John 1

1 Thoutan bi Chongkaang ga am ngaake khatle Chongkaang ga Rikrwang le ong bacham ngaake khatle Chongkaang ga Rikrwang ngaake. 2 Maan thoutan bi Rikrwang le ong bacham ngaake. 3 Pot bingza Bapaan bina dam thang rwe khatle dam thang damnu pot bing ga Maan sui makka khatchale dam thang make. 4 Bakhou ringnu am ngaake khatle ringnu ga mi nun om babaan ngaake. 5 Babaan gana zingnu riak pi baan thang nge khatle zingnuna ha ding ga ngam make. 6 John diga kounu Rikrwang khouna lang hungnu manpa pakhat am ngaake. 7 Mi bing za bapaan bina balumsa dam lang, maanna Babaan om lang bi sake pi lang maan sake toga hung rwe. 8 Maan Babaan ga make atiyeda Babaan om lang bi sake pi lang lang hungnuwe. 9 Mi bing ding pi baan thangnu, talei ram bi hungnu ga bazenu Babaanne. 10 Maan talei ram bi am ngaake, Bapaan bina talei ram ding dam thang rwe atiyeda talei ram mi nunna Bating thei mak ngaake. 11 Maan Bami nun khou hung rwe atiyeda Bami nunna Bating loukhut thang make. 12 Atiyeda Bating lou thangnu bing ding, dinuba Bameng bi balumsanu nun ding Rikrwang sa rwan to lang Maanna ngam pi thang rwe: 13 bani ga thi bina mak tabe pum om baningnu mak tabe misa om baningnu bina ponnu make atiyeda Rikrwang om baningnu bina ponnuwe. 14 Chongkaangna zanti pum gonluga ani lak pi lung thang rwe khatle Pa khouna khat tak khatchanu Sa Kapaisa om lwat liannu, phaangkriang khatle bazenuna sipnu Balwat liannu ga anina phaangmu rwe. 15 John na Balang bi sake piga paoga rinne, “Eina rin damnu Maan ga heiya rwe, ‘Anung la hungnanu Maan ga ameithaanna am ngaak briakpina, Maan ama inkuwe.’ ” 16 Ani mi bingna Baom sipnu bina phaangkriang lu chung bi phaangkriang lousu rwe. 17 Balangbe Moses paan bina chongtan ga pi thang rwe atiyeda Jisu Christa paan bina phaangkriang le bazenu ga hung rwe. 18 Pakhatchanale Rikrwang ding impha ni beida mu make. Bapa pam bi ong ongnu, khat tak khatchanu Sa Kapaisa Maan gana Balang bi indao thang rwe. 19 Jihudi rwanna John khou, “Nang tubo?” diga ngai lang Jerusalem bi ongnu tako rwan le Levi rwan ding lang hungnu kaan bi maanna pi damnu sake ga heiye. 20 Maanna rin indao swak rwe khatle za maknu to make atiyeda “Ei Christa ga make” diga rin swak rwe. 21 Banina bakhou ngaiye, “Ati dabe nang tubo? Nang Elijah bo?” John na rinne, “Ei make.” “Nang Thiamting garubo?” Maanna katake “Make.” 22 Banina bakhou rinne, “Ani ding lang hungnu rwan khou anina chong katak pi lang, nang tubo? Nalang bi nang pa-aam rinnubo?” 23 John na rinne, “Thiamting Isaiah na rin damnu danga, ‘Ramhaang bi, “Pukraangba lampui ga to bazeyo,” diga pao ongnu khwan ga’ ei rwe.” 24 Bani ga Pharisee rwan khouna lang hungnu mi nunne. 25 Banina bakhou ngaiye, “Nang Christa le mak, Elijah le mak, Thiamting ga le mak tabe nang pa-aam to lang baptize tonubo?” 26 John na bani khou katake, “Eina tui bi baptize to thang nge atiyeda nanina thei maknu Pakhat nani lak pi han ongme. 27 Anung la hungnanu Maan ga ama inkuwe, baom sandal rui ga hakna sut lang ei khopnu make.” 28 Hei bing nga John na baptize to ongnu riak Jordan raan la amnu Bethany bi swak ngaake. 29 Inswan lampai John na bakim bi Jisu se hungnanu muluga rin rwe, “Phaang ngo, talei ram mi nun noh lou sat thangnu Rikrwang Zao saza! 30 ‘Anung la Pakhat hung nge, Maanna ama am basom ngaak briakpina, Maanna ama inkuwe,’ diga eina rin damnu Maan ga heiya rwe. 31 Balangbe Ei Bating thei mak ngaake; atiyeda Bating Israel rwan khou indao thang lang, eina tui bi baptize to thangga hung rwe.” 32 John na sake piga rinne, “Katha na tambaan lana banphi danga tanu ga eina mu rwe khatle Katha ga Balu chung bi am ngaake. 33 Ei Bating thei mak ngaake atiyeda tui bi baptize to thang lang ating lang hungnu Maanna akhou rinne, ‘Katha gana taluga Balu chung bi ta ongnu nangna mulune, Katha Bathiangnuna baptize to thang dingnu ga Maan rwe.’ 34 Maan Rikrwang Sa Kapaisa ga rwe dinu eina muluga sake pi rwe.” 35 Inswan lampai le, John na baom potroi pat ni le han ong ngaake. 36 Maanna Jisu se ongnu ding muluga rinne, “Phaang ngo Rikrwang Zao saza!” 37 Maanna kabianu ga potroi pat ni gana ngaisuluga, barwei Jisu nung sui drwe. 38 Jisu na kanei swak pi barweina Banung sui se ongnu muluga barwei khou rinne, “Narwei paaam ding zongnubo?” Barweina Bakhou rinne, “Rabbi” bakabana Bachuthangnupa dinuwe, “Nang ingaipai ongnubo?” 39 Maanna barwei khou rinne, “Hungluga phaang ngo.” Barweina hungnu kaan bi Maan ongnu riak ka mu rwe khatle ha ni ga barwei Maan le diga ong bacham rwe, haga chakrin som khak tanu dat pi ngaake. 40 John na kabianu ngaisuluga, Jisu nung sui damnu, pat ni lak pi pakhat ka Simon Peter nao, Andrew ngaake. 41 Maanna batang Simon ding kamaga kadouluga bakhou rinne, “Anina Messiah ding lou su rwe,” (bakabana Christa dinuwe). 42 Andrew na bating Jisu khou kalwang hung rwe. Jisu na bating phaangluga Maanna rinne, “Nang Jonah sa kapaisa Simon ne. Nating Cephas” “diga kou lang rwe,” (bakabana lung dinuwe).” 43 Bathang om lumik pi Jisu Galilee la se nwam ngaake, atiga Maanna Philip ting kadouluga bakhou rinne, “Anung suiro.” 44 Philip heiya Andrew le Peter na ongnu namlian, Bethsaida rwanne. 45 Philip na Nathanael ding kadouluga bakhou rinne, “Moses om chongtan khatle thiamting rwanna hiak thang ngaaknu Bating anina kadou rwe. Maan Joseph sa kapaisa Nazareth rwan Jisu we.” 46 Nathanael na bakhou rinne, “Nazareth pina kasanu swak lang khopkabo?” Philip na bakhou rinne, “Hungluga phaangro.” 47 Jisu na Nathanael Bakim bi hungnanu muluga, balang bi atiga rinne, “Phaang ngo, heiya bataknu Israel rwan miye, bakhou rou sianu maake!” 48 Nathanael na Bakhou rinne, “Nang ating tatoga theinubo?” Jisu na bakhou katake, “Philip na nating kou mak balei, nang tacham kung thwei bi ong ngaaknu ga Ei mu rwe.” 49 Nathanael na Bakhou katakka rinne, “Rabbi, Nang Rikrwang Sa Kapaisa ye! Nang Israel rwan Krwang nge!” 50 Jisu na bakhou katakka rinne, “ ‘Eina nating tacham kung thwei bi mu rwe,’ diga Eina rin briakpina nang balumsanubo? Hei ma lian inkunu chwan nang mulune.” 51 Maanna bakhou rinne, “Batak sekka Eina nakhou rinnuwe, heiba nung bi tambaan inkhaan lat swaknu khatle Rikrwang om tambaan chonglang rwanna Misa Sa Kapaisa lu chung bi tanu khatle kanu nanina phaangmulune.”

John 2

1 Ni thum ni Galilee taram Cana namlian bi tazwan bahwannu am ngaake khatle habei ga Jisu nu Mary le sui ngaake. 2 Banina Jisu le Baom potroi rwan ding le tazwan bahwannu riak pi ga talot ngaake. 3 Banina drakha tui ga maak hungnu kaan bi Jisu nu Mary na Bakhou rinne, “Bani drakha tui maak rwe.” 4 Jisu na Mary khou rinne, “He kamaisa, nangna banang thangga ongnu bi ga Athou pa-aam amgabo? Aom chakrin ga hung mak aang nge.” 5 Banuna swak rwan khou rinne, “Maanna nani khou rinnu ga towo.” 6 Jihudi rwan om bapum to bathiangnu om chaang toga, haba riak pi ga tui thang lang lung tui ben karuk am ngaake, tui ben khatna tui litre somkariat mak tabe raza khak chan ngaake. 7 Jisu na bani khou rinne, “Tui ben bing ga tui thangsipo.” Banina haga baring tangga thangsip rwe. 8 Maanna bani khou rinne, “Atun habei gana kasem la swakluga, balou om thoupuba khou piro.” Banina haga pi rwe. 9 Balou om thoupuna drakha tui gon damnu tui ga batem rwe khatle haga inlammangnabo dinu maanna thei mak ngaake (atiyeda haga tui la thang ngaaknu swak rwanna thei ngaake), habei ga balou om thoupuna tazwanpa ding kou rwe. 10 Atiga maanna bakhou rinne, “Mi bingna kama bi kasanu drakha tui pi inne atiga mi nunna in kalo taknu kaan bi kasem tadomnu drakha tui pi in late. Atiyeda nangna atun tangga kasanu drakha tui thang ong maang nge!” 11 Jisu na badannu chwan bing om kamanu heiya Galilee om Cana namlian bi to thangga, Balwat liannu chwan ga indao thang ngaake khatle Baom potroi rwanna Bating balumsa ngaake. 12 Haba nung bi Maan, Banu, Banao rwan le Baom potroi rwan le diga Capernaum la se ngaake; bani habei ga lumik taswang khak nei mak ngaake. 13 Jihudi rwan om Takan Swaknu Balou nai hungnu kaan bi Jisu Jerusalem la se ngaake. 14 Maanna kalum in bi sen chan, zao, banphi zwannu nun le sian kachoi kainu langgonnu mi nun ding hung dou rwe. 15 Habei ga Maanna senrui karengluga zao, sen chan khatle mi bing ding kalum in bina kazun swak rwe, sian kachoi bing ga le bun sat rwe khatle bani table bing ga le tun ka lat sat rwe. 16 Maanna banphi zwannu nun khou rinne, “Hei bing nga lou thou dro! Apa in ding nanina langgonnu in pi to mako.” 17 “Nain lang chungna sung khutnuna Ating sa sat ting rwe” diga hiak thang ngaaknu ga Baom potroi rwanna baningsu rwe. 18 Atibriak pina Jihudi rwanna bakhou katake, “Nangna hei bing nga to ru briakpina, ani khou pa-aam badannu chwan pi murubo?” 19 Jisu na bani khou katake, “Heiba kalum in ding nga raita dro atiga ni thum sung bi Eina haga to thou latne.” 20 Habei ga Jihudi rwanna rinne, “Heiba kalum inna to thou bi sangwan sombaliga karuk khute khatle Nangna hei ding nga ni thum bi to thou dingbo?” 21 Atiyeda Maanna rin ongnu ga Bapum om kalum in ding kabianuwe. 22 Atibriakpina Maanna thinu nun lak pina ring thou latnu kaan bi hei bing nga bani khou rin thang ngaake dinu Baom potroi rwanna baningsu rwe; habei ga banina Bathiangnu Chongdip khatle Jisu na rin thangnu chong ga balumsa rwe. 23 Takan Swaknu Balou ni, Maan Jerusalem bi ong ngaaknu kaan bi Maanna to damnu badannu chwan bing ga banina munu kaan bi mi taswang khakna Bameng bi balumsa rwe. 24 Atiyeda Jisu na mi bing ding bapu thei briakpina, Bazan ding bani khou bachoi thang mak ngaake, 25 atiga tudannu pakhatna mi khat om lang bi sake pi lang bathaang maake, balangbe mi khat sung bi pa-aam ambo dinu Maanna theiye.

John 3

1 Pharisee rwan lak pi Nicodemus tiga kounu, Jihudi rwan ding kai thangnu manpa khat am ngaake. 2 Heiba manpana zingpha Jisu kim bi hungluga Bakhou rinne, “Rabbi, Nang Rikrwang khouna hungnu Bachuthangnupa khate dinu anina theiye; balangbe Rikrwang na bakhou sui thang make dabe Nangna to ongnu chwan bing nga pakhatchanale tonu ngam make.” 3 Jisu na bakhou rinne, “Batak sekka Eina nakhou rinnuwe, mi khatna pon kathan make dabe, maan Rikrwang om krwang talei munu ngam make.” 4 Nicodemus na Bakhou rinne, “Mi pakhatna patso hungnu kaan bi tatoga pon lat ting gabo? Maan banu bon sung bi leng ninu toga khutluga ponnu ngamgabo?” 5 Jisu na katake, “Batak sekka Eina nakhou rinnuwe, mi pakhatna tui le Katha bi pon make dabe, maan ga Rikrwang om krwang talei bi khutnu ngam make. 6 Zanti pum bi ponnu gana zanti pumme, Katha bi ponnu gana katha ye. 7 ‘Nang pon kathan lat lang zung nge’ diga Eina rinnu bi loh lo mako. 8 Thiraangna raang nwamnu pek la raang nge khatle nangna bakhwan ga ngaisuwe atiyeda haga inlamna hungnubo khatle inlammang thou dambo dinu nangna thei make. Katha bina ponnu mi bing ga le hadannuwe.” 9 Nicodemus na Bakhou rinne, “Hei bing nga tatoga hung tangnu ngam dingbo?” 10 Jisu na bakhou rinne, “Nang Israel rwan om bachuthangnupa toluga, hei bing nga thei makpo? 11 Batak sekka Eina nakhou rinnuwe, Anina theinu ga Anina rinnuwe, Anina munu ga Anina sake pinuwe atiyeda Ani om sake ga nanina lou thang make. 12 Eina talei ram om lang bi nani khou rinnu kaan bi nanina balumsa make dabe, Eina tambaan om lang bi rinnnu kaan bi nanina tatoga balumsa langbo? 13 Tambaan lana tanu Misa Sa Kapaisa Maan ga makka, pakhatcha hakna tambaan la ka dam mak aang nge. 14 Moses na ramhaang bi barun ding kai thou damnu ga danga, Misa Sa Kapaisa ding le kai thoulune, 15 tudannu Bating balumsanu mi bingna braan lat makka ringzoknu kum lousu lang nge. 16 “Balangbe Rikrwang na talei ram ding atiga kriang thang rwe, hagazo Basa Kapaisa Khatchanu ding pi thang rwe, atiga Bating balumsanu mi bingna braan lat makka ringzoknu kum lousu rwe. 17 Balangbe talei ram ding chong to lang Rikrwang na Basa Kapaisa ding lang hungnu make atiyeda Bapaan bina talei ram ding kan thang langnaye. 18 “Bating balumsanu mi ga Maanna chong to make; atiyeda balumsa maknu bating ga chong to taang rwe, balangbe maanna Khat tak Khatchanu Rikrwang Sa Kapaisa meng ding balumsa make. 19 Chong tonu ga heiye, babaan ga talei ram bi hung rwe atiyeda mi nunna babaan ding ma zingnu ding bathai rwe, balangbe bani chwan ga sa make. 20 Balangbe kasianu chwan to ongnu mi bingna babaan ding batanne khatle bachwan ga indaolune diga babaan bi hung make. 21 Atiyeda tudannu bazenu to ongnu maan gana, maanna to ongnu chwan ga Rikrwang khou to ongnuwe dinu mu dam lang, babaan bi hung nge.” 22 Hei bing nung bi Jisu khatle Baom potroi rwan Judea taram la hung rwe khatle Maan habei ga bani le diga ong bachamluga bani ding baptize to thang ngaake. 23 John na le Salim kim bi amnu Aenon nampui bi ga baptize to thang ngaake, balangbe habei ga tui tamga am ngaake. Banina habei ga hungluga baptize to ngaake. 24 Balangbe haba kaan bi ga Herod na John ding qwan in bi thang mak aang nge. 25 John om potroi rwan le Jihudi rwan pakhat le diga to bathiangnu lang bi kae kale ngaake. 26 Banina John kim bi hungluga bakhou rin rwe, “Rabbi, Jordan raan la Maan nang le diga ong bacham ngaaknu, nangna Balang bi sake pi damnu ding ga phaang ngo, Maanna baptize to thang ongme khatle mi bing Bakhou hung ongme.” 27 John na katake, “Rikrwang na tambaan lana mi khat khou pi thangnu makka maanna khatchale lousu ngamlaye. 28 ‘Ei Christa make,’ Atiyeda ‘Bameithaan ating lang hungnuwe’ diga eina rin damnu bi ga nani aom sake rwe. 29 Tazwannu lousunu maan ga tazwanpa gaye; tazwanpa baan rwan gana, hanluga ngai ongnu kaan bi tazwanpa baraam ga ngaisuluga, taswang khak lang karowe. Atibriakpina akaro ga pi bapungpha thang rwe. 30 Maan inku thoulune atiyeda eiba inkhinta damlune. 31 “Basaang lana tanu Maan ga pum brumza lu chung bi amme; talei ram bina hungnu maan ga talei ram omme khatle maanna talei ram om chong kabiaye. Tambaan lana tanu Maan ga pum brumza lu chung bi amme. 32 Maanna mu damnu, ngaisu damnu ga Maanna sake piye; atiyeda pakhatchanale Baom sake ding ga lou thang make. 33 Baom sake lousu damnu maan gana Rikrwang nga bazenuwe dinu seal nam thang rwe. 34 Rikrwang na lang thangnu Maan gana Rikrwang chong kabiaye, balangbe Rikrwang na balaang Katha ga badatluga pi thang make. 35 Pa na Sa Kapaisa ding kriang nge khatle pum brumza Bakut pi sin thang nge. 36 Sa Kapaisa ding balumsanu maan ga ringzoknu kum lousu rwe khatle Sa Kapaisa ding balumsa maknu maan ga ringnu kum mulaye atiyeda Rikrwang balung pwan balu chung bi amme.”

John 4

1 Jisu na John ma potroi tamga khomluga baptize to thang damnu ga Pharisee rwanna ngaisu drwe dinu Maanna theinu kaan bi 2 (Jisu Maan bahakna baptize to thang make atiyeda Baom potroi rwan naye), 3 Maan Judea bathan satluga Galilee la thou lat tam ngaake. 4 Maan Samaria taram serwan thang lang bathaang am ngaake. 5 Atibriakpina Maan Samaria taram om Sychar diga kounu namlian bi hung rwe, haga Jacob na basa kapaisa Joseph lang pi thang ngaaknu louphung kom biye. 6 Habei ga Jacob om tuikhun am ngaake. Jisu Maan lampui se riangre hung briakpina, tuikhun kim bi hung ongta rwe. Haga chakrin karuk tanu dat pi ngaake. 7 Haba tuikhun bi ga Samaria rwan mannu pakhat tui laa lang hung ngaake. Jisu na bakhou rinne, “Alaang tui in lang piyo.” 8 Balangbe Baom potroi rwan ga nampui la thaisaak kalei lang thou dam ngaake. 9 Habei ga Samaria rwan mannu gana Bakhou rinne, “Nang, Jihudi rwan pakhat toluga, tatoga Samaria rwan nu akhou tui in lang ninubo?” Balangbe Jihudi rwanna Samaria rwan le diga kakhai kale mak ngaake. 10 Jisu na bakhou rinne, “Rikrwang om leithwan khatle nakhou ‘Alaang in lang tui piyo,’ diga rin ongnu Bating nangna bapu thei ngaake dabe nangna Bakhou ni ngaak tingnuwe, atiga Maanna nalaang ringnu tui ga pi thang ngaak tingnuwe.” 11 Haba mannu gana Bakhou rinne, “Bachuthangnupa, Nakhou tui laa ka lang khatchale maake, tuikhun le thuke. Nangna ringnu tui ga ingaina lousu dingbo? 12 Heiba tuikhunna ani lang pi thang ngaaknu, ani pa Jacob ma Nangna lian inkunubo? Maan bahak, basa kapaisa rwan khatle baom indwan khouring bing le abeina in ngaake.” 13 Jisu na bakhou katake, “Tudannu heiba tui innu maan ga taraan latlune, 14 atiyeda Eina bakhou pi dingnu tui ga innu mi bingna impha ni beida taraan lat pila rwe. Atiyeda Eina bakhou pi dingnu tui gabe balaang khwa sei ringnu kum pwak swaknu tuipwak imbeilune.” 15 Haba mannu gana Bakhou rinne, “Bachuthangnupa, ei taraan mak lang khatle abeiya tui hung la lat mak lang haba tui ga alaang pi thang ngo.” 16 Jisu na bakhou rinne, “Sero, nabasan ding kouluga abeiya hung ngo.” 17 Haba mannu gana katake, “Ei abasan maake.” Jisu na bakhou rinne, “Nangna ‘Abasan maake,’ diga bazega katak rwe, 18 balangbe nang nabasan impaang rwe, atun am ongnu ga nabasan make; nangna heiya bazega rin rwe.” 19 Haba mannu gana Bakhou rinne, “Bachuthangnupa, Nang thiamting khate dinu ei thei rwe. 20 Ani pu pa rwanna heiba rammwan biya kalum ngaake atiyeda nani Jihudi rwannaba kalum dingnu riak ka Jerusalem biye diga rinne.” 21 Jisu na bakhou rinne, “He kamaisa Ating balumsawo, nanina Pa ding heiba rammwan bi le Jerusalem bi le kalum mak tingnu chakrin ga hung rwe. 22 Nanina thei maknu Bating kalumme; anina theinu ga anina kalumme, balangbe ringriak ka Jihudi rwan omme. 23 Atiyeda bazenu kalumnu nunna Pa ding Katha bi khatle bazenu bi kalum dingnu chakrin ga hung tang rwe, atun le rwe; balangbe Pa na Pukraangba ding kalum lang ha rwan ding zong ongme. 24 Rikrwang nga Katha ye khatle Bating kalumnu mi nun gana katha bi khatle bazenu bi kalum ding gaye.” 25 Haba mannu gana Bakhou rinne, “Ei Messiah hunglune dinu theiye,” (Maan Christa diga kouwe). “Maanna hungnu kaan bi balang bingza ani khou rin thanglune.” 26 Jisu na bakhou rinne, “Nating chong kabia ongnu Eiya Maan ga rwe.” 27 Haba kahan bi ga potroi rwan hung lat rwe, Maanna mannu pakhatle diga meiri rai ongnu hung douluga bani loh lo rwe; atiyeda “Nang pa-aam ding zongnubo?” mak tabe “Nang mannu ga le diga impei meiri rai ongnubo?” diga pakhatchanale ngai mak ngaake. 28 Haba mannu gana baom tui ben ga thangsialuga, namlian la thou drwe khatle mi nun khou rinne, 29 “Hung ngo, eina to damnu chwan bing ding rin swaknu Manpa pakhat ting hung phaang ngo. Heiya Christa ga ngaak tingbo?” 30 Haba nung bi namlian bina mi nun swakluga Jisu kim bi hung rwe. 31 Atiyeda Baom potroi rwanna Bakhou rinne, “Rabbi, saro.” 32 Atiyeda Maanna bani khou rinne, “Nanina thei maknu thaisaak Alaang amme.” 33 Atibriakpina potroi rwanna bani cham atiga rin rwe, “Tudannu mi khatna balaang thaisaak lou hungnu am bi dabo?” 34 Jisu na bani khou rinne, “Aom thaisaak ka Ating lang hungnu Maanna baningnu chwan to ongnu khatle to loinu heiya rwe. 35 “ ‘Tha bali nung bi lou lwak dat hunglu rwe,’ diga nanina rin makpo? Phaang ngo, Eina nani khou rinnuwe, nani mai batou kaluga lou la phaang ngo, balangbe lou ga min bazin rwe! 36 Lou aatnu maan gana balo man lousuwe khatle khwa sei ring langna bakraa ga khom thouwe, atiga tachi bwannu le lou aatnu ga karo bachamme. 37 “Atibriakpina rin ongnuwa bazenuwe, ‘Pakhatna tachi bwanluga kateina lou lwake.’ 38 Nanina chwan to thang maknu riak pi lou aat lang Eina nani ding bathan thang rwe; katei rwanna chwan towe khatle banina chwan tonu gana nani lang tong rwe.” 39 “Eina to damnu chwan bing Maanna rin swak rwe,” diga mannu gana sake pi ga rin briakpina Samaria namlian bi mi taswang khakna Bating balumsa rwe. 40 Habei ga Samaria rwanna Bakim bi hungluga, Jisu ding bani khou neita thang lang rin rwe; Maan habei ga ni ni neita ngaake. 41 Atiga Bachong paan bina mi taswang khakna Bating balumsa rwe. 42 Banina mannu khou rinne, “Atun ani balumsa rwe, haga nangna rin briakpina makka, anina haga ngaisu briakpi naye, balangbe Maan talei ram ding Kanthangnupa, Christa ye dinu ani thei rwe.” 43 Ni ni nung bi Maan habei gana swakluga Galilee taram la thou dam ngaake. 44 Balangbe thiamting pakhat ting batalei bi takung tazei to thang make diga Jisu Maan Bahakna sake pi ngaake. 45 Jisu na Galilee bi hungnu kaan bi balou ni Maanna Jerusalem bi to damnu chwan bing ga banina mu briakpina Galilee rwanna Bating lou thang ngaake; balangbe bani le balou riak la se ngaake. 46 Jisu na tui ding drakha tui pi gonnu riak Galilee taram Cana bi hung lat rwe. Habei ga Capernaum la basa kapaisa naa ongnu tudannu kasei kalian pakhat am ngaake. 47 Jisu Judea lana Galilee bi hung ongme dinu maanna ngaisunu kaan bi maan Jisu kim bi hung rwe khatle Bating bain la seluga basa ding pi sa thang lang hweini rwe, balangbe basa ga thi dingga ong ngaake. 48 Jisu na bakhou rinne, “Nanina badannu le tasiatnu chwan mu mak basaan, nanina khatchale balumsalaye.” 49 Kasei kaliannu manpa gana Bakhou rinne, “Bachuthangnupa, asa thi maknu meithaan ta thang kammo!” 50 Jisu na bakhou rinne, “Sero; nasa Kapaisa ga ring ongme.” Bakhou rin thangnu chong ga manpa gana balumsaga se thou drwe. 51 Maanna se ong bi baswak rwanna bating kadouluga rinne, “Nasa Kapaisa ga ringga ongme!” 52 Habei ga maanna bani khou basa kapaisana sa damnu chakrin ga ngai rwe. Banina bakhou rinne, “Inzaan chakrin siari tanu dat pina bakhunnu ga lan drwe.” 53 Bapana haga Jisu na bakhou, “Nasa kapaisa ga ringga ongme,” diga rinnu chakrin bi ga rwe dinu thei rwe. Maan bahak khatle bain inkhun bing Jisu ding balumsa rwe. 54 Heiya Jisu na Judea lana Galilee bi hungnu kaan bi to lat tamnu leng ninu tasiatnu badanne.

John 5

1 Haba nung bi Jihudi rwan om balou khat am ngaake, ha ni ga Jisu Jerusalem la ka ngaake. 2 Jerusalem bi Zao Inkhaanmun diga kounu riak pi tuikhun khat am ngaake, heiya Hebrew chongla, Bethesda diga kouwe, haba tuikhun ga inkhu impaang am ngaake. 3 Habei ga naanu mi khang pui khat, mik chonu, ket thoknu khatle pum baang thinu nunna tui kaling thounu ding ngaakka ong ngaake. 4 Balangbe balak lak pi tambaan chonglang khat taluga tuikhun tui ga pi kaling ngaake; tui ga kaling thounu nung, tudannu takamanu maan ga, pa-aam aam tanat am ngaakle sa ngaake. 5 Haba riak pi ga sangwan somthumga kariat songa ongnu manpa khat am ngaake. 6 Jisu na maan habei ga in ongnu mu rwe khatle maan atiga ongnu ga bakhwa sei rwe dinu theiluga, Maanna bakhou rinne, “Nating pi sa thangnu bathaibo?” 7 Naanu manpa gana Bakhou katake, “Pukraangba, tui kaling thounu kaan bi ating tui bi phunta thang lang mi maake; atiyeda eina se hung bi mi kateina ameithaan takama damme.” 8 Jisu na bakhou rinne, “Lon thouro, nakain riak ka lou thouluga sero.” 9 Haba kahan bi haba manpa ga sa rwe khatle bakain riak ka lou thouluga se drwe. Haga Sabbath ni ngaake. 10 Atibriakpina naanu sa damnu manpa khou ga Jihudi rwanna rinne, “Aniya Sabbath lumik chung nge; nangna nakain riak phunluga se ong lang za make.” 11 Maanna bani khou katake, “Ating pi sa thangnu Maanna akhou rinne, ‘Nakain riak ka lou thouluga sero’ ” 12 Banina bakhou ngaiye, “ ‘Nakain riak ka lou thouluga sero’ diga nakhou rinnu Mi gazo tubo?” 13 Naanu sa damnu maan gana haga tubo dinu thei mak ngaake, balangbe habei ga amnu mi khang lak pina, Jisu sepen thou dam ngaake. 14 Haba nung bi Jisu na bating kalum in bi kadouluga bakhou rinne, “Phaang ngo, nating pi sa thang rwe. Nakhou inkuga kasianu hung lat mak lang noh tolanro.” 15 Haba manpa ga se swakluga bating pi sa thangnu ga Jisu we diga Jihudi rwan khou rin rwe. 16 Atibriakpina Jihudi rwanna Jisu ding rai rwe khatle Bating athat lang zong thou rwe, balangbe Maanna hei bing nga Sabbath ni to ngaake. 17 Atiyeda Jisu na bani khou katake, “Apa na atun tangga chwan to ongme khatle Ei le to ongme.” 18 Atibriakpina Jihudi rwanna Jisu ding athat lang inkuga zong thou rwe, balangbe Maanna Sabbath ting to baknuza makka, Rikrwang ding Bapa ye diye khatle Bating Rikrwang le pi bachamme. 19 Haba nung bi Jisu na bani khou rinne, “Eina nani khou batak sekka rinnuwe, Pa na tonu ga phaangmu briakpina makka, Sa Kapaisa gana baraanto khatchale tonu ngam make, balangbe Pa na tonu ga Sa Kapaisana le hadanga towe. 20 Balangbe Pa na Sa Kapaisa ding kriang nge, Maan Bahakna tonu bing ga Bakhou pi mu thang nge khatle nani loh lo lang, Maanna lian inkunu chwan bing pi mu thanglune. 21 Balangbe Apa na thinu nun ding pi ring thouluga bani khou ringnu pi thang rwe, hadanga Sa Kapaisana le Maanna pi ring thou nwamnu bani ding pi ring thoulune. 22 Balangbe Pa na pakhatcha ding hakna chong kasem make atiyeda chong kasem lang ha bing ga Sa Kapaisa khou pi thang rwe, 23 heiya banina Bapa ding takungnu ga danga Sa Kapaisa ding le khangsungna takung lang nge. Tudannu Sa Kapaisa ding takung maknu maan ga Bating lang hungnu Pa ding le takung maknuwe. 24 “Eina nani khou batak sekka rinnuwe, tudannu Achong ga theiluga Ating lang hungnu Bating balumsanu maan ga khwa sei ringnu lousu rwe khatle maan chongsem bi suila rwe atiyeda maan thinu bina ringnu bi takan swak rwe. 25 Eina nani khou batak sekka rinnuwe, thinu nunna Rikrwang Sa Kapaisa khwan ngaisu dingnu chakrin ga hung rwe, atun le rwe khatle ngaisunu banina ringlune. 26 Balangbe Pa na Bazan Bahak pi ringnu amnu ga danga, Sa Kapaisa Bahak khou le ringnu ga am dam lang Maanna ngam pi thang rwe 27 khatle Maan Misa Sa Kapaisa briakpina, Pa na bakhou chong kasem lang le ngam pi thang rwe. 28 “Hei ding nga nani loh lonu to mako; balangbe thaan sung bi ongnu bingna Bakhwan thei dingnu chakrin ga hung rwe, 29 atiga kasanu chwan tonu nunna ring lang khatle kasianu chwan tonu nunna pi koi thang lang, bani thaan bina ring thoulune. 30 Eina Araanto khatchale tonu ngam make. Eina theisunu nung suiga, Eina chong kasemme khatle Achong kasemga bazenuwe, balangbe Ating lang hungnu Apa na baningnu makka Araanto zana baningnu ga Ei zong make. 31 “Eina Araantoza om sake piye dabe, Aom sake ga baze maknuwe. 32 Alang bi sake pinu katei khat amme khatle Alang bi Baom sake ga bazenuwe dinu Ei theiye. 33 “Nanina chonglang rwan ding John khou lang hung rwe, atiga bazenu lang bi maanna sake to rwe. 34 “Eina mi nun om sake lou make atiyeda nani ding kan thang lang Eina hei bing nga rinnuwe. 35 Maan chok ongnu khatle baan ongnu thaomei gaye khatle nanina bakaan kasemza lang babaan bi karo ongnu bathaiye. 36 “Atiyeda John om ma lian inkunu Aom sake amme; balangbe Pa na Akhou pi bapung pha thang lang pi thangnu chwan, dinuba Eina to ongnu chwan bing ngana Ating Apa na lang hungnuwe dinu, Alang bi sake piye. 37 Ating lang hungnu Apa Bahakna, Alang bi sake pi rwe. Nanina impha ni beida Bakhwan ngaisu mak aang nge khatle Bating mu dam mak aang nge. 38 Bachong ga nani khou chat makka am ong make, balangbe Maanna lang hungnu Bating nanina balumsa make. 39 “Nani Bathiangnu chongdip tingga zong nge, balangbe habei ga khwa sei ringnu amme diga nani baning nge khatle Alang bi sake pinu ga haga rwe. 40 Atiyeda nani khou ringnu ga am lang nanina Akhou hung nwam make. 41 “Ei mi nun khouna takhwang bathai make. 42 Atiyeda Ei nani ding theiye, dinuba nani sung bi Rikrwang om kriang maake. 43 Ei Apa meng bi hung rwe atiyeda nanina Ating lou thang make; mi kateina bazan bahak om meng bi hung nge dabe, nanina bating lou thanglune. 44 Khat tak Khatchanu Rikrwang khouna hungnu lwat liannu ga zong makka, khatna khat ting takhwang tonu ding bathaiye dabe, nanina tatoga balumsanu ngam dingbo? 45 “Eina nani ding Pa meithaan bi koi impu thanglune diga baning mako; nani ding koi impu thangnu pakhat amme, haga nainina bachun ongnu Moses kaye. 46 Balangbe nanina Moses ting balumsa ngaake dabe nanina Ating le balumsa ngaak tingnuwe; balangbe maanna Alang bi hiak thang ngaak rwe. 47 Atiyeda maanna hiak thang ngaaknu ga nanina balumsa make dabe, tatoga nanina Achong ding balumsa dingbo?”

John 6

1 Hei bing nung bi Jisu na Galilee tuipui, Tiberias tuipui raan la takan swak ngaake. 2 Mi khang pui khat Banung sui se ngaake, balangbe Maanna tanat bachaat bingna naanu mi nun khou tasiatnu chwan to thang damnu ga banina mu ngaake. 3 Jisu na rammwan la kaluga, habei ga Baom potroi rwan le diga ongta rwe. 4 Takan swaknu Balou, Jihudi rwan om balou thaisaak ka nai hung ngaak rwe. 5 Jisu na Bamai batoukaluga phaangnu kaan bi mi khang pui gana Bakim bi hungnanu muluga, Maanna Philip khou rinne, “Hei rwanna sa dam lang ani uilu inlampaina kaleizobo?” 6 Jisu na haga Philip ting tamga rinnuwe, balangbe Maan Bazanna pa-aam to dingbo dinu theiye. 7 Philip na Bakhou katake, “Bani pakhat khatna tit titcha phang lang, denari raza ni om uiluna khoppilaye.” 8 Potroi rwan lak pi pakhat, Simon Peter nao, Andrew na Bakhou rinne, 9 “Abeiya barley uilu impaang le ngaa swan kani amnu naosen khat amme atiyeda mi heiza lang heiyana pa-aam to ding gabo?” 10 Jisu na rinne, “Mi nun ding ga pi ongtaro.” Balangbe habei ga lousam daam am ngaake. Atiga kapaisa rwan mi raching impaang khak badungta rwe. 11 Jisu na uilu ga louluga, swanka thangnu nung potroi rwan khou pi rwe khatle potroi rwanna ong ongnu mi nun lang kasem thang rwe; hadanga ngaa ga le, banina sakhop basaan lang kasem thang rwe. 12 Bani khangsung sa imbanu kaan bi Maanna potroi rwan khou rinne, “Kasem baleinu ga khatchale to braan makka khom thouwo.” 13 Banina haga khom thou rwe khatle mi nunna barley uilu impaang bina sabaleinu ga luklei somga kani sip ngaake. 14 Jisu na badannu chwan tonu mu damnu mi nun gana rinne, “Heiya batak takka talei ram bi hung dingnu Thiamting gaye.” 15 Bating krwang pi to lang banina hung nam ding rwe dinu Jisu na theiluga, Maan baraanto rammwan la pen thou lat tam ngaake. 16 Khwazinren tanu kaan bi Baom potroi rwan tuipui la taluga, 17 li hwan rwe khatle Capernaum pek la takan swak rwe. Bakaan ga zing ta ngaak rwe atiyeda Jisu bani kim la hung mak aang nge. 18 Thiraang rakanga raang hung briakpina tuipui ga kabaap thou rwe. 19 Banina li Hwanluga mile inthum bina bali khak hwankhutnu kaan bi Jisu tuipui chung bi ketna bani li pek la se hungnanu banina mu rwe; atiga bani kachi rwe. 20 Maanna bani khou rinne, “Ei zung nge; kachi mako.” 21 Atiga banina Bating li sung bi karoga loukhut thang rwe khatle haba kahan bi banina tang dingnu taram ga hung tang rwe. 22 Inswan lampai, tuipui paan bi han ong ngaaknu mi nun gana potroi rwanna twang damnu li ga makka, li katei mu dam make khatle Jisu potroi rwan le diga li bi se dam make, bani raantoza thou damme dinu banina thei ngaake, 23 Atiyeda Pukraangba na swanka thangluga bani uilu sa bacham ngaaknu riak kim bi, Tiberias lana li kasem hung rwe, 24 mi nunna Jisu le, potroi rwan habei ga ong lan rwe dinu theiluga, bani le li bing bi ga twangluga Capernaum la Jisu ding zong hung ngaake. 25 Banina Bating tuipui raan khat la kadounu kaan bi Bakhou rin rwe, “Rabbi, Nang abeiya impei dat pi hungnubo?” 26 Jisu na bani khou rinne, “Eina nani khou batak sekka rinnuwe, nanina badannu chwan mu dam briakpina Ating zongnu make atiyeda nanina uilu sa imba briakpi naye. 27 Braan dam dingnu thaisaak langna nani chwan to mako atiyeda Misa Sa Kapaisana nani lang pi thang dingnu khwa sei ringnu thaisaak langna nani chwan towo, balangbe Pa Rikrwang na Baom seal ga Misa Sa Kapaisa lu chung bi nam thang rwe.” 28 Banina Jisu khou ngaiye, “Rikrwang chwan to lang, anina pa-aam to langbo?” 29 Jisu na bani khou katake, “Maanna lang hungnu Bating balumsanu heiya Rikrwang chwan rwe.” 30 Atibriakpina banina Bakhou rinne, “Anina muluga Nating balumsa lang, Nangna ani khou pa-aam badannu pi thang dingbo? Nangna pa-aam chwan tonebo? 31 Ani pu pa rwanna ramhaang bi manna sa ngaake; heiya hiak thang ngaaknu ga dannuwe, ‘Maanna bani khou tambaan lana sa lang uilu pi thang ngaake.’ ” 32 Jisu na bani khou rinne, “Eina nani khou batak sekka rinnuwe, Moses na nani lang tambaan lana uilu pi thang make atiyeda Apa na tambaan lana nani lang bataknu uilu pi thang rwe. 33 “Balangbe Rikrwang om uilu ga tambaan lana tanu talei ram mi nun lang Bakum pi swak ngaaknu Maan gaye.” 34 Banina Bakhou rinne, “Pukraangba, bakaan bathin haba uilu ga ani lang pi thang ngo.” 35 Jisu na bani khou rinne, “Ei ringnu uilu gaye. Tudannu Akhou hungnu maan ga chaam latla rwe khatle Ating balumsanu maan ga taraan latla rwe. 36 Atiyeda Eina nani khou rinnuwe, nanina Ating mu beida balumsa make. 37 Apa na Akhou pi thang damnu bing ga Akhou hunglune khatle Akhou hungnu bating ga Eina bathou satla rwe. 38 “Balangbe Ei Araanto zana baningnu chwan to lang, tambaan lana tanu make atiyeda Ating lang hungnu Maanna baningnu chwan to lang naye. 39 Ating lang hungnu Pa na baningnu ga heiye dinuba Maanna Akhou pi thang damnu bing ding Eina khatchale to braanlaye atiyeda kakhamnu lumik pi bani ding pi ring thou thangne. 40 Ating lang hungnu Maanna baningnu ga heiye, Sa Kapaisa ding munu khatle Bating balumsanu mi bingna khwa sei ringnu lousu lang nge khatle kakhamnu lumik pi Eina bating pi ring thoulune.” 41 Jihudi rwanna Balu chung bi tu tu tam tam thou rwe, Balangbe “Ei tambaan lana tanu uilu gaye,” diga Maanna rin ngaake. 42 Banina rinne, “Heiya Jisu, Joseph sa kapaisa, Banu le Bapa ding ani theinu makpo? Atiyeda Maanna tatoga ‘Ei tambaan lana tanuwe,’ diga rinnubo?” 43 Atibriakpina Jisu na bani khou katake, “Nani lak pi tu tu tam tam mako. 44 Ating lang hungnu Pa na bating kai hung thangnu makka pakhatchanale Akhou hungnu ngam make; atiga Eina bating kakhamnu lumik pi pi ring thoulune. 45 “Thiamting rwanna hiak thang nge, ‘Rikrwang na bani mi bing ding bachu thanglune.’ Atibriakpina Pa khouna theisu damnu khatle bachu damnu mi bing gana Akhou hunglune. 46 Rikrwang khouna hungnu Maanza gana Pa ding munu makka, pakhatchanale Pa ding mu make; Maanna Pa ding mu rwe. 47 “Eina nani khou batak sekka rinnuwe, tudannu Ating balumsanu maan ga khwa sei ringnu lousu rwe. 48 Ei ringnu uilu gaye. 49 Nani pu pa rwanna ramhaang bi manna sa ngaake khatle bani thi damme. 50 Mi pakhatna saluga thi lat mak tingnu, tambaan lana tanu uilu ga heiya rwe. 51 Ei tambaan lana tanu ringnu uilu gaye. Tudannu heiba uilu saye dabe, maan ga khwa sei ringlune; Eina pi dingnu uilu ga talei ram mi nunna ring lang Eina pi dingnu Azan ga rwe.” 52 Atibriakpina Jihudi rwanna bani cham kana kalega rinne, “Tatoga heiba Manpana Bazan sa lang ani lang pinu ngamgabo?” 53 Haba nung bi Jisu na bani khou rinne, “Eina nani khou batak sekka rinnuwe, nanina Misa Sa Kapaisa zan ga sa make dabe khatle Bathi ga in make dabe, nani khou ringnu amlaye. 54 Tudannu Azan sanu khatle Athi innu maan ga khwa sei ringnu kum lousu rwe khatle Eina bating kakhamnu lumik pi pi ring thou thanglune. 55 Batakka Azan ga thaisaake, batakka Athi ga in lang nge. 56 Azan sanu khatle Athi innu maan ga Akhou ongme atiga Eina le bakhou ongme. 57 Ringga ongnu Pa na Ating lang hungnu khatle Ei Bapaan bina ringnu danga, Azan sanu maan ga le Apaan bina ringlune. 58 Tambaan lana tanu uilu ga heiya rwe, nani pu pa rwanna manna saluga thinu ga dannu make. Heiba uilu sanu maan ga khwa sei ringlune.” 59 Hei bing nga Maanna Capernaum bi bachu thang damnu danga synagogue pi rin damnuwe. 60 Baom potroi rwan taswang khakna heiba chong nga ngaisuluga rinne, “Heiya kung taknu chong zung nge; tuna heiya theinu ngam ding gabo?” 61 Baom potroi rwanna hei lang bi tu tu tam tam ongnu ga Jisu na theiluga, Maanna bani khou rinne, “Heiyana nani ket basuirubo? 62 Misa Sa Kapaisa gana Maanna ong ngaaknu riak la ka damnu phaangmunu kaan bi nani tato dingbo? 63 Ringnu pi thangnu ga Katha ye; zanti pumba khatchale tongnu maake. Eina nani khou kabia damnu bing ga Katha ye khatle ringnuwe. 64 Atiyeda nani nun lak pi balumsa maknu kasem amme.” Balangbe thoutan bina Jisu na Bating balumsa maknu khatle Bating pi swak tingnu ga tubo dinu kamaga theichaak ngaake. 65 Atiga Maanna rinne, “Atibriakpina Eina nani khou rin drwe, Apa na bakhou za thang make dabe, pakhatchanale Akhou hungnu ngam make.” 66 Habei gana thouga Baom potroi rwan mi taswang khak Bakhouna thou dam ngaak briak pina Maan le se bachamlan rwe. 67 Jisu na potroi pat somga kani khou rinne, “Nani le thou dam nwamrubo?” 68 Simon Peter na Bakhou katake, “Pukraangba, ani tu nung sui dinggabo? Nakhou khwa sei ringnu chong bing ga amme. 69 Nang Christa gaye, ringnu Rikrwang Sa Kapaisa gaye dinu anina thei rwe khatle balumsa rwe.” 70 Jisu na bani khou rinne, “Nani nun mi pat somga kani ding Eina ka thangnu makpo atiyeda pakhat kaba Diabol ne?” 71 Maanna haga Simon sa kapaisa, Judas Iscariot om lang bi rinnuwe, balangbe maan potroi pat somga kani lak pi sui ngaak peida, Jisu ding pi swak tingnu pakhat ka maan ngaake.

John 7

1 Heiba nung bi Jisu Galilee taram la se ngaake; balangbe Jihudi rwanna Bating athat lang zong briakpina, Maan Judea bi se thang kaat ngaake. 2 Jihudi rwan om Pwan In Balou nai hung ngaak rwe. 3 Atibriakpina Banao kapaisa rwanna Bakhou rinne, “Naom potroi rwanna Nangna tonu chwan bing ga phaangmu lang, Nang abeina se swakluga Judea la sero. 4 Balangbe bazan ding phun indao nwamnu maanna inkamga khatchale chwan to make. Nangna heiba chwan bing nga towe dabe, talei ram bi Naraanto Nating indao swako.” 5 Balangbe Banao kapaisa rwanna tangga Bating khatchale balumsa mak ngaake. 6 Habei ga Jisu na bani khou rinne, “Aom bakaan hung mak aang nge atiyeda nani langba badou chanu ga bakaan bathin amme. 7 Talei ramna nani ding batannu ngam make atiyeda Eina bani chwan bing ga sa make diga sake pi briakpina talei ramna Ating batanne. 8 Nani balou riak la ga sero. Ei balou riak la ga sela maang nge, balangbe Aom bakaan ga hung mak aang nge.” 9 Maanna hei bing nga bani khou rin taangnu nung, Maan Galilee bi ongsia rwe. 10 Atiyeda Banao kapaisa rwanna thou damnu nung, Maan le balou riak la se ngaake atiyeda indaonu to makka, inkamga se ngaake. 11 Habei ga Jihudi rwanna balou riak pi Bating zong ga rinne, “Maan ingaipai ambo?” 12 Mi nun lak pi Balang bi kasao kabao thou rwe. Mi kasemna rinne, “Maan mi kasanu zung nge,” katei rwanna rinne, “Make, Maan mi nun ding minamme.” 13 Atiyeda Jihudi rwan ding kachi briakpina pakhatchanale Balang bi indaoga rin mak ngaake. 14 Balou om bazai tangnu kaan bi Jisu na kalum in bi seluga mi nun khou bachu thang ngaake. 15 Jihudi rwanna loh lo ga rinne, “Maan khatchale bachu makka, hei bing nga tatoga theinubo?” 16 Jisu na bani khou katake, “Aom zekrin heiya Aom make atiyeda heiya Ating lang hungu Baomme. 17 Tudannu pakhatna maanna baningnu ga to nwamme dabe, zekrin heiya Rikrwang khounnamo mak tabe Ei Araantoza om ngamna kabia ongnumo dinu maanna theilune. 18 Baraantoza ding kabia ongnu maan gabe baraantoza ding swan lang zong ongnuwe; atiyeda Bating lang hungnu Bapa ding swan lang zong ongnu maan ga bazenuwe khatle bakhou ririak se maknu maake. 19 Moses na nani khou chongtan pi thangnu makpo? Atiyeda nani pakhatchanale haga ngaak make. Pa-aam lang nanina Ating athat lang zongnubo?” 20 Mi nunna katake, “Nakhou ri kasia khut rwe. Tuna Nating athat lang zong gabo?” 21 Jisu na bani khou rinne, “Eina chwan khat towe, atiga nani mi bingna loh lowe. 22 Atibriakpina Moses na nani khou mun rom lang chongtan pi thang rwe (Heiya Moses khouna make atiyeda haga pu pa rwan khou naye) khatle nanina Sabbath ni mun romme. 23 Mi khatna Moses om chongtan ga to bak mak lang Sabbath ni mun romme dabe, Eina Sabbath ni naanu mi pakhat ting pi sa bathiang thang briakpina nanina Alu chung bi pa-aam lang balung pwannubo? 24 Nanina bapaan bi munu bi ga chong kasem mako atiyeda ririak senu chongsemna chong kasemmo.” 25 Jerusalem lana hungnu mi kasemna rinne, “Banina athat lang zong ongnu Maan ga heiya makpo? 26 Atiyeda Phaang ngo, Maanna sung raangga chong kabiaye khatle banina Bakhou chong khatchale rin make. Heiya Christa ye dinu bapuba rwanna bathiangga thei ngaak tingbo? 27 Atiyeda Manpa heiya inlamnabo dinu anina theiye; atiyeda Christa na hungnu kaan bi Maan inlamnabo dinu pakhatchanale theilaye.” 28 Jisu na kalum in bi bachu thang ongnu kaan bi Maanna paoga rinne, “Nanina Ating theiye, Ei inlamna hungnubo dinu nanina theiye; Ei Araantoza khouna hungnu make atiyeda Ating lang hungnu Maan ga bazenuwe, nanina Bating thei make. 29 Balangbe Eina Bating theiye, Ei Bakhou naye khatle Maanna Ating lang hungnuwe.” 30 Atibriakpina banina Bating nam lang zong ngaake; atiyeda bani pakhatchanale Balu chung bi kut ta mak ngaake, balangbe Baom chakrin ga hung mak ngaak maang nge. 31 Mi nun tamga Bating balumsaruga, banina rinne, “Christa na hungnu kaan bi heiba Manpana to damnu ma inkuga Maanna tolu dingbo?” 32 Mi nunna Balang bi tu tu tam tamga kabia ongnu ga Pharisee rwanna ngaisu rwe, habei ga Pharisee rwan le diga takopuba rwanna Jisu ding nam lang kalum in ngaak rwan ding lang thang ngaak rwe. 33 Jisu na bani khou rinne, “Ei nani le diga bakaan kasem ong bachamlune, haba nung Ating lang hungnu Bakim la Ei selune. 34 Nanina Ating zonglune atiyeda zongsulaye khatle Eina ongnu riak la nanina hung ngamlaye.” 35 Jihudi rwanna bani cham atiga rinne, “Anina zongsula dingnu riak inlampai Maan se dingnubo? Maan Greek rwan lak pi pak imphaang thou damnu riak la Greek rwan ding bachu thang lang se dingnubo? 36 Maanna ‘Nanina Ating zonglune atiyeda zongsulaye khatle Eina ongnu riak la nanina hung ngamlaye’ diga rinnuwa impei chongbo?” 37 Kakhamnu lumik, baloudei ni, Jisu na han thouluga paoga rinne, “Tudannu taraanne dabe, maan Akim bi hungluga in ding ngo. 38 Tudannu Ating balumsanu maan ga, Bathiangnu Chongdipna rin damnu ga danga, balungning bina ringnu tuiqwa lwang swaklune.” 39 Maanna heiya Bating balumsanu nunna lousu dingnu, Katha om lang bi rinnuwe; balangbe haba kaan bi tangga Jisu ding lwat pi lian mak aang briakpina, Katha Bathiangnu ga pi thang mak ngaak maang nge. 40 Atibriakpina rin ongnu chong ga ngaisunu mi nun lak pi mi taswang khakna rinne, “Batak takka heiya Thiamting khat chung nge.” 41 Katei rwanna rinne, “Heiya Christa ga rwe.” Atiyeda mi kasemna rinne, “Christa ga Galilee lana hunglu dingbo? 42 David inphum khatle David na ong ngaaknu namlian, Bethlehem bina Christa hunglune diga Bathiangnu Chongdipna rin damnu makpo?” 43 Atiga Balang bina mi nun lak pi sung cham maknu am ngaake. 44 Bani nun mi kasemna Bating nam nwam ngaak rwe atiyeda pakhatchanale Bakhou kut zaan thang make. 45 Kalum in ngaak rwanna takopuba rwan le Pharisee rwan khou han hungnu kaan bi banina kalum in ngaak rwan khou ngaiye, “Pa-aam toga nanina Bating phun hung maknubo?” 46 Kalum in ngaak rwanna katake, “Mi pakhatchanale heiba Manpa danga impha ni beida chong kabia mak aang nge!” 47 Pharisee rwanna bani khou ngaiye, “Nani ding le minamrubo? 48 Bapuba rwan mak tabe Pharisee rwan tudannu Bating balumsanu suirugabo? 49 Atiyeda chongtan ding thei maknu bani ga taseng ta thangnu mi nun zung rwe.” 50 Nicodemus na (Kani khat zingpha Jisu kim bi hung ngaaknu maan ga, bani lak pi naye) bani khou rinne, 51 “Mi pakhatna rinnu ngai mak balei ani chongtanna bating chong kasemgabo?” 52 Banina bakhou katake, “Nang le Galilee lanabo? Zongluga phaang ngo, balangbe Galilee bina thiamting pakhatcha hakna swak make.” 53 Habei ga bani mi bing bain bain la thou dam ngaake.

John 8

1 Jisu Olive Rammwan la thou dam ngaake. 2 Maan louthwan khwan kalum in bi hung lat rwe khatle mi bing le Bakim bi hung rwe; habei ga Maan badungtaluga mi nun ding bachu thang rwe. 3 Chongtan bachuthangnu rwan le Pharisee rwanna lungkoi lungmaannu chwan to ong ngaaknu kamaisa pakhat ting namluga Bakim bi kalwang hung rwe. Banina bating mi nun zai bi thangluga, 4 Jisu khou rinne, “Bachuthangnupa, heiba mannu ding nga lungkoi lungmaannu chwan to ong ngaaknu dat pi anina nam hungnuwe. 5 Moses om chongtanna, ani khou heipai ding nga lungna satthat lang nge diga zathang pi thang nge. Atiyeda Nangna pa-aam rinbo?” 6 Banina heiya Bating koi impu thang langna, Bating tamga rinnuwe. Atiyeda Jisu na kuntaluga banina kabia ongnu ga thei maknu danga, talei bi Bakutzungna hiak ong ngaake. 7 Banina Bakhou ngai lat latka ong briakpina, Maanna phaangkaluga bani khou rinne, “Nani lak pi tudannu noh maaknu pakhatna, kamaga heiba mannu ding lungna sat ting ngo.” 8 Maan kunta latluga talei bi hiak ong ngaake. 9 Haga ngaisunu kaan bi kakoi baze theinu sungna bani koi theiluga bani patso khouna thouga kakhamnu tangga, khat khat toga se swak tam ngaake. Habei ga Jisu za ding thangsia rwe khatle kamaisa gana bazai bi han ong ngaake. 10 Jisu na batoukanu kaan bi kamaisa ga makka pakhatcha ding le mulan rwe, Jisu na bakhou rinne, “Kamaisa, nating koi impu thangnu mi nun ga inlam thoudrubo? Nating pakhatchanale pi koi thang makpo?” 11 Maanna rinne, “Pukraangba, pakhatchanale pi koi thang make.” Jisu na bakhou rinne, “Eina le nating pi koi thang make; sero khatle noh to latlanro.” 12 Heiba nung bi Jisu na bani khou rin late, “Ei talei ram om babaanne. Anung suinu maan ga zingnu bi sebila rwe atiyeda bakhou ringnu baan ga amlune.” 13 Atibriakpina Pharisee rwanna Bakhou rinne, “Nangna Naom lang bi sake piye; Naom sake ga baze make.” 14 Jisu na bani khou rinne, “Eina Aom lang bi sake pi beida, Aom sake ga bazenuwe, balangbe Ei inlamna hungnubo khatle inlam se ongnubo dinu Eina theiye; atiyeda Ei inlamna hungnubo khatle inlam se ongnubo dinu nanina thei make. 15 Nanina pum nung suiga chong kasemme; Ei pakhatcha ding hakna chong kasem make. 16 Eina chong kasem ngaak peida, Achongsem ga bazenuwe; balangbe Ei Araantoza make atiyeda Ei Ating lang hungnu Pa le ong bacham ongme. 17 Nani om chongtan bi pat nina sake pinuga bazenuwe diga le hiak thang ongme. 18 Aom lang bi sake pinu Ei khat rwe khatle Ating lang hungnu Pa na Aom lang bi sake piye.” 19 Banina Bakhou rinne, “Napazo ingaipai ambo?” Jisu na katake, “Nanina Ating le Apa ding le thei make. Nanina Ating thei ngaake dabe Apa ding le thei ngaak tingnuwe.” 20 Jisu na heiba chong bing nga kalum in bi bachu thangnu danga, sian rik in bi kabia ngaake; Baom chakrin hung mak aang briakpina, pakhatchanale Bating nam mak ngaake. 21 Jisu na bani khou rin late, “Ei se swak tam maang nge, nanina Ating zonglune khatle nani nani noh bi thilune. Eina senu riak la nanina hung ngamlaye.” 22 Jihudi rwanna rinne, “ ‘Eina senu riak la nanina hung ngamlaye’ diga rinnuwa Maan Baraanto thi ding bidamo?” 23 Jisu na bani khou rinne, “Naniba kathwei la naye; Eiba basaang la naye. Naniba talei ram bi naye; Eiba heiba talei ram bina make. 24 Atibriakpina nani nani noh bi thilune diga Eina nani khou rin drwe; balangbe nanina Ating Maan ga rwe diga balumsa make dabe, nani nun nani noh bi thilune.” 25 Banina Bakhou ngaiye, “Nang tubo?” Jisu na bani khou rinne, “Eina kama bina nani khou rin damnu ga rwe. 26 “Nani nun om lang bi Eina rin lang khatle chong kasem lang taswang khak amme atiyeda Ating lang hungnu Maan ga bazenuwe khatle Eina Bakhouna theinu bing ga talei ram bi mi nun khou rin swaknuwe.” 27 Jisu na Pa om lang bi rinnu ga banina bakaba thei mak ngaake. 28 Jisu na bani khou rinne, “Misa Sa Kapaisa ding nanina taan kanu kaan bi Ei Maan ga rwe, Araanto zana tonu make; atiyeda Apana Akhou bachu thangnu danga, Eina hei bing nga rin ongnuwe dinu nanina theilune. 29 Ating lang hungnu Maan ga Ei le ong bacham ongme. Pa na Araantoza ding bathan thang make, balangbe Eina Bating pi pemnu chwan bakaan bathin towe.” 30 Maanna heiba chong bing nga rinnu kaan bi mi taswang khakna Bating balumsa rwe. 31 Jisu na Bating balumsanu Jihudi rwan khou rinne, “Nani nun Aom chong biya chat makka ong nge dabe nani Aom potroi rwan bahak rwe. 32 Nanina bazenu ga theilune khatle bazenu gana nani ding rang pi to thanglune.” 33 Banina Bakhou rinne, “Ani Abraham om bakik taat rwanne, ani pakhatcha om swak to mak aang nge. Atibriakpina Nangna tatoga ‘Nani ding rang pi to thangne’ diga rinnubo?” 34 Jisu na bani khou rinne, “Eina nani khou batak sekka rinnuwe, noh tonu bing ga noh swake. 35 Swak ka in bi khwa sei lang ong make atiyeda sa Kapaisa gabe khwa sei lang ong nge. 36 Atibriakpina Sa Kapaisa gana nani ding rang pi to thang nge dabe, batak takka nani rang tolune. 37 Nani nun Abraham om bakik taat rwanne dinu Ei theiye atiyeda nanina Ating athat lang zong ongme, balangbe Achong ga nani khou maake. 38 Eina Apa le diga mu damnu ga rinnuwe atiyeda nanina nani pa rwan khouna munu ga nanina towe.” 39 Banina Bakhou rinne, “Abraham ga ani pa ye.” Jisu na bani khou rinne, “Nani nun Abraham sa rwanne dabe, Abraham na tonu chwan ga nanina le to ngaak tingnuwe. 40 Atiyeda Rikrwang khouna bazenu ngaisunu nani khou bachu thangnu Ating nanina athat lang zong ongme. Abraham naba heiya to make. 41 Naniba nani pa om chwan ga towe.” Banina Bakhou rinne, “Ani ding lungmaannu chwan toga pon thangnu sa rwan make; ani Pa khat amme, haga Rikrwang nge.” 42 Jisu na bani khou rinne, “Rikrwang ga nani Pa ngaake dabe nani Ating kriang ngaak tingnuwe, balangbe Ei Rikrwang khouna swak rwe khatle hung rwe; Ei Araanto hungnu make atiyeda Maanna Ating lang hungnuwe. 43 Eina rin ongnuwa nani pa-aam toga thei maknubo? Balangbe Eina rin ongnu chong nga nanina ngainu ngam make. 44 Naniba nani pa Diabol omme khatle nanina nani pa na bathainuza ga nanina tonu bathaiye. Maan kama bina mi athatnuwe khatle bazenu bi han make; balangbe bakhou bazenu khatchale maake. Maanna chong karwaknu kabianu kaan bi baraanto zana theinu ga kabiaye, balangbe maan chong karwaknuwe khatle maan haba pa gaye. 45 Atiyeda Eina bazenu rin briakpina, nanina Ating balumsa make. 46 Nani nun lak pi tuna Ating noh amme diga indaonu ngambo? Eina nani khou bazenu rinne dabe, nani pa-aam toga Ating balumsa maknubo? 47 Rikrwang khouna hungnu maan gana Rikrwang chong ngaiye; atiyeda nani Achong ga ngai thang make, balangbe nani Rikrwang khouna make.” 48 Jihudi rwanna Bakhou rinne, “Nang Samaria rwan khatle ri kasia khutnu miye diga anina bazega rin damnu makpo?” 49 Jisu na katake, “Akhou ri kasia khut make; atiyeda Eiba Apa ding takung nge, nanina Ating takung make. 50 Ei Araanto lwat lang zongnu make; ha ding zongluga chong kasem ongnu Pakhat amme. 51 Eina nani khou batak sekka rinnuwe, tudannu Achong zeiye dabe, maan impha ni beida thinu mulaye.” 52 Jihudi rwanna Bakhou rinne, “Nang ri kasia khutnu miye dinu atun anina thei rwe! Abraham le thi drwe khatle thiamting rwan le thi drwe; atiyeda nangna rinne, ‘Tudannu Achong zeinu maan ga thinu khatchale batemlaye.’ 53 Thi damnu ani pa Abraham ma Nangna liannubo? Thiamting rwan le thi drwe. Nang Naraanto Nating tuwe dinubo?” 54 Jisu na katake, “Eina Araanto Ating swankaye dabe, Ei swankanu ga khatchale make. Ating swanka thangnu ga Apa naye, Maan nani Rikrwang nge diga Balang bi nanina rinne. 55 Atiyeda nanina Bating thei make atiyeda Eina Bating theiye. Eina ‘Ei Bating thei make,’ diga rinne dabe, Ei nani danga chong karwaknu to rwe; atiyeda Ei Bating theiye khatle Eina Bachong zeiye. 56 Nani pa Abraham na Aom lumik ka mulune diga karo ngaake khatle maanna haga muluga karo ngaake.” 57 Jihudi rwanna Bakhou rinne, “Nang sangwan somnga hakna tang mak aang nge, Nang Abraham ding murugabo?” 58 Jisu na bani khou rinne, “Eina nani khou batak sekka rinnuwe, Abraham pon mak balei meithaanna Ei amme.” 59 Habei ga banina lung kachung thouluga Bating sat lang to rwe; atiyeda Jisu na inkamga kalum in bina swakluga, bani lak pi se phao swak tam ngaake.

John 9

1 Jisu na se hungnu kaan bi mik choga ponnu manpa pakhat ting Maanna mu ngaake. 2 Potroi rwanna Bakhou ngaiye, “Rabbi, maan mik choga ponnuwa tuna noh to briakpinabo, heiba manpa namo mak tabe banu bapanabo?” 3 Jisu na katake, “Heiba manpana le make, banu bapana le make atiyeda Rikrwang chwan bakhou indao lang naye. 4 Ating lang hungnu Bachwan ga Eina lumik ambalei to lang nge; pakhatchanale chwan to ngam mak tingnu zingpha ga hung naye. 5 Ei talei ram bi ong basaan, Ei talei ram lang baannuwe.” 6 Maanna hei bing nga rinluga, talei bi bachinta rwe khatle hagana talei nei imphaanluga; mik chonu manpa mik pi tei thang rwe. 7 Maanna mik chonu manpa khou rinne, “Sero, Siloam tuikhun la kasin satro,” (bakabana bathan thangnu dinuwe). Maanna seluga kasin sat rwe khatle mik muga hung lat rwe. 8 Atibriakpina banu pok pina mik chonuwe dinu mu damnu innai lounai rwanna rinne, “Manpa heiya badungluga nisa ongnu ga makpo?” 9 Mi kasemna rinne, “Heiya maan gaye.” Kateina rinne, “Bating kapwanu mi zung nge.” Maanna rinne, “Ei maan ga rwe.” 10 Atibriakpina banina bakhou ngaiye, “Namik tatoga mu latnubo?” 11 Maanna katake, “Jisu diga kounu Mi Pakhatna talei nei imphaanluga amik pi tei thang ngaake khatle Maanna akhou rinne, ‘Siloam tuikhun la seluga kasin satro.’ Eina seluga kasinnu kaan bi amik mu rwe.” 12 Banina bakhou ngaiye, “Maan inlam ambo?” Maanna katake, “Ei thei make.” 13 Mik cho ngaaknu manpa ding ga banina Pharisee rwan khou kalwang hung rwe. 14 Jisu na bamik pi talei imphaan tei thangluga mik pi mu thang damnu ga Sabbath ni ngaake. 15 Habei ga Pharisee rwanna bakhou tatoga mik mu latnubo diga ngai lat rwe. Maanna bani khou rinne, “Maanna amik pi talei imphaan tei thang ngaake atiga eina kasin sat rwe khatle ei mu rwe.” 16 Atibriakpina Pharisee rwan mi kasemna rinne, “Manpa heiya Rikrwang khouna make, balangbe Maan Sabbaath ting ngaak make.” Kateina rinne, “Tatoga noh mi pakhatna heipai badannu chwan bing tonu ngam dinggabo?” Atiga bani lak pi sung cham maknu am ngaake. 17 Banina mik cho ngaaknu manpa khou rin late, “Maanna namik pi mu thang briakpina nang Balang bi pa-aam rinnebo?” Maanna rinne, “Maan Thiamting khate.” 18 Atiyeda Jihudi rwanna maan mik cho ngaake khatle mu lat rwe dinu lang bi, bamik mu latnu manpa om banu le bapa ding kou hung mak basaan, banina balumsa mak ngaake. 19 Banina banu le bapa khou ngaiye, “Mik choga ponnu narwei sa kapaisa ga heiyabo? Maan tatoga mik mu latnubo?” 20 Banu le bapana bani khou katake, “Heiya arwei sa kapaisa ye, maan mik choga ponne dinu arweina theiye; 21 atiyeda maan tatoga bamik mu latnubo, tuna bamik pi sa thangnubo dinu arwei thei make. Maan patso zung rwe; bakhou ngaiyo. Balang bi maanna rinlune.” 22 Jihudi rwan ding kachi briakpina banu le bapana hei bing nga rinnu ngaake, balangbe tudannu pakhatna Maan Christa ye diga rin swake da be bating synagogue pina kazun sat lang nge diga Jihudi rwanna han thangnu am ngaake. 23 Atibriakpina banu le bapana rinnuwe, “Maan patso zung rwe; bakhou ngaiyo.” 24 Jihudi rwanna mik cho ngaaknu manpa ding ga kou latluga bakhou rinne, “Rikrwang ding swanno! Heiba Manpa heiya noh miye dinu ani thei rwe.” 25 Maanna rinne, “Maan noh mi bo mak tabe noh mi makpo dinu ei thei make. Eina hei khatpa theiye: Ei mik cho ngaake, atun mu lat rwe.” 26 Banina bakhou rin late, “Maanna nakhou pa-aam to thangbo, Maanna tatoga namik pi mu thangbo?” 27 Maanna bani khou rinne, “Ei nani khou rin drwe, nanina ngai thang make. Nanina haga pa-aam lang ngai nwam lat latnubo? Nani le Baom potroi to nwambo?” 28 Habei ga banina bating tweiga rinne, “Baom potroizo nang rwe, atiyeda aniba Moses om potroi rwan zwe. 29 Rikrwang na Moses ting chong kabia ngaake dinu anina theiye; heiba Manpa heiya Maan inlamna hungnubo dinu ani thei make.” 30 Manpa gana bani khou rinne, “Heiya tasiatnu omme, Maan inlamna hungnubo dinu nani thei make; atiyeda Maanna amik pi mu thang rwe! 31 Noh mina kalumnu ga Rikrwang na ngai thang make; atiyeda tudannu pakhatna Rikrwang ding kalumnu khatle Maanna baningnu ga towe dabe, Rikrwang na baom kalumnu ga ngai thang nge dinu anina thei rwe, 32 Mik choga ponnu ding pi mu thangnu dinuwa talei ram dam thou bina pakhatchanale ngaisu mak aang nge. 33 Manpa heiya Rikrwang khouna make dabe, Maan khatchale tonu ngamlaye.” 34 Banina bakhou rinne, “Nangba nohna sipka ponnuwe, nang ani ding bachu thangnubo?” Habei gana banina bating kazun sat rwe. 35 Banina bating kazun sat rwe dinu Jisu na ngaisu ngaake; haba nung Jisu na bating kadounu kaan bi Maanna bakhou rinne, “Nang Rikrwang Sa Kapaisa ding balumsabo?” 36 Maanna katake, “Pukraangba, eina balumsa dingnu Maan gazo tubo?” 37 Jisu na bakhou rinne, “Nangna Bating mu rwe, atiga nating kabia ongnuwa Maan ga rwe.” 38 Haba nung bi maanna rinne, “Pukraangba, ei balumsa rwe!” Maanna Bating kalum rwe. 39 Jisu na bakhou rinne, “Eina chong kasem lang talei ram bi hung rwe, balangbe mik mu maknu nunna mu lang khatle mik munu nunna mik cho lang nge.” 40 Maan le diga ong bachamnu Pharisee rwan mi kasemna heiba chong bing nga ngaisuluga, Bakhou rinne, “Ani le mik chorubo?” 41 Jisu na bani khou rinne, “Nani nun mik cho ngaake dabe nani noh maak ngaak tingnuwe; atiyeda atun nanina rinne, ‘Ani mik muwe.’ Atibriakpina nani noh ammaang nge.

John 10

1 “Eina nani khou batak sekka rinnuwe, inkhaanmun bi khut makka lampui katei lana bazaak kaluga, zao in bi khutnu maan ga, barusanu khatle kasut sanu miye. 2 Atiyeda inkhaanmun bi khutnu maan ga zao nun ding siannu zaosiannupaye. 3 Inkhaan ngaaknu maan gana inkhaan lat thang nge, zao nunna Bakhwan ga theiye khatle Maanna Baom zao nun ding bani meng kouga kalwang swake. 4 Maanna Baom zao nun ding kalwang swaknu kaan bi maanna bani meithaan la seye khatle zao nun gana banung suiseye, balangbe banina bakhwan ga theiye. 5 Banina mi katei nung sui make atiyeda bakhouna pak tamlune, balangbe banina mi katei rwan khwan thei make.” 6 Jisu na heiba chongchak heiya Pharisee rwan khou rin thang ngaake atiyeda Maanna rinnu ga banina bakaba thei mak ngaake. 7 Atibriakpina Jisu na bani khou rin late, “Eina nani khou batak sekka rinnuwe, Ei zao nun om inkhaanmun gaye, 8 Ameithaan la hung ngaaknu bing ga barusanu khatle kasut sanu mi nunne, zao nunna bani khwan ga thei make. 9 Ei inkhaanmun gaye. Tudannu Akhou khutnu bating kan thangne khatle maan se swak sekhutka basaak riak doulune. 10 In barunu gana baruza lang makka, to that lang khatle to braan langna hungnuwe. Eina hungnuwa bani nun ringnu lousu lang nge khatle haga inkuga khopsanu lousu lang hung rwe. 11 Ei kasanu Zaosiannupa gaye. Kasanu Zaosiannupana zao nun lang Bakum pi swak thang nge. 12 Atiyeda zaosiannupa ka maknu lan thangnu, zao nun ga baom maknu, maan gana tangiya nun hungnu kaan bi maanna zao nun ding bathan sat basialuga pak tamme; atiga tangiya nunna zao nun ding hung namluga bani ding to imphaang thang nge. 13 Maan ga lan thangnu mi briakpina pak tamme khatle zao nun lang banang thang make. 14 Ei kasanu Zaosiannupa gaye; Eina Aom zao nun ding theiye khatle Aom zao nunna Ating theiye. 15 Apana Ating theinuga danga, Eina le Apa ding theiye khatle Eina zao nun langna Akum pi swake. 16 Heiba zao in bina maknu Aom zao katei nun le amme; ha rwan ding ga le Eina lou hung lang nge, banina Akhwan theilune khatle zao nun khat atiluga zaosiannupa khat amlune. 17 Atibriakpina Apana Ating kriang nge, balangbe Eina Akatha loukhut lat langna Akum pi swake. 18 Pakhatchanale Akhouna Akatha lou sat make atiyeda haga Araanto zana pi swaknuwe. Eina haga pi swak lang Akhou ngam amme, loukhut lat lang le Akhou ngam amme. Heiba zathang nga Eina Apa khouna lusu rwe.” 19 Maanna hei bing nga rin briakpina Jihudi rwan lak pi sung cham maknu swak lat rwe. 20 Bani mi taswang khakna rinne, “Bakhou ri kasia khut rwe khatle kalo rwe. Pa-aam lang nanina Bachong ngainubo?” 21 Kateina rinne, “Heiya ri kasia khutnu mi chong make. Ri kasia khutnu mi khatna mik chonu nun ding pi sa thangnu ngamgabo?” 22 Jerusalem bi kat thangnu balou dat hung tang ngaak rwe, haga sikpha kaan ngaake. 23 Jisu na Solomon inkhu bi, kalum in bi se swak ngaake. 24 Habei ga Jihudi rwanna Bating han qwatluga Bakhou rinne, “Nangna intia bakhwa seiga ani ding sung pi tamam ong ding maangbo? Nang Christa ye dabe, ani khou bathiangga rin thangro.” 25 Jisu na bani khou katake, “Eina nani khou rin drwe atiyeda nanina balumsa make. Eina Apa meng bina tonu chwan bing gana, Alang bi sake pinu rwe. 26 Atiyeda nanina balumsa make, balangbe Eina nani khou rin damnu ga danga, nani Aom zao nun make. 27 Aom zao nunna Akhwan theiye, Eina le bani ding theiye khatle banina Anung suiye. 28 Eina bani lang ringzoknu kum pi thang nge khatle bani impha ni beida braan la rwe khatle bani ding pakhatchanale Akut pina kasut swakla rwe. 29 Bani ding Akhou pi thangnu Apa ga, pum brum khon bina lian kataknuwe khatle bani ding pakhatchanale Apa kut pina kasut swaknu ngamlaye. 30 Ei le Apa le khatchaye.” 31 Haba nung bi Jihudi rwanna Bating sat lang lung kachung thou lat rwe. 32 Jisu na bani khou rinne, “Apa khouna kasanu chwan bing Eina nani khou pi mu rwe. Ha bing lak pi gana pa-aam chwan lang bina nanina Ating lungna sat langbo?” 33 Jihudi rwanna katake, “Kasanu chwan langna anina Nating lungna sat lang make atiyeda Nangna Rikrwang lu chung bi rin basiat briakpinaye, Nang misa theikhaan khaanluga, Naraanto Nating Rikrwang pi towe.” 34 Jisu na bani khou rinne, “Nani om chongtan bi atiga hiak thangnu makpo, ‘Eina nani khou rin drwe, “Nani ri nunne” ‘? 35 “Rikrwang chong bani khou hung tang ongnu bani ding, Maanna ri nun diga kouwe dabe (bathiangnu Chongdip ka pakhatchanale to baknu ngam make), 36 ‘Ei Rikrwang Sa Kapaisa ye’ diga Eina rin briakpina, nanina ‘Rikrwang ding Nang rin basiate,’ diga Pa na kalang swakluga talei ram bi lang hungnu Bating rinnubo? 37 “Eina Apa chwan to mak ngaake dabe ating balumsa mako, 38 atiyeda Eina chwan bing ga towe dabe, nanina Ating balumsa mak peida, Apana Akhou ongme khatle Eina Bakhou ongme dinu nanina theiluga balumsa lang chwan bing ga balumsawo.” 39 Atibriakpina banina Bating nam lang zong thou lat rwe atiyeda Maan bani kut pina dwak lat tam ngaake. 40 Haba nung bi Maanna Jordan tui raan la John na meithaan baptize to thang ngaaknu riak la se latluga, Maan habei ga hungnei rwe. 41 Mi taswang khakna Bakim bi hungluga rinne, “John na badannu chwan to mak ngaake atiyeda heiba Manpa om lang bi John na kabianu bing ga bazenuwe.” 42 Mi taswang khakna Bating habei ga balumsa rwe.

John 11

1 Lazarus tiga kounu pakhat naa ong ngaake, Maan Mary le bau Martha na ongnu namlian, Bethany bi naye. 2 Naa ongnu heiya, Jisu ding banamsanu thao kanun thang damnu khatle Baket pi samna kanun sat thang ngaaknu Mary nao Lazarus ngaake. 3 Atibriakpina bau rwanna Jisu khou mi lang thangluga pi rin rwe, “Pukraangba, phaang thang ngo, Nangna kriangnu maan ga naa ongme.” 4 Jisu na haga ngaisunu kaan bi atiga rinne, “Naanu ga thi lang naanu make atiyeda Rikrwang lwat lian lang khatle hapaanna Rikrwang Sa Kapaisa lwat pi lian lang nge.” 5 Jisu na Martha, banao Mary khatle Lazarus ting kriang ngaake. 6 Lazarus naa ongnu ga Jisu na theisunu kaan bi Maan ongnu riak pi ni ni neita ngaake. 7 Haba nung Maanna Baom potroi rwan khou rinne, “Ani Judea la se lat maangzo.” 8 Potroi rwanna Bakhou rinne, “Rabbi, bakhwa sei maknu meithaan Jihudi rwanna Nating lungna sat lang zong ngaake, Nang ha la ga se lat maang gabo?” 9 Jisu na katake, “Thamlai kaan bi chakrin somga kani amnu makpo? Tudannuna thamlai seye dabe, maan ket basui make, balangbe maanna talei ram om babaan ding ga muwe. 10 Atiyeda mi khatna zingpha seye dabe, maan ket basuiye, balangbe baannu ga bakhou maake.” 11 Maanna hei bing nga bani khou kabia taangnu nung, Maanna bani khou rinne, “Ani baan Lazarus inthi drwe atiyeda Ei bating bathou lang semaang nge.” 12 Habei ga Baom potroi rwanna rinne, “Pukraangba, maan in damme dabe maan sa dam zung rwe.” 13 Atiyeda Jisu na maan thi damnu lang bi rinnuwe atiyeda Maanna kabia ongnu ga in basak tamnu ding nge diga banina baning ngaake. 14 Jisu na bani khou bathiangga rin rwe, “Lazarus thi drwe. 15 Nanina balumsa lang, Ei ha la ong maknu ga nani lang chungna Ei karowe ati ngaaklena ani bakim la serizo.” 16 Habei ga Didymus tiga kounu, Thomas na potroi rwan khou rin rwe, “Maan le diga thi bacham lang ani serizo.” 17 Jisu na hung tangnu kaan bi Lazarus ting thaan bi ri thangnu ni bali rwe dinu Jisu na thei rwe. 18 Bethany heiya Jerusalem bina, mile kani khak namlaa ngaake. 19 Thi damnu barwei nao langna pi lozaang sa thang lang Jihudi rwan mi taswang khak, Martha le Mary kim bi ongnu mannu rwan nung sui ngaake. 20 Habei ga Martha na Jisu hungna rwe dinu thei khap tinu le, Bating swak kadou rwe atiyeda Mary ba insung la badung ong ngaake. 21 Martha na Jisu khou rinne, “Pukraangba, Nang abeiya ong ngaake dabe anao thi mak ngaak tingnuwe. 22 Atiyeda Nangna Rikrwang khou ninu bing ga, atun le Maanna pi thanglune dinu eina theiye.” 23 Jisu na bakhou rinne, “Nanao ga ring thou latlune.” 24 Martha na bakhou rinne, “Kakhamnu lumik pi ring thou latnu ni maan le ring thou latlune dinu ei theiye.” 25 Jisu na bakhou rinne, “Ei ring thounu khatle ringnu gaye. Ating balumsanu maan ga, thi beida ringlune. 26 Ating balumsanu ringga ongnu mi bingna impha ni beida thilaye. Nang heiya balumsabo?” 27 Martha na Bakhou rinne, “O, Pukraangba, Nang talei ram bi hung dingnu, Rikrwang Sa Kapaisa, Christa gaye dinu ei balumsa rwe.” 28 Martha na hei bing nga rinluga maan thou drwe khatle banao Mary ding inkamga kouluga rinne, “Bachuthangnupa hung rwe, atiga nating kou ongme.” 29 Mary na ngaisu khap tinu le, lon thouluga barapka Bakim bi hung rwe. 30 Haba kaan bi Jisu namlian bi ga hung tang mak aang nge atiyeda Martha na Bating kadounu riak pi ga Maan ong ngaak rwe. 31 Insung la maan le diga ong ongluga, bating pi lozaang sa thang ongnu Jihudi rwanna, Mary na barapka lon thouluga se swak tamnu muluga, “Maan thaan la chap lang thou drwe” diga baningluga banung sui se ngaake. 32 Jisu na ongnu riak pi Mary hung rwe khatle Bating mu rwe, maanna Jisu ket pi in bakhuptaluga Bakhou rinne, “Pukraangba, Nang abeiya ong ngaake dabe anao thi mak ngaak tingnuwe.” 33 Mary na chap ongnu khatle maan le diga hung bachamnu Jihudi rwanna, chapka ongnu ga Jisu na muluga, Maan katha bi sung riangre ngaak rwe khatle sung katop ngaak rwe. 34 Maanna rinne, “Nani bating ingaipai ri thangnubo?” Banina Bakhou rinne, “Pukraangba, hungluga phaang thang ngo.” 35 Jisu chap rwe. 36 Jihudi rwanna rinne, “Phaang ngo Maanna Lazarus ting intia lang kriangnubo!” 37 Mi kasemna rinne, “Mik chonu ding pi sa thang ngamnu Maanna, heiba manpa ding le thi mak lang to thang ngam bilabo?” 38 Jisu Basung riangre takka, thaan la hung ngaake. Haga khun kapop ngaake khatle lungna thangnamnu ngaake. 39 Jisu na rinne, “Lung ga lou sat tammo.” Thi damnu Lazarus bau, Martha na Bakhou rinne, “Pukraangba, atunba banam sia lang zung rwe, balangbe maan thi damnu ni bali tang rwe.” 40 Jisu na bakhou rinne, “Nangna balumsaye dabe Rikrwang om lwat liannu ga mulune diga Eina nakhou rin makpo?” 41 Habei ga banina kathi pum thangnu riak pina thaankham lung ga lou sat rwe. Jisu na basaang la batoukaluga rinne, “Apa, Eina ninu Nangna ngaisu thangnu langna swankaye. 42 Eina ninu ga Nangna bakaan bathin pi thang nge dinu Eina theiye, balangbe Nangna Ating lang thangnuwe dinu Akim bi han ongnu mi nunna balumsa lang heiya Eina rinnuwe.” 43 Maanna hei bing nga rinluga, Maan baraam basaangga paoga rinne, “Lazarus, swakro!” 44 Habei ga thi damnu maan ga bakut baket thaan pwanna kazwanluga se swak rwe, bamai kum le pwanna kazwan ngaake. Jisu na bani khou rinne, “Sut thangluga bating pi sero.” 45 Mary kim bi hung ngaaknu Jihudi rwan mi taswang khakna, Jisu na to damnu chwan bing ga muluga Bating balumsa rwe. 46 Atiyeda mi kasemna Pharisee rwan khou seluga Jisu na to damnu om lang bing bani khou pu ngaake. 47 Habei ga takopuba rwan le Pharisee rwanna thampei kou kadoiluga rinne, “Ani pa-aam tozobo? Heiba Manpana badannu chwan tamga to rwe. 48 Anina Baraantoza ding atiga barang toga bathan thang nge dabe, mi bing nga Banung suiloi dam zung rwe khatle Rome rwanna hungluga ani kaong riak khatle ani chaat ting to braan lang zung rwe.” 49 Bani lak pi haba kum ga takolu tonu Caiaphas na, bani khou rinne, “Nani khatchale thei make, 50 mi pakhatna khangsung hut toga thi thangluga hagana chaat bingza braan maknu gana, nani lang sanuwe dinu nani kakhan make.” 51 Heiba chong nga maanna babaning zana rinnu make; atiyeda maan haba kum ga takolu to briakpina Jisu na chaat bing langna thilune diga thiamting khat tanga rinnuwe, 52 haba chaat nun za lang thi thangnu make atiyeda pak imphaang thou damnu Rikrwang sa rwan ding khatcha toga khom kadoi lang naye. 53 Ha nina thouga, banina Jisu ding athat lang tup thou rwe. 54 Atibriakpina Jisu na Jihudi rwan lak pi indaoga se mak ngaak rwe atiyeda Maan habei gana swakluga ramhaang kim la amnu Ephraim diga kounu nampui la thou dam ngaake khatle habei ga potroi rwan le ong ngaake. 55 Jihudi rwan om Takan swaknu Balou nai hung ngaak rwe, Takan swaknu Balou meithaan nampaan lana mi taswang khakna bani pum bahak to bathiang langna, Jerusalem bi hung ngaake. 56 Banina Jisu ding zong ngaake khatle bani kalum in bi han kadoi ongnu kaan bi bani lak pi atiga kabia rwe, “Nani paaam baningbo? Maan balou riak pi hung bilagabo?” 57 Tudannu mi khatna Jisu ingaipai ambo dinu theiye dabe, Bating nam lang, bani khou pi thei ding gaye diga takopuba rwan le Pharisee rwanna zathang pi swaknu am ngaake.

John 12

1 Takan swaknu Balou lang ni karuk baat balei, thinu nun lak pina pi ring thou latnu, Lazarus na ong thang ngaaknu riak, Bethany bi Jisu hung ngaake. 2 Habei ga banina Balaang khwazin thaisaak sa lang laang thang ngaake; Martha na chwanlaang to ong ngaake atiga Jisu le diga sa in lang ong bacham ongnu lak pi Lazarus le khat ngaake. 3 Habei ga Mary na baman kung taknu nard thao litre baang khak louluga Jisu ket pi kanun thangluga, basamna Baket ka kanun sat thang ngaake. Atiga in ga thao barimna sip ngaak rwe. 4 Atibriakpina Bating pi swak tingnu, Baom potroi pakhat, Simon sa kapaisa, Judas Iscariot na rinne, 5 “Banamsanu thao heiya denari raza thum lang zwanluga sian ga lungsianu nun lang paaam toga pi thang maknubo?” 6 Heiya maanna lungsianu nun lang baningga rinnu make atiyeda maan barusanu mi briakpina, bakhou sianbu am ngaake khatle habei thangtanu sian ga maanna lou khap khap ngaake. 7 Habei ga Jisu na rinne, “Maanna bathainu ga to dam ding ngo; Ating imphum bani lang maanna haga to ongnuwe. 8 Balangbe lungsianu nun ga nani le bakaan bathin ong bacham ongme atiyeda Eiba nani le bakaan bathin ong bachamlaye.” 9 Jihudi rwan mi taswang khakna Jisu habei ga ongme dinu theiluga; habei ga hung rwe, haga Jisu om langza bina makka, thinu nun lak pina pi ring thou latnu, Lazarus ting le phaang langna hungnuwe. 10 Atiyeda takopuba rwanna Lazarus ting le athat lang chong tup ngaake, 11 balangbe Lazarus om lang bina Jihudi rwan mi taswang khakna takopuba rwan ding asat basialuga Jisu ding balumsa ngaak rwe. 12 Bathang om lumik pi balou bi hung ngaaknu Jihudi rwan mi khang pui gana, Jisu Jerusalem bi hung naye dinu theiluga, 13 ruidan nabom choiluga Jisu ding swak kadouluga pao rwe, “Hosanna! ‘Pukraangba meng bi hungnu Maan ga aih saye!’ Maan Israel rwan Krwang nge.” 14 Jisu na lola swan khat douluga, Maan habei ga katwang rwe; haga hiak thang ngaaknu ga dannuwe: 15 “Kachi mako, Zion sa kamaisa; Phaang ngo, na om Krwang ga, lola swan khat chung bi twangluga hung naye.” 16 Hei bing nga Baom potroi rwanna meithaan thei mak ngaake; atiyeda Rikrwang na Jisu ding lwat pi liannu nung, hei bing nga Balang bi hiak thangnuwe khatle banina haga Bakhou to thangnuwe dinu baningsu rwe. 17 Atibriakpina Maanna Lazarus ting thi bina pi ring thouluga thaan bina kou swaknu kaan bi Maan le diga ong bacham ngaaknu mi nun gana, baom sake pi rwe. 18 Ha langna mi nunna Pukraangba ding hung kadou rwe, balangbe Maanna heiba badannu chwan to rwe dinu banina ngaisu rwe. 19 Atiga Pharisee rwanna bani lak pi rinne, “Nani chwan khatchale to swak lan rwe dinu nanina mu rwe. Phaang ngo, talei ram mi bingna Banung sui drwe!” 20 Balou riak pi ri kalum lang hungnu nun lak pi Greek rwan le hung ngaake. 21 Habei ga Galilee taram Bethsaida lana hungnu Philip khou, banina ngai rwe, “Bachuthangnupa, ani Jisu ding kadou nwamme,” 22 Philip na Andrew kim bi hungluga rin rwe khatle Philip le Andrew na Jisu kim bi hungluga rin lat rwe. 23 Atiyeda Jisu na bani khou rinne, “Misa Sa Kapaisa lwat lian dingnu chakrin ga hung tang rwe. 24 Eina nani khou batak sekka rinnuwe, gehu na talei bi ta thangluga thi make dabe, haga baraanto atiga am ongme; atiyeda haga thiye dabe, bakraa kraa tamme. 25 Tudannu bakum ding kriangnu maan ga braanlune khatle tudannu talei ram bi bakum ding batannu maan gana khwa sei ringnu loulune. 26 Tudannu Ating chwanlaang tonu maan ga, Anung sui ding ngo khatle Eina ongnu riak pi ga, Achwanlaang tonu maan ga le onglune. Tudannu Ating chwanlaang tonu bating ga Apana takung lune. 27 “Atun Ei Asung riangre rwe, Ei pa-aam kabia langbo? ‘Apa, heiba chakrin bina Ating kan thang ngo’ atiyeda hei langna Ei heiba chakrin biya hungnu rwe. 28 Apa, Nameng lwat liannu pi to thang ngo.” Habei ga tambaan lana khwan khatna rinne, “Eina haga lwat pi lian thang rwe khatle pi lian thang latlune.” 29 Atibriakpina habei ga han ongnu mi nunna haga ngaisuluga rinne, heiya khwa brinu zung nge. Katei rwanna rinne, “Heiya tambaan chonglang khatna Bating kabianu zung nge.” 30 Jisu na katake, “Heiba khwanna Alang bina hungnu make atiyeda nani lang naye. 31 Atun talei ram ding chong kasem ongme; atun talei ram om bapuba ding kazun satlu rwe. 32 Banina Ating talei ram bina kai thouwe dabe, mi bing ding Eina Akim la kai hunglune.” 33 Maanna heiya rinnu langba, Maan impei thit thilu dingbo dinu pi thei lang naye. 34 Mi nunna katake, “Christa ga khwa seiga amme dinu chongtan bina anina theiye khatle ‘Misa Sa Kapaisa ding kai thoulu rwe’ diga Nangna tatoga rinnubo? Misa Sa Kapaisa dinuzo tubo?” 35 Jisu na bani khou rinne, “Bakaan kasemza lang baannu ga nani khou amme. Zingnu gana nani ding hwam lem mak lang, baannu ga ambasaan nani habei ga seyo; zingnu bi se ongnu maan ga maan inlampai se ongnubo dinu thei make. 36 “Baannu ga ambasaan baannu sa rwan to lang, baannu ding ga balumsawo.” Jisu na heiba chong bing nga kabialuga, se swak trwe khatle Maan bani khouna inkam drwe. 37 Maanna bani meithaan bi badannu chwan taswang khak to beida, banina Bating balumsa mak ngaake, 38 balangbe thiamting Isaiah na rin thang ngaaknu chong ga hung tang lang nge, “Pukraangba, tuna ani om sacham ga balumsarugabo? Tu khou Pukraangba om ngam indao thangrubo?” 39 Atibriakpina banina Bating balumsanu ngam mak ngaake, balangbe Isaiah na atiga rin lat ngaake: 40 “Bani mikna mu mak lang, bani sungna thei mak lang, Banina sung le mak lang khatle Eina bani ding pi sa thang mak lang, Maanna bani mik pi cho thang rwe Khatle bani sung pi nat thang rwe.” 41 Isaiah na Balwat munu khatle Balang bi rinnu kaan bi heiba lang bing nga rin ngaake. 42 Ati ngaaklena bapuba rwan lak pi tangga mi taswang khakna Jisu ding balumsa rwe atiyeda Pharisee rwan langna banina bani ding synagogue pina kazun sat mak lang, banina Jisu ding indaoga rin swak mak ngaake; 43 balangbe Rikrwang na swannu ma mi nunna swannu ding banina bathai inku rwe. 44 Habei ga Jisu na paoga rinne, “Ating balumsanu maan ga Ating balumsanu make atiyeda Ating lang hungnu Bating balumsanuwe. 45 Ating munu maan gana Ating lang hungnu Bating mu rwe. 46 Ating balumsanu mi bingna zingnu bi ong mak lang, Ei talei ram bi babaan toga hung rwe. 47 Tudannu Achong ngaisuluga balumsa make dabe, Eina bating chong kasem make; balangbe Ei talei ram ding chong kasem lang hungnu make atiyeda talei ram ding kan thang lang hungnuwe. 48 Ating za maknu khatle Achong lou thang maknu mi ding, chong kasemnu khat amme, Eina kabia swak tamnu chong bahak kana bating kakhamnu lumik pi chong kasemlune. 49 Eina Aom ngamna kabianu make; atiyeda Ating lang hungnu Pa na Eina rin dingnu khatle Eina kabia dingnu lang bi, Akhou chongtan pi thang rwe. 50 Baom zathang ga khwa sei ringnuwe dinu Eina theiye. Atibriakpina Eina kabia ongnuwa, Pa na Akhou rin thangnu danga Eina kabianuwe.”

John 13

1 Takan Swaknu Balou meithaan, Jisu na Maan talei ram bathan satluga Pa khou se dingnu Baom chakrin hung tang rwe dinu theinu kaan bi talei ram bi ongnu Bami nun ding kriang thangga, balan tangga Maanna bani ding kriang thang rwe. 2 Bani khwazin thaisaak sa ong bi, Diabol na Simon sa kapaisa, Judas Iscariot sung bi khutluga, Jisu ding pi swak lang pi kakhan ngaak rwe, 3 Bapana pot bingza Bakut pi pi thang rwe, Maan Rikrwang khouna hungnuwe khatle Rikrwang khou selune dinu Jisu na theiluga, 4 khwazin thaisaak sa ong bina lon thouluga, Bapwan lwak ta rwe khatle tui kasin pwan khat louluga Bakong bi khuap rwe. 5 Haba nung bi, Maanna suktheng bi tui sung thangluga potroi rwan ket kasin thang thou rwe khatle Bakong bi khuapnu pwan gana bani ket kanun sat thang rwe. 6 Habei gana Maan Simon Peter kim bi hung rwe. Peter na Bakhou rinne, “Pukraangba, Nangna aket kasin thang lang zunggabo?” 7 Jisu na bakhou katake, “Eina to ongnuwa atun nang bakaba thei make atiyeda kanung nangna theilune.” 8 Peter na Bakhou rinne, “Nangna impha ni beida aket kasin thang mak tingnuwe!” Jisu na bakhou katake, “Eina naket kasin thang make dabe, Akhou naom dam maake.” 9 Simon Peter na Bakhou rinne, “Pukraangba, aket cha makka, akut le alu le kasin thang ngo!” 10 Jisu na bakhou rinne, “Tui kasin taangnu maan ga baket makka katei kasin lang bathaang maake, pubrumza bathiang rwe; nani bathiang nge atiyeda nani mi bingzaba bathiangnu make.” 11 Balangbe Bating pi swak tingnu maan ga Jisu na thei briakpina; “Nani mi bingzaba bathiangnu make” diga Maanna rinnuwe. 12 Haba om langna Jisu na bani ket kasin thang rwe khatle Bapwan louluga badungta lat rwe, Maanna bani khou rinne, “Eina nani khou to thang damnu ga nani theibo? 13 Nanina Ating Bachuthangnupa khatle Pukraangba diga kouwe, atiga nanina bazega rin rwe, balangbe Ei haga rwe. 14 “Eina nani om Pukraangba khatle Bachuthangnupa toga, nani ket kasin thang nge dabe, nanina le khatle khat ket kasin thang dingnu zek swake. 15 Eina nani khou to thangnu danga, nanina le to lang Eina nani khou rin kabanu pi thangnuwe. 16 Eina nani khou batak sekka rinnuwe, swakna bapuba ma lian inkunu make; chonglang mi gana bating lang hung thangnu bama lian inkunu make. 17 Nanina ha bing ga theiluga haga towe dabe nani aih sanuwe. 18 “Eina nani khangsung om lang bi kabianu make. Eina kathang swaknu mi nun ding Eina theiye; heiya Bathiangnu Chongdipna rin thang ngaaknu ga hung tang lang nge, ‘Ei le diga uilu sa bachamnu maan gana Ameithaan bi baket khong kai basaang thou rwe.’ 19 Haga hung tangnu kaan bi Maan ga Ei rwe dinu nanina Ating balumsa lang atunna thouga haga swak mak balei, Eina nani khou rin chaaknuwe. 20 Eina nani khou batak sekka rinnuwe, Eina lang thangnu Bating lou thangnu maan ga Ating lou thangnuwe; Ating lou thangnu maan ga Ating lang thangnu Bating lou thangnuwe.” 21 Jisu na hei bing nga rin taangnu kaan bi Maan Basung riangre rwe khatle Maanna sake piga rinne, “Eina nani khou batak sekka rinnuwe, nani lak pi pakhatna Ating pi swaklu rwe.” 22 Habei ga Baom potroi rwanna khat le khat phaang kaleluga, Maanna kabia damnu lang bi loh lo ong ngaake. 23 Potroi rwan lak pi Jisu na kriangnu, potroi pakhat Bapam bi ong hai ong ngaake. 24 Atibriakpina Maanna tuom lang bi kabia ongnubo dinu ngai lang Simon Peter na potroi khou ga mik kakhip ngaake. 25 Maanna Jisu pam bi ong hailuga Bakhou ngaiye, “Pukraangba, maan ga tubo?” 26 Jisu na katake, “Eina uilu than khat imphomluga pi dingnu maan ga rwe.” Atiga Maanna uilu than ga imphomluga Simon sa kapaisa, Judas Iscariot khou pi ngaake. 27 Uilu ga lounu nung, Seitaan na Judas sung bi khut rwe. Atibriakpina Jisu na bakhou rinne, “Nangna to dingnu ga barapka toro.” 28 Atiyeda table bi ong ongnu mi lak pi pakhatchanale Maanna paaam om lang bina bakhou atiga rinnubo dinu thei mak ngaake. 29 Judas khou sianbu am briakpina Jisu na bakhou, “Balou langna ani lang bathaang amnu pot bing ga kaleiwo,” mak tabe lungsianu rwan khou kasem pi thang lang, Maanna rinnu ngaakne diga bani mi kasemna baning ngaake. 30 Judas na uilu than ga sanu nung, barapka se swak trwe. Haga zingpha ngaake. 31 Judas na thou damnu nung, Jisu na rinne, “Misa Sa Kapaisa ding balwat pi lian thang rwe khatle Bakhou Rikrwang om lwat pi lian thang rwe. 32 Bakhou Rikrwang lwat pi lian thang nge dabe, Rikrwang na le Bating Bakhou bahak lwat pi lian thanglune khatle Bating haba kahan bi lwat pi lian thanglune. 33 Kasinnu naosen rwan ga, Ei bakaan kasemza nani le diga ong bacham ongme. Nanina Ating zonglune khatle Eina Jihudi rwan khou, ‘Ei senu riak la nani senu ngamlaye,’ diga rin damnu ga danga atun le Eina nani khou rinnuwe. 34 Eina nani khou zathang kathan khat piye, nani khat le khat kriang kaleyo; Eina nani ding kriangnu danga, nani khatna khat ting kriang kaleyo. 35 Nani khat le khat kriang kaleye dabe, heiyana mi bingna nani Aom potroi rwanne dinu theilune.” 36 Simon Peter na Bakhou ngaiye, “Pukraangba, Nang inlam mang se ongnubo?” Jisu na bakhou katake, “Ei senu riak la nang atun Anung suinu ngamlaye atiyeda kanung nangna Anung suilune.” 37 Peter na Bakhou rinne, “Pukraangba, atun Ei paaam toga Nanung suinu ngam mak tinggabo? Ei Nalaang chungna akum pi swakne.” 38 Jisu na bakhou ngaiye, “Batak takka Nang Alaang chungna nakum pi swak tingbo? Batak sekka Eina nakhou rinnuwe, nangna Ating thei make diga za mak leng thum mak basaan aankhongna khwanglaye.

John 14

1 “Nani sung riangrenu to mako; Rikrwang ding balumsawo Ating le balumsawo. 2 Apa in la kaong riak tamga amme; ati mak ngaake dabe Eina nani khou rin thang ngaak tingnuwe. Eina nani lang kaong riak daan lang seye. 3 Eina seluga nani lang kaong riak daan thang nge dabe, Ei hung latlune khatle Ei ongnu riak pi ga nani le ong lang; Eina nani ding Akim bi loukhut thangne. 4 Ei inlam se ongnubo dinu nanina theiye khatle Alampui ga le nanina theiye.” 5 Thomas na Jisu khou rinne, “Pukraangba, Nang inlam se ongnubo dinu ani thei make, anina lampui ga tatoga theinu ngam dingbo?” 6 Jisu na bakhou rinne, “Lampui ga le, bazenu ga le, ringnu ga le Eiye. A paan bina makka pakhatchanale Apa riak pi hung ngam make 7 “Nanina Ating thei ngaake dabe nani Apa ding le thei ngaak tingnuwe; atunna thouga nanina Bating thei rwe khatle Bating mu rwe.” 8 Philip na Bakhou rinne, “Pukraangba, Apa ding ani khou pi mu thang ngo atiye dabe ani sung pemlune.” 9 Jisu na bakhou rinne, “Philip, Ei nani le bakhwa seiga ong bacham beida, aniya tangga nang Ating thei mak aangbo? Ating munu maan ga Apa ding le munu rwe; tatoga nangna, ‘Apa ding ani khou pi mu thang ngo’ diga rinnubo? 10 Ei Apa khou ongme khatle Apana Akhou ongme dinu nang balumsa makpo? Eina nakhou rin ongnu chong bing nga Ei Aom ngam bina rinnnu make; atiyeda Akhou ong ongnu Apana chwan ga towe. 11 Eina Apa khou ongme khatle Apana Akhou ongme diga rinnu wana Ating balumsawo mak tabe Eina to ongnu chwan bing langna Ating balumsawo. 12 Eina nani khou batak sekka rinnuwe, Ating balumsanu maan gana, Eina tonu chwan bing ga maanna le tolune khatle Eina Apa khou se ding briakpina, Maanna hei bing ma liannu chwan bing tolune. 13 Balangbe Sa Kapaisa khou Pa na Balwat lian lang, nanina Ameng bi ninu bing ga Eina to thangne. 14 Nanina pa-aam aam ngaakle Ameng bi niye dabe Eina haga to thangne 15 “Nanina Ating kriang nge dabe, Aom zathang bing nga zeiyo. 16 Eina Apa khou hweinine khatle Maanna nani ding khwa sei ong bacham thang lang, Paangthangnu katei Khat ting pi thanglune; 17 Paang thangnu ga bazenu Katha gaye, talei ramna Bating lousunu ngam make, balangbe talei ramna Bating mu make khatle Bating thei make; atiyeda nanina Bating theiye, balangbe Maan nani le diga ong bacham ongme khatle nani sung bi onglune. 18 Eina nani ding taraisiasa rwan ding danga asat thanglaye; Ei nani khou hunglune. 19 “Bakaan kasem ongluga talei ramna Ating mu latla rwe atiyeda nani nabe Ating mulune. Ei ring ong briakpina, nani le ringlune. 20 Eina Apa khou ongme, nanina Akhou ongme khatle Ei nani khou ongme dinu nanina haba lumik pi ga theilune. 21 Aom zathang bing khatle ha bing ding zeinu maan gana ating kriangnuwe. Ating kriangnu bating ga Apa na le krianglune atiga Eina le krianglune khatle Apum Bahak ting Bakhou indao thanglune.” 22 Iscariot ka maknu Judas na Bakhou ngaiye, “Pukraangba, Nangna Napum Bahak ting ani khou indao thangne khatle talei ram mi nun khou make dinuwa tatonubo?” 23 Jisu na bakhou katake, “Tudannu khatna Ating kriang nge dabe, maanna Achong zeilune; Apana bating krianglune, anina Bakhou hunglune khatle Maan le diga lung bachamlune.” 24 “Ating kriang maknu maan ga Achong zei make; nanina ngaisu ongnu chong heiya Achong make atiyeda Ating lang hungnu Pa om chong nge. 25 “Eina nani le diga ong bacham ong bi hei bing nga nani khou rin thang rwe. 26 Atiyeda Paangthangnu, dinuba Katha Bathiangnu ga, Ameng bi Apana lang hunglune, Maanna nani ding balang bing bachu thanglune khatle Eina nani khou rin thang damnu chong bing ga nani ding pi baningsu thanglune. 27 Eina nani khou dai bazaangnu thangsiaye, Eina nani khou Aom dai bazaangnu piye; talei ramna pinu danga Eina nani khou pi make. Nani sung riangre mako khatle kachinu to mako. 28 “ ‘Ei se swak tammaang nge khatle nani khou hung latlune,’ diga Eina nani khou rin damnu ga nanina ngaisu rwe. Nanina Ating kriang nge dabe, ‘Ei Apa kim la se ding maang nge,’ diga Eina nani khou rin briakpina nani karo ngaak tingnuwe, balangbe Apana Ama lian inkunuwe. 29 Haga hung tangnu kaan bi nanina balumsa lang, heiya hung tang mak balei Eina nani khou atun rin ongnuwe. 30 Ei nani le chong kabia tamlaye, balangbe hei talei ram puba ga hung nge, Akhou baom badam khatchale maake. 31 Atiyeda Eina Apa ding le kriang nge dinu talei ramna thei lang, Apana Akhou zathang pi thangnu danga, Eina towe. Thouro, ani abeina serizo.

John 15

1 “Ei bataknu drakha zemme khatle Apa ga anqwat Mi ye. 2 Akhou ongnu bakraa kraa maknu bakachang bing ding Maanna katap sate khatle bakraa kraanu kachang bing ga bakraa kraa tam inku lang, Maanna bakachang katap bathiang thang nge. 3 Eina nani khou rin damnu Achong paan bina nani bathiang rwe. 4 Akhou chat makka ong ngo khatle Eina nani khou chat makka ongne. Drakha zem bi bakachang gana chat makka ong make dabe, baraanto karaanu ngam maknu ga danga, nanina Akhou chat makka ong make dabe, nani bakraa kraanu ngamlaye. 5 “Ei drakha zemme, nani bakachang nge. Tudannu Akhou chat makka ongnu khatle Eina bakhou chat makka ongnu maan gana, bakraa tamga kraaye; balangbe Ei sui makka nanina khatchale tonu ngam make. 6 Tudannuna Akhou chat makka ong make dabe, bating bakachang khat ting danga bazwan sate khatle baowei taye; atiga mi nunna bakachang ga khom kadoiluga mei bi bazwan thang nge khatle bakachang bing ga mei bati sate. 7 Nanina Akhou chat makka ong nge dabe khatle Achongkaang ga nani khou chat makka amme dabe, nanina ni nwamnu niyo, haga nani khou to thangne. 8 Nanina bakraa tamga karaanu heiyana, Apa om lwat pi lianne; atiga nani nun Aom potroi rwan tolune. 9 “Pa ga na Ating kriangnu danga, Eina le nani ding kriang nge; nani Akriang sung bi chat makka ong ngo. 10 Eina Apa om zathang bing zeiluga Bakriang sung bi chat makka ongnu ga danga, nanina le Aom zathang bing zeiye dabe, nani Akriang sung bi chat makka onglune. 11 Aom karo ga nani khou am lang khatle nani karoga khopsa langna, Eina heiba chong bing nga nani khou rinnuwe. 12 Eina nani ding kriangnu danga nani khatna khat ting kriang ngo, heiya Aom zathang nge. 13 Mi khatna babaan rwan lang bakum ga pi thangnu ga ma, lian inkunu kriang pakhatcha khou le maake. 14 Eina nani khou pinu zathang bing nga nanina towe dabe nani Abaan rwanne. 15 Eina nani ding swak rwan diga kou latla rwe, balangbe swak kana bainpubana pa-aam to ongnubo dinu thei make; atiyeda Eina nani ding baan rwan diga kou rwe; balangbe Eina Apa khouna ngaisunu bing ga nani khou pi thei thang rwe. 16 Nanina Ating ka thangnu make atiyeda nanina seluga bakraa kraa lang, nani khou bakraa ga chat makka am lang khatle nanina Ameng bi pa-aam aam ngaakle ninu ga Apana nani khou pi thang lang, Eina nani ding ka thang rwe khatle banei thang rwe. 17 Nani khatna khat ting kriang kale lang, hei bing nga Eina nani khou zathang pi rwe. 18 “Talei ramna nani ding batanne dabe, nani ding batan mak baleina hagana Ating batan rwe dinu nanina theiyo. 19 Nani nun talei ram omme dabe, talei ramna baom ding ga kriang ngaak tingnuwe. Atiyeda nani talei ram om mak briakpina atiyeda Eina talei ram bina kathang swak briakpina, talei ramna nani ding batannuwe. 20 “ ‘Swakna bainpuba ma liannu make,’ diga Eina nani khou rin thang damnu ga baningsuwo. Banina Ating raiye dabe, banina nani ding le railune. Banina Achong zeiye dabe, banina nani chong le zeilune. 21 “Atiyeda banina Ameng lang chungna hei bing nga nani khou tolune, balangbe Ating lang hungnu Bating banina thei make. 22 Eina hungluga bani khou kabia thang mak ngaake dabe bani noh maak ngaak tingnuwe atiyeda atunba bani noh bina dwak lat zanu riak maake. 23 Ating batannu maan gana Apa ding le batanne. 24 Pakhatchanale to maknu chwan bing ga Eina bani lak pi to mak ngaake dabe bani noh maak ngaak tingnuwe; atiyeda atunba banina haga muluga Ating le Apa ding le batan rwe. 25 Atiyeda ‘Banina Ating balang maakka batan rwe,’ diga bani om chongtan bi hiak thangnu chong ga hung tang lang heiya swak rwe. 26 “Eina Apa khouna nani khou lang hung dingnu Paangthangnu dinuba Apa khouna swaknu bazenu Katha gana, hungnu kaan bi Maanna Alang bi sake pi lune. 27 Nanina le Alang bi sake pi lune, balangbe kama bina nani nun Ei le diga ong bacham hung rwe.

John 16

1 “Nani nun ket basui mak langna, Eina hei lang bing nga nani khou rin rwe. 2 Banina nani ding synagogue inza bina kazun satlune; nani ding athatnu maan gana Rikrwang chwanlaang tonuwe diga baning dingnu chakrin ga hung nge. 3 Banina Pa ding le Ating le thei mak briakpina kabia ongnu bing nga banina nani khou tolune. 4 Atiyeda chakrin ga hung tangnu kaan bi heiba lang bing nga Eina nani khou rin drwe dinu nanina baningsu lang, Eina nani khou heiba chong bing nga rin ongnuwe. Eina nani le ong bacham briakpina, kama bi Eina heiba chong bing nga nani khou rin thang maknuwe. 5 “Atiyeda atun Ei Ating lang hungnu Pa kim la selune atiga nani pakhatchanale Akhou, ‘Nang inlam senebo?’ diga ngai make. 6 Atiyeda Eina heiba chong bing nga nani khou rin briakpina nani sung riangrenuna sip rwe. 7 Ati ngaaklena Eina nani khou bazenu ga rinnuwe. Ei se swaknuwa nani lang inkuga sanuwe; balangbe Eina se swak make dabe, Paangthangnu gana nani khou hunglaye; atiyeda Eina se swake dabe Eina Bating nani khou lang hunglune. 8 “Maanna hungnu kaan bi talei ram ding noh lang bi, ririak senu lang bi khatle chong kasemnu lang bi indao thanglune: 9 Noh lang bi dinuba banina Ating balumsa make; 10 ririak senu lang bi dinuba Eina Apa kim la seye atiga nani Ating mu lat pilaye; 11 “Chong kasemnu lang bi dinuba hei talei ram om bapuba ding chong kasem drwe. 12 “Ei nani khou rin lang chong taswang khak amme atiyeda nanina ha bing ga atun loukhutnu ngamlaye. 13 Atiyeda bazenu Katha gana, hungnu kaan bi Maanna nani ding bazenu bing bi kai thanglune; Maanna baraantoza ngam paan bina rinlaye atiyeda Maanna ngaisu damnu bing ga rinlune khatle swak tingnu bing ga nani khou pi thei thanglune. 14 Maanna Ating lwat pi lian thanglune, balangbe Maanna Akhouna louluga nani khou haga pi thei thanglune. 15 Apa om ka am bing ga Aomme. Atibriakpina Maanna ha bing ga Akhouna lou swakluga nani khou indao thanglune diga Eina rinnuwe. 16 “Bakaan inchan maknu lak pi nani Ating mulaye khatle inchan maknu lak pi nanina Ating mu latlune, balangbe Ei Apa kim la seye.” 17 Baom potroi rwan lak pi mi kasemna khat le khat atiga rinne, “Maanna ani khou ‘Bakaan inchan maknu lak pi nani Ating mulaye khatle bakaan inchan maknu lak pi nani Ating mu latlune, balangbe Ei Apa kim la seye’ diga rinnuwa pa-aam dingbo?” 18 Atibriakpina banina rinne, “Bakaan inchan maknu lak dinu Maanna rin ongnuwa pa-aambo dinu ani thei make.” 19 Banina Bakhou chong kasem ngai nwamnu ga Jisu na theiluga bani khou rinne, “Eina ‘Bakaan inchan maknu lak pi nanina Ating mulaye khatle bakaan inchan maknu lak pi nanina Ating mu latlune’ diga rinnu lang bi nani cham ngai kale ongnubo? 20 Eina nani khou batak sekka rinnuwe, nani chaplune khatle nu hweilune. Atiyeda talei ramna karolune khatle nani sung riangre lune atiyeda nani sung riangre ga karonu bi gon swaklune. 21 Kamaisa khatna nao lung lang nainu kaan bi sung riangreye, balangbe baom chakrin ga hung tang rwe. Atiyeda maanna nao ga am thang khap tinu le talei ram bi misa khat lung hung rwe diga karo briakpina maanna riangrenu bing ga baningsula rwe. 22 Atiga nani le atun riangreye atiyeda Ei nani ding kadou latlune, nani sung karolune khatle nani karo ga pakhatchanale nani khouna lou satla rwe. 23 “Atiga ha ni ga nanina Akhou chong khatchale ngai latla rwe. Eina nani khou batak sekka rinnuwe, nanina Ameng bi Apa khou ninu ninu ga Maanna nani lang pi thanglune. 24 Atun tangnu sung bi nanina Ameng bi khatchale ninu maake. Niyo, nanina lousulune khatle nani karo ga sipsalune. 25 “Hei bing nga Eina nani khou chongchak toga rin thang drwe. Atiyeda Eina nani khou chongchak toga kabia lat makka, Apa om lang bi nani khou bathiangga indao thang dingnu dat ka hunglune. 26 “Ha ni ga nanina Ameng bi nilune atiyeda Eina nani lang Apa khou hweinine diga nani khou rinnu make. 27 Balangbe Apa Maan Bahakna nani ding kriang nge, nanina Ating kriang nge; balangbe Ei Rikrwang khouna hungnuwe dinu nanina balumsaye. 28 Ei Apa khouna hungluga talei ram bi hung rwe. Atiluga Ei talei ram bathan thangsialuga Apa khou seye.” 29 Baom potroi rwanna Bakhou rinne, “Phaang thang ngo, Nangna atun ani khou chongchak to makka bathiangga rin thang rwe. 30 Nangna pum brumza thei phik phike, atun pakhatchanale Nakhou chong ngai lat lang maak rwe dinu anina thei rwe, hagana Nang Rikrwang khouna hungnuwe dinu ani balumsa rwe.” 31 Jisu na bani khou katake, “Atunbe nani balumsarubo? 32 Phaang ngo, batak takka nanina Ating asat thangsialuga balaang balaang pak imphaang dam dingnu chakrin ga hungna rwe, atun hungna rwe. Atiyeda Apana Ating ong bacham thang ong briakpina Ei Araantoza make. 33 Nani nun Akhouna dai bazaangnu lou langna Eina hei bing nga nani khou rin thang rwe. Talei ram bi nani riangre kanang doulune atiyeda nani lozaang sawo, Eina talei ram ding ngam rwe.”

John 17

1 Jisu na hei bing nga rinnu nung, tambaan la batoukaluga kalum rwe, “Apa, chakrin ga hung tang rwe. Nasa Kapaisana le Nating lwat pi lian lang, Nasa Kapaisa ding lwat pi lian thangro. 2 Mi bingza lu chung bi Nangna Basa Kapaisa khou ngam pi thangnu danga, Nangna Alaang pi thang damnu mi bing khou Eina khwa sei ringnu ga pi thang lang nge. 3 “Khat tak Khatchanu bazenu Rikrwang ding khatle Nangna lang hungnu Jisu Christa ding banina theinu ga khwa sei ringnu gaye. 4 Eina talei ram bi Nalwat pi lian rwe. Nangna Alaang pi thangnu chwan ga Eina to loi rwe. 5 He Apa, talei ram am mak baleina Nang le Akhou am ngaaknu lwat kana atun Nang le bachamga Ating lwat pi lian thangro. 6 “Apana talei ram bi Alaang pi thang ngaaknu mi nun khou Eina Nameng phun indao thang rwe. Bani ga Naomme, bani ding Nangna Akhou pi thang rwe khatle banina Nachong zei rwe. 7 Nangna Alaang pi thangnu bing ga Nakhou naye dinu atun banina thei rwe. 8 “Balangbe Nangna Akhou pi thangnu chong bing ga Eina bani khou pi rwe; banina chong bing ga lousu rwe, Ei Nakhouna hungnuwe dinu bani bathiangga thei rwe; atiga Nangna Ating lang hungnuwe dinu bani balumsa rwe. 9 Eina bani lang kalumme. Talei ram lang make atiyeda Nangna Akhou pi thangnu mi nun lang nge, balangbe bani ga Naomme. 10 Aom bing ga Naomme, Naom ga Aomme khatle bani khou Ating lwat pi lian rwe. 11 Ei talei ram bi ong lan rwe atiyeda bani nunba talei ram bi ong maang nge atiga ei Nakhou hung nge. Bathiangnu Apa, Arweina khatcha to nu danga, bani le khatcha to lang Nangna Akhou pi thang damnu mi nun ding Nameng paan bina ngaak thang ngo. 12 Eina bani le diga talei ram bi ong bachamnu kaan bi Eina bani ding Nameng bi ngaaksian thang ngaake. Nangna Akhou pi thangnu mi nun ding Eina ngaaksian thang ngaake; atiga Bathiangnu chongdip pi rin thangnu, braan dingnu sa kapaisa ga makka bani pakhatcha hakna braan make dinu ga hung tang rwe. 13 “Atiyeda atun Ei Nakhou hung rwe khatle bani khou Aom karonu ga sipsaga am dam langna, Eina talei ram bi chong bing nga rin thang rwe. 14 Eina Nachong ga bani khou pi thang rwe khatle talei ramna bani ding batan rwe balangbe Ei talei ram om maknu danga, bani nun le talei ram om make. 15 Nangna bani ding talei ram bina lou swak thang ngo diga Eina hweininu make atiyeda sa maknu bakhouna bani ding ngaak thang ngo dinuwe. 16 Ei talei ram om maknu danga bani le talei ram om make. 17 Bazenu Nachong paan bina bani ding to bathiang thang ngo. Nachong ga bazenuwe. 18 Nangna Ating talei ram bi lang thangnu danga, Eina le bani ding talei ram bi lang thang rwe. 19 Ei Azan ding to bathiangnu danga, bani ding bazenu gana to bathiang thang lang nge. 20 “Eina hei rwanza lang kalumnu make atiyeda bani chong paan bina Ating balumsa dingnu mi nun lang leye; 21 Apa, bani mi bing khatcha to lang, Eina kalumme, Nangna Akhou ongnu khatle Eina Nakhou ongnu danga; bani nun ani khou ong ding ngo, heiya Nangna Ating lang hungnuwe dinu talei ramna balumsa lang nge. 22 Arwei khatcha to nu danga, bani le khatcha to langna Nangna Akhou pi thangnu lwat liannu ga Eina le bani khou pi thang rwe: 23 “Eina bani khou ongnu khatle Nangna Akhou ong thangnu danga; khatcha tonu bi bani nun khopsanu to lang nge, atiga Ating Nangna lang hungnu khatle Nangna Ating kriangnu danga, bani ding le kriang nge dinu talei ramna thei lang nge. 24 “Apa, Nangna Akhou pi thang ngaaknu lwat ka banina mu dam lang khatle Eina ongnu riak pi ga bani le ongnu Ei bathaiye; balangbe talei dam mak baleina Nangna Ating kriang thang rwe. 25 “He ririak senu Apa, talei ramna Nating thei make atiyeda Ei Nating thei rwe khatle Nangna Ating lang hungnuwe dinu hei rwanna thei rwe. 26 Eina Nameng ding bani khou indao thang rwe, atiga Akhou amnu Nakriang ga bani khou le am lang khatle Ei bani khou am lang haga indao thangne.”

John 18

1 Jisu na heiba chong bing nga kabia taangnu kaan bi Baom potroi rwan le diga Kidron tuiqwa la thou dam ngaake, haba riak pi ga amnu anqwat khat pi, Maan le Baom potroi rwan le diga khut rwe. 2 Bating pi swak tingnu Judas na le, haba riak ka thei ngaake; balangbe Jisu na Baom potroi rwan le diga habei ga katupka kadou ngaake. 3 Haba nung bi takopuba rwan le Pharisee rwan khouna kalum in ngaak rwan le, kraanmi rwan ding, Judas na kalwangluga thaomei, meila khatle sung chem choiluga habei ga hung rwe. 4 Jisu na Bakhou swak tingnu bing ga thei briakpina, meithaan la se swakluga bani khou rinne, “Nani tu ding zongnubo?” 5 Banina Bakhou katake, “Nazareth Jisu ding nge.” Jisu na bani khou rinne, “Maan ga Ei rwe.” Atiga Bating pi swak tingnu Judas le bani le diga han bacham ong ngaake. 6 Jisu na, “Maan ga Ei rwe,” diga rinnu kaan bi banina nung la inkhin swakluga talei bi in balumta rwe. 7 Habei ga Jisu na bani khou ngai late, “Nani tu ding zongnubo?” Banina rinne, “Nazareth Jisu ding nge.” 8 Jisu na katake, “Nani khou Maan ga Ei rwe diga rin drwe. Atibriakpina nanina Ating zongnuwe dabe, bani ding ga pi sedro.” 9 Heiya rin thang ngaaknu ga hung tang lang nge, “Nangna Alaang pi thangnu nun lak pi pakhatcha ding hakna Eina to braan make.” 10 Habei ga Simon Peter na kachaak chem kaswaluga takolu swak pakhat om inchang kana kapak chat trwe. Haba swak meng ga Malchus tiga kouwe. 11 Atibriakpina Jisu na Peter khou rinne, “Kachaak chem ga chemthaang bi thang dro. Apana Alaang pi thangnu ngai ga Ei in lang makpo?” 12 Haba nung bi kraanmi nun, kraan milu khatle kalum in ngaak rwanna Jisu ding namluga karak rwe. 13 Banina kamaga Jisu ding Anas kim la kalwang hung rwe, balangbe maan haba sangwan bi takolu to ngaaknu Caiaphas pu we. 14 Caiphas heiya Jihudi rwan khou mi pakhatna mi bing lang thi thangnu ga sanuwe diga rin ngaaknu gaye. 15 Simon Peter le potroi katei khatna Jisu nung sui hung ngaake. Takoluna potroi khat tingga thei briakpina, Jisu le bachamga barwei takolu in inkhu tangga suizon hung ngaake. 16 Atiyeda Peter na langkaang la han ong ngaake. Atibriakpina takoluna theinu potroi pakhat kana, swakluga inkhaan ngaak rangaaknu khou rinluga Peter ding kalwang khut rwe. 17 Habei ga inkhaan ngaak rangaaknu gana Peter khou rinne, “Nang le heiba Manpa om potroi rwan lak pi pakhat makpo?” Peter na, “Ei make” diga katak rwe. 18 Sik briakpina swak rwan le kalum in ngaak rwanna mei kahaiga han kadoi ong ngaake. Atiga Peter le bani lak pi mei kahaiga sui ong ngaake. 19 Takoluna Jisu khou Baom potroi rwan khatle Maanna bachu thangnu zekrin lang bi chong ngai ngaake. 20 Jisu na bakhou katake, “Eina talei ram mi nun khou indaoga rinnuwe. Eina Jihudi rwanna hung kadoinu riak synagogue inza bi khatle kalum in bi, bakaan thin inkamnu to makka bachu thang ngaake. 21 “Pa-aam toga nangna Akhou ngainubo? Eina rinnu ngaisu damnu mi nun khou ngaiyo. Phaang ngo, Eina rinnu ga banina theiye.” 22 Atiyeda Maanna ha bing ga rin taangnu kaan bi Bakim bi han ongnu kalum in ngaak nun lak pi pakhatna Jisu ding bakut bazaana kabengga rinne, “Nangna takolu meithaan bi atiga kataknubo?” 23 Jisu na katake, “Eina kasianu kabia damnu amme dabe, kasianu om lang bi sake piyo; atiyeda kasanuwe dabe, nangna pa-aam lang Ating bweinubo?” 24 Haba nung bi kut karakluga ongnu Jisu ding Anas na takolu Caiaphas khou bathan thang rwe. 25 Simon Peter mei kahaiga ong ngaake. Atibriakpina banina bakhou ngaiye, “Nang le Baom potroi rwan lak pi pakhat makpo?” Maanna, “Ei make!” diga katak rwe. 26 Takolu om swak pakhat, Peter na bakanaa kapakchat tamnu insung rwan pakhatna le rinne, “Eina anqwat pi Maan le diga chwanlaang bacham ngaaknu munu ga nang makpo?” 27 Habei ga le Peter na Jisu ding za mak lat rwe; atiga haba chakrin bi ga aankhongna khwang rwe. 28 Haba nung bi banina Jisu ding louthwan khwan, Caiaphas khouna Praetorium la kalwang hung rwe. Banina Takan Swaknu Balou sa bi tanaat mak langna, bani Praetorium sung bi khut mak ngaake. 29 Pilate na swakluga bani khou rinne, “Heiba Manpa lu chung bi pa-aam koi impu thangnu amga nanina Bating akhou kalwang hungnubo?” 30 Banina bakhou katake, “Heiba Manpana sa maknu chwan to maknu ngaake dabe anina Bating nakhou kalwang hunglaye.” 31 Habei ga Pilate na bani khou rinne, “Nanina Bating kalwangluga nani om chongtan nung suiga chong kasem sero.” Atibriakpina Jihudi rwanna bakhou rinne, “Mi khat ting athat lang ani khou ngam pi thang make,” 32 Jisu na Maan tatonu thit thilu dingbo dinu rin chaak thang ngaaknu ga hung tang lang nge. 33 Habei ga Pilate na Praetorium sung la khutlatluga Jisu ding kouga, Bakhou ngai rwe, “Nang Jihudi rwan Krwang bo?” 34 Jisu na bakhou katake, “Heiya naraanto zana rinnumo mak tabe Alang bi nakhou mi khatna rin thanggabo?” 35 Pilate na katake, “Ei Jihudi rwanbo? Nachaatna khatle takopuba rwanna Nating akhou pi thang rwe. Nang paaam to ba dabo?” 36 Jisu na katake, “Akrwang talei ga heiba talei ram om make. Akrwang talei ga hei talei ram om ngaake dabe ating Jihudi rwan khou pi swak mak lang, Aswak rwanna katwak ngaak tingnuwe; atiyeda atunba Akrwang talei ga hei talei ram om make.” 37 Atibriakpina Pilate na Bakhou rinne, “Ati dabe Nang Krwang bo?” Jisu na katake, “Nangna Ei Krwang nge diga bazega rin rwe. Hei langna Ating pon thangnuwe khatle bazenu sake pi langna Ei talei ram bi hungnuwe. Bazenu mi bingna Akhwan ngaiye.” 38 Pilate na Bakhou rinne, “Bazenu dinuwa paaambo?” Maanna heiya rin taang bi, Jihudi rwan khou selatluga bani khou rinne, “Ei Balu chung bi koi khatchale dou make. 39 Atiyeda Takan Swaknu Balou dat pi eina nani lang mi pakhat ting bathan thang lang nani om chaang amme. Atibriakpina Jihudi rwan Krwang ding ga nani lang eina bathan thangnu nani bathaibo?” 40 Habei ga bani khangsungna paoga rinne, “Heiba Manpa ding nga make, Barnabas ting bathan thang ngo!” Barnabas ka kasut sanu mi ngaake.

John 19

1 Haba nung bi Pilate na Jisu ding kalwang swakluga pi bwei rwe. 2 Atiga kraanmi nunna kaling luthop khat bachaluga Balu bi thop thang rwe khatle banina Bakhou sendumnu pwan sin thang rwe. 3 Banina Bakhou rinne, “Kalumme, Jihudi rwan Krwang!” Atiga banina Jisu ding bani kutna kabeng rwe. 4 Pilate na swaklatluga, bani khou rinne, “Phaang ngo, eina Balu chung bi koi khatchale dou make dinu nanina thei lang, Bating nani khou phun swaknu rwe.” 5 Habei ga Jisu kaling luthop thopluga khatle sendumnu pwan sinluga swak rwe. Pilate na bani khou rinne, “Phaang ngo, heiba Manpa ding nga!” 6 Atibriakpina takopuba rwan le kalum in ngaak rwanna Bating munu kaan bi banina paoga rinne, “Bating cross pi athat thang dammo, Bating cross pi athat thang dammo!” Pilate na bani khou rinne, “Nani raanto Bating kalwangseluga cross pi athatro, balangbe ei Balu chung bi koi dou make.” 7 Jihudi rwanna bakhou katake, “Ani om chongtan amme, ani om chongtan nung suiga Maan thi lang khop rwe, balangbe Maanna Baraanto Bating Rikrwang Sa Kapaisa ye diye.” 8 Rin ongnu chong ga Pilate na ngaisunu kaan bi maan kachi tak ngaak rwe, 9 maanna Praetorium la khut latluga Jisu khou ngaiye, “Nang inlamna hungnubo?” Atiyeda Jisu na bakhou katak make. 10 Pilate na Bakhou rinne, “Nang akhou pa-aam toga katak maknubo? Nating bathan thang lang khatle cross pi athat lang akhou ngam amme dinu nang thei makpo?” 11 Jisu na katake, “Nakhou basaang lana pi tanu mak ngaake dabe Alu chung bi naom ngam khatchale maak ngaak tingnuwe. Atibriakpina Ating nakhou pi swaknu maan ga noh lian inku rwe.” 12 Habeina thouga Pilate na Jisu ding bathan sat lang lampui zong thou rwe atiyeda Jihudi rwanna paoga rinne, “Nangna heiba manpa ding nga bathan sate dabe nang Caesar baan lan rwe. Tudannu baraanto bating krwang pi tonu maan ga Caesar ding rin basiatnu miye.” 13 Pilate na haba chong ga ngaisunu kaan bi maanna Jisu ding langkaang la kalwang swak rwe khatle Hebrew chong la, Gabatha diga kounu, chongsem riak pi badungta rwe. 14 Haga Takan Swaknu Balou lang Chamdaannu Lumik, chakrin karuk tanu dat pi ngaake. Maanna Jihudi rwan khou rinne, “Phaang ngo, nani Krwang ding ga!” 15 Atiyeda banina rakan ranga pao ong ngaake, “Bating kalwang thoudro! Bating kalwang thoudro! Bating cross pi athat thang dammo!” Pilate na bani khou rinne, “Nani Krwang ding eina cross pi athat lang zungbo?” Takopuba rwanna katake, “Caesar makka ani lang krwang maake!” 16 Habei ga Pilate na Jisu ding cross pi athat lang bani khou pi swak rwe. Atiga banina Jisu ding kalwang thou drwe. 17 Jisu na Baom cross phunluga Hebrew chong la Golgotha diga kounu Luru riak la hung rwe, 18 banina mi katei pat ni, pakhat ting inchang pek la, pakhat ting imbei pek la khatle Jisu dingna bazai bi cross pi taanka rwe. 19 Pilate na meng khat hiakluga cross pi thang rwe. Hiak thangnu ga, “NAZARETH RWAN JISU, JIHUDI RWAN KRWANG” dinuwe. 20 Jihudi rwan mi taswang khakna haga pa rwe, balangbe Jisu ding cross pi athat thangnu riak ka namlian kim bi ngaake; atiga haga Hebrew, Greek khatle Latin chong la hiak thang ngaake. 21 Atibriakpina Jihudi rwan om takopuba rwanna Pilate khou rinne, “ ‘Jihudi rwan Krwang,’ diga hiak thang mako, atiyeda ‘Maanna rinnu danga, “Ei Jihudi rwan krwang nge” diga rinnu ga hiak thang ngo.’ ” 22 Pilate na katake, “Eina hiaknu ga hiak trwe.” 23 Kraanmi rwanna Jisu ding cross pi athat thangnu nung, banina Jisu om pwan ga kraanmi pakhat khat lang, badam bali to swak rwe khatle talathu ga le lou rwe. Haba talathu ga bamun maaknu kasaklana pwan khatcha toga khongnu ngaake. 24 Atibriakpina bani cham atiga rinne, “Ani heiya kaire makcho, tuna lousulu dingbo dinu ani tasaan phaangzo,” heiya Bathiangnu chongdip pi rin thangnu, “Banina Apwan bani lak pi kasemluga, Apwan lang chungna banina tasaan rwe” dinu ga hung tang lang nge. Ha bing ga kraanmi nunna to ong ngaake. 25 Jisu om cross kim bi Banu le, Banu nao, Cleopas mei Mary khatle Magdalene Mary le han ong ngaake. 26 Jisu na Banu le, Maanna kriangnu potroina han ongnu ga muluga Banu khou rinne, “Kamaisa, Nasa Kapaisa ding ga phaang ngo.” 27 Habei ga Maanna Baom potroi khou rinne, “Nanu ding ga Phaang ngo,” Haba chakrin bina haba potroi gana Banu ding bain la kalwang thou dam ngaak rwe. 28 Heiba nung bi, Jisu na atunbe chwan bing loi rwe dinu theiluga Bathiangnu chongdip pi rin thang damnu ga hung tang langna atiga rinne, “Ei taraanne!” 29 Habei ga kathunnu drakha tui thangsipnu ben khat am ngaake; atiga banina kathunnu tui bi ga sponge bachemluga hyssop thing lan bi thangluga haga Bamun tangga balaanka rwe. 30 Jisu na haba tui ga batemluga, “Loi rwe!” diga rinnu nung Balu kuntaluga Bakatha bathan thang drwe. 31 Haga Chamdaannu Lumik briakpina pum bing ga Sabbath ni cross pi thang ong mak langna (balangbe haba Sabbath ni ga thuk kataknu lumik ngaake), bani ket bwei ropluga, lou thou dam lang Jihudi rwanna Pilate khou ni ngaake. 32 Atiga kraanmi rwanna Maan le diga cross pi bakhai thang bachamnu kamanu manpa khatle kaninu manpa ket ka bwei rop rwe. 33 Atiyeda banina Jisu khou hungnu kaan bi Maan thi rwe dinu theiluga Baket bwei rop mak ngaake. 34 Atiyeda kraanmi rwan lak pi pakhatna Babanaak pi sungna chou rwe khatle haba kahan bi ga thi le tui lwangta rwe. 35 Haga munu maan gana sake pi rwe khatle baom sake ga bazenuwe; maanna bazenu rinnuwe dinu nanina balumsa lang nge. 36 Balangbe Bathiangnu chongdip pi, “Baru khatchale to roppilaye,” diga rin thangnu bing ga swak ngaak rwe. 37 Bathiangnu Chongdip kateina rin late, “Banina sungna chounu Bating phaanglune.” 38 Haba nung bi Jihudi rwan ding kachi briakpina, Jisu om potroi to ngaaknu, Arimathea rwan Joseph na Pilate khou inkamga hungluga, Jisu pum ding ni ngaake; Pilate na bakhou haga za thang rwe. Atibriakpina Jisu pum ga louta rwe. 39 Meithaan kani khat zingpha Jisu kim bi hung ngaaknu Nicodemus le hung ngaake, maanna myrrh le aloes thang katwaknu banamsanu thao kilo somthumga impaang khak phunluga hung ngaake. 40 Banina Jisu pum ga louluga Jihudi rwan om pu pa chaang nung suiga ri lang banamsanu pot ka le diga Bapum ga banemnu pwanna kazwan rwe. 41 Atiga Bating cross pi bakhai thangnu riak kim bi anqwat khat am ngaake, haba anqwat sung bi ga pakhatcha ding le ri thang mak aangnu thaan kathan khat am ngaake. 42 Haga Jihudi rwan om Chamdaannu Lumik ngaak briakpina banina Jisu ding haba riak pi ga thang ngaake, balangbe thaan ga naiga am ngaake.

John 20

1 Maap lak om kamanu ni louthwan karang takka khwa baan swak mak balei, Magdalene Mary na thaan la hungnu kaan bi thaan bina thaankham lung ga lou sat tam ngaaknu mu rwe. 2 Atiga maanna pak seluga Simon Peter le Jisu na kriangnu potroi pakhat kim bi hungluga barwei khou rinne, “Pukraangba ding banina thaan bina lou thou drwe, Bating inlampai thang damnubo dinu theilan rwe.” 3 Atibriakpina Peter le potroi katei pakhat kana swakluga thaan la se ngaake. 4 Atiga barwei pat ni pak bacham ong bi, potroi pakhat kana Peter ding pak khan kaluga thaan la hung kama rwe. 5 Maanna kuntaluga phaang khutnu kaan bi banemnu pwan ga nui satsianu mu rwe; atiyeda maan basung la khut make. 6 Simon Peter na hungnu kaan bi barwei pat ni thaan sung la khut rwe; atiga banemnu pwan ga nui satsianu mu rwe, 7 Balu bi kabetnu pwan ga le banemnu pwan ga thang karung makka tei kadipluga thang ngaake. 8 Thaan bi hung kamanu potroi katei pakhat ka le suikhut rwe; atiga maanna muluga balumsa rwe. 9 Balangbe Jisu na thinu nun lak pina ring thou latlune diga Bathiangnu chongdip pi rin thang ngaaknu ga bani thei mak ngaak maang nge. Mary khou Pi mu thangnu 10 Haba nung bi potroi rwan ga bani riak la thou lat tam ngaake. 11 Atiyeda Mary na chapka thaan paan la han ong ngaake khatle maanna kuntaluga thaan sung la phaangkhut ngaake. 12 Jisu pum ding ri thangnu riak pi pwan kangounu sinnu tambaan chonglang pat ni, khatna lu pek la khatna ket pek la badung ongnu maanna mu rwe. 13 Barweina bakhou rinne, “Kamaisa, nang pa-aam toga chap ongnubo?” Maanna barwei khou rinne, “Balangbe banina Apukraangba ding lou thou drwe, banina Bating inlampai lou thou dambo dinu ani theilan rwe.” 14 Mary na heiba chong nga kabialuga, maan kanei swaknu kaan bi Jisu han ongnu ding mu rwe atiyeda haga Jisu we dinu thei mak ngaake. 15 Jisu na bakhou rinne, “Kamaisa, nang pa-aam toga chap ongnubo? Nang tu ding zongnubo?” Maanna Bating anqwat miye diga baningga Bakhou rinne, “Bapuba, Nangna Bating lou thou damnuwe dabe, ingaipai thang dambo dinu akhou rin thang ngo, Ei Bating lou thou damne.” 16 Jisu na bakhou rinne, “Mary!” Maanna kanei swakluga Bating “Rabboni!” diga kou rwe, (bakabana Bachuthangnupa dinuwe). 17 Jisu na bakhou rinne, “Ating banaan mako, balangbe Ei Apa kim la se mak aang nge; atiyeda nangna au anao rwan khou seluga bani khou, ‘Ei Apa khou khatle nani Pa khou, Arikrwang khou khatle nani Rikrwang khou semaang nge diga barinno.’ ” 18 Magdalene Mary na potroi rwan kim bi hungluga maan Pukraangba ding mu rwe khatle heiba chong bing nga Maanna bakhou rin thang rwe diga bani khou hung rin rwe. 19 Maap lak om kamanu lumik khwazinren tanu dat pi, potroi rwanna Jihudi rwan ding kachiga inkhaan khaanluga ong kadoi ong ngaake, habei ga Jisu na bani lak pi hung hanluga, bani khou rinne, “Nani khou dai bazaangnu am ding ngo.” 20 Atiga Maanna heiya rinnu nung, bani khou Bakut khatle Babanaak pi mu rwe. Habei ga potroi rwanna Pukraangba ding muluga karo ngaak rwe. 21 Haba nung bi Jisu na bani khou rin late, “Nani khou dai bazaangnu am ding ngo! Apana Ating lang thangnu danga Eina le nani ding lang thang rwe.” 22 Maanna heiya rinnu nung, bani khou Bakaphuk sem thangluga rinne, “Katha Bathiangnu louro. 23 “Nanina tudannu pakhat om noh kok thang nge dabe, bani noh ga le kok thang rwe; nanina kok thang make dabe, haga kok thang lan rwe.” 24 Jisu hungnu kaan bi potroi pat somga kani lak pi pakhat, Didymus tiga kounu Thomas ka bani lak pi ong mak ngaake. 25 Atibriakpina potroi rwan kateina bakhou rinne, “Ani Pukraangba ding mu rwe.” Atiyeda maanna bani khou rinne, “Bakut pi thinzum zam ga eina mu mak basaan, Bazam bi ga akut zungna banaan mak saan khatle Babanaak pi akut banaan mak basaan ei balumsa make.” 26 Atiga ni kariat nung bi Baom potroi rwan insung bi hung kadoi lat ngaake, habei ga Thomas le sui ngaake. Banina inkhaan khaanluga ong ongnu kaan bi Jisu na hungluga bani lak pi hanluga rinne, “Nani khou dai bazaangnu am ding ngo!” 27 Habei ga Maanna Thomas khou rinne, “Nakutzung ga abeiya tangga balaan swakluga Akut heiya phaang ngo khatle nakut balaan swakluga Abanaak pi banaanno. Balumsianu to mako atiyeda balumsawo.” 28 Thomas na Bakhou rinne, “Apukraangba khatle Arikrwang!” 29 Jisu na bakhou rinne, “Thomas, nang Ating mu briakpina balumsa rwe. Mu mak peida balumsanu maan ga aih sanuwe.” 30 Jisu na batak takka potroi rwan meithaan bi badannu chwan to thang damnu heiba chongdip pi hiak thang maknu amsip ammaang nge; 31 atiyeda Jisu wa Rikrwang Sa Kapaisa ye dinu nanina balumsa lang khatle balumsaluga Bameng bina ringnu lousu dam langna heiba badannu bing nga hiak thangnuwe.

John 21

1 Hei bing nung bi Jisu na Bapum bahak ting Tiberias tuipui paan bi potroi rwan khou pi mu thang lat ngaake khatle Bating bani khou atiga pi mu thang rwe: 2 Habei ga Simon Peter, Didymus tiga kounu Thomas, Galilee taram Cana bina hungnu Nathanael, Zebedee sa kapaisa rwan khatle potroi pat ni le diga ong ngaake. 3 Simon Peter na bani khou rinne, “Ei ngaa namse maang nge.” Banina bakhou rinne, “Ani le nanung suide.” Bani nun se swakluga barapka li sung bi khut rwe atiyeda ha ni zingpha bani ngaa khatchale namsu mak ngaake. 4 Louthwan khwa baan swaknu kaan bi Jisu tui paan la han ong ngaake; atiyeda haga Jisu we dinu potroi rwanna thei mak ngaake. 5 Jisu na bani khou rinne, “Naosen rwan ga, nani khou sa zanu pot ambo?” Banina Bakhou, “Maake” diga katak rwe. 6 Maanna bani khou rinne, “Kalang ga li om inchang pek la sattawo atiye dabe nanina phangkhape.” Banina kalang ga satta rwe, atiga atun ngaa ga tamlai briakpina bani kalang ga kai thounu ngamlan rwe. 7 Atibriakpina Jisu na kriangnu potroi gana Peter khou rinne, “Heiya Pukraangba zung nge!” Simon Peter na haga Pukraangba ye dinu theinu kaan bi baom langkaangnu talathu na bapum bi kabet thangluga (balangbe maan pwan basoi mak ngaake), tuipui la kachakta rwe. 8 Potroi rwan katei gana liswan khat pi hungluga (balangbe bani tui paan bina namlaa makka, kutki raza ni khak dinuba, meter somkaqwa khak namlaanu riak pi am ngaake), ngaana sipnu kalang ga banina kai hung rwe. 9 Banina tui paan swaktang khap tinu le, mei toluga, mei bi ngaa rou ongnu khatle uilu ga mu rwe. 10 Jisu na bani khou rinne, “Nanina namnu ngaa ga lou hungro.” 11 Simon Peter na hungluga ngaa kaliannu raza somnga ga inthum suinu kalang ga tui paan la kai swak rwe; ngaa ga heitia lang tam beida, kalang ga re make. 12 Jisu na bani khou rinne, “Hungro, louthwan thaisaak saro.” Atiyeda potroi rwanna haga Pukraangba ye dinu thei beida, “Nang Tubo?” diga pakhatchanale ngainu ngam mak ngaake. 13 Jisu na uilu ga hung louluga bani khou pi rwe, hadanga ngaa ga le pi rwe. 14 Jisu na thinu nun lak pina ring thou latnu nung Bapum bahak ting Baom potroi rwan khou pi mu thangnu heiyana leng thumnuwe. 15 Banina louthwan thaisaak sa taangnu nung, Jisu na Simon Peter khou ngaiye, “Jonah sa kapaisa Simon, hei bing ding ma nang Ating kriang inkubo?” Peter na Jisu khou rinne, “O, Pukraangba; eina Nating kriang nge dinu Nangna theiye.” Jisu na bakhou rinne, “Aom zao swan nun ding basaak pi sa thang ngo.” 16 Jisu na leng ninu toga Simon Peter khou ngai late, “Jonah sa kapaisa Simon, nang Ating kriangbo?” Peter na Bakhou rinne, “Pukraangba, eina Nating kriang nge dinu Nangna theiye.” Jisu na bakhou rinne, “Aom zao nun ding sian thang ngo.” 17 Jisu na Peter khou leng thumnu toga ngai late, “Jonah sa kapaisa Simon, nang Ating kriangbo?” Jisu na bakhou leng thumnu toga “Nang Ating kriangbo?” diga ngai briakpina Peter basung riangre rwe, maanna Jisu khou rinne, “Pukraangba, Nangna pum brumza theiye; eina Nating kriang nge dinu Nangna theiye.” Jisu na bakhou rinne, “Aom zao nun ding basaak pi sa thang ngo. 18 Batak sekka Eina nakhou rinnuwe, nang naosen bado, naraanto nakong bi kongkhaak khaakluga nangna se nwamnu riak la se ngaake; atiyeda nangna patso hungnu kaan bi nakut balaan swakluga mi khatna kongkhaak khaak thangluga nangna se nwam maknu riak la maanna nating kalwangselune.” 19 Maanna impei thit thiluga Rikrwang lwat pi lian dingbo dinu pi thei thangga Maanna hei bing nga rinnuwe. Maanna heiya rin taangnu nung Peter khou rinne, “Nang Anung suiro.” 20 Peter na nung la kanei swaknu kaan bi Jisu na kriangnu potroi ga sui hungnanu mu rwe, haba manpa ga khwazin thaisaak sanu kaan bi Pukraangba pam bi ongluga, “Pukraangba, Nating pi swak tingnu maanzo tubo?” diga ngai ngaaknu gaye. 21 Peter na bating muluga Jisu khou rinne, “Pukraangba, heiba manpa lang bi tato langbo?” 22 Jisu na bakhou rinne, “Eina hung lat mak basaan maan ringga ongnu ga Eina baningnuwe dabe, hagana nalaang pa-aam togabo? Nang Anung suiro.” 23 Haba potroi ga thilaye dinu chong ga unao rwan bing lak pi thei chang thou dam ngaake. Atiyeda Jisu na maan thilaye diga rinnu make atiyeda “Eina hung lat mak basaan maan ringga ongnu ga Eina baningnuwe dabe, hagana nalaang pa-aam togabo? dinuwe.” 24 Haba potroi ga hei bing lang bi sung kahan pi thangnu khatle hiak thang ngaaknu maan gaye; atiga baom sung kahanga bazeye dinu anina theiye. 25 Jisu na to thang ngaaknu chwan katei katei le amsip amme, ha bing ga khat khat toga hiaktaye dabe hiak tingnu chongdip bing ga talei ram bi thangchanlaye diga ei baning nge. Amen.