1 Ehei limpa sak matienga, trongsan ha chu am phur so weh; amo chu Chungthieng hitta am ha ae, hana amo ha Chungthieng ae. 2 Athou hai thou wa trongsan ha chu Chungthieng hitta am ha ae. 3 Ma jarra Chungthieng na eheilim pa sa ae; kutsem limpa hi amo tolno wa ephao sem no ae. 4 Trongsa hana ringchang hina shukna ae, akha chu na ring changna malmashi lim ta awar choi phao ae. 5 Awar hana athim sunga war ae, hana athim hana na awar hata nea no ae. 6 Chungthieng na marouron Johon ta hla ae. 7 Amo na mee ngeita awar hana maramma rilranga phao ae, chuna meelim pana rouril ha thei weta ngoiring ranga ae. 8 Amo matak mak chu awar ha ah no ae; amo na awar hana rou ril ranga phao ae. 9 Na awar hi adiek awar sha ae, na awar hina simlei ah phao hi malmashi limpa chunga awarranga ae. 10 Trongsan ha simlei chunga amphur so ae, hana Chungthieng majarra shimlei lim hi sem ae, chu phao sunga simlei ngei na chu amo ta dangno ae. 11 Amona mahu maram sunga phao ae, chuti weta mamee ngeina amota lah no ae. 12 Chuti halkom, ahre na chu, amota lah ae akha chu amo ta ngoiring ae; chuna amo na manita Chungthieng sanao ngei hina phaphung shuk pha pi so ae. 13 Mani hi don hei thou wa chu Chungthieng sanao ngei no ae, maram chu mani hi malmashi pa ngei thouwa don sha ae; chuti weta Chungthieng hi mani pa maksa ae. 14 Trongsa hana mee changa lungshi lea adiek hana shi ah ani karra am phur ae. Hana mapa haithou wa akha chakka don sanao na pha mahung majai ha kani na riphur songe. 15 Johonna maramma trongphur ae, amona rilsukke, “Hi akha hina maramma ae keina karilphurha, ‘Amona kanutinga phao ae, chuti weta amona keita lella loktekke, maram chu keita donma hei thouwa amochu amphur so weh.’ ” 16 Malungshit hana shihakti hei thouwa amona anilimta yaihra bopi so weh, anita yaihra akha nuteinga akha pepi ae. 17 Chungthieng na Moses hei thouwa roukung pe ae, Chuti weta lungshi thei lea adiek chu Khrista Jisu kol hei thou phao phur ae. 18 Atu akha na kom Chungthieng ta etikka kom ri nosonge. Akha chak don Asanaopa, Chungthieng, hitta akharukti akha chu Mapa ningtinga am, amona amota dangpi so weh.
Johon Baptias Na Rouril
19 Jerushalem ma am rouril nea Jewish ngei na Thiempu ahre lea Levites ngeita Johon kolla “Nang atu acha meh?” ta sairang hla ae. 20 Johon na sangnum no ae no lutta thienga ta amo na ril shuk kae, “Kei hi Messiya ha ah nonge.” 21 “Chuleh chu, nang atu che meh?” ta mani na sai. “Nang Elija che?” “A-no ae, kei a-nonge,” Johonna sangphure. “Nanghi Thiempu che? ta manina sai. “Ah nonge” ta amona sange. 22 “Chuleh chu kanita atu cha mo rillo.” mani na ril. “Kani ta hla ngei am na ah nasang rou ha ron na lea ange nang natak mak hi atu inge ti cha meh?” 23 Johon na roumaphu Isaiya rilphur rouha rilsir ae; “Arengpu mathingrang lamha tingpi-oh-ta ramrukka ao sanrolha kei inge!” 24 Pharisis ngei na hla rouron ngei na. 25 Johon kolla sai, “Ejonga nang hi Messiya anole Elija ano lea roumaphu anonge ti lea alo wa nangna meeta baptias ae pi ah che? 26 Johon na sang, “Keina tui ah baptias ae pi inge, chuti weta nangei kar sunga ngir tolla am akha ha chu nangei na dang nijo chou ae. 27 Amo ha kanutinga phao halkom kei na mahuirang rui sui pi phao kei chu matik cha nonge.” 28 Nalimpa hi Bethany ah Jordon tuiwa nasutienga shuk sha ae amunt hana ae Johon na baptias ae pi na ha.
Chungthieng Kelmo
29 Mathangpa rungnie ah Jisu na Johon makolla wak ha ripha ah ril, “Anno Chungthieng kelmo nao ha, amona simlei chunga pak lim pa ron na thing ange! 30 Hi akha hina maram ma ae keina karil phurha, “Apa akha kanutienga phao ange, amona keita hella loktekke rou ram chu keita don matienga amo chu am hlakso. 31 Keina amohi eyongpa mee angmo dang nonge, chuti weta Isarel meengei na amota dangranga keina tuisunga baptias ae pi ranga wa inge.” 32 Hana Johonna saro ei ah rille, “Keina muhla hana thangwan hei thou wa peipi hekta jungtumma machunga am so weh. 33 Keina amota atunpha dang nonge chuti weta tuisunga baptias ae pi rang keita hla Chungthieng amo na kakolla rille, ‘Muihla athieng na tum ma jung weta atu jong apa akha chunga am ha ripha ange, amo mak ha sa-ae muihla ah baptias ae pi ang ha.’ 34 Keina ri pha singe” Johon na ril, “Hana sarukka keina nangei kolla rilla aminge amo hi Chungthieng sanaopa ae.”
Masha Ah Jisu Rui Changei
35 Mathang pa rungnie ah Johon na marui ani hitta hana woiha leya ngirra am meh, 36 amo na Jisu wakha ri weta, amo na ril, “Amo hi ae Chungthieng kelmo ha!” 37 Arui ani na hita maril thei weta Jisu hitta thingha so ae. 38 Jisu na heileh a an weta manutieng jui ani hata sai, “Nanui nie na e-yong pa ann rol chou meh?” Manui na sang, “Rabbi hoija munt na nang am manga che?” (Rubbi rilna chu “ocha”.) 39 “Wa weta anwa oh,” amona sange. Manuina wa weta ma am rang na mun ha risho ae, hana manui na hanie rungnie ha chu amo hita am ha so ae. (Nalei ha nietating apha inli tulso weh.) 40 Manui anie sunga akha chu Simon Pitar manaopa Andrew ae. 41 Amona masha ah ma-ata Simon ta tukhlakka makolla ril, “Kani na Messiya” tuk songe (“Khrista” ta rilna.) 42 Hana amona Simon ha Jisu kolla ruija wa ae. Jisu na anweta makolla ril, “Naming hi Johon sanaopa Simon ae, chuti weta nangta Kephas ta kokkange” (hina rilna chu Pitar tichu “alung” ta ril na hita mana ae.)
Philip Lea Nathanael Ta Jisu Kok
43 Mathangpa rungnie ah Jisu na Galily ah thing ranga ngirso. Amona Philip ta tukka makolla rille. “Kanu jui wa-oh!” 44 (Philip hi Bethsaida ah mee ae Andrew lea Pitar am na hulok ka ae.) 45 Philip na Nathanel tukhlakka makolla ril, “Kani na Moses na roukung abai sunga jiekka shi akha chu roumaphu ngeina kom jiekka shi Arengpu ha kani na tukhlak so ae Amo ha Nazareth ta Josep sanao Jisu ae.” 46 Nathanael na saiye, “Nazaretta hei thou wa e-ahra shuknea ang meh?” “wa weta ann wa oh,” Philip na sange. 47 Nathanaelna makolla wak Jisuna rijuija amona ma maramma rille, “Hina adiektak Israel am so ae; makolla diek lau akha phao am no ae!” 48 Nathanael na makolla sai, “Alo ta kei ta nangna dangpha che?” Jisu na sang, “Philip na nangta kok matienga nangna theichang kung thuija na am ha keina ri inge.” 49 Nathanael na sange, “Arengpu,” “Nanghi Chungthieng sanaopa ae! Nanghi Israel ngei Rengpa ae!” 50 Jisu na ril, “Keina nanghi theichung kung thuija ri inge ta karil sa rukka ngoiringa che? Hita hella alok alok tullu nangna ri pha ang che!” 51 Hana amona manita rille, “Kei na adiek rou rilla aminge nangei kolla nangei na thangwan ram honga am ri ange hana Chungthieng wanrui ngei na meesanaopa chunga kalla hang tum ma jung ri ange.”
Kana Ah Taichangna Ah
1 Rungnie nani waitakka Galily sunga Kana hulokka athieng nuhla ammeh Jisu manu kom hana am tol ae, 2 hana Jisu akha chu marui ngei ta kom luhongna ah manita kom kokke. 3 Darkha tui ha thanghap ti pa chu, Jisu manu na amota rille, “Mani darkha tui am nijo weh.” 4 Jisu na sange, “Nangna ka ae angha rillanga a-no ae,” “Ka ae-ang aphaha atun pha no songe.” 5 Chuna Jisu manu na asuuk ngeita rille, “Maril eheilimpa nangeina ae-oh.” 6 Jehudi ngei talit tamang anu juija alung bel akhana tui litres riha chal alok aruk mani na shil tengrang doija shi ae. 7 Jisu na shuk ngeita ril, “Na tuibel ngei hi tui shi hak ti pi oh.” Mani na bel amai phao shihak ti pi so ae. 8 Hana amo na manita rille, “Atun chu tui ahre shukka lah weta abak a inn ron na am pa kolla choija thingo.” Mani na tui ha shukjuija. 9 Atun chu darkha tui wulso ae hana amo na chihou an so ae. Amona na darkha tui hi hoitienga thou phao mo dangno ae (chuti weta tui shukka am arui hana chu dange.) Chuna amo na taichang angpa ta kokka. 10 Makolla rille, “Masha a meelimta hra tekti darkha tui nangna samso che hana nutienga kom athui hrit ti hra akha sampi che ae chuti weta atun phao sunga ehekta hra darkha tui lim ma am songe!” 11 Jisu na ahalpa anealah tullu hi Galily ah Kana luhonga ripi ae. Hana amo na mahung majai ha mari pi juija marui ngei na amota ngoiring thou so ae. 12 Hina nutienga Jisu hina manu manao akha chu marui ngeina kapharnahum ma thing weta rungnie atite am thinge.
Jisu Na Athieng Inn Na Thing
13 Lanpina na Reen apha naija wa sou chu Jisu na Jerushalem tinga thinge. 14 Athieng inn sunga sum jurra am ngei kelmo jur ngei paipi jurngei hana sum chui kui ngei ejana na am amo na tuk hlakke. 15 Chuna amona ruija rul mol sem weta athieng inn awao ah sum kelmo ngei ta julla wa ae hana sum chui kui ngei doukang kom achung athui letta sum chui ngei bun na chok chai so ae. 16 Hana amo na paipi jurra am apa ta rille, “Hina hei thou wa choija shuk jou oh! Kapa inn hi kaithiel kal na neinou-oh.” 17 Marui ngei na jieksa rou ha angei thei ae, “Oh, Chungthieng na inn sunga kamokhi sarmei hekta keita kange.” 18 Jehudi ane angam ngeina sangveta rou saiye. “Nangna na tullu na lu hi aephung shukketa kani kolla eyongpa anealah ae weta mune ang chame?” 19 Jisu na sange, “Na athieng inn hi nangei na hri hou-oh hana keina rungnie nathum nie a woiha lea a sha sir nea ange.” 20 “Nangna rungnie nathum nie ah woiha lea ah sha sir nea ange!” Mani na amota rille, “Nahi akum somli aruk lutta shak athieng inn ae!” 21 Chutiveta athieng inn ta Jisu tronga am hi chu mapum hata ril na sa ae. 22 Chuna amo na athi hai thou wa ring thou juija marui ngei na na rou hi ae maril phur ta angei thei ae. Hana manina jieksha rou akha chu Jisu na rilphur ha ngoiringso.
Malmashi Lungta Jisuna Dang
23 Jisu na lanpina reen sunga Jerushalem ma, ma am leija angakpi maripi hata ri manina amota ngoiringso. 24 Chuti weta Jisu matakmakna chu mani ta ngoiring no ae, rouram chu amo na mani lim pa ta dange. 25 Hana atu akha na kom mani ha taranga makol rourillang am no ae, rouram chu amo matakmakna mani lungrang lim dange.
Jisu Lea Nicodimas
1 Hana leiya Jehudi ngei lamkai amingna Nicodimas tipa amo ha chu Pharisi ngei abom sunga tol lea. 2 Nahani jintienga amo na Jisu kolla thing weta rille, “Ocha, kani na nanghi Chungthieng na hla ocha akha ae ta dang unge atu akha na kom angakpi na lu tullu jongpa ae no ae Chungthieng na amo hitta am hano wa chu.” 3 Jisu na sange, “Keina nakolla adiek rou rillinge atu akha na Chungthieng rengram ha ri ang no ae amona lea ah don nowa chu.” 4 “Alota lokka hangsa mee na lea ah don sirrang meh?” Nicodimas na saiye, “Amo na manu von sunga lut weta woini suna pa don chu nea ang no ae!” 5 “Keina nangei kolla adiek rou rillinge” Jisu na sange, “Atu akha na ko Chungthieng Rengram lut nea ang no weh amo na tui akha chu muihla athiengna don a no wa chu. 6 Malmashi hi manumapa hei lhou wa don ae chuti weta amo ha chu muihla tienga muihla a don ae. 7 Nangna ephao angak shukno oh keina nakolla tharra don oh karil sarukka. 8 Thirangna madit na ram munt tieng range thinge nangna atarra chu theipha che ae chuti weta nangna hoitienga thou phao mo akha chu hoitienga thingmo chu dangno ae chu hekta. Muihla a don meelim ko hati sa ae.” 9 “Nahi alo ta shuk kang meh?” Nicodemas na saiye. 10 Jisu na sang. “Nanghi Isrel ngei alok ocha akha weta nangna na hi dangno wa che.” 11 Keina adiek rou nangei kolla rilla aminge kanina rilla am hi chu kani na dang akha chu kanina ripha ha thangkou wa unge chu phao sunga nangei akha phao na kani rouril ha lah num no chau ae. 12 Nangei na keita ngoiring no che ae keina simlei chunga roulim karil juija ngoiring no weta alo ta keina thangwan rouramma karil juija ngoiring ang sha? 13 Chuna atu akha na thungwan na kal thing no songe thang wanna thou jung meesanaopa amo ano wa.” 14 Moses na ramrukka arul ta thing kathanga tar hekta meesanaopa ta kom tar ange. 15 Chuna atujong akha na makolla ngoiring lim na samla ringchang pha ange. 16 Chuna Chungthieng na simlei hita ehekta lungshi pi-ae hana jarra akha chak don amo na masanaopa ta pepi so ae. Chuna atujong meena amota ngoiring lea chu athi am no wa samla ringchang ha pha so ae. 17 Chungthieng na asanaopa ta simlei ah hla hi routreem ae rang no ae chuti weta sanpi ranga ae. 18 Atujongna meesanaopa ta ngoiring lea chu routreem ae ang no ae chuti weta ngoiring no mee amota chu routreem so ae rouram chu amona Chungthieng akha chak don asanao ta ngoiring no ae. 19 Routreem ha chu hiti a-ae tichu. Simlei chunga awar hi tungso ae chuti weta malmashi ngei na chu awar ta hella athiem ta di tekke maram chu mani ae-ngam ahra tullu no ae. 20 Atujong akha na hrano tullu lu lea chu awar ta atir ae hana awar am na ah wanum no ae. Maram chu hrano tullu ma lu ha ri pi num no ae. 21 Chuti weta atujong na adiek tullu lu lea chu amo na awar am na wa num ae maram chu ma lu tullu ha Chungthieng aril atrong jui ja ae ta awarna muh ranga sa ae.
Jisu Lea Johon
22 Hina waitakka Jisu akha chu arui ngei na Judiya ram tienga thinga hana apha atante mani hitta am ha weta baptias ae pi so ae. 23 Johon na kom Aenon na baptias ae pi ah am meh Salim hai thou wa aram lah no ae, rouram chu amunt hana tui leima tam am jarra mee ngei makolla phao weta amona mani ta baptias ae pi ae. 24 (Nahi Johon ta ahungin sunga si matienga ae.) 25 Johon arui ahre na Jehudi akha kolla trong wuk hlakka thou so ae mani talit tamang anu jui ja kut silna maramma. 26 Chuna manina Johon am na thing weta ril, “Ocha, Jordon nasu tienga apa akha nanghitta am ha ma maramma naril phur ha angei thei che? amona atun baptias ae pi ah am meelim makolla thingso ae.” 27 Johon na sang, “Atu akha na Chungthieng na makolla pe a no wa chu ephao pha nea no ae. 28 Keichu Messiya ha anonge, chuti weta keita mamatienga hla a sa aeta karilphurha nangei natakna kataranga meelungir ano ah chou meh. 29 Taichang angnu taranga chu taichang angpa ae; chuna makolla ngirra marou ngai ah am luhonh angpa atronpi na masanrol theijuija eja ah ariem meh hina chu hekta keina kariem hi shi hakti so ae. 30 Amona lella loktekka hangange keina sintekta tumma jung ang ae.”
Thangwan Hei Thou Wa Jungpa
31 Achungtieng hei thou phao amo hana eheilim chunga amona loktekke. Amo hana aleiram tienga lea chu amona alei ram taranga rou rillange. Chuti weta thungwan hei thou phao amo na ehei lim chunga ameh. 32 Amona mari akha chu mathei pha ha rilpi-ae, chu phao sunga atu akha na marou ril lah num no ae. 33 Chuti weta atujong na marouril lah lea chu Chungthieng hi adiek takke ta lingno wa am meh. 34 Chungthieng na hla atujong amona Chungthieng rou chak tronge rouram chu Chungthieng na machunga muihla shi hakta pe ae. 35 Mapana asanao pa ta lungshi ae chuna jarra eheilimpa makut chunga shi so ae. 36 Atujong na asanaopa ta ngoiring lea chu amo ha samla ringchang pha so ae. Chuti weta atu jongna aril jui nole chu amo na ringchang tukne ang no ae chuna Chungthieng a lei choiya am mange.
Jisu Lea Samariah Nameinu
1 Pharisis ngei na theipha so, Jisu na Johon ta hella baptias ae pi ah akha chu marui na tam tekkae ta. 2 (Routakka chu Jisu matakmak na atu akha takom baptias ae pi no ae, marui ngei na ae pi sa ae. 3 Chuna Jisu rouhi theijuija amo na Judiah houphur weta Galily ah lea so. 4 Hana maleh na lampi hana amo hi Samariah samma thinga tah ae. 5 Samariah sunga Sychar ti hulokka amo na pha so. Hana na ram ha chu Jacob na asanao Josep ta pek loupukha aram lah ni jo weh. 6 Hana Jacob tuikung ammeh, mani thingna lamma Jisu ha olla tuikung hana onga solhla so. Naha chu niesoun tieng ti lei so ae. 7 Samariah nameinu na tui shuk kanga wa ah, Jisu na makolla ril, “keita inn rang tui pepi oh.” 8 (Marui ngei chu hulok hanna abak ranga lei thing hlakka am meh.) 9 Nameinu na sange, “Nangchu Jew ae, hana kei chu Samariah inge, chuna sarukka alo ta nangna kakolla inn rang tui sai ah che?” (Jews ngei na Samariah ngei tuidon inn na inn no ae.) 10 Jisu na sang, “Nangna Chungthieng na pek hi emo dang phurta lea akha chu nakolla inn rang tui nie mee ha atu meh ta dangphur ta lea chu, nang na nie phur anga ae, hana amo na nangta ringna tui pepi anga ae.” 11 Nameinu na ril, “Arengpu” “Nangna tuishuk na bartin kom am no wa hija thuk tuikung hi alota nangna ringna tui shuk weta pe ang che? 12 Kani puthou Jacob na kani ta peksha tuikunge; Amo na kom hana asanao ngei akha chu majoksha ngei na kom hina inphur ae. Nangna Jacob ta hella loktekkae ta halla am ma che?” 13 Jisu na sang, “Atujong akha na, na tuikung hina tui inn ngei na woiha lea ah tuiral sier ange. 14 Chuti weta atujong meena kapek kang tui inn mee amo ha woiha lea ah tuiral am mang no ae. Hana makolla kapek kang tui ha chu tuiphut changa ringchanga tuiral am no wa akha chu samla ringchung pha ange.” 15 Nameinu na ril, “Arengpu” “Keita na tui ha pepi oh! Chuleh chu woiha lea ah tuiral ka am no ranga hana keina na amunt hina lea ah tui shuk wak no ranga.” 16 “Thing weta napishal kok thingo, hana hina lea sierro ta Jisu na makolla ril.” 17 “Kei chu kapishal am nonge” ta nameinu na sang, “Kapishal am nonge ta naril rou ha leima adiekka ril so che. Jisu na sang. 18 Nang chu napishal ranga shu so ae, hana atun nang hitta am ha spa ha napishal athieng ah no ae. Nangna naril ha adiek takkae.” 19 Nameinu hana ril, “Keina arengpu ha ripha singe, nanghi thiempu ae.” 20 “Kani Samariah pa pu ngei na, na mullon hina Chungthieng ta mokkae, chuti weta Jews nangei na chu nangei Chungthieng hi Jerushalem ma mokkanga ae ti ae.” 21 Jisu na namei ta ril, “Keita ngoiringo, namei nu, malmashi ngeina, na mullon ah hal Jerushalem ma hal mapata mok no rang apha phao ange. 22 Samariah nangei na nangei mokhi routakka atu kolla mok mo dangno chao ae; chuti weta Jews kanina atu kolla moksha ti hi dang unge, chuna sarukka aring kaetlo hi Jews hai thou wa phao ae. 23 Chuti weta apha hakom phao ange hana hina amsu hakso ae, hana Chungthieng muihla hina jaitha jarra malmashi ngeina mokkange mapa amo ha mak. 24 Chungthieng chu muihla ae, chuna ma muihla hana jaitha jarra chak malmashi ngei na amota mok kange adiek tolla.” 25 Nameinu na rille makolla, “Messiya jung ange ti ha keina dang inge hana majung juija amona eheilimpa kanita ril pi ange.” 26 Jisu na sang, “Amo ha kei inge, nang hitta tronga am ha kei inge.” 27 Hana apha makka Jisu rui ngei lea ah mani na leima tam angak shuk kae amona namei akha hitta tronga am tukhlak juija. Chuti hal kom mani kar sunga kom namei nuta ril no ae “ejongpa nadit am sa?” ano lea “elo sarukka nameinu ta trong hlakka am ma che takom makolla sai no ae?” 28 Hana nameina na matapot houphurra mani hulokka lea weta mani mee ngei kolla rou ril. 29 “Wa weta anno katullu lu eheilimpa ril nea spa akha amo hi Messiya kom ah ngei ae?” 30 Chunapa chu mani na mani hulok houphur weta Jisu am na thingso. 31 Hana lei apha sunga marui ngei na Jisu kolla nie, ocha abak pot eyongpa akha bak ko.” 32 Chuti weta Jisu na sang, “Keina abak rang nangei danglao am minge.” 33 Chunapa chu marui ngei na mani thei chakka sai hlak thou so, “Atujong akha na tieng mabak rang choiya phao mee tol la mo?” 34 Jisu na manita ril, “kabu chu” keita hla amo hana mahal keita mapek tullu su pi weta aril jui ha ae. 35 Nangna chu hita rilleh, ‘Shangpottang hla li chak so weh,’ chuna keina nangei kolla rilla aminge nahong tou wa namit anno loupokka shang ha potta ngei hang so ae! 36 Muchi vorh pa lea shang pot pa na eya ah ariem ha angsa, shangpot pa na malom mant pha hana atreem neino wa ring ranga muchi ha homma shi ae. 37 Rilla am hi adiek tak ae, ‘spa akha na muchi vorh ae, adang akha na muchi lukke.’ 38 Keina shang pottanga nangta hla singe natullu lu no na loupukka adangei kom tullu lu ah am meh hana nangna kom tullu na lu na lommant tok pha ange.” 39 Samariah hulokka am meelim pa na Jisu ta ngoiring ae, roulam chu hana nameina ril rou ha, “Amona ka tullu lu eheilimpa ha keita rilleh.” 40 Chuna Samariah ngeina Jisu kolla wa ae, mani na Jisu kolla mani hitta am ha ranga rilla Jisu na rungnie nanie am ha so ae. 41 Marou ril hana nujuiya leima tam tekka ngoiringso. 42 Chuna mani na namei nu ta ril, “Narou ril sharukka kanina ngoiring ah no weh. Kani tak makna marou hi theipha sarukka ae hana kani na dang songe amo hi routakka simlei limpa ta sanpipa ae.
Jisu Na Offisar Sanaopa Ta Dampi
43 Jisu na rungnie nanie am ha su waitakka manita houphurra Galily ah thingso. 44 Amo matak makna ril, “Chungthieng rouril ngei hi aram mak ngei na ajak ati no ae.” 45 Amona Galily matungjuiya malmashi ngeina ariem lamtuk hakka am meh, roulam chu manina Jerushalem ma lanpina reen na mani thinglei ah reen sunga eheilimpa ma lu tullu ha mani na riphur so ae. 46 Hana amona Galily Kana ah lea so amunt hana ae tui ta dharkha wul pi na ha hana Government offisar sananao pa kom Kapharnahum ma ana ah am meh. 47 Amona Jisu hi Judiah ram hai thou wa Galily ah phao so ae ta mathei juiya, amona Jisu kolla thinge, Kapharnahum ma thing weta asanao pa thi ang ae am pa ta dampi ranga sai so. 48 Jisu na makolla ril, “Atu akha nakom angakpi anealah nangei na ri malim ma ngoiring no ae.” 49 Offisar pa na sang, “Arengpu, kasanao thit matienga kei hitta thingsui oh.” 50 Jisu na makolla ril, “Thing jou oh nasanaopa ha ring ang ae!” Spa hana Jisu rouha ngoiringa thingso. 51 Ma inn lampi ah kor ngeina amota tukhlak wa ah routhar ha ril so, “Nasanaopa ha dam sho ae.” 52 Amona manita sai, “Eyongpa apha ah kasanaopa hratekka hang meh, mani na sange, ajan ni soun na atrun manockha dom ae apha na akha tah jui ja.” 53 Hana mapana angei thei so ha chu Jisu na makolla rilna apha makkha, “Nasanao pa ha ring ang ae.” Chunapa chu amo akha chu inn sung limpa na ngoiringso. 54 Judiah heithou ah Galily maphao ah Jisu na woinie sunapa anealah hi ae so.
Bethsaida Tuikom Ma Jisu Dampi
1 Hi waitakka Jisu na Jerushalem ma dramo reen sarukka thing so. 2 Jerushalem ma kelmo sungkar am na ah tuikum akha am meh alutna ranga limpa hlumma shi ae Ebriya na chu nahi Bethsaida ta kokkae. 3 Ahlutna ah kaettik mitcho, hana pum ahui athi sa wairul riha rai am malmashi ngei hana jalhlakka am meh. 4 Ejong apha ah wanrui na tumma jung weta tuikum ma tui lingpi juija hana atujong akha na masha ah tui lingsu tukka katlo lea chu ejongpa rai hal kom ma-am rai ha dompi ae. 5 Akum somthum arit ana ah am spa akha hana am meh. 6 Jisuna jalla ma am ri ah akha chu amo na dangpha ae apha eja sotta amo hi ana pha ah am meh tah; chuna Jisu na amo ta sai. “Nangna adam pha num ma che?” 7 Ana ah am spa na sang, “Arengpu, tuina ling juija keita lut pi ang mee kataranga atu akha am no ae; chuna keina lut ranga thou rang ka ae leija atu jong akha na masha chak ti ae.” 8 Jisu na makolla ril, “Naphar choi weta thou wo, hana thingo.” 9 Apha hana makka spa hana thou weta maphar ha choi weta thing thou so. Shukka am rungnie hi Sabbath nie ae. 10 Chuna Jews ane angam ngeina spa hata atu na nangta dampi meh, “Rungnie hi sabbath ae chuna ani roukung ta ngeino tullu lu nangna phar choija rol hi.” 11 Amo na sange, “Keita dampi spa hana keita ril lea kaphar hi choiweta thingo.” 12 Manina amota sai, “Atu meh spa ha nangta hi tullu lu oh ta ril mee ha?” 13 Chutiweta adam pha spa hana chu Jisu atu meh ti dangno ae amunt hana wairul riha na amna Jisu chu shukka thingso ae. 14 Hana nutienga Jisu na athieng inn sunga tuk hlakka ril, “Ano atun chu nang dam so ae; chuna pap tullu chan jou oh hella sathi rai nachunga shuk no ranga.” 15 Hana spa hana thing weta Jewish ane angam ngei kolla ril so, “Keita dampi mee ha Jisu ae.” 16 Chuna manina Jisu ta aol ana pe thou so. Rouram chu amona sabbath rungnie ah ana ta dampi ae. 17 Jisu na sange manita, “Kapa na apha chang honna tullu lu ah am meh hana keina kom hahekta tullu lu tah ae.” 18 Hina sarukka Jewish ane angam ngei na Jisu ta that ranga hella jong thou so, amona sabbath rungnie ah roukung anu juija kuipi chak ano wa Chungthieng ta kapa ae ta rilla, akha chu matak makhi Chungthieng hitta mana pe ae.
Meesanaopa Na Ane Angam
19 Chuna Jisu na manita sang, “Keina nangei kolla adiek rou rillinge asanaopa na mathei chakka ephao ae nea no ae, ma lu tullu chu mapathieng na lu tullu mari ha chakkae, ejongpa mapathieng na lu tullu ha asanao pa na kom ae ah ae. 20 Hina rou ram chu mapa na asanaopa ta lungshit jarra matakmakna lu tullu ri pi ae. Amona hita hella alok tullu ta hella kom ae rang ri pi ange hana nangei na angak shukkange. 21 Mapathieng na athi sa ngeita ringthou pi weta manita ringchang pekpi hekta asanao pana kom aring di ngei ta kom ringchang pe pi ae. 22 Mapathiengna chu atu akha ta routreem ae no ae. Amona asanaopata rou shu rang routreem ae nea rang pe so ae. 23 Chuna sarukka mapata meelim pa na ajak ati ae hekta asanaopa ta kom ajak ati anga ae, atu jongpa na asanaopa ta ajak ati no lea amota hla mapathieng ta kom ajak ati no ah ae. 24 “Keina nakolla adiek rou rilla aminge: atujong na karou theija akha chu keita hla amo ta ngoiring mee chu samla ringchang pha ange. 25 Keina nangei kolla adiek rou rillinge apha hi leima nei so ae. Apha ha chu tungso, athi sa ngei na Chungtheing sanaopa sarol thei rang, hana amona thei lea chu ringchang ha pha ange. 26 Mapa thiengna matak makka ring chan am chu hekta asanaopa kom makolla ringchang pe nea ae. 27 Hana amona asanaopa ta routreem ae nea rang jaitha kom pe so ae rouram chu amo ha meesanao pa ae. 28 Nahina sarukka angak shukno oh. Athi sa ngei na sanrol ha thei rang apha akha phao ange. 29 Hana mani hlanhur sunga thou wa shuk kange atujong ahra tullu lu ngeina hana ringthou wa aringpha ange. Hana atujong hrano tullu lu ngeikom ringthou weta amo ta chu aol pe ange.
Jisu Taranga Saro Ei
30 “Keina kathei chakka ka nea ephou am nonge; routreem ka ae chu Chungthieng na keita ril ha chakkae, chuna karoutreem hi chu adiek chakkae rouram chu keina kadit hana ae rang kom am nange, chuna kei chu keita hla mee hana adit ha chak sa ae. 31 Kei kathei chakna kataranga saro ei lea chu keina ril num minge amoha alakrang rou am no ae. 32 Chuti weta kasarukka saro ei mee am sharukka. Hana keina kom dang inge kata maram ma ma-ril ha adiek takkae. 33 Nangai makna Johan kolhai thou theipha so chou, akha chu amona adiek rou hana rou ril so. 34 Keina chu malmashi kolla kataranga saro ei mee lah ah nonge, chutichun nangei ta sanpi ranga keina rou hi ril singe. 35 Johon ha chu dewarkari si na chunga warra chak am ha ae chuna nangei na apha atan te taranga mamai kunga ariem ha di chao ae. 36 Chuti weta kei chu kasarukka soro ei Johon na pek saro ei ha ta hella alok am minge ka ae ah am tullu hi kapathiengna keita ae oh ta pek tullu lu hana makka keita hla ae ta karou hana saro am meh. 37 Keita hla pathiengna kom ka rou hana saro pe pi ae. Nangei na ephao ma sanrol hi theikom thei no songe hana mamai kom ri no songe. 38 Hana marouril kom nangei lungsunga shi no chao ae, hana nangei na mahla amo ta kom ngoiring no ae. 39 Nangei na jieksha rou ha Jong chao ae, chuna sharukka hana sunga nangei na samla ringchang pha ange ta hal chao ae! Akha chu kamaramma jieksha rou rilla shi hi, hi ae. 40 Chu phao sunga nangei na ringchang ha pha rang sarukka ka am na ah wa num no chao ae. 41 Keina malmashi ngei na dom ma shi di nonge. 42 Chuti weta keina chu nangei hi ejongpa malmashi moti ha dang inge hana Chungthieng ta nangei lung sunga lungshit am no ae ti kom dang inge. 43 Kaphao hi kapathieng hina ane angam hita phao ha inge chuti weta nangei na kei ta lah num no ae; atujong akha na mathei chakka ane angam hitta phao hajui amo ta chu lah num meh. 44 Nangei na akha lea akha nangei mashel dom hlak di chau ae chuti weta nangei na Chungthieng athei chakna dom ranga ephao hot na no ae chuna sarukka alota nangei na keita ngoiring ang sha? 45 Keina nangei ta kapathieng am na ah aral nei nunt pe ange ta hal no oh, nangei na lungranga am Moses na tieng naral mei nunt pe ange. 46 Ejonga nangna routakka Moses ta ngoiring ta lea chu keitakom ngoiringo, rouram chu majiek rou ha karou ae. 47 Chuti weta nangei na majiekka shi ngoiring no am sou chu alo ta chu nangei na karilla am hi ngoiring ang sha?”
Malmashi Lasing Ranga Ta Bakpi Na
1 Hina waitakka Jisu na Galily tuipi lalla thingso. (Tiberias tuipi ta kom kokkae.) 2 Wairul riha na manutieng jui je, rouram chu mani na Jisu na angakpi ah rai eja ta madampi hana. 3 Jisu na mullon na kalla arui ngei hitta thing weta ongso. 4 Lanpina reen kom apha leima neija wa so ae. 5 Jisu na ahul tunga an juija wairul riha na makolla wak ripha so. Chuna pa chu amo na phelip ta sai, “Hoija amunt na ani na hija tam mani bakpi rung lei thing ang meh?” 6 (Marilla am hi Phelip ta chang an na routakka chu amo na ejongpa tullu lu ang sa dang su so ae.) 7 Phelip na sang, “Na mani limpa hi na atan te hal kom chungsap ti ranga chu rupa rihanie ah budol na kom lei ja hop hlak kang no ae.” 8 Adang marui Simon Pitar mata Andrew na ril, 9 “Hina rungthar sanao te akha kolla budol ranga lea tuiriek ani chu am meh, chuti weta mani hija tam hina taranga chu hophlakkang no ae.” 10 Jisu na manita ril, “Malmashi ngei ha ong ranga ae pi oh.” (Amunt hana tingthou leima am meh.) Hana ong malmashi ngei ha spa ngei chakka lasing ranga jongpa ae. 11 Jisu na budol lah weta Chungthieng kolla nie so, hana onga am malmashi ngei ta sam piso. Hana amo na tuiriek kom hahekta ae weta ma ngei na mani hop ma lim ma pe so. 12 Mani na shihakti so nu ti juija Jisu na arui ngei ta ril, “Atan atun tulla am ngei ha rachon pi oh anina ariem salla houno ei oh.” 13 Chunapa chu mani na ha lim pa ha rachon pi juija chu tai asom anie sunga shi so, malmashi ngei na budol baksu waitakka. 14 Jisu na ri pi ah am angakpi ri veta malmashi ngeina ril, “Routakka simlei chunga jung ange ti Chungthieng rou phupa mee ha amo ange!” 15 Jisu na dangpa so mani na makolla wa weta mani rengpa chang ranga amota mant nange ta; chuna amo na adang mullon thinga thing so.
Jisu Na Tui Chunga Thing Na
16 Nietak apha pha juija Jisu rui ngeina tuipi ah tumma jungso. 17 Kung sunga lut weta kapharnahum tienga tuipi lalla thing so, jantieng pha wa so, Jisu chu mani am na phao no songe. 18 Hana lei apha sunga ajap ahai hanga tuijul hella hangso. 19 Arui ngeina kung holla thinga kilometres ranga aruk hai thou wa Jisu na tui sunga kal choi ja mani kung neija wak ripha so. Hana mani na tri thouso. 20 “Atri no oh,” kei inge ta Jisu na manita ril. 21 Hana manina ariemma Jisu ta kung sunga rui lutpi weta apha hana makka mani kung ha mani tung rang amunt mani matienga tungso.
Malmashi Ngeina Jisuta Jong Na
22 Hana huwar rungnie ah wairul riha tuipi aralla am na dangso, ha chu kung sanao akha chak am meh. Hana Jisu na marui ngei hitta thing ha no weta manina dangso. Arui ngei na amota houphurra thingso. 23 Adang kung akha kom Tiberias hai thou wa-ah tuipi ahou tungso Jisu na budol dom weta mani bakna amunt ha nei hlak so. 24 Wairul riha na Jisu akha chu arui ngei hana am no juija, manina hana am kung hana lut weta kapharnahum tienga Jisu ta jonga thingso.
Jisu Hi Ringchang Budol Ae
25 Malmashi ngei na Jisu ta tuipi aralla mani tukhlak juija manina makolla ril, “Arengpu, etikka na amunt tunga che?” 26 Jisu na sange, “Keina adiek rou nangei kolla rillinge. Nangei na keita jonga rol hi, budol nangei bak sarukka akha chu nangei dit pha jarra ae aeneleh nangei na ri sarukka no ae. 27 Abak taranga tullu lu no oh hrano tah ange, hana hutta samla rinchung taranga tullu lu pa na sottek kange na abak hi ae, meesanaopa na pekkang ha, rouram chu pa Chungthieng na machunga shi angei ha ae. 28 Chuna mani na makolla sai, “Kani na e tullu lu anga meh Chungthieng na kanita dit tullu lu ang hi? 29 Jisu na sang, “Chungthieng na nangei ta adit tullu chu mahla mee hata ngoiring ha ae. 30 Mani na sang, “Ejongpa anealah kanita ri pi anga che, kani na naha ri weta nangta ngoiring ranga? Ejongpa ae ang che? 31 Kani pi pu ngei na ramrukka Manna bakpha ae, jieksha rou na ril nujuija “Amo na thangwan hai thou badol bakranga pe ae.” 32 “Keina adiek rou nangei kolla rillinge.” Jisu naril, “Moses na nangei ta pek budol ha thangwan hai thou ah no ae; Ka pathieng na nangei ta pek budol ha chu athieng thangwan hai thou ae. 33 Chungthieng na pek budol ha chu thungwan hai thou wa tumma jung weta maringchang simlei taranga pekha ae?” 34 Manina makolla sai, “Arengpu,” “Kanita hajon budol ha apha chang honna pepi oh.” 35 Jisu na manita ril, “Ringchanghina budol ha kei inge.” “Atu motieng kakolla wa mee chu awon tam am mangno ae; keita ngoiring mee amo na tuiral ti kom am mang no ae. 36 Atun chu keina nangei kolla rilla aminge nangei, na keita ri so chau ae chuti weta ngoiring no chau ae. 37 Kapathiengna keita peksha nangei lim hi, ka kolla wa ange, ka-am na wa mee akha phao nutienga lea pi ang nonge. 38 Rouram chu thangwan hi thou wa kajung hi kahal ha ae ranga jung nonge, keita hla mee amo hana ahal ae ranga jung inge. 39 Akha chu keita hla amo hana ahal ha ah ae amona kakolla pek limhi akha phao mangpi ang nong ae, chuna sarukka keina atreem na rungnie ah mani lim pa ta ringa thou pi ah ringchang pe anga ae. 40 Hina rouram ma pathiengna dit meesanaopa ta ri meelim na amo ta ngoiring lea chu samla ringchang pha ange, hana keina mani ta atreem nie rungnie ah thoupi weta ringchang pa ange.” 41 Malmashi ngeina amota ril hlak thou so, ha chu amo na rilleh, “Kei thangwan hai thou jung budol inge.” 42 Chuna manina ril, “Na spa hi Jisu no meh Josep sanao pa ha? Ani na mapa manu danga am weta alo ta amo atun thungwan haithou jung inge ta rilla meh?” 43 Jisu na manita ta ril, “Nangei thei chakka rilhlakka am ha chanjou oh. 44 Keita hla kapathiengna lamkaija wa ano wa chu atu akha na kom kakolla wa nea no ae hana keina amota atreem nie rungnie ah ringthou pi ange. 45 Rouphupa na jiekka shi so ae, ‘Chungthieng na meelimpa ta chupi ange.’ Hana kapa kol hai thou mee atujong lim akhana theija dang nakakolla wa ange. 46 Nahina rilna chu meelimpa na kapathieng ta ri so ae ti na ah no ae. Chuti weta Chungthieng kolla am amo na chak kapa ta ri pha ae. 47 Keina adiek rou nangei kolla rilla aminge, atu motieng ngoiring mee na samla ringchang pha ange. 48 Ringchang hina budol ha kei inge. 49 Napa napu ngei na ramrukka Manna bak phur ae, chuti weta mani ha thi ae. 50 Chuti weta thangwan hai thou jong budol bak mee chu lungshi thei ah athi am ang no ae. 51 Thangwan hai thou jung aring budol ha kei inge ejong atujong akha na, na budol bak mee amo na atreem nei no wa ring ang ae, hana makolla kapekkang budol ha chu katak mak ae hana kapek hachu simleija aring pha range.” 52 Nahina mani karak sunga hella lungsha hlakka trong jethlak thou so. “Alota na spa hina matak ta abakranga ani ta pe ang sha?” Mani na sai. 53 Jisu na manita ril, “Keina adiek rou rillinge; ejonga nangei na katak akha chu meesanaopa hana athee inn no lea chu nang natakmakha ringchang pha ang no che. 54 Atujong akha na katak akha chu kathee inn meelim pa na samla ringchang pha ange hana atreem nie rungnie ah kei na ringchang pe ange. 55 Chuna katak ha chu routak budol ae hana routak inn ranga hachu kathee ae. 56 Atujong katak bakmee akha chu kathee inn mee amona kakolla ringe, hana keina kom makolla ring inge. 57 Aring pathiengna keita hla jarra keikom ring inge hana hekta atujong keita bak mee amo hakom kajarra aring pha ange. 58 Hina sarukka thangwan hai thou jung budol ha napa napu ngei na bak phur budol ano ae mani thit ha chu hana tujong na hi budol bak mee na atreem nei no wa aring pha ange.” 59 Jisu na, na hi Kapharnahum Synagogue sunga chupi takpi ae.
Samla Ringchang Rou
60 Manutieng jui meelim na rou hi thei weta ril, “Machupi hi leima akai ae atuna ngeine ang meh?” 61 Manina ril shuk no hal, Jisu na mani lungsunga rillhlakka am dangpha ah manita ril, “Na hina ngeita akai shukpi ah mo ae? 62 Chu lea chu mee sanao pa na masha ah ma am na ah lea weta kal ri ta lou chu alo ta rillanga chau? 63 Ringchang pek ha chu Chungthieng muihla sa ae; malmashi jaitha chu areem sum lea, nakolla karil rou ha chu muihla akha chu naha aringe. 64 Chu phao sunga nangei na ngoiringno chao ae.” (Jisu na dange athou hai thou wa atu ngeina ngoiring ang no ngei, akha chu amota jurra hou ang akha ha ta.) 65 Hana amona hikom rilleh, “Hina sarukka atu akhana kom kapa hai thou wa pe ah no wa chu ka-am na ah wa nea ang no ae.” 66 Hina rou sarukka Jisu nutieng jui eja na nungtienga lea ah amo hitta anutieng chu thingha nea no ae. 67 Chuna sarukka amona marui asom anie ta sai, “Nangei na kom manihekta houphurra thingnum ma chou?” 68 Simon Pitar na makolla sang. “Arengpu kani chu atu hitta thing ha ang meh? Samla ringchan pe nea rou ha nakolla am ae. Nangna rou wa chu nangna samla ringchang pe angeti. 69 Atun chu kani na ngoiring shung ae akha chu nang hi athieng Chungthieng kol hai thou ah jung ae ti hi dang shonge.” 70 Jisu na sang, “Keina nangei asom anieta halla shuk no wa meh? chu phao sunga nangei sunga akha chu dijabol ae!” 71 Marilla am hi Judas, Simon Iscariot sanao pa ta ae amo na arui asom anie sunga akha hal kom amona Jisu ta jurrange.
Jisu Ulea Nao
1 Hina waitakka Jisu na Galily ah thingso; Jewish ane angam ngei na amota that rang ae ah am jarra, amona Judea ram tienga thing num no ae. 2 Jew ngei tusang reen kom leima ngija wa so. 3 Hana pachu Jisu uleh nao ngeina makolla ril, “Na amunt hi houphur weta Judiah ram tienga thingo. Chu lea chu nanutieng jui mee ngeina na ae ah am tullu limpa ri ange. 4 Atu akha na aming thangpi num lea chu matullu ae thuppa shi no ae. Nangna na tullu lu ah na am hina simlei ram lim pana nata dang su oh!” 5 (Ma-u-manao ngeina phao amota ngoiring no ae.) 6 Jisu na manita ril, “Kataranga acha apha ha pha no songe, chuti weta nangei taranga chu apha changhonna acha ae. 7 Nangei ta chu simleiram na anda no ae keita anda ah ae chunasarukka keina apha chang honna karilha malmashi ngei thabak hra no aeta ka ril shuk sharukka keita chin simlei malmashi ngei na chu anda ae. 8 Nangei chu reen ha tol thingo, kei chu reen ha thing ang nonge rouram chu kataranga apha acha ha phao no songe.” 9 Nahi ril weta, amona Galily ah am phur so weh.
Jisu Na Tusang Reen Sunga
10 Ma-u-manao ngei na reen ha thingsu waitakka Jisu kom thingso, chituhalkom amo chu aruhan ta thinge phongsonga thingno ae. 11 Jewish ane angam ngei na chu amota anna rolla am hana reen sunga manina sai “Amo ha hoija am meh?” 12 Mani wairul riha karsunga aru aru ah rilhlak so. Ahre na chu, “Amo hi ahra spa ae,” adang ahre na chu “hra no ae,” adang na chu, “Amona malmashi ngei ta lam diekno wa lamkai ae.” 13 Chuti weta atu akha kom awau shukka trong no ae, rouram chu mani na Jewish aneangam ngei ta atri jarra. 14 Reen ajai challa wakjuija Jisu na athieng inn sunga lut weta chupi takpi thou so. 15 Jewish ane angam ngei na ehekta hliwir shukka ril, “Alo ta na spa hina hoija kom chu thing no weta hija danga am ma meh?” 16 Jisu na sange, “kachupi ah am hi katak hei thou mak ah no ae, Nahi keita hla Chungthieng hai thou junge. 17 Atujong na ae num lea Chungthieng na ejongpa di moti dang ange, hana ka chupi lim hi kom Chungthieng ningtieng hai thou mo anoleh kathei chakka ane ah moti dang ange. 18 Malmashi akha na mathei chakka ane angam ma trongshuk chu amo na mahung majai ha mathei chakka pha num ma ae. Chuti weta atu jong amo ta hla mee taranga ahung majai am mee chu alung thieng ange hana makolla diekno ephao am mang no ae. 19 Moses na nangeita roukung pe pa ha? Chutihalkom nangei akha phao na roukung anu jui no ae, alo sarukka nangei na keita that tang ae ah chau?” 20 Wairul riha hana sange “Atu na nangta that tang ae ah meh? Nalung sunga dijabol am meh!” 21 Jisu na sange, “keina anealah akha ri pi lea chu nangei limpa na hliwir shuk kange. 22 Moses na nangei sanao asarh tan rang trongsan pe ae (hihi Moses thou ah no ae chuti weta pi pu thou ah ae) hana nangei sanaopa ngei asarhtan ha sabbath nie ah tan ae. 23 Ejonga apasanao te ngei asarhtan ha sabbath nie ah tan lea chu Moses hina roukung pek ha kuipi no wa, ejeranga keina sabbath rungnie ah malmashi ta kadampi juija nangei lungsha ah chau? 24 Malmashi mai an weta routreem no oh chuti weta adiek rou ha diekka routreem ae oh.”
Amo Hi Messiya Meh?
25 Jerushalem ma am malmashi ahre na rilleh, “Ane angam rouron ngeina thattange ta jonga rol mee ha amo no meh? 26 Anno! Amo na meelim maikunga maril rou ha manina ephao makolla ril nea no ae. Mani na routakka amo hi Messiya ae ta danga meh? 27 Chuti weta Messiya na phao juija chu atu akha na amo hi hoitienga phao mo dang ang no ae, hana ani na dang ange na spa hi hoitinga phao sa.” 28 Jisu na athieng inn sunga machupi ah amleija amona arol ringa ril. “Nangei na routakka keita danga chau meh hana kei hoi thou wa phao sa ti hi? Kaphao hi kathei chakka ane angam ma phao nonge keita hla amo ha chu adiek mee ae nangei na chu anota dangno ae. 29 Chuti weta kei chu dang inge rouram chu kei hi makol hai thou phao inge hana ano na keita hla ae. 30 Chuna mani na amota mant rang hot na ae chuti weta atu akha na machunga aban dok shuk mee am no ae, rouram chu mata apha ha pha no songe. 31 Chuti weta wairul riha na mee ejana amota ngoiringa mani na ril, “Messiya na phao jui amo na spa hitta hella anealah ae nea ang meh?
Jisu ta Manrang Chak Ngei Hlan Na
32 Wairul riha na Jisu hina rou ril hlak tronghlak ha Pharisis ngei na theipha ah manina chungtekti thiempu ngei hitta bomtol weta Jisu ta mant ranga ahak ngei ahre hlaso. 33 Jisu na ril, “Keina apha atan te sunga nangei hitta am ha ange hana waitakka chu, keita hla mee am na ah thing ange. 34 Nangei na keita jong ang chau, chuti weta nangei na keita tuk kang no chau, rouram chu ka am na ah nangei na chu thing nea ang no chau weh.” 35 Jewish ane angam ngei na mani mashel rilhlak so. “Anina jonga tukkang no na hoija amunt am ma-amo na thing anga meh? amona Grik hupi ah thing anga, ani mee ngei am na ah. Thingveta Greekta chupi takpi anga meh? 36 Maril ha anina amota jong rol ange, chuti weta amota chu tuk kang no ae hana ma am ang na amunt na ani na thing nea ang no ae ti chu eta rilna mo ae?”
Aring Ringchang Tuichier
37 Ehekta mara oi akha chu atreem nie reen rungnie ah Jisu na ngir thou weta sanrol shukka ril, “Atujong tuiral mee na ka am na ah wa weta inn wa oh.” 38 Jieksha rou hana ril ae, “Atujong mee na keita ngoiring lea chu ringchanga pek tuichier ha malunga bun pi ange.” 39 Jisu na muihla rou ha rille, atu motieng amota ngoiring mee na pha ange hanalei apha makka chu muihla hi pe no songe, rouram chu Jisu hi ahung ajai tolla ringthou no songe.
Meengeina Ani Shukka Hrana
40 Wairul riha sunga hai thou wa malmashi ahrena hi rou hi thei pha ah rilleh “Na spa hi routakka Chungthieng rouphupa ae!” 41 Adangei na ril, “Amo chu Messiya ae!” Chuti weta adangei na ril, “Messiya chu Galily hai thou wa phao ang no ae! 42 Jieksha rou na rilleh, Messiya chu Rengpa David ngei atu ate sunga Bethlehem ram ma don nange ti ae, David na am phur na hulokka.” 43 Chunapa chu mani wairul riha sunga Jisu hina rou wa ahran pha hlakso. 44 Ahre na chu amota mant num ae chuti weta atu akha na makut ta chu oh nea no ae.
Jehudi Ane Angam Ngeina Ngoiringno Na
45 Ahak ngei na lea juija chungtekti thiempa ngei lea Pharisis ngei na manita sai, “Alo wa nangei na amota rui ja phao no wa chau?” 46 Ahak ngei na sang, “Malmashi lim pa na spa trong hekta trongne no ae!” 47 Pharisis ngei na mani ta sai, “Nangei ta kom lam adanga ruijo meh?” 48 “Ane angam ngei kar sunga ano lea Pharisis ngei atu jong akha na amota ngoiring jou meh? 49 Na wairul riha na Moses hina roukung ha dang no ae chuna mani ha Chungtheing na sarkou tukka am meh!” 50 Pharisis sunga Nicodemus Jisu kolla thing weta amatienga anthing amo na adangei kolla ril. 51 “Ani roukung anuting juija ani na ma lu tullu ejongpa mo tukhlak malim ma, akha chu kok weta marou thei malim chu amo ta neinunt pe ngei no ae.” 52 Manina sang, “hra so weh,” “Nangkom Galily hai thou wa cha mo ae? Jieksha rou jonga akha chu nangna tuk hlakkang no ae Galily hai thou wa thiempu akha phao shuk kang no ae.
Simsi Bohron Namei Nuta Mant Na
1 Hana mani inn lam ma lea ah, Jisu na Olives mullon tienga thingso. 2 Hana huwar nituk chama angal apha ah Jisu na athieng inn sunga lea so. Makolla meelim pana ahul tunga ongveta amona mani ta chupi takpi thou so. 3 Roukung ocha ngei na akha chu Pharisis ngei na Simsi-bohron namei nu akha mani lim maikunga ruija wa weta ngirpi so. 4 Manina Jisu kolla ril, “Ocha, na numei hi simsi-bohron ae leimakka kani na mant song ae.” 5 Kani Moses roukunga chu hita trongsan pe ah shi ae, hijong namei ta chu alunga denga thatto ta chuna nangna chu alo ta ril num che?” 6 Jisu ta changa mant nang na hi mani na ril ae chuna amota neinunt peak ranga chuti weta amona oun weta alei chung akut challa hita jiekso. 7 Manina hata ngirra am weta makolla sai amona ngirthou weta amomakna manita ril, “Nangei kar sunga atujong pak am no akha na masha ah alung namei nu ta dengo.” 8 Hana amona oun weta alei chunga jieksierso. 9 Manina rou hi theijuija mani akha akha houphur ulien tek ti pa na masha Jisu chak am phur so. Hana nameinu ha chu hata ngirra am the songe. 10 Amo matak makna ngir thou weta namei nuta ril, “Mani ha hoi ah thing so meh? Atu akha phou nanta neinunt pe ang amphur no meh?” 11 Namei nu na sang, “Arengpu atu akha phao am no ae “hra so ae.” Jisu naril, “Keina nangta ephao neinunt pe nonge, chuna thing jou oh chuti weta lea oh pak tullu lu no sa oh.”
Jisu Hi Simlei Chunga Awar Ae
12 Jisu na Pharisis ngei kolla woiha lea ah rilleh, “Kei hi simlei hina awar inge.” Amona ril, “Atu jongpa na kanutienga jui lea chu amo ha awar ringchang pha ange hana athiem thuija etik kom thing ang no ae.” 13 Pharisis ngeina makolla ril, “Nangna nathei chak ka narou ah ril shuk che ae chuna narou ha na saro na ei ha adiek no ae.” 14 Jisu na sange, “Ano ae,” “Kei na kathei chakka karou wa saro ei halling kom karil ha adiek takkae, rouram chu keina dang inge kei hi hoitienga thou phao sa hana hoitienga thing ang sha nangei na chu dang no ae kei hi hoi thou wa phao hana hoija thing ang sha. 15 Nangei na pum ma an weta routreem ae chau ae kei chu atu akha ta kom routreem ae nonge. 16 Chuti weta ejonga keina hajong routreem ae lea chu diekka ae ange rouram chu na ha kathei chakka ae ang nonge keita hla kapana ka-am na ah am tolae. 17 Nangei roukunga chu hita jiekka shi ae, mee ani na saro eipi lea chu nangei na mani ril ha adiek so ae. 18 Kathei chak ka rou ha kei na saro ei halling kom kapana karou wa amona saro ei pi ae.” 19 Mani na sai amota, “Napa chu hoija am meh?” Jisu na sange, “Nangei na kapata kom keitakom dang no chau ae, ejonga nangei na keita dang ta lou chu kapa ta kom dang anga ae.” 20 Jisu na nalim pa hi athieng inn sunga pektheina upu am na amunt ka sunga chupi takpi halkom atu akha na amo ta mant no ae, rou ram chu mapha pha no sarukka.
Kathingna Amuntna Nangeina Thing Nea Ang No Ae
21 Woihapa Jisu na manita ril, “Keina kathing juija; nangei na keita jong ang chau ae, chuti weta nangei chu nangei pakka thi ange chuna nangei na kathingna ah nangei na thing nea ang no ae.” 22 Chunapa chu Jewish ane angam ngeina ril, “Amona rilleh ani na mathingna ah ani na thingne ang no ae. Hina rilna rou chu amo na mathei chakka that tikkae tina mo nu?” 23 Jisu na sange, “nangei chu, na simlei chunga mee ngei ae chuti weta kei chu achung tieng hai thou phao inge nangie chu na simlei chunga ae kei chu na simlei chunga nonge. 24 Nangei pak hana nangai thi ang chau ae ta keina nangei kolla ril no meh. Hana kei hi atu moti ngoiring no tlou chu nangei pak hana thi ang chau ae.” 25 Mani na makolla sai, “Nang chu atu ah cha meh?” Jisu na sang, “Keina nangei maikunga athou hai thou wa karilha. 26 Keina nangei kolla karilang leima tam am meh, nangei kolla hana taranga neinunt kapekkang am meh keita hla mee ha chu adiek takkae hana simlei mee ngeita ka rilhi makol hei thou wa athei ha chak ae.” 27 Jisuna mapa hana rouram ma manita rilla am meh ti hi sungjel thei no ae. 28 Chuna pa chu manita ril, “Meesanaopa ta dom shijuija nangeina dang ange kei hi atu mo; nangei na dang ang chau ae keina eikom kane matik ephao ae no ae tihi, chuti weta karil rou hi kapana keita rou chu ha chak rilla ae. 29 Hana keita hla amo ha kakolla am tolleh, amo na keita ka thei chakka houphur no ae rouram chu apha chang honna malunghop rang tullu chak lu inge.” 30 Jisu ril thei meelim na amota ngoiringe.
Adiek Hana Nangta Arimshala Hla Ange
31 Chuna Jisu atujong amota ngoiring mee ngei kolla ril, “Ejonga nangna kachupi kakakpi jui ta lea chu nanghi adiek takka karui ae. 32 Nangei na adiekha dang ange, hana adiek hana nangei ta arimshala hla pi ange.” 33 “Ani hi Abraham atu at-engie ae” mani na sang, “Hana ani na hoi ah kom meekor changna am no ae. Nangei ta hla pi ange ta marilna rou hi alo tina mo ae?” 34 Jisu na mani ta ril, “Keina adiek rou nangei kolla rillinge atujong akha na pakka am lea chu amo ha pak hana kor ae. 35 Kor hana ma am na inn sung hitta atreem nei no wa am ha ngei no ae chuti weta sanaopa chu atreem nei no wa am ha ange. 36 Ejonga sanaopa na nangeita arimshala hla pi lea chu nangei ha adiektakka arimshala hla pi so ae. 37 Keina dang inge nangei hi Abraham atu ate ngei ae ta, chu phao sunga nangei na keita that ranga hot na chao rouram chu nangei na ka chu pi katakpi ha lah num no ae. 38 Kapana keita ri pi ha keina ril singe hana nangei na kom napa na nangei kolla rilha ae oh.” 39 Manina sang, “Kani pa chu Abraham meh.” Jisu na sang, “Ejonga nangei na adiek takka Abraham sanao ngei lea chu nangei na ma ae hekta nangei kom ae oh.” 40 Eheilimpa ka tullu lu chu nangei kolla adiek rou rillanga ae keina Chungthieng hai thou wa theipha inge chu phao sunga nangei na keita that ranga hot na chao ae Abraham na chu hita eiko ae no ae! 41 Nangei na lu tullu chu napa na kom hata ae sarukka ae manina sang. “Chungthieng amo chakkae kani pa ha chu. Hana kani hi adiek tak masanao unge.” 42 Jisu na manita sang, “Ejonga Chungthieng hi adiek takka nangei pa ah lea chu nangei na keita lungshi anga ae rouram chu kei hi Chungthieng kol hai thou phao inge hana atun keina hina am singe hina kaphao hi kathei chakka phao num ma phao nonge chuti weta keita amo na hla pi ae. 43 Alo sarukka nangei na karil rou hi song jel thei no wa chao? na hi nangei na karou ril hi hrabakta ngei thei no sarukka ae. 44 Nangei chu hrano dijabol sanao ngei ae, chuna nangei na napa na adit hana na juija thing num chao athou hai thou wa amo chu mee that mee ae hana makolla adiek ekom am no ae. Amo chu murthai mee ae hana marthui matrong juija mataranga chakkae amo chu murthai ngei lim hana mapa ae. 45 Chuna saruka keina nangei kolla adiekka karil juija nangei na keita ngoiring no ae. 46 Atu na nangei kar sunga keita pak nagam ae so ae ta takne ang meh? ejonga keina nagei kolla adiek karil jui hana allo ah keita ngoiring no chau meh? 47 Chungthieng ningtieng haithou phao ngei na marou ha ngei ae nangei chu Chungthieng hai thou wa ano sou chu nangei na ngeinum no ae.”
Jisu Lea Abraham
48 Manina Jisu ta sai, “kanina nangta Samariah akha chu nakolla dijabol am meh ta rilla chu anonge?” 49 Jisu na sang, “Kakolla dijabol am no ae.” “Keina kapata ajak atri inge chuti weta nangei na chu keita ajak atri no ae. 50 Keina kathei chakka ajak atri ranga jonga rol nange chuti weta atu mo akha na kataranga amona routreem ae pi ah jonga rolla am meh. 51 Keina nangei kolla diekka rillinge; atujong akhana kachupi katakpi jui lea chu athi pha ang no ae.” 52 Manina makolla ril, “Atun chu kani na hrabak ta dang so ae nakolla dijabol am meh! Abraham kom thi ae hana Chungthieng rou phu ngei kom thi ae chu phao sunga nangna nachupi natakpi jui ngei chu athi ang no ae. 53 Kani pa Abraham athi hata nangna hella loktek ka che? hana Chungthieng rouphu maril ngei kom thi ae nangna alota nang chu alo ti inge ta halla che?” 54 Jisu na sang, “Ejonga kei na kathei chak taranga ajak atri ang lea hajong ajak atri ha chu ekom am no ae keita ajak atri ae amo ha keita ano ae kapata ae hana nangei na rilla am ha Chungthieng amo ta ae. 55 Nangeina amota ephao dang no ae chuti weta kei chu dang inge amo ta ejonga keina amota dang nonge ta rilleh chu keikom nangei hekta murthai mee ae chuti weta kei chu amota dang inge hana keina marou kom jui inge. 56 Nangei pa Abraham na kaphao ang apha hana taranga riem ma am meh, hanan mari jui ja leima tam ariem meh.” 57 Mani na Jisu kolla ril, “Nang chu akum som-nga kom ulien no weta nangna alota Abraham ta ri ah che?” 58 Jisu na sang, “Keina nangei kolla adiek rou rillinge” “Abraham pok matienga, ‘kei am phur singe.’ ” 59 Hanapa chu manina alung sarweta amota deng ang ae pa chu amo na bi weta athieng inn houphurra thing so.
Apokhai Thou Wa Amittcho Spa Jisu Na Dampi Na
1 Jisu na hata mathing juija adon haithou wa amit cho spa akha ta riso. 2 Marui na Jisu kolla sai, “Ocha atu pakka amo hi amit cho ah don na meh? Nahi mapakka mo ano lea manu mapa ngei pakka meh?” 3 Jisu na sange, “Mamit cho hi ephao mapakka akha chu manu mapa pakka ah no ae. Mamit cho hi Chungthieng na mahung majai ha mee na dang ranga ae. 4 Nahi ani na am lei lim chu anina hla amo mataranga ani na hata tullu lu ah am tah ae jantieng apha phao so ae atu akhana tullu lu ang no apha. 5 Keina alei ramma ka-am lei lim chu keina aleiramma awar ha kei inge.” 6 Nahi maril sutakka, Jisu na alei chunga achil shak weta amo na adur sem ma amo na adur ha mitcho spa mitta tai so. 7 Hana amo na ril, “Siloam tuikum ma thing weta namai phi tingo.” (Siloam ril na chu “hla.”) Chuna na spa hana thinga, amei phi ah amit ri ah lea so. 8 Ma inn-ning kolla am mee ngei nakom amo ta bunie mee ae ta ril phur ae malmashi ngei na sai, “Na spa hino meh ong weta sum nie pa ha?” 9 Adangei na ril, “Amo ha ae” Chu ti weta adangeina ril “Amo ha no ae” amel malla sa ae.” Chunapa chu matak makna ril, “Spa ha kei inge.” 10 “Alota nang atun chu ripha nea ah che ta?” mani na mokolla sai. 11 Amo na sang, “Jisu ti spa na adur sem weta kamitta tai pi ae, hana Siloam tuikum ma thing weta kamai phi thingo ta rilleh, hana keina thing weta kamai phi su inn len keina ripha singe.” 12 “Amo ha hoija ammeh?” mani na sai, “Amo na sanga “kei dang nonge.”
Damna Rou Hana Pharisis Ngeina Jongna
13 Hana mani amit cho houphur pa hata Pharisis ngei am na ah rui so. 14 Jisu na adur sem weta mitcho pa ta dampi nie rungnie ha sabbath nie ae. 15 Pharisis ngei na spa mitcho houphur pa ta sai, alo ta amo na amit ri ah meh, amona mani ta ril, “Amo na adur ahre lah weta kamitta taipi ae, hana kamai kaphi jui hana chu keina rine singe.” 16 Adang Pharisis ngei na ril, “Na spa ha Chungthieng ningtieng hai thou ang no ae rouram chu amo na Sabbath hana rou jui no ae.” Chuti weta adang ahre na ril, “Alo ta chu pak chel mee akha na chu hijongpa anelah tullu lu nea anga meh?” Chuna mani kar sung abom adang adang shukso. 17 Chunapa chu Pharisis ngei na woihapa lea ah spa hata sai sier so. “Hra so ae nangna namitcho hi madam pi ae ta ril ta lea chu nangna chu amo ta alo ta ril num ma che?” Amo na sange, “Amo chu Chungthieng rouphu mee ae.” 18 Manu mapa ta kok ma limphao, manina spa ha mitcho houphur ae akha chu ri so ae ti hi manina ngoiring num no ae. 19 Hana mani na sai, “Na hi nasanaopa mo ae? nangei na chu adon hai thou wa mitcho ae rilleh atun chu alo ta amo na ri ah meh?” 20 Manu mapana sange, “Kani na kani sanaopa ae tihi dang unge hana kani na adon hai thou wa mitcho ah don ae ta dang unge. 21 Chuti weta kani na dangno chu alota amo na amit ri nea mo, hana atu na amota dampi mo chu kani na dang nonge amo ta sai oh, Amo ha ulien chang so ve amo na, nalim pha sang nea ange!” 22 Manu mapa na na rou ril hi, Jewish ane angam ngei ta atri jarra ae rouram chu atujong akha na Jisu ta Messiya ae ta ngoiring mee ano ah Synagogue sung hai thou aming kakka julla hla ange ta angei hlak am sa so ae. 23 Hana sarukka ae manu mapa na ril, “Amo ha ulien chang so ae makolla sai oh!” 24 Woinie sunapa ah mani na adon hai thou mitcho pa kokka lea weta sai, “Chungthieng maikunga saro ei ah adiek rou rillo! Kani na nangta dampi mee ha dang unge amo ha pakchel mee ae.” 25 “Kei na dang nonge ejonga amo hi pak chel mee mo mee no mo,” “Kadang akha chu am meh, kei hi mitcho mee inge chuti weta atun chu keina ri pha nea sange” ta ano na sang. 26 Mani na sai, “Alo ta amo na nangta aepe meh? “Alo ta amona namit acho ha dampi meh?” 27 Amo na sange, “Kei na nangei kolla ril su sange” “Hana nangei na ngeinum no ae, chuna alo sarukka woiha pa thei num ma chau? nangei tieng marui chang num ma chou meh?” 28 Mani na trongsi ah ril, “Nang chu hajong mee hana rui ae; chuti weta kani chu Moses nu jui mee unge. 29 Kani na dang unge Chungthieng na Moses tolla rou rilla hla ae, hana hajong spa ha chu kani na amo hi hoitieng hai thou phao mo phao dang nonge!” 30 Spa hana sange, “Ehekta angakpi ahno meh! nangei na amo hi hoitieng hai thou phao mo ti dang no hal amo na chu kei kamit ri pi ae! 31 Kani na dang unge Chungthieng na pak chel ngei kok thei num no ae, hana Chungthieng chu amota ajak atri ah mok ngei ta rang chak ae pi ae. 32 Simlei hi athou hai thou wa atu akha na theipha no ae adon hai thou wa mitcho mee na ripha so ae ta. 33 Nahi Chungthieng ningtieng hai thou ano wa chu amo na hijongpa tullu lu nea ang no ae.” 34 Manina sang, “Nangchu adon hai thou wa pakchella lokka sai ah hange hativeta nangna kanita chupi takpi ang hotna am ma che?” Hana mani na Synagogue sung hai thou amota julla hla so ae.
Muihla Ah Mitcho Na
35 Jisu na shukka am ngei theipha juija amona spa akha tukhlakka makolla sai, “Nangna meesanaopa ta ngoiringa che?” 36 Spa na sang, “Kaning nga rilpi oh amo atu meh Arengpu, chu lea chu keina amo ta ngoiring tik ae!” 37 Jisu na makolla ril, “Amota nang ri so che ae hana amo ha chu atun na nang hitta tronga am pa ha ae.” 38 Spa hana ril, “Jisu maikunga ahuk hrun weta kei na nangta ngoiring ing Arengpu!” 39 Jisu na ril, “Simlei chunga kaphao hi routreem ae ranga ae chuna mit cho ngei na ri nea ange hana amit ri ah am ngei na mitcho ange.” 40 Pharisis ahre hana am ha ah maril rou thei ngei na makolla sai, “Chuleh kani hi mitcho mee ae rilna mo?” 41 Jisu na manita ril, “Ejonga nangei na mitcho lea chu nangei ha pak am no ae chuti weta atun nangei na mit ri unge ti sou chu nangei ha pak chella am mee ae.”
Ahra Kelmo Rungpa Hina Panteem
1 Jisu na ril, “Keina nangei kolla adiek rou rillinge innkalla lut no kelmo hana adang lam ma lut kelmo ha chu aru thei mee ae. 2 Hana innkalla lut mee amo ha chu kelmo ngei hina kelmopu ae. 3 Innkal hakpa na amota innlamhar honga am meh, hana kelmo ngei na kom masanrol ha thei ae, amo na makelmo ngeita mata mata minga kokke hana amo na manita lamkai ah rui ah shukkae. 4 Amo na ruija mashukjuija mani matienga amona thinga manutienga kelmo ngeina juija thing rouram chu mani na masanrol ha dange. 5 Mani na atujong akha nutieng jui no ae hana hutta mani hajongpa kolhai thou wa tan na thinge, rouram chu mani na masanrol ha dang no ae.” 6 Jisu na na panteem hi rilveta, mani hana rilna rou ha lungkim thei no ae.
Jisu Ahra Kelmo Rungpa Ae
7 Chuna Jisu na woiha lea ah ril, “Keina nangei kolla adiek rou rillinge kei chu kelmo ngei lut na inn lamhar inge. 8 Hana ka matienga wa limpa ha aru thei ngei ae hana kelmo ngei na kom mani rol dong no ae. 9 Kei chu inn lamhar ha ah inge hana atu jongpa ka am na lut mee na sanpi pha ange; amo na lut weta akha chu shukka thing weta sachik am na ha arak jong tuk kange. 10 Aruthei meena phao chu aru rang akha chu athat akuit shukpi ang chakkae, na kajung chu mani na ringchan pha rang akha chu mani ringchanna awat am no wa shi hakta ringchan ranga ae. 11 “Kei chu ahra kelmo rungpa inge kelmo taranga thi tik ta am minge. 12 Summanek spa, kelmo rungpa ano tipa chu akha chu makelmo ah no sharukka ram ui na phao juija kelmo lim houphurra tanna thinga kelmo limpa ta ram ui na adang adang hran pi ae. 13 Summanek spa ha tran na thing ae rouram chu amohi summa nek sou chu akha chu, kelmo ngei tarang ephao halno ae. 14 -15 Kei chu ahra kelmo rungpa inge kapana kom kei ta dange hana keina kom kapa ta dang inge hahekta kakelmo ngei ta keina dang inge hana mani na kom keita dange hana kei na kom mani tarang athi tik ta am minge. 16 Kakelno adang ahre am songe mani ha avul amunt na tulno ngei keina mani takom ruija lut ah ta-ae manina kasanrol thei ang ae hana manina kelmo avul akha, kelmo rungpa akhachak chang ange. 17 “Kapana keita lungshi ae rouram chu keina karing chang pe num ma aminge woiha lea ah karingchang hi leah pha ranga. 18 Atu akha na karing chang hi kakol hai thou wa lah ah thing no ae. Kapekka ka am hi kathei chakka ariem salla keina pe inge kapekkang ha kakut chunga ammeh hana kei na lea ah kalak sier ang kakut chunga am meh. Na hi a kapana keita ae oh ta pek rakit-rou ha ae.” 19 Rouram hina sarukka mani kar sunga abom anie shukka hran so. 20 Mani atam ta na hita rilleh, “Amo hi dijabol ae! Amo hi awet ae! Ejeranga marou ngei ja am ma chau?” 21 Chuti weta adang ahre na ril, “Dijabol hita am ha spa na hijong rou rillang no ae! Alo ta dijabol na mitcho mitta ri pi nea ang meh?”
Jisu Ta Ngeino Na
22 Phalbi hla sunga athieng inn pek na reen akha Jerushalem ma ae ah. 23 Jisu na Solomon leihal athieng inna rollei ah. 24 Mee ngeina ahul tunga makolla ra chon weta sai, “Apha eja sotta kani na nangta lung chingna ah am mang meh? Chuna kani ta diekka ril pi oh nang hi Messiya ah cha meh?” 25 Jisu na sange, “Keina nangei kolla ril su sange. Chuti weta nangei na keita ngoiring no ae, kapa mane matik ka lu tullu limpana keita takpi so. 26 Chuti weta nangei na keita ngoiring no ae rouram chu nangei ha kakelmo ah no ae. 27 Kakelmo ngei na kasanrol thei ae. Keina manita dang inge hana mani na kom kaniu tieng jui ae. 28 Keina manita samlah ringchang pe inge chuna mani na thi ang no ae atu akha na kakol hai thou wa mani ta aru wa ruija thing ang no ae. 29 Kakolla manita pepipa kapa na eheilim chunga chungtek kae chuna atu akha na kapa kut chung hai thou wa ru wa thing nea ang no ae. 30 Kapa lea kei chu akha chakkae.” 31 Hana malmashi ngei na amo ta deng rang alung woiha sar so. 32 Jisu na manita ril, “Keina nangei maikunga ahra tullu eja ae sange kapana keita ae rang pekha ha tullu lim kar sunga ejongpa sarukka alung deng anga chau keita? 33 Manina sang, “Kanina nangta ahra tullu na ae sarukka alung deng ah no ae chuti weta narou ril sarukka ae! Nang chakkae nathei chakka Chungthieng changrang hotna hi!” 34 Jisu na sange, “Nangei roukung hana jiekka shi sa so ae Chungthieng ril ha, ‘Nang hi Chungthieng ae.’ 35 Ejonga amona manita hlawang ae ta kok lea chu atu taranga Chungthieng rou chu phao wa meh. (Hana jieksha rou ha chu akui am mang no ae.) 36 Kataranga chu, kapa na keita hal ae ha na keita simlei chunga hla pi ae. Kei hi Chungthieng sanaopa ae ta karil surukka alo ta nangei na keita Chungthieng ta thi ah ril ae ta halla chau? 37 Ejonga keina kapa tullu lu no lea chu keita ngoiring no oh. 38 Chuna ejonga nangei na keita ngoiring no hal kom manitarang ka ae anelah te chak chu ngoiring oh hana nangei lungkim ang chu kapana kakolla am meh akha chu keina kapa kolla am minge.” 39 Woiha pa mani na Jisu ta mant ranga hotna ae chuti weta Jisu chu mani kut chunga hai thou wa shukka thingso. 40 Hana Jisu na Jordon tuirel la samma lea ah Johon na tuilup na munt hana amo na am phurso. 41 Malmashi ngei na makolla phao weta ril. “Johon chu anelah ephao ae no ae,” mani na ril, chuti weta na spa hina taranga maril limpa hi chu adiektakkae. 42 Hana malmashi eya na amota ngoiringe.
Lazarus Thit Na
1 Bethany na am Lazaras ti spa akha ana ah am meh, Bethany ti hulok ha chu Mary akha asar nu Martha na am na ae. 2 (Na Mary hi ae arengpu kaekunga ariem hoi siektui so weta asam maru phur hana amo hina mata ana ah am Lazaras ae.) 3 Na asar nu te na Jisu kolla rourilla hla ae; “Arengpu natonpi pa ha ana ah am so ae.” 4 Jisu na nahi thei juija amo na ril, “Na Lazaras hina ana ah am hi achana ah chu mathit rang ah no ae, nahina Chungthieng na hung ajai lokka choija phao range hana Chungthieng sanaopa hana ahung ajai pha ranga ril na chang ange.” 5 Jisu na Martha, ma-ute akha chu Lazaras ta lungshi ae. 6 Chuti halkom amo na Lazaras hi na ah am meh ta thei su takka kom Jisu ha rungnie nani phai ah am songe. 7 Hana amona arui ngei ta ril, “Anina Judea ramma lea sai oh.” 8 Arui ngeina sange, “Ocha, Apha atante matienga mee ngei na nangta alung deng ang ae ha, hatveta nangna hana lea ranga semma am ma che?” 9 Jisu na ril, “Atun hi apha asom ani tah no wa meh?” Chuna atujongpa na niesoun jai ja thingleh chu kae mathui am mang no ae rouram chu amona simlei chunga awar ha ri jarra. 10 Chuti weta ejonga amo na jantienga thing ta lea chu kae mathui ange rouram chu makolla awar am no ae.” 11 Jisu na nahi ahre ril sop so, “Ani tonpi Lazaras ha jalla am so ae keina thing weta amota hranga thoupi ange.” 12 Arui ngeina sang, “Ejonga amo na jalla am lea chu arengpa oh, amo thou ange.” 13 Jisu na rilna chu Lazarus ha thi so ae. Chuti weta mani hal chu mahou sa ah ajal ha ae ta. 14 Hana pa chu Jisu na hrabakta manita ril so, “Lazarus ha thi so ae, 15 chuna nangei sarukka kei ariem minge ha chu kei ha makolla amha nonge, chuna nangei ngoiring rang. Atun chu thing sei makolla.” 16 Didymas ta kom kok Thomas na atonpi ngeita ril, “Anina arengpu hita thing ha ei oh. Chu lea chu ani na amo hitta thi ha ange!”
Jisu Chu Aring Akha Chu Ringchang Ha Ae
17 Jisu na hana tungjuija Lazarus ha rungnie naly matienga phom su hakso ae. 18 Bethany hi Jerushalem phao sunga kilometer inthum meh. 19 Judiah mee ngei na Martha lea Mary mata Lazarus thit sarukka manui lungdam ranga manui ta tuk hlak phao hom meh. 20 Martha na Jisu phao ae ta mathei juija Jisuta tukhlak ranga tan na shukso. Chuti weta Mary chu inn na am hakkae. 21 Martha na Jisu ta ril, “Ejonga nangna hina am phur lea, Arengpu kata hi thi ang no ae! 22 Chuti weta keina dang inge atum kom Chungthieng na pe ange makolla nanik lim ha.” 23 “Nata ha ringthou wa ringchang pha ange” Jisu na amota ril. 24 Amona sang, “Keina dang inge,” “Ha chu achannie rungnie ah amo hi ringthou weta ringchang pha ange.” 25 Jisu na makolla ril, “Kei ing ringthoune akha chu aring ringchang, atujong akha na keita ngoiring lea chu athi sa phao ringthou ange; 26 Akha chu atujong na keita ngoiringa ringa am lea chu amo na athi pha ang no ae. Nahi nangna ngoiring che?” 27 Amona sang, “Oh weh Arengpu!” “Keina nangta ngoiring inge nanghi Messiya ae ta, hana Chungthieng sanaopa ae ta, simlei chunga phao ang pa ae ta.”
Jisu Tap Na
28 Martha na nahi ril su takka, amo na lea weta ma-ute Mary ta aruhan ta kok thingso. “Ocha ha hina am so” ma ute kolla amonaril, “hana amona nangta sai ae.” 29 Mary na rou hi theijui amo na thou weta Jisu ta tukhlak ranga tanna thingso. 30 (Jisu chu mani husunga tung no the songe Martha na amo ta tukhlak na amunt na hana am songe.) 31 Mary inn na lungkimpi ngeina amoha thou wa rijui ah mani na manu juiso. Mani hal chu Mary hi hlankung thing weta tap thing so ae ta. 32 Mary na Jisu am na amunt tungso, hana amo ta mamel ri su inn len, makae kunga tuveta amo na ril, “Arengpu oh” “Ejonga nangna hina am phur ta lea chu kata hi thi ang no ae!” 33 Jisu na matap ri ah akha chu amo hita am ha ngei na tap kom ri pha so. Chuna malung leima tonga amo na leima olso. 34 “Hoija amunt na amota phum ma chau?” mani ta Jisu na sai. Mani na sang, Arengpu “wa oh anthingei oh.” 35 Jisu tapso, 36 Meengei na ril, “Anno amo na eja ah amo ta lungshi meh!” 37 Chuti weta adang ahre na ril, “Mitcho ngei ta ripi mee ha amo no meh? Hana amo na thit no ranga kom ae nea ang no meh?”
Lazarus Ringchang Lea Na
38 Woihapa Jisu lung olla Jisu na hlankunga thienga thingso. Hlan hur mai ha chu alung akhana harra shi ae. 39 Jisu na trongsan pepi, “Alung ha lah ah hou oh!” Athi Lazarus sarnu na sang, “Amo hi rungnie naly phom ma shi so ae chuna ariem leima nam shi jo ve arengpu.” 40 Jisu na makolla ril, “Chungthieng mahung majai nang na ri ange ta keina nakolla ril no meh?” ayonga nang na ngoiring lea chu. 41 Mani na alung ha lah ah hou wa Jisu na achungtienga an weta ril. “Apa keina ariem minge nangta ha chu nangna karou ngei pi che ae. 42 Kei na dang inge nangna apha changhon na kei ta ngei ja am pi che ae chuna hina am mee ngei sarukka rilla aminge ha chu kei hi nahla mee ae ta ngoiring ranga.” 43 Na hi maril su takka amo na sanrol shukka kok so, “Lazaras shukjou oh!” 44 Amo na akae akut athi punna hlumma akha chu amai pun na hlum ma shukso. Jisu na manita ril. “Pun ngei ha hla pi jou oh hana thing jou su oh amo ha.”
Jisu Ta That Ranga Semsa Na
45 Mary am na ah phao mani lim pa na Jisu ae ha ri weta amo ta ngoiring so ae. 46 Chuti weta adang ahre na chu Pharisis ngei am na lea weta Jisu ae na ha manita takso. 47 Chunapa chu Pharisis ngei lea chungtekti thiempu ngei na ulien chungei ta tuk hlakweta ril, “Alo ta ae ei ti meh? Anno na spa hina anelah ae ah am hi! 48 Ejonga ani na amo hi hata malamma thing jou shu oh ti lea meelim na amo ta ngoiring ange, hana Roman ram ma ane angam ngeina ani athieng inn kaha chu ani jati makhai ta akuit atah shukpi ange!” 49 Mani kar sunga hakumma chungtekti thiempu aming na kaijapha na ril, “Eja ah lungmo nangei hi! 50 Nangei na dangne no wa chau, jati akha na akuit atah shuk kang saruk chu mee akha na thi pa na hella hra tekno meh?” 51 Adiktak chu amo na mathei chakka rou wa ril no ae amo hi chungtekti thiempu ae nakum um hana Jisu na Jehudi ngei taranga kom thi pi ange, ta amona rilshuk ae. 52 Hana mani taranga chak no wa amo na Chungthieng mee ngei amunt aram adang adanga rolla am mee ngie hi amo na pum akha chakka ra-chon pi ange. 53 Chuna Hani rungnie hai thou wa Jewish ane angam ngei na Jisu ta that rang sem sa so. 54 Chunapa chu Jisu na Judiah ram ma ephong phonga thing nijo weh chutihalkom Jisu na ramruk tienga thing weta Ephraim ti hulokka thing nga amunt hana arui ngei hitta am ha so. 55 Lanpina Reen ae rang kom apha neija waso. Chuna sarukka mee ngei na maram houphur weta Jerushalem ma thing weta mani talit nu juija reen ae na maitienga hajong athiengpi na tullu taranga thingso. 56 Manina Jisu ta jonga am, manina athieng inn sunga rachunna akhu na adang ta sai hlakka, “Nangna chu alo ta halla che? outakka amo hi na reen hina phao ang no mo anoleh phao ang meh?” 57 Chungtekti thiempu akha chu Pharisis ngei na atujong akha na Jisu am na mun dang mee am lea chu amo na tak shu oh ta trongsan pe so. Chuta lea chu manina amota mant nea ange.
Bethany Ah Jisu Tah Sirik Notna
1 Kannathingna rungnie naruk matienga Jisu na Bethany ah Lazarus athisa hai thou ringthou sapa inn na thing ae. 2 Mani hana bu bakha ranga semsa ah Lazarus ha Jisu hitta bakha ranga ong tolla am lei ja Martha chu mani bakranga semsa san na am meh. 3 Hana Mary na amant atam ariem hoi siriktui ser tangkhai choija hong weta Jisu kaechunga bun na mani inn sung chu ariem hana shihak ti so Mary na masam takka akae ha hana siriktui ha rupi. 4 Jisu hina arui ngei sunga Judas Iscariot amota jurra hou ang pa na ril. 5 “Alo wa hija amant tam siriktui hi rupa riha thum ma jur weta apha sum hana sara ngei ta pe lea chu?” 6 Amona nahi maril chu sara ngei ta hal weta ril ano ae nahi na maril chu amo mak ha aru thei mee ae amo na sum hou ha ma choi sarukka akha chu sumha machang rang sharukka nahi ril ae. 7 Chuti weta Jisu na ril, “Keita phum mang nie apha rungnie ha nei so ae chuna madit mahal hana hata ae shu oh.” 8 Nangei na apha chang honna sara ngei hitta am ha chou ae, chuti weta kei chu nangei hitta am ha nea ang no ae.”
Lazarus Chunga Nainun
9 Ehekta tam malmashi ngeina Jisu hi Bethany ah am meh tah thei pha ah, manina amunt hana thingso, Jisu taranga chak no wa Jisu na athi hai thou wa ringthoupi Lazarus taranga kom tolla. 10 Chuna pa chu chungtekti thiempu na Lazarus tah kom that rang ae thou sa. 11 Rouram chu masarukka Jew ngei na manita ngei num no ah Jisu ta ngoiring hom so.
Jerushalem Ah Ral Ne Ah Lutna
12 Hana mathangpa rungnie ah wairul riha na lanpina reen na Jisu kom Jerushalem ma phao ae ta theiya. 13 Chunapa chu manina annohbak hriem yeta Jisuta tukhlak ranga aou wa thingso, “Chungthieng ta dom munge! Chungthieng arengpu maminga phao meeta jaihra pe shu oh! Chungthieng na Israel ngei Raeng ta jaihra pe su oh!” 14 Jieksha rouna ril chu hekta, Jisu na kormoh akha tuk-ka amona kormoh achunga chung so weh. 15 “Zion hupi ngei atrino oh! Hina nangei Raeng jungso. Kormo nao chunga chung waso.” 16 Apha hana arui ngeina lungkim no ae, chuti weta Jisu na mahung majai pha jui; hana amota jeiksha rouna ril ha, manina ngaileh so, akha chu manina nahi mata ranga ae pi ae. 17 Rou lamchu Lazarusta hlan hei thou kokka athi thou ringpi hina Jisu ritta am ha malmashi ngeina hana shuk phur lim tang kou so. 18 Amona anealah ae tihi manina theipha ah, chuna sharukka abom ngeina amota tuk hlak ke. 19 Pharisi ngeina manisunga ril hlak ke, “Anina eko ae nea no! Anno, simlei lim na manu jui ah am!”
Grik Ahrena Jisu ta Jongna
20 Atun chu Grik ahre kom reen hana mok thing ang nga phao ngei kar sunga tolleh. 21 Manina Philip kolla thinge (amohi Galily Bethsaida hei thou ae) hana amota ril, “Arengpu, keina Jisuta ri num mung.” 22 Philipna thinga Andrew kolla rilleh, hana manuina Jisu kolla thing weta ril. 23 Jisuna manuita sange “Meesanaopa na arat mahung majai pha rang apha ha atun waso ae. 24 Keina adiek nakolla ril linge: taineen aruna alei ah tullah thi nole, naha akha chak hata am mange, hatichun naha thi lea atamma ra-ae. 25 Atujong pana maring chan hita lungsi limna thi ange; atujongna maring chan ta nasimlei hina atir limna samlah ringchan pe ange. 26 Atujong meena kahlou ae num limna kanu jui shu oh. Chuna ka-am na amunna kashuk ha kom am mange. Hana kapana kahlou ae meelimta ajak ati pe ange.
Jisu Na Mathit Rang Rouril Na
27 “Atunchu kalunghi leima aol sing hana keina ei ril ang sha? Chule chu Apa, pha hi ka kolla phao no ha ah su oh? Chuti weta hina jarra kei phao inge. 28 Apa, nahung najai naming alok chang pi oh!” hana vanram hei thou sanrolna tronga hita ril, “Keina nahung najai ha lok ko lok pi singe, hana nahung najai ha lea ah lok pi sir ang ing.” 29 Wairul reha hana ngira am ngeina sanrol ha thei, akha chu mani ahre na ril nahi rurie ae, adang ahra na chu hita ril, “Wanrui na makolla rou ril la-ae!” 30 Chuti weta Jisu na manita ril, “Nahi kata ranga sanrolna rou ril no sha ae, chuti weta nangei taranga ae. 31 Na apha hi shimlei ta routreem rang so ae. Shimlei hita routreem mee ngei ta dang hou ange. 32 Keita leiram heithou wa domjui, keina meelimta kakolla rui lut tang ing ae. 33 (Hi marilna chu amo hi aol donga thit ranga ril ae). 34 Wairul reha na sang, “Kani rouphun na chu hita ril Messaiah ha chu atreem neai no ah ring ang ae. Chu lea chu nang na meesanaopa hata dom ang ae ta rilla che? Mee sanaopa ha atu meh?” 35 Jisu na sang, “Nangei kolla awar ha apha atante am mange. Na kolla awar amleiya nalam hana atim am no lutta thing ngo, chuna athim ha nakolla phao ang no ae; Atu yong mei akhana athim thui ah thing jui amo na dang pha no ae hoitinga amo na thing sa tihi. 36 Awar hata ngoiring oh, nakolla awa ha am leiya, chuna nangha mee ngei awar ha chan ang ae.”
Mee Ngei Na Ngoiring No Na
Jisuna na ril sutakka, amona mani kolthou ah shukka thinga athei chakka beso. 37 Amona anealah mani maikunga ae hal kom, mani na amo ta ngoiring no ae, 38 nahi rouphupa Isaiah na jiek rou tung rang nga ae: “Rengpu, ani ril roukit ha atuna ngoiring nga meh? Atu kolla Arengpuna nanae yaitha ripi meh?” 39 Hana manina ngoiring nea no ae roulam chu Isaiah na kom ril ae, 40 “Chungthieng na mani mit ha chopi so ae hana mani luhal kom thing pi so ae, Chuna mani mit na kom ri ang niyo, mani luhel kom lungkim niyo, maniha kakolla heileh niyo, Chungthieng na ril, keina chu manita dampi rang ae.” 41 Isaiah na ril, roulam chu amo na Jisu mahung majai ri ah hana mataranga rou ril phur ae. 42 Haphao sunga Jehudi anea angam eya na Jisu ta ngoiring ae, chuti weta Pharisee sarukka manina awao shukka trong shuk no ae, chuna Synagogue thouwa julla hou norang ae. 43 Chungthieng ngei hita lella malmasi ngei angei ha hella di ae.
Jisu Rou Wa Routreem Na
44 Jisu na sanrol shukka ril, “Keita ngoiring meelimna, keita chak ngoiring ah no ae chuti weta keita lha amota kom ngoiring ah ae. 45 Keita ril lim na keita lha amota kom ri so ae. 46 Keina simlei ramma awar changa jung ing ae, chuna keita ngoiring limna athim hana am mang niyo weh. 47 Atujong akha na karou kit thei lea chu hana amo na jui no lea chu, keina amota routreem mang no ae. Simlei hina kajung hi routreem rang ah no ae chuti weta sanrang nga ae. 48 Atujong keita ngaino mee hana karoukitta sungkim no mee amota routreem mang mee akha am meh. Karil sa rou hana amota atim nie rungnie ah amota routreem ang ae. 49 Nahi adiek ae, roulam chu keina kanea matik katarang nga chak trong ah nong ae chuti weta keita lha kapa na katrong rang, karil rang roukit rou pe ah ae. 50 Hana keina danging na roukit rou hina samlah ringchan pe pi ae.”
Jisuna Ruingeita Kea Silpina
1 Kannathingna reen hina matinga Jisuna simlei ram hi lha houwa mapa kolla thingange tihi dange. amona simlei ramma marui ngeita apha chang honna lungshi ae, akha chu manita atiem phaowa lungshi ae. 2 Jisu akha chu arui ngei hitta bakha leiya, hrano muihla hana Jisuta yurranga Simon Ischariot sanaopa Judas lung sunga song pi so weh. 3 Mapana makolla rat na lim pe ae ti hi Jisuna dange; Chungthieng kol hei thou ah yunge akha chu Chungthieng kolla thingange ti hi amona dange. 4 Chuna amona Maicham hei thouweta, malinglut achul ha lipweta puntit akonga sui so weh. 5 Hana pachu amona hengkung akha sunga tui sung weta ma-rui ngei kea sil thousowe akha chu akonga sui puntit hana ru pi ae. 6 Amona Simon Pitar kolla wakle, makolla hita saiye, “Kei ko silpi anga che meh, Reng oh?” 7 Jisuna makolla sange, “Na ka ae hi nangna atunchu dang angno che ae, chuti weta anutingchu dangpha ang che ae.” 8 Pitar na hita rille, “Rengna ltikkako kake silpiphung shuknowe! Keina nake silpinole chu,” Jisuna sange, “Nang karui ah no weh.” 9 Simon Pitar na sange, “Rengo chutile chu kake chak ahnowa, kakut akha chu kalu ko silpio!” 10 Jisuna rille, “Atu yong tuibulsa ngei chu ake chak silhanga ae, apum chu thieng so weh, nangei lim thieng hap so weh, nangei kara akha chu thieng no weh.” 11 Jisuna amota jur ang mee ha dang ae; hina sarukka amona rille, “Nangei limha thiengso chou ae, chuti weta mee akha chu thiengno ae.” 12 Jisuna mani ke silpi sule, malinglut achul ha hasir weta Maicham ah ongsirso weh, “Nangei na dangpha chou meh nangei kolla ka ae pi hi?” amona sai ae. 13 “Nangei na keita achupipa akha chu Rengpata kok hi, adiktakke, tichu nahamak kei inge. 14 Kei, nangeihana Reng akha chu achupipa keina nangei kea silpi ta lea chu, nangei ko akha lea akha ke ha silpi lhak au oh. 15 Keina nangei taranga panteem changa ripi sange, chuna sarukka ka-ae hekta nangei ko ae-oh. 16 Keina adiktaka rilinge; kor na maputa lela loktek no ae, hana rou choipa na amota hlapa ta lella loktekno ae. 17 Atunpa chu na adiek hi nangeina dangso chou ae, chuna nangei na tullu changa aeta lechu iya ah ariem anga meh! 18 “Nangei limpata kei rilla ah no weh; kahal mee ngei keina danginge! Kei hitta bakha mee akhana kachunga toh kallange! ti hi athieng abai sunga rilphur ha tungrang nga sa ae. 19 Kei na atun shuk matinga karilhi, anutinga karillim hi shuk jui nangeina keita ngoiring ranga ae. 20 Keina nangeita adiktaka rillinge; atuyong akhana ka-hla mita langpi lea chu keita langa ae; hana atu yong akhana keita langle chu keita hlapipa amota langa ae.”
Jisuna Amota Sawnloh Roumuhna
21 Jisuna hilim hi rilnuting, alung thuka olla awao shukka phuksukee, “Keina adiktaka nangeita rillinge: nangei karra akhana keita sawnlok ange.” 22 Amona atu roulamma rilmo dangtheino ah arui ngeina akha lea akha anlhak ke. 23 Arui ngei sunga akha tichu Jisuna lungsit tekte akha ha chu Jisu mathang maka onga ame. 24 Simon Pitar na amota rhima rille, “Amona atuta rilla mo ae ta saiyo.” 25 Chuna arui hana Jisu kolla nairhita wa weta saiye, “Na-ha atuwa meh, Rengo?” 26 Jisuna sange, “Kei na butol antuiya lupweta kapek miha amo ha-ae.” Chuna amona butol ahui laweta, lupweta Simon Ischariot sanaopa Judas ta pesowe. 27 Judah na butol ha langinglen hrano satan alung sunga lutsowe, Jisuna amota ril ae, “Na ae rangha ranga ae oh!” 28 Bakna hana am ngei ha Jisu na hirou makolla rilhi maruingeina lungkim no ae. 29 Arui arhe na Judas na mani sum hao ruisou chu mani reen na bakrang inrang ha thing weta lak thingrang rilla rangeta, ahnole sara ngeita eyongpa pekrang ril range ta halphure. 30 Judas na butol ha lakinlen awao shukka thing so weh hana thimsowe.
Athar Rakit Rou
31 Judas na houphurlen, Jisuna rille, “Atunchu meesanaopa hana alok asei ha ripisowe; atun Chungthieng Mahung majai machung hei thouwa ripi so weh. 32 Hana Chungthieng na machung hai thouwa ripile chu, hana Chungthieng na machunga mahung majai ha ripi ange, hana amona mahung majai ha ri pi len ange. 33 Kasanao ngei oh, kei nangei hitta sotta am ha pha ang nonge. Nangei na keita yong ang chou weh; chuti weta atunna karilhi Jahudi ya anea-ngam ngei ta karilchu hekta ae, ‘Nangeina kathingna lamma thingne ang no chou ae.’ 34 Hana atun keina athar Rakit rou pe-inge: Akha lea akha lungsi lhakkou oh. Keina nangeita lungsit hek ta, chuna nangeiko khale kha lungsi lhako. 35 Nangei na kha lea kha lungshi lhak lea, limpana nangei ha ka-rui aeta dangpha ange.”
Jisu Na Pitarta Mangei Angno Mahalla Ril
36 “Hoiya thinganga chame. Rengo?” Simon Pitarna amota saiphure. “Nangna atuna kathing ha yuine angno che,” Jisuna sangphure; “Chutiweta anuting chu jui ang che ae.” 37 “Rengo atun elo kayui nea norang meh?” saiye Pitarna. “Nataranga thi phao kai ngirsinge!” 38 Jisuna sangphure, “Nang katarang adiek ka thine takkang che meh? Keina adiktaka rilla aminge: Ar hong pa na hung mating nangna kei dang nonge ti hi woithum rillang che ae.
Jisuna Mapa Kolla Tungrang Lam Ma
1 “Nangei olno aowo akha chu ningsi ningrhul aenou wo,” Jisuna manita rilphure. “Chungthiengta ngoiringo khachu keitako ngoiringo. 2 Kapa inna tungrang amhome, hana keina nangei tarang amunt semthing inge. Hitinole nangeita rilphur ang no singe. 3 Chuna keina nangei tarang amunt semthingle, kei leya yungsira nangei keina rui kallange, chuna ka-amna hana nangeiko amange. 4 Kathing na amunha tungrang lamha nangei na dangchou weh.” 5 Thoma na makolla rille, “Reng, nang hoiya thingang kanina dang nongei chuna kanina ha pharang lamha alota dang ang meh?” 6 Jisuna makolla sangphure, “Keina, lamha, adikha akha chu ringchang ha inge; kei ano ah chu atunako Mapa kolla thingne angnowe.” 7 Atunchu keita nangeina dangsochou weh, “Amona manita rille, nangeina kapatako dangchou ae, hana atun hei thouwachu nangeina amota dangsochou ae, khachu amota rie ko rie sochou weh.” 8 Philipna amota rille, “Reng, kanita Mapa ha ripi oh nahiye kanina ditchu.” 9 Jisuna sangphure, “Apha hichan sotta nangei hitta amha phao; nangna keita dangno che, Philip? Keita risa ngei ha kapa ta risa ae. Chuna saruka ‘Mapa ta ripi oh ta nangna rilla che meh?’ 10 Philip, keina kapa kolla aminge Mapana kakolla ameti hi nangna ngoiring no ah cha meh? nangei kolla Karilsa tongsan hi, kakolla thou shuk ah no ae,” Jisuna arui ngeita rille, “Kakolla am mapa hana ma ae tullusa ae. 11 Keina kapa kolla, kapana kakolla ameh ti karilyuiya nangeina ngoiring ou wo. Ha ah no lea ka-ae tullu hinako ngoiringo. 12 Keina nangeita diek rillinge atuyongpana keita ngoiring lea chu ka-ae lim amoko ae ange ae, hita lelko amona ae-ange, tichu kei kapa kolla thing ange. 13 Hana kaminga nangei niek lim ha keina ae-ange, hana jui ah chu Mapa hana Mahung Majai lim asanaopa Chungthieng thouwa ri-ange. 14 Eyonga kaminga nangeina eiheilim saile chu, keina ae-anginge.
Athieng Muilha Pekrang Saro
15 “Eyonga nangei na keita lungsile, nangei na kata rakitrou jui ange.” 16 Keina mapa hata ni-ange, hana amona adang sanpinepa akha nangeita pe-ange, amohana nangei itta atreem amnolutta am ha ange. 17 Amoha ae Chungthieng hina marama adiek ka ripinepa Muilha ha. Alei ramna amota langne angnowe, tichu amochu riko, dangko nea ang no ae. Chutiweta nangei chu amota dangchou weh, tichu amona nangei itta amha ae, khachu nangei sunga ame. 18 “Keina kathingyuiya, nangeithei chak houphur ang nonge; nangei kolla woiha lesirange. 19 Apha atite te sunga chu aleiramna keita ripha angno ae, chuti weta nangei chu keita ri angchou weh, chuna roulam chu keina ringa amchu hekta, nangei ko ringa am ang chou weh. 20 Na rukniha phao jui ah chu, keina kapa kolla ame ti hi nangeina dangpha ange, keina nangei sunga amhekta nangei na kakolla ameh. 21 “Atuyonglimna katarakitrou ngaipiya, yuipi lea chu amo ha keita lungsi mee akha ae. Keita lungshi mee ha Kapana lungsi ange. Keina ko lungsi ange akha chu kei katak mak machung ripi ange.” 22 Judas (Judas Ischariot ah no lutta) na rille, “Reng, shimlei chunga ah no ah alota nang na kani ta chak ripi ang nga cha meh?” 23 Jisuna amota sangphure, “Atuyongna keita lungsilechu kachupihi yuiange. Kapana amota lungsi ange, hana Kapa akha chu keina makolla lutta amohita amha ange. 24 Atuyongna keita lungsinole kachupiko jui angno ae. Hana ka chupi nangei thei sa hi kakolla hei thou ah nao ae, chuti weta kei ta lha, kapa kolla thou yungsa ae. 25 “Nangei hitta hita amhalei sunga nahi nangeita rilphuringe. 26 Sanpipa ha, Atheing Muilha ha, Kapana kaninga lha angpa hana nangeita eiheilim chupi ange, hana karilphur lim hi amona nangeita songyelpi ange. 27 “nangei kolla kahouphur chu adai ha sa ae; nahi kakolla am adai ha sa ae nangeita kapekhi. Keina kapek hi alei ram ma pek hek tino ae. Nangei olno oh, khachu ningsi ningrhul ae no oh; nangei atino oh. 28 Keina nangeita karil hi nangei na thei so chou weh ‘Kei lha houwa thingang singe, chuti weta nangei kolla leya phao sir ange.’ Nangei na keita lungsilechu keina kapa kolla thing anginge ta karilhi nangei na ariemang chou ae; tichu amona keita lella loktek ae. 29 Hilim hi shuk matinga nangei kolla hihi ril phuringe, chuna ashuk jui ah nangeina ngoiring angsharukka ae. 30 Keina nangeita asotta tongthao nea ang ni ang ae, tichu aleiram hina roukam ngei phao so weh, amona kachunga mane amno ae. 31 Chutiweta keina mapata lungsi ae tihi aleiramna danganga ae; chuna saruka keita aeyota maril mahei ripta kei ae ange.” Wa-oh amunt hina hei thou wa thingsei oh.
Jisuna Adiek Drakha Ae
1 “Keina adiek drakha inge, kapana mahun ae mee ha ae. 2 Amona kakolla am ara rano abaklim rhima hou ae, hana ara ra abak limta tengpi ae, hanachu ara lella ra-ae. 3 Nangei chu kei kachupi hana jara amahalla thiengso chou weh. 4 Kakolla chat nolutta am mou-oh, hana keina nangei kolla chat nolutta amange. Abakna athei chakka ara rane no ae; akunga chatno lutta amlechak amona ara ra nea ae. Chuhekta nangei kakolla amno ah lea chu ara rati changne ang no ae. 5 “Keina akung inge, hana nangeina abake. Atu yong pana kakolla chat nolutta amle, hana keina ko makolla amle, ara lella rah ange; tichu kei tolno ah nangei iko ae nea ang no ae. 6 Atu yongna kakolla chat nolutta amnole chu abakta tanweta charpi hekta charpi ange; hayongpa abak ngei ha homweta sarmei sunga denga, manita kangpi ang ae. 7 Nangei kakolla chat nolutta amle akha chu rou nangei kolla chat nolutta amle chu, kakolla nangei hallim rilloa wo, hana nangei na pha-ang chou weh. 8 Nangeina ara atam rah hana kapa mahung majai hi nangeina mupi chou ae; hi hekta nangeina ka-rui ha changso chou ae. 9 Kapana keita lungsit hek keina nangeita lungsi ingei, kalungsit hana chat nolutta amo. 10 Nangei na karakit rou yuita lea chu, nangei kalungsit hina chatno lutta amange keina kapa rakitrou jui hekta, malungsit ha chat nolutta amhekta. 11 “Ka-riem hi nangei sunga amweta nangei ariem ha ahoirang keina nangeita na hi rillinge. 12 Ka-rakit rou chu hi-ae; kei nangeita lungsit hek, nangeina khale kha lungsi lhakko. 13 Atu yongpa akhana atonpi taranga ringchan peya thipi hita lella loktek lungsi amno ae. 14 Karil ha nangeina ae lea chu nangei katonpi ngei ae. 15 Keina nangeita suuk kae ta kokang nea ang ae, tichu suuk akhana amitpu na e-ae sa tihi dangphano ae. Hana hutta keina nangeita tonpi ta kokang singe, tichu keina kapa kolla katheilimpa nangei kolla ril shing nge. 16 Nangei na keita halh ahno ae, keina nangeita halhing, hana nangeita hlou-pae inge, thingweta ara atam ra rang, hana nangei ara ha chat no lutta amrang, nangeina kaminga kapa kolla nieklimpa ha kapa amona pe pi ange. 17 Chuna saruka nangei khale kha lungsit lhakrang keina rakitrou pe-inge.
Simlei Na Atir Na
18 “Eyong shimlei na nangeita atirle chu, keita masa atir ae ti ha ngaileh-oh. 19 Eyong nangeina simlei tarang chang lechu, simlei hinako nangeita matak lungsit hek lungsi ange. Chutiweta keina simlei hei thouwa nangeita halsinge, hana nangei simlei taranga ah no ae; chuna saruka simlei ngeina nangeita atira ae. 20 Karil phurha ngaileh oh! Akorna amitputa lella loktekno ae; eyonga manina keita ol peleh chu, nangei tako olpe ange, eyonga manina kachupi yuilechu, nangei chupiko yuiange. 21 Chutiweta manina nalimhi nangei kolla ae ange, roulam chu nangei ha kata ae; tichu keita hla mee ha manina dangno ae. 22 Keina yungweta manita tongsam pephur nole chu, mani pak amangno ah ae, chuti weta atun chu mani pak ngaidam rang amno ae. 23 Atu yongna keita atirle chu kapatako atir ae. 24 Atu akhanako aephurno tullu ha keina mani kolla ae phurnole chu mani pak am ang no ah ae; chuti weta atunchu manina keitako kapatako riko riso, atirko atirso weh. 25 Chuna saruka manina iko ‘ariem salla keita atirsowe ti ha mani tongsan hana jieka siha adiek ranga ae.’ 26 Chutiweta keina sanpi ang akha hla ange, tichu kapa kolla shuk Muihla hana yungyuiya, Chungthieng hina adiek lim amona ripiange. Keina kapa lhei thou ah nangei kolla amota hla ange, hana amona kataranga rou rillange. 27 Nangei nako kataranga rou rillange roulam chu athou hei thouwa nangeina kei ita amha hange.
1 Keina nangoiring chan noranga nahi nakolla rillinge. 2 Nangeita Synagog sungthou yullange, Nangeita thatweta manina Chungthiengta adom tullu lu angeta hallang apha wa ange. 3 Meengeina nalimhi nangei chunga ae-ange roulam chu manina Kapa tako akha chu kei tako dangno ae. 4 Chutiweta nangei kolla hi rou karil chu, manina hi ngei limhi ae wakjui apha ah nangeina karillim leya ngaileh rang nangeita rilphur inge.
Athieng Muilha Hina Tullu
“Keina hilim ngei hi athou leiya nangeita ril phur nonge roulam chu nangei hita amha jarrah. 5 Chutiweta atun chu keita hlapa makolla thingang singe, chuphao sung nangei atu akha nako keita kathing rang hoiya mo aeta saino chou ae. 6 Hana atun chu keina nangeita rilsinge, nangei shilung olna sih so chou ae. 7 Chutiweta keina adieka nangeita rillinge: Kei kathing hi nangei ninga chu lella hrateke, roulam chu keina thingnole nangaita, sanpi rang muihla ha yungang no weh. Chutiweta keina thing souchu, keina amota nangei kolla hla ange. 8 Hana amona ma yung jui ah, amona aleiram ma am meelim ngeita pak lamma diekno akha chu, Chungthiengna routimna malama dangpi ange. 9 Pak jarrah manina diekno ae, roulam chu manina keita ngoireing no ae. 10 Adiek tihi iya meh ti roulam mani diekno ae, roulam chu kei kapa kolla thingange hana nangeina keita ripha angniyo chou ae; 11 Akhachu routreem roulamma mani diekno ae, roulam chu aleiram hina alu chingeita routreem ha ae su so ae. 12 “Keina nangeita karillang atam amme, nangei kolla tam hei sulla ronne angno chou ae. 13 Chutihalko eyonga, muilha hana yungjui ah, Chungthieng roulam ma adiekha muhpi ange, amona adiek lima lamkai piang. amona mathei marat hana tong ril langno ae, chuti weta amona mathei anu juiya rillange, hana anuting shuk kang ko rillange. 14 Amona keita mahung pe ange, roulam chu amona karillim laweta nangei kolla rillange. 15 Kapa kolla amlimha kata ae; chuna sarukka keina karil kapek lim muihlana laweta nangei kolla rillange.
Aol Akhachu Ariemna
16 “Apha atite sunga nangeina keita ripha angnochou weh, hana leya apha atante nutinga keita risirrang chao weh.” 17 Arui ahre na mani sunga saihlakke, Amota apha atante sunga anina rihlakangno ae; hanapa woiha apha atante anutinga anina rihlakange, “ti hi ita rilna meh?” Hitako amona rilsir-ae, ‘hina roulam chu keina kapa kolla thing ang inge.’ 18 Na ‘apha atante’ tihi ita rilname? amona eril nameh tihi anina dangpha no ae. 19 Mani sainumha Jisuna dangpha a manita rille, “Keina karil apha atante sunga nangeina keita rihlakangno ae, hana apha atante nutinga nangeina keita ri-ange, hino meh nangai sunga sailhaka amha? 20 Keina nangeita adiektaka rillinge, nangeina aowa tap ang chou ae, chuti weta simleiram ngei na ariem ange; nangei olang chouwe, chuti weta nangnei olha ariem tinga letpi ange. 21 Namei ngaina nao donangtinga, amoha olle, roulamchu ma-oldongang apha pahsowe; chuti weta unga hana donsujui chu, amona ma ollim ha maksowe, roulamchu amo arimso weh, tichu unga akha simleirama donsowe. 22 Chuna nangei kollako hihekta ti-ange; atun nangei olle, hatihalko kei woiha leya nangei itta rihlaksir-ange, hana nangei shilungha ariemna si-ange, hana ariem ha atuna ko nangei kol heithouwa la-a houne angno ae. 23 “Rukniha phaojuiya, nangeina kaninga sai angni yo chou ae. Keina adiekka rillinge: Kapa kolla nangeina kaminga niek lim pe-ange. 24 Atun phao sunga nangeina kaming iko phao nie no song chou ae, nie jou oh hana nangeina roulam chu nangei ariem ha pharanga pha-angchou ae.
Simleiram Chunga Ral Nea Amna
25 “Roulamlim hi keina panteem changa nangeita rillinge, chuti weta panteem changa rilnolutta singsengta kapa roulam nangeita karillang aphaha wasowe. 26 Rungni ha phajui ah nangeina kaminga nie angchou ae; keina nangei tarang makolla nie angeta rilla nonge. 27 Roulam chu Mapa amomakna nangeita lungsi ae, amona nangeita lungsi roulam chu nangeina lungshit jarrah keihi kapa kolla thou yunge ti hi nangeina ngoiringchou ae. 28 Kei kapa kol heithouwa simleiram chunga yunginge; hana atun chu keina simleiram hlahouwa kapa kolla thing ange.” 29 Hanapachu aruingeina amota rille, “Atun chu nangna panteem ah nolutta singsengta rilpi so che ae. 30 Rengna ripta dange tihi kanina dangpha songe; chuna atu akha nako nakolla shai ang eko atunchu amno ae. Hina sarukka Rengchu Mapa kol heithouwa yunge ti hi ngoiring unge.” 31 Jisuna manita sange, “Atunchu nangei ngoiring jo chou meh? 32 Anno aphaha wa ange, atunhi ah so ae, Nangeilim chokka, ma inn ma inn na thinga, katheichak houphur angchou ae. Chutihalko kei katheichak ah angno ae, roulam chu Kapa ha kei itta ameh. 33 Kei itta amhaweta nangeina adai pharang keina roulim hi nangeita rilphur inge. Simleiram na nangeita aol pe ange chutihalko rattou oh! Keina simleiram ha nesinge!”
Jisuna Aruingei Taranga Niek Na
1 Jisuna rouhi rilsunutinga, wanramting anweta nieye, “Apa apha ha waso ae, Nasanaota Mahung majai ha peyo, hana asanao nako amota mahung ha pek ranga. 2 Roulam chu simlei ram chunga am malmasilim chunga ae nea matik pepi soche ae, chuna makolla napek manilimta samla ringchang ha pesu oh. 3 Samla ringchang ti hi chu amota dang adiek Chungthieng, akha chu nalha Jisus Khrista ta dang ti hi ae. 4 Keina aleirama mahung majai muh phur sange; keita napek tulluha aesu sange. 5 Apa! atun keita namaikunga nahung najai pepio, simlei ram semmating anui amhalei hung jai ha pepi oh. 6 “Simlei ramma am kaninga napekngei kolla nawarha ripisange. Mani ha nata sa ae, kaning ha nangna pepiso che ae. Manina natongsanha yuiye, 7 kaninga napek tongsanha manita rilsinge, hana manina langsowe; kei hi nakol hei thou yunge tihi manina diek dange; manina keihi nalha aeta ngoiringe. 8 Kaninga napek tongsanha manita rilsinge, hana manina langsowe; keihi nakol hei thou yunge tihi manina diek dange; manina keihi nalha aeta ngoiringe. 9 “Mani taranga keina nie inge. Simlei ram taranga nie nonge, keita napekngei taranga keina nie inge, Roulam chu maniha nata sa ae. 10 Kakolla amlim nata ae, hana nakolla amlimko kata ae; hana kahung kajai kaseilim mani ningthou wa ripisowe. 11 Hana atun kei nakolla wa-inge; kei simleiram am ni ange, manichu simlei ram ma amsonge. Athieng Apa! anuina akha chak amhekta, maniko amrang kakolla napek manita naminga selpi rungpi-oh. 12 Keina mani hitta amha leiya, keina naminga selrung sang ae, hana keina manita rhabaka anpisange, athieng abaisunga rilphur ha shukranga, amanghana sanaopa ah no a chu mani atu akhaphao mangno ae. 13 Hana atun kei nakolla wa-inge; hana mani takchunga ka-riem ka-hoi pharanga keina aleirama narou hi rillinge. 14 Keina narou natong manita rilsinge; hana simleiramna mani ta atir ae, maram chu mani ha simlei ram ma mee niyo ae, hahekta keikom simlei mee ah nonge. 15 Keina nakolla manita simleiram hei thouwa lahou oh ti nie nonge, chuti weta manita hrano hei thouwa selpi oh ta nakolla keina rillasinge. 16 Keina simleiram mee ah no ha, hahekta maniko simleiram mee ah no ae. 17 Manita adiek hana thieng pi-oh, narou chu adiekke. 18 Keita simleirama nalha hekta, kei manita simlei rama lha inge. 19 Mani hana sarukka keina nakolla thinga kapeknu jui ah, maniko nakolla thienga pesu-oh. 20 “Keina mani tarang chak nie nonge, mani ril tong ngoiring mee ngei tarangko ni-inge. 21 Manilim akha chak chang ranga nie inge; kei hi nalha ae tihi simlei ngei ngoi ring ranga, oh kapa Lokpa, nangna kakolla keina nakolla amhekta mani nako ani kolla amrang keina nie inge. 22 Anina akha chak am hekta, maniko akha chak chang ranga, Lokpa kakolla pek ahung ha keina manita peinge. 23 Keina mani kolla aming, akha chu Lokpana kakolla am, hana manina akha chaka chang ranga ae, tichu Lokpana keita lhapi ae, akhako Lokpana keita lungsit hekta, manita lungsi ae tihi simlei ngei nako dangranga ae. 24 “O apa, nangna manita kakolla peapiso che, hana keina mani lim hi ka am na changhon amha num inge. Chuna manilimna kakolla napek kahungha mani kom risu oh.” Simlei ama tinga keita lungsit sarukka. 25 “Athieng apa simleina nangta dangno ae, hatiweta keina nangta danginge, keita lokpa nangna lha ae tihi mani na dange. 26 Keina Lokpa namingha manita dangpi inge akha chu keina dangpi songang inge, hatilechu keita nalungsit hi mani chunga amange, keinako mani chunga amnage.
Jisuta Ta Mant Na
1 Jisuna na aniek hi su inlen, arui ngei hita amunhi lha houwa Kidron akuk aralla thinge. Na amunt hana ingkul akha amme, hana Jisuna aruingei itta lutsowe. 2 Mee yurpa Judas na amunha amoko danga, maram chu Jisuna arui ngei itta na amunt hana malunna thingphure. 3 Chuna Judas na ingkul hana, Rom ralmee abom arhe khachu chungtikti thimpu akha chu Parisi aniekna inn hakngei arhe hitta; cham sei akha chu meisum choiya ruiya wa ae. 4 Jisuna makolla ashukang limha danga chuna amona matinga sonna wa weta manita ril, “Atu meh nangeina yonha?” 5 “Nazareth ta Jisu hata ae.” manina sange. “Kei ha amo inge,” amona ril, Judas, meeyurpaha, ko mani itta ngirha amme. 6 “Kei ha amo inge.” ta Jisuna rilyuiya maniha nungtinga sonna leweta aleichung tuh so weh. 7 Jisuna woiha leya saiye, “Atu tingame anngeina yongha?” “Nazareth ta Jisu ha ae,” mani na sange. 8 “Keina ama haalla nangeita rilsange, kei amo ha inge,” Jisuna rille, “Nangeina keita yong ah lea chu hi adangmi ngeichu thing jo su oh.” 9 (Amona hi marilhi chu, tongniya marilphursa rou adiekka tung rang aha ae. “Apa oh kakolla napek akha phao keina mangpi angnonge.”) 10 Chamsei choi, Simon Pitarna chamsei kai shukka chungtekti thimpu hana kor, changting kur tanne. Kor hana mingha Malchus ti ae. 11 Jisuna Piterta ril, “Na chamsei ha leya abura thunno! Kapana kataranga pek aol tuidonha keina inang no ae ta nangna halla cha meh?”
Anna Maikunga Jisu
12 Hanachu Rom ralmingei akha chu aluching ngei hana Jehudi ngeina Jisuta mant sowe, akha chu hup so weh, 13 hana masa ah Anna kolla amota rui phao ae. Amo chu kaiyapha ha na mapu ae, kumhana chungtekti thimpu akha ae. 14 Jihudi ane angam ngeita apa akhana meelim taranga thipipana lella hratekke ta tong pe ha hi kaiyapha hiye.
Pitar Na Jisu Ta Ngainoi Na
15 Simon Pitar lea adang arui akhana Jisu nuting yuiphure. Hana adang arui akha hachu chungtekti thim ha hitta danglhak sarukka insung pha a luttolle. 16 Chutilei sunga Pitar chu awao songkara amphur so weh. Hana adang arui akha hana leya shukweta, songkara am namei sanao akha na rilla Pitar ta inn sunga ruilut pi so weh. 17 Songkara am namei sanaotehana Piterta rille, “Nang ko apahana arui akha sale-oh?” “Kei ah nonge” Pitar na sange. 18 Adaiya tiya chu anekngei akha chu songkar hakngei na meihol homweta meilum ongkar sunga Piterko meilum onga amtolle.
Chungtekti Thimpuna Jisu Kolla Tongsai Na
19 Chungtikti thimpu hana Jisu marui akha chu machupi Roulam sai ae. 20 Jisuna sange, “Keina meelim maikunga apha changhonna athup amno lutta tonginge, keina kachupiko Jihudi limna bom tulla amna inna chupi inge, itikako keina aru-a kachupinako amno ae. 21 Chuna iye sarukka nangna keita tongsai chameh? Katong theisa mee ngei hita saiyo. Manita karilphur limha saiyo, manina karillim dange. 22 Jisuna hi rilleiya, ahak akhana amota beng weta hita rille, “Nangna hayongpa tong chungtikti thimpu kolla ngaiya meh.” 23 Jisuna amota sange, “eyongpa keina katong lelle chu, hina am mee ngeita kalalna ha rillo, chuti weta eyongpa keina karilsa hina diek lea chu, eye sarukka nangna keita phitta che?” 24 Hana pachu Anna na hupha hlapi no lutta Chungtekti thimpu kaiyapha kolla hla so weh.
Pitar Na Jisuta Woiha Leya Ngaino Na
25 Pitar ha ngir weta meikolla matak lumpiya am songe chuna mee adangeina amota rille, “Nangnko apha hana arui ah no a cha meh?” Chuti weta Pitar na ngaino ae. “Ah nonge kei ahnonge,” amona rille. 26 Chungtekti thimpu akha hina kor, Pitarna akur tanpa itta ulenao shuk akhana rilshuk sire. “Ingkulla amo itta amha kariha nangno meh?” amona saiye. 27 Woiha leya Pitarna rille, “Ah nonge” tilen arhongpa hung so weh.
Pilat Maikunga Jisuta Ruiwak Na
28 Inthou ngalta ah Jisuta kaiyapha innhei thouwa ramlok luching inn sunga ruilut so weh, hana Jihudi ane angam ngei chu luttolno ae, roulamchu mani tun hlou anu jui ah mani matak ha thienga alalpi reen abak ahin tol pharanga. 29 Hana sarukka Pilat awao ah shukweta manita saiye, “Nangeina apa hita ediekno ae sarukka rilla chou meh?” 30 Hana mani tong sang chu, “Amona hrano aephur nole chu kanina amota nakolla ruiphao ang nong ae.” 31 Pilatna manita rille, “Chulechu nangei na amota rui chaou weta nangei aephung anu jui ah aeyou oh.” manina sange, “Kanita chu mee akhaphao thit pi ngaipino ae.” 32 (Hitina roulamchu, eya meh tiweta Jisu tongsan ha trung ranga ae, tichu amona mathit tanghi alota thi-angameta marilphur ha trungranga ae.) 33 Pilat inn sunga lutsirweta Jisuta ruilutte. “Nang Jihudi ngei Rengcha meh?” amona saiye. 34 Jisuna sange, “Na natongsai hi nakol hei thou wa mo anole mee adangna karoulam nakolla rilla meh?” 35 Pilat na sang, “Nangna keihi Jihudi ae ta ngaija chameh? nami ngeina akha chu chungtekti thimpu ngeina nangta ruiphao ah kakut chunga pe ae. Nangna e ae ya cha meh?” 36 Jisuna rille, “Ka rengram chu simlei chung hina ah no ae; kareng ramha simlei chung hina ah lea chu, keita Jihudi ane angam kutchung pekno rang, kanu jui ngeina ril lange. Ahno ae, kareng ram hi simlei chung hina ano ae!” 37 Pilatna amota saiye, “Hatalechu nang Reng akha a chameh?” Jisuna sange, “Nangna keihi Reng akha ae ta rilsoche ae. Adiek roulamma tongpiranga kei simlei ram a yung singe. Adiek chang meelimna karil tonghi thei ange.” 38 “Hatile chu adiek tiha ei meh?” Pilat na sai.
Jisu Ta That Ranga Hlaso
Chuna Pilat na awao ah mee ngei amna ah shuk sir weta manita rille, “Keina amota thatrang diekno tuk pha nonge; 39 Chutiweta nangei yiik anu jui ah keina nangei taranga atuyon amant mee akhata nangei alalpa reen sunga arimsalla hlapi chak ti einge. Chuna nangei Jihudi Reng hita nangei taranga hlapa dichou meh?” 40 Mani rol ringa auwete sange; “Ah no ae amohi ano ae! kanina Baraba ta hla di unge (Barabbas ha aru thei mee ae.)
1 Hanapa chu Pilat na Jisu ta laweta phit pi so weh. 2 Hana ralmee ngei na aling abak thou wa lubur sam weta aluwa burpi ae; hana punsanko paipi ae. 3 Hana makolla wa weta rille, “Sotta ringsu oh Jahudi ngei Reng!” manina wa weta beng so weh. 4 Pilat na woiha shukweta abom ngeihata rille, “Anno keina amota angnei kolla rui shuk weta ripiange hana kei amota that rang diekno tukpha nonge.” 5 Chuna Jisuna aling lubur bura, Punsan paiya shuk so weh. Pilatna manita rille. “Amo! Apaha hina amso weh!” 6 Chungtikti thimpu khachu mokna innhak ngeina amota riyuiya manina aowe, “Aban yamweta thatto! aban yamwet that to!” Pilat na manita rille, “Nangeina amota ruiweta hata aban yamma amota thatta keina amota thatrang roulam tuk nonge.” 7 Meebom ngeina hita sanglesir ae, “Kani rouphun kha ame, hana anu jui ah amo ha thitphung shuk kae, roulam chu amona athei chakka Chungthieng sanao ingeta rille.” 8 Pilatna nahi theiyuiya, amoha ati lelsowe. 9 Amona woiha insunga lut sir weta Jisuta saiye, “Nang hoi thou phao che?” chuti weta Jisuna sangno ae. 10 Pilat na amota rilsir ae, “Kaninga nang tong ang niyo chame? keina nangta hla rang khachu thatrang ae nea ha kakut chung ame tiha dang ngo.” 11 Jisuna sange, “Nangna kachunga ae nea na amha Chungthieng pekke. Chuna sarukka keita nakut chung pe mee hana alella yai sitekke” 12 Pilatna rou theiyui ah, Jisuta hla hourang lam yo nge. Chuti weta meebom ngeihana leya aosirae, “Nangna amota hla hou lea chu, nang keisar tronpini yo ae! atuyong Reng chang numle Keisar chunga rouril num ma ae!” 13 Pilat na, na rongei hi theiyuiya, Jisu ta awao ah rui shuk weta. “Ongna alung” ti routreem ngei ongna hana ongpi so weh. (Ebriya tonga chu hi aming hi, “Gabbatha” ti-ae.) 14 Hana nahi alalpi reen hana mating akha chu nishun pouyai pha hangso weh. Pilat na mee ngeita rille, “Hina nangei Reng ha amsowe!” 15 Manina leya aolha ae, “Amota thatto! Amota thatto! Amota aban yama thatto!” Pilat na manita sai, “Keina ngei reng hata aban yama thatha dit chou?” Chungtekti thimpuna sange, “Kani rengchu Keisar chakke!” 16 Chuna Pilat na Jisuta thatranga manita pesowe.
Jisu Ta Aban Yamma That Na
Chuna manina Jisuta thatranga ruisowe. 17 Amona mathitrang Kross ronna shukka “Lukuk ti amum pha so weh,” (Ebriya na chu “Golgotha” ta kokke.) 18 Hana manina amota aban yamma thatsowe; manina adang apa aniko nak khating khatinga Jisuna ayai dongweta aban yamma thatte. 19 Pilatna tonglam akha Kross luwang chung tarre. Hana mayik tonglam chu hi ae, “Nazareth ta Jisu Jihudi ngei Rengpa.” 20 Mee atampana na ayikha pa home roulam chu Jisuta thatna anun ha hupi hei thou aram lano ae. tongshan ha Ebriya, latin akha chu Grik tonga yikke. 21 Chungtekti thimpuna Pilatta rille, “Nang na ‘Jihudi ngei Rengpa’ ae ta jiek no oh, chuti ang saruk chu ‘apa hina kei Jihudi ngei Reng ingeta rillea ta jiek ko.’ ” 22 Pilatna sange, “Keina kajieksa chu jieksa so ae.” 23 Ralmee ngei hana Jisuta thatsu nutinga, manina mapun mani ha atum inli shukka sammeh, ralmee chang honna tum akha akha change. Manina aphotna lam amno linglut achul hako lal weta, 24 Ralmee mani makhei, kha lea kha rillhakke; “Hichu therno eiyo; ani sung atuna changmo rawan anhlakei-oh.” Hi mani ae hi Athieng abai sunga jiekka houphur ha diekka shuk ranga ae: “Manina kapun kadir mani mahei sam lhakange akhako kalinglut achul manina rawan anhlakange.” Himak hi ralmee ngeina aephur ha. 25 Manu, ma-ou, Chlopas hina ammei Mathy, akha chu Madalini Jisu Kross kolla naiya ngir ae. 26 Jisuna manu akha chu malungsit arui ngeina hana ngira amha ri so weh; hana amona manuta rille, “Amo nasa nao pa ae.” 27 Hana amona ma-rui ngeita rille, “Amoha nangei nu ae.” Apha hana thouwa arui ngei amota ma-inna amharang rui so weh.
Jisu Na Thit Na
28 Atunchu Jisuna ngamlim suhap so weta danga; athieng abai sunga ril shuk ranga, “Kei tuiralsange,” ta rille. 29 Amunt hana athur na sihakti bel akha ameh, changpan asung tulweta, tongka thun weta ma-mura thunkalle. 30 Jisuna athur tuiha inweta rille, “Susinge,” hana chu amona alu bu weta thiso.
Jisu Nakka Seina Hoh Na
31 Chuna Irai ni rukni sarukka, mani kross chunga solhakni phao am norang mani ke ha hrim weta choi tum ranga Jihudi ngeina Pilatta niye. Roulam chu solhakni hi athieng rungni ae. 32 Chuna sarukka ralmee ngeina wawete Jisu itta thiha apa ani hana ke ha rhim so weh. 33 Hana Jisu ke hrimang wakjui ah Jisuchu thihak tipachu manina hrim niyowe. 34 Chutiweta ralmee akhana Jisu nakka sei hoh ae, hati inlen athi akha chu tui lunga shuk kae. 35 (Hita shuk ri mee akhana rilphure, chuti lea chu nangei ko ngoiring ange. Maril ha adiekke, ‘Khachu amona matong hi adiekke ti dange.’) 36 Maram chu, “Jisu saru akhaphao tikkang no ae,” Athieng abai sunga rilha tung ranga hita shukka ae. 37 Hana adang abai akha na hita rille, “Meengeina nakka hoo amota anange.”
Jisu Ta Phum Na
38 Hina anutinga, Arimethia Josep na Jisu pum phum ranga Pilatta niye. (Josep hi Jisu nutinga aruwa jui mee ae, maram chu amona Jehudi ngei ane angam ngeita ati yarra.) Pilatna amota apum ranga ngaipi so weh. Chuna Josep na choiya thing so weh. 39 Jisuta yinting akha rilhak thing phurpa Nikodim ko Josep itta thingha ae, maminga aman tam ariemhoi tang somthum, khachu myrrh lea aloe choiya thinge. 40 Hita ae ah manina Jisu pumha Jehudi ngei alam nu jui ah phum ranga ariem hoi choiya akha chu aman tam pun ah lhum so weh. 41 Jisuta thatna amunt kolhana mahun akha ame, hana sunga atu akha phao phum no the lhan akha ammeh. 42 Nahi Solhakni rukni mating ah sarukka, akha na lhanna naiya amsarukka, Jisu ha hana phum so weh.
Aruksa Lhan
1 Solhakni inthou huwar maah Madalini Mary na lhankunga thinge, hana lhan maiah dolla si alungha honga amha riso. 2 Amona entinga tanna leweta Simon Pitar akha chu adang arui Jisuna lungsit manita rilsowe, “Manina Rengta lhansung hei thouwa choi thing so weh, hana hoiya siyomo kanina dangpha niyo onge!” 3 Hanapa chu Pitar akha chu adang rui hana lhankunga thingso ae. 4 Manui aniha ranga tanna thinge, chuti weta adang rui hana Piterta lella tanna lhankunga amona ma-sa-a tungso ae. 5 Amona unna anyuiya alhumna punha ri-ae, chuti weta asunga chu amo lutno ae. 6 Manutinga Simon Pitar tungso, hana amona yangbakta lhankung sunga lutsowe. Amona alhumna punha lhum ma amha riphure. 7 Hana Jisu lu lhumna punhachu apum lhumna pun kolla amno ae chuti weta athei chakka kulla ame. 8 Lhankunga masa-a lung aruihako asunga lutso ae, akha chu amoko ngoiringso ae. 9 (Manina athieng abaisunga rilphur ha amona athi heithouwa ringthou angetihi lunga lungkimno ae.) 10 Chuna arui ngeihana intinga leso-ae.
Jisu Na Mary Madalini Kolla Ripi Na
11 Mary na lhan awao-a tappa amleiya, anona lham sunga birra thirre. 12 Wanrui anina awar pen dir aeweta Jisuna yalphurna a akhana aluchung, akhana kekunga onga amha ripha so ae. 13 “Namei ije sarukka tappa ama che?” manina amota saiye. amona sange, “manina ka Rengha choiya thing so weh, chuna manina hoiya simo keina dangpha ni ange. 14 Chuna amona heile a anyuiya Jisu hana ngira am ri so weh; chuti weta amona Jisu makke tihi dangno ae. 15 “Namei nang eye sarukka tappa ama che?” Jisuna amota rille, “Atuta nang na yonga cha meh?” Mary na amohi mahun aepa ha rangeta halla amo na makolla rille, “Nangna amota la ah houtale, kakolla naha rilpi oh hana keina thing inge ae ta amota lathing tikke.” 16 Jisuna makolla rille, “Mary!” Mary na maning tinga heiweta, Ebriya tonga rille, “Rabboni!” (Tichu “chupipa.”) 17 “Keita onoh oh,” Jisuna makolla rille, “Roulam chu kei atun kapa kolla thing no song inge. Chuna ka-u-kanao ngei kolla thingchaweta kei kapa akha chu nangei pa, kapa Chungthieng akha chu nangei Chungthieng kolla lesier ange ta rilthing oh.” 18 Chutipachu Mary Madalini na thing weta arui ngeita keina arengpu amota rishing: akha chu Jisuna maing nga ril mahei amona sui thing so weh.
Jisuna Aruingei Kolla Ripi Na
19 Solhakni atai nietak phayui, arui ngeina Jehudi ane angam ngeit atit yarra manina inn sunga innkal kal weta amleiya. Jisuna lut weta mani karra ngir weta, “Adai ha nangei kolla amsu oh” ta amona rille. 20 Hi rou rilsu in len, amona makut akha chu manak ha manita ripi ae. Arui ngeiha Rengta riyuiya ariemna siso ae. 21 Jisuna manita leya rilsir ae, “Adai ha nangei kolla amsu-oh. Kapana keita lha hekta, nangeita ko keina lha inge.” 22 Hana amona hukthal manichung sem weta rille, “Athieng Muilha ha pha au-oh. 23 Nangei na mee ngei pak kokpi lechu mani ha kokpiso ae; nangei na manita kokpi nole, maniha kokniyo ae.”
Jisu lea Thoma
24 Arui asomani sunga akha, Thoma (Abor tako kok) ha Jisu phaolei amochu mani itta amha phurno ae. 25 Chuna adang rui ngeina makolla rille, “Kanina Rengha risonge!” Thoma na manita rille, “Keina makutta thir ame kakutta thamalim khachu anakka kakutta tham malim kei ngoiring ang nonge.” 26 Rukni sari nutinga arui ngeina leya insunga bomma amlei, Thoma kom mani itta amha ae. Inn harha kalle, chuti weta Jisuna lut weta mani karra ngir weta rille, “Adai ha nangei kolla amsu oh.” 27 Hana amona Thoma ta rille, “Nakut chalha hina si oh; hana kakut hi anno; akhako nakutha yam chaweta kanakka thunno, nalung tinno ae no sa-oh ngoiring oh!” 28 Thoma na makolla sange, “Ka Rengpa khachu ka Chungthieng.” 29 Jisuna makolla rille, “Keita risarukka nangna ngoiring yo ah che? Eya ah yairha ah meh keita rino lutta ngoiringei ha!”
Hi Abai Hina Ahal
30 Jisuna aruingei maikunga anealah tullu eya ma lu phur hi Abai sunga yikno iya amsonge. 31 Chuti weta Jisu chu Chungthieng sanaopa Messiya aeta nangeina ngoiring ranga, akha chu nangeina amota ngoiring jarra. Nangei ha aring pha ang ae.
Jisuna Arui Sarita Melrung Muh Na
1 Hina nutinga, Jisuna woiha leya Tiberi Tuipi kolla arui ngeita ripisir ae. Hana amona manita ripi. 2 Simon Pitar, Thoma (Abor takok), Nathanel (Galily sung Caana thou phaopa), Zebedi sanaoparel, Jisu rui adang ani, hit manilim tulla amlei, 3 Simon Pitar na adangei ta rille, “Kei tuirik manthing angsinge.” “Kani ko nanu jui ange,” manina makolla rille. chuna manilim kung akha chunga thing so weh, chuti weta zinting huwar phao manina ekhaphao mant no ae. 4 Ni shukka hang jui ah, Jisuna tuihou ah ngirre, chuti weta arui ngeina chu Jisu ae ta dang phano ae. 5 Hana amona manita saiye, “Unga ngei oh, nangei e akha phao mant no chou meh?” akha phao mamonge, manina sange. 6 Amona manita rille, “Nangeina lenha kung changting nakka yunno, hana ahre mant ang chou ae.” Chuna manina len ha yun so weh, hana tuirik tamma mant na len he kaine niyo ae. 7 Jisu na lungsit arui Pitar ta rille, “Hichu Rengpa ha ae!” Pitar na Rengpa ae ta theiyuiya, amona malinglut achulha lahou weta (tichu amona malinglut ha lip so.) tuisung chomma lut so weh. 8 Adang rui ngeiko kungha chung weta tuihouwa tuirik na sihakti lenha kaiya wa-ae. Maniha kangpal pharang aram laniyowe, lam riha chak so weh. 9 Manina kang palla tungle, manina meihol tungpi weta achunga turik roh ah am akha chu batol ahre amha manina riso ae. 10 Jisuna manita rille, “Atuna nangei mant tuirik ahre choiya shukko.” 11 Simon Pitar na thing weta tuirik alok na sihakti lenha kaiya wa ae, tuirik limha tuljuiya riha lea somnga inthum shuk kae; haya tam yuihalko lenha itephao titno ae. 12 Jisuna manita rille, “Bakwa aowo.” Arui atu akha phaona amota, “Nang atu ah che meh?” ta saino ae roulam chu manina Renge ta dange. 13 Chuna Jisu na wa weta, batol laweta manita pe ae, tuirik ha ko laweta chuhekta ae so ae. 14 Chuna hi Jisuna athi hei thouwa ring thouwa amona aruingeita woithum su ah ripi so ae.
Jisu Lea Pitar
15 Manina baksulen, Jisu na Piter ta rille, “Simon Johon sanao pa, nangna hi adangei lungsitta lella keita lungsi cha meh?” “Oh ae, Rengo,” amon sange, “Keina nangta lungsi ae ti nangna dangche ae.” Jisuna amota rille, “Ka kelmo ha rhabakta anpi oh.” 16 Woini lea ah Jisu na amota rille, “Simon, Johon sanaopa, nang kei ta lungsi cha meh?” “Oh ae, Rengo,” amona sange, “Keina nangta lungsi ti nangna nadang ha ae.” Jisu na amota rille, “Ka kelmo ngei ha rha bakta anpi oh.” 17 Woithum shu ah Jisu na rille, “Simon, Johon sanaopa, nangna keita lugnsi cha meh?” Pitar ha alung olso ae, roulamchu Jisuna amota waithum, “Nangha keita lungsi cha meh?” ta saipachu. Chuna amona makolla rille, “Rengo, nang na ripta dang che ae; “Keina nangta lungsi ae ti nang dangche ae!” Jisuna amota rille, “Ka kelmo ngei ha rhabakta anpi oh. 18 Keina naninga adiek ka rillinge: nangna naoponglei chu nangna konghit sui weta nathing num na ah thingche ae; chuti weta nangna ulien chang jui chu, nangna naban dokkang che ae hana atuyong ngeina nangta huppange hana nathing numlou amunt ah thingang che ae.” 19 (Hita rilna chu Pitar anutinga mathitrang ha rilla ae.) Akha Chungtheing mahung pek ranga chuna Jisuna rille, “Kanu yui-oh.”
Jisu Akha Chu Adang Aruingei
20 Pitar na heiya anyui ah manungting Jisu na lungsit arui abakleiya Jisu ta haiton weta, “Rengo, atuna nangta yurrang ae ah meh?” ta sai arui ha ammeh. 21 Pitar na amota riyuiya, amona Jisu ta sai ae, “Reng, hi apa hi chu alo tiang meh?” 22 Jisu na maninga sange, “Keina amota kayung malim amhakko rille, nakolla inarillang am mameh? Kanu yuiyo!” 23 Chuna Jisu arui limngei na, Jisu arui ngei chu thiangno ah ata rouhi thei hom so weh. Chutiweta Jisu na chu amoha thi ang no ae ti ah no ae, amona maril chu, “Kei na kayung malim amona hakka amlea chu, nahana nakolla eshukka meh? tia ae. 24 Roulam ngeihi rilphur ae akha chu jiekka houphur aruiha hi ae, na majiek limhi adiekke ti anina dange.
Routreemna
25 Atun Jisuna aephur adang eya kon am meh. Halim ha akha akha jiek lea chu, simlei ram lima abai challang no ae ta ngai inge.