Shah-i Phai Leipü
1 Chongpangpülei Shah nyu, hatü Shah Kahvang mü nyu, hatü Shah-ü Kahvang nyuteke. 2 Büpayü chongpangpülei Kahvang mü nyu. 3 Douthü peü büpa homei vam; lingei nyupü douthü peü büpa ne-omi hükao neling. 4 Büpa kü yangnyuyem nyu, hatü ha yangnyu-ü hangkuli peüei vangngai nyuteke. 5 Hapa vangngai-i shangmang kü khang, hatü shangmangi ha nemettükaok. 6 Kahvang leipü shompü shennyak hük Johan shei mentü nyu. 7 Peüi büpa homei hinglemhen shingvaishi büpai hapa vangngai nang denpü shuohhen denbü hük vaishi pei. 8 Büpayü hapa vangngai nevai, shejao büpai hapa vangngai nang denpü shuohhen pei. 9 Peü kü vangngai shuohpü hapa hingshangpü vangngai kahdoknyülei pei. 10 Büpa kahdoknyülei nyu, hatü kahdoknyü-ü büpa homei ling, shejao kahdoknyüi büpa nenying. 11 Büpa laophülei nanglak touei pei, shejao laophülei nanglaki büpa neyah. 12 Shejao üami büpa yah, büpalei men kü hinglem, büpai hathü peü kü Kahvang hathü leihen ngan shuohteke. 13 Jomphongü iy nevaijü phai-i mongpü nevaijü hangku-i mongpü kü bühpü nevai, shejao Kahvangi bühpüthü. 14 Hapa Shah phai lei hatü jen mü nyu, hatü jeni büpalei müknyinshekhang, Pa leipü Halomei müknyinshekhang keiha phahji hatü shahhingi maei eeteke. 15 Johani büpa nang denpü shuoh. Büpai lenei, “Ngei üpa nang e, hayü büpa hih. ‘Ngei pheikü üpa peikünya, büpayü ngei mü longpüba; mehenangkü büpayü ngei shekü nyuhampeih. 16 Büpalei phahji mapü kübü jen peü moihiman hük pheikü hük dangteke. 17 Mehenangkü shahkungü Mosa homei shuoh, shejao phahji hatü shahhingü Jisu Khrista homei peipeih. 18 Üpaiyao Kahvang ne-ee, shejao hapayü Kahvang Halom Ha, üpa Pa philei nyu, büpai büpa nyinghüteke.’ ”
Johan Baptükbüi Denpü Shuohpü
19 Hapayü Jehoda ami Jerusalem leipü ngongpathü hatü Levi ami büpa kü, “Nüng üpaang?” shei phenüng shomshingkü Johani shuohpü denpü nyüke. 20 Büpai nelahpih shei ne-e, shejao ngaiheyei, “Ngeiyü Messiah nevaipih” shei lahteke. 21 Jomi büpa kü, “Shejema nüng üpaang? Nüngü Elijah je?” shei phe. Büpai, “Nevaipih” shei e. Nüngü thibü je? Büpai, “Nevaipih” shei jang. 22 Jomi büpa kü, “Nüng üpaang? Hamphong shompüthü kü ejahen shahnyok yahshih. Nüngi nüng nang mehe enya?” shei phe. 23 Büpai jangei Isaiah thibüi epükei, “Ngeiyü Shembüpalei lem kangshangi temtuh shei jahpanei lenpü ngeü hük hih” shei eteke. 24 Shaang jomphongü Pharisee khong kübü shomteke. 25 Jomi büpa kü, “Shejema nüngü Messiah-ao nevai, Elijah-ao nevai, nevaijü thibü hükao nevaivai-i mehekei baptüknya?” shei phe. 26 Johani jomphong kü, “Ngei yungi baptüknyeih. Am khongkü ammi nenyingi hük yaongshi nyüke, 27 ngei pheikü üpa peikünya, ngei büpalei lathuhvü dangkao laihen neshangangpih” shei e. 28 Hapayü Bethany kahdokei Johani baptükei nyupü Jordan yungdang philei vamteke.
Kahvang Mi Cheha
29 Nyihphei Jisu büpa philei heihja-i eeyei büpai, “Kahdoknyü mang koei lüdaipü Kahvang Mi Cheha kü veituh” shei e. 30 “Ngei pheikü shennyak hük peikünyüke, büpa ngei mü longpüba; mehenangkü büpa ngei shekü nyuhampeih” shei ngei ehampeyü büpa hih. 31 Ngeiyao büpa nenyingham, shejao büpa Israel am kü shakei vamhühen tata kü ngei yungi baptükei peipeih. 32 Johani, “Ngei vangsho leipü Laangha athuba kei yiüei büpa kü bakpü eepeih” shei denpü shuoh. 33 Ngeiyao büpa nenyingham, shejao üpai ngei yungi baptükhen shom, büpai ngei kü, “Üpa kü nüngi Laangha yiüei bakei ee, büpai Laangha Daülangpai baptükphahen shei ephopeih, 34 hatü ngei nyingiyao eeteke, hatü hapayü Kahvang Ha shei denpü shuohnyeih” shei eteke.
Shongpü Jisulei Nanglomthü
35 Shao nyihphei Johani büpalei nanglom nyi mü yaongshi nyu, 36 hatü büpai Jisu kamei daijapü eeyei büpai, “Kahvang Mi Cheha kü veituh!” shei e. 37 Mechem büpai ha epü nanglom nyi-i danpa, jijinyi-i Jisu phei mü. 38 Yaakei veishingkü Jisui jiji müjapü eeyei, “Anji mehe napa?” shei phe. Jijinyi-i, “Rabbi, lappai, ‘Nyuhbü’ nüng melei nyunya?” shei phe. 39 Büpai, “Peiyei veituh” shei e. Hanangkü jiji daiyei büpa nyupü shing ee, hatü ha nyih büpa mü themteke. Hapayü an baji yangkü nyuteke. 40 Johani epü danei Jisu phei müpü nyi khongkü hükü Simon Peterlei chenaü Andrew nyu. 41 Büpai shongei chejei Simon pongei büpa kü, “Hamphongi Messiah, (lappai, Khrista) pongpeih” shei e. 42 Büpai Jisu touei büpa müei dei. Jisui büpa kü veitü, “Nüngü Johanei cheha Simon. Nüng kü Cephas, (lappai, Peter) shei nyükhen” shei eteke.
Jisui Philip hatü Nathanael Nyi Nyükpü
43 Nyihphei Jisui Galilei heihhen tem. Büpai Philip heüei, “Ngei phei mükei” shei e. 44 Shaang Philipü Andrew hatü Peter am ching Bethsaida leipü nyuteke. 45 Philipi Nathanael pongei büpa kü, “Hamphongi Nazareth am Josephei cheha, üpa jung Mosai shahkungnyüthü kü hatü thibüthüi eyei nyu ha pongtepih” shei e. 46 “Nazareth leipao lemhük mei vamaokhen je?” shei Nathanaeli phe. Philipi, “Peiyei veituh” shei e. 47 Mechem Jisui Nathanael ngoijapü eepa, “Meheyao shahshem neshiüpü hingshangpü Israel am hatouei nyüke” shei büpai büpa nang e. 48 Nathanaeli, “Nüngi ngei mekei nyingpa?” shei phe. “Philipi nüng kü nyükshekü ngei nüng adhapü phangei uoshi eetepih” shei Jisui jangei e. 49 Nathanaeli jangei, “Nyuhbü, nüngü Kahvang Ha khih! Nüngü Israel amei Ongpa khih!” shei e. 50 Jisui, “Ngei nüng adhapü phangei uoshi eepeih shei ephopü nangkü nüngi ngei kü hinglemnyu je? Nüngi hathü mao longpü douthü eehen hih” shei e. 51 Shao büpai büpa kü, “Hingmei mü ngei nüng kü enyeih, nüngi vangsho shaden aptüktü Shennyak Ha shak kü vangsho phongshanthü aongpü leipü eehen hih” shei eteke.
Kana Chingei Yiükjingpü
1 Nyih jempabü kü Galil kahdok Kana chingei yiükjing mo hük nyu, hatü halei Jisulei chenyüao omei nyu. 2 Hapa yiükjing mo kü Jisu hatü büpalei nanglomthü kao nyük. 3 Mechem yiü kemdaipa, Jisulei chenyüi büpa kü, “Jom yiü kemdaiteke” shei e. 4 Jisui pinnyü kü, “Nyüha, ngei mehe dükhen, ha nüngi te-epha. Ngelei hepak shao mangngoi” shei e. 5 Chenyüi chongphobüthü kü, “Büpai mehe ephahenshang ha düktuh” shei e. 6 Shaang Jehoda amei vanglem aimü daühen shingvaishi dük dok kho hük shing shüpü yaongi lingpü yungdük vok shemshi nyuteke. 7 Jisui jomphong kü, “Hathü yungdük kü yung maei shihtuh” shei e. Jomi dükju thahshi yung müngteke. 8 Hapheikü büpai jomphong kü, “Shaang haleipü hanei shoei mo shembü touei deijatuh” shei e. Hanangkü jomphongi ha dei. 9 Mechem nemnopüthüi yungi lingpü yiü kü jepei veipa, yung shopü chongphobüthüi nyingjao ha meleipü nemnopüthüi nenyingi jomi mo shembüpa kü nyüktü, 10 büpa kü, “Peüi meipü yiü shong shuohnyeih; yenthüi moh-ei yingpheikü mon maani nemeipü yiü bhenyüpeih, shejao nüngü shaang thahshi hajük meipü yiü joshi angpü je?” shei phe. 11 Jisui hayü Galil kahdok Kana chingei shongpü yashanpü dou dükei pangpü nyuteke. Hapakei büpalei müknyinshekhang shakei vam, hatü büpalei nanglomthüi büpa kü hinglem. 12 Hapheikü büpai chenyü, chenaüthü hatü nanglomthü mü Kapernaumei yiüei halei nyih maani nyu.
Jisui Phopshem Daühüpü
13 Jehoda amei Hompü Mo yoei nyushi Jisu Jerusalemei aong. 14 Phopshemei büpai mohoh, mi hatü athuba, hatü lop jeiteipüthü haüdü touei uoshi ee. 15 Büpai vülepi bheiyaki phopshem leipü mohoh hatü mithü changtük. Büpai shao lop jeiteipüthülei lop haitük hatü jomei haüdü khüptük. 16 Büpai athuba yupüthü kü, “Hatoueipü hathü dou yahlangtuh! Opalei shem amphongi bhei leihshing teleitük!” shei e. 17 “Nüngei shem kü nyakpükenpai ngei awi kei hahtükhen” shei nyangei nyupü büpalei nanglomthüi deih-ei dang. 18 Hahepak kü Jehoda ami büpa kü “Nüngi hathü peü dükhen wong nyüpeih shei huaokhen mü mehe nyangeihepü huaokhen?” shei eteke. 19 Jisui jomphong kü, “Hapa moila shem bentü nyih jem mongkü shao vehen hih” shei e. 20 Hahepak kü Jehoda ami, “Hapa phopshem bong pinyipü vok yah-ei vepeih, shejema nüngi nyih jem mongkü bentü veaokhen je?” shei phe. 21 Shejao büpai büpalei büm phopshem jung eteke. 22 Büpa dipü kübü yangei leipheikü büpalei nanglomthüi büpai ha epü khih shei deih-ei dang, hatü jomi laihing hatü Jisui epü shahthü kü hinglem. 23 Mechem Hompü Mo hepak kü büpa Jerusalemei nyupa, longshi shing büpa kü hinglem; mehenangkü jomi büpai dükpü yashanpü douthü eeteke. 24 Shejao Jisui payü jomphong kü hingnelem; mehenangkü büpai nanglakthüi deihpü peü nyingdai, 25 hatü büpa shingvaishi shennyak hük shing shennyak hük leipü denpü nadang neshiü; mehenangkü shennyak peü kü mehe nyu, ha büpai nyingdaikem.
Jisu hatü Nikodemas
1 Shaang Pharisee am Nikodemas shei mentü Jehoda am mübü hük nyu. 2 Büpai nyak kü Jisu touei peiyei büpa kü, “Nyuhbü, nüngü Kahvang leipü yiüpü nyuhbü shei nyingnyüke; mehenangkü Kahvang ne-ompheikü nüngi dükpü nyangeihepü douthü üpaiyao nedükaokpih” shei e. 3 Jisui büpa kü, “Hingmei mü ngei nüng kü enyeih, nyipabü nebühpheikü üpaiyao vangsho ongching dangnüng neaokpih” shei e. 4 Nikodemas-i büpa kü, “Shennyak hük viüdaipheikü mekei etü anghen? Shennyak hük shao nyüei vom mongei shütü anghen je?” shei e. 5 Hingmei mü ngei nüng kü enyeih, shennyak hük yung hatü Laanghai nebühpheikü mekei etao vangsho ongchingei shününg neaok. 6 Mehe phai-i büh, hayü phai, hatü mehe Laanghai büh, hayü laangha. 7 “Nüng nyipabü angtuh” shei ngei epü kü nüng tethama. 8 Vanglüki melemei lükhünya, halemei lüknyüke. Nüngi hapalei ngeü dannyüke, shejao nüngi ha melemeipü peinya, hatü melemei dainya, ha nüngi nenying. Hapa keiha Laangha kü angpü peü nyunyüpeih. 9 Nikodemas-i, “Hathü mekei aokhen” shei büpa kü e. 10 Jisui büpa kü, “Nüngü Israel amei nyuhbü hük khih; shejema nüngi hathü nenyingpü je?” shei e. 11 Ngei nüng kü hingmei enyeih, jeni nyingei nyupü jung jeni eteinyeih, jeni eepü jung jeni denpü shuohnyeih, shejao ammi hamei shahjangmei neyah. 12 Ngei amphong kü kahdoknyü douthü jung ephüjü ha kü hingnelem, shejema ngei vangsho leipü douthü jung ephüjü mekei etü ammi hinglemhen? 13 Vangsho leipü yiüpü Shennyak Ha mü lenei üpaiyao vangsholei ne-aong. 14 Mosai jahpanei biü lungei anpü keiha Shennyak Hayao lungei anshihhen, 15 hatü üami büpa kü hinglem yangnyuyem danghen. 16 Mehenangkü Kahvangi kahdoknyü kü longi bampü nangkü büpai laophülei Halom shuoh; üami büpa kü hinglem nemahhen, shejao düngeipü yangnyuyem danghen. 17 Mehenangkü Kahvangi kahdoknyülei laophülei Ha kahdoknyü nyonghühen shingvaishi nevai, shejao büpa homei kahdoknyü yanghen shingvaishi shompeih. 18 Üpai büpa kü hinglemnya, nenyonghünyih; shejao üpai hingnelem, nyonghütükteke; mehenangkü hathüi Kahvang Halomei men kü hingnelem. 19 Shahphenpü dou-ü ha: Vangngaiyü kahdoknyülei yiü, shejao hangkuthüi vangngai nangjei vangnyak küang bam; mehenangkü jomei douthü-ü mang nyuteke. 20 Mehenangkü mang dou dükpü peüi vangngai kü jiühitnyeih, hatü jomei mang douthü shakei vamjahen khih shei nyemei vangngailei nepeinyih. 21 Shejao üami hingshangpü dou düknya, jomi mehe dük hayü Kahvang kü dükpeih shei huhen shingvaishi vangngailei peinyüke.
Jisu hatü Johan Baptükbü
22 Hapheikü Jisu hatü büpalei nanglomthü Judea kahmük lemei dai, hatü büpa halei kanja jomphong mü nyu, hatü baptükshuoh. 23 Johanao Salim yopai-i Aenonlei baptükei nyu; mehenangkü halei yung changshi nyu, hatü nanglakthü nedoh-i pei hatü baptükshuoh. 24 Hahepak kü Johanü khoklatei mangshü-i nyu. 25 Shaang Johanei nanglomthü hatü Jehoda am hük aa kü daühenlanghen vanglem nangkü shah dakteiyei nyu. 26 Jomi Johan touei peiyei büpa kü, “Nyuhbü, nüng mü Jordan yungdangei nyupüba, üpa jung nüngi denpü shuohpa, büpaiyao baptüknyüke hatü peü büpa touei peinyüke” shei e. 27 Johani, “Vangsho leipü shuohpü nevaipheikü üpaiyao meheyao nedangaokpih” shei e. 28 “Ngeiyü Messiah nevai, shejao ngeiyü büpa shekü yeihshi shompeih” shei ngei epü ha kü amphong denbüthü nyüke. 29 Yiükü yiükyahbülei nyüke. Yiükyahbülei küphüpai danei büpalei ngeü bangnyüke, hatü mechem büpai yiükyahbülei ngeü danhenshang mongongnyüke. Hayü ngelei mongong hatü ha changhüteke. 30 Büpa longkhan longhen, ngei maan khan maanhen.
Vangsho Leipü Peipü Hük
31 Üpa shangphi leipü pei, büpa peü shak kü longpüba; üpa kahdoknyü leipü nyupa, büpayü kahdoknyülei hatü kahdoknyü douthü jung enyeih. Üpa vangsho leipü yiü, büpa peü shak kübü. 32 Büpai mehe ee, hatü dan, ha jung denpü shuohnyeih, shejao üpaiyao büpalei denpü neyahnyu. 33 Üami büpalei shah yah, Kahvangü shahhing shei denpü shuohnyüke. 34 Büpa üpa Kahvangi shom, büpai Kahvangei shah enyüke, mehenangkü büpai Laangha maei shuoh. 35 Pa-i Ha kü bampü nangkü lemphüli büpalei lak kü shuohteke. 36 Üami Ha kü hinglem, yangnyuyem nyüke, üami Ha kü hingnelem, yangnyuyem nedanghen shejao Kahvang mongshihpü heühen.
Jisu hatü Samaria am Nyüha
1 Mechem Phariseethüi Johan meyü Jisui nyeishi nanglomthü leihüei baptüknyükeja shei danpa, 2 (Hingmei meyü Jisui üpa kao bapnetük, shejao büpalei nanglomthüi baptükteke), 3 büpa Judea leipü shao Galilei leidai. 4 Shejao büpa Samaria homei leihen mü nyuteke. 5 Hanangkü büpai Samaria kü nyupü Sykhar chingei pei; hapayü cheha Joseph kü Jakobi shuohpü kahdok yopailei nyu. 6 Hatouei Jakob yungkuk nyu, hatü yenlem kü nyiuei Jisu yungkuk touei uoshi nyu. Hayü haümhahphei hepak nyu. 7 Mechem Samaria am nyüha hük yung shohen heihjapa, Jisui pinnyü kü, “Ngei kü yinghen yung yahshih” shei e. 8 (Büpalei nanglomthü hahying shaknüng chingei aongdaitü nyu). 9 Hapa Samaria am nyühai büpa kü, “Nüngü Jehoda am khih; mekei etü Samaria am nyüha hük kü yung yünya?” shei e. (Mehenangkü Jehoda ami Samaria am mü bhaong chaihamteke.) 10 Jisui pinnyü kü, “Nüngi paoh Kahvangei thintho nyinglang meyü, ‘Ngei kü yinghen yung yahshih’ shei üpai nüng kü yünya, nüngi büpa kü vanyangyem yung yühah shepeih” shei e. 11 Hapa nyühai büpa kü, “Longpüba, nüngei yungshong neshiü, hatü yungkuk chüshi nyüke, nüngi meleipü ha vanyangyem yung dangnya? 12 Nüngü hamei bü Jakob mao longpü je? Büpai ham kü ha yungkuk shuohpeih, hatü büpalei hapeüthü hatü yemhimakthüi ha yingnyüpeih” shei e. 13 Jisui pinnyü kü, “Üami haleipü yung yingnya shao-üng yunglehen, 14 shejao üami ngei shuohpü yung yinghenshang mechemao yung nelehen. Ngei shuohpü yungü jom kü yunglok leiyei vanyangyem touei bhaoei vamhen” shei e. 15 Hapa nyühai büpa kü, “Longpüba ngei hajük kü mechemao yung nelehen, hatü hatouei yungsho neheihteinüng ngei kü ha yung yahshih” shei e. 16 Jisui pinnyü kü, “Leituh, ambaha nyükei heihkei” shei e. 17 “Ngei baha neshiüpih” shei hapa nyühai e. Jisui pinnyü kü, “Nüngi ngei baha neshiüpih shei epü jiüangke; 18 nüng baha nga nyuhampü khih, hatü shaang nüng mü nyupeyü nüngei baha nevaiang. Nüngi epeyü jiüangke!” shei e. 19 Hapa nyühai büpa kü, “Longpüba nüngü thibü hük khih shei ngei veiaoknyüke. 20 Hamei bühipathüi hapa kahshangei khümhampeih, shejao nanglakthüi khümhen shingü Jerusalem hih shei ammi enyüke” shei e. 21 Jisui pinnyü kü e, “Nyüha, ngei kü hinglemtuh; nüngi Opa kü hapa kahshang nevaijü Jerusalemei nekhümhen hepak ngoikünyüke. 22 Am Samaria ami üpa kü khümnya nenyingi khümnyüke; hami üpa kü khümnya ha nyingnyeih; mehenangkü yemleipeyü Jehoda kübü nyüke. 23 Shejao mechem hingshangi khümpüthüi Opa kü laangha hatü shahhingi khümhen, ha hepak ngoikünyüke hatü hayü shaang khih; mehenangkü Opai hapakei büpa kü khümpüthü yemnyüpeih. 24 Kahvangü laangha, hatü büpa kü khümpüthüi laangha kü, hatü shahhing kü khümhen vongbong.” 25 Ha nyühai, “Messiah lappai, Khrista peikünyüke shei ngei nyingnyüke, hatü mechem büpa peihen, büpai ham kü lemphü ephahen” shei eteke. 26 Jisui pinnyü kü, “Ngei, üpai nüng mü shah eteinya, hayü büpa hih” shei e. 27 Hahepak kü büpalei nanglomthü nyokei lei. Büpa nyüha hük mü shah eteipü eeyei jom peüi thama, shejao üpaiyao büpa kü, “Nüng mehe napa?” nevaijü “Nüngi pinnyü mü mehekei shah eteinya?” shei nepheshuoh. 28 Hapa nyühai pinnyülei yungdük yakphongtü chingei nyokei aong. Pinnyüi nanglakthü kü, 29 “Ngei dükei nyupü lemphüli ephopü shennyak kü peiyei veituh. Hapayü Messiah vaila?” shei e. 30 Jomphong ching leipü büpa mü pongnüng yiü. 31 Hahepak kü büpalei nanglomthüi büpa kü, “Nyuhbü, lemhük payü hahtuh” shei nyeanteke. 32 Shejao büpai jomphong kü, “Ammi nenyingpü ngei hahhen hahying nyüpeih” shei e. 33 Hanangkü nanglomthü hüki hük mü, “Hanei ami büpa kü hahhen lemhük shuohphei hiang yo?” shei etei. 34 Jisui jomphong kü, “Ngelei hahyingü ngei shompübai mongpü dükhen, hatü büpalei dou temhen ha hih. 35 Len ali mon angtü hahvet hepak ngoikahen shei ammi ne-enyu je? Shejao ngei am kü enyeih, shinei veituh, hatü hah vethen hah meandaipü kü veihümao. 36 Hah vetbüi nanglat dangnyeih, hatü yangnyu shingvaishi betjük thainyeih, shejüang li haibü hatü vetbü nyi chemi mongongnyeih. 37 ‘Hüki hainyeih, hüki vetnyeih’ shei epü jiünyüke. 38 Ammi nelingpü kah leipü vethen ngei am shompeih; mih-i ha lingteke, hatü jomi dükpü kübü nanglei ammi dangteke” shei e. 39 Hapa nyühai, “Ngei dükei nyupü lemphüli büpai ephopeih” shei denpü shuohpü homei hapa ching leipü Samaria am longi büpa kü hinglem. 40 Hanangkü mechem Samaria am büpa touei peipa jomi büpa kü jom mü nyuhen e, hatü büpa jom mü nyih nyi themteke. 41 Shao büpalei shah homei nyeishi hinglem. 42 Jomi ha nyüha kü, “Hami hajük keyü nüngi epü nangkü hinglemnyu nevaipih, shejao ham peüi laophü laophüi dantepih, hatü hingmei mü hapayü kahdoknyü Yangbü shei hami nyingteke” shei e.
Jisu Galilei Leipü
43 Mechem nyih nyi peihpa, büpai hapa shing leipü Galilei dai, 44 (mehenangkü Jisui thibü hükei chingei thibü hük kü dhüm neshuohnyih shei eteke). 45 Mechem büpa Galil ngoipa, Galil ami büpa ombomei yah; mehenangkü Jerusalemei mo hepak kü büpai dükpü dou lemphü eeteke; mehenangkü jomphongao mo kü daiteke. 46 Hapheikü büpai Galilei nyupü Kana, büpai yungi yiü leihüpü chingei pei. Shaang halei ongpalei lakchongbü hükei ha Kapernaumei tüngei nyu. 47 Mechem büpai Jisu Judea leipü Galilei leiteke shei danpa, büpa peiyei Jisu kü yiüei cheha tüngpü meitükshih shei khümei e; mehenangkü büpa dihen mü nyu. 48 Hahepak kü Jisui büpa kü, “Ammi yashanyale nyangeihepü ne-eepheikü hingnelemnyu” shei e. 49 Hapa ongpalei lakchongbüi, “Longpüba, naü didaishekü yiükütuh” shei e. 50 Jisui, “Nüng leituh, anha meidaitü chongkahen hih” shei e. Hapa shennyaki Jisui epü shah kü hinglemei layaongei lei. 51 Büpa leishingkü büpalei chongphobüthü büpa pongnüng aongpü heüei büpa kü naü meidaiteke shei e. 52 Hanangkü büpai hathü kü büpa meiyei pangpü hepak phe, hatü jomphongi büpa kü, “Menyih haümhahphei hük baji kü meidaipeih” shei e. 53 Chepai büpa kü Jisui, “Anha meidaitü chongkahen hih” shei eshuohpü hepak kü khih shei nying. Hanangkü büpa hatü shem am kemei hinglem. 54 Shaang hapayü Jisui Judea leipü Galilei leipheikü dükpü nyipabü nyangeihepü nyuteke.
Jisui Sabbath Nyih Meihüpü
1 Hapheikü Jehoda amei mo hük nyu, hatü Jisu Jerusalemei aong. 2 Shaang Jerusalemei Mi Shaden touei bangtap nga kohpü shemyung hük Hebrew shah mü Bethesda shei mentü nyu. 3 Halei tüngpüthü– mükphüngdaipü, la khodaipü, bümphi diyei tüngpüthü bangtapei lemshi yung jenpü danei nyu. 4 Mehenangkü hepak hepak kü vangsho phongshan yiüei hapa yung jenhamteke. Yung jenshan ieyei üpai shong halei laongei hünghenshang, mehe din vaijao meidaihamteke. 5 Halei shennyak hük bong hapüanpüshet thahshi tüngpü nyu. 6 Mechem Jisui büpa halei lemshi eepa, hatü büpa halei bong luangi nyuphei khih shei nyingei büpai büpa kü, “Nüng meihünyüla?” shei phe. 7 Tüngpü shennyaki büpa kü, “Longpüba, yung jenshingkü ngei yungei deihen shennyak üpayao neshiü. Mechem ngei heihnüng shei nyuhen, hanei ami ngei shekü heihdaitü mon nyunyüke” shei e. 8 Jisui büpa kü, “Yaongtuh, hatü nüngei lüng paitü kamtuh” shei e. 9 Chemjalak kü hapa shennyak meidai, hatü büpai lüng paitü kam. Hapayü Sabbath nyih nyuteke. 10 Hanangkü Jehoda ami tüngpü meipü shennyak kü, “Shinnyih-ü Sabbath nyih; nüngi nüngei lüng paitü kamhenü shahkung kü nejiü” shei e. 11 Shejao büpai jomphong kü, “Ngei meihüpü shennyaki ngei kü, ‘Nüngei lüng paitü kamtuh’ shei ephopeih” shei e. 12 Jomi büpa kü, “Nüng kü, ‘Nüngei lüng paitü kamtuh’ shei epü shennyakü üpaang?” shei phe. 13 Shejao hapa tüngpü shennyaki büpa tüngpü üpai meishuohpa nenying; mehenangkü Jisu-ü hatouei nyupü khong kü vukdaiteke. 14 Pheishi Jisui büpa phopshemei heüei büpa kü, “Veituh, nüng meidaiteke! Nüng hajük kü mang thah-ei tenyu; hei nevaijema lemhük nemeipü dhaümkahen” shei e. 15 Hapa shennyak daiyei Jehoda am kü büpa meihüpeyü Jisu khih shei eshuoh. 16 Hanangkü Jisui hapa keipü douthü Sabbath nyih dükpü nangkü Jehoda ami büpa kü shüveihen chongpang. 17 Jisui jomphong kü, “Ngelei Opai shinnyih-ao dou düknyüke, hatü ngeiyao düknyüpeih” shei e. 18 Ha tata kü Jehoda am nyeinya büpa jühen yem, mehenangkü büpai Sabbath mangpü mon nevai, shejao büpai Kahvang kü büpalei Pa shei nyükei büpa nying Kahvang mü hükkeipü leiteke.
Halei Wong
19 Jisui jomphong kü, “Hingmei mü ngei am kü enyeih, Ha-i büpai mongpü meheyao nedükaoknyih, shejao Pa-i mehe dükei ee, ha mon düknyüpeih; mehenangkü mehe mehe Pa-i düknya, Ha-i hapakei düknyüpeih. 20 Pa-i Ha kü bamnyüpeih, hatü büpai ha mao longpü douthü huphahen, shejüang am thamahen. 21 Pa-i dipü kübü yangei leitü jom kü yangnyu shuohpükei Ha-iyao büpai mongpüthü kü yangnyu shuohnyeih. 22 Pa-i üpa kao shah nephennyih, shejao shahphenpü peü Ha kü shuohtükteke, 23 shejüang Pa kü dhüm hupükei Ha kao dhüm huhen. Üpai Ha kü dhüm nehu, büpai büpa shompü Pa kü dhüm nehunyu” shei e. 24 “Hingmei mü ngei am kü enyeih, üpai ngelei shah banghen hatü ngei shompüba kü hinglemhen yangnyuyem nyüpeih, hatü shahphenpülei nepeihen, shejao dipü kübü yangnyuyem touei lüdaiteke. 25 Hingmei mü ngei am kü enyeih, dipüthüi Kahvang Halei ngeü danhen, hatü ha danpüthü yemmü nyuhen hepak ngoikünyüke, hatü hayü shaang khih. 26 Mehenangkü Pa kü büpa kü-üng yangnyuyem nyupü keiha Ha kao büpa kü yangnyuyem nyuhen shuohpeih; 27 hatü büpai büpa kü shahphenhen wong shuohpeih; mehenangkü büpayü Shennyak Ha nyüke. 28 Ammi ha kü tethama; mehenangkü mahngshalei nyupüthüi büpalei ngeü danhen hepak ngoikünyüke, 29 hatü haleipü paoei vamkahen; mei dükpüthü yangnyuyem touei yangei leikahen, hatü mang dükpüthüao nyonghühen shingvaishi yangei leihen.”
Jisu kü Denpüthü
30 “Ngei mongpü kü meheyao nedüknyih. Ngei danpükei ngei shahphennyeih, hatü ngei shahphenpeyü shahhing; mehenangkü ngei mongpü dükhen ngei neyemnyih, shejao üpai ngei shom büpai mongpü düknyeih.” 31 “Ngei-i ngei nying kü denpü shuohhahjema ngelei denpeyü nejiü. 32 Ngelei men kü denpü shuohpü hük nyüpeih, hatü büpalei denpeyü ngei keyü jiüangke shei ngei nying. 33 Ammi Johan touei phongmokbüthü shom, hatü büpai shahhing kü denpü shuohteke. 34 Ngei hangkulei denpü yahnyeih shei nevai, shejao am yanghen shingvaishi ngei hathü enyeih. 35 Büpayü bahpü hatü nyapü awdük nyuteke, hatü amphong kansho hük büpalei vangngai kü mongongshi nyu. 36 Shejao Johani denpü mao nyeipü denpü hük ngelei nyüpeih. Pa-i ngei kü temhen shingvaishi shuohpü ngei shaang dükpü douthü homei Pa-i ngei shompeih shei denpü shuohnyüke. 37 Ngei shompü Pa-i büpa nyingi ngei nangkü denpü shuohteke. Ammi büpalei ngeü mechemao nedan nevaijü büpalei dhe ne-ee; 38 hatü büpalei shah ammei mong kü netuh; mehenangkü büpai üpa shom, ha kü ammi hingnelem.” 39 “Ammi laihing yemnyüke; mehenangkü halei yangnyuyem nyüpeih shei ammi deihnyüke; ha laihingthüi ngei jung denpü shuohnyüke, 40 shejao yangnyuyem danghen shingvaishi ammi ngei touei peihen nemongnyu. 41 Ngei hangku leipü dupü-oupü neyemnyih, 42 shejao ammei mongdangei Kahvang bampü nenyu shei ngei nyingnyüpeih. 43 Ngei Opalei men kü yiüpeih, shejao ammi ngei neyah; lebü hük büpalei men kü peikülang meyü ammi büpa yahhen vaipeih. 44 Üpa mon Kahvang nyu, ammi büpa leipü peipü müknyinshekhang neyemi am hüki hük leipü dupü-oupü yemyaki mekei etü am hinglemhen? 45 Pa touei ngei am nyonghühen shei tedeih; am nyonghühenü ammi monglempü Mosa nyüke. 46 Ammi Mosa kü hinglemjema ngei kü hinglemhen vaipeih; mehenangkü büpai ngei jung nyangpeih. 47 Shejao büpai nyangpü kü ammi hingnelemjema, ngei epü kü mekei etü ammi hinglemhen?”
Haja Nga Ühyingpü
1 Hapheikü Jisui Galil Yungching hükphi lemei heih (hapa kü Tiberius Yungching sheiyao nyüknyüke). 2 Büpai tüngpüthü kü dükpü nyangeihepüthü eeyei khongnyü longpü büpa phei müshi nyuteke. 3 Jisui kahshangei aongei büpalei nanglomthü mü uo. 4 Shaang Jehoda amei Hompü Mo ngoihen yopailei nyu. 5 Mechem Jisui yaakei veipa büpai khongnyü longpü hük büpa lemei peijaei eeyei Jisui Philip kü, “Hathü nanglakthüi hahhen hahying jeni meleipü shakhenang” shei phe. 6 Büpai hapayü büpa kü dokei eteke; mehenangkü büpa laophü nyingi mehe dükhen ha nyingtüktü nyu. 7 Philipi büpa kü, “Jom peü maanbaongi hahhen dangkao len vokei nanglati hahying shakjao nechangükhih” shei e. 8 Büpalei nanglomthü khongkü hük Andrew, Simon Peterlei chenaüi büpa kü, 9 “Hatouei hashih hükei barley aan pha nga hatü nyah nyi nyüke. Shejao hapai hajükpü khongkü mehe vainüng” shei e. 10 Jisui, “Nanglakthü peü uohütuh” shei e. Shaang hatouei thüngkon longpü nyu; hanangkü peüshep shennyak haja nga hükshing hatouei uoteke. 11 Hapheikü Jisui ha aan yah-ei menvih shuohtü hatouei uopüthü kü bheteke; büpai nyah yah-ei hapakei jomi hahhüpüshük shuoh. 12 Mechem jom moh-ei hahpa, büpai nanglomthü kü, “Nedamnehuhen shingvaishi phuohinuo aopü thaituh” shei e. 13 Hanangkü jomi barley aan pha nga hahpüthüi aopü phuohinuo thaishingkü mühdow anpünyi nyuteke. 14 Mechem nanglakthüi büpai dükpü nyangeihepü eepa, jomi, “Hapayü kahdoknyülei yiükahen nyupü thibü khih” shei eteihen chongpang. 15 Jom peiyei vangmü lükei büpa ong vaihühen deihshi nyüke shei mechem Jisui nyingpa, büpa monha shao kahshangei aongdai.
Jisu Yung Shangkü Kampü
16 Mechem om dhüpa, büpalei nanglomthü yungei heih-ei, 17 ai mongei shü, hatü Kapernaumei heihhen yung homei dai. Sheyü nyakdai, hatü Jisu jomphong touei mangpei-i nyu. 18 Vanglük mangshi lükpü nangkü yung longi nemei-i jen. 19 Jom mile jem nevaijü ali hükshing yaatei heih-ei nyushi Jisu yung shangkü kamei ai yopailei peijapü eeyei jomphong longi nyem. 20 Shejao büpai jomphong kü, “Hayü ngei hih; tenyem” shei e. 21 Jomi büpa ai mongei shühahhüei deih, hatü jom ngoihen heihpü yungphaangei jom lomi ngoidai.
Shennyakthüi Jisu Yempü
22 Nyihphei yungdang phihük lemei nyupü shennyakthüi halei ai hük mon nyupü ee. Büpalei nanglomthü mü Jisu ai mongei neshüpü jomphongiyao eeteke, shejao büpalei nanglomthü mon daiteke. 23 Hapheikü Shembüpai moihimantü jomi aan hahpü shing yopailei Tiberius leipü ai hanei peiteke. 24 Shejao mechem shennyakthüi halei Jisu nevaijü nanglomthü üpayao ne-eepa, jomi ai kü uotü Kapernaum lemei Jisu yemei dai.
Jisu-ü Yangnyu Hahying
25 Mechem jomi yungdangei Jisu heüpa, jomi büpa kü, “Nyuhbü, nüng hatouei mechem heihpa?” shei phe. 26 Jisui jomphong kü, “Hingmei mü ngei am kü enyeih, ammi nyangeihepü eepü nangkü ngei yemnyu nevai, shejao moh-ei hahhen dangpü nangkü ngei yemnyu khih. 27 Shedailaidaihen hahying teyem, shejao vanyangyem nyuhen hahying yemtuh; hayü Shennyak Ha-i am kü shuohhen. Mehenangkü hapayü Pa Kahvangi büpa kü füoshang shingei nyüke” shei e. 28 Hahepak kü jomi büpa kü, “Kahvangi napü douthü dükhenü hami mehe dükhen?” shei phe. 29 Jisui jomphong kü, “Büpai shompü üpa nyüpa, büpa kü hinglemtuh; hapayü Kahvangei dou hih” shei e. 30 Hanangkü jomi büpa kü, “Shejema hami veitü nüng kü hinglemhen shingvaishi nüngi hamphong kü mehe nyangeihepü yahphahenang? Nüngi menüng dou düknya? 31 Hamei bühipai jahpanei manna betjük hahteke; ‘Büpai vangsho leipü hahying hahhen shuoh’ shei nyangei nyüke” shei eteke. 32 Hahepak kü Jisui jomphong kü, “Hingmei ngei am kü enyeih, am kü vangsho leipü hahying shuohpeyü Mosa nevai shejao hingshangpü hahying shuohpeyü ngelei Opa hih. 33 Mehenangkü Kahvangei hahyingü vangsho leipü peinyüpeih, hatü kahdoknyü kü yangnyuyem shuohnyeih” shei e. 34 Jomi büpa kü, “Longpüba, düngei hamphong kü ha hahying yahshih” shei e. 35 Jisui jomphong kü e, “Ngeiyü yangnyuyem hahying. Üami ngei touei pei, mechemao ne-aeipih, hatü üami ngei kü hinglemnya mechemao yung nelepih. 36 Shejao ammi ngei eetü ngei kü hingnelempü nangkü ngei am kü ha epeih. 37 Pa-i ngei kü shuohpüthü peü ngei touei peikahen, hatü üpa ngei touei peinya, ngei mechemao nechangtükhen; 38 mehenangkü ngei vangsho leipü ngei mongpü düknüng yiüpü nevai, shejao üpai ngei shom, büpai mongpü düknüng yiüpeih. 39 Büpai ngei kü shuohpü peü meheyao nemahtükhen, hatü dohpü nyih kü yangei leihen hapayü üpai ngei shom, büpai mongpü ha hih. 40 Üami Ha ee, hatü büpa kü hinglemnya, vanyangyem danghen, hatü dohpü nyih kü ngei yangei leishihhen hapayü ngelei Opai-i mongpü nyüke.” 41 Hahepak kü, “Ngeiyü vangsho leipü yiüpü hahying” shei epü nangkü Jehoda ami büpa khüei eela. 42 Jomi, “Hapayü Josephei cheha Jisu nevaipü je? Chenyü chepa jeni nyingei nenyupü je? Mekei etü büpai, ‘Ngeiyü vangsho leipü yiüpeih’ shei eaoknya?” shei eteiteke. 43 Jisui jomphong kü, “Am nyingi langmaanpü dohtuh. 44 Ngei shompü Opa-i müei nedeipheikü üpayao ngei touei peinüng neaok; hatü ngei dohpü nyih ngei hapa shennyak yangei leishihhen. 45 Thibüthüi ha nyangei nyüke: ‘Jom peü kü Kahvangi nyuhnyeih. Üpai Pa kü bangnya, hatü büpa leipü nyinghahnya, ngei touei peinyeih. 46 Kahvang leipü hük mü lenei üpaiyao Pa ne-ee; büpai mon Pa eeteke. 47 Hingmei ngei am kü enyeih, üami hinglemnya, vanyangyem nyüpeih. 48 Ngeiyü yangnyu hahying. 49 Ammei bühipathüi jahpanei manna betjük hah hatü didai. 50 Shennyak hüki hahtü nedihen vangsho leipü yiüpü hahyingü hatouei nyüke. 51 Ngeiyü vangsho leipü yiüpü yangnyu hahying. Üami hapa hahying hahhen, den kü yemmü nyuhen, hatü kahdoknyü kü ngei shuohpü yangnyu hahyingü ngelei phai’ ” shei eteke. 52 Hahepak kü Jehoda ami jom jom, “Hapa shennyaki mekei etü büpalei phai jen kü hahhen shuohhenang?” shei etei. 53 Hanangkü Jisui jom kü, “Hingmei ngei am kü enyeih, ammi Shennyak Halei phai nehahpheikü hatü büpalei iy neyingpheikü am kü yangnyuyem nenyu. 54 Üami ngelei phai hah hatü ngelei iy ying, hathü kü yangnyuyem nyüke, hatü dohpü nyih kü ngei jom yangei leishihhen; 55 mehenangkü ngelei phaiyü hingshangpü hahying, hatü ngelei iy-ü hingshangpü yung. 56 Üami ngelei phai hah hatü ngelei iy ying, ngei kü nyunyüke, hatü ngei jom kü nyunyeih. 57 Vanyangyem Opa-i ngei shompü keiha, hatü ngei büpa homei nyupü keiha, üami ngei hahhen, ngei homei mon nyuhen. 58 Vangsho leipü yiüpü hahyingü ambü ampai hahtü dipü keipü hahying nevai. Shejao üpai hapa hahying hahhen den den kü yemmü nyuhen” shei eteke. 59 Büpai hathüyü Kapernaumei Sinagoglei nyuhpü hepak kü eteke.
Vanyangyem Shahthü
60 Mechem büpalei nanglomthüi ha danpa, jomi, “Hapa nyuhpü venpeyü wongshi khih; üpai ha yah-aoknüng?” shei etei. 61 Shejao Jisui büpalei nanglomthüi ha nangkü langmaanpü danei büpai jomphong kü e, “Hapai amphong huluh vaihünyu je? 62 Shejema Shennyak Ha büpa shongei nyupü shingei aongdai-i eejü mekei ehen? 63 Yangnyuyem shuohpeyü laangha hih; phaiyü yahlak neshiü, hatü ngei am kü epü shahthüyü laangha hatü yangnyuyem nyüke. 64 Shejao amphong khongkü hingnelempü hanei nyüke.” Mehenangkü Jisui shongei mebü-üng üpa hingnelem, hatü üpai büpa luhahhen nyingei nyuteke. 65 Büpai nedoh-i, “Ha tata kü ngei shelei mebü amphong kü Opa-i neshuohpheikü üpaiyao ngei touei nepeiaokpih shei ngei etepih” shei e. 66 Ha tata kü büpalei nanglomthü longshishing nyokei leidai, hatü hajük kü büpa phei nemü. 67 Hanangkü Jisui Anpünyi kü, “Amphongao nyokei leidaihüangke je?” shei e. 68 Simon Peteri, “Shembüpa, ham üpa touei daijanüng? Nüng kü vanyangyem shahthü nyüke. 69 Nüngü Kahvang kübü Daülangpü Hük shei hinglemei peinyüke hatü nyingnyüke” shei e. 70 Jisui jomphong kü, “Ngei am Anpünyi neje-angpü je? Shejao amphong khongkü hükü kahshih nyüke!” shei e. 71 Büpai hapayü Simon Iskariotei cheha Judas nang eteke; mehenangkü büpai Anpünyi khongkü hük vaijao büpa luhahhen nyuteke.
Jisulei Chenaüthüi Hingnelempü
1 Hapheikü Jisu Galilei kamtei. Büpai Judea philei neheihhü; mehenangkü Jehoda ami büpa jühen lem yemei nyuteke. 2 Shaang Jehoda amei Ashakshem Mo ngoihen yopailei nyu. 3 Hanangkü chenaüthüi büpa kü, “Nüng hatoueipü Judealei heihtuh, shejüang nüngi dükpü douthü nüngei nanglomthüi nyem-ee; 4 mehenangkü shakei vamei mih peüi nyemnying shei deihpü üpa shennyakiyao joshi nedüknyih. Nüngi hathü dou dükjema, kahdoknyü kü nyinghütuh” shei e. 5 Chenaüthüiyao büpa kü hingnelem. 6 Jisui jomphong kü, “Ngelei hepak shao-üng mangngoi, shejao am shingvaishi hepak peü jiünyüke. 7 Kahdoknyüi amphong kü nejiühithen, shejao ngei kü jiühitnyüke; mehenangkü ngei ha khüei hapalei douthüyü mang shei denpü shuohnyeih. 8 Am nying mo kü daituh. Ngei ha mo kü nedaipih; mehenangkü ngelei hepak shao-üng lomei mangpei” shei e. 9 Büpai ha etü Galilei nyu.
Jisu Ashakshem Mo kü Peipü
10 Shejao chenaüthü molei lüdaipheikü büpaao ngaiheyei nevai, joei dai. 11 Jehoda ami molei, “Büpa melei daipa yo?” shei büpa yemei nyu. 12 Büpa nangkü khong longi langmaanteiyei nyu. Hanei ami, “Büpayü shennyak mei hih” shei e, haneiyü, “Nevaipih, büpayü mih luhahnyüke” shei e. 13 Shejao Jehoda am kü nyempü nangkü üpaiyao ngaiheyei nelangmaan. 14 Mo jiam kü Jisu phopshemei peiyei nyuhhen pang. 15 Jehoda ami thamaei, “Meleiyao nyuhhahpü neshiüpü kü hapa shennyaki mekei etü hajükjük nyingaoknya yo?” shei e. 16 Hahepak kü Jisui jomphong kü, “Ngei nyuhpü venpeyü ngelei nevai, shejao üpai ngei shom, büpalei hih. 17 Üpai Kahvangi mongpü dükhen shei mongei nyu, büpai hapayü Kahvang leipü hi ngei nyingkü deihtü ehahnya nyinghen hih. 18 Üami laophülei nang mon ehahnya, hathüi laophü nyingkü müknyinshekhang yemnyüke; shejao üpai büpa shom, büpalei müknyinshekhang yempeyü shahhing, hatü büpa kü shahshem neshiü” shei e. 19 “Mosai am kü shahkung neshuoh-angpü je? Shejao amphong üpaiyao shahkung nedüknyu. Mehekei ammi ngei jühen lem yemnya?” shei e. 20 Khongi büpa kü, “Nüng kü kahshih nyüke! Üpai nüng jühen yemnyüke?” shei e. 21 Jisui jomphong kü, “Ngei yashanpü dou hük dükjü am peüi thamanyüke. 22 Mosai ammei hapeüthü kü shuw japhen shuoh, (jiüpü lemi hapayü Mosa kübü nevai; ambü ampa leipü peipeih), hatü ammi Sabbath nyih hapeüthü kü shuw japnyüke. 23 Ammi Mosa shahkung nemanghen tata kü Sabbath nyih shuw japjema, shejema ngei Sabbath nyih shennyak hükei büm kemei meihüjü ammi ngei kü mongshihnyu je? 24 Ammi shakdokei eepü kü shah tephen, shejao jiüpü shahphen shuohtuh” shei e.
Büpayü Messiah Je?
25 Shaang Jerusalem nanglakthü hanei-i, “Jomi jününg yempü shennyakü ha nevaipü je? 26 Büpayü hatouei ngaiheyei shah enyüke, shejao jomi büpa kü meheyao ne-eshuohnyu! Hapayü Messiah hih shei mübüthüiyao nyingpü hiang yo? 27 Shejao hapa shennyak meleipü peipa, jeni nyingei nyüke; shejao mechem Messiah peihenshang, üpaiyao büpa meleipü peipa nenyingaokhen” shei e. 28 Hahepak kü Jisui phopshemei nyuh-ei nyushingkü büpai wongmü lenei, “Ammi ngei nying, hatü ngei meleipü ammi nyingnyüke. Ngei ngei nyingi mongpü kü neyiü; shejao üpai ngei shom, büpayü hingshangpü, hatü ammi büpa nenying. 29 Ngei büpa nying; mehenangkü ngeiyü büpa leipü, hatü büpai ngei shompeih” shei e. 30 Hahepak kü jomi büpa yepnüng khe, shejao üpaiyao büpa kü laki neshoungaok; mehenangkü büpalei hepak shao-üng mangngoi-i nyuteke. 31 Shejao khong kü longshi shingi büpa kü hinglem hatü jomi, “Mechem Messiah peihenshang, hapa shennyaki dükpü mao nyeishi nyangeihepü dou dükkahen” shei etei.
Jisu Yepnüng Shompü
32 Khongi büpa nang hapakei eteipü Pharisee ami danei, ngongpathü hatü Pharisee ami büpa yephen phopshem leipü veshanthü shom. 33 Jisui hahepak kü, “Ngei amphong mü hepak kanja mon nyutü üpai ngei shom, büpa touei ngei lüdaihen. 34 Ammi ngei yemhen, shejao nedanghen, hatü ngei melei nyu, halei am nepeiaokhen” shei e. 35 Jehoda am hüki hük mü, “Jeni büpa nedanghen mü hapa shennyakü melei daihen deihnya yo? Büpayü jenei shennyakthü Greek am mü yanei haishi nyupü am touei daiyei nyuhen deihnyu hiang yo? 36 ‘Ammi ngei yemhen, shejao ngei nedanghen, hatü ngei melei nyu, halei am nepeiaokhen’ sheiyü mehe lappü enya yo?” shei etei.
Yangnyuyem Yungyen
37 Mo dohpü hatü longpü nyih, Jisui yaongtü wong mü lenei, “Üam yung lenya, ngei touei peikei, hatü yingtuh, 38 hatü üami ngei kü hinglem, laihingi eyei nyupükei, yangnyuyem yung büpalei mongdang kübü yenhen” shei e. 39 Shaang büpai hayü büpa kü hinglempüthüi yahhen Laangha jung eteke; mehenangkü Jisu müknyinshekhang kü mangaongdai-i nyupü nangkü Laangha shao-üng mangshuoh-i nyuteke.
Shennyakthü Shahju Nejiüteipü
40 Mechem jomi hathü shah danpa, khongkü hanei-i, “Hingmei hapa shennyakü thibü khih” shei e. 41 Lebüthüi, “Büpayü Messiah khih” shei e. Shejao hanei ami, “Mekei etü Messiahyü Galil leipü peihenang?” shei e. 42 Laihingi Messiahyü David am phang kübü, hatü David nyupü Bethlehem kübü vamhen shei eyei nenyupü je? 43 Hanangkü büpa nangkü khong shahju nejiütei-i vam. 44 Jom haneiyü büpa yephüei deih, shejao üpaiyao büpa kü laki neshoungaok.
Hingnelempü Jehoda am Mübüthü
45 Mechem ngongpathü hatü Pharisee am touei phopshem yompüthü leijapa, hathüi jomphong kü, “Ammi mehekei büpa yepei neleiküpa?” shei phe. 46 Phopshem yompüthüi, “Üpaiyao hapa shennyaki epükei epü mangdanpih” shei e. 47 “Amphongao büpai luhahpü je?” shei Phariseethüi jomphong kü phe. 48 “Mübü hanei nevaijü Pharisee am hanei dangkao büpa kü hinglemei nyüpü je? 49 Hapa khongnyüi Mosa Shahkung meheyao nenyingpü nangkü jomphongü thaüvaü phangkü nyüke.” 50 Jomphong khongkü shennyak hük, Nikodemas, üpa Jisu mü pongteinüng dai, büpai hathü kü, 51 “Shennyak hük büpai mehe dükpa hapa shong mangdani jenei shahkungi hanei am nenyonghünyih” shei e. 52 Jomi büpa kü, “Hingmei, nüngao Galil leipü je? Laihing yemtuh, hatü nüngi Galil leipü thibü nevamnyih shei nyangei eehen” shei eteke. 53 Hapheikü jom laophü laophülei shemei leidai.
Mükbongjuyungpü Nyüha Hük
1 Hahepak kü jom peü shemei leidai, shejao Jisu payü Olive Kahshangei aongdai. 2 Dhom mü shao büpa phopshemei pei. Shennyakthü peü büpa touei pei, hatü büpai jomphong kü nyuhhen pang. 3 Shahkung nyuhbüthü hatü Pharisee ami büpa touei mükbongjuyung dükei nyushi yeppü nyüha hük müei dei. Jomi pinnyü khong peü touei yaonghütü, 4 jomi büpa kü, “Nyuhbü, hapa nyühayü mükbongjuyung dükei nyushi yeppeih. 5 Shaang Mosa Shahkungi hapa keipü nyühayü yaongi shükei jütuh shei eyei nyüke. Nüngiyao mekei ehenang?” shei phe. 6 Jomi hapayü büpa nyonghühen shah laphen yemei dokei peiteke. Jisui aümei shatü büpalei lakjaangi kahdok kü nyangteke. 7 Mechem jomi nedoh-i büpa kü pheyei chongjapa, büpa lanei yaongtü jomphong kü, “Amphong khongkü üpa kü mang nenyu, büpai shongei pinnyü kü yaongi shüktuh” shei e. 8 Hapheikü büpa aümei shatü kahdok kü nyang. 9 Mechem jomi ha danpa, behethü mü pangtü hükchem hükchem lüdaikem; Jisu monha hapa nyüha mü yaongshi tuhphong. 10 Jisui lanei yaongei pinnyü kü, “Nyüha, hathü melei daipa? Üpaiyao nüng nenyonghü yo?” shei e. 11 Pinnyüi, “Hih, longpüba” shei e. Jisui, “Ngeiyao nüng nenyonghünyih. Leituh, hatü shaang mü leitü ne-ei mang tethah” shei e.
Jisu Kahdoknyü Vangngai
12 Shao Jisui jomphong kü, “Ngeiyü kahdoknyü vangngai. Üpai ngei phei münya, vangnyak kü nekamhen, shejao yangnyu vangngai danghen” shei e. 13 Phariseethüi büpa kü chengei, “Nüngi nüng jung denpü shuohnyüke; nüngi denpü shuohpeyü nejiü” shei e. 14 Jisui jangei, “Ngei ngei nang denpü shuohhahlangmao, ngelei denpeyü jiütei; mehenangkü ngei meleipü peipa hatü melei dainya ngei ha nying, shejao ngei meleipü pei hatü melei dainya, ha ammi nenying. 15 Ammiyü shennyakei laphen aimü shahphennyüke, shejao ngei üpa kao shahnephennyih. 16 Shejao ngei paoh shah phenlangmao ngelei shahphenü jiüshi nyüpeih; mehenangkü hayü ngei moni phennyu nevai, shejao ngei hatü ngei shompü Pa henji-i phennyüpeih. 17 Ammei shahkungei pa nyi-i denpü shuohpeyü jiüpeih shei enyüke. 18 Ngei ngei nangkü denpü shuohnyeih, hatü ngei shompü Pa-i ngei nangkü denpü shuohnyeih” shei e. 19 Hahepak kü jomi büpa kü, “Ampa melei nyüpa?” shei phe. Jisui, “Ammi ngei nevaijü Opa nenying. Ammi ngei nyinglang meyü Opayao nyinghen vaipeih” shei e. 20 Jisui hathü shah phopshem mop jaoshingei nyuh-ei nyushi e, shejao üpaiyao büpa neyep; mehenangkü büpalei hepak shao-üng mangngoi-i nyuteke.
Ngei Daipülei Am Nedaiaokhen
21 Nyipabü Jisui jomphong kü, “Ngei lüdainyeih, hatü ammi ngei yemhen, shejao amphongü ammei mang kü dihen. Ngei melei dainya, halei am nepeiaokpih” shei e. 22 Hahepak kü Jehoda ami, “Büpa laophü nyingi jühahnüng hiang? ‘Ngei melei dai, halei am nedaiaokpih’ sheiyü büpai ha nang epü hiang?” shei e. 23 Jisui jomphong kü, “Amphongü phang leipü, ngeiyü shangphi leipü; amphongü kahdoknyülei, ngeiyü kahdoknyülei nevai. 24 Ammei mang kü am dihen hih shei ngei am kü etepih; ammi ngeiyü büpa shei hingnelempü thahshi amphongü ammei mang kü dihen” shei e. 25 Jomi büpa kü, “Nüng üpaang?” shei phe. Jisui jomphong kü, “Ngei amphong mü mehe vainüng eteihen? 26 Ngei amphong nang shahphenei ehen longi nyüpeih, shejao üpai ngei shom büpayü shahhing, hatü ngei mehe büpa leipü dan, ha kahdoknyü kü enyüpeih” shei e. 27 Büpai Pa jung enyeih shei jomi ha nyingei neaok. 28 Hanangkü Jisui jomphong kü, “Mechem ammi Shennyak Ha shangei lungei anshihhen, hahepak kü ammi ngeiyü büpa khih shei nyinghen, hatü ngei mongpü meheyao nedüknyih, shejao Pa-i ngei kü epü douthü jung enyüpeih. 29 Üpai ngei shom, büpa ngei mü nyüpeih; büpai ngei mon netuhphongnyih; mehenangkü ngei düngei büpai mehe kü mong hah, ha düknyüpeih” shei e. 30 Büpai hathü shah eshingkü longshishing büpa kü hinglem.
Hinglempü Nanglomthü
31 Hahepak kü Jisui Jehoda am büpa kü hinglempüthü kü, “Ammi ngelei shah bangjema, am hingshangpü ngelei nanglomthü; 32 hatü ammi shahhing nyinghen, hatü shahhingi am bümei leihühen” shei e. 33 Jomi büpa kü, “Hamphongü Abrahamei hühihathü hatü ham üpalei aayao nevaihampeih. ‘Am bümei leihühen’ shei epeyü mehe lappa?” shei e. 34 Jisui jomphong kü, “Hingmei ngei am kü enyeih, mang thahpü peü mangei aathü hih. 35 Shemong hük kü aa hük mechemao denshing nenyunyih, shejao hapeü-ü denshing nyushing nyüpeih. 36 Hanangkü Ha-i am bümei leihüjema, am bümei vaidaihen. 37 Amphongü Abrahamei hühihathü shei ngei nyingnyüke, shejao ammi ngei jühen lem yemnyüke; mehenangkü am kü ngelei shah nyuishing neshiü. 38 Pa nyushingei ngei mehe ee, ngei ha enyüpeih; amphongiyü Pa leipü mehe dan ha düktuh” shei e.
Jisu hatü Abraham
39 Jomi büpa kü, “Abrahamü hamei pa hih” shei e. Jisui jomphong kü, “Amphong Abrahamei hapeüthü vailangmeyü Abrahami dükpü douthü ammi dükhah shepeih, 40 shejao shaang ngei Kahvang leipü danei shahhing ephopü shennyak, ngei jühen khenyüke. Abrahami dükpeyü ha nevaipih. 41 Amphongiyü ampa ami mehe dük, ha düknyüke” shei e. Jomi büpa kü, “Hamphongü shounghathü nevaipih; hamei pa hük nyüpeih, hayü Kahvang” shei e. 42 Jisui jomphong kü, “Kahvangü ammei Pa vailangmeyü ammi ngei kü bamhah shepeih; mehenangkü ngei Kahvang leipü peipeih, hatü shaang ngei hatouei nyüpeih. Ngei mongpü kü ngei nepei, shejao büpai ngei shompeih. 43 Ngei epü ammi mehekei nedannya? Hayü ammi ngelei shah neyahpü nangkü hih. 44 Amphongü ampapa am kahshihthü leipü khih, hatü ammei ampapa ami lümpü dükhen jenyüke. Büpayü panghinüng shennyak jüpü am nyupeih; shahhing kü neshoung; mehenangkü büpa kü shahhing nenyu. Mechem büpai shahshem ehen, büpai büpalei nyingnyoi aimü enyüke; mehenangkü büpayü shahshem ebüthü hatü shahshemei pa. 45 Shejao ngei shahhing epü nangkü ammi ngei kü hingnelem. 46 Am üpai ngei kü mang nyüke shei eaokhen? Ngei am kü shahhing ephüjü mehekei ammi ngei kü hingnelemnya? 47 Üam Kahvang leipü nyüpa, Kahvangei shahthü bangnyeih. Amphongi hathü nebangpü lappeyü amphongü Kahvang leipü nevai” shei e. 48 Jehoda ami büpa kü jangei büpa kü, “Hami nüng kü Samaria am khih hatü nüng kü kahshih nyüke shei epeyü ham nejiüpü je?” shei e. 49 Jisui, “Ngei kü kahshih neshiüpih, shejao ngei Opa kü dhüm shuohnyeih, hatü ammi ngei kü dhüm nehunyu. 50 Ngei ngei shing müknyinshekhang neyemnyih; shejao ha yempü hük nyüke, hatü büpayü shahphenbü nyüke. 51 Ngei am kü shahhing enyeih, üpai ngelei shah bangnya, büpa mechemao nedipih” shei e. 52 Jehoda ami büpa kü, “Nüng keyü kahshih nyüke shei shaang hami nyingteke. Abraham didai, hapa keiha thibüthüao didaiteke, shejao nüngi, ‘üpai ngelei shah bangnya, mechemao dipü ne-eepih’ shei enyüke. 53 Didaipü hamei pa Abraham mü nüng longpü je? Thibüthüao didaiteke. Nüngü üpa hih shei deihhahnya?” shei e. 54 Jisui jangei, “Ngei nyingi müknyinshekhanghahjema, ngelei müknyinshekhangü angsha. Ngei müknyinshekhanghüpeyü ngelei Opa hih; ammi büpa nenyingjao üpa jung ammi ‘Büpayü hamei Kahvang’ shei enya, hayü büpa hih. 55 Shejao ngei büpa nyingnyeih; ngei büpa nenyingnyih shei ejema ngeiyao am kei shahshem epü am leidaihen. Shejao ngei büpa nyingnyeih hatü büpalei shah bangnyeih. 56 Ammei pa Abrahami ngelei nyih deih-ei mongongpeih, hatü büpai ha eetü mongongteke” shei e. 57 Hahepak kü Jehoda ami büpa kü, “Nüngü bong pinyipüanao manglomjü nüngi Abraham eephei je?” shei e. 58 Jisui jomphong kü, “Hingmei ngei am kü enyeih, Abraham shekü ngei nyuhampeih” shei e. 59 Hanangkü jomi büpa kü shükhen yaong hom, shejao Jisu jodai, hatü phopshem leipü lüdai.
Mükphüngdaitü Bühpü Meihüpü
1 Jisu daishingkü mükphüngdaitü bühpü shennyak hük ee. 2 Büpalei nanglomthüi büpa kü, “Nyuhbü, hapa shennyak mükphüngdaitü bühhen meyü üpai mang thahpa, büpai hi nyühipa homei vampa?” shei phe. 3 Jisui e, “Hapa shennyak nevaijü nyühipa üpaiyao mang nethah; büpa mükphüngdaitü bühpeyü Kahvangei dou büpa kü shakei vamhen shingvaishi nyüke. 4 Üpai ngei shom, büpalei dou jeni vangngai kü dükhen vongbong; üpaiyao dou nedükaokhen mü vangnyak peikünyüke. 5 Ngei kahdoknyülei nyupü thahshi ngei kahdoknyü vangngai.” 6 Büpai ha epheikü, büpai kahdok kü yu-op shaotü nyetei ashem leihütü ha yah-ei büpalei mük kü nyiotü, 7 büpa kü, “Daiyei Siloam yungyenei paütüktuh” shei e. (Hapa lappü, Deishihpü). Hapheikü büpa daiyei paütüktü mük eeyei shemei lei. 8 Jomei chingyowthü hatü shelei büpa yühahjaiyingei eepüthüi, “Uoshi yühah-ei nyuteipü shennyak nevai je?” shei phetei. 9 Hanei ami, “Hayü büpa khih” shei e. Lebüthüi, “Nevai, hayü büpa lepü lebü shennyak khih” shei e. Shejao büpai, “Hapayü ngei hih” shei nedoh-i e. 10 Shejao jomi büpa kü, “Shejema mekei etü nüngei mük appa?” shei nedoh-i phe. 11 Büpai jomphong kü, “Jisu shei menpü shennyaki ashem nuitü ngelei mük kü nyiotü ngei kü, ‘Daiyei Siloamei paütüktuh’ shei ephopeih. Hanangkü ngei daiyei paüjü ngelei mük eepeih” shei e. 12 Jomi büpa kü, “Büpa melei nyüke?” shei phe. Büpai, “Ngei nenying” shei e.
Mük Meidaipü Nang Hienpü
13 Jomi shelei mükphüngdaitü nyupü shennyak Phariseethü touei müei dei. 14 Jisui ashem nuitü mük kü nyiotü mük vamhüpeyü Sabbath nyih jiüteke. 15 Hahepak kü Pharisee ami büpalei mük mekei eeaokpa ha büpa kü phe. Büpai jomphong kü, “Büpai ngelei mük kü ashem nyiophopeih. Hapheikü ngei paütükpeih hatü shaang ngei mük eenyüpeih” shei e. 16 Pharisee am hanei-i, “Hapa shennyakü Kahvang leipü nevai; mehenangkü büpai Sabbath jiüshi nethemnyu” shei e. Shejao lebüthüi, “Mang shennyak hüki mekei etü hapa keipü yashanyale dou dükaoknüng” shei e. Khongü nyi vaishi hantü nyu. 17 Hanangkü jomi shao mükphüngpa kü, “Nüngiyao büpa nang mekei enya? Nüngei mük appeyü büpa je?” shei e. “Büpayü thibü hük khih” shei büpai e. 18 Mük meidaipülei nyühipa mangnyük thahshi Jehoda ami hapa shennyak mükphüngdaitü nyupü meipü khih shei hingnelem; 19 hatü nyühipa nyi kü, “Hapayü anjilei ha mükphüngdaitü bühpeih shei epü vaila? Mekei etü büpai shaang eeaoknya?” shei phe. 20 Büpalei nyühipai, “Hapayü hamei hapeü shei nyingnyüke hatü büpayü mükphüngdaitü bühpeih; 21 shejao mekei etü büpai shaang eeaoknya hami nenyingang, nevaijü üpai büpalei mük appa nenying; büpayao nethe leidai; büpai-üng büpa nang ekahen hih” shei e. 22 Chenyü chepai hayü Jehoda am kü nyempü nangkü eteke; mehenangkü üpai Jisu-ü Messiah shei lahhenshang Sinagog leipü changtükhen shei Jehoda ami temtüktü nyu. 23 Hanangkü chenyü chepai, “Büpa nethe leidai; büpa kü phehahtuh” shei e. 24 Hanangkü nyipabü jomi hapa mükphüngdaipü shennyak nyükei büpa kü, “Kahvang müknyinshekhangtuh! Hapa shennyakü mang shennyak shei hami nyingteke” shei e. 25 “Hapa shennyakü mang shennyak hi nevaipa, ngei nenying. Ngei nyingpeyü ha mon: Ngei mükphüngdaitü nyupeih shejao shaang ngei eenyeih” shei büpai e. 26 Jomi büpa kü, “Büpai nüng kü mehe dükphopa? Büpai nüngei mük mekei apphopa?” shei phe. 27 Büpai jomphong kü, “Ngei amphong kü ephei hih, ha ammi nebangpeih. Mehekei ammi shao hapa banghünya? Amphongao büpalei nanglomthü leihünyu je?” shei e. 28 Hahepak kü jomi büpa kü eelaei, “Nüngü büpalei nanglom, shejao hamphongü Mosalei nanglomthü. 29 Kahvangi Mosa homei eteipeih, shejao hapa shennyakü meleipü peipa hami nenying” shei e. 30 Hapa shennyaki, “Hapayü thamabenüng dou khih! Büpa meleipü peipa ammi nenying, shejao büpai ngelei mük appeih. 31 Kahvangi mangthülei shah nebangnyih shei jeni nying, shejao üpai büpa kü khüm, hatü büpai mongpü dükpüthülei shah bangnyeih. 32 Kahdoknyü vamhinüng üpaiyao mükphüngdaitü bühpü shennyakei mük vamhüpü nedanangpih. 33 Hapa shennyak Kahvang leipü nevaijema, büpai meheyao nedükaokpih” shei e. 34 Jomi büpa kü, “Nüngü bühhinüng mang kü bühteke, hatü nüngi hamphong küang nyuhnüng yaongnyu je?” shei e, hatü jomi büpa Sinagog leipü changtük.
Laangha Mükphüngpü
35 Büpa changtükpü jung Jisui dan, hatü mechem büpai büpa pongpa, büpai, “Nüngi Shennyak Ha kü hinglemnyüla?” shei e. 36 “Longpüba, büpa üpaang? Ngei büpa kü hinglemhen hih, eshih” shei e. 37 Jisui büpa kü, “Nüngi shaang büpa eeteke, hatü shaang nüng mü shah eteipeyü büpa hih” shei e. 38 Büpai, “Shembüpa, ngei hinglemnyeih” shei e, hatü büpai büpa kü khüm. 39 “Ngei kahdoknyülei peipeyü ne-eepüthüi eehen, hatü eepüthü mükphünghen nangkü shahphenhen peipeih” shei Jisui e. 40 Büpa yopailei nyupü Pharisee am hanei ha danei büpa kü, “Mehe? Hamphongü mükphüngpü am je?” shei e. 41 Jisui jomphong kü, “Am mükphüngpü am vailangmeyü am mang nethahhen vaipeih. Shejao shaang ammi, ‘Hami eenyeih’ shei epü nangkü ammei mang nedoh-i nyüke” shei e.
Jisu Mi Yombü Meipü
1 “Hingmei mü ngei am kü enyeih, üpai mi khaok shaden homei neshüi lebü lemei bakei shünya, büpayü gühpa hatü peileipa. 2 Üpa shaden homei shünya, büpayü mithü yombü. 3 Shaden yombüi büpa kü mi khaok sha apnyüke, hatü mithüi büpalei ngeü dannyüke. Büpai laophülei mithü kü men homei nyüknyeih, hatü müei dainyüke. 4 Mechem büpai laophülei mithü khaok leipü ngaihenshang, büpa jom shekü dainyeih, hatü mithü büpa phei münyüke; mehenangkü hathüi büpalei ngeü nyingnyüke. 5 Mithüi yenthüng phei nemühen shejao jomphong büpa toueipü nyaidaihen; mehenangkü jomi büpalei ngeü nenying.” 6 Jisui jomphong kü hapa e, shejao büpai mehe enya jomi ha nenying. 7 Hanangkü shao Jisui jomphong kü, “Hingmei ngei am kü enyeih, ngeiyü mi khaok shaden. 8 Ngei shekü peipüthü peü gühpa hatü peileipa, hatü mithüi jomphong kü nebangnyu. 9 Ngeiyü shem shaden. Üami ngei homei shühen yanghen, hatü daitü lei, daitü lei shei nyuhen hatü hahying danghen. 10 Gühpayü gühhen, jühen hatü mangtükhen nangkü mon peinyeih. Ngeiyü jomphong yangnyuyem nyuhen, hatü changshi nyuhen shingvaishi yiüpeih” shei e. 11 Ngeiyü mi yombü meipü. Mi yombü meipai mithü shingvaishi laophülei yangnyu lanei shuohnyeih. 12 Üpa mi yombü nevai, shejao lathahbü mon hatü laophülei mi nenyu, büpai shahhishuw peipü eeyei mithü mon tuhphongtü mokdainyeih, hatü shahhishuw peiyei jom shüknyüke hatü yantüknyüke. 13 Lathahbü mokdainyüke, mehenangkü lathahbüi mi kü nejungnyu. 14 Ngeiyü mi yombü meipü. Ngei ngelei mithü nying hatü ngelei mithüi ngei nying. 15 Opai ngei nyingpü keiha ngei Opa nyingnyeih, hatü ngei ngelei yangnyu mithü shingvaishi lanei shuohnyeih. 16 Hapa mi khaok kü nepaümpü lebü mithü nyüpeih. Ngei jomphong müei leihen hatü hathüi ngelei ngeü banghen. Hanangkü mi khong hük hatü mi yombü hük mon nyuhen. 17 Mehenangkü ha tata kü Opai ngei kü bamnyeih, mehenangkü nyipabü anlanghen shingvaishi ngei ngelei yangnyu lanei shuohnyeih. 18 Üpaiyao ngelei yangnyu ngei kübü neyahlang, shejao ngei ha ngei nyingi mongei shuohnyeih. Lanei shuohhen hatü nyipabü yahlanghen ngei kü wong nyüpeih. Hapa shahkung ngei Opa leipü dangpeih. 19 Hathü shah nangkü Jehoda am shao khong hanteke. 20 Longshi shingi, “Büpa kü kahshih nyüke hatü ngadainyu khih. Mehekei büpai epü bangnya?” shei e. 21 Lebüthüi, “Hapayü kahshih nyupülei shahthü nevaipih. Kahshih-i mükphüngpalei mük apaokhen je?” shei e.
Jisu Neyahpü
22 Hapa hepak kü Jerusalem phopshem Daüpü Mo ngoi. Hayü ünyü hepak, 23 hatü Jisu phopshemei Solomonei shemshomei kamteiyei nyu. 24 Hanangkü Jehoda am büpa shonei thaitü büpa kü, “Nüngi meshük lushi hamphong hapakei küpshi tuhhen? Nüng Messiah vaijema ngaiheyei ham kü eshih” shei e. 25 Jisui jomphong kü, “Ngei am kü etepih shejao ammi hingnelem. Opalei men kü ngei dükpü douthü ngei jung denpü shuohnyüke; 26 shejao ammi hingnelem; mehenangkü amphongü ngelei mithü nevai. 27 Ngelei mithüi ngelei ngeü dannyeih, ngei jom nyingnyeih, hatü hathü ngei phei münyeih. 28 Ngei jom kü vanyangyem shuohnyeih, hatü jom mechemao nemahhen. Ngelei lak leipü üpaiyao jom aetei nedaiaokpih. 29 Mehe ngelei Opai ngei kü shuohtepa, hayü peü mü longpüba; Opalei lak leipü üpaiyao aetei dainüng neaok” shei e. 30 Opa hatü ngeiyü hük. 31 Jehoda ami shao büpa kü shükhen yaong homei noteke. 32 Jisui, “Ngei am kü Opa leipü doumei longi hutepih. Ha tata kü ammi ngei kü yaongi shüknüng yaongnyu je?” shei e. 33 Jehoda ami, “Hami doumei nangkü nüng kü yaongi shüknüng yaongnyu nevaipih, shejao Kahvang khüei eelapü nangkü hih; mehenangkü nüngü shennyak hük mon tuhtü Kahvang hih shei epü nangkü hih” shei e. 34 Jisui, “Kahvangi, ‘Amphongü kahvangthü’ shei ammei Shahkungthü kü nyangei nenyupü je? 35 Üam touei Kahvangei shah pei, hathü kü ‘Kahvangthü’ shei nyükjema laihing shah mangtüknüng neaok– 36 ‘Ngeiyü Kahvang Ha’ shei epü nangkü Opai daütüktü kahdoknyülei shompü hüki thaüvaüei enyüke shei ammi eaokhen je? 37 Ngei Opalei dou nedükpü vaijema ngei kü hingtelem. 38 Shejao ngei hathü dükjema, ammi ngei kü hingnelemjao dou kü hinglemtuh, shejüang Pa ngei kü nyüke, hatü ngei Pa kü nyüke shei ammi nyinghen hatü danaokhen” shei e. 39 Hahepak kü shao jomi büpa yepnüng khe, shejao jomei lak kübü büpa yangdai. 40 Büpa Jordan yung homei shelei Johani baptükpü shingei daiyei büpa halei nyu. 41 Büpa touei shennyakthü longi pei, hatü jomi, “Johani meheyao nyangeihepü nedük, shejao hapa shennyak jung Johani epü lemphüli jiüteke” shei e. 42 Halei shennyak longi büpa kü hinglem.
Lazar Dipü
1 Shaang Bethany am Lazar shei menpü shennyak hük tüngteke. Bethany-ü Mary hatü chenaü Martha am ching nyuteke. 2 Mary, üpai Shembüpalei la kü vong meipü meli nyiotü pinnyülei sho-i thitpa, pinnyülei chenaü Lazar tüngei nyuteke. 3 Hanangkü nyahinaü nyi-i Jisu kü, “Shembüpa, nüngi bampü themei tüngei nyüke” shei shahjang shom. 4 Mechem Jisui ha danpa, büpai, “Hapa dinshani büpa nedipih, shejao hapayü Kahvang müknyinshekhang shingvaishi nyüke, shejüang hapa homei Kahvang Ha müknyinshekhanghen” shei e. 5 Jisui Martha, chenya hatü Lazar kü bamjao, 6 Lazar tüngpü danpheikü büpa nyupü shingei shao nyih nyi nyeishi themdai. 7 Hapheikü büpai nanglomthü kü, “Jenphong shao Judealei heihshah” shei e. 8 Nanglomthüi büpa kü, “Nyuhbü, Jehoda ami nüng kü yaongi shükhen kheteijü nüng shao halei heihhen je?” shei e. 9 Jisui jangei, “Nyih kü ghonda anpünyi nenyupü je? Üami nyihnüng kam, jomi huluh neshuohnyih; mehenangkü jomi kahdoknyü vangngai eenyüpeih. 10 Shejao üam shangmang kü kam, huluh shuohnyüpeih; mehenangkü jom kü vangngai neshiü” shei e. 11 Ha epheikü shao büpai jomphong kü, “Jenei küphü Lazar shidaiteke, shejao ngei büpa phuknüng halei dainyeih” shei e. 12 Nanglomthüi büpa kü, “Shembüpa, büpa shidaipü vaijema, büpayü meheyao nevaipih” shei e. 13 Shejao Jisui büpa didaipü jung eteke, shejao jomi büpa heiüng shipü jung epeih shei deih. 14 Hahepak kü Jisui jomphong kü ngaiheyei, “Lazar didaiteke. 15 Ammei men kü ngei büpa mü nenyupü kü mongongnyeih, shejüang ammi hinglemhen. Shejao jenphong büpa yemei daishah” shei e. 16 Thomas, üpa kü Didymus shei nyük, büpai küphü nanglomthü kü, “Büpa mü dihen jenao daishah” shei e.
Jisu-ü Yangei Leipü hatü Yangnyuyem
17 Mechem Jisu ngoijapa, Lazar diyei mahngchongei nyih alipabü nyuteke. 18 Shaang Bethany-ü Jerusalem yopailei mile nyi hükshing daiyei nyu, 19 hatü Jehoda am longi Martha hatü Mary nyi kü chenaü didaipü nangkü jom mong nyiumeihühen thaiyei nyu. 20 Mechem Martha-i Jisu peikünyüke shei danpa, Mary shemei tuhphongtü pinnyüi Jisu ombaong heih. 21 Martha-i Jisu kü, “Shembüpa, nüng hatouei nyulangmeyü ngelei naüpeü nedihah shepeih. 22 Shejao shaang vaijao nüngi mehe yühenshang Kahvangi yahphahen shei ngei nyingnyeih” shei e. 23 Jisui pinnyü kü, “Anaü shao yangei leikahen hih” shei e. 24 Martha-i büpa kü, “Dohpü nyih yangei leipü hepak kü büpaao yangei leikahen” shei e. 25 Jisui pinnyü kü, “Ngeiyü yangei leipü hatü yangnyuyem. Üpai ngei kü hinglem, jom dijao yemmü nyuhen, 26 hatü üami yemmü nyuei ngei kü hinglemhen mechemao nedihen. Nüngi ha kü hinglemnyüla?” shei e. 27 Pinnyüi büpa kü, “Hih, Shembüpa, nüngü Messiah, kahdoknyülei peipü Kahvang Ha” shei e.
Jisui Thep
28 Mechem pinnyüi ha eyei kempa, pinnyü nyokei leiyei chenaü Mary kü nyüktü pinnyü kü joei, “Nyuhbü hatouei nyüke hatü nüng kü nyüknyüke” shei e. 29 Mechem pinnyüi ha danpa, pinnyü met shei yaongei büpa touei heih. 30 Shaang Jisu-ü ching mangngoi-i Martha-i büpa pongpü shingei nyu. 31 Jehoda am pinnyü mü shemei mong nyiushemmei shah eyei nyupüthüi Mary shülangi yaongei vamdaipü eeteke. Jomi pinnyü phei mü; mehenangkü pinnyü mahngchongei mahngthep heihnyu khih shei jomi deih. 32 Mechem Jisu nyupü shingei Mary ngoiyei büpa eepa, pinnyüi büpalei la tüngei aümei shatü, “Shembüpa, nüng hatouei nyulangmeyü naüpeü nedihah shepeih” shei e. 33 Mechem Jisui pinnyü theppü hatü pinnyü mü peipü Jehoda ami theppü eepa, büpalei mong kü hong, hatü thephüei pei. 34 Büpai, “Ammi büpa melei vüpa?” shei phe. Jomi büpa kü, “Shembüpa, peiyei veituh” shei e. 35 Jisui thep. 36 Hanangkü Jehoda ami, “Veituh, büpai büpa kü meshük bampüang!” shei e. 37 Shejao jomphong hanei-i, “Mükphüngdaipü shennyakei mük aphüpü shennyaki hapa shennyak nedihüi netuh-aokpü je?” shei e.
Jisui Lazar Yangei Leishihpü
38 Hapheikü shao Jisu thephüei deih, hatü mahngchongei heih. Hapayü yaongsha hük nyu, hatü ha kü yaong hük küpshi nyu. 39 Jisui, “Ha yaong yahlangtuh” shei e. Dipü shennyakei chenya Martha-i büpa kü, “Shembüpa, büpa dipheikü nyih alipabü hih; hanangkü shie longi büdaitih” shei e. 40 Jisui pinnyü kü, “Nüngi hinglemjema Kahvang müknyinshekhang eehen shei ngei nüng kü ne-eangpü je?” shei e. 41 Hanangkü jomi yaong ngowtük, hatü Jisui shang lemei ngangei veitü, “Opa, nüngi ngei kü bangpü nangkü menvih shuohnyeih. 42 Nüngi düngei ngei kü bangnyeih shei ngei nying, shejao ngei hayü hatouei yaongpü khong men kü enyeih, shejüang nüngi ngei shompü khih shei jomi nyinghen” shei e. 43 Büpai ha epheikü büpai ngeü longpai lenei, “Lazar vamkei!” shei e. 44 Dipü shennyak lakhila kü, hatü dhe kü ashaki ngeihtüktü vam. Jisui jomphong kü, “Büpa kü ha sheyeishuoh hatü büpa leishihtuh” shei e.
Jisu Jühen Phaüshah Showpü
45 Hanangkü Mary mü peipü Jehoda ami Jisui mehe dük, ha ee, hatü büpa kü hinglem. 46 Shejao jom hanei Phariseethü touei peiyei Jisui mehe dük, ha eshuohteke. 47 Hanangkü ngongpathü hatü Phariseethüi shahtapei shahthai hük thongei, “Jeni mehe dükhenang? Hapa shennyaki nyangeihepü longi düknyüke. 48 Jeni büpa hei-üng tuhjema peüi büpa kü hinglemdaihen khih, hatü Rom am peiyei jenei phopshem hatü kahmük nyiphen mangtükhen khih” shei e. 49 Shejao jomphong khongkü hapa bong ngongchong vaipü Kaiaphas-i jomphong kü, “Amphongü meheyao nenyingnyu khih! 50 Kahmük hük peü mangtüklei meyü nanglak peü shingvaishi shennyak hük dipü-üng meipeih shei ammi nenyingnyu khih” shei e. 51 Büpai hayü büpalei mongdeih epü nevai, shejao hapa bong ngongchong vaipü nangkü Jisu-ü jat hük shingvaishi dihen, 52 hatü jat hük shing mon nevai shejao haidaipü Kahvang hathü thaiyei leihen jung teteivanei eteke. 53 Hanangkü ha nyih mü leitü büpa jühen küpjan tem. 54 Hanangkü Jisu hajük kü ngaiheyei Jehoda am mü nekamtei, shejao hatoueipü jahpan yopailei hapa moidoi kü jila hük Ephraim shei epülei daiyei büpa halei büpalei nanglomthü mü nyu. 55 Shaang Jehoda amei Hompü Mo yopailei nyu, hatü kahmük kübü longi Hompü Mo shekü laophü laophüi daütükhen shingvaishi Jerusalemei pei. 56 Jomi Jisu yemei phopshemei yaongtü hüki hük mü, “Nüngi mekei deih-angke? Hingmei büpa mo kü nepeikahen hiang yo?” shei etei. 57 Shaang ngongpathü hatü Phariseethüi Jisu yephen shingvaishi büpa melei nyu nyingpüthüi jomphong kü shah shuohhen ngeükhüam shuohtüktü nyu.
Mary-i Jisu kü Vong Meipü Meli Phupü
1 Hompü Mo ngoihen nyih vok shekü Jisui Bethanylei dipü kübü yangei leishihpü Lazar amei shemei pei. 2 Halei jomi büpa kü bhaong üh. Martha-i nemno hatü Lazar-ü büpa mü nükdü kü chemi hah-ei nyu. 3 Mary-i longi bhei wongpü vongmei meli shong hük deiyei Jisulei la kü phutü pinnyülei sho-i thit. Hapa shem meli vongi mateke. 4 Shejao Judas Iskariot, büpalei nanglomthü khongkü hüki (üpai büpa luhahhen nyu), 5 “Mehekei hapa vongmei meli nanglat kho jemei bhei kü yutü hapa lop taopathü küang neshuohnya?” shei e. 6 Büpai hapayü taopathü kü kenpü nangkü nevai, shejao büpayü gühpa nyu; büpai khongei lop tuw noteke, hatü büpai haleipü güh-ei noteihamteke. 7 Jisui, “Pinnyü hei-üng nyemnyu. Pinnyüi hayü ngei mahng vühen nyih shingvaishi nyingshangi yongei tuhpü khih. 8 Am mü taopathü düngei nyuhen, shejao ngei am mü düngei nenyukahen” shei e.
Lazar Jühen Tempü
9 Mechem Jehoda am khong longpai büpa Bethanylei nyükeja shei danpa, jomi Jisu nangkü mon nevai, shejao büpai yangei leishihpü Lazar kao veihen pei. 10 Hanangkü ngongpathüi Lazarao jühen küpjan tem; 11 mehenangkü hapayü büpa tata kü Jehoda ami jom yakphongtü Jisu kü hinglemei lüdai.
Aokpü Dangei Jisu Jerusalemei Yiüpü
12 Nyihphei mo kü peipü khongnyü longpai Jisu Jerusalemei peiteke shei dan. 13 Hanangkü jomi phenhavunglak bhagei büpa mü pongteinüng, “Hosanna! Üpa Shembüpa, Israel Ongpalei men kü peikünya moihimantuh!” shei lenyaki peiteke. 14 Jisui gadu cheha hük yah-ei hapa kü uo; ha nyangei nyüke: 15 “Tenyem, Zion nela Veituh, ammei ongpa gadu dok shangkü uotü peikünyüke.” 16 Büpalei nanglomthüi shongei ha nenyingaok, shejao mechem Jisu müknyinshekhangpa, hapheikü jomi büpa nang hathü nyangei nyüke, hatü büpa kü ha dükteke shei deih-ei dang. 17 Hanangkü büpai mahngsha leipü Lazar kü nyüktü yangei leishihpü hepak kü büpa mü nyupü khongi nedoh-i büpa jung denpü shuoh. 18 Büpai hapa nyangeihepü dükpüja shei danpü nangkü khongnyüi büpa mü pongnüng pei. 19 Hahepak kü Pharisee am hüki hük mü, “Veihümao, jeni meheyao nedükaokhen khih. Veituh, kahdoknyü-ü büpa phei müdaiteke” shei etei.
Greek am Hanei Jisu kü Veihüpü
20 Shaang mo kü khümnüng peipü khongkü Greek am hanei nyuteke. 21 Jomi Galil leipü Bethsaida am Philip kü peiyei, “Longpüba, hamphongi Jisu kü veihüangke” shei e. 22 Philip heih-ei Andrew kü e, hatü Andrew hi Philip nyi heih-ei Jisu kü e. 23 Jisui jiji kü, “Shennyak Ha müknyinshekhanghen hepak ngoiteke. 24 Hingmei ngei am kü enyeih, hahkuk hük kahdokei vüei mangdi thahshi hahkuk lakshing nyunyeih, shejao ha dijema, hapai betjük longi jüknyeih. 25 Üami laophülei yangnyu kü bamnya mahtükhen, hatü üami hapa kahdoknyü kü laophülei yangnyu kü jiühitnya, vanyangyem shingvaishi yangei tuhhen. 26 Üami ngei chongphonya, ngei phei mütuh, hatü ngei melei nyu, halei ngelei chongphobüthü nyuhen. Üami ngei chongphonya, Opai-i dhüm huhen” shei e.
Jisui Büpa Dihen Jung Enyüke
27 “Shaang ngei mongshangnyüke, hatü ngei mehe ehenang? Opa, hapa hepak kübü ngei yangtuh shei ehen hiang? Nevai, hapa shangpong hepak homei daihen tata kü ngei peipeih. 28 Opa, nüngei men müknyinshekhangtuh.” Hahepak kü, “Ngei müknyinshekhangtepih, hatü shao müknyinshekhanghen” shei vangsho leipü ngeü vam. 29 Hatouei nyupü khongi ha danei hapayü vangmuk khih shei e. Lebüthüi, “Vangsho phongshan hüki büpa kü epü khih” shei e. 30 Jisui, “Hapa ngeü-ü ngelei men kü nevai, ammei men kü peipü khih. 31 Shaangü hapa kahdoknyü kü shahphenhen hepak; shaangü hapa kahdoknyü kübü vanglem lembü changtükhen hepak. 32 Mechem ngei hapa kahdoknyü kübü shangei anlanghen, ngei laophü touei nanglak peü yahlanghen” shei e. 33 Büpai ha epeyü mekeipü shangpongi büpa dihen, ha nang eteke. 34 Khongi büpa kü, “Messiah-ü den kü nyunyeih shei hami shahkung leipü danpeih. Nüngi mekei etü Shennyak Ha shangei anshihhen shei enya? Shennyak Ha shei epeyü üpaang?” shei e. 35 Jisui jomphong kü, “Amphong mü vangngai kansho hük nyuhen. Am mü vangngai nyushingkü vangngai kü kamtuh, shejüang vangnyaki am she neyeihen. Amphong shangmang kü kamjema, am melei dainya nenyinghen. 36 Amphong vangngai hathü leihen shingvaishi vangngai am mü nyushingkü hapa vangngai kü hinglemtuh” shei e.
Shennyakthüi Hingnelempü
Jisui hathü epheikü büpa daiyei jomphong toueipü jodai. 37 Büpai jom touei nyangeihepü longi dükjao jomi büpa kü hingnelem. 38 Hapayü Isaiah thibüi epü shah jiühen shingvaishi vamteke: “Shembüpa, üpai jenei shahjangmei kü hinglempa, hatü üpa kü Shembüpalei lak shakei vampa?” 39 Hanangkü jomi hingnelemaok; mehenangkü Isaiah-i shao, 40 “Büpai jomei mük phüngtük, hatü jomei mong vaantük, hanangkü jomei müki neveiaok, hatü jomei mongi nenyingaoki lepdai– hatü ngei jom meitükhen.” 41 Isaiah-i hapa epeyü büpai Jisulei müknyinshekhang eepü nangkü büpa nang epeih. 42 Shejoongpa longi, mübüthüao omshi büpa kü hinglem. Shejao Pharisee ami jom Sinagog leipü changshuohhen khih shei nyempü nangkü jomi hinglempü ngaiheyei nelah; 43 mehenangkü jomi Kahvangi vihpü meyü shennyaki vihpü lümdai. 44 Hahepak kü Jisui lenei, “Mechem shennyak hük ngei kü hinglemnya, büpai ngei kü mon hinglemnyu nevai, shejao üpai ngei shom büpa kao hinglemnyeih. 45 Üpai ngei eenya, büpai ngei shompübaao eenyüke. 46 Ngei kü vaipü üpaiyao vangnyak kü nekamhen shingvaishi ngei kahdoknyülei vangngai hük kei yiüpeih” shei e. 47 Ngelei shah dantü nedükpü shennyak shingvaishi ngei shah nephennyih; mehenangkü ngeiyü kahdoknyü shahphenhen yiüpü nevai, yanghen yiüpeih. 48 Ngei yaktükpü hatü ngelei shah tüktükpü shingvaishi shahphenbü hük nyüke; dohpü nyih ngei epü shah-i büpa nyonghühen. 49 Mehenangkü ngei ngei mongpü ne-enyih, shejao ngei shompü Opa-i mehe ehen, mekei ehen ha ngei kü shahkung shuohpeih. 50 Hapa shahkungi yangnyuyem touei münyeih shei ngei nying. Hanangkü ngei mehe enya hayü Opa-i etuh shei epü enyeih.
Jisui Nanglomthülei La Paüpü
1 Shaang Hompü Mo shekü hapa kahdoknyü kübü yanei Pa touei daihen hepak ngoiteke shei Jisui nying. Kahdoknyülei nyupü büpalei nanglakthü kü bampü nangkü büpai jom kü meshük thahshi bamnya, ha huteke. 2 Shaang Simonei cheha Judas Iskariotei mongdang kü Jisu luhahhen shingvaishi kahshih-i deihpü hük peihü. Yanüng bhaong hahshingkü, 3 chepai büpalei lak kü lemphü shuohteke, hatü büpa Kahvang leipü pei, hatü Kahvang touei daihen shei Jisui nyingei, 4 nükdü leipü yaongei büpalei bhagthuh bhüh-ei shaktü ashak hük yah-ei ngeihteke. 5 Hapheikü büpai chilimji hük kü yung shihtü büpalei nanglomthülei la paü, hatü ashak yah-ei thittük. 6 Büpa Simon Peter touei heihjajü büpai “Shembüpa, nüngi ngelei la-ao paühen je?” shei e. 7 Jisui jangei, “Shaang ngei mehe düknya, ha nüngi nenyingpih, shejao pheilei nyinghen hih” shei e. 8 Peteri büpa kü, “Nüngi ngelei la demü tephukei” shei e. Jisui, “Ngei nüng mangpaü thahshi nüng ngei mü phaihan neshiü” shei e. 9 Simon Peteri büpa kü jangei, “Shembüpa, shejema ngelei la mon nevai, ngelei lak hatü shangjing thahshi paütükshih” shei e. 10 Jisui büpa kü, “Hangha laktükpü hüki la paühen mü lenei peü paühen nadang neshiü, shejao peü daüshi nyüke. Peü nevaijao amphong daüshi nyüke” shei e. 11 Mehenangkü üpai büpa luhahhen büpai nyingdai, hanangkü büpai, “Am peü payü nedaü” shei eteke. 12 Büpai jomphongei la paüpheikü büpai shao bhagthuh thuhtü nükdü touei leiyei uotü jomphong kü, “Ngei amphong kü mehe dük, ha nyingla? 13 Ammi ngei kü, ‘Nyuhbü hatü Shembüpa ‘shei nyüknyüke– amphong jiütei; mehenangkü ngeiyü ha-üng. 14 Hanangkü ngei, ammei Shembüpa hatü Nyuhbüi ammei la paüjema, amphong hüki hükei la paüteihen vongbong. 15 Mehenangkü ngei amphong kü lappü hük, ngei dükpü keiha amphongiyao düktuh shei shuohnyeih. 16 Hingmei ngei am kü eshah, chongphobüthüyü shembü mü longpü nevai, nevaijü phongmokbüyü büpa shompü shennyak mü longpü nevai. 17 Ammi ha nyingei hathü dükjema, amphong moihiman. 18 Ngei am peüei nang ne-enyih; ngei üamphong je, ngei hathü nying. Shejao laihingei, ‘üpai ngei mü hahying hanteiyei hah, büpai ngei khüei yaongteke’ shei epü jiühühen shingvaishi nyüke. 19 Hapa vamshekü ngei am kü shaang enyeih, shejüang mechem ha vamhen, ammi ngeiyü büpa khih shei hinglemhen. 20 Hingmei ngei enyeih, üami ngei shompü hük yahnya ngei yahnyüke, hatü üami ngei yahnya, ngei shompübaao yahnyüke” shei e.
Jisui Büpa Luhahhen Jung Enyüke
21 Ha epheikü Jisu mongshang hatü, “Hingmei ngei am kü enyeih, amphong khongkü hüki ngei luhahhen khih” shei ngaiyei e. 22 Nanglomthüi üpa nang enya shei nenyingi hüki hük kü veitei. 23 Büpalei nanglom hük üpa kü Jisui bam, büpa touei dhienei nyu. 24 Hanangkü Simon Peteri üpa jung enya shei Jisu kü phenüng yaong. 25 Hanangkü Jisu kü nyangei shatü, “Shembüpa, hayü üpaang?” shei büpai büpa kü phe. 26 Jisui, “Ngei üpa kü hapa aan yah-ei haoyung kü hüngtü shuohhenshang, hapayü büpa hih” shei Jisui e. Hapheikü aan yah-ei haoyung kü hüngtü Simonei cheha Judas Iskariot kü shuoh. 27 Judas-i hapa aan yahhinüng büpa kü kahshih shüteke. Jisui büpa kü, “Nüngi mehe dükhüpüshang lomi düktuh” shei e. 28 Shaang nükdülei uopüthüi mehekei büpa kü büpai hapakei enya nenyingaok. 29 Hanei ami Judas-i khongei lop nopü nangkü Jisui büpa kü, “Jeni mo kü nahenthü shaktuh, nevaijü taopathü kü lemhük shuohtuh” shei epü vaaishang shei deih. 30 Hanangkü Judas-i hapa aan yahpheikü büpa shülangi lüdai hatü hapayü nyakdaitü nyuteke.
Shahkungnyü Ja
31 Mechem büpa vamdaipa, Jisui, “Shaang Shennyak Ha müknyinshekhangteke, hatü büpa kü Kahvang müknyinshekhangteke. 32 Kahvang müknyinshekhang büpa homei shakei vamhüjema, Kahvangi laophü kü-üng Shennyak Ha müknyinshekhanghen, hatü büpai hapakei chemjalak kü dükhen. 33 Maanpü hashihthü, ngei am mü hepak kansho hük mon nyuhen. Ammi ngei yemhen hatü ngei Jehoda am kü epükei shaang ngei am kao enyeih, ‘Ngei melei nyu, halei am nepeiaokhen.’ 34 Ngei am kü shahkung ja hük shuohnyeih, am hüki hük mü bamteituh. 35 Am hüki hük mü bamteijema, hapai amphongü ngelei nanglomthü khih shei peüi nyinghen” shei e.
Peteri Nelahhen Jisui Enyüke
36 Simon Peteri büpa kü, “Shembüpa, nüng melei dainya?” shei e. Jisui, “Ngei melei dainya halei nüng shaang nemüaokpih; shejao pheilei mühen” shei e. 37 Peteri büpa kü, “Shembüpa, ngei mekei shaang nüng phei nemüaokhen? Nüng shingvaishi ngelei yangnyu lanei shuohhen hih” shei e. 38 Jisui, “Nüngi ngei shing nüngei yangnyu lanei shuoh-aokhen je? Hingmei mü ngei nüng kü enyeih, ou gashekü jempa thahshi nüngi ngei nelah-aokpih” shei e.
Jisu Mon Lemnyü
1 Amphong mongteshang. Kahvang kü hinglemtuh, hatü ngei kao hinglemtuh. 2 Opalei shemei nyushing longi nyüke. Hei nevailangmeyü ngei amphong kü ephahen vaipeih. Ngei am shing nyushing hük temnüng dainyeih. 3 Ngei daiyei am shing shing hük tempheikü ngei nyipabü yiüei ngei mü nyuhen shingvaishi ngei am yahhen, hatü ngei melei nyu, halei amphongao nyuhen. 4 Ngei melei dainya, ha lem amphongi nying. 5 Thomas-i büpa kü, “Shembüpa, nüng melei dainya hami nenying, shejema hami mekei etü lem nyinghen?” shei e. 6 Jisui jangei, “Ngeiyü lemnyü, shahhing hatü yangnyu; ngei nehompheikü üpaiyao Opa touei nepeiaokpih. 7 Ammi hingshangi ngei nyinglang meyü ammi Opayao nyinghen vaipeih. Shaang mü leitü ammi büpa nyingnyüke hatü eeteke” shei e. 8 Philipi büpa kü, “Shembüpa, hamphong kü Opa hushih, hatü hapai ham shing changpü vaihen hih” shei e. 9 Jisui jangei, “Ngei amphong mü hajük hepak lushi nyupheikü nüngi ngei nenyingnyu je? Üpai ngei ee, büpai Opa eeteke. ‘Ham kü Opa hushih’ shei nüngi mekei enya? 10 Ngei Opa kü hatü Opa ngei kü nyüpeih shei nüngi nenyingang je? Ngei nüng kü epü shahthüyü ngelei lompü shah nevai. Shejao hapayü Opa, üpa ngei kü nyu, büpai ha dou düknyüke. 11 Ngei Opa kü hatü Opa ngei kü nyüke shei ngei kü hinglemtuh; nüngi hapakei hingnelemjema, yashanpü douthü kü dangkao hinglemtuh. 12 Hingmei ngei am kü enyeih, üpai ngei kü hinglemhen, büpai ngei dükpü douthü dükaokhen; hingmei, ngei dükpü kao nyeishi dükaokhen; mehenangkü ngei sheyü Opa touei lüdainyeih. 13 Ha kü Pa müknyinshekhanghen shingvaishi ammi ngelei men kü mehe yühenshang ngei ha shuohhen. 14 Ngelei men kü ammi mehe yühenshang ngei ha am kü shuohhen” shei e.
Laangha Daülangpü Shomhen Lahpü
15 Ammi ngei kü bamjema, ngelei shahkungthü banghen. 16 Ngei Opa kü yühen, hatü büpai am kü lebü Sheühbü hük den kü am mü nyuhen yahphahen. 17 Hapayü shahhing Laangha. Kahdoknyüi büpa neyah-aok; mehenangkü kahdoknyüi büpa ne-eeaok nevaijü nenyingaok. Shejao ammi büpa nying; mehenangkü büpa am mü nyüke, hatü am kü nyukahen. 18 Ngei amphong hashihha kei netuhphongpih; ngei nyipabü yiükahen. 19 Kansho hük pheikü kahdoknyüi ngei ne-eehen, shejao ammi ngei eehen; mehenangkü ngei yemmü nyupü nangkü amao yemmü nyuhen. 20 Hapa nyih kü ngei Opa kü nyüke, amphong ngei kü nyüke hatü ngei am kü nyüke shei nyinghen. 21 Üam kü ngelei shahkungthü nyu hatü hathü düknya, hathüyü ngei kü bampüthü, hatü üami ngei kü bamnya, hathü kü Opai bamhen, hatü ngei jom kü bamhen hatü ngei jom kü shakei vamhen. 22 Judas-i (Iskariot nevai) büpa kü, “Shembüpa, nüngi mekei kahdoknyü touei nevai-i hamphong touei shakei vamhen?” shei e. 23 Jisui büpa kü, “Üami ngei kü bamnya, hathüi ngelei shahthü banghen, hatü Opa-i hathü kü bamhen, hatü ham jom touei peiyei jom mü chemi shemong hük leiyei nyuhen. 24 Üami ngei kü nebam, hathüi ngelei shahthü nebangnyih, hatü ammi danpü shah-ü ngelei nevai, shejao hapayü ngei shompü Opa leipü hih” shei e. 25 Ngei am mü nyushingkü hathü ngei am kü etepih. 26 Shejao Sheühbü, Laangha Daülangpü, üpa ngelei men kü Opa-i shomhen, büpai am kü lemphü nyuhphahen, hatü ngei am kü epü peü deih-ei lehühen. 27 Ngei am mü chingmei tuhphünyeih; ngelei chingmei ngei am kü shuohnyeih. Kahdoknyüi shuohpükei ngei am kü neshuohnyih. Ammei mong teshanghü nevaijü tenyemhü. 28 Ngei am kü, “Ngei lüdainyeih, hatü ngei am touei peikahen” shei epü ammi danteke. Ammi ngei kü bamjema ngei Opa touei lüdaipü kü ammi bamhen; mehenangkü Opayü ngei mü longpüba. 29 Ha vamshekü ngei am kü ha yeihshi enyeih, hatü mechem ha vamhenshang, ammi ha kü hinglemhen. 30 Ngei amphong mü hajük kü ahshi ne-ehen; mehenangkü hapa kahdoknyü vanglem lembü peikünyüke. Büpa ngei shak kü mehe wongao neshiü; 31 Ngei Opa kü bamnyüke shei kahdoknyüi nyinghen shingvaishi ngei Opa-i epü düknyüpeih. Yaongtuh, jen daishah.
Jisu-ü Hingshangpü Nyalingngupai
1 Ngeiyü hingshangpü nyalingngupai, hatü Opayü pe dükbü. 2 Ngei kü nyupü betjük nejükpü kaothü büpai langtüknyeih, hatü betjük jükpü kao shao nyeishi jükhen shingvaishi büpai hapa kao daütüknyeih. 3 Ngei am kü epü shah-i am daüdaiteke. 4 Ngei kü nyutuh, hatü ngei am kü nyuhen. Pü bümnyü kü nenyupheikü kao hük mekei etao betjük nejükaok; hapa keiha ngei kü nenyupheikü am nyingi betjük jüknüng neaok. 5 Ngeiyü pünyü büm, amphongü kaothü. Üpai ngei kü nyuhen, ngei büpa kü nyuhen, hatü büpai betjük longi jükhen; mehenangkü ngei mü yanei ammi meheyao nedükaokhen. 6 Üam ngei kü nenyu, hathüyü kao hük kei yaktüknyeih hatü vandainyeih; hapa keipü kaothüyü thaiyei aw kü shükei jaktüknyeih. 7 Amphong ngei kü nyujema hatü ngelei shahthü am kü nyujema, ammi mehe na ha yütuh hatü ha am kü shuohhen. 8 Ammi betjük longi jükpai ngelei nanglomthü khih shei huhen; hapai Opa müknyinshekhanghühen. 9 Opa-i ngei kü bampü keiha ngeiyao amphong kü bamnyeih; ngei kü nyutuh. 10 Ammi ngelei shahkungthü bangjema, ngei Opalei shahkungthü bangei büpa bampü kü nyupükei amphongao ngei bampü kü nyuhen. 11 Ngelei mongong am kü nyuhen hatü am mongongpü changhühen shingvaishi ngei hathü am kü epeih. 12 Ngei am kü bampü keiha am hüki hük mü bamteituh; hapayü ngelei shahkungnyü. 13 Küphü hük shingvaishi laophülei yangnyu lanei shuohpü mü nyeipü lebü bampü neshiü. 14 Ngei am kü epü dükjema amphongü ngelei küphüthü. 15 Ngei hajük kü amphong kü aathü shei nenyüknyih; mehenangkü shembüi mehe düknya, ha aa hüki nenyingnyih; shejao ngei am kü küphüthü shei nyüknyeih; mehenangkü ngei Opa leipü danpü peü ngei am kü nyinghütepih. 16 Ammi ngei neje, shejao ngei amphong jepeih. Am daiyei betjük jükhen, hatü den kü nyuhen betjük jükhen shingvaishi ngei amphong jepeih; shejüang ngelei men kü ammi mehe mehe Opa kü yühenshang büpai ha am kü shuohhen. 17 Am hüki hük mü bamteihen shingvaishi ngei hathü shahkung shuohnyeih.
Kahdoknyüi Jiühitpü
18 Kahdoknyüi am kü jiühitjema, am kü jiühit shekü ngei kü jiühitteke shei ammi nyingtuh. 19 Amphong kahdoknyülei vailangmeyü kahdoknyüi laophülei lompü kei bamphahen. Mehenangkü amphongü kahdoknyülei nevai, shejao kahdoknyü kübü ngei amphong jelangpü nangkü kahdoknyüi am kü jiühitnyüke. 20 “Aathüyü shembü mü longpü nevai” shei ngei am kü epü shah deih-ei dangtuh. Jomi ngei kü dangkao shüveijema, am kao shüveiphahen. Jomi ngelei shah bangjema, ammei shah-ao bangkahen. 21 Shejao ngelei men tata kü jomi am kü ha douthü dükphahen; mehenangkü üpai ngei shom, jomi büpa nenying. 22 Ngei paoh peiyei jom kü ne-elangmeyü jom mang nethahhah shepeih; shejao shaangü jomei mang nangkü jom kü mang tükpü neshiü. 23 Üpai ngei kü jiühitnya, Opa kao jiühitnyüke. 24 Üpaiyao mangdükpü dou ngei jomphong touei nedüklangmeyü jomi mang nethahhah shepeih. Shejao shaang jomi ha eeteke, hatü ngei hatü Opa henjiphen kü jiühitnyüke. 25 Jomei shahkung kü, “Meheyao ten neshiüpü kü jomi ngei kü jiühitteke” shei nyangei nyupü ha jiühen shingvaishi vamteke. 26 Ngei am kü Opa leipü shompü Sheühbü mechem peikahen, Opa leipü peipü shahhing Laanghai ngei nangkü denpü shuohhen. 27 Pangpü mebü am ngei mü nyuhamphei vaipü nangkü ammiyao ngei jung denpü shuohtuh.
1 Am huluh neshuohhen shingvaishi ngei ha douthü am kü etepih. 2 Jomi am Sinagog leipü changtükhen. Hingmei, am jüpüthüi hapakei dükpai Kahvang kü khümnyeih shei deihhen hepak hük ngoikünyüke. 3 Jomi Opa nevaijü ngei nenyingpü nangkü jomi ha dükphahen. 4 Shejao hapa hepak am touei ngoishingkü ngei am kü hathü jung ephütepih shei deihhen shingvaishi ngei hathü am kü etepih.
Laangha Daülangpülei Dou
Pangpülei ngei hathü am kü ne-eangpih; mehenangkü ngei am mü nyuteke. 5 Shejao shaang üpai ngei shom, büpa touei ngei lüdainyeih; shejao amphong üpaiyao ngei kü, “Nüng melei dainya?” shei nephe. 6 Shejao ngei hathü epü nangkü amphong mongmangi madaiteke. 7 Shejoongpa ngei am kü shahhing enyeih: am vangmeihen nangkü ngei lüdainyeih; mehenangkü ngei nedaijema Sheühbü am touei nepeikahen; ngei lüdaijema ngei am touei büpa shomphahen. 8 Mechem büpa am touei peihen, büpai kahdoknyü kü mang, daülangshemshepü hatü shahphenpü nang nejiü shei huhen; 9 mang nangkü, mehenangkü jomi ngei kü hingnelem; 10 daülangshemshepü nangkü; mehenangkü ngei Opa touei lüdainyeih hatü hajük kü ammi ngei ne-eehen; 11 shahphenpü nangkü, mehenangkü hapa kahdoknyü vanglem lempüthü nyonghüteke. 12 Shao-üng ngei am kü ehen longi nyüpeih, shejao ammi shaang hathü neko-aoknyu khih. 13 Mechem shahhing Laangha peikahen, büpai shahhing peü lemei am müphahen; mehenangkü büpai büpa nang ne-ehen, shejao büpai danpüthü ephahen, hatü ngoikahen douthü jung am kü ephahen. 14 Büpai ngei müknyinshekhanghühen; mehenangkü büpai ngelei lompüthü yahhen hatü ha am kü nyinghühen. 15 Opai angpü peü ngelei vaipü nangkü büpai ngelei lompüthü yahhen, hatü ha am kü nyinghühen shei ngei enyüpeih.
Mongmang hatü Mongmei
16 “Kansho hük pheikü sheyü ammi ngei ne-eehen, hatü kansho hük pheikü ammi ngei eehen.” 17 Hahepak kü büpalei nanglomthüi hüki hük mü, “Kansho hük pheikü ammi ngei ne-eehen, hatü kansho hük pheikü ammi ngei eehen” shei büpai jen kü ha mehe lappü epüang yo? shei etei. 18 “Büpai, ‘Kansho hük pheikü’ shei epeyü mehe lappa yo? Büpai mehe jung enya nenyingang” shei jomi etei. 19 Büpa kü phehünyu khih shei Jisui nyingei büpai jomphong kü, “Ngei amphong kü, ‘Kansho hük pheikü sheyü ammi ngei neeehen, hatü kansho hük pheikü ammi ngei eehen’ shei mehe lappü ngei epa ha jung eteinyu je?” shei phe. 20 Hingmei ngei am kü enyeih, amphong thepeiyounghen, shejao kahdoknyüi mongonghen; am tüngpüyapü eehen shejao ha mongongpü leidaihen. 21 Mechem nyüha hük hapeü angnya longi tüngnyüpeih, mehenangkü pinnyülei hepak ngoiteke. Shejao mechem hapeü angtükhen, pinnyüi kahdoknyü kü hangku hük angtükpü nangkü pinnyüi tüngei ponghahpü deih-ei nedangnyih. 22 Hanangkü shaang am tüngnyüke, shejao shao ngei am eehen, hatü am mongonghen, hatü am leipü ammei mongong üpaiyao neyahlanghen. 23 Hapa nyih ammi ngei kü meheyao nephehen. Hingmei ngei am kü enyeih, ammi ngelei men kü Opa kü lemhük dangkao yüjema, büpai ha am kü shuohhen. 24 Shaang thahshi ammi ngelei men kü meheyao mangyü. Ammei mongong changhühen shingvaishi ammi yütuh hatü ha danghen.
Kahdoknyü Shak kü Aokpü
25 Ngei am kü ha shahthü shahlappai epeih. Ngei hajük kü amphong kü shahlap ne-ehen hepak ngoikünyüke, shejao ngei am kü lapjai Opa jung ephahen. 26 Ha nyih ammi ngelei men kü yühen. Ammei men kü ngei Opa kü yühen shei ngei ne-enyih; 27 mehenangkü Pa-i laophü nyingi am kü bamnyüke; mehenangkü ammi ngei kü bam, hatü ngeiyü Kahvang leipü pei shei ammi hinglemteke. 28 Ngei Opa leipü pei, hatü kahdoknyülei yiü; shao ngei kahdoknyü tuhphongtü Opa touei lüdainyeih. 29 Büpalei nanglomthüi, “Hayü khih, shaang nüngi shahlap nevai, lapjai enyüke! 30 Shaang nüngi peü nyingnyüke shei hami nyingnyüke, hatü üpaiyao meheyao nephehahhünyu; hapai nüngü Kahvang leipü peipü khih shei hami hinglemnyeih” shei e. 31 Jisui jomphong kü e, “Ammi shaang hinglemnyu je? 32 Hepak ngoikünyüke; hingmei ha ngoiteke; ammi ngei mon tuhphongtü laophü laophülei shemei yandaikemhen. Shejao ngei mon nevai Opayao ngei mü nyüpeih. 33 Ngei kü am chingmei nyuhen shingvaishi ngei hathü am kü etepih. Kahdoknyülei am shüveipü ponghen, shejao monglongtuh; mehenangkü ngei kahdoknyü aoktepih.”
Jisui Nanglomthü Shingvaishi Phoppü
1 Jisui hathü shah epheikü büpai vangsho philei ngangei veitü eteke, “Opa, hepak ngoiteke, Anha-i nüng müknyinshekhanghen shingvaishi Anha müknyinshekhanghütuh. 2 Nüngi büpa kü shuohpüthü peü kü yangnyuyem shuohhen shingvaishi nüngi hangkuthü peü shak kü büpa kü wong shuohteke. 3 Jomi nüng, hingshangpü Kahvang hatü nüngi shompü Jisu Khrista nyinghen hayü yangnyuyem hih. 4 Kahdoknyü kü nüngi ngei kü dükhen shuohpü dou dükei tempai ngei nüng müknyinshekhangtepih. 5 Hanangkü shaang, Opa, kahdoknyü lingshekü nüng touei ngei kü nyupü müknyinshekhangi nüng touei ngei müknyinshekhanghütuh.” 6 Kahdoknyü leipü nüngi ngei kü shuohpüthü kü ngei nüngei men nyinghütepih. Jomphongü nüngei, hatü ngei kü nüngi hathü shuoh, hatü jomi nüngei shah bangteke. 7 Ngei kü shuohpü lemphü nüng leipü khih shei jomi shaang nyingteke; 8 mehenangkü nüngi ngei kü shuohpü shahthü ngei jomphong kü shuohtepih, hatü jomi ha shah yahteke, hatü hingshangi ngeiyü nüng leipü peipü khih shei jomi nyingteke, hatü nüngi ngei shompü khih shei jomi hinglemteke. 9 Ngei jomei men kü phopnyeih; ngei kahdoknyülei men kü nephopnyih, shejao nüngi ngei kü shuohpüthülei men kü phopnyeih; mehenangkü jomphongü nüngei. 10 Ngeilei nyupü peü nüngei, hatü nüngi angpü peü ngelei, hatü ngei jomphong kü müknyinshekhangtepih. 11 Shaang ngei hajük kü kahdoknyülei nenyuhen, shejao jomphong payü kahdoknyülei nyüke, hatü ngei nüng touei peikünyeih. Daülangpü Opa, nüngi ngei kü shuohpüthü nüngei men kü yangei tuhtuh, shejüang ji hük vaipükei jomphongao hük leihen. 12 Mechem ngei jom mü nyupa, nüngi ngei kü shuohpüthü nüngei men kü yangei tuhtepih. Ngei jomphong yomtepih, hatü laihingei epü jiühühen shingvaishi mahhen hük daümtükpü mü lenei hükao nemahtük. 13 Shejao shaang ngei nüng touei peikünyeih, hatü jom kü ngelei mongong changhühen shingvaishi ngei kahdoknyülei hathü enyüpeih. 14 Ngei jomphong kü nüngei shah shuohtepih, hatü kahdoknyüi jom kü jiühitteke; mehenangkü ngei kahdoknyülei nevaipükei jomphongao kahdoknyülei nevai. 15 Jom kahdoknyü leipü yahlanghen nangkü ngei nephopnyih, shejao nemeipü kübü jom yanglanghen shingvaishi phopnyeih. 16 Ngei kahdoknyülei nevaipü keiha jomphongü kahdoknyülei nevai. 17 Shahhing kü jom daühütuh; nüngei shah-ü shahhing nyüke. 18 Nüngi ngei kahdoknyülei shompükei ngei jomphong kahdoknyülei shomnyüpeih. 19 Jomao shahhing kü daühühen shingvaishi jomei men kü ngei nyingi daütüknyeih. 20 Ngei jomei men kü mon nephopnyih, shejao jomei shah homei ngei kü hinglemhenthü shingvaishiyao phopnyüpeih, 21 shejüang jom peü hük vaihen. Opa, nüng ngei kü hatü ngei nüng kü nyupükei jomphongao ji kü nyuhen, shejüang nüngi ngei shompü khih shei kahdoknyüi hinglemhen. 22 Nüngi ngei kü shuohpü müknyinshekhang ngei jomphong kü shuohtepih, shejüang ji hük vaipükei jomphongao hük leihen. 23 Ngei jom kü hatü nüng ngei kü nyüke; jomphong hük leiyei mongjemhen, shejüang nüngi ngei shompü khih, hatü nüngi ngei kü bampükei ngei jomphong kü bampü khih shei kahdoknyüi nyinghen. 24 Opa, nüngi ngei kü shuohpüthü ngei melei nyu, halei jomao nyuhen, hatü nüngi ngei kü shuohpü ngelei müknyinshekhang jomi eehen ngei nanyüpeih; mehenangkü nüngi ngei kü kahdoknyü chongnyiam lingshekü ngei kü bampeih. 25 Daülangpü Opa, kahdoknyüi nüng nenyingnyu, shejao ngei nüng nyingnyüpeih, hatü nüngi ngei shompü khih shei hathüi nyingnyüke. 26 Ngei nüngei men jomphong kü nyinghütepih, hatü ngei ha nyinghühen, shejüang mepa bampai nüngi ngei kü bam, ha bampü jom kü nyuhen, hatü ngei jom kü nyuhen.
Jisu Luhahpü hatü Yeppü
1 Jisui hathü shah eyei kempheikü büpai büpalei nanglomthü mü Kidron Kahji homei pe hük nyupü shing hükei dai, hatü halei büpa hatü büpalei nanglomthü nyuteke. 2 Shaang Judas, üpai Jisu luhahpa, büpai hapa shing nyingei nyu, mehenangkü Jisui düngei büpalei nanglomthü mü hatouei pongteihamteke. 3 Hanangkü Judas-i büpa mü ngongpathü hatü Phariseethüi shompü Rom veshanthü hatü phopshem yompü veshanthü awdük, awnya, hatü lahhilaong notü müei pei. 4 Hahepak kü Jisui büpa kü mehe vamhen ha peü nyingei she philei heih-ei jomphong kü, “Ammi üpa yemnya?” shei phe. 5 Jomi, “Nazareth am Jisu” shei jangei e. Jisui jangei, “Büpayü ngei hih” shei e. Büpa luhahpü Judas-ü jomphong mü yaongshi nyu. 6 Mechem Jisui jomphong kü, “Büpayü ngei hih” shei eshuohpa, jom ngaümphei lemei leitü kahdokei doei sha. 7 Shao büpai jomphong kü, “Ammi üpa yemnya?” shei phe. Jomi büpa kü, “Nazareth am Jisu” shei e. 8 Jisui jangei, “Büpayü ngei hih shei ngei am kü etepih. Hanangkü ammi ngei yemjema, hathü shennyak deitüktuh” shei e. 9 Hapayü büpai, “Nüngi ngei kü shuohpü hükao nemahtük” shei epü jiühühen nangkü vamteke. 10 Hahepak kü Simon Peterlei lakei yan hük nyu; büpai ha tukei ngongchongei aalei lakdahphi dhaong lüktük. Ha aapalei menü Malkhus nyu. 11 Jisui Peter kü, “Nüngei yanlu yanpishungei hülangtuh. Opa-i ngei kü shuohpü yungshong ngei neyinghen je?” shei e.
Jisu Ngongchong Anna Touei
12 Hanangkü veshanthü, jomei lakchongbüthü, hatü Jehoda am veshanthüi Jisu yepei shateke. 13 Shongei jomi hapa bong ngongchong vaipü Kaiaphaslei chenyühalei chepa Anna touei müei dei. 14 Jehoda am kü nanglakthü shingvaishi shennyak hük dihen meipeih shei shahnying epeyü hapa Kaiaphas nyuteke.
Peteri Jisu Nelahpü
15 Simon Peter hatü lebü nanglom Jisu phei mü. Hapa nanglomü ngongchong mü nyingteiyei nyupü nangkü büpa Jisu mü ngongchongei shem mongei shü, 16 shejao Peter payü chingshelei peshaden touei yaongshi nyu. Hanangkü ngongchong mü nyingteipü lebü nanglom vamei peshaden yompü nyüha mü eteitü Peter-ao mongei müei shüteke. 17 Hapa nyühai Peter kü, “Nüngao hapa shennyakei nanglom hük nevaipü je?” shei e. Büpai, “Ngei nevaipih” shei e. 18 Shaang wohongpü nangkü aathü hatü veshanthüi aw jaktü hapa shinei yaongshi wohong meiyei nyu. Peter-ao jomphong mü yaongtü wohong meiyei nyu.
Ngongchongi Jisu kü Shah Phepü
19 Hahepak kü ngongchongi Jisu kü büpalei nanglomthü hatü büpai nyuhpü venpü nang shah pheteke. 20 Jisui jangei, “Ngei kahdoknyü kü ngaiheyei etepih; ngei düngei Jehoda am peü thaipü Sinagog hatü phopshemei nyuh-ei nyuhampeih. Ngei joei meheyao ne-eangpih. 21 Ngei kü mehekei phenya? Ngei jom kü mehe e, ha danpüthü kü phetuh; ngei mehe e, ha jomi nyingei nyüke” shei e. 22 Mechem büpai ha epa, büpa yopailei yaongshi nyupü veshan hüki Jisulei dhe kü aptü, “Nüngi ngongchong kü hapakei shah leinyu je?” shei e. 23 Jisui jangei, “Ngei nejiüi epü vaijema nejiü shei etuh. Shejao ngei jiüpü ejü mehekei nüngi ngei kü apnya?” shei e. 24 Hahepak kü Anna-i shatükpü lakshing büpa Kaiaphas ngongchong touei shom.
Shao Peteri Jisu Nelahpü
25 Shaang Simon Peter-ü aw touei yaongshi wohong meiyei nyu. Jomi büpa kü, “Nüngao büpalei nanglomthü khongkü hük nevaipü je?” shei e. “Ngeiyü nevaipih” shei büpai nelah-aoki e. 26 Ngongchongei aa hük, Peteri dhaong lüktükpülei shem am hüki büpa kü, “Ngei nüngao büpa mü pemongei eephei nevaipü je?” shei e. 27 Shao Peteri ha nelahaok, hatü hahepak kü ou gateke.
Jisu Pilat Touei Yaongpü
28 Hahepak kü jomi Jisu Kaiaphas toueipü müei Pilatei ongshemei dei. Hapayü dhom hepak nyu. Jehoda am mübüthü ongshemei neshü; mehenangkü jomi Hompü Mo hahhen shingvaishi jom nyingi daütüktü nyuteke. 29 Hanangkü Pilati jom touei vamei, “Ammi hapa shennyak mepa homei nyonghünya?” shei e. 30 Jomi jangei, “Hapa shennyaki nepunglangmeyü hami büpa nüng kü lanei neshuohhen vaipeih” shei e. 31 Pilati jomphong kü, “Amphongi büpa müei daiyei ammei shahkungnyü aimü shahphenhahtuh” shei e. Jehoda ami jangei, “Üpaao jühen ham kü wong shuoh-ei neshiüpih” shei e. 32 Hapayü mekeipü dipü lemi büpa dihen, ha Jisui huei epü jiühühen shingvaishi vamteke. 33 Hahepak kü Pilat ongshemei shao shüei Jisu kü nyükei büpa kü, “Nüngü Jehoda amei Ong je?” shei phe. 34 Jisui, “Hapayü nüngi deihtü phenyu hi nevaijü hanei ami ngei jung ephopa?” shei e. 35 Pilati jangei, “Ngeiyü Jehoda am hük nevai, vaila? Ammei jat hatü ngongpathüi nüng yepei ngei kü shuohpü khihma. Nüngi mehe dükshuohpa?” shei e. 36 Jisui jangei, “Ngelei ongchingü hapa kahdoknyülei nevai, hapa kahdoknyülei vailangmeyü Jehoda ami ngei yepei shuohpü kü neshuohhühen ngelei nanglomthüi hokhen vaipeih. Shejao ngelei ongchingü kahdoknyülei nevaipih” shei e. 37 Pilati büpa kü, “Shejema nüngü ong je?” shei phe. Jisui jangei, “Nüngiang ngeiyü ong hük khih shei enyüke. Ha tata kü ngei bühpeih, hatü ha tata kü ngei hapa shahhing denpü shuohhen nangkü ngei kahdoknyülei yiüpeih. Hapa shahhing kü nyupü peüi ngei epü bangnyeih” shei e.
Jisu Dihen Nyonghüpü
38 “Shahhingü meheang?” shei Pilati phe. Büpai ha epheikü büpai shao Jehoda am touei vamei jomphong kü, “Büpa nyonghühen mü ngei meheyao nedangang. 39 Hompü Mo kü ngei am touei shennyak hük vephahen vanglem nyüke. Ngei am touei Jehoda amei Ongpa vephahen hiang?” shei phe. 40 Jomi lenei, “Hapa shennyak nevai, shejao Barabbas!” shei jangei e. Shaang Barabbas-ü gühpa hük nyuteke.
1 Hapheikü Pilati Jisu deiyei büpa kü bheiteke. 2 Veshanthüi hühthangi athen hük lingtü büpalei shangjing kü thenhü, hatü manghmepü ow owhü. 3 Jom nedoh-i büpa touei peiyei, “Jehoda amei Ongpa, yangnyu shoshoshi nyutuh!” shei e, hatü büpalei dhe kü apteke. 4 Shao chem Pilat chingshelei vamei khong kü, “Veituh, büpa nyonghühen mü ngei meheyao nedangang shei am kü nyinghühen shingvaishi ngei büpa am touei ngaikünyeih” shei e. 5 Hanangkü Jisu hüh athen thentü, manghmepü ow owtü vamteke. Pilati jomphong kü, “Veituh, shennyakü ha khih” shei e. 6 Mechem ngongpathü hatü veshanthüi büpa eepa, jomi, “Büpa shophang kü aptuh! Büpa shophang kü aptuh!” shei len. Pilati jom kü, “Am nyingi büpa müei daiyei shophang kü aptuh, ngei büpa nyonghühen mü meheyao nedangang” shei e. 7 Jehoda ami büpa kü jangei, “Hamei shahkung hük nyüpeih, hatü hapa shahkung aimü büpa dihen jiüteke; mehenangkü büpai büpayü Kahvang Ha hih shei epeih” shei eteke. 8 Shaang mechem Pilati ha danpa, büpa nyeishi nyem. 9 Büpai shao ongshemei shüei Jisu kü, “Nüng meleipüang?” shei phe. Shejao Jisui büpa kü shah nelei. 10 Hanangkü Pilati büpa kü, “Nüngi ngei kü shah ne-ehen je? Nüng vehen nevaijü nüng shophang kü aphen wong ngei kü nyüpeih shei nüngi nenyingnyu je?” shei e. 11 Jisui jangei, “Shangphi leipai nüng kü neshuohlangmeyü nüng ngei shak kü wong nenyuhah shepeih; hanangkü üami ngei yepei nüng kü lanei shuohnya, jomi nyeipü mang thahteke” shei e. 12 Hajük mü leitü Pilati Jisu vetükhen khe, shejao Jehoda ami lenei, “Nüngi hapa shennyak vetükjema, nüngü ongpalei küphü nevai. Üpai ong leihünya, büpayü ongpalei vepa” shei e. 13 Mechem Pilati hathü shah danpa, büpai Jisu chingshelei müei anei, “Yaongdü” nevaijü Hebrew shah mü “Gabbatha” shei epü shingei shahphenpü uoshing kü uoteke. 14 Shaang hapayü Hompü Mo shing Tempülempü nyih nyu, hatü ha haümhah hepak nyuteke. Büpai Jehoda am kü, “Ammei Ongpayü ha khih!” shei e. 15 Jomi lenei, “Büpa jütuh! Büpa jütuh! Büpa shophang kü aptuh!” shei len. Pilati jomphong kü, “Ngei ammei Ongpa shophang kü aphühen je?” shei phe. Ngongpathüi jangei, “Kaisar mü lenei hamei ong neshiüpih” shei e. 16 Hahepak kü büpai jomphong kü shophang kü aphen shingvaishi Jisu lanei shuoh.
Jisu Shophang kü Appü
Hanangkü jomi Jisu lanei yah, 17 hatü büpai laophülei shophang paitü “Shangvang” (Hebrew shah mü Golgotha) shei menpü shingei dai. 18 Halei jomi büpa hatü büpa mü nyonghidah kü lebü nyi, büpa jiamei shei shophang kü ap. 19 Pilati shah hük hapakei nyangtü ha shophang shangei tuh: “Nazareth am Jisu, Jehoda amei Ongpa.” 20 Jehoda am longshi shingi ha nyangpü ee; mehenangkü Jisu shophang kü appü shingü chingnyü yopailei nyu, hatü hapayü Hebrew, Latin hatü Greek shahthü mü nyang. 21 Hahepak kü Jehoda am ngongpathüi Pilat kü, “Jehoda amei Ongpa” shei tenyang, shejao hapa shennyaki, “Ngeiyü Jehoda amei Ongpa” shei epeih shei eteke. 22 Pilati jomphong kü, “Ngei mehe nyangtük, nyangtük” shei e. 23 Veshanthüi Jisu shophang kü appheikü büpalei ashak ali anei shaaktü hükbaong hanei yah. Jomi büpalei bhagthuh-ao yah, hatü hapayü sho kübü la thahshi baong neshiüi dakpü bhagthuh nyuteke. 24 Hanangkü jomphong hüki hük mü, “Jeni hapayü teshaakshah; üpai danghen shangkü phongyomei veishah” shei e. Hapayü laihingei, “Jomi ngelei ashakviha hantei, hatü ngelei büm-ow nangkü phongyomteke” shei epü jiühühen nangkü ha vamteke. Hanangkü veshanthüi ha dükteke. 25 Hahepak kü Jisulei shophang yopailei yaongpeyü chenyü, chenyülei chenaü Klopaslei chenyüha Mary hatü Mary Magdalen hathü nyu. 26 Mechem Jisui chenyü hatü büpai bampü nanglom pinnyü touei yaongshi eepa, büpai chenyü kü, “Nyüha, anha kü veituh” shei e. 27 Hapheikü büpai hapa nanglom kü, “Anyü kü jungtuh” shei e. Hapa hepak kü-üng büpai jomei shemei pinnyü leilang.
Jisu Dipü
28 Hapheikü mechem Jisui dou peü temteke shei nyingpa, (laihing kü eyei nyupü jiühühen shingvaishi) “Ngei yung leangke” shei e. 29 Hatouei dük hük kü yiüthi maei shihtü haüshi nyu. Hanangkü jomi phümphah yah-ei hyssop püthang kü jap, hatü ha yiüthi kü hüngtü anei ju kü jeeshuoh. 30 Mechem büpai ha yiü yah, büpai, “Ha temteke” shei e, hatü büpalei ngaüm thaungei büpalei laangha lüdai.
Jisulei Haampat kü Hümpü
31 Hapa nyih-ü Tempülempü nyih vaipü nangkü Jehoda ami Sabbath nyih shophangei mahng netuhhü; mehenangkü Sabbath-ü longi daülangpü nyih nyu. Hanangkü jomi Pilat kü shophang kü appüthülei la bhagei veitü mahng yahlanghen shingvaishi pheteke. 32 Hahepak kü veshanthü peiyei Jisu mü shophang kü appü shongpübalei la bhag, hatü hükpalei la-ao bhag. 33 Shejao mechem jomphong Jisu touei heihpa, büpa meishi didaipü eeyei jomi büpalei la nebhagtük. 34 Ha nangjei veshanthü khongkü hüki büpalei haampat kü phungi hüm, hatü iy hatü yung chemi vam. 35 (Üpa shennyaki ha vampü ee, denpü shuohteke, hatü büpalei denpeyü shahhing. Büpai shahhing enyeih shei büpai nying, hatü ammi hinglemhen shingvaishi ha jung denpü shuohnyüke). 36 Laihingei, “Büpalei vang hükao nebhagtük” shei epü jiühühen shingvaishi ha vamteke. 37 Shao lebü laiphong hanei kü, “Jomi üpa kü phungi hüm, jomi büpa eehen” shei enyüke.
Jisulei Mahng Vüpü
38 Hathü vampheikü, Arimathea am Joseph, üpa Jehoda am kü nyempü nangkü joshi vaijao Jisulei nanglom nyuhampa, büpai Pilat kü Jisulei mahng yah-ei daihen nyemmongshuoh shei peiyei phe. Pilati büpa kü mongshuoh; hanangkü büpa peiyei mahng yah-ei dai. 39 Nikodemas, üpa shongei Jisu touei yanüng pei, büpa-ao vong meipü myrrh hatü aloe meli dok hapüan hükshing yah-ei pei. 40 Jomi Jisulei mahng yah-ei Jehoda am mahng vüteipü vanglem aimü nyemin ashak kü vongmei meli shihtü mahng kü ngeihteke. 41 Shaang büpa shophang kü appü shingei pe hük nyu, hatü hapa pemongei mechemao üpaao mangvüpü mahngchong ja hük nyu. 42 Mehenangkü hapayü Jehoda am Tempülempü nyih vaipü nangkü, hatü mahngchongao yopailei nyupü nangkü jomi Jisu halei vüphong.
Jisu Yangei Leipü
1 Hat kü shongpü nep, pibom kü Mary Magdalen mahngchongei heih, hatü mahngchong leipü yaong ngowtüktü ee. 2 Hanangkü pinnyüi mokei leiyei Simon Peter, hatü Jisui bampü lebü nanglom hük kü, “Jomphongi mahngchong leipü Shembüpa yahlangteke, hatü büpa melei vüpüshang nenyingang” shei e. 3 Hahepak kü Peter hatü lebü nanglom nyi layaongei mahngchongei heih. 4 Jiji chemi mok, shejao lebü nanglomi Peter kü yeiyei büpai shong mahngchong ngoi. 5 Büpai phaangei mongei veishuohjü ngeihpü nyemin ashak mon haüshi ee, shejao büpa mongei neshü. 6 Hahepak kü Simon Peter büpa phei müshi ngoiyei mahngshalei shüteke. Büpai ngeihpü nyemin ashak haüshi ee, 7 hatü Jisulei shangjing kü shakpü ashakü büm kü ngeihpü ashak mü khaatei hayaoha dütü shing hükei nyu. 8 Hahepak kü lebü nanglom üpa shongei mahngchong ngoi, büpaao mongei shü hatü büpaiyao ha eetü hinglem; 9 mehenangkü hahepak thahshi büpa dipü kübü yangei leihen shei epü laihing nenyingaok. 10 Hapheikü nanglom nyi shemei leidai.
Jisu Mary Magdalen Touei Vampü
11 Shejao Mary payü mahngchong shelei thepei yaong. Pinnyü thepshingkü mahngshalei veihen aümei sha; 12 hatü pinnyüi vangsho phongshan nyi shola ow owtü Jisulei mahng shangjing lemei hük hatü la lemei hük uoshi ee. 13 Jiji-i pinnyü kü, “Nyüha, nüng mehekei thepnya?” shei e. Pinnyüi jiji kü, “Jomi ngelei Shembüpa yah-ei lüdaiteke, hatü jomi büpa melei tuhtükpüshang ngei nenyingang” shei e. 14 Ha etü mechem pinnyüi yaakei leipa, hatouei Jisu yaongshi ee, shejao pinnyüi hapayü Jisu khih shei nenying. 15 Jisui pinnyü kü, “Nyüha, nüng mehekei thepnya? Nüngi üpa yemnya?” shei e. Pinnyüi hapa shennyakü pe dükpü am khih shei deih-ei, “Longpüba, nüngi büpa yah-ei lüdaipü vaijema, nüngi büpa melei tuhpüshang eshih, ngei büpa yah-ei lüdaihen hih” shei e. 16 Jisui pinnyü kü, “Mary!” shei e. Pinnyüi yaakei büpa kü Hebrew shah mü Rabboni (lappai, Nyuhbü) shei e. 17 Jisui pinnyü kü, “Nüngi ngei kü laki tedükpha; mehenangkü ngei Opa touei mangaongpih. Shejao ngelei jeihinaüthü touei daiyei jomphong kü, ‘Ngei ngelei Opa hatü ammei Pa, hatü ngelei Kahvang hatü ammei Kahvang touei aongdainyuja’ shei etuh” shei eteke. 18 Hanangkü Mary Magdalen daiyei nanglomthü kü, “Ngei Shembüpa eetepih” shei e, hatü büpai hathü shah ngei kü ephopeih shei pinnyüi e.
Jisu Nanglomthü Touei Vampü
19 Hat kü shongpü nyih om kü mechem nanglomthüi Jehoda am kü nyemei sha küptü thaiyei nyupa, Jisu peiyei jomphong khong touei yaongtü, “Amphong mü chingmei nyutuh” shei e. 20 Büpai ha epheikü büpai jomphong kü büpalei lak hatü haampat hushuoh. Hahepak kü nanglomthüi Jisu eeyei mongong. 21 Jisui shao jomphong kü, “Amphong mü chingmei nyutuh. Opa-i ngei shompükei ngeiyao amphong shomnyeih” shei e. 22 Mechem büpai ha epa, büpai jomphong kü ngüi dutü jomphong kü, “Laangha Daülangpü yahtuh. 23 Ammi hanei amei mang tükjema, jomei mang tüktükteke; ammi hanei amei mang netükjema jomei mang netüki nyüke” shei e.
Jisu hatü Thomas
24 Shejao Thomas (üpa kü Didymus shei nyük), anpünyi khongkü hük Jisu peishingkü büpa nenyu. 25 Hanangkü lebü nanglomthüi büpa kü, “Hamphongi Shembüpa eetepih” shei e. Shejao büpai jomphong kü, “Ngei büpalei lakbha kübü kojal kaw mang-ee thahshi hatü hapa kojal kaw hatü haampat kübü makaw kü ngelei lakjaangi mangyuk thahshi ngei hingnelempih” shei e. 26 Hapta hük pheikü shao büpalei nanglomthü hapa shemei nyu, hatü Thomas-ü jomphong mü nyu. Sha küptü nyujao Jisu peiyei jomphong touei yaongtü, “Amphong mü chingmei nyutuh” shei e. 27 Hahepak kü büpai Thomas kü, “Nüngei lakjaangi hammü yuktuh, hatü ngelei lak kü veituh. Nüngei lak deiyei ngelei haampat kü yuktuh. Nüng tejü-ü shejao hinglemtuh” shei e. 28 Thomas-i büpa kü, “Ngelei Shembüpa, ngelei Kahvang!” shei e. 29 Jisui büpa kü, “Nüngi ngei eepü nangkü hinglemnyu je? Üami ne-ee shejao hinglemnya, jomphong moihiman” shei e.
Hapa Laitapei Mükhong
30 Shaang Jisui büpalei nanglomthü mü nyangeihepü longi dük, hatü hathü ha lai kü nyangei neshiü. 31 Shejao hathüyü ammi Jisu-ü Messiah, Kahvang Ha shei hinglemhen, hatü ha kü hinglempü homei ammi büpalei men kü yangnyuyem danghen shingvaishi nyangnyüpeih.
Jisui Nanglomthü Jom Nyet Touei Vampü
1 Ha douthü pheikü shao Jisui büpalei nanglomthü kü Tiberias Yungchingei vamei huteke, hatü büpa hapakei vamteke. 2 Hatouei thaiyei nyupü khongkü Simon Peter, Thomas (üpa kü Didymas sheiyao nyük), Galilei nyupü Kana am Nathanael, Zebedeelei cheha nyi, hatü büpalei nanglom lebü nyi nyuteke. 3 Simon Peteri hathü kü, “Ngei nyahyep lüdainyeih” shei e. Jomi büpa kü, “Hamao nüng mü daihen hih” shei e. Jom daiyei ai mongei shü, shejao ha ya jomi nyah hükao neyep. 4 Vangngai meiyaki Jisu yungphaangei peiyei yaong, shejao nanglomthüi hapayü Jisu khih shei nenying. 5 Jisui jomphong kü, “Küphüthü, amphongi nyah meheyao neyepangpü je?” shei phe. Jomphongi büpa kü, “Neyep” shei e. 6 Büpai jomphong kü, “Hapa ai lakdah lemei shang shepeishuoh, hatü halei maani yephen hih” shei e. Hanangkü jomi shang shep, hatü hapa shüei neleiaok; mehenangkü halei nyah longi manei nyuteke. 7 Jisui bampü nanglomi Peter kü, “Hapayü Shembüpa khih!” shei e. Mechem Simon Peteri, “Hapayü Shembüpa khih” shei epü danpa, büpai ashak hanei ngeihtü yungei laongdai; mehenangkü büpa bümkong nyuteke. 8 Shejao lebü nanglomthüi ai touei heih-ei shang maei nyah shüei lei; mehenangkü jomphong phaang kübü longi taishi nenyu; meter kho hük shing mon yungei heih-ei nyu. 9 Mechem jom yungphaangei leipa, jomi hatouei aw jaktü halei nyah hatü aan eeteke. 10 Jisui jomphong kü, “Amphongi shaang yeppü nyah hanei deikei” shei e. 11 Hanangkü Simon Peteri ai mongei shütü shang yungphaangei shüei lei. Halei nyah longpü mon 153 thahshi nyu; nyah hajük manjao shang neshaakdai. 12 Jisui jomphong kü, “Heih-ei cheü-a hahtuh” shei e. Shaang nanglomthü üpaiyao büpa kü, “Nüng üpaang?” shei nephe; mehenangkü jom peüi büpayü Shembüpa khih shei nyingdai. 13 Jisu heih-ei aan yah-ei jom peü kü shuoh, hatü büpai hapakei nyah-ao shuoh. 14 Jisu dipü kübü yangei leipheikü hapai jempabü büpalei nanglomthü touei vamei huteke.
Jisu hi Peter Nyi
15 Mechem jomphong hahyingei tempa, Jisui Simon Peter kü, “Johanei ha Simon, nüngi hathü mao nyeishi ngei kü bamnyüla?” shei e. Büpai büpa kü, “Hih, Shembüpa; ngei nüng kü bamnyeih shei nüngi nying” shei e. Jisui büpa kü, “Ngelei mihathü haümtuh” shei e. 16 Nyipabü büpai büpa kü, “Johanei ha Simon, nüngi ngei kü hingmei bamnyüla?” shei e. Büpai büpa kü, “Hih, Shembüpa; ngei nüng kü bamnyeih shei nüngi nying” shei e. Jisui büpa kü, “Ngelei mithü jungtuh” shei e. 17 Büpai jempabü büpa kü, “Johanei ha Simeon, nüngi ngei kü bamnyüla?” shei e. “Nüngi ngei kü bamnyüla?” shei büpai büpa kü jempa thahshi eshuohpü nangkü Peter mong yimei deih. Büpai büpa kü, “Shembüpa, nüngi lemphü nyingei nyüke; ngei nüng kü bamnyeih shei nüngi nyingei nyüke” shei e. Jisui büpa kü, “Ngelei mithü haümtuh” shei e. 18 “Ngei nüng kü hingmei mü enyeih, mechem nüng vaanwong hepak nyupa, nüngi laophü nyingi shüngshep sheptü nüng melei daihü halei daihampeih. Shejao mechem nüng viüdaihen, nüngi laophülei lak haonghen hatü mih-i nüng kü shünglok lokhen, hatü nüng nedaihüpülei müei daihen” shei e. 19 (Büpai hapayü büpa mepakei dipai Kahvang müknyinshekhanghen ha huhen nangkü eteke). Hapheikü büpai büpa kü, “Ngei phei mükei” shei e.
Jisu hatü Bampü Nanglom
20 Peteri yaakei veijü Jisui bampü nanglom jomphong phei müjaei ee; büpayü hahyingpü hepak kü Jisu touei dhenei uotü, “Shembüpa, nüng luhahhenü üpaang?” shei phepeyü büpa nyuteke. 21 Mechem Peteri büpa eepa, büpai Jisu kü, “Shembüpa, büpa nang mekeiang?” shei e. 22 Jisui büpa kü, “Ngei yiüpü thahshi büpa yemmü tuhjao nüngi ha mehe vainüng? Ngei phei mükei” shei e. 23 Hanangkü hapa nanglom nedihenja shei jeihinaüthü khongkü shahjang yanteke. Shejao Jisui büpa nedipih shei büpa kü ne-e, shejao “Ngei yiüpü thahshi büpa yemmü tuhjao nüngi ha mehe vainüng?” shei mon eteke. 24 Hathü dou jung denpü shuohpü hatü nyangpeyü hapa nanglom hih, hatü büpalei denpeyü shahhing shei jeni nying. 25 Shejao Jisui dükpü lebü douthü longi nyüke; peü paoh nyangnüng elangmeyü hapa jung nyangpü laithüi hapa kahdoknyü kao nechapih shei ngei deihnyüke.