Rinkhu Pauna
1 Mupṭhun daat le pauna ava amda, ungta pauna ava Isowr tu kilṭhida, ungu pauna ava Isowr kurthuwk da. 2 Mma mupṭhun daat le Isowr tu kilṭhida; 3 Mma thu do mkheng nga seemda, ungta mdo seem thung ngi Mma ktaakki mdo seem do khat lee ame. 4 Mma thu rinkhu amda, ungu rinkhu ava dultimii tummi mar awng kurthuwk da. 5 Mar awng ava kjiingnu thu lengda, ungta kjiingnu ngi do khat lee pchaang me. 6 Isowr do arjun sii mmiing Johon tdit miilai khat amda. 7 Mma ngi mar awng hin sakhi piida, mleija Mma thu mii mkheng ngi mdo rin chaak nra, rinpaumin ava tummi arjungda. 8 Mma mar awng ava pme, pdainu mar awng ava sakhi kpiira kurjung. 9 Mii pum ktai leenni kleng rangki kindit mar awng ava dultipaam thu arjungda. 10 Mma dultipaam thu am dokda, ungta dultipaamma Mma thung ngi seemda, anto daat joso dultipaamva Mma dei me. 11 Mma ngi mdak kat ki inn thu arjungda, ungta Mma ava mmii rek kat va arlaang chme. 12 Pdainu Mma karlaang kcha, Mma miing krin kcha mii mkheng nga, Isowr naole mkurthut nraan rutan pii chlam da. 13 kṭou mii rek ava hii lei pme, mdit mata daksaa lei pme, mdit mata miilai do ngei lei pme, pdainu Isowr thung ngi kṭou. 14 Ungta pauna ava dulti miilai khat kurthuwk da, ungu nen narlak inni amda, plungnee leh kindit ti dim chda; nenni Mma laarnee dei chaan minnu, laarnee ava Mpah hinki Mchapa khdaat chrel ava. 15 Johon na Mma sakhi kurthuwk da, ungta owngda, “ ‘Nei kdil tha kurjung Mii ava nei kihinva klin langlang, mleija Mma nei kdu ngi ka am dok,’ dinu neiji kdo the ava hava.” 16 Ungta nen nkheng inna Mma plungnee thu, plungnee tunni plungnee tarlaan chaak in. 17 Mleija Mousi mpha thung ngi Nowlam piida; ungta plungnee leh kindit ava Jisu Khrista mpha thu kurjung. 18 Mpah awng ngi ka am Mchapa khat chrel ava hinni mdo tdet kma donle, Mpah kdei ku khat lee ame.
Baptis Kuptlot Johon Doparyaam
19 Ungta Jihudia rek ava ngi Jerusalem ki thiimpu rek leh Levi rek mhin vasii lamda, paukhewl lamda, “Nah ku ptida?” dida mtheen mpha thungki Johon rinpauminna hava. 20 Mma ngi karthe thuwda, mmava mat me, pdainu, “Neia Khrista pmaang,” dida. 21 Ungbi mmaanni mhin khewl lamda, “Ava mkurthuttu nah ku ptida? Nah Elijah pti mo?” Mma ngi theda, “Neia mma pmaang.” “Nah khulpu khat pti mo?” Ungbi mma ngi arthawngda, “Eme.” 22 Mmaanni mhin theda, “Ava mkurthuttu nah ku pti da? Neen mhai ksii rek hin kdo arthaan chaak nraan, nah mlei thu ku ping ngi kardi ptida?” 23 Mma ngi theda “‘Mukpu lamṭoira arjii,’ dida khulpu Isaijah ngi mdo the lulu ngi, neia kbowklaiji ko owng krowl khat ava ping.” 24 Tunva Pharisi rek do haisii mmaanni, 25 mhin khewl lamda, “Khrista akurthut ma, mdit mata Elijah ruk akurthut ma, mdit mata khulpu akurthut mau, talu leiji nangva baptis ado ptlot da?” 26 Johon ni mhin inni arthawngda, “Neiva dii tu kilṭhi ngi baptis kuptlot, pdainu naan arlakki krip rek thungki Khat ava naanni dei maan ti. 27 Nei kdil ṭoida kurjung Mma ava mkhukok rii daat mak klua kparthle pik ra nea kurhui chmaang.” 28 Hava nong nga Johon ni baptis muptlot lamthu, Jordon raalpha ngi mmun Bethania thu kthuwk.
Isowr Jao
29 Ungta mupduk nii ngi mhin Jisu karva slii deida, ungu theda, “Dultipaam thungki pnu klou pthii ra Isowr ki Jaonao ava asuwn! 30 ‘Nei kdil ṭoida kurjung Mma ava klin langlang, mleija Mma nei kdu ngi ka am dok,’ dinu kdo the Mma ava hava. 31 Nei kdak kat daat rukva Mma dei chmaang; pdainu Mma ngi Isreel mii rek hin mdo pandan nra, hava tummi neiva dii tu kilṭhi ngi baptis ado kuptlot in.” 32 Ungta Johon ni sakhi piida, “Parwaan ki pthla uṭhuw heppi arjungda Mma leen kchu neiji deinu. 33 Nei kdak kat rukva Mma dei chmaang; pdainu dii tu kilṭhi ngi baptis kdo ptlot rangki mju ksii Mma ngi kihin theda, ‘Pthla ngi arjungda mleen kchu ado dee hava Mma ngi pthla kchiir ri baptis ktlo ra.’ 34 Ungta Isowr Chapa tdit neiji deinu ava sakhi kpiik chaakka.”
Rukri reepki Jisu Siikhu rek
35 Ungta mupduk nii va Johon na msiikhu rek knii tu rip daat lamda; 36 Ungta mma ngi mche slii chunni Jisu suwda, ungu theda, “Isowr Jaonao asuw in!” 37 Msiikhu rek miilai knii ngi hava mdo the aryaa da, ungbi mmaanni Jisu dil ṭoi chlam da. 38 Jisu ngi mdil mkinlet thungta, mmaanni mdil mdo ṭoi slii lam deida, ungbi mhin inni theda, “Talu da ado thlaam inna?” Ungta mmaanni Mhin the chlamda, “Rabbi,” (mleija Chukpu) “Tva tha ka am pti da?” 39 Mma ngi mhin inni theda, “Arvaan, ungu asuwn,” ungta mmaanni arva lamda, ma amna dei lamda, ava nit va amṭhi lamda, mleija ṭhang sowm arveel kurthuwk da. 40 Johon do the aryaa da Mma dil kṭoi cha miilai knii thungki khat ava Simon Pitor upa Andrija. 41 Rukri ngi mma ngi mnaopa Simon pha da, ungu mhin theda, “Neenni (Khrista tdit) Masija kphaak chaak inna.” 42 Mma ngi Jisu ṭhi paphaak da, Jisu ngi mma suw thida, theda, “Nah Johon chapa Simon pti mo? Nang nga Siphas di nikdi.” (Mleija Pitor)
Jisu ngi Philip leh Nathaniel mdo Own
43 Mupduk niiva Jisua Galil tha vang nuwm da. Ungta Mma ngi Philip phada, ungu mhin theda, “Nei kdil aṭoi cha.” 44 Tunva Philip ava Andrija leh Pitor khuwpii Bethsaida ki kurthuwk da. 45 Philip pi Nathaniel phada, ungu mhin theda, “Mousi Nowlam thung ngi mdo the, ungta khulpu rek ruk va mdo kjit dok, Joseph chapa, Nasareth ki Jisu, neenni pha chaannu.” 46 Nathaniel li mhin theda, “Nasareth thung ngi do kṭha khat kthuwk rang mo?” Philip pi mhin theda, “Arva ungu asuw!” 47 Jisu ngi Mma hin Nathaniel karva slii deida, ungu mhin theda, “Isreel mii kat ava asuwn, mkarma nra ame!” 48 Nathaniel li Mhin theda, “Tak heppi nea ado tdee da?” Jisu ngi mhin arthawngda, “Philip pi ato own du ngi, kduwt ding ti ngi a am daat mpha thu Neiva ado kdee.” 49 Nathaniel li Mhin arthawngda, “Rabbi, Nah Isowr Chapa pti! Nah Isreel rek Kruwng ava pti!” 50 Ungbi Jisu ngi mhin arthawngda, “Mleija Neiji kduwt ding ti ngi ado kdee dinu kdo the leiji arin chaak mo? Havale hinva klin klin nong nang ngi dei nadi.” 51 Ungta Jisu ngi mhin theda, “Kindit, kinditti, Neiji ahin kthea, nang ngi parwaan kparvang, ungta Isowr Waantamsii rekki Mii Chapa leen kuhung kal ungu kurjung ṭum slii meek nang ngi dei nadi.”
Kana thungki Kphal
1 Ungta mnii kdumna nitti Galil thungki Kana thu kphal khat amda, ungu Jisu nuh rukka ava tha amdaat da; 2 ungta Jisu rukka msiikhu rek tu kphal ava thung ngi kowlla chlam da. 3 Rikrou dii mtlan dok thungta, mnuh ngi Jisu hin theda, “Rikrou dii thloi chlamme.” 4 Ungbi Jisu ngi mhin theda, “O snu, talu mtlot ṭhi nda? Nei ki ṭhang vei mlai.” 5 Ungta mnuh ngi sra owr rek hin theda, “Mma do the khim khai atlo in.” 6 Tunva lung ksowr truk thii lamda, mleija Jehudia rek kinditki kartleu nrang leiji ksowr ktaiji uwm som knii nii mdit mata som kdum dum luna. 7 Ungta Jisu ngi mhin inni theda, “Ksowr rekka dii apdim in.” Ungbi kiplee daatti pdim lamda. 8 Mma ngi mhin inni theda, “Tunva angṭhe alou inra kmaal supkchil rek hin vang sin in.” Ava leiji mmaanni lou lamda. 9 Kmaal supkchilli diia mpartem thungta, tunva rikrou dii kur owlda, ungu tva ki kthleng tdit dei lamme, (dii ksuwk sra owr rek va deida.) kmaal sup kchilli kphalpa ownda, 10 ungu mhin theda, “Mii khim khaiva rukri ngi rikrou dii makṭha themda; ungta mii rekki mneek prit thung ro ngi mjasee mdo them; pdainu tun kpha thung ngi rikrou dii kṭha thloi tlit daat tinu.” 11 Hava Galil ki Kana thung ngi ru kri reep ki titinna ava Jisu ngi tloda, ungu ava thu mlaarnee kandang da; ungu msiikhu rekki Mhin rin chlam da. 12 Hava dil tha Mma ngi Kaparnahum tha mnuh leh mnaopale ungu msiikhu rek tu kilṭhida sunda; ava tha mmaanni niikhuw kcheeng bong lamda.
Jisu ngi Luwbuk Inn tha Mhan
13 Jihudia rek ki taplaanna ava nai tekda, ungu Jisu ngi Jerusalem tha hangda. 14 Luwbuk Inn thu sil, jao, ungu uṭhuw rek kjur, ungta sum kparthleng rekki sumdowl mdolo in phada. 15 Luwbuk Inn thungki jao, sil ava riijei khat seemda rei pthiida, ungta sum kparthleng rek thiir sum ava ptlong pthii da ungu tebol la parlup parthel pthiida; rei pthii lamda. 16 Ungta uṭhuw rek kjur hin Mma ngi theda, “Hava lea alou pthiin, naanni Kpah Inn na sum dowl adolo naanni ktlo rome.” 17 “Nah Inn kuplung mlut reen leiji makchaa dok ra,” dida mdo kjit ava siikhu rekki bin phaak lamda. 18 Ava dilli Jehudia rekki Mhin the lamda, “Hava ado tlot naki titinna rek talu mti det naan di?” 19 Jisu ngi mhin inni arthawngda, “Hava luwbuk Inn ava ae krep da ungu nii kdum daat thung ngi prip nik di.” 20 Ava dilli Jihudia rekki theda, “Luwbuk Inn ava kum somplii lei truk klutti tsak, ungta Nangva nii kdum daat thung ngi prip namo?” 21 Pdainu Mmava luwbuk Inn ava mdaksaa mdo thena kurthuwk da. 22 Ava ngi mlei kurthuwk da, Mma ngi kdiyou thungki mrin kardel mpha thu, msiikhu rekki hava mdo the ava bin phaak lamda; ungta mmaanni Laaika leh Jisu dothe dok pauna ava rin chlam da. Jisu ngi Dulti Mii Nopa mdo Dee 23 Tunva Mma ava taplaanna kmaal mpha thu Jerusalem tha am daat da, Mma ngi titinna rek mdo tlot mdo dee lei inni, mii maknem mi Mma miing rin chda. 24 Pdainu Jisu va mdaksaa ava mmaan hin kalrin chme. 25 Ku mii khatti Mii ava ki sakhi mdo ri pik nrangki arleek setti ame, mleija mii mkheng nga Mma ngi dei dok da; mleija miilai thu ka am ava Mma mdakki dei dok da.
Jisu leh Nikodimas
1 Tunva Jihudia rek paam kpupa khat mmiing Nikodimas tdit Pharisi miilai khat amda. 2 Hava miilaiji jaanni Jisu hin arva da ungu Mhin theda, “Rabbi, Nah Isowr hinki kurjung Chukpu khat tdit neenni kdee chaak in; mleija Isowr ri ado tiṭhi kma donle, Nah dotlot hava titinna rekka ku khat lee ngi tlo pchaang me.” 3 Jisu ngi mhin arthawngda, “Kindit, kinditti, Neiji ahin kthea, miilai khat ava renni kṭou kma donle, Isowr Kruwngpaam mma ngi dei chip pchaang nime.” 4 Nikodimas ava ngi Mhin theda, “Miilai khat ava mder chaakku tak heppi kṭou rangda? Mvei knitna ngi mnuh poi thu lut da mma kṭou rang mo?” 5 Jisu ngi arthawngda, “Kindit, kinditti, Neiji ahin kthea, miilai khat ava dii leh pthla ngi mṭou mabi, Isowr Kruwngpaam lut chip pchaang nime. 6 Mleija dakki kṭou ava dak, ungta pthla ngi kṭou ava pthla. 7 Nah hinni hava kdo the leiji ngak chma, ‘Ren ni aṭouma rome.’ 8 Tarthli ngi mraan nuwm na thung ngi kraang, ungta nang ngi marchaang ava aryaa nadi, pdainu nang ngi tva ki kthleng mdit mata tva tha kchet tdit dei mti; ava leiji pthla ngi kṭou mii pum ktaija anto lu hep daat.” 9 Nikodimas ava ngi Mhin theda, “Tak heppi hava kthuwk rang da?” 10 Jisu ngi mhin arthawngda, “Nah Isreel rek chukpu khat pti, ungu tak heppi hava dei pandi mti da? 11 Kindit, kinditti, Neiji ahin kthea, neenva kdo dee in ava ktheen ping, ungta kdo dee chaak in ava sakhi kpii in ping; pdainu neenki rinpauminna naanni arlaang chmaan ti. 12 Neiji dultipaam ki do kdothe ava nang ngi arin chaak mau, tak heppi parwaan ki do kdothe ava nang ngi rin chna di? 13 Ku khat lee ngi parwaan tha hung pchaang me, pdainu Mii Chapa ava parwaan ki kurjung kṭum. 14 Kbowk laiji Mousi ngi pruwl mdo khiin heppi, Mii Chapa mdo khiin ma rome. 15 Mleija Mma krin kcha ku mii khat ava kṭuw knai kma rinkhu kpha chra. 16 Mleija Isowr ri dultipaamma tija thu wonsat loda, ditta Mchapa khat chrel pii chda, Mma krin cha ku mii khat ava mawng nime pdainu kṭuw knai ma rinkhu kpha chra. 17 Mleija Isowr ri Mchapa ava dultipaam thung ngi arjun siida, dultipaam mraal kpii rang lei pme, pdainu Mma ngi dultipaamma kaktlan pik ra. 18 Mma krin cha mii ava mraal pii nime, Isowr Chapa khat chrel miing krin kma mii ava mma ngi mdo rin chaak ma leiji mraal mdo piik dok. 19 Ungta mdo kṭewlla hava, ditta dultipaam thu mar awng arjungda, ungta mii rekva mar awng ava kchang nga, kjiingnu wonsat loda, mleija mnong tlot inna ṭha me. 20 Mleija kṭha kma ktlo mii pum ktaiva mar awng pdar chda, mnong tlot in mdo pandan nuwm maan leiji, mar awng tha arvang nuwm lamme. 21 Pdainu kindit ktlo miia Isowr ri mrot pik tdit mar awng ngi mdo tdet nra, mar awng tha karvang.
Jisu leh Johon
22 Hava dil tha Jisu leh msiikhu rekka Judia paam tha vang lamda; Mma ngi avatha mmaan kcheen ṭhida baptis ptlot lamda. 23 Johon rukva Salim be tha Aenon thung ngi baptis ptlot slii da, ava thu dii mnem bet leiji, mii rek arva lamda, ungta baptis ptlot pik chlam da. 24 Mleija Johon na rowng inn thu am mlai. 25 Tunva Johon siikhu rekki Jihudia miilai khat hin kartleu mlei thu karteen ṭhi lamda. 26 Ungta mmaanni Johon hin arvang lamda, ungu mhin the lamda, “Rabbi, Jordon raalpha ngi nang tu kilṭhi, nah sakhi hurpik, Mma ava tha ka am daatta, Mma hin kthleng mii mkheng Mma ngi baptis ptlot pik lamda.” 27 Johon ni arthawngda, “Parwaan ki ngi Mhin kpii kma donle, ku khat lee ngi do khat lee arlaang nime. 28 Neia Khrista pmaang, pdainu Mma du sukki nea mdo tsii dinu ado kthe pik dok in, ava naan adaksaan katti sakhi. 29 Jur kphal la kphalpa; ungta ripda karyaa kcha rek kphalpa plap rekki kphalpa krowl aryaa da, kdung ngi kanpa kcha a; ava ngi mlei kurthuwk da, hava ngi neiki kanpa ava kurkhumma. 30 Mma klin thang ra, pdainu nea kdil thang kat rang ping.
Parwaanki Kurjung Mii
31 Tun knungki kurjung Mma ava mkheng leenni tun knung ra; dultipaam ki mii ava dulti mii do, ungta dulti mii pauvi kpau; parwaan ki kurjung Mma ava mkheng tun riimmi ka amra. 32 Mma va mdo dee leh mdo aryaak ava sakhi mdo piik, anto daat joso Mma rinpaumin na ku mii khat lee ngi arlaan pik me. 33 Mma rinpaumin karlaang cha miia, kindit kdiki Isowr kbiinam mi mdo nam pik dok. 34 Mleija Isowr dosii Mma va Isowr pauna rek mdo the, mleija tparte, na thung ngi parte da pthlava Mhin mdo piik pme. 35 Mpah ngi Mchapa ava wonsat loda, ungta do mkheng nga Mma khut thu mdo piik dok. 36 Mchapa hin krin cha miia kṭuw knai ma rinkhu kpha chra; Mchapa kleek miia rinkhu dei nime, pdainu Isowr plung thit mleen kthlung ra.
Jisu leh Samaria Snu Khat
1 Tunva Mukpu Jisu ngi baptis ptlot lamda, Johon hinva siikhu rek knem mi mseemma tdit ki pau Pharisi rekki mdo aryaak Mukpu ngi deida. 2 (Jisu mdak kat va baptis plo lamme, pdainu msiikhu rek daatti plo daat joso), 3 Mma ngi Judia paam ma pthii thida Galil tha kunsun nowlda. 4 Mma ngi Samaria mdo klaan ra kurthuwk da. 5 Ava leiji Mma ngi Sykhar tdit Samaria khuwpii khat tha, Jakob pi mchapa Joseph hin mdo piik bil ava be thang ngi arvang da. 6 Ava thu Jakob diirum amda, ava lei Jisua lam kchet kipjiin mkurthut leiji kham chda diirum be ngi karnga da. Ava ṭhang truk arveel. 7 Ava thu Samaria snu miilai khatti dii ksuwk ra arva da. Ungta Jisu ngi mhin theda, “Kdo neek ra mhai pii cha.” 8 Mleija msiikhu rekka khuwpii tha then krenra va dok lamda. 9 Samaria snu ava ngi Mhin theda, “Tak heppi Jihudia khat Nangva, Samaria snu nei kihin ki ado neek ra dii ado ṭhilda?” Mleija Jehudia rek leh Samaria rekka kurchom nlamme. 10 Jisu ngi mhin arthawngda, “Nang ngi Isowr chla deida ungu nah hinni kpau slii Mma ava ku tdit adee tlaangbi, ‘Kdo neek ra dii mpii tidonle,’ nang ngi Mma hinki kring dii ava ṭhil chna di.” 11 Snu ava ngi Mhin theda, “Ocha, adii su nra ado thloi makpa, ungta diirum rukka ktlum, Nangva kring diia tva ki pha na da? 12 Hava diirum mikpii kchaan, ungta mma mdak, ungu mchapa le, ungta msil rek rukva mthungki dii mdo neek, neenki kpah in Jakob hinva Nah klin pti mo?” 13 Jisu ngi mhin theda, “Hava thungki dii knee mii pum ktaija mning kakraal nowlra, 14 pdainu Neiji kdo piik ra dii ava knee ku mii khat ava, tden thung preva mning kraal nime. Neiji kdo piik ra dii ava mma thung ngi diitlaang kur owl donle, kṭuw knaima rinkhu ngi kphul ra.” 15 Snu ava ngi Mhin theda, “Ocha, neiji kning makraal ma nra, mdit mata dii kdo su ma nra,ava diia mhai pii cha.” 16 Jisu ngi mhin theda, “Vang, a innpu vang ownra, ungu hava thu arhai ṭhi.” 17 Snu ava ngi Mhin arthawngda, “Ki innpu thloi chmaang.” Jisu ngi mhin theda, “Nang ngi ki innpu ame diti mkindit athea; 18 mleija nang ngi innpu miilai parnga ado thloi, ungta tun tunni ado thloija a innpu pme; hava mkindit nang ngi athea.” 19 Snu ava ngi Mhin theda, “Ocha, Nah khulpu khat pti tdit neiji kdee chaakka. 20 Neenki kpah leva hava lownpii luwbuk lamda; ungta Nangva mmun Jerusalem tha luw ado buk raan pi ditinu.” 21 Ungbi Jisu ngi mhin theda, “Snu, naan ki Apah in ava hava lownpii mdit mata Jerusalem tha luw ado buk ma nraanki ṭhang ava karvang sliia. 22 Naanva ado dee maan luwbuk inti; neenva kdo dee in luwbuk innu, mleija kirliing ava Jihudia thung ngi kthuwk. 23 Pdainu tun rukva mkindit luw kbuk rekki Mpah ava pthla leh kindit ava ngi luw mdo buk nraanki ṭhang ava karvang sliia, mleija Mpah rukva Mhin anto lulu ngi luw kbuk ra ava mdo thlaam. 24 Isowra Pthla, ungta Mhin luwkbuk miirekva pthla leh rinkinditti luw mdo buk ra.” 25 Snu ava ngi Mhin theda, “Masija kurjung nga tdit neiji kdee chaakka. (Mma ava Khrista) Mma ngi murjun mpha thu do mkheng mhai ktidet chraan.” 26 Jisu ngi mhin theda, “Nang hinni kpau meek slii Nei ava Mma ping.” 27 Ava dilli siikhu rek arvang lamda. Snu miilai khat mdo karbiik ṭhi leiji ngak chlam da, pdainu “Talu angei da?” mdit mata “Talu leiji mma ado karbiik ṭhida?” dida ku khat lee ngi the pchaang me. 28 Ava leiji snu ava ngi mdiiuwm ma thida khuwpii tha vangda, ungta mii rek hin theda, 29 “Nei kdo tlot mkheng kthethuw Miilai khat ava arva inra asuwn. Hava Khrista ngaal mo?” 30 Mmaanni khuwpii ki thuwk lamda Mhin arva lamda. 31 Ava arlaanni siikhu rekki, “Rabbi, maal,” dilam da Mhin ktham chlam da. 32 Pdainu Mma ngi mhin inni theda, “Naan dodee ma then kdo chaak ra ka am.” 33 Ava leiji siikhu rekki khat leh khatti the lamda, “Mma hinni then ksin ku mii khat ka am ngaal in pti mo?” 34 Jisu ngi mhin inni theda, “Nei miksii Mma dongei ktlo dok ava Nei kthen. 35 ‘Thla plii diltha buh khau pha kveira,’ dida naanva the maanti mo? Neiji akthe pik inna, amik inni tan aan inra hansuwn, bil rekka min dok da buh khau pha kveija. 36 Kakhau mii ava ngi marda man karlaang chra, ungta kṭuw knai kma rinkhu tummi thei kpurkuk chra, ava leiji kakhau leh kapṭau ava kanpave lamra. 37 Mleija ‘khat do pṭau khatti kakhaura’ dida mdo the kcho ava mkindit kat. 38 Naan nonglo nma, ktlok rek nonglo dok nthu kakhaura Neiji aksii inna, ungta naanna mmaan nonglo thung ngi klut kcha in pti.” 39 Snu ava rinpaumin ni mlei kurthuwk da, khuwpii thungki Samaria mii knempok ki Mma hin rin chda, “Nei knong tlot mkheng Mma ngi thethuw dokda.” 40 Ava leiji Samaria rekki Mma hin arva lamda, mmaan hinni makcheen daat nra ktham chlam da, ungbi nii knii kcheengda. 41 Ungta Mma pauna leiji mii knempokki Mhin rin chda. 42 Mmaanni snu ava hin the lamda, “Nah apauna leiji neenni kdo rin kurnowl in pme, mleija neen kdak kat inni aryaa chaannu, ungta hava ava ngi dultipaam kaktlan pik ra tdit neenni kdo dee chaak in.”
Jisu ngi Nong klin kpuw Chapa mdo Pdam
43 Nii knii diltha Mma ngi Galil tha vangda. 44 Mleija Jisu mdak rukva khulpu khatta mdaksaa ki khuwpaam thangva kjat pik me tdit deida. 45 Ava leiji Mma ngi Galil tha arvangda, mleija mmaan rukka kmaal mche lei inni, Jerusalem tha kmaal thung ngi mdo tlot mkheng dei lamda, Galil mii rekva Mma kowl chlam da. 46 Ava leiji Mma ngi Galil ki Kana tha dii ava rikrou dii mdo pur owl na thang ngi arvangda. Ungta Kaparnahum thung ngi nong klin kpuw miilai khat chapa ava kukoi amda. 47 Jisu ngi Judia ki Galil tha marvan maryaak thungta, Jisu ngi ju da mchapa mdo pdam pik nra, mma ngi hangda Mhin ktham chda, mleija mchapa ava kdiyou daat rang ngi koi chda. 48 Ava leiji, Jisu ngi mhin theda, “Nang ngi titinna rek leh tngana rek adee du khim khaiji rin chnim ti.” 49 Nong klin kpuw ngi Mhin theda, “Ocha, knao mdiyo du ngi mhai thlen pik cha.” 50 Jisu ngi mhin theda, “Jung, achapa kring chra.” Mma ngi Jisu dothe pik pauna rin chda mlam tha jungsunda. 51 Mma ngi hanto mjun slii arlaanni, mma sra owr rekki kurdut ṭhida, achapa kring kcha a kdingi song lamda. 52 Ava leiji mma ngi kdam mdo pṭhun na ki ṭhang mhin inni khewl lamda, ungbi mmaanni mhin the lamda, “Janii ngi ṭhang tikheu thu riiphaak va ma da. 53 Jisu ngi “Achapa kring chra,” dida mhin mdo thena ṭhang thung katta mpah ngi dei da; ungta mma mdak kat ungu mphungka mkheng ngi Mhin rin chlam da. 54 Jisu Judia ki Galil tha marvan mpha thung tunva hava mvei knit naki titinna rek mdo tlot.
Liibum thu mdo Pdam
1 Hava diltha Jihudia rek kmaal khat amda, ungbi Jisua Jerusalem tha hangda. 2 Tunva Jerusalem thung ngi jao paltong ava be tha dulbuk parnga amda, Hebru pauva Bethjatha mdo dit, ava thu liibum khat amda. 3 Havale thung ngi kukoi, mik ktot, khu kseek, kyeng rek kurtuwl pok lamda. 4 (Mleija mkret mkretti Mukpu Waantamsii ngi liibum thu arjungda, diia tnok kchokda, ungu dii maknat thung ngi ru kri ngi jungkṭum mii ava mo omlai khim khai kdam cha.) 5 Ava thung ngi kum som kdum lei tret lik thung ngi kukoi kcha miilai khat amda. 6 Jisu ngi mma deida, ungta mpha roi ksotti koida ava thung ngi ki iip chdaat tdit deida, Mma ngi mhin theda, “Kdamra angei mo?” 7 Kukoi miilaiji Mhin theda, “Ocha, liibum dii maknat mpha thu, mikṭhi chra ku khat lee thloi chmanu, ungta neiji kjun ṭum slii arlaanni, nei kdu ngi ktlok khatti ṭum chdok khot kchokda.” 8 Jisu ngi mhin theda, “Kardel, ungu a iina aloura, chet.” 9 Ungta mpha ava kat thung ngi mma dam chda, ungta mma ngi mi iina louda, ungu chetda. Tunva ava sabath nit kurthuwk da. 10 Ava leiji Jihudia rekki kdam miilai hin theda, “Sabath nit kurthuwkka, a iina ado loa Nowlam dorot pme.” 11 Pdainu mma ngi mhin inni arthawngda, “Nei mkapdam Mma ngi ‘A iina aloura echet,’ dida theda.” 12 Ungbi mmaanni mhin khewl lamda, “ ‘A iina alou ungu echet,’ dida ahin kthe Miia kuda?” 13 Tunva kdam miiva Mma ava ku tdit dei me, mleija mun ava thu mii mkurtuwl pok leiji Jisua kunsun dok da. 14 Dil thang ro ngi, luwbuk Inn thu Jisu ngi phada, ungu mhin theda, “Asuw, kdam kcha im ptine! kheel sii aleenni mtlaak ma nra, pnu tla kurnowl ma.” 15 Miilai ava ngi sunda mma kapdam ava Jisu tdit Jihudia rek hin songda. 16 Ungta Mma ngi sabath nitti hava mdo tlot leiji, Jihudia rekki Jisua kja kakham pii lamda. 17 Pdainu Jisu ngi mhin inni arthawngda, “Kpah ngi tun kpha thu nong tloda, ungbi Nei rukva nong kdo tlot.” 18 Hava leiji Jihudia rekva kheel sii ngi Mma mdo eayo nraan mlam thlaam lamda, mleija Mma ngi sabath nit daat pkuime, pdainu Isowra Mma Pah pi dida, mdakka Isowr tu kpinṭim da.
Mchapa Rutan
19 Ungta Jisu ngi mhin inni theda, “Kindit, kinditti, Neiji ahin inni kthea, Mchapa mthi na ngi do khat lee tlo pchaang me, pdainu Mpah do tlot slii mdo dee ava daat, mleija Mma do tlot khim khaija Mchapa rukva anto lulu ngi mdo tlot. 20 Mleija Mpah ngi Mchapa wonsat loda, ungu Mma do tlot slii mkheng Mhin tdet da; ungta anga chaak nraan havale hinva klin sii nong rek Mma ngi akti det raan. 21 Mleija Mpah ngi kdiyou dok rek pring pardel da rinkhu mdo piik lulu ngi, Mchapa rukva mdo ngei rek hin rinkhu kpii ra. 22 Mpah va ku mii khat lee kṭewl me, pdainu mdo kṭewl ra mkheng nga Mchapa hin mdo piik dok. 23 Mmaanni Mpah mdo kjat chaak in lulu, mii mkheng ngi Mchapa mdo kjat chaak nrang lei kurthuwk. Mchapa kakjat kma miiva Mma arjun ksii Mpah ruk kjat chme. 24 Kindit, kinditti, Neiji ahin thaanni kthea, Nei kpauna aryaa da ungta Nei mju ksii Mma krin cha mii ava, kṭuw knai kma rinkhu mthloija, Mma dokṭewl rang thung ngi thleng nime, pdainu kdiyou rang thungki rinkhu tha maklaan chaak dokka. 25 “Kindit, kinditti, Neiji ahin thaanni kthea, tun tun rukva kdiyou dok rekki Isowr Chapa krowl mdo aryaak nraan, ungta kdiyou dok rekki kring mdo phaak chaak nraan ki ṭhang karvang sliia. 26 Mleija Mpah ngi mdaksaa thung ngi rinkhu mdo thloi lulu ngi, Mchapa rukva mdaksaa thung ngi rinkhu mdo thloi nra Mhin kpii dok. 27 Mma ngi Mii Chapa mkurthut leiji mdo kṭewl nra Mhin mdo piik dok. 28 Hava ngi ngak chmaan; mleija thlaan thungki mii mkheng ngi Mma krowl mdo aryaak nraanki ṭhang ava karvang nga. 29 Ungta kṭha ktlo rekka rinkhu mdo piik nra kring kardel ra, ungu kṭha kma ktlo rek ava mdo kṭewl nrangki ngi kardel ra.
Jisu hin Sakhi mdo piik
30 Neiva kthi naki rutanni do khat lee tlo pchaang maang; Neiji kdo aryaak ava heppi, kdo kṭewl; ungta Nei kdo kṭewl ava mkindi,t mleija Nei mju ksii Mma do ngei kma donle, kthina ki Neiji thlaam maang. 31 Neiji kdaksaa kthina ki sakhi kpiikbi, Neiki krinpaumin ava kindit me; 32 Neiki sakhi mikpiik pik ktlok khat rukka ka am, mma ngi Neiki rinpaumin mdo piik ava kindit tdit Neiji kdee. 33 Naanni Johon hin mii sii inti, ungu mma ngi kindit sakhi piida. 34 Nei kdo arlaan rinpaumin ava mii rek hinki pme, pdainu naan ado tiktlan pik chaak nraan, Neiji hava kdo the. 35 Mma ava kṭuwng slii ungu kleng daat meila, ungta naanna mpha mruk tummi Mma ar awng thung ngi kanpa kcha nuwm inpti. 36 Pdainu Nei kdo thloi rinpauminna Johon hinki hinva klin sii; mleija Nei kdo pṭut chaak rangki nong rek ava Kpah ngi mrot pik chda, Neiji kdo tlot slii hava nong rek kat daat rukva, Neia Kpah dosii tdit ki sakhi piida. 37 Ungta Nei mjuksii Kpah mdak kat rukva, Neiki sakhi mpiik pik chda. Naanni Mma krowlla aryaa liit maanti, mrungchen dei maanti; 38 ungta naan plung ril thung ngi Mma pauna arkhii maanti, mleija Mma ngi mdo sii Mii ava naanni rin chmaanti. 39 Mleija naanva Laaika rek thung ngi kṭuw knai kma ki rinkhu pha chraan pak innu kdingi thlaam intinu; ungta mmaanva Neiki sakhi kpii kurthuwk; 40 anto daat joso naanni rinkhu ado phaak chaak nraan, Nei kihinni thleng nuwm maan ti. 41 Neiva mii rek hinki laarnee ava arlaang maang. 42 Pdainu Isowr wonsat naanni thloi maanti tdit Neiji kdea. 43 Kpah miing ngi Neia kurjung ping, ungta naanva marlaang chmaanti; mdaksaa miing ngi ktlok khat mthlenbi, mma ava arlaang naandi. 44 Isowr khdaat ava hinki laarnee kthlaam kma ungu khat leh khat hinki laarnee kthlaam miia tak heppi arin chaak inna? 45 Kpah hinni Neiji araal in kpii rang heppi bin maan; naanki mraal akpii raanna naanni ado bin chaak in Mousi avara. 46 Naanni Mousi arin chaak inbi, Nei mrin chnaandi, mleija mmava Neiki mlei mdo kjit. 47 Pdainu naanni mma do kjit arin chaak maannu, tak heppi Nei kpauna rekka rin chnaandi?”
Jisu ngi Mii Pun Parnga mdo Pmaal
1 Hava diltha Jisua Tibarias truwn mdo dit, Galil truwn raalpha khat tha vangda. 2 Ungta kurtuwl mii rekki mdil ṭoida, mleija Mma ngi kukoi mii rek hin titinna rek mdo tlot dei lamda. 3 Ungta Jisu ngi lownpii tha hangda, ava tha msiikhu rektu ku ong lamda. 4 Tunva Jihudia rek kmaal taplaanna ava nai tekda. 5 Mma ngi tan aanda mmik mpahar thungta, kurtuwl mii rek Mhinni karhang deida, Jisu ngi Philip hin theda, “Tak heppi thenpen ren min don hava mii rekka tapmaal raanda?” 6 Mmava mdo pirsin nangi hava theda, mleija Mma mdakki mdo tlot rang nga dei dok da. 7 Ungta Philip pi Mhin arthawngda, “Dinari arjaa kniiva mii pum ktaiji mruk sisi mdo phaak raan ruk khop nime.” 8 Ungbi msiikhu khat Simon Pitor upah Andrija ngi Mhin theda, 9 “Tjun thenpen parnga leh tuwlva knii kthloi pselnao khat ka amma; pdainu hava mii knempok arlak va tak hep rangda?” 10 Ungbi Jisu ngi theda, “Mii rekka apkong in.” Tunva mmun ava thu nowmsuwl pa amda; ava leiji pun parnga nga ngi ko ong lamda. 11 Ava dilli Jisu ngi thenpen louda, Mma ngi mpanpaak dok dilli, ko kong mii rek hin them pik lamda; mmaan dongei ja ngi tuwlva ruk anto tlo lamda. 12 Ungta mmaanni poi kpa ngi mmaal dok inle, msiikhu rek hin Mma ngi theda, “Kekleem kṭikka kma liit kma apurkuk dok in.” 13 Ava leiji mmaanni tjun thenpen parnga, mii do chaak don mkekleem kṭik ava bowr sowm lei knii kdimmi purkuk lamda. 14 Mii rekki titinna rek mdo tlot mdee in thungta, mmaanni the lamda, “Hava dultipaam thung ngi kurjung rangki Khulpu ava kat!” 15 Ava dilli mmaanni arva lamda, namtrom mi kjowngda kruwng mdo tpurthuw nraan mdo tlot in Mma ngi deida, spar jikki lownpii tha mthina ngi Jisu ngi kikneeng dokda.
Jisu ngi Dii leen Mche
16 Ungu khuw mjiin thungta, msiikhu rekka truwn leen jung lamda, 17 arkuwng khat leen tuwng lamda, Kaparnahum kphara, truwn kvang arkaan pṭhun lamda. Tunva khuw jiingda, ungta Jisu va arjun pha mlai lamda. 18 Truwn ava tnokda, mleija tirthli kdung ngi raangda. 19 Mmaanni meel kdum mdit mata plii arveel arkuwng tunni mvan slii arlaanni, truwn leen Jisu chetda arkuwng ktongtha mnai dei lamda, kdung ngi piir chlamda, 20 Pdainu Mma ngi mhin inni theda, “Nei ping, ṭi maan.” 21 Mmaanni arkuwng leen mdo tuwn ṭhi nraan leiji kanpa chlam da, ungta kbei sekki mdo phaak raan laan ava thlung lamda.
Mii rekki Jisu mdo Thlaam
22 Mupduk nii ngi mii rekva truwn raalpha khat tha ka am arkuwng khdaat chrel dei lamda, ungta Jisua arkuwng thung ngi msiikhu rek luṭhi lamme, pdainu msiikhu rekka mthi naanni sun lamda. 23 Mukpu ngi mpanpaak dok diltha thenpen mdo chaak naan mun be tha Tiberia ki arkuwng rek arvada. 24 Ava leiji mun ava thungva Jisu daat don msiikhu rek daat don am lamme tdit mii rekva deida, mmaanni arkuwng leen tuwng lamda, Jisu kthlaam Kaparnahum tha vang lamda.
Jisua Rinkhu ki Thenpen
25 Ungta truwn raalpha khat ktong tha mmaanni pha chlamda, Mhin the lamda, “Rabbi, hava thangva tden ni karvang ptida?” 26 Ungbi Jisu ngi mhin inni arthawngda, “Kindit, kinditti, Neiji ahin thaanni kthea, naanni Nei ado tathlaam in ava, titinna rek ado dee lei inpme, pdainu poi kpa ngi thenpen ado chaak lei in. 27 Kmaang chrangki tummi nong lou maan, pdainu Mii Chapa ngi ado tpiik chaak raan, kṭuw knai ma rinkhu ado phaak chaak raan ki tummi alou in, mleija Mma leenni Isowr ri kbiinam namda mdo piik dok. 28 Ava dilli mmaanni Mhin theda lamda, “Isowr, Nah anong rek ktlo kukurthut nraan neenni tak tlo chnikaan di?” 29 Jisu ngi mhin inni arthawngda, “Mma ngi mdosii Mii ava naanni arin chaak inbi, hava Isowr nong.” 30 Ava leiji mmaanni Mhin the lamda, “Ava mkurthuttu, neenni deida kdo rin chaak nraan, titinna talu tlo nadi? Talu nong tlo na? 31 Mdo kjit dok lulu ngi, kbowklaiji neenki kpah leva manna chaa lamda, ‘Mdo chaak raan parwaan ki thenpen Mma ngi pii chlamda.’ ” 32 Ava dilli Jisu ngi mhin inni theda, “Kindit, kinditti, Neiji ahin thaanni kthea, parwaanki thenpen na Mousi do piik pme; kindit thenpen ava Kpah ngi parwaanki ado tpiik chaak in. 33 Mleija Isowr thenpen na parwaanki kurjung, ungta dultipaam thung ngi rinkhu mdo piik.” 34 Ungta mmaanni Mhin the lamda, “Mukpu, hava thenpenna mpha ktai thung ngi mhai pii chaan.” 35 Jisu ngi mhin inni theda, “Neia rinkhu thenpen ava ping; Nei kihin karvang miia mpoi tham nime, ungu Nei mikrin kcha miia mning kraal nime. 36 Pdainu Neiji ahin thaanni kthea, mleija naanni mdei daat jown ti mrin chni maanti. 37 Kpah do piik mkheng Nei kihin karvangra; ungta Mma hinni karvang mii ava Neiji reipthi nimaang. 38 Mleija Neia kthina ki kdongei ktlora parwaanki kurjung pmaang, pdainu Nei mjuksii Mma plungbin ktlo rangki kurjung ping. 39 Ungta Nei kihinni mdo tpiik chaak mkheng kdo pmaan ma nra; ungu mṭutna nitti kdo prin pardel lam nrangki ava Nei mjuksii Mma plungbin kurthuwk. 40 Mleija Mchapa deida ungu Mma hin krin cha mii pum ktai ava kṭuw knai ma rinkhu kpha chra; ungta mṭutna nitti Neiji pring pardel nikdi, hava Nei Kpah plungbin.” 41 Ava dilli Jihudia rekki mkho the chlam da, mleija “Neia parwaanki kurjung ṭum thenpen ava ping,” dida Mma ngi theda. 42 Mmmaanni theda, “Hava Joseph Chapa, mpah leh mnuh nenni tdee in, Jisu ava pmemo? Tak heppi Mma va tunva ‘Parwaanki kurjung ping,’ dida mdo theda?” 43 Jisu ngi mhin inni arthawngda, “Asingreel inni kukho the maan.” 44 Nei mju ksii Kpah dohowl kma donle, ku khat lee ngi Nei kihinni arvang nime; ungta mṭutna nitti Neiji pring pardel nikdi. 45 Khulpu rekki hanto kjitda, ‘Ungta mmaan mkheng nga Isowr ri kpurchuk ra,’ Kpah hin karyaa kcha ungu kurchuk mii pum ktai ava Nei kihinni karvangra. 46 Isowr hinki Mma ava kma donle ku mii khat lee ngi Mpah ava deime; Mmava Mpah ava mdo dee dok. 47 Kindit, kinditti, Neiji ahin thaanni kthea, krin kcha mii ava ngi kṭuw knai maki rinkhu mthloi chaakka. 48 Neia rinkhu thenpen ava ping. 49 Naan pah leva kbowk laiji manna mchaak in, ungta mmaanna kdiyou chlam. 50 Mii ngi chaa da mdiyo ma nra; hava thenpen na parwaan ki kurjung ṭum. 51 Neia parwaanki kurjung ṭum kring thenpen ava ping; ku mii khatti hava mchaakbi, kṭuw knaima kringra; ungta dultipaam tumra kdo piik thenpen ava Nei kdaksaa.” 52 Ava dilli Jihudia rek thung ngi msingreel inni karteen psuk lamda, the lamda, “Tak heppi hava Miilai va tchaak raanni mdaksaa mikpii raanda?” 53 Ava leiji Jisu ngi mhin inni theda, “Kindit, kinditti, Neiji ahin thaanni kthea, naanni Mii Chapa ava daksaa chaada, ungta mhii aneek du in khim khai rinkhu thloi nimaan ti; 54 Nei ki kdaksaa ava chaada, Nei kihii knee mii ava kṭuw knai kma rinkhu kpha chra, ungta mṭutna nitti Neiji pring pardel nikdi. 55 Mleija Nei kdaksaa ava tchaak rangki kat, ungta kihii ava tneek kat ra. 56 Nei kdaksaa chaada, ungta kihii knee mii ava, Nei kihinni ka am, ungu Neiji mma hin ka amping. 57 Kpah ngi Neia msiida, ungta Kpah leiji Neiji ringnu ka am lulu ngi, Nei mhai kchaa mii ava Neiji mlei kurthuwk nu kringra. 58 Hava parwaanki kurjung ṭum thenpen ava, apah leenni chaada mdiyo ava lulu pme; hava thenpen kchaa mii ava kṭuw knai kma kring ra.” 59 Hava Kaparnahum thung ngi mpurchu mpha thung, synagog thung ngi mdo the.
Kṭuw knai kma ki Rinkhu Pauna rek
60 Msiikhu rek mii maknem mi maryaak thungta the lamda, “Hava kparsa lang lang khatti mthea, ku do aryaak pik rang da?” 61 Pdainu msiikhu rekki mkho mdo the chaak ava Jisu mdak katti dei da, mhin inni theda, “Hava leiji plung apinlet pthiinmo? 62 Anto mkurthuttu Mii Chapa ngi chodu ki ma amna tha mhun kinlet dei naan mo? 63 Rinkhu kpii ava pthla, daksaa ava do ksi pme; Neiji ahin thaanni kdo the pauna rek ava pthla ungu rinkhu. 64 Pdainu naan mii angṭhe ngi rin chmaanti.” Mleija krin kma mii ava Jisu ngi mdu ngi mdo dee dok, ungta Mma kro kmara mii ava ku tdit mdo dee dok. 65 Ungta Mma ngi theda, “Kpah do rot pik mii ava kma donle, Nei kihin ku khat lee karvang rome dinu Neiji ado kthe pik dok in. 66 Hava diltha msiikhu rek mii ma knemmi mdil kinle chlam da, Mma tu kilṭhi da chet kurnowl lamme. 67 Jisu ngi sowm lei knii rek hin theda, “Naan rukka ksun nuwm in ptimo?” 68 Simon Pitor ri Mhin arthawng da, “Mukpu ku hin sun nikaan da? Kṭuw knai kma ki rinkhu pauna pda Nang ngi thloi ti; 69 ungta neenni ava rin chaannu, ungu Nah Isowr ki Kchiir khat pti tdit neenni dei chaannu. 70 Jisu ngi mhin thaanni arthawngda, “Neiji sowm lei knii akchol maanring mo? Ungta arlak inki khat ava dijabowl pmemo?” 71 Iskariot Simon chapa Judas mlei thung Mma ngi theda, mleija sowm lei knii thungki khatti mro nime dida Mma ngi theda.
Jisu leh Mnaopale
1 Hava diltha Jisua Galil tha vangda, Judia tha Mma ngi hang nuwm me; mleija Jihudia rekki Mma ke eayou rangki thlaam lamda. 2 Tunva Jihudia rek buw inn kmaal ava nai tekda. 3 Ava lei mnaopale ngi Mhin the lamda, “Hava ama thira Judia tha hang, mleija asiikhu rekki anong tlot adei lamso. 4 Mleija miilai ava ngi kaplaar ra mthlaambi, ku khat lee ngi tuprut nong tlo nime. Naan adaksaan ni havale atlot nuwm inta, adaksaan na hava dultipaam atidet chaan.” 5 Mleija mnaopale rukva Mma rin chlamme. 6 Jisu ngi mhin inni theda, “Nei ki mpha arjung mlai, pdainu naanki mpha ava kdet liit kma hava thung ngi ka am daat ra. 7 Dultipaamva naan apder in nime, pdainu Nei mkipder ra, mleija mnong rek inna ṭha me tdit Neiji kparteel dokka. 8 Kmaal rang nga naan hang daat in, Neia kmaal thu hang nimaang, Neiki mpha ava arjung kurkhum mlaija. 9 Ava leiji Mma ngi anto theda Galil tha kcheeng daat da.
Jisu ngi Buw Inn Kmaal Mhan
10 Pdainu mnaopale ngi kmaal mhan dok dil thaan, Mma rukka sparjitti hangda. 11 Kmaal thung ngi Jihudia rekva Mma suw thlaam lamda, the lamda, Mma tva thang da? 12 Ungta Mma mlei thu mii rekva msingreel inni mkho the chu chu lamda. Mii angṭheva, “Mma kṭha,” dida mthe slii arlaanni, angṭhe rek nowlva “Eme, Mma ngi lele tha mii ṭhida,” kdingi the lamda. 13 Anto daat joso mmaanni Jihudia rek mdo ṭit chaak lei inni ku khat lee ngi kandang ngi pau theme. 14 Kmaalli mṭim lop mphaak le Jisu ngi luwbuk Inn thu hangda purchuk da. 15 Jihudia rekva Mhin ngak chlam da, the lamda, “Hava Miilaija kurchuk liit kmapava tak heppi mdo dee daat da?” 16 Ava leiji Jisu ngi mhin inni arthawngda, “Nei kdo purchua Nei kdo pme, pdainu nei mju ksii ava do; 17 ku mii khatti Mma dongei mtlotbi, hava kdo purchua Isowr hinki mo, mdit mata Nei kthina ki rutanni kdo the mo tdit mma ngi kdeira. 18 Mthina ki rutanni kpau mii ava mthina ki laarnee kthlaam kcha; Pdainu Mma laarnee kthlaam Mii ava Mma dosii kindit ava daat, ungta Mma thu karmak ame. 19 Mousi ngi Nowlam ado tpiik in pmemo? Anto daat joso ku khat lee ngi Nowlam ava arkhii me. Talu leiji Nei mke eayoura atathlaam inna?” 20 Mii rekki arthawngda, “Nah tarnam arve chaakka! Nah ake eayoura ku ngi atathlaam da?” 21 Jisu ngi mhin inni arthawngda, “Nei knong tlot khat ava ngi naan akheng ngak chnaan di. 22 Mousi ngi vunmor apreen inda, (ava Mousi hinki pme pdainu apah leen hinki), ungta naanni miilai khat ava sabath nitti mvunmor adoreen in. 23 Sabath nitti miilai khatti vunmor kreen mdo phaak chaak ava ngi Mousi Nowlam kupkui mkurthut mau, sabath nitti miilai khat mdak mkheng Neiji kdo pdam leiji aplung in kthi mo? 24 Naanni mduwn daat kṭewl maan, pdainu kindit deek do kṭewlli akṭewl in.
Mma Masija
25 Ava ngi mlei kurthuwk da Jerusalem thungki mii angṭheva theda, “Hava Miilaija mmaanni ke eayoura mdo thlaam in ava pmemo? 26 Ungta Mma va hava thung ngi kandang ngi pausaam da, ungu Mma hin do khat lee the lamme! Rutan kthloi rekva hava Khrista kat pi tdit kdei lam rang mo? 27 Anto daat joso Mma tva ki kthleng tdit nenni ndee in; ungta Khrista mthlen mpha thu ku khat lee ngi tva ki kthleng tdit dei nime. 28 Ava leiji luwbuk Inn thu Mma ngi mpurchu mpha thu Jisu ngi paryaam da, “Naanni atidee in, ungta tva ki kthleng ping tdit adee inmo? Pdainu Nei kthina ki rutanni kthleng pmaang; Nei mjuksii Mma ava kindit ungta Mma ava naanni dei maanti. 29 Mma Neiva kdee, mleija Neia Mma hinki kthleng ping, ungta Mma dosii ava ping.” 30 Ava leiji mmaanni ku kjowngra thlaam lamda, pdainu ku khat lee ngi mleen khut bel pchaang me; mleija Mma ki ṭhang ava vei mlai. 31 Anto daat joso mii knempokki Mma rin chda, “Khrista mthlen mpha thu hava Miilai dotlot kheelli titinna rek tlo nime mo?”
Jisu Kuk Kjowngra Kseel rek mdo Siin
32 Kurtuwl mii rekki Mma mlei thung ngi mdo the chuchu in Pharisi rekki aryaa lamda. Ungta thiimpu kinreel rek leh Pharisi rekki Mma kukjowng rang ki nong klin kpuw rek vasii lamda. 33 Ava dilli Jisu ngi theda, “Ksot bong ngi aju amṭhi daat nikaan di, ungta ava dil rongi Nei mjuksii hin hung nikdi; 34 naanni Nei mthlaam naandi, ungu mpha nimaanti; Nei ka amna thangva naanna thleng pchaang nimaanti.” 35 Jihudia rekki khat leh khatti the lamda, “Nenni tphaak pchaanma tva tha hava Miilaija kchet rangki da? Grik rek arlakki nmii rek in kmaang cha Grik rek hin chet da mpurchu nuwm mo? 36 ‘Naanni mthlaam naandi ungu mpha nimaanti, ungta Nei ka amna thangva thleng pchaang nimaanti,’ hava talu mdo the ndaat da?”
Kring Rinkhu Kpii Dii Kluwng
37 Kmaal mṭutna nitta klin langlang kurthuwk da, Jisu ngi ripda ungu paryaam da, “Ning kakraal ku mii khatti arva sora anee chaso. 38 Laaika do the heppi, Nei mikrin kcha ku mii khat ava ‘Muplung thu kring dii kreng ngi kluwngra.’ ” 39 Tunva krin cha rekki pthla mdo arlaan chaak nraan Mma ngi kthe kurthuwk da; mleija Jisua mkunlor mlai leiji pthla kpii mlai kurthuwk da.
Mii rek Arlakki Kinṭhen
40 Mmanni hava pauna rek maryaak in thungta, mii angṭhe ngi theda, “Hava Khulpu mkindit kat.” 41 Mii angṭhe rek nowlva theda, “Hava Khrista.” Pdainu mii angṭhe ngi theda, “Khrista Galil ki kthleng rang mo? 42 Khrista Devid charuwl thungki, ungu Devid khuwpii Bethlehem thungki kthleng rang pi dida laaika va the memo? 43 Ava leiji Mma mlei thung ngi mii rek arlakki kinṭhen khat amda. 44 Mma mii angṭheva kjowng nuwmda, pdainu mleen khut kbel khat lee ame.
Rutan kthloi Jihudia rek do Rinma
45 Ava leiji nong klin kpuw rekka thiimpu kinreel rek leh Pharisi rek hin vang kinle lamda, “Talu leiji Mma arvan ṭhi maanti?” dilamda mmaanni the lamda. 46 Nong klin kpuw rekki arthawng lamda, “Hava Miilai pau heppi ku khat lee ngi kpau ame!” 47 Pharisi rekki mhin inni arthawngda, “Naan rukka lele dung ngi ati ṭhiinmo? 48 Rutan kthloi rek mdit mata Pharisi ku khat lee ngi Mma krin cha ka ammo? 49 Pdainu Nowlam kdei kma hava kurtuwl mii rekka pauhur kbukra.” 50 Rukri ngi mmaan arlak thung ki khat Mma hinni kthleng, Nikodimas ava ngi theda, 51 Rukri ngi Mma dotlot karyaak pik kma ungu kurchuk kma donle Nowlamva mii makṭewl mo?” 52 Ungta mmaanni mhin arthawngda, “Nang rukka Galil ki pti mo? Athlaambi dei nadi, Galil ki khulpu ku khat lee thuwk me.”
Losang Kṭhi Snu mdo Kjown in
1 Mmaanni mi inn mi inn thaanni sun lamda, pdainu Jisua kruwn lown tha hangda. 2 Mma ngi jiingsun kpanma ngi luwbuk Inn thu arjung nowl da; mii mkheng nga Mma hin thlengda, ungta Mma ngi ko ongda purchuk lamda. 3 Ungta Nowlam chukpu rek leh Pharisi rekki losang kṭhi snu khat kjowng lamda ṭhi lamda, ungta mma marlak inni thii lamda, 4 mmaanni Mma hin the lamda, “Chukpu, hava snua losang kṭhi slii kdo kjown in. 5 Tunva hantolu miia Mousi va lung ngi adeeng you in dida Nowlam thu pau mreen pik inda. Mma mlei thu Nangva tak heppi athea?” 6 Mlei murson thlaamda Mma ki mraal mdo piik nraan mdo pirsin naanni hava the lamda; ungbi Jisu ngi tpee da mkhut chelli dul leen kjit da. 7 Ungta mmaanni kurnowl lamda Mhin mkhewl in thungta, Mma ngi ripda mhin inni theda, “Naan arlakki pnu ktong kma mii ava ngi rukri ngi adeeng so.” 8 Ungta Mma ngi tpee nowlda dul leenni kjit da. 9 Pdainu mmaanni ava maryaak in thungta, khat khatti kver ki ngi pṭhunda sun tir chlam da, ungu Jisua mthina daatti mmaiṭhuwmmi snu krip daatti ma pthii lamda. 10 Jisu ngi suw thida mhin theda, “Snu, tu ung tir lamda? Ku khat lee ngi araal apii memo?” 11 Snu ava ngi theda, “Ku khat lee ame, Mukpu.” ungta Jisu ngi theda, “Nei rukva araal apii maang; vang, ungu pnu thu tla kurnowl ma.”
Jisua Dultipaamki Mar awng
12 Veikhat nowlli Jisu ngi mhin inni pausaam da, theda, “Neia dultipaam ki mar awng ava ping; Nei kdil kṭoi cha miia kjiing thu chet nime, pdainu rinkhu mar awng kthloira.” 13 Ava dilli Pharisi rekki Mhin theda, “Nah adaksaa athina ki sakhi kirpii tinu, Nah arinpauminna kindit ava pme.” 14 Jisu ngi arthawngda, “Neia kdaksaa kthina ki sakhi kuhur kurthuwk joring, Nei krinpaumin ava kindit, mleija Neiji kthlen na leh ksun nra ava kdo dee, pdainu naanva Nei kthlen na leh ksun nrang nga dei maanti. 15 Naanva daksaa dil kṭoiji ado kṭewl in, Neiva ku khat lee kṭewl maang. 16 Neiji kṭewl daat joring, Nei kdo kṭewlla kindit, mleija Nei kthina daatti kṭewl maang; pdainu Nei leh Nei mjuksii Mma tu kdo kṭewl ve in. 17 Naanki Nowlam thung ngi mdo kjit miilai knii ki rinpaumin ava mkindit kat. 18 Neiji kdaksaa ki sakhi kirpii nu, ungta Nei mjuksii Kpah va Neiki sakhi mpiik pikda.” 19 Ava ngi mlei kurthuwk da, mmaanni Mhin theda, “Nah Pah tu ungda?” Jisu ngi arthawngda, “Naanni Nei ruk mdit mata Kpah ruk dei maanti; naanni Nei atidee tlaang inbi Kpah ruk dei naandi.” 20 Mma ngi luwbuk Inn thung ngi mpurchu mpha thu, sumbuwr be ngi hava pauna rekka theda, pdainu ku khat lee ngi kjowng me, mleija Mma ki ṭhang vei mlai da.
Nei Kche slii ntha Chet Pchaang nimaanti
21 Veikhat nowlli Mma ngi mhin inni theda, “Neia sun chnik di, ungta naanni mthlaam inti donle, apnu ton inni diyou naan di; Nei ksun nrang tha naanna thleng pchaang nimaan ti.” 22 Ava dilli Jihudia rekki the lamda, “Mthina ngi kurhuwk you rangki mo? ‘Nei ksun nrang tha naanna thleng pchaang nimaanti,’ dida mdo thea.” 23 Mma ngi mhin inni theda, “Naanna kurdu ki in pti, Neia tun knungki ping, naanna hava dultipaam ki in pti, Neia hava dultipaam ki pmaang. 24 Neiji kthea, apnu ton rek inni diyou naan di, mleija naanni Nei ava Mma thide dida arin chaak du in khim khai, apnu ton rek inni diyou naan di.” 25 Mmaanni Mhin the lamda, “Nah ku ptida?” Jisu ngi mhin inni theda, “Kupṭhun daatki Neiji ahin thaanni kdo the ava Ping. 26 Naan mlei thung ngi do knempok theda do knempokki ado kekṭewl nraan ka am, pdainu Nei mjuksii Mma ava kindit kat, ungta Mma hinki Neiji kdo aryaak ava dultipaam thung ngi kdo the.” 27 Mpah mlei thung ngi Mma ngi mdo the ava mmaanva dei pandi lamme. 28 Ava leiji Jisu ngi theda, “Naanni Mii Chapa akhiin dok dil thaanni, Nei ava Mma thide tdit dei ro naandi, Neiva kthina ki rutanni do khat lee tlo maang, pdainu Kpah do purchu ava heppi Neiji kpau ping. 29 Ungta Nei mjuksii Mma ava Nei tu kilṭhi in ping, ksangtlaakki Mma va Neia mhai ma pthiime, mleija mpha ktai thu Neiji Mma dongei kdo tlot.” 30 Mma ngi hava mdo the leiji mii knempokki Mma rin chda.
Kintek Mii ungu Suwk rek
31 Ava dilli Jisu ngi Mma krin cha Jihudia rek hin theda, “Naanni Nei kpauna rek thung ngi anowl tlit daat inbi, naanna mkindit kat ki Nei ksiikhu rek in pti. 32 Ungta naanni kindit ava dei naandi, ungu kindit ava ngi akpintek chraan.” 33 Mmaanni Mhin arthawng lamda, “Neenna Abraham charuwl rek in ping, ungu ku mii khat lee dobowl thung ngi am maan ring. Tak heppi Nangva ‘Kintek pha chnaan di,’ diti ado the da?” 34 Jisu ngi mhin inni arthawngda, “Kindit, kinditti, Neiji ahin thaanni kthea, pnu thung ngi ktla mii khim khaija pnu suwk. 35 Suwkva inn thu kurnowl tlit da amme, chapa va kurnowl tlit da kṭuw knai kma ka amcha. 36 Ava leiji Chapa ngi kintekki atithiik inbi, naan rukka kintek naandi. 37 Naanna Abraham charuwl rek in pti tdit Neiji kdo dee dok, anto daat joso Neia mke eayoura mthlaam intinu, mleija naan thung ngi kpauna am nra mun ame. 38 Kpah tu kilṭhi ngi kdo dee chaak ava Neiji kdo the, ungta naanva apah leen dothe ava aryaa intinu ado tlot in. 39 Mmaanni Mhin arthawngda, “Abraham ma neen kpah.” Ungbi Jisu ngi mhin inni theda, “Naanna Abraham naole akurthut inbi, Abraham do tlot lulu tlo naan di. 40 Pdainu tunva Neiji Kpah hinki kdo aryaak kindit pau ava kdo the, anto daat joso naanva mke eayoura mthlaam intinu, anto lulu ngi Abraham va tlo me. 41 Apah leen do tlot naanni tlo in tinu.” Mmaanni Mhin theda, “Neenna nala tartlaang kturkui thungki kṭou pmaan ring, Kpah in khat Isowr ruk kdo thloi in. 42 Jisu ngi mhin inni theda, “Naanki Apah inna Isowr mkurthutbi, Nei wonsat mlo naan di, mleija Neia Kpah hinki thuwk nu kdusuk kdo nowl; kthina ki rutanni Neia kurjung pmaang, pdainu Neia Mma dosii ping. 43 Nei kdo the ava talu leiji dei pandi maan ti? Naanni Nei kpauna diil da ado aryaak maan leiji hava. 44 Naanna naanki apah in dijabowl hinki in pti, ungta naan dongeija naan pah dongei kurthuwkda, mupṭhun daatki mma va mii eayouda, ungta kindit tu kilṭhi ngi mdo tlot nra ame, mleija mma thu kindit ava ame, mma ngi plei mne mpha thu mdak nopa dil kṭoiji pauda, mleija leineipa pda pleineida. 45 Pdainu Neiji kindit ado kthe pik lei inni, naanni mrin chmaanti. 46 Pnu pi dida naan arlakki ku ngi kraal mpii naandi? Neiji kindit kthe ku kurthut tu, talu leiji mrin chmaan ti? 47 Isowr hin ka am miiva Isowr hin mdo aryaak; naan do aryaak inki mlei ava ngi naanna Isowr ktong ki pmaanti.
Jisu leh Abraham
48 Jihudia rekki Mhin arthawngda, “Nah Samaria khat ungu tarnam khat athloija kdingi neenni kdo the ava mkindit pmemo?” 49 Jisu ngi arthawngda, “Neia tarnam thloi maang; pdainu Neiji Kpah kjat nu; ungta naanva Neia makjat maanti. 50 Anto daat joso Neiva kthina ki laarnee thlaam maang; ava kthlaam rang nga khat ka am kcha ungu Mma ngi kekṭewl chra. 51 Kindit, kinditti, Neiji ahin thaanni kthea, ku mii khatti kpauna rek markhiik chaakbi, mma ava diyou liit nime.” 52 Jihudia rekki Mhin theda, “Nah tarnam kthloi pti tdit tunva kdee chaak inna. Khulpu rek diyo lulu Abraham ruk kdiyou kcha, ungta Nangva ‘Ku mii khatti kpauna markhiik chaakbi, kdiyou du liit nime,’ diti athea. 53 Neenki kpah Abraham hinva Nah klin ptimo? Khulpu rek ruk kdiyou dok cha! Ku ping ngi kardi im pti?” 54 Jisu ngi arthawngda, “Neiji kdaksaa kpunlor bi, Nei kdo punlor ava do khat lee pme, Nei mukpunlor ava naanni neenki Kpah ado dit in Kpah ava. 55 Pdainu naanva dei mlai inti, Neiva kdo dee dok. Mma dei maang dida Neiji kthe kukurthutbi, Nei rukka naan lulu ngi plei knei khat kurthuwk nikdi, pdainu Mma Neiji deinu mpauna rek kdo arkhiik. 56 Neiki nit rek deida kanpa chrang ava naanki apah Abraham ra, mma ngi deida ungu kanpa cha.” 57 Ava dilli Jihudia rekki Mhin theda, “Nah kum som parnga ruk thlung mlaiti, ungta Nangva Abraham adee mo?” 58 Jisu ngi mhin inni theda, “Kindit, kinditti, Neiji ahin thaanni kthea, Abraham du ngi Neia ka am dok ping.” 59 Ava leiji mmaanni lung chom lamda, Mma kdeengra kurthlong lamda; pdainu Jisua kurdowl dok da, luwbuk Inn thungki duwn thuwk dok da.
Mik Ktotti Kṭou Khat Jisu do Pdam
1 Mma ngi hanto mkurlon thungta, mik ktotti kṭou cha miilai khat Jisu ngi deida: 2 Ungbi msiikhu rekki Mhin khewl lamda, “Rabbi, hava miilaija mma pnu leimo mnuh mpah pnu mkurthut na mmikka mṭou daatki ktot chda?” 3 Jisu ngi arthawngda, “Hava mma mdak mdit mata mnuh mpah pnu ton lei pme, pdainu Isowr nong rek mma thung ngi mdo tpandan nrang lei. 4 Nei mjuksii Mma nong thung ngi khuw mvaar daat arlaanni nenni tutlot raan, khuw mjiin dok bi, ku khat lee ngi nong tlo pchaang nime. 5 Neiji dultipaam thu ka am khim khai thu, Neia dultipaamki mar awng ava ping.” 6 Mma ngi hava mthe chunni, dul leen ptil pthot da, mdo pthot bul ava louda, bul ava mik ktot leen pthowm da, 7 mhin theda, “Vara Siloam liibum thung ngi aphiit dok.” (mlei ava mdo haisii) Ava leiji mma ngi vada phiit da, ungta khuw kdeiji arvang kinle da. 8 Mveen rek leh chodu ngi then kṭhil kcha chok miilai ava thide tdit kdei mii rekki the lamda, “Hava miilaija ku ongda then kṭhil kchok ava pmemo?” 9 Mii angṭhe ngi theda, “Ava mma,” Angṭhe nowlva theda, “Eme, mma kdujik chngaal.” Ungbi mma ngi theda, “Neia mma ping.” 10 Mmaanni mhin the lamda, “Ava mkurthuttu tak heppi amik klengda?” 11 Mma ngi arthawngda, “Jisu mdo dit ava ngi bul seemda kmik pbul thida ki hinni theda, ‘Vara Siloam thung ngi aphiit,’ dida ava leiji neiji vanu kphiit thungta, khuw kdo dee chaak.” 12 Mmaanni mhin theda, “Mma tva thang da?” Mma ngi theda, “Dei maang.”
Pharisi rekki Kapdam mdo Khewl Thlaam in
13 Mik ktotti kṭou miilai ava mmaanni Pharisi rek hin ṭhi paphaak lamda. 14 Tunva Jisu ngi bul seemda mdo pdamna ava sabath nit. 15 Tak heppi mmava khuw mdo dee tdit Pharisi rekki mhin paukhewl nowl lamda. Ungbi mma ngi mhin inni theda, “Mma ngi kmik leen bul pthowm da ungu neiji kphiit thungta khuw kdo dee chaak.” 16 Pharisi rek mii angṭhe ngi theda, “Hava miilaija Isowr hinki pme, mleija Mma ngi sabath nit danme.” Pdainu angṭhe rekki the lamda, “Tak heppi pnu ktong khat va hava lu titinna rek ktlo rangda?” Mmaan arlakki hanto kinṭhen chowp lamda. 17 Ava leiji mmaanni mik ktot hin the lamda, “Amik ado tipdam pik leiva Mma mlei thu nangva tak heppi athea?” Mma ngi theda, “Mma Khulpu khat.” 18 Mma ava mik ktot miilai ungu khuw mdo dee chaak tditki mlei ava mnuh leh mpah ownda pau mkhewl du in khim khai inni Jihudia rekki rin liit lamme. 19 Ungta mhin inni khewl lamda, “Hava mṭou daat ki ktot kcha ado dit in naan chapa mo? Mik ktot mkurthut tu tunva tak heppi khuw mdo dee da?” 20 Mnuh leh mpah ngi mhin inni arthawngda, “Hava neen kchapa, ungu mṭou daatki ktot kcha tdit neenni kdee in; 21 pdainu tunva tak heppi khuw mdo dee mdit mata ku ngi mmik maplen pik tdit dei chmman ring. Mdak akhewl chaan, mkum kver dok, mdaksaa tumva mma ngi kthe chra. 22 Mnuh leh mpah va Jihudia rek mdo ṭit lei inni hanto mdo theen, mleija Mma ku mii khatti Khrista pi dida kthe thuw ma ambi, mii ava synagog duwn tha tiknen pthii raan kdingi kulrot ndok lamda. 23 Ava ngi mlei kurthuwk da, mnuh leh mpahva ‘Mkum kver dok, mdak akhewl chaan,’ kdingi mdo theen. 24 Ava leiji mmaanni mik ktot ava mvei knitna own lamda, ungu mhin the lamda, “Isowr apanpaak cha; hava Miilaija pnu ktong khat tdit neenni kdee in.” 25 Mma ngi arthawngda, “Mma pnu ktong khat mo neia dei chmaang; do khat pang lamchi kdee, neia ktot cha ping, tunva khuw kdee chaakka.” 26 Mmaanni mhin the lamda, “Mma va tak atpardit da? Tak heppi amikka mdo pdam da?” 27 Mma ngi mhin inni arthawngda, “Neiji ado kthe pik dok in, ungu naanva knaa tkiin liit maanti. Talu leiji aryaak nuwm nowl inna?” Mma siikhu kurthuwk nuwm in ptimo?” 28 Ungta mmaanni rai chda, mhin the lamda, “Nah Mma siikhu pti, pdainu neenna Mousi siikhu in ping. 29 Isowr ri Mousi hin pau mdo the neenni kdee in, pdainu hava Miilai ava tva ki kthleng tdit neenni dei maan ring.” 30 Mii ava ngi arthawngda, “Talu leida hava tngana khat kurthuwkka! Mma ava tva ki kthleng tdit naanni dei maan ti, anto daat joso nei kmik rekka Mma ngi mhai plen pik chda. 31 Isowr va pnu ktong rekka aryaak pikme tdit nenni ndee in, pdainu ku mii khatti Mma luwbuk da, ungu Mma dongei mtlotbi, Isowr ri mhin mdo aryaak pik. 32 Mik ktotti kṭou ku khat lee pre dultipaam mupṭhun daatki ku khat lee ngi mdo plen taryaak liit inpme. 33 Hava Mma Isowr hinki kma mkurthutbi, Mma va do khat lee tlo pchaang nime.” 34 Mmaanni mhin arthawngda, “Nah pnu thung ngi kuplup changi kṭou pti, ungta neenna nah do purchu rangki in ping mo? ungta mmaanni duwn tha kneng pthi lamda.
Pthla Rinkindit Tot chaakna
35 Mii ava duwn tha mdo knen pthiin Jisu ngi deida, Ungu Mma ngi mphaak khot thungta mhin theda, “Mii Chapa arin chaakka?” 36 Mma ngi arthawngda, “Mma ku da? Ocha; ditta neiji Mma kdo rin chaak nra.” 37 Jisu ngi mhin theda, “Mma ado dee dok, ungta ahinni kpau slii ava Mma.” 38 Mma ngi theda, “Mukpu, neiji krin chaakka.” Ungta mma ngi Mhin luwbuk chda. 39 Jisu ngi theda, “Mleija kdei cha kma mii ngi mdo dee chaak nra, ungta kdei mii rekki mdo dee ma nra, dultipaam thung ngi kekṭewl ra Neia kurjung ping.” 40 Ungta mbe ki Pharisi rek mii angṭhe ngi hava aryaa da, ungbi mmaanni Mhin the lamda, “Neen rukka ktot in pingmo?” 41 Jisu ngi mhin inni theda, “Ktot akurthut tlaang inbi, ado parma ma raanna; pdainu tunva, ‘Kdee in,’ ado dit lei inni ado parma inna ka am tlit daatta.
Jao Krung Paupurtol
1 Kindit, kinditti, Neiji ahin thaanni kthea, ku mii khatti jao luwng thurngot thung ngi klut ma, pdainu lam lep da kakal mii ava kupru ungu daku khat kurthuwk. 2 Pdainu thurngot thung ngi klut mii ava jao krung do ruwn jao rek kurthuwk. 3 Mma ava paltong kseel rekki mdo pvan pik, jao rekki Mma krowl mdo aryaak in, ungu mjao rekka mmiing mmiing inni ownda, mdo pthuw pik chaak lam. 4 Mkheng kheng ngi Mma ngi pthuwk thida, Mma ngi ruri da, ungu jao rekki mdil ṭoida, mleija mmaanni mukrowl mdo aryaak in. 5 Mmaanva mal rek dil ṭoi lamme; pdainu mmaanni mhin ki kchen chlam, mleija malrek krowl mmaanni aryaa pindit pikme.” 6 Mmaan hin Jisu va hava pau purtolli theda, pdainu Mma ngi mhin inni mdo the ava deipindi lam mda.
Jisua Kṭha Jao Krung
7 Ava leiji Jisu ngi mhin inni theda, “Kindit, kinditti, Neiji ahin thaanni kthea, Neia jao rek thurngot ava ping. 8 Nei kdusukki karvang mii mkheng nga kupru leh daku rek lam, pdainu jao rekva aryaak pik me. 9 Neia thurngot ava ping; Nei kthung ngi ku mii khatti mlu chaakbi, mma kaktlan pikra, ungu Mma thung ngi lut don thuwk donle suwl kpha chra. 10 Kupruva mdo alrowt ra, mdo aeyo ra, ungu ke eakrep rang lei kthleng; Neia mmaanni rinkhu mdo phaak chaak nrang lei kthleng ping, ungta kheelli kpha chlamra. 11 Neia kṭha jao krung ava ping; kṭha jao krung ngi mjao rek tummi mrinkhu mdo piik chaak. 12 Jao rek kpupa kma, mdo vai mii va tkei rek kthleng mdee mpha thu jao rek ma pthiida, kchen kcha; ungta tkeiji kjowng lamda ṭheek pinṭheu pthi tir da. 13 Mma tvai mkurthut leiji kchen cha, ungta jao rek tuk sut pik me. 14 Neia kṭha jao krung ava ping; Neiji kjao rek deinu, ungta kjao rekki Neia mdo tdee lam, 15 Kpah ngi Nei mdeida Neiji Kpah kdo dee chaak ava lulu; ungu jao rek tummi Neiji krinkhu kdo piik chaak. 16 Ungta ktlok jao ruk Neiji kdo thloi, mmaanna hava mluwng thu ame, mmaan rukka Neiji kdo ṭhi ma rome, ungta mmaanni kukrowl karyaa chlam ra. 17 Ditta hava ngi mlei kurthuwkda, Neia Kpah ngi wonsat mloda, mleija Neiji wonsat kdolo kurnowl nra krinkhu kdo piik chaak. 18 Ku mii khat lee ngi Nei kihinki mlowng nime, pdainu kjao rek tummi Neiji kdo piik chaak, Neiva kpii ki rutan kthloi, ungta klou pthii ki rutan ruk kdo thloi; hava Kpah ngi Nei kihinni mdo tsil chaak ndok. 19 Hava pauna rek leiji Jihudia rek arlakki kinṭhek khat am nowlda. 20 Mii maknem mi theda, “Mma tarnam mdo thloi leiji mong kukto kcha a; talu leiji Mhin ni aryaak pik inna?” 21 Mii murson rekki theda, “Hava tarnam kthloi khat pauthe lu pme, tarnamva mik ktot maplen pchaan mo?”
Jisu mdo Pthlei in
22 Phalbi kat thung ngi Jerusalem thung ngi taplaanna kmaal khat amda; 23 ungta Jisua Solomon dulbuk ki, luwbuk Inn thu kurlon da. 24 Ava leiji Jihudia rekki klop dok lamda, Mhin the lamda, “Tak pang roi ksotti makrem naandi? Khrista akurthut ta mhai the pik in.” 25 Jisu ngi mhin inni arthawngda, “Neiva akthe pik dok in, ungta naanva rin chmaanti, Kpah miing ngi Neiva nong rekka kdo tlot, mmaanni Neiki sakhi mdo tpiik pik lam; 26 pdainu naanni rin chmaanti, mleija naanna Nei kjao rek kurthuwk maanti. 27 Nei kjao rekva kukrowl mdo aryaak in, ungu Neiji kdee lam, ungta mmaanva kdil mdo ṭoi chaak in; 28 Ungta Neiji kṭuw knai kma ki rinkhu kdo piik chaak lam, ungu mmaan ava maang nime, ungta Nei kukhut thungki ku khat lee ngi mlowng pchaang nime. 29 Nei kihinni mikpii kcha Kpah ava mkheng thungki klin sii kurthuwk, ungta Kpah khut thungki ku khat lee ngi lowng pchaang nime. 30 Kpah leh Neia khdaat in ping. 31 Jihudia rekki lung chom lamda kdeeng ra kurthlong lamda. 32 Jisu ngi mhin inni arthawng da, “Neiji Kpah hinki nong kṭha rek ado ktidet in leiji havale thungki tva pi dida lung ngi mdeeng naandi?” 33 Jihudia rekki Mhin arthawngda, “Kṭha nong rek leiji neenva lung ngi akdeeng ra kurthlong maan ring, pdainu Isowr kjowm kcha ngi apau lei, mleija miilai khat kurthuwkki Isowr ping ngi kardi tinu.” 34 Jisu ngi mhin inni arthawngda, “Neiji kthea, naan Nowlam thung ngi naanna isowr rek in pti dida kjit memo? 35 Isowr pauna arjun narek hinni Mma ngi mukpu rek dida (ungu laaika ava kui me), 36 Mpah ngi kcholda dultipaam thu mdo arjun sii Mma hin, ‘Naanni Isowr kjowm changi kpauva,’ kdingi atheennu, ‘Neia Isowr Chapa ping,’ kdo dit leimo? 37 Neiji Kpah nong rek ktlo kma kukurthutbi, naanni mrin chni maanti. 38 Pdainu Neiji ktlo kukurthut bi, naanni rin cha mjown tiva, Kpah Nei kthung ngi amda, Neiji Kpah thung ngi ka am tdit ado dee nraan, knong tlot rekka arin chaan.” 39 Veikhat nowlli mmaanni kukjowng ra kurthlong lamda, pdainu Mma ngi mkhut thuwnki karthlet chda. 40 Mma ngi Jordon arkaanda, chodu ngi Johon ni baptis mdo tlot na mun tha vang nowlda, ungu ava thu kcheeng chdaat da. 41 Ungta Mma hinni mii knempok thleng da, “Johon va titinna rek tlome, pdainu hava Miilai mlei thung ngi Johon ni mdo the khim khaija kindit kat kurthuwkka.” 42 Ungta ava thung ngi mii knempokki Mma rin chda.
Lasar Diyo
1 Tunva Mery leh mu unu Martha khuw Bethania tha Lasar tdit miilai khat ava koida. 2 Mukpu khu tun thao ptlongda ungu ṭap da mkhu ava msammi kuknuwl Mery ava ṭahpa Lasar ra koi chda. 3 Ava leiji Mma hinni mnaonu vasii da, theda, “Mukpu, Nah wonsat lo mma kukoi kcha a.” 4 Pdainu Jisu ngi ava maryaak mpha thu, theda, “Kukoi ava kdiyou rang lei pme, ava ngi Isowr Chapa mdo tpunlor nrang lei, Isowr laarnee. 5 Tunva Jisu va Martha leh mnaonu ungta Lasar ava kdung wonsat lo chlam da. 6 Mma ngi Lasar kukoi maryaak dok dil tha, Mma ngi ma am ndaat thung ngi nii kcheeng bongda. 7 Ava dilli hava diltha Mma ngi msiikhu rek hin theda, “Nenni Judia tha vang nowl inche.” 8 Siikhu rekki Mhin theda, “Rabbi, Jihudia rekva tun tunni lung ngi akdeeng youra athlaam slii lamda, ungu ava tha vang nowl nmo? 9 Jisu ngi arthawngda, “Nii khatta ṭhang somlei knii pmemo? ku mii khatti suwnni mchebi, mma ngi khusiir parthi nime, mleija mma ngi hava dultipaam ar awng mdo dee. 10 Pdainu jaanni ku mii khatti mchebi, mma ngi khusiir kparthira, mleija mma thung ngi mar awng ame.” 11 Mma ngi mpau dok le mhin inni theda, “Nenki nplap in Lasarra ki iip chdokka, pdainu Neiji vangda ki iip thungki pardel nikdi. 12 Siikhu rekki Mhin theda, “Mukpu, mma ngi mi ii bi, kdam chmunra.” 13 Tunva Jisuva mdiyo dok mdo thena kurthuwk da, pdainu mmaanva ki iip karnga kcha ngaal the pak da kdingi bin lamda. 14 Ava leiji Jisu ngi kindit the pik lamda, “Lasar ra kdiyou dokka; 15 naan do rin chaak nraan, naan tummi ava tha ka amma kdung ngi kanpa kchaam ping, pdainu mma vanpha inche.” 16 Kinphiir mdo dit Thomas ava ngi mmiiṭhi rek hin theda, “Mma tu kilṭhi ngi tdiyo nraan nen rukka vang inche.”
Kring Karheel ungta Rinkhua Jisu
17 Tunva Jisu marvan thungta, Lasar ra thlaan thung ngi mnii plit nangi phada. 18 Bethania khuw ava Jerusalem thungki meel knii arveelli lam karlat, 19 Mṭahpa inni mlei kurthuwkda, Martha leh Mery plung ngam kpiira Jihudia rek mii knempok thlengda. 20 Jisu karvang slii Martha ngi maryaak thungta, Mery ngi inn thu mkon daat arlaanni, mma ngi lam tha vadu chda. 21 Martha ngi Jisu hin theda, “Mukpu, hava tha a am daat tlaangbi kṭahpa inna kdiyou kma rang nga. 22 Ungta tun rukva Isowr hin tha Nang ngi ado ṭhil chaak khim khai ava akpii chra.” 23 Jisu ngi mhin theda, “Aṭahpa ava kring kardel nowlra.” 24 Martha ngi Mhin theda, “Mṭutna ki kring karheel thung ngi mma kring karheel nowlra tdit neiji kdee.” 25 Jisu ngi mhin theda, “Neia kring karheel, ungu rinkhu ava ping; Nei mikrin kcha mii ava mma ngi diyou daat joso kringra, 26 ungta kring mii leh Nei mikrin kcha mii pum ktai ava diyou nime. Hava arin chakka?” 27 Mma ngi Mhin theda, “Oji, Mukpu, Nah Isowr Chapa Khrista dultipaam thung ngi kurjung tdit neiji krin chaak pi.”
Jisu Kṭap
28 Martha ngi hava mthe dok diltha, Mery hin vangda, ungu ownda, tuprutti mhin theda, “Chukpua hava tha ka am daatta, ungu nah ato ownna.” 29 Ungta mma ngi ava maryaak thungta rip tengda Mma vaphada. 30 Tunva Jisua khuw thu klut mlaiji, Martha do kurdut na mun thung ngi am daatda. 31 Mma hin lungam piida inn thu ka am daat Jihudia rekki, Mery ngi rip tengda mhaithuw dei lamda, thlaan tha kṭap va pakda kdingi mmaan rukva mdil vaṭoi lamda. 32 Ava leiji Meryva Jisu am ndaat mun tha arva da, ungu Mma mdee thungta mkhu therri tluwda, Mhin theda, “Mukpu hava tha a am daat tlaangbi, kṭahpa kdiyou kma rang nga.” 33 Mery leh mmiiṭhi Jihudia rek kṭap mdee thungta, Jisua pthla ngi muplung kdung ngi thowngda, ungu muplung khamda; 34 ungta Mma ngi theda, “Tva thung ngi alruwl inda?” Mmaanni Mhin theda, “Mukpu arva ra asuw.” 35 Jisu ṭapda. 36 Ava leiji Jihudia rekki the lamda, “Asuwn, tija pang thu Mma va wonsat mlo chaak daatta!” 37 Pdainu mii angṭhe ngi theda, “Mik ktot rek kiplen pik Mma va mdiyo ma nra tlot pik pchaang nimemo?”
Lasar Rinkhu mdo Piik
38 Ava dilli Jisua kdung reenni muplung thowng nowlda, thlaan tha arvada, khur khat leen lung khat tipnen amdaat da. 39 Jisu ngi theda, “Lung alou pthiin.” Ungbi kdiyou ava chernu Martha ngi theda, “Mukpu, tunva kapnam reenra, mleija mdiyona nii plii mphaak dokka.” 40 Jisu ngi mhin theda, “Nang ngi arin chaakbi, Isowr laarnee dei chnadi, dinu athe pik maangmo?” 41 Ava leiji mmaanni lung nga lou pthi lamda, ungta Jisu ngi tan aanda theda, “Apah ado taryaak pik leiji akpanpaak chaakka. 42 Mpha ktai thu Nah do aryaak pik Neiji kdee chaak, pdainu hava kdo the ngi Neia Nah do arju sii tdit kbe tha krip daat rekki mdo dee nraan.” 43 Mma ngi hava mthe diltha, krowl kparyaa ngi owngda, “Lasar arhun thuwk.” 44 Kdiyou miilai ava mkhut mkhu ungta mmai buw kurlum dokki arhun thuwkda. Jisu ngi mhin inni theda, “Aparjee pik chaan, ungta mma ngi vang chaso.”
Jisu Ke Eayoura Kursop
45 Ava ngi mlei kurthuwkda Mery do ṭhi Jihudia rek mii knempokki, Mma do tlot dei lamda, Mma rin chlam da. 46 Pdainu mii angṭhe ngi Pharisi rek hin vangda, Jisu nong tlot song lamda. 47 Ava leiji thiimpu kinreel rek leh Pharisi rekki karseelra kurkuk lamda, the lamda, “Nenva tak tlo chenaan di? mleija hava Miilaiva titinna rek knempok mtlotta. 48 Mma ngi hanto mtlot kurnowl tlit daatbi, mii khim khaiva Mma krin chra, ungta Romia rekki thleng donle mmun kchiir ruk nmii rek in ruk mikniing ngi ki ae krep ra.” 49 Pdainu mmaan arlakki khat, ava kum thung ngi thiimpu kparthaang ngi ka am, Keiphas ava ngi mhin inni theda, “Naanni do khat lee dei maanti; 50 mleija mii rek tummi khat kdiyoura, ungta chati rek mkheng nga maang nime tdit kurthut chak ava naanni dei maanti.” 51 Mmava mthina ki rutanni the me, pdainu kum ava thung ngi thiimpu kparthaang ngi amda, chati rek tummi Jisu kdiyoura tdit ki mma ngi mdo phuwn. 52 Ungta chati tum daat rang pme; pdainu duwn tha Isowr naole ṭheek kinṭheu ava khdaatti ma am nrang lei. 53 Ava leiji nit ava thungki pṭhun lamda, tak heppi te eayo raan kdingi karseel psuk lamda. 54 Ava ngi mlei kurthuwkda, Jisua Jihudia rek arlakki kandang ngi chet kurnowl me, pdainu kbowk lai ktinel khuwpaam, Ephrahim mdo dit khuwpii tha vangda; ungta msiikhu rektu ava tha am lamda. 55 Tunva Jihudia rek taplaanna ava nai tekda, taplaanna du ngi mdaksaan mkartleu chaak nraan; khuwpaam ava thungki mii knempok Jerusalem tha hanglamda. 56 Mmaanni luwbuk Inn thung ngi mri daat in mpha thu Jisua suw thlaam lamda, khat leh khatti the lamda, “Tak heppi abin inna? Kmaal thung ngi thleng nime mo?” 57 Tunva thiimpu kinreel rek leh Pharisi rek va, ku mii khatti Mma mdee ta, tukjown nraan mihai the pik inso kdingi pau pṭum lamda.
Bethania thu Jisua Thao mdo Pbul
1 Jisua taplaanna nii truk mkanthan daat arlaanni, Jisu ngi kdiyou dok mdo prin pardel Lasar amna Bethania tha arvangda. 2 Ava tha mmaanni kjiingki von vailamda; Martha ngi sok lo lamda, ungta Lasar ra Mma tu tebol tun kuk ong khat kurthuwk da. 3 Mery ngi mman klu langlang nard tdit reidii kpanchel deek mkhung mṭim louda, Jisu khu pbul pik da, ungta msammi mkhu knuwl pikda, ungu inn thung nga reidii krimmi dim chda. 4 Pdainu msiikhu rek thungki khat Iskariot Judas (Mma kro kma) ava ngi theda, 5 “Talu leiji hava reidiia dinari arjaa kdum mi jurda sra hin pii meda?” 6 Mma ngi sra tuk msut kat na mdo the ava pme, pdainu mma ngi sumbuwr arkhii da, kupru khat mkurthuwk leiki, mthung ngi mdo daal ava mma ngi mdolo chaak lu. 7 Jisu ngi theda, “Mma ama dok in, Nei mdo tulruwl na mma ngi arkhii chaso. 8 Naanni sra ava mpha ktai thung ngi ado amṭhi daat in, pdainu mpha ktai thung ngi Neia mthloi ni maanti.”
Lasar Ke Eayoura Kursop
9 Kurtuwl klin langlang Jihudia rekki Mma ava tha ka am daatta tdit maryaak in thungta, arva lamda, Jisu lei daat kma pdainu Mma ngi kdiyou thungki mdo prin pardel Lasar ruk suw nuwm lamda. 10 Ava leiji thiimpu kinreel rekki Lasar ruk mdo eayo nraan tlo lamda. 11 Mleija mma leiji Jihudia rek knempok sun chda Jisu rin chlam da.
Kapchaang riimmi Jerusalem Mlu
12 Mupduk niiva Jerusalem tha kmaal rangki Jisu karhang nga tdit kurtuwl mii rekki aryaa da. 13 Ava leiji mmaanni sipra ding baak lou lamda, ungta Mma kurdut ṭhira chet lamda, owng lamda, “Hosanna! Mukpu miing ngi kthleng Mma ava msuwkṭha, Isreel rek Kruwng ava msuwkṭha. 14 Ungta Jisua skowlraam suwn khat phada, mleen ko ongda; ava hanto mdo kjit dok, 15 “ṭi ma, Sijon chanu; asuw, nah akruwng nga kurjung nga skowlraam suwn leen kuk ong nga!” 16 Rukriva msiikhu rekva hava dei pandi chlamme; pdainu Jisu mkunlor dilli Mma mlei thung ngi mdo kjit, leh Mma thu kthuwk bin phaak ro lamda. 17 Ungta thlaan thungki Lasar mo own mpha thu Mma tu kilṭhi kurtuwl mii rekki kdiyou thungki mdo prin pardel naki sakhii hurpik lamda. 18 Kurtuwl mii rekki Mma kurdut ṭhira mhai naanki mlei ava titinna mdo tlot lei. 19 Ava dilli Pharisi rek khat ti the da, “Naanva do khat lee tlo pchaang maanti, asuwn, dultipaamva Mma dil mṭoi chaakka.”
Jisua Grik Mii angṭhe ngi mdo Thlaam
20 Tunva kmaal thung ngi luwkbuk ra kahang mii rek arlakki Grik mii angṭhe amda. 21 Galil ki Bethsaida thungki Philip hinni havalea thleng lamda, mhin the lamda, “Ocha, neenni Jisu kdee nuwm chaak inna.” 22 Philip pi vangda Andrija hin songda, ungta Andrija ngi Philip tu vave lamda, mmaanni Jisu hin song lamda. 23 Ungta Jisu ngi mhin inni arthawngda, “Mii Chapa kunlor nrangki ṭhang ava kvei dokka. 24 Kindit, kinditti, Neiji ahin thaanni kthea, kehu muh khatti dul leen tla da mdiyo mabi, anto ka am chdaatra, pdainu mdiyobi, thei knempokki kchuira. 25 Rinkhu wonsat klo miia kmaang chra; ungu hava dultipaam thu rinkhu kipder miia rinkhu ava tummi kṭuw knai kma markhiik chaakka. 26 Ku mii khatti Nei wonsat mtalobi, mma ngi kdil aṭoi chaso; ungta Nei ka am na thung ngi ksra owr rek rukka ka amra; ku mii khatti Nei sok mtalo chaakbi, Kpah ngi kakjat pik ra. Jisu ngi Mdiyo nra Mlei mdo The 27 Tunva kraothla kja kcha a. Ungta Neiva tak the nikda? ‘Apah hava ṭhang thu mhai ktlan nim timo? Eme, Neia hava ṭhang tummi kthleng ping. 28 Apah Nah amiing kunlor kurthuwk so.” Ava dilli parwaanki krowl khat thlengda, “Neiji akpunlor dokka, ungu punlor nowl nikdi. 29 Mma be ngi krip kurtuwl mii rekki aryaada, ungbi the lamda, “Khuw kipria,” kdingi the lamda. Angṭhe rekva theda, “Waantamsii ngi mkarbiik ṭhia.” 30 Jisu ngi arthawngda, “Krowl hava Nei ktum pme naan tummi kthleng. 31 Tunva hava dultipaam mdo kṭewl nra, hava dultipaamki paamkpu rek duwn tha mdo var pthi nra; 32 ungta Neia dulti thungki mtikhiin mpha thu, mii mkheng ava Nei kdaksaa thung ngi howl nikdi.” 33 Hava mdo the ava Mma ngi tak hep kdu ki diyo ngi kdiyou rang tdit mdo tdet na. 34 Kurtuwl mii rekki Mhin arthawngda, “Khrista kṭuw knai kma ka am ra tdit Nowlam thung ngi neenni karyaak in. Mii Chapa ava kikhiing rangpi diti tak heppi Nangva athea? Mii Chapa kuda?” 35 Jisu ngi mhin inni theda, “Mpha roi ksot bong kira mar awng ngi ado tiṭhiin, aleen thaanni kjiingnu mthlun ma nra, mar awng athloi slii thuwnni chet in; kjiing thu kchet miiva Mma tva tha kchetta tdit deime. 36 Mar awng athloi daat in mpha thu, naanni mar awng chapa rek akurthut nraan, mar awng ava arin chaan.” Mii rek Dorinma Jisu ngi hava the thida, sun chda, mmaan thungki mthina ngi kurdowl chda. 37 Mma ngi titinna rek knempok mmaiṭhuwm inni tlo daat joso, mmaanva Mma rin chlam me; 38 Khulpu Isaijah dothe pauna ava hanto kurkhumda: “Mukpu neen kpausaam chaak inna ku ngi rin chdon, ungu ku ngi Mukpu rawl dona ava kpunlor rangda?” 39 Ava ngi mlei kurthuwkda, mmaanni rin chliit lamme. Mleija Isaijah ngi hanto the nowlda, 40 “Mma ngi mmik in ptotda, ungu muplung in tapchai da, mmik inni dei lam mso, muplung ril inni deipandi lam mso, ungta mdam nraan Nei ki hin kinle lam mso.” 41 Isaijah ngi hava mdo the naki mleija, mma ngi Mma laarnee deida, ungu Mma mlei thu kpau. 42 Anto daat joso rutan kthloi mii knempokki Mma rin chda, pdainu mmaanna synagog duwn tha mdo knen pthi ma nraan, Pharisi rek mdo ṭit lei inni thethuw lamme; 43 mleija mmaanva Isowr do panpaak kchang nga mii rek do panpaak ra ngei lamda.
Jisu Pauna do Kṭewl
44 Ungta krowl kparyaa ngi Jisu ngi owngda, theda, “Nei mikrin cha mii va Nei mdo trin chaak ava pme; pdainu Nei mjuksii Mma krin cha kurthuwk. 45 Ungta Nei mhai kdei cha miiva Nei mjuksii Mma ava kdei cha kurthuwk. 46 Nei mhai krin cha ku mii khat ava ngi kjiingnu thu ma amma nra, Neia dultipaam thung ngi mar awng khat lulu ngi kurjung ping. 47 Ku mii khatti Nei kdo the hava aryaada, ungu markhiik mabi, mma Neiji kṭewl maang, mleija Neia dultipaam kekṭewl kurjung pmaang, pdainu dultipaam kaktlan ra kurjung ping. 48 Nei mapthleida kpauthe karlaang cha kma mii ava kekṭewlra; Nei kdo the dok pauna ava ngi mma mṭutna nitti kekṭewlra. 49 Mleija Neiva kthina ki rutanni the maang, Nei mjuksii Kpah mdak katti, tak the nikdi ungu tak heppi pau nikdi tditki paureen mdo tpiik chaak dok. 50 Ungta Mma paureen ava kṭuw knai kma ki rinkhu tdit Neiji kdee chaak. Ava leiji Nei kdo the ava Kpah dothe ava kthe cha ping.”
Jisu ngi Siikhu rek Khu mdo Alṭhut
1 Tunva taplaanna kmaal ava dutha Jisu ngi hava dultipaam thungki Mpah hin tha msun chaak nrangki ṭhang kvei dok mdee thungta, dultipaam thungki Mma mii rekka kdung ngi wonsat lo chda, Mma ngi mṭutna kpha dekki wonsat lo chlamda. 2 Ungta dijabowlli Simon chapa Iskariot plung thung ngi mdo ro ma nrangki mdaal dok diltha, kjiingki kmaal mpha thu, 3 Jisu ngi hava do mkheng nga Kpah ngi kukhut thu mdo tpiik chaak dok, ungu Kpah hinki kurjung ping, ungta Kpah hintha hung nikdi tdit dei dokda, 4 Mma ngi kmaal thungki ripda, mdomna msiirri thii thida, ungta Mma mdaksaa ki buw liple suwn ava kparyeelda. 5 Ava dilli Mma ngi arkuw khat thung ngi dii ptlongda, ungta siikhu rek khu kulṭhu pṭhunda. Ungta Mma doyeel daat buw liple suwn ava ngi knuwl pik lamda. 6 Mma ngi Simon Pitor hin arvangda,; ungbi Pitor ri Mhin theda, “Mukpu, kukhu mhai alṭhut pik namo?” 7 Jisu ngi mhin arthawngda, “Tun tunva Neiji tak ktlotta tdit dei nimti, pdainu dil thang rongi deipandi nadi.” 8 Pitor ri Mhin theda, “Nang ngi kukhu kulṭhu ro nime.” Jisu ngi mhin arthawngda, “Neiji akhu kulṭhut mabi, Neitu mri am mti.” 9 Simon Pitor ri Mhin theda, “Mukpu, kukhu hehe daat kma, kluw ruk mhai alṭhut pik cha.” 10 Jisu ngi mhin theda, “Kulṭhu dok miia mkhu daat kma donle arleek setti mkulṭhut nra amme, pdainu mdak mkheng nga kartleu chdok, ungta nah kartleu dok pti, pdainu naan mii pum ktai ava pme.” 11 Mleija Mma kro kmara miia dei chda; ava leiji Mma ngi akheng inva kartleu maanti,” dida theda. 12 Mma ngi mkhuwn mulṭhut dok le mdomna rek louda, ungu mkonna arsang thida, mhin inni theda, “Neiji ahin inni kdo tlotta adee inna? 13 Naanva Chukpu, ungu Mukpu, kdingi ado to own in, ungu ava mkindit kat kurthuwk, mleija Neia ava ki tum ping. 14 Ava mkurthut tu naanki Mukpu leh Chukpu ngi akhuwn mulṭhutbi, naan rukva khat leh khat khu akulṭhut raan. 15 Mleija Neiji purtolnu ado kpiik in, Neiji naan hin kdo tlot heppi naan rukva atloin. 16 Kindit, kinditti, Neiji ahin thaanni kthea, sra owr khatti mma ki chukpu ava hin klin ava pme; mdit mata mdo haisii mii ngi ksii ava hinni klin ava pme. 17 Naanni hava lea deida atlot inbi, naanna suwkṭha in pti. 18 Neiva akheng in hinni pau the maang, Nei kdo kcholla Neiji kdo dee; laaika mkurkhum nra, ‘Neiji thenpen kdo maalṭhi mii ava ngi mkhu pkhong khiing donle kraal mikpii ra.’ 19 Nong mthuw du ngi tun tunni hava akthe pik dok inna, mleija nong mthuw thu rongi Neia Mma thide kdingi mrin cha ro naandi. 20 Kindit, kinditti, Neiji ahin thaanni kthea, Nei kdosii thungki khat karlaang cha miiva, Nei mdo tarlaan chaak, ungta Nei mkarlaang cha miiva Nei mjuksii Mma mdo arlaan chaak.”
Mma Krokmara Jisu Dophuwn
21 Jisu ngi hanto mthe dokle, Mma pthla ngi ja chda, ungu the thuwda, “Kindit, kinditti, Neiji ahin thaanni kthea, naan arlakki miilai khat ava ngi mro nime.” 22 Ku mdo thena tdit mkindit ma leiji, siikhu rekka khat leh khat kursuw lamda. 23 Ava leiji Jisu wonsat lo, Jisu plung tnelda kikbeu, siikhu rek thungki khat, 24 Simon Pitor ri mmik pkhapda, ungu theda, “Mma kuda, mhai the pik chaan.” 25 Jisu plung tun kikbeu ava ngi Mhin theda, “Mukpu ku da?” 26 Jisu ngi mhin arthawngda, “Neiji thenpen kṭik puhuwmda kdo piik mii avara.” Ava leiji Mma ngi thenpen kṭik puhuwm thida, Iskariot ki Simon chapa Judas ava hinni piida. 27 Ava leiji thenpen kṭik diltha mma thung ngi seitaan lutda. Jisu ngi mhin theda, “Nang ngi ado tlot nuwm slii ava kbeiji atlo dok.” 28 Tunva tebol be ngi kuk ong mii khat lee ngi talu lei mhin anto mdo the tdit deipandi chlamme. 29 Mii angṭhe rekva Judas ava ngi sumbuwr mdo sin lei pakda kdingi bin lamda, mleija Jisu ngi mhin theda, “Kmaal tummi tikriin inna aren dok.” Mata sra hin mrukjown mdo them pik nra theda. 30 Ava leiji mma ngi thenpen kṭik marlaan dok diltha, duwn tha thuwk tengda, ungu mpha ava jaan.
Ren Paureen
31 Mma msun dok diltha Jisu ngi theda, “Tunva Mii Chapa ava kpunlor ra, ungu Mma thung ngi Isowr ra kunlorra. 32 Mma thung ngi Isowr mkunlorbi, Isowr rukka Mma mdaksaa thung ngi kpunlorra, ungta Mma kuknot ti kunlor ra. 33 Kmo sisi rek, naanna mpha mongtek pang thu Neiva aju kurthlo ṭhi nikaandi, naanni mthlaam naandi; Neiji Jihudia rek hin kdo the lulu ngi tun rukku ahin thaanni Neiji kthea, ‘Nei ksun nra mun ava tha naanna thleng pchaang nimaanti.’ 34 Neiji paureen ren khat akpiik inna, khat leh khat wonsat ekurlo in; mleija Neiji wonsat ado klo in heppi, khat leh khat wonsat kurlo chaan. 35 Naanni khat leh khat wonsat akurlo inbi, naan ava Nei ksiikhu rek tdit hava mii mkheng ngi kdei rora.”
Jisu ngi Pitor do Mat ra mdo Thethut
36 Simon Pitor ri Mhin theda, “Mukpu tva tha ṭoi nadi?” Jisu ngi arthawngda, “Tun tunva kche nrang thangva mṭoi pchaang nimti; pdainu dil thang ngi mṭoi ro nadi.” 37 Pitor ri Mhin theda, “Mukpu talu leiji tun tunva aṭoi pchaang ni maangda? Nah tummi krinkhu var nikdi.” 38 Jisu ngi arthawngda, “Nei ktummi arinkhu var namo? Kindit, kinditti, Neiji ahin kthea, nang ngi vei kdum atmat du khim khai harkhuwng ngi khuwng nime.
Jisu ngi Mpah Lam mdo Tarngai
1 “Naanni plung pjada am maan, Isowr arin chaan. 2 Kpah hin thangva innka knempokki ka am; anto mkurthut mau, Neiva hung nik don naan tumra mun apurchuwl pik nikaandi dida the nikmo? 3 Ungta Neiji hungda mun khat kpurchuwl dok le, veikhat arjung kinleda, Nei ka am ntha naan ruk a am nraan, ungu Nei kdak katti alou nikaan di. 4 Ungta Neia tva tha kchet slii imping tdit naanni ado dee in.” 5 Thomas ti Mhin theda, “Mukpu tva tha ṭoi nadi tdit neenva dei chmaan ring, tak heppi Nah lamma dei nikaanda?” 6 Jisu ngi mhin theda, “Neia lam, ungta kindit, ungu rinkhu ava ping; Nei kihin kma donle ku mii khat lee ngi Kpah hin thleng pchaang me. 7 Naanni Nei atidee inbi, Kpah ruk dei naandi, tunva Mma ava adee inna ungu Mma ava adee chaak dok inna.” 8 Philip pi Mhin theda, “Kpah in ava mhai tdet chaan, ungta kuplung in kngam ra.” 9 Jisu ngi mhin theda, “Hava mpha roi ksot thung ngi Neiva akurthlo ṭhi daat innu, ungu nangva mdei liit mti mo Philip? Nei mikdei kcha miiva Kpah ruk mdo dee; tak heppi, ‘Kpah mhai tdet chaan,’ ditinu athea? 10 Neiji Kpah hin ungu Kpah ngi Nei kihin ka am tdit rin cha mtimo? Neiji ahin inni kdo the pau ava kthina ki rutanni kdo the ava pme; pdainu Nei kthung ngi ka am Kpah ngi Mma nong rekka mdo tlot. 11 Neiji Kpah hin ungu Kpah ngi Nei kihin ka am tdit arin cha; mdit mata nong rek ava leiji mhai rin cha. 12 Kindit, kinditti, Neiji ahin thaanni kthea, Nei mikrin kcha miiva Neiji kdo tlot nong rek mma ngi ktlora, mleija Neia Kpah hin hung nikdi. 13 Naanni Nei kmiing ngi aṭhil chaak in khim khai thu, Neiji atlot pik nikaandi, mleija Mchapa thung ngi Mpah ava kpunlor ra. 14 Nei kmiing ngi ado ṭhil chaak in khim khaija Neiji atlot pik nikaandi.
Pthla Kchiir Paureel
15 “Naanni Nei wonsat atulo inbi, Nei kpaureen rek arkhii naandi. 16 Ungta Neiji Kpah hin ṭhil nikdi, ungu akbom chraanni Mma ngi ktlok khat, 17 ditta kṭuw knai liit kma akṭhi chraanki kindit pthla ava akpii chraan, dultipaam va arlaang pchaangme, mleija Mma tdee ruk deime kdei ruk kurthuwk me; naanva adee in, mleija Mma ngi naan thung ngi akurthlo ṭhi tlit inda, ungu naan thung ngi ka am. 18 “Neiva asui nimaan ring, Neiji naan hin arjung nikdi. 19 Anto daat joso mpha mruk tummi dultipaamva mdei bong nime, pdainu naanva mdei naandi; mleija Nei krin leiji naan ruk ring naandi. 20 Nit ava thu Neiji Kpah hin, ungta naanni Nei kihin, ungu Neiji naan hinni ka am ava dei ronaandi. 21 Nei kpaureen rek arlaangda, avale karkhii cha miia Kpah ngi wonsat klora, ungu Neiji wonsat lo nikdi ungta mhin Neiji kdaksaa kat tdet nikdi. 22 Iskariot kma Judas ava ngi Mhin theda, “Mukpu, adaksaa katta mtidet chaanti, ungu dultipaam hin pme diti tak heppi ado theda?” 23 Jisu ngi mhin theda, “Ku mii khatti Nei wonsat mtulobi, mma ngi kpauna rek karkhii ra, ungta Kpah ngi wonsat klora, ungu neenni Mhin thleng nikaan di, Mma tu kilṭhi ngi ta am nraan inn sa nikaandi. 24 Nei wonsat muklo kma miiva kpauna rek arkhii me; ungta naan do aryaak pauna ava Nei kihin ki pme, pdainu Nei mjuksii Kpah Mma hinki. 25 “Neiji aka am ṭhiin slii thu hava lea ahin inni kthea. 26 Pdainu Nei kmiing ngi akbom raan Kpah dosiira Pthla Kchiir Mma ngi do mkheng akpurchuk chraan, ungta Neiji ahin thaanni kdo the mkheng akpibin paphaak chraan. 27 Naan hinni Neiji kdaai akmaak pik inna, Neiki kdaai ava akpiik chaak inna, dultipaam do piik lulu ngi Neiva apii maan ring, aplung in pja maan ungu ṭi maan. 28 ‘Neia sun nikdi, ungta ahin thaanni thleng nikdi,’ dinu Neiji naan hin kdo the aryaa naandi, naanni Nei wonsat atolo inbi, Neiji Kpah hin kuhun leiji kanpa naandi, mleija Nei kihinva Kpah ngi klin sii. 29 Ungta mthuw mpha thung ngi ado rin chaak nraan, tun mthuw du ngi Neiji akthe pik inna. 30 Neiji ahin thaanni knemmi pau saam bong nimaang, mleija dultipaam ki paamkpu kthleng nga; mmava Nei kleen rutan thloime; 31 pdainu Neia Kpah wonsat kdolo, Kpah ngi Nei kihin mdo tpiik paureen ava heppi Neiva kdo tlot mleija dultipaam ava ngi mdo dee nrang lei. Kardel in hava thungki sun in che.
Jisua Kindit Rikrou Dii
1 Neia kindit rikrou dii ava ping, ungta rikrou kpurthlot ava Kpah. 2 Thei kchui kma mbaak khim khaija kapra pthiira, ungta thei kchui mbaak khim khaija knem betti mchui nra kardiin pik ra. 3 Naanna Neiji pauna ado kthe pik dok lei inni kartleu dok in pti. 4 Nei kihin kbaang chaan, ungta Neiji ahin inni am nikdi. Rikrou baak ava mdingtu mkurjom mabi, mthina ngi thei mchui pchaan ma lulu ngi, naanni Nei kihin akbaan tlit chaak maanbi, thei chui pchaang nimaanti. 5 Neia rikrou ping, naanna mbaak in pti. Nei kihin kak baang tlit, ungta Neiji mma hin ka am tlit mii ava thei knemmi kchui, mleija Nei ktaakki naanni do khat lee tlo pchaang nimaanti. 6 Ku mii khatti Nei kihin makbaan tlit chaak mabi, mma ava mbaak lulu kipthira, tuṭon ruk kṭong chra, ungta mbaak rekka purkukda meithung ngi var pthi donle kukbung chra. 7 Naanni Nei kihin kbaang tlit da, ungta Nei kpauna ngi naan hin makbaan tlitbi, naanni ado ṭhil nuwm in aṭhil chaan, ungta ava akurthut pik raan. 8 Naanni thei chuida, ungta Nei ksiikhu akurthut in hava ngi Kpah mdo punlor. 9 Kpah ngi Nei wonsat mdo talo lulu ngi, Nei rukva wonsat ado klo chaak in, Nei kwonsat thung ngi kbaang tlit chaan. 10 Neiji Kpah paureen rek arkhinu Mma wonsat thung ngi kakbaan tlit lulu ngi, naanni Nei kpaureen arkhii inra, Nei kwonsat thu jiam in. 11 Nei kakanpat ava naan thung ngi ma am nra, ungta akanpat in mkurkhum nra, hava lea Neiji ahin inni kdo the. 12 “Neiji naan wonsat ado klo in lulu ngi, naan rukva khat leh khat wonsat kurlo in, ditta hava Nei kpaureen. 13 Maplap tummi ku mii khatti mrinkhu kpii cha hava kheelli wonsat kthloi ku khat lee ame. 14 Nei kpaureen ava naanni atlot inbi, naanna Nei kaplap in pti. 15 Neiji naanna sra owr rek dida a own kurnowl in nimaang, mleija mma kpupa ngi talu mtlot tdit sra owrva deime; pdainu Neiva naanna plap ado kdit in, mleija Neiji Kpah hinki kdo aryaak mkheng naan hin ado ktidet dok in. 16 Naanni Neia mukchol maanti, pdainu Neiji naanna ado kukchol in, ungta nong ado kpupuwk in, naanni chetda thei achui nraan, ungta naanki thei makbaan tlit daat nra, Nei kmiing ngi naan doṭhil chaak khim khai, Mma ngi akpii chraan. 17 Naanni khat leh khat wonsat akurlo nraan Neiji hava pau ado kreen pik in.
Dultipaam do Pder
18 Naanna dultipaam mii ngi atipder chaak inbi, naan atipder chaak du inni Nei mdo tipder chaak tdit adei in. 19 Naanna dultipaam ki akurthut inbi, dultipaam va mthina ngi wonsat kurlo chra, pdainu naanna dultipaam ki akurthut maan leiji, naanna Neiji dultipaam thungki ado kukchol dok in, ava ngi mlei kurthuwk da dultipaam ava ngi ado tipder chaak in. 20 ‘Sra owr ava mma kpupa hinnu klin kurthuwk me,’ dinu Neiji ahin thaanni kdo the pau ava abin phaak in. Mmaanni Nei suwk mtupthuwbi, naan ruk suwk akupthuwk raan; mmaanni Nei kpauna markhiik inbi, naan hinki ruk kirkhii lamra. 21 Pdainu Nei kleiji mmaanni hava le mkheng nga naan leenni klou lamra, mleija Nei mjuksii Mma ava mmaanni dei me. 22 Neiji arjungda mhin thaanni kpau tlaang mabi, mmaanni pnu arvei nime, pdainu tunva mmaan pnu tonna ptlot pik nime. 23 Nei mkipder cha miiva Kpah ruk mdo pder chaak. 24 Ku mii khat lee dotlot mlai nong rek ava Neiji mmaan arlakki ktlot ma tlaang bi, mmaanni pnu arvei nime; pdainu tunva mmaanni dei lamda, ungta Nei ruk Kpah ruk mapder chaanda. 25 ‘Mlei ktaak liitti mmaanni Neia mapder clam da,’ dida mmaan Nowlam thu mdo kjit dok pauna ava mkurkhumna. 26 Pdainu Neiji naan hin kdo siira Kpah hinki kbom ava, ditta Kpah hinki kthuwk kindit pthla ava murjun mpha thu Mma ngi sakhi muku hur pik chra. 27 Ungta naan rukka sakhi kurthuwk in pti, mleija mupṭhun daatki naanna Nei tu tkilṭhi daat in.
1 Naanni khusiir ado parthit ma nraan, hava mkheng nga Neiji ado kthe pik dok in. 2 Mmaanni synagog thungki akikneng pthii raan; naan ake eayou in ku mii khatti Isowr hin tlaai downnu sok klo chaakka dida mdo bin nrangki ṭhang ava karvang nga. 3 Ungta mmaanni hava ktlora, mleija mmaanni Kpah ruk Nei ruk mdei inme. 4 Pdainu mmaanki ṭhang marvan thung ngi Neiji naan hin kdo son dok pau ava ado bin phaak nraanni hava lea kdo the.
Pthla Kchiir Nongtlot
“Neiji akṭhi daat inki, mupṭhun daatki hava lea naan hin kdo the liit pme. 5 Pdainu tunva Nei mjuksii Mma hin kuhung rang imping; tun rukku naan ku mii khat lee ngi, ‘Tva tha ṭoi nada?’ dida mkikhewl am maanti. 6 Pdainu Neiji naan hin havale kdo the leiji plung kja ngi kdim kcha in pti. 7 Anto daat joso Neiji kindit ado kthe pik in; Nei ksun rang nga naan ṭhat nra, mleija Nei ksun mabi, kbom ava naan hin arjung nime; pdainu Nei ksunbi, Mma Neiji ahin thaanni sii nikdi. 8 Ungta Mma murjun mpha thu pnu mlei leh rinkindit mlei ungu kekṭewl mlei thung ngi dultipaam ava mraal ktidet ra: 9 mmaanni mdo trin chaak ma lam leiji, pnu mlei thu mdo parma in; 10 rinkindit mlei thungva Neia Kpah hinni hung nikdi, ungta naanni mdei kurnowl nimaanti; 11 kekṭewl mlei thungva dultipaam ki paam kpu rek ava mdo kṭewl dok. 12 “Naan hinni do knempok kdo thera ka am daatta, pdainu tunva naanni hur pchaang nimaanti. 13 Kindit pthla murjun mpha thu, Mma ngi kindit mkheng thu akṭhi chraan, mleija Mmava mthina ki rutanni pau the nime, ungta Mma ngi kthuwk rang rek ava akthe pik chraan. 14 Mma ngi Neia mukpunlor ra, mleija Mma ngi Nei kihinki lou donle ungu naan hin akti det chraan. 15 Kpah dothloi mkheng nga Nei kdo; ava leiji Nei kdo ava Mma ngi lou donle aktidet chraan dinu Neiji kdo the.
Karbin kor oi ungu Kanpa
16 “Mpha mruk suwn diltha naanni Neia mdei kurnowl nimaanti; ungta mpha mruk diltha naanni mdei ro naandi.” 17 Msiikhu rek angṭhe ngi khat leh khatti the lamda, “Mpha mruk thu naanni mdei nimaanti, ungu mpha mruk dil tha mdei nowl naandi; mleija ‘Neia Kpah hintha hung nikdi’ dida mdothea tak mdo the nda?” 18 Mmaanni the lamda, ‘Mpha mruk khat,’ ava tak mdo thena da? Mma ngi tak mdo thena tdit nenni dei maan min.” 19 Mmaanni Mhin mdo khewl nuwm in ava Jisu ngi deida; ava leiji Mma ngi mhin inni theda, “Mpha mruk khat thu naanni mdei nimaanti, ungu mpha mruk khat diltha naanni mdei nowl naandi, dinu Neiji ahin thaan kdo the leiji asingreel inni karkhewl in ptimo? 20 Kindit, kinditti, Neiji ahin thaanni kthea, naanni kurnung karbaangda ṭap naandi; pdainu dultipaam ma kanpa ra; naanni karbin kur oida amnaandi, pdainu akarbin akur oi in ava kanpa tha kur owlra. 21 Snu khatti nao kuplu rangki mukdung mṭou mpha thu karbin kur oilu, mleija mmaki ṭhang veida; pdainu mma ngi dultipaam thu kṭouva tdit mdo dee leiji mukdung ava bin kurnowl me. 22 Anto heppi naan rukka karbin kur oi in pti, pdainu Neiji veikhat adei nowl in nikdi ungu aplung ril in kanpa chra, ungta ku mii khat lee ngi akanpat inna alowng in nime. 23 Nit ava thu naanni do khat lee mkhewl nimaanti. Kindit, kinditti, Neiji ahin thaanni kthea, Nei kmiing ngi naanni Kpah hin ado ṭhil in khim khaija akpii chraan. 24 Tun kpha thu naanni Nei kmiing ngi do khat lee ṭhil chmaanti; aṭhil chaan, akanpat in mkurkhum nra arlaang chnaandi.
Dultipaam mdo Pchaan
25 “Neiji ahin inni paupurtol nu kdothe; naan hin purtol da kdothe kurnowl ma nra pdainu Kpah mlei thung ngi kandang ngi ado kthe pik nraanki ṭhang ava karvang nga. 26 Nit ava thu naanni Nei kmiing ngi ṭhil chnaandi; ungta naan tummi Neiji Kpah hin aṭhil pik nikaandi dinu Neiva ado kthe pik dok in; 27 mleija Kpah mdak katti naanna wonsat ado tolo chaak in, mleija naanni Neia Kpah hinki diinti wonsat mlo inti ado trin chaak in. 28 Neia Kpah hinki arjungnu dultipaam thung ngi kthleng ping; veikhat nowlli Neiji dultipaam ma thida Kpah hin hung nikdi.” 29 Mma siikhu rekki theda, “Oho, tunva pau kpurtol kma kandang ngi atithe pik chaak inna! 30 Tunva Nang ngi do mkheng deiti, ungta neenni ado kikhewl chaak raan do khat lee ame tdit neenni kdee chaak inna; hava ngi Nang ava Isowr hinki kurjung di innu krin chaak inna.” 31 Jisu ngi mhin inni arthawngda, “Tunva naanni arin chaak inna? 32 Tunva naanni ksang tlaak ki mma pthii thida ainn ainn thaanni akinvei tir chaak nraanki ṭhang ava karvang nga, kvei chdokka, anto daat joso Neia ksangtlaak pmaang, mleija Kpah ngi mdo tiṭhii daat. 33 Naanni Nei kihin kdaai ado phaak chaak nraan Neiji hava naan hin kdo the. Dultipaam thu naanni suwkthuwk in pti, pdainu kṭha ngi plung apngam daat in, Neiji dultipaam kap chaanna.”
Jisu ngi Msiikhu rek tummi mdo ṭhil chaak
1 Jisu ngi hava pauna rek mthe dok diltha, ta aanda parwaan hansuwda ungta theda, “Apah, ṭhang nga kvei dokka; 2 Nang ngi Mhin ado piik chaak mkheng leen kṭuw knai kma rinkhu ado piik chaak nra, Achapa Neia mhai punlor cha. 3 Ungta khdaat kurthuwk, kindit Isowr ungu Nah do arjuk sii Jisu Khrista hava mmaanni deida kṭuw knai ma ki rinkhu kurthuwk ka. 4 Neiji dultipaam thu aju punlor doknu, kdo tlot ra nong ado tpiik chaak ava kupṭut chaakka; 5 ungta tunva, Apah, dultipaam mapṭhan du liitti Nangtu ta amve thungki Nei klaarnee ka am ava ngi Nah a awng katti mhai punlor cha. 6 “Nang ngi dultipaam thungki Nei kihin ado tpiik chaak mii rek hin Nah amiing kpandan chaakka; mmaanna Nah ado, ungta mmaan ava Nei kihin mpii chti, ungu mmaanni apauna markhiik chaak inna. 7 Nang ngi Nei kihin ado tpiik chaak do khim khai ava Nah hinki tdit tunva mmaanni mdee chaak inna. 8 Mleija Nah dopiik chaak pauna rek ava Neiji mmaan hin pii chnu, ungta mmaanni arlaang chda, ungu Neia Nah hinki kurjung tdit mkindit dei chlamda, ungu Neia Nah dosii tdit mmaanni mrin chaak inna. 9 Mmaan tummi kṭhil chaakka; Neiva dultipaam tummi kdo ṭhil ava pme, pdainu Nah do piik chaak rek tum, mleija mmaanna Nah ado, 10 Nei kdo thloi mkheng nga Nah ado, ungta Nah ado thloi ava Nei kdo, ungu mmaan thung ngi Neia kunlor cha ping. 11 Neia dultipaam thu am kurnowl nimaang, pdainu mmaanna dultipaam thu ka am daat lamra, Ungta Neia Nah hinni kurhung chrang ping. Kchiir Apah, Neenve ngi khdaat tkurthut lulu ngi khdaat mkurthut nraan, Nah do piik chaak mmaan hava Nah miing ngi mhai arkhiik pik cha. 12 Neiji ka am ṭhi lam mpha thu, Nang ngi Nei kihin ado tpiik chaak hava mmaan ava, Neiji Nah amiing ngi kdo arkhiik chaak lam, Neiji kdo seel chaak lam, ungta laaika mkurkhum nra, kmaang chapa ava kma donle, mmaan ku mii khat lea maangme. 13 Pdainu tunva nea Nah hinni kurhung chrang ping; ungta mmaan mdaksaa thuwn Neiki kanpa mkurkhum nra, hava lea dultipaam thu Neiji kthe kcha ping. 14 Neiji Nah apauna kpiik chaak lamma, ungta dultipaamva mmaan ava pder chlamda, mleija Neiji dultipaam thungki kukurthut ma lulu, mmaan rukka dultipaam ki pme. 15 Neiva dultipaam thungki mhailo pik pthii lam kdingi kdo ṭhil chaak ava pme, pdainu Nang ngi mmaan ava kṭha kma thungki mhai arkhiik pik chlam kdingi kṭhil cha ping. 16 Neiji dultipaam thungki kukurthut ma lulu ngi, mmaan rukka dultipaam thungki lam pme. 17 Mmaan ava Nangki kindit ava ngi apartleu pik chlam; Nah apauna ava kindit. 18 Nang ngi dultipaam thu Nei ado tsii lulu ngi, Neiji mmaanna dultipaam thu ksii chaak lamma. 19 Ungta mmaan rukva kindit ava mkarpiik de nraan, Nei kdaksaa kat ava mmaan tummi kpiik chaakka. 20 “Neiva hava le tum daatti ṭhil chmaang, pdainu mmaan pauna krin cha tum ruk, 21 mmaan mkheng ngi khdaat mkurthut nraan kṭhil cha ping, Neia Nah dosii tdit dultipaammi mdo rin chaak nra, Apah, Nang ngi Nei kihin, ungta Neiji Nah hin ta amve lulu ngi, mmaan rukka Nen Nthung ngi ma am nraan kṭhil chaakka. 22 Neenve ngi khdaat tkurthut lulu ngi, mmaanni khdaat mkurthuw nraan, Nang ngi Nei kihin ado tpiik chaak laarnee ava mmaan hinni kpiik chaakka. 23 Neiji mmaan hin tha ungu Nang ngi Nei kihin ka am ava mmaanni kinreel mkurthut nrang lei, mleija Nang ngi Nei mjusii ti, wonsat ado,talo chaak lulu ngi, mmaan rukka wonsat mloa tdit dultipaammi adeiso. 24 Apah, dultipaam mapṭhan du liitti wonsat mlo chtinu, ado tpiik chaak Neiki klaarnee ava Nei kihin Nah dopiik chaak rek ava ngi mdo dee chaak nra, Nei ka amna mun thu mmaan ruk kdo amṭhi lam ra Neiji kngei chaakka. 25 O, rinkindit Apah, dultipaamva Nah adeime, pdainu Neiva akdee chaak, ungta Neia Nah dosii tdit mmaanni deime. 26 Nang ngi Nei wonsat ado talo chaak ava mmaan thung ngi ma am nra, ungta Neiji mmaan thung ngi ka am nra, Neiji Nah amiing mhin inni tdet nu, ungta tdet lam nikdi.
Jisu mdo KJown in
1 Jisu ngi hava pauna rek mthe dok diltha msiikhu rek tu kilṭhi ngi Kidron daamjowl raalpha tha vang lamda, ava thungki innbil khat thung ngi msiikhu rek tu lut lamda. 2 Tunva Mma krokma Judas rukva msiikhu rektu maknem ava thu kurdu kchok tdit deida. 3 Ava leiji Judas ava ngi rawlmii rek lop khat, ungta thiimpu kinreel nong klin kpuw rek, ungu Pharisi rek ṭhida, kla leh klachoi sin lamda, ungta rawl dona tu thleng lamda. 4 Ava dilli Jisu ngi Mma thu kthuwk ra mkheng dei dok da, mhin inni vada theda, “Ku kthlaam in pti da?” 5 Mmaanni Mhin arthawng da, “Nasareth ki Jisu.” Jisu ngi mhin inni theda, “Nei ping.” Mma kro kma Judas ava mmaan tu rip sap daat lamda. 6 “Nei ping,” dida Mma ngi mthe thungta dil kursown lamda ungu dul leen tluw tir lamda. 7 Mma ngi khewl nowl lamda, “Ku kthlaam in pti?” Ungbi mmaanni theda, “Nasareth ki Jisu.” 8 Jisu ngi arthawngda, “Neia Mma ping ngi dinu ado kthe pik dok in; ava leiji naanni Nei atathlaam inta, hava mii rekka sun chlamso.” 9 Mma do the dok hava pauna mkurkhum na ngi, “Nah dopiik chaak rekka khdaat pre pmaang maang.” 10 Ava dilli Simon Pitor ri mdo arkeen daat mkaangksaang maklee thungta, thiimpu kparthaang suwk owr knaa khat mchang ktongki sel bukda. Suwk owr miing ava Malkas. 11 Jisu ngi Pitor hin theda, “Akaang ksaang nga mkok thung ngi adaal dok; Kpah do piik tong nga Neiva nee nimaang mo?”
Annas Maiṭhuwmki Jisu
12 Ungta rawlmii rek lop ungta mmaanki berksu ungu Jihudia rek nong klin kpuw rekki Jisua kjowng lamda ungu bowl lamda. 13 Rukri reeppi mmaanni Annas hin ṭhi lamda, mleija mma ngi kum ava thu thiimpu kparthaang ngi ka am Keiphas ava puh kurthuwk da. 14 Miilai khatti mii rek tummi mdiyo ava ngi mchangha siira dida Jihudia rek hin Keiphas ava ngi kthe pik lam kurthuwk da.
Pitor ri Jisu mdo Mat
15 Simon Pitor leh ktlok siikhu khatti Jisu dil ṭoi lamda, ktlok siikhu khat ava thiimpu kparthaang maide mkurthut leiji, thiimpu kparthaang dulbuk kpha dekki Jisu vanglu ṭhida. 16 Pitor ra duwnki thurngot be ngi rip daatda. Ava leiji thiimpu kparthaang maide ktlok siikhu khatti vangthuwk da thurngot ksut pṭoi snu ava karbiik ṭhida, ungu Pitor ra vanglu ṭhi chda. 17 Thurngot ksut pṭoi snu ava ngi Pitor hin theda, “Nang rukka hava Miilai siikhu rek thungki khat ptimo?” Mma ngi theda, “Nei pmaang.” 18 Tunva sra owr rek leh nong klin kpuw rekki mei ai pchok lamda, mleija kjiil sikda, ungta rip lamda mdaksaan kpurlum lamda; Pitor rukka mmaan tu rip sap lamda, ungu mdaksaa kpurlum da.
Thiimpu Kparthaang ngi Jisu Pau mdo Khewl
19 Ungta Jisua thiimpu kparthaang ngi msiikhu rek leh mdo purchu mlei thung ngi paukhewlda. 20 Jisu ngi mhin arthawngda, “Neiva dultipaam thu kandang ngi kpauping, Jihudia rek mkheng mthuw kurkuna synagog rek leh luwbuk Inn thu mpha ktai thu Neiji kdo purchu; Neiva tuprut pau khat lee the maang. 21 Neia talu leiji nangva pau atikhewlla? Neiji mmaan hin tak kthe tdit ava karyaa rek hin akhewl cha; Neiji tak kthe tdit mmaanni mdee in.” 22 Mma ngi hava mthe thungta, nong klin kpuw rek thungki krip daat khatti, Jisu tpeengda theda, “Nang ngi thiimpu kparthaang nga anto arthawng namo?” 23 Jisu ngi mhin arthawngda, “Neiji karmak pau kthe ta, mkarma naki sakhi apii, pdainu Neiji kindit pau kthe ku kurthut tu, talu lei nangva ati tpeenna?” 24 Ava dilli mdo bowl in ava Annas va thiimpu kparthaang Kaiphas hin vasiida.
Pitor ri Jisu mdo Mat Nowl
25 Tunva Simon Pitor va krip daatti mdaksaa kpurlumda. Mmaanni mhin theda, “Nang rukka msiikhu rek thungki khat pti ma?” Mma ngi mat da theda, “Nei pmaang.” 26 Pitor ri maknaa mdo sel buk thiimpu kparthaang sra owr khat ava rilam kthuwk miilai khatti khewlda, “Innbil thung ngi Mma tu kilṭhi kdo dee ava pti ma?” 27 Pitor ri eme, dida mat nowlda; ungbi tunkat daatti harkhuwng ngi khuwngda.
Pilat Maiṭhuwmmi Jisu mdo ṭhiin
28 Ava dilli Jisua Kaiphas inn thungki lusang inn ava thu vanṭhi lamda. Ungta ava jiingsun kpanma kurthuwkda. Ungu mmaanni kbuwr kma taplaanna mmaal nraanki, mmaan mdak inna lusang inn thu lut lamme. 29 Ava leiji Pilat ti vangthuwk da mhin inni theda, “Hava Miilai hin ado plaal naan tak ka amda?” 30 Mmaanni mhin arthawng lamda, “Hava Miilaiji kṭha kma ktlo mkurthut mabi, neenni Mma aṭhi psuk nimaan ring.” 31 Pilat ti mhin inni theda, “Naan adaksaan katti aṭhi chaan, ungu naanki Nowlam dil kṭoiji akṭewl chaan.” 32 Jisu ngi hava tak hep kdu diyo ngi kdiyou rang ping dida mdo the ava mkurkhumna. 33 Pilat ti lusang inn thu vanglut thida Jisu own nowlda, ungu Mhin theda, “Nah Jihudia rek Kruwng ptimo?” 34 Jisu ngi arthawngda, “Ava nah dothe mo mdit mata murson rekki Nei klei thu ahin mdo sonda?” 35 Pilat ti arthawngda, “Neia Jihudia khat ping mo? Nah amii rek leh thiimpu kinreel rekki nei kihin ado tiṭhi psuk lam; Nangva tak atlot da?” 36 Jisu ngi arthawngda, “Nei ki Kruwngpaam ma hava dultipaam ki ava pme; Nei ki Kruwngpaam ava hava dultipaamki mkurthutbi, Jihudia mii rek hin mdo tparlaan ma nra Nei ksra owr rekki kurduk ṭhi lamra, pdainu Nei ki Kruwngpaam ava hava dultipaam thungki pme.” 37 Pilat ti Mhin theda, “Ava leiji Nah Kruwng khat ptimo?” Jisu ngi arthawngda, “Kruwng khat diti adothe ava ping. Mleija hava tummi Neia kṭou ping, ungta kindit sakhi kpiira, hava tummi Neia dultipaam thu kurjung ping. Kindit mii pum ktaiji Nei kukrowl karyaa chra.” 38 Pilat ti Mhin theda, “Kinditta talu da?”
Jisu Kdiyoura Mdodit
Mma ngi hava mthe dok le, Jihudia rek hin vangthuwk nowlda, ungu mhin inni theda, “Mma doparma neiva pha chmaang. 39 Pdainu taplaanna thu neiji naan tumra miilai khat khat kdo pthuw kcholu; atum raanna neiji Jihudia rek Kruwng ava pthuwk nimo?” 40 Mmaanni owng nowl lamda, “Eme, hava Mma rang pme, Barabas ra!” Tunva Barabas ava kuppru khat kurthuwk.
1 Ava dilli Pilat ti Jisua louda Tpubun lamda. 2 Ungta rawlmii rekki tirliing luwkhum khat her lamda, ungu mluw pkhum lamda, ungta kning ngi ksen buw pihiil lamda. 3 Mma hin thleng lamda, “Roi ksotti ring cha, Jihudia rek Kruwng!” kdingi the lamda, ungu mkhut inni tpeeng lamda. 4 Pilat ti vangthuwk nowlda mhin inni theda, “Asuwn, neiva Mma doparma do khat lee dei chmaang tdit naan ni ado dee nraan, neiji Mma naan hin kupthuw a. 5 Ava lei Jisua tirliing luwkhum khumda, ungu kning ngi buw ksen hiilda, arvang thuwkda. Ungta Pilat ti mhin inni theda, “Asuwn Miilai ava!” 6 Thiimpu kinreel rek leh nong klin kpuw rekki Mma mdee in thungta, mmaanni owng lamda, “Khros leen apthoi in, khros leen apthoi in!” Pilat ti mhin inni theda, “Naan adak kat inni alou inra khros leenva apthoi chaan, mleija neiva Mma doparma pha chmaang.” 7 Jihudia rekki mhin arthawng lamda, “Neenki Nowlam khat ka am, ungta ava Nowlam dil kṭoiji mdiyo kat ra, mleija Mma mthina ngi Isowr Chapa kpurthuw da. 8 Ungta Pilat ti hava pauna maryaak thungta, kdung ṭi da; 9 mma ngi lusang inn thu vanglut nowlda, ungu Jisu hin theda, “Nah tva ki ptida?” Pdainu Jisu ngi arthaan pik me. 10 Ava ngi mlei kurthuwkda, Mma hin theda, “Ki hinni the nimti mo? Nah akupthuwk rangki rutan ungu khros leen akupthoi rang ki rutan kdo thloi ava dei mtimo?” 11 Jisu ngi mhin arthawngda, “Nah hinni tun knungki ava ngi atpiik matlaangbi, rutan kthloi akurthut ma rang nga; ava ngi mlei kurthuwkda, nah hinni kparlaan mii ava ngi klin siiki pnu marve chaakka. 12 Hava leen Pilat ti mdo pthuw pthii nrangki mlam thlaamda, pdainu Jihudia rekki owng lamda, “Nang ngi hava Miilai apthuw pthiibi, Keisar plap kurthuwk mti; mdaksaa mthina ngi kruwng kpurthuw nuwm mii pum ktaiva Keisar tun kpaulu.” 13 Pilat ti hava pauna rek maryaak thungta, mma ngi Jisua duwn pthuwk thida, lung tsak Hebru pauvi Gabbatha tdit mun thu kekṭewl longkhom tun ko ongda. 14 Ungta ava taplaanna mdo purchuwl naanki nit; ungta ṭhang truk arveel kurthuwkda. Mma ngi Jihudia rek hin theda, “Asuwn, naanki Kruwng!” 15 Mmaanni owng lamda, “Aṭhi pthuwk in, aṭhi pthuwk in, Mma khros leen apthoi in. Pilat ti mhin inni theda, “Naanki Kruwng nga neiva khros leen pthoi nimo?” Thiimpu kinreelli mhin arthawngda, “Keisar kma donle neenki Kruwng ame.” 16 Ava dilli Mma khros leen mdo pthoi nraanki mhin inni parlaan pthiida.
Jisua Khros leen mdo Pthoi in
17 Ava leiji mmaanni Jisua lou lamda mdaksaa ki khros mthina ngi kdomda, Hebru pauvi Golgotha mdo dit luwru kdimna mun mdo dit ava tha hang ṭhi lamda. 18 Mmun ava thu mmaanni ktlok miilai knii rek mlaiṭimmi khros leen pthoi kthen lamda. 19 Pilat rukva jiik khat kjit da, ungta khros leen daarda; mdo kjitta, “Nasareth ki Jisu, Jihudia rek Kruwng,” dida. 20 Ungta jiik ava Jihudia rek mii maknemmi pa da mleija Jisu khros leen mdo pthoi naan mun ava khuwpii tnel tek da; ungta jiik ava Hebru, Letin, ungu Grik pauvi kjitda. 21 Ava leiji Jihudia rek thiimpu kinreel rekki Pilat hin the lamda, “ ‘Jihudia rek Kruwng,’ dida kjit ma,” Pdainu “Hava Miilaiji, ‘Neia Jihudia rek Kruwng ping,’ dida theda, adira akjit.” 22 Pilat ti arthawngda, “Neiji kdo kjit dok ava kdo kjit dok.” 23 Jisua rawlmii rekki khros leen mupthoi in mpha thu mdo mna ava lou lamda, rawlmii khatti khat khat kpurtum lamda, plii ngi trat lamda; mdiir ruk lou lamda. Pdainu mdiir ava tpurdut na ktaakki, karthak kingi kurdu kpha turkhown kthen. 24 Ava lei khat leh khatti mmaanni theda, “Nenni kṭet maan che, ku ngi kpha chrang kdingi pchel piik sut naan che.” Hava Laaika mkurkhumna, “Mmaanni Nei kdona ava marlak inni them lamda, ungta kdonaak daat tummi pchel piik sut nlamda.” 25 Ava leiji rawlmii rekki hava tlo lamda, pdainu Jisu be tha Mnuh, ungta Mnuh naonu Klopas numei Mery, ungu Magdaleni Mery rip daat lamda. 26 Jisu ngi Mnuh leh Mma wonsat lo msiikhu khat mbe ngi krip daat mdee thungta, Mma ngi Mnuh hin theda, “Snu, asuw, nah achapa!” 27 Ava dilli Mma ngi msiikhu hin theda, “Asuw, nah anuh!” Ungta ṭhang ava kat thung ngi siikhu ava ngi mnuh ava mi inn tha vanṭhi da.
Jisu Diyo
28 Hava diltha Jisu ngi nong mkheng kupṭut dokka tdit deida, (laaika mkurkhumna ngi) theda, “Kning kakraalla.” 29 Ava thu ju kdor ri kdim uwm khat am daat da; ava leiji mmaanni buwphown kdimmi ju kdor thu puhuwm lamda, hyssop tdit kchung leen daar lamda, ungu mner thu han pneek lamda. 30 Ungbi Jisu ngi ju kdor nee thida, Mma ngi theda, “Kṭuw kcha a,” Ungta Mma ava tngeng da, ungu diyou chda.
Jisua Mjii tha mdo Thun in
31 Ungta mdo purchuwl naan nit mkurthut thungta, kluwng rek ava sabath nitti khros leen ma am daat ma nra (mleija sabath nitta kparthaang kurthuwkda), mkhu in pbeng pthii thida mdo lo dok nraan, Jihudia rekki Pilat hin ṭhil lamda. 32 Ava leiji rawlmii rekki thleng lamda, ungta Mma tu kilṭhi ngi khros leen mdo pthoi kthen in rukri thokki khu pbeng lamda ungu ktlok khat khu pbeng lamda; 33 pdainu mmaanni Jisu mphaak in thungta Mma kdiyou dokki dei lamda, Mma khua pbeng lamme. 34 Pdainu rawlmii rek thungki khatti mjii tha kcheiji thunda, ungbi tun kat daatti hii leh dii ngi phulda. 35 Mleija naan rukva ado rin chaak nraan, mik ki kdei mma ngi sakhi piida, mma rinpaumin ava kindit, ungu Mma ngi kindit mdo the tdit mma ngi deida. 36 Mleija ‘Mma ru khat lee beng nime,’ dida laaika dothe mkurkhum nangi hava lea kthuwk. 37 Ungta ktlok laaika ngi the nowlda, ‘Mmaanni mdo thun naan mjii ksuw lamra.’
Jisu mdo Alruwl in
38 Hava diltha Jisu siikhu khat Arimathia Joseph pi, Jihudia rek mdo ṭit leiji, tuprutti Pilat hin Jisu kluwng mdolo chaak nra ṭhil chda, ungbi Pilat ti rot pik da sun da. Ava leiji mma ngi arva da Jisu kluwng nga lou chda. 39 Ungta jaanni Mma hinni rukri ngi karva Nikodimas rukva myrrh leh aloes tdit reidii tpurchuwm sum arjaa khat arveelli krik ava hurda arvada. 40 Mmaanni Jisu kluwng nga lou lamda, Jihudia rek nopa dil kṭoiji reidii tu kurthloppi plabuw ktarnaal dang ngi klum lamda, alruwl chlam da. 41 Tunva khros leen Mma mdo pthoi naan ava thu innbil khat amda, ungta ku mii khat lee mdo alruwl na mlai thlaan ren khat amda. 42 Ava leiji Jihudia rek do purchuwl naan nit mkurthut leiji, mmaanni Jisua alruwl chlam da, mleija thlaan ava nai tekda.
Thlaan Ktlong
1 Tunva hapta ki mnii khat na thok, jiingsun kpanma ngi, khuw mutmul daat arlaanni Magdaleni Mery ngi thlaan tha arvada, ungbi thlaan leenki lung nga kurlou dok deida. 2 Ava leiji mma ngi vang chenda Simon Pitor leh Jisu wonsat lo siikhu khat hin songda, “Nenki Mukpua mmaanni thlaan thungki mlo dok inna, ungu mmaanni talu thu mthiik in tdit nenni dei maan min. 3 Ava leiji Pitor leh ktlok siikhu khatti kurlou lamda thlaan tha va lamda. 4 Mmaanve mikniing inni vachen lamda, pdainu ktlok siikhu khatti Pitor vakheelda ungu rukri betti thlaan vathlung da. 5 Ungta tpeda msut thungta plabuw ktarnaal dang kurthluwng daat deida, pdainu mma vanglut me. 6 Ava dilli Simon Pitor ri mma dil ṭoida arvada, thlaan thung ngi vanglut da, ungbi plabuw ktarnaal dang, 7 ungu mluwthlun tha lukhaang ava plabuw ktarnaal dang tu kthii ve kma mun msik ki karthlep daat deida. 8 Ava dilli rukri ngi thlaan va kthlung dok siikhu khat rukka vanglut da, ungta mma ngi deida ungu rin chda. 9 Mleija Mma kdiyou thungki kring kinlera dida laaika dothe ava mmaanni dei pandi lam me. 10 Ava dilli siikhu rekki mi inn thaanni vang kinle lamda.
Jisu ngi Magdaleni Mery hin Maktardet
11 Ungta Mery ava thlaan duwn tha ṭapda rip daat da, ungu mma ngi mṭa chunni thlaan khur mhai sut thungta; 12 Jisu kluwng mdo thiik naan mun thung ngi, kpowl dang dang ngi kurthlong Waantamsii knii, khatti mluwthlun tha ungta khatti mkhu therri kuk ong daat mma ngi vadei lamda. 13 Mmaanni mhin theda, “Snu, talu leiji kṭap ptida?” Mma ngi mhin inni theda, “Mleija mmaanni neiki Mukpu lou dok lamda, ungu tva tha mthiik dok in tdit neiji dei chmanu.” 14 Hava mthe chunni mma ngi mdil kinle da, ungbi Jisu krip daat deida, pdainu ava Jisu tdit mma ngi tin chme. 15 Jisu ngi mhin theda, “Snu, talu leiji kṭap ptida? Ku kthlaam pti da?” Mma ava innbil kseel cha mii pakda kdingi, Mhin theda, “Ocha, Nang ngi alo pthi dokta ado thiik na mun mhai the pik cha, neiji lou chni.” 16 Jisu ngi mhin theda, “Mery,” Mma ngi mdil kinle da Hebru pauvi Mhin theda, “Rabboni!” (Chukpu mdo dit na) 17 Jisu ngi mhin theda, “Mhai arpom ma, mleija Neiji Kpah hin hung mlai ring; pdainu ku u knao rek hin vangra pau ava ason pik chlam, Neia Neiki Kpah ungu naanki Isowr ava hinni kuhung imping. 18 Mery Magdaleni ngi vangda siikhu rek hin theda, “Neiji Mukpu dei chnu”; Mma ngi kihinni hava le theda, kdingi mhin inni song chda.
Jisu ngi Msiikhu rek hin Maktardet
19 Ungta hapta ki mnii khatna thok, kjiing tha, Jihudia mii rek mdo ṭit lei inni siikhu rekva ma am naan thurngot arkam lamda, ungu marlak inni Jisu thlengda mhin inni theda, “Kdaai ava ngi aju kurthlo ṭhiinso.” 20 Mma ngi hava mthe mpha thu mhin inni mkhut leh mjii tdet lamda. Ava dilli siikhu rekki Mukpu tdit mdee in thungta kanpa chlam da. 21 Jisu ngi mhin inni the nowlda, “Kdaai ava ngi aju kurthlo ṭhi chaanso. Kpah ngi Nei mdo tsii lulu ngi aksii inna. 22 Ungta Mma ngi hava mthe dok le, Mma ngi tdaalli muwt lamda, mhin inni theda, “Pthla Kchiir arlaang chaan. 23 Naanni ku mii khat pnu ton aptlot pik inbi, mmaanna kuptlot pikra, naanni ku mii khat pnu tong aptlot pik maanbi, ava ptlot pik nime.
Jisu leh Thomas
24 Tunva kinphiir mdo dit Thomas, sowm lei knii thungki khat, mma ava Jisu mthlen mpha thungva mmaan tu kilṭhi me. 25 Ava leiji siikhu murson rekki mhin theda, “Neenni Mukpu kdee chaak in.” Pdainu mma ngi mhin inni theda, “Neiji Mma khut jotpi kbii deida, ungu kukhut chelli jotpi kbii thunda, ungta kukhutti mjii kikmei du khim khai, neiji rin chni maang.” 26 Nii tret diltha, siikhu rekka Thomas tu kilṭhi ngi inn thu am daat lamda. Thurngot sul dok lamda, pdainu Jisu thlengda marlak inni ripda ungu theda, “Kdaai ava ngi aju kurthlo ṭhi chaan so.” 27 Ava dilli Mma ngi Thomas hin theda, “Nah akhut chelli hava kukhut rek athunra asuw; ungta akhut akhiingra kjii tha akmei; nang ngi krin kma tloma, pdainu arin cha.” 28 Thomas ti Mhin arthawngda, “Neiki Mukpu, ungu neiki Isowr!” 29 Jisu ngi mhin theda, “Nang ngi ado dee leiji arin chaakka? Dei mjoso krin cha rek ava msuwkṭha.”
Hava Laaika Mlei
30 Tunva hava laaika thu tikjit ma titinna rek murson knempok ruk Jisu ngi siikhu rek maiṭhuwmmi tloda. 31 Pdainu Jisua Isowr Chapa Khrista tdit naanni ado rin chaak nraan ungta rin chda Mma miing ngi naanni rinkhu ado phaak chaak nraan hava lea kikjit kurthuwk.
Jisu ngi Siikhu rek Tikheu hin Maktardet
1 Hava diltha Jisu ngi mdaksaa ava Tibaria truwn be ngi siikhu rek hin ktardet nowlda; ungta Mma ngi hanto ktardet da. 2 Simon Pitor, kinphiir mdo dit Thomas, Galil ki Kana thungki Nathaniel, Yebedi chapa rek, ungu siikhu murson miilai knii rek, mmaan ava kurkuk lamda. 3 Simon Pitor ri mhin inni theda, “Neia tuwlva kukjowng chet ni.” Mmaanni mhin the lamda, “Neen rukva aju ṭoi chaanni.” Mmaanni chet lamda arkuwng leen tuwng lamda; pdainu ava jaanva mmaanni do khat lee kjowng chlamme. 4 Khuw mtlei thungta, diibiing ngi Jisu rip daat da, anto daat joso siikhu rekva Jisu tdit deipandi chlamme. 5 Jisu ngi mhin inni theda, “Kmo rek tuwlva ka am ngaal mo?” Mmaanni Mhin arthawng lamda, “Eme.” 6 Mma ngi mhin inni theda, “Arkuwng machang ktong tha kchak adeeng in, ungu naanni mruk kjowng chnaandi.” Ava leiji mmaanni deeng lamda, ungbi tuwlva mnemreen leiji mmaanni ṭen pchaang lam mda. 7 Jisu wonsat lo siikhu ngi Pitor hin theda, “Ava Mukpu!” Mukpu tdit Simon Pitor ri maryaak thungta mnonglona dona parthleng da, mdo mna naa tengda ungu truwn thung jun khuwngda. 8 Pdainu siikhu rek mursonva tuwlva ngi kdim kchak ava arkuwng thung ngi ṭen lamda, mleija mmaanna laan tu lam karlat pame, pdainu khutuk arjaa khat arveelli karlat. 9 Mmaanni laan tha mhunkal dok in thungta, ava thung mei ai kchok amda, mleenni tuwlva leh thenpen ka am daat dei lamda. 10 Jisu ngi mhin inni theda, “Tun katti ado kjown in tuwlva mruk arvan sin in.” 11 Ava leiji Simon Pitor ri vada tuwlva klin klin arjaa khat som parnga lei kdummi kdim kchak ava laan tha ṭenpthuwk da, ungta tuwlva nempok daat joso kchak kilṭet me. 12 Jisu ngi mhin inni theda, “Arvang inra emaal in.” Mma ava Mukpu tdit mmaanni dei lamda, siikhu ku khat lee ngi, “Nah ku pti da?” dida pau khewl nuwmme. 13 Jisu ngi arvangda ungu thenpen louda ungu mhin inni piida, tuwlva ruk anto tloda. 14 Jisu ngi kdiyou thungki mrin kardel diltha siikhu rek hin maktardet ava hava ngi mvei kdumna.
Jisu leh Pitor
15 Mmaanni mmaal dok inle, Jisu ngi Simon Pitor hin theda, “Johon chapa, Simon, hava le kheelli Neia wonsat ataloa?” Mma ngi Mhin theda, “Oji, Mukpu, neiji wonsat ado klo ava Nang ngi ado dee.” Mma ngi mhin theda, “Kjao nao rekka mhai pmaal pik cha.” 16 Mvei knitna ngi Mma ngi mhin theda, “Johon chapa, Simon, Neia wonsat ataloa?” Mma ngi Mhin theda, “Oji, Mukpu; neiji wonsat ado klo ava Nang ngi ado dee.” Mma ngi mhin theda, “Kjao rekka mhai sut pṭoi pik cha.” 17 Mma ngi mvei kdumna mhin ni theda, “Johon chapa, Simon, Neia wonsat ataloa?” Vei kdum chak thung, “Neia wonsat ataloa?” dida mdo khewl leiji Pitor plung jada. Ungta mma ngi Mhin theda, “Mukpu, Nang ngi do mkheng adodee; wonsat ado klo ava Nang ngi adodee.” Jisu ngi mhin theda, “Kjao rekka mhai pmaal pik cha.” 18 Kindit, kinditti, Neiji ahin kthea, nang ngi akset lai akurthut mpha thu, adaksaa ki arkowl kparyeel ti ungu ache nuwm natha kchet pti; pdainu nang ngi ader mpha thu, nang ngi akhut arjii tidon nah dongei nma tha akṭhira.” 19 (Tak hep kduki diyo ngi diyou donle Pitor ri Isowr kpunlor rang tdit mdo tdet nangi Mma ngi hava mdo the.) Ungta hava diltha Mma ngi mhin theda, “Kdil aṭoi cha.”
Jisu leh ktlok Siikhu
20 Pitor ri mdil mkinlet thungta jisu wonsat lo siikhu ngi mdil in mdo ṭoi deida, mmaanni kjiing ki then mmaal slii arlaan inni, Mma plung tun kbeuda, “Mukpu, Nah akparlaan pthii rang nga kuda?” dida kthe ava kurthuwk. 21 Pitor ri mma mdee thungta, mma ngi Jisu hin theda, “Mukpu hava miilaija tak hep rangda?” 22 Jisu ngi mhin theda, “Nei kurjun du khim khai mma ngi ma am daat ra kngeiju, ava ngi nah hin tak kurthuwkka? Kdil aṭoi cha!” 23 Hava siikhua diyou nime tdit ki pau ava mu u mnao rek thung ngi kurjouda; anto daat joso mma ava diyou nime dida Jisu va mhin mdo the ava pme, pdainu “Nei kurjun du khim khai mma ngi ma am daat ra ava Neiji kngei ju, ava ngi nah hin talu kthuwkka?” mdo ditna. 24 Havale sakhi kpii, ungta havale kikjit; siikhu ava hava; ungu Mma rinpaumin ava kindit tdit nenni ndee in.
Mṭutna
25 Pdainu Jisu ngi mdo tlot do knempok ruk ka am daat; khat khatti kikjit ra nkurthutbi, tikjit ra laaika mkheng nga dultipaam thung rukva chel pchaang nime kdingi kbin chaakka.