Karingbo Ladkeng
1 Kadihpiri dammak gasu Ladkengse bamniu-e, pahai Tingwang panai bamniu-e, khatdi pahai Tingwang panai nchamme. 2 Paphibang gasu Ladkengse Tingwang panai bamniu-e. 3 Papen gasu Tingwang niu mania hina damkhai-e, gandam khatnagadi pakhu ganiu makjiu dambo ha-e. 4 Ladkengse karingbo phibang si-e khatdi karingbo haisiniu chamaina khuga kabenbo phungwang-e. 5 Kabenbo siniu tamiuboga thaoben khai-e, sichiujiu tamiubo siniu wadaodi kammid lanlu makge. copy 6 Tingwang niu paladlangtadmai khat pazanniu John kubo piutu langkhai-e. 7 Paniu kabenbo lamga maidung khuga paokhaijiu, paliuniu pagu champao situ chiulujiu malum lura leng-e. 8 Pasiakra kabenbo makge, chiudi kabenbo lamga dinkhaira wangbo-e. 9 Haise palingbo kabenbo si-e, palamra kabenbo siniu kadihpiriga wangjiu chamaina mathiu khuga thaoben khai-e. 10 Ladkengse kadihpiriga bamniu-e, khatdi Tingwang niu papen gasu kadihpiritu damkhai-e, chiudi kadihpiri niu patu silu makge. 11 Paniu pagu kadihga wangbo-e, chiudi pamaidung siniu patu lukhai makge. 12 Chiudi maidung khangsianiu patu lukhai-e, khatdi patu malum khai-e, sichiujiu paniu paliutu Tingwang nahdung pithiu khaira pumtan pikhai-e. 13 Paliuse chamaina lunlung gasu Tingwang nahdung thiubo makge, chiubora chamaina khat piu nahdung thiubo makge, chiudi Tingwang papum siakniu paliu piu thiubo-e. 14 Sichiujiu Ladkeng siniu chamaina lun thiuwangbo-e, khatdi lungsiat nai majiboniu phui lujiu aliu ruangga lungwang-e. Aliuniu pakendise ngaode, sibo kendise Papiu gu kamalibo Nahpiu si-e. 15 John niu palamga dinjiu haichiu sen-e, “Hainase Iniu dinbambo pah si-e, pahai asailam wangkin-e, chiudi para asuang di-e; palamra atu dammak gasu para bambo-e.” 16 Pakhuga lungsiatniu phuijiu bambo jengniu, paniu aliu mathiutu thoi khaide sichiujiu aliu khatniu khattu thoikhai raleng-e. 17 Tingwang niu Tacheng-tajaise Mose khuga pikhai-e, chiudi lungsiat nai majibo haira Jesu Khrista khuga suniu-e. 18 Mai khatniudi Tingwang tu ngao makge. Pumlibo Nahpiu, Tingwang tu maluang bambo paniu patu pisi khaibo-e.
John Baptist Gu Champao
19 Jerusalem ga bammai Jehudi maigu apaimaidungniu, singkudung nai Levi mai khangsiatu John khuga langkhaijiu maniu-e, “Nang hai saolo?” 20 John niu paliutu paokak makbo thiumakjiu, haichiu dinkhai-e, “Ira Khrista se makge.” 21 Paliuniu maniu-e, “Sichiusai nang saolo? Nang hai Elijah sima?” John niu paokakge, “Chiumakge.” Siga paliuniu maniu-e, “Chiusai nang hai phaimiukakungse ma?” Paniu paokakge, “Chiumakge.” 22 “Sichiusai nang hai sao siaklo?” chiubo aliu khuga dinkhailo, aliutu langkhai mai khuga aliu pao malan wangra leng-e. “Nangniu nalamga dechiujiu dinralo?” 2323 Phaimiukakung Isaiah niu dinkhai mibo chamkengse khoilujiu John niu din-e, “Ira ramjingga chakhuan senkinbo si-e: Rapiu niu tadrabo npuise kam maji khailo.” 24 Pharisee maidunggu walang tadmai siniu John khuga maniu-e, 25 “ Nang hai Khrista dimak, Elijah dimak, phaimiukakung dimak sai dekamjiu tadui nphumbo tien hai kambam jiulo?” 26 John niu paokakge, “Ira taduiniu nphum khaibo-e, chiudi naliu ruangga chap bambo piutu naliuniu simakge. 27 Para asailam wangkinne, chiudi Ira paphitop riangdi khira akaji makge.” 28 Haidungse John niu Jordan Giu tingbanglam bambo Bethany ga, John niu tadui nphum bambo lon padmibo-e.
Tingwang gu Milypoi
29 Pasaibo naise Jesu pakhuga wangkinbo ngaolujiu John niu din-e, “Phuilo, uise Tingwang gu Milypoi, kadihpirigu nuan phung maha khaibo piu si-e! 30 Mai khat asailam wang kinne, chiudi para asuang di-e, palamra atu damkhai makha gasu para bambo-e, chiujiu Iniu dinbambo si-e. 31 Pase saokumbo mai thiu ralo chiubo simakge, chiudi Israel maidungtu pijiu patu silu raleng Ira tadui nphum khaibo-e.” 32 Sichiujiu John niu pagu jengdin thiujiu din-e, “Tinggen lamsu makhao kumjiu Hiupuina pariga kiu taokhaibo Iniu ngao-e. 33 Haise pa-e chiubo Ira silu makge, chiudi atu tadui nphumra langkhaibo Tingwang siniu akhuga din-e, ‘Mai khat piriga Hiupuina kiubo nang ngaosune, pase Masanbo Hiupuina gasu nphum khai rabo piu si-e.” 34 John niu din-e, “Haise Iniu ngao lubo-e khatdi naliu khuga dinbo-e, chiubora pase Tingwang Napiu si-e.”
Jesu Gu Karaibo Ladlangtadmai
35 Pasaibo naise John niu pakhommai khangniatu maluang lujiu chap bamboga; 36 paniu Jesu wangkinbo ngao lujiu din-e, “Phuilo, uise Tingwang gu Milypoi si-e!” 37 Paniu dinbose pakhommai khangnia siniu chiulujiu Jesu sai suitad mide. 38 Jesu niu mariwang paliutu ngao lujiu paliu khuga maniu-e, “Naliuniu degu phiukin gulo?” Paliuniu paokakge, “Rabbi yo, nang delam lungkin jiulo?” (Rabbi ladkeng rambaniu ‘Katipao’ chiubo-e). 39 Paniu paokakge, “Wangjiu phuilulo?” (Haise n-nien wanchak madai ningga-e). Sichiujiu paliuniu pasai suilujiu paniu bambo bamse ngao lujiu sibo nai gasu pasai suitad mide. 40 Khang khat sira Simon Peter saikariupiu Andrew si-e. 41 Paniu pasingna Simon tu ngao lujiu din-e, “Aliuniu Messiah tu daolude.” (Paramba siniu Khrista chiubo-e). 42 Sichiujiu paniu Simon tu Jesu khuga puiwang-e. Jesu niu patu phuilujiu din-e, “John nahpiu Simon yo, chiudi natuse Cephas chiujiu kumine.” (Cephas chiubo haise Peter chiubo panai nchambo-e, paramba siniu Tudi chiubo-e).
Jesu Niu Philip Nai Nathanael Tu Kubo
43 Pasaibo naise Jesu niu Galilee lam tadraleng kaden lujiu tadpadboga, paniu Philip tu daolujiu pakhuga din-e, “Asai suilulo.” 44 (Philip ra Andrew nai Peter niu lungbo bam Bethsaida gasu-e). 45 Philip niu Nathanael tu daolujiu din-e, “Tacheng-tajai ga Mose niu raokhaibo khatdi phaimiukakung mainiu raokhaibo patu aliuniu daolude, para Nazareth ga bambo Joseph nahpiu Jesu si-e. 46 Nathanael niu din-e, “Nazareth gasu wa kawibo padlu buima?” Philip niu paokakge, “Wanglo, phui matailo!” 47 Nathanael niu pakhulam wangkinbo Jesu niu ngao lujiu din-e, “Haiga Israel mai masan siakbo piu bamme. Pakhuga kamaobo wa khatdi ha-e!” 48 Nathanael niu pakhuga maniu-e, “Degasu nangniu atu silu jiulo?” Jesu niu paokakge, “Philip niu natu kubo masuang, nangniu ndutbang hangga chapjiu bambo gasu Iniu natu ngaokhai mibo-e.” 49 Nathanael niu paokakge, “Katipao yo, nangra Tingwang Nahpiu, Israel mai Wangpiu si-e.” 50 Jesu niu pakhuga din-e, “Nang ndutbang hangga chap bamme chiujiu Iniu dinbo donniu nang malum jiuma? Nangniu haisuang kadibo ngao sune!” 51 Sichiujiu paniu paliu khuga din-e, “Iniu naliu khuga pachang paling dinbo-e, Tinggen nkhamse lepadbo khatdi Tingwang mazadung siniu Nahpiu riga kiu-khangjiu bambo naliu ngao sune.”
Cana Ga Tanao Magiangbo
1 Jengnia saiga Galilee ga bambo Cana namdiga tanao magiangbo khat bamme. Siga Jesu puidi wang bamme, 2 siga Jesu nai pakhommaidung tudi kukhaide. 3 Sichiujiu mumjawse hamiboga Jesu khuga papuiniu din-e, “Paliugu mumjawse loimide.” 4 Jesu niu paokakge, “Apui yo, Iniu degu kamralo chiubo nangniu dinra makge. Aleng pawan wangtang makha-e.” 5 Siga Jesu pui siniu kavang maidung khuga din-e, “Paniu naliu khuga dinbo hina kamkhai bilo.” 6 Jehudi maigu tacheng saisuijiu khiu masanbo thiak bamme, sijengniu siga tadui karung charuk bamme; karung khatse wa madatpiang kai khat kumbo ngutsui kamme. 7 Jesu niu kavang maidung khugase din-e, “Haibo karungdungse tadui maliphui khailo.” Siga paliuniu pawongcheng tangbo tadui maliphui khaide. 8 Siga paniu paliu khuga din-e, “Tuhoira taduise tamnakha thuaklujiu machapiu situ pikhai bilo.” Sichiujiu paliuniu taduise thuaklujiu pakhuga pikhaide. 9 Tuhoira paniu machanbo tingga sibo duise mumjaw mawui mide; mumjaw haise ndechiu wangbo gulo chiubo para silu makge, (chiudi kavangdung sira sibamme). Siga paniu naopaopiu situ kulujiu din-e, 10 “Mai hinaniu sak kawibo jawse raiboga njanbo-e, sichiujiu chagiangmai siniu sak maniu mibo sainiu wiju makbo jawse njanbo-e. Chiudi nangra tuhoi tangbo sak wibo jawse khai bamkha-e!” 11 Galilee ga bambo Cana gasu Jesu niu pagu raithubo tasibo tien hai thiukhai-e. sichiujiu paniu pakendise madukhai-e, sichiujiu pasingnamaidung nai pakhommaidung siniu patu malum mide. 12 Haibo saiga, Jesu niu papui nai pasingnadung khatdi pakhommaidungtu Capernaum lam maluang wanglujiu, siga pakak khat bamkhai mide.
Jesu Niu Charaky Ga Tadbo
13 Tuhoira Kenpadbo Ngee hai nawang mide, sijengniu Jesu niu Jerusalem lam tadde. 14 Charaky lungga paniu matom-kabui, milydung khatdi kaphinadung jonjiu bambo khatdi rangkang nkhiakjiu bammaitu daode. 15 Siga paniu phenlubo chariang siniu thinlujiu Charaky lungga khaoring hinatu, matom-kabui khatdi milydung hinatu hapad sude, khatdi rangkang nkhiakjiu bam maigu pakaidungse tun makhum-tun masijiu rangkangse phe- mara mide. 16 Sichiujiu kaphina jonmaidung khuga chamtan thiujiu din-e. “Haigasu lupad milo! Apiu ky haitu ka-alibo bam pithiu khai tulo.” 17 Siga pakhommaidung siniu Masanbo ariakga dinkhai bambose maning taode, “Oh, Tingwang, nakyga Iniu kahumbo haise alungga chami kumjiu tao-e.” 18 Siga Jehudi maigu apaimaidung siniu paokakjiu haichiu maniu-e, “Haikumbo ngam kamra nangniu ndegu tasibo aliutu lenkhai ngamlo?” 19 Jesu niu paokakge, “Haibo Raky hai rathon milo, Iniu jengsum lungga thiulan lubui-e.” 20 Siga paliuniu maniu-e, “Nangniu haise jengsum lungga thiulan lubui-e ma? Haibo Raky hai thiuboga takum atai-je-charukkiu ngutkhai mibo-e. 21 Chiudi Jesu niu dinbo sira papum raky lamga dinbambo-e. 22 Sichiujiu paniu shailujiu ringsulan miboga pakhommaidung siniu haise paniu dinmibo si-e chiubo maningtao lude, khatdi Masanbo ariak nai Jesu niu dinbo situ malumde.
Jesu Niu Chamaina Lunlungtu sibo
23 Kenpadbo Ngee tingga Jesu niu Jerusalem ga bambo lon tasibo ngam kamkhaibo ngao lumai kakeng khaniu patu malum mide. 24 Chiudi Jesu ra paliutu malumkhai makge, palamra paniu paliu mathiutu sibamme. 25 Paliu lamga mai khatniu pakhuga dinkhaira pageng ha-e, palamra paliu mathiu lungchunse paniu sikam bamme.
Jesu Nai Nicodemus
1 Jehudi maigu jupao khat pazanniu Nicodemus chiu kubo, Pharisee mai khat bamme. 2 Naikhat nchun paniu Jesu khuga wanglujiu din-e, “Rabbi yo, nangra Tingwang niu langwangbo katipao khatle chiubo aliuniu si-e; palamra Tingwang niu patu maluang khaibi maksai nangniu kamkhaibo tasibodung hai kamlu lakge.” 3 Jesu niu paokakge, “Iniu nakhuga pachang paling dinbo-e, mai khatniu mana kasan lanlu maksai Tingwang gu Chawangdihga ngutlu lakge.” 4 Nicodemus niu maniu-e, “Dechiujiu katingmai khatniu mana kasan lanlu ralo? Paniu wadao khatdi papui wonlungga ngutlan silakge, sichiujiu mana lonnia lulakge.” 5 Jesu niu paokakge, “Iniu nakhuga pachang paling dinbo-e, mai khatniu tadui nai Hiupuina gasu mana kasanlu maksai, Tingwang gu Chawangdihga ngutsi lakge. 6 Chamai gasu manabose chamai-e, chiudi hiupuina gasu manabose Hiupuina-e. 7 Nang mana kasanlan rabo-e chiujiu Iniu dinboga nasuang hami mane. 8 Tingkai siniu hunkhai nibo lam hunkhai-e, sise nangniu pakhuan ronna chiu-e, chiudi sise delam suniu, delam hunkhai bamlo chiubo nang simakge. Hiupuina gasu mana lumai hinadi sikumbo-e.” 9 Nicodemus niu maniu-e, “Haise dechiujiu padngam ralo?” 10 Jesu niu paokakge, “Nangra Israel maigu katipao kadibo khatle, chiudi haise nang simak jiuma? 11 Iniu nakhuga pachang paling dinbo-e: Aliura kasibo dinbo-e, khatdi ngao lubose dinbo-e. Chiudi aliugu champao haitu naliuniu lukhaini makge. 12 Haibo kadihgu lamga Iniu dinboga naliuniu atu malum maksai, Iniu tinggen lamga dinsai dechiujiu naliuniu malumlu ralo? 13 Khatdi tinggen lamsu kiubo Nahpiuse makjiu mai khatdi tinggen lam khang makge.” 14 Mose niu ramjingga tanaaginiu kambo kaniutu jumaseng khai mibo kumjiu Chamai Nahpiu tudi jumaseng surabo-e. 15 Sichiujiu patu malummai hina tingtheng ringbo ngao lune. 16 Palamra Tingwang niu kadihpiri haitu haijiukha kungbo donniu panah pumlibo situ pikhai bide, sichiujiu patu malum lumai hina shaimakjiu tingtheng karingbo daolura leng-e. 17 Palamra Tingwang niu Nahpiu situ kadihpiri haitu ladjan thiura langkhaibo makge, chiudi haisitu rankhai raleng-e. 18 Mai khatniu Nahpiu situ malum lusai patu ladjan thiu lakge, chiudi mai khatniu patu malum maksai ladjan thiuloi mibo-e, palamra paniu Tingwang Nahpiu pumlibo situ malum makbo donniu-e. 19 Haichiujiu ladjan thiu rabo-e. sisera kabenbo siniu kadihpiriga wang-e chiudi maidung siniu kabenbotu suang tamiubo situ masenne, palamra paliu tienkamse kasabo donniu-e. 20 Mai khatniu kasabo tien kamsai paniu kabenbo situ mareng mibo-e, palamra pagu tienkam kasabose madu padni makge. 21 Chiudi kamajibo kam maidung siniu kabenboga wang-e, sichiujiu kabenbo siniu pagu tienkamse Tingwang kadin piubo-e chiubo madulen raleng-e.
Jesu Nai John
22 Haibo sai, Jesu niu pakhommaidungtu puilujiu Judaea ramlungga tadde, siga paniu paliutu maluang bam khaide, khatdi tadui nphum khaide. 23 John di Salim gasu diumakbo Aenon kubo bamga tadui nphum khaijiu bamme, palamra siga tadui kengbamme. Maidung siniu pakhuga wang karenjiu bamme, sichiujiu paniu paliutu tadui nphum khai-e. 24 (Haise John tu kavangkyga khai makhabo suang-e). 25 Jehudimai khangsianiu John gu pakhommaidung khuga tacheng saisuijiu kam masanbo lamga arijiu bamme. 26 Sijengniu paliuniu John khuga tadlujiu haichiu din-e, “Katipao yo, nangdi maningtao bamdi sui-e, chiubora Jordan gu tingbanglam nangniu dinkhai mibo piuse, tuhoira padi tadui nphum khaijiu bamme, sichiujiu mai hina pasai sui mide!” 27 John niu paokakge, “Tingwang niu patu pikhaibi maksai mai khatniudi kam ngam lakge. 28 Naliu pumsiakniu agu jengdin thiu bambo-e, chiubora ‘Ira Messiah se makge chiudi pamasuangga atu langkhaibo-e.’ 29 Naopaopuise naopaopiu leng-e chiudi naopaopiu kahmaidung pamungga chap bammai siniu, naopaopiu khuan chiuboga paliu chun wi-e. Haichiujiu agu chunwibo hai wiphu lubui-e. 30 Ira nkhin kiubi-bi mine,chiudi para nkiukhangbi-bi rabo-e.”
Tinggen Lamsu Wangbo
31 Tinggen lamsu wangbo piuse mathiu suang di-nkiu-e, kadihpiriga lungmai hinase kadih gu-e, khatdi kadihpiri lamga dinbo-e; chiudi tinggen lamsu wangbo para mathiu suang nkiubo-e. 32 Para ngaolubo nai chiulubose dinbo-e, chiudi pachamse mai khatniudi lukhai makge. 33 Sichiudi pacham lukhai mai hinaniu Tingwang ra majibo-e chiujiu lukhaibo-e. 34 Tingwang niu langkhaibo paniu Tingwang ladkengse dinbo-e, palamra Tingwang niu pagu Hiupuina kaphuibose paleng pikhai-e. 35 Papiuniu Nahpiu situ lungsabo jengniu pumtan hinase paleng pikhai bibo-e. 36 Mai khatniu Nahpiutu malum lusai tingtheng karingbo daolune; mai khatniu Nahpiutu malum maksai tingtheng karingbose daolakge, chiudi Tingwang gu sajai hangga bamme.
Jesu Nai Samaria Maipui
1 Jesu niu John suang pakhommai keng nkiu mide, khatdi tadui nphum khai maidung keng mide, chiujiu Pharisee maidungniu chiude. 2 (Pachang siakra pakhommaidung siniu sangnu, Jesu papum siakra mai khattudi tadui nphum khai makge). 3 Jesu niu haibo chamse chiuluboga, paniu Judaea phutlujiu Galilee lam malan khai mide. 4 Sichiujiu pagu npuise Samaria kenjiu tadra padde. 5 Samaria ramlung gase Sychar chiubo namdi, Jacob niu panah Joseph leng pikhaibo luzam gasu watheng makbo gase paniu wangde. 6 Jacob akhunse siga bamme, Jesu niu npui tad jengniu, magenthiu mibo jengniu akhun munggase ntao mathak khaide. Haise niending tingga-e. 7 Siga Samaria maipui khat tadui thuakra mengde, siga Jesu niu pakhuga din-e, “Tadui sak khaira aleng khelo.” 8 (Pakhommaidung sira katiu liuraleng namdi lamse tadmibo-e). 9 Maipui siniu paokakge, “Nangra Jehudi mai-e, Ira Samaria mai-e, dechiujiu nangniu akhuga tadui sakra khengjiulo?” (Jehudi maidungra Samaria mainiu thinbo kuang-piang gasu wa tiu aruang makbo-e.”) 10 Jesu niu paokakge, “Tingwang niu pibo kalense, khatdi nakhuga tadui sak khaira kheng bambo patuse nangniu sisai, nangniu pakhuga karingbo duise pikhaira nangniu khengbam rabo-e.” 11 Maipui siniu Jesu khuga din-e, “Paohubo, nakhuga thuakrabo piangdi ha-e, khatdi akhun haira sukge. Nangniu delamsu karingbo duise daolu ralo? 12 Aliu pao Jacob niu akhun hai aliuleng pikhaibo-e; sichiujiu panahmaidung khatdi patom pabuidung hinaniu haise sakjiu bambo-e. Nang, Jacob suang di-e chiujiu maning jiuma?” 13 Jesu niu paokakge, “Haibo akhun gasu sakmai hinara charilan rabo-e. 14 Chiudi Iniu pikhaibo dui sakmai hinara wadaodi charilan lakge. Iniu pikhai rabo dui sira palung gasu duipin thiujiu ringbo duise patu pikhaijiu, tingtheng karingbose thiumi rabo-e.” 15 Maipui siniu din-e, “Paohubo yo, sibo duise atu pikhai khelo! Sichiusai Iniu wadaodi charilan lak mine khatdi tadui thuakra haiga menglanta mine.” 16 Siga Jesu niu pakhuga din-e, “Sichiusai tadlujiu nakinatu kulujiu wanglo.” 17 “Akina ha-e,” chiujiu paniu paokakge. Jesu niu paokakge, “Nakina ha-e chiujiu nangniu dinbose maji-e. 18 Sichiudi nangniu khang mangiu khuga lungkhai mide, sichiujiu tuhoi nangniu maluang lung bambose nakina kachang siakbo makge. Nangniu akhuga majibose dinbo-e. 19 Maipui siniu din-e, “Paohubo, nang hai phaimiukakung khatle chiubo I silude. 20 Aliu Samaria mai pao-peh mainiu haibo luongri gasu Tingwang tu kahumme, chiudi naliu Jehudi maidungniu Jerusalem gasu Tingwang tu kahum rabo-e chiujiu din-e.” 21 Jesu niu pakhuga din-e, “Maipui yo, atu malum lulo, maidungniu haibo luongri gasu maksai Jerusalem gasu Papiu situ kahummak rabo wanse wang kinne. 22 Naliu Samaria maidungniu detu kahum kinbolo chiubo naliuniu sisiak makge, chiudi aliu Jehudi maidungra aliuniu kahum kinbo patu si-e. Palamra juringbo haise Jehudi mai khugasu wangbo-e. 23 Chiudi pawanse wang kinne, wangdi wang bamde; maidung siniu Papiu situ Hiupuina gu pumtan gasu kahum rabo-e, khatdi paniu lunibo kumjiu majibo gasu kahum rabo-e. 24 Tingwang sira Hiupuina-e, khatdi patu kahum mai siniu Hiupuina ga khatdi majiboga patu kahum rabo-e.” 25 Maipui siniu pakhuga din-e, “Messiah wangkinne chiubo I si-e, sichiujiu paniu wangsai, paniu wahina aliu khuga dinkhaibi rabo-e.” 26 Jesu niu paokakge, “I hai pah si-e, natu npao bambo I si-e.” 27 Sibo wan-gase pakhommaidungse wangde, khatdi paniu maipui situ npao bamniubo ngaoboga paliu suang hamide. Chiudi paliu mai khatniudi paniu, “Degu luni jiulo”, maksai “Nang dekamjiu patu npao bam jiulo?” chiu maniu makge. 28 Siga maipui siniu paduikhiu khaidiak lujiu namdi lamse wangjiu maidung khuga din-e, 29 “Khe, meng phui matailo, Iniu kammibo hinase din madukhai bibo piu khat bamme. Pahai Messiah kubo piu sima?” 30 Sijengniu paliuniu namdi gasu mengjiu Jesu tu phuide. 31 Sibo wan-gase pakhommaidung siniu Jesu tu katiu tiura din-e, “Katipao yo, poinagadi tiukhailo.” 32 Siga Jesu niu paokakge, “Naliuniu simakbo agu tatekse bamme.” 33 Sijengniu pakhommaidung siniu paliu ronna dinsude, “Mai khatniu paleng katiu phungwang khaibi jiuma?” 34 Jesu niu paliu khuga din-e, “Agu tatek sira atu langwangbo pagu chunning nai patiense kamloi rabo si-e. 35 Naliuniu haichiu dinbo bamme, ‘Chahiu madai bamlujiu atiatne,’ chiudi Iniu naliu khuga dinbo-e, luzamse ngang phuilo, chamiuse atiat raleng min maren bamde! 36 Atiatra lankhaibo maileng chaphijeng pirabo-e, sichiujiu kagebo piu siniu tingtheng karingbo leng miusy khom madui-e; sichiujiu lingkhaibo piu nai gewangbo piuse chunwi macham rabo-e. 37 Kadinchamse maji-e, ‘Mai khatniu lingkhai-e, mai khatniu gewang-e.’ 38 Naliuniu tenkhai makbo luzamga, maidungniu tenkhaibo luzamga Iniu naliutu langkhai-e, sichiujiu paliu tienkam gasu naliuleng genglu rabo-e,” 39 Sichiujiu sibo namdiga bammai Samaria mai kakeng khaniu Jesu tu malum mide, palamra maipui siniu haichiu dinbo jengniu, “Iniu kammibo hinase din madukhai bi-e.” 40 Sijengniu Samaria maidung siniu pakhuga wangjiu paliu khuga manai khaira kheng-e, sichiujiu Jesu niu siga jengnia manai khaide. 41 Pacham gasu maidung kengkha malum mide. 42 Sijengniu paliuniu maipui khuga din-e, “Tuhoira aliuniu malum lude, haise nangniu dinbo jengniu makge; paniu dinbo champaose aliuniu chiulujiu, pahai kadihpiritu Ranpao-e chiubo aliuniu pachang palingjiu silude.”
Jesu Niu Chakampao Khat Nahpiutu Wikhaibo
43 Siga jengnia manaikhai lubo sai, Jesu Galilee lam tad mide. 44 Palamra paniu haichiu din-e, “Phaimiukakung situ pakiluong gara chakhuang thiu makge.” 45 Paniu Galilee ga wangboga maidung siniu patu lukhai-e, palamra paliuniu Kenpadbo Ngee leng Jerusalem ga tadbo tingga, changee kak lungga paniu kamkhai mibo hinase ngaolude. 46 Sigasu Jesu niu Galilee ga bambo Cana, paniu tadui gasu mumsy-jaw pi mawui khaibo bam gase tadlan mide. Capernaum ga bambo dithinpao gu chakampao khat nahpiu marajiu bamme. 47 Jesu se Judaea lamsu Galilee ga wangkinne chiubo paniu chiulujiu, pakhuga wangjiu Capernaum ga wangjiu panah marajiu shaira kumjiu bambotu piwi khaira kheng-e. 48 Jesu niu pakhuga din-e, “Tasibo khatdi maisuang habo ngamse ngaolu maksai naliu mai khatniudi malum lakge.” 49 Chakampao siniu paokakge, “Katipao yo, anahse shai makhaga wangjiu patu wikhailo.” 50 Jesu niu pakhuga din-e, “Tadsulo, nanahse ringlu rabo-e.” Sibo piu siniu Jesu ladtu malum lujiu tad mide. 51 Paniu npuikiga tadkinbo lon pavangmai patu meng daojiu din-e, “Nanahse wimide ringlu rabo-e.” 52 Dekumbo wansiak gasu ngenase wimi jiulo chiujiu paniu paliu khuga maniu-e. Paliuniu paokakge, “Danai wanchak khat ningga kakhunbose wimibo-e.” 53 Siga papiu siniu danai sibo wansiakga Jesu niu pakhuga, “Nanahse ringlu rabo-e,” chiujiu dinbo situ maning taode. Sijengniu pakikhunmai mathiu malum mide. 54 Haise Jesu niu Judaea lamsu Galilee ga wangbo saiga kamlon niabo tasibo si-e.
Ajai Gasu Wikhaibo
1 Haibo sai, Jesu niu Jerusalem lam changi raleng tadde. 2 Jerusalem gase Mily Rengmun mungga, kahun mangiu bambo ajai khat, Hebrew mai lad gasu Bethzatha kubo bamme. 3 Sibo kahun gase kamara maidung, pamik katiatmai, paphi-paben katangmai khatdi papum-phan kashaimai jibam karenne. (Paliuniu taduise malai rabotu khuanjiu bamme. 4 Palamra pakak kakga, taduise kam malai khaira Rapiu gu maza khat kiu-e. Siga taduise kam malai khaiboga tadui jiuga ngutrai thubo piuse parapot wilu-e). 5 Siga maipiu khat takum samriuje-tachatkiu marawang mibo piu khat bamme. 6 Paniu siga jibambo khatdi pating kathengkha marajiu bambo-e chiubose Jesu niu silujiu pakhuga maniu-e, “Nangdi wikhaini jiuma?” 7 Kamarabo piu siniu paokakge, “Paohubo yo, taduise thin malai khaigap chiuboga, atu ajai gase jukhaira mai hajiu bambo-e. Iniu ngutra matan bamboga mainiu asuang ngutraimi mijiu bambo-e.” 8 Jesu niu pakhuga din-e, “Nazise ponlujiu tad sulo.” 9 Sibo piuse winuang mide; sichiujiu pazise ponlujiu tad mide. Haise Tabamnai padmibo-e, 10 sijengniu Jehudi maigu apaimaidung siniu wimibo piu khuga din-e, “Haise Tabamnai-e, nangniu nazi pon lujiu tadkinbose aliugu Tacheng-tajainiu suimakbo-e.” 11 Siga paniu paokakge, “Atu wikhai bibo piu siniu azi ponlujiu tadsulo chiujiu atu dinkhai bibo-e.” 12 Paliuniu pakhuga maniu-e, “Saolo, haikumbo ngam kamra nakhuga dinkhai bibo piuse?” 13 Chiudi wimibo piu siniu Jesu se saolo chiubo simakge, palamra siga chamai kengkha bambo-e, sichiujiu Jesu ra tadmibo-e. 14 Pakak khat saiga, Charaky lungga Jesu niu patu adao lujiu din-e, “Phuilo, tuhoira nang wimide; sijengniu nuan kamlan talo, sichiu maksai nakhuga haisuang kasa padbo sui-e.” 15 Sigasu sinapiu siniu, Jehudi maigu apaimaidung khuga patu wikhai bibo piuse Jesu niu-e chiubo wang paokhaide. 16 Sichiujiu paliuniu Jesu tu kam mathadra kamsude, palamra paniu wikhai bibose Tabamnai-e. 17 Jesu niu paliu khuga din-e, “Apiuse pawan machang changam kamjiu bambo-e, sijengniu Idi kamjiu bamrabo-e.” 18 Haibo cham jengniu Jehudi maigu apaimaidung siniu Jesu tu kamshatra rangsude. Palamra Tabamnai gu tacheng-tajai paniu kampangbo ronna makjiu, paniu Tingwang tu Papiu siakge chiu lukhaijiu, Tingwang tu pagu machamleng lukhai-e.
Nahpiu Gu Pumtan
19 Sijengniu paliu khuga Jesu niu din-e, “Iniu naliu khuga pachang paling dinbo-e: Nahpiu siniu wadaodi pamaning ngam kamsi lakge; paniu Papiu maning ronna Papiu ngamkam saisuijiu kambo-e. 20 Palamra Papiuniu Nahpiu situ lungsabo jengniu paniu kambambo hina lenkhai bi-e. Paniu haisuang kadibo kamra lenkhai bine, siga naliu suang hasune. 21 Papiu siniu kashai maitu piringsu khaibo kum, khatdi karingbo ringting pikhaibo kum, Nahpiu siniudi paniu pikhai nimai khuga karingbo ringtingse pikhai rabo-e. 22 Papiu siniu mai khat tudi paronna ladjan thiu makge, Nahpiu siniu ladjan thiura paniu pumtan hina pikhai mide. 23 Sijengniu mai hinaniu Papiu tu chakhuang thiurabo kumjiu, Nahpiu tudi chakhuang thiurabo-e, Nahpiu situ chakhuangthiu makbo mai hina, patu langkhaibo Papiu tu chakhuang thiu makbo-e. 24 “Iniu naliu khuga pachang paling dinbo-e: mai khatniu alad chiulujiu atu langkhaibo patu malum lumai hina tingtheng ringbo daolune. Patuse ladjan thiura hamide, chiudi kashaibo gasu karingbo lam kenpad mide. 25 Iniu naliu khuga pachang paling dinbo-e: pawanse wang kinne, khatdi wang bamde, kashaimai siniu Tingwang Nahpiu khuanse chiusune, khatdi chiulu mai hina karingbo daolune. 26 Papiuse karingbo phibangbo kum, paniu Nahpiu tudi karingbo phibang leng damkhai mibo-e. 27 Sichiujiu paniu Nahpiu situ ladjan thiura pumtan pikhai mide, palamra pase Chamai Nahpiu si-e. 28 Haiga naliu suang hami tulo, palamra kashaimai siniu pakhuan chiurabo wanse wangkinne. 29 Sichiujiu paliu raw gasu paliuse npad rabo-e, kawibo tenkhai mibo maidung siniu ringsu lanjiu lungbam mirabo-e, kasabo tenkhai mibo maidung siniu ringsu lanjiu ladjan thiurabo-e.
Jesu Lamga Jengdin
30 “Iniu aronna amaning wadi kam makge, Tingwang niu dinkhaibo kumjiu Iniu ladjan thiubo-e, sijengniu agu ladjan hai majibo-e, palamra Iniu machunbo makjiu, atu langkhai bibo pamaning kambo-e. 31 “Iniu alamga dinsai, aladse maji makbo-e. 32 Chiudi alamga jengdin thiubo piu bamme, sichiujiu paniu dinbose majibo-e chiubo Iniu si-e. 33 Naliuniu John khuga naliu walang tadmaitu langkhai-e, sichiujiu pase kamajibo lamga dinbo-e. 34 Mai khatgu jengdintu Ira dinbo makge, chiudi naliuniu juringbo daolura Iniu dinbo-e. 35 John sira chamibung khat matao lujiu sanben khaibo kumbo-e, sichiujiu naliuniu pabiu situ pakak khat leng ronna masenbo-e. 36 Chiudi John niu pikhaibo suang kadibo haiga agu jengdin bamme: Iniu kambo haise, Apiuniu atu pikhaibo khatdi alamga din bambose madu khaibo-e. 37 Sichiujiu atu langkhai bibo Apiuniu alamga jengdin thiujiu bambo-e. Naliuniu pakhuandi chiu matai mak, pazudi ngao matai makge. 38 Sichiujiu naliuniu pachamse naliu lungga lukhai makge, palamra patu langkhai bibo piutu naliuniu malum makge. 39 Naliuniu tingtheng karingbo daolura chiujiu Masanbo ariak kati-e. Sichiujiu Masanbo ariak hainiu alamga din bambo-e! 40 Sichiudi naliura karingbo lura akhuga wang makge. 41 “Chamainaniu thuonbo tu Ira phiubo makge. 42 Chiudi naliu dekumbo mailo chiubo I si-e, chiubora naliu lungchun gasu Tingwang tu lungsabo ha-e chiubo Iniu si-e. 43 Iniu Apiu gu pumtan jaojiu wangbo-e, chiudi naliuniu atu lukhai makge; chiudi mai khatniu pumtan jaojiu wangsai, patu naliuniu lukhai sune. 44 Naliu karainiu khat khattu thuonbotu naliura masenne, sichiujiu khatnaga bambo Tingwang khugasu kathuonbo tura naliuniu matan makge; sichiusai dechiujiu naliuniu atu malum ralo? 45 Sichiudi Iniu Apiu khuga naliutu ladjan thiune chiubo maningmi mane, chiudi naliuniu malumjiu bambo Mose siniu naliutu ladjan thiu rabo-e. 46 Naliuniu pachang siakjiu Mose tu malumsai, atudi malum rabo-e, palamra paniu alamga raokhaibo-e. 47 Chiudi paniu raokhaibose naliuniu malum maksai dechiujiu Iniu dinbo naliuniu malum siralo?”
Jesu Niu Chamai Sang Mangiutu Kikhaibo
1 Haibosai, Jesu niu Galilee Ajai (maksai Tiberia Ajai kubo), hugen lamse kenpad lujiu tadde. 2 Paniu mara-sathiumai kakeng khatu wikhai bibo jengniu maidung mendi khatniu pasai suitad kin-e. 3 Jesu niu luongbut khatga pakhommaidungtu maluang lujiu ntao kiude. 4 Haise Kenpadbo Ngee leng pating nawang mibo-e. 5 Jesu niu ajangjiu phuiboga, maidung mendi khatniu pasai suikinbo ngao lujiu, paniu Philip khuga maniu-e, “Maidung haijiukha leng aliuniu delamsu katiu liulu ralo?” 6 (Paniu haise dinbora, Philip tu madiura chiubo sangnu paniu degu kamralo chiubo raijiu sibambo-e). 7 Philip niu paokakge, “Maidungniu poi-poina tiujiu tadi, rangkang kai nia manniu builakge.” 8 Pakhommai rong gasu mai khat Simon Peter saikariupiu, Andrew niu din-e, 9 “Uiga, piumainah khat khuga taruak pek mangiu nai chakhapek nia bamme. Chiudi siniu paliu mathiu tiubui lakge.” 10 “Maidung situ pijiu ntao khailo, “chiujiu Jesu niu paliu khuga dinkhaide. (Sibo bamse taphi li-e). Sichiujiu chamai sang mangiu kumbo ntao kiude. 11 Jesu niu taruak pekse thin lujiu, Tingwang tu thuonne, khatdi siga ntao bammai mathiu khuga jankhaide. Chakhapek sidi paniu sichiujiu njan khaijiu, paliuniu tiu kanithen tiura njankhai bide. 12 Paliuniu tiu magiu mibo saiga, paniu pakhommaidung khuga din-e, “Tiu kamalibo hina aliuniu kam maha makjiu khoi madui lankhe.” 13 Sijengniu paliuniu pakhiangna khomwang aruangboga, taruak pek mangiu gasu chamai sang mangiuniu tiu mali padbose chabeng kariu-je-niakiu phuibo khoi padde. 14 Jesu niu haikumbo tasibo ngam kamkhaibo ngaolu mainiu din-e, “Pachang siakjiu hainase kadihpiriga lungwangbo phaimiukakung khatle!” 15 Paliuniu patu manom minlujiu, paliu wang pi thiura kammibo silubo jengniu, Jesu niu paronna maluong lamse tadlan mide.
Jesu Niu Tadui Riga Tadbo
16 Chawan wangbo tingga, Jesu pakhommaidungse ajai lamse tadlujiu, 17 malee khatga tuanglujiu Capernaum lam malan mide. Nchun wangmide, chiudi Jesu se paliu khuga wanglan makha-e. 18 Siga tingthung katanbo wangjiu taduise hun kabuak sude. 19 Khommaidung siniu mathakbam sum maksai madai kumbo maleese rampad miboga, Jesu niu tadui rigasu malee mungga tadwangbo paliuniu ngao luboga nping charen mide. 20 Siga Jesu niu paliu khuga din-e, “Pingtulo, haise I-e.” 21 Siga paliuniu patu malee lungga lukhaide, sichiujiu paliuniu tadrabo bamgase wangtang nuang mide.
Maidungniu Jesu Tu Phiubo
22 Pasaibo naise, maidung siniu ajai hugen khatlamse malee khat ronna bamdiak mibose maning taode. Jesu niu pakhommaidung situ phutkhai lujiu paronna tad mali mide chiubo paliuniu sibamme. 23 Rapiu niu thuonkiu lujiu maidungniu taruak tiukhai mibo bam Tiberia lamsu maleedung wang-e. 24 Sigase Jesu di, pakhommaidungdi ha-e chiubo paliuniu silujiu, paliugu malee lungga ngutlan lujiu Capernaum lam patu phiutad mide.
Jesu Hai Karingbo Taruak Si-e
25 Paliuniu Jesu tu ajai hugen khat lamse adao luboga, pakhuga maniu-e, “Katipao yo, haiga nang dedaoniu wangjiulo?” 26 Jesu niu paokakge, “Iniu naliu khuga pachang paling dinbo-e: naliuniu atu phiubo lamra Iniu kamkhai mibo tasibo jengniu makge, chiudi naliuniu tiu kanithen tiukhai mibo taruak jengniu-e. 27 Sami rabo tatek jengniu matan mitulo, chiudi tingtheng ringbo tatek jengniu matan lulo. Haise Chamai Nahpiu siniu naliutu pikhai rabo tatek si-e, palamra Papiu Tingwang siniu suikhaibo madan si-e.” 28 Sijengniu paliuniu pakhuga maniu-e, “Tingwang niu lunibo aliuniu degu kam ralo?” 29 Jesu niu paokakge, “Tingwang niu naliu khugasu lunibo sira paniu langkhaibo patu malumbo si-e.” 30 Paliuniu paokakge, “Aliuniu natu malumra nangniu degu tasibo tenkhai jiulo? Nangniu degu kamkhai ralo? 31 Aliu paopeh mainiu ramjing gase manna tiu kamigu-e, sise Masanbo ariakga dinkhai kamigu-e, ‘Paniu tinggen lamsu paliuleng taruak pikiu khai mibo-e.’” 32 Jesu niu din-e, “Iniu naliu khuga pachang paling dinbo-e: Mose niu naliutu pikhaibo taruakse tinggen lamsu makge, sise Apiuniu pikhaibo, palingbo tinggen lamsu pikiubo taruak si-e. 33 Palamra Tingwang niu pikhaibo taruak sira tinggen lamsu kiubo Nahpiu si-e, sichiujiu paniu kadihpiritu karingbo pikhai-e.” 34 Paliu niu pakhuga maniu-e, “Katipao yo, sibo taruakse aliuleng pikhai tan-tanlo.” 35 “I hai karingbo taruak si-e,” chiujiu Jesu niu paliu khuga din-e. “Akhuga wangbo paniu wadaodi mariulan lakge; khatdi atu malumbo paniu wadaodi charilan lakge. 36 Tuhoi Iniu naliu khuga dinbo-e chiubora naliuniu atu ngaolude chiudi malum makge. 37 Apiuniu atu pikhaibo hina akhuga wangrabo-e. Akhuga wangbo mai situ Iniu wadaodi hathon lakge. 38 Palamra tinggen lamsu Iniu kiubora amaning kamra kiubo makge, chiudi atu langkhaibo pagu maning kamra leng-e. 39 Sichiujiu haise pagu maning-e chiubora paniu atu pikhai bibo mai khatna tudi kam maha makjiu, chiudi kanambo naise paliu mathiutu piring khai raleng-e. 40 Palamra Apiuniu lunibo sira mai hinaniu Nahpiu situ ngao lujiu malum lumai hinatu tingtheng karingbo pikhai raleng-e. Sichiujiu kanambo naise Iniu paliutu piringsu khai lan rabo-e.” 41 Maidungse patu paliu lung amanta mide, palamra paniu din-e, “I hai tinggen lamsu kiubo taruak si-e.” 42 Sijengniu paliuniu din-e, “Hainase Joseph nahpiu Jesu si-e. Sichiu makma? Aliuniu papui nai papiutu si-e. Sichiusai, dechiujiu tinggen lamsu pah kiubo-e chiujiu tuhoi dinjiulo?” 43 Jesu niu paokakge, “Naliu lung pomjiu bam talo. 44 Atu langkhaibo Apiu niu aleng pikhai makbo mai khatniudi akhuga wanglakge, sichiujiu kanambo naise patu piringsu khai rabo-e. 45 Phaimiukakung maidungniu haichiu raokhai mibo-e, ‘Tingwang niu mai hinatu katikhaibi rabo-e.’ Papiu kadin piumai khatdi pakhu gasu katilubo mai siniu akhuga wang rabo-e. 46 Haisiniu Papiu situ mai hinaniu ngaolude chiubo makge, Tingwang khugasu kiubo paronna Papiutu ngaobo-e. 47 Iniu naliu khuga pachang paling dinbo-e: patu malummai pasiniu tingtheng karingbo daolu rabo-e. 48 I hai karingbo taruak si-e. 49 Naliu paopehmai siniu ramjingga manna tiulujiu shai mide. 50 Chiudi tinggen lamsu kiubo taruak tiulu mai sira shailakge. 51 I hai tinggen lamsu kiubo ringbambo taruak si-e. Naliuniu haibo taruakse tiulusai tingtheng ringrabo-e. Iniu pikhai rabo taruak sira atia-e, haise kadihpiri mainiu karingbo daolura Iniu pikhaibo si-e. 52 Sijengniu paliu lungpomjiu paliu ronna ari sude, “Haina siniu aliu tiura dechiujiu patia pikhai ralo?” 53 Jesu niu paliu khuga din-e, “Iniu naliu khuga pachang paling dinbo-e: naliu mai khatniu Chamai Nahpiu tiase tiu maksai, khatdi pajai sak maksai, naliuniu karingbose daolakge. 54 Mai khatniu atia tiu-e sai, khatdi chamtan sak-e sai pase tingtheng karingbo daolune; sichiujiu kanambo naise Iniu patu piringsu khaibi rabo-e. 55 Palamra atia hai palingbo tatek si-e, khatdi chamtan sira pachangjiu sakrabo si-e. 56 Atia tiu mai hina khatdi chamtan saklu mai hina akhuga bambo-e, khatdi Iniu paliu khuga bambo-e. 57 Ringbambo Piu siniu atu langkhaibo-e, sichiujiu pajeng gasu Idi ringbambo-e. Sikumjiu atu tiulumai siniu ajeng ganiu ringrabo-e. 58 Sijengniu, haise tinggen lamsu kiubo taruak si-e, haise nda naliu pao-peh mainiu tiulujiu shaimibo taruak kumbo makge. Haibo taruak tiumai hinara tingtheng karingbo daolu rabo-e.” 59 Jesu niu haise Capernaum maduikyga katikhaijiu dinkhai mibo-e.
Tingtheng Karingbo Ladkeng
60 Haise pasai suikin maidung siniu chiuluboga, haichiu din-e, “Haibo katikhaise kungchang-kung-e. Saoniu haikumbotu nking ngamlu ralo?” 61 Paliu ronna haibo lamga arijiu bambose Jesu niu silujiu paliu khuga din-e, “Haisiniu naliu phi masuibo bamjiu ma? 62 Sichiusai, Chamai Nahpiu siniu karaiga paniu bambo bamga malanwang misai naliu dechiu ralo? 63 Karingbo pikhaibose Tingwang gu Hiupuina-e, chamaina pumtan sira pageng wadi ha-e. Iniu naliu khuga dinbo hainiu naliu khuga Tingwang gu karingbo Hiupuina pikhaibo-e. 64 Chiudi naliu khangsia maira malum makge.” (Karai gasu malummak rabo khatdi patu jonrabo situ Jesu niu sibambo-e). 65 Sichiujiu paniu dinsan kiu-e, “Haijeng gasu Iniu naliu khuga dinkhai mibo-e, chiubora Papiu siniu suikhaibo makjiu mai khatnadi akhuga wanglu lakge.” 66 Haijengniu, Jesu saisui kinmai kakeng kha malan mide, khatdi pasai suita mide. 67 Sijengniu paniu pakhommaidung khang kariu-je-niakiu khuga maniu-e, “Sichiujiu naliudi tadmini jiuma?” 68 Simon Peter niu paokakge, “Rapiu yo, aliu sao khulam tadkhai ralo? Nakhuga tingtheng karingbo ladkengse bambo-e. 69 Sichiujiu, nang hai Tingwang khugasu wangbo Masanbo Khatnakhabo si-e chiubo, tuhoira aliu malum mide.” 70 Jesu niu paokakge, “Iniu naliu khang kariu-je-niatu kadakhai mibo makma? Chiudi naliu khang khatra Satan khuga sude!” 71 Paniu haise Simon nahpiu Judas Iscariot lamga din bambo-e. Palamra Judas hai pakhommaidung khang kariu-je-niakiu ruangga bamdi patu jonrabo-e chiubo paniu si-e.
Jesu Nai Pasingna Maidung
1 Haibo saiga, Jesu niu Galilee lam nbin tadde, paniu Judaea lam nbin tadrao mide, palamra Jehudi maigu apaimaidung siniu patu kamshatra rangmide. 2 Haise Miusan Ngee ting namide, 3 sijengniu Jesu singna maidung siniu pakhuga din-e, “Haibo bam phutlujiu Judea lam tadlujiu, nangniu kambambose nasai kasui maidung situ lenkhai bilo. 4 Mai khatniu patu pijiu kasimai thiukhai nisai, paniu kambambose nbai lakge. Sichiujiu nangniu kam bambo hinase kadihpiri pakhiangnatu pisimi sulo!” 5 (Pasingna maidung katangna patu malum makge). 6 Jesu niu paliu khuga din-e, “Aleng pawan wangtang makha-e. Pawan haise naliu lengra sui kamme. 7 Kadihpiri siniu naliutu mareng makge, chiudi atura mareng-e. Palamra haibo npuise sa-e, chiujiu Iniu din bambo-e. 8 Changee raleng naliu tadsulo, Ira haibo ngee gara tadlakge, palamra pawanse aleng wangtang makha-e.” 9 Haichiu paniu dinkhai lujiu Galilee ga pah bammide.
Miusan Ngeega Jesu
10 Pasingna maidungniu changi raleng tadmibo saiga, Jesu niu madumakjiu, mahinjiu tadde. 11 Changi gase Jehudi maigu apaimaidung siniu Jesu tu phiujiu bamme. Paliuniu maniu-e, “Pah delam bammi jiulo?” 12 Maidung siniu palamga ladtum karenjiu bamme, khatdi khangsianiu din-e, “Para kawimai-e.” Maidung khangsianiu din-e, “Makge, paniu maidungtu jumao kammi lajiu bamme”. 13 Chiudi mai khatniudi madujiu din makge, palamra paliuniu Jehudi maigu apaimaidungtu ping-e. 14 Changeese loisu rabo tingga Jesu niu Charaky lungga ngutlujiu katikhai sude. 15 Siga Jehudi maigu apaimaidungse paliu suang hamide, sichiujiu paliuniu din-e, “Hainase wadaodi kati matai makge, chiudi dechiujiu haijiukha paniu silu jiulo?” 16 Jesu niu paokakge, “Iniu katikhaibo haise amaning makge, chiudi atu langkhaibo Tingwang khugasu wangbo-e. 17 Tingwang niu lunibo kamni mai siniu, Iniu katikhaibo hai Tingwang gasu ma maksai amaning gasu ma chiubo sira-e. 18 Mai khatniu pamaning cham dinsai, paronna pamaken dira matanbo-e. Chiudi patu langkhaibo pamaken dira matan bamsai para ka-nchang mai-e, khatdi pakhuga kamaobo wadi ha-e. 19 Mose niu naliuleng Tacheng-tajaise pikhai mibo makma? Chiudi naliu mai khat niudi Tacheng-tajaise majai makge. Dekamjiu naliuniu atu kamshatra matanbam jiulo?” 20 Maidung siniu paokakge, “Nakhuga rasa bambo jengniu-e! Saoniu natu kamshatra matan jiulo?” 21 Jesu niu paokakge, “Iniu tasibo khat kamme, siga naliu mathiu suang ha-e. 22 Naliu nahdungtu chagi romra Mose niu chamtan pikhai-e (haise Mose niu makge, chiudi naliu pao-peh mainiu kamsubo-e), sijengniu naliu nahmaitu Tabamnai naliuniu chagi romme. 23 Nahmai khattu Tabamnai chagi rombo siniu Mose gu Tacheng-tajai kampang maksai, Iniu mai khattu Tabamnai piwi khaisai, dekamjiu naliuniu atu naliu lung pomjiulo? 24 Lenlam suniu ladjan thiu tulo, chiudi majibo siniu ladjan thiu lulo.”
Pahai Messiah Sima?
25 Jerusalem ga bammai khangsianiu din-e, “Apaimaidungniu kamshatra phiukinbo hai patu makma? 26 Phuilo! Pah mathiu ruangga chalad din bamme, chiudi paliuniu wadi din makge! Pachang siakjiu pahai Messiah si-e chiujiu paliu silu jiuma? 27 Chiudi Messiah niu wangbo naira mai khat niudi pah delamsu wangjiulo chiubo silakge. Hainara delamsu wangjiulo chiubo aliuniu sibamme.” 28 Jesu niu Charaky lung gase pakhuan tanjiu katikhaijiu din-e, “Pachangsiakjiu naliuniu atu sima, khatdi delamsu I wangjiulo chiubo naliu sima? Iniu amaning thiujiu wangbo makge. Chiudi naliuniu simakbo atu langwangbo pasira majibo-e. 29 Chiudi Ira patu sibamme, palamra paniu atu langkhaibo jengniu I wangbo-e.” 30 Paliuniu patu minra matan sude, chiudi mai khat niudi paliu ben khaira kam makge, palamra pawanse wangtang makha-e. 31 Sichiujiu maidung rong gasu kakeng khaniu patu malum mide, khatdi paliuniu din-e, “Messiah niu wangsai haisuang kengjiu tasibo ngam kamkhai rama? “
Jesu Tu Minra Akhemaidungtu Langkhaibo
32 Maidung siniu sichiujiu Jesu lamga arijiu bambo donniu Pharisee maidung nai singkupaodung aruang lujiu, patu minra akhemaidung khangsiatu langkhaide. 33 Jesu niu din-e, “Iniu naliutu pakak khat ronna bam macham khai lujiu atu langkhaibo piu khulam malanwang mine. 34 Naliuniu atu phiusune, chiudi naliuniu atu phiudao lakge, palamra Iniu tadbo bam gase naliu tadtanglu lakge.” 35 Siga Jehudi maigu apaimaidung siniu paliu ronna din-e, “Pah delam tadmine chiujiu aliuniu patu phiudao lakge chiujiulo? Paniu Greek mai namdi lam aliu maidung lung bambo lam tadlujiu Greek maidungtu katikhaira tadmine chiujiu ma? 36 Aliuniu patu phiusune chiudi aliuniu patu daolakge, khatdi paniu tadbo bamga aliuniu tadtang lakge chiujiu paniu dinbo hai, paniu degu maning jiulo?”
Karingbo Duipin
37 Kanam thubo khatdi para thiubo ngee naise Jesu niu chapsu lujiu, pakhuan tanjiu din-e, “Charimai hina akhuga wangjiu saklulo. 38 Masanbo ariakniu dinbo kumjiu, ‘Atu malummai hina lung gasu karingbo duipinse luangpad rabo-e.’” 39 Malum maidungniu daorabo Hiupuina lamga Jesu niu haise dinbambo-e. Sibo tingga sira Hiupuinase daomakha-e, palamra Jesu tu pakendibo gase piringsu khai makha-e. Maidung Maning Tam-tambo 40 Paniu haichiu din bambose maidung rong gasu khangsianiu chiuluboga din-e, “Hainase pachang siakjiu phaimiukakung si-e!” 41 Khangsianiu din-e, “Pahai Messiah si-e!” Chiudi khangsianiu din-e, “Messiah sira Galilee gasu wang lakge! 42 Masanbo ariakniu din-e, chiubora Messiah sira chawang David kaikik gasu-e, khatdi David niu lungbo namdi, Bethlehem gasu mana rabo-e.” 43 Sichiujiu maidung siniu Jesu lamga tam-tamjiu lukhai mide. 44 Khangsianiu patu manomjiu minra kamde, chiudi mai khatniudi patu min makge.
Jehudi Maigu Apaimainiu Malum Makbo
45 Akhemaidung siniu malan wangboga, singkupaodung nai Pharisee maidungniu paliu khuga maniu-e, “Dekamjiu naliuniu patu puiwangmak jiulo?” 46 Akhemaidung siniu paokakge, “Mai khat nakhadi haina kumjiu din matai makge!” 47 Pharisee maidungniu paliu khuga din-e, “Paniu naliutudi kaniklu jiuma? 48 Apaimai khatniu maksai Pharisee mai khatniu patu malumme chiubo naliuniu sijiuma? 49 Maidung hai Mose gu Tacheng-tajaise simakbo jengniu Tingwang gu tasiang hangga paliu bam mide!” 50 Karaiga Jesu tu adao mibo piu, Nicodemus kubo Pharisee mai khatse siga bamme. Paniu kakimaidung khuga din-e, 51 “Aliugu Tacheng-tajai saisuijiu, aliuniu mai khattu ladjan thiujiu pakhu gasu chiulu maksai, aliuniu patu din masa silakge.” 52 Paliuniu paokakge, “Wide, nangdi Galilee gasu wangbo ma? Masanbo ariak kenlo, siga nangniu phaimiukakung hai Galilee gasu padlakge chiubo silu sune.”
Ka-makhabo Puitu Minbo
1 Mai hina paliu ky lam wang mide, chiudi Jesu ra Olive Luonglam tad mide. 2 Pasaibo nai nsuan kalu paniu Charaky gase tad lande. Siga maidung mendi khat pakhuga wang-e, siga paniu ntaokiu lujiu paliutu katikhai sude. 3 Siga Tacheng-tajaigu katipaodung nai Pharisee maidungniu ka-makhabo pui khattu minwangjiu mathiu ruangga pichap khaide. 4 Paliuniu Jesu khuga maniu-e, “Katipao yo, aliuniu hainapuitu paniu makha bambo wan siakga minlubo-e. 5 Aliugu Mose gu Tacheng-tajai gara haikumbo puitu tatuniu rotshatmi rabo-e chiu-e. Chiudi tuhoi nangniu degu dinralo?” 6 Paliuniu haichiu dinbo haira, patu minlura tathak thiubo-e. Chiudi paniu kinkiu lujiu pa-njungniu kadihga wakhat raosude. 7 Paliuniu sichiu maniujiu chap bambo donniu, Jesu niu suchap lujiu paliu khuga din-e, “Naliu ruangga nuan kam makbo mainiu patu rotrai kachanglo.” 8 Sichiujiu paniu kinkiulan lujiu kadihga raolan mide. 9 Paliuniu pachamse chiuluboga tingthubo gasu sujiu mai hina tadkam mide. Sichiujiu sibo pui nai Jesu ronna siga chapbam mide. 10 Paniu suchap lujiu pakhuga maniu-e, “Paliuse delam tadkammi jiulo? Mai khatniudi natu ladjan thiura hajiu tama?” 11 “Mai khatdi ha-e,” chiujiu paniu paokakge. Jesu niu pakhuga din-e, “Wide, sichiusai Iniudi natu ladjan thiulakge. Tadsulo, sichiujiu nuan tenlan talo.”
Jesu Hai Kadihpiri Nbiu-e
12 Jesu niu Pharisee maidung khuga dinlan-e, “I hai kadihpirigu nbiu si-e. Mai khatniu asai suisai, pah karingbo nbiuga bambo-e, sichiujiu paniu tamiuboga wadaodi tadlan lakge.” 13 Pharisee maidungniu pakhuga din-e, “Tuhoira, nangniu dinbo hai majita mide, palamra nangniu naronna nagu jengdin thiu-e.” 14 Jesu niu paokakge, “Chiumakge, Iniu alamga jengdin thiubamdi majibo-e, palamra Iniu wangbo bam khatdi tadlan rabo bamse Iniu si-e. Sichiudi naliura delamsu wangjiulo maksai delam tadkinbo jiulo chiubo simakge. 15 Naliura chamaina lunlung gasu maitu ladjan thiu-e, chiudi Ira mai khat tudi ladjan thiu makge. 16 Chiudi Iniu ladjan thiusai, agu ladjanra majibo-e, palamra siga aronna makge, atu langkhaibo Papiu siniu atu maluang bambo-e. 17 Naliugu Tacheng-tajaiga haichiujiu raokhai bamme chiubora mai khangniagu jengdinse majibo-e. 18 Iniu alamga jengdin thiubo-e, khatdi atu langkhaibo Papiu siniudi alamga jengdin thiubo-e.” 19 Paliuniu pakhuga maniu-e, “Napiu se delam bamlo?” Jesu niu paokakge, “Naliuniu atudi simakge, Apiu tudi simakge. Naliuniu atu sisai, Apiu tudi sirabo-e.” 20 Jesu niu haidungse Charaky lungga wa kadkhaibo bung mung gasu dinbambo-e. Chiudi mai khatniudi patu min makge, palamra paleng pawanse makha-e.
Iniu Tadrabo Gase Naliura Tadtang Lakge
21 Jesu niu paliu khuga din lan-e, “I tad mine, naliuniu atu phiu sune, chiudi naliura naliu nuan ga shaikhai mira-e. Iniu tadbo bamga naliu tadtang lakge.” 22 Sijengniu Jehudi maigu apaimaidung siniu din-e, “Paniu tadbo bamga aliuniu tadtanglu lakge chiujiu din-e. Haibo rambara pah paronna nkhekshat mine chiujiu ma?” 23 Jesu niu paokakge, “Naliura haibo kadihpiriga lungbambo mai-e, chiudi Ira kaku lamsu wangbo-e. Naliura haibo kadihpiri gu-e, chiudi Ira haibo kadihpiri gasu makge. 24 Sijengniu naliura naliu nuan ga shaikhai mirabo-e chiujiu Iniu dinbo-e. Sichiujiu ‘I hai I-e’ chiubo naliuniu malum maksai naliuse naliu nuan ga shaikhai rabo-e.” 25 Paliuniu pakhuga maniu-e, “Nang hai saolo.” Jesu niu paokakge, “Karai gasu Iniu naliu khuga dinkhai mibo si-e. 26 Iniu naliu lamga dinrabo khatdi ladjan thiurabo kengjiu bamme. Atu langkhaibo para majibo-e sichiujiu Iniu pakhu gasu chiulubo ronna kadihpiri mai khuga dinbo-e.” 27 Jesu niu Tingwang lamga din bambo-e chiubo paliuniu sitanglu makge. 28 Sijengniu paniu paliu khuga din-e, “Chamai Nahpiu situ jumaseng subo nai ‘I Hai I-e’ chiubo, khatdi Iniu amaning tenmakjiu, atu langkhaibo Apiuniu dinkhaibose Iniu dinbo-e chiubo naliuniu sisu rabo-e. 29 Khatdi atu langkhaibo paniu atu maluang bamme, paniu wadaodi atu phutkhai makge, palamra Iniu patu pikim khaira ronna kambo-e.” 30 Jesu niu haidungse dinboga chiulumai kakeng khaniu patu malum mide.
Majibo Siniu Naliutu Pijiu Khenrang Thiukhai Rabo-e
31 Sijengniu patu malum maidung khuga paniu din-e, “Naliuniu alad majai lusai, pachang siakjiu naliu hai akhommaidung-e. 32 Naliuniu majibo situ silusai, majibo siniu naliutu khenrang thiukhaibi rabo-e.” 33 Paliuniu paokakge, “Aliura Abraham kaikikdung-e, khatdi aliu wadaodi mai khat vangdi thiu matai makge. ‘Naliutu khenrang thiujiu phutkhai bine,’ chiujiu nangniu dinbose nde maning jiulo?” 34 Jesu niu paliu khuga din-e, “Iniu naliu khuga pachang paling dinbo-e: nuan kambo mai hina nuan vang-e. 35 Kavang sira chakyga bamphu makbo-e, chiudi panah sira tingtheng bamphu rabo-e. 36 Chamai Nahpiu siniu naliutu khenrang thiujiu phutkhai bisai, palingjiu naliu khenrang thiu mibo-e. 37 Naliu Abraham kaikikdung-e chiubo I si-e. Chiudi naliuniu atu kamshatra kamme, palamra Iniu naliutu katikhaibo hai naliuniu luni makge. 38 Apiuniu atu langkhaibo lamga Ira dinbo-e, chiudi naliura naliu piuniu dinbose kamme.” 39 Paliuniu patu paokakge, “Aliu piura Abraham si-e.” Jesu niu paokakge, “Naliu pachang siakjiu Abraham kaikikdung-e chiusai, paniu kambo kumjiu naliudi kamrabo siakge. 40 Iniu kambo hinase Tingwang khugasu Iniu chiulubo si-e, khatdi haise majibo-e. Chiudi naliura atu kamshatra kamme. Haikumbo ngamse Abraham kam makge. 41 Naliura naliu piuniu kambose kambo-e.” Paliuniu paokakge, “Aliu Piu sira Tingwang paronna-e, khatdi aliura panahmai siakge.” 42 Jesu niu paliu khuga din-e, “Pachang siakjiu Tingwang se naliu Piu-e chiusai naliuniu atu lungsa rabo-e, Palamra I hai Tingwang khugasu wangbo-e. Iniu amaning thiujiu wangbo makge, chiudi paniu atu langkhaijiu I wangbo-e. 43 Iniu dinbo hai naliuniu dekamjiu sitang mak jiulo? Palamra naliuniu acham hai nking ngam makge. 44 Naliu piura Satan si-e, naliura panahmai-e, sichiujiu naliuniu naliu piu maning saisuijiu lungbo-e. Karaigasu para chamaitu kagibo mai-e, khatdi majibotu paniu wadaodi sui makge, palamra majibose pakhuga wadi ha-e. Aratbo hai pagu lunlung-e, palamra para aratbo mai-e, khatdi para aratbo hina piu-e. 45 Iniu naliu khuga majibose dinbo-e chiudi naliuniu atu malum makge. 46 Naliu rong gasu saoniu I hai nuan phungmai-e chiujiu dinlen ngamlu ralo? Iniu majibose dinboga, naliuniu dekamjiu atu malum makjiulo? 47 Tingwang khugasu wangbo paniu Tingwang chamse lukhaibo-e. Chiudi naliura Tingwang khugasu makbo jengniu, naliuniu lukhai makbo-e.”
Jesu Nai Abraham
48 Paliuniu Jesu khuga maniu-e, “Nangra Samaria mai-e khatdi nakhuga rasa bambo-e chiujiu aliuniu dinbose maji makma?” 49 Jesu niu paokakge, “Akhuga rasa ha-e. Iniu Apiutu chakhuang thiubo-e, chiudi naliura atu chakhuang thiu makge. 50 Atu chakhuang thiu khaira Iniu phiubo makge. Chiudi agu jengdin thiujiu, alam ponjiu ladjan thiubo mai bamme. 51 Iniu naliu khuga majibose dinbo-e: Iniu katikhaibo haitu majai lumai hina wadaodi shailakge.” 52 Paliuniu pakhuga din-e, “Tuhoira, nakhuga chara kasabo bam siakge chiubo aliuniu silude! Abraham shai mide, khatdi phaimiukakung maidungdi shaikam mide, palamra nangniu katikhaibo majaimai hinara shailakge chiujiu nangniu katikhaibo-e. 53 Aliu piu Abraham shai mide, chiudi nang hai aliu piu Abraham suang di-e chiujiu maning jiuma? Phaimiukakungdungdi shaimide. Nang sao-e chiujiu naronna maning jiulo?” 54 Jesu niu paokakge, “Iniu aronna atu chakhuang thiusai pageng ha-e. Naliuniu naliu Rawang-e chiujiu dinbo pase Apiu-e, paniu atu chakhuang thiubo-e. 55 Naliuniu patu wadaodi simakge, chiudi Ira patu si-e. Iniu patu simakge chiujiu dinsai, Idi naliu kumjiu arat mai-e. Chiudi Ira patu sibambo donniu palad majaijiu bambo-e. 56 Naliu piu Abraham niu I wangrabotu ngaokhai nijiu bambo-e, sichiujiu paniu atu ngaokhai lujiu pachun wikhai kamigu-e.” 57 Paliuniu pakhuga din-e, “Nangra takum ringiudi tangmakha-e, chiudi nangniu Abraham tu ngaomi jiuma?” 58 Jesu niu paokakge, “Iniu naliu khuga majibose dinbo-e: Abraham tu mana makhaga ‘I Hai’ bammibo-e.” 59 Siga paliuniu patu tatu rotra kamjiu tatu khoisuboga, paronna Charaky gasu mari mide.
Jesu Niu Papui Managasu Pamik Tiatbo Mai Khattu Wikhaibo
1 Jesu niu haichiu tadkiubo tingga papui managasu pamik tiatbo mai khattu ngao-e. 2 Siga pakhommaidung siniu pakhuga maniu-e, “Katipao yo, pahai saogu nuan gasu pamik tiatjiulo? Papui nai papiu nuan gasu ma, maksai pa-nuan gasu niulo?” 3 Jesu niu paokakge, “Pamik tiatbo hai papui papiu nuan gasu niudi makge, pa-nuan gasudi makge. Pamik tiatbo haira Tingwang gu pumtanse pakhu gasu madupad lura leng-e. 4 N-nien pawan bambo tingga atu langkhaibo pa-ngamse Iniu kamrabo-e; nchunse wangmi sai mai khatniudi changam kam lulakmi rabo-e. 5 Iniu kadihpiri ga bamthen, I hai kadihpiri nbiusi-e.” 6 Haichiu paniu dinlubo sai Jesu niu kadihga patai masiukhai lujiu, taniangse khoikhang uinapiu mik gase manuk khaijiu din-e, 7 “Siloam Ajai gase tadlujiu nazu npiu milo,” (Haibo rambara Langkhaibo chiubo-e). Sichiujiu uinapiu siniu tadlujiu pazu nphiu khaide, siga ngao lujiu malan wangde. 8 Pakiningmai nai paniu takheng tiubo ngaokhai mibo maidungniu patu ngaolujiu din-e, “Hainase wakhatga ntao lujiu takhengtiu bambo piuse makma?” 9 Khangsianiu din-e, “Pahai sinapiu-e.” Chiudi khangsianiu din-e, “Tiumakge, sinase makge, pakumgap mai-e.” Sijengniu uinapiu siniu din-e, “I hai sinapiu si-e.” 10 “Sichiusai tuhoi dechiu nang ngaolumi jiulo?” chiujiu paliuniu maniu-e. 11 Paniu paokakge, “Jesu kubo piu siniu taniang manui lujiu amikga manuk khai lujiu, Siloam ga tadlujiu azu npiu milo chiujiu atu dinkhaijiu, Iniu siga tadlujiu azu npiu khai gapboga I ngao mibo-e.” 12 “Pah delam bamlo,” chiujiu paliuniu pakhuga maniu-e. “I simakge,” chiujiu paniu paokakge.
Pharisee Maidungniu Wikhaibo Situ Maniu Katinbo
13 Sichiujiu paliuniu pamik tiatbo piu situ Pharisee maidung khuga majang wangde. 14 Jesu niu taniang manui lujiu pamik tiatbo piu situ wikhaibo naise Tabamnai-e. 15 Pharisee maidungniu uinapiu khuga pamikse dechiu ngaolu jiulo chiubo maniu lan-e. Paniu din-e, “Paniu amikga taniang manukkhai bide, khatdi Iniu azu npiu khaiboga Iniu ngao mibo-e.” 16 Pharisee maidung khangsia mainiu din-e, “Haibo ngam kambo piuse Tingwang khugasu makge, palamra paniu Tabamnai chengtu majai makge.” Chiudi maidung khangsia mainiu din-e, “Dechiujiu nuan phungmainiu haikumbo tasibo ngam kamlu ralo?” Sichiujiu paliu ronna paphom tam-tam mide. 17 Sijengniu Pharisee maidungniu uinapiu khuga maniu lan-e, “Wide, paniu namik tiatbo wikhai-e chiujiu nangniu din-e; sichiusai nangniu palamga nde dinralo?” “Pahai phaimiukakung khatle” chiujiu uinapiu siniu paokakge. 18 Sichiudi Jehudi maigu apaimaidung siniu papui nai papiutu kulujiu pahai pamik tiatbo-e khatdi tuhoi ngaolan mibo-e chiujiu maniutang makthen malum makge. 19 Sichiujiu panai khuga maniu-e, “Hainase nanai nahpiu sima? Pamik tiatjiu mana-e chiulujiu, tuhoi dechiujiu paniu ngaolan mijiulo?” 20 Papui nai papiu siniu paokakge, “Pa hai anai nahpiu si-e, khatdi pahai pamik tiatjiu mana-e chiubo anainiu si-e. 21 Sichiudi paniu tuhoi dechiu ngaolanmi jiulo, maksai saoniu patu wikhai bilo chiubora anainiu simakge. Pakhuga maniu lulo, pah paronna kakngam lubui-e, palamra pahai pasiu chap mibo-e.” 22 Papui nai papiuniu haichiu dinbo lamra, Jehudi maigu apaimaidung situ pingbo donniu-e, palamra paliuniu Jesu tu Messiah-e chiujiu malum maitu maduiky gasu hathon mine chiujiu suikhai mibo-e. 23 Sijengniu papui nai papiu siniu, “Pakhuga maniu lulo, pahai pasiu chap mibo-e,” chiujiu dinbo-e. 24 Niabo thiujiu paliuniu pamik tiatjiu manabo piu situ kulan lujiu maniu-e, “Tingwang masuangga pachang siakjiu nangniu majibose dinbo-e chiujiu ladriat thiulo! Natu wikhaibo piu hai nuan phungmai-e chiubo aliuniu si-e.” 25 Uinapiu siniu paokakge, “Pahai nuan phungmai-e, maksai nuan phungmai makge, chiubo I simakge. Khatra Iniu si-e, chiubora I hai amik tiat bamniu-e, chiudi tuhoira I ngaolan lude.” 26 Paliuniu maniu lan-e, “Paniu natu degu kamkhai bilo. Namik tiatbose dechiu wikhai bilo?” 27 Paniu paokakge, “Iniu naliu khuga dinmibo-e, chiudi naliuniu nking khai makge. Dekamjiu naliuniu nkinglan lanni jiulo? Naliudi pakhommai thiuni jiuma?” 28 Paliuniu patu siangjiu din-e, “Nangra sinapiu khommai-e, aliura Mose khommai-e. 29 Tingwang niu Mose tu npao-e chiubo aliuniu si-e; chiudi sinapiu sira delamsu wangjiulo chiubo aliu simakge.” 30 Paniu paokakge, “Sise katasibo khatle! Pah delamsu wangjiulo chiubo naliuniu simakge, chiudi amik tiatbo haitu paniu pi ngaokhai bibo-e. 31 Nuan phungmaitu Tingwang niu chiukhai makge chiubo aliuniu si-e; chiudi patu chakhuang thiubo mai ladse nking khaibi-e. 32 Kadihpiri damkhai karai gasu mai khat niudi pamik tiat maitu pi ngaokhai-e chiubo aliu chiu matai makge. 33 Pah Tingwang khugasu wang maksai, paniu haikumbo ngam kamsi lakge.” 34 Paliuniu paokakge, “Nuan ga mana khaibo nangniu aliutu katikhaira kamjiu ma?” Sichiujiu paliuniu patu maduiky gasu hathon mide.
Hiupuina Ga Mik Tiatbo
35 Padmibose Jesu niu chiulujiu khatdi patu daolan lujiu pakhuga maniu-e, “Chamai Nahpiu situ nang malumma?” 36 Uinapiu siniu paokakge, “Katipao yo, pah saolo chiubo akhuga dinkhailo, sichiusai Iniu patu malum ngamme.” 37 Jesu niu pakhuga din-e, “Nangniu patu ngao lude, khatdi tuhoi paniu natu npao bamme.” 38 Siga uinapiu siniu khudungkiu kahumjiu din-e, “Rapiu, I malumde!” 39 Jesu niu din-e, “Haibo kadihpiriga Iniu ladjan thiura wangbo-e, sichiujiu pamik tiatmai siniu ngaolu rabo-e khatdi ngao bammai siniu pamik tiatmi rabo-e.” 40 Siga bambo Pharisee maidung khangsianiu pacham chiulujiu pakhuga maniu-e, “Pachangjiu aliura aliu mik tiat makge chiubo nang sijiu bambo makma?” 41 Jesu niu paokakge, “Naliu mik tiat bamniusai, naliu mao lakge, chiudi naliu ngao bamme chiujiu naliuniu dinbo jengniu naliu mao hai bamkha-e.”
Milykhuanpiutu Din Champanbo
1 Jesu niu din-e, “Iniu naliu khuga majibose dinbo-e: mai khatniu rengmun gasu ngut makjiu, katam lamsu marenwang sai, pase agatiu mai-e khatdi humtiu mai-e. 2 Rengmun gasu ngutbo piuse mily kakhuanpiu-e. 3 Rengmun khuanpiu siniu paleng rengmunse lekhai bine, khatdi milydung siniu pakhuan si-e, sichiujiu paniu paliu zan kujiu paliutu jukhai bine. 4 Paniu paliu masuangga tadraijiu paliuniu pasai suitadne, palamra paliuniu pakhuan si-e. 5 Paliuniu kakimai saira suilakge, chiudi paliuniu sikumbo mai khugasu pakmi rabo-e, palamra paliuniu pakhuanse simakge.” 6 Din champanbo hai Jesu niu dinkhaidi paliuniu wadi sitanglu makge.
Jesu Hai Kawibo Milykhuanpiu Si-e
7 Sijengniu Jesu niu din lan-e, “Iniu naliu khuga majibose dinbo-e: Ira milydunggu rengmun si-e. 8 Asuangga wangrai mibo mai hinase agatiu mai-e khatdi humtiu mai-e, sichiujiu milydung siniu paliu khuan chiukhai makge. 9 I hai rengmun si-e. Akhuga wangmai hinatu Iniu gukhai bine; sichiujiu paniu tadpad tadngutjiu piubuanse daolune. 10 Agatiu mainiu wangbo sira, agatiura, kamshatra khatdi kam mahara ronna wangbo-e. Iniu wangbo haira naliuniu karingbose lutaora leng-e, khatdi karingbose tathui lura leng-e. 11 “I hai kawibo milykhuanpiu-e, milydung leng shai khai raleng kadenlubo piu-e. 12 Milykhuanpiu makbo, tajeng lankhai mai sira tany wangbo ngaosai, paniu milydung situ phutlujiu pakmi rabo-e; sichiujiu tany siniu milydung situ nimlu tiumi rabo-e, khatdi kam marami rabo-e. 13 Chaphi kaphimai sira pakmi-e, palamra patura lankhaibo-e, khatdi milydung situ manang khai makge. 14 -15 I hai kawibo milykhuanpiu-e. Papiuniu atu sibo kum, Iniu Papiutu si-e, sikumjiu Iniu agu milydungtu si-e, khatdi paliuniudi atu si-e. Sichiujiu Iniu paliuleng shaikhai bine. 16 Haibo milydung makbo, kakibo milydung agu bamkha-e. Iniu paliutu puiwang rabo-e; sichiujiu paliuniu akhuan nkingne, sichiujiu paliuniu milydung khat thiujiu milykhuanpiu khat thiu rabo-e 17 Papiu siniu atu lungsa-e palamra Iniu paliutu lukhailan lura agu ringting pikhai-e. 18 Mai khatniudi agu ringting hai akhu gasu lulan ngam lakge. Iniu khen-rang thiujiu pikhaibo-e. Iniu pikhaira khatdi lulanra agu pumtan bamme. Haise Papiuniu atu pikhaibo chamtan si-e.” 19 Haibo ladkeng jengniu maidungse paphom-phom thiujiu tam-tam mide. 20 Paliu kakeng khaniu din-e, “Pakhuga rasa bamme! Pahai kaluang mide! Dekamjiu naliuniu palad lubam jiulo?” 21 Chiudi khangsia mainiu din-e, “Rasa bambo mai khatniu haichiujiu din ngam lakge! Dechiujiu rasa bammai siniu pamik katiat maitu pi ngaokhai ngam ralo?”
Jesu Tu Lukhai Makbo
22 Haise tathe wan mide, sichiujiu Charaky kadkhaibo Ngeese Jerusalem ga changijiu bamme. 23 Charaky lungga Solomon gu Kahun gase Jesu niu tad mariujiu bamme. 24 Maidung siniu pakhuga wanglujiu maniu-e, “Dethengkha nangniu aliutu pi manangjiu bamralo? Palingjiu aliu khuga dinkhailo: nang hai Messiah sima?” 25 Jesu niu paokakge, “Iniu naliu khuga dinkhai mide, chiudi naliuniu atu malum makge. Iniu Apiu pumtan gasu kamkhai mibo ngamdung siniu agu jengdin thiubo-e, 26 chiudi naliuniu atu malum makge, palamra naliura agu milydung makge. 27 Agu milydung sira akhuan nking-e; Iniu paliutu si-e, sichiujiu paliuniu asai sui-e. 28 Iniu paliutu tingtheng karingbo pikhai-e, siniu paliu wadaodi shailakge. Mai khatniudi paliutu akhu gasu sutpad ngam lakge. 29 Apiuniu akhuga pikhaibo hinase wahina suang di-nkiu-e. Mai khatniudi Apiu ben gasu sutngam lakge. 30 Papiu nai Ira khatle.” 31 Siga maidung siniu patu tatu rotra kamlan sude. 32 Siga Jesu niu paliu khuga din-e, “Apiuniu atu pikhaibo kawibo ngamdungse Iniu naliu masuangga kamkhaibo donniu, naliuniu atu tatu rotra kamjiuma?” 33 Paliuniu paokakge, “Kawibo ngam kambo jengniu aliu natu tatu rotne chiubo makge, chiudi nalad donniu-e! Nangra chamaina-e, chiudi nangniu naronna Tingwang pithiu khai nibo jengniu-e!” 34 Jesu niu paokakge, “Tingwang niu din-e, ‘Naliu hai charadung-e,’ chiujiu naliugu Tacheng-tajaiga raokhai mide. 35 Masanbo ariakniu dinbose tingtheng majibo-e chiubo aliuniu si-e, sichiujiu Tingwang niu pacham pikhai mibo maidung situ charadung-e chiujiu kukhai kamigu-e. 36 Atura, Apiuniu kadapad lujiu kadihpiriga langkhaibo-e. Sichiusai, naliuniu dechiujiu alad jengniu chiubora I hai Tingwang Nahpiu-e chiujiu dinboga alad mao-e chiujiulo? 37 Apiuniu machunbose Iniu kam maksai, atu malum mane. 38 Chiudi Iniu sise kambam sai naliuniu atu malummak tadi, agu ngamkam jengniu Apiu hai akhuga bamme, khatdi I hai Apiu khuga bamme chiubo naliuniu silubui-e.” 39 Paliuniu Jesu tu minra kamlan sude, chiudi paliu khugasu pah marilujiu tadmide. 40 Sichiujiu John niu tadui nphum khaijiu bambo Jordan Giugen mung gase Jesu malanwang mide. 41 Maidung kakengniu pakhuga wangjiu din-e, “John niura tasibo ngam wadi kam makge, chiudi paniu hainapiu lamga dinbose maji kamme.” 42 Sichiujiu maidung kakeng khaniu patu malum mide.
Lazarus Shaibo
1 Bethany ga bambo mai khat, pazanniu Lazarus kubo pahai marajiu bamme. Bethany haise Mary nai pasingnapui Martha niu lungbambo namdak si-e. 2 (Haibo Mary hainiu Rapiu phiga parim wibo wasa manuk khaijiu khatdi pathamniu nunsang khaibo pui si-e, marajiu bambo Lazarus hai papiubo-e). 3 Patanpui kania siniu Jesu khuga champao langkhai-e, “Rapiu yo, nangniu kungbo nakahpiuse marajiu bamme.” 4 Jesu niu haise chiuboga din-e, “Lazarus niu marabo hai shaira leng makge, haisiniu Tingwang gu kendibo phungwangra leng-e; khatdi haisiniu Tingwang Nahpiu siniu pakendibo lutaora leng-e.” 5 Jesu niu Martha nai pasingnapui tu khatdi Lazarus tu lungsabo-e. 6 Chiudi paniu Lazarus se marajiu bamme chiubo chiuluboga paniu bambo bamga jengnia manailan bam mide. 7 Sichiujiu paniu pakhommai khuga din-e, “Aliu Judea lam malanwang sukhe.” 8 Pakhommaidung siniu paokakge, “Katipao yo, maidungniu natu tatu rotra kambose pating watheng makha-e, sibo bam gase nangniu tadlanra maning jiuma?” 9 Jesu niu paokakge, “Naikhatga wanchak kariu-je-niakiu bammak jiuma? Sijengniu n-nien tingga tad mariubo pasiniu paphi masui lakge, palamra paniu haibo kadihpiri nbiuse ngao-e. 10 Chiudi paniu nchun tad mariusai paphi masui rabo-e, palamra pakhuga kabenbose ha-e.” 11 Jesu niu haise dinkhai lubo saiga din lan-e, “Aliu kabo Lazarus jimide, chiudi Iniu tadlujiu patu makiang khaine.” 12 Siga pakhommaidung siniu paokakge, “Rapiu yo, pah jijiu bamsai wilanmi rabo-e.” 13 Jesu niu dinbora Lazarus shai mide chiubo-e, chiudi paliuniu maningbora chamainaniu kajibo situ maningbo-e. 14 Sijengniu Jesu niu paliu khuga din-e, “Lazarus shai mide, 15 chiudi Iniu patu maluang bam makbose naliu jengniu achun wi-e, haisiniu naliu malumlu raleng-e. Aliu pakhulam tadsukhe.” 16 Thomas (Naphinbo chiu kubo) niu pakahmaidung khuga din-e, “Aliu mathiudi Katipao sai suilujiu meng shaikhai macham mikhe!”
Jesu Hai Ringsulanbo Khatdi Karingbo Si-e
17 Sichiujiu Jesu niu wangbo tingga, Lazarus tu nphum khaimibo jeng madai tangmide. 18 Bethany haise Jerusalem gasu mathakbam nia suang nabo-e, 19 sichiujiu Martha nai Mary piubo shai mibo donniu panai chun kam mangai khaira chiujiu Judaea maidungdi kengjiu wang bamme. 20 Jesu wangkinne chiubo Martha niu chiuluboga paniu patu sundaora tadmide, Mary sira kalungga bamme. 21 Martha niu Jesu khuga din-e, “Nangniu haibo bamga bamniusai, apiubo hai shai lakge, Rapiu yo! 22 Chiudi, tuhoidi nangniu kakhengbo hina Tingwang niu pikhai bine chiubo Iniu si-e.” 23 Jesu niu pakhuga din-e, “Napiubo hai ringsulan rabo-e.” 24 Paniu paokakge, “Yo, kanambo naise pah ringsulan rabo-e chiubo Iniu si-e.” 25 Jesu niu pakhuga din-e, “I hai ringsulanbo khatdi karingbo si-e. Atu malumbo mai siniu shai midi ringsulan rabo-e; 26 khatdi ringjiu malum bammai siniu wadaodi shailan lakge. Haise nang malumma?” 27 Paniu paokakge, “Yo, Rapiu, nangra Tingwang Nahpiu Messiah, kadihpiriga wangrabo si-e chiubo Iniu malumme.”
Jesu Kapbo
28 Martha niu haichiu dinlubo sai, paniu pasingnapui Mary tu kulujiu pakhuga mahin din-e, “Katipaose haiga bamme, khatdi paniu natu maniu bamme.” 29 Haise chiuluboga, Mary niu patu adaora pakpad mide. 30 (Jesu se kaluangga wangtang makha-e, kalu Martha niu patu adaobo bam gase palunjiu bamme). 31 Mary tu kalungga maluang ntao bammai siniudi pasai suilujiu tad padde. Palamra paniu padbo hai charawlam tadjiu kapraleng bamne chiujiu paliuniu maningbo-e. 32 Jesu niu bambo bamgase mengtang kaji-kari Mary niu paphiga makhum kiujiu haichiu paniu din-e, “Rapiu yo, nangniu haiga bamniusai apiuhbo hai shailakge.” 33 Paniu kapjiu bambo khatdi patu maluang bammai mathiuse kapjiu bambo Jesu niu ngao luboga palungdi chariu chang chariu mide. 34 Khatdi paniu paliu khuga maniu-e, “Naliuniu patu ndega baikhai nbamlo?” Paliuniu paokakge, “Wangjiu phui khailo, Rapiu yo.” 35 Jesu kap-e. 36 Siga maidung siniu din-e, “Phuilo, paniu patu dejiukha lungsalo! 37 Chiudi paliu khangsia mainiu din-e, “Paniu pamik ka-tiatmai tudi pi ngao khai mimak jiuma? Paniu Lazarus tudi pishai makra ngamlu buibo makma?”
Lazarus Tu Piringsu Khai Lanbo
38 Palung chariuboniu phuilu, tatuniu rawkham kamlujiu khai nbambo charaw gase Jesu tadmide. 39 “Tatu hai kalad thon milo,” chiujiu Jesu niu chamtan pi-e. Shaimibo tanpui Martha siniu paokakge, “Rapiu yo, tenmi bamne. Patu nphum mibo hai jeng madai tang mide.” 40 Jesu niu pakhuga din-e, “Nangniu malumsai Tingwang gu kendise nangniu ngao rabo-e, chiujiu Iniu nakhuga dinkhai mibo makma? 41 Sichiujiu paliuniu tatuse kalad thon padde. Siga Jesu niu tinggen lam ngangsu phui lujiu din-e, “Apiu yo, Iniu natu thuonkiu-e, palamra nangniu alad chiukhai bi-e. 42 Pawan machang nangniu alad chiukhai bijiu bamme chiubo Iniu si-e, sichiujiu haiga chap bammai jengniu Iniu khengbo-e, nangniu atu langkhaibo-e chiubo paliuniu silu raleng-e.” 43 Haichiujiu paniu dinkhai lubosai, pakhuan tanjiu ku-e, “Lazarus yo, npadlo.” 44 Siga paphi pabense fainoi niu kabet lujiu khatdi pazu domkhai bambose palunjiu npad sude. Sichiujiu Jesu niu paliu khuga din-e, “Patu khipad milo khatdi pitad khailo.”
Jesu Tu Kamshatra Phiubo
45 Mary tu phuikhaira wangmai kakeng khaniu, Jesu niu kamkhaibo ngao lujiu malum mide. 46 Chiudi paliu khangsiamai siniu Pharisee maidung khuga wangjiu Jesu niu kamkhai mibose dinkhaide. 47 Sijengniu Pharisee maidung nai singkudung siniu Apai maidungtu maluang lujiu haichiu dinsude, “Aliuniu degu kamralo? Phuilo, haina piuniu tasibo ngamdung kamkhaibo haise! 48 Aliuniu patu haichiujiu pitad khaijiu bamsai, mai hinaniu patu malum mine, sichiusai Rom maigu apaimainiu wangjiu aliu Raky tudi, aliu jat tudi kam maha mine!” 49 Paliu rong gasu sibo kum Dibo Singku thiujiu bambo pazanniu Caiaphas kubo siniu din-e, “Dejiukha naliu hai panglo? 50 Mai hinatu kam maharabo suang, mai khattu kam maha miboniu wi-e, chiubo naliu maningkhai makma?” 51 Pachang siakjiu, paniu haise dinbora pamaning makge, chiudi paniu sibo kumgu Dibo Singku thiubo donniu Jehudi mai mathiu sung, Jesu niu shaikhaira chiujiu din masuang khaibo-e. 52 Sichiujiu paliuleng ronna makjiu, Tingwang maidung lung maratad mibo mai hina leng-e. 53 Sibonai gasu Jehudi maigu apaimaidung siniu Jesu tu kamshatra rangsu mide. 54 Sijengniu Jesu se Judaea ram lungga madujiu tad mariu tamide, chiudi ramjing lam bambo namdi khatlam pazanniu Ephraim kuboga pakhommaidungtu maluang lujiu bammide. 55 Kenpadbo Ngee tingse nawang mide, sijengniu maidung kakeng khaniu panam-nam lamsu Jerusalem ga paliu cheng saisuijiu kam masan raleng tadsude. 56 Paliuniu Jesu tu phiu-e, khatdi paliuniu Charaky lungga aruang lujiu khat-khat khuga maniu sude, “Naliu degu maninglo? Pachangjiu paniu haibo ngeega wanglak jiuma?” 57 Sichiujiu singkudung nai Pharisee maidung siniu chamtan pijiu din-e, mai khatniu Jesu tu ngaosai paokhai rabo-e, sichiujiu paliuniu patu minra kamsude.
Jesu Tu Bethany Ga Wasa Manuk Khaibo
1 Kenpadbo Ngee masuang jeng charuk maga Jesu niu kashaibo gasu kam maring khai lanbo Bethany lam Lazarus kygase tadde. 2 Siga paliuniu paleng wa tiura kaden khai-e, siga Martha niu machajiu bamme, khatdi Lazarus di Jesu kuangkaiga maluang ntao bamme. 3 Siga Mary niu paman kungbo wasa parim kawibo madatpiang phan kumbo thin wangjiu Jesu phiga manuk khaisude khatdi pathamniu nunsang khai sude. Sichiujiu parim wibo siniu kalung pakhiangna manam phui mide. 4 Jesu khommai rong gasu Judas Iscariot, patu jonrabo piu siniu din-e, 5 “Parim wibo wasa haise dekamjiu rangkanggi kaisum leng jonlujiu kalek kasamaidung leng jankhai makjiu haichiu kam nchum bamjiulo?” 6 Paniu haise dinbora paniu kalek kasamaidungtu lungsabo donniu makge, chiudi para agatiubo mai-e. Paniu rangkang bungse thinbo-e, sichiujiu paleng ronna phiubo mai-e. 7 Chiudi Jesu niu din-e, “Hainapui haitu pakhen-pani pithiu milo. Paniu akhuga kamkhaibo hai atu nphumkhai rabo leng kambambo-e. 8 Naliuniu kalek kasamai tura tingtheng maluang bamrabo-e, chiudi naliuniu atu maluang bamtan-tan silakge.”
Lazarus Tu Kamshatra Phiubo
9 Jesu niu Bethany ga bamme chiubo maidungniu chiulujiu Jesu tu ronna makjiu, Jesu niu pi ringsukhai lanbo Lazarus tudi phiura tadde. 10 Sichiujiu singkudung siniu Lazarus tudi kamshat mira phiu sude. 11 Palamra padon jengniu Jehudi maidung kakeng khaniu paliutu suimakjiu Jesu tu malum mide.
Jesu Niu Chawang Thiujiu Jerusalem Ga Ngutbo
12 Pasaibo naise Kenpadbo Ngeega wangmaidung kakeng khaniu Jerusalem ga Jesu wangkinne chiubo chiude. 13 Sijengniu paliuniu kadanniu thin lujiu patu adaora padjiu chakhuan sen-e, “Hosanna! Rapiu zan gasu wangbo patu Tingwang niu thoikhai bilo! Tingwang niu Israel mai wangtu thoikhai bilo!” 14 Masanbo ariakga raokhaibo kumjiu, Jesu niu qonniam riga tuanglujiu wang kinne, 15 “Zion namdi mai yo, pingtulo! Haiga naliu wangpiuse qonniampoi riga ntao lujiu wang kinne.” 16 Haibo rambase sibo tingga pakhommaidung siniu sitanglu makge; chiudi Jesu tu shaibo gasu kendiboga ringsu khailanbo gasu, haise Masanbo ariakniu palamga dinkhai mibose wangtang khaira leng-e chiubo maning taode. 17 Jesu niu Lazarus tu charaw gasu kujiu kashaibo gasu pi ringsukhai lanbo ngaolu maidung siniu haise paokhaide. 18 Maidungniu patu ngaodaobo sira paniu haikumbo tasibo ngam hai kamkhai-e chiubo chiulubo jengniu-e. 19 Sichiujiu Pharisee maidung siniu khat-khat khuga din-e, “Naliuniu ngao lude, aliuniu wadaodi ngam lulak mide. Phuilo, kadihpiri pakhiangna pasai suikam mide!”
Greek Mainiu Jesu Tu Phiubo
20 Changee tingga Jerusalem ga kahumra tadmaidung ruangga Greek maidung khangsia bamme. 21 Paliuniu Philip khuga tadlujiu din-e, “Paohubo, aliu Jesu tu phuikhai ni-e.” (pahai Galilee ga bambo Bethsaida gasu-e) 22 Philip niu tadlujiu Andrew khuga din-e, sichiujiu panainiu tadlujiu Jesu khuga dinkhai-e. 23 Jesu niu panai khuga paokakge, “Chamai Nahpiu siniu paken dibose daora tuhoira pawan wangtang mide. 24 Iniu naliu khuga pachang palingjiu dinbo-e: Miusy pum siniu kadihga nkai kiujiu shaikhai makthen, pasy khat ronna bambo-e. Haisiniu shaikhai misai pasy kengjiu padrabo-e. 25 Paronna patu lungsa maise hami rabo-e, paronna patu haibo kadihpiriga mareng maise tingtheng ringbo daolu rabo-e. 26 Atu macha nimai siniu asai suirabo-e, sichiujiu avangse Iniu bambo bamga bamrabo-e. Khatdi atu machamai hinatu Apiuniu chakhuang thiukhai birabo-e.
Jesu Niu Pah Shairabo Lamga Dinbo
27 “Tuhoira alung magenthiu mide, Iniu degu dinralo? ‘Apiu Yo, haibo wanse akhuga pijiu wangkhai tulo’ chiujiu Iniu din rama? Chiudi Iniu haijeng gasu wangbo-e—sichiujiu Iniu haibo magenthak gasu kenpad rabo-e. 28 Apiu yo, nazanse paken dibo thiu milo!” Siga tinggen lamsu chakhuan khatniu din-e, “Haiga Iniu kendibo phungwang khaide, sichiujiu haise phungwang khai lanrabo-e.” 29 Siga chap bammaidung siniu chakhuanse chiu-e, sichiujiu khangsia mainiu din-e, “Haise tingsin khuan-e.” Khangsianiu din-e, “maza khatniu patu npaobo-e!” 30 Chiudi Jesu niu paliu khuga din-e, “Chakhuan hainiu dinbose ajeng gasu makge, chiudi naliu jengga suniu-e. 31 Tuhoira haibo kadihpiritu ladjan thiurabo wanse wang mide, tuhoira haibo kadihpiri mawangpao situ luthonmi rade. 32 Sichiujiu atu kadih gasu lukhang mibo naise Iniu mai hinatu akhuga juwang aruang khaine.” 33 (Haichiu dinbo siniu dechiujiu patu kamshat ralo chiubo lamga paniu pisi khaibo-e). 34 Maidung siniu paokakge, “Aliugu Tacheng-tajai siniu din-e, chiubora Messiah hai tingtheng lungrabo-e. Sichiusai dechiujiu Chamai Nahpiutu maomakjiu jumaseng rabo-e chiujiu nangniu dinjiulo? Chamai Nahpiu hai saolo?” 35 Jesu niu paokakge, “Kabenbo hai naliu khuga pakak khat ronna bamkhai rabo-e. Kabenbose bambo tingga naliu npuiga tad lulo, sichiusai tamiubo siniu naliutu nammi lakge, palamra tamiubose wangmi sai mai khatdi ngaota mirabo-e, khatdi paniu delam tadkin gulo chiubo silakge. 36 Sichiujiu naliuniu kabenboga bambo lon, naliu kabenbo mai thiulura, kabenbo situ malum lulo.”
Maidungniu Malum Makbo
Jesu niu haise dinlubo saiga, paronna tadpat lujiu paliu khugasu marijiu mide. 37 Paniu tasibo ngamdung hai paliu mathiu suangga kamkhai bidi paliuniu malum makge, 38 haise phaimiukakung Isaiah niu dinkhai mibose wangtang raleng-e: “Rapiu, aliuniu dinbo champao hai saoniu malum ralo? Rapiu niu saokhuga pumtanse madukhai milo?” 39 Sichiujiu paliuniu malum ngam makge, palamra Isaiah niu haisidi dinkhai-e: 40 “Tingwang niu paliu mik kamtiat mide, khatdi paliu lungchunse gomnam mide, sichiujiu paliu mikniu ngaomak raleng-e, khatdi paliu lungchunniu simak raleng-e; sichiujiu paliuniu akhuga mari wangjiu, aliutu wikhailo chiujiu dinmak raleng-e,” chiujiu Tingwang niu din-e. 41 Isaiah niu haise dinbo lamra paniu Jesu gu kendibose ngao lujiu dinkhaibo-e. 42 Jehudi maidunggu apaimaidung kakeng khaniudi Jesu tu malum mide, chiudi Pharisee maidung jengniu haise paliuniu dinpad makge palamra paliutu maduiky gasu hathon mak raleng-e. 43 Paliura Tingwang niu thuonbo suang chamainaniu thuonbotu masen-e.
Jesu Ladkengniu Ladjan Thiubo
44 Jesu niu pakhuan tanjiu din-e, “Atu malumbo mai siniu atu ronna malumbo makjiu, atu langkhaibo Apiu tudi malumbo-e. 45 Atu ngao lumai siniu atu langkhaibo patudi ngaojiu bambo-e. 46 Atu malummai siniu tamiuboga bam makra, Iniu kadihpiriga kabenbo thiujiu wangbo-e. 47 Mai khatniu acham hai chiulujiu majaimak tadi, Iniu patu ladjan thiu lakge, palamra Iniu kadihpiritu ladjan thiura wangbo makge; Iniu haitu rankhaira wangbo-e. 48 Atu lukhai makmai khatdi achamtu majai kamak maitu ladjan thiurabo khangkhat bamme. Iniu dinkhai mibo ladkengdung hainiu kanambo naise ladjan thiurabo-e! 49 Haise palingbo-e, palamra Iniu amaning dinbo makge, chiudi atu langkhaibo Piu siniu, dinra khatdi phara atu chamtan pikhai bibo-e. 50 Sichiujiu pagu chamtan siniu tingtheng karingbo phungwang-e chiubo Iniu si-e. Sichiujiu Iniu dinbo haise Apiuniu akhuga dinkhaibose dinbo-e.”
Jesu Niu Pakhommaidung Phi Khiubo
1 Haise Kenpadbo Ngee masuangbo naisi-e. Paniu kadihpiri haitu phutlujiu Papiu khulam wanglan mine chiubo Jesu niu si-e. Haibo kadihpiriga bambo pagu hinatu paniu lungsa-e, sichiujiu paniu paliutu kaloibo nai tangjiu lungsa khaine. 2 Jesu niu pakhommaidungtu maluang lujiu chawan maluadse tiu bamboga, Kasabo piuniu, Simon nahpiu Judas Iscariot khugase Jesu tu jonrabo lungchunse kamkhai mide. 3 Papiu siniu pumtan hina patu pikhai mide chiubo Jesu niu si-e. Sichiujiu pase Tingwang khugasu wangbo-e khatdi pakhulam pah wanglan mirabo-e chiubo paniu sibamme. 4 Sichiujiu paniu chakuangkai gasu suchap lujiu pafai ndanbo faise khoipad lujiu pakhian-ga manukfai khat khek khaide. 5 Sichiujiu paniu tadui nkhiukuang gase tadui masun khai lujiu pakhommaidung phise nkhiu khai sude, khatdi manukfai siniu manuk masang khai sude. 6 Paniu Simon Peter khuga wangboga, pakhuga din-e, “Rapiu yo, nangniu aphi khiukhai rama?” 7 Jesu niu paokakge, “Iniu kambambo hai tuhoi nang silak kha-e, pasainiu nang sirabo-e.” 8 Peter niu din-e, “Wadao khatdi nangniu aphi khiukhai wimakge.” Jesu niu paokakge, “Iniu naphi nkhiu khai maksai nang hai akhommai thiusi lakge.” 9 Simon Peter niu paokakge, “Rapiu yo, sichiusai aphi ronna makjiu abendi, apidi khiu khailo!” 10 Jesu niu din-e, “Mai khatniu khiu masan lusai, paphi makjiu khiu lanra ha-e. Naliu rong gasu khangkhat ronna sangnu, kakimai hinara masan kamme.” 11 (Patu jonrabo piutu paniu silujiu haichiu dinbo-e, “Naliu rong gasu khangkhat ronna sangnu, kaki maira masan kamme.”) 12 Jesu niu paliu phise khiukhai lubo sai pafaise khoilujiu pabamga wanglan mide. Paniu maniu sude, “Tuhoi Iniu kamkhai mibo hai naliu siluma? 13 Naliuniu atu Katipao khatdi Rapiu chiujiu ku-e, naliuniu kambo hai maji-e, palamra sise I-e. 14 Naliu Rapiu khatdi naliugu Katipao thiubo Iniu haichiujiu naliu phi khiu khaide. Sichiusai naliuniu khatniu khat-khat phi khiu rabo-e. 15 Iniu naliu khuga madan thiujiu kamlen khaibo-e sichiujiu Iniu naliutu kamlen khaibo kumjiu naliudi kamrabo-e. 16 Iniu naliu khuga majibose dinbo-e: kavang khatse pawangpiu suang dimakge, khatdi walangtadbo pasiniu langkhaibo piu suang dimakge. 17 Tuhoira majibose naliuniu silude, naliuniu haise kam lusai dejiukha don wiralo! 18 “Iniu naliu mathiu lamga dinbo makge, Iniu kadakhai mibo maitu sibamme. Chiudi Masanbo ariakga dinkhai mibose wangtang raleng-e, ‘Atu maluang tiu macham bambo paniu atu suimak rabo-e.’ 19 Iniu haise tuhoi pad makhaga dinbo-e, sichiujiu haise sonnai padboga, ‘I Hai I-e’, chiubo naliuniu malum lura leng-e. 20 Iniu naliu khuga majibose dinbo-e: Iniu langkhaibo maitu lukhaimai hina atudi lukhaibo-e, khatdi atu lukhai mai hinaniu atu langkhaibo patudi lukhaibo-e.”
Jesu Niu Patu Jonmi rabo Lamga Din Masuangbo
21 Haichiu dinlubo saiga, Jesu palung magenthiuboniu phui lujiu haichiu dinpad lande, “Iniu naliu khuga majibose dinbo-e: naliu rong gasu khangkhatniu atu jonmi rabo-e.” 22 Paniu haichiu dinbo jengniu paliu suang hajiu khat-khattu phuisude. 23 Pakhommaidung rong gasu, Jesu niu lungsabo piuse, Jesu mungga ntao bamme. 24 Siga Simon Peter niu pakhuga mariwang lujiu din-e, “Paniu saotu dinbam jiulo, pakhuga maniu matailo.” 25 Sijengniu sibo khommai siniu Jesu mungga mariwang lujiu maniu-e, “Rapiu yo, sibo piuse saolo?” 26 Jesu niu paokakge, “Iniu taruak khuangse chagandui sumlujiu pikhaine, sinase pah-e.” Sichiujiu paniu taruak khuang khat khoilujiu, sise chagandui sumlujiu Simon nahpiu Judas Iscariot khuga pikhaide. 27 Judas niu taruak khuangse khoigapboga Satan se pakhuga ngut mide. Siga Jesu niu pakhuga din-e, “Nangniu kamrabo ngamse kalangjiu kamsulo.” 28 Chakuangkaiga ntao bammai khatniudi paniu din bambose simakge. 29 Judas hai rangkang thinbo donniu, paliuniu changeega tiura leng maksai kalek kasamaileng pikhaira dinjiu bamne chiu paliuniu maning-e. 30 Judas niu taruak khuangse khoilujiu tadpatnuang mide. Haise nchun-e.
Kasanbo Ladrian
31 Judas tadpat mibo saiga, Jesu niu din-e, “Tuhoira, Chamai Nahpiu kendise madupad mide, tuhoira Tingwang kendise pakhu gasu madupad mide. 32 Sichiujiu Tingwang kendise madupad khaisai, Tingwang niu Chamai Nahpiugu kendise pakhu gasu madupad khai bine, khatdi haise paniu kamnuang khai bine. 33 Anahmaidung yo, Iniu naliutu maluang bam matheng silak mide. Naliuniu atu phiu sune, chiudi Iniu Jehudi maigu apaimaidung khuga dinkhai mibo kumjiu naliu khugadi tuhoi dinkhai lanbo-e, “Iniu tadrabo bam gase naliu tadtang lakge. 34 Sichiujiu tuhoi Iniu naliutu kasanbo ladrian pikhai-e: naliu khatniu khattu lungsalo. Iniu naliutu lungsabo kum naliudi khatniu khattu lungsa rabo-e. 35 Naliu khuga lungsabo hai bamsai, mai hinaniu naliu hai pakhommaidung-e chiubo silu rabo-e.”
Peter Niu Suimak Rabose Jesu Din Masuang Khaibo
36 Simon Peter niu maniu-e, “Rapiu yo, nang delam tadmi ralo?” Jesu niu paokakge, “Iniu tadrabo lamse tuhoira naliu suitang lulakge, pasainiu suiwang rabo sangnu.” 37 Peter niu maniu-e, “Dekamjiu tuhoi aliuniu sui ngam lakge chiujiulo, Rapiu yo. Najeng gasu I shaira kaden lude!” 38 Jesu niu paokakge, “Pachang paling nangniu ajeng gasu shaira kadenlu dama? Iniu nakhuga majibose dinbo-e: nangniu atu simakge chiujiu dinlon sum makthen maruireng siniu khuang lakge.
Jesu Hai Papiu Khulam Tadrabo Npui Si-e
1 “Naliu lung magen thiujiu kabuakmi tulo”, chiujiu Jesu niu paliu khuga din-e. “Tingwang tudi malumlo, atudi malumlo. 2 Apiu kyga pabam keng bamme, sichiujiu Iniu naliuleng pabam kadenra tadmine. Haise bammak liusai Iniu naliu khuga dinkhai lakge. 3 Sichiujiu Iniu tadlujiu naliuleng pabamse kaden loisai, Iniu bambo bamga naliudi bamra I malan wangjiu naliutu puirabo-e. 4 Iniu tadrabo npuise naliuniu sijiu bambo-e.” 5 Thomas niu pakhuga din-e, “Rapiu yo, nangniu tadrabo bamse aliuniu simakge; sichiusai aliuniu dechiujiu sibo npuise silu ralo? 6 Jesu niu paokakge, “I hai npui si-e, majibo si-e, khatdi karingbo si-e; akhu gasu makjiu mai khatniudi Apiu khuga wanglu lakge.” 7 Sichiujiu paniu paliu khuga din-e, “Tuhoira naliuniu atu silude, sijengniu Apiu tudi naliuniu silu rabo-e, sichiujiu tuhoi gasu naliuniu patu simide khatdi ngao mide. 8 Philip niu pakhuga din-e, “Rapiu yo, aliu khuga Papiu situ lenkhailo; sise aliuniu luni-e.” 9 Jesu niu paokakge, “Pating haithengkha Iniu naliu mathiutu maluangwang kinbo-e, chiudi naliu atu simakha jiuma, Philip yo? Atu ngao lumai hina Papiutu ngaolubo-e. Sichiusai nangniu dechiujiu Papiutu aliu khuga lenkhailo chiujiulo? 10 Philip yo, nangniu malum makjiu ma? Tuhoira I hai Papiu khuga bambo-e khatdi Papiu siniu akhuga bambo-e, chiubo Iniu naliu khuga dinkhai mibo ladkengse, akhu gasu padbo makge. Akhuga bambo Piu siniu pangam kam bambo-e. 11 Iniu Papiu khuga bambo-e, khatdi Papiu siniu akhuga bambo-e, chiujiu Iniu dinbo haitu malum makdi, Iniu kambo ngamdung jengniu malum lulo. 12 Iniu naliu khuga majibose dinbo-e: mai khatniu atu malumsai, Iniu kambo hinase paniu kamne—Yo, sisuang kadibo ngamdi paniu kamrabo-e, palamra Iniu Papiu khulam tadmibo donniu-e. 13 Azan gasu naliuniu khengbo hina Iniu kamkhai bine, sichiujiu Papiu kendise Nahpiu khugasu lenkhai bine. 14 Naliuniu chamtan gasu khengbo hina Iniu kamkhai bine.
Masanbo Hiupuina Pikhaira Ladriat Khaibo
15 “Naliuniu atu lungsa-e sai, agu chamtan haise majai rabo-e. 16 Iniu Apiu khuga khengkhai bine, sichiujiu paniu naliuleng Khakhaipao khat pikhai bine. 17 Pahai Tingwang lamga majibo madukhaibo Hiupuina si-e. Kadihpiri siniu patu lukhai ngam makge, palamra haisiniu patu ngao makge, maksai simakge. Chiudi naliura patu sibamme, palamra paniu naliutu maluang bamme khatdi naliu khuga pah bamme. 18 “Iniu tadmidi, naliutu ronna phudkhai lakge; I naliu khuga wanglan rabo-e. 19 Pakak khatga kadihpiriniu atu ngaota mine chiudi naliura atu ngaojiu bamne; palamra Iniu ringbambo kumjiu naliudi ringbamne. 20 Pating mikse wangtang dasai Iniu naliu khuga bambo kumjiu, Apiu khuga I bambo-e khatdi naliuse akhuga bambo-e chiubo naliu silune. 21 “Agu chamtantu lukhaibo khatdi majaibo pase atu lungsabo-e. Atu lungsamai hinatu Apiuniu lungsa khai bine; Idi paliutu lungsajiu apumsiak madulen khai bine.” 22 (Judas Iscariot makbo) Judas niu din-e, “Rapiu, nangniu dechiujiu aliu khuga madulen khai lujiu kadihpiritu madulen lakge chiujiulo?” 23 Jesu niu patu paokakge, “Atu lungsamai hina siniu achamdi majai rabo-e. Apiuniu paliutu lungsakhai bine, khatdi Apiu anainiu paliu khuga wanglujiu paliutu maluang lungkhai bine. 24 Atu lungsa makmai siniu achamdi majai makge. Iniu naliutu katikhai bambo hai achun maning makge, chiudi atu langkhaibo Apiu khugasu wangbo-e. 25 “Iniu naliutu maluang bamboga haise naliu khuga dinkhaibo-e. 26 Apiuniu chamtan gasu langkhai rabo Khakhaipao, Masanbo Hiupuina siniu pakhiangna katikhai bine khatdi Iniu naliu khuga dinkhai mibo hinase naliutu pi maningtao khaine. 27 “Iniu naliu khuga agi-manaibo pikhaibo-e; Iniu naliuleng pikhaibo haise agu agi-manaibo-e. Kadihpiriniu pibo kumjiu Iniu pikhaibo makge. Naliu manang tulo, khatdi kabuakmi tulo, khatdi pingmi tulo. 28 Iniu naliu khuga dinbo hai naliu chiumide, ‘I tadmine, chiudi I naliu khuga wang lanne.’ Naliuniu atu lungsa-e sai, Iniu Apiu khulam wangmiboga naliu chunwi rabo-e, palamra pah asuang dibo-e. 29 Iniu haise pad makhaga naliu khuga din masuang khaibo-e, sichiujiu haise pad sai naliuniu malumlu raleng-e. 30 Iniu naliutu npao matheng ngam lakde, palamra haibo kadihpirigu mawangpaose wang kinne. Pah ariga pumtan ha-e, 31 chiudi Iniu Apiutu lungsa-e chiubo hai kadihpiriniu silura leng-e. Sijengniu paniu atu chamtan pibo hinase Iniu kambo-e. “Khe, aliu haibo bam gasu tadmi sukhe.
Jesu Hai Palingbo Mumken si-e
1 “I hai palingbo mumken si-e, khatdi Apiuse kareng npao-e. 2 Akhuga bamjiu pasy masi makbo ke hinatu paniu riothon mine, khatdi pasy masibo ke situ paniu mathan khaijiu pasy kengjiu masi rabo-e. 3 Iniu katikhai bibo donniu naliutu kam masan mide. 4 Akhuga bamtan-tan lulo, sichiusai Idi naliu khuga bamtan-tanne. Pake khat siniu paronna pasy masi lulakge; haisiniu paken- ga bamsai pasy masi lubui-e. Sikumjiu naliudi akhuga bamlu maksai pasy masi lulakge. 5 “I hai paken si-e, naliura pakedung si-e. Akhuga bambo, khatdi Iniu pakhuga bambo pah siniu pasy kengjiu masirabo-e, palamra I jaomakjiu naliuniu wadi kamlu lakge. 6 Akhuga bam makbo patura, paketu riothon mibo kumjiu luthon mine, sichiujiu shaimi rabo-e; sikumbo kedung tura khom madui lujiu chamiga thonkhaijiu rumi rabo-e. 7 Naliuniu akhuga bamsai khatdi aladkengse naliu khuga bamsai, naliuniu lunibose chamtan gasu khenglo, sise naliuniu daolune. 8 Naliuniu pasy kengjiu masibo siniu Apiu kendise lenkhaibo-e, sichiujiu naliu akhommai thiulubo-e. 9 Apiuniu atu kungbo kum Iniu naliutu kungbo-e, sijengniu agu lungsaboga bamlulo. 10 Iniu Apiu chamtan majaijiu pagu kungboga bambo kum, naliudi agu chamtan majai lujiu agu kungboga bamlulo. 11 “Iniu naliu khuga haise dinkhaibo sira naliuniu agu chunwiboga bamlu raleng-e, khatdi naliugu chunwibose tathuilu raleng-e. 12 Agu chamtan sira hai-e: Iniu naliutu lungsabo kum, naliu khatniu khattu lungsa lulo. 13 Mai khatniu pagu ringtingse pakamaileng pikhaibo lungsiat suang wadi kadibo ha-e. 14 Iniu naliutu chamtan pikhaibose naliuniu majai lusai naliu akahmaidung-e. 15 Iniu naliutu kavang chiujiu kumakge, palamra kavang siniura pawangpiuniu kambose sitanglu makge. Sibosung, Iniu naliutu akahmaidung chiujiu kubo-e, palamra Iniu Apiu khugasu chiulubo hinase naliu khuga dinkhai mibo-e. 16 Naliuniu atu kadabo makge, chiudi Iniu naliutu kadalubo-e; sichiujiu naliuniu tadlujiu pasy kengjiu masilura leng-e, sise tingtheng bamrabo leng-e. Sichiujiu naliuniu azau gasu khengbo hina Apiuniu naliuleng pikhai bine. 17 Sichiusai, haise Iniu naliuleng chamtan pibo-e: naliu khatniu khattu lungsa lulo.
Kadihpiriniu Marengbo
18 “Kadihpiriniu naliutu marengsai, haisiniu raijiu atu mareng mide chiubo maningtao lulo. 19 Naliuniu kadihpirigu thiusai, haisiniu naliutu lungsa rabo-e. Chiudi Iniu naliutu haibo kadihpiri gasu kada lude, sijengniu kadihpiri haisiniu naliutu mareng rabo-e. 20 Iniu naliu khuga dinkhai mibose maningtao lulo: ‘Kavang khatniu pawangpiu suang dimakge’. Paliuniu atu kam mathad khaisai, paliuniu naliu tudi kam mathad rabo-e; paliuniu acham majaisai, paliuniu naliu chamdi majai rabo-e. 21 Chiudi paliuniu haise naliu khuga kamrabo-e palamra naliu hai agu-e, delosai paliuniu atu langkhaibo patu simakge. 22 Iniu wangmak liusai khatdi paliu khuga dinkhai mak liusai, paliu nuanse habam niura-e, chiudi tuhoira paliu nuanse bailura hamide. 23 Atu marengmai hinase Apiu tudi marengbo-e. 24 Mai khatniudi kamkhai makbo ngamse Iniu paliu ruangga kamkhai mak liusai, paliu nuanse habamniu rabo-e, chiudi Iniu kamkhai mibose paliuniu ngaolude, sichiujiu paliuniu atudi, Apiu tudi mareng-e. 25 Chiudi, haise paliugu Tacheng-tajaiga raokhai mibose wangtang raleng-e: ‘Palam wadi habo gasu paliuniu atu mareng-e.’ 26 “Khakhaipaose wang sune, sise Tingwang lamga majibo madu khaibo khatdi Apiu khugasu wangbo Hiupuina si-e. Apiu khugasu Iniu patu naliu khuga langkhai bine, sichiujiu paniu alamga dinkhai bine. 27 Sichiujiu, naliudi alamga dinrabo-e, palamra paphibang gasu naliuniu atu maluang bambo-e.
1 “Iniu haise naliu khuga dinbora, naliuniu naliugu malumbo situ phutmak raleng-e. 2 Naliutu maduiky gasu hathon padsune, sichiujiu naliutu kamshatbo haise paniu Tingwang tien thiubambo-e chiu maningjiu kambo wanse wang sune. 3 Maidungniu haichiujiu kamsune, palamra paliuniu Apiu tudi, atudi simakbo jengniu-e. 4 Chiudi Iniu haidungse naliu khuga dinbora, haikumbo wanse wang dasai, Iniu naliu khuga dinkhai mide chiubo naliuniu maningtao raleng-e.
Masanbo Hiupuina Tienkam
“Karaiga haidungse Iniu naliu khuga dinmakge, palamra Iniu naliutu maluang bambo-e. 5 Chiudi tuhoira atu langkhaibo pakhulam I tadmine, chiudi naliu mai khatniudi I delam tadralo chiubo maniu makge. 6 Tuhoi Iniu naliu khuga haichiu dinbo jengniu, naliu chun saboniu phuimide. 7 Iniu naliu khuga majibose dinbo-e: I tadmibo hai naliuleng wi-nkiu-e, palamra I tad maksai, Khakhaipaose naliu khuga wang lakge. Chiudi Iniu tad misai, naliu khuga Iniu patu langwang rabo-e. 8 Sichiujiu pah wangsai, paniu kadihpiri maidung nuan lamga khatdi majibo lamga, khatdi Tingwang gu ladjan lamga pisikhai bine. 9 Paliuniu atu malum makbo jengniu, nuan lamga paliu mao-e. 10 Agu majibo lamga paniu madukhai bine, palamra Apiu khulam I tad mine, sichiujiu naliuniu atu ngaota mine; 11 khatdi ladjan lamga paliu mao mide , palamra haibo kadihpiri mawangpao situ ladjan thiuloi mide. 12 “Iniu naliu khuga dinkhaira kengjiu bamme, chiudi tuhoira naliu phung ngamlak mide. 13 Sichiujiu, Hiupuinase wang dasai, Tingwang lamga majibose paniu madukhaijiu majibo gase naliutu jukhai bine. 14 Paniu atu kendibose pikhaine, palamra Iniu dinbose paniu naliu khuga dinkhai bine. 15 Apiugu kabambo hinase agu-e, sijengniu Iniu Hiupuina khuga pikhaibo hinase paniu naliu khuga dinkhai bine chiu dinbo-e.
Chunsabo Nai Chunwibo
16 “Naliuniu atu pakak khat ngaota mine, palamra I apiu khulam tadmi rabo-e, chiudi pawan khat sainiu atu ngaolan sune.” 17 Pakhommaidung khangsia siniu paliu karai maniu sude, “Haise dechiubo rambalo? Paniu aliu khuga din-e, aliuniu patu pakak khat ngaota mine, chiudi pakak khat sainiu ngao lanne. Sironna makjiu paniu din-e, ‘Iniu Apiu khulam tadmi rabo jengniu-e.’ 18 ‘Pakak khat’ chiubo ramba hai detulo? Paniu dinbo hai aliu simakge!” 19 Paliuniu pakhuga maniukhai nijiu bambo hai Jesu niu silujiu, paniu paliu khuga din-e, “Iniu dinbo-e, ‘Naliuniu atu pakak khat ngaota mine, sichiujiu pakak khat sainiu atu ngao lanne.’ Haibo lamga naliu karai maniujiu bambo ma? 20 Iniu naliu khuga majibose dinbo-e: naliuniu kapjiu kiam sune, chiudi kadihpiri mainiu chunwi sune; naliu chunsiat hai chunwibo thiu mine. 21 Puimai khatniu mana surabo ting wangsai pachun sa-e, palamra paniu magenthiu rabo tingse wang mide; chiudi ngenase mana luboga, pagu magenthakse mangai mi-e, palamra ngena khat kadihpiriga mana wangde chiujiu pachun wi-e. 22 Sikum gapjiu naliu khuga bambo-e: tuhoira naliu chunsajiu bamme, chiudi Iniu naliu khuga madulen khai dasai naliu chunwibo siniu phuimi rabo-e; sibo chunwatse naliu khugasu mai khatniudi lupad ngamlu lakge. 23 “Patingse wangtang dasai, naliuniu wakhatdi akhuga maniulak mide. Iniu naliu khuga majibose dinbo-e: naliuniu Apiu khuga khengbo hina paniu chamtan gasu pikhai bine. 24 Tuhoi tangbo naliuniu chamtan gasu wakhatdi kheng makha-e; khenglo, naliuniu daolune, sichiujiu naliugu chunwatse tathuilu rabo-e.
Kadihpiritu Chari Ngambo
25 “Haidungse Iniu naliu khuga din champanbo thiujiu dinbo-e. Din champanbo thin makjiu, chiudi masanjiu Apiu lamga naliu khuga dinkhai rabo wanse wang kinne. 26 Sibo tingmikse wangtang dasai naliuniu chamtan gasu kheng sune, haise Iniu naliu sung kheng khaine chiubo makge. 27 Palamra Apiu papum siakniu naliutu lungsabo-e. Paniu naliutu lungsa-e, palamra naliuniu atu lungsa-e, khatdi I hai Tingwang khugasu wangbo-e chiubo naliuniu malumde. 28 Apiu khugasu I wangbo-e, khatdi kadihpiriga wangbo-e; chiudi tuhoira Iniu kadihpiri haitu saodiak lujiu Apiu khulam tadmine.” 29 Siga pakhommaidung siniu pakhuga din-e, “Tuhoira nangniu din champanbo thin makjiu masanjiu dinkhaide. 30 Tuhoira wahinase nang si-e chiubo aliu silude. Mai khatniudi nakhuga wa maniura pageng hade. Haisiniu nang Tingwang khugasu wangbo-e chiubo aliu malumde.” 31 Jesu niu paliutu paokakge, “Tuhoira naliu malumlu dama? 32 Pawanse wangkinne khatdi wang bamme; naliu mai hinatu paky ky lam hamara mine khatdi atu ronna phutkhai diakne. Chiudi Ira aronna makge, palamra Apiuniu atu maluang bambo-e. 33 Iniu haise naliu khuga dinkhaibora, naliuniu agu agi-manaiboga bamlura leng-e. Kadihpiriniu naliutu kam chariu sune, chiudi hujiu bamlo! Iniu kadihpiritu ngam lude!”
Jesu Niu Pakhommaidung Leng Khengbo
1 Jesu niu haise dinlubo saiga, paniu tinggen lam ngangphui lujiu din-e, “Apiu yo, pawan hai wang bamde. Kendibose Na-Nahpiu leng pithiu khai sulo, sichiujiu Nahpiu siniu naleng kendibose pithiu khai raleng-e. 2 Palamra nangniu patu jat hina riga pumtan pikhaibi-e, sichiujiu nangniu pakhuga pikhaibo mai hina leng paniu tingtheng karingbo pikhaira leng-e. 3 Tingtheng karingbo chiubora nang hai khatnakha bambo majibo Tingwang si-e, khatdi nangniu langkhaibo Jesu Khrista tu silura leng-e. 4 Iniu nagu kendibose kadihpiriga lenkhai mide, sichiujiu nangniu atu langkhaibo ngamse kamloi mide. 5 Apiu yo, tuhoira nagu kendibose atu pikhai sulo, karaiga kadihpiri haitu dam makhabo tingga Iniu natu maluang bambo kendise pikhai sulo. 6 “Kadihpiriga nangniu atu pikhaibo hina khuga Iniu natu pisikhai kam mide. Paliu hai nagu-e, paliutu nangniu akhuga pikhaibo si-e. Paliuniu naladse majai lude. 7 Tuhoira nangniu akhuga pikhaibo hinase nakhu gasu wangsiakbo-e chiubo paliuniu silude. 8 Nangniu akhuga pikhaibo champaose Iniu paliu khuga pikhai mide, khatdi paliuniu sise lukhai lude. I hai nakhu gasu wangbo-e, khatdi nangniu atu langkhaibo-e chiubo majibose paliu silude khatdi malum lude. 9 “Iniu paliuleng khengbo-e. Iniu kadihpiri leng khengbo makge, chiudi nagu, nangniu aleng pikhai maidung leng khengbo-e. Palamra paliu hai nagu-e. 10 Agu kabambo hinase nagu-e, khatdi nagu kabambo hinase agu-e; khatdi agu kendibose paliu khugasu lenkhai-e. 11 Tuhoira I nakhu lam wang kinne, Ira kadihpiriga bamta mine, chiudi paliura kadihpiriga bamme. Masanbo Piu yo, nazan pumtan siniu paliutu gukhailo; sichiujiu anai I khatbo kumjiu, paliu tudi khat thiulu raleng-e. 12 Iniu paliutu maluang bambo tingga nangniu atu pikhaibo zan pumtan pen gasu paliu mathiutu gukhai mide, sichiujiu Masanbo ariakga raokhaibose wangtang lura jengniu hamirabo piuse makjiu, mai khatdi hamakge. 13 Tuhoira I nakhu lam wanglan kinne, sichiujiu paliu khuga agu chunwibo hai phuijiu bamlura Iniu kadihpiriga haise dinkhaibo-e. 14 Iniu nagu champaose paliu khuga paokhai mide, sijengniu kadihpiri hainiu paliutu mareng mide; palamra I hai kadihpirigu makbo kumjiu paliudi kadihpirigu makge. 15 Paliutu kadihpiri gasu lupad mira Iniu khengbo makge, chiudi paliutu Kasabo piu khugasu gukhaira khengbo-e. 16 I hai kadihpirigu makbo kum, paliudi kadihpirigu makge. 17 Paliutu nangniu majibo siniu kam masan khailo, palamra nagu ladkeng sira majibo-e. 18 Nangniu atu kadihpiriga langkhaibo kum, Iniudi paliutu kadihpiriga langkhai-e. 19 Sichiujiu paliu jengniu apum hai nakhuga kadkhaibo-e, majibo siniu paliutu kam masan khailo. 20 “Iniu paliuleng ronna kheng makge, chiudi paliu champao gasu atu malum lumai lengdi khengbo-e. 21 Paliu mathiuse khat thiulura Iniu khengbo-e. Apiu yo, nang akhuga bambo kum, khatdi Iniu nakhuga bambo kumjiu, paliu tudi ania khuga pibam khailo. Paliutu pijiu khat thiu khailo, sichiusai nangniu atu langkhaibo-e chiubo kadihpiri hainiu malumlu raleng-e. 22 Nangniu atu pikhaibo kendise Iniu paliu khuga pikhai-e, sichiujiu ania khatbo kumjiu paliudi khat thiulu raleng-e: 23 Iniu paliu khuga, khatdi nangniu akhuga bamme, sichiujiu paliu hai khat nakha thiura leng-e. Khatdi nangniu atu kungbo kum, paliutu nangniu kungbo-e, sichiujiu nangniu atu langkhaibo-e chiubo kadihpiri hainiu silura leng-e. 24 “Apiu yo, nangniu paliutu akhuga pikhaibi-e, sichiujiu nangniu atu pikhai bibo kendise paliuniu ngaolu raleng, Iniu bamboga paliutu pibam aruang khaira Iniu masenbo-e; palamra kadihpiri haitu dammak gasu nangniu atu kungjiu bambo-e. 25 Tacheng matipbo Piu yo, kadihpiri hainiu natu simakge, chiudi Ira natu sijiu bamme, khatdi haisiniu, atu langkhaibo haise nangniu-e chiubo silura leng-e. 26 Nangniu atu kungbose paliu khuga bamlura khatdi Iniu paliu khuga bamlu raleng Iniu paliu khuga natu pisikhai mibo-e khatdi pisikhaijiu bamrabo-e.”
Jesu Tu Minbo
1 Jesu niu haichiu kheng lubo saiga, paniu pakhommaidungtu puilujiu Kidron giuki lamse tadpad mide. Siga kareng khat bamme, Jesu niu pakhommaidungtu maluang lujiu siga ngut mide. 2 Patu jonmibo Judas niu sise sibamme, palamra siga Jesu niu pakhommaidungtu ngao adao-dao-e. 3 Sijengniu Judas niu Rom mai riphendungtu puilujiu khatdi singkupaodung nai Pharisee maidungniu langkhaibo Charaky akhemaidung khangsiatu maluang lujiu kareng gase tadde. Paliuniu chaheng-changiu thin lujiu khatdi kahiu ponlujiu wangde. 4 Pakhuga wang kinbo hina Jesu niu silujiu, suanglam tadpad lujiu, paniu paliu khuga maniu-e, “Naliuniu saotu phiukin jiulo?” 5 Paliuniu paokakge, “Nazareth Jesu tu-e.” Paniu din-e, “I hai-e.” Sigase patu jonkhaibo Judas di chapjiu bamme. 6 Paniu paliu khuga, “I hai-e, “ chiujiu dinkhaiboga paliuse sailam nkhin padlujiu kadihga kaokiu-e. 7 Jesu niu paliu khuga maniu lan-e, “Naliuniu saotu phiukin jiulo?” Paliuniu paokakge, “Nazareth Jesu tu-e.” 8 Jesu niu din-e, “ I hai pah-e chiujiu naliu khuga dinmibo-e. Naliuniu atu phiu kinsai, kakimaidung haitu pitad milo.” 9 (Paniu haichiu dinbora, paniu dinkhai mibose wangtang raleng-e: “Apiu yo, nangniu akhuga pikhaibo maidungse mai khatdi hamakge.”) 10 Apangheng phungbambo Simon Peter siniu paheng thadpad lujiu Dibo Singku vangpiu kuon majad lamse septap mide. Sibo vangpiu zanse Malkha chiu ku-e. 11 Jesu niu Peter khuga din-e, “Nahengse pakhaiga khailan milo. Apiuniu atu pikhaibo magenthiu chariubo piangse Iniu sakmak rabo-e chiujiu nangniu maning jiuma?”
Anna Masuangga Jesu
12 Rom riphendung siniu Jehudi maigu akhemaidung situ majang lujiu Jesu tu nimlujiu ratlude, 13 sichiujiu patu raiboga Anna khuga puiwang-e. Pase sibo kumgu Dibo Singku thiujiu bambo Caiaphas pao-e, 14 Maidung mathiu sung mai khatniu shai khaibo siniu wi-e chiujiu Jehudi maigu apaimaidung khuga ladti khaibo Caiaphas hai pah si-e.
Peter Niu Jesu Tu Suimakbo
15 Simon Peter nai pakhommai khat Jesu saisuijiu tad kin-e. Khommai khang khatse Dibo Singku situ simawijiu bambo jengniu Dibo Singku kyjeng lamse ngut mide. 16 Peter sira rengmun lenlam bammide. Pakhommai khangkhat siniu malan padlujiu rengmun-ga chapkhuan bambo riliupui khugase npao lujiu Peter tu kalunglam maluang ngut khaide. 17 Rengmun-ga chapkhuan bambo riliupui siniu Peter khuga maniu-e, “Nangdi uinapiu khommai khangkhat makma?” Peter niu paokakge, “Chiumakge I makge.” 18 Haise agibo wan-e, sijengniu kavangmaidung nai akhe maidungse siniu chami thiulujiu maga malumjiu chap karen bamme. Sijengniu Peter di tadlujiu paliu ruangga chaplujiu maga malumjiu bamme.
Dibo Singku Siniu Jesu Tu Wa Maniubo
19 Dibo Singku siniu Jesu khuga, pakhommaidung nai paniu katikhaibo lamga maniu sude. 20 Siga Jesu niu paokakge, “Iniu mai hinatu mathiu rong gasu katikhaibo-e, maidungniu maduikyga khatdi Charakyga wang maduibo lon Iniu katikhaibo-e. Wadaodi I mahinjiu wakhatdi dinkhai makge. 21 Sichiusai, dechiujiu akhuga maniubam jiulo? Alad chiukhai mibo maidung khuga maniu lulo. Iniu kadinbo hina paliuniu sibam kamme.” 22 Jesu niu haise dinboga, siga chap bambo akhemai khatniu pabiang kaphijiu din-e, “Nangniu Dibo Singkutu haichiujiu npaora nakaji bamma?” 23 Jesu niu patu paokakge, “Iniu dinbambo hai kamaobo bamsai, haiga bammai hina khuga dinkhailo. Chiudi Iniu dinbo haise maji bamsai dekamjiu nang atu dapjiulo?” 24 Sigasu Anna niu patu ratlujiu Dibo Singku Caiaphas khulam langkhai mide.
Peter Niu Jesu Tu Suimak Lanbo
25 Peter se siga chap lujiu chami maga malumjiu bamkha-e. Siga khangsia mainiu pakhuga maniu-e, “Nangdi uinapiu khommai khangkhat makma?” Chiudi Peter niu suimakjiu din-e, “Chiumakge, Ira makge.” 26 Peter niu Dibo Singku vangpiu kuon septap mibo kiriangmai khatniu din lan-e, “Kareng lungga nangniu patu maluang lujiu bambo Iniu natu ngaokhai mibo makma?” 27 Peter niu din lan-e, “Makge.” Siga maruireng khuanggap sude.
Jesu Tu Pilate Masuangga Majang Wangbo
28 Nsuan kalu Jesu tu Caiaphas ky gasu, dihthinpao kylam puitad mide. Jehudi maidung siniu kalunglamse ngut makge, palamra Kenpadbo Ngee maluadse tiuraleng paliuniu tacheng saisuijiu masan kani jengniu-e. 29 Sijengniu Pilate niu kamalam padlujiu paliu khuga maniu-e, “Naliuniu haina piutu dekambo donniu pamao pijiulo?” 30 Paliuniu haichiu paokakge, “Paniu kamaobo kam maksai, aliuniu patu nakhuga puiwang lakge.” 31 Pilate niu paliu khuga din-e, “Sichiusai patu puilujiu naliugu Tacheng-tajai saisuijiu naliu ronna ladjan thiu lulo.” Paliuniu paokakge, “Aliuniu mai khattudi kamshat suimakbo donniu-e.” 32 (Haise Jesu, paniu dechiu shairalo chiujiu pashit lamga dinkhai mibose wangtang raleng-e). 33 Pilate niu kalunglam ngut lujiu Jesu tu kulujiu maniu-e, “Nang hai Jehudi mai wangpiu-e ma?” 34 Jesu niu paokakge, “Nangniu haichiu maniubo hai nangniu maningbo ma, maksai maidungniu nakhuga dinkhai jiulo?” 35 Pilate niu paokakge, “I hai Jehudi mai-e chiubo nangniu maning jiuma? Namaidung siakniu khatdi singkupaodung siniu natu akhuga pikhaibo-e. Nang degu kamkhai mijiulo?” 36 Jesu niu din-e, “Awangdih haira haibo kadihpirigu makge, awangdih haise kadihpiri bamliusai, Jehudi maigu apaimaidung khuga atu pikhai makra asaisui maidung siniu aphen surabo-e. Awang dihra haise makge!” 37 Sijengniu Pilate niu pakhuga maniu-e, “Sichiusai, nang hai chawang khat ma?” Jesu niu paokakge, “I chawang khatle chiujiu nangniu dinmide. Majibo haise dinra atu manawangbo-e khatdi haibo jengniu, I wangbo-e. Sichiujiu majiboga bammai hina siniu akhuan nking-e.” 38 Pilate niu maniu-e, “Majibose desilo?”
Jesu Tu Kamshatra Suikhaibo
Siga Pilate niu kamalam padlan lujiu maidung khuga din-e, “Iniu patu ladjan thiura wadi kamaobo pakhuga daomakge. 39 Chiudi naliu cheng saisuijiu Kenpadbo Ngee tingga Iniu naliuleng bangkhai bammai rong gasu khang khattu phutkhai khaibo-e. Sichiusai Iniu Jehudi mai wangpiu situ naliuleng phutkhaibo naliu lunima?” 40 Paliuniu chakhuan senjiu din-e, “Makge, patu luni makge. Aliura Barabbas tu luni-e!” (Barabbas haira pamao kabambo piu-e).
1 Sigasu Jesu tu dapkhaira Pilate niu pikhaide. 2 Riphendung siniu tathu pirun khat kam lujiu papee ga runkhai sude, khatdi chafai ranranbo khat patu benkhaide, 3 khatdi pakhuga wang lujiu din-e, “Jehudi mai wangpiuse tingtheng ringbamlo!” Sichiujiu paliuniu tadpad lujiu patu kaphi sude. 4 Pilate niu mathiu ruanggase tadpad lanlujiu din-e, “Phuilo, Iniu patu ladjan thiura kamaobo wadi daomakge chiubo naliu khuga jupad lenne.” 5 Sichiujiu Jesu tu tathu pirun runkhai lujiu khatdi ranranbo faise benkhai lujiu puipadde. Pilate niu paliu khuga din-e, “Phuilo, hainapiuse haiga bamme!” 6 Singku paodung nai Charaky akhemaidung siniu patu ngaoboga paliu khuan tanjiu din-e, “Patuse jumasengjiu kamshat milo! Patuse jumasengjiu kamshat milo!” Siga Pilate niu paliu khuga din-e, “Sichiusai, naliuniu patu jumasengjiu kamshat sulo. Ira patu ladjan thiura wadi kamaobo daomakge.” 7 Maidung siniu paokakge, “Aliuniu patu kamshat suibo cheng bamme, palamra pahai Tingwang Nahpiu-e chiujiu paronna din-e.” 8 Pilate niu haise chiuluboga ping nkiu mide. 9 Paniu kalunglam wang lujiu Jesu khuga maniu-e, “Nang hai delamsu wang jiulo?” Chiudi Jesu niu paokak khai makge. 10 Pilate niu pakhuga din-e, “Nang atu npao lakma? Iniu natu phutkhaira maksai jumaseng lujiu kamshat mira agu pumtan bamme chiubo maningtao lulo.” 11 Siga Jesu niu paokakge, “Nangniu ariga pumtan bambo sira Tingwang niu natu suikhaibo donniu-e. Sichiujiu atu nakhuga pikhaibo maise pamao sa-nkiu-e.” 12 Pilate niu haise chiuluboga Jesu tu phutkhai mira npui phiu sude. Chiudi maidung siniu paliu khuan tanjiu senlan sude, “Nangniu patu phutkhai misai, nangra Wangdi kamai makge! Mai khatniu pase chawang-e chiujiu dinsai, pahai Wangdi piugu mikre piu-e!” 13 Pilate niu haise chiuluboga, paniu Jesu tu lenlam puipad lujiu, ladjan bam, “Tudonbam” kubo gase pi-ntao khaide. (Haise Hebrew mai lad gara “Gebatha” chiu ku-e). 14 Haise Kenpadbo Ngee masuang nai niending wan mide. Pilate niu paliu khuga din-e, “Haiga naliu wangpiuse bamme!” 15 Paliuniu paliu khuan tanjiu sen sude, “Patu kamshat milo! Patu kamshat milo! Patuse jumaseng lujiu kamshat milo!” Pilate niu paliu khuga maniu-e, “Naliu wangpiutu jumasengjiu kamshatra atu naliuniu masenjiu ma?” Singku paodung siniu paokakge, “Aliu wang sira Wangdi paronna-e.” 16 Sijengniu Pilate niu Jesu tu jumasengjiu kamshat mira paliu khuga benlen khai mide.
Jesu Tu Jumasengjiu Kamshatbo
Sichiujiu paliuniu Jesu tu thinman lude. 17 Paniu pagu singchai phung lujiu tadpad sude, khatdi “Tapeeruang Luong” kubo gase wangtangde. (Haise Hebrew ladga “Golgotha” chiu ku-e). 18 Siga paliuniu patu jumaseng sude, sichiujiu paliuniu pamungga mai khangnia tudi jumaseng khaijiu, Jesu tu n-gangga khai bamme. 19 Pilate niu singchai rigase pisikhaibo khat thiujiu “Nazareth Jesu, Jehudi mai wangpiu,” chiubo ladkeng raolujiu dengkhai bamme. 20 Sise maidung kakeng khaniu kentaode, palamra Jesu tu jumaseng khaibo bamse namdi gasu diuju makge. Pisikhaibo chamse Hebrew, Latin khatdi Greek mailad gasu raokhaibo-e. 21 Singku paodung siniu Pilate khuga din-e, “Jehudi mai wangpiu” chiujiu raokhai tulo, chiudi “Hainaniu din-e, I hai Jehudi mai wangpiu-e,” chiujiu raokhailo. 22 Pilate niu paokakge, “Iniu raokhai mibose raokhai mibo-e.” 23 Riphendung siniu Jesu tu jumaseng mibo saiga, pafaise jan madai thiu lujiu paliuleng khat khat jam njan lude. Sichiujiu pa-charui kahabo ntiang sidi paliuniu khoilude. 24 Riphendung siniu khat khat khuga din-e, “Aliuniu haibo ntiangra phetmi dukhe, saoniu luralo chiubo taden thonjiu phuikhe.” Haise Masanbo ariakniu dinbose wangtang raleng-e: “Agu fainidungse paliuleng njan bamme, khatdi a-ntiang jengniu taden thonjiu bamme.” Riphendung siniu haise kamkhai kamigu-e. 25 Jesu gu singchai mung gase papui, papui singna, Clopas nao Mary, khatdi Magdalene Mary paliu chap bamme. 26 Jesu niu papui nai paniu kungbo khommai siniu chap bambo ngao lujiu, paniu papui khuga din-e, “Phuilo, pase nanahpiu si-e.” 27 Khatdi paniu khommaipiu khugase din-e, “Phuilo, pase napui si-e.” Sibo wan gasu khommai siniu patu pakylam puilujiu wang mide.
Jesu Niu Shaibo
28 Tuhoira wahina machang kammide chiubo Jesu niu silujiu Masanbo ariakga raokhai bambose wangtang raleng, paniu din-e, “I chari-e.” 29 Siga paman malabo jawse bamme, sijengniu sibo jawse marampuang tangga sumkhai lujiu pamun-ga ponkhang donkhai bide. 30 Jesu niu sibo jawse sak lujiu din-e, “Haise loimide,” Sichiujiu papeese makiang kiujiu shai mide.
Jesu Lepga Changiu Rikhaibo
31 Sibo saiga Jehudi maigu apaimaidung siniu singchai riga masengkhai bammai ngendungse kakhiu tangkhai lujiu lukiu mira Pilate khuga kheng-e. Paliuniu haichiu khengbo rambara, haise Masannai-e, sichiujiu Tabamnaise pijiu singchai riga masengkhai nbambotu luni makge, palamra wangkinbo Tabamnaise nkiubo masanbo-e. 32 Sijengniu riphendung siniu tadlujiu Jesu tu maluang maseng nchamkhai bambo piu kania ngense kakhiutang mide. 33 Sichiujiu paliuniu Jesu khuga wangbo tingga Jesu ra shai mide, sijengniu paliuniu pa-ngenra kakhiutang makge. 34 Sichiudi riphenmai khang khatniu Jesu lepga pangiuse rikhaide, siga tazai nai duiking luangpadle. 35 (Haise ka-ngaobo piuniu dinbo-e, haise majibo-e, naliuniu malum lura haise dinbo-e. Paniu dinbambo haise maji-e chiujiu kasibo piu khat bamme). 36 Haise Masanbo ariakniu dinbose wangtang raleng-e: “Parahse wa khatnadi kam tang makge.” 37 Masanbo ariak pabam khatga haichiujiu dinkhai-e: “Paliuniu changiu rikhai mibo piutu maidungniu phuisu rabo-e.”
Jesu Tu Nphum Khaibo
38 Haibo saiga, Arimathea namdakga bambo Joseph siniu Jesu pumse Pilate khuga wang kheng-e. (Joseph haise mahinjiu Jesu saisuijiu bambo mai khatle, palamra paniu Jehudi maigu apaimaidungtu pingbo jengniu-e). Jesu pumse lubo sui-e chiujiu Pilate niu dinkhaibo jengniu, paniu wangjiu lulu tad mide. 39 Naikhat nchun Jesu khuga wangbo Nicodemus siniu parim wibo wasa madat samriu kumbo phung lujiu Joseph saisui wang-e. 40 Panai khangnia siniu Jesu pumse ponlujiu wasase manuk khaide, khatdi Jehudi mai cheng saisuijiu fainoi siniu domkhai lujiu nphum raleng macha khaide. 41 Jesu tu kamshat khaibo bamgase kareng khat bamme, siga mai khat tudi baikhai makbo charaw kasan khat bamme. 42 Haise Tabamnai masuang siakga mibo jengniu khatdi charawse sibo mungga bamniubo donniu, panainiu Jesu tu siga nphum khai mide.
Maruangbo Raw
1 Nidnai nsuan kalu, tingben masan makhaga Magdalene Mary se charaw lamse mengde, siga rawkham tuse kalad padmibose ngaode. 2 Paniu Simon Peter nai Jesu niu kungbo khommai khugase pakwang lujiu din-e, “Paliuniu Rapiu tu charaw gasu lutad mide, paliuniu delam patu baikhai milo chiubo aliu silu makge!” 3 Siga Peter nai khommai khangkhatse charaw lam tad sude. 4 Panai khangniase paktad sude, chiudi khommai khangkhat siniu Peter suang tanjiu charaw gase mengtang rai mide. 5 Paniu kinkiu phuiboga Jesu tu domkhaibo fainoise ngaode, chiudi palung gara ngut makge. 6 Pasai lamsu Simon Peter se wang-e, chiudi para charaw lung gase buang ngut taron mide. Paniu majiukhai nbambo fainoise ngaode. 7 Jesu piga kabet khaibo faise khatdi fainoise mainiu majiu khaibo makjiu paronna nkai khaibose ngaode. 8 Siga charawga mengtang raibo khommai sidi ngut lande, sichiujiu padi ngaolujiu malum mide. 9 (Kashaibo gasu pah ringsumi rabo-e chiujiu Masanbo ariakga dinkhai bambose panainiu sitanglu makha-e). 10 Sichiujiu pakhommaidungse paliu ky lam malanwang mide.
Jesu Niu Magdalene Mary Khuga Ngaolen Khaibo
11 Mary se kapjiu charaw mungga chap bamme. Paniu kap-kapjiu charaw lungga kinkiu phui-e, 12 siga kakabo pon piubo maza khangnianiu, Jesu pum khaibo gase khatniu papee jailam, khatniu paphi jailam ntaobam niubo ngaode. 13 Panainiu pakhuga maniu-e, “Maipui yo, nang dekamjiu kapbam jiulo?” Paniu paokakge, “Paliuniu a-Rapiu tu lutad mide, khatdi paliuniu patu delam baikhai milo chiubo I simakjiu-e!” 14 Sichiujiu paniu mariwang lanboga Jesu chap bamniubo ngaode, chiudi sise Jesu-e chiubo paniu silu makge. 15 Jesu niu pakhuga maniu-e, “Maipui yo, nang dekamjiu kapbam jiulo?” Pahai kareng khuanpiu-e chiu maning lujiu, paniu pakhuga din-e, “Paohubo, nangniu patu lumi-e sai dega khai nbamlo, akhuga dinkhai janlo, Iniu tadlujiu patu ponlune.” 16 Siga Jesu niu patu ku-e, “Mary yo!” Paniu pakhulam mariwang lujiu Hebrew lad gasu, “Rabboni!” chiujiu paokakge. (Parambara “Katipao” chiubo-e). 17 Jesu niu pakhuga din-e, “Atu ditulo. Palamra Iniu Apiu khulam wangtang makha-e. Chiudi asingna maidung khulam tadlujiu Iniu Apiu khulam khatdi paliu Piu khulam, a-Rawang khulam khatdi paliu Rawang khulam malan wanglan mine chiujiu dinkhai bilo.” 18 Sichiujiu Magdalene Mary niu tadlujiu pakhommaidung khuga, paniu Rapiu tu ngaolubo khatdi paniu pakhuga dinkhaibo hinase paokhaide.
Jesu Niu Khommaidung Khuga Ngaolen Khaibo
19 Sibo Nidnai chawanse pakhommaidungse Jehudi maigu apaimaidungtu pingbo donniu akham tenlujiu bamme. Siga Jesu niu paliu ruangga wang chaplujiu paliu khuga din-e, “Naliu khuga agi-manai bamlo.” 20 Haichiu dinlubo saiga, paniu paliu khuga paben nai palepse lenkhaide. Rapiu tu ngaoluboga pakhommaidungse paliu chun kawibo siniu phui mide. 21 Jesu niu paliu khuga din lan-e, “Naliu khuga agi-manai bamlo. Apiuniu atu langkhaibo kum, Iniu naliutu langkhai-e.” 22 Sibosai, paliu riga pasiu mudkhai lujiu din-e, “Masanbo Hiupuina daolulo.” 23 Naliuniu maidung nuanse kuak khai bisai, paliu tu kuak khai mibo-e; naliuniu paliutu kuak khaibi maksai paliutu kuak makbo-e.”
Jesu Khatdi Thomas
24 Khommaidung khang kariu-je-niakiu rong gasu, Thomas (Naphinbo chiujiu kubo) khatse Jesu wangbo tingga bam makniu-e. 25 Sijengniu kakimaidung siniu pakhuga din-e, “Aliuniu Rapiu tu ngao lude!” Thomas niu paliu khuga din-e, “Iniu paben ndiga natri jamse ngao makthen, khatdi abenniu palep jamse ditao makthen, Ira malum silakge.” 26 N-nid kak khat saiga, pakhommaidungse akham lujiu bam aruang bamboga, Thomas di paliu ruangga bamme. Akhamse khamten khai nbamme, chiudi Jesu niu paliu ruangga wang chap lujiu din-e, “Naliu khuga agi-manai bamlo.” 27 Sigasu paniu Thomas khuga din-e, “Naben kario padlo, khatdi aben hai phuilulo, naben kariopad alepga kamed khailo. Malum makbose thiuta sulo, khatdi malum lulo!” 28 Siga Thomas niu patu paokakge, “a-Rapiu khatdi a-Rawang!” 29 Jesu niu pakhuga din-e, “Atu ngaolubo donniu nang malum jiuma? Atu ngao makjiu malum maidungse dejiukha donwibo mailo!”
Haibo Ariakkhuang Lam
30 Haibo ariakkhuangga raokhai makbo, Jesu niu pakhommaidung suangga tasibo kamkhaibo tiendung kengjiu bamme. 31 Chiudi haidungse raokhaibo sira Jesu hai Tingwang Nahpiu, Messiah si-e chiubo naliu malum lura leng-e; sichiujiu naliuniu malumbo pen gasu tingtheng karingbose daolura leng-e.
Jesu Niu Khommai Khang Chinniatu Ngaolen Khaibo
1 Haibo saiga, Jesu niu pakhommaidungtu Tiberia Ajai gasu ngaolen khai-e. 2 Haise haichiujiu padmibo-e. Simon Peter, Thomas (Naphinbo chiu kubo), Nathanael (Galilee ga bambo Cana gasu), Zebedee nahpiu kania khatdi Rapiu Jesu gu khommai katambo khangniase aruang bamme. 3 Simon Peter niu paliu khuga din-e, “Ira chakha khara tad mine.” Siga paliuniu pakhuga din-e, “Aliudi nasai suilujiu tadne.” Sichiujiu paliu mathiuse aliam khat gasu tad mide, chiudi sibo nchunse wa khatdi paliuniu thonlu makge. 4 Nsuan naimik padsubo tingga Jesu se ajai mungga chap bamniu-e, chiudi haise Jesu-e chiubo pakhommaidung siniu silu makge. 5 Siga paniu paliu khuga maniu-e, “Akhangmaidung, naliu wadi thonlu mak jiuma?” Paliuniu paokakge, “Wadi thonlu makge.” 6 Paniu paliu khuga din-e, “Naliugu alangse aliamjai majad lamse thonkhai sai, naliuniu tamnakhara daosune.” Sijengniu paliuniu alangse thonkhaide, siga paliugu alangse jupad ngamlak mide, palamra paliuniu chakhase malenna thonlude. 7 Jesu niu kungbo khommai siniu Peter khuga din-e, “Haise Rapiu-e!” Peter niu haise Rapiu si-e chiubo siluboga pafaise makhen lujiu taduijiu gase machak khai mide (palamra paniu pafaise gaopad mibo-e). 8 Khommaidung kakimaidung sira aliam gasu chaphu lamse chakhaniu phuibambo alangse julujiu wangde. Paliuse kadih gasu wathengkha makjiu, chakhet ringiu kumbo ronna diujiu bambo-e. 9 Paliuniu chaphu lamse npadboga, chami thiu nbambo khatdi siga chakha nai taruak rukhai nbambo ngaode. 10 Siga Jesu niu paliu khuga din-e, “Naliuniu tuhoi thonlubo gasu chakha tamnakha khoiwanglo.” 11 Simon Peter niu tadpad lujiu chakha kadibo niu phuibo alangse taphulam jupadsude; siga chakhapui kai-khat-je-ringiu-je-sumkiu bamniu-e, haijiukha chakhase kengbamdi alangse kekmi makge. 12 Jesu niu paliu khuga din-e, “Wanglo, tiusulo.” Siga paliuniu, “Nang hai saolo,” chiubo maidi maniuhu makge, palamra pahai Rapiu si-e chiubo paliuniu simide. 13 Sijengniu Jesu niu tadpad lujiu chakha nai taruakse paliuleng njankhai bide. 14 Haise Jesu niu shailubo saiga, pakhommaidung khuga ngaolen khaibo palon pasumbo-e.
Jesu Panai Peter
15 Paliuniu wa tiulubo sai, Jesu niu Simon Peter khuga din-e, “John nahpiu Simon, haimaidung suang nangniu atu lungsa ma?” Paniu paokakge, “Yo, Rapiu, Iniu natu lungsa-e chiubo nangniu sibamme. Jesu niu pakhuga din-e, “Agu milypoidungtu manang khailo.” 16 Lonniabo thiujiu Jesu niu pakhuga din lan-e, “John nahpiu Simon, nangniu atu lungsa monma?” Paniu paokakge, “Yo, Rapiu, Iniu natu lungsa-e chiubo nangniu sibamme.” Jesu niu pakhuga din-e, “Agu milydungtu manang khailo.” 17 Lonsumbo thiujiu Jesu niu din lan-e, “John nahpiu Simon, nangniu atu lungsa diangma?” Jesu niu, “Nang atu lungsa monma?” chiujiu pakhuga maniu lonsum mibo jengniu Peter palung chariu mide; sijengniu paniu pakhuga din-e, “Rapiu yo, nangniu pakhiangna sikam bamme, Iniu natu lungsa-e chiubo nangniu sijiu bambo-e” Jesu niu pakhuga din-e, “Agu milydungtu manang khailo. 18 Iniu nakhuga pachang paling dinbo-e: nangniu nahbo tingga, nangniu tadkhai nibo bamga nachun-narang thiujiu tadkhai mide, chiudi nangniu thenwang misai nangniu tadkhaini makbo bamga nabense ratlujiu jutad sune.” 19 (Haichiu dinbora, Peter hai dechiujiu shaikhai ralo khatdi sise Tingwang kendi phungwang rabo-e chiubo Jesu niu pisikhaibo-e). Sichiujiu Jesu niu pakhuga din-e, “Asai suilulo!”
Jesu Nai Katambo Khommai
20 Peter niu mariwangbo ga katiu tiubo lon Jesu mungga ntao bambo, Jesu niu kungbo khommai, “Rapiu, natu jonrabo piuse saolo?” chiujiu maniubo piuse pasaiga bamniubo ngaode. 21 Peter niu patu ngao luboga paniu Jesu khuga maniu-e, “Rapiu, hainapiu haira dechiu ralo?” 22 Jesu niu patu paokakge, “Iniu wanglan makthen, patu Iniu piringkhai nisai, na-ngam debam jiulo? Nangra asai suilulo!” 23 Sijengniu haibo khommai piuse shailakge chiubo cham hai Jesu saisui kinmai ruangga dinsude. Chiudi Jesu niu dinbora pahai shailakge chiubo makge; paniu dinbora, “Iniu wanglan makthen, patu Iniu piringkhai nisai, na-ngam debam jiulo?” chiubo-e. 24 Haibo chamdung dinjiu bambo khatdi raojiu bambo pahai khommai-e, sichiujiu paniu dinbambo haise majibo-e chiubo aliuniu si-e.
Munkom khaibo
25 Sichiujiu, Jesu niu kamkhaibo hai kengjiu bamme. Pakhiangnase khat-khat thiujiu raokiusai, kadihpiri pakhiangna ga sibo ariak khuangdungse khaingut lakge chiujiu Ira maning-e.