The Old Testament of the Holy Bible

Benkaden 1

Limha Liyingo ji Motsü

1 Benkadeni Potsow na limhatsü shi liyingathüngjo 2 liko shiji opho n liv pothetsü tssocho. Jümang ntav eyuktsüo shi emüngna eyukzhücho, osi Potsow etho jina ojü ji poni evongphia vancho. 3 Tole Potsow na "Wondang lithuka" to yizüng pile wondang licho. 4 Potsow na hoji mmhona chanchecho. Jisülojo ombona wondang ji emüng lona khotayicho, 5 Osi ombona wondang ji tsüngon to tsayicho, osi emüngji zümoto tsayicho. Zümo ji yakchisi enya chirocho osi tsüngon ovüngo ji hoji tssocho. 6-7 Jisülo Potsow na "Ojü ji chisoe telük eni kümthokvü tsükona khosota lithuka" to yizüng pile hojito tssocho. Hojito Potsow na khosota lithoki ojü ji hoji pomoe tona oküpoe to chisoicho. 8 Ombona pothe ji oyak to tsacho. Zümo ji yakchisi enya chirocho osi tsüngon enioto ji hoji tssocho. 9 Jisülo Potsow na "Oyak shi kupi jo ojü jiang topvü telukalo tsürhyuthuksi liko lithuka" to yizüng pile hojito tssocho. 10 Tole ombona likoji limha to tsayicho, osi ojü tsürhyuo jijo jümang to tsacho. Potsow na hoji mmhona to chanchecho. 11 Jisülo Potsow na "Liko jina otssüng odung lan benria, otsüng ethiolan osi tssüngthi ethiodung lithuka" to yizüng picho, tole hojito tssocho. 12 Hojito liko jilona otssüng odung olan benria bukcho. Potsow na hoji mmhona to chanchecho. 13 Zümo ji yakchisi enya chirocho osi tsüngon ethümotoji hoji tssocho. 14 Jisülo Potsow na "Tsüngon tona zümo to khotathoku, osi tsüngon, nzyu osi yuta chekaphen osi tokhu jiang benkaphen chethethoku tsükona oyaki wondang lithuka; 15 Ontena oyakina tüngrae limhaji wondangthuka" to yizüng pile hojito tssocho. 16 Potsow na wondang tsüphov eni, eng jijo tsüngon ji wondang, choro jijo zümo ji wondang to liyingcho, osi ombona shantio jiangha liyingcho. 17 Ombona oyaki tüngrao jiang theo jijo limha ji wondangthokvü tsükona, 18 tsüngon osi zümo jiang tüngrathoku tsükona osi emüng evon khotathokvü tsükona. Potsow na hojiang mmhona to chanchecho. 19 Zümo ji yakchisi enya chirocho osi hoji tsüngon mezhüoto ji tssocho. 20 Jisülojo Potsow na "Ojüi ekümrümlan taro vanthuka osi oyaki woroden vanthuka" to yizüng picho. 21 Hojito Potsow na jümangi ekümrüm tsüphov jiang ojüi evamo ekümrümlan taro jiang osi worolan taro liyingcho. Osi Potsow na hojiang ji mmhona to chanchecho. 22 Ombona onte topvü mmhayithukcho osi ojüi ekümrüm jiang thicherüche jümang ji pyingthukle to ezocho, osi ombona woro jiangha thichele to ezocho. 23 Zümo ji yakchisi enya chirocho osi tsüngon mongoto ji hoji tssocho. 24 Jisülo Potsow na "Limha jilo ekümrümlan taro vanthuka, oki ekümo, orae ekümo osi teri tsüpho vanthuka" to yizüng picho tole hojito tssocho. 25 Hojito onte topvü Potsow na liyingcho osi Potsow na jiang ji mmhona to chanchecho. 26 Jisülo jo Potsow na "Enhungo etena kyon joyingtavka; onte no ete esüa ete pyonori esüthokvü ka. Ontena ongo, woro osi oyaki evamo tona orae evamo ekümrüm teri tsüphov jiang topvü pono etho livka" to phyocho. 27 Hojito Potsow na kyon ji ombo esüa joyingcho, Osi ombona ombo pyonori khi eboe tona eloe to liyingcho 28 Osi mmhayithukcho, osi ezocho, "Nte tsoronichen jiang na limha topvü pyinga vani limha ji ontena sayao tssoa thicherücheta yivka. Ana ongo, woro osi orae ekümrümo jiang topvü pono opvüi nte kümthokaka. 29 Ana otsüng ejüo osi tssüngthilan taro ntena etsov tsükona nte methakithaka; 30 tokhatola orae ekümrümo osi woro jiang topvü tsükona ero osi limo jiang onte jak methakithaka" to phyole hojito tssocho. 31 Potsow na ombona liyingo jiang topvü elümoto mmhona chanchecho. Zümo ji yisi enya chirocho osi tsüngon tiroko toji hoji tssocho.

Benkaden 2

1 Hojito limha osi oyak ji methakcho. 2 Osi tsüngon tiyingoto jilo jo Potsow na elhi tssoa vamo ji esancho. 3 Ombona tsüngon tiyingto ji mmhayicho osi tsüngon thanpo jiang lona khotae vanthukcho, ntiotssole hoji tsüngono jo ombona liyingo elhi jiang topvü thakthakcho. 4 Hojito lyui limha osi oyak jiang liyingcho.

Eden Parhi

OPVÜI Potsow na limha osi oyak ji liyingathüng jo, 5 limha jilo otssüng odung n lihancho osi ntia nbukhancho, ntiotssole ombona eryu n jothukhancho osi liko jiha ejom ochia n vanhancho; 6 tokhatola lichungina ojü chiyi liko ji etssoncho. 7 Jisülo jo OPVÜI Potsow na likoe na ochon tara khi kyon liyingcho; ombona kyon ji khenokvüi eküm ethük ehathechiyicho, tole kyon ji eküm evamo kümcho. 8 Jisülojo OPVÜI Potsow na engkhvüwoe, Eden lo parhi motsünga methaki ombona liyingo kyon ji hojilo vanthukcho. 9 Ombona odung ezehungo lantaro hojilo zathuki tssüngthi mmhom ethithukcho. Parhi ji lungi eküm epio dung tona mmhom n mhom ntsiwo dung toha zathukcho. 10 Eden lo zhükhfü motsünga tsüthe parhi ji etssonthukcho; osi hoji zhükhfü jina Eden yakthakale mezhü shümchei yicho. 11 Zhükhfü ovüngo jijo Pishon, hojina Havilah meta füa tsüala. 12 (Hojilona shona njüm tona mozhürhüm mmhom ntsemvü osi tsentsü long to hungala.) 13 Zhükhfü enioto jijo Gehon; hojina Kush meta yakchia tsüala. 14 Zhükhfü ethümoto jijo Tigris; hojijo Assyaria meta ji engkhüwoe tsüa yiala; osi zhükhfü mezhüto jijo Euphrates. 15 Jisülo OPVÜI Potsow na Eden parhi ji jonthoku osi hoji nhyakthoku tsükona kyon ji hojilo vanthukcho. 16 Ombona kyon ji ezocho, "Nina parhi licho dung jiang lona tssüngthi topvü tsokhoka, 17 tokhatola, mmhom n mhom ntsiwo dung jijo nina n tsoche. Nina hoji tssüngthi jijo n tsonrüngu shikhfü; nina tsocho jo hoji nchuk na ni chüv." 18 Jisülo jo OPVÜI Potsow na phyocho, "Eboe ji ombo tae vanthokvü jo n mhon. Ana ombo meri mmhom liyingi khi ombo nzanchithokuka." 19 Hojito ombo na likoe na ochon tara khikae ekümrüm osi woro woni topvü liyingcho. Tosi ombona hojiang ji kyon jina kvüto tsayiv sana to ombo thüngi sosi wocho; osi hojito lyui onte topvü omying piracho. 20 Hoji tsükona kyon jina eküm rümo jiang osi woro woni jiang topvü omying tsayiracho; tokhatola jiang yulo motsünga tina ombo mericheo tüv n tssocho. 21 Hoji sülojo OPVÜI Potsow na kyon ji yiplakthukcho, osi ombona yipa vanathüng Potsow na eboe ji khyoyoryu motsünga khicheyisi oso na etssüpzhüyicho. 22 Ombona khyoyoryu ji khi eloe joyingi eboe ji thüngi sosi wocho. 23 Tole kyon jina phyocho, "Enhüngati, a esüo tüv hungala - A ryu lona khichecho oryu, osi a so lona khichecho oso. Ompvü mying jo 'eloe' to tsavka, ntiotssole, ompvüo eboe lona khichecho." 24 Hoji tsükona eboe tsükana ombo opoha oyo oni silanchisi ombo engh thüngi senjümtae vanala, osi oniji oso motsünga kümala. 25 Eboe jiha eloe jiha tsükshü vancho, khatola onte n yikracho.

Benkaden 3

Kyon na Potsow Yi N ngao Ji

1 OPVÜI Potsow na ekümrüm liyingcho yulo nrü ji okyak elitso tssocho. Nrü jina eloe ji ezocho, "Potsow na otsotso parhi tssüngthi ntia ti-tssole to nte ezocho alo?" 2 Tole eloe jina janlancho, "Parhi odung jiang tssüngthi topvü ena tsokhuka, 3 khatola parhi lungi odung motsünga ji tssüngthi jo ena n tsoche. Hoji tssüngthi jo ena titsole osi evüngkatia tievüngkale; to osi ena hoji tsocho jo echüv to, OPVÜI Potsow na ezocho." 4 Tole nrü jina janlancho, "Hojijo ejüngka; nte chüv meka. 5 Potsow na hojito phyo jijo ntena hoji tsoa na ombo esüa mmhom n mhom ntsia nte kumvü to ombona ntsia, küma jinaka. 6 Eloe jina hoji tssüngthi dung ji elümoto mmhona zechecho osi hoji tssüngthi jo kvüta mmhom ato; osi nchümri eli-i ekümvü jo kvüta emhokthav tssov ato to nchümcho, ji tsükona ompvüna tssüngthi ejoma khi tsocho. Ompvüna orapvü ha ejoma picho osi ombona ha tsocho. 7 Onina hoji tsotapvüto oni chüngtsoe, onio tsükshü to ntsicho; jitsükona onina züvo yo khümtae mpensütacho. 8 Hoji mmyui OPVÜI Potsow na parhi sanphia onina owon zocho, tole onina parhi odung yulo mphotacho. 9 Tokhatola OPVÜI Potsowna eboe ji tsae ezocho, "Nino kvüila?" 10 Tole ombona janlancho, "Ana parhi ni von zoe, a kyuo jina ni mphocho, ntiotssole aiyo tsükshü tssocho. 11 Potsow na engacho, "Ochona nino tsükshü to ni ezochola?" "Ana titsole to ni ezovo tssüngthi ji nina tsothakcho alo?" 12 Tole eboe jina janlancho, "Nina shilo eloe a ndüngo ameri vanthuko jina tssüngthi ji apicho, hoji tsükona na tsocho." 13 Jisülojo OPVÜI Potsow na eloe ji engacho, "Nino ntiolyui hojito lyuchola?" Tole ompvü na, "Nrü jina akyakthechia a tsothukcho" to janlancho.

Potsow na Randanka yi phyosochio Jiang

14 Jisülo OPVÜI Potsow na nrü ji ezocho, "Nina hojito elhio ji tsükona ezüp ni pivka; ekümrüm topvü yulo ni taena rhiyirandanka shi khivka; osi enhünga na benkae nina ni mman na liko shuka phyuv ka, osi nina eküm echung ochhon tsoa vamvüka. 15 Elani ana ni tona eloe ji to nini ori kümthoku ka. Ompvü tsoronichen tona ni tsoronichen to yuta topvülo ori tssotavka. Ompvü tsoronichen na ni kvüri ji ni ejüproyiv, osi nina onte jo-nkhonglo njüyivka." 16 Jitosi ombona eloeji ezocho, "Ana ni tsohanyuhan yutalo ezüp ni rankayivka osi ni tsopuknipok yutalo enov jiha ni rankayivka. Hojito tssolea nina nirapvü ji chokalam; tolea nino ombo küpo vamvüka." 17 Jitosi ombona eboe ji thüngi ezocho, "Nina ni engh ji yi engae ana titsole to ni ezovo tssüngthi ji tsocho. Hoji tsükona ji ntana liko shi rhiyirandankae siala. Küma nina etsoyu tssona hungi etsov tsükona jo nina ni eküm echung kongtsüng ryumhena sanga tssoe tsovka. 18 Liko jilona ero osi okyo shunguka osi nina ni eküm echung limosüvo tsoa eküm vamvüka. 19 Liko jilona etsoyu chiyithokvü jo nina eshanjü theta sanga, ochhon kümoe na ni joyingcho sana ji ni n kümlanthüng nandang jo ryumhena elhi tssovka. Nino ochhon na ni joyingcho küma elani ochhon ni kümlamka." 20 Hoji sülojo Adam na ombo engh ji Eve to tsacho; ntiotssole ompvüo kyon topvü opvü oyo ji tssocho. 21 Jitosi OPVÜI Potsow na ekümrümo fü na osü methaki Adam ha ombo; eloe Eve to oni ekathukcho.

Adam ha Eve Oniji Eden Parhina Phanchukchi Sioji

22 Jisülo OPVÜI Potsow na phyocho, "Enhungo kyon jiha ete esüa kümthaka, mmhom n mhom chekathaka. Omboji eküm dung ji tssüngthi tsothoka kümali eküm vanthoku meka." 23 Hojito OPVÜI Potsow na ombo ji Eden parhi na phanchukchi sia ochhon kümoe na ombo joyingcho sana ji joni tsolo yithukcho. 24 Hoji sülojo ombona parhi ji engkhüwoe jo eküm evamo ekumrümo tona milon yonri nken akvülo nlüphicheo tüv doni vacho. Hojijo ochinaha eküm epio dung jilo n rochethokvü tsükona.

Benkaden 4

Kain Tona Abel to

1 Hoji sülojo Adam na ombo engh Eve thüngi ponilan tssocho, osi ompvü ji otsük n jüngu sicho. Ompvüna tsokhying buki heto phyocho, "OPVÜI nzan lona ana tsokhying hungthaka" osi ompvüna Kain to ombo tsacho. 2 Elani ompvüna Abel buklancho. Osi Abel jo olyu enhyang Kümcho, osi Kain jo lijon kümcho. 3 Tsüngona lo Kain na ombo joncho-rücho lona khiche Potsow thano hansi wocho. 4 Tole Abel na ombo olyu jiang yulo mmhontso ji khi hansi owo lüngthae oso mmhontso ji OPVÜI thancho. Tole OPVÜI na ombo thüngi osi ombo than jilo emathayicho; 5 tokhatola Kain tona ombo than jito jo n khichoyicho. Hojina Kain ji lüm tsukachi sicho. 6 Hoji tsükona OPVÜI na Kain ezocho, "Nino ntiolyui nilüm tsukala osi ni mha ji nzhüala? 7 Nina elhi mmhom tssocho salivo, nino enhünga jo menseta vamvü, khatola nina n mhom tsso jina mmen jina ni kipüng tsenkathaka. Hojina ni sayav tssoala, khatola nina hoji ekhyov ekhyo tssov shikhfvü." 8 Tole Kain na onyuro Abel ji ezocho, "Olivoe sanphia wotavkalo." Osi onina kvüthüng oli wotacho sana Kain na onyuro Abel ji sakae lüngthacho. 9 Hojisüi jo OPVÜI na Kain engacho, "Ninyuro Abel jo kvüla?" Tole mbona janlancho, "Ana n tsika. Ana a nyuro tsükona wongkhyuv lichoke?" 10 Hoji sülojo OPVÜI na ombo ezocho, "Nino ntio tsükona ekhenthav elhi hetüv tssochola? Ni nyuro ejen jina omüng nlile to tüngkachia esüa likoe na athüngi kyakachia vanthaka. 11 Nino rhiyirandankae ni sithaka, osi nina enhungo liko ji n jonlanche. Nina ninyuro lüngthao jithüngji liko jina ombo khichoa esüa likoji küngsoe ombo ejen ji khi rethukthaka. 12 Küma nina benrolea liko jina ntia ethiv mek; osi niji limha shilo oson oki nlina khyutsokhyua vamvüka." 13 Tole Kain na OPVÜI ezocho, "Ezüp shijo ana n hankhoko tsükshikhünga. 14 Nina meta shilona phani a siala osi ni vanhya lona a kontathukala. Aiyo limha shilo oson oki n lina rhümphia evan tssov sala, osi ochona a hunga sana jina alüngthav." 15 Tokhatola OPVÜI na janlancho, "Hojito tssov meka, ochona ni lüngthata sana, ni müng jitüv tiying khi nlilamvüka. Hoji tsükona kyon ochinaha ombo tilüngthale to Kain pono chekav ejüpkayicho. 16 Jitopvüto Kain na OPVÜI thüngina pyontae Eden na engkhüwoe "Khyuphi rümphi" to tsa meta jilo yicho.

Kain Tsoronichen

17 Kain omboena otsoe tsüka buki Enokh to tsacho. Hoji sülojo Kain na yantsü motsünga tssokachicho osi hoji ombo tsoe ji myingo tsakata tsacho. 18 Enokh lona otsoe tsüka buki Irad to tsacho, ombo Mehujael opo tssocho, osi Mehujael na otsoe buklani Methushael to tsacho osi ombo Lamekh opo. 19 Lamekh na eloe eni Adah tona Zillah to tsa soa vancho. 20 Adah na otsoe tsüka Jabal to tsa vancho osi ombo lona chencheo jiango sükilo vani ekümrümo ekümi etsoeden küma yicho. 21 Ombo ojenio jo Jubal, ombo tsoronichen jiango, khendenphen, Phyululyu, tona khendenzhü to tsütsaeden kümcho. 22 Zillah na Tubal Kain bukcho osi Tubal Kain jo yungmen tona yonjak to khi ebensü ejoe kümcho. Ombo oyilov jo Naamah tssocho. 23 Lamekh na ombo eloe jiang ezocho, "Adah ha Zillah oni, engatava, khyingroe tsükana atacho lona ana ombo lüngthathaka. 24 Osi Kain lüngthacho eküm tiying khiyiv tssona, a lüngthacho jo eküm ekhatiyingsi tiying khiyiv."

Seth ha Enokh Oni

25 Adam omboena tsokhying thanpo buklancho. Tole Eve na phyocho, "Kain na lüngthao Abel ji tongche Potsow na otsoe epithaka" osi ompvüna Seth to ombo tsacho. 26 Seth na otsoe buki Enokh to tsacho. Hojithüng na benkae kyon jiangna khümta thüng OPVÜI ntho mying ji tsütsatacho.

Benkaden 5

Adam Tsoronichen Jiang

1 Adam tsoronichen jiang ji heto rena yicho: (Potsow na kyon joyingo ji ombo esüa joyingcho. 2 Ombona eboe tona eloe to joyingi onte mmhayisi, "Kyon" to onte tsacho.) 3 Adam na nzyu nzoasi thümro tssoathüng ombo esüa tsokhying tsüka vani ombona Seth to tsacho. 4 Hoji sülojo, Adam na nzyu nzo tiza vanlancho. 5 Ombona otsoeoro thanpoe ha vancho osi nzyu nzo tokusi thümro vansi chücho. 6 Seth na nzyu nzoasi mongo tssoathüng tsokhying tsüka vani Enosh to tsacho. 7 Osi elani nzyu nzo tizasi tiying vanlansi chücho. Ombona otsoeoro thanpoha vancho 8 osi ombo nzyu nzo tokusi taro enilo ombo chücho. 9 Enosh na nzyu ekha toku tssoathüng tsokhying tsüka vani Kenan to tsacho, 10 osi ombo na elani nzyu nzo tizasi taro mongo vancho. Ombona otsoeoro thanpoe ha vancho, 11 osi nzyu nzo tokusi mongo lo ombo chücho. 12 Kvüthüng Kenan na ombo nzyu ekha tiying tssocho sana jithüng tsokhying tsüka vancho osi ombona Mahalalel to tsacho, 13 osi ombona elani nzyu nzo tizasi zhüro vanlancho. Ombona Otsoeoro thanpoe ha vancho, 14 osi ombo nzyu nzo tokusi taro lo ombo chücho. 15 Mahalalel na nzyu 65 tssoathüng otsoe tsüka vancho, osi Jared to tsacho, 16 osi elani nzyu nzo tizasi thümro vanlancho. Ombona otsoeoro thanpoe ha vancho, 17 osi ombo nzyu nzo tizasi ekha tokusi mongo lo ombo chücho. 18 Jared na ombo nzyu 162 lo otsoe vancho osi Enokh to tsacho, 19 osi elani nzyu 800 vanlancho. Ombona otsoero thanpoe ha vancho, 20 ombo nzyu 962 lo chücho. 21 Enokh nzyu 65 lo otsoe tsüka vancho osi Methuselah to tsacho. 22 Jisülo jo Enokh na Potsow thüngi khümshümta nzyu 300 vanlancho osi otsoeoro thanpoeha vancho. 23 Ombo nzyu 365 vancho. 24 Ombona ombo eküm echung Potsow khümshüm lo vancho osi jisüi jo ombo n hungu sicho, ntiotssole omboji Potsow na khi hansi yi sicho. 25 Methusalah na ombo nzyu 187 tssoathüng tsokhying tsüka vancho, osi Lamekh to tsacho, 26 osi hoji sülo ombona nzyu 782 vanlancho. Ombona otsoeoro thanpoe ha vancho, 27 osi ombo nzyu 969 lo ombo chücho. 28 Elani Lamekh na ombo nzyu 182 lo tsokhying tsüka vancho, 29 osi ombona phyocho, "Potsow na randankao likotsük shilona ngaro shina esangmmuk jiang topvü epoyivka." Hoji tsükona ombona Noah to ombo tsacho. 30 Lamekh na elani nzyu 595 vanlancho. Osi Ombona otsoeoro thanpoe ha vancho. 31 Osi ombo nzyu 777 tssoathüng ombo chücho. 32 Noah na ombo nzyu 500 tssosanati, ombona otsoe nchyu ethüm bukcho, osi onteno Shem, Ham, tona Japheth to tsacho.

Benkaden 6

Kyon N thanri Jiang

1 Kyon na limha pyinga osi loroe bukcheta yiale, 2 potsüwoe evan eboe ejoma na limhalo loroe jiang opyon mmhona zechecho, osi ontena jüpomo jiang soa vantacho. 3 Hoji süijo OPVÜI jina phyocho, "Ana kyon jiang ji kümali n vanthukche; tolea onteno echüo tssov. Enhüngana benkae ontena nzyu nzoasi mekyu lo sikata vamvü meka." 4 Hoji yuta jilo tssolea, mekana ji süloha to limha shilo eloena bukcho jiang tssolea potsüwoe kyon tssolea kyonpvüden osi etho ejüi vanracho. Hojiang jo nkolo ekhyo ekhüngden osi thüngche jiang tssocho. 5 Kvüthüng OPVÜI jina limha shilo kyon otsük akvü onte nchümri jiang yuta topvü lo n mhon osi n thanri na pyingcho to hungcho sana, 6 Ombona onte joyingi limha shilo onte vanthuko ji worhyucho saka to etho jaka nchümcho. Osi omboji elümoto etho jako ji tsükona, 7 "Ana joyingi evao kyon shiang topvüto phyaklüpi siv osi ekümrümo tona worowoni to jiang ha monthoku, ntiotssole ana onte joyingo ji tajo man to nchüma a etho jaka" to phyocho. 8 Tokhatola OPVÜI na Noah thüngi jo emathacho. 9-10 Noah motsü jijo heto: Ombona otsoe otsük ethüm, Shem, Ham tona Japheth to vancho. Noah lo ntia phyochorüchov n licho osi ombo echungren jilo jo kyon mmhom ji ombo tae tssocho. Ombona Potsow thüngi khümshümta vancho. 11 Khatola kyon thanpoe jo ochia mmhom n vancho, osi meta topvü tolo jenpukta tae tssocho. 12 Osi Potsow na limha ji chani zele n mhom tae na pyingi lia hungcho, ntiotssole kyon jiang topvüna eküm n mhom vantacho. 13 Potsow na Noah thüngi ezocho, "Ana kyon topvüto montokvü methakthaka. Limha ji jenpukta elhina pyingthaka, küma ana onte monthokvü ka. 14 Ni tsanthephen orhung motsünga shana, osi tsüngpyak mmhom khi shani hoji chungroe, opon ochung onyi na rizhüi khia. 15 Orhung ji esüi metre 133 elani etsüi meter 22 ntssoni meter 13 to tssothuka. 16 Orhung ji mhonki ha epfükata osi mhonki tona echung to jiang yutalo centemetre 44 hae khi vata. Orhung ji echungta ethüm tssoa osi echung jilo kipüng motsünga hae vata. 17 Ana limha ji ojüna phyonchüthoki olantaro monthoku saka. Limha shilo vancho topvü chüvka, 18 tolea ni thüngi jo ana ntsata vav. Orhung jilo ni engh, ni tso eden, osi onte engh to jiang sosi rheyia. 19-20 Ni nzo orhungi ekümrüm olan akvü opong okyu, elani orolan akvü hanpong hankyu to sonhya, eküm onte vanthokvü tsükona. 21 Osi ni tona onte to tsükona etsoyulan taro ha khi hana." 22 Potsow na ezo jiang topvü Noah na tssocho.

Benkaden 7

Jüvaktsü Ji

1 OPVÜI na Noah ezocho, "Ni wopan topvü sosi orhungi rheyia; limha heteralo elamo etssoe jo nitae to ana ntsithaka. 2 Khümkvükhümtsalo ethelan tssochewo ekümrümo tüv jo poni jo tiying ren theta tolea n tssüngrüng ekümrüm poni jo olan motsünga ren tae thenhya. 3 Osi orolan akvü ponilan tiying theta. Shiang yakchia ekümrümo na limha reni yilanthoku tsükona onte sonhya. 4 Henasüi tsüngon tiying sülojo ana zümo zhüro, eng zhüro to eryu jothoki ana joyingo eküm evamo topvü monthoku sala." 5 OPVÜI na ombo ezo jiang topvü Noah na tssocho. 6 Noah na ombo nzyu nzo tirok tssoathüng limhalo jüvaktsü ji rothukcho. 7 Ombo tona ombo engh, ombo tsoe osi onte engh jiang to topvü jüvak jilona tsanchov tsükona orhung jilo rheyitacho. 8 Ekümrüm olan akvü osi worolan akvüto ntho osi n tho ekümrümo topvü poni ponina, 9 Potsow yi ji ephan Noah nzo orhungi rheyithukcho. 10 Jitosi tsüngon tiying sülojo jüvaktsü ji rocho. 11 Noah na nzyu nzo tirok tssoathüng choro enioto jilo tsüngon tarosi tiyingoto lichungi jüvaktsü jiang pokrhüprae, osi oyaki ojü thangphen jiang chonchirae, 12 limhalo eng zhüro, zümo zhüro to eryu jocho. 13 Hoji tsüngon tsük jilo Noah na ombo osi ombo engh tona ombo tsoe Shem, Ham, osi Japheth tona onte engh jiang to orhungi rheyitacho. 14 Onte nzo orae osi oki evamo ekümrümo teri tsüpho tona worowonilan taro to rheyicho. 15 Potsow na ezo ji ephan eküm evamo to etsa jo obung okyu topvü Noah nzo orhungi rheyitacho. 16 Tosi OPVÜI na Noah sülami na kipüng ji khani sicho. 17 Ojü ji tsüngon zhüro düngajo orhung ji phfükachicho. 18 Ojü ji jungkata yicho osi orhung jina jüponina ehaphicho, 19 ojü ji elümoto jungo jina phunglan ntsontso jiangha ndüngzhücho; 20 osi ndünga vani phunglan jiang kvüri metre tiying chüngia ndüngcho. 21 Limha lo eküm evamo topvü chüracho woro topvü, ekümrümo osi kyon topvü chücho. 22 Limha lo echenkoa evan topvü chüracho. 23 Limha lo evan ekümrüm topvü OPVÜI na monthukcho kyon, ekümrümo osi worowoni topvü. Enhyokacho jo Noah tona ombo ndüngo sonhyao jiang to tae tssocho. 24 Ojü jina tsüngon nzoasi tinyan nandang n nghav vancho.

Benkaden 8

Ojü ji Esamo Ji

1 Potsow na Noah osi ombo ndüngo etssoe jiang n mhechohancho, ombona npung venthukcho osi ojü ji nghata joyiv benkacho. 2 Lichungi jükvü osi oyaki jülan jiang khancho. Eryu ji esancho, 3 osi ojü jina tsüngon nzoasi tinyan khia nghacho. 4 Choro tiyingoto jilo tsüngon tarosi tiyingoto lo orhungji Ararat jilo oyi esancho. 5 Ojü jina ngha vani choro taroto tsüngon ovüngo jilojo phunglan yondon jiang hungracho. 6 Tsüngon zhüro sülo Noah na orhung jilo kheriki ji chonchi, 7 yivan motsünga chivothukcho, tole yivan jina elani n yina ojü ji n nghathüngjo pyaphia vani sicho. 8 Jithüngji Noah na ojüji nghenghahancho sana to zelo yukhyu motsünga chivothukcho. 9 Tokhatola meta topvü ojü tae tssojina yukhyu jina eshonphen n hungcho. Ombona kholani pya yicho osi Noah na yonchukchia rhümae khithecho. 10 Ombona tsüngon tiying nhyaklansi yukhyu ji chivolanthukcho. 11 Tole myulani ti olive wo eyii nkyansi kholani yicho. Tole ojüji nghathaka to Noah na ntsicho. 12 Jisülo ombona tsüngon tiying nhyaklansi yukhyu ji chiwolanthukcho, tole jithüngjo kholani n yilam sicho. 13 Noah na nzyu nzo tiroksi ekha tssoathüng choro ovüngo jilo tsüngon ovüngoto lo ojüji nghacho. Noah na orhungji chonchi eyingole limhaji kyingsochia vanthakcho. 14 Choro enioto jilo tsüngon mekyu tiying tssoajo limhaji mmhona kyingcho. 15 Potsow na Noah ezocho, 16 "Ni engh, ni tssoeden osi onte engh jiang sosi orhungina chiyitava. 17 Ni ndüngo ekümrüm osi woro jiang vachia osi rotssoronithuki limha nzüa yithuka." 18 Tole Noah na ombo engh, ombo tsoeden osi onte engh jiang sosi orhungina chiyicho. 19 Ekümrümo osi woro topvüna onte olan akvüna oten tssoe sanchokcho.

Noah na Erungthan Piala

20 Noah na OPVÜI thanphensa roncho; ombona ekhümo etheo ntho ekümrüm motsünga tona woro motsünga to khi othan tssoa thanphensa jilona mpüm tona rungcho. 21 Erungthanji rhüm jina OPVÜI ji emathacho, osi ombona heto phyocho, "Enhungo ana kvüthüngha lea kyon etssophyo zesi limha ji rhiyirandankav meka; kyon nchümrijo ombo nongothüngna n mhon to ana ntsia. Nchüng shi esüajo ana elani eküm evamo topvü monthukvü meka. 22 Limha shi elithüng nandangjo mojü ethe yuta osi liri yuta lithukvüka. Etssük elüm, vami nzyu osi zümo eng jiang linrhüvka."

Benkaden 9

Noah Thüngi Potsow Ntsata

1 Potsow na Noah tona ombo tsoeden to jiang mmhayithuka ezocho, "Ni tsoronichen na limha pyingi evamo tssoa otsoeoro khosha lia yikhe. 2 Ekümrümo topvü, woro woni osi ongo jiang topvüna nikyua eküm vamvüka. Onte topvü ni küpo vanthukvüka. 3 Nina shiang osi limosüo jiang tsokhuka; ana ni tswothukvü tsükona shiang topvü ni piala. 4 Tolea ejen n kyingkavjo oso ji titsoa; ekümji ejenlo ejüo jina ana hoji khanala. 5 Ochona kyon eküm khiyiana ezüp ombo piv. Eküm kvümoena kyon eküm khiyiana ana chüthuka ezüp ombo piv. 6 Kyon jo Potsow esüa joyingcho, ji tsükona ochona kyon lüngthata sana omboha thanpoena ombo lüngthav. 7 "Ni tsoronichen na limha pyingthukvü tsükona, nina otsoe oro khosha liv shikhfü." 8 Potsow na Noah tona ombo tsoe jiang to thüngi ezocho, 9 "Ana ni osi ni tsoronichen thüngi, osi eküm evamo topvü, 10 woro woni osi ekümrümo topvü thüngiorhungina kvüta nte nzo chiyicho sana jiang topvü thüngi a ntsata vatala. 11 Ana nte thüngi heto phyoa a ntsata ji vatala: Enhungo ana kvüthüngha eküm evamo topvü ojüna monthukvü meka, osi kvüthüngha ojüna limha shi monthuklamvü meka. 12 Ana ni osi eküm evamo topvü thüngi kümali ntsata methako ji chekaphen tssoa, 13 ana eluk yulo a süngrüka ji khyingthukala. Hojijo limhaji thüngi a ntsataji chekaphen ji tssovka. 14 Kvüthüng elukna oyak ji eyuki hojilo süngrüka khyinga sana, 15 ana kvüto ni osi eküm evamo topvü thüngi elani ojüna limhalo eküm jiang n monthuk to phyochakcho sana ji nchümchevka. 16 Kvüthüng süngrüka ji eluki hunga sana ana limhalo eküm jiang topvü thüngi kümali ntsata vao ji nchümchev. 17 Hojijo ana eküm evamo topvü thüngi ntsata vaoji chekaphen ji."

Noah Osi Ombo Tsoeden

18 Noah tsoeden orhungina chiyio jiango Shem, Ham tona Japheth to. (Ham jo Kannan opo). 19 Noah tsoe otsük ethüm shiango limhalo kyon topvü pyimtsü motsüi jiang. 20 Noah jo lijon tsso jina limhalo jününgrothi li jondemo ji. 21 Ombona jününgrojü tara yucho, tole ombo kinocho, osi ombo mpensü jiang khikhani vasi ombo süranki tsükshü yipa vancho. 22 Kannan opo Ham na opo Noah na tsükshü yipa vamoji hungi chiwo ombo ojenio otsük eni jiang ezocho. 23 Tole Shem ha Japheth onina osü khi sülamoe na bentasi sülamoe eseta süranki rhowo opo mpenthuktacho, osi ombo tsükshü ji n zetav tsükona onina omha nlüpi sicho. 24 Noah ji chüngtsoe ombo tsoe wokhao jina ntio tssocho sana ji ntsiale, 25 ombona phyocho, "Kannan echi jo n mhonthukvüka! Ombo otae jiang nri ombo kümthukvüka. 26 Shem Potsow OPVÜI ji mying thüngia! Kannan jo Shem nri tssovka. 27 Potsow khi Japheth thicherüchethukvüka! Ombo tsoronichen jiangji Shem kyon jiang nzo vanthuka! Kannan jo Japheth nri tssovka." 28 Noah ji ojüna meta moncho sülo nzyu nzo ethümsi tinyan vanlancho, 29 osi ombo nzyu nzo tokvüsi tinyan lo ombo chücho.

Benkaden 10

Noah Tsoe Jiang Tsoronichen Jiang

1 Noah tsoeden, Shem, Ham tona Japheth to tsoronichen jiango shiang, ojüna limha moncho sülo onthüm tsoe jiang. 2 Japheth tsoeden jo, Gomer, Magog, Madae, Javan, Tubal, Meesheech tona Tiras to shiang ji onte mying lo tsakao kyon jiang pyimtsümotsüiden kümracho. 3 Gomer tsoronichen jiango Ashkenza, Riphath, tona Togarmah, to kyon jiang. 4 Javan tsoronichen jiango Elishah, Spain, Cyprus, tona Rhodes to tssocho; 5 Onteno jütssae osi jüyi lo evan kyon jiang omotsüiden kümcho. Shiango Japheth tsoronichenden, onteno jipo osi meta khotae okho akvüna yisanpo nsana evan jiang. 6 Ham tsoeden jiango Kush, Ejip, Lipya, tona Kanaan to shiang onte mying ejani evan kyon jiang motsüi kümracho. 7 Kush tsoronichen jiango, Seba. Havilah, Sabtah, Ramakh tona Subtua to jiang tssocho. Osi Ramaah tsoronichen jiang jo Sheba tona Dedan to kyon jiang tssocho. 8 Kush na Nimrod to tsa otsoe tsüka vancho. Ombo limhalo rikhyoe tsüphoe yulo ovüngtso ji. 9 Ombo OPVÜI ekyo-erung yakchia shikari tsüphoe tsüka tssocho, hoji tsükona, kyon na, "OPVÜI khi Nimrod esüa shikari tsüphoe ni kümthokuka!" to yijaktala. 10 Ovüngthüngjo ombo ekhüngyan ji Babylon, Erekh, tona Akkad to shiang phata tssocho osi meta onthümata Babylon lo tssocho. 11 Hoji metajilona ombona Assyria lo owo Nineveh, Rchoboth Ir, Kalah, 12 tona Nineveh ha Kalah oni yutalo elio Resen yantsü ji to yantsü shiang tssocho. 13 Ejip tsoronichen jiango, Lydia, Anam, Lehab, Naphtub, 14 Pathrus, Lasluh tona Philistine jiang omotsüi Kapthor tolo evamo kyon jiang. 15 kanaan tsoeden jo Sidon erantso ji, tona Heth to osi onte mying ejana vana vamo kyon jiang omotsüiden. 16 Kanana jo Jebusite, Amorites, Girashite, 17 Hivite, Arkite, Sinite, 18 Aravadite, Zemarite tona Hamathite to kyon jiang omotsüi ha tssocho. Kanaan kyon jipo jiang echümpo echümpo nzonsorae, 19 Kanan erü ji jolowoe Gaza ndüngo Gerar jana joyicho, osi engkhüwoe jo Sodom, Gomorrah, Adimah, Lasha, ndüngo Zeboim to. 20 Shiango Ham tsoronichenden onte jipo tona metapoe vantawo jiang to, osi okho akvü yisanpo nsantao jiang. 21 Japheth ota eramo Shem jo Hebrew jiang topvü omotsüi ji. 22 Shem otsokhyongo, Elam, Ashur, Arpachshad, Lud, tona Aram to shiango onte mying ejani evamo kyon jiang omotsüiden kümcho. 23 Aram tsoronichen jiango Uz, Hul, Gether tona Meshak to. 24 Arpachshad jo Eber opo Shelah ji opo. 25 Eber na otsoe otsük eni vancho, tsüka jo Peleg to tsacho, ntiotssole ombo echungo limha ji chisocho, osi thanpoe jijo Joktan to tsacho. 26 Joktan tsoronichen jiango Almodad, Sheleph, Hazar maveth, Jerah, 27 Hadoram, Uzal, Diklah, 28 Obal, Abimeal, Sheba, 29 Ophir, Havilah, tona Jobab tolo kyon jiang. Onte topvü Joktan lona thichecho. 30 Ontena vamo meta jijo engkhüwoe Mesha lona Sephar nandang. 31 Shiango Shem tsoronicheden onte jipo osi metapoe vanta yisanpo nsanta vamo jiang. 32 Kyon shiang topvüto Noah lona thichecho tae, onte topvü motsürüi echümpo echümpoena osi jipo echümpo echümpoe na. Ojüna limha monsi sülojo limhalo jipolan topvü Noah lona thichechoden.

Benkaden 11

Babylon Yaki Jiang

1 Benkadeni jo limhalo yisanlan topvü motsünga tssocho, osi yitsüka tsütsatacho. 2 Ontena engkhüwoe khyuta oyi Babylon hayi jilo vanjüng tssocho. 3 Osi ontena phyotacho, "Yitava! etena ochhon rungi karakthuki khitav kalo." (yita) Hojito ontena ochhon kholung rungi hojiang züptsütaphen ha licho. 4 Ontena phyotacho, "Etena oyak etssunga yantsü motsünga tssokachitavkalo, to tssona ete mying liv osi limha ezoni e n yithuktavkalo." 5 Tole kyon jiang na etsso yantsü ji OPVÜI na joro zecho, 6 osi phyocho, "shiang hetopvü okho motsünga osi ontena oyi motsünga nsantala; ontena ntio tssov sana enhüngati benkatala. N sungu ontena ntio tssohunga na tssota yiv! 7 Etena jowo onte yi ji khotayia onte ji n thyutacheo kümthuktavka lo." 8 OPVÜI na onte ji limhatsü ezoni yithukcho osi yantsü ji ntssotav esani sicho. 9 OPVÜI na yanmying ji Babylon to tsacho, ntiotssole hojilona OPVÜI na kyon yisan echümpotathukcho, osi jilona ombona kyon jiang limha topvü lo ezonroe sithukcho.

Shem Tsoronichen

10 Shem tsoronochen jo shiang. jüvaktsü yisi nzyu eni sülo Shem na nzyu nzoa tssoathüng otsoe tsüka bukcho osi Arpachshad to tsacho. 11 Hoji sülo ombona nzyu nzo mongo vanlancho osi otsoe oro thanpo ha valancho. 12 Arpachshad na nzyu thümrosi mungo tssoathüng, otsoe tsüka buki Shelah to tsacho; 13 jisülo ombona nzyu 430 vanlancho osi otsoe oro thanpo ha vanlancho. 14 Shelah na nzyu thümro tssoathüng, otsoe tsüka buki Eber to tsacho; 15 jisülo ombona nzyu nzo mezhüsi ethüm vanlansi, otsoe oro thanpo ha vanlancho. 16 Eber na nzyu thümrosi mezhü tssoathüng, otsoe tsüka buki Peleg to tsacho; 17 jisülo ombona nzyu nzo mezhüsi ethüm vanlansi otsoe oro thanpo ha vanlancho. 18 Peleg na nzyu thümro tssoathüng, otsoe tsokhying tsüka buki, Reu to tsacho; 19 jisülo ombona nzyu nzo enisi tuku vanlansi, otsoe oro thanpo ha vanlancho. 20 Reu na nzyu thümrosi eni tssoathüng, otsoe tsüka buki, Serug to tsacho; 21 jisülo ombona nzyu nzo enisi tiying vanlansi, otsoe oro thanpo ha vanlancho. 22 Serug na nzyu thümro tssoathüng, otsoe tsüka buki Nahor to tsacho; 23 jisülo ombona nzyu nzo eni vanlansi, otsoe oro thanpo ha vanlancho. 24 Nahor na nzyu mekyu tuku tssoathüng, otsoe tsüka buki Terah to tsacho; 25 jisülo ombona nzyu nzoasi taro tuku vanlansi otsoe oro thanpo ha vanlancho. 26 Terah na nzyu ekhatiying tssosanati Abram, Nahor tona Haran to opo kümcho.

Terah Tsoronichen

27 Abram, Nahor tona Haran to opo Terah tsoronichen jo shiang. Haran jo Lot opo, 28 osi Haran jo Babylon lo ombo ebuk yantsü Ur lona opo n chüthüngna chücho. 29 Abram na Sarai soa vancho, osi Nahor na Haran otsolov Milach soa vancho. Haran jo Iscah opo ha tssocho. 30 Sarai na jo otsoe oro n vancho. 31 Terah na ombo tsoe Abram, tona tsorüi Lot, Haran tsoe ji tona orüv Sarai Abram engh ji to shiang sosi Kannan metae owo vantav tsükona Babylon metalo Ur yantsü ji sisi khochitacho. Ontena Haran jana owo hojilo vanjüngtacho. 32 Terah jo nzyu nzo enisi mungo tssoathüng hoji meta jilona chücho.

Benkaden 12

Potsow na Abram Tsao Ji

1 OPVÜI na Abram ezocho, "Ni ebuk meta, opankitsük osi nipo ki jiang sisi meta motsünga ana ni ejüvka hoji yia. 2 Ana tsoronichen khosha ni pivka osi onte ji jipo tsüphov kümka. Ana ni mmhyia ni thüngchethukuka, osi nino mmhao tssovka. 3 Ochoangna ni mmhayitoka sana ana onte mmhayiv, tolea ochoangna ni rhiyirandankata sana anaha onte rhiyikav, osi ni yakchia ana jipo topvü mmhayivka." 4 Abram na ombo nzyu ekhatiying si mungo tssoathüng OPVÜI yi ji ephan Haran lona khochukcho; osi Lot na ombo phana wocho. 5 Abram na ombo engh Sarai tona ombo tsorüi Lot, tona ejüeli osi nriden ontena Haran lona tsütsata vamo jiang topvü sokhansi Kannan metae yitacho. 6 Ontena Kannan janthakale Abram na khyua owo Shechem lo ntho meta Moreh jilo chivocho, (jithüng jo Kannan kyon jiang na meta jilo vantapvü tssocho.) 7 OPVÜI na Abram nduki ezocho, "Ana ni tsoronichen jiang pivsa evamo metaji shi." Tole Abram na, ombona nduko OPVÜI ji tsükona thanphensa hojilo ronkachicho. 8 Jisüijo Ombona jolowoe jovo Bethel yantsüna engkhvüwoe phunglanro meta jianglo engrhelamoe Bethel tona engkhvüwoe Ai to yutalo vancho. Hojilo ha ombona thanphensa ronkachi OPVÜI khümcho. 9 Jisüijo ombona meta motsünga lona motsüngae to khyuphia Kannan metawoe jowocho.

Ejip Metae Abram

10 Tole Kannan metalo otsi vara lio jina Abram na konkata jolowoe Ejip metae vanyalo jowocho. 11 Ombona Ejip erü nkyakvü sathüng ombo engh Sarai ezocho, "Nino opyon mmhom eloe. 12 Ejip kyon jiangna ni hungana nino a engh to nchümtav osi a lüngthasi ni vanthukvü. 13 Jitsükona nino a oyilovka to phyokhe, tona ana eküm vanchevka." 14 Ombona erü nkyakthakale Ejip kyon jiang na ombo engh ji opyon mmhona zechecho. 15 Mesao ki evan ejoma na ompvü pyon mmhom ji hungi mesao ezocho, tole mesaki ombo sosi wocho. 16 Ompvü tsükona mesao jina Abram nzana olyuden, Nyanyan, mangsü, Gadho, phajae osi Ut to ombo picho. 17 Khatola mesao jina Sarai khio ji tsükona OPVÜI na ombo osi ombo mesaki kyon jiang pono ekhenthav nochonori rothukcho. 18 Tole mesao jina Abram tsathoki engacho, "Nino ntio a ezochola? ompvüo ni engh to ntioli a n zochola? 19 Ompvüo ntiolui ni oyilov to a ezoa a engh a tssothukchola? Ni engh shi sosi tsani yia!" 20 Mesao jina ombo kyon jiang ezoa Abram tona ombo engh, ombo ejüeli jiang to hansi meta jilona yithukcho.

Benkaden 13

Abram ha Lot Oni Khosotala

1 Abram na ombo engh osi ejüeli topvü hansi Ejip lona khoe khümkiwoe Kannan jolowoe yicho, osi Lot naha ombo phana yicho. 2 Abram jo ejüeli tssocho, olyu, nyanyan, mangsü tona shona janti toha licho. 3 Ombona hojiang vanthuksi meta khyua Bethel meta jiwoe wocho. 4 Ombona Bethel tona Ai to yutalo ovüngthüng OPVÜI thanphensa roni vao jilo chiyicho. Osi ombona jilona OPVÜI khümcho. 5 Lot ha olyu, nyanyan osi mangsüden vancho, osi ombo wopan tona phajaeden toha vanracho. 6 Jitsükona oni nzo vani ekümrümo jiang yantsothukphen eroyo tssona n licho, ntiotssole oni ekümrümo jiangji khosha tssocho. 7 Jitsükona Abram ekürümo eze tona Lot ekümrümo eze to onte khontacho. (Jithüng jo Kannan kyon tona Perizzite kyon to meta jilo van cho.) 8 Tole Abram na Lot ezocho, "Enio okilo, ni kyon tona a kyon to khontav n li. 9 Hoji tsükona eni khotae vantavka. Ni chokao meta ji nipopo ethüngi khia. Nina meta esanawoe yina, aiyo phokomoe yivka." 10 Lot na eyingoe zesi Jordan hayi, Zoar woe eolan meta ji OPVÜI phari ji esüa osi Ejip meta esüa ojü pvülyua chanchecho. (Hojijo OPVÜI na Sodom osi Gomorrah yantsü jiang n monthukthüng.) 11 Jitsükona Lot na Jordan hayi totona hoe khicho osi engkhvüwoe yicho. Hojito lyui oniji pyontacho. 12 Abram jo Kannan meta lo vancho, osi Lot jo hayitsüi yantsü jiang yulo Sodom ndüngo vancho, 13 hojiang lo kyon jiango nthae OPVÜI mhadungo mmen etssoeden tssocho.

Abram na Hebron Lo Yiala

14 Lot na yithakale, OPVÜI na Abram ezocho, "Nina evamo jilona hepi hepi tüngochünga engophi zeta. 15 Nina hungwo meta shiang hetopvü ana ni osi ni tsoronichen thüngi pivsala, osi hojijo kümali ni echi tssovka. 16 Ana tsoronichen nipivsa vamo jiango kyon ochinaha n khakhamo tssov, limhalo hajang jiang ekhav elaro tata ni kümthukvü! 17 Enhungo, owo meta topvü chani zeta ana hojiang topvü ni piravsaka." 18 Jitsükona Abram na ombo vanphen eseni Hebron lo Mamre ntho dung jiang ndüngo vanjüng tssocho, osi ombona hojilo OPVÜI thanphen tssocho.

Benkaden 14

Abram na Lot Shanchoala

1 Mesao otsük mezhü, Babylonia meta Amraphel, Ellasar lo mesao Ariokh, Elam lo mesao chedorlaomer, tona Goiim lo mesao Tidal, 2 to shiangna mesao thanpoe otsük mungo, Sodom lo Bera, Gomorrah lo Birsha, Admah lo Shinah, Zeboiim lo Shemeber tona Bela lo mesao ji to thüngi ori tssotav khochicho. 3 Mesao otsük mungo shina onte shentae rasan jiang khümtsütae, enhünga echü jümang to tsao Siddim hayilo vancho. 4 Onteji Chedorlaomer küpo nzyu taro eni vancho khatola nzyu taro ethümo to jilo jo ontena ombo panlana ori tssocho. 5 Nzyu taro mezhüo to jilojo Chedorlaomer tona ombo lo khümkao rasan jiang to nzo tssoe Ashteroth Karnaim lo Rephaim, Ham lo Suzim, Kiriathaim hayilo Emim, 6 osi Edom phunglani Horite kyon jiang to khyoe lijüng tssae Elparan jana phanchicho. 7 Jisülojo ontena Kadesh lo kholancho. (Jithüng jo Enmishpat to tsacho.) Ontena Amalekites meta topvü khyosi Hazazon Tamar lo evamo Amorite jiang khyocho. 8 Tole Sodom, Gomorrah, Admah, Zeboiim tona Bela to lo mesao jiangna onte rasan jiang ekhvürhyui Sidiim hayi lona, 9 Elam mesao, Goiim mesao, Babylonia tona Ellasar mesao to omezhü thüngi omungona ori tssocho. 10 Hayitsü ji totona rinyik sokvü na pyingcho, osi Sodom tona Gomorrah to mesao jiangna tsamvü khilato tssole sokvüi elungtheracho, khatola mesao thanpoe otsük ethümjo tsani phunglani yiracho. 11 Mesao otsük mezhü jina Sodom Gomorrah lo licho topvü, etsoyu jiang phata khi hantasi yicho. 12 Abram tsorüi Lot jo jilo vana vancho, ji tsükona ontena ombo ejüeli ha khiyicho. 13 Tokhatola kyon tsükana tsani oyi Hebrew kyon Abram ochona Amorite kyon Mamre ji echhi ntho dung jiang yulo vancho sana ji oyi yirücho. Mamre tona ojeniden Esheol ha Aner onio Abram shomden tssocho. 14 Abram na ombo tsorüi Lot rhümao ji zoale ombo vanpheni ritsso kyon jiang onte nzo ethümsi taro tiza tsarhyui mesao otsük mezhü ji Dan jana phanchicho. 15 Hojilona ombona ombo kyon jiang chitae ori jiang ji zümolo hatae khyothechicho. Ombona Damaskas khümkiwoe Habah ji jana onte phanchicho, 16 osi ejüeli rechothako jiang phancholancho. Ombona tsorüi Lot tona ombo ejüeli elani eloeden osi evüngki evan ejoma to shanchocho.

Melkhizedek na Abram Mmhayiala

17 Abram na Chedorlaomer tona mesae thanpoe jiang to khyosi yia vanathüng Sodom mesao jina chiwo Shaveh hayi lona ombo ndukcho. (Mesao hayi toha tsala.) 18 Osi Salem lo mesao Melchizedek, ntssontso Potsow pvüti jina hümri tona eyuo to hansi owo Abram ndukcho. 19 Osi ombo mmhayithuka ezocho, "Ntssontso Potsow ochona oyak osi liko joying cho sana jina Abram mmhayithuka! 20 Ntssontso Potsow ochona niri pono ekhyo ni picho sana hoji thüngtathuka." Tole Abram na ombona phancholamo ejüeli jiang topvü lona tarochia khichei Melchizedek picho. 21 Sodom roza jina Abram ezocho, "Nina phancho jiang khisi a kyon jiango a pilana." 22 Tole Abram na janlancho, "Ana otsotso OPVÜI, ntssontso Potsow, oyak osi limha joyingo ji mhadungo phyoala, 23 ana ni tsütsaelan ntia khiv meka, oying esünga mekana, jokhüpzhü motsünga lea khiv meka. Osi ninaha 'Ana Abram lithukchoka' to phyov meka. 24 Ana ntia a echi tssoa khiv meka. Ana a kyon jiang na tsütsathako jiang tae khiv, khatola a shomden, Aner, Asheol osi Mamre tojo onte ejan khithuka."

Benkaden 15

Abram Thüngi Potsow Ntsata

Hoji sülo Abram na müngdüng hungcho osi OPVÜI na heto ombo ezoa zocho, "Tikyua, Abram. Ana ekyusü lona ni nkohavka osi yantso tsüphov ni pivka." 2 Tokhatola Abram na janlancho,

"Sandamo OPVÜI, aiyo otsoeoro n van küma ni mmha ji ntio lyuvla? A tsentso jo Damaskas kyon Eliezer vamo ji tae. 3 Nina otsoeoro a n pi küma a ezii yulo tsükana a tsentso tssoa yiv." 4 Jisülo jo OPVÜI na heto ombo ezoa zolancho, "Phajae Elizer shina ni tsentso kümvü meka, ni tsoe na ni tsentso kümvüka." 5 Elani OPVÜI na hapoe ombo sosi chivo ezocho, "Oyaki zekachia, Shantio jiang khae zev ekhyo tssoe zeta, ni tsoronichen ha hojitata tssovka." 6 Abram na OPVÜI lo longtsükacho, hoji tsükona OPVÜI na ombo khichocho, ntiotssole OPVÜI na ombo thüngi ematha licho. 7 Hoji süijo OPVÜI na ombo ezocho, "Ana meta shi ni epiv tsükona Babylon meta Ur lona ni sochukcho, osi OPVÜI ji a ka." 8 Tokhatola Abram na phyocho, "Sandamo OPVÜI, meta shiji a echi tssov to ana kvütoli ntsivla?" 9 Tole ombona ezocho, "Mangsü, Nyanyan, tona Olyuro to onte top vü nzyu ethüm ro jitüv hansi oyi apia, elani vefü motsünga tona yukhyu motsünga toha apia." 10 Hoji tsükona Abram na ekümrümo jiangtopvü hansi oyi, hojiang ji eni tansokhani onte chanchitao oren eni tssoe vancho, tokhatola woro jiango ombona n rhonsona vacho. 11 Hojiang ji tsolo müngtsov na jorocho khatola Abram na phani sicho. 12 Eng rhetale Abram na yiptheta yicho, osi ekhen nsüp na ombo pyingcho. 13 Hoji sülojo OPVÜI jina ombo ezocho, "Ni tsoronichen jiang ji oyam metae omoatsi kyonden kümvüka; onteji hojilo eziiden tssoa nzyu nzo mezhü vantav osi onte ji elümoto nshümoa tsütsav. 14 Tokhatola ochoang na ezii onte tssothokcho sana ji jipo jiha ana ezüp piv; osi ontena oyam meta ji sisi yia na ontena ejüeli elümoto hungi hansi yivka. 15 Nino ni sontsünga harishia ni vamvü osi noyingroa ni chüi ni shothev. 16 Osi ni tsoronichen jiang na echungren mezhü süloti shilo elani yivka, ntiotssole Amorite kyon jiang ji elümoto jancho n zov n kümthüng jo ana ezüp onte pia phani onte siv mek." 17 Kvüthüng eng ji. rhe münga yicho sana omi phungphen ophfü motsünga tona milon motsünga to esüngaro taena chiro ekümrümo tansoe evao jiang yuta lona yakchia yicho. 18 Hojithüng hojilona Potsow na Abram thüngi ntsatacho. Osi ombona phyocho, "Ejip erü lona benkae Euphrates zhükhfü nandang meta shi, 19 Kenite meta, Kenizite meta, Kadmona kyon jiang, 20 Hittitites jiang, Perezite jiang, Rephaim jiang, 21 Osi Amorite kyon, Kanaan kyon, Girgashite kyon jiang, Gebusite kyon to topvü jüa meta shi ni tsoronichen jiang piv to ana phyochakala."

Benkaden 16

Hagar Tona Ishmael To

1 Abram engh Sarai na otsoe n vancho. Khatola ompvü na Ejip kyon phajae tsüka Hagar to tsa eloe vancho, 2 tole Sarai na Abram ezocho, "OPVÜI na otsoe evamvü etho a n pi. Hoji tsükona nina aphajae eloe ji nini nzo yipvo, ompvüna otsoe abukiv mpa tssov." Sarai na ephyo ji Abram na engayicho. 3 Osi ompvü na Hagar ji Abram yingaloroe tssothoku picho. (Shijo Abram na Kanaan meta lo vansi nzyu taro sülo tssocho.) 4 Abram na Hagar thüngi ponilan tssocho osi Hagar ji otsük n jüngu sicho. Osi ompvüna kvüthüng ngaro hanthaka to ompvübo ntsicho sana, kanchana Sarai ji nkhanzicho. 5 Tole Sarai na Abram ezocho, "Hagar na atssako shijo ni ori lona. Ompvü ji ana ni thüngi ni picho, osi ompvüna kvüthüng ngaro hanthaka to ntsicho sana jilona benkae atssakcho. Hoji tsükona ni elan alo a elan sana OPVÜI khi zethuka!" 6 Tole Abram na janlancho, "Mmhonka, ntsoto, ompvüo ni phajae küma ompvüo ni küpo; nina kvüto ompvü eküm hunga sana ni etso tssoa." Hoji süijo Sarai na Hagar ji elümoto ekümshaka eküma jo Hagar na tsani sicho. 7 Tole OPVÜI lanben na Shur lani jükvü jilona Hagar nduki ezocho, 8 "Sarai phajae Hagar, nino küina rosi küi yiala?" Tole ompvüna janlancho, "Aiyo a kipvüo ji thüngina tsani yiaka." 9 Tole ombona ezocho, "Ompvü thüngi yilana, osi ompvü phajae ji to tssoa." 10 Osi ombona elani heto ezolancho, "Ana tsoronichen kyon ochinaha nkhacheo tata ni pivka. 11 Nina tsokhying buku sala, osi nina Ishmael to ombo tsav ntiotssole nina nungra kyao ji OPVÜI na zothaka. 12 Khatola nitsoe jina romhon kurü esüa eküm vamvü, ombona otsük akvü panlamka osi hojito otsük akvüna ombo panlamka. Elani ombona ombo wopan topvü thüngina khotae vamvü." 13 Hagar na ompvübo engacho, "Ana otsotso Potsow hungthakcho alo osi ombo tsükona ephyov eküm vanalo?" Hoji tsükona Potsow ochona ompvü jancho sana ji Potsow ji ompvüna, "Hunga evamo Potso" to tsacho. 14 Hoji tsükona jükha Kadesh tona Be red to yutalo elio jijo kyon na "Eküm evamo Potsow ochona ahunga vancho sana ji jükha" to tsatala. 15 Hagar na Abram tsoe tsüka vancho osi ombona Ishmael to tsacho. 16 Hojithüngjo Abram jo nzyu ekha tizasi tirok tssothakcho.

Benkaden 17

Ntsatao Ji Chekaphen tssoa, Tsemo Ji

1 Abram ji nzyu ekha tokusi toku tssaothüng OPVÜI na ombo thüngi oro ezocho, "Aiyo Thotsü Potsow jika. Ayi enga, yuta topvülo elan ji tssoa vankhe. 2 Ana ni thüngi ntsatavka osi tsoronichen elümoto ni pivka." 3 Tothüngji Abram na ombo mha ji liko jana nkhümthecho, tole Potsow na ombo ezocho, 4 "Ana ni thüngi ntsata heto vav; Nino jipolan elümoto omotsüi tssov to ana phyochakala. 5 Ni mying jo enhungo Abram to mekna Abraham to ni tsavka, ntiotssole ana jipo khosha omotsüi ni kümthukala. 6 Ana tsoronichen khosha ni pivka osi onte yulo ejoma jo mesaeden tssov. Ni tsoronichen khosha kümi jipo khosha küma yiv. 7 "Kümali ntsata lithokvü tsükona ana ni osi sülami ni tsoronichen thüngi phyochak shiang benthoku. Aiyo ni osi ni tsoronichen Potsow tssovka. 8 Nina enhünga tsanthan esüa evamo meta shiji ana ni osi ni tsoronichen thüngi pivka. Osi Kanaan meta shiji kümali tsükona mpüm totona ni tona ni tsoronichen to echi tssovka, Osi Aiyo onte Potsow tssovka." 9 Potsow na Abraham ezocho, "Ninaha a thüngi ntsata evav tsükona ni lüm na rüngu lia, osi sülami ni tsoronichen jiang topvüna. 10 Ni osi ni tsoroichen jiang topvü na eboe to etsa tseniv lia. 11-12 Enhünga na benkae khi ntena eboeroro topvü vansi tsüngon tizao tolo tsenivka; osi ni phajae nikina buko jiang tssolea metapoe na sosi eyio phanjae jiang tssolea topvü tsenivka. Hojijo eni yutalo ntsata lia toji chekaphen ji. 13 Otsük akvü tseniv osi hojijo, eni yutalo kümali ntsata lioji oponina hungi nchümchephen. 14 Eboe ocho n tsenicho sana jijo a kyon to khav meka, ntiotssole ombona a thüngi ntsata n vacho." 15 Potsow na Abraham thüngi ezocho, "Nina enhungo ni engh ji Sarai to tsav meka, enhüngana benkae ompvü mying jo Sarah to tsavka. 16 Ana ompvü mmhayivka osi ompvü yakchia ana otsoe ni pivka. Ana ompvü mmhayiv osi ompvüo jipotsü oyo kümvüka; osi ompvü tsoronichen yulo mesaeden jüvka." 17 Abraham na ombo mha jina liko jana nkhümthecho, khatola ombona heto nchüma emahungcho, "Kyon tsükana nzyu nzoa tssosanati otsoe lichevke? Osi Sarah nzyu ekha toku tssosanati otsoe lichevalo?" 18 Ombona Potsow engacho, "Ntio tsükona Ishmael na jo a tsentso n tssochevla?" 19 Tole Potsow na ezocho, "meka ni engh Sarah na otsoe bukuka, osi nina Isaak to ombo tsavka. Ana ombo osi ombo tsoronichen thüngi kümali ntsata vavka. Osi hojijo kümali evamo ntsata tssovka. 20 Nina Ishmael tsükona jonjiwo ji ana zothaka, ana ombo mmhayithokuka osi otsoeoro osi tsoronichen khosha ombo pivka. Ombo mesatso otsük taro eni opo ombo kümvüka osi ombo tsoronichen jiang ji ana jipo tsüphov kümthokvü. 21 Tokhatola ana a ntsata jijo ni tsoe Isaak thüngi vavka, omboji nzyu etsao jilo yuta heto-thüng Sarah lona bukuka." 22 Potsow na heto Abraham ezothakale ombo sisi yi sicho. 23 Hoji tsüngono Abraham na Potsow yi enga ombo tsoe Ishmael ji tsenicho osi ombo ki wopan elani eziden eshio jiang elani ombo kina bukcho jiang to topvü tseniracho. 24 Abraham jo nzyu ekha tokusi toku loti tsencho; 25 Osi ombo tsoe Ishmael jo nzyu taro ethümoto lo tsenicho. 26 Oniata tsüngonalo tsentacho, 27 Osi Abraham eziden jiang ha hoji tsüngono tsenracho.

Benkaden 18

Abraham Thüngi Otsoe Epiv Phyochako Ji

1 OPVÜI na Mamre lo ntho dung jiang yulona Abraham ndukcho. Abraham na eng etsso tso yuta jilo ombo süranki kipüngo khoka vanathüng, 2 ombona engokae zekachile kyon otsük ethüm phanti vana hungchicho. Ombona onte hungchipvü zakto yungchuki onte ndukcho. Ombona kvüri jina liko jana n khümthei phyocho, 3 "Tsüphoeden, nzansi aki n khokthev jo tiyakchitava; ana nte benkavka. 4 Nte jo jiang nte epyoyiv tsükona ana ojü tara hansi yivka, odung shi kupi esana vantava. 5 Ana etsoyuha tara yani hansi yiv osi hojina etho jükae nte yentsathoku. Ntena aki roji yakchia amying chüngithukthaka, hoji tsükona ana nte sochobenchovka. Ontena ezocho, "Montsoka, hojito tssov jijo e mathata." 6 Jitopvü Abraham na ombo süranki yunga oyi ombo engh Sarah ezocho, "Zakto, hümri rüngphen ohüm mmhomtsowlo yachei khi hümri tara rünga." 7 Tothakale ombona yunglana owo tsideni mangsüro belevü tüv khi phajae tsüka pia zaktole nonthukcho. 8 Ombona elani ethyu tara, shirojü tara elani oso ji to khi ekvüi tssitso hantssoe khi yentsae jiang vayicho. Osi jilo odung jiang küpina ombona tssilonhanlona onte tsothukcho. 9 Ontena "Ni engh Sarah jo kvüla" to ombo engacho. Tole ombona, "Ompvüo süranki chungi vana" to onte ezocho. 10 Onte yulo tsükana phyocho, "Ana choro toku sülo elani rolamka osi ni engh Sarah na otsoe bukuka." Tothüngjo Sarah jo ombo sülani süranki kipüng jilona enga vancho. 11 Abraham tona Sarah to woniata elümoto sonthako jina, Sarah jo ompvü tathi choro mmen tia n tssov sithakcho. 12 Jitsükona Sarah na ompvübo emakata phyocho, "Enhungo aiyo sonpvüro akümthak na kvütoli ana ponilan tssov choka li khi otsoe hamvüla? Jitae mekna arapvü ha sontsüngthaka." 13 Hoji süijo OPVÜI jina Abraham ezocho, "Ntioli Sarah na ompvübo emakata, 'Otsotso sonpvüro a kümsanati ana otsoe vankhukchoke?, "' to phyochola? 14 OPVÜI tsükona ekhüngu tsotso tüv ntio sana lichoalo? Ana phyothako ji esüa, choro toku sülo ana elani rolamka osi Sarah na otsoe bukuka." 15 Tole Sarah na kyua nchümo jina, ekhirana "Ana n maka" to phyocho. Tole "Meka, nina ema nrüngchoka" to ezocho.

Abraham na Sodom Tsükona Jonjiala

16 Jisüijo kyon otsük ethüm jiang na khochi oyi meta motsünga lona Sodom ji zechochicheo tüv lo yitacho, osi Abraham ha onte phana olani onte sochilo wocho. 17 Tole OPVÜI na ombobo heto phyocho, "Ana ntio tssov zikacho sana ji ana Abraham mphov meka. 18 Ombo tsoronichen jo thotsü eli jipo osi tsüphov kümvüka, osi ombo yakchia ana jipo jiang mmhayivka. 19 Ana ombo ethüngcheo jijo ombo khi ombo tsaoronichen jiang ji ayi engtale to ezoa ntio jo ntsa osi elan sana jiang lo sokathoku tsükona. Ontena hojito tssona ana ntio phyochaki ombo vayicho sana jiang topvü benthokuka." 20 Hoji süijo OPVÜI na Abraham ezocho, "Sodom tona Gomorrah to nlan ekhenthav lithaka, osi onte mmen ji elümoto kyungthaka to phyotala. 21 Otssotso memekcho sana ana jowo zevka." 22 Hoji sülojo kyon otsük eni jina khochi Sodom towoe wotacho, tole OPVÜI jijo Abraham ndüngo vancho. 23 Tole Abraham na engokae OPVÜI ji engacho, "Nino otsotso kyon mmhom jiang ha kyon n mhomo jiang nzo monthoku sake? 24 Yantsü jilo ntsanthoe otsük tinyan tia vanwo nina yantsü ji memonthokula? Tinyan ji nkoho lona tia nina yantsü ji n monthoku alo? 25 Otsotso, nina ntsanthoe jiang ji n mhon jiang nzo monthoku jo meku tssov. Hojijo n tssochewo! Nina hojito n tssochenrüng. Nina hojito tssoana, ntsanthoe jiangha n mhom jiang nzo chüthokala. Tojo n tssochewo elhi. Limha shi mpümto yitssoe jina jo ntsa lona tssov lia." 26 OPVÜI na janlancho, "Ana Sodom lo ntsanthoe otsük tinyan tia yancheta tssona onte tsükona tia yantsü ji nkohochev." 27 Tole elani Abraham na ezolancho, "Nzansi ana lüm tssona ni jana vamo ji n lan a siyia OPVÜI, aiyo kyonshae, osi ntia ephov elan nli, 28 Ntosito tinyan meklea, otsük zhüromongo tia ntsanthoe vancho sao, mongona m pemo jina nina yantsü totona monthoku alo?" Tole OPVÜI na janlancho, ntsanthoe otsük zhüro mongo tia hunga tssona ana yantsü ji monthokvü meka. 29 Abraham na phyolancho, "Tole zhüro tae vancho sao" Tole ombona janlancho, "Zhüro tia vana tssona jiang nkoho lona lea yantsü ji n monthuk." 30 Elani Abraham na phyocho, "OPVÜI yo, nzansi lüm titsuk khe, ana phyolamka, "Tole, thümro tae vancho sawo kvüto tssov?" Ombona phyocho, "Thümro tia vanwo n monthuk." 31 Abraham na phyocho, OPVÜI ana lüm tssoni ni jana vamo shi nlan a siyia. Kvütoli sana tia mekyu vancho salivo?" Ombona phyocho, "Ana mekyu tia yanchevo yantsü ji monthukvü meka." 32 Abraham na phyocho, "OPVÜI ana enhungo yenjoa tae phyovka lüm titsuk khe. Taro tia yanchevo kvüto tssovla?" Ombona phyocho, "Taro tia vanvo ana yantsü ji n monthuk." 33OPVÜI na Abraham thüngi oyi shiang nsanrathakale yi sicho, osi Abraham ha ombo ki yicho.

Benkaden 19

Sodom Mmen Jiang

1 Hoji mmyu lanben otsük eni jina Sodom yan jilo role Lot jo yantsü kipüngi khoka vancho. Ombona onte hungpvü phanthi owo onte ndukcho. Ombona onte mhadungo nkhümthei, 2 ezocho, "Tsüphoeden, ana nte benkav tsükona methaki vanka, nzansi a ki rotava. Ntena ojo epyotasi nchüng zümojo shilo yiptava. Enyathüng jo ntena nyazüngina phanthi khochi yikhuka." Tokhatola ontena janlancho, "Meka, ena nchüngo yanlungi lea yiptavka." 3 Tole ombona onte tsa mungcho, osi sülamijo ontena ombo phana oki yitacho. Lot na ombo phajae jiang ezoa yentsae jiang tsükona hümri mmhom rüngthukcho. Osi methakthakale ontena tsotacho. 4 Yentsae jiangna yipkachipvü Sodom kyon jiangna oki ji hayacho. Yantsü jilo kyon ngaro eran hojilo rocho. 5 Ontena Lot tsachuki ezotacho, "Nchüng zümo ni ki yentsae nchemo jiang kvülo vanchola? E thüngi sosi chiyia!" Sodom kyon jiangna yentsae jiang thüngi ponilan tssotav nchümcho. 6 Lot na haphoe chivo kipüng ji khani sicho. 7 Osi ombona onte ezocho, "Oshomden, hojitüv ntha elhi ti-tssotale to ana jonjiala! 8 Zetava, ana a tsolov loroe otsük eni vanka sosi chiyi nte pivka nte lümcho onte thüngi tssotava. Osi kyon shiang thüngi jo ntia ti-tssotava; onteno a lankonden küma ana onte nkohachev." 9 Tole ontena ombo ezocho, "Oh tsanthan, e mhadungona tsana! Ena ntio tssov sana nina ezovke? E nkachia, to mekana jiang thüngina tsükshika ni tssoyivka." Ontena Lot ji khyalanchisi kipüng ji rakrhüplo chongotacho. 10 Tokhatola kichungi yentsae jiangna yonchukchia Lot süthesi oki ji khancho. 11 Jitosi ontena haphoe evamo kyon jiang topvü omhyik jukrae sithukcho, hoji tsükona ontena kipüngji n yanchecho.

Lot na Sodom Lona Khoe Yiala

12 Yentsae otsük eni jina Lot ezocho, "Nina wopan thanpoe tsokhying, tsolo, orüiden osi kyon thanpoe ni wopan yantsü shilo vancho tssona tsachuka, 13 ntiotssole ena meta shi monthukvü sala. Kyon shiang n lan ekyuthav jiang OPVÜI na zothaka. Osi OPVÜI na Sodom monthuko erothukcho." 14 Tole Lot na otsolov engae elio orüo jiang thüngi yunga owo ezocho, "OPVÜI na meta shi monthukvü saka zakto shilona tsani yitava." Tokhatola ombona ngashüa tsayia ontena nchümtacho. 15 Wonchiale lanben jiangna Lot ji ekhyolakle to ezocho, "Zakto! Ni engh tona ni tsolov otsük eni ji to sosi tsana, to tssona yantsü shi monthukathüng nte eküm monhyav meka." 16 Lot na woewolancho. Khatola OPVÜI na ombo khonzana nchümcho; jitsükona lanben jiangna omboe tona otsolov otsük eniji to okhe lona erüi yantsüi na süchokcho. 17 Jisüi jo lanben tsüka jina ezocho, "Nte eküm tsükona yunga tsantava! Sülani tizechitava osi hayi jiang loha titamangtava. Nte n chüthukvü tsükona yingsüng jianglo tsani yitava." 18 Tole Lot na ezocho, tsüphoe yo, hojito e titssothuka, 19 Nina e nzana eküm e shanchoyithaka, khatola yingsüng ji eyivjo kontia; ezüp jilona n tsanchov hoji n jam achüv. 20 Oyan teriv lio ji nina hehungchi? hojijo enhyanka hojilo a yithuka jijo oyan teriv osi hoji lojo tsanchoa vancheta. 21 Ombona janlancho, "Ana lüm na rüngka, toka ana hojijo monthukvü meka. 22 Zakto! hojilo tsana yia! nina hoji n jam jo ana ntia sakav meka." Lot na oyan teriv to tsao jina oyan ji Zoar to tsacho.

Sodom Gomorrah Monthuko Ji

23 Lot na Zoar jana jo eng rheta vanthakcho. 24 Jitopvü OPVÜI na omi müngzüv kholong jothuki Sodom tona Gomorrah to yantsü jiang osi, 25 hayitsü osi jiang lo kyon vamo jiang tona liko poni zacho topvü monthukcho. 26 Tole Lot eloe jijo sülani engolani zechiwo jina madurhyu kümi sicho. 27 Ojyuato nyazüngina Abraham na ombona OPVÜI nduko meta jilo wocho. 28 Ombona Sodom tona Gomorrah, osi hayitsü jiwoe zechile mikyu tsüphov lona phunga esüa miphong chiyia hungcho. 29 Khatola OPVÜI na hayitsü jilo Lot na vamo yantsü jiang monthukathüng Abraham n mhechocho osi Lot tsanchothukcho.

Moab Kyon Tona Ammon Kyon Jiangto Bukcheo Ji

30 Lot na kyua Zoar lo n vanhungo jina ombo tona otsolov otsük eni ji to yingsüng jianglo oyi longkvüi vantacho. 31 Otsolov eramo jina nungo ji ezocho, "Apo jo sonala osi enina yanpi otsoe oro vanthukvü tsükona limha shilo eboe ochia n van. 32 Yia, Apo kinothuki enina ombo nzo yipsi otsoe bokthuktavkalo." 33 Hoji zümo jilo onina soko ombo yuthukcho osi otsolov eramo jina opo thüngi yipsi ponilan tssotacho. Tokhatola ombo kinotsüngo jina hoji n tsicho. 34 Ochyuato jo eramo jina oka ezocho, "Ana nsümo jo ombo thüngi yipcho, nchüngha ombo kinothuktavka, osi nina ombo thüngi yipa. Tona enita na apo tsoe bukvüka." 35 Hoji tsükona hoji zümo ha onina ombo kinothukcho osi otsolov nungo jina ombo thüngi yipsi ponilan tssocho. Toaha ombo kinotsüngo jina hoji n tsilancho. 36 Hojitolyui Lot otsolov woniata na opo ngaro hanracho. 37 Otsolov eramo jina tsokhying bukcho. Osi ompvüna Moab to ombo tsacho. Ombo nchüng tsüngono Moab kyon shiang omotsüi ji ombo kümcho. 38 Otsolov nungo jinaha tsokhying buki ompvüna Benammi to ombo tsacho. Ombo nchüng tsüngono Ammon kyon shiang omotsüi ji kümcho.

Benkaden 20

Abraham Tona Abimeilek To

1 Abraham na Mamre lona Kanaan jolowoe oyi Kadesh tona Shur to yutalo vancho. Sülami jo ombona Gerar lo vanale, 2 Ombo na ombo engh ji ombo oka to ejancho. Tole mesao Abimelek na Sarah ji ombo thüngi tsacho. 3 Tole zümo motsünga lo Potsow na ombo nduki ezocho; "Nina eloe shi khio jina ni chüv sala, ntiotssole ompvüo yanpithaka." 4 Tokhatola Abimelek na ompvü ndüngo n vohamo jina phyocho, "OPVÜI a nlan n lika, nina a osi a kyon shiang memonthokula? 5 Abraham na ombo oka to phyocho osi ompvü na ha hojito phyocho. Ana ntio tssocho sana abobo chetünga ntsia, osi ntia woricho n li." 6 Potsow na omüngina ombo janlancho, "Hoka, nina chetünga hojito tssocho ana ntsia, hoji tsükona a mhadungo mmen ni n tssothoku tsükona ompvü ni n vüngkathukcho. 7 Enhungo eloe ji ompvü orapvü thüngi yithokuka. Ombo Potsow yi elonpvüi, ombona ni randaniv osi ni chüv mek. Tokhatola nina ompvü n yithuka tssona ana ni ezoala, ni chüvka osi ni kyon jiang ha chüravka." 8 Hojito etsso ji Abimelek na nyazüngi na ombo küpo lhisae jiang topvü tsae ezocho. Tole onte ekhentsüngracho. 9 Tole Abimelek na Abraham tsae engacho, "Nina e pono ntio tssothakchola? Ana ni mhadungo ntio woricho lona akyon pono osi a ekhüngyano hetüv yichola? Nina tssothaka to kyon ochinaha etssov n li. 10 Nino ntiolyui hojito elhichola?" 11 Abraham na janlancho, "Ana jo meta shilo Potsow ekyui ochia n vancho tsaya kyon jiang na a lüngthasi a engh ji khiv tsayicho. 12 Ompvüo otsotso aka, ompvüo apo otsolov khatola ayo otsolov meka, osi ana ompvü soa vancho. 13 Jitsükona Potsow na apo kina khochoku a ezoathüng ana ompvü ezocho, nina a lo longtsükata vamo ji chekav esüa oyam thüngi jo aiyo ni opyao to ezoa." 14 Tole Abimelek na Sarah ji Abraham thüngi yithukcho, osi ombona olyuden, mangsüden, osi eziiden toha ombo picho. 15 Ombona Abraham ezocho, "Shiang hetopvü a likoka, ni lümcholo vana." 16 Ombona Sarah ezocho, "Ni n lan n li, to ni nzo etssoe jiang chekathoku tsükona ana ni pyao ji janti rang wothüng motsünga piala. Hojilona kyon topvü na nino n lan n li to chekavka." 17-18 Abraham engh Sarah thüngi ntio tssocho sana ji yakchia Potsow na Abimelek mesaki evan ochia otsoeoro n picho. Ji tsükona Abraham na Abimelek randanile Potsow na ombo emiyicho. Ombona ombo engh ji osi eloe thanpoe ombo eziiden jiang ha otsoeoro ehungu tsükona to randanicho.

Benkaden 21

Isaak Buko Ji

1 OPVÜI na ombo phyochak yi ji ephan Sarah mmhayicho, 2 Osi ompvü na Abraham esoniti otsoe hani bukcho. Eboeroro ji Potsow na kokao tsüngon jilo bukcho. 3 Abraham na Isaak to ombo tsacho, 4 Osi Isaak ji tsüngon tiza tssoale Abraham na Potsow yizüng ephan ombo tsenicho. 5 Isaak bukajo Abraham nzyu nzoa tssothakcho. 6 Sarah na phyocho, "Potsow na ematha osi longshi a hungthukthaka. Yithen shi ezoe topvü na a emathakyov." 7 Jitosi Ompvü na phyolancho, "Sarah na ngaro nijüpvüto ochona Abraham ezokhukchola? Tokhatola ombo esonlani ana tsokhying ombo bukithaka." 8 Ngaro ji rankacho, osi ombo khakchi tsüngon jilo Abraham na tokhu tsüphov methakcho.

Hagar ha Ishmael Oni Yithukala

9 Ejip kyon Hagar lona buko Abraham tsoe Ishmael na tsüngona lo Sarah tsoe Isaak oni khürita vancho. 10 Tole Sarah na oni hungi Abraham ezocho, "Phajapvüi shi tona ompvü tsoe ji to woniata yi sitoka, osi ni ejüeli a tsoe Isaak ejan jilo eloe shi tsoe jina ntia khichev meka." 11 Hojina Abraham ji elümoto n vanthev sicho, ntiotssole Ishmael ha ombo tsoe tsso jina. 12 Khatola Potsow na Abrham ezocho, "Ni ezii Hagar tona tsokhying ji to tsükona ti-wongkhyua, Sarah na ntio ni ezoa na ji ephan tssoa, ntiotssole ana phyochako tsoronichen jiang Isaak lona chiyithoku. 13 Ni ezii ji tsoe jiha ana tsoronichen elümoto piv sala, osi onte lona jipo motsünga phanthiv. Omboha ni tsoe." 14 Ojyuato nyazüngina Abraham na etsoyu tara tona ojü sofü sükvü motsünga to picho. Ombona ompvü tsoe ji ompvü pvüthuksi yithokcho. Ompvü na khochoki oyi Beersheba romhoni khyuphia vancho. 15 Ojü ji yurathakale ompvü na tsokhying ji rannuk kupi vanthuksi 16 hoji lona metre nzoa harümi owo khokthei vancho. ompvüna phyocho, "A tsoe ji zeta n chüthokkhok." Ompvüna hojilo khokthei kya vancho. 17 Otsoe jina kyao ji Potsow na zocho osi Potsüwoe lanben na Hagar ezocho, "Ntiona ni emhukelüma la Hagar? Tikyua, Potsow na ngaro ji ekya ji zothaka. 18 Phanthi, owo ombo tsakae ejichoa. Ana ombo tsoronichen lona jipo tsüphov chiyithokuka." 19 Tole Potsow na ompvü mhyik pochiyicho osi ompvüna jükha motsünga hungcho. ompvüna owo ojü woe sofü sükvü jilo yeni otsoe jiha yuthukcho. 20 Otsoe ji rankatathüng Potsow na ombo ndüngo tssocho; Ombona Paran romhoni vani elümoto tssothimoria sophanyiphani etsoe kümcho. 21 Oyo na ombo eloe etssov Ejip kyon tsüka yani picho.

Abraham ha Abimelek Oni Ntsata

22 Hojithüng Abimelek na ombo rasan esopvüi Phikol nzo owo Abraham ezocho, "Ni elhi topvü lo Potsow na ni kyoala. 23 Hoji tsükona Potsow mhadungo shilona nina a osi a tsoronichen jiang n jithechi to phyochaka. Ana ni longtsükata vanthaka, hoji esüa ninaha a osi nina vamo meta, shilo kyon thüngi longtsüka lia vana." 24 Abraham na phyocho, "Ana phyochakala." 25 Abraham jüka motsünga, Abimelek phajae na rechoe khicho yilan Abimelek thüngi ezocho. 26 Abimelek na ezocho, "Ochona hojito tssocho sana ana n tsi, ninaha hojitüv yilan a n zo, aiyo enhüngati zoala." 27 Tole Abraham na olyu osi mangsü tara to Abimelek picho, osi oni yutalo ntsata vatacho. 28 Abraham na ombo olyuden jilona olyu tiying khichecho, 29 tole Abimelek na ezocho, "Nino ntioli hojito lyuato?" 30 Abraham na janlancho, "Olyuro tiying shi khia. Osi hoji yakchia, jükha shijo ana shanchoto chethei khia." 31 Ji tsükona meta ji Bersheba to tsacho, ntiotssole onina hojilona ntsatacho. 32 Onina Bersheba lona hojito ntsata si Abimelek ha Phikol onina Philistia lo yitacho. 33 Tosi Abraham na Bersheba lo Tamarik odung chümi kümali Potsow OPVÜI ji khümtacho. 34 Abraham na Philistia lo sunga vancho.

Benkaden 22

Isaak ji Othan Tssole To Potsow na Abraham Ezoala

1 Yuta tara sülo Potsow na Abraham ojang tssocho, Ombona, "Abraham!" to tsacho. Tole Abraham na, "Hao, OPVÜI, shilo a vanka!" to ezocho. 2 Tole Potsow na ezocho, "Nitsoe, tsonthi Isaak, ni nzantso ji sosi Moriah metae yia. Hojilo ana meta motsünga ni ejüvka, jilona ombo khi a thana." 3 Ojyuato jo Abraham na nyazüngina thanphen otssüng tara oroe ombo Gadho ji hanthuksi, Isaak tona phajae otsük eni to sonhyasi Potsow na ejüo meta jilo wotacho. 4 Osi tsüngon ethümoto jilo jo Abraham na meta ji hungchicho. 5 Tole ombona phajae jiang ezocho, "gadho ji nzo shilo vantava, a tsoe shi enina owo khümtasi elani nte thüngi yitavka." 6 Hojito phyoa Abraham na erung tssüng ha ji Isaak hanthuksi ombo yonri tona tssokachiphen michüm to bencho. Osi onina yita vanathüng ji, 7 Isaak na, "Apo!" to tsacho. Tole Abraham na "Hao, Otsoe, Kvütola?" to ezocho. Jisüijo Isaak na ezocho, "Nina otssüng omi jo hana khatola olyuro jijo kvülo khi thantav sala?" 8 Abraham na janlancho, "Potsow na ombobo motsünga apivka," to ezoa yita vancho. 9 Osi kvüthüng Potsow na ombo ezovo meta ji jancho sana, Abraham na thanphen sa roni otssüng ji hankachicho. Jisülojo ombona ombo tsoe ji chhüngi thanphen sa jilo otsüng jiang poni ekachicho. 10 Osi ombona Isaak ji lüngthav tsükona ombo yonri ji süngkacho, 11 Tole OPVÜI lanben na Potsüwoe na "Abraham, Abraham!" to ombo tsaphicho. Ombona, "Hao, shilo a vanka" to yichocho. 12 Hoji süijo Lanben jina ezocho, "Eboeroro ji timeyana, osi ntia tilyuia." "Nina Potsow kyuala osi ombo yi engala to ana che kathaka, ntiotssole nina ni tsonthi jitia n valanchina ombo kyuchiala." 13 Jithüngji Abraham na engokae zele, olyu motsünga khyonrho na shiyae vancho hungcho. Hoji tsükona ombona hoji owo khi ombo tsoe ji ethan thung ji olyu jina erung than tssoa thancho. 14 Osi hoji metaji Abraham na, "OPVÜI na epiala" to tsayicho. Nchüng jana kyon na "OPVÜI na phunglani na epiala" to phyotala. 15 OPVÜI lanben jina Potsüwoe na Abraham tsae ezocho, 16 "Ana a mying khi phyochakala OPVÜI na phyoala Ana emhokthav ni mmhayivka. Ntiotssole nina heto tssothaka, osi a thüngina nitsoe jitia n valanchicho. 17 Hoji tsükona ana echüma ni ezoala, 'Ni tsoronichen jo shantio jiang tata osi jürani hajang to thichthukuka. Osi ni tsoronichen jiangna onte ri jiang khyoa wovka.' 18 Ana ni tsoronichen jiang mmhayio ji esüa onte mmhayile to jipo topvüna chontav ntiotssole nina a yizüng jiang topvü engacho." 19 Abraham na ombo phajae jiang thüngi elani yicho osi Abraham vanphen Beersheba lo onte nzo yitacho.

Nahor Tsoronichen Jiang

20 Yuta tara sülojo Milka na ombo ojenio Nahor ji otsoeoro otsük tiza bukithaka to Abraham na zocho. 21 Otsoe ovüngo ji Uz, ombo onyuro Buz, Aram opo Kenuei, 22 Chesed, Hazo, Phildash, Jidlah tona 23 Rebeka opo Bethuel to otsoe otsük tiza shiang shi Milka na Abraham ojenio Nahor bukicho. Nahor shom loroe 24 Reumah na Tebah, Gaham, Tahash, tona Makha to vancho.

Benkaden 23

Sarah Chüala Osi Abraham na Müngsiphen Shiala

1 Sarah na nzyu nzoasi mekyu vancho. 2 Ompvüji kanaan meta Hebron lona chücho, osi ompvü chüo ji Abraham na nungraicho. 3 Ombona ombo engh echümüng ji vasi owo Hittite kyon jiang ezocho, 4 "Aiyo nte yulo tsanthan tssoa vanaka, a engh ji shothev tsükona meta a shituktava." 5 Ontena janlancho, 6 "Tsüphoeyo, ena ni ezovka engachia, "Nino esopvüi tssokhong tsüka to ena ntsia, liko shianglo ni chokao lo ni engh ji shotheta. E yulo ntinsana liko ni pia ni engh ji ni shothetukuka." 7 Tole Abraham na onte mhadungo nkhümthei phyocho, 8 "Ntena a engh shi shilo a shothethuka tssona, nzansi Zoar tsoe Ephron ezoa, 9 Machpelah longkvü ji a shithuka, hojijo ombo litssae ka. Oman shenthi ji a khiyia nte mhadungona a shithukle to ezoa, tona ana hoji müngsiphen khivka." 10 Ephron na Hittite thanpoe jiang nzo yantsü pikhfü jilo oyan etssikhophen jilo khoka vancho, osi ombona hojilo evan topvü na zoa janlancho, 11 "Tsüphoeyo, ana a kyon shiang mhadungona Machpelah longkvü ji totona ni shithukuka, osi hojilo ni engh ji ni shothethokuka." 12 Khatola Abraham na Hittite jiang mhadungo epyakthe topvü na zoa, 13 Ephron ezocho, "Ana oyi motsünga jonjikhukchoalo? Ana oli ji totona shivka nzansi oman shi a khiyia, tona ana a engh ji jilo shothevka." 14 Ephron na janlancho, 15 "Tsüphoeyo, liko ji man ji jantirang nzo mezhü tae küma jitüv jo eni tsükona jo ntia meka. Ni engh ji nra hojilo shotheta." 16 Ephron na nzontsü na zoa ephyo jantirang nzo mezhü ji Abraham na shishoe füphen shenthi lona fücho. 17 Hojitolyui Mamre na engkhüwoe Machpelah lo evan Ephron meta ji Abraham echhi kümcho. Hojilo oli ji, longkvü ji, elani litssa jana otssüng odung jiang to jücho. 18 Hojilo sanrhyuo Hittite kyon jiang topvü na liko ji Abraham echhi to chekacho. 19 Hoji tsükona Abraham na ombo engh Sarah ji Kanaan meta longkvü jilo shothecho. 20 Hojitolyui Hittite jiang liko osi longkvü ji Abraham echhi müngsiphen kümcho.

Benkaden 24

Isaak Engh

1 Enhungo Abraham ji elümoto sonthakcho osi OPVÜI na ombo elhi topvü lo ombo mmhayithukcho. 2 Ombona phajae yulo erantso ochona ejüeli topvü zechecho sana ji ezocho, "A jo ophi jiang yutalo nyimkae phyochaka. 3 Nina atsoe ji engh ji Kanaan meta shilona n khithuk to Potsüo osi limha OPVÜI Potsow myingo na ni a phyochakthuk hungala. 4 Nina a tsoe Isaak engh ji a ebuk metae a wopan jiang yulo owo yani soa vanthokuka." 5 Tole phajae jina engacho, "Tole loroe jina meta ji sisi hepi a phana n yina kvüto lyuvla? Ana ni tsoe ji ni ebuk metae elani yithuklam alo?" 6 Abraham na ezocho, "Nina a tsoe ji hoji tiyilanthuka! 7 Potsüwoe OPVÜI Potsow na apo meta osi a wopan jiang metae na tsanchuki hepi a yithukcho, osi ombona meta shi a tsoronichen jiang epiv tsükona tüngochünga phyochakcho. Nina a tsoe ji engh yancheo tssoa Potsow na ni vüngina lanben wothukuka. 8 Loroe jina ni phana n yia tssona ana ni phyochakthuko shina ni ti-wongkhyua. Khatola nti lanka lonaha nina atsoe ji meta ji elani n yithukche." 9 Tole phajae jina, ombo OPVÜI Abraham phi yutalo nimkae Abraham na phyo jiang topvü tssovto phyochakcho. 10 Abraham ejüeli ezepvüi phajae jina ombo pvüi ji Odh jiang yulona taro khichei sosi Nahor na vamo meta mesopotomia khümkiwoe wocho. 11 Ombona kvüthüng hoji jancho sana Odh jiang yantsü tssae jükha motsüngalo esanrathukcho. Osi jithüng jo mmyua vanthako jina eloeden na ojü olo rota vanthakcho. 12 Ombona heto randancho, "OPVÜI, apvüi Abraham Potsow. Nchüng a elhi shiang a bencheyia, osi a pvüi Abraham thüngi ni phyochak ji benthuka. 13 Aiyo yantsü shilo loroe shiangna ojü ophen jüka shilo vana. 14 Osi ana onte yulo tsüka thüngi, 'Nzansi jümvüru ji vachochia ojü ayuthuka' to ezov sala. Ompvüna, Tua, osi ni Odh ji tsükona ha ana ojü ranlani hansi yivka' to phyona, ompvü ji ana ni nri Isaak engh tssothuku ka. Osi hojito tssona nina apvüi ji thüngi phyochako ji benthukcho to ana longtsüv." 15 Ombona randan ji n thakvü Rebieka na epvülo jümvüru ejümkachi hansi rocho. Ompvüo Abraham ojenio Nahor ha ombo engh Miikan oni tsokhying Bethuel ji otsolov tssocho. 16 Ompvüo elümoto opyon mmhona osi njüm loroe tssocho, osi ompvüna jükhae jowo mvüru jina ojü rankae hansi yicho. 17 Tole phajae jina yunga owo olani na ompvü nduki ezocho, "A nzansi ni mvüru lona ojü a yuthuka, " 18 Ompvüna, "Yua, tsüphoe yo" to ezoa epvüi na mvüru ji khichoe ejümsi ombo yuthukcho. 19 Ombona yuthakale, ompvüna phyocho, "Ana ni odh jiang tsükona ha ojü hana yivka onte etsson yuthuka" 20 Tosi zaktole ompvüna ojü ji odh yuphen opvü jilo lithesi onte topvü n yuchyuthüng nandang jo ojü woe hansi oyi yuthukcho, 21 OPVÜI na ombo bebencheyiv sana to yingto ompvü cheta vancho. 22 Ompvüna odh jiang yuthukrathakale ombona tsentsü shona yingrüm ehamo jiang khichei ompvü kheno lo nkonkayisi shona tivü eni khilani ompvü evon lo phungtheyicho. 23 Jisüijo ombona ezocho, "nzansi nipojo ocho sana a ezoa. Osi ombo ki a tona a nzo etssoe shiang to nchüng zümo tsükona nchenphen lilivla?" 24 Tole ompvüna, "Apo jo Nahor ha Milcha oni tsoe Bethuel jika. 25 Osi eki nchenphen ha elani mavü ekümrümo jak ha to elümoto lia." to ezocho. 26 Hoji süijo phajae jina khuktseni OPVÜI khümcho. 27 Osi ombona phyocho, "Apvüi Abraham Potsow ochona ombo phajae ji thüngi ombo phyochak ji benchethuka sana hoji OPVÜI ji thünga. OPVÜI na a pvüi wopan jiang thüngi a sosi rothaka." 28 Loroe jina oki yunga oyi motsü ji topvü oyo rüa ezocho. 29 Rebieka na opyao Laban to tsa vancho, osi ombona jükhae Abraham phajae ji thüngi yunga wocho. 30 Laban na oyulov shona yingrünm tona tivü to jiang topvü hungcho, osi phajae jina kvüto ompvü ezothakcho sana jiha zothakcho. Osi ombona Abraham phajae jina ombo odh jiang nzo mangta evamo jilo wocho, 31 osi ezocho, "Aphana oki roa, nino OPVÜI na mmhayio kyon tsüka. Nino ntiolyui shilo manga vanala? Ana aki ni tona ni odh to jiang tsükona nchenphen methaki nte vayithaka." 32 Tole kyon jina oki wocho osi Laban na odh jiang ha jiang lanchoe vayisi mavü tona ojak to onte picho. Tosi ombona Abraham phajae ji tona ombo razhü to jiang ojo epyothoku ojü hansi chiyicho. 33 Tosi etsoyu hansi chiyile Abraham phajae jina phyocho, "Ana ntio ephyov zicho sanaji n phyov jo etsoyu n tso." Laban na ezocho, "Ntio phyov sana phyoa." 34 Ombona benkae nsancho, "Aiyo Abraham phajae, 35 OPVÜI na apvüi ji emhokthav mmhayithaka, osi ombo ejüeli tsüka. Ombona olyuden, osi mangsüden, kurüden osi shonajanti elani miden eboe eloeden to ombo mmhayithaka. 36 A pvüiji esonlani ombo engh Sarah jina esonlani otsoe ombo vanicho, osi apvüi na ombo ejüeli topvü ombo pithaka. 37 Apvüi na phyochak motsünga avathukcho. Osi ombona phyocho, 'Atsoe ji engh jo Kanaan meta shilona tikhikhe. 38 Jithüngina jo a metae owo a wopan jiang yulo ombo engh yanikhe.' 39 Tole ana apvüi ji engacho, 'Loroe jina aphana n yina kvüto lyuvla?' 40 Tole ombona phyocho, 'Ana yuta topvülo oyi engayio Potsow jina ombo lanben khi ni phana rwothukvü ka, osi ni bencheyivka. Nina a tsoe ji engh ji a metae a wopan jiang yulo na ethüngivka.' 41 Phyochak shilona nkacheo lanka jo ni tsükona motsünga tae lia; hojijo nina a wopan jiang thüngi osi ontena ni nkhichona, ana ni ezo ji ephan n tssolea ntia n tsso." 42 Ana nchüng jükha jilona oro randancho, "OPVÜI, apvüi Abraham Potsow, a elhi shiang lo etho apia, 43 ana jükha shilo vana loroe tsükana ojü olo rona ana ompvü mvüru jilona ojü a yuthukle to ezov sala. 44 Osi ompvüna a yuthuksi a odh jiangha yuthuka tssona, ompvü ji nina a pvüi tsokhying ji engh ethüngchecho tssovalo?" 45 Tole ana randan jitia n. chev Rebieka na epvüi jümvüru ekachi bensi jükhae oju olo rheyi cho. Ana "Anzansi ojü ayuthuka" to ompvü ezole, 46 ompvüna zakto jümvüru ji khichoe bensi "Yua, ana ni odh jiangha yuthokuka" to phyocho. Hoji tsükona ana yucho osi odh jiangha yuthukcho. 47 Ana, 'Nipojo ochola?' to ezole ompvüna, 'Apojo Nahor ha Milka omboe tsokhying Bethuel jika' to ompvüna a ezocho. Hoji tsükona ana yingrüm ji ompvü khenolo nkonkayisi tivü jiha ompvü evono, phungtheyicho. 48 Ana jilo na khuktseni OPVÜI khümcho. Osi ana apvüi Abraham Potsow ji thüngcho. Ntiotssole ombona apvüi wopan jiang yulo asosi oro apvüi tsokhying ji engh a yanchethukcho. 49 Enhungo ntena apvüi thüngi etssov elio ji tssoa elamo lona ombo nzana tssona, anzansi ntena a ezoa, mekana ana kvüto lyuv sana ji a ezoa." 50 Laban ha Bethuel onina janlancho, "Yilan shi OPVÜI thüngina chiyio jina ena ntia methaku n li. 51 Rebieka ji shika OPVÜI na phyo ji esüa nra sosi oyi nipvüi tsokhying ji engh tssothuka." 52 Abraham phajae jina hoji zoale ombona nkhümthei OPVÜI khümcho. 53 Tosi ombona janti osi shona oyuk osen jiang khichei Rebieka picho. Ombona ompvü oyo tona opyao to oni thüngi ha tssentsü man yantso picho. 54 Jisüijo Abraham phajae ji tona ombo razhü jiang tona etsoyu tssotacho osi hoji zümo jo hojilo yiptacho. Ontena enyathüng phan thiale ombona phyocho, "Enhungo apvüi thüngi a yithuka." 55 Tole Rebieka oyo ha opyao onina phyocho, "Loroe shi e ndüngo tsüngon tiying mekana taro tia vanthuksi sosi yia." 56 Tole ombona ezocho, "Eti vanlanthuka, OPVÜI na eyentsa shi e mmhayithaka enhungo apvüi thüngi kholani a yithuka." 57 Ontena janlancho, "Toka loroe jina jo kvüto phyov sana tsae engae zetava." 58 Ontena Rebieka tsae engatacho, "Nina kyon shi phana ni yeyihungula?" Tole ompvüna 'Yivka" to phyocho. 59 Jisüi jo Rebieka ha onte phajae eson jito ji Abraham phajae ji phana yithukcho. 60 Osi ontena heto phyoa Rebieka randankacho. "Oyuloe, nino kongdung opvü oyo, ni kümthokuka! Ni tsoronichen jiangna niri jiang yantsü jiang khyothokvuka!" 61 Hojisüi jo Rebieka tona ombo ndüngo loroeden to jiangna odh jianglo tsankarae Abraham phajae ji nzo khochitacho. 62 Isaak na romhon meta motsünga, "Ahunga evamo eküm evamo Potsow ji jükha" to tsao jilo oro Kanaan jolowoe vancho, 63 Ombona mmyulamoe sanphia oli jianglo wole Odh jiang tsata hungchicho. 64 Rebieka na Isaak hungchiale Odh jilona tsukjoe, 65 Abraham phajae ji engacho, "Oli na ete thüngoe etsao jijo ochola?" Tole phajae jina "Ombo apvüi jika" to ezocho, tole ompvüna zakto kvüri eyuk ji khi omha shüngi zicho. 66 Phajae jina ombona elhi tsoa yithako jiang topvü Isaak rüa ezocho. 67 Hoji süijo Isaak na Rebieka ji sosi oyi oyo Sarah na vansi eyio süranki jilo sothecho, osi ombo engh ompvü kümthukcho. Isaak na Rebieka nzancho, osi oyo chüo ji nungra ji kyimjoa yicho.

Benkaden 25

Abraham Tsoronichen Thanpo Jiang

1 Abraham na eloe thanpo Keturah to tsa soa vanlancho. 2 Ompvü lona Zimran, Joksham, Medan, Midian, Ishbak tona Shuah to bukcho. 3 Joksham na Sheba ha Dedan oni opo kümcho, osi Dedan tsoronichen jo Asshurim jiang, Letushim jiang tona Luemmim to jiang tssocho. 4 Midian tsoeden Ephah, Epher, Hanoch, Abida, tona Eldaah to tssocho. Shiang hetopvü Keturah tsoronichen tae. 5 Abraham na ombo ejüeli topvü Isaak vayicho. 6 Khatola ombo n chüthüngna ombo engh thanpoe jiang lona buko tsoe jiang ha yantso piracho. Tosi onte topvüto Isaak nkachoa engkhüwoe yirathukcho.

Abraham Chüoji Osi Shotheo Ji

7-8 Abraham jo ranbena nzyu nzoasi ekhatiyingsi mongo vansi chücho. 9 Ombo tsoeden Isaak ha Ishmael onina Machpelah longkvü Mamre na engkhüwoe Hittite kyon Zoar otsokhyongo Ephron tsoe ji echhi jilo ombo shothecho. 10 Hojijo Abraham na Hittite jiang thüngi shio ji, osi Abraham ha Sarah ompoeta hojilo shothecho. 11 Abraham chüsi sülo Potsow na Isaak ji mmhayicho osi "A hunga evamo eküm Potsow ji jükha" to tsao jilo vancho.

Ishmael Tsoronichen Jiang

12 Sarah phajae Ejip eloe Hagar lona buko Abraham tsoe Ishmael, 13 jina otsoe vamo jiang eranina etsüngcho heto: Nebaith, Kedar, Adbeel, Mibsam, 14 Mishma, Dumah, Massa, 15 Hadad, Tema, Jetur, Napish tona Kedemah to, 16 onteno pvüji taro eni omotsüiden osi onte mying jo ontena vana ewo oyan jianglo likhancho. 17 Ishmael jo nzyu nzoasi thümro tiyinglo chücho. 18 Ishmael tsoronichen jiang na Havila tona Shur to meta yuta lo vancho, jijo Assyria lani Ejip na engkhüwoe. Ontena Abraham tsoronichen thanpoe jiang thüngina kontae vancho.

Esau ha Jakob oni Buko Ji

19 Abrham tsoe Isaak motsü ji heto: 20 Isaak na Bethuel Aramee ji otsolov osi Laban oyulov Rebieka ji soa vanathüng jo ombo nzyu zhüro tssocho. 21 Rebieka na otsoe n buko jina Isaak na OPVÜI thüngi ompvü randanicho, tole OPVÜI na ombo randan engae khi Rebieka na ngaro hani sicho. 22 Ompvüna nshümtso hancho osi oni n bukthüng na mmanina oni khonta vancho, osi ompvüna phyocho, "Ntio hetüv a lona tssoato?" Jitsü kona ompvüna OPVÜI engalo wocho. 23 Tole OPVÜI na ompvü ezocho, "Ni mmani jipolan eni jüa; Nina n ratao jipo eni bukuka. Tolea tsüka ji etho ejüvo tssovka; Osi eramo jina nungo ji benkavka." 24 Hojitoli ompvüna tsobuk yuta jani nshümtso ji bukcho, 25 eramo jijo rakia osi hümpvüa tüv tssocho, ji tsükona Esau to tsacho. 26 Enioto jijo Esau jonkhuk ji tsükyasi bukcho, ji tsükona Jakob to tsacho. Kvüthüng onte vancho sana Isaak jo nzyu rokro benthakcho.

Esau na Ombo Eran yenala

27 Eboerworo woniata mmhona rankacho osi Esau jo hapo kyon yantso ranben lo tssothimori kümcho, tokhatola Jakob jo kichungi yingto evan tüv kümcho. 28 Isaak na Esau chokacho, ntiotssole ombona Esau na riromo ji tsoa vamo ji tsükona, tokhatola Rebieka najo Jakob nzamo tssocho. 29 Tsüngon motsüngalo Jakob na orho hanjü vüpa vanle, Esau na ranbeno osi yicho. Osi ombo wondomo jina, 30 ombona Jakob ezocho, "A khangtsünga ka; nina rakia vüpa vamo ji tara apia." (jitsükona Edom to ombo tsacho.) 31 Tole Jakob na janlancho, "Nina ni eran ji apina anaha shi ni pivka." 32 Esau na ezocho, "Toka ni pivka, achüv sathüng aiyo eran ji ntio lyuvla?" 33 Jakob na ezocho, "Nina ni elan jiang apiv to echüma a ezodena." Hoji tsükona Esau na echümchaka ombo eran ji Jakob picho. 34 Hoji süijo Jakob na hümri tara tona hanjü to ombo picho. Ombona tsoyusi phanti yicho. Esau na ombo eran elan ji hojito tsütsasoracho.

Benkaden 26

Isaak na Gerar lo Vanala

1 Abraham echungo meta jilo otssi vara yithako jilo elani thanpo otssi vara lilancho. Isaak na Philistia mesao Abimelekh thüngi Gerar lo wocho. 2 OPVÜI na Isaak nduki heto ombo ezocho licho, "Ejip metae tiyia, ana vanle to ni ezovo meta shilo vana. 3 Shilo vana tona anaha ni ndüngo vamvü osi ni mmhayivka. Meta shiang hetopvü ana ni osi ni tsoronichen thüngi piv sala. Ana nipo Abraham thüngi phyochako ji benthokvüka. 4 Oyaki shantio kvüta sana jitata ni tsoronichen vanthukuka, osi meta shi hetopvü ana onte thüngi piv. Ana ni tsoronichen thüngi mmhayio ji esüa onte mmhayile to jipo topvü na chontav. 5 Abraham na ajancho zoa a yizüng osi shikhfü jiang topvü benphiwo ji tsükona ana ni mmhayivka." 6 Hojito lyui Isaak na Gerar lo vancho. 7 Hojilo evamo kyon jiangna kvüthüng ombo engacho sana ombona ombo engh ji ombo oyulovka to onte ezocho. Ombona ombo engh ka to n phyohungo jijo Rebieka ji elümoto opyon mmhomo ji tsükona ontena ombo lüngthasi ompvü khiv esüka to nchümo jina. 8 Isaak na hojilo yuta tara vansi sülo mesao Abimelekh na ombo kherüki na zechochile Isaak ha Rebieka oni jünata nzanta hungchochicho. 9 Hoji tsükona Abilemekh na Isaak tsathuki ezocho," Ompvüo ni engh la! Ntio tsükona ni oyulov ka to phyoala?" Tole ombona ezocho, "A engh ka to phyochocho a lüngthav esü küma to nchümo jinaka." 10 Abimelekh na phyocho, "Nino ntiolui ethüngi heto elhiala? A kyon ochona sana ompvü thüngi yipcho salivo nlan ji epono tssov." 11 Jisüijo Abimelekh na kyon topvü thüngi ezocho, "Ochona kyon shi tona ombo engh to jaktona sana chüthoku ka." 12 Isaak na meta jilo mojü thecho, tole hoji nzyu jo ombona mojü theo ji tata nzoa poni richocho, ntiotssole OPVÜI na ombo mmhayicho. 13 Omboji nkhon mmha lia elümoto ejüeli kümcho. 14 Ombona olyu osi mangsü elani phajaeden elümoto vamo jina Philistia kyon jiangna ombo pono omhyik rakia yicho. 15 Jitsükona ontena opo Abraham ekümo ombo phajae jiang na shani vao jükha jiang topvü hanzhüi sitacho. 16 Abimelekh na Isaak ezocho, "Ni ji e lona etho likata ni kümthaka, e meta sisi tsana." 17 Jitsükona Isaak na hoji lona eseni oyi Gerar hayi jilo yuta tara vancho. 18 Osi Abraham ekümo jükha shancho Philistine jiangna Abrham chüale hanzhüi siwo jiang ombona shanlancho. Isaak na jükha jiang topvü opona tsayio mying jiang topvü tsalancho. 19 Isaak phajae jiangna hayi jilo jükha shanle ojü yanchecho. 20 Gerar lo olyu enhyang jiang na Isaak olyu enhyang jiang thüngi khonta "Shijo e jükha ka" to phyotao jina Isaak na jükha ji "Khontaphen" to tsacho. 21 Isaak phajae jiangna thanpo motsünga shanlanle hoji lona ha khontao jina hojijo ombona "Nkhyingta" to tsayicho. 22 Ombona hojilona eseni oyi thanpo motsünga shanle hojilo jo n khontao jina hojijo "Etancho" to tsacho. Osi ombona phyocho, "Enhungo OPVÜI na etancho epithaka, küma shilona e jüolia ekümcheta yiv." 23 Isaak na meta ji sisi Beersheba lo yicho. 24 Osi hoji zümo jilo OPVÜI na ombo nduki heto ombo ezocho, "Aiyo nipo Abraham Potsow jika, ti-kyua; Ana nithüngi vamvüka. Aphajae Abraham thüngi a phyochak jiang benthokvü tsükona, ana ni mmhayiv osi tsoronichen khosha ni piv." 25 Tole Isaak na hojilo thanphen roni OPVÜI khümcho. Ombona hojilo vanphen tssocho osi ombo phajae jiang na jükha motsünga shanlancho.

Abimelekh Tona Isaak To Ntsata

26 Abimelekh na Gerara lona ombo ndungntssungpvüi Ahuzaah tona rasantsü esopvüi ji to sosi Isaak thüngi wocho. 27 Isaak na ombo engacho, "Ntena ovüngthüng jo athüngi n khyingtav vancho osi nte metaena a tsanthukcho, tona ntiolui enhünga jo a nduko rotachola?" 28 Ontena janlancho, "OPVÜI na ni ndüngo vana to ena ntsithaka, osi ete yutalo ntiona methak vatav to ena nchümala. Ena kvüto ni ntachicho sana jito ninaha en tachi to ni e chümchakthuk hungala. 29 Ena ntia ni n tssoyiv noyinga ni yithukcho. Osi OPVÜI na ni mmhayithaka to ena mmhona chethethaka." 30 Isaak na etsoyu methaki onte picho osi ontena tsoyutacho. 31 Ojyuato nyazüngi na otsük akvüna phyochak vatasi phyochak jiang echümchak theta methaktacho. Tothakale Isaak na pyonta salüm onte pia oshom ejoena pyontacho. 32 Hoji tsüngon jilo Isaak phajae jiang na ontena jükha shantao ji motsü ji rüa ombo ezotacho. Osi ontena phyocho, "Etena ojü shanrhüpthaka" 33Tole ombona jükha ji "Echümchak" to tsayicho. Hojito lyui yantsü ji mying ji Beersheba to tsayicho.

Esau Engh Metapoe Kyon Jiang

34 Esau na ombo nzyu zhüro tssoathüng ombona Hittite loroe otsük eni soa vancho, onteno Beeri otsolov Judith tona Elon otsolov Basemath to. 35 Ontena Isaak ha Rebieka oni eküm ji enungrathao eküm kümthukcho.

Benkaden 27

Isaak na Jakob Mmhayiala

1 Isaak ji sontsüngi omhyik juki sicho, ombona otsoe eramo Esau ji owo tsathuki, ombona "Atsoe yo!" to tsale, "Hao" to ombo yichocho. 2 Isaak na phyocho, "Enhungo a sonthako ji nina ntsia, osi nsungu achüv. 3 Ni lotssi osi lotsüng jiang bensi orae owo oso kotsüngi a hanisi yia. 4 Osi ana achokao so tara eküi oyi apia. Ana hoji tsosi a nchüthüng a mmha wokhao ji ni randankavka." 5 Isaak na hojito Esau ezoa vamo ji Rebieka na enga vancho. Ji tsükona Esau na sophano khochithakale, 6 ompvüna Jakob thüngi ezocho, "Nipona Esau ezo ji ana zothaka, 7 owo oso kotsüngi eküi hansi oyi apia, tona ana a nchüthüng OPVÜI mhadungo na ni randankavka to ezochoka. 8 A tsoeyo ana ntio ni ezov sana ji enga. 9 Owo nyanyanden jilo belev eni tatsüngi hansi yia, tona ana nipona chokatso tüv eküyivka. 10 Nina hoji khi hansi owo nipo pia tsothuka tosi ombo n chüthüng mmha ni randankaithuka." 11 Tokhatola Jakob na oyo ezocho, "Esau jo hümpvüa osi aiyo ofü enipa to nina ntsia. 12 Apo na a epyanphisi ana ombo ejithechiala to ntsia na mmha mekna abobo rhirandanka mpa yanchev." 13 Tole oyona janlancho, "Rhirandanka jo topvü a echi tssothoku ka, otsoeyo, yingto ana ni ezoato owo nyanyanro eni ji hana oyi apia." 14 Ombona owo khi hansi oyi pile ompvüna opona chokao han ekvüicho. 15 Tosi ompvüna Esau mpensü mmhontssov vayio jiang khi Jakob hanthukcho. 16 Elani ompvüna nyanyan fü jiang khi Jakob evono tona evüngo otsan n pao jianglo to phungtheyicho. 17 Hoji sülojo etsoyu mmhom tsoyani evao ji tona ompvüna hümri rungi evao jiang to khi Jakob picho. 18 Hojisüi jo Jakob na etsoyu jiang bensi owo "Apo" to tsacho. Tole ombona "Hao" "Nino a tsoe kümoe jila?" to engacho. 19 Jakob na ezocho, "Aiyo ni tsoe eramo Esau jika, nina a ezowo ji ephan tssothaka. Khokthei ana etsoyu ni methakio shi tsosi a randania." 20 Isaak na, "Nino kvütolui tata tssüsoa hungchola a tsoe?" to ezole Jakob na "Ni Potsow, OPVÜI na akyochichoka" to ezocho. 21 Isaak na Jakob ezocho, "A thüngi sena roa, ana epyanphi ni zevka, nino otsotso Esau memek?" 22 Jakob na opo thüngi sena wole opona ombo epyanphisi "Ni won ji Jakob esüa tolea ni evon shiango Esau evon esüa." 23 Ombona Jakob n chethecho, ntiotssole ombo evon jianglo Esau esüa otssan khyingo jina. Ombona randankav vanathüng elani 24 "Nino otsotso Esau memek? to engalancho." Tole ombona, "Aiyo Esau ka" to ombo ezocho. 25 Isaak na phyocho, "Etsoyu tara hansi oyi apia, ana tsosi ni randankavka." Jakob na hansi oyi picho osi ombona zükhi ha tara hana oyi picho. 26 Tole opo na ezocho, "A tsoeyo, sena oro a emanphia." Ombona opo emanphilo sena wole Isaak na osü jiang rhüm ji zoe ombo randankacho. 27 Ombona phyocho, "A tsoe shi sü rhüm mmhom shijo OPVÜI na a mmhayio oli ji rhüm esüa. 28 Potsow na potsüwoe na yentso rümjothoki ni li jiang mmhayithokuka, osi lizü kümthokuka! Ombona otssuk ozü osi tssüngthijü pvülyua ni pithokuka! 29 jipo thanpoe jiango ni phajaeden tssothuka, osi kyon khi ni mhadungo epyakthethuka, osi niyo tsoronichen topvüna ni mhadungo nkhümthevka. Ni n zehungo jiango rhyirandankathuka, osi ni nzamo jiango mmhayithuka."

Esau na Isaak Mmha Chonala

30 Isaak na mmha randanka ji thaki, Jakob na khoe yipvüto, Esau na oraena yicho. 31 Osi ombona ha etsoyu mmhom tssoyani hansi opo thüngi wocho. Ombona opo ezocho, "Apo, ni khi mmha a randankayithoku tsükona ana etsoyu tara hansi oro lika, nzansi khokthei tsoa." 32 Tole Isaak na, "Nino ochola?" to engacho. Tole ombona "Ni tsoe eramo Esau jika," to ezocho. 33 Hoji süijo Isaak na otsük mpümna enetsünga phyocho, "Tona enhr üngati ekümrümro lüngthae oro a tsothuko jijo ochola? Nina apipüngrolo ana hoji tsothaka. Osi ana a randan wokhao ji ombo randanka thaka, hoji tsükona enhungo kümali ombo echi tssothaka." 34 Esau na hoji zoale emhena owon chuka kya phyocho, "Athüngi ha ni mmhaji apia, apo!" 35 Tokhatola Isaak na janlancho, "Ninyuro jina oro a ejiphia ni mmha ji khithaka." 36 Esau na phyocho, "Yenjo enioto ombona a ejithechiala. Heto tsso jina Jakob to ombo tsacho sayia. Ombona a eran jiha akhiyicho tona kvütoli nchüngha a mmha ji akhiyiala. Nina a tsükona mmha enhyokae a n vayichoke?" 37 Isaak na janlancho, "Ana ombo wopan topvü phajaeden ni khümthukthaka. Ana tssukromümro osi tssüngthijü topvü ombo mmhayithaka. Enhungo ntia ni tssoyicheo tüv n lika, a tsoeyo!" 38 Toaha Esau na opo thüngi heto jonjia mungcho, "Apo, nina mmha motsünga tae vachoke? Anaha a mmhayia, apo!" to phyoa kyacho. 39 Jisülojo Isaak na ombo ezocho, "Ni tsükona potsüwoe na yentso n li, Osi ni tsükona lizü liha nli. 40 Nina yonri yakchia eküm vamvüka, ninyuro ezii tssoa. Tokhatola nina panlana tssona, ombona ni etancholo ni vachivka." 41 Opona mmha ji Jakob pi esio jina, Esau na Jakob tssakcho. Osi ombona nchümcho, "Apo chüi nungrata etünga, küma ana jithüng Jakob lüngthavka." 42 Tokhatola, Rebieka na Esau etüm ezi ji zoale, ompvüna Jakob thüngi kyon wothuka ezothukcho, "Nita Esau na ni sakav osi ni lüngthav methaka vanka. 43 Jitsükona a tsoeyo, ana ntio ni ezoana ji enga. Osi zakto apyao Laban thüngi Harani tsani yia, 44 Osi yuta tarajo jilo vansi, nina ntio elhicho sana ji nitana 45 mhechoa lüm n tssukrothüng nandangjo jilo vana. Jisüiti ana ochosana rothuka ni tsathukvüka. Ana enga taena a tsoe woniata monthukvü mek."

Isaak na Jakob Ji Laban Thüngi Yithukala

46 Rebieka na Isaak ezocho, "Esau engh jipopoe shiang a laka zechethaka. Jakob na ha Hittite eloe shiang ochosana soa vanchojo chüi lea asihungu."

Benkaden 28

1 Isaak na Jakob tsae monkhüm pisi ezocho, "Kanaan eloe soa tivankhe. 2 Ji thüngina jo Mesopotamia metae owo ni motsüi Bethuel thüngi owo nimo Laban otsolov yulo tsüka soa vana. 3 Thotsü Potsow khi ni yapiyanthan ji mmhayithuki ni tsoronichen vanthuki jipo elümoto opo ni kümthukvüka! 4 Ombona Abraham mmhayio ji esüa ni osi ni tsoronichen jiang mmhayithuka, osi Potsow na Abraham pio meta ntena evamo shi ni echi tssothuka!" 5 Isaak na Jakob ji Mesopotamia lo Aramia kyon Bethuel ji tsoe osi Esau ha Jakob oni oyo Rebieka opyao ji thüngi yithukcho.

Esau na Engh Thanpo Khilanala

6 Isaak na Jakob mmhayisi Mesopotamia lo engh yana yithukthaka to Esau na ntsicho. Elani Isaak na Jakob mmhayisi Kanaan eloe soa tivanle to tangcho toha Esau na zocho. 7 Osi Jakob na opoha oyo oni yi enga Mesopotamia lo yithaka toha ombona zocho. 8 Ji tsükona opona Kanaan eloe thüngi n mathatala to Esau na engathecho. 9 Hoji tsükona ombona Abraham tsoe Ishmael thüngi ovo otsolov Mahalath, Nebaioth oyenio ji soa vancho.

Jakob na Bethel Lona Omüng Emhala

10 Jakob na Beersheba lona khochi Harani yia vancho. 11 Osi eng rhetale ombona ntho meta motsünga jani hojilo esancho. Ombona olung nkhümsi yipa yicho. 12 Tole ombona omüngiji phopha motsünga na potsüo jana ronkachicho hungcho, osi lanbenden na hojilona jorochüngi tssoata vana hungcho. 13 Osi hojilo OPVÜI na ombo ndüngo phanthi vancho. OPVÜI na ombo ezocho, "Aiyo, Abraham ha Isaak oni Potsow OPVÜI jika. Nina vamo meta shiji ana ni osi ni tsoronichen thüngi pivka. 14Onteno limha shilo livero hetata to tssovka. Ontena onte meta ji nken akvüwoe tsükarankata yithoku, osi ni tona onte to yakchia ana jipo topvü mmhayiv. 15 Osi nchümchekhe, nina kümoe woana ana ni ndüngo tssov osi ni nkochei khi meta shilo ni sosi yilamvü. Ana ni epiv ephyo shiang n benkhamvü jo ana ni siv meka." 16 Jakob na yipjüngchi phyocho, "OPVÜI ji helo vana! Ombo shilo vana, osi aiyo hoji n tsiv vancho!" 17 Ombona kyua heto phyocho, "Shijo ntio ekyuthav meta hetüv ato? Potsow ki ji shi tssokhuka, osi Potsüwoe chüngiphen kipünglan ji shi tssokhuka." 18 Jakob na ojyuato jo nyazüngi na phanthi ombona nkhümo long ji tsakae nchümchephen long tssoa chümi vacho. Osi ombona hoji OPVÜI echi to khochaku tsükona hojilo oli ve thyujü ha phyangkacho. 19 Ombona meta ji Bethel to tsacho."Hojilo yantsü jijo nkolojo Luz to tsacho" 20 Osi Jakob na OPVÜI thüngi heto phyochak vacho: "Nina a ndüngo vani ana yentsa vamo shilo etsoyu, nipensü apia ankoha tssona, 21 osi ana apoki mmhona elani yilanchena, nino a Potsow tssovka. 22 Ana chekaphen long chümi lio shilojo ni khümphen ji tssovka, osi nina ntio apia sana jiang topvü lona ana tarochia ni pilamvü."

Benkaden 29

Jakob na Laban ki Janala

1 Jakob na yentsa lana owo engkhüwoe chivocho. 2 Tole jitopvü oli olyuden ethüm na jükha motsünga ji nkonchaki yipta vancho tüvlo chiwocho. Jüka ji emeni olong tsüphov na lhüpi jilona olyuden jiang ojü pia tüv jükha tssocho. 3 Olyu jiang topvü na sanrhyuana olyu enhyang jiang na longpyak ji seriphi ojü ranchei onte yuthukcho, osi olung jina khanlani vatacho. 4 Jakob na olyunhyang jiangji, "Okhümoden, nteno ntio meta lona rotachola?" to engacho. Tole ontena, "Eyio Harani na ka" to janlancho. 5 Jisüijo ombona "Ntena Nahor tsoe Laban ji ntsicho alo?" to engacho. Ontena, "Ho, ena ntsika" to ezocho. 6 Ombona elani "Ombo mmhona ve van?" to engalanle, Ontena "mmhona vanka" osi, "Zeta ombo otsolov Rachel ji shilo olyu rhükia roa vanaje" to ombo ezocho. 7 Tole Jakob na onte ezocho, "Enhüngajo nmyuhan osi olyu jiang phanrhyuv yuta n janhan küma ntena ojü onte yuthuktasi elani yantsolo sosi n wothuklamke?" 8 Tole ontena phyocho, "Olyu topvü shilo n vanra, osi olung ji khoe n sidem jo ena ojü n yuthukche." 9 Jakob na hojito onte thüngi janta vanathüng Rachel na olyuden ji phana chiyicho. 10 Kvüthüng Rachel na Laban olyu jiang phana chiyia Jakob na hungcho sana, ombona jükha jilo owo, olung ji seriphi sisi olyu jiang ojü yuthukcho. 11 Hojisülo jo ombona ompvü ntsüpsi ematha lona ekyav benkacho. 12 Osi ombona ompvü ezocho, "Aiyo nipo wopan ka, Rebieka otsokhyongo jika." Jisülojo ompvüna opo ezolo yunga yicho osi 13 ombona orüo Jakob won zoale yunga oro ombo nduki khayae ntsüpsi oki sosi yicho. Osi kvüto tssocho sana jiang topvü Jakob na Laban ezole, 14 Laban na phyocho, "Otsotsoka, nino a ejen oso motsünga ka." Jakob na hojilo choroa vancho.

Jakob na Rachel Tona Leah To tsükona Laban Benkatala

15 Laban na Jakob ezocho, "Niji a wopan tssoji ndani tajo elhijo ni n tssothuk. Ni jokheman jo kvütata tssovla?" 16 Laban na otsolov otsük eni vancho; eramo jijo Leah to tsacho osi nungo jijo Rachel to. 17 Leah jo omhyik ji eze mmhona tüv, tolea Rachel jo osak ophung mmhona opyon mmhoncho. 18 Jakob na Rachel jüpona nzana vamo jina, ombona heto phyocho, "Nina Rachel soa avanthuk na ana nzyu tiying elhi ni tssoyivka." 19 Tole Laban na ezocho, "Ana ni yaka thanpoe a n pihungala, küma shilo a thüngi vana." 20 Jakob na Rachel soa vamvü tsükona nzyu tiying elhi tssoyicho. Khatola Rachel ji ombo nzamo jina esüngaro tae vanchecho. 21 Jisüijo Jakob na Laban ezocho, "Yuta ji benthaka; küma nitsolov ji soa a vanthuka." 22 Tole Laban na yanpithan tokhu methaki otsük akvüto tsacho. 23 Tokhatola hoji zümo jilo ombona Rachel mekna Leah ji Jakob thüngi sosi wocho, osi Jakob na ompvü thüngi yipcho. 24 (Laban na Leah ezii Zilpah ha vancho osi hoji Leah phajae tssothoku picho.) 25 Ompvüo Leah toji Jakob na enyathüngti ntsicho. Hoji tsükona ombona Laban thüngi owo ezocho, "Nino ntiolui heto elhichola, aiyo Rachel lom yaka elhi ni tssoyicho. Tona ntioli a ejithechichola?" 26 Laban na janlancho, "Meta shilo shikfü ephan jo ota ji vüngina onyuro ji n yanpithukala. 27 Yanpithan tokhu hopta ji ben thuksa, tosanati ana zesi nina nzyu tiying lomyaklamvü to tssona Rachel ji ni pivka." 28 Jakob na hoji khichocho, osi yanpithan tokhu ji thakale, Laban na ombo otsolov Rachel ji Jakob engh tssothoku picho. 29 (Laban na ombo eziiloroe Bilhah jiha Rachel phajae tssothoku tsükona picho.) 30 Jakob na Rachel thüngina ponilan tssocho osi ombona Leah thünginajo Rachel nzamo tssocho. Jitsosi ombona Rachel lomyak ndana nzyu tiying Laban elhi tssoyilancho.

Jakob Tsoeoro Jiang

31 Jakob na Leah ji lümato n chokana Rachel ekyungo nzanala to OPVÜI na ntsiale, OPVÜI na Leah jo otsoeoro lithuksi, Rachel jo otsoe n lithukcho. 32 Leah na ngaro hani tsokhying bukcho. Ompvüna phyocho, "OPVÜI na a ezüp ji hungthaka, küma enhungo arapvü na anzamvü tssovka"; to phyoa ompvüna Reuben to tsacho. 33 Ompvüna ngaro hanlani tsokhying vanlancho. Ompvü na, "Aiyo a tssakcho to OPVÜI na ntsiwo jina ombona otsoe shiha apilanthaka" to phyoa Simon to tsacho. 34 Elani ompvüna ngaro hanlani tsokhying buklancho. Ompvüna, "Enhungo ana tsokhying otsük ethüm vanithako jina a rapvüna chüng chüngkata a nzamvü, to phyoa Levi to ombo tsacho. 35 Elani ompvüna ngaro hanlani tsokhying tsüka buklancho. Osi ompvüna 'Nchüng shilo jo ana OPVÜI thüngu' to phyoa Juda to ombo tsacho. jitosi jo ompvüna ngaro n vamvü sicho."

Benkaden 30

1 Tokhatola Rachel na jo Jakob tsoe nbukcho. jitsükona ompvüna ota omhyik rakia, Jakob ezocho, "Otsoeoro apia, to mekna chüi sivka." 2 Tole Jakob na Rachel thüngi lüm tsuka phyocho, "Ana Potsow thung jo n tssoche. Ombona otsoe ni n piala." 3 Ompvüna phyocho, "shilo a ezii Bilhah vanka, shi thüngi yipsi ompvü khi atsokhying a bukithuka. Hojitolui ompvü yakchia ana opvü-oyo kümvü." 4 Hojito phyoa ompvüna Bilhah ji ombo thüngi pia ombona khi ponilan tssothukcho. 5 Bilhah na ngaro hani Jakob tsokhying bukicho. 6 Tole Rachel na phyocho, "Potsow na athüngoe thethaka. Ombona arandan engae otsoe apithaka." Jitsükona ompvüna Dan to ombo tsacho. 7 Bilhah na ngaro hanlani Jakob tsoe enioto buklancho. 8 Jitsükona Rachel na phyocho, "Ana ayenio thüngi khonda etssov khon tacho khatola ana khyothaka." to phyoa Naphatali to ombo tsacho. 9 Leah na otsoe n liv sithaka to ompvübo ntsiale ompvü na phajae Zilpah ji Jakob engh tssothuk cho. 10 Tole Zilpah na Jokob tsokhying bukicho. 11 Leah na, "Ana ha oton lia" to phyoa ompvü na Gad to tsayicho. 12 Zilpah na otsoe Jakob bukicho, 13 tole Leah na "aiyo kvüta a emathacho ato, enhungo eloe topvüna emathae to a tsav" to phyoa Asher to ombo tsacho. 14 Omüm li eri etüngathüng Reuben na oli wole ngaro ehamo tüv tssüngthi wo (Mandrakes) hungcho osi ombona oyi oyo Leah picho. Rachel na Leah ji, "Nzansi ni tsoe ji oha tara apia" to ezocho. 15 Tole Leah na janlancho, "Nina a rapvü a rechoyisi elani a tsoe ji oha ji ha chonlanake?" Rachel na janlancho, "Nina ni tsoe ji oha ji apina nchüng zümo jo Jakob thüngi ni yipthukvüka." 16 Jakob na mmyulani olina yia vanle Leah na chivo ombo nduki ezocho, "Nchüng zümo jo nino a thüngi yipvü sala, ana a tsoe ji oha ji khi ni shithaka." Tole ombona hoji zümo jilo ompvü thüngi ponilan tssocho. 17 Potsow na Leah randan ji engae ompvüna ngaro hancho, osi Jakob tsokhying mongo to bukicho. 18 Leah na, "Potsow na a yantsothaka, ntiotssole ana a phajapvüi ji a rapvü picho." to phyoa Issakhar to ombo tsacho. 19 Leah na ngaro hanlani otsoe tiroko to Jakob bukicho. 20 Ompvüna phyocho, "Potsow na yantso mmhom a pithaka. Enhungo ana tsokhying tirok ombo bukithako jina a rapvüna kyongkata a nzamvüka." Osi ompvüna Zebulum to ombo tsacho. 21 Okhao jo ompvüna tsolo tsüka buki Dinah to ompvü tsacho. 22 Jisüi jo Potsow na Rachel nchümchecho; ombona ompvü randan engayia ngaro ehamo etho ompvü picho. 23 Ompvüna ngaro hani tsokhying bukcho. Ompvüna phyocho, "Potsow na otsoe a pia a n bennzi osi yikra ji khi a siyithaka. 24 OPVÜI khi tsokhying thanpo a pilanthukvüka; hojito phyoa ompvüna Joseph to ombo tsacho."

Laban Thüngina Jakob Khakchiala

25 Joseph bukcho süi Jakob na Laban ezocho, "Ana oki elani yivka ayithuka. 26 Ana elhi ni tssoyia mmyochothako a engden osi otsoeden jiang apia ayithuka. Ana kvütata elhi mmhona ni tssoyithakcho sana ji nina ntsia." 27 Tole Laban na ombo ezocho, "Ana heto phyovka; Nina vamo ji yakchia OPVÜI na ammhayithaka to ana ratsen yakchia ntsithaka, 28 Ana ni jokheman jiang etsüngi ni pivka." 29 Jakob na janlancho, "Ana kvüta elhi ni tssoyithakcho sana osi ana zecho yakchia ni tssiden kvüta rankathakcho sana ji nina ntsia. 30 Ana n yithüng nina ejükaro lioji emhokthav rankathaka, osi ana küwoe khochia na topvü lona OPVÜI na ni mmhayithaka. Enhungo anaha a echi eyamvü yuta janthaka." 31 Laban na "Ana ntio ni pivla?" to engacho, tole Jakob na "Ana ntia jokheman ethev n li; nina shi engana elani ana ni tssiden jiang ni zeyilamvü; 32 Nchüngo ana tssiden jiang yana osi olyu enikvü tona Nyanyan baraku to kvüta jüana khichevka. Hojiang tae ana jokheman tssoa khivka. 33 Aiyo ntsa lona evan memekana nina sülamiti ntsivka. Nina ajokheman ji zeta roathüng hojilo nyanyanro n barako osi olyu n yiko jitüv jüa tssona jiang jo ana efücho to ntsi khia." 34 Tole Laban na "Hoto tssona, nina phyoji ephan tssotavka" to phyocho. 35 Tokhatola hoji tsüngono jo Laban na ombo tssiden jilo nyanyan opung baraku mekana tsükrhav jiang tona okyu pyakrhüv osi olyu enyiku jiang topvü khiche sicho. Osi ombona hojiang ji ombo tsoe jiang zeyata vanthuksi 36 tssiden thanpo jiang sosi Jakob nkachoa metapoe nchuk ethüm yentsa woe sicho. Osi jilo enhyo tsiden jiango Jakob na zeyata vancho. 37 Jakob na almond khero tona thanpo khero to ekhüpi ejoma nrhaki sisi baraka kümthukcho. 38 Ombona hojiang ji olyu jiangna ojü yuphen ojen jiang mhadungo vayicho. Ombona hojilo evao jijo ekümrüm jiang na kvüthüng ojü yulo jilo roa sana jithüng phankatao jina hojilo vayicho. 39 Ntiotssole la tona nyanyan jiangna khero barako jiang ndüngo na phankatae nronjüa na woro jiang ji baraku nrocho. 40 Jakob na olyu jiang ji nyanyan jiang lona khotae vanthukcho, osi olyu jiang ji Laban tssiden lo enyikvü osi baraku jüwo jiang thüngoe zechiwo vanthukcho. Hojitolui ombona ombo tssiden thichethukcho; osi Laban tssiden lona khotae vanthukcho. 41 Ekümrüm belev jiang na phankata hunga na Jakob na zakto khero jiang ji onte yuphen jüjen ji mhadungo vayicho, hojitolui khero jiang yulona ontena phankatacho. 42 Khatola ekümrümo kvüritsangrio jiang ndüngo jo ombona khero jiang n vayicho. Osi yuta esüngaro tae tssoa Laban tssiden jo ekümrümo kvüritsangrio jiang tae kümi sicho, osi Jakob ekümrümo jo beleo jiang tae kümi si to tssocho. 43 Hojito lyui omboji elümoto ejüeli kümcho; osi Ombona tssiden elümoto vancho, elani phajaeden osi odh, Gadho toha elümoto vancho.

Benkaden 31

Jakob na Laban Thüngina Tsani Yiala

1 Laban tsoe jiangna "Jakob na opo eli topvü khithaka, osi ombona elio jiang topvü opo eli lona khichecho" to phyota Jakob na zocho. 2 Laban na ovüngthüng esüa ombo thüngi n mathav zechecho, 3 osi OPVÜI na ombo ezocho, "Ana ni ndüngo tssovka, nipo osi ni wopan jiang metae yia." 4 Hoji tsükona Jakob na Leah ha Rachel oni ji oli ombo tssiden vamo jilona oro ombo ndukle to ezocho. 5 Ombona onte ezocho, "Nipona ovüngthüng esüa a n khyingu sithaka to ana zechethaka; khatola apo Potsow jina a ndüngo vana. 6 Ana etho topvü theta nipo elhi tssoyicho to niniata na ntsia. 7 Toaha ombona a ejithechia a jokheman ji yenjo taro dungphithaka. Khatola Potsow na ombo khi a n tachithukcho. 8 Laban na kvüthüng 'Nyanyan baraku jiang ni jokheman tssovka' to phyoana tssiden topvüna baraku nrocho. Elani ombona 'Nyanyan serav jiango ni jokheman tssovka' to phyoa na tssiden topvü na serav nrocho. 9 Hojitolui Potsow na nipo tssiden lona tssiden khiche apicho." 10 Ekümrümo jiang phankata yutalo ana omüng emhacho, Nyan yan obung jiang topvü baraka osi serav tae hungcho. 11 Potsow lanben na omüngi na heto a ezocho, "Jakob, ana 'Hao' to yichole ombona a ezolancho, 12 'Zeta, phantalo ewoe nyanyan obung jiang topvü baraku osi serav tae.' Shiang hetopvü ana tssoala, ntiotssole Laban na ni thüngi ntio tssoa sana ana topvü ntsithaka. 13 Aiyo nina Bethel lona nduko Potsow ji, Nina nchümchephen olung chümi olive thyujü phyangkata nthoche vasi echümchak evao ji. Enhungo ni ebuk meta jilo eyiv tsükona methaka." 14 Rachel ha Leah onina Jakob janlancho, "Apo thüngina ena ehungo ntia n liv sithaka. 15 Ombona jipopoe esüa e zetala. Ombona e yencho, osi e man jiha topvü ombona ezikhanthaka. 16 Enhungo Potsow na apo ejüeli lona khicheo ejüeli jiang shiango topvü ete echi, jitsükona, Potsow na ntio ni ezocho sana ji ephan tae tssoa." 17-18 Jitsükona Jakob na Kanaan lo opo metae eyiv tsükona methakcho. Ombona ombo tsoeden osi ombo engh jiang odh mankvüi tsankathukcho, osi ombo tssiden topvü osi ombona Mesopotamia lona hungwo ejüeli topvü ovüngna yia vanthukcho. 19 Laban na ombo olyu jiang tssan mmyaelo woathüng Rachel na opo ohalong jiang efüicho. 20 Jakob na mphoa khochi tsamo jina Laban ejithechicho. 21 Ombona ombo echi topvü hansi zaktole yi sicho. Ombona Euphrates zhükvü ji bankae phunglan meta Gilead lo yicho.

Laban na Jakob Phanala

22 Tsüngon ethüm süloti Jakob na yithako ji Laban na zocho. 23 Ombona ombo kyon jiang sosi tsüngon tiying phani owo Gilead lona phayacho. 24 Hoji zümo Potsow na omüngina Laban ezocho, "Nti lonaha Jakob ti-ekhenthukle." 25 Jakob na phunglani oyi tsankae vancho. Osi Laban jo ombo kitsük nzo Gilead phunglani meta jiang lo vancho. 26 Laban na Jakob ezocho, "Nino ntio tssona a ejithechia atsolov jiang ritssolona rhümhacho esüa sosi tsanchola? 27 Ntiotssona nino a ejithechia a n zona mphoa tsanchola? Nina azocho saliwo ana khendenzhü osi tsüngrüngu won theta longshita olani ni phana rov. 28 Nina a orüo jiang, osi atsolov jiang tia emanphia pyonta salüm a npithukcho. Jijo zhüva elhi! 29 Ana ni tssatssothoku etho lia, tokhatola nsümo nipo Potsow jina kvütoliha ni tiekhenthukle to a tangcho. 30 Nina oki eyiv nhyaktsüka vamo jina tsanchoto ana ntsia, khatola nino ntio tssona oha long jiang efüchola?" 31 Jakob na janlancho, "Nina nitsolov jiang akhiyiv tsaya akyucho. 32 Tokhatola e yulo ochona sana ni oha long jiang hancho tssona chüthok-khuka. Ena ni echi ntia khekhicho sana shilo eboetso shiang ehungo na yana." Rachel na Laban oha long jiang efüio ji Jakob na ntsicho. 33 Laban na owo Jakob süranki jiang shyui zecho, osi ombona Leah süranki tona phaj apvüi otsük eni ji süranki to zeyicho, toaha ombo Potsow jiang n yanchecho. Jisüijo ombona Rachel süranki wocho. 34 Rachel na oha long jiang efücho osi ompvüna odh mankvüi khokthephen jiang kupi vae khokthezhüi vancho. Laban na süranki topvü yanrhyua ha n yanchecho. 35 Rachel na opo ezocho, "Tsüphoe, a thüngi lüm ti-tsuka, aiyo mmen yia vamo ji tsükona ni mhadungo n phanthichetaka." Laban na yanaha ombo oha long jiang n yanchecho. 36 Tole Jakob lüm tsuki phyocho, "Ana ntio nlan tsüphov tssochola?" Ana ntio shikhfü yesocho nina heto araphanala. 37 Nina a tsüitsailan topvü shyui zewo jilona ni echi ntio shyuchechola? Shilo khichuka, tona ni kyon tona akyon tona zesi eni ocho elan sana phyothukuka. 38 Ana nzyu mekyu ni thüngi vancho osi ni olyu, nyanyan jiang na rotssoroni n tümjakhan, osi ana ni tssiden lona ntia khiche n tsohan. 39 Orae ekümo na olyu rümana hojijo ana ekhyimcho. Ana a nlan mek to phyoa hoji oyi ni ejücho mek. Nina zümolo lea engo lea ntio mona sana ana ekhyimle to achonicho. 40 Yuta elümoto lo ana eng etsso zalanchia osi etssük zümo zalanchicho. Ana eyipvü tia n hungcho. 41 Ana nzyu mekyu ni thüngi vamoji hotüv ekümo vancho. Ni tsolov onyeni man nzyu taro mezhü za lomyakcho osi ni tssiden jiang nzyu tiruk rhükicho. Toaha nina a jokheman ji yenjo taro dungphicho. 42 Amotsüi jiang Potsow osi Abraham Potsow jina a ndüngo n vancho salivo, nina khejüng a yithukthakvü. Tokhatola Potsow na a ezüp osi ana ntio tssochosana ji hungthaka, osi nsümo ombona ombo yitsso ji rothukcho.

Jakob ha Laban Oni Ntsatala

43 Laban na Jakob ezocho, "Eloe shiango a tsolovden, onte ngaro jiango a echi osi tssiden shiangha a echi. Otsotso phyotana shilo hunga vancho topvü a echi tae. Khatola ana a tsolov osi onte tsoe jiang vasi ntia ethev n lio jina, 44 ana ni thüngi ntsata a vahungala. Ete ntsata ji chekaphen olong penrhyui vatavka." 45 Tole Jakob na olong khi nchümchephen tssoa chümi vacho. 46 Ombona ombo kyon jiang ezoa olong hanrhyuthuki nshakachi vathukcho osi hoji ndüngona etsoyu tssotacho. 47 Laban na hoji Jagar Sahadutha to tsacho, khatola Jakob najo Galeed to tsacho. 48 Laban na heto Jakob ezocho, "Olong nsharyuo shijo enita tsükona nchümchephen tssovka." Ji tsükona meta ji Galeed to tsacho. 49 Laban na hetoha phyocho, "Eni pyontae vanathüng lea OPVÜI mhyik ji ete pono vanthukvüka. Ji tsükona meta ji Mizpah to ha tsacho. 50 Laban na elani heto phyocho, "Ana ni n hung lea nina a tsolov shiang khangshia osi eloe thanpoe soa vanchojo Potsow na ezeta vanka. 51 Ana eni yutalo olong nshae vao jiang shiangka osi shijo nchümchephen long jika. 52 Olong nshao shiang osi nchümchephen long jo shi heto shiang yakchia nchümchetavka. Ana kvüthüngha shi yaki ni halo chirov meka, osi nina ha shi yaki a halo rhorov meka. 53 Abraham Potsow osi Nahor Potsow jina eni yuta lo oyi etssoyivka." Tole opo Isaak na khümo Potsow ji myingona Jakob na hoji ntsata ji benphiv to phyochakcho. 54 Ombona ekümrümo lüngthae phunglan jilona othan pisi ombo kyon jiang etsoyu tssolo tsacho. Ontena tsotasi ji zümo jo phunglan jilo yiptacho. 55 Ojyuato jo Laban na nyazüngina orüo jiang tona otsolov jiang to pyonta salüm emanphisi, kholani oki yicho.

Benkaden 32

Jakob na Esau Nduku Methakala

1 Jakob na yia vanathüng, olani na lanben ejoma na ombo ndukcho. 2 Ombona kvüthüng onte hungcho sana ombona phyocho, "Shijo Potsow esanphen"; ji tsükona ombona meta ji Mahanaim to tsacho. 3 Jakob na Edom metae ota nduko ovüngna yithenpvüi wothukcho, 4 osi ombona heto phyole to onte ezocho, "Ni jancho ezoe ni phajae a Jakob shina a pvüi Esau thüngi heto ni ezoala, ana Laban thüngi vana vansi zakto n yichev enhüngati yiala. 5 Ana mangsü, Gadho, Olyu tona Nyanyan elani phajaeden to vanra. Tsüphoeyo, nina athüngi mmhontav to eyiloa yithenpvüi yithukala." 6 Tole yithenpvüi jiangna Jakob thüngi elani oyi ezocho, "Ena nita Esau thüngi wotale ombona olani na ni nduko roa vanthakcho. Ombona kyon owo nzo mezhü sosi tsata." 7 Jakob na hoji zoe ekhentsünga wongkhyucho, osi ombona ombo razhü jiang, Mangsü, Olyu, Nyanyan tona Odh to jiang ji okho eni chichecho. 8 Ombona nchüm cho, "Esau na oro razhü ovüngo ji haa tssona enioto jina tia tsanchov." 9 Jitosi Jakob na randancho, "Amotsü Abraham Potsow, apo Isaak Potsow, a randan a engayia! Potsow, ninajo a metae a wopan jiang thüngi yile to a ezocho, osi nina olan topvü mmhonthoku to phyocho. 10 Nina ni nri a thüngi khonzan osi longtsüka a ejüthako ji ana mancho na meka. Ana Jordan zhükhfü ji ntia n thena jarung taena pankacho. Osi enhungo ana razhü eni shi sosi elani yithaka. 11 Ana randanala, ata Esau khe lona a shanchoa, ombona e topvü elo nungoe osi nungori shiang nzo roe esilo tsacho tssov. 12 Nina a tsükona olan topvü mmhonthoku osi, ochinaha n khacheo tsoronichen jürani hajang tata a mmhayiv to phyochak ji ti-mhechoa." 13-15 Ombona jilo zümoa yipsi ota Esau epiv tsükona ombo tssideni na, olyu okyu nzo eni tona obung mikyu, Odh roso thümro, mangsü zhüro elani mangsübung taro, Gadho okyu mikyu tona obung taro to khichecho. 16 Osi ombona hojiang ji oden chicherae oden akvüto phajae tsüka rhükithukcho. Ombona onte ezocho, "Avüngina yitava, osi oden jiang yutalo pothe vatava." 17 Ombona phajae ovüngo ji heto yizüng picho, "Ata Esau na nte nduki 'nte pvüi jo ochola? nteno kvüi yitala? osi nte mhadungi ekümrüm shiang OPVÜI jo ochola to nte engana, ntena heto janlantakhe, 18 "Shiango ni phajae Jakob echi. Ombona ombo pvüi Esau thüngi yantso tssoa shiang hanthukala. Jakob ha e sülani tsata." 19 Hoji esüa tssiden enioto jiha, ethümoto ji tona oden topvü ezei jiang thüngi hojito ezoracho."Shi heto shiji ntena kvüthüng Esau nduka sana ombo ezonrüngvüka. 20 Ntena, "Hoka, ni phajae Jakob ha e sülani tsaka." Jakob na jo, "Ayantso jiang khi ata emathathokuka osi ana kvüthüng ombo nduka sana nlan asiyiv tssov," to nchümcho. 21 Hojito ombona yantso jiang ovüng na yithuksi zümo ji hojilo yipchocho.

Peniel Lona Jakob na Eyatala

22 Hoji zümo Jakob na phanthi ombo engh otsük eni ji, osi ombo yingaloroe eni ji elani ngaro otsük taro ekha jiang to sosi Jabbok zhükfü ji pankatacho. 23 Tolea ombona onte topvü onte pankatadenthuksi elani ombona ehamo osi eso jiang topvü chiyithukcho, 24 ombo sülani ombo tae vancho. Tole kyon tsükana zümo tona ombo thüngi oro wonchi jana eyatacho. 25 Tole kyon jina ombona n khyoala to ntsiale Jakob ji phijümta lo ejüpthechiyicho, tole chüngta lukphiyicho. 26 Hoji süi jo kyon jina, "Wonchiaka ayithuka" to phyocho. Tole Jakob na, "Nina a n mmhayithüng jo ni n yithuk" to ezocho. 27 Kyon jina "Ni mying jo ochola" to ombo engacho. Tole ombona "Jakob ka" to janlancho. 28 Tole kyon jina "Nimying jo enhungo Jakob tssov meka. Nina Potsow thüngi osi kyon thüngi rotathaka; osi nina khyothaka; jitsükona nimyingjo enhungo Israel tssovka" to ezocho. 29 Jisüijo Jakob na "Enhungo ni mying ji a ezoa" to ezocho. Tole kyon jina, "Nino ntiolui a mying ji ni ntsihungala?" to phyosi ombona Jakob mmhayicho. 30 Jakob na phyocho, "Ana omha omha Potsow thüngi nduktathaka, toaha ana elani eküm vanala"; hojito phyoa ombona meta ji Peniel to tsacho. 31 Jakob na Peniel lona khochiale eng chirocho, osi ombo ji ophina eno jina ojo esunga yicho. 32 Jakob ji phijümtalo ekayio jina enhünga jana lea Israel shiango phiso ozü jijo n tsoala.

Benkaden 33

Jakob Na Esau Ndukala

1 Esau na ombo kyon nzo mezhü sosi etsao ji Jakob na hungchi ombo ngaro jiang ji Leah, Rachel tona ombo yingaloroe nchyu eni jiang to jantayia zethukcho. 2 Ombona ovüngtssoa yingaloroe jiang vüngthukcho, jisülo Leah tona ompvü ngaro jiang, jisülojo wokhao tssoa Rachel tona ompvü tsoe Joseph to tssothukcho. 3 Jakob na ota ndukale zaktole ovüngna owo likoe yenjo tiying epyakthecho. 4 Tokhatola Esau na yunga oro ombo nduki ombo khayacho, osi eyulo ntssüpicho. Jisülojo woniatana kyatacho. 5 Esau na eyingoe zele eloe jiang tona ngaro jiangto hungcho, hoji tsükona ombona, "Ni nzo eyio shiango ochoangla?" to engacho. Jitsükona Jakob na ezocho, "Tsüphoeyo, shiango Potsow na anzana a mmhayicho ngarodenka," 6 Tole yingaloroe jangna onte ngaro jiang nzo sana oyi epyakthei yikrachitacho; 7 Jisülo Leah tona ompvü nargo jiang to yicho, osi wokhao tssoa Rachel tona ompvü tsoe Joseph tona chiyi epyak thetacho. 8 Tole Esau na engacho, "Tona razhü thanpo ana nduktemo jiango kvütola, osi ntio etssola?" Jakob na ezocho, "Ni khi emathata ekhichothuku tsükona ka." 9 Tole Esau na phyocho, "Anaha etsson lika, onyuro, to nina tssona vata." 10 Jakob na ezocho, "Meka, nina athüngi ni emathacho tssona nzansi ana ni yantso jiang khia. Ana ni mha hungwo shijo a tsükonajo Potsow mha hungcho esüa tüvka, osi enhungo nina heto athüngi mmhontao jijo elümoto mmhona. 11 Nzansi ana ni hanio yantso shiang khichoa; Potsow na a nzankhünga ana lio shiang hetopvü ombona a pichoka." to phyoa Ombona n khithüng jo Jakob na rikata pia mungcho. 12 Esau na phyocho, "Etena methaki yitavka, ana nte vüngi na yivka." 13 Jakob na janlancho, "Ngaro jiango n khyohan, elani tssiden jiang lo olyuro osi nyanyanro jiang ha nchünmchev lia. Onte ji enga tia khangshia olan tsathukana chürav. 14 Nzansi a vüngi na yia vana etonandang tssiden shiang osi ngaro jiang nzo oyi Edom lona ni phayavka." 15 Esau na ezocho, "Toka a kyon ejoma ni nzo tsswothukvüka." Tole Jakob na janlancho, "Ntia hojitüv ti wonkhyua, ana eyilo jijo ni emathathuku ji tae." 16 Jitsükona hoji nchuk Esau na khochi Edom lo yicho. 17 Tokhatola Jakob na ombo tona otsoeden jiang to mmhiphen Sukkoth lo oki tssolo yicho. Jitsükona meta ji Sukkoth to tsacho. 18 Jakob na Mesopotamia lona kholani yio ji oyi Kanaan meta lo Shechem yantsü ji mmhona jani yantsü ji tssalo oli motsünga lo vancho. 19 Ombona hoji liko ji shechem opo Hamor thüngi janti rang nzoa na shicho. 20 Ombona hojilo khümphen roni Israel Potsow El, ji mying tsayicho.

Benkaden 34

Dinah Thüngi Worio Ji

1 Tsüngon motsüngalo Jakob ha Leah oni otsolov Dinah na Kanaan eloe ejoma janthechilo wocho. 2 Hoji meta jilo OPVÜI tsüka Hivite kyon Hamor tsoe Shechem jina ompvü hungale, ompvü rhümae n lan tssocho. 3 Tole loroe ji elümoto opyon mmhona ombona zecheo jina ompvü khi ombo nzanthukvü lanka yana yicho. 4 Osi ombona opo ezocho, "Nina loroe shi a eng etssov a khiyia." 5 Ombona otsolov yikrathuko ji Jakob na zoaha, ombo tsoe jiang topvü oli tssiden jiang rhükita vamo jina onte n yithüng jo yingto vancho. 6 Shechem opo Hamor na Jakob thüngi thyutalo wocho, 7 tole hojithüng Jakob tsoe jiang na olina yita vancho. Ontena hoji yivon zoale, Shechem na Jakob otsolov ji thüngi n lan tssoa Israel kyon jiang n khanzio jina elümoto lüm tsuktacho. 8 Hamor na Jakob ezocho, "A tsoe Shechem na ni tsoe ji thüngi nzantae sika; nzansi oni vantathuka. 9 Ni kyon tona a kyon to lolan tssotao tüv ntsata vatavka. 10 To tssona nina e meta shilo, helo lea helo lea ni vanhungo lo vancheta, osi ni etancho shisho khophia ejüeli vakuka." 11 Shechem na Dinah opo ha opyao jiang to ha ezocho, "Ntena a yi a engayina nte phyocho nte piv. 12 Ntena ntio yantso khihunga na a zoa, osi oman ji nte eto ntssona a ezoa; ntena tae ompvü soa a vanthukna ntena ntio phyoana nte pivka." 13 Shechem na onte oyuloe Dinah ji yikrathuko jina Jakob tsoeden jiang na Shechem tona Hamor to ji kyakthechia janlancho. 14 Ontena ezocho, "Ena e oyulov ji tseni n siwo jipo thüngi yanpithukvü jo yikra lia. 15 Jitsükona nina ni kyon eboetso tsenia e esüa kümvü to phyochak na ntena phyoji engavka. 16 Hojito tssona ete lo lolan tssotavka. Ena nte yulo vamka osi ete ji khümtsüng motsünga kümvüka. 17 Khatola ena phyo shi ntena khichoa tseni n sia tssona ena ompvü sosi helona khoe yiv." 18 Hoji ntsata ji mmhona to Hamor ha Shechem ombotsoe na nchümcho, 19 osi khyingroe jina ntsata ji ephan zakto ntio phyatacho sana tssocho, ntiotssole ombona Jakob otsolov ji lüma vancho. Ombo wopan lo ethelan eli kyon ji ombo tssocho. 20 Hamor ha Shechem ombo tsoe na yantsü pikhfü ji ndüngo etssirhyuphen jilo owo oyamo kyon jiang ezocho. 21 "Kyon shiango oshomden ka, ete metalo noyinga vanthuka osi rümphithuka. Metana ha etssonka. Etena onte otsolov jiang soa vam, etena ha onte thüngi yanpithuk to tssovka. 22 Tokhatola kyon shiangna ete yolo vani lolan tssotav jo etena eboetso tseni onte tssolan esüa benphi sanati tssochev. 23 Onte ekümrümo tona ejüeli topvü to ete echi tssovsa mekchoke? Hoji tsükona ontena ete ndüngo vancheo methak-tava." 24 Yantsü jilo evan topvü na Hamor ha Shechem onina phyoji khichocho; osi eboetso topvüna tseni sitacho. 25 Tsüngon ethüm sülojo eboe jiang tseni sioji okhvü jiang tia n poham Dinah opyao, Jakob tsoe Simon ha Levi onina ochinaha oni ntsina yonri bentasi yantsüi owo eboe topvü, 26 Hamor ha Shechem oni phata lüngtharae sicho. Osi ontena Shechem kina Dinah ji khi sotasi tsani sitacho. 27 Hojito lüngtharasi Jakob tsoe thanpoe jiang na onte oyulov yikrathuko ji nlia yantsü ji shyui khitacho. 28 Ontena yantsüi osi oli tssiden, mangsü kurü tona thanpo ntio liana topvü khitacho. 29 Ontena oman elio tsütsailan topvü khitacho, eloe tona ngaro to jiangha rhümhakhani khitasi oki jianglo licho topvü khitacho. 30 Jakob na Simeon ha Levi onita ezocho, "Ntena a ezüp yanchethaka, enhungo Kanaan kyon, Perisite kyon osi meta shilo kyon topvü na a tssaku. Ana kyon khosha n van; ji tsükona onte topvü khümtsütae a sakacho jo ete wopan topvüto emom." 31 Tole onina janlancho, "Ena e oyuloe ji eloesha esüa thama kyon khi n tsütsathukche."

Benkaden 35

Potsow na Bethel Lona Jakob Mmhayiala

1 Potsow na Jakob ezocho, "Zakto Bethel lo woa osi hojilo vana. Nina nita Esau thüngina tsana vanathüng nduko Potsow shi tsükona thanphensa ronkachia." 2 Jitsükona Jakob na ombo ndüngo etsso osi ombo wopan jiang topvü thüngi ezocho, "Ntena jipopoe Potsow elio jiang sirava, osi ntepopo ntssüngche mpensü ethan ekatava. 3 Etena meta shilona khochi Bethel lo yitavka, osi Potsow ochona a ezüp yutalo a nzana osi ana kui woana a ndüngo vanpvü sana hoji thanphen hojilo ronkachivka." 4 Hoji tsükona ontena jipopoe Potsow varao jiang osi jiangna ehamo oyuk-osen jiang topvü Jakob pitacho. Jakob na hojiang ji Shechem ndüngo lümro dung ji kupi shothei siracho. 5 Osi Jakob tona ombo tsoeden to jiang na khochiale, hoji nkonjano yantsü jianglo kyon jiang ekhentsüngracho, osi ontena onte n phancho. 6 Jakob na ombo kyonden jiang nzo Kanaan meta Luz lo chiyicho, hojijo enhüngajo Bethel. 7 Ombona hojilo thanphen roni Bethel Potsow mying tsayicho, ntiotssle ombona ota thüngina tsana vanathüng Potsow na hoji lona ombo ndukcho. 8 Elani Rebika nijüpo Deborah ji chüi Bethel jolowoe lümro dung ji kupi shothecho. Jitsükona hoji dung jijo "Ekya lümro dung" to tsacho. 9 Jakob na Mesopotomea lona kholani yiathüng ha Potsow na ombo nduki mmhayicho. 10 Potsow na ombo ezocho, "Ni mying jo Jakob khatola enhungo Israel to tsavka." Hojito Potsow na Israel to ombo tsacho. 11 Potsow na ombo ezocho, "Aiyo Thotsü Potsowka. Otsoeoro elümoto lia yikhe. Ni lona jipo elümoto chiyivka, osi mesao elümoto motsüi ni kümvüka. 12 Ana Abraham osi Isaak epio meta ji ni pivka, osi ni chücho sülo lea ana hoji ni tsoronichen thüngi pivka." 13 Hoji sülo jo Potsow na ombo sisi yicho. 14 Osi Potsow na meta kvülo na ombo jancho sana jilo Jakob na nchümchephen lung chümkachi hoji zükhi tona olive thyujü to renkata nthochecho. 15ombona meta ji Bethel to tsacho.

Rachel Chüo Ji

16 Jakob tona ombo wopan to jiang na Bethel lona khoe yicho, osi ontena Ephrata ejam tara liathüng Rachel na otsoe ebuku yuta jancho, osi elümoto ompvü noa vancho. 17 Ompvü eno tsükshio yuta lo ompvü ezei jina ompvü ezocho, "Tivwongkhyua, Rachel, eboeroro vanlam saka." 18 Tokhatola ompvü chüa vancho, osi ompvü echüpüngrolo ompvüna tsokhying ji Benoni to tsacho, khatola opo najo Benjamin to tsacho. 19 Hojito Rachel ji chüi Ephrata lantssae shothecho, enhünga jo meta jijo Bethlehem to tsala. 20 Jakob na hojilo nchümchephen lung chümcho, hojina nchüng jana Rachel lüp ji chekatala. 21 Jakob na khochi oyi Eder zenki na phokowoe vancho.

Jakob Tsokhying Jiang

22 Jakob na meta jilo vanathüng, Reuben na ombo loroe tsüka Bilhah ji thüngi ponilan tssocho; Jakob na hoji zoe elümoto lüm tsukcho. Jakob na tsokhying taro eni vancho. 23 Leah tsokhying jo Reuben (Jakob tsoe erantso ji) Simeon. Levi, Issakhar tona Zebulum to. 24Rachel tsokhying jo Joseph tona Benjamin to oni. 25 Rachel phajapvüi Bilhah tsokhying jo Dan tona Nephatali to oni. 26 Le ah phaj apvüi Zilphah tsokhying jo Gad tona Asher to; tsokhying shiango Mesopotamea lona bukcho.

Isaak Echüo Ji

27 Jakob na Hebron lo Abraham ha Isaak onina vamo meta mamre lo opo Isaak thüngi wocho. 28 Isaak na nzyu nzoasi ekha tiza vansi sonsanati chücho; 29 osi ombo tsoe Esau ha Jakob onina ombo shothecho.

Benkaden 36

Esau Tsoronichen Jiang

1 Esau ocho Edom toha tsacho sana ji tsoronichen jo shiang. 2 Esau na Kanaan eloe shiang soa vancho: Hittite kyon Elon otsolov Adah, Hivite kyon Zibeon otsokhyongo Anah otsolov Oholibamah; 3 Ishmael otsolov Basemath, Nebaioth otsolov ji. 4 Adah na Eliphaz bukcho, Basematha na Reul bukcho; 5 Osi Ohalibahmah na Jeush, Jalum tona Korah to bukcho. Tsokhying shiang topvü Kanaan meta lona bukcho Esau tsoeden. 6 Tole Esau na ombo engh jiang, otsoe jiang osi otsolov jiang tona ombo ki kyon topvü, elani ombona Kanaan meta lona hungcho tsiden osi ejüeli jiang topvü hansi onyuro Jakob thüngina pyontae metapoe yicho. 7 Ombo tona Jakob to na evamo meta jina onte n tsomo jina ombona metapoe yicho; ntiotssole ontena tsiden khosha evamo jina onte rt vantachyuv sicho. 8 Jitsükona Esau na Edom yingsüng metae vancho. 9 Edom kyon jiang omotsü Esau tsoronichen jo shiang: 10-13 Esau engh Adah na tsokhying tsüka Eliphaz bukcho, osi Eliphaz na tsokhying mongo vancho; jiango, Teman, Omar, Zepho, Gatam, tona kenaz to. Osi engh thanpoe Timna naha tsokhying Amalek vancho. Esau engh Basemath na tsokhying tsüka Reuel bukcho, osi Reuel na tsokhying mezhü, Nahath, Zerah, Shammah tona Mizzah to vancho. 14 Esau engh Oholibamah, Zibeon tsoe Anah otsolov jina tsokhying ethüm, Jehu, Jalam tona Korah to bukcho. 15 Esau lona bukcheo pvüji ji shiang. Esau tsoe ovüngo Eliphaz ji shiang omotsüi kümcho, Teman, Omar, Zepho, Kenaz, 16 Korah, Gatam tona Amalek to shiang hetopvüto jo Esau engh Adah tsoronichenden tssocho. 17 Esau tsoe Reuel ji shiang omotsüi kümcho; Nahath, Zerah, Shammah tona Mizzah to shiang hetopvüto Esau engh Basemath ji tsoronichen. 18 Pvüji shiang Esau engh Oholibamah, Anah otsolov lona chiyicho, Jesush, Jalam tona Korah to. 19 Pvüji shiango Esau lona chiyicho.

Sier Tsoronichen Jiang

20-21 Edom lo vanjüng etssoe kyon jiang ji pvüjilan chirorae yicho osi onte omotsüi jiango Horite kyon Sier tsoronichen jiango shiang; Lotan, Shobal, Zibeon, Dishon, Ezer tona Dishan to. 22 Lotan jo Hori tona Heman to omotsüi kümcho. (Lotan na oyuloe Timna vancho) 23 Shoban jo Alvan, Manahath, Ebal, Shepo tona Onam to omotsüi kümcho. 24 Zibeon na tsokhying otsük eni, Ajah ha Anah oni vancho. (Shijo romhonina opo olyu rhüki tssoathüng jülüm bukphen yancheo Anah ji) 25-26 Anah jo Hemdan, Eshban, Ithran, tona Cheran to pvüji omotsüi Dishon opo kümcho. Anah na otsolov Oholibamah to tsa vancho. 27 Ezer jo Bilhan, Zaavan, tona Akan to pvüji omotsüi kümcho. 28 Dishan jo Uz tona Aran to omotsüi kümcho. 29-30 Edom lo Horite jipo shiang vancho: Lotan, Shobal, Zibeon, Anah, Dishon Ezer tona Dishan to.

Edom Mesao Jiang

31-39 Israel lo mesao. ochia n vanthüng na mesao. shiang na chungta Edom meta ji satacho: Dinhabath kyon Boer tsoe Bela, Bozrah kyon Zerah tsoe Jobab, Teman kyon Husham, Avith kyon Bedad tsoe Hadad (ombona Moab metae na rotathüng Midian kyon jiang khyocho.) Mazerekah kyon Samlah, Rchoboth lo zhükhvü metae na Shaul, Achobor tsoe Baal Hanan Pau kyon Hadad (Ombo engh jo Matred otsolov osiMezahab orüv Mehetabel) to tssocho. 4043 Esau jo Edom kyon pvüji shiang omotsüi kümcho: Timna, Alvah, Jetheth, Oholibamah, Elah, Pinon, Kenaz, eman, Mibzar, Magdiei tona Iram to. Kyon shiangna vantawo meta jiango onte jipo jianglo tsakata tsaracho.

Benkaden 37

Joseph tona Ojenioden Jiang To

1 Jakob na opo vanphen Kanaan lo vana vancho, 2 Jakob wopan motsü jijo heto: Joseph nzyu taro tiying jina opo yingaloroe Bilhah tona Zilbah to tsokhying ojenio jiang nzo olyu, nyanyan, rhükia vancho. Ombona ojenio jiang elhi yivon n mhon jiang opo hanjancho. 3 Jakob na ombo tsoe thanpoe jiang lona kyongkata Joseph ji nzancho, ntiotssole ombo esolani tsoe etsso jina. Ombona osü phungnrhüo okhe siphoa tüv ombo vüicho. 4 Opo na onte lona kyongkata Joseph nzamo ji tsükona hoji ntsiale Joseph ji ziza n jantav sicho. 5 Osi zümo motsüngalo Joseph na omüng emhacho, osi ombona omüng ji ojenio jiang thüngi rüa ezole kyongkata ombo tsaktacho. 6 Ombona phyocho, "Amüng ji engtava. 7 Ete topvüna oli tssukvüng chüngta vancho, tole a tssukchüng jina phanthi mangcho. Tole nte tssukchüng jiang na hoji nkonphia reni hoji yikrachitacho." 8 Ojenio jiang na ombo ezocho, "Nina e yulo mesao osi ezOPVÜI tssoe esav to zialanüng?" Hoji tsükona ombo müng ji tona ombona onte tsükona ntio phyocho sana ji to yakchia ontena kyongkata ombo tssaktacho. 9 Jisüloha Joseph na omüng thanpo emhalani hoji ojenio jiang rüa ezolancho; "Ana omüng thanpo emhalancho, Eng, Choro tona shantio taro ekha tona nkhümthei a khüma emhacho." 10 Ombona omüng ji opo ha rüa ezole opona ombo makcho, "Ntio müng jitüvla? Ninajo, niyo, nijenioang elani a to tssoe ni khümtav tsayia alo?" 11 Joseph ji ojenio jiang na ombo n zekhoku vancho, khatola opo na hoji nchüma zia vancho.

Joseph ji yeni Ejip metae Sosi Yiala

12 Tsüngonalo Joseph ojenio jiang na Shechem lo tssiden jiang rhüki lo otale, 13 Jakob na Joseph ezocho, "Nijenio jiangna olyu rhükita vamo ji Shechem lo ni a wothuk hungala." Tole Joseph na ezocho, "Ana evov methakala." 14 Opona "Nijenioang ji kvüto vancho sana osi tssiden jiang mmhona vevantana owo zesi oyi a ezoa. Hojito ezoa opona Hebron hayi lona ombo wothukcho." 15 Joseph na Shechem jani oli sanphia vanle kyon tsükana ombo hungi ezocho, "Nino ntio yanala?" 16 Ombona janlancho, "Aiyo ajenio olyu rhükita vamo jiang yanala. Onteno kvüi vancho sana nina a ezokhukcho alo?" 17 Tole kyon jina phyocho, "onteno khoe yirathaka, Dothan lo yitav to phyota zoa." Tole Joseph na phana owo ojenio jiang Dothan lona ndukcho. 18 Ontena ekonina ombo hungchicho. Osi ovüngna ombo chüthoku okyak tssota khyimta vancho. 19 Ontena phyotacho, "Omüng emhae ji rothaka. 20 Etena ombo lüngthae echü müng ji jükha nghachecho tüv lo thechi sitavka lo. Orae ekümrümo na ombo rümcho to etena phyocheta. Tosi ombo müng ji bebem sana zetavka." 21 Reuben na hoji zoe Joseph shancho hunga ekhyo tssocho. Osi ombona "Etena ombo ji n lüngthatala" to onte ezocho. 22 "Rhomoni jükha jilo thechi ombo sitvaka osi ombo timeyanthuka" to phyolancho. Ombona jo shanchoe opo thüngi yilanthuk hunga hojito phyocho. 23 Joseph na ojenioang jana chiroale ontena ombo phongnrhüo sü okhe siphowo ji shaki khiyitasi, 24 Jükha ekyingu tüv lo thechi ombo sicho. 25 Ontena etsoyu tsota vanathüng zaktole Ishmael kyon Gilead lona Ejip metae yita hungcho. Onte odh jiang ji topvü wohanlo etheo rhüm tona tssüngthi nkong to hanthukcho. 26 Juda na ojenio jiang thüngi ezocho, "Etena ete nyui ji lüngthasi hoji mphoana ete tajo ntio lichola? 27 Jithüngona jo Ishmalite kyon shiang thüngi ombo yentavkalo? To tssona etena ombo meyam mek, phyolea ombo ete nyui, etena ejen oso motsünga." Tole ojenio jiangna hoji engacho. 28 Osi Midian shishoeden hojilo chiracho, ontena Joseph ji jükhae na süchei Ishmael kyon shishoe jiang thüngi janti rang mekyu na yentacho osi ontena Ejip metae ombo sosi yicho. 29 Reuben na jükha jilo oro zethechile Joseph n vana jo ombo mpensü jiang reroa nungracho. 30 Ombona ojenio jiang oyi ezocho, "Nungori ji jilo n van, aiyo kvüto lyuvla?" 31 Ontena nyanyan lüngthae Joseph phukthesi ji hojilo jümthechicho. 32 Osi ontena phukthesü ji hansi opo thüngi oyi phyotacho, "Ena shi khyochola, ni tsoe ji echi memek?" 33 Ombona hoji chetheo jina phyocho, "Ho, shijo ombo süka! Ora ekümrümo na ombo rümthaka. A tsoe Joseph ji mpvüroe sithaka!" 34 Hojito phyoa Jakob na nungra lona ombo sü jiang reroe sisi posta sü ekacho. Ombona ombo tsoe ji tsükona elümoto sunga nungracho. 35 Ombo tsoe osi otsolov jiang topvüna oro ombo ejichocho khatola ombona nngacho, osi phyocho; "Ana a tsoe ji tsükona nungrao shi hansi echüli rheyivka." Hojito ombo tsoe Joseph tsükona nungra mungcho. 36 Hojithüng Ejip lona Midian kyon jiangna Joseph ji mesao küpo tsüphoe tsüka Potiphar, mesaki enhyang jiang esopvüi ji thüngi yenchenlancho.

Benkaden 38

Juda ha Tamar Oni

1 Hoji yuta harümo Juda na ojenio jiang sisi Adullam yantsü kyon Hirah thüngi vanwo yicho. 2 Hoji lona Juda na Shua otsolov, Kanaan loroe tsüka nduki ombona ompvü soa vancho, 3 osi otsoe tsüka buki Er to tsacho. 4 Elani ompvüna ngaro hanlani tsokhying vanlancho osi hojijo Onan to tsacho. 5 Elani ompvüna tsokhying vanlamo jina ombo Shelah to tsacho. Tsokhying ji vanathüng jo Juda jo Achzib lo vancho. 6 Juda na ombo tsoe eramo Er ji engh etssov Tamar yanchecho. 7 Tokhatola Er etsophyo n mhomo ji tsükona OPVÜI na n mathacho, osi OPVÜI na ombo lüngthacho. 8 Tole Juda na Er ojenio Onan ezocho, "Owo nijenio emi ji thüngi yipa. Ompvü orhan elhi ntio licho sana nina tssoa, hojito tssona ni jenio na tsoronichen vamvüka." 9 Khatola otsoeoro lilea ombo echi tssov meka to Onan na ntsiwo jina ombona omi thüngi ponilan tssoana ojenio tsoronichen n thichethoku tsükona ombona oponi ethangi sithukcho. 10 Ombona hojito lyuo jina OPVÜI na ombo thüngi n mathav OPVÜI na omboha chüthokcho. 11 Tole Juda na orüv Tamar thüngi ezocho, "A tsoe Shelah ji n khyochethüng jo nipoki oyi emia vana." Ombona hojito phyo jijo Shelah ha ojenio jiang chüo ji esüa chüi siv küma to kyua phyocho. Jitsükona Tamar na opo ki elani yicho. 12 Yuta tara sülojo Juda engh ji chücho. Ombona nungra ji pükthakale ombo shom Adullah kyon Hira oni olyu tssan tssüpheüi Timnah lo wotacho. 13 Ombona Timnah lo ombo olyu jiang tssüilo yiala to ochona sana Tamar ezocho. 14 Tole ompvüna zaktole emi mpensü jiang sisi ompvü mha ji eyuksi Timnah lani Enaim yantsü ji pikhfü lo khothei vancho. Juda tsoe Shelah ji khyochethaka ha oni n vanthukala toji ompvü na mmhona ntsicho. 15 Juda na ompvü hungale ompvü mhashüng ji zesi lonsülonphyoe eloe tsayicho, ntiotssole ompvüna mhashüngi vancho. 16 Ombona lantssae ompvü thüngi chivo engacho, "Kvütola, kvüta khiyiala?" (ombo orüv jika to ombona n tsicho) tole ompvüna "Nina ntio a pivla?" to ezocho. 17 Tole ombona, "Ana atssideni na nyanyanro ni hanthokuka" Tole ompvüna janlancho, "Toka nina hoji a n pithüng ntiosana apiyae vata." 18 "Ana ntio ni piyae vavla?" Tole ompvüna ezolancho, "Nimying ejüpkaphen ji tona hojilo wozhü khyingo ji, elani ni khelo jarung ji to avayia." Ombona hojiang topvü pisi oni ponilan tssotacho osi ompvüna ngaro hancho. 19 Hoji süijo Tamar na oki oyi mhashüng ji khi vasi emi mpensü ji ekalancho. 20 Tothakale Juda na ombo shom Hirah jenchia nyanyanro ji tona ombona echümchak ndana ombo tsütsailan eloe ji thüngi elio ji to khilo wothukcho, khatola Hira na ompvü n hungcho. 21 Ombona Enaim lo kyon ejoma engacho, "Shilo lantssae lonsülonphyoe eloe jijo kvüla?" Tole ontena, "Shilo kvüthüng ha lonsülonphyoe eloe n vanhan" to ombo ezocho. 22 Hoji tsükona ombona kholani oyi "Ompvü nyancheka" to ombo ezocho. Osi hojilo kyon evamo jiang na kvüthüngha meta jilo lonsülonphyoe eloe n vanhan to phyoala to ombo ezocho. 23 Tole Juda na oyam khi e n makathuk hungka "tsütsailan jiang ji to ompvü vathuka" to phyocho. Anajo ompvü elov nchümcho khatola nina ompvü n hung küma totae. 24 Jito tssosi choro ethüm harümo jo ochona sana Juda thüngi ezocho, "Nirüv Tamar jo lonsülonphyoe kümi vana osi ompvüo ngaro hanthaka" Tole Juda na "süchoki rungtsüngi ompvü sia" to yidan picho. 25 Tole ompvü süchokathüng ji ompvüna omo thüngi heto oyi yencho, "Ana tsütsailan lio ji pvüi jina ngaro a hanthukchoka, zeta shiango ocho echi sana, omying ejüpkaphen ji tona wozhü shi, elani jarung shi to." 26 Juda na tsütsailan jiang chethei phyocho, "Ompvüna phyoji elana. Ana ompvü thüngi elhi n tssojam lia. Ana ompvü ji atsoe Shelah khi soa vanthoku likasi n tssojancho." Jitosi jo Juda na ompvü thüngi ponilan ntssov sicho. 27 Ompvüna ngaroji evamvü ji yuta janale nshümtso vamvü sala to ntsicho. 28 Ompvü na noa vanathüng ji ngaro tsüka ji khe ji njüpcho tole, zaktole ebuknilo ezei jina süporo emyom okhelo ntssükayia "Shijo tsokhfü jika" to phyocho. 29 Tole ombona okhe ji tssüngthelani siajo ojenio ji bukdencho, tole ebukni ezei jina "Nino hetoli tssürhüpi chiyiake!" to ezocho. Hoji tsükona ombo Peres to tsacho. 30 Hoji sülojo onyuro ji okhelo süporo emyom ji khyinga bukcho, tole Zerah to tsacho.

Benkaden 39

Joseph Tona Potiphar Engh Ji To

1 Ishmael kyon jiang na Joseph ji Ejip metae sosi oyi mesao küpo tsüphoe tsüka, mesaki enhyang jiang esopvüi ji thüngi yenthakcho. 2 OPVÜI na Jospeh thüngoe thei etho ombo pia vancho. Ombona Ejip kyon ombo pvüi ochona, 3 Potsow na Joseph etho pia olan topvü lo kyochiala to chethecho sana ji khelo vana vancho. 4 Potiphar na ombo emathayia ombo phajae tssothukcho. Ji tsükona ombona ombo ki osi ejüeli jiang topvü pono OPVÜI ombo tssothuka vancho. 5 Jithüngna benkae Joseph vamo jina OPVÜI na Ejip kyon osi ombo wopan elani ombo ejüeli jiang topvü lo mmhayicho. 6 Potiphar na ombo ejüeli topvü Joseph khelo thei siyisi ombo etsov jilo yaka ntia n wongkhyucho. 7 Joseph ji osak ophung mmhona opyon mmhomo jina yuta tara sülo jo ombo. pvüi ji engh jina ombo chokae oni nzo yiptav ombo ezocho. 8 Toaha ombona ekhirana ompvü ezocho, "Zeta, apvüi na avamo ji yakchia ntia ongkyu n liala. Ombona eli topvü a khelo atheyithaka. 9 Oki shilo ombo tona a to etho kheti, ombona ni yaka jo topvü a khelo a theyithaka. Tona kvütoli ana hojitüv n lan tssoe Potsow mhadungo mmen tssovla?" 10 Ompvüna eng akvüto Joseph ji khyima ha Joseph na ompvü n yipkyocho. 11 Tokhatola tsüngona lo Joseph na oki ombo elhi tssolo rheyile jithüng jo phajae ochia n vancho. 12 Ompvüna ombo phukthesü lona süyae ezocho, "oyi ayipkyoa" tole ombo phukthesü ji silanchia hapoe chiyile, 13 kvüthüng ombo mpensü ji silanchia chyithaka to ompvüna hungcho sana, 14 ompvüna oki jilo phajae jiang, topvü tsae ezocho."Zetava, a rapvü na oki sosi eyio Hebrew kyon shina omying e mmeniaka. Ombona a yipheni rhoro athüngi nlan tssov tssoaha ana owon tssoa tüngkachicho. 15 Ana erona zoale ombona phukthesü shi shaki sia tsani chiyicho." 16 Ompvüna Joseph pvüi ji eyi nandang phukthesü ji ompvü thüngi vacho. 17 Tosi ompvüna motsü ji heto ombo ezocho: "Nina Hebrew ezii sosi eyio jina a yipheni rhoro a nkhanzicho. 18 Osi ana eronale ombo phukthesü ji shaki a ndüngo sia hapoe chiyicho." 19 Joseph pvüi jina lüm tsukchei, 20 Joseph ji rhümhae mesao khe lona Joseph ji vüngpheni thechicho, osi ombona jilo vancho. 21 Khatola OPVÜI na Joseph thüngoe thecho osi evüngki ezei jinaha ombo nzancho. 22 Ombona Joseph ji evüngki evan topvü ombo pono vayicho. 23 Joseph na n tsicho jitüv evüngki ezei jina wongkhyuo tüv n licho; ntiotssole OPVÜI na Joseph thüngoe thei olan topvü lo mmhom ombo tssochethukcho.

Benkaden 40

Joseph na Evüngki Evan ji Müng Yichak Ezoala

1 Yuta tara sülo Ejip mesao zükhi echanpvüi jiha ombo hümri erüngpvüo ji wonina mesao lüm etsuko tüv elhi tssosoracho. 2 Ombona tsüphoe otsük eni shi pono lüm tsukcho, 3 hoji tsükona oniji Joseph vüngi elio jilo enhyang esopvüi ji ki thechicho. 4 Ontena evüngki elümoto sunga vantacho osi enhyang esopvüi jina Joseph ji onte phajae esüa tssothukcho. 5 Zümoalo jo zükhichan jiha hümri erüng ji woniata na omüng emhacho, osi omüng jiang yichak ji echümpotacho. 6 Joseph na enya thüng oni ndukle oni nungra vana huungcho. 7 Ombona oni engacho, "Ntio tssocho nchüngo hetata nini nungrala?" 8 Onina ezocho, "Eniatana omüng emhacho kasi ochina ha hoji yichak ji ezoe n van." Joseph na ezocho, "Omüng jiang yichak jo Potsow na etho pia khophithukala. Omüng jiang ntio sana a ezotava." 9 Tole zükhichan jina phyocho, "Omüngi ji a mhadungo jününgro zhü khero ethüm khyinga tüv licho. 10 Osi hojina owo jiang chenpvüto thera ebeni tssüngthi ethicho. 11 Ana mesao pvü ji bencho osi ana tssüngthi jiang hojilo zümthei ombo pia emhacho." 12 Joseph na ezocho, "Yichak ji heto; khero ethüm jijo tsüngon ethüm. 13 Mesao na tsüngon ethüm sülo ni vachiv, nlan ni siyiv osi ni elhi jilo ni kyochilam, ovüngthüng nina ombo zükhichan tsso ji esüa ombo pvüji elani ombo pilamka. 14 Tokhatola ni echi mmhonthakna a nzansi a nchümchekhe. Ana ha shilona chiyichev tsükona mesao thüngi a phyoyiv a nchümchekhe. 15 Otsotso tssoana aiyo Hebrew metae na rhümae a sosi yicho, osi shilo Ejip loha ana ntia woricho n li, toaha aiyo vüngpheni vanala." 16 Hümri erüng jina zükhichan ji yichak ji mmhona to ntsiale omboha Joseph thüngi heto ezocho, "Anaha heto emhacho. Ana hümri tekho ethüm echungtae a kvürina hansi yia vancho. 17 Tekho omhawoe jilojo mesao echi hümrilan taro jücho, tole woro jiang na hojiang ji tsota emhacho." 18 Joseph na janlancho, "Yichak ji heto; tekho ethüm jijo tsüngon ethüm. 19 Mesao na tsüngon ethüm sülo ni vachiv osi kvüri ji ni voniv! osi ni tsük ji oyaki donkachi ni siyiv osi ni so jiang worona ni tsoyiv." 20 Tsüngon ethümo tolo mesao jina ombo ebuk tsüngono tukhü nsüngri ombo küpo tsüphoe jiang tsacho; 21 ombona ombo zükhichan ji ombo elhilo rheyithuklancho, 22 Tolea hümri erüng jijo chüthukcho. Hojiang topvü Joseph na phyo ji benkhancho. 23 Tokhatola zükhichan jina Joseph ji ntia n chümphiv mhecholangi ombo sicho.

Benkaden 41

Joseph na Mesao Müng ji Khophiala

1 Nzyu eni sülo jo Ejip mesao na omüngi ji Nile zhükhfü tssae mangi vana emhacho, 2 hojithüng mangsü beleta pherüo tüv tiying zhükhfüi na chiyi eroyoe yantsota vancho. 3 Jithüng mangsü thanpo kvüria oryu njüpa tüv tiying chiyilancho. 4 Ontena chiyi zhükhfü tssae mangsü beleo jiang nzo yantsota vansi beleo tiying jiang rumi tsoe sitacho. Jithüng mesao ji yipjungchicho. 5 Ombona yiplanle omüng thanpo emhalancho. Otssuk dunga lona ethi tiying khyingi rani licho. 6 Tole ethi thanpo lijüng ezhü rhecho epyimra tüv tiying chiyi hojiang na ranbenthako jiang tsoe sicho. 7 Mesao jina yipjüngchile ombona omüng emhao jiang nchümchecho. 8 Ombo wongkhyuo jina enyathüng ji Ejip lo methevüjae topvü tsacho. Ombo na omüng ji onte ezoaha ochina ha eroroe ombo n zochecho. 9 Tole zükhichan jina mesao ezocho, "Ana orithako ji phyochakala. 10 Nina nilüm tsuki hümri erüng ji eni enhyang esopvüi ji ki vüngpheni e thechicho. 11 Zümoa jo enita na omüng emhacho osi yichak echümpo tssocho. 12 Hojilo Hebrew eboeroro, enhyang esopvüi ji phajae ha vüngi vancho. Ena omüng jiang ombo ezotale ombona yichak jiang e zocho. 13 Tole ombona phyoji benkhancho: nina a vanphen ji apilansi, hümrirüng jijo chüthukcho." 14 Mesao jina Joseph tsalo wothukcho, osi ombo ji zaktole vüngpheni na sosi yicho. Ombona kvüri tssüi sisi mpensü dungphisi mesao mhadungo chiwocho. 15 Mesao na ombo ezocho, "Ana omüng emhale ochina ha yichak ji a n zoala. Nina omüng yichak ntsia to ana zocho." 16 Joseph na ezocho, "Tsüphoeyo, ana jo n tssoche, tolea Potsow na etho a piv." 17 Mesao jina phyocho, "Ana omüngi ji Nile jürani manga vanle, 18 mangsü beleta pherüv tiying zhükhvü jilona chiyi eroyoe yantsota vancho. 19 Jithüng ji mangsü thanpo kvüria oryu njüpa tüv tiying chiyilancho. Hojiango ana Ejip lo hungthakcho yolo mangsü nkungratsowo jiang. 20 Mangsü kvürio jiangna beleo jiang nzhüi sicho, 21 tokhatola tathi vanphen ji esüa kvürio jina ochina ha hoji ntsicho. Jithüng a yipjüngchicho. 22 Ana hetoha emhacho, Tssuk dung motsüngalo ethi ranbencho tiying khyingcho. 23 Tole ethi thanpo lijüng ezhüna echükrocho epyimra tüv tiying chiyicho, 24 Osi tssukdung kirothako jiangna beleo jiang nzhürae sicho. Ana omüng ji methevüjae jiang ezole ontena yichak ji a n zokhukcho." 25 Joseph na mesao ji ezocho, "omüng enita yichak motsünga tae, Potsow na ntio tssov sa sana ombona ni ezothaka. 26 Mangsü belev tiying jijo nzyu tiying, elani otsukdung ranbencho tiying jiangha nzyu tiying, onte yichak jo kheti. 27 Mangsü kvüriv tiying sülani chiyio jiang tona tsukdung lijüng ezhü na echükrocho tiying to jiango otssi vara nzyu tiying. 28 Ana ni ezothako ji esüa Potsow na ntio tssov sa sana hoji ni ejücho. 29 Ejip meta topvülo emhokthav pvülyuhanlyu nzyu tiying livka. 30-31 Jisülo jo otssi vara nzyu tiying livka osi hojina meta ji yantsathako jina nzyu tiying mmhonthako ji mpato mhechoe siv. 32 Nimüng ji esüta emhalamo jijo, Potsow na n sungu hoji benthoku, osi yuta ji ombona kokathako ji tsükona." 33 Nina hungjan-rüjan lia kichuk ejüi kyon ethüngcherae meta shi zethuka. 34 Nina tsüphoe ejoma ethüngchelani pvülyu nzyu jianglo joncho-rücho lona mongochia khachei varhyuthuka. 35 Pvü lyu nzyu jianglo otssuk omüm jiang yantsü akvülo hantherae hoji nhyaktao tüv etho pia. 36 Hoji etssov jiango Ejip meta topvüto otssi vara nzyu tiying etsao jilo echi nkümi vathuka. Hojito tssona kyon jiang khangu meka.

Joseph ji Ejip lo Esapvüi Kümthukala.

37 Mesao jina ombo tsüphoe jiang nzo tssoe hoji madang ji khichocho, 38 osi onte ezocho, "Etena kvüthüngha Joseph lo mmhonkao kyon hungu meka, Potsow mon ejüi kyon tsüka ka." 39 Mesao jina Joseph ezocho, "Potsow na shiang ji ejüthako jina nilo hungjan-rüjan osi nchümri likao ochia n van to zechethaka. 40 Ana a meta shi ezepvüi ni kümthokuka, osi a meta kyon topvüna ni yi engavka. Ni etho jo a küpo tsotso ji tssovka. 41 Ana Ejip lo esapvüi ni kümthukala." 42 Mesao jina ombo yingro lo mesa mying ejüpkaphen yingrüm ji phachei Joseph yingro lo phungtheyicho. Ombona sünyipvü phungthesü mmhom ombo hanthuksi evüngo shona zhü eyikthukcho. 43 Ombona mesao zotoro enioto ji ombo pia tsankathuksi, ombo enhyang jiang khi ombo vüngi na wothuka, "Olan vayia! Olan vayia!" to tünga wothukcho. Hojito Joseph ji Ejip esapvüi kümthukcho. 44 Mesao jina ombo ezocho, "Aiyo mesao jika Ejip lo kyon ochinaha ni yizüng n khiv okhe osi ojo lea tsakav meka." 45-46 Ombona Joseph ji Ejip mying Zaphenath Paniah to tsayicho. Osi Helipolis lo pvüti Potiphera otsolov Asenath ji ombo engh tssothukcho. Joseph na Ejip mesao küpo esae kümo jithüng jo ombo nzyu thümro tssothakcho. Ombona mesao kina khochi meta topvü khyua wocho. 47 Nzyu tiying mmhom jithüng joncho-rücho elümoto licho. 48 Osi Joseph na hojiang hanrhyue yantsü jilo varhyucho. Yantsü akvü nkonphia oli jiang lona richo jiang ombona hoji yantsü jilo hanrhyucho. 49 Otssukomüm khosha richo jina Joseph na n madangrao tsso jina madangi n zev sicho jümangi hajang tata tssocho. 50 Otssi vara nzyu jiang n yithüng Joseph na Asenath lona otsoe otsük eni vancho. 51 Ombona phyocho, "Potsow na a ezüp yuta jiang osi a wopan jiang a mhechothukthaka", jitsükona ombona otsoe ovüngo ji Manasseh to tsacho. 52 Ombona hetoha phyocho, "Potsow na a ezüp meta shilona otsoeoro apithaka." to phyoa tsokhying enioto ji Ephraim to tsacho. 53 Ejip na pvülyu nzyu tiying ji yakracho, 54 osi Joseph na phyo ji esüa otssi vara nzyu tiying benkhancho. Meta thanpo topvülo vara licho, khatola Ejip lojo etsoyu etsson licho. 55 Ejip kyon jiang na khangale ontena mesao thüngi etsoyu chona kyatacho. Jitsükona Joseph thüngi wotale osi ombona phyo ji ephan tssotale to onte ezocho. 56Vara ji tsükshikata meta topvülo rankata yicho, jitsükona Joseph na oson jiang chonchi Ejip kyon jiang etsoyu shithukracho. 57 Vara ji tsükshio jina limha topvü lona etsoyu shiilo Ejip metae roracho.

Benkaden 42

Joseph Ojenio Jiangna Ejip Metae Etsoyu Shiilo Yiala

1 Ejip metae etsoyu lia to Jakob na zoale ombona otsoe jiang ezocho, "Ntena heto lyutava, 2 Ejip metalo etsoyu lia to yivon zoka, owo etsoyu shitava, to mekana khangtsüi echüvka. 3 Jitsükona Joseph ojenio otsük taro jiangna Ejip metae etsoyu shiilo wotacho, 4 khatola Jakob na Ben jamin jo olani na tssolüp phyolüp kyua n wothukcho." 5 Kanaan loha vara lio jina Jakob tsoeden jiangha oyam nzo etsoyu shiilo Ejip metae wotacho. 6 Ejip esapvüi Joseph na limha topvü thüngi etsoyu sithoka vancho. Jitsükona Joseph ojenio jiangna oro ombo mhadungo nkhümthei khümtacho. 7 Joseph na ojenio jiang hungale ombona onte chethecho, khatola ombona n tsicho esüa etsophyocho. Osi ombona haruka esüa onte engacho, "Nteno meta kvülona rotachola?" Ontena janlancho, "Eiyo Kanaan lona etsoyu shilo rotachoka." 8 Joseph na ojenio jiang chekataha ontena jo ombo n chethecho. 9 Ombona emhao müng ji nchümchei onte ezocho, "Nteno chepyimdenla, ntena e meta kvülo n penri lichosana ji chelo rotachola" 10 Tole ontena ezotacho, "Meka tsüphoeyo, ena ni phajaeden kümi etsoyu shilo rotachoka. 11 Eiyo topvü jeni motsünga tae osi e topvü ntsae kyonden." 12 Joseph na onte ezocho, "Meka, nteno e meta kvülo n benri lichosana ji chelo rotachoka." 13 Ontena ezocho, "Tsüphoeyo, eiyo Kanaan lo kyon tsüka tsoeden ejeni taro eni vancho, khatola ejeni tsüka chüthaksi wokhatso jijo oki apo thüngi vanka." 14 Joseph na onte ezocho, "Ana nte ezothaka to" "Nteno chepyimden, 15 Ana hetoli ojang nte tssovka: Ana mesao myingona echümchakala, ntena nte onyuro wokhao ji shilo n rothuk thüng nandang jo ana nte yithokvü meka. 16 Nte yulo tsüka na oyi ombo sosi roa. Jilo enhyo jiango ntena phyoji otsotso to n tsithüngjo enhyang khelo nte vanthokuka, To n tssona ana, mesao eküm vamo ji esüa, nteno chepyimden tae" 17 Jitosi ombona tsüngon ethüm onte vüngcho. 18 Tsüngon ethümoto lo Joseph na onte ezocho, "Aiyo Potsow ekyui kyon, jitsükona ntsata motsünga vatasi eküm nte shanchoyivka. 19 Ntena phyo jiang ntsa to ntsiv tsükona nte yulo tsüka na vüngpheni vansi enhyo jiang na etsoyu shithako jiang hansi oyi nte wopan khangta evamo jiang tsothuka. 20 Tosi ntena nte onyuro wokhao ji athüngi sosi rotava. Hojilona ntena ntsa phyoala to ji chethevka, osi ana nte chüthoku meka." Ontena hoji khichocho osi phyotacho, 21 "Oh, etena enhünga ezüpta vamo shijo etena ete ojenio tsüka ji thüngi ntio elhitacho sana hoji man ezüptala, ombona ezüp tsüphovlo vani nzanchiv yanaha etena n ngayicho. Jitsükona eteno ezüp shilo vana." 22 Reuben na phyocho, "Ombo timeyanta to ana nte ezocho, khatola ntena n gacho. Enhungo eteno ombo chüthoko jokheman ji hungala." 23 Ontena phyotao jiang Joseph na ntsia, khatola ontenajo hoji n tsicho, ntiotssole ontena oyi elon yakchia ombo thüngi janta evamo ji tsükona. 24 Joseph na onte nkachoe kyacho. Ombona oyi nsanchelanale elani chivo, Simeon tsachuki onte mhadungona chüngcho.

Joseph Ojenio Jiangna Kanaan lo Elani Yiala

25 Joseph na ojenio jiang sükvü jianglo etsoyu etsson lenile osi elani olani etsoyuvha pile to yizüng picho osi hoji esüa tssocho. 26 Ontena etsoyu shithako jiang khi onte Gadho jiang poni oha tssoe khochitacho. 27 Ontena olani yiptao meta jilona, onte yulo tsükana oha ji lanphe Gadho ji phiv ojak khichele ombo rang ji oponi thei lia hungcho. 28 Ombona ojenio jiang tsae ezocho, "Arangji apilancho." "Shilo ahae jüa!" Tole ontena ekhena phyotacho, "Potsow na ete thüngi ntio etssoyithakcho to!" 29 Ontena Kanaan lo opo thüngi chiyiale onte opono ntio tssocho sana jiang topvü rüa ombo ezotacho. 30 "Ejip lo esapvüi jina eiyo chepyimden ombo meta chelo rotacho to phyoa elümoto haruka ejancho. 31 Ena eiyo echepyim mek, kyon mmhomden ka to ezotacho. 32 Eiyo jeni taro eni osi opo motsünga tsoeden, khatola tsüakjo chüthaka osi wokhao jijo Kanaan lo apo thüngi vana to ezotacho." 33 Tole ombona phyocho, "Nte ji kyon mmhomden toji ana hetoli ntsivka. Nte yulo tsüka na andüngo vana osi enhyo jiango etsoyu hantasi oyi nte wopan khangta evamo jiang tsothuka. 34 Osi nte ojenio wokhao ji sosi a thüngi rotava, to tssona nte ji chepyimden mek, tolea kyon mmhomden to ana ntsiv. Ana nte ojenio wokhao ji nte pilam osi ntena shilo vani shishoe kümrakhoka." 35 kvüthüng ontena oha jiang lichetacho sana otsük akvüna ombo rangtsen ji ohae jücho nungracho; osi ontena orang jiang hungale onte osi opo Jakob topvü ekhentsüngracho. 36 Opo na onte ezocho, "Ntena atsoe topvü a monikhanthoku ke? Joseph monthaka! Simeon ha monthaka, enhungo ntena Benjamin hansi yitav sala. Shiang hetopvüto epüp jo ana khiala!" 37 Reuben na opo ezocho, "Ana Benjamim ji ni thüngi sosi n yilana tssona, nina atsoe otsük eni jiang lüngthae sia. A pono tssothuka, tona ana ombo sosi yilamka." 38 Tokhatola Jakob na phyocho, "A tsoe shina nte phana rochev meka, ojenio ji chüthaka osi ombo tae vana. Olanina ntiosana ombo tssochojo, aiyo eson küma ntena anungrathoko jina a chüv."

Benkaden 43

Joseph Ojenio Jiangna Benjamin sosi Ejip lo Yitala

1 Kanaan lo otssi vara ji tsükshikacho, 2 Osi Jakob wopan na Ejip metae na etsoyu hansi eyio jiang tsokhanthakale, Jakob na ombo tsoe jiang ezocho, "owo ete etsoyu tara shitalana." 3 Tole Juda na phyocho, "Esapvüi jina e jenio wokhao ji n sonhyav jo ombo ndüngo e nrothuk to rarünga ezocho. 4 Küma nina enyuro ji ephana rothukna owo etsoyu ni shiyivka. 5 Osi nina ombo sosi e n wothukna eiyo wov meka, ntiotssole kyon jina e nyuro ji n jüv jo kvüthüngha ombo thüngi e n rothuk to phyocho." 6 Jakob na ezocho, "Nteno ntio tssona nte onyuro vanlana to ombo ezotasi hetata ezüp apitala?" 7 Ontena ezotacho, "Kyon jina ete wopan motsü tae enga mongo jina, nipo eküm vevan? nte ojenio thanpo vevelan?" to enga mongo jina ena ombo janlamo tssoe sicho. Ombona enyuro ji sosi role to ezov to ena kvütoli ntsivla? 8 Juda na opo ezocho, "Nongori ji ephana rothuka ena zakto khochivka, to tssona ete ochia khangtsüngi echüv meka. 9 Ana a eküm na züngchak vatala, osi nina ombo tsükona jo to apono avayia. Ana ombo ji ephyoerüv n khyingna ni thüngi solansi n yia tssona eküm echung n lan ji ana hamvüka. 10 Etena shi nhyakta n vanvo, etena hoji osi yenjo enilea yilanthaku." 11 Opona onte ezocho, "Toka jito tssona, ete metalo yantso mmhontso jiang ohae thei hantasi esapvüi ji yantsotava; tssüngthi nkyicho tara, Ohanrhüm, nothi tsüng, elani Almond to hantava. 12 Orangha ovüngthüng tata eni hantava, ntena ohae shyucheo rang ji woricho tssokhuka, to tssona hoji ha pilanchevka. 13 Nte onyuro ji sosi zakto khochitava. 14 Thotsü Potsow khi nte khonzanthoki kyon ji khi Benjamin tona nte ojenio tsüka ji to nte pilanthokuka. A tsükona jo atsoe emon licho tssona mom." 15 Jeniden jiangna yantso jiang hanta, orang ji ovüngthüng tata eni hanta tosi elani Benjamin sota tosi Ejip metae khochitacho. ontena owo Joseph mhadungo chivotacho. 16 Joseph na onte razhülo Benjamin hungale ombo ki ezeo phajae ji ezocho, "Kyon shiang sosi aki yitava, onteno nchüngo aki tsovka, ekümrümo tatsüngi etsoyu methaka." 17 Phajae jina hoji ephan tssocho osi jeniden jiang ji Joseph ki sosi yicho. 18 Oki onte sosi yiale ontena kyua heto nchümtacho, "Yenjo ovüngo jilo orang ji tsükona shilo esosi yicho. Ontena e sakae Gadho shiang khitasi onte phajae ekümthoku sala." 19 Jitsükona ontena kibüng jilona phaje ezepvüi ji ezotacho, 20 "Tsüphoeyo, ena ovüngthüngha etsoyu shiilo yenjoa rotathaka. 2i Ena oki yiathüng olani nchentasi e ha jiang shyui zetale otsük akvü na ombobo rang ji ombobo hae eben jüa hungcho. Jitsükona ena hoji nte thüngi hantasi rolantacho. 22 Ena elani etsoyu shilantav tsükona ha orang tara hana. Ochona erang jiang e hae theracho sana ena n tsi." 23 Phajae jina phyocho, "Tiwongkhyutava, osi ti-kyutava. Nte Potsow osi nte opo Potsow jina orang jiang nte thelanicho tssovka. Anaha oman jo nte khiyicho, tosi ombona Simeon sosi onte thüngi chiyicho." 24 Phajae jina jeniden jiang oki sothecho. Ombona ojo epyov ojüha onte pisi onte Gadho jiangji ojak phiyicho. 25 Ontena Joseph nzo etsoyu tssotav sala to phaje jina onte ezowo jina Joseph na englongjüngo oki yile ontena yantso jiang ombo piv methaki vantacho. 26 Joseph na oki rheyile ontena yantso jiang bentasi oki rhowo Joseph mhadungo nkhümthetacho. 27 Ombona onte yentsa yivon engasi phyocho, "Ntena nte opo vana to a ezotacho, ombo kvüto vana, ombo mmhona eküm vanpvü memek?" 28 Ontena ezotacho, "Ni phajae teritso, e opo ji enhüngha vana osi mmhona vana." Tosi ontena nkhuk tseni ombo khümtacho. 29 Joseph na onyuro Benjamin hungale phyocho, "Tona nte onyuro wokhaotso ji shi nüng? ntena ombo motsü a ezoji Potsow khi ni mmhayithokuka, a tsoe." 30 Jitosi Joseph na zakto chiyi sicho. Ntiotssole ombo ongo tsükona ombo lümbüm ji nzan enyip na pyingcho. Ombona kyahungo jina ombo yipheni chiyi kyacho. 31 Ombona omha mmyosi chiyi ombobo sayata, etsoyu jiang hansi chiyile to choncho. 32 Joseph jo tssisaro motsüngalo ekachiyisi ojenio jiang tssisaro thanpoe ekachiyicho. Hojilo tsanhyao Ejip kyon jiang ha saro thanpolo ekachiyicho, ntiotssole onteno Hebrew jiang nzo tsorhyutav jo teriv esüa nchümcho. 33 Jeniden jiango Joseph zechiwo eranina etsüngi nungotso jinandang reni tsotacho. Hojitolyui khukthetao ji ontena ntsaile onte omhae zekachita emhuktacho. 34 Onte ji Joseph tssisa jilona onte tssichanhanchancho, osi Benjamin jo thanpoe jiang shayio jitata mungo shayicho. Osi ontena Joseph nzo tsoyutasi onte kinoracho.

Benkaden 44

Opvü Momo Ji

1 Joseph na ombo ki ezeo phajae ji ezocho, "Kyon shiang haa jianglo onte hankhuk etsoyu lenia, osi onte otsük akvü rang ji oha poni lenkayia. 2 A janti pvüi ji onte yulo nungotso ji haalo otssuk rang oman ji nzo lenia." Phajae jina ombo ezoji ephan tssocho. 3 Nyazüngina jeniden jiang na onte Gadho jiang nzo khochitacho. 4 Ontena yantsüi na tara tae yihana Joseph ana ombo ki phaje ji ezocho, "Zakto kyon jiang phana woa. Nina onte phayana ezoa, ntio tsükona mmhom nte tssoyile n mhom khi pilanala? 5 Ntiolyui nteno apvüi pvü ji efütachola? Hojijo ombo yuphen osi methephen ji. Ntena nlan tsüphov tssothaka!" 6 Phajae jina onte phayatale hojito onte ezolancho. 7 Ontena ombo ezotacho, "Ntio etsso e ezoala, tsüphoe? Ena hojito n tsso to echümala. 8 Nina ntsia, ena orang ehae jüwo jiang ji Kanaaan metae na hanlansi oro ni picho. Tona kvütoli ena janti mekana shona ni efüyivla? 9 Tsüphoeyo, e yulo hoji hancho shyuchetana ombo chüthuka, osi e topvü na ni phajae kümvüka." 10 Ombona phyocho, "Hotoka, tolea opvü hamo jitae na a phajae kümvüka, osi thanpoe jiango yikhuka." 11 Ontena zakto onte haa jiang ejümchorae ombobo haa ji shyue zetacho. 12 Joseph phajae jina onte yulo erantso jilona benkae shyui zeyicho, osi opvü ji Benjamin hae na shyuchecho. 13 Jeniden jiangna nungra lona mpensü jiang reroe sita oha jiang tssolani hantasi yantsüi jiwoe elani yilantacho. 14 Juda tona jeniden jiang tona Joseph ki chiyile ombona hojilo vanpvü tssocho. ontena ombo mhadungo nkhümthetacho, 15 tole Joseph na ezocho, "Nteno ntio elhitachola, a esüa tsüphoe na methei nte n yanchev tsayichoke?" 16 Juda na janlancho, "Tsüphoeyo, ena ntio ni ezovla? Ena kvüto ekhiramla osi ebobo kvütoli ntsachevla? Potsow na e nlan ji oponi chiyithukthaka. Ocho hae opvü jücho sana ji tae mek, e topvü ni phajae ekümthukthaka." 17 Joseph na ezocho, "meka, ana kvüthünga hojito lyuiv meka! A pvü hamo jitaena a phajae kümvüka. Nteno mmhona nipo thüngi yitava."

Juda na Benjamin Tsükona Jonjiala

18 Juda na Joseph thüngi chungo ezocho, 'Tsüphoeyo, nzansi ni thüngi etancho a nsanthuka. A thüngi lüm ti-tsuka, nino mesao ji nini khetika. 19 Tsüphoeyo nina epo osi ojenio thanpo vevancho sana to e engacho. 20 Tole ena ni ezocho, 'Ena e opo eson vana osi e onyui tsüka apo esonlani bukcho tsüka vana to. Nungori ji ota jo chüthaka, osi oyo motsünga tso jo ombo tae vana, opo na elümoto ombo nzanalana. 21 Tsüphoeyo, tole nina ombo zehungilato ombo sosi role to e ezocho, 22 tole nungori jina opo yaki n voche, ombona woana opo ji chüv to ni ezocho. 23 Tole nina hoji n sov jo enhungo ni thüngi e n rothuk to phyocho.' 24 Ena e opo thüngi kholani oyi nina ezo jiang ezotacho. 25 Tole ombona oro etsoyu tara shitalanle to e ezocho. 26 Tole ena ezocho, "Ena n oche, ena e onyuro wokhao ji n sov jo kyon ji mhadungo n chiwoche. Ni tsoe nungotso jina e phana rosanati ena ochev." to ombo ezotacho. 27 Tole e opona e ezocho, "A eloe Rachel na bukcho jo otsoe eni tae to ntena ntsia. 28 Onilo tsüka na a sisi yithaka, omboji orae ekümrümo na rüngroe sicho tssov, ntiotssole ombona khochisi ana ombo n hunghan. 29 Enhungo ntena shi a thüngi na sosi osi ombolo ntiosana tssochojo, eson a hetüv jo ntena anungrathuko jinalea a chüv." 30-31 Juda na ezolancho, "Enhungo, tsüphoeyo, ana a nyui shi n sov oki yicho jo apo na ahungpvüto ombo chüv, ntiotssole ombo eküm jo nungori jina sayasi vanala. Hoji tsükona nungori ji n sona eson küma nungra lona lea ombo chü khukka. 32 Ji ekalo a eküm na apo thüngi ntsatae rocho, ana nungori shi sosi n yilana tssona nlan ji eküm echung apile to. 33 Jitsükona tsüphoeyo, nungori ji thung ji ana ni phaje tssoa shilo vamvüka, ombo ojenio jiang nzo ombo yithuka. 34 Nungori ji n jüv ana kvütoli apo thüngi chiyilamvüla? Hojitüv emhukelüm apona ndukujo ana n zekhuk."

Benkaden 45

Joseph na Ombo Ochosana Ojenioang Ezoala

1 Joseph na ombo lümbüm chungina nchüma vamo ji n rümkhoku sithako jina ombona phajae jiang topvü hapoe chiyithukcho. Joseph na ombo ocho sana ojenio jiang ezoathüng ombo ndüngo ochia n vancho. 2 Ombona elüm emhena kyao jina Ejip kyon jiang na zoracho, osi yithen jina mesaki jancho. 3 Joseph na ojenio jiang ezocho, "Aiyo Joseph ka. Apo eküm vananüng? Khatola ojenio jiang na shi zoale ekhentsüngrae ombo n janlanchecho. 4 Tole Joseph na ezocho 'Nzansi sena yitava' ontena sena wotale ombona ezocho, "Aiyo nte onyuro Joseph ntena Ejip metae yentao jika. 5 Ntena hepi a yentao ji khi etho tijaktava, osi nte bobo nlan tipitava. Potsow na kyon eküm shanchothoku tsükona nte vüngina hepi a rothukchoka. 6 Meta shilo otssi vara yisi nzyu eni tae tssohan, elani nzyu mongo jo oli ejom osi eriv n lio yuta lihana. 7 Potsow na hetüv ezüp lona nte shanchoe nte tsoeroro jiang kümchethoku tsükona ovüngna hepi ayithukchoka. 8 Jitsükona hepi ayithoko jijo ntena mek. Khatola Potsow na. Ombona mesao küpo thanpoe tsüphoe jiang yulo ntssontso ji akümthukthaka. Aiyo ombo meta totona ezepvüiji. Aiyo Ejip mpüm esapvüi ji. 9 Enhungo zakto apo thüngi oyi ombo tsoe Joseph na heto phyoala to ezotava: 'Potsow na Ejip meta mpüm lo esapvüi a kümthukthaka; zakto athüngi roa. 10 Nteno a ndüngo Goshen metalo vankhuka, nte tsoeoro, tsorüiden, nte olyuden, nyanyanden, mang süden osi nte ejüeli topvü hansi hepi yitava. n Ntena Goshen lo vana tssona ana nte zejamvü. Otssi vara nzyu mongo lilanhan ji tsükona ana nte, nte wopan osi ekümrümo jiang, nte n khangthukhungala." 12 Joseph na phyolancho, "Enhungo nte topvüna, Benjamin naha aiyo Joseph to a ntsithaka. 13 Aiyo Ejip lo kvüta etho eli-i sana apo ezoa osi ntena ntio hungthakcho sana jiang topvü mbo ezoa, osi zakto ombo sosi hepi yitava." 14 Ombona Benjamin epvülo vonyasi kyacho, Benjamin naha ombo khayasi kyacho. 15 jitosi ombona kya ojenio jiang otsük akvü khayae ntsüphia wocho. Jisülojo ojenio jiangna ombo thüngi thyuda yicho. 16 Joseph ojenio jiang rochoto yithen jina mesaki janale mesao osi tsüphoe topvüna longshitacho. 17 Ombona Joseph ezocho, "Ni jenio jiang ezoa, ekümrümo lo oha tssoe Kanaan metae yitava to ezoa. 18 Onte opo osi wopan jiang sotasi hepi yitava to ezoa. Ana Ejip lo meta mmhontso ji onte pivka, osi onte eküm süphiv tsükona etsson hunguka. 19 Ejip lona zotoro khi hantasi oyi onte tsoeni, ngaro osi opo ha to hojianglo thei sotasi yitale to onte ezoa. 20 Ontena tsütsailan n hanrav silanchilea tiwongkhyuta to ezoa, Ejip lo liko mmhontso ji onte echi tssovka." 21 Jakob tsokhying jiangna onte ezo ji esüa tssotacho. Joseph na mesao yi ji ephan zotoro tona olani etsoyu to onte picho. 22 Ombona onte otsük akvü mpensü tongphiphen tajo onte piracho, tokhatola Benjamin jo ombona janti rang nzo ethüm tona osü sülan mongo to ombo picho. 23 Ombona ombo echi ha Ejip lo tsütsailan mmhontsov tona Gadho taro, tsünghanrho, hümri tona olani etsoyu to Gadho taro hanthukcho. 24 Ombona ojenio jiang khochithuksi, "Olanina ti-khontale" to onte ezocho. 25 Ontena Ejip lona khoe Kanaan metae opo thüngi yitacho. 26 Ontena opo ezotacho, "Joseph jo eküm vana!" "Ombo Ejip meta mpüm tolo esapvüi ji!" tole Jakob ji ngangtsüngi sisi onte n longtsü khukcho. 27 Khatola Joseph na onte ezo jiang topvü ontena ombo ezotacho, Joseph na ombo sosi yile zotoro hanthuko jiang hungale ekhemo ji mmhoni sicho. 28 Ombona phyocho, "A tsoe Joseph ji eküm vanchoke!" "Ana nte engakhuko ji jitae! Ana a n chüthüng owo ombo ndokuka."

Benkaden 46

Jakob Tona Ombo Wopan to Ejip Metae Yitala

1 Jakob na ombo eli topvü oha tssoe hansi Beersheba lo owo opo Isaak Potsow thüngi erungthan picho. 2 Potsow na zümolo ombo hungthuki, "Jakob" to ombo tsacho. Tole ombona, "Hao aiyo helo vanka" to janlancho. 3 Potsow na ezocho, "Aiyo Potsow, nte opoang Potsow jika," Ejip lo ewov ti-kyua; ana hojilo na tsoronichen jiang jipo tsüphov kümthukvüka. 4 Ana ni nzo Ejip lo wovka osi ana ni tsoronichen jiang meta shilo sosi yilamka. Ni nchüthüng Joseph na ni ndüngo vamka." 5 Jakob na Beersheba lona khochicho. Ombo tsoe jiangna ombo, onte ngaro jiang tona onte engh jiang to Ejip mesao na hanthuko zotoro jilo rheyithukcho. 6 Ontena ekümrümo jiang tona kanaan lona ejüeli hungwo jiang to hantasi Ejip lo yitacho. Jakob na ombo tsoronichen topvü sonhyacho: 7 ombo tsoe jiang, tsorüi jiang, tsolo jiang tona orüv jiang to. 8 Jakob wopan ombo nzo Ejip lo yio jiango, ombo tsokhying eramo Reuben 9 Reuben tsokhyingden: Hanoch, Pallu, Hezron, tona Carmi to, 10 Simeon tona ombo tsokhyingden: Jamuel, Jamin, Ohae, Jachin, Zohar, Kanaan eloe tsokhying Shaul to. 11 Levi tona ombo tsokhyingden: Gershon, Kohath, tona Merari to. 12 Juda tona ombo tsokhyingden: Shelah, Perez tona Zerah to. (Juda tsokhying thanpo jo; Er, Onan to jo Kanaan lona chücho.) Perez tsokhy ingden jo Hezron tona Hamui to. 13 Issakhar tona ombo tsokhyingden: Tola, Puah, Jashub, tona Shimron. 14 Zebulun tona ombo tsokhyingden: Sered, Elon, tona Jahleel to. 15 Shiang jo Lea na Mesopotamea lona otsolov Dinah ephalo Jakob bukio tsokhying jiang. Leah yakchia ombo tsoronichen licho tssotsüi thümrosi ethüm. 16 Gad tona ombo tsokhyingden: Zephon, Haggi, Shuni, Ezbon, Eri, Arod tona Areli to. 17 Asher tona ombo tsokhyingden: Imnah, Ishvah, Ishvi, Beriah, tona onte oyuloe Serah to. Beriah tsoeden jo Heber tona Malchiel. 18 Otsük taro tiruk shijo Laban na otsolov Leah pio ezipvüi Zilpah lona Jakob tsoronichen jiang. 19 Jakob eloe Rachel na tsokhying otsük eni ombo bukicho. Joseph tona Benjamin to. 20 Ejip metae na Joseph na tsokhying eni vancho, Manasseh tona Ephraim to Heliopolis lo pvüti Potiphera otsolov Asenath lona bukcho. 21 Benjamin tsokhyingden jiango, Bela, Becher, Ashbel, Gera, Naaman, Ehi, Rosh, Muppim, Huppim tona Ard to. 22 Otsük taro mezhü shijo Rachel lona Jakob tsorochen 23 Dan tona ombo tsoe Hushim. 24 Naphtali tona ombo tsoeden: Jahzeel, Guni, Jezer, tona Shellem. 25 Otsük tiying shijo Laban na otsolov Rachel pio eziipvüi Bilhah lona Jakob tsoronichen. 26 Jakob tsoronichen Ejip metae yio jiango tssotsüi rukrosi tiruk, jilo jo ombo tsoe jiang engh jiang n khanhya. 27 Ejip lona Joseph tsoe otsük eni bukcho, hojiang thenhyae tssotsüi Jakob wopan Ejip metae yicho ekhatiying.

Ejip lo Jakob Tona Ombo Wopan to

28 Jakob na Joseph khi oro Goshen lona onte ndukthukvü tsükona Juda ji ovüngna wothukcho. 29 Ontena janale Joseph na kurü zotoro lo tsankae opo nduko Goshen lo wocho. Onte nduktale Joseph na opo evüngo khayae sunga kya mungcho. 30 Jakob na phyocho, "Ana ni hungthako jina osi ni eküm vana to ntsithako jina enhungo echüv methakthaka." 31 Tole Joseph na ombo jeniden osi wopan kyon thanpoe jiang thüngi ezocho, "Ana owo mesao ji a jenio jiang osi apo wopan Kanaan metalo vamo jiang a thüngi yitathaka to ezov lia. 32 Ana nteno olyu rhükiden osi ekümrümo ekümden osi ntena nte tssiden osi ejüeli topvü hansi rothaka to ezov. 33 Mesao na nte tsae nteno ntio elhi tssoa evanden sana nte engana ti-mhechotana, 34 nteno nte motsüi jiang esüa e eküm echung ekümrüm rhükia evanden ka to ezotava, tona ombona Goshen lo nte vanthukvü." Ejip kyon jiang na olyu rhüki thüngi ntia khetsü n li to ntsiwo jina Joseph na hoto onte ezocho.

Benkaden 47

1 Joseph na ojenio otsük mungo sosi mesao ji thüngi owo ezocho, "Apo tona a jeniden to jiang Kanaan metae na onte ekümrüm tssiden osi ejüeli topvü hanrasi yithaka. Onteno enhünga jo Goshen metalo vana." 2 Tosi ombona ojenio jiang ji mesao thüngi ejücho. 3 Tole mesao jina onte engacho, "Nte elhilan jo ntiola?" Ontena ezocho, 'Tsüphoeyo, e motsüi jiang esüa enaha olyu rhükiden ka. 4 Kanaan lo vara ji tsükshio jina yantsophen n li küma ena meta shilo vantav rotachoka. Nzansi Goshen metalo evanthuka." 5 Mesao jina Joseph ezocho, "Nipo tona nijenio jiang to chirothako ji tsükona Ejip meta shijo onte echika. 6 Meta shilo mmhontsowo Goshen lo onte vanjüngthuka. Osi onte yulo ekhyo etoe jüna a tssiden jiang ha onte zethuka." 7 Tole Joseph na opo Jakob sosi oro mesao ji ejücho. Jakob na mesao ji mmhayithukcho, 8 Tole mesao jina, "Nino nzyu kvüta tssothaka?" to ombo engacho. 9 Jakob na janlancho, "A rümphi eküm ji nzyu nzoasi thümro tssothaka. A motsüi jiang na nzyu sunga rümphia vamo ji ephan jo a nzyu jiango mataroa osi ekhüngu tae." 10 Jakob na mesao ji pyonta mmha pisi yicho. 11 Tole mesao jina methako ji ephan Joseph na opo osi ojenio jiang ji Ramases yantsü ndüngo liko mmhontso ji picho. 12 Joseph na opo, ojenioang osi opo wopan lo nungotso ji nandang etsoyu picho.

Otssi Vara Ji

13 Otssi vara ji elümoto tsükshio jina meta kvüloha etsoyu n licho, osi Ejip kyon tona Kanaan kyon to jiang ekhang lona elümto mikamishüa kümracho. 14 Ontena etsoyu shitao rang ji Joseph na khyarhyui mesaki hansi wocho. 15 Ejip tona Kanaan to metalo orang topvü ezikhanthakale, Ejip kyon jiangna Joseph thüngi oro ezotacho, "Etsoyu epia, e ti chüthoka, ntiosana lanka yana, e rang jiang ezikhanthaka." 16 Tole Joseph na ezocho, "Nte rang jiang ezikhanthak na nte ekümrümo jiang sosi rotava, ji man etsoyu nte pivka." 17 Tole ontena ekümrümo jiang sosi Joseph thüngi rotale Joseph na onte kurü, Olyu, nyanyan, mangsü tona Gadho to jiang man etsoyu onte picho. Hoji nzyu jo ombona onte ekümrümo jiang man etsoyu onte picho. 18 Thüngkümto jo ontena oro ezotalancho, "Tsüphoeyo, ena ntsa ji n phona ni zov, e rang jiang topvü ezikhanthaka osi ekümrümo jiang ha ni echhi. Enhungo e tsük shiang tona e liko to shiang yaka ntia ni piv n li. 19 Eti chüthoka. Ntiosana lanka yana! E li jiang e ti shithuka. Etsoyu man e osi eli jiang khia. Ena mesao ji phajae tssovka osi eli jiang mesao echhi tssovka. Eküm evanthoku etsoyu epia osi eli jiang lo ethev mojü epia." 20 Joseph na Ejip lo liko topvü mesao echhi shiyicho. Otssi vara ji tsükshio jina Ejip kyon otsük akvüto liko jiang eyemo tssoe sicho, osi liko topvü mesao echhi kümcho. 21 Joseph na Ejip meta nkeni na nken phoko jana kyon jiang ji phaje etssov shiracho. 22 Ombona n shirhyucho liko jo pvüti jiang liko jiang tae tssocho. Onteno mesao na tajo theta tsoyuthoku ji tsükona liko jiang n yenlea vanchecho. 23 Joseph na kyon jiang ezocho, "Nte tona nte liko jiang to ana mesao echhi shirathaka. 24 Nte li shiang lo eyingu mojü shiang khitava, osi oli riana ntena mongochia mesao pivka. Hojilo enhyo jiango ntena mojü osi wopan etsov khikhuka." 25 Ontena janlancho, "Nina a eküm a shanchoyithaka. Osi nina ethüngi elhi mmhom tssothaka, tsüphoeyo, eiyo mesao phajaeden tssovka. 26 Hojito Joseph na Ejip meta topvü lona joncho rücho mongochia mesao piv to shikhfü methakcho. Shikhfü shi nchüng jana tsütsatala. Pvüti meta jiang tae mesao echhi n kümcho."

Jakob Jonji Okhao Ji.

27 Israel kyon jiangna Ejip lo Goshen metalo vantacho, hoji lona onte ji eli-i küma otsoeoro elümoto vancho. 28 Jakob na nzyu nzoasi zhüro nandang Ejip lo nzyu taro tiying vancho. 29 Ombo echü tsüngon enhyanale ombona Joseph tsae ezocho, "Ni khe ji aphi yutalo nyimkae echüma, nina a echü müng ji Ejip lo a n si to. 30 Apoang kvülo shothecho sana jilo a shothehungala. Ejip lona a hansi oyi onte ndüngo a shotheta." Joseph na janlancho, "Nina phyoji esüa ana tssovka." 31 Jakob na phyocho, "Nina hojito tssovto echümchaka" Joseph na echümcho, osi Jakob na belüngi na montso picho.

Benkaden 48

Jakob na Ephraim Tona Manasseh To Randaniala

1 Yuta tara sülo jo opo ra vana to Joseph na zocho. Hoji tsükona ombona otsoe otsük eni Manasseh tona Ephraim to sosi Jakob nduko wocho. 2 Ombo tsoe Joseph na ombo nduko rotacho to Jakob na zoale ombona ekhyo tssoe phanthi belüngi khukthecho. 3 Jakob na Joseph ezocho, "Thotsü Potsow na Kanaan Luz lona a nduki a mmhayicho. 4 Ombona a ezocho, 'Ana otsoeoro khosha ni piv, osi ni tsoronichen jiang na jipo khosha kümvüka; ana meta shi ni tsorinichen jiang pivka osi kümali onte echi tssovka.' " 5 Jakob na phyolancho, "Joseph, ana hepi n rothüng Ejip meta shilona nina tsokhying eni Manasseh tona Ephraim to oni buko jiango a echika, onio Reuben ha Simeom oni esüa a tsoeden ka. 6 Nina otsoe thanpo lilanlea jiango a echi tssov meka, onteno Manasseh ha Ephraim oni yakchia tssentso kümka. 7 Ana heto tsso shijo niyo Rachel tsükona tssoala. Ana Mesopotamea lona kholani yia vanathüng, Ephrath lona enhyano Kanaan meta lona nungra sotheta chücho. Ana hojilo Ephrath lantssae ompvü shothecho." (Ephrath jo enhungo Bethlehem to tsala.) 8 Jakob na Joseph tsokhying jiang hungale onteno ochoang sanato ombo engacho. 9 Joseph na ezocho, "Shiango Potsow na Ejip lona a mmhayio tsoeden ka." Jakob na phyocho, "Ana onte mmhayivka onte sosi a thüngi yia." 10 Jakob ji sontsüngo jina ombo myik jiang monlyua mmhona n hungcho. Joseph na ombo tsoe jiang sosi yile ombona khayae onte ntssüphicho. 11 Jakob na Joseph ezocho, "Ana jo ni tia ni hungu to eyilo n liv vancho, tole Potsow na ni tsoe jiang mpato a hungthukthaka." 12 Jitosi Joseph na Jakob phi lona onte ejümchoe ombo mhadungo nkhümthecho. 13 Joseph na Ephraim ji Jakob ayiwoe, Manasseh ji amimoe to vanthukcho. 14 Tole Jakob na ombo khe jiang onlontathuki ombo amimoe ji Ephraim kvürilo, ombo nungo khatola, osi ombo khe ayio ji Menasseh, eramo ji kvürilo to nyimkaecho. 15 Jitosi ombona heto phyoa Joseph Randankacho: "Apoang, Abraham osi Isaak na benkao Potsow jina tsokhying shiang mmhaithuka! Potsow ochona nchüng tsüngon jana a sothak cho sana ji khi onte mmhaithuka! 16 Lanben ochona ekyusü topvü lona a shanchocho sana jina onte mmhaithukvüka! A mying, osi apo Abraham, Isaak to jiang ji tsokhying shiang yakchia lea yithukvüka! Ontena otsoeoro khosha lithukvüka, tsoronichen khosha lithukvüka!" 17 Opona ombo khe amimoe ji Ephraim kvürilo nyimkayio ji hungale Joseph na n mathav sicho, jitsükona ombona opo khe ji Ephraim kvüri lona khi Manasseh kvüri lo nyimkathukcho. 18 Ombona opo ezocho, "hojito meka apo, eramo ji shika ni khe amimoe ji ombo kvüri lo nyimkata." 19 Tole opona ekhirana phyocho, "Ana ntsia otsoe, Manasseh tsoronichen ha jipo tsüphov kümvü, tolia ombo onyuro jo ombo lona tsükao tssov, ombo tsoronichen jo jipo tsüphov kümrav." 20 Hojito ombona hoji nchuk onte mmhayia phyocho, "Israel kyon jiang na mmha randana na nte phyophivka. Ontena, "Potsow khi Ephraim ha Manasseh oni esüa nte mmhaithukvüka' to phyotav. Hojito Jakob na Ephraim ji Manasseh vüngi tssothukcho." 21 Jitosi Jakob na Joseph ezocho, "Nina hunga aiyo achü etünga, tolia Potsow na ni ndüngo vam ka osi ombona ni pyimtsü motsüi metae ni sosi yivka. 22 Ana Shechem ji ni jenio jiang thüngi mekna ni pivka. Hoji meta jijo lizü meta ana Amorite kyon jiang thüngina yonri osi lotssi theta khi vacho."

Benkaden 49

Jakob Yi Okhao Jiang

1 Jakob na ombo tsoe jiang tsarhyui ezocho, "Etssirhyutava, ana nte mhadung ji kvütüv tssov sana nte ezovka: 2 Tsenrungtava, Jakob tsoeden, nte opo Israel na phyo ji engatava." 3 "A tsokhvü Reuben, a etho jo nika A jalithüng tsoe, A tsoe yulo etho ejütso osi kanchantso ji. 4 Nino jükyo ndav esüa tüv, Tokhatola ni ji opvütsotso ji tssov mek, ntiotssole nina a yinga loroe ji thüngi yipcho osi nipo belüng mmenthukcho." 5 "Simeon ha Levi onio jeni. Onina oni epenesü jiang jenpokta lo tsütsatacho. 6 Ana onte mpho thyuta jianglo n rhovo, osi onte sanrhyuta jianglo ha ana wov mek, ntiotssole ontena lüm etsuk lona kyon jiang lüngthacho osi ontena ngashiphen tsükona tssipong jiang ojo jakitacho." 7 Onte lüm etsuk jiang tsükshi khünga, onte rhiyirandankata, ntiotssole onte mhathen shüthen jiang ji' ntakhünga. Ana Israel meta topvülo nzonsorae onte sivka osi Israel kyon yulo nzithechi onte sivka. 8 Juda ni jenio jiangna ni thüngtavka. Nina ni ri jiang evüngona tssenyatala. Ni jenio jiangna ni mhadungo epyakthev. 9 Juda jo hengho esüa, hingho na ekümrüm tatsüngi sisi oshüpi kholani yio ji tüv, Ombona ombo tsük ji rüngi yipala. Osi ochinaha ombo n khetsükhukala. 10 Juda na mesa jarung ji süvka, osi ombo tsoronichen tae na yansavka. Jipo jiangna kyuchitssen ombo lov osi ombo yi enga ombo mhadungo epyakthev. 11 Ombona ombo gadho ro jiang jününgrozhü lo shenkatala, topvülo jününgrozhü mmhontso jilo shenkatala. Ombona ombo sü jiang jününgrojü lona etssüala. 12 Ombona Jününgrojü yuchona mhyiktsüng jiang ejen to rakiala. Ombona shirojü yuchona oho mpato emhümtsüala. 13 "Zebulun jo jümang tssae vamvüka. Ombo jüran jo orhung esanphen tssovka. Osi ombo meta jo Sidon jana tssovka." 14 Tssakhar jo gadho lona mmhonkav meka, gadho na khokthephen sakayiv tsükona rüngpvü süi nhyaka tüv tssov. 15 Khatola esanphen ji mmhona to ombona ntsiv Osi meta jilo etsov jüa to ombona chethev. Jitsükona ombona echen ji eyaki oha ji hanala Osi ombo ji phajae esüa rikata elhithukala. 16 'Dan jo ombo kyon jiang esapvüi tssovka. Onteno Israel jipo thanpoe jiang esüa tssovka. 17 Dan jo lantssa nrü esüa tssovka, Osi lantssae mozhü n mhom nrü tssovka, Hojina kurü ji jolo njüyi khi tsankao ji sülamoe ekhyuchukchi sithukala." 18 "OPVÜI, ana ni shancho ji nhyakala." 19 "Gad ji retsoreyui razhüna hayav, Khatola ombona kholani onte phanlamvü." 20 "Asher liko lona etsoyu mmhom chiyiv, Ombona mesao na lia tsokhoko jitüv etsoyu chiyithukvü." 21 "Naphtali jo siano na etancho yungphia tüv tssov, Hojina siano ro mmhom hana." 22 "Joseph jo jünhyo ndüngo orae gadho esüa tüv, Osi yingsüng tssae orae gadho ro. 23 Ombo ri jiang na ntav tssoa ombo hayatala Osi ontena lotssi tona yonri to bentasi ombo phantala. 24 Tolia ombo lotssi ji khyonga vanala, Osi ombo evon jiang etho khyongthukcho Hojijo Jakob Potsow Thotsü ji etho lona, Osi Israel enhyang osi nkohoe ji etho lona. 25 Nipo Potsow jina ni kyochiala, Thotsü Potsow jina oyakina eryu khi ni mmhayithukala, Osi lichungina ojü khichuki ni mmhayithukala, Otsoeoro osi ekümrümo mmha khosha , 26 Tsünghonrho osi thera mmha, Nkolo phunglan ehen jiang mmha, Kümali evamo yingsüng jiang lona ejüpomo tsütsaelan mmha. Mmha jiang jo Joseph kvüri lo esanthukala, Ojenio jiang thüngina jo ombo oton elio tssothukala." 27 "Bejamin jo ranfü therüng tüv. Ombona enyanyu rüngi tsoala." 28 Shiango Israel pvüji taro eni jiang, osi onte opona pyonta yilan oyi enüngu onte otsük akvü ezoathüng phyocho.

Jakob Chüi Shotheo Ji

29 Jisülo jo Jakob na ombo tsoe jiang ezocho, "Enhungo ana achüi a kyon jiang thüngi eyi etüngo jina apoang ndüngo Kanaan lo Mamre na engkhvüwoe,30 Machpelah Hitite kyon Ephron li longkvü jilo a shotheta. Hojijo Abraham na müngsüphen etssov tsükona Ephron thüngi shicho. 31 Hojilo ontena Abraham tona ombo engh Sarah to shothecho. Isaak tona ombo engh Rebeka to ha hojilo shothecho; osi ana Leah ha hojilo shothecho. 32 Oli ji tona longkvü ji tojo Hittite kyon jiang thüngi shicho. Hojilo a shotheta." 33 Jakob na ombo tsoe jiang ezov elio jiang ezorasi yipkachilani chüi sicho.

Benkaden 50

1 Joseph na ombo vankae kya ombo mha lo ntssüpicho. 2 Jisülo jo ombona opo echümüng ji thyujü nzüyile to yizüng picho. 3 Thanpothüng esüa thyujü na echümüng ji nzüyiv ji tsüngon zhüro khicho. Ejip kyon jiang na ombo tsükona tsüngon ekhatiying kyatacho. 4 Ekya yuta ji yakale Joseph na mesao küpo tsüphoe jiang ezocho, "Nzansi yithen shi mesao ezotava: 5 Apona ombo echü etüngathüng ana ombo ji Kanaan metae ombona okhüp methaki elio jilo ombo juthev to a phyochakthukcho. Ji tsükona nzansi a vothuka ana oyi Apo shothesi elani yivka.' " 6 Mesao jina ezocho, "Nina tssov to phyochako ji esüa ovo nipo shotheta." 7 Tole Joseph na opo shothelo yicho. Mesao ji küpo tsüphoe topvü, ombo mesaki eramoe topvü, osi Ejip lo esopvüiden topvüna Joseph phana wocho. 8 Ombo opan, ombo ojenio jiang tona opo wopan topvü tona ombo phana wocho. Osi onte ngaro eniro jiang, olyu, nyanyan osi mangsü jiang to taena Goshen meta lo vancho. 9 Kyon jiang na kurü zotoro osi kurü manküi na ha wocho osi razhü tsüphov tssocho. 10 Ontena Jordan na engkhüwoe Atad lo litssenphen jilo chiyile, hoji lona sunga kyata mungcho, osi Joseph na müngkya tssolanphyolan tsüngon tiying tssocho. 11 Atad lona ontena kyatao ji Kanaan kyon jiang na hungi phyotacho, "Ejip kyon shiangna müngkya tssolanphyolan mmhom emüngyana khitala!" Jitsükona meta ji Abel Mizraim to tsacho. 12 Hojito Jakob tsoe jiangna ombona ezo ji esüa tssotacho. 13 Ontena ombo müng ji hantasi Kanaan metae oyi Mamre na enhkhüwoe Mechpelah lo longkvüi Abraham na Hittite kyon Ephron thüngi müngsiphen shii evao jilo ombo shothecho. 14 Joseph na opo shothethakale ombona ojenio jiang tona kyon kvütata müngsilo ombo phana ocho sana jiang nzo Ejip lo kholani yicho.

Joseph na Ojenio Jiang Ntsaka Pilanala

15 Onte opo ji chüthakale Joseph ojenio jiangna phyocho, "Joseph na etena kvütata ombo thüngi syulyuo tssocho sana ji e nlilam zia vanchojo kvüto lyutav to!" 16 Jitsükona ontena Joseph thüngi yithen heto yithukcho, "Apo nchüthüng ombona ni ezole to heto ezocho, 17 'Nijenio jiangna ni thüngi worhyua syulyuo tssoji nzansi nlan esiyile. Jitsükona ni opo Potsow phajaeden e shina ntio nlan tssocho sana nzansi e siyia.' Joseph na hojito yithen ji hungale kyacho." 18 Ombo jenio jiangna oro ombo mhadungo epyakthetacho."Ena shilo ni mhadungo ni phajaeden ejoena chirothaka" to ezotacho. 19 Tole Joseph na onte ezocho, "Tikyutava, ana Potsow vanphen ji khiyiv meka. 20 Ntena jo apono n mhom tssocho khatola Potsow na hoji mmhom kümthokcho, hojijo, ji yakchia nchüng eküm vamo kyon shiang khosha eküm shanchoyiv tsükona ombona tssocho. 21 Ntena ntia ekyuv n lika. Ana nte osi nte ngaro jiang nte ntanknshomka." hojito ombona onte lümbümo erhako nzan yi khi onte ntsakata ezocho.

Joseph Chüo Ji

22 Joseph na opo wopan jiang nzo Ejip lo vana vancho. Ombo nzyu nzoasi taro lo ombo chücho. 23 Ombona Ephraim tsoeoro osi tsoronichen jiang hungjana eküm vancho. Osi ombona Manasseh tsoe Makhir tsoronichen jiang ha hungjana eküm vancho. 24 Ombona ojenio jiang ezocho, "Aiyo achüv saka, tolea Potsow na nte nzanrünguka osi meta shilona nte sochokuka, ombona Abraham Isaak osi Jakob thüngi tüngochüa phyochakcho. 25 Jisülo jo ombona ombo kyon jiang phyochakthukcho. Ombona phyocho, 'Kvüthüng Potsow na meta shilona nte socheta sana ntena a echümüng ji hansi nte nzo yiv' to phyochaktava." 26 Joseph na nzyu nzaosi tarolo Ejip metaena chücho. Ontena ombo echümüng ji thyujüna nzüyisi echü bakos lo thechitacho.

Khochuk 1

Ejip lo Israel Jiang Khangshiala

1 Jakob tsokhying jiang na onte wopan jiang sorasi Jakob nzo Ejip metae yio jiango, 2 Reuben, Simeon, Levi, Juda, 3 Issakhar, Zebuln, Benjamin, 4 Dan, Nephtali, Gad, tona Asher to. 5 Jakob lona tondüng thichecho, jiang topvü tssotsüi owo ekha tiying. Ombo tsoe Joseph jo Ejip lo vancho. 6 Sülani jo Joseph osi ojenio jiang osi onte echungren kyon jiang chüracho, 7 tokhatola onte tsoronichen Israel jiang na etsoeoro elümoto thiche otsson kümi Ejip meta pyingcho. 8 Jisüi jo Ejip lo Joseph n tsio mesao ethan na echungcho. 9 Ombona ombo kyon jiang ezocho, "Israel kyon shiang otsson kümthako jina ete tsükona ekyuv lithaka. 10 Ritsso chiyiana ontena ete ri jiang thüngoe tssoe esakasi meta shilona tsanrae yikhoka. Jitsükona onte ji owo n kyungkathukvü etena lanka yantav lia." 11 Jitsükona onte ji ntssonshi khi lüm terithukvü tsükona Ejip kyon jiang na ez-i rhükiden ethüngcherae onte rhükia elhi tssothukcho. Israel jiang na Pithom tona Ramases to yantsü ji, mesao ji tsükona echenlonphen lungjüng kümthukvü tssokachitacho. 12 Tokhatola Ejip kyon jiang na kvüta khangshiana Israel jiang ranka rankana yicho osi meta ji nzüpyinga yicho. Ejip kyon jiang na Israel kyon jiang kyuo jina 13-14 elhi ekhüngu onte tssothuka eziiden kümthukcho. Ontena Israel kyon jiang ji oki etsso thüngoe, oli elhi thüngoe, khangshia elhithukcho. 15 Jitosi Ejip mesao jina Hebrew eloe jiang tsobuk nibuk lo nzanchi eloeden Shiphrah tona Pauh to oni ji ezocho. 16 "Ntena Hebrew eloe jiang tsobuk lo nzanchiathüng eboeroro bukna lüngthae sirayia osi eloeroro tssona to vanthuka." 17 Tokhatola elopvüi jiang na Potsow kyusi mesao ji yi n ngayicho, jithüngona jo ontena eboeroro jiang kümchethukcho. 18 Jitsükona mesao jina elopvüi oni ji tsae ezocho, "Nteno ntiolyui heto elhita eboeroro jiang vanthukchola?" 19 Ontena janlancho, "Hebre eloe jiango Ejip eloeden tüv mek, eni ochina owo onte n jam ontebobo buki siala." 20-21 Eloepvüi jiangna Potsow kyuo jina Potsow na onte wopan ha bukchethukcho, osi Israel kyon jiang n tümjakvü rankacho osi etho khyunga kümcho. 22 Okhao tssoa mesao jina ombo kyon topvü heto yizüng picho: "Hebre eboeroro bukpamo jiang topvü khi Nile zhükhfüi thechi sitava, osi eloeroro jiang tae vanthuka."

Khochuk 2

Moses Buko Ji

1 Yuta jilo Levi jipo eboe tsüka na ombo jipo eloe tsüka soa vancho. 2 Osi ombona tsokhying tsüka ombo bukicho. Tsokhying ji elümoto mmhom tsso jina, choro ethüm jo mphoa vancho; 3 Tokhatola ompvüna ombo n phokhoku siale, ompvü na terüm na tükcho dekho motsünga khi nitsü na raying jiang rizhücho. Ompvüna ngaro ji hojilo thei zhükhfü tsae ero ntssomu lio jiang poni ekachicho. 4 Jitosi ngaro ji oyulov jina kvüto tssoa sana to ekonina cheta vancho. 5 Tole mesao otsolov jina zhükhfüi tsükalo joroathüng ompvü phajae jina zhükhfütsa tsünga wocho. Jithüng ji esüngaro taena ompvü na zhükhfü tssae ero siphov elio jiang poni dekho ji hungi ompvü phaj apvüi tsüka ezoa owo tsakathukcho. 6 Mesao tsolo jina elhichi zele hojilo eboeroro jücho. Ombona kya vamo jina ompvüna nzana nungra nchümcho. Ompvü na, "Shijo Hebrew ngaro jiang yulo tsüka ka" to phyocho. 7 Tole ngaro oyulov jina ompvü ezocho, "Ana owo Hebrew eloe tsüka tsae nijüpthuka ne?" 8 Tole ompvüna, "Nzansi owo a tsayia" to ezocho. Tole oyulov jina ngaro ji oyo ji tsae sosi yicho. 9 Mesao tsolo jina eloe ji ezocho, "Ngaro shi khi a nijüpia, tona ana jokheman ni pivka" tole ompvüna ngaro ji khi nijüpcho. 10 Sülani jo, ngaro ji khyochetale ompvüna ombo sosi mesao otsolov ji thüngi wocho, tole ompvüna otsoe tssoa ombo vanthukcho. Osi ompvübo heto phyocho, "Ana ojüina ombo süchukcho küma Moses to ombo tsavka."

Moses na Midian Metae Tsanthetala

11 Moses na ombo khyochetale ombo kyon Hebrew jiang zethechia wole onte ji kvüta rikata elhi ekhüngu tssothuka sana ji hungcho. Ejip kyon tsükana Moses jipo Hebrew tsüka lüngthata ha ombona hungcho. 12 Moses na eyingosi ochia n hungale zakto Ejip kyon ji lüngthae omüng ji hajang lo shothei sicho. 13 Ojyua to ombona olanle Hebrew otsük eni khonta hungcho. Ombona onilo worio tsüka ji thüngi ezocho, "Nino ntiolyui ni kyon ji heto taala?" 14 Tole kyon jina janlancho, "Ochona e pono esapvüi yitssoe ni tssothukchola? Nina Ejip kyon ji lüngthata to anaha a lüngthav tssoalo?" Tole Moses na kyua "A elhi ji kyon na ntsithaka" to phyocho. 15-16 Hoji yivon ji mesao jina zoale ombona Moses ji lüngthav yancho, tokhatola Moses na Midian metae tsanthei sicho. Tsüngona lojo Moses na jükha motsünga lo khokthei vanle Midia lo pvüti Jethro otsolov nchyu tiyingna opo olyu, nyanyan jiang tsükona jüyuphen jiang lo ojü othelo engo rotacho. 17 Tole olyu enhyang ejoma na Jethro otsolov jiang phani sitacho. Tole Moses na onte nkoyae onte ekümrümo jiang ojü yuthokcho. 18 Ontena opo thüngi elani yitale ombona onte engacho, "Nchüngo nteno ntio tata tsüsoa yitachola?" 19 Ontena ezocho, "Ejip kyon tsükana olyu enhyang jiang khelona e shanchocho. Ombona ojü mpato woe ete ekümrümo jiang e yuthokicho." 20 Ombona otsolov jiang engacho, "Ombo kvülo vanchola?" Nteno "Kvütolui ombo jilo sitachola? owo tsae ete nzo etsoyu tssotava." 21 Tole Moses na hojilo vamvü lüm na rüngcho, osi Jethro na ombo otsolov Zepporah ji ombo engh tssov picho, 22 tole ompvü na tsokhying tsüka ombo bukicho. Moses na ombobo phyocho, "Aiyo meta shilo tsanthan küma Gershom to ombo tsavka." 23 Nzyu tara sülojo Ejip mesao ji chücho, tokhatola Israel jiango ezii tssoa eronta ekyo-erung yanta vanpvü tssocho. Onte ekya ji Potsow na zocho, 24 Potsow na onte ekyaji zoe ombona Abraham, Isaak osi Jakob thüngi ntsata vao ji nchümchecho. 25 Ombona Israel jiang oyam eziiden kümi vamo ji hungi onte tsükona wongkhyucho.

Khochuk 3

Potsow na Moses Tsala

1 Tsüngon na lo Moses na omo Jethro, Midian lo pvüti ji olyu, nyanyan to jiang rhükia vanathüng ombo na tssiden ji sosi lijüng ji pankae ntho phunglan Sinae jilo wocho. 2 Hoji lona OPVÜI lanben na ranuk lona omi kisochia ombo jancho. Moses na ranuk ji omi kiaha n rongu hungcho. 3 Ombona nchümcho, "Shijo emhokthav motsünga, ntiolyui ranuk ji n ronga to, ana sena owo zev." 4 Moses na sena roa OPVÜI na hungale ombona ranuk ji longina, "Moses! Moses!" to tsacho, Tole ombona, "Hao, Shilo a vanka" to ezocho. 5 Tole Potsow na ezocho, "Hojilo enhyankata tiroa. Ni jokhüp ji phungcheta, ntiotssole nino ntho liko lo phanthi vana. 6 Aiyo ni motsüi Abraham, Isaak osi Jakob to jiang Potsow ji." Jitsükona Moses na ombo thüngoe n zechikhokvü kyua ombo mha ji shüngi sicho. 7 Jitosi OPVÜI na phyocho, "Ejip lo a kyon jiang kvüta khangshia vancho sana ana hungthaka; ontena ezii rhüki jiang khelona shanchole to phyoa kyatao ji ana zothaka. Ontena ezüpa vamo jiang ana ntsithaka. 8 Hoji tsükona ana onte shancholo rocho, Ejip kyon jiang khelona onte shanchoe lizü osi ejüeli meta motsünga Kanaan kyon, Hittite kyon, Amorite kyon, Perizzite kyon, Hivite kyon osi Jebusite kyon jiang na enhunga vana evamo meta ngazao ji onte piv. 9 Otsotso ana a kyon jiang na kyatao jiang zothaka, osi Ejip kyon jiang na kvüto onte khangshia sana ana hungthaka. 10 Ana a kyon jiang ni sochethoku tsükona Ejip mesao thüngi ni wothukala." 11 Tole Moses na Potsow ezocho, "Aiyo ochona a ntsicho, kvütoli ana mesao thüngi owo Israel kyon jiang Ejip lona sosi chiyichevla?" 12 Potsow na ezocho, "Ana ni ndüngo tssovka osi nina Ejip lona a kyon jiang sochukthakana phunglan shi lona a khümvüka. Ana ni wothukcho toji hoji lona chethev." 13 Tole Moses na janlancho, "Ana Israel kyon jiang thüngi owo 'nte motsüi Potsow jina nte thüngi a rothukcho ka' to ezoana ontena, "Ombo myingjo ochola?' to a engav, küma aiyo kvüto onte ezovla?" 14 Potsow na phyocho, "Aiyo ocho sana ji a ka. Osi ocho jo 'A ka to tsacho sana jina nte thüngi a rothukchoka to onte thüngi ezoa.' 15 Israel jiang thüngi OPVÜI, 'A, onte pyimtsümotsüi jiang, Abraham, Isaak osi Jakob Potsow jina niji onte thüngi ni rothukcho to ezoa. A mying jo Kümali hoto tssovka; osi echungren etsao jiang naha hojito a tsavka. 16 Owo Israel esopvüi jiang tsarhyui onte motsüi Abraham, Isaak osi Jakob Potsow a shina ni ndukcho to onte ezoa. A, OPVÜI na onte thüngi rothaka to ezoa osi Ejip kyon jiang na ntio onte tssoyia vancho sana ana hungthaka to ezoa. 17 Ejip metae na onte khangshia vamo jilona onte sochoku ana methakthaka osi ejüeli, lizü meta Kanaan kyon, Hittite kyon, Amorite kyon, Perizzite kyon, Hivite kyon tona Jebusite kyon tona enhünga vamo meta jilo onte sosi yiv sala to onte ezoa. 18 "Nina ntio onte ezoa na a kyon jiang na engavka. Jitosi nina Israel esopvüi jiang nzo Ejip mesao thüngi owo 'Hebre jiang Potsow, OPVÜI jina e hungthaka. Jitsükona OPVÜI e Potsow othan pilo evov tsükona tsüngon ethüm yentsa lijüngi e wothuka' to ezotava. 19 Ombona rikacho yaka Ejip mesao na nte n wothuk to ana ntsia. 20 Tokhatola ana a ethotsütsae emhokthav elhi tssoa Ejip kyon jiang khangshivka. Jisülo jo ombona nte yithokvü ka." 21 "Ana Ejip kyon jiang khi nte yikrachithuki ntena khochuka na khejüng khochitokvü meka. 22 Israel eloe otsük akvüna ompvü kiren Ejip kyon jiang thüngi osi Ejip eloe thama thüngi owo mpensü, Shona, Janti, oyuk-osen nsothokuka. Osi hojiang ji Israel kyon jiang na onte tsokhying tsolo jiang ekathuksi Ejip ejüeli jiang hansi yithokvü ka."

Khochuk 4

Potsow na Moses Ji Emhukthao Etho Piala

1 Tole Moses na OPVÜI ezocho, "Tole Israel jiang na a nlongtsükav ana ntio phyoana ji n nga tssona kvüto lyuvla. Nina a n duk to ontena phyona kvüto lyuvla?" 2 OPVÜI na ezocho, "Nina bemo jijo ntiola?" Tole ombona "Jarung ka" to ezocho. 3 Tole OPVÜI na ezocho, "Likoe shümchochia." Moses na jarung ji shümchochile hojina nrü kümi sicho, tole ombona hoji mhadungo tsancho. 4 Tole OPVÜI na Moses ezocho, "Nkhfüthei emhi lona tsakata." Moses na nkhfüthei emhi lona tsakale jarung kümlani sicho. 5 Tole OPVÜI na ezocho, "Hoji esüa tssoe Israel jiang ejüa tona ontena onte motsüi Abraham, Isaak osi Jakob Potsow a shina ni ndukcho to chekathuka." 6 OPVÜI na Moses ezolancho, "Ni khe ji ni phukthesü kupi yonthechia." Moses na yonthechisi khichele, okhe ji porüp na eyukcho to nochonori khyingi sicho. 7 Tole OPVÜI na ni khe ji elani ni phukthesü kupi yonthechia to ezocho. Ombona yonthechisi khichele tathi ji esüa poe sithakcho. 8 OPVÜI na ezocho, "Ontena chethev ovüngo ji n longtsüna, enioto shina onte longtsüthukvüka. 9 Osi chethev enio shi ontena n longtsüa tssona osi nina phyo jiang n longtsüna, Nile zhükhfüi na ojü wokae likoe phyangchochia, tona hojina ejen kümka, " 10 Tole Moses na phyocho, "Meka, OPVÜI a ti wothuka, ana kvüthüng ha okhen oyi mmhom n sanchehan, nina a jam benkasi sülo tia oyi nsanthia a n kümhan. Aiyo okhen oyi lo n tssothi, zünyoa osi titoteria." 11 OPVÜI na ombo ezocho, "Ochona kyon ji obüng lyukayiala? Ochona nobüng osi eyim ombo kümthukala? Ochona ombo hungthukchola mekana mhyikjung ombo kümthukchola? OPVÜI, a shina memek. 12 Tona, khochia! Ana ni kyochia ni nsanthukvüka, osi ntio phyovsana ni ezovka." 13 Tole Moses na ezocho, "Meka, OPVÜI, thanpoe ochosana jenjia." 14 Tole OPVÜI na lüm tsoka ombo ezocho, "Ni nyuro Aaron, Levite kyon jijo kvütola? Ombona mmhona nsanthia to ana ntsia. Osi ombona ni nduko tsata osi ni ndukvü ji emathatala. 15 Nina ombo thüngi thyuta ntio phyovsana ombo enga. Ana ninita thüngi phyov osi ntio elhiv sana nte ezovka. 16 Ombona ni nsanpvüi tssoe ni thungtssoa kyon jiang thüngi nsamka. Nino Potsow esüa tssoe ntio phyov sana ombo ezovka. 17 Jarung shi bena; shina chethev elhi tssovka."

Moses na Ejip Lo Yiala

18 Tole Moses na omo Jethro thüngi oyi ezocho, "Nzansi Ejip metae oyi a wopan jiang thüngi eküm vevana na a zethuka." Tole Jethro na pyonta salüm pia ombo yithukcho. 19 Moses na Midia lona khochiathüng OPVÜI na ombo ezocho, "Ejip metae yilana, ntiotssole ni lüngthav eyamo jiang topvü chüthaka." 20 Jitsükona Moses tona ombo engh tona otsoe jiang to gadho lo tsankathuki Potsow na ben to ezowo jarung ji bensi Ejip metae khochicho. 21 OPVÜI na elani Moses ezocho, "Nina Ejip metae yia vamo jina ana chethev elhi etssov etho ana ni pio jiang topvü Ejip mesao ji mhadungo tssovka. Khatola ana mesao ji lümbüm khüngthuki a kyon jiang vachithukvü meka. 22 Osi OPVÜI a shina heto phyoala to nina ezovka, 'Israel jo a tsokhfü, tsokhying ji. 23 A tsoe ji vachi a khümthukle to ana ni ezole nina ekhirancho. Jitsükona enhungo ana ni tsokhfü topvü lüngthav sala.'" 24 Ejip lani nchenathüng OPVÜI na Moses nduki ombo lüngthav ekhyo tssocho. 25"26 Tole ombo engh Zipporah na olung erov khi ompvü tsoe ji tseni siyisi olong erov ji khi Moses jo lo evüngkayicho. Ompvüna Moses ezocho, "Nino ejen lona a orapvü." Hojitolyui OPVÜI na Moses eküm ji nkochecho. 27 Jithüng OPVÜI na Aaron ezocho, "Lijüngi owo Moses nduka." Tole ombona ntho phunglani na owo ombo ndukcho; osi ndukale ombo ntssüpcho. 28 Tole Moses na OPVÜI na Ejip metae yilanle to ombo ezo jithüng ntio ombo ezochosana topvü Aaron ezocho. OPVÜI na chethev elhi tssole to ombo ezo jiang ha ombona Aaron ezocho. 29 Jitsükona Moses ha Aaron onina Ejip metae owo Israel esopvüiden topvü tsarhyucho. so OPVÜI na ntio kvüto Moses ezocho sana topvü Aaron na onte ezocho, osi Moses na chethev jiang topvü kyon jiang mhadungo tssoe ejücho. 31 Tole ontena longtsücho, osi OPVÜI na onte thüngi rothaka osi kvüto onte khangshia sana ombona hungthaka to ezoale ontena nkhümtherae khümtacho.

Khochuk 5

Ejip Mesao Mhadungo Moses Ha Aaron Oni

1 Moses ha Aaron onina Ejip mesao ji thüngi owo ezotacho, "Israel Potsow OPVÜI jina phyoala, 'A kyon jiang vachia oyi lijüngi na tokhü tssota a yikrachithuka.' " 2 Tole mesao jina "OPVÜI jijo ochola?" "Ana ntiolyui ombo yi engae Israel jiang vachivla? Ana OPVÜI ji n tsi, osi ana Israel jiang n vachi." 3 Moses ha Aaron onina janlancho, "Hebre jiang Potsow jina ombobo e hungthukthaka. Lijüngi tsüngon ethüm yentsa oyi e OPVÜI ji othan piv tsükona e vachia. Ena hojito n tssoana ombona nochonori na mekana ritsso khi e chürathukvü." 4 Mesao jina Moses ha Aaron oni ezocho, "Kyon jiang onte elhi lona esanthukvü jo ntio etsso phyotala? Zakto ezi-i jiang elhi sakathuka!" 5 Nte kyon jiang Ejip kyon lona wotssonka kümthaka. Enhungo ntena elhi lona onte esanthuk hunga vanthaka!" 6 Hoji nchukna Ejip mesao na ezii rhüki jiang tona Israel ezepvüi jiang to ezocho, 7 "Kyon jiang na kitssolong nsüngrüv ntena mavü onte tipitava, onte khi owo yanpani nsüngrüthuka. 8 Tolea ontena enga-a lo kvüta nsüngrüphen sana jilo motsünga lea n matakana nsüngrüchevka. Onte ji elhi tssona n piküma vachi oyi onte Potsow thüngi othan pithukle to a ezota mongala! 9 Kyon shiang ji elhi khosha pia ntssochov vanthuka tona ontena onbung yibung jiang engav yuta liv meka." 10 Ezii rhüki jiang tona Israel ezepvüi jiang to na owo Israel jiang ezocho, "Mesao na nte ji enhungo mavü nte n pi to phyocho. 11 Ombona nte bobo mavü yanpani elhitale osi thanpothüng methakphen jilo mpüma lea ti mataka na methakle to phyoala." 12 Jitsükona kyon jiangna Ejip meta topvü lo mavü yanta wotacho. 13 Osi ezii rhüki jiang na onte yuta thanpothüng mavü onte piathüng methakphen jilona kitssolong motsünga lea n matakathukna engakvü bena nsüngrüle to rikacho. 14 Ejip kyon ezii rhüki jiang na Israel ezepvüi jiang ha ekhoesükcho. Ontena "Ntiolyui nte kyon shiango kitssolong ovüng thüng chiyiphen tata n chiyithukala?" to ezocho. 15 Tole rhükipvüi jiangna mesao thüngi owo erenjantacho, "Yikrachio tsüphoe, nino ntiolyui heto etssoyichola? 16 Mavü e npi na kitssolong nsüngrüv ezoala! Elümoto ekho-esükala osi shijo nte kyon jiang nlanka." 17 Mesao na janlancho, "Nte ji etho n jüi tsso jina elhi nte n tssohung küma nte vachia oyi OPVÜI thüngi othan nte pithukle to a ezotala. 18 Zakto oyi elhi tssotava! Ntia mavü nte piv meka, tolea thanpothüng methakphen tata methakvüka."19 Mavü n pina kitssolong thanpothüng methakphen tata methak to onte ezoale elhi rhükipvüi jiangna onte ji ezüp lithaka to nchümtacho. 20 Ontena yita vanle, Moses ha Aaron oni na onte nhyakta vamo jiang ndukcho. 21 Ontena Moses ha Aaron oni ezocho, "Nini na ntio elhitacho sana OPVÜI na hungthaka, osi nini elhi yakchia mesao osi ombo küpo tsüphoe jiang khi etssaktuko ji tsükona OPVÜI na nte khangrivka."

Moses na OPVÜI Thüngi Erenjanala

22 Tole Moses na OPVÜI thüngi owo ezocho, "OPVÜI nino ntiolyui ni kyon shiang heto khangriala? Nina ntiolyui hepi a rothukchola? 23 Ana mesao ji thüngi owo ni thung tssoa phyopvüto ombona haruka onte tsütsatala. Osi nina onte nzanchiwo ntia n tssohan!"

Khochuk 6

1 Tole OPVÜI na Moses ezocho, "Enhungo ana mesao ji thüngi kvüto lyuvsana nina hunguka. Ana a kyon jiang yithukvü ombo khüng kavsala. Ombona rikata phani onte siwo tüv ana ombo tsswothukvü sala."

Potsow na Moses Tsala

2 Potsow na Moses ezocho, "Aiyo OPVÜI ji. 3 Ana Abraham, Isaak osi Jakob thüngi aiyo Thotsü Potsow ji to hungthukcho, tokhatola ana a ntho mying OPVÜI ji yakchia onte khi a ntsithukcho mek. 4 Elani ana ontena yentsae esüa vana vamo Kanaan meta ji onte piv phyochaka onte thüngi ntsata vacho. 5 Osi ana Israel jiang na Ejip jiang eziiden tssoe kyata vamo jiang zothaka, osi onte thüngi a ntsata ji ana nchümchethaka. 6 Hoji tsükona ana heto phyoala to Israel jiang ezoa, 'Aiyo OPVÜI jika; ana nte shanchoe Ejip kyon jiang küpo ezii eküm ji lona nte vachivka. Ana a khe tsakae ekhenthao ezüp onte pia onte khe lona nte shanchoka. 7 Ana a kyon nte kümthukvüvka, osi aiyo nte Potsow tssovka. Ana Ejip kyon jiang khelo ezii eküm jilo ha nte vachiana ntena aiyo OPVÜI ji to ntsivka. 8 Ana nte piv to Abraham, Isaak osi Jakob thüngi tüngochüa phyochako meta ji ana nte piv; osi hoji nte echi tsotso tssoa ana nte piv. Aiyo OPVÜI ji ka.' " 9 Moses na shiang hetopvü Israel jiang ezoaha onte lümbüm jiang ezii eküm lona rokhanthako ji tsükona ontena ombo yi n ngacho. 10 Tole OPVÜI na Moses ezocho, 11 "Ejip mesao ji owo ezoa, ombona meta shilo na Israel jiang vachi nrüngle to." 12 Tole Moses na phyocho, "Israel jiangna lea a yi n ngav kvütoli mesao na engavla? Aiyo oyi n nsanthi tsüka." 13 OPVÜI na Moses ha Aaron oni ezocho: "Ana Israel kyon jiang Ejip lona sochuko nte wothukcho to Israel jiang tona mesao ji to ezotava."

Moses ha Aaron Oni Wopan Kitsük

14 Jakob tsokhfü Reuben na tsokhying mezhü vancho: Hanoch, Pallu, Hezron, tona Garmi to, onteno onte mying ejana eyio pvüji jiang omotsüiden kümcho. 15 Simeon na tsokhying tirok vancho: Jemuel, Jamin, Ohad, Jachin, Zohar, tona Shaul, Kanaan eloe tsoe ji to; onte ha onte mying ejana yio pvüji jiang omotsüiden kümcho. 16 Levi na tsokhying ethüm vancho: Gershon, Kohath, tona Merari to; Onteno onte mying ejana yio pvüji jiang omotsüiden kümcho. Levi na nzyu nzoasi thümro tiying vancho. 17 Gershon na tsokhying eni vancho: Libni tona Shimei to, osi ontena tsoronichen elümoto vancho. 18 Kohath na tsokhying mezhü vancho: Amram, Izhar, Hebron, tona Uzziel to. Konath na nzyu nzoasi thümro vancho. 19 Me rari na tsokhying eni vancho: Mahli tona Mushi to. Shiang hetopvü Levi pvüji tona onte tsoronichen jiang to. 20 Amram na opo oyilov Jochebed soa vancho, osi onina Moses ha Aaron oni bukcho. Amram na nzyu nzoasi thümro tiying vancho. 21 Izhar na tsokhying ethüm vancho: Korah, Nepheg, tona Zichri to. 22 Uzziel naha tsokhying ethüm vancho: Mishael, Elzaphan, tona Sithri to 23 Aaron na Amminadab otsolov osi Nahshon oyilov Elisheba ji soa vancho: ompvüna Nadab, Abihu, Eleazar, tona Ithamar to bukcho. 24 Korah na tsokhying ethüm vancho: Assir, Elanah tona Abiasaph to; onteno Korah pvüji chiroe yio jiang omotsüi jiang. 25 Aaron tsoe Eleazer na Putiel otsolov soa vancho, osi ompvüna Phinehas bukcho. Shiang jo Levi pvüjiden jiang osi wopan lo eramoe jiang. 26 Aaron ha Moses onio OPVÜI na, "Israel pvüji jiang Ejip lona sochoka" to ezo jiang. 27 Onteno Israel jiang vachile to Ejip mesao ezoe jiang.

Moses ha Aaron Oni Thüngi Yizüng

28 OPVÜI na Ejip metaena Moses thüngi heto ezocho, 29 "Aiyo OPVÜI jika, ana ntio ni ezothakcho sana topvü Ejip mesao ji ezoa." 30 Tole Moses na ezocho, "Aiyo oyi n santhi küma kvütoli mesao jina a engayivla?"

Khochuk 7

1 OPVÜI na phyocho, "Ana mesao ji mhadungo ni ji Potsow esüa ni tsswothukvüka, osi nijenio Aaron jo ni yi ephyoe tsswothukvüka. 2 Ana ntio ni ezoasana topvü Aaron ezoa, tona ombona mesao ji ezoa Israel jiang ombo metae na khochithukuka. 3

Khochuk 4 Tokhatola ana mesao ji lüm khüngthuki ana Ejip lo emhukthao chethev elhi tssolea ombona ni yi engav meka. Jisüijo

ana Ejip pono ezüp ntav piv osi Israel pvüji jiang meta jilona sochokvüka. 5 Ana a khe khikae onte panlana Israel jiang onte metae na sochukathüng ti Ejip kyon jiang na OPVÜI ji a ka to chethevka." 6 OPVÜI na ntio yizüng picho sana Moses ha Aaron onina ji ephan tssocho. 7 Ontena mesao thüngi thyutao jithüng jo Moses nzyu ekhatiza, Aaron nzyu ekhatiza si ethüm to tssocho.

Aaron Jarung Ji

8 OPVÜI na Moses ha Aaron oni ezocho, 9 "Ntena chethev tssoe ombo ejüle to mesao na chona tssona, Aaron ezoa ombo jarung ji mesao mhadungo shümchithuka, tona hojina nrü kümvüka." 10 Tole Moses ha Aaron oni na owo OPVÜI na onte ezo ji ephan tssotacho. Aaron na ombo jarung ji mesao osi ombo lhisae tsüphoe jiang mhadungo shümchile hojina nrü kümi sicho. 11 Tole mesao jina ombo küpo ozen ntsiwo jiang tsae hoji esüa tssothukcho. 12 Ontena onte jarung jiang shümchochira le, jarung jiangna nrü kümracho. Tokhatola Aaron jarung jina onte jarung jiang nzhüracho. 13 To tssoaha, mesao jina lüm khüngi vancho, osi OPVÜI na phyoji esüa ombona Moses ha Aaron oni yi n ngacho.

Ejen Vara na Ejip Rhakala

14 Tole OPVÜI na Moses ezocho, "Mesao ji lüm elümoto khünga, osi kyon jiang n yithuk to ekhiranala. 15 Jitsükona ombona enyathüng Nile zhükhfüi jowoathüng owo ombo nduka nrü kümcheo jarung ji bensi jowo jürani na ombo nhyaka vana. 16 Tosi mesao ji heto ezoa, 'Ni khi Hebrew jiang vachia oyi lijüngi na ombo khümtatho kle to ni ezolo Hebrew jiang Potsow jina a rothukcho. Tole enhünga jana hoji n ngahan. 17 Jitsükona, yikrachio tsüphoe, enhungo nina OPVÜI jo ocho sana chetheo tssoa OPVÜI na elhi tssovsala. Zeta, ana jarung shina ojü poni evakthechiana ojü topvü ejen kümi sivka. 18 Ongo jiang chürav, osi ojü ji nnanphfüphfü na kümi Ejip kyon na hoji n yuchev siv." 19 Tole OPVÜI na Moses ezocho, "Aaron ezoa ombo jarung ji khi Ejip meta lo zhükhfü, jülan, osi wozhü jiang pono khikae bensi vanthuka. Tona ojü topvü, otssüng osi olong na shamo jüjen jiang lo jüwo jiang mpato ejen kümkhani sivka." 20 Tole Moses ha Aaron onina OPVÜI na ezoji esüa tssocho. , Mesao ji osi ombo küpo lhisae tsüphoe jiang topvü mhadungo na Aaron na jarung ji tsakae jüponi evakthechicho, tole ojü topvü ejen kümracho. 2l Ojüi ongo jiang chürae nnantsüi Ejip kyon jiangna ojü ji n yuchev sicho. Ejip meta topvü lo ejen na pyingcho. 22 Tole mesao küpo ozen ntsiwo jiang naha hoji esüa tssochecho. tolea mesao jina lüm khüngi vanpvü tssocho. OPVÜI na phyoji esüa mesao jina Moses ha Aaron oni yi ji n ngayicho. 23 Hoji chethev ji tia n chekav ombo mesaki kholani yi sicho. 24 Ejip kyon jiang na zhükhfü jü ji n yucheo jina jürani ojü eyuv jükha shanracho. 25 OPVÜI na zhükhfü jilo okhe thesi tsüngon tiying tssothakcho.

Ovüden

Khochuk 8

1 OPVÜI na Moses ezocho, "OPVÜI na heto phyoala to owo mesao ji ezoa, 'A kyon jiang vachi, onte khi a khümthuka. 2 Nina ekhirana tssona ana ovüden vachi ni meta lo ezüp rwothukvüka. 3 Nile zhükhfü ji ovü taena phyingkachisi jilo na sanchuki ni mesa ki, ni yippheni, ni belüngi, ni küpo tsüphoe jiang osi ni kyon jiang ki topvü lo, osi ni tssoyan ki osi hanpvüi mpato ovü taena pyinguka. 4 Onte na ni osi ni kyon jiang, osi ni tsüphoe jiang topvü tsukzhüv." 5 OPVÜI na Moses ezocho, "Aaron ji ombo jarung ji khi zhükhfü jiang, jülan osi wozhü jiang poni nsüchi bensi ovü jiang sanchothuki Ejip meta ji eyukthukle to ezoa." 6 Aaron na jüponi nsüchi benle ovü jiang na sanchoki meta ji pyingi sicho. 7 Tole ozen ntsiwo jiangna ha onte ozen etho lona ovü meta jilo chiyithukchecho. 8 Tole mesao jina Moses ha Aaron oni tsae ezocho, "Ovü shiang monthukvü tsükona OPVÜI thüngi randantava, tona ana nte kyon jiang vachia oyi OPVÜI thana khümthukvü ka." 9 Moses na ezocho, "Ni randaniv tsükona a emathata. Kvüthüng ni osi ni tsüphoeden osi ni kyon jiang tsükona randam sana yuta koe a pia. Tona ovü shiang na nkachorae Nile zhükhfüi tae vani siv, osi ni noyinguka." 10 Mesao jina janlancho, "Ojyua a randania." Tole Moses na ezocho, "Nina phyoji esüa ana tssovka, osi OPVÜI e Potsow OPVÜI ji yaka thanpo Potsow kvüloha n van to nina ntsivka." 11 Ni osi ni tsüphoeden osi kyon jiang topvü thüngina ovü jiang tsanrae Nile zhükhfüi tae vamka. 12 Moses ha Aaron onina mesao thüngina khochi yicho, osi oyi Potsow thüngi ombona mesao thüngi ovü rothuko jiang khilani siyile to Moses na randancho. 13 Moses na randamo ji esüa OPVÜI na tssocho, osi oki hapho osi oli jiang topvü lona ovü jiang chürae sicho. 14 Ejip kyon jiang na hojiang hanrhyui meta topvü nnana kyoncho. 15 Ovü jiang chürathaka to mesao jina ntsiale mesao ji lüm khüngi silancho, osi OPVÜI na phyoji esüa, mesao jina Moses ha Aaron oni yi n ngacho.

Pyatük

16 OPVÜI na Moses ezocho, "Aaron ji ombo jarung jina liko lo sathechile to ezoa, tona Ejip metalo livero topvü pyatük kümkham ka." 17 Tole Aaron na ombo jarung ji khi liko ji sacho, osi Ejip lo livero topvü pyatük kümi sicho. Osi hojiang na kyon osi ekümrümo jiang sanzhüi sicho. 18 Ozen ntsiwo jiang naha pyatük chiyithukvü ekhyo tssotacho khatola n tssochecho. Meta topvü pyatük na pyingcho. 19 Osi ozen ntsiwo jiang na mesao ezocho, "Shijo Potsowna tssocho!" Tokhatola mesao ji lüm khüngi vancho. Osi OPVÜI na phyoji esüa ombona Moses ha Aaron oni yi n ngacho.

Benoden

20 OPVÜI na Moses ezocho, "Ojyua riyazüngi na owo mesao jina zhükhfüi yia vanathüng nduki OPVÜI na heto phyoala to ezoa, 'A kyon jiang vachi oyi a khümthuka. 21 Nina ekhirana tssona ana ni osi ni tsüphoeden, ni kyon topvü to thüngi benoden rwothukvü to ni ezoaka. Ejip kyon jiang ki topvü beno na pyinguka osi liko topvü beno na eyukuka. 22 Khatola a kyonden na vamo Goshen meta jijo ana nkoyav ka, osi jilo jo beno rhowov meka. Nte khi A, OPVÜI na meta shilo elhi tssoala to chethethukvü tsükona ana hojito tssovka. 23 Ana a kyon tona ni kyon to khotathukuka. Chethev shi ojyua tssov.' " 24 OPVÜI na mesaki tona ombo tsüphoe jiang vanpheni to benodentsü sanchukthukcho. Hoji tolyui Ejip meta topvü lo beno jiang na ezüp picho. 25 Tole mesao jina Moses ha Aaron oni tsae ezocho, "Meta shilo na owo nte Potsow othan pitava." 26 Moses na ezocho, "Hojito etssov jo etüm n li, ntiotssole ena ekümrümo khi e OPVÜI Potsow thamo jina Ejip kyon jiang lüm tssatssov. Ena Ejip kyon jiang ehungo na ekümrüm shiang othan picho jo onte lüm tsuki olong na ephyatsünguv. 27 Ena e Potsow ji ombo na phyo ji ephan othan piv jo tsüngon ethüm yentsa lijüngi na oyi thanchev." 28 Mesao jina phyocho, "Ntena elümoto ekoni n yia tssona ana nte yithuka lijüngi na nte Potsow nte khümthukuka, a randanitava." 29 Moses na janlancho, "Ana khochipvü ojyuana ni osi ni tsüphoe tona kyon jiang to thüngina beno jiang khi sile to randamka. Tokhatola nina ejiphilana kyon jiang khümo n yithukvü ti sikhe." 30 Moses na mesao ji sisi oyi OPVÜI thüngi randancho, 31 tole OPVÜI na Moses randan engayicho. Beno jiangna mesao, ombo tsüphoe jiang osi kyon jiang nkachoe yicho, osi motsünga tia n vam sicho. 32 Tole jithüng ha mesao jina lüm khüngi sicho, osi kyon jiang n yithukvü sicho.

Khochuk 9

Ekümrümo Echü

1 OPVÜI na Moses ezocho, "Mesao ji owo ezoa, Hebrew jiang Potsow OPVÜI jina phyoala, 'A kyon jiang vachi a khümthuka. 2 Nina ekhiralana onte n yithuka tssona, 3 ana ni ekümrümo topvü pono ekyuthav vara rothuki ni ezüpthukuka ni kurü jiang, gadho, odh, olyu osi nyanyan topvü pono rwothukvüka. 4Ana Israel jiang ekümrümo jiang tona Ejip kyon jiang ekümrümo jiang to khotathukvüka, osi Israel jiang ekümrümo motsünga lea chüv meka. 5 A OPVÜI na ojyua tsüngon kokae shi benthukvüka.' " 6 Ojyuato jo OPVÜI na ombona phyo ji esüa tssocho, osi Ejip kyon jiang ekümrümo topvü chücho, toaha Israel jiang ekümrümo jo motsünga tia n chücho. 7 Mesao jina kvüto tssocho sana to ethümi zele Israel jiang ekümrüm jo motsünga tia n chü to zocho. Khatola ombo lüm khüngi kyon jiang n yithukcho.

Vela

8 Tole OPVÜI na Moses ha Aaron oni ezocho, "Mitssopheni na mibuk tara khichei; Moses na mesao ji mhadungo ezhüi venkachia. 9 Hojiang na makvüro enyipvü esüa Ejip meta ji eyukvüka, osi meta topvü lo ontena vela kümi kyon osi ekümrümo jianglo emho khyingrav ka." 10 Tole onina mibuk tara yae bentasi mesao mhadungo phanthi Moses na ezhüi vakachile hojiangna kyon osi ekümrümo jiang emhotsüngracho. 11 Ozen ntsiwo jiangha Ejip kyon thanpoe jiang esüa emho khyingrao jina ontena Moses mhadungo n chiwochecho. 12 Khatola OPVÜI na mesao ji lüm khüngthukcho, osi OPVÜI na phyo ji esüa mesao jina Moses ha Aaron oni yi n ngacho.

Sheryu

13 Tole OPVÜI na Moses ezocho, "Ojyua nyazüngi na mesao ji nduki Hebrew jiang Potsow OPVÜI jina heto phyoala to ezoa, 'A kyon jiang vachi oyi a khümtathuka. 14 Nchüng shilojo ana ni tsüphoeden osi kyon jiang tae mek na niha ni khangshivka, osi hojilona nina limha shilo a esüa ochia n van to a ntsivka. 15 Ana a khe süngkae khi nochonri na ni tona ni kyon jiang to pono rothukvo nte topvü rorüpi nte sithakvü, 16 tokhatola a etho ni ejüv tsükona osi a mying ji meta topvülo pyinga yithoku tsükona tae nte vanthukcho. 17 Toaha nina kangtsüa a kyon jiang süyasi vana. 18 Ojyua heto-thünga ana Ejip meta lo echungatia n tssohancho jitüv motsü rütaphen sheryu jothokuka. 19 Jitsükona enhungo ni ekümrümo kvüta hapoe vancho sana ranki tsathei vanthukle to yizüng pia. Kyon osi ekümrümo hapoe vana tssona jiang topvü sheryu na echüktsüngi chüthokuka.' 20 Mesao tsüphoeden ejoma jo OPVÜI na phyoji kyuo jina onte phajaeden osi ekümrümo jiang oki sothei vanthukcho. 21 Tokhatola thanpoe jiango OPVÜI na phyo ji nngayiv onte phajae jiang tona ekümrümo jiang to hapoe vanthukcho.'" 22 Tole OPVÜI na Moses ezocho, "Ni khe ji oyaki rükachia tona sheryu na Ejip meta topvüto pyinguka osi hojina kyon, ekümrümo osi oli yolanhanlan topvü eyukuka." 23 Jitsükona Moses na ombo jarung ji oyaki rükachicho tole OPVÜI na tharak osi sheryu rothukcho osi liko ji tsüngjocho. 24 OPVÜI na sheryu echhiv jothuka sülan mhadung potsüo nlüpthukcho. Hojijo Ejip lo n lihan jo jitüv ekhenthav sheryu jocho. 25 Osi Ejip meta topvü tolo hapoe vancho to etsa kyon osi ekümrümo mekana thanpolipo tssolea topvü monthukcho. Oli yulanhanlan osi otsüng odung topvü echhüki sicho. 26 Goshen meta kvülo Israel kyon jiang na vancho sana jilo tae sheryu ji n jocho. 27 Tole mesao jina Moses ha Aaron osi tsae ezocho, "Nchüng shilojo ana mmen tssothaka; OPVÜI elan lia, osi a kyon tona a tonlan lia. 28 OPVÜI thüngi randantava! Ena tharak osi sheryu etsson hungthaka. Ana nte yithoku phyochakala, ntena helo vanlamvü meka." 29 Moses na ombo ezocho, "Ana yantsü shi yaki yipvüto a khe yonkachia OPVÜI thüngi randamvüka. Tharak shi esamka osi sheryu jolam meka, osi liko shijo OPVÜI echhi to nina ntsivka. 30 Khatola ni osi ni tsüphoe shiangna OPVÜI Potsow n kyuhan to ana ntsia." 31 Osi wozhü odung jiang pvüpüma osi omüm jiang ethiche mhena to vamo ji tsükona jiang roe sicho. 32 Khatola n mhenhamo tssüngthi jiango ntia n tssocho. 33 Moses na mesao thüngi na khochi yantsü ji pankae chiyi okhe yonkachi OPVÜI thüngi randancho. Tole tharak, sheryu, osi eryu jiang topvü esanracho. 34 Hojito tssoji mesao na ntsiale ombona elani mmen tssocho. Ombo osi ombo tsüphoe jiang topvü na ovüngthüng esüa lüm khünglani sicho. 35 Osi OPVÜI na Moses yakchia phyoe elio ji esüa mesao jina Israel kyon jiang n vachicho.

Khochuk 10

Khomung Vara Ji

1 Jisüi jo OPVÜI na Moses ezocho, "Owo mesao ji nduka. Ana ombo osi ombo tsüphoe jiang lüm khüngthukcho, hojijo ana onte yulo chethev elhi tssov tsükona osi 2 ana chethev elhi tssoe kvüto Ejip kyon jiang ejithechicho sana hoji ntena nte tsoronichen jiang ezotathoku tsükona. Aiyo OPVÜI ji to nte topvüna ntsivka." 3 Jitsükona Moses ha Aaron onina mesao thüngi owo ezotacho, "Hebrew jiang Potsow OPVÜI jina phyoala, 'Nina ayi n ngana kvütenhyaka ekhirana vanala? A kyon jiang vachia a kümthuka. 4 Nina ekhirana munga tssona ana ojyua meta shilo khomungden rwothukvüka. 5 Ontena liko ji mpato eyuki sia jitüv rwothukvüka. Sheryu jina n rov enhyokao jiang, odung hakao jiang mpato khomung jiang na tsoe sivka." 6 Ontena ni mesaki osi ni tsüphoeden osi kyon jiang ki topvü sanzhüvka. Osi onte motsüi jiang na hungthakcho topvü lona tsükshikata tüv tssovka. Tole mesao jina mmilani yi sicho. 7 Mesao küpo tsüphoden jiangna ombo ezotacho, "Kyon shina kvütenhya ekhetsüv sato? Israel jiang vachi oyi onte Potsow ji khümthuka. Ejip meta shijo moni sithako shi nino n tsichoke?" 8 Tole Moses ha Aaron oniji mesao thüngi sosi yicho, osi mesao jina oni ezocho, "Ntena oyi nte Potsow ji khümkhuka, tole otsotso ochoang yithoku sala? 9 Moses na janlancho, 'E topvüna yivka, e tsoeoro osi pvüchiporan topvü sosi yivka. Ena e tsokhying tsolo jiang, olyu nyanyan jiang, mangsü jiang to sonhyav, ntiotssole ena e pvüi Potsow yikrachia tokhu khitav." 10 Mesao jina ezocho, "Ana Potsow myingona echümala, ana kvüthüngha nte eloe osi ngaro jiang sosi nte n yithuk! Ntena a panlantav khentala to ana ntsithaka. 11 To n tssoche! Nte yihungna eboetso tae na oyi OPVÜI khümtava." Hojito ezoa Moses ha Aaron oni ji mesao thüngina phanchukchi sicho. 12 Tole OPVÜI na Moses ezocho, "Ejip metalo khomungden chiyithuku tsükona ni khe ji rükachia. Tona ontena sana chiyi benro osi thanpo kvüta sheryu jina enykacho sana jiang tsoe sithokuka." 13 Tole Moses na ombo jarung ji rükachile OPVÜI na engkhüwoe na mpung chiyithuki hoji tsüngon osi zümo totona venthukcho. Enyathüng jo hojina khomungden jiang sochukcho. 14 Ontena oden tssoe rüma oyi meta ji eyuki sicho. Hoji khomungden jijo kvüthüngha n hunghan osi n hunglamo jitüv tssocho. 15 Ontena liko ji mpato nyika eyuki sicho. Sheryu jina halanchicho ntio licho sana ontena tsoracho osi odungi tssüngthi jiang ha tsoracho. Ejip meta topvü lo limo mmyaku n liv tsorae sicho. 16 Tole mesao jina zaktole Moses ha Aaron oni tsae ezocho, "Ana nte Potsow osi nte mhadungo mmen tssothaka. 17 A mmen jiang nlan a siyitava, osi OPVÜI khi echüo vara shi khi a siyithuku randantava." 18 Moses na mesao thüngi na yicho, osi OPVÜI thüngi randancho. 19 Tole OPVÜI na engkhüwoe ezhü ji engrhelamoe ezhü kümthoki sicho osi hoji ezhü jina khomung jiang sosi Suez jünken jiwoe yithukcho. Ejip lo khomung motsünga tia n züpkav sicho. 20 Tokhatola OPVÜI na mesao ji lüm khüngthuki ombona Israel jiang n vachicho.

Emüng

21 Jisüijo OPVÜI na Moses ezocho, "Ni khe ji potsüwoe rükachia, tona emüng echhiv epyanphyata tüv na Ejip meta ji eyuki sivka." 22 Moses na ombo khe ji potsüwoe rükachile emüng na tsüngon ethüm eyuki sicho. 23 Ejip kyon jiang na onte tia n hungtacho, osi yuta jilo jo ontena oki yaki n chivochecho. Khatola Israel jiango ontena vamo jilo jo wondang licho. 24 Mesao na Moses tsae ezocho, "Oyi nte Potsow ji khümtava, eloe osi ngaro jiangha sosi yitava. Tokhatola nte olyuden osi nyanyan osi mangsü jiango vanthuktava." 25 Moses na ezocho, "To tssona ena othan osi erungthan OPVÜI epiv ji nina ekümrüm epichev. 26 Meka, ena ekümrümo jiang sonhyachev, motsüngalea n valanchiche. Ena ekümrümo kumoe khi OPVÜI thamvü sana e bobo ethüngu lia. Osi ena meta ji oyi n jamu jo kvütüv na thamvü sana ntsiv mek." 27 OPVÜI na mesao ji lüm khüngthukcho, osi ombona kyon jiang n yithukcho. 28 Ombona Moses ezocho, "A ehungo na tsani sia, ana ni nduklamvü meka! Ana tsüngon kvülo ni hungana ji tsüngono ni chüthokuka!" 29 Moses na ezocho, "Nina ha n duklan to phyo ji elanthata," "Nina elani ahunglam meka"

Khochuk 11

Tsokhying Ovüngo Ji Echüv Ji Moses na Tüngsochiala

1 Tole OPVÜI na Moses ezocho, "Ana Ejip mesao osi ombo kyon jiang thüngi ezüp olan motsünga tae piv lika. Jisülo jo ombona nte yithukuka. Ombona phani nte yithukuka. 2 Jitsükona Israel kyon jiang topvü ezoa, onte phinakiren thüngi shona janti oyuk-osen nsorathuka." 3 OPVÜI kyak yakchia Ejip kyon jiangna Israel jiang longtsükacho. Tsüphoe jiangna mpato, Moses ji elümoto tsüphoe to longtsükacho. 4 Tole Moses na mesao ezocho, "OPVÜI na phyoala, 'Zümolongo ana Ejip yakchia wovka, 5 osi Ejip metalo tsokhying ovüngo jiang topvü mesao tsokhying yansa tssentso tssovsa evamo ji lona benkae tsüngonrho enhying eloe ji tsokhying ovüngo ji nandang chüvka. Tssiro mangsü jiang oro ovüngo jiangha chüravka. 6 Ejip meta topvü lona kyatanrungta won zovka osi kvüthüng ha hojito n tssohan osi n tssowo jitüv sükhying tssovka. 7 Tokhatola Israel jiang osi onte ekümrümo jiango füro na tia rhyuv meka. Osi A, OPVÜI shina Israel kyon jiang tona Ejip kyon jiang to khotathukala to ntena chethevka.' " 8 Moses na wokhao tssoa heto ezocho, "Ni küpo tsüphoe topvü na a thüngi oro epyakthie a khüma a kyon jiang sosi yirale to chontavka. Tosanati ana yivka." Tosi Moses na elümoto lüm tsuka mesao thüngina yi sicho. 9 OPVÜI na heto Moses ezoe licho, "Ana Ejip lo chethev elhi elümoto etssowo tssoa mesao jina sunga ni tanglanchia munguka." 10 Moses ha Aaron onina chethev shiang hetata shi mesao ji mhadungo tssocho, khatola OPVÜI na ombo lümbüm ji khüngthuki Israel kyon jiang n vachithukcho.

Khochuk 12

Yakchi Tokhu Ji

1 OPVÜI na Ejip metae na Moses ha Aaron oni ezocho, 2 "Choro shijo nte tsükona nzyualo choro ovüngtso ji tssovka. 3 Israel kyon topvü thüngi heto engathethuka, choro shilo tsüngon taro to jilo otsük akvüna ombo wopan ji tsükona olyuro mekana nyanyanro motsünga ethüngchei vanthuka. 4 Ombo wopan jina ekümrüm mpüm jo n tsorao tüv wozana to tssona ombo phinakiren oni motsünga shümta tatsüngthuka, kyon tsükana kvüta tsokhukvü sana ji ephanina. 5 Ntena olyu lea nyanyan lea khikhuka, tolea nzyuatso osi obong ntia ephyo erüv n khyingo tüv khivka. 6 Jitosi choro jilo tsüngon taro mezhüo to ji mmyulani Israel topvüna ekümrümo jiang tatsüngthuka. 7 Ontena ejen tara ranchei oki kvülona oso ji tsotav sana ji kipüng tyurhyu lo osi kipüng mhalo koküngo esekae vathuka. 8 Hoji zümo oso ji rii limo ekhov tona ebung mozhü to n thena rüngcho hümri nzo tsotathuka. 9 Oso ji eshüi na mekana ekvüi ti-tsotava, tolia mpüm totona ojo, kvüri osi pokchung jiang theta rii tsotava. 10 Hojilo na ntia tsonhyoe enyathüng jana tivatava, ntio enhyoana rungi sitava. 11 Ntena zakto tsoyutav lia ntiotssole nte yentsa tsükona mpensü ekata, ojolo jokhüp osi okhelo jarung to ehamvü lia. Shijo OPVÜI, A, shi a yikrachiv tsükona yakchi tokhü. 12 "Ana hoji zümo Ejip meta yakchia ezüp pia kyon lea ekümrümo lea tsokhfü osi obong topvü chüthuka Ejip potsow jiang ezüp pia ovsala. Aiyo OPVÜI ji, 13 kibüng tyurhyu lo ejen ji yakchia nte evan ki to chethevka. Ana hojiang hungana nte yakchia yi sivka osi Ejip kyon jiang kangshiathüng nteno nte nkoyavka. 14 OPVÜI A, shina ntio elhicho sana ntena nchümcheo tssoa ntena tokhü shi nte ekhümlan tokhü tssoa benphitavka. Yuta topvülo shi benphia wotava."

Vüm-mhi Mozhü Ntheo Hümri Tokhu

15 OPVÜI na phyocho, "Ntena tsüngon tiyingo jo ebung mozhü etheo hümri tsov meka ebung mozhü n thecho tüv tae tsotava. Tsüngon ovüngo jilo jo nte kilo ebung mozhü topvü sitava, ntiotssole tsüngon tiying yuta jilo ochona ebung mozhü etheo hümri tsoana enhungo ombo ji a kyon to n khanhya. 16 Tsüngon ovüngo jilo tona tsüngon tiyingo to jilo to ntena nduktae khümtava, hoji tsüngon jianglo ntena tssoyanmori yaka ntia elhi tssov meka. 17 Tokhü shi benphia wotava, ntiotssole tsüngon shilo ana nte jipo shi Ejip meta lona nte sochecho, yuta topvülo ntena tsüngon shi ji tokhü tssoa benphia wotava. 18 Choro shilo tsüngon taro mezhüo toji mmyuina benkae tsüngon ekhao toji mmyui nandang ntena ebung mozhü thecho hümri tsov meka. 19-20 Tsüngon tiying nandang nte kilo ebung mozhü lithoku meka, ntiotssole meta kyon tssolea, metapoe kyon tssolea ochona ebung mozhü theta rüngcho hümri tsoa na a kyon to n khanhya."

Yakchi Tokhü Ovüngo Ji

21 Moses na Israel esopvüi topvü tsarhyui ezocho, "Nte otsük akvüna olyuro lea, nyanyanro lea motsünga ethüngchei lüngthavka, osi nte wopan akvüna yakchi tokhü khivka. 22 Limo ovüng ntsanchoe hoji ekümrümo ejen etheo ophi jilo jümthechi ejen ji nte kibüng tyurhyupvü ji tona koküng tolo esekae vatava. N vonchithüng nandang nte ochinaha oki yaki chiwov meka. 23 OPVÜI na Ejip kyon jiang chüthoka Ejip yakchiathüng nte kibüng tyurhyupvü tona koküng tolo ejen ji zesi echü lanben ji ezoa nte ki jo rhoro nte n lüngthathuk. 24 Nte osi nte tsoronichen jiangna shikhfü shiang kümali benphivka. 25 OPVÜI na nte piv phyochako meta jilo ntena kvüthüng rheyia sana shi benphitava. 26 Shio ntio etsso benphitala, to nte tsoronichen jiang na nte engana? , ntena, 27 'Shijo OPVÜI yikrachi tsükona yakchi tokhü jika, ntiotssole ombona Ejip metae na Israel jiang ki jiang yakchicho, ombona Ejip kyon jiang chüthoksi eteno e shanchocho to ezotava.' " Tole Israel kyon jiangna nkhuk tseni khümtacho. 28 Osi ontena oyi OPVÜI na Moses ha Aaron onina ezovo ji ephan benphitacho.

Eboe tsokhfü Jiang Chüo Ji

29 OPVÜI na zümo longo Ejip lo eboe tsokhfü topvü chüthokcho, mesa vantsü tsentso tssov sa vamo mesatso jilona benkae vüngphen ki vamo ji tsoe nandang lüngthacho, osi ekümrümo nrodemo jiang ha topvü chüthokcho. 30 Hoji zümo mesao ji, ombo küpo tsüphoe jiang osi Ejip kyon thanpoe jiang topvü nthechiracho. Hoji zümolo Ejip meta topvülo kyatanrungta licho, ntiotssole oki kvüloha otsoe nchücho n licho. 31 Hoji zümo mesao na Moses ha Aaron oni tsathuki ezocho, "Nte osi Israel topvü tsatava. A meta shi sisi yitava! Osi ntena phyo ji esüa nte pvüi ji khümtava. 32 Nte olyuden, nyanyanden, osi mangsü jiang sotasi tsantava. Osi a tsükona ha mmha a randanitava." 33 Ejip kyon jiang na Israel jiang ji zakto meta jilona khoe yitale to rikata ezocho."Ntena khoe n yia na e topvü echükhamvü." 34 Jitsükona kyon jiang na onte hümri rüngphen jiang, ebung mozhü n thena ohüm nhyoncho osi tssüngpyak jiang to thei onte sü jiang na ejei epvüina ejümtasi yicho. 35 Moses na ezoji esüa Israel jiang na Ejip kyon jiang shona janti, oyuk-osen tona mpensü to nsorae licho. 36 OPVÜI etho lona Ejip kyon jiangna Israel jiang longtsüka khukcho. Osi Ontena ntio chona na pithukcho. Hojitolui Israel jiang na Ejip kyon jiang eli jiang hansi yitacho.

Israel Jiangna Ejip Lona Khochiala

37 Israel jiangna ojoena Ramases lona khochi Sukkoth lo yitacho. Onte ji eloe osi nongori n khana owo wothüng nzo tiruk khochitacho. 38 Kyon thanpoeden okho tsüphov osi olyuden, nyanyanden, osi mangsüden to onte khochitacho. 39 Ontena Ejip metaena tssüngpyak hantao jiang lona ebung mozhü n theo hümri rungi tsotacho, ntiotssole esüngaro taena tssüka onte phanchukchio jina etsoyu osi ebung mozhü n theo hümri n rüngchocho. 40 Israel kyon jiangna Ejip lo nzyu nzo mezhüsi thümro vanthakcho. 4l Nzyu nzo mezhüsi thümro ji eben tsüngon jilona OPVÜI kyon pvüji topvü na Ejip meta lona khochicho. 42 OPVÜI na Israel jiang zeyata chiyithuko jijo zümothüng tssocho; hoji zümotsük jijo Israel jiangna khochaki OPVÜI pia yuta topvülo Israel jiangna enhyak zümo tssothukala.

Yakchi Tokhü Tssolan Shikhfü Jiang

43 OPVÜI na Moses ha Aaron oni ezocho, "Yakchi tokhü ji tsükona lanso heto lika: Metapoe kyon ochinaha yakchi tokhü etsoyu ji tsov meka, 44 tokhatola nina ezii shicho vana tssona, osi nina ombo tsenicho tssona ombona jo tsokhuka. 45 Nina esüngaro vanthukcho yingae osi nchenbae ochinaha tsov meka. 46 Etsoyu ji oki kvülona methakcho sana hoji lona topvü tsoravka; osi hoji lona hapoe hansi chivov meka. Elani, ekümrümo jiang ryu jiang ntia jakiv meka. 47 Israel okho topvü na tokhü shi benphivka, 48 tolea tseni n siwo kyon ochinaha tsov meka. Tsanthan ochoang sana nte yulo vanjüng tssoa vancho tüvna tokhü shi benphi OPVÜI yikrachi hunga tssona ntena ovüng tssoa opo kilo eboetso topvü tseni siyidemka. Jisüi jo omboji Israel kyon esüa yanchi kyon to khakhuka osi ombona tokhü ji tsokhuka. 49 Shikhfü tsük shi Israel jiang pono osi tsanthan vanjüng tssoa yio jiang ponoha benphivka." 50 Israel topvü na oyi engacho osi Moses ha Aaron onina phyoji esüa tssotacho. 51 Hoji tsüngono OPVÜI na Israel pvüji topvü Ejip lona sochukcho.

Khochuk 13

Tsokhfü Jiang Khochaki OPVÜI Pioji

1 OPVÜI na Moses ezocho, 2 "Eboe tsokhfü topvü khochaki a thüngi pitava, ntiotssole Israel eboe tsokhfü akvü osi onte ekümrümo nrodemo jiang topvü a echi."

Ebung Mozhü Ntheo Hümri Tokhü

3 Moses na kyon jiang ezocho, "Ntena Ejip lona khochio tsüngon shi nchümchetva, Ejip meta kvülo ntena oyam ezii tssota vancho sana shi lona khochio ji tsüngon shilo OPVÜI na ombo etho tsüphov ji khi nte sochukcho. Ebung mozhü n theo hümri tsonrüngu meka. 4 Ntena choro ovüngo Abib shilo nchüng Ejip lona khochiala. 5 OPVÜI na meta motsünga Kanaan kyon, Hittite, Amorite, Hivites osi Jebusite jiang na vamo ji nte piv to nte omotsüi jiang thüngi phyochaki lia. Ntena eli osi lizü meta hojilo kvüthüng rheyiasana nzyu akvü choro ovüngo jilo shi tokhü shi benphivka. 6 Ntena tsüngon tiyingjo ebung mozhü n theo hümri tsoa vansi tsüngon tiyingo to jilo jo OPVÜI yikrchia tokhü shi khitava. 7 Tsüngon tiying ntena ebung mozhü etheo hümri ti-tsotava; meta jilo ebung mozhü osi ebung mozhü etheo hümri lithoku meka. 8 Ntena tokhü shi benkata na nte tsoe jiang thüngi ntio tsükona tokhü shi khia sana ezotava, OPVÜI na Ejip lona nte vachio jithüng ntio kvüto tssocho sana ezotava. 9 Shi benphiwo shijo ntena ntiosana nte khe mekana otonlo khüngkae hancho esüa elaro nchümchephen tssovka; shi yakchia ontena OPVÜI yizüng jiangha yantav osi lümbümina khatav nte nchümchethokuka, ntiotssole OPVÜI na ombo etho tsüphov ji khi Ejip lona nte sochecho. 10 Nzyu akvü yuta eben lo tokhü shi khitava.

Tokhu Jiang

11 "OPVÜI na Kanaan kyon jiang meta kvümoe ombona nte motsüi jiang thüngi epiv tongochüa phyochaki vacho sana hojilo nte sothechivka. Ombona hojilo nte sothechiana, 12 ntena eboe tsokhfü topvü khochaki OPVÜI pivka. Nte ekümrümo obung ovüngo jiang topvü OPVÜI pitava, 13 tokhatola gadho obung nrodemo jiango olyu worona wothung tssoa pitasi rhanchoe vatava. Osi gadhoro jiang nte n rhancho hunga tssona evüng ji jakisi vanthuka. Ntena eboe tsokhfü jiang topvü rhanchoe vanthukvü shikhfü. 14 Henasüi nte tsoe jiangna ntio etsso shi benphia sana to nte engana ezotava, "OPVÜI na ombo etho tsüphov khi etena Ejip lo ezii tssota vamo jilona esochokcho. 15 Ejip mesao jina lüm khünga Israel jiang e n vachio jina OPVÜI na Ejip eboe tsokhfü akvü chüthukcho, ekümrümo obung nrodemo jiangha chüthukcho. Jitsükona etena ekümrümo obung nrodemo jiang topvü OPVÜI thansi ete tsokhfü jiang rhanchoala." 16 Heto benphiwo shijo ntiosana ete khe osi otono khüngkae hancho esüa e nchümchethukvü, OPVÜI na ombo etho tsüphov theta Ejip lona e sochokcho to e nchümchethukvü tsükona.' " 17 Ejip mesao na kyon jiang yithukathüng Potsow na onte ji jütssa dunga Philistin woe jiyio ji lan ji enhyantso khatola jiwoe na mekna onte socho. Potsow na nchümcho, "Ana kyon shiang olani na ori tssothuka na ontena elani Ejip metae yilanhungu, " 18 Jitsükona ombona onte ji lijüng rhüa jümyon jümang jiwoe socho. Israel jiango ritsso ebensü benriracho. 19 Moses na Joseph echümüng ji hancho, ntiotssole Joseph na onte na hoto tssotale to Israel jiang echümchakthukcho. Joseph na heto onte ezoe licho, "Potsow na nte rhanchoa na ntena a müng shi meta shilona hansi yitakhe." 20 Israel jiangna Sukkoth lona khoe Etham meta lijüng tssa jilo chiyicho. 21 Engo jo OPVÜI na olan onte esov tsükona onte mhadungi na eluk kholong khi socho, osi zümolo jo ombona omi kholüng khi onte mhadungi na wondang pia onte socho, hojitoli ontena zümolo ha yentsachecho. 22 Engo jo eluk kholung jina yuta topvü lo onte mhadungi tssocho, osi zümolo jo omi kholung na onte mhadungi tssocho.

Khochuk 14

Jümyon Jümang Yakchio Ji

1 Hojisüi jo OPVÜI na Moses ezocho, 2 "Ntena kholani Baal Zephon ndüngo jümyon jümang jiha Migdol oni yutalo Pi Harioth lo esantale to Israel jiang ezoa. 3 To tssona mesao jina Israel jiang ji lijüng jina nhyonyae meta ji n yakvü khyuphita vancho tsayiavka. 4 Osi ana ombo lüm khüngthuklani omb khi nte phanthoku ka, osi ana mesao ji tona ombo rasan jiang to khyoe a mying tsükathuku ka. To tssona Ejip kyon jiangna aiyo OPVÜI ji to antsivka." Israel kyon jiangna hoji esüa tssotacho. 5 Kvüthüng kyon jiang ji yithaka to Ejip mesao ezocho sana, ombo osi ombo tsüphoeden jiangna lümbüm tongphi phyotacho, "Etena ntio elhitachola? Etena Israel jiang yithukthaka osi ezii n vamvü epüpi sithaka." 6 Mesao jina ombo ritsso zotoro jiang tona rasan jiang to methakcho. 7 Ombona ombo ritsso zotoro mmhontso nzo tirok ji ephalo zotoro thanpo jiang topvü tsüphoeden jiang khi sothuksi khochithukcho. 8 OPVÜI na mesao ji lüm khüngthuki Israel jiangna ekhyoe tssoa yita vamo jiang phanthukcho. 9 Ejip rasan jiangna kurü jiang, zotoro jiang, zotoro esoeden jiang topvü nzo tssoe phana owo pi Harioth tona Baal Zephon to ndüngo jümyon jümang jilona owo phayacho. 10 Israel jiangna mesao osi ombo rasan jiangna onte phana la to ntsiale onte ekhenrhüka kyochile to OPVÜI thüngi randantacho. 11 Osi ontena Moses ezotacho, "Ejip metae jo olüp n lichoalo? Lijüng shilona echüthoku nina e sosi yichoke? Lijüng shilona echüthukvü nina e sosi yichoke? Zeta, nina Ejip metae na esosi oyi ntio lyuchechola! 12 Etena n khochithüng na ena hetvüti tssovka to ni zezo? Ena e ti khetsüna to Ejip metae eziiden tssoa e vanthukle to ni ezocho. Hepi lijüngi na echüv jo hojina echüo ji mmhomo tssov." 13 Moses na ezocho, "Tikyuta, tisenphina vantava, OPVÜI na nchüng ntio elhi tssoe nte shanchov sana ntena ntsivka, ntena Ejip kyon jiang kvüthüngha hunglam meka. 14 OPVÜI na nte thung tssoa rotavka, osi ntena etssowo ntia liv meka." 15 OPVÜI na Moses ezocho, "Nino ntiolyui ekyorung chona tüngkachiala? Mhadungoe khochile to kyon jiang ezoa. 16 Ni jarung ji khyokae jümangoe rüchi bena. Ojü ji chisoe sivka osi Israel jiangna likying yakchia yichevka. 17 Ana Ejip kyon jiang lümbüm khüngthuki Israel jiang sürüa santhethukuka osi ana elani mesao ji osi ombo rasanden, ritsso zotoro osi hojiang esüi jiang to pono ekhyo khi, myingthüng khivka. 18 Ana onte khyoana aiyo OPVÜI ji to Ejip kyon jiangna chethevka." 19 Potsow lanben Israel rasantsü mhadungi tssoa vamo jina ha nkanphi sülamoe wocho. Eluk tyurhyu jina ha nkanphi 20 Ejip kyon tona Israel jiang to yutalo rheyicho. Osi Ejip jiango emüng chungi tssothukcho, khatola wondang jo Israel jiang picho, osi rasan jiangna zümo tona onte enhyanta ha n duktachecho. 21 Moses na ombo jarung ji jüponi rüchi bencho tole OPVÜI na engkhvüwoe ezhü soa chiyi ojü ji khyanlanchi sicho. Osi zümo tona veni ojüji chisoe sicho, 22 osi Israel jiangna jümang ji hayi hamen ojü echung jiang yutalo na likying yakchia chiyicho. 23 Ejip kyon jiangna onte phana ritsso zotoro, ritsso kurü osi hojiang esoe jiang to Israel jiang sü rüa rhowotacho. 24 Wonchibüngo OPVÜI na eluk tyurhyu osi omi tyurhyu jiang ponina zechochisi Ejip kyon jiang ekya nungra lo thechicho. 25 Ombona zotoro khoro jiang rhyuyae sithuksi n senphiphov sithukcho. Tole Ejip kyon jiangna phyotacho, "OPVÜI na Israel jiang thung tssoa ete thüngi rotala. Etena shilona chiyi sitav kalo!" 26 OPVÜI na Moses ezocho, "Ni jarung ji jüponi rüchi bena tona ojü jina kholani rheyi Ejip kyon jiang, onte ritsso zotoro tona hojiang esoe jiangto monthukuka." 27 Moses na jarung ji jüponi rüchi benle wonchibüngo jo ojü jina ombo vanphen jilo rheyilancho. Ejip kyon jiangna ojü ji mhadungo tsanhungcho khatola OPVÜI na jülongi onte thechicho. 28 Ojü jina kholani ritsso zotoro jiang, esoe jiang tona Ejip rasan kvüta na Israel jiang phana jümangi rhowocho sana jiang to eyuki sicho, osi onte tsüka tia n nhyokacho. 29 Tokhatola Israel jiango hayi hamen ojüna chungsi likyingina yakchicho. 30 Hoji tsüngono OPVÜI na Israel jiang Ejip kyon jiang khelona shanchocho, osi Ejip kyon jiango jürani chüi erichirae lia Israel jiangna hungcho. 31 OPVÜI na etho tsüphov khi Ejip jiang khyoji Israel jiangna hungale ontena OPVÜI kyucho, osi OPVÜI tona ombo nri Moses to lo longtsüka tacho.

Khochuk 15

Moses Khen Ji

1 Tole Moses ha Israel kyon jiang to na OPVÜI heto denkatacho: "Ana OPVÜI denkav, ntiotssole ombona khyotsü khyothaka; ombona kurü jiang to na tsankae jiang to jümangi shümthechirathaka. 2 OPVÜI jo a nkohapvüi thokhyong ji, a shanchowo ji ombo, ombo a Potsow ana ombo thüngüv. Osi ombo a motsüi jiang Potsow, ana ombo tsüpho ji nsikata dem. 3 OPVÜI jo rikhyoe; ombo mying jo OPVÜI." 4 "Ombona Ejip rasan jiang , tona ritsso zotoro jiang to jümangi shümthechicho; osi ombo tsüphoe mmhontso jiang, jümyon jümangi rheyithukcho. 5 Jümang ejungu jina onte eyukzhücho; osi olong esüa jümang lazae onte elungthecho." 6 "OPVÜI, ni khe amimoe jijo ekhenthav etho jüa; hojina ori jiang echükroala. 7 Nina thotsü ekhyo lona ni ri jiang khyothechiala; ni lüm etsuk ji kisochiala osi mavü esüa onte rungala. 8 Nina jümangi mhvüthechicho tole ojü jina oyaki evakachicho; ojü jina echung esüa mangi sicho; jümang jilo ejungtso jiha kholongi sicho. 9 Ori jina phyocho, 'Ana onte phani rhümavka; Ana onte ejüeli jiang chiroe ana chokao jiang khivka; Ana a yonri tssüngchei onte ejüeli topvü khiyivka.' 10 Khatola OPVÜI, nina yenjoa echenkochona, Ejip kyon jiang ojüi rheyikhancho; onte ji shisha esüa ojüi ekyuthav jilo jüngtheracho." 11 "OPVÜI, potsow jiang yulo ni esüa ocho jücho ato? Nino emhukthav ntho, ochona ni esücho ato? Ochona ni esüa chethev osi emhuko elhi tssochecho ato? 12 Nina ni khe amimoe ji rüchile, liko jina e ri jiang nzhücho. 13 Nina phyochako ji longtsüka lia, nina shancho kyon jiang nina sochokcho. Ni etho khi nina ntho meta jilo onte sochicho. 14 Jipo jiangna zothaka, osi ontena ni ekyu lona enetala; Philistian jiang ekhenrhükala. 15 Edom esopvüi jiangha ekhentsüngala; Moab ekhyo ekhüng jiang enetsüngala; Kanaan kyon jiang etho mmyimthaka. 16 Ekhenlong osi ekyusü na onte pyingthaka. OPVÜI, ontena ni etho ji zetasi yutaloe ezüpa vancho ni kyon jiangna onte yakchia n yithüngjonina ezii eküm lona vachio kyon jiang. 17 Nina onte sothei ni phunglani onte chümcho, hojijo nina ni ki tssov ekyochei vao meta ji, osi nina nipopo tssovo khümphen ji. 18 OPVÜI, nino kümali, kümali mesao tssov."

Miriam Khen

19 Israel jiangna jümang ji likying esüa yakchicho. Tokhatola Ejip ritsso zotoro jiang osi onte kurü tona kurü esoe jiang to na jümang jilo rhovole, OPVÜI na ojü jiang sothelani onte eyukzhüthukcho. 20 Aaron oyulov Miriam, zenkhying jina ompvü pyapiro ji tsakale, eloetsü na ompvü sürüa pyapiro jiang ekhophita sharitacho. 21 Miriam na heto onte denicho: "OPVÜI nsikata, ombona khyotsü khyothaka; Ombona kurü jiang osi jilo tsankae jiang topvü jümangi eyithechirathaka."

Ojü Ekhov

22 Jisüi jo Moses na Israel kyon jiang jümyon jümang jilona sosi Shur lijüngi yicho. Ontena lijüng ji yakchia tsüngon ethüm yentsata ha ojü n hungcho. 23 Jisüi jo ontena meta motsünga Marah to tsa jilo chiyicho, khatola hojio ojü ji elümoto kho jina ontena n yuchecho. Hoji tsükona meta ji Marah to tsacho. 24 Kyon jiang na Moses nhyenchoa phyotacho, "Eteno ntio yutavla?" 25 Moses na OPVÜI thüngi tüngochüa randancho, tole OPVÜI na otssüng wochoro motsünga ombo ejüle ombona hoji khi ojüi shümthechicho; tole ojü ji yucheo kümcho. Hoji lona OPVÜI na vana evov shikhfü ha pi, nna elani chyui ha onte ze to tssocho. 26 Ombona ezocho, "Ntena otsotso ana ntio elan to zichetana jiang benphia osi a yizüng jiang enga a jancho zov to tssona, nochonori kümoe ana Ejip kyon jiang pono picho sana jiang khi jo ezüp nte n pila. Aiyo OPVÜI ji, ochona nte emiyia sanaji." 27 Jisülo jo ontena Elam meta, kvüloshi jünhyo taro eni nna Palm dung ekha tiying to licho sana jilo chiyicho; osi hojilo jütssae esantacho.

Khochuk 16

Mana Tona Piluku To

1 Israel khümtsüng totona Elam lona khochuki, ontena Ejip lona khochisi choro eni si tsüngon taro mongo to jilo ontena Sin to tsao lijüng jilo chiyicho, hojijo Sinai tona Elam to yutalo. 2 Hoji lijüng jilona ontena Moses ha Aaron oni nhyenchoa phyotacho, 3 "OPVÜI na Ejip metaena e chüthokcho salivo to ena nchüma vanthaka. Hoji metaejo ena khukthei tia oso osi thanpo etsoyu etsson tsoyuchecho. Khatola ntena lijüng hetüv lo esochukchi khangtsüngi echüthoku sala." 4 OPVÜI na Moses ezocho, "Ana oyaki na nte etsoyu jothoku sala. Kyon jiang na eng akvü hoji nchuk etsov ji chivo khyorhyuvka. Hojitolui ontena a yi ngengav sana to chyui zevka. 5 Tsüngon tiruko to jilo jo ontena chivo tsüngon eni etsov khyoe methaki vavka." 6 Jitsükona Moses ha Aaron onina Israel kyon jiang topvü ezocho, "Ejip lona onte sochuko ji OPVÜI na toji ntena nchüng mmyulani ntsivka. 7 Enyathüng jo OPVÜI vanrhyu jina tsünglüpo ji ntena hunguka. Ntena ombolo phyochophyorio jiang ombona zothaka, ntiotssole ena ombo ndungntssung engae tae tssoala." 8 Jisülo Moses na phyocho, "OPVÜI na mmyulani etsov oso nte piv osi enyathüng etsov ha hümri etsson nte piv, ntiotssole ntena ombo pono phyochophyorio jiang ombona zothaka; ntiotssole ntena epono phyochophyorio jijo OPVÜI thüngi phyochophyoricho." 9 Moses na Aaron ezocho, "Okho totona shilo oro OPVÜI mhadungo mangtale to ezoa, ombona nte phyochophyori jiang zothaka." 10 Aaron na kyon okho ji hojito ezole ontena lijüngi zechitacho, tole jitopvü OPVÜI wondang ji tsünglüpa elukina rachochia onte hungthukcho. 11 OPVÜI na Moses ezocho, 12 "Ana Israel jiang phyochophyori jiang zothaka. Onte ezoa, nchüng eng rhev engkhvü mmyonathüng ontena etsov hunguka, osi enyathüng etsov tsükona ha onte tsokhuk hümri pivka. Jitosanati ontena aiyo OPVÜI onte Potsow ji to antsivka." 13 Mmyuale piluku onten tsüphov rümchukchicho, osi hojiang na nchenphen meta ji pyingkachicho osi enyathüng jo nchenphen jiang topvü porüp na pyingcho. 14 Porüp jiang phyoni ethük shungi chüngithakale lijüng ji poni ntiosana porov tssiyoro esüa liracho. Hojiang ji porüp kholung esüa mpümroa tüv liracho. 15 Israel kyon jiangna hojiang hungi ntiosana n tsiküma onte yulo "Shijo ntioato?" to engatacho. Tole Moses na onte ezocho, "Shijo nte etsov tsükona OPVÜI na nte piojika. 16 OPVÜI na nte otsük akvü nte ethelan ephan, wopan kyon tsükalo opvü eni ejan khyorhyutale to nte ezoala." 17 Israel jiang na hoji esüa ejoma na khosha ejoma na tara to khyorhyutacho. 18 Khatola ontena etüki zetale khosha khyorhyuo jiang naha onte tssochyu jilo na tajoa n tssocho, osi mataroa khyorhyuo jiang ha n tsoyucho mataroa to n tssocho. Otsük akvüna onte ekyan tae khyocho tssocho. 19 Moses na onte ezocho, "Nte ochinaha ojyua echi vav meka" 20 Khatola onte ejoma na Moses yi ngav enhyoe vacho. Tole ojyuato jo jiang topvü ora rhei kyoni orhüm tssothakcho osi Moses na onte thüngi lüm tsukcho. 21 Enya akvü onte otsük akvüna ombobo ethelen eli ephan khyotacho, osi eng rancheta na likoe enhyoe siwo jiango phyonkhani sicho. 22 Tsüngon tiruko to jilojo ontena eng eni etsov khyotacho, tsükalo opvü mezhü ejan khyotacho. Okho jilo esopvüiden jiangna owo Moses yirütacho, tole ombona onte ezocho, 23 "Ojyua jo ntho esan tsüngon, ombo tsükona khochaki evao tsüngon tssov to OPVÜI na phyothaka. 24 Ntena ntio tsonhyoa sana jijo ojyua echi vanthuka. Moses na ezovo ji esüa ontena enhyo jiango ojyua to tsükona vatacho, osi hojijo n yeso elani ora ha n van to tssocho. 25 Moses na ezocho, "Nchüngo shi tsotava, nchüngo esanmung ji, OPVÜI lo khochaki vao esan tsüngon ji osi ntena hapoe ntia etsoyu hungu meka. 26 Ntena nchyuk tiruk jiang lojo eng akvü etsoyu yani vav, khatola tsüngon tiyingo to jilojo esan tsüngon küma etsoyu ntia yamvü liv meka." 27 Tsüngon tiyingo to jilo kyon ejoma na etsoyu yana hapoe chivoa ha ntia n licho. 28 Tole OPVÜI na Moses ezocho, "O kyonden, ntena kvütenhyaka ayi nngav ngangtapamvüla? 29 A, OPVÜI shina esan tsüngon nte piala toji nte nchümchethuku tsükona, nchuk tiroko to jilo jo nchuk eni tsükona etsoyu etsson nte picho. Hoji tsükona tsüngon tiyingo to jilo jo otsük akvüna oki yaki n ona vamuka." 30 Hoji tsükona tsüngon tiyingo to jilojo kyon jiangna elhi ntia n tssotacho. 31 Israel kyon jiangna hoji etsoyu ji Manna to tsacho. Hoji jo ntio sana otsüng ehüma tüv, osi tsakijüna hümri rüngcho tsoa to tssocho. 32 Moses na phyocho, "OPVÜI na phyoala, Ombona Ejip metae na esochetathüng etena lijüngina ntio tsotacho sana ete tsoerüi jiang ejüphen Manna tara nkümi vatale to". 33 Moses na Aaron ezocho, "Mvüru motsünga khi jilo manna opvü eni etüktheta osi hoji ete tsoerüi jiang ejüv tsükona OPVÜI vanrhyu meta jilo vata." 34 OPVÜI na Moses ezoji esüa Aaron na hoji khi ntsata vaphen bakos jilo vacho. 35 Hoji sülo nzyu zhüro jo Israel jiangna Kanaan n janthung nandang manna tsotacho. Jisüi jo Kanaan lo vani sitacho. 36 (Hojithüng otse etükphen shenthi jijo enhünga etükpvü mekana litre mekyu ethe tssocho.)

Khochuk 17

Longpvü Lona Ojü

1 Israel okho totona Sin lijüng lona OPVÜI yizüng ephan meta motsünga lona thanpoe to khyuta yitacho. Ontena Rephidim lo nchentacho, tole hoji lo eyuvjü n jücho. 2 Ontena Moses thüngi erenjanta "Eyuvjü e pia." to ezotacho. Tole Moses na ezocho, "Nteno ntiolyui erenjantala? Nteno ntiolyui OPVÜI ojang tssotala?" 3 Khatola kyon jiang elümoto eratsüngo jina Moses thüngi erenjantapvü tssocho. Ontena phyotacho, "Nino ntiolyui Ejip metae na e sochukchola? E ngaro osi ekümrümo shiang nzo eratsüngi echüthukvü to alo?" 4 Moses na OPVÜI thüngi tüngkachia randana phyocho, "Aiyo kyon shiang kvüto lyuvto, ontena a ephyatsüngu sala." 5 OPVÜI na Moses ezocho, "Israel jiang yolo nina ejoma sosi kyon jiang vüngi wotava. Nina Nile zhükhfüi sathechio jarung jiha bena. 6 Ana Sinai phunglani longpvü motsünga poni mangi nte mhadungi vamka. Hoji longpvü ji erhüpa tona kyon jiang eyuv hojilo na ojü joyivka." Moses na Israel esopvüi jiang mhadungo na hojito tssocho. 7 Meta ji Massah tona Meribah to tsacho, ntiotssole Israel jiangna hoji lona erenjanta osi OPVÜI ojang tssoa, "OPVÜI ji ete yolo vevanchoto?" to phyotacho.

Amaleket Jiang Thüngi Ritsso

8 Amaleket jiangna oro Rephidim lona Israel jiang hatacho. 9 Tole Moses na Joshua ezocho, "Ojyua owo Amaleket jiang thüngi rotav tsükona kyon ejoma ethüngcheta. Ana yingsüng kvüri phanthi OPVÜI na a hanthuko jarung ji bensi vamka." 10 Moses na ombo ezoji esüa Joshua na Amaleket jiang thüngi rotalo wocho, osi Moses, Aaron tona Hur to jo yingsüng kvüri chüngitacho. 11 Moses na jarung ji ekhyonkae ebenthüng nandang jo Israel jiangna khyocho, osi Moses na vachochiana Amalekite jiangna khyocho. 12 Moses khe jiang jakratana Aaron ha Hur onina olong hanayi Moses khukthethuksi onina ombo mphyima phanthi ombo khe jiang sayitasi eng n rhethüng jo zatacho. 13 Hojito lyui Joshua na Amalekite jiang khyothechi sicho. 14 Jisüi jo OPVÜI na Moses ezocho, "Ekhyo shi nchümcheta wothukvü tsükona shi motsü ji erani vata. Ana Amalekite jiang khyothechi sivka to Joshua ezoa." 15 Moses na thanphensa roni "OPVÜI jo a Riven to tsacho." 16 Ombona phyocho, "OPVÜI riven ji ntssona ekhyonkae bena! OPVÜI na Amelekite jiang thüngi nchüngkhonto n tümjakna rotavka!"

Khochuk 18

Jethro na Moses Ndukala

1 Potsow na Moses tona Israel kyon jiang to Ejip lona sochokathüng kvüto elhi tssocho sana jiang motsü topvü Moses omo Jethro, Midian lo pvüti jina zocho. 2 Jitsükona ombona Moses engh Zipporah, ombo thüngi valanchio ji tona ompvü, 3 tsoeden Gershom ha Elizer oni to sosi Moses thüngi rocho. (Moses na "Aiyo oyam metae yentsae tssoa vanala"; to phyoa otsoe tsüka ji Gershom to tsacho. 4 Ombona hetoha phyocho, "Apo Potsow jina Ejip mesao na e lüngthav lona e kyochia e shanchocho" otsoe thanpo ji Eliezer to tsacho.) 5 Jethro na Moses engh ji tona ompvü tsoe otsük eni ji to sosi lijüngi Moses na ncheni vamo ntho phunglan jilo rocho. 6 Ontena tsata to ombona Moses thüngi oyi yemo jina, 7 Moses na ombo nduko chiwo, ombo mhadungo nkhümthecho, osi ombo ntssüpcho. Ontena kvüto vantala to onte ethümta engatasi Moses süranki rheyitacho. 8 Potsow na Israel kyon jiang shanchov tsükona Ejip kyon jiang osi mesao thüngi ntio elhi tssocho sana topvü Moses na Jethro ezocho. Elani Israel jiangna ezüp khio jiang tona OPVÜI na kvütoli onte shanchocho sana jiang topvü ezocho. 9 Jethro na shiang zoale, ombona emathata phyocho, 10 "Potsow thünga, ochona Ejip mesao osi kyon jiang khelona nte shanchocho sana ji! Potsow thünga, ombona ombo kyon jiang ezii eküm lona shanchothaka! 11 Enhungo ana ntsithaka, OPVÜI jo Potsow thanpo jiang topvü lona tsükata, ntiotssole Ejip kyon jiangna Israel jiang ji etssangkung kümthuka vanathüng ombona heto elhi tssocho." 12 Jisüi jo Jethro na erungthan totona erungo tona othan thanpo jiang to OPVÜI tham hansi rocho; osi Aaron tona Israel esopvüi thanpoe jiang topvüna ntho etsoyu ji tsota Potsow khümmo ombo nzo khochicho.

Yitssoeden Ethüngcheo Ji

13 Ojyuato jo Moses na kyon jiang ekhiranta jiang nlan nsüngu oyi tssoyia, enyathüng na mmyu jana n tssochov vancho. 14 Moses na etssov lio jiang Jethro na ntsiale, ombona ezocho, "Nina kyon shiang tsükona tssoa vamo shiango ntio etssola? Ntiolyui nibotina elhi tssoa kyon shiangna nyazüngina mangrae ni ngatüng ngaria mungthukala?" 15 Moses na ezocho, "Kyon shiangna Potsow lüm erüng ji ntsiv tsükona a thüngi roala, jitsükona ana shiang etssov licho. 16 Kvüthüng otsük eni yutalo ekhiranta liasana ontena a thüngi roala, tona ana ocho elan sana ezoala osi Potsow shikhfü yizüng jiang onte ezoala." 17 Tole Jethro na ezocho, "Nina lanka elamoe na mekna tssoala. 18 Nibobo ni sangtsüngi siv osi kyon shiang ha mmuki siv. Nina shiang shi ni botina tssov jo oha mmyingtia. 19 Enhungo ana lanka ni ejüvka osi Potsow na ni ndüngo tssovka. Nina etssov elamo jijo Potsow mhadungo nina kyon jiang thung chiwov ji osi onte ekhiranta jiang ombo mhadungo hansi ewov ji. 20 Nina Potsow yizüng jiang onte püngnov lia, osi ontena kvüto vamsana osi ntio elhi tssov sana onte engathethukvü lia. 21 Elani nina kyon jiang yolona ekhyoetoe ethüngcherae kyon jiang esopvüiden tsswothukvü lia, wothüng, nzoa, tinyan osi taro to pono esopvüiden. Onteno Potsow ekyuiden osi ekhüp n tsoeden osi longtsüka eliden tssov shikhfü. 22 Onte khi kyon jiang yitssoyiv elhi lo shera zathuka. Oyi mmyinguv jo ontena ni thüngi hansi rokhuka tolia oyi teriv jo ontena methakthuka. Ontena hojito ni hankyona ni tsükona elaro tssovka. 23 Potsow na heto ni tssothukhungo ji esüa nina hojito tssona, nibobo ni mmukvü meka, osi kyon shiang topvüna onte ekhiranta jiang senjümtae sisi yirav." 24 Moses na Jethro ndungntssung yi ji engae, 25 Israel jiang yolo ekhyoetoeden ethüngcheracho. Ombona onte ji wothüng, nzoa, tinyan osi taro pono esopvüiden tssothukcho. 26 Ontena kyon jiangna ekhiranta chiyiathüng mmyantayi elhilo shera zacho osi oyi teriv jiang jo ontena tssoyisi oyi mmyinguv jo Moses thüngi hansi wocho. 27 Jisülo jo Moses na Jethro ji pyonta salüm pia yithukcho osi Jethro naha ombo ki yicho.

Khochuk 19

Sinai Phunglani Israel Jiang

1 Israel jiangna Rephidim lona khochicho osi ontena Ejip lona khochisi choro ethümoto jilo tsüngon ovüngo jilo Sinai lijüng jilo chiyicho. Ontena Sinai phunglani jothe lo nchenphen ranki tssoe vasi, 3 Moses na Potsow nduko phunglan jilo chungocho. OPVÜI na phunglani na ombo tsae Jakob tsochen Israel jiang heto ezole to ombo ezocho, 4 "OPVÜI A, shina Ejip kyon jiang thüngi ntio elhi tssocho sana nina ntsia osi ana kvütoli mungshiro na ompvü ro jiang echo küpina hanphia to nte sosi a thüngi shilo nte yithukcho sana ji nina ntsia. 5 Jitsükona ntena ayi enga a yizüng jiang benphina nteno a kyonden tssovka. Limha shi topvü a echi, tokhatola nteno ana ethüng cheo kyonden tssovka. 6 A lo tae khochaki evamo kyonden, osi ntena pvütiden esüa abenkavka." 7 Tole Moses na joyi kyon jiang esopvüiden jiang tsarhyui OPVÜI na ntio ombo ezocho sana topvü onte ezocho. 8 Tole kyon jiang topvüna rümto janlancho, "OPVÜI na ntio phyocho sana jiang topvü ena tssovka", Tole Moses na hoji OPVÜI ezocho. 9 OPVÜI na Moses ezocho, "Ana eluk echhiv lungina ni thüngi rovka, tona ana ni jamo ji kyon jiangna zov osi ontena ni longtsüa yivka." Kyon jiangna janlamo ji Moses na OPVÜI ezocho, 10 tole OPVÜI na ombo ezocho, "Kyon jiang thüngi oyi nchüng tona ojyua to jo Potsow ekhümvü tsükona ntssüng-rüngta mungle to ezoa. Onte mpensü jiang tssülatssütüngta mungtasi, 11 rajyuo methaki vantale to ezoa. Hoji nchuk jo kyon topvüna ahungo tssoa ana Sinai phunglani jorovka. 12 Phunglan jilo kyon yaki n rhovocheo erü süngi vata, osi phunglan jilo tichungotale osi ndüngolea ti-otale to kyon jiang ezoa. ochona hojilo khotheta sana ombo chüthokvü; 13 Hojitüv kyon jo okhena n vüngka na olungna ephyatsüngi mekana lotssi na kotsüngi sivka. Kyon lea ekümrüm tssole hojitolyui chüthoka. Tokhatola tatara ji khvüa na kyon jiangna phunglani chungovka." 14 Jisülo jo Moses na phunglani na joyi kyon jiang ji ekhüm tsükona methaktale to ezocho. Tole ontena onte sü jiang etssütale Moses na ezocho, 15 "Rajyuo methaki vantakhe, osi hoji n janthüng ochina ha ponilan tssov meka." 16 Rajyuto enyathüng jo Potsow nlüpa osi tharaka, phunglan jilo eluk echhiv jorocho osi tatara won zocho. Tole nchenphen jilo vancho topvü ekyu lona enetsüngcho. 17 Moses na nchenki na onte sochuki Potsow nduko phunglan yenjo jilo wotacho. 18 OPVÜI na omi lona joro jina Sinai phunglan totona miphungna eyukcho. Miphung jina mijen lona phungato chüngicho. 19 Tatara won ji ntsanka ntsanka na yicho. Moses na oyi nsancho osi Potsow na tharak won lona ombo janlancho. 20 OPVÜI na Sinae phunglan kvüri joro Moses ji phunglan kvüri tsakacho. Moses na chungocho 21 tole OPVÜI na ombo ezocho, "Jowoa osi kyon jiang ochinaha eru ji yaki rhoro a tizeie to ezoa, ontena hojito tssoana onte elümoto chüv. 22 Pvüti na lea ochoang na a thüngi roa sana onte bobo ntssungrüngchev, to mekna ana onte ezüpthoku." 23 Moses na OPVÜI ezocho, "Kyon jiang na n chungroche, ntiotssole nina phunglan shi ntho tssothukle to yizüng apia erü süngchaki vacho." 24 OPVÜI na janlancho, "Jowo Aaron ji ni nzo sosi chungroa. Tolea pvüti jiang tona kyon jiang to ochinaha erü ji yaki athüngi rov meka, to mekna ana ezüp onte piv." 25 Tole Moses na kyon jiang thüngi OPVÜI na ntio phyocho sana jiang ezocho.

Khochuk 20

Yizüng taro Ji

1 Potsow na oyi shiang phyocho: 2 "Aiyo ntena Ejip metae oyam ezii tssota vanathüng, nte sochuko OPVÜI nte Potsow ji. 20 3 "A yaki jo potsow thanpo ti-khümtava. 4 "Ntena nte tsükona potsüo, limhalo osi lichungi jümang jiang lo licho tüv kisü ntia ti-nsüngrütava. 5 Nti kisü mhadungo ha ti-epyakthetava osi ti-khümtava, ntiotssole OPVÜI nte Potsow ji A, osi ana a yaki jo ochia a n vanthuk hungala. Ochoang na a tsaka sana jiang thüngi a na onte tsoronichen pochung ethüm mezhü jana ana ezüp piala. 6 Tokhatola ochoang na a nzana a shikhfü jiang benphia sana jiango ana pochung wothüng wothüng jana a nzan ejüala. 7 "A mying ji khi n mhom thüngoe ti tsütsata, ntiotssole OPVÜI nte Potsow A, shina a mying tsütsasorae jiang ezüp piv. 8 "Esanmung ji lithuka osi nthoa vanthuka. 9 Ntena nte elhi etssov tsüngon tiruk liala, 10 tokhatola tsüngon tiyingo to jijo esan tsüngon a tsükona khochaki vanthuka. Tsüngon jilo ochinaha elhi tssov meka nte tssolea, nte ngaroden, eziiden, nte ekümrümoden, osi nte metalo metapoe kyon vamo jiang ochinaha elhi tssov meka. 11 OPVÜI, A, shina tsüngon tiruk lo limha, woyak, jümang, osi jianglo evamo jiang topvü liyingcho, tokhatola tsüngon tiyingoto jilo jo ana esancho. Jitsükona OPVÜI, A, shina esanmungji lithukcho osi hoji ntho tssothukcho. 12 "Nipo osi niyo yikrachia, to tssona ana nte pio meta jilo ntena harishia vamvüka. 13 "Oyam ti-lüngthata. 14 "Efürama ti-tssoa. 15 "Ti-efüa. 16 "Ejüngona oyam n lan ti-pia. 17 "Oyam ki ti-jüpona; ombo engh jiha ti-jüponia, ombo ezii, mangsü, kurü osi ombo ejüeli ntia ti-jüponia."

Kyon Jiang Ekyu

18 Kyon jiangna tharak won osi tatara won jiang zoa phunglan jilona potsüo nlüpa omi phungo jiang hungale ekyu lona enetsüngrae ekonina zechita vancho. 19 Ontena heto Moses ezotacho, "Nina e thüngi ntio phyoana, ena engav; tokhatola Potsow na ethüngi oyi nsana na echüv küma ekyuala." 20 Moses na ezocho, "Tikyutava; ntena mmen n tssovo tssoa ombo kyuchia tae nte vanthoku tsükona Potsow na ojang tssoe nte zelo rochoka." 21 Toaha kyon jiangna ekonina mangta vantacho osi eluk emüngo ji küpo Potsow vamo ji ndüngo jo Moses tae na wocho.

Thanphensa Jiang lo Shikhfü

22 Potsow na Israel jiang heto ezole to Moses ezocho: "OPVÜI A, shina potsüwoe na nte thüngi oyi nsamo ji ntena hungthaka. 23 Ntena a ephalo khümphen tssoa shona janti na kisü potsoden nsüngrüi tivatava. 24 Ntena a tsükona ochon khi thanphensa nsüngrüi ji pono nte olyu osi mangsü jiang khi othan tssoa rongthuka osi khümshümta than tssothuka. A khümle to ana meta kvülo khochaki nte vayiana ana jilo na oro nte mmhayithukuka. 25 Ntena olungna thanphensa nsüngrüta tssona titukrona rontava, ntiotssole ntena longthenphen theo lung jiango a tsükona tsütsav n tüm. 26 Phopha shankao thanphensa ha a ti ronitava; ntiotssole ntena hojilo chungoa thüng nte chanchev.

Khochuk 21

Ezii Jiang Tsükona

1 "Israel jiang thüngi shikhfü md JL shiang benphiv tsükona pia: 2 Nina Hebrew ezii shia tssona ombona nzyu tiruk ni benkavka. Tolea nzyu tiyingo jilojo ntia tikhiyina vachia. 3 Ombona ni ki yiathüng yanpiyanthan n tssov yicho tssona yanpiyanthan n tssona yivka, khatola ombona engh sosi yicho tssona ombona yiathüngha engh ji sosi yivka. 4 Ombo pvüi jina yanpiyanthan tssoyicho tssona osi otsoeoro vancho tssona, eloe jiha ngaro jiangha OPVÜI ji echhi osi ombo tae elani yivka. 5 Tolea ezii jina ombo pvüi osi ombo engh elani otsoeoro jiang nzanala to phyochaka etancho vana n yihungna, 6 ombo pvüi jina khümpheni ombo sosi owo kibüngo durhyupvü jilo enghokae vanthuksi eno ji veyivka. Jisülojo ezii jina eküm echung ombo ezii tssoa vamvüka. 7 "Kyon ochona sana ombo otsolov ji ezii etsovlo yena tssona ompvüo eboe ezii vachia to vachiv meka. 8 Ompvü ji oyam engh etssov yenle eboe jina ompvü n jüpomvü sina OPVÜI jina khilani ompvü opo thüngi yenlamka; metapoe thüngi yemu meka; ntiotssole ombona ntsa shikhfü lona meku ompvü ekümthaka. 9 Kyon ochona ombo tsokhying echii eloe ezii shia sana ombona ompvü ji otsolov esüa vanthokuka. 10 Osi kyon ochona sana lothan ekata tssona ombona lohemü jiha mpensü osi etsoyu kheti pivka osi ovüng thüng ompvü elan lio jiangha topvü pivka. 11 Ombona ompvü thüngi heto etssov lio shiang ntssoa tssona ombona ompvü ji ntia n khiyina etancho vachivka.

Meyanta thüng Shikhfü

12 "Kyon ochona oyam yonkae chüthuka sana omboha chüthoku lia. 13 Tokhatola okyak n tssoaha tssolüpi meyantacho tssona ombona ana etssyukae epio meta motsünga lo oyi tsanthei vankhuka to tssona omboji nkohachev. 14 Tokhatola kyon ochona lüm etsukona etana na oyam chüthuka sana ombona a thanpheni oyi tsankalea ombo chüthoku lia. 15 "Ochona opo mekana oyo yonkata sana ombo chüthoku lia. 16 Ochona oyam tssolea mekana ezii tssothoku tsükona tssolea kyon efüi khia sana ombo chüthoku lia. 17 "Ochona opo osi oyo etssorandankata sana hojiha chüthoku lia. 18-19 "Khontathüng tsükana olong mekana okhena tsüka ji yonkata ha n chüna ombo ezüp epiv n li. okhvü hamo kyon jina belüngi ezüpa vansi sülamiti jarung süsi sanphia tssona, hojito yuta ezio ji manji ochona ombo meyancho sana jina loyivka osi n mhonphithüng nandang jo tanünguka. 20 "Kyon ochona sana ombo ezii eloe tssolea eboe tssolea erhüpi jilona chüthuka sana hoji kyon mo ji ezüp piv lia. 2i Tokhatola ezii ji engania yutalo nchüa tssona tona OPVÜI ji ezüp epiv n li, ombo ejüeli emomo jina chüngtakhuka. 22 "Eboe khontathüng eloe ngarohan tachi ompvü ngaro ji yesoe sina, tolea ompvü eküm ntia n tssona orapvüna echha rüngwo ji yitssoe na khichoyio ji ephan ochona meyancho sana ji echha khiyivka. 23 Tokhatola eloe jiha meyancho tssona nlilam man ji eküm man eküm, 24 omhyik man omhyik, oho man oho, okhe man okhe, ojo man ojo, 25 omi khü man omi khü, wontssa man wontssa, tamüngcho man tamüngi to tssovka. 26 "Kyon ochona sana ombo ezii eloe lea eboe lea omhyiko tayi omhyik ji yesoe sia sana ombona omhyik ji man ezii ji etancho yithokuka. 27 Ombona oho tachiyi cho tssona oho ji man ezi ji vachivka.

Ehopvüo Jiang Ejan Elhi

28 "Tssibung na ocho sana shüngi chüthoka tssona, tssibung ji ephyatsüngi sivka osi oso jiha ochinaha tsov meka; tolea mangsüpvüo jijo ezüp epiv n li. 29 Twokha tola tssibung ji oyam tssatssophen tssoe hoji sheni evav ezoaha n ngacho tssona, hojina kyon shüngtsünga na mangsü jiha opvüo jiha chüthoku lia. 30 Tokhatola opvüo jina ombo eküm shancho hunga elo pia tssona kvüta man sana topvü lokham lia. 31 Ji esüa tssibung jina eloeroro mekana eboeroro shüngtsünga tssona jiha hoji esüa lovka. 32 Tssibung jina ezii eloe lea eboe lea shüngtsüng na mangsü pvüo jina ezii ji pvüi ji janti rang thümro losi tssibung ji tatsüngi sivka. 33 "Kyon ochona sokvü elhüp lae sisi mekana sokvü jui n lhüpna tssibung lea gadho lea hojilo rhethuka sana, 34 ombona ekümrümo ji tsen ji lovka. Ombona ekümrümo ji man ji losi ekümrüm chüthako jiha khivka. 35 kyon tsüka mangsü na oyam mangsü shüngtsüng na tssibung eküm ji yeni OPVÜI otsük eni jina chitasi tssibung echüo ji so jiha chitavka. 36 Tokhatola tssibung ji oyam tssatssophen tssoe hoji sheni evav ezoaha n ngav hojito meyancho tssona opvüo jina tssibung eküm na losi echü ji khikhuka.

Khochuk 22

Lolantav Shikhfü Jiang

"kyon ochona sana mangsü mekana olyu efüi tatsünglea, yenlea mangsü motsüngalo mangsü mongo, olyu motsüngalo olyu mezhü to opvüo ji pilamka. 24 Ombona efüo ji man lochev, osi ombo ejüeli ntia n licho tssona ezii ejoena ombo yeni efüo ji man lovka. Osi efüo ekümrüm ji mangsü tssolea gadho tssolea, olyu tssolea nchüv eküm vancho tssona motsüngalo eniren pilamka. "Efüi tsüka na zümolo oki pharhüpa vanathüng ombo rachei lüngthalea lüngthapvüo jijo münghan nlan piv meka. Tokhatola engo hojito tssocho jo münghan nlan piv. 5 "Kyon tsükana ombo li mekana jününgroli ombo ekümrümo yantsothuka thüng khyumhi oyam li benro za vamo jiang tsoyina hoji man ji ombo li osi jününgroli elio benro jiang khi lovka. 6 'Tiyon tsükana ombo li omi tssoe jina oyam li benro za vamo jiang mekana oyo-ohan yanyoe nshae evao jiang rungina omi themo jina hojiang topvü lovka. 7 "Kyon tsükana oyam rang mekana tssentsüman vayiathüng ombo kina efüina khiyina, osi efüi ji rhüma na efüi jina hotata eni lov. 8 Tokhatola efüi ji n rhümata tssona evapvüo ji khümpheni sosi owo ombona oyam tsütsailan n khi to echümthoku. 9 "Ejüeli lona pangta chiyina, mangsü tsükona tssolea, gadho, olyu, mpensü mekana monkvü monyo tsütsailan tsükona tssolea pangtao ji woniatana khümpheni wotav osi Potsow na ocho nlan pia sana jina tsükao ji hojitata eni pilam. 10 "kyon tsükana oyam gadho, mangsü mekana olyu mekana thanpo ekümrümo ekümiv methakle, ekümrümo ji chüa lo, meyana lo mekana oyam na rechoe hansi sana yiaha ehungpvüi n vana tssona, 11 kyon jina khümpheni owo ombona oyam ekümrümo n khi to echümvüka. Osi ombona ekümrümo ji n fücho tssona OPVÜI ji epüp tae, osi eküma vamo jina elov n li; 12 tokhatola ekümrümo ji efüicho tssona ombona opvüo ji lovka. 13 Ekümrümo ji orae ekümrüm na rümcho tssona, eküma vamo jina rajak ji hansi oyi ejüv, osi orae ekümrümo na rümchojo ombona elov n li. 14 "Kyon tsükana oyam ekümrümo nsole opvüo jina n hungathüng meyana alo chüa sana tssona kyon jina lochev. 15 Tokhatola opvüo ji ehungo na hojito tssona elov n li. Osi ekümrümo ji engochocho tssona engocho man jina chüngtav.

Ntsanrük osi Ekhümlan thüngoe Shikhfülan Jiang

16 "Eboe tsükana loroe oyam na nkohan jitüv eküm yesoyina, ombona loro man ji losi ompvü soa vamvüka. 17 Tokhatola loroe ji opona oni n vantathuk to phyona eboe jina loro man ji tata loroe ji opo ji lovka. 18 "Eloe ochona oyam sorisotüka mekana jaktona sana chüthuka. 19 "Eboe ochona ekümrümo thüngi ponilan tssoa sana chüthoka. 20 "Kyon ochona OPVÜI a yaka potsow thanpo erungthan pia sana chüthoki sia. 21 "Lankonlansi jiang tijaktona osi tikhangshia, nteha Ejip metae lankonden tssoa vancho to ji ti-mhechotava. 22 Emi osi opvüpoe n vamo jiang tikhangshia. 23 Ntena onte khangshia na ontena kyochile to ayirüv küma OPVÜI ana onte janlam, 24 osi a lüm tsuki ritsso lona nte chüthoku. Nte engh jiang emi kümkhamvü osi nte tsoeoro jiang opo n vanden kümkhamvü. 25 "Ntena a kyon ochoang sana yantsae tüv orang nona rangvae jiang etsso tssoa eran tikhiyia. 26 Ntena ochhi loyaro tssoa ochoang sana mpensü khi vata tssona eng n rhethüng pilana, 27 ntiotssole ombo tsük lümthukphen ji hoji tae. Ombona ntio mpensi yipvüla? Ombona nzanchile to athüngi chona na ana janlam, ntiotssole aiyo khonzanti to etssoe. 28 "Potsow tachia oyi n mhom tiphyoa, osi nte kyon esopvüi jiang ti-rhiyikata. 29 "Ntena nte tsonghonrho osi zükhi, nte thyujü jiang lona khichei yuta ebenlo a thantava. Ntena nte tsokhfü jiang apitava. 30 Nte mangsü osi olyu nrodemo jiang apitava. Obung nrodemo ji tsüngon tiying opvü ndüngo vanthuksi tizaoto lojo a thantava. 31 "Nteno a kyonden, jitsükona ntena orae ekümrümo na rümcho rajak jiang tsov meka; tolea hotüv jo füro jiang phitava.

Khochuk 23

Ntsanrük Osi Elan

1 "Ejüng onpungyipung tihanphia, osi nlan etssoe tsüka ejüng ehungpvüi tssoyia tikyochia. 2 Wokyongona silyuo tssoa osi ntsa monthuko elhi tssoathüng tiphankata. 3 Yantsae ji oyi tssoyiathüng omhyik theta titssoyia. 4 "Ni ri ji mangsü mekana gadho tsanmhicho hunga tssona opvüo ji thüngi sosi owo pia. 5 Ni riji ekümrümo mangsü mekana gadho jina oha mmyingo ji n tov epyakthe vana tssona sükata; zeta yakchi yi tisia. 6 "Yantsae jina yitssoki roathüng ombo elan lio jiang n piv tisia. 7 Ejüngo na nlan tishakata osi ntsa evan ji tichüthoka, ntiotssole ochona hojito n mhom tssoana ana nlan piv. 8 Ekhüp tikhia ntiotssole ekhüp jina kyon ji ntsa jiwoe omhyik jukiala osi nlan n lio kyon jiang elan jiang moni siyiala. 9 "Lankonlansi jiang tikhangshia; ntiotssole nteha Ejip metae lankonden tssoa vancho osi Iankon jo kvütüv sana ntena ejyueranthaka.

Nzyu Tiyingoto Ji tona Tsüngon Tiyingo to Ji to

10 "Nte li jianglo nzyu tiruk tsükona benrotava, osi ji lona joncho-rücho jiang hanthetava. 11 Tokhatola nzyu tiyingo to jilo jo hae sia, osi hojilona ntio ethi-ebena sana ti khia. Hojilona ethi-ebenmo jiango yantsae jiang na tsovka, osi jilona enhyo jiango orae ekümrümo na tsovka. Hoji esüa nte jününgrothi jiang tona olive dung to jiang tsükona ha benphitava. 12 "Hopta lo tsüngon tiruk elhi tssotava, osi tsüngon tiyingo tojilo jo elhi ti tssotava, to tssona nte eziiden osi lankonden nte ki elhi tssota evamo jiangha esan hungu, osi nte ekümrümo jiangha esan hungu. 13 "A, OPVÜI shina, nte ezowo jiang topvü engtava. potsow thanpo thüngi tirandantava; onte mying jiang tia tiphyophitava.

Tokhu Tsüphov Ethüm Jiang

14 "Ntena ayikrachiv tsükona tokhu ethüm shiang tssotava. 15 Ntena Ejip metae na khochio ji choro Abib jilo jo ebung mozhü n theo tokhü ji ana nte ezovo ji lankaewoe na khitava. Shilo tsüngon tiying tokhü jilo jo ebung mozhü thecho hümri tsov meka. Akhümo roathüng ntia othan npem jo tironrüngtava. 16 "Ntena nte benro jiang eriv benkata na liri tokhvü ji khitava. "Ntena linhyangthüng nte jününgroli osi tssüngthili jiang lona tssüngthi lhoathüng ranki tokhü ji khitava. 17 Nzyu akvü tokhu ethüm shilo eboetso topvü na oro OPVÜI nte Potsow a khümtavka. 18 "Ntena ekümrümo na athantathüng ebung mozhü etheo hümri na tithantava. Tokhu shianglo athancho ekümrüm jiang ethyu jiang ojyuto enya jana vav meka. 19 "Nzyu akvü ntena khichodemo otsuk-omüm jiang nte Potsow ki hansi rotava. "Nyanyanro osi olyuro jiang opvü shyurojü lona tiekvüa.

Phyochak Osi Püngnoyi

20 "Ntena yentsatathüng ana nte vüngina lanben wothuka nte nkohathokuka, osi ana methako meta jilo nte sochukchivka. 21 Ombolo lüm thetava osi oyi engayitava. Ombo tipanlantava, ntiotssole ana ombo rothukcho osi ombona hojito panlan jiang nlan siyiv mek. 22 Tokhatola ntena ombo yi enga ana ntio phyoa sana ji benphita tssona nte ri jiang topvü thüngi ana rotavka. 23 A lanben na nte mhadungi na owo Amorite jiang, Hittite jiang, Perizzite jiang, Kanaan kyon jiang, Hittite kyon osi Jebusite jiang metae nte sosi yivka, osi ana onte monthukravka. 24 Onte potsow jiang mhadungo epyaktheta osi khümta to ti-tssotava, osi ekhümlan tssolanphyolan jiang tibenphitava. Onte potsow jiang roe sitava osi onte ntho long dyurhyu jiang roe sitava. 25 Ntena OPVÜI nte Potsow a khümta tssona, ana etsoyu osi ojü nte mmhayithukuka. Osi nte nkyipnrüp jiang topvü khi nte siyivka. 26 Nte meta lo eloe ochinaha ngaro yesoe sia mekana otsoeoro n liv tüv liv meka osi harishia nte vanthokuka. 27 "Nte panlamo kyon jiang khi a kyuthuka, osi ntena ori tssoa vamo jiang ana hamathukuka, osi nte mhadungo onte tsanthokuka. 28 Ana nte ri jiang ekhenrhükthoku, osi ntena kvütata vüngtsana yiana jitata ana Hivites kyon, Kanaan kyon elani Hittite kyon to jiang phani siv. 29 Ana nzyua yuta lona jo phani onte n si; to tssoa na meta ji yingsiyingloe siv osi orae ekümrümo na elüm nte khetsüv. 30 Jitsükona ana tara tara na onte yithoka vani meta ji sayakhuka nte santhethoku. 31 Ana nte meta erü jiang Aquba jünken lona benkae Euphrates zhükvü nandang, tona Mediterranean jümang lona lijüng ji nandang lo tsükathoku. Meta pvüo jiang pono ana etho nte piv osi ntena rakhoa na ontena tsamvü. 32 Onte thüngi osi onte potsow jiang thüngi ntia ntsa tae tivatava. 33 Kyon jiang nte meta loha tivanthuka; ntena hojito tssoa na, ontena athüngi mmen nte tssothoku. Ntena onte potsow jiang khümcho jo echü tsirhi lona nte sav."

Khochuk 24

Ntsata Shikhfü Ji Methaktala

1 OPVÜI na Moses ezocho, "Phunglani chungrotava, ni tona Aaron, Nadab, Abihu tona Israel esopvüiden ekhatiying to, osi ntena chungro ejam tara liathüng na epyakthei khümtava. 2 Ni yaka, thanpoe na a ndüngo rochev meka. Kyon jiango phunglani tia chungrov meka." 3 Moses na OPVÜI yi jiang osi yitan jiang oyi kyon jiang ezocho, tole kyon topvüna nzo tssoe heto phyotacho, "OPVÜI na phyothako jiang topvü etena benphivka." 4 Moses na OPVÜI yizüng jiang topvü erancho. Ojyuato to nyazüngi na ombona phunglan ji jothelo thanphen roni Israel pvüji taro eni ji nkhen olong taro eni chümcho. 5 Jisüi jo ombona khyingroeden ejoma wothuka mangsü tara khi OPVÜI thüngi khümshümta than pithukcho. 6 Moses na ekümrümo jiang ejen chiso khi ophilo thesi chiso jijo thanphen jilo chükae sicho. 7 Jisülo jo ombona OPVÜI yizüng eramo ntsata kako ji khi kyon jiang na zoa ekhyoto khacho. Tole kyon jiangna phyotacho, "Ena OPVÜI yi engav, osi ombona phyo jiang topvü benphiv." 8 Jisülo jo Moses na ophi lona ejen ji khi kyon jiang poni erhikacho. Osi ombona phyocho, "OPVÜI na yizüng shiang nte piathüng nte thüngi ntsatao ji cheka ejen ji shi." 9 Moses, Aaron, Nadab, Abihu tona Israel esopvüiden ekhatiying jiang 10 to phunglani chung wotacho 10 tole ontena Israel Potsow ji hungcho. Ombo jonpho kupi jo tssentsü long ejüm pyon, oyak shi esüo tüv na roncho esüa hungcho. 11 Israel kyon esopvüiden opvü odung etssoe shiang ji OPVÜI na nmeyancho; Ontena Potsow hungcho osi ontena tsoyutacho.

Sinai Phunglani Moses

12 OPVÜI na Moses ezocho, "A thüngi phunglani chungroa, tona nina hepi vanathüng ana kyon jiang püngnoyi yizüng topvü ana erankacho longpyak eni ni pivka." 13 Moses tona ombo kyochi Joshua to onina methaki, Moses na khochi phunglani chungocho. 14 Moses na esopvüi jiang ezocho, "Ena n joyithüng jo helona nhyakta vantava. Nte ndüngo Aaron ha Hur oni vamka, jitsükona nte yolo ochoangna pangtarüta liana oni thüngi wotava." 15 Moses na Sinai phunglani chungole, eluk na phunglan ji eyukcho. 16-17 OPVÜI phfütsson tsünglüpo jina phunglan jilo jorocho. Osi hoji wondang ji Israel jiang na jo phunglan kvüri jilona omi kiato hungcho. Eluk jina phunglan ji tsüngon tiruk eyuki vansi tsüngon tiyingo to jilo jo OPVÜI na eluk longina Moses tsacho. 18 Moses na phunglani eluk ji longi chungocho. Osi hojilo tsüngon zhüro, zümo zhüro to vancho.

Khochuk 25

Ntho Süki Than Jiang

1 OPVÜI na Moses ezocho, 2 "Israel kyon jiang thüngi othan a pitale to ezoa. Kyon jiangna lüm joa ntio thana sana khichoyia. 3 Othan jiangjo: shona, janti, yongmenyonjak; 4 Sünyipvü; ejümsü; khonthyupyon, osi tssansü emyom, nyanyan tssansü; 5 olyufü emyom na jümcho; sofü enyipvü; akaciatssüng; 6 mii on lo thephen thyujü; otsük nzüphen thyujü lo thephen orhüm mmhom; 7 tssentsü long emyom tona thanpo tssentsü long to pvüti tsüphoe ji phukthesü tona teki eyuk tolo khümkaphen to jiang. 8 Kyon jiang khi a tsükona ntho sükiro tssothuka, tona ana onte yolo vamka. 9 Süranki ji heto tssov to ana onte ejüo ji ephan tssothuka.

Ntsata Bakos

10 "Akacia-tssüng na Bakos esi centimetre 110, etssüi centimetre 66, ntssoni centimetre 66 to shanthuka. 11 Bakos ji opon ochung shona njüm na esezhüa osi ochüm jiangha shona na nkhon nsüngrükata. 12 Shona nkon mezhü nko ni ojo mezhü ji nkhen ejümphen theta, to tssona phokolo nkon eni khyingüv. 13 Akaciatssüng na khora thei shona khi esezhüa 14 tolyui Bakos ji phukoatalo khatheta. 15 Khora jiango nkhon jianglo khathepvü vavka, khichov meka. 16 Tothakana ana yizüng jiang erankacho longpyak eni ji ni pivka, osi Bakos jilo hoji thei vavka. 17 "Bakos ji elhüp ji esi centimetre 110, etsüi centimetre 66 to shona njüm na phyonzhüa nsüngrüa. 18 Elhüp ji ochüm tsonkho ekümrümo echo eni mpao tüv shona na eni joe züpkata, 19 osi eni ji chüngtana oni ji wozhü motsünga kümka. 20 Ekümrümo eni ji elhüp ji ponina zechitao tssov osi oni echo jiangna elhüp ji eyukzhüv. 21 Longpyak eni ji Bakos jilo thei elhüp jina lhüpzhüa. 22 Ana hoji lona ni ndukvüka osi ekümrümo ji echo eni yuta lona ana Israel jiang a yizüng topvü pivka.

Potsow Thamo Hümri Ji Ekachiphen Saro

23 "Akaciatssüng khi saro motsünga nsüngrüa, esi centimetre 88, etsüi centimetre 44, ntssoni centimetre 66 to. 24 Osi shona njüm khi phyonzhüa, osi nkhon rhüa shona zümkata. 25 Hoji rhüa nkhon motsünga millimetre 75 nzoa tüv otssa rhüa shona rikae saro ji rhüa theta. 26 Osi shona na ejümphen nkon mezhü nsüngrüi ojo mezhü jiang eren nken jianglo theta. 27 Khora khathephen nkon jiangji nkhon ndüngo theta. 28 Khoro jiangjo akaciatssüng khi nsüngrüa osi shona khi nzukzhüa. 29 Zükhi thanphen ji tsükona ophi, opvü tona phikok to shiang hetopvü shona njüm na nsüngrüvka. 30 Saro jijo Ntsata thephen Bakos ji mhadungo vavka, osi saro ji poni jo yuta topvülo ntho hümri ji ekachi vavka.

Milon Ekachiphen Ji

31 "Shona njüm khi milondung nsüngrüa. Ndungkaphen ji tona odung ji tojo shona na joe khia; osi hojilo merithukvü thera eki tona pvübüm to nsüngrükata. 32 Hoji ayi amen khero tiruk ethümthüm ren nsüngrükata. 33 Khero motsüngtsüng lo merithukphen thera ethüm ren eki tona pvübüm to almond kicho esüa thevka. 34 Milondung jilo almond kicho esüa merithukvü thera mezhü eki tona pvübüm to nsüngrükavka. 35 Khero ethüm remo jiang akvü küpo pvübüm motsüngtsüng thevka. 36 Pvübüm jiang, khero jiang tona milondung to jiang topvü shona jocho kholong tae tssovka. 37 Milondung jilo evav milon tiying nsüngrüi mhadungoe tüngrachio vata. 38 Hojilo myakaphen tona phikukro to jiango shona njüm na nsüngrüa. 39 Milondung ji tona hojilo nsüngrükao to jiang tsükona shona seri thümrosi mongo tsütsata. 40 Hoji kvüto nsüngrüv sana ana phunglani na ni ezoji ephan nsüngrüa.

Khochuk 26

OPVÜI Vanrhyu Ranki Ji

1 "A vanphen ntho ranki ji kichungi jo sünyipvü sütsük taro khi tssansü ejüm tona müngzhüv, emyom to lo tüktsüi zona. Osi jilo echo mpao ekümrüm kisü khümkarata. 2 Sütsük akvü esi metre taro eni, etsüi metre eni to ren kheti tssothuka. 3 Sütsük mongo ji sütsüka kümthuka vütsüa osi thanpo sütsük mongo jiha vütsüa. 4 Mongo vütsüo sükvü ji akvü otssawoe jo ejüm ying khi nkoncho pikata. 5 Vütsücho sütsük ovüngo jilo nkon tinyan vükata osi hojiang chanwonta sütsüka jilo ha tinyan vükata. 6 sütsük eni ji yitsütav tsükona shona khi yikaphen tinyan joe yitsütae sütsü ka kümthuka. 7 "Ranki ji eyukphen nyanyan tssansü sütsük taro ekha nsüngrüa. 8 Osü jiang topvü esi metre taro ethüm tona etsüi metre eni to ren tssothuka. 9 Sükvü mungo na sütsüka kümthuk, sükvü tiruk jina sütsüka kümthuk to tssoa. Tiruk vütsüo sü ji eni chüpchei ranki ji mhadungoe ji eyuka. 10 Sütsük ovüngo jilo sükvü otamo ji chüm rhüa nkonka tinyan vükata osi sütsük motsüng ao jiha ochüm rhüa tinyan vükata. 11 yongmen yonjak na yikaphen tinyan joe sütsük eni ji yitsütae eyuk motsünga kümthuka. 12 Sükvüa tajo jijo ranki ji sülamoe zona. 13 Osi sütsük enita lona esiwoe metre tinyan ren tajo jiango ranki ji kikhyo tsungkho zonzhüphen tssothuka. 14 "Eyuk eni nsüngrülana, motsünga jo olyu tssan emyom na jümcho khi nsüngrüa, osi motsünga jo sofü mmhom na nsüngrüi eyuk opomo ji tssothuka. 15 '"Ranki ji ronri tssov tsükona akacia tssüng na ndungkachio ronria. 16 Ronri motsünga lo esi metre mezhü, etsüi centimetre rokro tiruk to tssothuka, 17 osi ronri akvülo rafüp kheti tssokata, toli ronri jiang mmyanta chüngtathuka. Ronri akvüto lo rafüp khyingthuka. 18 Ranki ji jolowoe tsükona ronri mekyu nsüngrüa 19 osi hojiang ndungkaphen janti na zhüro joe ronri motsünga lo ndungkaphen eni ren tssothuki rafüp eni ji sayathuka. 20 Ranki ji khümkiwoe tsükona ronri mekyu nsüngrüa 21 osi motsünga lo jantai ndungkaphen eni ren zhüro tssothuka. 22 Engrhewoe ranki ji sülamoe ronri tiruk, 23 tona nken jilo ronri eni to theta. 24 Nkeni echi ronri jiango ojowoe na chüngtae hojina mhonki janthuki khia. Nken jilo ronri eni jiha hotoli khia. 25 Hojito ronri tiza ji tsükona ndungkaphen taro tiruk tssovka. 26 "Akacia tssüng khi nkho taro mongo eraktae khia, ranki esanawoe tsükona mongo, 27 esanawoe tsükona mongo elani engrhewoe sülamoe jilo mongo to theta. 28 Nkho olungo kvüwoe na ronri jiang renso jana chüngiv sana jijo ranki ji ochüm esanawoe na esanawoe jana khia. 29 Ronri jiang shona khi phyonzhüa osi hojiang lo nkho jiang sayaphen shona na nken jokarava, osi hojiang ha shona na phyonzhüi khia. 30 Ranki ji ana phunglani na nizo ji ephan tssokachia. 31 "Tssansü ejüm, müngzhüv osi emyom to tüktsücho khi zonchak sü nsüngrüa. Osi hojilo ekümrümo echo mpao kisü vükata. 32 Hoji zonphen akacia tssüng na tyurhyu mezhü chümi shona na nzüi yikaphen lyukarae hoji janti ndungkaphen mezhülo ndungkae khia. 33 Ranki ji mhonki jilo yikaphen rencho kosüng jilo zonchaksü ji zona, osi sülamoe jo longpyak eni ejüo Ntsata Bakos ji vata. To tssona zonchak sü jina ntho meta jiha nthotsowo meta ji woni khosotavka. 34 Ntsata Bakos jilo elhüp ji theta. 35 Nthotsowo meta ji pomoe jo thanphen saro ji ranki jina jükiwoe vata osi milondung jijo ranki ji jolowoe vata. 36 "Ranki ji kipüng zonchakphen jo sünyipvü opyon ejüm, müngzhüv tona emyom to tüktsücho lo kisü vükaracho tüv khia. 37 Zonchaksü shi tsükona ha acacia tssüng na tyurhyu mongo methaki shona na nzuki jilo shona yikaphen therae hojiang ndungkaphen jo pyontsü yonjak na jocho mongo na tssothuka.

Khochuk 27

Thanphen Sa Ji

1 "Akacia tsüng khi thanphen sa nsüngrüa. Osi thanphen ji nken mezhü khetitathuka, etsüi ha metre eni si tsyuka eni, esi ha metre enisi tssyuka eni, osi ntssoni jo metre motsüngasi tssyuka ethüm tssothuka. 2 Nken mezhü ji akvü rafüp khyingthuka. Hojiang topvü tssotsüi thanphen ji opho motsünga tssothuka, osi yongmen na eyukzhüa. 3 Thanphen jilo mipok yingsüv thoncho jiang thephen ophfü, khotherang, phikuk, oyii tona nghiriphfü to methaka. Shiang hetopvü yongmen yonjak na nsüngrüa. 4 Yongmen yonjak khi raying theta hankhan esüa nsüngrüi nken mezhü jilo nkonka mezhü theta. 5 Raying theo elhüp ji thanphen ji nkho ji kupi thei thanphen ji ntsson ji riso eyukachithuka. 6 Osi akacia tssüngna khoro nsüngü rhyui yongmen na eseta, 7 osi thanphen ji ejüma na khora jiang ji nkonka jianglo sokthei ejümtava. 8 Thanphen ji tssüngpyak eporov na nsüngrüa osi okuk khyingthuka, ana phunglani na ni ezo ji ephan nsüngrüa.

OPVÜI Vanrhyu Ranki Ji Epichak

9 "A vanrhyu ranki ji eyukzhü jo sünyipvü na zonchakvüka. Jolowoe jo zonchak ji esi metre 44. 10 Osi hoji yongmen yonjak mekyu poni yongmen durhyu mekyu chümi sayathuka, osi hojilo yikaphen jiang tona khathephen mekyu tojo janti na jovka. 11 Eyuk ji jükiwoe ha hoji esüa thevka. 12 Engrhewoe jo zonchak sü esi metre 22 ji ndungkaphen taro zathuki sayathuka. 13 Engkhüwoe kibüng khyingo jiwoe ha zonchak sü esi metre 22 tssothuka,14-15 Kibüng ji hayiamen zonchak sü metre 6.6 tüv ndungkaphen ethum lo durhyu ethüm zathukcho ren thevka. 16 kibüng ji zonchak jo esi metre 9 tüv sünyipvü lo tssansü ejüm, müngzhüv tona emyom to tüktsücho osi kisü pikaracho tüv khivka. Hojijo ndungkaphen mezhü pono durhyu mezhü chümi sayathuku. 17 Ranki ji epichak jilo durhyu jiang topvü janti khyimro na shentsüthuka, osi yithephen jiango janti, osi durhyu jiango yongmen to tssothuka. 18 Epichak ji esi metre 44, etsüi metre 22, ntssoni metre 2.2 to khia. Zonchaksü jiango sünyipvü na osi ndungkaphen epyako jiango yongmen to khia. 19 Ranki jilo tsütsao tsakalan topvü, osi eshentan jiang topvü yongmen na nsüngrüvka.

Milon Ji Ntangshon

20 "Milon ji mmyu akvü njükae vav tsükona mijü jo olive thyujü mmhontso ji oro ni pile to Israel jiang ezoa. 21 Eyukzhü ji pomoe a vanrhyu ranki, Ntsata Bakos ji zechiwo tssoe lio jilo Aaron tona ombo tsoe jiang to na milon ji vavka. Hoji na a vanrhyu lona mmyui na benkae enyathüng jana kia vamüka. Shi yizüng shijo Israel jiang tona onte tsoronichen to jiangna nchüngkhon to benphia wovka.

Khochuk 28

Pvüti Jiang Mpensü

1 "Nijenio Aaron tona ombo tsoeden, Nadab, Abihu, Eleazar and Ithamar to jiang tsarhyua. Ontekhi pvütiden elhi tssoa a benkathukvü tsükona Israel jiang yolona tsanchuki vanthuka. 2 Ni jenio Aaron ji pvüti mpensü methakia osi ombo ji yjkrachi osi opyon jüthuka. 3 Ana etho pio tssiyanmori jiang topvü tsae Aaron mpensü nsüngrüithuka, osi ombo ji a elhi lo pvüti to khochaki vanthuka. 4 Onte khi tekiekhüp, epvü eyuk, phok-nrhüo, phokthesü thera pikacho, kvüri eyuk toha ryuphan-sü to methakithuka. Ontena pvüti mpensü shiang ji ni jenio Aaron tona ombo tsoe jiang to echi methakia onte khi pvüti elhi lo a benkathuka. 5 Tssiyan jiangna tssansü ejüm, müngzhüv tona emyom elani shona ying osi sünyipvü to khi methakithuka. 6 "Epvüeyuk sü ji tssansü ejüm, müngzhüv tona emyon elani shona ying osi sünyipvü to khi tüki kisü pikatathuka. 7 Epvü khüngo sü eni jina eyuksü ji khüngzhüa hayiamin thevka. 8 Ryukhüngzhü ha hotüv na nsüngrüi eyuksü jilo khümkae sütsüka kümthuka. 9 Tssentsülong myonshüv eni khi jilo Jakob tsoe taro eni jiang mying, 10 nzyu eran ephanina, motsünga lo tiruk ren erankata. 11 Jakob tsoe jiang mying thenkav jo thera ejoe tssothimori yani olong eni jilo thenkathuka, osi olong eni ji shona kholong lo ndungkata. 12 Osi longpyak eni ji eyuksü jilo theo epvülo zonka sü jianglo vükae Israel pvüji taro eni jiang echanthuka. Hojitoli onte mying jiang epvülo ephfükae hamka, tona ana yuta topvülo a kyon jiang nchümchevka. 13 Shona na ndungkaphen eni nsüngrüa 14 osi shona zhü eni nsüngrüi eritsütae longpyak jiang ndungkaphen jianglo shenkathuka.

Teki Eyuk Ji

15 'Pvüti tsüpho ji tsükona Potsow lüm erüng yani zephen tssov tsükona teki eyuk methakia. Hoji ha eyuksü nsüngrüo tsütsaelan tsük jiangna nsüngrüi hojito opyon lyukarae khia. 16 Hojijo nken mezhü ekhyingo osi eni chüpchei ekhio tssoa esi centimetre 22, etsüi centimetre 22 to khia. 17 Hojilo tssentsülong myonshüv, hakhiu tona myontsangüv to khia; 18 oren enio to jilojo tssentsülong mmyakvü, ejüm tona tsünglüpvü to rena; 19 oren ethümoto jilo jo tssentsülong shakya pyon, tssentsülong humphokvü tona müngzhüv pyon to khia; 20 oren mezhüo to jilo jo tssentsülong mmyakvü, myonshiv tona hakhfü to reni khia, shiang hetopvü shona phyonkacho poni chümkavka. 21 Olong taro eni shiang akvülo Jakob tsoe taro eni jiang yolo tsüka mying khyingthuki Israel pvüji jiang echanthuka. 22 Teki eyuk jilo shenkaphen shona njüm na wozhü eritsütae khia. 23 Shona nkonka eni joe teki eyuk ji ochüm omhawoe jianglo shenkae, 24 shona zhü eni ji nkonka eni jilo shenkata. 25 Osi shona zhü ochüm phokowoe eni jijo ndungkaphen jilo shenkae, eyuksü jilo epvülo zonkasü ji woni mhadungoe tssothuka. 26 Shona nkonka eni joe eyuksü ji ndüngo teki eyuk ji ochüm ochungo jilo shenkata. 27 Shona nkonka eni jolani ryukhüng seseo ji mhalo süchüm ji ndüngo eyuksü jilo epvüsü eni mhadungi zonchochio ji woni chümi oküpo eni jilo shenkata. 28 Teki eyuk jilo nkonka jiang tona eyuksü jilo nkonka jiang tojo ejüm zhüna shentsüa, to tssona teki eyuk jina ryukhüng jilo ndungkav osi chüngchüngüv. 29 "Aaron na ntho meta jilo rhowoa na Israel pvüji mying thenkao teki eyuk ji hamka, tona OPVÜI, A, shina a kyon jiang yuta topvülo nchüchev. 30 Phalyu zephen füfo jiang teki eyuk jilo chüm kata, tosi Aaron na hoji hansi a ntho vanpheni rhorothuka. Hotüv yuta lojo ombona teki eyuk ji hanpvü na vamvüka, tona Israel kyon jiang tsükona a lüm erüng ji ombona ntsivka.

Pvüti Mpensü Thanpo Jiang

31 "Eyuksü ji pono phuknrhüo jijo tssansü ejüm taena nsüngrüka. 32 Hojilo kvüri phungthephen epo havka, osi epo ji reta n yithoku büngshüng vükavka. 3334 Hoji süjüm oküpo ji dungowo tssansü ejüm, müngzhüv, emyom to khi tsarümthiphen kisü vükata osi hojianglo shona khyingtsü kisü theta. 35 Aaron na pvüti elhi tssoana shi hamuka. Ombona a ntho vanpheni rhoroathüng osi yiathüng khyingtsü won ji zov küma ombo lüngthav mek. 36 Shona njüma na oyuk-osen joe hojilo "OPVÜI lo khochaki picho" to erankata. 37 Kuri eyuk ji mhadungoe hoji ejüm zhü na khüngkata. 38 Aaron na hoji oton lona hansi kyon jiang than jiang pina, kyon jiangna thanathüng tara ori nandang jo ana khichoyivka. 39 "Aaron phukthesü jo sünyipvü na tükia, osi kuri eyuk ha sünyipvü na nsüngrüyia, elani ombo ryuphansü jiha kisü tükaracho tüv nsüngrüyia. 40 "Aaron tsoe jiang monkhüm lia opyon jüthoku tsükona phukthesü, ryuphansü tona kikho to methakirava. 41 Osü shiang nijenio Aaron tona ombo tsoe jiang to mpensüthoka. Jitosi onte khi pvüti elhi lona a benkathoku tsükona oliv thyujü onte nzüyia elhilo khochaki onte vanthuka. 42 Sünyipvü khi eryu lona ophi ejan eyuko sü onte methakia tona onte tsük jiang hungu meka. 43 Aaron osi ombo tsoe jiang na kvüthüng a vanrhyu ranki jilo rhowoa osi thanphen ji ndüngo pvüti elhilo woa sana hojiang hamvüka, tona onte tsük jiang chanchev mek, osi onte chüthoku mek. Shikhfü tsük shijo Aaron tona ombo tsoronichen to tsükona n senphina tsütsavka.

Khochuk 29

Aaron Tona Ombo Tsoeden Jiang To Pvüti Elhilo Etsa Lanso

1 "Nina Aaron tona ombo tsoeden to jiang ji a elhilo pvüti khochaki tssothukathüng ji heto tssovka. Mangsü tssibungro motsünga tona olyu opung eni to ome n khyingo tüv khia. 2 Otsüng chencho lo vümhi n thena olive thyujü khi hümri tara rünga, osi ejoma jo thyujü n theo ha rünga, ejomajo thyujü tara tae esekacho tüv ha rünga. 3 Hümri jiang loksa lo theta osi nina kvüthüng tssibung ji tona olyu jiang to a thana sana hojiang nzo a thana. 4 "Aaron tona ombo tsoeden jiang to sosi a vanrhyu ranki kibüngo rothuka, osi nthocheta tsükatale to onte ezoa. 5 Jisülojo Aaron ji pvüti mpensü jiang phukthethuksi ji eyuksü ji, eyuksü poni phuknrhüo ji, teki eyuk ji tona ryukhüng ji to ekathuka. 6 Kikho ji ombo hanthuka osi hoji poni "OPVÜI lo khochaki picho" to eramo ji khüngkayia. 7 Jitosi thyujü ji khi kvüri lo ombo phyangkayia ombo nzüyia, 8 "Ombo tsoe jiangha sosi oyi phukthesü jiang hanthuka; 9 osi onte eryulo ryukhüng jiang khüngia osi kvürilo kikho jiang hanthuka. Hojito nina Aaron tona ombo tsoe jiang to khochaki vavka. Onte osi onte tsoronichen topvü na nchüngkhonto pvüti elhi lona a benkavka. 10 "Tssibung ji a vanrhyu ranki ji kibüngo süsi roa, osi Aaron tona ombo tsoe jiang to okhe jiang tssibung ji kvürilo nyimkale to ezoa. 11 Osi hoji lo a ntho vanrhyu jilo, ranki ji kibüngo na tssibung ji tatssünga. 12 Jisüi jo tssibung ji ejen tara khi thanphen jilo edyukao jianglo ni khena erhikata. Tosi ejen enhyoe elio ji khi thanphen jilo lazae chükata. 13 Tothakana pokchung eyuko ethyu jiang tona, nthen jilo mmhontso ji tsücho, okhfü eni ji ethyu jiang khyinga khicho toli thanphen jilona rungi a thana. 14 Osi tssibung ji so ji tona ofü jiang tona erü jiang tojo epina pomoe na chivo runga. Hoji jo pvüti jiang mmen jiang siyiv tsükona thamo ji. 15 "Olyu motsünga ji khi Aaron tsoe jiang khe jiang ji kvürilo nyimkathuka. 16 Tosi olyu ji lüngthae ejen ji khi thanphen ji nken mezhü jilo phyangkata. 17 Jisüi jo olyu ji rhonroa, osi pokchung jiang tona ojo sülamoe jiang to etssüi oso thanpo jiang poni ekachia. 18 Tothakana hoji totona etsoyu than tssoa thanphen sa jilona runga. Hoji than ji rhüm jina a ematha-thukala. 19 "Olyu thanpo khochak elhilo tsütsao ji khi Aaron tona ombo tsoe jiang khe jiang to hoji kvürilo nyimkathuka. 20 Jisülojo olyu ji tatsüngi, ejen tara khi Aaron tona ombo tsoe jiang to eno amimoe nomüng jilo eseyia, elani onte khe amimoe yingpvü jianglo tona joyingpvü amimoe jianglo to eseyia. Tothakana ejen enhyo ji khi thanphen sa ji haphia erhikata. 21 Thanphen jilo ejen ji tara tona, nzüphen thyujü tara to khi Aaron tona ombo tsoe jiang to mpensü jianglo erhyikayia. To tssona ombo tsoe jiang tona onte sü jiang toji khochaki apivka. 22 "Olyu jiang ethyu jiang emhilo ethyu ji, pokchung eyuko ethyu ji, nthen jilo etsov mmhomo ji, okhfü eni ethyu na eyuko ji totona tona ophi amimoe to ji khichoe vata. 23 Othan apithako hümri ji lona hümri olan motsüngtsüng khicho, hümri olive thyujü na rüngcho motsünga, thyujü n thena rüngcho motsünga elani thyujü tara tae esekata rüngcho motsünga to khicheta. 24 Etsoyu shiang topvü Aaron tona ombo tsoe jiang to khelo theyia osi echümporo tssoa nthoche a thanle to ezoa. 25 Jitosi onte thüngi na khi erungthan ji poni ekachi etsoyu than tssoa a thana. Hoji than ji rhüm jina amathathukala. 26 "Aaron khochak elhilo tsütsao olyu ji shyuro ji khichoe echümporo than tssoa a pisi hoji nina khia, hojijo ni ejanka. 27 "Kvüthüng pvüti khochak elhi tssoa sana hojilo olyu tsütsao ji shyuro ji tona ophi ji tojo echümporo tssoa a pisi hojijo pvüti jiang ejan tssovka. 28 Yuta topvülo akyon jiangna kvüthüng khümshümta than apia sana solan shiango pvüti jiang ejan tssovka. 29 "Aaron chüana ombo sü jiango ombo tsoe jiang pia onte khochaka thüng hanthuka. 30 Aaron tsoe ochona ombo echunga sana hojina a vanrhyu ranki ntho meta jilo pvüti elhilo rhowoathüng pvüti sü jiang tsüngon tiying hamuka. 31 "Aaron tona ombo tsoe jiang to nthochak lo tsütsao olyu ji so ji khi ntho meta lona ejkvüa. 32 Oso ji tona loksalo hümri jüwo jiang to toji Aaron ha ombo tsjoe jiang tona a vanrhyu ranki kibjüngo na tsovka. 33 Ana nthochaka thüng nlan sita elhilo tsütsao ji tssovka. Shijo ntho hoji tsükona pvüti taena tsovka. 34 Etsoyu mekana oso n tsorav enyathüng jana lio jiango rungi sia, hoji jo ntho küma tsov meka. 35 "Aaron tona ombo tsoe jiang to nthochak elhi ji ana ni ezowo ji ephan tsüngon tiying khia. 36 Eng akvü nina mmen siyi than tssibung motsünga thamuka. Hojina thanphen ji nthochev. Jisülo jo olive thyujü khi nzüa nthocheta. 37 Hojito tsüngon tiying tssoa tona thanphen ji ntho tsotso kümvüka, osi hoji ochona mekana ntiona sana evüngkata sana hojilo ntho etho jina tssatssov.

Eng Akvü Than Jiang

38 "Nchünkhon tsükona enga akvü thanphen jilo olyuro nzyua tso tüv eni thana. 39 Olyu motsünga ji enyathüng than motsünga jijo mmyui than to tssoa. 40 Olyuro ovüngo ji ohüm chencho seri motsünga lo olive thyujü njüm seri motsünga nzii thana. Zükhi seri motsüngato othan tssoa phyangkata. 41 Olyu motsünga jijo mmyulani thana osi hojilo ha ohüm tona olive thyujü, zükhi to enyathüng ji esüa kheti theta thana. Shijo OPVÜI athüngi etsoyu than thanala osi hoji rhüm jina amathathukala. 42 Othan shijo yuta topvülo a mhadungo a vanrhyu ranki ji kibüngo na thana wovka. Ana hoji lona a kyon jiang nduku osi ana ni thüngi ni jamu. 43 Ana hoji lona akyon Israel jiang nduku osi a phfütson tsünglüpo meta ji ntho kümthoku. 44 Ana ranki ji tona thanphen ji to ntho kümthoku osi Aaron tona ombo tsoeden jiang to pvüti elhi lona abenkav tsükona nthochaku. 45 Ana Israel kyon jiang nzo vamvü osi aiyo onte Potsow tssov. 46 Ana onte ndüngo vamvü tsükona Ejip metaena onte sochukcho to ontena ntsiv. Aiyo OPVÜI onte Potsow ji.

Khochuk 30

Orhüm Mmhom Rungphen Thanphen Ji

1 "Orhüm mmhom rungphen thanphen sa Akacia tsüng khi nsüngrüa. 2 Thanphen ji nken mezhü mmyana tüv osi essi centimetre 45, etsüi centimentre 45, nna ntssoni centimetre 90 to khia. Hoji nken mezhü jiang lo edyuka jiangha thanphen jilo lyutsüi khia. 3 Hoji opomoe, otssawoe osi khümchio jiang topvü shona njüm na phyonzhüi nkhon jiang ha rhüa shona zümkae khia. 4 Shona khi ejümphen nkonka eni joe nkhon eni ji küpo nsüngrükae ejümphen khora jiang khathephen tssothuka. 5 Khora jiangha Akacia tsüng khia osi shona na phyonzhüia. 6 Thanphen shijo Ntsata vaphen bakos ji mhadungoe osü zomo ji pomoe vata. Ana hoji lona ni ndukuka. 7 Enya akvü Aaron na milon ji methako roathüng hojilo orhüm mmhom runguka. 8 Ombona mmyulani milon ji tekatahüng ha hojito tssovka. Orhüm mmhom than shijo ntinaha n khetsüthukna yuta topvülo lia wothuka. 9 Thanphen shijo jo orhüm thamo shiang osi ekümrüm than jiang elani benro-niro than jiang osi zükhi to ekachiv meka. 10 Aaron na nzyualo yenjoa mmen than piathüng ekümrümo ejen ji khi thanphen khümchio mezhü jianglo esekata thanphen ji nthochevka. Nzyu akvü heto tssoa yuta topvü lo benphia wovka. Thanphen shijo ntho tsotso, OPVÜI A, tsükona khochaki vanthuka."

OPVÜI vanrhyu Ranki ji Tsükona Tssenkhya

11 OPVÜI na Moses ezocho, 12 "Nina Israel owo kha na eboe tso otsük akvüna ombo eküm man tssenkhya apivka, to tssona owo khathüng ombolo ntia ejak era liv meka. 13 Owo khata jilo thenhyae otsük akvüna shikhfü lona tssenchako ji eben orang thevka. Otsük akvü na athüngi othan shi apivka. 14 Eboe nzyu mekyu pomoe kvüta wokhata lo jüa na topvüna tssenkhya shi thevka. 15 Onte eküm tsükona otssen shi thetathüng ejüeli jina ha kyongkata thev meka. 16 Otssen shi kyon jiang thüngi na khyae a vanrhyu ranki jilo ethüng ezi tsükona tsütsata. Otssen shijo onte eküm tssen tssovka osi ana onte nkochev nchümchevka."

Yongmen Phikuk Ji

17 OPVÜI na Moses ezocho, 18 'Yongmen yonjak khi ophi joa osi laza jiha yongmen khia. Osi hoji jo ranki ji tona thanphen ji to yutalo vae khi ojü yena. 19 Aaron tona ombo tsoe jiangna a vanrhyu ranki jilo rhowoathüng osi thanphen jilo etsoyu than pilo rhovov sathüng 20 hoji lona okhe tona ojo to epyovka. to tssona onte lüngthav meka. 21 Onte n lüngtha thoku tsükona onte khe jiang tona ojo jiang to epyovka. Shikhfü shijo onte tona onte tsoronichen jiang topvü na benphia wovka."

Nzüphen Thyujü Ji

22 OPVÜI na Moses ezocho; 23 "Mozhürhüm mmhontsov heto methaka: Myrrh rhüm seri tiruk, sangsuryu orhüm mmhom seri ethüm, Süngbenjü orhüm mmhom seria, 24 tona Akacia orhüm mmhom seri ethüm, (shiang hetopvü shikhfü lona tssenchako ji ephan füi thev.) olive thyujü seri mezhü to thei 25 nzüphen ntho thyujü thanpoe thyujü mmhom esüa nzitsüa. 26 Hoji rhüm mmhom ji khi a vanrhyu ranki tona Ntsata thephen ji tolo nzükata. 27 Thanphen saro ji osi jilo tsakalan jiang, milondung ji tona jilo tsakalna jiang, orhüm mmhom thanphen ji, 28 Othan rungphen osa ji tona hojilo tsakalan jiang, epyophen phikuk ji tona hoji laza ji to nzüa. 29 Shiang shi hetolyui nthochaki a tsükona vanthuka tona ntho tsotso kümvüka, osi ntiona hojilo evüngkata sana ntho etho jina tssatssov. 30 Osi Aaron tona ombo tso ejiang to a elhi tsükona pvüti kümthoku nzüyia khochaki vanthuka. 31 'Ntho nzüyi thyujü shi a elhilo nchüngkhon tsütsavka to Israel jiang ezoa. 32 Hoji jo kyon shae lo phyangkav meka, osi mozhüsha nsüngrüathüng jo hoto benribenyov meka. Shijo ntho, jitsükona nina ntho to vanthuka. 33 Ochona hetüv thyujü nsüngrüa sana osi hojitüv khi kyon shae pvüti meko tüv nzüa sana jijo a kyon to khanhyav meka.' "

Orhüm Mmhom Ji

34 OPVÜI na Moses ezocho, "Orhüm mmhom olan olan shiang kheti theta benria tssütsserhüm mmhom, tssüngfürhüm mmhom tona Galbanum rhüm tonma onijü rhüm njüm to theta benria. 35 Shiang benria theta mozhürhüm mmhom esüa nzinzoe orhüm nzüngrüa. Hoji ntssünga osi nthoa vanthuku tsükona oma theta. 36 Hoji lo tara khichei enhyikroe owo a vanrhyu ranki Ntsata thephen jilo erhikata. 37 Orhüm mmhom shi ntho tsotso esüa tsütsata osi orhüm mmhom shi esüa ni tsükona jo tinsüngrüa. Tole shijo a lo khochaki picho ntho to vanthuka. 38 Ochona mozhürhüm nsüngrüathüng hoji esüa benria sana a kyon to khanhyav meka."

Khochuk 31

OPVÜI Vanrhyu Ranki Ji Etssoeden

1 OPVÜI na Moses ezocho, 2 "Ana Juda pvüji kyon Hur tsorüi Besalel, Uri tsoe ji ethüngchei, 3 a etho na pyingthukthaka. Ana elhilan taro thüngoe engathe, tssothimori osi etho ombo pithaka, 4 shona janti osi yongmen elhilo nchümri lia, haton hari thüngoe, 5 elani oyuk-osen zentüng zenri chümkav tsükona tssothimori, elani otssüng eshan thüngoe, ji yaka tssiyanmori topvü thüngoe tssothimori ombo pithaka. 6 Ana Dan pvüji lonaha Abisamah tsoe Oholiab ha ombo nzo elhi tssothoku ethüngchethaka. Ana elhi etssoe thanpoe jiangha topvu tssothimori pirathaka, hoji jo ana ntio nsüngrüv methakcho sana jiang etssov tsükona; 7 a vanrhyu ranki ji, Ntsata thephen ji tona elhüp ji, ranki ji lo benribenyoyiv jiang, 8 saro ji tona jilo ethelan jiang, shona njüm milondung ji tona jilo ethelan jiang, tona orhüm mmhom rungphen thanphen ji to. 9 Erungthan thanphensa ji tona jilo tsakalan jiang, ojo okhe epyophen phikuk ji tona hoji laza ji, 10 Aaron tona ombo tsoeden to na pvüti elhi tssoathüng mpensü jiang, 11 nzüphen thyujü ji tona ntho meta jilo echi orhüm mmhom ji to shiang hetopvü nsüngrüv tsükona ontena ana ni ezowo ji ephan tssovka."

Esanmung, Esan tsüngon Ji

12 Israel kyon jiang ezole to OPVÜI na Moses ezocho, 13 "A esan tsüngon esanmung ji lithuka, ntiotssole hojijo nchünkhon tsükona a tona nte to yutalo chekataphen motsünga, a opvüo shina a kyon nte kümthukcho to chekaphen ji. 14 Esan tsüngon ji ntena benphivka, ntiotssole shijo ntho. Hoji tsükona ochona tsüngon jilo elhi tssoa sana chüthokvüka. 15 Ntena nte elhi etssov tsüngon tiruk liala, tokhatola tsüngon tiyingo to jijo tsüngon tsüphov tssoa alo khochaki vatava. Ochona tsüngon jilo elhi tssoa sana chüthokvüka. 16 Israel kyon jiangna tsüngon shiji Ntsata ji chethephen tssoa vanthukuka. 17 Hoji jo a tona Israel kyon to yutalo chekaphen tssoa nchünkhon, vavka, ntiotssole a opvüo na oyak osi limha shiang tsüngon tiruk lo lyuyingcho, osi tsüngon tiyingo to jilo jo ana elhi vachochisi esancho." 18 Potsow na Moses ji Sinai phunglani na hojito ezorathakale, ombona longpyak eni jilo Potsow na ombo yizüng jiang erankao ji picho.

Khochuk 32

Shona Mangsüpong Kisü Ji

1 Moses na phunglani na n joyiv sunga vanale kyon jiang na Aaron ndüngo sanrhyui heto ombo ezotacho, "Ejip metae na esochuko Moses to tsao kyon tsük shi kvüto lyucho sana n tsiv sika olan esothoku tsükona Potsow motsünga e nsüngrüiyia." 2 Aaron na onte ezocho, "Nte enghden osi tsokhying tsoloden na ekao shona thera jiang phungi hansi yi apitava." 3 Hoji tsükona kyon topvüna onte shona thera jiang phungrae hansi oro Aaron pitacho. 4 Tole ombona thera jiang khi shüngi phyonthuki okuk lo phyangthei shona mangsübung nsüngrücho. Tole kyon jiangna phyotacho, "Shijo Ejip metae na e sochuko ete potsow jika!" 5 Jisülo jo Aaron na Shona mangsübung ji mhadungo thanphen nsüngrüi vasi phyocho, "Ojyua jo OPVÜI kyuchi tokhu khitavka," 6 Tole ojyuato jo nyazüngina kyon jiang na ekümrüm sheni sütasi erungthan pilo roracho, osi ejoma jo khümshümta than tssoa tsoyutav tsükona roracho. Kyon jiangna tokhuta tsoyutav tsükona khoktheracho tokhatola tsoyuva zhüva tona lonsülonphyo to kholuk kümcho. 7 OPVÜI na Moses ezocho, "Zakto joyia, ntiotssole ni kyonden nina Ejip metae na sochuko jiangna mmen tssoa khaki a sithaka. 8 Ana ejüo ji lan ji ontena n dungu sithaka, osi ontena shona phyoni mangsübung nsüngrüi hoji khümta osi othan pita yithaka. Osi hoji potsow jina Ejip metae na onte sochukcho to phyotala. 9 Kyon shiang ji kvüta lümbüm khüngcho sana ana ntsia. 10 Enhungo a ti panga, ana onte thüngi alüm tsukala küma moni onte sithokvüsala. Tosi ana ni tona ni tsoronichen to jiang jipo tsüphov kümthokuka." 11 Tokhatola Moses na heto phyoa OPVÜI thüngi jonjicho, "OPVÜI, nina ntioli ni kyonden nina Ejip metae na etho tsüphov theta so chuko jiang thüngi ni lüm tsukala? 12 Ntioli Ejip kyon jiang khi nina ni kyon jiang phunglani na chüthokrae siv tsükona Ejip metae na sochukracho saka to phyothokvü la? Ni lüm etsuk ji kyimjothuka osi ni kyon jiang thüngi hetüv ekya nungra n lithoku tsükona nchümi ni lüm dungphia. 13 Ni phajaden Abraham, Isaak osi Jakob jiang nchümcheta osi nina onte thüngi phyochak tsüphov onte vayio ji osi onte tsoronichen jo oyaki shantio tata thichethoku osi nina meta onte piv phyochako ji kümali onte echhi tssov to ezoji nchümcheta." 14 Jitsükona OPVÜI na ombona tümkao ji dungphicho, osi kyon jiang pono ezüp n yithukcho. 15 Moses na longpyak eni pondüng tsungkho lo yizüng erankao ji bensi phunglani na elani joyicho. 16 Longpyak jiang Potsow na nsüngrüi yizüng jiangha ombona hojilo thenkacho. 17 Kyon jiangna tüngratüngrita Joshua na zoe Moses ezocho, "Ana nchenpheni khonta rota won zoala" 18 Tole Moses na phyocho, "Hojijo rikhyo won osi n khyocho won mek, tolea okhen denta cho on." 19 Kvüthüng Moses na nchenphen ji enhyano na oyi mangsübung ji tona kyon jiangna sharitao ji hungcho sana ombona lüm tsukcho. Osi ombona bensi joyia vamo longpyak ji phunglan jothei jilo vachochia vanroe sicho. 20 Osi ontena mangsübung kisü nsüngrüo ji khi, rungi phyoni, ohüm küma enhyikroe ojülo nzithechi sicho. Osi ombona Israel kyon jiang ji hoji yuthukcho. 21 Tosi ombona Aaron ezocho, "Kyon shiang na ntio ni thüngi ni tssoyicho na ekhenthav mmen hetüv tssothukcho la?" 22 Tole Aaron na janlancho, "A thüngi lüm ti tsuka, kyon shiangna mmen etssov kvüta mhanka licho sana nina ntsia. 23 Ontena heto a ezocho, 'Ejip lona esocheo Moses ji ntio küma yithakcho sana ena n tsi; jitsükona e lansoe etssov Potsow ejoyia.' 24 Hoji tsükona ana onte shona yukosen jiang apile to ezocho, tole ontena phungcherae hansi oro apicho. Ana oyuk-osen jiang omi thechile hetüv mangsübung chiyicho!" 25 Aaron na kyon jiang n sayajamvü onte bobo ori mhadungo na ejithechithaka to Moses na zechecho. 26 Hoji tsükona ombona nchenphen kibüngona mankachi heto tüngcho, "Ochoang kvüta na OPVÜI thüngoe tssov sana helo yirava!" Tole Levi kyon jiang topvüna ombo füchüma sanrhyu cho, 27 osi ombona heto onte ezocho, "Israel Potsow OPVÜI jina nte topvüna yonri hanrümle osi kibüng shi lona nchenpheni rhowo nte ojenio jiang, oshom osi phinakiren jiang lüngthae sile to yizüng nte piala." 28 Tole Levi kyon jiangna hoji engae hoji nchuk tae na wothüng ethüm harüma lüngthae sicho. 29 Tole Moses na Levi jiang ezocho, "Ntena nchüng nte tsoe osi ojenio jiang lüngthae sia nte OPVÜI lo khochaki pia pvüti kümala, hoji tsükona OPVÜI na ombo mmha ji nte pithaka." 30 Ojyuato jo Moses na kyon jiang thüngi ezocho, "Ntena ekhenthao mmen tssothaka, tokhatola ana elani OPVÜI nduko phunglani chongovka, ana OPVÜI thüngi nlan siyi nte jonjiyiv mpato tssovka." Sl Jisülo jo Moses na OPVÜI thüngi chungo heto ezocho, "Kyon shiangna ekhenthao mmen tssothaka. Ontena shona khi potsow nsüngrüi hoji khümtathaka. 32 Nzansi n lan onte siyia, tokhatola nina nlan onte n siyia na a mying ji nina ni kyon jiang mying erankao jilona mhei a siyia. 33 Tole OPVÜI na janlancho, "Ochoangna a mhadungo mmen tssoa sana jiang mying tae ana khi siyivka. 34 Enhungo oyi kyon jiang sosi ana ni ezowo meta jilo yitava. A lanben na ni sovka, hoji ti-mhechoa, osi kyon shiang jo ana onte mmen man onte ezüpthoku yuta ji tsathaka." 35 Ontena Aaron khüngkata mangsübung kisü nsüngrüthuko jina OPVÜI na kyon jiang pono nochonori vara rothukcho.

Khochuk 33

OPVÜI na Sinai Lona Yile to Israel Jiang Ezoala.

1 OPVÜI na Moses ezocho, "Ni tona nina so kyon jiang to meta shilona khoe ana Abraham, Isaak osi Jakob tona onte tsoronichen to jiang thüngi pio meta jiwoe yitava. 2 Ana olan onte sothokvü tsükona lanben rothuka ka osi ana nte meta jilo vamo kanaan kyon, Amorite, Hittite, Perisite, Hivite tona Jebusite to jiang phani sivka. 3 Nteno lizü osi ejüeli metae yiaka, tolea nteji lümbüm ekhüngden küma ana olani na mpa nte chüthokrav küma ana nte phana rov meka." 4 Kyon jiangna hoji zoale nungratacho osi oyuk-osen n katav sicho, 5 OPVÜI na Moses ezoa heto phyothukcho, "Nteno lümbüm ekhüngden, ana shanlana tia nte phana rochojo nte chüthukrav. Nte oyuk-osen jiang khichorava. Ana kvüto nte lyuyiv sana zevka." 6 Hojito ontena Sinai phunglan yaki yithakale Israel kyon jiangna oyuk-osen nkatav sicho.

OPVÜI Vanrhyu Ranki Ji

7 Israel jiang na nchenki kvüthüng tssoa sana Moses na OPVÜI vanrhyu ranki ji khi nchenpheni na nkachoa vacho. Hoji jo OPVÜI vanrhyu ranki to tsacho osi ochona OPVÜI thüngi thyutav lia sana hojilo wocho. 8 Moses na hojilo woana kyon jiangna süki kibüngi mangrae Moses na n rhowothüng nandang zeta vancho. 9 Moses na rheyithaka na eluk durhyu jina joro vanrhyu kibüngo vani OPVÜI na hoji yakchia Moses thüngi jantacho. 10 Kvüthüng eluk durhyu jina ranki kibüngo vana hunga sana kyon jiang na epyakhetacho. 11 Hoji lona OPVÜI na Moses thüngi omha omha nduktae oshom thyuta to thyutacho. Jisülojo Moses na ombo ranki kholani yicho. Tokhatola ombo nzanchi khyingroe Joshua Nun tsoe jina ranki jilo vancho.

OPVÜI na Ombo Kyon Jiang Ndüngo Tssov To Phyochakala

12 Moses na OPVÜI ezocho, "Otsotso nina kyon jiang sosi meta jilo yile to a zochoka, tokhatola a nzo ocho rothoku sana nina a n zo. Nina mmhona a ntsia osi alo ni ematha lia to nina a ezocho. 13 Hoji tsükona ni vancho tssona ni etüm ezi jiang antsithuka, tona ana mmhona ni benkachev osi ni emathathoku. Nina kyon shiang ji ni kyon etssov ethüngchecho toji ti-mhechoa." 14 OPVÜI na ezocho, "Ana ni nzo khochivka, osi ana ekhyo nte pivka." 15 Tole Moses na ezocho, "Nina e nzo n roa tssona meta shi e tiyakthuka. 16 Nina e nzo n roana kvütoli nina ni kyon jiang osi a thüngi ni emathatala to ntsivla? Nina e nzo ro ji tae na e tona jipopoe jiang to echümpota ji ntsiv." 17 Tole OPVÜI na Moses ezocho, "Nina chomo jiang ana tssovka, ntiotssole ana mmhona ni ntsia osi ni thüngi a ematha lia." 18 Tole Moses na jonjia, "A nzansi ni vanrhyu pfütsson ji a hungthuka" to ezocho. 19 OPVÜI na janlancho, "Ana a pfütsson wondang ji ni mhadungo osi ni vanhya lona yakchithoku osi a ntho mying ji ni ezov. Aiyo OPVÜI ji osi ana a kyon jiang thüngi khonzan ejüv. 20 Tolea a mha jo ni hungthoku meka, ntiotssole ochinaha a hungsi eküm n vanlanche, 21 tokhatola nina a ndüngo meta shilo mangphen longpvü shi lia. 22 A vanrhyu wondang tsünglüpo jina yakchia na ana olong ji kui ni rheyithoki a khena e phoe ni vasi yakchithokuka. 23 Jisülo jo ana a khe ji khiv küma nina a mankvü ji hunguka tolea a mha jo hungu meka."

Khochuk 34

Longpyak Enioto Ji

1 OPVÜI na Moses ezocho, "Ovüngthüng ji esüa longpyak eni thencholana. Ana hojilo ovüngthüng yilan ni picho nina vanroe siwo jiang erankalamka. 2 Ojyua enyathüng jo methaki a thüngi Sinai phunglani chongroa. 3 Osi kyon ochia ni nzo chongrov meka, ochinaha phunglan ji phuko lea hungu shikhfü n lika, osi olyu mangsü naha phunglan ji yenjoe yantsov meka." 4 Tole Moses na OPVÜI yizüng ephan longpyak eni theni phunglani hansi chongolancho. 5 OPVÜI na emhenjü lona joro ombo ndüngo mangi ombo ntho mying "OPVÜI ji" to phyocho. 6 Hojisüi jo OPVÜI na ombo mhadungoe na oro ezocho, "Aiyo OPVÜI, Osi Potsow khonzan osi khonzantharo eli, zakto lüm n tsukna nzan tsüphov osi longtsüka eli ji. 7 Ana a phyochak jiang eclmngren wothüng jana vatala osi mmen n mhom jiang nlan siyiala, tokhatola opvüpoe mmen man ji onte tsoero tsochenrüchen jiang ji echungren ethüm mezhü jana onte n züpthoku siv mek." 8 Jitopvü Moses na likoe nkhümthei khümcho. 9 Osi ombona phyocho, "OPVÜI yo, otsotso nina alo ni ematha licho tssona, nina e nzo role to jonjiala. Kyon shiang jo lümbüm ekhüngden, tokhatola e nlan osi n mhom jiang nlan esiyisi, ni kyon to e khichoa."

Ntsata ji Ntssachoala

10 OPVÜI na Moses ezocho, "Enhungo ana Israel kyon jiang thüngi ntsata methaku ka. Ana onte mhadungona limha lo jipo ochi thüngiha n tssohancho tüv tssovka. Ana ekhenthao elhi nte tssoyivka osi kyon topvüna hojiang hunguka. 11 Ana nchüng yizüng nte pio shiang engatava tona ana Amor kyon, Kanaan kyon, Hittite, Perizite tona Jebusite to shiang nte mhadungona phani sia yivka. 12 Ntena rheyia vamo meta kyon jiang thüngi ntsata tivatava, ntiotssole hojijo nte echüo tsirhi mpato kümvü. 13 Jithüngina jo onte khümphen jiang roe siyia osi onte Potsow Ashera kisü ji roe siyia." 14 Potsow thanpo ntia ti khümtava, ntiotssole jiang ji a n vanthuk hungala. 15 Meta jilo kyon jiang thüngi mmhontae tivantava, ntiotssole ontena onte potsow jiang khüma othan pia na jilo rotale to nte tsav, osi ontena potsow thamo etsoyu jiang nte tsoyu hunga yiv. 16 Nte tsoe jiangna jipopoe loroe jiang soa vana yivka osi eloe jiangna onte potsow onte khümthuka a thüngina kontae yikhuka. 17 Yonjak na potsow ti n süngrütava osi hojiang ti khümtava. 18 "Ebung mozhü n theo hümri tokhu ji vatava. Ana nte ezo ji esüa Abib chorolo jo tsüngon tiying jo ebung mozhü n theo hümri tsotava. Ntiotssole ntena hoji chorolo Ejip lona khochicho." 19 "Otsoe tsokhfü, okilo ekümrümo nrodemo jiang topvü a echi tssothuvka. 20 Tokhatola ntena gadho nrodemo thungjo olyuro na wothüng tssoa pisi khitava. Ntena hoji rhani n khia tssona evüng ji jaki siyia. otsoe tsokhfü topvü rhanchoe khitava "Ochinaha a mhadungo othan n pem rov meka. 21 "Ntena elhi etssov tsüngon tiruk lia tokhatola tsüngon tiyingo jilo jo elhi ti tssotava, lichen lirilo tssolea lirhonthüng tssolea tsüngon jilo jo elhi ti tssotava. 22 "Ntena otssuk ridemo jilo liri tokhu lithuka, osi ntena pvüthehanthe thaka ranki tokhu ji khitava. 23 "Israel eboetso topvüna nzyualo yenjo ethüm OPVÜI Israel Potsow a khümtavka. 24 Ana nte mhadungi na jipopoe jiang phani sithaka na osi nte meta nte tsükayithakana jipopoe ochinaha tokhu ethüm ji yutalo jo nte thüngi ori tssov meka. 25 "Ntena ekümrümo a thana na jilo ebung mozhü etheo hümri n thena a thana. Yakchi tokhu lo lüngthao olyuro ji so ji ojyuato enyathüng jana ti vata. 26 "Nzyu akvü ntena otssuk omüm richodemo jiang lona khi OPVÜI ki oro thana. "Olyuro osi nyanyan ro jiang opvü shirojü lona ti kvüa." 27 OPVÜI na Moses ezocho, "Oyi shiang eranrhyua, ntiotssole ana oyi shianglo ndongkae ni tona Israel topvüto thüngi ntsata methakala." 28 Moses na jilo etsoyu n tssov tsüngon zhüro zümo zhüro to OPVÜI ndüngo vancho, ombona longpyak jilo ntsata yilan Yizüng Taro ji erankacho.

Moses na Sinai Phunglani na Joyiala

29 Moses na Sinai phunglani na yizüng taro ji bensi joyile, ombo mha ji wondangkiri tssocho ntiotssole ombona OPVÜI thüngi thyuta vancho; tokhatola ombona hoji n tsicho. 30 Aaron osi thanpoe topvü na Moses mha ji tüngra hungcho osi onte kyua ombo mhadungo n votacho. 31 Tole Moses na Aaron tona kyon jiang to tsasanati ontena ombo thüngi wotacho osi ombona onte jancho. 32 Hoji süloti kyon topvüna ombo hazhüa sanrhyucho osi Moses na OPVÜI yizüng Sinai phunglani na khicho ji onte ezocho. 33 Moses na onte ezokhanthakale osü khi ombo mha ji eyuki sicho. 34 Kvüthüng Moses na OPVÜI thüngi thyutalo vanrhyu ranki rhowoa na ombo mhashüng ji khi sicho. Ombona hapoe chiyiana OPVÜI na ombo ezo jiang topvü kyon jiang ezoracho, 35 tona ontena ombo mha ji tüngra hungcho. Hoji süijo ombona OPVÜI thüngi n wothüng nandang jo mhashüng ji hancho.

Khochuk 35

Esanmung Tsükona Shikhfü Jiang

1 Moses na Israel kyon topvüto tsarhyui ezocho, "OPVÜI na heto etssov yizüng nte picho: 2 Ntena nte elhi etssov tsüngon tiruk lia, tokhatola tsüngon tiyingoto jijo ntho tsüngon OPVÜI a tsükona vanthukuka, ochona tsüngon shilo elhi tssoana hojijo chüthukvü. 3 Esanmung jilojo nte ki omi tssokachiv tia ti tssotava."

Ntho Ranki Ji Tsükona Othan

4 Moses na Israel kyon topvü ezocho, "OPVÜI na heto yizüng nte picho: 5 OPVÜI thüngi othan pia. Ochona hojito othan pihunga sana shona, janti, yongmen; 6 Sünyipvü, ejüm, Müngzhüv, tssansü emyom, nyanyan tssansü; 7 olyu tssan emyom na jümcho; sofü enyi pvü, akacia tssüng; 8 milon thyujü, thyujü nzüphen jilo tona orhüm enüngüv jilo thephen orhüm; 9 pvüti ntssomo ji epvüsü tona tekisü tolo züpkaphen, tsünglüpvü long to shiang khi thanthuka.

OPVÜI Vanrhyu Ranki Jilo Tsütsaelan

10 "Nte yulo tssiyanthi topvü na oro OPVÜI na phyo ji ephan heto tssiyantava. 11 Süranki ji, hoji eyukphen opon ochung yikaphen tona ronri to jiang, khyanrongphen, durhyu tona khora osi jilo thephen topvü, osi eshendan jiang; 12 Ntsata Bakos, hoji durhyu jiang elhüp ji osi hoji eyuksü; 13 saro ji, hoji durhyu jiang osi hojilo tsakalan topvü, hümri than Potsow pio jiang; 14 milon tsükona milon dung tona jilo thephen jiang, milon jianglo thyuj:u yencho; 15 tssütsse erungthan tsükona thanphen tona hoji khora jiang, nzüphen thyujü jiang, tssütsse rhüm enüngo ji, raki kipüng zonlanchi ji; 16 othan rungphen thanphensa ji, hojilo ndungthephen yongmen nrakao ji, jilo khora tona thephen topvü, okhen ntsükphen ophi ji, tona hojiang ndungthephen jiang; 17 fülanchiphen süzon jiang, hoji durhyu tona nsükaphen to jiang, fülanchio jilo rhowolani zolanchiphen ji; 18 fülanchiphen tona ranki ji lo eshendan tona wozhü jiang; 19 elani pvüti jiangna ntho meta jilo elhi tssoathüng mpensüphen ratsao jiang, Aaron pvüti osi ombo tsoe jiang nthosü jiang, to topvü nsüngrütava."

Kyon Jiang na Onte Than Hansi Roala

20 Israel kyon topvü na khochicho, 21 osi ochoangna than hungcho sana jiangna OPVÜI vanrhyu ranki ji etssov tsütsaelan hansi roracho. Ekhümlo osi pvüti sü jilo ethelan jiang topvü ontena hansi rocho. 22 Eboe ha eloe ha ochoang na chokacho sana jiangna eze mmhom ntsükaphen thera, ying rüm, yoko tona shona oyuk osen lan taro hantasi oro khochaki OPVÜI pitacho. 23 Ochoang na sünyipvü licho sana, ejüm, Müngzhüv, osi tssansü emyom, nyanyan tssansü, olyu fü emyom na jümcho, osi sofü enyipvü to lio jiang na hantasi rocho. 24 Ochoang na janti osi yongmen thekhukcho sana jiangna ha hansi OPVÜI thüngi rocho, ochoangna akacia tssüng lichosana jiangna ha ranki jilo ethelan hansi rocho. 25 Tssiyanthi eloe topvüna sünyipvü tükphen oying, ejüm osi khonthyu pyon, tssansü emyom to ontena tssiyamo jiang hansi rotacho. 26 Ontena nyanyan tssan na nsüngrücho oying ha hansi rocho. 27 esopvüi jiangna tsünglüpvü tona oyuk-osen thanpo to ntho epvüsü tona tekisü to lo tükaphen hansi rocho, 28 Osi orhüm mmhom tona milon thyujü to, nzükaphen thyujü tona orhüm mozhü toha hansi rocho. 29 OPVÜI na Moses ezowo elhi ji etssov tsükona Israel kyon topvü na ochoang na chokacho sana ji ephan OPVÜI than hansi rocho.

OPVÜI Vanrhyu Ranki Jilo Tssiyanthi Jiang

30 Moses na Israel jiang ezocho, "OPVÜI na Uri tsoe, Hur tsorüi Bezalel ji Juda pvüji lona ethüngchethaka. 31 Potsow na ombo etho khi ombo pyingthuki tssothio kyak osi engathe to shiang elhilan taro tsükona ombo picho, 32 elhi ekhüngu matangu tsükona osi shona, janti tona yongmen to ejov thüngoe; 33 tssentsülong züpkaphen rhüchov thüngoe, otssüng eshan osi tssiyanlan taro thüngoe. 34 OPVÜI na ombo tona Dan pvüji kyon Ahisamakh tsoe Oholiab to oni ji onte tssothimori jiang oyam shikacheo etho picho. 35 Ombona thenkav elhi tssothi mori, opyon haton elhi, sünyipvü etük elhi, tssansü ejüm, müngzhüv tona emyom osi thanpo sü etükvü lo tssothimori to oni picho. Onina elhilan topvü tssothicho osi opyon hatonhari lo elümoto mmhon cho.

Khochuk 36

1 "Bezalel, Ohaliab, osi tssiyanthi thanpoe ochoang OPVÜI na tssothi mori osi engathewo etho picho sana, osi ochoang na ntho ranki ji etssov lo ethelan topvü tssothicho sana jiangna olan topvü OPVÜI na ezo ji ephan nsüngrüv ethev lia."

Kyon Jiang na Othan Khosha Hanrhyuala

2 Moses na Bezalel, Ohaliab, ji yaka OPVÜI na tssothimori epi thanpoe ochoang na nzanchi elhi tssohunga vancho sana jiang topvüna elhi ji sakale to ezocho. 3 Israel jiangna ntho ranki ji etssov tsükona othan oro theo jiang Moses na khi kitssoe jiang picho. Khatola kyon jiangna n tümjak na engakvü othan oro Moses khelo pitacho. 4 Tole kitssoe jiangna owo Moses ezotacho, 5 "OPVÜIna ranki etssov ezo jilo ethelan lo tajoa kyon jiangna oro thanala." 6 Tole Moses na nchenpheni kyon topvü thüngi ochinaha hojilo na kyongkata ti thantale to ezocho, tole kyon jiangna othan ji esancho. 7 Ntio kvüta hanrhyuthakcho sana hojina elhi ji thaksi enhyo tüv tssothakcho.

OPVÜI Vanrhyu Ranki Ji Tssoala

8 Elhi etssoe jiang yolo tssothitso jiangna OPVÜI vanrhyu ranki ji tssocho. Ontena ranki ji sünyipvü sütsük taro lo tssansü ejüm, müngzhüv tona emyom to tüktsücho osi echo khyingo ekümrüm kisü tükacho tüv na tssocho. 9 Sükvü akvüto etsüi, esi kheti, esi metre taro eni, etsüi metre eni to. 10 Ontena sükvü mongo mongona sütsük eni vüchecho. 11 Ontena mongo vütsüo jiang akvülo süchüm otssawoe ejüm sü na nkon vükaracho. 12 Ontena sütsük motsünga jilo nkonka tinyan vükasi hojiang titüngta sütsüka jiloha tinyan vükatacho. 13 Ontena sütsük eni jilo yitsütaphen shona nkonka tinyan vükacho. 14 Jisülo jo ontena ranki ji eyukphen jo nyanyan tssansü na sükvü kheti taro ekha vütsüi khicho. 15 sükvü akvü kheti, esi metre tarosi ethüm tona etsüi metre eni ren to khicho. 16 Ontena sükvü mongona sütsüka, sükvü tiruk na sütsüka to vütsütacho. 17 Ontena sütsüka jilo sükvü otamoe jilo nkon tinyan, sütsüka jilo ha sükvü otamo ji süchümi tinyan to vükatacho. 18 Ontena sütsük eni khümtsütae sütsüka kümthukvü tsükona yongmen na yikaphen tinyan vükacho. 19 Eyuk opomo ji tsswothukvü tsükona olyufü na sütsüka, sofü enyiprov na sütsük to vütacho. 20 Ontena ranki jilo ethev tsükona akacia tssüng na ronri zakachio nsüngrücho. 21 Ronri akvü metre mezhü, etsüi centimetre rokrosi tiruk, 22 jilo ronri akvülo chüngtaphen edyuka eni ren khyingcho. Ronri akvülo edyuka ji khyingracho. 23 Ontena ranki ji jüjowoe echung tsükona ronri mekyu tona hojiang ndungkaphen janti na zhüro, 24 ronri motsüngalo edyuka eni khyingo ji nken jianglo chüngkav nsüngrücho. 25 Ontena ranki ji jükiwoe echung ji tsükona ha nsü mekyu nsüngrüi, 26 nsü motsüngalo edyuka eni ji echi janti na ndungkaphen zhüro nsüngrücho. 27 Ontena engrhewoe echung ji sülani ethev tsükona nsü tiruk tona 28 nkeni ethev eni to nsüngrücho. 29 Nkeni nsüng shiango oküpoe na chüngtae myo jana chüngtae khicho. Nken eni shilo nsü eni etheo jiang ji hetoli khicho. 30 Hojito nsü tiza jilo janti ndungkaphen taro tiruk, nsü motsüngalo eni ren thecho. 31 Ontena akacia tssüngna nsü tarosi mongo ranki kikhyo esanawoe nsü jiang tsükona mongo, 32 kikhyo esanawoe nsü jiang tsükona mongo, sülamoe engrhewoe nsü jiang tsükona mongo to methakcho. 33 Olungo nsü kvümoe na ronri jiang ntssoni rensoa chüngicho sana jijo ranki ji ochüm phokowoe na phokowoe jana khicho. 34 Ontena ronri jiang shona na phyonkacho osi shona nkon therhyui nsü jiang sayathukcho osi nsü jiang ha shona na nzukcho. 35 Ontena sünyipvüna zonchaksü motsünga, tssansü ejüm, mü ngzhüv tona emyom to tüktsücho ekümrümo echo ekhyingo tüv kisü lyukaracho tüv khümtsüi nsüngrü cho. 36 Ontena akacia tssüngna dyurhyu mezhü nsüngrüi zoncha ksü ji thecho osi dyurhyu jiang shona na phyonkae elani shona yikaphen nsüngrüi theracho. Dyurhyu jiang ndungkaphen ha janti na mezhü nsüngrücho. 37 Ran ki ji kipüng zonchak jo sünyipvü tona tssansü ejüm, müngzhüv tona emyom to tüktsücho tüv lo kisü lyukacho tüv khicho. 38 Zonchaksü shi tsükona dyurhyu mongolo yikaphen therae mmyoe tona yika phen nsü jiang to shona na nzuki dyurhyu jiang ndungkaphen jo yo ngmen na mongo nsüngrüi khicho.

Khochuk 37

Ntsata Bakos Ji Nsüngrüala

1 Bezalel na Ntsata Bakos ji akacia tsüng khi nsüngrücho, hoji esi centimetre 110 nzoe 66, ntssoni 66 to. 2 Ombona hoji opon ochung phyonzhücho osi ochüm jiang ha shona na khfüpüngcho. 3 Ombona hoji ejümpiien nkonka mezhü nsüngrüi ojo mezhü jilo phokolo eni ren lyukacho. 4 Ombona akacia tssüng na ejümphen khora mezhü nsüngrüi, shona na nzuki, 5 hayi amen nkonka jiang lo khathecho. 6 Hoji elhüp ha ombona shona njüm na esi centimetre 110, nzoe centimetre 66 to nsüngrücho. 7 Ombona shona ekümrümo echo mpao tüv eni joe, 8 elhüp ji ochüm esanawoe lo motsüng tsüng thecho. Hojiang ha elhüp jilo oso motsüng a esüa lyutsüi khicho. 9 Echo mpao ekümrümo jiang na elhüp ji ponina zechitao osi onte echo jiangna elhüp ji eyuko tssothukcho.

Potsow Thamo Ji Ekachiphen Saro Nsüngrüala

10 Ombona saro ji akacia tssüng na nsüngrücho, hoji esi centimetre 88, nzoe centimetre 44, ntssoni centimetre 66, to khicho. 11 Ombona hoji shona njüm na nzukcho osi ochüm jiangha shona na khfüpüngi khicho. 12 Ombona hoji nkona nkhon millimetre 75, lyukae hoji tssa jiang ha shona na khfüpüngzhüi khicho. 13 Ombona hojilo ejümphen mezhü shona na lyukae ojo chümkao nken mezhü jianglo, 14 saro ji ejümphen khora khathephen nkonka shiang ji nkhon ji ndüngo lyukacho. 15 Om bona khora jiang akacia tssüng na nsüngrüi shona phyonkacho. 16 Ombona saro ji poni okong ophi jiangha shona njüm tae na nsüng rücho; ophi jiang, opvü jiang, mvüru jiang, osi zükhi thanphen ophi jiang topvü to.

Milondung Ji Nsüngrüala

17 Ombona milondung ji shona njüm na nsüngrücho. Ombona ndungkaphen tona odong ji tojo shona joe khicho, hojilo merithukvü thera eki osi pvüpüm khyingo jiha hojilo oso motsünga tssoa lyutsüi khicho. 18 Dungpvü jilona khero tiruk yangroe yicho, 19 khero akvü lo merithukvü thera almond eki esüa pvübüm tona eki to khyingracho. 20 Milondung jilo ha merithukvü thera almond eki esüa mezhü pvübüm tona eki to khyingcho. 21 Khero ethüm nkhük ji akvü kupi pvüpüm motsünga tssothukcho. 22 Pvübüm osi khero jiang milondung ji to topvü shona na oso motsünga jotsüi khicho. 23 Ombona milondung jilo echi milon tiying nsüngrücho, osi hojilo mmyaphen tona phikokro ji tojo shona njüm na nsüngrücho. 24 Ombona milondung ji tona jilo ethev topvüto tsükona shona seri thümrosi mongo ezicho.

Orhüm Rungphen Thanphen Ji Nsüngrüala

25 Ombona orhüm rungphen akacia tssüng na thanphen roncho. Hoji jo nken mezhüata khetita nzoe centimetre 45, esi centimetre 45, nna ntssoni centimetre 90 to khicho. Hojilo nken mezhü jiang lona edyuka mezhü khyingo jiang ha hojilo soa tssothuki khicho. 26 Ombona hoji opomoe, otssa nkonphia shona na phyonkae ochümi ha shona na khfüpüngi khicho. 27 Hoji ejümphen khora jiang khathephen ha ombona shona na nkonka eni otani lyukae khicho. 28 Ombona khora jiang ha akacia tssüng na nsüngrüi shona phyonkae khicho.

Nzükaphen Thyujü Ji Tona Orhüm to Nsüngrüala

29 Ombona ntho nzükaphen thyujü jiha methakcho osi orhüm mmhom jiha benria nzitae khicho.

Khochuk 38

Othan Rungphen Saphang Ji Nsüngrüala

1 Othan rungphen tsükona ombona akacia tssüng na thanphen motsünga roncho. Hoji jo ombona nken mezhü khetita esi metre 2. 2, etsüi metre 2. 2, osi ntssoni metre 1. 3 to khicho. 2 Ombona nken mezhü jianglo edyuka khyingrathuki soa tssüng kümthukcho. hoji topvü yongmen na phyonzhüi khicho. 3 Ombona thanphen jilo etheo thanpo shiang ha methakcho: nghiphen phfü, thanphiphen, phikuk, yiphiphen tona miron thanthephen ji to. Shiang hetopvü to yongmen na nsüngrücho. 4 Ombona yongmen na saro nrhangi thanphen ji nkhon kupi thechicho, osi hoji na than phen ji renso nandang vankachicho. 5 Ombona ejümphen nkonka mezhü joe nken mezhü jiang lo thecho. 6 Ombona akacia tssüng na khora nsüngrürae yongmen na phyonkacho, 7 osi thanphen ji otssa tsungkho nkonka jianglo khathecho. Thanphen ji ombona olungi jo okuk tssoa chungi khicho.

Yongmen Phikuk Nsüngrüala

8 Ombona yongmen phikuk ji tona ndungkaphen yongmen ji to jiang OPVÜI vanrhyu ki ji kipüngo elhi etssoe eloeden jiang mhachanphen jiang khi nsüngrücho.

OPVÜI Vanrhyu Ranki Ji Ekvüzhü

9 OPVÜI vanrhyu ranki ji chungchak jo ombona sünyipvü khi zonchakcho. Jüjowoe jo zonchak sü ji esi metre 44, 10 ji yongmen durhyu mekyu, yongmen ndungkaphen mekyu lo ndungkathuki jianglo janti na yikaphen tona khathephen nsü to lyukarae khicho. 11 Jükiwoe ha hojito lyui chungcho. 12 Engrhewoe jo zonchak sü jo esi metre 22 ji yongmen ndungkaphen taro zathuki, jianglo janti na yikaphen tona khathesü to lyukarae khicho. 13 Engkhfüwoe kipüng etheo jiwoe ha zonchak jo hotoli khicho. 14-15 Kipüng ji hayi hamen zonchak sü esi metre 6.6, tüv durhyu ethüm ndungkaphen ethüm poni ndungkarae khicho. 16 Epichako ji rhüa zonchak topvü sünyipvü na nsüng rücho. 17 Durhyu jiang ndungka jiango yongmen na joracho osi yikaphen, kathe-nsü tona durhyu mmyo eyuk to jo janti khicho. Zonchak ji rhüa durhyu jiang topvü janti na jocho khathensü na chüng kae khicho. 18 Epichak jirhowolan jilo zonchak jijo sünyipvü lo tssansü ejüm, müngzhüv tona emyom to tüktsüi jilo kisü na opyon therae khicho. Hoji jo epichak jilo zonlanchi ji esüa esi metre 9, ntssoni metre 2 to khicho. 19 Hoji jo yongmen ndungkaphen mezhü poni yongmen durhyu mezhü zathuki jilo zonkae khicho. Hojiang lo oyii jiang khathe nsü tona durhyu mmyoe eyuk tojo janti khicho. 20 Ranki ji eshentan tona epichak ji es hentan to jiang topvü yongmen khicho.

OPVÜI Vanrhyu Ranki Jilo Tsütsao Yonjak Jiang

21 Yizüng taro ji erankao longpyak eni evao OPVÜI vanrhyu ranki jilo yonjak hetata tsütsacho. Shiang ethev ji Moses na eranrhyui Aaron pvüti ji tsoe Ithamar na ndungntssung pia Levi jiangna elhi tssocho. 22 Juda pvüji kyon Hur ji tsoe Uri ji tsokhying Bezalel na OPVÜI na ntio ezocho sana ji ephan tssoracho. 23 Ombo nzanchi Dan pvüji kyon Ahisamach tsoe Ohaliab, ombo nzanchiwo jijo otssüng olongo thenkalo tssothia, ophowoluk hanton lo tssothia osi sünyipvü tona tssantsü ejüm, müngzhüv, emyom to tükathia tüv tssocho. 24 Ntho ranki ji ndana shona kvüta OPVÜI lo khochaki thecho sana topvü tssotsüi shikhfü ephan fücho seri wothüng motsünga. 25 Janti jo seri 3,430, jiha shikhfü ephan fücho. 26 Shijo wokhata lo kvüta jücho sana jiangna shikhfü eben füi theo ji jitata tsso cho. Jilo nzyu mekyu na omhawoe eboetso owo 603,550 na wokhata lo thecho. 27 janti jiang lona seri 3,400 jo ntho ranki jilo zonchaksü ji tsükona ndungkaphen nzoa jocho, osi ndungkaphen motsüngalo seri 34 ren tssocho. 28 Seri thümro enhyo jijo Bezalel na kathe nsü jiang, durhyu lo oyi jiang tona durhyu mmyu jiang phyonzhüv tsütsacho. 29 OPVÜI khochaki picho yongmen topvü tsotsüi seri othüng eni si nzo mezhü si mekyu mongo tssocho. 30 Ombona hoji khi OPVÜI vanrhyu ranki kipüngo ndungka jiang, yongmen na roncho thanphensa yongmen na phyo nkao ji tona thanphen jilo tsakalan jiang,3l epichak jilo ndungkaphen theo jiang, epichak kipüngo ndungka jiang, epichak jilo osi ranki jilo eshentan jiang to tsükona tsütsacho.

Khochuk 39

Pvüti Jiang Mpensü Methako ji

1 Pvüti jiangna ntho meta jilo elhi tssaothüng hanphen ontena tssansü ejüm, müngzhüv, tona emyom to methakitacho. Ontena Aaron pvüti mpensü jianglo OPVÜI na Moses ezoji ephanina ratsa methakitacho. 2 Ontena epv üi eyuksü ji sünyipvü tona tssansü ejüm, müngzhüv, emyom tona sho na ying to tüktsüi khicho. 3 Ontena shona ji eporoa joe tsenroe sünyipvü ji tona tssansü ejüm, müngzhüv tona emyom tolo tüktsüi khicho. 4 Ontena epvülo zonkasü jilo mhadungoe khümkav sü müng eni tükcho. 5 OPVÜI na Mos es ezoji esüa rulankhüng jiha hojitüv tsütsailan khi tükacho. 6 Onte na tssentsülong emyom methaki osü jilo shona jianglo chümkaracho. 7 Hojilo Jakob tsoe otsük taro eni jiang mying ji elümoto mmhona erankacho. OPVÜI na Mo ses ezo ji esüa Israel pvüji taro eniji wochanphen tssoa epvü lo sü ji poni sümüng jilo chümkatacho.

Teki Sü ji Nsüngrüala

8 Ontena tekisü jiha epvülo sü jilo theo jiang esüa tüv tsütsailan osi thera niro theta benritacho. 9 Tekilo osü jijo etsüi osi esi kheti tüv eni chüpchecho, esi centimetre 22 tona nzoe centimetre 22 to khi cho. 10 Hoji poni jo tsentsülong oren mezhü chümkacho: Oren ovüngo jilo jo myonshiv, hakfü tona myontsangü to thecho; 11 Oren enio jilo jo mmyaku, ejüm tona tsünglüpvü long to thecho; 12 oren ethümto jilo jo shakya pyon, mhümphoku, müngzhüv to thecho; 13 osi oren mezhüoto jilo jo mmyaku, myonshiv tona hakfü to reni khicho. Shiang hetopvü shona poni chümkae khicho. 14 Israel pvüji taro eni ji wochanphen tssoa longtsüng akvülo Jakob tsoe taro eni jiang yulo tsüka mying thetacho. 15 Teki ekhüp jilo jo ontena shona zhüshentata joe eritsüi khicho. 16 Ontena shona kholung eni tona nkon eni to methaki shona nkon eni ji teki ekhüp ji nken omhawoe lyukae khicho. 17 Ontena shonazhü shenta eniji ochüm esanawoe shona nkonka eni jilo shenka, 18 osi ochüm phoko jiang ji shona kholung jianglo shenka toli epvü sü ji poni sümüng jiang mhadungoe tssothuki khicho. 19 Ontena shona nkon eni joe epvü sü ji ndüngo teki ekhüp ji ochüm oküpoe osi ochungoe shenkae khi cho. 20 Ontena shona nkon eni jolani ryukhüng ji mhalo epvü sü ji poni sümüng eni ji chüm jianglo vükatacho. 21 OPVÜI na Moses ezoji ephan ontena teki khüp jilo nkon jiang epvü sü jilo nkon jiang onte na ejüm zhüna shentsütae teki eyuk ji ryukhüng jilo khüngünga wokae khicho.

Pvüti Mpensü Thanpo Jiang Nsüngrüala

22 Epvü sü ji poni phuknrhüo jijo metsüka tssansü ejüm na tükcho. 23 Osü jilo evüngkvü jijo reta n yithoku tsükona püngshüngi khicho. 24-26 Osü ji ojowoe ochüm rhüa sünyipvü tona tssansü ejüm, müngzhüv tona emyom to khi tsarümthiben kisü lyukaracho, osi OPVÜI na Moses ezoji esüa tsarümthiben jiang yuta akvülo shona khyingtsü kisü na nchaei khicho. 27 Ontena Aaron tona ombo tsoe jiang to tsükona phukthesü methaktacho, 28 Osi OPVÜI na Moses ezoji ephan kvüri ekhüng, kikho, sünyipvü ryuphan, 29 tona yizonphen sümüng ji tojo sünyipvü tona tssansü ejüm, müngzhüv, emyom to tüktsüi ji poni kisü pikarae khicho. 30 Ontena khochaki epi ntho chekaphen oyuk-osen jijo shona njüm na joe ji poni "OPVÜI lo khochaki piala" to erankacho. 31 Ontena hojiha OPVÜI na Moses ezoji ephan ejümzhüna kvüri ekhüng jilo khüngkae khicho.

Elhi Ji Methakala

32 OPVÜI vanrhyu ranki jilo elhi topvü wokhao tssoa methakcho. OPVÜI na Moses ezoji esüa Israel jiang na tssoracho. 33 Ontena ranki ji tona jilo tsakalan topvü yikaphen jiang, ronri jiang, nsu jiang, durhyu jiang, tona nzükaphen jiang; 34 olyufü na eyukphen emyom jümo ji: sofü eyuk ji; nna chunglanchiphen ji; 35 Longpyak eni jüwo Ntsata Bakos ji; hoji ejümphen khora tona elhüp jiang; 36 Saro ji tona jilo tsakalan jiang, Potsow thamo hümri ji; 37 Shona njüm na nsüngrüo milon ekachiphen ji, milon jiang, jilo tsakalan topvü, osi milon jiang echi thyujü; 38 shona thanphen sa ji; nzüphen thyujü ji; orhüm mmhom mozhü ji; ranki kipüng zonchak ji; 39 yongmen na roncho thanphen osi yongmen mironsa ji, hoji ejümphen khora tona jilo tsakalan topvü; jüpvü tona hoji ekachiphen ji; 40 epichak jilo zonphen tona jilo ndungkaphen jiang; epichak ji kipüngo zonchak ji tona jilo wozhü jiang; ranki eshentan jiang; ranki jilo tsütsaelan topvü; 41 pvüti jiangna ntho metae hanphen mpensü ratsav jiangAaron pvüti tona ombo tsoe jiang to mpensü jiang topvü kyon jiangna Moses thüngi hansi rocho. 42 OPVÜI na kvüto Moses ezocho sana ji ephan Israel jiangna elhi topvü tssoracho. 43 Moses na jiang topvü zele OPVÜI na phyo ji esüa tssorathakcho. Jitsükona Moses na mmha onte randankacho.

Khochuk 40

OPVÜI Vanrhyu Ranki Ji Tssokachi Nthochetala

1 OPVÜI na Moses ezocho, 2 "Choro ovüngo ji tsüngon ovüngo jilo OPVÜI vanrhyu ranki ji tssokachia. 3 Hojito yizüng taro ejüo Ntsata Bakos ji vata osi mhadungoe zonchak ji theta. 4 Saro ji süsi rheyi hoji poni tsütsaelan jiang vata. Elani milon ekachiphen jiha hansi rheyi milon jiang jilo ekachia. 5 Shona sa thanphen mozhü rhüm rungphen ji hansi rheyi Ntsata Bakos ji mhadungoe vata osi kipüngo zonchak ji theta. 6 Ranki ji mhadungo orhüm mmhom than rungphen sa ji vata. 7 Ntsüknlükphen phikuk ji ranki tona thanphen ji yuta lo vae ojü yena. 8 Epichak ji theta osi hoji kipüng zonchak sü jiha theta. 9 "Jisülo jo ranki tona hojilo jüwo jiang tolo thyujü erhikata nthocheta tona ntho kümvüka. 10 Jisülo jo hojilo tsakalan jiang topvü thyujü nzüa nthocheta tona topvü nthotsotso kümvüka. 11 Hojito ntsüknlükphen phi ji tona ndungkaphen ji toha nthocheta. 12 "Aaron tona ombo tsoeden jiang to ji kipüngi oro ntssüngcheta tsükathuka. 13 Tosi Aaron ji pvüti mpensü ekathuka osi thyujüna ombo nzüyia pvüti elhilo khochaki vanthuka. To tssona ombo na pvüti elhi lona a benkavka. 14 Ombo tsoe jiang ha sosi oro phukthesü jiang ekathuka. 15 Onte opo ji nzüyio ji esüa onte ha nzüyia khochaki pvüti elhilo vanthuka. Hojito nzüyio shi yakchia nchüngkhon tsükona pvüti onte kümvüka." 16 OPVÜI na ezo ji esüa Moses na tssoracho. 17 Ontena Ejip lona khochisi nzyu enio to jilo choro ovüngo jilo tsüngon jantemo jilo OPVÜI vanrhyu raki ji tssokachicho. 18 Moses na ndungkaphen jiang nsüi, etsen jiang ndungkae, nsü jiang ekae durhyu jiang chümcho. 19 Ombona raki ji eyuk ji thesi jilo eyuk opomo ji thelancho, hojijo OPVÜI na Moses ezo ji ephan tssocho. 20 Jisülo jo ombona longpyak eni ji khi Ntsata Vaphen jilo thecho. Ombona Ntsata Bakos jilo nkonka jianglo khora jiang sukthei, elhüp jina lhüpcho. 21 Jisülo jo ombona Bakos ji ranki vasi nkoha zonchak ji thecho. Hojito OPVÜI na ezo ji ephan Ntsata Bakos ji nkohae vacho. 22 Ombona saro ji ranki chungi jükiwoe zonchak ji pomoe vacho, 23 osi OPVÜI na ezo ji esüa hoji poni hümri than ji vacho. 24 Ombona milondung ji ranki chungi jolowoe saro ji mha chunga vacho. 25 Osi OPVÜI na phyo ji ephan ombona hojilo OPVÜI vanrhyu lona milon jiang dekacho. 26 OPVÜI na ezo ji ephan ombona shona sa thanphen ji ranki chungi zonchak ji mhadungoe vacho. 27 Osi jilona orhüm mmhom than ji rüngcho. 28 Ombona ranki ji kipüngo zonchak ji thei, 29 hoji mhadungo erungthan thanphen sa ji vacho. OPVÜI na phyo ji ephan ombona hoji poni erungthan tona benro niro to than jiang thancho. 30 Ombona ntsüknlükphen phikuk ji ranki ji tona thanphen ji yutalo vacho osi hojilo ojü yencho. 31 OPVÜI na phyo ji ephan Moses Aaron osi ombo tsoe jiangna 32 ranki jilo mekana thanphen sa jilo rhowo akvüto hojilo na ojo okhe epyotacho. 33 Moses na ranki ji tona thanphen ji to rhüa epichak ji thecho osi hoji kipüngo zonchak ji thecho. Hojito ombona elhi topvü thakcho.

OPVÜI Vanrhyu Ranki Ji Poni Eluk

34 Eluk na ranki ji eyukcho osi OPVÜI vanrhyu jina hoji tüngrazhücho. 35 Hojito tsso jina Moses na ranki jilo n rhowochecho. 36 Eluk ji ranki jilona shaki yisanati Israel jiangna eseni oyi meta thanpoe nchentacho. 37 Eluk jina hojilo evanthüng jo ontena meta jilona n yicho. 38 Onte yentsa yuta hetenya ji ontena engo jo eluk ji, zümolo jo ranki poni omi tüngrao ji to yakchia OPVÜI vanrhyu ji hungcho.

Pvüti 1

Totona Erung Than

1 OPVÜI vanrhyu ranki jilona OPVÜI na Moses tsacho, 2 osi Israel jiang na ekümrüm than piathüng shikhfü jiang heto tssov to ezocho. Kyon tsükana ekümrüm than piathüng ombo mangsü mekana olyu mekana nyanyan tssiden lona khichekhuka. 3 Ombona mangsü yolona khiche erungthan pia tssona ephyorüv n khyingo mangsübung tüv khivka. OPVÜI na ombo khichwothukvü tsükona ombona mangsübung ji OPVÜI vanrhyu kipüngo süsi chiwovka. 4 Kyon jina ombo kheji mangsübung ji kvürilo nyimkav, tona hoji ombo mmen jiang khi esio than to khichoyiv. 5 Ombona hoji lona mangsü ji lüngthav osi Aaron wopan pvüti jiangna ejen ji khi OPVÜI vanrhyu kipüngo lio thanphen sa ji nken mezhü jianglo phyangkavka. 6 Jisüijo ombona ekümrümo ji ofü shaki rhomvü, 7 tona pvüti jiangna thanphen jilo otssüng nsüngkae omi tssovka. 8 Ontena oso lümchak jiang, kvüri osi ethyu jiang to topvü omi thechiv. 9 Ethanpvüo jina bukchung jiang tona ojo sülamoe eni jito etssüv osi shen dung pvüti jina totona thanphen poni ekachi rungüv. Etsoyu than shi rhüm shina OPVÜI emathathukala. 10 Kyon jina ombo olyu mekana nyanyan tssideni na khi thana tssona ntia ephyo erüv n pao obung tüv khivka. 11 Ombona thanphen ji jükiwoe na ekümrümo ji tatsüngüv osi ejen ji pvüti jiangna khi thanphen sa nken mezhü jiang lo phyangkavka. 12 Kyon jina kvüri osi ethyu jiang jüa solan topvü omi jilo thechivka. 13 Ethanpvüo jina pokchung jiang tona ojo sülamoe jiang to etsüthaka na pvüti jina othan ji OPVÜI piv osi totona thanphen sa jilona runguv. Etsoyu than shina OPVÜI emathathukvü. 14 Kyon jina woro khi erung than pia tssona yukhyu mekana vefü khivka. 15 Pvüti jina hoji khi thanpheni ekachi evüng ji erüpi si kvüri ji thanphen poni na runguka. Woro ji ejen jo thanphensa ji tssae zani sithukvüka. 16 Ombona jakje ji tona jilo jüwo jiang to thanphen jina engkhfüwoe mibuk siphen jiwoe sivka. 17 Ombona echo jiang lona rhümasi otsük ji thanrhüpvü, echo jiang nrüngchona, osi totona thanphen ponina rungu. Etsoyu than shi rhüm jina OPVÜI emathathukvü.

Pvüti 2

Otssuk Omüm Than

1 Kyon ochona otssuk omüm than piasana ombona ovüngtssoa cheni ohüm kümthukdemka. Hojito olive thyujü tona orhüm mozhü to thei 2 bensi Aaron wopan pvüti jiang thüngi hansi rovka. Shendung pvüti jina ohüm ezüma, thyujü ji tona orhüm ji to bensi OPVÜI thancho to chekathukvü thanphen ponina rungu ka. Osi etsoyu than shi rhüm jina OPVÜI emathathukuka. 3 Jilo enhyoe lio than jijo pvüti ji echi tssovka, osi hoji jo OPVÜI thancho lona khicheo ji tsükona elümoto ntho tssovka. 4 Othan ji hümri rüngpheni na rüngcho hümri tssona ebung mozhü n thena rüngcho tssovka. Hoji jo olive thyujü theta hümri echiv rüngcho tssovka mekana olive thyujü esephi ehüngcho tae lia tssovka. 5 Othan ji ngheriphfü lona rüngcho hümri tssona ebung mozhü n thena olive thyujü lona rüngcho tssovka. 6 Nina hoji thanpheni hansi woana mpvüroe hoji lo thyujü tara phyangkae thamvüka. 7 Othan ji rungphen teriv lona rüngcho tssona ohüm tona olive thyujü tona rüngcho tssovka. 8 OPVÜI than tssoa hoji nina bensi oro pvüti ji pia tona ombona thanpheni hansi wovka. 9 Hoji jo OPVÜI thancho to chekav tssoa pvüti jina kyochia thanphen jilona rungüvka. Etsoyu than shi rhüm jina OPVÜI emathathukuka. 10 Hojilo enhyo than jijo pvüti jiang echi tssovka osi hoji jo OPVÜI than jilona khicheo jina elümoto ntho tssovka. 11 Nina otssuk omüm khi OPVÜI thamo jiang lo kvülo ha ebung mozhü thev meka. Nina OPVÜI thancho etsoyu kvülo ha ebung mozhü tona tssakijü to thev meka. 12 Nzyu akvü nina rakchodemo tsüngonrho ji OPVÜI thüngi othan hansi rovka, tolia jijo thanpheni na rungu meka. 13 Otssuk omüm than akvü lo oma theta ntiotssole oma ji chekav jo Potsow nte yutalo ntsata lio ji. (Ntena othan topvülo oma thev shikhfü.) 14 Ntena tsüngonrho ovüngtso ji kvüthüng OPVÜI thana sana omina ri mekana cheni ohüm kümthuki thana. 15 Hoji lo olive thyujü tona orhüm to theta. 16 Pvüti jina thyujü osi orhüm theo chekaphen than ji tona orhüm topvü to khi etsoyu than tssoa OPVÜI thamvüka.

Pvüti 3

Khümshümta Than

1 Ochona ombo mangsü yolona khichei khümshümta than piasana obung tssolea okyu tssolea ephyorüv n pao tüv khivka. 2 Kyon jina ekümrümo ji kvüri lo okhe nyimkasi OPVÜI vanrhyu kipüngo na tatsünguka. Aaron wopan pvüti jiang na ejen ji khi thanphen ji nken mezhü ji phyangkasi 3 solan shiang khichei etsoyuthan tssoa OPVÜI pivka: Bukchung jiang lo ethyu topvü, 4 Okhfü jiang tona jianglo ethyu jiang, nthen jilo mmhomtsow ji khichoe thev to tssovka. 5 Erungthan ji ephalo shiang tssotsüi pvüti jiangna thanphen jilona runguvka. Etsoyu than shi rhüm jina OPVÜI emathatala. 6 Khümshümta than tsükona olyu mekana nyanyan khia tssona obung tssolea okyu tssolea ephyorüv n pao tüv khivka. 7 Ochona olyu thanana jina ombo khe ji, 8 Olyu ji kvüri lo nyimkasi OPVÜI vanrhyu ki ji hapo lona tatsünguka. Pvüti jiangna ejen ji khi thanphen ji nken mezhü jianglo phyangchisi 9 solan shiang khichei etsoyuthan tssoa OPVÜI pivka: emhilo ethyu ji chenryu ndüngona tssachov elani bukchung eyuko ethyu jiang topvü, 10 okhfü jiang tona jilo ethyu jiang elani nthen jilo mmhontso ji khiche toli thevka. 11 Shiang hetopvü shendung pvüti jina khi etsoyuthan tssoa thanphen jilona runguvka. 12 Ochonasana nyanyan thana tssona, 13 Ombona ombo khe ji ekümrümo ji kvüri nyimkasi süki ji hapoena tatsüngüvka. Osi pvüti jiangna ejen ji khi thanphen ji nken mezhü jianglo phyangkasi 14 solan shiang khi etsoyuthan tssoa OPVÜI pivka; bukchung jianglo ethyu jiang topvü, 15 okhfü jiang tona jianglo ethyu jiang tona nthen jilo mmhontso ji khiche toli thevka. 16 Pvüti jina shiang topvü khi OPVÜI emathathuko etsoyuthan tssoa thamvüka. Ethyu topvü OPVÜI echi tssovka. 17 Israel kyon ochina ha ethyu osi ejen tsov meka, shikhfü shijo nchünkhon tsükona Israel jiangna kvülo vana na benphia wovka.

Pvüti 4

N tsiv Tssomhio Mmen Than Jiang

1 OPVÜI na Moses ezoa 2 Israel kyon jiang ji ochona etana na mekana n tsiv OPVÜI shikhfü jiang yolo motsünga tia yesoa sana heto tssovka to ezothukcho. 3 Pvüti tsüpho jina mmen tssoe kyon jiang pono nlan hansi yia tssona, ombona ephyoerüv n pao tssipungro tüv khi ombo mmen tsükona OPVÜI thamka. 4 Ombona tssipungro ji süki ji kipüngo hansi oro ombo khe ji hoji kvürilo nyimkasi OPVÜI vanrhyu lona tatsünguka. 5 Tona pvüti tsüpho jina ejen tara khi süki ji chungi hansi rhowovka. 6 Osi ombona ombo yingro ji ejen jilo tssyuthechisi ejen ji ntho süzonchak jilo yenjo tiying erhikavka. 7 Tosi ombona ejen ejoma ji khi süki chungi rungphen thanphensa nken edyukao jiang lo esevka, Tosi ejen enhyoe elio jijo süki ji kipüngo erungthan thanphen sa ji oküpoe phyangkavka. 8 Ombona tssipung shilona ethyu topvü khichov, bukchung. jianglo ethyu jiang, 9 okhfü jiang osi jiang lo ethyu jiang, tona nthen jilo mmhontso ji to khicho toli thevka. 10 Tosi pvüti jina ethyu shiang khi erungthan thanphen sa jilona runguka. Elani khümshümta than tssoa tatsüngo ekümrüm ji ethyu ji tsütsao ji esüa tsütsavka. 11 Osi ombona ofü ji, oso ji topvü, kvüri ji, ojo jiang, erü jiang osi bukchung topvü, 12 to shiang hansi pikhfü pomoe kvülo mibuk thani sisi ntho vata sana jilona otssüng poni vae runguka. 13 Israel jipo totona n tsiv mmen tssoe OPVÜI shikhfü yesoe nlan li sina, 14 mmen ji ntsitapvüto zakto okho jina tsipung khi mmen than pivka. Ontena tsipung ji OPVÜI vanrhyu ki kibüngo süsi wovka, 15 osi okho esopvüi jiangna onte khe jiang tsipungro ji kvürilo nyimkasi hojilona tatsünguka. 16 Tona pvüti tsüpho jina ejen ejoma khi süki ji chungi hansi rhowo 17 ombo yingro ji ejen jilo jümthechi si zonchaksü jilo yenjo tiying erhikavka. 18 Tothakana ombona orhüm than rungphen osa jilo nken edyukao jianglo thesi enhyo jijo süki ji kipüngo erungthan vaphen ji kupi phyangkavka. 19 Jisülojo ethyu topvü ombona khi thanphen jilona runguvka. 20 Ombona tsipung shiha mmen than lo theo tsipung ji tsütsao ji esüa kyon jiang mmen ji tsükona thamka, tona kyon jiang nlan jiang siyivka. 21 Jisülo jo ombona tsipung ji yantssae hansi chivo ombo mmen than tsipung than rungo ji esüa runguvka. Shijo kyon jiang mmen ji khi siyiv tsükona mmen than pioji. 22 Yansapvüi na n tsiv mmen tssoe OPVÜI yizüng yesao n lan rhüka na, 23 mmen ji ombona ntsipvü zakto nyanyanpung ephyo erüv n pao tüv hansi oro thamka. 24 Ombona ombo khe ji ekümrümo ji kvürilo nyimkasi thanphensa ji jükiwoe erungthan ekümrüm tatsüngphen jilona tatsünguka, Shijo mmen khi esio than. 25 Pvüti jina ekümrüm ji ejen jilo ombo yingro ji jümthechisi thanphen ji nken edyukao jianglo esesi enhyo jijo thanphen ji oküpoe phyangkavka. 26 Tosi ombona khümshümta than ethyu rungo ji esüa ethyu jiang ji topvü thanphen sa jilo na runguvka. Hojitoli pvüti jina yansae ji nlan than ji thamka osi nlan ombo siyiv. 27 Elani kyon shae tsükana n tsiv mmen tssoe, OPVÜI yizüng yesoa nlan rhüka na, 28 ombona mmen ji chekapvüto ombo than tssoa ephyo erüv n pao tüv nyanyan okyuro motsünga pivka. 29 Ombona ombo khe ji nyanyan ji kvürilo nyimkasi thanphen ji jükiwoe erungthan thanphen jilona tatsünguka. 30 Tona pvüti jina ombo yingro ji ejen jilo tssyuthechisi thanphen ji nken jianglo edyukao jianglo nzükasi ejen enhyo jijo thanphen ji oküpoe phyangi sivka. 31 Jisülo jo ombo na ethyu topvü khümshümta than jilona khichoa to khichoe thanphen jilona rungi OPVÜI emathathukukai Hojitoli pvüti jina kyon ji mmen than ji piyivka osi kyon ji nlan siyivka. 32 Kyon tsükana mmen than olyu hansi rona, ephyo erüv n pao okyuro tüv tssovka. 33 Ombona ombo khe ji olyu ji kvürilo nyimkasi thanphen ji jükiwoe erungthan tatsüngphen jilona tatsünguka. 34 Pvüti jina ombo yingro ji ekümrümo ji ejen jilo tssyuthechisi, thanphen ji nken. edyukao jianglo esesi enhyo jijo thanphen ji oküpoe phyangkavka. 35 Jisülo jo ombona ethyu topvü khümshümta than olyu jilona khichoa to khichoe etsoyuthan ji nzo OPVÜI thamka. Hojitoli pvüti jina kyon ji mmen than ji piyivka osi kyon ji nlan siyivka.

Pvüti 5

Mmen Than Epiv Elio Lanka Jiang

1 Mmen than jo shiang hetüv ndam lo piv ethev lia. Kyon tsüka ji ombona hungwo osi ezo jiang ehungpvüi pilo nzontsü mhadungo tsale ehungpvüi n pia tssona hojina ezüp shicheo ji ombona hamvü. 2 Ochona sana n tsiv n thono evüngkata tssona, ejyukae na echümüng esüa, ombona hoji chethepvü to nlan ombo piv. 3 Ombona kyon lona chiyicho nthono ntiona n tsiv evüngkata tssona, ombona hoji nchümchepvü nlan piv. 4 Ochona sana n tangshom echümchak vata tssona hetüv tsükona tssolea hetüv tsükona tssolea, ombona hoji nchümchepvü nlan ombo piv. 5 Kyon tsüka jina nlan tssona ombona nlan ji phyochakvü shikhfü, 6 osimmen etsso ji echa olyu mekana nyanyan okyu khi OPVÜI thamvü. Kyon ji mmen ji tsükona pvüti jina othan pivka. 7 Kyon tsükana olyu osi nyanyan n pikhuka tssona ombo mmen ji man ombona yukhyu eni mekana vefü eni khi motsünga jina mmen than, motsünga jina erungthan to pivka. 8 Ombona pvüti ji thüngi hansi rona pvüti jina ovüng tssoa mmen than ji pitemka. Ombona woro ji kvüri ji n jakthukna evüng ji jakthuki 9 ejen ejoma khi thanphen ji tssae erhikavka. Osi ejen enhyo jijo thanphen ji küpoe zankae sithukvüka. Shijo mmen khi sithuko than tssovka. 10 Jisülo jo ombona woro enioto ji khi tssolan shikhfü ephani na erungthan tssoa pivka, hojito pvüti jina kyon ji mmen than pivka osi nlan ombo siyivka. 11 Kyon tsükana yukhyu eni mekana vefü eni n pikhuka tssona ombona ohüm chencho seri motsünga hansi oro mmen than pivka. Ombona ohüm jilo olive thyujü osi orhüm ntia thev meka, ntiotssole jijo mmen than, etsoyuthan mek. 12 Ombona pvüti ji thüngi hansi rona topvü OPVÜI thancho to chekav tssoa pvüti jina ohüm ezüma khi etsoyuthan tssoa thanphen jilona rungüv. Shijo mmen khi esio than. 13 Hojitoli pvüti jina kyon ji mmen siyio than piv, tona nlan siyiv. Osi Otssuk omüm than jilo esüa enhyo jijo pvüti ji ejan tssovka.

Lolanta Than Jiang

14 OPVÜI na shikhfü shiang Moses picho. 15 Ochona sana OPVÜI lo nthoa epiv lio jiang n tsiv n pichev sina ombona pilan than olyu mekana nyanyan obung ephyorüv m pao tüv hansi oro thamka. Ekümrümo ji man jo tssenchaki evao ji shikhfü ephanina matangi khivka. 16 Ombona epiv liaha n piv siwo ji ephalo nzoalo mekyu thei pivka. Ombona hoji pvüti ji khelo pina pvüti jina eküm rümo ji khi kyon jiang mmen thanpiyivka, tona kyon ji nlan siyivka. 17 Ochona sana n tsiv OPVÜI yizüng motsünga tia yesona ombo nlan lia osi hoji man echa piv lia. 18 Ombona lolan than tssoa olyu mekana nyanyan ephyorüv n pao tüv thamka. Ekümrümo ji than jo tssenchaki evao ji ephan matangi khivka. Pvüti jina kyon ji mmen than piyivka, tona kyon ji nlan jiang siyivka. 19 Shijo ombona

Pvüti 6

OPVÜI tachia mmen tsso ji lolan than.

1 OPVÜI na shikhfü shiang Moses picho. 2 Kvüthüng Israel kyon tsükana Israel thanpoe thüngi tsütsaelan epiv liathüng piya tssen tssolea, efü tsütsaelan tssolea, ejithechi khicho tsütsaelan tssolea 3 moncho tsütsaelan khyoe echüng echüma khilea, hotüv tsütsaelan jiang n pilamo ji yakchia OPVÜI thüngi mmen tssona hoji ntana othan pivka. 4"5 Ochona hotüv mmen tssoana n tsa lona khio tsütsaelan jiang pilamka. Hojito elhia ombo racheo ji tsüngon tsük jilo tsütsaelan ji epen lo nzoalo mekyu ekalani pilamka. 6 Osi ochii elov than nyanyan mekana olyu obung ephyorüv n khyingo tüv khi OPVÜI etham tsükona süsi oro pvüti ji pivka. Osi hoji tssen jo mmen than matangi lio jina ejyui zevka. 7 Pvüti jina kyon ji mmen tsükona othan piyina kyon ji nlan siyivka.

Totona Erungthan

8 Erungthan tsükona Moses na shikhfü shiang 9 Aaron tona ombo tsoeden jiang thüngi pile to OPVÜI na yizüng picho. Erungthan ji thanphen jilo zümo totona ekachi vav osi omi jiha kia vanthukvüka. 10 Tothakana pvüti jina ombo sünyipvü phoktheo ji tona ryuphamo ji to ekasi thanphen jilo rüngtse pyotükvü elio jiang khi thanphen tssae esekae vav. 11 Jitosi ombona osü tongphisi myukyu jiang hansi pikhfü pomoe ntssüngchethako meta jiwoe wovka. 12 Thanphen jilo omi jijo m mhetukna kia vanthuknrüvka. Enyakvü pvüti jina otssüng njükthechiv osi hoji poni erungthan ji ekachi khümshümta than jilo ethyu jiang runguka. 13 Thanphen jilo omi jijo kvüthüngha m mhetukna kia vanthukvüka.

Otssuk Omüm Than Jiang

14 Otssuk omüm thanathüng shikhfü shiang benphivka. Aaron wopan pvüti na otssuk omüm ji khi thanphen ji mhadungo hansi wovka. 15 Jitosi ombona ohüm jilona ezüma khichei thyujü ji tona tssütsse rhüm ji khi toli topvü OPVÜI thancho to chekav tssoa hojilo na runguka. Hoji than ji rhüm jo OPVÜI na chokao rhüm. 16-17 Hojilo enhyo jiango pvüti jiangna tsovka osi enhyo jiang khi ebung mozhü n theo hümri rungi ntho meta, OPVÜI vanrhyu ranki hapho jilona tsotavka. Hojijo OPVÜI na etsoyuthan jilo pvüti jiang ejan tssoa picho. Hojijo mmen than mekana pilanthan esüa elümoto nthoa. 18 Hojijo yuta topvü lo etsoyu na OPVÜI thamo jilo Aaron tsoronichen jiang etsov ejan tssoa wovka. Thanpoe ochona etsoyuthan evüngkata sana hoji ntho ji etho jina tssatssovka. 19 OPVÜI na shikhfü shiang Moses picho, 20 Aaron wopan pvüti elhilo nthochakathüng tssolan phyolan jiango heto tssovka. Ombo nthochako ji tsüngono ombona ohüm seri motsünga (engakvü otssuk omüm than pio tata) ji enyathüng chiso mmyu chiso to OPVÜI thamvüka. 21 Hojilo thyujü nzüi erüngphfü lona rüngi hoji mpvüroe OPVÜI emathao rhüm tssoa thamka. 22 Echungren topvülo Aaron wopan ochona pvüti tsüphoe tssoasana heto thana wovka. OPVÜI than tssothuka totona runguka. 23 Otssuk omüm than pvüti na thamo jilo jo ntia khichei tsov meka, tolea totona rungkhamka.

Mmen Than Jiang

24 Mmen than tsükona shikhfü shiang: 25 OPVÜI na Aaron tona ombo tsoe jiang to ezole to Moses thüngi yitan picho. Mmen than ekümrüm ji khi thanphen ji jükiwoe erungthan tatsüngphen jilona tatsüngüvka. Shijo elümoto ntho than. 26 Othan epio pvüti jina OPVÜI vanrhyu ranki ji hapho lo ntho meta jilona tsovka. 27 Hoji ekümrümo so jina kyon ocho osi nrio tsütsaelan evüngkata sana ombo ntho etho jina tssatssov. Tsütsaelan osi mpensü kvümoe hoji ejen jina tümkata sana ntho meta lona etssüi sivka. 28 Chonphfü lona oso ji ekvücho tssona ophfü ji varhüpi sivka osi yonjak phfü lona ekvücho tssona shuki sisi ojü na evakphi sivka. 29 Pvüti wopan eboe thama na shi tsocheta; shijo elümoto ntho. 30 Tokhatola ranki jilo ejen hansi rhowo mmen epyo elhi tssocho tssona ekümrümo ji n tsov shikhfü; hojijo mpüm na rungi thanchev.

Pvüti 7

Lolan Than Jiang

1 Lolan than tsükona shikhfü heto lia, 2 Othan shilo ekümrümo jijo thanphen ji jükiwoe erungthan tatsüngphen jilona tatsünguka osi ejen ji khi thanphensa ji nken mezhülo phyangkavka. 3 Ethyu jiang topvü khichei thanphensae na thamvüka; emhi jilo ethyu ji, bukchung eyuko ethyu jiang, 4 okhfü jiang tona hojiang eyuko ethyu jiang, tona nthen jilo mmhontso ji to, 5 Pvüti jina ethyu shiang topvü khi etsoyu than tssoa OPVÜI tamvüka. Shijo jo lolan than tssov. 6 Hoji so jijo pvüti wopan eboetso topvü na tsokhuka, tolea ntho meta lona tae tsochev, ntiotssole shijo elümoto ntho. 7 Mmen than tona lolan than tolo tsütsao shikhfü motsünga heto lia; jijo oso ji ochona thana sana hoji pvüti ji echhi tssov. 8 Erungthan lo theo ekümrüm ji ofü jiha thanio pvüti ji ejan tssovka. 9 Otssuk omüm than rungphen lona tssolea, ophfü lona rüng cho tssolea mekana nghriphfü lona tssolea jiang topvü pvüti ocho na thanicho sana ji echhi tssovka. 10 Tokhatola omi poni na n rünghamu otssuk omüm than enhyoe elio jiango Aaron pvüti wopan jiang na kheti jantae khivka.

Khümshümta Than

11 Khümshümta than OPVÜI piathüng shikhfü jo heto lia. 12 Kyon tsükana montsso than tssoa othan Potsow pina ombona oso ji ephalo ebung mozhü n theo hümri, ohüm lo olive thyujü theta rüngcho tssolea, hümri porov olive thyujü eseta rüngcho tssolea to. 13 Hoji ephalo ombona vümhi n theo hümri ha thamvüka. 14 Ombona echümporo ekhya tssoa hümrilan akvü lona echhia khichei OPVÜI thamvüka; hoji ekhya jijo pvüti ochona ejen ji khi nken mezhü jianglo phyangkacho sana ji echhi tssovka. 15 Othan tssovo ekümrümo jijo thamo ji tsüngono na tsoe sivka, ntia enhyoe ojyuato jana vav meka. 16 Kyon tsükana phyochak than lo tssolea erung than lo tssolea benthoku tsükona khümshümta than hansi rona hoji topvüto hoji tsüngono na tsorale to mek, enhyo jiango ojyuato tsokhuka. 17 Tolea rajyu to jana elio so jiang topvü khi rungi sivka. 18 Hojilo enhyo ji rajyuto ti tsoana hoji Potsow na n khichoyi. Elani othan ji ombo thüngoe khakae n vayi osi hoji jo n tho to khanhyav, osi ochona hoji tsoana hoji man ji ombona ezüp hunguka; 19 Oso jina n thono tsütsailan lo evüngkathaka na, hoji jo n tsov shikhfü, tolea totona rungi sivka. Etsükria ntsüngrünga evamo jiang na jo oso ji tsokhuka, 20 tokhatola n sarisapvüo tüv kyon na oso ji tsocho jo; ombo ji Potsow kyon to n khanhyav siv. 21 Elani ochona na sana n thono ekümrümo tssolea, kyon tssolea evüngkasi oso ji tsocho jo, hoji kyomo jijo potsow kyon to n khanhyav sivka. 22 Israel kyon jiang tsükona, 23 Potsow na shikhfü shiang Moses picho, Mangsü, olyu osi nyanyan shiang ethyu jiang tsov meka. 24 Ekümrümo kirana chücho mekana orae ekümrümo na rümcho jiang ethyu jo tsov meka tolea thanpo ethelan lojo tsütsakhuka. 25 Kyon ochona OPVÜI etsoyu thanlo theo ekümrümo ethyu jiang tsoa sana jijo Potsow kyon lo khanhyav meka. 26 Israel jiang na helo vanlea helo vanlea ontena kvüthüngha ekümrümo osi woro ejen jiang tsov meka. 27 Shikhfü shi yeso kyon jijo Potsow kyon to khanhyav meka. 28 OPVÜI na shikhfü shiang ji 29 Israel kyon jiang tsükona Moses picho. Ochona khümshümta than picho sana hojilo tara khakchei echümporo than tssoa OPVÜI pivka; 30 osi hoji ombo khena bensi oro etsoyu than tssoa OPVÜI pivka. 31 Tona ethyu ji pvüti jina thanphensa jilo na rungu osi enhyo jijo pvüti jiang ejan tssovka. 32 pvüti ochona ethyu tona ejen to khi khümshümta than piyia sana, 33 ekümrümo ji ojo hamimo ji khi echümporo hanyan tssoa khivka. 34 Osi ekümrümo ji shyuro jijo echümporo yantso osi ojo hamimo jijo echümporo hanyan to tssoa OPVÜI na Israel kyon jiang thüngi na khichei pvüti jiang picho. Shi jo Israel kyon jiang na yuta topvülo pvüti jiang echümporo yantso esüa pia wovka. 35 Shijo OPVÜI thamo ekümrüm jilo khichei Aaron tona ombo tsoeden to jiang pvüti elhilo onte nthochaka thüng onte pio ji. 36 Hoji tsüngon no OPVÜI na hojito khichei onte pile to kyon jiang ezocho. yizüng shijo Israel jiang na yuta topvülo benphia ewov picho. 37 Shiang hetopvü ji erung than, otssuk omüm than, mmen than, pilan than, nthochak than osi khümshümta than to tsükona shikhfü methako jiang. 38 Shiang hetopvüto OPVÜI na lijüng metae Sinai phunglanina Israel jiang othan epi tsükona Moses ezoathüng shikhfü picho tae.

Pvüti 8

Aaron Tona Ombo Tsoe Jiang to Nthochak Tsükona

1 OPVÜI na Moses ezocho, 2 "Aaron tona ombo tsoe jiang to sosi a vanrhyu ranki kibüng jilo woa osi pvüti mpensü jiang, nzüyiphen thyujü ji, mmen than tsükona na tssibungro ji, olyu obung eni, vümhi n theo hümri luksa ji to hansi woa. 3 Tothakana kyon kholuk jiangha hojilo tsarhyua." 4 OPVÜI na ezoji esüa Moses na tssocho osi kyon jiang sanrhyuthakale ombona onte ezocho, 5 "Enhünga ana ntio tssov sa sana jijo OPVÜI na a ezovo ji ephan tsovka" 6 Moses na Aaron tona ombo tsoe jiang to sosi chiyi shikhfü ephan tsükav ezocho. 7 Ombona phukthesü ji tona phuknrhüo ji, ryukhüng ji to Aaron ekathukcho. Ombona epvü eyuksü jiha khi Aaron ekathuksi hojilo ryukhüng enyipvü khi jina eryu chüngchünga khüngicho. 8 Elani ombona tekikhüp ji khi ekathuksi phyalyu zephen jiha jilo khümkayicho. 9 Jitosi OPVÜI na yizüng pio ji ephan kvüri ekhüng ji ekathuksi jilo ntho khochak chekaphen shona oyuk-osen jiangji mhadungoe khümkayicho. 10 Jisülo jo Moses na nzüphen thyujü ji khi OPVÜI vanrhyu ranki süki jilo osi ji chungi ntio kvüta liana topvütolo nzücho osi ombona hojitolui tOPVÜI ji OPVÜI lo khochaki vacho. 11 Ombona thyujü tara khi thanphen sa jilo osi jilo etheo tsütsailan jiang topvülo tona jüpvü jilo osi hoji küpo to yenjo tiying erhikata topvü ji OPVÜI lo khochaki vacho. 12 Ombona thyujü tara khi Aaron kvürilo phyangkayia nthochecho. 13 Jisülo jo Moses na Aaron tsoe jiang ha mahdungi sosi oyi OPVÜI yizüng ephanina onte topvü phukthesü ekathuksi, eryu khüngisi onte kvürilo kikho venthukcho. 14 Jisülo jo Moses na mmen than tsükona tssibung ji süsi yicho osi Aaron tona ombo tsoeden to jiang na onte khe ji ekümrümo ji kvürilo lo nyimkaracho. 15 Tole Moses na thanphen sa ji nthochev tsükona ekümrüm ji tatsüngi ejen jilo omb yingro tssyuthechi jina thanphen ji tssae edyuka jianglo esecho. Jisülo jo ejen enhyo ji ombona thanphen ji küpoe phyangkacho. Hojitoli ombona thanphen ji ntssüngcheta nthochecho. 16 Moses na bukchungi ethyu jiang topvü khicheracho, elani nthen mmhontso ji, okhfü jiang tona jilo ethyu eyuk jiang: to khiche thanpheni na rüngcho. 17 Ombona mangsü ji so enhyoe elio ji, ofü, oso, erü to jiang khi OPVÜI na phyo ji esüa vanphen hapowoena rüngcho. 18 Jisülo jo Moses na olyu bung ji sosi yile Aaron tona ombo tsoeden to jiang na onte khe jiang hoji kvürilo nyimkaracho. 19 Jisülo jo Moses na hoji lüngthae ejen ji khi thanphen sa nken mezhü jianglo phyangkacho. 20-21 Tosi ombona olyubung ji rhonrocho osi bukchung jiang tona ojo sülamo jiang to etssüi, OPVÜI na ezoji esüa, kvüri ji, ethyu jiang khi toli mpüm totona thanphen sa jilo na rüngcho. Othan shijo etsoyu than tssoa picho osi etsoyurhüm jina OPVÜI emathathukcho. 22 Jisüi jo Moses na pvüti nthochaklo thanphen tsükona olyubung enioto süsi yilancho. Osi Aaron tona ombo tsoeden to jiangna onte khe jiang olyu bung ji kvürilo nyimkatacho. 23 Tole Moses na hoji tatsüngo ejen ji khi okhe hamimoe yingpvü jilo, ojo hamimoe yingpvü jilo to ejen esecho. 24 Jisü lojo ombona Aaron tsoe jiang sosi oyi onte nomüng jiang lo tona onte hamimoe yingpvü jianglo tona ojo hamimoe yingpvü jiang lo to ejen eseyicho. Jisülo jo ejen enhyo ji khi Moses na thanphen nken mezhü jianglo phyangkacho. 25 Ombona ethyu jiang, emhilo ethyu jiang, bukchunglo ethyu jiang, nthen jilo mmhontso ji, nna okhfü jiang to elani jilo ethyu jiang tona ojo sülamo amimo ji to khichecho. 26 Jisülo jo ombona vümhi n theo hümri luksa lo thei OPVÜI lo khochaki evao jilona hümri motsünga khichei, thyujü theta rüngcho hümri motsünga khiche, hümriro motsünga khichelan toli jiang ji ethyu ji tona ojo sülamo ji to poni ekachicho. 27 Ombona etsoyu shi heto benri Aaron tona ombo tsoeden to jiang pia OPVÜI thüngi echümporo than tssoa pithukcho. 28 Tole Moses na etsoyu ji khichoe nthochak than tssoa erungthan ji poni ekachi thanphen sa jilona rüngcho. Shijo etsoyuthan osi orhüm jina OPVÜI emathacho. 29 Tole Moses na shyuro so ji khichoe echümporo than tssoa OPVÜI picho. Hoji jo nthochak than lo etheo olyu bung jilo Moses ejan ji. Moses na shiang hetopvü OPVÜI yizüng ephan tssocho. 30 Moses na nzüphen thyujü tara thanphen ejen jilo tara to khichei Aaron tona ombo tsoe jiang to erhikacho. Osi onte mpensü jianglo ha erhikayicho. Hoji toli ombona onte osi onte mpensü jiang OPVÜI lo nthochaki vanthukcho. 31 Moses na Aaron tona ombo tsoe jiang to ezocho, "Oso ji hansi OPVÜI vanrhyu ranki kipüng jilona owo ekvüi OPVÜI na yizüng epio ji ephani na nthochak than loksa jilo jüwo hümri jiang nzo tsotava. 32 Oso tssolea, hümri tssolea enhyo jiango rungi sia. 33 Nte nthochak elhi jiang n thakthüng jo ntena OPVÜI vanrhyu ranki kipüng jilo tsüngon tiying vamka. 34 Nchüng etena tssothako shiangjo nte mmen khi nte siyiv tsükona OPVÜI na phyo ji ephan tssotacho. 35 OPVÜI na phyo jiang ephan ntena OPVÜI vanrhyu kipüngo zümo eng tsüngon tiying vamka. Hoji to n tssona nte chüvka. Shijo OPVÜI yizüng ephan." 36 Tole Aaron ha ombo tsoeden to jiangna OPVÜI na Moses yakchia yizüng pio ji ephan tssotacho.

Pvüti 9

Aaron na Othan Piala

1 Nthochak elhi jiang thaksi ojyuato jo Moses na Aaron, ombo tsoe jiang tona Israel esopvüiden jiang to tsachukcho. 2 Ombona Aaron ezocho, "Tssibungro motsünga tona olyu motsünga to ome n khyingo tüv khi tssibungro jijo mmen than tsso, nna olyu jo erungthan to tssoa OPVÜI thana. 3 Jitosi Israel jiang ezoa heto thanthuka, mmen than tsükona nyanyan bung motsünga, mangsüro nzyuatso tüv motsünga, olyu nzyuatso tüv motsünga ome n khyingo tüv motsünga tojo erung than tssothuk, 4 Tssibung motsünga tona olyu motsünga tojo khümshümta than khümshümta than to tssoa thanthuka. Shiang topvü otssuk omüm than jilo tssotsüi thyujü nzükae OPVÜI thamka. OPVÜI na nchüng onte thüngi rov sala jitsükona ontena shiang etssov lia." 5 Moses na ezo jiang topvü ontena hansi OPVÜI vanrhyu ranki ji hapoe rocho, osi kyon topvüna OPVÜI khümvü tsükona jilo sanrhyucho. 6 Moses na ezocho, "OPVÜI na shiang hetopvü etssov nte ezo jijo ombo vanrhyu phfütsson wondang ji nte hungthukvü tsükona." 7 Tosi ombona Aaron ezocho, "Ni mmen osi kyon jiang mmen jiang khi esiv tsükona thanpheni owo mmen than tona erungthan to pia. OPVÜI na phyo ji esüa kyon jiang mmen jiang khi siyithukvü tsükona othan shi pia." 8 Aaron na thanpheni na owo ombo mmen than tssibung ji tatsüngcho. 9 Ombo tsoe jiangna ejen ji hansi yile ombona jilo yingro ji tsyuthechisi thanphen jilo otssae edyukao jianglo tara esesi enhyo jijo thanphen ji kupi phyangkacho. 10 Jitosi ombona thanphen ponina ethyu ji okhfü jiang nthen jilo mmhotso ji to khichei OPVÜI na phyo ji esüa rungi thancho. 11 Tokhatola ofü ji tona oso ji tojo ombona yantssae na rüngcho. 12 Ombona ombo erungthan ekümrümo ji lüngthacho osi ombo tsoe jiangna ejen ji hansi yile ombona thanphen sa ji nken mezhü jianglo phyangkacho. 13 Ontena kvüri jiang tona solan thanpo jiang to ombo pile ombona thanphen ponina rungi thancho. 14 Jisüi jo ombona bukchung jiang tona ojo sülamoe jiang to etssüi erung than ejoma jiang poni ekachi rüngcho. 15 Hoji sülojo ombona kyon jiang than jiang piyicho osi ombona ombo tsükona thamo ji esüa nyanyan ji khi lüngthae kyon jiang mmen than picho. 16 Ombona erung than ekümrümo jiha han si oyi shikhfü ephani na thancho. 17 Ombona otssuk omüm than ji khi ohüm tara yachei thanphen ponina rüngcho. (Shijo engakvü than ji ephalo thancho.) 18 Ombona kyon jiang khümshümta than tssoa mangsü bung ji tona olyu jito lüngthacho. Ombo tsoe jiangna ejen ji oyi ombo pile ombona thanphen ji nken mezhü topvülo erhikacho. 19 Aaron na mangsü pung ji tona olyu ji to ethyu jiang shyuro jiang 20 poni ekachi thanpheni hansi wocho. Ombona ethyu ji thanpheni na rüngcho. 21 Osi Moses na phyoji esüa shyuro jiang tona ojo hamimoe sülamoe jiang to echümporo tssoa OPVÜI picho. 22 Aaron na othan topvü methaksi ombo khe jiang kyon jiang pono rükachi onte mmhayithuksi khichocho. 23 Moses ha Aaron onina OPVÜI vanrhyu ranki rhowosi chiyi kyon jiang mmha randankayithakale OPVÜI vanrhyu phfütsson wondang ji kyon jiangna hungcho. 24 Jitopvü OPVÜI na omi rothukcho, osi hojina erungthan ji tona ethyu jiang to rungkhancho. Kyon jiangna hoji hungale topvüna tüngkachia onte mha nkhümtheracho.

Pvüti 10

Nadab Tona Abihu to Mmen Ji

1 Aaron tsoeden Nadab ha Abihu onina mironphfü ji bentasi jilo miron thei, tssütsse rhüm thei toli OPVÜI thancho. Tokhatola hoji jo. ntho mekcho ntiotssole hoji thanle to OPVÜI na onte n zohancho. 2 Jitopvü Potsüwoe na omi joroe OPVÜI mhadungo na rungtsüngi oni sicho. 3 Tole Moses na Aaron ezocho, "Heto etssov shi OPVÜI na heto phyoe vacho, 'A benkae topvüna a ntho ji yikrachivka; Ana a phfütsson ji kyon jiang hungthukvüka.'" Tokhatola Aaron na yingto vani sicho. 4 Jisülo jo Moses na Aaron oporo Uzziel tsoeden Mishael tona Elzaphan oni tsae ezocho, "Oro ni jenio shiang müng jiang ntho ranki jilona ejümi vanphen pomoe chiwo sitava." 5 Tole Moses na ezoji esüa ontena owo echümüng jiang osü lona ejümtasi vanphen pomoe chiwo sitacho. 6 Tole Moses na Aaron tona ombo tsoeden Eleazar ha Ethamar oni thüngi ezocho, "Ntena nungrala to n tsithukvü ji nte tssan jiang n khev osi osü jiang reroa to ti tssotava. Ntena hojito tssochojo nte chüvka osi OPVÜI na okho topvü poni lüm tsukvüka. Tokhatola Israel shilo okho kyon topvüna nchüng OPVÜI na omi rothuki rungtsüng thuko jiang tsükona nungratava. 7 Nteno OPVÜI thyujü na nte nzüyithako jina ntena ranki kipüng shi yaki ti wotava, to tssochojo nte chüvka." Tole ontena Moses na ezo ji esüa tssotacho.

Pvüti Jiang Tsükona Shikhfü

8 OPVÜI na Aaron ezocho, 9 "Ni osi ni tsoeden jiangna soko yusi a vanrhyu ranki rhorov meka; ntena hoto lyuchojo nte chüvka. Shiji nte tsoronichen topvüna tsütsao shikhfü tssovka. 10 Ntena ntiojo nzontsüna tsütsao, ntiojo Potsow echi to sana khota lithukvü shikhfü, ntiojo shikhfü na nthothuk, ntiojo ntho to sana khotathukvü. 11 Ana Moses ezoa yizüng nte pio jiang topvü nina Israel kyon jiang püngnovka." 12 Moses na Aaron tona ombo tsoe otsük eni enhyoe vamo jiang, Eleazar tona Ithamar to ezocho, "OPVÜI thamo etsoyu jilona enhyoe otssuk omüm than ji khi hojina vümhi n theo hümri rüngi thanphensa ji tssae na tsotava, ntiotssole othan shijo elümoto nthoa. 13 Hoji khi ntho meta jilona tsoa; ntiotssole hoji jo OPVÜI thamo jilona khicheo, ni osi ni tsoe jiang ejan ji OPVÜI na hojito yizüng a picho. 14 Tokhatola pvüti jiang ejan echümporo yantso osi ekhya tssoa OPVÜI thamo ekümrümo ji shyuro osi ojo hamimo sülamoe jiang toha ni osi ni wopan na tsokuka. Ntena hojiang khi ntho meta thama lona tsokhokka. Othan shiango Israel jiangna khümshümta than pio jilona ni osi ni tsoeden jiang ejan khichecho. 15 Ontena ethyu ji etsoyu than OPVÜI thamo ji yuta jilo shyuro ji tona ojo hamimoe sülamoe jiang to hansi yivka. Shijo OPVÜI na phyo ji esüa nchünkhon ni osi ni wopan ejan tssoa wovka." 16 Moses na mmen than nyanyan ji ethümle rungthaka to zocho. Tole hojina ombo lüm tsuki Eleazar tona Ithamar to oni engacho, 17 "Ntena ntio tsükona mmen than ji ntho metae na n tsotachola? Hoji jo elümoto nthoa osi OPVÜI na okho topvü mmen khi siyiv tsükona nte picho. 18 Hoji ejen ji ntho ranki hansi n rheyi küma oso jijo jilona tsov shikhfü, ana nte ezo ji ephan." 19 Tole Aaron na janlancho, "Ana mmen than ji nchüng tsovo, OPVÜI na hoji khekhichov la? Zeta nchüng kyon jiangna onte mmen than jiang OPVÜI pithaka, osi erungthan jiangha hansi rothaka, toaha hetüv ezüp ejan thaka." 20 Moses na hoji zoale lümbüm pükcho.

Pvüti 11

Etsowo Ekümrümo Jiang

1 Israel kyon jiang tsükona OPVÜI na shikhfü shiang 2 Moses ha Aaron oni picho. Limha lo vancho ekümrümo 3 Jonkhfü ekhyingo osi nkhichi njaklamo jiang topvü ntena tsokhuka,4"6khatola odh, mekana lishüso osi lishüso terio jiang tojo ti tsotava. Hojiango n ntho ntiotssole onteno nkhichi tssoa khatola jonkhfü n khying. 7 Woko ha ti tsotava, onteno jonkhfü khyinga khatola njaktse n tssoala. 8 Shiang hetopvü n tssüngrüng ekümrümo tae, hoji tsükona ti tsotava osi hotüv echü ha ti evüngkata. 9 Ntena ngolüp osi chokon nokori ekhyingo ngo jiang tsotava, 10 tokhatola ojüi evan kvümoe na chokon nokon osi ngolüp n khyinga sana jiango ti tsotava. 11 Hotüv ekümrüm jo n tho. Ntena hojiang ti tsotava osi echü jiang ha ti vüngkatava. 12 Ojüi evamo kvüwoe na olüp osi choko nokon n khyinga sana jiango ntena tsov meka. 13-19 Ntena hetüv woro shiang ha ti tsotava: nhyavam, velungu, müngshitsü, müngshiro, kyorhü, Müngtsov, kyashak, josi-woro, jümang-woro, jü-woro, nhyayoworo, jütssa-woro, ngotso-woro, tona sosiro to. 20 Tsuki eyio jiang yaka jo, 21 echo ekhyingo ora oben topvü n tho. 22 Ntena khomung, shüngrü osi shilungu to jiango tsokhuka. 23 Tokhatola thanpo ora oben kvümoe na echo khyinga osi epvüa sana jiango n tho to khanhyala. 24-28 Ochoangna ekümrümo shiang echü evüngkata sana jiango mmyu nandang n tho to khayiv: jonkhfü ekhyingo topvü, jonkhfü shümrosi nkhichi etsoe yaka jo sariv, elani ojo mezhü mpao ekümrümo jiang topvü yolo jompho khyingo jiang to. Hetüv ekümrümo chücho ochona hansi woa sana ombo sü jiang etsüi siv tolea mmyu jana ombo sariv. 29-30 Lipvüso, zhüro, zütssünaro osi süngrüm to jiango n tho to khanhya. 31 Hojiang evüngkae osi hotüv echü jiang evüngkae jo mmyu jana n tho. 32 Hotüv echüna ntio tsütsaelan lo evüngkata sana jiangha n tho. Hotüv tsütsaelan otssüng, osu, sofü, sükvü shiang hetüv lo tssüthelea, thechi lea n tho kümvü. Hotüv jiango ojüi jümthechiv tolea mmyu nandang n tho to vamvü. 33 Hotüv echü chonphfü lo elungtheta tssona jilo ntio jüana topvü n tho kümvü osi ophfü ji varoe siv shikhfü. 34 Potsow etsoyulan kvümoe ojü ji hotüv n tho phfü lona khi yencho sana n tho kümvü osi hotüv phfülo ojü eyuv vao jiha n tho. 35 Ntio tsütsaelan lo echü na evüngkata sana n tho kümvü, ochon mijen osi tssoyanphen jiang ha roe sithuka; 36 tokhatola jünhyo osi jüpvü jiango nthoa tae vamvü, thanpoe tsütsaelan jiang ji echü na evüngkata na sarita lea. 37 Mojü mono eyingu vacho tüv lo echü evüngkacho ha ntia n tsso. 38 Tokhatola mojü ji ojüi jümi vacho tüv lo echü elungkachojo n tho kümvü. 39 Etso ekümrümo chücho tüv ochona evüngkata sana mmyu nandang sariv. 40 Osi ochona sana hoji ekümrümo ji so tsona ombona ombo mpensü jiang etssüi siv tolea mmyu jana n tho to ombo sariv, ochona echü ji hanphia sana jina ha mpensü jiang etssüv, tolea mmyu jana ombo sariv. 41 Ntena likoe epvüphio ekümrümo terio jiang ntia ti tsoa, 42 epvüphio jiang tssolea, ojo mezhüna sanphio jiang tssolea mekana ojo khosha mpao tssolea, 43 shiang hetüv tsoe khi n tho ti kümtava. 44 Aiyo OPVÜI nte Potsow ji osi ana ntho ji esüa nteha nthoa vam shikhfü. 45Aiyo OPVÜI nte Potsow, Nte Potsow etssov tsükona Ejip metae na nte socheo ji. Ana ntho ji esüa nteha nthov shikhfü. 46 Tona oro, ojüi osi limhae evamo ekümrümo to jiang tsükona shikhfü ji shiang. 47 Ntena ntiojo shikhfü ephan ntssüng, ntio jo n tssüng to sana khotachev shikhfü, elani etso tona n tso to eküm rümo jiangha khotav shikhfü.

Pvüti 12

Tsobuknibuk Sülo Eloe Nthoche Elhi

1 Israel jiang tsükona OPVÜI na shikhfü shiang Moses picho 2 Eloe tsükana tsokhying buksi tsüngon tiying nandang jo ompvü ji shikhfü ephani na n tho tssothukala, ompvü choro mmen eyi yuta lo esüa. 3 Osi tsüngon tizao tolo ngaro ji tsenia mvüchuku. 4 Jisülo ompvü ejen yio jilona n thochethüng tsüngon thümrosi ethüm jo n tho to vamvü. Ompvü nthoche yuta ji m pem jo ompvüna ntho tsütsaelan evüngkav meka osi ntho süranki jiloha rhowov meka. 5 Eloe na tsolo buksi tsüngon taro mezhü jo n tho tssoa vamvü, ompvü choro mmen eyi yutalo esüa. Jisülo ompvü ji tsüngon rukrosi tiruk süloti ejen yio jilona nthochev. 6 Tsokhying tssolea tsolo tssolea ompvü nthoche elhilan ji benrithakana ompvüna OPVÜI vanrhyu ranki ji kipüngo evamo pvüti ji thüngi olyu nzyuatso tüv erungthan tsükona tona vefü mekana yukhyu motsünga to mmen than tsükona hansi oro pivka. 7 Pvüti jina OPVÜI mhadungo hansi osi ompvü n thono ji khi siyiv tsükona thaniv tona ompvü nthochev. Shi heto shijo eloe na tsobuk nibukcho sülo benphivka. 8 Eloe jina olyuro n pikhuka tssona ompvüna vefü eni mekana yukhyu eni, motsünga jo mmen than motsünga jo erungthan to tssov tsükona thev, tona pvüti jina elhilan tssoe n thono ji khi siyia ompvü nthochev.

Pvüti 13

Ratsü Enoe Tsükona Shikhfü

1 OPVÜI na Moses ha Aaron oni thüngi shikhfü shiang picho. 2 Kyon ocho sana ofü lo emho, vela mekana runga eno tüv osi hoji na rathia eyio tüv ofü nochonori khyingna Aaron pvüti wopan thüngi sosi owo zethuka. 3 Pvüti jina zesi ombo emho jilo otssan jiang emhüma osi okhfü ji jungcho tssona ratsü eno to pvüti jina phyov, osi kyon ji saritavka. 4 Tokhatola emho jiang osi jilo otssan jiang n hüma tssona kyon ji pvüti jina tsüngon tiying echümpo vanthoki zev. 5 Tsüngon tiyingto jilo pvüti jina ombo zelan si emho ji rankata n yiv vanphen ji to tae tssona elani tsüngon tiying echümpo vanthuklam ka. 6 Tsüngon tiyingo to jilo pvüti jina ombo zelan si emho ji pozhüa yia tssona hoji jo emho sha tsso jina kyon ji ntssünga to phyochev. Kyon jina ombo sü jiang etssüi sithaka na ntssüngchethaka. 7 Tokhatola pvüti jina ntssünga to phyocho sülo emho ji rankata yia tssona ombona elani pvüti ji owo zethukalam. 8 Tona pvüti jina zesi emho ji rankacho tssona ratsü eno tsso jina ombo ji n tssüng to phyoyiv. 9 Kyon ocho sana ratsü khyingna ombona pvüti thüngi oro zethokvü. 10 Emho ji ehüma osi hojilo otssan jiang ehüm na osi emho ji jencho tssona 11 jilo ratsü eno ji mhoran tssothakcho tssov. 12 hojito chancheta ntsiwo jiango echümpo vanthuki ezev ethev n lio jina pvüti jian zesi n tho to phyoyiv. Ratsü eno na kyon ocho kvüri na ojo jana khyinga sana ombo zeyilam, 13 osi enov jina otsük eyukzhüthaka na enhungo ekyuv n li pvüti jina kyon ji ntssünga to phyoyiv. Osi ombo fü topvü ehümtsüthakcho tssona kyon ji ntssüng chethaka to phyoyiv. 14 Tokhatola chancheta emho khyinga tssona n tho to sariv. 15 Pvüti jina ombo zeyilansi emho ji opon tssoa khyinga tssona n tho to ombona phyoyiv. Opon tssoa emho khyingo jijo ratsü eno tssov, hoji tsükona n tho kyon tssov. 16 Tokhatola emho ji poe ehüm ma küma na ombona pvüti ji thüngi elani wolam, 17 tona pvüti jina ombo zeyilam. Emho ji ehüm thakna ombo ji ntssüngthaka to pvüti jina phyoyiv. 18 Kyon ochona sana velasi pothaka ha 19 sülani hojilo ehüma pumkana mekana okhfü jilo rakiv tona ehüm to khyingna ombona pvüti ji thüngi owo ejüv. 20 Pvüti jina ombo zeyisi okhfü ji nkonphia jianglo na jungka na osi hojilo otssa jiang ehüma tssona ombo ji n tho to pvüti jina phyoyiv. Ntiotssole vela khfühen jilo ratsü eno sothethakcho tssov. 21 Tokhatola pvüti jina zele okhfü jilo otssan jiang ehüma n kümvü, osi okhfü ji nkonjan jianglo n jungka khatola okhfü ji evona zechena pvüti jina tsüngon tiying omboti vathuki zev. 22 Okhfü ji nzüa yia tssona ombo ji nochonori khyingo jina pvüti jina n tho to phyoyiv. 23 Tokhatola okhfü ji n rankav vanphen ji tae vana tssona mhorak tae tsso jina pvüti jina ntssünga to ombo phyoyiv. 24 Kyon ocho sana omina rungchile okhfü ji ehüma osi rakina, 25 pvüti jina ombo zeyiv. Okhfü jilo otssan jiang ehüma osi nkonjan jiang lona jungkata tssona omi khü jilona ratsü eno benkathakcho tssov. Hoji tsükona pvüti jina n tssüng to phyoyiv. 26 Tokhatola otssa ji n hüm elani okhfü ji nkonjan jianglo na n jungka to tssolea okhfü ji evona to tssona pvüti jina tsüngon tiying echümporo ombo vanthoku. 27 Pvüti jian tsüngon tiyingo to jilo ombo zesi emho ji tsükata yia tssona kyon ji n tho to phyoyiv. 28 Tokhatola okfü ji ombo vanphen ji vanpvü tssona osi okhfü ji evonroa to tssona ratsü eno mek. Hoji tsükona pvüti jina nthothaka to ombo phyoyiv, ntiotssole hoji jijo omi khü ji mhorak tae. 29 Eboe tssolea eloe tssolea ocholo kvüri emho osi khoka lo emho khyinga na, 30 pvüti jina zeyiv. Okhfü ji nkonjan jianglo jungkata osi hakhfüa to tssona jijo ratsü eno, hoji tsükona pvüti jina omboji n tho to phyoyiv. 31 Pvüti jina zele okhfü ji n junglea jilo otssan shenthi tüv n khyingcho jo ombo ji tsüngon tiying echümpo vanthoki zev. 32 Pvüti jina tsüngon tiying jilo zeyile emho rankaji rankata n yiv, okhfü ji n jungu osi jilo otssan jiang n hakhfü na, 33 kyon jina okhfü ji rhüa tssüi siv. Osi pvüti jina tsüngon tiying omboti vathuklani zev. 34 Tsüngon tiyingo jilo pvüti jina ombo zeyilam, osi emho ji n rankav osi okhfü ji nkonjan jiang lona n jungka na pvüti jina kyon ji ntho to phyoyiv. Kyon jina ombo mpensü jiang etssüi sithak na ombo ntssüngchethaka 35 Tokhatola ombo ntssünga to phyosana ti emho ji ranka na, 36 pvüti jina ombo zelaniv. Emho ji nzüa yia tssona ombona otssan hakhfüo tüv n hunglea; kyon ji n tssüngcho tssov. 37 Tokhatola emho ji n tsükav osi jilona otssan shunga tssona emho ji pothakcho tssov. Hoji tsükona ombo ntssüngchethaka to pvüti jina phyoyiv. 38 Eboe tssolea eloe tssolea, otsüko ehümu paraka khyingna, 39 pvüti jina ombo zeyiv. Osi okhfü ji mmia ehümcho tssona jijo thama parhüpcho tae tssov; hoji tsükona kyon ji ntssünga. 40-41 Kyon tsüka odoni tssole sikvüwoe tssolea otssan vülea jina n tssüngu kümcho mek. 42 Tolea parhüp ji myonshia ehümrhüp na jijo ratsü eno tssov. 43 Pvüti jina ombo zeyisi emho myonshia mhumphuka khying na ratsü eno tsso jina, 44 pvüti jina ombo ji n tssüng to phyoyiv, ombo kvüri mara ekhyingo ji tsükona. 45 Kyon ochona ratsü eno hana sana ombona mpensü jiang rethechi hansi, otssan ji shyuroe han, emen eyuk tosi "Ntssüng, ntssüng!" to tüngakachia vam. 46 Ombo osi ompvü nochonori ji ekhyingthüng nandang jo n tho to vam, osi oyam nkachoa pikhfü tssae ombo vanthoku.

Phümtson Pvükao Jiang Shikhfü

47 Kvüthüng tssansülo tssolea, sünyipvülo tssolea, 48 mekana tssansü osi sünyipvülo rechocholo lea, sofü lo osi sofü na nsüngrücho tsütsaelan lo lea, phümtson khyinga tssona, 49 hoji mmyakvü osi rakishuka tssona jijo phümtson ji nzüa yia vamo jina hansi owo pvüti zethoku. 50 Pvüti jina zesi tsütsaelan ji echümporo vasi tsüngon tiying zev. 51 Tsüngon tiyingo jilo zelan si phümtson ji rankata tssona tsütsaelan ji n tho to phyov. 52 Hotüv tsütsaelan jijo phümtson nzüa vamo jina pvüti jina rungi siv. 53 Tokhatola pvüti jina zele phümtson ji nzüa n yihan na, 54 Osü ji etssüi tsüngon tiying echümporo valani zev. 55 Hoji sülo phümtson ji nzüa n yihanlea opyon n dungphina vanpvü tssocho jo pvüti jina n tho to phyov osi tsütsaelan ji mhadungoe kyoncho tssolea sülamoe tssolea omina rungi sile to yidan pia rungi sithoku. 56 Tokhatola pvüti jina phümtson ji monthakcho tssona osü mekan sofü ji nken kvülo phümtson khyingcho sana jitae rechoe siv. 57 Osi phümtson ji nzüa yia tssocho jo OPVÜI jina hoji rungi siv. 58 Tolea tsütsaelan ji etssüi zele phümtson ji mona tsona elani etssülam tona hojijo ntssüngthakcho tssov. 59 Shiang jo osü lo phümtson khyingcho shikhfü, osü ji sümyon na tükcho tssolea, sünyipvüna tükcho tssolea mekana sofü na nsüngrücho tsütsaelan tssolea, topvü hojito tssov.

Pvüti 14

Ratsü Eno sülo nthoche

1 Ratsü enoe pocho sülo nthoche shikhfü: 2 OPVÜI na Moses yakchia heto picho, ombo nthoche tsüngon no jo pvüti ji thüngi sosi rov, 3 tona pvüti jina pikhfü tssae ombo sosi chiwozeyiv. Osi nochonori ji mmhonthakcho tssona, 4 pvüti jina ntho woro eni yani hansi yile to kyon ji ezov, hoji nzo cedar tssüng wochoro motsünga, oying emyom motsünga, kherang motsünga to hansi yiv. 5 Tosi chonphfü motsünga lo ojü ntssüngu yenthei ji poni na woro motsünga ji tatsüngu. 6 Tosi woro motsünga ji khi, hoji nzo cedar tssüng wochoro tona, oying emyom tona kherang ji to topvü khi woro ji ejen jilo jümthechiv. Tosi pvüti jina khi yenjo tiying kyon ji erhika si ombo ntssüngthaka to phyov. 7 Jitosi ombona woro motsünga ji phenmngi phyachi siv. 8 Kyon jina ombo sü jiang topvü etssüi sisi kvüri tssan ji tssüi sisi tsükae siv; to tssona omboji shikhfü ephan ntssüngchethaka. Ombona oyani rheyikhuka, khatola ranki n rheyi sana tsüngon tiying hapoe vam. 9 Tsüngon tiyingo to jilo elani ombona kvüri ji tssülam, menhüm osi mhyiktssan jiang, tona otsüko otssan topvü to tssükhani siv, tosi ombona osü jiang etssüi sisi tsükae sithak na shikhfü ephan ombo ntssüngthaka. 10 Tsüngon tizao to lojo ombona olyuro obung eni okyu motsünga to ephyorüv m pao nzyuatso tüv, ohüm chencho seri ethüm olive thyujü lo nzüka, jilo olive thyujü etükpvü echi ethümo echia harüma to thev. 11 Pvüti jina othan shiang tona kyon ji to sosi OPVÜI vanrhyu ji kipüngo wov. 12 Tosi pvüti jina olyuro obung motsünga tona thyujü etükpvü ethümo echia harüm ji to khi lolan than tssoa piv. Ombona othan jiang echümporo than tssothuka OPVÜI tham. 13 Ombona olyuro ji ntho meta kvülo na mmen to ekümrüm rungphen sana jilona lüngthae thamka. Ombona hojito tham shikhfü ntiotssole lolan than shiha mmen than ji esüa pvüti ji ejan tsso jina elümoto ntho tssothukala. 14 Pvüti jina olyuro ji ejen tara khi kyon ocho nthochev sana ji eno hamimoe jilo esev, okhe hamimo yingpvü jilo esev, ojo hamimo yingpvü jilo eseyiv. 15 Pvüti jina thyujü tara khi ombo khe hayiwoe mmyokvüi thei, 16 ombo khe hamimo yingro motsünga tssyu thechisi OPVÜI vanrhyu jilo yenjo tiying erhikav. 17 Ombona ombo khelo jüwo thyujü ji lona tara, olyuro ji ejen tara, to khichei kyon ocho nthochev vancho sana ji nomüng hamimoe jilo theyi, okhe hamimo yingpvü jilo tona joyingpvü hamimo jilo to eseyiv. 18 Jitosi ombo khelo thyujü enhyoe bemo ji kyon ji kvüri lo theyia nthoche elhi ji tssoyivka. 19 Jisülo jo pvüti jina mmen than ji thana ntho elhi tssoyiv. Jisülo ombona erungthan ekümrümo ji tatsüngi 20 oyohan than jilo tsotsüi rungu. Hoji to lyui pvüti jina nthoche elhi tssoyia kyon ji nthochev. 21 Kyon ji yantsae tssoe ethüng ezi n tssokhuk na ombona olyuro obung motsünga tae hana oro ombo lolan than tssoa pvüti ji yakchia OPVÜI thüngi echümporo than piv. Ombona oyohan than tssoa ohüm seri motsünga olive thyujü lo nzi, elani olive thyujü serialo ethümchia to hansi rovka. 22 mbona mmen than tona erung than to tsükona yukhyu mekana vefü eni hansi rovka. 23 Osi nthoche elhi tsüngon tizao to jilo OPVÜI vanrhyu kipüng jilo pvüti ji thüngi hansi rovka. 24 pvüti jina olyuro ji tona olive thyujü ji to khi pvüti ji yakchia echümporo than OPVÜI pivka. 25 Pvüti jina olyuro ji lüngthae ejen tara khi kyon ji eno mmyo hamimoe jilo theyi, yingpvü hamimo jilo tona joyingpvü hamimoe to theyiv. 26 Pvüti jina thyujü tara khi ombo mmyokvü hayiwoe thev, 27 osi yingro hamimo na ejen ji OPVÜI vanrhyu jilo yenjo tiying erhikav. 28 Ombona thyujü ha tara khi OPVÜI vanrhyu jilo esev, kyon ji eno hamimoe, kheyingpvü hamimoe tona joyingpvü hamimoe to. 29 Osi pvüti ji khe hamimoe thyujü jijo kyon ji kvüri lo theyi tolyui nthoche elhi ji benriv. 30 Jitosi ombona yukhyu mekana vefü motsünga jo mmen than, 31 motsünga jo erung than to piv. Hojito pvüti jina nthoche elhi ji benriv. 32 Shijo ratsü enoe ochona ombo ntssüngchethukvü tsükona othan shenthi n pikhuka sana ji tsükona.

Oki Phümtson Jiang

33 Oki phümtson pvükatathüng elhilan jiang tsükona 34-35 OPVÜI na Moses ha Aaron oni heto shikhfü picho. (Osi shikhfü shiangjo OPVÜI na phyochako meta Kanaan jilo Israel jiangna rheyicho sülo benphile to picho.) Kyon ochona ombo ki phümtson pvükathukcho hunga sana hoji owo pvüti ji ezov. 36 Tona pvüti jina oki ji zelo n rhowothüng tsütsaelan topvü hapoe hanchukchi vale to ezov; to n tssoana oki jilo ntio lia na n tho to khanhyayiv. hojito oki ji lichesanati pvüti jina rhowo 37 phümtson ji kvütüv sana zev. phümtson jilo myakvü osi myonshiv jüa oki echung jiang tsoroa vanchojo, 38 ombona oki jilona chiyi tsüngon tiying tsükona oki ji khani siv. 39 Tsüngon tiyingo to jilo elani oro oki ji chonchi zelam. Osi phümtson ji rankata lia tssona 40 olong kvülona buki phümtson ji pvüa sana hoji lae pikhfü tssae shümchukchi sithukvü. 41 Osi kyimchung ochungo jiwoe topvü opon ji nshaki thonjo jiang hansi pikhfü tssae sithukvü. 42 Jitosi olong ethan na echung ji nlichoe echungji ethan tssoe mosilani siv. 43 Echung jiang ethan tssoe moksika sanati elani phümtson pvükalana tssona, 44 Pvüti jina owo zelam osi phümtson pvülana tssona, oki ji n tssüng to phyoyiv. 45 Hoji ki jijo phii siv, osi otssüng olong osi moksio jiang topvü hansi pikhfü tssae n tho metae chiwo siv. 46 Oki ji khani vatathüng yuta jilo ochona jilo rhowoa sana kyon mo jiha mmyu n janthüng jo n tssüng to vanthukvü. 47 Kyon ochona oki jilo yipkachia osi jilo na etsoyu tssoana jina ombo mpensü jiang topvü etssüi sivka. 48 Tokhatola echung jiang tongphicho sülo pvüti jina owo zele phümtson ji n pvükalana tssona oki jijo shikhfü ji ephani na ntssüngthaka to phyoyiv. Ntiotssole phümtson ji n khyingu sithaka. 49 Oki ji nthochev tsükona pvüti jina woro eni cedar tssüng tara, oying emyom tona kherang to methakvü. 50 Ombona ochon phi lo ebukjü ntssüngu the vao ji poni na woro motsünga tatsüngüv. 51 Jitosi ombona cedar tssüng ji, kherang ji, oying emyom ji tona woro eküm ji to khi woro ejen jilo jümthechiv osi ojü ntssüngo jilo jümthechi to tssov, tosi oki jilo yenjo tiying to erhikav. 52 Hojito pvüti jina yenjo tiying erhikav woro ji ejen, ebukjü ntssüngu, woro eküm ji, cedar tssüng tona oying emyom ji to khi oki ji nthochev. 53 Jitosi ombona woro eküm evamo ji khi yantsü pikhfü pomoe oli pyachi siv. Hojito pvüti jina oki nthoche elhi ji bencheyi sanati oki ji shikhfü ephan ntssüngthaka to phyoyiv. 54 Shiang hetopvü jo ratsü eno; 55-56 emho, vela, runga eno tona oki osi mpensü lo phümtson pvükao jiang to tsükona shikhfü pio jiang. 57 Shikhfü shiangna ntssüng n tssüng ji etsiv.

Pvüti 15

Otsüki na Mmen yiathüng Shikhfü

1 Israel kyon jiang tsükona OPVÜI na Moses ha Aaron oni 2 heto shikhfü picho. Eboe ocho lona mmen yiasana jijo mmen to tssothuku, 3 mmen ji yiathüng tssolea esancho sülo tssolea. 4 belüng kvülo ombona yipa osi khoktheta sana hoji ha mmen to khav. 5 Kyon thanpoe ochona ombo khokthepheno khoktheta osi belüng ji evüngkata sana, 6 jina ombo mpensü jiang zakto etssüi sia tsükae sivka, osi mmyu jana mmen to vamuka. 7 Otsüki na mmen yia vamo kyon tsük ji ochona evüngkata sana ombona ha tsükae sia osü jiang etssüi sivka, tokhatola n myuthüng jo mmen to vam. 8 Mmen yia vamo kyon jina ocho njüna nchukata sana kyon mo jina ha osü etssüi sia tsükae siv, khatola n myuthüng nandang jo mmen to vam. 9 Mmen yio kyon jina khoktheo jiha mmen to khav. 10 Kyon mo jina khoktheo ji evüngkao kyon jiha n myuthüng jo mmen to vam. Kyon jina khokthecho lona ntio sana thei hanphio kyon jiha mpensü etssüi sisi n myuthüng jo mmen to vam. 11 Mmen yia vamo kyon jina okhe ntsük lea kyon ocho evüngkata sana kyon jina mpensü jiang etssüi sia tsükasi n myuthüng nandang jo mmen to vam. 12 Mmen yia vamo jina evüngkao chonphfü jijo varoe siv, osi tssüngphi evüngkao jiang jo süi siv shikhfü. 13 Mmen yio ji mmhoncho sülo tsüngon tiying nhyaksi mpensü etssüi sia, ebukjü ntssüngu na tsükae sia ntssüngchev. 14 Tsüngon tizao to jilo ombona yukhyu mekana vefü eni hansi owo OPVÜI vanrhyu ranki kipüng jilo pvüti ji piv. 15 Tona pvüti jina woro motsünga ji mmen than pisi motsünga jo erung than piv. Hojito Pvüti jina shikhfü ephan kyon ji ntssüngchev. 16 Eboe tsükana eboe tathi tsükjü yina otsük totona tsükae sisi n myuthüng jo mmen to vam. 17 Osü osi sofü tsütsaelan ntiolo hotüv tsükjü esekata sana etssüi sisi n myuthüng jo hoji mmen to vanthukvü. 18 Eboe tona eloe to ponilan tssotasi sülo woniata na tsükae siv osi n myuthüng nandang jo onitana mmen to. vam. 19 Eloe tsükana ompvü tathi mmen yiana tsüngon tiying mmen to vam. Ompvü evüngkae kyon topvü n myuthüng jo mmen to vam. 20 Ompvüna hoji yutalo ntiolo erikachia osi khoktheta sana topvü mmen to khav. 21-23 Ochona ompvü belüng osi khokthephen evüngkata sana jina mpensü etssüi sia tsükae siv osi n myuthüng jo mmen to vam. 24 Ompvü mmen eyi yutalo eboe ochona ompvü thüngi ponilan tssoa sana ombo tsüngon tiying mmen to vam osi ombo yiphen jiha mmen to khanhyav, 25 Eloe ocho lo tathi yuta jilo tajoa sunga mmen yia vana sana, ompvü tathi yutalo mmen to vamo ji esüa ejen ji n santhüngjo mmen to vam. 26 Hotüv yutalo ompvü belüng osi khokthephen jiang ha mmen to vam. 27 Kyon ochona hotüv vanphensanphen evüngkatana mpensü etssüi sia tsükae sisi n myuthüng jo mmen to vam. 28 Ompvü ejen ji esan si sülo tsüngon tiying nhyaksi süloti ntssüngchethaka to khanhyav. 29 Tsüngon tizao jilo ompvüna yukhyu mekana vefü eni bensi OPVÜI vanrhyu ji kipüng jilo pvüti ji thüngi hansi wov. 30 Pvüti jina woro motsünga jo erung than motsünga jo mmen than to piyia shikhfü ephan ompvü nthochev. 31 Israel kyon jiangna onte mmen myak jiang tüngochüngtale to OPVÜI na ntangshon yi Moses picho, ntiotssole onte vanphen lungi OPVÜI vanrhyu ranki ji n menthukvü tsükona. Ontena hoji mmenthuka na onte chüthukvü 32 Shikhfü shiang jo eboena mmen yia osi onte tsükjü chiyiathüng tona, 33 eloena ompvü tathi mmen yiathüng osi hotüv eloe thüngi eboena ponilan tssoathüng to tsükona.

Pvüti 16

Thungthan Tsüngon

1 Aaron tsoe otsük eni ji ontena n thomi na OPVÜI thana thüng chüthoko ji sülo OPVÜI na Moses heto ezocho. 2 "Nijenio Aaron ji zonchak chungi vanphen jilo jo yuta eben jilo rhowochev meka to ezoa, ntiotssole jilo jo ana elukina oro Ntsata vaphen Bakos ji elhüp ji poni vanphen ji. Ombona hoji n ngachojo ombo chüthokuka. 3 Ombona mmen than tssibungro tona erungthan olyuro to bensi tham tsükona yakajo nthotsowo vanphen jilo rhowov meka." 4 Jisülo jo OPVÜI na heto shikhfü pilancho. Aaron na nthotso jilo n rhowothüng ombona tsükae sisi pvüti mpensü jiang ekav: sünyipvü phuknrhüo ji tona sütukaro jiang, ryukhüng tona kiven to jiang. 5 Israel khümtsüng na mmenthan nyanyan bung eni tona olyu bung motsünga to Aaron piv. 6 Aaron na ombo mmen tona ombo opan mmen to khi siv tsükona tsibung motsünga tham. 7 Tona ombona nyanyan bung eni ji khi süsi OPVÜI vanrhyu ranki kibüngi wov. 8 Ombona hojilona phyalu zev, osi olung eni khi motsünga jo "OPVÜI echi" to eranka motsünga jo "Azazel echi" to eranka toli tsakae zev. 9 OPVÜI echi to tsako ji khi Aaron na mmen than tssoa piv. 10 Azazel to erankacho tsakao jijo eküm na OPVÜI thansi, lijüngi Azazel thüngi yithokvü. Hoji jo kyon jiang mmen jiang khi siyiv tsükona. 11 Kvüthüng Aaron na ombo tona ombo wopan to tsükona mmenthan tssibung thana sana, 12 ombona miron thanphen motsünga lo miron epying thanthei jilo tssütsserhüm khezüm eni thei nthotsowo chungchak jilo hansi rhowovka. 13 hojito OPVÜI vanrhyu lona ombona tssütsse ji rungi miphung jina Ntsata Vaphen elhüp ji eyukzhüthoku, to n tssoa na ombona hoji hungi ombo chüv. 14 Ombona tssibung ji ejen tara khi Ntsata Vaphen elhüp ji poni erhika, tosi Ntsata Bakos mhadungoe ha yenjo tiying erhikav. 15 Jisülo jo ombona kyon jiang mmenthan nyanyan ji lüngthae ejen ji khi nthotsowo chungchak jilo hana rhowo Ntsata Vaphen elhüp jilo erhika, Bakos ji mhadungoe erhika to, tssibung ji ejen ji erhikao ji esüa erhikav. 16 Hojitolyui ombona nthotsowo chungchak ji Israel jiang n thono osi mmen topvü lona nthochev. OPVÜI vanrhyu ranki ji ombona hoto nthocheo jijo ranki ji mmen kyon ochoang jo shikhfü ephan n tssüngchehancho sana jiang ndüngo tssokachio ji tsükona. 17 Hojito Aaron nthoche elhilo rhowo ji lona benkae kholani n chiyithüng nandang ochinaha vanrhyu ranki jilo khothev meka. Ombona, ombo wopan osi kyon jiang nthoche elhi ji thakthakana 18 elani ombona erungthan tsükona thanphen ji owo nthochev. Ombona tssibung ji ejen tara, nyanyan ji ejen tara to khi owo thanphen ji nken jianglo esekav. 19 Tothakana ombona ombo yingro jina edyuka akvülo yenjo tiying erhikav, osi ombona hojitoli Israel kyon jiang mmen lona thanphen ji nthochev.

Thungtssoe Nyanyan Ji

20 Aaron na nthotsowo chungchak ji, OPVÜI vanrhyu ranki ji tona thanphen ji to ntssüngche elhi jiang thakthaka na, Azazel tsükona vao nyanyan ji OPVÜI thüngi piv. 21 Ombona khetsungkhona nyanyan ji kvürilo nyimkae Israel jiang n mhon, mmen osi Potsow panlamo etso-ephyo jiang topvü phyochaku, tona hojiang topvü nyanyan jina hansi yiv. Jisülo jo nyanyan ji phana evov zikae vao kyon jina phana owo lijüngi phanchi siv. 22 Tona nyanyan jina kyon jiang mmen jiang hansi kyon n van metae rhomoni yi siv. 23 Jisülo jo Aaron na pvüti pipo hansi nthotsowo vanphen jilo rhowo mpensü jiang phungche. OPVÜI vanrhyu ranki jilo vav. 24 Tothakana ombo na ntho metae na tsüka si ombo mpensü jiang ekav. Hoji süloti ombona chiwo ombo mmen osi kyon jiang mmen tsükona erungthan ji piv. 25 Ombona mmen than ekümrümo ji ethyu ji thanpheni na runguka. 26 kyon ochona nyanyan ji Azazel thüngi phanchilo ocho sana jina ombo mpensü jiang etssüi sia tsüka sanati nzontsü vanpheni rheyivka. 27 Jisülo jo tssibung osi nyanyna kumoe nthotsowo vanphen jilo ejen na mmen than picho sana ji so jijo erü tssae hansi chivo runguka. 28 Kyon ochona hoji rüngcho sana ombona nzontsü vanpheni n rheyithüng ombo mpensü jiang etssüi sia tsükae sidemka.

Thungthan Tsüngon Mungyanchi

29 Nchünkhon tsükona shikhfü oküpoe elio shiang benphivka. Choro tiyingo jilo tsüngon taroto jilo jo Israel osi onte nzo evan metapoe kyon jiang topvüna ekhang khivka osi elhi ha ntia tssov meka. 30 Hoji tsüngon no jo mmen lona onte nthochev tsükona tssolanphyolan jiang tssovka. 31 Hoji jo onte tsükona elümoto ntho tsüngon, ontena elhi n tsso na ekhang ekhiv tsüngon. Hojiang shikhfü ji nchüngkhon benphia ewov lia. 32 Pvüti tsüphoe ocho jo opo echungcho khuka nthochaki benri vanthukcho sana jina nthoche tssolan jiang tssovka. Ombona pvüti mpensü hansi 33 nthotsowo vanphen ji, OPVÜI vanrhyu ranki ji, thanphen ji, pvüti jiang osi khümtsüng kyon topvü tsükona nthoche elhi ji tssovka. 34 Shikhfü shiango nchüngkhon tsütsata wovka. Tssolan shijo Israel kyon jiang mmen lona nthochev tsükona nzyualo yenjoa tssovka. Hojito OPVÜI na ezoji esüa Moses na tssocho.

Pvüti 17

Ejen Jo Ntho

1 OPVÜI na Moses ezoa 2 shikhfü shiang Aaron tona ombo tsoeden osi Israel kyon topvü to thüngi pithukcho. 3-4 Israel kyon ochona OPVÜI etham tsükona mangsü tssolea, nyanyan tssolea OPVÜI vanrhyu ranki ji kibüngo na yaka meta thanpoe na lüngthata sana jina shikhfü yesothaka. Ombona ejen zanthuko ji tsükona enhungo Potsow kyon jiang yolo tsüka to ombo n khanhya. 5 Shikhfü shi yichak jo Israel jiang na hapoe na thama ekümrüm lüngthata vamo jiang ha topvü OPVÜI thüngi hansi rov tsükona. Ontena enhungo ekümrümo jiang hansi oro OPVÜI vanrhyu kibüngo pvüti ji thüngi hansi oro khümshümta than tssoa tatsünguka. 6 Pvüti jina ejen ji khi vanrhyu ranki kibüngo thanphen ji nkonphia phyangkasi ethyu jiang rungi OPVÜI chokao rhüm. tssothuku ka. 7 Enhungo Israel kyon jiangna OPVÜI n longtsüka elhi esüa meta thama lona ekümrümo lüngthae mmen mon jiang thüngi othan piv meka. Israel jiang na shikhfü shiang nchüngkhon benphia wovka. 8 Israel tssolea pvüjipoe tssolea Israel okho lo vana evan ochona erungthan osi thanpo than jiang, 9 OPVÜI vanrhyu kibüngo na yaka OPVÜI thana sana kyon mo jijo Potsow kyon to khanhyav meka. 10 Israel kyon na tssolea jipopoe okholo vancho tüv na tssolea ochona oso ejen n kyingkav tsoa sana ji OPVÜI na ombo khomvü osi Potsow kyon yolo khanhyav meka. 11 Eküm evamo jiang topvü eküm ji ejen jilo jüala. Hoji tsükona OPVÜI na kyon mmen khi siyiv jo othan jilo ejenji khi thanphen jilo chükale to yizüng picho. Ejen jo eküm tsso jina mmen epyoe sichetala. 12 Hoji tsükona OPVÜI na Israel jiang ezocho, onte tssolea yentsae onte thüngi vancho tüv tssolea ejen khyinga oso tsov meka to. 13 Israel kyon tssolea onte ndüngo jipopoe vancho tssolea ochona oso phano woe mekana woro khümo woe tsohunga sana ejen jijo likoe zanthuki ochon na thanzhüi sivka. 14 Eküm evamo eküm topvü ji ejen jilo jüwo ji tsükona OPVÜI na Israel jiang ji ejen khyinga oso ti-tsole to ezocho. Ochona ejen khyinga oso tsoana ombo kyon to nkhanhyav siv. 15 Elani Israel kyon tssolea thanpoe kyon tssolea ochona ekümrümo chücho mekana orae ekümrümo na rümcho jitüv rajak tsoa osi evüngkata sana jina mpensü etssüi sia tsükae siv lia tolea n myuthüng ji mmen to vam. 16 Ombo na hojito n tssoana hoji man ombona ezüp tssükav.

Pvüti 18

Ponilan Lo Sariv Lanka Jiang

OPVÜI na Moses yakchia, 2 Israel jiang heto ezocho, "Aiyo OPVÜI, nte Potsow jika. 3 Ntena ovüngthüng nte nzo vamo Ejip kyon jiang etso-ephyo, osi ana nte epiv phyochako Kanaan meta jilo evamo kyon jiang etso-ephyo jiang tihungchotava. 4 Tolea ana ntio nte ezoa na ji engata a yizüng jiang benphitava. Aiyo OPVÜI nte Potsow jika. 5 Ana shikhfü osi tssolanphyolan nte pio jiang tsütsatava; hojito tssona jina nte eküm shanchovka. Aiyo OPVÜI ji." 6 OPVÜI na shikhfü shiang ha picho. Nte wopan ndüng jiang thüngi ponilan ti-tssotava. 7 Niyo thüngi ponilan tssoe nipo tiyikrathuka osi omying ti mmenia. Nina niyo ha n yirathuku shikhfü. 8 Nipo eloe jiang yulo tsüka thüngilea ponilan tssoe nipo ti-yikrathuka. 9 Ni kina süphichecho tssolea hojitüv meklea, ni yulov ndüng tssolea, ni yuloe nshoni tssolea to jiang thüngi ponilan ti-tssoa. 10 Ni tsorüv jiang thüngi ponilan ti-tssoa. Hojito tsso jijo nibobo mmenala. 11 Jipo motsünga chungi ni yulov jiang thüngi ponilan ti-tssoa; hojiang ha niyuolovden ka. 12-13 Nino thüngi ponilan ti-tssoa, mekana niyoro jiang thüngi ha ti-tssoa. 14 Niporo tsoeni thüngiha ponilan ti-tssoa; hojiha niyo ka. 15 Ni tsokhyongo tsoeni thüngi ponilan ti-tssoa, 16 mekana ni jenio tsoeni thüngiha ponilan ti-tssoa. 17 Nina ponilan tssoa ero eloe ji otsolov mekana hoji tsorüv tüv thüngiha ponilan ti-tssoa, onte ji ni opan, ejen motsünga tssokhuka, hoji tsükona hojitüv jo okilo worhyutacho tssoala. 18 Ni engh ji eküm evanthüng nandang jo nirahm ji ni tsoeni ti-tssoa. 19 Eloe na men yiathüng ponilan ti-tssoa, ntiotssole ompvüontssüng-rüng yutalo vana. 20 Oyam tsoeni thüngi ponilan ti-tssoa; hojina ni mmenhyav. 21 Ni ngaro ochia Molekh Potsow khümpheni othan tssoa ti-pia; ntiotssole hojijo OPVÜI Potsow yikrathuko elhi. 22 Eboe ochi naha eboe thanpoe thüngi ponilan ti-tssoa, hojitüv elhi jo Potsow na tsakala. 23 Eloe na tssolea eboe na tssolea ekürümo thüngi ponilan elhi ti-tssoa; hojitüv phola elhina ni mmenala. 24 Shiang hetopvü khi nte timmenthuka, ntiotssole tssolanphyolan shiango Kanaan lo evan n longtsüi ochoang OPVÜI na phani sisi nte vanthukcho sana jiangna benphia onte popo mmentao jiang elhi. 25 Onte etso-ephyo jiang na meta ji mmenhtuko jina OPVÜI na meta ji khi kyon jiang phani sithoku tsükona meta ji jaktoncho. 26-27 Ontena etssakthao shiang tssota meta ji mmenthukcho khatola ntena jo hojito tssov meka. Nte topvü na Israel kyon tssolea, thanpoe nte ndüngo vamo jiang na tssolea jiang topvü na OPVÜI yizüng jiang benphivka, 28 hojito tssona meta jina ntena n yithüng kyon jiang khoe esio ji esüa nte siv meka. 29 Kyon ochona etssakthav elhi shiang tssoa sana Potsow na ombo kyon yolo n khanhya to ji ntena ntsia. 30 OPVÜI na heto phyocho, "Ana nte pio yizüng shiang enga benphitava; osi nte vüngi na evamo kyon jiang etso-ephyo ti phankatava. N mhon hetüv motsünga lea benphi nte popo timmentava. Nte OPVÜI, Potsow jo A ka."

Pvüti 19

Ntho Osi Ntsanrük Shikhfü

1 OPVÜI na Moses yakchia Israel kyon jiang thüngi heto ezothukcho, 2 "Ntena nthoa vantava, ntiotssole A, nte OPVÜI Potsow jo Aiyo ntho. 3 Nte otsük akvüna opo osi oyo yikrachitava, osi ana nte ezo ji esüa esanmung ji benphitava. Aiyo OPVÜI nte Potsow jika." 4 A khaki sisi kisü khümta ti-woa, yonjakna ha potsow nsüngrüi ti khümtava. Aiyo OPVÜI nte Potsow jika. 5 Ntena khümshümta than etssov tsükona ekümrümo tatsünga thüng ana nte pio shikhfü jiang ephan tssotava, tona othan ji ana nte khichoyivka. 6 Ekümrümo ji lüngthao ji nchük mekana ojyuato na oso ji tsorav shikhfü. Tsüngon ethümo to jana oso enhyo jiango rungi siv lia, 7 ntiotssole hojijo shikhfü ephanina n tho, hoji tsükona ochona hojitüv tsoana jijo ana khichoyiv meka. 8 Ochona othan kümoe khochaki pithakcho tüv tsoana hojina othan ji ata-sha kümthukala, küma ombo a kyon yolo khanhyav meka. 9 Ntena oli riana mvüthan jiang etsümkata ri ti-khia, osi mosü jiangha yana ti-olana. 10 Ntena jününgrothi lhoathüngha enhyokao jiang ti-khilana, osi likoe elongcho jiang ti-khyoa. Hojiang topvü yantsae osi metapoe kyon yentsae jiang echi vayia. Aiyo OPVÜI nte Potsow jika. 11 Ti-füa, ti ejethechia osi ejüng ti phyoa. 12 Nina benphiv to n zikav jo a myingo na ti echüma; hojina a mying mmenala. Aiyo OPVÜI nte Potsow ji. 13 Oyam n tssocho benta lo ti bupthuka, osi ti efüyia. Nina mmyolo so ji jokheman ji zümoa tia ti valanchiyia. 14 Nobüng jiang ti rhiyia osi mhyikjung jiang nshüphithukvü ntia mhadungoe ti vayia. A kyutava, aiyo OPVÜI nte Potsow ji ka. 15 Ntena yitssolo methak khiathüng ntsa nrük osi chimyan theta methak-tava. Yantsae jiang thüngoe thelanga mekana ejüeli jiang kyua ti tssotava. 16 Oyam echi ejüng ti bukcheyia, ochona sana yitssopheni van na nina ehungpvüi phyo jina ombo zenzanchikhuka na zetena. Aiyo OPVÜI ji ka. 17 Ochi thüngi ha oyi rhükae ti lithuka, hoji tüv lia sayilea mmyantae siv yana, tona ombo tsükona nina mmen tssov meka. is Ochia ti nlilana, mekana sunga oyam tssaka ti vana. Ni phinakishü jiang ji nipopo nzana esüa nzana. Aiyo OPVÜI jika. 19 A yizüng jiang engatava. Oki ekümrümo echümpotao tüv khi ti phankatathuka. Oli motsünga lo mojülan eni ha ti theta. Sülan eni khümtsütacho ha ti mpentava. 20 Kyon tsükana ombo ezi eloeroro ji yingaloroe tssoa eküma vansi hoji man ntia ompvü n pihan, vachiha n vachihan, to tssoa vanathüng ji eboe thanpoe na ompvü thüngi ponilan tssona ezüp oni piv, tolea chüthukvü jo n tüm, ntiotssole ompvüo ezii tssoa vanpvü. 21 Tokhatola ombona lolan than a vanrhyu kipüngona tham tsükona olyu bung hansi rovka. 22 Tona pvüti jiangna hoji khi nthoche elhi tssoyiv. Tona nlan ombo siyivka. 23 Ntena Kanaan meta jilo kvüthüng rheyi tssüngthi yinga sana nzyu ethüm nandang jo tssüngthi jiang n tho to ntsitava. Hoji yutalo tssüngthi ethio jiango ntena n tsov shikhfü. 24 Nzyu mezhüo to jilo jo tssüngthi lonphen topvü khi a thamvüka, ntiotssole aiyo OPVÜI ji. 25 Nzyu mongoto loti ntena tssüngthi ji tsokhuka. Ntena hojito benphina nte tssüngthidung jiangna elümoto ethiv. Aiyo OPVÜI nte Potsow ji. 26 Ntena oso lo ejen n kyingkav ti tsotava. Oyam sori-s otük elhi ti tssotava. 27 Nte enojüp tssungkhoata lo otssan jiang ti tssütava, mekana men-hüm jiang ha ti tssütava 28 otssuk jiha eranroe ti hantava osi echü kyatathüng ha otsüko ti phothechitava. Aiyo OPVÜI ji ka. 29 "Nte otsolov jiang khümpheni lonsü lonphyo elhi etssov lo ti wothuka, ntena hoji to tssochojo potsow thanpo yanta yiv osi lonsü lonphyo na meta ji pyingüv. 30 Esanmung ji mmhona benphitava osi a khümphen meta jiang kyuchitava. Aiyo OPVÜI ji ka." 31 "E chüi mon jiang thüngi thyutae jiang thüngi na ndungntssung ti khia. Ntena hojito tssochojo nteha n tho nte kümvü. Aiyo nte OPVÜI Potsow ji. 32 "Eran jiang yikrachi kyuchitava. Aiyo OPVÜI ji ka, A kyuchitava. 33 "Metapoe kyon nte yulo vana vamo jiang ti khangshitava. 34 Ontena Israel kyonden nzana to nzantava osi nte popo nzana to nzantava. Nteha tsüngona lojo Ejip metae jipopoe tssoa vancho to ti mhechotava. Aiyo nte Potsow OPVÜI jika. 35 "Oyam ejiphia etsi-konphen, efü-seri, osi etük jiang phephia ti tsütsatava. 36 Efü-seri, duki-long, osi etük jiang ntsanrüka benphitava. Aiyo OPVÜI nte Potsow ochona Ejip metae na nte sochokcho sana hoji. 37 A yizüng osi shikhfü topvü enga benphitava. Aiyo OPVÜI ji ka."

Pvüti 20

Jancho N zo Man Ezüp Ntssonshi

1 OPVÜI na Moses yakchia Israel kyon jiang heto ezothukcho, 2 "Nte ochona sana, osi nte ki evan Iankon ochona ngaro khi Molekh ekhümvü lo pithuka sana topvü na sani kyon ji ephyatsüngi sia. 3 Ochona ombo ngaro khi Molekh potsow pia a ntho ki mmenthuka sana osi a ntho mying mmenthuka na ana kyon mo ji zevka osi a kyon to khanhyav meka. 4 Tokhatola okho jina n hung ntan tssosi n chüthuka tssona, 5 ana a bobo kyon mo ji, ombo wopan osi thanpoe ochoang na ombo khümkae a yenchoa Molekh khümta yiasana topvü ana zevka. Ana onte ji a kyonden to n khanhyav sivka. 6 "Kyon ochona echüi mon thüngi ngatüngari lo woasana ana ombo zevka osi a kyon to khanhyav meka. 7 Aiyo OPVÜI nte Potsow ji ka, ntena nthoa vantava. 8 A yizüng benphitava, ntiotssole aiyo nte nthotoko OPVÜI ji." 9 OPVÜI na shikhfü shiang picho. Ochona opo osi oyo rhiyikata sana ombo chüthukvü; osi ombo chülea ombobo chüthukcho tssoala. 10 Ochona ombo shom Israel kyon thanpoe engh thüngi worhyuta na eloe jiha eboe jiha chüthuka. 11 Kyon ochona opo engh thüngi worhyuta na eloe ji wonita chüthukvü, ntiotssole ombona opo yikrathukala. Oni chüo ji woni bobo yancho. Ohaji wonina ham. 12 Eboe ochona ombo tsoeji engh thüngi worhyuta na onita chüthukvü. Ntiotssole onteno okilo worhyutacho osi oni chüo ji wonibobo yancho tae. 13 Eboe ochona eboe thanpoe thüngi ponilan tssoa sana onina enkongthao elhi tssothaka, hoji tsükona woniata chüthuka. Oni chüo ji woni pono tae. 14 Eboe ochona eloe ompvütsoeata ombo engh etssov khirhüma sana onthümata rungtsüngi sia; nte yulo jo hotüv tssotav meka. 15 Eboe ochona ekümrümo thüngi ponilan tssoa sana woniata chüthuka. 16 Eloe ochona ekümrümo thüngi ponilan tssoa sana jiangha woniata chüthuka. Onte chüo ji haji woni pono. 17 Eboe ochona oyilov osi oporo ota ndüng tsolo soa vanasana oniji okho lona yikrathuksi okho lona phanchukchi sia. Ombona oyuloe worhyuo jina hoji man ji ezüp khivka. 18 Eboe ochona eloe mmen eyi yutalo ponilan tssaosana, onita okho lona phani sia, ntiotssole ntssüng-rüng shikhfü yesothaka. 19 Eboe ochona oporo ota engh thüngi worhyua sana ombona oporo otaji yikrathukala, hoji tsükona eloe ji wonita na ezüp khivka. Osi woniata otsoe oro n liv chüvka. 20 Eboe ochona ojenio engh soa vanasana woniata otsoe oro n liv chüv. 21 Ombona ojenio yikrathukala, osi mmen ntho shikhfü yesothukala. 22 OPVÜI na phyocho, "A shikhfü yizüng jiang benphitava, to tssona ana nte sothechia evamo Kanaan meta jina nte siv meka. 23 Meta jilo evan jiang etssophyo ti khitava, ntiotssole ana nte vanthukvü tsükona n longtsüi jiang phani siv sala. Ontena etsso-ephyo n mhoncho lona a lüm tsukthukthaka. 24 Tokhatola meta lizü mmhom hetüv nte piv phyochako ji nte pivsala. Aiyo OPVÜI nte Potsow ji, hoji tsükona jipo topvü yulona tsachoki echümpo nte vanthukthaka. 25 Hoji tsükona ana woro osi ekümrümo ha ntio jo ntho ntiojo n tho sana khotathukthaka, ntena hojiang khota lia benphitava. N tho ekümrümo osi woro jiang ti tsotava. Ana n tho to phyothako jiang ntena tsochojo n tho nte kümala. 26 Ntena nthoa vansi a thüngoe tae vamka, ntiotssole aiyo OPVÜI ji osi nthoa. Ana jipo thanpoe jiang yulona nte khochaki vao jijo a echi tae nte kümthukvü tsükona". 27 "Eboe tssolea eloe tssolea ochona echüi mon jiang thüngi thyutav yanasana ntena ephyatsüngi sia. Ombo osi ompvü chüo ji onte pono."

Pvüti 21

Pvüti Jiang Ntsa Ntho

1 OPVÜI na Moses yakchia Aaron pvüti okho jiang heto ezothukcho, "Pvüti ochina ha, ombo oyo, opo, tsokhying, tsolo, ojenio 2 mekana oyuloe n yanpiv ombo ki vana vancho jiang echü yaka wopan thanpoe chüathüng, 3 talüngo woe ombobo n tho kümthukvü meka. 4 Lolanta thüngoe na opantao tüv echü zelo osi ombobo n tho kümthukvü meka. 5 "Pvüti ochina ha echü nongra chekaphen tssoa kvüri tssüa, menhüm tssüa osi otsüko tsüthechia to tssov meka. 6 Ombona nthoa vam shikhfü osi a mying n menthukvü shikhfü. Ombona etsoyu than a piala, hoji tsükona nthoa vamvü lia. 7 Pvüti jijo ntsennthoa, hoji tsükona ombona eloe lonsü lonphyoa vanthakcho mekana sichicho tüv soa vam meka. 8 Pvüti jina ha etsoyu than jiang a piala, hoji tsükona kyon jiangna ha ombo ji nthoa to ombo nchümiv lia. Aiyo OPVÜI ji, aiyo ntho tsso jina ana a kyon jiang ntho kümthukala. 9 Pvüti otsolov na lonsülonphyoe küma tssona om bona opo yikrathukala, hoji tsükona omina rungtsüngi chüthuka. 10 "Pvüti tsüphoe jijo kvüri lo thyujü nzüyia khochaki pvüti pipo hanthukcho, hoji tsükona ombona echü nongra yuta ka to ejüv tsükona kvüri n khev osi osü reroe sia to ti tssoa. 11-12 Omboji a lo nthochaki vanthukthako jina ombobo n tho ti kümthuka, osi ombo opo oyo mpato chülea hojiang zethachisi a ntho süranki ji ti mmenthuka. 13 Ombo ntsennthoa evan loroe tüv soa vamka, 14 Oyam na sichicho, emi mekana lonsü lonphyoe tüv soa vam meka. Ombona ombo pvüji lo ntsa-nthoa evan tüv soa vamka. 15 Hojito n tssoana ombo ngaroden ochoang ntho tssov shikhfü sana jiangha n tho tssoala. Aiyo OPVÜI ji osi a pvüti tsüphoe ombo tsswothukvü ana khochaki ombo vanthukcho. 16 OPVÜI na Moses yakchia Aaron ezocho, 17 "Ni tsoronichen yulo otsük oso n pennzii ochinaha etsoyu than a piv meka. Shijo nchüngkhon tsükona. 18 Mhyikjung, jojang, omha odon yesocho osi lyusoracho ochinaha etsoyuthan ji a tham meka. 19 Ojo mekana okhe n mhohvtüy, 20 echen nkhfüi osi n rankae, omhyik mekana ofü nochonori eli, elani bokyu-lokyu ochina ha etsoyu than a piv meka. 21 Aaron pvüti ji tsoronichen yulo otsük osolo n pen-nzio ochina ha etsoyu than ji apiv meka. 22 Hojitüv kyon na etsoyuthan ntho jiang mekana nthotsowo' etsoyu than jiang tsokhuka, 23 tokhatola onteno otsük osolo n pen-nzio jina: ntho chungchak ji ndüngo osi thanphen ji ndüngo jo rochev meka. Ombona ntho tsütsaelan shiang miiienthukvü m'eka, ntiotssole aiyo ntho osi ana nthoa onte vanthukala." 24 Shiang hetopvü Moses na Aaron thüngi, Aaron tsoe jiang osi Israel topvü thüngi ezocho.

Pvüti 22

Othan Ji Ntho

1 Opvü1 na Moses yakchia 2 Aaron tona ombo tsoe jiang to ezothukcho, "Ntena a ntho mying ji ti mmenthuka, Israel kyon jiangna a thüngi ntho than a pio jiang nthoa vanthuka. 3 Ni tsoronichen ochona n thono yutalo, Israel kyon jiangna ntho than a piathüng ndüngo roa sana jina elani jo kvüthüngha thanpheni elhi tssolam meka. Shijo nchünkhon tsükona shikhfü. Aiyo OPVÜI ji ka. 4 "Aaron tsoronichen ochina ha ratsü noathüng osi otsüko mmen yiathüng ntho than jiang tsov meka. Pvüti ochona echü evüngkacho lona n tho kümthuko tüv tsütsaelan evüngkata sana, osi tsük-jü yia, 5 mekana ekümrümo osi kyon echü evüngkata sana jithüng jo ombo n tho. 6 Pvüti ocho n tho sana jijo n myuthüng nandang jo n tho to vamvü, osi tsükasanati ntho than jiang tsov. 7 Engrheta na ombo nthochetala, tosanati etsoyu nthothan jiang ombona tsovka; 8 Ekümrümo chücho osi rajak so to jiango ombona tsov meka. Hotüv na n: tho ombo kümvü. Aiyo OPVÜI ji. 9 "Pvüti topvü na ana pio shikhfü jiang benphivka, to mekana ontena nlan rhükae jina onte chüvka, ntiotssole ontena ntho shikhfü yesocho. Aiyo OPVÜI ji, ana hojiang nthoa vanthukala. 10 "Pvüti wopan kyon taena ntho than jiang tsokhuka, ji yaka ochina ha n tsokhuk; pvüti ndüngo evan osi pvüti jina engochoe vanthuko jiangna ha n tsokhuk. 11 Tokhatola pvüti rang na shicho phajae osi ombo kina bukcho phajae na jo pvüti na khio etsoyu jiang tsokhuka. 12 Pvüti otsolov pvüti mekcho tüv thüngi yanpio jina ha ntho than jiang n tsokhuk. 13 Tokhatola pvüti ji otsolov yanpicho emi küm na osi sichitae ngaro n vam oyi opolo enhyikae vancho tüv tssona ompvüna jo opona pvüti etsoyu khichowo jiang tsokhuka. Pvüti wopan kyon jiang taena ntho than jiang tsokhuka. 14 "Pvüti wopan mekcho tüv na ntho than jiang n tsiv tsorhak na tsothako jilo mekyu chia ekae pilam. 15 Pvüti jina ntho etsoyu jiang 16 kyon shae tsothuki mmen rhukvü n li, ntiotssole hoji ome ji kyon jilo kav. Aiyo OPVÜI ji, ana othan jiang nthoa vanthukala." 17 OPVÜI na Moses yakchia 18 Aaron, Aaron tsoe osi Israel jiang heto shikhfü picho, "Israel osi Israel lo evan jipopoe na phyochaki vancho than lea erungthan lea kvüthüng erungthan pia sana, ekümrümo ji ntia ome n khyingo tüv pivka. 19 Ntia ome n khyingo tüv ekümrümo obung tüv than sanati elonchoyivka. 20 Ntena ekümrümo ome ekhyingo tüv thancho jo OPVÜI na e khichoyiv mek. 21 Ochona sana phyochak than lea, erungthan lea, khümshümta than piana ekümrümo ji ome n khying sanati khichoyiv. 22 Eküm rümo mhyikjung, ojeokhe n penri osi tssatssocho, elani emho tsünga vancho, elani ofü jenrhüpcho khyingo tüv OPVÜI n tham shikhfü. 23 Lüm erungthan jo ekümrümo n bentso tüv lea thankhuka, tolea phyochaki vacho than jo hojitüv jo n thanche. 24 Ekümrümo obung otsüng ji yesocho tüv osi jilo okhfü khyingo tüv ha tithana. Hotüv jo nte meta shilo shikhfü lo nli. 25 Metapoe kyon thüngina khicho ekümrümo khi etsoyuthan ti-tssoa. Hojitüv ekümrümo jo ephyoerüv lia, osi n khichoche. 26-27 Kvüthüng mangsüro, olyuro, osi nyanyan ro nroa sana tsüngon tiying n tssov jo opvü ji thüngi na khi hansi yiv meka, tokhatola hoji sülo jo etsoyuthan khikhuka. 28 Mangsü ompvüroni lea, olyuompvüroni lea, nyanyan ompvüroni lea enga yuta lona ompvüroniata jo thamvü meka. 29 Ntena OPVÜI othan piana shikhfü shiang ephani na thana, tona nte khichoyivka; 30 osi tsüngon tsük jilo tsoe sia, ojyuato jana tilithuka. 31 OPVÜI na phyocho, "Aiyo OPVÜI jika; A yizüng benphitava. 32 A ntho mying ji timmenthuka; Israel kyon topvü na ntho to a chethev shikhfü. Aiyo OPVÜI ji osi ana ntho nte kümthukcho; 33 Ana nte Potsow etssov tsükoan Ejip metae na nte sochecho. Aiyo OPVÜI ji."

Pvüti 23

Ekhüm Tokhu Jiang

1 Israel jiangna khümtav sanrhyuta thüng tsükona, 2 ekhüm tokhu lo tssolanphyolan jiang OPVÜI na Moses yakchia picho. 3 Ntena nte elhi etssov tsüngon tiruk lia, tokhatola tsüngon tiying to jijo esanmung ka toji ti-mhechotava. Hoji tsüngono jo elhi ti-tssotava tolea sanrhyui khümtava. Ntena shilo vanlea shilo vanlea esanmung tsüngon jijo OPVÜI echhi. 4 Oküpoe tokhu shiang yuta eben lo khitava.

Yakchi Tokhu Tona Vümhi Ntheo Hümri To

5 Yakchi tokhu, OPVÜI Phfütsonthoku tokhu jijo choro ovüngo jilo tsüngon taro mezhüoto ji eng rhecho sülo benkatala. 6 Tsüngon taro mezhüto jilojo vümhi n theo hümri tokhu ji benkatala osi tsüng won tiying jo ntena vümhi thecho hümri tsov meka. 7 Tsüngon shianglo ovüngo jilo jo ntena nte elhi ntia tssov meka tolea sanrhyui khümtavka. 8 Nte etsoyu than jiang tsüngon tiying OPVÜI thantava. Osi tsüngon tiyingo to jilo jo ntena nte eng akvü elhi jiang tssov meka, tolea ntena sanrhyutae khümtavka. 9-10 Kvüthüng OPVÜI na nte pia vamo liko jilo oyi oli joni riana tssukchüng ovüngo jijo owo pvüti pia. 11 Ombona hoji khi echümporo than tssoa OPVÜI pivka, tona ni khichoyivka. Esanmungo ji ojyuato pvüti jina hoji OPVÜI pivka. 12 Ntena ethi-eben than pio ji tsüngono olyuro obung ephyoerüv n pao tüv ha erungthan tssoa OPVÜI pivka. 13 Hoji nzo ntena ohüm ha seri eni Olive thyujü lona nzii etsoyuthan tssoa pivka. Othan ji rhüm jina OPVÜI emathathukala. Elani ntena hoji nzo zükhi ha etükpvü motsünga thantava. 14 Osi ntena OPVÜI n thanthüng jo ethi-eben ethan. jiang, eshü tssolea, richo tssolea mekana vüpi tssolea ti-tsotava. Shijo nte jipo kyon topvü na nchünkhon to benphia evov shikhfü.

Liri Tokhu Ji

15 Ntena tssukchüng OPVÜI thamo ji tsüngon no na hopta tiying eben etsünga. 16 Osi tsüngon tinyamo to esanmung tiyingo to ji sülo tsüngon jilo ethi-eben than OPVÜI pitava. 17 Wopan akvüna hümri eni hansi echümporo than tssoa OPVÜI pivka. Hümri motsüngalo ohüm seri eni ni ren na rüngcho osi ebung mozhü theta rüncgho tüv khi ethi-eben lhochodemo than tssoa OPVÜI pitava. 18 Okho jinaha hoji nzo ephyoerüv n khyingo tüv olyuro nzyua tso, mangsübung motsünga, nyanyan eni to thamka. Shiang ji ethi-eben than ji nzo thamka. Othan shi rhüm ji OPVÜI na chokatala. 19 Elani mmenthan nyanyan bung motsünga, khümshümta than nyanyanro obung nzyua tso tüv eni to thamka. 20 Hojijo OPVÜI echümporo than tssothuka, pvüti jina olyuro eni ji tona hümri ji to thamka. 21 Hoji tsüngono jo nte elhi jiang ti-tssotana sanrhyui khümtava. Nte tsoronichen jiang na kvülo vana sana shikhfü shiang nchünkhon benphivka. 22 Ntena olina ethi-eben jiang lhoathüng litssae elio ethi-eben jiango hae sitava, osi hojiang yana ti-olana; hojiang jo yantsae tona tsan than to jiang echi vanthuktava.

Nzyu Ethan Tokhu

23-24 Choro tiyingo to jilo tsüngon ovüngo jijo echümporo esan tsüngon tssoa mungtava; osi tatara won ji zoana ekhümvü tsü, kona sanrhyutava. 25 Hoji tsüngono jo etsoyuthan ha OPVÜI pitava osi nte elhi jo ti-tssotava.

Thungthan Tsüngon Ji

26-27 Choro tiyingo jilo tsüngon taro to jijo kyon jiang mmen khi siv tsükona nzyua jilo tssolanphyolan opvü ji tssov. Hoji nchuk jo ntena ntia tsov meka; tokhatola sanrhyui khümta etsoyuthan OPVÜI pitava. 28 Hoji nchuk jo nte elhiha ti-tssotava, ntiotssole hoji jo mmen khi esio than epi tsüngon. 29 Ochona hoji nchuk ntiosana tia tsoyua sana ana akyon to khanhyav meka. 30 Elani ochona hoji nchuk elhi tssoa na OPVÜI na ombo chüthoku. 31 Shikhfü shiang jo nte tsoronichen jiangna kvülo vana yiana me ta topvü lona benphivka. 32 Tsüng won tokuoto ji eng erhe lona benkae tsüngon taro to ji eng erhe nandang jo ntia etsoyu n tssona esan tsüngon tssoa mungtavka.

Ranki Tokhu

33-34 Ranki tokhu ji choro tiyingo to jilo tsüngon mongo to jilo na benkae tsüngon tiying khiv. 35 Tokhu ji tsüngon ovüngo jilo jo elhi ntia tssov meka, tolea sanrhyui khümtakhe. 36 Tsüngon tiying ji akvüto ntena etsoyuthan pivka. Osi tsüngon tizao to jilo jo sanrhyutalani khümta etsoyuthan pitavaka. Hojijo ekhüm tsüngon etsso jina ntena ntia elhi tssov meka. 37 (Tsüngon shiang jo ntena ekhümlan tokhu khita, etssyurhyui khümta, etsoyuthan pita, erungthan, ethi-eben than pita ekümrüm than osi zükhi than pita to eng akvüto tssotakhe. 38 Tokhu shiang jo nte tathi than jiang, phyochak than jiang, osi lüm erüng than pitaphen jiang ephalo epio than ka.) 39 Ntena oli jiang rithakana choro tiyingo to jilo tsüngon taro mongoto jilo na benkae tokhu shiang khitava. tsüngon ovüngo jijo esan tsüngon tssovka. 40 Hoji nchuk jo nte tssüngthi dung jiang lona tara lho, Palm wo ndonchaki va, owo khoshao tüv dung lona khero ekhüp toli theta Potsow phfütssonthuko tokhu khitava. 41 Hojito tsüngon tiying tokhutava. Shikhfü shiango nte tsoronichen jiang na kvülo vana sana jilona yuta topvülo benphia wovka. 42 Israel topvü na hoji yutalo tsüngon tiying ranki vamka; 43 hojito tssona Israel tsoronichen jiang na Potsow na Ejip metae na nte sochetathüng hojito ranki nchenta chiyichoka to chekathoku tsükona. Ombo nte OPVÜI Potsow ji. 44 Hetolui Israel kyon jiang na ekhüm tokhu khio jiang yakchia OPVÜI phfütssonthokvü tsükona Moses na kyon jiang thüngi shikhfü shiang picho.

Pvüti 24

Milon Jiang Kiavanthuka

1 OPVÜI na Moses yakchia shikhfü shiang 2 Israel jiang thüngi picho: Süranki milonpvü jianglo olive thyujü njüm thei milon ji to kia vanthuka. 3 Mmyu akvü Aaron na milon jiang njükatava, osi nthotso meta jilo Ntsata vaphen Bakos ji zonchak ji pomoe OPVÜI vanrhyu jilo enyathüng jana kia vanthuka. Shikhfü shinag jo yuta topvü lo benphia wovka. 4 Shona njüm milondung jilo omi ji Aaron na zeyata OPVÜI vanrhyu jilo kiyata vanthokuka.

Potsow Thamo Hümri Ji

5 Ohüm seri taro eni khi hümri taro eni rünga. 6 Hümri jiang khi OPVÜI vanrhyu jilo shona njüm na eyuko saro ji poni otssa phukowoe tiruk, otssa phukowoe tiruk to reni vata. 7 Oren eniato lo OPVÜI thüngi etsoyuthan chekaphen tssoa tssütsserhüm njüm khi hümri jianglo theta. 8 Nchüngkhonto, esanmung akvü OPVÜI vanrhyu jilo hümri ji vavka. Shijo Israel jiang na nchüngkhonto tssoa evov tsükona. 9 Hümri jijo pvüti jiang tsükona OPVÜI thüngi etsoyuthan pio jiang lo ntsotso ji tsso jina Aaron tona ombo tsoronichen to ejan tssovka.

Ntsa Osi Elan Lona Ezüp Piojiang Ejyuka

10-11 Tsüngonalo kyon tsüka, opo jo Ejip kyon osi oyo jo Israel kyon Dan pvüji Dibri ji otsolov Shelomith to tsa vancho. Ombona okho vanpheni na Israel kyon tsüka thüngi khontacho. Osi khontathüng ombona Potsow rhiyio jina kyon na ombo sotasi Moses thüngi wocho. 12 Osi enhyang küpo ombo vanthuksi OPVÜI na kvüto ombo lyuyiv sana to nhyakta vancho. 13 OPVÜI na Moses ezocho, 14 'Vanpheni na kyon ji sochuka. Osi kyon kvütata na ombona rhiyia zochosana jiang topvüna nlan ombo piv tsükona onte khe jiang ombo kvürilo nyimkata, tosi kyon topvü na ephyatsüngi ombo sia. 15 jitosi Israel jiang ezoa, kyon ochona Potsow rhiyia na hojito khangshia chüthoku ka to. 16 Israel osi pvüjipoe Israel metalo vancho ochona OPVÜI rhiyia na kyon topvüna ephyatsüngi sivka. 17 "Ocho na omüng hana sana ji chüthoku, 18 osi ochona oyam ekümrümo chüthoka na ombo lothoku. Shikhfü ephanina eküm thung eküm khiyiv. 19 "ochona sana oyam tssatssoa tssona ombona ntio tssoyicho sana hoji ephan ombo thüngiha tssoyiv. 20 Oryu motsünga jakina ombo ryu ha motsünga jakiv, omhyik motsünga jukicho tssona ombo mhyik jiha motsünga jukiv, ombona oho motsünga elungicho tssona omboha motsünga ombo elungiv. Ombona kvüto oyam tssatssoyia sana hojito ombo tssoyilam. 21 Ochona ekümrümo lüngthayia sana hoji nliche pithoku, tokhatola ochona kyon eküm khiyia sana ombo chüthokvü. 22 Aiyo OPVÜI nte Potsow ji, shikhfü shijo nte topvü thüngi osi Israel metalo pvüjipoe vamo jiang topvü thüngi benphivka." 23 Moses na Israel kyon jiang thüngi shiang ezole, ontena kyon ji süchoki ephyatsüngi sitacho. Hojito OPVÜI na Moses ezoji esüa Israel jiang na tssotacho.

Pvüti 25

Nzyu Tiyingo Toji

1 OPVÜI na Sinai phunglani na Moses thüngi ezoa shikhfü shiang Israel jiangna benphiv pile to ezocho. 2 OPVÜI na nte pia evamo meta jilo ntena kvüthüng rheyia sana OPVÜI yikrachi chekav esüa nzyu tiyingo to jilo jo liko ji n jon na hae sivka. 3 Ntena nzyu tiruk jo mojü theta jününgro li jiang nrücheta joncho rücho hanrhyuvka. 4 Tokhatola nzyu tiyingo to jijo esantsü nzyu, OPVÜI lo khochaki evao nzyu tssothuka. Hoji nzyu jo mojü ti thetava osi jüngüngro li jiang ha ti nrüchetava. 5 Ntena n theo okyo lona buko jiang lea ti ria, osi ntena nrücheo jününgro zhü lona ethio jiangha ti-lhotava; nzyu jijo liko ji esantsü nzyu tssovka. 6 Hoji nzyu liko ji n jonlea liko jina etsov chiyithuki nte osi nte phajae jiang, nte yingae jiang, lankon nte nchen kae vamo jiang, 7 nte ekümrümo jiang tona nte li oso woro jiang to tswothukvü. Hojilona ntio chiyia sana tsokhuka.

Rilanta Nzyu

8 Nzyu tiying tüv tiying etsüngi nzyu zhüro si tuku tssothuka. 9 Jisülo jo choro tiyingo to jilo tsüngon taroto ji, rhancho tsüngon jilo kyon tsükana meta nken akvü thenjana tatara khfüa wothuka. 10 Hojito lyui ntena nzyu tinyamo to ji khochaki vanthuka osi meta jilo kyon topvü thüngi etancho lithukvü yithen pivka. Yuta shilojo ejüeli osi tsütsaelan yenthako jiang OPVÜI ovüngo ji khelo mekana tsoronichen jiang khelo yilanthuka, osi ezii yemo jiangha onte wopan thüngi elani yilanthukvüka. 11 Ntena nte li benro thev meka osi ombobo buko jiangha lhov meka elani ntena nrücheo jününgro zhü jiang lona ha tssüngthi lhov meka. 12 Nte tsükona jo nzyu totona nte nthoa vanthukvüka, osi oli jilona ntio tathi chiyia sana jitae tsotavka. 13 Nzyu shilo jo ovüngthüng yenthako tsütsaelan jiang topvü rilani OPVÜI ovüngo ji khelo chiyithukuka. 14 Hoji tsükona ntena kvüthüng kyon Israel thanpoe thüngi shisho khophita sana ntsanrük benphitava. 15 Liko shitao ji man jo shitao jilona benkae rilanta nzyu owo n janthüng kvüta jonchoe tsovsana hoji madangi shitava. 16 Nzyu khosha joni tsophen tssona oman ji tssükav osi nzyu tara tae joni tsov tssona oman ji matarov, ntiotssole oli jilona richowo ji ephan oman khitav. 17 Nte Israel kyon thanpoe jiang ti ejiphitava, osi OPVÜI kyutava.

Nzyu Tiyingo to Jilo Etsov Ji

18 OPVÜI shikhfü yizüng jiang topvüto enga benphitava tona ntena meta jilo noyingroa vanchevka. 19 Liko jina etsson ethiebem ka osi ntena ethev lio jiang benria joncho-rüchovka osi noyinga vanchevka. 20 Nzyu tiyingo to jilo jo ntio tsotavto to ochona sana emhukhoka, ntiotssole hoji nzyu jo mojü n the osi oli n ri. 21 OPVÜI na nzyu tiruko to jilo liko jilona tssona nte mmhayithukvü. 22 Ntena nzyu tizao to ji jonathüng ha nzyu tiruko to jilo richo jiang tsoa jontav, osi hoji nzyu ethi-eben n janthüng jo tssona etsov livka.

Tsütsaelan Pilanta

23 Liko ntena lio jijo nchünkhon nte echi mek, Hoji tsükona nchünkhon tsükona ti yena, liko jijo Potsow echi osi ntena yentsaeden esüa esüngaro hoe tsütsacho tae. 24 Kvüthüng liko yena sana tsüngona lojo OPVÜI jina hoji shilam elan lio ji chekatava. 25 Israel kyon ochosana yantsa lona liko eyamo tssona ombo okilo kyon na shii vav. 26 Hoji shii vayio tüv kyon n vamo jina lea tsüngona lojo pvülyua kümi hoji shicholana likhuka. 27 To tssoa na ombona ovüngthüng khiyio man jilona owo rilanta tsüngon ejam nzyu kvüta liana jilona joncho-rüchov elio ji man ji khakchei siyisi rilamka. 28 Tokhatola ombona rilanta man ji orang tssona n lia tssona owo rilanta nzyu n janthüng jo eshio ji khelo vanthuka. Rilanta nzyu loti opvüo ji khelo chiyilamka. 29 Kyon tsükana yantsü epi chungi oki yena tssona, nzyua süloti rilani khikhuka. 30 Tokhatola ombona nzyua yuta jilo n rilankhuka tssona ombona rilam elan lio ji monala, osi oki ji eshipvüo ji osi ombo tsoronichen jiangna nchünkhon onte echi tssov. Hojijo rilanta nzyu lea n rilanche. 31 Tokhatola epi n lio jiang lo oki yenchocho liko yencho shikhfü onte kheti tssovka. Hotüv jo OPVÜI ovüngo jina rilani khikhuka osi rilanta tsüngono jo OPVÜI ovüngo ji khelo chiyivka. 32 Tokhatola pvüti jipo jiangna jo epichakcho yantsü chungi lea oki jiang yuta thamalo rilani khikhuka, yantsü ji ontena elhi tssoji yantsü jilo tssona. 33 Yantsü motsüngalo pvüti jipo tsükana oki yena tssona osi rilani n khikhuka tssona, owo rilanta nzyu jilojo pvüti jipo ji pilamka, ntiotssole pvüti jiangna Israel kyon jiang yolo oki lio jiango nchünkhon to onte echi to vamvü. 34 Tokhatola pvüti jipo jiangna vamo yantsü ji nkona ero yantsophen li lio jiango kvüthüng ha yem meka, hojiango nchünkhon to onte echi.

Yantsae Epvünomo Jiang

35 Nte Israel kyon yulo ochosana yantsa lona ombo büng tia n chhoa tssona ombo ji nte yingae esüa tsonhya yunhyav lia, tona nte ndüngo vanchevka. 36 Ntia ti khiyina, Potsow kyuchia nte kyon thanpoe jiangji nte ndüngo vanthuka. 37 Ombona orang eno jiloha eran ti khiyia osi nina etsoyu ombo shithuko jilona ha ntia ekhak ti khiyia. 38 Shiang jo Ejip metae na nte sochuko Potsow ochona meta ji nte pia sana osi nte Potsow tssoa sana ji thüngina shikhfü yizüng.

Ezii Jiang Vachi

39 Nte Israel kyon ochosana yantsa lona ombobo ni thüngi ezii etssov yena tssona nina ezii elhi jiang ombo ti tssothuka. 40 Ombona ni yingae ejoe na rilanta tsüngon ji n janthüng nandang jo ni ndüngo vamka. 41 Hoji tsüngono jo ombo osi ombo wopan na niki sisi onte pyimtsü motsüi son oki yana yivka. 42 Israel jipo jo OPVÜI eziiden, OPVÜI na Ejip metae na onte sochukcho, hoji tsükona ezii ejoena onte yemvü meka. 43 Onte ti makshak khonshaka, tolea nte Potsow yi engatava. 44 Ntena ezii ethev lina nte nkonphia evamo jipopoe jiang shitava. 45 Ntena jipopoe nte tsankae vamo jiang ngaro jiangha shikhuka. Hojito jipopoe ngaro nte meta lona buko jiango nte echi tssocheta, 46 osi nte tsorinichen jiang echi vayikhuka. To tssona ontena nchünkhon ezii tssoa nte tsoronichen jiang benkav. Tokhatola nte Israel kyon jiang yolo jo haruk-hashüa ti tsütsatava. 47 Ntonsinato nte yolo evan jipopoe jina eli kümsi Israel kyon tsüka jijo yantsae kümi ombona lea mekana ombo wopan tssolea jipopoe ji ezii küma tssona. 48 Ombo yencho sülo lea rhanlani evam ombo elan lia. Ombo ejenio na, ombo opo ojenio na 49 Ombo opo ojenio na mekana ombo wopan kitsük ochona sana ombo rhancho kuka. To mekana ombona ombobo tssona mmyochoa tssona ombobo rhanchoe etancho vankuka. 50 Ombona ombo eshio kyon ji thüngi engatheta rilanta nzyu ji jamvü nzyu kvüta lia na hoji yuta jilo yingae tsüka ji kvüta epiv etümcho sana hoji tata pilansi etancho vana yiv. 5152 Ombona nzyu enhyoe lio ji ephanina oman ejoma pilansi yivka, 53 Hojijo nzyu nzyu engochoman pia vana rocho ejoena. Ombo OPVÜI jina haruk hasha ombo tsütsav meka. 54 Ombo ji lanka shiang kvütowoe na ha n vachicheta tssona owo rilanta tsüngono ti ombo osi ombo wopan jiang vachiv ka. 55 Israel kyon tsüka ji nchünkhon ezii tssoa yem meka, ntiotssole Israel jipo jo OPVÜI eziiden, ombona Ejip metaena onte sochecho; Ombo onte OPVÜI Potsow ji.

Pvüti 26

Jancho Ezo Lo Mmha Jüo Ji

1 OPVÜI na phyocho, "Kisü ti nsüngrütava, mekana khümphen tssüng olong ti ndungkachitava osi olong ha duki ti khümtava. Nte Potsow OPVÜI jijo a ka. 2 Nte ekhümlan tokhu jiang lithuka osi a khümphen meta jiang yikrachitava. Aiyo OPVÜI ji ka. 3 "Ntena a shikhfü ephan vana tssona osi a yizüng jiang benphina, 4 ana eryu jiang yuta epen lo nte joyithukvü, hojito lyui liko jina yuta ebenlo ethiebem osi odung jiangna tssüngthi ethiv. 5 Nte joncho rücho pvülyuv osi ntena jününgrothi elhov yuta jana tsünghanrho tssoa vamvü osi tsünghanrho etsso jana jüngüngrothi tsojana vamvü. Ntena etsoyu etsson livka osi nte meta lo noyingroa vanchevka. 6 "Ana nte metalo noying lithukuka, osi ntena ntia n kyuna yipvüka. Ana ekümrümo ekyuthao jiang esani sithukvü osi ritsso ha meta jilo lithukvü meka. 7 Ntena ori pono ekhyo hunguv ka; 8 Nte otsük mongo tssoana ori nzoa khyov osi nte nzoa tssona ori wothüng taro khyovka. 9 Ana otsoeoro elümoto nte mmhayivka; Osi ana ntio phyochaki nte vayicho sana jiang benrathukvü. 10 Ntena elümoto tssukro mümroa richov, osi nzyua etso yaka richoe ethan hanthetathüng ehen jiang hanchukchi siv. 11 Ana ntho ranki jilona nte vanrhyuv osi nte thüngi na yaki yiv meka. 12 Ana nte ndüngo vam osi aiyo nte Potsow tssov, osi nteno a kyonden tssovka. 13 A OPVÜI shina, Ejip metae na nte sochokcho, hoji tsükona enhungo ezii nte n kümlanthuk. Nte sayao etho ji ana tanchi nte siyisi omha khokae nte sanphithukvüka.

Jancho N zo Ji Man

14 OPVÜI na phyocho, "Ntena a yizüng jiang n benphina, nte ezüpthukvü. 15 Ana yizüng nte pio jiang ntena n benphiv osi ete ntsatao ji yesoa tssona, 16 ana nte ezüpthukvü. Ana nte pono tssorophyoro rwothukvü n pocheo nochonori khi omhyik nte jukia osi sangtsüngi esio nochonori nte piv. Ntena mojü thev tolea oman liv mek, ntiotssole nte ri jiangna nte khyoe ntena benro jiang ontena tsov. 17 Ntena oyam n khyo tssoa ana nte lona nkae yivka, osi nte etssak nkong jiangna nte yansavka; osi nte ekhentsüngo jina ochinaha nte n phanlea etsan tae tsamvü ka. 18 "Heto tssoaha ntena elani jancho a nzoyilana tssona, nte ezüp jiang ji yenjo tiying rankathukvüka. i9Ana nte ngangshi ngangri ji nte rosochiyiv; osi meta jilo eryu jwothukvü meka, osi liko jiha yonjak to kyingi karaki sithukvüka. 20 Ntena sanga elhi tsso jiang ntia oman liv meka, ntiotssole nte li jiang lona ntia ethi ebem mek osi odung jiangna ha bentssov mek. 21 "Ntena jitosi süi ha a panlana a yi n nga tssona, ana elani nte ezüp ji yenjo tiying rankalanthokvüka. 22 Ana nte yolo ekyuthav ekümrü rothuki jiangna nte ngaro jiang rümthukvü, nte tssiden jiangha roe sithukvü, osi wozanro tae nte enkhyokae nte lantsü jiang sirhaki sithukvü. 23 "Shiang hetopvü süloha ntena a yi ngav ngangshia tssona, 24 tona ana nte pono phanthi nte ezüpthuk thako tata tiying nte ezüpthuk lamvü. 25 Ntena ete ntsata ji yesoa tssona ana ritsso chiyithuki nte ezüpthukvü osi ntena nlhichov khilato yantsü jiang lo tsantheta tssona ana n pocheo nochonori yithuki nte khangshiv osi nte ri mhadungo epyaktheo nte kümthukvü. 26 Ana nte etsoyu jiang matathuki eloe otsük taro lea mijen motsünga lona tae tssoyancheo tata tae kümthukvü. Ontena nte jantayiv khatola hoji tsothaka na nte wontonlam ka. 27 "Shiang hetopvü sülo lea ntena ngangilana a yi n ngana, 28 ana nte thüngi lüm tsuklani nte ezüp jiang yenjo tiying n mhonkao kyungkalantukvü. 29 Nte wonton era kyongkhüngo ji yakchia ntena nte ngaro jiang tsotav. 30 Ana phunglani nte khümphen jiang roe nte siyiv, osi nte tssütsserhüm rungphen jiangha roe nte siyiv, osi nte echümüng jiang ji nte khümphen kisü jianglo hankae nte siyiv. 31 Ana nte yantsü jiang roe nte siyisi, nte khümphen meta jiangha roe nte siyiv, osi nte than jiangha nte n khichoyi. 32 Ana nte meta ji n pen n khio roe nte siyiv küma nte ri ochoang na nte meta ji phanchoe vanasana jiangna mpato emhoka zev. 33 Ana ntelo ritsso chiyithuki metapoe nzonsorae nte siv. Nte metaji sinki siv, osi nte yantsü jiangha roe ekachi siv. 3435 Jitosi meta jina ntena npio esan ji nzyu sunga esanphyav; nte ji ori khelo vüngi vanathüng na liko jina ha esan khia vamvü. 36 "Nte ochoang oyam khelo vancho sana jiang yolo ana nsüp ekyu rheyithuki mbungna lomoro venphichona lea ritssolo tsanta to nte tsanthoku. Osi ori nte ndüngo n vanlea nte ekhenrhüki nte ekhüngüv. 37 Ochinaha nte n phanlea nte nte sümtsüngta tsam, osi ntena ori kumoe ha n khyo. 38 Nte ji metapoe nte shotherav, osi meta jina nte nzhükham. 39 Nte ri jiang metae nte ejoma enhyokao jiangha nte mmen osi nte pyimtsümotsüi mmen yakchia nte chürav. 40 "Tokhatola nte tsoronichen jiango nte mmen osi nte pyimtsümotsüi ochoangna a panlana mmen tssocho sana osi alüm tsukthoki 41 onte wori jiang metae yithukcho sana jiang mmen jiang phyochaku. , Sülamiti nte tsoronichen jiang na onte bobo teriv kümsanati, osi onte mmen osi panlan manji ezüp sanati, 42 ana Jakob, Isaak osi Abraham thüngi a ntsata ji ntssachoe ana phyochako meta ji nte piv. 43 Tolea ovüng tssoa, meta jilo evamo kyon jiang phani sisi meta ji esan pisav, osi ontena a yizüng n khicho ji man onte ezüpthuksav. 44 To mpa to tssolea, ontena onte ri metae vanathünglea ana jo mhecholangi onte n si osi monrathukijo onte n si. Ntiotssole heto tssoana ana onte thüngi ntsatao ji moni sicho esüa tssoala, ntiotssole aiyo onte Potsow ji. 45 Osi ana onte Potsow tssov tsükona Ejip metae na onte sochuka limha ji a etho ejüo jithüng ana onte pyimtsümotsüi jiang thüngi ntsata vao ji ntssachovka." 46 Shiang hetopvü ji Israel kyon jiang tsükona OPVÜI na Sinai phunglani na Moses pio yizüng jiang.

Pvüti 27

OPVÜI Than Tsükona Shikhfü Jiang

1 Israel kyon jiang tsükona OPVÜI na shikhfü shiang Moses picho. 2 Kvüthüng kyon tsüka na echümporo tssoa OPVÜI epiv tsükona echümchak vata sana, hoji kyon mo jina orang pita shikhfü shiang ephanina pisanati. 3-7 etancholo vachiv: Eboe eranküm, nzyu mekyu lona rukro nandang: janti rang tinyan eloe eranküm: janti rang thümro Khyingroe, nzyu mongo lona mekyu nandang: Janti rang mekyu Loroe: janti rang taro eboeroro nzyu mongo kupi cho: janti rang mongo eloeroro: janti rang ethüm Eboe eranküm nzyu rokro pomoe: janti rang taro mongo osi eloe eranküm nzyu rokro pomoe: janti rang taro to thev. 8 Kyon tsüka na echümchak vacho khatola yantsa lona shikhfü benria n benchekhuk na pvüti ji thüngi sosi ov, tona pvüti jina zesi kyon jina pikhoko tüv ejo nsüngrüyiv. 9 Echümchak ji ekünirümo ethev zikae vacho tssona, OPVÜI etham vao jiang topvü ntho tsso jina, 10 kyon jina hoji nliche ekümrümo thanpo khi benchev meka. Ombona hojito tssohungna ekümrümo onita OPVÜI echi tssovka. 11 Tokhatola echümchaki vao ekümrümo ji OPVÜI than lo n theo ome khyinga tssona ekümrümo ji hansi owo pvüti ejüa. 12 Tona pvüti jina zesi ekümrümo ji ephan oman tssenchaku küma ji ephan tssovka. 13 Kyon jina hoji shilan hungna oman jilo nzoalo mekyuchia ekalani thesi khivka. 14 Ochona sana ombo kiji OPVÜI than tssoa pina pvüti jina zesi oki ji ephan oman tssenchaku küma hoji ephan khivka. 15 Kipvüo jina oki ji shilani khihungna pvüti jina methako man jiilo nzoalo mekyuchia ekae thesi khivka. 16 Ochona sana ombo liko erüchoe OPVÜI thana tssona pvüti jina kvüta echhen sana zesi hoji ephan oman methaku, mojü seri mekyu echhen lo janti rang taro ren ejoe na methaku. 17 Osi ombona liko jo rhancholan nzyu ji yakchipvü thechicho tssona oman shera tssov. 18 Tokhatola sülaniti thecho tssona pvüti jina zesi rhancholan nzyu ejam kvüta liana ji ephan oman methaku. 19 Liko ji thamo kyon jina shilan hunga tssona oman jilo nzoalo mekyuchia ekae thesi khivka. 20 Tolea Ombona OPVÜI thüngina n shilam oyam thüngi yenchenlani sina ombona shilancheo elan ji moni siala. 21 Rhancholan nzyu etsao jilo jo liko jijo nchünkhon tsükona OPVÜI echi tssothako ji tsükona; liko jijo pvüti jiang na khivka. 22 Kyon tsükana ombona shicho liko OPVÜI thana tssona, 23 pvüti jina rhanlan nzyu ji ejam nzyu kvüta liana ji ephanina oman tssechaku osi kyon jina hoji nchuk na orang ji OPVÜI thamuka, ntiotssole hoji liko man jijo OPVÜI echi. 24 Rhancholan nzyu ji jana na liko ji opvüo ji khelo mekana ombo tsoronichen khelo theyilamvü. 25 Oman topvü shikhfü lo licho ephan tae tssenchakvü. 26 Ekümrümo nrodemo jijo OPVÜI echi to vanthokwo jina hojitüv jo erungthan etssov n li. Olyuro, mangsüro osi nyanyanro nrodemo jiang jo OPVÜI echi, 27 tokhatola n tho ekümrüm nrodemo jiang jo opvüo jina rhancho tsen thesi jilo nzoalo mekyu ekae thesi khikhuka. Osi hoji opvüo jina nshilana tssona shinhung thama na tssenchako tsen jina shikhuka. 28 Kyon lea, ekümrümo osi liko tssolea khochaklangi thei sithako jiango ochinaha n shilanche. Hotüv jo nchünkhonto OPVÜI echi tssothaka. 29 Hojito khochaklangi thethako jiang jo kyonlea shilani n khiche; tolea chüthoki esiv lia. 30 Otssukomüm lea, tssüngthi lonphen oli jilona chiyicho tarochia jijo OPVÜI echi. 31 Ochona sana hojitüv shilani khihung na tssenchaki lio man jilo mekyuchia ekae khiyivka. 32 Oki ekümrümo jiang topvü lona taro yolo motsünga jo OPVÜI echi. 33 Ethanpvüo jinaha ekümrümo thanthako ji mmhon n mhon ethümi ezev n li, elani dongphiv ha n h, osi dongphi hunga tssona onita ntho than OPVÜI picho to vanthuka, osi hojitüv jo shilani n khiche. 34 Shiang jo OPVÜI na Israel kyon jiang tsükona Sinai phunglani na Moses picho.

Wokhata 1

Israel Jiang Wokhata Ovüngo Ji

1 Israel jiangna Ejip lona yisi nzyu enisi choro enioto tssoa thüng tsüngon ovüngo jilo, Sinai lijüngi na OPVÜI na ombo vanrhyu ranki na Moses ezocho. 2 "Aaron, nina Israel jiang wopan osi jipo ephani na owo khatava. Eboe tso nzyu mekyuna mhawoe 3 rasan elhi tssokhong kvüta vana na omying eranrhyua. 4 Jipo akvü lo na esopvüi tsük tsük zikae ni nzan chito ka." 5-16 Jipo akvü lona esopvüi ethüngcheo jiang mying ji shiang. Jipo Jipo esopvüiden Reuben Shedeur tsoe Elizur Simeon Zurishaddai tsoe Shelumiel Juda Amminadab tsoe Nashon Issachar Zuar tsoe Nathanel Zebulun Helon tsoe Eliab Ephraim Ammihud tsoe Elishama Manasseh Pedahzur tsoe Gammaliel Benjamin Gideoni tsoe Abidan Dan Ammishaddai tsoe Ahiezer Asher Ochran tsoe Pagiel Gad Deuel tsoe Eliasaph Naphatali Enan tsoe Ahira 17 Otsük taro eni shiang na kyochia Moses ha Aaron onina choro enioto tsüngon ovüngo jilo Israel 18 pvüji topvü tsarhyui jipo osi wopan jiang eranrayicho. Nzyu mekyu na pomoe eboe tso topvü 19 OPVÜI yizüng ephan omying erani owo khatacho. Hoji jo Sinai lijüngi na Moses na omying erantao ji. 20-46 Jakob tsokhying erantso Reuben lona benkae, wopan osi jipo ephanina eboe tso nzyu mekyu pomoe rasan elhi tssokhung topvü omying eranicho. Hojiang topvü tsotsüi hetata tssocho. Jipo Owo Rebuen 46,500 Simeon 59,300 Gad 45,650 Juda 74,600 Issachar 54,400 Zebulun 57,400 Ephraim 40,500 Manasseh 32,200 Benjamin 35,400 Dan 62,700 Asher 41,500 Naphtali 53,400 Tsotsüi: 603,550 47 Levi jipo jo oyam nzo n ranhyacho, 48 ntiotssole OPVÜI na heto Moses ezocho, 49 "Nina kvüthüng rasan elhilo rhowothukvü kyon kha sana Levi jipo jo ti-khanhya. 50 Levi jipo jiango a vanhya ranki ji tona jilo tsakalan jiang to ezeden vanthuka. Ontena hoji hanphitavka osi hojilo elhi tssotavka, osi hoji nkonphia nchenphen tssoa wovka. 51 Ntena kvüthüng oyan jilona eseni yia sana Levi jiang na süranki ji luki oyi nchenphen yanthan tssokachilamka. Kyon thanpoe ochoang na süranki ji ndüngo woasana chüthokvü ka. 52 Levi meko Israel jiango okho okho na ombo ombo okho ji riven donkachi vantavka. 53 Tokhatola kyon ochinaha süranki jilo woe a lüm etsuk lona okho topvü n sithokvü tsükona Levi jipo jiang na süranki ji rhüa nchenphen tssoe nhyakta vamvüka." 54 Hojito OPVÜI na Moses yizüng pio jiang ephan Israel kyon jiangna tssocho.

Wokhata 2

Nchenphen Jiang Lo Pvüji Jiang Nlansüng

1 Moses ha Aaron oni thüngi OPVÜI na heto ejü-rünyo picho. 2 Kvüthüng Israel jiang na nchenphen tssoa sana eboetso otsük akvü na ombo ombo khümtsüng riven ji kupi nchenphen jiang tssovka. Nchenphen jiang ji süranki ji füchüma tssovka. 3-9 Engkhüwoe jo Juda khümtsüng riven ji küpo nchenphen jiang onte esopvüi shiang nzi etssirhyuvka. Jipo esopvüi Owo Juda Amminadab 74,600 tsoe Nashur Issakhar Zura tsoe 54,400 Nathanel Zebulun Helon tsoe 57,400 Eliab Tsotsüi: 186,400 Juda rasan na ovüngo ji tssoa khochivka. 10-16 Jüjowoe jo Reuben khümtsüng riven ji küpo etssoe jiang na onte esopvüi shiang nzo etssirhyuvka: jipo esopvüi Owo Reuben Shedeur 46,500 tsoe Elizur Simeon Zurishaddai 59,300 tsoe Shelumeil Gad Deuel tsoe 45,650 Eliasaph Tsotsüi: 151,450 Reuben rasan na okho enioto ji tssovka. 17 Hojito rasantsü rakho ovüngo eni ji tona sülamo eni ji to yutalo Levi jipo tssothuki a vanrhyu ranki ji ejümtavka. Rasantsü okho akvü na kvüto etsünga nchencho sana ji ephan etsüngi ombo ombo riven küpo na khochivka. 18-24 Engrhewoe jo Ephraim jipo riven ji küpo etssoe jiang na ombo ombo esopvüi nzo shiang ephanina nchemka: Jipo esopvüi Owo Epharaim Ammihud 40,500 tsoe Elishama Manasseh Pedahzur 32,200 tsoe Gamaliel Benjamin Gideoni tsoe 35,400 Abidan Tsotsüi: 108,100 Okho ethümo toji jo Ephraim rasantsü na tssovka. 2531 Jükiwoe jo Dan jipo riven ji küpo etssoe jiang na ombo ombo esopvüi jiang nzo nchemka. Onte esopvüi jiang küpo kyon jiang ji shiang esüa tssocho: Jipo esopvüi Owo Dan Ammishaddai 62,700 tsoe Ahiezer Asher Ochran tseo 41,500 Pagiel NaphtahEnan tsoe 53,400 Ahira Tsotsüi: 157,600 Dan okho rasantsü jina sülantso ji tssoa khochivka. 32 Khümtsüng khümtsüng na owo khatacho Israel rasan topvü tsotsüi 603,550 tssocho. 33 OPVÜI na Moses yizüng pio ji ephan Levi jipo jiango Israel thanpoe jiang nzo omying n ranhyacho. 34 Hojito OPVÜI na Moses ezowo jiang topvü Israel kyon jiangna tssotacho. Onte topvüna ombo ombo riven küpo nchentacho, osi ombo ombo jipo ephan khochicho.

Wokhata 3

Aaron Tsokying Jiang

1 OPVÜI na Sinai lona Moses thüngi jantao jithüng Moses ha Aaron oni wopan vamo jiang shiang. 2 Aaron na tsokhying mezhü vancho: Nadab jo erantso ji, Abihu, Eleazar, tona Ithamar to. 3 Onte ji pvüti etssov tsükona thyujü nzüyia nthochaki vacho, 4 tokhatola Nadab ha Abihu onio Sinai lijüngi na n tho mi khi OPVÜI thancho ndana chüthokcho. Oni chüche tsokhying n vamo jina Aaron evanthüng nandang jo Eleazar ha Ithamar onina pvüti tssocho.

Pvüti Jiang Phajae Tssothokvü Levi Jiang Ethüngchecho

5 OPVÜI na Moses ezocho, 6 "Levi pvüji ji sosi oyi pvüti Aaron phajae tssothuka. 7 Ontena a vanrhyu ranki jilo tsakasüka elhi jiang tssovka osi pvüti jiang tona kyon topvü to tsükona elhi tssovka. 8 Süranki jilo tsakalan topvü ontena sayata hojilo elhi topvü ontena Israel topvü tsükona tssoyivka. 9 Levi jiang elhi jo Aaron tona ombo tsoe jiang to benkav jitae. 10 Nina Aaron tona ombo tsoe jiang to pvüti elhi etssov zikata osi kyon thanpoe ochona hoji tssoa sana chüthokvü." 11 OPVÜI na Moses ezocho, 12-13 "Enhungo Levi kyon jiang a echi ka. Ana Ejip metalo tsokhfü jiang chüthoka thüng Israel wopan akvü lona tsokhying ovüngo ji tona ekümrümo nrodemo jiang tojo a echi tssoa khochaki vacho. Enhungo hojiang dungche jo ana Levi kyon jiang hoe vatala; Onteno a echi tssovka. Aiyo OPVÜI ji."

Levi Jiang Owo Khata

14 Levi jiang ombo ombo wopan osi jipo ephani na owo khae 15 eboetso choroa tona jilona rankathako to etsa omying eranile to OPVÜI na Sinai lijüngi na Moses ezocho, 16 osi Moses na hojito tssocho. 17-20 Levi na tsokhying onthüm vancho: Gershon, Kohath, tona Merari to, shiang jo pyimtsümotsüi mying ejamo khümtsüng jiang. Gershon na tsokhying oni vancho: Libni tona Shimei to; Kohath na tsokhying mezhü vancho: Amram, Izhar, Hebron, tona Uzziel to; Osi Merari na tsokhying eni vancho: Mahli tona Mushi to. Shiang jo wopan onte mying ejana motsüiden jiang. 21 Gershon jipo jo Libni wopan tona Shimei wopan to tsotsüi kümcho. 22 Eboetso choroa lona ranka cho tsotsüi 7,500 erantacho. 23 Jipo jijo engrhewoe, süranki ji sülamoe nchemo tssocho, 24 osi onte yolo jiporan jo Lael tsoe Eliasaph tssocho. 25 Onteno süranki ji tanünga ezev elhi jancho, hojilo eyuk ochungo tona eyuk opomo, elani kipüng zonchak ji, 26 ranki ji hapoe füa zonchako ji, thanphen sa zonchak tona, hapoe füa zonchak jilo kipüng zonchako ji to. Shiang hetopvü ezev ji onte enhikacho. 27 Kohath jipo jo Amram, Izhar, Hebron tona Uzziel to wopan jiang tsotsüi kümcho. 28 Eboetso chorao osi ji pomoe jiang topvü tsotsüi 8,600 erantacho. 29 Jipo shi jo süranki ji jolowoe nchemvü ezocho, 30 osi onte jiporan jo Uzziel tsoe Elizaphan tssocho. 31 Onte elhi jo Ntsata thephen Bakos ji, saro ji, milondung ji, thanphen sa jiang, pvüti jiangna ntho chungchaki tsütsao oyo-opvü jiang, tona nthotsowo jilo rhowolani zonchak ji to. Shiang hetopvü ethelan jiang zeyav zikacho. 32 Levi jiang yolo OPVÜI jo pvüti Aaron tsoe Eleazar ji. Ombo ntho chungchak jilo lhitssoe jiang ezepvüi ji. 33 Merari jijo Mahli tona Mushi to wopan jiang tsotsüi kümcho. 34 Eboetso choroa tona ji pomoe to jiang tsotsüi 6,200 erantacho. 35 Jipo shijo süranki ji khümkiwoe nchemvü ezocho osi onte jiporan jo Abihaiel tsoe Zuriel ji tssocho. 36 Onteno süranki khiron jiang, nkho jiang, durhyu jiang, ephyu jiang tona hojiang topvü chüngta jiang to. Shiang hetopvülo ethelan jiang onte zikacho. 37 Elani onteno zonchak opomo jilo durhyu, ephyu, lendan tona shenzhü to jiangha ezev zikacho. 38 Moses tona Aaron to na ombo tsoeden tojo engkhüwoe, süranki ji mhadungoe nchemvü ezocho. Onteno Israel kyon jiang tsükona elhi ntho chungchak jilona etssov jiang zikacho. Thanpoe ochona elhi shi tssoana chüthokvü licho. 39 Levi kyon eboetso choroa tona ji pomoe to Moses na OPVÜI yizüng ephan jipo ephani na eranrhyuo jiang tsotsüi 22,000 tssocho. Levi Jiangna Tsokhfü Jiang Thung ji Tssocho 40-41 OPVÜI na Moses ezocho, "Israel tsokhying tsokhfü to etsa a echi tssovka. Hoji tsükona Israel tsokhying tsokhfü topvü choroa tona hoji mhawoe to jiang eranrhyua. Tokhatola onte thung ji Levi kyon topvü a echi tssovka! Aiyo OPVÜI ji! Elani ana tsibung nrodemo jiang thung tssoa Levi jiang topvü a echi tssoala." 42 Moses na hoji engae tsokhfü topvü choroa 43 tona ji pomoe to etsa erancho tsotsüi 22,273 tssocho. 44 OPVÜI na Moses ezocho, 45 "Israel tsokhfü topvü thung ji Levi jipo jiang a echi tssoa nthochaki a vayia, elani Israel jiang tssibung nrodemo ji thung tssoa tssiden topvü methaki nthochaki a vayia. 46 Israel tsokhfü topvü tsotsüo ji owo 273 na Levi jiang lona kyungkao ji tsükona enhyo jiango nina rhanlani vavka. 47 Shikhfü lo lio ji ephan tsükalo janti rang mongo ren, zii orang ji Aaron tona ombo tsoe jiang to pia." 48 Moses na hoji engayicho osi 49 janti rang tsotsüi 50 1,365 ji khi 51 Aaron tona ombo tsoe jiang to picho.

Wokhata 4

Kohath Tsochen Levi Jiang Elhi

1 Kohath tsochen Levi jiang ji, 2 wopan osi nkhük ephanina eboetso nzyu thümro tona tinyan to yutalo 3 kvüta na OPVÜI vanrhyu jilo elhi tssokhoka na jiang owo khae omying eranile to OPVÜI na Moses ezocho. 4 Onte elhi jo elümoto ntho elhi thenhya tüv jancho. 5 OPVÜI na Moses ji heto tssole to ezocho. Kvüthüng nchenyan esena sana jithüng Aaron tona ombo tsoe jiang to na süranki jilo rhovo Ntsata Bakos ji mhadungoe zonchak ji khichoe Bakos ji eyukvü ka osi 6 hoji poni sofü enyipvü eyukae ji pomoe ejümsü eyukalani tosanati ejümphen khora jiang thevka. 7 Tosi hümri khi OPVÜI thana thüng ekachiphen saro jilo ontena ejümsü sakae ji poni ophi jiang, tssütse rungphen phikuk jiang, othan thephen phikuk jiang, zükhi thephen ojen jiang to ekachivka. Saro ji poni yuta topvü lo hümri ekachi vanrhüv ka. 8 Ontena shiang poni sümyon eyukae ejümphen khora jiang thevka. 9 Ontena ejümsü khi milondung ji tona milon jiang, mmyakaphen jiang, elonphen phi jiang, tona olive thyujü pvü jiang to topvü tsotsüi eyukvü ka. 10 Ontena hojilo tsakalan topvü benria thei sofü enyipvü na eyuki ejümphen ronrio jilo thevka. 11 Hoji sülo jo ontena shona thanphen sa jilo ejümsü eyukav, ji poni sofü enyipvü khi eyukav tosi khora jiang thechiv. 12 Ontena ritho chungchak jilo oyo-opvü jiang khi ejümsü na eyuki, ji poni sofü enyipvü eyukae ejümphen ronri jilo thev. 13 Ontena thanphen sa jilo live valako jiang shae sisi ji poni sümüngzhüv eyukae siv. 14 Thanphen sa jilo tsütsao oyo-opvü jiang, nghiriphfü jiang, yichukphen jiang, thanphiphen jiang tona jükuk jiang to sümüngzhüv ji poni ekachivka. 15 jitosi ontena ji poni sofü enyipvü eyukae tosanati khora jiang thevka. Osi nchenyan senphia na Aaron ha ombo tsoe jiang to na ntho tsütsaelan jiang tona jilo tsakalan jiang to mmhona eyuksanati Kohath pvüji na oro hoji ejümtavka, Kohath pvüji kyon najo ntho tsütsaelan jiang n vüngkache, ontena evüngkacho jo onte chüvka. Süranki ji senphia Kohath pvüji elhi jo hojiang tssovka. 16 Aaron tsoe Eleazar ji elhi jo süranki ji totona, milon jiang, thyujü jiang, tssütsserhüm jiang, otsuk-omüm than jiang, nzüyiphen thyujü ji tona süranki jilo tsütsaelan kvüta OPVÜI lo nthochaki vacho sana jiang topvü ezev ji. 17 OPVÜI na Aaron ha Moses oni ezocho, 18 "Kohath pvüji jiang ji ntho tsütsaelan shiang, 19 ndüngo rocho jo chüvka ti-rothuka. Osi shi tanglanchiv jo Aaron tona ombo tsoe jiang to na süranki rhovo Kohath pvüji jiangna otsük akvüna ntio ejümvü sana ezoa, 20 tokhatola ontena rhowo ntho tsütsaelan jiang senphiv oha tssoa vamo jiang hunga tssona, onte chüv."

Gershon Tsochen Levi Jiang Elhi

21 OPVÜI na Geshori tsochen Levi pvüji kyon jiang, 22 opan nkhük ephani na owo khale to Moses ezocho, osi nzyu thümro tona tinyan to yuta jilo 23 eboetso kvüta OPVÜI vanrhyu süranki jilo elhi tssokhuka na jiang eranrhyule to ezocho. 24 Onteno tsütsaelan shiang ejümvü zikatala. 25 Süranki ji, hoji eyuk ochungo ji, eyuk opomo ji, ji poni sofü enyipvü eyukaphen ji, rhowolani zonchaksü ji, 26 süranki jiha, thanphen jiha oni füa epichako jilo wozhü tona zonchaksü jiang, epichak jilo rhowolan jiang zonchaksü jiang, hoji zonathüng eshentan osi thanpo tsakalan jiang to ejümvüka. Shiang hetopvü tsükona elhi jiang ontena tssovka 27 Elani Aaron tona ombo tsoe jiang to na onte zikao jiang, Gershon kyon jiang na tssetssoa sana ji Moses ha Aaron onina zevka. 28 Süranki jilo Gershon kyon jiang elhi jo shiang tssovka, ontena Aaron tsoe Ithamar ji lanso ephan shiang topvü tssovka.

Merari Tsochen Levi. Jiang Elhi

29 OPVÜI na Moses ji Merari tsochen jiang wopan nkhük ephani ha owo khale osi eboetso nzyu thümro tona tinyan to yutalo 30 kvüta OPVÜI vanrhyu süki jilo elhi tssokhuka vancho sana omying eranile to ezocho. 31 Ontena süranki jilo ejümphen ronrio jiang, nsü jiang, durhyu tona ela jiang, 32 elani füchak opomo jilo durhyu, ela, eshentan, tona füchak jilo wozhü, jiang elani hojiang zonkachiv lo tsakalan topvü to ejümvü ji onte elhi tssovka. 33 Süranki ji ejümtathüng Merari pvüji ji elhi jo heto tssovka, osi ontena pvüti Aaron tsoe Ithamar lanso küpo na shiang tssovka.

Levi Jiang Wokhata

34-48 OPVÜI yizüng ephani na Moses, Aaron tona okho lo esopvüi jiang to na Levi pvüti ethüm, Kohath, Gershon, tona Merari to jiang owo khatacho. Ontena wopan nkhük ephani na owo khae hojilo eboetso nzyu thümro lona tinyan yutalo kyon kvüta na OPVÜI vanrhyu ranki jilo elhi tssokhokcho sana jiang ji hetata khachecho. Pvüji Owo Kohath 2,750 Gershon 2,630 Merari 3,200 Tsotsüi: 8,580 49 OPVÜI na ezo ji ephan eboetso topvü erantacho, osi OPVÜI na Moses ezoji ephan otsük akvü ombo ombo elhi, ejümvü mekana benka elhi jiang jantayicho.

Wokhata 5

N thono Kyon

1 OPVÜI na Moses ezocho, "Israel kyon jiang ezoa, 2 kyon ochona ratsü na eno mekana otsüko mmen eyi yuta osi echümüng to jiang evüngkata sana jiang topvü pikhfü pomoe phanchukchi sitoka. 3 Ana vanrhyuo nchenyan ji n menthoku tsükona n tho kyon hetüv jiang phanchukchi sia."4 Israel jiang na OPVÜI yi enga hotüv kyon topvü phanchukchi sicho.

Wori Elhi Jiang Tsükona Lolan

5 OPVÜI na Israel kyon jiang tsükona shikhfü heto picho. 6 Kyon ochona OPVÜI jancho n zov oyam tachia woricho sana, 7 ombona ombo mmen ji phyochaksi ombona ocho tachia woricho sana ji thüngi hoji tssen-nli jilo nzoalo mekyu ekae pilamka. 8 Tokhatola ombona tachio kyon ji chüthaksi hoji wopan ha n van na tssona otssen ji pvüti jiang echi tssothokvü tsükona OPVÜI thani sivka. Otssen shijo ori pvüo kyon ji, nthoche elhilo theo olyubung ji ephalo ekata thev. 9 Elani Israel kyon na echümporo ekhya kvüta OPVÜI piana jiha pvüti jiang echi tssovka. 10 Pvüti otsük akvüna ombo khelo etheo than ji ombo echi tssoa khivka.

Orapvü Jiangna Engh Jianglo Hungkarenka Liathüng

11 OPVÜI na Israel kyon jiang thüngi püngnoyi shiang 12-14 pile to Moses ezocho. Engh jina orapvü ji n yikarchiv oyam thüngi ori khi ompvüpo mmenthaka to orapvü jina hungkarenka likhuka. Tokhatola engh jina mphoa vamo jina osi ochinaha ehungpvüi n piyi, elani hojitüv elhi tssoa ochinaha ompvü n rhüma to etsso jina orapvü jina mmhona n tsiv vankhuka. Mekana ompvü na nlan n tssolea orapvü jina hungkarenkata vankhuka. 15 Tolea otsotso tssolea, ejüng hungkalea, eboe jina eloe ji sosi pvüti thüngi wov. Ombona shikhfü lo lio ji esüa ohüm chencho ha seri motsünga hamvü, tokhatola hojilo thyujü mekana tssütsserhüm ntia n thev shikhfü, ntiotssole hoji jo hungkarenka lia evan orapvü tsüka na ntsa ji oponi chiyithokvü othan picho tae tsso jina. 16 Pvüti jina eloe ji sosi owo thanphen sa ji mhadungo mangthukvü. 17 Ombona chonphfü lo ntho jü tara thei, OPVÜI vanhyu ranki tapvüi na ochon tara khi jilo thei ojü ji ekhov kümthokvü. 18 jisülo jo ombona eloe ji tssan ji lanpheyisi ohüm than ji ompvü khelo theyiv. Pvüti jina ojü ekhov kümoe na rhiyikao etho licho sana hoji ombo khena bemvü. 19 Jitosi pvüti jina heto echümchakyi khi eloe ji elonchotokvü, "Nina efürama n tssocho tssona ojü shina ni tssatssov meka. 20 Tokhatola nina efürama benphicho tssona, 21 OPVÜI khi ni mying ji okholo rhiyikao mying kümthuka. Osi ombona ni tsobukphen ji epyimkae sithuksi ni mman ji bümkachitokvüka. 22 Ojü ekhov shina ni mmani rheyi ni mman ji bümachithuksi ni tsobukphen ji epyimkae sithuka." Tona eloe jina phyov, "Ana hoji khichoala; OPVÜI na hojito tssothuka." 23 Jitosi pvüti jina rhiyirandanka yi shiang erankae, hoji ojü ekhov jilona epyothechivka. 24 Osi pvüti jina ojü kümoe na eloeyuthoksi jina mman na ompvü nnothuthüng, 25 pvüti jina eloe ji khelo ohüm than bemo ji khi OPVÜI nthochaki pia ekhyonkae bensi thanphen ji poni ekachiv ka. 26 Jitosi ombona othan jilo na ezüma khichei cheka' than tssoa thanphen ponina rungi OPVÜI thamvüka. Osi wokhao tssoa ombona ojü ekhov ji eloe ji yuthokvüka. 27 Ompvüna efürama tssocho tssona, ojü ekhov jina mman na eno benkav, ompvü mman ji büma osi tsobukphen ji epyimkae siv. Osi Ompvü mying ji ompvükyon jiang yolo rhiyikao mying kümi siv. 28 Tokhatola ompvü ntsa licho tssona, ompvü n tssatsso osi ompvü na ezüp n lina otsoero liv. 29-30 Shijo orapvü jina omhyik rakia engh ji hungkarenka liathüng tsükona shikhfü. Eloe ji OPVÜI vanrhyu ranki ndüngo mangthuki pvüti jina shiang elhi tssoe epyochethokvü osi pvüti jina tssolan shiang benchev. 31 Orapvü jijo n lan n pi, tokhatola eloe jina n lan lichocho ompvü na ezüp ji khiv.

Wokhata 6

Nazerite Kyon Kümvü Tsükona Shikhfü

1 OPVÜI na ejü-rünyo Israel jiang pile to Moses ezocho, 2 Eboe osi eloe ochona eküm khochaki Nazerite kyon kümi OPVÜI benkav echümchaka sana 3 ombona soko osi tssüngthijü züran ntia yuv meka. Ombona jününgrothi jü ntia yuv meka osi jününgrothi ha eyi lea nkongcho lea ntia tsov meka. 4 Ombona Nazerite to ejani evanthüng nandang jo jününgrothi lona chiyicho ofü osi otsüng lea ntia tSoyuv meka. 5 Ombona Nazerite echümchak ji küpo evanthüng nandang jo otssan ha n tssü, menhüm ha n tssü tona vamvüka. Ombo yuta ere OPVÜI lo khochaki vamka osi ombo otssan tona menhüm tOPVÜI hamka. 6"7 Ombona Potsow lo khochaki vana vamoji chekav jijo otssan ji, hoji tsükona ombona echümüng ndüngo woe ombobo mmemvü meka, opo echümüng lea, oyo, ojenio, opyae osi oka ota echümüng to lea ndüngo wov meka. 8 Ombona Nazerite to evanthüng jo ombo OPVÜI lo khochaki vanala. 9 Nazerite jina kyon thama na chücho tüv ndüngo woe ombo tssan ji mmenthuka tssona tsüngon tiying sülo otssan ji, menhüm ji to tssüi sivka, tona ombo ntssüngchevka. 10 Tsüngon tizaoto jilo ombona yukhyu eni mekana vefü eni hansi oro OPVÜI vanrhyu kipüng jilona pvüti ji pivka. 11 Pvüti jina woro motsünga ji mmen than piyiv osi motsünga jo erungthan piyiv, hojito lyui ombona echü ndüngo owo ji ntssüngchei ombo siyiv. Hoji tsüngonona kyon jina ombo tssan ji nthochak lani 12 ombo yuta topvülo Nazerite to khochaki pilamvü. Ombona ovüngthüng khochaki vamo jijo n khayi ntiotssole ombona otssan nthochako ji mmenthuko jina. Osi worio ji than tssoa ombona olyu oro nzyuatso tüv khi thamka. 13 Kvüthüng Nazerite tsükana ombo echümchak ji benthaka sana shikhfülo tssolan elio jiang tssovka. Ombona OPVÜI vanrhyu kipüng jilo owo ekümrümo ethüm thevka. 14 Erungthan tssoa olyuro obung nzyuatso ephyorüv n pao tüv khiv, mmen than etssov tsükona olyu okyuro nzyuatso, khümshümta than to tsükona olyu obung tüv to khivka. 15 Ombona hümri ha vümhi n thena rüngcho tüv loksa motsünga thamvüka; Hojijo hümri jiha chilüma olive thyujü theta rüngcho tona porov olive esekata rüngcho to ephalo tsünghanrho tona zükhi thathi thanphen ji to thamka. 16 Pvüti jina shiang hetopvü khi OPVÜI pia mmen than tona erungthan to ji thamvüka. 17 Ombona olyu obung ji khi khümshümta than tssoa hümri jiang to nzo thamka, jitosi ombona tsünghanrho tona zükhi to than jiang ha pivka. 18 Nazerite jina oro OPVÜI vanrhyu ji kipüngona ombo tssan ji tssüi khümshümta than runga vamo jilo thechi runguka. 19 Kvüthüng olyu obung ji epvüso ji mhena sana pvüti jina khichei, hümri chilümo ji tona poro motsünga to loksa jilo na khichei Nazerite ji khelo theyivka. 20 Tosi pvüti jina hoji khi echüporo than tssoa OPVÜI piv, osi shiang jo othan echümporo tssoa pvüti ji pio ji. Shijo olyu obung ji shyuro ji tona ojo jiang to thathi pvüti ejan ji ephalo pio ji. Hoji sülojo Nazerite jina zükhi yukhuka. 21 Shiang jo Nazerite tsükona shikhfü jiang, tokhatola Nazerite jina ombona thamvü elio ji pomoe epiv phyochak licho tssona hoji benthuka.

Pvüti na Mmha Randanka

22 Aaron tona ombo tsoe to jiangna 23 Israel kyon jiang mmha randankatathüng heto randanle to ezole to OPVÜI na Moses ezocho: 24 OPVÜI na nte mmhayia osi nte zeyathukvüka; 25 OPVÜI khi nte nzana nte khonzanthukuka; 26 OPVÜI na nzan khi nte zekata noying nte pithukvüka. 27 OPVÜI na phyocho, "Ontena kyon mmhayiv a mying theta randankata tssona ana onte mmhayivka."

Wokhata 7

esopvüi Jiang Than

1 Moses na OPVÜI vanrhyu ranki ji tssokachioji tsüngon jilo ombo na ranki totona jilo tsakalan jiang, thanphensa ji tona jilo tsakalan jiang to topvü thyujü nzükata nthochaki vacho. 2 Jitosi jiporan ochoang na Israel pvüji lo esopvüi tssocho sana osi owo khata lo ezepvüiden tssocho sana jiangna, 3 onte yantso shiang hantasi OPVÜI thüngi wotacho: zotoro tiruk osi tssibung tari eni, esopvüi otsük eni lo zotoro motsünga tona tsükalo tssibung motsünga to. Ontena hojiang thanthaka na, 4 shiang ji khichoe OPVÜI vanrhyu ki jilo ethelan tsükona vale to 5 Levi jiang otsük akvü elhi ji ephan zesi jiang pile to, OPVÜI na Moses ezocho. 6 Hoji tsükona zotoro jiang tona tssibung jiang to Levi jiang picho. 7 Moses na zotoro eni, tssibung mezhü to Gershon jiang picho, osi 8 zotoro mezhü osi tssibung tiza to Merari jiang picho. Osi onte elhi topvü ji Aaron tsoe Ithamar na olan soa tsswothukvü ezocho. 9 Tokhatola Moses na Kohath kyon jiango ntia n picho, ntiotssole ntho tsütsaelan jiang ezev osi onte epvüi na ejümo tüv zikao jina. 10 esopvüi jiangna elani thanphensa ji nthochev ha tsütsaelan hansi rotacho. Ontena onte yantso jiang thanpheni evav methakale OPVÜI na, 11 heto Moses ezocho, "Tsüngon taro eni tsükona esopvüi tsükalo engakvüto yantso pia than phen ji nthoche elhi tssothuka." 12-83 Ontena othan jiang heto hansi rotacho: Tsüngon Jipo esopvüi Ovüngo Juda Amminadab jilo tsoe Nahshon Enio to Issachar Zuar tsoe Nathenel Ethümo Zebulun Helon tsoe to Eliab Mezhüo Reuben Shedeur to tsoe Elizur mongo to Simeon Zurishaddai tsoe Shelumiel Tiruko to Gad Deuel tsoe Eliasaph tiyingo Ephraim Ammihud to tsoe Elishama Tizao to Manasseh Pedahzur tsoe Gamaliel Tukvüo Benjamin Gideoni to tsoe Abidan Taro to Dan Ammishaddai tsoe Taro ekhao to Taro enio to Ahiezer Asher Ochran tsoe Pagiel Naphtali Enan tsoe Ahira Otsük akvü than ji esüta hansi roracho; Janti pvü seri 1.5 mmyinga tüv, tona janti phikuk 800 to shikhfü lo lio ji ephan füi onita ji ohüm tona thyujü to nzitsücho na pyingthukrae otssuk omüm than etssov vav; shona phi mmyingi gram 110 ji tssitsserhüm na pyingthuk; tssibungro motsünga, olyubung motsünga, olyu nzyuatso to, mmen than tsükona nyanyan motsünga, khümshümta than tsükona tssibung eni, olyu bung mongo, tona nzyuatso olyuro mongo to hansi rov. 84-88 esopvüi otsük taro eni jina thanphensa ji nthochev yantso hansi ro jiang tssotsüi: janti pvü taro eni tona janti phi taro eni to tssotsüi mmyingi seri 27.6 shona phi taro eni, mmyingi tssotsüi seri 1.32, topvü tssütsserhüm na pyingi Tssibung taro eni, olyubung taro eni, nzyuatso olyuro taro eni tona nzo otssuk omüm than thei erungthan piv ji mmen than tsükona nyanyan tari eni, tssibung mekyusi mezhü, olyubung rukro, nyanyan rukro, olyuro nzyuatso rukro, to tssoe khümshümta than piv ji 89 Moses na OPVÜI thüngi thyutalo ranki rhowole, echo khyingo ekümrümo ji woni yuta lo Ntsata Bakos ji elhüp ji poni na OPVÜI na ombo jana Moses na zocho.

Wokhata 8

Milon Ji Evav

1 OPVÜI na Moses ozocho, 2 "Aaron na kvüthüng milon tiying ji ndungkachia sana omi jina mhadungoe tüngrachio tssoa ndungle to ezocho." 3 Aaron na hoji ephan milon ji ndungkaphen jiwoe zechiwo vacho. 4 Milondung jijo OPVÜI na Moses ezowo ji ephanina mmyoe na ndüng ejan shona na jocho.

Levi Kyon Jiang Nthoche Osi Nthochak

5 OPVÜI na Moses ezocho, 6 "Israel jiang yolo na Levi jiang khochak thuki heto nthochei onte vanthuka 7 nthoche jü onte erhikata osi onte tsüko otssan topvü tssüi sisi mpensü jiang etssüi sitale to ezoa, tona onteno shikhfü ephan ntssüngchethaka. 8 Jitosi ontena mangsübung oro motsünga khi, ethi-eben than ohüm jilo thyujü nzükae, elani mmen than tssibung motsünga khilam ka. 9 Tothakana Israel woro topvü etssirhyuthuki Levi jiango a vanrhyu ji ki mhadungo mangrav ka. 10 Israel kyon jiang topvü na onte khe ji Levi jiang kvüri lo nyimkavka, 11 Jitosi Aaron na Levi jiang ji Israel kyon jiang thüngi na echümporo yantso a picho esüa nthochaki a elhi tssoa vanthukvüka. 12 Tothakana Levi jiangna onte khe jiang tssibung eni jiang kvüri lo nyimkayisi motsünga jo mmen than, motsünga jo erung than to pia Levi jiang nthochevka. 13 "Levi kyon jiango a tsükona echümporo yantso esüa vanthuksi Aaron tona ombo tsoe jiang to khi onte ezepvüi tssothuka. 14 Levi jiang ji Israel jiang yulona hetolui khochaki a echi to vanthuka. 15 Ntena hojito nthochei khochaki vanthuk sanati ontena a vanrhyu ranki elhi tssovka. 16 Israel jiang tsokhfü jiang thung tssoa ana onte hoe vatala hoji tsükona onteno a echi tae tssovka. 17 Ana Ejip lo tsokhfü jiang topvü chüthukathüng Israel jiang wopan lo tsokhfü tona onte ekümrümo nrodemo to jiang a echi hoe vacho. 18 Enhungo ana Israel jiang tsokhfü jiang thung ji Levi shiang khiala, 19 osi ana Levi jiang ji Israel jiang thüngi na echümpo a yantso cho esüa Israel jiang tsükona a vanrhyu ranki jilo elhi etssov, osi Israel jiangna ntho meta jilo roathüng onte tssatssov lona onte nkochev tsükona ana onte ji Aaron tona ombo tsoe jiang to khelo theyiala." 20 Hojito OPVÜI na Moses ezo ji ephan, Moses tona Israel kyon topvü to tssoe Levi jiang nthochaki vatacho. 2i Levi jiangna onte popo nthochei mpensü jiang etssütasi sülo jo Aaron na onte ji OPVÜI tsükona echümporo yantso tssoa nthochaki vanthukcho. Ombona onte nthoche tssolan lio jiangha tssocho. 22 OPVÜI na Levi jiang tsükona ntio Moses ezocho sana topvü kyon jiangna tssocho. Hojito Levi jiang ji Aaron tona ombo tsoe jiang to küpo na OPVÜI elhi etssov etümthukcho. 23 OPVÜI na Moses ezocho, 24 "Nzyu mekyu mongo lona benkae Levi otsük akvü na a vanrhyu ranki jilo elhi tssosi, 25 nzyu tinyan lojo esamka. 26 Jisülojo ombona Levi thanpoe jiangna vanrhyu ranki elhi tsso jiang nzanchikuka, tokhatola ombona jo ombobo jo elhi ntia tssov meka. Hojito ntena Levi elhi jiang nsüngivka."

Wokhata 9

Yakchi Tokhu Enioto Ji

1 Israel kyon jiangna Ejip metae na khochisi nzyu enioto choro ovüngo jilo OPVÜI na Sinai lijüngi na Moses thüngi heto ezocho. 23 "Choro shilo tsüngon taro mezhüoto jilo eng erhe lona benkae Israel jiangna yakchi tukhü ji tssolan jiang ephanina khivka." 4 Hojito Moses na kyon jiang thüngi choro enioto ovüngo jilo tsüngon taro mezhüoto jilo 5 Sinai lijüngi na yakchi tokhü ji khitale to ezocho. Tole kyon jiangna OPVÜI na kvüto Moses ezocho sana topvü hoji ephan tssocho. 6 Tokhatola onte yolo n tssüngrüng ha jüracho ntiotssole ontena echümüng evüngkatacho, hoji tsükona ontena owo Moses ha Aaron oni owo ezotacho, 7 "Ena echümüng evüngkao jina eyio e n tho, tokhatola ntiotssona Israel thanpoe jiang esüa ena OPVÜI othan epiv ji n tssochev la?" 8 Tole Moses na onte ezocho, "Ana OPVÜI thüngina lanso nhung thüng nandang jo nhyaktava." 9 OPVÜI na Israel jiang heto ezole to Moses thüngi ezocho, 10 "Nte yolo ochosana mekana nte tsoronichen ochona sana echümüng evüngkae n thov vana tssona, mekana yentsalo ewov titünga khatola yakchi tokhu ji khihungna, 11 choro enioto jilo tsüngon taro mezhüoto jilo mek lea choroa sülo khikhuka. Tokhu ji vümhi n theo hümri tona lomo ekhov to theta khitava. 12 Etsoyu jiang ojyua enyathüng jana ntia ti vatava, osi ekümrümo ryu jiangha ti jakia. Shikhfü lo lio ji tssolan phyolan ephan tokhu ji khitava. 13 Tokhatola ochona sari yuta mekvü osi yentsalo n woaha tokhu ji n khia sana jijo a kyon ekhalo n the, ntiotssole ombona othan ji yuta eben lo a n picho. Ombona ombo mmen man ji hamvüka. 14 "Lankon nte nchenkae evan tüv na tokhu ji khihungna tssolan shikhfü lo lio jiang ephan khithuka. Shikhfü tsük ji lankon na tssolea metapvüi na tssolea kheti benphivka."

Omieluk Durhyu Ji

15-16 OPVÜI vanrhyu ranki ji tssokachio ji tsüngono eluk kholung na oyi hoji eyuki sicho osi emüngo jo eluk ji omi esüa zechecho. 17 Kvüthüng eluk jina vanphen esena sana Israel jiangna ha nchenphen eseni eluk ji vanpheno tssolancho. Osi eluk jina metapoe n yithüng jo hojilo ranki jiha to vanthukcho. 18 Kyon jiangna OPVÜI yizüng ephani na nchenyan jiang luki ombo yi ephani na tssokachilancho osi eluk jina süranki ji poni evanthüng jo ontena nchenyan tsük jilo vantacho. 19 Eluk jina ranki jiang poni sunga vana na kyon jiangna OPVÜI yi enga kichungi vantacho. 20 Kvüthüngna jo eluk jina süranki ji poni yuta tara tae vancho, tokhatola OPVÜI na ezo ji ephan ontena ochungi na vantacho, mekana senphicho. 21 Kvüthüng najo eluk jina mmyu na benkae enyathüng nandang tae vancho, osi eluk jina shaki yipvüto ontena ha nkanphitacho. Osi kvüthüng eluk jina shaki yiasana ontena khochi yitacho. 22 Tsüngo eni tae tssolea, choroa tssolea, nzyu mekana sungkalea eluk ji süranki ji poni elithüng jo onte n senphicho, tokhatola eluk jina shaki yisanati ontena khochicho. 23 Ontena nchenyan pyoni eyiv lea, mekana tssokachiv lea OPVÜI na Moses ezo ji ephanina tae tssotacho.

Wokhata 10

Janti Tatara Jiang

1 OPVÜI na Moses thüngi ezocho, 2 "Kyon jiang tsarhyuphen osi ncheyan pyonthukphen tsükona janti tatara eni joe vata. 3 Kvüthüng tatara woniata na sunga sünga khüa sana kyon topvüna a vanrhyu ranki ji kipüngo ni hachüma sanrhyuvka. 4 Osi kvüthüng tatara motsünga taena khvüa sana wopan esopvüi jiang taena ni hachüma sanrhyuvka. 5 Tolea kvüthüng tatara ji chentuka khvüa sana engkhfüwoe nchenkao jipo jing sanrhyuvka. 6 Kvüthüng yenjo enioto chentuka tatara khfüa sana jüjowoe nchenkao jipo jina sanchukvü. Hojito owon chentuka khvüana nchenphen pyonthukvü tsükona tssov. 7 Tokhatola owon ji sünga khfüana okho etssirhyuthukvü tsükona. 8 Tatara jiangjo Aaron tona ombo tsoeden jiang to pvüti jiangna khvüv. "Shikhfü shiang nchünkhon tsütsata wotava. 9 Ntena nte meta lo vanathüng oyam na ori nte tsso cho rolanchiv tssoana ritsso benkav ji tatara khvüsochia. OPVÜI nte Potsow a shina nte khyovka osi ori khe lona nte shanchovka. 10 Hoji esüa nte ematha yutalo, chothan tokhu jiang lo osi ekhüm lan thüngoe tokhu jiang loha tatara khvütava. Erungthan osi khüm shümta than piathüng ha tatara khvütava. To tssona nte nzanchivka. Aiyo nte OPVÜI Potsow ji."

Israel Jiang Nchenyan Pyonala

11 Israel jiangna Ejip metae na khochisi nzyu enisi choro enioto jilo tsüngon mekyuoto jilo OPVÜI vanrhyu ranki poni eluk ji shaki yicho, 12 osi Israel jiang na Sinai lijüngina khochi onte yentsa benkacho. Tole eluk jina Paran ronmhoni oro esancho. 13 OPVÜI na Moses yakchia yizüng pio ji ephan ontena khochicho, 14 osi ontena vanphen eseni khochi akvü ovüngthüng renphen ji esüa reni khochicho. Juda jipo riven küpo etsso jiang ji Amminadab tsoe Nashon na sokata razhü razhü na khochicho. 15 Issakhar jipo jo Zuar tsoe Nethanel na socho, 16 osi Zebulen jipo jo Helon tsoe Eliab na socho. 17 Jitosi süranki ji luki hoji ejümden Gershon tona Merari to pvüji na khochidencho. 18 Jisülo jo Reuben jipo na esowo rasan okho ji riven küpo etssoe jiangna okho okhona khochiv osi jijo Shedeur tsoe Elizur na sov. 19 Simeon jipo jo Zurishaddai tsoe Shelumiel na socho, 20 osi Gad jipo jo Deuel tsoe Eliasaph na socho. 21 Jisülo jo Kohath tsochen Levi jipo jiangna ntho tsütsaelan jiang bensi khochivka. Ontena nchenyan ethamo ji oyi jana jo jilo süranki ji tssokachithajkcho. 22 Jisülo jo Epharaim jipo na esowo rasan okho ji riven küpo etssoe jiangna, kholuk kholuk na khochiv osi hoji jo Ammihud tsoe Elishama na sov. 23 Pedahzur tsoe Gamaliel jo Manasseh jipo ji socho, 24 osi Gideon tsoe Abidan jo Benjamin jipo ji socho. 25 Okhao tssoa Dan jipo na esowo rasankho ji riven küpo etssoe sülamoe jiangna okho okho na khochiv, osi Ammishaddai tsoe Ahiezer na sov. 26 Ochran tsoe pegiel na Ahier jipo socho, 27 osi Enan tsoe Ahira na Aapthali jipo ji socho. 28 Hojito kvüthüng Israel jiangna nchenyan eseni khochia na shi esüa etüngi rasancho. 29 Moses na Midian kyon Jethro tsawoe Habab, onüng ji heto ezocho, "Ena OPVÜI na kokae epio meta ji ejamo tssoa khochiv sala. OPVÜI na Israel jiang tsükarankathüki etsson elüm epiv phyochaki lika, ephana roa, tona ena ejüeli ni chinhyavka." 30 Tole Hobab na janlancho, "Mo, aiyo a metae elani yiala." 31 Moses na ezocho, "E nzansi e sisi tiyia, ena kvülo nchemvü sana nina ntsika e lansoe tssoa. 32 Nina ephana rona OPVÜI na kvüta e mmhayia sana jiang ena ni shümnhyav ka."

Kyon Jiangna Khochiala

33 Kyon jiangna Sinai ntho phunglan jilona khochi tsüngon ethüm yentsatacho. Yuta topvü lo OPVÜI Ntsata Bakos jina ovüng na nchenyan onte yania yia vancho. 34 Ontena nchenyan jiangTlona khochi akvü engo jo OPVÜI eluk jina onte socho. 85 Ntsata Bakos jina khochiana Moses na heto phyonrhücho, "OPVÜI, Phanthi ni ri jiang ezonsorae sia, osi ni etssang jiang tsankhanthuka." 36 Elani kvüthüng hojina esana sana ombona heto phyonrhücho, "OPVÜI, Israel wopan wothüng wothüng shiang yolo elani yia."

Wokhata 11

Teberah To Tsao meta Ji

1 Kyon jiangna ezüpale OPVÜI thüngi erinjanta phanthicho. OPVÜI na onte erinjanta ji zoale ombona lüm tsuki onte pono omi jorothukcho. Omi jina onte yolo na kisochi, nchenyan ji nken phuko rungi sicho. 2 Tole kyon jiangna nzanchile to Moses thüngi jonjitacho. Osi Moses na OPVÜI thüngi randanle omi ji mhe sicho. 3 Hoji tsükona meta ji Taberah to tsacho, ntiotssole jilona OPVÜI mi ji onte yolona kicho.

Moses na esopvüi Ekhatiying Ethüngchetala

4 Hojilo lankon ejoma ha Israel jiang nzo yentsata vancho. Onte na n rümkhoku oso etsora chiyicho, tole Israel jiang naha heto erinjantav benkacho, "Etena oso jükaro tia tsophyawo mmhona! 5 Ejip metae jo ete tsokhuk ongo tsotacho osi kiaman tsotacho. Lishakthi, Mhelithi, Lasen, Pyaz, Sanran to etena tsotao jiang chenchümcheta? 6 Tokhatola enhungo ete etho monkhani sithaka. Enhungo ntia etsov n li; mana shiang eng akvü tsota vamo shi tae!" 7 (Manna jo hümphuka osi hakfhüshuka otsüng teriv esüa tüv. 8-9 Hojiang ji zümo lo yentsso nzo jochou. Ojyuato enyathüng jo kyon jiangna khyorhyua woe ohüm esüa cheni vüpi hümri epyaku rungi tsotacho. Osi hoji jo olive thyujüna hümri rüngcho esüa tsochecho.) 10 Kyon jiangna onte kibüngo mangrae erinjanta vanathüng Moses na zocho. OPVÜI na kyon jiang thüngi lüm tsuko ji Moses na nungracho. 11 Osi ombona OPVÜI ezocho, "Nino ntioli athüngi heto n mhom tssoala OPVÜI? Ntioli athüngi ni lüm tsukala? Ntio tsükona kyon shiang hetata poni elhi shiang apichola? 12 Ana onte joyingcho meka, osi ana onte bukthukcho mek. Nina kvütolui onte ji ngaro esüa epvüina ajümthuksi nijüpa onte motsüi jiang epiv ezowo meta ji ayithukvüka? 13 On te hetata tsükona aiyo oso kvülo khivla? 14 Kyon hetata tsükona ana oha ji n khichokhuk, a tsükona oha shi mmyingtia. 15 Nina heto a tssothuka tssona anzansi a chüthoka: tona enhungo ni lüm etsuk ha ana hamvü meka." 16 OPVÜI na Moses ezocho, "Israel esopvüiden to chekao jiang onte ekhatiying etssirhyuthuka, onte ji avanrhyu ranki jilo ni hachüma etsssirhyuthuka. 17 Ana joro hoji lona onte thüngi ezovka, osi ana ni pio mon jilo tara khichei onte ha pivka. Tona ontena kyon shiang sayalo ni kyochivka, to tssona ni taena onte ha ji hamvü meka. 18 Kyon jiang heto ezoa, "Nte bobo ntssüngchetava, ojyua jo ontena oso tsophyavka, ntena oso tara tia tsophyavo osi Ejip metae vanpvü savo to erinjantao ji OPVÜI na zothaka. Enhungo OPVÜI na oso nte pivka osi ntena hoji tsovka. 19 Ntena tsüngon motsünga eni, mekana mongo, taro, mekana mukyu tsükona tae tsov meka, 20 tokhatola choro totona, nte enoe na mpato chiyia osi hoji na nte laki nte n khetsü thüng jo tsotavka. Hojijo ntena erenjanta, ombona nte yolo vanpvü na nte bobo Ejip meta ji yaki n yitacho savo to epilanchita phyotao ji tsükona hojito tssovka. 21 Moses na OPVÜI ezocho, "Ana kyon 600,000 soala, osi nina choroa tsükona oso etsson tssothoku phyochakcho, 22 tona mangsü osi olyu onte tsochyua vancho alo? jümangi ongo topvü na lea onte tsochyuv alo? 23 OPVÜI na ezocho, "A etho ochüm licho alo? Ana phyoji bebenchev sana ji nina n sungu hunguka!" 24 Tole OPVÜI na ntio phyocho sana jiang topvü Moses na chivo kyon jiang ezocho. Ombona esopvüiden ekha tiying jiang tsarhyui vanrhyu ranki ji hachüma etssithukcho. 25 Tole OPVÜI na eluki na joro ombo thüngi thyudacho. Ombona Moses pithako mon jilona tara khichei esopvüi ekha tiying jianglo theyicho. Omon jina ontelo roale ontena zenkhyingden esüa nshata benkacho, tokhatola hoji sunga n tssocho. 26 esopvüi ekha tiying jiang yolo otsük eni jo ranki ji nvotav oki vancho. Tole hojilo ha omon jina oro onte pyingcho, osi oninaha zenkhyingden esüa nshatav benkacho. 27 Tole onina ntio tssoa vancho sana hoji hungi khyingroe tsüka na yunga owo Moses ezocho. 28 Tole Nun tsoe Joshua, nungothüng na Moses nzanchia evan jina Moses ezocho, "Tsüphoeyo, onte esanthuka!" 29 Tole Moses na ombo ezocho, "Ana nchümo ji nina a ntsijanicho alo? Aiyo OPVÜI mon na kyon topvü pyingi zenkhying den esüa tisantawo to nchümala!" 30 Jisüijo Moses tona esopvüiden onte ekha tiying to jiang na nzo nchenpheni yitacho.

OPVÜI na Piluku Rothukala

31 OPVÜI na esüngaro taena jümangina mpüng chiyithuki piluku sonhya venthukcho, osi onteji liko ponina eryu harüma lona rüma yicho. Piluku jiangji nchenyan osi hojiang poni onte nkonphia jiang lo elümoto pyatheracho. 32 Tole hoji tsüngon ji totona, ojyuato jana kyon jiangna piluku tae rümta mongcho osi tsükalo seri wothüng poni rhümaracho. Osi ontena nchenyan ji füchüma nkitacho. 33 Ontena etsoyu etsson licho khatola OPVÜI na lüm etsuk lona onte yolo vara yithukcho. 34 Hoji meta jijo, "Tssüphiyangphi müngshiphen" to tsacho, ntiotssole hojilo ontena etsoyuv tsükona tssüphi yangphio jiang shothei sitacho. 35 Ontena hoji lona khochi Hazeraoth lo oyi nchenyan tssotacho.

Wokhata 12

Miriam Ezüp Picho

1Moses na Kushite eloe soa vancho, tole Miriam ha Aaron onina ombo ekhirancho. 2 Ontena phyotacho, "OPVÜI na Moses yakchia tae nsana ke? Ombona e yakchia jo n sanake?" Tole onina hoto phyotao ji OPVÜI na zocho. 3 (Moses jo limha lo vancho yolo emirotsowo kyon ji tssocho.) 4 OPVÜI na jitopvü Aaron, ha Miriam, oni ezocho, "Ninthümata a vanrhyu süki jilo chirotava." ontena chiwotale, 5 OPVÜI na eluk durhyu lona joro ombo van-rhyu süki kipüngo mangi "Aaron! Miriam!" to omying rüki tsachukcho, tole onina sena chiwole, 6 OPVÜI na oni ezocho, "Ana nte ezov lio ji shi! Nte yolo zenkhying vanthuka na ana abobo onte hungthukala osi omüngina ana onte janala. 7 Tokhatola a phajae Moses thüngi jo ana a kyon Israel topvü ezepvüi tssothukala. 8 Jitsükona ana ombo thüngi jo omha omha tsentae tontüng ombo ezoala, ana ombo thüngi mphoyi ejungu lona n zoala. Ombona wo sak ophong kvütüv sana jiha hungthaka. Tona ntena ntio tsükona a phajae tachia nsantala?" 9 OPVÜI na oni thüngi lüm n tssocho; jitsükona OPVÜI na oni yaki yipvüto 10 osi eluk jina süki ji yaki yipvüto Miriam tsük topvü ratsü eno khyingi sicho osi sheryu esüa ehüma pholüp khyingi sicho. Aaron na ompvü nochonori ji hungi, 11 Moses ezocho, "Tsüphoeyo, nzansi, e zhüva mmen lilea hetüv ezüp jo e ti khyingthuka. 12 Ompvü ji ntiosana echü buki otsük phoko tsothakcho esüa ti kümthuka." 13 Tole Moses na OPVÜI thüngi randancho, "O Potsow, ompvü emiyia!" 14 OPVÜI na janlancho, "Ompvü opo na omhalo ompvü nchuka-yi-cho sawo ompvü na yikra ji tsüngon tiying hansi vam. Hoji tsükona ompvü ji ncheyan pomoe tsüngon tiying vanthük sanati yanehungi ompvü sosi rheyia." 15 Tole Miriam ji tsüngon tiying yantssae vanthukcho, osi Miriam na n rheyithüng jo okho jina nchenphen eseni n yiv vancho. 16 Jisüloti Hazeroth lona khochi oyi Paran romhoni nchentacho.

Wokhata 13

Chepyim Jiang

1 OPVÜI na Moses ezocho, 2 "Jipo taro eni jiang akvü lona esopvüi jiang yolo tsük-tsük ethüngchei ana Israel kyon jiang pia evamo meta Kanaan jilo chepyim lo wothuka." 3-15 Moses na hoji ephan Paran romhoni na esopvüi shiang wothukcho; Jipo esopvüi Reuben Zaccur tsoe Shammua Simeon Hori tsoe Shaphat Huda Jephunneh tsoe Caleb Issachar Joseph tsoe Igal Ephraim Nun tose Hoshea Benjamin Raphu tsoe Palti Zebulun Sodi tsoe Gaddiel Manasseh Susi tsoe Gaddi Dan Gemalli tsoe Ammiel Asher Michael tsoe Sethur Naphtali Vophsi tsoe Nabbi Gad Machi tsoe Geuel 16 Echepyim shiang ji Moses na Kanaan meta ji khyui zelo wothukcho. Ombona Nun tsoe Hoshea ji Joshua to omying dungphiyicho. 17 Moses na heto onte ezoa khochithukcho, "Shilona khochi owo Kanaan meta Juj owoe chiwotava osi jilona elani yingsüng jiang lo rhowotava. 18 Meta jilo rhowo meta ji kvütüvsana, kyon kvüta vana sana osi onteno kvüta etho jüchosana chei zetava. 19 Meta ji mhemmhomcho sana osi hojilo kyon jiango pikhfü tssoe vana alo hapolo vana sana zetava. 20 Meta jilo liko ji lizü memekana osi enung eran liliana zetava. Osi meta jilona ethicho tssüngthi ejoma lhoe hansi yitava." (Hojithüng jo jününgro emhen etünga vancho.) 21 Tole ontena meta ji jükiwoe rhowo Zin rhomhoni na benkae jükiwoe Hamat rasanlan ji ndüngo Rchob jana khyui zetacho. 22 Ontena ovüngtssoa jüjowoe rhowoe oyi Hebron metalo thojüi jipo Anakim to tsao jiang tsoronichen Ahiman, Sheshai tona Talmai to pvüji na vamo jilo chiwocho. (Hebron jo Ejip metalo Zoan ji n tssothüng nzyu tiying vüngina tssocho.) 23 Ontena Eshcol hayi chiwo jününgro khero motsüngalo tssüngthi otsük enina khathei ejümo tata ethicho tüv etssae khora thei ejümtasi yicho. Ontena tsarümthipen tona züwothi ha tara hantasi yicho. 24 Hoji metaji Ashcol to tsao jijo Israel jiangna jilona jününgrothi etssacho ji tsükona. 25 Meta ji tsüngon zhüro khyui zetasi 26 ontena Moses, Aaron tona Israel topvü to thüngi kholani Paran romhoni. Kadesh lo yitacho. Metaji ontena hungthaka to ezoa ontena jüngüngrothi vüng ji hana oyi ejücho. 27 Ontena Moses ezotacho, "Ena meta ji khyui zethaka osi meta ji lizü, ejüeli meta osi meta jilo tssüngthi ejoma jo shiang je. 28 Tokhatola metapvüi jiang jo elümoto etho jüa osi ontena pikhfü tssoe vanala osi onte yantsü jiangha tsüphoa osi pikhfü mmhona tssocho. Hoji ekalo meta jilo kyonpvü thojüi jipo ha vanlana. 29 Meta ji jüjowoe jo Amalik jiangna vanala, phunglan jiang lojo Hittite, Jebusite tona Amorite to jipo jiangna vanala, tosi Kanaan jipo jo Mediterranean jümang tssae tona Juda tssae to vantala." 30 Kyon jiangna Moses thüngi phyocho-rüchota vamo ji Kaleb na jükrübi onte vanthuksi ezocho, "Etena enhungo owo onte sakae meta ji khyoe khitavka, eteji onte ekhyowo tüv etho jüa." 31 Tokhatola Kaleb ndüngo etsso kyon jina phyocho, "Meka, eteno onte sakao tüv ete etho na n toka, metapvüi jiang ji ete lona etho elümoto etho jükata. 32 Ontena hungwo metaji tsükona heto yibung ejüng elümoto Israel jiang ezotacho. Ontena phyocho, "Meta jilona chiyichojo metapvüi jiang tia n süphichyu ka, kyon ha ena hungwo jiang topvü ntssonnron tae, 33 elani meta jilo Anak tsoronichen kyonpvü thojüi jiang mpato hungra. Onte zena eteno khomungden esüa tüv, ontena hojito e zechecho tssov."

Wokhata 14

Kyon Jiangna Erenjantala

1 Kyon jiangna lüm n tssov zümotona kyatathüngcho. 2 Ontena Moses ha Aaron oni nhyenchoa phyotacho, "Ejip metae na alo hepi lijüng sana echüi sivo ji mmhomo! 3 Ntioli OPVÜI na Kanaan metae e sosi yiala? Ritsso lona echürae e tsoeni osi e ngaro jo oyam na rumi khivlo. Tona Ejip metae kholani yicho mmhomo mekchoke?" 4 Osi ontena onte yolo heto phyotacho, "Ete esopvüi ethüngi Ejip metae kholani yitavkalo!" 5 Tole Moses ha Aaron onina kyon jiang mhadungo na likoe nkhümthetacho. 6 Tosi chepyim wothuko, Nun tsoe Joshua tona Jephunneh tsoe Kaleb to onina nungra lona oni mpensü jiang reroe sia, 7 kyon jiang ezocho, "Ena owo chei zewo meta jijo emüngyanthav meta. 8 OPVÜI na ete thüngi emathana hoji meta lizü osi ejüeli meta ji epiv. 9 OPVÜI panlan ti-tssotava osi meta jilo evamo kyon jiang ti-kyutava. Etena elaro onte khyovka. OPVÜI na ete thüngoe vana osi ombona meta jilo potsow onte nkohao jiang khyothaka; jitsükona ti-kyutava." 10 Kyon topvüna oni ephyatsüngu tssocho tole jitopvü süranki ji poni OPVÜI vanrhyu phfütsson ji ontena hungcho.

Moses na Kyon Jiang Tsükona Randanala

11 OPVÜI na Moses ezocho, "Kyon shiang na kvütenhyaka a sinkivla? Ana onte yulo chethev elhi hetata tssoe ejüaha ontena kvütenhyaka n longtsüka na vanpamvüla? 12 Ana vara rothuki onte chürüpthoku ka, tolea nino ana ontelo longtsükao jipo pono opo ni tssothokvüka." 13 Tole Moses na OPVÜI ezocho, "Nina kyon shiang ni etho na Ejip metae na sochukcho. Osi nina ni kyon jiang pono elhi tssothako shi Ejip kyon jiang na zoana, 14 ontena shilo metapvüi jiang ezov. OPVÜI nina e ndüngo vanato kyon shiangna zothaka, ni eluk na e pono esamo ji lona chancheta ni hungala osi engo ni eluk kholung jina e vüngina esoji elani zümolo ni mi kholung jina e soji, kyon shiangna zothaka. 15 Hoji tsükona nina enhünga ni kyon jiang chüthokcho jo kyon thanpoe ochoangna ni myingthüng zothakcho sana jiangna jo 16 nina ni kyon jiang lijüngi na sochokchio etho n licho lona chüthoki sicho to phyotav. 17 Hoji tsükona enhungo, OPVÜI, nina ni etho ji ejüa osi nina heto phyochakp ji benthukvo to ana randanala. 18 'Aiyo OPVÜI Potsow, osi elaro lüm n tsuk, osi ana nzan tsüphov benphia kyon mmen osi panlan jiang nlan siyiala. Tokhatola ana opvüpoe mmen tsükona tsoronichen jiang pochung ethüm mezhü jana khangshinrüngu.' 19 Osi enhungo, OPVÜI, ni n tongphio nzan tsüphov ji ephanina nlan siyia to ana randanala, ontena Ejip metaena khochipvü nina nlan onte siyipvü." 20 OPVÜI na janlancho, "Nina randamo ji esüa ana nlan onte siyivka. 21 Tolea ana vana osi a vanrhyu na limha pyingo ji tsükona kyon ochoangna a vanrhyu ji hunga osi Ejip lo a elhi jiang hungsi elan elani lüm afüphiyia ayi n ngasana, 22 onte tsüka na lea ana onte motsüi thüngi phyochak pio meta jilo rheyiv nhyakcheta eküm vamvü meka. 23 Ayi nngae ochinaha ana onte pyimtsümotsüi piv phyochako meta jilo rheyichev meka. 24 Tokhatola a phajae kaleb jo nchümribo tssoa alo longtsüka lia vamo jina, 25 ombona owo khyui zewo meta ji hayitsü kvülo Amalek tona Kanaan kyon to na enhünga vancho sana jilo ombo sochukchivka, osi ombo tsoeworo jiangna jilo vamvüka. ojyua kholani yia osi Aqaba jünken jiwoe lijüng jilo yia."

Kyon Jiang Erenjan Man ji OPVÜI na Tssoriala

26 OPVÜI na Moses ha Aaron oni ezocho, 27 "Kyon shiangna kvütenhyaka a thüngi erinjantapamvüla? Hetüv erinjan shina azolakthaka! 28 Enhungo heto ezoa, 'Ana vamo shi esüa chetünga ana phyochakala, kyon shiangna chontao ji ana pivka. A, OPVÜI na phyoala. 29 Nte chüravka osi nte müng jiangna lijüng shi nzüpyingu ka. Ntena erinjantao ji tsükona nte yolo nzyu mekyu pomoe kyon ochia meta jilo rheyichev meka. 30 Ana meta jilo nte vanthoku phyochakcho, tokhatola kaleb ha Joshua oni yaki tsükalea jilo rheyi chev meka. 3i Ntena nte ngaro jiang oyam na nte rhümayiv to kyutala, tokhatola ana phyochak pio ji esüa meta jijo onte echi tssovka. 32 Nteno lijüng shilona nte chüravka. 33 Nte yolo wokhao ji jana n chürathüng jo nte jancho n zo man ji ngaro jiangna nzyu zhüro lijüngi ezüpa khyuta vamvüka. 34 Ntena nte mmen ji man nzyu zhüro ezüpvü, hojijo nte metaji khyui zev tsüngon zhüro khio tsüngon ji tsüngonala nzyua ren ezüpvüka. Ana nte thüngoe n tssov nte ri küma na, kvüto tssov sana ntena jilona engathevka. 35 Nte ochoang na sanrhyui a panlantacho sana jiang thüngi heto tssoyiv to ana phyochakala. OPVÜI a, shina phyothaka, nte otsük akvü romhoni na nte chüvka.' " 36-37 Moses na meta ji chelo wothuko kyon jiangna oyi ejüngj üng ehungpvüi pio ji yakchia kyon jiangna OPVÜI thüngi erinjantav benkacho. Hoji tsükona OPVÜI na enoera n mhom khi onte khyingthuki chüthokcho. 38 Echepyim onte taro eni ji yolo Joshua ha kaleb oni tae enhyokacho.

Metaji Khyov Sakademo Ji

39 OPVÜI na phyoji Moses na Israel jiang ezole ontena nungrata kyatacho. 40 Ontena nyazüngi na meta ji heto phyoa sakatacho, "Enhungo OPVÜI na phyochak epio meta jilo yitala, otsotso etena mmen tssothaka." 41 Tole Moses na onte ezocho, "Tona nteno ntioli OPVÜI jancho n zotala? Ntena ochüm echhev meka. 42 Ti-otava. OPVÜI na nte thüngoe thev meka, orina nte chüravka. 43 Ntena Amalek tona Kanaan to kyon jiang thüngi rota na ralina nte chüravka, ntena ombo sü rüv ekhiramo jina OPVÜI na nte thüngoe n tssov sithaka." 44 Tolea ontena ryua yingsüng jiwoe wotacho osi Ntsata Bakos ji tona Moses tojo nchenphen ji yaki n wocho. 45 Tole Amalek tona kanaan kyonden to jilo vamo jiangna onte ryulanchia Hormah jana onte phanchicho.

Wokhata 15

Othan Epi Shikhfü

1 OPVÜI na onte epio jilo vanathüng 2 Israel jiangna benphia ewov tsükona shikhfü Moses yakchia heto picho. 3 Mangsübung, olyubung, olyu mekana nyanyan to khi erungthan, mekana phyochakthan mekana, lüm erungthan, mekana ekhümlo tathi thanphen to tssoa OPVÜI pithoka, hoji than ji rhüm jina OPVÜI emathathukala. 4-5 Ochona olyu mekana nyanyan khi erungthan piasana ekümrümo ji akvü nzo ohüm seri motsüngalo olive thyujü etükpvü motsünga nhyonkae ethi-eben than tssothuka osi jilo zükhi opvü motsünga oro thana. 6 Kvüthüng olyubung thana sana ji nzo ohüm seri eni olive thyujü opvü motsünga si chiso nhyonkae benrothan tssothuksi, 7 hoji nzo zükhi opvü motsünga si lungta ekae thana. Othan shi rhüm jina OPVÜI emathavka. 8 Kvüthüng mangsübung khi erungthan mekana phyochak than, mekana khümshümta than OPVÜI pia sana, mangsübung akvü nzo benrothan tssoa 9 ohüm seri ethüm lo olive thyujü opvü eni nhyonkae, 10 jilo zükhi opvü eni thephae khümvüka. Othan shi rhüm jina OPVÜI emathavka. 11 Hojito mangsübung akvü, olyubung, olyu osi nyanyan akvü nzo thamvüka. 12 Osi ekümrüm motsünga lo kyungkata thana tssona hoji ephan benrothan jiangha rankathokuka. 13 Israel kyon otsük akvüna etsoyuthan khi orhüm mmhona OPVÜI emathathukathüng heto thamuka. 14 Osi kvüthüng na lankon nte nzo evan esüngaro nchenyalea sunga evanlea, tüv na etsoyuthan khi orhüma na OPVÜI emathathoku thana tssona omboha shikhfü shiang ephan thamka. 15 Nchünkhon tsükona nte osi lankon jiang tsükona shikhfü shi benphivka. OPVÜI mhadungo jo nte osi onte topvü kheti; 16 Shikhfü tsük jina nte osi onte satsüala. 17 OPVÜI na onte pia vamo meta jilo vanathüng 18 Israel jiangna benphiv tsükona OPVÜI na Moses heto shikhfü shiang picho. 19 kvüthüng meta jilona chiyicho etsoyu tsoa sana ovüngna tara khichei vasi echümporo tssoa OPVÜI tham vüka. 20 Ntena tsünghanro ethan na hümri rüngdemo jilona nyakchodemo ji khi echümporo than tssoa OPVÜI pivka. Shijo ntena tsünghanro jilona echümpoto thamo ji esüa thamvüka. 21 Ntena rüngwo hümri jilo khichei thamo shi jo nchünkhon benphia wovka. 22 Tokhatola OPVÜI na Moses pio shikhfü shiang ochona sana n tsiv woria tssona, 23 osi khümtsüng totona sülami jo OPVÜI na Moses pio shikhfü shiang n benphiv vanta yia tssona, 24 osi hoji n tsiv okho na woricho tssona, ontena mangsübung khi erungthan OPVÜI thamvüka, hoji rhüm jina OPVÜI emathathokuka. Hoji nzo benrothan tona zükhi than to etüm elan ephanina pivka. Hoji ephalo onte mmen than tssoa nyanyan bung khi thamvüka. 25 Pvüti jina okho topvü tsükona nthoche elhi jiang tssoyiv osi onte nlan jiang OPVÜI na siyiv, ntiotssole onte wori ji etama na mek osi ontena mmen than ji etsoyuthan tssoa OPVÜI picho. 26 israel khümtsüng osi onte yanki nchenkae evan jiang topvüna worio ji tsükona onte topvü nlan siyiv. 27 Kijaena n tsiv mmen tssona ombona nyanyan okyuro nzyuatso khi mmenthan pivka. 28 Pvüti jiang thanpheni na nthoche elhi tssoa kija ji mmen lona nthochevka osi nlan ji ombo siyivka. 29 Israel tssolea, nchenkae vancho lankon tssolea shikhfütsük ji tsütsavka. 30 Tokhatola metapvüi tssolea lankon tssolea ochona etana na mmen tssoa sana ombona OPVÜI ji etssakthav kümthoki ji yakchia nlan tsso jina ombo chüthoku, 31 ntiotssole OPVÜI na phyo jiang ombona khi sia etana na ombo yizüng yesoyio ji tsükona ombo chüo ji ombo pono tae.

Esanmung Shikhfü Yeso Kyon Ji

32 Israel jiangna lijüngi vanathüng emung motsünga lo kyon tsükana otssüng woa vancho. 33 Tole ombo ji Moses, Aaron osi Israel topvü mhadungo sosi wocho, 34 osi omboji kvüto lyuyiv sana n tssüngcheo jina nhyakyata vanthukcho. 35 Tole OPVÜI na Moses ezocho, "Kyon tsük ji chüthokvü lia, ombo ji nchenphen tssae sosi chivo okho toto khi ephyatsüngi sitoka." 36 Hoji tsükona OPVÜI na phyoji ephan nchenphen tssae sosi chivo ephyatsüngi sitacho.

Süjüm Ntssüka Shikhfü

37 Israel jiang thüng heto ezole to OPVÜI na Moses yizüng picho, 38 "Nte mpensü otssae nken akvülo süjüm ntssükatava osi ntssü akvü ejüm na sechaktava. Ntena heto nchünkhon benphitava. 39 Süjüm ntssüo jiangna a yizüng jiang nte nchümchethukvüka, ntena kvüta hojiang hunga sana a yizüng topvü nchümchei benphivka, to tssona ntena a mhechoe sisi nte etancho etssophyov meka. 40 Süjüm jiangna a yizüng jiang topvü nte nchümchethukvü osi nteno a kyonden to vamvüka. 41 Aiyo OPVÜI nte Potsow tssoa Ejip metae na nte sochukcho. Aiyo OPVÜI Potsow ji."

Wokhata 16

Korah, Dathan Tona Abiram To na Panlamo Ji

1 Kohath lo Levi jipo Izhar tsoe Korah jina lüm tssoni Moses panlancho. Ombo tephfüden jo Reuben pvüji lo Eliab tsoeden Dathan, Abiram, Peleth tsoe On tona Isreal thanpoe onte 250 to, okhona ethüngcheo esopvüi thüngche jiang. 3 Ontena Moses ha Aaron oni hachümi phyotacho, "Elümoto nte woyakthaka! okholo kyon topvü OPVÜI echi osi OPVÜI na ete ndüngo vana. Tona Moses, nino ntiolyui OPVÜI kyon okho pono nibobo OPVÜI tssoala?" 4 Moses na hoji zoale likoe vanthei randancho. 5 Ombona Korah tona ombo sürüi jiang to ezocho, "Ojyua enyathüng OPVÜI na ombo kyon ochosana e hungthukvüka, ombona ombo kyon, ombona ochoang ethüngchecho sana hoji khi thanpheni na ombo ndukthukvü ka. 6-7 Ojyua enya jo ni tona ni sürüi jiang to tssoe mitssophfü lo miron thei, tssütsserhüm thei toli benrasi thanphen jilo wotava. Tona etena OPVÜI ethüngche kyon ji chekavka. Nte Levi na woyakcho ka!" 8 Moses na Korah ezolancho, "Engatava, Levi kyonden! 9 Israel Potsow na nzontsüi na khochaki ombona nte ndukthukvü, OPVÜI vanrhyu ki jilo elhi nte tsswothukvü osi kyon jiang eshanlanga onte benkav nte ethüngcheo jijo thama tsayia nchümta alo? 10 Ombona nte osi Levi thapoe jiang topvü mying tsüphov hetüv pile enhungo pvüti elhi jiha ntena hoe khilam alo! 11 Ntena Aaron thüngi erinjantao jijo ni osi ni sürüi jiangna OPVÜI thüngi panlana erinjantacho tae." 12 Tosi Moses na Dathan ha Abiram oni tsalo wothukle, oni na phyocho, "Ena rov meka! 13 Nina Ejip meta lizü jitüv lona e tsachuki lijüng hetüv lo e chüthukvü e sosi yio jina lea mmhonthaka. Tona nina e pono ha OPVÜI tssolam ke? 14 Nina liko mmhom osi e li, osi jününgro li e picho n lihan, osi enhungo ejithechiv sala. Ena rov meka!" 15 Moses na lüm tsuki heto phyocho, "Kyontsük shiangna hana rocho than ntia ti-khichoyia. Ana onte ochia n tachihan; ana onte kurü ro motsünga tia n khiyihan." 16 Moses na Korah ezocho, "Ojyua ni tona ni sürüi 250 ji to OPVÜI vanrhyu ki jilo rotava; Aaron ha rovka. 17 Nte Otsük akvüna mitssophfü ji bensi hojilo tssütsserhüm thei OPVÜI thanpheni hansi rovka." 18 Tole otsük akvüna ombombo mitssophfü jilo miron tona tssütsserhüm to therae bensi oro Moses ha Aaron oni nzo OPVÜI vanrhyu kipüngo mangcho. 19 Tole Korah na kyon jiang topvü tsarhyui oro OPVÜI vanrhyu kipüngo na Moses ha Aaron oni zechiwo mangracho. Tole jitopvü OPVÜI vanrhyu phfütsson jina tsünglüpkirina kyon jiang pono rakacho. 20 Osi OPVÜI na Moses ha Aaron oni ezocho, 21 "Kyon shiang yolona esenlani yitava ana okho totona monthukvü saka." 22 Tokhatola Moses ha Aaron onina nkhümthei phyotacho? "O, Potsow nino eküm topvü epipvüi ji. Kyon tsükana mmen tssona okho topvü monthukvü ke?" 23 OPVÜI na Moses thüngi ezocho, 24 "Kyon jiang ji Korah, Dathan tona Abiram to ranki na nkachoe yira to ezoa." 25 Tole Moses tona Israel esopvüi jiang to na Dathan tona Abiram to thüngi wotacho. 26 Ombona kyon jiang ezocho, "Nthae kyon shiang ranki na nkachoe yitava osi onte tsütsaelan ntia ti tsüngkatava to mekana onte mmen man ji nte topvü nte monnhy. avka." 27 Tole ontena Korah, Dathan tona Abiram to ranki na nkachoe yiracho. Dathan tona Abiram to na onte ngaro osi eloe jiang nzo chiro kipüngi mangrae vancho. 28 Moses na kyon jiang ezocho, "Shiang hetopvü yakchia aiyo OPVÜI na a ethüngchecho elhi tssoakha a etancho tssoa mek to ntena chekav ka. 29 Kyon shiang ji OPVÜI thüngi na ezüp n hungu tathi echü chüna a ji OPVÜI na a ethüngchecho mekcho tssovka. 30 Tokhatola OPVÜI na onte lo ntiosana n tssophen tssothuki liko ji küngsoe onte osi onte ejüeli jiang nzo ekümi na onte suktherae echüli onte rheyia tssona ontena OPVÜI n khichocho to ntena engathevka." 31 Moses na hojito phyopvüto, liko ji küngsoe Dathan, Abiram tona onte opan, 32 Korah tona ombo sürüi jiang osi onte ejüeli jiang to liko ekük jilo suktherae sicho. 33 Hojito onte topvü ji onte ejüeli jiang nzo ekümi na echüli rheyiracho. Liko jina züptalani onte monrathukcho. 34 Ontena kyatao ji zoale hojilo evamo Israel jiangna tsanrae sicho. Ontena, "Tsantava! liko jina eteha e nzhüv ka!" to phyotacho. 35 Tole OPVÜI na omi jorothuki tssütsserhüm erungo otsük 250 jiang rungtsüngrae sithukcho.

Mitssophfü Jiang

36 Tole OPVÜI na Moses thüngi ezocho, 37 "Aaron tsoe pvüti Eleazar ji ezoa, kyon rungtsüngo jiang khelo yongmen mitssophfü jiang khyarhyui jianglo miron jüwo jiang nzüroe sithuka, ntiotssole mitssophfü jiango ntho. 38 Hojiang ji OPVÜI thanpheno thanthako jina ntho kümcho. Hoji tsükona rungtsüngo kyon jiang khelona khi hojiang ji poroa jocholani thanphensa ji lhüphen tssothuka. Hoji na Israel kyon jiang ntangshon piphen kümka." 39 Tole Eleazar pvüti jina hojiang khyarhyui thanphen ji elhüp jocho. 40 Hoji yakchia Israel kyon jiangna engathev jijo Aaron tsoronichen na yaka ochina ha thanpheni oro erungthan piv meka to. Ochona hojito tssoana ombo ha Korah tona ombo kyon den to monthuko ji esüa monthukvüka. Shiang hetopvü to OPVÜI na Moses yakchia Eleazar thüngi ezoji ephan tssocho.

Aaron na Kyon Jiang Shanchoala

41 Ojyuato jo kyon topvüna Moses ha Aaron oni thüngi heto erinjantacho, "Ntena OPVÜI kyon ejoma chüthukthaka." 42 Ontena sanrhyui Moses ha Aaron oni thüngi erinjantathakale, ontena OPVÜI vanrhyu ranki jiwoe zechitale eluk jina ranki ji eyuka vancho osi OPVÜI vanrhyu phfütsson jina razhüa vancho. 43 Moses ha Aaron onina owo ranki ji mhadungo mangcho, 44 tole OPVÜI na ezocho, 45 "Kyon shiang yolona nkachotava, ana enhünga onte rungtsüngthukvü ka!" Tole onina liko woe nkhümthei vanathüng, 46 Moses na Aaron ezocho, "Ni mitssophfü ji khi thanpheni na miron tsachei jilo theta, osi miron jiang poni tssütsserhüm tara theta. Jitosi kyon jiang thüngi tsüsoa owo shikhfü ephan onte nthoche elhi tssoyia. Zakto tssoa! OPVÜI lüm etsuk ji chiyithaka osi echü vara benkathaka." 47 Aaron na hoji ephan mitssophfü ji bensi zakto kyon jiang etssi vamo jilo wocho. Vara ji benkathaka to ombona hunga jo zaktole miron jilo tssütsse thei kyon jiang nthoche elhi ji tssocho. 48 Hojina vara ji esanicho osi ombo echüi jiang tona eküm vamo jiang to yutalo phanthi vancho. 49 Hojilo kyon chüo jiango 14,700,' shi jo Korah panlan jilo chüthuko jiang n khanhya. 50 Vara ji esanthaka le, Aaron na OPVÜI vanrhyu kipüngi Moses thüngi kholani yicho.

Wokhata 17

Aaron Jarung Ji

1 OPVÜI na Moses ezocho, 2 "Israel kyon jiang ji pvüji akvü esopvüi thüngi jarung motsüng tsüng ren, jarung taro eni ni, pile to ezoa. Jarung akvülo esopvüi ji mying erankata. 3 Levi pvüji jarung jilo jo Aaron mying erankata. Jipo esopvüi tsükalo jarung motsünga ren tssovka. 4 Hojiang hansi a vanrhyu ranki Ntsata bakos ji mhadungo ana ni ndukphen jilo vanthuka. 5 To tssona ana ethüngcheo esopvüi ji jarung jijo rüni chenkae livka. Hojitoli Israel ochoangna nipono phyochophyoria sana jiang ana esanthokuka." 6 Moses na Israel jiang ezocho, osi onte esopvüi otsük akvüna jarung motsüng tsüng, tsotsüi taro eni ombo picho, osi Aaron jarung jiha jilo thecho. 7 Tole Moeses na jarung jiang topvü Ntsata Bakos ji ndüngo varhyucho. 8 Ojyuato jo Moses na süranki jilo wole Levi pvüji lo Aaron jarung jina shungkae ebeni almond ethi mheni licho. 9 Moses na jarung jiang khirae Israel kyon jiang ejüracho. Osi ontena hojito tssoji hungale, esopvüi jiang otsük akvüna onte jarung jiang khilantacho. 10 OPVÜI na Moses ezocho, "Aaron jarung ji Ntsata Bakos ji mhadungi vanthuka. Hoji jo erinjana vamo Israel jiang ji onte erinjan ji esani n siana onte chüv to püngnophen ji tssovka." n Moses na OPVÜI yi ephan tssocho. 12 Israel kyon jiangna Moses ezotacho, "Toana echümtan ji hoji tssovla! 13 Hoji ndüngo ewoe topvü chüv tssona e topvü echükhancho tüv."

Wokhata 18

Pvüti Tona Levi To Elhi Jiang

1 OPVÜI na Aaron ezocho, "A vanrhyu ranki shilo elhingo jiango ephyorüv tssochechojo nlan jiang ni, ni tsoeden, osi Levi jiang na hamvüka, tokhatola pvüti elhi lo ephyoverüv tssochecho jo nlan jo ni tona nitsoe jiang to taena hamvüka. 2 Ni kitsük kirhyu Levi jiang sosi oro ni tona ni tsoe jiang to na vanrhyu ranki jilo elhi tssoathüng ni nzanchithuka. 3 Ontena nte thüngi etssov lio jiang osi vanrhyu ranki jilo etssov lio jiang tssokhuka tokhatola Ntho meta jilo osi thanphen jilo Ntho tsütsaelan jiang ndüngo ewov jo n li. Ontena hoto tssocho jo onte osi nte topvü chüravka. 4 Ontena nte nzo elhi tssoa osi vanrhyuki jilo onte elhi jiang tssokhuka, tokhatola n tüm kyon ochinaha nte nzo elhi n tssoche. 5 A lüm etsuk ji Israel topvü pono n chiyilamo tssoa ni tona ni tsoeden jiang to taena ntho meta osi thanphen jilo elhi tssovka. 6 Nte wopan Levi jiang ethüngche yantso esüa nte pio ji ana. Ontena vanrhyuki jilo elhi etssov tsükona ana khochaki onte vanthukcho. 7 Tokhatola ni tona ni tsoe jiang to tae na nthotsowo meta jilo tona thanphen jilo to elhi jiang tssovka. Ana pvüti elhi ji khi nte yantsoa esüa pithako ji enhungo shiang jo nte elhi kümthaka. N tüm kyon ochona Ntho tsütsaelan jiang ndüngo roana chüthoku ka."

Pvüti Jiang Ejan Ji

8 OPVÜI na Aaron ezocho, "Erungthan mekna echümporo than apio jiang topvü ana nte piala toji nchümchetava. Ni tona ni tsoronichen to jiang thüngi ana nchünkhon tsükona nthochaki elhi nte zikao jiang ndana nte piala. 9 Thanphen sa jilona n rungo than ntholo nthotsowo jiang ji ana heto shiang nte piala: Otsukomüm than jiang, mmenthan jiang, osi lolan than jiang to. Hojito ntho than kvüta athancho sana jiango ni tona ni tsoronichen to jiang echi tssovka. 10 shiang topvüto eboe taena, ntho meta lona tsovka, osi hojiang topvüto ntho tssothuka tsütsavka. 11 "Israel jiangna echümporo than apio jiang ephalo, othan kvüta athana sana jiang topvü nte echika. Hojiang ji ana nchüngkhon tsükona ni tona ni tsokhying osi tsoloden to jiang thüngi piala. Ni wopan yolo ochoangna tssolan shikhfü ephani na ntssüngchethakcho sana jiang topvü na tsokhuka. 12 "Israel jiangna ontena hungdemo than mmhontso nzyu akvüto a thüngi apio shiang topvü ana nte piala: Olive thyujü mmhontso, zükhi osi otsuk-omüm mmhontsowo jiang topovüto. 13 Hojiang topvü nte echika. Ni wopan yolo ochoang jo shikhfü ephanina ntssüngchethakcho sana jiang na tsokhuka. 14 "Israel jiang na ntio kvütata ndam nlina khochaki apicho sana jiangha topvü nte echi tssovka. 15 "Onte tsokhfü jiang tssolea, mekana ekümrümo nrodemo jiang tssolea, Israel jiangna kvüta a thana sana jiang topvü nte echi tsssovka. Elani tsokhfü thancho shilamo jiang tssolea, mekana ekümrümo nrodencho kvütata shikhfü ephanina n tssüngchehancho shilana sana jiang man jiang topvü to ntena khichovka. 16 Ngaro jiang topvü choroa tssoathüngna shikhfü ephanina tssenchaki evao janti rang mongo taena rhanlani khivka. 17 Tokhatola mangsü, olyu tona nyanyan to nrodemo jiango rhanlani khiv meka, hojiango topvü a echi nrünga tsso jina khochaki a thamvüka. Osi ejen jiango thanphen sa jilo erhikasi ethyu jiang rungi orhüm ji khi a emathathokuka. 18 Tolea hojilo oso jiango nte echi, shyuro so, ojo sülamoe amimoe echümporo than tssoa a pio jiango jiang topvü nte echi tssovka. 19 "Israel jiangna echümporo than tssoa athamo jiang topvü nchünkhon tsükona ni osi ni tsokhyingden osi tsoloden jiang thüngi ana nte piala. Shijo bej aki n siwo tssoa ni thüngi tona ni tsoronichen to jiang thüngi ntsatala." 20 OPVÜI na Aaron thüngi ezocho, "Ninajo nti ejüeli ha tsentso tssoa khiv meka, elani Israel liko lo ni ejan tssoa ntia khiv meka. Nina ethev elio jijo, A, OPVÜI shi taeka."

Levi Pvüti Jiang Ejan Ji

21 OPVÜI na phyocho, "Israel jiangna tarochia apio jiang topvü ana Levi jiang pithaka. Shijo ontena a vanrhyuki jilo elhi etsso ji jokheman. 22 Israel thanpoe najo vanrhyu ki jilo woe onte popo echü rhükav meka. 23 Nchüng nandang na süranki jilo elhi jiang topvü Levi jiang pono tae tssovka. Shijo echümporo tssoa nte tsoronichen' jana benphia ewov shikhfü. Levi jiangna Israel lo onte ejüeli vajüng ntia tssov meka, 24 ntiotssole onte ejan jo Israel jiang na echümporo yantso tssoa tarochia apio ji ana onte pithaka. Hoji tsükona ontena jo Israel lo onte ejüeli vajüng tssoa ntia khiv meka."

Levi Jiang Than

25 OPVÜI na Levi jiang ezole to heto Moses yizüng picho, 26 "Kvüthüng ntena Israel jiang thüngina OPVÜI yantso tarochia ji hunga sana jilona taro chia khichei echümporo than tssoa OPVÜI pivka, 27 echümporo than shijo lijon jina benro ethan osi zükhi ethan lona khichei thamo ji woni kheti tssovka. 28 Hoji esüa nteha Israel thüngina tarochia yantso hungwo jiang lona echümporo than OPVÜI pivka. Osi echümporo than shi ntena pvüti Aaron khelo theyivka. 29 Hoji jo ntena hungcho yulo mmhontso jilona khichei thana. 30 Mmhontso ji khichei thanthaka na enhyo jijo lijon jiang na mmhontso ji thansi enhyo jijo ontena khio ji esüa ntena khitava. 31 Hoji lona enhyo ji ni osi ni wopan na kvülona nte tsohungana tsocheta, ntiotssole jijo ntena vanrhyuki elhi tsso ji jokheman. 32 Ntena hoji lona mmhontso ji khichei thansi sülojo enhyo ji etsov ntia nlan n li. Tokhatola ti-mhechotava, yantso kvoeha mmhontso ji khichei n thandem jo ti-tsotava, to tssocho jo nte chüthoku ka."

Wokhata 19

Mangsü Emyom Rungo Mibuk Jiang

1 OPVÜI na shikhfü shiang Israel jiang pile to 2 Moses ha Aaron oni ezocho. Mangsü emyom ntia ome n khyingo osi elhi n tssothukhamo tüv, 3 motsünga hansi oro pvüti Eleazar pia. Hojijo pikhfü pomoe süsi chiwo ombo mhadungo na tatsünguka. 4 Eleazar na hoji ejen ji tara khi, ombo yingro na yenjo tiying süranki jiwoe erhichivka. 5 Osi ekümrümo ji totona, ofü, oso, ejen osi erü jiang theta pvüti ji mhadungona runguvka. 6 Jisülo jo pvüti jina cedar tssüng tara khi, jümkaphen tona oying emyom to tara thei omi jilo thechivka. 7 Hojisülo jo ombona mpensü jiang etssüi sisi tsükasi nchenpheni rheyivka, tokhatola ombo ji mmyu nandang jo ntho to vamvü. 8 Mangsü ji erungo kyon jiha ombo mpensü jiang etssüi sisi tsükae sivka, tokhatola mmyu nandang jo omboha n tho to vam. 9 Jitosi shikhfü ephani na nthochethako tüv kyon tsükana mangsü rungo ji mibuk ji khi pikhfü pomoe meta ntssüngchethako tüv lo vavka. Hoji jo Israel jiangna ojü mmen tüv ntssüngche elhi tssoathüng tsütsav tsükona vavka. Hoji elhilan jijo mmen nthochephen osi mmen khi esiv tsükona nthoche elhi. 10 Kyon ochona mibuk ji hanrhyucho sana ombona mpensü jiang etssüi sivka, tokhatola omboha mmyu n janthüng jo n tho to vamka. Shikhfü shiang jo yuta topvülo Israel osi metapoe onte yolo vamo jiang topvüna benphia ewov tsükona.

Echümüng Phyao Ji (Evüngkao ji)

11 Ochona echümüng evüngkatana tsüngon tiying n tho to vamka. 12 Ombona nthoche jü khi tsüngon ethümo to jilo tona tsüngon tiyingo to jilo nthoche sanati ombo ntssüngchevka. 13 Ombona echümüng evüngkasi nthoche jü na n thochethüng jo n tho to vamvü, ntiotssole nthoche ji' ombolo n phyangkahan. Hoji tsükona ombona OPVÜI vanrhyu ki ji mmenthukala osi ombo ji OPVÜI kyon to ombo n khanhya. 14 Ochosana raki chungi na chüna hojithüng ranki chungi evamo kyon ji mekana hojithüng ranki jilo ochona rhowoa na jina tsüngon tiying n tho to vamvü. 15 Ranki jilo ophfü ophi kvüta elhüp n thev licho sana jiang lea n tho to khav. 16 Kipüng pomoe na oyam na lüngthacho mekana tathi echü chücho tüv ochona evüngkata sana, mekana kyon ryu osi olüp evüngkata sana ombo ji tsüngon tiying n tho to vamvü. 17 Hotüv n thono khi esiv jo mangsü emyom mmen khi siphen rungo ji mibuk ji ophfülo thei jilo ojü ntssüngu chüthechivka. 18 Ovüngo jo nthoe ochona sana erhikaphen khi ojüi jümthechi ranki jilo erhikav, jilo tsütsaelan kvüta lichosana jiang topvülo erhikavka. Enioto jo, nthoe kyon tsükana, ojü ji khi kyon ochona echü ryu mekana echümüng osi olüp evüngkacho sana ji erhikav. 19 Nthowo kyon jina ojü ji tsüngon ethümo to jilo tona tiyingo to jilo to n tho kyon ji erhikavka. Tsüngon tiyingo to jilo jo ombona kyon ji nthochethakana kyon jina ombo sü ji etssüi sisi tsükae sithakana eng rhecho sülojo ombo nthochev. 20 Kyon ochona n thono evüngkasi ombo n thochena vana sana ombo n thoe to vam, ntiotssole ntho jü ji ombo n rhikahan. Ombona OPVÜI vanrhyu ki ji mmenthukala osi ombo ji Potsow kyon to ombo n khanhyav siv. 21 Shikhfü shi ntena yuta topvülo benphia wovka. Ochona oyam nthocheta sana jina ha ombo mpensü jiang etssüi siv lia, osi ochona ojü ji evüngkata sana jiha mmyu n janthüng jo n tho to vamvü. 22 N tho kyon jina ntio evüngkata sana jiha n tho tsütsaelan kümala hoji tsükona hotüv evüngkae kyon ha mmyu n janthüng jo n tho to vamvü.

Wokhata 20

Kadesh Lo Tssocho

1 Choro ovüngo jilo Israel khümtsüng topvü Zin lijüngi oyi Kadesh lo nchentacho. Hojilo na Miriam chüi jilo shothecho. 2 Ontena nchemo jilo ojü n jüwo jina kyon jiangna Moses ha Aaron oni hazhüi 3 heto erinjantacho: "Ete ji OPVÜI vanrhyu ranki mhadungo na Israel thanpoe jiang ete nzo echüvo ji mmhomo tssov kasi. 4 Ntioli nino lijüng hetüv lo esosi yichola? Shilona e tona e ekümrümo shiang to echürathukvü tssocho alo? 5 Nteno ntioli Ejip metae na esochuki ntia n zao lijüng hetüv lo esochukchicho la? Helo tsünghanro, züwothi, jününgrothi osi tsarümthipen ntia n li. Elani ojü eyuv tia ntia n jü." 6 Moses ha Aaron onina nkachoe oyi vanrhyu ranki ji kipüngo vancho. Onina oni mha ji likoe nkhümtheta le OPVÜI vanrhyu wondang jina oni rakacho. 7 OPVÜI na Moses ezocho, 8 "Ntsata Bakos ji mhadungoe jarung ji khi bensi kyon jiang topvü tsarhyua. Osi onte topvü mhadungo na jilo longpvü lio ji ezoa tona hoji lona ojü tsüchukvüka. Hojitoli nina kyon jiang osi onte ekümrümo jiang eyuv ojü hunguvka." 9 Tole OPVÜI na ezowo ji esüa Moses na owo jarung ji khicho. 10 Aaron onina kyon topvü oni mhadungo etssi vanthuksi Moses na phyocho, "Engatava oyam panlanden! Ena olong shilona ojü chiyi nte yuthukvü alo?" 11 Jitosi Moses na jarung ji sükae longpvü ji yenjo eni erhüpcho, tole jilona ojü tsüchuki kyon jiang tona onte ekümrümo jiang to topvüna yutacho. 12 Tokhatola OPVÜI na Moses ha Aaron oni khona ezocho, "Nini na kyon jiang mhadungo na a ntho etho ji chekata n chüo jina niniha ana nte piv phyochako meta ji jana onte sov meka." 13 Shijo Meribah lo tssocho, kyon jiangna OPVÜI thüngi erinjantao jina OPVÜI na ombo ntho to onte hungthukcho.

Edom Lo Mesao Jina Israel Jiang Nkachi N yithukala

14 Moses na Kadesh lona Edom mesao thüngi yithenpvüi wothukcho. Yithenpvüi jiangna ezocho, "Yithen shijo ni ejaworo Israel jiang thüngina ka. Ena ezüpthako ji nina ntsia, 15 e pyimtsümotsüi jiangna Ejip metae oyi nzyu elümoto ezüpta vancho. Osi Ejip kyon jiangna e pyimtsümotsüi jiang osi e topvü to elümoto ekangshicho, hoji tsükona 16 ena e nzanchile to OPVÜI thüngi randantacho. Ombona e randan jiang engae lanben tsüka rothuki, Ejip lona esochukcho. Enhunga jo ena ni meta ndüngo Kadesh yan janthaka. 17 E nzansi ni meta yakchia e yithuka. E osi e ekümrümo jiangna lantssa kathev meka osi nte li lo osi jününgroli jianglo nhyethev meka, nte jükha jü lona ha yuv meka. Ena ni meta n yakthüng jo lanjüngi taena yitavka." 18 Tokhatola Edom kyon jiangna ezocho, "Ena e meta yakchiv nte khanala! Ntena ngangia yakchicho jo ena sani nte rokav." 19 Israel jiangna phyocho, "Ena olani taena yiv, osi e ekümrümo jiang nte jükha jü yuana oman nte piv, ena ethev lio jijo yakchia yiv ji tae." 20 Edom kyon jiangna phyolancho, "Ena nte n yakchithukala!" Tosi ontena Israel jiang sakav tsükona rasan etho elitsov chirothukcho. 21 Tole Edom jiangna hojito khalanchio jina Israel jiangna kholani lanpoe na yitacho.

Aaron Chüo Ji

22 Israel khümtsüng topvü Kadesh lona sani oyi, 23 Edom erüi Hor phunglan ji jancho. Hoji lona OPVÜI na Moses ha Aaron oni ezocho, 24 "Aaron jo ana Israel epiv phyochako meta jilo rheyichev meka, helona ombo chüv saka ntiotssole ninina Meribah lona a yizüng panlancho. 25 Aaron ha ombo tsoe Eleazar oni sosi Hor phunglani chungoa, 26 0si hojilo na Aaron na ekao pvüti mpensü jiang phungi Eleazar ekathuka. Aaron jo jilona chüvsaka." 27 OPVÜI na ezo ji esüa Moses na tssocho. Osi ontena kyon topvü ehungo na phunglani chungotacho, 28 osi Moses na Aaron mpensü jiang topvü phungi Eleazar ekathukcho. Hoji phunglan kvürina Aaron ji chücho osi Moses ha Eleazar onio elani joyitacho. 29 Aaron chüthaka to topvüna zoe ontena tsüngon thümro nungratacho.

Wokhata 21

Kanaan Kyon Jiang Khyo Ji

1 Israel jiangna Atharim lamoe na tsata to Kanaan jolowoe mesao Arad na zoale owo onte hae ejoma rhümacho. 2 Tole Israel jiangna OPVÜI mhadungo echümchaktacho: "Nina kyon shiang e khyothukna ena onte osi onte yantsü jiang nilo khochaki vasi roe siv." 3 Tole OPVÜI na onte randan engayia onte nzanchia Kanaan kyon jiang khyothukcho. Israel jiangna yantsü jiang rokhani siyia onte lüngthakhancho osi meta ji Hormah to tsacho.

Yongmen na Nrü Nsüngrücho

4 Edom meta nkona yakchiv tsükona Israel jiangna Hor na khoe Aqaba jü nken jiwoe yio lan ji dunga yitacho. Tokhatola olani jo kyon jiangna erüm n tov, 5 Potsow tona Moses to thüngi erinjantacho. Ontena phyotacho, "Nino ntioli Ejip metae na esochuki etsoyu osi ojü n jüwo lijüng hetüv lo yitachola? Ena enhungo yantsa etsoyu hetüv n tsokhukvü sithaka!" 6 Tole OPVÜI na nrü n mhom rothuki Israel jiangji onte elümoto njütsüngrathukcho. 7 Kyon jiangna Moses thüngi oro phyotacho, "Ena OPVÜI osi ni thüngi erinjantao ji yakchia mmen tssothaka. Hoji tsükona nrü shiang khi esiyiv OPVÜI thüngi randana." Hoji tsükona Moses na kyon jiang tsükona randancho. 8 Tole OPVÜI na Moses ji yongmen yonjak khi nrü joe tssüngpüm lona donkachile to ezocho, hoji jo kvüthüng nrü na kyon jiang njüa sana ontena hojilo zekana onte emiyiv tsükona. 9 Hoji tsükona Moses na yonjakna nrü nsüngrüi tssüngpüm lo donkachicho osi nrü na ocho njüa sana yonjak nrü jilo zekachina emi siwo tssocho.

Hor Phunglani na Moab Jiang Hayitsüi

10 Israel jiangna khochi Oboth lo oyi nchentacho. 11 Ontena jilona khoe Moab meta engkhfüwoe lijüng jilo Abarim roe elio jilo oyi nchentacho. 12 Jisülo jo ontena Zered hayitsüi nchentacho. 13 Ontena jilona khochilani oyi Amon zhükhfü khümkiwoe lijüng na Amorite meta jana yio jilo nchentacho. (Amon jo Moab jiang tona Amorite jiang to yutalo erü ji.) 14 Hoji tsükona, OPVÜI Ritsso To Tsao Kako Jilona Heto Phyoala "... Subhah metalo Waheb yantsü jiang osi hayitsü jiang, Amon zhükhfü ji,15osi Ar yantsü tona Moab erü to jana eyio hayitsü liphyuro jiang to." 16 Hojilo na oyi ontena "Jükhayo" to tsao meta ji jani OPVÜI na Moses ezocho, "Kyon jiang tsarhyua tona ana ojü onte pivka." 17 Hojithüng Israel jiangna okhen shi dencho: "Jükhaden, ojü ndüngtava; Tona ena okhen onte denkavka18 Mesatso osi Israel esopvüiden na Jükha shancho jükhaden, Mesa jarung osi etsi na ejyuo jükhaden." Ontena lijüngina Mattanah lo chiyi, 19 hojilona Nahaliel lo chiyi, 20 jilona Bamoth lo, Bamoth lona Pisgah phunglan kvüri, hayi chanchiphen ji yenjo lo Moab kyon metae hayitsü jilo chiyitacho.

Mesae Sihon Tona Og To Oni Khyo Ji

21 Israel jiangna Amorite mesao Sihon thüngi heto yithen picho; 22 "Ni meta e yakchithuka. E osi e ekümrümo shiangna lanpvü yaki nte li osi jününgroli rhowov meka, osi ena nte jükhae na ojü yuv meka; ena nte meta n yakrathüng jo ena lanpvü yakvü meka." 23 Tokhatola Sihon na Israel jiang ombo meta n yakchithuk hungcho. ombona ombo rasan jiang erhümi lijüngi Jahaz meta jilona owo Israel jiang sakacho. 24 Tokhatola Israel jiangna onte ri jiang elümoto lüngtharae sisi onte meta khümkiwoe Amon zhükhfü lona Amorite jiang meta Jabbok nandang vanzhüi sicho, ntiotssole Ammon meta jijo mmhona nhyakyae licho. 25 Hojito Israel jiangna Ammon jiang yantsü topvü, osi hoji nkonjan yantsü topvü rechoe jilo vantacho. 26 Heshbon jo Ammon jiang mesao Sihon, ochona Moab mesao ehemo ji thüngi rotae hoji meta ji Amon zhükhfü jana khichicho sana ombo yantsü ji hoji tssocho. 27 Hoji tsükona chungyi eran jiangna heto dentacho; "Heshbon, Sihon mesao yantsü jilo rotale! Ena yantsü ji tssocholana ezehungala. 28 Tsüngona lojo Heshbon yantsü shilona Sihon rasan jiangna omi bukata khochicho; Hojina Moab lo Ar yantsü ji roe sicho Osi Amon khümkiwoe yingsüng jiang khyocho. 29 Moab kyonden, nte tsükona kvüta ekhenthao ato! Chemosh ekhüm, nte topvüto nte monthukthaka! Nte Potsow jina kyon jiang tsanthan kümthukala, Osi eloe jiang topvü Amorite mesao evüngki rheyirathaka. 30 Tokhatola enhungo nte tsoronichen jiango monrathukthaka, Heshbon lona Dibon jana, Hashim lona Medeba ndüngo Nophah jana monthukthaka." 31 Hojito Israel jiangna Amorite metalo vancho, 32 osi Moses na Jazer yantsü hav tsükona lanyka mmhom hungi kyon wothukcho. Israel jiangna yantsü ji tona hoji nkojan jiang to khyoe Amorite jiang phani siracho. 33 Jisülo jo Israel jiangna khophi Bashan lan dunga yitacho, tole Bashan mesao Og na ombo rasan sosi owo Edrei lona Israel jiang sakacho. 34 Tole OPVÜI na Moses ezocho, "Ombo ti-kyua. Ana ombo tona ombo meta ji osi kyon jiang to ni khyothukuka. Nina Amorite mesao Sihon ochona Heshbon sachosana ji tssoyiwo ji esüa ombo tssoyia." 35 Tole Israel jiangna Og tona ombo tsoe jiang osi ombo kyon jiang to ochia n hyokav lüngtharae sisi meta jilo vantacho.

Wokhata 22

Moab Lo Mesao Jina Balaam Tsalo Wothukala

1 Israel kyon jiangna khochi oyi Jeriko zechilo Jordan na engkhüwoe Moab hayitsü jilo nchentacho. 2 Kvüthüng Zippor tsoe Balak, Moab lo mesao jina Israel jiang na Amorite jiang thüngi ntio tssoyichosana osi onte ji owo kvüta sana ji zoale, 3 ombo osi ombo kyon jiang topvü na ekhentsüngracho. Moab kyon jiangna Media kyon eramoe jiang ezocho, "Razhütsük shina nsungu hetopvü ete hakono ntio liana 4 mangsübung na ero tümi tsoa to rorüpi e sivsala." Tole Moab mesao Balak na Amaw metalo Euphrates zhükhfü ji ndüngo Pethro lo vamo Beor tsoe 5 Balaam ji tsalo yithenpvüi wothukcho. Ontena owo heto ombo ezotacho, "Ana heto ni ntsithuk hungala, Ejip lona jipo motsünga oyi meta topvü pyinga yia vana, osi ete meta shiha ekhiyiv ekhenthukala. 6 Ontena ete jipo kyon shiang e sanzhüv sala, hoji tsükona nina oro onte etanglanchiyia rhiyikata. Tona etena onte khyoe ete meta lona phani sichev mpa tssov. Ana ntsia, nina mmha randankao kyon jiangna mmha hungala, osi nina rhiyikao kyon jiango rhiyikao kyon kümala." 7 Hoji tsükona Moab kyon tona Median to esopvüi jiangna owo rhiyika tssen ji Balaam pia Balak yithen ji ombo ezotacho, 8 Tole Balaam na onte ezocho, "Nchüngo hepi yiptava, tona OPVÜI na ntio a ezoa sana ana ojyua nte ezovka." Hoji tsükona Moab esopvüi jiangna Balaam thüngi yipchotacho. 9 Potsow na Balaam oro engacho, "Ni thüngi ncheni vamo shiango ochoangla?" 10 Ombona ezocho, "Balak mesao na a tsalo yithenpvüi athüngi rothukcho, 11 Ejip lona jipo motsünga sani oyi meta shi nzüpyingthaka to phyoala osi ombona hojiang khyothechi phanchukchi sicheo tssoa onte rhiyikale to a ezoala." 12 Potsow na Balaam ezocho, "Kyon shing phana ti-woa osi Israel jipo jiang ti-rhiyikata, ntiotssole onteno a mmha randankacho kyon." 13 Ojyuato Balaam na Balak yithenpvüi jiang ezocho, "OPVÜI na nte ti-phankale to a tangala, ntena elani yitava." 14 Tole ontena elani oyi Balaam na onte phana n yiala to Balak ezotacho. 15 Tole Balak na razhü ovüngo jilona kyungkao osi ethelan likao kyon wothuklancho. 16 Ontena Balaam ji heto yithen pitacho, "Nina athüngi erov ji ntinaha ti-khatüngle to jonjiala! 17 Ana yantso tsüphov ni pia nina ntio phyoa na ni engayivka. Nzansi oro kyon shiang rhiyikata." 18 Tokhatola Balaam na janlancho, "Balak na ombo mesaki shona janti topvüto apilea ana kvüthüngha a OPVÜI Potsow yi tssantsüng tera lea n ngav n siche. 19 Tolea razhü ovüngo jiang esüa nte ha shilo yipchotava, OPVÜI na ntia a ezolamu lilicho sana zetavka." 20 Potsow na hoji zümo Balaam thüngi oro ezocho, "Kyon shiangna nitsalo rocho tssona phana woa, tokhatola ana ntio ni ezoana ji ephan tae tssoa." 21 Hoji ephan Balaam na ojyuato jo ombo kurü jilo tsankae Moab esopvüi jiang phana wocho.

Balaam Tona Ombo kurü ji To

22 Balaam na khochiale Potsow na lüm tsukcho osi Balaam na ombo kurü jilo tsankae ombo tepfü otsük eni jiang nzo yita vanathüng OPVÜI na lanben na olan lungi mangchaki ombo khalanchicho. 23 Kurü jina lanben lanlungi yonri bensi manga vamo ji hungale, lantssae kathei oli rheyicho. Tole Balaam na kurü ji erhüpa lanlungi rheyithuklancho. 24 Tole lanben jina jününgroli olongna epicho yuta lo olan kvütssümvü tüv lo mangkachilancho. 25 kurü jina lanben ji hunglanale lantssae kathelani olong eshemo jiang lona Balaam jo ji eshüpkacho. Hoji tsükona Balaam na kurü ji talancho. 26 Tole lanben jina lankvütssüm kvümoe ha khophi n yicheo tüv lona manglani vancho. 27 Osi kurü jina lanben ji hungale ephathei sicho. Tole Balaam na lüm tsuki ombo etsi ji khi kurü ji erhüplancho. 28 Tole OPVÜI na kurü ji oyi nsancheo etho picho, osi Balaam ezocho, "Ana ntio ni tssocheyichola? Osi ntio tsükona yenjo ethümoto atachola?" 29 Tole Balaam na ezocho, "Nina a n khanzio jina ni tacho, ana yonri hancho savo ni lüngthathaku." 30 Hoji tsükona kurü jina heto janlancho, "Aiyo nina ni eküm echung tsankae rümphio kurü ji mekchoke? Ana kvüthüng sana heto ni etsso-ephyoyithakcho alo?" Ombona, "Meka" to janlancho. 31 Tothüng ji OPVÜI na lanben yonri bensi lanpvüi manga vamo ji Balaam hungthukcho; toajo Balaam na jitopvü omha nkhüma likoe vanjoe sicho. 32 Jithüng lanben jina ezocho, "Nino ntioli ni kurü ji yenjo ethüm erhüpchola? Nina hetüv elhilo khochiv n lio jina ana oro olan ni khanicho. 33 Tokhatola ni kurü jina ahungi yenjo ethüm kholancho. Kurü jina n kholancho savo ana ni lüngthasi kurü ji eküm vanthoku." 34 Balaam na janlancho, "Ana mmen tssothaka, nina akhalanchiv olani na vana to n tsicho, tokhatola ana khochiv elan n li to tssona ana kholani oki yivka." 35 Tokhatola lanben jina ezocho, "Kyon shiang nzo woa, tolea ana ni ezocho ephan tae phyovka." Hoji tsükona Balaam na kyon jiang phana wocho.

Balak na Balaam Elonchoala

36 Balaam tsata to Balak na zoale ombona owo olani Moab erüi Amon zhükhfü tssalo Ar yantsü jilona ombo ndukcho. 37 Balak na ombo ezocho, "Ana ni tsalo rothukdemo jithüng na ntioli n rochola? Ana jo tssona ni n yantsochev tsayicho alo?" 38 Balaam na janlancho, "Ana rothaka, n rochoke? tolea enhungo a etho n li, OPVÜI na ntio phyole to a ezoa sana jitae ana phyov." 39 Balaam na Balak phana Huzoth yantsü jilo wotacho, 40 Osi Balak na jilona mangsü tona olyu to tatsüngi oso ejoma Balaam tona ombo ndüngo esopvüiden to jiang picho.

Balaam Zenkhyingyi Ovüngo Ji

41 Ojyuato enyathüng jo Balak na Balaam sosi Bamoth Baal jilo chungo Israel kyon ejoma jiang Balaam hungthukcho.

Wokhata 23

1 Balaam na Balak ezocho, "Shilo thanphen tiying a ronia osi tssibung tona olyu obung tiying to süsi yia." 2 Balak na hoji esüa süsi oyi onina thanphen akvü tssibung motsünga tona olyu bung motsünga to ren thantacho. 3 Balaam na Balak ezocho, "Ni erungthan shi ndüngo manga vana, ana OPVÜI na athüngi tenduktav sana zevka. Osi ombona ntio a ntsithukana ji ni ezovka." Jitosi ombona phunglan kvüri omboti chungocho, 4 tole Potsow na ombo ndukcho. Balaam na Potsow ezocho, "Ana thanphen tiying roni motsünga lo tssibung motsünga tona olyu bung motsünga to ren thanthaka." 5 OPVÜI na ntio kvüto phyov sana ji Balaam ezocho osi ombo yithen ji Balak pile to ezocho. 6 Ombona elani joyile Balak jo Moab esopvüi jiang nzo erungthan ji ndüngo mangpvü vancho. 7 Balaam na heto zenkhyingcho, "Maob mesoa Balak na engkhüwoe phunglan jianglo Syria lo na a sosi yicho. Ombona 'oro a nsania,' osi Israel kyon jiang pono 'a rhyikayia' to phyocho. 8 Tokhatola, Potsow na n rhyikayio jiang ana kvütoli rhyikayivla, mekana OPVÜI na monthoku n phyov kvütoli ana n mhom phyovla?" 9 Ana phunglan ntssonina onte hungala; Ana yondon jiang lona onte zechochiala. Onteno onte poti evan jipo; Onteji jipo thanpoe lona rankata onte mmhayithukcho to ontena ntsia. 10 Israel tsoronichen jo hajang tata; N khacheo tata, onte okyunga."Anaha Potsow kyon tsüka to ochüm echeta a vanthuka; Osi ntsanthoe jiang esüa noyinga a chüthoka." 11 Tole Balak na Balaam ezocho, "Nino ntio elhi a tssoyiala? Aiyo a ri shiang rhyikalo ni tsale, nina mmha onte randankathaka." 12 Balaam na janlancho, "OPVÜI na ntio phyole to a ezoana ji tae ana phyovka."

Balaam na Ye Njo Enito Zenkhyingala

13 Balak na Balaam ezocho, "Elani aphana rolana, meta motsünga lona nina Israel jiang ejoma tae hungwo tüv lo wotavka. Osi hojilona nina a tsükona onte rhiyikata." 14 Hojito phyoa ombona Balaam sosi Pisgah phunglan kvüri Zophim li jilo chungotacho. jiloha ombona thanphen tiying roni hojiang akvülo tssibung motsünga olyubung motsünga to thancho. 15 Balaam na Balak ezocho, "Ana owo ojilona Potsow ndukuka. Shilo ni erungthan shi ndüngo na vana." 16 Tole OPVÜI na Balaam ndukcho, osi ombona ntio kvüto phyov sana ji ezocho, osi Balak thüngi yithen pia yithukcho, 17 Ombona kholani yile Balak jo Moab esopvüi jiang nzo thanphen ji ndüngo mangkachipvü vancho. Balak na OPVÜI na ntio ombo ezocho sana to engacho, 18 osi Balaam na zenkhyingyi shiang shi phyochicho: "Zippor tsoe Balak, shilo yia, Osi ana ntio phyov licho sana ji enga. 19 Potsow jo kyon esüa, ejüng ephyoe mek; Ombo kyon na ombo lümbüm tongphia vamo ji esüa tüv mek. Tolea ombona ntio phyochaka sana ji, tssoala; Ombona phyochiana hojito benchetala. 20 Ana mmhayile to a ezocho, Osi Potsow na mmhayithuko ji ana n phüplanche. 21 Israel jiangna ochyu wo vüngi sükhying n mhom osi ezüp licho ntia n hungchi. Onte OPVÜI Potsow jina onte yolo vana; Ombo onte mesao to ontena thenchoala. 22 Potsow na onte ji Ejip metae na sochukcho, Osi ombona onte tsükona mikulyu esüa rotayiala. 23 Okyak n mhon osi ratsenrapvü elhi ntia Israel jiang pono etsso tüv n li. Enhungo kyon na Israel jiang motsü rütav, "Zeta Potsow na ntio tssothakcho sana to!" 24 Israel jipo jo hingho etho ejüi tüv: Ombona mpvüroe tsoe n sithüng jo jüngtheta n vanala, osi ombona rümo jiang ejen ji n yuthüng jo yingto n vanala. 25 Tole Balak na Balam ezocho, "Nina Israel jiang rhiyikav ekhirana tssona toka mmha jo ti-randankayia!" 26 Balaam na ezocho, "OPVÜI na a ezo jiang ephan tae ana tssov, to ana ni n zocho ke?"

Balaam na Yenjo Ethümoto Zenkhyingala

27 Balak na phyocho, "Ana meta thanpoe ni sosi wolam ka roa. Nkhontsi Potsow na a tsükona Israel jiang ni rhyikathoku mpa tssov." 28 Ombona Balaam sosi lijüng ji hungcho chiwo tssoa Peor phunglan kvüri chungotacho. 29 Balaam na ombo ezocho, "Shilo thanphen tiying a ronia, osi tssibung tiying tona olyubung tiying to süsi yia." 30 Balak na hoji esüa tssocho, osi thanphen akvü tssibung motsünga, olyu motsünga to ren thancho.

Wokhata 24

1 Jithüng jo Potsow na Balaam ji Israel jiang mmha randankathuk hungala to ombona engathecho, hoji tsükona ombona ovüngthüng esüa phyalyu zepam ethev n licho 2 ombona lijüngoe zechile Israel jiang ji pvüji pvüjina kupa ncheni vana hungcho. Jithüng Potsow mon na ombo sayae heto phyocho: 3 "Yithen shijo Beor tsoe Balaam, Ochona ntssünga hungasana ji thüngina yicho yi, 4 Osi Potsow na phyocho ezowo kyon ji. Ana omhyik nrüngi Thotsü Potsow hungthuk ji müngtüngina zetala. 5 Israel jiang ranki jiango ezev mmhona, 6 Palm dung rencho tüv Mekana zhükhfü tssae phari licho tüv, Mozhürhüm mmhom dung OPVÜI na chümcho tüv Mekana zhükhfü tssae cedar zacho tüv. 7 Erhyu tssona onte jochochiyiv Osi ojü sothechicho likolo ontena mojü thev. Onte mesao jijo Agag lona tsükao tssov, Osi ombo yansa jo kona nzoa tssov. 8 Potsow na Ejip metae na onte sochukcho; Ombona onte tsükona tssibung ntav esüa rotayiala. Ontena onte ri jiang nzhüala, Onte ri jiang ha ejüproe siala, Osi lotssi jiang roe sitala. 9 Jipo shijo hengho esüa tüv; Hojina yipa vana na ochinaha n thechikuk. Ochona Israel mmhayia na ombo mmhayiv, Osi ochona Israel rhiyiana ombo rhiyikav." 10 Balak na ombo kheji zümi lüm tsuka phyocho, "Aiyo onte rhiyiv ni tsale ji sisi nina yenjo ethüm onte mmhyithaka. 11 Enhungo oki yi sia! Ana yantso ni piv phyochakcho khatola OPVÜI na yantso ji ni n khithukala." 12 Tole Balaam na janlancho, "Ntena a thüngi rothuko yithenpvüi jiang ana ezochola 13 nina ni mesaki jilo licho shona janti jiang topvü a pile ana a etancho tssoa OPVÜI yi n ngav n tssoto. OPVÜI na a ezo jiang tae phyovto ni zochola."

Balaam na Okhao Tssao Zenkhyingala

14 Balaam na Balak ezocho, "Enhungo aiyo a kyon jiang thüngi kholani yiala tokhatola ana n yithüng ntangshon ekyuv heto ni zov, jijo Israel jiangna ni kyon jiang thüngi kvüto tssoyiv sana ji." 15 Ombona zenkhying yi heto phyocho: "Beor tsoe Balaam, ntssüng-rünga ehungo kyon ji yithen ji heto, 16 Potsow na phyo jiang ezoe kyon Osi Ntssontso Potsow thüngina ntsiran ehungo kyon. Ana Thotsü Potsow hungthuk mungtüngi na hungwo ji rüki zetala. 17 Ana mhadungi zechile, ana Israel jipo jiang hungala. Shantio wondanga esüa tüv mesao jipo jilona chiyiv. Ombona ngazo sünga esüa Israel lona chiyiv. Ombona Moab lo esopvüi jiang tathechiv Osi Seth kyon jiang tathechi siv. 18 Ombona Edom lo ombo ri jiang khyov Osi onte meta jiang ombo echi tssoe siv, Osi Israel na ekhyo tae khia yia vam. 19 Israel jipo na onte tssethechirav Osi wokhae enhyokao jiang mpato phüpi siv." 20 Balaam na mungtüngi na Amelek kyon jiang hungi phyocho: "Amelek jo topvülo etho elitso jipo tssocho, Tokhatola wokhae jo n phanthilamo moni sivka." 21 Ombona mungtüngi na Kenite jipo jiang hungi phyocho: "Ntena vamo meta jijo nkocheta noyinga phunglan poni oshüp tssokae licho tüv, 22 Tokhatola Assyria kyon jiangna rumi nte vünga na nte Kenite jipo ji moni siv." 23 Balaam na heto zenkhying yi phyocho: "Jükiwoe etsseni vamo shiango ochoangla? 24 Cyprus lona ritssoeden roravka; Ontena Assyria tona Eber to khyov, Tokhatola onteha kümali onte monlam." 25 Jitosi Balaam na methaki ombo kiwoe kholani yicho osi Balak ha yi sicho.

Wokhata 25

Israel Jiang Peor Lo

1 Israel jiangna Akacia hayi lo nchenathüng, eboe jiangna Moab eloe meta jilo vamo jiang thüngi rama tssotacho. 2 Eloe jiangna Moab Potsow khümphen jianglo ekümrüm than tokhutao jianglo Israel eboe jiang tsanhyatacho. 3 Hojito Israel jiangna hotüv etsoyu tsotasi Peor lo Baal potsow ji khümtacho. Hoji tsükona OPVÜI na lüm tsuki Moses ezocho 4 "Israel esopvüi jiang tsarhyui a yizüng ephanina engo kyon na hungra chüthuka, tona ana kyon jiang thüngi lüm tsukvü meka." 5 Tole Moses na tsüphoe jiang ezocho, "Nte pvüji lo eboe kvüta Peor lo Baal ji khümchosana lüngtharae sia." 6 Kyon topvü OPVÜI vanrhyu ranki kipüngo na nungrata vanathüng Israel eboe tsükana Moses tona kyon topvü na hungra Midian eloe tsüka sosi ochungi rheyicho. 7 Kvüthüng Aaron pvüti ji orüo Eleazar tsoe Phinehas na hoji hungchosana okho lona phanthi yi sicho, 8 osi ombona oyi otsso khi bensi ranki rhowo, 9 wotssona eboe jiha eloe ji woni kavüa chenlangi sicho. Hojitoli nochonori vara Israel lo lio ji esancho. Tokhatola tothüng jo kyon otsük wothüng mekyu mezhü chüthakcho. 10 OPVÜI na Moses ezocho, 11 "Phinehas na ntio elhicho sana ji yakchia enhungo ana Israel kyon jiang thüngi lüm etsuk n li. Ombona a yaka potsow thanpo ekhüm jiangji n rümkhukcho. Hoji tsükona ana lüm etsuk lona kyon jiang roe n sicho. 12 Hoji tsükona ombo ezoa, ana yuta topvü tsükona ombo thüngi ntsata methakvüka. 13 Ombo tona ombo tsoronichen to jiang ji nchünkhon tsükona pvüti elhi tsswothukvüka, ntiotssole a yaka Potsow thanpo ekhüm ji ombona n rümkuko ji yakchia kyon jiang mmen siyicho." 14 Midea eloe ji nzo lüngthae siwo Israel eboe jijo Simeon pvüji lo wopan motsünga lo kvüri Salu tsoe Zimri to tsacho. 15 Eloe ji mying jo Kozbi, osi opo Zur jo Midia pvüji lo okho motsünga pono OPVÜI. 16 OPVÜI na Moses ezocho, 17 'Peor lo vara jilo chüthuko eloe Kozbi etssophyo osi, 18 Midian jiang na elhi n mhom lona nte ejithechio ji tsükona onte thüngi ori tssoe monthuka."

Wokhata 26

Wokhata Enioto Ji

1 Vara ji sülo jo OPVÜI na Moses tona Aaron tsoe Eleazar to ezocho, 2 "Israel khümtsüng topvü wopan opan na eboetso nzyu mekyu na omhawoe rasan elhi tssokukthang topvü owo khatava." 3-4 Moses ha Eleazar onina hoji ephan eboetso kvüta hoji yingaren sana khatacho. Kyon jiangna Jeriko lo Jordan bankae Moab hayi jilo etssirhyucho. Ejip lona chiyio Israel kyon jiang shiang: 5 Jakob tsokhying ovüngo Reuben, tona ombo tsoe jiang Hanoch lona bukcheo wopan jiang; Pallu lona bukcheo wopan jiang, 6 Hezron lona bukcheo jiang tona Carmi lona bukcheo jiang to, 7 Shiang jo Reuben lona bukcheo jiang osi onte tssotsüi eboetso 43,730. 8 Pallu lona bukchecho 9 Eliab tona ombo tsoeden Nemuel, (Nathan tona Abiram to okho na ethüngchecho. Onte OPVÜI panlana Moses ha Aaron oni sisi Korah sürüiden kümcho. 10 Onteji liko küngsoe onte nzhüi sicho osi Korah tona ombo sürüi jiang to omi na kyon 250 chüthuko jithüng onte chüracho, osi onte ji kyon na ekyu yilan ejyukaphen kümcho. 11 Tokhatola Korah tsoe jiango n chüthukcho.) 12 Simeon jipo jo Nemuel pvüji, Jamin pvüji, Jachin pvüji, 13 Zerah tona Shaul to pvüji to. 14 Onte tssotsüi eboetso 22,200. 15 Gad jipo jo, Zephon, Haggi pvüi; Shuni pvüji; 16 Ozni pvüji, Eri pvüji, 17 Arod tona Areli to pvüji. 18 Pvüji shiang eboetso tssotsüi 40,500. 19-21 Juda jipo jo, Shelah pvüji, Perez pvüji, Zerah pvüji, Hezron tona Hamui pvüji to. (Juda tsoeden Er tona Onan tojo Kanaan meta lona chücho.) 22 Pvüji Pvüji shianglo eboetso tssotssüi 76,500. 23 Issakhar jipo jo: Tola pvüji, Puah pvüji, 24 Jashub pvüji tona Shimron pvüji to 25 Pvüji shiang lo eboetso tssotssüi 64,300. 26 Zebulun jipo jo: Sered pvüji, Elon pvüji tona Jahleel pvüji to. 27 Pvüji shianglo eboetso tssotsüi 60,500. 28 Joseph jipo jo, Ombo tsoe Manasseh ha Ephrim oni. 29 Manasseh jipo jo: Gilead opo Manasseh ji tsoe Machir, osi tsoronichenden jo shiang: 30 lezer pvüji, Helek pvüji, 31 Asriel pvüji, Shechem pvüji, 32 Shemida pvüji, tona Hepher pvüji to. 33 Hepher tsoe Zelophehad jo otsoe n vancho tolea otsolovden vancho; onte mying jo Mahlah, Noah, Hoglah, Milka tona Tirzah to. 34 Pvüji shilo eboetso tssotsüi 52,700. 35 Ephraim jipo jo, Shuthelah pvüji, Bechar pvüji, tona Tahan pvüji to. 36 Eran pvüji jo Shuthelah rüiden lo rükatala. 37 Pvüji shiang lo eboetso tssotsüi 32,500. Joseph lona bukcheo pvüji jiang shiang. 38 Benjamin jipo jo: Bela pvüji, Ashbel pvüji, Ahiram pvüji, 39 Shephupham tona Hupham pvüji to. 40 Ard tona Naaman to pvüji shiang jo Bela trüiden to yanchetala. 41 Pvüji shiang lo eboetso tssotsüi 45,600. 42 Dan jipo lona jo Hushim pvüji, 43 osi eboetso tssotsüi 64,400. 44 Asher jipo jo: Imnah pvüji, Ishvi pvüji, tona Beriah pvüji to. 45 Heber tona Malchiel to pvüji jo Beriah rüiden to. 46 Asher na Serah to tsa tsolo vancho. 47 Pvüji shiang lo eboetso tssotsüi 53,400. 48 Naphtali jipo: Jahzeel pvüji, Guni pvüji, 49 Jezer pvüji, tona Shillem pvüji to. 50 Pvüji shiang jo eboetso tssotsüi 45,400. 51 Israel eboetso tssotsüi jo 601,730. 52 OPVÜI na Moses ezocho, 53 "Meta ji jipo mata ekyung ephan erüsotayia. 5456 Phyalyu fuki zesi meta ji jipo wokyungo jiango tsüpo pi, jipo wozamo jiango teriv pi to erütayia." 57 Levi jipo jo Gershon pvüji, Kohath pvüji, tona Merari pvüji to. 58 Onte rüiden yolo jo pvüji nkhükro Libni, Hebon, Mahli, Mushi tona Karah to jura. Kohath jo Amram opo, 59 ombona Levi otsolov Jochebed Ejipi na vamo ji soa vancho. ompvüna Amram tsokhying eni Moses ha Aaron onjeni tona tsolo tsüka Miriam to bukcho. 60 Aaron na tsokhying mezhü Nadab, Abihu, Eleazar, tona Ithamar to vancho. 61 Nadab ha Abihu onio n thomi OPVÜI thansoracho lona chücho. 62 Levi tsoronichen eboetso nzyua pomoe jo 23,000 tssocho. Onteno Israel lo ejüeli n pio jina Israel yolo nthena echümporo khae vanthukcho. 63 Pvüti shiang hetopvü to Moses ha Eleazar onina Jeriko lo Jordan pankae Moab hayitsü lona wokhata khiathüng eranrhyucho. 64 Moses ha Aaron onina Sinai phunglani na wokhata khidemo jithüng eboetso erantao jiangjo OPVÜI na phyoe licho 65 osi Jephunneh tsoe Kaleb tona Nun tsoe Joshua to yaki jo topvü jüracho.

Wokhata 27

Zelophehad Otsolov Jiang

1 Hepher tsoe Zelophehad otsolovden jo, Mahlah, Noah, Hoglah, Milcah, tona Tirzah to, osi Hepher opo jo Gilead, Gilead opo jo Machir, Machir opo jo Manasseh, Manasseh opo jo Joseph. 2 Onteno OPVÜI vanrhyu ji kipüngo Moses tona pvüti Eleazar osi esopvüiden to tsokhying jiang osi kyon okho topvü mhadungo chivo heto phyotacho, 3 "E opo jo otsoe n vamvü lijüngina chüi sithaka. Ombo Korah ochona OPVÜI panlansi chücho sana ji sürüi mek tolea ombo mmen tsükona ombo chücho. 4 Ombona tsokhying n vancho tsükona tae jo kvütoli Israel yolo na ombo mying khi siyichola? E opo kitsük jiang yolo enaha e ejan ejüeli epia." 5 Ontena chomo ji OPVÜI thüngi jonjiyile, 6 OPVÜI na ombo ezocho, 7 "Zelophehad otsolov jiang na jonjiwo ji elanthata, onte opo kitsük jiang yolo onteha ejüeli pia. Ombo ejüeli jiang onte pono ha janta yithuka. 8 Israel jiang ezoa, kvüthüng kyon tsükana tsokhying n vam chüa sana ombo ejüeli jiang otsolov na hovka. 9 Ombona otsolovha n vana tssona, opo ojeni jiangna tssentso tssovka. 10 Ombona ojenio n vana tssona, opo ojenio jiangna tssentso tssovka. 11 Ombona ojeni osi opo ojenio ha n vana tssona ombo wopan ndüngta enhyamo jina tssentso tssoe ombo eli to hovka. A, OPVÜI na yizüng nte pio shi esüa Israel kyon jiangna shikhfü ephan tssoa heto benphia wovka."

Moses Echungchov Joshua Ethüngchetala

12 OPVÜI na Moses ezocho, "Abarim phunglani chungoe ana Israel shiang pia vamo meta ji chani zeta. 13 Nina hoji hungthaka na ni jenio Aaron esüa niha ni chüvka, 14 ntiotssole nini na Zin lijüngi na a panlantacho. Meribah lona kyon topvüna a thüngi erinjantao jithüng ninina a etho ji ehungpvüi n tssocho." (Meribah ji Zin lijüngi Kadesh lo jükvü ji) 15 Moses na heto randancho, 16 "OPVÜI Potsow, eküm topvü bukchephen, ana randanala, okho shiang sokhüka, 17 osi ritssolo onte ekievong khuko kyon tüv ethüngcheta to tssona ni kyon shiang ji rhüki n vamo olyuden to tssov meka." 18 OPVÜI na Moses ezocho, "Nun tsoe Joshua tssochyui kyon ji khi nina kvürilo nyimkayia. 19 Ombo ji pvüti Elezar osi kholok topvü pono phanthithuka, osi topvü mhadungo na ombo ji ni echungchoe to phyothuka. 20 Ni etho tara ombo tsütsathuka, tona Israel topvü na oyi ombo engayivka. 21 Ombo ji pvüti Eleazar ocho a lüm erüng ji phyalui zesi chethev sana ji pono enhikae vanthuka. Hojito Eleazar na Joshua osi Israel kyon topvü nkankvü topvülo olan sovka." 22 OPVÜI na ezoji esüa Moses na tssocho. Ombona Joshua ji pvüti Eleazar osi kholok ji mhadungo mangthukcho. 23 OPVÜI na yizüng pio ji esüa Moses na Joshua kvürilo nyimkayisi ombo echungchoe to phyoyicho.

Wokhata 28

Eng Akvü Epio Than Jiang

1 OPVÜI na Moses thüngi ezoa, 2 Israel jiang ji OPVÜI na emathao etsoyu than jiang yuta kokae elio ji ephan thantale to ezothukcho. 3 Etsoyu than OPVÜI epiv elio jiang shiang: Eng akvü erungthan tsükona olyuro obung nzyu eni osi ntia ome n khyingo tüv eni, 4 motsünga ji enyathüng, eniotoji mmyulani to, 5 osi enya mmyu than akvüto ohüm chencho seri motsüngalo olive thyujü mmhontsov etükpvü motsünga nhyontsüi thana. 6 Shijo totona erungo etsoyu than orhüm mmhom OPVÜI emathathoku tsükona ovüng tssoa Sinai phunglani na thamo than tsük ji. 7 Olyuro tsokhfü ji nzo thanphen zükhi than jijo thanphen jilo etükvpvü motsünga phyangkata. 8 Mmyui ha enyathüng thamo jito olyuro enioto ji khi zükhi than theta thana. Hojiha etsoyu than, orhüm mmhom jina OPVÜI emathathoku thana.

Esanmung Than Ji

9 Esanmung tsüngono jo olyuro obung eni ntia ome n khyingo tüv khi, ohüm seri enilo olive thyujü nhyontsüi otsuk omüm than tssoa thana. 10 Erungthan shijo enya mmyu than jianglo ekaro tssoa esanmung akvü thamka.

Choro Ovüngo Jilo Tsüngon Ovüngo lo Etham Jiang

11 Choro benkaden akvü erungthan pia: mangsübung tssiniro eni, olyubung motsünga, olyubung nzyuatso tüv tiying to ntia ome n khyingo tae thamvüka. 12 Otssukomüm than tssoa ohüm lo olive thyujü nhyonkae thana: Tssibung akvülo ohüm seri ethüm, olyubung akvü lo seri eni; 13 Olyuro akvülo seri motsünga to ekae thana. Erungthan shiango orhüm mmhom khi OPVÜI emathathoko etsoyu than. 14 Zükhi than tsotso jijo tssibung motsüngalo zükhi etükpvü eniren, olyubung akvülo etükpvü motsünga si chiso ren, olyuro akvülo opvü motsünga to thei thamo ji. Shijo nzyu totona choro benkaden akvü tsüngon ovüngo jilo erungthan pio ji. 15 Eng akvü erungthan osi zükhi than to jilo ekata mmen than tssoa nyanyanbung motsünga thana.

Vümhi N theo Hümri Tokhu Jilo Othan Jiang

16 OPVÜI yikrachio tssoa Yakchi Tokhu ji choro ovüngo jilo tsüngon taro mezhüo to jilo khivka. 17 Tsüngon taro mongo to jilo jo ekhümlan tokhu benkav osi tsüngon tiying khiv osi hoji yuta lojo vümhi n thena rüngcho hümri tae tsovka. 18 Tokhu ji benka nchuk jo ntena ekhüm tsükona sanrhyutavka osi ntia elhi tssov meka. 19 Etsoyuthan tssoa erung than OPVÜI thantava: Tssibung eni, olyubung motsünga, nzyuatso olyubung tiying to ntia ome n khyingo tüv thamvüka. 20 Otssukomüm than shenthi lo ohüm chencho lo olive thyujü nhyontsüo ji thana: Tssibung akvülo ohüm seri ethüm, olyubung akvülo ohüm seri eni ren, 21 olyuro akvülo seri motsünga to ren thei thana. 22 Mmen than tssoa ha nyanyanbung ha motsünga to thana. Hojitoli kyon jiang nthocheta. 23 Shiang hetopvü ji enga akvüto thanphen jiang akvülo thamvüka. 24 Hoji OPVÜI emathathoku etsoyu rhüm than ji tsüngon tiying tsükona thana. Shi ji eng akvü erungthan osi zükhi than jiang ekalo thana. 25 Tsüngon tiyingo to jilo jo ekhümvü tsükona sanrhyutava osi ntia elhi ti-tssotava.

Liri Tokhu lo Thamo Ji

26 Liri tokhu tsüngon ovüngo jilo ntena ovüngo ethi-eben than thanathüng ntena sanrhyui khümtavka, osi ntia elhi tssov meka. 27 OPVÜI emathao rhüm than tssoa heto thana: Tssibungro eni, olyubung motsünga, olyuro obung nzyuatso tüv tiying to ntia ome n khyingotüv khi thamka. 28 Otssukomüm than shenthi jilo ohüm tona olive thyujü nhyontsüo ji thana: Tssibung akvülo ohüm seri ethüm, olyubung akvülo seri eni, 29 olyuro akvülo seri motsünga to ren thei thamka. 30 Jilo ekata mmen than tssoa nyanyanbung motsünga khi thanna kyon jiang nthoche tssolan jiang berithuka. 31 Othan shiang jo eng akvüto erungthan osi otssuk-omüm than jiang ekalo thantava.

Wokhata 29

Nzyu Ethan Tokhu Than Jiang

1 Choro tiyingo to jilo tsüngon ovüngo jilo jo ntena elhi ntia ti tssotana sanrhyui khümtava. Hoji nchuk jo tatara khfütava. 2 Erungthan orhüm mmhom thani OPVÜI emathathuka: mangsü obungro motsünga, olyubung motsünga, olyuro obung nzyuatso tüv tiying, to shiang topvü ephyoerüv n pao tae khi thantava. 3 Otssuk omüm than ohüm lo olive thyujü nzükao jiha thei thana: mangsü obungro jilo ohüm seri ethüm, olyubung jilo ohüm seri eni, 4 olyuro akvülo ohüm seri motsünga. 5 Elani mmen than tssoa myanyan bung motsünga thaii toli kyon jiang ntssüngcheo elhi jiang benrithuka. 6 Choro jilo tsüngon ovüngo jilo otssuk-omüm than ji ephalo tathi engakvü than lio jiha thana, osi engakvü erungthan tona otssuk-omüm than jiha zükhi than ji to. Etsoyu than shiang jo OPVÜI emathao rhüm mmhom.

Thungthan Tsüngon Jilo Othan Jiang

7 Choro tiyingoto jilo tsüngon taroto jilo jo etsoyu ti tsotana sanrhyutae khümtava. 8 OPVÜI emathao rhüm erungthan heto pitava: mangsü obung motsünga, olyubung motsünga, olyuro obung nzyutso tüv tiying to shiang hetopvü ome n khingo tüv khivka. 9 Tathi thanphen otssuk-omüm than ohüm lo olive thujü nzükao ji heto thana: mangsübung ji nzo ohüm seri ethüm, olyubung ji nzo ohüm seri eni, 10 olyuro akvülo ohüm seri motsünga. 11 Hoji ephalo mmen than tssoa nyanyanbung motsünga thana, elani hoji ephalo kyon jiang nthoche than, tona engakvü than otssü-omüm than tona zükhi than toji thana.

Rankiro Tokhu Jilo Othan Jiang

12 Choro tiyingoto jilo tsüngon taro mongoto jilo jo sanrhyui khümtava. OPVÜI yikrachi tsükona tokhu shi ji tsüngon tiying khitava osi elhi ti tssotava. 13 Tsüngon ovüngo shilojo etsoyu rhüm mmhon khi OPVÜI thani emathathuka: mangsü obungro taro ethüm, olyubung eni, olyuro obung nzyuatso tüv taro mezhü, to shiang hetopvü ome n khyingo tüv khivka. 14 Tathi thanphen otssuk-omüm tham ohüm lo olive thyujü nzükao ji heto thamka. Tssibung akvü ohüm seri ethüm, olyubung akvü ohüm seri eni, 15 olyuro akvü ohüm seri motsünga to shiang khi zükhi than jiang lo thephae thamka. 16 Hoji ephalo mmen than nyanyanbung motsünga thamka. Shiang hetopvü ji engakvü than jianglo otssuk-omüm osi zükhi than jiang nzo thamka. 17 Tsüngon enioto jilo mangsübung teriv eni, olyubung eni, olyuro obung nzyuatso tüv taro mezhü to ome n khyingo tüv tae thamka. 18-19 Shiang hetopvü ji tsüngon ovüngo jilo tathi thanphen jiang ekalo thamka. 20 Tsüngon ethümo jilo jo mang sü obung taro ekha, olyubung eni, olyu obungro nzyuatso tüv taro mezhü to topvü ome n khyingo khi thamka. 21-22 Shiang ji engakvü tathi thanphen jiang ephalo thana. 23 Tsüngon mezhüoto jilo jo mangsü obungro taro, olyubung eni, olyu obungro nzyuatso tüv taro mezhü to shiang hetopvü ome n khyingo tüv khivka. 24-25 Shiang ji tsüngon ovüngo jilo ethamvü elio jiang nzo thamka. 26 Tsüngon mongoto jilo jo mangsü obungro tokvü, olyubung eni, olyu obungro nzyuatso tüv taro mezhü to shiang hetopvü ome n khyingo tüv khi thamka. 27-28 Shiang ephalo tsüngon ovüngo thanphen jiang topvü thephae thamka. 29 Tsüngon tiruko to jilo jo mangsü obungro tiza, olyubung eni, olyu obungro nzyuatso tüv taro mezhü shiang hetopvü ome n khyingo tüv khi thamka. 30-31 Shiang topvü ji tsüngon ovüngo jilo thanphen jiang ephalo thamka. 32 Tsüngon tiyingoto jilo jo mangsü obungro tiying, olyubung eni, olyubung nzyuatso tüv taro mezhü to ome n khyingo tüv khi thamka. 33-34 Shiangji tsüngon ovüngo to jilo thanphen jiang ephalo thamka. 35 Tsüngon tizaoto jilo jo elhi ti tssotana sanrhyui khümtava. 36 Etsoyu orhüm mmhom OPVÜI emathao than tssoa erungthan heto pivka; mangsü obungro motsünga, olyubung motsünga, olyu obungro nzyutso tüv tiying to ome n khyingo tüv khi thamka. 3738 Shiang jo tsüngon ovüngo to jilo thanphen jiang ephalo thamka. 39 Shiangjo erungthan, otssuk-omümthan, zükhi than tona khümshümta than to ntena tokhu jianglo OPVÜI ethamvü jiang tsükona lanso. Shiang jo ntena phyochak than osi lüm erungthan to pio jiang ephalo othan jiang. 40 Hojito OPVÜI na Moses yizüng epio jiang topvü Moses na Israel jiang ezocho.

Wokhata 30

Phyochak Than Tsükona Püngnoyi

1 Israel lo pvüji jiang ezOpvüiden jiang thüngi Moses na püngnoyi picho. 2 Kvüthüng kyon tsükana OPVÜI othan epiv phyochaka sana osi etso-ephyo esiv phyochaka sana ombo echümchak ji n yesothukna ombo yi ji ephan tssov shikhfü. 3 Kvüthüng n yanpihan loroe opvüpoe ki evan tsükana OPVÜI ethamvü mekana etssophyo esiv phyochaka sana, 4 opona hoji zoe ekhirancho yakajo ompvüna phyochako ji ephan benthukvü shikhfü. 5 Tokhatola ompvü opona hoji zoe ekhirachocho ompvü phyo chak ji ephan n tssolea Potsow na nlan ompvü siyiv, ntiotssole opona hojito n tssothuko jina. 6 N yanpihan eloena etamana tssolea n tangshon yakchia süsoroa etssophyo esiv phyochaksi hoji süloti yanpiyanthan tssona, 7 orapvüna ntsi ekhirancho yakajo hoji benthukvü shikhfü. 8 Tokhatola orapvü jina hoji zoe ompvü ekhirana tssona n benchev silea OPVÜI na nlan ompvü siyiv. 9 Lorana evan mekana sichithako eloe jina phyochak vao jiang mekana etssophyo esiv phyochako jiang ji ompvü yi jiang ephan benphiv shikhfü. 10 Yanpicho eloe tsükana ntiosana phyochak lina osi etssophyo esiv phyochakna, 11 orapvüna hoji zoe ekhirancho yakajo ompvü yi jiang ephan benthukvü shikhfü. 12 Tokhatola orapvüna shiang bethukvü ompvü ekhirancho tssona ompvüna n bethuklea nlan ompvü n pi. 13 Ompvüna phyochak vao jiang ji n benchethukvü tangi esio etho orapvü na lia. 14 Tokhatola orapvü na ezowo ji tsüngon jilo ntia ekhiran n lio ji yichak jo ombona lüm na rüngcho. 15 Tokhatola ombona sülaniti ekhirana tssona hoji phyochak ji n benchev siwo ji ome ji ombo khyingu. 16 Shiangji n yanpihan osi yanpi orapvü kilo evan eloe echümchak yi jiang tsükona Moses na Israel jiang pio yizüng jiang.

Wokhata 31

Midian Jiang Thüngi Ntho Ritsso

1 OPVÜI na Moses ezocho, 2 "Midian jiangna Israel jiang thüngi etssophyo ji tsükona nina onte khangshia. Hoji sülojo ni chüvka." 3 Tole Moses na kyon jiang ezocho, "Ntena ritsso tsükona methak-tava, osi owo Midian jiangna OPVÜI thüngi ntio tssochosana ji man onte hatava. 4 Israel pvüji akvü lona kyon ovo wothüng motsüng tsüng wothuki ori tssotava." 5 Hojito pvüji akvü lona ethüngcheo ji wothüng taro enina khochiv methakcho. 6 Razhü ji esov tsükona Moses na ntho tsütsaelan ezepvüi osi tatara won epipvüi Phinahas, Eleazar pvüti tsoe ji ethüngchecho. 7 Moses na onte ezo ji ephani na ontena Midian eboetso topvü, 8 Mesaeden otsük mongo: Evi, Rekem, Zur, Hur, tona Reba to jiang phata lüngtharae sicho. Ontena Beor tsoe Balaam ha lüngthacho. 9 Israel jiangna Midian eloe jiang, ngaro jiang tona onte mangsü, olyu to jiang hayae khiyicho osi onte ejüeli topvü re khiyisi onte yantsü, 10 osi nchenphen jiang topvü rungi siyicho. 11 Ontena rechowo monrantsan jiang tona ekümrümo jiang to hantasi yicho, 12 osi Moses ha Eleazar oni tona Israel okho ji to Jordan pankawoe Moab hayilo ncheni vamo jilo yitacho.

Rasan Jiang Kholani Yicho

13 Moses, Eleazar tona Israel esopvüi jiang to na nchenki na khochi rasan jiang nduko chiwotacho 14 Tole Moses na rasan esopvüiden, nzoa yolo esopvüi osi othüng motsüngalo OPVÜI jiangna ritssolo na kholani yio jiang thüngi lüm tsukcho. 15 Ombona onte ezocho, "Nteno ntiolyui eloe topvü nkachitacho la? 16 Eloeden jiango Poer lona Balaam yi engae kyon jiang ji OPVÜI thüngi na n kachoe yithuko ji ntena n tsicho alo? Hoji yakchia Potsow kyon jjangyolo vara yichola. 17 Hoji tsükona khyingroe osi eloe kvütana rama benphithakcho sana lüngtharae sia, 18 osi loroe kvütana rama n tssohancho sana jiango nte echi vatava. 19 Nte kvütana kyon lüngthata osi echümüng evüngkacho sana topvüna nchenki tssae tsüngon tiying vamka. Osi tsüngon ethümo jilo tona tiyingoto jilo tojo onte osi ontena rama tsso eloe jiang to nthochetava. 20 Nte tsakalan akvü, mpensü osi sofüna nsüngrücho nyanyantssan osi otssüngna nsüngrücho topvü nthochevka." 21 Pvüti Eleazar na eboetso ritsso lona yio jiang ezocho, "Shikhfü shiang jo OPVÜI na Moses picho. 22-23 N rungo tsütsaelan sho na, janti, yongmen osi yonjak, mekana shisha shiangjo omina evangi sia nthocheta. jiang yaka thanpo jo nthoche jü khi nthocheta. 24 Tsüngon tiyingoto jilo jo ntena mpensü jiang etssüi sitava, to tsso na nte ji shikhfü ephan nthochecho tssov osi nchenki rheyichev."

Phancho Jiang Chitao Ji

25 OPVÜI na Moses ezocho, 26 "Ni tona Eleazar, elani okho esopvüi jiang to tssoe phanchowo tsütsaelan osi morantsan jiang, ekümrümo jiang to khae zetava. 27 Phanchocho topvü ji echi eni chichei echia jo rasan jiang pia, echia jo kyon okho jiang pia. 28 Rasan jiang ejan jilo na morantsan nzo mongo lo tsüka ren khiche, hoji esüa mangsü, kurü, olyu osi nyanyan jiang lona ha hoji ephan khicherae OPVÜI ekhya tssen vayia. 29 Hojiang jo OPVÜI thüngi echümporo yantso tssoa pvüti Eleazar pia. 30 Nzontsü okho ejan jilona morantsan otsük tinyan akvü lona tsüka khichei, mangsü, kurü, olyu osi nyanyan jiang lona ha hoji ephan khicheta tolyui OPVÜI vanrhyu ki enhyang Levi jiang pia." 31 Tole Moses ha Eleazar onina OPVÜI yizüng ji ephan tssocho. 32-35 Onte ndüngo vanthako jianglo ekata elani rasan jiangna shiang shi phancho cho: olyu tona nyanyan to tsotsüi 675,000, ekümrümo thanpo 72,000; kurü 61,000; elani loroe eboe n tsihan tüv 32,000 to. 36-40 Osi phancho jiang olan akvüto lona chiso jo rasan jiang ejan tssoa heto picho: Olyu tona nyanyan to tsotsüi 337,500; jilo 675 jo ontena OPVÜI thüngi tssenkhya tssoa picho, ekümrümo thanpo 36,000 jilo 72 jiha OPVÜI echi tsenkhya thecho; kurü 30,500 rasan jiang ejan pio jilona ontena 61 jo OPVÜI echi tssenkhya thecho; elani loroe onte ejan 16,000 jilona ontena 32 jo OPVÜI thüngi tssenkhya tssoa thecho. 41 Hoji tsükona OPVÜI yizüng ephanina kvüta tsenkhya tssoa thecho sana jiang ji topvü Moses na Eleazar pvüti picho. 42-46 Hojito okho jiang ejan jo rasan jiang pio ji esüa chiso ji heto picho: Olyu tona nyanyan to tsotsüi 337,000; tssiden thanpo 36,000; kurü 30,500; elani loroeden 16,000 to tssocho. 47 Israel kholuk ejan shi lona Moses na OPVÜI yizüng ephanina ombo ejan tssoa morantsan tona ekümrümo topvü to lona tinyan yolo motsünga ren khichei Levi kyon OPVÜI vanrhyuki jilo elhi etssoeden jiang picho. 48 Jitsosi rasan tsüphoe jiang na owo Moses ezocho, 49 "Tsüphoe yo, e küpo rasan jiang ji ena khatae zele ochia n mom vankhana. 50 Hoji tsükona ena phanchowo shona thera, tivü, tekikhüp, yingrüm, eno thera osi yoko jiang to hansi tsata. OPVÜI khi e eküm e nkohayithoku ena shiang topvü hansi oro OPVÜI thanala." 51 Moses ha Eleazar onina shona thera niro jiang topvü khicho cho. 52 Rasan jiangna theo jiang topvü tssotsüi seri nzo eni bencho. 53 Tsüphoe meko jiango ontena phanchowo jiang ombo mbo na khitacho. 54 Hojito OPVÜI khi Israel kyon jiang eküm jiang nkocheyithukvü tsükona Moses ha Eleazar onina shona than jiang owo OPVÜI vanrhyu ki thetacho.

Wokhata 32

Jordan na Engkhfüwoe Jipo Jiang

1 Reuben jipo tona Gad jipo to na tssiden elümoto vancho. Jazer tona Gilead to meta ji onte tssiden jiang vanphen mmhona to ontena zechetale 2 Ontena Moses, Eleazar osi okho esopvüi thanpoe jiang thüngi owo ezotacho. 3-4 "OPVÜI na Israel jiang nkohae khithuko, yantsü Ataroth, Dibon, Jazer, Nimrah, Heshbon, Elealeh, Sibmah, Nebo, tona Beon to shiang jüwo meta shijo tssiden tsükona meta mmhona osi ena tssiden elümoto vana. 5 Hoji tsükona e nzansi Jordan pankae e ti chiyithukna meta shi e pia e echi tssothuka." 6 Tole Moses na janlancho, "Ete shom Israel thanpoe jiangna ritssolo woathüng nteno helo nte vanhunga ke? 7 Ntena kvütoli Jordan pankawoe meta Potsow na Israel pio ji chiyiv tsükona Israel jiang lümbüm terikatayiala. 8 Ana Kadesh Barnea lona meta ji khyui zelo nte pyimtsü motsüi jiang wothukathüng ha ontena hojito oyam lüm terikayicho. 9 Ontena Eschol hayi jana chiwocho, khatola ontena kholani yithakale kyon jiang ji lüm teriyia OPVÜI na pio meta jilo n rheyithukcho. 10 Hoji tsüngon jilo OPVÜI na lüm tsuki heto echümchaka phyocho. 11 'Ana phyochakala, ontena a longtsükata n vamo jina Ejip metae na chiyio jiang nzyu mekyu na omhawoe kyon ochia ana Abraham, Isaak, Jakob to pio meta jilo rheyiv meka.' 12 Otsük akvü hojina rhakcho osi Kenizite kyon Jephunneh tsoe Kaleb tona Nun tsoe Joshua to onina OPVÜI longtsükata vamo jina oni taena meta jilo rheyicho. 13 OPVÜI na onte thüngi lüm tsuko jina hoji mharen ji n chükhanthüng jo nzyu zhüro lijüngi khyuta vanthukcho. 14 Hoji tsükona enhungo hoji esüa ntena nte motsüi jiang etssophyo khia mmen etssoe echungren ethan chiyilani Israel pono lüm etsuk rolanthukvü sala. 15 Hoji tsükona nte Reuben osi Gad jipo na OPVÜI n phanka na ombona elani kyon shiang topvü khoe silam küma onte emomo ji nte pono tssov." 16 Tole ontena Moses thüngi ezotacho, "Ovüngtssoa shilo e olyu shiang ekvülanchi eshem tona elo-nongoe shiang tsanthephen to olong na eshenlanchiv yuta epia. 17 To tssosanati ena e shom Israel thanpo jiang nzo owo ori tssov osi ena sokata ori tssoe onte meta jilo onte rheyithukvü. Hojithüng jo e eloe, nongori jiangna ekvülanchio jiang lo vani kyon jiang nkachov. 18 Israel jiang topvüna OPVÜI na onte epio meta jilo n rheyithüng jo ena oki yiv meka. 19 Eiyo Jordan na hepiwoe na e ejan ejüeli jiang khithako jina Jordan pankawoe jo onte khetsüv meka." 20 Moses na ezocho, "Nteno otsotso phyoa tssona shilo OPVÜI mhadungona methaki ritssolo khochitava. 21 Nte yolo ritssoe jiang topvüna Jordan pankae chiwo OPVÜI lanso küpo na ori tssoe khithukvüka. 22 Hoji süiti ntena OPVÜI thüngi osi nte shom Israel jiang thüngi nte ejan elhi ji methaki nte ki yitakhuka. Hojito tssona Jordan na engkhüwoe meta shijo nte echito OPVÜI na chekav. 23 Tokhatola ntena nte yi ephan n tssochojo ntena OPVÜI thüngi mmen tssoala to ana ekyu yi nte piala. Ntia ti worhyutava, ntena mmen tssochojo nte ezüpthukvüka. 24 Hoji tsükona nte yantsü jiang tssotava osi olyu vanphen jiang eshentava, tokhatola nte phyochak jijo benthuka." 25 Gad tona Reuben to kyon jiangna phyotacho, "Tsüphoeyo, nina phyo jito ena tssovka. 26 E eloe osi ngaroden, e olyu, mangsü jiang Gilead lo yantsü jianglo vanthukvüka. 27 Tokhatola e topvüna OPVÜI lanso küpona ori tssovka. Nina phyo ji esüa ena Jordan pankae owo ori tssovka." 28 Moses na Eleazar, Joshua, tona Israel esopvüi thanpoe jiang to thüngi heto ezocho, 29 "Reuben tona Gad to kyon na Jordan pankae OPVÜI lanso küpona ritssolo ewov methaka tssona osi onte kyochi yakchia ntena meta ji khyoa tssona Gilead metajo onte echi tssoa pia. 30 Tokhatola ontena Jordan pankae chiro nte nzo ori n tssona onteha nte nzo Kanaan meta jilo janhyavka." 31 Gad tona Reuben to kyon jiangna janlancho, "Tsüphoeyo, OPVÜI na phyo ji ephan ena tssovka." 32 Ombo lanso küpona ena Jordan pankae owo Kanaan lo owo ori tssoka, osi eyio ejüeli jo Jordan na engkhfüwoe ji khivka. 33 Hoji tsükona Moses na Amorite mesao Sihon metaji topvü tona Bashan lo Og mesao meta, tona hojiang nkonjano yantsü osi meta jiang toji Gad jipo, Reuben jipo tona Manasseh jipo chiso to ejan picho. 34 Gad jipo na Dibon, Ataroth, Aroer, S5 Atroth shophan, Jazer, Jogbehah, 36 Beth Nimrah tona Beth Haran to yantsü shiang pikhfü jiang tssochotacho. 37 Reuben jipo na Heshbon, Elealeh, Kiriathan, 38 Nebo, Baal, Meon tona Sibmah to shiang omying ethan pitacho. 39 Manasseh tsoe Machir pvüji jina Gilead meta ji khyoe jilo evamo Amorite jiang phani sisi jilo vantacho. 40 Hoji tsükona Moses na Gilead metaji Malchir pvüji pia jilo vanthukcho. 41 Manasseh jipo lo Jair na oyan tara hae khyoe khi "Jair yan" to myingthan piracho. 42 Noabah na Kenath meta tona jilo oyan jiang to khyoe meta ji Nobah to myingthan picho.

Wokhata 33

Ejip Lona Moab Ejan Yentsa

1 Israel jiangna jipo jipona Moses ha Aaron oni lanso ephan Ejip lona khochi meta kvülo kvülo nchena yicho sana meta mying ji shiang. 2 OPVÜI yizüng ephanina Israel jiangna meta kvüta nchena yicho sana jiang mying ji Moses na erani vacho. 3 Israel jiangna Ejip lona yakchi tokhu ovüngo ji khisi ojyuato nzyu jilo choro jandemo tsüngon taro mongo to jilo khochicho. Ontena OPVÜI nkoho khi Rameses yantsü kvülo shi otsoe tokhfü chüo jiang jutheta vancho sana jiang hunga yantsü jilona khochitacho. 4 Osi ontena eyio jiha Ejip kyon jiang topvü na onte zeta vana khochi yitacho. Hojito tsso ji yakchia OPVÜI na ombo Ejip potsow jiang lona tsüphokata toji ejücho. 5 Israel jiangna Ramases lona khochi Sukkoth jancho. 6 Jisülo jo lijüng ji tssae Etham lo oyi nchentacho. 7 Jilona oyi ontena Baal Zephon na engkhüwoe Pi Hahiroth lo kholani oyi Migdol ndüngo nchentacho. 8 Ontena PiHahiroth lona khochi Jümyon ji yakchia oyi Shur lijüngi chiyicho, osi tsüngon ethüm yentsata oyi ontena Marah lo nchentacho. 9 Hoji lona oyi Elim jancho osi ontena jilo nchentacho, ntiotssole jilo jünhyo taro eni tona Pam dung ekhatiying to licho. 10 Ontena Elim lona khoe oyi Suez jüyi jancho. 11 Jisülo jo oyi Sin lijüngi nchentacho. 12 jisülo jo Dopkhah jancho, 13 Jisülo jo Alush jancho, 14 Jisülo jo eyuv jü n jüwo meta Rephidim lo chiyicho. 15-37 Ontena Rephidim lona Hor phunglan ejam jilo meta shiang lo nchentacho. Sinai lijüng; Kibroth Hattaavath (Tssüphi yangphi lüp) Hazeroth, Rithmah, Rimmon Perez, Libnah, Rissah, Kehelathah, Shepher phunglan, Haradah, Makheloth, Tahat, Terah, Mithkah. Hashmonah, Moseroth, Bene Jaakan, Hor, Haggidgad, Jotbathah, Abronah, Eziongeber, Zin lijüng, (jijo Kadesh ji) osi jilona Edom meta tssae Hor phunglan jilo chiyicho. 38-39 OPVÜI yizüng ephanina pvüti Aaron na Hor phunglani chungocho. Ombo nzyu 123 tssoathüng Israel jiangna Ejip lona khosi nzyu zhüro to jilo choro ovüngo jilo phunglani jilo na ombo chücho. 40 Israel jiangna tsata to kanaan jolowoe Arad lo mesao jina zocho. 41-49 Hor phunglan jilona Moab hayi ejan ji Israel jiangna meta shianglo nchentacho: Zalmonah, Punon, Oboth, Moab lo Abarim roe sithako metaji; Dibon Gad, Almon Diblathaim, Nebo phunglan ndüngo Abarim phunglan osi Jordan pankae hayitsü jilo; jilona beth Jeshimoth tona Akacia hayi to yutalo lio ji tolo nchentacho.

Jordan N pankathüng Lanso yi Ezo Jiang

50 Jeriko lona Jordan pankawoe Moab hayi lona 51 OPVÜI na Israel jiang tsükona heto Moses ezocho, "Ntena Jordan pankae kanaan lo rheyiathüng, 52 meta jilo evan jiang topvü phani sitava. Onte khümphen olung osi yonjak kisü jiang tona khümphen jiang toha roe siyitava. 53 Meta ji ana nte piaka hoji hoe vantava. 54 Meta ji jipolan pvüji jana jantao tssoa phyalyu füki zesi erütae, jipo khoshao jiang meta tsüpho pi, terio jiango meta teriv pi to jantava. 55 Tothakana ntena meta jilo kyon jiang phani n siracho jo onte ji nte mhyiki kihav jücho to osi nte jo-nhye lo okyo lichoto nte khetsüvka; osi ontena nte thüngi rota nrhüvka. 56 Ntena phani onte n sicho jo onte roe esithung ji ana roe nte sivka, "

Wokhata 34

Meta ji ErüNkon Jiang

1 Israel jiang tsükona OPVÜI na heto Moses ezocho, 2 "Ana nte pio Kanaan meta jilo ntena rheyiana, erü-ekük ji heto tssovka. 3 Jolowoe jo Zin lijüngina benkae Edom erü dunga yivka. Echü jümang ji jolowe echephen jilo eng chirolamoe na benkav. 4 Hoji lona jolowoe Akrabbim eyak jiwoe joyi Zin yakchia jolowoe Kadesh Barnea jana joyivka. Jilona engrhe khümkiwoe Hazzar Adar jiwoe chungi Azmon lona 5 Ejip erü lo hayi lio jiwoe oyi Medeterranean jümangina echevka. 6 "Engrhewoe erü jo Medeterranean jümang ji tsovka. 7 "Khümkiwoe erü jo Medeterranean lona dungi, 8 Hor phunglani oyi Hamath eyak jilo chiyivka. Hoji lona Zadad tona 9 Ziphron, osi jilona oyi Hazar Enan lo echevka. 10 "Engkhfüwoe erü jo Hazar Enan lona dungi oyi Shephan lo yivka. 11 Hoji lona jolowoe joyi Ain engkhfüwoe Harbel, oyi Galillee jüran na engkhfüwoe phunglan jianglo echevka. 12 Hoji lona jolowoe Jordan zhükhfü ji dungi oyi echü jümangoe joyiv. "Hojito nte meta ji erü mezhü ji hojito tssovka." 13 Hoji tsükona Moses na Israel jiang ezocho, "Shijo OPVÜI na phyalyu fuki zetasi nte jipo tokusi chiso ji chitale to nte pio ji. 14 Reuben tona Gad to jipo tona Manasseh chiso engkhfüwoe vamo jiang to jo Jeriko zechi jilo Jordan na engkhfüwoe, 15 wopan na jantao meta ji pithaka."

Meta Ji Jantav Enhikao esopvüi Jiang

16 OPVÜI na Moses ezocho, 17 "Pvüti Eleazar tona Nun tsoe Joshua to onina kyon jiang yolo meta ji jantayivka. 18 Jipo akvü lona esopvüi tsük tsük ethüngchei nzanchithuka erüsotayia." 19-28 OPVÜI na ethüngcheo kyon jiango shiang: Jipo esopvüi Juda Jephunneh tsoe kaleb Simeon Ammihud tsoe Shelumiel Benjamin Chisolon tsoe Elidad Dan Jogli tsoe Bükki Manasseh Ephod tsoe Hanniel Ephraim Shiphtan tsoe Kemuel Zebulun Parnah tsoe Elizaphan Issachar Azzan tsoe Pakltiel Asher Shelomi tsoe Ahihud Naptali Ammihud tsoe Pedahel 29 Kyon shiango OPVÜI na Kanaan metalo liko ramüng jantav enhikao jiang.

Wokhata 35

Levi Jiang Pio yantsü Jiang

1 Jeriko lona Jordan pankae Moba hayi jilona OPVÜI na Moses ezocho, 2 "Israel jiang heto ezoa, ontena enhungo meta jilona yantsü khicherae Levi jiang pia, osi yantsü jiang haphia yantsophen tüv ha vayitava. 3 yantsü shiang jo Levi jiang echhi tssovka osi ontena jianglo vamka, phenlung jiango onte tssiden osi ekümrümo thanpo jiang tsükona tssovka. 4 Phenlung jiang ji yantsü jiang lona nkona metre 450 nandang tssovka. 5 Osi yantsü ji tssae etsüi esii metre 900 tssosi yantsü jijo olungi tssovka. 6 Elani ontena n tsiv oyam lüngthata thüng tsanthephen yantsü tiruk onte vayia. Hoji ephalo yantsü zhüro eni tona jilo phenlung yantsophen jiang thepha toli, 7 tsotsüi yantsü zhüro tiza onte pia, 8 Jipo akvülo yantsü kvüta tssov sana jo jipo jina meta kvütera hunga na ji ephan tssovka."

Tsanthephen yantsü Jiang

9 OPVÜI na Israel jiang ezole to Moses ezocho, 10 "Ntena Jordan pankae kanaan meta lo rheyia na, 11 tsanthephen yantsü ethüngche vatava, tona ochona sana kyon lüngthata thüng tsanthephen tssovka. 12 Tona wopan na omüng n-liv yamo jilona tsanchov. Münghan jiang ji okho mhadungo na oyi n tssoyiv jo n chüthokche. 13 Jitsükona yantsü tiruk ethünga, 14 Yantsü ethüm jo Jordan na engkhüwoe, ethüm jo Kanaan meta lo to. 15 Yantsü shinag jo israel jiang osi metapoe kyon nte kholo esüngaro tssolea sunga lea evamo jiangna n tssiv omüng hanathüng tsanthephen. N tssiv omüng ehan otsük akvüna yantsü shiang yolo motsüngalo tsanthekhuka. 16-18 'Tokhatola ochona yonjak, olong osi otssüng khi oyam chüthoka sana ombona omüng hanthaka, hoji tsükona ombo chüthokvü lia. 19 Echüo ji wopan ndüngtso jina omüng ji n-liv shikhfü. Ombona kvüthüng münghan ji nduka sana chüthoki siv shikhfü. 20 "Kyon tsükana ocho sana khyanchüchüi meka na ntiona sana ephaye, 21 mekana ombo khena cheni chüthoka sana ombona omüng hanthaka, hoji tsükona omboha chüthokvü lia. Echüo ji wopan ndüngtso jina omüng ji n-liv lia, osi kvülo na münghan ji hunga sana lüngthae siv lia. 22 'Tokhatola ochona sana thanphoe tsüka ji etssak lona khyanchüchüi mekana ntiona sana ephyae chüthukcho mekna n tssiv chüthoka tssona, 23 mekana ombona n hungu olongna ochonasana ombona n tssako tüv ephyatsüng na, 24 hojitüv yuta lojo okho topvü na meyamo ji wopan jilo mekna n tsiv meymo ji yilo theyiv lia. 25 Okho jina kyon ochona woria omüng hansi tsana vancho sana ji shanchoe omboji tsanthei yantsü jilo owo vanthoku. Osi ombona pvüti tsüpho ji nchüthüng nandang jo jilo vanchev. 26 Tokhatola ombona tsantheo yantsü jilona khochoki chiwo, 27 ombo n-liv yana vamo jina ombo lüngtha na jijo münghan elhi to n kha. 28 Pvüti tsüpho ji nchüthüng jo ombona tsanthei yani vamvü osi pvüti ji chüsanati ombona kholani ombo yani yikhuka. 29 Shikhfü shijo ntena kvülo vana sana nte osi nte tsoronichen jiang na benphia wov. 30 "Omüng ehan ji otsük eni mekana jilo kyongkata na ehungpvüi tssosanati chüthokcheta, tsükana ehungpvüi tssocho taena jo münghan n tanche. 31 Münghan jo chüthokvü shikhfü, N lan shijo ombona orangna locho na n büktache. 32 Ochona tsanthei yani yiana ombona pvüti tsüpho ji nchüthüng jo orangna n lolanchiche. 33 Ntena hojito orang khicho jo nte evan meta ji mmenala, osi münghan ji chüthoki siwo ji yaka ntinaha omüng jotao meta ji nthocheo tüv lanka n li. 34 Aiyo OPVÜI ji osi ana Israel kyon jiang yolo vanala, hoji tsükona ntena evamo meta ji münghanta khi timmenthuka."

Wokhata 36

Yanpithako Eloe Jiang Tssentso

1 Machir tsoe, Gad pvüji lo jiporan ji tona Joseph tsoe Manasseh rüi ji tona Moses to na esopvüi thanpoe jiang to thüngi owo heto ezotacho. 2 "OPVÜI na phyalyu fuki meta ji Israel jiang chirotayile to OPVÜI na nte ezocho. OPVÜI na e wopan Zelophehad ejüeli ji ombo otsolov jiang jantayile toha e ezocho. 3 Tokhatola ti-mhechotava, ontena jipopoe thüngi yanpitacho jo ejüeli jiang jipopoe echhi kümvü, toana e ejüeli jiang matarokav. 4 Ejüeli shitao jiang topvü rilanta nzyu jilo opvüo jiang khelo chiyilana na Zelophehad otsolov jiang ejüeli jo jipopoe jiang khelo rankata tae vamvü osi e jipo epüp tssoa yiv." 5 Hoji tsükona Moses na Israel jiang thüngi OPVÜI yizüng heto picho, "Manasseh jipo na phyo ji elanthata, 6 hoji tsükona OPVÜI na phyoala, Zelophehad otsolov jiangna onte jüpomo thama eboe thüngi yanpicheta tokhatola onte jipo thüngi tae yanpichev. 7 Israel otsük akvü tsütsaelan jo ombombo jipo echhika to lia vamvüka. 8 Tssentso ekhi eloe otsük akvüna ompvüpo jipo eboe thüngi yanpivka. Hojitoli Israel otsük akvüna ombombo motsüi ejüeli ji hovka, 9 osi ejüeli jiang jipo motsünga lona motsüngae hana yiv meka. Jipo akvüna ombombo ejüeli honrhüa yivka." 10-11 Zelophehad otsolov jiang, Mahalah, Tirzah, Hoglah, Milka, tona Noah to shiang na Moses thüngi ezoji esüa onte pyaro-niroe jiang thüngi yanpitacho. 12 Ontena Joseph tsoe Manasseh jipo chungi tae yanpitacho osi onte ejüeli jiang ji onte pyimtsümotsüi ejüeli to lia vanthukcho. 13 Shikhfü shiang jo Jeriko lona Jordan pankae Moab hayi jilona OPVÜI na Moses yakchia Israel jiang pio jiang.

Shikhfü Enioto 1

1 Oyi shiang jo Jordan zhükhfü Onteno Suph ndüngo Jordan hayi na engkhfüwoe lijüngi na esanawoe Paran yantsü tona Moses na Isreal jiang ezocho. esanawoe Tophel, Laban, Hazaroth tona Dizahab to yutalo vancho. 2 (Sinai phunglani na Kadesh Edom phunglan meta jiang yakchia Kadesh Barnea ejam jo tsüngon taro ekha khiala.) 3 Ontena Ejip metae na khosi nzyu zhüro si choro taro ekhaoto tsüngon ovüngo jilo OPVÜI na kyon jiang ezole to ombo ezo jiang Moss na ezoracho. 4 Shiangjo Heshbon yantsü lo esapvüi Amorite mesae Sihon tona Ashtaroth yantsü tona Edrei yantsü lo esapvüi Bashan mesae Og to OPVÜI na khyocho sülo. 5 Israel jiangna Jordan engkhfüwoe Moab metalo vanathüng Moses na OPVÜI yizüng jiang onte ezocho. ombona ezocho, 6 "Etena Sinai phunglani vanathüng OPVÜI na e zocho, 'Ntena phunglan shilo sungtia vanthaka. 7 Enhungo nchenphen eseni khochia. Ntena khochi Amorite meta phunglanro nkonjan, Jordan hayi, phunglan osi hayi jiang jolowoe osi Mediterranean jüran jianglo wotava. Kanaan meta osi Lebanon phunglan jiang osi Euphrates zhükhfü tsüpho ji jana wotava. 8 Shiang hetopvü OPVÜI ana nte motsüi Abraham, Isaak, tona Jakob osi onte tsoronichen jiang epiv phyochako meta jika. Owo hojilo vantava.' "

Moses na Yitssoeden Ethüngchetala

9 Moses na kyon jiang ezocho, "Ana Sinai phunglanina nte ezo ntsacho, 'Ana nte esopvüi etssov ji elhi kyongtia. A taena jo n tssoche. 10 Nte OPVÜI Potsow na nte ji oyaki shantio tata nte kümthukthaka. 11 OPVÜI nte pyimtsü motsüi Potsow na phyochako ji esüa nte ji hetata wothüng wothüng bena thicherae nte mmhayithukthaka. 12 Tokhatola kvütolyui a taena nte emhukelüm shiang nte nsüngichev la? 13 Nte pvüji akvü lona nchümri eli, engathe eli osi ejyueran eliden ethüngchetava tona ana nte esopvü onte tsswothukvüka. 14 Ana hoto nte ezole ntena hojito etssov jo mmhona to nte lüm na rüngcho. 15 Hoji tsükona ana nte yolo nchümri eli osi ejyueran eli jiang ethüngi nte esopvüiden tssothukcho. Ochoangna jo wothüng pono esopvüi, ochoangna jo nzoa esopvüi, ochoangna jo tinyan, ochoangna jo taro yolo esopvüiden to. Elani ana pvüji topvülo esopvüi thanpoe ha ethüngcheracho. 16 "Hojithüng ana nte ezoracho, 'Nte khümtsüng lo pangtarüta chiyio jiang engatava. Yilan akvüto ntsanrüka tssoyitava, nte yolo tssolea, nte tona nte nchenkae evan lankon to yolo tssolea. 17 Nte methak jiang lo omha eze ti-tssotava; shi tssolea shi tssolea otsük akvüto yitssolan motsünga kheti tssoyia. Ochia ti kyutava, ntiotssole ntena methako jijo Potsow thüngina yicho methak. Yilan kvümoe ntena n methakuka sana jijo a thüngi yithuka, ana methakvüka.' 18 Hojithüngti ntena ntio etssov liana topvü ana nte ezoracho.

Kadesh Barnea Lona Echeepyim Wothukala

19 OPVÜI ete Potsow na ntio etssov ezochosana topvü ena tssoratacho. Ena Sinai phunglan lona khochi ekyuthao lijüngtsü ji yakchia Amorite meta phunglanro jianglo chiyitacho. Etena Kadesh Barnea janale ana phyocho, 20-21 "Enhungo etena Amorite meta phunglanro kvümoe OPVÜI ete pyimtsümotsüi jiang Potsow na epicho sana hoji janala. Zechitava, o-jika. Ombona ezoji esüa owo meta ji hoe khitava. Titoteria osi kyua to ti-tssotava." 22 "Tole ntena oro a ezotacho, 'Ete vüngina kyon wothuka owo zethuksi meta jilo ntio yantsü lichosana osi olan kvüwoe na wotav sana ezothuka.' 23 "Tole hoto etssov ji elana zechei ana pvüji akvü lona tsük-tsük, taro eni ethüngchecho. 24 Tole ontena phunglan meta jianglo owo, Eshkol hayi jana zetasi yicho. 25 Ontena meta jilona tssüngthi lhoe hantasi oyi 'OPVl na epio metaji elümoto lizüa' to phyotacho. 26 "Tokhatola ntena OPVÜI yizüng jiang panlantasi meta jilo n rheyitacho. 27 Nte yolo heto phyota erinjantacho: 'OPVÜI na etssakala. Ombona Ejip metae na esosi chiyi Amorite shiang khi elüngthatukvü sana. 28 Etena ntiolyui meta jilo rhowotavla? E kyuala. Etena chelo wothuko jiangna ezo ji ephanjo meta jilo evamo kyon jiango ete lona etho jükata osi siphokata, onte yantsü pikhfü jiango oyak etssunga epikachi vantalato osi kyonpvü elümoto vana hungi lato!' 29 "Tole ana nte ezocho, 'Kyon jiang ti-kyutava. 30 Nte OPVÜI Potsow na nte sovka osi ntena Ejip metae na osi lijüngi na hungthako ji esüa ombona nte tsükona rotayivka osi 31 ombona kvüto ntangshona nte sosi, opona otsoe ejüma to nte ejümsi meta shilo chiyithukcho sana ji ntena hungthaka.' 32 Tokhatola ana hoto phyoaha osi ombona nte vüngina nte nchenphen methaki nte vayia ha 33 ntena OPVÜI ji n longtsücho. Olan nte sov tsükona ombona nte mmhadungi zümolo jo midurhyu, engo jo eluk kholung to khi nte socho.

OPVÜI na Israel jiang khangshiala

34 "OPVÜI na nte erinjanta ji zoe lüm tsuka phyochakcho, 35 Nte mharen n mhom shilo tsüka na lea meta mmhom ana nte pyimtsümotsüi piv phyochako jilo rheyiv meka. 36jephunneh tsoe Kaleb taena hojilo rheyivka. Ombona a lo longtsükata vamo ji tsükona ana ombona chei zewo metaji ombo osi ombo tsoronichen jiang pivka.' 37 Nte tsükona OPVÜI na athüngi lüm tsuka phyocho, 'Moses, nina tia meta jilo rheyiv meka. 38 Tokhatola ni jokyim Nun tsoe Joshua mhanka jilo nzanchia. Ombo na Israel jiang sosi meta jilo rheyivka. 39 "Jisüi jo OPVÜI na ete topvü to ezocho, 'Nte ngaroden elan n lan n chethehamo jiangjo meta jilo rheyiv ka. Ntena jo nte ngaro jiang ji ori na rechoe nte khiyiv to phyotacho. Khatola ana metaji onte pivka, osi hojilo ontena vamka. 40 Tokhatola nte tsükona jo khophilani osü rüa lijüngi Aquba jünken jilo rheyitava.' 41 "Tole ontena phyotacho, 'Moses, ena OPVÜI thüngi mmen tssothaka. Enhungo ena OPVÜI na phyoji esüa owo kyon jiang thüngi rotavka.' Jitosi nte otsük akvüna phunglanro meta ji elaro khyov tsayia nchümta rotalo wov methaktacho. 42 "Tokhatola OPVÜI na a ezocho, 'Owo ori ti-tssotale to onte ezoa, ntiotssole ana onte kyochiv meküma, onte ri jiangna onte khyovka.' 43 OPVÜI na phyo ji ana nte ezole, ntena n ngacho. Ntena ombo panlana nte kanchan lona khochi phunglanro meta ji wotacho. 44 Tole meta jilo vamo Amorite jiangna otssak ryua to sani nte hacho. Ontena Hormah jana nte phani Edom meta phunglanro jilo na nte khyothechicho. 45 Tole ntena OPVÜI thüngi kyata jonjita ha ombona nte n kyochicho.

Lijüngi Yentsatao Nzyu Jiang

46 "Hojito lyui, etena Kadesh lo sunga vantacho,

Shikhfü Enioto 2

1 Osi etena tae to khochi Aquba jünken lan ji dunga OPVÜI yizüng ephan khochi Edom meta phunglanro jianglo sunga yentsatacho. 2 "Jisüijo ena phunglanro jianglo sunga vanthako jina 3 OPVÜI na khümkiwoe khochitale to ezocho. 4 Ombona heto nte ezole to a ezocho: 'Enhungo ntena Esau rüiden nte wopan kitsük vanphen Edom meta phunglanro jiwoe khochiv sala. Ontena nte kyuvka tolea, 5 Onte thüngi ori ti-tssotale, ntiotssole ana onte metaji phata meta jitera nte piv meka. 6 Edom metajo ana Esau tsoronichen jiang pithaka.' 7 "Ntena ntio tssoana topvü lo OPVÜI na nte mmhayithuko ji nchümchetava. Ntena lijüng hetara yentsata vanathüng OPVÜI na nte zeyacho. Nzyu zhüro hetenhya shi ombona nte ndüngo thei nte ethelan topvüto nte pithaka. 8 "Hoji tsükona etena Elath to na Eziongeber to lan yakchia echü jümangoe yio lan ji sisi engkhfü khümkiwoe yitacho. 9 Tole OPVÜI na phyocho, 'Lot tsoronichenden Moab lo vamo jiang ti-khetsütava mekana onte thüngi ori ti-tssotava. Ana Ar yantsü ji onte pithaka, hoji tsükona ana yantsü jiang nte piv meka.' " 10 (Ai lojo Emim to tsao kyonpvü thojüi jiang vanracho. Onteno Anakim jiang esüa ntssonnrona. 11 Thojüi kyon Anakim jiang tsao ji esüa onteha Rephaim toha tsacho, tokhatola Moab kyon jiangna Emim to onte tsacho. 12 Horite kyon jiangna Edom lo vancho khatola Esau tsoronichen jiangna phani onte sia jipo ji monthuksi hojilo ontena vani sicho, Israel jiangna OPVÜI na onte pio meta jilona metapvüi jiang phana to phani sicho.) 13 "Jitosi OPVÜI na phyo ji esüa etena Zered zhükhfü ji pankacho. 14 Shijo etana Kadesh Barnea lona khosi nzyu thümrosi tiza lo tssocho. OPVÜI na phyoji esüa meta jilo ritsso kyon jiang chürathakcho. 15 Onte topvü n chürathüng jo OPVÜI na onte panlana mongcho. 16 "Onte topvü chürathakale, 17 OPVÜI na e ezocho, 18 'Ntena nchüngo Ar lamoe na Moab meta yakchivka. 19 Hojitüng ntena Lot Tsoronichenden meta Amorite jiang meta yakchivka. Hoji tsükona onte ti-khetsütava osi ori onte ti-tssotava, ntiotssole ana onte pithako meta jiang ana khi nte pilam mek.' " 20 (Meta shijo Rephaim jiang meta toha tsacho, hoji jo jilo vamo kyon jiang mying ji; tole Amorite jiangna jo onte ji Zamzummim to tsacho. 21 Onteno Anakim jiang esüa siphoa. Onte ji khosha osi otsson jipo tssocho. Tokhatola OPVÜI na onte monthuksi metaji Amonite jiang picho. 22 Edom phunglanro jianglo evamo Esau rüiden jiang thüngi ha OPVÜI na hoto tssocho. Meta jilo evamo Horite jiang monthuksi Edom kyon jiang hojilo vanthukcho osi enhünga jana hojilo vana. 23 Mediterranean jütssa dunga jütssa jilo Crete jüyi lo evan kyon jiangna vanthakcho. Ontena Avvim kyon jiang khyothechisi onte meta ji jolowoe Gaza jana khichochicho.) 24 "Etena Moab yakchithakale OPVÜI na ezocho, 'Enhungo khochi Amon zhükhfü yakchitava. Ana Sihon tona Heshbon lo Amorite mesao ji, ombo meta jiang to nte khelo rheyithukvüka. Ombo thüngi ori tssoe ombo meta ji khitava. 25 Ana nchüng tsüngon lona benkae kyon topvü na nte kyuthukvüka. Otsük akvüna nte mying zoa na eneta kyuvka.

Israel Jiang na Sihon Meta Khyoala

26 "Jisüi jo ana Kedemoth lijüngina Heshbon mesao Sihon thüngi mmhonta yithen heto picho; 27 'Ni meta yakchia e yithuka. Ena lantssa n khathena saksak olan dunga yivka. 28 Ena etsoyu osi ojü tsütsao jiang manjo nte lovka. Ena ethev lio jijo ni meta yakchiv jitaeka. 29 Jordan zhükhfü yakchia OPVÜI Potsow na epio meta jilo rheyiv tsükona taeka. Edom lo Esau tsoronichen jiang tona Ar lo Moab kyon jiang tojo onte meta yakchiv echonchithaka.' 30 "Tokhatola Sihon mesao na ombo meta yakchia e n yithoku tssocho. Nte Pvüi Potsow na ombo lüm khüngthoki ete khi ombo khyothoki ombo meta ji ekhithoko jina etena hojilo enhünga jana vanala. 31 "Jisülojo OPVÜI na a ezocho, 'Ana Sihon mesao tona ombo meta to ji ntena ekhyowo nte pithaka; ombo khyoe meta ji khiyitava.' 32 Tole Sihon na ombo woro jiang sosi ori etssov tsükona Jahaz yantsü ndüngo chirocho, 33 tokhatola OPVÜI na ombo ji ete küpo tssothuki etena ombo, ombo tsoe jiang osi ombo woro jiang to lüngthacho. 34 Tothüng etena yantsü jiang roe siyicho osi eboe, eloe tona ngaro topvü lüngtharacho. Etena ochia enhyokae n vanthukcho. 35 Etena mangsü jiang khiyia yantsü jiang retsoyitacho. 36 Ete OPVÜI Potsow na e kyoa Amon hayi tssa lo Aroer yantsü lona hayitsü ji lungi yantsü ji to Gilead jana khyoe khi ekhithukcho. Nti yantsü pikhfü naha e n zalanchikhukcho. 37 Tokhatola etena Amorite jiang meta Jakuk zhükhfü tssa mekana phunglanro meta jianglo yantsü jiang osi meta kvülo OPVÜI na ti-rhowota to phyocho sana jiang lojo, ji ndüngo tia n wotacho.

Shikhfü Enioto 3

Israel Jiangna Og Mesao Khyoala

1 "Jisülo etena khümkiwoe Bashan metawoe chüngitale Og mesao na ori etssov ombo woro topvü sosi Edrei yantsü ndüngo na enhyaka vancho. 2 Tokhatola OPVÜI na a ezocho, 'Ombo ti-kyua, ana ombo tona ombo woro topvüto ni khelo rheyithokvü ka. Nina Heshbon lo Amorite mesao Sihon thüngi tssoato tssoa.' 3 "Hojito OPVÜI na Og mesao tona ombo woro jiang toha ete khelo rheyithuki etena topvü onte lüngthacho. 4 Jithüng etena onte yantsü jiang khiyiraecho osi yantsü kvüiha n khio n licho. Topvü tsotsüi etena yantsü rokro khicho, jijo Orgob metaro kvülo Bashan mesao Og na sa vancho sana topvü. 5 Yantsü shiang topvü pikhfü ntssom, kipüngtsü osi khanphen tsüphov na khanracho. Tokhatola pikhfü n lio yan ha elümoto liracho. 6 Etena Heshbon lo Sihon mesao thüngi tssoato eboe, eloe osi ngaro topvü lüngtharacho. 7 Etena mangsü jiang khiyisi yantsü jiang retsoyicho. 8 "Hojithüng etena Amorite mesao eni ji khelo na Jordan engkhüwoe metaji, Amon zhükhfü lona Hermon phunglan na ndang. 9 (Hermon phunglan jijo Sidon kyon najo Sirion to tsa, nna Amorite jiangna jo Siner to tsacho.) 10 Etena Bashan mesao Og ji meta shiang topvü khiyicho: Yondon jianglo yantsü jiang, Gilead tona Bashan to meta jiang ji Salekha tona Edrei to yantsü jana khiyicho." 11 (Og mesao jo Rephaim thojüi jiang yolo wokhao ji. Ombo khüp jo olongna esi metre mezhü, etsüi metre eni to shikhfü ephan etsiphen ji ephan tssocho. Nchüng jana ombo khüp ji Amorite yantsü Rabbah lo lia.)

Jordan Engkhfüwoe Vamo Pvüji Jiang

12 "Etena meta ji khithakale ana Reuben pvüji tona Gad pvüji to ejan jo Amon zhükhfü ndüngo Aroer yan ji khümkiwoe ji tona Gilead meta phunglanro ejoma tona jilo yantsü jiang to picho. 13 Manaseh pvüji ejoma jo ana Gilead meta enhyoe lioji tona Bashan meta topvü, Og mesao na sawo meta Argob meta to topvü to picho." (Bashan jo thojüi Rephaim jiang meta to tsacho. 14 Manasseh pvüji lo Jair to tsao jina Ardob meta topvü, Bashan topvü, Gershur tona Maakah to erü jana khicho. Ombona oyan jiang ji ombo mying pio jina nchüng jana Jair to tsacho.) 15 "Gilead jo ana Manasseh pvüji lo Machir picho. 16 Reuben tona Gad to pvüji jiang jo ana Gilead meta lona Amon zhükhfü nandang meta ji picho. Zhükhfü ji olongo jo onte meta jolowoe erü ji tssocho osi khümkiwoe erü jo Jabbok zhükhfü osi jinaha Amorite erü riso tssoala. 17 Engrhelamoe jo onte erü jina Jordan zhükhfü jancho, khümkiwoe jo Galillee wozhü osi jilona jolowoe echü jümang jana osi Pisgah phunglan jo engkhüwoe tssocho. 18 "Osi ana heto onte engathethukcho: OPVÜI ete Potsow na Jordan na engkhüwoe meta shi nte pithaka. Enhungo nte rasan jiang ebensü benrithuksi Israel pvüji thanpoe jiang thüngina Jordan pankae chiwoe onte nzanchia meta jilo rheyithuka. 19 Ntena tssiden elümoto vana to ana ntsia, hoji tsükona nte eloe jiang, ngaro jiang tona tssiden jiang tojo nte metae vanthuksi khochitava. 20 Ntena nte shom Israel thanpoe jiangna kyochia owo Jordan engrhelamoe meta ji khithoki onteha ntena noyinga vana to OPVÜI khi noyinga onte vanthokvü nzanchitava. Hoji süiti ntena ana nte pio meta jilo elani rheyitava.' 21 "Jisülo jo ana heto Joshua engathethukcho: 'OPVÜI nte Potsow na mesao Sihon ha Og oni thüngi ntio tssocho sana ji ntena hungthaka; hoji esüa nte na kyon kvüta thüngi ori tssoana topvü thüngi OPVÜI na hojito tssoyiv. 22 Tikyutava, nte OPVÜI Potsow na nte tsükona rotavka.'

Moses Jo Kanaan Lo N Rheyithukala

23 "Hojithüng ana lüm joa randancho, 24 'Sandamo OPVÜI, nina ntio etho osi chethev tssov vancho sana jiang yolo benkaphen jiang tae a hungthukhan to ana ntsia. Limha osi Potsüwoe kvüloha nina chethev elhi tssothaka to etssoe potsow n van! 25 OPVÜI, Jordan pankae owo lizü meta osi phunglanro merio jiang tona Lebanon phunglan jiang to a hungthuka.' 26 "Tokhatola nte tsükona OPVÜI lüm tsuki a randan a n gayicho. Jithüngina jo ombona a ezocho, 'Jitae na mmhona! Elani hoji ti-phyolana! 27 Pisgah phunglan kvüri chungoe jolo khümki osi engrhelan osi engkhülamoe ji eyingoe chhani zeta. Nina hungwo jiang chetheta zei khia, ntiotssole nina kvüthüngha Jordan panke ochev meka. 28 Nina hungwo meta jilo rheyiv tsükona Joshua na kyon jiang sosi rheyiv ka, to ombo engathethuka lüm tssonkayia.' 29 "Hoji tsükona etena Bethpeor yantsü ji zechi hayi jilo vantacho."

Shikhfü Enioto 4

Moses na Israel Jiang Jancho Ezov Ntssungala

1 Jisüloj Moses na kyon jiang ezocho, "Ana nte püngnoa vamo shikhfü shiang topvü benphitava tona nte motsüi jiang Potsow OPVÜI jina nte pia vamo meta jilo ntena rheyichevka. 2 Ana nte ezowo shiang lo ntia ti-thepahatava osi khiha ti-sitava. OPVÜI yizüng ana nte pithako shiang engatava. 3 OPVÜI na Peor phunglani na ntio tssocho sana nte mhyikna hungthaka. Hojilo Baal ekhüm jiang otsük akvüto ombona monthukcho, 4 tokhatola longtsüka eli nte shiang jo nchüng jana vanra. 5 "OPVÜI na a ezoji ephan ana yizüng topvü nte püngnothaka. Shikhfü jiang ji ntena rheyiv sa vamo ji meta jilona benphitava, 6 tona nteno nchümri lia to limhalo jipopoe jiangna engathevka. Shikhfü shiang hetopvüto ontena zoana phyotav, 'Jipo tsüphov shi kyon shiang jo kvütoli hetata nchümjan zijan licho ato!' 7 "Jipo tsüpho lea, jipo thanpo kvüina ha ontena ethev liathüng ete Potsow na ete ndüngo vana to ndüngo vancho n li. Etena kvüthüng nzanchi ethev lia chona sana ombona e janlanala. 8 Ana nchüng ntio nte püngnothakcho sana ntsa shikhfü jitüv jipo kvümoe naha n li. 9 Tüngochüngtava! Ntena nchüng ntio hungthakcho sana ntena eküm echunglea n mhechov tsükona. Nte ngaroden osi tsoerüiden jiang ezotava, 10 ntena tsüngona lo kvüto Sinai phunglani na OPVÜI mhadungo mangtacho sana osi OPVÜI na heto a ezocho sana, 'Kyon jiang sanrhyuthuka. Ana ezovsa shi onte eküm echung a engathuk hungala osi onte tsoe jiang a püngnothuk hungala.' 11 "Ntena kvüto phunglan kvüri miphung enyikvü elukna eyukzhüi omina oyaki tüngrakachia vancho sana jilo ehungo ejyueramo ji nte tsoeden jiang ezotava. 12 OPVÜI na milungina kvüto nte jancho sana ezotava. 13 Ombona nte thüngi ntsata methako ji kvolyui benphiv sana ombona nte ezochowombona olong epyakvü eni lo yizüng taro erankao ji ntena engav lia. 14 OPVÜI na shikhfü jiang topvü nte püngnole to a ezocho, ombona nte pia vamo meta jilo ntena vanathüng benphiv shikhfü jiang.

Kisü Ekhüm Ntangshon Yi

15 "OPVÜI na Sinai phunglani na omi lungi na nte jancho khatola ntena ombo tsük ntia n hung. 16 Hoji tsükona nte echi mmhonthukvü tsükona ntena kisü ntia khümi ntena mmen ti-tssotava 17-18 eboe tssolea eloe tssolea, ekümrümo tssolea worowoni tssolea, epvüphio osi ongo tssolea nsüngrüi n khümtav shikhfü. 19 Ntena oyaki ntio hunganaeng tssolea choro tssolea shantio tssolea n khümtav ekhyo tssotava. 20 Tokhatola nteno ombona omi esüo Ejip khelona shanchowo jiang. Ntena nchüng kvüto vancho sana ji esüa ombo kyon nte kümthukvü tsükona ombona nte shanchocho. 21 Nte tsükona OPVÜI Potsow lüm tsuki aiyo Jordan pankae lizü meta ombona nte pia vamo jilo n rheyiche to phyochakthaka. 22 Aiyo zhükhfü ji n pankav helona a chüv sala, osi nteno hoji pankae lizü meta jilo rheyiv sala. 23 OPVÜI nte Potsow na nte thüngi methaktao ntsata ji n mhechotav ekhyo tssotava. Ombo yi engatava nti kisü ha nsüngrüi ti-khümtava, 24 ntiotssole OPVÜI nte Potsow jo omi eki tüv; ombona ombo yaka thanpo Potsow ntia n zekukala. 25 "Ntena meta jilo sunga vani ngaro osi tsoronichen vana yilia kisü ntia khümi mmen ti-tssotava. Hotüv jo OPVÜI mhadungo jo mmen tsso jina OPVÜI na n mathatala. 26 Ntena a jancho n zoana limha shilo na moni nte siv to ehungpvüi esüa ana oyak osi limha shi nchüng tsarhyuala. Ntena Jordan pankae meta jilo vamsa vamo jilo sunga vam meka. Nte ji monrae nte sivka. 27 OPVÜI na limhalo jipo jiang yolo nzonrorae nte sivka osi nte tararo tae nte enhyovka, 28 Tothüng jo ntena kyon khena nsüngrücho otssüng osi olung potsow khümtavka, ehungha n hung, ezo ha nzo to potsow jiang osi etsoyu n tssowo osi orhüm n zowo potsow jiang khümtavka. 29 Jithüng ntena OPVÜI nte Potsow yantav osi ntena nte lümbüm topvü na ombo yana tssona ombo yanchev. 30 Nte ji ezüp nduki ezüp jiang topvü yiana ntena wokhao tssoa OPVÜI thüngi khophi ombo yi engatavka. 31 Ombo khonzanthao Potsow. Ombona nte siv meka osi nte sinkiv meka, osi nte monthukvü meka osi ombona nte thüngi ntsata methako ji ombona mhechov meka. 32 "Nkolo yuta jiang etsüngi zetava, nte n bukthüng osi Potsow na limha lo kyon lyuyingo jithüng yuta ji etsüngi zetava. Limha hetopvü zii zetava. kvüthüng ha nchüng shi esüa tsüphov tssoa rothakcho alo? 33 Ntena Potsow na milungi na nsana zosi eküm vanala to ochoangna sana tssoa rothakcho alo? 34 OPVÜI nte Potsow na Ejip metae na nte thüngi tssoji esüa potsow ochona sana limhalo jipo motsünga ethüngchei ombo kyon tssothukcho licho alo? Nte mhyikna hunga ombona etho tsüphov tsütsacho; vara osi ritsso rothukcho, emhuko elhi tssoe ejücho, osi ekhenthao tssoa yithukcho. 35 Shiang hetopvü OPVÜI nte Potsow na, Potsow jo ombo tae osi thanpoe Potsow n van to nte ejüv tsükona tssocho. 36 Ombona nte püngnov tsükona potsüwoe na owon tssoe nte zothukcho; osi limha lona ombo ntho mi ji nte hungthuka jilona oyi nsani nte zothukcho. 37 Ombona nte motsüi jiang nzamo jina nte ethüngchecho, osi ombona ombo etho tsüpho ji khi Ejip meta lona nte sochukcho. 38 Ntena mhadungoe khochiale, ombona ntelona tsüphokao jipo jiang mpato phani nte siyia nte sosi onte meta enhünga ntena vamo shi nte picho. 39 Hoji tsükona nchüng nehümehetava, OPVÜI jo oyaki osi limhae Potsow jika. potsow thanpo n vanka. 40 Ana nchüng nte pio ombo shikhfü shiang topvü benphitava, tona nte tsükona osi nte tsoronichen tsükona lanka topvü lo mmhomka. OPVÜI na kümali echi nte pia vamo meta jilo ntena sunga vana wovka."

Jordan Engkhfüwoe Tsankaphen Yantsü Jiang

41 Jisülo jo Moses na Jordan engkhfüwoe yantsü ethüm khyochei vacho 42 jijo ochona sana ombo ri meko tüv woria lüngthatathüng tsankaphen yantsü. Ombona yantsü shiang motsünga lo tsanthe na ombo n chüthuk. 43 Reuben pvüji tsükona jo Bezer yantsü jo, lijüngi yondonro lo lio ji; Gad pvüji tsükona Gilead meta lo Ramoth; Manasseh pvüji tsükona Bashan meta lo Golan yantsü.

Potsow Yizüng Epiv lo Yizüng

44 Moses na Israel jiang thüngi yizüng osi püngo yi jiang picho. 4546 Ontena Ejip lona chiyi sanati osi Jordan na engkhfüwoe hayi jilo Bethpoer zechi jilo vanathüng yizüng shiang picho. Shijo Heshbon lo yansae Amorite kyon Sihon mesao ji metae vanathüng tssocho. Moses tona Israel jiang to na Ejip lona chiyiathüng ombo khyothechicho. 47 Ontena ombo meta ji tona Amorite mesao thanpoe Bashan lo Og mesao, Jordan engkhfüwoe vamo ji meta to khiyicho. 48 Meta shijo Amon zhükhfü tssalo Aroer yantsü ji lona benkae khümkiwoe Sirion phunglan jana, jijo Hermon phunglan ji chüngicho. 49 Elani Jordan engkhfüwoe meta jiang, jolowoe echü jümang tona Pisgah phunglan jothe jina engkhfüwoe to meta jiang jana jüa.

Shikhfü Enioto 5

Yizüng Taro Jiang

1 Moses na Israel kyon topvü tsanrhyui ezocho, "Israel kyonden, ana nchüng nte pio yizüng shiang topvü engatava. Engathei khitasi benphiv ekhyo tssotava. 2 OPVÜI ete Potsow na Sinai phunglani na ete motsüi jiang tae mekna 3 ete nchüng eküm evan topvü thüngi ntsata picho. 4 Hoji lona OPVÜI na omi theta nte thüngi tontüng nsancho. 5 Hojithüng ana nte tona OPVÜI to yutalo mangi ombona phyo jiang eloni nte ezocho, ntiotssole ntena omi ji nte kyusi phunglani n chungotacho. 6 "OPVÜI na phyocho, 'Aiyo ntena Ejip metae eziiden tssoa vanathüng, nte shanchowo OPVÜI nte Potsow ji ka. 7 Jijo " 'A yaka Potsow thanpo ti-khümtava. 8 Jijo " 'Potsowoe osi limhalo, ojüi osi liko chungi ntia khi nte Potsow ti-nsüngrütava. 9 Kisü mhadungo ti nkhümthetava osi ti-khümtava, ntiotssole aiyo nte Potsow ji, osi ana Potsow thanpoe n khayiala. A tssako kyon jiang osi onte tsoronichen echungren ethüm mezhü jana ana ezüp piala. 10 Tokhatola ochoangna a nzana a yi enga sana jiang tona onte echungren wothüng wothüng jana tojo ana a nzan ejüala. 11" 'Elhi n mhom tsükona a mying titsütsatava, OPVÜI nte Potsow A, shina a mying tsütsasorao jiang ezüp piala. 12 " 'OPVÜI nte Potsow A, shina nte ezothako ji esüa esanmung ji nthoa vanthuktava. 13 Ntena elhi etssov tsüngon tiruk lia, 14 tokhatola tsüngon tiyingo to jijo a echi to khochaki vanthuka. Hoji nchukjo nte ochina ha elhi tssov meka, ntiotssole nte ngaroden, nte ezii jiang nte ekümrümo jiang osi nte metalo lankon ncheni vamo jiang naha tssov meka. Ntena esanato nte ezii jiangna ha esamka. 15 Ntena Ejip metae eziiden tssota vancho OPVÜI nte Potsow A, shina etho tsüphov theta nte sochecho toji ti-mhechotava. Hoji tsükona emung ji lithukvü ana nte yizüngala. 16 " 'Nte pvüpoe jiang yikrachitava, tona nte tsükona sükhying topvü mmhomka, osi ana nte pia vamo meta jilo ntena harishia vamka. 17 " 'Omüng ti-hana. 18 " 'Efürama ti-tssoa. 19 " 'Ti-füa. 20 " 'Ejüngona oyam nlan ti-pia. 21 " 'Kyon thanpoe tsoeni ti-jüpona; ombo ki ji, ombo likoramüng, nri jiang, ekümrümo jiang, kurü mekana ombo ejüeli ntia ti-jüponia.' 22 "Yizüng shiang jo ntena phunglan jilo etssirhyui vanathüng OPVÜI na nte pio jiang. Ombona omi osi eluk echhiv lungina emhokthav ovon tssoa nsamo jithüng yizüng shiang nte picho, thanpoe na nte picho mek. Jitosi ombona yizüng shiang longpyak enilo erankae a picho.

Kyon Jiangna Kyuala

23 "Kvüthüng phunglan ji omina pyingi emüng longina ovon chiyia ntena zocho sana nte esopvüden tona jipo lo ekhüng jiang to na a thüngi oro phyotacho, 24 ena OPVÜI na omi longina nsana zo jithüng ombo etho tsüphov osi phfütsson ji hungcho! Ena nchüng hungthaka, enhungo Potsow na jancho sülo lea kyon jina eküm vanlanala. 25 Tokhatola etena ntioli echü yantavla? Ekhenthao mi jina e monthukvü. OPVÜI ete Potsow na nsana etena zolancho jo e chünrünguka. 26 Eküm evamo Potsow na omi na jancho sülo kyon ochona sana eküm vanlam alo? 27 Elani yia, Moses, osi OPVÜI na ntio phyoana topvü enga. Osi elana oro OPVÜI na phyo jiang e zoa. Tona ena jiang engavka.' 28 "OPVÜI na shiang zoale a thüngi heto a ezocho, 'Kyon shiangna phyo jiang ana zothaka osi ontena phyo ji elanthata. 29 Ontena yuta topvülo heto nchümo mmhona! Ontena yuta topvülo heto a yikrachia a yi engao, olan topvü nchüngkhon to onte mmhoniv osi onte tsoronichen jiang ha mmhonhyav. 30 Owo kyon jiang onte süranki yirale to ezoa. 31 Tokhatola, Moses, nino helo a thüngi vana, ana a yizüng jiang ni pivka. Kyon jiang ji a yizüng jiang püng woa osi ana nte pia vamo meta jilo vanathüng hojiang benphithuka.' 32 "Israel kyonden, OPVÜI na nte ezowo jiang topvü enga benphitav ti-mhechotava. Ombo yizüng kvüwoe ha n ngav ti-sitava. 33 Nte tsükona olan taro mmhom tssoa, osi ana nte pia vamo meta jilo sunga vancheo tssoa yizüng shiang topvü engatava.

Shikhfü Enioto 6

Yizüng Tsüphov Ji

1 "OPVÜI nte Potsow na nte püngnole to a pio yizüng jiang shiang. Ntena rheyiv vamo meta jilo vanathüng benphitava. 2 Ntena eküm evanthüng nandang nte osi nte tsoronichen topvüna ana nchüng nte pio yizüng shiang benphia OPVÜI kyuchitav lia, tona ntena meta jilo sunga vanchevka. 3 Yizüng shiang engatava, osi benphitava, Israel kyonden! tona nte tsükona olantaro mmhom ka osi ete motsüi Potsow jina phyochako ji esüa nte ji jipo etssom thichei lizü meta jilo vanchevka. 4 "Israel, shi nchümchetava! OPVÜI ji osi OPVÜI tae ete Potsow ka. 5 Ni PVI Potsow ji ni lümbüm totona, ni eküm totona osi ni etho totona nzana. 6 Ana nchüng nte pio yizüng shiang kvüthüngha ti-mhachotava. 7 Nte ngaro jiang shiang püngnotava. Ntena oki vanathüng osi hapoe woathüng, ntena elhi tssoathüng osi esana vanathüng topvü lo shiang khatava. 8 Nte nchümchethukphen tssoa eono phankae hantava, osi otono ha phankae hantava. 9 Nte ki kipüng durhyu jianglo osi pikhfü rheyilano erankae vatava.

Jancho N zo Man Ekyuv

10 "OPVÜI nte Potsow na nte pyimtsümotsüiden Abraham, Isaak osi Jakob ezoji esüa ombona ntena n tssocho yantsü tsüphov osi ejüeli yantsü nte pivka. 11 Oki jiangha ntena n vacho tsütsaelan mmhom na pyingcho tssovka, ntena n shancho jükha osi ntena n chümcho jününgroli osi olive tssüng li liravka. OPVÜI na meta shilo nte rheyithuka na, osi nte tsoyuhungo jiang topvü benria hungana, 12 jithüng OPVÜI ochona ntena Ejip metae eziiden tssota vanathüng nte sochecho sana hoji ti-mhechotakhe. 13 Nte Potsow OPVÜI kyutava, ombo tae khümtava osi ombo myingo taena nte phyochak vatava. 14 Potsow thanpo ti-khümtava, nte hachüma evamo kyon jiang potsow kvüwoe ha ti-khümtava. 15 Nteno Potsow na omi esüa nte thüngi lüm tsuki mpüm na nte monthukvüka, ntiotssole OPVÜI nte Potsow ochona nte ndüngo vanchosana jina ombo ephfü potsow ochia n vanthukhungala. 16 "Ntena Massah lona tssoa to OPVÜI nte Potsow ojang ti-tssotava. 17 Ombona nte pio yizüng jiang topvü benphitav ekhyo tssotava. 18 OPVÜI na ntiojo mmhona osi elana to phyoasana jiang tssotava tona nte tsükona olan taro mmhomka. Tona OPVÜI na nte thüngi phyochako lizü meta ji ntena hochevka. 19 Osi ombona phyo ji esüa ntena ori jiang phani sichevka. 20 "Okholi jo nte ngaro jiangna heto nte engav, 'OPVÜI ete Potsow na ntioli yizüng jiang engav ezochola?' 21 Hojithüng ezotava, 'Eteno Ejip mesao eziiden tssocho, tole OPVÜI na ombo etho tsüphov khi erhanchocho. 22 Emhyikna hunga ombona Ejip kyon jiang, mesao ji tona ombo tsüphoe jiang to thüngi ekhenthav chethemothev elhi tssocho. 23 Ombona Ejip metae na evachi esosi oyi ombona ete motsüi thüngi phyochako ji meta shi epicho. 24 Jisülo jo OPVÜI ete Potsow na yizüng shiang hetopvü benphiv osi ombo kyuchiv ezocho. Etena hojito ombo yi engana ombona ete jipo shi e nhyakyata e mmhayithukvü to phyocho. 25 Potsow na ezo jiang topvü etena enga benphina ombona ete thüngi emathav.'

Shikhfü Enioto 7

OPVÜI Kyon Jiang

1 "Ntena rheyia vamo meta ji OPVÜI na nte pivka osi ombona jilona jipo elümoto phani sivka. Ntena rheyiathüng OPVÜI na nte lona tsükao osi etho jükao jipo tiying shiang phani siv. Hittite jiang, Girgashite jiang, Amorite jiang, Kanaanite jiang, Perizzite jiang, Hivite jiang tona Jebusite jiang to. 2 OPVÜI na kyon shiang nte khelo theyia ntena khyoana ntena onte chürathukvü shikhfü. Onte thüngi ti yenkitava osi khonzan ti ejütava. 3 Ntena ha onte ochia soa ti-vana osi nte tsoe jiangna ha onte soa tivanthuka, 4 Ntena to tssoana ontena nte ngaro jiang ji potsow thanpo ekhümden kümthukvü. Hojito tssoana OPVÜI na nte thüngi lüm tsuki jitopvü nte chürathukvü. 5 Hoji tsükona onte khümphen jiang roe siyitava, onte ntho long jiang vanroe siyitava, onte potsow Asherah kisü ji tanchüchüi rungi siyitava. 6 Nteno OPVÜI nte Potsow echi tsso jina hojito etssov lia. Limhalo kyon topvü yolona nte ethüngchei ombona ombo kyon nte tssothukala. 7 "Ntena oyam jipo lona kyung kacho lona opvüi na nte ethüng checho mek; ntena limhalo jipo teritso ji. 8 Tokhatola OPVÜI na nte nzancho osi ombona nte motsüi thüngi phyochako ji nte pihungcho. Hoji tsükona ombona elhi tsüphov theta nte shanchocho osi Ejip mesao khe lona nte vachicho. 9 OPVÜI nte Potsow ji tae Potsow osi ombo longtsüka eli-i ombona ombo phyochak jiang vatala. Osi ombo yi engae kyon jiang thüngi echungren wothüng wothüng jana nzana vanala. 10 Tokhatola ombo tssako kyon jiang jo ombona zaktole ezüp piala. 11 Hoji tsükona enhungo ombona ntio nte ezothakcho sana ji engatava; ana nchüng nte pithako yizüng jiang topvü engatava.

Oyi Engao Jilo Mmha

12 "Ntena yizüng shiang engae longtsükata benphina, tona OPVÜI na ombo ntsata ji vav osi ombona nte pyimtsümotsüi thüngi phyochako ji esüa n tümjakna nte nzamvüka. 13 Ombona nte nzana nte mmhayivka, ombona nte li jiang nte mmhayia khosha ethi-ebenthukvüka, jününgro osi olive jiang rankathukvü, osi mangsü, olyu nte rankayithukvüka. Shiang hetopvüto ombona nte motsüi thüngi phyochako mmha jiang, ntena meta jilo rheyiathüng hunguka. 14 Limhalo nti jipo ha nte mmhayia to tssona mmhayiv meka. Nte ochia osi nte tssiden kvümoe ha oro n rowo tüv vam meka. 15 OPVÜI na nochonori lan taro lona nte nkochev osi ntena Ejip metae na hungwo nochonori n mhon jiang ntina ha nte kav meka, tokhatola ombona nochonori jiang jo nte ri jiang khyingthukvüka. 16 OPVÜI nte Potsow na nte khelo theyio jipo jiang topvü roe monthuki sitava, osi ntia khonzan onte ti-ejütava. Onte potsow jiang ti-khümtava, ntena khümchojo nte chüthukvüka. 17 "Jipo shiang ji ntelo kyongkata osi ntena onte phani esiv jo n to to ti-phyotava. 18 Onte ti-kyutava, OPVÜI na Ejip mesao thüngi osi Ejip kyon jiang thüngi ntio tssoyicho sana ji ti-mhechotava. 19 Ntena hunga ekhenthao vara rothuko jiang nchümchetava, emhokthao elhi osi chetheo elhi jiang, osi OPVÜI na etho tsüphov khi nte vachio ji ti-mhechotava. Ombona Ejip kyon jiang monthukato nte ri ntena kyua vamo shiangha monthukvüka. 20 Ombona onte yolo ekhenrhük sotheyiv osi tsani eyio jiang ha mwothukvü. 21 Hoji tsükona kyon shiang ti-kyutava. OPVÜI nte Potsow na nte ndüngo vamka; ombo Potsow tsüpho ji küma ombo kyuchiv na lia. 22 Ntena mhadungoe khochia yiana, ombona ori jiang phani sia yivka. Ntena yenjoa taena onte rorüpi sichev meka, to tssoana orae ekümrümo jiang rankav küma nte tsükona ekyusü rankavka. 23 OPVÜI na nte ri jiang ekhenthuki nte khi roe onte sithukvü. 24 Ombona onte mesao jiang nte küpo kümthukvü. Ntena onte lüngthav osi mhechoe onte siv. Ochinaha nte n tanglanchiche osi ntena topvü monthukvü. 25 Onte kisü khümphen jiang ntena rungi siyia. Osi onte ki jiang lo shona janti lio jiang tijüpontava, osi ti-khitava. Ntena khichocho nte chüvka, ntiotssole OPVÜI na kisü ekhüm ji tssakala. 26 Kisü shiang nte ki hansi ti-rheyia, to mekana onte randankao ji nte kavka. Kisü khümphen shiango OPVÜI na randankae siwo jina ntena ha tssakvü na lia.

Shikhfü Enioto 8

Meta Mhom Hoe Ekhiv

1 "Ana nchüng nte pithako yizüng jiang ntsanrüka benphitava, tona ntena eküm vanchev, nte thicherüchev osi OPVÜI na nte pyimtsümotsüi piv phyochako meta ji ntena khiv. 2 OPVÜI nte Potsow na longtsükata lijüngi na nzyu zhüro sunga nte sothakcho sana, osi ojang ekhüngu khi füi nte zeta, ntena ntio tssov sana osi ombo yizüng jiang engav sana to nte zecho. 3 Ombona nte wontonthuksi mana etsov nte picho, nte osi nte motsüi na n tsohancho etsoyu. Ombona shi nte pio jijo kyon na hümri taena eküm n vanala to ejüv tsükona, tokhatola OPVÜI yi jiangha theta eküm vanala to ejüv tsükona. 4 Nzyu zhüro yuta shilo nte mpensü jiang n kehan, nte jo jiangha n püm. 5 Opona otsoe thangshio ji esüa OPVÜI nte Potsow na nte elanchoyia ntssonshiala to nchümchetava. 6 Hoji tsükona OPVÜI na nte ezoa to benphitava; ombo shikhfü jiang benphia ombo kyutava. 7 OPVÜI nte Potsow na lizü meta nte piv sala, meta kvülo osi zhükhfü, jünhyo liracho sana osi lichungi jükvü jiangna liponi hayi osi phunglan jiang lona bokchukchia vancho sana, 8 meta kvülona otssuk-omüm, jününgrothi, züwothi, tsarümthiben, olive osi tssakijü lichosana ji nte piv sala. 9 Hojilo jo ntena kvüthüngha nte n vonton osi ezüpa n van. Meta jilo longro jianglo yonjak jüa, osi phunglanro jiang lona yongmen jyuchev. 10 Ntena nte tsoyuhungo jiang topvü benria hungu osi OPVÜI na lizü meta nte pio ji tsükona ntena OPVÜI montsson nte pihungüv.

OPVÜI Mhecho Jilo Ekyu Jiang

11 "Ntena OPVÜI nte Potsow n mhechov tsükona tüngochüngtava. Ana nchüng ombo shikhfü nte pia vamo shiang benphiv ti mhechotava. 12 Ntena etsoyu topvü ben ria hungsi evam oki tssotathaka na 13 Osi nte mangsü osi olyu, nte janti osi shona osi nte ejüeli topvü rankathaka na kangtsü lona, 14 OPVÜI nte Potsow n mhechov tsükona tüngochüngtava, ombona nteji Ejip metae eziiden tssota vanathüng nte sochecho. 15 Ombona ekhenthao lijüng tsüphov jilo nrü osi züthem evan meta jiang yakchia nte sochecho. Hojitüv likying lijüng metae mpa ombona olong lona ojü bukthuki nte yuthukcho. 16 Lijüngina ombo na mana joe nte tsothukcho, hojitüv etsoyu jo nte motsüi jiangna ha kvüthüngha n tsohan. Ombona ojang esüa ezüp nte picho osi ochümi jo mmhom khi nte mmhayithukcho. 17 Hoji tsükona ntena nte etho lona nte popo eli-iden kümcho to ti-nchümtava. 18 OPVÜI nte Potsow na ejüeli nte kümthukcho to ti-mhechoa. Ombo na hoto tsso jijo nkolo ombona nte motsüi jiang thüngi ntsatao ji om bona vao ji tsükona. 19 OPVÜI nte Potsow ji kvüthüng ha ti-mhecho tava, osi potsow than pokhüma ti-yitava. Ntena hojito tssoana nte monthukvüka to nchüng ana ekyu yivon nte piala. 20 Ntena ombo yi n ngana kvüto ombona nte mha dungo ori jiang roe sia nte ejücho sana ji esüa roe nte siv.

Shikhfü Enioto 9

Kyon Jiang Jancho Nzo Ji

1 "Engatava Israel kyonden! Nchüngo ntena Jordan zhükhfü ji pankae ntelo etho jükao osi khyungkao jipo jiangna vamo meta ji khivsala. Onte yantsü jiango pikhfü oyak etssunga tüv na epicho. 2 Kyon jiang siphov osi thojüi tae osi kyon ochina ha onte n zalanchikuk to ntena zothaka. 3 Tokhatola nte mhyikna hunga OPVÜI nte Potsow na nte mhadungi na omi ntav esüa khochivsala. Ntena khochiana ombona nte thung tssoa nte khyoyiv osi ombona phyochako ji esüa zaktole onte khyothechiv. 4 "OPVÜI na nte thung tssoa onte ji phanchukchi sithakana ntena mancho tsükona meta jilo rheyi vanala to ti-phyotale. Ntiotssole kyon jiangji nthao ji tsükona OPVÜI na phani onte siala. 5 Nte ji mmhoncho osi ombo yi engacholona OPVÜI na onte meta ji nte picho meka. Onteji n thao ji tsükona osi OPVÜI na nte motsüi Abraham, Jakob osi Isaak thüngi phyochako ji benthukvü tsükona phani sicho tae. 6 Ntena mancho na OPVÜI na lizü hetüv shi nte pia mek toji ntena mmhona ntsinrüngu lia. Mek, nteno lümbüm ekhüng osi harung kyonden. 7 "Ntena kvütoli khi lijüngina nte OPVÜI Potsow ji lümbüm tsukthukcho sana ji ti-mhechotava. Ntena Ejip metae na khochio ji tsüngon na benkae meta shilo oyi n janthüng nandang ntena OPVÜI panlantacho. 8 Sinai phunglani na mpato nteno OPVÜI lümbüm tsukthukcho; nte roe esio tüv sükhying nandang lüm tsukthukcho. 9 OPVÜI na nte thüngi ntio ntsata vachosana hoji longpyak eni lo erankao ji khilo ana phunglani chungocho. Ana hojilo ntia n tsoyu na tsüngon zhüro, zümo zhüro to vancho. 10 Hoji süloti OPVÜI na ombo khena erankao longpyak eni kvülo ntena phunglan ji yenjoe sanrhyutathüng milungina nte thüngi ombona ntio nte ezochosana jiang erankao ji a picho. 11 Ho; tsüngon zhüro zümo zhüro to süloti OPVÜI na ombona ntsata erankao longpyak eni ji a picho. 12 "Hoji sülojo OPVÜI na a ezocho, 'Zaktole phunglani na joyia, ntiotssole ni kyonden nina ochoang Ejip lona sosi chiyicho sana jiangji mmenthaka. Osi ontena n mhom tssothaka. Ana yizüng onte pio jilona nkae yithaka, osi onte khümphen tsükona kisü nsüngrüthaka.' 13 "OPVÜI na a ezocho, 'Onteji kvüta lümbüm khüngcho sana ji ana ntsia. 14 A tssünglam ekhyo ti-tssoa. Ana totona rorüpi onte siv tsükona nchümala, hojito tssona henavüngi jo ochinaha onte nchümchelamvü mek. Hoji sülojo ana onte lona etho jüka osi jipo tsüphokao jitüv nsüngrüv.' 15 "Hoji tsükona ana kholani ntsata erankao longpyak ji bensi joyicho. Phunglan jilona omi eki chiyia vancho. 16 OPVÜI na ete ezowo jiang n ngav ntena mmen tssothaka to osi ntena yonjak na tssibung joe khümta yithaka to ana ntsithakcho. 17 Hoji tsükona ana nte mhadungo na longpyak jiang shümchochi vanroe sicho. 18 "Jisülojo ana a mha shi likolo nkhümkae tsüngon zhüro, zümo zhüro to etsoyu n tsov vancho. Ana hoto tsso jijo ntena OPVÜI mhadungo mmen tssoe ombo lüm tsukthuko jina. 19 OPVÜI na elümoto lüm tsuko ji tsükona ombona nte monthukvü to ana ntsia. Tokhatola ombona a yi engalancho. 20 OPVÜI na Aaron thüngi ha elümoto lüm tsuka ombo chüthukvü tssocho, hoji tsükona ana Aaron tsükona randancho. 21 Ntena mmen elhi yonjak khi tssibung joe vao ji ana khi omi thechi sicho. Jitosi ana hoji ejüproe ohüm küma mmyaroe zhükhfü phunglani na tsüa joyia vamo jilo thechi sicho. 22 "Ntena Tabera, Massah, Kibroth tona Hattaava to shiang lona ha OPVÜI nte Potsow ji lüm tsukthukcho. 23 Ombona Kadesh Barnea lona nte thüngi ombona meta nte pia vamo ji owo hoe khitale to nte ezowo jiha ntena n ngav ombo panlancho. Ntena ombo loha n longtsüka, ombo yi ha n ngayi to tssocho. 24 Ana nte ntsipvüto ntena OPVÜI panlana nte hungpvü. 25 "Hojito OPVÜI na nte monthukvü methako jina ana a mha ji liko lo nkhümkae tsüngon zhüro, zümo zhüro to etsoyu n khiv vancho. 26 Osi ana randancho, 'Thotsü Potsow, nina Ejip metae na ni etho tsüphov osi thokhyung theta sochuko ni kyon jiang ji ti-monthuka. 27 Nina ni miden Abrahan, Isaak osi Jakob to jiang nchümi zesi kyon shiang lümbüm ekhüng osi mmen jiang to siyia. 28 Hoto n tssoana Ejip kyon jiangna nina ni kyon jiang sochukchi nina phyochako meta ji onte n pito nchümtavka. Nina ni kyon jiang tssako jina sosi oyi lijüngi na chüthuki sicho to Ejip kyon jiangna phyotavka. 29 Totae mek tolea kyon shiang ji nina ni kyon tssov ethüngchei ni etho theta Ejip metae na onte sochukcho.'

Shikhfü Enioto 10

Moses na Elani Yizüng Jiang Khichoala

1 "Jisüi jo OPVÜI na a ezocho, 'Ovüngthüng ji esüa longpyak eni thenchoa osi hojiang thei vaphen Bakos shana. Osi phunglan jilo a phana chungroa, 2 tona nina vanroe sithako longpyak jiang lo ana ntio erankacho sana hoji ana erankalamka, osi longpyak jiang ji nina Bakos jilo thei vavka.' 3 "Hoji tsükona ana akacia tssüng khi bakos shanlani longpyak ethan eni thenchoe hansi phunglani chungocho. 4 Tole OPVÜI na long pyak jianglo ombona phunglani nte sanrhyuthuki omi yakchia yizüng taro nte pio jiang ovüngthüng erankao ji esüa erankalancho. 5 OPVÜI na longpyak jiang a picho osi phunglani na azoji esüa ana longpyak jiang Bakos jilo thei vao ji nchüng jana lipvü." 6 (Israel jiangna Jaakan kyon jiang jükha jilona khochi Moserah lo yicho. Hoji lona Aaron chücho osi jilo ombo shothecho, osi ombo tsoe Eleazar na pvüti elhi ji ombo echungcho. 7 Hoji lona ontena Gudgodah lo yicho, elani jilona Jotbathah, meta ojü tssona jüwo jilo yicho. 8 Phunglan jilona OPVÜI na Levi jipo khi Ntsata Bakos ji ezepvüiden osi pvüti elhi ombo tssoyiv osi kyon jiang thüngi ombo myingona mmha randankaeden ethüngchecho. Nchüng jana onte elhi jo hojiang. 9 Hoji tsükona Levi jipo jo jipo thanpoe jiangna hungwo ji esüa meta liko n pi; onte ejan jo OPVÜI nte Potsow na phyochako ji esüa ombona pvüti elhi etssov lo mmha picho.) 10 "Ana ovüngthüng esüa phunglani tsüngon zhüro, zümo zhüro to vancho. Osi OPVÜI na elani a randan engae nte n monthuk to phyocho. 11 Hoji sülo jo ombona nte motsüi piv phyo metaji nte khithukvü nte sosi wole to a ezocho.

Potsow na Ntio Rüngala

12 "Enhungo, Israel kyonden, OPVÜI nte Potsow na ntio yizüng nte piasana shi engatava: OPVÜI khümtava osi ombona nte ezowo jiang topvü tssotava. Ombo nzantava, nte lümbüm topvü theta ombo benkatava osi ombo yi topvü engatava, 13 nte echhi mmhomo tsswothukvü tsükona ana yizüng shiang nchüng nte piaka. 14 topvülo ntssontso oyak shiang, liko shi nte osi jilo ntio lichosana topvüto OPVÜI echi. 15 Tokhatola OPVÜI na nte motsüi jiang emhokthav nzamo ji tsükona ombo kyon to onte ethüngchecho osi nchüng jana nte shiango ombo kyonden. 16 Hoji tsükona nchüng tsüngon lona OPVÜI yi engatava osi lümbüm ti khüngtava. 17 OPVÜI nte Potsow jo potsow topvü pono osi etho topvü pono ventan ji. Ombo tsüphoa, thotsü osi ombo yi engav lia. Ombona omhyik eze elhi n tsso osi ekhüp n khi. 18 Ombona nrimphen osi emi-nloe jiang ntsanrük epiv chokatala; ombona ete ndüngo lankon vankae vamo jiang nzanala, osi etsoyu mpensü onte piala. 19 Hoji tsükona tsanthan jiang nzantava, ntiotssole ntena tsanthan esüa Ejip metae vantacho. 20 OPVÜI nte Potsow jancho zotava osi ombo tae khümtava. Ombo lo longtsüka ji ti senphina vatava osi nte echümchak jiang ombo myingona tae vatava. 21 Ombo nte Potsow ka ombo mying tae thüngtava, ombona nte tsükona ekhenthao elhi osi elhi tsüphov tsso jiang ntena hungthaka. 22 Nte motsüi jiangna Ejip metae yio jithüng jo onte owo ekhatiying tae yicho. Tokhatola enhunga jo OPVÜI nte Potsow na n khacheo tata oyaki shantio jiang esüa nte thichethukthaka.

Shikhfü Enioto 11

OPVÜI Tsüpho Ji

1 "OPVÜI nte Potsow nzantava osi yuta topvülo ombo yizüng jiang engatava. 2 Ntena ombo thüngina ntio ejyu-eranchethakcho sana nchüng nchümchetava. Nte ngaro jiangna mek, ntena OPVÜI thüngina ejyu-erancho. Ntena OPVÜI tsüpho ji hungcho, 3 ombona etho, ekhüng osi chethev elhi jiang tssoa ntena hungcho, elani ombona Ejip mesao ji thüngi osi meta jilo ntio tssochothukcho sana jiang ntena hungthaka. 4 Ejip rasan jiangna nte phanathüng jümyon jümang jilona onte kurü tona zotoro to jiang nzo onte monthuko ji ntena hungthaka. 5 Ntena shilo n rheyithüng OPVÜI na lijüngina ntio nte tssoyithakcho sana ntena ntsia. 6 Ombona Reuben pvüji Eliab ji tsoeden Dathan tona Abiram to oni thüngi OPVÜI na ntio tssoyicho sana ntena nchümchev tssov. Kyon topvüna hunga onte wopan topvü, onte ranki, onte phajaeden, osi ekümrümo jiang nzo liko küngsoe nzhüi zicho. 7 OPVÜI na hetüv elhi tsüphov tsso jiang ehungo kyon ji nte shi.

Phyochak Meta Jilo Mmha Jiang

8 "Ana nchüng nte pithako yizüng shiang topvü benphitava. To tssona ntena rheyivsa vamo meta jilo zhükhfü pankae rheyichevka. 9 To tssona OPVÜI na nte motsüi osi onte tssoronichen jiang phyochaki vayio eli osi lizü meta jilo rheyichevka osi harishia vamka. 10 Ntena rheyiv sa vamo meta jijo ntena vansi yio Ejip meta ji esüa meka. Hoji lojo ntena mojü thetana elümoto ezüpa jülan nrhüi ojü sothechicho; 11 Tokhatola ntena rheyia vamo meta jijo phunglan tona hayi to nzitacho osi eryujü na etsonala. 12 OPVÜI nte Potsow na meta shi zeyatala osi nzyu totona ombona ntangshona vanthukala. 13 "Hoji tsükona ana nchüng nte pio yizüng shiang benphitava; nte OPVÜI Potsow nzantava osi nte lümbüm totona Ombo benkatava. 14 Hojito tssona ntena ethev liathüng OPVÜI na eryu jothuki tsüngkying nzyu topvülo nte li jiangna otssuk-omüm, jününgrothi, olive tssüngthi to ethithukvü, 15 osi nte ekümrümo jiang tsükona limo chenthukvü. Ntena ethelan elio etsoyu topvü ntena hunguka. 16 OPVÜI thüngi na kontae potsow thanpo khüma eyio tüv nte ti sosorathuka. 17 Ntena hoto tssona OPVÜI na nte thüngi lümbüm tsukvüka. Ombona eryu jwothukvü mek osi liko ji likyingi sisi ntia zav mek. Hojito OPVÜI na meta mmhom nte pilea jilo na khangtsüngi nte chüv. 18 "Yizüng shiang ti mhechona nchümcheta vantava. Nte evono phankae hantava osi nte ton no khüngkae hantasi nchümchetava. 19 Hoji khi nte ngaro jiang püngnotava osi ntena oki vanathüng tssolea, haphoe vanathüng tssolea, esana vanathüng tssolea mekana elhi tssoathüng tssolea hojiang yilan jjiang phyotava. 20 Nte ki durhyu lo osi kipüngo erankae vatava. 21 Hoto tssona nte osi tsoronichen jiang OPVÜI na nte pyimtsümotsüi piv phyochako meta jilo sunga vamka. 22 "Ana nte pithako yizüng topvü longtsükata benphitava, OPVÜI nte Potsow nzantava; Ombona nte ezo jiang topvü benphitava, osi ombo lo longtsükata vantava. 23 Hoto tssona ntena khochiathüng na OPVÜI na jipo topvü phani sisi nte pomoe etho jükao jipo jiang meta ji nte pivka. 24 Ntena yakchicho meta topvü nte echi tssovka. Nte metajo jolowoe lijüng jilona khümkiwoe Lebanon phung lan nandang, engkhfüwoe Euphrates zhükhfü lona engrhewoe Mediterranean jümang nandang tssovka. 25 Meta jilo jo ntena kvülo woana OPVÜI na kyon jiang khi nte kyuthukvüka, ombona phyochako ji esüa osi kyon ochina ha nte tanglanchiv meka. 26 "Nchüngo ana mmha tona rhiyirandanka to lona ethüngi ekhiv nte piala 27 ana nchüng OPVÜI nte Potsow yizüng nte pio shiang engana mmha tssov; 28 tokhatola ntena yizüng shiang n ngav potsow thanpo ntena n khümhancho tüv khümta yiana rhiyika ji nte pono liv. 29 Ntena khivsa vamo meta jilo OPVÜI na nte sothechiana ntena Gerizim phunglan lona mmha randamvüka osi Ebal phunglan lona rhiyika randamka. 30 (Phunglan eni shijo Jordan hayi evamo Kanaan kyon jiang metalo Jordan na engrhelamoe. Shiang jo Gilgal yan ndüngo Moreh lo ntho dung lona lümha n kom tüv lo.) 31 OPVÜI na nte pio meta ji khiv tsükona ntena Jordan pankae rheyiv sala. 32 Nte na Jordan pankae rheyiv meta jilo rheyiana ana nchüng nte pia vamo yizüng shiang ti mhechotava.

Shikhfü Enioto 12

Khümphen Motsünga Ji

1 "OPVÜI, nte motsüi Potsow na nte pio jilo evanthüng nandang tsükona yizüng shiang benphia vantale to nte piala. Hojiang engatava. 2 Ntena rheyia vamo meta jilo kyon jiangna onte potsow khümphen phunglan osi yontoni, odung mmyakvü kupi lio jiang topvü roe sitava. 3 Onte thanphensa jiang phiroe sitava osi onte ntho long jiang vanroe sitava. Onte potsopvüi Asherah kisü jiang tona onte kisü jiang n khümthuklamo tssoa roe siyitava. 4 "Ntena OPVÜI nte Potsow khümo ji kyon shiangna onte potsow khümo ji esüa ti khümtava. 5 Nte pvüji meta jiang lona OPVÜI khümphen meta motsünga etssyukae kyon jiang khi ombo eshüpo osi tarochia jiang, phyochak than jiang, 6 lüm erungthan jiang tona nte tssiden lona nrodemo jiang to thamka. 7 Hojito, OPVÜI nte Potsow ochona nte osi wopan topvü mmhayithukcho sana, hoji vanrhyu lona ntena sangchowo tssüngthi jiang tsovka. 8 "Hoji yuta ji jana na ntena, enhünga esüa etssophyov meka. Enhünga nandang jo ntena nte etancho khümta vantala, 9 ntiotssole ntena OPVÜI nte Potsow na nte pio meta jilo rheyi noyinga n vanhan. 10 Ntena Jordan zhükhfü pankathakana, OPVÜI nte Potsow na meta ji hoe nte vanthukvü. Ombona nte ri jiang thüngina tsan choe noyinga nte vanthukvü. 11 OPVÜI na meta motsünga etssyukae nte khi ombo khümthukvüka, hojilo ntena ana nte ezowo than jiang topvü hansi rovka; nte erungthan tona othan thanpo jiang, nte tarochia osi othan jiang tona ntena OPVÜI lo phyochako echümporo than jiang to hojilo na thamka. 12 Hojilo ombo vanrhyu lona nte ngaro jiang nzo, nte phajaeden osi nte metalo pvüti jiang nzo longshitava; Levi jiango onte ejan liko n li toji ti mhechotava. 13 Ntena nte than jiang nte etancho meta lona tham meka; 14 nte pvüji meta jiang yolona OPVÜI na meta motsünga ethüngcheo jilo taena thantavka. Hojilo taena ntena erungthan jiang pivka. Osi ana nte pio yizüng jiang esüa tssovka. 15 "Tokhatola ntena kvülo vana na jilona ntena nte ekümrümo jiang lüngthae tsokhuka. OPVÜI na kvüta nte piana ntena tsokhuka. Nte topvü na shikhfü ephan ntssüng lea mekana n tssüng yutalo lea thanpo so, sepvü siano so tsoato tsokuka. 16 Tokhatola onte ejan jiang ntena n tsov shikhfü, tokhatola ojü chüa esüa likoe chüi siv shikhfü. 17 Ntena OPVÜI thamo jiangjo nte vanphen lona tsov meka. Ntena ethi-eben tarochia thamo jilea, nte jününgro jü tssolea, olive thyujü tssolea, nte tssiden osi olyu lona bukden than tssolea, OPVÜI yantsov phyochako ji tssolea, nte lüm erungthan osi othan thanpo kvüwoe ha ntena vamo jilo na tsov meka. 18 Nte osi nte ngaroden, nte phajaeden, nte metalo Levite vamo jiang na tssolea othan shiang ji nte OPVÜI Potsow na hokao khümphen meta ombo vanrhyu jilo na tae tsocheta. Osi hoji lona ntena ntio tssoasana ji khi nte emathav shikhfü. 19 Ntena meta jilo evanthüng nandang jo ntena Levite jiang ti mhechotava. 20 "OPVÜI na phyochako ji esüa ombona nte meta ji nte rankayia na, ntena kvüthüng nte tsohunga na oso tsokuka 21 Khümphen meta ji okina koncho tssona, ana nte ezothako ji esüa ntena OPVÜI na nte pio ekümrümo jiang thama tatsüngi nte kina tsokuka. 22 Nte topvü nthoa evan osi n tholo evah topvüna sepvü-siano so tsoato tsokuka. 23 Oso jiang lo ejen jüpvüna ti-tsotava, ntiotssole ejen jilo eküm jüa. 24 Ejen jiang jo etsoyu tssoa ti tsotava, ojü esüa likoe chüi sitava. 25 Ntena shiang engana OPVÜI na nte emathayivka. Osi nte tona nte tsoronichen to echi mmhomka. 26 Nte than osi phyochak yantso jiang ji khümphen meta motsünga jilo hansi wotava. 27 Hojilo na nte mbüm na erungthan jiang OPVÜI thanphensa lo thantava. Osi ntena ejen etso so jiangha thantasi ejen jiang jo thanphen jilo phyangkae sitava: 28 OPVÜI na ezothako jiang topvü longtsükata benphitava tona nte osi nte tsoronichen jiang echi kümali mmhomka, ntiotssole ntena ntio jo elancho sana osi OPVÜI nte Potsow emathao sana hojiang tssov.

Kisü Ti Khümtale To Ntangshonala

29 "Ntena jipo poe jiang ori tssoana OPVÜI na onte monthuksi onte meta ji nte pia nte vanthukvü. 30 OPVÜI na jipo jiang roe sithaka na ntena onte ekhümlan jiang ti phankatava, to tssoana nte chüvka. Ontena onte Potsow jiang kvütoli khümtasana to ti ethümtava, tosi ontena khümo ji esüa ti phankatava. 31 Ntena OPVÜI nte Potsow khümathüng onte potsow khümato ti khümtava, ntiotssole ontena OPVÜI na etssako elümoto tssoala. Ontena onte ngaro jiang mpato thanpheni omi jilo thechi thanala. 32 "Ana nte ezothako shiang topvü tssotava; hojiang lo ntia tithephata osi ntia khi tisia.

Shikhfü Enioto 13

1 "Zenkhying mekana müngyi ephyoe na ntena n khümhancho potsow nte khümthukvü, 2 chethev elhi nte ejüv phyochakuka. Ombona phyo jiang bencheta nte ejülea, 3 ombo ti longtsütava. OPVÜI na ojang nte tssov tsükona ombo tsütsatala, ntena lümbüm totona ombo zenzana sana nte zev tsükona. 4 OPVÜI phankata osi ombo kyutava; ombo yi enga ombo yizüng jiang benphitava; ombolo longtsüka lia ombo khümtava. 5 Tokhatola ntena Ejip metae eziiden tssoa vanathüng nte socheo Potsow ji thüngi na kontav nte ezowo zenkhying osi omüngyi ephyoe jiango chüthuktava. Hojitüv kyon jo n mhon etssoe osi OPVÜI na evam nte ezowo eküm jilona nte sosorav ekhyo etssoe. Hoji tüv n mhon lona tsanchov tsükona, ombo chüthuki siv lia. 6 "Nte jeni osi tsokhying mekana tsolo, nte nzamo engh osi oshom ndüng jiangna mpato nte osi pyimtsümotsüi na n khümhancho potsow khüma yiv, osi mphoena nte sosorakuka. 7 Onte yolo ochosana ntena vanrhyuo kyon jiang potsow jiang mekana metapoe potsow jiang ekhümvü nte ezokuka. 8 Tokhatola ombo khi nte ti enayathuka; ji sisi enga tia ti engayia. Ombo nzana osi nkocheta ti vana. 9 Lüngthae ombo sia! Nina vünga ombo ephyadena osi otsük akvüna ombo ephyatsüngthuka. 10 Ephyatsüngi ombo chüthuka! Ombona nte ji ntena Ejip metae ezii tsota vanathüng nte socheo Potsow ji thüngsina nte sosora hungala. 11 To tssona Israel topvüna hoto etsso ji ntsivka, osi onte kyui ochina ha hotüv n lan tssov meka. 12 "OPVÜI nte Potsow na yantsü nte pio jianglo ntena vana na yanpoe ochoang na jo 13 kyon ejoma sosorae ntena n khümhancho potsow khüma yithukcho yiwon zovska. 14 Ntena hotüv yiwon ethan zoana tüngochüa ethümi zetava, osi otsotso tssona hotüv yantsü jilo, 15 kyon jiangna osi onte tssiden jiang lüngtharüpi sitava. Yantsü jiha roe sitava. 16 Yantsü jilo eli jiang yanlungi hanrhyui vasi yantsü ji totona rungi OPVÜI than esüa kümthuka. Yantsü ji kümali roe kvüthüng ha n tssocholamo kümthuka. 17 Hotüv yantsü lona ntia khichei ti khitava tona OPVÜI na ombo lüm etsuk ekhenthao ji lona khophi nte khonzam. Ombona nte khonzani ombona nte motsüi thüngi phyochako ji esüa owo elümoto nte thichethukvü ka, 18 Hojijo ana nchüng ombo yizüng nte pio shiang topvü benphia ombo yi engasanati tssochev.

Shikhfü Enioto 14

Nungralan Khanio Jiang

1 "Nteno OPVÜI Potsow kyonden. Hoji tsükona ntena echüi kyatathüng oyam esüa nte bobo osolo tsüthechia mekana dontssan tssüi sita to ti-tssotava. 2 Nteno OPVÜI Potsow kyonden. Ombona limha lo kyon topvü yolo na nte ethüngchei ombo kyon nte tssothukcho.

Shikhfü Enioto Ntho Osi N Tho Ekümrümo

3 "OPVÜI na n tho to tsacho ntia ti tsotava. 4 Ntena shiang tsokuka: mangsü, olyu, nyanyan, 5 siano, ora olyu, ora nyanyan osi tsiyo to 6 ekümrüm kvüwoe na jokhyan khyinga osi nkhichi tsoa yipa sana jiang tsokuka. 7 Tokhatola ekümrüm kvüwoe jokhyan n khyingu osi nkhichi n tsoana jiango ti-tsotava. Oat, lishüso osi sethan to shiang jo ti-tsotava. Shiang jo n tho, ntiotssole ontena nkhichi tsoa khatola jokhyan n khying. 8 Woko ti tsotava, Woko jo n tho, onteno jokhyan khyinga khatola nkhichi n tsoala. Hojitüv ekümrümo ntia ti tsotava osi hotüv echüha ti vüngkatava. 9 "Ntena ongo chokonoko tona ngolüp to khyingo jiang topvü tsokhuka, 10 tokhatola ojüi evan ngolüp osi chokonoko n khyingo tüv ntia ti tsotava; hotüv jo n tho to khanhyala. 11 "Ntena woro ntssüngu topvü tsokuka. 12-18 Tokhatola woro shiang hetüv jo ti tsotava: mungshitsü, velungu, mungshiro, kyorhü; müngtsov, kyashak, josiorojüoro, jüphotük; jü-ngangav; sosiro to shiang. 19 "Echo mpao oraoben topvü n tho, hojitüv ti tsotava. 20 Ntena oraoben nthov jo tsokuka. 21 "Ekümrüm tathi echü ti tsotava. Hotüv jo ntena lankon nte yolo vamo jiang tsothuka mekana lankon thanpoe shithuka. Tokhatola nteno OPVÜI nte Potsow kyonden, nteno ombo echi. Nyanyaro osi olyuro jiang ji opvü shyurojü lona ti kvüa.

Tarochia Epi Shikhfü

22 "Nte li na nzyuakvü chiyio jiang lona tarochia khichei vatava. 23 Jisülojo OPVÜI khümphen meta hokao jilo owo OPVÜI vanrhyu jilona nte tsünghanro, jününgrothi, olive thyujü, tarochia osi nte mangsü olyu nrodemo jiang to tsotava. Ntena OPVÜI nte Potsow ji kümali yikrachio tssoa hoto benphitava. 24 Khümphen meta ji nte jina ekoni tssoe OPVÜI na nte mmhayio jilo na tarochia jiang hansi ewov ezüp lina, heto lyutava: 25 Nte than jiang yeni orang ji khümpheni hansi woa. 26 Hoji lona owo ntiolona nte ezi hungana eziamangsüso, olyu, tssüngthijü, zükhi-to shi, nte wopan nzo OPVÜI vanrhyu lona longshita tsoyutava. 27 "Nte yani Levi kyon vamo jiang ti khachotava, onteno ejüeli n lika. 28 Nte joncho-rücho jilona tarochia jiang nzyu ethümo yenjoa hanrhyui nte yantsüi vatavka. 29 Etsoyu shiang jo Levi jiang tsükona tssov, ntiotssole onteno ejüeli ntia n li, elani lankon, nrinphen osi emi jiang to nte yantsüi vamo shiang echi tssovka. Ontena oro onte ethelan ephan khivka. Shiang esüa tssotana OPVÜI nte Potsow na nte elhingo topvülo nte mmhayivka

Shikhfü Enioto 15

Nzyu Tiyingoto Ji

1 "Nzyu tiying akvüto oyam na orang ochi nte epiv elio jiang ntena siyitavka. 2 Hojijo hetowoe na tssov. Kyon ochona Israel thanpoe orang noe liana ochi ji siyiv, ombona orang ji khislaniv mek, ntiotssole OPVÜI na siyithaka. 3 Lankon na nte epiv elio jiango khiyikuka tolea Israel kyon na nte epiv elio jiango ti khiyia. 4 "OPVÜI nte Potsow na nte pia vamo meta jilona ombona nte mmhayiv, nte yolo kyon tsüka lea yantsav meka, 5 ntena ombo yi enga ana nchüng nte ezo shiang benphia tssona. 6 OPVÜI na phyochako ji esüa ombona nte mmhayiv. Ntena jipo elümoto sav khatola jipo kvüina ha nte sav meka. 7 "OPVÜI na nte pia vamo meta jilo oyan kvülo yantsae vana na ntena tajo elüm lona n zanchiv ti sitava. 8 Jithüngina jo lungphyata ombo eno-rürontava, ombo ethelan eli ji ephanina. 9 Ochi siyita nzyu ji enhyani lato yantsae jiang epvüeno n piv n norürom ti sitava. Hojitüv nchümri n mhom na nte ti pyingthuka. Nina enov ekhirana na ombona OPVÜI thüngi kyakachiv osi ni n lan tssov. 10 tinkyim na ombo pia osi tajo tilüm na pia, to tssona nina ntio tssoa na jilo OPVÜI na ni mmhayiv. 11 Yuta topvü lo Israel yantsae osi ethev eli kyon vamka hoji tsükona onte thüngi lungphyatale to nte ezoala.

Ezii Jiang Tsükona Ntsata

12 "Nte Israel ochosana yantsa lona eboe lea eloe lea ombobo ni thüngi yena tssona, Ombona nzyu tiruk ni benkasi sülo ombo, ompvü vachivka. Nzyu tiyingoto jilo jo nina ombo ji etancho vachivka. 13 Nina ombo vachiana ombo ji khejüng ti yithuka. 14 OPVÜI na olyu, otssuk-omüm osi jününgrothi ni mmhayio jilona lungphya ombo pia yithuka. 15 Ntena Ejip metae eziiden vancho OPVÜI nte Potsow na nte sochukcho toji ti mhechotava; hoji tsükona enhünga yizüng shi nte piala. 16 "Tokhatola ni ezii jina n yihungu mpato tssov; ombona ni osi wopan chokata elani vanlanhungu mpato tssokuka. 17 To tssona ombo sosi ni durhyu jilona owo eno ji ombo veyia, to tssona ombona eküm echung ni ezii tssovka. Eloe ezii jiangha hoji esüa ekümtava. 18 Ntena ezii vachiana n chokav to ti tssotava, ntiotssole ombona jokheman chiso lona nzyu tiruk ni benkathaka. Shi esüa tssoa tona OPVÜI nte Potsow na nte elhi topvülo nte mmhayiv.

Mangsü Osi Olyu Nrodemo Jiang

19 "Nte olyu osi mangsü obung nrodemo jiang OPVÜI lo khochaki vatava; shiang jo elhi lo ti tsütsata osi otssan ha ti reyia. 20 Nzyu akvü nte osi wopan topvüna khümphen meta OPVÜI vanrhyu ki jilona hojiang tsotavka. 2i Tokhatola ekümrümo jianglo ojo okhe n benriv mekana omhyik juka osi ephyoeriv khyingna hotüv jo OPVÜI nte Potsow ti thantava. 22 Hojitüv ekümrümo jo ntena okina tsotava. nte topvüna, n tholo yutalo tssolea hojiang ji sepvüsian so tsoato tsotava. 23 Tokhatola ntena ejen jo etsoyu tssoa tsov meka, ji thüngona jo ojü esüa likoe chüi sitava.

Shikhfü Enioto 16

Yakchi Tokhu Ji

1 "Abib choro lo yakchi tokhu ji OPVÜI monkhüm yikrachia khitava; hoji choro zümo motsüngalo OPVÜI na Ejip lona nte sochukcho. 2 Khümphen meta motsünga jilona owo nte OPVÜI Potsow yikrachiv tsükona nte olyu mekana mangsü ji lüngthatava. 3 Ntena tokhu shi tssotana hümri jiang vümhi ti thena rüngtava osi kvüto Ejip lona khochukathüng süsoa tsotacho sana ji esüa tsüngon tiying vümhi n theo hümri tsotavka. Hotüv hümri tsotavahojijo ezüp hümri to tsavka. Hojitoli ntena evanthüng jo ezüp meta Ejip lona ntena chiyio ji nchümchetavka. 4 Tsüngon tiying tsükona nte ochina ha oki lo vümhi vav meka, osi tsüngon ovüngo ji zümolo ekümrümo lüngthao ji hoji zümolo tsoravka. 5-6 "Yakchi tokhu ekümrümo ji khümphen meta jilona lüngthata OPVÜI na nte pio meta jilo meta thanpo kvülona ha lüngthav meka. Ntena Ejip lona khochio jithüng ntio yutalo khochicho sana ji yuta tsük jilo engrhetathüng shi tssotava. 7 Oso ji vüpi khümphen meta motsünga jilona tsotasi, ojyuato enyathüg oki yitava. 8 Jisülo tsüngon tiruk jijo ntena vümhi n theo hümri tsotava, osi tsüngon tiyingo to jilo jo sanrhyui OPVÜI nte Potsow khümtava osi tsüngon jilo jo elhi ti tssotava.

Liri Tokhu

9 "Ntena liri benkao jilona hopta tiying etssünga, 10 osi OPVÜI na nte mmhayio ji ekyan erungthan bentasi OPVÜI phfiitssonthuka tokhutava. 11 OPVÜI vanrhyu lona nte wopan jiang nzo ngaro, phajae osi Levi, lankonden, opvüpoe n van osi emiden nte yantsüi vamo jiang nzo longshitava. Shiang ji khümphen meta motsünga jilona tssotava. 12 Ntena yizüng shiang engav ti-mhechotava. Nteno Ejip metae eziiden to ti-mhechotava.

Ranki Tokhu

13 "Ntena nte tssuk jiang tseni vasi jününgro jiang zümrathaka na ranki tokhu ji tsüngon tiying khitava. 14 Tokhu ji nte ngaroden, phajeden, Levi jiang, lankonden, opvüpoe n van osi emiden to nte yantsüi vamo jiang nzo longshitava. 15 Khümphen meta motsünga jilona tsüngon tiying tokhu khita nte OPVÜI Potsow yikrachitava. Longshitava, ntiotssole OPVÜI na nte elhi osi liri ji mmhayithukcho. 16 "Khümphen meta motsünga jilo nte jipo lo eboetso topvü na nzyualo yenjo ethüm rovka; yakchi tokhu lo, liri tokhulo tona ranki tokhulo to. 17 Eboe otsük akvüna OPVÜI na ombo mmhayio jilo na ombona thankhoko ji ephanina yantso hansi OPVÜI thüngi rovka.

Ntsanrük Yansasa

18 "OPVÜI nte Potsow na nte pio yantsü akvü lo yitssoe osi tsüphoeden ethüngche vatava. Ontena kyon jiang omhyik n thena savka. 19 Onte yitsso jiang lo n tsa nrük osi mhyikthe n lina tssovka; ontena ekhüp ha khiv meka, ntiotssole nchümri eli osi ntsanrük jileha yantso na omhyik eyukicheta osi silyuo methak khikhoka. 20 OPVÜI nte Potsow na nte pia vamo meta ji ntena khi hojilo harishia evam tsükona yuta topvülo ntssüng-rünga osi ntsanrüka etsso-ephyotava. 21 "Ntena nte OPVÜI Potsow thanphensa ronta na hoji tssae Ashera potsow kisü shani tivanthuka. 22 Elani kisü khümu tsükona olongha chümkachi ti vatava; OPVÜI na hojitüv tssakala.

Shikhfü Enioto 17

1 "OPVÜI nte Potsow thüngi ekümrümo ephyoerüv khyingo tüv ti thantava; OPVÜI na hoji tssakala. 2 Ntena oyan kvülo sana eboe eloe mekana ochona sana OPVÜI tachio mmen tssoa osi 3 ombo ntsata ji yesoa potsow thanpo khüma, eng mekana choro shantio khüma OPVÜI yizüng yesocho zokhuka. 4 To tssona ntena tüngochüa ethümoe zetava. Osi otsotso Israel yolona hojito etssoe vana tssona, 5 yantssae ombo sosi chiwo ephyatsüngi sia. 6 Tokhatola ombo ji ehungpvüi otsük eni mekana kyongkao na ehungpvüi piyi sanati chüthoku; tsüka taena ehungpvüi tssoyicho jo n chüthokche. 7 Enhungpvüi jiangna olong ovüngo ji shümchidensi, kyon topvüna ephyatsüngi sia; hetüv mmen nkachotava. 8 "Kvülona jo metaro jilo yitssoe jiangna n methakcheo yilan ekhüngu ha chiyikhoka, ejyukaena tsütsaelan chov, otsüko tssatssorükhü mekana münghan alo tssatssota sana to n khotao yilan ha chiyikhuka. Hotüv yilan chiyia na OPVÜI na khümphen hokao meta jilo owo, 9 Levi pvüti ji tona jithüng yitssoe ji to yenjani hoji ephan tssoa. 10 Ontena onte methak jiang nte ntssithoku osi ontena nte ezoji ephan tae tssov. 11 Onte yitan ji khichoa osi ontena phyo ji ephan yitsüng akvü tssoa. 12 Ochona yitssoe ji mekana pvüti ji methak ji n khichoa sana chüthoki sia; hojitoli n mhom ji Israel yolona khi sia. 13 To tssona otsük akvüna zoe hoji ekyu lona n mhom tssov meka.

Mesao Tsükona Lanso

14 "Ntena OPVÜI nte Potsow na nte pia vamo meta jilo rheyi vanthakana, nteha jipopoe nte nkonphia vamo jiang esüa mesao nte vanthokhungu. 15 Hoji tsükona ntena OPVÜI lüm erüngo mesao ji ethüngu ti-mhechotava. Ombo ji nte kyon yolona ethüngchevka; jipopoe khi nte mesao titssothuka. 16 Mesao jina ombo rasan tsükona kurü khosha ethev n li, osi ombona kurü shilo Ejip metae ha wothoku n li; ntiotssole ntena kvüthüngha Ejip metae ti-olantale to OPVÜI na phyocho. 17 Mesao jina engh elümoto vanthoku meka, ntiotssole to tssoana ombona OPVÜI mhechoe siv; elani ombona shona janti khosha vae eli kümvü meka. 18 Ombona mesao küma na, OPVÜI yizüng kako ndüng motsünga pvüti jiang na vao ji khi zeta eranthoki vavka. 19 Ombona kako ji ombo ndüngo vasi, ombo eküm echung kha hojilo ntio erancho sana topvü benphia OPVÜI kyuchivka. 20 Hojito tssona ombona ombo, Israel kyon thanpoe jiang lona ombo tsükacho esüa nchümvü meka; osi OPVÜI shikhfü jiang n ngav siv meka. To tssona ombona Israel pono sunga sav osi ombo tsoronichen jiangna echungren sunga Israel savka.

Shikhfü Enioto 18

Pvüti Jiang Ejan

1"Pvüti jipo jiangna Israel lo liko onte ejan liv meka; onteno othan osi thanpo yantso OPVÜI pio jiang tsoa vamka. 2 Onteno jipopoe jiang esüa liko hov meka; onteno OPVÜI na phyochako ji esüa OPVÜI pvüti tsso ji lona ematha lia vamka. 3 "Kvülo mangsü osi olyu thana sana pvüti jiang jo worhyo-o ji, okan ji tona mman ji to pivka. 4 Ontena tsünghanro, jününgro, olive thyujü osi tssansü ovüngo jiang pivka. 5 Nte jipo topvü yolona OPVÜI na kümali ombo benkathukvü Levi pvüji ethüngchecho. 6 "Israel lo oyam kvülo Levi tsükana oro OPVÜI elhi tssohunga sana khümphen jilo Levi vamo jiang 7 esüa onte ha pvüti elhi tssoa ombo OPVÜI Potsow benkakuka. 8 Omboha Levi thampo jiang esüa othan jiang kheti hunguka, tolea ombo hanthuko jiangjo ombona vakhuka.

N longtsüi Etssophyo Jiang N tssov Tsükona Ntangshom

9 "OPVÜI nte Potsow na nte pia vamo meta jilo ntena rheyiana hojilo metapoe vamo jiang etssophyo etssakthao jiang ti phankatava. 10 Nte thanphen mi jianglo nte ngaro jiang ti thechitava; elani ntena ratssen rapvüi ti lithuka, phyalyu eze randankae jakton mekana 11 oha benphita osi echüi müngyi tssoe thüngi ngatüngngari ti lithuka. 12 OPVÜI nte Potsow na hetüv etssophyo e nkongthao shiang tssako jina hetüv benphiwo jiang phani sisi nte rheyithukala. 13 OPVÜI lo tae chüngchünga longtsükatava."

Zenkhying Rwothukvü Phyochak

14 Jisülo Moses na phyocho, "Ntena rheyia vamo meta jilo jo kyon jiangna ratssenta phyalyu zetala, tokhatola OPVÜI nte Potsow na jo shiang nte n tssothukala. 15 Jithüngo najo ombona a esüa zenkhying tsüka rwothukvü osi ntena ombo yi engav. 16 "Ntena Sinai phunglani sanrhyuo ji nchuk jo ntena Potsow mha omi esüo ji hungi nte chüv nte kyua enhungo OPVÜI na nte ti janthukle to jonjitacho. 17 Hoji tsükona OPVÜI na a ezocho, 'Ontena elanthata jonjithaka. 18 Ana onte yolona ni esüa zenkhying tsüka khyo chei onte thüngi wothukvüka; ana ntio phyole to ombo ezoana ombona kyon jiang thüngi ezoravka. 19 Ombona a myingona phyov osi ochona ombo yi n ngasana ana ezüp piv. 20 Tokhatola zenkhying ochona ana n zov a myingona nsana sana ombo chüthukvü, hoji esüa potsow thanpo myingona nsamo zenkhying jiang ha chüthukvü.' 21 "Kvüthüng zenkhying ji yi ji OPVÜI thüngi na meka sana, kvüto phyov sana n tsiv nte emhukvü. 22 Zenkhying tsükana OPVÜI myingona nsamo ji nbencheta tssona ombo OPVÜI yithen hanphi mek. Hoji zenkhying jina ombo etancho nsancho tssoala osi ntena ombo ekyuv n li.

Shikhfü Enioto 19

Tsanthephen Yantsü

1 "OPVÜI nte Potsow na kyon jiang monthuki sisi onte yantsü jiang nte pia onte ki jianglo ntena vanana, 2-3 metaji kheti ethüm erüsoe osi echi akvü lo lungjüngo, yantsü motsüngtsüng zikae vata. Tona oyam lüngthae jiangna hotüv yantsü lo tsanthei nlhichoa vam. 4 Ochona sana ori meko tüv oyam tssatssoana ombona yantsü shiang motsüngalo tsanthei nlhia vankhoka. 5 Ejyukae na otsük eni otssüng volo wotale tsüka ji pvüji esuki tsüka ji meyani sina ombona yantsü ethüm ji yolo motsüngalo tsanthei sikhoka. 6 Yantsü ji motsünga tae tssocho jo kontio jina n tsancham echüo ji wopan ocho sana nlilam tsükona n lan n lio kyon ji lüngthakuka. Ntiotssole ombo ri mek khatola n tsiv tssatssotacho. 7 Hoji tsükona ana yantsü ethüm kokae vale to nte ezoala. 8 "OPVÜI nte Potsow na nte motsüi jiang ezoji esüa nte yantsü jiang nte tsüka rankayia na, osi ombona phyo meta jiang topvü nte pithakana, 9 ntena yantsü jiang nte ethüngchelam. (Ana nchüng nte ezo shiang ntena enga benphina osi OPVÜI püngnoyi ephani na eküm vanta tssona opvüi na meta shi nte pivka.) 10 Shijo OPVÜI na nte pio meta jilona ntena noying kyon thama na n chüthukvü tsükona. 11 "Tokhatola ochona sana ombo ri jina yingto vanathüng etana na lüngthana osi yantsü shianglo tsantheta tssona. 12 Münghan ji wopan jiangna yantsü jilo owo ombo rhümae sosi oyi echüo ji wopan khelo theyia ombo chüthukvü shikhfü. 13 Hotüv kyon jo khonzan ti jüa, Israel yolo hojitüv kyon tivanthuka, tona nte sükhying mmhona vamka. 14 "OPVÜI nte Potsow na nte pio meta jilo nkolo ntio liko erü chümtacho sana jiang ti lukphia.

Ehungpvüi Tsükona

15 "Kyon tsüka ji nlan epiv tsükona jo ehungpvüi tsüka taena n tssochyu, matacho otsük eni na ehungpvüi pia nlan piv shikhfü. 16 Ochona sana ejüngona nlan oyam shakav ekhyo tssona, 17 woniatana khümphen meta motsünga jilo owo hoji lo yitssoe osi pvüti ochoang sana jiang khi oyi tssothuka. 18 Yitssoe jiangna mmhona yani zesi kyon jina ejüngona nlan oyam shakacho tssona, 19 nlan etssoe na ekhio ezüp ji ombo piv shikhfü. Hojito lyui ntena n mhom ji khi sichev. 20 Hojito tssona otsük akvüna hoji zoe onte kyuv osi ochina ha hojitüv nlan tssov mek. 2l Hojitüv yilan lojo khonzan ti-ejütava, jokheman ji eküm man eküm, omhyik man omhyik, oho man oho, okhe man okhe osi ojo man ojo to pia.

Shikhfü Enioto 20

Ritsso Tsükona

1 "Ntena kvüthüng ritssolo khochia sana kurü osi zotoro mekana rasan nte lona kyungkao hunglea ti kyutava. OPVÜI nte Potsow ochona Ejip metae na nte sochecho sana jina nte ndüngo vamka. 2 Ntena ritsso n sakathüng pvüti tsükana chiro nte rasan jiang heto ezovka, 3 'Israel kyonden, engachitava! Nchüngo ntena ritsso lo yiaka. Nte ri jiang ti kyutakhe osi etho mmyima ekhenrhüka to ti tssotava. 4 OPVÜI nte Potsow na nte nzo yiala, osi ombona ekhyo nte pivka.' 5 "Jisülo jo tsüphoe jiangna kyon jiang heto ezovka, 'Shilo ochosana oki ethan tssoe vasi n thocheham vancho alo? Hotüv kyon jüna oki elani yia. To n tssov rali na ombo chücho jo kyon thanpoe na ombo ki ji nthochei siv. 6 Shilo ocho sana jününgro li joni vasi tssüngthi n lhohan tüv jücho alo? Hotüv jüna oki yithuka. To n tssov ralina ombo chücho jo kyon thanpoe na ombo tssüngthi jü ji yuv. 7 Shilo ochosana lojilongae vasi vancho jücho alo? To tssona, oki ombo yithuka. Rali na ombo chücho jo ombona engae vao eloe ji oyam na khiv.' 8 "Tsüphoe jiangna heto ha kyon jiang ezovka, 'Shilo ochosana nsüp-nrüp tüv jücho alo? To tssona, oki ombo yithuka. Ombona thanpoe jiang lüm etsson ji moniv.' 9 Tsüphoe jiangna hoto ezorathak na kholukro akvülo esopvüiden ethüngcheta. 10 Ntena yantsü halo woana, ovüngtssoa yantsü jilo kyon jiang ontebobo nte küpo rheyio yuta pitena. 11 Ontena pikhfü chonchi nte küpo rheyiana onte topvü nte eziiden kümi nte benkav. 12 Tokhatola yantsü jilo kyon jiangna nte küpo n rheyina rotav methaka tssona yantsü ji nte rasan na nkonyata. 13 Tosi OPVÜI nte Potsow na etho nte pia nte khyothukna jilo eboe vancho topvü lüngthae sitava. 14 Tokhatola elopvüi jiang, ngaro jiang osi ekümrümo tona yantsü jilo lio jiang tojo nte echi khikuka. Nte ri jiang echi topvü ntena tsütsakuka. OPVÜI na hojiang nte pithaka. 15 Hojito ntena vamo meta jilona ekoni yantsü jiang lo ntena hoto tssoyivka. 16 "Tokhatola OPVÜI nte Potsow na nte pia vamo meta jilo yantsü jiang phanchoana jilo vancho kyon topvü lüngthae sitava. 17 OPVÜI na nte ezo ji esüa kyon topvü: Hittite, Amorite, Kanaan kyon, Perizzite, Hivite tona Jebusite to topvü roe sitava. 18 Ontena onte Potsow jiang khümtao etssakthao elhilan jiang nte sokae OPVÜI mhadungo mmen nte n tssothuko tssoa rorüpi sitava. 19 "Ntena yantsü khyoe khivsana jilo, tssüngthi dung jiango sunga. ori tssotalea roe ti sitava. tssüngthi jiang tsotava osi odung jiango tani ti sitava. Odung jiango nte ri mek. 20 Odung thanpo jiango ntena tani ritsso yutalo jo pikhfü tssoa yantsü ji n khyothüng nandang tsütsakhoka.

Shikhfü Enioto 21

Münghan N yancheo Jiang

1 "Ejyukaena OPVÜI nte Potsow na nte pia vamo meta jilo oli motsünga lo ochosana lüngthae licho hungna osi ochona lüngthacho sana ji nina n tsi na, 2 nte yitssoeden osi esopvüiden jiang na owo omüng lio jilona oyan kvülo enhyamo sana etsi zev. 3 Jitosi hojilo oyan enhyantso jilo evan jjiangna mangsüro oli ejom lo n tsütsahan tüv ethüngchev. 4 Ontena mangsüro ji süsi zhükhfüro kvüthüngha n nghao jitüv ndüngo osi oli ochina ha n johan tüv lona evüng ji jakiv. 5 Levi pvüti jiangna hojilo ha wov ntiotssole jenbukta yi topvülo ontena oyi tam. OPVÜI nte Potsow na ombo benkav osi ombo myingona nte mmhayithukvü onte ethüngchecho. 6 Jitosi omüng lio ji meta jilona oyan enhyantso jilo kyon jiangna mangsü ji poni na onte khe jiang ntsükvü 7 osi phyotav, 'Ena kyon ji n lüngtha, osi ochona lüngthacho sana ena n tsi. 8 OPVÜI nina Ejip metae na socheo Israel kyon jiang n lan siyia, ochona ntsa kyon shi lüngthacho sana ontena n tsika.' 9 Hojito OPVÜI na lümbüm na erüngo ji tssotava tona münghan ji nte ntam meka.

Eloe Morantsan Tsükona

10 "OPVÜI nte Potsow na ritssolo ekhyo nte piana osi ntena ritssolo na morantsan sosi yina, 11 ntena jiang yolona loroe opyon mmhom nte soa vanhungo tüv zechekhuka. 12 Tona ompvü sosi nte ki oyi otssan tssüyia, yenkyip jiang lümia, 13 osi ompvü sü jiang dungphiyia. Ompvü na nte ki vani choroa tsükona ompvü pvüpoe jiang tsükona nungravka; hoji sülo jo nina ompvü soa vankhuka. 14 Sülani jo nina ompvü n jübon na tssona vachi yithuka. Nina ompvü ji rikata ponilan tssotao ji tsükona, ompvü ji ezii esüa n tsütsache osi ompvü n yenche.

Tsokhfü Ji Tssentso

15 "Kyon tsükana eloe eni soa vani otsoe otsük eni vanle, tsokhfü ji ombona tata n jüpomo eloe jina vankhuka. 16 Tolea ombona otsoe jiang yolo eli jantayia na ombo nzamo eloe jina buko ji nzan lona otsoe thanpoe ji elan ji n yesoyiche. 17 Ombo nzantso eloe ji tsoe meklea tsokhfü jijo ejan eni piv lia. Kyon na ombo tsoe ovüngo ji chekav na lia osi shikhfü ephan ombo ejan lio ji piv shikhfü.

Otsoe Jancho N zoe Tsükona

18 Kyon tsükana otsoe n thacheo tüv vankhuka, ombo ji ezüp pia püngnolea jancho n zoe vankhuka. 19 Tona ombo pvüpoe jiangna ombo sosi oyan jilo esopvüi jiang mhadungo owo ombo mangthuki oyi jantayiv. 20 Opvüpoe jiangna esopvüi jiang heto ezov, 'E tsoe shijo lüm ekhüng osi ena n püngnoche, ombo na orang elümoto eziala osi sukona kinoe tsüka.' 21 Tona yantsü jilo kyon jiangna olung na ombo ephyatsüngi chüthukvü. Hojitoli ntena hetüv shikhfü n mhon lona tsanchov. Ntio tssocho sana shi Israel otsük akvü na zoe kyuv.

Shikhfü Lantaro

22 "Kyon tsüka ji ombo n lan lona chüthuki donkachi sina, 23 Hojilo zümoa yipchoa ti lithuka. Omüng ji hoji nchuk jyuthei siv shikhfü, ntiotssole echümüng donkachi lio ji yakchia Potsow na meta ji rhiyikatala. OPVÜI nte Potsow na nte pio meta ji n menthukvü tsükona omüng ji khi shothei sia.

Shikhfü Enioto 22

1 Nina Israel thanpoe mangsü mekana olyu tsanmona hungna yingto vani tisia; rhümae OPVÜI ji thüngi sosi yia. 2 Tokhatola OPVÜI ji ekoni evan tssona osi OPVÜI n thümchena ni thüngi sosi oyi vanthuka. OPVÜI jina yana rona ombo pia. 3 Nina gadhoro hunglea, osü khyolea mekana thanpo tsütsaelan Isreal kyon na monlea hojito tssovka. 4 "Israel kyon na ochosana gadho mekana mangsü ekhünga hungna to tisia; owo ekümrümo ji sükata. 5 "Eloe na eboe mpensü ekav meka, eboe na ha eloe mpensü ekav meka; OPVÜI na hotüv elhi tssakala. 6 "Ntena oyaki tssolea, likoe tssolea oroshüp hungathüng opvü jina ejü mekana oro lea shüpa van na opvü ji khiyiv meka. 7 Ntena woro jiang khikuka tokhatola opvü jijo vachiv shikhfü tona ni harishia mmhona vamvüka. 8 "Ntena oki tssoana mhonki tssa füchüma eraklanchi epikatava. To tssona ochosana ni mhonki na elungi chülea ni pono mek. 9 "Oli motsüngalo jününgrothi tona thanpo to yingtsüv meka, to tssocho jo benro kvüwoe ha ntena tsochev meka. 10 Oli jom tsükona gadho tona mangsübung to ti shentsüa. 11 Tssansü tona sünyipvü to khümtsüi ti mpena. 12 "Nte sü nken mezhü jianglo süchüm vükae ungjoe hantava.

Ntsanthoa Evam

13 Eboe tsüka na eloe soa vansi ombo n chokav sikhuka. 14 Ompvü ji yanpiyanthan n tssothüng lonsülonphyo lia to orapvüna hungka renkakhuka. 15 "Hoto tssona eloe ji pvüpoe jiangna yanpithan sü mmen ji khi owo oyan jilo yitssoe jiang ejüa onte tsolo ji ntsanrük phyoyiv. 16 Opo jina heto phyov, 'Ana a tsolov ji shi thüngi yanpithukle, ombona yanpithan ntsanrük n lito ntana n jüpomvü sithaka. 17 Tokhatola a tsolov ji ntsanrük ejüv tsükona yanpithan sü shilo ejen evükao shi hansi oro nte zethukala!' 18 Tona oyan jilo esopvüi jiangna orapvü ji süyae tav. 19 Ontena orapvü ji echa janti rang nzoa khi eloe jiang pvüpoe jiang piv, ntiotssole eboe jina Israel eloeroro tsüka omying mme nio ji tsükona. Osi elani ompvüna orapvü ndüngo tsoeni tssoa vamvü, osi ombo eküm evanthüng jo ompvü n sichiche. 20 "Tokhatola otsotso eloe ji ntsanrük n licho tssona, 21 esopvüiden jiangna ompvü pvüpoe jiang kipüngina ompvü süchuki oyan kyon topvüna olong khi ephyatsüngi ompvü siv. Ompvüna opvüpoe ki n yanpiv vanathüng lonsülonphyoe khi ete jipo mying mmenthuka yikra nduktacho. Hojito lyui ntena n mhom hetüv shiang nkachovka. 22 "Eboe ochona oyam eloe thü ngi nlan lia rhümata sana woniata chüthuki sivka. Hojito lyui n mhom hetüv shiang nkachotava. 23 "Yantsüi na eboe ochona sana loroe oyam na engae vacho tüv thüngi nlan tssoathüng rhümakhuka. 24 Tona ntena woniata yantssae sosi chiwo ephyatsüngi sivka. Eloeroro jijo yantsüi kyon khosha yolo khatola ompvüna nzanchile to n romo jina chüthukvü. Eboe jijo oyam na engae vacho eloe worhyuo ji ntana chüthukvü. Hojitolyui ntena n mhom hetüv lona nkachotava. 25 "Eboe tsükana oyam na engae vacho eloe yantssae na retso-rama tssona eboe ji tae chüthukvü; 26 ntiotssole eloe jijo echüo tüv nlan ntia n tsso. Eboe tsükana thanpoe thama na lüngthatathüng ha hojito thungoena oyi tssoyiv; 27 Eboe jina eloe ji yanjoe na retso-ramao ji tsükona ompvüna eron lea oyam na zoe n zanchicheo tüv tsso ji tsükona. 28 "Eboe tsükana oyam na n ngahan loroe tüv thüngi retso-rama tssokuka. 29 To tssona ombona loroe man ji janti rang tinyan khi eloe ji opo losi oni vantae sithuka, ntiotssole ombona ompvü rikata nlan tsso ji tsükona. Ombo n chüthüng jo ompvü n sichiche. 30 "Eboe ochina ha opo eloe jiang ochi thüngi ha ori elhi tssoe opo yikrathukvü meka.

Shikhfü Enioto 23

OPVÜI Kyonden Yolona Phani Esiv

1 "Eboe ocho otsüng ji yesoe sithakcho mekana echiehan ji rhae sithakcho sana jiang jo OPVÜI kyon jiang yolo khanhyav meka. 2 "Kyon ocho efürama lona bukcho sana osi hojitüv tsoronichen jiang echungren taro süi tsoeoro jiang lea OPVÜI kyon yolo khanhyav meka. 3 "Ammonite mekana Moabitejiango ochia echungren taro tsochen lea OPVÜI kyon yolo khanhyav meka. 4 Ntena Ejip metae na chiyiathüng ojü osi etsoyu nte n picho, osi ontena Mesopotamia lo Pethor yantsü jilo Beor tsoe Balaam ji engochoe nte rhiyikathukcho. 5 Tokhatola OPVÜI nte Potsow na Balaam yi n ngacho; ji thüngina jo ombona nte nzamo ji tsükona rhiyi ji mmha kümthuki sicho. 6 Ntena jiponchüngi evanthüng nandang jo jipotsük shiang nti lanka lona ha ti nzanchitava mekana onte ji mmhom ti kümthuktava. 7 "Edom kyon jiango ti tssaktava, onteno nte opanden ka. Ejip kyon jiang ha ti tssaktava, yuta motsünga lojo ntena onte ndüngo vansi yicho. 8 Onte tsoronichen jiangha echungren ethümoto lona benkae OPVÜI kyon yolo khanhyakuka.

Rasan Vanphen Ji Ntssüngrüng

9 "Ritsso yutalo ntena rasan kyingi vanathüng jo olan taro lona ntebobo ntssüngcheta vantava. 10 Eboe ochona sana hojilo yipathüng phola yipjüngchina nchenphen ji pikhfü na pomoe chiwo vanthuka. 11 mmyulani jo ombona tsükae sisi engrhecho süiti nchenpheni rheyikhuka. 12 "Ntena esanchochiv ethev liathüng echi nte nchenphen na pomoe ranki tssoe vatava. 13 Ntena sanphiathüng jo jarung sütava, ntiotssole obuk yesoe nyalo ona jarung jina jyui shozhüi sia. 14 Nte nchenphen jiang olan topvü lona nthoa vanthuktava, ntiotssole OPVÜI nte Potsow na nte vanrhyui nte nkoa nte ri jiang nte khyothukala. Ntena ntia n mhon tssoe OPVÜI ji nte thüngina yi ti sithuka.

Shikhfülantaro Jiang

15 "Ezii tsükana ombo pvüi ji thüngina tsani oyi ni tsankana, ombo ti yilanthuka. 16 Ombona nte yantsü ntinsalo vankhuka tolea ntena ombo ntssonshia ti vanthuka. 17 "Israel ochina ha eboe lea eloe lea, khümpheni lonsülonphye kümvü meka. 18 Elani hotüv elhi lona orang mmyocho jiang khi echümchak than piv meka. OPVÜI na khümpheni lonsülonphyo elhi ji tssakala. 19 "Ntena Israel thanpo jiang thüngi orang osi tsütsaelan noa tssona eran ti khiyina notava. 20 Ntena lankon thüngi no jiang lojo eran khiyikuka. Tokhatola Israel kyon thüngi eno pio jiang jo eran ti khitava. Yizüng shiang benphitava tona OPVÜI nte Potsow na nte pio meta jilo evanthüng jo ntena ntio tssoana topvülo nte mmhayivka. 21 "Ntena OPVÜI nte Potsow thüngi phyochak vao jiang ntia n penthukvü ti sitava; OPVÜI na nte echümchak jiang nte vayia vamvü osi hojiang n penthuko jijo mmen. 22 OPVÜI thüngi echümchak n vao jilojo mmen n jü, 23 tokhatola ntena lüm erüng lona echümchak vata tssona hojijo benthuka. 24 "Ntena oyam jününgrothili yakchiathüng nte tsohung na nte choka nandang tsokhuka, tokhatola hoji thephen lo lhothei hansi ti yia. 25 Ntena oyam tsonghanro li yakchiathüng nte tsohungna nte khena rakchoe tsokhuka, tokhatola lepukro najo ti tsona.

Shikhfü Enioto 24

Sichita Tona Yanpiyanthan Tssolam to Yilan

1 "Ejyukaena eboe tsüka na eloe soa vanle sülami jo eloe jilo ombo n chokao ntiosana zechei ombo n mathav sikoka. To tssona ombona sichita kako erani ompvü pia ombo kina ompvü yithokcho. 2 Tole ompvüna eboe thanpoe thüngi yanpilanle, 3 hoji eboe jina ha ompvü n chokav sichi kako jiang erani ompvü pia yithukuka. Mekana ompvü orapvü enioto ji chükhuka. 4 Heto tssocho sülo jo eboe ehemo jina ompvü soa n vanlanche," tolea ombona n thono thüngoe ompvü tsswothukvü. Ombona ompvü soa vanlancho jo OPVÜI nshüthukala. OPVÜI nte Potsow na nte pia vamo meta jilona jo hetüy ekhentao mmen ti tssotava.

Shikhfü lantaro Jiang

5 "Yanpiyanthan tssopamo eboe ji rasan elhi mekana nzontsü elhilo ti thechia, ombona oki vani eloe ji emathathuku tsükona nzyua esan pia. 6 "Ntena oyam epvü noathüng nkoho tssen tsükona ombo tsünghanro enhyikphen long ji ti khiyia. To tssocho jo wopan eküm saya etsoyu nsüngrüphen ji khiyiala. 7 "Israel ochona Israel thanpo rhümae ezii tssoa eküma sana mekana ezii tssov yeni sia sana ombo chüthuka. Hojitüv nlan jo hojitoli nkachotava. 8 "Nte ji ratsü-eno na nte kana Levi pvüti jiangna nte ezoji ephan tssotava; ana onte pio lanso jiang ephan tssotava. 9 Ntena Ejip lona chiyiathüng OPVÜI nte Potsow na Miriam thüngi tssoji nchümchetava. 10 "Nina ochosana ntiona noa tssona nkoho tssen ombo phokthesü ji khilo oki ti woa, 11 nina haphoe na nhyaka vansi ombo khi hansi oro ni pithuka. 12 Ombo ji yantsae tssona zümo yipchoa ti vayia; 13 mmyua akvü ombo pilana zümothüng mpensi yipthuka. Tona ombona montsso ni pio jina OPVÜI nte Potsow na ni emathayiv. 14 "Yantsae ezüpa evan osi mmyotsoe jiang ti-ejiphia, omboji Israel kyon tssolea, lankon nte yantsüi vana vancho tüv tssolea. 15 Engakvü eng n rhethüng hoji tsüngon jokheman ji ombo pia. Ombona orang ji ethev lia zinhyae vathako jina. Nina ombo jokheman ji picho jo ombona kyao ji OPVÜI na zoana ni nlan mmen tssov. 16 "Ngaro jiangna mmen tssocho tsükona opvüpoe jiang ti chüthuka; opvüpoe na mmen tssocho man ha ngaro jiang ti chüthuka. Otsük akvü ombo mbona mmen tsso ji tsükona tae chüthuka. 17 "Opvüpoe nvan jiang osi lankon jiang ji onte elan jiang ti monia; osi emi ji mpensü khi eno nkoha tssen ti tssothuka. 18 Nteno Ejip metae eziiden vancho OPVÜI nte Potsow na nte sochecho toji ti mhechotava, hoji tsükona ana yizüng shi nte pithaka. 19 "Ntena oli riathüng otssuk omüm ejoma n hanrav sina hojiang khilo ti wolana; hojiang jo tsanthan, opvüpoe nvan, emi to jiang echi tssothuki OPVÜI nte Potsow na emathata nte elhi lan taro lo nte mmhayithuka. 20 Ntena olive yenjoa lhothaka na elani enhyo jijo ti lholantava; enhyo jiang jo tsanthan, opvüpoe nvan osi emi jiang echi tssothuka. 2i Ntena nte jününgrothi jiang yenjoa lhothakana jününgrozhü jiang lona lholo ti olantava; enhyowo jününgrothi jiango tsanthan osi opvüpoe n van tona, emi to jiang ejan tssovka. 22 Nteno Ejip metae jo eziiden tssota vanchoto ti mhechotava. Hoji tsükona ana yizüng shiang nte piala.

Shikhfü Enioto 25

1 "Ejyukaena Israel otsük eni yitssolo yitssopheni wotacho, tole tsüka jo noying kyon to yanchesi tsüka jo nlan lia to yanche kuka. 2 Nlan elio kyon ji erhüpvü methaka tssona yitssoe jina omboji nkhümo yipthüki erhüpvü. Rüpüm kvüta erhüpvü sana jo ombo nlan ji ephan tssov. 3 Omboji rüpüm zhüro mandang erhüpkuka osi jilo kyongkata na ombo ji nzontsü pono na yikrathukcho tssoala. 4 "Ntena tssibung ji oli tsenthukathüng ombo emen ji ti mmania.

Ojenio Chüthako Ji Tsükona Elhi Tssoyiv

5 "Jeni otsük eni tssentso motsünga tssole tsüka ji tsokhying n vam chüna ombo emi opanpoe jo yanpithukvü meka; echüo ji ojenio jina ompvü soa vamvü shikhfü. 6 Osi oni lona tsokhying vandemo jijo echüo ji tsokhying ejanthuki echüo ji wopan motsü ji Israel jipo yolo lia vanthukvüka. 7 Tokhatola echüo ji eloe ji ojenio jina soa n vanhungna ompvüna oyan jilo ephyo-esan jiang mhadungo owo phyov, 'A rapvü ojenio jina ombo ojenio echüo ji motsü ji Israel yolo lia n vanthuk hungla.' 8 Tona oyan jilo esopvüi jiangna ombo ji tsae thyutav, 9 To tssoa ha ombona emi ji soa n van to ekhirana tssona esopvüi jiang mhadungo na jokhüp motsünga phongisi ombo mhalo nchukayisi phyov, 'Kyon ochona ombo jenio ji tssentso tssoyiv ekhia sana kyomo jijo heto tssovka.' 10 Ombo wopan jijo 'jokhüp phongio kyon ji wopan to Israel jiang yolo phyota wovka.'

Yizüng Thanpo Ejoma

11 "Eboe otsük eni khontale tsüka ji eloe jina orapvü kyoa lato eboe thanpoe ji nzhü-ngophen jilona tümi süna, 12 ompvü nzana ti nchüm na okhe ji epania. 13-14 "Ntena efü-seri tsütsatathüng oyam ti-ejiphia. 15 OPVÜI nte Potsow na nte pio meta jilo harishia evamo tssoa efü-seri ntsanrüka benphitava. 16 Oymn ejiphi jiango OPVÜI na tssakala.

Amalekite Jiang Chüthukvü Yizüng Ji

17 "Ntena Ejip metae na yiathüng Amelekite jiangna nte thüngi tssoji ti mhechotava. i Ontena Potsow ekyu n tsi, hoji tsükona nte ryusang mmokathüng ontena sülami na nte hatacho osi sülani etssoe jiang lüngtharacho. 19 Hoji tsükona OPVÜI nte Potsao na meta ji nte pithoksi hojilo evamo ori jiang thüngina tsanchoe noyinga nte vanthuko jina Amalekite jiang lüngtharae sisi ochina ha onte n chümchev sithuka. Ntena hoji elhi etssov ji ti mhechotava!

Shikhfü Enioto 26

Liri Than Jiang

1 "OPVÜI nte Potsow na nte pia vamo meta jilo rheyi vanjüngthaka na, 2 nte otsük akvüna tsüngthi lhochodemo ji luksalo thei bensi khümphen meta motsünga jilo wovka. 3 Hoji lo elhi jamo pvüti ji thüngi owo ezoa, 'OPVÜI na a pyimtsümotsüi thüngi epiv phyochako meta jilo ana rheyithaka to ana ehungpvüi tssoala.' 4 "Tona pvüti jina luksa ji khi OPVÜI nte Potsow thüngi thanphen jilo hansi wovka. 5 Tosi OPVÜI vanrhyu lona nina heto phyovka: 'A motsüi jo Aramean yentsae, oson-oki n liv tsanthan tssoa ombo wopan sosi Ejip metae vanwo yicho. Ontena hoji yiathüng jo onte wozanro khatola jilona otsson osi etho eli jipo kümcho. 6 Ejip kyon jiangna e khangshia eziiden esüa elhi ekhungu khüngkata e tssothukcho. 7 Tole ena e kyochile to kyata e motsüi Potsow thüngi chontacho. Tole ombona e ezüp osi enungrathav sükhying ji e ntsiyicho osi e randan e ngayicho. 8 Ombo ethojo tsüphov ji khi ombona Ejip kyon jiang khe lona e shanchocho. Ombona chethemothev elhi tssocho. 9 Ombona shilo e sosi oyi lizü meta shi e picho. 10 Hoji tsükona ana OPVÜI mhadungo ombona a pio liri ovüngo ji lona ovüngo ji khichei hansi OPVÜI thüngi roala.' "Hoji to OPVÜI vanrhyu jilo luksa ji vachochi ombo khümvüka. 11 OPVÜI nte Potsow na ni wopan lo ntio nte pithakcho sana ji khi OPVÜI thünga; osi Levite tona amoatssi kyon nte yolo vamo jiang toha tukhu jilo thethuka. 12 "Nzyu ethüm thümo nte chonchorücho tarochia ji Levite, amoatssiden, opvüpoe n van jiang, osi emi jiang pia, tona okho akvü lona onte etsoyu jiang hunguka. Ntena hojito tssothaka na, 13 heto OPVÜI ezoa, 'Ntho tarochia jiang kvüwoe ha a ki valanchi n li, ana tarochia ji Levite, , amoatssi, opvüpoe n van osi emi jiang ni yizüng ephan pithaka. Tarochia tsükona ni yizüng jiang ana n mhecho osi n ngav n si. 14 Ana a nungra yutalo hoji tsoe n sihan; ana a n thono yutalo ana hoji a kina n khichuk; elani echüi than tssoa ana hoji n tsütsa. Ana ni yi engathaka OPVÜI. Ana tarochia shikhfü nina a pio jiang benphirathaka. 15 Ni ntho vanpheni na zechochia Israel jiang mmhayia, elani nina e motsüi thüngi phyochaki vayio ji esüa e pithako meta lizü eli meta shiha mmhayia.'

OPVÜI Kyon Jiang

16 "Nchüng OPVÜI nte Potsow na ombo yizüng jiang topvü engatale to nte ezoala, hoji tsükona nte lümbüm topvü na ombo yi engatava. 17 Nchüng ntena OPVÜI ji nte Potsow to khichothaka; ntena ombo yi engav phyochakthaka, ombo yizüng topvü benphiv toha phyochakthaka. 18 OPVÜI na phyochako ji esüa nchüng nte ji ombo kyonden to nte khichothaka, osi ombona ombo yi topvü engatale to nte ezothaka. 19 Ombona lyuyingcho jipo topvü yolo jipo tsü photsowo ji nte kümthukvü, osi ntena ombo mying thüngu osi phfiits son lithukvü. Ombona phyo chako ji esüa nteno ombo kyonden tssov."

Shikhfü Enioto 27

Potsow Yizüng Olong Lo Erancho

1 Jisülo jo Moses tona Israel esopvüiden to tssoe kyon jiang ezotacho, "Ana nchüng püngnoyi nte pio shiang topvü engatava. 2 Ntena tsüngon kvülo Jordan zhükhfü yakchia OPVÜI Potsow na nte pia vamo meta jilo rheyia sana hoji tsüngono olong tsüphov tara khi süporo na eyukra 3 hojiang poni püngnoyi shiang erankatava. Nte pyimtsümotsüi Potsow OPVÜI jina eli meta osi lizü meta nte pio jilo rheyithaka na, 4 osi Jordan pankawoe vanta na olong shiang ana nchüng nte ezoa esüa süporo na eyuki Ebal phunglani chümkachitava. 5 Yonjak ebensü na n tsyuka hamo long tüv khi thanphensa rontava, 6 ntio tssole ntena OPVÜI thanphen kvü lo nsüngrüa sana topvü olong n vanrohan omh khi nsüngrüvka. Hojiang poni erungthan jiang topvü thamka, 7 ntena hojiang poni khümshümta than jiang thamka osi hojiang tsota OPVÜI nte Potsow vanrhyu lona montsso pitavka. 8 Süporo na eyuko long jiang poni Potsow yizüng jiang yitsüng akvü ntssüng-rünga erankavka." 9 Jisülo jo Moses tona Levi pvüti jiang to nzo tssoe Israel kyon jiang topvü heto ezovka, "Israel kyonden ntena eno ndungi engatava, nchüng tsüngon lona benkae nte ji Potsow kyonden nte kümthaka; 10 hoji tsükona ana nchüng nte pio yizüng shiang engatava."

Jancho N zoji Rhiyirandanka

11 Jisülo jo Moses na Israel kyon jiang ezocho, 12 "Ntena Jordan pankae rheyi mmha nte randankata na pvüji shiangna Gerizim phunglani manguka: Simeon, Levi, Juda, Issakhar, Joseph tona Benjamin to. 13 Elani rhiyika yuta jilo jo pvüji shiangna Ebal phunglani manguka: Reuben, Gad, Asher, Zebulun, Dan tona Naphtali to. 14 Levite shiangna yilan shiang tüngkachia phyovka: 15 " 'Kyon ochona olong, otssüng osi yonjak na kisü nsüngrüi mphoa hotüv khüma sana Potsow na rhiyikatala; ntiotssole kisü ekhüm jo OPVÜI na tssakala.' "Hojithüng kyon topvü na, 'Amen!' to janlamka. 16 " 'Kyon ochona ombo opo osi oyo n kha-nyikra sana hoji pono Potsow na rhiyi randankatala.' "Osi hojithüng kyon topvüna, 'Amen!' to janlamka. 17 " 'Kyon ochona ombo phinakiren erü-ekük sephia sana hoji pono Potsow na rhiyikatala.' "Hojithüng kyon topvü na, 'Amen!' to janlamka. 18 " 'Kyon ochona mhyikjüng ji olan sulyuoe soa sana hoji pono Potsow na rhiyikatala.' "Hojithüng kyon topvü na, 'Amen!' to janlamka. 19 " 'Kyon ochona lankon lansi, opvüpoe n van osi emi-nloe jiang elan jiang khi siyia sana ji pono Potsow na rhiyikatala.' "Hojithüng kyon topvü na, 'Amen!' to janlam. 20 " 'Kyon ochona opo engh jiang thüngi rama tssoe opo yikrathuka na ji pono Potsow na rhiyikatala.' "Hojithüng kyon topvü na, 'Amen!' to janlam. 21 " 'Ochona ekümrümo thüngi rama tssoa sana ji pono Potsow na rhiyikatala.' "Hojithüng kyon topvüna, 'Amen!' to janlam. 22 " 'Kyon ochona oyuloe ndüng thüngi osi oyuloe thanpoe thüngi rama tssoa sana hoji Potsow na rhiyikatala.' "Hojithüng kyon topvüna, 'Amen!' to janlam. 23 " 'Kyon ochona ombo engh ji oyo thüngi rama tssoa sana hoji Potsow na rhiyikatala.' "Hojithüng kyon topvü na, 'Amen!' to janlam. 24" 'Kyon ochona mphoena omünghana sana hoji pono Potsow na rhiyikatala.' "Hojithüng kyon topvü na, 'Amen!' to janlam. 25 " 'Kyon ochona noying kyon lüngtha man mphoa orang khia sana hoji pono Potsow na rhiyikatala.' "Hojithüng kyon topvü na, 'Amen!' to janlam. 26 " 'Kyon ochona Potsow yizüng osi püngno jiang topvü n nga sana hoji pono Potsow na rhiyikatala." "Hojithüng kyon topvü na, 'Amen!' to janlam.

Shikhfü Enioto 28

Jancho Zoji Man Mmha

1 "Ntena OPVÜI nte Potsow yi enga ana ombo yizüng kvüta nchüng nte pia sana jiang enga tssona ombona limhalo jipo topvü pono tsüphokao nte kümthukvü. 2 "OPVÜI nte Potsow yi enga tona mmha shiang hetopvü nte echi tssovka. 3 "OPVÜI na nte yan jiang osi nte li jiang mmhayithukvü ka. 4 "OPVÜI na otsoeoro elümoto nte mmhayiv, osi joncho-rücho elümoto nte mmhyiv, elani olyu mangsü ha nte mmhayiv. 5 "OPVÜI na nte tsünghanro li jiang osi hojiang lona etsoyu methako jiang nte mmhayivka. 6 OPVÜI na nte elhicho topvülo mmha nte theyivka. 7 "Nte ri jiangna nte hayatathüng OPVÜI na nte ri jiang khyothechiv. Ontena lankvüa lona nte hav, tokhatola lankvü akvü lona ntena tsanravka. 8 "OPVÜI nte Potsow na nte elhi jianglo nte mmhayivka osi nte son jiang otssuk na hanpyingthukvüka. Ombona nte pia vamo meta jilona nte mmhayivka. 9 "Ntena OPVÜI nte Potsow yi engatana osi ombo yizüng jiang topvü ephan tssota tssona, ombona phyo ji esüa ombo kyonden nte kümthukvü. 10 To tssona limhalo kyon topvüna ombona nte ethüngchei ombo kyon nte tssothukala to chethev osi ontena nte kyuv. 11 OPVÜI nte Potsow na nte pyimtsümotsüi jiang piv phyochako meta jilona otsoeoro, tssiden, osi otssuk omüm elümoto nte mmhayivka. 12 Ombona potsüwoe ombo ejüeli ki jilona eryu jothuki nte elhi jianglo nte mmhayi khi nte khi jipopoe jiang norü-ronthuksi ntena jo onte thüngi enowo tüv liv meka. 13 OPVÜI nte Potsow na nte ji oyam phankaeden mekna esopvüiden nte kümthukvüka; osi ana nchüng ombo yizüng nte pia vamo shiang ntena enga tssona nteno olan tarolo mmha tssovka osi ebüp liv meka. 14 Hojiang yolo kvüwoe ha n ngav ti sitava osi thanpo Potsow benkata ti khümtava.

Jancho N zo Man

15 "Tokhatola ana nchüng ombo yizüng nte pio shiang ntena nnga tssona sükhying n mhom jiang nte jamvüka. 16 "OPVÜI na nte yan osi oli jiang rhiyikavka. 17 "OPVÜI na nte tsünghanro li jiang rhiyikavka osi jiang lona ntena etsoyu nsüngrüo jianglo nte rhiyikayiv. 18 "OPVÜI na etssorandankae otsoe oro tara tae nte mmhayiv, joncho rücho matarwothukvü osi mangsü jiang mataroa nte mmhayithukvü. 19 "Ntena okhe thecho topvü OPVÜI na rhiyikav. 20 "Ntena n mhom tssoe OPVÜI khaksia na OPVÜI na nte ji zakto n monthukthüng jo ntena tsso jiang topvülo tssorophyoro, hamahatük osi ezüp rhükav. 21 Ombona nochonori motsünga sülo motsünga to rheyithuki ntena rheyivsa vamo meta jilo ochia enhyokae rheyiv mek. 22 OPVÜI na katao nochonori rheyithuki ehüm osi era nte kathukvü. Ombona eng azüm osi ezhü etssov rothuki nte benro jiang roe nte siyiv. Epüp shiang ji nte eküm evanthüng jo lia vam. 23 Nti eryu ha jov meka osi liko pon ji yonjak to karaki siv. 24 Eryu ejov thung khorü erita tona hajang even to nte n chüthüng nandang vem. 25 "OPVÜI na nte ri jiang nte pono ekhyo piv. Ntena lankvüa lona onte hav, tokhatola ntena lankvü elümoto lona onte thüngina tsam, hojitoli ntena ntio ezüp ndukcho sana hojina limhatsü ekhentsüngu. 26 Nte chüana orae ekümrümo na nte müng ji tsov, osi ochina ha onte ephamo tüv n van. 27 OPVÜI na Ejip kyon jiang pono vela rothuko ji esüa nte pono ha rwothukvü. Ombona nte tsük jiang emho taena pyingthukvü. Nthük nrük na nte pyingu osi epov lanka liv mek. 28 OPVÜI na nte lümbüm monthukvü. Ombona mhyikjuk tona ochyuta to rothuku. 29 Engo lea ntena mhyikjung esüa ephophitav osi ntena nte lan ji ephochev mek. Ntena ntio elhia na mmhom elhichev mek. Yuta topvülo nte khangshia nte kyakthachiv, osi nte retsoyiv, tolea ochina ha nte nzam mek. 30 Ntena loroe engae valea kyonpoe na soa vam. Ntena oki tssov khatola jilo vanphyav mek. Ntena jününgrothi li jom khatola ntena tsophyav mek. 31 Nte ehungona nte mangsü jiangna tsanrov tolea hojiang so ntena tsophyav mek. Ntena zeta vana nte gadho jiang süsi yiv osi nte pilam mek. Nte olyu jiang nte ri jiang piv, khatola nte nzanchi ochia vam meka. 32 Ntena zeta vana nte tsokhying tsolo jiang sosi eziiden esüa amoatssi jiang thüngi piv. Engakvü nte mhyikna noa zechia eyilov khatola nte tsoeden jiang elani yiv meka. 33 Ntena esang mmoka joni vao benro jiang jipopoe na lhoe tsov osi nteno n tümjak na khangshi ezüp ji yaka ntia nte ejan liv meka. 34 Nte ezüp yakchia nchümri moni siv. 35 OPVÜI na nte jo jianglo enov osi emho n powo tüv khi pyingthukvü osi vela na ojoe na kvüri nandang nte eyukvü. 36 "OPVÜI na nte osi nte mesao jiang metapoe sosi yithukvü, ntena osi nte motsüi na n van hamo tüv metae. Hoji meta jilona ntena tssüng olong potsow benkatav. 37 OPVÜI na nte phanchio jilo evan jiangna nte sükhying ji zesi ngangtsünga ekhem, osi ontena nte yikvü emakav. 38 "Ntena khosha yinglea tara tae richov, ntiotssole khomung na nte li jiang tsoe siv. 39 Ntena jününgro chümi jonchev khatola orana wozhü jiang tsochi sisi ntena tssüngthi lhophyav mek osi tssüngthijü ha n yurhak. 40 Olive na nte li jianglo zav khatola ethi jiang vükhani siv osi ntena tsophyav mek. 41 Ntena tsokhying tsolo vam khatola nte ndüngo vam mek, ntiotssole oyam na morantsan tssoa evüngki sosi yirav. 42 Nte tssüng odung osi oyo-ohan topvü orana tsoe siv. 43 "Nte metalo jipopoe vamo jiangna etho khyongkata yisi nteno etho mona yiv. 44 Ontena orang nte nov khatola ntena jo onte enov ntia liv mek. Okhao tssoa ontena nte esapvüi kümvü. 45 "Epüp nungra shiang hetopvü nte pono rov osi nte n chürathüng jo liv, ntiotssole ntena OPVÜI nte Potsow yi n ngacho osi ombona yizüng nte pio jiang ntena n benphicho. 46 Hojiang jo nte pono osi nte tsoronichen pono Potsow yitsso nchünkhon chethephen ji. 47 OPVÜI na olan tarolo nte mmhayithukcho, khatola ntena lümbümi na longshyua ombo n penkao ji tsükona hojito tssocho. 48 Hoji tsükona OPVÜI na nte thüngi rothuko ori jiang ntena benkavka. Nteji wonton era, mpensü hungi n kav olan topvü lona nte n pentav siv. Nte n monrathüng jo OPVÜI na elümoto nte khangriv. 49 OPVÜI na limha chümina jipopoe sosi oyi nte rokathukvü, ntena oyi n tsio jipo jipopoeden. Ontena mungshitsü esüa nte pono eyukav. 50 Ontena ngaro eran ochi thüngi ha khonzan ejüv mek tolea tssolüp phyolüm kyonden tssov. 5i Ontena nte ekümrümo osi oli jiang tsov osi nteno khangtsüngi nte chüv. Ontena nte tsünghanro, tssüngthijü, olive thyujü, mangsü osi olyu ntia enhyoe nte vayiv mek, osi nte chürav. 52 OPVÜI na nte pia vamo meta jilo yantsü topvü ontena hae khyov, osi ntena longtsükata evamo pikhfü jiang topvü eyarae siv. 53 "Nte ri jiangna nte yan jiang hata na nteno tssikhang hakhang ekhenthao ji yakchia nte ngaro OPVÜI na nte pio jiang ntena tsotav. 54-55 Nte yolo elümoto tssochyu mochyui kyon jina mpato etsoyu ntsen yakchia ombo ngaro jiang tsov. Ombona ojenio tssolea, ombo nzamo engh ji osi ngaro enhyoe vamo jiang tia n pina tsov. 56-57 Nte yolo elümoto tssochyu mochyui eloe jina ovüngthüng jo ejüeli tsso jina olan tia n tsav rocho khatola jina ha hojito etssophyoa yiv. ori jiangna ompvü yan jiang hayatana tssikhang hangkhang lona ompvü ngaro vanpamo ji mphoena tsoe siv. Ompvüna ompvü nzamo orapvü osi ompvü ngaro jiang ochia n pina tsov. 58 "Potsow püngoyi shiang kako shilo erankao shiang ntena n benphi osi OPVÜI nte Potsow emhokthav mying ji n yikrachicho. 59 Ombona nte osi tsoronichen pono ekhenthao osi n powo nochonori rwothukvü. 60 Ntena vara ekhenthao Ejip metaena nduko jiang elani nte thüngi yithuklam, osi kvüthüng ha pov mek. 6i Ombona Potsow yizüng kako shilo n jücho vara osi nochonori ha rwothukvü osi nte monthukvü. 62 Nte ji oyaki shantio tata nte kümthuklea nte tara tae enhyokav, ntiotssole ntena nte OPVÜI Potsow yi n ngacho. 63 OPVÜI nte Potsow na kvüto nte thicherüchethukcho sana ji esüa ombona nte monthukvü osi nte yeswothukvü loha chokav ka. Ntena rheyivsa vamo meta jilona ombona monthuki nte sithukvü. 64 "OPVÜI na limha chümi na ochüm jana nzüroe nte siv, nte osi nte motsüi jiangna kvüthüngha n khümhancho potsow otssüng olong khümtav. 65 Ntena meta kvüloha noyinga vanchev mek osi nte meta ka to tsao tüv liv mek. OPVÜI na nkhenrak, eyilo n li, osi ekhen emhok na nte pyingthukvü. 66 Nte eküm jo yuta topvü lo ekyuetssina pyingu. Zümo eng ekyutssina nte pyingu osi echüv ekyuna nte pyingrhüv. 67 Ntena ntio hungana jiang nte kyua lümbüm thokthokvü. Enya akvü mmyu ji elaro yivo to nchümtav osi mmyu akvüto enya ji zakto yivo to nchümtav. 68 OPVÜI na orhungina Ejip metae nte yilanthukvü, ombona hoji nte n yilanthuk to phyocho khatola. Hojilo jo ntena nte ri jiang thüngi ezii esüa ntepopo nte yenhungu khatola ochinaha nte shiv mek."

Shikhfü Enioto 29

Moab Metae na OPVÜI na Israel Thüngi Ntsata

1 OPVÜI na Moab meta lona Israel jiang thüngi Ntsata methaki Moses pia kyon jiang thüngi ezothoko ji heto; shiang jo OPVÜI na Sinai lona ntsatathako ji ephalo picho. 2 Moses na Israel kyon topvü tsarhyui ezocho; "OPVÜI na Ejip mesao thüngi, osi ombo tsüphoeden jiang thüngi elani ombo meta lo ntio tssoyicho sana ji nte topvüna hungthaka. 3 Ntena ekhenthao vara jiang, chethev elhi jiang, osi OPVÜI na emhokthav tüv tsso jiang hungrathaka. 4 Tokhatola ombona nchüng tsüngon jana hojiang nte n chethethuka han. 5 OPVÜI na nte soa ntena lijüngi nzyu zhüro yentsata ha nte jokhüp osi mpensü jiang n rocho. 6 Ntena hümri hungi n tso, jününg rojü ha hungi n yu, tokhatola OPVÜI na ombo nte Potsow ji, toji nte chethethuku nte ethelan eli-i topvü nte benriyicho. 7 Osi etena meta shilo chiyile Hebron mesao Sihon, Bashan mesao Og to onina chiro ete thüngi rotacho. Tokhatola etena khyocho, 8 osi onte meta ji khi Gad tona Reuben to pvüji chiso tona Manasseh pvüji na chiso to jantaecho. 9 Hoji tsükona ntena ntio tssoa sana topvü lo mmhonthoku tsükona ntsata shi longtsüka lia engae benphitava. 10 "Nchüngo nteno nte OPVÜI Potsow vanrhyulo phanthi vanante topvü, nte esopvüiden, 11 eloeden, ngaroden, osi tsanthan kvüta nte thüngi vani otssüng ojü nte tssoyia sana jiang topvü OPVÜI vanrhyu lo vara. 12 Nchüngo nteno topvüna OPVÜI ntsata jilo rheyi hojina rüngwo ji ephan evam ntsata lo rheyivsala. 13 To tssona OPVÜI na nchüng nteji ombo kyonden to nte ntsakae ombona nte Potsow kümvü. Hojijo ombona nte, nte pyimtsümotsüi, Abraham, Isaak, osi Jakob to thüngi ntsatao ji ephanina. 14 OPVÜI na ombo ntsata osi jilo elhi jüwo jiang ji nte thüngi tae ntsata mek, 15 Ombona ete shilo mangi evamo shiang hetopvü thüngi osi ete tsoronichen n bukhamo jiang to topvü thüngi nchüng ntsata shi methakala. 16 "Ntena Ejip metae vamo ji tona ntena meta yakchia yia vamo meta shilo yentsav tojo kvütüv sana ntena ejyuchethaka. 17 Ntena onte etssakthao kisü, otssüng, olong, osi shona janti na nsüngrüo jiang hungthaka. 18 Nchüng shilo zae evan-eboe eloe osi wopan osi pvüji kvüwoenaha OPVÜI sisi jipopoe potsow yana yiv meka. Hojito etssov jo tssüngyingna odung mozhüm n mhom ejüo ekho tüv chenkav sünga to tssovka. 19 Nchüng shilo zae evan ochinaha ombona OPVÜI yizüng mmhom shiang zosi ombona lümbüm khünga tsani yilea ombo sükhying mmhomka to nchüma evan ti-jüthoka. Hojito tssocho jo nte mmhom, n mhom topvü nte monkham. 20 OPVÜI na hojitüv kyon jo nlan siyiv meka. OPVÜI na ombo lüm etsuk omi to tsso ji ombo kikavka, osi yizüng kako shilo ekyuv erani elio shiang topvü ombo lo khyingthoki ombo monthokuka. 21 Hojitüv kyon jo OPVÜI na Israel topvü thüngi ejyukaphen esüa kümthoku, osi OPVÜI püngno kako shilo ntsata jüwo jianglo ekyuv jüwo jiang topvüna ombo khyingthokvü. 22 "OPVÜI na nte metalo rhiyika rothoko jiang nte tsoronichen vanpam osi ekoni jipopoe to jiang na hunguka. 23 Oli jiang ji lijüng kümi olong osi oma kholong na pyingi siv, osi ntia benrochev meka osi ero tia zav mek. Nte meta ji Sodom tona Gomorrah to esüa, Admah tona Zebulun to OPVÜI lüm etsuk ekyi yutalo moni sithokvü ji esüa tssovka. 24 To tssona limhatsü na phyotav, 'OPVÜI na ntiolyui onte meta ji heto tssoyichola? Ntio tsükona heto omi kia lüm tsukchola?' 25 Hoji janlan jo, 'Ontena onte pyimtsümotsüi Potsow OPVÜI ochona Ejip metae na onte sochuki onte thüngi ntsata methakcho sana ji yesoyio ji tsükona. 26 Ontena ovüngthüng n khümhancho potsow khümta yicho, hojiang ekhümvü jo OPVÜI na onte khancho. 27 Hoji tsükona OPVÜI na ombo kyon jiang thüngi lüm tsuki kako shilo jüwo vara shiang onte metalo rothukcho. 28 OPVÜI na emhokthav lüm tsuki, onteji onte metae na oyingi na süchoki oyam metae thechi nchüng jana onte vanthukala.' 29 "OPVÜI na mphoe evao tüv ntiosana jo lia; tokhatola ombo yizüng jiang jo entsithukthaka, osi ete tona ete tsoronichen to na nchüngkhon enga benphiv lia.

Shikhfü Enioto 30

Mmhonlanthoku osi Mmhayiv lo Ethelan to

1 "Ana mmha tona rhyika to eni jilo ethüngi ekhiv nte pithaka. Shiang hetopvü tssoana osi OPVÜI nte Potsow na jipopoe yolo nzonroe nte vanthokwo jilo vana na ntena ana ethüngu nte pio jiang nchümchevka. 2 Nte osi nte tsoronichen na OPVÜI lo khophi oyi ana nchüng ntio yizüng nte pia sana jiang benphina, 3 tona OPVÜI nte Potsow na ntelo khonzan livka. Ombona jipopoe yolo nzithechi nte siwo jilona nte sochuklani nte mmhonlanthoku ka. 4 Nteji limha ehüm ekontso jiwoe mpato nte yithukcho tssolea OPVÜI nte Potsow na nte sochuklamka, 5 osi nte motsüi jiang na vanthako meta ji ntena hoe vanlamka. Osi ombona nte motsüi jiang na kvüthüngha n hunghamo tata ejüeli osi wokyong nte kümthoku ka. 6 OPVÜI nte Potsow na ntena lümbüm totona ombo nzamo tssoa osi meta jilo harishia evamo tssoa jancho ezo lümbüm nte theyivka. 7 Ombona rhiyika shiang topvü nte ri jiang kae sithoksi, 8 nteno ana nchüng yizüng nte pia vamo shiang enga nte benphithoku. 9 Ntena ntio tssoa sana topvülo OPVÜI na tssochyu mmhom nte piv; ntena otsoeoro elümoto vamvü osi tssiden elüm vamvü osi oli ronsyu rov. Ombona nte motsüi jiang mmhonithako ji esüa nte mmhonithoku, 10 tokhatola ntena ombo püngnoyi shikhfü niro erankao kako shilo jüwo jiang enga benphi nte lümbüm totona ombo piv lia. 11 "Ana nchüng nte pia vamo yizüng shiang jo elüm khüngcho mek; mekana ntena n tssochewo mek. 12 Hojiang ji oyak etssunga ntssonacho meka. Ntena, 'Ochona ehungo khi hansi joyi e engathoki etena hoji engao tssov la? to engao tüv liv meka.' 13 Mekana hoji jümang pankawoe licho mek. Küma ntena, 'Ochona jümang ji pankata chiwo khi hansi oyi engathoki etena hoji ephan tssovla? to engatao tüv liv meka.' 14 Meka, hojijo nte ndüngo lika. Ntena ntsia osi yizüng jiang ji enhüga lea phyocheta, hoji tsükona enga benphitava. 15 "Ana nchüng mmhom tona n mhom to ethüngu osi eküm tona echü to ethüngu nte pithaka. 16 Ntena ana nchüng OPVÜI yizüng nte pia vamo shiang enga tssona, ntena ombo nzana, oyi engayina osi ombo yizüng jiang benphina, nteji nte thicherüchev osi jipo tsüphov nte kümvü. Ntena rheyia vamo meta jilo na OPVÜI nte Potsow na nte mmhayivka. 17 Tokhatola ntena ombo yi n ngav osi ombo yi shiang n zoyina osi Potsow thanpo khümta yiana, 18 ana shilona nchüng nte ezoala n teji moni nte sithoku. Ntena rheyivsa vamo Jordan pankae meta jilo ntena sunga harishia vamvü meka. 19 Enhünga ana echü eküm tona mmha osi rhiyika tolo ethüngi ekhiv nte piala osi ana oyak tona liko to enhungpvüi tssothukala. Eküm ji ethüngi khitava. 20 OPVÜI nte Potsow nzan tava, osi ombo jancho zoa longtsükata vantava, to tssona ombona nte motsüiden Abraham, Isaak osi Jakob to epiv phyochako meta jilo nte osi nte tsoronichen na sunga harishia vamüka."

Shikhfü Enioto 31

Joshua na Moses Echungala

1 Moses na Israel kyon jiang elani ezolancho, 2 "Enhungo aiyo nzyu nzoasi mekyu tssothaka osi nte esopvüi n tssokhokvü sithaka. Hojilo ekata OPVÜI na aiyo Jordan pankav meka to a ezothaka. 3 OPVÜI nte Potsow na nte mhadungi na owo meta jilo vamo jipopoe kyon jiang rorüpi siv; osi ntena meta ji khiv, osi OPVÜI phyochak ephanina nte esopvüi jo Joshua tssovka. 4 OPVÜI na kvüto Amorite mesaeden, Sihon ha Og oni khyoe onte metaji roe siyicho sana ji esüa kyon shiangha roe siv. 5 OPVÜI na onte pono ekhyo nte piv, osi ana kvüto nte ezocho sana ji ephan ntena onte tsütsavka. 6 Tümkae lüm tssontava. Ti kyutava, OPVÜI nte Potsow na nte nzo tssovka. Ombona nte n zev siv mek osi nte sinkiv meka." 7 Jisülojo Moses na Joshua tsae Israel topvü mhadungo na ezocho, "Mhankata osi lüm tssona, OPVÜI na onte motsüi phyochak pio meta jilo nina kyon shiang sochukchivka. 8 OPVÜI na olan ni sovka osi ni ndüngo tssovka. Ombona ni n zev siv meka, osi ni sinkiv meka, lümbüm titeria osi ti-kyua."

Yizüng ji Nzyu Tiying Akvüto Khav

9 Hoji tsükona Moses na Potsow yizüng jiang erankae Levi pvüti ochoang pvüti Ntsata jiang ji ezev zikacho sana jiang tona esopvüi jiang to picho. 10 Ombona onte ezocho, "Nzyu tiying akvülo ochhi siyita nzyu, ranki tokhu jianglo, ntena sanrhyutae yizüng shiang ji owon chuka khatava. 11 Israel kyon jiangna khümphen meta jilo sanrhyuta thüng onte ezolo na khavka. 12 Eboe, eloe, osi ngaroden, osi nte yantsüi omoatssi vamo jiang topvü tsarhyua. Toli otsük akvüna zoe benphi OPVÜI nte Potsow yikrachia longtsüka lithoka. 13 Hojitolyui nte tsoronichen ochoangna OPVÜI yithen ji kvüthüngha n zohancho sana jiang na zov. Osi hojito tssona ontena Jordan pankae meta jilo vanathüng ji OPVÜI kyuchiv ntsiv."

Moses Thüngi OPVÜI na Thakchiyi Piala

14 Jisülo OPVÜI na Moses ezocho, "Nina enhungo sunga vamvü meka. Joshua tsae süranki sosi roa, tona ana ombo thüngi lanso rünyo pivka." Moses ha Joshua onina otale, 15 OPVÜI na eluk durhyu esüa süranki ji kipüngo ndungi vancho. 16 OPVÜI na Moses ezocho, "Nino n sungu ni chüv osi ni echüsüi jo kyon jiangna a n longtsüv ana nchüng pia vamo ntsata shi yesov. Ontena a sisi ana pio meta ontena rheyia vamo jilo potsow jiang khümta yiv. 17 Hojito tssoana ana onte thüngi alüm tsuki; ana onte siv küma, onte monkhamvü. Osi onte pono ekhentav vara rov osi ontena onte Potsow ana onte ndüngo n vamo jina hojito tssoala to nchümchev. 18 Tokhatola ana onte nzanchiv mek, ntiotssole ontena potsow thanpo khümta mmen tssoa yiv. 19 "Enhungo, okhen shi erankata. Osi ontena jancho n zo ji chekav esüa lithokvü onte shikae vata. 20 Ana onte pyimtsümotsüi ezothako ji esüa ana onte sosi hojilo rheyivka. Hojilo ontena etsoyu topvü hungi tsoa emathata vamvüka. Tokhatola ontena tsani potsow thanpo khüma yivka. Ontena a siv osi a ntsata ji yesov, 21 osi onte pono ekhenthao vara rov. Tokhatola okhen shijo denta vam osi onte ehungpvü esüa vam. Enhünga na, ana onte pio meta jilo n rheyithüng na ontena ntio nchümta vancho sana ana ntsia." 22 Hoji nchuk Moses na okhen ji erankae Israel jiang shikacho. 23 Jisülo jo OPVÜI na Nun tsoe Joshua ezocho, "Lüm tssona mmhanka vata. Nina kyon jiang sosi ana pio metae rheyiv ka osi ana ni ndüngo tssovka." 24 Moses na Potsow yizüng jiang ji ntia n khacho na kakolo erankae vacho. 25 Ombona eranrathakle OPVÜI Ntsata Bakos ezeiden Levi pvüti jiang khelo theyicho, 26 "Potsow yizüng kako shi khi OPVÜI nte Potsow ntsata Thephen ji Bakos ji ndüngo vata, tona kyon jiang ehungpvüi tssoa lia vam ka. 27 Onteno kvüta lüm khünga oyam panlana sana ana ntsia. A eküm evanthüng ontena OPVÜI panlancho hoji esüa a chüthakana kyungkata tssov. 28 Nte pvüji esopvüi topvü osi tsüphoe topvü a mhadungo sanrhyutava, tona ana shiang onte ezovka. Ana a ehungpvüi tsswothukvü oyak osi liko shiang tsavka. 29 A chüthakana kyon jiangna nthae kümrae ana püngno jiang n ngav siv to ana ntsia. Osi yuta etsao jilo jo ontena vara ndukvü, ntiotssole ontena OPVÜI na tango ji tssoe OPVÜI lüm tsukthukvü."

Moses Khen

30 Israel kyon tOPVÜI sanrhyui engata vana Moses na okhen ji heto engocho. (Yilan 32 lo lio ji)

Shikhfü Enioto 32

Moses Khen Ji

1 "Liko osi woyak, a yi shiang zotava, ana ntio phyoa sana tüngochüa engatava. 2 A püngoyi jiang eryu esüa joe likoe yentsso renkav. A yi jiangna odung eniro lo eryu jokachoto tssov, osi eroyo enyipvü lo eryu enyipvü jokacho to tssov. 3 Ana OPVÜI mying thünga, osi ombo kyon jiangna ombo etho tsüpho ji phyotav. 4 "OPVÜI jo ni nkochepvüi etho tsüphov, osi olan topvülo njüm osi ntsa; Nte Potsow jo longtsüka lia osi ntsa; Ombona elamo osi ntssüngo ji tssoala. 5 Tokhatola nteno longtsüka n liden, osi ombo kyonden etssov etüm n liden, mmen etssoe osi kyakthechi jipo. 6 Ntena OPVÜI jo hetowoe na tsütsatake, O zhüvae, osi nchümri nli kyonden? Ombo nte opo, nte lyuyingpvüi ji, ombona jipo tsüphov nte kümthukcho. 7 "Yuta sunga yithako ji zi zetava; kvüto tssoa rocho sana nte opo jiang engae zetava, eson jiang thüngina kvüto tssoa rochosana engae khitava. 8 Ntssontso Potsow na jipo topvü onte meta kokae picho; kyon jiangna kvülo vam sana ombona zikae picho. Ombona jipo akvü potso motsünga picho, 9 tokhatola Jakob tsoronichen jiang jo ombona ombobo ethüngi vayicho. 10 "Ombona onte ji lijüngi khyuta hungcho, mbungna echüko yingsi yinglo metae sanphita hungcho. Ombona onte nkochei ombobo nkoa esüa onte nkohachecho. 11 Mungshiro na woro jiang epyav shika to, osi ombo echo jilo eshonthuka to, OPVÜI na ha Israel jiang n lungthukvü sayacho. 12 OPVÜI taena Potsow thanpoe n thena ombo kyon jiang socho. 13 "Ombona onteji meta ntssomo jiang sathukcho, osi olina ntio chiyiasana hoji ontena tsotacho. Ontena olong yolona ora tssakijü hungcho; onte olive dung jiang olung poni mpato zacho. 14 Onte mangsü osi nyanyan jiangna shyurojü etsson picho; ontena olyu, mangsü osi nyanyan mmhontsowo jiang vancho, hümri osi tssüngthijü mmhontso jiang licho. 15 "OPVÜI kyon jiang eliden kümcho, tokhatola, OPVÜI thüngi n khyingtacho; onteno beleta osi etsoyu na mmhitsüngcho. Ontena onte lyuyingpvüi Potsow sinkicho osi emhokthao onte shanchopvüi ji khoe sicho. 16 Onte kisükhüm jina OPVÜI ji omhyik rakithukcho; ontena n mhom tsso jina ombo lüm tsukthukcho. 17 Ontena potsow meko jiang thüngi erungthan pitacho, hojiango onte motsüi na n tsihancho, osi Israel na kvüthüng ha n khümhancho potsoden, IS Ontena onte Potsow etho ejüo shanchopvüi ji mhechocho, eküm onte pio ji mhechoe sitacho. 19 "OPVÜI na shi hungale, ombo lüm tsuki ombo tsolo osi tsokhying jiang khoe sicho. 20 Ombona phyocho; 'Ana enhungo onte nzanchiv meka; osi kvütüv onte kümsana ana zevka, onteno lüm ekhüng, longtsüka nlio kyonden. 21 Hoji tsükona ana jipo motsünga khi onte lüm tsukthukvüka, ontena potsow to tsatao potsow meko jiang thüngi omhyik a rakithukcho. Hoji tsükona ana jipo motsünga khi onte lüm tsukthukvü ka; ana onte ji zhüva jipo tüv khi onte jüponthukvü ka. 22 A lüm etsuk na omi esüa tssovka osi limha lo ntio liana rungi sivka. Omi jina lichung jani phunglan ying jiang rungu ka. 23 " 'Ana onte thüngi ochüm n lio tssoro phyoro rwothukvü osi lotssi topvüto onte thüngoe yonphiv. 24 Onte ji ekhang osi nochonori lona chürav; onte ji nochonori ekhenthav lona chürav. Ana ora ekümrümo khi onte rokathukvü, osi nrü n mhom khi onte njüthukvü. 25 Ritsso na lantsüi echü sothev; ekhen emhok na oki jiang rhakvü. Loroe osi khyingroe jiang chürav; ngaro osi esoneran jiang ha enhyokav meka. 26 Ana onte ji totona monthuknrüngi sithukvüka, to tssovo ochina ha onte nchümchev mek. 27 Tokhatola onte ri jiang khi a kyon khyothechicho to kangtsüa a nvan thukhungala, ntiotssole ana onte monthukcho kha onte ri jiangna mek.' 28 Israel jo nchümri n li jipo; onteno ntia nchümri n lirüng. 29 Onteno ntiolyui oyam n khyocho sana onte popo n tsio jipo; ntio tssoa yicho sana ontena n ngathecho. 30 Ntio tsükona wothüng motsünga ji tsüka taena khyochola, osi wothüng taro ji otsük eni taena khyochola? OPVÜI, onte Potsow na onte siwo jina; onte Thotsü Potsow na onte sithaka. 31 Ori jiangna ha onte potsow jiango etho mataroa to ntsia, Israel Potsow esüa etho n jü to ntsia. 32 Onte ri jiango, Sodom Gomorrah esüa ntha, osi tssüngthi mozhü n mhom ethio jününgro esüa tüv. 33 Osi nrü mozhü na tssüngthijü nsüngrücho tüv. 34 "Onte ri jiangna ntio tssocho sana, OPVÜI na nchümchetala; osi ombona onte khangriv tsükona yuta eben ji nhyaka vanala. 35 OPVÜI na onte nnlilana onte ezüpthukvü; onte elungu yuta ji rov; onte monthukvü yuta ji enhyanthaka. 36 Kvüthüng onte etho monasana, OPVÜI na ombo kyon jiang shanchov. Ontena ntia nzanchi n liv vanathüng, ombona onte khonzam. 37 Hojithüng OPVÜI na ombo kyon jiang engav, 'Ntena longtsükao potsow jiango kvüi vanrachola? 38 Ntena nte than ethyu jiang khi onte süphicho osi tssüngthijü yuthuka onte thancho. Onte khi oro enhünga nte nzanchithuka, osi onte lo tsankatava. 39 " 'Potsow ji A, osi A tae; thanpo potsow jiango otsotso mek. Ana chüthukala, osi eküm piala, ana meyanthuksi ana emiyiala, osi ana ntio tssoa sana ochinaha n panlanche. 40 A ji kvüto eküm evamo Potsow ji tssocho, sana ji esüa ana a khe yonchi echümala, 41 Ana a yonri ji ntssae, ntsanrük lithukvü lo tsütsav. Ana a ri jiang nnlilam, osi a tssako jiang ezüp piv. 42 A lotssi lona onte ejen zhüchov, osi a panlamo jiang topvü a yonri na chüthukvü. Athüngi khontae ochia ana enhyokathukvü meka, tssatsso jiang osi evüngki vamo jiang mpato chüthukvüka.' 43 "Jipoden, ntena OPVÜI kyon jiang omying thüngitav na lia, onte lüngthao jiang topvü ombona ezüpthukala. Ombona ombo ri jiang nnlilana la, osi ombo kyon jiang mmen jo siyiala." 44 Moses ha Nun tsoe Joshua onina okhen shia khae Israel kyon jiang engathukcho.

Moses Ndungtssong Okhao Jiang

45 Moses na Potsow püngnoyi jiang kyon jiang pithakale heto ezocho, 46 "Ana nchüng yizüng nte pio shiang engav ti mhechotava. Nte ngaro jiang thüngi ha shiang khae ezotasi onte khi Potsow püngnoyi jiang topvü longtsükata engathuka. 47 Püngnoyi shiang jo ejüng tüv mek; tokhatola nte eküm ji shilo jüa. Shiang enga benphitava, tona ntena Jordan pankae rheyivsa vamo meta jilo harishia vamvüka." 48 Hoji tsüngono OPVÜI na Moses ezocho, 49 "Jeriko zechilo Moab metae Abarim phunglan jilo woa; osi Nebo phunglan jilo ehungo ana Israel kyon jiang pivsa evamo Kanaan meta ji chani zeta. 50 Ni jenio Aaron ji Hor phunglani na chüo ji esüa niha Nebo phunglani na ni chüvka, 51 ntiotssole ninita na Israel jiang mhadungo na a n longtsükav etssophyotacho. Ntena Zin lijüng ndüngo Kadesh yantsü ndüngo Meribah jü jilona nina kyon jiang mhadungona a mying a mmenicho. 52 Nina meta ji ekoni na zechivka, tokhatola ana Israel pia vamo meta jilo jo nina rheyiv meka."

Shikhfü Enioto 33

Moses na Israel Jipo Jiang Mmhayiala

1 Potsow kyon Moses na ombo n chüthüng Israel jiang mmha randankao ji shiang. 2 OPVÜI na Sinai phunglani na chirocho, Ombona Edom ponina eng esüa chiroe, Paran phunglani na ombo kyon jiang pono onkacho. Ombo ndüngo lanben othüng taro sosi, ombo khe amimoe na milon bensi chirocho. 3 OPVÜI na ombo kyon jiang nzanala osi ombo kyon jiang nkochetala, hoji tsükona etena ombo jolo epyakthei, ombo yi jiang engatala. 4 Moses na epio yizüng jiang etena engatala, osi jiang jo ete jipo ejüeli tsentssü ji. 5 Kvüthüng Israel pvüji jiang osi, esopvüi jiang sanrhyutacho sana, OPVÜI na ombo kyon jiang mesae kümcho. 6 Moses na Reuben pvüji tsükona heto phyocho: "Reuben pvüji ji wozanro tssolea, kvüthüng ha ti-monthuka." 7 Ombona Juda pvüji tsükona phyocho: "OPVÜI, ontena nzanchile to randamo ji engayaia. Onteji pvüji thanpoe jiang thüngi mmyantalania, Onte tsükona nina rotayia OPVÜI, onte ri jiang mhadungona onte nzanchia. 8 Ombona Levi pvüji tsükona phyocho: "OPVÜI ni lüm erüng ji phyalu yakchia ehungthuka. Osi ni longtsüka phajae Levi jiang yakchia e ntsithuka; Nina Massah lona ojang onte tssocho, Osi Meriba jü lona ntsaka to onte ejyuchecho. 9 Ontena opvüpoe, ojenio osi otsoero , thüngina jo ni thüngi tsüphowo longtsükacho, Osi ontena ni yizüng jiang engae, Ni ntsata jiang longtsükata vacho. 10 Ontena ni kyon jiang ni yizüng engav püngnov; Osi ontena ni thanpheni othan piv. 11 OPVÜI onte pvüji etho ji rankav lo nzanchia: Ontena ntio tssoa sana jilo emathayia. Onte ri jiang topvü rorüpi siyisi, Onte ti-phanthilanthuka." 12 Ombona Benjamin pvüji tsükona phyocho; "Shijo OPVÜI na nzana nkohao pvüji. Ombona eng totona onte nkohoala, osi ombona onte yolo vanala. 13 Ombona Joseph pvüji tsükona phyocho, "OPVÜI na onte meta jilo eryu jothoki, mmhayithuka Osi lichungi na ojü buki mmhayithuka. 14 Onte meta ji engna mhenicho tssüngthi mmhayithuka, osi oküm akvü tssüngthi mmhontsov khi mmhayithuka. 15 Onte motsüi phunglan jiang ji tssüngthi mmhontsowo na pyingthuka. 16 Onte meta ji mmhom topvü khi pyinghtuka, OPVÜI ochona mikio ranuk lona nsancho sana, hoji mmhon khi meta ji mmhayithuka. Shiang mmha shi Joseph pvüji lo lithuka, Ntiotssole ombo ojenio jiang yolo esopvüi ji ombo. 17 Joseph jo tssibung etho tata jüa, Osi mukyulu ejü etho esüa hana. Ombo ejü jiango Manasseh na wothüng to tsaoji Osi Ephraim na wothüng taro to tsatao ji, Ombona ejü jiang khi jipo jiang shüngala, Osi limha chümi khyanchi onte siala." 18 Ombona Zebulun tona Issakhar to pvüji tsükona heto phyocho: "Zebulun jiangji onte jümangi shisho jianglo mmhayithuka, Osi Issakhar ki jilo mmha rankayia. 19 Ontena onte phungalan jilo metapoe kyonsothetala Osi jilo othan elanthao jiang thanala. Ontena ejüeli jiang jümangi na hungala Osi jüran dunga hajang jiang lona hungala." 20 Ombona Gad pvüji tsükona phyocho: "OPVÜI ochona onte meta ji tsükayicho sana omying thüngia. Gad na hengho esüa okhe mekana Kvüritssan shaki siyiv nhyaka vanala 21 Ontena meta jilo mmhontsowo ji onte ejan tssoa khiala; Onte ji esopvüi ejan onte picho. Israel esopvüi jiang etssirhyuathüng, Ontena OPVÜI yizüng osi shikhfü jiang engacho." 22 Ombona Dan pvüji tsükona phyocho: "Dan jo hengho-ro ka; Ombona Bashan lona tsukchukala." 23 Ombona Naphtali pvüji tsükona phyocho: "Naphtali jo OPVÜI ematha mmhon jina tssochyua onte mmhayicho; Onte meta jo Galilee jümang lona benkae jolowoe jana joyicho." 24 Ombona Asher tsükona phyocho: "Asher jo pvüji thanpoe jiang lona kyongka mmhayicho. Ombo ojenio jiang yolo chokatsowo ji kümthaka, Osi ombo meta ji olive dung na phyingthuka. 25 Ombo yantsü jiang ji yonjak hankan na nkothuka. Osi ombo yuta topvülo nkoho lia noyinga vanthuka." 26 Israel kyonden, nte Potsow esüa Potsow n van, ombona phfütsson lona oyak dunga sanphiala, osi eluk jiang yakchia sanphia nte nzanchilo roala. 27 Potsow jo yuta topvülo nte nkohae tssoa vanpvü; ombo kümali evon jiang khi etho nte piala. Ntena khochiathüng ombona nte ri jiang phani nte siyicho, osi onte topvü monthukle to nte ezocho. 28 Hojito Jakob tsoronichen jiangna noyinglo vanala, oyakina yentsso joe liko etsomo osi tsünghanro tona tssüngthijü to pvülyuo meta jilo, noyingroa vanala. 29 Israel nino kvüta ematha licho ato! Kvüloha ni esüa OPVÜI na, shanchowo jipo n van. OPVÜI na ombobo ni tsung otsso yonri tssoa, ni nkocheta ekhyo ni piala. Ni ri jiangna khonzan chona rov, osi nina onte sümroe siv.

Shikhfü Enioto 34

Moses Chüo Ji

1 Moses na Moab hayi na Nebo phunglani, Jeriko engkhfüwoe Pisgah phunglani chungocho, osi jilo OPVÜI na metaji topvü ombo ejücho: Gilead meta lona benkae khümkiwoe Dan yantsü jana; 2 Naphtali meta topvü osi Ephraim tona Manasseh, Juda meta lona engrhewoe Mediterranean jümang; 3 Juda meta jolowoe; osi Zoar lona mitssüngyo yantsü Jeriko jana hayitsü ji to. 4 Jisülo jo OPVÜI na Moses ezocho, "Shijo ana Abraham, Isaak osi Jakob to thüngi onte tsoronichen jiang thüngi piv phyochako meta ji. Ana ni hungthukthaka, tokhatola ana jilo ni rheyithukvü meka." 5 Hojito OPVÜI nri Moses ji OPVÜI na phyoe vao ji esüa Moab meta lona chücho. 6 OPVÜI na omboji Bethpeor yantsü zechilo Moab hayitsü jilo ombo shothecho, tokhatola nchüng jana meta kvülo ombo shothecho sana mekata jo ochina ha n tsi. 7 Moses jo chüathüng nzyu nzoasi mekyu tssocho; ombo nchünkhon kheti etho chücho, osi ombo mhyik jiangha mmhompvü na chücho. 8 Israel kyon jiangna Moab hayi lona ombo echüo ji tsüngon thümro nongrata müngyanchitacho. 9 Nun tsoe Joshua jo nchümri mmhom na pyingcho, ntiotssole Moses na ombo echung ombo ethüngchecho. Israel kyon jiangna Joshua yi engatacho osi OPVÜI na Moses yakchia yizüng epio jiang topvü enga benphitacho. 10 Israel lo Moses esüo tüv zenkhying kvüthüng ha n vanhan, OPVÜI na ombo thüngi tontüng jahtacho. 11 Opvüi na Ejip mesao, ombo tsüphoeden osi meta jilo kyon topvü hungthukvü Moses yakchia chethemothev tsso jiang esüa zenkhying ochina ha n tssohan. 12 Moses na Israel topvü mhadungo elhi tsüphov osi ekhenthav tsso jiang esüa zenkhying ochina ha n tssochehan.

Joshua 1

Potsow na Joshua Thüngi Kanaan ji Khyole to Yizüng Piala

1 OPVÜI phajae Moses ji chücho sülo Nun tsoe Joshua, Moses nzanchia eroji thüngi OPVÜI na ezocho, 2 "A phajae Moses ji chüthaka. Enhungo nina Israel jiang sosi ana onte pio meta jilo rheyiv tsükona methaki Jordan pankae rheyitava. 3 Ana Moses ezothako ji esüa ana ni osi kyon jiang thüngi ntena yakchiv sa evamo meta ji topvü nte pithaka. 4 Nte erü ekük jo, jolowoe lijüng jilona khümkiwoe Lebanon phunglan jiang, engkhfüwoe Euphrates zhükhfü jiang lona Hittite meta ji yakchia oyi engrhewoe Mediterannean jümang nandang tssovka. 5 O Joshua, ni evanthüng jo ochinaha ni khyov meka. Ana Moses thüngoe theo ji esüa ni thüngoe tssovka. Ana yuta topvü lo ni nzo vamka; osi ana kvüthüng ha ni sinkiv meka. 6 Mhankae lüm tssona vana, ntiotssole ana onte motsüi jiang ezowo meta jilo rheyiana Israel jiang nina sovka. 7 Mhankae lüm tae tssona osi a phajae Moses na ni pio yizüng jiang tüngochüa benphia. Nina yizüng jiang motsünga tia ti-lhasana benphia tona nina kvümoe woana ekhyo hunguka. 8 Nte ekhüm topvü lo yizüng jiang khatav ti-mhechotava. Yizüng jiang zümo eng kha osi jilo erancho ntia tikhachona benphitava. To tssona nte tssochyu-mochyua wov osi ekhyo hunguka. 9 Ana mhanka osi lüm etsson vale to ni ezowo ji timehchoa. Tikyua osi lüm tiesuka, ntiotssole ni Potsow OPVÜI A, shina nina kvüi woana ni ndüngo vamvü."

Joshua na Kyon Jiang Yizüng Piala

10 Tole Joshua na esopvüi jiang ezoa owo kyon jiang ezothukcho, 11 "OPVÜI nte Potsow na nte pia vamo meta jilo rheyiv tsüngon ethüm tae lika etsoyu tara methakta vantava." 12 Joshua na Reuben pvüji ji, Gad pvüji tona Manasseh pvüji chiso to thüngi ezocho. 13 "OPVÜI phajae Moses na nte ezowoji nchümchetava, OPVÜI nte Potsow na Jordan engkhfüwoe meta ji nte vanphen tssov nte piala to nte ezocho. 14 Nte engh jiang, ngaro jiang tona nte tssiden jiang to shilo vanthuka osi nte rasan kvüta na ritssolo ewov pipothakcho sana jiango Israel thanpoe jiang vüngina khoe owo Israel jiang na 15 Jordan engrhewoe OPVÜI na pio meta jilo n khothethüng nandang rakonia nzanchia vamka, Hojito ombona Israel jiang nkoyae noyingthukthaka na nteno elani oyi Jordan engrhewoe OPVÜI phajae Moses na nte pio shilo vani sikhuka." 16 Onte na Joshua janlancho, "Nina e zowo jiang topvü ena tssovka, osi nina kvüwoe eothuka na wovka. 17 Ena yuta topvülo Moses yi engayio ji esüa ni yi engavka osi OPVÜI ni Potsow na Moses ndüngo vamo ji esüa ni ndüngoha vanthokvü ka! 18 Ochona ni yizüng ekhirana sana osi nnga sana chüthoki sivka. Mhankata osi lüm tssona!"

Joshua 2

Joshua na Jeriko lo Chepyim Wothukala

1 Jisülo jo Joshua na Akasia nchenphen jilona otsük eni ethüngche Kanaan meta ji chelo, osi opvü tssoa Jeriko yantsü ji chelo wothukcho. Onina yantsü jilo owo lonsülonphyoe eloe tsüka Rahab ki nchentacho. 2 Israel kyon chepyim Jeriko lo oro vana to Jeriko mesao na zoe, 3 Rahab thüngi oyi yencho: "Niki kyon nchemo jiango Jeriko yantsü shi chelo rochoka! Onte sosi chiyia!" 4-6 Ompvüna janlancho, "Kyon ochoang sana aki jo rochoka," "Tokhatola onteji kvüina rocho sana jijo ana n tsi." Ontena eng erhe yutalo pikhfü n khanthüng na kvüi sana yitacho. Ontena kvüi yitacho sana ana n tsi, khatola nina enhünga phana tssona phayav tssov." (Jithüng jo Rahab na oni ji phfüki chungithoki oying na shazhüi mphoe vanthukcho.) 7 Mesao rasan jiang na yantsü pikhfü ji khani sisi khochuki chiwocho. Ontena Israel chepyim jiang yanta Jordan kyakao lan ji nandang chivotacho. 8 Chepyim onina n yipthüng Rahab na phfüki ehungo oni ezocho, 9 "OPVÜI na meta shi nte pithaka to ana ntsia. Meta shilo kyon otsük akvüna eneta nte kyuala. 10 Ntena Ejip lona yiathüng OPVÜI na jümyon jümang ji kyingthuko ji ena zothaka. Ntena Jordan engkhfüwoe Amorite mesao Sihon ha Og oni lüngthao jiha ena zothaka. 11 Ena hoji zopvüto ekyutsüngcho osi nte tsükona e lüm etsson topvü monthaka. OPVÜI nte Potsow jo oyaki osi liko shilo Potsow. 12 Hoji tsükona ana kvüto nte kyochithakcho sana ji esüa a wopan thüngi a nzanchitav to ombo myingona echümchak apitava, osi ana nte longtsükao tüv chekav apitava. 13 Ntena apo osi ayo, apyaeden osi yeni jiang tona onte wopan topvü to nkochev to phyochak a pitava! E ti chüthuktava!" 14 Kyon jiang na ompvü ezocho, "Ena phyo ji esüa ena n tssoana Potsow khi echüthoka! Osi ena ntio tssoa vancho sana jiang nina oyam e n zoyina, kvüthüng OPVÜI na meta shi epiasana ni wopan jo nte nkohavka." 15 Rahab jo yantsü ji pikhfü lo oki tssokae vamo jina ompvü na wozhü khi süngchochi bani ji mmyia opomoe chiyithukcho. 16 Osi ompvüna oni ezocho, "Phunglanro metaji yi sitava, mesao kyon jiang na nini rhümav ka. Ontena kholani n yithüng jo jilo tsüngon ethüm aria mphoe vantava. Tosi jisülo jo nte eyi yitava." 17 Onina ompvü ezocho, "Nina e phyochakthuko ji ena vavka, 18 tolea nina heto tssov shikhvü, ena nte meta shi ori tssoa na nina evachochio kipüngro jilo sümyon ntssükae vata. Tosi nipo, niyo osi ni pyae jiang osi wopan topvü ni ki vanrathuka. 19 Ocho na hapoe chiroa sana ombo chülea ombo pono tae, oyi n li; tokhatola ni nzo kipüngi evan ocho sana meyancho jo epono tssov. 20 Tokhatola ena ntio tssoa yia vancho sana ji nina oyam ezocho jo nina ephyochakthuko shiang ena benphiv meka." 21 Ompvüna oyi ji khichoa onte yithukcho. Onte yithakale ompvüna kipüngro mekana kherüki jilo sümyon ji shenkae vacho. 22 Osi chepyim oni jina phunglanro jilo owo mphoe vantacho. Mesao wworo jiangna tsüngon eni ethüm yanta ha n hungwo jina elani Jeriko lo kholani yitacho. 23 Tole chepyim onina phunglani na joyi, zhükhfü ji yakchia Joshua thüngi yitacho. Osi ntio kvüto tssocho sana topvü onina Joshua ezotacho, 24 osi onina phyocho, "Meta ji OPVÜI na epithaka to ji etena mmhona ntsithaka. Meta jilo kyon topvüna ekhentsünga ekyuta vana."

Joshua 3

Israel Jiangna Jordan Pankatala

1 Ojyuato enyathüng jo Joshua tona kyon topvü tona nyazüngi na phanthi Akacia nchenphen lona khochi Jordan lo owo zhükhfü ji pankav tsükona ncheni vantacho. 2 Osi tsüngon ethüm sülojo esopvüiden jiang na nchenpheni evan topvü 3 heto ezocho, "Pvüti jiang na OPVÜI nte Potsow Ntsata Bakos ji ejümtasi yakchiana nchenphen eseni onte phana wotava. 4 Ntena meta shilo n rohan küma onte na olan ji nte ejüvka. Tokhatola Ntsata Bakos ji ndüngo jo ti-otava, tolea kilometre bena sülamoe na vantava. 5 Joshua na kyon jiang ezocho, "Ojyua Potsow na nte yolo chethemothev elhi tssov saka, nte bobo ntssüngchetava." 6 Jisülo jo ombona pvüti jiang ji Ntsata Bakos ji bentasi kyon jiang mhadungi na yita vanle to ezocho. Tole ontena hojito tssocho. 7 OPVÜI na Joshua ezocho, "Ana nchüng ntio tssoasana ji yakchia Israel kyon topvüna ni ji kyon tsüphoe tsüka to ni chethevka, osi ana Moses thüngoe tssoji esüa ni ndüngo tssoala to ontena engathevka. 8 Ntsata Bakos ejümo pvüti jiang ji zhükhfüi khothei jürani mangi vanrale to ezoa." 9 Jisülo jo Joshua na kyon jiang ezocho, "Sena oro OPVÜI nte Potsow na ntio phyov sana ji engatava. 10 Ntena khochia na ombona Kanaan kyon jiang, Hittite kyon jiang, Hivites jiang, Perizzite jiang, Girgashite jiang, Amorite tona Jebusite jiang to phani sivka. 11 Kvüthüng limha topvü Potsow ji Ntsata Bakos jina nte mhadungina Jordan zhükhfü ji yakchia sana eküm evamo Potsow ji nte ndüngo vana to ntena ntsivka. 12 Israel pvüji akvü lona tsük tsük, ethüngi otsük taro eni ethüngcheta. 13 Kvüthüng limha topvü Potsow Ntsata Bakos ji pvüti jiangna ejümtasi ojüi khotheta sana Jordan jü jina n tzüv siv osi ojü tzüa vamo ji meta motsüngalo tzsürhyui siv." 14-15 Yuta jijo liri yutalo tssocho osi zhükhu ji phyonchüa tsüa vancho. Kvüthüng kyon jiang na Jordan ji pankav tsükona khochicho sana pvüti jiangna onte vüngi na Ntsata Bakos ji ejümtasi khochicho. 16 Pvüti jiang na ojüi khothepvü ojü jina omhawoe Zarethan yantsü Adam jilona tüngchaki vani sicho. Ojü ji echü jümangoe tsütheta vamo ji esani sisi Israel jiang na Jeriko ndüngo na zhükhfü ji yakchicho. 17 Kyon jiangna likying ji yakchiathüng pvüti jiangna Ntsata Bakos ji ejümtasi kyon jiangna n yakchi thüng nandang jo zhükhfü lungi likying jilo mangi vantacho.

Joshua 4

Nchümche Long Chümtacho

1 Israel jipo topvüna yakchithakale OPVÜI na Joshua ezocho, 2 "Pvüji akvü lona tsük-tsük ren otsük taro eni ethüngcheta, 3 osi zhükhfü ji lungi pvüti jiangna mangi vamo jilona olung taro eni khyokatale to ezoa. Olong ji bentasi oyi ntena nchüng zümo kvülo nchenta sana jilo vatale to ezoa." 4 Tole Joshua na otsük taro eni ethüngcheo jiang tsae ezocho, 5 "Jordan zhükhfüi OPVÜI Ntsata Bakos ji mhadungo wotava. Nte otsük akvüna Israel pvüji akvü tsükona olong motsüngtsüng epvüi ejümkachi bentava. 6 OPVÜI na ntio tssothakcho sana jiang nchümchephen jo olong shiang tssov ka. Osi ochyu-ovüngi nte ngaro jiangna olong shiang yichak nte enga na, 7 OPVÜI Ntsta Bakos jina zhükhfü ji yakchiale Jordan jü jina n tsüv esani sicho to ezovka. Osi shilo ntio tssocho sana jiang ji olong shiangna Israel jiang ji nchünkhon nchümchethokvüka." 8 Kyon jiang na Joshua yi engatacho osi Jordan lungina olong taro eni Israel pvüji akvü thung khyokae hansi oyi nchenpheni vatacho. 9 Joshua naha pvüti jiangna Ntsata Bakos ji ejümtasi zakachi vamo zhükhfü lungjüng jilo olong taro eni chümkachicho. (Olong jiango enhüngalea jilo lira) 10 OPVÜI na Joshua ezoa kyon jiang na etssov pio jiang n tssorathüng jo pvüti jiangna zhükhfü lungi zakachipvü vantacho. Shijo Moses na yizüng pi ntsae vacho. Kyon jiangna tsütsoa zhükhfü ji pankatacho. 11 Kyon jiangna juran pankae vanthakale pvüti jiang na vüngsi Ntsata Bakos ji bentasi jüran esanawoe chiyitacho. 12 Reuben pvüji kyon, Gad kyon tona Manasseh pvüji chiso to jo Moses na ezoji ephan ritssoeden tsso jina kyon jiang vüngina khochicho. 13 OPVÜI vanrhyu lona ritssoe wothüng zhüro harüma na zhükhfü ji pankae Jeriko ndüngo hayitsü jilo chiyicho. 14 Hoji nchuk elhi jiang zesi kyon jiangna Joshua ji kyon tsüphoe tsüka to chethecho. Osi ontena Moses yikrachio ji esüa Joshua ha ombo eküm echung yikrachitacho. 15 Jisülo jo OPVÜI na Joshua ezoa, 16 pvüti jiangna Ntsata Bakos ji bentasi vamo ji bentasi zhükhfüina chiyitale to ezothukcho. 17 Tole Joshua na pvüti jiang ezoe, 18 ontena chirathakale jitopvü zhükhfü jina tzüa chiyi jüran jiang pyinglani sicho. 19 Kyon jiangna choro jandemo osi tsüngon taro to jilo Jordan ji pankae chiyi Jeriko na engkhüwoe Gilgal lo nchentacho. 20 Hojilo Jordan lona khicheo olong taro eni ji Joshua na chümcho. 21 Ombona Israel kyon jiang ezocho, "Ochyuovüngi nte ngaro jiang na olong shiang yichak jo ntiola to nte enga na, 22 ntena Jordan ji ngachei pankao ji motsü ji rüa ezotava. 23 OPVÜI nte Potsow na kvüto ete tsükona jümoyon jümang ji kyingthuki e pankathukcho sana ji esüa Jordan jiha kyingchei nte pankathuko ji rüa ezotava. 24 Shi tsükona kyon jiangna limhalo Potsow etho ji kvüta tsüphocho sana ntsivka osi ntena eküm, echung ombo kyuchivka."

Joshua 5

1 Jordan engrhewoe Amorite mesao topvü na osi Mediterannean jümang mphyima vamo mesao jiang topvü na OPVÜI na Jordan kyingthuki ombo kyon Israel jiangna n yakchithüng jo nghae siwo ji yivon zocho. Israel jiang tsükona onte kyua lüm etsson moni sicho.

Gilgal Lona Tsenio Ji

2 Jisüijo OPVÜI na Joshua ezocho, "Olong eporov nsüngrüi khi Israel eboe jiang tseni siyia." 3 Tole OPVÜI na ezoji esüa Joshua na tssocho, osi ombona tseniphen phunglan to tsao jilona Israel jiang tsenicho. 4-6 Tokhatola ontena nzyu zhüro lijüngi yentsatathüng yuta jilo ngaro buko jiang ochia n tsenihancho. Elani jithüng jo Ejip lona khochi ritssolo wothuko jiango chürathakcho, ntiotssole ontena OPVÜI jancho n zocho. Ombona phyoji esüa OPVÜI na onte pyimtsümotsüi jiang thüngi phyochako meta lizü ejüeli meta ji onte n hungthukhancho. 7 Hoji echungren ethan jilo ngaro jiang ji n tsenihamo jina Joshua na topvü tseniracho. 8 Tothakale topvü na okhfü jiang npothüng jo nchenpheni vantacho. 9 OPVÜI na Joshua ezocho, "Ejip lo ezii tssotao ji yikraji ana nchüng tsüngon shilo khi nte siyiala." Hoji tsükona meta jijo nchüng jana Gilgal to tsala. 10 Israel jiangna Jeriko ndüngo hayi jilo ncheni vantathüng choro jilo tsüngon taro mezhüoto jilo yakchi tokhu ji khitacho. 11 Hoji ojyuato jo ontena kanaan lona chiyicho sülo etsoyu tsoden ji tsotacho. Ethieben jiang rungi tsotacho osi ebung mozhü n theo hümri rungi tsotacho. 12 Osi jitopvü mana jiang n jov esani sicho. Osi Israel jiangna elani hotüv n hungu sicho. Hoji yuta jilona benkae ontena Kanaan lona ethi-ebencho tsota yicho.

Joshua Tona Yonri Ebemo Kyon Ji To

13 Joshua na Jeriko janale ombo mhadungo yonri eben tsüka mangi vana hungcho. Tole Joshua na owo ombo engacho."Nino e rasan yolo tsüka alo eri la?" 14 Tole kyon jina phyocho, "Aiyo ori ha mek, nte rasaan ha mek, tokhatola OPVÜI rasan jiang esopvüi ka." Tole Joshua na likoe vanthei ombo khüma ezocho, Tsüphoeyo, aiyo ni phajae ka, nina ntio a tssothokvüla?" 15 Tole OPVÜI rasan esopvüi jina phyocho, "Nino ntho metalo zae vanka, ni jokhüp ji phungcheta" Tole ombo ezoji esüa Joshua na tssocho.

Joshua 6

Jeriko Khyo Ji

1 Israel jiang n rhowothukvü tsükona Jeriko pikhfü ji khalanchi nhyakyae vancho. Ochina ha yantsü jilo n rhowoche osi jilona ha n chiyichecho. 2 OPVÜI na Joshua ezocho, "Ana Jeriko yantsü jilo mesao jiang. rasan lüm etsson jiang toji ni khyothokvü ni piala. 3 Ni tona ni ransan jiang to na yantsü ji enga lo yenjoa füchokchia tsüngon tirok füphitava. 4 Pvüti otsük tiying na tatara bensi Ntsata Bakos ji mhadungo wovka. Tsüngon tiyingo to jilo jo ni tona ni rasan jiang to na yantsü ji yenjo tiyingo to füathüng pvüti jiang na tatara khüa vamka. 5 Osi ontena tatara won motsünga jo sunga süngkachiv osi hojithüng ni tona ni rasan jiang to na elümoto ntssana horateritavka to tssona jithüng pikhfü yantsü ji eyavka. Tothakana rasantsü topvü na yantsü jilo rhowovka." 6 Joshua na pvüti jiang tsarhyui ezocho, "Ntsata thephen ji khi hoji mhadungi nte otsük tiying na tatara bensi khochia." 7 Jisülo jo ombona OPVÜI Ntsata Thephen ji vüngi lanvüng wothuka ombo rasan topvü khochithukcho. 8-9 Joshua na ezoji esüa pvütiden tatara ekhfüi jiang na mhadungi wocho osi jisülo jo Ntsata Bakos ejümo pvüti jiangna tssosi onte sülo enhyang razhüna etsüng kae khochitacho. Shiang yuta topvülo tatara jo owon tssoa vancho. 10 Tokhatola Joshua na ombona yizüng n pithüng jo owon ti-tssole to ombo woro jiang ezocho. 11 Ombona okho ji ezoa OPVÜI Ntsata bakos ji bensi yantsü ji yenjoa füthukcho. Jisülojo ontena nchenpheni elani oyi hoji zümo jo jilo esantacho. 12-13 Joshua na nyazüngi na phanthi tsüngon ovüngo jilo rentao ji esüa pvüti jiang tona rasan jiang to rentae yenjo enioto yantsü ji fütacho. Ovüngoe jo lanvüng jiang, jisülo jo tatara ekhfüiden pvüti otsük tiying jiang, wokhao tssoa jo sülani enhyang jiang to tssocho. Yuta hetopvü lo tatara jiang na owon tssoa vancho. 14 Hojito tsüngon enioto jiloha ontena yantsü ji yenjoa fülantasi elani nchenpheni yitacho. Hoji esüa tsüngon tiruk tssotacho. 15 Hoji esüa tsüngon tiyingoto jiloha ontena vonchipvü phanthi yantsü ji yenjo tiying fütacho, tsüngon shilo tae ontena yenjo tiying fütacho. 16 Yenjo tiyingo to jilo pvüti jiangna tatara owon tssovsathüng Joshua na heto phyoa ombo woro jiang horateritale to ezocho, "OPVÜI na yantsü ji nte pithaka! 17 Yantsü ji tona jilo licho topvü OPVÜI thancho esüa rorüpi sitava. Rahab lonsülonphyoe ji tona ompvü wopan to tae hakae vanthuka, ntiotssole ompvüna ete echepyim jiang mphoe vathukcho. 18 Tokhatola ntiojo roe esiv licho sana jiang ntia ti-khitava, ntena hojitüv khitacho jo ntena Israel kholo ezüp sothevka. 19 Janti na jocho, shona, yongmen osi yonjak na nsüngrücho topvü OPVÜI echi vata, hojiang topvü OPVÜI ejüeli vapheni vatava." 20 Hoji tsükona. pvüti jiangna tatara jiang khfütacho. Osi kyon jiangna hoji zopvüto tüngkachia ratetacho, tole yantsü pikhfü ji eyae sicho. Jitopvü rasan jiang topvü na phunglanro ji chungoe yantsü ji khyoe khicho. 21 Ontena yonri jiang khi yantsü jilo evan topvü, eboe, eloe, ngaro eran topvü rorüpi sicho. Ontena olyu, mangsü osi kurü jiangha rorüpi sitacho. 22 Jisülojo Joshua na echepyim otsük eni ji ezocho, "Ntena phyochak pio ji esüa lonsülonphyoe ji ki owo ompvü wopan topvü sosi chiyia." 23 Onina owo Rahab, opo, oyo, opyae osi wopan jilo evan to jiang topvü sosi yicho. Osi onte wopan topvü sosi oyi Israel nchenphen ndüngo noyingroa vanthukcho. 24 Jisülojo ontena yantsü jilo omi thei yantsü jilo licho topvü rungi sitacho, tokhatola shona janti osi yongmen tona yonjak tsütsaelan to jiango OPVÜI echhi tssoa khitacho. 25 Tokhatola lonsü lonphyoe Rahab tona ompvü wopan tojo Joshua na nkümfüche vanthukcho, ntiotssole ombona wothuko otsük eniji ompvüna mphoe vanthukcho. (Ompvü tsoronichen jiang nchüng jana Israel lo vanala.) 26 Hojithüng Joshua na ntangnshon yilan opvü picho, "Kyon ochona yantsü shi tssokachilam yana sana OPVÜI rhiyikaphen tssovka. Kyon ochona tssokaphen soyinga sana ombo tsoe ovüngo ji chüvka; Osi ochona yantsü pikhfü ji tssochoa na ombo tsoe wokhao ji chüvka. 27 Hojito OPVÜI na Joshua thüngoe thecho osi ombo myingthüngna meta ji pyingcho.

Joshua 7

Akhan Mmen Ji

1 OPVÜI na Jerikolo ntio liana roe sivkha ti-khile to ezoji n ngayicho. Osi Akhan to tsa kyon tsükana hoji yizüng ji yesoji tsükona OPVÜI na Israel jiang thüngi elümoto lüm tsukcho. Akhan jo Karmi tsoe osi omotsü Zabdi osi Juda jipo chungi Zerah pvüji kyon. 2 Joshua na Bethaven ndüngo Bethel na engkhfüwoe Ai yantsü ji khyui zelo kyon ejoma wothukcho, 3 tole ontena osi oyi Joshua ezotacho: "Ai khyolo otsük akvüna ewov n li, wothüng eni mekana ethüm tae wothuka. Yantsü ji tsüphov meka rasan totona jo tiothuka." 4 Hojito wothüng ethüm harüma wothukcho khatola ejomajo elani yithukcho. 5 Ai yamo kyon jiangna pikhfü pomoe longranyo phunglan jiang jana onte phanlanchia chiwo phunglanro jiang jana joyiathüng otsük thümrosi tiruk harüma onte lüngthacho. Tole Israel jiangna lümbüm teria kyutacho. 6 Tole Joshua tona Israel esopvüiden to jiang na nungra lona odono live shakae hantasi onte mpensü jiang reroe sia OPVÜI Ntsata Bakos ji mhadungo vanthei nungratacho. 7 Joshua na phyocho, 'Thotsü OPVÜI! Nina ntioli Jordan pankae esosi chirochola? Amorite jiang khelo erheyithokvü tsükona alo? Emonkhanthokvü tsükona alo? 8 Ntiolyui eteno zhükhfü esanawoe n vantachola? Enhungo Israel na ori jiang mhadungona tsani yithako jina eiyo kvüto lyuvla? 9 Kanaan kyon osi meta shilo kyon otsük akvüna hoji yilan ji zov. Osi ontena ehayae otsük akvü elüngthav. Tona nina ni myingthüng ji lithuka vamvü tsükona kvüto lyuvla? 10 OPVÜI na Joshua ezocho, "Phanthia, nino ntioli hetoli vanthei vanala? 11 Israel na mmen tssothaka! Ana onte ezoji ontena nngav sithaka. Roe sile to onte ezo jiang yolona tsütsailan ejoma onte na khithaka. Ontena ejüng phyotao jiang ji khi onte tsütsaelan lo nzi vathaka. 12 Hoji tsükona Israel jiangna onte ri jiang mhadungo zalanchikhoku meka. Ontena ori mhadungo tsanala ntiotssole onteji monthoki esiv jianglo khanhyathaka. Ana roe sile to ezo jiang tsütsaelan ejoma nte ndüngo lio jiang roe n sithüng jo ana nte ndüngo vamvü meka! 13 Phanthia! Osi kyon jiang nthoche a thüngi rothuka. Israel Potsow A shina heto phyov lika, 'ojyua jo a thüngi rwothukvü tsükona kyon shiang methaka, Israel kyonden, ana roe sile to nte ezocho yolo ejoma ntena hoe vae lia. Ntena hojiang khi n sithüng nandang jo nte ri mhadungo phanthikhoku meka!' 14 Hoji tsükona enyathüng jo nteji pvüji ephanina sosi chiyia. Tona ana khyocheo pvüji ji tsitso khümtsüng ephanina mhadungi chirothokvü ka. Elani ana khyocheo khümtsüng ji wopan lo kyon tsük-tsük na chiyilanthuka. 15 Osi ana khyocheo kyon ji khelo roe esiv yizüng pio tüv tsütsaelan yanchecho jo kyon moji, tona ombo wopan osi ejüeli topvü nzo rungi sivka; ntiotssole ombona Israel pono emhokthav yikra nungra hansi yithaka." 16 Ojyua to jo Joshua na Israel jiang ji pvüji motsüngtsüng na sosi chiyicho osi Juda pvüji khyochecho. 17 Ombona Juda pvüji khyochei jilo khümtsüng ji wopan ephan khyochelancho osi Zerah khümtsüng khyochecho. Ombona Zerah khümtsüng ji wopan opan na khyochei Zabdi wopan khyochelancho. 18 Elani Zabdi wopan jilo kyon tsüka khyochei jilo Akhan, Zabdi tsoe karmi ji tsoe ji khyochecho, 19 Joshua na Akhan ezocho, "A tsoeyo, Israel Potsow OPVÜI mhadungo ntsa phyoa, osi ni nlan phyochaka. Nina ntio tssocho sana ji a ezoa osi mphoa ti-vana." 20 Tole Akhan na phyocho, "Otsotsoka, ana Israel Potsow mhadungo mmen tssothaka osi ana heto tssocho. 21 Etena phancho jiang yolo ana Babylon kyon phukthesü motsünga, janti seri eni, shona seri chiso harüma to elümoto a jüpomo ji tsükona ana khi vacho. Hojiang ji süranki chungi janti jina küpsi juthei lia." 22 Joshua na kyon ejoma wothuka süranki ji owo zethukle otsotso janti jina küpsi jyuthei licho tsütsaelan jiang yanchecho. 23 Ontena süranki na khichei hansi oyi Joshua tona Israel esopvüi to jiang mhadungo OPVÜI vanrhyu lo ekachicho. 24 Tole Joshua tona Israel esopvüi jiang to nzo tsoe Akhan tona janti, shona osi phukthesü toji, elani Akhan tsokhying tsolo jiang, ombo mangsü kurü, olyu osi ombo süranki jilo ombo tsütsaelan topvü to jiang khi hantasi "Ezüp hayi" to tsao jilo wotacho. 25 Joshua na ezocho, "Nino ntioli e pono ezüp hansi yichola? OPVÜI na nipono enhünga ezüp yithokvüka!" Jitopvü Israel topvüna sani Akhan ji ephyatsüngi sicho osi ejüeli tona ombo wopan tojo rungi sicho. 26 Ontena ombo müng jilo olong elümoto penkae sioji nchüng jana lia. Hoji tsükona meta jijo nchüng jana Ezüp Hayi to tsala. Hoji sülojo OPVÜI ji lüm n tsukvü sicho.

Joshua 8

Ai Yantsü Khyoe Monthoki Sio Ji

1 OPVÜI na Joshua ezocho, "Rasan topvü sosi Ai lo chüngia. Lümbüm teria kyua ti-vana. Ana Ai mesao pono ekhyov ni pivka, osi yantsü jiha liko jiha ni echhi tssovka. 2 Nina Jeriko osi jilo mesao ji thüngi tsso ji esüa, Ai osi jilo mesao thüngiha tssovka, tokhatola shilojo nina onte tsütsaelan osi ekümrümo jiang nte echhi tssoa khitava. Yantsü ji mphoe na sülamoe na hav methaka." 3 Joshua na Ai lo evov tsükona ombo rasan jiang methakcho. Ombona rasan mmhontsov wothüng thümro ethüngi heto ezoa zümothüng khochithukcho, 4 'Yantsü ji esanawoe mphoa vantava osi yantsüi na tata nkon na vantava tolea yantsü ji hav tsükona methak-tava. 5 Ana a kyon sosi yantsüi rhorovka. Osi kvüthüng Ai kyon jiangna chiro ephana sana ovüngthüng esüa etena tsamka. 6 Etena yantsü ji nkachoa tsani yiv osi ontena e phanrhüv. Tona ovüngthüng etena tssoji esüa etena tsana tsayia ontena epham. 7 Hojithüng ntena sanchuki yantsü ji khyoe khivka. OPVÜI nte Potsow na yantsü ji nte khelo nte theyivka. 8 Ntena yantsü ji khyothakana hojilo omi thei sia, ntiotssole OPVÜI na hojito nte ezocho." 9 Hojito Joshua na onte chiwothukcho osi ontena owo Ai tona Bethel to yutalo Ai na engrhewoe onte mphophen jilona owo nhyakta vancho. Joshua na hoji zümo jo nchenpheni vancho. 10 Joshua na nyazüngi na phanthi rasan jiang tsarhyucho osi ombo tona Israel esopvüiden to na onte sosi Ai lo wotacho. 11 Rasan jiang na onte nzo yantsü pikhfü opvü jilo owo jükiwoe hayitsü jina onte yutalo tssoa nchentacho. 12 Ombona onte wothüng mongo harüma sosi yantsü jina engrhewoe Ai tona Bethel to yutalo owo mphoa vanthukcho. 13 Rasan jiango yantsü jina jükiwoe rotav tsükona methaki vasi kyon thanpoe jiango engrhewoe vanthukcho. Joshua jo hoji zümo jo hayitsü jilo vancho. 14 Ai yantsü mesao jina Joshua woro jiang hungale zaktole nthinlümcho. Osi sülamoe na ombo halanchiv to n tsiv Ai mesao na ombo rasan jiang sosi Israel jiang sakalo Jordan hayitsüi khochuktacho. 15 Joshua tona ombo woro ejoma to jiangna okyaki na tsana esüa lijüng jiwoe sana yia ejücho. 16 Toajo yantsü jilo kyon jiang topvü nzo tssoe Israel jiang ji konka konka na phanta yi sicho. 17 Osi Ai lo eboetso topvü na Israel jiang phanta yi sicho osi yantsü jijo ochinaha n hyakvü chonchitsüi sicho. 18 Tole OPVÜI na Joshua ezocho, "Ni tssoji Ai lo etssyuchia; Ana yantsü ji ni piala." Joshua na hoji esüa tssocho. 19 Osi ombona okhe khikatale züma vamo kyon jiangna zaktole phanthirae yantsü ji khyoe khicho. Jitopvü ontena yantsü jilo omi thei sicho. 20 Ai kyon jiangna yantsüi zechitale miphung taena yantsü ji eyukzhüa chüngia hungcho. Ontena tsanchophen lanka n licho, ntiotssole lijüngoe tsana ejüo Israel jiangna mmilani onte phanlancho. 21 Yantsü ji Israel jiangna khithaka osi omi thethaka to Joshua tona ombo kyon jiang to na ntsiale ontena Ai kyon jiang lüngthtav benkacho. 22 Jithüng ji yantsüi vamo Israel jiang na sanchuklani rota jilo thecho. Ai kyon jiang ji onte tsanthephen n-liv hazhüi topvü lüngtharae sicho. Ochinaha tsanchuko n licho osi hoji yakchia eküm n vancho, 23 tokhatola Ai mesao jitae enhyokacho. Mesao jijo rhümae Joshua thüngi sosi wocho. 24 Israel jiang na Ai kyon lijüngina onte phanchia ewo jiang lüngtharacho. Osi yantsüi ha owo kyon topvü lüngtharacho. 25-26 Joshua na ombo tssoji Ai woe etssyuchi vanthukcho osi yantsü jilo kyon topvü n lüngthathüng jo n vachicho. Hoji nchuk Ai lo evan oro ojü eboe eloe topvü tsotsüi wothüng taro eni lüngthacho. 27 OPVÜI na Joshua ezoji ephan Israel jiangna phanchowo tssiden osi yantsü jilo tsütsailan jiang jo ontena khitacho. 28 Joshua na Ai ji rungi roe sicho. Yantsü ji nchüng jana roe ekachi lipvü. 29 Ombona Ai mesao ji odungina na doni sisi ombo müng ji mmyu ejan hojilo vanthukcho. Eng rhetahakale Joshua na omüng ji khichoe yantsü pikhfü rheyipheni sile to yizüng picho. Ontena omüng ji olong tsüpho tsüpho tüv na byenzhüi siwo ji nchüng jana lia.

Ebal Phunglani na Yizüng ji Khala

30 Tole Johsua na Ebal phunglan jilo OPVÜI Israel Potsow ji thanphen tssokachicho. 31 Ombona thanphen ji OPVÜI phajae Moses na ezoji ephan osi yizüng kakolo lioji ji esüa tssocho, "Ochina ha yonjank n thenkahancho thanphen." Hoji lona ontena erungthan osi khümshümta than pitacho. 32 Hoji jo Israel jiang na Joshua zeta vana Moses na eramo yizüng ji olong jilo thenkacho. 33 Israel jiang na onte esopvüiden, tsüphoeden, yitssoeden osi onte nchenkae evan tsanthan topovü na OPVÜI Ntsata Bakos ji otssa tsungkho reni hoji ejümo pvüti jiang zechia vantacho. Kyon ovo chisona Gerizim phunglan ji mankvü na philanchi, chiso na Ebal phunglanji mankvüna philanchi toli vantacho. Ontena kvüthüng mmha ji hunga sana ontena hojitoli vantale to OPVÜI phajae Moses na onte e zocho licho. 34 Jisülo Joshua na mmha topvü osi rhiyika jiang topvü ji eramo ji ephan kharae engatacho. 35 Hojilo evan topvü eloe osi ngaro, elani tsanthan topvü thüngi Joshua na yizüng jiang topvü khae engathukcho.

Joshua 9

Gibeon Kyon Jiangna Joshua Ejithechiala

1 Israel jiang ekhyo yivon ji Jordan na engrhewoe evan mesae topvü na zocho, hayi, phunglani osi phunglan yenjoe evanden osi Mediterranean jütssae hayi vamo jiang topvü na osi Lebanon phunglan jükiwoe, Hittite mesaeden jiang, Amorite mesaeden, Kanaan mesaeden, Perizite mesaeden, Hivite osi Jebusite mesaeden jiang topvü na zocho. 2 Onte topvüna mmyantae Joshua osi Israel thüngi ori tssotacho. 3 Tokhatola Gibeon kyon Hivite jiangna Joshua na Jeriko tona Ai to lo ntio tssothakcho sana ji zoe, 4 ontena ombo ejithechitav methaktacho. Ontena owo etsoyu yani sükhfü ekye osi sofü jüpvü ekye khümcho tüv lo therae gadho jiang hanthuktacho. 5 Ontena mpensü ekye osi jokhüp ethacho tüv ekatacho. Ontena hümri hamo jiangha kyingseruk na zümrocho tüv tssocho. 6 Hojitoli ontena Gilgal lo owo Joshua osi Israel jiang ezotacho, "Eiyo ekoni na rocho osi nte thüngi e mmhonta hungala." 7 Tole Israel jiangna ezocho, "Ntioli ena nte thüngi mmhontav la? Nteno enhyano evanden mpato tssov." 8 Tole ontena Joshua ezocho, "Eiyo nte benkav methaki vana." Joshua na onte ezocho, "Nteno ochoang osi meta kvüi na rotachola?" 9 Tole ontena motsü shi ombo ezocho, "Eiyo ekoni na rochoka tsüphoe yo, ntiotssole nte Potsow OPVÜI ji motsü ji ena zothaka. Ombona Ejip lo ntio tssocho sana jiang topvü ena zothaka 10 osi Jordan engkhfüwoe Amorite mesao otsük eni ji thüngi ntio tssochosana jiha ena zothaka, Ashtaroth lo vamo Heshbon mesao Sihon tona Og mesao Bashan lo vamo ji to motsü ji. 11 E kyonden esopvüiden osi e nzo evan topvüna etsoyu methaki hansi oro nte ndukleto ezocho. Osi nte phajae etssov osi nte thüngi mmhontav ezoa erothukcho. 12 E hümri jiang zetava. Ena nte nduko okina khochiathüng jo hümri jiang lüma vancho. Tokhatola enhungo kyingseruk osi emerothaka. 13 Ena jüpvü shianglo tssüngthijü yenathüngjo ethan khatola sükhfü shiang ekyethaka. Yentsalo na e mpensü osi jokhüp shiang ekerathaka." 14 Israel jiangna onte khelona etsoyu tara khichecho khatola hoji tsükona ontena OPVÜI thüngi n thyutacho. 15 Joshua na Gibeon kyon jiang thüngi mmhontacho osi onte hakae vanthukcho. Israel esopvüiden jiangna ha mmhontav onte echümchak vacho. 16 Mmhontav methaktasi tsüngon ethüm sülo jo Gibeon kyon jiang ji enhyano evanden to Israel jiangna ntsicho. 17 Hoji tsükona Israel jiangna sani owo tsüngon ethüm sülo jo Gibeon jiang vanphen jancho. Hojilo jo Gibeon, Che phirah, Beeroth osi Kiriath Jearim to vanphen tssocho. 18 Tokhatola Israel jiangna onte n lüngthakukcho ntiotssole onte esopvüi jiangna Israel Potsow myingona ntsatae vathakcho. Shi tsükona kyon topvüna onte thüngi phyochophyoritacho, 19 khatola ontena janlancho, "Ena Israel OPVÜI Potsow myingona onte thüngi mmhon ta methaktae lia. 20 Enhungo etena onte vanthukvü lia. To n tssoa na Potsow na ekhangshiv. 21 To onte vanthuka, tokhatola onteno ete tssüngvo jüwoeden tssovka." Hojito esopvüi jiangna ezocho. 22 Joshua na Gibeon kyon jiang ombo thüngi sosi yithuki ezocho, "Nteno ntioli e ejithechia meta ekoni evanden to phyotachola? Nteno shilo evanden la. 23 Ntena hojito ejiphio ji tsükona Potsow na nlan nte pithaka. Nteno nchünkhon eziiden tssoa a Potsow thanpheni tssüngvo jüwoeden tssovka. 24 Ontena janlancho, "Tsüphoe yo hoto tsso jijo ena heto zio jinaka, OPVÜI nte Potsow na Moses ji meta shi totona nte pileto osi ntena khochiathüng yakchio jiang topvü lüngtharale to. Ena ekhenthao ji tsükona osi e eküm emomvü ekyuo jina hoto tssochoka. 25 Eiyo enhungo nte etho küpo, ntena ntio mmhona to zecheta sana hoji e thüngi tssoa." 26 Tole Joshua na heto lyuicho; ombona onte nkochei Israel jiang khi n lüngthathukcho. 27 Tokhatola ombona eziiden onte kümthuka Israel jiang tsükona osi OPVÜI thanphen ji tsükona tssüngvo jüwoeden onte kümthukcho. Nchüng tsüngon jana ontena OPVÜI na ethüngcheo khümphen jilo elhitsük shi tssota vanala.

Joshua 10

Amorite Jiang Khyola

1 Joshua na Jeriko tona jilo mesao ji to lo ntio tssocho sana ji esüa Ai jiha hayae jilo mesao ji lüngthae sisi yantsü ji roe sithaka to Jerusalem mesao Adonizedek na zocho. Elani Gibeon kyon jiangna Israel jiang thüngi mmhontae onte nzo vantala to ha ombona zocho. 2 Jerusalem kyon jiangna ekhentsüngcho ntiotssole Gibeon jo yantsü thanpo mesao evan jiang esüa elümoto tsüpoa osi jilo kyon jiango ritssolo mmhon tae. 3 Hoji tsükona Adonizedek na yithen heto mesao jiang thüngi picho, Hebron mesao Hoham thüngi, Jarmuth mesao Piram, Lachish mesao Japhia, Eglon mesao Debir to thüngi: 4 "Gibeon kyon jiangna Joshua tona Israel to jiang thüngi mmhontae sithaka, ntena onte thüngi ori etssov oro a kyochia." 5 Tole Amorite mesaden otsük mongo, Jerusalem mesao, Hebron mesao, Jarmuth mesao, Lachish mesao tona Eglon mesao to shiang na mmyantae Gibeon ji hayae ori tssotacho. 6 Tole Gibeon kyon jiangna Joshua na Gilgal lo ncheni vanathüng heto ezochicho: "Tsüphoe yo, e ti-nsinkia! oro e kyoa! osi e shanchoa! Phunglanroe. Amorite mesao jiang topvüna mmyantae ori etssoala!" 7 Hoji tsükona Joshua na ombo rasan topvü sosi ritssolo mmhontso jiang sonhyasi Gilgal lona khochicho. 8 OPVÜI na Joshua ezocho, "Onte ti kyua, ana onte topvü ni khelo ni theyithaka. Onte ochina ha ni zalanchiv meka." 9 Joshua tona ombo rasanden to jiangna zümo thüma sani Gibeon woe khochicho osi ontena Amorite jiangna n tsiv vanathüng owo hayacho. 10 Amorite jiangna Israel jiang hungale OPVÜI na onte ekhenrhükthukcho. Israel jiangna Gibeon lona onte lüngthasi elani phunglan yenjo Beth Horon eyak jana onte phanchochisi, jolowoe Azekah tona Makkeda to jana roa jowocho. 11 Amorite jiangna Israel jiang mhadungo tsana eyak ji joyiathüng ontena Azekah ejan nandang OPVÜI na sheryu tsüphov jothuki Israel jiangna onte lüngthao jilona kyungkao onte ji ephyatsüngthukcho. 12 OPVÜI na Israel khi Amorite jiang khyothuko tsüngon jilo Joshua na OPVÜI thüngi thyutacho osi Israel jiang topvü yolona phyocho, "Eng, Gibeon jiang poni manga; Choro, Aijalon hayi ji pono mangi sia." 13 Tole eng jina mangi sicho osi ontena ori n khyothüng nandang jo choro jina n kanphiv sicho. Shi motsü jo Jashar kako lo erani lia. Eng jina potsüo longjüngo mangi sicho osi tsüngon ji n yiv sicho. 14 Hoji nchuk OPVÜI na kyon phyocho engayio ji esüa kvüthüngha n tssohancho. OPVÜI na Israel thüngoe thei ori tssocho! 15 Hoji sülojo Joshua tona ombo rasanden to jiangna onte nchenphen Gilgal lo yicho.

Joshua na Amorite Otsük Mongo Jiang Hayatala

16 Tole Amorite mesao otsük mongo jiango kvütoli sana tsanchoe Makkedah lo longkvüi mphota vancho. 17 Tole ochona sana onte yanchei, onte mphophen ji Joshua ezoyicho. 18 Ombona Joshua ezocho, "Longkvü kipüng jilo olong tsüphov erichochia. Hojilo enhyang tara vanthuka, Khatola nino hojilo ti vana, 19 ori jiang etsüngkata phana osi onte yantsüi ti tsanthethuka! OPVÜI nte Potsow na onte ji ni khelo etssov ekhyo ni pithaka." 20 Joshua tona Israel to jiangna onte lüngtharacho toaha ochoangna jo kvütoli sana tsanchoe onte yantsü pikhfü chungi rheyi siracho. 21 Jitosi Joshua woro topvü ntia n tssona nchenphen Makkedah lo chiyiracho. Meta jilo ochina ha Israel jiang echirütav tia n licho. 22 Joshua na phyocho, "Longkvü rhowolan jiang chonchi mesao otsük mongo jiang a thüngi sosi yia." 23 Tole longpvü kipüng ji chonchi Jerusalem mesao, Hebron mesao, Jarmuth mesao, Lachish mesao tona Eglon mesao toji sosi 24 Joshua thüngi yicho. Tole Joshua na Israel kyon jiang tsarhyui jilo tsüphoe jiang topvü na mesao otsük mongo jiang evüng lo nhyekayita to ezocho. Tole ontena hojito tssocho. 25 Joshua na ombo küpo tsüphoe jiang ezocho, "Tikyu tava osi lüm ti teritava. Mmhankae longtsüka litava ntiotssole OPVÜI na nte ri topvü thüngi heto tssovsala." 26 Jitosi Joshua na mesao otsük mongo ji lüngthae odungo onte müng jiang doni mmyu jana vacho. 27 Eng rhetale onte müng jiang khichoe ontena longkvüi mphoe vanthuko jilo süthechirae sile to Joshua na yizüng picho. Longkvü kipüng jianglo longpyak tsüphov lhüpkarae sicho osi hojiang ji nchüng jana lia.

Joshua na Amorite Meta Khiyilanala

28 Hoji nchuk Jashua na Makkedah yan ji hae jilo mesao ji rhümacho. Hojilo vancho topvü lüngthacho osi ochia n valanchicho. Ombona Jeriko mesao thüngi tssoyiato Makkedah mesao thüngi ha tssoyicho. 29 Hoji sülo Joshua tona ombo rasan to jiangna Makkedah lona owo Libna yantsü ji hatacho. 30 OPVÜI na yantsü shi osi jilo mesao jiha Israel jiang khelo theyicho. Ontena ochia enhyokae n vav topvü lüngtharüpcho. Ontena Jeriko mesao thüngi tssoji esüa yantsü shilo ha tssocho. 31 Hoji sülo, Joshua tona ombo rasanden to jiangna Libnah lona Lachish lo owo hoji hatacho. 32 Tsüngon enioto rotacho sülo OPVÜI na Israel jiang pono ekhyo picho. Ontena Libnah lo tssoji esüa yantsü shiloha ochia enhyokae n vav lüngtharacho. 33 Gezer lo mesao Heram na Lachish kyolo rocho khatola Joshua na onte ochia n nhyokav lüngthae sicho, 34 Jisülo jo Joshua tona ombo rasan to jiang na Lachish lona Eglon lo owo yantsü ji hatacho. 35 Lachish lo ontena tsso ji esüa hoji nchuk na onte rhümae lüngtharae sicho. 36 Hoji sülo Joshua tona ombo rasan to jiangna Eglon lona phunglani Hebron jilo owo yantsü ji hatacho. 37 Ontena hojilo mesao osi jilo evan topvü osi yanren jilo evan topvü lüngthae siracho. Joshua na Eglon lo tssoji esüa jilo ha yantsü ji roe sisi kyon topvü lüngthae sicho. Yantsü jilo tsüka tia n nhyokacho. 38 Tosi Joshua na ombo rasan jiang sosi oyi Debir ji hae khyocho. 39 Joshua na Eglon lo tssoji esüa jilo ha yantsü ji roe sisi kyon topvü lüngtharae sicho. Yantsü jilo tsüka tia n nhyokacho. Joshua na Hebron tona Libnah osi jilo mesao ji thüngi ntio tssocho sana ji esüa Debir yantsü tona jilo mesao jiang to thüngi tssocho. 40 Joshua na meta ji topvü khyocho, osi ombona phunglanro jianglo, engkhfüwoe meta jianglo, osi engrhewoe meta tona jolowoe likying jianglo mesaoden to jiang khyoracho. Ombona ochia n valanchiv lüngtharae sicho. Hojijo OPVÜI Israel Potsow na yizüng pioji ephanina tssocho. 41 Joshua na ritsso ji, jolowoe Kadesh Barnea lona benkae jütssawoe Gaza lona Goshen meta jiang tona oyi khümkiwoe Gibeon to jana rhakcho. 42 OPVÜI Israel Potsow na Israel kyon jiang kyochio jina Joshua na meta shiang osi jilo mesao jiang ji rajo motsünga tae na khyoe khicho. 43 Hoji sülojo Joshua tona Ombo rasan to jiangna Gilgal lo kholani yicho.

Joshua 11

Joshua na Jabin Tona Ombolo Shenkae Evan To Jiang Khyoala

1 Israel ekhyo yivon jiang Hasor mesao Jabin na zoale ombona Madon lo Jobab mesao, Shimron mesao tona Achshaph mesao, 2 elani phunglani mesao jiang, Galilee wozhü jolowoe Jordan hayi mesao ji, phunglan yenjo mesao osi Dor ndüngo jütssae mesao to jiang thüngi yithen pichicho. 3 Ombona elani Jordan ayi amen lo Kanaan kyon jiang, Amorite jiang, Hittete jiang, Periz zite jiang tona phunglani Jebusite jiang elani Mizpah metae Hebron phunglan yenjoe vamo Hivite jiang to ha yithen piracho. 4 Ontena onte rasan jiang topvü jürani hajang tata sani rocho. Ontena kurü tona ritsso zotoro toha elümoto liracho. 5 Mesao shiang topvü khyentae Merom zhükhfü tsalo oro ncheni Israel jiang thüngi ori etssov methakcho. 6 OPVÜI na Joshua ezocho, "Onte ti-kyua. Ojyua heto-thüng jo ana Israel tsükona onte lüngtharathakuka. Nina onte kurü jiang ojo jakiv osi onte ritsso zotoro jiang rungi siyivka." 7 Hoji tsükona Joshua tona ombo rasan to jiangna Merom zhükhfü jilona onte hatacho. 8 Osi OPVÜI na Israel jiang khi onte khyothukcho. Israel jiang na onte ji hae Misrethpoth Maim tona Sidon to jana osi engkhüwoe Mizpah hayi jana onte phanchicho. Ori jiang tsüka tia n hyokav n chüthung jo ritsso ji n sancho. 9 OPVÜI na kvüto yizüng picho sana ji ephan Joshua na tssocho: osi onte kurü jiango ojo jakisi zotoro jiango rungi siyicho. 10 Hoji sülojo Joshua na osü elani oyi Hasor yantsü ji hayae jilo mesao ji lüngthacho. (Hoji yutalo jo ekhüngyan jiang topvü lo Hasor etho elio vancho.) 11 Ontena hojilo evan topvü ochia eküm n valanchina chüthukcho, osi yantsü ji rungi sicho. 12 OPVÜI phajae Moses na ezoji ephan Joshua na yantsü shiang hetopvü hayae onte mesao jiang chüthukracho. 13 Tokhatola Israel jiangna Hozor yantsü Joshua na erungo ji yakajo phungdunglo tssokao yantsü jiang kui ha roe n sicho. 14 Israel jiangna yantsü shiang lona tssentsü kikyo nikyo osi ekümrüm jiang topvü ontena khitacho. Tokhatola ontena kyon jo topvü chüthuksi tsükatia n valanchicho. 15 OPVÜI na ombo yizüng jiang Moses picho osi Moses na Joshua pilacho osi Joshua na hojiang benphicho. OPVÜI na Moses ezo jiang topvü Joshua na benphicho.

Joshua Na Khio Meta Ro Jiang

16 Joshua na phunglan, hayi, jolo khümki, Goshen meta osi hojiang jolowoe likying meta jiang osi Jordan hayi topvü khyoe khicho. 17-18 Jolowoe Edom ndüngo Halak phunglan nandang, osi jükiwoe Baalgad nandang, Hermon phunglan jolowoe Lebanon hayi jana khicho. Joshua na metaro shilo mesao ji thüngi sunga ori tssoa vancho, khatola ombona khyocho osi onte topvü hayae lüngtharacho. 19 Israel thüngi mmhontae evan yantsü jo Gibeon tae, Gibeon lo jo Hivite kyon ejoma vancho. Ji yakajo thanpoe topvü khyothechiracho. 20 Onte ji Israel thüngi ori tssothoki nzan n lina onte topvü monthoku tsükona OPVÜI na onte lümbümi Israel thüngi rotav tssohungthukcho. Hojijo OPVÜI na Moses ezoe vacho. 21 Hoji yutalo Joshua na Anakim to tsa thojüi jipo phunglan Hebron, Debir, Anab, osi Juda tona Israel to lo phunglan jianglo evamo jiang topvü owo rorüpi sicho. Joshua na onte rorüpi sisi yantsü jiang roe siyicho. 22 Israel lo kvüloha Anakim jiang n hyokav sicho, khatola onte tara jo Gaza, Gath Ashdoth to shianglo vancho. 23 OPVÜI na Moses ezoji esüa Joshua na meta topvü khicho. Joshua na meta ji totona Israel jiang picho osi ontena pvüji ephan chitae khicho. Jisülojo kyon jiangna ritsso lona esantacho.

Joshua 12

Moses Na Ekhyowo Mesao Jiang

1 Israel jiang na Jordan engkhüwoe meta jiang topvü khyothakcho. Amon hayi lona benkae Jordan hayi jiwoe chüngicho osi jükiwoe ha Hermon phunglan jana khyocho. Ontena mesao otsük eni khyocho, 2 tsüka jo Amorite mesao Heshbon lo esopvüi Sihon. Ombo ekhüngyan jo Gilead chiso jüa; (Amon hayi tssae) Aroer lona benkae hoji hayitsü ji lungjüngi Amon erü Jabbok jana; 3 Ombo ekhüngyan jilo Jordan hayi ha Galilee wozhü lona benkae echü jümangoe Beth Jeshimoth, elani jilona Pisgah phunglan jana yicho. 4 Ontena Rephaim jiang yolo wokhatssowo Bashan mesao Og ha khyocho. Ombona Ashtaroth tona Edrei to sa vancho. 5 Ombo ekhüngyan jo Hermon phunglan ji, Salekah, Bashan meta topvü Deshur ha Maakah oni erü jana osi Gilead chiso jüa osi Heshbon lo mesoa Sihon meta jiha jüa. 6 Mesao heto onio Moses tona Israel to na khyocho. OPVÜI phajae Moses na ote meta ji khi Reuben, Gath tona Manasseh pvüji chiso to onte echhi tssothoku picho.

Joshua Na Ekhyo Mesao Jiang

7 Joshua tona ombo woro to jiangna Jordan engrhewoe meta jiang osi mesao jiang topvü Lebanon hayitsü Baalgad lona benkae jolowoe Edom ndüngo Halak phunglan nandang khyocho. Joshua na meta shi Israel jiang yolo chitayia nchünkhon onte echhi tssothukcho. 8 Ontena khyo meta ji phunglanro jiang tona engrhewoe phungdung jiang, Jordan hayi tona hoji phunglan jothe, engchirolamoe liphyu jiang tona jolowoe likying jiang toha jüa. Meta shiang jo Hittite jiang, Amorite jiang, Kanaan kyon jiang, Perizzite jiang, Hivite jiang tona Jebusite meta jiang to. 9 Israel jiang na yantsü shianglo mesao jiang khyocho: Jeriko, Ai, (Bethel ndüngo), 10 Jerusalem, Hebron, 11 Jarmuth, Lachish, 12 Iglon, Gizer, 13 Debir, Gedar, 14 Hormah, Arad, 15 Libnah, Adullam, 16 Makkedah, Bethel, 17 Tappuah, Heper, ig Aphek, Lasharon, 19 Ma don, Hazor, 20 Shimron Meron, Achshap, 21 Tannakh, Megiddo, 22 Kadesh, Jokneam, (Karmel lo), 23 Dor, (jütssae ji) Goiim (Galilee lo),24Tirzah to tssotsüi mesao otsük thümro si ekha tssocho.

Joshua 13

Meta N khihamo Jiang

1 Joshua ji elümoto sonthakcho. Osi OPVÜI na heto ombo ezocho, "Elümoto ni sonthaka, khatola meta elümoto n khirahan, 2 Philistia tona Gesher to meta jiang, 3 Jolowoe Avim meta jiang. (Shihor zhükhfü lona benkae Ejip meta erü ji jana osi khümkiwoe Ekron jana Kanaan meta tssocho; Philistia mesao jiangna Gaza lo, Ashdod lo, Ashkelon lo, Gath lo tona Ekron lo to vantacho. 4 Elani kanaan kyon jiang meta ji topvü lihana, elani Sidon kyon meta Mearah ji to lihana, jilona Amorite erüi Aphek jana;5 elani Gibalite jiang metaji, Lebanon topvü osi engrhewoe ejan, Hermon phunglan jolowoe Baalgad hojilona Hamath to eyak nandang. 6 Hojilo Sidon kyon Lebanon phunglan tona Misrephoth Maim to yutalo vamo jiang meta topvü jüa. Ana shiang hetopvüto phankhani sisi Israel kyon jiang rheyitoka yivka. Tona ana ni ezothako ji esüa nina meta jianglo Israel kyon renthetoka yivka. 7 Enhungo meta shiji Israel pvüji thanpo tokvü jiang tona Manasseh pvüji chiso to yolo jantayia."

Jordan Engkhfüwoe Meta Jiang Chisotao Ji

8 Rebuen pvüji, Gad pvüji, tona Manasseh pvüji chiso to jo OPVÜI phajae Moses na onte pio ji esüa liko ji pithakcho, hojijo Jordan zhükhfüna engrhewoe tssocho. 9 Onte ejan meta ji (Amon hayi tssae) Areor tona hoji hayi lungjüngi yantsü ji, elani Medeba lona Dibon yuta jilo phungdungro osi hayi jiang topvü to jüa. 10 Meta jina Amon jana yicho osi Amorite mesao Sihon, Heshbon lo yansae jina sanhyao meta topvü jüa. 11 Hojilo Gilead, Gesheur tona Maakah, Hermon phunglan, topvü tona Bashan topvü osi Salekah jana yicho. 12 Hojijo Rephaim yolo wokhao Og ochona Ashtaroth tona Edrei to sacho sana ji ekhüngyan ha jüa. Moses na hojilo kyon jiang khyothechi phani sithakcho. 13 Tokhatola Israel jiangna Gesehur tona Maakah to kyon jiango phani n sicho, ontena nchüng jana Israel lo vanala. 14 Levi pvüji jo Moses na liko n picho. OPVÜI na Moses ezoji ephan onte ejan jo kyon jiangna Israel Potsow thüngi othan hansi oro thanphensae na rungo jilo onte ejan jüa.

Reuben Pio Meta Ji

15 Reuben pvüji lo wopan jiang thüngi Moses na liko tara pithakcho. 16 Onte meta ji Amon hayi tssae Areor ji jana osi hayitsü lungjüngi yantsü ji tona Medeba füa phungdung jiang to jüa. 17 Hojilo Heshbon tona phungdung jianglo yantsü jiang topvü: Dibon, Bamoth Baal, Beth Baalmeon, 18 Jahaz, Kedemoth, Mephaath, 19 Kiriathaim, Sibmah, Zerethshahar, 20 Pisgah phunglan yenjo ji tona, Beth Jeshimoth to. 2l Hojilo phungdung jianglo yantsü topvü tona Heshbon yansao Amorite mesao Sihon ekhüngyan ji to jüa. Sihon jo Moses na khyocho, elani Midian esaeden Evi, Rekem, Zur, Hur, tona Reba toha Moses na khyocho. Onte topvüna Sihon mesao ekhüngyan ji sathakcho. 22 Israel jiang na lüngthao jiang yolo Balaam ratssen, Beor tsoe jiha jücho. 23 Reuben pvüji ji meta engrhewoe jo Jordan tssocho. Shiang jo Reuben pvüji thüngi pio meta jilo yantsü osi meta jüwo jiang.

Gad Pio Meta Ji

24 Moses na Gad wopan ha onte ejan jiko picho. 25 Onte meta ji Jazer tona Gilead lo yantsü topvü Ammon meta chiso jina Rabbah meta engrhewoe Aroer ejan; 26 onte meta ji Heshbon lona Ramath Mizpeh tona Betonim nandang, Mahanaim lona Lodebar erü nandang tssocho. 27 Jordan hayi jilo jo Beth Haram, Bethmimrah, Sukkoth tona Saphon to Heshbon kyon Sihon mesao ekhüngyan ji to jüa. Onte meta ji engrhewoe erü jo Jordan zhükhfü jina Galilee wozhü jana chüngicho. 28 Shiang jo Gad wopan epio meta jilo yantsü osi yanro jiang.

Engkhfüwoe Manasseh Ejan Meta Ji

29 Moses na Manasseh pvüji chiso wopan jiang ha meta picho. 30 Onte meta jo Mahanaim jüa osi Bashan meta topvü jüa, Bashan mesao Og ekhüngyan ji tona Bashan lo Jair yan rukro jüa. 31 Gilead meta ha chiso jüa, Ashtaroth tona Bashan mesao Og yanpvü Edrei to jüa. Shiang hetopvü Manasseh tsoe Machir tsoronichen jiang owo chiso ejan tssoa picho. 32 Hojitoli Moses na Moab lo vanathüng Jeriko engrhewoe meta tona Jordan to ji jantayicho. 33 Tokhatola Moses na Levi jiango ntia meta n picho. Ombona ezocho, onte ejan jo Israel Potsow thamo jilo jüa to.

Joshua 14

Jordan Engrhewoe Meta Ji Chitao Ji

1 Shi sülo motsü shijo Kanaan meta Jordan engrhewoe meta ji Israel jiang jantayio ji. Pvüti Eleazar, Nun tsoe Joshua tona Israel pvüji jianglo esopvüi jiang to na meta ji Israel woro jiang yolo chitayicho. 2 OPVÜI na Moses ezoji esüa Jordan engrhewoe pvüji tukvü si chiso jiang meta jijo phyalyu fuki jantacho. 34 Jordan engrhewoe meta jijo Moses na pvüji enisi chiso jiang pithakcho. (Joseph tsoronichen jo Manasseh tona Ephraim to eni chichie yicho.) Tokhatola Moses na Levi jiang jo liko n chinhyacho. Levite jiango yantsü piracho. Yantsü jianglo onte phari pikhfü osi ekümrümo ekümcheta picho. 5 OPVÜI na Moses ezo ji ephanina Israel kyon jiangna liko ji jantacho.

Hebron Ji Kaleb Picho

6 Tsüngon motsünga lo Juda pvüji lona kyon ejoma na oro Gilgal lo Joshua ndukcho. Onte yolo Kenizzite kyon Jephunneh tsoe Kaleb jina Joshua ezocho, "OPVÜI na Potsow kyon Moses thüngi Kadesh Barnea lona eni tsükona ezoji nina ntsia. 7 OPVÜI phajae Moses na meta shi chelo Kadesh Barnea lona a rothuko jithüng jo aiyo nzyu zhüro tssocho. Ana a zeche ephan ntsa yithen oyi ombo picho. 8 Tokhatola atepfü etssowo jina ete topvü ekyuthoko ehungpvüi picho. Tokhatola aiyo longtsüka lia OPVÜI yi engacho. 9 Ana hojito tsso jina Moses na ana yakchio meta topvü a tona a tsoronichen jiang piv to phyochaki lia. 10 Tokhatola OPVÜI na hojito Moses ezosi nzyu zhüro mongo tssothaka. Hojithüng jo Israel na lijüng yakchia vancho osi OPVÜI na ombo phyochak ephanina eküm avanthukpvü. A zeta, aiyo nzyu ekhatiza si mongo tssothaka, khatola aiyo Moses na a wothuko jithüng etho jüwo ji esüa enhüngaha etho jüa. 11 Ana nchüng jana ritsso osi olan topvü tsükona ekhyo eto lihan. 12 Hoji tsükona a osi a kyon jiangna yithen hansi oyi apio jithüng OPVÜI na phyoji ephan phunglanro meta ji nchüng apia. Ena hojithüng ni ezocho, thojüi pvüji Anakim to tsao jiangna yantsü jiang pikhfü tssoe lioji OPVÜI na phyo ji esüa ombona akyochia hojiang ji ana phani sikhok ka." 13 Joshua na Jepunneh tsoe Kaleb ji mmhaithukcho osi Hebron yantsü ji ombo ejan tssov picho. 24 Nchüng jana Hebron jo Kenizzite kyon Jepunneh tsoe Kaleb tona Ombo tsoronichen to ejan, ntiotssole ombo na Israel Potsow OPVÜI ji longtsüka lia oyi engayicho. 15 Hoji vüngoe jo Hebron jo Arba yantsü to tsacho. (Arba jo Anakim jiang yolo tsüphotso ji tssocho.) Enhungo meta jilo noying licho.

Joshua 15

Juda Pio Meta Ji g gr Juda pvüji lo wopan jiangna meta shiang hungcho:

Onte meta jina Edom erüi Zin lijüng jolowoe ochüm jana jowocho. 2 Jolowoe erü shina echü jümang jolowoe na oyi,3joloe Akrabim eyak lona Zin lo yicho. Hoji lona Kadesh Barnea Jolowoe joyi Hezron yakchia Addar lo yisi jilona Karkawoe oyi 4Azmon lo oyi Ejip erü lo zhükhfü ji dunga oyi Mediterranean jümang woe oyi ochüm tssocho. 5 Engrhewoe erü jijo echü jümang jilona chungi Jordan tsüthephen jina nandang tssocho. Khümkiwoe erü jijo hoji lona benkae 6 oyi Beth Hoglah jani jilona khümkiwoe yingsüng ji jani Jordan hayi chanchochi nandang tssocho. Hoji lona Bohan lung to tsao ji chungi (Bohan jo Reuben tsoe tsüka), 7 Ezüp hayi ji lona Debir nandang, elani oyi jilona, khümkiwoe Gilgal nandang, jilona hayitsü ji jolowoe Adumim eyak ji chanka ji nandang to tssocho. 8 Hoji lona Enshemesh jüpukphen jianglo oyi Enrogel lo phunglanro lio Jebusite yantsü Jerusalem tssoji jolowoe chiyicho. 9 Hoji lona Nephroah jüro jiang lona oyi Ephron phunglan ndüngo yantsü jianglo chiyicho. Hoji lona Baalah (Kiriath Jearim toha tsacho) woe oyi 10 Baalah engrhewoe na Seir phunglanro jilo chiyi Jearim (Chesalon) phunglani na oyi Beth Shemesk woe joyi Timnah yakchia yicho. 11 Hojilona phunglanro jianglo chiyi Ekron jükiwoe chüngilani Shikkeron woe oyi Baalah phunglan yakchia Jamnia woe yicho. Hoji lona oyi Mediterranean jümang jilo 12 chiyi engrhewoe erü jilo echecho. Erü shiang chungi Juda pvüji vancho.

Kaleb na Hebron Tona Debir to Khyoala

13 OPVÜI na Joshua ezoji ephan meta motsünga jo Juda pvüji lo Jepuneeh tsoe Kaleb ji picho. Ombona Anak opo Arba yantsü Hebron ji khicho. 14 Kaleb na Anak tsoronichen jiang ji yantsüi na phani sicho. Sheshai pvüji, Ahimam tona Talmai to pvüji jiang. 15 Ombona hoji lona Debir lo evamo kyon jiang owo hacho (yantsü shijo Kiriath Sepher to tsata rocho) 16 Kaleb na phyocho, "Ochona Kiriath Sepher yantsü ji khyoana ana a tsolov Achsah ji pivka." 17 Tole Kaleb ojenio Kenaz ji tsoe Othniel na yantsü ji khyo jina ombo otsolov Achsah ji ombo picho. IS Yanpiyanthan tsüngono Othniel na Achsah ji opo thüngi liko chonle to ezocho. Ompvüna Gadho manküina joyile Kaleb na ntio ompvü jümponasana to engacho. 19 Ompvüna janlancho, "Nina liko apio ji likying küma ana jükha ethev lia." Tole Kaleb na jolo khümki jünhyo jiang ompvü picho.

Juda Yantsü Jiang

20 Juda pvüji wopan jiangna onte meta hungwo ji shiang. 21 Edom erü ndüngo yantsü oküptso jiango Kabzeel, Eder, Jagur, 22 Kinah, Dimonah, , Adadah, 23 Kedesh. Hozor, Ithnah, 24 Zip, Telem, Bealoth, 25 Hazor, Hadattah, Kerioth Hezron, (mekana Hazor) 26 Amam, Shema, Moladah, 27 Hazar Gaddah, Hesmon, Bethpelet, 28 Hazar Shual, Beersheba, Biziothiah, 29 Baalah, Lim, Ezem, 30 Eltolad, Chesil, Hormah, 31 Ziklag. Madmannah, Sansannah, 32 Leboath, Shilhi, , Ain, tona Rimmon to: topvü tssotsüi yantsü mekyu tokvü tona jiang nkonphia oyan jiang to. 33 Phunglan jothe lo yantsü jiango, Eshtaob, Zorah, Ashanah, 34 Zanoah, Engannim, Tappuah, Enam, 35 Jrmuth, Adullam, Sokoh, Azekah, 36 Shaaraim, Adithaiam, Gederah tona Gederothaim to: topvü tssotsüi yantsü taro mezhü tona jiang nkonphia jianglo oyan jiang to. 37 Hoji ephalo Zenah, Hadashah, Migdalgad, 38 Dilean, Mizpah, oktheel, 39 Lachish, Bozkath, Eglon, 40 Kabbon, Lahmam, Chitlish,4i Gederoth, Bethdagon, Naamah, tona Makkedah: topvü tssotsüi yantsü taro tiruk tona hoji nkonphia oyan jiang to. 42 Elani Libnah, Ether, Ashan, 43 Iphtah, Ashnah, Nezib, 44 Keilah, Achzib, tona Mareshah to: tsotsüi yantsü tokvü tona hoji nkonphia oyan to. 45 Elani Ekron tona jilo yanro yantsü jiang, 46 tona Ashdod ndüngo yanro yantsü jiang to, osi elani Ekron lona Mediterranean jümang nandang to. 47 Elani Ashdod tona gaza to ephalo yanro yantsü jiang na Ejip erüi zhükhfü ji ejan tona Mediterranean jümang tssa ejan to. 48 Phunglanro meta jianglo yan tsü Shamir, Jattir, Sokoh, 49 Dannah, Kiriath Sepher (Debir), 50 Anab, Eshtemoa, Anim, 51 Goshen, Holon, tona Giloh to yantsü taro ekha osi hojiang nkonjano yanro jiang to. 52 Elani yantsü toku Arab, Dumah, Eshan, 53 Janim, Beth Tappuah, Aphekah, 54 Humtah, Hebron, tona Zior to tsotsüi yantsü tokvü osi shiang ephalo yanro jiang, 55 elani yantsü taro Hoan, Karmel, Ziph, Juttah, 56 Jezebel, Jokdeam, Zanoah, 57 Kain, Gibeah, tona Timnah osi shiang nkonjano yanro jiang to. 58 Elani Hulhul, Bethzur, Gedor, 59 Maarath, Bethanoth tona Elketekon to yantsü tiruk shiang tona hojiang nkonphia yanro jiang to. 60 Elani Kiriath Baal (Kiriath Jearim) tona Rabbaj to yantsü eni ji tona jiang nkona yanro lio jiang to. 61 Lijüngi Beth Arbah , Middin, Seokakah, 62 Nibshan, oma yantsü ji tona Engedi to yantsü tiruk tona jiang nkonphia yanro jiang to. 63 Tokhatola Juda kyon jiang na Jebusite kyon Jerusalemi vamo jiang phani n sikhukcho. Hoji tsükona nchüng jana Jebusite kyon jiango Juda kyon jiang nzo Jerusalem lo vanala.

Joshua 16

Ephraim Pio Meta Tona Manasseh Engrhewoe Jito

1 Joseph tsoronichen jiang pio meta ji jolowoe erü ji jo Jerikondüngo Jordan lo Jeriko jüpukphen jina engrchoe na lijungoe rheyicho. Hoji lona Jeriko oena phunglan metawoe na Bethel jana chüngicho. 2 Tosi Bethel lona Achites jiang vanphen yakchia Luz woe yicho. 3 Hoji lona engrhewoe Japhletites jiang metawoe Beth Horon oküpo ji jana yicho. Hoji lona Gezer woe oyi Mediterrenean jümangoe yicho. 4 Joseph tsoronichen, Ephraim jipo tsoronichen tona Manassegh engrhewoe evan jiang to na meta shi onte ejan tssoa hungcho.

Ephraim

5 Ephraim wopan meta jo shi: Onte erü jo Ataroth addar lona engkhüwoe Beth Horon omhao ji jana yicho. 6 Osi jilona Mediterranean jümang jana yicho. Michemethath jo onte khümkiwoe tssocho. Hoji lona engrhewoe na erü ji khuki Zanaath shiloh lo rheyi hoji yakchia oyi Janoah engkhüwoe chiyicho. 7 Jitosi Janoah lona benkae Ataroath tona Naarah tolo oyi Jeriko jani jilona Jordan lo echecho. 8 Erü jina Tappuah lona engrhewoe oyi kanak zhükhfüro ji yakchia Mediterannean jümang lo echecho. Shijo Epharaim wopan jiang pio meta shi ephalo Manasseh metae chungi 9 yanro yantsü tara thephae picho. 10 Tokhatola Gezer lo vamo kanaan kyon jiango ontena phani n sicho. Hoji tsükona nchüng jana Kanaan kyon jiang na Epharaim kyon jiang nzo vana khatola onteji rikata onte nriden tssothukala.

Joshua 17

Engrhewoe Manasseh Ji

1 Jordan na engrhewoe meta jijo Joseph tsoe eramo Manasseh tsoronichen jiang picho. Manasseh tsoe eramo jo Gilead opo Machir, rasan esopvüi ekhüng tsso jina Jordan engrhewoe Gilead tona Bashan tojo ombo picho. 2 Jordan engrhewoe meta jijo Manasseh wopan ejoma shiang picho: Abiezer, Helek, Asriel, Schechem, Hepher, tona Shemida to. Shiango Joseph tsoe Manasseh tsokhying jiang osi wopan lo OPVÜI etssoe jiang. 3 Manasseh tsoe Machir, jitsoe Gilead, jitsoe Heper. jitsoe Zelophehad jo tso khying n van na tsolo tae vancho. Onte mying jo Mahlah, Noah, Hoglah, Milkah, tona Tirza to. 4 Ontena pvüti Eleazar tona Nun tsoe Joshua osi esopvüiden to jiang thüngi owo ezotacho, "OPVÜI na e osi eboe e wopan ha meta chichoe epile to Moses yizüng picho lia." Hoji tsükona OPVÜI na phyo ji ephan onte osi onte wopan eboe jiang to meta chichoe picho. 5 Hojito Manasseh jo Jordan engkhüwoe Gilead tona Bashan to ephalo ejan taro hungcho. 6 Hojijo ombo tso khying tona tsolo to jiangna ejan hungroa jina. Osi Gilead meta jo Manasseh wopan enhyoe vamo jiang picho. 7 Manasseh meta jina Asher lona Sechem engkhüwoe Michmeth jancho. Jisülo jo erü jana jolowoe joyi Entappuah kyon jiang nkonhyacho. 8 Tappuah nkonphia meta jijo Manasseh ejan, tokhatola erü lo Tappuah yantsü jijo Ephraim echhi. 9 Jisülo jo erü jina oküpoe Kanah zhükhfüro jiwoe joyicho. Zhükhfüro ji jolowoe yantsü jiango Manasseh meta khatola Ephraim ejan. 10 Ephraim jo jolowoe osi Manasseh jo khümkiwoe toli Mediteranean jümang jo engrhewoe erü ji tssocho Asher jo engrhe khümkiwoe osi Issakhar jo engkhfüwoe to tssocho 11 Issakhar tona Asher to metae Manasseh na Bath Shan tona Ibleam, hojiang nkonphia yantsü jiang, jütssae Dor, Endor, Taanacho, Megiddo tona onte nkonphia yantsü jiang to. 12 Tokhatola Manasseh kyon jiangna jilo vamo kyon jiang phani n sikhukcho, hoji tsükona Kanaan kyon jiangna jilo vanala. 13 Israel jiangna heto etho jüa kümaha ontena Kanaan jiang topvü phani n sicho, tokhatola ontena Kanaan kyon jiang ji onte nriden tssothukcho.

Ephraim Tona Engrhe Manasseh To na Meta Chonphatala

14 Joseph tsoronichen jiang na Joshua ezocho, "Nino ntio tssona eiyo meta motsünga tae epichola? OPVÜI na e mmhayio ji ephan e ji owo elüm tssothaka." 15 Joshua na ezocho, "Nteji owo khoshasi phunglan meta jina nte n tssona tssona Perizzite tona Rephaim to meta ji owo nte popo eran danrhüpi vantava." 16 Ontena janlancho, "Phunglan meta jina e n tsson, khatola hayitsüi evamo Kanaan kyon Beth Shan tona hoji nkonjano evan elani Jezreel hayi evan to jiangna yonjak zotoro elümoto lia." 17 Joshua na Ephraim jipo tona engrhe Manasseh to thüngi ezocho, "Otsotso nte ji woro wotsson osi elümoto etho jüa. Nteno meta motsünga tae mekna nte jamka. 18 Phunglan meta jiha nte ejan tssovka. Hoji jo erantsü khatola ntena danrhüpi litssa esanawoe na esanawoe jana hoe vantava. Kanaan kyon jiang jo ontena yonjak zotoro lia etho jülia phani onte sitava."

Joshua 18

Meta Enhyoe Lio Ji Jantao ji

1 Israel jiangna metaji khyothakale onte topvüna Shiloh lo etsseni OPVÜI vanrhyu süranki ephokachitacho. 2 Israel jipo yolo pvüji tiying jo meta chitao ji n janhancho. 3 Hoji tsükona Joshua na Israel jiang ezocho, "Nte motsüi Potsow OPVÜI jina nte epio meta jilo rheyi meta chov tsükona ntena ntio nhyakta mungala? 4 Pvüji akvülo na otsük ethüm ren ethüngi rothuka. Ana onte chiwothuka onte jüpomo meta jiang owo nkoe vathukvüka. Jitosi ontena a thüngi elani yithukvüka. 5 Metaji echi tiying chiroe pvüji tiying ji pivka; Juda jo jolowoe onte meta jilo vamka, Joseph ha jükiwoe onte meta jilo vamka. 6 Hojito pvüji tiying ji meta jiang erani oyi a pitava. Tona ana ete Potsow lüm erüng ji yamvü tsükona phyalyu tssoe zevka. 7 Tokhatola Levi jiango nte nzo ejan jo hungu meka, ntiotssole onte ejan jo onteno OPVÜI pvütiden tssoe ombo benkav ji. Gad, Beuben, engkhfü Manasseh to jo OPVÜI phajae Moses na Jordan engkhfüwoe onte pirathaka." 8 Joshua na heto onte ezothakale ethüngche wworo jiangna chiwo meta jiang erükontacho: "Chio meta topvü rashi zetava osi hokarae vatasi, a thüngi yitava. Tona ana shiloh shilona nte tsükona OPVÜI thüngi thyutavka." 9 Tole kyon jiangna chiwo onte metaji echi tiying jantao ji, yantsü jiang jüa eranrhyutacho. Jisülojo ontena Shiloh lo Joshua thüngi yitacho. 10 Joshua na Shiloh lona OPVÜI thüngi jantasi pvüji tiying jiang meta piracho.

Benjamin Pio Meta Ji

11 Benjamin pvüji jamo metaji ovüngo picho. Onte meta jo Juda tona Joseph to meta yuta lo tssocho. 12 Jükiwoe onte erü jo Jordan lona benkae Jeriko jükiwoe tssalüpro jilona engrhewoe oyi phunglanro jiang yakchia oyi Bethaven lijüng ji jana yicho. 13 Jisülojo erü jina Luz jolowoe Beth Horon (Bethel to tsa), oküpo ji jolowoe phunglan Ataroth Addar ji joyicho. 14 Jisülojo erü jina phukowoe yicho, osi phunglanro shi engrhewoe na oyi jolowoe Kiriath BaaKKiriath Jearim), Juda echi jiwoe joyicho. Hoji jo engrhewoe erü ji. 15 Jüjowoe erü jina Kiriath Jearim tssalona benkae Nephtoah jünhyo jilo yicho. 16 Jilona joyi Hinnom hayi chanchochio phunglan Rephaim hayitsü tssalo lio ji jothelo joyicho. Jisülo jo jüjowoe Hennom hayitsü yakchia joyi Enrogel woe Jebusite yingsüng ji jüjowoe chiyicho. 17 Jilona jükiwoe Enshemesh lo chungi jilona Adummim eyak ji zechilo Geliloth jilo chiyicho. 18 Jilona Bohan longpvü to tsao jilo joyicho (Bohan jo Reuben tsoe) toli Jordan hayi chanchochio yingsüng jilo chüngicho. 19 Jilona hayitsü jiwoe Beth Hoglah yingsüng ji jükiwoe na joyi echü jümangi tsüthei jükiwoe Jordan na tsütheta vamo jilo echecho. Hojijo jüjowoe erü ji. 20 Jordan na engrhewoe erü ji. Shiang jo Benjamin wopan ejan tssoa pio meta ji erü jiang. 21 Benjamin pvüji pio yantsü jiango Jeriko, Beth Hoglah, Emek Keziz, 22 Beth Arabah, Zemaraim, Bethal 23 Aim, Parah, Ophrah, 24 Chepharammoni, Ophni, tona Geba: to yantsü taro eni shiang tona jiang nkonphia yanpvü jiang to. 25Elani Gibeon, Ramah, Beeroth, 26 Mizpah, Chephirah, Mozah, 27 Rekem, Irpeel, Taralah, 28 Zela, Haeleph, Jebus, (mekana Jerusalem), Gibeah, tona Kiriath Jearim to yantsü taro mezhü shiang tona onte nkonphia yanro shiang tojo Benjamin pvüji wopan jiangna hungwo meta ji.

Joshua 19

Simeon Pio Meta Ji

1 Meta janta enioto jilo jo Simeon pvüji wopan jiang picho. Onte meta jina Juda meta jana wocho. 2 Hojilo Beersheba, Sheba, Moladah, 3 Hazar Shual, Balah, Ezem, 4 Eltolad, Bethul, Hormah, sziklag, Beth Marcaboth, Hazar Susah, 6 Beth Lebaoth, tona Sharuhen: heto yantsü taro ethüm shi tona hojiang nkonphia oyan jiang to. 7 Ji ephalo Ain, Rimmon, Ether, tona Ashan to: yantsü mezhü shiang tona hojiang nkonphia oyan jiang to. 8 Yantsü jiang tona hojiang nkono oyan jiang to jina jüjowoe Baalath Beer (Ramah), jana joyicho. Simeon pvüji lo o pan jiangna onte echi meta hungwo ji shi. 9 Juda jo onte ethelan eli lona tsükata meta hungwo jina ejoma jo erüchoe Simeon pvüji picho.

Zebulun Pio Meta Ji

10 Meta janta ethümoto jijo Zebulun pvüji lo wopan jiang ejan tssocho. Ontena hungwo meta jina Sarid jancho. 11 Erü jina hojiloha engrhewoe Mareal oyi Dabbesheth tona Jokneam zhükhfü to rhaka yicho. 12 Sarid esanawoe jo erü jina engrhewoe Chisoloth Tabor erüi jana jilona oyi Daberath lo oyi Japhia jana yicho. 13 Hoji lona engkhüwoe Gath Heper tona Ethkazin to jana oyi Rimmon lamoe Neah jiwoe na fin' yicho. 14 Jükiwoe jo erü jina Hannathon woe oyi Iphtahel lo echecho. 15 Hoji lo Kattath, Nahalal, Shimron, Idalah, tona Bethlene: to yantsü taro eni tona onte nkonphia oyan jiang to. 16 Yantsü shiang tona jilo yanro shenkao jiang to topvü Zebulun pvüji lo wopan jiangna hungwo meta jilo jüa.

Issakhar Pio Meta Ji

17 Meta janta mezhüo toji jo Issakhar pvüji wopan jiang picho. is Hojilo Jezereel, Chesulloth, Shunem, 19 Haparaim, Shion, Anaharath, 20 Rabbith, Kishion, Ebez 21 Remeth, Engnnim, Enhad dath, tona Bethpazzez to jüa. 22 Erü jina Tabor, Shahazuma, tona Beth Shemesh to rhaka oyi Jordan lo echecho. Hojilo yantsü taro tiruk tona jiang nkonphia yanro jiang to jüa, 23 Yantsü shiang tona jilo yanro shenkao jiang tojo Isaakhar pvüji wopan jiang na hungwo meta jilo jüa.

Asher Pio Meta Ji

24 Meta janta mongo toji jo Asher pvüji lo wopan jiang picho. 25 Onte meta jilo Helkath, Hali, Beten, Achshaph, 26 Allam Melek, Amad, tona Mishal to. Engrhewoe jo erü jina Karmel tona Shior Libnath to rhaka yicho. 27 Erü jina engrhewoe yio jiwoe jo Bethdagon woe yicho osi Zebulun tona Iphtahel to rhaka oyi Bethemek tona Neil to jükiwoe yicho. Hoji lona jükiwoe Kabul, 28 Ebron, Hammon tona Kanah to lona Sidon jana yicho. 29 Hoji lona erü ji Ramah woe oyi pikhfüo yantsü Tyre woe na echecho. Jilo Mahalab, Achizib, 30 Ummah, Aphek tona Rchob to yantsü miku eni tona jiang nkonphia yanro jiang to. 31 Yantsü osi yanro shiang ji Asher pvüji lo wopan jiang meta jilo jüracho.

Naphatali Pio Meta Ji

32 Meta chita tiruko jijo Naphtali pvüji wopan jiang picho. 33 Onte erü jana Helep lona benkae Zaanannim, lo lümro dung ji nandang, elani jilona Adaminekeb, jilona Jamnia osi Lakkkum jana oyi Jordan lo echecho. 34 Jilona erü ji engrhewoe Aznoth Tabor, woe oyi jilona Hokkok lo oyi jolowoe Zebulun rhak, nna engrhewoe Asher rhak, engkhüwoe Jordan rhak to yicho. 35 Pikhfü theo yantsü jo Ziddim, Zir, Hammath, Rakkath, Chinneerth, 36 Admah, Ramah, Hazor, 37 Kedesh, Edrei, Enhazor,38Yiron, Migdalel, Horim, Bethanath, tona Beth Shemesh: to tsotsüi yantsü taro toku jiang tona onte nkonphia yanro jiang to. 39 Yantsü osi yanro shi ang hetopvü Naphtali pvüji lo opan jiangna hungwo meta jilo jüa.

Dan Pvüji Pio Meta Ji

40 Meta janta tiyingo to jijo Dan pvüji lo wopan jiang picho. 41 Onte meta jilo Zoro, Eshtaol, Leshemesh, 42 Shaalbim, Aijalon, Ithlah,43Elon, Timnah, Ekron, 44 Eltekeh, Gibbethon, Baalath, 45 Jehud, Beneberak, Gathrimmon,46Mejarkon, tona Rakkon, elani Joppa nkonphia meta jiang to. 47 Dan jipo na onte meta ji monale owo Laish ji ori tssoe jilo kyon jiang lüngtharae sisi meta ji onte echhi to hoe khicho. Ontena jilo vankae Laish ji Dan to tsae khicho, jijo onte motsüi Dan myingo tsakacho. 48 Yantsü osi jilo yanro jiang topvü Dan pio meta jilo jücho.

Meta Jantakhao Ji

49 Israel jiang na meta ji jantarasi ontena Joshua ha meta picho. 50 OPVÜI yizüng ephanina ontena ombo na echomo yantsü ji picho: Timnath Serah tsao Ephraim phunglanro jilo yantsü ji ombo picho. Ontena hojito meta ji jantacho. 51 Nun tsoe Joshua, elani Eleazar pvüti, osi Israel to pvüji lo kvüri esopvüi jiang na Shiloh lona OPVÜI mhadungo süki kipüng lona onte thüngi ngatüngngarisi sülo phylyu fuksi meta ji hetowoe na chitae picho.

Joshua 20

Tsanthe Yantsü Jiang

1 Jisülo jo OPVÜI na heto Joshua ezoa Israel jiang ezothukcho, 2 "Ana nte ezole to Moses ezowo tsanthe yantsü jiang ethüngi khilana. 3 Kyon ochona sana n tsiv ochosana lüngtha na ombo nlilam yana vamo ji mhadungo tsani yantsü jianglo tsanthevka. 4 Ombona yantsü jiang motsüngalo tsana rheyi kipüngo yitssophen jilo esopvüiden vamo jiang thüngi kvütolyui tssatssotacho sana ji yirüvka. Tona ontena ombo sosi yantsüi rheyi meta motsünga ombo pia vanthukvü. 5 Omüng nlipvüi jina yantsüi rolia kyon jiangna münghan ji ombo khelo theyiv meka. Ombona kyon ji etana na lüm etsuk yakchia meyancho mek tolea n tsiv meyamo ji tsükona ontena ombo ji ezüpi thechiv meka. 6 Ombo yitsso n yakthüng jo osi jilo pvüti ji n chüthüng jo yantsü jilo vamvüka. Jisüi ti ombona ombo yani kholani yivka." 7 Hoji tsükona Jordan na engrhewoe jo ontena phunglan meta Naphtali lo Galilee jilo Kedesh, phunglan meta Ephraim lo Shechem, tona phunglan meta Juda lo Hebron to ethüngchecho. 8 Jeriko engkhfüwoe lijüng phungdungro Jordan na engkhfüwoe jilo, Reuben metae na Bezer to ethüngchecho. Gad meta Gilead lona Ramoth ethüngchecho osi Manasseh meta Bashan lona Golan ethüngchecho. 9 Yantsü shiang jo Israel topvü tsükona osi onte yolo evan tsanthan jiang tsükona ethüngcheo yantsü jiang. Kyon ochona n tssiv oyam lüngthata na ombo n-liv yana vamo ji mhadungo na tsani yantsü jianglo tsanthekhoka; ombo ji nzontsü mhadungo na oyi n tssoyithüng jo n lüngthache.

Joshua 21

Levite Yantsü Jiang

1 Levite wopan esopvüi jiangna pvüti Eleazar tona Nun tsoe Joshua osi Israel topvü lo jiporan jiang to thüngi wotacho. 2 Ontena jilo Kanaan meta Shiloh lona onte ezotacho, "OPVÜI na enaha vanphen yantsü epile to Moses ezocho lia osi yantsü ji nkonphia e ekümrümo yantsophen eroyo meta epiv phyoe lia." 3 Hoji tsükona Israel jiangna OPVÜI yizüng ephani na onte ejan lo khichei Levite jiang yantsü tona jiang nkonphia eroyo meta to picho. 4 Levite pvüji lo Kohath wopan jiang ovüngo pidencho. Aaron pvüti lona thicheo wopan jiango Juda, Simeon tona Benjamin to meta lona yantsü taro ethüm khichei picho. 5 Kohath pvüji enhyoe vamo jiango Ephraim, Dan, tona engrhe Manasseh to lona yantsü taro khichei picho. 6 Gershon pvüji jo Issachar, Asher, Naphtali tona engkhfüwoe Manasseh to lona yantsü taro ethüm picho. 7 Merari pvüji lo wopan jiango Gad, Reuben tona Zebulun to meta lona yantsü taro eni khichei picho. 8 OPVÜI na Moses yakchia phyoe vao ji ephan Israel jiangna yantsü shiang tona eroyo meta jiang to phyalyu zetasi Levite jiang pitacho. 9 Yantsü shiang jo Juda tona Simeon to meta erüi na khichei, 10 Aaron tsoronichen lo Kohath pvüji Levi lona bukcheo jiang pio yantsü mying jiang: meta shiang ji ovüng tssoa onte pidencho. 11 Ontena Juda phunglanro lo Arba yantsü (Arba jo Anak opo), enhünga Hebron to tsao ji tona hoji füa eroyo jiang to picho. 12 Tokhatola yantsü jilo oli jiang tona yanro shenkao jiang to jo Jephunneh tsoe Kaleb ji pithakcho. 13 Hebron (tsanthe yantsü yolo motsünga), ji ephalo yantsü shiang jo Aaron pvüti tsoronichen jiang picho; Libnah, 14 Jattir, Eshtemoa, 15 Holon, Deber, i6Ain, Juttah, tona Beth Shemesh to yantsü tukvü shiang tona jianglo eroyo jiang to jo Juda tona Simeon to lona khichecho 17 Benjamin meta lona yantsü mezhü: Gibeon, Geba, i8Anathoth, tona Almon jilo eroyo jiang to. 19 Hojito Aaron pvüti tsoronichen jiang ji yantsü taro ethüm jilo eroyo jiang to picho. 20 Aaron tsoronichen Kohath wopan ejoma jiango Ephraim meta lona yantsü ejoma picho. 21 Onteno yantsü mezhü: Ephraim phunglanro Shechem tona jilo eroyo jiang (tsanthe yantsü yolo motsünga), Gezer, 22 Kibzaim tona Beth Horon, elani jilo eroyo jiang to picho. 23 Elani Dan meta lona yantsü mezhü onte picho: Eltekeh, Gibbethon, 24 Aijalon, tona Gathrimmon osi jilo eroyo jiang to picho. 25 Engrhewoe Manasseh lona ha yantsü eni onte picho: Taanakh tona Gathrimmon tona jilo eroyo jiang to. 26 Hojito Kohath pvüji wopan jiangna yantsü taro tona jianglo eroyo jiang to hungcho. 27 Levi thanpoe Gershon wopan jiango, engrhe Manasseh lo yantsü eni; Bashan lo Golan yantsü (tsanthe yantsü motsünga) ji tona Beeshterah yantsü to jiang ji yantsophen meta jiang phanhya hungcho. 28 Elani Issakhar erüwoe na benkae yantsü mezhü: Kishon, Daberath, 29 Jarmuth tona Engannim to jiang ji yantsophen meta jiang nzo picho. 30 Jiang ephalo Asher erüwoe yantsü mezhü: Mishal, Abdon, 31 Helkath, tona Rchob to jiang ji onte yantso li eroyo jiang phata picho. 32 Naphtali erüwoe ha yantsü ethüm: Galilee lo Hedesh (tsanthe yan yolo motsünga), jiha yantso' li ji thenhya hungcho, elani Hammoth Dor, tona Kartan to jiang ha onte yantso li jiang phanhya hungcho. 33 Gershon khümtsüng wopan jiangna ehungo jiang ji tssotsüi yantsü taro ethüm onte yantso li eroyo jiang phanhya hungcho. 34 Levi khümtsüng enhyolani evamo, Merari jiango Zebulun erüwoe yantsü mezhü: Jokneam, Kartah, 35 Dimnah tona Nahalal to ji yantso li eroyo jiang thenhya hungcho. 36 Reuben erüwoe jo yantsü mezhü: Bezer, Jahaz, 37 Kedemoth tona Mephaath to ji yantso li jiang phanhya hungcho. 38 Gad wopan jiango yantsü mezhü: Gilead lo Ramoth (tsanthe yan motsünga), Mahanaim, 39 Heshobon tona Jazer to jiang topvü ji onte yantso li jiang thenhya jancho. 40 Merari khümtsüng wopan ejamo jiango tssotsüi yantsü taro eni jancho. 41-42 Israel jiangna liko ekhio jiang lona tssotsüi yantsü zhüro tiza tona hojiang nkonphia yantso li jiang to ji Levi jiang picho.

Israel Jiangna Meta Ji Hoe Khiala

43 Hojilo OPVÜI na onte pyimtsü motsüi jiang thüngi epiv tsükona tüngochünga phyochako jiang topvüto Israel jiang picho. Ontena kvüthüng hojiang ji hoe khicho sana, ontena hojiang lo vanjüng tssoe sicho. 44 Ombona onte pyimtsü motsüi jiang thüngi phyochaki vao ji esüa, OPVÜI na meta topvüto lo noying onte picho. OPVÜI na Israel jiang ji onte ri jiang topvü pono ekhyo pithako ji tsükona, onte ri jiang yolo motsünga ti naha onte n zalanchikhukcho. 45 OPVÜI na ombona phyochako jiang ji motsünga tia n valanchina topvüto Israel jiang thüngi bencheyicho.

Joshua 22

Engkhfüwoe Pvüji Jiang Joshua na Oki Yithukala

1 Jisülo jo Joshua na Reuben pvüji, Gad pvüji tona engrhewoe Manasseh pvüji to kyon jiang tsarhyucho. 2 Ombona onte ezocho, "OPVÜI phajae Moses na nte ezowo jiang osi ana nte ezowo jiang topvüto ntena engae tssorathaka. 3 Yuta shiang hetopvü yakchia ntena nte Israel kyon jiang n sihan. Ntena OPVÜI nte Potsow yi jiang engae benphithaka. 4 Enhungo OPVÜI nte Potsow na ombo püngzüng ephan Israel jiang noying pithaka. Enhungo ntena OPVÜI phajae Moses na nte pio meta Jordan na engkhfüwoe ntena hoe vao jilo yitava. 5 Moses na nte pio shikhfü jiang benphitav ti mhechotava: OPVÜI nte Potsow nzantava, ombo rüngcho tssoyitava, ombo yizüng jiang benphitava, ombolo longtsükata vantava osi nte lümbüm osi eküm topvü na ombo benkatava." 68 Joshua na ombo mmha onte randankata heto ezoa yithukcho: "Nteno ejüeliden kümi oki yitala, tssiden khosha vanthaka, shona, janti, yongmen osi yonjak tona mpensü elümoto lithaka. Ntena ori khelona shiang hungwo ji oyi nte oshomden thüngi chitakhe." Jisülo jo ontena oki yitacho. Moses na Manasseh pvüji phoko jo Jordan engkhfüwoe meta ji picho, tokhatola onte ejoma jo pvüji thanpo jiang nzo Jordan engrhewoe picho. 9 Hojito Reuben, Gad, tona engrhe Manasseh to pvüji jiangna onte ki yiracho. Ontena Israel kyon ejoma jiang Kanaan lo Shiloh lo silanchia onte meta Gilead, OPVÜI na Moses yakchia phyoe vacho onte pio jilo yitacho.

Jordan ndüngo Thanphen ji

10 Rebuen, Gad, tona engküwoe manasseh to na Geliloth lo chiyicho osi jijo Jordan engrhewoe. Ontena jilo thanphen sa elümoto mmhom tssokachicho. 11 Tole Israel kyon thanpoe jiang na ezocho, "Zetava, Israel kyonden, Reuben, Gad tona engkhüwoe Manasseh pvüji kyon na Jordan na onte metawoe thanphen tssokachithaka!" 12 Israel thanpoe jiangna hoji zoale onte topvüna Shiloh lo sanrhyutae engkhüwoe evamo pvüji jiang thüngi ori tssolo evov sanrhyutacho. 13 Tole Israel kyon jiangna Eleazar pvüti ji tsoe Penehas ji Gilead meta lo Reuben, Gad tona engkhüwoe Manasseh to pvüji kyon jiang thüngi wothukcho. 14 Pinehas nzo otsük taro, engrhewoe pvüji jiang akvü lona esopvüi tsük-tsük tona khümtsüng akvü lona jiporan tsük-tsük to wothukcho. 15 Ontena Gilead meta ji owo jani OPVÜI kyon topvü thung tssoa Rebuen, Gad tona engrhe Manasseh to kyon jiang thüngi ezocho, 16 "Nteno ntioli Israel Potsow mhadungo hetüv nlan tssochola? Ntena nte echhi thanphen tssoji yakchia OPVÜI nlümo tssothaka! Enhungo nteno ombo sürüiden mek! 17 Ntena Peor lona mmen tssoe OPVÜI na vara rothuko ji zeta. Eteno nchüng jana hoji ndana ezüpi vana. Hoji mmen jina e n tssonchoke? 18 Nteno ombo sürüiden etssov ekhiranta alo? Ntena nchüng OPVÜI panlana tssona ombona ojyua jo Israel topvü thüngi lüm tsukvü. 19 Hoji tsükona rite meta jilona ekhümvü nte n tsson na OPVÜI metae ombo süranki tssoe elio jilona oro khümtava. Ete yolona liko chontava. Tokhatola OPVÜI panlana osi ete yolo n myanta chancheta khümphen thanpo ti-tssotava. 20 Zerah tsoe Akhan na kvüto roe esiv tsütsailan jiang tsükona oyi nngav Israel okho topvüna ezüp ndukcho sana ji zetava. Akhan mmen ji tsükona ombo tae chücho mek." 21 Reuben, Gad tona engkhüwoe Manasseh to pvüji kyon jiangna engrhewoe pvüji eramoe jiang ji heto janlancho, 22 "Tokhamo jijo Potsow! Ombo OPVÜI ji! Thotsü jo Potsow! Ombo OPVÜI ji! Ena ntio tsükona hoto tssocho sana ji ombona ntsia osi ena nteha nte ntsithukhungala! Ena OPVÜI panlana ombo n longtsüv sia tssona eküm e ti vanthuka! 23 Ena ebobo thanphen tssoe jilona erungthan piv, benro than osi khümshümta than piv tssocho tssona OPVÜI khi ezüp epithuka. 24 Meka! Ena hoji tsso jijo sülani nte tsoronichen na heto e ezov ekyu lona tssocho, 'Nteno OPVÜI Israel Potsow thüngi ntio tssov lia? 25 Ombona e tona Reuben, Gad, woro to nte yutalo erü ji Jordan tssothukcho. Ntena OPVÜI thüngi ekhiramo n li.' to ezokhuka. To tssona nte tsoronichen jiang tona e tsoronichen jiang jina OPVÜI n khümvü sikhoka. 26 Hoji tsükona ena erungthan pia, othan thanpo piv tsükona thanphen tssocho mek, 27 tokhatola e kyon osi nte kyon to chekaphen tsükona osi ete sülani echungren jiang tsükona, osi enaha erungthan tona khümshümta than hansi OPVÜI ntho süranki lona ombo khümala to chethephen ena tssocho. Shijo ena OPVÜI n tsi to nte tsoronichen jiang khi e n phyoyithokvü tsükona tae. 28 Hoji to e phyoyio yuta chiyiathüng e tsoronichen jiang na 'O, e motsüi jiangna ha OPVÜI thanphen ji esüa heto tssokachicho. Jijo othan rung phen osi ekümrümo thanphen mek, khatola e kyon tona nte kyon to chethetaphen.' to phyothoku etüm ena vasi tssocho. 29 Ena kvüthüngha thanpoe tssoe erungthan osi benro than pia OPVÜI tachio osi ombo n longtsüv siv tsükona mek. OPVÜI vanrhyu ranki mhadungo thanphen lio ji yaka ena thanphen thanpo etssov etümezi n li." 30 Pvüti Penehas tona okho esopvüiden otsük taro engrhewoe pvüji jiang yolo wopan lo eramo jiang to jiang na Reuben, Gad osi engkhfü Manasseh to kyon jiangna phyoji engasi lüm pükcho. 31 Pvüti Eleazar tsoe Penehas na onte ezocho, "Enhungo OPVÜI nte ndüngo vana to ena chethethaka. Ntena ombo panlancho mek, hoji tsükona ntena Israel kyon jiang ji OPVÜI na ekhom lona shanchothaka." 32 Jisülo Penehas tona esopvüiden to jiangna Gilead metalo Reuben tona Gad, to kyon jiang sisi Kanaan metae Israel kyon jiang thüngi oyi ezotacho. 33 Tole Israel jiangna lüm püki OPVÜI thüngtacho. Jisüi jo ontena Ruben tona Gad to vanphen meta ji owo ori tssoe meta ji roe esiv n phyotav sicho. 34 Reuben tona Gad to kyon jiangna phyotacho, "Thanphen shijo ete topvü thüngi OPVÜI jo Potsow to e chethethukphen." Hoji tsükona ontena metaji "Ehungpvüi" to tsacho.

Joshua 23

Joshua Thakchi Yi

1 Sülani jo OPVÜI na Israel jiang nkonphia ori vamo jiang khelona onte shanchocho. Jithüng jo Joshua ji elümoto sonthakcho, 2 hoji tsükona ombona Israel jiang topvü, eramoeden, esopvüiden, yitssoeden tona tsüphoeden to jiang tsae ezocho, "Enhungo aiyo a sonthaka. 3 OPVÜI nte Potsow na nte tsükona jipo thanpo shiang thüngi ntio tssothakcho sana ntena hungthaka. OPVÜI nte Potsow na nte tsükona rotapvü. 4 Jipopoe Jordan zhükhfü lona benkae Mediterranean jümang nandang vamo jiang ana khyothaka osi n khyorav enhyoe lio jiang topvü meta ji nte pvüji echi etssov ana nte pithaka. 5 OPVÜI nte Potsow na onte ji nte thüngi na tsanthukvüka. Osi nte mhadungi na ombona onte phani sia yivka. OPVÜI nte Potsow na phyochako ji esüa onte meta ji nte echi tssovka. 6 Hoji tsükona tüngochüa oyi engata, Moses yizüng lo erani lio jiang topvü benphiv ekhyo tssotale. Hoji lo erani lio jiang ejükaro tia ti khaksitava. 7 Nte ndüngo jipopoe enhyoe vamo shiang thüngi ti khümshümtava, onte Potsow jiang mying khi ha ti echümtava osi hojiang khümta onte mhadungo ti epyakthetava. 8 Jithüngi na jo nchüng jana heto nte vanthuko shi OPVÜI thüngta vantava. 9 Ntena khochiathüng OPVÜI na nte mhadungi na etho ejüi jipo jiang phankhani nte siyicho osi ochina ha ombo n zalanchikhuk. 10 OPVÜI nte Potsow na ombo phyochak ephanina nte tsükona ori tssoa vana, hoji tsükona nte ri wothüng motsünga na nte yolo tsüka mhadungo tsamka. 11 Hoji tsükona OPVÜI nte Potsow yi engayiv ti mhechotava. 12 Nte lo longtsüka yesoa nte yolo jipopoe vamo shiang yolo theta nte yolo lolan tssota yicho jo, 13 ntena khochiathüng opvüi na nte mhadungi na ori shiang phani siv mek to engathe khitava. Jithüngina jo, onte ji nte tsirhi nte vayicho esüa osi sokvü nrhüi nte vayicho esüa ekyuv lia kümvüka, osi mankvüi nte erhüpicho to nte noa, nte mhyiki okyo jücho esüa tssovka. Osi hotüv ekyutssi ji nte tsükalea meta mmhom OPVÜI na nte pio shilo na n chürathüng jo livka. 14 "Enhungo a echüv tsüngon janthaka. OPVÜI nte Potsow na mmhom nte piv phyochako jiang topvü nte pithaka to nte otsük akvü lümbümi na ntsia. Ombona phyochakcho topvü motsünga tia n khachov benthukthaka. 15 Tokhatola ombona mmha phyochaki vao jiang topvü nte pithako ji esüa ekyuv nte pio jiang ha topvü benthukvü. 16 OPVÜI nte Potsow na ntsata benphiv nte vayio jiang ntena n benphia tssona, osi ntena Potsow thanpo benkata khüma tssona, ombo lüm etsuk lona nte ezüpthukvüka, osi ombona meta mmhom nte pithako shilo nte ochina ha vanphyav meka."

Joshua 24

Joshua na Shechem Lo Kyon Jiang Ezoala

1 Joshua na Israel lo pvüji topvü Shechem lo tsarhyucho. Ombona eramoe jiang, esopvüi jiang, yitssoe jiang tona tsüphoe jiang to tsacho osi ontena OPVÜI vanrhyu lo rotacho. 2 Joshua na kyon topvü ezocho, "OPVÜI, Israel nte Potsow na heto phyov elio ji: 'Nkolo jo nte motsüi jiangna Euphrates zhükhfü na pankae vani thanpo Potsow khümtacho. Hojiang yolo tsüka jo Abraham ha Nahor oni opo Terah. 3 Hojithüng ana nte motsüi Abraham ji Euphrates zhükhfü pankae na tsachuki sosi Kanaan meta topvü yakchia ombo socho. Ana tsoronichen elümoto ombo picho. Ana Issak ombo picho, 4 osi Isaak lona Esau ha Jakob oni bukcho. Ana Esau ji Edom meta phunglanro ji picho, tokhatola nte motsüi Jakob tona ombo tsoeoro jiang to jo Ejip metae yi sicho. 5 Sülani jo ana Moses ha Aaron oni wothukcho, osi Ejip lo ezüp elümoto rheyicho. Tokhatola ana nte sochukcho; 6 ana nte motsüi jiang Ejip lona sochukcho, tole Ejip kyon jiangna ritsso zotoro osi rasan theta onte phancho. Tokhatola nte motsüi jiangna jümyon jümang ji tssükae 7 hoji tona onte ri jiang to yutalo n nhyai kyata vancho. Tole ana jümang ji shüi Ejip kyon jiang eyukzhüi onte rhekhanthukcho. Ana hoto Ejip kyon jiang tssoyiwo ji ntena ntsia. Ntena lijüngi sunga vancho. 8 Jitosi ana nte sosi Jordan engrhewoe Amorite meta jilo nte chiyithukcho. Ontena nte rolanchia ha ana onte pono ekhyo nte picho. Ntena onte meta ji khicho osi nte khochi mhadungro lona ana onte monthuka yicho. 9 Tole Moab lo mesao Balak, Zepor tsoe jina nte rolanchicho. Ombona Beor tsoe Balam ji nte rhiyikale to oyi yencho. 10 Tokhatola ana Balaam yi n ngayicho, hoji tsükona ombona nte mmhayithukcho. Hojitoli ana Balak khelo na nte shanchocho: 11 Ntena Joradan pankae Jeriko lo chiyicho. Amorite, Perizzite, Kanaan, Hittite, Giegashite, Hivite to jiang na nte rolanchio ji esüa Jeriko lo kyon jiangna ha nte rolanchicho. Tokhatola onte khelona ha ana ekhyo nte picho. 12 Ntena khochiale ana onte yolo ekhenrhük sotheyi Amorite mesao otsük eni ji phani sicho. Onte ekhyo jijo nte yonri osi lotssi na mek. 13 Ana ntena n joncho tüv li nte picho, yantsü jilo vani ntena n chümcho Jününgrozhü lona lhoe tsotala, ntena n chümcho dung lona olive tsotala. 14 "Hoji tsükona enhungo," OPVÜI yikrachita osi longtsüka lia ombo benkatava. Nte motsüi jiangna Mesopotamea osi Ejip lona khümo jiang sitasi OPVÜI khümtava. 15 Ntena ombo n benkahung na ocho benkav sana nchüng methak-tava, nte motsüi jiangna Mesopotamea lona khümo jiang alo ntena enhünga vamo meta shilo Amorite jiang Potsow jiang khümtav la. Tokhatola a tona a wopan to na jo eyio OPVÜI benkavka." 16 Tole kyon jiangna janlancho, "Ena kvüthüng ha OPVÜI sisi Potsow thanpo khümvü meka! 17 OPVÜI ete Potsow na ete opo jiang osi ete ji Ejip metalo ezii eküm lona e sochukcho osi ombona chethev elhi tsso jiang etena hunga. Etena jipo lantaro kyon yakchiathüng topvü lo ombona e nkochecho. 18 Etena meta shilo rheyiathüng ha OPVÜI na meta shilo evamo Amorite jiang phani e siyicho. Hoji tsükona ena ha OPVÜI khümvüka; ombo ete Potsow." 19 Joshua na kyon jiang ezocho, "Tolea ntena OPVÜI n benkakhokvü mpato tssov. Ombo ntho Potsow küma ombona nte mmen n siyikhokvü mpato tssov. Ombona ombo yaka Potsow thanpo zekhukvü mek, 20 osi ntena ombo sisi metapoe Potsow khümta yicho jo ombona nte khangshiv. Ombona ovüngthüng nte thüngi mmhoncho mpato tssolea nte chüthukvü." 21 Tole kyon jiangna Joshua ezocho, "To tssov meka! Ena OPVÜI benkavka." 22 Tole Joshua na ezocho, "Ntena OPVÜI khümvü methako ji ehungpvüi ji nteka." "Ontena janlancho, "Hoka," E ehungpvüi jo e ka." 23 Joshua na ezolancho, "Jito tssona ntena lio metapo potsow jiang sitasi OPVÜI khümvü echümchaktava, Israel Potsow lo longtsükav phyochaktava." 24 Tole kyon jiangna Joshua ezocho, "Ena ete OPVÜI Potsow benkav ka. Ombo yizüng jiang engavka." 25 Tole Joshua na hoji nchuk kyon jiang thüngi ntsata methakcho osi jithüng Shechem lona shikhfü lanso onte picho. 26 Yizüng shiang Joshua na Potsow yizüng kako lo erankacho. Hojito ombona olong khi OPVÜI ntho meta jilo Nitsüdung ji kupi chümkachicho osi heto phyocho. 27 "Ete ehungpvüi ji olong shi tssovka. OPVÜI na e jamo yilan jiang topvü olong shina zothaka. Hoji tsükona nte khi OPVÜI n panlanthukvü ehung pvüi ji olong shi tssovka." 28 Jisülo jo Joshua na kyon jiang yirathukcho, osi otsük akvü na ombo mbo metae yiracho.

Joshua ha Eleazar Oni Chüala

29 Jisülo jo, Nun tsoe Joshua OPVÜI nri ji nzyu nzoasi taro lo chücho. 30 Ontena ombo müng ji Ephraim phunglan meta Gaash phunglan ji jükiwoe Timnath Serah jilo shothecho. 31 Joshua evanthüng nandang osi esopvüi ochoang na Potsow na Israel tsükona chethev tssowo jiang hungchosana jiang evanthüng jo Israel kyon jiangna OPVÜI khümcho. 32 Israel jiangna Ejip lona hansi yio Joseph echümüng ji Shechem lo meta Jakob na jantirang nzoa na Shechem opo Hamor tsoe jiang thüngi shio jilo shothetacho. Meta shijo Joseph tsoeworo jiangna hoe khicho. 33 Aaron tsoe Eleazar ha chücho osi ombo müng jo Ephraim phunglanro meta jilo ombo tsoe Phinehas pio yantsü Gibeah lo shothetacho.

Yitssoeden 1

Juda Tona Simeon to Pvüji na Adonibezek Khyoala

1 Joshua chücho sülo kyon jiangna OPVÜI engacho, "E pvüji jiang yolo kvümoena owo Kanaan sakademla?" 2 Tole OPVÜI na janlancho, "Juda pvüji na khochidemka. Ana meta ji onte khelo theyiala." 3 Juda kyon jiangna Simeon kyon jiang ezocho, "E pio meta jilo ete nzo owo Kanaan kyon jiang thüngi ori tssotavka. E phana rotava; tona enaha nte meta jilo ori nte tssokyuvka. Hojito Juda 4 tona Simeon to pvüji nzo tssoe owo ori tssotacho. OPVÜI na Kanaan kyon tona Perizzite kyon jiang to pono ekhyo onte picho, osi ontena Bezek lona kyon wothüng taro khyothechicho. 5 Hoji lona ontena Adonibezek nduki ombo thüngi rotacho. 6 Ombona yunga tsancho khatola ontena ombo phani rhümae ombo yingpvü tona joyingro to jiang tanchoe siyicho. 7 Tole Adonibezek na ezocho, "Yingpvü tona joyingro to n khyingo mesae ekha tiying na a tssisa kupi khyotsokhyoyua vancho küma enhungo OPVÜI na hoji esüa anaha a nlilanthaka." Jisüi jo Jerusalem mi ombo sosi yicho osi jilona ombo chücho.

Juda Pvüji na Jerusalem Tona Hebron To Khyoala

8 Juda kyon jiangna Jerusalem ji hae khyoe khicho. Ontena hojilo yanchi kyon jiang lüngtharae sisi yantsü ji rungi sicho. 9 Hoji sülojo ontena jüjowoe phunglan metae, phunglan yenjoe osi likyingi to evamo Kanaan kyon jiang thüngi owo rotacho. 10 Ontena Kiriath Arba to tsao Hebron yantsü jilo Kanaan kyon vamo jiang thüngi owo rotacho. Hojilo ontena Sheshai, Ahiman, tona Talmai to pvüji jiang owo khyothechicho.

Othniel na Debir Yantsü khyoala

11 Hoji lona Juda kyon jiangna Debir yantsü (hojithüng jo Kiriath Sepher to tsacho) ji sakalo wocho. 12 Onte yolo Kaleb to tsao jina phyocho, "Khyingroe ochona Kiriath Sepher khyoa sana ana atsolov Achsah ji soa vanthoku ka." 13 Tole Kaleb ongo Kenaz ji tsoe Othneil na owo khyo jina Kaleb na ombo otsolov Achsah ji soa vanthukcho. 14 Yanpiyanthan tsüngono jo Othneil na Achsah ji ompvü opo thüngi oli motsünga chonle to ompvü ezocho. Ompvüna Gadho ji lona joyile opona ntio ompvü jüpona sana to ompvü engacho, 15 tole ompvüna ezocho, "Ana jükha tara ajüponala. Nina apio jijo likying tsso jina." Tole Kaleb na jüpokphen jolowoe osi khümkiwoe woniata ompvü picho.

Juda Tona Benjamin to Pvüji Ekhyo Jiang

16 Moses omo Kenite kyon ji tsoronichen jiangna Jeriko lo mitssüngyo yantsü to tsao jilona Juda kyon jiang nzo khochi Juda jüjowoe lijüng meta Arad lo wotacho. Ontena hojilo Amalikite jiang yolo vanjüngi sicho. 17 Tole Juda kyon jiangna Simeon kyon jiang nzo tssoe owo Zephath yantsü lo vamo Kanaan kyon jiang khyoe khicho. Onte na yantsü ji rhiyikata roe sitacho osi Hormah to tsacho. 18-19 OPVÜI na Juda kyon jiang kyochicho osi ontena phunglan meta ji khicho. Tokhatola onte na Gaza, Ashkelon meka na Ekron to jiang nkonphia yanro jiang tojo n khicho. Meta shianglo kyon jütssa rhüa vamo jiang na yinjak zotoro mmhom lirao jina Juda kyon jiangna phani onte n sikhokcho. 20 Moses na phy woe vao ji ephan Hebron ji Kaleb picho. Ombona Anak tsoronichen yantsü jilo vamo jiang phani sisi vancho. 21 Tokhatola Juda kyon jiangna Jerusalem lo vamo Jebusite jiang jo phani n siwo jina onte na Benjamin kyon jiang onte nzo vantacho.

Manasseh Tona Ephraim to Pvüji na Bethel Khyoala

22-23 Epharaim tona Manasseh to pvüji na Bethel yantsü (Jithüng jo Luz to tsacho) ji halo wotacho. Tole OPVÜI na onte kyocho. Onte na yantsü ji chelo chepyim wothukcho, 24 tole chepyim jiangna kyon tsüka yantsüi na tsana vancho nduki ontena heto ombo ezocho, "Yantsü jilo kvütoli rhowov sana ji nina e zona ena ni meyam meka." 25 Ombo na onte ejüle Ephraim tona Manasseh to kyon jiangna kyon tsüka tona ombo wopan to tae hakasi yantsü jilo evan topvü lüngthae siracho. 26 Hoji sülo jo ombo na Hittite jiang metae owo yantsü tssoe yantsü ji Luz to tsacho, ji enhünga jana lia.

Israel Jiangna Phani N siwo Kyon Jiang

27 Manasseh pvüji na Beth Shan, Taanach, Dor, Ibleam, Megido to yantsü shiang osi jiang nkonphia oyan jiang tolo vamo kyon jiang phani n si; Kanaan kyon jiangna to jilo vani sicho. 28 Kvüthüng Israel jiang etho lia yicho sana ontena Kanaan kyon jiang phani n si tokhatola onte phajae tssothukcho. 29 Ephraim pvüji na Gezer yantsü lo vamo Kanaan kyon jiang phani nsi, hoji tsükona ontena Israel jiang nzo vantacho. 30 Zebulun pvüji naha Kitron tona Nahalal to yantsü lo vamo jiang phani n si; hoji tsükona onteha Israel jiang nzo vani Israel kyon jiang phajae tssotacho. 31 Asher pvüji naha Akko, Sidon, Ahlab, Achzib, Helpah, Aphek tona Rchob to yantsü lo vamo kyon jiang phani n si; 32 Asher kyon jiang na phani onte n siwo ji tsükona onte nzo vantacho. 33 Naphtali pvüji naha Beth Shemesh tona Bethanath to yantsü lo vamo jiang phani n si. Naphtali kyon jiang na Kanaan kyon jiang phani n siwo ji tsükona onte nzo vancho khatola Israel jiangna Kanaan kyon jiang rikata onte phajae tssothukcho. 34 Amorite jiang na Dan pvüji kyon jiang ji phunglan metae phankachi sisi hayi n joyithukcho. 35 Amorite jiang na Aijalon, Shaalbim tona Heres phunglan to lo vancho, khatola Ephraim tona Manasseh to kyon jiangna onte shikhfü küpo vanthuksi onte phajaeden tssothukcho. 36 Edom erü jo Sela jükiwoe Akrabbim eyak lona yakchi yicho.

Yitssoeden 2

Bochim Lo OPVÜI Lanben ji

1 OPVÜI lanben jina Gilgal lona Bochim lo owo Israel jiang ezocho, "Ana Ejip lona nte sochuki ana nte motsüi jiang piv phyoe vao meta jilo nte sochukchicho. Ana phyocho, 'Ana kvüthüngha nte thüngi a ntsata ji yesov meka. 2 Ntena meta shilo kyon shiang thüngi kvüthüngha ntsata vav meka. Ntena onte thanphen jiang roe siyitav shikhfü.' Tokhatola nte na ana nte ezoji n tssohan. Jithüngina jo ntena engang silyuo elhi tssothaka! 3 Hoji tsükona ana enhünga nte ezoala, ana nte mhad ungina na ori jiang phani nte siyiv meka. Onteno nte ri tssovka osi nteji onte potsow jiang nte khümthokvü nte süyavka." 4 Lanben jina hojito phyoale, Isreal kyon jiang topvüna kyatav benkacho,5hoji tsükona metaji Bochim to tsacho. Ontena hoji lona OPVÜI thantacho.

Joshua Chüo Ji

6 Joshua na Israel kyon jiang wothuka onte otsük akvüna ombombo ejan liko khithukcho. 7 Joshua evanthüng nandang jo Israel jiangna OPVÜI benkacho. Osi onte esopvüi ochoangna OPVÜI na Israel thüngi elhi tsüphov tsso jiang onte mhyik na hungcho sana jiang evanthüng jo ontena OPVÜI benkacho. 8 Nun tsoe Joshua, OPVÜI phajae ji nzyu nzoasi taro lo chücho. 9 Ombo echümüng jo Gaash phunglan jükiwoe Ephraim phunglan meta jianglo Timnath Serah lo ombo likolo shothecho. 10 Hoji echungren jijo moni sicho, osi hoji echungren ethan kyon jiangna jo OPVÜI na Israel tsükona ntio tssoa rocho sana ji n tsiv sitacho.

Israel Jiangna OPVÜI Ekhümvü Ji Esanala

11 Jisülojo Israel jiang na Baal khümta OPVÜI mhadungo mmen tssocho. 12 Ontena onte pyimtsümotsüi OPVÜI Potsow ochona Ejip metae na onte sochukcho sana ji mhechoe sisi potsow thanpo, onte nkonjano vamo jiang potsow jiang khümta yicho. Ontena hojiang mhadungo nkhümthei khüma OPVÜI lüm tsukthukcho. 13 Ontena OPVÜI ekhümvü ji sisi Baal tona Astartes to khümta yicho. 14 Jitsükona OPVÜI na lüm tsuki onte ri jiang khi onte sakathukcho osi onte retsoyithukcho. Ombona onte nkonphia ori jiang topvü khi onte sakathukcho osi Israel jiangna onte bobo n kochekhoku sicho, 15 OPVÜI na phyoji esüa ontena ritssolo ewo akvüto ombona onte ryulanchicho. Hoji tsükona ontena elümoto emhokekhentacho. 16 Tole OPVÜI na Israel jiang ji ori khelo na onte shanchoe esopvüiden onte picho. 17 Tokhatola Israel jiangna onte esopvüi jiang lo longtsüka moni sisi potsow thanpo khümta yicho, Onte pyimtsümotsüi jiang na jo OPVÜI yi engacho khatola echungren shilo kyon jiangna hojito n tssov sicho. 18 OPVÜI na kvüthüng esopvüi ethüngcheta sana ombona ethüngcheo esopvüi ji evanthüng nandang jo OPVÜI na kyochia Israel jiangna ori khyocho. Israel jiang na ezüp vara hansi eronta na OPVÜI na khonzan to tssocho. 19 Tokhatola esopvüi ji chüa na Israel jiangna onte eküm eheni kholani echungren ovüngo jiang lona n mhonkao etsso-ephyotacho. Ontena potsow thanpo khümta onte etsophyo n mhom jiang esiv ekhirantacho. 20 To tssoana OPVÜI na lüm tsuki phyocho, "Jipo shina ana onte motsüi jiang thüngi ntsatao ji yesothaka. Ontena ayi n ngao ji tsükona. 21 Joshua chüathüngna onte metalo vamo ri jiang ana phani siv meka. 22 Onte motsüi jiangna ayi engao ji esüa tssetsso sana ana onte ri shiang soa ojang onte tssovka. 23 Hojito jipopoe jiang OPVÜI na onte metalo vanthukcho, onte ekhyov ha Joshua etho n pi; elani Joshua chüpvüto ha süsoa phani onte n si to tssocho.

Yitssoeden 3

Meta Jilo Vanlamo Jipopoe Jiang

1 Hojito OPVÜI na Israel ritssolo n thehamo jiang ojang etssov tsükona meta jilo jipopoe vanthukcho. 2 Shijo OPVÜI na Israel jiang ritsso lona ojang etssov tsükona, opvü tssoa ovüngthüng yenjao tia ritssolo n ohamo jiang onte yolo vanthukcho. 3 Meta jilo vanthuko jipopoe jiango, Philistine yantsü mongo jiang: Kanaan kyon topvü, Sidon kyon jiang tona Baal Hermon phunglan lona Hamath eyak nandang Lebanon phunglan lo vamo Hivite jiang to. 4 Onte vanthuko jijo OPVÜI na Moses yakchia Israel jiang yizüng pioji ontena bebenphia sana to ojang tssophen tsükona. 5 Hoji tsükona Israel jiangna Kanaan kyon jiang, Hittite jiang, Amorite jiang, Perizzite jiang, Hivite jiang, tona Jebusite jiang to nzo vantathukcho. 6 Ontena jipopoe shiang thüngi lolan tssotacho osi onte potsow jiang khümtacho.

Othneil

7 Israel jiang na OPVÜI onte Potsow mhechocho, ontena ombo mhadungo mmen tssoa Baal tona Ashera to kisü khümtacho. 8 Hoji tsükona OPVÜI na onte pono lüm tsuki Kushan Rishathaim to tsao Mesopotamea mesao ji khi onte khyothoki nzyu tiza onte sathukcho. 9 Jisüi jo Israel jiangna OPVÜI thüngi kyata jonjitale OPVÜI na onte shanchoe kyon chiyithukcho. Hojijo Kaleb onyuro Kenaz tsoe Othneil. 10 OPVÜI mon ji ombolo joro vani Israel esopvüi kümcho. Othneil na ritssolo wocho osi OPVÜI na Mesopotamea mesao pono etho ombo picho. 11 Jisülo jo Israel lo nzyu zhüro noying yicho osi Othneil ha chüi sicho.

Ehud

12 Israel jiangna elani mmen tssolancho. hoji tsükona OPVÜI na Moab mesao Eglon ji onte pono etho jükata kümthukcho. 13 Eglon na Ammonite jiang tona Amalekite to jiang erhümi Israel thüngi ori tssoe onte khyocho osi mitssüngyo yantsü Jeriko ji khiyicho. 14 Israel jiang na Eglon khelo nzyu tiza vantacho. 15 Tole Israel jiangna OPVÜI thüngi kyata jonjitacho osi OPVÜI na kyon tsüka, Benjamin pvüji kyon Ehud to tsao Gera tsoe hayina yonphio ji ethüngchecho. Israel jiangna Ehud ji yantso hanthuksi Moab mesao Eglon thüngi wothukcho. 16 Ehud na ombo ebem yonri tsungkho erov khejüa bena tüv joe licho. Ombona hoji ombo tsük amimoe süküpi khüngkae hancho. 17 Ombona Eglon beleo ji thüngi yantso ji hansi wocho. 18 Ombona yantso ji pithakale yantso ehamo kyon jiang tsasi kholani yitacho. 19 Tokhatola Gilgal ndüngo olong thenkacho lio jilona Ehud na kholani owo Eglon ezocho, "Tsüphoe yo, ana ni tsükona mphoyi hana." Tole Eglon mesao na ombo phajae jiang topvü hapoe chiyirale to ezocho. 20 Tole mesao jina ombo mhonki mmyimo jilo khuka vanathüng, Ehud na owo ombo ezocho, "Ana Potsow thüngina yithen ni hanisi rocho." Tole mesao jina phanthicho. 21 Tothüng ji Ehud na ombo hamimoe yonri hamo ji okhe hayio na tssüngchei mesao ji mmano ekhyipthechiyicho. 22 Yon ri ji mpüm na, nhyapüng ji mpato rheyia ekhyipicho. Osi ethyu tae na hoji eyukzhüi sicho. Ehud na yonri ji n tssüngche na sicho. 23 Jisüi jo Ehud na chiyi hapoe na kipüngji khalanchia yi sicho. 24 Mesao phajae jiangna oyi kipüng khani elio ji hungcho khatola ontena jo mesao jina ombombo khalanchi esana vancho tsayi cho. 25 Ontena etüm nandang nhyaki zetaha mesao jina chiro n chonchio jina ontena japi ji khi oki ji chonchitacho. Tole onte pvüi ji tapvüi erichi chüi lia hungcho. 26 Ontena nhyakta vanathüng Ehud na yi sicho. Ombona olong thenkacho lio jiang yakchia Seirah lo tsana rheyi sicho. 27 Ombona jilo Ephraim phunglan metaro jilo chiyi Israel jiang ritssolo etsa won tatara ji khükachicho, osi ombona onte sosi phunglani na joyicho. 28 Ombona ezocho, "OPVÜI na nte ri Moabite jiang pono ekhyo nte pithaka aphana rotava." Ontena Ehud phana joyi Moabite jiangna jordan kyakav vamo metaji khyoe khicho. Ontena Moabite jiang tsükatia Jordan n pankathukcho. 29 Hoji nchuk ontena Moabite rasan jiang yolo mmhontsov otsük wothüng taro harüma lüngthacho, onte ochia n tssanchothukcho. 30 Hoji nchuk Israel jiangna Moab khyocho osi Israel lo nzyu ekha tiza noying licho.

Shamgar

31 Israel esopvüi ethümo to jijo Anath tsoe Shamgar. Omboha Philistine nzo tiruk ji mangsü kyanryu khi lüngthae sisi Israel jiang shanchocho.

Yitssoeden 4

Deborah Tona Barak To

1 Ehud chüthakale Israel kyon jiangna OPVÜI tachia mmen tssolancho. 2 Hoji tsükona OPVÜI na onteji Hozor yantsü esao Kanaan mesao Jabin ji khi onte khyothukcho. Ombo rasan esopvüi jo pvüjipoe meta Harosheth lo vamo Sisera to tsao ji tssocho. 3 Jabin na ritsso zotoro yonjak na jocho nzo tokvü licho osi Israel jiang nzyu mekyu haruka sacho. Jisülo jo Israel jiangna OPVÜI thüngi kyochile to kyatacho. 4 Lappidoth engh Deborah jo zenkhying tssocho osi yuta jilo jo Israel lo yitssoe tssoa vancho. 5 Ompvüna Ephraim phunglanroe Ramah ha Bethel oni yutalo mitssüng dung kupi khokthei tae vanrhücho, osi Israel jiang na ompvü methak yilan jiang engalo hojilo wotacho. 6 Tsüngona lo ompvü na Naphatali Kedesh yantsü lo vamo Abinoam tsoe Barak ji thüngi heto oyi yencho, "OPVÜI, Israel Potsow na heto ezoala: 'Naphtali tona Zebulun to lona wothüng taro sosi Tabor phunglani woa. 7 Ana Jabin rasan esopvüi Sisera sosi oro Kishon zhükhfü lona ni thüngi ori tsswothukvüka. Ombona ritsso zotoro osi kurü soa khatola ana ni khi ombo khywothukvüka.' " 8 Tole Barak na janlancho, "Nina a nzo ona anaha wovka, osi nina a nzo n rona anaha wov meka." 9 Tole ompvüna janlancho, "Toka ana ni phana rovka, tolea nina ekhyo lo therhakvü meka, ntiotssole OPVÜI na Sisera ji eloe tsüka khelo theyiv sala." Hojito Deborah na Barak nzo Kedesh lo wotacho. 10 Barak na Naphtali tona Zebulun pvüji to jiang Kedesh lo tsarhyucho osi eboe wothüng taro na ombo phana wocho. Deborah ha ombo phana wocho. 11 Jithüng ji Kenite kyon Heber na Kedesh ndüngo Zanannim lo lümro dung ji ndüngo nchenphen tssae vancho. Ombona Kenite kyon thanpoe, Moses onüng Hobab ji tsoronichen jiang thüngina nkachoe vancho. 12 Barak na Tabor phunglani chüngithaka to Sisera na ntsiale, 13 ombona ombo ritsso zotoro yonjak na jowo jiang tona ombo rasan jiang to topvü pvüjipoe meta Harosheth lona Kishon zhükhfüi yithukcho. 14 Jisülo jo Deborah na Barak ezocho, "Woa, OPVÜI na ni soaka, nchüng ombona Sisera ekhyov ni pithaka." Tole Barak na Tabor phunglani na ombo rasan wothüng taro ji sosi khochicho. 15 Barak na ombo rasan sosi ritsso sakatale OPVÜI na Sisera tona ombo rasan osi ritsso zotoro jiang hamatsüi sithukcho. Sisera na ombo ritsso zotoro lona joyi ojoe na tsancho. 16 Barak na ritsso zotoro tona rasan to jiangji pvüjipoe meta Harosheth jana phanchicho, osi rasan topvü lüngtharacho. Tsüka tia n nhyokacho. 17 Sisera na Kenite kyon Heber ji engh Jael to tsao ji süranki tsani yicho, ntiotssole Hozor me sawo Jabin na Heber wopan thüngi khyingta vancho. 18 Jael na Sisera chiwo nduki ezocho, "Rheyia, tsüphoe yo, a süranki rheyia osi ti kyua." Ombona rhowole ompvüna zonchaksü sülami ombo mphothukcho. 19 Ombona ompvü ezocho, "A eratsünga ka nzansi ojü a yuthuka." Ompvüna sofü sükvü lo shirojü jücho khichei ombo yuthuksi ombo mphothuklancho. 20 Jisülojo ompvüna ombo ezocho, "Süranki kipüngi mangi vana, osi ochona sana ranki chungi vevan to ni engana n van to ezoa." 21 Sisera ji mmoktsüngi yipi sicho. Tole Jael na lendan tona eshenphen to bensi yingto ehungo lendan ji ombo kvüri esanawoe na esheni likoe eshenkae ombo chüthukcho. 22 Barak na Sisera yana role Jael na chiwo nduki ezocho, "Roa, nina yana vamo kyon ji ana ni ejüvka." Ombona ompvü phana rhowole Sisera ji lendan na kvüri lona likoe eshenkae chüi lia hungcho. 23 Hoji tsüngono OPVÜI na Israel jiang khi Kanaan mesao Jabin ji khyothukcho. 24 Ontena ombo n chüthukthüng jo ekhyoka ekhyoka na ombo tssethukcho.

Yitssoeden 5

Deborah ha Barak Oni Khen Ji

1 Hoji nchuk Deborah ha Abinoam tsoe Barak onina okhen shi dentacho: 2 OPVÜI Thünga! Israel jiangna ori tssov methakthaka; kyon jiangna emathata ontebobo khichothaka. 3 Engatava, nte mesaeden! Engatava, Yanasaronden! Ana Israel Potsow OPVÜI ji thüngi okhen dena khenzhü rhüv. 4 OPVÜI, nina Seir phunglan lona khochiathüng, osi nina Edom metae na chiyiathüng, Limha shi enhyokcho osi oyaki na eryu jocho. Ho, eluk jiang lona ojü phyangchocho. 5 Sinai lo OPVÜI ji mhadungo phunglan jiang enhyokcho, OPVÜI, Israel Potsow nhadungo. 6 Anath tsoe Shamgar tsüngono, Jael tsüngono, yentsae jiang na yenlan n tssov sicho; osi yentsae jiangna erhülan tae dungtacho. 7 O, Deborah ni n chiyithüng jo Israel yantsü jiang eyinga sirhaki vancho. Tole Israel oyo esüa nina chiyicho. 8 Israel jiang na potsow ethan jiang ethüngche khümale, meta jilo ritsso rheyicho. Israel lo ritssoe wothüng zhüro jiang, ochona sanatia otsso lebuk n bencho alo? 9 Alümbüm jo Israel rasansoe jiang thüngi lia, emathata ontebobo khochio jiang pono lia. OPVÜI thünga! 10 Hoji phyotava, wo kurü ehümvü mankvüi etssoeden, mankvüi ejonka jianglo khothei den, osi yuta topvülo ojoena etssoeden. 11 Engatava! Jükha jiang nkona ontssotao jiang, topvüna OPVÜI ekhyo ji tüngtala; Israel kyon jiang ekhyo ji dentala. Tole OPVÜI kyon jiangna onte yantsüi na khochukracho. 12 Sosi woa, Deborah, Sosi khochia! Sosi woa, khendena soa! Mhadungi woa, Abinaom tsoe Barak, nina khyo jiang sosi yia! 13 Tole longtsüka eli jiangna onte esopvüi jiang yana joyiracho. OPVÜI kyon jiangna ori etssov methaki ombo yana yiracho. 14 Ontena Ephraim lona hayitsüi jorocho; osi Benjamin pvüji tona ombo kyon jiang to sülami etssüngkacho. Rasan esopvüi jiangna Machir lona jorocho, osi tsüphoe jiangna Zebulun lona khochukcho. 15 Issakhar esopvüi jiangna Deborah nzo rocho, ho, Isakhar tona Barak to rocho osi ontena ombo phana hayitsüi wotacho. Tokhatola Reuben pvüji jo chirorae sicho, ontena khekhochiv sana n tsiv sicho. 16 Ontena ntioli olyu jiang nzo sülami vanchola? olyunhyang jiangna olyu tsatao jiang engata vancho alo? Ho, Reuben pvüji ha chirotacho osi ontena khekhochukvü sana n methaku sicho. 17 Gad pvüji na Jordan engkhüwoe vancho, Osi Dan pvüji na orhung jianglo vantacho, Asher pvüji na jümang tssae vanracho osi ontena jüran rhüa vantacho. 18 Tokhatola Naphtali tona Zebulun to kyon jiango onte eküm thana ritssolo wocho. 19 Mesao jiang na Megiddo zhükhfüro tssae oro Tannach lona rotacho." Kanaan mesae jiangna rotacho, tokhatola ontena janti ntia n khicho. 20 Shantio jiangna oyaki na rotacho; Ontena oyakina sanphita, Sisera thüngi ori tssotacho. 21 Kishon jüvak na onte phfüa yiracho Kishon zhükhfü ojü tssomo jina. Ana khochiv, etho jükae khochiv! 22 Jisüi jo kurü jiangna tsukta roracho, onte nkhfü jiangna liko ji ekyima roracho. 23 "Meroz rhiyikata" to OPVÜI lanben na phyoala, "rhiyia, jilo evan jiang ji n mhom rhiyikata. Ontena OPVÜI kyochilo n rocho, rasan esüa oro OPVÜI tsükona n rota." 24 Eloe yolo odon elitso jo Jael, Kenite kyon Heber engh ji- Süranki evan eloe jiang yolo odon elitso ji. 25 Sisera na ojü chonle, ompvü na shurojü ombo picho; ompvü na opvü ezehungu lona shurojü bonshüng thei hana yicho. 26 Ompvü na okhe esana na ranki lentan bencho; kheta na vümphen bencho; Ompvü na Sisera vümi kvüri ji ejüproyicho; ompvü na ombo kvüri ji kavüyicho. 27 Tole ombona khoktseni evümthei sicho, evümthei ompvü jo küpina jükrüpi sicho. Ombona khoktseni ompvü jo lo evümthecho; osi likoe vanthei, chücho. 28 Sisera oyona kherki na zechukchile; ompvü na erakzhüo jiang lona chechukchicho."Ntioli ombo ritsso zotoro jiang sülana n chiyiato?" to ompvüna phyocho."Ntioli ombo kurü jiang heto sülana n chiyiato." 29 Ompvü küpo eloe nchümri elio jiangna ezotacho, osi hoji ompvüna elan elani phyocho, 30 "Ontena tsütsaelan phanchoe chitav yanta vana tssovka, rasan otsük akvü echhi loroe tsük tsük, mekana eniren tona Sisera echhi tssentsü sü, osi mesali tsükona yoko thera lyukacho yanta vana tssov." 31 O OPVÜI, ni ri jiang topvüto hojito chürathuka, tokhatola ni shom jiang jo eng chirocho to tüngrathuka! Hoji sülo meta jilo nzyu zhüro noying licho.

Yitssoeden 6

Gideon

1 Israel jiangna elani mmen tssolancho, toli OPVÜI na Midian kyon jiang küpo nzyu tiying onte vanthukcho. 2 Midian kyon jiang ji Israel kyon jiang lona etho jükao jina Israel jiangna longkvü osi phunglani nlhyiphen mmhom jiang lo nlhyitacho. 3 Kvüthüng Israel jiangna mojü yinga sana Midian kyon jiangna Amalekite jiang sosi oro onte hayatacho. 4 Ontena oro jianglo nchenkae mojü thei elio jiang ji jolowoe Gaza jana roe sitacho. Ontena olyu, mangsü, kurü jiang topvü khikhani si Israel jiango ntia enhyoe n vayicho. 5 Ontena onte ekümrümo jiang sosi süranki jiang hantasi khomung rümato khosha sani rocho. Onte osi onte ut jiang topvü n khacheo tata rocho. Ontena oro meta ji tsorüpi siwo jina, 6 Israel jiango ezüp sothe sicho. 7 Tole Israel jiangna Midian kyon jiang khe lona onte shanchole to OPVÜI thüngi randana kyatacho, 8 tole ombona zenkhying tsüka, Israel Potsow OPVÜI yithen heto hansi onte thüngi wothukcho: "Ana Ejip lo ezii eküm lona nte sochechoka. 9 Ana Ejip kyon jiang khelona nte shanchocho, elani meta shilo nte thüngi ori tssoa vamo jiang khelo na nte shanchocho. Nte mhadungi khochi akvü ana ori jiang phani nte siyia yicho osi onte meta jiang nte picho. 10 Aiyo OPVÜI nte Potsow jika to ana nte ezocho osi ntena vamo meta shilo Amorite potso jiang ti khümtale to nte ezocho. Tokhatola ntena a yi n ngacho." 11 Jisülo jo OPVÜI lanben na Ophrah yan jilo joro Abiezer pvüji kyon Joash ji mhadung lümrodung ji kupi khukthei vancho. Ombo tsoe Gideon jo tssüngthijü mmyaphen lo Midian jiang mphoa tssüngthijü mmya vancho. 12 OPVÜI lanben jina ombo thüngi oro ezocho, "O lüm etsson etho ejüi kyon, OPVÜI na ni ndüngo vanka!" 13 Tole Gideon na ombo ezocho, "Tsüphoe yo, ana heto engakhukcho alo? OPVÜI na a ndüngo vana tssona kvütoli shiang hetüv e pono yiala? Nkolo OPVÜI na chethev elhi tssoe Ejip metae e motsüi jiang sochukocho motsü e pvüpoe na ezowo jiango kvütola? OPVÜI na Midian jiang khelo thechi e sisi enhungo e n zev sithaka." 14 Tole OPVÜI na ombo ezocho, "Ana ni wothuka ka, ni etho tsüphov ji khi owo Midian jiang khelo na ni kyon jiang shanchoa." 15 Gideon na ezocho, "Tole ana kvütoli Israel jiang shanchochevla? Manasseh pvüji lo a wopan teritso osi aiyo wopan yolo ethev n litso ji." 16 OPVÜI na janlancho, "Ana ni kyov küma nina tssokhuka. Nina Midian jiang ji kyon tsüka tae esüa meyani sivka." 17 Gideon na ezocho, "Nina a thüngi ematha na nino OPVÜI jito chethev ntio sana a jüa. 18 Ana etsoyu than tara ni nthan thüngjo ti yisa." Tole ombona ezocho, "Nina kholani n yithüng jo ana shilo vamvüka." 19 Gideon na okina nyanyan oro motsünga ekvüi jilo ohüm seri taro khi ebung mozhü n theo hümri rüngcho. Ombona oso ji luksalo thei, sohanjü ji OPVÜIo thei toli, hansi OPVÜI lanben na lümrodung kupi khokthei vamo jilo hansio picho. 20 Tole lanben jina ombo ezocho, "Oso ji tona hümri jiang to longphi shi poni vae jilo sohanjü ji phyangkata." Tole Gideon na hojito tssocho. 2l Tole OPVÜI lanben jina ombona bemo jarung ji khi yonchia oso tona hümri ji to evüngkacho. Tole oyaki na omi joroe oso ji tona hümri ji to rungi sicho. 22 Tole Gideon na jisüiti kyon jijo OPVÜI lanben saya to chethecho osi okhen heto engocho, "Sandamo OPVÜI!, ana ni lanben a mhyik na hungthaka!" 23 Tole OPVÜI na ezocho, "Noyinga vana, Tikyua, ni chüv meka." 24 Gideon na jilo thanphen tssoe heto tsacho, "OPVÜI jo noying." (Hoji jo nchüng jana Abiezer wopan meta Ophrah lo lia) 25 Hoji zümo OPVÜI na Gideon ezocho, "Nipo tssibung ji tona tssibungro thanpo nzyu tiying tüv to khi vasi nipo na Baal thanphen ji roe sia, hoji tssalo Ashera kisü lio jiha roe siyia. 26 Yondonro shi kvüri OPVÜI ni Potsow thanphen chüngchünga tssoyia. Tosi tssibungro enioto ji khi Asher kisü nina roe siwo tssüng jina rungi mpüm than tssoa OPVÜI thana." 27 Gideon na ombo phajae otsük taro sosi OPVÜI na ombo ezowo ji ephan tssocho. Ombona engo hoji etsosv ji ombo wopan tona yantsü jilo kyon jiang to kyuo jina zümoloti tssocho. 28 Yantsü jilo kyon jiangna ojyuato phanthi zetale Baal thanphen ji, hoji tssalo Ashera kisü ji to roe sisi jilo thanphen ethan tssokachi tssibungro enioto ji thancho hungcho. 29 Ontena, "Ochona heto lyuchola?" to phyota emhuktacho. Ontena ethümoe zetale Joash tsoe Gideon na tssocho to zocho. 30 Tole ontena Joash ezotacho, "Ni tsoe Gideon ji shilo sosi yia, ena ombo lüngthav ka. Ombona Baal thanphen ji phiroe sisi ji tssalo Ashera kisü ji roe sicho." 31 Tole Joash na hojilo ombo ryukata vamo jiang topvü ezocho, "Nteno Baal thüngoe theta ke? Nteno ombo phyocheta ke? Ochona ombo yilo theta na ojyua n vonchiv ombo chüvka. Baal ji Potsow tssona ombobo nkohathuka. Ombo thanphen roe esio ji shi." 32 Hoji lona benkae Gideon ji Jerubaal to tsacho, ntiotssole Joash na phyocho, "Baal ha ombobo nkohachethuka, ombo thanphen roe sichoka." 33 Tole Midian kyon jiang, Amalekite tona lijüng kyon jiang to etssirhyui Jordan zhükhfü ji khyingkae Jereel hayi nchentacho. 34 Jithüng OPVÜI mon jina Gideon lo vanyae Gideon na tatara khüa Abiezer pvüji kyon jiang ji ombo sü rüle to tsacho. 35 Ombona Manasseh meta lo yithenpvüi wothuka onte tsathuki ombo thüngoe rothukcho. Ombona Asher pvüji, Zebulun tona Naphatali to kyon jiang tsacho osi ontenaha rocho. 36 Tole Gideon na Potsow ezocho, "Nina a etho khi Israel shanchov to phyocho. 37 Ana eli tsenphen jilo tsansü tara vachochi vavka. Tosi enyathüng jo lenthümsü jilo tae ronren renkae lisi likoe n renkacho hungna, nina Israel shanchov tsükona atsütsatala to ana ntsi khivka." 38 Tole hojito tondüng tssocho. Gideon na ojyua to phanthi zele ombo na tsansü jilo na ojü opvü pyinga zümchocho. 39 Jisülo Gideon na Potsow ezocho, "Athüngi lüm titsukna yenjao aphyolanthuka. Tssansü ji khi yenjao ojang tssolani a zethuka. Enhünga jo lenthümsü ji kyingthuksi liko ji njüi lithuka." 40 Hoji zümo Potsow na hojito tssocho. Ojyuato enya jo tssansü ji kyingserunk na licho osi liko jo njüa vancho.

Yitssoeden 7

Gideon na Midian Jiang Khyoala

1 Tsüngona lo Gideon tona ombo woro jiang to na nyazüngi na phanthi Herod jünhyo ndüngo nchentacho. Midian kyon jiang jo Moreh phunglan ndüngo onte Jükiwoe ncheni vancho. 2 OPVÜI na Gideon ezocho, "Nina sonhyao kyon jiang Midian jiang khyov jo kyungtia. Ontena onte otssomo jina khyocho tsayia a etho ji nchekav siv. 3 Thenchoa, 'Kyon jiang yolo ochona nsüpa na oki kholani yile to, osi etena shilo Gilead phunglani vamka to ezoa.' " Tole wothüng mekyu eni kholani yisi wothüng taro enhyoe vancho. 4 OPVÜI na Gideon ezolancho, "Enhünga ha nte kyungtihan, kyon jiang zhükhfüi sanchothuka tona ana jilona ni khosotayivka. Kyon ocho nina sonhya to ana phyoana jina rovka, osi ochojo ana ni phana ti role to ana ezoana jina jo rov meka." 5 Gideon na kyon jiang sosi ojüi jowole OPVÜI na ezocho, "Kyon ochona ojü yuathüng füro na yuato mmyaka yuana jiang tona ochoangna khoktseni yuana jiang to khotathuka." 6 Tole otsük nzo ethüm na onte khena wokae fürona yuato yucho, osi thanpoe jiango khoktseni yuracho. 7 OPVÜI na Gideon ezocho, "Otsük nzo ethüm na ojü okhena wokae yuo jiang khi ana Midian jiang ni khywothukvüka. Thanpoe topvü oki yitale to ezoa." 8 Tole Gideon na otsük nzo ethüm ochoangna etsoyu osi tatara ethelan eli jiang vachosana jiang tae vanthuksi thanpoe topvü oki yithukcho. Midian jiang nchenphen jo onte küpoe hayitsü jilo tssocho. 9 Hoji zümo OPVÜI na Gideon ezocho, "Phanthi onte nchenphen ji hayatava; ana ekhyo ni piv saka. 10 Tokhatola ni kyua to tssona ni phajae Purah sosi onte nchenpheni jowoa. 11 Tona ontena phyotao jiang nina zoe ni lüm tssonkae onte havka." Tole Gideon na ombo phajae Purah sosi ori jiang nchenphen ji tssae jowocho. 12 Tole Midian jiang, Amalekite jiang tona lijüng jipo kyon jiang to hayitsü jilo khomung rümkachoto tüngi vancho, osi onte ut jiango jümang tssae hajang tata vancho. 13 Gideon na hojilo chiwole kyon tsükana ombo müng rüa oshom ezoa vancho, jijo heto, "Ana omüngi ji, omüm hümri motsünga eria oyi ete nchenpheni süranki lo vümkale süranki ji vanthei likoe epyakthei sia emhacho." 14 Ombo shom jina janlancho, "Hojijo Joash tsoe Gideon, Israel kyon ji yonri jika, thanpo tssov meka! Potsow na Midian jiang tona ete rasan topvüto ekhyov etho ombo pithaka!" 15 Gideon na kyon ji müng ji yichak ji zoale, khoktseni Potsow khümcho. Ombona Israel jiang nchenpheni oyi phyocho, "Phanthitava! OPVÜI na Midian rasan jiang ekhyov nte pithaka!" 16 Ombona rassan nzo ethüm ji okho ethüm chirotae otsük akvü tatara tona mvüryu lo milon thei toli piracho. 17 Ombona ezocho, "Ana ori nchenphen ji tsssae chiwoa na a zeta vantasi ana ntio tssoana hojito tssotava. 18 A tona a nzo etssoe to na tatara khfütana nte topvüna nchenphen ji nkonzhüa nte tatara jiang mhümtava osi heto phyotava, 'OPVÜI osi Gideon tsükona!' " 19 Gideon tona ombo nzo otsük nzoa jiang tona zümo longo enhyang tongphitapanthüng ori nchenphen ji tssalo chiwocho. Ontena tatara jiang khfükachia mvüryu bemo jiang tarhüptacho, 20 tole okho eni jiangna ha hojito tssocho, onte topvüna hayiwoe na milon ji bentasi hamimoe na tatara ji benta tosi tüngkachitacho, "OPVÜI tona Gideon to tsükona yonri!" 21 Otsük akvüna ori nchenphen ji hachüma ombo ombo zaphen lo zacho osi rasan jiangna eronta tsanroe sicho. 22 Gideon wworo jiangna tatara khfüale OPVÜI na ori jiangji onte bobo yonrina lüngthatao nsüngrücho. Ontena Zarethan metawoe Beth Shittah jana osi Tabbath ndüngo Abel Mcholah yantsü jana tsantacho. 23 Jisülo jo Naphtali pvüji, Asher, tona Manasseh meta enita lona kyon tsanchukrae onte topvüna Midian jiang phantacho. 24 Gideon na yithenpvüi wothuka Ephraim phunglan meta topvülo heto ezorathukcho, "Joro Midian jiang thüngi ori tssotava. Jordan zhükhfü tona jüro jiang to topvü Bethbarah jana nkonyae vanthuka." 25 Ontena Median ekhüng otsük eni Oreb tona Zeeb to rhümae Oreb ji Oreb longroyo lona chüthuk, Zeeb ji Zeeb tssüngthijü mmyaphen ji ndüngona chüthuk to tssocho. Ontena Midian jiang phanlana wotacho osi Oreb ha Zeeb oni kvüri ji Gideon thüngi Jordan engrhewoe hansi yitacho.

Yitssoeden 8

Midian Jiang Khyothechikhao Ji

1 Ephraim kyon jiangna Gideon ezocho, "Ntena Midian jiang thüngi ori tssoathüng ntioli e n tsanhyatachola? Ntena ntioli heto etsütsatala?" Ontena hojito phyoa elümoto erinjantacho. 2 Tole Gideon na ezocho, "Ana ntio tssocho sana jijo ntena etsso jilo etsitana ntia meka. Nte Ephraim kyon na ejükaro tsso jijo a jipo topvüna tsso jilona kyongkata. 3 Ntena Potsow etho yakchia Midian ekhüng otsük eni Oreb ha Zeeb oni lüngthacho. Ana jo hoji esüa elhi tsüphov kvülo tssohanchola?" Ontena hoji zoale tata lüm n tsukvü sicho. 4 Hojithüng jo Gideon tona ombo woro nzo ethüm jiang to na Jordan zhükhfü ji oro jani zhükhfü pankae vanthakcho. Onte ji sangtsüngrathakcho, khatola ori jiang phanta vanpvü tssocho. 5 Ontena Sukkoth lo chiwo Gideon na yantsü jilo kyon jiang ezocho, "Nzansi a woro shiang hümri tara pitava. Onte ji mmuktsüngra thaka, osi ena Midian mesao Zalmunna ha Zebah oni phanala." 6 Tole Sukkoth esopvüi jiangna phyotacho, "Ntioli ena ni rasan jiang etsoyu pivla? Ntena Zebah ha Zalmunna oni n rhümahan." 7 Tole Gideon na ezocho, "Toka OPVÜI na Zebah ha Zelmunna oni rhümav etho a pithakana ana lijüngi yiza osi okyo khfüi nte erhüpvüka!" 8 Gideon na Penuel loha owo yilantsük ji jonjicho tole ontena ha Sukkoth kyon jiangna phyo ji esüa phyocho. 9 Tole Gideon na ezocho, "Ana mmhona kholani yilamka, osi ana nte rizümphen zenki jiang vanchüchüi nte siyivka!" 10 Zebah ha Zalmunna onio oni rasan sosi Karkor lo vancho. Lijüng rasan topvü tssotsüi wothüng taro mungo harüma tae enhyoe vancho; osi rasan wothüng nzoasi mekyu jo lüngthathakcho. 11 Gideon na Nobah tona Jogbehah to engkhfüwoe lijüng ji tssa rhüa owo ori jiang mphoa vükthechicho. 12 Midian mesae otsük eni, Zebahha Zalmunna onina tsantacho khatola ombona phani oni rhümale oni rasan jiang ekhenrhükcho. 13 Gideon na rotapheni na khoe Heres eyaklan jilona chiyi Sukkoth yamo khyingroe tsüka rhümae engacho. 14 Tole khyingroe jina Sukkoth lo ephyo esan otsük ekhatiyingsi tiying mying erani Gideon picho. 15 Tole Gideon na owo Sukkoth lo kyon jiang ezocho, "Ntena a kyochiv ekhiramo ji chenchümche? Ntena a rasan khangtsünga vamo jiangji ana Zebah ha Zalmunna oni n rhümav jo etsoyu n pi to phyotacho. Onio shiang je!" 16 Tothakale ombona lijüngi na okyo osi yiza khero khi Sukkoth kyon jiang erhüpcho. 17 Ombona Penuel lo rizümphen jiha vanroe siyisi oyan jilo kyon jiangha lüngtharae sicho. 18 Jitosi Gideon na Zebah ha Zalmunna oni ezocho, "Ntena Tabor lona lüngthao kyon jiango kvütola?" Ontena ezocho, "Onteha nte esüa tüv otsük akvü mesao tsoe esüa tüv." 19 Gideon na phyocho, "Onteno a jeniden, ayo tsoeden. Ana otsotso echümala, ntena onte n lüngtha to tssona anaha nte n lüngtha." 20 Tosi ombona ombo tsoe erantso Jether ji heto ezocho, "Owo onte lüngthata!" Tokhatola khyingroe jina yonri n süchukcho. Ombo ji nunghori tsso jina ombona titocho. 21 Tole Zebah ha Zalmunna onina Gideon ezocho, "Nina oro e lüngthata, eboe elhijo eboena tssov lia." Tole Gideon na onte lüngthasi onte ut evüngo oyuk-osen jiang khiyicho. 22 Hoji sülo Israel jiangna Gideon ezocho, "Ni osi ni tsoronichen na e sOPVÜI tssotava. Ntena Midian jiang khelona eshanchothaka." 23 Gideon na ezocho, "A osi a tsoe na nte esopvüi tssov meka. OPVÜI na nte savka." 24 Ombona ezocho, "Nte otsük akvüna eno thera khio jiang a pitava." (Lijüng kyon thanpoe jiang esüa Midian kyon jiangna thera enocho.) 25 Kyon jiangna janlancho, "Ena emathata ni pivka." Ontena osü sachi jilo otsük akvüna ontena khio thera jiang thetacho. 26 Gideon na shona thera khio jiang tssotsüi seri mekyu bencho, jilojo Midian mesao jiangna enowo osi onte ut na eyiko oyok-osen jiang n khanhya. 27 Gideon na shona jiang khi kisü nsüngrüi ombo yantsü Ophrah jilo vacho. Tole Israel topvüna Potsow ji mhechoe sisi kisü khümo hojilo wocho. Hojijo Gideon tona ombo wopan to tsükona tsirhi esüa tssocho. 28 Hojito Midian ji Israel jiangna khyoe sisi ekyuv n liv sicho. Gideon na n chüthüng nandang meta jilo nzyu zhüro noying licho.

Gideon Chüo Ji

29 Gideon na ombo ki elani oyi vani sicho. 30 Ombona eloe khosha vamo jina otsoe ekhatiying van cho. 31 Ombona Shechem loha yingalore vancho. Osi ompvüna ha otsoe buki Abimelek to tsacho. 32 Gideon ji sontsüngi chücho osi Abeizer pvüji yantsü Ophrah jilo opo Joash khüp jilo ombo shothecho. 33 Gideon chüthakale Israel jiangna elani OPVÜI jancho n zov Baal khümta yicho. Ontena Baal ji onte potsow kümthukcho, osi 34 OPVÜI ochona onte ri khelona onte shanchocho sana ji n khümtav sicho. 35 Osi Gideon na Israel tsükona kvüta elhi tssochosana ji wopan thüngi ha montsso to n tssocho.

Yitssoeden 9

Abimelekh

1 Gideon tsoe Abimelek na Shechem yani owo, oyo wopan vamo jilo eboe jiang heto 2 ezole to ezocho, "Nteno Gideon tsoe otsük ekhatiying topvüna nte sathukhunga alo? Tsüka taena nte sathukhugala? Abimelek jo nte ejenoso motsünga to ti mhechotava." 3 Tole oyo wopan jiangna ombo wopan tssoa Shechem ky won jiang thüngi hojito ezoyicho. Tole Shechem kyon jiangna Abimelek küpo tssov methakcho, ntiotssole onte wopan tsso jina. 4 Ontena Baal khümphenina janti rang ekhatiying khi ombo pile ombona hoji ethev n lio nthae kyon shirhyui ombo thüngoe tssothukcho. 5 Ombona Ophrah lo opo ki owo olong motsünga ponina ojenio ekhatiying Gideon tsoe jiang lüngtharacho. Tokhatola Gideon tsoe wokhao Jotham jo mphoe vamo jina n lüngthacho. 6 Tole Shechem tona Bethmillo to kyon jiang tssotsüi owo Shechem lo ntho lümrodung jilona Abimelek ji mesao kümthukcho. 7 Jotham na hoji zoale Gerizim phunglan kvüri eshoni heto onte tüngcho, "O Shechem kyonden, ana phyo shi engatava, tona Potsow na nte yi engayivka! 8 Tsüngnalo odung jiangna onte mesao ethüngu etsirhyutacho. Ontena olive dung ji onte mesae tssole to ezotacho. 9 Tole olivedung jiangna phyocho, 'Ana nte esopvüi tssoa na Potsow osi kyon yikrachi ejüphen thyujü chiyithukvü mek.' 10 Tole odung jiangna züwodung ji owo ezotacho, 'Oro e mesao tssoa.' 11 Tole züwodung jina phyocho, 'Ana nte esopvüi tssoana a tssüngthi enüngu ji n thithukchev siv.' 12 Tole odung jiangna jününgrozhü ji ezotacho, 'Nina oro e mesao etssoyia.' 13 Tole jününgrozhü jina ezocho, 'Ana nte esopvüi tssoana ana yuphen mmhom chiyithuki Potsow osi kyon emathathuko ji n tssochev siv.' 14 Tole odung topvüna okyodung ji ezotacho, 'Nina oro e mesao etssoyia.' 15 Okyodung jina ezocho, 'Ntena otsotso nte mesae a tssothuk hungna oro a kupi khümcho nlhyitava, to n tssoana a okyo khero jiang lona omi buki Lebanon lo cedar dung jiang rungi sivka.' 16 Jisüi jo Jotham na heto ezocho, "Hoji tsükona, ntena Abimelek ji nte mesae tssothuko ji otsotso lüm joa tssocho alo? Ntena Gideon nchümchei yikrachia ombo elhi mmhom ji man ombo wopan jiang yikrachialo? 17 Apona nte tsükona ori tsso jiang ti mhechotava. Ombona Midian jiang khelona nte shanchov tsükona ombo eküm epi njan rotacho. 18 Tokhatola ntena nchüngo apo wopan thüngi ori kümthaka. Ntena ombo tsoeden otsük ekhatiying, bokhying jiang olong motsünga ponina lüngthacho, osi apo yingalore ji tsoe Abilemek oyo ji nte wopan tsso jitaena ntena omboji Shechem lo mesao kümthukcho. 19 Hoji tsükona ntena Gideon tona ombo wopan to thüngi tssothako ji elanthata to tssona Abimelek thüngi emathata vantava. Osi omboha nte thüngi emathathuka. 20 Jito mekcho tssona jiha Abimelek lona omi chiyi Shechem tona Bethmillo to kyon jiang tona Abimelek to rungtsüngi sithuka." 21 Jitosi ojenio Abimelek kyuo jina Jotham na tsani oyi Beer lo vancho. 22 Abimelekh na nzyu ethüm Israel sacho. 23 Tole Potsow na Abimelekh tona Schechem kyon to ori kümthukcho osi ontena Potsow thüngi ha n khyingtav sicho. 24 Heto tsso shijo Abimelekh tona Schechem kyon ochoangna ombo ntssungi Gideon tsoe jiang lüngthathukcho sana jiang to jokheman piv tsükona tssocho. 25 Shechem kyon jiangna phunglan kuri na Abimelekh zümta vansi kyon kvüta yakchiana retsoyi tacho. Osi hoji Abimelekh thüngi ezocho, 26 Jithüng Ebed tsoe Gaal na ojenio jiang sosi Shechem lo rotale Shechem kyon jiang na ombo longtsükacho. 27 Onte topvüna onte jününgroli owo tssüngthi lhorae oyi hojina zükhi nsüngrüi vatasi tokhu tssotacho. Ontena onte potsow khümphenina owo tsoyutasi Abimelekh thüngi karangtacho. 28 Gaal na phyocho, "Ete Shechem kyon jo kvütüv tae ato? Eteno ntioli Abimelekh küpo vanta to? Ombo ocho yila wole? Gideon tsoe lojo! Zebul na ombo yizüng engayiala, tokhatola etena ntioli ombo benkavla? Nte motsüi Hamor, nte pvüji chenkaphen ji yikrachitava! 29 Ana kyon shiang esopvüi salivo to nchüma! Tovo ana Abimelekh ji khi siv je! Osi heto ombo ezov, "Ni rasan jiang ekhfürhyua, osi chiyi ori tssotava!' " 30 Yantsü ji esae Zebul na, Gaal na phyo yi ji zoe lüm tsukcho. 31 Hoji tsükona ombona Arumah lo Abimelekh thüngi heto owo ezole to ezoa yithenpvüi wothukcho, "Ebed tsoe Gaal na ombo ojenio jiang sosi oro Shechem lo vana osi ontena yantsüi ni n rhowothuk to phyotala, 32 hoji tsükona ni woro jiang sosi zümo na sani oyi oli mphotava. 33 Osi ojyua engchirobüngo phanthi zakto yantsü ji hatava. Osi kvüthüng Gaal na tona ombo woro jiang tona nte rokalo chiroa sana, nte eto onte ekayitava!" 34 Hoji tsükona Abimelekh tona ombo woro to jiangna zümolo sani chiyi okho mezhü chichei Shecehm tssae mphoe vatacho. 35 Osi Abimelekh tona ombo woro to jiangna chiro yantsü pikhfü lo manga vana hungale ontena mphopheni na phanthiracho. 36 Gaal na onte hungi Zebul ezocho, "Zeta, phunglan kvüri na kyon sanjoa vana!" Tole Zebul na ezocho, "hojiang jo kyon mek, phunglan ji khümcho tae." 37 Gaal na phyocho, "Zeta, phunglan kvüri na kyon joyira vanka, onte razhü khosha, osi razhüa jo methevüjaphen lümrodung jilona olan dunga tsata!" 38 Tole Zebul na ombo ezocho, "Enhungo ni kangtsü ji kvüla? Abimelekh shi ochona benkav la? to ephyo ji ni. Shiango nina tssaka zewo kyon jiang je. Nra khochi owo onte thüngi rotava." 39 Gaal na Shechem kyon jiang sochuki Abimelekh thüngi rotacho. 40 Gaal na tsancho osi Abimelekh na ombo phancho. Osi yantsü ji kibüngona mpa kyon elümoto meyancho. 41 Abimelekh na Aruma lo vancho osi Gaal tona ombo ojenio to jiang ji Shechem lona phani sicho osi jilo onte n vanlanthukcho. 42 Ojyuato jo Shechem kyon jiang na Oliwoe yitav sala to Abimelekh na ntsicho, 43 hoji tsükona ombona ombo woro jiang sosi okho ethüm chichei oli owo mphoe nhyakta vancho. Kyon jiangna yantsüi na chiyia hungale ombona onte lüngthalo chiwocho. 44 Osi Abimelekh tona ombo woro jiang to na yantsü pikhfü ji nkoyalo yiathüng oli kyon okho eni mphoe vamo jiang na kyon jiang hayae lüngtharacho. 45 Osi onteji eng totona rotacho. Abimelekh na yantsü ji hayae, kyon jiang lüngtharae sisi, yantsü ji roe sisi liko ji oma na eyepyingi sicho. 46 Shechem lo rizümphen jilona kyon opvü etssoe jiangna shi zoale ontena Baal khümpheni tsanthei mphotav yancho. 47 Onte ji jilo etsseni vana to Abimelekh na zoale, 48 ombona ombo woro jiang nzo Zalmon phunglani chungocho. ji lona ombona opvü khi odung khero motsünga etssachochi ombo epvülo ekachicho. Osi ombo woro jiangha zakto hojito tssole to ezocho. 49 tole onte otsük akvüna khero etssachoe ontena Abimelekh sülo etssüngkata khero jiang ji rizümphen jilo hankatacho. Hojitolyui ontena rizümphen jilo omi thecho osi hoji chungi evan eboe, eloe to tsotsüi otsük wothüng bena chücho. 50 Jisülo jo Abimelekh na Thebez lo owo yantsüji hacho. 51 Tole hojilo zenki chüngchüngu licho osi eboe, eloe elani esopvüiden to jilo santaiei vancho. Ontena ontebobo khalanchi mhonki sankacho. 52 Osi Abimelekh na hoji hayalo roathüng ji jilo omi thev tsükona kibüngo wocho. 53 Tole jithüng eloe tsüka na hümchenphen long vachochia kvürilo ombo vaniajo kvüri ji kherhüpcho. 54 Tole ombona zakto ombo yonri ehamo khyingroe ji tsae ezocho, "Eloe na alüngthacho tojo a nphyohungka zakto ni yonri ji khichei a lüngthae sia." Tole khyingroe jina ekhyiptsüngi ombo chüthukcho. 55 Abimelekh chüthaka to yivon zoale Israel jiangna oki sani yiracho. 56 Hojito lyui Abimelekh ji ombona ojenio ekha tiying lüngthao ji Potsow na ombo nlilancho. 57 Gideon tsoe Jotham jina rhiyikata thüng phyo ji esüa Potsow na Shechem lo kyon jiang ji onte ntha man ezüp picho.

Yitssoeden 10

Tola

1 Abimelekh chücho sülojo Dodo tsorüi osi Puah tsoe Tola na Israel jiang vachiv tsükona chiyicho. Ombo Issakhar pvüji kyon osi Ephraim phunglan meta Shamir lo evan tssocho. 2 Ombona Israel esopvüi nzyu mekyusi ethüm tssocho. Jisülo jo ombo chüi Shamir lo shothecho.

Jair

3 Tola echü süijo Gilead lona Jair chiyicho. Ombona ha nzyu mekyusi eni Israel sacho. 4 Ombo na tsokhying thümro vancho osi onte na kurü thümro lo tsankacho. Onte na Gilead metalo yantsü thümro licho osi hojiang ji nchüng jana Jair yan to tsatala. 5 Jair ji chüi Kamon lo shothecho.

Jephthah

6 Israel jiang na elani Baal tona Astrate to khüma OPVÜI mhadungo mmen tssocho. Ontena Syria, Sidon, Moab, Amon tona Philistia to potsow ha khümta yicho. Osi ontena OPVÜI ekhümvü ji esani sita ombo khaki sitacho. 7 Hoji tsükona OPVÜI na Israel jiang thüngi lüm tsuki Philistine jiang tona Amorite to jiang khi onte khyothukcho 8 Gilead lo Jordan zhükhfü engrhewoe Amorite metalo Israel vamo jiang nzyu taro tiza khangricho. 9 Amorite jiangna Jordan ji mpa bankae chiro Juda, Benjamin toha Ephraim to thüngi ori tssocho. Hojito Israel ji elümoto ezüpcho. 10 Tole Israel jiangna OPVÜI thüngi kyata phyotacho, "Ena e Potsow ni sisi Baal potsow khümta ni mhadungo mmen tssothaka." 11 OPVÜI na heto janlancho, "Ejip kyon jiang, Amorite jiang, Ammonite, Philistine, 12 Sidon jiang, Amalek tona Moab kyon jiang tona ovüngthüng nte khangshicho. Tole ntena athüngi kyata jonjitacho. Hoji tsükona ana hojiang khelona nte n shanchocho ke? 13 Tokhatola ntena a sisi potsow thanpo khümtacho, hoji tsükona ana nte shancholam meka. 14 Ntena ethüngi khio potsow ji thüngi owo kyatava. Nte ezüp yutalo onte khi nte shanchothuka." 15 Tole Israel jiangna OPVÜI ezocho, "Ena mmen tssothaka, nina ni etancho tssoa, tokhatola nchüngo e shanchoa."16 Tole ontena jipopoe potsow jiang sisi OPVÜI khümcho; tole ombona Israel ezüp ji sisi wongkhyua nchümcho. 17 Jisülo jo Amon rasanden jiangna ritsso tsükona Gilead lo vanphen methakta vancho. Israel jiang ha Gilead lo Mizpah jilo vanphen methakta vancho. 18 Israel esopvüiden osi kyon jiangna heto engata benkacho, "Amon kyon jiang thüngi rotav ochona e sovla? Ochona esopvüi tssoana jina Gilead lo evan topvü sovka."

Yitssoeden 11

1 Jephthah to tsao Gilead yamo rasan lüm etsson jijo lonsülonphyoe tsoe tssocho. 2 Opo Gilead na ombo engh tsotso ji nga ro elüm vamo jina onte khyochetale Jephthah ji okina phani sicho. Ontena ombo ezocho, "E opo thüngina nina ntia tssentso hungu meka; nino eloe thanpoe tsoeka." 3 Jephthah na ojenio jiang thüngina tsani oyi Tob metalo vancho. Hojilo ombona ethelan n li kyon okho motsünga tssüngyae ombo phanphithukcho. 4 Jitosi yuta tara süloti Amon kyon jiangna Israel thüngi ori tsso cho. 5 Hojito tssoale Gilead lo eso pvüi jiangna owo Jephthah ji Tob meta lona sosi yicho. 6 Ontena heto onte ezoa tsatacho, "Oyi nina esoa Amon jiang thüngi ori tssotava." 7 Tokhatola Jephthah na janlancho, "Ntena a tssaka apo kina phani a sicho, tona ntioli nte ezüp yuta loti oro atsatala?" 8 Tole Israel jiangna ezocho, "Ena ni thüngi ro jijo ni khi esoa Ammon kyon jiang thüngi ori tssotav tsükona osi Gilead lo esopvüi ni kümthukvü tsükona ka." 9 Tole Jephthah na onte ezolancho, "Ntena asosi oyi ori tssotale OPVÜI na etho a pia ntena toa tssona ana nte esopvüi tssovka." 10 Tole ontena janlancho, "Ena hotoji e lümna rünga, OPVÜI jo e hungpvüi ka." 11 Jephthah na Gilead esopvüi jiang phana o cho. Osi ontena omboji onte esopvüi osi esapvüi kümthukcho. Jephthah na ombo etümezi jiang OPVÜI mhadungo Mizpah lona phyoe engathukcho. 12 Jisüi jo Jephthah na yithenpvüi wothuka Ammon mesao ji heto ezothukcho, "Nino ntio ntana a thüngi khontala? Ntio tsükona e meta thüngi ori tssoala?" 13 Ammon mesao na Jephthah yithenpvüi ji heto janlancho, "Israel jiangna Ejip lona chiyiathüng a meta ji Amon zhükhfü lona Jabbok zhükhfü tona Jordan zhükhfü to nandang a khiyicho. Enhungo ntena hoji noying lona a pilantava." 14 Jephthah na elani heto ezoa yithenpvüi wothuklancho 15 Israel na Ammon metae osi Moab meta khicho n li, hojijo ejüng. 16 Oyi ji heto: Israel jiangna Ejip lona khochi Aqaba jüyi jiang lona lijüng yakchia Kadesh lo rheyicho. 17 Jisülo jo ontena Edom mesao thüngi ombo meta onte yakchithukle to yithenpvüi wothukcho. Tole Edom mesao jina onte n yakchithukcho. Ontena Moab mesao ha hojito engataha onte n yakchithukcho. Hoji tsükona Israel jiangna Kadesh lo vani sicho. 18 Jitsükona ontena Edom tona Moab to lijüng yakchia oyi Amon jütssa esanawoe Moab na engkhfüwoe chiyicho. Ontena jilo vancho khatola Amon n yakchicho, ntiotssole hojijo Moab erü tssocho. 19 Jisüi jo Israel jiangna Heshbon lo Amorite mesao Sihon thüngi onte meta yakchia yithukle to chonthukcho. 20 Tole Sihon na Israel jiang n yakchithukcho. Ombona ombo rasan sosi oro Jahaz lo vani Israel thüngi ori tssocho. 21 Tokhatola, OPVÜI Israel Potsow na Israel jiang ekhyo pia Sihon tona ombo rasan jiang to khyothukcho. Hoji tsükona Israel na Amor kyon na vamo meta jianglo vani sicho. 22 Israel na Amor meta topvü, Jüjowoe Amon lona benkae jükiwoe Jabbok nandang, tona engrhewoe lijüng jilona Jordan na engrhewoe nandang to khicho. 23 Hojito Israel Potsow OPVÜI jina ombo kyon Israel jiang tsükona Amorite kyon jiang phani sicho. 24 Ntena hoji nte khilanhunga alo? Ntena nte potsow Ghemosh na nte pio jiang vavka. Tokhatola e OPVÜI Potsow na epio jiango topvü ena vav. 25 Nteno Zippor tsoe Balak, Moab mesao jilona mmhonkata to nchümata alo? Ombona kvüthüngha Israel merang cho n li, toalo merang chola? Ombona ethüngi ori tssocho alo? 26 Israel na Heshbon, Areor tona hojiang nkonphia oyan jiang elani Amon zhükhfü tssalo yantsü shiang tolo nzyu nzo ethüm vanthaka. Tona ntena hetenhya meta jiang n khilan na vanta choke? 27 Meka, ana ntia nte n lümo nte n tssoyihan ka. Ntena a thüngi ori tssoa a nlümo a tssoyicho taeka. Ehungpvüi esüa OPVÜI vana, ombona nchüng Israel tona Ammonite to yutalo methak khivka." 28 Tokhatola Jephthah thüngina yithen eyio shiji Ammon mesao na n ngayicho. 29 Hojisüi jo OPVÜI mon jina Jephtah lo oro vancho. Osi ombona Gilead tona Manasseh tolo osi Gilead lo Mizpah jilo oyi elani Ammon lo wocho. 30 Jephthah na OPVÜI thüngi phyochakcho; "Nina Ammon jiang pono ekhyo apia tssona, 31 a kina ochona chiro a ndukdena sana ji rungi ni thamka, Osi ana hoji kyon tsük ji erungthan tssoa ni thamka." 32 Osi Jephthah na Ammon jiang thüngi ori tssolo zhükhfüi bankae khochicho, osi ekhyo ji ombo picho. 33 Ombona Aroer lona onte nduki rotacho osi Minnith hakon jiang jana yantsü mekyu jiang osi Abel Keramin jana hayacho. Hojithüng kyon elümoto lüngthacho osi Israel jiangna Ammon jiang khyocho.

Jephthah Otsolov Ji

34 Kvüthüng Jephthah na Mizpah lo ombo ki kholani yicho sana jithüng ombo otsolov jina sharia tsüngrüngu ekhophia ombo nduko chirocho. Ompvüo Jephthah otsolov nthi ji. 35 Ombona ompvü hungchiale ombo nungra lona ombo sü jiang nthyuroe sia phyocho, "O atsolov, nina alümbüm a royithaka! Kvütoli nina a lümbüm a royio tssochechola? Ana OPVÜI thüngi phyochak mmyingu vathaka, osi ana hoji n kilanche!" 36 Ompvüna ombo ezocho, "OPVÜI na niri Ammon jiang ni nlilathukthako ji tsükona nina phyochaki vao ji ephan tssoa." 37 Tokhatola ompvüna opo thüngi heto ezocho, "A tsükona shi a tssoyia, choro eni yuta apia a shom jiang nzo phunglani na ehungo loro ekümona echüv ji a nungrathuksa." 38 Hoji tsükona ombona choro eni tsükona wole to ompvü ezocho. Ompvüna oshom jiang nzo phunglani ehungo n yanpina osi otsoe n boku chüv ji tsükona nungratacho. 39 Choro eni sülojo ompvüna opo thüngi joyicho. Osi ombona OPVÜI thüngi phyochako ji ephan tssocho; osi ompvü ji loro ekümo na chücho. Hoji lona benkae Israel lo loroe jiangna 40 nzyualo tsüngon mezhü jo okina hapoe khochoki owo Gilead lo Jephthah otsolov ji müngyanchitala.

Yitssoeden 12

Jephthah Tona Ephraim Jiang To

1 Ephraim lo eboetso na ritsso tsükona methakcho. Ontena Jordan zhükhfü pankae Zaphon lo owo Jephthah ezotacho."Nino ntioli e n tsav Ammon jiang ori tssolo Jordan pankae ochola? Nina vamo kiji rungi ni siyivka!" 2 Tole Jephthah na onte ezocho, "Ana a kyon jiang thüngi Ammon jiang tsükona elümoto khontacho. Ana nte tsacho khatola ntena onte khelona a n shanchohungcho. 3 Ntena a n zanchi to ana zecheo jina ana a popo a eküm na thana Jordan pankae chiwocho, tole OPVÜI na onte ekhyov a picho. Tona ntena ntioli enhüngati oro khontala?" 4 Jisüi jo Jephthah na Gilead kyon topvü erhümi sosi Ephraim kyon jiang thüngi rotacho, osi onte khyocho. (Ephraim kyon jiangna heto phyotacho, "O Gilead lo kyon Ephraim tona Manasseh to lo evanden, nteno Ephraim lona tsanthei evanden ka!")5 Ephraim jiang chakyav tsükona Gilead kyon jiangna Jordan khyingkaphen jiang topvü lona zümta vancho. Ephraim kyon na oyi zhükhfü ji khyingkav engale Gilead kyon jiangna engalancho, "Nino Ephraim kyon alo?" 6 Tosi ombona "mek," to phyoa na ontena "Shibboleth" to phyole to ezocho; tona ombona "Sibboleth" to phyocho, ntiotssole ombona hoji mmhona n phyochecho. To tssoana ontena ombo rhümae Jordan zhükhfü khyingkaphen motsünga ndüngona owo ombo lüngthae sitacho. Hojithüng Ephraim kyon wothüng zhüro eni lüngthacho. 7 Jephthah na ombo kyon Israel jiang nzyu tiruk socho osi ombo chüi ombo meta Gilead lo shothecho.

Ibzan, Elon Tona Abdon To

8 Jephthah sülo jo Bethlehem kyon Ibzan na Israel socho. 9 Ombona tsokhying thümro, tsolo thümro to vancho. Ombona tsolo jiang ji onte pvüji pomoe kyon thüngi yanpithuksi tsokhying jiangji onte pvüji tüv loroeden soa vanthukcho, osi loroe otsük thümro sosi yicho. Ibzan na nzyu tiying Israel sacho, 10 jisüijo ombo chüi Bethlehem lo shothecho. 11 Ibzan sülojo, Zabulun kyon Elon na nzyu taro Israel sacho. 12 Jisülo jo ombo chüi Zebulun metae Aijalon lo shothecho. 13 Elon sülojo Pirathon kyon Hillel tsoe Abdon na Israel sacho. 14 Ombona otsoe otsük zhüro tona orüi otsük thümro to jiangna kurü ekhatiying lo tsankathung vancho. Osi Abdon na Israel jiang nzyu tiza sacho. 15 Jisüi jo ombo chüi Amalek phunglanro metalo Ephraim metae Pirathon lo ombo shothecho.

Yitssoeden 13

Samson Buko Ji

1 Israel jiangna OPVÜI mhadungo mmen tssolancho, hoji tsükona OPVÜI na onte ji Philistine jiang küpo nzyu zhüro thechi sicho. 2 Hojithüng ji Zorah yamo Manoah to tsa vancho. Ombo Dan pvüji kyon. Ombo eloe jina otsoe n vanham vancho. 3 Tole OPVÜI lanben na ompvü thüngi oro heto ezocho, "Nina kvüthüngha ngaro n vanhan, khatola n sungu nina ngaro hani tsokhying tsüka bukvü ka. 4 Suko osi zükhi ntia ti-yukhe, osi sario tüv etsoyu ntia titsole. 5 Osi nitsoe ji bukthaka na ombo tssan ji kvüthüngha titsenia, ntiotssole ombo buklena echümchak tsoe (Nazirite) to khochaki vanthokvü. Osi ombona Philistine jiang khe lona Israel jiang shanchov elhi ji benkav ka." 6 Tole eloe jina orapvü thüngi owo heto ezocho, "Potsow kyon tsü ka athüngi rocho osi omboji OPVÜI lanben esüa ekhena zecheta tüv. Ombona kvüina rocho sana ji ana engae n ze, osi ombo mying jo ocho sana jiha a n zo. 7 Tokhatola ana ngaro hani otsoe buku to ombona a ezocho. Ombo na suko osi zükhi ntia tiyule osi sario etsoyu ntia ti-tsoyule to a ezocho, ntiotssole eboeroro ji ombo eküm echung Nazirite to Potsow lo khochaki vanthokvü to phyocho." 8 Manoah na OPVÜI thüngi heto randancho, "OPVÜI, nina nzansi Potsow kyon ethüngi rothuko ji elani rothuklani nagro ji bukna kvüto lyuvsana e zothuka." 9 Manoah na chomo ji esüa Potsow na ombo lanben ji rothuka eloe jina oli vanathüng oro ndukthukcho. Hojithüng jo orapvü Manaoh jo ompvü ndüngo n van, 10 hoji tsükona ompvüna yunga owo orapvü thüngi ezocho, "Hei, zeta! nchuka a thüngi erowo kyon ji elani rolanthaka." 11 Manoah na phanthi ombo engh ji phana wocho. Osi ombona owo kyon ji heto ezocho, "Nino a eloe ji thüngi thyutao kyon mo ji me-mek?" Tole kyon jina, "Ho, a ka" to ezocho. 12 Tole Manoah na ezocho, "Ni yi ji bena otsoe ji buka tssona ombona kvüto lyuvla? osi ombona kvütüv eküm vamvü lichola?" 13 Tole OPVÜI lanben jina janlancho, "Ana ni eloe ji ezowo jiang ombona tssonrüngu lia. 14 Ombona jününgrozhü lona chiyicho ntia tsov meka; suko osi zükhi ntia yuv meka, elani sario etsoyu ntia tsoyuv meka. Ana ompvü ezowo jiang topvü benphivka." 15-16 Hoji jo lanben to Manoah na ntsicho, hoji tsükona ombona ezocho, "Nzansi ti yisa, ni tsükona nyanyanro ekvütavka." Tokhatola lanben jina phyocho, "Ana n yina vanlea, ni etsoyu tsov meka. Tokhatola nina ni methakhungna OPVÜI thüngi erungthan pia." 17 Manoah na ezocho, "Ni mying ji ezoa, tona niyi ji benchetathüng ena ni monkhümyikrachivka." 18 Lanben jina janlancho, "Nino ntiolyui a mying ji ni ntsihungala? A mying jo e mhuko tüv myingka." 19 Jisüi jo Manoah na nyanyanro motsünga khi nna otsüngha tara khi toli, emhokthav elhi etssowo OPVÜI ji thüngi olong thanphen sa jilona thancho. 202l Thanphen jilona omi evakachile OPVÜI lanben ji milungi na potsüwoe chüngia Manoah omboe na hungcho. jithüngti kyon jijo lanben saya to Manoah na ntsicho osi omboeata na nkhümo likoe vanthetacho. Tosijo onina lanben ji n hunglam sicho. 22 Manoah na ombo engh ji ezocho, "Enina Potsow hungthak küma echünrünguka!" 23 Tole ombo eloe jina ezocho, "OPVÜI na echüthoko sawo eni than ji e khichoyiv mek, osi enhünga shiang hetopvüto ehungthuka ezothokvü mek." 24 Eloe jina tsokhying buki Samson to tsacho. Ngaro ji rankata yicho. Osi OPVÜI na ombo mmhayicho. 25 Osi ombona Zorah tona Eshtaol to yutalo Dan lo ncheni vanathüng OPVÜI na etho ombo jükayiv benkacho.

Yitssoeden 14

Samson Tona Timnah Loroe Ji To

1 Tsüngona lo Samson na Timnah lo jowocho tole hojilo loroe tsüka vana ombona hungcho. 2 Ombona oki elani oyi opoha oyo oni thüngi ezocho, "Timnah lo Philistine elororo tsüka a zehungo tüv vana. Ompvü soa a vanhungka, owo sosi yitava." 3 Tokhatola opoha oyo onina ombo ezotacho, "Eloe jo n longtsüi Philistine jiang yolo owo yanake? Ete pvüji chungi, osi ete kyon yolo na nina loroe n yanchecho nüng?" Tokhatola Samson na opo ezolancho, "Ajüpomo ji ompvü, hoji tsükona ntena ompvü sosi oyi a thüngi vanthuktava." 4 Samson ji OPVÜI na olan soa elhi heto tssothuka evamo ji opvü-opo jiangna n tsicho, ntiotssole OPVÜI na Philistine jiang thüngi ori tssov lanka yana vancho. Shi yuta shiang lojo Philistine jiangna Israel sa vancho. 5 Hoji tsükona Samson na opoha oyo oni phana Timnah lo jo wocho. Ontena jününgroli yakchiathüng hinghoro vantüngro tüv na erhyua ombona zocho. 6 Jitopvü OPVÜI na etho ombo pi, hinghoro ji nyanyanro esüa kheshü taena nshyuroe sicho. Tokhatola ombona ntio tssocho sana ji opoang n zocho. 7 Jitosi ombona loroe ji thüngi owo thyutae zele, ombona ompvü chokae sicho. 8 Tsüngon tara sülojo Samson na ompvü soa vamvü tsükona wocho. Osi olani woa thüng ombona lüngthae esio hingho ji zelo wole hingho ji müng jilo otssak rhei tssakijü tara jüa jo ombo emhokcho. 9 Hoji tsükona ombona tssakijü ji khichei olan dunga tsoa wocho. Jisülojo ombona opo ha oyo oni thüngiha owo tara picho. Ontena na tsotacho, khatola hingho tsükina khichecho to Samson na onte n zocho. 10 Opo na loroe jiang ki wocho, osi Samson na hoji lona tokhu tsüphov picho. Hoji jo khyingroe jiangna hojito etssov shikhfü lio jina. 11 Philistine jiangna ombo hungale khyingroe otsük thümro ombo ndüngo owo vanthokucho. 12-13 Tole Samson na onte ezocho, "Ana janlanmo ekhüngu nte engavka. Osi ntena yanpiyanthan yuta tokhu tsüngon tiying ji n yakthüng a n janlanchena nte otsük akvüto sünyipvü thümro tona osü mmhom thümro to nte khiyivka, osi ntena ajalancheta tssona anaha hojito nte pivka." Tole ontena ombo ezotacho, "Toka ntio sana phyoe engathuka." 14 Ombona ezocho, "Oyam etsoe jilona ntiosana etsov chiyicho; Etho ejüi jilona ntiosana enüngu chiyicho." Nchuk ethümoto yiaha ontena engao ji n jalanchecho. 15 Osi tsüngon mezhüoto jilojo ontena Samson engh ji ezotacho, "Nirapvü khi ntio kyak sana ji ezothuka. To mekana ena nipo ki shilo omi thei jilo rungnhyae ni sivka. Nimboe tssoe e retsoyiv to etsatachola, nüng?" 16 Tole Samson eloe jina esü elonga orapvü thüngi owo ezocho, "Nina a n zan! Tolea nina otsotso a tsakala! Nino a shom jiang engao chüksi ntio yichak sana ji aiyo a nzoake!" Tole ombona ezocho, "Zeta, hojijo ana apoha ayo onitia n zohan, Tona ana kvütoli hoji ni ezov la?" 17 Hoji tsükona ompvüna yanpiyanthan tokhü tsüngon tiying jo hoji tsükona kya vancho. Tokhatola eloe jina tsükshia ombo thüngi erinjana ombo khetsüo jina tsüngon tiyingo to jilojo ntio sanaji ombona ezoe sicho. Jisüijo ompvü na Philistine jiang ezocho. 18 Hojito tsüngon tiyingo to jilojo Samson na yipheni n rheyithüng kyon jiangna heto ombo ezocho, "Tssakijü lona nüngka jo ntio tssovla? Hingho lona etho jüka jo ntio tssovla?" Samson na janlancho, "Ntena amangsü ji nzo oli n rhontavo, ntena nchüng lea janlan ji n tsina vamvü." 19 Jitopvü OPVÜI etho jina Samson pyingi ombona jowo Ashkelon kyon nchyu thümro lüngthae sünyipvü jiang shaki hana oyi ochoangna phyochecho sana jiang elo picho, 20 hoji sülojo Samson na emhokthav lüm tsuka oki yicho osi ombo engh jijo yanpiyanthan lo ombo khümshümo ji picho.

Yitssoeden 15

1 Yuta tara sülo, liri etüngathüng Samson na nyanyanro hansi eloe ji janthechilo wocho. Ombona eloe ji opo ji ezocho, "Ana a eloe ji yipheni a rhowo hungala." Tokhatola omo jina Samson ji n rhowothukcho. 2 Tole heto ezocho, "Nina ompvü tssaka sicho tsaya ana ompvü ji nikhümo pithaka. Tolea oka ji opyon mmhomoka, nina ompvü khikhuka." 3 Samson na ezocho, "Nchüng shilo jo ana Philistine jiang thüngi ntio tssov sana ji apono mek!" 4 Tosi ombona owo shaeli nzo ethüm rhümhae emhi lona enini na ntsütsütae ntssü jilo milon khüngkayicho. 5 Tosi milon jiang njükayia shaeli jiang ji philistine jiang tsünghanro li phanthechicho. Hoji toli tsünghanro ranthako jiang tae mekna n ranhamo jiang, olive tssüngthili jiang toji Samson na rungi siyicho. 6 Ochona heto elhicho sana to Philistine jiang na ethümtae zele, Samson na to ethümchecho. Timnah lo Samson omo jina Samson eloe ji ombo shom thüngi yithoki siwo jina Samson na heto elhicho to ethümchecho. Tole Philistine jiang na owo eloe ji rungtsüngi sitasi ompvü opo ki jiha rungi siyitacho. 7 Tole Samson na onte ezocho, "Nteno heto elhitake! Ana nte n lirathüng jo esam meka!" 8 Tosi ombona elümoto haruka onte sakacho osi elümoto onte lüngthacho. Tosi ombona Etam lo longkvü sürhen jilo owo tsanthei vani sicho.

Samson na Philistine Jiang Khyothechiala

9 Philistine jiangna Juda lo oro nchenkae Lehi yantsü ji hacho. 10 Tole Juda kyon jiangna, "Nteno ntio tsükona e hatala?" to ezocho. Tole ontena "Ena Samson ji, ombona etsütsao ji esüa khangshiv tsükona rochoka to phyocho. 11 Tole Juda kyon wothüng ethüm na Etam sürheni longkvü jilo owo heto Samson ezotacho, "Philistine jiango ete esopvüiden to nina n tsichoke? Nina e thüngi ntio tssochola?" Samson na janlancho, "Ontena ntio a tssoyicho sana jito tae ana tssoyicho." 12 Ontena ezocho, "Ena ni rhümae chungi onte khelo ni thechilo rocho." Tole Samson na ezocho, "Toka ntena jo a n lüngtha to phyochak a pia." 13 Ontena phyocho, "Toka enajo ni lünthav meka," "Ena ni rhümae ni chungi onte khelo tae ni thechivka." Hojito ontena wozhü ethan eni khi ombo chungi longkvüi na ombo khichecho. 14 Ombona Lehi oyi janale, Philistine jiangna tüngkachia ombo thüngoe roracho. Jitopvü OPVÜI ethona ombo pyingi okhe chüngzhü jiangji mikyu esüa enato pheroe sicho. 15 Jisüi jo ombona Gadho kanryu sangchepancho tüv hungcho. Ombona nkhfüthei hoji tsakae hojina wothüng motsünga bena onte lüngthacho. 16 "Osi Samson na heto okhen dencho, Ana gadho kanryu khi kyon wothüng lüngthacho; Gadho kanryu khi ana onte müng jiang nshakachi sicho." 17 Jisüi jo ombona kanryu ji shümthei sicho. Heto tsso meta jijo Ramath Lehi to tsacho. 18 Jisüi jo Samson ji elümoto eratsüngi ombona OPVÜI ezocho, "Nina ekyo tsüphov hetüv a pithaka, tona enhungo eratsüngi Philistine shiang khelona a chüvke?" 19 Tole Potsow na Lehi lo liko küngsothuki hoji lona ojü chiyithukcho. Tole Samson na hoji yusi mmhona yicho. Osi Hoji jübukphen jijo Hakkore to tsacho; osi nchüng jana Lehi lo lia. 20 Philistine jiangna meta ji sathüng Samson na nzyu mekyu Israel jiang sacho.

Yitssoeden 16

Gaza Lo Samson

1 Tsüngnona lo Samson na Philistine yantsü Gaza to tsao jilo owo losülonphyoe eloe nduki ompvü thüngi yipcho. 2 Philistine jiangna Samson ji hojilo yipa vana to ntsi yantsü kipüngona zümo tona ombo nhyaktacho. Ontena heto nchümta jükrüpi vantacho, "Ombo ha wonchiana chiyivka küma etena ombo lüngthavka." 3 Tokhatola Samson na zümo riso tae yipsi phanthi yantsü ji pikhfü khanphen ji totona hankhan, ji durhyu phanhya rukchecho. Ombona hoji ejümsi Hebro ni chanchio phunglan ji chüngicho.

Samson Tona Delilah To

4 Hoji sülo Samson na Sorek hayi lo evan eloe tsüka Delilah to tsao ji lümcho. 5 Tole Philistine mesae otsük mungo jiangna Delilah thüngi owo ezotacho, "Samson ji kvütoli etho jüa sana osi ena kvütoli ombo rhümae chungi sisi ombo khyovsana ji mphoa ni ezothuka. tona ena otsük akvüna ranpyak nzo taro ekha ren ni pivka." 6 Tole Delilah na Samson ezocho, "Ntiona ni etho jüthuka sana ji nzansi a ezoa. Ochona sana ni chungi etho n liv ni sithukvü jo kvütoli tssochevla?" 7 Samson na ezocho, "Lokozhü n kyingkahan ethan tiying na a chüngchojo, anaha thanpoe esüa a etho n liv siv." 8 Tole Philistine mesao jiangna olozhü n kyinghancho tüv tiying khi Samson chüngle to Delilah picho. 9 Ompvüna chechünga sana ji zeta kyon ejoma nhyaka vanthukcho, osi tüngkachicho, "Samson! Philistine jiang tsata!" Tole wozhü jiang omina oying dyucho tüpato enato tüproe sicho. Osi ombo etho ejü ji ontena n yanchehancho. 10 Delilah na Samson ezocho, "Nina a ejiphia kha otsotso a nzoala. Nzansi ochona sana ni chüngüv jo kvütolyuv sana a zoa." 11 Ombona ezocho, "Ozhü n tsütsahan ethan tüv na a chünguvo anaha kyon thanpoe esüa to tae tssov." 12 Tole Delilah na wozhü ethan khi Samson chungi vasi ezocho, "Samson! Philistine jiang tsathaka!" Kyon jiangna chungchak esanawoe na ombo nhyakta vancho khatola ombona wozhü jiang oying tüpato ethüngroe sicho. 13 Tole Delilah na Samson ezolancho, "Nina enhünga ha otsotso a n zohan osi a ejiphiala. Ochona sana ni chüngvo kvütolyui ni chüngna tssochevla." Samson na ezocho, "Nina a tssan npyo-tiying ji pitsütae lentan khi hojilona a eshenhyavo anaha kyon thanpoe etho totae tssov." 14 Tole Delilah na Samson ji ejichoe yipthuksi ombo tssan npyo-tiying ji pitsütae hojilona eshentani vasi, "Samson! Philistine jiang tsata!" to tüngcho. Tole ombona phanthi ombo tsan ntssüo ji enato tssüngchei sicho. 15 Tole ompvüna ezocho, "Nina a nzanala to phyosi kvütoli hoji ephan mekchola? Nina yenjo ethüm a ejiphithaka osi enhünga jana ntiona ni etho jüthuka sana ji otsotso a n zohan." 16 Ompvüna engakvü ombo engamongo jina Samson ji nyinyangtsüngi sülani jo ntsaji ezocho, 17 "A tssan shi yenjoa tia n tssühan. a ebuk lona benka Nazirite to Potsow lo khochaki lia. A tssan shi tssüi sivo a etho ejü ji moni sisi anaha thanpoe esüa totae tssov." 18 Samson na otsotso ompvü ezochoto Delilah na zechetale ompvüna yithen heto pia Philistine mesae jiang tsachithukcho, "Echunga rotalana, ombona otsotso ji a ezothaka." Tole ontena orang ji hantasi rotacho. 19 Delilah na Samson ji ejichoa ompvü philo yipthuksi kyon tsüka tsae Samson tssan mpyo jiang tssüi siyithukcho. Jisülo jo ombo ethoji monthako jina ompvüna ombo khangriv benkacho. 20 Ompvüna phyocho, "Samson! Philistine jiang tsata!" Ombona yipjüngchi nchümcho, "Thanphothüng esüa nchüngha tsanchovka to." OPVÜI na ombo sithako jina ombona n tsicho. 21 Philistine jiangna ombo rhümae omhyik jiang khanchokchi ombo siyicho. Ontena Gazae ombo sosi oyi yongmen yonjakzhü na ombo chüngcho, osi vüngpheni ombo thechi hümchen long ombo khorithukcho. 22 Tole ombo tssan ji chenlana phanthicho.

Samson Chüo Ji

23 Philistine mesae jiang na sanrhyutae onte potsow Degon ji othan pia tokhutav methakcho. Ontena heto dentacho: "E potsow na e ri Samson ekhyov etho epicho!" 24-25 Ontena heto phyota ngangota vancho, "Samson tsae khfüri ejüthoka!" Samson ji vüngpheni na tsachuki khfüri onte ejüthukcho osi ontena durhyupvü eni yutalo zae ombo vanthukcho. Kyon jiangna ombo zetasi onte potsow thünga heto dentacho: "Ete potsow na ete ri ochona ete meta roe sia elümoto elüngthacho sana hoji ekhyov epithaka!" 26 Samson na okhe lona ombo süa vamo eboeroro ji ezocho, "Oki shi tsenkachio durhypvü jiang a epyanphithuki ze, ana jianglo enghokavka." 27 Oki ji eboe osi eloe na etsseni pyingi licho osi mhonki ha eboe osi eloe wothüng ethüm bena sankae Samson na khfüri onte ejüthoka vancho. Osi philistine mesao onte otsük mongo ha jilo vancho. 28 Tole Samson na heto randancho, "Limha sakhamo OPVÜI, a nzansi a nchümcheta; a nzansi, Potsow, a etho ji yenjoa apilana tona ana echunga yonphina Philistine ochoangna a mhyik shiang a khanchukchiyicho sana jiang nlilamka." 29 Jitosi Samson na oki tsenkachio durhyu eni ji rhümacho. Okhe nkhenta durhyupvü jiang nyimkae khyana ombona heto tüngcho, 30 'Philistine shiang nzo a chüthoka!" Ombona durhyu eni ji ombo pvükhyong khyanle, oki totona vanjoe Philistine mesao otsük mongo jiang tona jilo vamo kyon jiang topvü to chüracho. Hojitolyui Samson na ombo eküm vanathüng lüngthao jiang lona kyong kata ombo echü lo chünhyathukcho. 31 Ombo ojenio jiang tona wopan jiang to na ombo müng ji khilo jo wotacho. Ontena ombo müng ji khi hansi oyi Zorah ha Eshtaol oni yuta lo onte opo Manoah khüp jilo ombo shothetacho. Samson na nzyu mekyu Israel esopvüi tssocho.

Yitssoeden 17

Mikha Kisü Jiang

1 Ephraim phunglan meta jianglo Mikha to tsa kyon tsüka vancho. 2 Ombona oyo heto ezocho, "Ochona sana rangpyak othüng taro ekha ni efüile nina efüi ji rhiyicho. Nina rhiyia ana zocho. Tolea ana efüchoka, küma orang ji shikalo." Tole oyona ezocho, "OPVÜI khi ni mmhayithukvüka otsoeyo!" 3Ombona orang ji oyo pilanle ompvüna ezocho, "Ana randankao ji atsoe jilo n khyingthukvü tsükona ana orang shi OPVÜI piala. Orang shi khi otssüngna kisü shani janti na eyukthuka. Hojito enhungo ana jantirang shi ni pilanaka." 4 Hojito ombona orang ji oyo pilancho. Tole ompvüna rangpyak nzo eni khi yonjak ejoe pia otssüng na kisü shanthoki, hoji janti jina eyukthukcho. Osi hoji Mikha ki vacho. 5 Mikha na ombo khümphen meta licho. Ombona kisü tara shancho osi pvüti sümüng tükcho osi ombo tsoe yolo tsüka ombo pvüti tssothukcho. 6 Hojithüng jo Israel lo mesae ochia n vancho; jitsükona otsük akvüna ombobo etancho vantacho. 7 Hojithüng Juda meta Bethlehem lo Levi khyingroe tsüka vancho. 8 Ombona Bethlehem sisi metapoe evamvü tsükona yana wocho. Ombona yentsa woathüng Ephraim phunglanro metae Mikha ki chiwocho. 9 Tole Mikha na "Nino kvüina rochola?" to ombo engacho. Tole ombona janlancho, "Aiyo Juda meta Bethlehem yamo Levi kyon ka. Ana kvülo sana vanphen yanala." 10 Tole Mikha na ezocho, "A ndüngo vana. A pvüti tssoe a ndungntssunga vana, tona ana nzyualo jantirang rangpyak taro, elani mpensü tona etsoyu to ni pivka." 11 Levi khyingroe jina Mikha thüngi ombo tsoe esüa vamvü methakcho. 12 Osi Mikha na ombo pvüti tssothuka ombo ki vanthukcho. 13 Mikha na ezocho, "Enhungo ana Levi tsüka pvüti tssothukala, küma OPVÜI na a sükhying topvü a mmhonithokvüka."

Yitssoeden 18

Mikha Tona Dan Pvüji To

1 Hoji yuta lojo Israel lo mesao n vancho. Hojithüng ji Dan pvüji jina Israel pvüji jiang yolo onteno meta n lihamo jina meta hoe vav ekhyo tssota vancho. 2 Hoji tsükona Dan kyon jiangna wopan topvü yolo na ethüngche woro eboe otsük mongo ethüngi Zorah tona Eshtaol to yantsü lona khochi meta ji khyui zelo wothukcho. Ontena Ephraim phunglan meta jilo chiwo Mikha ki nchentacho. 3 Ontena jilo ncheni vanathüng Levi khyingroe jilo vamo ji yi nsan ji zoe ontena ombo engacho, "Nino shilo ntio elhi tssoala?" 4 Tole ombona ezocho, "Aiyo Mikha thüngi ntsatae, ombo pvüti tssoa jokheman khia shilo vanaka." 5 Tole ontena ombo ezocho, "Ena yentsata vamo shi oman liliv sana nzansi potsow thüngi engae ezeyi, " 6 Pvüti jina onte ezocho, "Ntena ntia wongkhyuv n lika, Nte yentsa shilo Potsow na nte soa vanka." 7 Jisüi jo otsük mongo jina khochi Laish yantsüi wotacho. Ontena hojilo kyon jiangna Sidon kyon jiang esüa vanta hungcho. Onteno noyingroa onte yolo khonta rota n liv vantacho osi onte ethelan eli topvü benria liracho. Onteno Sidon kyon jiang lona kontae vancho osi kyon thanpoe ochi thüngi ha shenta n licho. 8 Otsük mongo jiangna Zorah tona Eshtaol to lo kholani yile ontena kyon jiangna ntio hungcho sana to onte engacho. 9 Tole ontena phyotacho, "Rotava," "owo Laish ji hayatav ka! Meta ji elümoto mmhona. Shilo elhi n tssona ti vantava. Zakto khochi owo meta ji hayatava! 10 Ntena jilo ona kyon jiangna ntia oyam hungka renka n lio ji ntsivka. Meta ji elümoto tsüphoa osi kyon na jüpomo tüv topvü hungkhuka. Potsow na hoji nte pithaka." 11 Hoji tsükona Zorah tona Eshtaol to lona otsük nzo tiruk na ritssolo khochicho. 12 Ontena khochi owo Juda lo Kiriath Jearim lo engrhewoe nchentacho. Hoji tsükona meta jijo enhünga lea Dan kyon nchenphen to tsala. 13 Ontena jilona khoe Ephraim phunglan metae Mikha ki yitacho. 14 Otsük mongo Laish zelo wo jiangna onte shom jiang ezotacho, "Meta shilo oki motsüngalo otssüng kisü motsünga janti na eyukcho lio ji tsintsita? Jitae mek, kisü thanpo osi pvüti sü ha lira, küma etena kvüto lyutavla?" 15 Ontena Mikha ki rhowo Levi khyingroe ji thüngi kvüto vanala to engatacho. 16 Hojithüng ji Dan pvüji lona ritssoe otsük nzo tiruk jina ritsso sakav pikhfülo zae vanthakcho. 17 Echepyim otsük mongo jina oki rhowo otssüng kisü ji, kisü thanpo jiang tona pvüti sü ji to khitacho. Hojithüng jo pvüti jijo otsük nzo tiruk jiang nzo pikhfülo zae vancho. 18 Kyon jiangna Mikha ki rhowo ntho tsütsaelan jiang khiale pvüti jina onte engacho, "Nteno ntiolyutala?" 19 Tole ontena janlancho, "Yingto vana osi oyi motsünga lea ti nsana. Ephana oyi e pvüti osi e ndungntssungpvüi tssoa. Kyon tsüka wopan lo pvüti tssoji thüngina jo Israel pvüji topvü pono pvüti ni n tssohunga ke?" 20 Hoji zoe pvüti ji emathacho osi ombona ntho tsütsaelan jiang khi hansi onte phana yicho. 21 Ontena khophi onte ngaro jiang, ekümrümo jiang tona ejüeli to jiang hantasi khochicho. 22 Ontena kona yithakale Mikha na ombo yankho jiang ritssolo tsachukcho. Ontena 23 Dan kyon jiang phayae tüngtacho, tole Dan kyon jiangna khophilani Mikha ezocho, "Ntio tssochola, kyon okho shijo ntiolo tsachola?" 24 Tole Mikha na ezocho, "Ntio tssochola to jo ntiola? Ntena a pvüti ji tona ana nsüngrüo potsow jiang to khithaksi aiyo ntia enhyokae n li." 25 Tole Dan kyon jiangna phyocho, "Ntena kyon jiang lüm tsukthuki nte sakathukvü yana mekna ntia ti phyotava. To mekcho jo ni osi ni wopan topvü chürav." 26 Tole ontena yi sicho. Onte ji elüm etho jüa to Mikha na ntsiale ombona oki yi sicho. 2728 Dan kyon jiangna pvüti ji rhümae Mikha na nsüngrüo tsütsaelan jiang khiyidensi sülojo Laish yantsü Bethrchob lo noyinga vamo kyon jiang lüngthasi yantsü ji rungi sicho. Laish jo Sidon lona ekomo ji tsükona ochina ha onte n shanchochev sicho, elani ontena ha oyam thüngi shenta lia n vancho. Dan kyon jiangna yantsü ji tssochoe jilo vani sicho. 29 Ontena Laish to tsao ji süsi Jakob tsoe onte motsüi Dan mying ji oyan ji mying tsatacho. 30 Dan kyon jiangna onte khümphen kisü nsüngrütacho. Osi Gershon tsoe Jonathan, Moses orüo jina Dan pvüji jilo pvüti tssocho, osi Babylon vüngpheni n yithüng nandang jo ombo tsoronichen jiangna pvüti tssotacho. 31 Potsow khümphen ji Shiloh lo elithüng nandang jo jilo lia evamo kisü Mikha na nsüngrüo ji ontena chümkachitacho.

Yitssoeden 19

Levi Tona Ombo Lothanro To

1 Israel mesao n vanathüng yuta jilo Ephraim phunglanro jilo Levi tsüka vancho. Ombona Juda meta lo Bethlehem lona lothanro tsüka yani vanthukle, 2 ompvüna ombo thüngi lüm tsuki opo ki Bethlehem lo oyi choro mezhü vancho. 3 Tole ombona owo enia ompvü tsa elani yilanle to ezocho. Ombona ombo phajae ji tona gadho eni to sosi yicho. Loroe jina opo ki ji onte ejücho osi opo na khyingroe ji hungale emathata elonchocho. 4 Loroe ji opona khyingroe ji oki nchetale to ezoji tsükona ontena tsüngon ethüm hojilo vantacho, khyingroe jiha loroe ji omboe na etsoyu tssotasi zümo ethüm hojilo yipchotacho. 5 Tsüngon mezhüoto jilo enyathüng ontena phanthi yitav methakcho. Tole loroe ji opona ezocho, "Ntiosana tia tsoyuta si yitava. Tona hoji mmhomo tssovka. Ntena hoji sülotilea yitacheta." 6 Tole eboe otsük eni jina khukthe tsoyutacho. Tole loroe ji opona ombo ezocho, "Zümo shi helo yipsi nibobo longshi khia." 7 Levi jina yiv tsükona phanthile loroe ji opo na vansale to ombo ntssungo jina ombona zümoa vanlancho. 8 Tsüngon mongoto ji nyazaüngi na Levi na yitav phanthile loroe ji opona ezocho, "Nzansi etsoyu tssotasa. Tara sülani ti yitava." Tole otsük eni jina etsoyu tssotacho. 9 Eboe ji, ombo lothanro tona ombo phajae ji to na khochiv phanthitale loroe ji opona ezocho, "Zetava mmyuthak küma zümo shi yipchosi yitava. Enhünga münguka jüngtheta helo yiptava. Ntena ojyua nyazüngina phanthi khochitava." 10-11 Tokhatola eboe jina hojilo zümo n yipcholan hungwo jina ombo lothanro ji, ombo phajae ji tona gadho eni ji to sosi khochicho. Ontena Jebus (Jerusalem) oyi janale mmyui sicho, Hoji tsükona phajae jina OPVÜI ji ezocho, "Ntioli etena Jebusite yantsü shilo n yiptala?" 12-13 Tole OPVÜI jina ezocho, "Etena Israel meko kyon tüv yantsüi nchentav meka. Etena tara oyi Gibeah mekana Ramah lo nchentavka." 14 Ontena Jebus yaki yitacho. Ontena Benjamin pvüji yantsü Gibeah ji janale eng rheta vancho. 15 Ontena yentsa ji esani hojilo yiptav methakcho. Ontena yantsüi rhowo esanpheni khuk the vantaha ochina ha zümo jilo oki onte n sothecho. 16 Ontena jilo vanathüng eran tsüka olina mmuka yia vancho. Ombo Ephraim phunglan metae evan khatola jithüng jo Gibeah lo vancho. (Hojilo kyon thanpo vamo jiango Benjamin pvüji kyonden.) 17 Eson jina yantsüi yentsae jiang hungi engacho, "Nteno kvülona rotachola? Osi kvüi yitala?" 18 Levite jina janlancho, "Eiyo Bethlehem Juda lo wotacho, osi enhungo phunglan meta Ephraim lungjüngi yitale, zümo shilo ochina ha e n chenthukala. 19 Etsoyu jo hümri, zükhi tojo a loroe ji eni ejan osi a phajae ji ejan elani Gadho jiang tsükona mavü to topvüto ena hana. Ena ethev elio jiang topvü hana." 20 Tole eson jina ezocho, "A ki nte nchethukvüka! Ana nte sheküpvüka; yantsüi ti yiptava." 21 Ombona onte sosi oki oyi onte gadho jiang phicho. Ombo lankon jiangha ojo epyotasi etsoyu tssotacho. 22 Ontena hojito tsoyuta vanathüng yantsüi na lomo esüi sana oro oki ji hachümi kipüng chenphita eson ji ezotacho, "Ni ki lankon ro ji kvüla, ombo sosi chiyia! Ena ombo thüngi rama e tssohungala!" 23 Tole eson jina hapoe chiwo onte ezocho, "Meka, oshomden! Nzansi! Elhi n mhom jitüv ti tssotava! Kyon shijo a lankon ka. 24 Zetava! Ombo loroe ji shi osi a tsolov shiha loroe om, küma ntena onte khitava osi onte thüngi nte etancho tssotava. Tokhatola kyon shi thüngi jo hojito elhi n mhom ti tssotava!" 25 Tokhatola kyon jiangna ombo yi n ngayio jina Levi jina ombo yingaloroe ji tsachuki hapoe vanthukcho. Tole ontena zü mo totona enyathüng jana ompvü thüngi retso rama tssotacho. 26 Wonchiale loroe jina oyi orapvü ndüngo eson ji kipüngi vanthecho. Eng onsochia ompvü na jilo vancho. 27 Orapvü na enyathüng phanthi elhilo wovkato hapoe chiwole hojilo ompvü khe jiangna kipüngo yonchio vanthe vancho. 28 Ombona ezocho, "Phanthia. Yitavka." Tole ntia ombo n janlancho. Hoji tsükona Ombona ompvü müng ji gadho ji mankvüi ompvü sükachi hansi oki yicho. 29 Ombona oki janale, oki rheyi lebukro khi loroe ji müng ji taro eni tsüroe, Israel pvüji taro eni jiang lümchak motsüngtsüng picho. 30 Hoji ehungo jiang topvüna phyotacho, "Israel jiang na Ejip lona khochi yisi, ena kvüthüngha hetüv motsü n zohan! Etena shi tsükona kvütosana tssochev! Kvüto lyutavla?"

Yitssoeden 20

Israel Na Ritssolo Eov Methakala

1 Israel topvü, khümkiwoe Dan lona jolowoe Beersheba, engkhfüwoe Gilead nandang na etsa won ji zocho osi methaktacho. Ontena kholok tssoe Mizpah lo OPVÜI vanrhyu lona nduktacho. 2 Potsow kyonden sarhyuo shilo Israel pvüji akvü esopvüi tsük-tsük jücho, osi liko rasan 400,000 jücho. 3 Hojithüng Israel pvüji jiang Mizpah lo sanrhyuala to Benjamin pvüji na zocho. Israel jiangna phyotacho, "Kvütoli hetüv elhi n mhom tssochecho sana e zoa?" 4 Levi ocho loroe lüngthayicho sana jina phyocho, "Ana a loroe ji sosi Benjamin metae Gibeah lo zümoa tsükona wotacho. 5 Tole Gibeah kyon jiangna a sakalo oro zümolo oki ji hachümcho. Ontena a lüngthav rocho; khatola a loroe ji thüngi n lan tssotasi ompvü chüthukcho. 6 Jisüi jo ana ompvü müng ji khi rhonroe Israel pvüji akvü lümchaka picho. Kyon shiangna ete thüngi n mhom elhitacho. 7 Nte topvü Israel kyonden küma kvüto lyutavsana?" 8 Tole kyon topvüna phanthi phyotacho, "Ete ochina ha, ranki evanlea mekana oki evanlea, ochina ha oki kholani yiv meka. 9 Etena heto lyuvka: Etena kyon tara ethüngchei Gibeah ji owo hatavka. 10 Israel owo tarochia na etsoyu elomka, osi hojilo enhyo jiangna owo Gibeah ji havka, ntiotssole ontena Israel lo elhi n mhom hetüv tssocho." 11 Hojito Israel lo eboetso topvü na yantsü ji halo etssirhyucho." 12 Israel jiangna Benjamin meta topvülo heto ezoa wothukcho, "Nteno ntio n lan tsüphov hetüv tssochola? 13 Gibeah lo elhi n mhom etsso jiang rhümae e pia tona ena onte lüngthasi elhi n mhom shiang Israel lona esanthukvüka." Tokhatola Benjamin kyon jiangna hoji yithen ji n zontan tssotacho. 14 Benjamin yantsü jiang lona ontena sanchuki Israel thanpoe jiang thüngi ori tssotacho. 15-16 Ontena hoji nchuk onte yantsüi na owo wothüng mekyu tiruk tsachukcho. Hoji ephalo Gibeah lona ethüngche woro hayapvüi otsük nzo tiying ethüngchecho. Onte otsük akvüna olong yui shümehio ji otssan tera lea n khachov rhakcho. 17 Israel thanpoe jiango rasan thangshi pithakcho 400,000 ethüngchecho.

Benjamin Kyon Thüngi Ritsso Ji

18 Israel jiangna Bethel lo khümphen jilona owo Potsow thüngi heto chontacho, "Ochoang jipo na Benjamin jiang sakademla?" Tole OPVÜI na janlancho, "Juda jipo na vünga." 19 Ojyuato jo Juda jipo na enyathüng khochi owo Gibeah yantsü ndüngo nchentacho. 20 Ontena Benjamin rasan jiang sakalo owo rasan jiang yantsüwoe zechiwo methaki vantacho. 21 Benjamin rasan jiangna yantsüi na chiro hoji nchuk Israel wothüng mekyu eni lüngthacho. 22-23 Tole Israel jiangna khümphenina owo mmyu jana OPVÜI thüngi nungratacho. Ontena phyotacho, "Ena e ojenioden Benjamin kyon jiang thüngi elani ori tssolam alo?" Tole OPVÜI na "Ho" to ezocho. Israel jiang ji lüm tssonkae elani hoji nchuk ha rasan jiang ovüngthüng esüa reni vanthukcho. 24 Ontena Benjamin rasan jiang thüngi rotav yenjo enioto khochilancho. 25 Tole Benjamin kyon jiangna chirolani Israel rasan thangshithako jiang wothüng taro tiza lüngthacho. 26 Tole Israel topvüna hojilo owo OPVÜI vanrhyulo khukthei mmyu jana etsoyu n tssov vantacho. Ontena khümshümta than tona mpümna erungthan to OPVÜI vanrhyu lona thantacho. 27-28 Hojithüng jo OPVÜI Ntsata Bakos ji Bethel lo licho osi Eleazar tsoe Phinehas, Aaron orüo jina hoji enhyang tssoa vancho. Kyon jiangna OPVÜI engatacho, "Ena e ojenioden Benjamin kyon jiang thüngi wolam alo; to esani sivla?" OPVÜI na janlancho, "Ori tssolantava, ana ojyua jo ekhyo nte pivka." 29 Israel jiangna rasan ejoma Gibeah tssae mphoe vanthukcho. 30 Ontena ovüngthüng esüa yenjo ethümoto khochi owo Gibeah yantsü ji zechiwo rasan jiang renthukcho. 31 Benjamin kyon jiangna rotalo yantsüi na chirocho osi ovüngthüng esüa Israel jiang Bethel lani tona Gibeah lani to vamo jiang lüngthata benkacho. Ontena Israel otsük thümro harüma lüngthacho. 32 Ontena phyotacho, "Etena nchüngha onte chüthuka vanthaka." Tokhatola Israel jiangna okyak nsüngrüi vao jijo yantsüi na olani onte sosi chiyiv methakcho. 33 Kvüthüng Israel rasan ekyungo na esenlani Baal Tamar lo etssencho sana, Gibeah yantssae longroyo jianglo mphoe vamo jiangna sanchukcho, 34 Israel lo ethüngche woro wothüng taro na Gibeah ji hayacho osi elümoto kyoryukata rotacho. Tole Benjamin kyon jiangna jo onte chürav sala to n tsicho. 35 OPVÜI na Israel jiang ji Benjamin ekhyov etho picho. Israel jiangna hoji nchuk onte ri wothüng mekyu mongosi nzoa lüngthacho. 36 Osi onte khyothaka to Benjamin jiangna engathecho.

Israel Jiangna Kvütoli Khyochola

37 Israel wokyungo na Benjamin kyon jiang thüngina esenlani yio jijo ontena Gibeah nkonphia mphoe vanthuko rasan jiang lo enhyikao jina. Mphoe vamo jiangna yantsüi nzoni otsük akvü lüngtharae sicho. 38 Israel ejoma tona mphoe evan jiang to chekav okyak pitae vacho. Ontena eluk tsüphov esüa miphong yantsü ji poni hungana, 39 ritssopheni na opomoe evamo Israel jiangna khophi ori jiang nkonchakvü to phyotacho. Hojithüng jo Benjamin jiangna Israel otsük thümro lüngthathakcho. Ontena "nchüng ha etena onte lüngthata vanthaka" to phyota vancho. 40 Tole chekaphen ji hungcho, miphung tsüphov yantsü ji poni chüngia hungcho. Osi Benjamin kyon jiangna onte sülamoe zechile yantsü ji topvü omi küma hungchi onte emhukcho. 41 Jitopvü Israel jiangna Benjamin jiang phani onte ekhenrhükthukcho; ntiotssole onte monkhamsala to ontena nchümchecho. 42 Ontena Israel jiang mhadungona tsani hapoe chiyicho khatola n tsanchov sicho. Onte ji Israel rasan ejoma mphoe vansi chiyio jiang tona yantsüi na kholani chiyia vamo jiang to yutalo halachi sicho osi onte chüracho. 43 Israel jiangna onte ri jiang chaklanchi phana owo Gibeah engrhewoe hathechi tsanathüng lüngtharae sicho. 44 Hoji lona Benjamin rasan mmhontsov wothüng taro tiza chüthokcho. 45 Thanpoe jiango meta ngazao jiwoe tsana chiyi Rimmon longpvü jiwoe tsana yitacho. Onte wothüng mongo jo olan dunga lüngthacho. Israel jiang na Gidom ejoma jiang phani 2000 lüngthacho. 46 Hoji nchuk tssotsüi Benjamin rasan lüm etsson wothüng mekyu lüngthacho. 47 Tokhatola onte nzo tiruk jo meta ngazao jiwoe tsana chiyi Rimmom longpvü jiwoe yicho osi ontena jilo choro mezhü vancho. 48 Israel jiangna Benjamin ejomae jiang phani lüngtharacho osi topvüeboe, eloe, ngaro osi ekümrümo topvü lüngtharacho. meta jilo yantsü topvü to ontena rungi sitacho.

Yitssoeden 21

Benjamin Pvüji Enghden Jiang

1 Israel jiang na Mizpah lo sanrhyui OPVÜI thüngi echü mchak tsüphov khitacho."Ete ochinaha ete otsolov jiang Benjamin kyon thüngi yanpithoku meka." 2 Israel jiang na hojito Bethel lo OPVÜI vanrhyu lo owo mmyu jana khukta vancho. Osi ontena elümoto tüngkachia heto kyatacho. 3 "OPVÜI Israel Potsow, kvütoli heto lyuchechoto? Kvütoli Benjamin jipo ji Israel pvüji lona khi siwo tssovla?" 4 Nyazüngina kyon jiang na hojilo khümshümta than tona erungthan mpüm ejoma to pitacho. 5 Ontena heto engatacho, "Israel pvüji jiang yolo kvüi na jo Mizpah OPVÜI vanrhyu lo sanrhyutao jilo n jücho alo?" (Ochona Mizpah lo n woa sana jijo chüthoku to ontena mmyinga echümchaktacho licho) 6 Israel kyon jiangna onte jenioden Benjamin kyon jiang tsükona nungrata phyotacho, "Israel na nchüng jipo motsünga monthaka. 7 Benjamin eboe enhyoe vamo jiang tsükona etena eloe kvülo khitavla? Etena ete tsolo jiang ochia onte n pi to OPVÜI mhadungo na echümtathaka." 8 Ontena Israel jipo yolo ochinaha Mizpah lo sanrhyu jilo n woe vevana na to ethümtale Gilead lo Jabesh lona jo ochinaha n wocho yanchecho, 9 ntiotssole rasan omying tsatao jilo Jabesh kyon ochia njücho. 10 Hoji tsükona okho jina onte rasan lüm etsson wothüng taro eni wothuka heto ezocho, "Owo Jabesh lo evan topvü, eboe, eloe, osi ngaro jiang phata lüngthae sitava. 11 Eboe topvü lüngthae sia osi loroe jiangha eboe ntsithako jiango topvü lüngthae sia." 12 Jabesh kyon jiang yolo ontena loroe wothüng mezhü yanchecho, küma ontena hojiang sosi Kanaan meta Shiloh lo nchenki jilo yitacho. 13 Jisüi jo okho jina Rammon longpvü jilo vamo Benjamin kyon jiang thüngi ritsso esanle to yithen wothukcho. 14 Tole Benjamin kyon jiang yicho osi Israel jiangna loroe sosi oyi vao jiang onte picho. Tokhatola onte n jantacho. 15 OPVÜI na Israel okho ji chiroyio jina Israel jiangna Benjamin kyon jiang tsükona nungratacho. 16 Hoji tsükona okho esopvüi jiangna phyotacho, "Benjamin jipo lo loroe n vam sithaka. Etena onte eboe enhyoe vamo jiang tsükona engh kvülo khiyitavla? 17 Israel na ombo pvüji taro eni jilo motsünga tia monthukvü n li. Etena Benjamin pvüji ji motsü rümoni n sithukvü nzanchitav lia, 18 tokhatola ete ochona ete tsolov jiang onte thüngi vanthukana rhiyikae lia küma ete tsolov jiang ha onte n piche." 19 Jisüi jo ontena nchümcho, "Nzyuakvü OPVÜI myingona Shiloh lona tokhu tssotao ji nsungu yiv." (Shiloh jo Bethel khümkiwoe osi Lebanon jolowoe, os Bethel ha Shechem. oni yutalo olan jina engkhfüwoe.) 20 Ontena Benjamin kyon jiang ezocho, "Owo jününgroli mphoe 21 cheta vantava. Osi Shiloh loroe jiangna tokhu jilo sharita chiroana ntena jününgro li na chiyitava. Nte otsük akvüna loroe tsük-tsük rechoe sosi Benjamin metae yitava. 22 Onte pyae mekana opo jiangna lüm tsuka nte yana rona heto ezotava, 'Nzansi e thüngi onte vanthuka, onte ji ena ritssolona nte khelona rechoe e eloe tssothuka meka. Osi ntena e picho meküma ntena phyochak yesochoha meka.' " 23 Benjamin kyon jiangna hojito tssocho osi Shiloh lo sharitao jilo na onte otsük akvü na loroe tsük-tsük sosi onte metae yicho. Osi ontena onte metae oyi onte yantsü jiang tssochoe vantacho. 24 Israel ejoma jiang ha otsük akvüna ombo mbo jipo, wopan osi ejüeli yana yilancho. 25 Hojithüng jo Israel lo mesae n van. Otsük akvüna ombo mbo etancho vantacho.

Ruth 1

1 Elimelekh Tona Ombo Wopan To na Moab Lo Yiala 1 Nkolo Israel lo mesao n vanthüng, meta jilo otssi vara licho. Jithüng kyon tsüka Elimelekh, Ephrath pvüji kyon Bethlehem Juda lo evan jina ombo engh Noami tona otsoe Mahlon ha Chilion to oni sosi Moab lo esünga ro vanwo yitacho. Ontena jilo vantathüng, 3 Elimelekh chüi sisi Noami tona tsokhying eni totae enhyokacho. 4 Osi woniata na Moab loroe Orphah ha Ruth oni soa vancho. Nzyu taro harüma sülojo 5 Mahlon ha Chilion woniata chücho osi Noami jo orapvü osi tsokhying n vamvü ompvü tae kümi sicho.

Noami ha Ruth Onina Bethlehem lo Elani Yiala

6 Yuta tara sülojo OPVÜI na ombo kyon jiang joncho-rücho mmhayithaka to Noami na zocho; hoji tsükona ompvüna orüv jiang sosi Moab meta lona khochiv methakcho. 7 Ontena Juda lo yitav khochitacho, osi olani na 8 ompvüna oni ezocho, "Nte metae elani oyi nini oyo ndüngo vantava. Nini na a osi chüa yithako jiang thüngi mmhon ejüo ji esüa OPVÜI khi nini mmhayithokvü ka. 9 OPVÜI khi niniata yanpiothoklani oki küma nte yithoku ka." 10 Noami na pyonta salüm oni eyolo ntssüpicho, tole woniata na kyata phyotacho, "Meka ena ni phana nte kyon jiang thüngi yivka." 11 Noami na ezocho, "A tsolovden, nini na elani yichevka. Ninio ntioli athüngi nte yita hungala? Ana otsoe vanlani nini soa vanthuklam alo? 12 Ana esonlani yanpilanchev meka, oki elani yitava. Yanpilanchev ana eyilo lea osi nchüng zümo yanpi otsoe buklea 13 nini na erankümthoku nhyakta vam alo? Hoto tssole ninina thanpoe jo n yanpichev alo? Meka a tsolovden, hojito n tssocheka. OPVÜI na athüngi n mathav sithaka osi nini tsükona anungrala." 14 Tole onina kyatalancho. Tosi Orpah na ono ji pyonta salüm eyolo ntssüpisi kholani oki yicho, tokhatola Ruth jo ono n vachicho. 15 Noami na ompvü ezocho, "Ruth, niyenio jijo kholani okiwoe ompvü wopan osi ompvü potsow yana yithaka. Nina ha ompvü phana okiwoe yia." 16 Tole Ruth na ezocho, "Ni sisi eyiv a ti-zoa! Tolea ni phana arothuka. Nina kvüi yiana anaha ji phana yivka, osi nina kvülo vana sana anaha jilo vamuka. Ni kyon jo a kyon tssovka, osi ni Potsow jo a Potsow tssovka. 17 Nina kvülona chüa sana anaha jilona chüvka, osi anaha jilo ashothevka. Osi ana echü lona yaka thanpo lona ana ni sia tssona OPVÜI khi ezüp mmyinga apithuka." 18 Ruth na ompvü phana yinrüngu methaki lia to Noami na zechetale, ntia n phyov sicho. 19 Onina Bethelehem n janthüng jo n sanna yitacho. Osi onina oyi Bethlehem janale kyon topvüna emathatsüngi phyotacho, "Otsotso shijo Noami alo?" 20 Ompvüna onte ezocho, "Noami to a ti tsatava, Narah to atsatava, ntiotssole thotsü Potsow na a eküm ji ekhov kümthukthaka. 21 Ana shilona khochia thüngjo ejüeli elümoto licho tokhatola ana jina khoe yiale alo ntia n li. OPVÜI thotsü Potsow na khoe asia hetüv ezüp a pia tssona ntioli Noami to atsatala?" 22 Hojito Noami na ompvü orüv Moab loroe Ruth ji sosi yicho. Onina Bethlehem oyi janathüng jo liri yutalo tssocho.

Ruth 2

Ruth Na Boaz Li Elhi Tssoala

1 Noami na ompvü orapvü Elimelek wopan Boaz to tsa ejüeli osi okholo ephyo-esan tüv vancho. 2 Tsüngona lojo Ruth na Noami ezocho, "Ana oli owo liriden jiang mosü yamvüka. Ana longtsüla ochona sana jo ombo nzo elhi a tssothoku to." Tole Noami na ezocho, "Otsolov, nraoa." 3 Ruth na oli owo oyam ngoza sülami rümphia mosü jiang yancho. Tole hoji jo Boaz li tssocho. 4 N sungu Boaz na Bethlehemi na oli oro liri jiang salüm pia, "OPVÜI khi nte ndüngo vanthuku ka." to ezoa wocho. 5 Boaz na yinga esopvüi ji ezocho, "Loroe shijo ochola?" 6 Tole ombona janlancho, "Ompvüo metapoe eloe Moab lona Noami phana yio jika. 7 Ompvüna liri jiang sülami na mosü yanthuk to a engacho. Ompvüna enyathüng na elhi tssopvüto osi enhüngati khümchoe esanala." 8 Jisüijo Boaz na Ruth ezocho, "Ana tara lanso ni pivka. Litsük shilo yaka oli thanpoe ti-okhe, osi shilo eloe jiang nzo elhi tssokhe; 9 Ontena kvülo ria sana zeta vansi jilo owo mosü yana. Ni ti Jikarükale osi ni ti-jalale to ana eboe jiang ezothaka. Ni eratsünga na ontena yeni vao jüpvü jianglo na yukhe." 10 Ruth na ompvü mha ji likoe nkhümthei liko tssyukata Boaz ezocho, "Nino kvütoli a tsükona tata wongkhyuala? Nino kvütoli metapoe eloe thüngi hetata nzan ejüala?" 11 Boaz na ezocho, "Nirapvü chüpvüto nina nino thüngi ntio mmhom tssoa vancho sana ana yivon zoa vanpvüka. Nina kvütoli ni pvüpoe osi ni meta sisi nina n tsio kyon thüngi yicho sana ana ntsia. 12 Nina ntio tssocho sana ji tsükona OPVÜI khi ni mmhayithuka. Israel Potsow ocho nina yana oyi tsankacho sana ji khi benria ni yantsothuk ka!" 13 Ruth na janlancho, "Tsüphoeyo, nino elümoto nzan lia. Aiyo ni phajae tsüka esüa tae khatola nina oyi mmhom hetata enyipina ajana a emathathukala." 14 Etsoyu yutalo Boaz na Ruth ezocho, "Oyi hümri tsakae shilo jümthechi tsoa." Tole ompvüna lhitssoe jiang nzo khukthele Boaz na otsüng nghicho tara ompvü vachiyicho. Ompvüna etsson tsosi enhyolancho. 15-16 Ompvüna phan thi mosü yano khochithakle Boaz na yingae jiang ezocho, "Ompvüna khina tssukchüng jiang ndüngo lea khikathuka, ntia ompvü ti-zotava. Hoji ekalo tssukchüng lona tara tssüngche ompvü vayia khithuka." 17 Ruth na mmyu jana mosü yancho, osi ompvüna tsenrhyue zele seri taro bena yanchecho. 18 Ompvüna otssuk ji hansi oyani oyi ono ejücho. Tole ono na etsoyu enhyoe licho ompvü picho. 19 Noami na ompvü engacho, "Nino shijo kvülo owo yanrhyuchola? Ocho li owo yanchola? Ochona ni chokata ni nzancho sana Potsow khi ombo nzathuku ka!" Tole Ruth na kyon tsüka Boaz to tsao ji li owo khicho to Noami ezocho. 20 Noami na phyocho, "OPVÜI na Boaz nzanthoku ka. OPVÜI na ombo phyochak jiang echüi, eküm, topvü pono benthoku ka." Ompvüna phyolancho, "Kyon jijo ete wopan ndüng ka, ombona ete topvü e nijüpvü ka." 21 Tole Ruth na phyocho, "topvülo mmhontso jijo ombo liri jiang na n rirathüng jo mosü yanle to aezoa a yanthukcho." 22 Tole Noami na Ruth ezocho, "Hoka, a tsolov, ni ji Boaz li eloe jiang yolo elhi etssovo ji mmhontsowo tssovka. Nina thanpoe li ochojo oyam na ni jükarükata ni jalav mpato tssov." 23 Ruth na otssuk omüm eri yuta n yakrathüng jo onte nzo elhi tssocho. Osi ompvüna ono ndüngo vancho.

Ruth 3

Ruth Na Orapvü Yanchetala

1 Yuta tara sülo Noami na Ruth ezocho, "Nina ni ki yancheo tssoa ana orapvü ni yanivka. 2 Nina eloe nzo elhi tssoa vamo jiang OPVÜI Boaz jo ete wopan ndungka. Enga, nchüng mmyui ombona omüm tsena vamvüka. 3 Tsükae sisi mozhürhüm mmhom thesi ni pipo mmhontso ji ekata. Osi ombona oli tsena vamo jilo woa. Tokhatola ombona etsoyu n tsorathüng jo ni tihungthuka. 4 Ombona yipo ji cheta vansi ombo yipthe thakana yingto owo ombo sü ji shyukae ombo jowoe yipa. Tona kvüto lyuv sana ombona ni ezovka." 5 Ruth na phyocho, "Nina ntio a zoana topvü ana tssovka." 6 Ruth na litssenpheni owo ono na ezoji ephan tssocho. 7 Boaz na etsoyu tssothakale emathacho. Osi ombona omüm nshae lio jilo owo yipi sicho. Ruth na yingto owo osü ji shakae ombo jolo yipcho. 8 Tole zümolo ombona zaktole yipjüngchi ombo ndüngo eloe yipa vamo ji hungi emhukcho. 9 Ombona engacho, "Nino ochola?" Ruth na ezocho, "Aiyo Ruth ka tsüphoeyo, nino ete wopan tsso jina a ezev lia. Hoji tsükona nina a soa vana." 10 Ombona ezocho, "OPVÜI khi ni mmhayithoku ka. Nina nino thüngi tsso jilona kyongkata ete wopan ka to n vachina heto longtsüka lia vanala. Oyam sawo nina khyingroe yantsae lea, eli lea yana yithaku khatola nino hotüv mek. 11 Hoji tsükona oyan shilo kyon topvü na nino eloe mmhom to ni ntsia, küma ana ni phyocho bena ni soa vamvüka, ti wongkhyua. 12 Otsotso ka aiyo ete wopan ndungka, küma ni zenhyav lika, tolea a lona ndüngkao tüv wopan tsüka vanka. 13 Nchüng zümo jo to shilo yipchoa, osi wonchia na ombona ni zezevsana owo engae zetavka. Ombona ni tsakana jiha mmhona; osi ombona ni n ze to phyona ana Eküm Potsow myingona ni ezoala, ana ni tsakav ka. Nchüng zümo jo shilo to yipchoa." 14 Ompvüna jilo yipchocho khatola Boaz na hoji ochia n tsithukhungo jina ompvüna nyazüngina phanthi yicho. 15 Boaz na ompvü ezocho, "Ni sü ji sachia" Tosi Boaz na omüm seri mekyu bena chütheyicho osi ompvü mankvüi ejümkachiyia yithukcho. Tole ompvüna hoji hansi yantsüi yicho. 16 Ompvüna oki janale ono na engacho, "Otsolov, nino kvüto dungo-oa yichola?" Tole Boaz na ompvü nzamo jiang topvü Ruth na ono rüa ezocho. 17 Ompvüna ezocho, "Ombona a ji khejüng ni thüngi n yithuk to phyoa omüm shi apicho." 18 Noami na ompvü ezocho, "Yingto erüm toa vana, nchüng Boaz na phyo yi jiang n methakrav jo jüngtheta vamvü meka."

Ruth 4

Boaz na Ruth Soa Vanala

1 Boaz na yantsü kipüngo sanrhyu ki jilo owo khukthei vancho. Tole Elimelek, Boaz na ephyo wopan ndüng ji rocho osi Boaz na ezocho, "Oshom, oro shilo khuktheta." Jitsükona ombona oro khuthecho. 2 Boaz na yantsü jilo esopvüi yolo otsük taro tsaphae khukthethukcho. Ontena khuktherathakale, 3 ombona ombo wopan ji ezocho, "Noami ha Moab metae na yithaka, osi ompvü na ete wopan Elimelek liji yenhungala, 4 osi ana nchümala ntena hoji ntsiv tssov. Nina ni shihungna oshom shiang mhadungona phyoa. Osi ni n chokana jiha phyoa, ntiotssole hoji eshiv elan ji ni jandenala, os jisüloto a janala." Kyon jina phyocho, "Ana shivka." 5 Boaz na ezocho, "Tona elüm mmhonka, tolea nina oli ji Noami thüngina shia tssona Moab eloe emi Ruth ha shinhyavka, ntiotssole oli ji echüo ji wopan khelo linrhüa yiv shikhfü." 6 Kyon jina janlancho, "Hojito tssona ana jo oli ji n shii. Osi to tssona a tsoeoro jiang naha oli ji n khi. Ana jo n shiala, küma nina shia." 7 Hoji tsüngon jilo jo tsütsaelan eyen osi oman etsüngta yutalo jo opvüo jina ombo jokhüp ji phungche eshipvüo ji epiv tüv shikhfü licho. Hojijo Israel jiangna oyi ji methakphen chethev jito tssotacho. 8 Hoji tsükona kyon jina Boaz ji, "Nina shia." to ezo jithüng ombo jokhüp ji phungi Boaz picho. 9 Tole Boaz na esopvüi jiang tona jilo evan topvü to ezocho, "Ana nchüng Noami thüngina Elimelek tona ombo tsoe Chilion tona Mahlon to oni ejüeli jiang topvü shithaka to enhugpvüi ji nteka. 10 Hoji ephalo, Mahlon emi Moab eloe Ruth ji a eloe kümala. Hojitoluyi echüo ji ejüeli ji ombo wopan lo lilana wovka. Osi ombo wopan jiang ji ombo kyon osi ombo yantsü jianglo vana wovka. Nte topvüna nchüng ehungpvüi tssoala." 11 esopvüiden osi thanpoe jiangna phyotacho, "Hoka, eiyo ehungpvüiden ka. OPVÜI khi ni engh ji Rachel ha Leah onina Jakob tsoe khosha vanio ji esüa tssothuka. Ni ji Ephrath pvüji yolo osi Bethlehem lo thüngche ni kümthokuka. 12 OPVÜI na loroe ni pio shi yakchia otsoeoro buki Juda ha Tamar oni tsoe Perez wopan esüa kümthoka."

Boaz Tona Ombo Tsoronichen To

13 Boaz na Ruth ji ombo engh tssoa oki sosi yicho. OPVÜI na ompvü mmhayicho osi omppvü na ngaro hani otsoe bukcho. 14 Eloe jiangna Noami ezocho, "OPVÜI thünga, ombona ni ezepvüi orüo ni pithaka. Tsokhying shi Israel lo thüngche kümthukvüka! 15 Nirüv shina ni nzanala osi ompvüna tsokhying tiying lona kyungkata ni mmhonithukthaka. OPVÜI na ni esonlani nirüo bukthuki ni nijüpa eküm ethan ni piala."16 Noami na ngaro ji tsakae, khayae, ombo nijüpcho. 17 Yankho jilo eloeden jiangna tsokhying ji Obed to tsatacho. Ontena otsük akvü ezotacho, "Noami tsükona tsokhying bukthaka!" Obed lona Jesse bukcho osi Jesse lona David bukcho. 18-22 Perez lona David nandang bochung ji heto tssochoPerez, Hezron, Ram, Amminaddab, Nahshon, Salmon, Boaz, Obed, Jesse tona David to.

1 Samuel 1

Shiloh Lo Elkanah Tona Ombo Wopan To

1 Ephraim jipo lo Elkanah to tsa tsüka vancho, osi ombo Ephraim phunglan metae Ramah yantsü lo vancho. Ombo Elihu tsoe Jeroham ji tsoe, osi Zuph pvüji lo Tohu wopan lona tssocho. 2 Elkanah na engh otsük eni, Hannah ha Peninnah oni vancho. Peninnah jo otsoe vancho, khatola Hannah jo otsoe n van. 3 Shiloh lo Thotsü Potsow khümphen jilo Eli tsoe Hophni ha Pinehas onina OPVÜI pvüti tssota vamo jilo Elkanah na nzyu akvüto Ramah lona khochi OPVÜI khümo wocho. 4 Elkanah na kvüta OPVÜI thanasana ji akvüto echia jo Peninnah pi, echia jo ompvü ngaro jiang pi to tssocho. 5 Elkanah na Hannah elümoto nzana khatola OPVÜI na otsoeoro ompvü n pio jina Elkanah na othan jilo echi motsünga tae ompvü picho. 6 Hannah jo OPVÜI na otsoeoro ompvü n vanthuko jina ompvü ri Peninnah na ompvü yikvüa ompvü khangshicho. 7 Hojito nzyu sunga tssoa vancho, osi ontena OPVÜI khümo kvüta ota na Peninnah na Hannah emakao jina Hannah jo lüm n tssov etsoyu tia n tssov kya tae wocho. 8 Tole orapvüna heto engacho, "Hannah, nino ntioli kyala, osi ntioli etsoyu n tssoala? Nino ntioli yuta topvülo ni nungrala? Otsoe otsük taro thüngina jo ana ni nzamo mekcho ke?"

Hannah ha Eli Oni

9-10 Tsüngona lo Shiloh lo OPVÜI kina ontena etsoyu tssotacho sülo Hannah na phanthicho. Ompvü ji elümoto nungrao jina elümoto kya OPVÜI thüngi randan cho. Hojithüng ji pvüti Eli na kipüngo ombo vanphen jilo khothei vancho. 11 Hojithüng Hannah na phyochak tsüphov OPVÜI thüngi heto phyochakcho: 'Thotsü Potsow, ni nripvüi athüngi zechia! A nungra shi a zesi a nchümcheta! A ti mhechoa. Nina tsokhying tsüka apina ana omboji ni elhilo khochaki pivka osi ombo tssanji kvüthüngha tssüyiv meka." 12 Hannah na OPVÜI thüngi sunga randancho osi Eli na ompvü menfü jiang zeyia vancho. 13 Ompvüna menfü tae jelüpa owon n tssona randana vancho. 14 Tole Eli na hoji hungi soko na kino cho tsayia ezocho, "Ni kino zhüva etsophyo ji esana! Kino kiri lona esani chüngtsoe vana!" 15 Ompvüna ezocho, "Meka tsüphoeyo, a kinocho meka. Aiyo soko yua vancho meka! Aiyo elümoto nungra hansi a nungra jiang OPVÜI thüngi ezoaka. 16 Aiyo ethelen n li eloe to a tinchümia, a sükhying ji enungrathav etsso jina heto randana vanpvüka." 17 Tole Eli na ezocho, "Noyingroa oki yia," "osi nina ombo thüngi chomo ji Israel Potsow khi ni pithoku ka." 18 Ompvüna ezocho, "Ni khi yuta topvülo a nzana nchümchethoku ka." Tosi Hannah na oki yicho, osi ompvüna etsoyu tara tsosi nungra ji esani sicho.

Samuel Buki Khochako Ji

19 Ojyua enyathüng to jo Elkanah wopan na phanthi opvüi khümtasi Ramah lo oki yitacho. Elkannah na ombo engh Hannah thüngi ponilan tssocho osi OPVÜI na ompvü randan engayicho. 20 Hojitoli ompvüna ngaro hani tsokhying bukcho. Ompvüna otsoe ji Samuel to tsacho osi hoji yichak jo, "Ana OPVÜI thüngi choncho" to ompvüna phyocho. 21 Elani Elkanah wopan na nzyu akvü ekhüm osi ombona phyochako than jiang pilo Shiloh lo wotacho. 22 Tokhatola hojithüng jo Hannah na n wocho osi orapvü ji heto ezocho, "Ngaro shi khakpvü to ana ombo sosi owo OPVÜI ki eküm echung ombo vanthoku ka." 23 Elkanah na ezocho, "Toka nina zesi elamo ji tssoa; tolea ekhak n düngthüng jo okina vana. Osi OPVÜI khi ni randan ni bencheyithoku ka." Hoji tsükona Hannah na oki vani ngaro ji nijüpcho. 24 Ompvüna ngrao ji khakthakale sosi mangsübung nzyu ethüm tso motsünga, ohüm chencho seri taro tona zükhi sofü sükvü motsünga to hansi Shiloh lo wocho. Hojito ompvüna Samuel ji hgarothüng na Shiloh lo OPVÜI ki sosi wocho. 25 Ontena mangsü ji tatsüngthakale Samuel ji sosi Eli thüngi wotacho. 26 Hannah na ombo ezocho, 'Tsüphoe yo, nina a chechethe la? Aiyo shilo mangi OPVÜI thüngi randana nina a hungwo eloe jika. 27 Ana ngaro shi OPVÜI thüngi choncho osi ana chomo ji ombona a picho. 28 Hoji tsükona ana ombo ji OPVÜI lo khochaki piala. Ombo eküm evanthüng nandang jo ombo OPVÜI echi tssovka." Tosi ontena hoji lona OPVÜI khümtacho.

1 Samuel 2

Hannah Randan

1 Hannah na randancho: "OPVÜI na longshi khi a lüm pyingithukthaka; Ombona a tsükona tsso ji khi kvütata a emathacho ato! Ana a ri jiang emakav; Potsow na anzanthako jina ayio kvüta a emathacho ato! 2 "Ochia OPVÜI esüa nthoe n van; ochia ombo esüa n van. Ete Potsow esüa e n kohoe n van. 3 Nte kangtsü jiang esantava; ote kangtsü yi jiang jükrüptava. Ntiotssole OPVÜI jo ntsikhamo Potsow ji, osi kyon na tsso jiang topvü ombona ejyui zeyiala. 4 Thokhyung rasan jiang lotssi jiango jakthaka, tolea etho n liv vamo jiango etho piala. 5 Ochoang na mmhia tsoa vancho sana jiango enhungo mman mmyotsoa yithaka; tokhatola wondona vamo jiango mmhithuk thaka. Otsoe n lio eloe jina otsük tiying bukthaka. Tokhatola ngaro khoshao oyo jijo enhungo ochia n vam sithaka. 6 OPVÜI na chüthukala osi kümthukala; ombona kyon jiang echüli rheyithukala, osi sochelanala. 7 Ombona ochoang sanao yantsathukala osi ochoang najo elii kümthukala. Ombona ochoangnao terithuk, ochoangnao tsüphothuk to tssoala. 8 Ombona yantsae jiang ji ochon lona sükatala osi ethelan lia yana vamo jiang ji onte nungra lona sükatala. Ochona mesatso yolo onte rhowothukala osi myingthüng vanphen lo onte thechiala. Limha shi tssokaphen jiango OPVÜI echi; Ombona jiang poni limha shi tssokacho. 9 "Ombona ombo longtsükao jiang eküm ntangnshoniala, tokhatola n thae jiango emüngina moni siala; kyon na ombo etho lona ekhyo hunga mek. 10 OPVÜI ri jiango monthokvü; Ombona potsüwoe na tharaki onte monthukala. OPVÜI na limhatsü oyi tssoyiv; Ombona ombo mesao ji etho piv, ombona ethüngcheo mesao ji ombona ekhyo piv." 11 Jisülo jo Elkanah na Ramah lo omboti oki yicho; tokhatola Samuel jo Eli pvüti ndüngo Shiloh lo OPVÜI elhi tssoa vancho.

Eli Tsokhying Jiang

12 Eli tsoe jiango n thae osi ethelan nliden tssocho. Ontena OPVÜI loha lüm n the; 13 mekana pvüti na kyon jiang thüngina echom lio shikhfü jiang loha lüm n the to tssocho. Jithüngina jo, ochona sana erungthan pina pvüti ji phajae jina ekyukphen eshüm bensi rocho; osi oso ji ekvüa vanathüng na, 14 ombona ekhyuphen ji sohanphfü jilo ekhyuthechi jina ntio sücheta sana ji pvüti ji ejan tssoa khicho. Israel kvüta na Shiloh lo othan pilo roasana jiang topvü thüngi hojito tssoyicho. 15 Hoji ephalo othan jiang lona ethyu jiang tia n shakchothüng na pvüti phajae jina oro heto ezocho, "Pvüti jina ri etsov oso tara a pia; ekvücho jo ombona n khiala, pvüti jina soshu chonala." 16 Hojithüng kyon jina heto ezona, "Shikhfü ephan ethyu ji rungtademka, hoji süloti nina ethev elio jiang khia," tona pvüti phajae jina phyocho, "Meka! Enhünga apia! Nina a n pina, ana a etancho khivka." 17 Eli tsoe jiang na heto mmen tsso jijo OPVÜI mhadungo emhokthav n lan; ntiotssole ontena OPVÜI than jiang n yikrachicho.

Shiloh lo Samuel

18 Hojithüng jo eboeroro Samuel jo nthosü phungthesi OPVÜI benkata vanpvü tssocho. 19 Nzyu akvü oyona orapvü phana nzyua than ji pilo woana osü ethan ombo hanicho. 20 Hojithüng Eli na Elkanah ha ombo engh oni mmhayithuka heto Elkanah ezocho, "OPVÜI na eloe shi yakchia otsoe thanpo ha ni mmhaithoki ntena khochaki pithako shi echungcho thoku ka." Tothakale ontena oki yitacho. 21 Otsotso OPVÜI na Hannah mmhayithukcho, osi ompvüna tsokhying ethüm, tsolo otsük eni to vanlancho. Osi Samuel ji OPVÜI elhi lona khyocheranküma yicho.

Eli Tona Ombo Tsoe Jiang To

22 Eli jo elümoto sonthakcho. Osi ombo tsoe jiangna Israel kyon jiang thüngi etssophyowo jiang topvü ombona zoa vancho. Ombo tsoe jiang na OPVÜI vanrhyu ranki kipüngo elhi etssoe eloe jiang thüngi mpatao yiptala to ombona yivon zocho. 23 Hoji tsükona ombona onte zocho, "Nteno ntioli heto elhitala? Ntena mmen elhi tsso jiang otsük akvüna a ezotala. 24Esantava a tsoeden! OPVÜI kyon shiang na phyota vamo shiango ekhenthao motsü! 25 Kyon na kyon thüngi mmen tssona Potsow na ombo nkocheo ha lia; tokhatola OPVÜI thüngi mmen tsso jiango ochona nkochevla?" Tokhatola ontena opo na ezo jiang nngatacho, ntiotssole OPVÜI na onte chüthoku methakthakcho. 26 Jithüng ji eboeroro Samuel ji rankata yicho osi kyon tona Potsow to na chokata kümcho.

Eli Wopan Pono Potsow zenkhying yi

27 OPVÜI thüngina yithen heto hansi Eli thüngi zenkhying tsüka rocho, "Nte motsüi Aaron tona ombo wopan to na Ejip mesao küpo ezii tssota vanathüng, ana a bobo Aaron hungthukcho. 28 Israel jipo topvü yolo na ombo wopan ethüngchei a pvüti tssothuka, thanphen lo zathuka, tssütsserhüm runga, ntho sü ekasi athüngi thyudathuka rocho. Osi ana onte ejan ha thanpheni na rungo jilona khichei onte ejan lithukcho. 29 Tona nino, kvütoli kyon na athüngi othan epiv elio ji pio jiang ji epiera zetala? Eli, nino ni tsoe jiang ji othan jianglo mmhontso jiang lo khiche onte bobo tsotsüngi vanthuksi nina athüngina jo onte ekyongo yikrachiala? 30 OPVÜI Israel Potsow A shina ovüngthüng na phyoe lia, ni osi ni wopan na yuta topvü lo a pvüti tssoa abenkata wov ka to. Tokhatola enhungo hojito tssov meka to ana phyochakala! Jithüngona jo ochoangna a yikrachia sana ana jiang yikrachivka, osi ochoangna a khaki siana ana onte tssaku ka. 31 Enga, ana ni wopan osi nipvüji yolo khyingroe jiang topvü chüthoko tsüngon livka, osi ni wopan lo eboetso ochia eson jana vam meka. 32 Nina emhoknungra nduku ka, osi ana Israel jipo thanpoe jiang mmhayithoko jiang ji omhyik rakia zev, osi ni wopan yolo ochinaha eson jana harishia vanlam meka. 33 Tokhatola ana ni tsoeoro yolo tsüka enhyokathuki pvüti tssoa a benkathoku ka. Tokhtaola omboha omhyik juki eyilo n liv siv, osi ni tsoronichen thanpoe jiangha echü ntav lona chüravka. 34 Ni tsoe onjeni, Hophni ha Phinehas woniata enga na chüa na jijo, ana phyo jiang topvü benchetala to chekaphen ji tssovka. 35 Ana alo longtsükao tüv osi ana ntio a tssothuk hunga sana jiang topvü etsso tüv pvüti tsüka ethüngchevka. Ana tsoerüi ombo piv osi ana ethüngcheo mesao ji vanhya lo benkae elhi tssothoku ka. 36 Ni tsoronichen ochoang enhyokae vana sana jiang na pvüti ji thüngi orang osi etsoyu chomka, osi pvüti ji phajae tssoe eküm süphiv chomka."

1 Samuel 3

OPVÜI na Samuel Ndukala

1 Yuta jilo eboeroro Samuel na Eli küpo elhi tssoa vanathüng jo OPVÜI yithen hanphi matarocho osi OPVÜI thüngi na hungthuk ji elümoto matarocho. 2 Zümo motsünga lo, omhyik na n hungu sithako eson Eli na ombo yipheni yipa vancho, 3 osi Samuel jo Ntho Ntsata thephen lio jilo yipa vancho. Enyathüng, n wonchithüng, milon ji n mhethüng, 4 OPVÜI na Samuel tsacho. Tole ombona, "Hao tsüphoe yo," to yicho si, 5 Eli thüngi owo, "Nina a tsacho alo, aiyo shilo vanka" to ezocho. Tole Eli na ezocho, "Ana ni n tsaka oyi yipa vana" Tole Samuel na oyi yiplancho. 67 OPVÜI na Samuel tsalancho, tolea OPVÜI na echunga tia ombo n tsahamo jina ombo tsala to n tsicho. Hoji tsükona ombona phanthi Eli thüngi owo, "Nina a tsao ji aiyo helo vanka" to ezocho. Tole Eli na janlancho, "A tsoeyo, ana ni n tsaka, oyi yipa vana." 8 OPVÜI na yenjo ethümoto Samuel tsalancho. Tole ombona phanthi Eli thüngi owo, "Hao, nina atsoa ji shilo vanka" to ezocho. Jisüi jo OPVÜI na Samuel tsala to Eli na nchümchecho, 9 hoji tsükona ombona ezolancho, "Oyi yipa vana osi ni tsalana tssona, 'OPVÜI, ni phajae na enga vanaka jana' " to ezoa. Jisüi jo Samuel na yipa yilancho. 10 Jisüi jo OPVÜI na joro hojilo mangi ovüngthüng esüa, "Samuel! Samuel! to tsalancho" Tole Samuel na, "Ni phajae na enga vanka, jana" to ezocho. 11 OPVÜI na phyocho, "Tsüngona lojo ana Israel pvüji tsükona ntiosana tssoyiv osi hoji jo ekhenthao tssov osi hoji motsü ji ezoe topvü ngangchev. 12 Hoji tsüngono jo ana Eli wopan pono ekyuv jiang benkadeni na ochüm jana rothoku ka. 13 Ana ombo wopan ji nchünkhon tsükona ezüp piv sala to ezothaka, ntiotssole ombo tsoe jiang na athüngi n mhom phyothaka. Ontena hojito tssota vamo jiang Eli na ntsia ha ombona ntia onte n tangcho. 14 Hoji tsükona ana Eli wopan thüngi khünga phyochakala, nti than naha ekhenthao mmen shi man ji khi sichev meka." 15 Samuel na enyathüng jana yipa vansi phanthi OPVÜI ki kipüng ji chonchi cho. Osi ombona OPVÜI yithen ezowo ji Eli ezov kyucho. 16 Tole Eli na "A nungori Samuel" to ombo tsacho. Tole Samuel na "Hao, tsüphoe yo" to yichocho. 17 Eli na engacho, "OPVÜI na ntio ni ezochola? Ntia ati mphokhe, nina a mphocho jo OPVÜI na ni ezüpthuku ka." 18 Tole samuel na topvü ombo ezoracho, osi ntia n valanchicho. Tole Eli na phyocho, "Ombo OPVÜI, hoji tsükona ombona ombo tsükona ntio mmhontso to zecheta sana ji ephan ombo na tssovka." 19 Sam uel ji rankata yiale OPVÜI na ombolo vanrhücho osi ombona phyo jiang topvü benchethukcho. 20 Hojito Israel meta ochümi na ochüma janae na Samuel jo OPVÜI yiphyoe ji to chekacho. 21 OPVÜI na Samuel thüngi ombobo ejüthako ji esüa Shiloh loha ombombo hungthuka vanrhyucho. Osi Samuel na oyi nsana na, Israel topvü na engayicho.

1 Samuel 4

Ntsata Bakos Ji Phanchoyio Ji

1 Yuta jilo Philistine jiang na Israel thüngi ori tssov tsükona sanrhyutacho, hoji tsükona Israel jiang naha ori tssov tsükona khochicho. Israel jiang na Ebenezer lo nchen, nna Philistine jiango Aphek lo nchen to tssocho. 2 Philistine jiang na sakae elümoto rotasi ontena Israel jiang wothüng mezhü harüma ritssopheni na chüthokcho. 3 Israel enhyo jiang na nchenpheni kholani yile Israel esopvüi jiang na phyocho, "Nchüngo ntioli OPVÜI na Philistine jiang khi e khyothukcho ato? Etena Shiloh lo OPVÜI Ntsata Bakos ji khi hansi oyi ete ndüngo vasi hoji khi ete ri jiang khelona eshanchothoku ka." 4 Hojito ontena Shiloh lo yithenpvüi wothuka OPVÜI Ntsata Bakos ji, OPVÜI Thotsü ji Vantsü thungtssophen ji hana yithukcho. Osi Eli tsoe otsük eni, Hophni ha Pinehas onina phana wocho. 5 Ntsata Bakos ji hana yiale, Israel jiang na ematha lona emhokthav erontao jina liko mpato enhyokcho. 6 Hoji nshanlongta ji Philistine jiang na zoe phyotacho, "Hebre shiang nchenpheni nshanlongtao shi engatva! Hoji jo ntio etsso la?" Kvüthüng Ntsata Bakos ji Israel jiang vanpheni hansi yithaka to ontena 7 ntsicho sana ontena kyua phyotacho, "Onte nchenpheni Potsow rothaka! Ete ji e n benthaka! Ovüngthüng jo hetüv kvüthüngha ete thüngi n tssohan! 8 Ochona Thotsü Potsow jiang khe lona e shanchov la? Potsow shina lijüngi na Ejip kyon jiang lüngtharüpcho! 9 Philistine kyonden, lüm tssontava, osi eboe tssoe sakatava, to mekana etena onte ji ete ezii tssothuko ji esüa, etena Hebrew jiang ezii tssochevka. Hoji tsükona eboe esüa sakatava!" 10 Philistine jiang na etho theta rotae Isarael jiang khyocho osi Israel jiang na oki tsanta yicho. Hoji lona emhokthav chücho, Israel rasan wothüng thümro lüngthacho. 11 Osi Hebrew jiang Ntsata Bakos ji rechocho osi Eli tsoe Hophni ha Pinehas oniha lüngthacho.

Eli Chüo Ji

12 Benjamin pvüji kyon tsüka na ritssopheni na yongnrhüi hoji nchuk na oyi Shiloh jancho. Ombo nungra ji ejüv tsükona ombona osü jiang reroe sisi kvüri ochon shake hancho. 13 Eli jo OPVÜI Ntsata Bakos ji tsükona elümoto wongkhyua lantssae khukthephen jilo khukthei zechia vancho. Kyon jina yithen ji yantsü pyinga yithukcho osi otsük akvüna ekyu lona kyasochicho. 14 Eli na owon ji zoe engacho, "Shijo ntio won tssotala?" Tole kyon jina Eli thüngi zakto owo yithen ji ezocho. 15 (Jithüng jo Eli jo nzyu ekha tokusi tiza tssothakcho osi omhyik ha jukthakcho.) 16 Kyon jina phyocho, "Aiyo ritssopheni na tsan choe nchüngti yunga shilo yicho." Eli na ezocho, "Ntio tssochola a tsoe yo?" 17 Yithenpvüi jina ezocho, "Israel na Philistine jiang mhadungo tsanthaka, ekhenthao ekhyothaka! Hoji ekalo nitsoe Hophni ha Pinehas oniha lüngthacho osi Potsow Ntsata Bakos jiha rechoe khithaka!" 18 Kyon jina Ntsata Bakos ji motsü ji phyoa Eli na zoale ombona kipüng ndüngo lantssae khukthei vamo jilona sülamoe erithecho. Omboji elümoto beleta sonthako jina hoto ombo erithetathüng evüng jaki chüi sicho. Ombo Israel lo esopvüi nzyu zhüro tssothakcho.

Pinehas Emi Ji Chüo Ji

19 Pinehas eloe, Eli orüv jijo hojithüng ji ngaro hansi vancho osi ngaro ji evamu yuta janthakcho. Potsow Ntsata Bakos recho ji tona omo chüo ji osi orapvü chüo ji to jiang ompvüna zoale jitopvü ngaro evam eno benkae ngaro ji bukcho. 20 Osi ompvü chüa vamo jithüng ompvü nzanchia vamo eloe jina ezocho, "Lüm tssonkhe! Tsokhying bukthaka!" Tokhatola ompvüna hoji ntsayiv n janlancho. 21 Eloe jina tsokhying ji Tchabod" to tsayicho, ji yichak jo Potsow pfütsson na Israel sithaka" to. Hoji jo Potsow Ntsata thephen recho ji, omo chüo ji osi orapvü chüo ji tolo rakae tsacho. 22 Ompvüna phyocho, "Potsow pfütsson na Israel sithaka, ntiotssole Potsow Ntsata Bakos ji rechothaka!"

1 Samuel 5

Philistine Jiang Yolo Ntsata Bakos Ji

1 Philistine jiang na Ntsata Bakos ji rechoe Ebenezer lona onte yantsü Ashdad lo hansi oyi 2 onte Potsow Dagon khümpheni hansi owo Dagon kisü ji ndüngo vatacho. 3 Ojyuato nyazüngi jo Ashdad kyon jiang na Dagon kisü ji OPVÜI Ntsata Bakos ji mhadungoe nkhümo evümthei lia hungcho. Hoji tsükona ontena hoji khyokae vaphen jilo valancho. 4 Tole hoji ojyuato enyathüng ha kisü ji OPVÜI Ntsata Bakos ji mhadungo vanthei lia hunglancho. Hojithüng jo kisü ji kvüri ji tona okhe eni ji tojo jakchoe kipüng ndüngo licho, osi otsük jitae licho. 5 Hoji tsükona nchüng jana Dagon ekhüm jiang na hoji lo n hyekana nkyaka rhowo khümtala. 6 OPVÜI na Ashdod kyon jiang elümoto khangshia ekhenrhükthukcho. Ombona Ashdod kyon jiang tona hoji nkonjano evan jiang topvü to vela na jentsüngthukcho. 7 Ontena hoji ezüp ji hungale phyotacho, "Israel Potsow jina ete tona ete potsow Dagon to e khangriala. Etena Ntsata Bakos ji shilo n vatache." 8 Hoji tsükona ontena yithenpvüi wothuka Philistine mesao otsük mongo jiang tsae engacho, "Etena Israel Potsow ji Ntsata Bakos ji kvüto lyutavla?" Tole ontena ezocho, "Gath lo hansi yitava." Hoji tsükona ontena Philistine yantsü thanpo Gath jilo hansi yitacho. 9 Tole hoji vao ji yakchia jilo evamo kyon jiangha OPVÜI na elümoto ekhenthukcho. OPVÜI na hojilo evamo kyon jiang ji ngaro eran topvü bümtsüngthukcho. 10 Toajo ontena Ntsata Bakos ji Philistine yantsü thanpo Ekron to tsao jilo hansi yitacho. Tole hoji hansi oyi yantsü ji janpvüto jilo kyon jiangna phyotacho, "Echükhanthoku ji Israel Potsow Ntsata Bakos ji hepi hantasi yithaka!" 11 Tole elani ontena Philistine mesao jiang tsae egatacho, "Israel Potsow Ntsata Bakos ji ombo tathi vanpheni yithuka, to mekana wopan tona echükham ka." Potsow na elümoto onte khangshia vamo jina yantsü mpüm ekhentsüngcho. 12 N chüo jiang jo vela osi ebüm khyingi ezüpta onte potsow thüngi nzanchile to randantacho.

1 Samuel 6

Ntsata Bakos Ji Hansi Yilamo Ji

1 OPVÜI Ntsata Bakos ji Philistia lo choro tiying vasi sülo, 2 kyon jiangna pvüti jiang tona ozen ntsii jiang to tsarhyue ezocho, "OPVÜI Ntsata Bakso ji etena kvüto lyutavla? Etena ombo tathi vanpheni yithuka tssona hoji nzo ntio theyia yithokvü la?" 3 Tole ontena janlancho, "Ntena Israel Potsow Ntsata Bakos ji yithuka tssona ete mmen esiyithuko tssoa ntiosana yantso theta yithoku lia. Ntsata thephen ji yantso n jüv n yiche. To tssona nte emiyivka osi ntio tsükona ombona n tümjaku nte khangshicho sana ji engathevka." 4 Tole kyon jiangna, "Etena ntio yantso theyitavla?" to engatacho. Tole ontena ezocho, "Shona mpüm vela esüa tüv mongo tona zhütsünaro kisü shona na nsüngrücho mongo to thetava. Hojiang akvüto ji Philistine mesao tsüka thung tssoa pitava. Hojitüv ezüp jina nte otsük akvü tona mesao mongo jiang to thüngi yicho. 5 Vela tona zütsünaro to na meta shi roa vamo jina ntena hojiang kisü nsüngrüi Israel Potsow yikrachitava. To tssona Potsow na, nte tona nte potsow jiang to ezüp thuka vamo ji esanthoku mpato tssov. 6 Nteno ntioli Ejip kyonden osi onte mesao jiang esüa lümbüm khüngta vantala? Israel na Ejip meta lona n khochukthüng nandang Potsow na onte ejitheehio ji ti mhechotava. 7 Hojitsükona zotoro ethan shantava osi mangsü eni zotoro n suhan tüv methak-tava. Mangsü eni ji zotoro jilo shenkae mangsüro jiang ranki phana yia. 8 OPVÜI Ntsata Bakos ji zotoro jilo thesi hoji tssae ntena shona kisü nsüngrüo jiang thei OPVÜI thüngi nte mmen man yantso hanthuka. Zotoro ji khochithuka osi olani jo ombobo yithuka. 9 Tona zotoro jina ombobo Beth Shemesh yantsüwoe yina ji yichak jo vara shiang ji Israel Potsow na yithukcho to chethevka. Tokhatola zotoro jina jiwoe n yia tssona ji yichak jo vara shiangji Potsow na mek, ombo eyi yicho to chekae khitava." 10 Onte ezoji ephan ontena mangsü eni khi zotoro jilo shenkae onte ro jiango ranki shenkae vacho. 11 Ontena Ntsata thephen ji zotoro jilo thesi ji tssae vela tona zütsünaro to kisü jiang thecho. 12 Tole mangsü jiang na Beth Shemesh lamoe saksak khochicho. Mangsü jiangna nrunga khochitacho osi Philistine mesao otsük mongo jiang naha hoji phana Beth Shemesh erü jana wotacho. 13 Beth Shemesh kyon jiango oli rita vancho, osi ontena zakto zechitale Ntsata thephen ji hungcho. Toajo elümoto onte emathacho. 14 Zotoro jina Joshua to tsa Beth Shemesh yamo ji li longpvü motsünga ndüngo oyi esancho. Kyon jiang na otssüng zotoro ji tssiroe, mangsü jiang lüngthae OPVÜI thüngi erungthan pitacho. 15 Levi jiang na OPVÜI Ntsata Bakos ji tona shona kisü jiang to tsakae longpvü ji poni ekachicho. Jisülo jo Beth Shemesh kyon jiangna erungthan tona thanpo than to OPVÜI pitacho. 16 Philistine mesao otsük mongo jiangna shiang zeta vansi hoji nchuk na Ekron lo yitacho. 17 Philistine jiang na shona vela kisü mongo ji onte mmen than tssoa thantacho, yantsü mongo ji nkhen motsüngtsüngAshdod, Asheklon, Gath, Gaza, tona Ekron to. 18 Ontena shona zütsünaro kisü jiangha Philistine mesae otsük mongo na sawo yantsü pikhfü lio jiang osi pikhfü n lio jiang to thung pitacho. Hojito tsso ji chethephen jo Joshua li longpvü tsüphov ji enhünga lea lia. 19 Beth Shemesh kyon ochoang na Ntsata thephen ji zecho sana jiangji OPVÜI na otsük ekha tiying lüngthacho. OPVÜI na onte yolo hojito chüthoko jina kyon jiangna nugra kyatacho.

Keriath Jearim lo Ntsata Thephen ji

20 Jitsükona Beth Shemesh kyon jiang na phyotacho, "Ochona ntho Potsow mhadungo phanthikhokvü la? Etena ombo nkachotav tsükona kvülo ombo yithuk tavla?" 2i Ontena Kiriath Jearim kyon jiang thüngi heto ezolo yithenpvüi wothukcho, "Philistine jiangna OPVÜI Ntsata Bakos ji epilanthaka. Hoji tsükona joro khitava."

1 Samuel 7

1 Kiriath Jearim kyon jiangna OPVÜI Ntsata Bakos ji owo khi yondoni vamo Abinadab to tsao ji ki owo vatacho. Osi ontena ombo tsoe Eleazar ji hoji ezei tssov nthochaki vanthukcho.

Samuel na Israel lo Esapvüi Tssoala

2 OPVÜI Ntsata thephen ji Kiriath Jearim lo sunga nzyu mekyu vacho. Yuta shilo Israel topvüna OPVÜI thüngi nzan chona kyatacho. 3 Samuel na kyon jiang ezocho, "Ntena nte lümbüm totona OPVÜI lo khophi yia tssona, ntena jipopoe potsow jiang topvü tona eloe potsow Astarte kisü to jiang vachi sitava. Osi nte bobo OPVÜI lo khochaki pitava osi ombo tae khümtava tona ombona Philistine jiang khelona nte shanchovka." 4 Hoji tsükona Israel jiangna Baal tona Astarte to kisü jiang sitasi OPVÜI tae khümtacho. 5 Jisülo jo Samuel na Israel jiang Mizpah lo sanrhyutale to heto yivon picho, "Ana hojilona OPVÜI thüngi nte randanivka." 6 Hojitsükona onte topvüna Mizpah lo sanrhyutacho. ontena ojü wokae phyangchochia OPVÜI thantacho osi hoji tsüngon totona khangtacho. Ontena phyotacho, "Etena OPVÜI thüngi mmen tssothaka." (Samuel na Mizpah lona Israel jiang ekhiranta jiang mmyantayicho) 7 Kvüthüng Israel jiangna Mizpah lo sanrhyutala to Philistine jiangna zocho sana, mesao otsük mongo jiangna onte nzo tssoa kyon jiang ekhfürhyui Israel jiang hav tssocho. Tole Israel jiang na hoji zoe kyua, Samuel ezotacho, 8 "Philistine jiang khelona e shanchole to OPVÜI thüngi erandania vana." 9 Samuel na olyuro tatsüngi OPVÜI thancho. Jisülojo ombona OPVÜI thüngi Israel kyochile to randanle OPVÜI na ombo randan ji janlancho. 10 Samuel na othan pia vanathüng Philistine jiang na oro onte hayacho, tokhatola OPVÜI na potsüwoe na tharaka ejena onte phancho. Tole onteji hamae ekhenrhüka tsantacho. 11 Israel jiangna Mizpah lona khochi Philistine jiang ji Bethkar jana phani olan dunga onte lüngtharacho. 12 Samuel na olong khi Mizapah tona Shen to oni yutalo chümkachisi heto phyocho, "OPVÜI na hetopvü enzanchia rothaka," tothakale ombona olong ji "Nzanchi long" to tsacho. 13 Hojito Philistin jiang ji khyoe sicho osi Samuel evanthüng jo OPVÜI na onte khi Israel thüngi ori n tssothokvü tanglanchicho. 14 Philistin jiangna Ekron tona Gath yutalo Israel meta khithako jiang topvü pilancho osi Israel jiangna onte meta jiang topvü khilancho. Osi Israel tona Kanaan kyon to yutalo ha noying licho. 15 Samuel na eküm evanthüng nandang jo Israel sa vancho. !6 Nzyu akvüto ombona, Bethel, Gilgal, Mizpah to shiang lo khyua wocho, osi meta shianglo pangtarota jiang nlansüngia wocho. 17 Jisülo jo ombona ombo ki Ramah lo elani oyi yitssoe elhi tsso to tssocho. ombona Ramha lo OPVÜI thanphen sa roncho.

1 Samuel 8

Kyon Jiangna Mesao Chontala

1 Ombo sonale Samuel na ombo tsoe jiang ji Israel lo yitssoeden kümthukcho. 2 Otsoe eramo jijo Joel to tsacho osi nungo jijo Abijah to tsacho, osi onteno Beersheba lo yitssoeden tssocho. 3 Tokhatola opo ejyu-esü jiang n khina orang eyan tae tssocho. Hoji tsükona ontena ekhüp tae tsocho. Hoji tsükona ontena ekhüp khitasi ntsa lona oyi n tssotacho. 4 Tole Israel esopvüi topvü na nduktae Ramah lo Samuel thüngi 5 owo ezotacho, "Zeta, ni sona vanthaka osi ni tsoe jiangna ni esüa mmhona n vantala. Hoji tsükona e pono esapvüi tssothoku tsükona, pvüjipoe jianglo mesao vanthokwo ji esüa enaha mesao epia." 6 Ontena mesao chontao ji Samuel na n mathav sicho osi ombona OPVÜI thüngi randanle 7 OPVÜI na heto janlancho, "kyon jiangna ntio ni ezoana engayia. Ontena ni khaksicho meka, tolea onte mesao A shi a khaksichoka. 8 Ana onteji Ejip lona sochukpvüto ontena a thüngi na kontae potsow thanpo khümtapvü; enhungo ontena ntio a thüngi tssopvü sana ji ni thüngi tssotala. 9 Hoji tsükona onte engayia, tokhatola ntangshon yilan ekhüngu onte pia, onte mesao vana na ombona kvüto onte tsütsav sana jiang ezoa." 10 OPVÜI na ombo ezo jiang topvü Samuel na kyon jiang ezocho. 11 "Nte mesao jina heto nte tsütsavka." to samuel na phyoa heto onte ezocho, "Ombona nte tsokhying jiang khi rasan kümthoku, osi onte ejoma jo ombo ritsso zotoro jiang tsütsav, ejoma jo liko rasan tssov, elani ejoma jo zotoro jiang mhadungina lansoeden tssoa yungtav, 12 onte ejoma jo rasan wothüng pono esopvüiden, ejoma jo tinyan pono esopvüi to kümthokvü. Nte tsoe jiangna ombo li rhontav, osi ritav, ombo ebensü jotav osi ombo zotoro jilo ethelan jiang nsüngrüiden to tssotav. 13 Nte otsolov jiangna ombo echi mozhürhüm mmhom nsüngrütav osi ombo tssoyanden tona hümri erüngden to kümrav. 14 Ombona nte jününgroli mmhontso jiang khiv, nte li osi Olive rhyu mmhontso jiang khi ombo küpo tsüphoden jiang chitayiv. 15 Ombona ombo tsüphoe jiang tona yitssopheni tsüphoeden jiang to tsükona nte jününgroli osi tsünghanrho jiang lona tarochia nte khiyiv. 16 Ombona nte phajae jiang, osi nte mangsü kurü jiang khi ombo elhi tssothoku. 17 Ombona nte tssiden yolona tarochia khiv osi nteha ombo phajae kümrav. 18 Hoji yutaji yiana ntena nte popo ethüngo mesao ji thüngi erinjantav khatola OPVÜI na nte engayiv mek." 19 Tole kyon jiangna Samuel yi ji n ngatana phyotacho, "Meka! Ena e mesao ethev lia, 20 Jipopoe jiangna vamo ji esüa enaha ritssolo esophia ori etssoyithokvü osi e yansae tssothokvü mesao ethev lia. 21 Samuel na ontena ephyo jiang topvü engayicho osi topvü OPVÜI thüngi ezocho. 22 Tole OPVÜI na janlancho, Ontena rüngwo ji tssoyia, mesao onte pia" Jisülo jo Samuel na Israel jiang topvü oki yitale to ezoracho.

1 Samuel 9

Saul na Samuel Ndukala

1 Benjamin pvüji lo kyon tsüka Kish to tsa ejüeli osi okho pono etho eli tsüka vancho; Ombo Zeroro tsoe Abeil ji tsoe, osi Aphia khümtsüng lo Bekorath opan. 2 Ombona otsoe tsüka Saul to tsa khyingroe opyon mmhom vancho. Saul jo Israel lo kyon topvü pomoe kvüri njüpa siphoa opyon mmhoncho. 3 Tsüngonalo Kish gadho ejoma na khyumhia yi sicho, hoji tsükona ombona Saul ezocho, "A phajae tsüka sosi gadho momo jiang yana wotava." 4 Tole ontena Ephraim phunglan meta yakchia Shalishah metae chiwocho, khatola onte n yancheo jina Shaalim metae chiyitacho, tole gadho jiang ji jilo ha n vancho. Tole Benjamin erü jana yanta woaha n hungcho. 5 Osi kvüthüng Zuph metalo chiyicho sana Saul na ombo phajae ji ezocho, "Oki kholani yitavka, apona gadho jiang mekna eni tsükona nchüma wongkhyua vamvü." 6 Tole phajae jina janlancho, "Tosale! Shilo ntho kyon tsüka vana osi ombona ntio phyoa sana benchetala. Ombona gadho jiang kvülo vancho sana ezov mpato tssovka ombo thüngi wotavkalo." 7 Tole Saul na ezocho, "Enina owo ombo ndukna ntio pitavla? Etsoyu ha ji lichethaka osi ntia ombo hanio tüv nli la nüng?" 8 Tole phajae jina janlancho, "Ana janti rang teriv hanka, hoji ombo pina ombona gadho jiang kvülo vancho sana ji ezov tssovka." 9-11 Tole Saul na ezocho, "O tona elüm mmhona! Toka wotavka." Hojito phyota onina ntho kyon vamo yan jilo wotacho. Osi onina yantsü jilo chüngita vanathüng loroe ejoma ojülo jorota vancho ontena ndukcho. Tole ontena loroe jiang heto ezotacho, "Ratssen ji oyani vevan?" Yuta jilo jo zenkhying jiang ji ratssen to tsatacho osi ontena Potsow lüm erüng ntsihunga na, "O ratssen ji thüngi wotavkalo" to phyotacho. 12-13 Loroe jiang na ezocho, "Ho, ombo oyani vana," "Ntena tara ekhyinga chungotana nte mhadungo yia van küma ntena oyani khothepvüto ombo nduku ka. Ombona nchüngo oyani rocho, ntiotssole kyon jiangna phunglani na othan pitav sala. Osi ombona n chiov jo kyon jiang na tsoyuv mek, ntiotssole ombona ovüng tssoa othan ji randankav sala. Ntena enhünga ona ombona phunglani nchüngithüng ombo nduku ka." 14 Tole Saul ha phajae ji wonina yantsü jilo rhowotale Samuel na oni thüngoe ehiroa phunglani khümpheni chüngia vancho. 15 Njyuto OPVÜI na heto Samuel ezoe licho, 16 "Ojyua heto-thüng jo ana Benjamin kyon tsüka ni thüngi rothuku ka, ombo ji Israel lo mesao ji tssothoku tsükona thyujü nzüyia, tona ombona Israel jiang Philistia jiang khelona shanchovka. A kyon jiang ezüp ji ana hungthaka, osi ontena nzanchi chomo ji zothaka." 17 Samuel na Saul hungale OPVÜI na ombo ezocho, "Ana ni ezowo kyon ji shika, ombona a kyon Israel jiang savka." 18 Tole Saul na kipüng ndüngo owo Samuel ezocho, "Ratssen ji kvülo vana sana a zoa." 19 Samuel na ezocho, "Ratssen ji a ka, khümpheni woa vana. Nchüngo ninitana a thüngi tsoyutava. Ojyua enyathüng ana ni emhuk jiang ni janlankhamka osi oki ni niyithoku ka. 20 Nte gadho monsi nchuk ethüm tsothako jiang ji yanchethaka ti-wongkhyua. Osi Israel kyon na chokao ji nika, ni tona nipo wopan toka." 21 Tole Saul na janlancho, "Aiyo Benjamin pvüji kyon, Israel lo pvüji terio ji osi a wopan ha topvü lo teritsowo ji, tona ntioli nina hoto a ezoato?" 22 Tosi Samuel na Saul tona ombo phajae ji to sosi chungchak tsüphov lo yentsae thümro bena ncheni vamo ji yolo ntssontso vanphen ji ombo picho. 23 Tothakale Samuel na tssoyan ji ezocho, "Ana oso ni pia echümpo vanthuko ji hana oyi a pia." 24 Tole tssoyan jina ojo so ethüngchei vao ji hana oyi Saul ndüngo ekachicho. Tole Samuel na Saul ezocho, "Shijo ni ejan ni vayio jika, tsoa. Ana tsae vanthuko kyon shiang yolona ni tswothukvü ni vayichoka." Hoji nchuk Saul na Samuel nzo etsoyu tssocho. 25 Jisülo jo ontena khümpheni na oyani joyita vanathüng ontena mhonki Saul yiphen ronicho, 26 tole Saul na hojilo yipcho.

Samuel Na Saul Ji Esapvüi Ethüngchetala

Wonchiale Samuel na mhonki Saul vamo ji tsakachi, "Phanthia ana ni yithukvüka," to ezocho. Tole Saul na phanthi Samuel oni lantsüi wotacho. 27 Onina yantsü tssae chiyiale Samuel na Saul ezocho, "Phajae ji ovüngi yia vanto ezoa." Phajae jina khochicho osi Samuel na phyolancho, "Shilo tara tamanga ana Potsow na phyoji yithen ji ni ezovka."

1 Samuel 10

1 Jisülojo Samuel na olive thyujü opvü motsünga khi Saul kvüri phyangkayicho osi ombo ntsüphia ezocho, "OPVÜI na ombo kyon Israel jiang esapvüi ni tssothoku ni nzüyiala. Nina ombo kyon jiang yansavka osi ori khelona onte nkohachevka. Osi shijo OPVÜI na ombo kyon jiang esapvüi ni tssothuko ji chekaphenka. 2 Nina nchüng athüngi na khoe yiathüng Benjamin metalo Rachel lüp ji ndüngona eboe otsük eni nduku ka. Osi ntena gadho moncho yanta vamo jiang hungthaka to onina ni ezovka osi nipona gadho jiang tsükona wongkhyu ji sisi nte tsükona wongkhyua heto phyoa nte eyiloa vamu to ni ezovka, "Atsoe ji tsükona aiyo kvüto lyuv to?" to. 3 Ntena jilona oyi Tabor ntho dung ji n janthüng jo yita vamka osi jilona ntena kyon otsük ethüm Bethel lo othan pilo yita vancho nduku ka. Onte tsükana nyanyanro ethüm süv, tsükajo hümri ethüm bem osi ethümoto jina zükhi sofü sükvü motsünga to hamka. 4 Ontena nte nduki hümri jilona eni nte pivka osi nina hoji khichovka. 5 Tosi nina Gebea lo Potsow yingsüng jilo Philistian vamo jilo chungovka. Yantsü pikhfü jilona ntena zenkhying okho motsünga na phunglani thanphen jilona jungken khüta, ophyang tümta, philulyu tona zhükhen to khüta joyita vancho nduku ka. Osi ontena sharita owon tssota joyita vamka. 6 Jithüngji jitopvü potsow mon na ni pyingi onte kholo rhowoe longtsüi shari sharita owon tssotavka osi kyonthan ni kümvüka. 7 Shi esüa tssoa na Potsow na ntio etssov ni ezoa na ji ephan tssoa. 8 Ana Gilgal lona ni nduku ka, nina ovüngna jilo owo othan osi khümshümta than pikhe. Osi ana oro ntio kvüto tssov sana ji ni n zothüng jo nchuk tiying jilona anhyaka vankhe." 9 Kvüthüng Saul na Samuel thüngina khochicho sana kyon ethan ombo kümcho. Osi Samuel na ombo ezo jiang topvü hoji nchuk bencho. 10 Saul tona ombo phajae ji tona Gibeah lo chiyile zenkhying okho motsünga na onte ndukcho. Jitopvü Potsow mon na ombo sayae ombona onte kholo rhowoe sharia okhen dentacho. 11 Tole ovüngthüng ombo ntsithako kyon jiangna hoto tssoa ombo hungi phyotacho, "Kish tsoe shijo ntio tssothakcho ato?" 12 Hojilo evan tsükana phyocho, "Tona zenkhying thanpoe shiango kvütola Onte opo jo ochoang tssov to nchümtala nteno?" Hojilo na benkae, "Saul mpatona zenkhying kümthakchoke" to yijakta ji benkacho. 13 Saul na sharia okhen denta ji thakthakale phunglani thanphen jilo chungocho. 14 Jisüi jo Saul oporo jina Saul ha phajae ji woni nduki ezocho, "Ninio kvülo wotachola?" Saul na ezocho, "gadho jiang yana wotacho ka" "osi ena hojiang n hungwo jina Samuel nduko wotalancho ka." 15 Tole Saul oporo jina engacho, "Tole ombona kvüto nte ezochola?" Tole Saul na janlancho, 16 "Ombona gadho jiang yanchethaka to e zocho" Tokhatola Samuel na mesae ombo kümthukvü ombo ezo jijo Saul na oporo n zocho.

Saul ji Mesao to Khichoala

17 Samuel na kyon jiang ji ekhüm khitav tsükona Mizpah lo tsarhyui ezocho, 18 "Israel Potsow OPVÜI na heto phyoala, 'Ana Ejip lona nte sochukcho osi Ejip kyon tona thanpoe kvütata na nte khangshicho sana jiang khelona nte shanchocho. 19 Aiyo nte Potsow ji, nte ezüp phyingrüng topvü lona nte shanchoe ji, tokhatola nchüngo ntena asisi mesao chontathaka. Hoji tsükona ntena jipo osi khümtsük ephanina OPVÜI mhadungo etssirhyutava.' " 20 Jitosi Samuel na jipo akvüto OPVÜI mhadungo sanchukchithukcho, tole OPVÜI na Benjamin pvüji khyochecho. 21 Jisülo jo Samuel na Benjamin pvüji ji mhadungi chiyithuki jilo Matri wopan ji khyochecho. Jitosi Matri opan lo eboetso sanchukchile OPVÜI na Kish tsoe Saul khyochecho. Ontena ombo yanta ha n hungwo jina phyotacho, 22 "Ocho sana n chiyihancho alo?" to OPVÜI engatacho. Tole OPVÜI na janlancho, "Saul jo, O jilo etsoyu vaphen sülamoe mphoe vanaje." 23 Tole ontena yunga owo Saul sosi yicho osi Saul ji kyon topvü poni kvüri njüpa tüv tssocho. 24 Samuel na kyon jiang ezocho, "OPVÜI na ethüngcheo kyon ji shije! Ete yolo ochia ombo esüa n van." Tole kyon jiang topvüna, "Mesao ji harishia vanthuka" to tüngtacho. 25 Jisülo jo Samuel na mesao ezocho osi yilan jiang topvü erani, ntho metae vacho. Jisülo jo Samuel na onte topvü oki yirathukcho. 26 Saul ha Gibeah lo oki yicho. Osi Potsow na tssyukae etho ejüi kyon ejoma na ombo phana yicho. 27 Tokhatola ethelan n li kyon ejoma na heto phyotacho, "Kyon tsük shina ntio mmhom etsso yivla?" Hojito phyota ontena Saul yikvüta si yantso ntia hansi oro ombo n pitacho.

1 Samuel 11

Saul na Amorite Jiang Khyoala

1 Choroa sülojo Ammon mesao Nahash na Gilead metalo Jabesh yantsü ji rasan sosi owo hayacho. Tole Jabesh kyon jiang na Nahash ezocho, "Ethüngi mmhontav yana tona ena epono esapvüi ni kümthoku ka." 2 Tole Nahash na janlancho, "Ana hetowoe na nte thüngi ntsatavka; Ana Israel yikrathuku tsükona nte otsük akvü mhyik amimoe ji khi nte siyidemka." 3 Tole Jabesh lo esopvüi jiangna phyocho, "Tsüngon tiying evayia, ena ochina ha eke-kyov sana Israel topvü yivon pia wothuki zevka, osi ochia ekyochio tüv n vana tssona ni khelo rheyivka." 4 Yithenpvüi jiangrta Saul vamo Gibeah jilo chivocho, osi ontena yivon ji pile kyon topvüna ekhencho. 5 Hojithüng Saul na ombo lirhon mangsü jiang sosi oli na yia vancho osi ombona ezocho, "Ntio tssochola? Kvütoli otsük akvüna kyatala?" Tole jilo kyon jiangna Jabesh yithenpvüi jiang na phyoji ombo ezocho. 6 Saul na shi zoale Potsow mon na ombo saye elümoto ombo lüm tsukachicho. 7 Ombona mangsü eni khi lüngthae rhoni oso jiang hansi heto ezoa Israel meta topvü lo wotale to yithenpvüi jiang ezocho, "Kyon ochona Samuel ha Saul oni phana ritssolo n woasana ombo mangsü ji heto rhonroe siyivka." Tole Israel jiang na OPVÜI na ntio tssov sana ji kyua topvü mmyanta sanrhyutacho. 8 Saul na Bezek lo onte etssirhyuthoki zele Israel lona kyon owo 30,000, Juda lona owo 30,000 to chirocho. 9 Osi ontena Jabesh yithenpvüi jiang heto ezocho, "Nte kyon jiang oyi ezotava, ojyua nshi n düngu nte shanchovka to." Jabesh kyon jiang na hoji yithen ji zoale onte emathatsüngi 10 Nahash ezotacho, "Ena ojyuana ni khelo rheyivka, e poni ntio ni tssohunga na tssole." 11 Ojyuato nyazüngina Saul na ombo rasan jiang echi ethüm chiche khochi owo Ammon kyon jiang sakacho. Ontena ori jiang nshi edüngo jo khyothakcho osi ori enhyolani vamo' jiango ombobo tsancholan yana tsanroe sicho. 12 Jisülo jo Israel kyon jiangna Samuel ezocho, "Kyon ochoangna Saul ji ete mesae n tssothuk to phyochola? Onte ji rhümae sosi yia ena onte lüngthav ka!" 13 Tole Saul na ezocho, "Nchüngo kyon ochia chüthoku meka, ntiotssole tsüngon shijo OPVÜI na Israel shancho tsüngon ji." 14 Tole Samuel na onte ezocho, "Ete topvüna Gilgal elani oyi Saul ji ete mesao to yenjoa phyochaktalamka." 15 Ontena Gilgal lo oyi ntho meta jilona Saul ji onte mesao to phyochaktalancho. Ontena khümshümta than pitacho osi Saul tona kyon jiang topvüto nzo tssoe tokhutacho.

1 Samuel 12

Samuel na Kyon Jiang Thüngi Pyontayi Nsanala

1 Samuel na Israel jiang ezocho, "Ntena ntio etssov a zocho sana ji a na tssothaka. Nte yansathoku tsükona mesoa nte pithaka, 2 hoji tsükona enhungo ombo khi nte sothuka. Aiyo atsükona jo enhungo asona otssan pyokthaka, osi atsoe jiang nte yolo vana. Akhyingro ekümo na nchüng jana nte esopvüi tssoa rothaka. 3 Ana shilo vamka ochona sana nlan apio tüv lina Potsow tona ombona ethüngcheo mesao ji to mhadungo na nlan apitava. Ana ocho sana mangsü osi gadho khicho licho alo? Ana ocho sana ejiphia khangshicho licho alo? Ana ocho thüngi sana ekhüp khicho licho alo? Ana hetüv elhi tssocho lina ana khio ji pilamka." 4 Tole kyon jiangna janlancho, "Meka, nina ochia e jithechicho osi khangshicho n lika; Nina ochi thüngi ha ntia e khicho n li." 5 Samuel na janlancho, "OPVÜI tona ombona ethüngcheo mesao ji to mhadungo na ntena n lan n li kyon to ehungpvüi apithaka." Tole kyon jiang na phyotacho, "Hoka, e ehungpvüi jo OPVÜI ka." 6 Samuel na phyolancho, "OPVÜI na Moses tona Aaron to ethüngchecho, osi ombona nte pyimtsümotsüi jinag Ejip lona sochukcho. 7 Hoji tsükona ntena nte vanphen lo mangi vana, ana OPVÜI na nte osi nte pyimtsümotsüi jiang shanchov tsükona emhukthav elhi tssoa nte ejüa rothako jiang nte ezoa nlan nte pivka. 8 Kvüthüng Jakob tona ombo wopan to na Ejip meta owo vancho sana Ejip kyon jiang na onte khangshicho. Tole nte motsüi jiangna kyatacho osi OPVÜI na Moses ha Aaron oni wothuka Ejip lona onte sochukthuki meta shilo onte vanthukcho. 9 Tokhatola kyon jiangna OPVÜI nte Potsow ji mhechoe sicho. Hoji tsükona Philistin jiang. Moab mesao osi Hazor yantsü lo rasan esopvüi Sisera khi nte motsüi jiang ji ori khi nte khyothukcho. 10 Tole nte motsüi jiangna kyata heto OPVÜI thüngi ekhyo chontacho, 'OPVÜI, ena nithüngi na tsani Baal kisü tona Astarte to khümta yio jina mmen tssothaka. E ri jiang khe lona e shanchoa tona ena ni khümvüka! 11 Tole OPVÜI na, Gideon, Barak, Jephtah tona wokhao tssoa to etho epia onte shanchothukcho. E otsük akvüna nte ri khe lona nte shanchoe noyinga nte vanthukcho. 12 Tokhatola Ammon mesao Nahash na nte sakav vamo ji ntena hungi nte OPVÜI Potsow na nte mesao tssoa vamo ji sisi a thüngi 'Esathokvü tsükona mesao e pia' to a ezotacho. 13 "Ntena chomo ji shikaje, osi ntena chomo ji ephan OPVÜI na nte pithaka. 14 Ntena OPVÜI nte Potsow benkata ombo jancho zoa, osi ombo yikrachia tssona, osi nte tona nte mesao to na ombo phankata tssona, olan topvülo nte sükhying mmhomka. 15 Tokhatola ntena ombo yi n ngav ombo yizüng jiang n benphiana, ombona nte pyimtsümotsüi jiang thüngi tsso ji esüa OPVÜI na nte osi nte mesao thüngri ori kümvüka. 16 Hoji tsükona nte vanphen jilo to vantava, osi OPVÜI na elhi tsüphov tssov sa evamo ji zetava. 17 Enhüngajo tsüngkying yuta la nüng? Tokhatola ana randamka, tona OPVÜI na ejenlunga tharaka eryu jothoku ka. Hojito tssoana, ntena OPVÜI thüngi mesao chontao ji worhyucho saka to nchümchevka." 18 Tosi Samuel na randanle, jitopvü potsüo tharaka ejenlunga eryu jocho. Tole kyon topvüna Samuel tona OPVÜI ji to kyutacho, 19 osi ontena Samuel ezotacho, "Tsühpoe yo, nzansi, OPVÜI ni Potsow thüngi e tichüthukle to erandania. Enhungo ena e mmen thanpo jiang ekalo mesao choni mmen tssolanthaka to ena engathethaka." 20 Tole Samuel na onte ezocho, "Tikyutava, ntena hojitüv mmen tssothaka khatola OPVÜI thüngi na jo ti-kontava, tolea nte lümbüm topvü theta ombo benkatava. 21 Osi ejüng potsow jo ti-phankatava, ontena ntiloha nte n zanchiche mekana ntiolona ha nte n shanchoche, ntiotssole onteno potsow tsotso mek. 22 OPVÜI na phyochak tsüphov vathaka, ombona nte sinkiv meka, ntiotssole ombona ombo kyonden nte kümthoku methakthaka. 23 A tsükona jo nte n radaniv esani sisi OPVÜI thüngi mmen tssov meka. Jithüngi na jo elan etssov tsükona ana nte sokav ka. 24 OPVÜI jancho zotava, osi longtsükaroa nte lümbüm topvü khi ombo benkatava. Ombona nte tsükona elhi tsüphov tsso jiang nchümchetava. 25 Tokhatola ntena mmen tae tssolana vancho jo OPVÜI na nte mesao osi nte topvü nte monthokvü ka."

1 Samuel 13

Philistin Jiang Thüngi Ritsso

1 Saul na esapvüi kümathüngjo ombo nzyu zhüro tssoa vancho, osi ombona Israel pono nzyu thümrosi eni sacho. 2 Saul na kyon wothüng ethüm ethüngche wothüng eni jo ombo ndüngo Michomash tona Bethel. phunglanro jianglo to vanthukcho, osi wothüng motsünga jo ombo tsoe Jonathan khi sosi Benjamin metae Gibeah lo wothukcho osi enhyoe vamo jiang jo Saul na oki yithoki sicho. 3 Jonathan na Giba lo Philistin esopvüi ji lüngthacho, osi Philistin kyon topvü na hoji zocho. Tole Saul na Hebrew meta topvü lo yithenpvüi wothuka tatara mhüa ritssolo role to tsathukcho. 4 Saul na Philistin esopvüi ji lüngthathaka osi Philistin jiangna onte n zehungala to Israel topvü ezoracho. Hoji tsükona kyon topvü na etsao ji enga Gilgal lo Saul thüngi roracho. 5 Philistin jiangna Israel jiang thüngi ori etssov sanrhyucho. Ontena ritsso zotoro Kurü na esüo tüv wothüng thümro licho, osi kurü rasan wothüng tiruk tona jümang tssae hajang lio jitata rasan vancho. Ontena Bethavan na engchirolamoe Michmash lo owo nchentacho. 6 Hoji lona ontena Israel jiang elümoto mmyinga sakacho osi Israel jiang ji ezüp khatüng nduki sicho. Israel jiang na ochoang najo longkvüi, ochoangnajo olong yolo osi likokvüi, sokvüi, osi jükhae to mphotacho; 7 osi ejoma jo Jordan pankae Gad lo tona Gilead meta lo to chiyitacho. Tolea Saul jo Gilgal lo vanpvüto tssocho osi ombo ndüngo vamo kyon jiang na ekyu lona enetsüngracho. 8Samuel na ombo ezoji ephan ombona tsüngon tiying nhyaka vancho khatola Samuel jo Gilgal lo n rohancho osi kyon jiangna Saul sisi tsanrale, 9 ombona onte ezocho, "Erungthan tona khümshümta than to jiang hansi oyi apia." 10 Hojito ombona erungthan ji pira tona Samuel chirocho. Osi Saul na olanina chiwo ombo nduki elonchocho, 11 tokhatola Samuel na ezocho, "Nino ntio elhicho la?" Tole Saul na janlancho, "Kyon jiangna a sisi eyiv benkacho, elani nina erov phyo ji yuta ebenlo n rocho, ji ekalo Philistin jiangna Michmash lo sanrhyuta vancho; 12 hoji tsükona ana nchümcho, Thilistin jiang na Gilgal lona a sakav sala, osi ana OPVÜI emathao elhi n tssohan.' Hojitolui ana othan epiv benkacho." 13 Tole Samuel na ezocho, "Hoji jo zhüva elhi, osi OPVÜI Potsow na yizüng ni pio jiang nina n tssohan. Nina hoji engacho sawo ni osi ni tsoronichen jiang na eküm echung Israel sav, 14 tokhatola enhungo nina yansav meka. Nina ombo janchgo n zov sithako jina OPVÜI na ombo chokao kyon ji yani ombo kyon jiang esopvüi kümthukthaka." 15 Samuel na Gilgal lona khoe yicho. Saul na ritssolo khochicho osi ombo rasan enhyoe vamo jiang ha ombo phana wocho. Ontena Gilgal lona khochi Benjamin metae Gibeah lo wotacho. Saul na ombo rasan nzo tirok harüma ji rashii zecho. 16 Osi Saul tona Ombo tsoe Jonathan, rasan jiang to jo Benjamin metae Geba lo nchentacho, osi Philistin jiango Michmash lo vancho. 17 Philistin rasan jiang na okho ethüm tssoe onte nchenpheni na khochi owo rotacho. Okho motsünga na Shual metalo Ophrah lo wocho, 18 okho motsünga jo Beth Horon thüngoe wocho, osi okho motsünga jo Zeboim hayi to na lijüng to hungchio erü jilo wocho. 19 Philistin jiangna Hebrew jiang ji otsso lepok ejoe n vanthoku ekhyo tsso jina Israel lo yonjoe n vancho. 20 Israel jiangna onte lirhonphen yikaphen, opvü osi vekhfüro jiang phyako Philistin metae wotacho, 21 opvü teriv tona mangsü ejungphen ephyak mmyo tojo jantirang teriv motsünga pitacho. Osi opvü tona likhephen to ephyak mmyo jo janti rang eni pitacho. 22 Hoji tsükona ritsso tsüngono jo Saul, Jonathan to yaka rasan ochinaha yonri osi otsso n bencho. 23 Philistin jiangna Michmash eyak lan ji nhyako rasan razhü motsünga wothukcho.

1 Samuel 14

Jonathna Ekhyo Ekhüng Elhi

1 Tsüngona lo Jonathan na ombo ebensü ehan khyingroe ji ezocho, "Etena phukowoe Philistin jiang nchenpheni chivotavka" Tokhatola Jonathan na hoji yi ji opo Saul, 2 Gibeah ndüngo Migron lo tsarümthiben dung kupi ncheni vamo ji ntia n zocho. 3 (Pvüti sü ebemo pvüti jijo Ahijah, Shiloh lo OPVÜI pvüti Eli orüo Phinehas tsoe Ahitub, Ichabad ojenio ji tsoe ji tssocho.' Jonathan na khochithaka to ontena n tsicho. 4 Jonathan na yakchia Philistin jiang nchenpheni wov sa vamo Michmash eyak jilo olan tsungkho longpvü tsüphov eni licho. Motsünga jo Bozez, osi motsünga jo Seneh ta tsacho. 5 Motsünga jo eyak ji jükiwoe, Mikmash chanchio tssocho, osi motsünga jo jolowoe Geba woe zechiwo to licho. 6 Jonathan na khyingroe ji ezocho, "N longtsüi Philistin jiang nchenpheni pankawoe chivotavkalo. OPVÜI na ekyov mpato tssovka; osi ombona ekyoa tssona ete wozanro tssolea ekhyo epiv ji ntinaha ombo n khanche." 7 Tole khyingroe jina ezocho, "Nina ntio tssotav to nchüma na ji ephan tssoa, aiyo ni sü erüv tsükona methaki vanka." 8 Jonathan na phyocho, "Toka etena pankae chiwo Philistin jiang khi ehungthoktavka. 9 Osi ontena 'nte yana rovka nhyaka vanle' to e zona etena vanpheno vani nhyakvüka. 10 Tokhatola ontena, role to e tsana etena yana wovka, ntiotssole hojijo OPVÜI na onte pono ekhyo epithaka to chekav ji tssov." 11 Tosi ontena Philistin jiang khi onte hungthukle Philistin jiang na phyocho, "Zetava, Hebrew ejoma na onte mhophen tssungkvü, longkvü jiang lona chiyirathaka." 12 Tothakale ontena Jonathan tona khyingroe ji to tsae ezocho, "Hepi ethüngi chungrotava! Ena ntiosana nte ezov lika!" Tole Jonathan na khyingroe ji ezocho, "A sü rüa roa, OPVÜI na onte pono ekhyo ji Israel pithaka." 13 Jitosi Jonathan na yakchilan ji khejü tona nkhok tona tsena yanga chüngile khyingroe jinaha ombo phana chungocho. Jonathan na Philistin jiang ji sakae vümchüchüna khyingroe jina lüngthata phancho. 14 Lüngtha benkaden ji metaro teriv rima echen yuta lona Jonathan ha khyingroe ji wonina nchyu mekyu harüma lüngthacho. 15 Hojina meta jilo Philistin vamo jiang ji ekhentsüngkhancho. Osi onte nchenpheni ritssoe osi rasan evamo jiang ji ekyu lona enetsüngcho, osi liko ji mpa enhyoka jo onte ji emhokthav ekhentacho.

Philistin Jiang Khyo ji

16 Benjamin metae Gibeah nhyakta vamo Saul woro jiangna Philistin jiang ji ekhenzhüvae yungphita hungchicho. 17 Jitsükona Saul na ombo woro jiang ezocho, "Rasan jiang khae zesi ocho njücho sana zetava." Tole ontena khae zetale Jonathan tona ombo ebensü ehamo khyingroe ji to n jücho. 18 Jitsükona Saul na pvüti Ahijah ezocho, "Pvüti sü ji hansi hepi yia" (Hoji nchuk jo Ahijah na pvüti sü ji kyon jiang mhadungo na hansi vancho.) 19 Saul na pvüti ji thüngi janta vanathüng Philistin jiang ji elümoto kyongkata chyumota yicho, tole Saul na pvüti ji ezocho, "OPVÜI lüm erüng zeta evamo yuta n liv sithaka!" 20 Jitosi ombona ombo woro jiang nzo Philistin jiangna ontebobo rota chyumoe vamo jiang thüngi rotav wocho. 21 Hebrew ejoma Philistin thüngoe thei onte nchenpheni vamo jiangha khophi Saul tona Jonathan to thüngoe thecho. 22 Thanpoe ochoang Ephraim phunglani mphoa vancho sana jiangna Philistin jiangna tsanala to owon zoale benkae 23 Philistin jiang phana Bethava jana rokata phancho. Hoji nchuk OPVÜI na Israel jiang ekhyo picho.

Ritsso Sülo Etsso Jiang

24 Hoji nchuk jo Israel jiang ji wonton lona etho n jüv sicho, ntiotssole Saul na heto phyoe licho, "Ochona nchüng ana ori jiang n lilanthüng etsoyu tssoa sana hojijo rhiyikathoka." Hoji tsükona hoji nchuk jo ochinaha etsoyu n tsohancho. 25 Ontena ora oyi janale tssakijü elümoto hungcho, 26 khatola Saul rhiyika ekyu lona ochinaha n tsotacho. 27 Tokhatola opona kyon jiang rhiyikata ezoji Jonathan na n zohan cho. Jitsükona ombona ombo jarung jina tssakijü lo ejungthechi jilo züpkao jiang tsocho. Jitopvü ombo tsoyokata yicho. 28 Tokhatola kyon tsükana phyocho, "E topvü ekhangtsüngthakaj khatola nipona ekhenthuka heto phyo cho lia, 'Ochona nchüng etsoyu tsoasana hoji rhyikathuka.'" 29 Jonathan na janlancho, "Apona ete kyon jiang pono ntio ekhenthav tssoyicho ato! Zeta, ana tssakijü ji tsosanati kvüta etho jükacho sana. 30 Ete woro jiang na nchüng ori khyo jithüng ontena hamo etsoyu jiang tsocho sawo kvüta mmhomto. Nchümi zetava ontena Philistin jiang kvüta kyongkata lüngthav sana!" 31 Hoji nchuk jo Israel jiangna Philistin jiang khyocho, Mikhmash lona Aijalon jana phanchicho. Hojithüng jo Israel jiango wonton lona sangtsüngkhanthakcho. 32 Hoji tsükona ontena ori khelona recho jiang yana yitacho, osi olyu mangsü jiang khi lüngthae oso jiang lo ejen khyinga tsotacho. 33 Osi Saul ji heto ezocho, "Zeta, kyon jiangna oso lo ejen khyinga tsoe OPVÜI mhadungo mmen tssotaka." Tole Saul na tüngkachia ezocho, "Nteno yentsoedenla!" "Athüngoe olong tsüphov erichia." 34 Jisülojo ombona heto ezolancho, "Owo kyon jiang ji onte olyu, mangsü jiang ji helo sosi yita to ezotava. Ontena oyi shilona lüngthae tsotakhuka, osi ontena ejen khyinga oso tsoe OPVÜI mhadungo mmen tssov meka." Tole hoji zümo onte topvüna onte tssidden jiang süsi oro lüngtharacho. 35 Osi Saul na OPVÜI thanphen tssoden ji jilo tssokachicho. 36 Saul na ombo woro jiang ezocho, "Etena zümolo owo Philistin jiang hatavkalo osi n wonchithüng nandang onte phana lüngthatav kalo." Tole ontena janlancho, "Nina kvüto tssona mmhona to nchüma na ji ephan tssoa." Tole pvüti jina phyocho, "Etena ovüng tssoa Potsow lüm rüng yantadem ka." 37 Tole Saul na Potsow engacho, "Ana Philistin jiang saka na tona nina ekhyo apiv alo?" Tokhatola hoji nchuk jo Potsow na n janlancho. 38 Tole Saul ana kyon jiang esopvüi jiang ezocho, "Shilo oyi nchüng ntio mmen tssotacho sana ji zetava. 39 Israel ekhyo epio eküm evamo Potsow myingo na ana phyochakala, ochona n lan tssocho sana chüthoku, atsoe Jonathan tssolea chüthoku. Tole ochinaha ntia n phyocho. 40 Tole Saul na phyocho, "Nte topvüna hojilo vantava, osi a tona Jonathan tojo hepiwoe vamka." Tole kyon jiangna ezotacho, "Nina ntio mmhontso tssov to nchüma na ji ephan tssoa." 41 Tole Saul na OPVÜI Israel Potsow thüngi ezocho, "OPVÜI, nino nchüngo ntioli a n janlanala? OPVÜI Israel Potsow, ntho long jilona ajanlana. Nlan ji a tsoe Jonathan eni pono tssona, Urim phyalu yakchia a ntsithuka. Tokhatola nlan ji kyon jiang pono tssona Thumim phyalyu yakchia a janlana." Tole janlan ji ephan jo Saul ha Jonathan oni nlan tssocho. Osi kyon jiango ntssüngchecho. 42 Toajo Saul na phyocho, "A tsoe Joanthan eni ocho n lan sana a ntsithuka." Tole Jonathan khyochecho. 43 Tole Saul na Jonathan ezocho, "Nino ntio elhichola?" Tole Joanthan na phyocho, "Ana tssakijü tara tsochoka, aiyo echüv methaki vamka." 44 Tole Saul na ombo ezocho, "Ni nchüthoka tssona a Potsow na achüthoku ka!" 45 Tole kyon jiangna Saul ezocho, "Israel ekhyo pio Jonathan ji chüthoku ke? Meka! ena eküm evamo OPVÜI myingona echümchakala, Jonathan kvüri tssan motsünga tia elungu meka. Ombona nchüng tsso jijo Potsow ekyo-erung lona tssocho." Hojitolui kyon jiangna Jonathan ji echü lona shanchocho. 46 Jisülo jo Saul na Philistin jiang ephamu ji esani sisi onte metae yitacho.

Saul Yansa osi Wopan

47 Saul na Israel mesao kümthakale ote ri jiang topvü thüngi rotacho. Moab kyon, Ammon osi Edom kyon, Zobah mesao jiang tona Philistin jiang to. Ombona kvüta rotacho sana ekhyo hungcho. 48 Ombona lüm tssona rotasi Amalek jiang mpato khyocho. Ombona Israel jiang ori topvü lona shanchocho. 49 Saul tsoeden jo, Jonathan, Ishvi tona Malchishua to. Ombo otolov eramo jijo Merab osi wokhao jijo Michal. 50 Ombo engh jo Ahimaaz otsolov Ahinoam; ombo rasan esoe jo ombo oporo Ner tsoe Abner, 51 Osi Saul opo Kish ha Abner opo Ner tojo Abeil tsoeden tssocho. 52 Saul eküm totona Philistin jiang thüngi rota vancho. Hoji tsükona ombona etho ejüi kvüta hunga sana rasan lo rheyithukcho.

1 Samuel 15

Amalek Jiang Thüngi Ritsso

1 Samuel na Saul ezocho, "OPVÜI na ombo kyon Israel mesao ni kümthoku thyujü nzüa randankalo rothuko ji a ka. OPVÜI Thotsü jina ntio phyoa na enga. 2 Ombona Amalek jiang khangshiv sala, ntiotssole Israel na Ejip lona chiyiathüng ontena zalanchicho. 3 Hoji tsükona Owo Israel jiang sakata osi ontena ntio liana topvü rorüpi siyia. Ntia hakae ti-vana, eboetso, eloe osi nungori, kakaro, mangsü, olyu, Odh osi gadho topvü rorüpi sia." 4 Saul na ombo rasan jiang Telem lo tsarhyui khi chani zecho osi Israel lona rasan 200,000, Juda lona 10,000 to tssocho. 5 Jisüi jo ombona onte sosi owo Amalek yantsü zhükhfü jüran ekyingu tüv lona zümta vancho. 6 Ombona Kenite jipo ochoangna Israel jiang na Ejip lona chiyiathüng nzanchicho sana jiang thüngi ntangnshon yithen heto hanthukcho, "Ana Amalek jiang nzo nte n lüngthanhyao tssoa onte thüngi na tsantava." Tole Kenite jiang na tsani sicho. 7 Saul na Amalek jiang Havila lona benkae Ejip engkhüwoe Shur nandang roa wocho. 8 Ombona Amalek mesao Agag ji rhüma vasi thanpoe jiang topvü lüngtae sicho. 9 Saul tona ombo woro to jiangna Agag ji n lüngtha na vanthukcho osi ekümrümo mmhom, olyu, mangsü, osi olyuro tona mangsüro to mmhomotso osi olan topvü mmhomo jiang tojo hayae vasi ethev n lio jiang tae roe sicho.

Saul ji Mesao Lona Khi Siala

10 OPVÜI na Samuel ezocho, 11 "Ana Saul ji mesao kümthoko ji a ethojaka; ombona akhaksia ayi n ngav sithaka." Samuel na lüm tsukcho osi zümo totona OPVÜI thüngi jonjicho. 12 Ojyuato jo ombona nyazüngi na Saul yana wocho. Saul na Karmel lo owo ombo zekaphen tssokachi vasi Gilgal lo yithaka to Samuel na zocho. 13 Samuel na owo Saul ndukle ombona heto Samuel ezocho, "Samuel, OPVÜI khi ni mmhayithuka! Ana OPVÜI yizüng ji engathaka." 14 Tole Samuel na engacho, "Tona kvütoli ana olyu nyanyan erontacho zoala?" 15 Saul na janlancho, "A woro jiangna Amalek jiang thüngi na khichoka. Onte OPVÜI ni Potsow tham tsükona olyu, nyanyan mmhontso jiang khi vancho osi enhyo jiango topvü rorüpi sitacho." 16 Samuel na ezocho, "Yingto vana, OPVÜI na nsümo azoji ana ni ezovka." Tole Saul na "Azoa" to phyocho. 17 Samuel na Saul ezocho, "Nina nipopo teria nchümlea nino Israel pono esopvüi ji. OPVÜI na Israel mesao ni nzükata ni ethüngchecho 18 osi nthae Amalek jiang topvü roe sile to ni wothukcho. Nina onte n lüngthara thüng nandang ori onte tssoleto ombona ni ezocho. 19 Tole nino kvütoli ombo yi nngachola? Nino ntioli ori tsütsaelan jiang khilo yungchola osi OPVÜI n mathao elhi tssochola?" 20 Saul na ezocho, "Ana OPVÜI yi engacho. Osi ombona aezoji ephan ana khochi owo Agag mesao rhümae sosi oyi Amalek jiang jo topvü rorüpi sicho. 21 Tokhatola a woro jiangna olyu, mangsü ontena rhümao jiang yolo mmhontso jingo n lüngthana Gilgal lona OPVÜI etham tsükona hansi yiatcho." 22 Tole Samuel na ezocho, "OPVÜI na jo kvüwoe chokatalajancho ezoji alo othan jila? Olyu mmhomtsow ji ombo thamo ji thüngina jo jancho ombo zoyio ji mmhontsowo. 23 Ombo panlamo jijo etsiratsen elhi esüa mmen, osi kanchan elhi jijo kisükhüm esüa mmen. Nina OPVÜI yizüng ji khi siwo jina ombona mesao elhi lona khi ni sithaka." 24 Saul na ezocho, "Hoka, ana mmen tssothaka. Ana OPVÜI yizüng osi ni ndungntssung ji nngav sithaka. Ana aoro jiang ekyu lona onte phyocho ephan tssothaka. 25 Tokhatola enhungo a mmen nlan jiang asiyisi a phana Gilgal lo roa, Tona ana hoji lona OPVÜI khümehevüka." 26 Samuel na ezocho, "Ana ni phana rov meka, nina OPVÜI yizüng nngaoji tsükona ombona Israel mesao lona ni vachithaka." 27 Tosi Samuel na khochivkato nkanphile Saul na osü lona ombo rhumacho tole osü ji resocho. 28 Tole Samuel na ombo ezocho, "OPVÜI na nchüng Israel ekhüngyan ji ni thüngina rechoe nilo mmhonkao tüv tsüka pithaka. 29 Israel Potsow phfütsson eli jina ejüng n phyo osi lümbüm n senphi. Ombo kyon mek, osi ombona lümbüm n dongphi." 30 Saul na phyocho, "Ana mmen tssothaka. Tokhtaola Israel kyon osi esopvüi jiang mhdungo tia a yikrachia. Ana ni Potsow ekhümo tssoa a phana roa." 31 Tole Samuel na Saul phana Gilgal lo wole Saul na OPVÜI khümcho. 32 Tole Samuel na ezocho, "Mesao Agag ji helo a thüngi sosi yia." Tole Agag na heto nchüma eneta ombo thüngi yicho, "Chüv jo kvüto n mhom tssovto!" 33 Samuel na phyocho, "Ni yonri na opvü-oyo elümoto ngaro n vam kümthoko ji esüa, niyo ha ngaro n van oyo kümthokala." Tosi ombona Gilgal lo thanphen ndüngona mesao Agag ji ejoroe sicho. 34 Jisülo jo Samuel na Ramah lo yicho osi Saul ha Gibea lo oki yicho. 35 Samuel eküm evanthüng nandang ombona mesao Saul ji n hunglam sicho; tokhatola ombona Saul tsükona jo nungracho. Osi OPVÜI na ombona Saul ji mesao tssothoko ji tsükona nungracho.

1 Samuel 16

David Ji Mesao Etssov Nzüyiala

1 OPVÜI na Samuel ezocho, "Nino Saul tsükona kvütenhya nungra mongula? Ana Israel pono mesao lona khi ombo sithaka. Olive thyujü khi Bethlehem lo Jesse to tsao ji ki woa, ana ombo tsoe yolo tsüka mesao etssov ethüngchethaka." 2 Samuel na ezocho, "Ana kvütoli hoji tssovla? Saul na hoji zocho jo ombona alüngthav." OPVÜI na janlancho, "Mangsüro motsünga süsi OPVÜI thano yiaka to phyoa woa. 3 Hojithan jilo Jesse ha tsanhya tona nina kvüto lyuv sana ana ni ezovka. Ana ethüngcheo kyon ji nina mesao etssov nzüyivka." 4 OPVÜI na ezoji esüa Samuel na Bethlehem lo wocho tole yantsü jilo esopvüi jiangna enetsüngra oro Samuel ezotacho, "Nina noying elhi tsükona rocho alo?" 5 Ombona ezocho, "Hoka, ana OPVÜI thüngi othan pilo rochoka. Ntebobo ntssüngchei othan pilo aphana rotava." Ombona Jesse tona ombo tsoe jiang toha onte bobo ntssüngche othan jilo rotale to ezocho. 6 Ontena rorale Samuel na Jesse tsoe Eliab ji hungi nchümcho, "OPVÜI vanrhyulo evamo kyon shi OPVÜI na ethüngo ji shi tssovka." 7 Tole OPVÜI na ombo ezocho, "Siphoa opyon mmhomo ji ephan ti zeta, ana ombo n thüngcheka. Ntiotssole aiyo kyon na zeta to n zetala. Kyon na oponi chanka ji zetala tolea aiyo lümbüm ji zetala." 8 Tole Jesse na ombo tsoe Abinadab jitsae sosi Samuel thüngi rocho. Tole Samuel na ezocho, "Meka, OPVÜI na ethüngcheo ji omboha meka." 9 Jisülojo Jesse na Shammah sosi rocho. Tole Samuel na ezocho, "Meka, omboha OPVÜI na ethüngcheo ji mek." 10 Hojito Jesse na ombo tsoe otsük tiyingata sosi oro Samuel ejücho. Tole Samuel na ombo ezocho, "Onte ochia OPVÜI na ethüngcheo ji meka." 11 Tosi ombona engacho, "Ni tsoe vanlancho alo?" Tole Jesse na ezocho, "Nungotso ji vanhana, tolea ombo olyu jiang rhükia vana." Samuel na ezocho, "Hepi yile to ombo ezoa. Ombo n yithüng jo etena othan ji pitav meka." 12 Jesse na ombo tsalo wothukcho. Ombo otsük oso mmhona opyon mmhon tsüka osi ombo mhyik jiango rakachia tüv. Tole OPVÜI na Samuel ezocho, "Kyon ji shika ombo nzüyia." 13 Samuel na olive thyujü khi ombo ojenio jiang mhadungo na David nzüyicho. Jitopvü OPVÜI mon jina David sayae khi hoji tsüngono na ombolo vancho. Jisülo jo Samuel na Ramah yani elani yicho.

Saul Yitssoki David

14 OPVÜI mon na Saul vachi sicho osi OPVÜI na omon n mhom tüv rothuki ombo khangshithukcho. 15 Ombo phajae jiang na ombo ezotacho, "Potsow na rothukcho omon n mhom na ni khangshiala to ena ntsia. 16 Hojitsükona nina yidan epia tona ena zhükhen khüthi kyon tsüka yamka. Ombo n mhom jina ni sakata na ombona zhükhen ji khüv, tona ni mmhonlamka." 17 Saul na onte ezocho, "Ochona khenzhü mmhona khüa sana ji yani athüngi sosi yia." 18 Ombo nri tsükana ezocho, "Bethlehem lo Jesse na otsoe tsüka khenden vana. Ombo lümbüm etsson, rasan osi opyon mmhona oyi nsanha mmhona tüv kyon. OPVÜI na ombo tsütsatala." 19 Tole Saul na yithenpvüi wothuka heto Jesse ezothukcho, "Ni tsoe David olyu rhüki ji athüngi rothuka." 20 Hojitsükona Jesse na ombo tsoe David ji nyanyanro motsünga, osi gadho motsünga ji hümri hanthuk, zükhi sofü sükhvü motsünga to hanthuksi wothukcho. 21 David na Saul ki owo elhi benkacho. Tole Saul na elümoto ombo chokacho osi ombo ebensü ehan ombo kümthukcho. 22 Saul na Jesse thüngi yithen hanthukcho, "Ana David a choka ka, a elhi tssoa hepi ombo vanthoku ka." 23 Hoji tsüngono na benkae kvüthüng Potsow na omon n mhom Saul thüngi rothuka na David na ombo khenzhü ji khücho. Tona omon n mhom jina tsani sicho, osi Saul ha mmhonphia yicho osi elani tathi esüa mmhonlancho.

1 Samuel 17

Goliath na Israel Jiang Nochoala

1 Philistin jiangna Sokho to tsao Juda yan motsünga jilo sanrhyucho. Ontena Sokho tona Azekha to yutalo Ephes Dammim jilo sanrhyucho. 2 Osi Saul tona Israel to jiang Elah hayitsü jilo ncheni Philistin jiang thüngi rotav methaki vancho. 3 Philistin jiangna yingsüng motsüngalo ren, nna Israel jiangna yingsüng motsüng alo ren tocho osi onte yutalo hayitsü licho. 4 Gath yantsü lo Goliath to tsa tsüka jücho. Ombona Philistin jiang nchenkina chiro Israel jiang meranga nocho. Ombo ntssoni khejü tiruk pomoe, 5 osi yongmen yonjak tsükhüp seri tinyansi tiying bena ekasi yongmen yonjak kikho vencho. 6 Ombo jo jiangha yongmen yonjak na khüpzhücho osi otssoha yongmen yonjak tsso epvü lona ejümcho. 7 Ombo tsso ji sukthephen jijo tsitüm esüa chhia, osi tssowo jitaena seri tiying poni mmyinga. Osi ombo tssüng eben jiang na ombo ndüngo tssocho. 8 Goliath na phanthi Israel jiang heto ezocho, "Nteno jilo ntio lyutala? Ritsso tsükona reni vancho alo? Aiyo Philistin kyonka. Nteno Israel Saul nriden! Nte yolona tsüka ethüngche oro athüngi rotathuka. 9 Ombona a khyoe a lüngthata tssona eyio nte eziden tssovka; tokhatola ana ombo khyoe lüngthata tssona nteno eziden kümvüka. 10 Ana enhünga shilona Israel jiang nochoala. Ana nte yolo ocho sana rothuki a thüngi rotale to nte nochoala." 11 Saul tona ombo woro to jiang na hoji zoale elümoto ekhentsüngcho.

Saul Nchenpheni David Vancho

12 David jo Juda lo Bethlehem lona Epharata kyon Jesse tsoe. Jesse na otsoe jeni tiza vancho osi Saul na mesao küma jo Jesse jo sona vanthakcho. 13 Ombo tsoe eramo otsük ethüm jiangna Saul phana ritssolo wocho. Erantso jijo Eliab, ji küpo jijo Abinadab osi ethümoto jijo Shammah. 14 David jo onte yolo nungotso ji osi eramo otsük ethüm jiangna Saul thüngi vamo jina 15 ombo nsansam onte sisi Bethlehemi owo opo olyu jiang rhükilo wocho. 16 Goliath na Israel jiang ji zümo zhüro eng zhüro to enya mmyu merangcho. 17 Tsüngona lo Jesse na David ezocho, "Zakto tsüngpyak seri taro shi tona hümri taro shi to hansi owo nchenpheni nitang pia. 18 Osi ethyu kholong taro shiang ha hansi owo rasan esopvüi ji pia. Osi nitang ji kvüto vancho sana ethümi zeta osi onteji mmhona vana to chekav ntiosana oyi ajüa. 19 Mesao Saul tona nijenio jiang osi Israel topvü Elah hayitsüi Philistin jiang thüngi ori tssota vanka." 20 David na ojyuato jo nyazüngi na phanthi olyu jiang ezev ocho sana zikasi Jesse na ezo ji ephan etsoyu jiang hansi khochicho. Osi ombona chiwo jan tona Israel jiang na nzanlungta nchenkina khochuki ritssolo yita vancho. 21 Philistin tona Israel to jiang na onte zechita rotav tsükona methaki vanracho. 22 David na etsoyu jiang ji rasan esopvüi ji khelo vayisi ritssopheni otang kvüto vancho sana to zechilo yunga owo kvüto vantacho sana to ezocho. 23 Osi ombona otang thüngi janta vanathüngi ji ovüngthüng ombo tssophen ji esüa Goliath na chiro Israel jiang meranga nophicho. David na hoji zocho. 24 Israel jiang na Goliath hungale ekhenrhüka tsantacho. 25 Ontena phyotacho, "Ombo zeta! Osi Ombona e merango ji engatava! Saul mesao na ochona shi lüngthata na yantso tsüphov piv phyochaki lia; osi ochona shi lüngthata sana mesao na ombo otsolov ji soa vanthuksi opaong wopan ha tssenkhya n khiyi to methaki lia." 26 David na hojilo kyon vamo jiang heto ezocho, "Ochona Philistin kyon shi lüngthae sisi hetüv yikvü emaka lona Israel jiang vachina ntio yantso hungula? Otssotso tssoana nlongtsüi osi n mvüchung Philistin kyon shijo ochoyila eküm evamo Potsow kyon shiang heto yikvüato?" 27 Tole ontena hoji lüngthae ji yantso ji ntio tssov sana ji ombo ezotacho. 28 David ota Eliab na David na hojito oyam thüngi thyutao ji zoe David thüngi lüm tsuka phyocho, "Nino shilo ntio lyuala? Olyu jiang lijüngi ochona ni zeyia vanchola? Nina kangtsüa nchümo ji ana ntsia. Nino ritsso shi zelo rocho!" 29 David na ezocho, "Ana ntio tssochola? Ana ntia oyam nngache-choke?" 30 Hojito phyoa ombona khophi kyon thanpoe engalancho, tole ombona kvüta enga sana topvüna janlantsük ji ombo picho. 3i David na hojito phyoa kyon tsüka na zoe Saul ezoyicho. Hojitsükona Saul na David yana wothukcho. 32 Tole David na saul ezocho, "Tsüphoe yo, ochinaha Philistin kyon shi ti-kyutava. Ana ombo thüngi rotavka." 33 Tole Saul na ezocho, "Meka, Nino nongori, osi Goliath jo ombo eküm totona rasan tssoa rothaka, tona nina kvütoli ombo thüngi rotachevla!" 34 David na ezocho, "Tsüpheyo; aiyo apo olyu rhüki ka, osi hengo, sevan na chiro olyuro jiang süsi yiana 35 ana phani olyuro ji shanchoala. Osi hingho, sevan jiangna sakata na ana evüngona tssenyae tatsüngi siala. 36 Ana hingho sevan lüngthao ji esüa Philistin ochona eküm evamo Potsow yikvüa sana jiha hojito lüngthae sivka. 37 OPVÜI na hingho sevan khelona a shanchothaka, osi ombona Philistin shi khelona ha a shanchovka." Tole Saul na ezocho, "Toka woa, OPVÜI khi ni kyochithuku ka." 38 Tosi ombona ombo ritsso pipo jiang topvü hanle to David picho: Yongmen kiven, tona tsükkhüp ji to ombona David ekathukcho. 39 David na Saul yonri ji khathesi khochile ombo pashi meko jina n khochichecho. Ombona Saul ezocho, "Ana hetüv hanphen meküma shi hansi ori n tssoche." Osi ombona topvü khichoe vacho. 40 Ombona olyu rhüki pipoji tsakasi zhükhfüroe na longtsüng mongo mpümroa tüv khyoe sükvüi thecho. Tothakale ombona süporo loko ji methaki bensi Goliath nduko wocho.

David na Goliath Khyoala

41 Philistin jina ombo tsung ehan jiang ombo mhadungo tssothuksi David thüngoe wocho. Ombona enhyankata oro David ji mmhona zesi 42 David ji eboeroro khyingroe tae etsso jina emakata nchümcho. 43 Osi ombona David ezocho, "Ni jarung jijo ntio lyuphenla? Aiyo füro tsayicho alo?" Tosi ombona ombo potsow tsaphia David rhiyicho. 44 Tothakale ombona David ji, "Roa, ana niso ji woro woni osi ekümrümo to phi nisivka" to ezoa noa tsacho. 45 David na janlancho, "Nino yonri, otso osi ejungphen to benri bensi a sakalo roala, tokhatola aiyo nina yikvüo Israel rasantsü pono Thotsü Potsow ji myingona roaka. 46 Nchüng tsüngono OPVÜI na a khelo ni thechivka, osi ana ni kvüri ni onivka. Osi ana Philistin rasan jiang tsük jiang ji worowoni tona ekümrümo to phi sivka. 47 Osi shilo evan topvüna Israel na Potsow vana to chekavka osi OPVÜI na ombo kyon shanchov tsükona yonri osi otsso ethev n li to engathevka. Ombo ritssolo ekhyoe, ombona nte topvüto e khelo nte thechivka." 48 Goliath na elani David thüngoe woalancho osi David naha ombo sakalo Philistin reni vamo jiwoe yunga wocho. 49 Ombo na sükvüi yonthechia olong khichei Goliath ephyacho. Osi hojina Goliath ji otono ephayi khi kvüri ji küngsoe likolo nkhümkata evümthei sicho. 50 Hojito David na yonri n thena loko tona olong to tae na Goliath khyocho! 5 3 Ombona yunga owo Goliath müng jilo eshoni Goliath yonri ji khichei Kvüri ji wonia chüthokcho. Philistin jiangna onte ekhüng ji chüthaka to ntsiale tsanracho. 52 Toajo Juda kyon jiang na owon tssoa yungta Philistin jiang ji phana owo Gath tona Ekron to pikhfü ji jana onte phanchicho. Osi Philistin jiang ji Shaaraim lan dunga, Gath tona Ekron to jana olan tona meyani evümtherae sicho. 53 Israel jiangna onte sisi kholani yitathüng onte nchenpheni tsütsailan jiang khiyia yicho. 54 David na Goliath kvüri ji khi hansi Jerusalemi yicho, tolea ombo ebensü jiango nchenki ranki vacho.

David ji Saul Thüngi Sosi Yiala

55 David na Goliath sakalo yia Saul na hungi ombo rasan esopvüi Abner ji heto engacho, "Abner, shijo ocho tsoe la?" Tole Abner na ezocho, "Ana ntia n tsika tsüphoe yo," 56 Tole Saul na ezocho, "Tona ocho tsoe sana owo ngatüngngari zeta." 57 David na Goliath lüngthasi nchenki yile Abner na ombo sosi Saul thüngi wotacho. David na jithüng jana Goliath kvüriji hancho. 58 Tole Saul na engacho, "Khyingroe yo, nino ocho tsoela?" Tole David na "Aiyo ni nri Jesse Bethlehem yamo ji tsoeka." to janlancho.

1 Samuel 18

1 Saul ha David oni thyuta esancho. Jisülo jo Saul tsoe Jonathan na David ji elümoto ombo jüpona ombobo nzana esüa nzam benkacho. 2 Hoji nchuk na benkae Saul na David ji oki n yithukna ombo ki vanthukcho. 3 Jonathan na David ji elümoto chokao jina eküm echung nzanta vamvü echümchaktacho. 4 Ombona osü ekao ji phungchei jilo yonri osi ebensü, yuko tona ryukhüng ji to David picho. 5 David ji saul na ntio elhi zikata na mmhona tssochewo jina Saul na ombo rasan tsüphoe ombo kümthukcho. Hoji na Saul woro osi tsüphoe topvü na emathacho.

Saul na David Omhyik Rakiala

6 David na Goliath lüngthasi kholani oki yia van, nna rasan jiangna ha okiwoe kholani yita to vanle Israel lo eloe topvüna mesao Saul nduko wotacho. Ontena longshi khen denta, sharita tsüngrüngu ekhota osi zhükhen rhüphita wocho. 7 Eloe jiangna longshita heto dentacho, "Saul na wothüng motsünga lüngthacho osi David na wothüng taro lüngthacho." 8 Toajo Saul na hoji zoe lüm tsuki sicho. Ombona phyocho, "Ontena David jo wothüng taro nsikasi aiyo wothüng motsünga tae a nsikatala. Ontena enhungo David ji mesao kümthoku sala!" 9 Hoji nchuk na ombona David n zekhoku hungka renka li sicho. 10 Ojyuato jo Saul ji Potsow na omon n mhom khi pyingtoki sicho osi ombo kina elümoto zhüae esüa etssophyocho. Osi David jo ombo eng akvü pashi ji esüa zhükhen rhüphia okhen dena vancho osi Saul jo otsso bensi vancho. 11 Saul na phyocho, "Ana kyimchung jilo ombo lenkavka," tosi ombona yenjo eni David chhena ha David na ngae yi sisi n rhakcho. 12 OPVÜI na David lo vansi Saul lona tsanthako jina Saul na David kyucho. 13 Hojitsükona Saul na David ji rasan wothüng motsünga lo OPVÜI tssothuka yithuki sicho. 14 Osi OPVÜI na ombolo vamo jina David na ombo woro jiang sosi ritssolo woana ekhyo tae hungcho. 15 Saul na David tssochephyoche jiang hungi kyungkata ombo kyua yicho. 16 Tokhatola Israel lo tona Juda tolo kyon jiang topvüna David chokacho ntiotssole ombo esopvüi mmhom tssocho.

David na Saul Otsolov ji Soa Vanala

17 Hoji süijo Saul na David ezocho, "Atsolo eramo Merba ji shika he. Nina lümbüm etsson osi oyi engae rasan tssoe abenkata OPVÜI lona ori tssov to tssona ana ompvüji ni soa vanthoku ka." (Saul na jo hojito tssona ombona n lüngthalea Philistin jiangna David ji lüngthachev to nchüma vancho.) 18 David na janlancho, "Aiyo ochoyila osi a wopan jo ntiola ana mesao orüo kümchevla?" 19 Tokhatola Merba ji David thüngi yanpithoku yuta ji janale, kyon thanpoe Mcholah yamo Adriei to tsao ji pi sicho. 20 To tssoaha kvütolyui sana Saul otsolov Michal to tsao jina David jüponcho, osi Saul na hoji zoale ombo emathacho. 21 Osi ombona ombobo heto phy woa vancho, "Ana Michal ji David pivka; osi ompvü yakchia a tsirhi lona ombo sathüku ka," hojitolui Philistin jiang khi ombo lüngthathuku ka. Hojito yenjo enioto Saul na David ezocho, "Nino arüo tssovka." 22 Osi ombona ombo tsüphoe jiang ezoa, kijaena David ji heto ezole to ezocho, "Mesao tona ni esüa tsüphoe jiang topvüna nipono ematha lika; enhünga jo mesao otsolov ji yanpiyanthan etssov yuta ji mmhonka, soa vana." 23 Hojito ontena David ezotacho, tole David na onte janlancho, "A esüa tsitsayantsae, osi oyam na n cheka kyon hetüv na mesao orüo ekümvü jo oyi ji tsüpho-khünga, osi hojijo yikrachi tsüphov motsünga." 24 Tole tsüphoe jiangna David na ephyo yi ji saul ezotacho, 25 osi elani Saul na David thüngi heto ezole to yidan pilancho, "Eloe man ji mesao na ni thüngi na ekhiv nchümo jijo Philistin rasan ombo ri jiang nlilana onte myungphen mmyuro otsük nzoa echhi hansi oyi pina jitae tssovka." (Shi hetoena Saul na David ji Philistin jiang khi lüngthathoku lanka yancho.) 26 Saul na ntio phyocho sana jiang ji tsüphoeden jiang na David ezotalancho, tole David na mesao orüo etssov ji emathata nchümcho. Yanpiyanthan tsüngon ji n mekathüngna 27 David na ombo woro jiang sosi owo Philistin nzo eni lüngthacho. Osi ombona mmyungphen mmyuro jiang topvü tani hansi oyi khae mesao ejücho, hoji yakchia mesao orüo etssov tsükona. Hoji tsükona Saul na Michal ji David thüngi yanpithuko tssoe sicho. 28 OPVÜI na David ndüngo vana osi ombo otsolov Michal na David ji elüm chokatala to ji Saul na mmhona engathecho. 29 Hoji tsükona ombona David ji kyongkata kyucho osi ombo eküm echung ombo ri kümi sicho. 30 Kvüthüng Philistin rasan jiang na oro onte thüngi ori tssoana Saul küpo tsüphoe thanpoe jiang thüngi najo yuta topvülo David na ekhyo hungcho. Hoji yakchia David ji elümoto thüngcheta kümcho.

1 Samuel 19

Saul na David Khangshiala

1 Saul na ombo tsoe Jonathan tona ombo küpo tsüphoe jiang toji ombona David lüngthav methakala to ezocho. Tokhatola Jonathan na David ji elümoto chokacho, 2 hoji tsükona ombona David ezocho, "Apona ni lüngthav zia vanka, ojyua enyathüng jo tara ntaknshona nkeni mphoe vankhe. 3 Nina mphoa vamo jilo ana apo phana rovka osi ana nitsükona ombo thüngi thyutavka. Osi ana ntio sana zoa tssona ni ezovka." 4 Jonathan na David ji thanthünga heto opo Saul ezocho, Tsüphoe yo, ni nri David ji ntia n mhom ti-tssoyikhe. Ombona ntia n mhom ni n tssoyinrüng hanka; jithüngona jo ombona ntio tssoa sana jiang topvü ni tsükona jo nzanchi tsüphov taeka. 5 Ombona Goliath lüngthao jiloha ombo eküm na thana elhi tssocho osi OPVÜI na ombo thüngoe thei Israel ekhyo picho. Hoji nina hungi ni emathacho. Tona nina ntioli noying kyon tssatssov nchüma David ji ndam n liv lona chüthokvü sala?" 6 Jonathan yi jina Saul ji lümbüm dungphi ombona David n lüngtha to OPVÜI mhadungo phyochakcho. 7 Jonathan na David tsae hojiang topvü ezosi ombo sosi Saul thüngi wocho osi ovüngthüng esüa David na ombo nri tssoa vanlancho. 8 Philistin jiang thüngi ritsso benkalancho. David na onte sakae rotacho osi Philistin jiangna tsanracho. 9 Tsüngona lo omon n mhom na Saul rhümacho. Ombona ombo tsso ji süsi oki khuka vancho. Osi David jo ombo zhükhen ji khüa vancho. 10 Saul na David ji kyimchungo chenkav zia chenle David na, ngachoe sicho; Osi otsso ji kyimchungo chenkae sicho. Tole David na yunga tsani sicho. 11 Hoji zümo Saul na David ji chensi ojyuato enyathüng jo David ji lüngthalo kyon wothukcho. Tole David eloe Michal na heto ntangnshoyi ezocho, "Nina nchüng zümo n tsancho jo ojyua jo nino echü tssovka." 12 Tosi ompvüna kipüngro lona ombo khyanchukchia tsanthukcho. 13 Jistosi ompvüna oki kisü elio ji khi belüngi yipkachithuki kvürilo nyanyan tssan lyukacho tüv na nkhüm nsüngrüi eyuki vanthuksi tsanthukcho. 14 Saul woro jiangna David solo role Michal na ombo ra vanka to ezocho. 15 Tokhatola Saul na onte mhyik na owo zetale to ezoa wolanthukcho. Ombona heto onte ezocho, "Ombo belüng totona ejüma yitava tona ana lüngthavka."16 Ontena oki rhowotale kisü jilo nyanyan tssan eyukae nkhümsi yipthuko ji hungcho. 17 Saul na Michal engacho, "Ntioli nino hojito ajiphia a ri ji tsanthukchola?" Ompvüna ezocho, "Ana ombo nzanchia ombo n tssanthuka tssona ombona alüngthav to a ezocho." 18 David na tsanchoe Ramah lo Samuel thüngi owo Saul na ombo tsükona ntio kyakcho sana jiang topvü ezocho. Jisülo jo Samuel oni nzo tssoe owo Naioth lo vantacho. 19 David na Naioth lo vana to Saul na zoale ombona David rhümalo kyon wothukcho. 20 Tole ontena zenkhying okho ji Samuel na sosi owon tssota sharita vana hungcho. Osi OPVÜI mon jina ontelo roe onteha sharita owon tssota yicho. 21 Saul na hoji zoale kyon kyungkata wothukcho tole ontenaha benkae sharita yi sicho. Ombona yenjo ethümoto kyon wothukle jiangha hojito sharita yi sicho. 22 Jisülojo ombona ombobo Ramha lo wocho, Ombona Seku lo jükha tsüphov jilo owo jani David ha Samuel onio kvülo vancho sana to engale, Naioth lo vana to ombo ezocho. 23 Ombona hoji yia vanathüng Posto mon jina omboha rhümae omboha wontssonirota Naioth ejan sharita wocho. 24 Ombona mpensü shaki sisi Samuel mhadungona sharicho osi hoji zümo totona mpensü shaki sisi tsükshü sharithüngcho. Hoji lona heto yijakta ji benkacho, "Saul ha zenkhying kümthakcho ke?"

1 Samuel 20

Jonathan na David Kyochiala

1 David na Ramah lo Naioth lona tsani Joanthan thüngi wocho. ombona ezocho, "Ana ntio n mhom tssochola? Ana ntio tssochola? Osi ana nipo thüngi ntio silyuo tssocho ombona a lüngthav a yanala?" 2 Jonathan na janlancho, "Potsow na enzanthuksi ni nchüthoku ka! A pona ntio tssoasana terilea tsüphov lea a mphov meka. Yilan shijo ejüng tssovka!" 3 David na janlancho, "Nina a nzana to nipona mmhona ntsia, küma ombo etüm ezi jiangna ni tachiv to ntsiküma ni ezov meka. Ana eküm evamo OPVÜI myingona ni ezoaka, aiyo echüv jilona ekhoa tae konta vanka!" 4 Jonathan na ezocho, "Nina ntio phyoana ana tssovka." 5 David na janlancho, "Ojyuajo choro ethan tokhu. Aiyo mesao nzo etsoyu etssov lia, tolea nina emathana ana tsani owo oli mphoa rajyu mmyu nandang vamka. 6 Nipo na a njüo ji ntsi a ethüm na ana zakto Bethleham lo oyi wopan nzo nzyua than pilo ewov lio jina ni engasi yicho to a zoyia. 7 Ombona hoji khichoa, 'tssona mmhona,' osi hoji na lüm tsuka tssona ombona a meyam lümbüm hanato nina engathevka. 8 Nzansi hojito tssoa, osi nina a nzanchiv to ntho phyochak lio ji benthuka. Tokhatola a nlan lina ntioli nipo khi a lüngthathukvüla?" Nina lüngthae a sia. 9 "Jonathan na ezocho, hojitüv jo ti nchümphia!" "Apona ni meyam ziala to ana mmhona ntsivo ana ni nzovke?" 10 Tole David na ezocho, "Nipona lümbüm tsuka ni janlana tssona hoji ochona a yenjamla?" 11 Tole "Oli wotavkalo" to Jonathan na David ezocho. Osi onina wotacho, 12 osi Jonathan na David ezolancho, "Israel Potsow OPVÜI jo ete ehungpvüi tssovka! Ana ojyua heto-thüng tona rajyu to apo ngatüngarivka. Ombona ni thüngi mmhona nchüma vanchojo ana oyi ni yemka. 13 Ombona ni meyamvü zia vanaha ana ni ezoa ni n tsanthuka tssona OPVÜI khi a chüthoku ka. OPVÜI na apo thüngoe roji esüa ni thüngoe thethuka! 14 Osi ana eküm vana tssona ni ntho phyochak ji ephan a wopan thüngi longtsükata vana, 15 A chüa tssolea hojito a wopan thüngi longtsükata vana. Osi OPVÜI na ni ri jiang topvü chükhanthu thaklea 16 jithüng jana eni phyochak ji ti yesothukna vana. Osi hoji ntsata ji yesothukcho jo OPVÜI na ni khangshivka." 17 Joanthan na David ji ombobo nzana to nzamo jina David na ombo nzanala to mmhona phyochak-lanthukcho. 18 Jonathan na ombo ezocho, "Ojyua jo chothan tokhu küma nina etsoyu lo n rocho jo elaro ni chanchev. 19 Rajyuo elani kyungkata ni chanchelam, hoji tsükona nina ovüngthüng mpho jilo owo lungrokyu ji sülami mhpoe vana. 20 Tona ana longrokyu jilo okhe ntsena esüa lotssi tsüng ethüm kokav ka. 21 Tosi ana a phajae ji ezoa owo lotsüng jiang lokthoku. Osi ana heto ombo ezona, 'Zeta lotsüng jiang ji nina vamo jilo na hepiwoe ka owo khia' to ezona nina chiyia, ekyuv n licho tssovka. To tssona ni tsükona ekyuv n li to eküm Potsow myingona ana echümala. 22 Tokhatola ana aphajae ji heto ezona, 'Lotsüng jiang ji nina vamo jilona ovüngoe ka owo khi hansi yia' tona OPVÜI na tsanle to ni ezocho tssovka tsana. 23 Enina phyochaktao shi ji benthuku tsükona OPVÜI na kümali ekyochivka. 24 David na oli mphoe vancho. Chothan tokhu jilo Saul mesao na etsoyu tssolo rocho, 25 osi kyimchung ndüngo ombo vanphen jilo khukthecho. Ombo ndüngo jo Abner na khukthecho osi Jonathan jo hoji tondüngo khukthecho. David vanphen jo ejüngcho, 26 tokhatola Saul na David ji ntiosana ntssüng-rüng yuta tssochona n rocho tssov to nchüma hoji nchuk jo n thümphicho. 27 Ojyuato ha David vanphen ji ejünglani licho, tole Saul na Jonathan engacho, "David jo ntioli nchuk enio etsoyulo n roala?" 28 Jonathan na janlancho, "Ombona Bethlehemi ombo yi-thuk to a thüngi heto choncho, 29 "Nzansi Bethelehemi a yithuka, e wopan na yantsüi na othan pitala osi ajenio na oyi thele to a ezocho. Hoji tsükona niji a shom tssona oyi a wopan a ndukthuka.' Hoji tsükona ombona ni tsoyupheni vanphen n khichechoka." 30 Saul na Jonathan thüngi lüm tsuka ezocho, "O motso, nina David thüngoe thetala to ana ntsithaka, osi nibobo nimying osi niyo mying mmeniala! 31 David meta shilo evanthüng jo nina mesao n tssoche to nina n tsichoke? Zakto owo ombo sosi yia, ombo chüthoku ka!" 32 Jonathan na ezocho, "Ntioli ombo chüthoku la? Ombona ntio tssosorachola?" 33 Hojithüng Saul na otsso khi Jonathan chencho, tole Saul na David lüngthav methak lia to Jonathan na ntsi sicho. 34 Jonathan na tsopheni na lüm tsuka phanthi sicho osi hoji nchuk chothan tokhu tsüngon enioto jilo ntia etsoyu n tssocho. Saul na David elümoto yikvüo jina Jonathan na David tsükona elüm nungracho. 35 Oni phyotao ji ephan ojyua to enya jo Jonathan na David nduko oli wocho. Osi ombona khyingroe tsüka sosi hoji ezocho, 36 "Ana kochiv vamo lotsüng ji yunga owo khia." Tole khyingroe jina yunga owo khicho osi Jonathan lotssi tsüng ji ombo yaki ovüngoe kochicho. 37 Jonathan na kochio lotsüng ji khyingroe jina owo jancho, tole Jonathan na ezocho, 38 "Lotsüng ji ovüngoeka, hojilo manga tivan na zakto woa!" Hoji jo ntio etsso sana n tsina 39 khyingroe jina lotsüng ji khyokae oyi ombo pvüi ji picho. David ha Jonathan oni tae na ntsicho. 40 Jonathan na ombo ebensü ji khyingroe ji pia oyi oki vale to ezocho. 41 Khyingroe jina yithakale David na longroyo ji sülami na phanthi khuktseni yenjo ethüm likoe nkhümthecho. Jonathan woniata na kyata ntssüphitacho; David jo Jonathan lona kyungkata nungracho. 42 Jonathan na David ezocho, "Potsow ni ndüngo tssothoku kai enina ntho ntsata vao ji eni tsoronichen jana vata ewov ji OPVÜI na benchethokvü ka." Jisülo jo David na yicho, osi Jonathan ha yantsüi yi sicho.

1 Samuel 21

David Na Saul Thüngina Tsanala

1 David na Nob lo pvüti Abilemek thüngi wocho. Abimelek na enetsünga ombo nduko chiyi phyocho, "Nino kvütoli nipoti hepi rochola?" 2 David na janlancho, "Aiyo mesao elhilo shio rochoka. Ombona ntio elhilo arothukcho sana kyon ochia ti ezole to a e zocho. A woro jiang jo ana meta motsünga lona a ndukle to ezocho. 3 Nino etsoyu ntio methaki lia? Hümri mongo mekana nina ntio methaki liana apia." 4 Pvüti jina ezocho, "Ana hümri sha tüv n li, ntho hümri tae lia. Ni woro jiang na epayalo ponilan n tssocho tssona ntena hoji tsotakhuka." 5 David na janlancho, "Ontena hojitüv n tssoka. A woro shiangna ena yentsasha lo woathüng lea onte bobo etsükria vanala. Nchüngo echümporo elhilo küma ontena kyungkata etsüriv tssovka." 6 Tole pvüti jina hümri ji khi David picho, ntiotssole Potsow thani lio ji yaka ombona hümri thanpo n licho. Osi hümri ji ntho thanphenina khichesi hümri ethan na dungchelani vacho. 7 Saul tssiden rhüki esopvüi Edom kyon Deog jiha ekhüm elhilan lo rocho hojilo jücho. 8 David na Abimelek ezocho, "Nina otsso alo yonri sana lina apia, mesao yizüng ephan tsütssoa khochio jina otsso lebuk ntia n tsakachov khochi rochoka." 9 Ahilemek na ezocho, "Nina Elah hayi na lüngthao Philistine, Goliath ji yonri ji ana lia. Khümphen sülamoe osüna eyuki lia. Nina hoji ethev lina khia; shilo licho ebensü hoji tae." David na ezocho, "Hoji apia, shilo ntia ebensü hoji lona mmhonkao n lika!" 10 David na Saul thüngi na tsani Gath mesao Achish thüngi yicho. 11 Mesoa ji küpo tsüphoe jiang na Achish ezocho, "Shijo David, ombo meta mesao ji esüla? Shijo eloetsüna sharia heto denkatao ji esüla, 'Saul na wothüng lüngthathaka, osi David na wothüng taro lüngthathaka.' " 12 Onte yi jiangna David lümbüm rhakicho, osi ombona Achish elümoto kyua nchümcho. 13 Hoji tsükona onte ehungo na jo David na npenri zhüvae esüa etssophyoa ejücho, ntiotssole ontena ombo tangyav ekhyo tssocho; hojithüng jo ombona yantsü pikhfü hankhan jilo nshakphia ombo menhüm jiang zonjorae etsophyoa ejücho. 14 Tole Achish na ombo tsüphoe jiang ezocho, "Zeta kyon shijo zhüvae ka, nteno ntioli hetüv athüngi sosi yichola? 15 Ana shilo zhüvae khosha vanthaka, tona ntioli hotüv solansi oyi aki na zhüva etso-ephyo a hungthukala?"

1 Samuel 22

Pvüti Jiang Lüngthao Ji

1 David na Gath yantsü lona tsani owo Adullam yantsüi ndüngo longkvüi vancho. Ombona jilo vana to ombo ojenio osi wopan jiangna zoale ontenaha wotacho. 2 Oyam na khangshio osi lümbüm m püku vamo tüv kyon nzo mezhü ombo ndüngo wocho osi ombona onte esopvüi kümcho. 3 David na jilona Moab metalo Mizpah lo owo Moab mesao ji ezocho, "Potsow na ntio a tssothukhunga na ji ana n yanchethüng nandang nina nzansi apoha ayo oni oyi ni ndüngo vanyathuka." 4 David na opo ha oyo oni ji Moab mesao ndüngo vanthukcho osi David na longkvüi evanthüng nandang jo ontena jilo vantacho. 5 Tole zenkhying Gad na oro David ezocho, "Shilo ti-vana; Juda metae zakto tsani yia." Tole David na khochi Hereth ratsüi yicho. 6 Tsüngona lo Saul na phunglani tssüngthi ethem dung kupi khukthei vancho; Ombo khelo ombo tsso ji bensi ombo küpo tsüphoe jiangna ombo hachümi vancho. Osi David tona ombo woro to jiang ji yanchethaka to ombo ezocho, 7 jitsükona ombona ombo tsüphoeden jiang ezocho, "Benjamin kyonden engatava! David na nte topvü oli tona jününgroli to nte piv osi ombo rasan yolo esopvüi nte tssothoku to nchümta alo? 8 Osi hoji tsükona ntena a monthoku to kyaktalo? Osi nte ochinaha a tsoe jina David oni shentae lia to a zocho n li, elani yuta shilo jo a kyon David jina a lüngthav tsükona lanka yana vana, osi jijo a tsoe jina lümbüm tssonkayia vana toji a ezocho n lihan!" 9 Deog na jilo Saul tsüphoe jiang nzo manga vansi phyocho, "David na Nob lo Ahitub tsoe Ahimelek thüngi yia ana hunga. 10 David na ntio tssov sana Ahimelek na Potsow engacho osi ombona etsoyu David pisi Philistin kyon Goliath ji yonri ji ombo picho." 11 Tole mesao Saul na Ahimelek tona ombo wopan pvüti jiang to sosi yile to kyon wothukcho. 12 Saul na Ahimelek engacho, "Ahimelek, engachia!" "Tole, tsüphoeyo, ni benkav methaki vana" to Ahimelek na janalancho. 13 Saul na ombo ezocho, "Ntioli David ninio a eküm ekhiv tsükona khentala? Nino ntioli etsoyu ombo pisi yonri ombo pi tosi ombo tsükona Potsow lüm erüng yaniala? Ombona ayana vana, osi alüngthav tsükona tssochobenta yana vana!" 14 Ahimelek na janlancho, "Nina tsüpoe vancho yolo David jo long tsüka eli tsüka! Ombo ni myako, ni enhyang yolo esopvüi osi mesaki elhi etssoe otsük akvüna elümoto longtsükae tsüka. 15 Ana Potsow lüm erüng ombo yanicho, khatola nchüng tae hoto tssoa mek. Tolea ni pono okyak tssocho tüv jo, tsüphoeyo, nina a osi a wopan pono ntia nlan a ti-pia, ana hetüv yilan ntia n tsika!" 16 Tole mesao jina phyocho, "Ahimelek, ni tona ni wopan to nte chüthukchev." 17 Tosi jilo enhyang manga vamo jiang ombona ezocho, "OPVÜI pvüti jiang lüngthata! Ontena David onte kyaktacho osi ombona tsanthaka to ontena ntsia ha a n zocho." Tokhatola enhyang jiangna pvüti jiang tsüko okhe ethev ekhirana okhe n khyokacho. 18 Tole jilo Doeg vamo ji Saul na ezocho, "Nina onte lüngthata!" – tole Doeg na onte topvü lüngthacho. Hoji tsüngono ombona pvüti sü ekakhong tüv pvüti otsük ekhatizasi mongo lüngthacho, 19 Saul na pvüti yantsü Nob jilo evan topvü lüngthale to ezocho; eboe, eloe, ngaro, ngakaro, tssiden, gadho, osi olyu topvü lüngtharae sicho. 20 Tokhatola Ahimelek tsoe tsüka Abiathar jo tsanchoe owo David tsankacho. 21 Saul na OPVÜI pvüti jiang lüngthao ji ombona David ezocho. 22 Tole David na ombo ezocho, "Ana hoji nchuk Doeg hungwo jithüng ombona Saul ezov to ana ntsia. Hoji tsükona nte wopan chüo jiang topvüto a poni ka. 23 A thüngi vana osi ti-kyua. Saul na enita echüthukvü yana khatola ntia tssov meka."

1 Samuel 23

David na Keilah Yantsü Shanchoala

1 Philistin jiangna Keilah yantsü ji hayatala osi hoji nzyu jonchorücho topvü khiala to David na won zocho. 2 Hoji tsüko na ombona OPVÜI engacho, "Ana owo Philistin jiang hav alo, OPVÜI?" Tole OPVÜI na janlancho, "Ho, owo onte hae Keilah ji shanchoa" 3 Tokhatola David woro jiang na ombo ezocho, "Etena Juda lo lea elümoto ekyutsü lia, osi elani Keilah lo Philistin jiang hata lana tssona n mhonkao tssov!" 4 Hoji tsükona David na elani OPVÜI engalanle OPVÜI na ombo ezocho, "Owo Keilah hayata, ana Philistin jiang ekhyov etho ni pivka." 3 Hoji tsükona David tona ombo woro to jiangna Keilah lo Philistin jiang hatacho; osi ontena khosha lüngthae sisi ekümrümo jiang khiyitacho. Hojitoli David na Keilah shanchocho. 6 Ahimelek tsoe Abiathar na Keilah lona David tsankao jithüng ombo pvüti mpensü jiha hansi yicho. 7 David na keilah lo yithaka to Saul na zocho osi ombona phyocho, "Ombo ji Potsow na akhelo rheyithukthaka ntiotssole ombona pikhfü osi kipüng etheo yantsü Keilah lo rheyithaka." 8 Hojito Saul na ombo woro jiang ezosi David tona ombo woro jiang to thüngi rotav tsükona Keilah lo wotacho. 9 Saul na ombo hayalo tsata to David na zoale ombona pvüti Abiathar ezocho, "Pvüti shakasü ji shilo hana yia." 10 Tosi David na phyocho, "Israel Potsow OPVÜI, Saul na ni nri a tsükona ombo woro sosi Keilah yantsü shi roe silo tsata to owon zoa. 11 Keilah kyon shiangna Saul khelo athechiv tsükona ritssolo tsacho alo? OPVÜI, Israel Potsow, a nzansi a janlana." Tole OPVÜI na janlancho, "Saul na rovka" 12 Tole David na engalancho, "Keilah kyon shiangna a osi a woro shiang Saul khelo ethechiv alo?" Tole OPVÜI na janlancho, "Ho, ontena nte thechivka." 13 Tole David tona ombo woro to tsotsüi onte nzo tiruk harüma jina zaktole Keilah lona khochi yia vancho. Osi David na Keilah lona tsanthaka to Saul na zoale Keilah owo ehav methako ji esani sicho.

Phunglan Metae David

14 David na phunglan metae, Ziph ndüngo lijüngi mphoa vancho. Saul na yuta topvülo David yana vancho khatola OPVÜI na David ji Saul khelo n theyicho. 15 Saul na ombo lüngthav yana vana to David na ntsicho. David jo Zip lijüng ndüngo Horesh lo vancho. 16 Jonathan na hojito owo ombo lüm tssonkayia Potsow na ombo nkochevka to heto ezocho, 17 "Tikyua, apo Saul na ni tssatssov meka. Nino Israel lo mesao ji tssov osi aiyo ni küpo ji tssov to ombona mmhona ntsia." 18 Jitsosi onina onio oshomka to ji ntho ntsata vatacho. David jo jilo Horesh lo vancho osi Jonathan jo oki yilancho. 19 Ziph kyon ejoma na Gebeah lo Saul thüngi owo heto yirütacho, "David jo e metae Juda lijüngi jolowoe Hochilah phunglani Horesh lo mphoa vana. 20 Tsühpoe yo, nina kvüta ombo rhüma hunga vancho sana ji ena ntsia; küma e metae roa tona ena ni khi ombo rhümathoku ka." 21 Saul na janlancho, "Ntena a nzamo ji OPVÜI khi nte mmhayithoku ka! 22 Ombo ji meta kvülo nrünga vancho sana osi ochona ombo hungcho sana owo yenjoa oyi zetalansi oro a ezotava. Ombo elümoto okyak lia to ana zoka. 23 Ombona metaro kvülo vancho sana ji mekata owo zetasi oro a ezotava. tona ana jitopvü nte phana oro ombo yamka, osi Juda lijüng totona mpato khyua eyamo tssolea ombo yamka." 24 Hoji tsükona ontena Saul vüngina Zip lo kholani yitacho. Hojithüng jo David tona ombo woro jiang tojo Juda meta jolowoe ratsüi elio Moan enung nkeni mphoa vantacho. 25 Saul tona ombo woro to jiangna David yano khochitacho khatola David na hoji zoe Maon lijüngi longsrürheni tsani yicho. Saul na hoji zoe David phana wocho. 26 Saul tona ombo woro jiang tojo yingsüng esanawoe, David tona ombo woro jiang tojo yingsüngji esanawoe to chanchita vancho. Saul tona ombo woro to jiangna onte tssungkata onte rhümav tsao jina ontena tsanta vancho. 27 Hojithüng yithenpvüi tsüka na chiro Saul ezocho, "Philistin jiangna ete meta hala, zakto kholani yia!" 28 Hoji tsükona Saul na David phana vamo ji sisi kholani Philistin jiang thüngi rotalo yicho. Hoji tsükona hoji yingsüng jijo khosota esüng to tsala. 29 David naha hoji lona tsani oyi Engedi metae mphoa vancho.

1 Samuel 24

David na Saul Nkümala

1 Saul na Philistin jiang thüngi ori tssotasi yile David ji Engedi ndüngo lijüngi vana to ombo ezocho. 2 Jitsükona saul na Israel lo rasan mmhontsov wothüng ethüm sosi David tona ombo woro jiang to yana 'OraNyanyan Longroyo' to tsao jilo wotacho. 3 Ombona lantssae olyuden ndüngo longkvüi rhowo esancho. Tole jijo David tona ombo woro to jiang na ochungi mphota vamo jilo longkvü tssocho. 4 Tole David woro jiangna ombo ezocho, "Shijo ni yuta mmhontso jika! OPVÜI na ni ri ji ni khelo ni theyiaka nina ntio ombo tssoyinhuga sana tssoyia." David na yingto epvüa owo Saul na n tsina ombo süjüm ji rhachoe khiyicho. 5 Tokhatola jisüi jo David na ombobo khetsüa nchümcho 6 osi ombo kyon jiang ezocho, "OPVÜI khi esayathuksi ombona ethüngcheo mesao apvüi ji khelo okhe a tithethuka! Ana kvütoliha ombo n tssatssothuk, ntiotssole ombo OPVÜI na ethüngcheo mesao ji!" 7 Hojito David na ombo woro jiang ji Saul n tssatssov tsükona engathethucho. Saul na longkvü jilona phanthi khochi yia vancho. 8 Tole David na ombo sü rüa chivo ombo tsacho, "Tsüphoe yo!" Osi Saul na engoe zechile, David na yikrachi ombo pia likoe nkhümthe 9 ombo ezocho, "Nino ntioli kyon na ana ni meyam yanala to phyotao ji longtsüala? 10 Enhünga longkvüina OPVÜI na a khelo ni thechio ji nina ntsithak ku. A kyon ejoma najo ni lüngthale to a ezocho, khatola ana ni tsükona nungra onte ezocho, ana kvütoli ombo tssatssovla? ombo OPVÜI na ethüngcheo a mesao ji to onte ezocho. 11 Zeta, apo, ni süjüm ana bemo shi! Ana ni lüngthacheta khatola jithüng jo ana ni süjüm shi tae tseni khicho. Shi zesi nina engathev, ana ni n panlan osi ni meyamvü ni n yan to. Ana ntia nlümo ni n tssoyiaha nino a lüngthav a yanala. 12 OPVÜI khi eni ocho nlan sana zethuka! Ombo khi nina a thüngi worio ji ni khangshithuka, ana jo ejükarolea ni meyamu meka. 13 Yijaktaphen heto lioji nina ntsia, 'kyon n mhom jiangna n mhom tssoala.' Hoji tsükona ana ni meyam meka. 14 Zeta, Israel mesao na ocho lüngthav yana vancho sana! Ombona phana vamo ji zeta! Füro echü alo, Tezhüla? 15 OPVÜI khi eni ocho ori sana ezeyithuka, osi OPVÜI khi a nkohoa ni khelona a nkochethuka." 16 David na nsanrathakale Saul na heto phyocho, "O, David, otsotso ni alo, a tsoeyo?" Jisülojo ombona ekyav benkacho. 17 Ombona David ezocho, "Nino elana osi aiyo n lan. Nina a thüngi elümoto mmhona khatola ana ni thüngi n mhom tssothaka!18 Nina a thüngi kvüto mmhona vana sana ji ana nchüng ntsithaka, ntiotssole OPVÜI na ni khelo athechia ha nina a n lüngthacho. 19 Kyon na ombori rhümae ntia n lyuyi na vanchiv jo kvüta liv to? Nina nchüng athüngi tssoji man OPVÜI khi ni mmhayithokvü ka. 20 Enhungo Israel lo mesao ji ni tssov osi ni khelona rena yiv to ana ntsia. 21 Tokhatola nina a tsoronichen jiang a nkümchev lo OPVÜI myingona phyochaka tona a osi a wopan mying ji mhecholangi siv meka." 22 Tole David na hojito tssovka to echümchakcho. Jisülojo Saul na oki kholani yicho, osi David tona ombo woro jiang tonaha ontena mphota vamo meta jilo kholani yicho.

1 Samuel 25

Samuel Chüo Ji

1 Samuel chücho osi Israel topvü na sanrhyui ombo tsükona kyatacho, ontena Ramah lo ombo ki ombo shothecho.

David Tona Abigail to

Hoji sülojo David na Paran lijüngi yicho. 2-3 Hojilo Kaleb pvüji kyon Maon yamo Nabal to tsa tsüka na Karmel yantsü ndüngo liko licho. Ombo elümoto eli, ombona olyu wothüng ethüm, nyanyan wothüng motsünga to vancho. Ombo engh Abigail jo opyon mmhona kichuk ejüi tssocho, khatola ombo nkhyika osi lüm tssoshüa tüv tssocho. Nabal jo Karmel lo ombo olyu jiang otssan tssüyia vancho, 4 Osi David na lijüngina ombo yivon zoe, 5 khyingroe otsük taro wothuka Nabal ji yani salüm piyile to ezocho. 6 Osi Nabal ji owo heto ezole to ombona ezocho, "Oshom, David na ni osi ni wopan elani nina licho topvü to thüngi salüm ni hanthukcho. 7 Nina ni olyu jiang otssan tssüa vanala to ombona zothaka. Osi ni olyu rhüki jiangna ethüngi oro mungta khatola ena onte n khetsü. Ontena Karmel lo evanthüng nandang onte tsütsailan ntia onte n füyi. 8 Onte engae zeta tona ontena ni ezovka. Ena tokhu tsüngon tsükona helo rocho osi ntena e nzana e khichole to David na nte thüngi jonjiala. Ntena ni nriden osi ni shom David thüngi ntio epikhuka na epia." 9 David kyon jiangna David myingona yithen shi owo Nabal picho. Osi ontena jilona nhyakta vancho tole 10 Nabal na wokhaeti heto onte janlancho, "David ta? Ombo ochola? Ana ombo motsü n zohanla! Epayalo jo ezii tsancho tae na meta pyingi vana! 11 Ana hümri osi ojü tona ekümrümo to a elhi etssoe jiang epiv tatsüngo jiang khi meta kvülona rocho sanatia ana n tsio kyon tüv piv meka!" 12 Tole David woro jiangna oyi Nabal na ntio phyocho sana ji David ezotacho. Tole ombona onte ezocho, 13 "Nte yonri jiang ekatava" tole onte topvü na khi hantacho osi David ha ombo yonri ji hansi ombo woro nzo mezhü sosi khochicho, osi nzo eni jo etsoyu elonpvüi valanchicho. 14 Nabal nri tsükana Nabla engh Abigail thüngi ezocho, "Nino zezohan? David na lijüngi na ombo woro rotuka ete pvüi thüngi salüm oro pithukle ombona onte yikvücho. 15 Toaha ontena elümoto erüm toa enzana vancho. Ena onte yolo munga khatola e tsütsailan ntia n monhan. 16 Ena zümo eng onte ndüngo olyu nhyakathüng ontena e nkohachecho. 17 Nzansi nchümi zesi kvüto lyuv sana methaka. To n tssona ete pvüi pono osi ete topvü pono ezüp yikhuka. Ete pvüi shiji elümoto n khoka küma ombona ochi yiha n ngala!" 18 Abigail na jitopvü hümri nzo eni, zükhi sükvü eni, olyu rithakcho mongo, otsüng nghicho seri taro tiying, tssüngthi nkong ovüng nzoa, züvothi nkong nzo eni to methaki gadho oha nsüngrüicho. 19 Tosi ompvü na phajae jiang ezocho, "Ntena ota vana tona ana nte phana rovka." Tokhatola orapvü jo ompvüna ntia n zocho. 20 Ompvüna gadho lo tsankae phunglan yenjo rhüa yia vanle jitopvü David tona ombo woro jiang to tssükacho. 21 David na heto nchüma vancho, "Aiyo ntioli meta hetüv lo kyon tsük shi ejüeli nkocheyia vanchoto? Ombo woro tsütsailan motsüngatia n monihan, tole ana ombo nzanchiwo ji man jo ombona heto apilana saka! 22 Ana ojyua enya n ochiv kyon tsük shiang n chürathuka tssona Potsow khi alüngthathuka!" 23 Abigail na David ndukpvüto ompvüna tsukjoe 24 David jolo epyakthei ezocho, "Tsüphoeyo, nzansi enga, osi a engayia! N lan ji ana khivka. 25 Nabal ethelan n lii ji tsükona ti-wongkhyua! Ombo myingo tsakata zhüvae ka. Ni woro jiang na chiroathüng ana oki n vanchoka, tsüphoeyo. 26 Ni ri jiang nlilana lüngtharae esiv lona tanglanchio jijo OPVÜI na ka. Ana eküm evamo OPVÜI myingna echümchakala, ni ri osi ochoangna ni tssatssov yana sana jiang topvü Nabal esüa khangshivka. 27 Tsüphoe yo, nzansi ana yantso hamo shiang khichoe ni woro shiang pia. 28 Tsüphoeyo, ana woricho lina nlan a siyia. Nina OPVÜI ri tssoa vana, hoji tsükona ombona ni osi ni tsoronichen jiang mesapvüi ni kümthoku ka, osi nina evanthüng jo nina ntia n-mhom tssov meka. 29 Kyon ochona sana ni meyamvü ni hayata tssona OPVÜI na kyon tsükana ombo tssentsü eli nkümato ni nkümchevka. Osi ni ri jiango kyon tsükana lokolo thei shümchia to OPVÜI na shümchi sivka. 30 Osi OPVÜI na mmhom phyoe ni vayio jiang benchethuksi Israel lo mesao ni kümthukthaka na, 31 nina thama lüngthacho osi omüng nlicho khi ni etho jaka vamvü meka. Osi OPVÜI na ni mmhayithaka na nzansi a ti mhechokhe, tsüphoe yo." 32 David na ompvü ezocho, "Israel Potsow OPVÜI ochona nchüng a nduko ni rothukcho sana ji thünga! 33 Nina mmhom nchümcheo ji tsükona osi ntio kvütoli a ri jiang nlilam lona nina atanglanchicho sana ji tsükona OPVÜI thünga. 34 OPVÜI na ni n tssatssothoku a tangchoka, osi ana OPVÜI myingona echümala nina zakto oro a n dukcho savo ojyua enya wonchiana Nabal woro jiang topvü chüthakvü!" 35 Jitosi ompvüna hana ro jiang David na topvü khichoyisi ompvü ezocho, "Oki elani yia, osi nina ntio choncho sana ana benchethoku ka ti wongkhyua." 36 Abigail na Nabal thüngi oki yicho. Nabal jo mesao tokhu khia vancho. Osi ombo ji kinoe, emathata vamo jina ompvüna hoji zümo jo ntia ombo n zocho. 37 Ombo chüngtsoche sanati ompvü na olan topvü ombo ezoracho. Tole omboji echunga taena chenthuka otsük chüi sicho. 38 Osi tsüngon taro sülojo OPVÜI na Nabal tsüko okhe thei chüthoki sicho. 39 Nabal chüthaka to owon zoale David na phyocho, "OPVÜI thünga, Nabal na a yikvüo ji om bona nlilan si ombo phajae akhi n mhon n tssothukcho. OPVÜI na Nabal ji ombo nlan man ezüp picho." Jisülo jo David na Abigail soa evam tsükona yivon picho. 40 Ombo phajae jiangna Karmel lo owo heto ompvü ezotacho, "David na ombo engh ni etssov tsükona ni solo erothukcho." 41 Tole Abigail na likoe epyakthei ezocho, "Aiyo ombo phajae, ombo phajae jiang jo epyoyiv methak lia." 42 Ompvüna phanthi gadho lo tsankae, ompvü meri loroe otsük mongo sosi David phajae jiang phana owo David engh kümcho. 43 David na Jezreel kyon Ahinoan soa vanthakcho osi enhungo Abigail ha ombo engh kümthaka. 44 Tole Saul na ombo otsolov Michal David pithako ji khi Gallim yamo kyon Laish tsoe Palti ji picho.

1 Samuel 26

David na Saul Eküm Nkolana la

1 Ziph yamo ejoma na Gibeah lo Saul thüngi oro David ji Judea lijüngi Hachilah phunglani tsanthei vanala to ezocho. 2 Jitopvü Saul na Israel yolo rasan mmhomtsowv wothüng ethüm sosi Ziph romhoni David yana wocho, 3 osi ombona Hachilah phunglani lantssae ncheni vancho. David jo lijüngi vanpvü tssocho osi Saul na ombo yana rothaka to ombona zoale 4 echepvüi wothukcho, tole otsotso Saul rothakcho. 5 Ombona jitopvü Saul tona Ner tsoe Abner rasan esopvüi ji to na kvülo yipa sana ji chelo wocho. Tole Saul na nchenki chungi yipcho osi ombo rasan jiang na ombo füchüma yipa vancho. 6 Tosi David na Hittite kyon Ahimelek tona Joab ojenio Abishai to (onte oyo jo Züri) engacho, "Nini ochona Saul nchenpheni aphana rovla?" Tole Abishai na "Ana rovka" to janlancho. 7 Hoji zümo David ha Abishai onina Saul nchenpheni rhowotale, Saul jo nchenphen longi ombo tsso ji ombo khümki leni vasi yipa vancho. Abner tona rasan jiang tojo ombo füchüma yipta vancho. 8 Abishai na David ezocho, "Potsow na nchüngo zümo ni riji ni khelo ni theyithaka. Ana ombo tsso ji khi echunga yonphina likolo ombo a lenkathukana yenjo eni yonphiv n lika!" 9 Tole David na ezocho, "Nina ombo meyamvü n lika! Ochona OPVÜI na ethüngcheo mesao ji meyana sana ji ombona khangshivka. 10 Hoji tsükona eküm evamo OPVÜI Potsow myingona phyoala, OPVÜI na Saul ji chüthoku ka, Omboji nochonori lona yuta janleha, ritsso yutalo lea ombo chünrünguka. 11 OPVÜI na ethüngcheo mesao ji meyamvü jo OPVÜI khi a tangthuka! Hoji tsükona ombo tsso ji tona ombo jüyuphen ji totae khi hansi yitavka." 12 Hojito David na Saul nkümo na ombo tsso ji tona jüpvü ji to ombo khümki elio ji khi hansi Abishai onina yitae sicho. Toaha onte ochinaha hojito tsso ji n tsicho, mekana ontena n yipjüngchicho, ntiotssole OPVÜI na eyip ejungu onte picho. 13 David na eyak ji pankae phunglan kvüri ji, nkachoa chiyi Saul rasan jiang tona Abner to tüngkachia ezocho, 14 "Abner! nina a won zezojan?" Tole Abner na "Ocho yila mesao nthechia jitata tünga to" to phyocho. 15 Tole David na janlancho, "Abner, nino Israel lo tsüphotso ji mekchoke? Tona nino ntioli nipvüi mesao ji n kochetala? Enhünga tsotsoti ochona sana ombo lüngthalo rhorothaka. 16 Nina ni elhi ji n tssojam sithaka Abner! Ana eküm evamo OPVÜI myingona echüma ni ezoaka, nte topvüto nte echüv etüma, ntiotssole ntena nte pvüi ocho OPVÜI na mesao ethüngchecho sana ji n kohocho. Zeta! Mesao tsso ji jo kvülo licho sana? Osi ombo ndüngo jüpvü lio jijo kvüila?" 17 Saul na David won ji chethei engacho, "David, a tsoe, jijo ni alo?" Tole David na "Hoka, tsüphoeyo" to janlancho. 18 Tosi ombona ezocho, "Tsüphoe yo, ntioli nino ni phajae, a shi enhünga jana a yanala? , Ana ntio tssochola? Osi ana ntio elhi n mhom tssochola? 19 Tsüphoe yo, ana ephyov elio shi enga.'Nina ayana vamo ji OPVÜI na ni ndungntsungcho tssona othan yakchia ombo lümbüm dungphivka; tokhatola kyon na tssona onte pono etssorandanka ji elongkathoku ka. Ntiotssole ontena OPVÜI metae na metapoe ana oyam potsow yaka n khümcheo tüv lo a phanchicho. 20 OPVÜI vanrhyu nkachoe oyam metae na a ti lüng thata. Ntio tsükona Israel mesao jina tezhü esüa a hetüv a lüngthav yana roala? Ntio tssona ombona orae woro esüa akotsüngula?' " 21 Saul na janlancho, "Ana orichoka, a tsoe David, elani yia! Nina nchüngaha a eküm ji a nkümithka, küma ana kvüthüngha ni tssatsssov meka. A zhüva vanchoka! Ana ekhenthao elhi tssothaka!" 22 Tole David na janlancho, "Ni tsso ji shika, Tsüphoe yo. Ni phajae tsüka oro khithuka. 23 Longtsüka eli osi ntsanrüng jiang jo OPVÜI na yantso piala. Ombona nchüng ni ji a khelo a theyicho, khatola ana ni n meyancho, ntiotssole OPVÜI na mesao ni tssothokcho. 24 Osi ana kvüto nchüng ni eküm ji ni nkümcheyicho sana ji esüa, OPVÜI khi a eküm ji a nkocheyia ezüp topvü lona avachithokvü ka!" 25 Saul na David ezocho, "A tsoe, Potsow khi ni mmhayithuka! Nina ntio elhiana topvü lo ekhyo hungthoku ka!" Jisüi jo David ha yicho osi Saul ha oki kholani yicho.

1 Samuel 27

Philistin Jiang Yolo David

1 David na ombobo heto phyocho, "Tsüngona lojo Saul na alüngthavka. Jitsükona tsancholan mmhontso jijo ana Philistin metae tsani yio ji mmhomo. Jito tssona Saul na Israel yolo jo a n yamvü siv küma tsanchoe vamvü." 2 Jisüi jo David tona ombo woro nzo tiruk to jiang na Gath mesao Maoch tsoe Achish thüngi zaktole yitacho. 3 Osi David tona ombo woro jiang, onte wopan jiang to na jilo oyi vantacho. David na eloe eni vancho, Jezereel yamo Abinoam tona Nabal emi Abigail, Karmel yamo ji to oni. 4 David na Gath lo tsanthethaka to Saul na zoale ombo n yamvü sicho. 5 Osi David na Achish ezocho, "A ji ni shom tssona a vanphen yanro motsünga a pia. Ana ni ndüngo yanpvü jilo evam ethev n lika tsüphoe yo." 6 Tole Achish na Ziklag yantsü ji ombo picho. Hoji lona benkae Ziklag ji Juda mesae jiang echhi kümcho. 7 David na Philistin lo choro taro tiruk vancho. 8 Hoji yutalo David tona ombo woro to jiang na meta jilo sunga vanthako Geshur, Girzi tona Amalek to jiang thüngi owo rotacho. Ombona meta ji Shur lona Ejip jana 9 onte meta jiang rechoyia phancho, osi eboe eloe topvü lüngtahe sisi onte olyu, Nyanyan, gadho, Ot, osi mpensü to jiang mpato rechoe khiyicho. Jisülo jo ombona Achish thüngi elani yile 10 heto ombo engacho, "Nchüngo meta kvüi ji phano ochola nino?" Tole David na, "Juda jolowoe, mekana Jerhamel pvüji metae mekana Kenite vamo ji ocho" to ezocho. 11 Osi ochinaha ombo tona ombo woro jiang tona ntio tssota sana ji Gath lo elani oyi n phyothokvü tsükona David tona ombo woro jiang to na meta jilo eboe, eloe jiang topvü lüngtharüpi sicho. Ombona Philistin lo evamo yuta ji topvü David na hojito tssoa vancho. 12 Tokhatola Achish na David longtsüa heto phyoa vancho, "Ombo ji ombo kyon Israel jiang na elümoto tssaka küma ombo eküm echung a phajae tssoa vamka."

1 Samuel 28

1 Yuta tara sülo jo, Philistin jiangna Israel thüngi ori etssov sanrhyucho. Osi Achish na David ezocho, "Ni tona ni woro jiang tojo a thüngoe thei ori tssov to ana longtsüala." 2 Tole David na, "Hoka, aiyo ni phajae küma ana ni tsükona ntio tssokhukcho sana ji nina hunguka." Tole Achish na phyocho, "Mmhonka, ana ni ji ere a enhyang ni kümthoku ka."

Saul na Ratssen Ngatüngngariala

3 Samuel ji chüi topvüna ombo tsükona kyatasi ombo yantsü Ramah lo shothecho. Osi jithüng jo Saul na methevüjae topvü Israel lona tsanle to yidan pithakcho. 4 Philistin rasan jiang na sanrhyui Shunen yantsü ndüngo ncheni vantacho, tole Saul naha Israel rasan jiang ji ekhfüreni sosi Gilboa phunglani owo ncheni vantacho. 5 Saul na kvüthüng Philistin rasan jiang hungcho sana ombo ekhenrhüki sicho, 6 hoji tsüko na ombona kvüto lyuv sana to OPVÜI engacho. Tokhatola OPVÜI na ombo n janlancho, omüngi na ha, phyalyu naha elani zenkhying jiang yakchia ha ntia ombo n janlancho. 7 Tole ombona ombo küpo tsüphoe jiang ezocho, "Ana ompvü thüngi na ndungntssung khivka, eloe ratssen tsüka a yanitava." Tole ontena, "Edor lo hojitüv tsüka vana" to ombo ezotacho. 8 Saul na mpensü dungphi hansi ombo tsüphoe otsük eni sosi zümolo eloe ratssen ji yana owo heto ezocho, "Omon ji engasi ntio kvüto tssov sana ji a ezoa." Osi ombona hetoha ompvü ezocho, "Ana ocho mon thüngi janta to ni ezoana ji tsachuka." 9 Tole eloe jina ezocho, "Nina mmhona ntsia, Saul mesao na ntio tssocho sana ji, osi ombona kvütoli methevüjae jiang topvü Israel lona phani sicho sanaji. Tona nino kvütoli a kyakthechia a chüthokvü yanala?" 10 Tole Saul na ntho echümchak heto picho, "Otsotso eküm evamo OPVÜI evanthüng jo shi ndana ezüp ni piv meka." 11 Tole eloe jina ezocho, "Tona ocho ni tsayivla?" Tole ombona "Samuel a tsayia" to ezocho. 12 Kvüthüng eloe jina Samuel hungcho sana ombo na eronkachia Saul ezocho, "Nino ntioli a kyakthechiala? Nino mesao jila!" 13 Mesao jina ompvü ezocho, "Tikyua, nina ntio hungchola?" Tole eloe jina, "Ana omboji likoe na chiyia hungala." 14 Ombona engacho, "Ombo ntio esüa tüv la?" Ompvüna janlancho, "Sonporo tsüka chiyiala, osi eyuktsüo sü hana." Hoji süijo Saul na jijo Samuel to ntsicho, hoji tsükona ombona yikrachia likoe nkhümthecho. 15 Samuel na Saul ezocho, "Nino ntioli a khetsüla? Nino ntio tsükona a phanthithuklanchola?" Tole Saul na janlancho, "Aiyo ezüp tsüphov nduki lia. Philistin jiangna ori a tssoala, tole Potsow na asithaka. Ombona omünginaha mekana zenkhying yakchia tssolea to a n janlam sithaka. Hoji tsükona na kvüto lyuv sana ji ni khi a ezothokvü tsükona ni tsachoka." 16 Samuel na ezocho, "Ntioli OPVÜI na ni sisi ombo ri ni kümthuk thakcho tssona a tsala? 17 OPVÜI na ayakchia ni ezo ji ephan tssoala; ombona ekhüngyan ji ni thüngi na khi David pithaka. 18 Nina OPVÜI yi n ngav Amalekite jiang tona onte oli jiang to ji roe n sicho. Hoji tsükona OPVÜI na shi ji ni thüngi heto ni tssoyiala. 19 Ombona ni osi Israel jiang ji Philistin jiang khelo nte thechivka. ojyua ni tsoe jiang na a thüngi yivka osi Israel rasan jiang Philistin jiang khelo rheyivka." 20 Samuel na phyoji zopvüto Saul na ekheno na likoe evümthei sicho. Osi ombona zümo eng etsoyu n tsso jina elümoto n khyov kümcho. 21 Eloe jina ombo zele ombo ji ekhentsüngi vamo jina ompvü na ombo ezocho, "Tsüphoe yo, nina phyo ji ephan ana a eküm thana elhi tssochoka. 22 Hoji esüa nzansi enhungo ana phyocho a engayia, ana e tsoyu tara ni methakiv ka. Nina etho jükae yentsao tssoa etsoyu ji tssokhe." 23 Saul na ekhirana ntia n tsoyu to phyocho. Tole ombo küpo tsüphoe jiangna etsoyu etssov lia to ntssungcho. Tole ombona wokhaeti oyi enga phanthi belüngi khukthecho. 24 Jisüijo eloe jina zaktole ompvüna phia vamo mangsüro ji tatsüngcho. Ompvüna elani hümri tara khi vümhi n thena rüngcho. 25 Ompvüna etsoyu ji Saul tona ombo küpo tsüphoe jiang to picho osi ontena tsoyutasi hoji zümo na khoe yicho.

1 Samuel 29

Philistin Jiangna David ji N khichoala

1 Philistin jiang na onte rasan jiang topvü Aphek lo sanrhyuthukcho osi Israel jiang jo Jezereel hayi lo jüpukphen jilo ncheni vancho. 2 Philistin mesao mongo jiangna tsükalo rasan nzao tona wothüng motsünga to ren sosi khochicho osi David jo ombo rasan jiang nzoa Achish mesao sülamoe etsüngkae khochicho. 3 Philistin rasan esopvüi jina onte hungi ezocho, "Hebre shiango shilo ntio elhitala?" Tole Achish na janlancho, "Shijo David, Israel lo mesao Saul ji thung jika. Ombona a ndüngo yuta sunga vana vanthaka. Osi ombona a ndüngo vansi hetenhya tssoaha ana ntia n mhom ombo n zechehan." 4 Tole Philistin rasan esopvüi jina Achish thüngi lüm tsuki heto ombo ezocho," Hoji kyon tsük ji elani ombo yithuka osi nina ombo pio meta jilo oyi vanthuka, osi e nzo ritssolo ti-rothuka, ombona roana ete erokata mpa yivka. Ombona ombo mesao ji emathathoku jo ete woro echüthokvü ji yaka ntio lanka lichola? 5 Otsotso tssoa na shijo David, eloetsü na sharita, heto denkatao jila, 'Saul na wothüng lüngthacho, osi David jo wothüng taro lüngthacho.' " 6 Achish na David tsae ezocho, "Ana eküm evamo Israel Potsow myingona echümala, nina a longtsükata rothaka, osi a nzo ritssolo ni wothuk hungala. Nina a thüngi yio ji tsüngono na nchüng jana ana nilo ntia zeche n lihan. Tokhatola mesae thanpo jiangna ni n thenhyahungala. 7 Hoji tsükona noyinga oki kholani yia, osi onte n mathao ntia titssoyia." 8 David na janlancho, "Ana ntio tssosorachola Tsüphoe yo? Nina phyo ji esüa ana ni benkalo yio jithüng na benkae nina ntia n mhom a n zechecho tssona ni tsükona ana ori tssov ntio tsükona n tssochevla, a mesao osi a OPVÜI?" 9 Achish na ezocho, "Otsotsoka, ana niji Potsow lanben esüa longtsüka eli kyon to ni nchümiala. Tokhatola mesae thanpoe jiangna nina ritssolo ephana n roche to phyoe sithaka. 10 Hoji tsükona David ni osi nte kvüta na Saul sisi oro e benkata vancho sana topvüna ojyua jo nyazüngina phanthi wonchipvüto khochi yitava." 11 Hojito David tona ombo woro to jiangna ojyuato enya jo nyazüngina khochi Philistin metae yitacho osi Philistin jiango Jezereel lo wotacho.

1 Samuel 30

Amalekite Jiang Thüngi Ritsso

1 Tsüngon eni sülo jo David tona ombo woro to jiangna Ziklag lo chiyilancho. Osi hojijo Amalekite jiang na Juda jolowoe meta jiang lo Ziklag ji hae khisi nchuk ethümoto tssotakcho. Ontena yantsü ji hae 2 topvü rungi sisi, eloe jiang rhümacho tolea ontena ochia jo n lüngthacho khatola ontena yiathüng topvüto onte ndüngo sonhyasi yicho. 3 David tona ombo woro to jiangna Ziklag lo chiyile onte yantsü ji rungi sisi eloe osi tsokhying tsolo jiang topvü sorasi yithakcho. 4 Hoji tsükona David tona ombo ndüngo etsso jiang tona nshüthechia kyatacho osi onte sangtsüng sanati esantacho. 5 David engden Abinoam tona Abigail to jiang mpato sosi yithakcho. 6 Osi hoji yakchia David ji elümoto khatüng ezüp nduki sicho ntiotssole ombo woro jiang tsoeni osi otsoeoro jiang topvü sosi yithako ji na ontena ombo ephyatsüngu zita yi sicho; tokhatola OpvT ombo Potsow na lümbüm etsson ombo picho. 7 David na Ahimelek tsoe pvüti Abiathar ji heto ezocho, "Epvülo shakasü ji hansiyi apia." Tole Abiathar na hana oyi ombo picho. 8 tole David na OPVÜI engacho, "Ana ritssoe jiang phana wov alo? osi onte rhümav alo?" Tole OPVÜI na ezocho, "Nina phana woa, tona onte phayav osi morantsan sosi yia evamo jiang phanchochevka." 9 Hoji tsükona David tona ombo woro nzo tiruk to jiang na khochicho osi Besor zhükhfüro jilo chivotale ejoma jo jilo vani sicho. 10 Khatola David na rasan nzo mezhü jiang sosi phana wocho, ntiotssole onte nzo enijo mmoktsüngo jina zhükhfüro ji n pankakhoku jilo esani vantacho. 11 David nzo etssoe jiangna olani na Ejip kyon eboeroro nduki ontena hoji David thüngi sotasi yicho. Onte na etsoyu tara tona ojü 12 elani züvothi nkung tona tsüngthi nkung thanpo to oyüng eni ombo pitacho. Ombona hoji tsotha kale ombo etho jükalancho; ntiotssole ombona etsoyu n tsosi nchuk ethüm tssothakcho. 13 David na ombo engacho, "Nipvüi jo ochola osi nino meta kvülo evanla?" Tole ombona, "Aiyo Ejip kyon ka, osi Amalekite tsüka eziika, tolea atsük n mhomo jina ombona avalanchisi tsüngon ethüm tssothaka. 14 Ena Juda jolowoe Cherethit, Kaleb pvüji meta ji owo hatacho osi Ziklag ji rungi sitacho." to janlancho. 15 Tole David na engacho, "Nina hojiang thüngi a sosi veovla?" Tole ombona ezocho, "Nina a n lüngtha osi a pvüiji khelo a n thechi to eküm evamo Potsow myingo na echüma tssona ana ni sosi wovka." 16 Hojito phyoa ombona David ji sosi onte yana wotacho. Tole ori jiango ontena Philistia tona Juda to owo hae tsütsailan tona kyon to elümoto sosi yio ji myingo na nzonsorae tokhuta longshita to vancho. 17 Ojyuato wonchipüngo David na onte sakae mmyu jana rotacho. Osi onte otsük nzo mezhüna Oat lo tsankae tsamo jiang yaka ochia n tssanchov onte chüthukracho. 18 Osi Amalekite jiangna recho jiang topvü, ombo engh otsük eni ji jüa David na phancholani khicho; 19 osi ntia n khachona recholani khicho. David na eboe osi tsokhying tsolo vüngi elio jiang topvü elani Amalekite jiang na phanchoe licho topvü phancholani khiyicho. 20 Ekümrümo jiangha ombona oden oden na phancholani ombo woro jiangna, "Shiang jo David echila!" to phyota onte mhadungona eküma yitacho. 21 Hoji sülojo David na ombo woro nzo eni ochoang laphyatsüngi onte phana nov Besor lo vani sicho sana jiang thüngi yitacho. Ontenaha ovüng na khochi oro David tona ombo woro jiang to olanina nduktacho osi David na lümtsakirina onte. salümcho. 22 Tokhatola David nzo ewoe onte yolo nkhyiknrüng osi ethev n lio kyon jiangna jo, "Onteno ephana n ro küma phancho jiang ji ntia onte chinhyav meka, onte eloe jiang tona ngaro jiang to khi hansi yitana taekha." to phyotacho. 23 Tokhatola David na ezocho, "Ajenioden, OPVÜI na epia jiang khi ntena hojito n lyuchela! OPVÜI na e ntaknshona lyu ori jiang pono ekhyo epicho. 24 Küma ntena phyo jijo ochinaha khichov meka! Ete topvüto kheti jantavka: Sülamoe vani etsoyu echenlona vamo jiangha mhadungi ritssolo wo jiangha onte kheti hunguka." 25 David na hojito shikhfü metnako ji nchüng jana benphitala. 26 David na Ziklag lo kholani oyi ombona recho jianglo ejoma khi ombo shom Juda esae jiang pia heto ezocho, "Ena OPVÜI ri jiang khelona recho jiang yolona khichei yantso tara shi nte piala." 27 Jisülo jo"elani ombona Bethel, Juda jolowoe Ramah meta, elani Jattit yantsü kyon 28 osi Aroer, Siphmoth, Eshtemoa, 29 Rakal lo Jerahmeel, tona Kenite jiang 30 osi Hormah, Borashan, Athach, tona 31 Hebron tolo evamo kyon jiang tsükona ha hanthukcho. Elani ombo woro tona ombo na sanphio meta jiang topvü lo kyon jiang thüngiha hanthukcho.

1 Samuel 31

Saul Tona Ombo Tsoe Jiang To Chüo Ji

1 Philistin jiang na Gilboa phunglani na Israel jiang thüngi ori tssotacho. Hoji lona Israel elümoto chücho osi Saul tona ombo tsoe jiangha jüa elümoto na tsancho. 2 Tokhatola Philistin jiangna onte chakyae Saul tsokhying yolo otsük ethüm, Jonathan, Abinadab tona Malchisua to lüngthacho. 3 Saul na vamo ji nkonphia elümoto rotacho osi Saul ha ori lotssina rhaki khütssona meyancho. 4 Ombona ebensü ombo hanio khyingroe ji ezocho, "Potsow n tsii jiang na a emakata a chüthuk thüngina jo nina ni yonri ji tsüngchei a lüngthae sia." Tokhatola khyingroe jiang hojito etssov ji elümoto ekhencho. Hoji tsükona Saul na ombo yonri ji khichei ombobo hojilo vankacho. 5 Khyingroe jina Saul ji chüthaka to ntsicho, hoji tsükona omboha ombo yonri ji khichei ombobo hojilo vankae Saul nzo chüi sicho. 6 Hojitolui Saul tona ombo tsoe otsük ethüm nna ombo ebensü ehamo khyingroe ji to jiang ji hoji nchuk chücho; osi Saul woro jiangha topvü hoji nchuk chücho. 7 Osi kvüthüng Jezereel esanawoe Jordan zhükhfüna engkhüwoe vamo jiangna Israel rasan jiang na tsanthaka osi Saul tona ombo tsoe jiangha to chüthaka to owon zocho sana ontena ha yantsü jiang topvü sisi tsani sicho. Hoji sülojo Philistin jiangna chiro oyan jianglo vantacho. 8 Hoji ojyuato Philistin jiang na echümüng jianglo retsolo wotale Saul tona ombo tsoe otsük ethüm jiang toji Gilboa phunglani juthei lia ontena hungcho. 9 Ontena saul kvüri ji woni si ombo ebensü jiang khiyi tosi yithenpvüi wothuka Philistin meta topvülo onte khümphen kisü jiang osi kyon jiang thüngi yithen mmhom ji pithukcho. 10 Ontena onte ebensü jiang onte potsow Astarte khümpheni vacho, osi ombo müng jijo Beth Shan yantsü pikhfülo eshenkae sitacho. 11 Philistin kyon jiangna Saul hojito tssoyiwo ji Gilead lo Jabesh kyon jiangna zoale, 12 lümbüm etssontso kyon jiangna zümo lo Beth Shan lo wotacho. Ontena pikhfü lo Saul tona ombo tsoe jiang müng to eshenkae lio jiang hungale khichoe Jabesh lo hana oyi jilona rungi sitacho. 13 Jisülo jo onte na oryu jiang khyarhyui yantsüi odung kupi shothei sitasi tsüngon tiying khangtacho.

2 Samuel 1

Saul Chüo ji David na Zoala

1 Saul chüsi sülo David na Amalekite jiang khyosi oyi Ziklag lo Tsüngon eni vancho. 2 Ojyua to khyingroe tsükana Saul vanpheni na rocho. Ombo nungra ji ejüv tsükona ombona mpensü jiang reroe sia kvürilo ochon yakacho. Ombona David thüngi owo nkhüm thei khümcho. 3 David na ombo engacho, "Nino kvülona rochola?" Tole ombona ezocho, "Israel jiang nchenpheni na yichoka". 4 Tole David na ezocho, "Ntio tssocho sana a zoa" Tole khyingroe jina ezocho, "Ete rasan jiangna ori mhadungo tsanthaka osi ete woro elümoto chücho. Saul ha ombo tsoe Jonathan oni ha lüngthanhyacho." 5 David na engacho, "Saul ha Jonathan oni lüngthacho to kvütoli nina ntsichola?" 6 Tole ombona ezocho, "Ana Gilboa phunglani wocho, tole Saul na ombo tsso jilo enghokae vanathüng ori jiangna onte ritsso zotoro tona kurü rasan jiang to na ombo tssungkata woa hungcho. 7 Jithüng ombona a zechisi a tsacho. 'Ana helo a vanka kvütola tsüphoeyo!' to ezocho. 8 Tole ombona aiyo ochosana to a engacho, osi ana aiyo Amelek kyon ka to ezocho. 9 Tole ombona a ezocho, 'A ji elümoto khfütssona a meyani sika osi achüv saka oyi a lüngthae sia!' 10 Hoji tsükona ana ehungo ombo lüngthae sicho, ntiotssole ombo chüv to ana ntsia. Hoji sülo ana ombo kvüri lona ombo kiven ji khicho, evon jiang lona khekhüp jiang khicho toli hansi ni thüngi yichoka, tsüphoeyo." 11 Tole David na nungra ombo sü jiang reroe sicho osi ombo ngaro jiangna ha hojito lyucho. 12 Ontena Saul ha Jonathan oni tona Potsow kyon Israel hetata to chüo jiang tsükona mmyu nandang ekhang khia nungratacho. 13 David na yithenpvüi khyingroe ji engacho, "Nino meta kvülo kyon la?" Tole ombona ezocho, "Aiyo Amelek kyon ka, tolea aiyo ni metalo vanaka." 14 Tole David na ezocho, "Nino kvütoli OPVÜI na nthochaki vanthuko mesa ji lüngthachola?" 15 David na ombo woro tsüka tsae ezocho, "Kyon shi lüngthae sia!" 16 Tosi David na Amalek kyon ji ezocho, "Nina nibobo echüv yithen hansi yithaka. Nina OPVÜI na ethüngcheo mesao ji lüngthacho to nibobo phyothako jina nlan ji ni pono tssothaka."

Saul ha Jonathan oni Chüo ji Tsükona David na Kyala

17 Okhen shi David na Saul ha Jonathan ompotsoe denkacho osi 18 Juda kyon jiang topvü shikale to yizüng picho. (Okhen ji Jashar kako lo erani lia) 19 "Ete esopvüi jiang Israel phunglan jiang lona chürae sithaka! Ete rasan lüm etssontso jiang ha jotherathaka! 20 Hoji yithen ji Gath metalo mekana Ashkelon lantsüi jianglo tithenchoa. Philistia eloe jiang ji ti-longshuthuka; osi Potsow n tsi tsolo jiang ha ti-longshuthuka. 21 "Gilboa yondon jianglo nti eryu osi yentsso ha ti-jothuka; hoji li jiang ji nchünkhon likying vanthuka! Ntiotssole lüm etsson jiang tsung jiang ji hojilo yikra khia vantherae lia. Saul tsung jijo enhungo thyujü khi ntssalam mek. 22 Jonathan lotssi jo ekyuthav, osi Saul yonri jina jo khonzan to n tsso, etho ejüi jiang epanphen osi ori jiang chüthokphen. 23 "Saul ha Jonathan onio emhokthav, osi enzana tüv; ekümoha oni nzo, osi echü lolea oni nzo; mungshitsü lona ekhyingka, osi hingho lona etho jükata. 24 Israel eloetsü na Saul tsükona kyatava! ombona sümyon mmhom khi nte pipoyithukcho osi shona janti oyuk-osen khi nte etümthukcho. 25 "Rasan lüm etsson jiang ritssophenina chürathaka, onte ji rali na lüngthakhancho. Jonathan jo phunglanina chüi erichi lia. 26 "Ojenio Jonathan, ana ni tsükona a nungrala; Nina kvütata a nzancho ato! A tsükona ni nzan jijo kvüta emhokthav ato; eloe nzan lona lea mmhonkata. 27 "Rasan lüm etsson jiang jotherathaka, onte ebensü jiango ethev n liv ekachirae sithaka."

2 Samuel 2

David ji Juda lo Mesao Kümthukala

1 Hoji sülojo David na OPVÜI engacho, "Ana owo Juda yantsü motsünga hav alo?" Tole OPVÜI na "Ho" to janlancho."Kvüwoe jila" to David na engacho. Tole OPVÜI na "Hebron ji" to janlancho. 2 Hoji tsükona David na ombo enghden otsük eni Jezreel yamo Abinoahm ji tona Nabal emi Abigail, Karmel yamo ji to oni sosi Hebron lo wocho. 3 Ombona ombo woro jiang tona onte wopan jiang toha sosi owo Hebron ndüngo oyan jianglo vanthukcho. 4 Hoji süi jo Juda kyon jiangna Hebron lo oro David ji thyujü nzüyia mesao kümthukcho. Gilead lo esüa Jabesh kyon jiang na Saul shothethaka to David na zoale, 5 ombona hojilo heto yithen hansi kyon ejoma wothukcho."Ntena nte mesao ji nzana shothe ombo siwo ji OPVÜI khi nte mmhayithuka. 6 OPVÜI khi ntelo longtsükata nte nzana vanthokvü ka. Ntena ntio tssothakcho sana ji tsükona anaha nte thüngi mmhona nte savka. 7 Etho jüa lüm tssontava, osi nte mesao Saul ji chüthaka osi Judea kyon jiangna onte mesao kümthukthaka."

Ishbosheth Ji Israel lo Mesao kümthukala

8 Saul rasan esoe Abner, Ner tsoe jina Saul tsoe Ishbosheth ji woni Jordan pankae Mahanaim lo tsana chiyitacho. 9 Hoji lona Abner na Ishbosheth ji Gilead Asher, Jezreel, Ephraim, Benjamin tona Israel to topvü pono mesae ji kümthukcho. 10 Ombo jithüng jo nzyu zhüro tssocho osi ombona nzyu eni sacho. Tokhatola Juda pvüji jo David küpo vancho, 11 osi David na Hebron lo vani Juda pono nzyu tiyingsi chiso sacho.

Israel Tona Juda To Ritsso

12 Abner tona Ishbosheth to küpo tsüphoe jiangna Mahanaim lona khochi Gibeon yantsü lo wotacho. 13 Zeruiah tsoe Joab tona David küpo tsüphoe jiang to na wozhü motsünga lona onte ndukcho, osi onte ji ejoma na wozhü jina pankae thanpoe jiangna pankaewoe to zechitao vancho. 14 Tole Abner na Joab ezocho, "Okho enita lona khyingroe ethüngche ritsso thangshi lo sonhyatavkalo." Tole Joab na "To tssotavka" to janlancho. 15 Jitsükona Ishbosheth tona Benjamin pvüji to thung tssoa otsük taro eni ethüngchei, David woro otsük taro eni thüngi rotathukcho. 16 Onte otsük akvü tona ombombo tekyim ji kvüri lona rhümae yonri na khyoyo lo ekhyipthechiyitacho, hoji yakchia onte mekyusi mezhüata onte nzo chüracho. Hoji tsükona Gibeon metalo hoji metaro jijo "Yonri Meta" to tsacho. 17 Hoji sülo jo ritsso ntav rotae David woro jiang na Abner ha Joab oni woro jiang khyothechicho. 18 Zeruiah tsokhying otsük ethüm Joab, Abishai, tona Asahel toha jilo jücho, osi Asahel jo Siano na tsana to ekhyinga yunga tüv tssocho, 19 hojina Abner ji phanrhücho, 20 hoji tsükona Abner na mmyilani, "Jijo nike, Asahel" to ezocho. Tole ombona "Hoka" to ezocho. 21 Jitsükona Abner na, "Esana, a ti phana tolea rasan tsüka phani ombo khelo ejüo ji khiyia to ezocho, tokhatola Asahel na to vekata ombo phancho. 22 Tole Abner na ezolancho, 'A ti phana, ntiolui nino a khi ni lüngthatokvü tsükona heto elhiala, ana kvütoli nijenio Joab ndokvü mekla' " 23 Tokhatola Asahel na ombo phanrücho, hoji tsükona Abner na sülamoe yonchia ombo tsso jina chencho osi Asahel ji otsso jina mmani rhaki echenina chiyicho. Toajo Asahel na jilo evümthe sicho osi kyon kvüta na hoji yakchia na ngangi zetacho. 24 Jisüi jo Joab ha Abishae onina Abner phancho osi eng rhetale ontena Gibeon lijüng lamoe Giah na engrhelamoe Ammah phunglan jilo chiyicho. 25 Osi Benjamin pvüji kyon jiangna phunglanro motsünga lona Abner hachümcho osi ontena phunglamoe tsankae zatacho. 26 Abner na Joab tsae ezocho, "Etena n tümjak na rota mongu ke? Okhae jo epüp nungra yaka ntia ndokvü mek to nino ntsicho ke? Eiyo nte esüa ete meta kyon mekchoke? Tona nina kvüthüngti ni kyon jiang ezoa e n phamvü sithukula?" 27 Joab na ezocho, "Ana eküm evamo Potsow myingona echümala" "Nina hojito n phyowo a woro jiangna ojyua enya jana nte phamvü." 28 Jisüi jo Joab na tata raji mhüsochia ritsso ji esantacho. 29 Hoji zümo na Jordan hayi yakchia oyi hoji pankae ojyua enyathüng toha olan tsanrhüi oyi Mahanaim jancho. 30 Joab na ombo woro jiang etssirhyui zetale Asahel ephalo otsük taro toku chücho yanchecho. 31 David woro jiangna Benjamin pvüji woro Abner küpo etssoe otsük 360 lüngthacho. 32 Joab tona ombo woro to jiang na Asahel müng ji khi hansi oyi Bethlehem lo onte wopan khüp ndüngo shothecho. Jitosi ontena zümo thüma sani oyi ojyua to jo Hebron jancho.

2 Samuel 3

1 Saul rasan tona David rasan to rotao ji sunga khicho. David ji etho jüka jüka na yiale ombo ri jiango etho mataka mataka na yicho.

David Tsoe Jiang

2 Hebron lona bukcho David tsoe otsük tiruk jiang erani na heto rencho: Jezreel yamo eloe Ahinoam lona Amnon; 3 Karmel yamo Abigail, Nabal emi ji lona bukcho Chileab; Jershur yamo Talmai mesao otsolov Maakah ji otsolov Absalom; 4 Haggith lona Adonijah bukcho; Abital lona Shephatiah bukcho; 5 Eglah lona Ithream to onteno Hebron lona bukcho.

Abner na David Lo Khümkatala

6 Saul woro tona David woro to sunga rota yiale Saul tepfü Abner ji etho jükata yicho. 7 Tsüngona lo Ishbosheth Saul tsoe jina Abner na Aiah otsolov Rizpahj Saul yingaloroe ji thüngi yipo ji ndana makcho. 8 Tole Abner na elüm lümbüm tsukcho."Nino ana Saul ejithechiv tsayia alo? Aiyo Juda tsükona ori tssoa alo? Benkadeni na nchüng jana ana nipo Saul lo longtsükata ombo osi ombo ojenio jiang osi ombo shom to jiang mmhonthoku benkata osi David khelona nte hetopvü nte shanchothaka; tole nchüngo eloe tsükalo ndankae a n laii yanala nüng! 9-10 OPVÜI na ekhüng yan ji Saul tona ombo tsoronichen to khelona khiv osi David ji Israel tona Juda to onita pono ekhüngyan ochümi na ochüm jana mesao tssothoku to phyochakcho. Hoji n bem sia tssona Potsow na a chüthokvüka!" 11 Tole Ishbosheth na Abner ji elümoto kyuo jina oyi motsüngatia n samvü sicho. 12 Abner na Hebron lo David thüngi heto ezolo yithenpvüi Wothukcho, "Meta shi ochona sav sala? A thüngi ntsatava tona ana ni kyon Israel topvü ni thüngoe tssothoku ka." 13 David na janlancho, "Mmhon ka!" "Eni ntsatav tolea nina athüngi roathüng Saul otsolov Michal ji sosi oro apia, tona eni ntsatavka." 14 David na heto ha Ishbosheth erancho, "Michal ji apilana, aiyo Philistin myungphen mmyoro tsenchocho nzoa na ompvü shichoka." 15 Hojito Ishbosheth na Michal ji orapvü Paltiel, Lasih tsoe ji khelona khi hansi wocho. 16 Paltiel na olan dunga Bahurim jana kya chona wocho, tokhatola Abner na oki kholani yile to ezole yi sicho. 17 Abner na Israel esopvüi jiang thüngi owo ezocho, "Ntena David ji nte mesae kümthokvü tümtasi sungthaka, osi yuta shi lo jo hoji benchev mmhontso ji. 18 OPVÜI na heto phyoe lia, 'Ana a nri David khi a kyon Israel jiang ji Philistin osi onte ri topvü khelona shanchothokvü ka.' " 19 Abner na Benjaimn pvüji kyon jiang thüngiha thyutacho osi Israel pvüji tona Benjamin pvüji to na ntio ntsatacho sana owo Hebron lo David ezocho. 20 Abner na Hebron lo David thüngi otsük mekyu sosi role, David na tokhu onte picho. 21 Abner na David ezocho, "Ana enhünga khochi owo Israel topvü ni thüngoe khyoe khivka, Tsüphoe yo. Ontena ni ji onte mesao to ni khichovka, osi nina rüngwo ji bencheta meta shi topvü pono yansavka." David na Abner ji nkoche rümphithokvü phyochaka yithukcho.

Abner ji Lüngthatala

22 Sülani jo Joab tona David küpo tsüka to na ritssolo wotasi rechocho ejüeli khosha hansi yitacho. Tokhatola Abner jo David na nkoha pia yithukthako jina Hebron lo n vancho. 23 Joab tona ombo razhü to chiyiale Abner jo David thüngi oro vana vansi David na nkoha pia yithukthaka to Joab na zocho. 24 Tole Joab na mesao thüngi owo ezocho, "Nino ntioli Abner na role – n lüngtha na elani yithukchola? 25 Ombo ni ejithechiv tsükona osi nina ntio elhia osi kvüwoe eyi woa sana to chelo rocho to nina mmhona ntsia!" 26 Joab na jilona oyi kyon wothuka Abner sosi yile to Sirah jükhae othoki sosi yithukcho: tokhatola David na hoji n tsicho. 27 Abner na Hebron lo yile Joab na kija yi ombo ezov sa esüa sosi pikhfü tssae chiwocho, osi yonri na Abner mman jilo ekhyipicho. Hojito Abner na Joab ojenio Asahel ji lüngthao jina Abner ji lüngthae sicho. 28 Hoji yivon ji David na zoale heto phyocho, "A osi a woro na Abner ji n lüngtha to OPVÜI na ntsika. 29 Hoji ndana ezüp yio ji Joab osi ombo wopan pono tssothoka! Ombo wopan echungreno tsük tsük jo, echiehan lo ekhyingo nochonori ejüi, mara enoe, eloe elhi tüv tae etssoe, ori na echüi mekana yantsae jitüv jünrhüa wovka!" 30 Hojito Abner na Gibeon ritssolo oni ojenio lüngthayio jina Joab ha ombo ojenio Abishai onina Abner na Asahel lüngthao ji omüng nlilancho.

Abner Shothetala

31 Tole David na Joab tona ombo woro to jiang ji onte mpensü jiang reroe sitasi sünyikvü ekatasi Abner müng tsükona kyatale to ezocho. Osi echü shothelo otathüng David mesao na omüng ji sülani etsüngkae wocho. 32 Abner ji Hebron lo shothecho, osi mesao tona ombo woro jiang to na kyatacho. 33 David na Abner kyakata heto okhen dencho: "Kvütoli Abner ji zhüvae ejoena chüthokchola? 34 Ombo khe n chüng, ombo jo n chüng; Ombo ji münghan na lüngthacho esüa chücho!" Tole kyon jiang na kyatalancho. 35 Eng tona David ji etsoyu tssothokvü nshümta ha ombona n tsov heto phyocho, "Tsüngon shi ochüm n tssov ana ntiosana tsoyu na OPVÜI na achüthokvü ka!" 36 Ontena hoji zoe lüm pükcho. Hojito mesao na ntio tssoa na topvü kyon jiang emathao tssochecho. 37 David woro topvüna osi Israel topvüna Abner chüo jilo David khe n jü to engathecho. 38 Mesao na ombo tsüphoe jiang ezocho, "Nchüng Israel esopvüi chüo shi n chümcheta alo? 39 Aiyo Potsow na a ethüngcheo mesao ji khatola nchüngo a etho jaka nchümcheta. Zeruiah tsoe shiang ji a tsükona jo elümoto tssoshüa zecheta. Münghan jiango ontena mamo ji ephan OPVÜI na ezüp pithokvü ka!"

2 Samuel 4

Ishbosheth ji Lüngthacho

1 Hebron lona Abner ji lüngthataka to Saul tsoe Isbosheth na zoale ombo osi ombo woro topvü na ekhenrhüka kyutacho. 2 Ishbosheth na ombo küpo tsüphoe otsük eni, oyam ehae okho esopvüiden Benjamin pvüji Beeroth yamo Rimmon tsoeden Baanah ha Rechab to oni vancho. (Beeroth jo Benjamin metalo khanhyala. 3 Hojilo yanchi kyon jiango Gittaim lo tsani oyi sunga vanthakcho, osi ontena jilo vani sicho.) 4 Saul tsorüi thanpoe jo Jonathan tsoe Mephibosheth, Saul ha Jonathan oni chüathüng nzyu mongo tae tssohan tüv vancho. Osi ombona Jezreel yantsü lona opoha omotsü oni chüo ji yivon zoale ombo nijüpvüi jina ombo ejümsi tsantalato nsechi elungi ojo-okhe jaki sicho. 5 Rechab ha Baanah onina khochi Ishbosheth ki wotale nshi etüng harümo chivo jancho osi omboha esana vancho. 6 Osi kipüngo vamo eloe jina otsüng nchialato enga yi yipi sicho, hoji tsükona Banaah ha Rechab onina yingto pyeta rhowotacho. 7 Onina ochüngi rhowothakale, saksak Ishbosheth yipa vamo belüng jilo owo yipa vanathüng ombo lüngthatacho. Hoji süi jo onina kvüri ji woni hantasi zümo tona tsanta Jordan hayi yakchia yitacho. 8 Onina kvüri ji hansi oyi David mesao thüngi yant