Iringnii Chongsae
1 Abasenlimna chongsaechu om vasahva, amana chongsaechu Thangnang thoh ynruwhak ing om amanche chongsae inche Thangnang atak chusa. 2 Abasenlimna chongsaechu Thangnang thoh ynruwhak ing om. 3 Ama ajaarnache Thangnang ing peeh aangkheng aseem, amamah naka yntanga ynseem peeh omah. 4 Aningnache iringnii ahungsuwhnii ynsuwhka amanche havana iringnii inge laaruw mee ningnache irengchu ajenreenpa. 5 Ireng inche ynthim nache aenka, ynthim inche chehmahsa. 6 Thangnang ing achongjeer ajenba-then aruming Johon ichii om, 7 hava mee inge irengchu saarkhii ipeeh ijuwng ajaar inche mee vakhae ing siinaka athachanii khaenava. 8 Atak ichuve ireng chumahva, changvakonchu irengchu saarkhii ipeeh ijuwngva. 9 Laaruw paamna ijungtheng atak i mee aangkheng ningna irengchu ipeeh ichum ireng chusa. 10 Laaruw paamna chongsaechu omsa, ama ajaarna Thangnang ing laaruw paam seemkhang nakho laaruw mee inche manghuwmahsa. 11 Ama ing apaam sahna ijuwng vakonchu ameesah aenche herimahsae. 12 Changvakonchu achuw yngkheh inchembe thachaka ahengaraang ae; amatah nache enuwchu Thangnang siti ynsuwhnii ruwrengchu apeehpae. 13 Enuw i sii re hakchaang vokhehkho mee ing amanden nache jungom siti mahpae, Thangnang ing amanden nachenva. 14 Chongsae inche mee ynguurka tungsiih re ichum ynriim inche yng-kaarna paarsa; Thangnang sapa yngkheh ynsuwh ing alaar isachu iraangka, inuw ing alaar isachu imu ymphapa. 15 Johon ing ama akhaena uungka saarkhii apeeh, “Haviva ki ing akhaena ichong ingkha, ama ing kaanuwna juwngna changvakonchu atak ichuve kachungna ruunghakna, akhaechuve kaommah rirae ama om vasahva.” 16 Aningtanii tungsiih ynriim inche inuw vakhaechu ama ing bor ympeehpa. 17 Thangnang ing Mosi ajaarna chonghakchu apeehva chang-vakonchu tungsiih re ichum chuve Jesu Khrista ajaarnava. 18 Achuw ingkho Thangnang mumahri; Thangnang thoh aanghak ampa buumna ong asapa ningna chembe imuchu amamphasa.
Baptis Johon Chongjeer
19 Jerusalem tanii Jehudi aatuari-cheh aenche jaethiim aere Levi aechu Johon ningna vechiir aeka enuw ing aningna chong ensii, “Nang achuw vachii?” 20 Johon inche ynsang damahka ynthiingkiir ing abasang ae, “Ki chuve eekarpeeh Khrista chumahping.” 21 Chunuwcha achuw vachii ta aeka ensii. Elija vachii chang? Ki amamahping, taka Johon ing abasang ae. Chunuwcha jaephar vachii ta aeka ensii. Ama ing kimahping taka abasang. 22 Chunuwcha achuw vachii riirla enchii. Kenuwkho yngkaenungka ynvechiir ae ningna ahuwnii hungriir kenta. Natakcha achuwping nachiiva chang? 23 Amana Johon ing ajaennii jaephar Isaia chong ipherka ariir, “Ki chuve Aafhuw ing ajiinii lamchu manchiimruw ichiinii khaena, paamfhuwna uung senruwr yngkheh chuping!” 24 Pharisi aeng envechiir chong areen mee ae aenche, 25 Johon chu ensiireeh, “Natak icha Khrista chumah taniika, changmahka Elija chumah taniika vokhehkho jaephar chukhommah taniicha, yngkhaena mee aechu baptais namantupae?” 26 Johon ing abasang ae, “Ki ingve chiina baptais kamantunah chang-vakonchu nemanghuwmah mee yngkheh nengkaarna ngiirna, 27 atak chuve kaanuwting ijuwngpehva, changvakonchu ama akheerkhaang runoh rapkho parvakachii ki matik chasamah ing.” 28 Hava vakhae i iniisuwhtah yntongting om Johon ing batais amantunii ae Jordan chifhuw laar Bethani paam nache isuwhva.
Thangnang Jaoti
29 Akhuwvaar nache Jesu ing Johon ningna ivachu avemutah nache ariir, “Enruw, laaruw paam isiicher areenchir Thangnang jaoti reeh! 30 Havana mee iva, hangsenna kariir chakkha, ‘Mee yngkheh kaanuwna thengna, atakchu kachungna ruwreng adeensehsa, akhaechuve ki kaommah rirae ama om vasahva.’ 31 Ki ing atak i achuwvaate ichii chuve hemanghuw mahri ing changvakonchu Isrel mee aeng emanghuwnii khaena ki ing chii nache baptais kamantuva.” 32 Johon ing havana saarkhii i apeeh, “Khunu vaang ichii yngkheh thangbaen tanii laetha ynthiing ataklina ijung-chuwchu kamu. 33 Ataraenpha ing ama i manghuwmah ing changvakonchu chiina baptais itunii khaenache kichu ynjenchiir Thangnang ing ariir, ‘Mee yngkheh taklina laetha jungchum naka ichuw muvaanta; ama chuva laetha ynthiing ing mee aechu baptais mantu vachiichu.’ 34 Johon ing ariir, ki ing kamupa vokhehkho neningna kariirnah, atak i Thangnang sapa chuva.”
Ahaarpa Jesu Sebok ae
35 Akhuwvaarna Johon ing asebok mee ynniimeh ae thohche ingiirhak ae, 36 Jesu ing ivasichu ama ing vemuka ariir, “Enruw, Thangnang Jaoti chu vathengna.” 37 Sebok mee ynniimeh aenche ariirchu siiaeka amana Jesu aanuwchu enuw ing enjiipa. 38 Jesu ing avaanleh tahnache aanuw enjiichu muka eningna chong asiiae, “Nenuw ynchii nenjongva?” Enuw ing embasang, una ongvachii oja? 39 Ama ing abasang, “Huungruw vokhehkho va-enruw.” (Changlaenche siim apha manrii ita.) Enuw ing aanuwchu henjii aeka una ongva ichiichu emupa, vokhehkho ama inii nache aningna cheengsae. 40 Johon chongchu siiaeka Jesu aanuw enjii meenii sungne yngkheh chuve Simon Pitar naepa Andriu va. 41 Ama ing aipa Simon yntuwhfhuwka ariir, “Kenuw ing Mesaija chu kengaantuwh fhuwpa.” 42 Amana Jesu ningting Simon chu ahenruwpa. Jesu ing aningna enka ariir, “Nang i Johon sapa naruming Simon vachii changvakonchu atanii basenka naruming i Kaiphas yntavaata.”
Jesu ing Philip re Nathanel Aachiir
43 Akhuwvaar nache Jesu ing Galili ting vakningka achiipa. Amana Philip chu Jesu ing yntuwhfhuwka aningna kaanuw ijiira achii. 44 (Philip i Andriu re Pitar engkhuw Bethsaida taniiva.) 45 Mosi vajeer chonghak na ynziih vokhehkho Jaephar aengkho akhaena embaziih vasah Nazaret Jesu, Josep sapa chu kenuw ing kengaantuwh fhuwpa taka Philip ing Nathanel ningna ariir. 46 Changvakonchu Nathanel ing aningna ariir, “Nazaret tanii isa changsiichu hungsuwhcheh vaate?” Philip ing abasang, “Huungnana vaabuwrla.” 47 Nathanel ing Jesu ningting ihuungchu amutah nache ama akhaena ariir, “Enruw Isrel ynthiingkiirchu haviva; aningna ynraar yntanga omah.” 48 Nathanel ing aningna asii, “Yn-saangkhe kichu ymmanghuw vachii?” Jesu ing abasang, “Philip ing nang i yngeenmah rirae, thachang bur derna ong kamuchii.” 49 Nathanel ing ariir, “Oja, nang i Thangnang sapa vachii! Amanche Isrel ae iruwngchu vachii.” 50 Jesu ing ariir, “Thachang bur derna kamuchii kachiitahna ynthachapeh vachii? Nang ing havi chungna iruung iruung aajaeh hemuvanata.” 51 Amana aningna ariir, “Atatak ing naningna kariirnah, thangbaen chu ymmong vaata amanche Thangnang vaarmee aenche Mee Sapa taklinache ihangkar ijungchum entu nang ing muvaanta.”
Kana khuwna Rakhiinii Iriim
1 Inii ninii aanuwting Galili paam Kana khuwna rakhiinii iriim yngkheh om. Amanache Jesu amnuw chukho itheng. 2 Rakhiinii iriim nache Jesu vokhehkho asebok aekho engeen ae. 3 Rakhiinii iriim nache vomrip chiichu atangdoh tahnache Jesu amnuw ing Jesu ningna ariir, “Vomrip chii ensenfhuw tangdohsa.” 4 Amana Jesu ing abasang, “O rupanuw, ki nangthoh ynchii itupham omkhang? kakhaena aphachu henphamahri.” 5 Jesu amnuw inche meenae ae tingche ariir, “Neningna ariir vakhae-chu turuw.” 6 Jehudi ae iriim purah nache ynthiingnii khaena ynchaam ichii yngkheh om; ama khaena litar som-thum ichar beer kuruk ensiih. 7 Jesu ing sebok ae tingche ariir, “Beer vakhae i chii mansip chirruw.” Enuw ing beer aangkhengchu chii emansip chirpa, 8 aanuwnache eningna ariir, “Chiikha suwhnuwna iriim aapuh ningting hungpiruw.” Enuw ing chiichu suwh aeka enghungpeehpa. 9 Chiichu vomrip chii uurka chiipaksa. Aapuh inche utanii vomrip chii ithengva ichii manghuwmah (changvakonchu chii aasuwh ae inchembe emanghuw); chukhaenache ama ing songpa ningna-che ariir, 10 “Mee vakhae ing iriim abasen raenche aren ichiipakchu semchak aeka itheng vakhae ing engin aanuwna achuumchu ensen chakpae, changvakonchu nangve ataraenpha ing aren nasiihjaehva!” 11 Jesu ing anongtuna maensa ing laetho atuchu Galili paam Kana rakhiinii iriim nenva; amanache alaar isa amandang tahnache sebok aeng inempak embariim. 12 Havi aanuwnache amnuw vokheh-kho anae ae amanche sebok ae thohche Jesu ing Kaparnaum paamting siaeka inii topoh icheeng ae.
Jesu ing Rumniieen ting Iva
13 Manlaennii kuurva ichii apha ahenpha tahnache Jesu ing Jerusalem ting iva. 14 Rumniieen nache ama ing siirdaar, jao amanche khunu ijuwr mee ongpoh aechu amu; amana seersaam irep mee aeng heong ae chukho amu. 15 Amana siruw mong irehka jao ae vokhehkho deenkhaar aechu athurchirpa; amanche seersaam repnii ensiih chaap chukho barup barehka aajehchirpa; 16 vokhehkho khunu aajuwr ae ningnakho ipirpak ing ariir, “Hava vakhae i chichirruw; kapa sejaam i kithiir manguur mahruw!” 17 Amana sebok aeng ynziihka omchu engaansiipa, “Na-een khaena kabarungriir iruwhdeh ing kamanden inche kichu ynsahnah.” 18 Jehudi aatuaricheh aeng Jesu chu basang aeka chong ensii, “Ynchii ruwriimnii laetho keningna man-dangcheh vanachii deenchiika hava ae i itunii ruwreng nadeenva?” 19 Jesu ing abasang ae, “Havana rumniieen i mamaang chirruw, ki ing inii nithumna mangiirva katareeh.” 20 Enuw ing ensii, “Jerusalem rumniieen havi aantutahna kum sommanrii ariikruk chak iruwhva, amachu nang ing inii nithumna athar vokheh mangiirreeh chehva nachiiva?” 21 Changvakonchu Jesu ing rum-niieen khaena ichong ichuve ama ahakchaang ynchiiniiva. 22 Jesu ing thikka ahangring raenche asebok ae ing havi eningna ariirchu engaansiipa, vokhehkho ynthiing thiimziih re Jesu ing ariir chongchu enthachapa. 23 Manlaennii kuurva sungna Jesu ing Jerusalem na ongka atu ari laetho chaap mee vakhae ing imu emphatah nache inempak enthacha ae. 24 Changvakonchu Jesu ing enuw vakhaechu thachamah ae, akhaechuve enuw vakhae i ynchii meepae ichii isajaeh ing amanghuw vasahva. 25 Enuw engkhaena achuw ingkho aningna saarkhii ipinii omah, akhaechuve embarungriir sungna ynthinchu ama ing amanghuw vasahva.
Jesu re Nikodemas
1 Pharisi ae ruwr tanii Jehudi upa aruming Nikodemas ichii yngkheh om. 2 Jaenkhehna ama ing Jesu ningtingche vakka aningna ariir, “Rabi, nang i Thangnang ing ynjenchiir oja vachii ichii kamanghuwsa. Thangnang ynvaemah naka laetho hangjaeh natu i achuw ingkho chehmahnii.” 3 Jesu ing abasang, “Atatak ing na-ningna kariirnah, achuw yngkheh ing athar ynringreeh mahnave utaraenkho Thangnang iruwngpaam mucheh mahnii.” 4 Nikodemas ing Jesu ningna asii, “Mee inche ynsaangkhe athar naeduung vaang ynringreeh vachii vareeh? Ama ing utaraenkho athar amnuw ven rupumting ruwhreeh naka ynring chehmah nareeh.” 5 Jesu ing abasang, “Atatak ing naningna kariirnah, chiina vokheh-kho laethana ynringmah meechu utaraenkho iruwngpaam ruwhcheh mahnii. 6 Mee i amnuw ampa tanii hankchaang inuwzii ing ynringva, changvakonchu ama chuve laethacher nache ynringva. 7 Nenuw athar ynring-reehva nenchiiva ta ingka kariirne nang ngikmahra. 8 Sii ing raangningka achiitah tingche raangna; amachu nenuw ing ahuwrusa nensiinah, changvakonchu utanii ithengva changmahka utingkhe sine ichii chuve manghuwcheh mahchuw. Laethana yngringreeh vakhae chaap havi thohne aanghakva.” 9 Ynsaangkhe havichu suwhva chiiva taka Nikodemas ing asii. 10 Jesu ing abasang, “Nangve Isrel sungna athurfhuw aanchuwmee yngkheh chiika ynsaangkhe havi namanghuw mahva? 11 Ki ing na-ningna atatak ing kariirnah: Kenuw chuve kemanghuwchu kenriirva, changvakonchu havi achuw ingkho thacha nungka tamahchuw. 12 Laaruw paam tanii kariir chong nenthacha mahchu; ynsaangkhe thangbaen tanii kariir chongchu thachava nente? 13 Thangbaen tanii ijuwng Mee Sapa chumah naka achuw ingkho thangbaen karmahri.” 14 Paamfhuw nache Mosi ing siir baruwr aathoh vaangkhe Mee Sapa chukho ithoh vaatae, 15 amanche aningnache athacha mee vakhae aenche maangmahnii ae chang-vakonchu ichen naemah ringkum phavaatae. 16 Thangnang ing laaruw paam inempak aning amansiih khaenache asapa yngkhehpangchu ynjepeehsahpa, achuw yngkheh mee ing aningnache thacha nave maangmahnii changvakonchu ichen naemah ringkum phavaata. 17 Thangnang ing asapa ajenbathenchu laaruw paam vajeer tunii khaena mahva, changvakonchu ama ajaarnache laaruw paam ing ikarpeehchu phanii khaenava. 18 Chukhaenache aningna athacha mee chuve vajeer tumahsa; changva-konchu aningna athachamah mee chuve vajeer chisa, akhaechuve ama ing Thangnang sapa yngkhehpangchu thacha mahsa. 19 Haviva vajeer ichiichu, amachuve laaruw paamne irengchu thengsa, amachu mee ae inche ireng ening mansiihva enchii changdenna ynthimchu ening emansiihsehpa, akhaechuve enuw enong chaapchu sakmahsa. 20 Isamah atu vakhae aenche irengchu embatirnah, vokheh-kho ireng nache huungmah ae, yngkhaena ynchii imbe ama ing atu ari isamah chaapchu yndang naka tamahsa. 21 Changvakonchu achuw yngkheh ichum atu chuve anong vakhae nache Thangnang chongriir amanjiichu ynthiingkiir ing yndangnii khaenache ireng nache huungna.
Baptis Johon re Jesu
22 Havi aanuwna Jesu ing asebok aethoh Judia paam nache inii topoh vacheeng aeka mee baptais emantu. 23 Johon ingkho Salim kuurna om Enon iva nache mee baptais amantu, akhaechuve amanache chii inempak om; amanche mee aenche aningnache theng aeka baptais atuae. 24 Havi Johon chu kaeshum ting engkhum-mahri raenniiva. 25 Atii Johon asebok aere Jehudi yngkheh thohche ynthiingnii khaena chong ynsangsae. 26 Chukhaenache enuw ing Johon ningting huung aeka enriir, “Rabi, Jordan laarna ynruwhak chuwka saarkhii napeehkha havane ongna, amanche mee vakhae ing aningna theng aeka baptais entunah ae.” 27 Johon ing abasang, “Thangbaen tanii ing aningna jepimah naka, achuw ingkho phacheh mahnii. 28 Havana kariir i nentakrap ingkho kasaarkhii nachuw, ‘Ki Khrista chumahping, ama ajungtheng mahrirae ynjebathen chuping.’ 29 Songnuw i songpa rutum chuva; changvakonchu songpa khaena ingiir, achong arungae aarang chuve songpa senruwr asiiraenche inempak arotha rohna. Chukhaenache havana karotha iroh i atiive areersuwhsa. 30 Amave hungruung sehseh vaata, ki chuve jungtak sehseh vakata.”
Thangbaen tanii Ijungtheng
31 Chungtanii ijungtheng chuve aangkhenglaang taklina ruungsehna; laaruw mee chuve laaruw tavaata amanche laaruw khaena riirvaata; chungtanii ijungtheng chuve aang-khenglaangna ruungsehna. 32 Amave amu re asii vakhaechu ariirnah, amachu achuw ingkho asaarkhiichu herimahsae. 33 Achuw yngkheh asaarkhii aheri mee inchembe Thangnang i ichum remva taka amangiirnah. 34 Thangnang ing ajenbathen mee inche Thangnang chongchu ariirnah, akhaechuve Thangnang ing aningnache laetha ynriimjor ing apeehsa. 35 Ampa inche asapa chu aning mansiihka amanche akiklinache aangkheng amansir chirpa. 36 Achuw yngkheh mee ing asapa ningnache thacha nave ichen naemah ringkum aphapa; asapa chongriir amanjiimah mee chuve iringnii ringkum imu phamahnii, changvakonchu ataklinache Thangnang barungsii omjaeh vaata.
Jesu re Samaria rupanuw
1 Johon chungna Jesu ing mee inem khuumka asebok khaena baptais amantupa ichii i Pharisi aeng ensiipa. 2 (Jesu ing mee aechu baptais mantumah, asebok ae ing emantu vatah.) 3 Ama enriirchu asiicha Jesu ing Judia bathenka Galili paam ting ynrisa. 4 Ama ing ahunganri raenche Samaria ahemantheng. 5 Samaria nache ajae Jakop ing asapa Josep ningna apeeh lam yng-kheh om thohche yndahpakmah khuw yngkheh aruming Saikar ichii om. 6 Amanache Jakop rumchii heom, amana lamlah ing hungsi khaenache Jesu jahohka rumchii kuur nache aja abasiir phehpa. Apha chuve inii siimchim sungna vaata. 7 Samaria rupanuw yngkheh ing chii avathaarchu amucha Jesu ing aningna infhuw chii ipira taka aniihpa. 8 (Changlae asebok ae chuve khuwruung ting isahfhuw ynrii isiae.) 9 Rupanuw inche abasang, “Nangve Jehudi vachii, ki chuve Samaria ping. Amachu ynsaangkhe nang ing infhuw chii ynniih vachii?” (Samaria aere Jehudi ae thaemin sahakmah chak ae.) 10 Jesu ing abasang, “Thangnang ing ympeehchu ynchiiva vokhehkho infhuw chii ynniih ama meechu achuwva ichii nang ing manghuw taniive, nang ing niihromva nachiiva, amanche naningna iringnii chiichu ama ing ipirom vachiiva.” 11 Rupanuw inche abasang, “Oja, nangve asuwhnii chimahchii, rumchii chuve thuwhpakna. Una changchii iringnii chiichu rivanate? 12 Kemfhuw Jakop ing hava rumchii i ympeehva. Hane atuti aeng vokhehkho ensiir endaar aengche hava chii i in aeka hungomba. Amachu Jakop chungna nang ing iruunghak vachiikhang?” 13 Jesu ing abasang, “Hava chii i ain mee chuve athar achii raarva tareeh, 14 changvakonchu ki ing kapeeh chii ain mee chuve athar vokheh achii raarmahnii. Ki ing kapeeh chii inche aningna chiitaang ynsuwh naka, iringnii chiichu fuwrvaata vokhehkho amachu inche iringnii ringkum pivaata.” 15 Rupanuw inche athamsah, “Oja, ki athar vokheh kachii araarniimah ing vokhehkho athar havane chiithaar kavasiniimah ing changchii chiichu kaningna ipirasa.” 16 Yngkaera vokhehkho nafhuwsar hungeen nana vaanrireehra taka Jesu ing aningna ariir. 17 Rupanuw inche abasang, “Atanii ipha ing kafhuwsar omahri.” Jesu ing ariir, “Chumna kafhuwsar omahri nachiichu. 18 Natak chuve sapa runga ningna rakhii niisachii, ataraenkho naongfhuw ikho nafhuwsar rem mahva. Ichum chuve nariirsa.” 19 Rupanuw inche ariir, “Oja, natak i jaepharchu vachii ichii kamamghuw pachii. 20 Kemfhuw Samaria upa aeng hava bungne Thangnang enrum ae, changvakonchu Jehudi nenuw chuve Jerusalem na Thangnang manden vaanchiiva nenchiinah.” 21 Jesu ing aningna ariir, “Kariir manjiira, rupanuw, hava bungne changmahka Jerusalem na mee aeng apa Thangnang chu rummahva enchii aphachu hungvivaata. 22 Samaria nenuw chuve achuw kenrumva ichii manghuw mahchuw changvakonchu Jehudi kenuw chuve kemanghuwsa, yngkhaena ynchii imbe manlaenpeeh ichii i Jehudi tanii ithengva. 23 Atiive apha ichiichu hungviva, mee vakhae ing Thangnang laetha ruwrengchu empha raenche apachu rumvaatae vokhehkho ama ing amanden nache rumvaatae. 24 Thangnang i laetha chuva, amana laetha ruwreng inche mee aenche ichum ing rumvaatae.” 25 Rupanuw inche ariir, “Khrista jungtheng vaata ichiichu kamang-huwpa; ama ing ajuwnglaenche aangkhenglaang iriirpeeh vaata.” 26 Jesu ing ariir, “Ama meechu kiping, nangthoh atae chongnachuw.” 27 Changlaen siimche asebok ae ing enghunganri tahnache Jesu ing rupanuw yngkheh thoh hechong aechu muaeka ingik ae. Changvakonchu achuw ingkho rupanuw tingche ynchiiva tamah ae, amanche Jesu ningna chenkho yngkhaena rupanuw thohne hechong vachii tamahdeh ae. 28 Rupanuw inche abeer maka eenting mee vakhae ningna ahungriir, 29 “Ki ing kamu kasii mahri aajaeh ariircheh mee yngkheh ongna. Atakchu Khrista chuvamo va-enruw” 30 Mee aenche engkhuw bathen aeka Jesu ningtingche vaksae. 31 Aphanache sebok ae ing Jesu ningna enthamsah, “Oja, isahfhuw thaeminchu omsa topoh sara.” 32 Changvakonchu Jesu ing abasang, “Nenuw ing nemanghuwmah kasah-fhuw omsa.” 33 Amana sebok ae ing enum ing ichong ae, “Achuw yngkheh ing isahfhuw avepeeh pentah enchii.” 34 Jesu ing abasang ae, “Kasahfhuw thaemin chuve ki ynjenchiir ing amandenchu ynjii vokhehkho kaningna itufhuw nong ympeehchu amanchinii ing itu chuva. 35 Nenuw ing nenriirchak yngkheh omna, ‘Tha manrii aanuwna ruwbaar kuumpha hempha vaata?’ Changvakonchu ki ing kariirnah amachuve, ruwrae ae i isajaeh ing ibuwrruw, chimuw aangkheng hungminsa, vokhehkho ikuumnii aphachu ahenphapa! 36 Imin chimuw aakuum meechu ruthamen pivaata, amanche chimuw aangkheng ichen naemah ing omnii khaenache mangkong vaata; changlaenche aavor vokhehkho aakuum aenche rotharoh phahak vaatae. 37 Enriirchak i ichumva, ‘Mee yngkheh inche basaeka, mee yngkheh inche akuum chaknah.’ 38 Ruwbaar ikuumnii khaena ruwrae ting kachiirchuw changvakonchu nenuw anong tumahchuw; reentaang mee aeng tuaeka nenuw ing ikaanii nenphanah.” 39 “Kamu mahri, kasii mahri aajaeh ariircheh taka rupanuw ing ahungriir nache Samaria na ong mee aanem ing Jesu chu enthacha ae.” 40 Amana Samaria mee ae thengpoh aeka Jesu chu icheengnii khaena enthamsah tahnache Jesu ing amanache niniimeh icheeng. 41 Ama achongjeer nache mee inempak ing enthacha ae, 42 vokhehkho rupanuw ningnache enriir, “Atiive kenuwkho kenthachapa, havi nang ing nahungriir khaena mahva, chang-vakonchu kentakrap ing achong ara kensiitah nava. Atiive atak i laaruw paam mee Ikarpeeh Khrista chuva ichii kemanghuwpa.”
Jesu ing Lipah aaruung Sapa Ina Amandam
43 Inii ninii acheeng aanuwting Jesu ing ama maphamchu bathenka Galili paam tingche sisa. 44 takrap ingkho saarkhii apeeh, “Jaephar chu apaam mee rap aengkho rumah ae.” 45 Galili ahungtung tahnache, amana heong mee aeng ahebariimsah ae, akhaechuve ajae Jerusalem na manlaennii kuurva enturae Jesu ing atu ari aajaeh emuvasah khaenava. 46 Aanuwnache Jesu ing chiichu vomrip chii amanguurnii Galili khuwna om Kana tingche athar hunganrisa. Kaparnaum ichii nache lipah aaruung yngkheh asapa ina heom. 47 Jesu ing Judia tanii Galili ting hungtungsa ichii ama ing asiitah nache, vaantuwh fhuwka asapa ithii ynthong ing inachu yndamnii khaenache Kaparnaum ting ivakpeehra achii. 48 Jesu ing aningna abasang, “Nenuw ing laetho ingiknii ae i mumah tanuwve nenuw achuw ingkho thachamah tanuw.” 49 Lipah aaruung inche abasang, “Oja, kasapa athikmah rirae avejiisara achii.” 50 Jesu ing aningna ariir, “Yngkaera, nasapa damvaata!” Ama ingkho ruka yngkaesa. 51 Een ting ahungkae raenche lam nache ameenae aenche vatheng aeka rotharoh chong avereen ae amachuve, “Nasapa kha hungdamsa enchii.” 52 Asapa idamchu apha aajaeh vakhae nava taka asii aecha enuw ing embasang, “Ajaenii siim apha yngkhehna riitheng ichen enchii.” 53 Ampa ing aansii amachuve, ajaenii Jesu ing nasapa damsa achii apha thohkhe ynchim chaksa. Amana atak vokhehkho eengkuw engkheng Jesu chu enthacha. 54 Jesu ing Judia tanii Galili na ahungtung aanuwna laetho amandang havi inge vanii chaksa.
Rumchii kuurna ina amandam
1 Havi aanuwna Jesu ing Jerusalem na Jehudi ae kuurva entu nache isi. 2 Jerusalem na Jao suwngkung ichii nache eensukreen asae rungameh rumchii kuurnache om; amachu Hebreeu chong ing Bethesda enchii. 3 Amana mikchu, khi kik ibong, amanche hakchaang ithiipoh ing ina aenche ama rumchii kuurnache yntorpoh ae, 4 akhaechuve marak marakna vaarmee inche rumchiichu aanohchak. Changlaenche maensa ing aparcheh ina meechu idam chakpae. 5 Ama kaarnache kum songthum arii eeriih chak sungna ihungna sapa yngkheh ynvae. 6 ma yntorjaehchu muka, vokhehkho apha iseehpak ing ihungna chukho manghuwka aningna asii, “Nang dampak ningka nachiinah?” 7 Ina sapa inche abasang, “Oja, rumchii aanoh chaklae amatinge ivedom vachii mee omahka, kachehmah romrom ing kajuk incha mee maensadoh chakva.” 8 Changlaen siimche Jesu ing ariir, “Hangsuwra, amanche naduup pomna-na sira.” 9 Amana inachu vadamsa vokhehkho aduupchu pomka isi achehpa. Havi Deennii inii nache isuwhva, 10 chutahnache Jehudi aatuaricheh aenche idam meechu atanii Deennii iniina nang ing naduup naadom i vajeer chonghak nabakhiisa ta aeka enriir. 11 Ama ing ki ymmandam mee inche, naduup pomnana sira achiitah nava taka abasang ae. 12 Enuw ing ensii, “Achuwva havi tura achiichu?” 13 Changvakonchu idam mee inche Jesu va ichii manghuwmahsa, amana Jesu inche mee kaartanii ynruwhjaeh ing suwhsa. 14 Athar Jesu ing ama meechu rumniieen nache aantuwhfhuwrae ariirpeeh, “Atii damsachii, rungaera athar vokheh isii tumahra, havi chungna isamahpak naningna isuwh-kho arusa.” 15 Ama mee inche hungsuwhka Jehudi aatuaricheh ae ningna ama ing athacha meechu Jesu va taka amanthang. 16 Chukhaenache Jehudi aenche Jesu chu Deennii iniina ina amandam khaena ynnang embasenpa. 17 Amana Jesu ing abasang ae, “Kapa ing nong atunah, ama khaena kikho tuva kachiiva.” 18 Ama achongriir nache Jehudi aatuaricheh aenche ithehnii enjongpa; Deennii vajeer chonghak abakhii khaenapang mahka, ama ing Thangnang chu kapava achiinah vokhehkho ataksahrap Thangnang thoh amanchimpa.
Asapa Jesu Aatuaricheh
19 Jesu ing abasang, “Atatak ing kariirnah: kapa ing atuchu mu ingka katumah naka, Mee Sapa inche anum ing yntanga itu chehmah. Ampa ing atuchu asapa ingkho atuva. 20 Ampa inche asapa chu aning mansiihka atu ari chaapchu amansiiva. Havi chungna iruung iruung aajaehkho mansii vaata, amanache nenuw ngikva nenta. 21 Ampa inche ithii amanring vaang, asapa ingkho pining achii ningnache apeehnah. 22 Ampa ing achuw tikho vajeer tumah. Asapa ningna vajeer itunii aatuaricheh aangkheng apeehsa. 23 Amanche mee vakhae ing ampa aajavaang, asapa chukho ijavaatae. Achuw yngkheh ing asapa chu ijamah nave ajenchiir ampa chu aajamahva.” 24 Atatak ing kariirnah: Achuw yngkheh ing hava kariir chaap i rungaeka amanche ki ynjenchiirchu athacha mee inche ichen naemah ringkum phavaata. Entaklina vajeer yntumahnii changvakonchu ithii tanii iring emphapa. 25 Atatak ing kariirnah: Aphachu thengsa-apha ichiichu ahenphadehpa-ithii aenche Thangnang sapa iruurchu siivaatae, amachu asiichaap aenche iring phavaatae. 26 Ampa taklina ringkum suwhnii om vaange, asapa ningna chenkho ringkum suwhnii apeehpa. 27 Asapa chu mee taklina vajeer itunii aatuaricheh apeehpa, akhaechuve atak i Mee Sapa chutah nava. 28 Havi khaena nenuw ngikmahruw; ithii vakhae aenche asenruwrchu siiva enchii apha ahenphapa. 29 Thaen tanii hungsuwh vaatae; isa atu vakhae aenche hangring ae naka paarvaatae amana isii atu vakhae aenche hangring ae naka achinii vajeer phavaatae.
Jesu Asaarkhii
30 “Kataksah aatuaricheh ing yntanga itu chehmah ing; Thangnang ing ajeriir nache vajeer katu vatah, amatah nache kavajeer i ichumva, yngkhaena ynchii imbe kamanden-sahna tumah ing changvakonchu ki ynjenchiir amanden inuwzii inche katu vatah.” 31 “Kasaarkhii i kamandensah tanii vanave ichumrem chuva ichii rumahnii. 32 Changvakonchu kathenna saarkhii apeeh yngkheh omna, ama ing ariirchu chumna ichii kamanghuwsa. 33 Johon ningting nenuw ing chongjeermee nenchiir, amanche ama ing ichum inche ajeer. 34 Ki chuve mee ningtanii saarkhii kaphamahva; Hava kajeer inge nenuw vakhae nenringnii ynsuwh vaata. 35 Johon kha jaemi chuwhka vokhehkho ynreen thoh aanghakva, amanche nenuw ing apha topohpang khaena ireng nache nenrotha manroh nungka tavanenta. 36 Kakhaena saarkhii kadeensa, havi Johon ing ympeeh saarkhii chungna ruunghakna. Katu chaap i kapa ing atu inuwzii ing katuva, ama inche kathenna ariirnah vokhehkho kapa ing kichu ynjenchiirva ichii amandangniisa. 37 Ki ynjenchiir kapa ingkho kathenna saarkhii apeehsa, amanche nenuw ing asenruwrchu siimah dehchuw vokhehkho amaekho mumahchuw, 38 amanche ajaera chukho nenbarung-riir sungna siimahchuw, akhaechuve ynjenchiir ningnache thachamah sachuw. 39 Ynthiing thiimziih chuve nenpanah, akhaechuve amanache ichen naemah ringkum tuwhva kenta ichii nemandenpa. Changvakonchu ynthiing thiimziih inchembe kakhaena saarkhii pika chongna. 40 Changkhang nakho atanii ipha ing kaningting ringkum iphanii khaena huungmahchuw.” 41 “Ki ing mee ae ningtanii ympah-chu jongmah ing. 42 Nenuw ynchii mee vachuw ichii kamanghuw sachuw, vokhehkho nenbarungriir sungna Thangnang ningsiih deenmahchuw ichiikho kamanghuwsa. 43 Kapa aatuaricheh thohche ki ijuwngping amachu nenuw ing iheri mahchuw; changvakonchu achuw yngkheh ing ataksah aatuaricheh thoh juwngnave herivanenta. 44 Nenuwve yngkheh ing yngkheh isuursah nengadiksa, changvakonchu Thangnang tanii isuursah iphanii chuve jongmahchuw. Amachu inche kichu ynsaangkhe ithachava nenchiiva? 45 Kapa ningna ki ing nenuw i manraarva kachuw ichii ing kharmahruw. Mosi ningna ningmanden nemangom ingkhe nenuwchu imanraar savaata. 46 Mosi chu atatak ing nenthacha vanave kichu ithachava nenchiiva, yngkhaena ynchii imbe ama ing ki achuwva ichiichu abaziihchir vasahva. 47 Changvakonchu ama ing abaziih nenthachamah vakhaka, ki ing kariirchu ynsaang khenche thachava nenta?”
Jesu ing Mee Lising Runga Amamaar
1 Havi aanuwna Jesu ing Galili chiiding laar kahsa (Tiberia chiiding kho enchiinah ae). 2 Amana mee inempak aenche aanuw enjii, akhae-chuve ama ing ina ae taklinache laetho tuka amandamchu emupa. 3 Jesu ing reenting hangkarka asebok ae thohche ongsa. 4 Atii Jehudi ae Manlaennii Kuurva aphachu hunganeengsa. 5 Jesu ing paamkhuw athiirtah nache mee inempak ing aningting itheng aechu amupa, chukhaenache Philip ningna asii, “Havana mee ae chaap i mamaarnii khaena unakhe tar iriiva taruw?” 6 Havi Jesu ing Philip chu abarungriir aabuwrnii vatah, atatak chuve ama ing ynchii tuvakate ichiichu amanghuw vasahva. 7 Philip ing abasang, “Dinari chanii ing tar eeriitah nakho topohter thung-cheh mahnii ae.” 8 Asebok yngkheh Andriu ichii Simon Pitar naepa ing aningna ariir, 9 “Nae-pang yngkheh ing tar runga re nga ynniimeh achisa; changvakonchu mee hangjaeh inem nenche amachupang inche ynchii tuniiva taruwkhang?” 10 “Mee aekha mangong aeruw taka Jesu ing eningna ariirpa. Ama minchu fuwr inempak om. Chutahnache mee aangkheng ongsae, amana pasar aechu lising runga vakhae ae.” 11 Jesu ing tarchu verika bor apeeh aanuwna, asebok ae ningting jepika, amana asebok aenche mee vakhaechu empeehpa. Nga chukho aanghakjaeh ing bor pika enven ynva ing ensah ae. 12 Mee vakhaechu enven abava aanuwna Jesu ing sebok ae ningna ariir, “Abarii chaap aekha mampaam rudeh ing khuumruw.” 13 Chutahnache tar rungarik ensahnii tanii abarii chaapchu engkhuum tahnache buruk suum ariiniichak isip emangkong. 14 Jesu ing ama laetho atuchu emutah nache, mee aenche laaruw paamna jungtheng vaata enchii jaepharchu havi vachii vatah ta aeka enriir. 15 Mee aenche atakchu ruw ae naka iruwng amanvinii tuteehva enchiichu Jesu ing amanghuwtah nache taenka reenting hangkarsa.
Jesu ing Chii taklina Ivasi
16 Khuri ajungvitah nache Jesu sebok aenche chiidingchu enjepuwhpa, 17 ruwkuwng nache hangong aeka Kaparnaum laartingche ynriae. Jaen hungvi ipha ing Jesu ing embuum ting juwngmahsa. 18 Amana khuwsii ivaanleh inche chiichu aanohpa. 19 Sebok aenche meil runga kuruk vakhae enjehuur aanuwna Jesu ing chii taklina ivasichu emutah nache ynchiksae. 20 Amana Jesu ing ynchik mahruw kiping taka eningna averiir. 21 Enuw ing Jesu chu mangong nungka enchiipak ing ruwkuwng nache emangong tahnache, enuw ing vatungniiva enchii aphamchu anikung-narap vatungsae.
Mee aenche Jesu Enjong
22 Akhuwvaar nache chiiding laarna mee inempak ongpoh aenche ruwkuwng yngkhehpang omvatah ichii engaansii. Enuw ing Jesu chu sebok ae thoh ynruwhak mahsa anumpang ing emahpa ichii emanghuw. 23 Tiberias tanii ruwkuwng areh chuve Aafhuw ing tarchu bor apeeh aanuwna ensah-nii yntong tingche ivasi aechu emu. 24 Amana enuw ing ruwkuwng nache Jesu vokhehkho asebok ae chukho ynvaemahsae ichii emutah nache, enuw ing ruwkuwng nache hangong aeka Jesu ijong Kaparnaum tingche vasisae.
Jesu chuve Iringnii Tarva
25 Enuw ing Jesu chu chiiding denkhehna engaantuwhfhuw tahnache aningna enriir, “Oja, utaraenkhe havane ivatung vachii?” 26 Jesu ing eningna abasang, “Ki ing neningna atatak ing kariirnah: Nenuw ing ki ynjongchuw i laetho katukha nemutah namahva, tar kha nenven ynva ing nensahtah nakhenva. 27 Maangvachii isahfhuw khaenache nong tumahruw; ama changdenna ichen naemah ing chitha paarvachii ringkum phanii khaenache nong turuw. Haviva Mee Sapa inche thaemin ipiva chiichu, akhaechuve ampa Thangnang inche ataklina ahakpa.” 28 Chutahnache enuw ing aningna ensii, “Thangnang ing kenuwchu tuae naka achii amandenchu kenuw ing ynchii tuchehva kenchiiva?” 29 Jesu ing abasang ae, “Thangnang ing tutanuwka achii amanden chuve ama ing ajenchiir ningnache ithacha chuva.” 30 Enuw ing embasang, “Ynchii laetho tutaniika kemutahna nangchu thachava kenchii vachii? Ynchii tuvaanta? 31 ‘Ama ing thangbaen tanii eningna isahfhuw manna jepika ensah ae taka ynziih vaangche, kemfhuw fhuwven aenche paamfhuw nache manna ensah ae.’ ” 32 Jesu ing eningna ariir, “Ki ing neningna atatak ing kariirnah, Mosi ing thangbaen tanii tar ympimahva; changvakonchu kapa ing thangbaen tanii tarchu ympeehva. 33 Thangnang ing ympeeh tar chuve thangbaen tanii juwngka laaruw paamna iringnii apeeh chuva.” 34 Enuw ing aningna enriir, “Oja, keningna ama tarchu anasiir ipisara.” 35 “Ki iringnii tar chuping taka Jesu ing eningna ariir. Kaningting ihuung meechu utaraenkho aven chaammahnii; vokhehkho ki ynthacha mee inche utaraenkho achii raarmah reehnii.” 36 Ataraenkho neningna kariirnah, nenuw ing ki ymmupa-chuw amachu ithachamah tanuw. 37 Kapa ing kaningna ymmansir vakhae ae chuve kaningting huung vaatae. Kaningting ihungruwh chaap achuwkho hedamahning, 38 akhae-chuve laaruw paamne ijuwng ingchu ki kamanden itunii khaena mahva, ki ynjenchiirchu amanden tunii khaenava. 39 Ki ynjenchiir ing aman-den chuve haviva, ama ing kaningna ympeeh aechu yngkheh pangkho maangrudeh inche achinii inii nache iringkiir emphanii chuva. 40 Kapa ing amandenrem chuve Mee Sapa chu munaka aningna athacha vakhaechu ichen naemah iringnii ipha chuva. Amana ki ing achinii inii nache manringva katae. 41 “Ki thangbaen tanii ijungtheng tar chuping taka ama ing ariirtah nache, enuw ing ataklina inempak chongsae.” 42 Chutahnache enuw ing enriir, “Hava mee i Josep sapa Jesu khamah vakhang? Inuw ing ampa re amnuw ymmanghuwsae. Amachu ynsaangkhe ama ing thangbaen tanii ijungtheng ping achiiva?” 43 Jesu ing eningna abasang, “Nenuw nensungsahna ichong supsup chuwkha manchenruw. 44 Ki ynjenchiir kapa ing sirmah naka achuw ingkho kabuumne huungcheh mahnii, ihuung mee chuve achinii inii nache manring vakata. 45 Jaephar aeng embaziih omna, ‘Thangnang inche mee vakhae-chu manchuw vaata.’ Achuw yngkheh ing kapa chongchu siika vokhehkho amanjii chuve kaningting ihuungva. 46 Thangnang tanii ama inche mahna-ka achuw yngkheh inche kapa chu amupa kachiimahva; Atak chuve ampa chu amupa. 47 Neningna atatak ing kariirnah: Achuw yngkheh mee ing aningna athacha chuve ichen naemah ringkum aphapa. 48 Ki iringnii tar chuping. 49 Nenfhuw fhuwven aeng paamfhuwna manna ensah vakonchu ithii ae. 50 Changvakonchu thangbaen tanii ijungtheng changchii tarchu asah achuw yngkheh mee chuve thikmahnii. 51 Ki i thangbaen tanii ijungtheng iring tar chuping. Achuw yngkheh ing havana tar i sanave, ama ichen naemah ing ringvaata. Amanche laaruw paam mee ringnii khaena pivakachii tar chuve ki kasha iva.” 52 Chutahnache Jehudi ae enareer sahna chong suwhka enriir, “Ynsaang khenche atak ashachu isahnii khaenache ipiva chiiva?” 53 Jesu ing abasang ae, “Atatak ing neningna kariirnah: Mee Sapa ashachu samah tanuwka vokhehkho asiichu inmah tanuwve, neningna ringkumchu omahnii. 54 Kasha asah ae amanche kasii ain mee ae chuve ichen naemah iringnii emphasa, amanche achinii inii nache enuwchu manringva katae. 55 Kasha i thaemin rem chuva, vokhehkho kasii i infhuw rem chuva. 56 Kasha asah amanche kasii ain meechu kaningna ongva, vokhehkho ki ing aning nache ongning. 57 Iring kapa inche ynjenchiir vakhaka, akhaenache kikho iringping. Achuw yngkheh ki ynsah mee inche kakhaena ringvaata. 58 Havana tar iva thangbaen tanii ijungthengchu; ajae nenfhuw fhuwven aeng ensah aanuwting ithii ae tar khathohkhe aanghak mahva. Hava tar i asah mee chuve ichen naemah ing ringvaata.” 59 Kaparnaum meekongniina Jesu ing amanchuw aere havi ariirva.
Ichen Naemah Chongsae
60 Aanuw ajii mee aanem aenche havi ensiitah nache enriir, “Havi chuve akhopseh ing pirsa. Achuw inche rungaechehva takhang?” 61 Aningna riirmah khang ae nakho Jesu ing ichong aechu manghuwka eningna ariir, “Havi inge nennungae niimah omvachang? 62 Mee Sapa inche aburna aongnii tingche hangkarchu nemu vanacha ynchii khava chang? 63 Ringkum ympeehchu Thangnang laetha vatah; laaruw mee ruwreng chuve ikanii yntangakho omah. Nening-na chong kariir vakhae i laetha chuva vokhehkho iringnii ympeeh chuva. 64 Changvakonchu achuw yngkheh chuve nenthachamah ynvaenachuw.” (Achuw yngkheh chuve thachamah naka rensavachii mee omna ichiichu Jesu ing aburna basenka amanghuw vasahva.) 65 Jesu ing ber buka ariir, “Chukhaenache neningna kariirva amachuve, kapa ing rumah tanga naka achuw ingkho kaningting huungcheh mahnii.” 66 Havi khaene Jesu aanuw ajii mee aanem aenche enganuw ynriaeka sihakmahsae. 67 Amatah nache Jesu ing asebok suum ariinii ae ningtingche asii ae, “Nenuwkho bathen nungka ynchiinahchuw?” 68 Simon Pitar ing abasang, “Aafhuw, kenuw ing achuw ningtingche siva kenchiiva? Ichen naemah ringkum ympeeh chongsaechu nang ing nadeensa. 69 Atiive kenuw ing nang i Thangnang tanii ijungtheng ynthiing yngkheh vachii ichii kenthachapa vokhehkho kemanghuwpa.” 70 Jesu ing abasang, “Ki ing mee suum ariinii nenuw i kaateer vachuw. Changvakonchu nengkaarna mee yngkheh chuve umlae chuwngna!” 71 Havana ariir i Simon Iskariot sapa Judas achiiniiva. Akhaechuve Judas ing sebok suum ariinii kaarna ynvae-khang nakho ama ing rensaro achiitah nava.
Jesu vokhehkho Anae ae
1 Havi aanuwna Jesu ing Galili ting sisa; akhaechuve Jehudi aatuaricheh aenche ithehnii khaena enjong. 2 Atii Jehudi ae Ynsennii Kuurva aaniichu hunganeengsa, 3 chu-khaenache Jesu anae aenche aningna enriir, “Hava mapham i bathen nana Judia paam ting sira, amana nasebok aenche natu nari nongchu muvaatae. 4 Mee ing imanghuw rasiing achii mee inche anongtuchu thuurmahchak. Chukhaenache nang ing hangchii i natu vanave, nataksah ing laaruw paamne mandangsara.” 5 (Ama anae ae rap ingkho aningna thachamah ae.) 6 Jesu ing eningna ariir, “Ki kakhaena apha ichiichu hemphamahri, changvakonchu nengkhaena apha chuve anasiirna omna. 7 Nenuwve laaruw paam mee aeng ibatirmah ae, changvakonchu ki chuve ymbatirnah ae, yngkhaena ynchii imbe entu enri vakhae sakmah ta ingka kariirpa. 8 Nenuw kuurva tingche sisaruw; ki chuve havana kuurva i simahning, akhaechuve kakhaena apha ichiichu hemphamahri.” 9 Havi riirka ama ing Galili nache ongsa.
Ynsennii Kuurvana Jesu ynvae
10 Anae aenche kuurva tingche ensi aanuwna Jesu kho isi; changvakonchu ama ing yndang ing siru ing ynruwhjaeh ing isi. 11 Jehudi aatuaricheh aenche kuurva sungnache jong aeka vokhehkho unakhe ongne ta aeka mee ae ensii. 12 Amana mee aenche ataklina aajaeh ichong ae. Mee topoh aenche atak i isapak meeva ta aeka enriir. Mee areh aenche ama sakmah, ama ing mee aechu arehting aruwnah enchii. 13 Changvakonchu achuw ingkho yndang ing riirmah ae, akhaechuve enuw ing Jehudi aatuaricheh aechu enchiitah nava. 14 Kuurva entuchu achimbang ahenpha ruvaena Jesu ing Rum-niieenna vakka amanchuw ae. 15 Jehudi aatuaricheh aenche ngik aeka vokhehkho enriir, “Hava mee inge thiimziih ateen chahsiing angjaehmeh amanghuwva?” 16 Jesu ing abasang ae, “Ki ing kamanchuwchuw i kaningtanii mahva, changvakonchu kichu ynjenchiir aning taniiva. 17 Thangnang ing amanden tuningka achii achuw yngkheh in-chembe kachong i Thangnang taniiva changmahka kaningtanii sahva ichiichu manghuw vaata. 18 Achuw yngkheh ing ataksah tanii ariir chuve ympahsah iphanii khaena atuva; changvakonchu atak ajenchiir meechu ama ing ympahsah phanii khaena atuchu ichum meeva, amanche aningnache ynraar ichii yntanga omah. 19 Mosi ing vajeer chonghak ipimahkhang? Changvakonchu nenuw achuw yngkheh ingkho vajeer chonghakchu manjiimahchuw. Ynchii khaena nenuw ing kichu ithehnii khaena ynjong vachuw?” 20 Mee ae ing embasang, “Nataklina umlae chuwngsa! Achuwva theh kachii taka ynjongchu?” 21 Jesu ing enuwchu abasang, “Ki ing laetho yngkheh katutahna nenruw riimna. 22 Mosi ing nensiti aechu vinchiip khaena ariirpa (amachu Mosi ing abasenmah vakhangnare, nenfhuw fhuwven aeng embasen vasahva), amana nenuw ing Deennii inii nache vinchiipchu nentupa. 23 Nenuw nensiti aechu Deennii inii nache vinchiip tutanuwve, Mosi vajeer chonghakchu kiimah, amachu ynchii khaena Deennii iniina meechu kamandam tahna kataklina nenbarung isiiva? 24 Taangna adongchang ing vajeer tumahruw, changvakonchu ichum inche vajeer turuw.”
Atak i Mesaija chuva?
25 Jerusalem mee topoh aenche enriir, “Hava mee i mahvakhang aatuaricheh aeng thehkenta enchiikha? 26 Enruw, ama ing mee kaarna chongna amanche enuw ing aningna yntangakho riirmah ae! Havi aatuaricheh aeng atatak ing Khrista chuva ichii emanghuwtah nava? 27 Changvakonchu Khrista ing ajuwnglaenche, achuw ingkho utanii ithengva ichii manghuwmahnii. Havana mee ichuve inuw ing utanii ithengva ichii ymmanghuwsa.” 28 Jesu ing Rumniieenna aman-chuw ae raenche senruwr ipirpak ing uungka ariir, “Nenuw ing ki i achuwva vokhehkho utaniiva ichii atatak ing ymmanghuw sachuw? Kataksah aatuaricheh ing ijuwng mahping; kichu ynjenchiir atak chuve ichumva. Nenuwve atakchu manghuw mahchuw, 29 changvakonchu kive kamanghuwsa, akhaechuve ki i aning taniiping amanche ama ing kichu ynjenchiirva.” 30 Chukhaenache enuw ing atakchu suwrkenta enchii, changvakonchu achuw ingkho ataklina vabachuw chehmah ae, akhaechuve akhaena aphachu hemphamahrisa. 31 Changva-konchu mee changjaeh kaarnache athacha mee ynvae aeka vokhehkho enriir, “Khrista ing ajuwnglaenche hava mee inge laetho atu ithi ing tuvachiiva?”
Laarchang aechu Jesu Isuwrnii khaena Enchiir
32 Mee changjaeh aeng Jesu taklina ichong aechu Pharisi aeng ensiipa, chukhaenache aanchung jaethiim aenche Jesu isuwrnii khaena laarchang aechu enchiir ae. 33 Jesu ing amana ariir, “Apha topoh khaenapang nenuw thoh onghakva kata amanche aanuwna chembe kichu ynjenchiir abuum tingche ynriva kata. 34 Nenuw ing kichu ijongva nenta changvakonchu ituwhmah tanuw, akhaechuve kaongnii tingche nenuw isi chehmah tanuw.” 35 Jehudi aatuaricheh aenche enareer sungna enriir, “Ama ing uting sinaka tuwhmah vaanchiiva? Grik ae khuwruung chaapna inuw ymmee ae ynsaenong aeka ong ae ningting sinaka amana Grik aechu manchuw vachiiva? 36 Ama ing ijongva nenta changvakonchu ituwhmah tanuw, vokhehkho ki ing ongvakachii nache nenuw ing huungchehmah tanuw achiinah. Havi ynchii achiiniiva?”
Iringnii Chii Ympeeh
37 Achinii vokhehkho athurfhuw kuurva inii nache Jesu ing hangiirka iruur ipirpak ing ariir, “Achuw yngkheh achii iraar mee inche kaningting huungsana inrasiing. 38 Ynthiing thiimziih ing ariirsa, ‘Kichu ynthacha mee ningnache abarungriir tanii iringnii chiitaang chiichu ruwngvaata.’ ” 39 Jesu ing ariir havi laetha khaenava amanche aningna athacha mee aenche amachu phavaatae. Changlaen chembe laetha ichiichu jepimahri, akhaechuve Jesu alaar isachu ithohmahri.
Mee aechu Jesu khaena Asiksik Suwhvachii
40 Mee inempak kaarna mee topoh aenche ariirchu siiaeka vokhehkho enriir, “Hava mee i jaephar remchu varae.” 41 Areh aenche Khrista chuva enchii. Changvakonchu mee topoh aenchembe Khrista chu Galili tanii thengva chiiva enchii. 42 Ynthiing thiimziih ing ariir chuve Khrista chu Iruwng Devit tuti tanii vachiiva vokhehhko Devit ing apaarnii Bethlehem khuwna omva chiiva achiisa. 43 Chukhaenache mee aechu Jesu khaena aruwr asiksik suwhsae. 44 Mee areh aenchembe suwrnungka achiiae, changvakonchu achuw ingkho engkik ing vabachuw chehmahsae.
Jehudi Aatuaricheh aenche Enthachamah
45 Laarchang aenche aanchung jaethiim aere Pharisi ae ningtingche hunganrisae, amana enuw ing enriir, “Ynchii khaena atakchu nenghenruw mahva?” 46 Laarchang aenche embasang, “Achuw yngkheh ingkho ama ing ichong vaange chongmahri enchii.” 47 “Nenuwkho ama ing aasiirting ynruwva?” 48 “Aatuaricheh ae changmahka Pharisi aenche aningna enthachapa ichii yngkheh tanga ne-manghuwse? 49 Havana mee hangjaeh inem ae inge Mosi vajeer chonghakchu emanghuwmah tahnache, Thangnang siraap dernache ongpae!” 50 Nikodemas ichii Jesu aantuwh-fhuw vasah, Pharisi ae kaartanii ama inche eningna ariir, 51 “Inuw ynvajeer chonghak inuwzii ing aningtanii chong ynsiimah rirae vokhehkho ynchii atuva ichiichu yntuwhmahri raenche inuw ing meechu manraar chehmahmuw.” 52 Enuw ing embasang, “Nangkho Galili tanii vachii? Ynthiing thiimziih nache jongla amanche jaephar achuw ingkho Galili tanii thengmahnii ichiichu muvaanta.”
Ichuwhmah Rupanuw Ensuwr
1 Mee vakhae ama ama a-eenting yngkaesae, changvakonchu Jesu chuve Oleep Bung ting sisa. 2 Ziing imaenpak nache ama ing Rumniieen tingche junganri reehka, mee vakhae inche aningting thengpohsae. Amana mee aechu ama ing amanchuw. 3 Thiimthang aere Pharisi ae inche ichuwhmah rupanuw yngkhehchu veruw aeka vokhehkho mee vakhae kaarnache mangiir aeka 4 enuw ing Jesu ningna enriir, “Oja, havana rupanuw inge ichuwhmah atu khaena-che kensuwrva. 5 Mosi vajeer chonghak nachembe hangchii rupanuw i rung ing deengtanuwka thehva nenchiiva achiinah. Atarae nang ing akhaene ynchii nariirnah?” 6 Havana enriir chong i enuw ing Jesu chu mennungka manraar kenta enchii khaenava. Changvakonchu Jesu ing jukhupka akikchar ing ruwruwna abaziih. 7 Enuw ing nuum aeka ensiitah nache ama ing hangiirka eningna ariir, “Nengkaarna achuw yngkheh isii atumahrideh mee inche ataklina maensa ing rung inche deengrasiing.” 8 Amana athar jukhupka ruwruw nache abaziih. 9 Enuw ing ama chongchu ensiitah nache, upa na ing yngkheh yngkheh ynjuwh chirsae, amana Jesu chu amaensokna ingiir rupanuw thoh chenpang emahpa. 10 Jesu ing hengenka rupanuw ningnache ariir, “Rupanuw, enuw utingpae? Nangchu achuw ingkho ymmanraar mahva?” 11 Rupanuw inche abasang, “Oja, achuwkho omah.” Changvaniive sakna taka Jesu ing ariir, “Ki ingkho nangchu manraarmah chii ing, chang-vakonchu nang yngkaenana athar isii tumahra.”
Jesu i Laaruw paam Irengva
12 Jesu ing Pharisi ae ningnache athar chongka ariir, “Ki i laaruw paam ireng chuping. Kichu ynjii mee achuw yngkheh inche ynthim nache simahnii, changvakonchu ringkum irengchu phavaata.” 13 Pharisi aenche aningna enriir, “Nang chuve nataksah saarkhii napeeh-sah vatah; nang ing nariir i irifhuw omah.” 14 Jesu ing eningna abasang, “Chang-mahva, kataksah saarkhii vakhang nakho kariir i ichumva, akhaechuve ki ing utanii ithengping amanche uting sining ichiichu kamanghuwsa. Nenuw ing utanii ithengping changmahka uting sining ichiichu manghuw mahchuw. 15 Nenuwve laaruw mee barungriir ing vajeer nentunah; ki chuve achuw taklinakho vajeer tumah ing. 16 Changvakonchu ki ing tuvakachii maniive kavajeer chuve chumvaata, yngkhaena ynchii imbe vajeer itu nache kanumpang mahping; kichu ynjenchiir kapa inche eenruwfhuwsa. 17 Nenuw nenchonghak nakhe havi ynziihna amachuve, mee ynniimeh ing saarkhii omnave ichumva. 18 Ki kataksah ing saarkhii katusa, amanche kichu ynjenchiir kapa inche kataklina asaarkhii ngiirna.” 19 Enuw ing ensii, “Nangpa chu ukhova?” “Nenuw ing katak kho kapa kho manghuw mahchuw taka Jesu ing abasang ae. Nenuw ing ki imanghuw tanuwve, kapa chukho nenuw ing manghuwva nenchiiva.” 20 Jesu ing hava vakhae i Rumniieen sungna om seer upu omnii kuurnache amanchuwpae; changvakonchu achuw ingkho atakchu suwrcheh mahsae, akhaechuve akhaena aphachu hempha-mahrisa.
Nenuw ing Kasinii tingche Sichehmah tanuw
21 Athar vokheh Jesu ing eningna ariir, “Ki sivakata; nenuw ing ki ijongva nenta, amanche isii nentu inche thikva nenta. Nenuw ing kasinii tingche sichehmah tanuw.” 22 Chutahnache Jehudi aatuaricheh aenche enriir, “Ama ing ariirnah amachuve, ama asinii tingche inuw sichehmah manuw. Havi ataksah ing yntheh savachii ariirniiva ynchiiva?” 23 Jesu ing abasang ae, “Nenuw chuve laaruw mee vachuw, changvakon-chu ki chuve chungtanii ijuwngping. Nenuw chuve laaruw tanii vachuw, changvakonchu ki chuve laaruw tanii mahping. 24 Amatah nachemba neningna kariirnah, nenuw isii nentu nache thikva nenta. Nenuw ing ki i Aafhuw chuva tatanuwka ithachamah tanuwve, isii nentu nache thikva nenta.” 25 Enuw ing aningna ensii, “Nang achuw vachii?” Jesu ing abasang ae, “Aburna basen ingka neningna kariir vasahva. 26 Ki neningna kariirfhuw inempak omna, vokhehkho vajeer tufhuw inempak omna. Ki ynjenchiir chuve ichum ing isipva, amanche aningtanii kasii pangchu laaruw mee ningna kariirva.” 27 Jesu ing ampa khaena ichongchu enuw ing manghuw chehmah ae. 28 Chutahnache ama ing eningna ariir, “Nenuw ing Mee Sapa chu nengathoh raenche ki i achuwva ichiichu manghuwva nenta, amanche kataksah ing ynchiikho tumah ing, changvakonchu ki ynjenchiir kapa inche yntahpeeh inuwzii ing katuva ichiichu nenuw ing manghuwva nenta. 29 Kichu ynjenchiir ama inche eenruwfhuwsa, ama ing kichu ibathen mahdeh, akhaechuve ki ing abarungriir penniichu anasiir katunah.” 30 Jesu ing ariirchu aasii vakhae aenche aningna athacha ae.
Ruwkuwrjoh mee vokhehkho Suwh
31 Jesu ing aningna athacha vakhae ae ningnache ariir, “Ki ing kamanchuw-chuw i manjii tanuwve, atatak ing kasebok vachuw; 32 amanche nenuw ing ichumchu manghuwva nenta, vokhehkho ichum inche ruwkuwrjoh imanpha vaata.” 33 Enuw ing aningna embasang, “Kenuw Abraham tuti pung, amanche utaraenkho kenuw ing achuw yngkheh suwhkho ynsuwhmah ung. Amachu nang ing ruwkuwrjoh phavanenta nachii i ynchii nariirniiva?” 34 Jesu ing eningna ariir, “Ki ing neningna atatak ing kariirnah: Isii atu mee chaapchu isii suwhva. 35 Suwh inche eengkuw sungna ingam ing paarchehmah, changvakonchu sapa chuve ingam ing ynriijaehna. 36 Sapa inche ruwkuwrjoh imanpha nave, atatak ing ruwkuwrjoh nenphava. 37 Nenuw i Abraham tuti vachuw ichiichu kamanghuwsa. Changvakhang nare nenuw ing kichu ithehnii nentunah, akhaechuve kamanchuw chaapchuw i rinungka tamahchuw. 38 Kapa ing ymmansii chaap khaenache ichongping, nenuw chuve nenpa ing ariirchu nentuva.” 39 Enuw ing embasang, “Kenuw kempa chuve Abraham va.” “Nenuw Abraham siti vatanuwve, ama ing atu arichu tuva nenchiiva, taka Jesu ing abasang ae. 40 Havana kariir vakhae i Thangnang tanii kasiichu kariir vatah, changvakonchu nenuw ing kichu ithehnii nensirnah. Abraham ve jinge tamah! 41 Nenpa aeng entuchu nenuw ing nentunah.” “Kenuw kempa chuve Thangnang chupang vatah amanche kenuw ama asiti chupung ta aeka embasang.” 42 Jesu ing eningna abasang, “Thang-nang chu nenpa rem vanave, nenuw ing kichu nening imansiih romva nenchiiva, akhaechuve Thangnang ningtanii juwng ingka atarae hane ongning. Kataksah ing ijuwng mahping, kapa ing ynjenchiirva. 43 Ki ing kariir i yngkhaena nemanghuw chehmahva? Havi akhaechuve kajaera i nenrungaechehmah tahnava. 44 Nenuw i nenpa umlae siti vachuw, amatah nache nenpa ing amandenchu aanuw jiinungka nenchiiva. Aburna basenka ama i mikthehva amanche ichum nache ongchehmah, akhaechuve ataklina ichum omah. Ama ing ynraar ariir raenche aningna om anunuchu atuva, akhaechuve atak i ynraar ariir meeva amanche ynraar chaap vakhae ampa chuva. 45 Changvakonchu ki ing ichumchu kariirva, amatah nache nenuw ing kichu ynthachamah vachuw. 46 Achuw ing ki i isii icherva tatanuwka riirchehva nenta? Ki ing ichumchu kariir raenche, ynchii khaena nenuw ing ynthachamah vachuw? 47 Thangnang tanii mee inche Thangnang chongchu arungae-nah. Nenuw chuve Thangnang taniimah vachuw khaka nenrungae-chehmahva.”
Jesu re Abraham
48 Enuw ing aningna embasang, “Kenuw ing nang i Samaritaan tanii vachii amanche umlae ing nataklina chuwngna kenchiitahna chummah nungkhang?” 49 “Ki kataklina umlae chuwngmah taka Jesu ing abasang ae. Ki chuve kapa kaajanah, amachu nenuw ingve eejamahchuw. 50 Kataksah ing ynjasuwh phanii khaena kajong mahva; changvakonchu amachu aajong yngkheh omna amana atakrem inche vajeer tuvaata. 51 Ki ing neningna atatak ing kariirnah: Achuw yngkheh ing kachongriir i manjiither nave, ama ing utaraenkho ithii mumahnii.” 52 Enuw ing aningna enriir, “Atii isajaeh ing kemanghuw pachii ama-chuve, nataklina umlae chuwngna. Abraham kho ithii, amavaangche jaephar aekho ithii ae, amachu nang ing kachongriir amanjii mee vakhae inche thikmahnii nachiinah. 53 Ithii vasah kempa Abraham chungna iruunghak vachii? Vokhehkho ithii jaephar aechu khomva! Nang achuw-ping nachiinah?” 54 Jesu ing abasang ae, “Kataksah ing ympah ningve, amachu yntangakho ynsuwhmahnii. Ki ymmanpah chuve kapa vatah, amachu nenuw ing kempa chuva nenchiinah. 55 Atakchu nenuw ing manghuwmah richuw, ki chuve kamanghuwsa. Ki ing atakchu manghuwmah ing taningve, nenuw vaange mee ynchaechu kikho ynsuwhsing. Changvakonchu ki ing kamanghuwsa amanche achongriir chukho kamanjiisa. 56 Nenuw nenpa Abraham inche kaaniichu muvachii tahna arotha amanroh, vokhehkho muka inempak arotha iroh.” 57 Enuw ing aningna enriir, “Nang kum songakho phamah richii amanche nang ing Abraham chu namuva?” 58 Ki ing neningna atatak ing kariir-nah, “Abraham ing aommah rirae, ki om vasahping.” 59 Amana enuw ing rung ichuwm aeka deengkenta enchii, changva-konchu Jesu ing ynthuurka rumniieenchu abathen.
Jesu ing Mikchu vasah ing Ynring mee Amandam
1 Jesu ing avasiraenche, amik ichu ing ynring vasah mee yngkheh amu. 2 Amana asebok ae ing aningna ensii, “Oja, amik ichu vasah ing ynringchu achuw ing isii atutah nava? Ataksah ingva changmahka aanring aepae?” 3 Jesu ing abasang ae, “Havana mee inge isii atutah namahva vokhehkho aanring ae ing isii entutah namahva, changvakonchu Thangnang ruwreng nongchu ataklina aandangnii khaenava. 4 Kichu ynjenchiir anongchu inuw ing siim nache tuvaanchiiva; jaen ahungvi raenche achuw ingkho nong tuchehmah. 5 Ki ing laaruw paamna kaongraenne, laaruw paam khaena ireng chuping.” 6 Havi ariir aanuwna Jesu ing ruw-ruwna bachirka vokhehkho inuungchu abachir inche manuumka amik ichu mik nache itaehka 7 vokhehkho ariir, “Nang ing vaknana Silom rumchii nakhe namae vachaamra.” (Havana ruming Silom rumchii i achiir achiiniiva.) Chutahnache ama ing vakka amaechu achaampa vokhehkho imucheh phaka hunganrisa. 8 Ama aveenchaang ae vokhehkho mamaenna aniihmee ing aomlae amuvasah mee aenche enriir, “Hava mee i ongchakka aniihmee khamah vakhang?” 9 Mee topoh aenche ama khava enchii; areh aenche ama mahva, amathoh yntinpaetah enchii. Chutahnache ataksah ing ki ama mee khaping taka ariir. 10 Enuw ing ensii, “Chunuwcha ynsaangkhe imu naphava?” 11 Ama ing abasang ae, “Jesu ichii mee inche inuung manuumka kamik nache itaehka kaningna nang Silom ting vaknana namae vachaamra achii. Chutahnache ki ing vak ingka kavachaam tahnache imu kaphava.” 12 Enuw ing una ongna ta aeka ensiicha, ama ing ki manghuwmah ing taka abasang ae.
Pharisi aeng Amandamchu Enrudeh
13 Aanuwnache enuw ing mamaenna amik ichu meechu Pharisi ae ningting enveruwpa. 14 Jesu ing inuung ma-nuumka amik amandamchu Deennii inii nava. 15 Pharisi aenche athar aningnache ynsaangkhe imucheh naphava ta aeka ensiireehpa. Ama ing eningna ariir, “Ama ing kamikna inuung itaehka, kachaam tahnache atii kamuchehva.” 16 Pharisi topoh aenche enriir, “Hava mee i Thangnang tanii mahva, akhae-chuve ama ing Deennii inii vajeer chonghakchu manjiimah.” Changvakonchu areh aenche enriir, “Ynsaang khenche isii icher mee ing jinge ichii laethochu tuchehva takhang?” Amana enruwrsah nache asiksik suwhsae. 17 Chutahnache Pharisi aenche aningnache athar ensii, “Namik ichuchu amandam vakhaka, ama akhaena nang ing ynchii nariirnah?” Ama ing ariir, “Ama i jaephar va.” 18 Jehudi aatuaricheh aenchembe amik chuka atii amuchehpa ichiichu aanring ae een ae naka, vokhehkho eningna ensiimahri raentaangche thacha nungka tamahsae, 19 Enuw ing eningnache asii ae, “Havi mikchu ing nenbaring nensiti remva? Ynsaangkhe atii ama ing amuchehva?” 20 Aanring aenche embasang, “Kenuw kensitiva vokhehkho mikchu ing ynringva ichiichu kemanghuwsa; 21 changvakonchu atii ynsaangkhe amuchehva ichii chuve manghuwmah ung vokhehkho achuw ing amik i aamongpeehva ichii chukho manghuwmah ung. Atak siiruw; ama upasa, ataksah ing ibasang vaata.” 22 Ama aanring aeng havi enriir i Jehudi aatuaricheh aechu enchii khaenava, akhaechuve achuw yngkheh mee ing Jesu chu Khrista va tanaka thacha nave meekongnii tanii kakvataruw ichii engaanrunii om vasah tahnava. 23 Chukhaenache aanring aenche ama upasa, atak siiruw enchiiva. 24 Chutahnache enuw ing mikchuchu avomanii een aeka aningna ensii, “Thangnang maana ichum riirva kata tanana chongreep tura! Nang ymmandam mee i isii icher meeva ichii kenuw ing kemanghuwsa.” 25 Ama ing abasang ae, “Atak i isii icher meeva, icher mee mahva ichii ki manghuwmah ing; ki ing kamang-huwsah yngkheh chuve, ajae mikchu mee vakhang ningle, atii chembe kamupa.” 26 Enuw ing ensii, “Ama ing naningna ynchii atu? Ynsaangkhe ama ing namik amandamva?” 27 Ama ing abasang ae, “Ki ing neningna kariir vasahva, amachu nenuw ing rungaemahchuw. Ynchii khaena nenuw ing athar siinungka nenchii vareeh? Nenuwkho asebok ynsuwh nungka nenchiiva?” 28 Enuw ing ataklina siraap piaeka enriir, “Nang chuve ama asebok vachii, amanche kenuw chuve Mosi sebok pung. 29 Kenuw ing kemanghuw chuve Thangnang ing Mosi ningna ichongva, hava mee khaena chembe utanii ithengva ichii kenuw manghuwmah ung.” 30 Ama ing abasang ae, “Amachuve ingiknii varaem! Nenuw ing utanii ithengva ichii manghuwmahchuw, changvakonchu ama ing kamik ichuchu amandampa! 31 Inuw ing ymmang-huwsah chuve isii icher mee ningna Thangnang ing rungaepeehmah, chang-vakonchu achuw yngkheh Thangnang arum vokhehkho amanden atu mee ningnache arungaepeehnah. 32 Laaruw paam abasenlimna achuw yngkheh mee ing mikchu amandam ichii siimah ridehmuw. 33 Havana mee i Thangnang taniimah vaniive, ama ing ynchiikho tuchehmahnii.” 34 Enuw ing embasang, “Nang isii icher ing ynring chiika kenuwchu man-chuw kachii ynchii vachii?” Amana enuw ing atakchu meekongnii tanii engkakpa.
Laethana Mikchu
35 Jesu ing meekongnii tanii engkakchu asiipa, vokhehkho ama ing yntuwhfhuwka asii, “Nang ing Mee Sapa ningnache nathachase?” 36 Ama ing abasang, “Oja, atakchu achuwva, kaningna iriirpeehra, amana chembe ki ing aningnache thacha chehva kata!” 37 Jesu ing aningna ariir, “Atakchu nang ing namupa vokhehkho ataraene nang thoh chonghak nachuw.” 38 Aafhuw, kathacha nahchii taka Jesu maensokna vakhupka arumsah. 39 Jesu ing ariir, “Laaruw paamne vajeer tunii khaena ijuwngping, chukhaenache amumah aechu imunii khaena amanche amu ae inche emumahnii khaenava.” 40 Pharisi topoh amana ong aenche ariir chongchu siiaeka aningna ensii, “kenuwkho kemik ichuva?” 41 Jesu ing eningna ariir, “Nenuw nemik ichuvanave, nentaklina ynraar omahva chiiva; changvakonchu atarae nenuw ing kenuw kemusa nenchii vakhaka nentaklina ynraarchu omjaeh tahna.”
Jaocheerna Ynghuwnii
1 Jesu ing ariir, “Ki ing neningna kariirnah: Achuw yngkheh ing jao hungruwhnii suwngkung nache hungruwhru ing aasiir lamting iraen nave, atakchu lamruwva vokhehkho aangkhiiva. 2 nache ihungruwh mee chaap chuve jaocheer ajao chuva. 3 aarung inche akhaena suwngkungchu aamong peehnah; enruming parka a-een ae raenche ajao aenche aaruur ensiinah amanche ama ing enuwchu aruwnah ae. 4 Ama ing taangting ajenbasuw ae raenche maensaka ajao aenche aanuw enjiinah, yngkhaena ynchii imbe enuw ing aaruurchu emanghuwsa. 5 Enuw ing reentaang achuw tikho jiimahnii ae; ama changden nache enuw ing aningtanii taenvaatae, akhaechuve enuw ing aaruurchu manghuwmah ae.” 6 Jesu ing havana ynghuwnii thamin i eningna atong, changvakonchu enuw ing ynchii achiiniiva ichii manghuw-mah ae.
Jesu Isa Jaocheerva
7 Chukhaenache Jesu ing athar vokheh ariir, “Neningna atatak ing kariirnah, ki jao suwngkung chuping. 8 Kathengmah rirae ihetheng aekha lamruwpae vokhehkho aangkhiipae, amatah nache jao ae inche engaruur siimahsae. 9 Ki eenkhaar chuping. Achuw yngkheh kaningna ihungruwh mee chuve karvakata; ama ing sungting hungruwh taangting jungsuwh tunaka vokhehkho fuwrchu tuwhvaata. 10 Lamruw ing itheng chuve irinii, ithehnii amanche mamaangnii khaena vatah. Ki ijuwng ing chuve nenuw ing ynriimjor ringkumchu phanii khaenava.” 11 “Ki isa jaocheer chuping. Isa jaocheer inche aringkumchu jao khae-nache ithii chiimah. 12 Jao adeenmah ynneeh jaocheer inche imi ithengchu amuraenche, ama ing jaochu bathen-ka taenna; amatah nache imi inche jaochu suwrka amanpennah. 13 Ynneeh jaocheer inche taenna, yngkhaena ynchii imbe ama ing jao khaena ynchiikho kharmah. 14 Ki chuve isa jaocheer ping; ki ing kajao aechu kamanghuwsa amanche enuw ing kichu ymmanghuwsae, 15 Kapa ing kichu ymmanghuw vaange ki ingkho kapa chu kamanghuwsa, amanche ki chuve kajao ae khaenache ithii phanii ing karusa. 16 Amanche havana jao kuwne ihungruwhmahri ae reentaang jao aekho kadeensa. Ki ing enuw chukho henruw vakatae; amanche enuw ing kasenruwrchu siivaatae. Amana chembe enuw jaoruwr yngkhehpang ing om vaatae vokhehkho jaocheerchu yngkhehpang suwhvaata.” 17 “Amatah nache kapa ing kichu aning ymmansiihsa, akhaechuve karingkum i athar karichehnii khaena kapeehdehpa. 18 Achuw ingkho karingkum i iri chehmahnii. Kataksah ing ipidehnii ruwreng kadeensa, aman-che kataksah ing athar irinii ruwreng kadeensa; Havi chehnii khaenache kapa ningtanii kaphapa.” 19 Havi ariir khaena Jehudi ae enruwr sungna athar barungriir asiksik ing omsae. 20 Mee aanem aenche enriir, “Ama umlae chuwngsa! Ama baveehsa! Yngkhaena achong nenrungaeva?” 21 Changvakonchu areh aenche enriir, “Umlae ichuwng mee inche jinge chong chehmah! Ynsaang khen-che umlae inche mikchu mee mandam chehva takhang?”
Jesu Enrumah
22 Pharbuw hungvika Jerusalem nache Ynthiingnii Kuurva itunii apha-chu ahenpha. 23 Jesu ing Rumniieenna om Solomon eensukreen nache baversa. 24 Chutahnache Jehudi aeng abuumna vaangkong aeka aningna ensii, “Aasen iseeh ing nang ing kenuwchu idava nachiiva? Nang Khrista chu vataniive, keningna isajaeh ing riirla.” 25 Jesu ing abasang ae, “Ki ing kariirpa, nenuw ing thacha mah-chuw. Kapa rumingna katu vakhae aenge kaningna saarkhiipae; 26 changvakonchu nenuw ing thacha mahchuw yngkhaena ynchii imbe nenuw i kajao mahsachuw. 27 Ki kajao aenche kasenruwrchu enrungae-nah; ki ing kamanghuwsae amanche enuw ing kaanuw enjiinah. 28 Ki ing ichen naemah ringkumchu kapeehpae, amanche utaraenkho enuw thikmahnii ae. Achuw ingkho kakik tanii vakichehmahnii ae. 29 Kapa ing kaningna Ympeeh vakhae ae i aangkhengna iruungseh chupae, achuw ingkho enuw i kapa kik tanii vakichehmahnii ae. 30 Ki re kapa yngkheh pangnung.” 31 Amana mee aenche athar rung ichuwm aeka deengkenta enchii. 32 Jesu ing eningna ariir, “Kapa ningtanii isa nong aajaeh kamandangsa, ama sungne ukho khaenache kichu rung ing deengkenchii nenchiiva?” 33 Enuw ing basang aeka enriir, “Isa nong natu khaena rung ing deeng-kenchii kenchiimahva, changvakonchu Thangnang taklina ithipak ing ichongchii khaenava; akhaechuve natakve mee chiika nataksah ing Thangnang nabunah.” 34 Jesu ing eningna abasang, “Nenuw nenvajeer chonghak nakhe Thangnang ing nenuw i laevachuw taka ynziihmah vakhang? 35 Ynthiing thiimziih ing ariir chaap vakhae apha vakhaena ynthiingva ichii ymmanghuwsa; ama achongchu apeeh mee ae ningnache lae vachuw achiisa. 36 Ki chuve kapa ing eeteerka laaruw paamne ynjenchiirva. Ki ing Thangnang sapa ping kachii khaena ynsaangkhe Thangnang taklina ithipak ing chongnachii ynchii vachuw? 37 Kapa ing amandenchu katumah vaniive ithacha mahruw. 38 Changvakonchu ki ing katu vaniive, nenuw ing ithachamah khang tanuwkho katu karine thacharuw, amana chembe kapa ing kaningna ongna, ki inge aningna ongning ichiichu manghuwva nenta.” 39 Athar vokhehkho enuw ing Jesu chu suwrkenta enchii, changvakonchu engkik tanii ynjohsa. 40 Jesu ing ahaarpana Johon ing baptais atunii Jordan chifhuw veraenka amanache ongsa. 41 Mee inempak inche aningna theng aeka enriir, “Johon ing laetho tumahdeh, changvakonchu hava mee khaene Johon ing ariir chaapchu chumna.” 42 Amana mee inempak aenche ama mapham nache aningna enthachapa.
Lazarus Ithii Amanring
1 Meri re anaenuw Martha engongnii Bethani ichii khuw nache Lazarus ichii pasar yngkhehchu ina. 2 (Hava Meri i isivasahna Jesu khina barim isa richiithou itaehka asam ing aanuwr sanuw khava; amanche ina i achapa Lazarus va.) 3 Asar aenche Jesu ningting chong embatha: “Aafhuw, nang ing naning namansiih naarangkha nakna.” 4 Jesu ing amachu asiitah nache ama ing ariir, “Hava ina i ithiinii ing ina mahva, Thangnang laar isa yndangnii khaena vatah, amanche Thangnang sapa inche havi ajaarne ympahchu phanii khaenava.” 5 Jesu ing Martha re anaenuw vokhehkho Lazarus chu aning aman-siih ae. 6 Changvakhang nare Lazarus naksa ichii chongchu asiitah nache, ama ing inii ninii ongsareeh. 7 Amana asebok ae ningna ama ing ariir, “Inuw Judia ting ynritaruw.” 8 Asebok aenche aningna embasang, “Oja, idina nang i rung ing deeng kenchii ynchiipae; amanche atarae athar vaanritaruw nachiiva?” 9 Jesu ing abasang ae, “Nikheh ichii i apha suum ariiniiva, changmah vakhang. Chukhaenache achuw yngkheh ing siimna isi chuve isii ikha phamah, akhaechuve laaruw paam irengchu ama ing amusa. 10 Changvakonchu jaenna sinave isii ikha aphanah, akhaechuve aningna irengchu omah.” 11 Jesu ing havi riirka vokheh ber abu, “Inuw yngarang Lazarus kha jaarsa, changvakonchu ki ing vasiningka vabasuw kata.” 12 Sebok aenche embasang, “Aafhuw, ama ijaar vaniive riingtah vaata enchii.” 13 Jesu ing ariirnii chuve Lazarus thiksa achiiniiva, changvakonchu enuw ing emanden chuve ijaar tatakva ichii ing emandensah. 14 Chutahnache ama ing emanghuwnii inche eningna ariirpa, “Lazarus thiksa, 15 nenuw ing nenthachanii khaena ki ing amathoh onghakmah ingchu nengkhaena karotha kamanrohnah. Inuw aningting vaktaruw.” 16 Thomas (Ymphuwr kho enchii) ing aarang sebok aeting inuw eengkheng ing oja thoh vasihakpoh manuwka ithiikho thik haktah taruw achii!
Jesu inge Hangring vokhehkho Iringniiva
17 Atii Jesu ing avatungtah nache Lazarus chu thikka thaenna endim inii nimanrii ahenpha ynsuwhsa. 18 Bethani re Jerusalem ruwrakchu meil ynthum yndah phadirmah, 19 amatah nache Jehudi aenche Martha re Meri enchapa ithii khaenache barungriir amanungae peehnii ivatheng ae. 20 Jesu vathengna ichiichu Martha ing asiitah nache ama ing avaantuwh fhuwpa, changlae Meri chuve eensungna heong. 21 Martha ing Jesu ningna ariir, “Aafhuw, nang hane ongtaniive kachaapa i thikmah vachiiva! 22 Changvakonchu ataraen-kho nang ing Thangnang ningting nahentham chaapchu ijepivaata ichii kamanghuwsa.” 23 Jesu ing aningna ariir, “Nachaapa ing athar hangring vaata.” 24 Martha ing aningna ariir, “Ki ing kamanghuwsa amachuve achiniina ihangringnii inii nache hangring vaata.” 25 Jesu ing aningna ariir, “Ki i ihangring vokhehkho iringnii chuping. Achuw yngkheh ing kichu ithacha nave thikkhang nakho hangring vaata; 26 amanche achuw yngkheh ing aringlae kichu ynthacha mee chuve utaraenkho thikmahnii. Havi nang ing nathachanah?” 27 Ama ing abasang, “Unge Aafhuw! Nang i laaruw paamna ijungtheng Thangnang sapa Khrista chuvachii ichii kathachasa.”
Jesu Ichap
28 Martha ing havi ariir aanuwdehna ama ing ynrika ynruwhjaeh ing anaenuw Meri hungeenka ariir, “Oja vakka havane ongna vokhehkho nangchu ynjongnah.” 29 Amachu Meri ing asiitah nache jungsuwhka ynnehpak ing avaantuwh fhuwpa. 30 Jesu chuve khuwsung vatungmahri, changvakonchu Martha ing aantuwh-fhuwnii ruvaenache heongjaehsa. 31 Meri thoh eenna heong mee aenche Meri barungriir amanungaepeehnii chong ajeersah ae, changvakonchu Meri ing hangiirka ijungsuwhchu emutah nache, thaen ting vakka ivachapva ichii ing manden aeka aanuwchu envejii. 32 Meri ing Jesu aongniichu vephaka avemu thohche Jesu khiderna vatiihka Aafhuw, hane nang ongtaniive kachaapa i thikmah vachiiva achii. 33 Meri ichap vokhehkho ama thoh ynruwhakpoh ae ingkho ichap aechu Jesu ing amupa, amana Jesu chukho abarungriir asuhpa vokhehkho laetha nache ijapak ing ynlaapsa. 34 Amana Jesu ing eningna asii ae, “Unakhe nendimsa?” Enuw ing embasang, “Aafhuw, vaknana enla.” 35 Jesu chapsa. 36 Amana enuw ing enjaeh tahruw aajaehmeh aning amansiihva ta aeka enriir. 37 Changvakonchu areh aenche enriir, “Ama ing mikchu kha aman-dammah vakhang, amanche Lazarus athikniimah itukho chehmah niikhang?”
Lazarus Hangring
38 Barungriir inempak asuh ing Jesu ing thaen ipha ing vakka thaen-kuw kamnii rungchu avephapa. 39 Amana Jesu ing rungkha vekiruw taka ariirpa. Ithii pasar asarnuw Martha ing Aafhuw, aandimnii nimanrii ahenpha vakhaka manam siingta taka ariir. 40 Jesu ing aningna ariir, “Nang ing thacha taniive Thangnang laar isachu muvaanta tamah ingkhang?” 41 Enuw ing rungkamchu enrijohpa. Amana Jesu ing yngaenka Thangnang ting ahenriirsah, “Apa, kariirsah i nang ing ynsiipeeh tahnachii kamanpah sahnahchii. 42 Anasiirna kariirsah vakhaechu ynsiipeeh sachii ichii kamanghuwsa. Changvakonchu havane ong mee vakhae ae thenna havi kariirsahva, amana chembe ki i nang ing ynjenchiir vachii ichii thacha vaatae.” 43 Havi ariir aanuwnache senruwr iduung ing uungka Lazarus, jungsuwhra taka a-eenpa. 44 Amana akhi akik peen ing amanche amae aangkheng ynrom inche jungsuwhsa. Lazarus ijungsuwhchu amutah nache Jesu ing eningna bajohruw, ama sirasiing taka ariir.
Jesu Thehnii Ensir
45 Jesu ing atu arichu Meri ningna itheng vakhae aenche emutah nache, Jesu chu enthacha ae. 46 Changva-konchu achuw yngkheh chuve ynriaeka Pharisi ae ningting ahungtong ae. 47 Amana Pharisi aere aanchung jaethiim ae vokhehkho aanchungpuh yntuwh aeka emanseer, “Inuw ynchii tutaruw? Ama ing laetho aajaeh atu i enruw! 48 Inuw ing atu ari chaap i enjaeh manuwve, mee vakhae ing aningna thacha sehsehro enchiinah, amanche Rom aapuh aeng yntaklina imanraar ae naka ynta Rumniieen re ynjaati mamaangchir vaatae!” 49 Ama kum nache engkaarna Aanchung Jaethiim aruming Kaiphas ichii inche ariir, “Nenuw ynchiikho manghuwmahchuw! 50 Jaati maang-vachii changdenna mee yngkheh ithii inche sakseh mahkhang?” 51 Ama ing havi abarungriir tanii hungsuwh ing ariir changchii mahva, changvakonchu ama kum nache aanchung jaethiim yngkheh ynsuwh ing Jesu ing Jehudi ae khaena thikva chiichu ajeerva, 52 vokhehkho enuw khaena chenpang mahka, Thangnang mee ae ynsaenong aeka omchu yngkhehpang ing hungomnii khaenava. 53 Ama inii nache basenka Jehudi aatuaricheh aenche Jesu thehnii ensirpa. 54 Chutahnache Jesu ing Judia paam nache yndang ing simahsa, changvakonchu ama ing paamfhuw jiika Ephrem ichii khuw tingche sika, vokhehkho amanache asebok ae thohche ongsa. 55 Manlaennii Kuurva aaniichu hunganeengsa, amatah nache mee vakhae aenche Jerusalem na theng aeka kuurva aphamah rirae ynthiingnii entu. 56 Enuw ing Rumniieen nache ngiir aeka Jesu ithengmah itheng hengabuwr aeka yngkheh yngkheh chong ynseer aeka enriir, “Ynchii nemandennah? Ama kuurvane thengmah vachiiva?” 57 Atii aanchung jaethiim aere Pharisi aenche chong emanthangpa, achuw yngkheh ing aongniichu manghuw nave isuwrnii khaena ynningna chong ipirasiing enchii.
Bethani na Jesu chu Meri ing Richiithou Aataeh
1 Manlaennii kuurva hempha vachii inii niruk avaeh raenche ithii tanii amanring Lazarus ongnii khuw Bethani tingche Jesu ing vasisa. 2 Jesu avathengtah nache imaarnii khaena Martha ing ahesir; Lazarus ingkho isahnii nache Jesu thoh ongpoh kaarnache ynvae. 3 Changlae Meri ing barim isa richiithou inche Jesu khi itaehka asam inche aanuwr. Richiithou barim inche eensungchu bariimsa. 4 Amana Jesu rensavachii sebok aruming Judas Iskariot inche ariir, 5 “Yngkhaena abarim hangjaeh isa richiithou havichu seer dinari chathumna ynjuwr naka sara naeriing ae ningna ympimah tahka?” 6 Havana ariir i sara naeriing aechu akuurpeeh changchii khommahva, atak i abaruk tahnava. Ama ing seer thuungfhuwchu chinaka arutumsah khaena rivachii khaena vatah. 7 Jesu ing aningna ariir, “Sanuw inge tuning achii turasiing, ki yndimva kachii khaena havi ama ing asiihva. 8 Sara naeriing ae thohche nenuw anasiirna ongva nenta, changvakonchu ki thoh chembe anasiirna ongmah manuw.”
Lazarus Thehnii Ensir
9 Bethani khuwna Jesu thengna ichii ensiitah nache, Jesu khaenapang mahka ithii tanii hangring Lazarus chu ymbuwrnii khaenakho ta aeka mee inempak iva ae. 10 Chutahnache aanchung jaethiim aenche Lazarus chukho ithehnii khaena ensirpa, 11 akhaechuve ataklina Jesu ing atu ari khaenache mee vakhae ing eningtanii taen aeka Jesu chu enthacha khaenava.
Jerusalem na Aacheh Ivaruwh
12 Manlaennii kuurva nache itheng mee aajaeh aenche Jerusalem na Jesu vathengna ichii ensii. 13 Chutahnache enuw ing inubur ana chiaeka enva-puwh ae vokhehkho rotharoh ing uung ae, “Hosanna! Aafhuw rumingna ithengchu bor aphava, Isrel iruwngchu bor aphava!” 14 Ynthiing thiimziih ing ariirvaang Jesu ing lola vetuwhka ataklina hangongka vasisa, 15 “Zaion khuwruung nang ynchik mahra! lola nache vaongka naaruwng vathengna.” 16 Changlaenche asebok aenche ynchii enchiiniiva ichii manghuwmah ae, changvakonchu Jesu alaar isachu aandanglaenche akhaena ynthiing thiimziih ing ariirchu enuw ing engaansiipa. 17 Ithii vasah thaen tanii Jesu ing amanring Lazarus athamin vakhaechu amu asii vakhae aenche ahungriir ae. 18 Ama khaena chenva mee aenche engaantuwhfhuwchu, akhaechuve enuw ing laetho atuchu ensii. 19 Amatah nache Pharisi aeng enum ing yngkheh yngkheh ynriir ae, “Nemuse, inuw mancha chehmah samuw! Enruw laaruw paam mee vakhae ing aanuw enjiipa!”
Grik aeng Jesu Enjong
20 Kuurva nache Jerusalem na itheng ae kaarnache Grik topoh aekho ynvae ae. 21 Enuw ing (Galili paamna om Betsaida ichii khuwna ong) Philip ningting vak aeka enriir, “Oja, kenuw ing Jesu chu munungka kenchiinah.” 22 Philip ing Andriu yntuwhfhuwka enganii ing Jesu ningting vak aeka enriir. 23 Jesu ing eningna abasang, “Mee Sapa inche alaar isa phavachii aphachu atii ahenphapa. 24 Neningna atatak ing kariirnah: Gehu aanla inche ruwruwna buknaka thikmah nave changche omjaeh vaata; changvakonchu thiknave aanla inempak ynlavaata. 25 Achuw yngkheh ing aringkumchu aning mansiih nave ama maangvaata; achuw yngkheh ing laaruw paamne aringkumchu rumah nave, ichen naemah ringkumchu aningna omjaeh vaata. 26 Achuw yngkheh ing kichu rukuum ituning tanave kaanuwchu jiirasiing, amana chembe kameenae inche kaongnii nache ong phavaata. Ki rukuum yntu mee vakhaechu kapa ing bariimsa vaata.”
Jesu ing Thikvachii Ajeer
27 “Atii kabarungriir jaana. Ki ynchii riirkata? Ki ing jinge takate, ‘Apa, hava apha i kataklina thengmah rasiing.’ Changvakonchu ijachaam havi khaene apha havi phange ki ijuwngping. 28 Apa, naruming manruungla.” Aanuwnache thangbaen tanii iruur jungtheng, “Ki ing kamanruungpa, amanche vokheh manruung vakata!” 29 Changlae iruur huwrusachu asii vakhae aenche bicheeh huwrusava enchii ae, changvakonchu areh aen-chembe vaarmee ing chong abuwhva enchii ae. 30 Changvakonchu Jesu ing eningna ariir, “Ama senruwr kha kathen namahva, nenuw khaenava. 31 Laaruw paam taklina vajeer yntuvachii aphachu ahenphapa. 32 Laaruw tanii chungting eethoh aanuwnache mee vakhaechu kabuum tingche jekivakata.” 33 (Havana ariir i ijachaam yntuwhfhuw naka thikvachii amandangniiva.) 34 Mee aenche embasang, “Ken vajeer chonghak nachembe Khrista chu ichen naemah ing paarvaata taka ariirsa. Amachu ynsaangkhe nang ing Mee Sapa chu chungting eethoh vaatae nachiiva? Mee Sapa chu achuwva?” 35 Jesu ing abasang ae, “Ireng inche apha mongtehna nengkaar nache ongvaata. Irengchu aomraenche itufhuw turuw, amana chembe ynthimchu nentaklina thengmahnii; yngkhaena ynchii imbe ynthimna isi mee inche uting isiping ichii manghuwmah. 36 Neningna irengchu aomraenche, irengchu thacharuw, amana chembe nenuw ireng siti ynsuwhva nenta.”
Thacha omah Mee
Jesu ing havi ariir aanuwna, ening-tanii jungsuwhka ynthuursa. 37 Enuw emaekungna laetho aajaeh tukhang nakho, enuw ing aningna thachamah ae, 38 havi Isaia jaephar ing ariirchu hungchumro achiinah: “Aafhuw, achuw ing chong kemanthangchu athachase, amanche achuw ningnache Aafhuw changbaen ruwrengchu namandangva?” 39 Chutahnache enuw ing thacha chehmah ae, yngkhaena ynchii imbe Isaia ingkho ariir, 40 “Thangnang ing emik amanchupa vokhehkho embarungriir akampa, amatah nache emik inche mumahnii ae, amanche embarungriir nakho manghuw chehmahnii ae, vokhehkho idamnii khaena kabuum henjong mahnii ae, taka Thangnang ing ajeersa.” 41 Isaia ing Jesu alaar isachu muka ama khaenache havi ariir vasahva. 42 Changkhang nare Jehudi aatuari-cheh aenche Jesu chu enthacha; changvakonchu Pharisi aechu enchii tahnache vokhehkho meekongnii tanii engkak niimah khaenache yndang ing ichong chehmah ae. 43 Thangnang ing aru engadik chungna mee ing aruchu engadikseh ae.
Jesu Chong inche Vajeer Tuvaata
44 Jesu ing uungka ariir, “Achuw yngkheh ing ithacha nave ki pangchu ynthacha mahva, ki ynjenchiir Thangnang chukho athachava. 45 Ki ymmu mee inche ki ynjenchiir chukho amuva. 46 Laaruw paamna ireng yngkheh ing ijuwngping, ki ynthacha mee inche ynthim nache ongmahnii. 47 Achuw yngkheh ing kasenruwr i siinaka manjiimah nave, ataklina vajeer tumah ing; vajeer itunii khaena ki ijuwngmahping, changvakonchu laaruw paam ikarnii khaena ijuwngping. 48 Kichu thacha ningka ynchiimah mee ae vokhehkho kachong thacha ningka achiimah mee ae taklinache vajeer tuvachii yngkheh omna. Hava kachong inge achinii inii nache atakchu vajeer tuvaata! 49 Havi ichumva, akhaechuve kataksah aatuaricheh ing kariirmahva changvakonchu ki ynjenchiir kapa inche ynchii riirva kachiiva vokheh-kho ynchiikha chongva kachiiva ichiichu kaningna ympeehva. 50 Ki ing kamanghuwsa, amachuve ama achonghak i ichen naemah ringkumva. Hava kariir vakhae i riirla taka kapa ing kaningna ariirva.”
Jesu ing Asebok ae Khi Achaam
1 Atii Manlaennii kuurva aanii-chu aphamahri raenche, Jesu ing laaruw paam bathen naka ampa buumting yngkaeva chiichu apha ahenphapa ichii amanghuw. Laaruw paamna ipaar amee aechu inempak aning amansiihsa, vokhehkho achinii ipha ing aning amansiihsa. 2 Jesu ing asebok aethoh amaarpoh raenche umlae inche Simon Iskarot sapa, Judas chu Jesu irensahnii barungriir amanruwhpa. 3 Jesu ing akiklina ampa ing aangkhenglaang khaena ruwreng apeehchu amang-huwsa, vokhehkho Thangnang tanii ijuwngping amanche Thangnang ningting ynrireehva kata ichii amanghuw. 4 Jesu ing hangiirka anii peendiirchu siihka vokhehkho peenchu adiirriimna achiimpa. 5 Aanuwnache Jesu ing daona chiichu jesungka sebok ae khichu chaamka vokhehkho peen inche aanuwrpa. 6 Simon Pitar ning ahenpha tahnache ama ing ariir, “Aafhuw, nang ing kakhi chaanva nachiiva?” 7 Jesu ing aningna abasang, “Atarae katu i ynchii katuva ichii manghuw mahchii changvakonchu aanuwting manghuwva nata.” 8 Pitar ing aningna abasang, “Nang ing kakhi chaammahva nachiiva!” “Nakhi chaammah ningve natak i kithoh ynchiikho ynsuwh mahmuw taka Jesu ing abasang.” 9 Simon Pitar ing aningna achii, “Aafhuw, kakhi pangjaeh mahka, karusae kho amanche kakik kho ichaampeehra.” 10 Jesu ing aningna ariir, “Achuw yngkheh ynchaam vasah mee chuve manthiingsa amanche ynchaammah khang nakho ruvaata, akhi khaena chenpang vatah. Atiive nenuw man-thiing sachuw, changvakonchu mee yngkhehpang omtahna.” 11 Atak rensavachii meechu Jesu ing maen ing amanghuw vasahva, amatah nache havi ariirva, “Nenuw vakhae manthiingkiir sachuw, changvakonchu mee yngkhehpang omtahna.” 12 Jesu ing engkhi achaampeeh ae aanuwnache apeendiir niika aongniiting hungongka ariir, “Atarae katukha ynchiiva ichii nemang-huwse?” 13 “Nenuw ing kichu Oja vokhehkho Aafhuw ynchiichuw i chumnachuw, ki amachu rapping. 14 vokhehkho Aafhuw itachuwka nengkhi kachaamsa, havi vaange nenuwkho yngkheh yngkheh nengkhi ynchaam peehruw. 15 Ki ing manjiiva nenchii kamandangpa, nenuw ingkho neningna katuvaange turuw. 16 Atatak ing kariirnah: Suwh inche utaraenkho aafhuw chungna iruungmahva, isa chong areen mee ingkhe utaraenkho achiir mee chungna iruunghak mahva. 17 Atiive ichumchu nemanghuwpa, havi hemanjii tanuwve aajaehmeh bor phava nente!” 18 “Nengkhengna havi kariirmahva, changvakonchu ki ing kaateer vasah mee aechu kamanghuwsa. Ynthiing thiimziihna ariir havi hungchum vaata amachuve, ‘Kithoh thaemin kensahhak mee inche aanuw ynrisa.’ 19 Havi asuwhmah rirae ki ing kariirva, amana ahungsuwh raenche, ki i achuwping ichii manghuw vanenta. 20 Atatak ing neningna kariirnah: Ki ing kariirchu achuw yngkheh ing herinave, ki chukho ynriva; ki ynri mee inche ki ynjenchiirchu ariva.”
Jesu Rensavachii Maen ing Ajeer
21 Havi ariir aanuwdehna Jesu ing abarungriir inempak ija ing ariirjohpa, “Ki ing neningna atatak ing kariirnah: Nengkaarna mee yngkheh inche ki irensa vaata.” 22 Ama chongchu ensiitah nache, sebok aechu yngkheh yngkheh yngen aeka ynsiiae. 23 Jesu ing sebok ae kaarna aning amansiih yngkheh inche abuumna ong. 24 Simon Pitar ing aningna achuw taklina ichongva siira achii. 25 Amana sebok inche Jesu vaneengka asii, “Aafhuw, achuw khava?” 26 Jesu ing abasang, “Tar havi ahina fhuwm ningka aningna pivakachii mee chuva.” Amana tarchu jefhuwmka Simon Iskariot sapa Judas ningnache apeehpa. 27 Judas ing tarchu averi thoh ataklina umlaechu ruwhsa. Amana Jesu ing aningna ariir, “Tuva nachiichu tuchurchurla!” 28 Jesu ing ariirchu sebok aenche yntanga manghuwmah ae. 29 Judas ing seer thuungfhuw apaanii vakhaka, Jesu ing kuurva khaena vokhehkho sara naeriing ae ipeehfhuw khaena peehchae aanrii achiir varapmuw ichii ing emanden.
Ithar Chonghak
30 Judas ing tarchu iraangka taangting vat jungsuwhsa. Changlae aphachu jaen visa. 31 Judas ing taang asuwh aanuwna Jesu ing ariir, “Mee Sapa alaar isachu amanruungpa. 32 Thangnang laar isachu aningnache ruungnave, Thangnang ingkho alaar isachu Mee Sapa taklinache mandangnii vaata, 33 Kasiti ae, aasenru ing nenuw thoh onghakmah ynthongning. Nenuw ing ijongva nenta changvakonchu Jehudi aatuaricheh ae ningna kariirvaang, ‘Kasinii tingche isi chehmah tanuw.’ 34 Chukhaenache itharpeh chonghak yngkheh kapeehnahchuw: Nenuw yngkheh yngkheh ningsiih ympiruw. Ki ing kaning kamansiihchuw vaange, nenuwkho yngkheh yngkheh ningsiih ympiruw. 35 Nenuw ing yngkheh yngkheh ningsiih ympi tanuwve, mee vakhae ing nenuw i kasebok vachuw ichii imanghuw vaatae.”
Pitar ing Jesu Rumahvachii Maen ing Ajeer
36 “Simon Pitar ing Jesu ningna asii?” “Uting sivanachiiva Aafhuw.” Jesu ing abasang, “Kasinii tingche atarae nenuw ing ijiichehmah tanuw, changvakonchu nuwting chembe ijii-chehva nenta.” 37 Amana Pitar ing asii, “Aafhuw, naanuwchu ynchii khaena jiichehmahva kachiiva? Nakhaena ithii phanii ing ngiirning!” 38 Jesu ing abasang, “Kakhaena ithii phanii ing ingiir tatak vachii? Ki ing naningna atatak ing kariirnah: Aar-khuung ing akhuwngmah rirae nang ing ki vathumchak irumahtanii.”
Jesu i Lamva, Ichumva, vokhehkho Iringniiva
1 “Nenuw nenbarungriir manja-mahruw; Thangnang chu thacharuw, amanche ki chukho ithacharuw. 2 Kapa een nache ongnii inempak omna, amanche nenuw nengkhaena ongniichu iseem hesi-ping. Amachu omah maniive ki ing havi neningna riirmahva kachiiva. 3 Amanche nengongniichu hesiningka seem ningve, ki athar juwng ningka nenuwchu jungruwva kachuw, amanache nenuw ingkho kaongnii nache ongva nenta. 4 Ki kasinii lamchu nenuw ing nemanghuwsa.” 5 Thomas ing aningna ariir, “Aafhuw, nang uting isivachii ichii kenuw manghuwmah ung, amachu ynsaangkhe naongnii lamchu mang-huwva kente?” 6 Jesu ing abasang, “Ki lam chuping, ichum chuping, vokhehkho iringnii chuping; ki kajaar namah naka achuw ingkho kapa buum hungtung chehmahnii. 7 Nenuw ing ki imanghuw tanuwve, kapa chukho manghuwromva nenchiiva. Atii chembe atakchu nenuw ing nemanghuwpa vokhehkho nemupa.” 8 Philip inche aningna ariir, “Aafhuw, nangpachu keningna iman-siisara, amana pensavakenta.” 9 Jesu ing abasang, “Philip, apha hangsenna ki thoh ynruwhakjaeh muwka ki ymmanghuwmah vachii,? Ki ymmu mee inche kapa chu amuva. Ynchii khaena kapa chu keningna imansiira tachiika nariirva? 10 Ki ing kapa ningnache ongning, amanche kapa inche kaningna ongna ta ingka kariir chongchu nathacha mahva? Ki ing neningna chong kariir vakhae i kataksah tanii mahva; changvakonchu kaningna ong kapa inche anongchu atuva.” 11 Ki ing kapa ningna ongning amanche kapa ing kaningna ongna ichiichu thachara; changmahka nong yntu ajaarne ithachara. 12 Ki ing neningna atatak ing kariirnah: Achuw yngkheh ing kichu ithacha nave, ki ing katu kari havi ama ingkho tuvaata; amanche havi chungna iruungpak kho tuvaata, yngkhaena ynchii imbe ki kapa ningting ihuungping. 13 Karuming nache nenghenii vakhaechu ki ing tuvakata, amana chembe ampa alaar isachu asapa ajaarnache yndangvaata. 14 Karuming nache heniih tanuwve, ki ing tuvakata.
Ynthiing Laetha khaena Chongreep
15 “Nenuw ing nening imansiih tanuwve, neningna kapeehchuw chong-hak vakhae i manjiiva nenchiiva. 16 Kapa ningnache ki ing niihva kata, amanche ama ing reentaang Eebom yngkheh apha om vakhaena nenuw thohche ongjaeh vachiichu ama ing ijepivaata. 17 Thangnang khaena ichum mandang vachiichu laetha chuva. Laaruw paam mee aenche iraangcheh mahnii ae, yngkhaena ynchii imbe imu vokhehkho ynghuw chehmahnii ae. Nenuw inchembe nemanghuwsa, akhaechuve ama ing nenuw thoh ongjaehna vokhehkho neningna ongjaehna.” 18 “Ki ing kaangkaeraenche, nenum ing mamah ningchuw; ki neningting juwng vakata. 19 Apha mongteh khaena laaruw paam mee ing imu-mahnii, changvakonchu nenuw inchembe imuva nenta; amanche ki iringping khaeka nenuwkho ringva nenta. 20 Ama iniichu ahenpha raenche, ki i kapa ningna ongna amanche neningna ki ing ongvaang inge, nenuw ing kaningna ongnachuw ichiichu manghuw vanenta.” 21 “Achuw yngkheh ing kachonghak vakhae i runaka manjiinave, ki aning ymmansiih mee chuva. Kichu aning ymmansiih ningnache kapa ingkho aning mansiih vaata; ki ingkho kaning amansiihchu aningna mandang vakata.” 22 Judas (Judas Iskariot khamah) ing ariir, “Aafhuw, ynsaangkhe nang inche keningna yndang taniika amanche laaruw paam nache yndangmahva nachiiva?” 23 Jesu ing aningna abasang, “Achuw yngkheh ing ki aning imansiih nave kachongriir chaap manjiivaata. Kapa inche aning mansiih vaata, amanche kapa re ki ing aning nache theng nungka ama thohche onghakva kenta. 24 Achuw yngkheh ing ki aning imansiihmah nave kachongriir chaap manjiimahnii. Nenuw ing nensii kachongriir i kaningtanii mahva, kichu ynjenchiir kapa ningtaniiva.” 25 “Nenuw thoh kaong raenne havi kariirva. 26 Kapa ing karumingna Eebom jenchiir vachii inche aangkheng imanchuw vaata amanche kariir chong vakhae i nengaansiinii tuvaata.” 27 “Idaechu ki ing neningna kamahsa; kaningna om idaechu kapeehnahchuw; laaruw paam ing ympeeh thohche aanghakjaeh kapeehmah vachuw. Nenuw nenbarungriir manjamahruw, vokhehkho ynchik mahruw. 28 Ki ing neningna kariir i nensiipa, ‘Ki yngkae ningka amanche neningna juwngva katareeh.’ Nenuw ing nening imansiih tanuwve nenrotha manrohva nenchiiva, yngkhaena ynchii imbe kachungna kapa inche ruunghakna. 29 Hava vakhae i asuwhmah rirae neningna maen ing kariirpa, amana chembe ahungswuh raenche nenuw ing thacha vanenta. 30 Apha iseehpak ing nenuw thoh chongchehmah ing, havana laaruw paam aapuhchu thengna. Ama ing katklina ruwreng yntanga deenmah, 31 changvakonchu laaruw paam mee ing kapa i kaning kamansiihsa ichiichu manghuwva nenchiiting buksa; ama khaenache ama ing ariir vakhaechu katuva.” “Huungruw, inuw hava min i bathen taruw.”
Jesu Vomrip bur Remva
1 “Ki vomrip bur rem chuping, amana kapa inche aapaanii chuva. 2 Kaningna aanla omah abahchu ama ing thaahchir naka amanche aanla om abahchu inem aanlanii khaena manriip vaata. 3 Nenuw chuve havana kamanchuwchuw inge manthiing sachuw. 4 Kaningna ongjaehruw, amanche ki ingkho neningna ongjaeh vakata. Abah inche utaraenkho anum ing ynla chehmah. Vomrip bur nache ongjaeh vaang naka ynlapeh vachiiva. Ama vaangche kaningna nengongjaeh mahtaang, nenuw utaraenkho ynla chehmah tanuw. 5 “Ki vomrip bur chuping, amanche nenuw inche abah vachuw. Achuw yng-kheh ing kaningnache ongjaeh nave, ki ingkho aningnache ongjaeh vakata; akhaechuve kimah ningka nenuw yntanga tuchehmahchuw. 6 Achuw yngkheh kaningna ongjaeh mah chuve abah ynlen naka chongrep vaata; changchii abah aechu ynghuwng naka mi sungting ynthuvaata. 7 Nenuw ing kaningna ongjaeh tanuwka vokhehkho kachongchu neningna ongjaeh nave, nenuw ing nemandenchu heniihruw amanche phava nenta. 8 Nenuw ing inempak ynla tanuwve, kapa alaar isachu yndangnii vanenta amanche kasebok ynsuwhchu chehva nenta. 9 Kapa ing ki aning ymmansiih vaange, ki ingkho nenuwchu inempak kaning kamansiihnahchuw. 10 Kariir chaap vakhae i manjii tanuwve, ki ing kapa chongriir kamanjii vokhehkho aningsiih nache ongjaeh vaang, nenuwkho kaningsiih nache ongjaeh vachuw. 11 “Hava kariir inge karotha irohchu neningna omnii khaenava vokhehkho nenuw nenrotha rohnii chukho achiniikak ing omnii khaenava. 12 Neningna kariir chuve haviva: Ki ing nenuwchu kaning kamansiih vaangchuw inge, nenuwkho yngkheh re yngkheh ningsiih omruw. 13 Ningsiihna athurfhuw chuve mee yngkheh ing aarang khaena aring-kum apeehdehcheh chuva. 14 Ki ing kariir i manjii tanuwve nenuw kaarang vachuw. 15 Ki ing nenuwchu atii meenae tamah ningchuw, yngkhaena ynchii imbe meenae inche aafhuw ing atu ari yntanga mang-huwmah. Changvakonchu ki ing nenuwchu kaarang ae kachiivachuw, akhaechuve kapa ningtanii kasii vakhaechu neningna kariirchirpa. 16 Nenuw ing kichu eeteermah vachuw, changvakonchu ki ing nenuwchu kaateer vachuw; amanche nenuw ing sitanuwka aanla nemanlanii inche vokhehkho nengaanlachu apha omba khaena omjaehnii khaenache pham kathin vachuw; amanche nenuw ing karumingna apa ningna neniih neniihchu ama ing ipivaata. 17 Havi ki ing neningna kariirnah, nenuw yngkheh re yngkheh ningsiih ympiruw.
Laaruw paam Ijachaam
18 “Laaruw mee aenche nenuwchu ibatir ae nave, kichu ymbatirpae ichii i maensa ing manghuwruw. 19 Nenuw i laaruw paam ta ynsuwh vatanuwve, laaruw paam mee aenche entasah vangeng ichii ing ening imansiih vaatae. Changvakonchu ki ing nenuw i laaruw paam tanii kaateer vachuw, amanche atii nenuw laaruw paam ta ynsuwhmah sachuw. Amatah nache laaruw paam mee aenche ymbatir-pae. 20 Ki ing kariir vasahkha ynsiiruw: ‘Suwh inche aafhuw chungna iruunghak mahva.’ Enuw ing kichu ijachaam ipiae nave, enuw ing nenuw chukho ijachaam ipivaatae; enuw ing kachongchu manjii ae nave, nenchong chukho manjii vaatae. 21 Changvakonchu enuw ing hava vakhae i tuvaatae yngkhaena ynchii imbe nenuw i kata sachuw; enuw ing ki ynjenchiirchu manghuw mahsae. 22 Havi ki ing juwng ningka riirmah ningve enuw raarmahrom vachiipae; atiive enraar khaenache ikuhpeehnii engkhaena omahsa. 23 Kichu ymbatir mee inche kapa chukho abatirva. 24 Achuw ingkho atumah rideh i eningna katumah vaniive, enuw raar-mahrom vachiipae; enuw ing katu vakhaechu emupa amanche ki chukho, kapa chukho embatirpa. 25 Havi envajeer chonghakna ynziihka omchu ahungchumnii khaenache, “Enuw ing yntirfhuw mahna ymbatirpae.” 26 “Kapa ningtanii nenuwchu eebom ynthiing laetha, Thangnang khaena ichumchu mandangvachii jungtheng vaata. Ki ing kapa ningtanii neningting jenbathen vakata, amanche kakhaenache ama ing chongvaata. 27 Aburna basenka nenuw i ki thoh onghak vamuw khaka, nenuw ingkho kakhaena chongva nenta.”
1 “Hava kariir i nenuw nentha-cha nenbathenniimah khaenava. 2 Nenuw meekongnii tanii nenruming kakvaatae, amanche achuw yngkheh ing itheh naka, havi inge Thangnang nong atuniiva tavachii aphachu hempha vaata. 3 Mee aenche havi tuvaatae, akhaechuve kapa re kichu imanghuwmah ae. 4 Hava hangchii ae i mee aenche hentu vachii apha ahenpha raenche, havana kariir chaap i ynsiijaehruw ta ingka kariirnah.
Ynthiing Laetha Nong
“Aburna chembe ki nenuw thoh onghakmuw khaka havi riirmah ing. 5 Changvakonchu atii chembe ki ynjenchiir aningtingche yng-kaeva kachiiva, amachu nenuw achuw ingkho kaningna uting siva nachiiva itamahchuw. 6 Atii nenuw nenbarungriir inempak jaana. 7 Chang-vakonchu neningna kariirnah: ki yngkae ingi nengkhaena isapkva, akhaechuve ki yngkaemah ningve Eebomchu thengmahnii. Atiive ki yngkaeva kachii vakhaka atakchu nengkhaena jenchiir vakata. 8 Ama ing ajunwglaenche laaruw paam mee aeng isii tingche embuknii, amanche ichumchu ynchii khava ichiire Thangnang vajeer khaenache mandang vaata. 9 Isii icher inche enraarpa, akhaechuve kichu ithacha mahsae. 10 Ichumchu ynchii khava ichiinache enuw enraarpa, yngkhaena ynchii imbe ki kapa ningting yngkaeping amanche nenuw ing athar imumah tanuw. 11 Vajeer ichiinache enraarpa, akhaechuve havana laaruw paam aapuh khaene vajeerchu chisa. 12 “Neningna iriirfhuw inempak omna amachu nengkhaena nemvaata. 13 Thangnang chu yndangnii khaena ynthiing laetha ing ajuwnglaenche nenuw vakhaechu ichum tingche iruwvaata. Ama ataksah aatuaricheh inche chongmahnii, changvakonchu ama ing asii chaap vakhae vokhehkho nuwting hungsuwh vachii khaenache riirvaata. 14 Ama inche kaningna alaar isachu ipivaata, akhaechuve ki ing kariirchu rinaka nening nache riirvaata. 15 Kapa ing adeen vakhaechu kataava, chukhaenache ki ing kapeeh laetha inche rinaka nening nache riirvaata.
Ijaanii vokhehkho Rotharohnii
16 “Apha topoh aanuwna nenuw ing ki i imumah tanuw amanche apha topoh aanuwna kichu imuva nentareeh.” 17 Engkaarna sebok areh aenche enareerna ynsii ae, “Havive ynchii achiiniiva? Apha topoh aanuwna nenuw ing imumah tanuw amanche apha topoh aanuwna kichu imuva nentareeh achii i; vokhehkho ama ing ki kapa ningting yngkaeva kachiiva achii nareeh. 18 Apha topoh achii i ynchii ariirniiva? Ama ing ynchii ariirniiva ichii inuw manghuw mahmuw!” 19 Jesu ing aningting chong siiva enchiichu amanghuwtah nache eningna ariir, “Apha topoh aanuwna nenuw ing ki imumah tanuw vokhehkho apha topoh aanuwna kichu imuva nentareeh ta ingka kariirsa. Havi khaene yngkhaena nenuw yngkheh re yngkheh ynsiivachuw? 20 Ki ing neningna atatak ing kariirnah: Nenuw ichap ichuw phava nenta vokhehkho nenbarungriir javaata, changvakonchu ijachuwchu rotharoh ting yntehvaata. 21 Rupanuw ing siti abaring phana inempak jaana changvakonchu abaring aanuwna chembe ijachu abahirpa, akhaechuve ama ing naepangchu laaruw paamna ajungom tahnache arotha rohsa. 22 Havi vaange neningna ijanii thengna, changvakonchu aasenru ing nentaklina rotha rohniichu thengnaka nenbarungriir sungna isip ing omvaata, ama rotharoh chuve achuw ingkho nening tanii richeh mahnii. 23 “Aaniichu ahungviraenche kaningna yntanga isiimah tanuw. Neningna atatak ing kariirnah: Karuming nache nenuw ing kapa ningna neniih chaap vakhae ipivaata. 24 Ataniipha ing karumingna heniih-mah richuw; niihruw phava nenta, amana chembe nenrotha rohniichu achiniikak ing omvaata.
Laaruw paam Acheh
25 “Hava vakhae i neningna ynghuwnii ing chongsing. Hangchii chong i athar vokheh riirmahva kachii aphachu thengnaka iraesaksak ing kapa khaena itongnii hempha vaata. 26 Ama aphachu ahempha raenche nenuw ing karumingna niihva nenta; nenchangdenna ki ing niihva kata tamah ing, 27 akhaechuve kapa inche nenuwchu aning ymmansiihsa. Ama ing aning ymmansiih i nenuw ing kichu nening mansiihchuw khaenache vokhehkho katak i Thangnang ningta-niiva ichii ynthacha tahna vachuw. 28 Kapa ningtanii laaruw paamne ijuwngping; atii chembe laaruw paam bathen ingka aningting huungning.” 29 Aanuwnache asebok aenche aningna ensii, “Atiive kemanghuw chehnii ing nariirpa. 30 Nangve aang-kheng namanghuw chirva ichii atii kemanghuwpa; ama khaena athar isiivachii omahsa. Havi inge natak i Thangnang tanii ijuwng vachii ichii kenthachapa.” 31 Jesu ing abasang ae, “Nenuw atii ynthacha pachuw? 32 Apha ichiichu atii ahenphapa amachuve, nenuw vakhae penchirva nenta amanche kanum ing ima tanuwka nengeen lam hehchir vanenta. Changvakonchu kive kanum mahning, kapa ing eenruwfhuwsa. 33 Nenuw ing kaning nache idaechu nenphanii inche, ki ing havi kariirva. Laaruw paamne ijachaam phava nenta; changvakonchu nenthir mansakruw, ki ing laaruw paam kachehpa!”
Jesu ing Asebok ae khaena Athamsah
1 Havi riirka aanuwnache Jesu ing thangbaen ting hengenka atham, “Apa, apha ichiichu hungvisa. Nasapa ningna nalaar isachu jepisara, amanache nasapa ki inche nalaar isachu mandang sakata. 2 Laaruw mee vakhae khaena aatuaricheh ympeehchii vaange, nang ing ympeehchii ichen naemah ringkumchu mee vakhaena pisakata. 3 Ichen naemah ringkum ichuve ichum Thangnang chupang re najenchiir Jesu Khrista chu amanghuw chuva. 4 Laaruw paamna nalaar isa kamandangpa, itufhuw vakhae ymmansirchii nong vakhaechu kamanchipa. 5 Apa, laaruw paam abasenmah rirae naningna kadeen nalaar isa kha atarae ijepisara. 6 “Laaruw mee vakhae nache ka-mandang pachii. Enuw ae i kaningna ympeehchii namee khapae. Nang nachong emanjiipa. 7 Kaningna ym-peehchii vakhaekha naning taniiva ichii emanghuwpa. 8 Kaningna ympeehchii chong vakhaekha eningting pichir aengka engaraangpa. Atiive ki i nang ing ynjenchiir vachii ichii vokhehkho naning tanii ijuwngping ichiikho isajaeh ing enthachapa. 9 “Enuw engkhaena kathamsah-nahchii. Mee reentaang khaena mahva, nang ing ympeehchii namee ae khaenava. 10 Ki ing kadeenchu natava vokhehkho nang ing nadeenchu katava, amanche entaklina kalaar isachu kamandangsahpa. 11 Atii naningting huungning; laaruw paamne ki ongmahning, changvakonchu enuwve laaruw paamne ongnae. Ynthiing apa, nang ing ympeeh aechii i narumingna isiipeeh aera, amana chembe nang re ki yngkhehpangmuw vaange enuw ingkho yngkhehpang ing omvaatae. 12 Enuw thoh kaonglae nang ing ympeehchii naruming ruwreng ajaar inche maangrudeh ing kasiihpae. Ki ing enuwchu badaar aengka achuwkho ymmohmah ae, changvakonchu asae yngkhehpang chuve ynthiing thiimziih ahungchumnii khaenache ymmohna. 13 Atii nabuumting ki huungning. Havi laaruw mee vakhae ing embarungriir sungna rotharoh emphanii ing ta ingka mee vakhaena kariirva. 14 Najaera vakhae eningna kapeehpae, amanche laaruw paam mee aenche enuwchu embatirpa, akhaechuve ki i laaruw paam taniimah vaange, enuwkho laaruw paam tanii mahsae. 15 Enuw vakhaechu laaruw paam tanii jeri aera kachiimahva changvakonchu laaruw paamne isii tanii ibadaarpeeh aera kachiisahva. 16 Ki i laaruw paam taamah vaange, enuwkho laaruw paam taamahpae. 17 Naningtanii ichum inche manthiingsa aera, nachong chuve ichumva. 18 Laaruw paamne ki ynjenchiirchii vaange, ki ing enuwchu laaruw paamne kachiirpae. 19 Enuw vakhae thenna kataksahchu ynthiing saning, amana chembe enuwkho ichum inche manthiing vaatae. 20 “Ki ing kathamsahchii i engkhae-napang mahva, enuw enchong ajaarnache ynthacha mee vakhae khaena khomva. 21 Enuw vakhae i yngkhehpang ing engomnii khaena kathamsah vachii. Apa! Nang ing kaningna vokhehkho ki ing naningna ongjaeh vaange, enuw vakhae i ynningna omchir ae rasiing. Enuw vakhae i yngkhehpang ing omnii amanche mee aeng ki i nang ing ynjenchiir vachii ichiichu manghuw ae rasiing. 22 Nang ing kaningna nalaar isa ympeehchii amathohkhe aanghak ki ing eningna kapeehpae. Nang re ki yngkhehpangmuw vaange, enuwkho yngkhehpang ynsuwh ae rasiing. 23 Eningna ki ongning amanche nang ing kaningna ongnachii; ama vaange enuwkho yngkhehpang ing om ae rasiing; amana chembe nang ing ki ynjenchiir vachii, vokhehkho kichu nang ing naning ymmansiihchii vaange, enuwkho naning namansiihsae ichii laaruw paam mee vakhae ing manghuw rasiing. 24 “Apa! Nang ing enuw vakhae i kaningna ympeehpachii, ki ingkho enuw i kithoh ong aechu kadiknah, amanche nang ing nalaar isa ympeehchiichu enuw ing muvaatae, akhaechuve laaruw paam abasenmah rirae ki i nang ing naning ymmansiihsah vachii. 25 Ichum ynthiing Apa! Laaruw paam mee aeng nangchu imanghuwmah ae, changvakonchu ki ing kamanghuwchii inge nang ing ynjenchiir vachii ichiichu ynghuwna. 26 Ki ing ening nache kamandang pachii; ataraenkho hentu vakata. Amanache kakhaena ningsiih nadeenkha eningnakho omvaata amana ki ynchenkho eningna ongva kata.”
Jesu Ensuwr
1 Jesu ing hava vakhae i ariir aanuwna ama ing asebok ae thoh Kidron ichii phae tingche vaksae. Amana ingkhon yngkheh omnache enuw ing vaongsae. 2 Ama minchu Judas ingkho amanghuw, akhaechucve Jesu ing amanache asebok aethoh yntuwhchak ae. 3 Chutahnache Judas ing Rom ae laarchang ruwrkheh aere aanchung jaethiim aeng enjechiir vokhehkho Pharisi ae thohche ingkhon phanii inche vaksae; enuw ing jaemi re domi vokhehkho chemthar aajaeh enchi. 4 Jesu ing hungsuwh vachii vakhaechu amanghuwtah nache, ama ing eningting vaanseen sehka asii ae, “Nenuw achuwchu nenjongva?” 5 Enuw ing Nazaret tanii Jesu ta aeka embasang. Amachu kiping taka Jesu ing abasang ae. Jesu chu arensah Judas inche enuw thohche ingiirhak. 6 Jesu ing kiping taka eningna ariirtah nache, enuw entuknung ynriaeka ruwruw nache tiihpohsae. 7 Athar vokheh Jesu ing eningna asii ae, “Achuwva nenuw ing nenjongchu?” Enuw ing Nazaret tanii Jesu ta aeka enriir. 8 Jesu ing enuwchu abasang, “Ki amaping ta ingka neningna kariirpa; nenuw ing ki ynjong vatanuwve, havana mee ae i yngkae ae rasiing.” 9 (Havana ariir chong i ajae ama ing ajeer vasahchu ahungchumnii khaenava amachuve, “Apa, nang ing ympeeh aechii enuw i asae yngkheh-pangkho mamohmah aeng.”) 10 Amana Simon Pitar ing achem isuwka Aanchung Jaethiim suwhchu atuktah nache atari tanii aana asaehjohpa. Ama suwh aruming chuve Markus enchiiva. 11 Jesu ing Pitar ningna ariir, “Nachem kha thinla! Kapa ing ympeeh ijachaam kamchu inmahnii ichii ing namandenva?”
Jesu Annas ningna Enghenruw
12 Amana Rom laarchang aeng Jesu chu suwr aeka emphuwppa. 13 Ahaarpana Annas ningting ahenruw ae. Atakchu ama kum nache Aanchung Jaethiim ivi Kaiphas amfhuwva. 14 Havana Kaiphas iva ajae Jehudi aatuaricheh ae ningna mee aajaeh thikvachii changdenna mee yngkheh ithii inche sahakna taka ariir khava.
Pitar ing Jesu Arumah
15 Simon Pitar re sebok yngkheh ing Jesu aanuwchu ajiiae. Sebok yngkheh ive Aanchung Jaethiim ing amanghuw vasah vakhaka aanchung jaethiim eensukmae tingche Jesu thoh ynruw ing varuwhsa, 16 Pitar chuve suwngkuung ataang nache ong. Changlae sebok yngkheh ingkhe jungsuwhka suwngkungna ong rupanuw ningnache Pitar varuwh rasiing taka ariir. 17 na ong rupanuw inche Pitar ningna asii, “Nang hava mee i asebok ae kaarna yngkhehmah vachiikhang?” Mah, ki mahping taka abasang. 18 Isik om vakhaka laarchang aere suwh ae inche mi manseh aeka engu. Amana Pitar kho vaansenka michu ava u.
Aanchung Jaethiim ing Jesu Chong Asii
19 Aanchung Jaethiim inche Jesu asebok ae vokhehkho amanchuw ae khaenache inempak chong asii. 20 Amana Jesu ing abasang, “Apha vakhaena ki ing mee vakhae kaarna yndang ing thamin katong chakva, meekongnii nakho vokhehkho rumniieen nachenkho kamanchuw chak ae. Ki ing utaraenkho ynruwh ing tongmahchak ing. 21 Amachu ynchii khaena nang ing chong ynsii vachii? Ki ing ynchiikha kariirva ichiichu siiaera-kariir vakhae enuw ing emanghuwsa.” 22 Jesu ing changche achongtah nache, laarchang yngkheh inche ibeengka ariir, “Ynsaangkhe nang ing changche ichii ing Aanchung Jaethiim ningnache nabasangva?” 23 Aning nache Jesu ing abasang, “Ki ynraar ing ichongping vaniive, ong ae ningne ynchii khava ynraarchu riirla. Changvakonchu ichum vaniive ynchii khaena kataklina ymbinvachii?” 24 Amana Annas inche Aanchung Jaethiim Kaiphas ningting Jesu chu ymphuwp ing ahenbathen.
Pitar ing Jesu Arumahreeh
25 Changlaenpha inche Pitar ing mi uka ongjaeh. Chutahnache areh aenche aningna enriir, “Nang kho hava mee i asebok ae kaarna yngkhehmah vachiikhang?” Changvakonchu Pitar ing rumahka abasang, “Ki ama mahping.” 26 Aanchung jaethiim suwh yngkheh Pitar ing aana asaehjoh auwnaefhuw yngkheh inche Pitar ningna ivachong, “Nangmah vachiikhang Jesu thoh ingkhonna kamu chuwkha?” 27 Athar vokheh Pitar ing “Mah, ki mahping,” achiichakna aarkhuwng inche khuwngsa.
Jesu ing Pilaat Maana ingiir
28 Ziing imaenphikna Jesu chu Kaiphas een tanii vajeernii eenting enghenruw ae. Jehudi aatuaricheh ae chuve vajeernii een asungting varuwhmah ae, akhaechuve Manlaennii kuurva thaemin isahnii khaena iseeng ing ongnungka enchii. 29 Amatah nache Pilaat ing jungsuwhka mee ae ningtingche hava mee takline ynchii nemanraarnii omva taka asii ae. 30 Enuw ing embasang chuve, “Ama ing raarmah nave kenuw ing veruw mahnung.” 31 Pilaat ing ariir, “Nentaksah ing ama ruwnuwna nenvajeer chonghak inuwzii ing vajeer tusaruw.” Enuw ing embasang, “Kenuw ing mee achuw yngkhehchu ithehnii khaena ruwreng phamah ung.” 32 (Haviva Jesu ing ariir vasah ahungchumniichu achong inche aman-dangsa amachuve, ithii ningchuwh inche thiklo achiinah.) 33 Pilaat ing vajeernii eenting hungruwhka Jesu chu eenka asii, “Nang Jehudi ae iruwng vachii?” 34 Jesu ing abasang, “Nang ing hava ynsiichii i nabarungriir tanii hungsuwh sahva changmahka mee aeng riir aeka ynsii vachii?” 35 Pilaat ing abasang, “Ki Jehudi va ynchii vachii? Nangchu kaningting ynghenpeeh mee aere Aanchung Jaethiim aenche havi ariirpae. Nang ynchii naraar omva?” 36 Jesu ing ariir, “Karuwngpaam chuve laaruw paam nenmahva; karuwngpaam amachu laaruw paam i vaniive, kaanuw ajii aenche laar tuk ae naka Jehudi aatuaricheh ae engkik phamahva kachiiva. Karuwngpaam chuve laaruw paam imahva!” 37 Chutahnache Pilaat ing asiireeh, “Changmanuwve nang iruwng vachii?” Jesu ing abasang, “Ki i iruwng ping ichiichu nataksah ing nariirpa. Ki havi khaene jungom ingka laaruw paamne ichumchu ijungriirnii khaena ijuwngping. Achuw yngkheh ichum tanii mee inche kariir i rungaevaata.” 38 “Amana ichumchu ynchiiva?” taka Pilaat ing asii.
Jesu Ithehnii Chong Ichi
Aanuwnache Pilaat ing taangting jungsuwhka mee ae ningna ariir, “Ki ing ataklina miraar babukfhuw yntangakho tuwhchehmah ing. 39 Changvakonchu nenuw nenunu inuwzii ing manlaennii kuurva ne mee yngkheh kaeshumna yngkhum omna. Chukhaenache nenuw nengkhaena Jehudi iruwng havi bathen naka ynchiinahchuw?” 40 Enuw ing uung aeka embasang, “Hava mee i mahva, Barabas khava!” Barabas ive ynruw ynrep meeva.
1 Pilaat ing Jesu chu ruwka ithipak ing amambinpae. 2 Laarchang aenche iring abah ing phurchii seem aeka Jesu arusae nache emangkhum; vokhehkho peen isen mansing aeka 3 vokhehkho vaneeng aeka Jehudi ae Irunwg Ringkum iseehpak ing ringraso ta aeka enriir. Amana enuw ing engabeengpa. 4 Pilaat ing athar jungsuwhka eningna ariir, “Enruw, ki ing atarae neningting jenbasuw vakata, amachuve ataklina ki ing ynraarfhuw yntanga tuwhmah ing.” 5 Chutahnache Jesu ing iring phurchii re isen peenchu singka jungsuwhsa. Pilaat ing eningna ariir, “Enruw, mee havi!” 6 Aanchung jaethiim aere Rumniieen aarung laarchang aenche enjemutah nache va-uung aeka enriir, “Khros taklina ynjamrasiing! khros taklina ynjamrasiing!” Pilaat ing eningna ariir, “Nenuw ing ruwnuwna jamsatahruw, ataklina ki ing miraar tuwhmah ing.” 7 Mee aenche embasang, “Ken vajeer chonghak inuwzii ing ama thik rarap vachiiva, ama ing Thangnang sapa ping achiinah.” 8 Pilaat ing ama chongchu asiitah nache ynchik sehsehsa. 9 Ama ing vajeernii eetingche athar huungka Jesu ningna asii, “Nang utanii itheng vachii?” Changvakonchu Jesu ing yntanga basang mahsa. 10 Pilaat ing aningna ariir, “Nang ibasang mahva nachiiva? Ki ing nangchu ynthennii vokhehkho khros taklina ijamnii ruwreng kadeensa ichii namanghuw mahva.” 11 Jesu ing abasang, “Nang ing kataklina ruwreng nadeen i Thangnang ing ympitahna vatah. Amatah nache kichu naningting ympeeh mee taklinache iruungpak isii omna.” 12 Amachu asiitah nache Pilaat ing Jesu chu ynthennii akhur ajongpa. Changvakonchu mee aenche athar uung ae, “Nang ing ama i bathen taniive, nang Kesar iruwng aarang-mah vachii! Achuw yngkheh ataksah ing iruwng ping tanave, Kesar iruwngchu arumahva!” 13 Pilaat ing ama chongchu asiitah nache, Jesu chu jenruwka Vaapa tunii ongnii (Hebreeu chong ing gabbatha) nache ong. 14 Changlaenche manlaennii kuurva inii siimchim hungta. Amana Pilaat ing mee ae ningnache ariir, “Enruw, nengaruwng havi!” 15 Enuw ing hanguung aeka enriir, “Thehruw! Thehruw! Khros taklina ynjamrasiing!” enchii. Pilaat ing eningna ariir, “Ki ing nengaruwngchu itheh nengadikva?” Aanchung jaethiim inche abasang, “Kenuw ing kendeen iruwng chuve Kesar vatah!” 16 Amana Pilaat ing Jesu chu khros taklina ijamnii khaena eningting amansirpa.
Jesu Khros taklina Enjam
17 Chukhaenache enuw ing Jesu chu enruwpa. Ama ing khros chu idomka isi inche rusaeruwh omnii (Hebreeu chong ing Golgotha ichii) minchu hungtungsa. 18 Amana enuw ing khros taklina enjampa; amanche meeniimeh ae chukho Jesu atari, atachang nache enjampa. 19 Pilaat ing Jesu khros ruchungna abaziih chuve, “Nazaret tanii Jesu, Jehudi ae Iruwng,” taka ataar. 20 Mee vakhae aenche ama ynziihchu empa, akhaechuve Jesu enjamnii minchu khuwruung thoh aasen yndahmah. Amana yntaarchu Hebreeu, Latin vokhehkho Grik chong ing ynziihva. 21 Aanchung jaethiim inche Pilaat ningna Jehudi ae iruwng tanana baziih mahra, ama changdenna ama ing Jehudi ae Iruwng ping achii, tanana baziihra achii. 22 Pilaat ing abasang, “Ki ing kabaziihchu kabaziihva.” 23 Laarchang aenche Jesu chu enjam aanuwna apeendiirchu yngkhehter engkhingnii ing asae manrii isuwh ing engasiih. Amanche aantuwnii omah aruw yngkhehpang ing yngkhuung anii peen chukho enri. 24 Amana laarchang aenche enareer ing enriir, “Havive isiihmah manuw, achuw ing phavaate ichii laepah enniitaruw.” Havi ynthiing thiimziihna ynziih vasahchu ahungchumnii chuva: “Kapeenchu entaksahna ynsem aeka vokhehkho kapeenchu enlaepah engenniipa.” Chukhaenache laarchang aenche havi entuva. 25 Jesu khros buumna ynneengtang ing ingiir ae chuve amnuw, amnuw-fhuw, Klopas arumee Meri, amanche Meri Magadalen aepae. 26 Jesu ing amana ingiir amnuw vokhehkho aning amansiihpak asebok Johon amucha, amnuw ningna ariir, “Rupanuw, nasapa i enla!” 27 Aanuwnache ama ing sebok ningnache ariir, “Enla, nangnuw i.” Apha ichii nache sebok inche ruwka eenting yngkaesae.
Jesu Ithii
28 Atii aangkheng chichirsa ichii amanghuwtah nache ynthiing thiim-ziihna ynziih vasahchu ahungchumnii khaenache, Jesu ing kachii raarne achiipa. 29 Bukam yngkhehna vomrip chii achuum isip ing omchu thor abasuwrna rup aeka, Jesu baena ahemansin ae. 30 Ama vomrip chiichu Jesu ing inka ariir, “Chisa!” Aanuwnache aruw barupka thiksa.
Jesu Isii ing Ensin
31 Khros taklina jam aeka entheh engkhichu mambong ae naka entakchu ynsumnii khaena Jehudi aatuaricheh aenche Pilaat ningna eniih. Akhaechuve ama iniichu Kuhnii iniisa, amatah nache ithii aechu Deennii iniichu hungvivachii khaena Ynthiingnii Inii nache omjaeh naka tamahsae. 32 Amatah nache laarchang aenche vak aeka Jesu buumna enjam ahaarpachu akhi emambongpa amanche avomanii yngkheh chukho akhi emambongpa. 33 Jesu chuve maensa ing ithii vasah vakhaka akhi mambong mahsae. 34 Changvakonchu laarchang yngkheh inche adeep nache isii ing asintah nache sii re chii suwhsa. 35 (Aamu mee ing havi ariirva, amanache nenuw ingkho thacha vanenta. Ama ing ariir i ichumva, amanche ichum kariirva ichii ama ing amanghuwsa.) 36 Havi aruw yngkhehpangkho bongmahnii taka ynthiing thiimziihna ynziihchu ahungchumnii khaenava. 37 Reentaang ynthiing thiimziih yngkhehna ariir chuve, “Enuw ing ensin mee ningnache mee aeng envaatae.”
Jesu Endim
38 Havi aanuwnache Aramathia tanii Josep inche Jesu ahakchaangchu irinii khaena Pilaat ningna aniihpa. (Josep ikho Jesu aanuw ajii mee yngkhehva, changvakonchu ynruwhjaeh ing ajiiva, akhaechuve Jehudi aatuaricheh aechu achiitah nache yndangmahva.) Jesu hakchaang irichu Pilaat ing ruka Josep inche ahangadom. 39 Isivasah jaenkhehna Jesu ningna itheng vasah aruming Nikodemas ichii ama ing Josep thohche mar vokhehkho aloes ichii barim isa kilo songthum vakhae enchi. 40 Enuw meeniimeh aenche Jehudi ae enunu inuwzii inche, Jesu hakchaangchu idimnii khaena barim isa marochu itaeh aeka isajaeh inche engarom. 41 Amanche Jesu enthehnii apham nache ingkhon yngkhehkho om. Ingkhon sungnache mee yndimmah rideh ithar thaen yngkheh om. 42 Ama iniichu Jehudi ae khaena chembe Ynthiingnii Inii vakhaka, enuw ing Jesu chu amanache emantorpa, akhaechuve thaenchu ynneengtang ing om.
Thaen Aruwh ing Heom
1 Atii niisin abasemnii ahaarpa inii nache, Meri Magadalen ing aarkhiim nache thaen ting avaktah nache thaen kamnii rungchu ymmongka heom amupa. 2 Amana Jesu ing aning amansiih Simon Pitar ningnare sebok yngkheh ningting vataenka avariir, “Aafhuw kha thaen tanii engasuwpa, amachu una ensiihsamo aomnii ynghuwmahsa!” 3 Pitar re sebok yngkheh inche thaen tingche vaksae. 4 Enuw ivataenhak ae, changvakonchu sebok yngkheh inche Pitar chu thijopka maensa ing thaenchu avepha. 5 Ama ing khupka aabuwrtah nache asungna peen yntorchu amu, changvakonchu asung tingve varuwhmah. 6 Ningkuur ing ivatung Simon Pitar inche vephaka thaensung tingche varuwhsa amana asungna peen hengantorchu amu, 7 vokhehkho Jesu rusae ynveennii peen chukho om. Ama peen chuve yngkheh thohche omhakmah changvakonchu ynthep ing heom. 8 Amana maensa ing ivatung sebok yngkheh khakho avaruwhtah nache muka athachapa. 9 (Changvakonchu ithii tanii hangring vaata ichii ynthiing thiimziih kha enuw ing manghuwmah riae.) 10 Amana sebok aenche engeen ting ynrisae.
Jesu ing Meri Magadalen ningna Yndang
11 Meri inche thaenkhur ataang nache ngiirka ichap. Ama ing achap baram baram ing jukhupka thaenchu aabuwrpa 12 amana ivaarjaeh ing ynthong ae vaarmee ynniimeh, yng-kheh ing Jesu yntornii arusae ruvaena amanche yngkheh inche akhi ruvaena ong aechu avemu. 13 Amana enuw ing aningna envesii, “Rupanuw, nang yngkhaena ichap vachii?” Ama ing ajebasang ae, “Ki kaafhuw chu enripa amanche unakhe ensiih vamo manghuw mahsing.” 14 Amana aruvae nache avaanlehtah nache Jesu ingiirchu amu; changva-konchu ama ing Jesu va ichii manghuwmah. 15 Jesu ing aningna asii, “Rupanuw, nang yngkhaena ichap vachii? Achuwva nang ing najongchu?” Ama ing amanden chuve atak i ingkhon aafhuw varapmuw taka aningna ariir, “Oja, nang ing naneeng vaniive iriirpeehra, unakhe naneengva, ki ing vakningka varisa kata.” 16 Jesu ing aningna “Meri!” achii. Ama ing aantongting vaanlehka Hebreeu chong ing ariir, “Raboni” (Havi arutho chuve Oja achiiniiva.) 17 Jesu ing ariir, “Kataklina iparmahra, akhaechuve ki kapa buumting ynrimahri ing. Nang yngkae-nana kauw kanae ae ningna hungriirla, ki kapa, enuwkho empa amanche ka Thangnang, enuw khaenakho Thangnang ningtingche ki ynrikata.” 18 Meri Magadalen ing yngkaeka sebok ae ningnache Jesu kamu ahungchiipa; amanche ama ing havi Jesu ing kaningna ariirva achii.
Jesu ing Asebok ae ningna Yndang
19 Abasemnii niisin inii khuri nache sebok aenche Jehudi aatuaricheh aechu chiiaeka engongnii eenkhaarchu kampang aeka ongpoh ae. Apha ichiinache eenkhaar kungna Jesu ing vangiirka ariir, “Idaechu neningna omrasiing.” 20 Havi ariir aanuwnache akik vokhehkho adeep aechu amansii ae. Sebok aenche Aafhuw chu emutah nache inempak enrotha irohsah. 21 Jesu ing athar vokheh ariir, “Idaechu neningna omrasiing. Kapa ing ki ynjenchiir vaange, nenuw ikho ki ing kachiirnahchuw.” 22 Amana eningting jehuka ariir, “Ynthiing laetha i iraangruw. 23 Nenuw ing mee ae isiichu kuhpeeh tanuwve, yngkuhpeeh vaata; nenuw ing kuhpeehmah tanuwve, yngkuhpeeh mahnii.”
Jesu re Thomas
24 Jesu atheng raenche sebok ae kaarna ynvae yngkheh aruming Thomas (ymphuwr kho enchii) ynvae-mah. 25 Amatah nache areh aeng Aafhuw kha kenuw ing kemupa ta aeka aningna entong. Thomas ing eningna ariir, “Akikna jopi buw kamumahri raentaang, amanche akikna abuw om taklinache kakikchar ing kapar mahri raentaang vokhehkho adeep nache kakik ing kaparmahri raentaangche, ki thacha mahning.” 26 Inii neeriih aanuwnache athar vokheh sebok aenche eensung nache ongsae, ama kaarnache Thomas kho ynvaesa. Eenkhaarchu yngkamkhang nakho, Jesu ing engkaarna vangiirka ariir, “Idaechu neningna omrasiing.” 27 Amana Jesu ing Thomas ningna ariir, “Nakikchar kha hane siira, amanche kakik i enla; vokhehkho kadeepne nakik ing veparla. Atii ithachamah kha manchen nana ithachara!” 28 Thomas ing abasang, “Ki kaafhuw, vokhehkho ka Thangnang!” 29 Jesu ing aningna ariir, “Ki ymmutah nachii nathachava? Kichu imumah khang ae nakho ynthacha mee aechu bor aphapae!” 30 Jesu ing asebok ae maekungna laetho inempak atu aanem hane ynziihmah omna. 31 Changvakonchu havana ynziih inge Jesu i Khrista chuva, Thangnang sapa chuva ichii thachanii khaena amanche ama arumingna ithacha ajaarnache nenuw ing iringnii phanii khaena chenva.
Jesu ing Asebok Sarii ae ningna Yndang
1 Havi aanuwna Jesu ing athar vokheh asebok ae ningna Tiberias chiiding nache yndangsa, amanche haviva isuwhchu. 2 Simon Pitar, Thomas (Ymphuwr kho enchii), Nathanel (Galili paam Kana tanii), Zebedee sapa ae, amana reentaang Jesu sebok ynniimeh ae thohche yntuwhpoh ae. 3 Simon Pitar ing eningna ariir, “Ki ngaklah isiping.” Enuw ing aningna kenuwkho jiikenchii enchii. Chutahnache enuw ruwkuwng nache sipohsae, changva-konchu ama jaen nache enuw ing yntangakho suwrmahsae. 4 Khuw hung-vaarka iniichu ahangsuwh raenche Jesu ing chiikuur nache hengiirsa, changvakonchu sebok aenche Jesu va ichii manghuw mahsae. 5 Jesu ing eningna asii ae, “Naepang ae, yntanga nensuwrmahva?” “Yntangakho suwrmah ung,” ta aeka embasang. 6 Ama ing eningna ariir, “Nengachak kha ruwkuwng omnii tachang tingkhe vedeengruw, amanache topoh suwrva nenta.” Enuw ing engachakchu envedeeng tahnache nga inempak khum aeka hengkicheh mahsae. 7 Jesu ing aning amansiih sebok yngkheh inche Pitar ningna ariir, “Ama i Aafhuw va!” Pitar ing Aafhuw va ichiichu asiitah nache, ama ing apeendiir veniika chiitingche vakhuwngsa. 8 Sebok areh ae chuve ruwkuwngna ong aeka taang tingche hungsuwh aeka ichak sungna nga engkhumchu enghengki. Amachu taangthoh aasen yndahpakmah, lam songthum vakhae yndahvaata. 9 Enuw ing taang enghenpha tahnache mi hechuwhka nga ynruvasah vokhehkho tar topoh heomchu emu. 10 Amana Jesu ing eningna atarae nensuwrpeh nga kha topoh henchiruw taka ariir. 11 Simon Pitar ing vakka chaama songa arii ynthum nga ing ynriim ichakchu taangting ahengki; nga chang-jaehchu ynthinkhang nare ichakchu ynsiihmahdeh. 12 Jesu ing eningna ariir, “Huung nuwna saruw.” Sebok aenche aningna nang achuw vachii tamahdeh ae, yngkhaena ynchii imbe atak i Aafhuw va ichii emanghuwpa. 13 Amana Jesu ing tar chukho amanche nga chukho apeeh ae. 14 Ama ing ithii tanii ahangring aanuwna sebok ae ningna yndang i havi inge avomanthum niiva.
Jesu re Pitar
15 Ensah aanuwnache Jesu ing Simon Pitar ningna asii, “Johon sapa, Simon, havana areh ae i chungna athiseh ing kichu naning ymmansiih nahchii?” Ama ing abasang, “Unge Aafhuw, kaning kamansiih sachii ichiichu nang ing namanghuwsa.” Jesu ing aningna ariir, “Kajao ae i rukuum tupeeh aera.” 16 Avomanii Jesu ing aningna asii, “Johon sapa, Simon, kichu naning ymmansiih nahchii?” Ama ing abasang, “Unge Aafhuw, kaning kamansiih sachii ichii nang ing namanghuwsa.” Jesu ing aningna ariir, “Kajao ae i rukuum tupeeh aera.” 17 Avomanthumnii Jesu ing asii, “Johon sapa, Simon, kichu naning ymmansiih nahchii?” Jesu ing vathumchak naning ymmansiih nahchii taka asiitah nache Pitar abarungriir jaasa; chutahnache ama ing abasang, “Aafhuw, nangve aangkheng namanghuw chirsa; ki ing kaning kamansiihchii i nang ing namanghuwsa!” Jesu ing aningna ariir, “Kajao ae i rukuum tupeeh aera. 18 Ki ing naningna atatak ing kariirnah: Nasiimnah nachembe siningka nachiitah vakhae tingche isichii; changvakonchu najungtar raenche nakik mangkaen taniika, achuw yngkheh aenche nang ing siningka nachiimah tingche iruwvaatae.” 19 (Havi inge ariirnii chuva, Pitar ing thiknii vachii vokhehkho Thangnang laar isa mandangnii vachii vakhaechu aningna amandangniiva.) Amana Jesu ing aningna ariir, “Kaanuw ijiira!”
Jesu re Reentaang Sebok
20 Pitar ing paamkhuw athiirtah nache Jesu ing aning amansiihpak sebok yngkheh amachuve-ajae tar ensahpohrae Jesu vaneengka, “Aafhuw, achuwva nang irensava chiichu,” taka chong asii sebokchu amu. 21 Pitar ing ama meechu amutah nache Jesu ningna asii, “Aafhuw, hava mee icha?” 22 Jesu ing abasang, “Ki kajuwng-mahri raentaang heringjaeh rasiing ichii manden ningve, naningna ynchii takhang? Kaanuw ijiira!” 23 Amatah nache Jesu aanuwzii aenche havana sebok i thikmah dehnii ta aeka enareer sungna ichong ae. Changvakonchu Jesu ing ama thikmah dehnii tamah; ama ing achii chuve, ki kajuwngmahri raentaang heringjaeh rasiing ichii manden ningcha; naningna ynchii takhang achii vatah. 24 Hava sebok iva hava vakhae takline saarkhii pika vokhehkho hava vakhae i abaziihsa; amanche inuw ing ariir vakhae i chumna ichii ymmanghuwsa.
Achinii
25 Ataraenkho Jesu ing atu ari reentaang aajaehkho omna. Ama vakhaechu baziih kiirta tamanuwve, ama thiimbuwr chuve laaruw paam chirmahnii ichii ing kamandennah.