Khring Chaanyei Tlou
1 Tlaipang kanrebongnang Tloulhang louklei, Tloulhang heiri Dunpukou louklei, heitoubi tloulhang heiwari Dunpuhak. 2 Tloulhang heiri kyou'rouweini Dunpukou louklei. 3 Airouwei Dunpune put namyerya sheemthutkhou; Airouwei nimakne Dunpuei hutsarap namyerwa heiya khatchatomkhi sheemthutkhoumak. 4 Tloulhang ari khring chaan waiyouna, heitoubi khring chaan heine tlaipang thimi rapnung kwaar yenpi. 5 Kwaar heine albi kmehya waaryerlei, heirou kmeh heine kwaar heiyei alya kouniroukhi mityerchangmak. 6 Dunpurei yenmalhetpikur napawa, aiyei minri John toubi ung, Paocha thimi khat pothutkhou. 7 Ane thimi rapnung kwaar heiyei ngamrou shunthutpikhou, heine thimi namyerni Lhangai Pao-laaya mayekbi uklumrou. 8 Ahakri kwaarri nimak; heiya ane kwaar heiyei ngamrou shunthutpinanungei yongpi. 9 Kwaarhak heiri tlaipangpalla yongbi heirou thimi rapbei doura waaryerlei. 10 Tloulhang heiri tlaipangra louleikhou, heirou Dunpune Airouwei tlaipangya kanrethutyerya hoiyanungkhi, tlaipang thimi rapne Aya mupimak. 11 Ane Ai'rammei thimi rapnung'tlim yongpi, heiya Aiyei thimi rapne Aya loulhakpimak. 12 Heisiya hoiyanungkhi, Aya loulhakbi uklum thimirap namyernung, Dunpuei chanaorap hoichangnanung mantrangya piwurla. 13 Yari tlaipang sharungei yu-cha rapya yenranna heeyei hilthungei nimak, heitoubi thimiyei kningei hilthungei pukkurkhi nimak, heiya Dunpuei kning hilthungei pukkur thimirap. 14 Heitoubi Tloulhang heiwari tlaipang sharung khoine pukbine, kringknale, chimne bilthimni, kaihangra thrungkhoula. Heitoubi Ane Pawa'rouwei phakur, Aiyei khatchatom khoi Chanapawa khat khoine Aiyei thang'al heiwaya kane muphawurla. 15 John'ne Aiyei ngamrou muthungkur heiwaya tlou khoine ane paothutkhou, “Keine shuthutdeinung atoubi kyunri Aiyei ngammei, ‘Keihilla hungbi klei A heiri keiya beimak duiyei tang thimi khat, ngamri A heiri keiya pukbongei waiyoubi louklei thimi.’ ” 16 Heirou Aiyei bil thimbi klei kringpiyei phorya kanungei waiknaine piwurla. 17 Dunpune Moses'nung Tloulamya pikhou, heiya kringpile, chim heirapri Jesu Christa'nung piwurla. 18 Thimi hukhatnekhi Dunpuya muthimakhui, heiya khatchatom khoi, Dunpuei bomra klei Chanapawa heinungtom Ane kanrethutpila.
Yui Luppi John'yei Pao-laa Shunthut
19 Jerusalem'ra klei Jehudi rapbei Upa rapne Suipipu thale Levirap thaya John'yei leinara heimalhetbi, ‘Nangri huwo?’ toubine wangaikyer. 20 Heirou John'ne koukhi karlheimakne mallangbi, tanghakpane louyunthutpikur, “Keiri Messiah nimakme.” 21 Heirouri yane “Heiyanungri nangri huwo? Elijahko?” toubi kngai. “Keiri Elijahkhi nimak,” toubi John'ne loumallangkur. “Heiyanungri nangri Thimkhuiko?” toubi yane hanui ngaithu, “Nimak, keiri Thimkhuikhi nimak,” toubi John'ne loumallangkur. 22 “Heiyanungri nangri huwo, kanungei bei yunpilak,” toubi yane anung kngai. “Kane neiyei kyun heiwari kaya heimalhetkur thimi rapnung pao mallengthunungme. Neiyei ngamrou nangne koutoubi yunkni leileiyo?” 23 John'ne Isaiah thimkhuiyei yunthutkhou heiwaya mintlangbi loukyun, “Keiri ramhangrei ungraochabi karwaicha thimime: ‘Nane Dunpuei chananungei lamya maryengyerlak!’ ” 24 Heirouri Lhangai karsa thimi rapbei heimalhetkur paocha rapne John'nung hanuikhi kngai, 25 “Heiyanungri nangri Messiah'khi nimak, Elijahkhi nimak heirou thimkhuikhi nimakme toulanungri, koutounei nangne miya yui luppikuro?” 26 Heirou John'ne loumallangkur, “Keine yuira luppi, heiya nai hangra nai mitne muphamak thimi khatri mayungbine leilei. 27 A heiri keihilla hungeirouhui, heiya keiri Aiyei horei khorkhang rui thiksutpiyakhi mtikchamaklei.” 28 Lhourap heiri John'ne yui luppina Jordan Kungei kulkung lhangrei klei Bethany'rei thukkurkhou.
Dunpuei Yaoshun
29 Heithangei tlainirou Jesu'ne John'yei leinara wakurya loumubi ane loushun, “Thilak, tlaipangei borhya urpinanungei Dunpuei yaoshun heiri bi arou leiyura. 30 Keine shunthutpiyei kaalnung atoubi kyun ari Aiyei ngammei, touri, ‘Napawa khat keihilla hungleikhui, A heiri keiya duiyei tangthimi, ngamri A heiri keiya pukbongei youbi louklei.’ 31 Keihaknikhi A heiri kounaksi thimi hoiroueiyo touri mukhoumak, heiya keine Aya Israellei thimi rapnung muyernanungei toubine yuira luppinei lhouya toupikhou.” 32 Heirou John'ne muthungkur tlou rapya ane yunthutpikur: “Thangmunrei Lhawaine mathru'nakne yongbi, heirou Aidoura chubi klei heiwaya keine loukmu. 33 Keihakni A heiri huwo touri mukhoumak, heiya keiya yui luppinanungei yenmalhetpikur Dunpune yukshunya keine loumayek, ‘Lhawaine yongchumbi heirou Aidoura chubi klei nangne loumuheirou; heirou Lhawai Khyingne kalhonbi yui luppirouri Ahak heirime.’ 34 Keine heiwaya muwurla, heitoubi keimitdei mukur heiya keine nanungei yunpilei touri Dunpuei Chanapawa heiri Ahakme,” toubi John'ne kyun.
Jesuei Lamkri Ruishikrap
35 Heithangei tlainirou hanuikhi John'ne aiyei ruishikrap napung-khnile kalhonne mayungbi leiyeinung, 36 Jesu'ne chabi kleiya mubi ane kyun, “Thilak, Dunpuei Yaoshun heiri arou leiyame!” 37 Ruishik napung-khnine aiyei kyunya mayeknarou yane Jesuei hilla chanthungkur. 38 Heirou Jesu'ne loukallekbi thinarouri, yane Aihilla heichanthungya Ane loukmu, heirou Ane yanung loukngai, “Nari kouya thiphawo?” Heitounei yane mallangmalom loukngai, “Rabbi, Nangri bi kourou kleiyo?” 39 “Nane wabine thilak,” toubi Ane loumallang. Heisi tounarouri yane Akou kalhonne wabi Aiyei leina bi heiwaya wamukur, (kheen heinungri pung phali dalumma). Heitoubi yane tlaini heirouri Akou kalhonne leiwurkhou. 40 Yaihang heirou napung khat heiri Simonyei nao Andrew. 41 Heirouri ane aiyei tei Simonya munarouri ane kyun, “Kane Messiah'ya muwurlame.” 42 Heisi tounarou ane Simon'ya Jesuei leinara heiruiheikur. Heirou Jesu'ne aya louthibine kyun, “Nangri John'yei chanapawa Simon nimaka! Heiya neiyari ‘Cephas’ toubi ungrouwa.” (Min ari ‘Peter’ toule khatnakdik, heiya mallengthutri ‘thlung’ touya kyun.)
Jesu'ne Philiple Nathanaelya Ungpikur
43 Thangei tlainirouri Jesu'ne Galilee'ra wananungei kartinkur. Ane Philip'ya murilnarouri anungei shun, “Keihilla chanthungalo!” 44 (Philipkhi Andrew'le Peter yakhuntayei leina khukarthil Bethsaida'rei klei thimi.) 45 Philip'ne Nathanael'ya murilnarouri ane kyun, “Kane Moses'yei Chaylamra heirou Thimkhui rapne mayekhounarei kyun thimi heiwaya muwurlame. A heiri Nazareth yultlairei klei Josephbei Chanapawame.” 46 “Nazareth'rei heinaksi lhangaiya thukrouri leileiko?” toubi Nathanael'ne loukngai. “Wabine thilak,” toubi Philipne loumallang. 47 Heirouri Nathanael'ne Jesuei leinara wanarou, Ane loumubi Ai'msha-Aitamei ngamrou loukyun, “Israel thimihakri bi arou leiyame, heirou Anungri klal koukhatkhi makme!” 48 Heirou Nathanael'ne Anung loukngai, “Nangri keiya kousitoubi kmu?” Jesu'ne anung louyunpi, “Philipne neiya ungbongnung nangri khyudhei trung holira louklei Keine neiya mukhou.” 49 “Rabbi, Nangri Dunpuei Chanapawame! Heirou Israellei Krungleime!” toubi Nathanael'ne loumallangkur. 50 Heirou Jesu'ne kyun, “Keine neiya khyudhei trung holira mukhou toubi yunnaroutom nangne Keiya uklumko? Heiya awaya duiyei tang lhou rapya nangne muphaheirouhui!” 51 Heirou Ane yanungei kyun, “Keine nanungei tanghakpane yunpilei: Thangmun laatbi heirou Dunpuei Thangring rapne Thimiyei Chanapawaei doura kyongle-kale karwaichabi klei heiwaya nane muheirou.”
Cana Yultlairou Nulou Markhulnara Kngakei Lhou Toukur
1 Tlaini Khniniyei hillou khyumni tlungkur heirouri, Galilee'yei Cana yultlairou nuruinei markhulyeinung, bi heirou Jesuei puiwikhi loukyao, 2 heirou Jesu'yakhi Aiyei ruishik raple kalhonne nuruina heirouei yaonanungei ungpikur. 3 Heirouri nuruina bi heirou mongnungei darkha yui luilhakurnarou, Jesuei puiwine Anung washunkur, “Yari darkha yui mongnungei makurame.” 4 Heirou Jesu'ne loumallangkur. “Keinungri shunrimakhui, Keiyei kheenri hungtlungmakhui.” 5 Heirou Jesuei puiwine shok rapnung shunmatukur, “Naiyei Upawayei shunmatupikur heirapbei hilthungne nane loutoulak.” 6 Nulounei malchak khangna bi heirou Jehudia rapbei youkna khoine, mathainanungei yui shungmallongna thlungei khanglhong thruktam loudunkhou, khanglhong khat'khatrou yui khangcha somni-somthum duine shunglhak kya. 7 Heirou Jesu'ne shok rapnung shunmatupibi watyilkur, “Nane yuikhangrap heiri yui shukthimlaka.” Heisi tounarou yane khanglhongrap heiri yui bilbil thimni shukthimkur. 8 Heirouri Ane yanung shun, “Arouri nane yuikhangrei yui thacha shorthutbi malkhangnei lhoubom heiyei wattouwa upawanung yenpilak.” Heitounei yane yuikhangrei yui thacha shorthutloubi wattouwa upawanung yenmalanpikur. 9 Heirou ane loumartambi thinarouri, yui heiri asinung darkha yui hollura. Heiya darkha yui heiri koulhangrei klouwo touri ane loumumak (heiyanungkhi shok rapneri kourei shorthutdo touri yane kmu); heirouri ane nu klou cheempuya ungloubi, 10 anungei kngai, “Thimi deineri malchak khangnarei khulbung rapnung lamkrine darkha yuiningya fleithutpiwurbi, yane mongmalipkur hillouri, shukya fleithutpi. Heiya nangneri asilumpha darkha yui ningya loukhouleihuinu!” 11 Jesu'ne lamkrine anaksi kngakei lhou rapya Galilee'yei khukarthil Canara touwurkhoubi, bi heirou thang'alya mutpiwurkhou, heirouri Aiyei ruishik rapne Aya uklumkur. 12 Heihillouri, Jesu'ne Aiyei puiwile, Aiyei teinaorap heirou Aiyei ruishik rapkou pulne Caperna-um'ra wawurbi, heitoubi yane bi heirou tlaini bei leiwurkhou.
Jesu'ne Pukhrumna Cheemra Wachang
13 Heirouri Jehudi rapne Ralthutpinei Kumtlun tlaini hungtlungrou younung, Jesu'ne Jerusalem'ranung yukur. 14 Bi heirou Pukhrumna Cheemwaira thimi rapne hal kyor, yao kyor, heirou mathru kyor heitoubi tuychui leepnananung ombi louklei Ane yumukur. 15 Heitounei ngamrou Ane ruikhuk khat shinbine, Pukhrumna Cheemrei yaorul raple heirou halrul rapkhi namma hulthutkur; heitoubi Ane tuychui leepnanungei loukhou thimi rapbei omna rapkhi thak-dak naimakne khangfletkur, heitoubi tuychui rapkhi thekchekur. 16 Heirou Ane mathru kyor thimi rapnung shunkur, “Nai putcheirap heiwari bi arouwei louthutdurlaka! Keiyei Pawaei Cheemya nane lal'holna keithil hoiyerkur yamakrou!” 17 Heirouri ruishik rapne Khyingei Lailikra mayewurkhou heiwaya tallengne loumayekthutkur, “O Dunpu, Neiya khrumchana cheemwairei lhou toukur heiwane Keiyei malungra meithlanni kangkurnak hoiyura.” 18 Heirouri Jehudi rapbei lhou'urpu rapne Anungei tlou kngai khoine kyun, “Nangne heinaksi lhouya kounaksi toubomthuk leinei ngamrou toukurro? Kai maibongrakhi kngakei hutlha khat mutpilakma!” 19 Heirou Jesu'ne loumallang, “Pukhrumna Cheem awaya thresundabi, heitoubi Cheem awaya tlaini khyumnirou Keine hanui kallengne sabangthurou.” 20 “Cheem heiwaya sabangeinung kum somlile-thrukbil changkurwaya, Nangne tlaini khyumnirou hanui tanghakpane sabangkur manerouko?” toubi yane Anungei loukngai. 21 Heiya Jesu'ne Pukhrumna Cheem ngamrou kyun heiri Aiyei sharungya yunkna. 22 Heisitoubi tlourap heiri Ane khirouwei ringthutkur hillouri, Aiyei ruishik rapne Ane shunthutkhou tlourap heiya mayekthutkur, heirou Khyingei Lailikrei Jesu'ne yunkhou heiri kouweiyo toubi yane uklumkur.
Jesu'ne Tlaipang Thimi Rapbei Ukningya Kmu
23 Arouri Jesu'ne Ralthutpinei Kumtlun tlainirou Jerusalem'ra leikhouyeinung, bi heirou Ane kngakei lhourap touthutnarei muthungkur thimi rapne Aya uklumkur. 24 Heiya Jesu Ai'mshane yaidoura malungam khoumak, ngamri Ane ya namyerwaya muchibi klei. 25 Ngamri bi heirou ya hukhatnekhi Anungei yaingamrou yunthutpinanung tloubomri koukhatkhi mak, ngamri Ane thimi rapbei ukningra ningchabi klei namma muchilei.
Jesu'le Nicodemus
1 Heirou bongnung Lhangai karsa rapbei hangrei Nicodemus toubi ung Jehudi rapbei lhou'urpu khat leikhou. 2 Masa khatnang napawa heine Jesuei leinara wabi kyun, “Rabbi, Nangri Dunpuei yenmalhetpikur Marnopi pume touri keinekhi mulei. Thimi hukhatnekhi Dunpune aya kalhonpikur nimakneri, neiyei toukur kngakkei lhou rapya touchangmaklei.” 3 Heirou Jesu'ne loumallang, “Keine neinung chimhakya yunpilei: Thimi hukhatnekhi aiyei ukningra hanui kallengne ranne pukmakanungri, ane kouniroukhi Dunpuei Krungramya muphachangmakrou.” 4 “Kousitoubi upakur thimine hanui kallengne pukthurouwo?” toubi Nicodemus'ne loukngai. “Ane hanui kallengne puiwiyei ukrilla kachangthubi koutoubi khnui tlungni pukthurouwo?” 5 “Keine neinung chimne yunpilei,” Jesu'ne loushun, “Hukhatnekhi yui heirou Lhawaine pukmakanungri, Dunpuei Krungramra changchangmakrou. 6 Tlaipang thimini tlaipang sharungei pukpikur heiri sharung, heiya Lhawaira pukkur thimi heiri lhawaiyei. 7 Keine neiya hanui kallengne ranne pukthuwalo toubi yunpinarou kngak toupimak. 8 Martheene aiyei thinina lhangra thibi chakur; heirou nane aiyei houyatom loumayekthung, heiya koulhangrei hungbine, koulhangranung thibi chakurro touri nane muthungmak. Lhawairei kallengne pukkur thimi kantangri heinakrimni khoi.” 9 “Heiri koutoubi hoirouwo?” toubi Nicodemus'ne loukngai. 10 Heirou Jesu'ne loushun, “Nangri Jehudia rapbei Marnopipu tangkhat hoibine heiyakhi mumakleiko? 11 Keine neinung chimne yunpilei: Kari kaiyei kmu rapya kyun, heirou kaimitne mukurya kane shunthutpilei, heiya nari kaiyei shunthutpikur lhangaiyei paolaaya hukhatnekhi loulhakpimaklei. 12 Keine nanung tlaipang lhou rapbei ngamrou yunpibikhi nane Keiyei kyunya uklumpimakur heineri, Keine Thangmunrei lhoubom rapya yunpilanungri kousitoubi nane uklum manerouwo? 13 Ngamri Thangmunrei yenmalhetkur Thimiyei Chanapawa nimakne, dei hukhatkhi Thangmunra kamakhui.” 14 Heirou Moses'ne ramhangra frul sheembine heengra khangmlamkur heinakne, Thimiyei Chanapawa heiyakhi khangbaangeirou, 15 heine Aya uklum thimi kantangne klui naimak khringei chaan pharou. 16 Ngamri Dunpune tlaipangpalya heinakchang malungshipi, heitounei Aiyei khatchatom klei Chanapawaya pikur, heineri Aya uklum thimi kantangne mang naimakrou, heiya klui naimakei khring chaan pharou. 17 Ngamri Dunpune Aiyei Chanapawaya tlaipangra pichar touyernanungei yenmalhetkur nimak, heiya kalpiyernanungei yenmalhetkur. 18 Huhune Chanapawa heiya uklummanungri, aya pichar bira klal dayermakrou; heiya Aya uklummak thimi rapyari picharra klal dayerwurla, ngamri ari Dunpuei khatchatom khoi Chanapawaya uklummak. 19 Heitoubi picharyei lhouri anakne hoirou: Kwaar heiri tlaipangra yongura, heiya thimi rapne kwaar heinung'tlimri kmehya duine madu, ngamri yai touthutkur lhourap heiri lhangaimakthil. 20 Lhangaimakei lhouya tou thimi heine kwaarya machinrou, heitoubi a heiri waarnara changnimak, ngamri aiyei lhangaimak lhourap heiri waarnara mutyernimak. 21 Heiya thimi hukhatne chim lhouya toulanungri a heiri warnara wachanglei, heine aiyei toukur chimlhou heiri Dunpuei lhoume toubi mutnanungei wachang.
Jesu'le John
22 Heihillouri Jesu'ne Aiyei ruishik raple kalhonbi Judeaei ramranung chakur; heitoubi bi heirou Ane tlaini bei yakou kalhonne leikhoubi thimi rapya yui lupkhoupi. 23 Heirou John'nekhi Salim'yei pongra klei Aenon'ra yui leinei ngamrou, ane thimi rapya yui lupkhoupi. Ngamri thimi rapne anungei wanarou ane yaya yui luppikur. 24 Kouweiyo toulanungri (Kheen heinungri John'ri kulla chalphopmakhui.) 25 Heirouri John'yei ruishik rapne Jehudia napawa khatle yai youkna hilthungne yui khrephangbi marthingyernei ngamrou tlou yeetrilkur. 26 Heisi tounarouri yane John'yei leinara wabi anung washun, “Marnopi pu, nangne Jordan Kungruiyei kulkung lhangra nangkou kalhonne leiyeinang bi heirou Aiyei ngamrou neiyei shunmatupikur heiso, asinung nangne malummurlako? A heiri asinung yui luppiwurla, heirou thimi namyerwane Anung changura.” 27 Heirou John'ne loukyun, “Thimi hukhatnekhi Anungei Dunpuei pithutkur nimakne koukhatchakhi ane phachangmakrou. 28 Nahakni keiyei yunthutdurkhou heiya muthung thimirap khoine mayungbi leilei, ‘Keiri Messiah nimak, heiya Aiyei maibongra loumalhetkur thimime.’ 29 Nu lourou kyou kartlanga heiri aiyei lounung nangaka heiyei hoirou; heiya kallotir napuinudou heiwine mayungbi ningeinung aishalyei houya loumayekbi nungkngai heinakne, arouri keiri nungkngaini thimmura. 30 Aiyei thangri heisi katduirou, heiya keiyeiri heisi yenkanthritrou.”
Thangmunrei Yongpi Pu
31 Thangmunrei yongpikur Pu heiri nam'rouwei tangdui hoirou. Tlaipangei Pu heiri tlaipangei hoirou, heitoubi ari tlaipangei lhoubomyathil yunrou; heiya Thangmunrei yongpikur thimi heiwari namyerrei thakra leirou. 32 Awari Aiyei mukur, heirou Aiyei mayekkur heiyatom yunrou, heiya thimi hukhatnekhi Aiyei shunthutpikur lhangai paolaaya loulhakpimak. 33 Heiya hukhatne shunthutkur heiya loulhakpila'nungri Dunpuri chimhakme toubi aya suiphobpirou. 34 Dunpuei yenmalhetpikur heiwane Dunpuei tlouyatom yunthutrou, ngamri Dunpune Anungei Lhawaira thimyerpiwurla. 35 Pawane aiyei Chanapawaya malungshipi, heirou Chawaei thang'al hutra namyerwa pilhakurla. 36 Huhune Chanapawaya uklummanungri klui naimak khring chaanya pharou; huhune Chanapawaei shunya hil-thungmanungri khringchaan phamakrou, heiya Dunpuei malungkhaei pichar heiri aidoura leirou.
Jesu'le Samaria'yei Napuiya
1 Arouri Jesu'ne thimirap chungwane malhimloubi yaya yui luppiwurbi John'ya duiyurame tounei pao heiri Lhangai karsa rapne mayekurla touri Ane muwurla. 2 (Chimhakri, Jesu Ahakneri thimi hukhatyakhi yui lupkhoumak, heiya Aiyei ruishik rapnetom yaya yui luppi.) 3 Heirouri heinaksi yunkril heiri Jesu'ne mayekurla, heingammei Ane Judea'yei ramya lakurkhoubine Galilee'ranung kallengkur; 4 heirou Aiyei yenkallengna lamri Samaria'yei ramra yenrallou dakur. 5 Heirouri Ane Samaria ramrei Sychar toubi ung khukarthilla hungtlungkur, khukarthil heiri Jacob'ne Joseph'nung piwurkhou rammei pongra klei. 6 Heitoubi bi heirou Jacobei yuisho klei, heirou Jesu'ne lam tlanarou lahwurnei ngamrou, yuisho pongra omkarngakur. Trum heinungri nunghangtlaikal hoiyura. 7 Bi heirou Samaria'yei napuiya khatne yui shukrou wayeinung, Jesu'ne anungei loushun, “Keinungei yui tha pimonglaklo.” 8 (Heiyei kheenrouri Aiyei ruishik rapne khukarthilla chanung-mainungei lorou louchakur.) 9 Heirou napuiya heiwine loumallangkur, “Nangri Jehudia hoibine, koutounei Nangne Samaria'yei napuiya keirouwei yui mongnungei bukurrawo?” (Ngamri Jehudia rapri Samaria'yei yrengkur yuikeprap heirou daarpang rapkhi yreng-kanlunrilmak.) 10 Jesu'ne anungei loushun, “Nangne lamkrine Dunpuei pikur hutthul heiri kouweiyo, heirou neinungei mongnung yui bubi klei A heiri huwo toubi mulanungri, nangne Anung bubi, heirou Ane neinungei khring chaanyei yuiheiya piwurlarou.” 11 “Upawa,” napuiya heine loukyun, “Nangri yui shorthutnanungei harulkhi shinmaklei, heiya yuiphumri yuklei. Heirou nangne khring chaanyei yui heiri kourei lourou touneiyo? 12 Nangri kanungei yuisho awaya pikhou kai patar Jacob'ya duine tang thimiko? Yuiso arou anekhi, aiyei chanao rapnekhi heirou aiyei ui-waa nammanekhi mongkhou.” 13 Jesu'ne loumallang, “Hukhatne yuisho heirouei yui mongloubikhi, ane hanuikhi yui hatthurou, 14 heiya hukhatne Keiyei pirou kyou yui heiya monglanungri, ari hanui kallengne yuikhat tou naimakarou. Heitoubi Keine anungei pirou kyou yui heiri anungei khring chaanya pinanungei yuiput hoirou, heitoubi yuiput heine anungei klui naimakei rongchanya pirou.” 15 “Upawa,” napuiya heiwine loukyun, “Heinaksi yui heiri keinungkhi pilaklo! Heiyanungri keiri kallengne yui hatmakarou, heirou bi arou keine hanui kallengne yui shukrou wamakarou.” 16 “Nangne cheemra shaalbi neiyei shal rapya hung'ungbine bi ara wathuwa,” toubi Jesu'ne anung loushunkur. 17 “Keiri shal khatchatomkhi makme,” toubi ane loumallang. Heirou Jesu'ne shun, “Neiyei shalri khatchatomkhi mak toubi kyun heiri chimmanu! 18 Heiya nangri napawa napung-phanganung shal dunkhoula, heirou asiyei nangkou kalhonne klei napawa heiri neishal'hak nimak. Neiyei Keinungei yunpikur heiri chimhaklei.” 19 Heirou napuiya heine kyun, “Nangri Thimkhui khatme touri keine muwurla. 20 Heirou keiyei Samaria'yei nutar-patar rapne lhungdoura bi arou Dunpuya khrumkhou, heiya na Jehudia rapneri Jerusalem heiri nai Dunpuya khrumna bihakme toubi yunlei.” 21 Heirou Jesu'ne anung shun, “Napuinu nangne Keiya uklumlak, thimi rapne lhungdou arou nimanung Jerushalem'rakhi Dunpuya khrummaknei trum hungeirou. 22 Heirou na Samaria rapne nai khrumbi klei heiri kouwo touri kanreni mumaklei; heiya ka Jehudia rapneri kai khrumbi klei heiyari mulei, ngamri Kalpipu heiri Jehudia raprei yongpikur. 23 Heiya kheen heiri hungtlungura, bi arou leiyura, heitoubi Dunpuei lhawaiyei mantrangni yongeinung thimi rapne Pawa Dunpuya lhawaine heirou chimmei ukningne khrumheirou. Heinaksiya Ane hoiyerkni. 24 Dunpuri Lhawai heineri Aya khrum thimi rapne lhawaile chimmei ukningne khrumrou.” 25 Heirou napuiya heiwine Anung kyun, “Messiah yongeiroume touri keinekhi mulei, heirou Ane yongeinung, Ane kanungei namyer shunmatupirou.” 26 “Nangkou tlou kallangbi klei Keiri A'hakme,” toubi Jesu'ne anung loumallangkur. 27 Kheen heihakrou Jesuei ruishikrap yenkallengkur, heirou Ane napuiya heile tlou kallangrilbi louklei heiwaya yane chanphakur heirouri beimakne ngakkur. Heiya ya hukhatnekhi napuiya heinung, “Nangri kouya ngaiphawo?” nimanung Jesu'nungkhi, “Nangri napuiya heile koutounei tlou kallangrilkurawo?” toubi ngaithimak. 28 Heisi tounarouri napuiya heine aiyei yuikhang lakurkhoubine khukarthilranung chankallengkur, heitoubi thimi rapnung hungshunpikur, 29 “Wathilak, napawa napung khatne keiyei touwurkhou lhourap nammaya shunthutkur manelei. A heiri Messiah hoimakrouko?” 30 Heisi tounarou yane khukarthilya lakurkhoubi Jesuei leinara wabi thikur. 31 Kheen heirou ruishik rapne Jesu'ya loushunchakur, “Rabbi, Nangri chamailaklo!” 32 Heiya Jesu'ne loukyun, “Keiyeiri nane asinung muphachangmak murchak leileihui.” 33 Heirouri ruishik rapne yaitam ngaikril, “Hukounak khatne Anungei murchak malanpikur yaolarouko?” 34 Heirou Jesu'ne yanung loushun, “Keiyei murchakri Keiya yenmalhetpikur Puwei kning hilthungne lhoutou heirou Aiyei kningne watyilkur khul'lhou heiwaya churbi lhangaine luilhakur heirime. 35 Heirou nanekhi asitoubi yunkril khat klei, touri ‘Tangla tlunphali leibi heihillouri trunwai lukrouwa.’ Heiya Keine nanung tanghakni yunpilei, nane louyao heiya thilak; trunwairap heiri minwurchiya, heirou luknanungei marshikkura! 36 Trunwaiya lukmarkum napawa heiwanung klah-man piwurla, heirou ane klui naimak rongchanyei trunwai lung rapya markumkhoula; heirouri lung tukkur napawa heiwale trunwai lukmarkum napawa yarukhniri pulne haraorouwa. 37 Kyun awari chimhakme touri, ‘Napawa napung khatne lung tuklhaklei, heitoubi napung khatneri trunwaiya luklhaklei.’ 38 Keine naya nai tuklhakhoumakna louyaora lung luknanungei malhetkur, thimi deine bi heirou lhou churlei, heirou naneri yai churkhounarei tungcha phalei.” 39 Heitounei khukarthil heiyei Samaria thimi rapne Jesu'ya uklumkur, ngamri napuiya heiwine asitoubi shunthutpikur, “Ane keiyei touwurkhou lhou rapya namyerwa shunthutpiwurlame.” 40 Heisi tounarou Samaria rapne Aiyei leinara wabi, yakou kalhonne leinanungei shunchanarou Jesu'ne tlaini khnini yakou pulne leiwurkhou. 41 Heiyakhi duine Aiyei shunthutpikur tlou rapya thimi chungwane uklumkur, 42 heirou yane napuiya heinung shun, “Asinungri kane uklum leiyura, neiyei shunthutkur heiyatom nimakne, kaiyei khnane Aiyei yunkur tlou rapyakhi mayekurla, heirou kanekhi muwurla, touri Kalpipu heiri Ahak heirime.”
Jesu'ne Galilee'rei Lhou'urpu Khatdei Chawaya Kna Raiyerkur
43 Jesu'ne bi heirou tlaini khnini leikhoubi heirou Ane Galilee'ranung kakur. 44 Ngamri Ahakne yunthutkhou, “Thimkhui heiyari airamyei thimi rapne rikrai khrumpikhoumak.” 45 Heirou Ane Galilee'ra ka'tlungeinung, thimi rapne Aya louropikur, ngamri yane Jerusalem'ra Ralthutpinei Kumtlun knei yaonanungei kanarou, bi heirou Jesuei touwurkhou kngakei lhourap nammaya mulhakur. 46 Heitoubi bi heirouweini Jesu'ne yuidingya darkha yui holyerna bi Galilee'yei Cana yulthungranung yenkallengkur. Bi heirou Krungei lhou'urpu khatne, Caperna-um'ra aiyei chanapawa heiri nawurame toubi louklei. 47 Heirouri ane Jesu heiri Judea'rouwei Galilee'ra ka'tlungura tounei paoya loumayeknarou, ane wabi Jesu'ya Caperna-um'ra yubine aiyei chanapawaei hikhlangni nabi klei heiwaya bei raiyerpinanungei wa'ungkur. 48 Jesu'ne anung loushun, “Nari kngakei lhouya mubongyenri Keiyari hukhatnekhi uklumpimaklei.” 49 Heirou lhou'urpu heiwane loushunchakur, “Upawa, keicha napawa hiwurbongnung keikou kalhonne keicheemra wapiyase.” 50 Heirou Jesu'ne loushun, “Shaallaka, neiyei chanapawa heiri kna rairouwa!” Napawa heine Jesuei kyun tlou rapya malungammurbi shaalkur. 51 Heirou ane cheemranung kallengeinung lamra aiyei shok rapne aya rorilbine, “Neiyei chanapawaei kna heiri raiyurame!” toubi pao loutampikur. 52 Aicha napawaei kna raiwurnei kheen heiri koulumeiyo toubi ane yanung loukngai, heirou yane loukyun, “Kheen heiri aangui nunghang kanchaitirrei kheenrou aiyei kanchun-kna heiri raikurme.” 53 Heirouri, “Neicha napawaei kna heiri rairouwame” toubi Jesu'ne anungei shunpikur heiri kheen heihakeime toubi aiyei pawane louningthutkur. Heirouri ale aiyei bommaiyei thimi nammane uklumkur. 54 Jesu'ne Judea'rouwei Galilee'ra kakur hillouri, Aiyei kngakei lhou touthutkur heiri awane khnui tlungkur.
Bethzatha Yuisora Kna Raiyer
1 Heihillou Jesu'ne Jerusalem'ra Jehudia rapbei Kumcher khatra yaonanungei wakur. 2 Jerusalem khukarthillei yao markumlhakna shumtrum pongra, Hebrew tlouni Bethzatha toubi ung, yuchangnanung khlak phangatam klei yuiphum khat klei. 3 Yuiphum heiyei yuchangna khlakrap heirou kna thimirap-mitdeo, hodeekrap heirou mnak pangkhat hisundakur thimi rapkhi chungwane neingakbi klei. 4 Bi heirou yane yuiphumrei yui heine katmartlaoya omkngaak, ngamri kounaksi kheenrou Dunpuei Thangring khatne yongbi yuiphumrei yui heiwaya toufyoukhi klei. Heiyei kheenrou kna thimi rapbei hangra yuira yuchumbine lamkriyei thirthungkur thimi heiri, aiyei sharungra koukouwei kna popbi leiyanungkhi tallengne raikur. 5 Bi heirou kum somthumle-chotbil nabi leikur napawa khat louklei. 6 Jesu'ne bi heirou aya mubi, heirou a heiri kum heinak tlane nabi leikur napawame toubi Ane mupibi, heirou Ane anungei kngai, “Neiyei kna heiwaya raiyernileiko?” 7 Heirou kna napawa heine loumallangkur, “Upawa, yui heine kanchekyeinung thirthungnungei keiya ruisundapirou thimiri hukhatkhi mak. Heitoubi keine yuirilla yuchangrou waiyouweinungri, thimi deine kei'maibongra loulamrikur.” 8 Heirou Jesu'ne anung shun, “Kanthoubi neiyei ipna phok heiya urloubi shaallaka.” 9 Heirouri tallengne napawa heiyei kna heiri raiyura; heitoubi aiyei ipna phok heiya shinloubine karwaichayoukur. Lhou heiwaya touthutkurri Mathrilna tlaini hoiwurnarou, 10 Jehudi rapbei lhou'urpu rapne kna raikur napawa heinung shunkur, “Angturi Mathrilna tlaini, heirou angtu nangne ipna phokya urbine lam tlakur heiri kaiyei Chaylamra karha'knaei lhou.” 11 Heirou ane loumallangkur, “Keiyei kna raiyerkur napawa heine keiya ipna phok urbi chawalo toubi keinung shunme.” 12 Yane anungei kngai, “Neiya heinaksi lhou toulaklo toubi shunri huweiyo, kounaksi napawawo?” 13 Heiya kna raikur napawa heiwane Jesuri huwo toubi kanreni mukhoumak, ngamri bi heirou Jesuri thimi hukhatyakhi muthungyermakne munne karlheithutkur. 14 Heihillouri, Jesu'ne aya Pukhrumna Cheemwaira murilbine, heirou anung shunkur, “Louninglak, arouri neiyei kna heiri raiyura, heine asinungri borhyei lhou toumaka, nimanungri neinungei heiwaya duine thuithi kna popthurou.” 15 Heirouri napawa heine shaallurbi, heitoubi ane Jehudi rapbei lhou'urpu upa rapnung aiyei kna raiyerkur napawa heiri Jesume toubine shunthutpikur. 16 Heisi tounarouri yane Jesu'ya marhotyoukur, ngamri Ane kna raiyernei lhou heiri Mathrilna tlainirou touwurnei. 17 Heirou Jesu'ne yanung loushunkur, “Keiyei Pawari tlainiser lhou churbi leilei, heine Keikhi heinakrim lhou churrou da.” 18 Heirou Jesu'ne heinaksi tlouya yunnarouri, Jehudi rapbei lhou'ur thimi rapne duine Aya hatnikur; Ane Mathrilna tlainiyei tloulamya toubaikurthil nimakne, heiya duine Ane Dunpuya Aiyei Pawame toubikhi yunthutkur, heirou Ahakkhi Dunpule malkname toubi yunthutdurnei.
Chanapawaei Mane-Mantrang
19 Heitounei ngamrou Jesu'ne yanung loumallangkur, “Keine nanungei chimne yunpilei: Chanapawane Ai'msha-Aitamnungri koukhatkhi touchangmak; heiya Aiyei Pawaei toubi klei heiyatom Ane toumane. Pawane toubi klei lhou heiyatom Chanapawanekhi toulei. 20 Ngamri Pawane Chanapawaya malungshipi, heine Aiyei toubi klei namyerwa heiya anungkhi mutpilei. Ane heiya duiyei tang lhou rapyakhi aya touyernanungei mutpiheirou, heirou nane ngakeirou. 21 Pawane hikur rapyakhi ringthutyerbi heirou yanung khringchaan pikurnakne, Chanapawanekhi aiyei hoiyerkni thimi rapya khringchaan piheirou. 22 Pawanekhi thimi hukhatyakhi pichar toupimak, heiya Ane Aiyei Chanapawanung mane-mantrangle kalhonne pichar touyernanungei pilhakurla. 23 Heini yane Pawaya rikrai khrumnakrim Chanapawa heiyakhi rikrai khrumpirou. Hukhatne Chanapawaya rikrai khrumpimanungri, a heine Chanapawaya yenmalhetpikur Pawayakhi rikrai khrumpimaklei. 24 Keine nanungei chimne yunpilei: Hukhatne Keiyei kyun tlou rapya ninglhakbi, heirou Keiya yenmalhetpikur heiya uklumkur thimirap heiri klui naimak chaan pharou. Ayari kouniroukhi pichar toupimarou, heiya a heiri khirouweini ringnara ralthutpiwurla. 25 Keine nanungei chimne yunpilei: kheen heiri hungtlungura, heirou trumkhi lhungura touri hikur thimi rapne Dunpuei Chanapawaei houya loumayeklanungri, heirou hou heiya mayekkur thimi rapne khirouwei ringthutthurou. 26 Heitoubi Pawane khringei chaanya yenyouna hoinakne, heinakrim Ane Aiyei Chanapawa heiyakhi khringei chaan yenyouna hoiyerlei. 27 Heirou Ane Aiyei Chanapawaya picharpu hoiyerwurla, kouweiyo toulanungri Ari Thimiyei Chanapawa. 28 Asi yunnarou nane kngak toupimak, hikur thimirap nammane aiyei houya loumayeknei kheen hungeirou. 29 Heirouri yaiyaiyei lhanrilrei loukanthouweirou; heirou lhangaiyei lhou touwurkhou thimi rapne ringthutbi khring chaan pharou, heitoubi lhangaimak lhou touwurkhou thimi rapri ringthutbi yari pichar bira changrou.”
Jesu'nung'tlim Myung Thimirap
30 “Keine Keitamyei kningne lhou touchangmak; heitoubi Keiri Dunpuei shunpikur heiyatom pichar toulei, ngam heine Keiyei pichar awari chim, ngamri Keine keitamtomei kningya hilthungne pichar toumak, heiya Keiya yenmalhetpikur Dunpuei kningya Keine toubi leilei. 31 “Keine keitamtomei ngamrou tlou yunlanungri, keitamyei kyun ari chimme toubi mine uklumpimakrou. 32 Heiya keinung'tlim tlou yunpirou thimi napung khat leileihui, heirou ane keingamrou tlou yunthutpi heiri chimhakme touri Keine mulei. 33 Nane naiyei paocha thimi rapya John'yei leinara heimalhetnarou ane chimmei tlouya loushunpikur. 34 Heiya thimi napung-khatdei kyuntlou heiya chimme toubi klou nimak, heiyanungkhi Keiyei kyun ari naya kalpinanungei houme. 35 John'ri meisharnak alkhou, heitoubi nane kheen bei aiyei kwaar heirou leikhou. 36 Heiya John'yei tlou mayungpiya duine tangkur Keitamei tlou mayungkhi Keine pilei: Keiyei toubi klei ari Keiyei Pawane Keinung piwurkhou lhourap heiya Keine churbine leilei, Pawane Keiya yenmalhetpime toubine lhourap heine muyerlei. 37 Heirou Keiya yenmalhetpikur Pawanekhi Keiyei ngamrou mayungpilei. Naneri Aiyei houya nimanung Aiyei shakrung heikhi kouniroukhi muphamakhui, 38 heirou nane Aiyei paolaa heikhi nai ukningra loulhakpimak, ngamri nane Aiyei yenmalhetpikur heiwaya uklumpimaklei. 39 Naneri Dunpuei Khying Lailik rapya marnolei, ngamri nane tlourap heirouwei khring chaanya pharoume toubi nane uklumlei. Heineri Khyingei lailik heihaknekhi Keiyei ngamrou yunthutlei! 40 Heiya hoiyanungkhi nane Khyingei chaan heiya phananungei changnimak. 41 “Keiri tlaipang thimi rapbei kanthangpikur heiya madu nimak. 42 Heiya nari kounaksi thimi rapbo touri Keine mulei, heitoubi nai ukningra Dunpuya malungshi makleime toukhi Keine mulei. 43 Keiri Pawayei mane-mantrangle kalhonne yongpi, heiya nane Keiya loulhakpimaklei; heitoubi hunak khatne aitamei minra yonganungri heinangtom nane aya loulhakpirou. 44 Nari khatne khatdei mathangpi heiyatom madulei, heiya nane Dunpuei khatchatom khoiyei mathangpi heiya madumaklei; heiya naneri kousitoubi Keiya uklum'rouwo? 45 Keine naya Keiyei Pawayei bomra klal theibaangpiroume toubi ningchapimak. Heitoubi naneri naya klal theibangpirou kyou Moses'yatom malungambine leilei. 46 Heini nane tanghakni Moses'ya malungamma'nungri, nane Keiyakhi malungamrou, ngamri ane Keiyei ngamrou mayekhoupilei. 47 Heiya nane aiyei mayethutkhou heiwaya malungampimakneri, Keiyei kyun tlou rapya koutoubi nane uklumkur manerouwo?”
Jesu'ne Thimi Lishing-Phangaya Pichakur
1 Heiyei hillouri Jesu'ne Tibaria toubikhi ung Galilee'yei samadru heiralbi wakur. 2 Bi heirou thimi chungne Aiyei hilla heichanthungkur, ngamri Ane kna thimirap kounakya kna raiyernei kngakei lhou toukurya yane mukur. 3 Jesu'ne aiyei ruishik rapkou kalhonbi lhungdoura kabine om'mathrilkur. 4 Heirouri Ralthutpinei Kumtlun kheenkhi yennakkura. 5 Bi heirou Jesu'ne karhilni thinarouri, thimi chungwane aiyei leinara wakar'umkur heiya Ane loukmu, heisi tounarouri Ane Philip'nung kngai, “Thimichung heiya picha-pimai'nungri kourei louserouwo?” 6 Tlou heiri ane Philipbei ukningya thinanungei kyuntomni, heiya Ane kou tourouwo touri lamkrine Ane mubi klei. 7 Heirou Philipni loumallangkur, “Thimi napung kantangne thathacha shainungei mumtol lolanungkhi tuyri macha'khni duine changrou.” 8 Heirou Aiyei ruishik Simon Peterrei naowane kyun, 9 “Bi arou gehuei mumtol tum phangale thanga khintamcha kyao napawa-douwa khat leileime. Heiya heichatomniri thimi heinak chungwanungri romakroume.” 10 “Thimi rapya tingtou doura omyerlaka,” toubi Jesu'ne shun. (Bi heirou tingtou chungwane pukbi klei.) Heisitoubi thimi rapya tou'omyerkur; bi heirou kleiri thimi lishing-phangayei mal phalei. 11 Heirouri Jesu'ne mumtol loubine Ane Dunpuya mathangkur, heitoubi bi heirou ombi klei thimi rapnung yerpinanungei malanpikur. Heitoubi ane thanga rapkhi heinakrimni yerpikur, heirouri thimi rapne yaiyaiyei kropilne, ukthone chaamaikur. 12 Heirou yane ukthowurchi hillouri, Ane Aiyei ruishik rapnung shun, “Shai'maleikur mumtolle thanga haarrap heiri markumlaka; maleirap heiri hangwalne khingurmakase.” 13 Heisi tounarouri yane mumtol tum phangarei thimi rapne ukthoni shailoubi, heiyei maleikur harrap heiri shangphai chiple-khni bilbil thimni markumthungkur. 14 Heirou Jesuei touthutkur kngakei lhou heiya munarouri, bi heirou klei thimi rapne kyun, “Tanghakpane tlaipangpal arou yongrou kyou Thimkhuiri ariyalei!” 15 Heirouri thimi rapne aya manbi Krung hoiyerrou waiyouleime toubi Jesu'ne muwurnarouri, ane bi heirouwei lhungdouranung chutkur.
Jesu'ne Yuidoura Honi Karwaicha
16 Heinirou yenrawaikur heirouri, Jesuei ruishik rapne samadruranung yongchumkur, 17 heitoubi yane malira wachangbi, heirou samadru heiralwurbi Caperna-um lhangranung kallengkur. Heirou masa yentheengkur ramphane Jesuri yaileinara hungthukmakura. 18 Kheen heirouri lhimnung kathukkurnei ngamrou yuilhoukhi katyoukur. 19 Heirou ruishik rapne mali heiri lamtup khyum-phali'yeimal yenhulbi hungeinung, Jesu'ne yuidoura Aihoni chabi yailhangra yenkarnakkur heiri yane loumukur, heirouri yane kalthi chikur. 20 Heitounei Jesu'ne yanung, “Nari chimaklo, keime!” toubi shunkur. 21 Heitounarou yane malungambine aya malira lourobi unglhakpikur, heitoubi tallengne mali heiri yai kartinbi yenchaheina bi heirou hungtlungkur.
Thimi Rapni Jesu'ya Rapha
22 Heithangei tlainirouri samadru ruira kartilbi klei thimi rapne mayekthutkur touri bi heirou mali khatpitom leikhou. Heirou Jesuri mali heiwirou tungmak, heiya Aiyei ruishik raptom tungbine shaalkur, heitoubi ayari lakurkhoulame touri yanekhi kmu. 23 Heitoubi mali deiri Tibarias'rei wabi, Jesu'ne Dunpuya mathangbi mumtol pishaikur thimirap chungwane kartilkhouna bi shirui heirou wamathrumkur. 24 Heirou thimi rapne bi heirou Jesule Aiyei ruishik rapri makurame toubi munarouri, yane malira wachangbi heitoubi Caperna-um lhangra, Jesu'ya rapharou wakur.
Jesuri Ringnanungei Mumtol
25 Thimi rapne Jesu'ya samadruei khatlhang mnakra raphamukur heirouri, yane Anung kngai, “Upawa, Nangri bi arou koulumei wa'tlungkurawo?” 26 Heirou Jesu'ne loumallangkur, “Keine nanungei tanghakni yunpilei: Nane Keiya raphakur awari, Keiyei kngak lhou toukur heirapya mulhakurnei ngammei nimak, heiya nane mumtolya ukthoni shailounei ngammeime. 27 Leemne dongurou kyou lhangaimak murchak heinung'tlim chanchabi lhou toumak; heinung'tlimri nane klui naimak rongchanyei khring murchaknung'tlim lhou churlak. Anaksi chamairi Thimiyei Chanapawane nanungei piheirou, ngamri Pawa Dunpune Aidoura yapiwurla.” 28 Heingammei yane Anung kngai, “Heiyanungri Dunpune kaya touyerkni heiya tounanungei kane kouya touserouwo?” 29 Heirou Jesu'ne mallangkur, “Dunpune naya touyerkni heiri Aiyei yenmalhetpikur heiwayatom malungamyerkni.” 30 Heirou yane loukyun, “Heiyanungri Neiya kane malungam'nungei Nangne kounaksi kngak lhouya kanungei toupirouwo? Heirou nangne kouya toupirouweiyo?” 31 “Bongnungri kai nutar-patar rapne ramhangra manna chamaibi leikhou, heirou Khyingei lailikni kyunnakrimni, ‘Ane yanung Thangmunrei shainung mumtolya yukpisundakhou.’ ” 32 “Keine nanung chimne yunpilei,” toubi Jesu'ne shun, “Moses'ne nanungei Thangmunrei mumtol yukpikhou nimak; heiya Keiyei Pawane Thangmunrei mumtolya nanungei pikhou. 33 Kouweiyo toulanungri, Dunpuei pikur mumtol heiri Thangmunrei yongchumbine, tlaipangpalnung khringchaan yenpikur A heiwarime.” 34 Heitounei yane anungei kngai, “Upawa, heinaksi mumtolya kanungei karyomne pilaklo,” toubi buchakur. 35 Heirou Jesu'ne yanung loushun, “Keiri khring chaanyei mumtol'hakme, Keinung wachangkur thimi heiri msultou naimakarou; heitoubi Keiya uklum thimi heiri yuikhat toukhi naimakarou. 36 Asinungri Keine nanungei yunpiwurla, touri nane Keiya muwurla, heiya malungampimak. 37 Keiyei Pawane Keinungei pilhakur thimi kantangne keinungei wachangrou, heitoubi keinungei wachangkur thimi kantangya Keine khingthutpimarou, 38 ngamri Keine keitamyei kningya tounanungei Thangmunrei kyong nimak, heiya Keiya yenmalhetpikur Aiyei kningya Keine tourou. 39 Heirou Keiya yenmalhetpikur heiwayei kningri kouweiyo toulanungri, Ane keinungei pilhakur thimirap namyerwaya khatchakhi maangyernung yamaklei, heiya Keine ya namya kluiyei tlainirou khringei chaanra ringthutyerheirou. 40 Ngamri Keiyei Pawane touyerkni heiri kouweiyo toulanungri Aiyei Chanapawaya mubi heirou aya uklum thimirap namyerwaya khringei rongchanya phayerkni. Heirou Keine yaya kluiyei tlainirou khringei chaanra ringthutyerpirou.” 41 “Keiri Thangmunrei yongchumpi mumtol” toubi Ane yunnarou, thimi rapne aingamrou kalthi yanimakne yunrilyoukur. 42 Heitounei ngamrou yane kyun, “Napawa heiri Josephbei chanapawa nimakeiko? Kane aiyei pui-payakhi muchilei. Heiyanungri koutounei asinungri ane Thangmunrei kyongme toubi yunthutkuraeiyo?” 43 Heirou Jesu'ne yanung loumallangkur, “Naitamne yeetkril heiri donglaka. 44 Kouweiyo toulanungri Keiya yukmalhetpikur Pawane napung-khatya keinungei heiruilhakpikur nimakne, thimi hukhatnekhi keinung wachangkur manemakrou; heirou kluiyei tlainirou Keine aya ringthutyerrou. 45 Thimkhui rapne asitoubi mayekhoulei, ‘thimi kantangya Dunpune marnopirou.’ Dunpuei kyunya ninglhakbine, heirou airouwei marnoloukhei thimi heiri keinung wachangrou. 46 Heisi toubine a heine Pawaya muwurla touneikhi nimakhui; heiya Dunpuei hoikur thimi heitomni Pawaya muphawurla. 47 Keine nanungei chimne yunpilei: Uklum thimini klui naimak khringchaan pharou. 48 Keiri khringchaanyei mumtol heirime. 49 Naiyei nutar-patar rapne ramhangra Manna chamaikhou, heiya yari hiwurthu. 50 Heiya Thangmunrei kyong mumtol heiri anaksime touri huhune mumtol heiya shailoukur thimi heiri hikur naimakarou. 51 Keiri Thangmunrei yongpikur khringei mumtol heiwari. Huhune mumtol heiya shailanungri, a heiri himakrou. Keine anungei piroukyou mumtol heiri Keiyei sharung heirime, Keine heiya piwurbi tlaipangne khring chaan pharou.” 52 Yane tlou heiya yeetrilwurbi yaihangra malungkharilkur. “Kousitoubi napawa heiwane aiyei sharungya chamainungei kanungei pirouweiyo?” toubi yane kngai. 53 Heirou Jesu'ne yanung shunkur, “Keine nanungei tanghakni yunpilei: Thimiyei Chanapawaei sharungya chamaimanung, heitoubi Aiyei heeya mongmanungri, nanungei khringei chaan tou heiri makrou. 54 Huhune Keiyei sharungya chamailanung, heirou Keiyei heeya monglanungri, anungei khringei chaan leirou, heitoubi Keine aya kluiyei tlainirou ringthutyerpirou. 55 Ngamri Keiyei sharung ari chimmei murchak, heitoubi hee ari chimmei mongnungei murchak. 56 Huhune Keiyei sharungya chamaibi, heitoubi Keiyei heeya mongloukur thimi heiri Keinungei klei, Keine anungei klei. 57 Ringbi klei Pawane Keiya yenmalhetpi, heirou Aingammei Keikhi ringbi klei. Heinakrimni huhune Keiya chamaikur thimi heiri Keiyei ngamne akhi ringrou. 58 Heiyanungri, Ari Thangmunrei kyong mumtol: Mumtol heiri nai nutar-patar rapne chamailoubi, heitoubi hikur heinaksiri nimak. Mumtol heiwaya chamaikur thimi heiri klui naimakne ringrou.” 59 Tlou ari Jesu'ne Caperna-um'yei Pukhrumna Cheemra marnopiwurkhou.
Klui naimak Khring Chaanyei Tlourap
60 Aihil chanthung thimi chungne Aiyei tlou heiya mayeknarouri yane yunrilkur, “Aiyei marnopikur heiri beimak lulei. Huni heiwaya ninglhak manerouwo?” 61 Yaihangra tlou heiyei ngamrou kalthi yeetrilbi leikur heiya ya hukhatnekhi anungei yunpimanungkhi, Jesu'ne muwurbi Ane yanung kyun, “Keiyei kyun tlou awane nanungeiri keihilla chanthungnanungei klu hoinaleiko? 62 Heiyanungri, Thimiyei Chanapawane haallei Aiyei leikhounara kallengkurya nane muphaheirouko? 63 Heirou khringei chaanya yenpiri Dunpuei Lhawai heiya tlaipangei mane-mantrang heine koukhatkhi karsukmakarou. Keine nanungei yunpikur tloulhangrap heiri Dunpuei khringchaanya yenpikur Lhawai heirime. 64 Heiya hoiyanungkhi na hukounakne heiya malungampimaklei.” (Jesu'neri, kyou'rouweini hunekhi aiyei kyunya uklumpimakrou, heitoubi hune Aya yorrouwo touri kmu.) 65 Heirou Ane hanuikhi yenyunthu, “Heiyei ngamhakrou Keine nanung yunpiwurkhoula touri, Pawane heihakya tounanungei hoiyerkur nimakne hukhatnekhi keinung wachangmakrou.” 66 Heiyei ngamne, Jesuei hilthung thimirap chungwane hil kallengurbi, hukhatnekhi akou kalhonne chamakeirouhui. 67 Ngam heine ane aiyei ruishik chiple-khninungkhi kngai, “Heitoubi nanekhi Keiya lakkurkhoubi shaalnileiko?” 68 Heirou Simon Peter'ne loumallang, “Upawa, kane neiya lakurkhoubi huileinara charouwo? Neinungri klui naimakei tloulhang klei. 69 Heirou kane neiya malungamlei, kane muwurla touri nangri Dunpurei kyong Khying Puhakme.” 70 Heirou Jesu'ne loushun, “Keine na napung chiple-khniya khalthutkur nimakeiya? Heiya hoiyanungkhi naihangrei napung-khatne khril lhangaimak thimi hoileihui!” 71 Ane Simon Iscariotyei chanapawa Judas'yei ngamrou yunkur, ngamri Judas heiri, ane ya napung chiple-khniyei hangra yaothimi hoiyanungkhi, ane Jesu'ya yorchaeirouhui.
Jesu'le Aiyei Teinaorap
1 Heihillou Jesu'ne Judea'yei ramra chanemaknei ngamrou, Ane Galilee'yei ramranung chakur; ngamri bi heirou Jehudiyei lhou'urpu rapne Aya hatninei ngaakbi louklei. 2 Heirouri Jehudi rapbei Pukhrumna Cheemchangnei Knei tounanungei kheenkhi yennakura, 3 heitounei ngamrou Jesuei teinaowa rapne Anung kyun, “Nangne bi aya lakurkhoubi Judea ramra wawalo. Heitoulanungri neihil chanthung thimi rapne neiyei toubi klei lhourap heiya mupharou. 4 Thimi napung-khatne ai'mshaya khulbung karshilyernianungri, huyakhi muyermakne munne lhou toumaklei. Heini nangne heinaksi lhou rapya toubi klei heiya mubi, tlaipang thimirap nammane neiyei ngamrou mulaksu!” 5 (Kheen heinungri aiyei teinaowa rapnekhi ayari uklumpimakhui.) 6 Heirou Jesu'ne yanung shun, “Keiyei kheen hungtlungmakhui, heiya nanungeiri karyomne hunglhungbi leiyura. 7 Tlaipangni nayari karhalmaklei, heiya Keiyari kalthi karhallei, ngamri Keine aiyei lhangaimak lhou toubi klei heiya karyom shunthutpikur. 8 Nane Pukhrumna Cheem changnei Knei heirou yuyaowalo, heiya Keiri bi heirou yumarou, ngamri keinungei kheen heiri hungtlungmakhui,” 9 Ane asi yunbi Galilee'ra yarekkur.
Jesu'ne Pukhrumna Cheemchang Knei Kyao
10 Aiyei teinao rapne Knei heirou yaonanungei yukur hillouri, Jesukhi yukur; heiya Ane thimi deiya muthungyermakne munne yukur. 11 Knei bi heirou Jehudi'yei lhou'urpu upa rapne aya thiphabi, “A heiya kourangawo?” toubine ngaiphakur. 12 Heirou thimi chung rapbei lhakra aiyei ngamrou munne kalthi rakalrilkur, heirou thimi thane, “Ari lhangai thimime,” toubi kyun, heiya thimi thaneri, “Nimakme, Ari lhangaimak thimime, A heiri miya lam tamungkyer thimime,” toubine yunrilkur. 13 Heiya thimi hukhatnekhi aingamrou baora khyingne yunthutchangmak. Ngamri yane Jehudiyei lhou'ur upa rapya chirilkur. 14 Heirou Knei heiri tlailam hungphayei kaalnung Jesu'ne Pukhrumna cheemra polhakbi marnopi waiyoukur. 15 Heirouri Jehudiya rapbei lhou'ur upa rapne kalthi ngakurbi heirou yane yunrilkur, “Napawa heiwane koukhatkhi marnomakne kousitoubi Ane heinaksi tlou rapya shunmatupi manekurreiyo?” 16 Heirou Jesu'ne loukyun, “Keiyei marnopikur tlourap ari keitamtomei mukheiya marnopi nimakme, heiya Keiya yenmalhetpikur Dunpurei Keine phabine marnopi. 17 Dunpuei touyerkniya toubi klei thimi rapne Keiyei marnopikur ari Dunpu'reiyo nimanung keitamtomei mukheiyei yunthutdo touri murou. 18 Thimi hukhatne aitamei mukheine yunthutkur heiri aitamei thangya kanyerchane thimiso. Heiya aya yenmalhetpikur Pu heiwayei thangya kanyerpi'kni thimi heiri ukning khying thimiso, heitoubi anungei klal touri koukhatkhi makrou. 19 Moses'ne nanungei Tloulamya pikhou nimaka? Heiya na hukhatnekhi aiyei tloulamya chanthungpimaklei. Heiyanungri kousi toubi nane Keiya hatnanungei wairaangkurawo?” 20 “Neinungei lhangaimak krao leinei ngammeime. Heirou hune bi arou neiya hatnanungei waikrang leileiyo?” toubi thimi rapne loumallangkur. 21 Heirou Jesu'ne loukyun, “Keine kngakei lhoukhat toupinarouri, na namyerwane ngakur. 22 Mosesrei nimanungkhi (bongei nutar-patar rapbei chaanrei louyounakhou khoine), ane nanungei chay pibine heirou nane Mathrilna Tlainirou naiyei chanapawa rapya murdannei lhou toukhou. 23 Heisitoubi napawacha khatya Mathrilna Tlainirou murdinyei lhouya toupinarou Moses'yei Chaylamra koukhatkhi karhamanungri, heinakrimni Keinekhi Mathrilna Tlainirou napawa khatya kna buldampinarou nane Keidoura malungkhapinung bomri kou leileiyo? 24 Heitoubi nane baorei shakrungya thibine pichar touya lakurkhoubi, chimmei picharya toulaklo.”
A Heiri Messiahko?
25 Heirou Jerusalem'rei thimirap thane wakyun, “Jehudi rapbei lhou'ur upa rapne hatnanungei wairaangkur napawari heiwari nimakeiko? 26 Thilak, Ane thimi chungna hangra shunmatubi leileime, heiya ya hukhatnekhi aiyei kyunya loumallangmaklei! Heirou yanekhi A heiri Messiahme touri muwurnei ngammei hoikurako? 27 Heiya Messiah'ne yongeinungri koulhangrei yongrouwo touri thimi hukhatnekhi mumakrou. Heirou ka nammaneri napawa heiri koulhangrei kyongo touri muchilei.” 28 Heirou Jesu'ne Pukhrumna Cheemra heisi shunmatupibi leiyeinung, Ane hou chouni kyun, “Tanghakni nane Keiya muleiko, heirou kei ari koulhangreiyo toukhi muleiko? Heirou Keiri keitamtomei kningne kyong nimak, heiya Keiya yenmalhetpikur pu chimkhat leilei, heitoubi naneri Aya mupimaklei. 29 Heiya Keineri Aya mulei, ngamri Keiri airouwei kyong, heirou Keiyari Ane yenmalhetpikur.” 30 Heirouri yane Aya mannanungei wairaangkur, heiya thimi hukhatnekhi churmanrouri manemak, ngamri Aiyei kheen heiri hungtlungmakhui. 31 Heiya thimi rapne Aya malungamnei yane kyun, “Messiahni hungeinungri napawa awaei touthutkur kngakei lhou rapya duine toumaneheirouko?” Raallui rapya Heimalhetbi Jesu'ya Mannungei Wairangkur 32 Heirouri thimi rapne Jesuei ngamrou yunkrilya lhangai karsa thimi rapne mayeklhakurbi, heirou yane Suipipu raple yarilbi raallui rapya heimalhetbi Jesu'ya mannanungei wairaangkur. 33 Heirou Jesu'ne loukyun, “Keiri nakou lepcha leikalhonkhoubi, heirou Keiya yenmalhetpikur Puei bira Keine charouwa. 34 Heirou nane Keiya thipharou, heiya nane Keiya muphamarou, ngamri Keiyei charou youna ramra nane chachangmakrou.” 35 Heirouri Jehudiyei lhou'ur upa rapne yaitam yunrilkur, “A heiri kouranung charou waiyoukurawo? Nimanung kane aya rapha muchangmaka'rouko? Nimanungri Ane kai thimi rapbei leina Greekyei khukarthilranung chawurbi, Greek rapnung marnopirou marshikkurako? 36 Heiya aiyei kyunri, kane aya thipharou heiya muphamakrou toulei, heirou kane aiyei leinarakhi chachangmakrou toulei. Heiyanungri aiyei kyun heiri kouwo?”
Khringchaan Phayerna Tuyshir
37 Heirou Knei yenluilhakna lilkhoi tlainirou Jesu'ne mayungbi hou chouni kyun, “Huhune msul-yuihat yaowanungri, keinungei wabi monglaksu. 38 Khyingei Lailikra yunkhounakne, ‘huhune Keiya uklumlanungri, khringchaan phayernei yuiput heiri aiyei malungrouwei heikungthutrou.’” 39 Jesu'ne tloubom heiri Aya uklumkur thimi rapne phanungei Lhawai Khyingei ngamya kyun. Heiya kheen heinungri Lhawai Khyingri pikhoumakhui, ngamri kheen heinang Jesuri thang'alra ringthutmakhui.
Thimi Rapbei Hangra Lhang-Lhang Da'kril
40 Thimi rapbei hangra ya thane aiyei kyunya mayeklhakbi heirou yane kyun, “Napawa heiri thimkhuileisame!” 41 Heirou thimi deine kyun, “Ari Messiahme!” Heiya dei thane kyun, “Messiah'ri Galilee ram'rouwei hungthukrou nimakme.” 42 Khyingei Lailikra atoubi yunkhoulei, “Messiah heiri Krung Davidyei shullamrei hungthukrou, heitoubi Davidni thrungkhouna Bethlehem khukarthilla pukrou.” 43 Heisi toubine thimi rapbei hangra lhang-lhang darilkur. 44 Bi heirou thimirap thane aya mankni, heiya hukhatnekhi aidoura hut lamthutbi manchangmakur.
Jehudi Lhou-Urpu Rapbei Uklum Mak
45 Heirouri raallui rapne yenkallengeinung, Suipi pu raple lhangai karsa rapne loukngai, “Koutounei nane Aya yenmanheimako?” 46 Raallui rapne loumallangkur, “Thimi hukhatnekhi napawa heiwaei kyun tlounak yunmakhuime!” 47 “Ane nayakhi marmulkhurako?” toubi lhangai karsa rapne yanung loukyun. 48 “Jehudi lhou'urpu rapbei hangrei napung-khatne nimanung lhangai karsa thimi napung-khatne aya uklumkurya nane muwurnatam leiyurako? 49 Anakei khulbung kulyom awane Moses'yei Tloulamya mumakhuinito, heitounei ngamrou ya namyerwari Dunpuei manchona daakra leiwurchiyame!” 50 Haalnungkhi Jesu'ya murillou toubi wakhou Lhangai karsa rapbei hangrei Nicodemus toubi ung napawa heiwane mideinung kyun, 51 “Chaylamyei hilthungneri kane thimi napung khatya, aiyei kyunya mayek'bongnung heirou ane kouya touwurkhoulawo toubi raphathutmakne aya klal dayernungri yamak.” 52 Heirou yane loumallangkur, “Heiyanungri lhangaiya, nangkhi Galilee'rei thimiko? Khyingei lailikya pathilak, heirou nangne murou touri Galilee'rouweiri hu thimkhui khatkhi hungthukmakrouso.” 53 Heirouri thimi rapne ai'aiyei cheemranung minung-minung shaalkur.
Napawa Khatle Ipmalnabi Klei Napuiya Khatya Kman
1 Heiya Jesuri Olive lhungdouranung kakakur. 2 Heitoubi thangei tlainirou ningshun manma Ane Pukhrumna Cheemra yenkallenglhak. Heirou thimi nammane Anungei loukar'umkur, heirouri Ane ombine shunmatupi waiyoukur. 3 Kheen heirou Chaylam marnopi pu raple lhangai karsa thimi rapne napawa khatle chorit naimak borhrei lhoutou napuiya khatya yenmanheibi heirou yane aya ya nammaei maibongra mayungyerkur. 4 Heitoubi yane kyun, “Upawa, napuiya ari kanthringei lhouya toubi louleirarei kane aya mankurme. 5 Kaiyei Chaylamra Moses'ne atoubi yunkhou klei touri anaksi napuiyari thlungne khinghatlaklo toulei. Heiya nangne arou kousi yunkni leilei?” 6 Yane Jesu'ya chaangra mannanungei heinaksi tlouya yunbine Aya klal dayernanung wairaangkur. Heiya Ane thleira shikhuplhakbi Aiyei hutmayungni yukmayekur. 7 Heitoubi yane bi heirou mayungbi Anungei tlou ngaiyeinung, heirou Ane katmayungbi yanung kyun, “Naihangra borhyei lhou tekkhi toumakme toubi klei thimi heiwane napuiya heiwiya thlungne heikhingrilak.” 8 Heitoubi hanuikhi Ane thleira shikhuplhakbi yukmayethu. 9 Heirouri yane Aiyei heitoubi kyunya mayeknarou, yane upa'rouweini douwathang knaine khat-khat waiknaine heishaalkur, heitoubi bi heirouri Jesu'le, napuiya heiwitom Aiyei maibongra mayungbine leithungkur. 10 Heirou Jesu'ne katmayungbi napuiya heiwinung kngai, “Yari kourangachiya? Ya hukhatnekhi neiya klal theibangpinungei leithungmakurako?” 11 “Hukhatkhi leithungmakura, Upawa,” toubi ane loumallang. “Heiyanungri lhangaiya,” Jesu'ne kyun, “Keinekhi neiyari klal dayermarou. Shaallaka heirou hanui kallengne borhyei lhou toumakano.”
Jesuri Tlaipangei Kwaar
12 Jesu'ne lhangai karsa rapnung hanuikhi yunthu, “Keiri tlaipangpallei kwaar,” Ane kyun, “Huhune Keihilla chanthunganungri khring chaanyei kwaarya pharou, heitoubi mehnara chamakarou.” 13 Heirou lhangai karsa rapne loukyun, “Asiyei Neiyei kyun heiri Neitamya yunthutkna; heirou Neiyei kyun heiri koukhatkhi chim yaomaklei.” 14 “Heiri nimakme,” Jesu'ne loumallang, “Keine keitamyei ngamrou yunthutknaya hoiyanungkhi, Keiyei kyun ari chim, ngamri Keine koulhangrei hungbi koulhangra chakurro touri mulei. Heiya naneri Keine koulhangrei hungbi koulhangra chakurro touri mumaklei. 15 Nane tlaipang thimiyei youkna hilthungne pichar toubi leilei; heiya Keiri huyakhi pichar toumak. 16 Heiya Keine heinaksi picharya toupirou dawanungri, chimmei picharya toupirou, ngamri Keiri keitamtom nimak, heiya pichar tounara Keiya yukmalhetpikur Pawa heiri Keikou kalhonbi klei. 17 Awari nai Chaylamrakhi mayekhoubi leilei touri mitne muthungkur thimi napung-khnine yarilbi yunthutkur heine chim hoirou. 18 Keine Keiyei ngamrou yunthutpilei, heitoubi Keiya yenmalhetpikur Pawanekhi Keiyei ngamrou yunthutpilei.” 19 “Neiyei Pawari koura kleiyo?” toubi yane Anungei loukngai. “Nane Keiyakhi heirou Keiyei Pawayakhi mumaklei,” toubi Jesu'ne loumallang. “Nane Keiya mulanungri, Keiyei Pawayakhi murou.” 20 Heinak tlourap namyerwa heiya Jesu'ne Pukhrumna cheemwaira, Dunpunung makatkur tuyphu dunkhouna bomthora ombi marnopiyeinung yunpiwurkhou. Kheen heinungri hukhatnekhi Aya manchangmak, ngamri aiyei kheen heiri hungtlungmakhui.
Keiyei Chanara Nari Chachangmakrou
21 Jesu'ne hanuikhi yanungei yunpithu, “Keiri bi arouwei chutrouwa; naneri Keiya thipharou, heiya nane nai borhrei lhoura hirouwa. Heitoubi nari Keiyei chana lhangra chachangmakrou.” 22 Heisitounei Jehudi rapbei lhou'urpu rapne kyun, “Aiyei kyunri kane Aiyei chana lhangra chachangmakrou toulei. Aiyei yunkur heiri Aitamne kanteohat'rouwa.” 23 Heirou Jesu'ne loukyun, “Nari daakrei klei tlaipang thimirap, heiya Keiri thaklhangrei kyong Pu. Nari tlaipangrei, heiya Keiri tlaipang arouwei nimak. 24 Heingammei nari naiyei borh lhoura hirouwame tounei kyun. Heirou nane ‘Keiri huwo’ toubi uklumni loulhakpimanungri nari nai borhra hirouwa.” 25 “Nangri huwo?” toubi heirou yane Anungei loukngai. Jesu'ne loumallang, “Haallei waiyoubi Keine nanungei yunpikur heirime. 26 Naingamrou heiyakhi duine Keine nanungei yunpinung leileihui, heiya duine naya klal dayernungkhi leileihui. Keiya yenmalhetpi heiri chimhak, heirou Keine arouwei mayekur heirapyatom tlaipangra loushunthutpilei.” 27 Heirou Jesu'ne yanungei Pawayei ngamrou kyun heiri yane muheimakura. 28 Heitounei ngammei Ane yanungei kyun, “Nane Thimiyei Chanapawaya khangbaangeinung, ‘Kei ari huwo’ touri nane muheirou; heirouri Keine Keitamtomei ngamrou koukhatkhi toumakme toubi nane muheirouhui, heiya Keiri Pawane yunthutpilaklo toubi shunmatupikur heirapya shunthutpilei. 29 Heirou Keiya yenmalhetpikur heiri Keikou kalhonne leilei; Ane Keitamtomya lakurkhoumaklei, ngamri Keine Aiyei malung pilnanungtom toubi leilei.” 30 Heirou Jesu'ne heitoubi kyun heiya mayekkur thimirap nammane Aya uklumkur.
Cha-Mranglam Heirou Shokrap
31 Heitounei ngamrou Jesu'ne aya uklumkur thimi rapnung kyun, “Nane Keiyei marnopi rapya chanthunganungri, nari Keiyei ruishikrap hoilei; 32 nane chim heiya murou, heirou chim heiwane naya kushine malhetpirou.” 33 “Kari Abraham'yei yu-cha rapme,” toubi yane loumallang, “heirou kari kouniroukhi mideiyei shokkhi hoikhoumakhui. Heiyanungri, Nangne ‘Naya kushini malhetthutpirou’ toubi kyun heiri kouyaeiyo?” 34 Jesu'ne yanungei kyun, “Keine nanung chimya yunpilei: Huhune borh lhouya tou thimiri borhyei shok hoileihui. 35 Kneek shok heiri puei cheemra cheempu khoine leichangmakrou, heiya cheempuei cha-mranglam heiri klui naimakne cheem heiyei pipa hoirou. 36 Chanapawa heine naya malhetthutpilanungri, nari tanghakpaei malhetthutpikur hoirou. 37 Heirou nari Abraham'yei yu-cha rapme touri Keine mulei. Heiya hoiyanungkhi nane Keiya hatnanungei wairaanglei, ngamri Keiyei marnopi rapya nane loulhakpimak. 38 Pawane keinungei mutpikur heiya Keine yunpilei, heiya nari nai Pawayei shunkhoupi heiya yunmaklei.” 39 Heirou yane Anung loumallang, “Kai Pawari Abraham.” “Tanghakpane nari Abraham'yei chanao rapme toulanungri, nanekhi aiyei toukhou lhou heinakrim tourou da,” toubi Jesu'ne loukyun. 40 “Heiya asinung Dunpuei chimtlouya mayekloubi nanungei yunpibi klei Keiyari nane hatnungei wairaanglei; Abrahamneri heinaksi toukhoumak! 41 Heiya naneri nai pawaei touwurkhou heiya toubi leileihui.” Heirouri yane, “Kai Pawari Dunpu'tomngei, heitoubi kari Aiyei chim chanaorap,” toubi loumallang. 42 Jesu'ne yanungei shun, “Dunpu heiri tanghakni naiyei Pawa hoikhouwanungri, nane Keiya malungshirou, ngamri Keiri Airouwei kyong. Keiri Keitamtomei kningne kyong nimak, heiya Ane Keiya yenmalhetpikur. 43 Keiyei kyuntlou arou koutounei nane muheimakurawo? Ngamri nane Keiyei kyunya ninglhaknimak. 44 Nari naipa kraowei chanaorap, heitoubi nari nai pawaei kningyatom chanthungbi leilei. Kyou'rouweini a heiri thimihat, heitoubi ari chimna lhangra tekkhi mayungkhoumak, ngamri anungei chimmo touri koukhatkhi mak. Ane mandallei tlouya yunlanungri, anungei klei youkna heiyei hilthungne toulei, ngamri a heiri mandal thimi heirou mandal thimi rapbeikhi pa. 45 Heiya Keine nanung chimtlouya yunpilei, heitounei ngammei nane Keiya uklumpimak. 46 Heirou hune Keiya klalme toubi yun manerouwo? Keine chimya kyun hoiyanungri, koutounei ngammei nane Keiya uklumpimako? 47 Dunpurei kyong thimi heiri Dunpuei kyun tlouya ninglhakrou. Heiya nari Dunpurei nimak, heitounei ngammei nane Aiyei shunya ninglhakchangmak.”
Jesu Heirou Abraham
48 Heirou Jehudi rapne Jesu'nung tlou kngai, “Kane neiya, ‘Nangri Samaria'rei thimi, heirou nangri lhimpop thimi’ toubi yunwurnarou kou klal leirouwo?” 49 “Keiri koukhi kraopop thimi nimak,” toubi Jesu'ne loukyun, “Keine Keiyei Pawaya rikrai khrumkna, heiya naneri Keiya rikrai khrumpimaknei tloutomni. 50 Keine keitamtomya rikrai khrumyerkniyei raphari nimaki. Heiya rikrai khrumkna kya khat leileihui heirou Ane Keiyei kning hilthungne pichar touyerheirou. 51 Keine nanungei tanghakni yunpilei: huhune Keiyei marnopiya chanthung thimirap heiri kouniroukhi himakrou.” 52 Heirou yane Anungei kyun, “Arouri kane muwurla touri Neinungei lhimkrao leilei! Ngamri Abrahamkhi hiyura, heirou thimkhui rapkhi hiwurchiya, heiya Nangneri huhune Neiyei shunmatupikur heirapya hilthunga'nungri kouniroukhi himakrou toubi yunthulei. 53 Kai pawa Abrahamri hiyura; heiya Nangneri Abraham'ya duine tangme toubine yunthulei? Heirou thimkhui rapkhi hiwurchira, heiyanungri Neiyei kningri Nangri yayakhi duine tang thimi touneiyanu?” 54 Heirou Jesu'ne loumal langkur, “Keine Keitamya rikrai khrumyerkna hoiyanungri, heinaksi rikrai khrumkna heiri karsukmakei lhou. Keiya rikrai khrumkna heiri nane naiyei Dunpu toubi kyun heiri Keiyei Pawa-Ahak heirime. 55 Naneri kouniroukhi Ayari mumakhui, heiya Keineri Aya kmu. Heiya Keine Aya mumakme toubi yunlanungri, Keikhi nanakrimni mandallei tlouyun thimi khat hoirou. Heitoubi Keiri Aya kmu, heirou Aiyei kyun tlouya Keine chanthunglei. 56 Nai pawa Abraham'ne Keiyei yongrou'kyou kheenya mubine heitoubi ane heinungei'tlim nungkngai.” 57 Heirou yane Anung loukyun, “Nangri kum somngakhi tlungmakhuirou, heiya Abraham'yari koutoubi nangne kmu?” 58 “Keine nanungei tanghakni yunpilei: Keiri Abraham'ya pukbongei youbi loukleime,” toubi Jesu'ne loumallang. 59 Heisi tounarouri yane thlung khulloubi aya khinghatrou waiyoukur, heirou Jesu'ne heiwaya muwurbi Pukhrumna Cheem'rouwei karlheithutdurbi shaalkur.
Jesu'ne Puknarouwei Mitdeo Napawa Khatya Raiyer
1 Jesu'ne lam heisi tlayeinung, puknarei waiyoubi mitdeo napawa khatya mulhakur. 2 Heirou aiyei ruishik rapne anungei kngai, “Upawa, napawa heiya mitdeone pukur heiri huwei borh leineiyo? Ai'mshaei borh leineiyo nimanung aiyei pui-payei borh leinei ngammeiko?” 3 Jesu'ne loumallang, “Aya mitdeokyer heiri ai'mshaei borh leineikhi nimak, heirou aiyei pui-payei borh leiwurneikhi nimakme. Heiya aiyei mitdeokur heiri, airouwei Dunpuei mantrangya mutnanungei toukurme. 4 Tlainine khuwaarleiyenri, Keiya yenmalhetpikur heiwayei lhouya kane churbi leirouda. 5 Heitoubi Keine tlaipangpalla leiliyenri, Kei ari tlaipangpallei kwaar.” 6 Ane tlou heisi yunbi, heirou thleira matil mathukdokbi, heitoubi matil heine thleibul mankonbine, heirou Ane thleibul heiya napawa heiyei mitlungra nalphaangbi, 7 heirou Ane shun, “Nangne wabi Siloam yuiphumra neiyei mai machaammurlak,” toubi shunbi heihilkur. Heisi tounarou napawa heine wawurbi, aiyei mai lhamathaikur, heirou aiyei mitdeo hei mumanewurbi yenkallengkur. 8 Heirouri aiyei cheemlhunyei thimi rapne, heirou heibongnung ane bucha-bumaibi leikhouya kmu thimi rapne kngai, “Napawa ari ombi bucha-bumaibi leikhou heiwari nimakeiko?” 9 Heirou thimi thane loukyun, “Moi, napawa heiwarime,” heiya thimi deine kyun, “A heiri nimakme; heiya thiyeinung aya kmal napawame.” Heitounarou napawa heine aitam kyun, “Keihakme.” 10 “Asinung neiyei mitdeo heiri koutoubi mumanekurro?” toubi yane anung loukngai. 11 Heirou ane loukyun, “Jesu toubi ung napawa heine thleibul mankonbi, heirou keimitra fnalpikur, heitoubi Ane keiya, ‘wabi Siloam yuiphumra mai lhamathai'wurlaklo’ toubi shunpinarou, keine wawurbi keiyei mai lhamathaikurle tallengne keiyei mitdeo awari mumanekur.” 12 “A heiri koulhangrangawo?” toubi yane anungei kngai. “Keiri mumakurame, koulhang'rangaeikhiyo,” toubi ane loumallangkur.
Lhangai Karsa Thimi Rapne Kna Raiyerwurnei Ngamrou Tlou Darphakur
13 Heirouri yane mitdeobi leikhou napawa heiya lhangai karsa thimi rapbei maibongranung ruilouheila. 14 Jesu'ne thleibul fnalphaangbi aiyei mitdeokur heiya lhangaiyerkur tlaini heiri Mathrilni hoikur. 15 Heirouri hanuikhi lhangai karsa thimi rapne aiyei mitdeo heiri koutoubi raikurro toubi tlou ngaithikur. Heirou ane yanungei louyunpikur, “Ane Keiyei mitra thleibul teipikur, heitoubi Keine mai lhamathaikur, heisi tounarouri Keiyei mitdeo ari mumanekur.” 16 Heirou Lhangai karsa thimirap thane kyun, “heinaksi lhouya toukur napawa heiri Dunpurei kyongri nimakrou, koungameiyo toulanungri ane Mathrilna tlainiyei Tloulamya chanthungmaklei.” Heiya hoiyanungkhi, thimi deine kyun, “Hunaksi borh thimi khatneri heinaksi kngakei lhouya toumanerouko?” Heisitoubi yaihangra karhourilbine lhang-lhang darilkur. 17 Heitounei ngamrou lhangai karsa thimi rapne napawa heinung hanui kallengne tlou ngaithikur, “Neiyei mitdeo heiri ane lhangaiyerkurme toubi nangne yunlei - heiyanungri lhangaiya, nangneri aingamrou kousitoubi yunkni leilei?” “Ari Thimkhui khatme,” toubi napawa heine loumallangkur. 18 Heiya hoiyanungkhi, Jehudi rapbei lhou'urpu rapneri heitoubi kyun heiya tloukhoine loupinimak, touri yane aiyei pui-paya ungbine heitoubi yanungei tlou kngai, 19 “Napawa ari nakhu shangramei chanapawa nimakeiko? Naneri aya mitdeoni pukthutme toubi yunlei; heiya asinungni kousitoubi aiyei mitdeohei mumanekurro?” 20 Heirou aiyei pui-pa rapne loumallangkur, “Moi, kane kmu, ari kaiyei chanapawa, heirou kane kmu touri a heiri mitdeoni pukkur. 21 Heiya asinungri aiyei mitdeo heiri kousitoubi mumanekurro touri kari mumakura, heirou hune aiyei mitdeo heiwaya raiyerkurro toukhi kari mumak. Asinungri nane anungei tlou ngaithipilak; akhi muheiyura, heine nai kngai tlou heiya ane loumallangpirou!” 22 Aiyei pui-pa rapne Jehudi rapbei lhou'urpu rapya chiwurnei ngamrou heisitoubi mallangkur, ngamri yane aya Pukhrumna Cheem'rouwei hulthutroume toubine yarilbi darilkur tloubomkhat klei. 23 Heitounei ngamrou aiyei pui-pane, “Akhi muheiyarou; heine nane anungei tlou ngaithipilaklo!” toubine loumallangkur. 24 Heirou khnui tlungni yane mitdeoni pukkur napawa heiya ungmallengbi kyun, “Nangne Dunpuei maibongra tlou kantombi chimne yunlak! Neiya mitdeo raiyerkur napawa heiri borh thimime touri kane mulei.” 25 “A heiri borh thimi hoiyo-hoimako touri keiri mumakura,” toubi napawa heine loumallangkur. “Heiya keiyei kmu khatri: Keiri mit deobi leikhou, heiya asinungri keiyei mitdeo awari lhangaiwurbi mumanewurame.” 26 “Aneri neinungei kouya toupikurro?” toubi yane loukngai. “Heirou neiyei mitdeo heiri ane kousitoubi lhangaiyerkuro?” 27 “Keine nanungei yunpiwurla, heiya naneri ninglhakpimaklei, kounungei hanui kallengne nane ningkniyo? Nakhi aiyei ruishikrap hoikni leileisane?” toubi ane loumallangkur. 28 Heitounei ngamrou yane aya manchopibi kyun, “Nanghakme, aiyei ruishik'hakri, heiya kari Moses'yei ruishik rapme. 29 Kane mulei touri aiyei kyunnakne Moses'nungkhi Dunpuei yunpiwurkhou klei, heiya hoiyanungkhi, A heiri koulhangrei hungthuko touri kane mumak!” 30 Napawa heine loumallang, “Heiri ngaknayei bom hoileime! Naneri aya koulhangrei hungthuko touri mumakle, heiya Aneri keiyei mitdeokur aya lhangaiyerwurla! 31 Kane mulei touri Dunpune borh thimiyei kyunri mayekpimaklei; heiya aya rikrai khrumkna thimi rapya heirou aiyei kningya toubi klei thimi rapya Ane ninglhakpi. 32 Tlaipang kanretirrei waiyoubi thimi hukhatnekhi mitdeoni pukthutkur thimi rapya lhangaiyerkurri makhui. 33 Heiya napawa heiwane Dunpurei kyong nimakneri, Ane koukhatkhi toumanemakrou.” 34 Heirou yane loukyun, “Neiyari pukyeinungkhi, heirou yukbaangei kaalnungkhi borhna hangra leiwurbine--heirou angturi nangne kaya shunmatupirou waiyouthuleinu?” Heisitoubi yane ayari Pukhrumna Cheem'rouwei hulthutkur.
Lhawaira Mitdeo Thimi
35 Jesu'ne thukkur lhou heiya mayekkurnarouri, Ane napawa heiya raphamubi anungei kngai, “Nangri Thimiyei Chanapawaya uklumleiko?” 36 Heirou napawa heine loukyun, “A heiri huweiyo keinungei yunpilaklo Upawa, heiyanungri Keine aya uklumrou!” 37 Heirou Jesu'ne anung loushun, “Nangne aya muwurla, heirou asinung nangkou tlou kallangrilbi klei heiri Ahakme.” 38 “Puwo, Keine uklumlei!” toubi napawa heine yunbi heirou ane Jesuei maibongra khuklu kanthrunchabi khrumkur. 39 Jesu'ne kyun, “Keine tlaipangra kyong ari pichar tounanungei kyong, ngam heine mitdeo thimi rapne mumanerou, heirou mit mubi klei thimi rapri mitdeo thimi hoiyurou.” 40 Heirou akou kalhonbi klei Lhangai karsarap thane Aiyei kyunya mayekthungurnarou yane anungei kngai, “Tanghakpane neikyun heiri kakhi mitdeo thimirap hoiyura tounei nimakrounu?” 41 Heirou Jesu'ne loumallang, “Nane mitdeo thimirap louhoiyanungri, nanung koukhatkhi klal makrou; heiya naneri mitdeo thimi nimakme toubine yunlei, heiyanungri nari asilumpha klallei lhoutou thimirap hoileihui.”
Yaoshilpuei Ngamrou Yailim
1 Jesu'ne kyun, “Keine nanungei tanghakni yunpilei: Yaocheemyei shumtrumra wachangmakne mnakra ranbangbi wachang thimi heiri mucha thimi heirou routang thimi. 2 Heiya shumtrumra wachang thimi heiri yaorulya shilpi puhakme. 3 Heirou yaocheem shumtrum kngaak thimi heine anungei loulatpirou; heirou ane yao rapya khatsol mintlangbi ungeinung yane aihouya louyekmanre, heirou ane yaya ruithutpi. 4 Ane yaya heiruithutpibi, heitoubi ane yaimaibongra lamkrine loucharou, heirou yao rapne aihilla chanthunglei, ngamri yane aihouya yekmanrelei. 5 Yane dei huihillakhi chanthungmakrou, heinung'tlimri yane heinak thimi raprouwei trukurou, ngamri yane aihouya yekmanremak.” 6 Jesu'ne yanungei yailim tlou heiya yunpinarouri, heirou yaneri kouya kyunno touri muheimakura.
Jesuri Lhangai Yaoshil Pu
7 Heitounei Jesu'ne hanuikhi kyun, “Keine nanungei chimne yunpilei: Keiri yao rapbei hungchangna shumtrum. 8 Keiyei maibongrei loukleirap namyerwa heiri mucha thimi'thillang, heirou routang thimi'thillang. Heitounei ngamrou yao rapne yaihouya mayekpimak. 9 Keiri shumtrumhak, huhune keirouwei wachangkur thimini kalpi pharou, ngamri ane wachang-wathuk toubine kalleicharou, heitoubi namh marthumni manbobi leina bira shaipharou. 10 Heitoubi mucha thimi heine muchana'nungtom, heirou miya hatnanungei heirou maangyernanung tom wachanglei. Heiya Keiri naya khringchaan phayernanungei, heirou na nammaya khringchaan heiya marthumni phayernanungei yongpilei.” 11 “Keiri yao rapnung'tlim hipikur mane lhangaiyei yaoshil Pume. 12 Heirou yaoshil puhak nimakne, kneek yaoshilpu heineri yaorul heiri aiyeihak nimak toubiri, ane yekshang wachangya loumulanungkhi yaorulya lakkurkhoubi loutrukurou, heirouri yekshang heine yao rapya hulchekkurbi mailourou. 13 Kouweiyo toulanungri a heiri kneek yaoshilpu hoinei ngamrou yaorul rapya ane lhou hoipimak, heitounei loutrukur. 14 Keiri lhangai yaoshil puhakme; 15 Keiyei Pawane Keiya mulei, heirou Keinekhi Pawaya kmu, heinakrimni Keine Keiyei yao rapya shakrung kanreni kmu, heirou yao rapnekhi Keiyei shakrungya kmu. Heitoubi Keine yao rapnung'tlim hipikurkhi manelei. 16 Heirou yaorul hangra yaomakei klei Keiyei yaorap deirakhi leileihui. Keine yayakhi urlhakpirouwa; heirouri yane keihouya ninglhakpirou, heisitoubi yakhi yaoshilpu khatdei daakrei klei yaorulkhat hoirouwa. 17 “Pawane Keiya malungshipiyei ngamri Keine Keiyei rongchanya makatkur mane, heitoubi hanuikhi heiya mallenglhakthurou. 18 Thimi hukhatnekhi Keiyei lhawaiya keirouwei louthutkur manemakrou. Heiya Keine koumankhi naimakne Keiyei lhawai aya leemni makatdurla. Ngamri Keine heiya makatkur manelei, heitoubi heiwaya mallengkurkhi manelei. Lhou ahakya Keiyei Pawane Keiya touyernanungei Chay piwurkhoula.” 19 Tloulhangrap heiyei ngamrou thimi rapbei hangra lhang-lhang darilkur. 20 Heirouri kulyom rapne yunrilkur, “Ari lhim popkur thimileime! Ari pongurame! Koutounei nane aiyei kyunya louningkurro?” 21 Heiya thimidei thane yunkril, “Lhimkrao pop thimiri heinaksi tlou yunchangmakrou! Kousitoubi lhimkraoni mitdeo thimiya lhangaiyerkur manerouwo?”
Jesu'ya Yapimakur
22 Heirouri phalbinung, Jerusalem'ra Pukhrumna Cheem marthingnei Knei khat klei, 23 Tlaini heirou Jesu'ne Pukhrumna Cheemra Solomonyei yuntlangmaira karwaichayeinung, 24 bi heirou Jehudirap chungne loukar'umbi loukngai, “Nangne kaya kounak tlane khalchanayerrouwo? Kanungei chimne yunpilak: Nangri Messiah nimakko?” 25 Heirou Jesu'ne loumallang, “Keine nanungei yunpiwurla, heiya naneri Keiyei kyunya tlou'khoine loupimak. Keiyei Pawane Keiya touyerkur lhourap heine keinung'tlim yunpilei; 26 heiya naneri Keiyei kyunya uklumpimaklei, kouweiyo toulanungri, nari Keiyei yaorap nimakme. 27 Keiyei yao rapne Keiyei kyunya mayeklei, heitoubi Keinekhi yaya kmu, heirou yane keihilla chanthunglei. 28 Keine yanungei khringchaanya pi, heine yane kouniroukhi himakrou. Heirou hukhatnekhi yayari keihutrouwei lungloukhei manemakrou. 29 Keiyei Pawane keinungei pikur heiri nam'rouwei duine tanglei, heirou hukhatnekhi yayari Pawayei hutrouwei lungloukhei manemakrou. 30 Ngamri Pawale Keiri khatsi hoilei.” 31 Heirouri thimi rapne thlung khulloubi Aya khinghatrou waiyoukur. 32 Heitounei Jesu'ne yanung loushun, “Pawane keinungei pikur lhangaiyei lhou rapya chungwane nai maibongra touwurkhoula; heitounei ngamrou lhourap heinung'tlim nane Keiyari thlungne khinghatrouwako?” 33 Heirou yane loumallangkur, “Nangne lhangaiyei lhou rapya touwurnei ngamrou kane neiya thlungne khinghatrou waikyou nimakme, heiya nangne Dunpuya mshitdei tlou yunwurnei ngammeime! Nangri Thimi hoibine, heirou neitamya Dunpume toubi yunkanthangnalei!” 34 Heirou Jesu'ne loumallangkur, “Awari Dunpuei yunkhou touri, naiyei Chaylamra atoubi mayebi leilei: ‘Nari thrai rapme.’ 35 Heirou kaneri mulei touri Khyingei Lailikrei kyun heiri klui naimakne chim hoirou; heirou Dunpune lhangaiyei Pao-laaya piwurkhou thimi rapya thrairap toubine ungpirou. 36 Heiya keinungeiri, Pawane Keiya khalthutdurbi tlaipangpalla yenmalhetpiwurla. Heiyanungri koutoubi nane ‘Keiri Dunpuei Chanapawame’ toubi yunwurnei ngamrou minamnei lhou toume toubine Keiya yunkurrawo? 37 Heiyanungri Keiyei Pawane Keiya touyerkni lhou rapya Keine toumakanungri, nane Keiyari malungampimak. 38 Heiya Keine heinakei lhou raypa toukur hoiyanungri, nane Keiya uklumpimaka'nungkhi, Pawane keinungei klei heirou Keikhi Pawanungei kleime toubi hanuitomcha, heirou hillou ramphane nai munanungei Keiyei touthutkur lhouthilla'nungkhi thibine malungampilakma!” 39 Heitounei ngamrou yane hanuikhi Jesu'ya mannanungei wairaangkur, heiya Ane yaihutrouwei karlheithutkur. 40 Heirou Jesu'ne hanuikhi John'ne Aya yuiluppina bi Jordan kungra yenkallengbine bi heirou Ane yarekwurkhou. 41 Bi heirou thimirap chungne wakar'umbi heirou Anung kyun, “Johnri koukhatkhi kngakei lhou touthutkhoumak, heiya hoiyanungkhi heinakei ngamrou aiyei kyun namyerwa heiri chimthillei.” 42 Heingammei bi heirou klei thimirap chungne Aya uklumkur.
Lazarus Hikur
1 Bethany yultlairei klei Lazarus toubi ung napawa heiwari nakur. Bethany yulthung heiri Mary'le aiyei tei Martha yakhu teinaowei leina yultlai. 2 (Mary heiwiri Upawayei hora muiknam shirek fleithutbi teiphaangurbi, heitoubi aiyei lurei shamne Aiyei hoya rutmathaipikur napuiyari; heirou nawurbi klei Lazarus heiri Maryei trah.) 3 Yakhu teinaoni Jesu'nung pao shunthungbi: “Upawa, neiyei paluiri nawurbi leiyurame,” toubi thimi heimalhetkur. 4 Heirou Jesu'ne pao heiya loumayekbi Ane kyun, “Heinaksi kna heiwine Lazarus hinamakrou; kna heiri Dunpunung aiyei thangya alduiyerna'nungei toume, heitoubi heinaksi kna heirouwei Dunpuei Chanapawane thang'alya phananungei toume.” 5 Jesu'ne Martha'le aiyei naowi Mary heirou yai trah Lazarusyakhi malungshi. 6 Heiyanungkhi Ane Lazarus'ri nawurame toubi pao loumayekbikhi, tallengne wamakne aiyei leina bi heirou tlaini khnini leiwurkhou. 7 Heirouri Ane aiyei ruishik rapnung, “Kane Judeara kallenglakase” toubi kyun. 8 Heirou ruishik rapne loumallangkur, “Upawa, tlaini khnini-khyumniyei maibongroukhi thimi rapne bi heirou neiya thlungne khinghatnanungei wairaangkur; heine angtukhi nangne bi heirou hanui kallengthurouko?” 9 Heirou Jesu'ne loukyun, “Tlaini khatrou kheen chiple khni klei nimaka? Heiniri huhune nunghang kwaar leiyeinung pocha thimi heine ho karyeinung thikmathuimakrou, ngamri ane tlaipangei kwaar heiya mulei. 10 Heiya a heine masanung chawanungri thikmathuirou, ngamri anungei kwaartou heiri mak.” 11 Jesu'ne heirouwei hanuikhi yenyunthu, “Kaipalui Lazarus heiri iplhakura, heiya Keine wabi aya fyoupirou.” 12 Heirou ruishik rapne loukyun, “Heiyanungri, Upawa, a heiri iplhakur hoiyanungri lhangaiya, aiyei kna heiri damlhengrouwa.” 13 Jesu'ne Lazarus heiri hiyurame tounei kyun, heiya yai louningkurri aiyei iplhakur heiri nanei ngammei iplhakurme toubine loukhalkur. 14 Heingammei Jesu'ne yanungei chimne yunthutpikur, “Lazarusri hiyurame, 15 nanung'tlim Keiri nungwailei, heiya naingamrou Keiri akou murilbi pulne leichangmak, heiya hoiyanungkhi kane aiyei leinara wawase, heitoubi nane mubi uklum pharou.” 16 ‘Kanfirwa’ toubikhi ung Thomas'ne aiyei palui ruishik rapnung kyun, “Ka nammane Upawakou kalhonbi wawase, heitoubi akou kalhonbi hirou!”
Jesuri Khirouwei Ringthut Heirou Khring Chaan
17 Jesu'ne bi heirou wa'tlungei kaalnungri, Lazarus hiwurbi phaliniyei maibongrou louphummurla. 18 Bethanyei yulthung heiri Jerusalem khukarthille tlatkrilri lamtup khni'tomni, 19 heine Jehudi'rap chungne wabi Martha'le Mary yakhu teinaoya yai trahwa hiwurnei lhawai klahne chapkanrelbi klei heiya wamanelkur. 20 Heirou Jesu wa'tlungurame toubi Martha'ne pao loumayekurle tallengne Aya louronanung wathuk, heiya Marywiri cheemwairei wathukmakne louklei. 21 Heirou Martha'ne Jesu'nung loushun, “Upawa, nangne bi arou louleiyanungri, keitrahwa heiri hiwurmakrou! 22 Heiya Keiyei malungam leilei touri nangne anung'tlim Dunpunung buchapila'nungri asinunghakhi Dunpune loupiroume.” 23 “Neitrahwa heiri hanui ringthueiroume,” toubi Jesu'ne anungei loushun. 24 “Keine mulei touri luiniyei tlainirou akhi ringthutheirou,” Martha'ne loumallangkur. 25 Heirou Jesu'ne anungei shun, “Khirouwei ringthutkur khringei chaanri Keime. Hukhatne Keiya uklummanungri, ane hiwurbikhi, hanui ringthutheirou; 26 heirou hukhatne Keiya malungambi khringei chaanya phakur thimi heiri hanuirouri kouniroukhi hikhoumarou. Keiyei kyun ari nangne malungam leileiko?” 27 “Moi, Upawa, nangri tlaipangra yongpikur Dunpuei Chanapawa Messiahme touri Keine uklumlei,” toubi ane loumallangkur.
Jesu'ne Lazarus'nungtlim Chapkur
28 Heirou Martha'ne tlou heiya yunchibi, heirou ane rilla hungchangurbi ainaowi Marya munne hung'ungbi kyun, “Upawari wa'tlungurame, heitoubi neiyakhi Ane ngaiphaleime.” 29 Mary'ne kyun heiya mayeknarou, ane khrangni Aya murilnanungei wathukkur. 30 (Kheen heirouri Jesu yultlaira wachangmakhui, heiya Martha'ne Upawaya lourorilna bira leileihui.) 31 Thimi rapne cheemmaira Maryle kalhonne leibi, aiyei lhawai klahya mathrilnanungei yunmanelpi, heirou ane khnotni wathukkur heiroukhi yane heichanthungkur. Yaneri ai wathukkur heiri lhanbira wabi wachaprou youkurasane toubi ningchathungkur. 32 Heirou Mary'ne Jesuei louleina bi heirou wa'tlungkur, heirouri ane Upawaya wamukurle tallengne aiyei hopongra kanellhakbine kyun, “Upawa, Nangne arou louleiyanungri, keiyei trahwa heiri himakrou!” 33 Jesu'ne Maryei chapkur heirou akou louklei thimi rapbei chapkur heiya munarouri, Aiyei ukningra kalthi nungwaimakur, 34 heirou Ane yanung kngai, “Nane ayari bi kourou phumwurla?” Heirouri yane, “Upawa, ara wathilak,” toubi loushunpirou, 35 Jesu chapkur. 36 Heirou thimi rapne kyun, “Thilak, Ane Lazarusya kounakei malungshi!” 37 Heiya ya thaneri asitoubi kyun, “Aneri mitdeo thimi rapya mit muyerkur nimaka? Heiyanungri koungammei Ane Lazarusyari hiyermakne khouchangmako?”
Lazarusya Ringyerkur
38 Jesu'ne hanuikhi aiyei lhawai kalthi lahwurbi lhanranung wakur, lhan heiri thlungra utlhakbi lhanpurra thlungpak khatne tinglhing hoinabi pingkhou. 39 Heirou Jesu'ne yanung shun, “Thlungpak heiri khaangthutlaka!” Hikurwayei char upawi, Martha'ne loumallang, “Upawa, chul-nammaroume. Aya phumkurri tlaini phalini tlungurame!” 40 Heirou Jesu'ne anungei shunkur, “Nangne uklummanungri, Dunpuei thang'alya mupharoume toubi Keine nanung yunkhoupimaka?” 41 Heitounei yane thlungpak heiya khaangthutkur. Heirouri Jesu'ne mangalbi kyun, “Pawa, Keiyei shuncha aya louningpinei ngamrou, Keine neiya mathanglei. 42 Keine mulei touri nangne Keiyei shunchaya karyomne ninglhakpi, heiya Keine atoubi kyun ari bi arou klei thimi rapnung'tlimme. Ngamri Keiyari bi arou Neiyei yenmalhetpikurme toubi yane muheirou.” 43 Ane atoubi yunchibine, heirou hou chouni heiungkur, “Lazarus, wathukalo!” 44 Heisi tounarou ane aiyei hut-ho namma heiri khi'lhung lhomna punshel kyaoni mairakhi yumphopburbi lhanrilrei wathukkur. “Aya lhomphopkur heiya shutdurpibi, shaalyerlaka,” toubi Jesu'ne yanungei shunkur.
Jesu'ya Hatnanungei Muni Waikrang
45 Marya thirou wathimi namni Jesuei touthutkur lhou rapya muwurbi, heirou yane Aya uklumkur. 46 Heiya yaihangrei thimirap thane lhangai karsa rapnung kallengbi, Jesuei touthutkur lhourap nammaya yanungei hungshunpikur. 47 Heitounei ngamrou Lhangai karsa raple Suipipu rapne pulne Yama-krungya murilbine kyun, “Kane kouya touserou? Napawa heine touthutkur kngakei lhourap namma heiya thilak! 48 Aiyei lhou rapya kane heisi touyerbi leiyanungri, thimi nammane Aya uklummurouleiya, heirou Romeayei lhou'urpu rapne kaidoura tlouphabi, heirou kaiyei Pukhrumna cheemle, heirou kai limyakhi mityerrouleiya!” 49 Kum heirou yai hangra suipi pukhi hoikhou Caiaphas toubi ung napawa heine kyun, “Nari koukhatkhi muheimakleintu! 50 Lim nammaya maangyerkur heinung'tlimri, thimi napung khatya hiyerkurni nanungei lhangaime touri nane ningmumako?” 51 Heiya aiyei kyun tlou heiri aitamei kningya yunthutkur nimak; heinung'tlimri, kum heirou ane Suipipu khoine leiyeinung, Jesu'ne Jehudiya nammanung'tlim hipiwurbi; 52 heirou yanungei tomkhi nimakne, chekkurbi klei Dunpuei thimirap namyerwaya sharungkhat khoine pulne markumlhaknanungei toubi yunthutkur. 53 Heiniyei waiyoubi Jehudiyei lhou'urpu rapne Jesu'ya hatnanungei wairaangkur. 54 Heitounei ngamrou Jesu'ne Jehudiya ramra mitdoni baora karwaichamakne leikur, heiya ramhei lakurkhoubi ramthing pongra klei Ephraim toubi ung khukarthilla wakur, heitoubi bi heirou Ane ruishik raple pulne leiwurkhou. 55 Ralthutpinei Kumtlun yennakurnei ngamrou, thimi rapne yaiyaiyei yultlairei Cherni maibong tlainirou youknaei marthingnanungei Jerusalem'ra marthingnei knei tlaini maibongrou kakartilkur. 56 Heirou yane Pukhrumna Cheemra kartilbine Jesu'ya louthiphabi, ya khatle khat ngaikril, “Naneri kousitoubi ningchalei? Ari Knei tlunna bi arou kouniroukhi kabine yaomakarou.” 57 Heirou Suipipu raple Lhangai karsa rapne thimi rapnung chay piwurbi, huhune Jesuei leikhouna mulanungri yanunungei pao shunpirou da, heiyanungri yane Aya manchangrou.
Bethany'ra Jesu'ya Shirek Teipikur
1 Ralthutpinei Kumtlun tlaini thrukniyei maibongrou, Jesu'ne Bethany'ra khirouwei ringthutyerpikur Lazarus'yei cheemra wachangkur. 2 Bi heirou yane Anungei chamai marshikpiyeinung, Martha'ne watlhou toupikur. Heitoubi bi heirou Jesukou omkalhon rapbei hangra Lazarus'khi kyao. 3 Heirou Maryne ‘nard’ toubi ung heengnaiyei sheemthut manklu-muiknam shirek tungka thimkhlangni loubi Jesuei hora shungphangbi fnalpikur, heitoubi aiyei lurei shamne rutmathaipikur. Muiknam shirek khrim heine cheemwai thimkur. 4 Heirou Jesuei ruishik rapbei hangrei Aya yorroukyou napawa-Judas Iscariot'ne kyun, 5 “Koungammei muiknam shirek heiya Denari macha-khyumnung yorrubine, heitoubi tuy heiri kanring thimi rapnung yerpikurri yamako?” 6 Ane heishi kyunri kanring thimi rapya kringpineikhi nimak, heiya ari mucha thimi. Heitoubi ari tuykao urchabine, kao heirou haallhakkur tuy rapya louthutbi aitamtom yrengchabidik klei thimi. 7 Heiya Jesu'ne kyun, “Aiyei kningya heisi toulaksu! Heirou aiyei klei heiso Keiya khiruiyeinung teiphaangpinung khouyerlak. 8 Nane kanring thimi rapya karyomne leimalnaeirou, heiya Keileri karyomne leimalnamakarou.”
Lazarus'yakhi Hatnanungei Wairangkur
9 Thimi kulyom rapne Jesu'ya Bethany'ra leiyurame toubi pao mayeknarouri, yane bi heirounung wakur, heitoubi yane Jesu'yatom nimakne, bi heirou Jesu'ne khirouwei lamkrine ringthutyerkur Lazaruskhi leileime tounei ngamrou yane wathikur. 10 Heirouri Suipipu rapne Lazarusyakhi hatnanungei wairaangkur. 11 Heingammei Jehudiyei thimirap chungne Suipi Pu rapne aidoura toukur lhou rapbei ngamrou yaya yanimakurbi shaalkur, heirou yane Jesu'ya uklumkur.
Maneyei Mantrangle Kalhonni Jerusalem'ra Wachang
12 Heithangei tlainirou Jesu'ne Jerusalem'ra wachangroume tounei pao heiri, Ralthutpinei Kumtlun yaonanungei wachangkur thimi rapne mayekurla. 13 Heingammei yane kangwoina deekloubi, yane Aya murilnanungei wathukbi, “Hosanna! Upawaei minra wachangbi klei Israel rapbei Krung heiri likarsui lhangai hoiyasu!” toubi yane loupaokur. 14 Heirou Jesu'ne gadha shuncha khat loubi yentungkhei, arouri Khyingei Lailikni atoubi yunkhounakrimni hungthukkura: 15 “Zionyei khukarthil, nari chimaklo! Louthilak, hungleime naiyei Krungni sapuk doura tungbine!” 16 Haalnungri Aiyei ruishik rapne thukkur lhoubomrap heiyei ngamrou koukhi phab dakhoumak; heiya hillouri Jesu'ne thang'alle kalhonne ringthutkur heirouri, yane Khyingei Lailikrei yunkhou heiri ariyalei, heirou lhou ari Aiyei ngammeilei toubi hungningmukur. 17 Jesu'ne Lazarus'ya lhanrilrei ungbine ringthutyerkur kheen heirou Akou kalhonkhou thimi rapne thukkur lhoubomrap heiyei ngamrou pao tamkur. 18 Heisi tounarouri thimirap chungne Aya murilkur, ngamri yane Aiyei touthutkur lhou rapbei ngamrou mayekkur. 19 Heirouri Lhangai karsa thimi rapne ya khatle khat yunrilkur, “Nane yukhalthilak, kai waikrang awari koukhatkhi karsukmaklei. Thilak, tlaipang thimi namyerwane Aihilla chanthungurchiya!”
Greek'rap Thane Jesu'ya Murilninei Rapha
20 Kumtlun heirou Jerusalem'ra khrumnungei wanarou yai hangra Greek rapkhi tha kyao. 21 Yane Galilee'yei Bethsaida yulrei napawa Philipnung wabine kyun, “Marnopi pu, kane Jesu'ya murilnileime.” 22 Heirou Philipni Andrewei leinara wabine heitoubi yakhuntane Jesu'nung washun. 23 Heirouri Jesu'ne yakhuntanung loukyun, “Thimiyei Chanapawane Aiyei thang'alya tangni phananungei trum heiri hungtlungurame. 24 Keine nanungei chim tlouya yunpilei: Gehulung khatchane thleira dalhakurbi pukthutdanungri, heirou ane heikhi chungne heirou. 25 Hukhatne aiyei rongchanya malungshi thimi heiri maangrou; heiya hukhatne tlaipangpal arou aiyei rongchanya machin thimi heiri, klui naimak khringei chaanya pharou. 26 Hukhatne Keiyei watlhou toupini thimi heiri Keihilla chanthungrou, heisi toubi Keiyei shik heiri Keiyei leina bi kantangrou leikalhonrou. Heitoubi Keiyei Pawane Keiya watlhou toupi thimirap namyerwaya rikrai khrumpirou.” Jesu'ne Aiyei Hirou Younei Ngamrou Yunthutpikhou 27 “Asinungri Keiyei lhawai beimak lahwura--heine Keiri kouya yunserou? Keine ‘Pawa, kheen heiri keidoura yenpirimakhuilo’ toubi yunserouko? Heiri nimak-heiya anaksi kheen arou klah-mrimya dounanungei Keine yongkurame. 28 Pawa, Neiminra Keinungei thang alyerpilaklo!” Heirouri Thangmun lhangrei hou khatne yukshun, “Keine heinung'tlim thang'alya yenpiwurla, heirou hanuikhi Keine thang alyerpithurou.” 29 Bi heirou mayungbi klei thimi rapne hou heiya mayeknarouri, ya thane ‘hou heiri marwanyei houleime’ toubi kyun, heiya ya thaneri ‘Hou heiri Thangringne anungei tlou yukshunnei houme’ toubinekhi kyun! 30 Heiya Jesu'ne yanungei shun, “Hou heiri Keinung'tlim kyun nimakme, heiya nanung'tlim yukyunpime. 31 Tlaipangra pichar tourouri kheen ahakme; tlaipangpallei pu rapya khingsundawurbi manerouri kheen ariyame. 32 Keiya tlaipangpal arouwei loubangkur kheen heirouri, Keine thimi nammaya ruilouheirou.” 33 (Asi yunbi Ane Aiyei hirouyounei ngam heirou Aiyei klah-knang dourou kyou heiyei ngamroukhi shunthutpikur.) 34 Heirou thimi rapne loukyun, “Kaiyei Chaylamyei kyunri Messiahne klui naimakne trungpirou touleime. Heiyanungri, nangneri koutoubi ‘Thimiyei Chanapawayari loubangrouwa’ toubi kyunno? Heitoubi Thimiyei Chanapawa heiri huwo?” 35 Heirou Jesu'ne loumallangkur, “Kwaar heine naihangra lepcha leikhourou. Nane kwaar leiyeinung naiyei lamtla heiri maibonglhangra mantonlak, heitoulanungri kmeh heine naidoura yukmakhup manemakrou; kouweiyo toulanungri mehnara karwaicha thimi heine aiyei chabi klei heiri koulhangrawo touri mumaklei. 36 Heiyanungri, nane kwaar leiyeinung, kwaar heiya malungampilak, heirouri nane kwaarrei thimirap hoipharou.”
Thimi Rapbei Malungam Mak
Jesu'ne heisi yunthutkur hillouri, Ane shaalwurbi heirou yaihangrouwei karlheiwurbi yulkur. 37 Ane yai maibongra heinaksi kngakei lhou rapya touthutbikhi, yane Aya uklumpimak, 38 heisitoubi Thimkhui rapbei yunthutkhou tlourap heiri chimne hungthukkura: “Upawa, kai shunthutpikur lhangai paolaaya hune uklummurlawo? Puni Aiyei mantrangya hunungei kanrethutpiwurlawo?” 39 Heitounei yane uklumkur manemak, ngamri Isaiah'ne asitoubikhi yunthutkhoulei, 40 “Dunpune yai mit muyermakura, heirou yai mulhakna ukningya tipburpila; heingammei yai mitne muchangmakrou, heirou yai ukningne muidane mulhakuri manemakrou, heirouri Keine yaya damyerpinanungei, yane Kei lhangra kalleklhakmaklei, toubi Dunpune yunlei.” 41 Isaiah'ne heisitoubi yunthutkhou ngamri, ane Jesuei thang'alya muwurkhounei ngamroukhi heitoubi Aingamroukhi yunthutkhoume. 42 Heiya hoiyanungkhi, Jehudiyei lhou'ur purap chungne Jesu'ya uklumkur, heiya Lhangai karsa thimi rapbei maibongrari yane khyingne yunthutyermak, hei nimanungri yayari Pukhrumna Cheemrei hulthutrou da. 43 Ngamri yane Dunpuei mathangpi heiyari thimi rapbei mathangpiya madukhou.
Jesuei Tloulhang Rapni Pichar Toupi
44 Jesu'ne hou chouni kyun, “Hukhatne Keiya malungam thimi heiri Keiyatom malungam nimak, heiya Keiya yenmalhetpi Pu Ayakhi uklum thimime. 45 Hukhatne Keiya mukur thimi heiri Keiya yenmalhetpikur Ayakhi mulei. 46 Keine tlaipangra kwaar khoine yongpiwurla, heine Keiya uklum thimi heiri kmehra leimakrou. 47 Hukhatne Keiyei paolaaya mayekloubi, heitoubi heiyei hilchanthung thimi heiyari, Keine aya pichar toumakrou. Heirou Keiyei kyong ari tlaipangpalya pichar tounanungei nimak, heiya kalpinanungei yongpime. 48 Hukhatne Keiya yapimakne, Keiyei Pao-laaya loulhakpimak thimiyari pichar toupirou pu khat leilei. Keiyei yunthutpikur tloulhangrap heine luiniyei tlainirou aya pichar toupiheirou! 49 Kyun ari chimhakme, ngamri Keiyei yunthutkur ari Keitamyei kningya yunthutkur nimak, heiya Keiya yenmalhetpikur Pawane Keiyei yunnung, heirou shunthutnungei chay piwurkhou. 50 Heirou Keine kmu touri Aiyei chaytlou heine klui naimak khringchaan yenpilei. Heiyanungri, Keiyei kyun ari Pawane Keiya yunthutpilaklo toubi shunpikur heirapya yunthutpime.”
Jesu'ne Aiyei Ruishik Rapya Hochoupi
1 Heirouri Ralthutpinei Kumtlun tlainiyei maibongrou, Jesu'ne tlaipangpal Aya lakurkhoubi Pawayei bomra kananungei trum hungtlungura touri muwurla. Tlaipang doura Anungei hoikur thimi rapya Ane karyom malungshipi, heirou kluiyei kheen heirampha Ane yaya malungshipikur. 2 Jesu'le Aiyei ruishik rapne Puwei Ralthutpinei Puluk markhulnara yaoweinung, heirou Satan'ne Simon Iscariot'yei chanapawa Judas'yei ukningra changurbi, Jesu'ya munne yorchawurnanung wairaangkur. 3 Jesu'ne kmu touri Pawane Anungei mane-mantrang namma piwurkhoula; heirou Ari Pawa'rei kyong heitoubi Dunpuei bomra hanui kallengthurou touri Ane kmu. 4 Heirouri Ane lukturng pongrei kanthouwurbi, heitoubi aiyei shamb rapya yaipongra khouwurbi, heirou aiyei shintlakra hutrutna punshel yitbine, 5 heitoubi heenglhingra yuiding shungthutbi, Aiyei ruishik rapbei ho choupikur, heirou Aiyei shintlakrei yitbi klei hut rutna punshelni rutmathaipikur. 6 Heitoubi Ane Simon Peter'yei lhangra hungchangeinung, ane loushun, “Upawa, Nangri keiyei hokhi choupirou touneiyako?” 7 Heirou Jesu'ne anungei loumallang, “Nangne asinung Keiyei toubi klei ari kouweiyo touri mumakeirou, heiya nangne hillou hungmuheirou.” 8 Heirou Peter'ne loukyun, “Upawa, kouniroukhi nangne Keiyei hoya choupibom thukmakroume!” “Keine neiyei hoya choupimakrou dawanungri, nangri Keiyei ruishik'hak nimaklei,” toubi Jesu'ne anungei shunkur. 9 Heirou Simon Peter'ne loumallang, “Heiyanungri, Upawa, keiyei hothil nimakne, keiyei hutkhi chikmathaipilak, heirou lukhi shupilak!” 10 Heirou Jesu'ne loukyun, “Hukhatne aiyei sharung namtomne choumathaikur thimi heiri aiyei hoyatom choupikur nimakneri deirari choumathaipinungei bomri mak, ngamri a heiri marthingura. Nari napung khatpatom nimakne deiri marthingura.” 11 Jesu'neri Aya hune yorrou youleiyo touri lamkrine muwurla, heitounei ngamrou Ane anaksiya yunthutkhou touri, “Thimi napung khatpatom nimakne deiri namma marthingura.” 12 Heisitoubi Jesu'ne yaya ho choupikur hillouri, Ane Aiyei shambya hanui kansamloubi tirrei Aiyei omkhouna bi lukturng pongra hung'ommurthu. Heitoubi Ane yanungei kngai, “Asiyei kheen arou Keine nanungei toupikur heiri kouwo touri nane muleiko? 13 Naneri Keiya Marnopipu, heirou Upawa toubi unglei. Moi, heiri chimhak touri nane heisihak ungpibom thuk, koungameiyo toulanungri nane heihakya ungpikur heiri Keihakpa hoilei. 14 Naiyei upa heirou Marnopi pu Keihakpane naya ho choupiwurla. Heiyanungri, nanekhi khatne khatdei hoya choupirillou da. 15 Keineri naiyei mulounanung marnopiwurla, heineri nanekhi Keiyei nanungei toupikur heinakrimni toupirillak. 16 Keine nanung chimhakya yunpilei: shok hukhanekhi aiyei Cheempuya duiyei tangri younamak, heirou paocha thimi hukhatnekhi aya yenmalhetpi puya duiyei tangri younamak. 17 Asinungri nane chim heiya muwurla, heirou chim heiwaya lhou khoine touthutlanungri nanungei kounakei nungkngai hoirouwo! 18 Keine na nammaei ngamrou kyunri nimak; Keiyei khalthutkur thimi rapyari Keine muchilei. Heiya Khyingei lailikni atoubi yunkhou heihakya chimne hungthuknanung toume, ‘Keikou pulne omkanthrinbi chamai thimi heiwane Keinung hollhakbi Keile karhoukril hoiyeirou.’ 19 Keine asinung heinakya hungthukbongnung nanungei yunpilei, heitoubi lhouhei hungthukeinung, ‘Keiri Keihakme’ toubi nane hungmubi uklumheirou. 20 Keine nanungei chimhakya yunpilei: hukhatne Keiyei yenmalhetpikur thimi hukounak khatya loulhakpi thimi heiri Keiyakhi loulhakpirou; heirou hukhatne Keiya loulhakpilanungri, Keiya yenmalhetpikur ayakhi loulhakrou.”
Jesu'ne Aya Yorrou Younei Ngamrou Yunthutpikhou
21 Jesu'ne tlou heiya yunchikur hillouri, aiyei lhawai heiri kalthi lahwura heirouri Ane khyingne yunthutpikur, “Keine nanungei tanghakni yunpilei naihangrei napung-khatne Keiya yorrou youlei.” 22 Heirouri ruishik rapne ngakurbi, huya yunkurrawo toubi yane khatle khat thirilbi leikur. 23 Ruishik rapbei hangra Jesu'ne nam'rouwei malungshidui napawa heine Jesuei pongra ombi leinarou, 24 Simon Peter'ne anungei mit heipiwurbi, “Aiyei kyun heiri huya yunkurrawo beicha heingaithilaklo,” toubi heishunkur. 25 Heisi tounarouri ruishik heiwane Jesuei mnakra tonkarsilbi loukngai, “Neikyun heiya huyawo, Upawa?” 26 Heirou Jesu'ne loumallangkur, “Keine mumtol har bei loubi daarkepra lupdokbine malanpirou kyou napawa heihakrime.” Heisitoubi Ane mumtol har khatcha loubine, heitoubi lupdokbi Simon Iscariotyei chanapawa Judasnung malanpikur. 27 Heirouri Judas'ne mumtol heiya louloukurle tallengne Satan'ne anungei changkur. Heirou Jesu'ne aya shunkur, “Neiyei tourou'kyou heiya khrangni toulaka.” 28 Heirou Jesu'ne koungammei anungei heisi shunpikurro touri lukturng pongrei omkarhungbi klei ruishik dei hukhatnekhi mumakur. 29 Judasri tuykao pa'kna thimi hoinei ngamrou aya shunbi yai chanung-mainung lorou watyilkurko, nimanung kanring thimi rapnungei koukouya heipilaklo toubi Jesu'ne aya watyilkura marbuni ruishikrap deine ningchakur. 30 Heirouri Judas'ne mumtol heiwaya louloubi tallengne daangra wathukkur, kheen heinungri masa hoiyura. 31 Heirou Judas'ne wathukkur hillouri, Jesu'ne kyun, “Asinungri Thimiyei Chanapawaei thang'al heiri kanrethutdurla; heirou Dunpuei thang'al heikhi Aiyei ngamne kanrethutdurla. 32 Heirou Dunpuei thang'al heiri anungei kanrethutpilari, Dunpune Thimiyei Chanapawayei thang'alkhi kanrethutyerrou, heitoubi Ane heiwaya tallengne hoiyerrou. 33 Keiyei chanaorap, Keiri nakou kalhonbi leikhourouri kheen tlamarou. Nane Keiya thipharou, heiya Keine Jehudiya lhou'urpu rapnung yunthutkhou heinakne Keine nanungkhi yunthutkhoupirou, ‘Keiyei charouyouna bi heirou nari chachangmakrou.’ 34 Heirou asinung Keine nanungei ran chaylam pikhoulei: nane khatle khat malungshirillak. Keine naya malungshipikur heinakne, nane khatle khat malungshirillou da. 35 Heirou nane khatle khat malungshirillanungri, nane murou touri na namyerwari Keiyei ruishik rapme.”
Jesu'ne, Peter'ne Aya Yapimakrou Younei Ngamrou Yunthutkhou
36 Heirou Simon Peter'ne anungei kngai, “Upawa, Nangri koulhangra charou touneiyo?” “Keiyei charou youna bira nane chanthung manemakrou,” toubi Jesu'ne loumallangkur. “Heiya nane hillou chanthungeirou.” 37 “Upawa, keine koutounei neihilla chanthungkur manemakrouwo? Keiri neinung'tlim hirou toubi marshikkurame,” toubi Peter'ne loukyun. 38 Heirou Jesu'ne loushunkur, “Nangri tanghakpane Keinung'tlim hirou'toubi wairaangkurako? Keine neinungei tanghakne shunpirou: Waapane khungbongnung nangne Keiyari mumakme toubi khyumbuirek yapimakne yunthutdeirou.”
Jesu'ri Pawayei Bira Changnanungei Lam
1 Jesu'ne yanungei shunkhou, “Naiyei ukning plangurbi, lhawai lahmakneyasu. Dunpuya uklumlak, heirou Keiyakhi uklumlak. 2 Keiyei Pawaei cheemra bomtho chungwane leilei, heitoubi Keine bi heirou nai leinanungei bom marshiknanungei lamkrine louchalei. Heisi nimaknungri Keine tlou aya nanungei yunpimakrou. 3 Heirou Keine louchabi nanungei leinabi marshikkur hillouri, Keine hanui yenkallengbi naya yongruithurou, heirou nakhi Keikou kalhonbi leirou. 4 Keiyei louchana bi heirou chananungei lam heiri nanekhi muwurla.” 5 Heirouri Thomasni anung loukngai, “Upawa, neiyei loucharou youna bi heiri koulhangrawo? Kari mumakme, heirou kane kousitoubi bi heirou tlungrouwo?” 6 Heirou Jesu'ne anung loumallangkur, “Lam heikhi, chim heikhi heirou khringei chaankhi Keime. Keiyei karyunrei nimakne thimi hukhatnekhi Pawaei bomra tlungchangmakrou.” 7 Ane yanungei kyun, “Asinungri nane Keiya muwurla, heirou Keiyei Pawayakhi nane mueirou, heirou asinung youbi nane Aya muwurla, heirou nai mitnekhi Aya muphawurla.” 8 Philipni Anung loushun, “Upawa, kanungei Pawaya muyerpilaklo; kane beimakne mu'kniri Ayame.” 9 Heirou Jesu'ne loumallangkur, “Kheen kounak tlane Keine nakou leimalnawurla; heiyanungkhi nangneri Keiya angtu ramphane mumakhuinu, Philip? Hukounakne Keiya mulanungri Pawayakhi murou. Heiyanungri koutounei, ‘Pawa heiri kanungei mutpilaklo’ toubi yunkurrawo? 10 Keiri Pawanung klei, heirou Pawane Keinungei kleime touri nangne uklummako, Philip?” Jesu'ne Aiyei ruishik rapnung kyun, “Keine nanungei shunpikur tlourap awari Keitamyei kningya yunthutkur nimak, heiya Keinungei klei Pawane Aiyei lhouya toukurme. 11 Keine Pawanungei klei heirou Pawane Keinungei kleime toubi yunyeinung nane uklumpimak. Heinimanung, Keiyei touthutkur lhou rapya uklumlak. 12 Keine nanungei chimhakya yunpilei: huhune Keiya uklum thimi heine Keiyei toukur lhouya hilthungne tourou, moi, chimlei, ane Keiyei touwurkhou lhou rapyakhi duine tangkur lhouya touheirouhui, ngamri Keine Pawayei leina bira chalei. 13 Heirou nane Keiyei minra koukouya buchalanungri, Keine heiya loutoupirou, heisitoubine Pawayei thang heiri Chanapawayei ngamne alyerrou. 14 Keiyei minra nane Keinung koukouya buchalanungri, heirapya Keine loutoupirou.”
Lhawai Khyingne Tlou Kantompi
15 “Nane Keiya malungshiyanungri, Keiyei chaylam rapya hilthungrouda. 16 Keine Pawanungei buchapibi, heirou Ane naya trungpinanungei napung khat yenmalhetpirou, heitoubi Ane naya klui naimakne kalhonpirou. 17 A heiri Dunpuei ngamrou chimya kanrethutpi Lhawai Khying heiri. Tlaipangpalne Aya loulhakpi manemaklei, ngamri tlaipangei mitne Aya loumumak, heirou mukhi mupimaklei. Heiya naneri Aya mulei, ngamri Ane nakou kalhonpilei, heitoubi naiyei rillakhi leipilei.” 18 “Keine chawura'nungri naitamtom horkhoupimakrou; Keine hanui yenkallengthurou. 19 Kheen lepcharou tlaipangpalne Keiyari muphamarou, heiya naneri Keiya mupharou; ngamri Keiri ringbi leileihui, heine nakhi ringheirou. 20 Tlainihei hungeinungri nane mupharou touri Keine Pawanung kleinakne, nakhi Keinung leilei, heirou Keinekhi nanungei leilei. 21 Huhune Keiyei chaylamya loulhakbi heirou heiyei hilya chanthungbi klei thimi heiri, Keiya malungshi thimi. Huhune Keiya malungshi thimi heiya Pawanekhi malungshipilei. Heirou Keinekhi aya malungshirou, heitoubi Keihakpane anungei muyerpirou.” 22 Judas'ne (ari Judas Iscariot nimak) kyun, “Upawa, koutoubi nangne tlaipangpalnung kanrepimakne kanungei kanrethutpirouwo?” 23 Jesu'ne anung loushun, “Huhune Keiya malungshiyanungri, Keiyei shunmatu rapya chanthungrou. Keiyei Pawane aya malungshipirou, heirou Keiyei Pawale Keile yongbine akou leikalhonpirou. 24 Hukhatne Keiya malungshima'nungri, ane Keiyei shunmatupi heikhi hilthungmarou Heitoubi nai mayekkur heirapri Keiyei nimak, heiya Keiya yenmalhetpikur Pawarei kyong. 25 Awari Keine nakou pulne leikhouweinung yunpiwurkhoula. 26 Pawane Keiyei minra yenyillou kyou Lhawai Khying heine nanungei namma shunmatupirou, heirou Keine nanungei yunpiwurkhou namma heiya ane naya ningthutyerrou. 27 Keine nanungei kyingya lakhoupilei; nanungei lakhoupikur kying ari Keiyeime. Keine nanungei pikur kying heiri tlaipangpalne pinaksi nimak. Naiyei ukning plangurbi, lhawai lahwurmakneyasu; heirou chimakne leiyalo. 28 Keine nanungei kyun heiya nane mayeklaklo, ‘Keine naya lakurkhoula, heiya Keiri hanuikhi nanungei yenkallengthurou.’ Nane Keiya malungshikhou hoiyanungri, Keine Pawayei leinara karouwame toubi nane haraorou, ngamri Ari Keiyakhi duine tanglei. 29 Asinung lhou namma hungthuk'bongnung Keine nanung yunthutdurkhoula, heine lhourap namma hungthukei kaalnung nane heirapya uklumheirou. 30 Keiri nakou kheen tlane tlou kallangril yamakarou, ngamri tlaipangei Pu heiri asinung hungthukkura. Ane Keiyei doura koukhi mantrang maklei, 31 heiya tlaipangne mubomthuk touri Keine Pawaya malungshilei; heingammei Keine Aiyei chay piwurkhou namyerwa heiya toukurme. Wawalo, kane bi arouwei chutdurlakase.”
Jesuri Chimyei Darkha'yam
1 “Keiri chimmei darkha yam, heirou Keiyei Pawane darkha yekul trunpipu hoilei. 2 Hei heimak darkhayam ban rapya Ane khribsundakur, heitoubi lhangaiyei hei heibi klei ban rapya ane lhangaidui trunmathaipibi, holira ngurbangpilei, heingammei banrap heiri marthing, heirou heikhi duine chungne heilei. 3 Nayari Keiyei marnopikur tlou rapne marthingpiwurla. 4 Nane keinungei marapbi leiyalo, heirou Keine nanungei marapbi leirou. Darkha ban heine aitam hei heichangmak; heiya ban heine darkha trungra maryombi leiyanungtom hei heichangrou. Heinakrimni nane Keinungei marapbi leimanungri, naitamne hei heichangmakrou.” 5 “Keiri darkha'yam, heirou nari darkha banrap. Huhune keinungei marapbi leiyanungri, heirou Keine anungei marapbi leiyanungri hei chungne heiroume; ngamri kei yaomakne nane koukhatkhi toumanemak. 6 Hukhatne keinungei marapbi leimak thimi heiri khripburbi taaryerkur bannakne hoirou, heitoubi markumloubine meiwaira khinglhakbi hongkurnaksi hoirou. 7 Heirou nane keinungei marapbine, heitoubi Keiyei tlourap heine naiukningra leiyanungri, nane koukouya bulanungkhi nanungei phayerrou. 8 Nane darkhahei chungne heiyerlanungri, Keiyei Pawaei thangya alyerlei; heisitoubi nane Keiyei ruishikrap hoirou. 9 Pawane Keiya malungshipikur heinakrimni Keinekhi naya malungshipilei; heineri nane Keiyei malungshipinara leiyalo. 10 Keine Keiyei Pawayei chay rapya hilthungbi heirou Aiyei malungshinara kleinakne, nanekhi Keiyei chay rapya hilthungne chawanungri, nane Keiyei malungshipinara leirou.” 11 “Nanungei Keiyei houklum leiyernanungei, heirou naiyei houklum heiri rongtlung hoiyernanungei toubi Keine nanung tlourap heiya yunpiwurkhoula. 12 Keiyei Chaylamri arime: Keine naya malungshipi heinakne, nane khatle khat malungshirillak. 13 Thimi napung khatne aiyei palui rapya tangni malungshipikur heiri aiyei palui rapnung'tlim aiyei rongchanya makatbi hipikur heiya duiri maklei. 14 Heirou nane Keiyei chay rapya hilthungne lhou toulanungri, nari Keiyei paluirap hoilei. 15 Keine nayari shokrap toubi ungpimakura, ngamri shok heine aiyei Cheempuei toubi klei heiri kouwo touri mumaklei. Heinung'tlimri Keine nayari palui toubi ungpilei, ngamri Keine Pawarei mayekkur namyerwaya nanungei yunthutpiwurla. 16 Nane Keiya khalthutkur nimak, heiya Keine naya khalthutkur, heirou nane chabi hei chungne heiyernanungei toubi Keine naya lhou lhakpikur. Heirou nane Keiminra Anungei koukouya buchala'nungkhi Pawane nai bucha heiya pirou. 17 Heiyanungri, Keine nanungei chay pibine shunlei: Nane khatle khat malungshirillak.
Tlaipangei Machin
18 “Tlaipangpalne naya machinlanungri, lamkrine Keiya machinme toubi nane mupilak. 19 Nane tlaipangpallei hoiyanungri, heirou tlaipangne nayari Aiyei nakrimni malungshipirou. Heiya Keine nayari tlaipangpal arouwei khalthutdurla, heine nari tlaipangei hoimakura; heitounei ngamrou nayari tlaipangpalne machinlei. 20 Keine nanungei yunpikur rapya ningthutlak: ‘Hukounak shok khatnekhi aiyei cheempuya duine tangmakrou.’ Yane Keiya marhotlanungri, nayakhi marhotdeirouhui; yane Keiyei marnopikurya hil thunglanungri, naiyei marnopikurkhi yane hil chanthungpirou. 21 Heiya yane nanungei heinaksi lhouya toueirou, kouweiyo toulanungri nari Keiyei thimirap hoiyura; heirou yaneri Keiya yenmalhetpikur Ayari mupimaklei. 22 Keine yongbi yanung heinakei tlou rapya yunkhoupimanungri, yaiyei borh makrou; heiya asinungri yaiyei borhya makhubphobnung bomri makura. 23 Huhune Keiya machin thimiri Keiyei Pawayakhi machinlei. 24 Thimidei hukhatnekhi toukhoumak lhou rapya Keine yaihangra toukhoumanungri, yaiyei borh koukhatkhi makrou; heiya nane Keiyei toukurya muwurla, heitounei ngamrou yane Keiyakhi heirou Keiyei Pawayakhi machinlei. 25 Tlou ari yaiyei chaylamra: ‘Yane koungamkhi maknarou Keiya machinkur’ toubi mayewurkhou heiya chimne hungthukna'nungei toume. 26 “Trungpipu Lhawai Khying heine hungbi, heirou ane Dunpuei ngamroukhi heirou airouwei hungbi klei heiwayei ngamrou chimya mutpirou. Keine aya Pawaei bom'rouwei yenmalhetpirou, heitoubi Ahakpane Keiyei ngamrou shunthutpirou. 27 Heirou nanekhi Keiyei ngamrou shunthutpirou, ngamri nari haallei waiyoubine Keikou kalhonbi klei thimirap.”
1 “Keine nanungei anaksi tlou rapya yunpinarou, tlou heine naiyei uklumya kanthrityermakrou. 2 Nayari Pukhrumna Cheemrei hulthutdurnungei trumkhi hungeirou, heirou thimi hukhatne naya hatdurbi, heirou aiyei toukur lhou heiri Dunpuei watlhoume toubi ane ningchabi leinei kheenkhi hungeirou. 3 Thimi rapne heinaksi lhou rapya nanungei toupiheirou, ngamri yane Keiyei Pawayakhi heirou Keiyakhi mupimaklei. 4 Heiya Keine tlourap heiya nanungei yunpiwurla, touri yane heinaksi lhou rapya tounanungei kheen hungthukeinung, heirou Keine nanungei lamkrine yunpiwurlame toubi nane ningthutdeirou.”
Lhawai Khyingei Lhoutou
“Keine heinaksi lhou rapya haalnung yunpikhoumak, kouweiyo toulanungri Keikhi nakou leimalnakhou. 5 Heiya asinungri Keiya yenmalhetpikur heiwayei bira Keiri charouwa, heiya naihangra hukhatnekhi Keiya koulhangra charou waiyoukurawo toubine ngaipimaklei. 6 Heirou asinungri nanung yunpiwurla, naiyei ukning klahni thimmura. 7 Heiya Keine nanungei chim tlouya yunpilei: Keiri nanung'tlim chakurni lhangai; ngamri Keine chamakanungri, nanungei trungpinanung pu heiri yongmarou. Heiya Keine chawuranungri, Keine aya nanungei yenmalhetpirou. 8 Heirou ane yongbi, tlaipangpallei thimi rapnung yai toubi klei borhyei lhou rapbei ngamrou, heirou chim lhouwei ngamroukhi heitoubi Dunpuei picharyei ngamroukhi ane shunpirou. 9 Yane borhyei lhouya touwurla, ngamri yane Keiya mupimaklei; 10 yane tharmu klallei lhouya touwurla, ngamri Keine Pawaei bira charouwa, heirouri nane Keiyari kallengne muphamarou, 11 heirou yane chimmei picharkhi toumakura, ngamri tlaipangpallei puyari pichar luilhakurla. 12 Keine nanungei shunpinung chungne leileihui, heiya asinungri naiyei ninglhaknung chungachakura. 13 Heiya Lhawai Khyingne yongeinung heirou ane Dunpuei ngamrou chim tlouya mutpirou, heirou ane naya chimna lhangra ruilhakpirou. Aneri aitamei ngamrou yunmakrou, heiya aiyei mayekkur rapya ane yunpirou, heirou ane hungthukrou kyou lhou rapyakhi yunpiyeirou. 14 Ane Keiya thang alyerrou, ngamri Ane Keiyei kyunya loulhakpirou heitoubi nanung yunpirou. 15 Keiyei Pawayei klei namma heiri Keiyei hoirou; heitounei ngammei Keine yunkhou touri Lhawai Khying heinungei Keiyei pikur namyerwa heiya loubi heirou ane nanungei yunthutpirou.”
Ukning Klah Heirou Hakrao
16 “Kheen lepcha leibi heirou nane Keiyari muphamarou, heitoubi lepchaei hillouri nane Keiya muthurou.” 17 Heirouri Aiyei ruishik thane yaitam ngairilkur, “Ane kanungei, ‘Lepcha leibi kane Aya muphamarou, heitoubi lepchaei hillouri kane Aya muthurou,’ toubi kyun heiri kouyaeiyo? 18 Heirou ‘Lepcha’ touri kouya kyunno? Aiyei kyun heiri kouwei ngamyawo kari mumaklei!” 19 Jesu'neri Aiyei yunkur tlou rapbei ngamrou yane Anungei hanui kallengne ngaithiniwura touri muwurla, heitounei ngamrou Ane yanung shunkur, ‘Lepcha leibi nane Keiya muphamarou, heirou lepchaei hillouri nane Keiya muthurou’ toubi shunkur heiyei ngamrou nane naitam ngairilkurako? 20 Keine nanungei chimya yunpilei: Naneri ungraobi chapbeirou, heiya tlaipangneri haraorou; nane ukning lahrou heiya nai ukning klah heiri haraonei lhangra hollhakeirou. 21 Napuiya khatne nao puklum hungphalanungri ane lhawai klah, ngamri aiyei klah-mrim dourou younei trum hungtlungura; heiya nao pukur hillouri, ane aiyei klah-mrimkur heiri malumkur, ngamri ane tlaipangra nao pukurlame toubi hakrao. 22 Heinakrimni nanungei leilei: Asinungri nai lhawai lah'leihui, heiya Keine naya hanui muphaeirou, heirouri nai ukningra nungkngaini thim'rouwa, heinaksi nungkngai heiri hunekhi nairouwei louthutkur manemakrou. 23 “Heinaksi tlaini hunganungri, nane Keinungei koukhatkhi ngailounung makrouwa. Keine nanungei chimhakya yunpilei: Nane Keiminra koukouya buchalanungri, Pawane nanungei pirou. 24 Asilumpha nane Keiminra koukhatkhi buchamakhui; buchalak, heiyanungri nane pharou, heitoulanungri naiyei hakrao heiri rongtlung hoirou.
Tlaipangya Mane
25 “Keine nanungei anaksi lhou rapya shunpinanungei toubi heinakei mu'kna tloulha rapya yrengbi kyun. Heiya heinaksi mu'kna tloulha rapya yrengmakne yunpina trumkhi hungeirou, heiya Keine Pawayei ngamrou nanungei khminne yunpiyeirou. 26 Heitoubi heinakei tlaini hungeinung, nane keiminra Anung buchaeirou; heirouri Keihakni nanung'tlim Pawanungei buchapiroume touri Keine nanungei yunmaklei. 27 Kouweiyo toulanungri Pawa Ahakne naya malungshipilei. Ane naya malungshipi, ngamri nane Keiya malungshipi heirou Keiri Pawa'rouwei kyongme toubi nane Keiya uklumpila. 28 Keine Pawa'rouwei tlaipangra yongpilei; heirou asinungri Keine tlaipangpalya lakurkhoubi Pawayei bira kathurouwa.” 29 Heirouri Aiyei ruishik rapne Anung kyun, “Asinung Nangne kanungei mu'kna tloulharap yaomakne yertleng yunpiwurla. 30 Asinungri kane muchila touri Nangri namma muwurla; heine hukhatnekhi Neinungei tlou ngaithibom thukmaklei. Awane kaya uklumyerla touri Nangri Pawayei bom'rouwei yongpilei.” 31 Heirou Jesu'ne yanung loukngai, “Nane asinungri uklummuranu? 32 Kheen heiri asinunghak hungtlungura, arouri na nammane Keitamya lakurkhoubi, minung-minung trukchekurbi ai'aiyei cheemra kallengrouwa. Heiya Keiri Keitamtom leithungmarou, ngamri Pawane Keiya kalhonpibi leilei. 33 Keine nanungei anakya yunkhoupila touri nane Keile marapbi leiyanungri nanungei kying hoirou. Tlaipangpalne naya mrim-nangyerreirou. Heiya nane kanthrambi leiyalo! Kouweiyo toulanungri Keine tlaipangpalya manekhoula.”
Jesu'ne Aiyei Ruishik Rapnung'tlim Shunchapi
1 Jesu'ne tlourap heiya yunchibi, Ane Thangmun lhangra katthibi kyun, “Pawa, kheen heiri hungtlungura. Neiyei Chanapawanung thang alyerpilak, heitoubi Chanapawa heinekhi Neinungei thang alyerrou. 2 Kouweiyo toulanungri, Nangne Aya tlaipangra ringbi klei namyerwaya manenanungei mantrang pikur, heitounei Nangne Anungei pilhakur thimi namyerwanung Ane klui naimak khring chaan phayerrou. 3 Heirou khringei chaan touri Neiya chim Dunpu khatme heirou Jesu Christa heiri Neiyei yenmalhetpime toubi kmu heiwari. 4 Keine Neiyei thangya tlaipangra alyerbi muyerwurla. Nangne Keiya touyerkur lhou heiwaya Keine touwurchila. 5 Pawa! Tlaipangpal sheembongei waiyoubi Keine Nangkou kalhonbi leikhouweinung alyerkur thang'al heinakrimni, asinungkhi Neiyei maibongra Keiya thang alyerpilak. 6 Tlaipangra Nangne Keinungei pithutkur thimi rapnung Keine Neiya muyerwurla. Yari Neiyei hoiyura, heirou Nangne yayari Keihutra pilhakurla. Yane Neiyei tlouya chanthunglei, 7 heitoubi asinungri Nangne Keinung pilhakur put namyerwa heiri Neirouwei kyongme touri yanekhi muwurla. 8 Nangne Keinung pilhakur Lhangai Pao-laa heiya Keine yanungei piwurla, heirou yane paolaa heiya loulhakurla; heitoubi yane mulei touri Keiri Neiyei birouwei kyong, heirou Nangne Keiya yenmalhetpime toubi yanekhi uklumlei. 9 Keine yanung'tlim shunchapilei, Keine tlaipangpal anung'tlim shunchapi nimak, heiya Nangne Keinungei pikur thimi rapnung'tlim Keine shunchapi, ngamri yari Neiyei hoiyura. 10 Keiyei klei namyerwa ari Neiyei, heitoubi Neinungei klei namyerwa heikhi Keiyei; heirou Keiyei thang'al namma heiri yanungei mutpiwurla. 11 Heitoubi asinungri Keiri Neinungei hunglei; heirou Keiri tlaipangpalla leikhoumarou, heiya yari tlaipangpalla leithungleihui. Khying Pawa! Nangne Keinungei piwurkhou Neiyei min heiyei mantrangei ngamrou yaya shuikngam leiyermakne khoupilaklo, heitoulanungri Nangle-Kei khatnak khoinakne yakhi khatsi khoine leirou. 12 Keine yakou kalhonbi leikhouweinung, Nangne Keinungei piwurkhou neiminyei mantrang heiyei daakra klah-knang leiyermakne yaya khoupila. Keine yaya ngaaksilpila, heitounei ngamrou khyingei tlou rapya chimne tlungyernanungei, maangurou kyou chanapawa heiwatom nimakne, ya deiri hukhatkhi maangmakura. 13 Heirou asinung Keiri Neinungei wachanglei, heirou Keine tloulhang rapya tlaipangra shunthutpiwurla, heiyei ngamne yai malungra Keiyei hakrao heine thimrou. 14 Keine Neiyei Pao-laaya yanungei shunthutpiwurla, heingammei tlaipangne yayari machinlei, ngamri Keine tlaipangei hoimaknakne yakhi tlaipangei hoimakura. 15 Keineri yaya tlaipangrei louthutnanungei Neinungei buchakur nimak, heiya Keine Neinungei buchari yaya lhangaimak lhawai rapbei hutrei kalthutpilaklo tounei. 16 Keine tlaipangei hoimaknakne, yakhi tlaipangei thimirap hoimaklei. 17 Neiyei chimtlou heiyei ngamne Keine yaya chimyerpibi, heirou Keine yaya Neinungei makatlei. 18 Nangne Keiya tlaipangra yenmalhetpikur heinakne, Keinekhi yaya tlaipangra malhetpiwurla. 19 Heitoubi yaingamrou Keitamya Neinungei Keine makatlei, heitounei ngamrou yanekhi yaimsha yaitamne Neinungei chimne makatrou. 20 Keine yanungeitom shunchapi nimak, heiya Neiyei paolaaya mayekbine Keiya uklumkur thimirap namyerwanungkhi buchapilei. 21 Keine yaya khatsi hoiyernanungei buchapilei! Pawa, Keine Neinungei klei heirou Nangne Keinungei klei heinakrimni, yakhi Neinungei leiniyasu. Yane khatsi khoine leiniyasu, heitoulanungri Kei awari Neiyei yenmalhetpikurme toubi tlaipangne uklumpirou. 22 Keile Nangri khattom khoinakne, yakhi khattom hoinanungei toubi, Nangne Keinungei piwurkhou thang'al heihakya Keine yanungei piwurla. 23 Keine yanungei klei, heirou Nangnekhi Keinungei klei, heisi toubine yane pulne khatsi hoirou, heirouri Nangne Keiya yenmalhetpikur, heitounei Nangne Keiya malungshi'nakne yayakhi malungshipime toubi tlaipangne mupirou. 24 Pawa! Nangne yayari Keinungei piwurla, heirou Keine yaya Keiyei leina bira leiyernileime, heiyanungri Nangne Keinung piwurkhou thang'al heiya yanekhi mupharou; ngamri Nangne tlaipangya sheembongei youbine Keiya malungshipi. 25 Khying Pawa! Tlaipangpalne Neiya mupimak, heiya Keineri Neiya mulei heirou Nangne Keiya yenmalhetpime touri anaksi lhou rapne mutpilei. 26 Keine Neiya yanung muyerwurla, heirou Keine yaya duine muyerheirou, heitoubi Nangne Keiya malungshipi heiso yanungkhi leirou, heitoubine Keikhi yanungei leipirou.”
Jesu'ya Kman
1 Jesu'ne shuncha luilhakur hillouri, ane aiyei ruishik rapkou kalhonbi Kidron phaikar kraalne wawurbi, bi khatrou yekul khat louklei, Ane bi heirou Aiyei ruishik raple pulne wachangkur. 2 Thimi kyor napawa Judas'nekhi heiyei biya kmu, ngamri Jesu'ne bi heirou aiyei ruishik rapkou karyom murilkhou. 3 Heitounei yekul heirou Suipipu raple Lhangai karsa rapne Judas'ya heimalhetbi, ane Romea'yei Raallui raple heirou Pukhrumna Cheem kngaak thimi rapya heiruiheibi wakur; heirou yane shonle-cheile heirou meishar shinbine wakur. 4 Jesu'ne aiyei doura thukrou kyou lhou namyerwa heiya ane lamkrine kmu, heitounei Ane maibong-lhangra louchanrobi yanungei loukngai, “Nari huya raphawo?” 5 “Nazarethrei Jesu'ya thiphame,” toubi yane loumallang. “Awari Keihakme,” toubi ane loukyun. Thimiya kyor Judas'ne yakou kalhonbi bi heirou wamayungkur. 6 Jesu'ne, “Keihakme” toubi louyunnarou yane hil karshonwurbi thleira kanellhakur. 7 Heirou Jesu'ne hanuikhi yanung loukngai, “Nari huya thiphawo?” Heirouri yane, “Nazarethrei Jesu'ya thiphame,” toubi loumallangthu. 8 “Keiri Ahakme toubi Keine haalnungkhi nanungei yunpilantu,” toubi Jesu'ne loushun. “Nangne Keiya thiphame toulanungri, ya deiri shaallakasu.” 9 (Aiyei heisi yunkur heiri: “Pawa, Nangne keinungei pikur thimirap heiya hukhatchakhi maangyermak,” toubi yunthutkhou heiwaya chimne tlungyernanung toume.) 10 Heirou Simon Peter'ne shonkhyang khat yepbi heileinarou, ane shonkhumrei phuithutbi, Suipipuei shok khatpayei thyarei khna shatsundawurpi. Shok heiyei minri Malchus toubi ung. 11 Heitounei Jesu'ne Peterya shunkur, “Neiyei shonkhyang heiri shonkhumra ronlhakurlak! Neiyei kningri Pawane Keinungei pikur klahyei daarkep heiya mongmaka touneiyako?”
Jesu'ya Annas'yei Maibongra Pichar Tounanungei Myungkyer
12 Heirouri Rome'yei raallui rapne yaiyei ruipipu raple Jehudi rapbei bomtang thimi rapne Jesu'ya manbi phonphopkur. 13 Heitoubi yane aya lamkrine Annas'nung heiruilhakur. Ngamri Annas heiri heiyei kumrou Suipipu upa hoibi klei Caiaphas'yei puwame. 14 Caiaphas'ne Jehudi rapbei lhou'urpu rapya shunmatupikur touri thimi nammaei rungkhlang heinung'tlim thimi napung khatya hiyerkurni lhangairou. 15 Heirou Simon Peter'le dei ruishik khatpane Jesuei hilla heichanthungkur. Heitoubi ruishik khatyari Suipipuni shak lhangaidui kmu, heingammei ane Jesukou kalhonne Suipi puwayei cheem yuntlangmaibil heichanthungbi wachangkur, 16 heitoubi Peter'ne yuntlangmaiyei wachangna lamruira mayungbi leiyeinung, ruishik khatpane wathukbi shumtrum'pongra louklei nangakawinung washunbi, Peterya rilwaira ruilhakpikur. 17 Heirouri nangaka heiwine Peterya loumubi kyun, “Nangkhi napawa heiwayei ruishik rapbei hangrei kyaokhat nimakeiya?” “Keiri nimakme,” toubi Peter'ne loumallangkur. 18 Kheen heinungri krei, heingammei shok raple raallui rapne yuntlangmaira meibom lukpopbi, yane karhil ombine mei r'haibi heiklei. Heitounei Peterkhi wachangbi yaihangra mei r'haithungkur.
Suipipu Upawane Jesu'ya Tlou Kngai
19 Suipipu Upawane Jesu'nung aiyei ruishik rapbei ngamle heirou aiyei shunmatupi rapbei ngamroukhi tlou kngai. 20 Heirou Jesu'ne loukyun, “Keine thimi napung kantangnung karyomne khulpam maibongrakhi yunpiwurlan'tu, heitoubi Keiyei marnopikur namma heiri thimichung kartilna Cheemra heirou Pukhrumna Cheemrakhi marnopikhoun'tu. Heirou Keine muneri koukhatkhi toukhoumakhui. 21 Heiyanungri, koutounei nangne Keinungei tlou kngai? Keiyei marnopinarei mayekloukhei thimi rapnung tlou ngaithipilakma. Keine yanungei kouya shunmatupikuro touri yanungei ngaithipilak - Keine kouya yunpikuro touri yane murou.” 22 Heirouri Jesu'ne heisi yunnarou, raallui khatne aya maibira ummurbi kyun, “Koutoubi nangne Suipipu Upawanung heinakei tlouya yunmaneyo?” 23 Heirou Jesu'ne anung loumallangkur, “Keiyei yunnarou klal kouleiyura, thimi kantangnung heingaithilak. Heiya Keiyei kyun heine chimmanungri, koutounei nangne Keiya umkur?” 24 Heirouri Aya phonphop shutmakne Annas'ne, Suipipu Upawa Caiaphasyei leinara heiyilkur.
Peter'ne Jesu'ya Hanuikhi Yapimak
25 Peter'ne bi heirou meilumbi heisi mayungbi leiyeinung, thimi deinekhi anungei heikyun, “Nangkhi napawa heiyei ruishik rapbei hangrei khat nimaka?” Heiya Peter'ne yanimakne, “Keiri nimakme,” toubi loumallangthu. 26 Heirou Peter'ne khna paangkhat shaatsundakur, Suipipu Upawayei shokyei teinaothuk napawa khatnekhi, “Neiyakhi yekulra napawa heikou kalhonbi klei Keine mukur nimaka?” toubi ane heikyun. 27 Heiroukhi Peter'ne hanui - “Keiri nimakme,” toubi louyunthunarouri waapane katkhungkur.
Jesu'ya Pilate'yei Maibongra Heiruilhak
28 Heithangei tlaini ningshun manmarou Jesu'ya Caiaphasyei cheem'rouweini Pichar puwayei cheemra heiruilhakur. Bi heirou Jeshudiyei lhou'ur upa rapne wachangnimakne leikur, koungameiyo toulanungri, yane bi heirou wachanganungri borhrouwa, heiyanungri Ralthutpinei Kum'tlunnara kyao yamakroume tounei ngammei wachangnimakur. 29 Heitounei Pilate'ne pura wathukbi yanungei wakngai, “Napawa heiyei doura naiyei yanimakri kouklei?” 30 Heirou yai loumallangkuri, “Ane koukhatkhi klal toukhouma'nungri kane aya neileinara heiruilhakmakrou.” 31 Pilate'ne yanungei kyun, “Heiyanungri nai Chaylamyei youkna hilthungne nane aya ruilouheibi tlou darlaka.” Heirou yane loukyun, “Kari thimi hukhatyakhi hiyernanungei toumak.” 32 (Lhou ari Jesuei yunthutdurkhou tlou rapya chimne hungthukyernungei toukur, Ane Aiyei hiroukyou heiri kounaksira hirouweiyo toubi yunthutkhou. ) 33 Pilate'ne aiyei pichar bira kallenglhakthubi Jesu'ya ungbi hungkngai, “Nangri Jehudi rapbei Krungko?” 34 Heirou Jesu'ne loumallang, “Neiyei kngai tlou heiri neitammei ningthutbi kngai tlouwo nimanung thimi deine keingamrou neinungei yunpikur yaoneiko?” 35 Heirou Pilate'ne loukyun, “Neiyei khalnarari Keikhi Jehudiame touneiko? Ari neiyei thimi rapne heirou suipipu rapne neiyari keihutra pilhakurme. Nangri kounaksi klal lhouya touwurkhouwo?” 36 Jesu'ne loukyun, “Keiyei Krungbomri tlaipangei nimak, Keiyei Krungbom ari tlaipangpallei hoiyanungri, Keiyei hil chanthung thimi rapne, Keiya Jehudiayei lhou'urpu rapbei hutra pilhakurnarei lhukthutnanung'tlim yane raal kardourillarou. Heihakri nimak, Keiyei Krungbomri tlaipangei nimakme!” 37 Heitounei Pilate'ne anungei loukngai, “Heiyanung nangri Krungko?” Heirou Jesu'ne loumallang, “Keiri Krungme touri neiyei yunthutkur heiwariya. Keiyari tlaipangra chimya yunpinanungei toubine pukpiwurla. Heini chim thimi rapne Keiyei kyunya ninglhakpirou.” 38 “Heiyanungri, chimmo touri kouweiyo?” toubi Pilate'ne anung loukngai.
Jesu'ya Hatnanungei Tlou Darilkur
Heirouri Pilate'ne pura wathukbi thimi rapnung wakyun, “Keine napawa heiya klal dayerna'nungei koukhatkhi phamaklei. 39 Heiya naiyei youkna hilthungneri Ralthutpinei Kumtlun tlainiserrou Keine nanungei kulla chalphopbi klei thimi rapya khat-khat malhetthutpikur. Angtukhi nane Keiya Jehudi rapbei Krung heiya nanungei malhet'thutyernileiko?” 40 Heitounei yane anungei ungraochane loumallangkur, “Heihakri nimak, ayari malhet'thutyernimak. Kanungei Barabbas'ya malhetthutpilak!” (Barabbas'ri mucha-mumainei ngamrou manbine kulla chalphopbi khoukur thimi khat. )
1 Heirouri Pilate'ne Jesu'ya tanglouheibi heirou aya umkur. 2 Heitoubi raallui rapne thru lukhup khat sheembine Aiyei lura makhupbangkur; heitoubi yane Anungei linglikchul mrao khat nabangpikur, 3 heirou yane aiyei maibongra wachangbi kyun, “Jehudi rapbei Krungri pulchi hoiniyasu!” Heirou yane aiyei pongra wachangbi Aya maibira phitkur. 4 Pilate'ne hanui kallengne thimichung leinara wathukbine kyun, “Thilak, Keine napawa awaya nai maibongra urthutbi nanungei muyerlei touri Keine napawa awayei doura klal dayernanungei aimral koukhatkhi phamaklei.” 5 Heirouri Jesu'ne thru lukhup khupbine heirou linglikchul mrao nabi wathukeinung, heirou Pilate'ne yanung kyun, “Thilak! Napawa heiri bi arou leiyurame!” 6 Heirou Suipipu raple Pukhrumna cheemmei bomtang thimi rapne Aya loumunarouri, yane ungraobi kyun, “Ayari manyarhatlak! Ayari manyarhatlak!” Heirou Pilate'ne yanungei kyun, “Heiyanungri nane Aya ruilouheibi manyarhatlaka. Heiya keineri Aidoura klal dayernanungei ngamri koukhatkhi phamak.” 7 Heirouri Jehudi rapne heimallangthu, “Kaiyei youkna chaylamyei hilthungne Ari hibom thuk thimi khatme, ngamri Aiyei mur'hakni Ari Dunpuei Chanapawame toubine yunthutkhou.” 8 Heirouri Pilate'ne heinaksi kyunya mayeknarou ari duiduine chiwurthuwa. 9 Ane pichar touna bira yenkallenglhakbi hanuikhi Jesu'nung hungkngai, “Nangri koulhangrei kyong thimiyo?” Heiya Jesu'ne loumallangmak. 10 Heitounei Pilate'ne anungei shun, “Nangri Keiyei kngai mallangmakrouko? Keine neiyari malhetkurkhi mane heirou manyar'hatkurkhi manelei touri nang mumako?” 11 Heirou Jesu'ne loumallangkur, “Nangne keidoura toumane mantrang klei heiri Dunpune neinungei piwurkhou. Heiyanungri Keiya neihutra pilhakur napawa heiri duiyei borh urthimi.” 12 Pilate'ne heitoubi kyunya mayeknarouri, ane Jesu'ya malhetdurnanungei lam raphakur. Heiya thimi rapne kalthi hei'ungraokur, “Nangne aya malhetlanungri, nangri Krung Caesaryei paluihak nimaklei! Hukhatne aitamya Krungme toubi yunthutkna thimi heiri kaiyei Krungya karhou thimime!” 13 Heirou Pilate'ne kyun heiya mayeknarouri, ane Jesu'ya urthutloubi Hebrew tlouni ‘Gabbatha’ toubi ung pichar touna bira wa'omkur. (Pichar touna bi heiri thleimaira thlungpaak lambine sheem. ) 14 Tlaini heiri Ralthutpinei Kumtlun tlainiyei maibong nunghangei hoikur. Pilate'ne thimi rapnung kyun, “Nai Krungri ariyame!” 15 Heirou yane ungraobi heikyun, “Aya ruilouheilaka! Aya ruilouheilaka! Heitoubi Ayari manyarhatlaka!” Heirou Pilate'ne yanungei loukngai, “Nane Keiyari naiyei Krungya manyarbi hatyernileiko?” Heirou Suipi pu rapne loumallangkur, “Caesar nimakne, kaiyeiri krung deiri makme!” 16 Heisitoubi Pilate'ne Jesu'ya manyar'hatnanungei yaihutra pithutkur.
Jesu'ya Manyar'hatkur
Heirouri yane Jesu'ya pura urthutloukur. 17 Heitoubi ane aitamei heeng karbakya urbine, heirou Hebrew tloura ‘Golgotha’ toubi ung bira wa'tlungkur, bi heiri ‘Lu'thru khingna bi’ toubikhi mu'kna. 18 Bi heirou yane aya manyarhatkur; heitoubi yane bi heirou thimi napung-khniyakhi, Jesu'ya tlailamra khoubi, thyoi-thyara napung khatsol manyarbi hatkur. 19 Pilate'ne “Nazarethrei Jesu, Jehudi rapbei Krung” toubi mu'kna khat mayebi heengkarbakra hempopkur. 20 Heinaksi mayebi muyerkur heiya thimi rapne pathikur, ngamri Jesu'ya manyarhatna bi heiri khukharthillouwei kalni tlatrilmak. Muyerna tlou heiri Hebrew, Latin heirou Greek tlou rapne mayekur. 21 Suipipu rapne Pilate'nung shun, “Jehudi rapbei Krung” toubi mayemaklo, heiri aitamne ‘Keiri Jehudi rapbei Krungme’ toubi yunthutkna. 22 Heirou Pilate'ne loumallangkur, “Keiyei mayekur heiri mayekurra, heisi leiwurlakasu.” 23 Raallui rapne Jesu'ya manyarhatdurbi, heirou yane Aiyei shamb rapya louheibi shungphali thukni threlkhaibi ya napung khatkhatne shung khatsol yerkhailoukhei. Heirou yane dourei waiyoubi mayuphaei thruina tekhi yaomak phiyeng khatdei linglikchul heiwakhi, 24 yane loubi, “Awari threlkhaimakase, kaihangra hune likarsui lhangai hoileiyo, meirui thinanungei tuypeek khingthiyase, heitoubi louwase,” toubi yunrilbi yerloukur. Ari Khyingei lailikra atoubi yunkhou heiya chimne hungthuknanungei touwurkhou: “Yane Keiyei shambya yaihangra yerrilwurla, heitoubi Keiyei linglikchul heinungtlim meiruikhi thirilwurla.” Yunthutkur tlou heinakrimni raallui rapne touwurkhou. 25 Jesuei heengkarbak pongrei mayungbi leikhou thimirap heiri Aiyei puiwi, Aiyei puiwiyei 'tei, Clopas'yei nu Mary'le heirou Mary Magdalene yarapri. 26 Jesu'ne Aiyei puiwile, aiyei nam'rouwei malungshidui ruishik heiwakhi bi heirou mayungbi heiklei kmu; heirouri Ane Aiyei puiwinung kyun, “Napuiwiyo, neicha napawaya thilak.” 27 Heitoubi Ane ruishik heiwanung shun, “Neipuiya thilak.” Kheen heirouwei waiyoubi ruishik heiwane aiyei puiwiya aicheemra ruilouheikur.
Jesu Hikur
28 Asinung lhou namma luilhakrouwa touri Jesu'ne kmu, heirou Khyingei lailikrei kyun heiya chimne hungthuknanungei ane atoubi yunkhou, “Kei yui hatdura.” 29 Kheen heirouri bi heirou daarpang khatra darkhayui bil'thimni shukbi heikhou; heirouri yane darkhayui kha-khyur heiya phimtum khatra lupdokbine, hyssop heengban msurra yepbi heirou katmalambi Aiyei murra katmandopikur. 30 Heirou Jesu'ne heiwaya loumongloubi kyun, “Awari luikurra!” Heitoubi aiyei lu shikhupbine kat'hikur.
Jesu'nei Onhimra Cheipakni Thunkur
31 Heirouri Jehudiyei lhou'ur upa rapne Pilate'nung buchabine manyarhatkur thimi rapbei ho umdeekkureise, heitoubi yai khi'lhungrap heiri heengkarbak'rouwei khingsundawureise toubi washunkur. Koungameiyo toulanungri yane thimi khi'lhungrap heiya Mathrilna tlainirou heengkarbak doura manyarbi khounimak, ngamri hungbi klei Mathrilna tlaini heiri namyerrouwei khyingdui tlaini. 32 Heitounei ngamrou raallui rapne wabi lamkrine Jesule manyarbi hatkanthrinkur napawa napung-khniya waiknaine ho umdeekkur. 33 Heiya yane Jesuei lhangra hungeinungri Jesuri louhiyurame touri mukur, heingammei yane aiyei ho heiri umdeekmakur. 34 Heiya raallui napung-khatne aiyei cheipakni Jesuei onhimra kat'thunkur, heirouri heele-yuile yenkungsundakur. 35 Thukkur lhou heiwaya muthungkur napawa heine lhouthuk heiyei ngamrou yunthutkhou, heirou Aiyei yunthutkhou heiri chimhakme, heitoubi yunthutkhou heiri chim touri ane kmu, heirou Aiyei kyun heiri chimleime touri nanekhi mubine uklumrou. 36 Tlou awari khyingei Lailikya chimne tlungyernanungei toume; “Aiyei thruri khatchatomkhi umdeekmakrou.” 37 Heitoubi khyingei lailik bi khatra atoubi yunkhoukhi khat klei: “Yane cheine thunkur napawa heiya thimi rapne mit'thrilbi leiheirou.”
Jesu'ya Khi Krui
38 Heihillouri, Arimathea'rei Joseph toubi ung napawa heine Pilate'nung wabi Jesuei khi'lhung heiya anungei pilaklo toubi wabukur. (Joseph heiri Jesuei hilthungkhou napawa khat, heiya ane Jehudi rapbei lhou'ur thimi rapya chinei ngamrou miya muyermakne munne hilthungbi leikhou napawa khat. ) Pilate'ne anungei yapiwurbi khi'lhung heiri loukhei yawaroume toubi loushun, heitounei Josephni wabi khi'lhung heiya waloukhei. 39 Heirou haalnungkhi masa'khatnang Jesuei leinara munne wakhou napawa Nicodemus'khi, muiknam shirekle mroh markapbi tungka khatdeimal heibine Josephle kalhonne wakur. 40 Yakhuntane Jesuei khi'lhungya loushundabi, Jehudi rapbei youkna hilthungne khi'lhung heiya muiknam shirekle mrohle marshikbine, heitoubi phaikhring punshelni lhomphopbi, khi heiya ruinanungei marshikkur. 41 Jesu'ya hatdurna bi heirou yekul khat klei, heirou yekul heiyei rilla thimi hukhatyakhi phummakna lhanran khatkhi louklei. 42 Thangei tlaini heiri Mathrilna tlainikhi khoi, heirou lhan heikhi naknara leinei ngamrou, yane Jesuei khi'lhung heiya bi heirou phumkur.
Lhanding
1 Hapta khatdei lamkri tlainiyei ningshun manma, meh'luplapbei kheenrou Mary Magdalene heine lhanbomra wabi thiyeinung, lhan'pingna tinglhing thlungpak heiri khaanglaatdurbi louklei ane wamukur. 2 Heisi tounarouri ane chankallengurbi Simon Peter'le, heirou Jesu'ne beimak malungshikhou ruishikpa yakhuntanung atoubi hungshunpikur, “Upawaya yane lhanrouwei louheibi bi kourou khouwurlawo mumakkurame!” 3 Heitounarouri Peter'le ruishik khatpane lhanranung wakur. 4 Yakhuntane channi wanarouri, ruishik khatpari Peterya tladuine louchawurbi lhanbira ane loutlungrikur. 5 Heirou ane sikhuplhakbi lhanrilla yukthinarou, khi'lhung lhomna phaikhring punsheltom yukmu, heiya rillari ane yuchangmak. 6 Heirou aihilla Simon Peter'ne wa'tlungbi, pura taankhoumakne lhanrilla yuchangbi thinarouri, phaikhringei punshel'le, 7 heirou Jesuei lu yumkhalna phimtumchakhi dabine louklei heiya ane yumukur. Phimtumcha heiri phaikhringei punshelkou pulne lokpa loukleiri nimak, heiya phimtum heichatom laichane khyophopbine louklei. 8 Heirouri lhanbira lamkrine loutlungkur ruishik heiwakhi rilla yuchangkur; heitoubi anekhi heiya muwurbi uklumkur. 9 (Yari kheen heiramphanekhi Khyingei lailikra ‘A heiri khirouwei ringthutthurou’ toubi yunkhou heiya ningthutmakhui.) 10 Heitoubi ruishik rapne cheemra yenkallengkur.
Jesu'ne Mary Magdalene'nung Muyerkur
11 Mary'ne lhan'paalra chapbine mayungkur. Heirou ane chapmlomne lhanrilla sikhuplhakbi yukthinarouri, 12 lhan rilla khngouwei shambya mansambi Thangring khintamne, Jesuei khi'lhung phneikhouna bira, khatne luthakra heirou khatpane hoshung lhangra ombine louklei ane mukur. 13 “Puiyawi, nangri kouya tounei chapkurrawo?” toubi yane anung loukngai. Heirou ane loumallang, “Yane keiyei Upawaya louheilame, heitoubi bi koutamrou khouwurpilawo, keiri mumakurame!” 14 Heirouri ane loukallekbi thinarouri Jesu'ne aiyei pongra mayungbi heiklei ane mukur; heiya mayungbi klei heiri Jesume touri ane mumakur. 15 “Puiyawi, nangri koutounei chapbi leikurrawo?” toubi Jesu'ne anung heikngai, “Nangri huya raphawo?” Aneri napawa heiri yekul kngaak thimisame toubi ningchakur, heitounei ane anungei loushun, “Keiteiyo, kounakpi nangne aya louheilanungri, bi koutamrou khouwurlawo, keinungei bei shunpilaklo, heirou Keine wabi aya walouweise.” 16 Jesu'ne anung loushun, “Mary!” Heirouri ane loukallekthibi anung Hebrew tloune kyun, “Rabboni!” 17 Heirou Jesu'ne anung shun, “Keiyari thirpimakhuilo, ngamri Keiri Pawaei leinara kat'kallengmakhui. Heiya nangne hungbi Keiyei teinao rapnung, ‘Keine Keiyei Pawa, heirou yaiyeikhi Pa, Keiyeikhi Dunpu heirou yaikhi Dunpu hoibi klei Anungei katkallengeirou,’ toubi hungshunpilaka.” 18 Heitounei Mary Magdalene heine shaallurbi heirou ane Upawaya mukur heile Jesu'ne anung yunpikur nammaya ruishik rapnung hungshunpikur.
Jesu'ne Aiyei Ruishik Rapnung Mu'kyer
19 Haptayei lamkri tlainiyei rawainung, ruishik rapne cheemkhar hang rotphopbi rilwaira kartilbi leikhou, ngamri yane Jehudi rapbei lhou'urpu upa rapya chikur. Heirouri Jesu'ne yaihangra wachangbi wamayungkur. Heitoubi ane, “Nanungei kying hoiniyasu,” toubi wakyun. 20 Ane heisi yunbine hillouri yanungei aiyei hutmairap heirou aiyei onhimya mutpikur. Heirouri ruishik rapne Upawaya muwurnarou yane kalthi nungwaikur. 21 Jesu'ne hanuikhi yanungei, “Nanungei kying hoiniyasu. Pawane Keiya yenmalhetpikur heinakne naya malhetlei,” toubi yunthu. 22 Heirouri ane yaidoura nil shophangpibi kyun, “Lhawai Khying phalakasu. 23 Hukounak khatdei borhya nane kukpilanungri, yanung borh heiri kukpiwurla; heitoubi hukounak khatdei borhya nane kukpimanungri, yanung borh heiri kukpimakhui.”
Jesu'le Thomas
24 Ruishik chiple khniyei hangrei Thomas(ayari Kanfirwa toubikhi ungkna) heiwari Jesu'ne wachangei kalnungri yaihangra louyaomak. 25 Heitounei ruishik dei rapne anungei pao louyunpikur, “Kane Upawaya muwurlame!” Heirouri Thomasni yanung loukyun, “Keiri keimitne Aiyei hutmairei thirmsui pur rapya mubi heirou Aiyei onhimrei chei'khmah heiwaya keiyei hut'myungni ronthibongyenri tekkhi malungammaklei.” 26 Heirouri hapta khatdei hillou ruishik rapne hanuikhi cheemwaira cheemkhar thungphopbi kartilkur, heirouri yaihangra Thomaskhi kyao. Heitoubi cheemkhar heiri hang rotphopbi klei, heiya Jesu'ne yaihangra wamayungbi yanung kyun, “Naidoura kying hoiniyasu.” 27 Heitoubi Thomasnung shun, “Neiyei hutmayungni Keiyei hutmaira thunthilak; heitoubi neihut lamthutbi Keiyei onhimra thunthilaklo. Neiyei ukningrei khalchabi klei heiya lakurkhoubi malungamlaka!” 28 Heitounei Thomasni loumallang, “Keiyei Upawa, Keiyei Dunpu.” 29 Heirou Jesu'ne anungei shun, “Nangne Keiya neimitne muwurnei ngamrou uklumko? Heiyanungri Keiya mitne mumakne uklum thimirap heiri kounakne nungkngai hoirou!”
Lailik Aya Mayewurnei Ngam
30 Jesu'ne Aiyei ruishik rapbei maibongra Lailik arou mayelhakhoumak kngakkei lhourap deikhi chungwane touwurkhou. 31 Heiya arou mayelhakur nane mubi, Jesuri Messiah heirou Dunpuei Chanapawame toubi uklumheirou, heitoubi naiyei uklum heiyei ngamne nane khringei chaanya pharou.
Jesu'ne Ruishik Napung-eninung Mu'kyer
1 Heihillou Jesu'ne hanuikhi Tiberia samadru ruira ruishik napung-eninung muyerthu. Heirouri atoubi thukkur, 2 Bi heirou Simon Peter'le, (Kanfirwa toubi ungkna) Thomas, Nathana-el(Galilee'yei Cana'rei), Zebedee'yei chanapawa'raple heirou Jesuei ruishik deirap napung-khnikhi kyaoni bungni lokpa kartilkur. 3 Simon Peter'ne ruishik dei rapnung kyun, “Keiri thanga manrou charouwa.” “Kakhi nangkou kalhonne charoume,” toubi yane anung loukyun. Heisi toubi yane mali khatra tungbi chakur, heiya heineyei masanungri yane kouthanga khatkhi manmakur. 4 Heirouri ningshun kinni kathukkurle, Jesu'ne yuiruira mayungbi heiklei, heiya ruishik rapneri a heiri Jesume touri mumakur. 5 Heirouri ane yanung kngai, “Kartlangarap, nane kouthanga khatkhi manmakleiko?” “Kari koukhatkhi manmakurame,” toubi yane loumallang. 6 Heitounei ane yanungei shun, “Naiyei lieng heiso maliyei thya lhangra heikhinglhaklaklo, heiyanungri nane thanga manroume.” Heisi tounarouri yane lieng heiri khinglhakkurbi taangthut manemakur, ngamri thanga chungwa makhubphopkur. 7 Heirou Jesu'ne beimak malungshipi ruishik heiwane Peter'nung shun, “A heiri Upawaleime!” Heirouri ‘A heiri Upawaleime’ toubi kyun heiya Peter'ne loumayekurnarou, ane punshel uploubi (lhou churnei ngamrou phi'up yaomakne ane louklei) heitoubi yuitlaira chunlhakur. 8 Heirou ruishikrap deine mali tungbi lingrilla thanga thimni yentangheibi yuiruira hungthukkur. Ya heiri yuiruirouwei kalnikhi tlatrilmak, thong machakhatnak lhatkril. 9 Heitoubi yane kungruira hungthukkurle tallengne meihal-doura thanga roubi louklei heiwale mumtol thakhi louklei yane hungkmu. 10 Heitounei Jesu'ne yanungei shun, “Nai kman thanga heiri keinungei tha yenlaklo.” 11 Simon Peter'ne mali doura wachangbi heirou thanga bilthimni kyao ling heiya watangthutkur, heirou lingrilla thanga machale somngale-khyumbil loukyao; heiya thanga chungwane louyaobikhi ling heiri cheetmak. 12 Heirou Jesu'ne yanungei shun, “Nane hungchangbi chamailaka.” Heirouri ruishikrap hukhatnekhi, “Nangri huwo?” toubi ngaithingammakur, ngamri a heiri Upawame toubi yane mukur. 13 Heitounei Jesu'ne hungchangbi yanungei mumtol loubi malanpikur; heitoubi ane thangakhi heinakrim loubi pimaikur. 14 Awane khyumbuitlung Jesu'ne khirouwei ringthutkur hillou ruishik rapnung muyerkur.
Jesu'le Peter
15 Heitoubi yane chamaikur hillouri, Jesu'ne Simon Peter'nung shun, “John'yei chanapawa Simon, nangne Keiya thimi deiyei malungshiya duine malungshileiko?” “Moi, Upawa,” toubi ane loumallang, “Keine neiya malungshi neiyei kmu heiwariya.” Jesu'ne anung shun, “Heiyanungri Keiyei yao rapya lhangaine thikullak.” 16 Heirou Jesu'ne hanuikhi anungei shun, “John'yei chanapawa Simon, nangne Keiya malungshileiko?” “Moi, Upawa,” toubi ane loumallang, “Keine neiya malungshi, neiyei kmu heiwariya.” Heirou Jesu'ne anung shun, “Keiyei yao rapya thikullak.” 17 Heirou khyumbui tlungni Jesu'ne anung shun, “John'yei chanapawa Simon, nangne Keiya malungshileiko?” Heirouri Peter lhawai lahwura, ngamri Jesu'ne anungei khyumbuirek tlungni, “Nangne Keiya malungshileiko?” toubi ngaithikur; heitounei ane Jesu'nung loushun, “Upawa, nangne namyerwa kmu heiwariya; nangnekhi kmu touri Keine neiya malungshilei!” Heirou Jesu'ne anungei shun, “Keiyei yao rapya thikulpilak. 18 Keine neinungei chimne yunpilei: neiyei dounungri, nangne marshikbi neiyei chanena kantangra chakur, heiya nangne yentarkur heirouri, neiyei hutbang malamthutbi thimi hukhatne heiya pomphopburbi neiyei chanemakna ramrakhi ruiloukhei.” 19 (Heisi yunbi Jesu'ne Aiyei hirou kyou heiri kounakrouwo tounei heirou Aiyei hikur heiwane Dunpunung thang alyernanungei toubine Peter'nung yunthutpikur). Heitoubi Jesu'ne anungei kyun, “Keihilla chanthunga!”
Jesu'le Ruishik Deikhat
20 Heirou Peter'ne hil-lhangra heikallekthinarou aihilla Jesuei malungshidui ruishik, Puluk markhulyeinang Jesuei pongra kanthrinni ombi, “Upawa, neiyari hune yorrou youleiyo?” toubi ngaithikur heiwaya mulhakur. 21 Peter'ne aya mukur heirouri, ane Jesu'nung kngai, “Upawa, napawa ari kousitoulei?” 22 Heirou Jesu'ne anungei loushun, “Keine yenkallengbongyen, aya Keine khringne louleiyerniyanungri, neinungri kousi tourou? Keihilla chanthunglaka!” 23 Heisi toubi Jesuei hilthung thimi rapbei hangra ruishik heiwari himakroume tounei pao heiya karyoune yunrilkur. Heiya Jesu'neri ruishik heiwari himakroume toubi kyunri nimak; heiya aiyei kyunri, “Keine yenkallengbongyen ayari khringne louklei hoiyanungri, heirou neinungeiri kousi tourouwo?” touthilnei. 24 A heiri heinaksi tlou rapya yunthutkhoubi, heirou yunthutpikur heirapya mayelhakhoupi napawa heirime; heirou kane mulei touri aiyei yunthutpikhou heirapri chimthil.
Luilhakna Tlou
25 Arouri, Jesuei touwurkhou lhourap chungwane klei. Heirapya thangknaine namyerwa mayechirou dawanungri, Keiyei khalnarari, lhourap heiya kluini mayewurbi, lailik heiwari tlaipangpal nammane shinbikhi manemakrou (Lailik heiri tlaipang doura khounakhi changmakrou.)