Ngao Meine Meng
1 Ükong wangwante Ngao ngoh, hüyange Ngaowa Kahwang phei ngoh, hüyange Ngaowa Kahwangne ngoh. 2 I Ükong wangwante muh Kahwang phei ngoh. 3 Sheminlamphe I kaiye lingngai, hüyange I ye-ompe ülam ja nehoi linge yengai. Hangyin linge ngaiyangki, 4 I mepu üyin ngoh, hüyange I üyin-a kahtalan wangngai ne ngoh. 5 Wangngaiye wangnyak me tee-nang, hüyange wangnyakke tüopa yemei ok. 6 Kahwang mepu shonpu kahta ja ngoh; I min John. 7 I-a saki phalak jingne, wangngai jeng saki phalak, I kaiye kahta üshei ütinglak-e tamlak jingne pei. 8 Wangngai I ne yeje, hüpoi tüopa wangngai jeng saki phalak jingne I pei. 9 Hatüowa ütingpa wangngai ne ngoh, hanghepa wangngai kahtoknyu te pei hüyange kahta üsheite teeye tam. 10 I kahtoknyu me ngoh; Kahwange I kaiye kahtoknyu ling, hüyangpoi kahtoknyuwe I yeshing. 11 I yoi kahtalan tangte pei, hüyangpoi I kahtalanne I yeyah. 12 Hüyangpoi hangshinne I yah hüyange I min me meng tüolan te Kahwang üha ne menglak wong Iye pha. 13 Iman iy me puhpu yeje, mei me puhpu yeje, yejema-a kahta mongpu me puhpu yeje, hüpoi Kahwang mepu. 14 Ngao kahta ne meng hüyange teman phei ngoh. I müktishiwapu, shüpshe hei ütinge maawe teman-e ngeyangki. Ipa mepu I shaha Halom ne menge hatüo müktishiwapu Iye tüoyangki. 15 Johnne I jingne saki pha, hüyange üngwün, “Hatüowa taowe ao jeng iyapeih I ngohnang, Ao ü-phei te pei, hüpoi I ü-phei sheyongpupa, hangjingne tao puh shao me I ngoh.” 16 Hangjingne I wangngoipu shüpshe mepu moiman ja phei me ja she Iye teman üshei moiman. 17 Hangjingne Kahwange Mosa kaiye ngaokeng pha; hüyangpoi shüpshe hei ütingpa Jesu Khrista kaiye pei. 18 Aowe-o Kahwang jeje mannge. Hüyangpoi Üpa mongjang me ngohpu, halom hawe I ütahte ngaipuwe shingne tam.
Baptipa John Ngaolan
19 Aope Jerusalem me ngohpu Jehudilanne ngengpa hei Levilan “Nang ao shi?” she Ite tonglak jingne shonne tei Johnne hatüo ngao iyangki. 20 Johnne yejanpe yengoh, hüpoi ngaiphaih-e hüyange meimei-e hüke iyangki, “Taowa Khrista ne yeje.” 21 Hüyange iman-e Ite tong, “Hümma-a nang ao shi?” “Nanga Elijah a?” “Iye jan, tao yeje.” Iman-e tong, “Nanga Hipa a?” Iye jan “Yeje.” 22 Iman-e i, hümma-a “Nanga ao shi tomante ipha.” “Aoyinne toman shon tüolan tangte toman-e nang mepu ngao yepu yahyelak yang. Nang jeng hangke ilak shi?” 23 Johnne janne Isaia hipa ngaokih-e hüke i: “Youngwanpa jingne tailam tingkhakke tümtüoh, she wanwüng jengme shejawe üngwünpu ngaowünga tao ngohnang.” 24 Phariseelanne-o kahta ütam shon. 25 Iman-e John te tong, “Nang Messiah ne-o yeje, yejema-a Elijah ne-o yeje, yejema-a Hipa ne-o yejepute hangne nange baptipu shi?” 26 Johnne jan: “Taowe yengme baptinang; hüpoi numan yo me ja yonge ngohnang numan-e yeshing. 27 I ü-pheite peiküki, hüyangpoi I yashom wu lanlak nehoi tao yewang.” 28 Tüolan üshei Bethani me ngai, Jordan yengyin jaye kaome, ümeken me Johnne bapti.
Jesu Kahwang Nyee Üha
29 Ünenyih Johnne I tangte Jesu peipu nge hüyange i; “Kahwang nyee üha leitüoh; aowe kahtoknyu ünu yahtei nang! 30 Taowe ao jeng hüke i, hatüowa i: ‘Kahta ja ü-pheite peinang, hüpoi I ü-phei sheyongpupa’ hangjingne tao manpuhpe I ngoh. 31 I ao ne menglak taowe yeshing, hüpoi Israel te I shingne tamlak jingne, taowe yengme baptiye peinang.” 32 Hatüo Johnne phapu saki: “Taowe wangdang mepu Yaha awshu kih yuwe nge hüyange I me pah. 33 Taowe I yeshing, hüpoi Kahwang, aowe yengme baptilak jingne tao shon, Iye üte i, ‘I ao me Yaha yuyange pah hüyange ngohpu nange nge, Yaha Üjao me baptitamlak pa-a I ngoh nang.’ ” 34 Hüyange Johnne i, “Taowe hatüo ngeteki. Hüyange taowe hatüo jingne saki phawe inang hatüowa Kahwang Üha.”
Jesu Pin Üwangpalan
35 Üne nyih I pinlan ni phei John üne-o tüome yongyange ngoh; 36 aope Iye Jesu kemme nge, Iye i, “Leihuyah, Kahwang Nyee üha tüome ngohnang!” 37 I pin niye Iye ngaopu jai hüyange Jesu phei woi. 38 Jesuwe lüppe yeyange lei, iman Ipheite woipu nge, hüyange imante i, “Numan-e hanghe yampu?” Iman-e jan, “Nang ümeken me ngoh nangki, rabbi?” (leppu konnyüopa) 39 Iye imante i, “Kei hüyange numan-e ngelak.” Tüophei me iman I pheite woi hüyange I ngohjing nge, hüyange tüonyih I phei nyoi. Hatüo shaaji ünhipak peli paji ne ngoh. 40 John ngao jaiyange, Jesu phei te woipu ni yo me ja-a Simon Peter ünao Andrew ngoh yangki. 41 Mokhshe Andrew-e Ijei Simon tüo hüyange Ite i, “Toman-e Messiah tüoteki.” (leppu “Khrista.”) 42 Tüophei me Iye Jesu tangte Simon woipei. Jesuwe Ite lei hüyange i, “Nang John üha Simon. Nang min Cephas she nyiklak.” (Peter min jamuh, hüyange leppu, “Longnyu.”)
Jesuwe Philip Hei Nathanael Nyikpu
43 Üne nyih Jesuwe Galilee te tailak jingne monge tüm. Iye Philip tüo hüyange Ite i, “Ü-phei woikei!” 44 Sha-a Philip-a Andrew hei Peter ni ngohpu ching Bethsaida mepu ne ngoh. 45 Tüokhei Philippe Nathanael tüo hüyange Ite i: “Ao jeng Mosawe ngaokeng lai me nyan, hüyange ao jeng hipalanne-o nyan, toman-e tüoteki. I-a Nazareth mepu Joseph üha, Jesu.” 46 Nathanael Ite tong, “Nazareth mepu ümei ütam ngailak a?” Philippe jan, “Kei hüyange leitüoh.” 47 Aope Jesuwe Nathanael I tangte peipu nge, I jeng Iye i, “Hatüo me ütingpa Israel. Ime hanghe ümengo yenang!” 48 Nathanael-e Ite tong, “Nange hangke tao shingpu?” Jesuwe jan, “Philippe nangte nyikshao me, aope nang phukpee phangme ngoh, Taowe nang ngeyangki.” 49 Nathanael-e jan, “Konnyüopa,” “Nanga Kahwang Üha! Nanga Israel Ahngpa!” 50 Jesuwe Ite janne i, “Taowe nang te nang aope phukpee phangme ngoh Taowe ngeki she ipu jingne nange üte ütinglak nangkü a? Nange tüophei sheyong shepu toilan ngelak!” 51 Hüyange Iye Ite i, “Taowe üting me inang; Numan-e wangdang epyange; hüyange Kahta Üha tangte Kahwang shongmokpalan ongpu hüyange tapu ngelak.”
Kana Me Naoyhapoi Mo
1 Nyih lüm shepu nyih me Galilee mepu Kana chingme naoyhapoi mopu ngoh; hüyange Jesu ünyu tüome ngoh. 2 Jesu hüyange I pinlan-o tüopa naoyha poipute nanpheng. 3 Aope wuwüngti khongküm yinge küm, Jesu ünyuwe Ite i, “Iman wuwüngti yenang.” 4 Hüwante Jesuwe janne i, “Sheko, hanghe linglak nange üte ilak ne yeje.” “Ü-hipak üne-o manngoi.” 5 Inyuwe namnopalante i, “Iye hanghe ilakei numan-e tüo lingyah.” 6 Jehudilan jaopu wanglam kih-e hüyange tüopa jingne longtük wok ja ja me taksheng ni hei lüm nyippu tüome ang. 7 Jesuwe namnopalante i, “Tüoyin longtük me yenge maatümtüoh.” Iman-e tüolan khongkümpu tükju ngoiye maatam; 8 hüyange Iye imante i, “Sha-a ütam shaotehu hüyange mo nokpupa tangte yah wenhu.” Iman-e tüopa I tangte yahwen. 9 Mo nokpupawe yeng jüppe nyao, hüyange wuwüngti ne mengteiye ngoh. Tüopa wuwüngti ümmepu pei Iye yeshing, hüyangpoi shaoshanpalan aoyinne yengshao iman-e shing. Iye nyemthe te nyik, 10 hüyange Ite i, “Kahta liliye üwangne shemeipupa wuwüngti jonnang, hüyange yinpalan-a moh yang pheime Iye shewengpupa phenang. Hüyangpoi nange sha-a ngoiye shemeipupa wuwüngti angpu a!” 11 Jesuwe Galilee mepu Kana me tüopa kahnyingwüngha füo üwangpa linge wang; I müktishiwapu hatüome ütahte ngai, hüyange I pinlanne Ite ütinglak. 12 Tüophei me Jesu hüyange Inyu, Inaolan hei pinlan Kapernaum te lai, hüyange tüome iman nyih üten ja ngoh.
Jesuwe Khümjing Jaotam
13 Jehudilan Yinyepu mo oteiye ngoh, hüyange Jesu Jerusalem te ong. 14 Khümjing me Iye mahu, nyee, hei awyei yaopalan hei ngin leijeipalan khao me shotyange nge. 15 Iye shetlak wu ling hüyange khümjing mepu yinmok üshei nyee hei mahu omme jange tei; Iye ngin leijeipalan khao shokke win hüyange iman ngin shaitam; 16 hüyange awyei yaopalante Iye ngaowe i, “Tüomepu tüoyin khongküm teitüoh! Numan-e üpa nok pheeileih nyoine tahmeng!” 17 I pinlanne laingao me hüke nyanne ngohpu teihpei, “Nang nok jingne tao lahnyikpuwe hahshulak.” 18 Jehudilan I tangte ngoi hüyange tong, “Nange tüoyin linglak jingne toman shaome hanghe kahnyingwüngha füo linge hüolak shi?” 19 Jesuwe jan, “Tüopa khümjing mengtam tüoh, hüyange nyihlüm mongme Taowe loilak.” 20 Hüwante Jehudilanne i, “Tüopa khümjing welak jingne wangpeng deli me wok yah, hüyange nange tüopa nyih lüm mongme loipu oklak a?” 21 Hüyangpoi Jesuwe I püm khümjing jeng ngao. 22 Tüokhei, aope I lipu mepu yange ye, I pinlanne Iye ngaoyangpu tüopa teihtüo; hüyange iman-e lai ngaote, hüyange Jesuwe ngaoyangpu ngaote ütinglak. 23 Aope Yinyepu Mo hipak me I Jerusalem me ngoh, Iye lingpu kahnyingwüngha füo ngeye kahtalan maawe I min me meng. 24 Hüyangpoi Jesuwe imante yoi nying nyingke mong yehüm, hangjingne kahta lili Iye meiye shing. 25 Hüyange kahta aowe-o ülao ja jingne saki phawe ilak wongpong yeje, hangjingne kahtalan mongjang me hanghe pei hüyange ngai Iye shing.
Jesu Hüyange Nicodemus
1 Phariseelan ükhong mepu Jehudilan woipa ja Nicodemus she minpu ngoh. 2 Yaja Jesu tangte tüopa kahta pei hüyange Ite i: “Rabbi, (konnyüopa) toman-e shingnang nang Kahwange shonpu konnyüopa ja, hangjingne I phei jamme Kahwang yenangma-a nange lingpu kahnyingwüngha füo aowe-o lingpu ye-oklak.” 3 Jesuwe Ite jan, “Üting tingha me Taowe nangte iphaning: I nishe yepuh ma-a, aowe-o Kahwang Ahngching ye-ngelak.” 4 Nicodemus Ite jan; “Lwngmei kahta ja hangke nishe puhlak? Inyu seate I nishe ongyange puhlak ikü a?” 5 Jesuwe janne i; “Üting tingha me taowe nangte ipha ning,” “Kahta ja yeng hüyange Yaha me yepuh pute Kahwang Ahngching te ongpu ye-oklak: 6 Hanghepa mei mepu puh hatüowa mei, hüyange hanghe yaha mepu puh hatüowa yaha. 7 Taowe nangte ipukhei she ya tahshan: ‘numan üshei nishe puhlak yang.’ 8 Iye ümeken me mong tüoken me wangyang leinang; nange tüopa mepu wüng jainang, hüyangpoi hatüo ümeken mepu pei yejema-a ümeken te tai nange yeshing. Tüokih-e aoyin Yaha me puh iman jingne hatüo kih ngohnang.” 9 Nicodemus Ite tong. “Hatüoyin hangke ngailak?” 10 Jesuwe Ite jan: “Nang Israel konnyüopa üyong ja, hüyangpoi nange tüoyin yeshing? 11 Üting tingha me Taowe nangte ipha ning: toman-e hanghepa jeng shing toman-e inang, hüyange toman-e hanghepa nge tüopa jeng saki phanang; hüyangpoi numan-e toman saki yeyah. 12 Taowe kahtoknyu jeng iwante nange üte üting yelak, hüma-a Taowe nangte wangdang jeng ima-a hangke ütinglak lak? 13 Hüyange Kahta Üha, ao wangdang mepu yu tüotokte kaiye ao-o wangdang te man ong.” 14 Phaonyu jongme hangke Mosawe shakphan yan pu yonge tam, tüokih-e Kahta Üha-o yonge tamlak yang, 15 tüopa kaiye aoyinne Ite ütinglak jintepu üyin Imepu tüolak. 16 Hangjingne Kahwange kahtoknyu te hüke kenpuwe aoyinne Ite ütinglak lakei yemahlak hüyangpoi jintepu üyin ngohlak jingne Iye yoi halom pha. 17 Hangjingne Kahwange Iha kahtoknyu ngaophünlak jingne yeje; hüpoi I toiye kahtoknyu yinlak jingne shon. 18 Aoyinne Iha te ütinglak yapeih ngao yephünlak; aoyinne üting yelakyapeih ngaophün yangki, hangjingne Iye Kahwang üha ja min me üting yelak. 19 Hatüokih ngaophünpu phanang: kahtoknyu te wangngai pei, hüyangpoi kahtalanne wangngai nanleiye wangnyak ken, hangjingne, iman-e ünu toilan ling. 20 Hüyange aoyinne ünu toi ling wangngai te nunang, hüyange wangngaite yepei külak, hangjingne Iye lingyangpu ünu toi Iye yehüohu. 21 Hüyangpoi aoyinne ütingpa toiling, wangngai te peinang, tüopa kaiye Kahwangte nyimmei hüowe I toi lingpu she hüonang.
Jesu Jengme John Phapu Saki
22 Tüophei me, Jesu hüyange I pinlan Judea kahtok te tai. Tüome I iman phei ngoh, hüyange baptitam. 23 Sha-a Johnne Salim phei o-pu Aenon chingme baptiye ngoh; hangjingne tüoyeme yeng wangmanne ngoh. Kahtalan I tangte maawe pei hüyange Iye imante baptitam. 24 Hatüowa John küpnok me angshao me ngohyangki. 25 Sha-a wanglam me jaopu jengme Jehudi hei John pinlan pa me mop ngai. 26 Tüokhei iman John tangte pei hüyange Ite i: “Konnyüopa, leihu! Jordan jayekao me nang phei ao ngoh, ao jingne saki pha, Iye baptinangki, hüyange kahta lili I tangte tai nangki.” 27 Johnne jan: “Kahwange Ite yepha pute kahta jawe hango tüone ye-ok.” 28 Tao Messiah yeje, hüyangpoi taowa I sheshao me shonpupa ngohnang. Tüopa numante taowe iyangki, hüyange numan ü-saki ngohnang. 29 Nyemnyanyu nokpupa-a nyemthepa ngohnang; nyemthepa shümpa yongnang hüyange jainang, hüyange aope Iye nyemthepa ngao wüng jaiyapeih I mongmei nang. Hatüo kih-e ümong meipu wangteki. 30 I sheyong she yonglak, hüyangpoi tao sheshoi she shoilak.
Ao Wangdang Mepu Yu
31 Ao ütangye mepu yu I üshei phei sheyongpupa; ao kahtok mepu pei kahtok jingne hüyange Iye kahtoknyu jeng inang. Ao wangdang mepu pei I üshei phei ütahpa. 32 Iye hanghe nge hüyange hanghe jai tüopa jeng saki pha nang, hüyangpoi aowe-o I saki yeyah. 33 Ao kahtawe I saki yahyapeih Iye Kahwang-a üting she shingteki. 34 Ao Kahwange shon, Kahwang ngaolan inang; hangjingne Kahwange Yaha hünghao tokyange yepha. 35 Ipawe Iha te ken, hüyange I yak me üshei phayangki. 36 Aoyinne Iha te ütinglak lakei jintepu üyin tüolak; aoyinne Iha ngao yejailakei aope-o üyin yetüolak hüyangpoi Kahwang mongshihpu I tangme jinte ngohlak.
Jesu Hüyange Samaria Sheko
1 Aope Jesuwe John phei shenyei she Iye baptitam-e hüyange pin omnang she Phariseelanne jaipu shing; 2 ütingpa me Jesu, Iye yeje; I pinlanne baptitam. 3 Aope Jesuwe tüopa jai, Iye Judea angyange Galilee te ye. 4 Sha-a I Samaria kaiye yelak ne ngoh. 5 Tüokhei Jacob-e Iha Joseph jingne phapu kahtok phei owe, Samaria me ngohpu Saikhar (Sychar) she minpu ching ja te I pei. 6 Jacob yengnung tüome ngoh, hüyange lamme kemwante nyaiteiye peiye Jesu tüome shot. Hüwante penme ni paji nanjing ngoh. 7 Hüwante Samaria sheko ja yengshao ne pei, hüyange Jesuwe yha te i, “Üte yinglak yeng yahkhu.” 8 Hangjingne I pinlan chingnyu te hahying shaklak jingne ongteiye ngoh. 9 Samaria shekonyu Ite janne i, “Nanga Jehudi hüyange taowa Samaria ja, hangke nange üte yinglak yeng tongpu shi?” (Hangjingne Jehudilanne aope-o Samarialan jonpu wan hei shengme yejon.) 10 Jesuwe yha te janne i, “Nange Kahwang hünghao shingshih ma-a, hüyange ‘Üte yinglak yeng yahkei,’ she nangte aowe iyapeih shingshihma-a, nange Ite tonghah shepu hüyange Iye nangte üyin yeng phahah shepu.” 11 Shekonyuwe i, “Üyongpa, nangme yengshaolak hango yenang hüyange yengnung lunang. Nange ümeken mepu üyin yeng tüolak shi? 12 Nang toman üpa Jacob, aowe tomante yengnung pha, hüyange Iye-o tüopa mepu ying, hüyange I hayim hei I yinmoklan ne ying, I phei sheyongpu a?” 13 Jesuwe yhate janne i, “Aowe tüopa yeng mepu yinglakei nishe yenglelak; 14 hüyangpoi aowe Taowe Ite phapu yeng yinglakei nishe yelelak. Hangjingne Taowe Ite phalak yeng Ime üyin yenglok ne menglak, hüyange Ite jintepu üyin phalak.” 15 Shekonyuwe Ite i, “Üyongpa, hatüo yeng üte yahkei; tüome nakshih tao aope-o yelelak, yejema-a tüopa mepu yengshao ne yepeilak.” 16 Jesuwe yha te i, “Taitüoh nang netanpa te nyik kei, hüyange tüome yekei.” 17 Shekonyuwe jan, “Taowe netanpa yenang.” Jesuwe yha te i: “Netanpa yenang she, nange ipu shunang. 18 Hangjingne nang netanlan nga phei ngoh, hüyange sha-a nang ao phei ngoh I nangjing ütingpa netanpa yeje. Tüopa me nange üte üting iyangki.” 19 Shekonyuwe Ite i, “Üyongpa, taowe nanga hipa ja she ngenang.” 20 “Toman Samaria puyimlanne tüopa kahtang me Kahwang te khüm, hüyangpoi kahtalanne Kahwang te khümlak nyoi Jerusalem üja she nange inang.” 21 Jesuwe yhate i: “Shekonyu, üte ütinglak yah, numan-e üpate tüopa kahtangme jeyah, Jerusalem me jeyah yekhümlak hipak ja peikülak. 22 Numan-e hangheyeih, yeshingpu ja te khümnang; toman-e hanghe shing tüopate toman-e khümnang, hangjingne yinyepupa-a Jehudilan mepu ngohnang. 23 Hüyangpoi hipak ja peiküki, hüyange hatüowa sha-a ngohnang, aope ütingme khümpa lanne üpate yaha me hüyange ütingpa me khümlakei, ütingpa khümpalanne mengetamlak jingne üpawe hükihpu kahtalan yamnang. 24 Kahwang-a Yaha, hüyange aoyinne Ite khümlakei yaha me hüyange ütingpa me khümlak yang.” 25 Shekonyuwe Ite i, “Khrista she nyikpu, Messiah peilak taowe shingnang. Aope I peilakeih Iye tomante khongkümpu iphalak!” 26 Jesuwe yhate janne i, “Tao, aowe nangphei ngaonang, Tao I ngohnang.”
Pinlan Jesu Tangte Leihye
27 Hüwante Jesu pinlan ye-e ngoi; hüyange I sheko ja phei ngaowe ngohpu ngeye iman yeonge yashan. Hüyangpoi iman yo me aowe-o yha te “Nange hanghe yampu?” she yengao; yejema-a “Yha phei nang hangne ngaoki?” she Ite yetong. 28 Tüophei me shekonyuwe yengtük tüohyange chingte ong, hüyange tüome ngohpu kahtalante i, 29 “Kei, hüyange kahta te leitüoh, taowe linge peiyangpu lili üte ngaoyangki. I Messiah ne mengyalak shi?” 30 Tüophei me iman-e ching tüohyange Jesu tangte pei. 31 Tüopa hipak me pinlanne Jesute tonge i, “Rabbi, (Konnyüopa) ülamja hahyah.” 32 Hüyangpoi Iye jan, “Numan-e yeshingpu hahlak ja taowe tüowe ngohnang.” 33 Pinlanne iman pa me teingaowe i, “Ütamme Ite hahlak peitüoh pu a?” 34 Jesuwe imante i, “Ü-hahyinga Tao aowe shonyapeih I toi linglak hüyange Iye üte phapu toishao sholak ngohnang.” 35 “Lekeng peli ngohnang, hüyange ‘tahyahlak hipak’ peikülak she numan-e ye-i a? Taowe numante inang, kahte leiyah; iman yahlak ne nyinteki! 36 Kahta aowe tahyah nang Ite nanmee phanang hüyange ülicklan jintepu üyin jingne shai jemnang; tüokhei ao kahtawe dei hüyange aowe tah yah imni moini jamshe mongmeilak. 37 Hangjingne jawe dei hüyange jawe yah she ipu ütingme ngainang. 38 Numan-e ümeken me yeham tüome tah yahlak jingne numan shonnang; ülao lanne hamyangki, hüyange iman-e hampu me numan jamnang.”
Samarialan Maawe Ütinglak
39 Tüopa chingme ngohpu Samarialan maawe Jesute ütinglak, hangjingne “Taowe hanghe linge pei khongkümpu Iye üte i,” she shekonyuwe ngao. 40 Tüokhei aope Samarialan peiye iman phei jamme ngohkei she Ite tong; tüoken me Jesu nyih ni nyoi. 41 I ngao kaiye kahtalan maawe ütinglak-e meng, 42 hüyange iman-e shekonyu te i, “Sha-a toman-e ütinglak nangki; hüyangpoi nange ipu jingne shaha yeje, hüyangpoi toman-e I mepu jaiteki, hüyange I-a kahtoknyu Yinyetampa she toman-e shing.”
Jesuwe Üyongpa Üha Meitam
43 Nyih ni ngohyange tüomepu Jesu Galilee te tai. 44 Hangjingne Jesu Iye muh iyangki, “Hipa ja yoi chingshao kahtalanne yeyah.” 45 Aope I Galilee ngoi tüome ngohpu kahtalanne I yah, hangjingne Yinyepu Mo jingne Jerusalem te iman ong hüyange mo hipak me Iye hangyin toiling iman-e nge. 46 Tüophei me Galilee mepu Kana, ümeken me Iye yeng-a wuwüngti ne ling tüo nyoite Jesu leihye; Kapernaum me Iha dakpu sokali shaoshanpa üyong ja tüome ngoh. 47 Aope Iye Judea mepu Galilee te Jesu peiteki she jai, I tangte I wen hüyange Kapernaum te taiye Iha ao pali she dak-e ngoh meitamlak jingne Ite tong. 48 Tüokhei Jesuwe Ite i, “Numan-e füo hüyange kahnyingwüngha mannge mannge numan aowe-o üting yelak lak.” 49 Üyongpawe jan, “Üyongpa, üha manlipe ü-phei laihah kei.” 50 Jesuwe Ite i, “Taitüoh, nangha üyin me ngohlak!” Tüopa kahtawe Jesuwe Ite ngaotampu ngaote ütinglak hüyange tai. 51 I nok manngoipe lamme ngohwante I shaoshanpalan ngaolan phei lamme hüo, hüyange Ite i, “Nang ha üyin me ngohnang!” 52 Iye imante tong hangke ting phei shuwe I ha-a meine wangpu, “Menyih nyihning ja paji me I dak mepu phünpu üja she, iman-e i,” 53 Tüophei me Ipawe “Nangha üyin me ngohlak,” she Jesuwe Ite ipu hipak yang she shinge pei. Tüophei me I hüyange Inok üshei ütinglak. 54 Hatüowa Judea mepu Galilee te Jesu pei pheime lingpu nishepupa kahnyingwüngha füo ne ngohyangki.
Bethesda Me Meitampu
1 Tüophei me, Jehudilan mo ja ngoh, hüyange Jesu Jerusalem te ong. 2 Jerusalem me Nyee Peten ü-o me Hebrew ngaome Beth-za-tha she nyikpu yeng-i ja panha nga pheipu ngoh. 3 Tüopa panha me mükmüopa, yafaipa, hüyange yimtin dakpu mokye-okpu kahtalan maawe peiye ngoh. (Iman yeng popu tanne ngohyangki; 4 hangjingne sha-a sha-a Kahwang shongmokpa yeng-i te yu hüyange yengte wuk. Ja jakihpu dak ne jeyapoi, yeng wukke potam wante aome shonge yengte yuwe jonlakei mei okke ngohyangki.) 5 Tüome wangpeng delüm me tet dakpu kahta ja ngoh. 6 Aope Jesuwe I lamyange nge, hüyange tüopa kahta hipak laowe dakyangki she Iye shing; tüokhei Iye Ite i, “Nang meihu nangkü a?” 7 Dakpawe jan, “Üyongpa, aope yeng polakei hüwante tao laitamlak tüome ao-o yenang; aope tao laine yonglakei, kahta ütam üwangne yuteiye shaha ngohnangki.” 8 Jesuwe Ite i, “Yongtüoh, nang leng yayah, hüyange kemtüoh.” 9 Hüwante muh tüopa kahta mei; Iye yoi shinleng aam yah, hüyange kem. Tüopa nyih Sabbath ne ngoh, 10 tüokhei Jehudilanne tüopa kahta te aowe meitam ei she tong, “Hatüowa Sabbath, hüyange nang shinleng aam paiyange kempu kaiye toman Ngaokeng mengnang.” 11 Iye jan, “Aope kahtawe tao meiye tam Iye üte i, nang leng paiyah hüyange kemtüoh.” 12 Iman-e Ite tong, “Aowe nangte lengpaiyah hüyange kemtüoh she i, tüopa kahta ao shi?” 13 Hüyangpoi tüopa kahtawe aowe meiye tam yeshing, hangjingne tüopa me kahta üngang ngohpu nanjingne Jesu pitte taimah. 14 Tüophei me, Jesuwe I khümjing me nge hüyange i, “Leihu, sha-a nang meiteki. Ünu shaaji tahling; yejema-a shemengpu nangte ngaine ok.” 15 Tüophei me tüopa kahta tai hüyange I meiye tampuwa Jesu üja she Jehudilan te i.
Ha Kaiye Üyin
16 Tüopa jingne Jehudilanne Jesu shange tamne wang, hangjingne tüopa meitampu toi Iye Sabbath me ling. 17 Hüpoi Jesuwe imante janne i, “Üpawe nyihjeih toi lingnang, hüyange Taowe-o linglak wongpong.” 18 Tüopa ngao ipu kaiye ünyei ne Jehudilan ne I toihuwe teih; hangjingne Iye Sabbath shaha mengpu ne yeje, hüyangpoi I nying nyingke Kahwang phei ja ne menge Kahwang-a Ipa üja she i. 19 Tüokhei Jesuwe imante janne i, “Üting tingha me Taowe numante ipha ning: Ühawe Iye mongpu toi hango yeling; Ipawe hanghe linge nge tüo hei Iye lingnang, Ipawe hanghe ling, Ihawe tüo lingnang. 20 Hangjingne Üpawe Üha te kennang hüyange Iye hangyin ling üshei hüonang. Iye Ite tüophei sheyongpu toi linglak hüolak. 21 Hangjingne Üpawe lipulan yange yetam hüyange imante üyin pha, tüokih-e Üha-o aoyinte Iye mongyapeih üyin phanang. 22 Üpawe ao te-o ngao yephün, hüyangpoi ngaophün lak wong khongkümpu Iye Üha te phayangki. 23 Hümme nakshih Üpate wangshüm hüopu kih Ha te-o kahta üsheiye wangshüm hüolak. Aoyinne Ühate ye-i-yeshe, I shonpu Üpate ye-i-yeshe. 24 “Üting tingha me Taowe numante iphaning: Aoyinne ü-ngao jai, hüyange Tao shonpupa te ütinglak, jintepu üyin tüolak. Ite ngaophünpu yengohlak, hüyangpoi lipu mepu üyin chingte taiteki. 25 Üting tingha me taowe numante iphaning: hipak peiküki, hüyange hatüowa sha-a ngohnang; aope lipulanne Kahwang Üha ngaowüng jailakei, hüyange aoyinne tüopa jai üyin ngohlak. 26 Hangkih-e Üpa Ime üyin ngoh, hatüokih Iye yoiha me üyin ngohlak pha. 27 Hüyange Iha te ngaophünlak wong pha, hangjingne I-a Kahta Üha. 28 Hatüo ngaote yatahshan: hangjingne liye mangkoksa me ngohpu üsheiye I ngao jailak hipak peiküki; 29 hüyange iman üshei mangkoksa mepu ngailak; aoyinne ümei lingyangki yange yelak hüyange üyin ngohlak, hüyangpoi aoyinne ümeng lingyangki yange yelak hüyange ngaophün lak.” 30 “Taowe ü-wonge hango yeling, Taowe hangke jai, Taowe hüke ngaophün nang; hüyange Taowe phünpu ngao shunang, hangjingne Taowe hanghe mong, linglak jingne Tao ye-ngang, hüpoi aowe Tao shon Iye mongpu ling.
Jesu Sakilan
31 “Taowe üjing saki phama-a, ü-saki üting yeje. 32 Hüyangpoi üjingne saki phapu ütam ngohnang, hüyange Taowe shingnang Iye hanghe üjingne saki pha üting ngohnang. 33 Numan-e John tangte shon, hüyange Iye ütingpa jingne saki pha. 34 Hanghe saki Taowe phanang hatüo kahta mepu ne yemeng; hüyangpoi numan yinyelak jingne Taowe hatüolan ngao inang. 35 John I vüntük jakih tee; hüyange loonge ngoh, hüyange üten japu jingne I vüntee me numan mongmei. 36 Hüyangpoi üme ngohpu saki John jing phei sheyong, hangjingne Üpawe hanghe toi lingkümlak üte pha, hüyange hangyin toi Taowe lingnang, tüolanne Üpawe, Tao shon she üjeng saki phanang. 37 Hüyange Üpa aowe, Tao shon, Iye üjing saki phayangki. Numan-e hangkih tingmo I ngao yejai, numan-e aope-o I sheta mannge; 38 tüokhei numan me I ngao yenang, hangjingne Iye ao shon, numan-e Ite üting yelak. 39 Numan-e laingao yam hangjingne iman me jintepu üyin tüolak she numan-e teih. Hüyange tüolan laingaowe ü-jeng ngaonang! 40 Tüoyangpoi numan üyin tüolak jingne ü tangte peilak yemong. 41 “Taowe kahtalan mepu minyong pute yelei. 42 Hüyangpoi Taowe numan shingnang; Taowe shingnang numan mongjang me Kahwang te kenpu yenang. 43 Tao Üpa min me pei, hüyangpoi numan-e Tao yeyah; hüyange aope ülao jawe yoi min me peilakeih, numan-e I yahlak. 44 Aope numan-e eiha mepu minyong phapu teileng, hüyange Kahwang mepu peipu minyongpu yamne ye-ngang, hümma-a numan hangke ütinglak lak? 45 Üpa sheshao me Taowe numante ümeng phalak she tahteih; numante ümeng phapa ja ngohnang tüowa Mosa aote numan-e yoi monghümpu ang. 46 Numan-e ütingme Mosa te ütinglakpu ngoh shihma-a, numan-e üte ütinglak hahshepu, hangjingne Iye ü-jeng nyan. 47 Hüyangpoi Iye hanghe nyan tüote numan üting yelakpute, numan-e ü-ngao hangke ütinglak lak?”
Jesuwe Haja Nga Uh
1 Tüophei me Galilee yengching jayekao te Jesu tai, tüopa-a Tiberia yengching; 2 hüyange ükhong üngang I pheite woi, hangjingne kahnyingwüngha füo dakpalan tang me Iye lingpu iman-e nge. 3 Hüwante Jesu kahtang yete ong, hüyange I pinlan phei tüome shot. 4 Sha-a Jehudilan Yinyepu Mo oteiye ngoh. 5 Aope Jesuwe nganne lei hüyange ükhong üyong I tangte peipu nge, Iye Philip te i, “Tüolan kahta khongkümpu uhlak jingne teman-e ümeken mepu hahying shaklak?” 6 Philip te toklak jingne Iye tüopa ngao i; hangjingne Iye hanghe linglak yoi nying nyingke shing. 7 Philip-e Ite jan, “Tüolan khongkümpuwe üjing jingha hahlak jingne nehoi, ngin gho ni phei nyeiye phapu an ne nehoi yewanglak yang.” 8 Pinlan yome ja, Simon Peter ünao Andrew-e Ite hüke i: 9 “Tüome naha ja ngoh nangki hüyange I yak me nükmei an ükhüo nga hüyange nyah ni ngoh nangki. Hüyangpoi teshinpu kahtalan jingne tüolan hangne menglak?” 10 Jesuwe i, “Kahtalan shotne tamtüoh.” Tüome hüng maawe ngoh. Tüokhei kahta üshei shot; kahta haja nga nanjing ngohyangki. 11 Jesuwe an jon, Kahwang te minyong pha, hüyange shotte ngohpu kahtalante tam. Hüyange Iye nyah jingne-o hüke muh ling, hüyange iman üsheiye moh hah. 12 Aope iman üshei hahmoh, Iye yoi pinlante i, “Ükhoih ünyai topu khongküm shaitüoh; teman-e yeshailak yang.” 13 Tüokhei khongkümpu shaijem, hüyange an khüo nga mepu iman-e hahyange topu muhto penme ni maa ngoh. 14 Tüome ngohpu kahtalanne, tüopa Jesuwe lingpu kahnyingwüngha füo ngeye i, “Ütingme kahtoknyu te peilak she iye ngohpu hipa-a hatüo!” 15 I pho ne hüyange kange ahngne mengtamlak jingne iman peine ngohpu Jesuwe shing; tüokhei I nying nyingke nishe kahtang yete onge mah.
Jesu Yengtangme Kem
16 Aope ün ngoi, I pinlan yengching te tai, 17 Lisheng ja me ong, hüyange yengching kaiye Kapernaum yete tai. Wangnyak, hüyangpoi iman tangte Jesu yepei. 18 Hüwante wangyang üyong lei hüyange yengching po. 19 Aope pinlanne mile lüm yejema-a peli lisheng yeih phei me, iman-e yengching nahme Jesu kemme nge hüyange lisheng phei owe pei. Iman nyam. 20 Hüpoi Jesuwe imante i, “Tahnyam,” “Hatüowa Tao!” 21 Iman-e I lisheng me inhuwe teih, hüyangpoi iman-e ngoi lak she teihpu kahtok nyoi mamshe ngoi.
Kahtalanne Jesu Yam
22 Üne nyih yengching jaye kaome ngohpu ükhonge tüoye me lisheng ja shaha ngohpu nge. Jesu ye-ompe I pinlan shaha lisheng me taipu she iman-e shing. 23 Youngwanpawe minyong pha phei me iman-e ümeken me anhah tüopa nyoi me Tiberia mepu ülao lishenglan pei. 24 Aope Jesu yejema-a I pinlan lisheng me yenangpu ükhonge shing, iman lisheng te ong hüyange I yamme Kapernaumte tai.
Jesu Üyin Hahying
25 Aope kahtalanne yengching janye me Jesu tüo iman-e Ite i, “Rabbi (Konnyüopa) tüome nang aope pei ei?” 26 Jesuwe imante jan: “Üting tingha me Taowe numante iphaning: numan-e Tao yampuwa kahnyingwüngha füo ngeyange yampu yeje, hüpoi numan-e an moh hah-wangyange yamnang. 27 Meng tailak hahying jingne toi tahling; hüyangpoi jintepu üyin jingne ngohlak hahying jingne toi lingtüoh. Tüopa hahying Kahta Ühawe numante yahphalak, hangjingne Ime Ipa Kahwange yoi füosang phayangki.” 28 Tüophei me iman-e Ite tong, “Kahwang toi linglak jingne toman-e hangke linglak shi?” 29 Jesuwe jan, “Kahwange numante lingne tamhupu toi hatüo: Iye shonpupate üting lakyah.” 30 Iman-e jan: “Toman-e ngeyange ütinglak lak jingne nange hanghe kahnyingwüngha füo tomante hüolak?” Nange hanghe toi linge hüolak? 31 Toman puyimlanne wanwüng jengme manna hah, laingaowe hüke ipukih: “Iye imante hahlak jingne wangmepu an pha.” 32 Hüwante Jesuwe imante i, “Üting tingha me Taowe numante ipha ning.” “Aowe numante wang mepu hahying pha tüopa-a Mosa ne yeje; hüyangpoi Üpawe numante ütingpa hahying wang mepu phanang. 33 Hangjingne Kahwang hahyinga ao wangmepu yu hüyange kahtoknyu te üyin pha tüopa ngohnang.” 34 Iman-e Ite tong, “Üyongpa, tüopa hahying tomante nyihjeih yahkei.” 35 Jesuwe imante i, “Tao üyin hahying,” “Ao ü-tangte pei I aope-o sea yenyaolak; hüyange aowe üte ütinglak lakei aope-o yeng yelelak.” 36 Sha-a Taowe numante inang, numan-e Tao ngeyangki hüyangpoi üting yelak. 37 Üpawe üte phayangpu üshei ü-tangte peinang. Ü-tangte aoyin pei Taowe jange yeteilak; 38 hangjingne aowe Tao shon Iye mongpu linglak jingne Tao wangdang mepu yu, Taowe mongpu lingne yeje. 39 Tao shonpupawe üte lingne tamhupu hatüo: Iye phayangpu ja nehoi Taowe yemahlak, hüpoi üküm nyih me üshei yinne yene tamlak. 40 Hangjingne Üpawe mongpu hatüo: aoyinne Üha ngeyangki hüyange Iye ütinglak üsheiye jintepu üyin tüolak; hüyange üküm nyih me Taowe iman yange yene tamlak. 41 Jehudilanne mongponge I jingne ngaone wang, hangjingne Iye i, “Tao wangmepu yupu üyin hahying.” 42 Tüokhei iman-e i: “Hatüowa Joseph üha Jesu yeje a? Inyu Ipa teman-e shingnang. Hümma-a, sha-a I wangmepu yupuweih she hangke ngaopu shi?” 43 Jesuwe imante jan, “Numan pa me mongponge tahngoh. 44 Tao shonpu Üpawe ü-tangte peine yetampute ao-o ü-tangte peipu ye-ok; hüyange üküm nyih me Taowe I yange yetamlak. 45 Hipalanne hüke nyan, ‘Kahwange kahta üshei te nyüotamlak.’ Kahta aoyinne Üpa ngao jai hüyange I mepu shing üshei ü-tangte peinang. 46 Tüokhei she ütamme Üpa ngeyangpune yeje; ao Kahwang mepu pei I ja shinge Üpa ngeyangki. 47 “Üting tingha me Taowe numante iphaning: aowe ütinglak nang I jintepu üyin ngohnang. 48 Taowa tüopa üyin hahying. 49 Numan puyimlan ne phaonyu jongme manna hah, hüpoi iman li. 50 Hüyangpoi hanghepa hahying wangmepu yu aowe hah, yelilak. 51 Tao wangmepu peipu üyin hahying. Kahta ütamme tüopa hahying hahma-a I jintepu üyin ngohlak. Hüyange Taowe Ite phalak hahyinga ü-mei, Taowe hatüo kahtoknyu üyin jingne pha.” 52 Hüwante Jehudilan yo me yeonge shemme teingaone hüke wang: “Hatüo kahtawe temante I mei hahne hangke phalak?” 53 Tüokhei Jesuwe imante i. “Üting tingha me Taowe numante iphaning: Numan-e Kahta Üha mei yehahma-a hüyange I iy yingma-a numan nying nyingke numan me üyin yenang. 54 Aowe ü-mei hah hüyange ü-iy yinglakei jintepu üyin ngohnang, hüyange üküm nyih me Taowe I yange yene tamlak. 55 Hangjingne ü-meiya ütingpa hahying, ü-iy yinglakpa üting. 56 Aowe ümei hahnang hüyange ü-iy ying ü-phei ngohnang hüyange Tao I me ngohnang. 57 Üyin ngohpu Üpawe Tao shon, hüyange I kaiye Tao üyin ngoh nang. Hatüo kih-e, aowe Tao hah lakei Tao kaiye üyin ngohlak. 58 Hatüowa wangdang mepu peipu hahying ngohnang; numan puyimlanne hahyange lipu kihpu hahying yeje. Aowe hatüo hahying hahlakei jinte üyin ngohlak.” 59 Jesuwe hatüowa Kapernaum mepu synagogue me nyüowante i.
Jintepu Üyin Ngao
60 I pinlan maawe tüopa jai hüyange i, “Hatüo nyüopuwa jamloi wannangki. Aowe tüopate jailak shi?” 61 I pinlan mongpongpu Jesuwe shing; tüokhei Iye imante i; “Hatüowa numan-e angtam hupu a? 62 Hümma-a numan-e Kahta Üha I üshongwante ngohpu nyoite onge ngema-a, hangke sheilak? 63 Üyin phapuwa Yaha ngohnang; meiye hangheme-o yejam. Taowe numante hanghe ngao ngaoyangki Yaha hüyange üyin ngao ngohnang. 64 Hüyangpoi numan ütamme üting yelak.” Hangjingne aowe üting yelak hüyange aowe I lowe tamlak, Jesuwe üwang memuh shing. 65 Hüyange Iye hüke muh i, “Tüokhei Üpawe Ite yehüo küma-a aowe-o ü-tangte peine ye-ok she Taowe numante iyangki.” 66 Tüophei me, I pinlan maawe lüppe ye hüyange shaaji I phei yekem. 67 Tüokhei Jesuwe pinlan penme ni te i, “Numan-o taihunang kü a?” 68 Simon Peterwe Ite jan: “Youngwanpa, ao tangte toman tailak? Nang me jintepu üyin ngao ngohnang. 69 Hüyange sha-a nang Kahwang mepu üjaopa she toman-e ütinglak nang.” 70 Jesuwe imante janne i, “Taowe numan penme ni lepu ne yeje a? Hüyangpoi numan yo me ja kahshih ngohnang!” 71 Iye Simon Iskariot üha, Judas jeng ngaoyangki. Hangjingne Judas penme ni yo me ja ne I ngohyah poi, I lowe tamlak.
Jesu Hüyange Inaolan
1 Tüophei me, Jesu Galilee yekaote kem; I Judea me yekemhu, hangjingne I toihupu Jehudilan tüome ngoh. 2 Sha-a Jehudilan panha mo oteiye ngoh. 3 Tüokhei Inaolanne Ite i: “Tüopa nyoi tüohyange Judea te taitüoh, hüyange nang pinlanne nange lingpu toi ngelak. 4 Hangjingne Iye lingpu shingne tamhuküma-a aowe-o lowe yeling. Nange tüolan toi lingpu ne mengma-a; kahtoknyu khongkümpu te tüolan nge ne tamtüoh!” 5 Hangjingne Inaolanne nehoi Ite üting yelak. 6 Jesuwe imante i, “Ü-hipak manngoi, hüyangpoi numan hipak jinte ngohnang. 7 Kahtoknyuwe numante yekhahlak, hüyangpoi üte khahnang, hangjingne tüolan toi ünu üja she tüopa jingne Taowe saki pha. 8 Numan mo te ongtüoh. Tao tüopa mo te min ong; hangjingne ü-hipak wangngoi-e manpei.” 9 Imante Iye tüopa ngao i, hüyange Galilee me ngoh.
Panha Mo Me Jesu
10 Hüyangpoi Inaolan mo te ong te phei me Jesu-o ong. Tüoyangpoi ütahte ngaiye ye-ong, lowe ongyangki. 11 Mo me Jehudilanne I yam. Iman-e i, “I üpu?” 12 Ükhong yo me I jingne yeonge mongpongpu ngoh, kahta ütam-e i, “I kahta ümei üja,” ütam-e i, “Yejeja, Iye kahtalan ünyong yete woinang ja she i.” 13 Hüyangpoi I jeng ütahte ngaiye aowe-o yengao ok, hangjingne iman Jehudilan te nyam. 14 Mo üwo nanjing hipak me Jesu khümjing te ong hüyange konnyüo ne wang. 15 Jehudilan yeonge yashan hüyange i, “Iye nyüopu yenangpeta, tüo kahtawe teshinne hangke shingpu shi?” 16 Tüokhei Jesuwe imante jan, “Taowe hanghe nyüo, üjing yeje, hüyangpoi tao aowe shon I mepu. 17 Kahta ütam-e Iye mongpu linghuküma-a, hatüowa Kahwang mepu heiya, yejema-a taowe ü-nying nyingke ngaopu tüopa nyüopu jeng Iye shinglak. 18 I aowe yoi wong okpu me ngao, Iye yoi müktishiwa yamnang; hüyangpoi aowe I shonpupa müktishiwa yamyapeih tüopa-a üting; Ime ütingpa yejepu hango yenang. 19 Mosawe numante ngaokeng yepha a? Phayapoi numan aowe-o ngaokeng yejon. Numan-e Tao toine hangne yamnangki?” 20 Ükhonge janne i, “Nang me laa ngohnangki! Aowe nang toine yampu?” 21 Jesuwe imante jan: “Taowe kahnyingwüngha ja ling hüyange numan üshei yashan. 22 Mosawe numante shokhüplak pha, tüoyangpoi Mosawe yeje numan puyimlanne ükong wang, hüyange numan-e Sabbath me shokhüp. 23 Naha ja Sabbath me shokhüppu kaiye Mosa Ngaokeng yemengpune mengma-a, Taowe Sabbath me kahta ja lanshe meiye tampu jingne numan-e üte hangne mongmengpu? 24 Ütah me leiyange numan-e ngao tahphün, hüyangpoi ütingpa me ngao phüntüoh.”
I Messiah Jeya?
25 Tüokhei Jerusalem mepu kahta ütam-e hüke i: “Iman-e toine yampu kahta tüo yejepu a? 26 Hüyange leihu, hatüome Iye yelope ngao nangki, hüyange iman-e Ite hango ye-i: woipa lanne ütingme Iya Messiah she shingyapushi? 27 Hüyange aope Messiah peilakeih, I ü-mepu aowe-o yeshinglak; hüyangpoi tüopa kahta ümeken mepu pei teman üsheiye shingnang.” 28 Tüokhei Jesuwe khümjing me nyüowante Iye üngwünne i; “Tao ümeken mepu pei, numan-e ütingme shingya? Tüoyangpoi Tao ü-nying nyingke peipu ne yeje. Aowe Tao shon, I ütingpa hüpoi numan-e I yeshing, 29 hüpoi Taowe I shingnang; hangjingne Tao I mepu pei hüyange Iye Tao shon.” 30 Tüophei me iman-e I phone ngang; hüyangpoi aowe-o Ite yak yeyu ok, hangjingne I hipak manngoipe ngoh. 31 Hüyangpoi ükhong yomepu maawe Ite ütinglak, hüyange i, “Aope Messiah peilakeih, tüopa kahtawe lingpu shinne kahnyingwüngha füo lingyalak?”
Yompalan Jesu Phone Tei
32 I jeng iye ükhong mongpongpu Phariseelanne jai, tüokhei iman hüyange ngengpa üjenglanne khümjing yompalan ütam Jesu pho ne shonne tei. 33 Jesuwe i: “Tao numan phei hipak tenha ja laowe ngohlak, tüophei me aowe Tao shon I tangte Tao tailak. 34 Numan-e Tao yamlak, hüyangpoi numan-e Tao ye-ngelak, hangjingne Tao ümeken me ngohlakei numan yepei oklak.” 35 Jehudilanne iman yo me hüke teingaowe i: “Teman-e ye-nge oklakne I ümeken me tailak ipu shi? I Greek chingnyulan me taiye Greeklan ngohjing me nyüo ne ipu a? 36 Numan-e yamlak hüyangpoi Tao ye-ngelak, hüyange Tao ümeken me ngohlakei, tüokente numan yepei oklak she Iye ipuwa hanghe te leppu?”
Üyin Yenglok
37 Mo üküm nyih, nyih üyong me Jesu yongyange hüke i: “Aowe yengle nang I ü-tangte peiye yingtam tüoh. 38 Ngaolaiye ipuke, ‘Aowe üte ütinglak lakei üyin yengyin yenglok I mongjang mepu yinlak.’ ” 39 Iye hatüowa Yaha jeng ngaoyangki, aoyinne Ite ütinglak iman-e tüolak, hangjingne hüwante yaha üne-o manpha, hangjingne Jesu üne-o müktishiwa ne mantam.
Kahta Yome Teitampu
40 Aope ükhong yo mepu kahta lanne tüopa ngao jai, ütam-e iyangki, “Hatüo kahta ütingme Hipa yang!” 41 Ülao lanne i, “Iya Messiah yang!” Hüyangpoi ülaolanne i, “Messiah Galilee mepu peilak ne yeje! 42 Ngaolai me Messiah David nokli mepu, hüyange David ngohpu Bethlehem mepu peilak she ye-i a?” 43 Tüokhei I jingne ükhong yo me tampu ngai; 44 Ütam jawe I pho huwe teih, hüyangpoi aowe-o Ite yak yeyu ok.
Üting Yelakpu Jehudi Woipalan
45 Ngengpa üjenglan hüyange Phariseelan tangte khümjing yompalan leihye, aoyinne imante tong, “Hangne numan phei jamme I phowe yepei ei?” 46 Yompalan ne jan, “Tüopa kahtawe ngaopu kih aowe-o manngao ja!” 47 Phariseelanne imante tong, “Numan-o ünyong yete woitampu a?” 48 “Woipalan yejema-a Phariseelan ütam Ite ütinglakpu ngaipu numan-e shingya shi? 49 Hüyangpoi tüolan ükhonge Mosa Ngaokeng yeshing, tüokhei Kahwang mepu phoipu ngohnang!” 50 Nicodemus, iman yo me ja ao üshongpe Jesu I tangte pei, imante hüke i: 51 “Kahta ja, I mepu manjai hüyange Iye hanghe ling man yampute teman Ngaokeng me ngao phünpu ngohlak a?” 52 Iman-e jan, “Nango Galilee mepu a? Ngaolai me yamtehu hüyange Galilee mepu hipa aope-o yengai she nange shinglak.” 53 Tüophei me iman yoi yoi nok te ye.
Phwngngampu Sheko Ja Phopu
1 Hüyangpoi Jesu Olive Kahtang te tai. 2 Napning shomme I khümjing te leihye. Kahta üngang I neikonne jem, hüyange I shot hüyange imante nyüone wang. 3 Ngaokeng nyüopalan hüyange Phariseelanne phwngngampu linge ngohwante phopu sheko ja woipei, hüyange iman üshei sheshao me yongne tam. 4 Iman-e Jesute i, “Konnyüopa,” “Hatüo sheko phwngngampu toi linge ngohwante pho. 5 Mosa phapu ngaokeng me hükihpu sheko-a longe shüppe toilak she ngohnang. Sha-a nange hangke ilakshi?” 6 Iye püokülak hüyange pholak she teihyange iman-e Ite tokke hatüo ngao iyangki. Hüyangpoi Jesu khuhta hüyange I yaklanne kahtok te nyan. 7 Iman-e yelakpe Ite ngao tonge yonge ngoh, Iye nganne lei hüyange imante i, “Numan yo me aome ünu yenang Iye tüopa shekote üwangne long shüppe wangtüoh.” 8 Nishe I khuhta hüyange kahtok te nyan. 9 Aope iman-e tüopa ngao jai, jeiyongpa me wange ja phei me ja she taiye küm. Shekonyu yha yongjing me, hüyange Jesu shaha tüoh. 10 I nganne lei hüyange yha te i, “Iman-a üpu, sheko? Sheja nehoi nangte yeyao yeli a?” 11 Yha jan, “Üyongpa, ja nehoi yenang,” Jesuwe i, “Hüma-a Taowe-o nang min yao minle. Taitüoh, shaaji ünu tahling.”
Jesu Kahtoknyu Wangngai
12 Jesuwe üne-o imante i: “Tao kahtoknyu wangngai. Ao ü-pheite woilakei wangnyak me aope-o yekemlak, hüyangpoi üyin wangngai tüolak.” 13 Phariseelanne Ite i, “Nange nang jingne saki phanangki; nang saki üting yeje.” 14 Jesuwe imante i, “Üjingne Taowe saki phayapoi, ü saki üting, hangjingne Tao ümeken mepu pei hüyange Tao ümeken te tailak Taowe shingnang; hüyangpoi Tao ümeken mepu pei yejema-a ümekente tailak numan-e yeshing. 15 Numan-e meiye mongpu kih ngao phünnang, Taowe ao ngao-o yephün. 16 Hüyangpoi Taowe ngaophün küma-a ütingme phünlak, hangjingne tüome ü-shaha yeje; Tao shonpupa Üpa ü-phei ngohnang. 17 Numan ngaokeng me hatüo nyanne ngohnang, aope kahta niye saki phalakei, iman-e hanghe I tüopa-a üting. 18 Taowe üjingne saki phanang, hüyange Üpa aowe Tao shon Iye üjingne saki phanang.” 19 Iman-e Ite tong, hüma-a “Nangpa ümeken me ngohnangki?” Jesuwe janne i, “Numan-e Üpa jeyah Tao jeyah yeshing;” “Numan-e Tao shingma-a, numan-e Üpa-o shinglak.” 20 Jesuwe tüoyin ngao, ngin angjing khümjing me ngao. Hüyange aowe-o I yepho, hangjingne I hipak manngoipe ngoh.
I Lilak Jesuwe Ngaotam
21 Jesuwe üne-o imante nishe i, “Tao taimahlak; numan-e Tao yamlak, hüyangpoi numan ünu me numan lilak. Tao ümekente tai numan taine ye-ok.” 22 Jehudilanne i, “Iye hüke inang, tao ümekente tai numan taine ye-ok, tüote leppuwa, Iye yoi nying nyingke toilak ipu a?” 23 Jesuwe janne i: “Numan-a üphangpa mepu, Taowa ütokpa mepu. Numan tüopa kahtok jing; Tao tüopa kahtok jingne yeje. 24 Tüokhei taowe numante iyangki, numan ünu me numan lilak. Hüyange ‘Taowa I’ she üting manlak manlak numan ünu me numan lilak.” 25 Iman-e Ite tong, “Nanga aoshi?” Jesuwe janne i; “Hanghepa taowe numante üwangne muh iyangki, 26 Taowe numante ilak maawe ngohnangki hüyange numan jingne ngao phünlak ngohnang. Aowe Tao shon I üting, hüyange Imepu Taowe hanghe jai kahtoknyu te inang.” 27 Iye Ipa jeng imante inangshe iman-e yeshing. 28 Tüokhei Jesuwe imante i, “Aope numan-e Kahta Üha nowe inpu ngelakei ‘Tao ao shi’ numan-e shinglak, tüophei me nakshih Taowa ü-mepu yeje, hüyangpoi Üpawe üte hanghe nyüowe tam, tüopa toi ling she numan-e shinglak. 29 Hüyange aowe Tao shon, I ü-phei ngohnang; Iye ü-shaha yetüoh, hangjingne Taowe jinte Iye mongpu ling.” 30 Iye hüke ngaopu jaipu üshei Ite ütinglak.
Ütingpa Pinlan
31 Tüokhei Jesuwe Ite, ütinglakpu Jehudilan te i, “Taowe nyüopu numan-e jaima-a ütingme numan-a ü-pinlan; 32 numan-e ütingpa-a shinglak, hüyange ütingpawe numan lantamlak.” 33 Iman-e Ite jan, “Toman Abraham nokli, hüyange toman aope-o ao rhane-o yemeng; hümma-a, ‘Numan lantamlak,’ she nange hanghete leppu?” 34 Jesuwe imante i, “Üting tingha me Taowe numante iphaning: aowe ünu ling I ünu rhapa. 35 Rhapa aope-o jinte nokme yengoh; hüyangpoi, Ha jinte ngohnang. 36 Hüma-a ühawe numan lantamküma-a numan ütingme lanteki. 37 Taowe shingnang numan Abraham noklilan. Hüyangpoi numan-e Tao toine yamnang, hangjingne numan me ü-ngao yenang. 38 Taowe Üpa mepu hanghe nge tüopa ngao nang; hüyange numan-e numan Üpa mepu hanghe jai tüo lingnang.”
Jesu Hüyange Abraham
39 Iman-e Ite jan, “Toman üpa-a Abraham.” Jesuwe imante i, “Numan ütingpa Abraham hayim ne jeshihma-a, Iye lingpu toikih numane-o linghah shepu; 40 Hüyangpoi Taowe lingpu lili Kahwang mepu hanghepa üting jai numan te ilak jingne! Hüyangpoi numan-e Tao toine ngangnang. Abraham-e hükih hango yeling! 41 Numan üpawe hanghe ling numan-e hatüo lingnang.” Iman-e jan, “Toman chingyang halan yeje.” “Toman-e Üpa ja ngohnang, Kahwang I.” 42 Jesuwe imante i: “Kahwang ütingme numan Üpa ne mengshihma-a, numan-e üte kenhah shepu; hangjingne Tao Kahwang mepu pei hüyange tüome ngohnang. Tao ü-nying nyingke peipu ne yeje, hüyangpoi Iye Tao shon. 43 Taowe hanghe i numan-e hangne yeshingpu shi? Hatüowa hangne ima-a, numan-e ü-ngao jaine ye-ngangpu jingne! 44 Numan-a numan üpa kahshih hayim, hüyange numan üpawe mongpu pheite numan woihunang. Üwang memuh I lüntoi lingpupa, hüyange ütingpa phei linglak hango yenang, hangjingne I me üting yenang. Aope Iye tahleih ilakei, I wanglamme hangke mong hüke ngaonang, hangjingne I tahleih ipa hüyange leihpa üpa. 45 Hüyangpoi Taowe ütingpa ngao, hüyange tüojingne numan-e üte üting yelak. 46 Numan yo me aowe tao ünu kahta she iye oklak? Taowe numante üting ipu ne mengma-a, hümma-a hangne üte üting yelakpushi? 47 Ao Kahwang mepu pei Iye Kahwang ngao jai hunang, numan-e yejai hupute leppuwa numan Kahwang mepu yeje.” 48 Jehudilanne Jesute jan, “Toman-e nanga Samaria mepu ja hüyange nangme laa ngohnang she ilak yeshu a?” 49 Jesuwe jan, “Üme laa yenang. Taowe Üpate iyeshenang, hüyangpoi numan-e üte ye-i-yeshe. 50 Taowe üjingne müktishiwapu yeyam, ja ngohnang Iye müktishiwapu yamnang hüyange ngao phün nang. 51 Üting tingha numante iphaning: kahta ütam-e ü-ngao tükke angma-a, Iye aope-o lipu ye-ngelak.” 52 Jehudilanne Ite i: “Sha-a toman-e shingnang nangme laa ngohnang. Abraham li, hüyange hipalan li, hüyangpoi nange i, kahta ütamme ü-ngao ngohma-a, Iye aope-o lipu ye-ngelak. 53 Toman üpa Abraham li; Abraham phei sheyongpu she nange ine ye-ok, jeya? Hüyange hipalan-o li. Nanga ao she nange teihnangki?” 54 Jesuwe jan, “Taowe Ü-nying nyingke müktishiwama-a, ü-müktishiwapu hangne-o yemeng. Aowe Tao müktishiwa ne tam hatüowa Üpa, ao te numan-e Üpa üja she inang. 55 Hüyang-poi numan-e I yeshing, hüpoi Taowe I shingnang; hüyange Taowe I yeshing she ima-a, taowe numan kih-e tahleih inang. Hüyangpoi Taowe I shingnang hüyange I ngao angnang. 56 Numan üpa, Abraham-e, ü-hipak ngelak jingne hoongli-e teih; tüopa Iye nge hüyange mongmei.” 57 Jehudilanne Ite i, “Nang wangpeng denga nehoi manngoi, hüyange nange Abraham ngetekü a?” 58 Jesuwe imante i, “Üting tingha me Taowe numante ipha ning, Abraham manpuhpe muh Tao ngohyangki.” 59 Tüokhei iman-e Ite shüplak jingne long toon; hüyangpoi Jesu I nying nyingke lo, hüyange khümjing mepu tai.
Mükmüoteiye Puhpu Kahta Ja Jesuwe Meitam
1 Aope Jesu kemme ngoh, puhwante muh mük müoteiye puhpu kahta ja Iye nge. 2 I pinlanne Ite tong, “Rabbi, (konnyüopa) ao ünu kaiye I mükmüo teiye puh ne tampu shi? I heiya Inyu Ipa ünu shi?” 3 Jesuwe jan, “Hatüowa I yejema-a Inyu Ipa ünuwe yeje. Hüpoi Kahwang toi ütahte ngailak jingne I mükmüo teiye puh. 4 Wangngai wante Tao aowe shon I toi teman-e linglak yang. Aowe-o toi yeling oklak, wangnyak peiküki, 5 Tao kahtoknyu me ngohpu mongme Tao kahtoknyu wangngai.” 6 Iye tüo ngaoyang phei me, Jesuwe kahtok te iyphao phao hüyange shamne menge ling, Iye sham yahpuwe kahta mükte shit. 7 Hüyange Ite i, “Taitüoh Siloam yeng me nang sheta layah.” (leppu taine tampu) Tüophei me I taiye sheta la, hüyange ngepu okke ye. 8 Yupilan hüyange üshongwante Iye hahyuwe ngeyang palan-e i, “Shotyange hahyuwe ngohpu kahta hatüo yejepu a?” 9 Ütamme i, “Hatüo I üja,” hüpoi ülaolanne i, “Yejeja, hüyangpoi I tüokih-e ngenangki.” Tüokhei tüopa kahtawe Iye ngaiye i, “Taowa I.” 10 Iman-e Ite tong, “Hümma-a nang mük hangke eppushi?” 11 Iye jan, “Jesu she minpu kahta jawe sham ütam nyüt, ü mükte pho, hüyange üte i, Siloam te taitüoh hüyange nang sheta layah: tüokhei tao tai, hüyange taowe poiyangpu phei jamshe ngepu ok.” 12 Iman-e tong, “I ümeken me ngohnangki?” Iye jan, “Taowe yeshing.”
Phariseelanne Meitampu Jesu Yam
13 Tüophei me iman-e mükmüopa ne ngohyangpu pa Phariseelan tangte woipei. 14 Jesuwe sham linge mük eppe tampu nyih-a Sabbath ne ngoh. 15 Phariseelanne-o nishe I mük hangke mei ei she tong. Iye imante i, “Iye ü-mükte sham phowe tam hüyange taowe sheta la, tüophei me taowe nge.” 16 Phariseelan ütamme i, “Hatüo kahta Kahwang mepu yeje, hangjingne Iye Sabbath yejon.” Ülaolanne i, “Ünu kahta jawe hükihpu kahnyingwüngha füo hangke ling ok lak?” Hüyange iman yo me tampu ngai. 17 Tüokhei Phariseelanne kahta te üne-o tong, “Iye nang mük epyangki she nange inang, hümma-a, nange I ao she ilak?” Iye jan, “I hipa ja.” 18 Tüopa kahta ünyu üpa lante mannyik mannyik, I mük müopane ngoh hüyange sha-a ngenang she, tüopa pungao te Jehudilanne üting yelak hu. 19 Hüyange nyupa ni te tong, “Hatüo nangni ha a? I mük müoteiye puh she nang niye ipu a? Hümma-a Iye sha-a hangke nge?” 20 Nyupalan-e janne i, “Hatüowa toman ha, hüyange Iya mükmüo teiye puhpu she toman-e shingnang. 21 Hüyangpoi sha-a Iye hangke iye nge, yejema-a I mük hangke ep toman-e yeshing. Ite tongtüoh, shaaji I lwngmei; I jingne Iye ngaokülak!” 22 Jehudilante iman nyam, tüokhei Inyu Ipalan-e hatüo ngao yangki; hangjingne kahta ütamme Jesuwa Messiah she yah ngohma-a I synagogue mepu teitamlak she Jehudilanne tümyange ngoh. 23 Tüokhei Inyu Ipa lanne “Shaaji I lwngmei, Ite tongyah she i!” 24 Tüokhei iman-e ao mükmüoyange ngoh Ite nishe nyik, hüyange Ite i, “Kahwangte yihlupu phatüoh; hatüo kahta-a ünu kahta she toman-e shingnang.” 25 Iye janne i, “I ünu kahta ja, heiya yejepu, taowe yeshing; taowe ja hei shingnang, tao mükmüopa ne ngoh, sha-a taowe ngenang.” 26 Iman-e Ite i, “Iye nangte hang ling ei? Iye nang mük hangke ep ei?” 27 Iye imante janne i, “Taowe numante iyangki, hüyangpoi numan-e yejai. Hangne üne-o jaihupu shi? Numan-o I pin ne menghu pu a?” 28 Hüwante iman-e Ite phoiye i, “Nanga I pin, hüyangpoi toman-a Mosa pinlan. 29 Mosa phei Kahwange ngao she toman-e shingnang, hüyangpoi tüopa kahta jingne I ü-mepu pei toman-e yeshing.” 30 Kahtawe jan: “Hatüowa yashanlakpa yang, I ü-mepu pei numan-e yeshing, hüyangpoi Iye ü-mük ep! 31 Ünupa ja te Kahwange yejai she toman-e shingnang, hüyangpoi ütamme Kahwang te khüm hüyange Iye mongpu lingma-a, Kahwange Ite jainang. 32 Kahtamyenghan memuh ja me nehoi mükmüo teiye puhpu kahta eppe tampu yejai. 33 Hatüo kahta Kahwang mepu ne yeje shima-a Iye hango yeling oklak,” 34 Iman-e Ite janne i, “Nang ünu ümongpa me puh; hüyange nange tomante nyüolak a?” Hüyange iman-e I synagogue mepu jange tei.
Yahame Mükmüopu
35 Iman-e I jange tei she Jesuwe jai, hüyange aope Iye I tüo, Iye i, “Nange Kahta Üha te ütinglak nangkü a?” 36 Tüopa kahtawe jan, “I aoshi üte ipha, üyongpa, taowe Ite ütinglak ning!” 37 Jesuwe Ite i, “Nange I ngeteki, hüyange nang phei aowe ngaoyapeih tüowa I.” 38 Iye jan, “Youngwanpa taowe üting laknangki.” Hüyange Jesu shaome yatuhshing khüm. 39 Jesuwe i, “Ngaophünlak jingne hatüo kahtoknyu te Tao peiyangki, aoyinne ye-nge ok iman-e ngelak, hüyange aoyinne ngenang iman mükmüopa ne mengtamlak.” 40 Iphei jamme ngohpu Phariseelanne tüopa jai hüyange i, “Toman-o mükmüopalan a?” 41 Jesuwe imante i, “Numan mükmüopa ne mengshihküma-a, numan ünu yengoh hahshepu, hüyangpoi sha-a numan-e inang, toman-e ngenang: tüokhei numan ünu ngohnang.
Nyeeyompa Ümei
1 “Üting tingha me Taowe numante ipha ning: aowe nyeekhok taten kaiye ye-ong, hüyangpoi ülao yete jhotte pei, I kuhpa hüyange leihpa. 2 Hüyangpoi aowe taten kaiye ongnang I nyeelan tepu nyeeyompa. 3 Taten yompawe Ite ta ep tamnang, hüyange nyeelanne I ngao jainang; Iye yoi nyeelan te min me nyiknang hüyange iman woi teinang. 4 Aope Iye yoijing nyeelan ükhok eplakei iman shaote I kemnang, hüyange nyeelan I pheite woinang hangjingne iman-e I ngao shing. 5 Yeshingpu kahta ja phei iman yewoilak, hüyangpoi I mepu phette tailak hangjingne iman-e ngaowüng yeshing.” 6 Jesuwe imante tüopa ngaolep i, hüyangpoi Iye hanghe i, iman-e yeshing ok.
Jesu Nyeeyompa Ümei
7 Tüokhei Jesuwe imante üne-o i, “Üting tingha me Taowe numante ipha ning: Nyeelan jingne taten-a Tao. 8 Ülaolan üshei aoyin Ü-sheshao me pei iman kuhpa hüyange leihpalan; hüyangpoi nyeelanne imante yejaikülak. 9 Tao taten. Ütam Tao kaiye ongma-a yinlak, hüyange yulak onglak hüyange heeijong tüolak. 10 Kuhpalan kuhlak jingne, toilak jingne hüyange mengtamlak jingne hei peinang. Iman-e üyin tüolak, hüyange hatüowa wangngoiye tüolak jingne Tao pei. 11 “Tao nyeeyompa ümei. Nyeeyompa ümeiye nyeelan jingne yoi üyin angtamnang. 12 Nanpa kahta, ao nyeeyompa yejema-a nyee nokpu ne yemeng, Iye aope sho peipu ngelakei, nyee tüohyange phette tainang; hüyange showe shüknang hüyange nyeelan yantam nang. 13 I phette tainang hangne ima-a, I nanpa ja hüyange nyeelan jingne yeteihtüo. 14 Tao nyeeyompa ümei: Taowe ü-nyeelan shingnang hüyange iman-e Tao shingnang; 15 Hüke Üpawe Tao hangke shing hüyange Taowe Üpa shing; Hüyange nyeelan jingne ü-üyin angtam nang. 16 Tüopa nyeelan phei ye-ompu üjing ülao nyeelan-o ngohnang; Taowe iman-o woipeilak hüyange iman-e ü-ngao jailak. Hüyange iman ükhong ja, hüyange nyee yompa ja ngohlak. 17 “Tüojing üne Üpawe üte kennang hangjingne Taowe nishe leih-e tüolak jingne ü-üyin phanang. 18 Aowe-o ü-mepu üyin yahteipu ye-ok. Hatüo ü-nying nyingke Taowe angnang. Hatüo anglak üme wong ngohnang, hüyange hatüo yahyepu oklak wong üme ngohnang. Tüopa nyinge tampu Taowe Üpa mepu tüo.” 19 Üne-o hatüo ngao kaiye Jehudilan yo me teitampu ngai; 20 Iman maapuwe hüke i, “I me laa ngohnangki! I nganang! Hangne Ite jainangki?” 21 Hüyangpoi ülaolanne i, “Laa ngohpu kahta jawe hüke yengao oklak! Laawe hangke mükmüopa mük eppe tamlak shi?”
Jehudilanne Jesu Yeyah
22 Jerusalem me khümjing ghuwaipu mo molak hipak ngoi; hatüo eanyu ne ngoh. 23 Hüwante Solomon, nokshüm khümjing phang me Jesu kemme ngoh. 24 Hüwante Jehudilan I neikonne jemme ta hüyange i, “Nange hangshin ne toman nüngnei ne tamlak shi? Messiah ne jeküma-a tomante üting me ngaiye ipha?” 25 Jesuwe jan, “Taowe numante iyangki, hüyangpoi numan-e üte üting yelak. Taowe Üpa minme lingpu toiye üjing saki phanang; 26 hüyangpoi numan-e üting minlak ja hangjingne numan ü-nyeelan ne yeje. 27 Ünyeelanne ü-ngao jainang; Taowe iman shingnang, hüyange iman ü-pheite woinang. 28 Taowe imante jintepu üyin phanang, hüyange iman aope-o yelilak: hüyange aowe-o ü-yak mepu iman yenyie-oklak. 29 Üpawe hanghe üte pha hatüowa üshei phei sheyongpupa, hüyange Üpa yak mepu aowe-o nyiene ye-ok. 30 Üpa hüyange Tao ja.” 31 Tüophei me Jehudilanne üne-o Ite shüplak jingne long toon. 32 Jesuwe imante i, “Üpawe phapu toimei maawe numan sheshao me Taowe linge hüoyangki, tüolan yo mepu ja jingne numan-e üte longe shüp hupu a?” 33 Jehudilanne Ite jan ye; “Toimei jingne toman-e nangte longe yeshüp hu, hüyangpoi nange Kahwang ye-i-yeshepu jingne! Nanga kahta ja, hüyangpoi nange Kahwang ne menghu nang!” 34 Jesuwe imante jan: “Taowe inang, ‘numan kahwanglan’ she numan ngaokeng me nyanyange yenang a? 35 Ngaolaiye hanghe i, jinte üting she toman-e shingnang: hüyange kahta aoyinte Kahwang ngaolan pha imante Iye kahwanglan she nyiknang. 36 Üjingnepa-a, Üpawe Tao le hüyange kahtoknyu te Tao shon. Hüma-a, Taowe Kahwang Üha she ipu jingne Taowe Kahwang ye-i-yeshe ja she numan-e iye ok? 37 Taowe Üpa toishao yelingpu ne mengma-a, üte üting tahlak. 38 Hüyangpoi Taowe tüolan lingküma-a, numan-e üte üting yelakyapoi, numan-e ü-toishaote ütinglak yah, hümme nakshih numan-e Üpa-a üme hüyange Tao Üpa me she teihlak hüyange shinglak.” 39 Tüokhei iman-e üne-o I pho ne ngang, hüyangpoi iman yak mepu I yin. 40 Tüophei me üne-o Jordan yengyin kaiye üwangne Johnne baptipu kente Jesu tai, hüyange tüome I ngoh. 41 Kahta maawe I tangte pei. Iman-e i, “Johnne kahnyingwüngha füo hango yeling.” “Hüyangpoi Iye hatüo kahta jeng hanghe yin i üting,” 42 hüyange tüome ngohpu kahta maawe Ite ütinglak.
Lazar Li Hüyange Yangeye
1 Sha-a Mary hei Inya Martha ni nyoipu Bethani ching me Lazar she minpu kahta ja dak-e ngoh. 2 Hatüo Mary aowe Youngwanpa te üpi meipu minnga pho hüyange yoi shangmin ne I ya phutte tam, hatüo ü-nao Lazar dakyangki. 3 Inya Inao niye Jesute ngaolan shon. “Youngwanpa, ao te nange kennang I daknangki.” 4 Aope Jesuwe tüopa jai Iye i, “Hatüo dakpuwe liye shonlak yeje, hüyangpoi hatüowa Kahwang müktishiwalak jingne; hatüo kaiye Kahwang müktishiwa Kahwang Üha me ngaitamlak.” 5 Sha-a Jesuwe Martha hüyange Inao, hüyange Lazar lante ken. 6 Tüoyangpoi aope Iye Lazar daknangki she jai, I ngohpu nyoi me yelakpe nyih ni nyoi. 7 Tüophei me Iye pinlante i, “Teman Judea te leih yehah.” 8 Pinlanne Ite i, “Rabbi” (konnyüopa), “Hipak üten ja hei taiteki Jehudilanne nangte longe shüpne lükyangki; hüyange nang tüoyete leih yelak a?” 9 Jesuwe i: “Nyih ja me ghonda penme ni yeje a? Kahta ja nyihning kemma-a, I yashah yehüoja, hangjingne Iye tüopa kahtoknyu wangngai ngenang. 10 Hüyangpoi kahta ja wangnyak me kemma-a I yashah hüonang, hangjingne I me wangngai yenang.” 11 Tüopa ngaoyang phei me Iye hüke paowe i, “Teman shümpa Lazar shiteki; hüyangpoi I shipu mepu loilak jingne Tao tainang.” 12 Pinlanne Ite i, “Youngwanpa, I shipune mengma-a, meiye lüokülak üja.” 13 I litepu jeng Jesuwe ngao, hüyangpoi Iye shipu wanglam inang she iman-e teih. 14 Hüwante Jesuwe imante ngaiye i, “Lazar liteki. 15 Hüyangpoi numan jingne Tao I phei yengoh yangpute mongmei nang, tüome nakshih numan-e ütinglak lak. Hüpoi I tangte teman taihah.” 16 Thomas, nipet she nyikpupawe, I shümpa pinlante i, “Iphei jamme lilak ne teman-o tai hah.”
Yange Yepu Hüyange Üyin Jesu
17 Aope Jesu ngoi, mangkoksa me Lazar mu phei me nyih peli ngoiteiye ngoh. 18 Bethani, Jerusalem mepu mile ni nanjing ngoh; 19 hüyange Jehudilan maawe imni ünao lipu mongyoong meitamlak jingne Mary hei Martha ni tangte peiye ngoh. 20 Aope Marthawe Jesu peiküki she jai, I phei hüolak jingne I phette yu; hüyangpoi Mary noksa me ngoh. 21 Marthawe Jesute i. “Nang tüome ngohshima-a, Youngwanpa, ü-nao yelihah shepu! 22 Hüyangpoi taowe shingnang shaa-o nange hanghe Kahwang mepu yulakei, Iye nangte yahphalak.” 23 Jesuwe yha te i, “Nang nao üne-o yange yelak.” 24 Martha jan, “Taowe shingnang, üküm nyih me yange yewante I nishe yange yekülak.” 25 Jesuwe yha te i, “Yange yepu hüyange üyinna Tao. Aowe üte üting laklakei I liyapoi üyin ngohlak; 26 hüyange aoyin üyin ngoh hüyange üte ütinglak aope-o yelilak. Nange tüopate ütinglak ya?” 27 Yha Ite i, “Eihya, Youngwanpa, kahtoknyu te peilak she ngohpu Kahwang Üha Messiah nang she Taowe ütinglak nang.”
Jesu Shap
28 Tüopa ngao iphei me Martha leihye hüyange Inao Mary jünge nyik-e hüke i; “Konnyüopa tüome ngoh nangki, hüyange Iye nangte nyik nangki.” 29 Aope Mary tüopa ngao jai I mamshe tümme yong hüyange I phei hüone lai. 30 Sha-a Jesu chingte manngai, hüyangpoi Martha phei hüoyangpu nyoi me muh I ngoh. 31 I mongmei tamlak jingne Mary phei nok me, ngohpu Jehudilanne Mary-e mamshe tümme taipu aope nge, yha mangjongte shapne lainang she teihyange iman-o woi. 32 Aope Jesu ngohjing te Mary ngoipei hüyange I nge, I yashong me yha lamme ta hüyange i, “Youngwanpa, nang tüome ngohshihma-a ü-nao yelihahshepu.” 33 Aope yha shappu Jesuwe nge, hüyange Jehudilan aoyin yha phei jamme pei iman-o shap, I yaha me yeonge po hüyange shangepei. 34 Hüyange Iye iman te i, “Numan-e I ümeken me mu ei?” Iman-e jan, “Üyongpa, wenne leihu.” 35 Jesu shap. 36 Tüokhei Jehudilanne i, “Leihu Iye hangshin Ite kenpu shi!” 37 Hüyangpoi ütamme i, “I ümuhma, aowe mükmüopa mük eppe tam; Iye hatüo kahta li ne yetamhah shepu no?”
Jesuwe Lazar Yange Yene Tam
38 Tüophei me, nishe Jesute powe pei, I mangjong te yu, hüyange mangkoksa-a longe küpyangpu longsa ne ngoh. 39 Jesuwe ngaophawe i: “Longkhao nowe wintüoh!” Lipupa ünya Marthawe Ite i, “Youngwanpa, I liphei me nyih peli, shaaji namteiye ngohkülak!” 40 Jesuwe yhate i, “Nange ütinglakma-a Kahwang müktishiwapu ngelak üja she Taowe nangte ye i a?” 41 Tüokhei iman-e longkhao nowe win. Jesuwe nganne lei hüyange i: “Opa, nange üte jaipu jingne, Taowe nangte minyongpu pha nangki. 42 Taowe shingnang nange jinte üte jainang, hüyangpoi tüome yonge ngohpalan jingne Taowe nang te tüopa ngao inang, hümme nakshih nange Tao shon she iman-e ütinglak lak.” 43 Iye tüopa ngao iyangphei me Iye üngwünne nyik, “Lazar, ngaikei!” 44 Litepu kahta lüowe, ya hei yak me pengkhai nye nyeihyange, hüyange I sheta me nyelümyange ngai. Jesuwe imante i, “Ite lantamtüoh.” “Hüyange taine tam tüoh.”
Jesu Toine Tümpu
45 Jehudilan maawe Mary phei hüone peipu lanne Jesuwe hanghe ling nge, hüyange Ite ütinglak. 46 Hüyangpoi iman yo me ütam Phariseelan tangte leihye hüyange Jesuwe hanghe ling imante i. 47 Tüokhei Phariseelan hüyange ngengpa üjenglan, ngao ipalan phei jamshe jem hüyange i: “Teman-e hang linglak shi? Hatüo kahtawe kahnyingwüngha füo üshei lingnangki! 48 Teman-e I hüke angne tamma-a, kahta liliye Ite ütinglak lakyang, hüyange Rome lan peiye teman nyoi hüyange teman kahtok meng phalak.” 49 Hüpoi Kaifas she minpu, iman yo me ja, tüopa wang Ütahpa Ngengpa ne mengpu pawe hüke i: “Numan-e hango yeshingpu yang! 50 Hüyange numan jat üshei mahpu phei-a, kahtalan jingne kahta ja lipu numan jingne shemeipu she numan-e yeteih.” 51 Hatüo ngao Iye mongpu shaha me ipu ne yeje; hüyangpoi tüopa wang I ütahpa ngengpa ne menge, jat hei li jingne Jesu lilak yang, 52 hüyange jat hei li shaha yeje, hüpoi yanne ngohpu Kahwang halan Iye shaijemlak jingne Iye tüopa hi-ngao ngaoyangki. 53 Tüokhei tüonyih memuh Jehudilanne I toilak kon yam. 54 Tüokhei Judea me Jesu Jehudilan yome ütahte ngaiye yekem ok, hüyangpoi tüohyange Ephraim she minpu wanwüng nyoijing ja te I tai, hatüo me pinlan phei I ngoh. 55 Jehudilan Yinyepu mo owe pei, hüyange yoi kahtok mepu kahtalan maawe, mo sheshao me jaopu mo linglak jingne Jerusalem te tai. 56 Iman-e Jesu lei, hüyange iman khümjing me jemwante hüke teingaowe i, “Nange hangke teihnangki? Ütingme I tüopa mo te yepei külak heiya peiya lak?” 57 Ngengpa üjenglan hüyange Phariseelan ütamme Jesu ngohjing shingma-a Iye mamshe ngao phatüoh, hüyange I pholak she ngao phawe i.
Bethani Me Jesu Minnga Photampu
1 Yinyepu mo ngoi eipe nyih wok ngohwante, Lazar, Jesuwe lipu mepu yange yetampu ngohjing Bethani te Jesu pei. 2 I jingne iman-e tüome yaning nük hahlak tüm, hüyange Marthawe namnowe phawante, Lazar Jesu phei khao me shotte ngoh. 3 Hüwante Mary-e yeonge üpe meipu hüyange pheei wanpu minnga ümei toktang nanjing peiye Jesu yate pho hüyange yha shangmin phei Jesu ya shütte tam. Minnga üpe meipuwe noksa maa. 4 Hüyangpoi Jesu pin yo mepu ja, Judas Iskariot, aowe I lotamlak; Iye i, 5 “Hatüo minnga ngin gho lüm te yaoyange hangne toihalante yepha pushi?” 6 Iye tüopa ngao toihalan teihyange ngaopune yeje, hüyangpoi I kuhpa, hüyange Iye yahhümpu ngin shao Ime ngoh. 7 Hüyangpoi Jesuwe i: “Yha shaha angne tamtüoh. Yhawe hanghe ngoh tüophei ü-mu nyihpu jingne yha-e min angyah. 8 Hangjingne toihalan numan phei jinte ngohnang, hüyangpoi Tao numan phei jinte yengoh külak.”
Lazar Toine Tümpu
9 Jehudilan ükhong üyong Bethani me Jesu ngohnang she jaiye iman tüoyete wen; Jesu shaha jingne yeje, hüyangpoi Jesuwe lipu mepu yange yetampu Lazar te-o leilak jingne pei. 10 Tüokhei ngengpa üjenglanne Lazar-o toilak jingne taisheng. 11 Hangjingne I jeng me Jehudilan yeonge iman woipa tüohyange Jesute ütinglakpu ngai.
Jerusalemte Okpu Ngeye Ongpu
12 Üne nyih Yinyepu mo te peipu ükhong üyonge Jerusalemte Jesu peiküki she jai. 13 Tüokhei iman-e lokyak jonyange Iphei hüone hüke üngwünne pei, “Hosanna! Youngwanpa min me ao pei Kahwange Ite moimantüoh! Kahwange Israel Ahngpate moiman tüoh!” 14 Jesuwe gado üha ja tüo hüyange tüome shot, laingaowe ipukih: 15 “Tahnyam, Zion hayim! Leihuyah, gado üha me shotyange numan ahngpa sha-a peiküki.” 16 I pinlanne hüwante hatüo jeng yeshing; hüyangpoi aope okpu ngeye Jesu yange ye, laingaowe hatüo iyangki, hüyange iman-e hatüo jingne lingyangki she shing. 17 Iye mangjong mepu Lazar yange yetamwante ngohpu ükhonge tüopa jeng saki pha. 18 Iye tüopa kahnyingwüngha füo lingyangki she jaiye ükhong I phei hüone pei. 19 Tüophei me Phariseelanne hüke teingaowe i, “Leihu, teman-e hango okpu ye-ngepu yang! Leitüoh, kahtoknyu üshei I phei te woiteki!”
Greeklan Ütamme Jesu Yam
20 Sha-a mo hipak me yoplak jingne Jerusalem te taipu yo me Greeklan ütam ngoh yangki. 21 Tüokhei Galilee mepu Bethsaida kahta Philip tangte iman pei, hüyange hüke i, “Üyongpa, toman-e Jesu phei hüohu nangki.” 22 Philip taiye Andrew te i, hüyange imni peiye Jesute i. 23 Jesuwe imante janne i, “Kahta Üha müktishiwalak hipak ngoiteki. 24 Üting tingha me Taowe numante ipha ning, tahlick ükek ja kahtokte yeiye yelima-a, I tahkek ja nehei ngoh-e shonlak; hüyangpoi I lima-a, Iye ülick maawe licklak. 25 Aowe yoi üyinte kenlakei mahlak, hüyangpoi aowe tüopa kahtoknyu me yoi üyinte nulakei Iye jintepu üyin jingne tüonang. 26 Aoyinne üshaoshanhu nang, ü-phei te woilak wongpong, hüyange Tao ümeken me ngoh iman ü-phei ngohlak. Aowe ü-shaoshan, Üpawe I yihnoonlak.
I Lilak Jeng Jesuwe Inang
27 “Sha-a ü-üyin yaha shangnang, hüyange Taowe hang ilakshi? Opa, hatüo hipak mepu Tao yinpha! Tüoyangpoi tüopa hipak jingne hatüo me Tao peiyangki. 28 Opa, nang min müktishiwatüoh!” Tüophei me wangmepu ngao ja pei, “Taowe hatüo müktishiwa yangki, hüyange Taowe hatüo nishe müktishiwalak.” 29 Tüome yonge ngohpu ükhonge i, “Hatüowa wangkhong puyang!” Ülaolanne i, “Wangdang shongmokpa lanne Ite ngao nangki!” 30 Hüyangpoi Jesuwe imante i: “Hatüo ngaowe ipuwa üjingne yeje numan jingne inang. 31 Kahtoknyu ngaophünlak sha-a hipak; kahtoknyu wanglam lampalan sha-a yeitamlak. 32 Hüyange aope Tao tüopa kahtok mepu no-inlakei, Taowe kahtalan üshei shui inlak.” 33 Tüopa ngao ipu kaiye hangkihpu shange pongpu phei I lilak tüopa jeng inang. 34 Ükhonge hüke janne ye: “Messiah jin jinte ngohlak she toman ngaokenge inang, hümma-a Kahta Üha no-inlak she nange hangke ipu? Hatüo Kahta Üha ao shi?” 35 Jesuwe janne i, “Hipak ütenhapu jingne wangngai numan phei ngohlak. Wangnyakke numan yemahlak jingne numan me wangngai ngohwante kemtüoh. Aowe wangnyak me kemnang, ümeken me kemnang Iye yeshing. 36 Numan me wangngai ngohwante, wangngai ühalan ne menglak jingne, wangngai te ütinglakyah.” Jesuwe tüolan ngao iyangphei me yanne tai hüyange I nying nyingke iman sheshao mepu lo.
Ütingyelakpu Jehudilan
37 Iman phinme teshinne kahnyingwüngha füo lingyapoi iman-e Ite üting yelak, 38 tüokaiye Isaia hipawe ngaoyangpu ütingne menge pei: “Youngwanpa, aowe toman ngaolan te ütinglak? Ao te Youngwanpawe I wong ütahte ngai hüo?” 39 Hangjingne tüojingne iman-e üting yelak, tüokhei Isaiawe üne-o hüke i: 40 “Iye iman mükmüone tamyangki! Iye iman mong küpne tam, tüojingne iman mükke ye-nge, iman monge hango yeshing, hüyange Taowe iman meitamlak jingne iman ü-tangte yelüplak.” 41 Iye Jesu müktishiwapu nge, hüyange Isaiawe I jeng ngaoyangki. 42 Jehudi woipalan maawe Jesute üting lakyangki; hüyangpoi Phariseelan shaote nyampu nanjingne ütahte ngaiye iman-e yengao, hümme nakshih iman synagogue mepu jange yeteilak; 43 hangjingne iman-e Kahwang mepu yihlupu pheiya kahta mepu yihlupu leng.
Jesu Ngaome Ngaophünpu
44 Jesuwe hüke üngwünne i: “Aowe üte ütinglakyapeih, ü-shaha te yeje hüpoi aowe tao shon Ite ütinglak tüoh. 45 Aowe Tao nge, Tao shonpupa-o ngenang. 46 Tao wangngai, hüyange üte ütinglakpu üshei wangnyak me yengohlak jingne Tao kahtoknyu te peiyangki. 47 Ütamme ü-ngao jai hüyange yejonpe ngohma-a, Taowe Ite ngao yephünlak; hangjingne Tao kahtoknyu ngao phünlak jingne yeje, hüyangpoi kahtoknyu yinlak jingne pei; 48 Aowe Tao yeyahlakei hüyange ü-ngao yeyahlakei Iye ngaophünpu tüolak. Taowe Ite ngaoyangpu ngaowe üküm nyih I ngao phünlak. 49 Hangjingne Taowe üwonge ngaopu hango yenang, hüyangpoi aowe Tao shon, Üpa Iye, Taowe hanghe ngaolak hüyange ilak üte phayangki. 50 Hüyange Taowe shingnang I ngaokeng kaiye jintepu üyin peitam nang. Taowe hanghe ngao, Üpawe üte hangke ngao tüo hei hüke ngaonang.”
Jesuwe Yoi Pinlan Yapoi
1 Hatüo shaaji Yinyepu Mo sheshao ne ngoh. Jesuwe tüopa kahtok angyange Ipa tangte tailak I hipak ngoiteki she shing. Kahtoknyu me I jingne aoyin ngoh imante Iye jinte ken, hüyange Iye imante üküm ngoiye ken. 2 Jesu hüyange I pinlan mowe ngoh. Kahshih-e Simon üha Judas Iskariot, mongme Jesu lowe tamlak jingne toilinge tam. 3 Ipawe wong üshei Ite phayang she Jesuwe shing; I Kahwang mepu pei hüyange Kahwang tangte tailak she Jesuwe shing. 4 Tüokhei khao me ngohpu Jesu yong. Iye inpu inkhek khokke ang, hüyange shiengme nyeshoh ja hit. 5 Tüophei me Iye yapoi shengme yeng yei hüyange pinlan ya poi hüyange I shiengme hitte ngohpu nyeshoh yahpuwe iman ya shitte tam. 6 I Simon Peter tangte wen. Peterwe Ite i, “Youngwanpa, nange ü-ya poilak a?” 7 Jesuwe Ite janne i, “Taowe hanghe ling sha-a nange yeshing, hüyangpoi phei me nange shinglak.” 8 Peterwe Ite i, “Nange ü-ya poilak ne yeje!” Jesuwe Ite janne i, “Taowe nang ya yepoitam küma-a, nang ü-phei meitam yenang.” 9 Simon, Peterwe Ite i, “Youngwanpa, hümma-a ü-ya shaha tahpoi, ü-yak hei shango poitam pha!” 10 Jesuwe Ite i, “Aoyinne yeng yaoyangki jaowe ngohnang hüyange I ya kaiye yengyaolak wongpong yeje. Ja tokte kaiye numan üshei jaowe ngohnang.” 11 I aowe lowe tamlak Jesuwe shing; tüokhei “Iye numan khongküm jaowe ngohpu ne yeje she i.” 12 Aope Iye iman ya poiye sho hüyange yoi inkhek in hüyange yoi shotjing me yeshot; Iye imante i, “Taowe numan jingne lingpu shingya? 13 Numan-e üte Konnyüopa hüyange Youngwanpa she nyik; hüyange numan-e shuwe nyikyangki, hangjingne hatüowa Tao. 14 Hümma-a numan Konnyüopa hüyange Youngwanpawe numan ya poipune mengma-a numane-o shejawe sheja ya teipoilak yang. 15 Hangjingne Taowe numante hangke linge hüo hüke linglak jingne leppu ja hüonang. 16 Üting tingha me Taowe numante inang; yoi nokpu phei rhapa sheyongpu yeje, yejema-a aowe shonne tei tüopa-a shonne tampupa phei yongpu yeje. 17 Sha-a numan-e tüopa ütingpa shingteki, numan-e toishao me hüowe lingma-a numan hangshin mongmeilak! 18 “Numan üshei jingne Taowe ngaopu ne yeje; aoyin Taowe le Taowe shingnang. Hüyangpoi hüke iyangpu laingao ütingpa me ngailak wongpong: ‘Aowe ü-mepu an hah Iye Ü-phei tüi-e yonglak.’ 19 Tüopa manngaipe sha-a muh Taowe numante tüopa ngao inang, hüke aope tüopa ütahte ngailakei numan-e ‘Taowa I yang’ she üting laklak. 20 Üting tingha me Taowe numante inang: aoyinne Taowe shonpu ütamja yahlakei, Tao-o yahnang; hüyange aoyinne Tao yah, aowe Tao shon I yahnang.”
I Lolak Jesuwe Inang
21 Hüke Jesuwe tüolan ngaoyang phei me, I yeonge luwe shang, hüyange ngaiye i: “Üting tingha me Taowe numante inang: numan yo me jawe Tao lowe tamlak.” 22 Pinlan eihate teilei hüyange ao jeng ipu shi, she yeonge nüngnei. 23 I pinlan yo me ja, ao te Jesuwe sheken she ngoh, Jesu jakuh me nyiangyange ngoh. 24 Tüokhei Simon Peterwe Ite mükke tinge leiyange i, ao jeng Iye ipuweih tomante ipha she tongtüoh. 25 Tüophei me I hangke ngoh, tüokih-e Jesu jakuh me nyienyange Iye i, “Youngwanpa, hatüowa ao shi?” 26 Jesuwe jan, “Taowe ao te tüopa ankhüo shengme hüngyange phalakei I ne menglak.” Tüophei me Iye ankhüo hüng, yah, jonyange Simon Iskariot üha, Judas te pha. 27 Aope Iye tüopa hah. Ite satan ong. Jesuwe Ite i, “Nange hanghe linglakei mamshe lingyah!” 28 Tüome shotte ngohpu aowe-o hangne Jesuwe Ite hüke ngao yeshing. 29 Ütamme teih, Judas me nginshao ang, tüokhei Jesuwe, “Mo jingne teman wongpong hanghe shaktüoh”, yejema-a, Iye toihalante ülam ja phalak jeng inang she teih. 30 Tüokhei Judaswe an yahyang phei me I mamshe yayong tai. Hüyange hatüowa wangnyak ne ngoh.
Ngaokeng Üla
31 Judas taite phei me Jesuwe i: “Sha-a Kahta Üha müktishiwa ütahte ngainang; sha-a Kahwang müktishiwa I kaiye ngainang. 32 Hüyange Kahwang müktishiwa I kaiye ngaipu ne mengma-a, hümma-a, Kahwang Iye Kahta Üha müktishiwapu ngaitamlak, hüyange Iye mamshe lingkülak. 33 Ühalan, Tao numan phei hipak laowe yengoh oklak. Numan-e Tao yamlak; hüyangpoi Jehudilante hanghe ngao, numante sha-a inang, ‘Tao ümeken me tai tüoken me numan yetai oklak.’ 34 Taowe numante ngaokeng üla pha nang; jawe ja te teiken yah, Taowe numante hangke ken hüke jawe ja te teiken yah. 35 Numan teikenpu ngeye üsheiye numan ü pinlan she shinglak.”
Peterwe Yejanlak Jesuwe Inang
36 Simon Peterwe Ite i, “Youngwanpa, nang ümeken te tailak shi?” Jesuwe jan, “Tao ümeken te taipuweih nange sha-a yewoi oklak, hüyangpoi nang phei me woilak.” 37 Peterwe Ite i, “Youngwanpa, nang phei tao sha-a hangne yetai okne? Nang jingne taowe ü-üyin phalakei.” 38 Jesuwe janne i, “Nange üting tingha me üjingne nang üyin phalak a? Taowe nangte ütingpa ipha ning, nange lüm me tao manjan manjan awha yekolak.”
Üpa Tangte Tailam-a Jesu
1 “Numan mong tahpai. Kahwang te ütinglak tüoh; üte-o üting lakyah. 2 Üpa nok me nyoi mawe ngohnang, hüke yenang shihma-a Taowe numante ihah shepu, Tao numan jingne nyoijing tümne tainang! 3 Hüyange Tao taiye numan jingne nyoijing tümküma-a, Tao leih yelak, hüyange Taowe numan ü-phei teilak, Tao ümeken me ngoh tüoken me numan-o ngohlak. 4 Hüyange Tao ümekente tailak ülam numan-e shingnang.” 5 Thomas Ite i, “Youngwanpa, nang ümekente tai toman-e yeshing; toman-e tailam hangke shinglak?” 6 Jesuwe Ite i, “Lamnyu hüyange ütingpa hüyange üyinna Tao. Tao yekai ma-a Üpa tangte aowe-o peine ye-ok. 7 Numan-e Tao shingma-a, numan-e Üpa-o shinglak. Sha-a muh numan-e I shingteki hüyange ngeteki.” 8 Philip-e Ite i, “Youngwanpa, toman te Üpa hüopha, hüyange toman jingne wanglak.” 9 Jesuwe Ite i, “Philip, Tao numan phei hüshinne ngohyahpoi, nange Tao yeshing a? Aowe Tao ngeyangki Iye Üpa ngeyangki. ‘Tomante Üpa hüopha she’ nange hangke ipu? 10 Tao Üpa me ngohnang, hüyange Üpa üme ngohnang she nange üting yelak a? Taowe hanghe ngao numante inang, ‘Ü-nying nyingke ngaopu ne yemeng.’ Hüyangpoi Üpa ü-phei ngohyange Iye toi lingnang. 11 Tao Üpa phei ngohnang hüyange Üpa ü-phei ngohnangshe ü-ngaote üting lakyah. Yejema-a, toishaolan jingne nehoi üting lakyah. 12 “Üting tingha me Taowe numante inang: Aowe üte ütinglak nang, hanghe toi Taowe ling, Iye hatüo linglak, hüyange tüolan toiphei sheyongpu Iye linglak: hangjingne Tao Üpa tangte tailak. 13 Hüyange numan-e ü min me hangyin yulakei, hatüo Taowe linglak, tüokhei Üpa müktishiwapu Üha kaiye hüolak. 14 Numan-e üte ümin me hanghe yulakei, hatüo Taowe linglak.”
Yaha Üjao Janpu
15 “Numan-e üte kenma-a ü-ngaokenglan numan-e jonlak. 16 Taowe Üpate yulak, hüyange numan phei jinte ngohlak jingne Iye numante ülao nyüolei jampa ja phalak. 17 Hatüowa ütingpa Yaha, kahtoknyuwe I yeyah, hangjingne kahtoknyuwe I ye-nge, hüyange shingo yeshing. Hüyangpoi numan-e I shing, hangjingne I numan phei ngohnang, hüyange numan me ngohlak. 18 “Taowe numan khahlei-e ye-anglak; Tao numan tangte leih yekülak. 19 Kenja ngohyang phei me, shaaji kahtoknyuwe Tao ye-ngelak; hüyangpoi numan-e Tao ngelak: hüyange Tao üyin me ngohpu jingne, numan-o üyin ngohlak. 20 Hatüo nyih me Tao Üpa me, numan üme hüyange Tao numan me ngohnang she numan-e shinglak. 21 “Aowe ü ngaokenglan shingnang hüyange angnang, I üte kenpupa. Hüyange aowe üte kennang, Üpawe Ite kenlak, hüyange Taowe Ite kenlak, hüyange Taowe ü-nying nyingke Ite ütahte ngaiye hüolak.” 22 Judas (Judas Iskariot ne yeje) Ite i, “Youngwanpa, hangne tomante nang nying nyingke ütahte ngaiye hüoyange, hüyange kahtoknyu te yehüolak?” 23 Jesuwe Ite janne i: “Ütam-e üte kenma-a, Iye ü-ngao jailak. Üpawe Ite kenlak, hüyange toman I tangte peilak, hüyange I phei ngohlak. 24 Aowe üte yeken Iye ü-ngao yejai. Numan-e hanghe ngao jainang, hatüo ü-ngao ne yeje, hüyangpoi aowe Tao shon tüopa Üpa mepu. 25 “Tao numan phei ngohwante muh tüolan ngao Taowe numante ngaoyangki. 26 Hüyangpoi jampupa, Yaha Üjao ao Üpawe ü-min me shonlak, Iye numante üshei nyüoleiphalak, hüyange Taowe numante iyangpu üshei teihtam phalak. 27 “Chingmei, Taowe numan phei angnang; ü-chingmei Taowe numante phanang. Kahtoknyuwe phapuke Taowe numan te yepha. Numan mong tahshang hüyange tahnyam. 28 ‘Tao, tailak hüyange numan tangte üne-o yelak,’ she Taowe numante ipu jaiyangki. Numan-e üte kenshima-a, numan mongmei hahshepu, hangjingne tao Üpa tangte tainang, hangjingne Üpa ü-phei sheyongpupa. 29 Hüyange aope hipak ngoilakei numan-e ütinglaklak jingne, tüolan khongküm ngaishao me, sha-a Taowe numante iyangki. 30 Taowe shaaji numan phei maawe min ngao, hangjingne tüopa kahtok wanglam lampa peiküki. I ü tangme wong yenang. 31 Hüyangpoi Taowe Üpate kennang she kahtoknyuwe shinglak wongpong; tüokhei Üpawe hanghe lingne tam Taowe ling. “Yongtüoh, teman sha-a taihah.”
Jesu Ütingpa Wuwüngwu
1 Tao ütingpa wu, hüyange hampa-a Üpa. 2 Üme ngohyange ülick yelickpu üqui lili Iye yahtei nang, hüyange ülick lickpulan üqui ülick sheyong she licklak jingne Iye jaowe lingnang. 3 Taowe ngaoyangpu ngao kaiye numan shaaji jaoteki. 4 Üme ngohyah hüyange Tao-o numan phei ngohning. Üwu me yengohküma-a, hangke üquiye ülick yelick ok, hatüokih, ü-phei yengohküma-a, numane-o ülick yelick lak. 5 “Tao üwu, numan üquilan. Ao üme ngohnang, hüyange Tao I me ngoh, hatüowe ülick maawe licknang, hangjingne ü-mepu yanne numan-e hango yeling ok. 6 Ütam ü me yengohküma-a, peequi lange winpu kih winnang; hüyange wannang, moi yonang, hüyange vünte jakke shunang. 7 Numan üme ngohküma-a hüyange ü-ngao numan me ngohküma-a, numan-e hangyin lengyapeih yuyah, hüyange hatüo numante linglak. 8 Numan-e ülick maawe lickke, hüyange ütingpa ü pinlan she hüowante Üpa müktishiwa nang. 9 Üpawe üte hangke ken Taowe-o numante hüke kennang. Ü yayeng me yelakpe ngohyah. 10 Hangke Taowe Üpa ngaokeng jon, hüyange I yayeng me ngoh, hatüoke numan-e ü-ngaokeng jonma-a, numan ü-yayeng me ngohlak. 11 “Ü-mongmeipu numan me ngohlak, hüyange tüopa mongmei wangngoilak jingne, Taowe numante tüolan ngao yangki. 12 Hatüo ü-ngaokeng Taowe numante hangke ken, hüke numan teikenyah. 13 Kahta jawe yoi shümpa jingne üyin phünne phapu tokte üyongpa kenpu hango yenang. 14 Taowe numante phapu ngaokeng numan-e lingma-a, numan ü-shümpalan. 15 Taowe shaaji numante shaoshanpa she yenyik; hangjingne yoi nokpupawe hanghe ling hatüo shaoshanpawe yeshing. Hüyangpoi Taowe numante shümpa she nyiknang, hangjingne Üpa mepu Taowe hanghe jai üshei Taowe numante iyangki. 16 Numan-e Tao leye ngaipu ne yeje, hüyangpoi Taowe numan leye ngai, hüyange numan taiye ülick licklak jingne hüyange ülick ngohlak jingne Taowe numan le. Tüokhei numan-e ü-min me Üpate hangyin yulakei, Iye numante yahphalak. 17 Hatüo Taowe numante ngaokeng phanang: Jawe ja te teikenpu ngohyah.”
Kahtoknyuwe Nupu
18 “Numante kahtoknyuwe nupu ne mengma-a, üte üwangne nuyangpu she numan-e shingyah. 19 Numan kahtoknyu jingne mengma-a, kahtoknyuwe I jingte kenhah shepu. Hüyangpoi kahtoknyu mepu Taowe numan lenang, hüyange numan kahtoknyu jing yeje; tüokhei kahtoknyuwe numante nunang. 20 ‘Shaoshanpa ja I nokpu phei sheyongpu yeje;’ she Taowe ipu teihtüoyah. Iman-e üte shaoshi ne tamma-a, iman-e numante-o shaoshi tamphalak; iman-e ü-ngao jai ma-a, iman-e numante-o jai phalak. 21 Hüyangpoi ümin jingne iman-e numante tüo lili lingphalak, hangjingne Tao shonpupa iman-e yeshing. 22 Tao peiye imante yengao shihma, iman ünu yengoh hahshepu. Hüyangpoi sha-a iman ünu jingne tailak lam yenang. 23 Aowe üte nunang, Üpate-o nunang. 24 Aowe-o yelingpu toi iman yo me Taowe yeling shihma-a, iman ünu yenanghah shepu; hüyangpoi iman-e ütoishao ngeyangki hüyange Üpa hüyange Tao moini te nu. 25 Hüyangpoi iman-e jajangjawe üte nu, she ngaokeng me nyanne ngohpu ngao ngailak jingne tüo ngainang. 26 “Hüpoi aope jampupa peilakeih, ütingpa yaha ao Üpa mepu pei; ao Taowe numante Üpa mepu shon, Iye üjingne saki phakülak. 27 Hüyange numane-o ü saki ne menglak hangjingne numan-e ü-phei üwangne muh ngohyangki.”
1 “Numan leamme taipu mepu yinlak jingne Taowe numante tüoyin ngaoyangki; 2 Iman-e numan synagogue mepu teiphalak: Eiyang, aowe numan toilakei, Iye Kahwang toi lingnang she teihlak hipak peiküki. 3 Iman-e Üpa jeyah yejema-a Tao jeyah yeshingpuwe tüoyin iman-e linglak. 4 Hüyangpoi aope tüoyin ngailak jingne hipak peilakeih, tüolan jingne Taowe ngaopha yangki she numan-e teihtüolak jingne Taowe tüolan ngao numante inang. “Üwangne muh taowe numante tüoyin ye i, hangjingne Tao numan phei ngoh.”
Yaha Üjao Toishao
5 Hüyangpoi Tao sha-a aowe Tao shon I tangte tailak. Hüyange numan aowe-o “Nang hang taiki?” she yetong; 6 hüyangpoi Taowe numante tüoyin ngaoyangpu jingne, numan mongjang mongmenge maateki. 7 Hüyangpoi Taowe numante üting inang: numante meilak jingne Tao taipu shemei, hangjingne Tao yetaiküma-a, numan tangte jampupa yepeikülak; hüyangpoi Tao taima-a, Taowe numan tangte I shonlak. 8 Aope I peilakeih, Iye kahtoknyu ünu jeng hüyange khakshupu hüyange ngaophünpu saki phalak; 9 Hüyange ünu jeng hangjingne iman-e khakshupu jingne üte üting yelak; 10 hangjingne Tao Üpa tangte tainang hüyange numan-e shaaji Tao ye-ngelak; 11 hangjingne tüopa kahtoknyu wanglam lampalan ngao phünyangki. 12 “Taowe numante yeonge ilak ngohnang, hüyangpoi numan-e tüopa sha-a yenün oklak. 13 Hüpoi aope I, ütingpa Yaha, peilakeih Iye ütingpa lam üshei me woiphalak: hangjingne Iye yoi wong phei yengaolak, hüyangpoi Iye hanghe jai Iye ngaolak, hüyange ngoikülak toi Iye numante iphalak. 14 Iye Tao müktishiwa tamlak hangjingne Iye numante hanghe ngaolakei Iye üjing hanghe ngoh tüomepu yah lak. 15 Üpa me hanghe ngoh üshei üjing; tüokhei Taowe iyangki Iye üjing mepu yahlak hüyange numante iphalak.”
Mongmenga Mongmeipune Lüplak
16 “Hipak ütenja ngohyange shaaji numan-e Tao ye-ngelak; hüyange tüophei me hipak üten ja ngohyang phei me numan-e Tao ngelak.” 17 I pinlan ütamme hüke teitonge i, “ ‘Hipak üten ja ngohyange, numan-e Tao ye-ngelak; üne-o hipak ütenja phei me numan-e Tao ngelak? Hangjingne Tao Üpa tangte tainang;’ hatüo Iye hangte leppune ipu shi?” 18 Tüokhei iman-e i, “ ‘Hipak ütenja ngohyange’, Iye hatüo hanghete leppu? Iye hanghe ngaopuweih teman-e yeshing!” 19 Iman-e Ite tonghupu Jesuwe shing, hüyange imante i, “Numan pa me hanghe jeng teitongpu shi? Taowe numante ‘Hipak ütenja ngohyange numan-e Tao ye-ngelak; üne-o hipak ütenja ngohyange numan-e Tao ngelak,’ she iyangpu jingne hei? 20 Üting tingha me Taowe numante ipha ning, numan-e shaplak hüyange yoonglak, hüyangpoi kahtoknyuwe mongmeilak; numan-e mongmenglak, hüyangpoi numan mongmeng mongmei ne lüplak. 21 Aope sheko jawe moipai ne hipak ngoi, yha mongmeng nang; hangjingne yha shaoshilak hipak ngoipei; hüyangpoi aope naha wangngai nge, yhawe yoi shaoshipu pemah nang, hangjingne nahaja kahtoknyu wangngai ngepu jingne yha mongmeinang. 22 Numan-o sha-a mongmenge ngoh nang; hüyangpoi Taowe numan nishe leilak, hüyange numan mongjang mongmeilak, hüyange aowe-o numan mepu mongmei yah yeteilak. 23 “Tüonyih numan-e üte hango yetonglak. Üting tingha me Taowe numante ipha ning, numan-e Üpate ü-min me ülam ja nehoi tongma-a hatüo Iye numante yahphalak. 24 Sha-a ngoipu mongme numan-e ümin me hango mantong (manyu) yutüoh hüyange numan-e tüolak, tüome numan mongmei wangpu oklak.”
Kahtoknyu Tangme Okpu Ngepu
25 “Taowe numante ngaoleppu me tüolan ngaoyangki. Hipak ja peiküki aope Taowe numante hüke yengaolak, hüyangpoi Taowe numante Üpa jeng ngaiphaih-e ilak. 26 Tüonyih numan-e ü min me yulak, hüyange numan min me Taowe Üpate yupha ning she Taowe ye i. 27 Hangjingne Üpa Iye numante kennang, hangjingne numan-e üte ken hüyange Tao Kahwang mepu pei she ütinglak. 28 Tao Üpa mepu ngai, hüyange Tao kahtoknyu te peiyangki. Üne-o Taowe kahtoknyu tüoh nang hüyange Tao Üpa tangte tainang.” 29 I pinlanne i, “Leiyah! Sha-a nange leppume yengaope, ngaiphaih-e ngaonang. 30 Sha-a nange khongküm shingnang she toman-e shingnang, hüyange aowe-o nang te tonglak wongpong ne yeje; tüo kaiye nang Kahwang mepu pei she toman-e jan.” 31 Jesuwe imante jan, “Sha-a numan ütinglak nangkü a? 32 Leitüoh, hipak ja peiküki, hüyange peiteki, aope numan, yoi yoi ching te jaja yanlakei, hüyange ü-shaha tüohlak: hüyangpoi ü-shaha ne yejelak, hangjingne Üpa ü-phei ngoh nang. 33 “Ü-phei numan chingmei ngohlak jingne, Taowe numante tüoyin, ngaonang. Kahtoknyu me numan shaoshilak. Hüyangpoi wongnang yah, Taowe kahtoknyu okyangki.”
Jesuwe Yoi Pinlan Jingne Yop
1 Aope Jesuwe tüolan ngaoyapeih, tüophei me Iye wangdang yete nganne lei hüyange i, “Opa, hipak ngoiteki, nang Hawe nang müktishiwa tamlak ne nang Ha müktishiwa tamtüoh; 2 shaaji nange Ite phayangpu üshei te jintepu üyin phalak jingne, kahta üshei tangme nange Ite wongpha. 3 Hüyange hatüowa jintepu üyin, iman-e nang shaha ütingpa Kahwang she shinglak, hüyange nange ao shon tüopa Jesu Khrista. 4 Nange üte lingne tampu toi shopu kaiye kahtoknyu me Taowe nang müktishiwa tamyangki. 5 Tüokhei sha-a O Opa! Kahtoknyu manling wante nangphei ngohwante Tao hanghe müktishiwa ngoh hatüo müktishiwa nange yoi phei Tao müktishiwa tampha. 6 “Kahtoknyu kahtalan aoyin nange üte pha, imante Taowe nang min ütahte ngaitam. Iman-a nang jing, nange iman üte pha, hüyange iman-e nang ngao angnang. 7 Sha-a nange üte pha yangpu üshei nang mepu pei she iman-e shing; 8 hangjingne nange üte phapu ngaolan Taowe imante pha, hüyange tüolan iman-e yah, hüyange Tao nangmepu pei she iman-e ütingme shing, hüyange nange Tao shon she iman-e ütinglak.” 9 Taowe iman jingne hei yopnang. Taowe kahtoknyu jingne yeyop, hüyangpoi aoyin nange üte pha, hangjingne iman-a nang jing. 10 Üjing üshei nang jing hüyange nang jingne ngohpu üshei üjing, hüyange iman me Taowe müktishiwa yangki. 11 Tao shaaji kahtoknyu me yenanglak, hüyangpoi iman kahtoknyu me, hüyange Tao nang tangte peinang. Üjaopa Opa, nange hangyin üte pha, nang min me iman angtüoh, hümme imane-o teman kih ja ne menglak. 12 Tao aope iman phei ngoh, nange hanghepa üte pha, Taowe nang min me iman angyangki, hüyange Taowe iman yomyangki, hüyange ngaolai ütahte ngailak jingne mahlak jingne nyingyangpu ha tokte kaiye ao-o yemah. 13 Sha-a Tao nang tangte peinang, hüyange Taowe tüolan kahtoknyu me ngaonang tüome nakshih iman me wang ngoine tampu ü-mongmei ngohlak. 14 Taowe imante nang ngao phayangki, hüyange kahtoknyuwe imante nuwe tam, hangjingne Tao kahtoknyu jing yejepu kih iman-o kahtoknyu jing yeje. 15 Kahtoknyu mepu iman yahteilak jingne Taowe nangte yoppu yeje, hüyangpoi nange iman ümengpa mepu tükyah. 16 Tao kahtoknyu jing yejepukih, iman-o kahtoknyu jing yeje. 17 Ütingpa te iman phünne phatamshi. Nang ngaowa üting. 18 Nange Tao kahtoknyu te shonpukih, Taowe-o iman kahtoknyute shonyangki. 19 Hüyange imane-o ütingpa te phünne phatamlak jingne, iman jingne Taowe ü-nying nyingke phünne phayangki. 20 “Taowe hatüolan jingne shaha yeje, hüyangpoi iman ngao kaiye aoyinne üte ütinglak iman jingne yopnang. 21 Nang kih-e, iman üshei ja ne mengtamshi; Opa, nang üme hüyange Tao nang me, hangjingne nange Tao shon she kahtoknyuwe ütinglak lak jingne, iman-o teman phei ngohne tamshih. 22 Teman hangke ja ne ngoh hüke iman-o ngohlak jingne, nange üte phapu müktishiwa Taowe imante phayangki! 23 Tao iman me hüyange nang üme, nange Tao shon she kahtoknyuwe shinglak jingne, hüyange nange üte hangke ken hüke nange imante-o ken she shinglak jingne iman ja ne manmeng manmeng wang ngoiye tamshih. 24 “Opa, Tao ümeken me ngohlakei tüoken me ngohlak jingne, nange üte hünghao ne phapu tüolan kahta ü-phei ngohne tamhunangki, hümme nakshih kahtoknyu lingshao me nange üte kenpu jingne phapu ü-müktishiwa iman-e ngelak. 25 Üjaopa Opa, kahtoknyuwe nang manshing, hüyangpoi Taowe nang shingteki, hüyange tüolan kahtawe nange Tao shon she shingteki. 26 Taowe imante nangmin shingne tamyangki hüyange shingne tamlak, hümme nakshih nange üte kenpu iman me ngohpu oklak, hüyange Tao iman me ngohlak.”
Jesu Lowe Tam Hüyange Phopu
1 Aope Jesuwe tüolan ngaowe sho, yoi pinlan phei Kidron yengtuh kaiye tai. Tüoye me pesha ja ngoh, hüyange I hei yoi pinlan tüopa te ong. 2 Sha-a Judas, aowe I lowetam, Iye-o tüopa nyoi shinge ngoh hangjingne Jesuwe yoi pinlan phei yelakpe tüopa me hüowe ngoh. 3 Judaswe kengphet hei ngengpa üjenglan mepu ütam hüyange Phariseelan, woiyange vüntük, ayeng hei yonglah jonyange woipei. 4 Hüwante Jesuwe Ite peingoilak khongkümpu shing, shaoyete ngai hüyange imante i, “Hanghe jingne numan-e ao yampu shi?” 5 Iman-e Ite jan, “Nazareth mepu Jesu.” Iye imante i, “Tao I.” Judas, aowe I lowe tam, I-o iman phei yonge ngoh. 6 Aope Jesuwe imante i, “Tao I,” iman tokphei yete shin ye hüyange kahtok me haowe ta. 7 Tüokhei Iye imante nishe tong, “Hanghe jingne numan-e ao yampu shi?” Iman-e i, “Nazareth mepu Jesu.” 8 Jesuwe janne i, “Tao I she Taowe numan te iyangki. Tüoyangpoi numan-e Tao yampune mengma-a, tüolan kahta taine tamtüoh.” 9 “Opa, nange üte phayangpu ja nehoi Taowe yemahtam,” she ngaolai me Iye iyangpu ütahte ngailak jingne Iye i. 10 Hüwante Simon Peter ao me yanglow ngoh, teakke yah, ütahpa ngengpa rhapa te müt hüyange I yakjah ye na lange win. Tüopa rhapa min Malkhas ngoh. 11 Jesuwe Peterte i, “Yanglow shankhong (yangleaplak) me leaptüoh. Üpawe üte phayangpu wan Taowe yeyinglak a?”
Annas Sheshaome Jesu
12 Tüokhei iman woipa phei kengphetlan hüyange Jehudi yompalanne Jesu pho. Ite sha, 13 hüyange üwangne iman-e I Annas ao Kaifas üküo, tüowangpe ütahpa Ngengpa ne ngoh Itangte yahtei. 14 Kahtalan jingne kahta ja lipu meilak she Jehudilante Caiaphaswe konphawe ngoh yangki.
Peter Jesu Yejan
15 Simon Peter hüyange ülao pin ja Jesu pheite woi. Tüopa pin ütahpa ngengpawe shinge ngoh, hüyange I ütahpa ngengpa nokshüm te Jesu phei ong. 16 Hüyangpoi Peter nokshao me tafün shongme yonge ngoh. Tüokhei ülaopa pin, ao ütahpa ngengpa phei teishingpu ngoh, nokshaote yu hüyange taten me ngohpu sheko phei ngao, hüyange Peter woi in. 17 Taten me ngohpu yhawe Peterte i, “Nango tüopa kahta pin yo me ja a?” Iye i, “Tao yeje.” 18 Sha-a rhapalan hüyange yompalanne vünhan phei vün jak hangjingne wangshümpu ngoh hüyange iman vünlüm meiye yonge ngoh. Peter-o iman phei vünlüm meiye yonge ngoh.
Ütahpa Ngengpawe Jesute Tong
19 Ütahpa ngengpawe Jesute I pinlan hüyange I nyüopu jeng tong. 20 Jesuwe Ite jan, “Taowe kahtoknyu te ngai phai-e ngaoyangki. Taowe jinte synagogue me hüyange khümjing me, ümeken me Jehudilan jem tüoken me nyüoyangki; hüyange Taowe lowe hango yengao. 21 Hangne nange üte tongki? Taowe imante hanghe iyangki, üte jaipalante tongtüoh. Taowe hanghe i iman-e shingnang.” 22 Aope Iye hatüo i, yonge ngohpu yompa jawe Jesu sheta te yakpha leiyange i, “Ütahpa ngengpa te nange ngao hüke janlak a?” 23 Jesuwe Ite jan, “Taowe püohwe ngaoyangküma-a, püohpu saki yahkei; hüyangpoi shuwe ngaopu ne mengma-a, hangne üte shet ki?” 24 Tüophei me Annaswe shayange muh ütahpa ngengpa Kaifas tangte I shontei.
Peterwe Jesu Nishe Yejan
25 Sha-a Simon Peter vünlüm meiye muh yonge ngoh. Iman-e Ite i, “Nango I pinlan yo me ja a?” Iye yejanpe lanne i, “Tao yeje.” 26 Ütahpa ngengpa rhapa yo me ao pheipu na Peterwe lange win Inok kahta rha yo me jawe i, “Taowe nang I phei pesha me ye-nge a?” 27 Peterwe üne-o yejan, hüyange tüophei jamshe awpong ko.
Pilate Sheshaome Jesu
28 Napning shomme, iman-e Kaifas mepu Jesu ahng gho te woipei. Lünt me ye-ompe Yinyepu mo hahpu oklak nanjingne iman ahngnok sa te ye-ong. 29 Tüokhei Pilate iman tangte yu hüyange i, “Hatüo kahta phei tüi-e hangheyin püohpushe numan-e yah pei ei?” 30 Iman-e Ite jan, “Hatüo kahta ümeng lingpupa ne yejeshihma-a, toman-e nang tangte I yah yepei hahshepu.” 31 Pilate imante i, “Numan nying nyingke I teiyah, hüyange numan ngaokeng me hangke ngoh hüke phünyah.” Jehudilanne Ite i, “Kahta li ne tamlak wong toman te yepha.” 32 Hatüowa hanghe lipu me I lilak Jesuwe ngaoyangpu ütahte ngai. 33 Pilate ghote leihye, Jesu te nyik hüyange Ite i, “Nang Jehudilan ahngpa a?” 34 Jesuwe jan, “Hatüowa nange shingpu ipu heiya yejema-a ülao lanne nangte ü-jeng i ei?” 35 Pilate jan, “Tao Jehudi a? Numan jat hüyange ngengpa üjenglanne üte nang phünne phanang. Nange hangling ei?” 36 Jesuwe jan; “Ü-ahngnyoi tüopa kahtoknyu mepu peipu yeje. Ü ahngnyoi tüopa kahtoknyu mepu ne mengshihma-a, Jehudilante Tao phünne yephalak jingne ü-shaoshanpalan-e hok hah shepu; hüyangpoi, hüke ü ahngnyoi tüomepu peipu ne yeje.” 37 Pilate Ite i, “Tüokhei nanga Ahng a?” Jesuwe janne i, “Taowa Ahngja she nange inang. Ütingpa jingne saki phane Tao kahtoknyu te pei hüyange puh she Taowe inang. Moilan aoyin me ütingpa ngoh ü-ngao jainang.” 38 Pilate Ite i, “Üting hanghe shi?” Aope Iye tüo ngao i, nishe Jehudilan tangte I yu hüyange imante i, “Taowe Ite kanglak ne ümeng hango ye-nge; 39 hüyangpoi numan wanglam kih-e Yinyepu mo hipak me numan jingne taowe kahta ja yinlak ngohnang. Jehudilan Ahngpa numan jingne lanne tamlak numan ü-phei mongya?” 40 Iman-e üngwünne hüke i, “I yeje hüyangpoi Barabbas!” Barabbas kuhlang ja ne ngoh.
Jesu Line Tampu
1 Tüophei me Pilate-e Jesu woipei hüyange shüt; 2 hüyange kengphetlanne ühuh pheipu shaoshaoh ling hüyange I shangme shaoh ne tam, hüyange iman-e Ite takmonnye inne tam. 3 I sheshao me iman peiye hüke i, “Jehudilan Ahngpa meiye ngohyah!” Hüyange I shongte wenyange iman-e Ite yakpha khüw leitam. 4 Pilate üne-o nokshaote yu hüyange Jehudilante i, “Leitüoh, Ime taowe kanglakne ümeng hango ye-nge she numan-e shinglak jingne taowe numante I yüonang.” 5 Tüokhei, huh shaoshaoh shaoh hüyange takmonnye inyange Jesu nokshaote yao. Pilate imante i, “Leitüoh, hatüome numan kahta.” 6 Aope ngengpa üjenglan hüyange yompalanne I nge, “I tangpem me taktüoh! I tangpem me taktüoh!” she iman-e üngwün. Pilate imante i, “Numan nying nyingke I yayah, hüyange I tangpem me takyah. Hangjingne taowe Ite ümeng pholakne hango ye-nge.” 7 Jehudilanne Ite janne i, “Toman-e ngaokeng ja ngohnang, hüyange ngaokeng kih-e I lilak wongpong; hangjingne Iye yoi nying nyingke Kahwang Üha ne meng.” 8 Aope Pilate tüopa ngao jai I yeonge nyam, 9 hüyange I gho te leihye, hüyange Jesute i, “Nang ü-mepu peipu shi?” Jesuwe Ite yejan. 10 Pilate Ite i, “Nange ü-phei yengao hupu a? Üme nang yintamlak wong hüyange üme nang tangpem me taklak wong ngohnang she nange yeshing a?” 11 Jesuwe jan, “Ütang mepu wong nangte yepha shihma-a, nange üte ngaolak wong hango yenang hah shepu. Tüokhei aowe nangte Tao phünne phayapeih I ünu sheyongpupa.” 12 Tüopa jaiyange Pilate I yinhuwe teih. Hüyangpoi Jehudilanne üngwün, “Nange tüopa kahta yintam küma-a, nanga Kaisar shümpa ne yeje! Aowe yoi ahngne menge ngaolakei Kaisar phei tüi-e wepa ne mengnang.” 13 Aope Pilate tüolan ngao jai Iye nokshaote Jesu yüo, hüyange “Longkon, Hebrew ngao me Gabbatha she nyikpu ngaophün shotjing me shotne tam.” 14 Hatüowa Yinyepu mo nyihshao, hüyange heeitam hahju hipak ne ngoh. Iye Jehudilante i, “Leitüoh, numan Ahngpa tüome!” 15 Iman-e üngwünne i, “I toitüoh, I toitüoh, I tangpem me taktüoh!” Pilate imante i, “Taowe numan Ahngpa tangpem me taklak a?” Ngengpa üjenglanne janne i, “Toman-e ahng yenang hüpoi Kaisar.” 16 Tüophei me tangpem me taklak jingne Iye imante yüowe pha.
Jesu Tangpem Me Tak
Tüokhei iman-e Jesu phünne yah, 17 hüyange Iye yoi tangpem paiyange, “Shangwaan kahmük,” Hebrew ngaome Golgotha she nyikpu kahmük ja te ong. 18 Tüome iman-e I tangpem me tak, hüyange I phei kahta ni, moini yekaote japong hüyange Jesu üwo me she tak. 19 Pilate-e ngaoja nyan hüyange tangpem me khüm. Nyanpuwa hüke ngoh, “Nazarethlan Jesu, Jehudilan Ahngpa.” 20 Jehudilan maapuwe nyanne ngohpu iye lei, hangjingne Jesu tangpem me takpu nyoi chingnyu phei owe ngoh, hüyange hatüowa Jewish, Latin hei Greeklan ngaome nyan. 21 Tüokhei Jehudi ngengpa üjenglanne Pilate te i, “Jehudilan Ahngpa,” she tah nyan: hüyangpoi Iye i, “Tao Jehudilan Ahngpa.” 22 Pilate jan, “Taowe hanghe nyan, taowe nyanyangki.” 23 Aope kengphetlanne Jesu tangpemme tak-e sho, iman-e I inkhek yah hüyange üphong peli ne iman-e tam, kengphetlan lep iye meitam japong yah. Iman-e phakshao-o yah; hüyangpoi hatüowa shüngpu üpong yenangpe, shangmepu ya ngoiye üpong yenangpe ja ne takpu ne ngoh. 24 Tüokhei iman-e hüke teingao, “Hatüowa tah tanghah, hüyangpoi ao jingne menglakei shinglak jingne phongyenge leihah.” Ngaolai ütingme ngaitamlak jingne hatüo ling: “Iman-e ü-nyemo iman yo me tam hüyange ü-phakshao jingne phongyeng.”
Hatüowa kengphetlanne ling.
25 Sha-a Jesu ünyu, Inyu ü-nao, Klopas sheko Mary hüyange Mary Magdalene iman I tangpem shongme yong ngoh. 26 Jesuwe Inyu nge hüyange Iye kenpu pinlan yha phin me yonge nge, hüyange Iye Inyute i, “Sheko leitüoh, nangha tüome.” 27 Tüophei me Iye pinte i, “Leitüoh, nangnyu hatüome.” Tüohipak mepu muh pinne yoinok te yha woitai.
Jesu Lipu
28 Jesuwe shing, shaaji toi üshei tümteki. Ngaolai ütahte ngailak jingne Iye hüke i, “Tao yengle nangki.” 29 Tüome yushi maapu tük ja ngoh. Iman-e sheakwan ja maawe yushi shokyange hyssop lenglao me sha hüyange I ju te huhtam. 30 Aope Iye yushite jüp nyüo hüyange i, “Üshei tümteki.” Tüophei me I ngüm khuhta hüyange I yaha teine tam.
Jesu Hempate Ngouwe Tüp
31 Hatüowa mo jingne tümpu hipakne ngoh. Tüokhei Jehudilanne Pilate te tangpem me toipalan ya phaklak, hüyange mang yahteilak jingne tong. Hatüowa iman wanglam Sabbath me tangpem me ye-anglak, hangjingne Sabbath nyih üyong ne ngoh. 32 Tüokhei kengphetlan pei hüyange üwangpa kahta yaphak hüyange Jesu phei takpu japa jingo phak. 33 Tüophei me iman Jesu shongte pei, hüyange aope iman-e I shaaji liteiye nge, iman-e Iya yephak. 34 Hüyangpoi kengphet yo me jawe I hempate ngouwe tüp, hüyange hüwante muh iy hei yeng ngai. 35 Hatüowa aowe nge Iye phapu saki, numane-o ütinglak lakshe teih-e phanang, hüyange I saki üting ngohnang. Iye üting inang she shingpu ja ngohnang. 36 “I waan ja nehoi yephaklak,” she ngaolai me iyangpu ütahte ngailak jingne, tüolan ngaiyangki. 37 Üne-o ngaolai ülao me inang, “Iman-e aote tüp iman-e Ite leilak.”
Jesu Mupu
38 Tüophei me Arimathea mepu Joseph, ao Jesu pin ne ngoh hüyangpoi Jehudilan te nyampu kaiye lowe ngoh, peiye Jesu mang yahlak jingne Pilate te tong; hüyange Pilate o-ngao pha. Tüokhei I pei hüyange I mang yahtai. 39 Nicodemus, ao wangnyak me üwangne I tangte pei, I-o üpe meipu yingwangti hei üpe pheipu sü nyütpu tok gho ja nanjing phei peingoi. 40 Tüokhei imniye Jesu mang yah hüyange Jehudilan wanglam kih-e üpe ümei pho hüyange nyekhaiye yout. 41 I takke toipu ken me pesha ja ngoh, hüyange tüopa pesha me ao-o man mupu mangkoksa üla ja ngoh. 42 Tüokhei hatüo Jehudilan mo jingne tümpu nyih ne menge, hüyange mangjong ü-o me ngoh ipute, iman-e Jesu tüome mu.
Mangjong Ükeng
1 Hat me üwangpa nyih napning shomme, pipom ne ngohwante, Mary Magdalene mang jongte pei hüyange mangkoksa mepu long yahtei teiye nge. 2 Tüokhei yha phette tai hüyange Simon Peter hei ülao pin ao te Jesuwe ken iman tangte pei, hüyange imante i, “Iman-e mangjong mepu Youngwanpa yahtei teki, hüyange iman-e ümeken me ang toman-e yeshing.” 3 Tüokhei Peter hei ülao pin tümme ngai hüyange mangjong yete wen. 4 Moini jamshe phet hüyangpoi ülao pin Peter shaoleiye phet hüyange mangkoksa te shonge ngoi. 5 Iye ngomme lei hüyange nye-ükhai phongyange nge, hüyangpoi I ümongte ye-ong. 6 Simon Peter I pheite woi pei, hüyange mangkoksa te ong; hüyange Iye nye ünyai phongyange nge, 7 hüyange hanghepa inkhek I shang me lümyange ang nyekhai phei yeje, hüyangpoi ülao ken me nüpyange nge. 8 Tüophei me ülao pin, ao mangkoksa te üwangne pei, I-o ong, Iye nge hüyange ütinglak; 9 hangjingne ngaolai me I lipu mepu yange yelak she ipu ngao iman-e yeshing. 10 Tüophei me pinlan nokte nishe leihye.
Mary Magdalene Tangte Jesu Ngai
11 Hüpoi Mary mangjong me yongyange shappe ngoh. Yha shapjang shappe mangkoksa te lei, 12 hüyange Jesu angjing üshang yeme ja, hüyange üya yeme ja she wangdang shongmokpalan ni inkhek üheng inyange shotte nge. 13 Iman-e yhate i, “Sheko, nang hangne shappu?” Yhawe imante i, “Hangjingne iman-e ü-Youngwanpa yahteiteki, hüyange iman-e ümeken me ang taowe yeshing.” 14 Aope yhawe tüo ngao iye sho, yha leppe ye hüyange Jesu yongyange nge, hüyangpoi hatüowa Jesu she yhawe yeshing. 15 Jesuwe yhate i, “Sheko, nang hangne shappu? Nange ao yampu shi?” Iya pesha hampa she yhawe teihyange Ite i, “Üyongpa, nange I yahteiyangpu ne mengma-a, nange I ümeken me ang üte ipha, hüyange taowe I yahteilakei.” 16 Jesuwe yhate i, “Mary!” Yha lüppe ye hüyange Hebrew ngaome Ite i, “Rabboni!” (leppu konnyüopa). 17 Jesuwe yha te i, “Üte tahjon, hangjingne Tao Üpa tangte man ong; hüyangpoi ü-jeihei naolan tangte taiye imante itüoh, Tao Üpa hüyange numan Üpa, ü-Kahwang hüyange numan Kahwang tangte ongnang.” 18 Mary Magdalene tai hüyange pinlante i, “Taowe Youngwanpa ngeyangki,” hüyange Iye tüolan ngao iyangki she yhawe imante i.
Yoi Pinlan Tangte Jesu Ngai
19 Hat tepu üwangpa nyih, tüonyih ünpongme, Jehudilante nyamteiye, pinlan ngohpu nok taküpyange ngoh; Jesu pei hüyange iman yo me yong, hüyange Iye imante i, “Numan phei chingmei ngohtüoh.” 20 Aope Iye tüopa ngao i, Iye imante I yak hüyange I hempa hüo. Aope iman-e Youngwanpa nge pinlan mongmei. 21 Jesuwe imante nishe i, “Numan phei chingmei ngohtüoh. Üpawe Tao hangke shon, hüke Taowe-o numan shonnang,” 22 Aope Iye hatüo ngao Iye imante lüoyu hüyange imante i, “Yaha Üjao yahtüoh. 23 Numan-e ütamte ünu winma-a, iman ünu wenyangki; ütam ünu numan-e tükke angma-a, iman ünu tükke angnang.”
Jesu Hüyange Thomas
24 Sha-a Thomas, nipet she nyikpu, penme ni yo me ja, Jesu peiwante iman phei yengoh. 25 Ülao pinlanne Ite i, “Toman-e Youngwanpa ngeteki.” Iye imante i, “I yakme yanlag mee hüyange yanlag meeme üyaklan mantüp, hüyange I hempa meete mantüp mantüp, taowe aope-o üting minlak.” 26 Nyihtet ngohyange I pinlan üne-o noksa me ngoh, hüyange Thomas iman phei ngoh. Taküp yange ngoh, hüyangpoi Jesu pei hüyange iman yo me yong hüyange i, “Numan phei chingmei ngohtüoh.” 27 Üneye Thomaste Iye i, “Nang yaklan tüome wenkei hüyange ü-yakte leiyah; nang yaklan tüome peiye ü-hempa te tüppe leihu; üting yelakpe tahngoh, hüyangpoi üting lakyah.” 28 Thomas Ite janne i, “Üyongpa hüyange ü-Kahwang.” 29 Jesuwe, Ite i, “Nange Tao ngeyange ütinglak nangkü-a? Aoyinne ye-nge hüyangpoi ütinglak iman mongmeilak.”
Tüopa Laitep Wongpong
30 Hatüo laitep me yenyanpu, kahnyingwüngha füo maawe Jesuwe I pinlan phei ling; 31 hüyangpoi numan-e Jesuwa Messiah, Kahwang Üha, she üting laklak jingne, hangjingne numan-e ütinglakma-a, I min me numan-e üyin tüolak jingne, hatüo yin nyanyangki.
Pinlan Nyit Sheshaome Jesu Ngai
1 Tüophei me Jesuwe üne-o Tiberia yengching me pinlan tangte hüo. Iye yoi nying nyingke hüke hüo. 2 Simon Peter, Nipet she nyikpu Thomas, Galilee mepu Kanalan Nathanael, Zebedee ühalan hüyange ülao pin ni iman jamme ngoh. 3 Simon Peterwe imante i, “Tao nyah omne tainang.” Iman-e Ite i, “Toman-o nang phei taiküki.” Iman yayong hüyange iman lisheng te ong, hüyange tüoya iman-e hango ye-om. 4 Wanghe ngaipu phei jamshe Jesu yengnah me yong, hatüowa I she pinlanne yeshing. 5 Jesuwe imante i, “Hayimlan (shümpalan), numan-e nyah omme ngohya?” Iman-e Ite janne i, “Yenang.” 6 Iye imante i, “Lisheng yakjah yeme numan-e shaan shaitüoh, hüyange numan-e ütam tüolak.” Tüokhei iman-e shai, hüyange sha-a nyah jamloi ompu nanjingne iman-e shuwe yepu ye-ok. 7 Pin yo me ja ao te Jesuwe ken Iye Peterte i, “Hatüowa Youngwanpa yang.” Aope hatüowa Youngwanpa she Simon Peterwe jai, Iye nyeyah, hangjingne Iye khokke angyange ngoh, hüyange yengching te phet; 8 Hüyangpoi ülao pinlan iman shaan me nyah maawe küoyange, iman lisheng me ye hangjingne iman yengnah mepu meiyange yejai, hüyangpoi yakkong ghoni nanjing jaiye ngoh. 9 Aope iman yengnah ngoi vün pheipu vünhan hüyange tüo tangme nyah hei an nge; 10 Jesuwe imante i, “Numan-e sha-a ompu nyah ütam wenkei.” 11 Simon Peter lisheng me wen hüyange nyah üyong maawe küoyange yengnah te shaan shuiye ye. Gho ja denga me lüm ngoh; nyah teshinne ngohyapoi shaan yehit. 12 Jesuwe imante i, “Wenyah hüyange phong hahyah.” Hatüowa Youngwanpa she shinge, “Nang ao shi?” she tonglak pinlan yome aowe-o mong yeyong. 13 Jesu wenne an yah, hüyange imante pha, hüyange hüke muh nyah pha. 14 Hatüowa I lipu mepu yange yephei me Jesuwe pinlante lüm shepupa hüo.
Jesu Hüyange Peter
15 Aope iman-e phong hah sho Jesuwe Simon Peterte i, “John üha, Simon, tüolan üshei phei shenyei she nange üte kennang kü a?” Iye Ite i, “Üm, Youngwanpa, taowe nangte kennang she nange shing.” Iye Ite i, “Ünyeehalan paoyah.” 16 Nishe Iye Ite i, “John üha Simon, nange üte kenya?” Iye Ite i, “Üm, Youngwanpa, taowe nangte kennang she nange shingnang”. Iye Ite i, “Ü-nyeelan yomyah.” 17 Lümshe Iye Ite i, “John üha, Simon, nange üte kenya?” “Nange üte kenya?” she Iye Ite lümme tongpu jingne Peter mongmeng, hüyange Iye Ite i, “Youngwanpa, nange khongküm shingnang; taowe nangte kennang she nange shingnang.” Jesuwe Ite i, “Ünyee paoyah. 18 Üting tingha me Taowe nangte inang, aope nang naoshe ne ngoh, nange nang shenghit hit hüyange nang taihupu yete kem; hüyangpoi nang aope wupa ne meng, nange nang yak nolak hüyange ülao jawe shenghit hit phalak hüyange nange yemongpu yete teiphalak.” 19 Hatüo ngaopu kaiye hangkihpu lipuwe Iye Kahwang müktishiwalak tüopa hüo. Aope Iye tüopa ngao iye sho Iye Ite i, “Ü-pheite woikei!”
Jesu Hüyange Ülao Pin
20 Peter lüppe ye hüyange Jesuwe ao te ken tüopa pin woipu nge. Ao Youngwanpa mo hahwante I jakuh me nyengyange, “Youngwanpa, nang lowe tamlakpa ao shi?” she tongpupa ne ngoh: 21 Aope Peterwe I nge Iye Jesute i, “Youngwanpa, tüopa kahta hangke?” 22 Jesuwe Ite jan, “Tao manyu manyu I ngohne tamhupu ne mengma-a, nangte hangke lingpu? Nang ü-phei te woikei.” 23 Tüokhei tüopa pin yelilak she jeiheinaolan mongme tüopa ngao yan. Hüyangpoi Jesuwe I yelilak she Ite ye i, hüyangpoi, “Taowe tao manyu manyu, I tanne tamhuma-a, nangte hangke nangpu?” she i. 24 Aowe hatüolan jeng saki pha hüyange nyanne ang hatüowa pinne ngohnang; hüyange I saki üting she toman-e shing.
Shopu
25 Jesuwe lingpu ülao toishao maawe ngohnang; tüolan japhei me ja she nyanshihma-a, nyanpu laitep-e kahtoknyu nopu me nehoi yeshemlak she taowe teihnangki.