Ahri Chipao
1 Shurai nou Chipao hai bue, Chipao hai Ramaiye koa bue, alia Chipao hai Ramaie. 2 Puh hai shurainou Ramaiye koa bue. 3 Na teitei hai puh vanou souloue, alia soukhai touyu taosü puh loumoa hatalia soulou moe. 4 Puh hisü ahri bue, alia ahri nasü maikhemai vei ava nasüe. 5 Ava nanou teizhi hi vapeie, alia teizhi nanou sünaye kolou moe. 6 Teile lihi Johan tea kuyu Ramai hinou seiveyu maili bue. 7 Puhnou ava navei zhopaoh soure donou, süolouzü puh vanou panou mai hrülaiye louche loure donou, puhnou zhopaoh donou ve-e. 8 Puhwo ava süna moe, ana ava navei zhopaoh soure donou ve-e. 9 Mai hrülaiye souva peiyu checheyu ava nasü deiphao hi velou loure. 10 Puh hai deiphao hi bue, alia deiphao hai puh vanou souloue, ana deiphao mainou puhye sülou moe. 11 Puh sü lah puh kihi ve, ana lah puh mainou puhye sü popei moe. 12 ana puhye polouyu mai hrülai hisü, süolouzü puh zhih hinou louche louyu maitaoye, puhnou Ramainah panou souloure khouko sü peire. 13 Puletao nalouyu haiolouzü zhe hinoua, vasounou li-choyu hinoua, moa mainou li-choyu hinoua moe, ana Ramai hilonoue. 14 Alia Chipao sünasü vasou daloua zhuvea ea achechenou phoupeia alia Eletao nou puh vei khouko-ava hai Puo hinou veyu likhuyu Nahpoutu vei khouko-ava kua ngaoe. 15 Johan nou puh vanou zhopaoh soua sha-a paoe, “ ‘Athainou veyu puhnou Ajünou duhie, daiolouzü puh hai Ajünou raia bue,’ tea Enou paoyu mai nasü hainare.” 16 Alia puh vei phoupeia buyu zhuveana hinou Eletao hrülainou zhuvea peinou zhuvea nasü ngaoloure. 17 Daiolouzü razhai nasü Moses vanou peie; ana zhuvea ea acheche na louzü Jisu Khrista vanou ve. 18 Maitalia Ramaiye ngaokhai mohie; Puo ngheikinou buyu likhuyu Nahpoutu puhnou Ramaiye süngao peire.
Johan Baptist vei Chipao
19 Alia Jerusalem hinou Jihudimai taonou Johan hi napaomaitao ea Levi maitaoye seive-a panou puh hinou, “Ne thaoh-e?” tea ve nouyuki Johan nou haibüa zhopaoh peie. 20 Puhnou paopae, puhnou bamoe, ana sheesha-a paopeie, “Ewo Khrista moe.” 21 Alia puletao nou puh hi noue, “Sükulouzü ne thaoh-e? Ne Elijahwu?” Puhnou chila peie, “E moe,” Puletao nou noupukhaie, “Ne rachi-paolamai sünawu?” Puhnou chila peie, “Moe.” 22 Puletao nou puh hi paoe, “Sükulouzü ne thaoh-e touyu Eletao hi paongao peio. Eletaoye seiveyu maitaohi paore donou chilali peikhaio. Nelah neyenou thaoh-e tea paoe?” 23 Puhnou paoe: “Isaiah rachi paolawo nou paoyu kua, ‘Mapao vei ludu nasü souzülo!’ tea rükounou mailinou shayu pai nasü E-e.” 24 Puletao hai Phariseemaitao hinou seive. 25 Puletao nou puh hi noue, “Sükulouzü nehai Khrista-a, Elijah-a moa rachi-paolana-a molouzü daidonou nenou dzükhao dapeiwe?” 26 Johan nou puletao hi chila peie, “Enou dzünou dzükhao dapeiwe; ana neletao hrohinou neletao nou sümoyu maili la-a bue. 27 Puh hai Athainou laie, ana Ewo puh phikharai pheipayu koutea khamoe.” 28 Chiphayu haihai Johan nou dzükhao da-a buyu buh Jordan rei teinghi palova Bethani hinoue.
Ramai Zhaotu
29 Thainaisho kisü Johan nou Jisu hai puh hilo taveyu ngaoloua paoe, “Zhukhaio, deiphaomai mah pota peiyu Ramai Zhaotunaye sü! 30 ‘Ajünou duyu maili Athainou lai-e, daiolouzü puh hai Ajünou raia bue,’ tea Enou paoyu nasü hainare. 31 Ewo louzü puhye sümoe; ana puhye Israel maitao hi pongao peire donou Enou dzünou dzükhao dapeia ve-e.” 32 Alia Johan nou zhopaoh peia paoe, “Enou Rako hai khao büa raki vanou kou-a puh pei hi kou tao-a buyu ngaoe. 33 Ewo louzü puhye sümoe; ana dzünou dzükhao dapeire donou Eye seivepeiyu puhnou Ahi paoe, ‘Rakonou kou maili peivahi taoa buyu nenou ngaolai; puh hai Rako Mashinou dzükhao dapeiyu mai sünasüe.’ 34 Enou süsü ngaoloure ea zhopaoh soua paowe süolouzü haina hai Ramai Nahpoutue.”
Jisu Rozümai Raikaitao
35 Süthaia, thainaisho sü Johan nou puh rozümai ahaiye koa la-a bue, 36 alia Jisu nou ta-a buyu sü ngaoloua puhnou paoe, “Zhukhaio, Ramai Zhaotu naye sü!” 37 Puh rozümai ahai nou puhnou sükua paoyusü choulou-a Jisu thaifü tare. 38 Jisu nou thailo reiveyu kisü puhai nou puh thai fülaiyu ngaoloua puhaihi noue, “Nehai dai phouwe?” Alia puhai nou puh hi chila peie, “Rabbi” (süolouzü Dou-apeio toue), “Ne dai kinou bue?” 39 Puhnou puhai hi paoe, “Taveloua zhukhaio.” Puhainou taveloua puhnou buyu buh sü ngaoloure; alia süzhousü puhai nou puhye koa chaobaire, daiolouzü sükisü koukhe teilecho adai tayu phahi koure. 40 Johan nou paoyu chouloua Jisu thai fülouyu mai ahai hinou alina louzü Simon Pitar thaihou Andrew-e. 41 Puhnou raikaia puh jürai Simon ye ngaoloua puh hi paoe, “Ehwo Razhepuye ngaoloure” (süvei kowo louzü Khrista toue). 42 Süthaisü puhnou Simon ye Jisu hi save. Jisu nou puhye zhuloua paoe, “Newo Johan nahpoutu Simon-e, ana neye Kephas tea kulai.” (Haihai Pitar touyu kheihaoe, süvei konou “Chuh” toue.)
Jisu nou Philip ea Nathanel ye Kulouyu
43 Thainaisho sü Jisu nou Galilee hi talai tea le laloure. Alia puhnou Philip ye ngaoloua puh hi paoe, “Athai fülo.” 44 Philip hai Andrew ea Pitar nou hrüyu Bethsaida nuhdu hinou ve-e. 45 Philip nou Nathanel ye ngaoloua puh hi paoe, “Moses nou razhaibvü hinou ea rachi paolamai taonou puh vanou rükhai touyu puhye sü Ehnou ngaoloure. Puh hai Nazareth hi Josef nahpoutu Jisue.” 46 Nathanel nou puh hi paoe, “Nazareth hinou avei tali palou süwu?” Philip nou puh hi paoe, “Taveloua zhukhaio.” 47 Jisu nou Nathanel hai puh hilo takouyu ngaoloua puh vanou paoe, “Zhukhaio, haihi checheyu Israel maili bue; puh hisü le sheemoyu alia hae!” 48 Nathanel nou puh hi noue, “Nenou Eye kabüa süloue?” Jisu nou puh hi chila peie, “Philip nou neye kumo jühi nenou doushibe phihi bubu kinou Enou neye ngaoe.” 49 Nathanel nou puh hi chila peie, “Rabbi, newo Ramai Nahpoutue! Newo Israel mai Veo süe!” 50 Jisu nou puh hi paoe, “Enou neye doushibe phihi bubu kinou ngaore tea ne hi paoyu vanou ne louchewu? Nenou hai jünou adu dulih ngaolai hie!” 51 Alia Jisu nou puletao hi paoe, “Enou neletao hi chichenou paowe, neletao nou raki houpayu alia rakivamai taonou Mai Nahpoutu peinou takou takheyu ngaolai.”
Kana hi Sheenghiyu
1 Süthai teithe asü zhousü Galilee hi buyu Kana nuh hinou sheenghiyu li buloure, alia Jisu pfüa sühi bue; 2 Jisu ea puh rozümai taoye-a sheenghiyu sühisü ku save thoure. 3 Darkha zhaoh halou khaie, Jisu pfünou puh hi paoe, “Puletao vei darkha zhaoh hare.” 4 Jisu nou puh hi paoe, “Oh naotupai, nenou Eye koa dai soure bue? Aphasü vete mohie.” 5 Puh pfünou kilai maitaohi paoe, “Puhnou neletao hi apao tali soukhaio.” 6 Alia sühisü Jihudimai vei sousheeyu zhai thaifüa, leeki alili hinou dzüchovou kaih pha loulou sü chuh leeki arou pove khaikhaitoue. 7 Jisu nou kilai taohi paoe, “Leeki haitaosü dzünou rüthou phoukhaio.” Alia puletao nou leeki sütaosü taihi khete rüthou phoure. 8 Alia sükisü puhnou puletao hi paoe, “Chuo dzü daotou saopa loua nühbuh hi peipha-apeio hi pokou peikhaio.” Südonou puletao nou dzü süsü puh hi saosha koupeie. 9 Chubü hinou darkha zhaoh dalouyu dzünasü nühbuh hi peipha-apeionou po chilouyu kisü, alia haihai daikinou velousa touyu sümoa (ana dzü saopoa veyu kilaitao louzü sükhaia), puhnou sheeyupuye kuloua 10 puh hi paoe, “Mai hrülainou arai kihai darkha zhaoh sho-aveinanou khaipeiwe; alia maikhe mainou shonü sholouyu thainou shoshina khaipeiwe; ana newo darkha zhaoh shovei nasü chu koutea khaikou khaitoue!” 11 Jisu nou raikaiyu shee haina hai Galilee hi buyu Kana hinou soua puh vei khouko-ava nasü pongaoe; alia puh rozümai taonou puhye loucheloue. 12 Süthaisü puhnou puh pfü, puh thaihou-jürai maitao ea puh rozümaitaoye koa Kapernahum hi takoure ea sühinou puletaosü teithe daotu nai-a bue.
Jisu nou Rathoki hi Taveyu
13 Jihudimai Tachonüh nasü ngheitei koure, südonou Jisu nou Jerusalem hi tapa loure. 14 Rathoki hinou puhnou cho, zhaotu ea rahou zhoyu mai, alia shano leayu maitao nou hupo poa buyu ngaoloure. 15 Alia rainou süda souloua puhnou zhaotua, choa veishinou koa Rathoki hinou hutare; alia puhnou shano leayu maitao vei shano sü lalaire ea puletao vei arübuh taosü popeishou khaire. 16 Puhnou rahou zhoyu maitaohi paoe, “Buh hai hinou na haitaosü poloua tawo; neletao nou Apuo kihai hu pobuh souwu laimoe.” 17 Alia “Ne kiye donou lenouyu nanou Alekhe hai meibüa deilai,” tea rükhai touyu nasü puh rozümaitao nou licho loure. 18 Sükisü Jihudimai taonou puh hi paoe, “Nenou vah haina souyu hi nezü bue touyu pongaore Eh hi dai shee soungaolou süe?” 19 Jisu nou puletao hi chila peie, “Rathoki haina hai souhawuwo, alia Enou sünasü teithe asü hinou soushu loulai.” 20 Süthaisü Jihudimai taonou paoe, “Rathoki hainasü po raidairou loua soue, anou newo sünahai teithe asü hinou soushulou laiwu?” 21 Ana Jisu nou paoyu Rathoki nawo louzü puh pfüphao vanou paobaie. 22 Südonou puhnou athai hinou hrishu louyu kisü, puh rozümai taonou puletao hi haihai puhnou paokhai toue touyusü liloure, alia puletao nou sheeyu larübvü ea Jisu nou paokhai touyu chipao nasü louche loure.
Jisu nou Emai Le Süyu
23 Chuo Jerusalem hinou Tachonüh hi bubuki puhnou souyu sheetao sü ngaoloua mai taolinou puhye louche loure. 24 Ana Jisu nou puh lah puletaoye louchemoe, daiolouzü puhnou puletaoye sükhaie, 25 alia puletao vanou maita linoua zhopaoh souyu puhye donou koyu hae; daiolouzü puh lahnou emai lehi dai bue touyu hai süa bue.
Jisu ea Nikodemas
1 Chuo Phariseemai hrohinou Nikodemas tea kuyu Jihudimai peikhomaili bue. 2 Mai hainanou khei Jisu hi veloua puh hi paoe, “Rabbi, nehai Ramai hinou veyu dou-apeimai alie touyu sü Ehnou süe; daiolouzü Ramai nou puhye kozhopei molouzü maita linoua nenou souyu shee haitaosü soulou hoe.” 3 Jisu nou puh hi chila peie, “Chichenou Enou nehi paowe, maita linoua nashulou molouzü, puhnou Ramai Vedei sü ngaolouhoe.” 4 Nikodemas nou puh hi paoe, “Kakua mainou tsülouyu thainou nakulou khailai? Puhnou puh pfü pouhi lou ahaikholoua nakhailou süwu?” 5 Jisu nou chila peie, “Chichenou Enou nehi paowe, maita linou dzü hinou ea Rako hinou nalou molouzü, puhnou Ramai Vedei hi loulou hoe. 6 Vasou hinou nalouyu sünanou vasoue, alia Rako hinou nalouyu sünanou rakoe. 7 ‘Nele hrülainou nashulou vuzülai’ tea Enou nehi paoyu donou khupaso. 8 Teikhainou hününü buh hi hüvewe, alia nenou sünavei khosü chouwe, ana sünahai daikinou vesa moa kahi taresa touyu nenou sümoe, südonou Rako hinou nalouyu mai talia sükheihaoe.” 9 Nikodemasnou puh hi noue, “Haisü kabüa souloulai?” 10 Jisu nou puh hi chila peie, “Newo Israelmai dou-apeimaili soua haisü sümowu? 11 Chichenou Enou nehi paowe, Ehnou süyu nasü Ehnou paowe, alia Ehnou ngaolouyu na vanou Ehnou zhopaoh souwe; ana nelenou Eh vei zhopaoh popeibae. 12 Enou neletao hi deiphao vei na khemai vanou paoyu ki neletao nou Eye louche peimoe, kabüa Enou rakivei natao vanou paoyuki neletao nou Eye louche khailai. 13 Alia Raki hinou kouyu Mai Nahpoutu puh baimoanou mailia raki hi khekhai mohie. 14 “Alia Moses nou rekounou nghou naye polayu kua, Mai Nahpoutuye-a polashu vuzülai, 15 süolouzü puhye loucheyu mai talinou halou hoyu ahri ngaoloulai.” 16 Daiolouzü Ramai nou deiphao maiye leshishoyu donou puhnou puhvei likhuyu Nahpoutuye peire, südonou puhye louche louyu maitalisü hakhailai moe, ana teisa ahrisü ngaoloue. 17 Daiolouzü Ramai nou puh Nahpoutuye panou deiphao maiye mah dukhaire donou deiphao hi seivepei moe, ana puh vanou deiphao maiye khaipei loure donou seive-e. 18 “Puhye loucheyu mai taliye sü chiku moe; ana louche moyu mai taliye sü chiku chere, daiolouzü puhnou Ramai vei likhuyu Nahpoutu zhih hisü louche loumoe. 19 Alia chikuyu nasü hainae, süolouzü ava sünasü deiphao hi veloue, ana maikhe mainou avana jünou azhi naye leshi loure, daiolouzü puletao vei vah taosü ashi baie. 20 Daiolouzü ashi vah souyu mai veishinou avaye ngaorawe, alia avahi vemoe, süku molouzü puhvei vah taosü popa ngaowushulai. 21 Ana acheche vah souyu puhnou puh vah taosü Ramai hinou souloure touyu nasü panou sheesha-a ngaoloure donou avahi vewe.”
Jisu ea Johan
22 Süna thaisü, Jisu ea puh rozümai taosü Judea teidei hi tare; sühinou puhnou puletaoye koa chao-a dzükhao dapeie. 23 Johan-a Salim ngheiki hi buyu Aenon hinou dzükhao dapeia bue, daiolouzü sühisü dzü alaosou bue; alia maikhe mainoua sühi taveloua dzükhao daloue. 24 Daiolouzü sükisü Johanye hukhahi thoumohie. 25 Sükisü Johan rozümai kamainou khüsheeyu naanou vanou Jihudimai aliye veiva loure. 26 Alia puletao nou Johan hi taveloua puh hi paoe, “Rabbi, Jordan rei teinghi palova hinou neye koa buyu alia puh vanou nenou zhopaoh souyu mai sünasü buh haihinou dzükhao dapeia bue, alia mai hrülaisü puh hi tavekhai baire!” 27 Johan nou chila peie, “Raki hinou sünasü puh hi peimo louzü maita linou hatalia ngaolou hoe. 28 ‘Ewo Khrista moe, ana Eye puhjü raia seivepei khaitoubaie’ tea Enou paoyu sü lah neletao nou Azhopaohmai souwe. 29 Nghirepaiye ngaolouyu puh sü sheerepue; ana la-a ea puh chi kei-a buyu sheerepu vei samai sünanou sheerepu vei pai chouloua le sashowe; südonou Avei asah nasü chuo chekhoure. 30 Puhwo dupu vuzülai ana Ewo khaikou vuzülai.”
Raki hinou Kouyuna
31 Reikounou kouyu puhnou mai hrülai jünou dukoukhai toue; deiphao nou veyu puhwo deiphao vei baie, alia deiphao vei vanou chi paobaie; Rakinou kouyu puhnou mai hrülai jünou dukhai toue. 32 Puhnou ngaolouyu ea choulouyu süna vanou puhnou zhopaoh souwe, ana maita linoua puh zhopaoh sü polou moe. 33 Ana puh zhopaoh polouyu puhnou Ramai hai chekhaoe tea le laloure. 34 Daiolouzü Ramai nou seiveyu puhnou Ramai chipao paoe, daiolouzü Ramai nou Rakohai khadaloua peimoe. 35 Puonou Nahpoutuye leshie, alia puh bah hi ha teitei thaothoukhai peire. 36 Nahpoutuye louche louyu puh hisü teisa ahri bue; Nahpoutu süna chi zümoyu puhnou ahrisü ngaolai moe, ana Ramai vei rarou sü puh pei hi chaoa bue.
Jisu ea Samaria Pfüpai
1 Chuo Jisu nou Johan jünou koua maikhe maiye panou rozümai souloure ea dzükhao daloure touyu hai Phariseemai taonou chouloure touyusü Jisu nou sülouyu kisü, 2 (Checheyu louzü, Jisu puh vuzünou mailia dzükhao dapeimoe, ana puh rozümaitao likheinou soubaie), 3 puhnou Judea thaowu-a Galilee hi dakhai tare. 4 Alia puhye donou Samaria tachopoa tare hi buloure. 5 Südonou Jakob nou puh nahpoutu Josef hi peikhai touyu dou süna ngheiki buyu Sukhar tea kuyu Samaria vei nuhdu alihi puhnou tave louloure. 6 Jakob vei dzükhao sü sühi bue, alia Jisu nou veihdu tayu vanou veasholoua dzükhao süna pehi kou chobu loure. Teile süsü heako teilecho kiahai tayu phahi noue. 7 Samariamai pfüli dzü pfüre donou tave loure. Jisu nou puh hi paoe, “Eye panou dzü kükhaio.” 8 Daiolouzü puh rozümai taosü touso hrüre donou nuhdu hi tare. 9 Samariamai pfüpainou puh hi paoe, “Kakua newo Jihudimai ali khaia, Samariamai pfüpai Ahinou panou dzü küre donou khowe?” Daiolouzü Jihudimainou Samariamai kha mata moe. 10 Jisu nou puh hi chila peie, “Nenou Ramai vei sa-apeina ea nehinou dzü khoyu puh hai thaohsa touyu süa buyu thaio nenou, puh hinou kholai, alia puhnou nehi hriyu dzü nasü peiloulai.” 11 Naotu süpainou puh hi paoe, “Dou-apeio, newo dzü saoloure halia hae, alia dzükhao nasü thoushowe; daikinou nenou hriyu dzü nasü ngaoloulai? 12 Newo Eh puo-pao Jakob jünou duhiwu? Puhnou Eletao hi dzükhao haina hai peie, alia sühinou puh-a, puh nahmai tao-a alia puhvei kikhaorü tao-a po küloue.” 13 Jisu nou puh hi paoe, “Dzü haina keyu mai talisü reipu khailai, 14 ana Enou peilaiyu dzü süna külouyu mai taliwo reipukhai khailaimoe; Enou peilaiyu dzü sünasü puhvei lekhe hinou teisa hrire donou küpayu dzüla datalai.” 15 Naotu sünapainou puh hi paoe, “Dou-apeio, Eye panou reipu more donou, alia buh haihi khaive panou dzü pfüpu more donou, Ahi dzü sünasü peikhaio.” 16 Jisu nou puh hi paoe, “Takhaio, alia ne chaaye buh haihi ku save khaio.” 17 Naotu süpainou puh hi chila peie, “Achaa hae.” Jisu nou puh hi paoe, “Nenou, ‘Achaa hae’ tea paoyu sü paozüe; 18 daiolouzü nevei chaa angoure, alia nenou chu koa buyu süna-a nechaa moe; sünasü nenou cheche-a paongaore.” 19 Naotu süpainou puh hi paoe, “Dou-apeio, nehai rachi paolamai alie touyu sü Enou süe. 20 Eh puo-pao mainou deichi haina hinou Ramaiye thowe; ana emainou Ramaiye thore buh louzü Jerusalem hi bai tea nelenou paoe.” 21 Jisu nou puh hi paoe, “Naotupai, Eye louchepei khaio, Puoye deichi haina hinou moa Jerusalem hinou nelenou tho more pha nasü vere. 22 Nelenou sümoyu nasü nelenou thowe; Ehwo Ehnou süyu naye thowe, daiolouzü khailu peiyu hai Jihudimai hinou ve. 23 Ana chekhaoyu ratho mainou Puoye rako ea acheche hinou tholaiyu phasü vere, alia chue, daiolouzü Puonou puhye sükua thoyu sü phoue. 24 Ramai hai rakoe, alia puhye thoyu mainou rako ea acheche hinou thovu zülai.” 25 Naotupai nou puh hi paoe, “Razhepu (Khrista tea kuyuna) nasü velai touyu hai Enou süe, puhnou veyu kisü Eletao hi puhnou halihala paongaokhai peilai.” 26 Jisu nou puh hi chila peie, “Neye chipha-a buyu Esü puh-e.” 27 Süphabü hinou puh rozümai taosü tave. Puhnou naotumai aliye koa chipha-a buyu sü ngaoloua puletaosü khupa loure, ana mailinoua, “Ne dai züpawe?” moa “Ne daidonou puhye koa chiphawe?” tea paomoe. 28 Sühinou naotu süpainou puh dzükhou sü thaowu-a nuhdu hi dakhai veloua sühi buyu maikhemai hi paoe, 29 “Tavekhaio, Enou soukhai-soukhai touyu veishi Ahi paongao peiyu mai sünaye ve zhukhaio. Puh hai Khrista laiwu?” 30 Südonou puletao nou nuhduna hinou tapaloua puh hi tavere. 31 Süphabü hinou rozümai taonou puh hinou khoa paoe, “Rabbi, potouwuwo!” 32 Ana puhnou puletao hi paoe, “Neletao nou sümoyu Avei toure touso bue.” 33 Südonou rozümai taonou puletao hrohinou alinou lihi haibüa paoe, “Maita linoua puh hi touso pove peire moma?” 34 Jisu nou puletao hi paoe, “Atouso louzü Eye seive peiyu puhvei leli souyu, alia puh vah soucheyu nasüe. 35 Neletao nou, ‘Khou adai shonou cha chilai hie,’ tea paomowu? Ana Enou neletao hi paoe, neletao nghithou pfüla loua dourou taosü daizhou cha chire donou meiche-a buresa touyu sü zhukhaio! 36 Thoutai vuyu na-a, cha chiyuna-a koa sazhore donou cha chiyu nanou zhosü ngaowe, alia teisa ahri vei donou routhou sü podzü loue. 37 Daiolouzü ‘Kamainou vuthoue ea kukhe alinou chiloue’ tea paoyu sü chekhaoe. 38 Neletao vei zho-hah loukhai moyu dou hisü panou cha chire donou Enou neletaoye seitawe; kukhenou te-a soukhaitoue, alia neletao nou puletao vei vah hisü lou zha ngaozho loure.” 39 Naotu sünapainou, “Enou soukhai-soukhai touyu veishi sü puhnou Ahi paongao peire,” tea zhopaoh souyu vanou nuhdu sünahi Samariamai alaosou puhye louche loure. 40 Südonou Samariamai taonou puh hi taveyu kisü puhye sü puletao hi naipeibaio tea puh hinou khowe, alia Jisu nou sühisü teithe ahai nai-a bue. 41 Alia puh chipao vanou mai alaosou louche puloue, 42 alia puletao nou naotupai hi paoe, “Chuo nevei chipao vanou Eletao nou louche louyu moe, daiolouzü Eletao-a Eletao lah puhnou paoyusü chouloure, alia chekhaoa puh hai deiphao maiye Khailu-apeio nasüe touyu sü Ehnou süe.”
Jisu nou Vahdumaili Nahpoutuye Souvei Peiyu
43 Teithe ahai thaisü puhnou buh sünasü thaowu-a Galilee hi tare. 44 Daiolouzü Jisu puh lahnou, “Rachi paolamai taliye lah puh teidei hi mainou tsükhouyu hae,” tea zhopaoh soua paoe. 45 Südonou puhnou Galilee hi velouyu kisü, Galilee hi maitao nou puhye sasa-a sheloue, daiolouzü puhnou Tachonühki Jerusalem hinou souyu teiteisü puletao nou ngaoloue, daiolouzü puletaoa nühbuh hisü veloue. 46 Süthaisü puhnou raiki dzünou darkha zhaoh sou dalouyu Galilee hi buyu Kana nuh hi tavepu khaire. Alia Kapernahum hisü nahpoutu soua buyu vahdumai ali bue. 47 Puhnou Jisu hai Judea hinou Galilee hi veloure touyu choulouyu kisü, puhnou puh hi taveloua puhye nou Kapernahum hi takouloua puh nahpoutuye souvei peiloure donou kholoure, daiolouzü puh hai thaiyu laire. 48 Jisu nou puh hi paoe, “Nelenou sheetao ea khupa vahtao ngaomo sasü louchekhai laimoe.” 49 Vahdumai nanou puh hi paoe, “Dou-apeio, Anah thaimo jühinou takou peikhaio.” 50 Jisu nou puh hi paoe, “Takhaio, ne nahpoutu sü hrilai!” Jisu nou puh hi paopeiyu chipao nasü mai sünanou louche loua tare. 51 Puhnou takoua buyu hinou puh kilai taonou puhye tave daoloua puh hi paoe, “Ne nahpoutu sü hriloua bure!” 52 Puhnou puletao hi puh hai dai pha hinou veipaloue tea noue. Puletao nou puh hi paoe, “Do koukhe teilecho ali tayu kinou puh sü rakee khaire.” 53 Sühinou puonou teilecho süsü Jisu nou puh hi, “Ne nahpoutu sü hrilai” tea paoyu pha nasüe touyu süloure; südonou puh-a ea puh kikhamai teitei-a louche loure. 54 Shee hainasü Jisu nou Judea hinou Galilee hi velouyu thainou souyu shee ahai chena süe.
Zaibvü hinou Mai aliye Souvei Peiyu
1 Haithaisü Jihudimai nühli buyu vanou Jisu nou Jerusalem hi takhere. 2 Jerusalem hi zhaotu romü ngheiki hi Ebriamai lah hinou Bethzatha tea kuyu kipao angou buyu zaibvü ali bue. 3 Kipao angou sütao hisü sho-vaimai, nghichamai, phichamai, ea pothaimai alaosou züa bue; (Puletao sü dzü lüyu khoa bue; 4 daiolouzü chacha kisü zaibvü sühisü Mapao vei rakivamai alinou takou loua dzü sü soulü lüwe. Dzü soulü peiyu thaibü zaibvühi taloulou raikaiyu mai talisü puhvei sounou tali hinou veilou baiwe.) 5 Sühisü po shiacha soukouyu mai ali bue. 6 Jisu nou puhye ngaolouyu kisü puh hai buh sühinou teile phashona züa bukoure touyu süloua puhnou puh hi paoe, “Ne veilouyu züpawu?” 7 Soua buyu mai sünanou puh hi chila peie, “Dou-apeio, dzü süna lüyu phaki Eye zaibvü hi pothou peire mai alia hae, alia Enou talouyu kisü kukhemai alinou Ajünou railoulou baiwe.” 8 Jisu nou puh hi paoe, “Lashulo, ne züh poloua takhaio.” 9 Alia sübühinou mai sünasü veiloure, alia puhnou puh züh sü poloua taloure. Teithe sünasü Soteithe-e. 10 Südonou Jihudimainou sou veilouyu mai sünahi paoe, “Haisü Soteithe-e, alia nenou ne züh poloua tayusü razhainou aetoumoe.” 11 Ana puhnou puletao hi chila peie, “Eye souvei peiyu mai sünanou Ahi, ‘Ne züh poloua takhaio’ tea paoe.” 12 Puletao nou puh hi noue, “Nehi, ‘Ne züh poloua takhaio’ tea paoyu mai nasü thaoh-e?” 13 Ana sou veilouyu mai sünanou Jisu hai thaohsa touyu sümoe, daiolouzü buh sühisü mai alaosou buyu vanou Jisu nou tavai loure. 14 Süthaisü Jisu nou puhye rathoki hinou ngaoloua puh hi paoe, “Zhukhaio, ne chuo veiloure! Haijünou shipuyu kukhe nepei hi vemore donou mah soupu khaiso.” 15 Mai sünanou taloua puhye souvei peiyu mai nasü Jisue tea Jihudimai taohi paopeire. 16 Alia Jihudimainou Jisu ye souveayu sü süna vanoue, daiolouzü puhnou vah hainasü Soteithe zhounou soue. 17 Ana Jisu nou puletao hi chila peie, “Apuonou chu koutea vah souwe, alia E-a vah soua bue.” 18 Sükua paoyu vanou Jihudimainou puhye southeare donou phoupue, daiolouzü puhnou Soteithe soukhoyu thebaimoa puh lahnou Ramaiye paokha-a Ramaiye puh Puo tea kuwe.
Nahpoutu vei Soure Khouko
19 Jisu nou puletao hi paoe, “Cheche vuzünou Enou neletao hi paowe, Puonou soua buyu sü ngaoloua puhnou soubaimoa Nahpoutu lahnou puh madonou hatalia soulou hoe; daiolouzü Puonou souyu tasü Nahpoutu nou-a sükheihaoa souwe. 20 Daiolouzü Puonou Nahpoutuye leshie alia lah puhnou soua buyu teitei sü puh hi pongaopeiwe. Alia neleye panou khupa loure donou sütao jünou dukouyu vahtao-a puhnou puh hi ngaopeilai. 21 Daiolouzü Puonou athai maiye sou hrishu loua puletaoye ahri peiyu kua, Nahpoutua puhnou züpayu maitao hisü ahri peie. 22 Puonou mai taliye chiku moe, ana chikure zü teitei sü Nahpoutu hi thoupeire, 23 sükua puletao nou Puoye tsükhouyu kua Nahpoutuye-a mai hrülainou tsükhoulai. Nahpoutuye tsükhou moyu mai talinou puhye seiveyu Puo sünaye tsükhoumoe. 24 “Cheche vuzünou Enou neletao hi paowe, Achipaotao choulouyu ea Eye seiveyu puhye louche louyu mai talisü teisa ahri ngaoloure; alia puh sü chikuyu hi loukhai laimoe, ana athai hinou ahri hi kacho paloure. 25 “Cheche vuzünou Enou neletao hi paowe, thaimainou Ramai Nahpoutu pai choulaiyu phasü vere, alia chue, alia pai süna choulouyu khemaisü hriloulai. 26 Daiolouzü Puo puhlah hi ahri buyu kua, Puhnou Nahpoutuye-a lah puh hi ahri buloure aetou peiwure; 27 alia puh hi chikukou peire zü nasü peiwure, daiolouzü puh sü Mai Nahpoutue. 28 Süna vanou khupayu souso; daiolouzü khüh taohi buyu veishinou puh pai choulaiyu phasü vewe 29 alia puletao vei khüh hinou tashu loua, avei soukhai touyu maitao nou ahri hi hrida shulai, alia ashi soukhai touyu maitao nou chikuyu hi hrida shulai.
Jisu vei Zhopaoh Maitao
30 “E lah Akhoukonou hatalia soulou hoe; Enou choulouyu süna thaifüa Enou chikue; alia Avei chikuyu sü chekhaoe, daiolouzü E lah Aleli phoumoe ana Eye seive-apeio puh leli phoubaie. 31 “Enou lah Avanou zhopaoh peibai louzü, Azhopaoh sü chekhao moe. 32 Ana Avanou zhopaoh peiyu mai kukhe ali bue, alia puhnou Avanou zhopaoh peiyu sü chekhaoe touyu sü Enou süe. 33 Neletao nou Johan hi mai seive-e alia puhnou acheche vanou zhopaoh peie. 34 Enou mai hinou zhopaoh ngaolou vuzülai touyu vanou moe; ana neletaoye panou khailu loure donou hainasü Enou paobaie. 35 Johan hai meitao-a ea va-a buyu meibvüe, alia neletao nou puh vei ava hinou pha jütou sa-a buyu züpae. 36 Ana Ahi buyu zhopaoh sünanou Johan vei jünou dukou hie, daiolouzü souchere donou Apuonou Ahi peikhai touyu vah taonou, süolouzü Enou soua buyu vah haitao vuzünou Puonou Eye seivepeie touyu Avanou zhopaoh souwe. 37 Alia Eye seive peiyu Apuonou puhlah Avanou zhopaoh soue. Puh paisü neletao nou choukhai mohie, puh zhusü neletao nou ngaokhai mohie; 38 alia neletao lekhehi puh vei chipao hai tobai soumoa bumoe, daiolouzü puhnou seive peikhai touyu sünaye neletao nou louche moe. 39 Nelenou Sheeyu Larübvütao hinou phoua bue, daiolouzü neletao nou sütao hinou teisa ahri bue tea chowe; alia sütaonou Avanou zhopaoh souwe; 40 Sütoukhaia neletao nou ahri ngaoloure donou Ahi venü moe. 41 “Enou mai hinou paoshoyu phoumoe. 42 Ana Enou neletaoye süwe, süolouzü neletao lekhehi Ramaiye leshiyu hae. 43 Enou Apuo zhih hinou ve, alia neletao nou Eye popei moe. Mai kukhe alinou lah puh zhih hinou velouzü, puhye sü neletao nou popeilai. 44 Alikhei baiyu Ramai Puh hinou veyu paoshoyu nasü phoumoa, alinou ali hinou paoshoyu ngaonüyu neletao nou kabüa Eye louche loulai? 45 Enou neletaoye Apuo nghojü hinou mah paodu khaipei shulai tea chowuso. Neletaoye mah paodu khaipeirena louzü neletao nou rei-a buyu Moses baie. 46 Neletao nou Mosesye louche louzü, neletao nou Eye louche loulai, daiolouzü puhnou Avanou rüe. 47 Ana neletao nou puhnou rükhai touyu taosü louche molouzü, kabüa neletao nou Achipao taosü louche loulai?”
Jisu nou Mai Thengouye Vaiyu
1 Haithaisü Jisu nou Tibiria zai tea kuyu Galilee zai polo dovahi tare. 2 Alia maisou alaosou puhthaisü fütare, daiolouzü puhnou sounou maitaoye souvei peiyu shee taosü puletao nou ngaoloue. 3 Jisu nou deichi hi tapa loua sühinou puh rozümai taoye koa kou buloure. 4 Chuo Jihudimai vei Tachonüh nasü ngheikoure. 5 Sühinou Jisu nou puh nghithou pfüla payu kisü maisou alaosou puh hilo taveyu ngaoloua, puhnou Philip hi paoe, “Mai haitaoye panou toure Eletao nou daikinou raokhao hrüloulai?” 6 Chi hainasü puhnou Philip zhai zhure donou paobaie, daiolouzü lah puhnou dai soulaisa touyu sü süa bue. 7 Philip nou puh hi chila peie, “Denarü kaih ahai nou raokhao hrüloua sütaonou puletao ali liye dao daotu peiyu koutea chelou hoe.” 8 Puh rozümaitao hrohinou Simon Pitar thaihou Andrewnou puh hi paoe, 9 “Shithou raokhao pho angou ea khah ahai pfülaiyu khemainah ali haihi bue; ana maisou haizhozhou hisü sütaotunou dai souloulai?” 10 Jisu nou paoe, “Maikhe maiye panou kou bukhaio.” Buh sühisü poudai alaosou bue. Südonou maikhemai hrülainou kou buloure; sühi kou buyu taosü mai thengou phae. 11 Süthaisü Jisu nou raokhao taosü poloure, alia puhnou Ramai hi kalo paowu-a sütaosü puhnou sühi koubuyu maitaohi zhihpeire. Puhnou khah-a sükua zhihpeire, alia puletao hrülainou lahlah züpasü touloure. 12 Alia puletao nou puletao pouphou toulouyu thaisü, puhnou puh rozümai taohi paoe, “Halia panou souha-a more donou toushoyu kou-lihtao veishi podzülo.” 13 Südonou puletao nou sütaosü podzü loure ea shithou raokhao pho angou hinou maikhe mainou toushoyu kou-lih taonou sülai kiahai phouloure. 14 Südonou puhnou souyu shee nasü maikhe mainou ngaoloua paoe, “Chekhaoa deiphao hi vere rachi paolawo nasü hainare!” 15 Süthaisü Jisu nou puhye maikhe mainou tave taitsüa panou Veo souloure donou nilou laire touyu süloua Jisu puhlah deichi hilo tarei tapu khaire.
Jisu nou Dzü Peihi Tayu
16 Koukhe louyu kisü Jisu rozümai taosü zaihi loutare, 17 alia puletao nou sakhao hi talou loua zai hinou tapoa Kapernahum hilo tare. Sükisü tei mailoure, alia Jisu sü puletao hi velou mohie. 18 Süpha kisü teikhai shishoa hüyu donou zai dzü sü houng loure. 19 Puletao nou kaacho asü adai pha sakhao saopoa takouyu kisü, Jisu nou zai peinou sakhao nahi takou ngheiyu sü puletao nou ngaoloure, alia puletaosü ngaopisho loure. 20 Ana puhnou puletao hi paoe, “Ebaie; piso.” 21 Sühinou puletao nou puhye sasa-a sakhaohi sathouloure, alia thala-a sakhao nasü puletao nou ta-a buyu teidei hisü velou loure.
Maikhe mainou Jisu ye Phouyu
22 Thainaisho sü zai polo dova hinou chaoa buyu maisou taonou buh sühisü sakhao alikhei bubaie touyu sü süloure. Puletao nou Jisu hai puh rozümai taoye koa sühi loumoe, ana rozümai taosü puhye samoa puletao lah tare touyu sü süe. 23 Ana Tibiria hinou sakhao kukhe taosü Mapao nou kalo paopeiwu-a raokhao touyu buh ngheiki hisü tave loure. 24 Südonou maikhe mainou buh sühisü Jisu-a puh rozümai tao-a hayusü ngaoloua, puletao lah sakhao taohi louloua Jisu ye phoupoa Kapernahum hi tare.
Jisu hai Ahri Raokhaoe
25 Puletao nou zai polo dova hinou puhye tave ngaolouyu kisü, puletao nou puh hi paoe, “Rabbi, ne dukinou buh haihi velou loue?” 26 Jisu nou puletao hi chila peie, “Cheche vuzünou Enou neletao hi paoe, neletao nou Eye phoutayu hai shee khemaitao ngaolouyu vanou moe, ana neletao nou raokhao pouphou toulouyu vanou baie. 27 Ha-kalaiyu touso donou vah souwuso; ana Mai Nahpoutu nou neletao hi peilaiyu teisa hrümainou bulaiyu touso süna donou vah soulo; daiolouzü puh pei hi Puo, Ramai nou puh vei paoshee soukhaire.” 28 Süthaisü puletao nou puh hi paoe, “Ramai vahtao soua bure donou Ehnou dai souyu kaoe?” 29 Jisu nou puletao hi chila peie, “Ramai vah louzü puhnou seivekhai touyu sünaye neletao nou loucheyu süna süe.” 30 Südonou puletao nou puh hi chila peie, “Sükulouzü Eletao nou ngaoloua neye louche loure donou nenou dai shee soungaolai? Nenou soua buyu vah nasü daie? 31 Eletao puo-pao mainou rekounou manna toue; alia haibüa rüthoure, ‘Puhnou puletao hi toure raokhao raki hinou peie.’ ” 32 Südonou Jisu nou puletao hi paoe, “Cheche vuzünou Enou neletao hi paowe, raki hinou neletaoye raokhao peiyu nasü Moses moe; ana Apuonou neletaoye raki hinou acheche raokhao nasü peiabaie. 33 Daiolouzü Ramai vei raokhaona louzü rakinou kouloua deiphao mai hi ahri peiyu sünasüe.” 34 Puletao nou puh hi paoe, “Mapao, Eletao hi raokhao hainasü teisanou peikhaio.” 35 Jisu nou puletao hi paoe, “E hai ahri raokhaoe; Ahi taveyu puhsü houkhai laimoe, alia Eye louche louyu puhsü reikhai laimoe. 36 Ana Enou neletao hi paoe, süolouzü neletao nou Eye ngaoloure ana neletao nou louche moe. 37 Apuonou Ahi peikhai touyu hrülaisü Ahi velai; alia Ahi velou louyu puhye sü Enou hulai khailai moe. 38 Daiolouzü E sü Aleli soure donou raki hinou koumoe, ana Eye seive peiyu puh leli soure donou koubaie. 39 Alia Eye seive peiyu puh leli nasü hainae, süolouzü puhnou Ahi peikhai touyu teiteisü Enou halia souhawu laimoe, ana akhai teitheki sütaoye panou hrishu loulai. 40 Daiolouzü Apuo leli nasü hainare, süolouzü Nahpoutuye ngaolouyu ea puhye louche louyu mai talisü teisa ahri ngaoloulai; alia Enou puhye akhai teitheki sou hrishu loulai.”
Jihudimai nou Jisu Peihi Nouyu
41 Sükisü Jihudimai taonou puh vanou noulealea loure, daiolouzü puhnou, “Ehai rakinou kouyu raokhao nasüe” tea paoe. 42 Puletao nou paoe, “Mai hainasü Eletao nou puh pfüpuoye süa buyu Josef nahpoutu Jisu mowu? Sükulouzü puhnou chuo kakua, ‘E hai rakinou koue,’ tea paowe?” 43 Jisu nou puletao hi chila peie, “Neletao lah neletao hrohinou noulealeaso. 44 Eye seive peiyu Apuonou puhye Ahi savepei molouzü, maita linoua Ahi velou hoe; alia Enou puhye akhai teitheki panou hrishu loulai. 45 Rachi paolamaitao larübvü hinou, ‘Alia puletao hrülaiye Ramai nou doupei loulai,’ tea rüwure. Puo hinou choulouyu ea doulouyu mai talinou Ahi vewe. 46 Süolouzü maita linoua Puoye ngaoloure toumoe; Ramai hinou veyu puh likheinou Puoye ngaobaie. 47 Cheche vuzünou Enou neletao hi paowe, louche louyu puhsü teisa ahri ngaoloure. 48 E hai ahri raokhao nasüe. 49 Neletao puo-paomai taosü rükounou manna toue, ana puletaosü thaire. 50 Maitalinou sünasü touloua thailai moyu rakinou kouyu raokhao nasü hainae. 51 Ehai rakinou kouyu hriyu raokhao nasüe. Maitalinou raokhao haina toulouzü, puhsü teisanou hrilai; alia deiphao mainou hrire donou Enou peilaiyu raokhao nasü Avasoue.” 52 Südonou Jihudimai taosü puletao lah puletao hrohinou haibüa veiva-a paoe, “Kakua mai hainanou Eletao hi puh vasousü toure donou peilousüe?” 53 Südonou Jisu nou puletao hi paoe, “Cheche vuzünou Enou neletao hi paowe, neletao nou Mai Nahpoutu vasou toumo louzü ea puh zhe kümo louzü neletao hi ahri nasü hae. 54 Avasou touyu ea Azhe keyu puh hisü teisa ahri nasü bue, alia Enou puhye akhai teitheki sou hrishulai. 55 Daiolouzü Avasou hai touso chekhaoe, alia Azhe hai chekhaoa küloure nasüe. 56 Avasou touyu ea Azhe keyu puhsü Ahinou tobai soumoa bue, alia E-a puh hi tobai soumoa bue. 57 Hriyu Apuonou Eye seiyu büa ea Enou Apuo vanou hriyu kua, Eye touyu mai talia avanou hrilai. 58 Raki hinou kouyu raokhao nasü hainae, alia haisü neletao puo-pao maitao nou touloua thaitayu raokhao süna bümoe; raokhao haina toulouyu puhsü teisanou hrilai.” 59 Chipao haisü Jisu nou Kapernahum hi rathobuh hinou doupeia bubuki paoe.
Teisa Ahri Chipaotao
60 Südonou puh thaifümai taolinou süsü choulouyu kisü haibüa paoe, “Haisü tatei shoyu chipaoe; thaohnou haisü keilai?” 61 Ana puletao nou süna vanou noulealea-a bure touyu sü Jisu puh lahnou süloua, puletao hi paoe, “Haina hinou neletao le tsülouwu? 62 Sükulouzü neletao nou hakinou Mai Nahpoutu nou raiki puhnou buyu buh hi takheyu ngaolouzü kakulai? 63 Ahri peiyu hai rako noue, vasou louzü zhiyu alia hae. Enou neletao hi paopeiyu chipao taosü rakoe ea ahrie. 64 Ana neletao hrohi louche moyu mai kamai bue.” Daiolouzü Jisu nou louche moyutao sü thaohthaoh maisa, alia puhye shoh soupei laiyu mai nasü thaohsa touyu hai shurainou süa bue. 65 Alia puhnou paoe, “Süvanou Enou neletao hi paopeire süolouzü Puonou puh hi aetoupei molouzü maita linoua Ahi velou hoe.” 66 Südonou süzhouh thainou puh thaifümai taoli thaikhai tare ea puhye koa tapukhai more. 67 Jisu nou rozümai taohi paoe, “Neletaoa tabailaiwu?” 68 Simon Pitar nou puh hi chila peie, “Mapao, Ehnou thaoh hi talai? Nehisü teisa ahri chipaotao bue. 69 Alia nehai Ramai hinou veyu Masheeo nasüe touyu hai Ehnou louche loure ea süloure.” 70 Jisu nou puletao hi chila peie, “Enou neletao kiahaiye dolou mowu? Ana neletao hrohinou aliwo louzü rashi nasüe!” 71 Sünahai puhnou Iskariot Simon nahpoutu Judas vanou paoe, daiolouzü puh hai rozümai kiahaitao hrohinou ali soua bukhaia puhye shoh souwulai.
Jisu ea Puh Thaihou-jüraitao
1 Haithaisü Jisu nou Galilee hi tasühao tare; puh hai Judea hi tanükhai more, daiolouzü Jihudimai taonou puhye southeare donou phoua bue. 2 Chuo Jihudimai Repaonüh nasü ngheire. 3 Südonou puh thaihou jürai maitao nou puh hi paoe, “Ne rozümai taonou nenou soua buyu vah taosü ngaoloure donou buh hainasü thaowu-a Judea hi tawo. 4 Daiolouzü maita linoua puh hai zhih talai toulouzü khei-a vah souwumoe. Nenou vah haitao soua bulouzü, nelah neye deiphao mai hi po ngaokhaio.” 5 Daiolouzü puh thaihou jüraimai koutea puhye louche moe. 6 Jisu nou puletao hi paoe, “Ateile louzü vetelou mohie, ana neletao teilewo louzü teisanou souda-a bue. 7 Deiphao mainou neletaoye ngaoba louhoe, ana sünanou Eye ngaobawe daiolouzü Enou puh vah taohai ashi baie tea zhopaoh peiwe. 8 Neletao lah nüh buh hi takhewo; Ewo nüh buh hi takhelaimoe, daiolouzü Ateile hai vetelou mohie.” 9 Puhnou sübüa paowu-a Galilee hinou nai-a bue.
Jisu nou Repaonüh hi Taveyu
10 Ana puh thaihou jürai maitao nou nühbuh hi tahoyu thaisü, pu-a dumoa khei-a nüh buh hi takhere. 11 Jihudimai taonou nühbuh hinou puhye phoua, “Puh hai kahi bue?” tea nouwe. 12 Alia sühisü maisou hrohinou puh vanou mülealea loure. Kamainou paoe, “Puh hai maivei maie,” ana mai kukhenou paoe, “Moe, puhnou maikhe maiye sümah tare.” 13 Ana Jihudimaiye piyu donou maita linoua dua puh vanou chi paomoe. 14 Nüh süna tsüle kouyu phakisü Jisu nou Rathoki hi talouloua doushu tare. 15 Jihudimai taosü süvanou khupa loua, “Mai hainanou larü doukhai moa kabüa haizhozhou süloue?” tea paoe. 16 Südonou Jisu nou puletao hi chila peie, “Enou doupeiyu hai Avei moe, ana Eye seive peiyu puh veie. 17 Maita linou Ramai züpa sounüa bulouzü, Enou doupeiyu hai Ramai hinou veho, lah Amadonou paosa touyu sü sülai. 18 Puh lah puh madonou pao-a buyu puhsü lah puh kathe phoubaie; ana puhye seiveyu puh vei kathe phouyu puhwo chekhaoe ea puh hisü madayu alia hae. 19 Moses nou neletao hi Razhai nasü peimowu? Ana neletao maili koutea Razhai nasü reimoe. Neletao daivanou Eye southeare phouwe?” 20 Maikhe mainou chila peie, “Nehi rashi ali bue! Neye southeare donou thaohnou phouwe?” 21 Jisu nou puletao hi chila peie, “Enou vah ali soue, alia neletao veishinou süvanou khupae. 22 Moses nou neletao hi hee-vadeyu naa peie (sünasü Moses hinou vemoe, ana puo-paomaitao hinou ve), alia neletao nou Soteithe kinou nahpoutumai aliye hee-vadewe. 23 Moses vei chikha soukho more donou nahpoutumai aliye Soteithe kinou hee-vade louzü, Enou mai aliye puh vasou teitei hai Soteithe kinou soushee shahpeiyu vanou neletao nou Apei hi rarouwu? 24 Khao-zhai zhua chikuwuso, ana zü zhua chikulo.”
Puh hai Razhepu Nawu?
25 Südonou Jerusalem hi buyu mai kamainou paoe, “Puletao nou southealai tea phouyu mai nasü haina mowu? 26 Ana zhukhaio! puhnou dua chi pao-a bu-a puletao nou puh hi ha chilia paomoe. Haisü tsümai taonou chekhaoa puh hai Khrista nasüe tea sülouyu vanou moma? 27 Sütoukhaia mai haina hai daikinou vesa touyu hai Ehnou süe; ana Khrista nanou veyu kisü, maita linoua puh hai daikinou vesa touyu hai sülaimoe.” 28 Südonou Jisu nou Rathoki hinou doupeia buyu hinou paikua paoe, “Neletao nou Eye süwe, alia E hai daikinou vesa touyu hai neletao nou süwe. Sütoukhaia, Ehai lah Amado hinou vemoe, Eye seiveyu puh hai chekhaoe, alia puhye neletao nou sümoe. 29 Ana Ewo puhye süwe, daiolouzü Esü puh hinou ve, alia puhnou Eye seive-e.” 30 Südonou puletao nou puhye niloure donou phoue; ana maita linoua puh pei hi bah khakhai moe, daiolouzü puh phasü velou mohie. 31 Sütoukhaia mai taolinou puhye louche loure; alia puletao nou paoe, “Khrista nanou veyu kisü puhnou mai hainanou souyu jünou koua shee soulaiwu?”
Jisu ye Niloure donou Reihmaiye Seiveyu
32 Maisou khemainou Jisu vanou chi kulealeayu sü Pharisee maitao nou chouloure, alia napao adumaitao ea Phariseemai taonou puhye niloure donou reih maiye seive-e. 33 Sükisü Jisu nou paoe, “Enou neletaoye koa phajü donou bulaihie, alia süthaisü Esü Eye seive peiyu puh hi vetalai. 34 Neletao nou Eye phoulai, ana neletao nou Eye ngaolaimoe, alia Abuh hi neletao velouhoe.” 35 Jihudimai taonou puletao lah alinou lihi paoe, “Eletao nou puhye ngaolai moyu buh kahi puhnou talai? Puh hai Greekmai hrohi poralouyu Jihudimai taohi taholoua Greek tamaiye doupei laiwu? 36 ‘Neletao nou Eye phoulai, ana neletao nou Eye ngaolai moe?’ alia ‘Abuh hisü neletao velou hoe’ tea puhnou paoyu hai daiye paosa?”
Ahri Dzüla
37 Nüh süna akhai ea matsü tsülai teithe kisü, Jisu nou lashuloua ea paikushoa paoe, “Maitalia reilouzü, puhye panou Ahi taveloua küloukhaio. 38 Eye loucheyu puhsü, sheeyu larübvü nou paoyu kua, ‘Puh lekhe hinou hriyu reidzütao kütalai.’ ” 39 Hainahai Jisu nou puhye loucheyu maitao nou ngaolaiyu Rako vanou paoe; daiolouzü Rakohai süki peilou mohie, daiolouzü Jisu hai khouko-ava hi hrida shulou mohie.
Maikhemai hrohinou Me Kukutayu
40 Puletao nou chipao haitao choulouyu kisü, mai kamainou paoe, “Mai haina hai chekhaoa Rachi paolawo nasüe!” 41 Mai kukhenou paoe, “Puh hai Khristae!” Ana kamainou paoe, “Khrista hai Galilee hinou velaiwu? 42 Sheeyu larübvü hinou Khrista hai David khü hinou, alia David nou hrüyu nuh Bethlehem hinou velai toumowu?” 43 Südonou Jisu vanou maikhemai hrohisü me kuku tare. 44 Puletao kamainou puhye nilouyu züpae, ana maitalinoua puh pei hi bahkha khakhai moe.
Jihudimai Tsümai taonou Louche Moyu
45 Reihmai taonou dakhai veyu kisü napao adumaitao ea Phariseemai taonou puletao hi paoe, “Neletao daidonou puhye save moe?” 46 Reihmai taonou chila peie, “Mai haina büa maitalia chi paokhai mohie.” 47 Phariseemai taonou puletao hi chila peie, “Neletaoye-a sümah tare moma? 48 Tsümaitao hrohinou moa Phariseemaitao hrohinou puhye maita linoua louchewu? 49 Ana razhai sümoyu maisou haitaowo louzü acha ngaolouyu maitao baie!” 50 Pharisee maitao hrohinou vuhli Jisu ye tave daoyu Nikodemas touyu nanou kukhemai taohi paoe, 51 “Eletao vei razhainou mai aliye raia puh chi keikhai moa ea puhnou dai sousa touyu phoupa loumoa chiku baiwu?” 52 Puletao nou chila peie, “Ne-a Galilee hinou vewu? Sheeyu Larübvü hinou phoukhaio ea Galilee hinou rachi paolamai lia pakhaimoe touyu sü nenou ngaolai.”
Khakha Mah hinou Nilouyu Naotupai
1 Süthaisü puletao hrülaisü lahlah kihi vetare, ana Jisuwo louzü Oliv deichi hi tare. 2 Thainaisho shohna sü puh hai Rathoki hi tavepu khaire; sükisü maikhemai veishinou puh hi tave loure, alia puhnou kou buloua puletaoye doushu tare. 3 Razhai dou-apei maitao ea Pharisee maitao nou khakha mah soua buyu hinou nilouyu naotumai aliye saveloua puhye panou puletao veishi nghojünou laloure. 4 Puletao nou puh hi paoe, “Dou-apeio, naotu haipai hai khakha-a buyu hinou niloue. 5 Eletao vei razhai hinou haibüyu naotumaiye chuhnou deitheawo tea Moses nou chikha peikhaitoue. Newo puh vanou dai paore bue?” 6 Puletao nou chi haisü puh pei hi mah dukhaire do phoupa loure donou puh zhai zhua paobaie. Jisu nou kikouloua puh bahtounou kou deiphihi rüe. 7 Alia puletao nou puh hi chi noua buyu hinou, puhnou lashuloua puletao hi paoe, “Neletao hrohinou mahlia hayu puh panou raikaia puhye sü chuhnou deikhaio.” 8 Alia puhnou kikou puloukhaia puh bahtounou kou deiphihi rütakhaire. 9 Ana puletao nou puhchi sünasü choulouyu kisü tsükhana hinou tashu poa ali linou takhaire, alia sühisü Jisu ea puh nghojünou la-a buyu naotupai süna likhei baire. 10 Jisu nou pah pfülaloua puh hi paoe, “Naotupai, puletao daiki tare? Mailinoua ne pei hi mah dukhai mowu?” 11 Naotupainou chila peie, “Mapao, mailinoua mah dukhai moe.” Alia Jisu nou paoe, “Sükulouzü veire, E-a nepei hi mah dukhai moe; tawo, alia mah soupu khaiso.”
Jisu hai Deiphao Ava Nasüe
12 Jisu nou puletao hi paopukhaie, “E hai deiphao ava nasüe; Athai füyu puhnou teizhi hi talai moe, ana ahri vei ava nasü ngaoloulai.” 13 Süthaisü Phariseemai taonou puh hi paoe, “Chuo nelahnou ne vanou zhopaoh peiwe; nevei zhopaoh hai chekhao moe.” 14 Jisu nou chila peie, “Elah Avanou zhopaoh peia bu-a Azhopaoh hai chekhaoe, daiolouzü E hai daikinou vesa ea daiki tahosa touyu hai Enou süwe, ana neletao nou E hai daikinou vesa moa daiki tahosa touyu hai sümoe. 15 Neletao nou vasou thaifüa chikuwe. Ewo maili-a chiku moe. 16 Alia Enou chiku yuma Avei chikuyu hai chekhaoe, daiolouzü chikuyu hisü E lah baimoe, ana Eye seive peiyu Apuonou Eye kozhowe. 17 Neletao vei razhai hinou mai ahai vei zhopaoh hai cheche-e tea rüthou khaitoue. 18 Enou lah Avei vanou zhopaoh souwe, alia Eye seiveyu Apuonou Avanou zhopaoh souwe.” 19 Südonou puletao nou puh hi paoe, “Nepuo daiki bue?” Jisu nou chila peie, “Neletao nou Eye-a Apuoye-a sümoe; neletao nou Eye sülouzü Apuoye-a süvuzülai.” 20 Puhnou chi haitaosü Rathoki hinou doupeia bubuki Sheelayu sübvü khaiyu kidena hinou paoe, ana maita linoua puhye nilou moe, daiolouzü puh vei phasü vetelou mohie.
Enou Tahoyu buh hi Neletao Velou hoe
21 Jisu nou puletao hi paopukhaie, “E talai, alia neletao nou Eye phoulai, ana neletao hai neletao mah hinou thailai, Enou tayu buh hisü neletao velou hoe.” 22 Südonou Jihudimai taonou paoe, “Puhnou lah puhye southea laiwu, daiolouzü puhnou ‘Enou tayu buh hisü neletao nou velou hoe,’ tea paoe?” 23 Jisu nou puletao hi chila peie, “Neletao louzü khekounou ve, Ewo louzü reikounou ve; neletao louzü deiphao hinoue, Ewo louzü deiphao hinou moe. 24 Südonou neletao hai neletao mah hinou thailai tea Enou paoe; daiolouzü ‘E-e touyu puhsü E-e’ tea neletao nou louche molouzü neletao vei mah hinou neletaosü thailai.” 25 Süthaisü puletao nou puh hi noue, “Ne thaoh-e?” Jisu nou puletao hi paoe, “Shurainou Enou neletao hi paopeiyu nasüe. 26 Enou neletao vanou paore ea chikure alaosou bue; ana Eye seive peiyu puhsü chekhaoe, alia Enou puh hinou choulouyu nasü deiphao mai hi Enou paongao peiwe.” 27 Jisu nou puletao hi Puo vanou paoe tea puletao nou sülou moe. 28 Südonou puhnou puletao hi paoe, “Neletao nou Mai Nahpoutuye polashuyu kinou ‘E-e touyu puhsü E-e’ touyu hai neletao nou süloulai; süthaisü Enou halia Amadonou soumoe ana Apuonou Ahi doupeiyu thaifüa haitaohai paobaie touyusü neletao nou sülai. 29 Alia Eye seive peiyu puhsü Eye koa bue; puhnou E likhu thaopei moe, daiolouzü Enou teisanou puh züpasü souwe.” 30 Puhnou sübüa paoyu vanou, mai alaosou puhye louche loure.
Mado Soulouyu Mai alia Kilaitao
31 Süthaisü Jisu nou puhye louche louyu Jihudimai taohi paoe, “Neletao nou Achipao hinou tobai soumoa bulouzü, neletao hai chekhaoa Arozümai taoe, 32 alia neletao nou acheche nasü süloulai, alia acheche nanou neletaoye mado soupeilai.” 33 Puletao nou puh hi chila peie, “Eletao louzü Abraham tyaonahmai taoe, alia maitali vei kilai soukhai mohie. Südonou nenou ‘Neletaoye mado soupeilai’ tea paoyusü daiye paowe?” 34 Jisu nou puletao hi chila peie, “Enou neletao hi cheche vuzünou paowe, mah souyu mai talisü mah kilai nasüe. 35 Kilai nasü ki sünahi teisanou bumoe; ana nahpoutuwo louzü sühi teisanou buwe. 36 Südonou Nahpoutu nanou neletaoye mado soupei louzü, neletaosü chekhaoa mado souloulai. 37 Enou neletao hai Abraham tyaonahmai taoe touyu süe; ana neletao nou Eye southeare donou phouwe, daiolouzü Achipao hai neletao lekhehi buh hae. 38 Enou Apuoye koa ngaoyu nasü Enou paowe, alia neletao nou neletao puo hinou choulouyu nasü souwe.” 39 Puletao nou puh hi chila peie, “Abraham hai Eletao puoe.” Jisu nou puletao hi paoe, “Neletao hai Abraham nahmai louzü, Abraham nou souyu nasü neletao nou souwulai; 40 ana Ramai hinou achechena chouloua neletao hi doupeiyu mai Eye chuo neletao nou southealai tea phouwe. Abraham nou sübüa soukhai moe! 41 Neletao puonou souyu vah nasü neletao nou souwe.” Puletao nou puh hi paoe, “Eletao louzü khanah moe; Eletao vei puo ali bue, süolouzü Ramaie.” 42 Jisu nou puletao hi paoe, “Ramai hai neletao Puo toulouzü, neletao nou Eye leshiwulai, daiolouzü Ehai Ramai hinou ve ea chuo Esü buh haihinou bure. Enou Amadonou velou moe, ana puhnou Eye seivepeie. 43 Neletao daidonou Enou paoyu sülou moe? Haisü neletao nou Achipao pfülou hoyu donou baie. 44 Neletao hai neletao puo rashina hinou ve, alia neletao lelihai neletao puo züpa souyu nasüe. Puh hai shurainou maiye southeayu nasüe, alia achecheye koa vah souzhore alia hae, daiolouzü puh hi acheche alia hae. Puhnou amada chi paoyu sü lah puh zhai thaifüa paobaie, daiolouzü puh hai amada nasüe ea amada teitei vei puo nasüe. 45 Ana Enou achechena paoyu donou, neletao nou Eye louche moe. 46 Neletao hrohinou thaohnou Eye mah paodukhai peilou süe? Enou acheche paowe toulouzü, daidonou neletao nou Eye louche peimoe? 47 Ramai hinou veyu puhnou Ramai chipaotao keiwe; neletao nou chipao sütao keibayu louzü neletao hai Ramai hinou vemoe.”
Jisu alia Abraham
48 Jihudimai taonou puh hi chila peie, “Nehai Samariamai alie ea nehi rashi ali bue tea Eletao nou paoyu sü paozü mowu?” 49 Jisu nou chila peie, “Ahi rashi alia hae; ana Enou Apuoye tsükhouwe, alia neletao nou Eye tsükhou moe. 50 Enou Akathe phoumoe; ana süna phouyu ea chiku peiyu maili bue. 51 Cheche vuzünou Enou neletao hi paoe, maita linou Achipao hai züa bulouzü puhnou athai sü ngaokhai laimoe.” 52 Jihudimai taonou puh hi paoe, “Chuo Eletao nou nehi rashi ali bue touyu sü süloure. Abraham-a rachi paolamaitao-a thaikhaire, ana ‘Maita linou Achipao hai züa bulouzü, puhnou athai nasü daokhai laimoe;’ tea nenou paoe. 53 Thaitayu Eletao puopao Abraham jünou nenou duhiwu? Rachi paolamaitao-a thaikhaire! Nelah neye nou thaohtu-a paowe?” 54 Jisu nou chila peie, “Elah Eye tsükhoubai louzü, Avei tsükhouyu nasü halia moe; neletao nou, ‘Puh hai Eletao vei Ramaie’ tea paoyu puh hai Eye tsükhou peiyu Apuoe. 55 Neletao nou puhye sükhaimoe; ana Ewo puhye süwe. Enou puhye sümoe tea paolouzü, E-a neletao büa amadamai souwulai. Ana Enou puhye süwe ea Enou puh chi züwe. 56 Neletao puo-pao Abraham nou Ateile nasü ngaolai tea lesae, puhnou sünasü ngaoloue ea le sashoe.” 57 Süthaisü Jihudimai taonou puh hi paoe, “Ne sü po raingou koutea pamo hie, alia newo Abraham ye ngaowu?” 58 Jisu nou puletao hi paoe, “Cheche vuzünou Enou neletao hi paowe, Abraham ye namo jünou Esü bue.” 59 Südonou puletao nou puhye deire donou chuh kou poloure; ana Jisuwo puh lah tutsü loua Rathoki hinou tapare.
Nghicha-a Nakouyu Mai aliye Jisu nou Souvei peiyu
1 Jisu nou sükua ta-a buyu hinou nakou rainou nghichayu mailiye ngaoloure. 2 Alia puh rozümai taonou puh hi noue, “Rabbi, mai haina nghicha-a nakouyu hai thaoh mah-e, mai haina mah ho, puh pfüpuo mah-e?” 3 Jisu nou chila peie, “Haisü mai hainanou moa puh pfüpuo nou mahyu donou moe, ana Ramai vei khupa vah hai puh vanou pongaore donou baie. 4 Teinghi bubukinou Eye seive peiyu puh vei vah taosü Eletao nou souvuzülai. Maita linoua vah soulou hore kheisü laire. 5 Enou deiphao bubusa, Enou deiphao vei ava nasüe.” 6 Puhnou haibüa paoyu thaisü, deiphihi taidzü sükhai loua taidzünou konai hüloure ea konai sünanou mai süna nghithouhi napeire, 7 alia puh hi paoe, “Takhaio, alia Siloam dzükhao hinou ne pah phülou khaio.” (Siloam touyu hai seitayu toue.) Südonou puhnou taholoua puh pah phüloure, alia nghithou ngaoloua khaivere. 8 Südonou kinapa maitao ea puhye raichoki tosüa ngaoyu maitao nou paoe, “Deiphinou bua tosüyu nasü mai haina mowu?” 9 Kamai nou paoe, “Puh sü hainae;” kukhe maitao nou paoe, “Puh moe, ana puh hai mai süna zhu raibaie.” Südonou mai sünanou paoe, “Mai sünasü E-e.” 10 Puletao nou puh hi noue, “Sükulouzü ne nghithou hai kakua hepaloue?” 11 Puhnou chila peie, “Jisu tea kuyu mai sünanou konai hüloua Anghithou hi napeie, alia haibüa, ‘Siloam hi taho nepah phüloukhaio’ tea paopeie; südonou Enou taho Apah phüloue ea Anghithou sü ngaoloure.” 12 Puletao nou puh hi noue, “Puh kahi bue?” Puhnou chila peie, “E sümoe.”
Phariseemai taonou Nghithou Veilouyu vanou Chinouyu
13 Puletao nou raichoki nghichayu mai sünaye Phariseemai taohi save. 14 Jisu nou konai hüloua mai süna nghithou souvei peiyu teithe sünasü Soteithe hinoue. 15 Phariseemai taonou puh nghithou hai kakua ngaoloue tea puh hi noupue. Alia puhnou puletao hi paoe, “Puhnou Anghithou hi konainou napeie, alia Enou Apah phülouyu kisü ngaoloure.” 16 Phariseemai kamainou paoe, “Mai haina hai Ramai hinou vemoe, daiolouzü puhnou Soteithe reimoe.” Ana kukhemai taonou paoe, “Kakua mahmai alinou sübüyu shee taosü soulou sülai?” Alia sühisü puletao hrohinou me kuku tare. 17 Südonou puletao nou nghichayu mai sünahi noupue, “Puhnou ne nghithou souvei peiyu donou nenou puh vanou daitoua paowe?” Mai sünanou paoe, “Puh hai rachi paolamai alie.” 18 Ana Jihudimai taonou nghichayu hinou ngaolouyu mai süna pfüpuoye kuloumo sasü puh hai nghichae ea chuo ngaoloure touyusü alia louche moe, 19 alia puletao nou putamai hi noue, “Netamainou nghicha-a nakoue touyu nahpoutu nasü hainawu? Sütoulouzü puhnou chuo kakua ngaoloue?” 20 Puh pfüpuo nou chila peie, “Haisü Eh nahpoutue, alia puh hai nghicha-a nakoue touyu sü Ehnou süe. 21 Ana chuo puhnou kakua ngaolousa, moa thaohnou puh nghi souvei peisa touyu Ehnou sümoe. Puh hai tsüre, alia lah puh vanou paolou süe, puh hinou noukhaio.” 22 Puh pfüpuo nou Jihudimai taoye piyu donou sünahai paoe, daiolouzü maita linou Jisu ye Khrista-e tea louche louzü, puhye sü rathobuh hinou hutalai tea Jihudimai taonou kukou chere. 23 Südonou puh pfüpuo nou “Puh hai tsüre, puh hinou nouloukhaio,” tea paoe. 24 Südonou puletao nou nghicha-a nakouyu mai sünaye kuda khailoua puh hi paoe, “Ramaiye likhei shokhaio; mai hainasü mahmaibai touyu Ehnou süe.” 25 Puhnou chila peie, “Puh hai mahmaie, mahmai moe touyu E sümoe; ali louzü Enou süwe, süolouzü E nghicha-a buyu sü chuo E ngaoloure.” 26 Puletao nou puh hi noue, “Puhnou nehi dai soupeie? Puhnou kabüa nenghi chayu souveipeie?” 27 Puhnou puletao hi chila peie, “Enou neletao hi paochewure, alia neletao nou keipei bae. Neletao daidonou sünasü keipu nüwe? Neletaoa puh rozümai souyu züpawu?” 28 Puletao nou puhye nghei-a paoe, “Nenou puh rozümaie, ana Ehwo Moses rozümaie. 29 Ramai nou Moses hi paopeie touyu hai Ehnou süe, ana mai haina vanou louzü, puh hai kahinou vesa touyu Ehnou sümoe!” 30 Mai sünanou chila peie, “Neletao nou puh hai daikinou vesa touyu sümoyu hai khupa shoyu alie, ana puhnou Anghi chayu souvei peie! 31 Ramai nou mahmai pai keipei moe, ana maita linou Ramaiye thoa puh leli soulouzü, Ramai nou puh paisü keipeiwe touyu Ehnou süwe. 32 Deiphao soushu rainou maita linoua nghicha-a nakouyu mai tali nghithou souhepa peire touyu choukhai mohie. 33 Mai haina hai Ramai hinou vemo louzü, puhnou halia soulou hoe.” 34 Puletao nou puh hi chila peie, “Ne sü mahnou züa nakou khaitoue, alia nenou Eletaoye doupei laiwu?” Alia puletao nou puhye hulaire. 35 Puletao nou puhye hulaire touyu sü Jisu nou chouloure, alia puhye ve ngaolouyu kisü puhnou puh hi paoe, “Ne Mai Nahpoutuye louchewu?” 36 Puhnou chila peie, “Dou-apeio, Enou puhye louche loure donou puh sü thaoh-e!” 37 Jisu nou puh hi paoe, “Nenou puhye ngaoloure, alia chu neye chipha-a buyu nasü puh-e.” 38 Puhnou paoe, “Mapao, E louche,” alia sühinou puhnou kou puhye khurü loure. 39 Jisu nou paoe, “Ngaomoyu maitaoye panou ngaoloure donou, alia ngao-a buyu maitaoye panou nghicha tare donou, Enou deiphao hi chikure donou ve.” 40 Buh sühinou puhye koa buyu Phariseemai kamainou süsü chouloua puh hi paoe, “Eletao-a nghi chawu?” 41 Jisu nou puletao hi paoe, “Neletao hai nghichayu kowo, neletao mah sü bupaimoe; ana chuo, ‘Eletaowo ngaowe,’ tea neletao nou paoyu donou neletao mah sü bubaie.”
Zhao-akhowo vei Nada
1 “Cheche vuzünou neletao hi Enou paowe, kikhu hinou talou moa ludu kukhe hinou zhaovehi talouyu puhsü avaomaie ea maivei saotou maie. 2 Ana kikhu hinou talouyu puhsü zhaotu taovei zhaokhowo süe. 3 Puh hisü bomü khowonou kikhu houpeie; zhaotu taonou puh paisü chouwe, alia puhnou lah puhvei zhaotu taoye sü puletao zhih ali linou kua süthaisa papeie. 4 Puhnou lah puhvei taoye sü vakouhi sapayu kisü, puhnou puletao nghojünou tae, alia zhaotu taonou puhthai fütae, daiolouzü puletao nou puh pai shiwe. 5 Puletao nou shevai-shesü maitali thaisü fülaimoe, ana puletao nou puh hinou tuta bailai, daiolouzü puletao nou shevai-shesümai pai shimoe.” 6 Jisu nou nada hainasü puletao hi paopeie, ana puhnou puletao hi dai paosa touyu sü puletao nou sülou moe.
Zhaokho Aveiwo Jisu
7 Südonou Jisu nou puletao hi paopukhaie, “Cheche vuzünou Enou neletao hi paowe, E hai zhaotu taovei kikhu nasüe. 8 Anghojünou veyu puletao hrülai hai avaomai ea maivei saotoumai khaibaie; ana zhaotu taonou puletao paisü keipei moe. 9 E hai kikhue; maita linou Ahinou talou louzü, puhsü khailu loulai, alia puhnou tapa talouloua poudai aveibuh ngaoloulai. 10 Avaomai sünanou vaore, southeare ea souhare donou likhei vebaie. E louzü puletao ahri ngaoloure alia sünasü ngaochekhou loure donou ve-e. 11 “E hai zhaokho aveiwo süe. Zhaokho aveiwonou zhaotutao donou puh hrirai peie. 12 Zho kuhyu mai sünanou, puh hai zhao-akhowo moa zhaotutao paopu moyu donou nüsei taveyu ngaoloua zhaotu taoye thaowu-a tutabaiwe; alia nüsei nanou sütaoye nia hupho rarou baiwe. 13 Puh hai zho kuhyu maili baiyu donou zhaotutao donou halia leki khaimoa tuta baiwe. 14 -15 E hai zhaokho aveiwo süe. Apuonou Eye süyu ea Enou Apuoye süyu kua, Enou Azhaotu taoye süwe ea puletao-a Eye süwe. Alia Enou Ahrirai hai zhaotutao donou peie. 16 Alia zhaokhome haihi loumoyu Azhaotu kukhe-a bue. Enou puletaoye-a savelai, alia puletao nou Apaisü keilai, sükua puletao sü zhaokhowo alikhei hinou khome ali soubailai. 17 “Apuonou Eye leshiwe, daiolouzü Enou ahrirai hai podakhai loure donou Enou sünasü peiwure. 18 Maita linoua ahrirai hai Ahinou pota moe; ana lah Amadonou sünasü Enou pei-a baie. Süna peiwure sü Akhouko bue, alia süna podakhai loure Akhouko bue. Souloure zü hainasü Enou Apuo hinou ngaoloue.” 19 Chipao haitao vanou Jihudimaitao hrohisü me kukuta khaire. 20 Puletao hrohinou mai taolinou paoe, “Puh hi rashi ali bue, alia puh hai vore! Neletao daidonou puhchi keiwe?” 21 Ana kukhe taonou paoe, “Chipao sütaohai rashinou louyu mailinou paoyu chipao moe. Rashi alinou nghichamai nghithousü souhepa peilou süwu?”
Jisu ye Aetou moyu
22 Sükisü Jerusalem hisü Rathoki Posheela Nüh nasü nütare. 23 Teile sükisü saikie, alia Jisu nou Rathokihi, Solomon kipamü tea kuyu süna hinou takou takhe-a bue. 24 Südonou Jihudimai taonou puh hinou tave sühao buloua puh hi paoe, “Pha kasho nenou Eletaoye panou zhi-a bulai? Nehai Khristae toulouzü Eletao hi sheesha-a paongao khaio.” 25 Jisu nou puletao hi paoe, “Enou neletao hi paongaowure, ana neletao nou Eye louche peimoe. Apuo zhih hinou Enou souyu vah sütaonou Avanou zhopaoh peiwe; 26 ana neletao nou louche moe, daiolouzü Enou paoyu kua neletao hai Azhaokhome hinou moe. 27 Azhao taonou Apai keiwe, alia Enou puletaoye süwe ea puletao nou Athai fütawe. 28 Enou puletao hi teisa halou hoyu ahri peiwe, alia puletaosü hakilia hakhai laimoe. Alia maita linoua puletaoye Abah hinou shaolou hoe. 29 Puletaoye Ahi peiwuyu Apuonou hrülai jünou duhie, alia maita linoua puletaoye Apuo bah hinou shaolou hoe. 30 E alia Puosü alibaie.” 31 Sükisü Jihudimai taonou puhye deire donou kou chuh polou khaire. 32 Jisu nou puletao hi paoe, “Apuo hinou vah avei alao Enou neletao nghojühi soungaore; sütao hrohinou kana vanou neletao nou Eye chuhnou deilai touwe?” 33 Jihudimai taonou puh hi chila peie, “Eletao nou neye vah avei donou chuhnou deilai moe ana Ramaiye paoshiyu donou baie; alia newo mai baiyuma nelah Ramaiye paokhawe!” 34 Jisu nou puletao hi chila peie, “Neletao razhai hinou haibüa Ramai nou pao-a, ‘Neletaowo ramai taoe’ tea rükhaitou mowu? 35 Sükulouzü Ramai chipao peikhai touyu puletaoye puhnou ramaitaoe tea kulouzü sheeyu larübvü hinou paokhai touyu sü soukho louhoe. 36 Sütoulouzü Enou, ‘Ewo Ramai Nahpoutue,’ tea paoyu vanou, Puonou soushee pei-a deiphao hi seivekhai touyu puh hi neletao nou, ‘Newo Ramaiye paoshiwe’ tea paowu? 37 Enou Apuo vahtao soumo louzü, Eye loucheso. 38 Ana Enou sütaosü soua bulouzü, neletao nou Eye louche moyuma, Puosü Ahi bue ea Esü Puohi bue touyu süloure ea sheesha-a süa bure donou Avah taosü louche loukhaio.” 39 Südonou puletao nou puhye niloure donou tepue, ana puletao bah hinou puh hai tupa loure. 40 Süthaisü Johan nou raiki dzükhao dapeia buyu buh Jordan rei polo dova Jisu nou tapu khaire, alia sühinou puhnou nai-a bue. 41 Alia mai alaosou puh hi tave loure ea puletao nou paoe, “Johan nou shee alia soumoe, ana Johan nou mai haina vanou paoyu teitei sü chekhaoe.” 42 Alia sühinou mai taolinou puhye louche loure.
Lazaras Thaiyu
1 Sükisü Meri alia puh matoupai Marthanou hrüyu Bethani nuh hinou Lazaras touyu mai alihai souloure. 2 Mapaoye kaivei theadzünou napeiyu ea puh phihi puh peishunou posou peiyu paisü Meri hainapaie; sou-a buyu maina sü puh pou Lazaras süe. 3 Südonou tuhainou Jisu hi ko seiho-a paoe, “Mapao, nenou leshiyu puhsü sou-a bure.” 4 Ana Jisu nou ko süna choulouyu kisü paoe, “Sou hainasü thaire donou moe; haisü Ramai khouko-ava pongaore donou baie, alia süna vanou Ramai Nahpoutuye paosholai.” 5 Jisu nou Martha ea puh matoupai alia Lazaras ye leshie. 6 Ana puhnou Lazaras soue touyu ko nasü choulouyu kisü, puhnou buyu buh sühinou teithe ahai naipulou khaire. 7 Süthaisü puhnou rozümai taohi paoe, “Eletao Judea hi tapu laikhe.” 8 Rozümai taonou puh hi paoe, “Dou-apeio, zhovubü hinou Jihudimai taonou neye chuhnou deire donou phoua bue; alia newo sühi tapukhai laihiwu?” 9 Jisu nou chila peie, “Heako teilehai teilecho kiahai bumowu? Maita linou heako hinou ta-a bulouzü, puhnou phi süwumoe, daiolouzü puhnou deiphao hainavei ava nasü ngaowe. 10 Ana maita linou khei hinou talouzü, puhnou phi süwe, daiolouzü puh hisü ava nasü hae.” 11 Jisu nou sübüa paoyu thaisü, puletao hi puhnou paopukhaie, “Eletao sa Lazaras sü zhitare, ana Enou puhye soukaire donou talai.” 12 Rozümai taonou puh hi paoe, “Mapao, puh hai zhitare touyukowo, puh souhai veiloulai.” 13 Jisuwo louzü puhvei thaiyu vanou paobaie, ana züh hinou zhia soyu vanou puhnou paoe tea puletao nou chowe. 14 Südonou Jisu nou puletao hi sheesha-a paoe, “Lazaras thaire; 15 alia neletao donou E lesae, daiolouzü neletao nou louche loure donou Ehai buh sühi bumoe. Ana Eletao puh hi taholaikhe.” 16 Nahbei tea kuyu Thomasnou puh samai rozümai taohi paoe, “Eletao-a puhye koa thaire donou taholaikhe!”
Jisu hai Hrishuyu ea Ahri Nasüe
17 Chuo Jisu nou velouyu kisü Lazarasye khüh hi povuyuhai teithe adai pa-a ngaoloure. 18 Bethani hai Jerusalem ngheikihi kaacho ahaipha doua bubaie. 19 Alia Jihudimai alaonou Martha hai Meri hi puhai pou thaiyu vanou le souvare donou tave loure. 20 Südonou Martha nou Jisu laire touyu choulouyu kisü, puhnou tapaloua puhye daoloure, ana Meri louzü kikha hinou bue. 21 Martha nou Jisu hi paoe, “Mapao, nehai buh haihi buyukowo Apou hai thaipai moe! 22 Ana chukoutea Enou süe süolouzü nenou Ramai hinou khoyu talisü Ramai nou nehi peilai.” 23 Jisu nou puh hi paoe, “Nepou hai hrida khailai.” 24 Martha nou puh hi paoe, “Akhai teithe hi hrishuyuki puh-a hrishulai touyu hai Enou süe.” 25 Jisu nou puh hi paoe, “Ehai hrishuyu ea ahri nasüe; Eye loucheyu mai talinou puh hai thaiyuma hrilai; 26 alia hria Eye loucheyu mai talinou hatakia thailaimoe. Sünahai ne louche homoe?” 27 Puhnou Jisu hi chila peie, “Ovai, Mapao; nehai deiphao hi vere Ramai Nahpoutu Khrista nasüe touyu hai Enou louche-e.”
Jisu nou Krayu
28 Puhnou chi sünasü paowuyu thaisü, taloua taho puh matoupai Meriye kuloua puh hi kheikheisoua paoe, “Dou-apeio sü buh haihi bue ea neye phoua bue.” 29 Alia puhnou süsü choulouyu kisü, thala shuloua puhye daore donou tare. 30 Sükisü Jisu hai nuh hi veloulou mohie, ana Marthanou puhye daoyu buh hinou buhie. 31 Südonou kikha hinou bua puh le souva-a buyu Jihudimai taonou Meri nou thashoa kijühi tapayu ngaolouyu kisü puh hai khüh hinou taho krare donou tare tea choloua puletao nou puhthaifüa tare. 32 Jisu nou buyu buh hi Meri nou veloulou-a puhye ngaolouyu kisü puhnou Jisu phihinou kou duloua puh hi paoe, “Mapao, nehai buh haihi buyukowo Apou hai thaipai moe!” 33 Jisu nou Meri ea puhye koa taveyu Jihudimai taonou krayu ngaolouyu kisü puh lehai daisho loure; 34 alia puhnou puletao hi noue, “Neletao nou puhye kahi povuwure?” Puletao nou puh hi chila peie, “Mapao, tave zhukhaio.” 35 Jisu sü krare. 36 Südonou Jihudimai taonou paoe, “Zhukhaio, puhnou daizhozhoa puhye leshisa!” 37 Ana kamainou paoe, “Nghichayu mainaye souvei peiyu mai hainanou puhye panou thaimolou howu?”
Lazarasye Souhri Peiyu
38 Südonou Jisu hai le daisho puloukhaia khühhi tave; khüh sünasü chuhlea hinou raokhaitoue, alia süna pei hisü chuhlinou shikhai toue. 39 Jisu nou paoe, “Chuh nasü povai khaio!” Thaiyuna tupai Marthanou puh hi paoe, “Mapao, chuo kai nushi laire, daiolouzü puhye povuyu teithe adai pare!” 40 Jisu nou puh hi paoe, “Nenou louchea bulouzü Ramai vei khouko avasü ngaolai tea Enou nehi paomowu?” 41 Südonou puletao nou chuh nasü povaire. Alia Jisu nou pah pfülaloua paoe, “Apuo, nenou Akho keipeiyu donou, Enou ne kalo paowe. 42 Nenou teisa Akho hai noupeiwe touyu Enou süe, ana nenou Eye seivepeie touyu hai lasühao-a buyu maikhemai taonou louche loure donou Enou chi hainasü paowe.” 43 Puhnou sünasü paocheyu thaisü, paikusholoua paoe, “Lazaras tapalouwo!” 44 Thaiyu nanou puhphi, puhbah taosü khühsahnou phukhaitoua, alia puh pahsü sah alinou zükhaitoua tapa loure. Jisu nou puletao hi paoe, “Puhye sah laopa peiwu-a panou talouwo.”
Jisu ye Southeare donou Phouyu
45 Südonou Meriye koa taveyu Jihudimai taolinou Jisu nou souyu ngaoloua puhye louche loure. 46 Ana kamainou Phariseemai taohi taho Jisu nou souyusü paongao peire. 47 Südonou napao adumaitao ea Phariseemai taonou tsüme nasü kuve dzüloua paoe, “Eletao dai soulai? Daiolouzü mai hainanou shee taoli soua bure! 48 Eletao nou puhye panou haibüa talouzü, mai hrülainou puhye louchelou shulai, alia Rom mainou tave Eletao Rathoki ea Eletao tahrüh souha shulai!” 49 Ana puletao hrohinou süna pohi napao peichana soua buyu Kaiphanou puletao hi paoe, “Neletao nou halia sükhai moe! 50 Mai alinou maikhemai donou thaipei-a tahrüh teiteiye souhawu moyu nanou neletao donou veikouhie touyu sü neletao nou sümoe.” 51 Chi hainasü puhnou puh madonou paomoe, ana po sünahi napao peichana soua buyu vanou puhnou raia Jisu nou Jihudimai tahrüh donou thaipeilai tea paobaie, 52 alia tahrüh süna likhei donou bailaimoe, ana vakounou raroua buyu Ramainah taoye alikhei soua pove dzüre donoue. 53 Südonou sü teithe hinou shua puletao nou puhye southeare donou chi kutare. 54 Südonou Jisu nou dua Jihudimaitao hrohi takhai more, ana sühinou taloua radeikeena ngheiki buyu Ephraim tea kuyu nuh hi tare, alia sühinou puhnou puh rozümaitaoye koa bure. 55 Chuo Jihudimai vei Tachonüh nasü ngheikoure, alia mai alaosou nuhbuh hilonou taveloua puletao lah nüh jühinou naa thaifüa soushee loure donou Jerusalem hi tapare. 56 Puletao nou Jisu ye zhia Rathoki hinou la-a buyu hinou alinou lihi haibüa noue, “Neletaowo dai tea chowe? Puhwo nühbuh hi velaimona?” 57 Sükisü napao adumaitao ea Phariseemai taonou raia kharochi peire, süolouzü puletaoye panou Jisu ye niloure donou maitalinoua Jisu nou buyu buh sülouzü sünanou tave puletao hi süngaopei vuzülai.
Bethani hinou Jisu ye Theadzü Noupeiyu
1 Jisu nou Tachonüh vemo jühi teithe arou buyu phahinou puhnou athai hinou souhri peiyu Lazaras nuh Bethani hi tave loure. 2 Sühinou puletao nou puhye donou tovai ali souda peie. Martha nou vahva-a bue ea Lazaras-a Jisu ye koa arübuh hinou buyu maitao hrohinou alie. 3 Sükisü Meri nou muhtei shoyu ea kai veishoyu sheetouyu Nard theadzü dzüchovou dali poloua Jisu phihi noupei-a puh peishunou puh phisü posou peire; alia sühisü theadzü sünavei kai avei sünanou phoupei loure. 4 Ana puh rozümaitao hrohinou maili, Jisu ye ngaobamai bah hi thoupei laiyu Iskariot Judasnou paoe, 5 “Daidonou kaivei theadzü haina hai denarü kaihsü muh zholoua toure hamai hi peimosa?” 6 Puhnou sübüa paoyu hai toure hamaiye donou tsüchoa paoyu moe, ana puh hai avaomai ali baiyu donou paobaie ea shavü pokuyu mai ali soua sühi thoukhai touyu taosü puh lah vaoloulou baiwe. 7 Ana Jisu nou paoe, “Puh lah panou puh do soukhaio, alia puhye panou sünahai Eye povure teitheki donou pokhailouwo. 8 Daiolouzü toure hamai taoye neletao nou teisa koa bulai, ana neletao nou Eye koa teisanou bulai touyu moe.”
Lazarasye Southeare Do Phouyu
9 Jisu hai Bethani hi bue touyu kosü Jihudimai maisounou sülouyu kisü, puletao nou puhye donou likheibai moa puhnou athai hinou souhri peiyu Lazarasye-a zhure donou tave loure. 10 Südonou napao adumai taonou Lazarasye-a southeare donou do phouloure, 11 daiolouzü puh vanou Jihudimai taolisü puletaoye thaowu-a Jisu ye nou louche tare.
Jisu nou Kolouyu Asah hinou Jerusalem hi Talouyu
12 Thainaisho kisü nühbuh hi tavelouyu maisounou Jisu-a Jerusalem hi veloure donou laire touyu kosü chouloure. 13 Südonou puletao nou habo poloua puhye daore donou tapare alia shusoua shaloure, “Hosanna! Mapao zhih hinou tave louyu, Israelmai Veo puhsü rako veie!” 14 Alia Jisu nou rheisüh toutu ali ngaoloua süna phaohi pabu loure; daiolouzü sheeyu larübvü hinou haikua rüthouwure, 15 “Piso, Zion hi nah naotupai; Zhukhaio, nevei Veosü Rheisüh toutu ali phaohinou bua tavewe!” 16 Sükisü puh rozümai taonou hainavei ko alia sükhai moe; ana Jisu nou adusho hi hrishu louyu thainou, haina hai puh vanou rükhaitoue ea haisü puletao nou puh hi soupeire touyusü puletao nou sükinou liloure. 17 Jisu nou Lazarasye khüh hinou kupaloua puhye athai hinou souhri louyuki puhye koa buyu maisounou süna vanou zhopaoh soloure. 18 Maisounou puhye daore donou taveyu qo louzü puhnou shee hainasü soushe tea chouyu donoue. 19 Südonou Phariseemai taonou alinou lihi haibüa paoe, “Nele-a chokhaio, Eletao nou halia soulou hore! Zhukhaio, deiphaomai hrülainou puhthai fütakhaire.”
Greek Mainou Jisu ye Phouyu
20 Alia nühbuh hi rathore donou tave loulouyu maikhemai hrohisü Greekmai kamaia louwe. 21 Südonou mai haitaonou Galilee hi Bethsaida nuh hinou veyu Philip hi taveloua puh hi paoe, “Dou-apeio, Ehnou Jisu ye daonüwe.” 22 Philip nou taho Andrew hi paopeie, ea Andrew nou Philip ye koa taho Jisu hi paopeie. 23 Alia Jisu nou puhai hi chila peie, “Mai Nahpoutu nou kathe souloure phasü veloure. 24 Cheche vuzünou Enou neletao hi paowe, southou pfüli hai deiphihi dekou louloua thaimosa süna lah bubaiwe; ana sünasü thaita louzü thou alaosou shilouwe. 25 Lah puh hrümaiye leshi baiyu mai sünou sünasü habailai, alia deiphao haina hinou lah puh hrümaiye ngaorayu mai sünou sünahai teisa hrire donou pokhai loulai. 26 Maita linou Akuvah soulouzü, puhnou Athai füvuzülai; alia Enou buyu buh hisü Akilai-a bulai; maitalinou Akuvah soulouzü, Apuonou puhye tsükhoulai.
Jisu nou Puhvei Athai vanou Raia Paoyu
27 “Chuo Alehai veasho loure, alia Enou dai paolai? ‘Apuo, pha teile haina hinou Eye khaipapeio’ tea Enou paolaiwu? Moe, soure vah haina donou Enou pha hainahi velou loure. 28 Apuo, nezhih adusho soulouwo!” Sükisü rakinou paili shakoue, “Enou sünahai soudusho peire, alia Enou sünahai soudusho pupeilai.” 29 Sühinou la-a buyu maisounou pai sünasü choue ea puletao kamainou sünahai teisüwe tea paoe. Ana kukhe mainou sünahai, “Rakivamai alinou puh hi chi paobaie!” tea paoe. 30 Ana Jisu nou puletao hi paoe, “Pai haina hai Eye donou moe, ana neletaoye donou baie. 31 Chu deiphao hainaye chikure pha nasüe, chuo deiphao hainavei paopuye hutawulai. 32 Alia Eye deiphi hinou polashuyuki, Enou mai hrülaiye Ahi paivelai.” 33 Puhnou haibüa paoyu hai kakuyu athai zhaido hinou puh hai thailaisa touyu pongaobaie. 34 Maisounou puh hi chila peie, “Ehnou razhai hinou Khrista hai teisanou hrilai tea choue. Sükulouzü nenou kakua Mainah Potuoye sü polashu vuzülai tea paowe? Mai Nahpoutu hainasü thaoh-e?” 35 Jisu nou puletao hi chila peie, “Phajü donou ava nasü neletaoye koa bupulai. Avana bubu kinou neletao nou takhaio, molouzü teizhi nanou neletaoye nulou shulai; teizhi hinou tayu mai sünanou puh hai daiki tahosa touyu sümoe. 36 Neletao hi avana bubu kinou, ava nahmaitao souloure donou neletao nou ava naye sü louchelo.”
Jihudimainou Louche moyu
Jisu nou chi haina paocheyu thaisü, puh lah puletao hinou taloua tutsü loure. 37 Puhnou shee alaosou puletao nghojühi soungao peiyuma, puletao nou puhye louche peimoe. 38 Sünahai Isaiah rachi paolawo vei chipao sü vetere donoue: “Mapao, thaohnou Eh vei Chipao louche peie? Alia thaoh hi Mapao nou puhvei Khouko pongao peie?” 39 Alia südonou puletao nou louchelou hore, daiolouzü Isaiah nou paopukhaie: 40 “Puhnou puletao nghithou souchare ea puletao le soukhoure, sükumo louzü puletao nou puletao nghithounou ngaolou shulai ea puletao lenou sülou shulai, alia puletaoye souvei peire donou Ahi khaive shulai.” 41 Isaiah nou haisü paoe, daiolouzü puhnou Jisu vei adusho sü ngaoe ea puhnou puh vanou paopeie. 42 Sütoukhaia, Jihudimai peichamai koutea mai alaosou puhye loucheloue, ana Phariseemai taoye piyu donou puletao nou sünasü dua paopamoe, molouzü puletaoye rathobuh hinou huta shulai; 43 daiolouzü puletao nou Ramai nou shoyuna jünou mainou shoyuna-a züpahie.
Jisu vei Chipaonou Chikuyu
44 Alia Jisu nou paikushoa shapae, “Eye loucheyu mai talinou Eye likhei louche baimoe ana Eye seiveyu puhye-a louchewe. 45 Alia Eye ngaoyu mai talinou Eye seiveyu puhye-a ngaowe. 46 Eye loucheyu talinou teizhihi bumore donou, Enou ava büa deiphao hi velouloue. 47 Maita linou Achipaotao chouloua sütao hai zümo louzü, Enou puhye chiku moe; daiolouzü deiphao maiye chikure donou Enou vemoe, ana deiphao maiye khaipeire donou vebaie. 48 Eye laiyu ea Achipao pobayu mai sünaye chikuremai ali bue. Enou paopa khaitouyu chipao nanou akhai teitheki puhye chikulai! 49 Daiolouzü lah Amadonou chi paopamoe; ana Eye seiveyu Apuonou dai paolai ea kabüa paolai touyu chikhasü Ahi peikhaitoue. 50 Alia puhvei chikhahai teisa ahrina süe touyu hai Enou süe. Südonou Enou paoyu talisü Apuonou Ahi paopeiyu büa Enou paobaie.”
Jisu nou Puh Rozümaitao Phi Khüpeiyu
1 Chuo haihai Tachonüh vemo jübühi teithe nasüe. Jisu nou puhye donou deiphao haina thaowu-a puh Puohi tare phasü veloure touyu sü süloure. Puhnou deiphao hi puhmaitaoye teisanou leshi peia, akhai koute puletaoye puhnou leshipeie. 2 Koukhe tovai nasü vai-a buyu hinou, rashi nanou Simon nahpoutu Iskariot Judas lekhehi Jisu ye ngaobamai bah hi shoh southou peire tsü nasü pothou peire. 3 Puonou hali-hala puh bah hi thoupeire, alia puh hai Ramai hinou ve ea Ramai hi dakhai velai touyusü Jisu nou süe. 4 Südonou puhnou tovai buh hinou shuloua puh sahba nasü laokhaire, alia sazha ali poloua puh lah puh khyahi pozhaloure. 5 Süthaisü puhnou raikhaohi dzü lathouloua rozümaitao phisü khüpei tare ea puh khyahi zhakhai touyu sazha sünanou poloua puletao phisü southepei tare. 6 Puhnou Simon Pitar hi takoue; alia Pitar nou puh hi paoe, “Mapao, newo Aphi khülaiwu?” 7 Jisu nou puh hi chila peie, “Enou soua buyu hai neletao nou chu sümoe, ana nakinou neletao nou sülai.” 8 Pitar nou puh hi paoe, “Hakilia nenou Aphi khükhai laimoe!” Jisu nou puh hi chila peie, “Enou neye khüpei molouzü, nenou Eye koa zha zhoyu hae.” 9 Simon Pitar nou puh hi paoe, “Sükulouzü, Mapao, Aphi likhei baimoa Abah ea Apei-a khüpeio!” 10 Jisu nou puh hi paoe, “Dzü khülouyu mai sünanou puh phi likhei baimoa kukhe khüpuyu komoe; daiolouzü puhwo pfüphao teiteinou sheewe. Alia neletao sü sheewe, ana neletao hrülainou sheekhaiyu moe.” 11 Daiolouzü puhnou puhye shoh soupeire naye sü süwe; südonou puhnou, “Neletao hrülainou sheekhaiyu moe” tea paoe. 12 Jisu nou puletao phi khüpeiwuyu thaisü puh sahba poloua puh buh hi kou buta khaire. Alia puhnou puletao hi noue, “Enou neletao hi soupeiyu nasü neletao süsümoe? 13 Neletao nou Eye ‘Dou-apeio’ ea ‘Mapao’ tea kuwe; alia neletao nou kuyu hai kuzüe daiolouzü Esü sünasüe. 14 Chuo neletao vei Mapao ea Dou-apeio Enou neletao phi khüpeiyu thaisü, neletao-a alinou aliphi khüpeiyu kaoe. 15 Daiolouzü Enou neletao hi soure zhaido nasü soungao peire, süolouzü Enou neletao hi soupeiyu büa neletao-a souvu zülai. 16 Cheche vuzünou Enou neletao hi paoe, kilai talia puh paopu jünou dumoe; moa seita-a buyu puhnou seipeiyu puh jünou dumoe. 17 Neletao nou haitaohai sülouzü, sütao soua buyu neletao donou rakoveie. 18 “Enou neletao veishi vanou paomoe; Enou dolouyu maitaoye sü Enou süe; ana haisü sheeyu larübvü hinou haibüa paoyusü vete loure donoue, ‘Eye koa raokhao zhitouyu puhnou Eye hrailoure!’ 19 Süna pamojü chunou neletao hi Enou paoa bue, süolouzü süna payu kisü E hai puh-e touyusü neletao nou louche loulai. 20 Cheche vuzünou Enou neletao hi paoe, Enou seitayu mai sünaye popeiyu puhnou Eye popeiwe; alia Eye popeiyu puhnou Eye seive peiyu puhye popeiwe.”
Jisu ye Shoh Sou Laiyu vanou Raia paoyu
21 Jisu nou sübüa paoyu thaisü, puh lehai veasho loure, alia dua paopae, “Cheche vuzünou Enou neletao hi paoe, neletao hrohinou alinou Eye peithoulai.” 22 Thaoh vanou puhnou paosa touyu teipei lia sükhaimoa rozümai taonou alinou liye zhue. 23 Rozümaitao hrohinou Jisu nou leshiyu nasü Jisu ye dasa-a bue. 24 Südonou Simon Pitar nou puh hi nghisailoua paoe, “Puhnou paoyusü thaohyesa, puh hinou noukhaio.” 25 Südonou rozümai sünanou Jisu khaohilo pei pfüna kouloua puh hinou noue, “Mapao, sünasü thaoh-e?” 26 Jisu nou chila peie, “Enou raokhaopho nasü pothou süloua peilaiyu mai sünasüe.” Südonou puhnou raokhaopho nasü pothou süloua sünasü Simon Iskariot nahpoutu Judas hi peire. 27 Judasnou raokhaopho süna polouyu thaisü, Saitan nou puh hi louloure. Jisu nou puh hi paoe, “Nenou soure nasü thala-a soukhaio!” 28 Ana vaibuh hi buyu mailinoua daidonou Jisu nou sünahai puh hi paosa touyusü sümoe. 29 Daiolouzü Judas hi shavü nasü buyu donou Jisu nou puh hi, “Eletao nou nühki toure natao hrülouwo; moa toure hamai hi hatali peikhaio” tea paoe tea puletao kamainou choe. 30 Südonou Judasnou raokhaopho sünasü polouyu thaisü thalasou vakouhi tapare; alia süsü kheikie.
Chikha Ashuna
31 Judas nou vakouhi tapayu thaisü, Jisu nou paoe, “Chuo Mai Nahpoutuye soudusho peire, alia puh vanou Ramaiye soudusho peire. 32 Alia puh vanou Ramaiye soudusho peilouzü, Ramai nou-a puh vanou Nahpoutuye soudusho peilai, alia puhye thalasou soudusho peilai. 33 Anahkhemai, phajü donou Enou neletaoye koa bubailaire. Neletao nou Eye phoulai; ana Enou Jihudimai taohi paoyu kua chuo Enou neletao hi paowe, ‘Enou tayu buh hisü neletao nou velouhoe.’ 34 Enou neletao hi chikha ashuli peiwe; neletao alinou liye leshilo. Enou neletaoye leshi peiyu büa, neletao-a alinou liye leshi vuzülai. 35 Neletao hi alinou ali donou leshiyu nasü bulouzü, süvanou neletao hai Arozümai-e touyusü mai hrülainou süloulai.”
Jisu ye Pitar nou Laiwure Raia Paopeiyu
36 Simon Pitar nou puh hi noue, “Mapao, ne daiki taholai?” Jisu nou chila peie, “Enou tahore buh hisü nenou chu Athai fülou hoe; ana nakinou nenou Athai fülai.” 37 Pitar nou puh hi paoe, “Mapao, daidonou chu Enou nethai fülou holai? Enou neye donou Ahrirai peilai!” 38 Jisu nou chila peie, “Nenou Eye donou ne hriraisü peilaiwu? Cheche vuzünou Enou nehi paowe, nenou Eye vu asü laiwu mosasü houjünou khaolai moe!”
Jisu nou Puo hi Vere Ludue
1 “Neletao le chorowuso; Ramaiye lülo, Eye-a lülo. 2 Apuo kihi buh alaosou bue; alia Enou taho neletao donou buh ali soudalai. Sütoumo louzü haihai Enou neletao hi paolai moe. 3 Alia Enou taho neletaoye donou buh ali soudayu thaisü, Enou buyu buh hisü neletao-a bure donou Enou dakhaive neletaoye Ahi savelai. 4 Alia Enou tahore buh hi vere dunasü neletao nou süwe.” 5 Thomas nou puh hi paoe, “Mapao, nenou daiki tawe touyu Ehnou sümoe; südonou Ehnou kakua ludu nasü süloulai?” 6 Jisu nou puh hi paoe, “Ludu nasüa, acheche nasüa, alia ahri nasüa E-e; Ahinou moa maita linoua Puohi vemoe. 7 Neletao nou Eye süa bulouzü, Apuoye-a neletao nou süwulai; alia chushonou neletao nou puhye süloue ea puhye ngaoloure.” 8 Philip nou puh hi paoe, “Mapao, Puoye sü Eh hi ngaokhaio, alia sükulouzü Ehnou rukhalai.” 9 Jisu nou puh hi paoe, “Pha haisoso Enou neletaoye koa bukhaia, ne Eye sümo hiwu Philip? Eye ngaolouyu puhnou Puoye ngaoloure; sütou louzü, nenou kakua, ‘Puoye sü Eh hi ngaokhaio’ tea paowe? 10 Esü Puohi bue touyu sü nenou louche mowu? Enou neletao hi paoyu chipao taosü lah Amadonou paomoe; ana Ahi buyu Apuonou lah puhvah soubaie. 11 Eye louchelo, süolouzü Esü Puohi bue ea puosü Ahi bue; molouzü Enou souyu vah sütao vanou Eye louchelo. 12 Cheche vuzünou Enou neletao hi paowe, ‘Eye loucheyu puhnou Enou souyu vahtao sü puh-a soulai; alia haitao jünou duyu vahtao-a puhnou soulai, daiolouzü Enou Apuohi tawe. 13 Nahpoutu vanou Puoye soudusho peiloure donou, neletao nou Azhih hinou khoyu talisü Enou soupeilai. 14 Neletao nou Azhih hinou hatalia kholouzü, süsü Enou soupeilai.’
Rako Mashi Seikou peire Apaopeiyu
15 “Neletao nou Eye leshi louzü, Achikha taosü neletao nou zülai. 16 Alia Enou Puo hinou kholai ea neletaoye koa teisanou bure soukha-apeio kukhe ali puhnou neletao hi peilai. 17 Puh hai Ramai vanou achechena süngao peiyu Rako nasüe. Deiphao mainou puhye popei louhoe, daiolouzü sünanou puhye ngaomoe moa sümoe. Ana neletao louzü puhye süwe, daiolouzü puhnou neletaoye koa bue ea neletao lehi bue. 18 “Enou neletaoye vearouna kua thaowu laimoe; E neletao hi khaive khailai. 19 Phajü thaisü, deiphao mainou Eye ngaopukhai laimoe, ana neletao louzü Eye ngaolai; daiolouzü Enou hriyu donou, neletao-a hrilai. 20 Teithe sükisü, Esü Apuohi bue, neletaosü Ahi bue ea Esü neletao hi bue touyusü neletao nou sülai. 21 “Achikhatao polouyu ea sütao zülouyu mai sünasü Eye leshiyu nasüe. Eye leshiyu puhye Apuonou leshilai; alia E-a puhye leshilai ea E lah Eye puh hi pongaolai.” 22 Iskariot moyu Judas nou puh hi paoe, “Mapao, nenou kakua nelah neye deiphaomai hi moanou Eletao hi ngaopeilai?” 23 Jisu nou puh hi chila peie, “Maita linou Eye leshi louzü, puhnou Achipaosü zülai, alia Apuonou puhye leshilai, alia Apuo ea Enou puh hi taveloua puhye koa kilinou hrüzholai. 24 Eye leshi moyu puhnou Achipao taosü zümoe; alia neletao nou chouyu chipao nasü Aveimoe ana Eye seive peiyu Apuo veie. 25 “Haitao teiteisü neletaoye koa bubukinou neletao hi Enou paopeire. 26 Ana Apuonou Azhih hinou seive peilaiyu soukha-apeio Rako Mashi sünanou ha teitei neletao hi doupeilai, alia Enou neletao hi paokhai touyu pfüphou neletaoye panou li-chopa loulai. 27 “Kaonayu hai Enou neletao hi thaodai khaitoue; Avei kaonayu nasü Enou neletao hi peikhaitoue; Enou neletao hi peiyu hai deiphao mainou peiyu kumoe. Neletao lehai chorowuso, moa piwuso. 28 ‘E talai, alia neletao hi E khaive khailai,’ tea Enou neletao hi paoyusü neletao nou chouloure. Neletao nou Eye leshi louzü, neletaosü lesa loulai, daiolouzü Esü Apuohi tawe; daiolouzü Puonou Ajünou duhie. 29 Alia süna palouzü neletao nou louche loure donou, süna pamo jühinou chunou Enou neletao hi sünasü paongao peire. 30 Enou neletaoye koa phaso chipha khailai moe, daiolouzü deiphao hainavei paopusü laire. Puhnou Apei hi soure khouko hae; 31 Ana Enou Apuoye leshie touyu hai deiphaomainou süloure donou Apuonou Ahi chikha peikhai touyu thaifüa Enou soubaie. “Shulouwo, buh haihinou Eletao talairekhe.”
Jisu nou Darkha bejü Acheche Nasüe
1 “E darkha bejü acheche nasüe, ea Apuonou darkha kipei-khowo süe. 2 Ahinou tao-a buyu rashi shimoyu bo veishi puhnou vilaiwu baiwe; alia rashi shiyu bo veishiye panou rashi shipure donou puhnou soushee peiwe. 3 Neletaowo louzü Enou neletao hi paopeiyu chipao nanou sousheepei chere. 4 Ahinou tobai soumoa bulo, alia Enou neletao hi tobai soumoa bulai. Bo talinou bejü hi tobaisoumoa taomo louzü rashi shilou hoyu kua, neletao-a Ahinou tobai soumoa bumo louzü rashi shilou hoe. 5 “E darkha bejü nasüe, neletaosü bo taoe. Ahinou tobai soumoa buyu ea Enou puh hi buyu mai sünasü rashi alaosou shilai; daiolouzü E loumoa neletao nou hatalia soulou hoe. 6 Maita linou Ahinou tobai soumoa bumolouzü, puhye sü boli kua shilaiwu-a panou kita baiwe; alia sübüyu botaoye sü podzüloua meihi polaithou deiwu baiwe. 7 Neletao nou Ahi tobai soumoa bulouzü ea Achipao taosü neletao hi tobai soumoa bulouzü, neletao nou züpayu tali khokhaio, alia sünasü neletao donou soupeilai. 8 Neletao nou rashi alaosou shiloua Arozümaitaoe touyu zhopaoh souyu sünanou Apuoye soudusho peiwe. 9 Apuonou Eye leshi peiyu kua, Enou neletaoye leshi peire; Avei leshi hinou tobai soumoa bulo. 10 Enou Apuo chikhatao züloua puh leshi hinou tobai soumoa buyu kua, neletao-a Achikhatao zülouzü neletao nou Aleshi hinou tobai soumoa buloulai. 11 “Avei sayu nahai neletao hi buloure donou, alia neletao vei sayuhai liche loure donou Enou haitaosü neletao hi paopeire. 12 Haihai Achikha nasüe, süolouzü Enou neletaoye leshiyu kua neletao-a alinou liye leshilo. 13 Maita linou puh samaitao donou thaipeiyu süjünou dukouyu leshi kukhe hae. 14 Enou neletao hi chikha peiyu hai neletao nou soulouzü, neletao hai Asamaie. 15 Enou neletaoye kilaitao tea kupu more, daiolouzü kilai nanou puhvei paopunou dai sousa touyu sümoe. Ana Enou neletaoye samaitao tea kuloure, daiolouzü Enou Apuo hinou choulouyu teiteisü neletao hi Enou paongao peire. 16 Neletao nou Eye dolou moe, ana neletao nou taho rashi shiloure donou ea neletao vei rashi nasü teisanou buloure donou Enou neletaoye doloure ea buh thoupeire. Alia sükua neletao nou Azhih hinou Puohi khoyu tasü puhnou neletao hi peilai. 17 Südonou Enou neletao hi chikha peia paoyu nasü hainae: alinou liye leshilo.
Deiphao Mainou Rozümaitaoye Ngaorayu
18 “Deiphao mainou neletaoye ngaora louzü, sünanou neletaoye ngaoramo jühinou raia Eye ngaorare touyusü sülo. 19 Neletao hai deiphao veie toulouzü, deiphao mainou lah puhveiye sü leshilai. Ana neletao hai deiphao maivei moyu donou, alia Enou neletaoye deiphao hinou dolouyu donou, deiphao mainou neletaoye ngaorawe. 20 Enou neletao hi paopeiyu chipao nasü lilo; ‘Kilai talia puh paopu jünou dumoe.’ Puletao nou Eye souvea-souho louzü, puletao nou neletaoye-a souvea souholai; puletao nou Achi zülouzü, puletao nou neletao chi-a zülai. 21 Ana Azhih donou sütao veishi hai puletao nou neletao pei hi soulai, daiolouzü puletao nou Eye seive peiyu puhye sümoe. 22 Enou taveloua puletao hi paopeimo louzü, puletao hai mah bupaimoe. Ana chuo puletao vei mah donou puletaoye khaipeire hare. 23 Eye ngaorayu puhnou Apuoye-a ngaorawe. 24 Enou puletao hrohinou maita linoua soukhai moyu vah taosü soumoe toulouzü puletaosü mah bupaimoe; ana chuo puletao nou sheetaosü ngaoloure, alia Eye-a Apuoye-a ahaiyenou ngaora loure. 25 Haisü puletao razhaihi rüthoukhai touyu chipao nasü vetere donoue, ‘Puletao nou qo alia ha-a Eye ngaora loure.’ 26 “Ana Enou Puo hinou neletao hi seivepei laiyu, süolouzü Puo hinou velaiyu acheche Rako, soukha-apeionou veyu kisü puhnou Avanou zhopaoh soulai; 27 alia neletao-a Avanou zhopaoh soulai, daiolouzü neletao-a shurai hinou Eye koa bue.
1 “Neletaoye panou kao-du tamore donou chi haitaohai Enou neletao hi paopeire. 2 Puletao nou neletaoye rathobuhtao hinou hutalai. Cheche vuzünou phasü veloure, süolouzü neletaoye southeayu maitalinou sübüa souyu hai puhnou Ramai kuvah souwe tea cholai. 3 Alia puletao nou Puo moa Eye sümoyu donou vah haitaosü neletao hi soulai. 4 Ana Enou haitao hai neletao hi paopeire, süolouzü puletao nou vah sütao soure pha veyu kisü Enou neletao hi sütao vanou paosü peire touyu sü neletao nou liloulai.
Rako Mashi Vah
“Shurai hiwo Enou neletao hi haitao hai paopeimoe, daiolouzü Esü neletaoye koa bue. 5 Ana chuo Esü Eye seive peiyu puh hi tavelaire; sütoukhai-a neletao hrohinou maita linoua Ahi, ‘Ne daiki vetalai?’ tea noumoe. 6 Ana Enou neletao hi haitao paopeiyu donou, neletao lesü veasho loure. 7 Ana Enou neletao hi acheche nasü paowe: Enou tayuhai neletao donou veipuhie, daiolouzü E tamo louzü, soukha-apeio nasü neletao hi velaimoe. Ana Enou talouzü, puhye Enou neletao hi seive peilai. 8 Alia puhnou veyu kisü, deiphao maiye mah vanou, acheche vanou ea chikuyu vanou puletao hai mahre touyusü panou süloulai: 9 mah vanou louzü, puletao nou Eye louche moe; 10 acheche vanou louzü, Esü Puohi talai, alia neletao nou Eye ngaopukhai laimoe; 11 chikuyu vanou louzü, deiphao hainavei paopuye chi kuwure. 12 “Enou neletao hi paore alaosou buhie, ana sütao veishi hai neletao nou chu pfüpai louhoe. 13 Ana cheche Rako sünanou veyu kisü, puhnou neletaoye acheche teiteihi süthaive peilai; daiolouzü puhnou lah puh mado hinou chi paolai moe, ana puhnou chouyu talisü puhnou paolai, alia puhnou neletao hi thaikhai veretao vanou paopa peilai. 14 Puhnou Eye soudusho peilai, daiolouzü puhnou Avei nasü poloua sünasü neletao hi paopeilai. 15 Apuo hi buyu teiteisü Aveie; südonou puhnou Avei nasü poloua sünasü neletao hi paongao peilai tea Enou paowe.
Leveayu ea Lesayu
16 “Phajütou thaisü neletao nou Eye ngaolaimoe; alia phajütou thaisü neletao nou Eye ngaopu khailai.” 17 Puh rozümai kamainou alinou lihi noue, Puhnou Eletao hi, “Phajütou thaisü neletao nou Eye ngaolaimoe, alia phajütou thaisü neletao nou Eye ngaopu khailai, alia, ‘Sünahai Enou Puohi tayu donoue,’ tea paoyu hai daie?” 18 Puletao nou paopukhaie, “Puhnou ‘Phajütou thaisü’ tea paoyu hai daiye paosa? Puhnou dai vanou paosa touyu Eletao nou sümoe!” 19 Puletao nou puh hi nounüa buyu sü süloua Jisu nou puletao hi paoe, “Neletao hrohinou alinou lihi noua buyu nasü, ‘Phajütou thaisü neletao nou Eye ngaolaimoe, alia phajü thaisü neletao nou Eye ngaopukhailai’ tea Enou paoyu vanouwu? 20 Cheche vuzünou Enou neletao hi paowe, neletaosü kralai ea dopfülai, ana deiphao maiwo le salai; neletao hai le vealai, ana neletao vei le veayu hai panou le sayuhi soudalai. 21 Naotumai alinou nare kisü khya soushowe, daiolouzü puhvei veare phasü vere; ana nah sünaye nalouyu thaisü deiphao hi nah ali nakoure tea puhnou le sayu donou puhvei veayu nasü ngaiwu baiwe. 22 Sübüa, neletao hi-a chupha hisü le veayu bue, ana Enou neletaoye ve daopulai ea neletao lesü saloulai, alia maita linoua neletao vei sayu nasü neletao hinou pota laimoe. 23 “Teithe sükisü neletao nou Ahinou halia kholaimoe. Cheche vuzünou Enou neletao hi paowe, neletao nou hatali Puo hinou kholouzü, puhnou Azhih hinou sünasü neletao hi peilai. 24 Chu koute neletao nou Azhih hinou hatalia khokhai mohie. Khokhaio ea neletao vei asah nasü chekhoure donou neletao nou ngaoloulai.
Deiphao jünou Kolouyu
25 “Enou neletao hi chi haitao hai nada hinou paopeire. Ana Enou neletao hi nada hinou paomoa, Puo vanou dua neletao hi paopei laiyu phasü vere. 26 Teithe sükisü neletao nou Azhih hinou kholai; alia Enou neletao sühsoua Puo hinou kholai tea Enou neletao hi paomoe; 27 daiolouzü Puo lah puhnou neletaoye leshiwe. Puhnou neletaoye leshiwe daiolouzü neletao nou Eye leshiwe ea Esü Apuo hinou ve touyusü neletao nou louche loure. 28 Enou Apuo hinou tashuloua deiphao hi veloure; alia chuo Enou deiphaosü thaowu-a Apuohi vetalai.” 29 Süthaisü puh rozümai taonou puh hi paoe, “Zhukhaio, chuo nenou nada hinou moanou dua pao-are! 30 Nehai ha teitei süwe, alia maitaliye panou nehinou chi nouyu komoe touyu hai chuo Ehnou süre; süna vanou nehai Ramai hinou ve touyu Ehnou louche.” 31 Jisu nou puletao hi chila peie, “Chuo neletao nou louchewu? 32 Zhukhaio, neletaosü lahlah kihi poraveloua Eye lah thaokhai laiyu phasü laire, alia chekhaoa pha sünasü veloure. Ana Elah baimoe, daiolouzü Apuonou Eye koa bue. 33 Eye koa buyu hinou neletao hi kaonayu buloure donou, chi hainahai Enou neletao hi paopeire. Deiphao hisü neletao vea-holai; ana khuveilo! Enou deiphaoye koloure.”
Jisu nou Lah Puh donou Veachi Paoyu
1 Jisu nou chi haitao hai paoyu thaisü, raki hilo zhuloua paoe, “Apuo, pha nasü veloure; Ne Nahpoutu nou neye soudusho peiloure donou Ne Nahpoutuye soudusho peikhaio. 2 Daiolouzü nenou puh hi peikhai touyu puletao hrülaihi puhye panou teisa ahri peiloure donou, nenou puh hisü deiphaomai hrülai pei hi khore khouko nasü peiwure. 3 Alia puletao nou alikhei baiyu acheche Ramai neye süyu, alia nenou seiveyu Jisu Khrista puhye süyu sünanou teisa ahri nasüe. 4 Nenou soukhaio tea Ahi peikhai touyu vah nasü souchewu-a Enou neye deiphao hinou soudusho peire. 5 Alia Apuo, deiphao soumo jühinou Enou neye koa khouko-ava buzhoyu sünanou chuo nenou Eye ne nghojü hinou soudusho peikhaio.
Jisu nou Puh Rozümaitao donou Veachi paoyu
6 “Deiphao hinou nenou Ahi peikhai touyu puletao hi Enou nezhihsü süngao peire. Puletao sü neveie, alia nenou puletaoye Ahi peire, alia puletao nou ne chipaosü züloure. 7 Alia nenou Ahi peikhai touyu teiteisü ne hinou vebaie touyu sü puletao nou chuo süloure; 8 daiolouzü nenou Ahi peikhai touyu chipao taosü Enou puletao hi peire, alia sütaosü puletao nou poloure ea Esü nehinou ve touyu sü puletao nou chekhaoa süloure; alia nenou Eye seive peie touyu sü puletao nou louche loure. 9 “Enou puletao donou veachi paowe. Enou deiphaomai donou veachi paomoe ana nenou Ahi peikhai touyutao donou paobaie, daiolouzü puletaosü nevei baie. 10 Avei teitei hai nevei baie, alia nevei taosü Aveie; alia puletao vanou Eye soudusho peire. 11 Alia chuo Esü deiphao hi bupukhai laimoe, ana puletao louzü deiphao buhie, alia Ewo nehi tavewe. Mashi Apuo! Ahainou alikhei baiyu kua, puletaoye-a panou alikhei souloure donou, nenou Ahi peikhai touyu nezhih süna khouko hinou puletaoye khotou peikhaio. 12 Enou puletaoye koa bubu kisü, nenou Ahi peikhai touyu nezhih süna khouko vanou Enou puletaoye khotou peire; sheeyu larübvü hinou paoyu nasü vetere donou ha-kare nahpoutu likhei baideinou puletao kukhe louzü mailia hamoe daiolouzü Enou puletaoye khotou peire. 13 Ana chuo E nehi tavewe; alia Avei asah nasü lah puletao lehi liche-a buloure donou Enou deiphao bubu kinou chi haitaohai paowe. 14 Enou puletao hi ne chipao nasü peire; alia deiphao mainou puletaoye ngaorae daiolouzü E hai deiphao hinou moyu kua puletao-a deiphao hinou moe. 15 Enou puletaoye deiphao hinou potapeiwo tea nehi veachi paomoe, ana puletaoye ashina hinou khotou peiwo tea nehinou khowe. 16 E hai deiphao hinou moyu kua puletao-a deiphao hinou moe. 17 Puletaoye achechena hinou soushee peio. Nevei chipao sü acheche nasüe. 18 Nenou Eye deiphao hi seiveyu kua Enou puletaoye deiphao hi seiwure. 19 Alia puletao-a acheche hinou soushee loure donou Enou puletao donou Elah sousheewe.
Lüloumaime donou Veachi Paoyu
20 “Enou haitao likhei donou veachi paobai moe, ana puletao chipao vanou Eye louche louyu puletao donoua paowe 21 süolouzü puletao hrülaiye panou ali souloure donou Enou veachi paowe. Apuo, nenou Ahi buyu ea Enou nehi buyu kua, süolouzü nenou Eye seive peie touyusü deiphao mainou louche loure donou puletaoye-a panou Eh hi buloukhaio. 22 Ne ea Enou ali baiyu kua puletaoye-a panou ali souloure donou nenou Ahi peikhai touyu khouko ava nasü Enou puletao hi peire. 23 Puletaoye panou alikhei souloure donou Enou puletao hi bue ea nenou Ahi bue, sükuyu hinou nenou Eye seivepeie ea nenou Eye leshiyu kua puletaoye-a leshiwe touyu sü deiphao mainou süloulai. 24 “Apuo, deiphao soumo jühinou nenou Eye leshi-a Ahi peikhai touyu Avei adusho nasü puletao nou zhuloure. Ahi peikhai touyu maitaoye Enou buyu buh hinou Eye koa panou buresü Enou züpae. 25 O! Checheyu Apuo! deiphao mainou neye süloumoe, ana Ewo neye süe, alia nenou Eye seivepeie touyu sü mai haitaonou süwe. 26 Nenou Eye leshi peiyu lesha nasü puletao hi bure donou, alia E-a puletao hi bure donou, Enou ne zhihsü puletao hi süngao peire, alia sünasü Enou süngaopu peikhailai.”
Jisu ye Nilouyu
1 Jisu nou sükua veachi paoyu thaisü puhnou puh rozümai taoye koa Kidron reitou tacho pare. Buh süna hisü kipei ali bue, alia Jisu nou puh rozümai taoye koa sühi talou loure. 2 Chuo Jisu ye shoh soupeiyu Judas-a buh sünasü süwe; daiolouzü Jisu nou puh rozümai taoye koa sühinou ve daozhazhawe. 3 Südonou Judasnou napao adumaitao ea Pharisee maitao hinou seiveyu Rom reihmai ea Rathokihi reihkhaomai taoliye sapoa, meibvü, loumei ea reih bahseitao poloua kipei sünahi tare. 4 Sükisü Jisu nou puh pei hi vere pfüphou süloua, nghojülo takou loua puletao hi paoe, “Neletao thaohye phouwe?” 5 Puletao nou puh hi chila peie, “Nazareth Jisu ye phouwe.” Jisu nou puletao hi paoe, “Esü puh-e.” Alia puhye shoh souyu Judas-a puletaoye koa la-a bue. 6 Puhnou puletao hi, “Esü puh-e,” tea paoyu kisü puletaosü thaitsüloua deiphi kaokoure. 7 Süthai-a puhnou puletao hi noupue, “Neletao thaohye phouwe?” Alia puletao nou paoe, “Nazareth Jisu ye phoue.” 8 Jisu nou chila peie, “Esü puh-e touyu sü Enou neletao hi paopeire; südonou neletao nou Eye phoue toulouzü mai haitaoye panou talouwo.” 9 Sünahai puhnou, “Nenou Ahi peikhai touyu taoye sü Enou mailia panou hawumoe,” tea paoyu chipao nasü panou vetere donoue. 10 Süthaisü Simon Pitar nou puh hi buyu khoche nasü paizhouloua napao peichana qila sünaye podaoe ea puh nou zhoulo sü daodere. Qila süna zhihsü Malkhas toue. 11 Sükisü Jisu nou Pitar hi paoe, “Ne khoche nahai khokhahi pokhailou thouwu-o! Apuonou Ahi peikhai touyu pai nasü Enou külai mowu?”
Jisu ye Anna hi Saveyu
12 Süthaisü Rom reihmai taonou puletao pei chayuna ea Jihudimai reihmai taoye koa Jisu ye niloua puhye sü rainou phuwure, 13 alia raikai-a puhye Anna hi save, daiolouzü puh hai süna pohi napao peichana soua buyu Kaipha paoh-e. 14 Kaipha hai, “Mai alinou maisou süh soua thaipeiyu nanou veikouhie,” tea Jihudimai hi paopeiyu mai sünasüe.
Pitar nou Jisu ye Laiyu
15 Simon Pitar ea rozümai kukhe nanou Jisu thaifü loure. Rozümai kukhe nanou napao peicha naye shikhoyu donou, puhnou Jisu ye koa napao peichana chikukihi loure, 16 sükisü Pitar sü vakou kikhu bomü hinou la-a bue. Südonou napao peichanaye shikhoyu rozümai kukhe nanou vakouhi khaipa kikhu bomü khoa buyu loumainapai hi paopei-a Pitarye kijüpamü hi saloure. 17 Kikhu bomü khoa buyu loupainou Pitar hi paoe, “Ne-a mai hainavei rozümaitao hrohinou ali mowu?” Pitar nou chila peie, “E moe.” 18 Alia chuo teiseiyu donou kilaimaitao ea vahbuhmai taonou meiveinou mei souloua puletao lah la-a meivou-a bue. Alia Pitar-a puletaoye koa la-a meivou-a bue.
Napao Peichawonou Jisu hi Chinouyu
19 Sükisü napao peicha nanou Jisu hi puh rozümaitao ea puhvei doupeiyu chipao vanou noutare. 20 Jisu nou puh hi chila peie, “Enou deiphaomai hi dua paongaore; Enou Jihudimai hrülainou vedzüa buyu rathobuhtao ea Rathoki hinou teisanou doupeie. Enou hatalia kheia paokhai moe. 21 Südonou ne daidonou Ahinou nouwe? Achipao chouyu maitao hi Enou puletao hi dai paopeisa touyu sü noukhaio; Enou dai paosa touyu puletao nou süwe.” 22 Jisu nou haibüa paoyu kisü, sühinou la-a buyu vahbuhmai alinou kou puh bahnou Jisu ye pha-a paoe, “Nenou napao peichanaye sübüa chila peilaiwu?” 23 Jisu nou puh hi chila peie, “Enou paomahre toulouzü, mah sünasü haihi buyu mai hrülaihi paopa ngaokhaio; ana Enou züa paore toulouzü, daidonou ne Eye dawe?” 24 Süthaisü Annanou chukoutea Jisu ye baorai pheipapeimoa napao peichana Kaipha hi seitare.
Pitar nou Jisu ye Laipuyu
25 Alia Simon Pitarwo louzü sühinou la-a meivou-a bue. Südonou kukhemai taonou puh hi paoe, “Ne-a puh rozümaitao hrohinou ali mowu?” Ana Pitar nou süsü ba-a paoe, “E moe.” 26 Napao peichana kilaitao hrohinou ali, süolouzü Pitar nou nou daodeyu süna thaihou jüraimai alinou noue, “Enou neye kipei hinou puhye koa buyu ngaomokhaiwu?” 27 Pitar nou sükia bapu khaire; alia sübü hinou houjü alinou khaopare.
Jisu ye Pilat hi Saveyu
28 Süthaisü puletao nou shohna hinou Jisu ye Kaipha kihinou sapoa teideikhowona fühao hi saloure. Jihudimaitao louzü Tachonüh vei vai toure donou naa thaifüa puletao lah souzhailou more donou fühao khele taloumoe. 29 Südonou Pilatnou vakou tapa puletao hi noue, “Neletao nou mai haina pei hi sü dai mah dukhaiwe?” 30 Puletao nou puh hi chila peie, “Mai haina hai ashi souyumai moe toulouzü Ehnou puhye save ne bah hi thoupeiwu laimoe.” 31 Pilat nou puletao hi paoe, “Sükulouzü neletao lah puhye saloua lah neletao vei razhai thaifüa puh pei hi chikukhaio.” Ana Jihudimai taonou ba-a puh hi chila peie, “Eletao donou maita mailiye southeayu zhai hae.” 32 Haisü Jisu nou puh hai athai kana tyanou thailai tea paongao peiyu chipao süna vetere donoue. 33 Pilat nou puh fühao hi khailou puloua ea Jisu ye kuloua puh hi paoe, “Ne Jihudimai Veowu?” 34 Jisu nou chila peie, “Süsü nelah netsünou paobaiho, kukhe mainou nehi Avanou sünasü paowe?” 35 Pilat nou chila peie, “Ehai Jihudimai aliwu? Haisü lah nemainou ea napao adumaitao nou neye Abah hi thoupeibaie. Nenou dai souwure?” 36 Jisu nou chila peie, “Avei vedei louzü deiphao haina hinou moe; Avedei hai deiphao haina hinoue toulouzü, Akilaimai taonou Eye Jihudimaitao bah hi thoupeiwu more donou reihzü vuzülai. Ana Avedei louzü deiphao hinou vemoe!” 37 Südonou Pilatnou puh hi noue, “Sütoulouzü newo vemai aliwu?” Jisu nou chila peie, “Ehai vemai alie tea nenou paoe. Achechena vanou zhopaoh soure donou Eye nawure ea süna donou Esü deiphao hi veloubaie. Acheche hinou veyu mai talinou Apaisü chouwe.” 38 Pilatnou puh hi paoe, “Acheche touyu sü daie?”
Jisu ye Southeare Chi Lüpeiyu
Puhnou süna paoyu thaisü, vakou Jihudimai taohi tapa puloukhaia puletao hi paoe, “Enou puh hinou soumahyu alia ngaoloumoe. 39 Ana Enou neletaoye donou Tachonühki hukhahi buyu maita mailiye phapeiyu neletao vei zhai ali bue. Südonou Jihudimai veoye Eye panou neletaoye donou phapeiyu züpawu?” 40 Puletao nou paikua raopulou khaire, “Mai haina moe, Barabbasye nou bailai!” Ana Barabbas louzü maivei saotoumai alie.
1 Südonou Pilat nou Jisu ye saloua panou dapeire. 2 Alia reihmai taonou shunou peirüli khealoua sünasü puh pei hi porü peire, süthaisü puletao nou maomüyu duzao ali puh vahi zhaopeire; 3 alia puletao nou puh hi takouloua paoe, “O Jihudimai Veo, maiso theo!” Alia puletao nou puhye kou bahnou phapeie. 4 Pilat nou vakouhi tapapuloua puletao hi paoe, “Zhukhaio, Enou puh hinou soumahyu alia ngaoloumoe touyu sü neletaoye panou süloure donou Enou puhye neletao hi sapalai.” 5 Südonou Jisu nou shu peirü nasü rüpfüa ea maomüyu duzhao nasü zaopfüa vakou tapae. Pilatnou puletao hi paoe, “Zhukhaio, Mainaye sü!” 6 Napao adumaitao ea reihkhaomai taonou puhye ngaolouyu kisü, shusoua raopa loure, “Puhye kros vanou veatheawo, puhye kros vanou veatheawo!” Pilatnou puletao hi paoe, “Neletao lah puhye saloua kros vanou veatheawo, daiolouzü Ewo puh hinou soumahyu halia ngaomoe.” 7 Jihudimai taonou puh hi chila peie, “Eletao vei razhai ali bue, alia razhai süna thaifüa puhsü thaizüe, daiolouzü puh lah puhyenou Ramai Nahpoutu tea paowe.” 8 Pilat nou chipao sütao choulouyu kisü, puhsü pipusholou khaire, 9 alia puhnou puh fühao hi talou puloukhaia Jisu hi noue, “Ne daikinou ve-e?” Ana Jisu nou chila peimoe. 10 Südonou Pilat nou puh hi paoe, “Ne Ahi chi paolai mowu? Enou neye phapeire ea neye veatheare khouko bue touyu ne sümowu?” 11 Jisu nou puh hi chila peie, “Sünahai Ramai nou nehi peimoyukowo nenou Apei hi soure khouko alia bulai moe; südonou Eye nebah hi thoupeiyu puh vei mahnou dupuhie.” 12 Süna choulouyu kisü Pilatnou phapeire bo phoue, ana Jihudimai taonou shusouloua paoe, “Nenou mai hainaye phapeire toulouzü ne sü Kaisar samai moe. Maita linou puh hai vemai alie tea paolouzü puhsü Kaisar pei hi reihzüwe!” 13 Pilat nou chipao sütao choulouyu kisü puhnou Jisu ye vakouhi ku-sapaloua, “Chuhkhubuh” (süolouzü Ebria lahinou “Gabbatha”) tea buyu chikuyubuh süna hi panou kou buloure. 14 Sükihai Tachonüh jübü hi soudayu teitheki heako teilecho kiahai tayu phakie. Pilatnou Jihudimai taohi paoe, “Zhukhaio, neletao Veoyesü!” 15 Puletao nou shusoua raolou khaire, “Puhye satawo, puhye satawo, puhye kros vanou veatheawo!” Pilatnou puletao hi noue, “Neletao Veoye Enou kros vanou veathea laiwu?” Napao adumai taonou chila peie, “Kaisar baimoa Eh Veo kukhe hae.” 16 Südonou Pilatnou Jisu ye kros vanou veatheare donou puletao bah hi thoupeire.
Jisu ye Kros vanou Veatheayu
Südonou puletao nou Jisu ye sapoa tare. 17 Alia puhnou lah puhvei kros pfüa “Peirao Buh” süolouzü, (Ebriamai lahinou “Golgotha”) tea kuyu buh hi tare. 18 Sühinou puletao nou puhye koa kukhemai ahaiye puhvei bahkha zhoulo-nalo hi ea puhyenou puhai kolehi khailoua kros vanou veatheare. 19 Pilat nou chahkhao alihinou larüchah rüthouloua sünasü kros vahi dakhaire; sünasü, “Nazareth hi Jisu, Jihudimai Veo” tea rüthou khaitoue. 20 Jihudimai taolinou chahkhao nasü phoue, daiolouzü Jisu ye kros vanou veatheayu buh sünasü nuhduna ngheiki bubaie ea rükhai touyu la sü Ebria, Rom ea Greek tyamai lahinou rükhaitoue. 21 Südonou napao adumai taonou Pilat hi paoe, “‘Jihudimai Veo,’ tea rüwuso, ana ‘Mai hainanou paoe, Esü Jihudimai Veo süe,’ tea rüpeikhaio.” 22 Pilat nou chila peie, “Enou rüthouwuyu nasü rüthouwure.” 23 Reihmai taonou Jisu ye veatheayu thaisü, puletao nou puhvei sahnü taosü poloua reihmai ali linou zha chekhei ngaoloure donou zha adai soua zhiloure. Puletao nou sahlu hazheiyu peinou tei koute soulisoua dokhai touyu puhvei khele zaodu süna-a poloure. 24 Südonou puletao hrohinou alinou lihi paoe, “Haina louzü Eletao nou raphalai mokhe anou haina hai thaohveilaisa touyu rako zhulaikhe.” Sükua puletao nou souyusü sheeyu larübvü hinou paoyu nasü vetere donoubaie: “Asahnü taosü puletao lah zhiloure alia Avei duzaona donou puletao nou rako zhuloure.” Südonou haisü reihmai taonou souyu nasüe. 25 Ana Jisu kros ngheikinou puhpfü, puhpfü matoupai, Klopas chapfü Meri, alia Magdalini Meri nou la-a bue. 26 Jisu nou puhpfü ea puhnou leshiyu rozümai sünanou ngheikinou la-a buyu sü ngaoloua, puhpfühi paoe, “Naotupai, ne nahpoutuye zhukhaio!” 27 Süthaisü puhnou rozümai süna hi paoe, “Zhukhaio, nepfüye sü!” Alia teilecho sühinou rozümai sünanou puhye panou puh ki hinou hrüloure donou sapoa tare.
Jisu Thaiyu
28 Jisu nou chuo soure vahtao teitei sü souchewure tea sülouyu thaisü, sheeyu larübvü chipao nasü panou vetere donou puhnou paoe “E reiwe.” 29 Sühisü khairouyu darkha dzünou phoupeiyu khouh ali bue; südonou puletao nou phako ali poloua sünasü pothou darkha dzü hinou süchaloure ea sünasü hyssop be ali pei hi phupaloua panou küre donou puh mü hi pokhe süpeie. 30 Jisu nou khairouyu darkhadzü süna külouyu thaisü, “Chuo Chere!” tea paoe. Süthaisü puhpei sü pfüna kouloua puh rako sü thaothou peiwure.
Jisu Nahi Heung nou Khüyu
31 Teithe sünasü soudayu teitheyu donou, pfüphao sütaosü kros vahi Soteithezhou panou khaimore donou (daiolouzü Soteithe sünasü kuvoua sheeshoyu teithe aliyu donou), Jihudimai taonou Pilat hinou maisütao phisü sousha-a puletaoye kros vahinou potaloure donou tave khoe. 32 Südonou reihmai taonou taveloua Jisu ye koa kros vanou veatheayu mai araina phisü soushawure ea süthaisü kukhemai alina phi-a soushawure. 33 Ana puletao nou Jisu hi takouyu kisü puh thaiyu sü ngaoloua puh phisü puletao nou soushamoa baire. 34 Ana reihmaitao hrohinou mai alinou Jisu na hisü heung nou khüpeie, alia sübü hinou zhe alia dzü küpare. 35 Süna ngaolouyu puhnou zhopaoh peire, alia puhvei zhopaoh sü cheche-e. Alia neletaoye panou louche loure donou puhnou acheche nasü paobaie touyu sü puhnou süwe. 36 Daiolouzü sheeyu larübvü hinou, “Puh rao ali koutea soushawu laimoe,” tea paoyu sü vetere donou sütaosü sübüa paloure. 37 Alia sheeyu larübvü buh kukhe ali hinou paoe, “Puletao nou heung nou khüyu puhye sü puletao nou zhulai.”
Jisu ye Vuyu
38 Süthaisü Arimathea hinou veyu Josef nou Pilat hi taveloua Jisu pfüphao sü khoe. Josef hai Jihudimai taoye piyu donou kheikhei soua Jisu thaifü tayu rozümai alie. Pilatnou süna poloure chi lüpeiyu donou puhnou taveloua puh pfüphao nasü poloure. 39 Alia raiki Jisu hi kheinou veyu Nikodemas-a Josefye koa gondhar hai agur pothou hrüyu kainüvei na sühcho shirou pha poloua tave. 40 Mai sühainou Jisu pfüphao sü poloua vure donou Jihudimai zhai thaifüa kainüvei na sütaonou koa jüyu sahnou pozüre. 41 Alia Jisu ye kros vanou veatheayu buh sühisü kipei ali bue, alia kipei sühisü maitalia povukhai moyu sheetouyu khüh ali bue. 42 Südonou teithe sünasü Jihudi maivei soudayu teitheyu donou ea khüh sünasü nghei-a bubaiyu donou, puhai nou Jisu ye sühi povuwure.
Sakhaiyu Khüh
1 Rathozhou shohna teimaibu kinou Magdalini Meri nou khüh hi tahoe ea chuh nasü khühmü hinou phao laiyu sü ngaoloure. 2 Südonou puhnou Simon Pitar ea Jisu nou leshiyu kukhe rozümai sünahi taveloua puhai hi paoe, “Puletao nou Mapaoye khüh hinou potare, alia puletao nou puhye kahi pokhairesa touyu sü Ehnou sümoe!” 3 Südonou Pitar nou rozümai kukhenaye koa khüh hilo tahoe. 4 Puhai sü koa tutae, ana rozümai kukhe nanou Pitar jünou turailoua khüh hi velou raire; 5 alia puhnou kikouloua zhulouyu kisü, khüh sah nasü sühinou buyu ngaoloure, ana puhnou khevai taloumoe. 6 Sühinou Simon Pitar nou puh thainou taveloua khüh hi taloue. Puhnou sühinou jüyu sahna buyu, 7 alia Jisu pei hi zükhai touyu pei züsah nasü jüyusah naye koa khaimoa süna lah buh akuli hinou kheitou khaitoua khaikhai touyu sü puhnou ngaoloure. 8 Südonou khüh hi veraiyu kukhe rozümai süna-a khevai talou ngaoloure ea louche loure; 9 daiolouzü sheeyu larübvü hinou Jisu hai athai hinou hrishulou vuzülai tea paokhai touyusü chu koute puletao nou süloumoe. 10 Südonou rozümai sühai sü puhai kihi khaitare.
Jisu nou Magdalini Meri hi Ngaopeiyu
11 Ana Meri louzü khühpe hinou la-a kra-a bue, alia puhnou kra-a buyu hinou kikouloua khüh hi zhuloue; 12 alia sahnü kaa-a banouyu rakivamai ahai sü Jisu pfüphao pokhaiyu buh hinou, alinou pei hinou ea alinou phi hinou chobua buyu sü puhnou ngaoloue. 13 Puhainou puh hi noue, “Naotupai, daidonou ne krawe?” Puhnou puhai hi chila peie, “Puletao nou A Mapaoye potare, alia puletao nou puhye kahi pokhairesa touyu sü Enou sümoe.” 14 Puhnou sübüa paowu-a thailo reiveyu kisü Jisu ye la-a buyu ngaoloure; ana sünasü Jisue touyu sü puhnou süloumoe. 15 Jisu nou puh hi paoe, “Naotupai, ne daidonou krawe? Ne thaohye phouwe?” Puhye nou kipei akhowo nasüe tea choloua, puhnou puh hi paoe, “Dou-apeio, nenou puhye potare toulouzü, puhye pokhaiyu buh sü Ahi paongao peikhaio, alia Enou taho puhye poloulai.” 16 Jisu nou puh hi paoe, “Meri!” Puhnou reiveloua puh hi Ebriamai lanou paoe, “Rabboni!” (Süvei kowo louzü Dou-apeio touwe.) 17 Jisu nou puh hi paoe, “Eye deiso, daiolouzü E Apuohi khelou mohie; ana Athaihou jürai taohi taho puletao hi haikua paokhaio, ‘Esü Apuo ea neletao Puo, A Ramai ea neletao Ramai hi kheta-e.’ ” 18 Südonou Magdalini Meri nou taho rozümai taohi paoe, “Enou Mapaoye ngaoloure;” alia puh hi Jisu nou paopeiyu chitao sü puhnou puletao hi paongao peire.
Jisu nou Puh Rozümai taohi Ngaopeiyu
19 Rathozhou süna koukhe hisü rozümai taonou Jihudimai taoye piyu donou kikhu khua vedzü louyu kisü, Jisu nou tave puletao hrohinou laloua puletao hi paoe, “Neletao hi kaonayu buloutheo.” 20 Puhnou haibüa paoyu thaisü, puletao hi puhbah ea puhnasü pongaoe. Südonou rozümai taonou Mapaoye ngaolouyu kisü lesathou alao souloure. 21 Jisu nou puletao hi paopue, “Neletao hi kaonayu buloutheo. Apuonou Eye seipeiyu kua Enou neletaoye-a seiwe.” 22 Alia puhnou sübüa paoyu thaisü, puhnou puletao pei hi ssü houkhaipei-a paoe, “Rako Mashi sü ngaoloukhaio. 23 Neletao nou mai talivei mah khaipei louzü, sütao sü khaipeiwure; neletao nou mai talivei mah khaipei molouzü, sütaosü khaipei moe.”
Jisu ea Thomas
24 Rozümai kiahaitao hrohinou ali soua buyu, nahbei tea kuyu Thomas sü Jisu veyu kisü puletaoye koa bumoe. 25 Südonou rozümai kukhe taonou puh hi paongaoe, “Ehwo Mapaoye ngaoloure.” Ana Thomasnou puletao hi paoe, “Enou puhbah hinou hushu zheemü ngaomo sasü, alia Abah tounou hushu zheemü taohi thaithou mosasü, alia Abahnou puh nahi thaithou molouzü, Ewo louche laimoe.” 26 Teithe acha thaisü, puh rozümai taosü kikha hinou vedzüa bupukhaire, alia Thomas-a puletaoye koa bue. Kikhu taosü khukhaitoue, ana Jisu nou tave puletao hrohinou laloua paoe, “Neletao hi kaonayu buloutheo.” 27 Süthaisü puhnou Thomas hi paoe, “Ne bahtousü haihi thaithouwo, ea Abah sü zhukhaio; alia nebah topaloua Anahi thaithoukhaio, lü ha-a buwuso, anou louchelo.” 28 Thomasnou puh hi chila peie, “A Mapao ea A Ramai!” 29 Jisu nou puh hi paoe, “Nenou Eye ngaolouyu vanou louchelouwu? Eye ngaolou moyuma louche louyu puletao sü rakoveie.”
Larübvü haina Rüyu vei Matsü Ko
30 Larübvü hainahi rüthou moyu shee kukhe alao Jisu nou puh rozümaitao nghojü hinou soue. 31 Ana Jisu hai Ramai Nahpoutu Khristae touyu sü neletao nou louche loure donou, alia loucheloua neletao nou puhzhih hinou ahri ngaoloure donou shee haitao sü rüthou khaitoue.
Jisu nou Rozümai Anaitao hi Ngaopeiyu
1 Haithaisü Jisu nou Tibiria zaipe hinou puh rozümai taohi tave ngaopu peikhaie; alia puhnou haibüa ngaopeie. 2 Simon Pitar, nahbei tea kuyu Thomas, Galilee hi buyu Kana hinou veyu Nathanel, Zebedee nahpoutuhai, alia kukhe puh rozümai ahai taosü vedzüa bue. 3 Simon Pitar nou kukhe taohi paoe, “Ewo khah phouta laire.” Puletao nou puh hi paoe, “Eletao-a neye koa talai.” Südonou puletao nou taloua sakhao hi louloure; ana süzhou khei hisü puletaosü halia phouloumoe. 4 Ana shohna tei thepayu kisü Jisu sü zaipe hinou la-a bue, ana rozümaitao nou süna hai Jisue touyu süloumoe. 5 Jisu nou puletao hi noue, “Khemaina taore, neletao khah lia phoulou mowu?” Puletao nou puh hi chila peie, “Halia phoulou moe.” 6 Puhnou puletao hi paoe, “Neletao vei khahbe nasü sakhao zhoulo vahi laithou khaio, alia neletao nou daotu ngaoloulai.” Südonou puletao nou laithouyu kisü, khah loupouleyu donou puletao nou khahbe nasü pai palou hore. 7 Jisu nou leshiyu rozümai nanou Pitar hi paoe, “Haina hai Mapao-e!” Simon Pitar nou sünasü Mapao-e touyu choulouyu kisü, puhnou puh sahnü nouthouloure (daiolouzü vah souyu donou puhsü baitoua bue) alia zaihi choloure. 8 Ana kukhe rozümaitao louzü khahnou lou phoupeiyu khahbe nasü süthaipoa sakhao hinou takoue, daiolouzü puletao sü deithe hinou dousho more, hacho Kaihlipha dou baire. 9 Puletao nou deithe hi tapalouyu kisü, sühisü veimei ea süpei hi khah buyu, alia raokhao daotu-a buyu ngaoloure. 10 Jisu nou puletao hi paoe, “Neletao nou chubü hinou nilouyu khahtao hronou daotu pokoukhaio.” 11 Südonou Simon Pitar nou sakhao nahi takou louloua khahdu kaihlia raingouasünou lou phoupeiyu khahbe nasü deithe hi süthaipare; alia khahtaosü poushokhaia khahbe nasü soupha khaimoe. 12 Jisu nou puletao hi paoe, “Takou toulouwo.” Rozümaitao hrohinou maitalinoua, “Ne thaohwe?” tea khuveia puh hi noumoe, puletao nou sünasü Mapaobaie touyu süe. 13 Südonou Jisu nou takouloua raokhao nasü poloua puletao hi peie, alia sükua khah nasüa peie. 14 Chuo haina hai Jisu nou athai hinou hrishu louyuthai rozümai taohi ngaopeiyu lüh asü chenae.
Jisu ea Pitar
15 Puletao nou toulou cheyu thaisü Jisu nou Simon Pitar hi noue, “Johan nahpoutu Simon, haitao jünou nenou Eye leshi kouhimoe?” Puhnou chila peie, “Ovai Mapao, Enou neye leshie touyu sü nenou süwe.” Jisu nou puh hi paoe, “Azhaotaoye vaipei khaio.” 16 Jisu nou puh hi lüh ahaichena noue, “Johan nahpoutu Simon, ne Eye leshiwu?” Puhnou chila peie, “Ovai, Mapao, Enou neye leshie touyu sü nenou süwe.” Jisu nou puh hi paoe, “Azhaotaoye khopei khaio.” 17 Jisu nou puh hi lüh asü chena noue, “Johan nahpoutu Simon, ne Eye leshiwu?” Pitar sü levea loure daiolouzü Jisu nou puh hi lüh asü koute, “Ne Eye leshiwu?” tea puh hi noue, alia puhnou puh hi paoe, “Mapao, nenou hali-hala süwe; Enou neye leshie touyu sü nenou süwe!” Jisu nou puh hi paoe “Azhaotaoye vaipei khaio. 18 Cheche vuzünou Enou nehi paowe, nenou nahlebuki louzü nelah sahvealoua nenou taho nüyu buh hisü nenou tabaiwe; ana nenou tsüloulouzü, nenou nebah sü topalai, alia kukhe alinou neye phuloua nenou tanümoyu buh hi satalai.” 19 (Pitar nou kakuyu athai zhaido hinou Ramaiye soudusho peilaisa touyu süngao peire donou Jisu nou haisü paoe.) Süthaisü Jisu nou puh hi paoe, “Athai fülo!”
Jisu alia Rozümai Kukhena
20 Pitar nou thailo reiveyu kisü Jisu nou leshiyu rozümai nanou puhaithai füpoa laiyu ngaoe. Rozümai sünasü koukhe vai touyuki Jisu khao hinou vüa, “Mapao, neye shoh soupeire nasü thaoh-e?” tea nouyu nasüe. 21 Pitar nou puhye ngaolouyu kisü Jisu hi noue, “Mapao, mai hainawo louzü kaku khailai?” 22 Jisu nou puh hi chila peie, “E khaivemo koute Enou puhye panou hria bunülouzü, sünanou neye donou dai bue? Athai fülo!” 23 Südonou rozümai sünasü thailaimoe touyu ko sünasü thaihou jürai maitao hrohi kubou loure. Ana Jisu nou puh hi puh hai thailai moe tea paoyu moe, ana “E khaivemo koute Enou puhye panou hria bunülouzü, sünanou neye donou dai bue?” tea puhnou paobaie. 24 Chi haitao vanou zhopaoh peiyu ea chi haitao rükhaiyu rozümai nasü hainae; alia puhvei zhopaoh hai chechewe touyu hai Eletao nou süe.
Akhai Chi
25 Ana Jisu nou soukhai touyu vah kukhe alaosou buhie. Sütaohai ali linou rüthou khailai toulouzü, rüre larübvü taosü deiphao teitei noua pfüpai louhoe tea Enou chowe.