Roandông jabkhab
1 Khebengko jabkhab dângwah; Jabkhab pa Joban demnâng dângwah, ngale Jabkhab pa Joban dângwah. 2 Khebeng mejû Jabkhab pa Joban demnâng dângwah. 3 Joban ma chentôpa jabkhab junma hôanwah; ate aho thangma lithemin hôanho. 4 Jabkhab ko roandông dângwah, ngale roandông pumma mihnyan nyuchha nâng wenphiak kephûkoh era. 5 Wenphiak pumma rangnyek ko phiak eka, ngale rangnyek pumma wenphiak pa tamahsiet mah. 6 Joban ma ate nginmatte mihnyan wathe chienkatwah, ate mînpa Jon dângwah, 7 Atema mihnyan hehnâng wenphiak junma thôkohrãng katwah, erohkoba anga ngama nginkongpa chohtat lahma eputedâlem a. 8 Ate dedea ere wenphiak pa dangmah; rohkomin atema ere wenphiak pa thôkoh rãng katwah. 9 Arepa linlin wenphiak pa dângwah - are wenphiak pa hahtokkhoh ko kalahma chentô mihnyan hehnâng phiakka era. 10 Jabkhab pa hahtokkhoh ko dângwah, ngale ate junma Joban ma hahtokkhoh hôanwah, rohkomin hahtokkhoh ma ate jetlomah. 11 Atea ate dede diakko katwah, rohkomin ate mihnyan hehma ate kepmah. 12 Khakama atenâng putedâlem lahma kep eka; erohwah atema thinnâng Joban Chha dangthuk eka. 13 Thin a mihnyan nyuchha nyong awa hei angem junma chha lahma Joban Chha dâng dangmah; Joban dede thin Wa dâng phumma thin a Joban Chha dangeka. 14 Jabkhab pa mihnyan nyuchharãng litdang kaera, ngale atenâng mînchenchaan, ngale toangtang pa mênchong danglahma nãngdemnâng songkaera. Nãngma ate rânghôngpa kheki, ererânghông pa ate Wa Chha atelolo dângthã rânghông chohlahma khe eki. 15 Jon ma ate junma jabwah. Atema ngatwah, “Ngama ngatekpa ate junma ngatwah, ‘Atea ngadiko ekara, rohkomin atea nga noma adong, chenrãngma ngako ngachhat mama ate dângwah.’ ” 16 Atenâng ajahthem mînchenchaan tôngjunko atema nãngnâng rongrup lemma rangkoh ehi. 17 Joban ma Mosa junma nãngnâng Niemarang heh kohwah, rohkomin mînchenchaan le toangtangpa Jisu Krista junma kohehi. 18 Henmemin Joban mathatkhe eka. Rohkomin Joban danglahma Joban Wa demko tôngte wathelolo ate Chha pumma Joban pa jetthuk ehi.
Jon Baptis wah Joban Nginkong
19 Jeroselem wah Jews thôte jabte ngale soam aroakte ngale Livi hehma Jon nâng, “Nanga hen a?” ngama thôngphârãng chienkatwah. 20 Jon ma letûngmaang thangma, “Nga a Misaia dangmek” ngama sâpoangpoang dânthâng wah: 21 Ephumma thinma Jon nâng thôngphâ wah, “Eroh medang oko, nanga hen a?” “Nanga Ilija ne?” Jon ma, “Dangmek,” ngama dânthâng wah. Thinma wîenthông phâwah, “Nanga mõngne? “Dangmek,” ngama atema dânthâng wah. 22 Thinma ngatwah, “Eroh medang ako, nanga hen a erepa ninâng thôkohhi,” “Chenrãngma ngako ni chienkatte hehnâng nima ngakthôwên kohmin. Nanga nangdede hen ngama ngarii ekoa” 23 Jon ma Isaia mõng ma jabwah jabkhab pa jablahma dânthâng wah: “Nga a ‘hahran khonâng phoangrak tepa: Teso khôamrãng lemtin hôankoh en!’ ” 24 Farasi hehma chienkattah nginmatte heh, 25 ma Jon nâng thôngphâ wah, “Nanga Misaia min ledang ngale Ilija min ledang erediko mõngmin ledang medang oko nangma chenrãngma baptijem koh eko?” 26 Jon ma dânthâng wah, “Ngama joma baptijem koh ekang, rohkomin nekhu chhangko nema lejet thangma wathe tonga. 27 Atea ngadiko ekara, nga a ate daphâng putkoh rãngjô punmek.” 28 Are heh Jon ma baptijem koh ekathe Bathani hahwah Jordanjo sankat ngenâng dângwah.
Joban Saak
29 Eredijâko Jon ma Jisu ate tânâng wãng lahma khewah, ngale eko atema ngatwah, “Sû en, hahtokkhoh wah pap hênphete Joban Saak pa anã! 30 Ngama ngatekpa ate junma ngatwah, ‘Ngadiko wathe ekara, rohkomin atea nganoma adong, chenrãngma ngako atea ngachhat mama dângwah.’ 31 Atea henpa dângmin a erepa ngama lejetwah, rohkomin ngama atea Isrial mihnyan hehnâng jetthuk rãng joma baptijem koheka.” 32 Ngale Jon ma thinnâng thôkoh wah: “Ngama rangkhethung wah Jupa wo rãngrãng litlahma kalahma ate khohko tongka lahma khetek. 33 Ngamemin ate majet dângwah, rohkomin nganâng joma baptijem kohrãng chiente Joban ma nganâng ngatwah, ‘Nangma Ju kalahma henkhoh nâng tongka lahma khe eko; erepumma Asâthôanju ma baptijem ekoh a.’ 34 Jon ma ngatwah, “Ngama erepa khetek,” ngale “Ngama nenâng atea Joban Chha ngama thôkoh eka.”
Khebeng Jisu Dijunte
35 Eredijâ komin ate dijunte wanii demnâng eretheko Jon cheplahma dângwah, 36 Phumma chenthu atema Jisu loatkhoam lahma kheko, “Joban Saak pa anã!” ngama ngatwah. 37 Dijunte wanii pumma ere jabpa tatlahma Jisu demnâng johchhoan wah. 38 Jisu ma litphong lahma ngiaksok katko ate diko junkhoam lahma khewah, ephumma atema chienwah, “Nema chenni lemsû eken a?” Thinma dânthâng wah, “Rabi, Nanga chenko songkoa?” (Are ngaeka pa “Hethôte” nâng ngaeka.) 39 Atema dânthâng wah, “Kaletma sûkaren,” (Erepa sanhêmthah wanbelii sanpoatko dângwah.) Ephumma ate demnâng johka lahma ate sôngthepa khekat wah, ngale erejâko ate demnâng johtông wah. 40 Wathepa, Simon Piter naa Andru dângwah. 41 Lemlienma ate pho Simon chohmîn lahma, “Nima Misaia khetih” ngama thôkoh wah. (Are ngaeka pa “Krista” ngaeka.) 42 Erediko atema Simon Jisu tânâng siethokwah. Jisu ma atenâng sûlahma ngatwah, “Nangmînpa Simon, Jon chha, rohkomin nangnâng Kaipas ngama roomin.” (Arepa Piter ngama ngaeka, ngale arepa “Long” ngaeka.)
Jisu ma Philip ngale Nathaniel Nii Roo
43 Eredijâko Jisu Galili nâng katrãng chepwah. Atema Philip chohmin lahma ngatwah, “Nga demnâng johchhoan hang!” 44 (Philip pa Batsida wah dângwah, Andru le Piter niimin erehahko sôngte dângwah.) 45 Philip ma Nathaniel chohmin lahma atenâng thôkoh wah, “Mosa ma Niemarang titab nâng raang tahpa nima lâchoh khetih, ngale ate junma mõng hehmemin raangtah. Atea Nazarat wah Josep chha Jisu.” 46 Nathaniel ma chhienwah, “Nazarat hah wah chenni komin asenli eta jienhonga.” Philip ma, “Wãnglohma sûwãngro,” ngama dânthâng wah. 47 Chenthu Jisu ma Nathaniel ate tânâng wâng khelahma ngatwah, “Isrial jat linlinpa anã; atenâng chenmin achhih aho!” 48 Nathaniel ma atenâng chhienwah, “Nangma nga chenroh jienjet ehanga?” Jisu ma dânthâng wah, “Philip ma nangroo mako nanga phukbãng thongko tonglohma khetih.” 49 Nathaniel ma dânthâng wah, “Hethôte, Nanga Joban Chha! Nanga Isrial heh Lowang!” 50 Jisu ma atenâng ngatwah, “Ngama nanga phukbãng thongko tonglohma khetih ngatrãngma nangma pute ekoa? Nangma ere nomemin adong echohkheo!” 51 Ngale atema thinnâng ngatwah, “Ngama nenâng toangtang ngin thôkoh eka: Nema rangkhethung pa laang lahma ekhe en, ngale Mihnyan Chha khohko rangwah Joban ngintatte heh awângte akatte ditkhoam lahma ekhe en.”
Kana Hahnâng Nemnyansiet
1 Jânii diko Galili wah Kana hahnâng nemnyansiet kuhhôan dângwah. Jisu nyong min nemnyansiet thinnâng dângwah, 2 ngale jisu le ate dijunte hehmin nemnyansiet thinnâng roowah. 3 Chenthu angurti thôan phumma Jisu nâng ate nyong ma ngatwah, “Thin angurti lâthôantah.” 4 Jisu ma dânthâng wah, “Ngama moatthin moatlempa nangma nekthôkoh hang,” “Ngama moatrãng sanpoat mahûera.” 5 Erediko Jisu nyong ma haa hehnâng ngatwah, “Atema nenâng chenni chien ehèn a erepa mo en.” 6 Jews hehnâng seksâsoan niem tonga, erohwah ere niemko keprãng eretheko longwah hôanwah jotêm phangerok dângwah, ngale jotêm phangtheko châthe litat lânchhamroh dângwah. 7 Jisu ma haa hehnâng ngatwah, “Are jotêm heh joma menkien en.” Ephumma haa hehma mênkienwah, 8 ngale erediko atema thinnâng ngatwah, “Arejo kowah kholetma kuhhôan semwa khhepho nâng wênkoh en.” Ephumma thinma jokowah khoatwên kohwah, 9 erejopa angurtirãng litjâ lahma dângwah, ngale sêmwa khhepho pumma erepa thatjokwah. Phumma ere angurti pa chenwah choh ekapa atema lejetwah (rohkomin jokhoatwênte haa pumma epa jetwah); ephumma kuhhôan sêmwa khhepho pumma nemnyan wapa roowah 10 ngale atenâng ngatwah, “Anga ngama khebeng khoko angurtisen senpa rângbengkoh a, phumma mihhehma melejok tahkoba, khediko achhih pa rângkoh a. Rohkomin nangma athâng hehmin asen pa thien eko!” 11 Jisu ma arepa khebengrãng patritli moatlem Kana nâng bengmoatwah; Enâng Jisu ma ate chaanpa bengkhesok wah, ngale ate dijunte hehma atenâng putedâlem wah. 12 Erediko Jisu le ate nyong, naa heh, erediko ate dijunte heh Kaparnam nâng kalahma jâthe jânii tongkatwah.
Jisu Rangsoamhum nâng Hok
13 Ere sanpoat pa Adankhoam Lokuh thângnemnem dângwah, erohwah Jisu Jeroselem nângkatwah. 14 Atema Rangsoamhum ko lee amân, saak, phari sengte heh erediko ngun akem litminte heh tonglahma khehokwah. 15 Ephumma atema ruhepma watlahma chentô ngem heh Rangsoamhum kowah junloatwah, saak ngale lee amân hehmin junloatwah; ngale atema ngun litminte khoang heh dâthin phekoh relahma thin ngun heh rêmphekoh rewah; 16 ngale phariwo sengte hehnângmin atema, “Erekowah kepchhoanrãng chienwah! Nga Wa Hum pa phîn athã sengthin therãng nekhôan en!” ngama ngalahma junloatwah. 17 Joban nyapraangma ngaeka heh ate dijunte hehma thônghun wah, “Joban, Ngama nang Hum ko hun ekang pumma wenma khâmwah rãngrãng kham ehang.” 18 Jews heh thôte jabte heh ate tânâng ngin chhienrang ngakhok wah, “Nangnâng areheh moatrãng chaan tongho ngama nima jetrãng, nangma ninâng chenni patritli molohma khesok hia?” 19 Jisu ma dânthâng wah, “Nema are Rangsoamhum pa runsiet en, Ngama jârem khenko ngakhoan ang.” 20 Thinma chhienwah, “Nangma jârem khenko tangakhoan oa?” “Are Rangsoamhum pa hôanrãng roakbelii pâerok rangpâ lemwah!” 21 Rohkomin Jisu ma ngaeka rangsoamhum pa ate phoangpa ngatwah. 22 Ephumma chenthu Jisu ritwah ngakhîn diko, ate dijunte hehma atema jabtah pa thonghunwah, ngale Jisu ma jabtah Joban nyapraangko thinma putedâlem wah.
Jisu ma Mihnyan jat apat pa Jet
23 Jisu Adankhoam Lokuh rãng Jeroselem nâng dângpoatko, atema patritli moatlem heh moat khelahma jahmõang mihnyan hehma atenâng putedâlem wah. 24 Rohkomin Jisu ma thinnâng puteho, chenrãngma ngako Jisu ma mihnyan heh phangtang jetlahma dângwah. 25 Thinjunma atenâng chêmthôkoh thinjô aho dângwah, chenrãngma ngako thinhungnâng chenni thonghun eka erepa ate dedema jet dângwah.
Jisu ngale Nikodima
1 Jews heh khhepho ate mînpa Nikodima ngama wathe dângwah, ngale atea Farasi dângwah. 2 Jâthe rangpen nâng Jisu tânâng wãng lahma atenâng ngatwah, “Rabi, nima ajet nanga Joban ma chienkatwah hethôte. Henmemin nangma moeko rãngrãng patritli heh leta momin chenthu ate demnâng Joban chaan letong kako.” 3 Jisu ma atenâng dânthâng wah, “Ngama nangnâng toangtang thôkoh eki: henmin atea depnii lengakchha kako Joban Hahsông lechohkhe min.” 4 Nikodima ma chhienwah, “Dongchoan mihnyan pa chenroh depnii jienthe ngakchhat min a?” “Depnii ngakchhat rãng chenthumin ate nyong wokkhen nâng jienthe ngaklupmah!” 5 Jisu ma dânthâng wah, “Ngama nangnâng toangtang thôkoh eki” “Henmin jo ngale Juma lechha kako Joban Hahsông thenâng leta wãngmin. 6 Mihnyan hei angem phoangpa nyong awa ma chhaehi, rohkomin jupa Juma chhatmin. 7 Ngama nangnâng nanga depnii ngakchhatmin ngama ngatrãngma nekpatrii. 8 Pôngpa atema chennge nâng pôngchhoan huneka enge nâng rângpong chhoan a; ngale nangma pônglin peba rângtat o, rohkomin nangma chenwah ponghûera, ngale chennâng pongchhoan eka erepa rângjetmoh. Henhen Juwah chhaeka erehehmin ererãngrãng jôba dângmin.” 9 “Aroh chenroh jiendângmin a?” ngama Nikodima ma chhienwah. 10 Jisu ma dânthâng wah, “Nanga Isrial ko hethôte adong wathe, phumma nangma arepa jetmohne? 11 Ngama nangnâng toangtang thôkoh eki: Nima chenni jet ekia erepa thôeki, ngale chenni khe ekia erepa jôba thôeki, rohkomin nekhuma henmemin ni nginko putemet. 12 Ngama nangnâng are hahtokkhoh wah ngin heh thôkohko pute mahhang; phumma ngama nangnâng, rangkhethung wah ngin heh methôkoh eko jãtanga, nangma chenroh ejien pute hanga? 13 Ngale henmin rangkhethung nâng mathat wãngeka, Mihnyan Chhapa loloba rangkhethung wah kaera.” 14 Mosa ma janwah hôanwah pû sehahnâng thankah ranâng laangtah rãngrãng, Mihnyan Chhamin eroh laangmin, 15 erohkoba henhenma atenâng putedâlem eka erehehma roantang roanjêng roandông echoh a. 16 Joban ma are hahtokkhoh ko nyahrãng hunlahma ate Chha wathelolo pemin koheka, erohwah henhenma atenâng putedâlem eka ereheh leriimin rohkomin thinma roantang roanjêng roandông echoh a. 17 Chenrãngma ngako Joban ma ate Chhapa hahtokkhoh chhihsietrãng chienkat dangmah, hahtokkhoh pepângrãng chienkat era. 18 Henhenma Chhako putedâlem eka ereheh nâng achhih lengamin; rohkomin henhenma leputedâlem dangeka ereheh achhih ngama rângatah, chenrãngma ngako, thinma Joban Chha wathe loloko putedâlem mah. 19 Achhih asen pa aroh ren eka: wenphiak pa hahtokkhoh ko kaera, rohkomin mihnyan hehma wenphiakko hunnoma rangnyekko huneka, chenrãngma ngako thin moatlem heh achhih. 20 Henhenma achhihli moeka erehehma wenphiakko chhihchoh eka ngale wenphiakko hûwakmah, chenrãngma ngako thinma moatlem chhih heh kherit hunmah. 21 Rohkomin henhenma asenli moeka erehehma thin moatlem pa Joban junko moeka ngama wenphiak pumma chenkhesok a ngama wenphiakko hûeka.
Jisu ngale Jon
22 Erediko, Jisu le ate dijunte heh Judia diak ngenâng katwah, thindem ko enâng jâthe jânii rãng tongthien lahma baptijem kohthienwah. 23 Salim tâwah Ainon hahko Jon memin baptijem kohlahma dângwah, chenrãngma ngako eretheko jo ajah dângwah. Mihnyan heh ate tâko hûlahma thinnâng atema baptijem kohwah. 24 (Arepa Jon phâtek nâng sekmako dângwah.) 25 Jon dijunte khuthe Jews heh demnâng niemarang junko seksâsoan rãngma chhiakmîn wah. 26 Ephumma Jon tânâng wãng lahma thinma thôkoh wah, “Hethôte, nangma thonghun ekole Jordanjo rãngma sankat ngewah nang demko mihnyan wathe dangtah pa, nangma mihnyan hehnâng ate junma thôkotoh pa? atema athângheh baptijem koheka, ngale anga nga ate tânâng hûeka!” 27 Jon ma dânthâng wah, “Joban ma lekoh kako, mihnyan ma chenmin leta chohmin. 28 Ngama jab ekãngpa nema lâtattha, ‘Nga a Misaia dangmek, rohkomin nga a ate mako chienkatla ehang.’ 29 Nemnyanwa pa nemnyannyu rãng; rohkomin nemnyanwa tâwah cheplahma atenâng jetat eka ate lemruchha pa, nemnyanwa kahra tatko khuhah eka. Ererãngrãng ngamin khuhah ekang. 30 Ate jêngdong dongwãng rêmin, rohkomin nga jêngrin rinjâ rêmin.”
Rangkhethung wah Katte
31 Rangkhethung wah hen kaera erepa chentô noma adong. Henpa hahtokkhoh wah a ereheh a hahtokkhoh thiak ngale hahtokkhoh ngin ethôa, rohkomin henpa rangkhethung wah kaera erepa chentô noma adong. 32 Atema chenpa khetah a ngale tattah a ereheh thôkoh eka, rohkomin ate ngin pa henmemin pute mah. 33 Rohkomin henhenma ate nginpa kep eka erehehma Joban pa toangtang ngama jet eka. 34 Henpa Joban ma chienkat era erepumma Joban ngin thôeka, chenrãngma ngako atenâng Joban ma ate Jupa mênchong koheka. 35 Wama ate Chhanâng hunlahma chentôpa atenâng pênthuk eka. 36 Henhenma Chhako putedâlem eka erehehma roantang roanjêng roandông chohmin; Henhenma Chha nginlekep dangeka erehehma roantang roanjêng roandông lechohmin, rohkomin ereheh nâng Joban ma roantangma echêmthuk a.
Jisu ngale Samaritan Dihiaknyu
1 Jisu ma Jon noma dijunte ajah chohlahma baptijem koheka ngama Farasi hehma tatwah. 2 (Linlinko Jisu ate dedema wathenângjô baptijem kohho, ate dijunte hehma loloba kohwah.) 3 Chenthu are nginpa Jisu ma chohtat phumma, ate Judia wah loatchhoan lahma Galili nâng katwah: 4 Atema Samaria pa dankhoam lahma Galili nâng katwah. 5 Atea Samaria wah Sanchar hahko hokwah, arepa Jakob ma ate chha Josep nâng kohtah pit tâko dângwah. 6 Jakob ma thutah jokenpa eretheko dângwah, ngale Jisu boankhoam lahma ere joken tâko bôantôngwah. Erepa rangngihmong dângwah. 7 Samaritan dihiaknyu wathe jokhoatrãng katwah, phumma Jisu ma atenâng ngatwah, “Nganâng jowah jokthuk hang.” 8 (Ate dijunte heh bôjat nâng phhekchhah riakchoanwah.) 9 Dihiaknyu pumma dânthâng wah, “Nanga Jews, phumma nga Samaritan, nangma ngawah chenroh jienthajok ehanga?” (Jews hehma Samaritan hehma kepeka tit alek, le jojok bâti heh aroamma kepmah.) 10 Jisu ma dânthâng wah, “Nangma Joban ma chenni koheka erepa jetlohmeko, ngale nangwah jo thâjoktepa hen a erepa jetlohmeko, nangma atewah chenthajoktoh, ngale atema nangnâng roandông kohthinjo chenjok thuktho.” 11 Dihiaknyu pumma dânthâng wah, “Hethôte, nangnâng jokhoat thinmin aho, ngale joken pemin kenlu. Nangma chenwah - roandông chohthinjo jokthukmin a? 12 Are joken pa ninâng nite niwa Jakob ma kohwah; ate memin akowah jokwah, ate chhuchha ngale atema pemtah ngem angah hehmemin arekowah jokwah. Nanga Jakob noma adong ngama thonghunrii ekoa?” 13 Jisu ma dânthâng wah, “Henhenma are jokowah jok eka ereheh jolân ngakritmin, 14 Rohkomin henhenma ngama koh ekang jokowah jok eka ereheh chenthumin jolân lengak riimin. Ngama thinnâng koh ekang jopa, thinhung khennâng thinnâng roandông kohte jokhôrãng edanga, ngale thinnâng roantang roanjêng roandông ekoh a.” 15 Dihiaknyu ma dânthâng wah, “Hethôte, nganângmin ere jopa kohhang! erohkoba nga chenthumin jolân lethe ngakriitu edangang, ngale areko jokhoatrãng letham ngakkatu edangang.” 16 Jisu ma atenâng ngatwah, “Wãnglohma nang tangwa roowãngo,” “erediko anâng ngakkaren.” 17 Dihiaknyu pumma dânthâng wah, “Nganâng tangwa aho,” Jisu ma dânthâng wah, “Nangma tangwa aho ngaeko pa toangtang lâjabtoh. 18 Nanga mihnyan wabangâ nâng lâwãngtoh, ngale athângheh nâng rôamsong eko delawa pemin nang tangwa dangmah. Nangma nganâng toangtang lâthôkoh thang.” 19 Dihiaknyu pumma ngatwah, “Hethôte, ngama nanga mõnglêlê kheki,” 20 “Nite niwa Samaritan hehma Joban nâng are hahkong khoko soamwah, rohkomin ne Jews hehma Joban nâng rangsoam thinthe pa Jeroselem ngaeken.” 21 Jisu ma atenâng ngatwah, “Dihiaknyu, nganâng putedâlem hang, sanpoat pa ehûra, mihnyan hehma Wa nâng are hahkong khokomin lesoammin ngale Jeroselem nângmin lesoammin. 22 Ne Samaritan hehma hennâng soam eken a erepemin senthemthem laangjetmet; rohkomin ni Jews hehma hennâng soam ekia erepa jeteki, chenrãngma ngako khope pa ni Jews hehwah choheki. 23 Rohkomin sanpoat pa ehûra, ngale lâhûtha, Joban Juchaan chohte mihnyan hehma Wa nâng Ju ngale toangtangma esoam a, ngale eroh soampa Joban Wama huneka. 24 Joban pa Ju, ngale ate Juchaan meloloba mihnyan hehma atenâng atema huneka rãngrãng toangtangma jiensoammin.” 25 Dihiaknyu pumma atenâng ngatwah, “Ngama Misaia ekara ngama ajet, ngale chenthu ate meka theko, atema ninâng chentôpa ethôkohhi.” 26 Jisu ma dânthâng wah, “Epa nga, nangdemnâng ngin thôminte pa Misaia.” 27 Ere sanpoatko Jisu dijunte heh hokwah, ngale thinma dihiaknyu demnâng ngin thômînthu khehû lahma nyahrãng patritwah. Rohkomin dihiaknyuko henmemin, “Chenni hun ekoa?” ba, “Ate demnâng chenrãngma thômîn eko?” ngama ngaho. 28 Erediko dihiaknyu pumma ate jotitpa phethien lahma hahnâng ngakwâng wah, ngale atema enângwah mihnyan hehnâng thôkoh wah, 29 “Suka tanrên, mihnyan wathema ngama chenni motek a ereheh phangtang thôkoh ehang. Atea Misaia edangthêm a?” 30 Ephumma thinhahwah mihnyan heh Jisu sokrãng katwah. 31 Ere sanpoatko dijunte hehma Jisu nâng ngatwah, “Hethôte, chenni komin phhekchhah o!” 32 Rohkomin atema dânthâng wah, “Nganâng nema lejetli phhekchhah tonghang.” 33 Ephumma dijunte heh thindede tungko jabmînwah, “Atenâng henma akomin phhekchhah lâkephû themkotah.” 34 Jisu ma thinnâng ngatwah, “Nga phhekchhah pa, nga chienkatte nginkepkep danglekma atema chien ehang moatlem heh râmoatpa. 35 Nema aroh rângnga en, ‘Chhahmûn rãng jengbelii tonga.’ Rohkomin, Ngama nenâng thôkoh eka, pit hehnâng senthemthem sûtan en; chhah heh lâmuntah, ngale khôankhen lâthângtah! 36 Chhah khôankhente hehnâng dekbithã kohmin, ngale atema roantang roanjêng roandông rãng khôanthien eka; erohwah akhiette le khôankhente nii aroamma khuhah nâhah edanga. 37 Arepa toangtang ngin, ‘wathema chhahwên eka, ngale ahânma khôankhen eka.’ 38 Nema moatwah ledang pitkowah chhahmun eka heh khôankhen rãng ngama ne chienchhoan eka; ere pitpa mihhânma moatwah, phumma thinma moatmãn kowah chhahpa nema kep eken.” 39 Dihiaknyu pumma thôkoh junko erehah wah Samaritan mihnyan heh jahmõang Jisu nâng putedâlem wah, “Ngama chenni motek a ereheh phangtang atema thôkoh ehang.” 40 Ephumma Samaritan heh ate tânâng kalahma thin demnâng johtông rãng roatsep wah, ngale thin demnâng Jisu jânii johtôngwah. 41 Jisu nâng ate ngin junko ahan memin ajahthem ma putedâlem wah, 42 ngale thinma dihiaknyuko ngatwah, “Nima ade phumma lâputetih, rohkomin nangma ninâng thôkoh junko dangmah, nidedema ate ngin lâchohtattih, ngale linlin atea rangkhen Pângte ngama nima lâjettih.”
Jisu ma Sahhab wa Chha Paangmih Mesiet
43 Erehahko Jisu jânii tongthien lahma Galili nâng katwah. 44 Chenrãngma ngako ate dedema ngatwah, “Mõng heh thindiak akan nânglolo roak atoak leweih thangma hôan eka.” 45 Ate Galili nâng hokkhoam phumma, enângwah mihnyan hehma ate roowah, chenrãngma ngako thinkhu Adankhoam Lokuhrãng Jeroselem nâng katwah, ereko lokuh poatko atema chentô motah heh thinma khewah. 46 Erediko Jisu Galili wah Kana hahko ngakkatwah, ngale erehahko atema jowah angurtirãng litsietwah. Kaparnam hahwah Lowang khennâng moatte sahhabwa chha paangmih pa khunlahma dângwah. 47 Atema chenthu Judia wah Galili nâng Jisu lâkatha ngama chohtat phumma, atema Jisu demnâng chohmin kalahma Kaparnam nâng wãng lahma ate chha riinemnem khun ekapa mesiet kohrãng roatsep wah. 48 Jisu ma atenâng ngatwah, “Nekhuma patritli le bâritli moatlem heh lekhe kenko henmemin putedâlem met.” 49 Sahhab pumma dânthâng wah, “Hethôte, Nga chhapa ritmako nga demnâng johwãng mênghang.” 50 Jisu ma atenâng ngatwah, “Wãngo: Nang chhapa riimah!” Ere mihwa pumma Jisu nginko putedâlem lahma wângwah. 51 Ate humnâng wânglemko ate haa chohka lahma thôkoh wah, “Nang chhapa lâsentah!” 52 Atema thinnâng ate chhapa chenre sanpoatko sentah a ngama thôngphâ wah. Thinma dânthâng wah, “Mejâ sanhêmthah wanthe sanpoat tôko khoanchet pa sênwah.” 53 Ephumma atenâng, “Nang chhapa riimah,” ngama Jisu ma thôkotahpa ere sanpoatko thôkoh wah ngama naawa pumma thônghun wah. Ephumma ate ngale ate humte tangkâ heh phangtangma putedâlem wah. 54 Arepa Jisu Judia wah Galili nâng katdiko depniirãng patritli moatlem moatwah.
Binnâng Khoanchet Mesiet
1 Arediko Jisu Jews heh lokuh rãng Jeroselem nâng katwah. 2 Jeroselem wah saak luphokthin lemkam tâko bin wanthe dângwah ereko kânthong wan - bangâ dângwah; erepa Hebru jabma Batjatha ngama ngaeka. 3 Lemkam tâko khoanchette jahmõang juplahma dângwah mitdoak, dakò, kôasôte. 5 Eretheko roakbelii pâesat khoanchetma chêmlahma mihwa wanthe dângwah. 6 Jisu ma mihwa pa eretheko juplahma khewah, ngale mihwa pa ajahthem rangpâ khoanchetma lâchêmtah ngama Jisu ma ajet dângwah; ephumma atenâng Jisu ma thôngphâ wah, “Nangma asên hun ekole?” 7 Khoanchette mihwa pumma dânthâng wah, “Hethôte, jopa phetpoatko nga thien-katte aretheko henmin aho; ngadedema katrãng phungkohle, ngamako hen komin khekho chikep kaeka.” 8 Jisu ma atenâng ngatwah, “Toanchep o, nang hempa toanpe lohma khoam o.” 9 Lemlienma mihwapa senlahma tôanchep wah; atema ate hempa toanpe lahma khôamwah. Ere sentah jâpa Pientôngjâ dângwah, 10 Ephumma Jews thôte jabte hehma ere sentah mihwako ngatwah, “Thejâ Pientôngjâ, erohwah nãng Niem junko nangma nang hempa leta toanpemin.” 11 Atema dânthâng wah, “Nga sênsiette mihwa pumma nga hempa toangpe lekma khôamrãng chien ehang.” 12 Thinma atenâng thôngphâ wah, “Hen a nangnâng are hempa tôanpe chientepa?” 13 Rohkomin khoanchette mihwa pumma Jisu pa hen a erepa lejetwah, chenrãngma ngako eretheko mihnyan heh jahmõang dângwah, ngale Jisu min sitsiak mahkhoam wah. 14 Erediko Jisu ma Rangsoamhum nâng lepkhe lahma ere mihwako ngatwah, “Tattan, ade phumma nanga lâsentoh; erohwah papkaam nekthõng motu, eroh ledang koko erenoma khoanchet chhih ethechoh o.” 15 Erediko ere mihwa pumma chhoan lahma Jews heh thôte jabte hehnâng ate sênsiette pa Jisu dângwah ngama thôkoh wah. 16 Ephumma thinma Jisu nâng chêmsiet rãng bengphung wah, chenrãngma ngako atema Pientông jâko khoanchet mesietwah. 17 Jisu ma thinnâng dânthâng wah, “Nga Wa pa roantangma moatjûjû tongeka, ngale erohwah Ngamemin moatmin.” 18 Aroh ngat junko Jews heh thôte jabte hehma ate ritphe rãng ajahthem phungwah; erepa atema Pientôngjâ Niem chhihsiet lolo ledang atema Joban pa atedede Wa ngamemin ngaeka, ngale atedede Joban tôthã hôanrii eka.
Achha Chaan
19 Ephumma thinnâng Jisu ma dânthâng wah, “Ngama nenâng toangtang thôkoh eka: Chhama ate dedema chennimin tamomah; Ate Wama chenni molahma kheka erepaba moeka. Wama chenni moeka erepa Chha memin moeka. 20 Chenrãngma ngako Wa pumma Chha ko hunlahma ate moatlem chentô moeka heh phangtang khesok eka. Wama are nomemin moatlemdong heh ate Chha ko ekhesok a, ngale nekhu phangtang bârit ere en. 21 Wama chenroh ritwah ngakhinsiet lahma roandôngkoh eka ererãngrãng, Chha memin atema henhen nâng huneka ereheh nâng roandông ekoh a. 22 Ngale Wama hennâng min achhih asen ngama renmah. Atema ate Chha ko achhih asen rênrãng chaan phangtang lâkohtah, 23 erohwah thinma chenroh Wa nâng soangraang eka, ererãngrãng chentôma Chha pemin soangraangmin. Henma komin Chha nâng lesoangraang medang ako, ate chienkatte Wa nângmin soangraangmah. 24 “Ngama nenâng toangtang thôkoh eka: Henhenma ngajab pa tatlahma nga chienkatte ko putedâlem eka erehehma roantang roanjêng roandông echoh a. Thinnâng achhih ngama lengamin, rohkomin ritwah ahîn thinnâng lâdangtah. 25 Ngama nenâng toangtang thôkoh eka: Sanpoat pa hûera - ere sanpoat pa lâhûtha - riichoante hehma Joban Chha kahra echohtat a, ngale henhenma erepa chohtat eka ereheh engakhin a. 26 Chenroh Wa ngewah roandongchoh ekia ererãngrãng, atema ate Chhapa roandông kohterãng hôaneka. 27 Ngale atema Chha nâng achhih asen rênrãng chaankoh eka, chenrãngma ngako atea Mihnyan Chha. 28 Are nginko nekpatrii en; chentô riichoante hehma ate kahra chohtat sanpoat pa ehûra 29 ngale mangrukwah engaksatwãng wakra: Henhenma moatlemsen motah a ereheh roandông choh lahma engakhin a, ngale henhenma moatlem chhih motah a ereheh ngakhin lahma pap wendô nâng ekhamrii kawak a.
Jisu Rãngma Hâkhi
30 “Ngadede chaanma ngama chenmin tamomek; Nganâng Joban ma chenroh thôkoh ehanga eroh jôba ren ekang, erohwah ngama toangtangko ren ekang, chenrãngma ngako Ngama chenrohhun ekanga eroh momek, rohkomin nga chienkatte pumma chenroh moat huneka eroh moekang. 31 “Ngama ngadede lolo merângthôrii angko, ngama chenni thôekãnga erepa linlin ngama lekepmin. 32 Rohkomin nga rângthôte tonga, ngale ngama ajet, atema ngajunma chenni thôeka erepa toangtang. 33 Nema Jon tânâng ne nginmatte chienkattet, ngale atema toangtang thôkoh wah. 34 Ngama mihnyan wah hâkhi hunmek; Ngama arejab ekangpa nekho chenpe en ngama jabekang. 35 Jon pa wentitdô ma rângphiak arãngrãng phiak lahma dângwah, phumma nea ate wenphiakko poatthelolo khuhah nâhah dângwah. 36 Rohkomin Jon ma hâkhi hôantah noma adong ngarãng hâkhi hôante tonga: Ngama chenni moekanga, erepa Nga Wama mothuk ehang, are pumma ngajunma hâkhi hôanlahma jabeka, ngale nga a nga Wama chienkatwah ngama khesok eka. 37 Ngale nga chienkatte Wama min ngajunma hâkhi hôaneka. Nema ate kahramin mathat chohtat eken, ngale ate thhenphãng min mathat chohkhe eken, 38 ngale nema ate ngin pemin ne hungnâng thienmet, chenrãngma ngako atema chienkat erako nema putedâlem met. 39 Nema Joban nyapraangpa weih eken, chenrãngma ngako nema erekowah roantang roanjêng roandông chohmin ngama putedâlem eken. Phumma are Joban nyapraang pumma ngajunma jabeka! 40 Rohkomin nea ngatânâng roandông chohrãng hok hunmet. 41 “Ngama mihnyan ma rô hunmek. 42 Rohkomin nea chenrãngrãng mihnyan a erepa ngama jet a, ngale ngama ajet ne hungnâng Joban nâng hun achetpa aho. 43 Nga a nga Wa chaan demnâng kaerâng, rohkomin nema nga kepmahha; ngale henkomin atedede hungsima mehûrako erepa nema kep eken. 44 Nema wathema wathe rângthômin hun eken, rohkomin nema wanthe lolo Joban pumma rângthô pa hunmet; eroh medang enko nema nganâng chenroh ejien putedâlem ha? 45 Nema aroh nekthonghun en, Ewa tâko ngama nenâng esekhamhi ngama. Nima putedâlem eki ngama ngaeken Mosa ma jôba nenâng esekham hèn. 46 Nema linlinjô Mosa nâng putedâlem medang enko, nganângmin putedâlem min dângwah, chenrãngma ngako atema ngajunma raangwah. 47 Rohkomin atema chenni raangtah a ereko nema leputedâlem dâng phumma, ngama jabekang kojã tanga chenko eputedâlem en a?”
Jisu ma Hahjat Bangâ Mihnyan nâng Phhekchhah thuk
1 Erediko Jisu Galili Josi rankanâng dânwângwah (ba, ereko Tiberias, ngamemin ngatwah). 2 Jisu ma khoanchette heh patritli mêsiet pa khelahma jahmõang mihnyan heh ate diko junkhoam wah. 3 Jisu hahhokho nâng wãng lahma ate dijunte heh demnâng tôngwângwah. 4 Ere sanpoatko Adankhoam lokuh thângnemnem dângwah. 5 Jisu ma tûmlit phoangsû tahpa mihnyan heh ate tânâng jahmõang hûlahma khewah, ephumma atema Filip nâng chhienwah, “Are mihnyan hehnâng lânle phhekchhah thukroh chenwah phhekchhah chohrii ea?” 6 (Atema arepa Filip hungtôan rãng ngatwah; linlinko atema chenremin a erepa jet dângwah.) 7 Filip ma dânthâng wah, “Anga ngama chhupruchha lânle chhahroh phhekchhah riakrãng memin chânii ngun noma ajah lêmmin.” 8 Dijunte ahan wathe Simon Piter pho Andru ma ngatwah, 9 “Delachha wathe nâng wongwah hôanwah bankên wanbangâ ngale ngah lanii keplahma tonga. Rohkomin erepa are mihnyan hehrãng lemah.” 10 Jisu ma thinnâng ngatwah, “Mihnyan heh tongthuk en,” (Eretheko hin jahmõang dângwah) Ephumma mihnyan heh phangtang tongwah; ereko mihnyan heh hahjat bangâ rãng dângwah. 11 Jisu ma bankên pa semlahma Joban nâng dangkoh a ngat rangsoam soamlahma erekowah tôngte mihnyan hehnâng phenkohwah. Ngale atema ngah lanii pemin eroh soamlahma kohwah, ngale thinma chentô tachhah eka eretô anga ngama chhahwah. 12 Thinkhu phangtang phoatphoat chhah diko, Jisu ma ate dijunte hehnâng ngatwah, “Bâachâ heh phangtang khôantoan en, chhupthemin nekphahwa en.” 13 Ephumma mihnyan hehma phhekchhah tah bankên wanbangâ kowah bâachâ heh phangtang khôantoan lahma echhi phânii chõngchõng dângwah. 14 Jisu ma are patritli moatlem moatpa khelahma erekowah mihnyan hehma, “Linlinjô arepa mõng hahtokkhoh ko katte pa dângmin ngama ngatwah!” 15 Jisu ma ajet dângwah, mihnyan heh kalahma thin lowang rãng metkep dângmin jôba ngama ekhetlohang ngama; erohwah atelolo hahhokho nâng ngakwâng wah.
Jisu Jokhohnâng Khoam
16 Sanhêmthah ko Jisu dijunte heh Galili josi ngenâng katwah, 17 Ngale khôankhoko chhang lahma josi rankawah Kaparnam hah ngenâng wângwah. Rangnyek komin thin tânâng Jisu lehû dângwah. 18 Erepoatko pông chaanmõang pông lahma josi pemin denmetwah. 19 Dijunte heh meerem beliirãng chhoandiko thinma Jisu jokhoh pumma thin khôankho tâko khoamka lahma khewah, ngale erepa khelahma thin chei rewah. 20 Jisu ma thinnâng, “Nekchei en, arepa Ngaba!” ngama ngatwah. 21 Erediko thinma khôankhoko khuhah nâhah chhangthukwah, ngale khôankhopa lemlienma thinwângrãng ngaeka theko chepkatwah.
Mihnyan hehma Jisu Lem
22 Eredijâko josi rankawah mihnyan hehma khôankhopa phangthe loloba etonga ngama thonghun wah. Atea dijunte heh demnâng lejohchhoan thangma atelolo phethientah ngama thinma jetwah. 23 Khôankho ahan Tiberias wah katte heh, Teso ma Joban nâng dangkoh a ngama ngat rangsoam soamlahma jahmõang mihnyan hehma phhekchhah chhahtah josi kahko chepkatwah. 24 Chenthu mihnyan heh Jisu le ate dijunte heh eretheko lekhe dâng phumma, khôankhoko chhangwak lahma ate lêmsok Kaparnam hah ngenâng katwah.
Jisu pa Roandông Phhekchhah
25 Chenthu mihnyan hehma Jisu josi rankanâng chohkhe phumma thinma atenâng ngatwah, “Hethôte, nang aretheko chenthu katoh a?” 26 Jisu ma dânthâng wah, “Ngama nenâng toangtang thôkoh eka: Nema bankên phoatphoat chohphhek junko nga lemsû eha, ngama patritli moatlem motekpa jetloat junkolêm dangmahha. 27 Achhihjâ thin phhekchhah rãngma nekmo en; erenoma roantang roanjêng roandông chohthin phhekchhah rãngma mo en. Arerãngrãng phhekchhah pa Mihnyan Chhama nenâng ekohhèn, chenrãngma ngako Joban Wama atenâng erepa moatrãng chaankoh eka.” 28 Ephumma thinma atenâng thôngphâ wah, “Joban ma huneka moatlem moatrãng nima chenni moatmin a?” 29 Jisu ma thinnâng dânthâng wah, “Joban ma hen chienkattha ereko chen putedâlem a ngama hun ehèn.” 30 Thinma dânthâng wah, “Nima khelihma nangnâng jien putedâlem rãng nangma patritli moatlem chennimo oa? Nangma chennimo oa? 31 Nite niwa hehma sehahkho nâng mana chhahwah, Joban nyapraangma aroh ngaeka, ‘Atema thinnâng rangkhethung wah phhekchhah kohlahma chhahthuk eka.’” 32 Jisu ma ngatwah, “Ngama toangtang thôkoh eka,” “Mosa ma chenni kohthen a erepa rangkhethung wah phhekchhah dangmah; Ewa meba rangkhethung wah phhekchhah linlinpa nenâng koh ehèn. 33 Chenrãngma ngako Joban ma koheka phhekchhah pa rangkhethung wah kalahma hahtokkhoh nâng roandông chohkoh tepa.” 34 Thinma chhienwah, “Hethôte, ninâng are phhekchhah pa roantang roanjêngma kohhi.” 35 “Nga a roandông phhekchhah pa,” ngama Jisu ma thinnâng thôkoh wah. “Henhen ngatânâng hûera ereheh rêm leriimin; ngale henhenma nganâng putedâlem ehanga ereheh jolânmin leriimin. 36 Ngama nenâng thôkoh eka, nema nga khetha rohkomin nema nganâng putedâlem mahtha. 37 Ewa ma nganâng henhenkoh ehanga ereheh ngatânâng ehûra. Henhen ngatânâng hûera ereheh ngama chenthumin lejunlomin, 38 Chen-rãngma ngako nga rangkhethung wah nga hungsiko moatrãngkat dangmahrâng, ngachien katte hungsiko moatrãng kaerãng. 39 Ngale ngachien katte pumma hun ekapa atema nganâng henhen kohthanga ereheh wah wathemin lemahphe rãng huneka, athôanjâ rangwo ko ngama ereheh phangtang hînsietmin. 40 Chen-rãngma ngako Ewa ma huneka pa henhenma Chhapa khelahma atenâng putedâlem eka erehehma roantang roanjêng roandông chohrãng huneka. Ngale athôanjâ rangwo ko ngama thin engak hinsiet ang.” 41 Atema “Nga a rangkhethung wah katte phhekchhah pa” ngama jabphumma mihnyan heh ate lelatnâng nyahrãng chhihjabwah. 42 Ephumma thinma atenâng ngatwah, “Arepa Josep chha jisu ledangne? Nãngma ate nyong awa niimin jet e. Phumma atema nga rangkhethung wah katte phhekchhah ngama chenroh jienjab eka?” 43 Jisu ma dânthâng wah, “Nekhu dede tungko phoangchhih jabpa jekre en. 44 Ngachien katte Nga Wama lesiethû erako mihnyan heh henmin ngatânâng leta hûmin; ngale ereheh ngama athôanjâ rangwo ko engakhinsiet ang. 45 Mõng hehma raangwah, ‘Joban ma anga nganâng hethômin.’ Ngale henhenma Wa ngin keplahma atewah he eka ereheh ngatânâng ehûra. 46 Rohkomin arepa henma komin Wa lâthat chohkhetah ngama ngat dangmah; henpa Joban tâwah kaera erepumma loloba Wa pa lâchohkhetah. 47 Ngama toangtang thôkoh eka: henhenma putedâlem eka ereheh nâng roantang roanjêng lethôan roandông tonga. 48 Nga a roandông phhekchhah. 49 Nete newa hehma sehahkho nâng mana chhahwah, rohkomin thinmin riitah. 50 Phuma rangkhethung wah kaera phhekchhah kowah henhenma chhah eka ereheh leriimin. 51 Nga rangkhethung wah katte ahin roandông phhekchhah. Henma komin are phhekchhah kowah chhah eka erepa roantang roangjêng rãng hînmin. Ngama atenâng kohmin phhekchhah pa nga phoangpa, ngama erekoh ekangpa hahtokkhoh wah mihnyan heh ahînma tongrãngkoh ekang.” 52 Are junko thintungko nyahrãng rinkhah lahma chhiakmîn wah. Thinma ngatwah, “Are mihnyan pumma ate phoangpa nãngnâng chenroh jienphhekthuk hia?” 53 Jisu ma thinnâng ngatwah, “Ngama tongtang thôkoh eka: Nema Mihnyan Chha phoang kowah lephhek kenko, ngale ate hei lejok kenko, nededema roandông leta chohmin. 54 Henhenma ngaphoang kowah phhek eka, ngale nga hei jok eka erehehma roantang roanjêng lethôan roandông echoh a, ngale athôanjâ rangwo ko ngama engakhinsiet ang. 55 Chenrãngma ngako nga phoangpa phhekchhah linlin; ngale nga hei pa jokthin linlin. 56 Henhenma ngaphoang kowah phhek eka ngale nga hei jok eka ereheh nga demnâng dângmin, ngale ngamin thin demnâng edangang. 57 Nga a ahînte Wama chienkat ehang, ngale ere junwah ngamin ahîn dangekang. Ererãngrãng henhenma ngaphoang kowah phhek eka erehehmin ngajunma ahîn edanga. 58 Are phhekchhah pa rangkhethung wah kaera; arepa nete newa hehma chhah lahma khediko rit rewaktah rãngrãng dangmah. Henhenma are phhekchhah pa chhah eka ereheh roantang roangjêng rãng hînmin.” 59 Jisu ma arepa Kaparnam wah Sanagog ko hethô nungma ngatwah.
Roantang Roanjêng Roandông Chohthin Jabkhab
60 Ajahthem ate dijunte hehma are nginpa tatlahma ngatwah, “Are hethô ehipa nyahrãng alat. Arepa henma tâkepmin a?” 61 Jisu nâng henmemin lethôkoh thangmejô thinma phoangjab ekapa jetwah, ephumma Jisu ma thinnâng ngatwah, “Are ngin pumma ne putedâlem thinphe hunthuk ehèn a? 62 Thatthong hun tan, Mihnyan Chhapa khemako ate chenko tongtah a eretheko ngakwãng lahma khepa? 63 Roandông pa Joban Juma kohehi; hei angem phoangpa chennijô dangmah. Nga nedemnâng jabmîn eka jabkhab pumma Joban ngewah roandông chohthin Ju kephûkoh ehèn. 64 Rohkomin nekhuwah khaka pumma putedâlem met.” (Henhenma atenâng leputedâlem min a, ngale henma ate chênsângmin a erepa Jisu ma jetwah.) 65 Jisu ma ngatwah, “Are junko ngama nenâng thôkoh wah, Wama lehûthuk erako mihnyan henmin ngatânâng leta hûmin.” 66 Are junkowah Jisu dijunte heh ajahthem ate demnâng lejoh chhoantu ngakchhoan wah. 67 Ephumma Jisu dijunte echhi waniiko thôngphâ wah, “Nemin ngakchhoan hun eken a?” 68 Simon Piter ma atenâng dânthâng wah, “Teso, nia hen demnâng echhoan ea? Nangnâng roantang roanjêng lethôan roandông kohthin jabkhab pa tongho. 69 Ngale ade phumma nima lâpute dâlemtih, ngale nanga Joban tâwah katte Asâthôan pa ngama lâjettih.” 70 Jisu ma dânthâng wah, “Ngama nekhu echhi wanii ren eka, rohkomin nekhuwah wathe nâng juchhih etonghèn!” 71 Atema Simon Iskarot chha Juda rãngma jabwah. Chenrãngma ngako, Juda pa echhi wanii dijunte chhang kowah wathejô medang akomin, atema Jisu chênsângmin.
Jisu ngale Ate Naa heh
1 Arediko Jisu Galilijaa nâng phoangkhôam wah; atema Judia ngenâng wângpa lehun dângwah, chenrãngma ngako Jews heh thôte jabte hehma ate ritphe rãng hunwah. 2 Tembu hum hôan lahma wângchhah lokuh sanpoat pa thâng lahma dângwah, 3 Ephumma Jisu naa hehma atenâng ngatwah, “Nanga arethe kowah Judia nâng wãngo, erohkoba nangma chenni moeko ereheh nang dijunte hehma ekhea. 4 Chentôma chenjethang ngama methonghun oko mihnyan hehma thinma chenni moeka ereheh rânghuhriem mah. Nangma are chentô moeko hehmin rangkhen phangtangma chenjet ho!” 5 (Ate naa hehmemin atenâng putedâlem ho.) 6 Jisu ma thinnâng ngatwah, “Ngarãng sanpoat mathang eka. Rohkomin nekhu rãngma chentôpa sanpoatpun tuta. 7 Hah-tokkhoh mihnyan ma nenâng jienchhihchoh mahhèn, rohkomin nganâng chhihchoh ehang, chenrãngma ngako ngama thin moatlem pa achhih ngaekang. 8 Nea lokuh thinnâng wãngen. Nga a are lokuhko wãngmahrâng, chenrãngma ngako ngarãngma sanpoat pa mathâng eka.” 9 Atema aroh ngalahma Galili nâng jektôngwah.
Jisu Tembu Hum Wângchhah Lokuh thinnâng
10 Ate naa heh lokuh thinnâng wângdiko Jisu min junwângwah; rohkomin atea sansanma leloatkhoam thangma, huhchha ma hokwah. 11 Jews heh thôte jabte hehma lokuh thinnâng ate lêmsokwah. Thinma, “Ate chenkoa?” ngama chhienwah. 12 Mihnyan heh chhangko ate junma nyahrãng phoanghuh jabmînwah. Khaka hehma, “Atea mihnyansen” ngatwah, rohkomin khaka hehma, “Dangmah, Atea aba apha” ngawah. 13 Rohkomin ate junma henmejô laanglaang chinthôho, chenrãngma ngako thin a Jews heh thôte jabte heh ranchei wah. 14 Lokuh khaka râchoanko Jisu ma Rangsoamhum nâng wãng lahma hethô wah. 15 Jews heh thôte jabte heh nyahrãng patrii lahma ngatwah, “Are mihnyan pumma nyapweih nyapraangmin aho thangma aretô chenroh jienjet eka?” 16 Jisu ma dânthâng wah, “Ngama chenni hethô ekanga erepa ngadede wah hethô dangmek, erepa ngachien katte Joban ngewah hethô ekang. 17 Henhenma Joban ma chenni huneka erepa moat huneka erehehma, ngama Joban junko hethô ekang ale ngadede chaanmajab ekanga erepa ejet a. 18 Henhenma thindede chaanko jabeka erepumma atedede mîndôngpa ehun a. Rohkomin henma ate chienkatte mîndôngrãng huneka erepa toangtang, ngale atenâng chenni athejô aho. 19 Mosa ma nenâng Niemarang pa kohthen, rohkomin erepa henmemin kepmet. Nema nga chenrãngma ritphehun eha?” 20 Mihnyan hehma dânthâng wah, “Nangnâng juchhih tongho erepumma nang ritphehun eho?” 21 Jisu ma dânthâng wah, “Ngama patritli moatlem wanthe moatko, nekhu phangtang patritre eken. 22 Mosa ma nenâng delachha heh khoankhen niemhôanrãng chienwah (Erepa Mosa ma ledang nete newa hehma hôngmoatwah), ngale erohwah nema delachha heh Pientông jâko khoankhen niemhôan eken. 23 Delachha pa nema Joban Pientông jâko khoankhen niem hôanletma nema Mosa Niemarang pa lechhihsiet medang enko, Ngama khoanchette mihnyan pa Pientông jâko senthemthem mêsietrãngma nga demnâng chenrãngma rinkhah eha? 24 Khoankhoh nâng sûletma achhih asen ngama rênpa jekre en, toangtangma ren en.”
Atea Misaia ne?
25 Jeroselem wah mihnyan khuthema ngatwah, “Jews heh thôte jabte hehma ritphe rãng lemeka mihnyan pa arepa ledangne? 26 Sûtan! atema nok atang heh chhangko thôkoh eka, rohkomin thinma ate lelatnâng chenjô jabmah! Thinmemin atea linlinjô Misaia ngama jetthem eka? 27 Rohkomin chenthu Misaia pa meka theko, henmemin ate chenwah hûera erepa lejetmin. Phumma ate chenwah hûera erepa nãngkhu chentôma jet e.” 28 Jisu ma Rangsoamhum nâng hethô poatko, atema chaanmõang rakjabwah, “Nema nga linlinjô jet ha, ngale nga chenwah hûerânga erepa jet ha? Nga a ngadede chaanko hok dangmahrâng. Rohkomin, ngachien kattepa toangtang. Phumma erepa nema jetmet, 29 Ngale ngama ate jet ang, chenrãngma ngako nga ate tâwah kaerâng ngale atema chienkat ehang.” 30 Ephumma thinma ate loathunwah, rohkomin henmemin atenâng dek chinjâho, chenrãngma ngako ate sanpoat pa mahû dângwah. 31 Rohkomin mihnyan heh chhangwah melângma atenâng putedâlem lahma ngatwah, “Chenthu Misaia meka theko, are mihnyan pumma moeka nomemin ajahthem patritli heh emoa?”
Jisu Loatkhhek rãng Sipâhi heh Chienkat
32 Mihnyan hehma Jisu junma huhthômîn pa Farasi hehma leptatwah, ephumma thinma ngale soam aroakte hehma Jisu loatkhhek rãng sipâhi heh chienkatwah. 33 Jisu ma ngatwah, “Nga nedemnâng poatthe rãngba etongang, ngale erediko ngachienkatte tânâng ewãng ang. 34 Nekhuma nga elemsûha, rohkomin nema lechoh khemin, chenrãngma ngako nga chenre theko chhoan ekanga eretheko nekhu leta wãngmin.” 35 Jews heh thôte jabte heh thindede tungko jabmînwah, “Nãngma lechohlem thinnâng ate chenko chhoanrãng ngaeka? Nãnglemru Griik heh songeka hahnâng kalahma Griik hehnâng hethôkat rãng lengaeka? 36 Atema ngaeka, nãngma ate elemsûe, rohkomin nãngma ate lechoh khemin, ngale ate chenko chhoan eka eretheko nãng leta wãngmin. Atema chenni junkojab eka?”
Roandông Kohthin Jokhô
37 Lokuh râjâ rangwo ngale erejâpa nyahrãng alemthôanjâ rangwo ko Jisu toanchep lahma chaanmõang rakjabwah, “Henhen jolânrii eken a ereheh ngatânâng hûren, ngale 38 Henhenma nganâng putedâlem ehanga erehehma jok en. Joban nyapraangma ngaeka rãngrãng, ‘Ate phoangwah roandông kohthin jokhô ehongjen kara.’” 39 Arepa Jisu ma Ju junko jabwah, henhen ma atenâng putedâlem eka erehehma ere Ju pa chohmin. Ere sanpoatko Ju pa makoh dângwah, chenrãngma ngako, Jisu Joban chaan keplahma ritwah ma ngakhin dângwah.
Mihnyan heh Phoangphanjâ
40 Mihnyan heh chhangwah khakama are jabkhab pa leptat lahma ngatwah, “Are mihnyan pa linlinjô mõng!” 41 Khaka hehma, “Atea Misaia!” ngatwah Rohkomin khaka hehma, “Misaia pa Galili wah lehûmin! ngatwah, 42 Joban nyapraangma ngaeka, Misaia pa Devit Lowang chhuchha wah dângmin ngale atea Devit songtah hah Bathlehem nâng chhatmin.” 43 Erohwah Jisu junko mihnyan heh phoangphanjâ wah. 44 Khaka hehma loathunwah, rohkomin atenâng henmemin dek chinjâho.
Jews thôte jabte hehma putedalam mah
45 Chenthu abemte sipâhi heh ngakwâng phumma soam aroakte adong le Farasi hehma chhienwah, “Nema ate chenrãng lelowên dangeren a?” 46 Sipâhi hehma dânthâng wah, “Are mihnyan pumma jabeka rãngrãng hen mihnyan memin mathat jabeka!” 47 Farasi hehma thinnâng ngatwah, “Atema nemin baphhek thenne?” 48 “Jews thôte jabtema komin ba Farasi ma komin wathemejô atenâng putedâlem lahma nema thatjettet a? 49 Mihnyan hehma Mosa Niemarang pa jetmah, erohwah thin a Joban ma echhihsiet a!” 50 Phumma ereko amanâng Jisu demnâng chohmîn hokte Farasi wathe ate mînpa Nikodima dângwah. Atema ahan hehnâng ngatwah, 51 “Nãng Niem junko mihnyan kowah machohtat ma, ngale atema chenni chhihmoeka erepa machohkhe ma hennâng min athe jien ngamih.” 52 Thinma dânthâng wah, “Nangmin Galili wahne? Joban nyapraang meweih oko nangma ejet o chenthumin Galili wah mõng lehongmin.”
Dihiaknyu Dela Demnâng Kaamchhih Moatte Chohloat
1 Erediko anga nga humnâng chhoanwah, rohkomin Jisu Oliv hahho nâng wângwah. 2 Eredijâ rangkhah rangkhoma Jisu Rangsoamhum nâng ngakkatwah. Phumma mihnyan heh phangtang ate tumlitko khôantông wah ngale atemin tonglahma thinnâng hethô wah. 3 Niemarang hethôte ngale Farasi hehma dihiaknyu dela demnâng kaamchhih moatte lohû lahma, thin phangtang mathahko chepthuk wah. 4 Thinma Jisu nâng ngatwah, “Hethôte, are dihiaknyu pa dela demnâng kaamchhih molahma chohloeki. 5 Nãng Niem junko arerãngrãng dihiaknyu pa longma ritpetmin ngama Mosa ma chienwah. Phumma nangma chenroh ngaekoa?” 6 Thinma arepa Jisu bukrii thuklahma atenâng athe jienloatrãng ngatwah. Rohkomin Jisu ma kunka lahma ate deksuma hahko raanglahma dângwah. 7 Mihnyan heh eretheko cheplahma atenâng nginthongphâ poatko, ate toanchep lahma thinnâng ngatwah, “Nekhuwah henma pap mathat motea erepumma atenâng bengpet en.” 8 Eredi-komin atema thengak kunka lahma ate deksuma hahko raanglahma tôngwah. 9Chenthu mihnyan hehma are nginpa tatphumma phannang thôan pumma thunlahma wathe wathema phangtang thôanchhoan wah. Eretheko Jisu lolo dihiaknyu demko lekchep lahma phethien wah. 10 Jisu ma toanchep lahma dihiaknyuko ngatwah, “Mihnyan heh chenko dangeka? nangnâng achhih ngatrãng wathemin ahotune?” 11 Dihiaknyu pumma, “Hethôte, henjô ahotu,” ngama dânthâng wah. Phumma Jisu ma ngatwah, “Sen a, eroh medang ako, ngamemin nangnâng achhih ngamih. Choan o, rohkomin papkaam nekthe ngakmotu.”
Jisu Hahtokkhoh Rãngma Wenphiak
12 Jisu ma Farasi hehnâng wîenthe ngatwah. “Nga a hahtokkhoh rãngma wenphiak,” “Henhenma ngadiko junkhoam ehanga erehehma roandông wenphiak pa echoh a ngale thin chenthumin rangnyek nâng lekhoammin.” 13 Farasi ma atenâng ngatwah, “Nangma nangdede rângthôrit hun eko; erohwah nangma chenni thôeko ereheh sekhota.” 14 Jisu ma dânthâng wah, “Eroh dangmah, phumma nga dedejô merângthôrii angkomin, ngama chenni thôekanga ereheh tongtang, chenrãngma ngako, nga chenwah hûerânga ngale nga chenko chhoanmin a ereheh ngama ajet. Phumma nema nga chennângwah hûerânga ba chennâng chhoan ekanga erepa jetmahha. 15 Nema mihnyan nyuchha hung arin junko ren eken; phumma Ngama hennâng min renmek. 16 Rohkomin Ngama meren angko, ngama toangtangko eren ang, chenrãngma ngako arepa nga loloma rên dangmek; Nga chienkatte nga Wa min ngademko tonghang. 17 Nãng Niem nâng aroh raanglahma tonga, chenthu hâkhi wanii mehongtahko, thinma chenni thôeka erepa toangtang. 18 Ngama ngadede rângthôrii ekang, ngale nga chienkatte nga Wa memin nga jôba rângthô ehang.” 19 Phumma thinma, “Nang Wa pa chenkoa?” ngama thôngphâ wah. Jisu ma dânthâng wah, “Nema nga jetmahha, ngale nga Wa min jetmet,” “Nema nga jetngako, nga Wa min chenjettet.” 20 Jisu ma are chentôpa Rangsoamhum wah ngun bâkoat thieneka theko thinnâng hethô nungma ngatwah. Rohkomin henmemin ate lokhhek ho, chenrãngma ngako ate sanpoat pa mahû dângwah.
Nga Chenko Dang ekanga Eko Ne Tachhoanmet
21 Eredikomin Jisu ma thinnâng ngatwah, “Nga chhoan ere ang; phumma nema nga elemsûha, rohkomin nea nepap junko erii en. Nga chennâng dang ekanga eretheko ne tachhoan met.” 22 Ephumma Jews heh thôte jabte hehma ngatwah, “Ate chenko dangeka eretheko nãng leta chhoanmin ngaeka. Arepa atedede ritpherit rãng ngaeka” 23 Jisu ma dânthâng wah, “Nea are rangkhenko tôngte, rohkomin nga a rangkho wah kaerâng. Nea are hahtokkhoh kowah, rohkomin nga a are hahtokkhoh wah dangmek. 24 Erohwah ngama nea nepap demko erii en ngama thôkoh eka. Ngale ‘NGA, HEN NGA A’ ngama ngarii ekako leputedâlem kenko nepap khenkojô eriien.” 25 Thinma atenâng, “Nanga hen a?” ngama chhienwah. Jisu ma dânthâng wah, “Ngama khebengma chenni thôkotah a. 26 Ngama nenâng ajahthem thôkohthin tonga, ngale ajahthem achhih ngatthinmin tonga. Ngachien katte pa toangtang, ngale ngama atewah chenni chohtat ekanga erepa hahtokkhoh ko thôkoh ekang.” 27 Jisu ma thinnâng Joban Wa junma thôkoh eka erepa thinma jetmah. 28 Ephumma atema thinnâng ngatwah, “Chenthu nema Mihnyan Chhapa mechoangpe tetko ‘NGA, HEN NGA A’ ngama ngatrit tepa ejet en; erediko nga hungsima chennimin momek ngama ejet en, rohkomin Wama chenni jabrãng thôkoh ehanga erepa jôba jabekang. 29 Ngale ngachienkatte pa ngademko tonga; atema ngalolo thinphe mahhang, chenrãngma ngako ngama roantangma atema chenni huneka erepa lolo moekang.” 30 Jisu ma are jab ekapa chohtatte heh ajahthem ma atenâng putedâlem wah.
Toangtang Pumma elaang phehèn
31 Ephumma atenâng putedâlemte hehnâng Jisu ma ngatwah, “Ngama hethô ekapa nema mekep enko, nea linlin ngadijunte; 32 Nema toangtang pa ejet en, ngale toangtang pumma ne elaang phehèn.” 33 Thinma ngatwah, “Nia Abraham chhuchha” “ngale nia henhu ahaamin mathat dangeki. ‘Ne elaang phehèn’ ngama nangma chenni ngatthiak jab eko?” 34 Jisu ma thinnâng ngatwah, “Ngama nenâng toangtang thôkoh eka: Henhenma pap moeka ereheh paphaa. 35 Haaheh hen humnângmin roantang roangjêng rãng dangmah, rohkomin humkâ kowah delachha peba roantang roangjêng rãng tôngte. 36 Chha pumma ne melaang phehèn koba, nea linlinrãng laangphe ehèn. 37 Ngama ajet nea Abraham chhuchha. Rohkomin nema nga ritphe rãng huneha, chenrãngma ngako ngama hethôeka pa nemakep hunmet. 38 Nga Wama chenni khesok thanga erepa ngama thôekãng, rohkomin nema newama chenni thôkohthen a erepa moeken.” 39 Thinma atenâng dânthâng wah, “Niwa pa Abraham.” Jisu ma dânthâng wah, “Nea linlinjô Abraham chhuchha dângnomeko, nememin atema motah rãngrãng chenmotet. 40 Ngama Joban wah chohtattek toangtang nginpa nenâng thôkoh eka, rohkomin nema nga ritphe rãng huneha. Phumma Abraham ma arerãngrãng moho! 41 Newa hehma chenni motah a erepa nememin moeken.” Thinma ngatwah, “Niwa wathe loloba etonga, erepa Joban, ngale nia ate chha linlin.” 42 Jisu ma thinnâng ngatwah, “Joban pa linlin newa dângnomeko, nema nganâng hun reminwah, chenrãngma ngako nga Joban tâwah kaerâng, ngale athângheh akotong ang. Nga a ngadede chaankokat dangmahrâng, atema chienkat lahmeba kaerâng. 43 Ngama jab ekangpa nema chenrãngma lejet reken a? Arepa nema nga nginpa lenyoaktat junko dangeka. 44 Nea newa joakchha, ngale newa ma chenni huneka ere junko kep eken. Rangbâng hahbâng thuma atea mihritphete, ngale atea toangtang lemkhôko chenthumin mathat khoam eka, chenrãngma ngako atenâng toangtang aho. Atema mothô thôekapa, mothô thôtejat dâng phumma thôeka, chenrãngma ngako atea mothô ngale mothô khoanglep heh wa. 45 Rohkomin ngama toangtang thôkoh eka, erohwah nema nganâng putedâlem mahha. 46 Nekhuwah henma ngama pap molek-ma thatkhetha? Ngama toangtang methô angko, nema nganâng chenrãngma lepute dangeha? 47 Henhen Joban tâwah kaera erehehma Joban nginpa ejetat a. Rohkomin nea Joban tâwah dangmet, erohwah nema Joban nginko lejetat dangeken.”
Jisu ngale Abraham
48 Thinma Jisu nâng ngatwah, “Nanga Samaritan jat ngale nangnâng juchhih lup eho. Nima arepa punnga ekile?” 49 Jisu ma dânthâng wah, “Nganâng juchhih lupmahhang, Ngama nga Wa soangraang ekang, rohkomin nema nga soangraang mahha. 50 Ngama ngadede mîndôngpa hunmek. Rohkomin nga mîndôngthuk hunte wathe tonga, ngale atema ngarãngma ejab a. 51 Ngama nenâng toangtang thôkoh eka: Henhenma nga nginkep eka ereheh chenthumin leriimin.” 52 Thinma Jisu nâng ngatwah, “Athângheh nima linlin lâjettih nangnâng juchhih lâluptho! Abraham min riitah, ngale mõng hehmin riitah, rohkomin athângheh nangma nganâng henhenma putedâlem ehanga ereheh leriimin ngaeko. 53 Niwa Abraham riitah; Nanga Abraham, nomemin adong thonghunrii ekoa? Ngale mõng hehmin erohjô riitah. Nanga hen ngama thonghunrii ekoa?” 54 Jisu ma dânthâng wah, “Ngama ngadede merângthôrii angko, erepa sekhota dângmin. Nga rângthôte pa nga Wa - ere kojôba nememin ni Joban ngama ngaeken. 55 Nema ate mãthatjet eken, rohkomin ngama ate jet ang. Ngama ate jetmek menga angko, ngamin nekhu rãngrãng mothô jôba. Rohkomin Ngama ate jet ang, ngale ngama ate ngin kepekãng. 56 Newa Abraham ma ngakat sanpoat pa khelek mele ngama thonghun lahma khuhah nâhah dângwah; Erepa atema khelahma khuhahwah.” 57 Thinma atenâng ngatwah, “Nanga rangpâ roak bangâ min madang eko - phumma nangma Abraham khetoh o?” 58 Jisu ma dânthâng wah, “Ngama toangtang thôkoh eka, Abraham mako ‘NGA’ dângwah.” 59 Ephumma thinma atenâng longma petrãng long tôanwah, rohkomin Jisu huhtong lahma Rangsoamhum wah loatchhoan wah.
Jisu ma Achhat Mejû Mitdoak Dela wathe Sênsiet
1 Jisu dankhôam poatko, atema chhat mejû mitdoak chhatwah dela wathe lepkhewah. 2 Ate dijunte hehma atenâng chhienwah, “Hethôte, Hen pap junma atea mitdoak chhaeka? Atedede pap junko ale ate nyong awa heh pap junko mitdoak chhaeka?” 3 Jisu ma dânthâng wah, “Ate mitdoak pa ate pap junmemin dangmah ngale ate nyong awa heh pap junmemin dangmah. Ate mitdoak ekapa atenâng Joban chaan ma molahma jienkherãng doak eka. 4 Rangwo poatko, nãngma ngachienkatte moatlempa moatmin; rangnyek pa lâhûera, erepoatko henmemin lejien motumin. 5 Nga a hahtokkhoh ko dângpoatko, Hahtokkhoh rãngma wenphiak.” 6 Atema arepa ngatdiko, Jisu ma hahko thoakkah thoak lahma hahwah ngeknyetwah; ngale atema ere hahngek pa mihwa mitko hutkohwah 7 ngale atenâng ngatwah, “Nang thhenpa Silom binko mutphekao.” (Are ngaeka pa “achienchhoan” ngama ngaeka.) Ephumma mihwa pa kalahma ate thhenpa mutphê katwah, eko mitma jienkhe lahma ngakwâng wah. 8 Ate tok akhung wah hehma, ngale khemako chutphhekchhah khetah mihnyan hehma ngatwah, “Are mihnyan pa tonglahma chitha phhekchhah tahpa ledangne?” 9 Khaka ma, “Danga” ngatwah, ngale khaka ma, “Ate dangmah; rohkomin ate rãngrãngjô” ngama ngatwah. Ephumma mihwa pumma ate dedema hôngngatwah, “Nga ere mihnyan pa dangang” 10 Thinma chhienwah, “Nangma athângheh chenroh danglohma jienkhe ekoa?” 11 Atema dânthâng wah, “Mihnyan wathe ate mînpa Jisu, atema hahngek ngeknyet lahma ngamitko hutkoh ehang, ngale atema nang thhenpa Silom bin ko mutphekao ngama chienwah. Ephumma nga kalekma mutphêkat wah, ngale ngama mutphê rienrienko jienkhe ekang.” 12 “Ate chenkoa?” ngama thinma thôngphâ wah. “Ngama jetmek,” ngama dânthâng wah.
Farasi hehma Khoanchet Mêsiet junma Lêmte
13 Erediko mitdoak dangtah mihwa pa thinma Farasi heh tânâng siethokwah. 14 Jisu ma hahngek ngeknyet lahma ate mitdoak sensiettah jâpa Joban pientôngjâ dângwah. 15 Erediko Farasi hehma mihwako ate mitpa chenroh jienhong sentah a erepa thengak thôngphâ wah. Atema thinnâng thôkoh wah, “Atema nga mitko hahngek hutkohwah; erediko ngama thhen mutphe lekma jienkhe wah.” 16 Farasi khuthema ngatwah, “Are moatte mihnyan pa Joban tâwah ledangmin, chenrãngma ngako atema Pientông niem pa kepmah.” Ahan hehma aroh ngatwah, “Arerãngrãng patritli moatlem heh papi mihnyan ma chenroh ejienmoa?” Ngale thintung komin mâmâ khukhu dangjâwah. 17 Ephumma Farasi hehma ere mihwako wîenngak chhienwah, “Nangma nang mitpa atema sensiet ehang ngaeko - sen a, eroh medang ako nangma atea hen ngama ngaekoa?” “Atea mõng,” ngama mihwa pumma dânthâng wah. 18 Rohkomin Jews heh thôte jabte hehma ate nyong awa heh roomako atea mitdoak dângwah jienkhe eka ngama lepute dângwah 19 ngale thinma ate nyong awa hehnâng chhienwah, “Arepa nechha ne? ngale nema atea mitdoak chhat wahne; eroh medang ako, atema athângheh chenroh jienkhe eka?” 20 Ate nyong awa hehma dânthâng wah, “Nima ajet atea nichha, ngale nima ajet atea mitdoak chhatwah. 21 Rohkomin athângheh atema chenroh jienkhe eka erepa nimemin jetmih, ngale ate mitdoakpa henma sensiettah a erepemin nima jetmih. Atenâng chhien en; atea phannang lâdangtah, ate rãngma atedede mejô ejien dânthânghen” 22 Ate nyong awa hehma arepa Jews heh thôte jabte heh rancheima ngatwah, chenrãngma ngako Jews heh thôte jabte hehma henhenma Jisu nâng atea Misaia ngama putedâlem eka ereheh Sanagog wah junloatmin ngama nginpatwah. 23 Erohwah ate nyong awa hehma, “Atea phannang lâdangtah; atenâng thôngphâ en!” ngama ngatwah. 24 Eredikomin mitdoak dângwah sentah pa rekthe thengak roolahma atenâng ngatwah, “Joban mathahko toangtang thôang ngama toamsem o! Nima ajet are nang sênsiette mihnyan pa papi mihnyan.” 25 Mihwa pumma dânthâng wah, “Ngama atea papi dang ale dangmah a erepa jetmek” “Ngama wanthe loloba jet ang: Nga mitdoak dângwah, ade phumma ngama lâjienkhetek.” 26 Thinma thôngphâ wah, “Atema nangnâng chenni rethoa? nang mitdoak pa chenroh sensietthoa?” 27 Atema dânthâng wah, “Ngama thôkotah, rohkomin nema putemet. Chenrãngma thêngaktat hun eken a? Nemin ate dijunte dânghun eken a?” 28 Thinma atenâng dûmmek lahma ngatwah, “Nanga ere mihnyan dijunte; rohkomin nia Mosa dijunte. 29 Nima ajet Mosa demnâng Joban jabmîn rewah; phumma are mihnyan pa chenwah hûera erepa nima ajetjô lemjetmih!” 30 Mihwa pumma dânthâng wah, “Arepa chentô patritli ngin a! Nema ate chenwah hûera erepa jetmet, rohkomin atema nga mitdoak pa sensiet ehang! 31 Nãngma ajet Joban ma papi mihnyan hehnâng jetatmah; Ate rancheite le atema huneka moatlem moatte mihnyan hehnâng ba atema jetat eka. 32 Rangbâng hahbâng thuwah achhatma mitdoak chhatte nâng henmemin mitsensiet lahma mathat chohtat eki. 33 Erohwah are mihnyan pemin Joban tâwahkat ledang nâng, atema arerãngrãng pa leta momin” 34 Thinma dânthâng wah, “Nanga achhat mejû papi chhaeho - phumma nangma ninâng hethô hun ehia?” Ephumma thinma atea Sanagog wah junloat rewah.
Ju nâng Mitdoak
35 Ere nginpa Jisu ma chohtat diko, atema mihwa pa chohmîn lahma atenâng chhienwah, “Nangma Mihnyan Chha nâng putedâlem ekole?” 36 Mihwa pumma dânthâng wah, “Hethôte, Atea hen a erepa nganâng thôkoh hang, ephumma ngama atenâng eputedâlem ang!” 37 Jisu ma atenâng ngatwah, “Nangma ate lâkhetoh, ngale erepa athângheh nang demnâng thômîn ehopa.” 38 Mihwa pumma ngatwah, “Teso!, ngama putedâlem ekang,” eroh ngalahma Jisu mathahko khupjup wah. 39 Jisu ma ngatwah, “Nga are hahtokkhoh ko achhih asen rên rãngma kaerâng, erohwah mitdoak hehma ejienkhea, ngale henhenma jienkhe eka ereheh mitdoakrãng edanga.” 40 Ate demwah Farasi khuthe dangtah hehma erepa tatlahma atenâng ngatwah, “Nangma ninângmin mitdoak ngaehia?” 41 Jisu ma dânthâng wah, “Nea mitdoak dângnomeko nenâng pap aho dângmin wah; rohkomin nema nia mitdoak dangmih ngama ngatdi, nenâng pap tonghèn.”
Saaksokte Thakthô
1 Jisu ma ngatwah, “Ngama toangtang thôkoh eka: Hen komin Saak heh tânâng kâsek pumma ledang lemhânma mekohûako, erepa ahuhte. 2 Henhen kâsek pumma luphueka ere peba Saaksokte. 3 Kâsek bemte pumma aterãng kâsekpa elaangkoh a; ngale atema saak hehnâng mînma roko saak hehma ate kahra pa etat a, ngale atema esen chhoan a. 4 Chenthu atema mesen chhoan ako, saak heh mamako ate ekhoam a, ngale saak hehmin atediko ejûnkhoam a, chenrãngma ngako thinma ate kahra pa jîn eka. 5 Thinma mihhândi lejûnmin; erenoma, ererãngrãng mihnyan heh tâwah huhchhoan erea, chenrãngma ngako, thinma ate kahra jînmah.” 6 Jisu ma thinnâng are nginthakthô pa thôkoh wah, rohkomin atema chenni nâng ngaeka erepa thinma jetmah.
Jisu Pa Saaksokte Sen
7 Ephumma Jisu ma wîenthe ngatwah, “Ngama toangtang thôkoh eka: Nga a saak hehrãngma kâsek. 8 Ngamawah katte heh phangtang ahuh tuta, ngale saak hehma thinngin kepmah. 9 Nga a kâsek. Henhen nga kâsekkam pumma humkhen nâng lupwãng eka ereheh khope chohmin; thin a humkhen nâng wãng lahmemin ngakloat chhoan lahma thinma phem echohphhek a. 10 Ahuhte heh ahuhrãng, ngale ritphe rãng, erediko chhihsiet rãng lolo ehûra. Nga a nema roandông chenmamchoh en ngama hûerâng - chenni nângmin lethoam lethang roandông chenmamchoh en ngama hûerâng. 11 “Nga a saaksokte sen, ngale saak hehrãngma ritmin tariiang. 12 Saaksokte ngale saaktangte ledang thãkoh lahma thieneka mihnyan pumma chenthu soan mekhe ako atema saak heh phethien lahma huhchhoan erea; ephumma soan hehma saak heh kek lahma ephan chhoanthuk a. 13 Thã kohlahma thieneka mihnyan pa huhchhoan erea, chenrãngma ngako atea thã nângba moeka, atema saak hehrãngma patriimah. 14 -15 Nga a saaksokte sen. Ewa ma nga jet ehang rãngrãng, ngamemin Ewa jet ekang, ererãngrãngjô ngama ngasaak heh jet ang, ngale ngasaak hehmemin nga jethang. Ngamin ngasaak hehrãngma ritmin tariiang. 16 Are saak chhangko ledangte ngasaak ahan nângmin tonga. Ngama erehehmin metkep siethokmin; thinmemin nga kahra tatlahma saaksokte wanthe khennâng khuthe dângtumin. 17 “Wama nganâng hun ehang, chenrãngma ngako ngama nga roandôngpa koh ekang. Ngama ade ditthe ngakchohrãng nga roandôngpa koh ekang. 18 Henmemin nga roandôngpa nga ngewah tanyen mahhang. Ngama ngadede hungsima koh ekang. Ngama akohmin takoh ang, ngale ngakkepmin tare ang. Ngawama nganâng aroh moatrãng chien ehang.” 19 Eredikomin are jabkhab junko thintungnâng mâmâ khukhu dângjâwah. 20 Melâng mihnyan hehma atenâng ngatwah, “juchhih lup eka! Ngale apâ reka! ate ngin chenrãngma kep eken a?” 21 Rohkomin khaka hehma ngatwah, “Juchhih lupte mihnyan ma arerãngrãng jienjabmah! Juchhih ma mihnyan mitdoak pa chenroh jiensensiet koh a?”
Jisu nâng Thãjô
22 Arepa rangpa nâng dângwah, ngale Jeroselem wah Rangsoamhum wâng niemhôan lokuh dângwah. 23 Rangsoamhum wah Solomon Kânthong ngama ngaeka theko Jisu phoangkhoam lahma dângwah, 24 Mihnyan heh ate tumlitko khôanhu lahma atenâng chhienwah, “Nangma ni chentô lektûngmaang thukmin a? Ninâng laangthôkoh ehi: Nanga Misaia dangole?” 25 Jisu ma dânthâng wah, “Ngama nenâng râthôkotah, rohkomin nema nganâng putedâlem mahha. Ngama Ewa ma chien ehang moatlem moekang pumma ngarãngma jabeka; 26 roh akomin nema putedâlem met, chenrãngma ngako nea ngasaak dangmet. 27 Ngasaak hehma ngakahra pa tateka; Ngamemin thin jet ang, ngale thinma ngadijun ehang. 28 Ngama thinnâng roantang roanjêng roandông koh ekang, ngale thin chenthumin leriimin. Henmemin thin a ngadek wah leta nyenchhoanmin. 29 Ngawama nganâng chenni koh ehanga erepa chenni nomemin adongthôan, ngale henmemin Wa dekwah leta nyenchhoan min. 30 Ewa chenii a wanthe.” 31 Erediko mihnyan hehma atenâng petrãngma long tôanwah. 32 Jisu ma thinnâng ngatwah, “Wama nganâng mothukthang moatlemsen ajahthem ne mathahko mokotah; erehehwah chenre moatlemsen moatthã nema nga ritpetãng huneha?” 33 Thinma dânthâng wah, “Nima nangnâng moatlemsen moatthã ritpethun dangmih, nangma Joban thãsê jabkhab jabthãba ritpetrãng ngaeki! Nanga mihnyan danglohma, nangdede Joban rãng dângrit huneko!” 34 Jisu ma dânthâng wah, “Ne Niem nâng, Joban ma atenâng ‘Nanga Joban’ ngama raanglahma tonga. 35 Nãngma ajet Joban nyapraangma chenni ngaeka erepa roantang roangjêng rãng toangtang; ngale Joban ma ate ngin thôkotah mihnyan hehnâng joban ngawak eka. 36 Nga dangeka, Wama renlahma hahtokkhoh ko chienkat ehang. Phumma ngama nga a Joban Chha ngatrãngma nema nganâng chenroh Joban thãse eko ngama jienngaeha? 37 Ewa ma mothuk ehang moatlempa ngama lemo medang angko nganâng nekpute dâlemha. 38 Rohkomin ngama erehehjô memo angkomin nema nganâng putedâlem mahha, nganângjô leputedâlem eha komin, ngama moekang moatlem hehnâng putedâlem letmeko, nema Ewa pa nga demnâng ngale nga a Ewa demnâng ngama chenjettet.” 39 Eredikomin rekthe thinma Jisu loatrãng hunwah, rohkomin thindekwah Jisu pechhoanwah. 40 Erediko Jisu Jordanjo rankawah Jon ma baptijem koheka theko thengak wângwah, ngale ate eretheko tôngwah. 41 Eretheko ate tânâng ajahthem mihnyan hokwah. Thinma ngatwah, “Jon ma chenni patritli moatlemjô momah, rohkomin atema are mihnyan junma chenni ngatah a ereheh phangtang toangtang.” 42 Ngale ajahthem mihnyan hehma atenâng putedâlem wah.
Lazaras Rit Ngin
1 Bathani hahnâng sôngte mihnyan wathe ate mînpa Lazaras pa khun rewah. Mariam ngale ate naa Martha niimin erehahko sôngwah. 2 (Are Mariam pumma Teso dako tientumli ma lokko lahma ate khochoo pumma choakhut kohwah; phumma are khuntepa ate naa Lazaras dângwah.) 3 Ate khakho pumma Jisu nâng ngin matkatwah: “Teso, nang lemruchhasen pa riitah.” 4 Chenthu Jisu ma are nginpa tatphumma atema ngatwah, “Are khun junwah Lazaras leriimin; arepa Joban mîndôngthuk rãngba khun eka, ngale are junko Joban Chha mîn edongthuk a.” 5 Jisu ma Martha ngale ate khakho ngale Lazaras nâng nyahrãng hunwah. 6 Rohkomin chenthu atema Lazaras khun nginpa chohtat lahmemin leka thangma ate tongtah theko jânii tôngthienwah. 7 Erediko atema dijunte hehnâng ngatwah, “Nãng Judia nâng ngakwãnge.” 8 Dijunte hehma dânthâng wah, “Hethôte,” “Enângwah mihnyan hehma nang longma ritpetrãng phungtahwah chentô mataang eka; phumma nanga enâng ngakwâng phung ekoa?” 9 Jisu ma dânthâng wah, “Jâtheko echhi koantanii dangmahne? Erohwah henhen rangwo poatko khoam eka ereheh dakho lethutrii min, chenrãngma ngako are hahtokkhoh kowah wenphiak pa thinma khe eka. 10 Rohkomin thin rangnyek nâng mekhoam ako dakho ethut a, chenrãngma ngako thinnâng wenphiak aho.” 11 Jisu ma arepa ngatdiko thinnâng thôkoh wah, “Nãng lemruchha Lazaras pa juplekre eka, phumma nga kalekma ate satsiet katmin.” 12 Dijunte hehma dânthâng wah, “Teso, atea ajup medang ako, asen erea.” 13 Jisu ma Lazaras riitah ngama ngatthiak ngatwah, rohkomin thinma jup nângjô ngathem eka ngama thônghun wah. 14 Ephumma Jisu ma thinnâng, “Lazaras riitah, ngama thôkoh wah. 15 Rohkomin nga khuhah ekang, chenrãngma ngako nga ate demko ledangpa nekhurãng asen dangeka, ade phumma nema eputedâlem ha. Nãngkhu ate tânâng kae.” 16 Thomas (atenâng Didimas ngamemin roowah) ma ate lemru hehnâng ngatwah, “Nãngkhu phangtang nãng hethôte demnâng johkae, erohkoba nãngkhumin ate demnâng ejohriie!”
Jisu pa Arit wah Ngakhînte ngale Roandông
17 Chenthu Jisu hokkhoam phumma, Lazaras pa rukat tahwah jâbelii lâdangtah ngama tônglâwah. 18 Bathani hah pa Jeroselem kowah meenii nomemin athe dângwah, 19 ngale Jews mihnyan heh ajahthem Mariam le Martha tâko thinnaa ritjunko chohmîn hûlahma dângwah. 20 Chenthu Martha ma Jisu lâhûtha ngama chohtat phumma ate lemchohrãng loatchhoan wah, rohkomin Mariam pa humko tônglâwah. 21 Martha ma Jisu nâng ngatwah, “Teso, nang anâng dângwah dângnomeko, nganaa pa leriimin wah! 22 Rohkomin ngama jet athâng hehmin nangma Joban wah chenni thaeko erepa ekohho.” 23 Jisu ma atenâng thôkoh wah, “Nangnaa pa ngakhîn erea,” 24 Martha ma dânthâng wah, “Ngama ajet,” “Athôanjâ rangwo ko ate engakhin a.” 25 Jisu ma atenâng ngatwah, “Nga a ritwah ngakhînte ngale roandông. Nganâng henhenma putedâlem ehanga ereheh ritjô mere akomin, ahîn erea; 26 ngale henhenma nganâng putedâlem lahma tongeka ereheh chenthumin leriimin. Nangma areko putedâlem ekole?” 27 Atema dânthâng wah, “Teso, putedâlem ekang!” “Ngama nanga hahtokkhoh ko katte, Joban Chha Misaia ngamemin putedâlem eki.”
Jisu Sep
28 Martha ma arepa ngatdiko, ngakwãng lahma ate khakho Mariam pa huhchhama roowângwah. Ate khakho nâng thôkoh wah, “Hethôte pa ako tonga,” “ngale atema nang lem eho.” 29 Chenthu Mariam ma tatphumma, toanchep lahma Jisu chohmînrãng sitsiak loatkatwah. 30 (Ere poatko Jisu hahdaang nâng mahuwãng dângwah, ate demnâng Martha chohmîntah theko tonglahma dângwah.) 31 Mariam demnâng humko johtongtah mihnyan hehma Mariam tôanchep lahma sitsiak loatchhoan pa khelahma ate diko junchhoan wah. Mariam ma mangruk nâng kalahma sepkatrãng ngaeka ngama thinma thônghun wah. 32 Mariam, Jisu tâko hûka lahma Jisu chohkhe rienrien, Jisu dathongko khupjup katwah. Atema ngatwah, “Teso,” “Nanga anâng dângwah dângnomeko nganaa pa leriiminwah!” 33 Jisu ma Mariam seplahma khewah, ngale ate demwah mihnyan hehmin seplahma khewah; eko Jisu min nyahrãng hungchhihwah. 34 Jisu ma thinnâng, “Chenriang nâng binkattet a?” ngama chhienwah. Thinma dânthâng wah, “Teso, wãnglohma sûwãng tanro,” 35 Jisu sepwah. 36 Mihnyan hehma ngatwah, “Sûtan en atema chentô huneka!” 37 Rohkomin khaka hehma ngatwah, “Atema mitdoak hehmin sensiettah dangmahne? phumma atema Lazaras ritwah leta ngakhinsiet minne?”
Lazaras ngakhînsiet
38 Eredikomin nyahrãng hung wienthe chhih lahma, Jisu mangruk nâng katwah, mangruk pa longwah thutwah, ngale lupwâng thinko longkhama tangsek lahma dângwah. 39 Jisu ma “Longkhapa rephe en!” ngatwah. Martha aritte nyadem, pumma dânthâng wah, “Teso lânemtah dângmin. Ate binkat tihwah jâbelii lâdangtah!” 40 Jisu ma atenâng ngatwah, “Putedâlem mere oko nangma Joban chaanpa echohkheo ngama lethôkoh wahne?” 41 Thinma longpa rephewah. Jisu ma rangkho nâng sûwên lahma ngatwah, “Wa nangma nganâng chohtatdi dangkoh a ngaeki. 42 Ngama ajet nangma roantangma tatkat ehang, rohkomin arekowah mihnyan hehrãng sênrãngma arepa ngaeki, erohkoba nga a nangma chienkatwah ngama thinma eputedâlem a.” 43 Atema arepa ngatdiko, chaanmõang raklahma, “Lazaras, loatkaro!” ngama roowah. 44 Ate dek ada heh mangdoapkhet pumma doapkhhek, ngale ate thhenphãng komin khetma doaplahma loatkatwah. Jisu ma thinnâng ngatwah, “Khet heh jânphekoh en,” “ngale chenwãnga.”
Jisu Lelatnâng Ranchep
45 Mariam demnâng chohmînrãng jahmõang mihnyan hutah hehma Jisu ma chenni motah a erepa khelahma atenâng putedâlem wah. 46 Rohkomin khaka heh ngakchhoan lahma Jisu ma chenni motah a ereheh Farasi hehnâng thôkoh wah. 47 Ephumma Farasi le Soam aroakte adong heh ngoang awang heh demnâng chohmîn lahma ngatwah, “Nãngma chenre ea? Are mihnyan pumma patritli moatlem moeka hehnâng thatsûtan en! 48 Nãngma arohjû medangthuk eko, chentôma atenâng eputedâlem a, ngale Rom diakma nãngnâng chhihchoh lahma nãng Rangsoamhum ngale nãng diakpa echhihsiet kohhi!” 49 Kaipas ngama wathe ere rangpâko atea Soam aroakte adongthôan dângwah, erepumma ngatwah, “Nea talânbatet a! 50 Diaktangma chhihjâ noma mihnyan hehrãngma wathe mihnyan ritpeba asen ngama nema chhemhun metne?” 51 Linlinko ate hungsiwah hôngjabwah dangmah; phumma ere rangpâko atea Soam aroakte hehwah adongthôan dângwah dâng phumma, atema Jisu Jews hehrãngma ritmin ngama Joban ngewah loatjabwah, 52 ngale atelolo rãng ledang, Joban nâng putedâlemte mihnyan phoangphan chhoan eka heh wathe mihnyan rãngrãng roamsiet hokrãngma jabwah. 53 Erejâ phumma Jews heh thôte jabte hehma Jisu ritphe rãng themawa wah. 54 Ephumma Jisu Judia nâng mihnyan heh mitkheko leloat khoamtu thangma, sehah kêwah Ifariem hahko tôngwângwah, ereko ate dijunte heh demnâng tôngwah. 55 Adankhoam lokuh thângnemnem dângwah, ngale mihnyan heh jahmõang thindiakwah Jeroselem nâng lokuh mako seksâsoan niemhôan rãng hokwah. 56 Thinma Rangsoamhum ko khôanhû lahma Jisu lemsokwah, thinma wathema wathe nâng chhienmîn wah, “Nangma chenroh thonghun eko? Linlinjô atea lokuh rãng lehû minne?” 57 Soam aroakte adong ngale Farasi hehma ngatwah, Jisu chenriang nâng tongeka erepa jette hehma ninâng sitsiak thôhok kohmin, chenrãngma ngako thinma ate loatkhhek rãng ngatwah.
Bathani Hahnâng Jisu nâng Tienma Lokkoh
1 Adankhoam lokuh rãng jâerok mako, Bathani hahwah atema riichoanwah ngakhinsiettah mihwa Lazaras humko Jisu hokwah. 2 Thinma ere humko Jisu rãng rangjâ phhekchhah khoakhêm kohwah, phhekchhah kohtepa Martha dângwah; ngale Lazaras min Jisu demko johphhekchhah lahma dângwah. 3 Phumma Mariam ma nard bãngrin wah hôanwah tien thãchaanjat kephû lahma Jisu dako lokkohwah, ngale ate khochoo ma choakhutkoh rewah. Ngale tien pumma hum tangma tûmsietwah. 4 Jisu dijunte wathe, ate mînpa Juda Iskarot ate chênsângte pumma ngatwah, 5 “Are tienpa chârem ngun nâng sângminwah ngale ere ngunpa tangchhih hehnâng kohminwah” 6 Atema arepa tangchhih hehnâng mînchen lahma ngatwah dangmah, atea ahuh dângkowah ngatwah. Atea ngun thiente dâng phumma ere ngun kowah atedede rãng chîkepwah. 7 Phumma Jisu ma ngatwah, “Nekchhihsû en, ate hunsiko thien en! Atema nga ritjâ rangwo rãngma chenni moeka erepa chenmoa. 8 Nema ne demko tangchhih heh roantangma echoh en, rohkomin nema nga roantang chohmahha.”
Lazaras Lelatnâng Ranchep
9 Jahmõang mihnyan hehma Jisu Bathani hahnâng tonga ngama chohtatwah, ephumma thin Bathani hahnâng katwah, Jisu tânâng lolo ledang atema aritwah ngakhinsiettah Lazaras sokrãng memin katwah. 10 Ephumma soam aroakte adong hehma Lazaras min ritphe rãng themawa wah, 11 chenrãngma ngako ate junma ajahthem Jews hehma thinnâng leputetu thangma Jisu nâng putedâlem wah.
Tajien lahma Jeroselem nâng Hok
12 Eredijâko jahmõang mihnyan Adankhoam lokuh rãng hokte hehma Jisu Jeroselem nâng hûera ngama chohtatwah 13 Ephumma thinma Pam bãngphak heh semlahma Jisu chohmînrãng katwah, thinma, “Joban nâng rôe! Teso mînko hokte nâng Joban ma rangkoh eka! Joban ma Isrial Lowang nâng rangkoh eka!” ngama rakwah. 14 Joban nyapraangma ngaeka rãngrãng, Jisu ma Gado chha choh lahma ere khohko chhangwah, 15 “Zion chha heh, nekchei en! Ne Lowang pa lâhûtha, Gado chha khohko chhang lahma hûera.” 16 Ere sanpoatko ate dijunte hehma arepa jetloho; phumma Jisu ritwah Joban chaan chohlahma ngakhîn diko Joban nyapraangma arepa ate junma ngatwah ngale thinmemin arepa aterãng moatwah ngama thônghun wah. 17 Jisu ma Lazaras mangruk wah rookat lahma ritwah ngakhinsiettah poatko ate demnâng dangtah mihnyan hehma Jisu ma chenni retah a ereheh thôkoh wah. 18 Ere junko mihnyan heh ate demnâng chohmînwah - chenrãngma ngako Jisu ma are patritli moatlem moeka pa thinma chohtatwah. 19 Ephumma Farasi heh jabmînwah, “Thatsûtan en, nãngma tajek tãngmih! rangkhenpa phangtang ate diko jun eka!”
Griik hehma Jisu Lêm
20 Lokuh poatko Jeroselem nâng rangsoam rãng katte heh demnâng Griik jatmin khuthe dângwah. 21 Thinma Filip tânâng wãng lahma (atea Galilijaa wah Batsida hah wah dângwah) ngatwah, “Hethôte, nimemin Jisu demnâng chohmînhun eki.” 22 Filip wãng lahma Andru nâng thôkoh wah, ngale ere waniipa wãng lahma Jisu nâng thôkoh wah. 23 Jisu ma thinnâng dânthâng wah, “Mihnyan Chhama Joban wah nyahrãng chaandong choh sanpoat pa thângheh lâhûtha. 24 Ngama toangtang thôkoh eka: chhahpha pa hahko wênkat lahma leriikako phathelolo jôba dângmin. Erepa meriiako jôba, erekowah chhahpha ahan ajah ehonga. 25 Henhenma thindede roandôngko huneka erehehma mahphe erea; henhenma are hahtokkhoh ko thin roandôngko lehun dangeka erehehma thin roandông pemin lemahphe thangma roantang roanjêng roandông echoh a. 26 Henhenma ngadijun hun ehanga erehehma chenjunhang, erohkoba nga chenko dang ekanga eretheko ngahaa pemin edanga. Ngale henma nga khoakhem ehanga erepa nga Wa memin atenâng echhoanpôan a.
Jisu ma ate Rit Ngin Jab
27 “Athângheh ngahungpa nyahrãng chêm ekang - ngale ngama chenni jab anga? ‘Wa, are sanpoat pa nga khohnâng nekhu thukro’ ngama jabanga? Rohkomin ererãngma nga katwah - erohwah Ngama are chêm sanpoat pa chohmin jôba. 28 Wa, nangmînpa dongthuk e!” Erediko rangkho wah jabkhab jabkatwah, “Ngama Wa mînpa lâdong thuktek, ngale ademin edongthuk ang.” 29 Erekowah chepte mihnyan hehma ere jabkhab pa tatwah, phumma khaka hehma rangmok eka ngama ngatwah, erediko khaka hehma, “Atenâng rangkhethung wah Joban ngintatte hehma jabkat eka!” ngatwah. 30 Rohkomin Jisu ma thinnâng ngatwah, “Are jabkhab hongjab ekapa ngarãngma dangmah, nekhurãng sênrãngma hongjab eka. 31 Athângheh are hahtokkhoh pa achhih asen rên sanpoat pa; ngale are hahtokkhoh pênte juchhihpa rephe sanpoat. 32 Chenthu nga are hahtokkhoh kowah metoansietwên thangko, Ngama chentôpa ngatânâng sietwêmin.” 33 (Jisu ma arepa ate chenroh ritmin a erengin pa thôkoh wah.) 34 Mihnyan hehma dânthâng wah, “Ni Niemma Misaia pa roantang roangjêng rãng hînmin ngama thôkoh ehi. Nangma Mihnyan Chhapa tôansietwên min ngama chenroh jiennga eko? Mihnyan Chhapa hen a?” 35 Jisu ma dânthâng wah, “Wenphiak pa nekhu demko chutherãng tôngmin. Erohwah nema wenphiak pa chohpoatko khoam en, erohkoba nenâng rangnyek ma lelep edanghèn; chenrãngma ngako rangnyek nâng henkhoam eka erepumma ate chennâng chhoan eka erepa jetmah. 36 Nema wenphiak pa chohpoatko wenphiakko dâlem en, erohkoba nea wenphiak chha edangen.”
Mihnyan hehma Putedâlem wah
Jisu ma areheh ngatdiko, thintâwah chhoan lahma bîntông chhoanwah. 37 Jisu ma thintâko are chentô patritli hehjô memo akomin, thinma atenâng putedâlem ho, 38 Erohwah mõng Isaia ma chenni jabtah a ereheh toangtang dângwah: “Teso, nima thôkoh eki nginko henma putedâlem eka? Teso ma hennâng ate chaanpa khesoktah a?” 39 Ngale thinma putedâlem ho, chenrãngma ngako Isaia ma ngatwah, 40 “Joban ma thinmit pa doaksiet eka ngale thinhung pa basiet eka, erohwah thinmitma khe mah, ngale thinhung memin tajet mah, ngale Joban ma ngaeka, ngama thin sênsiet rãngma, thin ngatânâng hûmahra.” 41 Chenrãngma ngako Isaia ma are jabkhab jab ekapa atema Jisu mîndôngpa khelahma Jisu junma jabwah. 42 Eroh akomin ajahthem Jews thôte jabte hehmemin Jisu nâng putedâlem wah; rohkomin Farasi hehma Sanagog wah nekchen junlo ehi ngama thinma mihheh tânâng chinloat jabho. 43 Thinma Joban wah rô chohhun noma mihnyan hehwah rô chohba hunwah.
Jisu Jabkhab ma Achhih Asen pa Ren eka
44 Jisu ma chaanmõang rakjabwah, “Henhenma nganâng putedâlem ehanga erepa nganâng lolo putedâlem dangmah, ngachienkatte komin putedâlem eka. 45 Henhenma nga khe ehanga erepumma ngachienkatte pemin khe eka. 46 Nga a hahtokkhoh ko wenphiak rãngrãng kaerâng, erohwah henhenma nganâng putedâlem ehanga ereheh rangnyek khennâng letongtûmin. 47 Mihnyan hehma nga nginpa tatlahma lekep medang akomin, ngama thinnâng achhih lengamin. Nga a hahtokkhoh wah mihnyan hehnâng achhih asen rênrãngkat dangmahrâng, mihnyan heh pepâng rãngba kaerâng. 48 Henhenma nganâng lepute dâlemte ngale nga nginlekep dangeka ereheh nâng achhih ngate tonga. Ngama jabekang jabkhab pumma athôan jâko thinnâng achhih engawak a! 49 Arepa toangtang, chenrãngma ngako, ngama ngadede chaanjunko jab dangmek, rohkomin ngachienkatte Wama ngama chenni jabmin a ereheh thôkoh ehang. 50 Ngale ngama ajet ate ngin junko roantang roanjêng roandông choheki. Erohwah, Wama chenni thôkoh ehanga, ereheh ngama jabekang.”
Jisu ma Ate Dijunte heh Dasôan koh
1 Arepa Adankhoam lokuh majâko dângwah. Jisu ma hahtokkhoh pa phethien lahma Wa tânâng wâng sanpoat pa lâhûtha ngama jetritwah. Atema hahtokkhoh wah ate mihnyan hehnâng roantang hun achetjû dângwah, ngale atema thinnâng athôan sanpoatko kiat hunwah. 2 Jisu le ate dijunte heh rangjâ phhekchhah chhah lahma dângwah. Simon Iskarot chha Juda hungnâng Jisu chênsâng rãng thônghun thukte juchhihpa luplahma dângwah. 3 Wama nganâng chaan kohlahma chentôpa ngakhennâng lâdang thuktah ngama Jisu ma jetwah; ngale atea Joban tâwah katwah ngale Joban tânâng ngakwângmin ngamemin jetwah. 4 Ephumma phhekchhah chhahthin kowah toanchep lahma, akhohwah poh eka khetpa koakphe lahma, ate roamko khet tôankhhekwah. 5 Erediko wankhoang nang jokien lahma ate dijunte heh dasôan kohwah ngale ate roamwah khak eka khet pumma choakhut kohwah. 6 Ate Simon Piter tâko hokko, Simon Piter ma ngatwah, “Teso, nangma ngada soankohrãng ngaekoa?” 7 Jisu ma atenâng dânthâng wah, “Ngama athângheh chenni moekanga erepa nangma jetmoh, rohkomin nangma khediko erepa ejet o.” 8 Piter ma ngatwah, “Nangma chenthumin ngada lesoan kohmin!” Jisu ma dânthâng wah, “Ngama nangda lesoankoh medang eko,” “Nanga ngadijunte leta dângmin.” 9 Simon Piter ma dânthâng wah, “Teso, eroh medang ako ngada lolo neksoan kohhang! Ngadekmin soankohhang, ngale nga khomin setkohhang!” 10 Jisu ma ngatwah “Henhen josoanchoan a ereheh senthemthem lâsâtah, athê depsôanthin dangtumah, thinma dalolo ba soantumin. Nekhu phangtang lâsâtet wathe loloba ngek etonga.” 11 (Jisu ma erepa ate chênsângte pa jetlahma dângwah; erohwah atema ngatwah, “Nekhu phangtang lâsâtet, wathe loloba ngek etongen.”) 12 Jisu ma thinda soankoh diko, atema koakphetah khetpa ngaktoanpoh lahma phhekchhah chhahthin ko ngaktông katwah. Ngale atema chhienwah, “Ngama athângheh nenâng chenni mokotah a ereheh jet ekenle?” 13 “Nema nganâng Hethôte ngale Teso ngama rooeha, erepa nema lâpun rootha, chenrãngma ngako nga dangang jôba. 14 Nga ne Teso ngale ne Hethôte danglekma athângheh neda soankoh eka. Erohwah nemin wathema watheda soanmînkoh en. 15 Nema chenjet en ngama ba soankoh eka, erohwah ngama athângheh nerãng chenroh moekanga ererãngrãng nememin erohmo en. 16 Ngama toangtang thôkoh eka: haaheh henjô ate tângtewa noma adong dangmah, ngale ngintat chhoante heh henmin ngintat chiente noma adong dangmah. 17 Athângheh nema are toangtang pa lâjettet, phumma nema ererãngrãng memo enko chentôsên dângmin a! 18 “Ngama nekhu anga nga nginthô dangmek; Ngama henhen ren ekanga ereheh jet ang. Rohkomin Joban nyapraangma are ngaeka pa toangtang dângmin, ‘Ngadem kowah ngama chhah ekang phhekchhah kowah johchhahte pa nga lelatnâng dangeka.’ 19 Ngama nenâng arepa dângwâng mako thôkoh eka, phumma chenthu arepa medangwãng thako, nema ‘NGA, HEN NGA A,’ erepa ejet ha. 20 Ngama toangtang thôkoh eka: Henma komin ngama chienchhoan ekang mihnyan pa metãngroo ako erepa nga tãngroo ehang; ngale henhenma nga tãngroo ehanga erepa ngachien katte pemin tãngroo eka.”
Jisu ma Ate Chênsengmin ngama Jet
21 Jisu ma areheh ngatdiko, ate hungnâng nyahrãng chêmchoh lahma loatthôkoh wah, “Ngama toangtang thôkoh eka: Nekhuwah wathema nga echên esengha.” 22 Dijunte heh nyahrãng mokrii lahma arepa hendângmin a ngama wathema wathe nâng sokmînwah. 23 Dijunte wathe nâng Jisu ma nyahrãng hunlahma dângwah, erepa Jisu tâko tôngwah. 24 Simon Piter ma atenâng thak amak kohlahma ngatwah, “Atema hennâng ngaeka erepa chhientan.” 25 Ephumma ere dijunte pa Jisu tâko hehtong wãng lahma chhienwah, “Teso, erepa hen a?” 26 Jisu ma dânthâng wah, “Ngama penritiko bankên rumkat lekma hennângkoh ekanga; ere mihnyan pa dângmin.” Ephumma atema bankên toanlahma rumkat lahma Simon Iskarot chha Juda nâng kohwah. 27 Juda ma bankên pa thârienrien ate hungnâng juchhih lupwah. Jisu ma atenâng ngatwah, “Nangma chenni moatthin tonga erepa sitsiak mo o!” 28 Jisu ma arepa atenâng chenrãngma ngaeka erepa phhekchhah chhahrãng khoang kowah johtôngte hehma henmemin jet ho. 29 Juda pa ngunthiente dâng phumma, dijunte khaka ma, Jisu ma Juda nâng thinma lokuhko kepthin heh riakchhoanrãng chienthem eka, ba tangchhih hehnâng chenni komin kohchhoan o, ngama komin chienthem eka ngama thônghun wah. 30 Juda ma bankên pa thâdiko lemlienma khoamchhoan wah. Erepa rangpen nâng dângwah.
Hôkum nyan
31 Juda loatchhoan diko, Jisu ma ngatwah, “Adephumma Mihnyan Chhapa mîndong lahma ekhe e; ngale ate junma Joban mîndong lahmemin ekhe e. 32 Ngale ate junma Joban mîndong lahma mekhetihko, Joban memin ate junma Mihnyan Chha mîndongthuk lahma ekhe e, ngale erepa atema lemlienma edongthuk a. 33 Ngachhu achha heh, nga nekhu demnâng ajah talek tongtumek. Nema nga elemsûha; rohkomin ngama Jews heh thôte jabte hehnâng chenni thôkotek a ereheh ngama athângheh nenâng thôkoh eka, ‘Nga chenko chhoan ekanga eretheko ne leta hûmin.’ 34 Ngale athângheh ngama nenâng hôkum anyan koheka: wathema wathe nâng hun achhâmîn en. Ngama nenâng huneka rãngrãng, eroh nemin wathema wathe nâng hunmîn en. 35 Nema wathema wathe nâng mehunmîn enko, anga ngama nea ngadijunte ngama ejet hèn.”
Piter ma Jisu Jetmek ngatpa Jisu ma Khema ma Jetwah
36 Simon Piter ma chhienwah, “Teso, nang chenko dângmin a?” Jisu ma dânthâng wah, “Nga chenko chhoan ekanga eretheko ne athângheh tajun chhoanmah ren,” rohkomin; “nea khediko ejun chhoanha.” 37 Piter ma chhienwah, “Teso, chenrãngma ngama athângheh leta junchhoanmin a?” “Nga nangrãng ritmin tarii ang!” 38 Jisu ma dânthâng wah, “Nanga linlin ngarãng ritmin tariioa? Ngama toangtang thôkoh eki: wowên mako nangma nga jetmah hang ngama ditrem engao.
Jisu pa Wa tânâng Wângthin Lemkhô
1 Jisu ma thinnâng thôkoh wah. “Neksekmah patrii en,” “Joban nâng putedâlem en ngale nganângmin putedâlem ha.” 2 Ewa humnâng the jahmõang tonga, ngale nga nerãng the khoakhêm kohrãng wãngekang. Ereko the aho dângnomeko ngama nenâng lethôkoh minwah. 3 Ngale nga wãnglekma nerãng the khoakhêm kohdiko, Nga ngakka lekma nga demnâng esietwên a, ephumma nga chenko dangekanga eretheko nemin eta wãngrên. 4 Ngawãng ekang theko wângthin lempa nemajet en.” 5 Thomas ma ngatwah, “Teso, nang chenko dangekoa erepa nima jetmih; phumma nang wãngeko theko ni hokwângrãng lempa chenroh jienjetmin a?” 6 Jisu ma atenâng dânthâng wah, “Nga a Lemkhô, toangtang, ngale roandông; Wa tânâng henjô leta wãngmin, ngajunma lolojôba Wa tânâng tâwâng min. 7 Atema thinnâng ngatwah, Nema athângheh nga lâjettha,” “Ngale nema Ngawa min ejet en, ade phumma nema atemin lâjettet ngale lâkhetet.” 8 Filip ma atenâng ngatwah, “Teso, Wa pa ninâng khesok hi; ere khepa lolojôba nima huneki.” 9 Jisu ma dânthâng wah, “Filip, chenthu thuma nga nekhu demnâng dângwah; rohkomin athângheh nângmin nangma nga majet ehangne? Henhenma ngakhe ehanga erehehma Wamin lâkhetah. Nangma chenrãngma, ‘Wa pa ninâng khesok hi’ ngaekoa? 10 Filip, nga a Wa demnâng ngale Wa pa nga demnâng, erepa nangma putedâlem mohne? Jisu ma ate dijunte hehnâng ngatwah, Ngama nenâng thôkoh eka jabkhab pa ngadede wah loatjab dangmek.” Ngadem wah johtôngte Wama atedede moatlempa moeka. 11 Wa pa nga demnâng ngale nga a Wa demnâng ngama ngatko nganâng putedâlem ha. Eroh komin leputedâlem medang hako, ngama moekang moatlem heh junma komin putedâlem ha. 12 Ngama toangtang thôkoh eka: henhenma nganâng putedâlem ehanga erehehma ngama chenni moatlem moekanga ereheh emowak a, ngale erenoma moatlem dongmin eta mowak a, chenrãngma ngako Nga a Wa tânâng wãngekang. 13 Ngale nema ngamînko chenjô metha enkomin erepa ngama emokoh a, erohkoba Chha junma Wa mîndong lahma ekhe en. 14 Nema ngamînko chenjô metha enkomin, erepa ngama emo ang.
Asâthôanju kohrãng Toamsem
15 “Nema nganâng mehun hako, nema nga hôkum pa ekep en. 16 Ngama Wa wah etha ang, ngale atema nenâng chohsokte ahan ekohhèn, erepa nedemnâng roantang roangjêng rãng ejohtonghen. 17 Atea Ju, ngale atema Joban toangtang pa eloatsiet katra. Hahtokkhoh wah hehma ate kepmah, chenrãngma ngako thinma ate khemah ngale ajetmin jetmah. Rohkomin nema ate jet eken, chenrãngma ngako atea nedemnâng johtong ehèn ngale ne khennâng tong ehèn. 18 “Chenthu nga mewãng tekko, ngama ne lolo phethienmah; Nga netânâng engak karâng. 19 Chuthe diko hahtokkhoh wah hehma nga lekhe tumin, rohkomin nema nga ekheha; chenrãngma ngako nga a ahîn erohwah nemin ehin en. 20 Chenthu ere rangwo pa mehû theko, nema nga a Ewa demnâng ngale nea nga demnâng, erediko Ngamin nedemnâng dangekang pa ejet en. 21 “Henhenma nga hôkum pa keplahma erejunko dangeka ereheh nganâng hunte. Henhenma nganâng hun ehanga ereheh nâng Ngawa memin ehun a; Ngamemin thinnâng ehun ang ngale ngadede min thinnâng ekherii ang.” 22 Juda (rohkomin Juda Iskarot pa dangmah) erepumma ma ngatwah, “Teso, nanga hahtokkhoh wah hehnâng lekherii thangma ninâng lolo chenroh jienkherit min a?” 23 Jisu ma atenâng dânthâng wah, “Henhenma nganâng hun ehanga erehehma ngama hethô ekang nginpa ekep a. Ngawa memin thinnâng ehun a, ngale Ewa chenii thin tânâng kalihma thin demnâng ejoh songkae. 24 Henhenma nganâng hunmahhang a erehehma ngama hethô ekang ngin pemin kepmah. Ngale nematat ekenpa nga ngewah hethô dangmek, erepa Ngachienkatte Wa ngewah hethôeka. 25 “Ngama areheh nedemnâng dângpoatko thôkoh eka. 26 Wama ngamînko nenâng chohsokrãng Asâthôanju echien katra, ngale atema nenâng chentôpa ehethô hèn, ngale ngama nenâng chentô thôkotah a, ereheh phangtang ethonghun thuk hèn. 27 “Mêmo pa ngama nenâng phethien koheka; erepa ngadede ngewah mêmo koheka. Ngama erepa hahtokkhoh ma koheka rãngrãng koh dangmek. Nekpatrii sekmah en; ngale acheimin nekchei en. 28 Ngama nenâng thôkoh pa nema lâtattet, ‘Nga chhoan ekang, rohkomin nga netânâng engakkarâng.’ Nema nganâng mehun hako, Nga a Wa tânâng wângdi nerin eroan en; chenrãngma ngako atea Nga noma adong. 29 Ngama athângheh nenâng areheh phangtang linlin hongdâng mako thôkoh eka, erohwah chenthu areheh mehong dangwãng theko, nema eputedâlem en. 30 Nga nekhu demnâng ajah talek jabmîn tumah, chenrãngma ngako are hahtokkhoh pênte pa lâhûtha. Rohkomin atema nganâng chennimin tare mahhang, 31 Phumma ngama Wa nâng hun ekang ngama hahtokkhoh wah hehma jetmin; erohwah chentôpa atema nganâng chenroh thôkoh ehanga eroh ngama moekang. “Chepen, are thekowah chhoan e.
Jisu pa Angur Linlin
1 “Nga a angur linlin, ngale Ngawa pa bãngthong pânte. 2 Atema ngawah penri leri bãngphak chentôpa doakphe eka, ngale penri rite bãngphak chentôpa pân reka, erohkoba senthemthem donglahma penri ajah eria. 3 Ngama nenâng hethôeka jabkhab pumma ne lâsâsietthen. 4 Nga demnângjû dangen, ngale ngamin ne demnângjû danglekma etongang. Bãngphak pumma ate dedema penri jienhong rimah; bãng demkojû danglahma metong ekoba penri jienhong rimin. Ererãngrãng nemin nga demnângjû dangletma letong kenko nema penri jienrimet. 5 “Nga a angurbãng, ngale nea bãngphak. Henhen nga demnângjû danglahma tongeka, ngale ngamin hen demnângjû danglekma tongekãnga, erehehma penri ajah eria; chenrãngma ngako nga aho thangma nema chennimin leta momin. 6 Henhen nga demnângjû lejohdang thangma dangeka ereheh a petphe lahma bãngphak choakjâwah rãngrãng echoakjâa; Arerãngrãng bãngphak heh khôantoan lahma wennâng phêkatmin, ngale ere wenko jemkhâm erewak a. 7 Nea nga demnângjû medang enko ngale nga jabkhab pemin ne demnângjû medang hènko, nema chenni komin hun letma metha enko, erepa nema echoh en. 8 Ngawa mîndông pa nema penri ajah rijunko ekhesok a; ngale erohkoba nemin ngadijunte eta dangen. 9 Wama nganâng hun ehang rãngrãng ngamemin nenâng huneka; erohwah ngawah hunkojû tongen. 10 Ngama chenroh Ewa hôkum keplekma ate hunkojû danglekma tong ekanga, ererãngrãng nemin nga hôkumpa kepletma ngawah hunkojû dangletma tongen. 11 “Ngama nenâng are thôkoh ekapa, nga ngewah khuhah linlinpa nema kepletma, nehung khennâng nyahrãng khuhah nâhah chendangen ngama thôkoh eka. 12 Nga ngewah hôkumpa arepa: Ngama nenâng chenroh huneka, ererãngrãng nekhumin wathema wathe nâng hunmîn en. 13 Nema ne lemruchha nâng hun achet kowah adongthôanpa thinrãngma ne roandông kohpa. 14 Ngale ngama nenâng chenni chieneka erepa nema memo enko nea ngalemruchha. 15 Ngama nenâng haa ngama rootumah, chenrãngma ngako thin tângtewa pumma chenni moeka erepa haa hehma jetmah. Erohwah, ngama nenâng lemruchha ngama rooeka, chenrãngma ngako ngama Ewa wah chentô chohtat ekanga ereheh phangtang nenâng thôkoh eka. 16 Nema nga rên dangmahha; Ngameba ne renlahma chenthumin lechhihjâ thangma lektôngli penri richhoanthuk eka. Ngale ngamînko Wa ngewah nema chenni thaeken a ereheh atema ekohhèn. 17 Erohwah ngama arepa nenâng chieneka: wathema wathe nâng hunmîn en.
Hahtokkhoh wah hehma Chhihchoh
18 “Hahtokkhoh ma nenâng mechhihchoh hènko, thonghun en, khebengko nganâng chhihchoh ehang. 19 Nea hahtokkhoh rãng medang enko, hahtokkhoh ma nenâng aterãng dângdi ehunhèn. Rohkomin ngama nea are hahtokkhoh wah ren eka, ngale nea hahtokkhoh rãng dangmet; erohwah hahtokkhoh ma nenâng chhihchoh ehèn. 20 Ngama nenâng chenni thôkotah a ereheh thonghuntan en: ‘Haaheh thin tângtewa noma adong dangmah.’ Mihnyan hehma nganâng mechêmsiet hangko, thinma nemin echêmsiet hèn; ngale ngama hethô ekangpa thinma mekep ako, thinma ne nginmin ekephèn. 21 Rohkomin nea ngarãng dângdi are chentôpa thinma nenâng ehôan ejôan hèn; chenrãngma ngako ngachienkatte pa thinma jetmah. 22 Nga kalekma hahtokkhoh wah mihnyan hehnâng lethôkoh ngako thinnâng pap aho dângmin wah; Ade phumma thinpap heh map lekohtumin. 23 Henhenma nganâng chhihchoh ehanga nga Wa nangmin chhihchoh eka. 24 Henmemin lethat moli moatlem heh ngama thin tânâng lemo ngako thinnâng pap aho dângmin wah; phumma ngama chenni moekanga erepa thinma lâkhetah, rohkomin thinma Ewa chheni waniinii nâng chhihchoh ehi. 25 Arepa metkep dângmin, erohkoba thin Niem nâng chenni raangtah a erepa toangtang edanga: ‘Thinma nganâng ledangli nâng chhihchoh ehang.’ 26 “Achohsokte Ju ekara, atema Wa tâwah kalahma Joban toangtang pa ekhesok kahèn. Ngale atea ngama Wa tâwah nekhu tânâng echienkat râng, ngale atema nenâng ngangin ethôkoh hèn. 27 Ngale nememin nga nginpa mihnâng ethôkoh en, chenrãngma ngako nea khebengma nga demnângjû.
1 “Ngama ne putedâlem pa nekchen chhihjâ eken ngama arepa thôkoh eka. 2 Nea Sanagog wahmin ejunlo hèn, ngale mihnyan hehma ne ritphe lahma thinma Joban nâng soamtô eki ngama thônghûn sanpoat pa ehûra. 3 Mihnyan hehma Wa min lejet ngale Nga min lejet dâng phumma ne eritphe hèn. 4 Phumma ngama nenâng arepa thôkoh eka, erohkoba chenthu thinma arohmoat sanpoat mehûthako, ngama nenâng chenni thôkotah a ereheh nema ethonghun en.
Asâthôanju Moatlem
“Ngama areheh nenâng khebengko thôkomah, chenrãngma ngako, Nga nedemko dângwah. 5 Rohkomin ade phumma Nga a ngachienkatte tânâng wãngekang, rohkomin nekhuwah henmemin nga chennâng dângrãng ngaekanga erepa thongphâ mahha. 6 Ngale athângheh ngama nenâng thôkoh eka, phumma nea nyahrãng hungchhih rekmah dangeken. 7 Rohkomin ngama toangtang thôkoh eka: Nga chhoan ekangpa nerãng sênrãng chhoan ekang, chenrãngma ngako Nga lechhoan medang angko, chohsokte Jupa netânâng lekamin. Phumma Nga mechhoan angkoba Ngama netânâng ate echienkatrâng. 8 Ngale chenthu ate meka theko, atema hahtokkhoh wah mihnyan hehnâng, pap, ngale toangtang, erediko Joban ma khope rênjunma ekhesok a. 9 Thin a pap junko athe, chenrãngma ngako thinma nganâng putedâlem mahhang; 10 ngale thin a toangtang junkomin athe, chenrãngma ngako Nga a Wa tânâng wãngekang ngale nema nga lechoh khetûmin; 11 ngale thin a chhih asen rên junkomin athe ngama ekhesok a, chenrãngma ngako, are hahtokkhoh pênteko athe lângatah. 12 “Ngama nenâng ajahthem thôkohthin tonga, rohkomin athângheh nema ereheh phangtang takepmet. 13 Ephumma chenthu toangtang Ju pa meka theko, atema Joban toangtang pa ekhesokkat hèn, ngale atema nemin toangtang lemnâng esenhèn. Atema atedede hungwah lehong jabmin, rohkomin atema chenni chohtat eka erepa ethôa, ngale khediko chenni dângmin a erehehmin ethôkoh hèn. 14 Atema ngamîn edongthuk hang, chenrãngma ngako, ngama chennijab ekanga erepa atema nenâng thôkoh ehèn. 15 Ewa ngenâng chentô tongtong apa phangtang ngarãng; erohwah ngama ngaekang, ngama Junâng chennikoh ekanga erepa atema thalahma nenâng ethôkoh hèn.
Asep Ajôang ngale Khuhah Nâhah
16 “Chuthe diko nema nga lechohkhe tumin, ngale ere chuthe diko nema nga echohkheha.” 17 Ate dijunte khuthema thindede chhienmînwah, “Arepa chenni junko jabeka? Ngale atema nãngnâng chenni junko thôkoh ehia, Nãngma chuthe diko ate lechohkhe tumin ngale ere chuthe diko nãngma ate echohkhe e; ngale atema arohmin ngaeka, ‘Chenrãngma ngako Nga a Wa tânâng wãngekang.’ 18 ‘Chuthe diko’ pa chennâng ngaeka? Atema chenni junko jabeka erepa nãngma jetmih!” 19 Thinma nganâng thôngphâ hun ehang ngama jetlahma, Jisu ma thinnâng ngatwah, “Ngama ngaekang, ‘chuthe diko nema nga lechohkhe tumin, ngale ere chuthe diko nema nga echohkheha.’ Are junma nekhu dede tungko lechhienmîn eken a? 20 Ngama toangtang thôkoh eka: Nea sep ajoang ere en, rohkomin hahtokkhoh pa khuhah nâhah edanga; nea hungchhih rekmah edangen, rohkomin ne hungchhih rekmah dang ekenpa khuhah nâhahrãng elitjâa. 21 Chenthu dihiaknyu pumma naachhatrãng menga tahko, atenâng nyahrãng chhâ lahma rângchêm a; rohkomin chenthu naapa mechha tahko, atema naachhat poatwah chêmpa lekphe rângrea, chenrãngma ngako, hahtokkhoh ko naapa tachhakat era. 22 Ererãngrãng jôba nekhu demnâng dângmin: athângheh nekhua hungchhih rekmah dangeken, rohkomin nekhu demnâng Nga engak chohmîn a, ngale ephumma khuhah nâhah edangen, ere khuhah ekenpa newah henmemin leta rephe tumin. 23 “Chenthu ere rangwo pa mehû theko, nema nga ngewah chenmin letha tumin. Ngama toangtang thôkoh eka: Nema Ngamînko chenni komin Wa ngewah metha enko atema nenâng ekohhèn. 24 Nema ngamînko chenmin mathattha eken; tha en ekoba nema echoh en, erediko ba nema linlin dangletma khu ehah en.
Hahtokkhoh Jien
25 “Ngama are ngin heh nenâng nginthakthô rãngrãng keplekma thôkoh eka. Rohkomin ngama nginthakthô lekep thangma thôkoh sanpoat pa ehûra, ere sanpoatko ngama nenâng Wa nginpa eloat thôkoh a. 26 Chenthu ere rangwo pa mehû theko, nema atewah ngamînko etha en; ngale ngama atewah nerãngma ethakoh a ngama ngamek, 27 chenrãngma ngako, Wama nenâng hun ehèn. Atema nenâng hun ehènpa nema nganâng hundi ngale nga a Joban tâwah kaerâng ngama nganâng putedâlemdi hun ehèn. 28 Nga a hahtokkhoh ko Wa tâwah kaerâng; ngale ade phumma Ngama hahtokkhoh pa phethien lekma Wa tânâng wãngekang.” 29 Ephumma ate dijunte hehma atenâng ngatwah, “Athângheh nangma nginthakthô demnâng ledang thangma nima jetli thôkoh ehi. 30 Nima athângheh lâjettih, nangma chentôpa jet eko; nangnâng henma komin nginthôngphâ mehun ako, thinma thôngphâ mama nangma rângdânthango. Erejunko nanga Joban tâwah kaero ngama nima putedâlem eki.” 31 Jisu ma thinnâng dânthâng wah, “Nema athângheh ba putedâlem ehane? 32 Nekhu phangtang phânchhoan sanpoat pa ehûra, ngale erepa lâhûtha, nekhu anga nga mâmâ humnâng phanchhoan letma ngalolo ephe thienha. Rohkomin nga a linlinko ngalolo dangmek, chenrãngma ngako Ewa nga demnâng tonghang. 33 Ngama nenâng areheh thôkoh ekapa nga demnâng dangletma mêmo chenchoh en ngama thôkoh eka. Hahtokkhoh ma nenâng echêmthuk hèn. Rohkomin hung dongdong dangen! Ngama hahtokkhoh pa lâjientek!”
Jisu ma Ate Dijunte heh Rãngma Rangsoam
1 Jisu ma are ngin heh thôkoh diko, atema rangkhethung nâng sûwên lahma ngatwah, “Wa, sanpoat pa lâhûtha. Nangchha mînpa dongthuk o, erohkoba Nangchha memin nangmînpa edongthuk ho. 2 Chenrãngma ngako, nangma atenâng chentô mihnyan nyuchha khohko chaankoh eko, ngale nangma atenâng kohtoh hehnâng atema roantang roanjêng lethôan roandông koh eka. 3 Ngale roangtang roanjêng lethôan roandông ngaeka pa nanglolo jôba toangtang Joban ngama jetpa, ngale nangma chienkattho Jisu Krista jet ekipa. 4 Nangma nganâng moatrãng chienthang moatlempa tamo lekma; ngama hahtokkhoh ko nangmîn dongthuk lekma khesok ekang. 5 Ewa! athângheh nang tâko ngamîn dongthuk hang, chenroh rang ahah hôanmako nga nangdemnâng mîndong thukthang rãngrãng dongthuk hang. 6 “Are hahtokkhoh wah nangma nganâng henhen kohthanga ereheh nâng ngama nang jetthuk ekang. Ereheh nang mihnyan, ngale nangma ereheh nganâng koh ehang. Thinma nang nginpa kepeka, 7 ngale nangma nganâng chentô koh ehang heh nang tâwah kaera ngama thinma athângheh lâjettah. 8 Nangma nganâng thôkohthang ngin heh ngama thinnâng lâthô kotek, ngale thinma erengin heh kep eka; ngale nga a linlinjô nang tâwah kaerâng ngama thinma lâjettah, ngale nga a nangma chienkat ehang ngama thinma putedâlem wakeka. 9 “Ngama thinrãng rangsoam ekang. Ngama hahtokkhoh wah hehrãng soamkoh dangmek, nangma nganâng kohthang hehrãngba soam ekang, chenrãngma ngako, thin a nangthiak. 10 Nga ngewah chentôpa nerãng, ngale ne ngewah chentôpa ngarãng; ngale thin junma ngamîn dôngpa kheki. 11 Ngale athângheh nga nang tânâng wãngerâng; Nga a hahtokkhoh ko dangtumek, rohkomin thin a are hahtokkhoh ko tongeka. Asâthôan Wa! nangmîn chaan pumma thin pepâng lohma thien o, nangma nganâng kohthangmîn pumma, Erohkoba nãngheh wanthe dangeki rãngrãng thinmin wantherãng danglahma etonga. 12 Nga thin demnâng dângpoatko, nangmîn chaan pumma ngama pepâng lekma thienwah, nangma nganâng kohthangmîn pumma. Ngama pâng ahâng lekma thien ekang, ngale wathemin mahphemek, henpa amah rangjû hongtah a ere peba mahwah - erohwah Joban nyapraangpa toangtang dangeka. 13 Ngale athângheh nga nang tânâng wãngerâng, Ngale Nga a hahtokkhoh ko dângpoatko are ngawah khuhah pa thinhungnâng mênchong chentonga ngama jabekang. 14 Ngama thinnâng nang nginpa thôkoh ekang, phumma hahtokkhoh wah hehma thinnâng chhihchoh eka, chengrãngma ngako, Nga a are hahtokkhoh rãng ledang dangekang rãngrãng, thinmin are hahtokkhoh rãng dangmah. 15 Ngama nangnâng thin a are hahtokkhoh wah toansietwên o ngama ngatdangmih, rohkomin Achhih wah pepâng lohma thien o ngama rosep eki. 16 Chenroh nga are hahtokkhoh rãng ledang dangekanga, ererãngrãng thinmin are hahtokkhoh rãng dangmah. 17 Nang toangtang pumma sâsiet lohma nangrãng hôanwak o; chenrãngma ngako, nang jabkhab pa toangtang. 18 Nangma Nga hahtokkhoh ko chenroh chienkat thanga, ererãngrãng ngamemin thin a are hahtokkhoh ko chienchhoan ekang. 19 Ngale thinrãng sênrãngma Nga dedema nangnâng kohrii eki, erohkoba thinmin linlin danglahma nangnâng ekohriiwak ho. 20 “Ngama thinrãng lolo rangsoam koh dangmek, thin ngin keplahma henhenma nganâng putedâlem ehanga, ereheh rangmemin soamkoh ekang. 21 Thinkhu phangtang wantherãng chendanga ngama soam ekang. Wa! thinmin nãngdemnâng chendanghi, chenroh nga nangnâng ngale nang nganâng dangeki rãngrãng thinmin wanthe chendanga. Eroh koba hahtokkhoh mihnyan nyuchha ma nga a nangma chienkatwah ngama eputedâlem hang. 22 Nangma ngamîn dongthukthang rãngrãng ngamemin thinmîn dongthuk ekang, erohkoba, nãng heh wanthe dangeki rãngrãng, thinmin wanthe edanga: 23 Nga thin hungkhen nâng, ngale nanga nga hungkhen nâng, erohkoba thin a linlin wantherãng eta danga, ngale erohkoba hahtokkhoh mihnyan hehma nga nangma chienkatwah ngama ejet a, ngale nganâng hun ehang rãngrãng thinnângmin huneko, ngama ejetwak a. 24 “Wa! thin a nangma nganâng lâkoh thang, ngale nga chenko dangekanga eretheko thinmin nga demnâng dângthuk hun ekang, erohkoba thinma nga mîndông pa ekhe hang, ere mîndông pa nangma nganâng kohwah; chenrãngma ngako, are hahtokkhoh hôan mama nangma nganâng hunwah. 25 Toangtang thôan Wa! Hahtokkhoh ma nang jetmahho, rohkomin ngama nang jeteki, ngale are hehma nga a nangma chienkatwah ngama jeteka. 26 Ngama nang thinnâng jetthuk eki, ngale Ngama roantangma nang jetthukjû edangang, erohkoba, nangma nganâng hun pa thinnângmin etonga, ngale ngamin thinnâng edangang.”
Jisu Loatkhhek
1 Jisu ma are rangsoam pa tâsoam diko, ate dijunte heh demnâng Kidron hahthung ranka ngenâng dânkatwah. Eretheko penri thong dângwah, phumma Jisu le ate dijunte heh eretheko wângwah. 2 Jisu chên sângte, Juda ma erethepa jetlahma dângwah, chenrãngma ngako, eretheko Jisu ate dijunte heh demnâng chîchohmîn wah. 3 Juda ma ate demko Soam aroakte adong ngale Farasi hehma chienkatwah Roman sipâhi ngale Rangsoamhum bemte heh sietlahma penri thongko hokwah; thinma dãng apah, wentit, ngale wennan heh semlahma hokwah. 4 Jisu ma ate khohnâng chenni hokmin a ereheh phangtang jetchoan dângwah, ephumma chohkhoam kalahma atema thinnâng ngatwah, “Nema henlem eken a?” 5 Thinma, “Nazarat wah Jisu lemki,” ngama dânthâng wah. Jisu ma, “Erepa Nga,” ngama dânthâng wah. Thin demko chênsângte Juda johchep lahma dângwah. 6 Chenthu Jisu ma thinnâng, “Erepa Nga,” ngama ngatko, thin a tokdi ngenâng ngadâ lahma hahko kôanjâwah. 7 Eredikomin Jisu ma thinnâng thôngphâ wah, “Nema henlem eken a?” Thinma, “Nazarat wah Jisu lemki,” ngama dânthâng wah. 8 Jisu ma thinnâng ngatwah, “Erepa Nga, ngama nenâng lâthô kotah,” “Nema ate lem medang enko, are ahan heh chenchhoan eka.” 9 (Arepa khemako atema chenni jabtah a erepa toangtang dângrãng ngatwah: “Wa, Nangma nganâng kohthang heh ngama wathemin mahphemek.”) 10 Simon Piter ngenâng dãng dângwah, phumma atema dãngpa toanlahma Soam aroakte adongthôan haanâng doaklahma ate nâchahpa jâdoakwah. Ere haa mînpa Malkus dângwah. 11 Jisu ma Piter nâng ngatwah, “Nang dãngpa ate thienthin theko ngakthien o! Ewa ma nganâng kohthang chêmchei pa ngama nekchenchoh eka ngama thonghun ehanga?”
Jisu Anas tânâng Siethok
12 Roman Sipâhi sahhab le ate sipâhi erediko Jews heh Rangsoamhum bemte hehma Jisu loatwah, ngale thinma khhek rewah, 13 Thinma khebengko Anas tâko siethokwah. Atea Kaipas dihiak wa dângwah, ere rangpâko Kaipas pa Soam aroakte adongthôan dângwah. 14 Kaipas ma Jews heh thôte jabte hehnâng mihnyan heh phangtangrãng wathe mihnyan ritpeba asen ngama thôkoh wah.
Piter ma Jisu Jetmek ngat
15 Simon Piter ngale dijunte ahan wathe Jisu diko junchhoan wah. Ere dijunte wathe pumma Soam aroakte adongthôanpa senthemthem jetlahma dângwah, erohwah Soam aroakte adongthôan humthakho ko Jisu demnâng ate johwângwah, 16 Ere poatko Piter a panlienko tôngwah. Phumma ere dijunte pa rangsâ nâng ngakka lahma pankâsek kowah chepte dihiaknya ko ngalahma, Piter pankhen nâng sietwênwah. 17 Pankâsek kowah chepte dihiaknya pumma Piter nâng ngatwah, “Nangmin ire mihnyan dijunte wanthe dangoni?” Piter ma, “Nga dangmek,” ngama dânthâng wah. 18 Erepa rangchhông poatko dângwah, erohwah, haa ngale abemte hehma wenthhek lahma wenko tumlit cheplahma lêmsahrit wah.
Soam Aroakte Adongthôan ma Jisu nâng Ngin Chhien
19 Soam aroakte adongthôan pumma Jisu nâng ate dijunte heh ngale atema hethôeka ngin heh junma chhienwah. 20 Jisu ma dânthâng wah, “Ngama roantangma mihnyan heh nâtatko chentô nâng thôkotek; Ngama chentôpa mihnyan heh anga nga roamkhôan thin Sanagog ngale Rangsoamhum nâng hethô wah. Ngama chenthumin ngale chennimin huhchhama thôho. 21 Nangma nganâng chenrãngma chhien ehanga? Henhenma Ngangin tatthanga ere mihnyan hehnâng chhien o. Ngama thinnâng chenni thôkotek a erepa thinnâng thongpha en - ngama chenjabtek a erepa thinma jet a.” 22 Chenthu Jisu ma aroh ngat poatko, erethe kowah abemte wathema Jisu thhenko watlahma ngatwah, “Nangma Soam aroakte adongthôan nâng chenroh tapaanglaang dânthang ekoa!” 23 Jisu ma atenâng dânthâng wah, “Ngama chenni komin methe jabtekko, chenpa thejabtek a erepa arekowah hehnâng thôkoh. Rohkomin ngama toangtang jabwah medang angko nangma nganâng chenrãngma wat ehanga?” 24 Erediko Anas ma khhek lahma Soam aroakte adongthôan Kaipas tânâng chienwênwah.
Piter ma Jisu Jetmek ngama Wîenngatwah
25 Eretheko Piter cheplahma wenko lemsahrii lahma tôngwah. Ephumma ahan hehma atenâng ngatwah, “Nangmin ire mihnyan dijunte dangoni?” Phumma Piter ma, “Nga dangmek,” ngama dânthâng wah. 26 Soam aroakte adongthôan haa, atea Piter ma nâ jâdoaktah rãngma tangkâ dângwah, phumma erepumma ngatwah. “Nanga ngama ate demnâng penri thongko khetih?” 27 Erepoat komin Piter ma, “Nga dangmek,” ngama wîenngat wah - phumma lemlienma wowênwah.
Jisu Pilat tânâng Siethok
28 Rangkhahkho ma Jisu, Kaipas humwah Govono humnâng sietkatwah. Jews heh thôte jabte heh Govono humkhen nâng lupwãngwak ho, chenrãngma ngako, Adankhoam lokuh phhekchhah jienchhahrãng, thin a niemarang junko asâma tônghunwah. 29 Ephumma Pilat ma rangsâ nâng thintâko loatka lahma thinnâng thôngphâ wah, “Nema are mihnyan pa chennâng thelahma sekham eken a” 30 Thinma, “Atema lechhihmo nomeko nima nang tânâng lesiet huminwah” ngama dânthâng wah. 31 Pilat ma thinnâng ngatwah, “Eroh medang ako nema sietchhoan letma neniem junko sekham en.” Thinma dânthâng wah, “Niniem junko nima mih henjô tarit phemih.” 32 (Arepa Jisu ma rekthe ate chenroh ritmin a, erejunma jabtah pa toangtang dângrãng dângwah.) 33 Pilat ma ate humkhen nâng ngakwãng lahma Jisu nâng roowah. Ngale atema chhienwah, “Nanga Jews heh Lowang ne?” 34 Jisu ma dânthâng wah, “Are nginpa nangdede hungwah thôngphâ ehangle, nangnâng ngajunma henma komin thôkoh thoa?” 35 Pilat ma dânthâng wah, “Nangma Nga a Jews ngama lethonghun ehanga? Nedede mihnyan ngale Soam aroakte adong hehma nanga nga dekko siethukoh ehang. Nangma chenni motoh a?” 36 Jisu ma ngatwah, “Nga Hahsôngpa are hahtokkhoh korãng dangmah; Nga Hahsôngpa are hahtokkhoh korãng dângnomeko, ngadijunte heh loatmîn lahma Jews heh thôte jabte hehnâng Nga lelo thukminwah. Nga Hahsôngpa are hahtokkhoh korãng dangmah!” 37 Ephumma Pilat ma atenâng chhienwah, “Eroh medang ako nanga lowangne?” Jisu ma dânthâng wah, “Nangma Nga a Lowang ngama lâpun ngathang. Ngama toangtang thôrãng, ngale ererãngma lolo jôba nga chhatwah, ngale ererãngma lolo jôba are hahtokkhoh ko kaerâng. Erohwah henhen toangtangko dangeka erehehma ngangin etathang.” 38 Pilat ma chhienwah, “Toangtang pa chennia?”
Jisu Ritpherãng Nginpat
Erediko Pilat rangsâ nâng mihnyan heh tânâng ngakka lahma thinnâng ngatwah, “Ngama ate ritphe rãng chenjô chhihmo lahma chohkhemek. 39 Rohkomin neniem junko, Ngama Adankhoam lokuh roakweih phâtek nâng khhekte nerãng rânglaang phekoh a. Phumma nema Jews heh Lowang pa laangphekoh hun ekenle?” 40 Thinma raklahma dânthâng wah, “Nima ate hunmih! Nima Barabas ba huneki!” (Barabas pa mihngoan dângwah.)
1 Erediko Pilat ma Jisu sietchhoan thuk lahma watthukwah. 2 Sipâhi hehma suhkãngwah khophok hôanlahma Jisu khoko phokkohwah; erediko thinma atenâng khetchek pa pohkoh rewah 3 ngale ate tâko hûlahma atenâng ngatwah, “Jews heh Lowang roandônglo hin o!” Ngale thinma ate tâko wãng lahma thhenko watwângwah. 4 Eredikomin Pilat rangsâ nâng thengakka lahma mihnyan hehnâng ngatwah, “Sûtan en, Ngama ate ritphe rãng chenjô themo lahma chohkhemek, erepa nema chenkhe en ngama netânâng rangsâko sietkatkoh a.” 5 Erediko Jisu suhkhophok pa phok ngale khetchek pa poh lahma loatkatwah. Pilat ma thinnâng ngatwah, “Sûtan en! Mihnyan pa anã!” 6 Chenthu Soam aroakte adong ngale Rangsoamhum bemte hehma ate khephumma, thinma rakwah, “Arittekre en! Arittekre en!” Pilat ma thinnâng ngatwah, “Eroh medang ako, nema sietchhoan letma rittek chhoan en. Ngama ate ritphe rãng chenjô themo lahma chohkhemek.” 7 Mihnyan hehma ngakdânthâng wah, “Ninâng niem tonghi, ngale ere niem junko ate ritphe rêmin, chenrãngma ngako, atema Joban Chha ngariieka.” 8 Chenthu Pilat ma erepa tatphumma, ate ajahthem bâmcheiwah. 9 Atema humkhen nâng ngakwãng lahma Jisu nâng chhienwah, “Nanga chennangwah hûeroa?” Rohkomin Jisu atenâng dânthangho. 10 Phumma Pilat ma atenâng ngatwah, “Nangma nganâng ledanthang minne? Thonghun o, Ngama nang laangphemin tare e, ngale rittek thukmin tare e.” 11 Jisu ma dânthâng wah, “Joban ma nangnâng koh diba ngakhohko nangnâng chaantong eho. Erohwah henma nang tânâng Nga siethu ehanga erepumma papchhihthôan moeka.” 12 Chenthu Pilat ma erepa tatphumma atema, Jisu laangpherãng hunwah. Rohkomin mihnyan hehma rakwênwah, “Nangma ate melaangphe oko, nanga Chofa lemrujô dangmoh! Henma komin atea Lowang ngama châeka pa Chofa lelatnâng dangeka!” 13 Chenthu Pilat ma are jabkhab heh tatphumma, atema Jisu rangsâ nâng sietkat lahma “Longwah hôanwah the” ngamamîn eka kowah nginpatte tôngthinko tôngkatwah. (Areko Hibru jabma “Gabbatha” ngaeka.) 14 Erepa Adankhoam lokuh majâ rangngih mongko dângwah. Pilat ma mihnyan hehnâng ngatwah, “Ne Lowang pa anã!” 15 Phumma thinma danrakwên wah, “Aritphe re en! Aritphe re en! Arittekre en!” Pilat ma thinnâng chhienwah, “Ngama ne Lowang pa rittek chenrea ngama huneha?” Soam aroakte adong pumma dânthâng wah, “Nirãngma Lowang pa Chofa loloba etonga!” 16 Ere diphumma Pilat ma thinnâng Jisu ritphe thukwah.
Jisu Rittek
Ephumma thinma Jisu sietchhoanwah. 17 Jisu ma ate bãngphak pa pelahma chhoanwah, ngale “Khora sekthinthe,” ngaeka theko pêwênwah. (Erethepa Hibru jabma “Golgotha” ngaeka.) 18 Eretheko thinma Jisu rittekwah; ngale ate demko mihhanmin wanii johrittek wah, ere waniipa akêruko ngale Jisu amongko rittekwah. 19 Pilat ma nyapraang raanglahma bãngphakko betkohwah. Atema, “Nazarat wah Jisu, Jews heh Lowang,” ngama raanglahma betkohwah. 20 Ajahthem mihnyan hehma erepa weihwah, chenrãngma ngako, thinma Jisu rittektah thepa erehah kêko dângwah. Nyapraang pa Hibru jabma, Latin jabma, ngale Griik jabma raangwah. 21 Soam aroakte adong pumma Pilat nâng ngatwah, “‘Jews heh Lowang’ ngama nekraang, ‘Are mihnyan pumma nga a Jews heh Lowang’ ngaeka, ngama raango.” 22 Pilat ma dânthâng wah, “Ngama chenni raangtek a erepa lâraangtek, lerephe tumin.” 23 Sipâhi hehma Jisu rittek diko, thinma ate khet pa toanlahma chinbelii rãng chinsiet lahma sipâhi heh chinru phenwah. Ngale khetkhen nâng pohthin khetlo pemin tôanwah, are khetpa choatphin wah ledang dângwah. 24 Sipâhi heh jabmînwah, “Are khetpa chinsietmih; henma chenchoh ea, ngama longkendoh lihma tan e.” Arepa Joban nyapraangpa toangtang dângrãng lôamwah: “Thinma ngakhet pa thintungko phenkep eka ngale ngakhetlo rãngma longkendoh lahma tanwak eka.” Ngale Sipâhi hehma eroh rewah. 25 Jisu rittek bãngphak kêko ate nyong, ate nyong naa dihiaknya pa, Klopas tangnyu Mariam, ngale Mariam Makdaleni cheplahma dângwah. 26 Jisu ma ate nyong ngale atema nyahrãng huneka dijunte pa ereko cheplahma khewah; Ephumma Jisu ma ate nyong nâng ngatwah, “Atea nangchha.” 27 Erediko atema ate dijunte ko ngatwah, “Atea nang nyong.” Erejâ phumma dijunte pumma ate humnâng johsongrãng sietwênwah.
Jisu Rit
28 Ade phumma phangtang lâta dangtah ngama Jisu ma jetwah; ngale Joban nyapraangpa toangtang jiendângrãng atema, “Nga jolân riiekãng” ngatwah. 29 Eretheko titnâng angurti chhih mênchong thienlahma dângwah; ephumma jochupli pongpe noappa angurti chhihko rûmkatwah, ngale erepa Hisop bãngkãng rako hetlahma Jisu thunko tupsuh wênkohwah. 30 Jisu ma ere angurti pa joklahma, “Arepa lâthôantah!” ngatwah. Erediko ate khongut lahma ritwah.
Jisu Chham ko Pah ma Suhwah
31 Erediko Jews heh thôte jabte hehma rittektah mihnyan heh da heh ngoakkiak lahma thin mang heh bãngphak kowah jâtôanrãng Pilat wah thâwah. Thinma arepa Hokut batjâ dângkowah thâwah, ngale thinma Pientông jâko ere mang heh bãngphak khoko thienpa hunmah, chenrãngma ngako, ere Pientôngjâ rangwopa nyahrãng Asâthôan rangwo dângwah. 32 Ephumma Sipâhi hehma kalahma Jisu demko johrittektah mihnyan khebengwah dapa bengngoakkiak wah, ngale ere dikowah watheda pemin ngoakkiakwah. 33 Phumma chenthu thinma Jisu da ngoakkiak rãng katko, thinma Jisu riichoan khewah, erohwah thinma Jisu dapa lengoakkiak dângwah. 34 Rohkomin Sipâhi wathema ate pah pa toanlahma Jisu chhamko suhwênwah, phumma lemlienma hei le jo roamjenkat wah. 35 (Henma arepa khetah a ere mihnyan pumma nema chen putedâlem en ngama loatjabwah. Atema chenni thôtah a erepa toangtang, ngale atema toangtang thôekãng ngama ate dedema ajet.) 36 Arepa Joban nyapraangpa toangtang dângrãng moatwah: “Aterã hehwah wanthemin lethahmin.” 37 Ngale Joban nyapraangma arohmin ngatwah, “Thinma pahma suh ekako, mihnyan hehma esûa.”
Jisu Mangru
38 Erediko, Arimatha hahwah Josep ma Jisu mangpa tajâtoan angle ngama Pilat nâng chhienwah. (Josep pa Jisu dijunte dângwah, rohkomin atea huhhuhchha dângwah, chenrãngma ngako, atemin Jews heh thôte jabte heh ranchei dângwah.) 39 Khemako rangpen nâng Jisu tânâng chohmîn hutah Nikodima min myrh ngale aloe demnâng sakmîn lahma tientumli pa roakrem litat dangnemnem keplahma Josep demnâng johwângwah. 40 Mihnyan wanii pumma Jisu mangpa jâtoan lahma Jews heh mangru niem junko thinma tientumli heh demnâng johdoapwah. 41 Jisu ritphetah kêko penri thong dângwah, ngale eretheko mihhan mang henjô mathatru mangruk nyan dângwah. 42 Ngale erejâpa Pientông majâ dângwah, erediko mangruk pa atheko dâng phumma, thinma Jisu mangpa ere mangrukko rukatwah.
Sekhota Mangruk
1 Dobatjâ rangkhah rangkhoko, rangnyek thuma, Mariam Makdaleni mangruk nâng kalahma mangruk kenwah longpa loangphe chhoan khekatwah. 2 Atema ngakchhoanwãng lahma Simon Piter le Jisu ma dijunte atema nyahrãng huntah niinâng thôkoh wah, “Thinma mangruk wah Teso pechhoantah, ngale thinma chenko thienchhoan eka erepa nima jetmih!” 3 Ephumma Piter le ere dijunte nii mangruk nâng katwah. 4 Waniilat chhoanchhoan katwah, rohkomin wanthe dijunte pa Piter noma achaan chhoankala lahma mangruk nâng khekho hokkatwah. 5 Atema kunjup lahma sûwên tahpa khetlolo khewênwah, rohkomin ate akhennâng lupwãngho. 6 Ate didiko Simon Piter katwah, ngale ate kalahma mangruk khenko tintin lupwângwah. Phumma ate memin ereko khetlolo tongla lahma khewah 7 ngale ere khetpa Jisu khokowah khetpa dângwah. Ere khetpa Jisu mang doapkhet demko ledang thehannâng atedede tenrii lahma dângwah. 8 Erediko mangrukko khema hukatah dijunte pemin junlup wângwah; ate memin erepa khelahma putewah. 9 (Thinma ere poatkomin Joban nyapraangma ate ritwah ngakhînmin ngama ngatahpa letajet dângwah.) 10 Erediko dijunte nii humnâng ngakwâng wah.
Jisu Mariam Makdaleni tâko Hông
11 Mariam mangruk thakhoko seplahma dângwah. Atema asep jenjenma, kunjup lahma mangruk khenko sokwênwah 12 ngale rangkhethung wah Joban ngintatte wanii khetpo keplahma Jisu mang thientah theko, kho ngeko wathe ngale da ngeko wathe cheplahma khewênwah. 13 Thinma atenâng chhienwah, “Dihiaknyu, nanga chenrãngma sep ekoa?” Dihiaknyu pumma dânthâng wah, “Thinma nga Teso pa pechhoan eka, ngale thinma chenko thienchhoan eka erepa ngama jetmek!” 14 Erediko atema litphong lahma eretheko Jisu cheplahma chohkhe wah; rohkomin erepa Jisu ngama atema jet ho. 15 Jisu ma atenâng chhienwah, “Dihiaknyu, nanga chenrãngma sep ekoa?” “Nangma hen lemsû ekoa?” Dihiaknyu pumma erepa penri thong bemte edangthem a ngama thonghun lahma atenâng ngatwah, “Hethôte, nangma ate mangpa mepe chhoan tohko, chenko thienchhoantoh a erepa nganâng thôkohhang, ngama pechhoan lekma akhennâng ngaksekhû ang.” 16 Jisu ma atenâng, “Mariam” ngama roowah. Mariam ma Jisu ngeko litphong kalahma Hibru jabma, “Raboni!” ngama ngatwah, (Arepa “Hethôte” ngaeka.) 17 Jisu ma atenâng ngatwah, “Nganâng neksahlo hang,” “Chenrãngma ngako, Nga a Ewa tânâng mangak wãngekang. Rohkomin wãnglohma nganaa hehnâng thôkoh, nga a Ewa, ngale thin Wa min danga, erediko nga Joban, ngale thin Joban min danga, ate tânâng ngakwãng ekang.” 18 Ephumma Mariam Makdaleni wãng lahma dijunte hehnâng ngama Teso khetek ngama thôkoh wah, ngale Jisu ma atenâng thôkotah hehmin thôkoh wah.
Ate Dijunte heh tânâng Jisu Hông
19 Erejâpa dobatjâ dângwah, ngale dijunte heh rangjâ thahko kâsekpa seklahma aroamma khôanwah, chenrãngma ngako, thin a Jews heh thôte jabte heh ranchei dângwah. Ere poatko Jisu hûlahma thinmongko chephokwah. Ngale atema, “Nekhu mêmo dangen” ngatwah. 20 Atema aroh ngatdiko, thinnâng ate dak le chham pa khesokwah. Phumma Teso khelahma dijunte heh nyahrãng khuhah nâhah dângwah. 21 Jisu ma thinnâng eredikomin ngatwah “Nekhu mêmo dangen. Ewa ma nga chienkatthang rãngrãng ngamemin nekhu chienchhoan eka.” 22 Erediko atema thinnâng rekma metlahma ngatwah, “Asâthôanju tangchohtha en. 23 Nema mihnyan heh pap heh map mekoh enko, thinma map echoh a; nema thinnâng map lekoh kenko, thinma map lechohmin.”
Jisu ngale Thomas
24 Jisu thin tânâng hokpoatko echhi wanii dijunte kowah wathe, erepa Thomas (atenâng Didimas ngama ngaeka), aho dângwah. 25 Ephumma dijunte ahan hehma atenâng, “Nima Teso khetih,!” ngama thôkoh wah. Thomas ma thinnâng ngatwah, “Ngama ate dekwah sema tekmãn heh khelekma setekmãn hehnâng nga deksuma keh, erediko ate chhamko nga dekma sahlo lere kengko ngama putedâlem mek.” 26 Haptathe diko dijunte heh humkhen nâng wienthe ngakroam khôanwah, ngale erepoatko Thomas min dângwah. Kâsekpa seklahma dângwah, rohkomin Jisu hûlahma thinmongko chephû lahma ngatwah, “Nekhu mêmo dangen.” 27 Erediko atema Thomas nâng ngatwah, “Nang deksuma ako thatkeh tanhang, ngale ngadek hehnâng thatsû tanhang; erediko nang dekma ngachhamko thatlo tanhang. Nang hungnâng tungmaang pa jek reo, ngale nganâng putedâlem hang!” 28 Thomas ma Jisu nâng, “Nga Teso ngale nga Joban,” ngama dânthâng wah. 29 Jisu ma atenâng ngatwah, “Nangma nga khelohma ba putedâlem ehangni? Lekhe thangma putedâlemte hehma rangkepmin!”
Are Titab pa Chenrãngma Raangwah a
30 Jisu ma ate dijunte heh tâko lihân patritli moatlem hehmin ajahthem motah, ereheh are Titab ko raangthienmah. 31 Rohkomin are raangthien eka heh nema chenmam putedâlem en ngama raangthien eka Jisu pa Joban Chha, Misaia, ngale nema atenâng putedâlem junma ba nema roandông tâchohmin.
Dijunte Waengit tânâng Jisu Hông
1 Are dikomin rekthe, Tiberias josi kênâng Jisu ate dijunte heh tânâng hôngwah. Erepa aroh dângwah. 2 Simon Piter, Thomas (atenâng Didimas ngama ngaeka), Nathaniel (Galilijaa Kana hah kowah), Zibidi chha heh, ngale Jisu dijunte ahan wanii, thinkhu phangtang aroamma dângwah. 3 Simon Piter ma ahan hehnâng, “Ngama ngah lochhoan ang,” ngatwah. “Nimin nang demnâng johchhoanrii,” ngama ahan hehma atenâng ngatwah. Ephumma khôankhoma chhoanwah, rohkomin ere rangpen penliangko thinma chohloho. 4 Rangkhah san bânghongko Jisu jokahko cheplahma dângwah, rohkomin dijunte hehma erepa Jisu ngama jet ho. 5 Phumma Jisu ma thinnâng chhienwah, “Lemruchha heh, nema chenjô chohlo metne?” “Chennijô chohlomih,” ngama thinma dânthâng wah. 6 Jisu ma thinnâng ngatwah, “Nechaak pa khôankho dekchahko hatkattan en, eko nema roanche echohhat en.” Ephumma thinma chaakpa hatkat tahpa thinma tangak sietwên tûho, chenrãngma ngako, thinma ngah jahmõang chohhat wah. 7 Jisu ma nyahrãng huntah dijunte pumma Piter nâng ngatwah, “Arepa Teso!” Chenthu Piter ma erepa Teso ngama chohtat phumma, Piter ma ate khet akhohwah pohthin pumma atedede doapkhhek ritwah (chenrãngma ngako ere sanpoatko atema khet koaklahma dângwah) ngale atea joko jâtoak katwah. 8 Dijunte ahan hehma chaakko ngah jahmõang keplahma khôankho pumma sâranko wângwah. Thin a bam kowah chentô letaangko dângwah, mitat roak ekhu totaangko dângwah. 9 Chenthu bamko hokwângko, thinma wenko ngah behlahma khewah, ngale bankênmin roanche chohkhe wah. 10 Erediko Jisu ma thinnâng ngatwah, “Nema athângheh lotet ngah kowah kattan ren.” 11 Simon Piter ma khôankhoko kalahma chaakko ngah mênchong bamko sietwênwah, phangtang tungko châthe roakbangâ larem dângwah; ngah pa atô jahjô medang komin chaakpa khajâho. 12 Jisu ma thinnâng, “Wãngren ngale chhah wãngren,” ngatwah. Ate dijunte hehma henmemin atenâng, “Nanga hen a?” ngama chinchhien ho, chenrãngma ngako, atea Teso ngama thinma jetwah. 13 Ephumma Jisu ma bankên pa semlahma thin tânâng kalahma thinnâng kohwah; ngale atema ngah pemin kohwah. 14 Jisu ritwah ngakhîn diko arepa ate dijunte heh demnâng lôremrãng chohmînwah.
Jisu ngale Piter
15 Thinma ereheh phhekchhah diko, Jisu ma Piter nâng ngatwah, “Jon chha Simon, are ahan heh noma nangma nganâng ajahhun ehangle?” “Teso huneki,” “Nangma ajet ngama nangnâng huneki,” ngama dânthâng wah. Jisu ma atenâng ngatwah, “Nga saakchha heh senthemthem sûareo.” 16 Eredikomin depnii Jisu ma atenâng ngatwah, “Jon chha Simon, nangma nganâng hun ehangle?” “Teso huneki,” “Nangma ajet ngama huneki,” ngama dânthâng wah. Jisu ma atenâng ngatwah, “Nga saak heh senthemthem sûareo.” 17 Lôremrãng Jisu ma atenâng wienngat wah, “Jon chha Simon, nangma nganâng hun ehangle?” Piter hungkewah, chenrãngma ngako Jisu ma atenâng lôrem “nangma nganâng hun ehangle”? ngama thôngphâ wah, ephumma Piter ma Jisu nâng ngatwah, “Teso, nangma chentôpa jet; nangma ajet ngama huneki!” Jisu ma atenâng ngatwah, “Nga saak heh senthemthem sûareo. 18 Ngama toangtang thôkoh eka: Chenthu nea roandông lochaan poatko, nedede hungsiko chennâng chhoan hun eken a ereko rângchhoan en; phumma chenthu ne teka phannang medang tetko, nema nedek pa loatsiet ere en, ngale mihhanma khhek lahma chenko ne chhoan lehunthe a eretheko esiet chhoanhèn.” 19 (Jisu ma arepa Piter chenroh riilahma Joban mîn dôngthuk min a erengin pa jabwah.) Erediko Jisu ma Piter nâng, “Ngadijun hang!” ngatwah.
Jisu ngale Dijunte Ahan wathe
20 Piter litphong lahma sûtahpa ate tokdiko dijunte ahan wathe chohkhe wah, erepa Jisu demnâng phhekchhah chhahpoatko Jisu tâko kiettong kalahma, “Teso, nang henma chênsângmin a?” ngama thongphâte pa dângwah, ngale atenâng Jisu ma nyahrãng hunwah. 21 Chenthu Piter ma ere dijunte pa khephumma, atema Jisu nâng chhienwah, “Teso, are mihnyan pa chenroh dângmin a?” 22 Jisu ma atenâng dânthâng wah, “Atea Nga mangak ngakka ahînma tôngthuk mehun angko, Nangjã tanga chenroh dângmin a? Ngadijun hang!” 23 Ephumma Jisu dijunte heh chhangko are dijunte wathepa lerii tumin ngama thôlahma ngin hôngwah. Rohkomin Jisu ma ate leriimin ngama ngaho; Jisu ma, “Ngama atea Nga mangak ngakka ahînma tôngthuk mehun angko, Nangjã tanga chenroh dângmin a?” ngamaba ngatwah. 24 Ere dijunte pumma are ngin heh jabwah, ngale areheh atema raangthienwah; ngale nãngma ajet atema chenni jabtah a erepa toangtang.
Athôan
25 Are heh lekomin lihân moatlemmin Jisu ma jahmõang moatwah. Ereheh wanwanthe ma phangtang raangthien nomeko, Ngama thonghun ekang hahtokkhoh ma leta toanpetu lândangroh raangmin wah.