma celü vorimo, vele I hiko po kesü nekopo kelakeyi ngoyi ketola. 35 Püsü to keba kevepü, mu neko dopüla pü kevelü neko nüta nyü süzo. 36 Vele I John ceri zhoku tipü zhopo ba, kekrelamori Poo mhatho khapü amelü kesüko I thitso sü mozesu, mhatho süko azhopo thiyo, Poo aketsü süzole ti. 37 Poo sheri pü aketsü kesü zhopo thiyo. Neko mhapüceri püfü semo, mori pühü sheri ngo mozo. 38 Püjüko nekoyo bamo, kekrelamori neko pü ketsü kesüo melü yi kemola. 39 Lesilü thopü kemetako phri süte, kekrelamori sükolü kechothe kerhü bale melüba, sükolü aju thopü kemeta ngo yito. 40 Kerhü ngoyi ketola neko ace vori mute. 41 I thüma celü therho ngoyimo. 42 Vele I neko seba, nekoyo Jihova kekhrü bamo. 43 I a Po zalü vori, neko azüyi mote; mhace kekremipü pütho püzalü vori lize neko pü zü yito. 44 Neko kedipü bide melü yita, neko hunehu celü therho phuyo, Jihova celü lebi therho phu yomo? 45 Poo mhüjülü I neko mejo keto lühite, mipü neko mejo keto püba, süo Moses neko melü ketao. 46 Neko pü melü ketosa asheri melü tevele, kekrelamori pü aju thopü meta. 47 Vele neko pütho kesüko melüyomo lize dipü bide neko ajüko melüyi veta?

John 6

Mi nye püngu vathi kesü

1 Hisalü Jisu ta Galilee jü kezholü kita, Tibarias jükezho laco. 2 Makro püsa meji vorita, kekrelamori uko mha ungo kethiko ngo kesüla, kethimiko thi kesürho kesüko lari. 3 Jisu ta cejütuyo khota, sülü pü sajiko zü babata. 4 Jews miko thenyepü, takepranye meno bata. 5 Süce Jisu pümhü khrüpü pe süri, thüma kekro ta püce vori tazü, pü Philip ce pode, dirapü tsükhri khri püvo hikopo ti yita? 6 Pü medephi kesü zo, kekrelamori pü sheri seba pü dipü thi sü to sheri. 7 Philip püfü kelasü, penny (presa) krakena (tekhri shurü zhokra) zori ukola ti kemegu ngo yiho, mipü tho kedopüpü lebi zo sheri. 8 Pü saji mipü za Andrew, Simon Peter sazüo, püce poti, 9 Khresa mipü hice chütsükhri püngu mu fü kenine kena pü tale, vele süko makro hi thedüla dipü bita? 10 Jisu poti, Thümako po ba yite. Nha süce ba shu. Süla thümako bayi, mi nye püngu. 11 Jisu tsükhri püyi, pükemeza fü posü, side khapü thüma ba kebako zasü, fü sheri moze kesudü khapü zasü. 12 Uko ti megu keyisa, pü sajiko cepoti, timesho keyiko pfü kengu yite, usü püri khava hite. 13 Süla uko pfü kenguyi, uko tisho chütsükhri kengupü merha kerikenalü chuyi, 14 Süsa thümako kengo, Jisu ungo mhatho thi kesü la poti, Kethozo thüma hiohi saju kese mipü cejülü vori tole po ketao tazo. 15 Uko kelüce pükemu thide pü tüpü püpo kede thita keto rhüta, pü lebi tasü cejütuyo vota.

Jisu jüpi chota

16 Theva vorita, pü sajiko ta jü kezholü kita. 17 Uko ta rulü lüta, side ta Capernaun kevaco vo tazü. Tüzü vorita, Jisu ukoce vori mo bata. 18 Jü rephü süta, tükhra kerüla. 19 Süla uko thehethide ru thopü miledo sü/da pü tata, uko Jisu jüpi tavori kezü ngoyi, ru meno pheri kezüce uko meprüta. 20 Vele pü ukoce pode, I zole meprü hite. 21 Süsa uko püzüpü rulü kesü umedode züyi, siziyi metha uko ta cejü kesolü voyita. 22 Süsanha thüma jükhü kebako ru kekre di keta, methakeyiko kevori ruo zo kemosa, Jisu ru sülü methakeyiko züde lü mota, vele methakeyiko lebi tata. 23 Sizi kebace ru kekrehu Tiberias laco vori, uko tsükhri keti thethi kemenoce, Niepoo kethezü kha kesü sa.

Tülü tsükhri

24 Thümako Jisu sülü keba ngomo ketala, mori methakeyiko sheri sülü phu medi ketala, uko ru thopü Capernaun lü Jisu phu vorita. 25 Uko tavori jükhü kekre laco pü ngoyi, uko püce poti, Rabbi (kemethao) dipü tüce no hilü vota? 26 Jisu ukoce poti, I neko ce potü süto, Neko aphu ketahi mha ungo thi kesüko kengola mo, vele kekrelamori neko mhati megu keyi lanozo. 27 Ketikekra suta ketokola mhathi hite, vele ketico kechothe kehülü tayo tikola mhathi yite; süo thüma Nuo khapü neko tsü süto; kekrelamori Therü Poo püyo mohor vü süte. 28 Süsa uko püce poti, Jihova mhathoko hako thiyi ketola kedipü thiti mesü? 29 Jisu uko jü kelakesü, Mhatho hiohi Jihova mhatho zo, neko pü ketsü kesüo melü keyi. 30 Süla uko püce poti, süsa no zasi kedipü thisü hako meka süta, hako po ngo de melüyi ketola. No dipü mhatho thi süta? 31 Hako potsa neko rayho thilü manna keti thopü meta, Pü tüyo tsükhri rüpü ukopo ti. 32 Jisu ukoce poti, I nekoce potü süto, Moses tüyo tsükhri kha sümo, vele a Po tüyo tsükhri khapü uko tsü ketho. 33 Kekrelamori Jihova tsükhri tüyo kiri, kehü khapü cejüo tsüsü. 34 Süsa uko poti, Niepoo tsükhri süo kechothe khapü hako tsü süte. 35 Jisu ukoce poti, I kehü tsükhri süo zo, ace kevorimi mhapüceri meri taho; mu ace kevorimi mhapü ceri theri ri taho. 36 Vele I nekoce kepo, neko ango süte, vele amelü yomo. 37 Apo khapü atsü kesü metü ace vorito, ace kevorimi I mhapü ceri hu vaho. 38 Kekrelamori I tüyo kiri zo, atho amedo kethila kiri mo, vele aketsü kesüo nü thi ketola vori. 39 Hiohi a Po aketsü kesüo medozo, pü khapü aketsüko mipüri medi vakemo, vele thüla tünha süko phu mesüyi ketola. 40 Hiohi aketsü kesüo medozo, kehopüri Nuo kengoko pü melü keyi, kechothe kerhü ngoyi ketola, thüla tü nha pü kelayi ketola. 41 Jews miko uko dolü kemeli shuta, kekrelamori pü kepo, I tüyo kiri ti tsükhri da yozo si kesüla. 42 Uko poti, hiohi Jisu zo mome, Joseph nu, püpo püzu uko se baze? Dipüla pü tüyo kirile poba? 43 Jisu ukoce poti, neko dolü panyo (kebu) hite, 44 Mipüri ace vori yiho a Po tho pü tüsüpü vori zo kemosa, mu thela nha pü phu mesü yito. 45 Saju kepoko hiziti thopü meta, uko metü Therüoju pü metha süto. Thüma kehopüri sekeyimi Poo se yite, mu ace vorito. 46 Mipüri Poo sü ngomo, pücelü kevorio lebi tho zo kemosa, pü Poo sü ngo. 47 I nekoce potü süto, amelü keyimi kerhü ngoyi bate. 48 I kerhü tsükhrida süozo. 49 Nekrü netsüpumi rayho thilü manna ti ketho, side sarite. 50 Hiohi tüyo kevori tsükhri da yozo, thüma püti keyimi sata yiho. 51 I kerhü tsükhri da yozo tüyo kevorio, mhace thüma kehopüri püti keyimi pü kechothe rhü tato; tsükhri da süo athi apho hiozo, cejüopo kerhü ngoyi ketola I ta vori. 52 Jews miko uko dolü kemelita, de poti, thüma hio kedipü bide püthi püsü ukopo tiyi vetole po bata? 53 Süsa Jisu ukoce poti, I potü süto, neko thüma Nuo thi ti mu püzakra kemosa nekoyo kerhü di. 54 Kehopüri athi ti mu azakra keyimi kechothe kerhü nete, mu thüla nha I püphu mesü yito. 55 Athi sü themu kethozo, mu azari kekra zhüzo. 56 Somi athi ti mu aza kra sheri sümi alü ba yito, mu I pülü hüto. 57 Rhü keta Po a ketsüsü, I a Polü hüyo, süla ati ketimi alü hüto. 58 Tsükhri da hio tülü kiri, nepotsa neko manna ti de sa keta bimo, somi tsükhri hio tiyi sheri kechothe rhü tato. 59 Pü hiko Capernaun lü synagogue lü popü mi metha kesüko.

Kechothe kerhü jüko

60 Pü sajiko süko se kesüce thüma kekro poti, mha hio jü kerü shupü te, sopü süko seyi veta? 61 Jisu pü sajiko du kebu ba keta pülü sesüta, pü ukoce poti, mha hikola neko nümo teme? 62 Mhace neko Nuo ta tüyo kho keta ngo de pü thajü keba thilü kho taze di bi ta? 63 Rüpü tho kerhü khasüyo, uthi upho zono mhapüri thi yiho, I nekoce jüpo kesüko rüpüzo mu kerhü zo. 64 Vele neko dolü humi melü kemoba. Kekrelamori theralü Jisu somi melümo sheri seba, mu sopüno pü tüsü to sheri seba tila. 65 Pü poti, I süla neko cepoba, mipüri ace vori yiho, a Po tho khapü atsü sü zo kemosa. 66 Süyovilü pü sajiko kekro tata, püzü tasa mota. 67 Jisu pü saji mi keri kena koce poti, Neko sheri tata nyü bame? 68 Süsa Simon Peter püce poti, Niepoo hako sopüce vokha? No kechothe kerhü jüko ba. 69 Hako melü tazo, no Khrista kethozo, Jihova rhü keta Nuo zo. 70 Jisu ukoce poti, I neko mi keri kena kedayi mome, vele neko mipü therü keshü. 71 Pü Iscariot Judas, Simon nu poba. Kekrelamori pü hisa pü tüpü mice sü ketola, püri keri kena kodolü mipü.

John 7

Jisu sazü jürako pü melü kemo

1 Hizi kevasa Jisu ta Galilee lü tavota, Judea lü tasa mota, kekrelamori Jews miko pü dokhri va keto rhü ba ketala. 2 Jews miko kereshüce nye vori meno bata. 3 Pü sazü jürako püce poti, hice takhi Judea lü kho tate, n sajiko pori nmhathoko ngo ketola. 4 Kekrelamori mipüri kemekhrülü mhathi yomo, mipo nse nyüsa ba lize. Mhace no mhathi kebako pü cejülü mesesü nyü ba tisa. 5 Kekrelamori pü sazü jürako ri pü melü kemola. 6 Jisu ukoce pode, Atü tso vori molu vele neko tü tsosü bayo. 7 Cejüo neko ngometsü taho, vele ango metsüte, kekrelamori I zhopo thipü süo metsu kesüla, süo mhathoko kesu zo tila. 8 Neko ta thenyelü khote, I thenye sülü khohote, kekrelamori atü tsotü vori molu tila. 9 Pü jü hiko po kevasa Galilee lü basata.

Jisu ta pronyelü kekho

10 Vele püsazü jürako takho ketasa püri thenyelü khota, melemelu zode khomo vele kemekhrü pübi. 11 Süce Jews miko thenyelü püphu de, pü dipüce vota? 12 Thümako pü ketso de mebü bata, kekrelamori humi poti, pü thüma kevele; kekreko poti, Mole, pü thüma shüketse ta tele. 13 Kehothi sheri mipüri Jews miko mpe tila chozu jüpo zomo. 14 Thünye metsu hice pü ta kereshücelü vo de mi metha bata. 15 Jews miko ungo shuta de poti, thüma hio dipübi mhase phita, pü lesiphri mo zo sheri? 16 Jisu ukoce poti, akemetha jüko azhümo vele aketsü kesüo. 17 Thüma kehopüri Jihova medo thiyo süze akepo jüko se yito, Jihova celü vori me, mode atho amedo jüpo ba sheri. 18 Somi pütho püju poba sheri pü thechu therho phu bayo, vele pü ketsü kesüo la thechu therho phuyo lize süo zhopo kethozo, matho mezi kemo püri püyo tamo. 19 Moses thezho khapü neko tsüsü mome, siri neko mipüri thezho züta mote? Neko dipüla adokhri keta lüba? 20 Thümako püfü kela kesü, mipüri ndokhri keto rhü bamozo, therü kesu n yo keba la zotho? 21 Jisu ukoce pode, I mhathopü thisü mu neko ngophite. 22 Moses yikerü khapü neko tsü, süo Moses mori neko potsa neko khasü; neko Sabbath tüsozho nha yirüyo. 23 Mhace mipü Sabbath nha Moses zho varhü mo ketola yirü lizo I Sabbath nha mipü thi kesürho tso kesüla dito amejo ayo neko nü moya? 24 Umhüpü kengola sheco thi hite, vele sheco kemezilü thite.

Hiohi Khrista zome?

25 Jerusalem lü kevori thüma humi poti, uko pü dokhri vanyü phu keta thüma hio zo mome? 26 Hice pü mimhüngoce thepu shude zhopo thi sefü bate, vele mipüri mhapo mote. Kezhomiko hiohi Messiah zole ti seba teme? 27 Kehothisheri uko thüma hio dipüce vori sheri seba; vele Khrista vori ketosü mipüri dipüce vori to sheri seho. 28 Jisu kereshücelü jüpo meto shude poti, neko I dipüce vori sheri seba mu ase riba, I amedolü vorimo, vele aketsü kesüo lazo ketho, neko süo semo. 29 I püseba kekrelamori I pücelü vori zo tila, pü aketsü süzo. 30 Sizi kebace uko pü tüyi keto lüta, vele mipüri ube cho püyo sümo, kekrelamori pütü tso molu tila. 31 Thüma kekro pü melüyi, de poti, Messiah kevorice zasi ungo mhathoko kethi thüma hioceri thi mekroku sü tome?

Kezho miko ketsüpü Jisu tüno kesü

32 Pharisees miko thümako kepo keba sesü, mu Pharisees miko ri mu thevo kezhoko ri kesa de kezhoko ketsüpü pütü tole sü. 33 Sütüce Jisu poti, pütü kedopü I neko züba tolu, mu süsa I ta aketsü kesüo ce votato. 34 Neko aphuto vele ango yiho, I dipüce bata sheri neko sülü vori yiho. 35 Jews miko kepode, pü dipüce vota tole bata, uko püngo mota ketosü? Pü ta Jews kemoko (Gentile) koce vota tole bame, side süko metha ta tome? 36 Pü keposü dipüco po bata, neko aphuto vele ango yiho, akebara neko vori yiho?

Kerhüjü kekrü rüko

37 Thenye thelatho nha, Jisu thade po kebace, thüma kehopüri theri ketako ace vori de krayite. 38 Amelü keyimi ketholesi popü kemeta püvalü kerhü jüri rela prarito. 39 Vele pü kepo hiohi Kemesa Rüpü poba, pü kemelüko ngoyi keto, Kemesa Rüpü hitüce khasü molu, kekrelamori Jisu zapozale thiyi molu tila.

Thümako dolü kelakreta

40 Jü hiko se keyice thüma kekro pode, Hihi saju kepomi ta zo kethole. 41 Kekreko poti, Hiohi Khrista tazo. Vele humi poti, Khrista Galilee lü voriyi veme? 42 Ketholesilü kepo Khrista David shuyelü vori tole siba. Mu Bethlehem rünalü, David kevori lü. 43 Süla thümako dolü kejükre salata pü lano. 44 Humi pü tükeyi lüsü vele mipüri ube chopü püyo sümo.

Keku kekhi miko pü melü kemo

45 Kezho miko ta Phariseeko mu thevo miko ce vo, de ukoce poti, neko ditono pütüzü pü vorima? 46 Kezho miko po kesü, Mipüri pübide jükepo dile. 47 Pharisees miko po kesü, nekori püpo neko kedo valume? 48 Mikekha yo tiko mu Pharisee miko mipüri pü melü ta motho? 49 Vele thüma hiko thezho se kemoko reshu ve. 50 Nicodemus ukoce poti, (theva Jisu ce kevoo), püri uko mipü. 51 Uko thezho mipü reni mozo de mejo keva thezho ba motho, pü dipü thita sheri reni ketso ti mhüjü. 52 Uko sü püce posala de, nori Galilee mipü zome? Phu (pe) te ketho lesilü, saju kepomi mipüri Galilee lü vori mozole. 53 Uko metü ta utho ucelü vota.

John 8

Thenopü mipü thepu zü bade ngo keyi

1 Jisu ta Olive cejütu yo vo ta. 2 Keshu rena pü ta kereshücelü vori, thüma kro ta püce vori; pü bayi de uko metha. 3 Thezho keseko mu Pharisee miko theno mipü thepu khrü bade pütüpü Jisu cevori, uko süpü khapü metsulü süsü. 4 Kemethao, theno hipü mha kesu thizo kebalü pü tü yite. 5 Moses thezho khapü hako ketsü ketsüpü sübi ketako vakhri vate zisü; vele no kedipü pota? 6 Uko jü hio kepo pü kejo tüyi ketola zo, side pü mejo ketola. Vele Jisu neküki pü becüne khipü cejü (renyoyo) tho de pü uko fü se kemo bi bata. 7 Süla uko pü ketso sasa bata, sizi kebace pü tha medü süri de ukoce poti, Neko dolü kephoma kediopo ketsü pü püva mera süte. 8 Süsari pü nekü salaki renyoyo lesikho tho bata. 9 Uko süo sekesüce utho ulü mejo ketala, mipüpü redüta, pethithoo celü shudü de natsitho ketso taprüta; Jisu lebi keba zota thenopü uko dolü metsulü thazori. 10 Jisu tha medü süri tice mipüri dita, Jisu mu thenopü ni lebita; Jisu püce poti, thenopü nmejo ketako dipüce vota? Mipüri nmejo moteme? 11 Thenopü poti, Niepoo mipüri mote. Jisu püce pode, I sheri nmejo ho, tavo tate, mu kephoma thi sahite. 12 Süsa Jisu ukoce poti, I cejü keveo zo, kehopüri asa kemejimi mhapü ceri kezülü taho, vele kehü kevelü tato. 13 Pharisee miko püce poti, Ntho nzhopo thiyo, mu nzhopo kethomo. 14 Jisu uko fü kela kesü, Atho azhopo thizo sheri azhopo kethozo; kekrelamori I dirapü vori sheri mu dipüce vota to sheri seba tele; vele neko I dipüce vori mu dirapü vota to ba sheri poyiho. 15 Neko uthi upho relelü sheco thiyo, I mipüri mejo yomo. 16 I mhace mi sheco thizo sheri asheco sü kethozo, I alebi tamo, vele a Po aketsü kesüo hani ta. 17 Neko thezholü sheri thopü meta, mikena zhopo sü kethozo leno. 18 Atho azhopo kethi mu a Po aketsü kesüo azhopo thi tazo. 19 Süsa uko püce poti, n Po dipüce ba? Jisu pola kesü, neko asemo mu a Po sheri semo; neko ase süze a Po sheri sete vele. 20 Jü hiko kepo Jisu uko fü kela kesü, pü kereshücelü mi metha kebace; mipüri ube chopü püyo sümo, kekrelamori pütü tso molu tila.

Jisu püsüju kepo

21 Süsa Jisu ukoce posala kesü, neko aphuto vele ango yiho, mu neko kephomalü sa tato; I dipüce vota to sheri neko akevolü voriyi kehola. 22 Süsa Jews miko poti, Pütho pü dokhri va to bame? Kekrelamori pü poti, I dipüce vota to sheri neko tavori yiho. 23 Pü ukoce poti, neko mekhroco kevorimi, I mesoyo kevorimi, neko cejü hiolü thüma, I cejü hiolü thümamo. 24 Süla I nekoce kepo neko nekephomalü sa tato; kekrelamori mhace I nekoce kepo I zo, sizisü zori neko melümo ketala; nekephomalü sa tato. 25 Süsa uko püce poti, No sopü lezibata? Mu Jisu ukoce poti, therathoce I neko ce kepoo zo. 26 I mhakekro nekola po keto mu mejo keto ba, vele I ketsü kesüo sü kethozo, I mha süko pü cejüo ce po süte, I pücelü se keyiko. 27 Uko Poo ju se yimote pü ukoce posü zori. 28 Jisu ukoce poti, neko thüma Nuo phumesü kesüce seyito, I süo zoleti, atho ala I mhapüri thita mozo, vele Poo a ketsü kesüo ametha kesüko lebi, I süko pü poyo. 29 Pü aketsü kesüo azü tazo, a Po akhava mozo, kekrelamori I pünü pümedo lebi thi süta zo tila. 30 Pü jü hiko kepola thüma kekro pü melüyi. 31 Süsa Jisu Jews miko pümelü ketakoce poti, Mhace neko ajü melüyi ta lizo neko asaji miko tazo. 32 Mu neko kethoo seyito, mu ketho-osü neko phrü vato. 33 Uko püfü kelade, hako Abraham shuyemi mu mhapü nhari mijü thimozo, no dipüla neko phrü vato siti poba? 34 Jisu ukoce poti, I nekoce Ketho potü süto, Kehopüri kephoma thi ketami kephoma jü thi tazo. 35 Mijümi kechothe micelü basü yomo, vele Nuo kechothe basü tayo. 36 Mhace Nuo neko phrüsü ta lize, neko phrü süva kethozo. 37 I seba, neko Abraham shuye zo, vele neko adokhri tole rhü bayo, kekrelamori ajüko nekolü bayi mo ketala. 38 Apo I ngo kesüko pü nekoce hala süyo, neko a Po celü se keyiko thiti mesü.

Jisu mu Abraham

39 Uko püfü kelade püce pokesü, Abraham hako Potsa. Jisu ukoce pokesü, Mhace neko Abraham nuneko lize Abraham mhathoko thiti mesü. 40 Vele neko adokhri vanyü bate, thümapü nekoce ketho I a Po celü sekeyiko püposü; Abraham sizimo. 41 Neko neponeko mhatho thiyo. Uko püce po sala kesü, Hako kephoma mhatho kesulü menu yimo; ha Po püba mu süo Jihova zo. 42 Jisu ukoce poti, Mhace neko Jihova neko Po lize, neko akhrüto; kekrelamori I Jihova celü tavo rizo; atho amedolü tavo rimo, vele pü aketsü süzo. 43 Ditono neko afü seyi mota? Neko sheri akepo seyi mozo. 44 Neko po sü therü kesuo zo, nekopo kemengu (kecülu) ko thi tayo. Pü shüculü mi kedokhrimi, ketho-olü bayi yomo, kekrelamori ketho püyo kedila. Pü kemeda po süyo mu pütho püyo kevela poyo, pü kemedami, mu pü süo po-ozo. 45 Kekrelamori I ketho kepola neko melü mote. 46 Neko sopü apü kephomami le ziti poyi ve? Mhace I ketho po lize neko dipüla amelü mota? 47 Somi Jihova füse sheri Jihova jüzüyo, neko süko se yomo kekrelamori neko Jihova Ma motila. 48 Süsa Jews miko püce poti, Hako pomeve shu süzo, no Samaritan mipü therü kesu n yo ba? 49 Jisu po kesü, therü kesu ayo bamo, vele I apo rhoyo, neko arho yomo. 50 I atho atherho phu yomo, mipü süo phuyo mu mi mejoyo. 51 I nekoce potü süto, mhace humi ajüko khipü bayi lize pü mhapü ceri sa taho. 52 Jews miko püce poti, hako se bate, therü kesu nzüta. Abraham sate, mu saju kepoko ri sate; mu no poti, mhace neko akepoko züyi lize thüma süo mhapü ceri sa taho. 53 No hako potsa Abraham ce zho kume? Pü sate, saju kepoko sheri sate, no sopüle po bata? 54 Jisu ukoce polakesü, Mhace I atho azhopo thita lize süo kethomo, a Po azhopo thiyo de arhoyo, neko pükhapü neko Rüo le kebao. 55 Sizosheri neko pü semo I püseba, mhace akepo I püsemo zita lize neko biti I kemedami thi tato, vele I pü seba mu pükepoko thitazo. 56 Neko potsa Abraham atüsozhoko ngode pü rechü tazo, pü süo ngotila I anü we. 57 Süsa Jews miko püce poti, No tütse hepüngu ri molu zori no Abraham ngola? 58 Jisu ukoce poti, I nekoce potü süto, Abraham mhüjü I tazo. 59 Süsa uko ketsü khipü püva toli süta, vele Jisu resüta, mu kereshücelü pü taprata; uko dolü tapra de pü tata.

John 9

Umhü ce de menu keyi thümapü thipü mhango kesü

1 Jisu tapra kezüce mipü umhü ce de menu keyi mipü zü kesüyi. 2 Pü sajiko püce ketso de poti, Kemethao, thüma hio lame mode upo uzu kephoma la thüma hio mhüce de menu yita? 3 Jisu ukoce poti, thüma hio kephoma lari mo, mori ukrüne la rimo, vele püyo Jihova mhatho thipü mi mese mengo sü ketolazo. 4 A ketsü kesüo mhathoko I thisü moze su, tüso kebace; tüzü vori talize mipüri mhatho thimo tato. 5 I cejülü keba the, I cejü keveo zo. 6 Pü jü süko posü de mhütsapü cejü sü renyo pü nyoba thiyi, renyo pü mhüceo mhü kenhüsü. 7 Püce po kesü, tavo de Siloam zalü jüpü khrü vate, (Siloam, püco ketsü kesü). Pü ta vota, de jüpü khrüsü siri mhango vori ta. 8 Pü zanu miko mu sümhüjü pü kengo miko pümhü kece ngo; side uko kepoti, thüma hio umhü ce de mhakhrü ti kebao zomome? 9 Humi poti, püzole, kekre miko poti, pübizo tipüle, sizi bata. Vele pü po kesü, I püzole. 10 Süla uko püce poti, dipü bide nmhü mhango yita? 11 Pü ukofü kela kesü, Thümapü Jisu lezi tipü, nyoba khapü amhü kenhüsü, side ace poti, tavo Siloam zalü tavo khrü vate zisü. Side I tavo khrüva de mhango yi tele. 12 Süsa uko püce poti, pü dipüce vota? Mu pü po kesü, I se mole.

Pharisee miko theju ketso kega kesü

13 Uko umhü keceo tüzü Pharisee miko cevo. 14 Sünhasü Sabbath zho, Jisu renyopü nyoba thiyi de püpo mhango keyi nhasü. 15 Süsa Pharisee miko pü ketso de dipübi pü mhango ta sheri. Pü uko ce poti, Pü nyoba khipü amhü kenhüsü, I khrüva side mhango praritele. 16 Süla humi poti, Thüma hio Therümi mhatho mo, kekrelamori pü Sabbath tüsozho rhomo. Humi poti, kephomi dipübi de mhatho ungo thiyi veta? Thüma dolü kelakre de kebü ta. 17 Uko mhüceo ketso sala de poti, no dipüle pü lüba, nmhü thipü mhango kesüo? Pü po kesü, pü saju kepo mipü zo. 18 Vele Jews miko pü kepo melü muta, pümhü ce de mhangoyi, süla uko püpo püzuni cüsü. 19 Uko uni ketso de hiohi neni nu zome, neko poti pümhüce zode menuyi le kebao, dipü bide pü tsühi mhango pra rita? 20 Püpo püzuni ukofü kela de po kesü, Hani se keba hiohi hani nuzo, umhüce de menuyi. 21 Vele dipü colü pü mhangoyi teshi, hani semole, mori sopü pümhü khri sü sheri, hani süri semo; püsü pethite, pü ketsote: pütho püju posüto. 22 Jü hiko pükrüni posü, kekrelamori uni Jews miko mpe ketala; kekrelamori Jews miko metü sopüno püpü Khrista leno poto sheri synagogue lü pühu va keto uko medo keta seba ketala. 23 Süla pükrüni poti, pü pethite, pü ketsote sita. 24 Süla uko umhü cede mhango ketao cüsala sü, de püce poti, Jihova mezale püchu süte, hako püse keba thüma hio kephoma mizo. 25 Pü ukofü kela kesü, Pü kephomami me mosheri I semo, mhapü I seba süosü I thajü amhüceri tsühi I mhangote. 26 Uko pü ketso sala de poti, pü n yo kedipü thisüla? Dipü bide nmhüthipü mhango süta? 27 Pü ukofü kela kesü, I neko ce po süve, neko reni mute; dithito süo ketso sala ba? Nekori pü sajimi thita nyü bame? 28 Süsa uko pü kerhe de poti, No pü sajimite, vele hako Moses sajimiko. 29 Hako se keba Jihova Moses ce jüpo, thüma hiola zono hako semo pü dipüce vori sheri. 30 Thümao ukofü kelade ukoce po kesü, pü hicehi mha ungo thi kesü neko pü dipüce vori sheri semo zori, pü amhü thipü mhango süte. 31 Tsühi uko se keyi Jihova kephomami mipüri fü reni mo zolu, vele mhace humi Jihova reshü mu pü medo thiyo lize pü sümi fü reniyo. 32 Cejü thiyi culü vo tha ketso mipüri umhü cede menu keyimi thi meve kesü semo zolu. 33 Mhace thüma hio Jihova celü vorimo lize pü mhapüri thi yiho. 34 Uko püfü kela kesü, no kephomalü menuyi side hako metha tola? Uko pü hupü chozu süva. 35 Jisu pühu chozu sü keva seyi, tavo püngoyi de püce poti, “No Jihova Nu melü teme?” 36 Püfü kelakesü, “Niepoo püsopü sheri I pü melüyi ketola?” 37 Jisu püce po kesü, “No püngo bate, mu püzü kerethi kethao zo.” 38 Püpo kesü, “Niepoo I melüte.” Mu tatsü pü reshüta. 39 Jisu poti, I cejülü sheco la vori, mhakengo miko po ngomo ta ketola, mhango kemo mikopo mhangoyi ketola. 40 Pharisee miko jü süko se kesüce püce poti, hakori mhücemi thite me? 41 Jisu ukoce pokesü, neko mhüce lize kephoma baho, vele neko tsühi poti, “hako mhango ba,” süla ne kephoma bate.

John 10

Jisu teko kefü keveo

1 I nekoce potü süto, cekhalü talü teko krolü lü kemomi, vele sazho mele kelümi, süo keregomi mu mizhü süketimi zo. 2 Vele cekhalü kelü süo teko kefü-o zo. 3 Cekha kefüo cekha khripü pütsü süyo, teko kro püfü seyo; pü teko koza cü süyo; mu teko chotha zü ta voyo. 4 Pü koko züpra rize pü uko mhüjülü tara voyo, mu teko kro püsa meji tavoyo, kekrelamori uko püfü seyo tila. 5 Uko sekemomi sa meji yomo, vele pücelü tatayo, uko sekemo miko fü semo ketala. 6 Jüve hio Jisu ukoce posü, vele mhasüko pü kedipüla poba sheri uko semo. 7 Süla Jisu püsaji koce poti, I nekoce potü süto, I teko kro kharü yozo. 8 Amhüjü kevoriko metü keregomi mu süketi miko zo, vele teko kro uko fü reni mote. 9 I kharüo zo, kehopüri ayo kelümi, pü kelayi to; pü tapra talüde püco ngo yito. 10 Keregomi rego toli voriyo, mi dokhri tolino, mi meka sü tolino, vele I mipo kehü ngoyi ketola, mu süo ngo shuyi ketola. 11 I teko kefü keveo zo, teko kefü keveo püpho khapü teko kroko la kha süyo. 12 Vele püzho khrizü ketami, teko kroko püzhü kemola sace vori kezü ngo süde pü tata yo, sace vori de teko kro tüva mu hupho vayo. 13 Püzho khrizü ketao mipo püzho khripü ketala, teko kro khrü phi menu yomo. 14 I teko kefü keveo zo, akokro seba mu azhüko aseba. 15 Apo aseba, sübi I sheri a Po seba, apho khapü teko kro tsü süto. 16 Ako kekre kropü ba, süko teko kro hilü bamo, süko sheri züpü kro hilü vori moze su, süko afü seyito; side hiko zü kropü thi tato, teko kefü ri püzo tato. 17 Süla a Po aphi pünüyo, kekrelamori I apho khapü sü ketola, side I khila yito. 18 Mipüri süo acelü pü tata mo, atho kha kesü zo. Süo khasü keto akekuba, mu püsalayi keto sheri a keku ba. Hio thino khakesü jü a Po celü I ngoyi. 19 Jews miko dolü kelakreta jü hiko kepola. 20 Thüma kekro uko dolü poti, pü therü kesu zütale, pü nyote; neko dito püfü reni ba? 21 Kekreko poti, Jü hiko kepo therü kesu zü ketami jü mole, therükesu mimhü thipü mhangoyi veme? 22 Tüsü tüce, Jerusalem lü kereshüce thi kemesa ti thenye tülü. 23 Jisu Solomon cehükhro kereshüce lü taba. 24 Süsa Jews miko tavo pühu metuyi, de püce poti, dithepü no hakopo lüyi su bazota? Mhace no Khrista le zize hakoce po kemetse vate. 25 Jisu ukoce poti, I nekoce posüzo vele neko melü mute, mhatho kethiko I a Po zalü thi tazo; süko azhopo zo. 26 Vele neko melü mute, kekrelamori neko ateko kro mo tila, sizi I neko ceposüte. 27 Akoko afü seyo, I süko seba mu uko asameji yo. 28 I kechothe kerhüpü uko tsü süyo, uko mhapü ceri su taho, mori mipüri abelü süpü tataho. 29 Apo süko pü aketsüo metüko ceri zhoku, mu mipüri a Po belü süko süpü tata ho. 30 I mu a Po hani püzo. 31 Süsa Jews miko ketsüpü püva to züta. 32 Jisu ukoce poti, I apo celü mhakeve kekro thipü neko mekasü; mhatho sükola neko ketsüpü ava tome? 33 Jews miko püfü kelasü de poti, mhatho keve kola hako ketsüpü nva tomo; vele no Niepoo zhoshu tila; no thüma zori ntho npü Jihova thi ketala. 34 Jisu ukoce poti, nethezholü thopü kemeta, akepo “neko therü mizo.” 35 Mhace pü süko cüpü therümi le zi sütaze, Jihova celü vori keta ketholesi jü khipü mole zi va ho. 36 Apo ketsü kesüo, püthi kemesa sü de ketsüpü cejülü sü, size neko püpü Jihova zhoshu bale siziyi veme: I neko ce kepo I Jihova Nu zo zi kesü. 37 Mhace I a Po mhathoko thiyo mo tisa amelü hite. 38 Vele mhace I thiyo tisa neko amelü mota sheri mhathola melü yite, zize neko seyito mu melü yi tato; a Po alüta mu I pülü tazo. 39 Süla uko pütüyi tatole süta, vele pü uko belü therü tata. 40 Süsa pü ta John therace mipü jülopü kesü thethilü Jordan rükhüco cuvota de sülü bata 41 Thüma kekro ta püce vo de poti John ungo mhatho thi mo, vele John thüma hiola po pü kemeta metüko kethozo. 42 Thüma kekro sülü pü melüyi.

John 11

Lazarus sa keta

1 Thümapü püza Lazarus lezino mhathi bata, Bethany rünalü Mary mu püsazüpü Martha ni ra. 2 Mary tirü khapü Jisu kenhü kesüpü, pü pitha ri pü Jisu phezini shüsü, püprü-o Lazarus mhathi bata. 3 Süla pülipüni mi ketsüpü Jisu cesü, de poti, Hihe, no pükhrü ketao mhathi bate. 4 Jisu süo sekeyice poti, kethi hio sata ketola mo, vele Niepoo zapo zale kethila, Jihova Nu zapozale thiyi ketola. 5 Hitüce Jisu Martha, püjürapü mu Lazarus hiko khrü phi tayo. 6 Pü süse keyisa zho kena lüthü bata, pü keba thethilü. 7 Süsa pü sajiko cepoti, uko ta Judea lü sala kho tokhe. 8 Pü sajiko püce poti, Jews miko ketsüpü nva toli ba tila, Kemethao, no sülü sala kho tola? 9 Jisu ukoce poti, tüso kebace bavüdo kerikena ba mome? Thüma kehopüri tüso kebace chota lize püphe mesü vaho, kekrelamori pü cejülü keveo ngo kebala. 10 Vele kehopü sheri tüzülü ta lize, püphe meshü yito, kekrelamori keve püyo ta kemola. 11 Pü mha süko posü, süsalü pü ukoce poti, “Uko züo Lazarus zü bate, vele I tavo de pü kesümeco süto.” 12 Süsa püsajiko püce poti, “Pü züba lize uzho ba zotho.” 13 Sizo sheri Jisu püsü poba, vele uko kelüce pü zürelü keba lübata. 14 Süsa Jisu ukoce po metsü metsesü, “Lazarus sa tele.” 15 “I nekola anü tipü ba, I süce ba kemola; nekopo melü yive ketola: kehothi sheri uko ta püce vo khe.” 16 Süsa Thomas, cüpü Didymus (nube) lezi ketao püzükoce poti, “ukori tavo püzü sata khe.”

Jisu rhüla kesüo, mu kerhüroo zo.

17 Süsa Jisu tavori, pü khapü makhrelü khrü keva tüsozho da keta ngoyi. 18 Bethany hi Jerusalem zü kemecumo, furlong keripüngu lebi zo. 19 Jews miko kekro ta Mary mu Martha nice vori ba, uko tavo uni lü thomelu ketola, uni prüo lano. 20 Süsa Martha Jisu vori kezü sesü metha tavo püzü kesü, vele Mary püthilü bazo. 21 Süsa Martha Jisu cepode, mhace no hice ba lize, aprü-o sata ho vele. 22 Vele I sekeba, tsühi sheri no Jihova ce mhakehopü sheri chosü lize, Jihova khapü ntsü sü zoto. 23 Jisu püce poti, “Nprüo rhüla sürito.” 24 Martha püce posala sü, I sekeba pü thela nha rhü sala sürito. 25 Jisu püce po, I rhüla kesüo zo, mu kerhüro yozo; amelü ketami sata zori pü rhüla yito. 26 Kehopü sheri rhü kebalü amelü keyimi sata ho. No sü melü teme? 27 Thenopü püce poti, Ile, I melüte Niepoo, no Khrista zole, Jihova Nu, cejülü vori tole ketao zo. 28 Thenopü pokevasa ta pücholü vota, de vo pü sazüpü Mary cüsü, püce mekhrü de poti, Kemethao hice voribale mu ncü bale zisü.

Jisu krata

29 Thenopü süsesü metha rekri ta püce vo. 30 Hice Jisu rünalü vori molu, vele Martha püzü kesüti thethilü balu. 31 Jews miko thenopü zü pücelü kebako pülü thomelu ba, thenopü rekri tosü keta ngode püsa mejivo, uko kelüce thenopü tavo thekri thi toli zütho ziba. 32 Süsa Mary vo Jisu keba ngoyi de tatsü püphelü pü reshüta, de poti, Niepoo, mhace no hice ba lize aprüo sata ho vele. 33 Jisu thenopü kekra ngosü mu Jews mikori kra keta ngosü, pü rüpü melo bata, pülü kemezhe bata. 34 Pü poti, neko pü khapü dipüce mezü? Uko püce poti, Niepoo, tavori pete. 35 Jisu krata. 36 Süsa Jews miko poti, Hihe, pü didüpüri pükhrü sheri! 37 Humi poti, pü mimhü thimeve kesüo thüma hio pori samo tati thiyi ve mome?

Jisu Lazarus phü merhü kesü

38 Jisu pülü panyo de ta mhakhre cephe. Mhakhre süo kece cepü mu ketsü kezhopü khipü gü metha. 39 Jisu poti, Neko ketsüo püvate. Martha kesao lipü poti, pü sa mena tatole, Niepoo, kekrelamori pü sa keta zho date. 40 Jisu püce poti, I nce posü mome, mhace no melüyi lize no Jihova zapozale ngoto. 41 Süsa uko ketsüo püva, kesao khapü kemezülü. Jisu pümhü pü tüpede poti, Apo, no afü reni kebala nmeza. 42 No afü reni sü tayo keti I seba, vele thümako azü kethako la I hihi posü, no aketsü süzo keti ukopo seyi ketola. 43 Pü süko po kesüsa se de füphra meto shusü, “Lazarus, tasüri te.” 44 Sa ketao tasü rita, püphe pübe kesa füne khipü phapü süri; püzü sheri füpü kezhü meta. Jisu ukoce poti, “Püphrü süte, side püpo tavo tate.” 45 Süsa Jews miko kekro Mary vori kebako, mha süko Jisu thikesü ngo de pü melüyi.

Jisu dokhri va keto dorhü

46 Vele humi ta Pharisee koce vota, mu Jisu thikesüko pü ukoce posü. 47 Süsa thevo kezhoko mu Pharisee miko kenguyi de kerethita, de uko poti, Uko kedipü bita? Thüma hio mha ungo keti kekro thi süte. 48 Mhace uko pü khapü hizi zo ba ketosa, thüma metü pü melü tato; mu Roman miko tavori de uko thethi mu urüna sheri püyi tate. 49 Mipü püza Caiphas lezitio, tütse sülü thevo kezhoo thiba; püpoti, Neko mhapüri semo. 50 Mori ukola moze kesu lüri yomo, mipüpo thümakola sa keta mesü, size shuye metü katamo ketola. 51 Jü hio kepo pütho zomo, vele tütse hilü pü thevo kezhoo thiba tila, pü saju kepo Jisu po shuyela sa keta mesü ziba. 52 Shuye süo lebi lamo, vele Jihova nuneko hupre kevako züvo kenguyi ketola risa. 53 Süla sünha yowino pü dokhri va keto rhü tata. 54 Jisu süla melemelu Jewsmi dolü ta mota, vele rezü rüna mi kedira vota, rünapü Ephraim lü vota. Mu sülü püsajiko zü bata. 55 Jewsmi cukevo nye meno bata, thüma kekro uthi kemesa ketola ta Jerusalem lü voba. 56 Süla uko Jisu phu bata, uko dolü kepoti, kereshücelü kebace, “Pü thenyelü vori mota lize neko dipü biti lüba”? 57 Thevo kezhoko mu Pharisee miko jü khakesü, mhace humi pü dipüce ba sheri se lize po kemese süte, pütüyi ketola.

John 12

Mary tirü pü Jisu kenhü kesü

1 Cukevo nye mhüjü zho shurü kebalü Jisu ta Bethany lü kho, Lazarus celü, püthi merhü kesüo. 2 Uko theva-o pümesoyi de püpo mhatiyi, Martha rena püreyisü, vele Lazarus uko dolü mipü püzü miz yo mhati ba. 3 Mary tirü püma kerü (spikenard) pound pü lapü Jisu phezi kenhüsü de püpitha pü süva; mharü kethenyü süo celü metü chu bata. 4 Süsa püsajiko dolü mipü Judas Iscariot, Simon nu hisa pü tüsü ketoo poti, 5 Tirü kenhü ketio zhupü pence kra kena khriyi mano, de khapü kedimiko tsüsü mano? 6 Hio kepo, pü kedimi kekhrü lamo, vele pü keregomi tila, pü presa lekho khiyo, mu presa rego tayo tila. 7 Süla Jisu poti, “Thenopü kebü hite, pü akekhrüne kesü kesüla zo. 8 Kekrelamori neko kedimi züta süto, vele neko azü ta süho.”

Lazarus dokhri vaketo mharhü thiketa.

9 Jews miko kekro tavori, pü süce kebala, Jisu lebi la zo mori, Lazarus sheri pe ketola Jisu pü sa ketalü phü merhü kesüla. 10 Vele thevo kezhoko mharhü Lazarus sheri mesa va keto rhüta. 11 Kekrelamori püla Jews miko kekro sheri ta ketala, mu Jisu melüta.

Jisu melemelu ta Jerusalem lü kelü

12 Süsanha thüma kekro ta thenyelü vori, uko Jisu ta Jerusalem lü lü kezü sekeyice. 13 Uko revüniko thüpü mu sü kemejo coko rhopü, de püzü kesüto vori; uko se rekrü de Hosanna, Thejo kepütho Israelmi kedeo, Niepoo zalü vori kezüo. 14 Jisu gadanu püyo bayi, thopü kemeta bide. 15 Mpe hite, Zion nupü, Hihe nkedeo gadanu (tholi) püyo vori züho. 16 Mhahiko methakeyiko therace se bamo, vele Jisu zapozale thi kevasa uko sa lü vorita, hiko metü püju thopü meta tila, uko mhatho hiko thipü püyo sü. 17 Thüma püzü ketako mha hiko Lazarus mhakhrelü phü merhü kesü ngo mu seba. 18 Pü mha hiko ungo mhatho thi kesüla thümako tavo püpe toli vori. 19 Pharisee miko uko dolü kepoti, neko mhapüri thiyi mo keta lü bame? Hihe, cejü metü püsa meji tazü.

Greek mihu Jisu penyü keta

20 Thenyelü vori de reshü thi ketoko humi Greekmi. 21 Thüma süko ta Bethsaidalü Philip cevori, Galilee lü, püce poti hako Jisu penyü tale. 22 Philip tavo Andrew ce posü, süsa Andrew mu Philip ni kezüvo Jisu ce posü. 23 Jisu unice pokesü, pütü (bavüdo) vori bate, thüma Nuo zapozale thita keto sü. 24 I nekoce potü süto, teha retu cejü tsü de sata kemosa süo pü lebi ba tayo, vele süo mhace sata süze püse kekro zhüyi yo. 25 Somino pü kerhüro khrüta sheri katato, mu sopüno cejü hilü pü kerhüro khrümo (ngometsü) tato sheri kechothe kehü ngoyito. 26 Mhace humi achoyi thiyo lize, püpo asa meji yite; I dipüce ba sheri püpo sülü ba yito: mhace humi achoyi thiyo lize a Po pü rho süto. 27 Tsühi alü kemezhe bate, I dipü pota? Apo pütü hilü akela süte, vele püco hiola I pütü hilü vori. 28 Apo, nzapo zapozale thi yite. Süsa tülü füphrapü kiri, poti, I zapozale thi süzo mu thisa süto. 29 Thümako süce kebako süo sesü, de poti, tüsü süle; kekreko poti, tüyo choyipü püce jü posüle. 30 Jisu ukofü kela kesü, Füphra hio Alamo, vele nekola. 31 Tsühi cejüo neketi bate, hisa cejülü kekha keba kezhoo hu vato. 32 I cejülü tasü ketasa thüma metü tüsüpü aceco vori tato. 33 Pü kepo hio pü düpü sü thito sheri süo poba. 34 Thümako püfü kela kesü, Hako thezholü thopü kemeta sekeba Messiah kechothe ba sütole ziba; no dipüla thüma Nuo tasü tatole siziba? Thüma Nuo sü sopüta? 35 Jisu ukoce poti, pütü dopü keve neko zübato. Keve kebace neko kevelü tayite, sizi moze kezüo nekoce vori tato; kekrelamori kezülü ketami pü dipüce vozü sheri seyomo. (Thümako melütho keta). 36 Keve nekoce kebace neko keve melü yite, sizino keveo nuneko thi yite. Jisu jü hiko po kesüsa pü tavo mi kedira vota. 37 Vele pü mha kekro ungo mhathoko thisü zori uko pü melü muta. 38 Hihi thajü Isaiah saju kepoo popü kemeta thitsü sü ketola zo, “Niepoo sopü hafü melüyi ta, Niepoo bechopü somi yo sü?” 39 Side uko pü melü mota, kekrelamori Isaiah posa kesü; 40 Pü uko mhü thi mece ve, uko melü sheri thipü (revo) daduve; side ukopo ngomo ketola, mu uko melüpo mhalüyi mo ketola: uko thelü redeyi de sürhoyi ketolü. 41 Isaiah hiko po kesü püzapozale kethi ngotila mu püju posü. 42 Sizosheri mikekha keta kezhomi kekro sheri pü melüyi, vele Pharisee miko la phra mese zomo, kekrelamori uko synagogue kolü hupü chozu süva ketola. 43 Kekrelamori uko Therüopo uko chu keti ceri thümapo uko chuti menyüku tila.

Jisu kemetha jüko

44 Jisu semeto de poti, “amelü keyimi, amelü mori aketsü kesüo melü yi.” 45 Akengomi aketsü kesüo ngo sütazo. 46 I cejülü keveo thi vori, somi amelüyi sheri kezülü bati mesü mote. 47 Humi mhace ajüko sede melü mota lize, I pü mejomo, kekrelamori I cejüo mejo tole vorimo; vele cejüo kelayi ketola vori. 48 Pü amela kevao ajüko yimute, mipü pü mejo tato, I jüpo kesü jü süo thela nha pü mejo tato. 49 Kekrelamori akepoko atho amedo lamo, vele a Po aketsü kesüo, pü khapü atsü kesü, I po kesü mesüleno. 50 I sekeba pü khakesü jüko kechothe kerhü zo, I kehopü posü zori a Po acepo kesüko la I pü po sü.

John 13

Jisu metha keyiko phe khrü keti

1 Cukevo nye mhüjüce Jisu cejülü tata keto pütü tsoba keta seba tila cejülü pümako khrü zovo thela tsozo. 2 Uko theva mhaco ti keyisalü therükesu ta Iscariot Judas, Simon nu lü lüta, pü tüsü ketola. 3 Jisu pü Po mhametü khapü pümelü sü keta seba, pü Jihova celü vori zo, mu Jihova celü vota keto sheri. 4 Pü mhati keyisa tasü de püfüneko khipü kerüva, (towel) fünepü khiyi, mu püche phayi. 5 Jü rüpü büfü pülü süyi, de püsajiko phe khrü shüdü, fünheo pü uko phe shü meso sü pü püche phapü kebao. 6 Side pü ta Simon Peter ce pheri, ri Peter püce poti, Niepoo no aphe khrü tola? 7 Jisu püce pokesü, I dipü thiba sheri neko tsühi seyiho, vele no hisa seyito. 8 Peter po kesü, npo mhapü ceri aphezi khrü hole. Jisu püce posala kesü, mhace I nphe khrümo lize no ala mote (azü ta mote). 9 Simon Peter poti, Niepoo aphe lebi mori, abe mu api sheri khrü vate. 10 Jisu püce po kesü, Jürelo pü ketami sizi mori ve püphe lebisa, püpho metüko mesa bazo; mu no mesaba vele neko metüko mo. 11 Kekrelamori sopü pütüsü to sheri se kebala, sülü püpoti, neko metü mesa tsomo. 12 Süla pü uko phe khrü kevasa, pü füneko khisalayi de bayi, pü ukoce poti, neko seyi tetho I nekoyo dipü thisü sheri. 13 Neko acüpü Kemethao mu Niepoo siziyo; süsü potü süzo I süozo tila. 14 Mhace I neko kemethao mu Niepoo zori neko phe khrüyo lize, neko sheri hunehu phe khrü zü zo. 15 I mhathopü thapü neko meka kesüla neko sheri I thi kesü bide thiyi züzo. 16 I nekoce potü süto mithekümi pü niepoo ce zhoku tamo, mori ketsü kesüo mi pü ketsü kesüo ce zhoku mo. 17 Mhace neko süo seyi lize nenü yite, nekola keve zoho. 18 I neko metü pobamo, I pü kedakeyio poba tizo; vele ketholesi po tsoyi ketola, pü azü tsükhri ketio püphekapü amesü: siti kepo. 19 Tsühi nekoce posüte, süko thi vori keta mhüjü, nekopo I süo le ziti melüyi ketola. 20 I nekoce potü süto, kehopüri I ketsü kesüo zü keyimi, azüyizo; mu azü keyimi aketsü kesüo ri züyizo. 21 Jisu mhahiko po kesüsa pürüpülü kemezhe vorita, mu posa kesü, I nekoce potü süto, neko dolü mipü atü süto. 22 Süsa methakeyiko hunehu pe de sopü poba sheri ulü tsakhu bata. 23 Püsajiko mipü süce pükhoro mengu püba, Jisu khrü kebao. 24 Simon Peter püketso de sopü po ba sheri pübe chopü jüpoba. 25 Jisu khoro mengupü kebao püce poti, Niepoo, süo sopüta? 26 Jisu püfü kela kesü, I tsükhri pü jülü sü kesüsa süo khapü tsü kesüo toho. Süosalü pü tsükhri pü jülü süsü (metsüsü) de khapü Iscariot Judas tsüsü, Simon nu. 27 Pü tsükhri metsü kesüo ti keyisa Satan pü melülü lüta. Süsa Jisu püce poti, “No thiketha-o thimha süte.” 28 Hicehi miz khüce kebako mipüri pü dipü cola sizi püce poba sheri se bamo. 29 Kekrelamori humi lüti, Judas no presabü khita tila Jisu püpo thenyela mhakhriyi nosütho siziba, side kedimikola mha khapü tsüsü keto latho ziziba. 30 Pü tsükhripü jüsü kesüo ti keyisa tarekri ceta vota, süce tüzü ta.

Thezho kesa kha kesü

31 Pü taketa salü Jisu ukoce poti, Tsüsa thema Nuo zapo zale thitato, mu Jihova püyo zapozale thi tato. 32 Mhace Jihova püyo zapozale thiyi ta lize, Jihova sheri zapozale thiyi tato, side zapozale sü thiyi to. 33 Natsiko, pütü dopü I neko zü bati zo tato. Neko aphuto, I Jews mikoce po kesübi, I dopüce vota to sheri neko sülü vori yiho, süla I nekoce tsühi poba. 34 I jükesapü khapü neko tsüsü tolizü, Neko hunehu khrüyite; I neko khrü vori tibi, neko sheri hunehu khrü yi züzo. 35 Sizi keyilü thümako neko asajimi leti seyito, mhace neko hunehu khrüyi lize.

Peter Jisu phramu ta keto Jisu mejü pokesü

36 Simon Peter püketso de poti, Niepoo no dipüce vota tola? Jisu püfü kela kesü, I dipüce voto sheri neko asalü vori yiho, tsücehi. Vele hisaco asa meji vorito. 37 Peter püce posala kesü, Niepoo dipüla I nsa meji yihole zita? I apho sheri nla khasü zoto. 38 Jisu püfü kela kesü, no ala npho khasü tola? I nce potü süto, thevü kekhu mhüjü no vasü aphramo tato.

John 14

Jisu cho kethoo zo Poo celü kevo

1 Nlü kemezhe tasu, neko Jihova melü bayi, mu amelüri bayite. 2 Apo celü thüma ba baphi, mhace sizimo süze I nekoce posüva tevele, I tavo theba kesü pü neko füba tato. 3 Mhace I tavo nekola theba kesüyi ta lize, I sala tavori to; side neko zü akeba thethilü vori tato: akeba thethilü neko sheri bayi ketola. 4 I vota keto neko seba mu choo sheri neko se bate. 5 Thomas püce poti, Niepoo hako nekevo choo semole, dipübi hako cho süo seyita? 6 Jisu poti, I cho-ozo, kethoo mu kerhüo zo; mipüri Poo celü vo keyi bamo vele ayo lebi. 7 Mhace neko ase ba tisa neko a Po sheri se batato, tha yowi neko Poo se bate mu püngori süte. 8 Philip püce poti, Niepoo Poo sü pü hako mhüngo thi süte size hakola tso tato. 9 Jisu püce poti, Philip neko azü pütü kecho vorite, siziri, neko ase mo zola? A ngo kevami Poo sheri ngo vazo, süla dipüla neko Poo khipü hako mhüngo thi süte zibata? 10 Neko I Poo lüba mu Poo alü ba siti neko semo zo me? I jüpo kesüko atho ala jüpo sü mozo, vele Poo alü ba de mhathoko thi tazo. 11 I a Poo celü ba ti melüyite, mu Poo alü bati sheri, mo sheri mhathoko la sheri amelü yite. 12 I nekoce potü süto, amelü keyimi amhatho kethiko pü sheri thiyi to, mu mhatho süko ceri zhokuti thi yito; kekrelamori I a Po celü vota tokezüla. 13 Neko azalü mhakehopü cho zori I süko thipü tsü süto, sizi keyilü Nu-ola Poo zale thiyito. 14 Mhace neko azalü mhacho lize, I süko thipü neko tsü süto.

Kemesa Rüpü khasü keto reshujü

15 Mhace neko akhrü yo lize, I jü khapü neko ketsüko thi mu züyite. 16 I Poo ce mhacho süto, mu pü thelü thokemelu khapü neko tsü süto, side pü neko zü kechothe ba tato. 17 Ketho Rüpü, cejüo süo ngoyi keho, kekrelamori püse püngo kemola; vele neko püse bate, pü neko zü kebala, mu neko zü tasü tato. 18 I neko khapü thelü thokemelu kedi thi vaho, I nekoce vorito. 19 Vele pütü dopü cejüo ango motato, vele neko angoto; kekrelamori I rhüta zo tila, neko sheri rhüta zoto. 20 Sünha neko I a Po zü keta seyito, neko alü ba mu I neko lü kebala. 21 Sopüno akepoko kha püta mu züyi sheri pü akhrüta; pü akhrü ketao sü a Po sheri khrü tazo: I sheri pü khrüto, mu I akhapü pü mese mengo süto. 22 Judas (Iscariot kemoo), poti, Niepoo no dipü bide pü hako mese mengo süto vele cejüo mese mengo süho-ena? 23 Jisu püfü kelakesü, mhace thümao akhrü süze ajüko khipü bato, size a Po pü khrüto süsa a Po hani püce vorito, mu pülü hani ba tato. 24 Pü akhrü kemoo ajüko pü baho, neko ajü kepo keseko atho ajü mozo, vele a Po aketsü kesüo jüko zo. 25 I jü hiko kepo neko se bate, tsühi I neko zü kebalü. 26 Vele thelü thokemelu süosü Kemesa Rüpü, a Po azalü ketsüpü neko ce süto, pü mha metü pü neko metha süto; mu nekopo mha metü neko salü la vorito, I neko ce po kesü metüko. 27 Thelü thsi zi tipü khapü neko tsü süto, alü thelü kemenüpü neko tsü süto; cejüo khapü mi ketsü biho, I khapü neko ketsüno. Neko lü keho kerü thi tasu, mori mpe ri tahi. 28 Neko tsühi I nekoce kepoko se bate, I ta tato, nekoce sala vorito. Mhace neko a khrüyo lize, neko rechü yite, kekrelamori I a Po celü vota to kezüla; kekrelamori a Po ace zhoku. 29 Mha süko thi vori keta mhüjü I nekoce posüve, mha süko thi vori taze neko süko seyi mu melüyi ketola. 30 Hisalü I neko zü mhakepo phizo hote, cejülü kezho miko ta vori tazü mu ala mhapüri bamo te. 31 Vele cejüo po I a Po khrü keta seyi ketola, apo thi ketopü a Po khapü atsüsü, sübide I thi süte, Khe, uko tasü takhe, de ta vo tato.

John 15

Jisu khubübo kethoo zo

1 I khubübo botho-o zo, mu a PO-o kefü-o zo. 2 Kehopüri ayo use zhüyi kemomi rhodü vato, uco kehopüri use zhü keyimi pü ketso süyo side püpo use zhü shuyi ketola. 3 Neko tsüce mesa bate I nekoce jüpo kesü jükola. 4 Ayo bayi mu apo nekoyo bayi. Süco pütho zono püse zhüyi yomo püboyo ba kemosa sübi, neko ayo bakemosa nese zhü yiho. 5 I khubübo botho-o zo, neko pücoko, Pü ayo kebami mu apo püyo kebami püse zhüphi yito; kekrelamori neko asamode mhapüri thiyi hozo tila. 6 Mhace thümapü ayo bamo lize, süco dathü kevao revi tayo tibi tato; side mipo püpü methü vayo, püto medi vato. 7 Mhace neko ayo bayi mu ajüko neko lü bayi lize, neko mha nenüko choyite; süko thipü neko tsü süto. 8 Hibi tilü a Popo zale thiyi to, neko se zhüshuyito, sizi de neko asajimi thi yito. 9 Apo akhrü keta bi I sheri neko khrütayo, neko akekhrülü tayite. 10 Mhace neko I nekoce khakesü jüko thiyi lize, neko akekhrülü bayito; I sheri a Po jü khapü aketsüko zü tayo tibi, mu pü kekhrülü bayo. 11 I hiko popü nekoce kesü akenüpo nekoyo bayi ketola, side neko kenü thitsosü ketola. 12 Nekopo thino kesü thezho I khapü neko ketsü süo neko hunehu khrüyite, I neko khrü kevori bi. 13 Kekhrü hioce kezho püridi, thümapü ukehü khapü püzüko tsükesü. 14 Neko akhrethoko, mhace neko akepoko thi mu züyi lize. 15 Thayovi I neko cüpü thekümi lezi hote, kekrelamori mithekümi niepomi kedipü thiyo sheri seyomo; vele I neko cüpü khrethoko sizito: kekrelamori I a Po celü sekeyiko khapü neko mese mengo süketala. 16 Neko akedayimo, vele I neko kedayi; neko thi mekrepü nekopo nese zhüyi ketola, side neko sepo bayi ketola: neko azalü Poo ce mhakehopü cho sheri pü thipü neko tsü süto. 17 Mhahiko I nekopo thino kesüko, neko hunehu khrü yite. 18 Mhace cejüo neko meshu ta lize, himhüjü ameshu mera süte mu neko sheri meshu zoto. 19 Mhace neko cejüo thüma lize, cejüo püthümako khrüte vele neko cejüo kemola, I cejülü neko keda yite; süla cejüo neko metsü tato. 20 I nekoce kepoko rükra yite, mithekümi niepomi ce zhoku tamo. Mhace uko amethi lize neko sheri methi zoto tila; mhace uko akepoko seyi lize neko kepoko sheri seyi zoto. 21 Vele uko azalano mha hiko thipü nekoyo sü zoto, kekrelamori uko aketsü kesüo se kemola. 22 Mhace I ukoce posü molize uko kejo baho, vele tsüsa uko kejokeva basa mote. 23 Pü ango metsü ketao a Po sheri ngo metsü tazo. 24 Mhace mipüri thiyo kemoko I thisü molize, uko kephoma bamo; vele uko tsücehi ngo süte mu uko a Po hani kenani ngo metsüte. 25 Vele thajü ketho lesi thezholü thopü kemetako tsüyi ketola uko ango metsüte, kemechülü, mhapüri mozo sheri. 26 Vele thelü thokemelu vorito, I a Po celü chopü neko tsü süto; ketho Rüpü, a Po celü vorito, pü azhopo thisüto. 27 Mu neko sheri azhopo thito, kekrelamori neko theralü azü tazo tila.

John 16

1 I hiko popü nekoce kesü nekopo ayo jo tamo ketola. 2 Uko synagogue cekolü neko hu vato, Ile, humi neko dokhri tisü Jihova choyi thi bale lüto. 3 Mu uko mha siziti nekoyo thi süto, kekrelamori uko a Po ri mu ari semo tila. 4 Vele I mejümera nekoce posüve, siziti vori keto, süce neko nesa lüyi to, sizi keto ukoju pü I nekoce po kesüko. I Theralü neko zü ketace po süte. 5 Vele I ta a Po aketsü kesüo ce votato, vele neko mipüri aketsomo, “no dipüce votata”? 6 Vele I mha hiko pü nekoce pokesüla, neko lü su bate.

Kemesa Rüpü mhatho ju

7 Sizizo sheri I nekoce ketho posüto, I ta keta nekola kevezo, kekrelamori I tata molize, thelü tho kemelu voriho; vele I mhace tata süze I pü ketsüpü nekoce süto. 8 Pü vori tisa cejü kephoma mejo süto, kemezi mu sheco po süto. 9 Kephoma kekrelamori a melümo ketala. 10 Kemezi, kekrelamori I ta a Po celü votato kezüla, neko ango samo tato. 11 Sheco, kemejo, kekrelamori cejülü kedeko mejopü mezüte. 12 I mhakekro nekoce posü ketoba, vele neko süko tsühi seyi ho. 13 Kehothi sheri ketho Rüpü kevorice pü neko cho thapü kethokolü süto; pütho püju po taho, vele pü keseko pü po süto, mu vori ketoko pü nekoce po süto. 14 Pü apo pü zapozale thi süto, kekrelamori pü acelü ngo keyila, süko khapü neko mese mengo süto. 15 Apo celü mhakeba metüko azhüzo, süla I nekoce kepo, pü azhü khipü neko mengo süto.

Lüsu pü kenü thi keva

16 Dopü neko angomo tato, süsa pütü dopü neko angoto, kekrelamori I a Po celü vota tozü tila. 17 Süsa pü sajiko hunehu ketso de dopü neko angomo tato, süsa pütü dopü neko angoto, I a Po celü vota to zü tila, süsü dipü po bata? 18 Süsa uko poti, Pü kepo pütü dopü sizi tisü dipü po bata? 19 Hice, Jisu uko kelü se keyi uko pü ketsonyü ba keta, neko “pütü dopü” süo ketso nyü bame, neko dopü angomo ta ketosü, mu dopü ango sala to, siti? 20 I nekoce potü süto, neko krato mu neko lü shü tato, vele cejüo unü phito, neko thelü shüshu tato, vele neko lü keshü süo kenuco neko nüshu de rechü tato. 21 Thenomi nukemenulü ulü kemezhe bayo, pütü vori ketala; vele pünu menu kevasa pü mezheko rekra motayo, kekrelamori thepu mipü menupü cejülü sü ketala. 22 Neko süla tsücehi nekolü su bate, vele I neko zü kengo sala to, neko melü nelü nenü phi tato, mu kenü süo mipüri necelü süpü tata ho. 23 Sünha neko mhapüri aketso sa hote. I nekoce potü süto, neko mha kehopüri azalü cho süze a Po süo khapü neko tsü zoto. 24 Tsüketso neko azalü mhapüri chomo zolu, chote, khapü neko tsü süto, side nepo nenüko thitsüyi ketola.

Sajiko thelü kelu

25 Mha hiko I jüvelü nekoce po süte, vele pütüpü vorito süce I jüvelü nekoce pomo tato, vele a Po khapü mhotsu neko mengo süto. 26 Sünha neko azalü mhachoto, I a Poce nekola mhacho süto siziti I nekoce posü mome. 27 Kekrelamori a Po akhrü yo, neko akhrü tila mu I a Po celü vorizo ti melü ketala. 28 I a Po celü vorizo, I cejülü vori; mu I cejüo khava tatato, side ta a Po ce votato. 29 Pü sajiko pü ketso, Hihe, no tsühi jüpo mesa mesho süte, jüvelü po mori. 30 Tsühi hako nkepoko se mesa mesho bate, mipüri nketso mori vete, No Jihova celü vori zo ti hako melü bate. 31 Jisu uko ketsode, Neko melü teme? 32 Hihe, pütüpü vori zü, mu tsühi vori tso bate, neko huphrüpü pre tato, utho ucelü votato, side alebi batato. Sizi sheri alebi bamo, kekrelamori a Po azü kebala. 33 Mhahiko I nekoce kepo nekopo ayo nelü menü ba ketola. Cejülü neko kemezhe zoto, vele neko nezü vekrü yite; I cejüo pi kuyi ketala.

John 17

Jisu pü sajiko la cho kesü

1 Jisu jü hiko po kevasa, pümhüpü tü pede poti, Apo pütü sü vori tso bate, n Nupü zapozale thi süte, n Nu sheri npü zapozale thisü ketola. 2 No keku pü pütsüsü uthiupho metükopi, kechothe kerhüpü no khatsü kesü metüko yo. 3 Hihi kechothe kehü, No Therü kethoo zo mu Jisu Khrista no ketsü kesüo zole ti seyi keto. 4 I cejülü npü zapozale thi süho, I mhathoko thitso süte, no apo thino kha kesüko. 5 Tsühi, O a Po, cejü thi keyi mhüjü no athipü zapo zale thi kesübi, apü zapozale thi süte. I nza phrapü cejülü no thüma khapü aketsüko mhüjülü süte, mu uko njü züyite. 6 Cejülü thümako no khipü aketsüko ce I nza thipü mengo süte, süko nzhüzo no khapü aketsüko, mu uko njü zü yiteho. 7 Tsühi uko seyi keta no khapü aketsüko nzhü zoleti seyite. 8 Kekrelamori njüko no khapü atsü kesüko pü uko tsü süte, uko süko khiyite, I ncelü vorizoleti se bate, mu no aketsü kesü uko melü yite. 9 I ukola kecho thi süte, cejüola kecho thimo, vele no khapü atsü kesükola, süko nzhüzo. 10 Azhü metüko nzhüzo. Mu nzhü metüko azhüzo, I sükolü zapozale thi süte. 11 Tsühi I cejüolü zhü mote, vele hiko cejüolü balu, I nce vori tato. Kemesa Poo, no uko yoyite, nzalü, no khapü aketsüko, ukopo pü thiyite, avu kezü pü kethibi. 12 I cejülü uko zü kebace, nzalü I uko yopüba; mipü sheri medi vamo, vele kekri keta nuo lebi: jüopo tsüyi ketola. 13 Tsüsa I ta nce vori tato, mhahiko I cejüo ce posüve, ukopo ayo uko kenü tsüyi ketola. 14 I njüko khapü tsü süte, cejüo uko phi metsüte, kekrelamori uko cejüo mo tila, I sheri cejüo mo ketibi. 15 Npo cejülü uko züyi tate sizi I chomo, vele mhakesulü npo uko yoyi te ziti. 16 Uko cejüo mote, I sheri cejüo kemobi. 17 Uko thi kemesa yite, nketho-o yono, njü kethozo. 18 No aketsüpü cejülü kesü bi, I sheri uko ketsüpü cejülü süzüho. 19 Ukola I athi kemesa tayo, siziti ukopo sheri nketholü uthi kemesa ta ketola. 20 Akecho hiko lebi la mori, vele uko jükolü melü vori ketoko la sheri. 21 Sizide uko metü kezü püthi yi ve ketola, no a Po alüba mu I nlüba, sübi ukopo sheri uvuyo püthiyi ketola; side cejüopo no aketsü süzo ti seyi ketola. 22 No zapozale khapü atsü kesüko, I khapü uko tsü süte, sizide ukopo avu pü kethibi uko pori pü thiyi ketola. 23 I ukolüba, no alüba, side ukopo kezü püthi meveshuyi ketola, side cejüopo no aketsü kesü seyi ketola, mu no uko khrü tazo, no akekhrü bi. 24 Apo, no khapü aketsükopo akebalü bayi ketola, side ukopo azapozale ngo, no pü aketsü, kekrelamori cejü thikeyi mhüjü no akhrü keta la. 25 O Kemezi Po, cejüo nsemo, vele I nseba, mu hiko no aketsü kesü se bate. 26 I nza pü hala mese süte, mu posü zoto, kekhrü no kha aketsü pori ukoyo bayi ketola, I sheri ukolü bayi ketola.

John 18

Jisu pü zhu keva mu pütü keyi

1 Jisu jü hiko po kesüsalü püsajiko züde rütsi Kidron lü tizhepülü lüta mu pü sajiko sheri. 2 Judas, pütü kesüo sheri thethi süo seba, kekrelamori Jisu tsükenu püsajiko zü sülü voyo tila. 3 Judas sübide thüma kropü, kezho miko, thevo kezhoko, mu Pharisee miko züyi, de metobü, metosü, mu rineko khi vori. 4 Jisu mha süko metü püyo thisü keto seba tila, ta ukoce vode neko sopü phuzü? zisü. 5 Uko püfü kela kesü, hako Nazarethmi Jisu phu züle. Jisu ukoce poti, I thüma süo le zisü. Judas pütü kesüo ri süce tha uko züde. 6 I thüma süo le zisü metha uko tsüsata, de retu cejü tsüta. 7 Süsa pü uko ketsode, Neko sopü phu züla? Uko posala kesü, Jisu Nazarethmi phu züle. 8 Jisu posalasü, I nekoce posü mome, I thüma süo zole, mhace neko aphu ta lize neko atü yite. 9 Popü kemetako thitso sü ketola, pü po kesü, uko no khapü aketsüko I mipü sheri medi vamo. 10 Simon Peter süsa zecho khipü thevo kezhoo cetao ni metava, uzaco ni. Thekü süo za Malchus. 11 Süsa Jisu Peter cepoti, Zecho khapü pübülü süvate, a Po tehepü aketsü I krazü mome

Jisu thevo kezhoo mhüjülü kevo

12 Süsa kro süo kefüo, Jewsmi kezhoko, Jisu tüpü phayita. 13 Uko pü tüpü Anna, Caiphas ni celü vota, pü tütse sülü thevo kezhoo thi kebala. 14 Caiphas no hitülü Jews miko zü kerethi tilü poti, mipüpo thüma kola sava mo keshü posü. 15 Simon Peter püsa mejivo, mu methakeyi kekreko ri, thevo kezhoo metha keyio seba pü Jisu zü thevo kezhoo celü vo. 16 Vele Peter chozuco cekhace tha. Pü sajiko thevo kezhoo sekeba la tapra thenopü cekha fü kebao ce Peter zü celü lüri.

Peter Jisu phramu keta

17 Süsa thenopü cekha fü kethao Peter ce “No sheri püsajimi püzo mome? Pü poti, I no mole.” 18 Choyi miko mu kezhoko süce tha, megikrapü methi mevü kebala; tüsülü uko me megu kebala: mu Peter uko dolü tha, pü sheri me megu ba. 19 Thevo kezhoo Jisu ce pü sajiko ketso ba, mu pü kemetha jüko. 20 Jisu püfü kelakesü, I cejüo ce mhotsu posüzo, I synagogue kolü methasü, kereshüce kolü, sükolü Jews miko vori bazo, mu I kemekhrülü mhapomo. 21 No dipüla aketsoba, afü keseko ketsote, I ukoce dipü posü sheri; Hihe, uko akepoko seba tila. 22 Pü jüpo kesü salü kezhoko mipü beziphrepü püvü, no sübi de thevo kezhoo ce jüpo tome? 23 Jisu püfü kelakesü, I mhapo kekri süze no kesü zhopo thisüri ve, vele mhace sizi mo lize no dipüla avüba? 24 Hisalü Anna pütüphapü thevo kezho Caiphas ce süva. 25 Simon Peter süce tha de me meguba. Süla uko püce poti, No sheri püsajiko mipü zo mome? Pü süo kela kesü, I mole. 26 Thevo kezho theküo, Peter zechopü püni zathü kevao, pücekromi tila, Peter ce poti, tizhelü no püzü keta I nngo mome? 27 Süsari Peter püse mole pota, sizisü metha thevü füta. Jisu zü Pilate-e mhüjülü kevo 28 Süsa Caiphas celü Jisu zü thene keticelü vota, süce keshu renazo tila uko sheco celü lü molu; molize ce süo thimerhova ketola; vele uko cukevo nye mhati to kebala. 29 Pilate-e chozu prari ukoce, de poti, neko kedipü pü thüma hio mejoba? 30 Uko püfü kela de po kesü, mhace thüma hio thüma kesumi mo tisa hako püzü nce voriho. 31 Süsa Pilate-e ukoce poti, neko püzüvo neko zholü püshe ketite. Jews miko püce poti, hako zholü mi dokhri keti bamo. 32 Jisu popü kemeta thitsoyi ketola, pükepo, pü dipü sü thito sheri po meta tila. 33 Süsa Pilate-e ta sala sheco balü lü, Jisu cüsü, de püce poti, no Jews miko kedeo me? 34 Jisu püfü kela kesü, süsü ntho nkepo zome, mori kekremiko aju nce kepo me? 35 Pilate-e püfü kela kesü, I Jews mipüme? Nshuye mu thevo kezhoko, nzü ace vori, no dipü thi süta? 36 Jisu pola kesü, A kede kethino cejü hilü mo; mhace cejü hilü zhü lize asajiko mizü kezheto, atüpü Jews miko belü sümo ketola: vele tsühi, akede hice zhümo. 37 Pilate-e püce poti, süsa No kedemi me? Jisu poti, No apü kedemi le zisüte. Thüla hiola amenu vori, püco hiola I cejülü vori; apo ketho zhopo thisü ketola. Kehopüri ketholü ketami afü reniyo. 38 Pilate-e püce poti, Ketho sü dipü? Pü süo po kevasa ta Jews miko ce ceta prata, de ukoce poti, I püyo mha kesu püri ngo yimo. 39 Vele neko thezho püba, neko cukevo nyelü mipü kela süyo, apo Jews miko kedeo kelasü va toma? 40 Uko metü serekrü de poti, thüma hio mo vele Barabbas te. Barabbas lize mizhü süketimipü.

John 19

Jisu neketi de pü mesa keva

1 Pilate-e Jisu tüpü methi sü. 2 Thipaheko tsahu pira thipü püpiyo sü, mu mere keti füpü pü pü menesü. 3 Pükrünyü de poti, He! Jews miko kedeo, sisü de uko bezi phrepü püvü. 4 Pilate-e ta sala ukoce pra, de ukoce poti, Hihe, I püzü nekoce prari züho, nekopo seyi keto I püyo kejo püri ngoyi mozo. 5 Süsa Jisu tsahu pirapü, fü kemere be. Pilate-e ukoce poti, Hihe, thüma sü. 6 Thevo kezhoko mu kezhomiko pü ngo kesüce, semeto de poti, Püpü gu vate, pügu vate. Pilate-e ukoce poti, Neko püzü püvo gu vate; kekrelamori I püyo kejo ngoyi mozo. 7 Jews miko püce poti, hako thezho püba; mu pü thezholü sata ti mesüzo, kekrelamori pütho püpopü Jihova Nu zole zi ketala. 8 Pilate-e süo se kesüsa mpe sukuta. 9 Pü ta sala lü sheco balü bayi de Jisu ketsoti, No dipüce vori la? Vele Jisu jüpo mota. 10 Süsa Pilate-e püce poti, No ace mhaposü home? I npü guvari ve mu nkela sürive ti I keku keba no semome? 11 Jisu püfü kela kesü, no mhapü ceri ametsuyi hozo, mesoyo khapü ntsü kemosa; süla atüpü ntsü kesüo kephoma kro kute. 12 Hisalü Pilate-e pükelasü keto rhüta, vele Jews miko se kechü de poti, No mhace thüma hio khasüva ketosa no Caesar khrethomi mote; kehopüri utho ukhipü kedemi le sitimi Caesar metsu yo. 13 Pilate-e süko se keyice Jisu zü prari, pü sheco bayo bayi, cehükhro (nyho kemesa kesülü) vele Hebrewmi jülü Gabbatha ziyo. 14 Sünhasü deoba zho püngu nha cukevo nyela kerede keto tü, keba shurü (12 :00 ) pü po kesü, Hihe neko Kedeo. 15 Vele uko se rekrü de poti, püpo ta tate, ta tate, pügu vate. Pilate-e ukoce poti, I neko Kedeopü guva tome? Thevo kezhoko poti, hako kede bamo, vele Caesar lebizo.

Jisu pü gu keva

16 Süla pü pükhapü uko tsüva, guvano de. Uko Jisu zü tata. 17 Pütho pü cross (nphemedü sü) püde ta mipifürolü vota, Hebrew miko jülü Golgotha. 18 Sülü uko püpü guva, mi kekre kena sheri pü püsagu, püchü luco hico, mu Jisu metsulü. 19 Pilate-e thüzapü thopü cross yo sü, tho kesüosü hibi, “Jisu Nazarethmi Jews miko Kedeo.” 20 Jews miko thüma kekro sheri hio phrisü, kekrelamori Jisu kegu thethi nade zü kemeno tila; mu süo thopü Hebrew lü, Greek lü mu Latin lü sü. 21 Süsa Jews thevo kezhoko Pilate-e cepoti, Jews miko Kedeo ziti tho hite; vele pü po kesü, I Jews miko Kedeo. 22 Pilate-e posala kesü, I dipü thova sheri tho süvazo. 23 Süsa thipaheko Jisu gu keva salü, püfüneko püyi, de keza zada thiyi; bola mesoyo (coat) utherü bamo, uvolü ki uphe ketso. 24 Süla uko udolü kepo de uko cekhro va hi khe, vele khüle heve hesu pe khe; sopüza thito sheri, thopü kemeta ketho lesi jüko tsüyi ketola: “uko afüneko khipü kezayi mu a bola pü khüle (hevehesu) thide khiyi.” Hiko thipaheko thisü. 25 Cross (nphemedüsü) phece kethako püzu, püsazüpü, Mary Cleophas cemi, mu Mary Magdalene. 26 Jisu püzu mu püsajio, pükekhrüo süce ketha ngosü, püzuce poti, tsüce! Thenopü n Nu sü. 27 Süsa püsajio cepoti, Nzu peyite, süyovilü püzu züvo pücelü thekütata. 28 Hisalü, Jisu mhametüko thitso sü ketala, thopü kemeta jü-opo tsüyi ketola, I therite, side posü. 29 Hice kephrojü mhabüpülü chuba, fünhe pülü süo süyi (metsüyi) kekhujü khapü sülüsü, de püvo pütalü süsü. 30 Jisu süo krayi de poti, Tsüte, mu nekütsüta de pürüpü khasüva. (Jisu tsü chepha kesü, kengupü). 31 Jews miko cukevonye la mhakesü keyi tüta, themoko po bati mesümo, Sabbath nha, kekrelamori Sabbath nhasü tüso kezho tila. Uko tavo Pilate-e ce choti, uko pheko dochu va keto choyi, side uko pü tata ketola. 32 Side thipaheko taphe kerao phe dochu sü, mu kekreo püzü gupü kemezü-o phe niri dochusü. 33 Vele uko phe Jisu ngo tice, pü sazü keta ngoyi, püpheni dochu mota. 34 Vele thipahe mipü püngu khipü Jisu tsü züsü, süce thüza mu jü kesa krü kirita. 35 Thüma hiko kengo-o ngo kethozo, mu pükepoko kethozo; pü sekeba pükepoko kethozo, sübi nekopo melüyi ketola. 36 Mhahiko thi, ketho lesi po tsoyi ketola, Püro püri dochu mozo siziti popü kemeta. 37 Ketholesi kekrepülü popü kemeta, uko pütsü zükesüo peto (phuto).

Jisu kekhrü

38 Hisalü, Joseph Arimathea püsaji mipü, vele mekhrü tayo kekrelamori Jews miko kempela, pü tavo Pilate-e ce Jisu mo cho, mu Pilate-e khapü pütsüsü. Pü süla tavo Jisu mo khiyi. 39 Nicodemus sheri tavori, pü tüzülü Jisu ce kevoo, mharü kethenyü aloe mu myrrh kere keti Kg. hepüngu khi vori. 40 Side uko Jisu mo püyi, mharükenyüko kesa fünhe khipü pü kezhüsü, Jews miko kesa kekhrü zho bide. 41 Hice Jisu kegu thilü tizhe püba, tizhe sülü mhakhre püba. Sülü kesamo püri pü khrü molu. 42 Sülü uko Jisu mo khapü khrüva, sünha cukevonye la keredeti tü ketala; mu mhakhre uko meno kebalari sa.

John 20

Jisu rhüla kesü

1 Deobado sülü tüsozho thera nha, Mary Magdalene keshu rena tüzü kebalü ta mhakhre lüvo, ketsü phüketu keva ngoyi mhakhreyo. 2 Süsa thenopü ta Simon Peter mu püsajio Jisu kekhrüo nice vori, de unice poti, Uko Niepoo mhakhrelü khipü tate, mu hako semote, püpü dipüce vota sheri. 3 Peter mu püsajio ni süla ta mhakhrelü vo. 4 Uni kenani ta kemetha vo, mu püsajio Peter mhüjü tavota, de ta mhakhrelü ra vota. 5 Pü talü mhakhre lü pesüri, linen füko sülü ngo, siri pü ta ulü lümolu. 6 Süsa Simon Peter püsalü vori, de ta mhakhrelü lü, linen fünheko keba ngo. 7 Mu fükeni pü püpi kepha riba, vele linen füko zü bamo, pütho pülebi kezhi püba. 8 Süsa püsajio sheri ta mhakhrelü lüri, pü ta mhakhrece vori ra vele, mu pü talü ngoyi de melüta. 9 Sütüce uko ketholesilü thopü kemetako melü molu tila, pü sa kevasa rhüla süta keto. 10 Süsa pü sajini ta sala utho ucelü vota. 11 Vele Mary süce tha de kraba, pü krakezhü mhakhrelü nekü kipe. 12 Tüyo choyimi kena bade ngo, mipü püphece mu kekreo püpico, Jisu pü khrü kesü thilü. 13 Uni püce poti, thenopü no dipüla kratha? Thenopü poti, Hihe, mi a Niepoo khipü tatele, püvo dipüce süva sheri I semo tele. 14 Thenopü süko po kevasalü regü püsaco pesü, ri Jisu süce tha de ngoyi, vele Jisu tho ziti semo. 15 Jisu püce poti, Thenopü, no dito kraba? No sopü phu züta? Thenopü püpü tizhe kefüo le ziti lüba, süla püce poti, Kezhoo, no pü püvo dipüce süva sheri ace po süte, I pü püyi ta tomo. 16 Jisu pücüsü, “Mary.” Thenopü regü püpesü, de püce poti, (Rabboni) Kezhoo, (Kemethao). 17 Jisu püce poti, “Ani hite, I tüyo a Po ce kho molu, vele ta a sazüjürako ce vode ukoce po süte, I ta a Po, neko Po, mu a Rüo mu neko Rüo ce khota züho.” 18 Mary Magdalene tavo ukoce posü, pü Niepoo ngo ti mu püce po kesü kori.

Jisu metha keyiko mengo kesü

19 Sünha theva (deoba zho thera nha) metha keyiko tavo kengu püba, Jews miko mpe tila. Jisu talüri de uko dolü thayi, de ukoce poti, thelü kemenü po neko yo ba keyi thite. 20 Pü süko po kesüsa, pübe mu pütsü (rezakuko) pü uko mekasü. Süsa methakeyiko unü vorita, uko Niepoo ngo kesüla. 21 Jisu ukoce posa kesü, Thelü kemenü po nekoyo ba yite; a Po aketsü kesübi I sheri neko ketsü süzüho. 22 Pü süposü de püsüshü hapü uko yosü, Neko Kemesa Rüpü khiyi te. 23 Neko somi kephoma vasü sheri sümi kephoma va süte, mu sopü kephoma vamo ta sheri süko kephoma vayi motato.

Jisu Thomas mengo kesü

24 Vele Thomas cüpü Didymus li ketao metha keyiko mikerikena dolü mipü, pü süce bamo, Jisu kevorice. 25 Methakeyiko püce poti, hako Niepoo ngole. Vele pü ukoce poti, amhü khipü pübelü gojal kevükuko ngo mu abepü süko jüsü, süsa abe pü pütsülü rengukulü kerhüsü kemothe I melüho. 26 Tüsozho tütha sa methakeyiko celü kezüba, mu Thomas sheri sülü uko züba, Sülü Jisu ta lüri, cekhako kha meta, vele pü talü uko dolü thayi, de poti, Thelü kemenü po nekoyo ba keyi thite. 27 Pü Thomas cepoti, nbecüne khipü abelü thekuko pete, side nbe khipü atsü kerhü süte (rezakulü); side nkemelü kedi thita hite, vele melü yi zote. 28 Thomas püce poti, “A Niepoo mu a Rüo.” 29 Jisu püce poti, Thomas no kengola melüte, vele ngomo zori melü keyiko thejo kepütho.

Tho kesü lesi hio püco

30 Zasi kekro sheri Jisu pü methakeyiko mhüjülü thisü, süko thopü lesilü sümo. 31 Vele hiko tho kesü, Jisu hi Khrista zo ti nekopo melüyi ketola, Jihova Nu zo; melü keyila neko kerhü ngoyito püzalü.

John 21

Jisu püsajiko mi thüna mengo kesü

1 Hisalü Jisu püpü methakeyiko mengosü Tiberias jükezho khülü, hibide. 2 Uko kezü ketako, Simon Peter, Thomas cüpü Didymus kethio, Nathanael Cana mi Galilee lü, Zebedee nuni, püsajimi kekre kena sa. 3 Simon Peter ukoce poti, hano tatsü füthi tatoho. Ukori püce poti, hako sheri nzü tsü tole. Side uko kezü tsüta, uko rekri rulü lüta. Vele süzi mhapüri tüyimo. 4 Vele keshu rena Jisu jüpo cethayi, vele uko süo Jisu tho ziti semo. 5 Süsa Jisu ukoce poti, natsi miko neko ketico hupü tame? Uko püfü kho kesü, Mo. 6 Pü ukoce poti, neko jal (füketüfü) kehüpü ru thezaco süte, neko ngoyi toho. Süla uko kehüpü ru thezaco sü, siri uko khu kekro boyi ketala jal tü süsa yi hota. 7 Süla Jisu kekhrü sajio Peter ce poti, Niepoo tele. Simon Peter Niepoo tele siti se kesüce, pü füketü füne khipü püzheyi, (kekrelamori pü mechü tatila), de ta jülü lüta. 8 Pü saji kekreko ru keni püyo vorita, kekrelamori süce cejü keso zü kemecuba kemola, (botho kra kenapü püzo), jal lü füko süsapü vori. 9 Uko taphe cejü tsoyi mu metha, uko megikrapü methi meto keba ngoyi, mu füko süsa tsükhrida sheri bade 10 Jisu ukoce poti, Fü püvorite, neko tsüce tü keyi. 11 Simon Peter tavo füko süsa pü cejü pheri, khu kezho kekro ta, krapü hepüngu sü; fü kekro ta sheri jal pa (kro) tamo. 12 Jisu ukoce poti, “Tavori de mhati yite.” Uko mipüri “no sopü”? zimota. Pü Niepoo zoti seba ketala. 13 Jisu tavori de tsükhri mu khu ri pü uko tsüsü. 14 Hiohi vasüo Jisu püpü methakeyiko mengo kesü, pü sa keva salü rhüla sü ketasa.

Jisu mu Peter ni

15 Uko mhati ketasa, Jisu Simon Peter cepoti, Simon Jonas nu, no hikoceri (füko) akhrüku yome? Pü poti, Ile, Niepoo, I nkhrü yoti no seba. No akuko vathi yite. 16 Va kenao ri püce poti, Simon, Jonas nu, no akhrü yome? Ile, no seba, I nkhrü yoti. Püce posa kesü, No akunuko thekü yite. 17 Pü vasüo ri poti, Simon, Jonas nu, No akhrü yome? Peter pülü suta. Püce vasüo ri No akhrü yome? Sizi ketala. Püce po sala kesü, Niepoo no mha metü seba, I nkhrü yoti sheri seba. Jisu püce poti, “A kunuko thekü yite.” 18 I nce potü süto, no khresa kebace ntho nche phayi to, mu dipüce vonyü ba sheri ta no voto; vele no pethi (tsa) ketasa no nbe chopü mikekre po nche pha süto, de nzü vonyü kemora vo tato. 19 Kepo hio püco tisa, dipü sü (sa) thide Therüoza thimelesü to sheri poba. Pü hiko po kevasa püce po kesü, “Asa meji yite.”

Jisu mu pü kekhrü sajio

20 Süsa Peter regü prari Jisu khrü ketao püsa meji kezü ngoyi, pü Jisu khoroyo mengu püba theva mhaco tülü, Jisu ce pü poti, Niepoo, sopü ntü süla? 21 Peter püfü sekesü, Pü Jisu ce Niepoo thüma hio dipü bi tata? 22 Jisu püce poti, Mhace amedo lize I vori kemoce püpo tsizi bate, nla süsü kedipü ta? No asa meji yite. 23 Süla methakeyiko dolü kepoti, saji süo sataho le zi tayo, siri Jisu püce sizi sümo, Pü sataho; vele amedo lize püpo fü bate I vori kemoce, nlano süsü kedipü ta? 24 Pü saji hio süko pü po sü, mu hiko tho risü; mu hako se keba pü zhopo ketho zo. 25 Jisu thi kesü kekre kekro riba, süko püpü tho ketosa, I a kelüce cejü lesiko thotsü keyimo, tho kezüko thoto lize. Amen.