Rui Hymei Gaychamv

John 1

Ringhmei Tiiloumei Lat

1 Puakthau puaksiak khou Lat nai bam khwan e; Lat tei Ravguangc khou nai bam khwan e, kumna Lat tei Ravguangc khwan e. 2 Puakthau puaksiak khou rui Lat tei Ravguangc khou nai bam khwan e. 3 Ramh katana kapaan rui pat khwan e; nai bammei katana hei kamei kazauh makna patmei khat sini maek e. 4 Kakhou ringhmei nai e; mi ringhmei hei rui maansei ta tigaanclou the. 5 Gaanhmei hei zinghmei khou gaanc bam e, kumna zinghmei rui mi ta hei zingc liam ngam mak e.

Ravguangc rui John ta Ndiu Guangmei

6 Ravguangc rui ndiu guangmeipu gaanv khat nai e; kazanc John twna kaw e. 7 Meic guay chuna lwm khang, mi gaanhmei lam khou hei dinclou khang kamei guang tuang e. 8 Kamei thu gaanhmei kiu hamh e; gaanhmei lam khou hei dinclou khang kamei guang tuang e. 9 Meic guay ta tigaancloumei gaanhmei ling kiu mbaanv khou guang khwan e. 10 Lat tei mbaanv khou bam khwan e; tiki kapaan rui damcloumei mbaanv hei rui kata thay mak khe. 11 Kamei kakandic khou guang khwan e; tiki kamei nunc rui kata laalou mak khe. 12 Tiki kata laaloumei guay, kakhou lwmmei guay ta mu Ravguangc nac sw khang kamei rui ngamv tiilou the. 13 Kaniw Ravguangc nac swmei hei zei rui, meic pumc rui khatni maansei rui kahawmei rui hamh e; Ravguangc rui de. 14 Lat tei meic pumc chaguanhna, zauzian khatni nchumhmei padikna aniu pang khou lungclou the. Aniu katuang hymdaihmei, kapu Nac Mpouh akhat namei tuang hymdaihmei how the. 15 John rui kalam khou salou the. " 'Athei khou guangmeipu hei akhang suangc daic e, kalam thu ai puanh mak khou rui kamei nai bam khwan the,' twna ai samei tei kamei hei the," twna John rui kauc the. 16 Kakhou zauzian padikna naimei khou tei rui aniu khang zauzian ruc khou zauzian tiilou the. 17 Riakdanv hei Mousi khou rui tii guang e; tiki zauzian lev nchumhmei hei Jisu Khrista khou rui guang e. 18 Ravguangc ta howmei meic gaanv khat na sini maek he; tiki kapu pamv khou bammei a khat namei Nac Mpouh tei rui Ravguangc ta ndauhlou the.

Duiluploumei John Latdyn

19 Jerusalem khou bammei Jihudimei kapy nunc rui ndiuloumei amuh nunc khatni Levimei nunc rui, "Nang thow cho?" twna John khou thanv khwan e. 20 Kamei nkamh tuang maekna, "Ai thu Khrista hamh e," twna ndaw sa the. 21 "Kum e thei, nang thow cho? Elija cho?" twna kaniw rui thanv the. "Ai Elija hamh e," twna John rui daw the. Khoutei, "Nang muhzwng kiu cho?" twna kaniw rui thanv the. "Kiu hamh e," twna kamei rui daw the. 22 "Kum e thei, nang thow cho? Aniw ta ndiuloumei nunc khou salou dat khang, nang thow cho twmei aniw khou dinclou o," twna kaniw rui kakhou sa the. 23 "Ai hei, 'Poubauhmei guang pw the, kakhang chaeng sw tho!' twna tazikramv khou kauc bammei kiu the," twna muhzwng Isaia rui saloumei ta saancna John rui daw the. 24 Pharisi nunc rui ndiu guangmei nunc tei rui, 25 "Nang Khrista ni hamh, Elija ni hamh, Muhzwng kiu ni hamh e thei, tabui swna nang duiluplou bam tu cho?" twna thanv the. 26 John rui mundawna, "Ai rui thu dui rui duiluplou the; tiki nangniw thay makmeipu gaanv khat nangniw pang khou ding bam e. 27 Kamei athei khou guang e; tiki ai thu katuang phaythuapc riang rih khang na sini biuhpui mei hamh e." 28 Mi nunc rui guangna lat thanvmei hei, John rui duilup bampui bamv, Jordan tuang neihpat thangc naimei Bethani khou e.

Ravguangc Lauziu Nac

29 Nthuanh thauna, Jisu kadaeng khou guangmei ta how lana, John rui sa the, "Zauc lo, Ravguangc Lauziu Nac, kandihmei paap laa gancloumeipu! 30 'Akhang suangc daihmeipu athei khou guang e, ai puanh mak khou rui kamei nai bam khwan the,' twna ai rui sameipu kiu kamei hei the. 31 Ai kata thay mak khwan e, tiki ai guangna dui rui duiluploumei hei, kata Israelmei khou ndauh pat khang the." 32 John rui rui sa the, "Bumaengh akhouhna kumcna tingkauh thangc rui kakhou keylou kanmei ta ai how the. 33 Ai kata thay mak khwan e, tiki 'Gaanv khat khou, Bumaengh kauh thangc rui keyna bamlou kanmei ta nang how puni. Bumaengh Nthanmei rui luplou nimeipu kiu mi pu tei the,' twna, dui rui luplou khang ata ndiuloumeipu rui akhou sa the. 34 Mi tei ai how the, mi zaeng rui, kamei hei Ravguangc Nac Mpouh the twmei ai nangniw khou sa tu the."

Jisu Ziap Sw Reymei nunc

35 Nthuanh thauna John kaziap gaanv nei lev mi khou tei ding bam dat khwan e. 36 Mi khou tei Jisu tat bammei ta how lana, "Zauc lo, Ravguangc Lauziu Nac tei!" twna kamei rui sa the. 37 Kaziap nei tei mi tei chu lana, Jisu thei lay tat kan the. 38 Jisu thei ziangrih patna kaney kathei lay tat bammei ta how lana, "Nang ney tabui phu bam tu cho?" twna thanv the. "Rabbi, nang tabui khou bam tu cho?" twna kaney rui ni thanv the. (Rabbi twmei kabac thu, Dinhpouc twna e.) 39 "Guang o, how puni," twna Jisu rui sa the. Kumna kaney lay guangna Jisu bammei bamv tei how the, kumna mi nungc tei kadaeng khou bamlou the. Mi tei tingzyn ganvdak padeih zaengc khwan the. 40 Kaney khou gaanv khat thu Simon Pitar chana Andriu khwan e. 41 Kamei kachana Simon ta ariwpuilev, "Aney Messia (Khrista twna e) ta ariw the," twna sa the. 42 Kumna kamei rui kachaic ta Jisu daeng khou nduangh guang the. Khoutei Jisu rui kata zaucna, "Nang hei John nac mpouh Simon e, tiki nang ta Kephas (mi kabac thu Pitar twna e) twna kaw puni the," twna sa the.

Jisu rui Philip lev Nathanael ta Kawmei

43 Nthuanh thauna, Jisu Galili thangc tat ni the twna ning the. Khoutei kamei Philip ta ariw lana, "Athei lay o," twna kakhou sa the. 44 (Philip hei Andriu lev Pitar ramc Bethsaidamei e.) 45 Philip Nathanael ta ariw lana, "Riakdanv buk khou Mousi rui hyloumei khatni muhzwng nunc rui ni hyloumeipu ta kiuc aniw ariw the. Kamei hei Joseph nac Nazareth mei Jisu hei the," twna sa the. 46 Khoutei, "Nazareth khou rui ramh gaymei pat ngam puni di nah cho?" twna Nathanael rui sa the. Kum tina, "Guangna zauc o," twna Philip rui sa the. 47 Kumna Nathanael kadaeng khou guangmei ta how lana, Jisu rui kalam khou mi kumcna sa the, "Zauc lo, rouhsimei maekmei, Israelmei ling kiu!" 48 "Nang ata akumhna thayna cho?" twna Nathanael rui sa the. "Philip rui nang ta kaw mak khou, nang tadut bang bangc khou bam bam khou tei, ai nang ta how the," twna Jisu rui kakhou daw the. 49 "Rabbi, nang hei Ravguangc Nac Mpouh the! Nang hei Israelmei guangc the!" twna Nathanael rui mundaw the. 50 Mundawna Jisu rui kakhou sa the, "Nang tadut bang bangc khou bam bam khou tei ai nang ta how the, twna sapui zaeng khou na rui nang lwm tu cho? Mi khang suangc daih daihmei ni nang how puni he. 51 Ai rui nangniw khou kaling siakna sapui tuang e: tingpuk laanc patna Ravguangc baanchara Meic Nac Mpouh ruc khou key key ku ku bammei ta nang how puni."

John 2

Kanamei Nowsuanh Ngai khou Sw-nchinloumei

1 Mi tangv zaeng neih thumhpui nungc, Galili tuang Kana kaidai khou nowsuanh ngai akhat nai khwan e. Mi khou tei Jisu pui bam khwan e. 2 Jisu lev kaziap nunc ta ni kaw khwan e. 3 Luairyn zouc zangv ngam guang pwkhou, Jisu khou kapui rui, "Kaniw luairyn zouc biuh mak khe," twna sa the. 4 Khoutei, "Pui, nang akhou tabui thouc naina cho? Atuang ganv guang mak he," twna Jisu rui daw the. 5 "Kamei rui nangniw khou sa samei tei taanc tio," twna kapui rui tamthiwmei nunc khou tei sa the. 6 Jihudimei tuang riak thei layna, phay baanh khiu nthanpui dui khang, akhat khou dui abiw kathumh dou gutmei, ntauh rangbe charuk mi khou tei dungclou bam khwan e. 7 Mi guay tei dui lou padik o twna Jisu rui kaniw khou sa tikhou, mi guay tei lou padiklou ngam the. 8 "Mi dui tei suak patna nngaypy khang tei tii ti tho," twna Jisu rui kaniw khou sa the. Kaniw rui mi dui tei mi pu khang tei laa guang the. 9 Luairyn zouc chaguanh kanmei dui tei kamei mbap pwkhou, mi tei tabui thangc rui cho twmei kamei thay mak khe, (tiki dui tei tiimei tamthiwmei nunc na tei rui thay e.) Kum tina nngaypy rui nowpouc ta kawna, 10 "Meic baih baihmei kai thu, luairyn zouc gaymei luan rey e, kumna meic guayna zangv pian kan e thei, nsamvmei luan e; tiki nang thu ntaw nganv luairyn zouc gaymei lou bam bu di he cho!" twna sa the. 11 Jisu rui mi reymei sw nchinmei taanv hei Galili tuang Kana khou taanclou the. Mi khou tei kamei rui katuang hymdaihmei lyanlou the, kumna kaziap nunc kakhou lwm the. 12 Mi tangv, Jisu kapui, kachana nunc khatni kaziap nunc lev Kapernaum thangc tatna mi khou tei zaeng ramhbiuc dou bamlou the.

Jisu Ravkai Sw-nthanmei

13 Jihudimei tuang Kaanpatpui Ngai na guang tii thena, Jisu Jerusalem thangc ngangh the. 14 Khoutei guaih, lauziu khatni aphyna zuanhmei nunc, khatni syan akhiakmei nunc Ravkai khou tei dungc bammei ta kamei how the. 15 Kamei rui riangbuk kasiatcna, lauziu khatni guaih guay ta tei Ravkai khou rui kathamv alay pat the, khatni syan akhiakmei nunc tuang paeng guay thui nkhanlou ngam the. Syan guay tei kandih khou bun nkhanlou ngam the. 16 Kumna, "Mi guay hei laa tat kan tho! Apu kai ta lanvguanhpui kai tisw lak nina e!" twna aphyna zuanhmei nunc khou tei sa the. 17 Khoutei, "Nang kai ta lunghsuhmei rui apumc sw thuan puni the," twna hyloumei tei kaziap nunc ningtow the. 18 Jihudimei kapy nunc guangna, "Mi hei sw khang nang khou ngamv nai e twmei lyan khang nang tabui sw nchinmei tuang lyanlou ngam cho?" twna sa the. 19 "Mi ravkai hei ra keylou e thei, zaeng neih thumh khou ai rui sw thaulou dat puni," twna Jisu rui daw the. 20 "Nang mi hei zaeng neih thumh khou sw thaulou dat diw e twna ning nah cho? Mi Ravkai hei tingkwm riakdeina charuk gutna swlou tuang e," twna kaniw rui sa the. 21 Tiki Jisu rui sa bammei ravkai kiu thu kapumc ta de. 22 Kamei ringcthau dat kanmei tangv, kamei rui mi kumcna saloumei hei kaziap nunc ningtow dat the, kumna Nthanmei Latrik khou hyloumei khatni Jisu rui saloumei tei kaniw lwm the.

Jisu Meic nunc Lungning Thay e

23 Jisu kamei Kaanpatpui Ngai khou, Jerusalem khou bammei dak khou, kamei rui taancloumei sw nchinmei taanv guay tei how lana, meic mpeyna kakhou lwm the. 24 Tiki Jisu thu kaniw ta lwm mak e. Kalam thu kamei kaniw guay ta thay e. 25 Kaniw lam khou meic gaanv khat na rui sini kakhou salou bam khang kage maek e. Kalam thu kaniw lungning khou nai bammei tei kamei thay e.

John 3

Nikodim Jisu Daeng khou Guangmei

1 Jihudimei nunc tuang kapy, kazanc Nikodemas kawmeipu gaanv khat nai khwan e. Kamei hei Pharisi akhat e. 2 Mi pu hei zingbangc akhat Jisu daeng khou guangna, "Rabbi, nang hei Ravguangc rui ndiu guangmei dinhpouc akhat e twmei aniw thay e. Kalam thu Ravguangc kazauh makna meic gaanv khat na sini, nang rui sw bammei sw nchinmei taanv guay hei taanc ngam ni tu hamh e," twna sa the. 3 Mundawna Jisu rui sa the, "Ai rui nang khou kaling siakna samei kiu mi hei e: Thow pwni, puanc thanh mak e thei, kamei Ravguangc Guangcdic how ngam mak e." 4 Khoutei, "Maansei gaanvdaih kanmei gaanv khat hei akumhna puanc dat nina cho? Kamei kapui bung lungc khou gut datna puanc dat nuh dinah cho?" twna Nikodemas rui sa the. 5 Jisu rui sa the, "Ai rui nang khou kaling siakna sapui tuang e: Dui lev Bumaengh rui puanh mak e thei, meic gaanv khat na sini Ravguangc Guangcdic gut ngam mak e. 6 Meic pumc khou rui puanhmei tei meic pumc e, Bumaengh khou rui puanhmei tei bumaengh e. 7 'Nangniw puanc thanh nina e' twna ai rui nang khou samei khou hei ngak rio. 8 Mpwan hei nliu nii nii thangc nliu tat e; kakhwan chu e, tiki tabui thangc rui guangna tabui thangc tat kan tu cho aniu thay mak e. Bumaengh khou rui puanhmei kiu ni mi mi kumhmei tuang e." 9 "Mi kiu akumhna puanc nuh nina cho?" twna Nikodemas rui thanv the. 10 Jisu rui sa the, "Nang thu Israelmei tuang dinhpouc daihmei akhat di the, tiki nang mi hei kabah thay mak nah cho? 11 Ai rui nang khou kaling siakna sapui tuang e: aniw thaymei tei aniw sa e khatni aniw howmei tei aniw raclou e, tiki nangniw gaanv khat na sini aniw lat laalou mak e. 12 Ai rui mi kandic tuang sa tina nangniw lwm mak e thei, tingkauh thangc tuang sa tina nangniw tabui kumhna lwm nina cho? 13 Tingkauh thangc rui keymei Meic Nac Mpouh hamhna meic gaanv khat na sini tingkauh ku mak he. 14 "Mousi rui kuanzinc rui kasiamhmei nrui pauh twan khou louna tazikramv khou zay thaumei tei kumcna, Meic Nac Mpouh ta ni zay thau puni. 15 Mi tei kakhou lwmmei guay ringcsuangmei laa khang e. 16 Kalam thu Ravguangc rui mbaanv maansei nac ta heidikamv nzianpui zaeng rui, kanac mpouh akhat namei ta tiilou the. Thow pwni kakhou lwmmei guay theic dat makna ringcsuangmei laatow khang e. 17 Kalam thu Ravguangc rui Kanac Mpouh ta mbaanv khou ndiu guangmei hei mbaanv ta latzan sw khang hamh e; tiki kapaan rui mbaanv ta gulou khang e. 18 "Kanac Mpouh khou lwmmei mei ta tei thu latzan sw mak khe; tiki lwmlou makpui mei khang tei thu latzan luai tangv the. Kalam thu Ravguangc Nac Mpouh akhat namei khou tei kamei lwmlou mak e. 19 Latzan kiu mi hei e: Gaanhmei tei mbaanv khou guang the; tiki meicnunc hei gaanhmei ta suangc zinghmei ta kahaw the. Kalam thu kaniw tuang taanv si the. 20 Kataanv sipui mei tei gaanhmei ta laa zih e, kumna kataanv guay tei ndauh pat puni tina kamei gaanhmei khou guang mak e. 21 Tiki nchumhmei taanhpui mei tei, kataanv guay tei Ravguangc khou taanhpui taanv e twmei ndauh pat khang gaanhmei khou guang e."

Jisu khatni John

22 Mi tangv, Jisu khatni kaziap nunc Judia ramv khou guangna mi khou tei kaniw bam kanaklouna duiluplou bam khwan e. 23 John ni Salim khou rui duh makmei, Ainon kawmei bamv khou duiluplou bam khwan e. Kalam thu mi bamv khou tei dui mpeyna nai e. Kamei rui kaniw ta duiluplou bam khwan e. 24 (Mi hei John ta kangkai khou lou makmei hu khou e.) 25 John ziap nunc lev Jihudimeipu gaanv khat sw-nthanmei lam khou agi thau khwan e. 26 Kumna kaniw John daeng khou guangna, "Rabbi, Jordan paengc thangc nang bam nchamcloumeipu, nang rui kalam khou saloumeipu tei, duiluplou bam the. Kumna meic guayna kadaeng khou nzwan guang bam the," twna sa the. 27 John rui sa the, "Ravguangc rui tiilou tii mak e thei, nai nii sini nai ngam tuang hamh e. 28 'Ai thu Khrista hamh e; kahu kasuakc guangmeipu de' twna ai rui sa kanmei tei nangniw chu kan dyng the cho. 29 Nowpeic ta laa nimei thu nowpouc tei de; tiki kadaeng khou ding bammei nowpouc pam tei nowpouc khwan tei chuna neihla e. Mi tei kumcna, ai ni neihlamei rui padik bam tuang e. 30 Kamei thu mbu thau puni the; tiki ai thu key kan puni the."

Tingkauh thangc rui Guangmeipu

31 Kauh thangc rui keymeipu hei meic guayna ruc khou daic liangmeipu e. Mbaanv khou rui guangmeipu hei thu mbaanv tuang de, kumna kamei mbaanv tuang lam khou sa e; tiki kauh thangc rui keymeipu hei thu meic guay ruc khou daic liangmeipu e. 32 Kamei rui how kahakmei khatni chu kahakmei tei kamei sa e; tiki meic gaanv khat na sini kalat ta laalou mak e. 33 Tiki kalat hei laaloumei kathuic tei rui Ravguangc hei nchumhmei e twmei kamei laa the twna mi tei rui nchin the. 34 Ravguangc rui ndiu guangmeipu hei rui Ravguangc rui samei lat tei sa kadailou the. Kalam thu Ravguangc rui Bumaengh karyan kadath maekna kakhou tiilou the. 35 Kapu rui Kanac Mpouh ta nzian e, kumna ramh katana kabaanc khou tiilou the. 36 Thow pwni Ka Nac Mpouh khou lwmmei mei tei ringcsuangmei laatow the; Ka Nac Mpouh lat tei piu makpui mei tei ringhmei laa ni tu hamh e. Kalam thu karuc khou Ravguangc lungpuam nai bam e.

John 4

Jisu khatni Samariameipui

1 Jisu ziap rui John ziap suangc geic the khatni kamei rui duiluploumei geic mbu the twmei Pharisi nunc chu the twmei Poubauhmei thay the. 2 (Kaling thu Jisu rui thu duiluplou mak e, kaziap nunc rui de.) 3 Kum laa thena, kamei Judia mpatlouna Galili thangc tat the. 4 Mi chaenglwan khou tei kamei Samariamei ramv tat ruan khang sw khwan e. 5 Khoutei Jisu Sukhar kawmei Samariamei kaidai akhat khou guang the. Mi tei Jakob rui kanac Joseph khang tiiloumei ramvpuk daeng khou e. 6 Mi khou tei Jakob duikhun nai khwan e. Jisu tat lak laa thena, mi duikhun daeng khou tei dungc key the. Mi tei neih ndyng zaengc khou khwan e. 7 Khoutei Samariameipui gaanv khat dui zu khang pat khwan e. Kumna, "Ai zangv khang dui tiilou o," twna Jisu rui kakhou sa the. 8 Mi ganv khou tei tu zangvmei tuang liu khang kaziap nunc thu kaidai thangc tei tat kan khwan e. 9 "Jihudimei nang rui akumhna Samariamei akhou dui ney tu cho?" twna mi pui tei rui sa the. Kalam thu Jihudimei hei Samariamei lev gansaengc duilwan mak e. 10 Jisu rui mundawna, "Nang Ravguangc kaipat ta hei thay khwan e thei, khatni nang khou dui ney bammeipu hei thow cho twmei thay khwan e thei, nang rui kakhou ney ni tuang e. Kumna kamei rui nang khang ringhmei dui tii ni tuang e," twna sa the. 11 "Haicpouc, nang khang dui zu ku nuhmei tuang maek e. Mi duikhun hei ni nthuk nganv de. Ringhmei dui kiu nang tabui thangc rui laa nina cho?" twna mi pui tei rui sa the. 12 "Mi duikhun hei tiiloumeipu, kamei lev kanac nunc khatni katuang kiruai guay mi khou rui zangvna lungc kanmeipu, aniw pupouc Jakob khang suangc nang daic nah cho?" twna kamei rui sa the. 13 Khoutei mundawna Jisu rui sa the, "Mi dui hei zangvmei nunc thu tari dat puni de; 14 tiki ai rui tii nimei dui hei zangvmei guay thu tari dat zat lak khe. Ai rui tiilou nimei dui tei kakhou rui duipuakkai kumcna puak patna kakhang ringcsuangmei tiilou puni." 15 "Haicpouc, ai mi khou hei dui guang zu dat bam mak khang, tari dat lakmei dui kiu akhang tiilou o!" twna mi pui tei rui sa the. 16 Khoutei, "Nang tatna nang gaanv ta mi khou hei kaw guang o," twna Jisu rui kakhou sa the. 17 Mundawna, "Agaanv maek e," twna sa the. Jisu rui kakhou sa the, "Nang gaanv maek e twna nang rui samei hei nchumh the. 18 Tiki nang gaanv panguh the, kumna ntaw nai bammeipu hei nang gaanv ling hamh e. Nang rui samei hei nchumhmei the." 19 Mi pui tei rui sa the, "Haicpouc, nang hei muhzwng e twmei ai thay the. 20 Aniw pupouc nunc thu mi chyng but khou hei kalum e, kumna nangniw thu Jerusalem khou kalum nina de twna sa e." 21 Jisu rui kakhou sa the, "Tanpui le, ai rui samei hei lwm o: Pu ta mi chyng but khou ni hamh, Jerusalem khou ni hamhna kalum nipui ganv guang puni. 22 Samariamei nangniw hei nangniw kalum bammeipu ta thay mak e; tiki Jihudimei aniw thu aniw kalum bammeipu ta thay e. Kalam thu guloumei hei Jihudimei khou rui guang e. 23 Tiki nchumhna kalummei nunc rui Pu ta bumaengh khou khatni nchumhmei khou kalum nipui ganv guang the, ntaw hei the; kalam thu mi kumcna kalumpui mei ta tei kata kalum khang Pu rui phu e. 24 Ravguangc hei Bumaengh e, kumna kata kalummei guay rui bumaengh khou khatni nchumhmei khou kalum nina e." 25 "Khrista twna kawmei Messia guang puni twmei ai thay e; kamei guang pwkhou ramh guayna dinclou puni," twna mi pui tei rui sa tikhou, 26 "Nang ta lat kachuc bammeipu ai hei kamei kiu the," twna Jisu rui daw the. 27 Mi dyng khou tei Jisu ziap nunc guang dat the. Kumna kamei ntumei gaanv khat lev lat kachuc bammei ta kaniw how pwkhou kaniw khang ngak the. Tiki, "Nang tabui kakhi bam tu cho?" twna mi pui khou tei, hamh e thei, "Tabui swna nang mi pui lev lat kachuc bam tu cho?" twna Jisu khou meic gaanv khat na sini sa mak e. 28 Mi pui tei katuang duilai ganclouna, kaidai thangc tei tat the. 29 Kumna, "Ai rui taanc kanmei guay thay parimeipu bam e, pat zauc lo. Kamei hei Khrista kiu lana the ny?" twna meicnunc khou tei sa the. 30 Kaniw kaidai khou tei rui patna, Jisu daeng khou guang the. 31 Mi ganv khou tei ziap nunc tei rui, "Rabbi, tu di kho," twna sa tikhou, 32 "Nangniw thay makmei taektw ai tu khang nai de," twna Jisu rui daw the. 33 Khoutei, "Meic gaanv saekc rui taektw laa guang tina the ny?" twna ziap nunc tei khat khat khou sa the. 34 Khoutei Jisu rui sa the, "Atuang taektw twmei kiu ata ndiu guangmeipu rui ningmei tei taanhmei khatni kamei rui tiiloumei taanv taanc luailoumei hei the. 35 'Bw padeih tangv rui lautay nina de,' twna nangniw sa bam e. Tiki ai rui nangniw khou sa e: Laupuk ta hei zauc tho, minc mphwan phumh phum the. 36 Lau taypui mei khang kaphy nai e, kumna khuam guangmei kathai tei ringcsuangmei khang e. Kumna lingcloumeipu tei lev taymeipu tei neihla nchamc puni. 37 'Gaanv khat rui lingclou e, baihmei rui tay e,' twmei latchap hei kaling the. 38 Nangniw rui taanclou makmei lau tay khang ai rui nangniw ta ndiulou tuang the. Baihmei rui taanclou the, nangniw rui tay the." 39 "Ai rui taanclou kanmei guayna kamei rui akhou salou dat ngam the," twna mi pui tei rui salou tina, mi kaidai khou bammei Samariamei meic mpeyna Jisu khou lwm the. 40 Kumna Samariamei nunc kadaeng khou guangna neih keylou khang sa the. Kum tina, Jisu mi khou tei zaeng neih nei neihlou the. 41 Kalat chulouna meic baihmei mpeyna ni lwm dat di he. 42 Kumna, "Ntaw thu nang lat khou rui aniw lwm tu hamh the, tiki kamei rui samei tei aniw chu kahakna kamei hei mbaanv ta guloumeipu kiu changh di the twmei aniw thay the," twna kaniw rui sa the. 43 Mi khou tei, zaeng neih nei bamloumei tangv, kamei Galili thangc tat the. 44 Kumna, "Muhzwng ta kakandih khou thu chakhwang sw mak e," twna Jisu rui sa the. 45 Kamei Galili key tangc pwkhou, meicnunc rui kata laalou the. Kalam thu kaniw ni Kaanpatmei Ngai khou tei, Jerusalem khou nganghna kamei rui mi ngai lungc khou tei taancloumei guay tei how the.

Jisu rui Meicdaihmeipu Nac ta Tigayloumei

46 Jisu mi tangv tei, kamei rui dui ta luairyn zouc tiguanhlou kanmei bamv Galili tuang Kana thangc tat the. Kapernaum khou bammei meicdaihmei gaanv khatpu, kanac nnau ranv sihna theic ni kumcna bam khwan e. 47 Jisu Judia khou rui Galili khou key dat the twmei chu lana, kamei Jisu daeng khou guangna, kamei keyna kanac ta tigaylou khang huaycha the. 48 Khoutei, "Nangniw charynmei sw nchinmei taanv how mak e thei lwm zat ni tu hamh e," twna Jisu rui kakhou sa the. 49 "Kaipouc, anac theih mak khou keylou tho," twna mi pu tei rui sa the. 50 "Tat tho, nang nac ringc puni the," twna Jisu rui kakhou sa the, mi pu tei Jisu rui samei tei lwmna tat kan the. 51 Kamei kakai thangc key datmei chaenglwan khou, kabangc nunc kata ngangh riuna, "Nang nac ringc puni the!" twna sa the. 52 Mi nac tei akumhmei ganv khou rui gay dat tu cho twna thanv tikhou, "Douclaneic neih ndyng tangv rui kapumc chaenghmei nchu key kan the," twna sa the. 53 Khoutei, mi tei Jisu rui, "Nang nac ringc puni the," twna saloumei ganv tei the twmei kamei thay the. Khoutei kamei khatni kakai kaikhunhmei guay lwm the. 54 Mi hei Jisu, kamei Judia khou rui Galili khou key khou kaneimei sw nchinmei taanv e.

John 5

Bethzatha khou Tigayloumei

1 Mi tangv hei Jihudimei tuang ngai nai dat khwan e. Kumna Jisu mi ngai khang tei Jerusalem thangc ngangh the. 2 Jerusalem khou Lauziu Raengcmun daeng khou, Ibri lat khou Bethzathaa kawmei zeic akhat nai khwan e.i Mi zeic daeng khou tei kaisangh daihmei panguh nai khwan e. 3 Mi kaisangc guay khou tei nnaumei meic mpeyna—mik tiatmei, phaybaumei, khatni kapaektheihmei nunc zip padik bam khwan e. 4 Kaniw dui kalungcmei ta nkhwan bam tuang e, kalam thu kaluan luan Poubauhmei tuang baanchara keyna dui tei kabaw thau raph rap khwan e. Dui tei kabaw thaulou tangv pwkhou gut rey reymei tei karavpuatc guay gay dat raph rap khwan e.b 5 Tingkwm tamrucna tachat nnau bammeipu gaanv khat ni mi khou tei bam khwan e. 6 Mi pu tei mi khou tei zip bammei ta how pwkhou, kamei tingkwm hei saan nnau guang the twmei thay lana, "Nang ta tigayloumei ta kahaw bu cho?" twna Jisu rui kakhou thanv the. 7 "Haicpouc, dui kalung thaupui ganv khou, ata dui khou laa keylou nimei meic maekna the. Ai gut khang karamc bammei dak khou, meic baihmei rui gut rey raph rap kanna the," twna mi suanmeipu tei rui daw the. 8 "Thau tho, nang zy laa thauna tat tho," twna Jisu rui kakhou sa the. 9 Mi dyng khou tei mi pu tei gay dat the, kumna kazy laa thauna tat the. Mi tei Sabbath neic khwan e. 10 Khoutei Jihudimei kapy nunc rui, "Aseic hei Sabbath de, nang zy puancna nang tat bam nuh mak e," twna mi pu khou tei sa the. 11 "Ata tigayloumeipu rui azy laa thauna tat tho tw pwna de," twna kamei rui daw the. 12 "Mi kumcna sameipu kiu thow cho?" twna kaniw rui kakhou thanv the. 13 Tiki kata tigayloumeipu tei thow cho twmei kamei thay mak e. Kalam thu mi khou tei meic kangdai bam khwan e, kumna Jisu tei meic pang khou tei tiap maan kan the. 14 Katangv thangc, Jisu rui kata Ravkai khou ariwna, "Zauc lo, nang gay nthan thiak the. Mi khang suangc si ranvmei nang khou guanglou mak khang paapc taanc dat ri tho," twna salou the. 15 Khoutei mi pu tei tat lana, kata tigayloumeipu tei Jisu e twna Jihudimei kapy nunc khou salou the. 16 Khoutei, kamei rui mi tigayloumei taanv hei Sabbath neic taanc e twna Jisu ta swkasic khang sw thau the. 17 "Apu nthaekc makna taanc bam e, mi zaeng rui ai ni taanc nina e," twna Jisu rui kaniw khou daw the. 18 Khoutei kamei Sabbath riak swbakmei na hamhna, Ravguangc ta kapu twna kawna karana kata Ravguangc lev ti-nchamclou e twna Jihudimei kapy nunc tei kata swluai nii ranv ranv the.

Kanac Mpouh Ngamv

19 Jisu rui kaniw khou sa the, "Ai rui nangniw khou kaling salou tuang e: Ka Nac Mpouh hei ramh khat na sini karana kanyng swna taanc ngam mak e; Pu rui taanh taanhmei tei zaucna taanc bam tuang de. Pu rui taanhmei tei Ka Nac Mpouh rui ni taanh tuang e. 20 Pu rui Ka Nac Mpouh ta nzian e, kumna kamei rui taanhmei guay tei Kanac Mpouh khou lyanlou e. Nangniw ngak khang, mi khang suangc charynmei taanv taanh khang Pu rui kakhou lyanlou puni. 21 Pu rui theihmei ta tiringcthauloumei kumcna, Ka Nac Mpouh hei rui ni kamei rui tiringclou nimei nunc ta tiringclou e. 22 Pu rui gaanv khat na ta sini latzan sw mak e. Latzan swmei tuang ngamv guay tei Kanac Mpouh khou tiilou the. 23 Mi hei Pu ta chakhwang swmei kumcna, meic guayna rui Ka Nac Mpouh ta chakhwang sw khang e. Ka Nac Mpouh ta chakhwang sw makpui mei tei kata ndiu guangmei kaPu ta chakhwang sw mak tuang e. 24 "Ai rui nangniw khou kaling siakna samei kiu mi hei e: Thow pwni alat hei chu lana, ata ndiu guangmeipu khou lwmmei mei tei ringcsuangmei laa the. Kamei latzan khou guang dat mak khe, kamei theihmei khou rui ringhmei khou kaan pat tangv the. 25 Ai rui nangniw khou kaling salou tuang e: Theihmei nunc rui Ravguangc Nac Mpouh khwan chu nimei ganv guang pw the, khatni ntaw guang tangc the. Kumna mi tei chumei guay ringcthau dat puni. 26 Pu kakhou ringhmei naimei tei kumcna, Kanac Mpouh khou hei ni ringhmei nai khang tiilou the. 27 Khatni kamei rui Ka Nac Mpouh khou latzan swmei ngamv tiilou the. Kalam thu kamei hei Meic Nac Mpouh e. 28 Nangniw mi khou hei ngak nangh e. Theic kanmei guay rui kakhwan chuna, 29 ringcthau nipui ganv guang puni. Gaymei taancloumei guay rui ringh khang khatni simei taancloumei guay rui latzan khang ringcthau puni.

Jisu lam khou Saloumei

30 "Atuang latzan hei nchumh e. Kalam thu arana rui ramh khat na sini sw ngam mak e. Ai chumei thei layna taanh tuang de. Ai rui sw nii niimei ai sw khang hamh e, ata ndiuloumeipu rui sw o twmei tei sw khang de. 31 "Arana alam khou samei tei thu kachangc e twna laa khang hamh e. 32 Tiki ai hamhmei baihmei alam khou sa kanmeipu gaanv khat nai e, kumna kamei rui sa kanmei tei nchumhmei e twmei ai thay e. 33 Nangniw rui John khou ndiu guang khou tei kamei rui alam khou nchumhmei salou kan the. 34 Alam khou meic gaanv khat rui salou khang kahawna sa bam tu hamh e. Ai rui mi hei sa bammei hei thu, nangniw ta gulou khang e. 35 John hei chuangc bammei thaucmai kumcna gaanc bam khwan e, kumna kariw khou nangniw neihla kanak bam nii khwan e. 36 John khang suangc daihmei alam khou samei akhat nai e. Mi kiu thu ai rui taanc bammei, aPu rui akhou tiiloumei taanv guay hei the. Mi taanv guay hei rui ai thow cho twmei dinc the khatni aPu rui ata ndiu guang tuang e twmei lyan the. 37 Ata ndiuloumei apu rui ni alam khou dinclou e. Nangniw kakhwan chu zat mak e, kalwn ni how zat mak e, 38 khatni kalat nangniw lungc khou lou mak e. Kalam thu kamei rui ndiu guangmeipu ta nangniw lwm mak e. 39 Nthanmei Latrik khou tei rui ringcsuangmei laatow puni twna nangniw mi tei kathai e. Mi Nthanmei Latrik tei thu alam khou sa bam tuang de. 40 Tiki ringhmei laa khang nangniw akhou guang nii mak e. 41 "Meic nunc rui thuanhmei ta ai kahaw tuang hamh e. 42 Nangniw lungc khou Ravguangc ta nzianmei maek e twmei ai thay e. 43 Ai apu zanc khou guang tuang e, tiki nangniw ata laalou mak e. Thowkumhmei karana kacharay swna guang ti thei, nangniw kata laalou puni. 44 Nangniw khat khat rui thuanclou kary khang na swna, akhat namei Racguangc rui thuanclou khang thu sw makna, akumhna nangniw akhou lwm ngam nina cho? 45 Nangniw hei nkhuaimei nunc e twna ai rui aPu khou sa puni twna nangniw ning rio. Nangniw ta nkhuaimei nunc e twna sa nimei thu nangniw lwmgay bammei Mousi tei de. 46 Nangniw Mousi ta lwm changh e thei, nangniw ata lwm ni tuang e. Kalam thu kamei rui hyloumei hei alam khou the. 47 Tiki kamei rui hyloumei tei nangniw lwm mak ki, akumhna ai rui samei nangniw lwm ngam nina cho?"

John 6

Jisu rui Meic Chyng Panguh ta Titumei

1 Mi tangv hei, Jisu Tiberia Zeiclat twna ni kawmei Galili zeiclat paengc akhat thangc kaan pat the. 2 Suc numei nunc ta kamei rui tigayloumei sw nchinmei taanv guay tei how lana, mei kangdai kathei lay tat khwan e. 3 Jisu luangh but akhat khou ku lana, mi khou tei kaziap nunc lev dungc key the. 4 Mi tei Jihudimei tuang Kaanpatpui Ngai hu na khou khwan e. 5 Khoutei Jisu zauc pat pwkhou meic kangdai kadaeng khou guang bammei ta how lana, "Meic heizumei ta hei titu khang aniu tabui khou rui ntyan liu ngam nina cho?" twna Philip khou sa the. 6 (Mi tei Philip ta nchanvna sa tuang e; kamei sw nimei tei kamei thay de.) 7 "Meic katana katit katitna sini mbap tow ntangh khang ntyan liu pwkhou, denarik phay nei tuang rui biuc ni tu hamh e," twna Philip rui daw the. 8 Kaziap baihmei gaanv khat, Simon Pitar kachana Andriu rui mi kumcna sa the, 9 "Mi khou hei nggaanv nac gaanv khat khou siupian tyan dwm panguh lev khav kang nai e; tiki meic heizumei khang mi na hei rui tabui sw nina cho?" 10 "Meic guayna ta tidungc key tho," twna Jisu rui sa the. Mi khou tei mphuaih mpeyna nai khwan e. Kumna kaniw dungc key the. Nggaanvmei ching panguh dou khwan e. 11 Jisu ntyan tei laana, Ravguangc ta thuanckulouna, mi khou tei dungc bammei guay khou tei nzanhlou the. Mi tei kumc muaina, khav kang tei ni nzanhlou the. Kumna kaniw tu nii saanv tu the. 12 Kaniw tu nggu ngam kan pwkhou, "Tu nsaekcloumei guay tei khuam guang o; katitna sini swmaan rio," twna Jisu rui kaziap nunc khou sa the. 13 Kumna khuam guang pwkhou ntyan dwm panguh khou rui meicnunc tu nsaekcloumei tei nggiuh ruhna kanei padik khwan e. 14 Jisu rui taancloumei, mi sw nchinmei tei how lana, "Mi hei mbaanv khou guang nimei Muhzwng kiul changh lana di the!" twna meicnunc tei rui sa the. 15 Meic nunc tei guangna kata suncna guangh tisw khang nym puni the twmei thay lana, Jisu karana chyng thangc tat dat kan the.

Jisu Dui Ruc khou Tatmei

16 Tingzyn key pwkhou, Jisu ziap nunc zeihlat khou tei key the. 17 Kumna kaniw hih tuangcna Kapernaum biak thangc pat dat the. Zingc the, tiki Jisu kaniw daeng khou guang dat mak he. 18 Khoutei pwanzingh guangna dui kamuatc thau the. 19 Ziap nunc tei mail kathumh padeih chau gut pwkhou, Jisu dui ruc khou, kaniw daeng khou tat guangmei ta kaniw how lana ping the. 20 Khoutei, "Ai de, ping rio!" twna Jisu rui kaniw khou sa the. 21 Khoutei kaniw neihlana kata hih khou tei laa gutlou the. Kumna asaanh mak khou kaniw tangclou nipui bamv tangc the.

Meic nunc Jisu ta Phumei

22 Nthuanh thauna, Jisu ziap nunc tat dat kanmei hic khou tei Jisu kazauh kan mak e khatni mi khou tei hih baihmei ni maek e twmei mi khou tei bam duhmei meic kangdai tei thay khwan e. 23 Khoutei, Poubauhmei rui thuanckulouna meic kangdai ta ntyan tituloumei bamv daeng khou tei Tiberia thangc rui hih asaekc guang khwan e. 24 Jisu ni kaziap nunc ni mi khou tei bam mak khe twmei meic kangdai tei thay lana, kaniw mi hic guay khou tei gutna, Jisu ta phuna Kapernaum khou guang the.

Jisu hei Ringhmei Tyan e

25 Kaniw Jisu ta zeihlat paengc akhat thangc tei ariw lana, "Rabbi, nang tabui nungc rui mi khou hei guang lana cho?" twna kaniw rui Jisu khou sa the. 26 Jisu rui mundawna sa the, "Ai rui nangniw khou kaling salou tuang e: Nangniw rui ata phu bammei hei sw nchinloumei khou tei rui hamh e, ntyan rui nangniw bung ti-ngguloumei khou tei rui de. 27 Maan kan nimei taektw khang nangniw karamc bam riu; ringcsuangmei taektw laatow khang karamc o. Mi tei Meic Nac Mpouh rui nangniw khang tii puni. Kalam thu Pu Ravguangc rui kakhou mi ngamv hei tiilou the." 28 "Ravguangc rui ningmei taanh khang aniw tabui sw nina cho?" twna kaniw rui Jisu khou thanv the. 29 "Ravguangc rui ningmei thu Kamei rui ndiu guangmeipu khou lwmmei hei the," twna Jisu rui daw the. 30 Kaniw rui daw the, "Aniw nang ta lwm khang tabui sw nchinmei taanv nang taanclou ni cho? Nang tabui swlou ni cho? 31 'Kaniw tu khang kamei rui tingkauh thangc rui ntyan tii key the,' twna hyloumei kumcna, aniw pupouc nunc tazikramv khou manna tu khwan e." 32 Jisu rui kaniw khou sa the, "Ai rui nangniw khou kaling salou tuang e: Mousi rui nangniw khang tiimei tei thu tingkauh thangc tuang tyan hamh e;a tingkauh thangc tuang kalingmei tyan tiimei kiu thu aPu hei e. 33 Ravguangc rui tiimei tyan kiu thu tingkauh thangc rui keyna mbaanv khou ringhmei tiiloumeipu hei e." 34 "Haicpouc, mi tyan kiu aniw khang titaanc tanlou o," twna kaniw rui Jisu khou sa the. 35 Jisu rui kaniw khou sa the, "Ai hei ringhmei tyan e. Akhou guangmei mei tei ndaepc dat lak khe; akhou lwmmei mei tei tari dat lak khe. 36 Tiki ai rui nangniw khou sapui tuang e: Nangniw ata how the, tiki lwm mak e. 37 Apu rui akhou tiiloumei guay tei akhou guang puni, kumna akhou guangpui mei ta ai ganc pat lak e. 38 Kalam thu ai tingkauh thangc rui keymei hei ai ningmei taanh khang hamh e, ata ndiu guangmeipu rui ningmei taanh khang e. 39 Ata ndiu guangmeipu rui ningmei thu, kamei rui akhou tiiloumei guay tei gaanv khat na ta sini swmaan makna nkhamhpui nungc kaniw guay ta tiringcthaulou datmei hei e. 40 Kalam thu apu rui ningmei thu Ka Nac Mpouh ta howmei khatni kakhou lwmmei kathuic ringcsuangmei laamei hei e." 41 "Ai hei tingkauh thangc rui keymei tyan e," twna sa tipui zaeng rui meicnunc rui karuc khou tanglum thau the. 42 "Mi pu hei Joseph nac Jisu tei de. Aniu kapui kapu ta thay de. Akumhna kamei tingkauh thangc rui key tuang e twna sa tu cho?" twna kaniw rui sa the. 43 Khoutei, Jisu rui sa the, "Nangniw mi kumna tanglum bam rio. 44 Ata ndiu guangmei aPu rui zay guang tii mak e thei, meic gaanv khat na sini akhou guang ngam ni tu hamh e. Nkhamhpui nungc ai rui kata tiringcthaulou puni. 45 'Meic guayna ta Ravguangc rui nchamlou puni,' twna muhzwng nunc tuang latrik khou hylou e. Apu lat tei chuna thaymei guay akhou guang e. 46 Mi kumcna samei hei rui meic guayna Pu ta how the twna sa tu hamh e. Pu ta howmei thu Ravguangc khou rui guangmeipu na hei de. 47 Ai rui nangniw khou kaling salou tuang e: Akhou lwmmei mei khou tei ringcsuangmei nai the, 48 Ai hei ringhmei tyan e 49 Nangniw pupouc nunc tei tazikramv khou manna tw e, tiki theic ngam kan the. 50 Tingkauh thangc rui keymei tyan hei thu, twmei guay theic dat lak khe. 51 Ai hei tingkauh thangc rui keymei ringhmei tyan kiu the. Mi tyan hei twmei kathuic tingsaengzaeng ringc puni. Mbaanv maansei nac ringh khang ai rui tiimei tyan kiu thu apumc hei the." 52 Khoutei Jihudimei nunc tei lungc puamcna kaniw nchamc agina, "Akumhna mi pu hei aniw tu khang kazanc tii ngam nina cho?" twna sa the. 53 Jisu rui kaniw khou sa the, "Ai rui nangniw khou kaling salou tuang e: Nangniw Meic Nac Mpouh zanc tu mak e thei khatni kazei zangv mak e thei, nangniw ringh mak e. 54 Azanc tupui mei khatni azei zangvpui mei kathuic khou ringcsuangmei nai the. Kumna nkhamhpui nungc ai rui kata tiringc thaulou puni. 55 Azanc khatni azei hei taektw taekzang ling kiu the. 56 Azanc tupui mei khatni azei zangvpui mei kathuic tei akhou bam the khatni ai kakhou bam the. 57 Ringhmei tiiloumeipu Pu rui ata ndiulou the, kumna kapaan rui ai ni ringc e. Mi tei kumcna, ata twmei kathuic apaan rui ringc puni. 58 Tingkauh thangc rui keymei tyan kiu mi hei the; mi hei nangniw pupouc nunc tu laki theic kanmei tyan kumhmei tei hamh e. Mi tyan hei tupui mei tei thu tingsaengzaeng ringc puni." 59 Mi hei Jisu rui Kapernaum tuang sinagog khou nchamlou khou saloupui lat e.

Ringcsuangmei Lat

60 Mi tei chu laa khou, kaziap mpeyna rui, "Kamei sa bammei hei kungc langv e. Thow rui mi kumhmei hei nking bam ngam nina cho?" twna sa the. 61 Mi lam khou hei kaniw tanglum bam the twmei salou mak sini kalung khou thay lana, Jisu rui sa the, "Mi hei rui nangniw ta tiphaysuy thena cho? 62 Kum e thei, Meic Nac Mpouh hei kamei keymei bamv thangc ku datmei ta nangniw how e thei, akumh puni thah? 63 Ringhmei tiiloumei hei Ravguangc Bumaengc rui e, maansei rui ramh sw ngam mak e. Ai rui nangniw khou salou kanmei lat guay hei bumaengh e khatni ringhmei e. 64 Tiki nangniw pang khou lwm makmei meic gaanv saekc nai e." (Lwm lak nimei thow thow cho khatni thow rui kata zuanctu puni cho twmei Jisu thaurey khou na rui thay the.) 65 "Apu rui tiguangmei hamhna meic gaanv khat na sini akhou guang ngam mak e twna ai samei kiu mi zaeng rui the," twna Jisu rui sa the. 66 Mi khou tei rui, katuang ziap mpeyna hanc dat kan the, kumna kathei lay tat dat mak khe. 67 Khoutei, "Nangniw ni athei lay nii mak bu thah?" twna Jisu rui kaziap ruhna kanei khou tei sa the. 68 Khoutei Simon Pitar rui mundawna sa the, "Poubauhmei, aniw thow daeng thangc tat nina cho? Ringcsuangmei lat nang khou nai e twmei aniw thay e. 69 Nang hei Ravguangc khou rui guangmei Nthanmeipu e twmei aniw lwm the khatni thay the." 70 "Ai rui nangniw gaanv ruhna kanei ta kapahlou the. Tiki nangniw pang khou gaanv khat thu ravsic de!" twna Jisu rui sa the. 71 Mi hei Simon Iskariot nac Judas ta sa bam tuang e. Kalam thu, Juda kamei hei ziap ruhna kanei pang khou kazauh bam sini, kamei rui Jisu ta zuanctu puni tina e.

John 7

Jisu khatni Kakainac nunc

1 Mi tangv hei, Jihudimei kapy nunc rui kata swluai khang rik bam tina Jisu Judia thangc ngangh dat nii makna Galili ramv khou tat bam khwan e. 2 Ntaw Jihudimei tuang Chaengkai Ngai na guang khwan the. 3 Khoutei kachana nunc rui Jisu khou sa the, "Mi khou hei bamv ri tho, nang rui taanc bammei taanv guay hei how khang Judia thangc tat tho. 4 Meic guayna rui thaylou pwtu laa niipui mei thu nkamhna taanh mak e. Nang mi guay hei taanc bam changh e thei, kandih kapwm rui nang ta thay khang lyanlou ti tho!" 5 (Kalam thu kachana nunc rui nganv kata lwm mak e.) 6 Jisu rui kaniw khou sa the, "Atuang ganv tangh mak he. Nangniw khang thu tat nuhpui ganv rana de. 7 Mbaanv rui nangniw ta thu karaeng mak e, tiki ata thu karaeng e. Kalam thu kaniw taanv si e twna ai rui sa bam tipui zaeng rui e. 8 Nngay khang tei nangniw ngangh tho, mi ngai khang hei ai ngangh lak he. Kalam thu ai tat nipui ganv tangh mak he." 9 Mi kumna sana kamei Galili khou bam duc the.

Chaengkai Ngai khou Jisu

10 Mi ngai khang tei kachana nunc tat kanmei tangv, Jisu ni ngangh the. Kamei ndauhna ngangh mak khe, nkamhna ngangh the. 11 "Jisu tabui khou bam bu cho?" twna Jihudimei kapy nunc rui mi ngai khou tei kata phu the. 12 Meic pang khou kalam khou tadiuh tadiu bam geic the. Meic gaanv saekc rui, "Kamei hei meic gaymei e," twna sa the. Gaanv saekc rui, "Kamei hei kandihmei ta guatmeipu de," twna sa the. 13 Kalam khou meic gaanv khat na sini ndawna sa pat ngam mak khe, kalam thu kaniw Jihudimei kapy nunc ta ping the. 14 Nngay kabung zaengc khou, Jisu Ravkai khou guangna nchamlou thau the. 15 Khoutei, Jihudimei kapy nunc tei ngakna, "mi pu hei ncham mak ki tabui thangc rui mi guay hei thay lana cho?" twna sa the. 16 Jisu rui mundawna sa the, "Ai rui sa bammei hei akhou rui pat tuang hamh e, ata ndiu guangmeipu Ravguangc khou rui de. 17 Thow pwni kamei Ravguangc ningmei sw ni twna ning e thei, ai rui dinc bammei hei Ravguangc khou rui guang tuang ny, achwnphuakh khou rui cho twmei kamei thay puni de. 18 Karana kachwnphuakh khou rui sapui mei tei thu, karana kata tihymdaih khang sw e; tiki kata ndiu guangmeipu ta tihymdaih khang phumeipu hei thu nchumhmei sa e, kumna kakhou nchumh makmei maek e. 19 Mousi rui nangniw khang Riakdanv tiilou mak nah cho? Tiki nangniw gaanv khat na sini mi tei piu mak e. Tabui swna nangniw ata swluai khang phu bam tu cho?" 20 "Nang khou ravsic bam the! Nang ta thow rui swluai khang sw bamna cho?" twna meic kangdai tei rui sa daw the. 21 Jisu rui mundawna sa the, "Ai rui taanv akhat taanclou tiki, nangniw khang kadath dat the. 22 Nangniw nac mpouh nunc ta gihruamc khang Mousi rui latdanv pat the, (Kaling thu mi tei kahouhmei hei Mousi khou rui hamh e, nangniw pupouc nunc khou rui de) kumna nangniw Sabbath neic gihruamc e. 23 Mousi tuang Riakdanv ngaek khang Sabbath neic gihruamc e thei, ai rui Sabbath neic meic gaanv khat ta tigay nthan thiaklou e twna tabui swna nangniw ata lunghpuamc bam tu cho? 24 Meic zaw zaucna latzan sw rio, nchumhna latzan sw o."

Kamei hei Khrista Kiu Lana the Ny?

25 Khoutei Jerusalemmei gaanv saekc rui sa the, "mi pu hei swluai khang phu bammeipu tei hamh nah cho? 26 Zauc lo, Kamei charuangc khou lat sa tat bam de, tiki kaniw kata lat khat na sini nchyanlou mak e. Kamei hei Khrista the twmei kapy nunc thay changh lana the ny? 27 Khrista ta thu kamei lungc guangmei bamv meic gaanv khat na sini thay ni tu hamh e; mi pu hei kamei tabui bamv khou rui guang tu cho twmei aniu thay de." 28 Jisu Ravkai khou nchamlou bam khou, kauc ranvna sa the, "Ai thow cho khatni tabui thangc rui cho twmei nangniw kaling thay daih cho? Ai arana anyng swna guang tu hamh e. Ata ndiu guangmeipu hei thu nchumhmeipu e. Nangniw kata thay mak e; 29 tiki ai thu kata thay e. Kalam thu ai kakhou rui guang tuang e khatni kamei rui ata ndiu guang tuang e." 30 Khoutei kaniw kata nym khang sw the, tiki meic gaanv khat na sini karuc khou baanh keylou ngam mak khwan e. Kalam thu katuang ganv tangh mak he. 31 Tiki meic mpeyna thu kakhou lwmna, "mi pu suangc mbumei sw nchinmei taanv taanclou nimei Khrista guang puni di he nah cho?" twna kaniw rui sa the.

Jisu ta Nym khang Swmei

32 Meic kangdai tei rui mi kumcna chadiuna sa bammei tei Pharisi nunc rui chu lana, Jisu ta nym khang kaniw khatni amuh daihmei nunc rui ravkai rigaanv nunc ta ndiulou the. 33 Khoutei Jisu rui sa the, "Ai nangniw daeng khou bam kanaklou puni he, kumna ata ndiu guangmeipu daeng thangc tat dat kan puni. 34 Mi khou kiu, nangniw ata phu puni, tiki phu tow dat ni tu hamh the, kalam thu ai bammei bamv thangc tei nangniw guang ngam ni tu hamh e." 35 Khoutei Jihudimei kapy nunc khat khat khou sa the, "Aniu kata phu tow dat lak nimei kiu, kamei tabui thangc tat ni lana cho? Aniu mei nunc lungc bammei Grikmei kaidai guay thangc tatna Grikmei nunc ta ncham tat ni lana cho? 36 'Nangniw ata phu puni, tiki phu tow dat ni tu hamh the,' khatni 'Ai bammei bamv thangc tei nangniw guang ngam ni tu hamh e,' twna kamei rui sa bammei kiu, tabui kabac cho?"

Ringhmei Duiriang

37 Nngay luai nimei tingmik, twmei thu nngay kadaic nungc, Jisu dingthauna kaucna sa the, "Thow pwni tari e thei akhou guang zangv o. 38 Thow pwni akhou lwmmei mei tei, Nthanmei Latrik rui samei kumcna, 'kalung khou rui ringhmei duiriang luangc pat puni,' " 39 Jisu rui mi hei kakhou lwmmei guay laatow punimei Bumaengc lam khou samei tuang e. Mi ganv khou tei thu Bumaengh tei tiilou mak he. Kalam thu Jisu ta kahym tidaiclou mak he.

Meic nunc Lat Nchamc Mak Khe

40 Kamei rui mi hei samei tei chumei pang khou gaanv saekc rui, "Mi pu hei muhzwng kiu changh kan di the!" twna sa the. 41 "Kamei hei Khrista de!" twna meic baihmei gaanv saekc rui sa the. Tiki meic baihmei gaanv saekc rui thu, "Khrista kiu Galili khou rui guang puni nah cho? 42 Khrista thu David kaikhwang khou rui khatni David ramc Bethlehem khou rui guang puni de twna, Nthanmei Latrik khou nai e," twna sa the. 43 Kumna Jisu lam khou meic kangdai khou tei lungc chamc mak khe. 44 Meic gaanv saekc thu kata nym nii khwan the, tiki meic gaanv khat na sini karuc khou baanh keylou mak khwan e.

Jihudimei Kapy nunc Lwm Makmei

45 Ravkai rigaanv nunc tei guang dat pwkhou, amuh daihmei nunc khatni Pharisi nunc rui, "Nangniw tabui swna kata nym guang mak tu cho?" twna sa the. 46 Khoutei, "mi pu rui samei kumcna meic gaanv khat na sini sa mak e!" twna rihpy nunc rui daw the. 47 "Nangniw ta ni guat mbiangh thena cho?" twna Pharisi nunc tei rui kaniw khou sa the. 48 "Kapy pang khou rui hamh e thei Pharisi pang khou rui thowkumhmei kakhou lwmmei mei nai the twmei nangniw chu thena cho? 49 Mi mei pang hei Mousi tuang Riakdanv thay mak khe, kumna kaniw ruc khou ravsyang keylou puni the!" 50 Kazanc Nikodemas kawmei, Pharisi gaanv khat, kahunungc Jisu ta guang ariw kanmeipu tei rui kaniw khou sa the, 51 "Aniu tuang Riakdanv thei layna, meic gaanv khat ta kamwang khou rui chu kahak mak saanv, khatni kamei rui taanc kanmei tei mi hei the twmei nsihsing mak saanv, karuc khou latzan key mak tu hamhna cho?" 52 Khoutei, "Nang ni Galilimei lana the ny? Nthanmei Latrik tei kathai zauc o: Galili khou rui muhzwng khat na sini cha pat mak e," twna kaniw rui sa the. 53 Khoutei meic guayna kakai kakai thangc tat dat kan the,

John 8

1 tiki Jisu thu Oliv Chyng thangc tat kan the. 2 Nthuanh thauna laukhwan khwanzingh, kamei Ravkai khou guang dat the. Kumna meic guayna kadaeng khou guang kaduai dat pwkhou, kamei dungc keyna kaniw khou nchamlou thau the. 3 Khoutei lungcmaanv bam khou nymmei ntumei gaanv khat ta Riakdanv tadin nunc khatni Pharisi nunc rui zay guangna, meic pang laa khou tidinglouna, 4 Jisu khou sa the, "Dinhpouc, mi pui hei kamei nkhuaimei taanv taanc bammei dyng khou nym tuang the. 5 Mousi tuang Riakdanv rui mi kumhmei ta thu ntauh kwamluai nina e, twna sa the. Nang thu tabui sa tu cho?" 6 Mi hei kaniw Jisu khuay nym khang kata nchanvmei tuang e. Khoutei, Jisu nkhum keyna, kabaanczung rui kandih khou hy bam the. 7 Kaniw rui thanv dat thanv dat bam tikhou, Jisu kapy khuang thauna, "Nangniw pang khou paapc maekmei gaanv khat rui kwam rey tho," twna Jisu rui kaniw khou sa the. 8 Khoutei kamei nkhum key datna, kabaanczung rui kandih khou hy bam dat muai the. 9 Mi tei chu pwkhou, kaniw tei, gaanvdaih liangmei khou rui thauna, khat khat swna tat ngam kan the. Nkhamh khou, mi pui na tei ding bam duc the. 10 Khoutei Jisu ngangc thauna, "Tanpui le, kaniw tabui thangc tat ngam kan thah? Nang ta nkhuaimeipui e twna sa dat nimei meic maek khah?" twna sa the. 11 "Maek khe, Haicpouc," twna mi pui tei rui daw the. "Ai rui ni nang ta nkhuaimeipui e twna sa lak khe. Tat tho, paapc taanc dat ri tho," twna Jisu rui kakhou kadylou the.

Jisu hei Mbaanv khang Gaanhmei e

12 Jisu rui kaniw khou sa dat e, "Ai hei mbaanv khang gaanhmei e. Thow pwni athei laypui mei tei kakhou ringhmei tuang gaanhmei nai puni, kumna kamei zinghmei khou tat dat ni tu hamh the." 13 Khoutei Pharisi nunc rui Jisu khou, "Nang thu nang rana nang lam khou sa bam tuang de. Nang lat tei nchumh mak e. 14 Jisu rui mundawna sa the, "Alam khou hei ai rui sa bam sini, ai rui samei hei nchumhmei e. Kalam thu ai tabui thangc rui guang tu cho khatni tabui thangc tat bam tu cho twmei ai thay e. Ai tabui thangc rui guang tu cho khatni tabui thangc tat bam tu cho twmei nangniw thay mak e. 15 Nangniw rui maansei tuang latzan ramsu sw tina e. Ai thu meic gaanv khat na ta sini latzan sw mak e. 16 Tiki ai rui latzan sw e thei, atuang latzan thu nchumh puni. Kalam thu ai arana sw ni tu hamh e; ata ndiu guangmei aPu lev sw ni tuang de. 17 Gaanv nei rui samei tei nchamc e thei, kamei rui samei tei nchumhmei the, twna nangniw tuang Riakdanv khou hylou e. 18 Ai rui alam khou sa the, khatni ata ndiu guangmei Apu rui ni alam khou sa the." 19 Khoutei, "Nang Pu kiu tabui thangc tei naina cho?" twna kaniw rui kakhou sa the. Jisu rui daw the, "Nangniw ata ni aPu ta ni thay mak e. Nangniw ata thay khwan e thei, aPu ta ni thay ni tuang e." 20 Jisu rui mi guay hei kamei rui Ravkai khou, puatkat khuk pang loumei bamv khou nchamlou khou sa tuang e. Tiki meic gaanv khat na rui sini kata nym mak e. Kalam thu katuang ganv tangh mak he.

Ai Tat Nimei Bamv Thangc Nangniw Guang Ngam Ni tu Hamh e.

21 Jisu rui kaniw khou sa dat e, "Ai tat kan puni, mi khou kiu nangniw ata phu puni, tiki nangniw paap khou nangniw theic puni. Ai tat nimei bamv thangc tei nangniw guang ngam ni tu hamh e." 22 Khoutei, "Kamei tat nimei bamv thangc tei aniu guang ngam ni tu hamh e twna kamei rui sa bammei hei, kamei karana kata swluai ni tw lana cho?" twna Jihudimei kapy nunc rui sa the. 23 Jisu rui kaniw khou sa the, "Nangniw thu mbaanv khou rui e, ai thu kauh thangc rui e. Nangniw thu mi mbaanv tuang e, ai thu mi mbaanv tuang hamh e. 24 Mi zaeng rui, nangniw hei nangniw paap khou theic puni twna ai sa tuang e. 'Ai hei Ai kiu the' twna lwm mak e thei, nangniw hei nangniw paap khou theic puni." 25 "Nang thow cho?" twna kaniw rui Jisu khou thanv the. Khoutei Jisu rui daw the, "Thaurey khou na rui ai rui nangniw khou salou kanmei tei the. 26 Ai nangniw lam khou sa khang khatni nangniw ta latzan sw khang mpeyna nai e. Tiki ata ndiu guangmeipu hei thu nchumhmei e, kumna kakhou rui chumei tei ai rui mbaanv khou dinc kadai bammei tuang e." 27 Mi kumcna Jisu rui kaPu lam khou, kaniw khou sa bammei tei kaniw kabah thay mak khwan e. 28 Kum tina, Jisu rui kaniw khou sa the, "Nangniw rui Meic Nac Mpouh ta thaengc thau pwkhou, Ai hei kamei kiu the, twmei nangniw thay puni. Mi khou kiu ai arana anyng swna ramh khat sini taanh mak e, tiki aPu rui sa o twmei tei sa kadai bammei tuang de twmei, nangniw thay puni. 29 Ata ndiu guangmeipu tei ai lev tat nchamc bam e. Kamei arana ta mpatlou mak e. Kalam thu ai kaganv kathuic kamei rui ningmei taanc bam e." 30 Jisu rui mi guay hei sa pwkhou, meic mpeyna lwm the.

Nyngswmei khatni Bangh

31 Jisu rui kakhou lwmmei nunc khou sa the, "Ai rui dincloumei hei nangniw piu bam e thei, nangniw aziap ling the; 32 kumna nangniw nchumhmei tei thay puni. Kumna nchumhmei tei rui nangniw ta bangh khou rui tiduaklou puni." 33 "Aniw thu Abraham kikta de, aniw meic gaanv khat na bangc sini sw mak e. 'Nangniw ta bangh khou rui tiduaklou puni,' twna nang samei hei tabui kabac cho?" twna kaniw rui sa the. 34 Jisu rui kaniw khou sa the, "Ai rui nangniw khou kaling salou tuang e: Paapc taanhpui mei tei paapc bangc e. 35 Bangh tei thu kaikhunhmei swna tingsaengzaeng bam mak e; kanac mpouh tei rui tingsaengzaeng bam tuang de. 36 Ka Nac Mpouh hei rui nangniw ta tiduaklou e thei, nangniw duak changh puni. 37 Nangniw Abraham kikta e twmei ai thay e, tiki nangniw ata swluai khang sw bam e, kalam thu nangniw lungc khou alat khang kabamv maek e. 38 Apu khou rui ai howmei tei ai sa tuang e, tiki nangniw thu nangniw pu rui samei taanh tuang e." 39 Khoutei kaniw rui mundawna, "Aniw pu thu Abraham de," twna kakhou sa the. Jisu rui mundawna sa the, "Nangniw Abraham nac nunc e thei, kamei rui swmei tei kumcna sw ni tuang e. 40 Tiki Ravguangc khou rui chumei nchumh tei dinc kadailoumeipu ata swluai khang nangniw sw bammei hei, Abraham thu mi hei kumcna sw mak e. Nangniw pu rui sw kanmei tei nangniw sw bam tuang de." 41 "Aniw nkhahnanac nunc hamh e, akhat namei aniw pu kiu Ravguangc e," twna kaniw rui sa the. 42 Khoutei Jisu rui kaniw khou sa the, "Ravguangc hei nangniw pu e thei, nangniw ata nzian ni tuang e. Kalam thu ai Ravguangc khou rui guang tuang e. Ai arana anyng swna guang tu hamh e; kamei rui ndiu guang tuang e. 43 Tabui sw tina ai samei hei nangniw kabah thay mak tu cho? Mi hei nangniw alat nking zih tina hamh nah cho? 44 Nangniw hei nangniw pu Ravsic nac nunc e, kumna nangniw pu rui kahawmei nangniw taanc nii e. Thaurey khou na rui kamei thu meicdowmei de. Kumna kamei nchumhmei biak thangc ding zat mak e. Kalam thu kakhou nchumhmei twmei maek e. Kamei saraemhmei lat samei hei katuang lwnlung thei layna sa bammei tuang e. Kalam thu kamei hei saraemhmei e khatni saraemhmei guay pu e. 45 Tiki ai thu nchumhmei lat sa tina nangniw ata lwm mak e. 46 Ata 'nang paap kiu mi hei the,' twna sa ngammei nangniw pang khou thow nai cho? Ai rui nchumhmei sa tina, nangniw tabui swna ata lwm mak tu cho? 47 Ravguangc mei guay thu Ravguangc lat nking puni. Nangniw hei thu Ravguangc mei hamh lapui zaeng rui, kalat nking mak khe."

Jisu khatni Abraham

48 "Nang hei Samariamei e khatni nang khou ravsic gut the twna aniw rui samei hei nchumh mak nah cho?" twna kaniw rui sa the. 49 "Akhou ravsic bam mak e, ai aPu ta chakhwang sw e, tiki nangniw thu ata chakhwang sw mak e," twna Jisu rui daw the. 50 "Ai thu arana hymdaih khang phu mak e, tiki ata tihymdaiclou khang swmei khatni akhang latzan swloumeipu gaanv khat nai e. 51 Ai rui nangniw khou kaling salou tuang e: Alat hei piupui mei tei theic dat lak khe." 52 Kaniw rui Jisu khou sa the, "Nang khou ravsic gut the twmei aniw nthanna thay the. Abraham theic kan the, muhzwng guay ni theic kan the. 'Thow pwni alat piupui mei guay theic dat lak khe,' twna nang rui sa bammei hei nang khou ravsic bam tina the. 53 Aniw pu Abraham theic kan the. Nang hei Abraham khang suangc daihmei e twna sa bam tu cho? Muhzwng guay ni theic kan the. Nang rana nang ta thow e twna ningna cho?" 54 Jisu rui daw the, "Ai arana ahym thuanc e thei, mi hymdaihmei tei nsa de. Tiki nangniw rui, 'Aniw Racguangc' twna kawmeipu, aPu rui tihymdaiclou tuang e. 55 Nangniw thu kata thay mak e, tiki ai thu kata thay e. Ai kata thay mak e twna ai sa e thei, ai ni nangniw kumcna saraemhmei sw puni the. Ai kata thay e, kumna ai kalat piu e. 56 Nangniw pu Abraham, ai guangmei ta how puni twna neihla bam khwan e; kamei mi tei howna neihla the." 57 "Nang tingkwm riakngu sini tangh mak he ki, nang Abraham ta how thena cho?" twna kaniw rui sa the. 58 "Ai rui nangniw khou kaling salou tuang e: Abraham puanh mak khou rui ai nai bam tuang di the," twna Jisu rui daw the. 59 Khoutei kata kwam khang kaniw ntauh khuaic thau the, tiki Jisu nkamhna Ravkai khou tei rui tat pat kan the.

John 9

Kapui Bungpuak khou rui Kamik Tiatmeipu ta Tigayloumei

1 Jisu tat ruan pat khou, kapui bungpuak khou rui kamik tiatmeipu gaanv khat ta how the. 2 "Rabbi, mi pu hei kamik tiatna puanc patmei hei, thow paap zaeng rui cho? Kapaap zaeng rui ni, kapui kapu paap zaeng rui cho?" twna kaziap nunc rui Jisu khou thanv the. 3 Khoutei Jisu rui daw the, "Mi hei kapaap zaeng rui ni hamh, kapui kapu paap zaeng rui ni hamh e. Mi hei kakhou rui Ravguangc ngamv ndauh khang e. 4 Kalaanv saanv ata ndiu guangmeipu rui tiiloumei taanv aniu taanc nina e. Meic gaanv khat na sini taanv taanc dat nuh makpui ganv zingbangc guang puni. 5 Ai mi mbaanv khou bam saanv, mbaanv khang gaanhmei kiu ai hei the." 6 Mi hei sa tangv lana, Jisu kandih khou kateic nsuk keyna, mi tei rui bih kanuaicna, mi pu mik kanei khou tei paemvlou the. 7 Kumna, "Nang Siloam Zeic thangc tei nang zaw phi tat tho," twna kakhou sa the. ("Siloam" twmei kabac hei "ndiuloumei" twna e). Mi pu tei tatna kazaw phi the, kumna kamik howna guang dat the. 8 Khoutei kaigei kainingmei khatni kamei neytu bammei ta howloumei nunc rui, "mi pu hei dungcna neytu bammeipu tei hamh nah cho?" twna thanv the. 9 Meic gaanv saekc rui, "mi pu tei de," twna sa the; tiki baihmei gaanv saekc rui thu, "Kamei hamh e, luihmei tina de," twna sa the. Khoutei mi pu tei rui, "Ai mi pu tei de," twna sa the. 10 "Kum e thei akumhna, nang mik how dat tu cho?" twna kaniw rui thanv the. 11 "Jisu twna kawmeipu rui bih kanuaicna amik khou paemvlouna Siloam zeic thangc azaw phi tat o twna sa the. Kumna ai tatna phi the. Khoutei amik how dat the," twna mi pu tei rui sa the. 12 "Kamei tabui thangc bam bu cho?" twna kaniw rui thanv the. Khoutei, "Ai thay mak e," twna kamei rui daw the.

Tigayloumei Lam Tei Pharisi nunc rui Katakmei

13 Kamik tiatmei khou rui gay datmeipu ta tei, kaniw rui Pharisi nunc daeng khou nduangh guang the. 14 Jisu rui bih kanuaicna mi pu mik tei tihowlou datmei tei Sabbath neic khwan e. 15 Kamei akumhna kamik how dat tu cho twmei Pharisi nunc tei rui mi pu khou tei thanv dat khwan e. Khoutei, "Kamei rui amik khou bih paemvlouna, azaw phi tiki how dat the," twna kamei rui daw the. 16 "Mi pu hei Ravguangc khou rui guangpui mei hamh e, kalam thu kamei Sabbath ngaek mak e," twna Pharisi gaanv saekc rui sa the. Tiki meic baihmei gaanv saekc rui, "Akumhna paapcmei khat rui mi kumhmei sw nchinmei taanv hei taanc ngam nina cho?" twna sa the. Mi kumcna kaniw pang khou kalangv pat the. 17 Khoutei Pharisi nunc rui mi pu khou tei, "Nang mik tihowlou datmeipu ta kiu, nang thow e twna sa tu cho?" twna thanv tikhou, "Kamei muhzwng khat e," twna daw the. 18 Khoutei Jihudimei kapy nunc tei mi pu tei kamik tiatmei khou rui how datmei tuang e twmei lwm mak khe. Kumna kapui kapu ta kaw guangna, 19 "mi pu hei nang ney nac cho? Kamei kamik tiatna puanc pat tu cho? Akumh tina ntaw kamei how dat tu cho?" twna kaney khou thanv the. 20 Kapui kapu rui daw the, "Kamei aney nac e, kumna kamei kamik tiatna puanc patmeipu the. 21 Tiki akumh tina kamei how dat tu cho, hamh e thei thow rui tigaylou dat tu cho twmei aney thay mak e. Kakhou thanv ti tho. Kamei alauc hamh the. Kamei daw ngam puni the cho!" 22 Kapui kapu rui mi hei samei thu kaney Jihudimei kapy nunc ta ping lana e. Kalam thu Jisu hei Khrista e twmei lwmmei mei ta tei thu sinagog khou rui alay ganc puni twmei tuang nai tina e. 23 Kum tina, "Kamei alauc hamh the, kakhou thanv ti tho!" twna kaney sa tuang e. 24 Kamik tiatna puanc patmeipu ta tei, kaniw rui luan neimei swna kaw dat lana, "Nang latling sa ni twmei Ravguangc hu khou latryan sw o! Nang ta tigayloumeipu hei paapcmei de twmei aniu thay e!" twna sa the. 25 "Kamei paapcmei e, paapcmei hamh e twmei ai thay mak e; tiki ai amik tiat bam khwan e, tiki ntaw thu how dat the twmei thu ai thay e," twna kamei rui daw the. 26 "Kamei rui nang khou tabui swlou bu cho? Tabui kumhna kamei rui nang mik tiraklou tu cho?" twna kaniw rui thanv the. 27 Khoutei kamei rui daw the, "Ai nangniw khou raclou kan the, tiki nangniw nkinglou mak e. Tabui khang nangniw nking dat nii hena cho? Nangniw ni kaziap sw nii thena cho?" 28 Khoutei kaniw rui kata mphutna sa the, "Nang the, mi pu tuang ziap kiu. Aniw thu Mousi ziap de. 29 Mousi khou thu Ravguangc rui lat salou e twmei aniw thay e; mi pu ta kiu thu, kamei tabui thangc rui guang tu cho twmei sini thay mak e." 30 Mi pu tei rui mundawna sa the, "Mi hei kadath datpui tuang e! Kamei tabui thangc rui guang tu cho twmei nangniw thay mak e, tiki kamei rui amik tiatmei tigaylou dat the! 31 Ravguangc thu paapcmei nunc lat chulou mak e twmei aniu thay e. Kata kalummei khatni kamei rui ningmei taanhmei nunc lat rui chulou tuang de. 32 Kapui bungpuak khou rui kamik tiatna puanc patmei ta tihowlou dat kan e twmei mbaanv nai thau rap khou rui chu mak he. 33 Mi pu hei Ravguangc khou rui guangpui mei hamh e thei, kamei khat sini mi hei taanc ngam ni tu hamh e." 34 "Paapcmei swna puanc patmei nang kumhmei rui aniw ta ncham khang sw bam tu cho?" twna kaniw rui luh the. Kumna kaniw rui kata sinagog khou rui nthau pat the.

Bumaengh khou Mik Tiatmei

35 mi pu ta tei nthau patlou the twmei Jisu chu the, kumna kata ariw pwkhou, "Nang Meic Nac Mpouh khou lwm thah?" twna thanv the. 36 "Kaipouc, ai kakhou lwm khang, kamei thow cho twmei dinclou o," twna mi pu tei rui daw the. 37 "Nang kata how the, kamei kiu ntaw nang ta kachuc bammeipu hei the," twna Jisu rui kakhou sa the. 38 "Ai lwm the, Kaipouc!" twna mi pu tei rui sa the. Kumna kata kalum the. 39 Khoutei Jisu rui sa the, "Mik tiatmei nunc how khang khatni howmei nunc mik tiat khang latzan sw khang ai mi mbaanv khou guang e." 40 Kadaeng khou bammei Pharisi nunc rui mi tei chu laa khou, "Aniw ni mik tiatmei nah cho?" twna sa the. 41 Khoutei Jisu rui daw the, "Nangniw mik tiat khwan e thei, nangniw paapc nai lak ni tuang e; tiki nangniw how de twna ningpui zaeng rui nangniw paap nai bam e."

John 10

Lauziu Gaenghmei Latgiam

1 Jisu rui kaniw khou sa e, "Ai rui nangniw khou kaling salou tuang e: Chaengmun khou rui hamhna, baihmei chaeng rui nzaekc kuna lauziu kuanc khou gutpui mei tei kaihouhmei khatni kwamtupui mei e. 2 Tiki chaengmun khou rui gutmeipu tei lauziu nunc ta tei gaenghmeipu e. 3 Chaengmun nkhwanmeipu tei rui kakhang chaengmun tei laanclou puni; lauziu nunc tei kakhwan thay e, kumna kamei rui kaniw zanc kawna nduangh pat puni. 4 Kamei rui katuang lauziu guay ta nduangh patpui ganv khou tei, kamei hu khou tat e, kumna lauziu guay tei kathei lay tat e. Kalam thu kaniw kakhwan thay e. 5 Meic baihmei thei thu kaniw lay tat ni tu hamh e; zawthay makmeipu khou rui thu kaniw pak tat kan ni de. Kalam thu kaniw kakhwan thay mak e." 6 Jisu rui mi latgiam hei kaniw khou salou the, tiki kaniw kamei rui sa bammei kabac tei thay mak khe.

Jisu hei Gaymei Lauziu Gaenghmeipu e

7 Kum tina Jisu rui kaniw khou sa the, "Ai rui nangniw khou kaling salou tuang e: Ai hei lauziu nunc tuang chaengmun e. 8 Ahu khou guang kanmei baihmei guay tei thu, kaihouhmei khatni kwamtumei nunc e. Kumna lauziu nunc rui kaniw khwan thaylou mak e. 9 Ai hei chaengmun e. Akhou rui gutmei guay ta gulou puni, kumna kamei kakuanc khou gut dat pat datna mpac tu bam puni. 10 Kaihouhmei thu houh khang, swluai khang, khatni swmaan khang na guang e. Ai guangmei thu kaniw ringhmei laa khang e—gaat tuang nai dat makmei ringcpaan laatow kan khang e. 11 "Ai hei gaymei lauziu gaenghmeipu e. Gaymei lauziu gaenghmeipu rui lauziu nunc khang theiclou e. 12 Tiki gaengc phihmeipu, lauziu gaenghmei ling hamhmeipu tei thu, lauziu guay tei katuang hamh lapui zaeng rui, alaih guangmei ta how pwkhou, lauziu guay ta tei ganclouna pak e. Kum tina alaih tei rui lauziu ta tei nkay the, kumna lauziu pang tei pak phak the. 13 Gaengc phihmeipu tei pak tat kan the, kalam thu kamei thu phihmei de, kumna lauziu khang tei kadan tuang maek e. 14-15 Ai hei gaymei lauziu gaenghmeipu e. Apu ata thay e khatni ai aPu ta thay e. Mi kumcna ai atuang lauziu guay ta thay e khatni atuang lauziu guay ata thay e. Ai kaniw khang theiclou e. 16 Mi lauziu kuanc khou bam makmei atuang lauziu baihmei ni nai he. Mi nunc ta tei ni ai laa guang puni, kumna gaenghmeipu akhat bangc khou kaniw guay lauziu kang akhat sw puni. 17 "Apu rui ata nzian e, kalam thu ai apanty tii pat khang nuh the; mi tei ai laa dat khang e. 18 Meic gaanv khat na rui sini apanty laa tu hamh e; achwn rui nuhna ai rui mi hei tii pat tuang de. Mi hei tii pat khang akhou ngamv nai e, laa dat khang ni ngamv nai e. Mi latdanv hei ai aPu rui laa the." 19 Mi lat guay zaeng rui, Jihudimei nunc pang khou tei, kalangv pat dat khwan the. 20 Kaniw meic mpeyna rui, "Kakhou ravsic gut the! Kamei mba the! Nangniw tabui swna kalat nking bam tu cho?" twna sa the. 21 Tiki baihmei gaanv saekc rui thu, "Ravsic gutmei mei rui thu mi kumhmei lat hei sa ni tu hamh e! Ravsic rui mik tiatmei ta tigaylou ngam puni dinah cho?" twna sa the.

Jisu ta Laalou Makmei

22 Mi tangv Ravkai Kat gutpui Ngai, Jerusalem khou tat key bam khwan e. Mi tei tingsei khou khwan e. 23 Khoutei Jisu, Solomon Kaisangc twna kawmei bamv khou tat bam khwan e. 24 Khoutei meicnunc tei kadaeng khou huamc guangna, "Nang thow cho twmei dinclou makna asaanh bam ni hena cho? Nang hei Khrista kiu the ni, sa nthanlou tho," twna sa the. 25 Jisu rui mundawna sa the, "Ai nangniw khou salou kan the, tiki nangniw lwm mak khe. Apu rui tiiloumei ngamv paan rui taanclou kanmei taanv guay tei rui ai thow cho twmei dinclou kan the; 26 tiki nangniw lwm mak e. Kalam thu nangniw atuang lauziu hamh e. 27 Alauziu guay thu akhwan nking e; ai kaniw ta thay e, kumna kaniw athei lay e. 28 Ai rui kaniw khou ringcsuangmei tiilou the, kumna kaniw theic dat lak khe. Meic gaanv khat na rui sini kaniw ta abaanc khou rui asut pat dat ngam ni tu hamh the. 29 Kaniw ta akhou tiiloumeipu aPu hei daic liangmei di the, kumna gaanv khat na rui sini kaniw ta aPu baanc khou rui asut pat dat ngam ni tu hamh the. 30 Apu lev ai akhat de." 31 Khoutei kata kwam khang kaniw ntauh khuaic thau dat saanv the. 32 Khoutei Jisu rui kaniw khou sa the, "Apu khou rui ai rui nangniw hu khou gaytaanv mpeyna taanc lyanlou kan the; mi pang khou tei akumhmei taanv zaeng rui nangniw ata ntauh kwamluai nina cho?" 33 Kaniw rui mundawna sa the, "Gaytaanv zaeng rui aniw nang ta ntauh kwamluai nina hamh e; tiki nang rui Ravguangc ta sw chapavpui zaeng rui de! Nang maansei di ki, nang rana nang ta Ravguangc tiswloupui zaeng rui e." 34 Khoutei Jisu rui sa the, " 'Nangniw rav nunc e, twna Ravguangc rui sa e' twna nangniw tuang Riakdanv khou hylouna nai e. 35 Nthanmei Latrik rui samei hei thu kalaic dat mak khe, kumna Ravguangc rui katuang lat kaniw khou tiiloumei nunc ta tei rav nunc twna kaw the. 36 Kum e thei, 'Ai hei Ravguangc Nac Mpouh e.' twna sa e twpui zaeng rui, aPu rui reic patna mi mbaanv khou ndiu guangmei ata hei, Ravguangc ta swchapavpui mei e twna nangniw akumhna sa tu cho? 37 Ai aPu tuang taanv taanh mak e thei, ata lwm nangh e. 38 Tiki aPu tuang taanv taanc e thei, nangniw ata lwm ni tuang e, kumna ai Apu khou bam e khatni aPu akhou bam e twmei nangniw thay ni tuang e." 39 Kaniw Jisu ta nym khang sw dat khwan e, tiki kamei kaniw baanc khou rui tiap duak kan the. 40 Mi tangv, Jisu Jordan kaan pat datna, thaurey khou John rui duiluploumei bamv khou tei guangna bam kan the. 41 Meic mpeyna mi khou tei guangna, "John thu sw nchinmei taanv taanh mak e, tiki kamei rui mi pu lam khou saloumei guay hei thu nchumhmei the," twna kaniw rui sa the. 42 Kumna mi bamv khou tei meic mpeyna kakhou lwm the.

John 11

Lazaras Theihmei

1 Bethanimei kazanc Lazaras twna kawmeipu nnau bam khwan e. Bethani hei Meri khatni kaswanrey Martha ramc e. 2 (Mi Meri hei Jisu phay khou mwndui thauc teylouna kasam rui thut phuiloumeipui tei e; nnau bammei Lazaras hei kapuningc e.) 3 "Poubauhmei, nang nzianmeipu tei nnau bam e," twna kakai swanrey nei rui Jisu khou tithay guang the. 4 Mi tei chu pwkhou, Jisu rui sa the, "Mi nnau bammei hei theih khang hamh e; Ravguangc ta tihymdaih khang de, kumna mi paan hei rui Ravguangc Nac Mpouh tuang hymdaihmei ndaw khang e." 5 Jisu Martha kai swanrey nei khatni Lazaras ta nzian e. 6 Tiki mi chamv tei chumei tangv kamei bammei bamv khou tei zaeng neih nei bam keylou dat di he. 7 Mi tangv, "Aniu Judia thangc tat dat di kho," twna Jisu rui kaziap nunc khou sa the. 8 Khoutei, "Rabbi, ntaw Jihudimei nunc nang ta ntauh kwamluai khang phu bam khou, nang mi thangc tei tat dat khang raengc bam tu haih cho?" twna kaziap nunc rui daw the. 9 Jisu rui sa the, "Kalaanv dak hei ganvdak ruhna kanei nai tu hamh nah cho? Kalaanv tatmei thu kalanv mak e. Kalam thu mbaanv tuang gaanhmei riw rui kamei how e. 10 Tiki kamei zingbangc tat e thei, kaphay kalanv e, kalam thu kakhang gaanhmei maek khe." 11 Khoutei, "Aniu champanv Lazaras zip kan the, ai tatna kata nchyang thaulou dat puni," twna Jisu rui sa the. 12 "Poubauhmei, kamei zip kan e thei, gay dat kan ni the," twna kaniw rui daw the. 13 Jisu rui samei thu Lazaras theic the twmei tuang e; tiki kaniw rui thu kamei zip bam changh tina khuangh e twna ning the. 14 Khoutei Jisu rui ndauh phauna sa the, "Lazaras theic the, 15 tiki ai mi khou tei bam makmei hei nangniw khang ai neihla e. Kalam thu nangniw lwm khang the. Aniu kadaeng thangc tat di kho." 16 Naphinhmei kawmei Thomas rui, "Aniu ni kamei lev theiclou nchamc khang tat di kho," twna kapam ziap guay khou sa the.

Jisu hei Ringcthau Datmei khatni Ringhmei e

17 Jisu guang tangc pwkhou, Lazaras ta mbeihloumei zaeng padeih tangc the tw bam khwan the. 18 Bethani hei Jerusalem khou rui mail kanei sini tangh mak e. 19 Kum tina Martha lev Meri ta kaney puningc theihmei khou tei swmlou khang Judiamei meic mpeyna guang bam khwan e. 20 Martha tei Jisu guang e twmei chu lana, kata ariw khang pat the; tiki Meri thu kai khou bam kan de. 21 Martha rui Jisu khou sa the, "Poubauhmei, nang bam tu khwan e thei, apuningc theic lak ni tuang e! 22 Tiki ntaw ni nang rui ney neymei Ravguangc rui tiilou puni de twmei ai thay e." 23 "Nang puningc ringcthau dat puni de," twna Jisu rui kakhou sa tikhou, 24 "nkhamhpui nungc, theihmei guay ringcthau dat pwkhou kiu, ringc dat puni twmei ai thay e," twna Martha rui sa the. 25 Khoutei Jisu rui kakhou sa the, "Ringcthau datmei khatni ringhmei kiu ai hei e. Akhou lwmmei mei tei, kamei theic sini ringc puni; 26 ringcna akhou lwmmei mei tei thu, theic dat zat lak khe. Nang mi hei lwm daih?" 27 "Ngguay, Poubauhmei! Nang hei mbaanv khou guang punimei, Ravguangc Nac Mpouh Khrista kiu the twmei ai lwm e," twna kamei rui daw the.

Jisu Kap the

28 Mi hei salou lana, Martha kaswanrey Meri ta kaw khang tat kan the, kumna, "Dinhpouc guang bam e, kumna kamei nang ta kaw bam e," twna suaina salou the. 29 Meri mi tei chu pwkhou, dingthauna, kaluak kalat kadaeng thangc pat the. 30 (Jisu namv khou guang tangh mak he, Martha rui kata ariwmei bamv khou tei bam di he.) 31 Meri chadi chadana tat pat kanmei tei how lana, swmlou khang guang bammei nunc tei ni kathei lay pat the. Kalam thu kamei tarou thangc kap tat ni lana khuangh e twna kaniw ning the. 32 Meri Jisu daeng khou guang tangcna kata how rappuilev, kamei kaphaypav daeng khou khuksun keyna, "Poubauhmei, nang bam khwan e thei apuningc theic lak ni tuang e!" twna sa the. 33 Meri kap bammei ta, khatni kadaeng khou bammei guay ni kap bammei ta how lana Jisu kalung mpeyna kabiu the. 34 "Kata tabui thangc mbeihlou kan tu cho?" twna Jisu rui thanv the. "Poubauhmei, guangna zauc tho," twna kaniw rui sa the. 35 Jisu kap the. 36 "Zauc lo, kamei Lazaras ta adih nzian cho!" twna meicnunc tei rui sa the. 37 Tiki meic gaanv saekc rui thu, "Kamei mik tiatmei ta tiraklou ngam e thei, Lazaras ta titheih mak khang thu ngam mak khe nah cho?" twna sa the.

Lazaras ta Tiringcthaulou Datmei

38 Jisu kalung mpeyna kabiuna tarou thangc tat the. Mi tei kamun khou ntauh rui daengc thingcloumei khowlang e. 39 "Ntauh hei laa ganc tho!" twna Jisu rui sa the. Theihmeipu tanpui Martha rui, "Poubauhmei, zaeng padeih tangc the. Namh si puni di the," twna sa the. 40 "Nangniw lwm e thei, nangniw Ravguangc tuang hymdaihmei how puni twna ai nangniw khou sa mak nah cho?" twna Jisu rui kakhou sa the. 41 Kaniw rui roukhamtauc tei laanc pat the. Khoutei Jisu tingkauh thangc zauc thauna sa the, "He apu, nang rui alat chulou bammei khang nang ta thuancku e. 42 Nang rui alat chulou tanh tan bam de twmei ai thay e, tiki nang rui ata ndiu guangmei tuang e twmei mi khou bammei guay hei lwm khang, kaniw khang ai mi hei sa tuang e." 43 Kamei mi hei salou lana kauc ranvna, "Lazaras, pat tho!" twna sa the. 44 Lazaras tei kaphay kabaanc pheynuaih rui kasiatclouna khatni kazaw pheyzai rui duamlouna pat the. Khoutei, "Kata riclouna titat ti tho," twna Jisu rui sa the.

Jisu ta Swluai khang Swmei

45 Meri daeng khou guang bammei nunc tei Jisu rui taancloumei tei how lana kaniw meic mpeyna Jisu khou lwm the. 46 Tiki kaniw gaanv saekc thu Pharisi nunc daeng thangc tatna, Jisu rui taancloumei tei kaniw khou poulou the. 47 Khoutei Pharisi nunc khatni amuh daihmei nunc pei kawna sa the, "Aniu tabui sw kho cho? Mi pu hei rui sw nchinpui taanv mpeyna sw bam the. 48 Aniu rui kata mi kumcna mpatlou bam ti thei, meic guayna kakhou lwm ngam kan pungh di the. Kumna Rommei guangna aniu tuang nthanmei bamv khatni aniu zaat ta swmaan ngam pungh di the!" 49 Kaniw pang khou gaanv khat, mi kwm tei Tingkuh sw bammei, kazanc Kaiaphas kawmeipu rui sa the, "Nangniw ramh khat na sini thay mak khe! 50 Zaat kapwm ta swmaanmei suangc, meic gaanv khat rui meic guay khang theicloumei rui nangniw khang gaeng e twmei nangniw thay mak nah cho?" 51 Mi hei kamei kachwnphuakh khou rui sa tu hamh e; tiki mi kwm tei kamei Tingkuh sw bammei thei layna, Jisu Jihudimei zaat khang theiclou puni twna dinc kasuakcloupui tuang e. 52 Mi zaat khang na hamh e, zin phak tat kanmei Ravguangc nac nunc ta pumh akhat na khou khuam guang kariulou dat khang e. 53 Mi nungc tei rui thauna Jihudimei kapy nunc tei Jisu ta swluai khang kaphianh thau the. 54 Kum tina Jisu Judia khou, meic pang khou ndauhna tat dat mak khe, kumna tazikramv daeng thangc naimei Ephraim twna kawmei kaidai thangc tatna mi khou tei kaziap nunc lev bam kan the. 55 Kaanpatpui Ngai na guang tii thena, nngay hu khou pumh sw nthanmei thouc sw khang namv namv thangc rui Jerusalem khou ngangh geic the. 56 Kum tina kaniw Jisu ta phu the, kumna kaniw Ravkai khou ding kaduaina, "Kamei nngay khou thu guang pw lak khe ni? Nangniw akumhna ning bo?" twna khat khat khou sa the. 57 Mi ganv khou tei, Jisu ta nym khang, kamei bammei bamv thay thaymei rui dinclou nina e, twna amuh daihmei nunc khatni Pharisi nunc rui latdanv patlou bam khwan e.

John 12

Meri rui Jisu khou Thauh Teyloumei

1 Kaanpatpui Ngai khang zaeng charuk nai khou, Jisu Bethani khou guangna kamei rui tiringcthauloumei Lazaras kai khou bam khwan e. 2 Kaniw rui kakhang zingbangc nap tu khang chamdaanvlou the. Martha rui siamruai sw bam khwan e, tiki Lazaras tei thu tu zangv khang Jisu lev dungc bammei pang khou lay kazauh bam khwan e. 3 Meri rui kamanv kunghmei nthanmei mwnduithauc liter paekri doumei haan laana Jisu phay khou teylouna kasam rui thutlou the. Mi namh gaymei thauc rym tei rui mi kainung kapwm tei padik the. 4 Jisu ziap gaanv khat, kata zuanctu nimeipu Judas Iskariot rui sa the, 5 "Mi hei denarix phay thumh khang zuanc lana lungcsimei nunc khang tii damc bu cho!" 6 Kamei mi hei samei hei lungcsimei nunc khang kadanna sa tu hamh e, tiki kamei thu kaihouhmei e. Kamei meic geihmei tuang syan khau phungc lana, mi khou tei rui kakhang num laa raph rap bam lana e. 7 Khoutei Jisu rui sa the, "Kata sw kaguakclou tii rio! Katuang naimei tei ata mbeihmei nungc khang lou kan diu. 8 Lungcsimei nunc thu nangniw lev bam nchamc tanh tan bam puni de, tiki ai thu nangniw daeng khou bam tanh tan ni tu hamh e."

Lazaras ta Swluai khang Swmei

9 Jisu Bethani khou bam e twmei meic kangdai tei chu lana, kaniw mi thangc tei tat the. Jisu zaeng rui na hamhna, Jisu rui tiringcthauloumei Lazaras ta zauc khang ni e. 10 Kum tina amuh daihmei nunc kaphianhna Lazaras ta ni swluai khang sw the. 11 Kalam thu kazaeng rui Jihudimei mpeyna kaniw lat laa makna, Jisu khou lwm the.

Jisu Jerusalem khou Guangh Swna Gutmei

12 Nthuanh thauna, nngay khang guang bammei meic kangdai tei Jisu Jerusalem khou guang pu the twmei chu the. 13 Kaniw tadanv kuang puancna, "Hosanna! Poubauhmei zanc khou guangmeipu, Israelmei guangc ta hei suaihiamlou o," twna kaucna kata ariw khang pat the. 14 Jisu kuanniam launa akhat ariwna mi khou tei tuangc the. Mi hei, 15 "Ping rio, Zion kaidai! Nang guangc guang the, kuanniam launa khou tuangcna guang the." twna Nthanmei Latrik khou hylou bammei tei the. 16 Kaziap nunc mi ganv khou tei thu mi kabac tei thay mak khwan e; tiki Jisu ta hymdaihmei khou tiringcthaulou dat pwkhou, Nthanmei Latrik rui sa bammei hei Jisu lam khou the twmei khatni kaniw mi hei Jisu khang swlou tuang the twmei ningtow the. 17 Jisu rui Lazaras ta tarou khou rui kaw patna, tiringcthaulou datmei ganv khou bammei nunc rui mi lam khou tei meicnunc khou raclou the. 18 Jisu rui mi sw nchinmei taanv hei kakhou taanclou e twna chu lapui zaeng rui, meic kangdai tei Lazaras ta ariw khang guang tuang e. 19 Khoutei Pharisi nunc rui khat khat khou sa the, "Zauc tho nangniw rui sw bammei hei nsa di the! Kandih kapwm kathei lay kan the!"

Grikmei Gaanv Saekc rui Jisu ta Phumei

20 Mi ngai khou hei kalum khang guangmei pang khou Grikmei gaanv saekc kazauh khwan e. 21 Galili ramv tuang Bethsaida kaidaimei Philip daeng khou kaniw guangna, "Haicpouc, aniw Jisu ta ariw nii e," twna sa the. 22 Philip rui mi tei Andriu khou salou tina, kaney tatna Jisu khou salou the. 23 Jisu rui kaniw khou mundawna sa the, "Meic Nac Mpouh ta kahym tidaiclou nimei ganv guang the. 24 Ai rui nangniw khou kaling salou tuang e: Gehu thw akhat tei kandih khou keyna theiclou mak e thei, mi thu tei mbu pat mak e, tiki mi tei theiclou e thei kathai mpeyna nthai the. 25 Thow pwni karingcpaan ta nzavpui mei tei mi tei maan puni; thow pwni mi mbaanv khou karingcpaan ta nzav makpui mei tei ringcsuangmei ringcpaan laa puni. 26 Thow pwni asiamruai sw nii tw e thei kamei athei lay nina e, kumna ai bampui bamv khou tei asiamruai swpui mei tei ni bam puni. Asiamruai swpui mei ta tei aPu rui chakhwang swlou puni.

Jisu rui Kamei Theic Nimei Lam Saloumei

27 "Ntaw alung katuakc the—ai tabui lat sa kho cho? 'Apu mi ganv hei akhou tiguanglou rio!' twna sa kho cho? Hamh e; mi khang ai guang tu the. 28 Apu nang hym tidaiclou o!" Khoutei, "Ai rui mi tei tidaiclou kan the, tidaiclou dat puni he," twna tingkauh thangc rui kauc key the. 29 Mi khou tei ding bammei meic kangdai tei mi tei chu the, kumna gaanv saekc rui, "Ganh key tina e," twna sa the, baihmei gaanv saekc rui, "Kauh baanchara rui kata kachuc tina de," twna sa the. 30 Khoutei Jisu rui kaniw khou sa the, "Mi khwan hei akhang hamh e, nangniw khang de. 31 Ntaw hei mi mbaanv ta latzan sw puni the; ntaw mi mbaanv tuang dihsinpouc ta alay pat puni the. 32 Ata kandih khou rui zay thau pwkhou, meic guayna ta ai rui akhou zay guang puni." 33 (Mi hei kamei akumhmei ramthei theic puni cho twmei sa tuang e.) 34 Meic kangdai tei rui sa the, "Aniw tuang Riakdanv khou rui chumei thu, Khrista thu tingsaengzaeng ringc bam puni twna sa e. Mi kumc e thei, akumhna, 'Meic Nac Mpouh ta zay thau puni,' twna nang sa tu cho? Mi Meic Nac Mpouh kiu thow tei cho?" 35 Jisu rui mundawna sa the, "Nangniw pang khou gaanhmei hei bamv kanak puni he. Gaanc bammei dak khou tat laa tho, hamh e thei zingc namv lamc e. Kalam thu zingc khou tatpui mei tei thu kamei tabui thangc tat bam tu cho twmei thay mak e. 36 Nangniw gaanhmei nac nunc sw khang, gaanhmei hei nai bam khou, nangniw mi khou hei lwm la tho."

Meic nunc rui Lwm Makmei

Jisu mi hei salou tangv lana tat pat kan the, kumna kaniw khou rui nkamh kan the. 37 Kamei rui mi sw nchinmei taanv guay hei kaniw hu khou taanclou tisini, kaniw kakhou lwm mak e. 38 Mi hei, "Poubauhmei, thow rui aniw tuang lat ta lwm thena cho? Thow khou Poubauhmei rui kapumtan lyanlou kan thena cho?" twna muhzwng Isaia rui hyloumei tei guang tangc khang e. 39 Mi kumna kaniw lwm ngam mak khe, kalam thu Isaia rui mi kumcna salou e: 40 "Kaniw mik how mak khang, khatni kaniw lungning ning pat thay mak khang, kumna ai rui kaniw ta tigaylou khang akhou guang mak khang, Ravguangc rui kaniw mik sw tiatlou kan the, khatni kaniw lungning ti-ndylou kan the." 41 Isaia rui mi hei kamei Jisu tuang hymdaihmei how lana, kalam khou sa tuang e. 42 Kum bam sini, Jihudimei kapy nunc ni meic mpeyna Jisu khou lwmlou de; tiki kaniw ta sinagog khou rui alay ganc pw khang Pharisi nunc ta ping lapui zaeng rui, kaniw lwm the twmei thu sa pat mak khe. 43 Kaniw Ravguangc rui thuancloumei ta suangc, maansei rui thuancloumei ta kahaw the.

Jisu Lat rui Latzan Swmei

44 Jisu rui kaucna sa the, "Akhou lwmmei mei tei akhou na lwm tu hamh e, ata ndiu guangmeipu khou ni lwm tuang e. 45 Ata howpui mei tei ata ndiu guangmeipu ta how the. 46 Akhou lwmmei guay zinghmei khou bam dat mak khe. Ai mbaanv khou gaanhmei swna guang e. 47 Alat hei chu laki piu makpui mei ta tei, ai latzan sw lak e. Ai mbaanv ta latzan sw khang guang tu hamh e; mbaanv ta gulou khang de. 48 Ata laalou makpui mei khatni alat ta laalou makpui mei ta tei, nkhamhpui nungc ai rui sa pat kanmei lat guay tei rui latzan sw puni. 49 Kalam thu, ai arana achwnphuakh khou rui sa tu hamh e; ata ndiu guangmei aPu latdanv thei layna sa tuang de. 50 Katuang latdanv rui ringcsuangmei phungc guang e twmei ai thay e. Mi zaeng rui, ai rui samei hei Pu rui sa o twna samei lat e."

John 13

Jisu rui Kaziap nunc Phay Khiuloumei

1 Mi hei Kaanpatpui Ngai nngay guang nungc khwan e. Jisu kamei mbaanv hei mpatlouna kaPu daeng thangc tat dat nimei ganv na the twmei kamei thay the. Mi mbaanv khou bammei kamei nunc ta kamei nzian e; katwan nganv nzian e. 2 Khoutei Jisu kaziap nunc lev zingbangc taektw tu khang bam khwan e. Ravsic rui Simon Iskariot nac Judas lungc khou Jisu ta zuanctu niimei lungning tiilou the.a 3 Kapu rui ramh guayna kabaanc khou tiilou the, khatni kamei Ravguangc khou rui guang tuang e, kumna kakhou tat dat puni the twmei thay the. 4 Khoutei Jisu ding thau the, kumna katuang pheychuanh luak keylouna, pheyzai kasian khou malangvlou the. 5 Kumna keikhuang khou dui bunlouna kaziap nunc phay khiulou thau the. Kumna kasian khou malangvlou bammei pheyzai tei rui thut phuilou the. 6 Kamei Simon Pitar daeng khou guang tikhou, "Poubauhmei, nang rui aphay khiulou ni nah cho?" twna kamei rui sa the. 7 "Ai sw bammei hei nang ntaw kabah thay mak e, tiki thei thangc thay puni," twna Jisu rui sa daw the. 8 "Nang rui tabui nungc na sini aphay khiulou nina hamh e," twna Pitar rui sa the. "Ai rui nang phay khiulou mak e thei, akhou nang dam maek e," twna Jisu rui daw the. 9 Simon Pitar rui, "Poubauhmei, kumc e thei, aphay na hamh e, abaanc ni khiulou o, apy ni lowlou o," twna sa the. 10 Jisu rui sa the, "Duilow tangv kanpui mei tei thu, kaphay na hamhna baihmei guay tei thub khiu dat khang kage maek khe; kapumc kapwm tei nthan the. Nangniw nthan the, tiki meic guayna thu hamh e." 11 Kata zuanctu nimeipu ta thay lana, "Meic guayna thu nthanmei ramh e," twna sa tuang e. 12 Jisu kaniw phay khiulou tangv lana, katuang pheychuanh nu dat the, kumna kabamv khou guang dungc dat the. Khoutei, "Ai rui nangniw khou swlou kanmei kabac hei nangniw thay daih?" twna kaniw khou thanv the. 13 "Nangniw rui ata Dinhpouc khatni Poubauhmei twna kaw e; nangniw samei tei nchumh the, ai kiu the. 14 Nangniw tuang Kaipouc khatni Dinhpouc ai rui nangniw phay khiuloumei kumcna, nangniw khat khat phay khiulou nina e. 15 Ai rui nangniw khou taancloumei kumcna taanh khang ai rui nangniw khou taanc lyanlou tuang e. 16 Ai rui nangniw khou kaling salou tuang e. Bangh gaanv khat na sini kakaipouc suangc daih mak e, khatni latdiutatmei gaanv khat na sini kata ndiuloumeipu suangc daih mak e. 17 Ntaw nangniw mi kabac hei thayna taanc e thei, nangniw sangaymei nunc e. 18 "Ai nangniw guayna ta sa tu hamh e; ai rui kapahloumei nunc ta ai thay de. 'Atuang ntyan twmeipu rui ata sw khang sw the,' twna Nthanmei Latrik khou hyloumei tei guang tangc puni. 19 Mi hei pat mak khou ai rui nangniw khou sa kasuakcloumei lam kiu thu, mi hei patpui nungc kiu, 'Ai hei Ai' kiu the twmei nangniw lwm khang e. 20 Ai rui nangniw khou kaling salou tuang e: Ai rui ndiuloupui mei ta laaloupui mei tei ata ni laalou tu e; khatni ata laaloupui mei tei ata ndiu guangmeipu ta laalou tu e."

Jisu rui Kata Zuanctu Nimeipu ta Dinc Kasuakcloumei

21 Jisu rui mi hei salou lana, kalung ryanrana sa the, "Ai rui nangniw khou kaling salou tuang e: Nangniw gaanv khat rui ata zuanctu puni the." 22 Kamei thow ta sa bam tu cho twmei thay lamc makna ziap nunc tei khat khat ta zauc the. 23 Kaziap gaanv khat, Jisu rui nzianmeipu tei, Jisu daeng tuancna dungc bam khwan e. 24 Khoutei, "Kamei thow ta sa bam tu cho thanv o," twna Simon Pitar rui kakhou mikkhwan swna sa the. 25 Kum tina mi pu tei Jisu daeng beic guang tuancna, "Poubauhmei, mi kiu thow cho?" twna thanv the. 26 "Ai rui ntyan kiak ntinna tii nimeipu kamei tei the," twna Jisu rui sa the. Kumna ntyan kiak akhat laana mi tei ntinna Simon Iskariot nac Judas khang tii the. 27 Kamei mi tyan tei laa rappuilev Seitan kalung khou gut the. "Nang sw nimei tei katumcna sw tho!" twna Jisu rui kakhou sa the. 28 Jisu rui mi hei Juda khou samei hei tabui sa bam tu cho twmei mi khou tei dungc nchamc bammei nunc tei thu thay mak khwan e. 29 Judas tei kaniw tuang syan khau sinmeipu tipui zaeng rui, mi ngai khang tei ramh liu tat o twna ny, hamh e thei lungcsimei nunc khang nzanh tat o twna Jisu rui sa tw ny twna kaniw gaanv saekc thu kakhanh khwan e. 30 Ntyan kiak tei haemvlou rappuilev Juda tei kaizaeng pat kan the. Mi tei zingbangc khwan e.

Latdanv Kathanc

31 Juda tat pat kanmei tangv, Jisu rui sa the, "Ntaw thu Meic Nac Mpouh tuang tik hym tidaiclou the; kakhou rui Ravguangc tik hym tidaiclou the. 32 Kakhou rui Ravguangc tik hym tidaiclou e thei, Ravguangc rui ni Meic Nac Mpouh tik hym kakhou rui tidaiclou puni, kumna kamei rui mi tei dyng mak khou swlou puni. 33 Alaucthiu, ai nangniw lev asaanh bam ni tu hamh the. Nangniw ata phu puni; tiki ai rui Jihudimei kapy nunc khou sa kanmei tei kumcna, ntaw ai rui nangniw khou samei tuang e: Ai tat nimei bamv thangc tei nangniw guang ngam ni tu hamh e. 34 Latdanv kathanc ai rui nangniw khang tii e, mi kiu thu: Nangniw khat khat ta nzian o. Ai rui nangniw ta nzianmei hei kumcna, nangniw khat khat ta nzian nina e. 35 Nangniw khat khat ta nzian ti thei, nangniw hei aziap nunc e twmei meic guayna rui thay puni."

Pitar rui Kamei Jisu Mei Hamh e twna Sa Nimei

36 "Poubauhmei, nang tabui thangc tat nina cho?" twna Simon Pitar rui sa the. "Ai tat nimei bamv thangc tei nang ntaw thu lay tat ngam ni tu hamh e; tiki thei thangc nang ni athei lay guang puni," twna Jisu rui daw the. 37 "Poubauhmei, tabui swna ai ntaw nang thei lay tat ngam lak nina cho? Ai nang khang theiclou puni!" twna Pitar rui mundaw the. 38 Jisu rui kakhou sa the, "Nang akhang theiclou changh puni thah? Ai rui nang khou kaling salou tuang e: Nang hei amei hamh e twna nang rui sa liang kathumh mak saanv aseic nruay khuangc ni tu hamh e."

John 14

Jisu hei Pu khou Tat Nimei Chaeng e

1 Jisu rui kaniw khou sa the, "Nangniw lungc katuakc rio, Ravguangc khou lwm o, akhou ni lwm o.a 2 Apu kai thangc, nangniw bampui bamv khang mpeyna nai e; kum mak khwan e thei, ai nangniw khou salou puni tuang e. Mi khou tei nangniw bamv khang chamdaanvlou khang ai tat ni he.b 3 Ai tatna nangniw bampui bamv khang chamdaanvlou tangv e thei, ai nangniw ta guang laa dat puni, kumna ai bampui bamv khou tei nangniw ni bam puni. 4 Ai tat nimei bamv thangc tat nimei chaeng tei nangniw thay e. 5 "Poubauhmei, nang tabui thangc tat nina cho twmei aniw thay mak e; akumhna mi chaeng kiu aniw thay nina cho?" twna Thomas rui sa the. 6 Jisu rui mundawna kakhou sa the, "Ai hei chaeng e, nchumhmei e khatni ringhmei e. Apaan rui hamhna meic gaanv khat na sini aPu pamv tangc ngam mak e. 7 Nangniw ata thay e thei, nangniw aPu ta ni thay the,c kumna ntaw thu nangniw kata thay the khatni how the." 8 "Poubauhmei, Pu ta kiu aniw khou lyanlou o; kumc e thei aniw pian puni e," twna Philip rui sa the. 9 Jisu rui kakhou sa the, "Mi saan ai nangniw lev bam nchamc guang the; tiki Philip, nang ata thay mak he nah cho? Ata howmei tei aPu ta how tu the. Akumhna, 'Pu ta kiu aniw khou lyanlou o,' twna sa dat ni hena cho? 10 Ai aPu khou bam e khatni aPu akhou bam e twmei, Philip, nang lwm mak nah cho? Ai rui nangniw khou salou kanmei lat guay tei akhou rui pat tu hamh e. Akhou bammei aPu rui kataanv taanc bam tuang de. 11 Ai aPu khou bam e khatni aPu akhou bam e twna samei hei nangniw lwm o. Kum mak e thei, ai rui taancloumei taanv khou tei rui nangniw lwm o. 12 Ai rui nangniw khou kaling salou tuang e: Akhou lwmmei mei rui ai taanhmei hei taanc puni. Ngguay, mi khang tei suangc daihmei taanv sini kamei taanc puni, kalam thu ai aPu daeng thangc tat puni the. 13 Nangniw tabui pwni azanc khou neymei guay, Ka Nac Mpouh khou rui aPu hym thuanh khang ai rui taanclou puni. 14 Nangniw rui tabui pwni azanc khoud neymei guay tei, ai rui taanclou puni.

Bumaengh Nthanmei Tii Key khang Nrianhloumei

15 "Nangniw ata nzian e thei, atuang latdanv guay piu puni, 16 Ai rui nangniw khang Nkhavloumeipu baihmei gaanv khat aPu khou neylou puni, kumna tingsaengzaeng nangniw ta bam nduangh bam khang kamei rui tiilou puni. 17 Kamei hei mbaanv rui laatow ngam lakmei nchumhmei Bumaengc e. Kalam thu mbaanv thu kata how mak e khatni thay mak e; tiki nangniw thu kata thay e. Tabui cho tiki kamei nangniw ta bam nduangh bam e khatni nangniw lungc khou bam puni.d 18 "Ai nangniw ta ganc nrulou ni tu hamh e. Ai nangniw daeng khou guang dat puni de. 19 Asaanh makmei lungc khou mbaanv rui ata how dat ni tu hamh the, tiki nangniw thu ata how puni. Kalam thu ai ringc bam e, nangniw ni ringc bam puni. 20 Ai aPu khou bam e, nangniw akhou bam e khatni ai nangniw khou bam e twmei mi nungc kiu nangniw thay puni. 21 "Atuang latdanv guay hei laalou lana piupui mei tei ata nzianpui mei e. Ata nzianpui mei ta tei aPu rui nzian puni; ai ni kata nzian puni, kumna ata kakhou ndauhlou puni." 22 Khoutei Iskariot hamhmei baihmei Judas rui, "Poubauhmei, nang ta mbaanv khou thu hamhna aniw khou na ndauhlou nimei kiu akumh nina cho?" twna thanv the. 23 Jisu rui mundawna sa the, "Ata nzianpui mei tei alat piu puni. Apu rui kata nzian puni, kumna aPu lev ai kakhou guang lungc bam puni. 24 Ata nzian makpui mei tei alat piu mak e. Ai rui sa bammei lat hei akhou rui patmei lat hamh e, ata ndiu guangmei aPu lat de. 25 "Nangniw lev bam nchamc bammei dak khou, mi guay hei ai rui nangniw khou dinclou tuang e. 26 Apu rui azanc khou ndiu guang nimei Nkhavloumeipu, Bumaengh Nthanmei tei rui ramh lam guayna nangniw khou dinclou puni khatni ai rui nangniw khou saloumei guay hei kamei rui nangniw khou tiningtowlou puni. 27 "Ai rui nangniw khang chuzaenghmei tiilou duc e. Atuang chuzaenghmei hei ai nangniw khang tii tuang e. Mbaanv rui tiimei kumcna ai tii mak e. Nangniw lungc ryanra rio khatni ping rio. 28 'Ai tat lana guang dat puni de,' twna ai rui nangniw khou samei tei nangniw chu kan dyng the cho! Nangniw ata nzian e thei, ai aPu daeng thangc tat nimei khou hei nangniw neihla puni de; kalam thu aPu hei akhang suangc daic e. 29 Guang tangc pwkhou nangniw lwm khang mi guay hei nangniw khou salou kasuakc bam tuang e. 30 Ai nangniw khou lat sa saengc bam khang kaganv maek khe. Kalam thu mi mbaanv tuang dihsinpouc guang pw the. Kamei aruc khou kangamv maek e; 31 tiki ai aPu ta nzian e twmei mbaanv rui thay khang aPu rui kadyloumei ai piu nina di the. "Thau tho, aniu mi khou rui tat pat di kho."

John 15

Jisu Hei Luairyn Luai Ling e

1 "Ai hei luairyn luai ling e, kumna aPu hei luairyn lau taanhmeipu e. 2 Kamei rui kathai nthai makmei atuang chy guay ta tei laa ganc e, kumna kathai nthaimei chy guay ta tei nthai geic khang raplou e. 3 Ai rui nangniw khou saloumei lat tei rui nangniw ta sw-nthanlou the. 4 Nangniw akhou bam o, kumna ai ni nangniw khou bam puni. Luairyn chy tei kaluai khou bam mak e thei, karana kathai nthai ngam makmei tei kumcna, nangniw ni akhou bam mak e thei, kathai nthai ngam mak e. 5 "Ai hei luairyn luai e, nangniw hei kachy e. Akhou bammei khatni ai kakhou bammei kamei tei kathai nthai geic puni. Kalam thu ai kazauh makna nangniw ramh khat sini sw ngam mak e. 6 Akhou bam makpui mei ta, luairyn chy ganh kumc ganc e, kumna kangc kan e. Mi kumhmei chy guay tei khuam kaduaina mai khou phaiclouna ntei ganc e. 7 Nangniw akhou bam e thei khatni alat nangniw khou bam e thei, nangniw ney nii niimei ney o, nangniw khang taanclou puni. 8 Nangniw kathai nthai geihmei rui aPu hym tidaic e khatni nangniw aziap nunc e twmei lyan e. 9 Apu rui ata nzianmei kumcna ai ni nangniw ta nzian e; ai nzianmei lungc khou nangniw bam tanh tan o. 10 Ai aPu tuang latdanv guay piuna kamei rui nzianmei lungc khou bammei kumcna, nangniw ni atuang latdanv guay piu e thei, nangniw ai nzianmei lungc khou bam puni. 11 "Akhou naimei ramneila hei nangniw khou nai khang, kumna nangniw ramneila padik khang, ai rui nangniw khou mi guay hei sa tuang e. 12 Ai rui nangniw ta nzianmei kumcna, nangniw khat khat ta nzian o, twmei hei atuang latdanv e. 13 Meic gaanv khat rui kapam nunc khang theicloumei suangc daihmei ramzian maek e. 14 Ai rui nangniw ta mi kumcna sw o twna kadyloumei hei nangniw piu e thei, nangniw apam e. 15 Ai rui nangniw ta bangh kaw dat mak khe, kalam thu bangh thu kakaipouc rui taanc bammei tei thay mak e. Tiki ai rui nangniw ta apam kaw the, kalam thu ai rui aPu khou rui chumei guay tei nangniw khou dinclou the. 16 Nangniw rui ata kapah tu hamh e; nangniw tatna kathai, tingsaengzaeng nai bam nimei thay nthai khang, ai rui nangniw ta kapahlouna langlou tuang e. Kum pwkhou nangniw rui aPu khou azanc khou neymei guay kamei rui tiilou puni. 17 'Nangniw khat khat ta nzian o,' twmei hei ai rui kadyloumei latdanv the.

Mbaanv rui Karaengmei

18 "Mbaanv rui nangniw ta karaeng pw e thei, nangniw ta karaeng mak khou kaniw ata karaeng rey the twmei thay o. 19 Nangniw mi mbaanv tuang ti thei, mbaanv rui katuang ta thu nzian kan ni tuang e. Tiki nangniw ta thu ai rui mi mbaanv khou rui kapah patlou tuang di the. Kumna nangniw mbaanv tuang hamh the. Mi zaeng rui mbaanv rui nangniw ta karaeng bam tuang e. 20 'Bangh thu kakaipouc suangc daih mak e,' twna ai rui nangniw khou sa kanmei tei ningtow o. Kaniw rui ata swkasic khang sw kan the, mi tei kumcna nangniw ta ni sw puni the. Kaniw alat piu khwan e thei, nangniw lat ni piu ni tuang e. 21 Kaniw rui mi guay hei azaeng rui nangniw ruc khou swlou puni, kalam thu ata ndiu guangmeipu ta kaniw thay lam makna e. 22 Ai guangna kaniw khou salou mak khwan e thei, kaniw paap nai lak ni tuang e; tiki ntaw thu kaniw paap khou rui duak dat nuhmei chaeng maek khe. 23 Ata karaengmei tei aPu ta ni karaeng tuang the. 24 Meic gaanv khat na rui sini taanc kan makmei taanv ai rui kaniw hu khou taanclou kanmei tei, taanclou mak khwan e thei, kaniw paap nai lak ni tuang e; tiki kaniw mi tei how lana ata ni aPu ta ni karaeng the. 25 Mi hei, 'Kalam maekna kaniw ata karaeng the,' twna kaniw tuang Riakdanv khou hyloumei tei guang tangc khang the. 26 "APu khou rui ai rui nangniw khou ndiu guang nimei Nkhavloumeipu—aPu khou rui guangmei nchumhmei Bumaengc kiu guang pwkhou, kamei rui alam khou sa puni. 27 Nangniw ni alam khou sa puni, kalam thu ai taanv thau rap khou rui nangniw hei adaeng khou bam guangmei nunc e."

John 16

1 "Nangniw lwmmei khou phaysuy mak khang mi guay hei nangniw khou salou tuang e. 2 Nangniw ta sinagog khou rui alay ganc puni, kumna nangniw ta sw luaimei hei Ravguangc khang katloumei siamruai taanv e twna meicnunc rui ning nimei ganv guang puni. 3 Kaniw rui mi kumcna sw nimei hei kaniw ata ni aPu ta ni thay lamc makna e. 4 Ai rui nangniw khou mi hei saloumei lam thu, mi kumcna sw nipui ganv kaniw khang guang pwkhou, ai rui nangniw khou saloumei hei nangniw ningtow khang e.

Bumaengh Nthanmei Taanv

"Ai nangniw ta bam nchamc bampui zaeng rui, thaurey khou thu mi guay hei ai nangniw khou sa kan mak e. 5 Tiki ntaw thu ai ata ndiu guangmeipu daeng thangc tat dat puni the. Kum e tiki, 'Nang tabui thangc tat nina cho?' twna nangniw gaanv khat na sini akhou thanv mak e. 6 Mi guay hei salou tipui zaeng rui, nangniw lungc mpeyna ryanra the. 7 Tiki ai rui nangniw khou nchumhmei samei tuang e: ai tat patmei hei nangniw khang gaymei e. Kalam thu ai tat mak e thei Nkhavloumeipu tei guang ni tu hamh e. Ai tat pat e thei, ai rui kata ndiu guang puni. 8 Kamei guang e thei, paapc lam khou, ravchaptatmei lam khou khatni latzan lam khou mbaanv khou kaniw khuay ndauhlou puni. 9 Paapc lam khou kaniw nkhuai e, kalam thu kaniw akhou lwm mak e; 10 ravchaptatmei lam khou kaniw nkhuai e, kalam thu ai aPu daeng thangc tat puni the, kumna nangniw ata how dat ni tu hamh the; 11 khatni latzan lam khou kaniw nkhuai e, kalam thu mi mbaanv tuang dihsinpouc ta latzan sw kan the. 12 "Ai nangniw khou salou khang mpeyna nai e, tiki ntaw thu mi guay tei nangniw phungc ngam pw lak khe. 13 Nchumhmei Bumaengc tei guang pwkhou, nangniw ta nchumhmei khou zaylou puni. Kalam thu kamei karana kachwnphuakh khou rui ning patna tei sa ni tu hamh e, tiki kamei rui chumei tei kamei sa puni, kumna thei thangc guang punimei lam khou kamei rui salou puni. 14 Kamei rui ahym tidaic puni, kalam thu ai rui samei tei kamei rui laa lana, nangniw khou salou puni. 15 Apu khou naimei guayna tei atuang e. Mi zaeng rui, Bumaengh tei rui ai rui samei tei laa lana nangniw khou salou puni twna sa tuang e.

Lungh Ryanramei khatni Neihlamei

16 "Asaanh makmei lungc khou nangniw ata how dat mak puni the, tiki asaanh makmei tangv nangniw ata how dat puni." 17 Khoutei kaziap nunc khat khat khou sa the, " 'Asaanh makmei lungc khou kata how dat mak puni the, tiki asaanh makmei tangv kata how dat puni,' twna kamei rui aniu khou sa bammei hei tabui lana cho? 'Kalam thu ai aPu daeng thangc tat puni,' twna ni kamei sa di he. 18 'Asaanh makmei lungc khou,' twmei hei tabui ta cho? Kamei sa bammei hei aniu kabah thay mak khe!" 19 Kaniw thanv niina bammei tei thay lana, Jisu rui kaniw khou sa the, " 'Asaanh makmei lungc khou nangniw ata how dat mak puni the. Tiki asaanh makmei tangv ata how dat puni,' twna ai rui saloumei lam khou tei nangniw pang khou thanv bam tu cho? 20 Ai rui nangniw khou kaling salou tuang e: Nangniw kap puni, tiki mbaanv mei nunc neihla puni; nangniw lungc ryanra puni, tiki nangniw neihla dat puni. 21 Meicpui nunc kaniw nahbamv nipui ganv khou kaniw lungc ryanra e, kalam thu kaniw ryanra nipui ganv guang the. Tiki ngasatna tei puanc keylou pwkhou karam ryanra guay tei amuc ngam the; maansei akhat mbaanv khou puanclou the twna neihla the. 22 Mi tei kumcna, ntaw nangniw lungc ryanra e, tiki ai nangniw ta ariw dat puni. Mi khou kiu nangniw neihla puni, kumna nangniw neihla tei meic gaanv khat na rui sini nangniw khou rui laa ganc dat ngam ni tu hamh the. 23 "Mi nungc kiu nangniw akhou ramh khat sini ney dat ni tu hamh the. Ai rui nangniw khou kaling salou tuang e: Nangniw rui azanc khou aPu khou neymei guay tei kamei rui tiilou puni.a 24 Ntaw nganvmei nangniw ramh khat sini azanc khou ney mak he. Ney o, kumc e thei, nangniw neihlamei padik khang tiilou puni.

Mbaanv ta Ngammei

25 "Ai rui nangniw khou mi guay hei latgiam swna salou kan the. Tiki latgiam swna sa dat makna, aPu lam khou ndaw sa nipui ganv guang pu the. 26 Mi ganv khou kiu, nangniw azanc khou ney puni; ai rui aPu khou nangniw khang neylou puni twna sa tu hamh e. 27 Tabui cho tiki aPu rui nangniw ta nzian e. Kalam thu nangniw ata nzian e khatni ai kakhou rui guang tuang e twmei lwm the. 28 Ai hei aPu khou rui mbaanv khou guang the, kumna ntaw thu ai mbaanv ta mpatlouna aPu daeng thangc tat dat puni the." 29 Khoutei kaziap nunc rui sa the, "Ntaw thu nang latgiam sa makna ndaw sa the. 30 Nang ramh guayna thay ngam e twmei aniw thay the; nang khou thanv niimei lat guay nang thay the. Mi hei rui nang hei Ravguangc khou rui guangmeipu e twmei aniw lwm the." 31 Jisu rui sa the, "Ntaw thu nangniw lwm thah? 32 Nangniw guay kakai kakai thangc tat phak dat ngamna arana ta ganclou nipui ganv guang the. Tiki arana ta ganclou ni tu hamh e, aPu bam de. 33 Ai rui mi hei nangniw khou saloumei thu akhou bamna nangniw chuzaenghna bam khang e. Mi mbaanv khou nangniw khang ryanra ryanriumei nai puni, tiki neihla o! Ai rui mbaanv ta ngamlou kan the!"

John 17

Jisu rui Kaziap nunc khang Huayneyloumei

1 Jisu mi guay hei sa tangna, tingkauh zauc kuna sa the, "Apu, kaganv kiu guang tangc the. Nang Nac Mpouh hym tidaiclou tho, kumna mi tei rui nang Nac Mpouh rui nang hym ni tidaiclou khang e. 2 Kalam thu nang rui akhou tiiloumei guay khou ringcsuangmei tiilou khang, nang rui akhou meic guayna ruc khou ngamv tiilou the. 3 Akhat namei kalingmei Racguangc nang ta khatni nang rui ndiu guangmei Jisu Khrista ta thaymei hei ringcsuangmei kiu the. 4 Ai rui kandih khou nang hym lyanlou kan the; nang rui akhou tiiloumei taanv taanc luailou kan the. 5 Apu, mbaanv nai mak khou rui nang lev nai bammei atuang hymdaihmei tei, ntaw nang mav khou akhou tiilou dat o. 6 "Mbaanv khou rui laa patna nang rui akhou tiiloumei mei nunc khou hei ai rui nang ta tithaylou kan the. Kaniw hei nang tuang e, kumna kaniw ta akhou tiilou the. Kaniw nang lat piu the. 7 Akhou tiiloumei guayna hei nang khou rui guang tuang e twmei kaniw thay the. 8 Nang rui akhou tiiloumei lat guay tei kaniw khou tiilou kan the, kumna kaniw laa kan the. Ai hei nang khou rui guang tuang e twmei hei kaling the twmei kaniw thay the khatni nang rui ata ndiu guang tuang e twmei kaniw lwm the. 9 "Ai kaniw khang huayney tuang e; ai mbaanv khang huayney mak e, tiki nang rui akhou tiiloumei nunc khang e. Kalam thu kaniw hei nang tuang e. 10 Atuang guay hei nang tuang e, nang tuang guay hei atuang e, kumna kaniw khou rui ahym lyanlou kan the. 11 Ntaw thu ai nang khou guang dat puni the; ai mbaanv khou bam ni tu hamh the, tiki kaniw thu mbaanv khou puni he. Nthanmei aPu, nang lev ai akhat na swmei kumcna, kaniw ni akhat na sw khang nang zanc, nang rui akhou tiiloumei zanc pumtan tei rui kaniw ta gaeklou o.a 12 Ai kaniw ta bam nduangh bam saanv thu, nang zanc pumtan, nang rui akhou tiiloumei zanc tei rui kaniw ta gaeklou bam tuang e.b Ai rui kaniw ta gaeklou the, kum tina, Nthanmei Latrik khou hyloumei tei guang tangh khang, maan nimei nac mpouh na tei hamhna, kaniw gaanv khat na sini maan mak e. 13 Tiki ntaw thu ai nang khou guang dat puni the, kumna mi guay hei mbaanv khou rui sa bammei kabac kiu thu, kaniw lungc khou atuang neihla padikna nai khang e. 14 Ai rui kaniw khou nang lat tiilou kan the, kum tina mbaanv rui kaniw ta karaeng e. Kalam thu ai mbaanv tuang hamhmei kumcna, kaniw ni mbaanv tuang hamh the. 15 Kaniw ta mbaanv khou rui laa tat khang ai huayney mak e, tiki simeipu khou rui gaeklou o twna e. 16 Ai mbaanv tuang hamhmei kumcna, kaniw ni mbaanv tuang hamh the. 17 Nang lat hei nchumhmei e, mi paan tei rui kaniw ta reic patlou o. 18 Nang rui ata mbaanv khou ndiu guangmei kumcna, ai rui ni kaniw ta mbaanv khou ndiulou the. 19 Kaniw hei ni nang khang nchumhmei khou reic patlou khang, kaniw khang ai hei ni nang khang reic patlou the. 20 "Ai huayneymei hei kaniw khang na hamh e, kaniw lat khou rui akhou lwm nimei nunc khang ni e. 21 Kaniw guay akhat na sw khang neypui tuang e. Ai nang khou bammei kumcna khatni nang akhou bammei kumcna, kaniw ni anei khou bam diu o. Nang rui ata ndiu guangmei tuang e twmei mbaanv rui lwm khang, kaniw akhat na sw kan diu. 22 Nang lev anei akhat namei kumcna, kaniw ni akhat na sw khang, nang rui akhou tiiloumei hymdaihmei tei kaniw khou ni ai rui tiilou kan the. 23 Kaniw nthuihna akhat na sw khang ai kaniw khou bam khang khatni nang akhou bam khang e. Kum pwkhou nang rui ata ndiu guang tuang e khatni nang rui ata nzianmei kumcna kaniw ta ni nzian e twmei mbaanv rui thay khang e. 24 "Apu, nang rui akhou tiiloumei nunc hei ai bammei bamv khou adaeng khou bammei ta kahaw e, kumna mbaanv damh mak khou rui nang rui ata nzianpui zaeng rui akhou tiiloumei hymdaihmei hei kaniw how kan khang e. 25 He nchumhmei aPu, mbaanv rui nang ta thay mak e, tiki ai nang ta thay e, kumna nang rui ata ndiu guang tuang e twmei mi nunc hei rui thay e. 26 Nang rui ata nzianmei ramzian hei kaniw khou nai khang khatni ai kaniw khou bam khang, ai rui nang ta kaniw khou tithaylou kan the khatni tithaylou bam puni."

John 18

Jisu ta Nymmei

1 Jisu mi hei kumcna huayneyna salou tangv lana, kaziap nunc ta nduanghna Kidron duibaek kaan pat kan the. Mi khou tei pikwan akhat nai khwan e, kumna kaniw mi khou tei gut kan the. 2 Jisu ta zuanctu nimei Judas mi bamv tei thay khwan e; kalam thu Jisu khatni kaziap nunc katup sihna mi bamv khou tei guang kariu bam khwan e. 3 Amuh daihmei nunc khatni Pharisi nunc rui ndiuloumei ravkai rigaanv nunc khatni Rommei ricmei nunc ta nduanghna mi pikwan khou tei Judas guang the. Kaniw tei buy baeng, maibungc khatni mairam sin khwan e. 4 Kakhou patlou nimei guay tei Jisu thay lana tat patna, "Nangniw thow ta phu bam tu cho?" twna thanv the. 5 "Nazareth mei Jisu ta e," twna kaniw rui daw the. Khoutei, "Ai the," twna Jisu rui daw the. Jisu ta zuanctumei Judas mi pang khou tei ding bam khwan e. 6 "Ai the," twna Jisu rui sa tikhou, kaniw thei tangsyn patna kandih khou pun key the. 7 "Nangniw phu bammei kiu thow ta cho?" twna Jisu rui kaniw khou thanv dat di he. "Nazareth mei Jisu ta e." twna kaniw rui sa the. 8 " 'Ai the,' twna ai sa kan dyng the cho. Nangniw ata phu bam tuang e thei, mi baihmei guay hei thu tat kan di tho," twna Jisu rui sa the. 9 Mi hei, "APu, nang rui akhou tiiloumei gaanv khat na ta sini ai swmaan mak e," twna kamei rui sa kanmei tei guang tangc khang e. 10 Simon Pitar baeng phungc bam lana, kabaeng sat patna Tingkuh bangc ta dow the, kumna katuang baanzat nu siap tap the. Mi bangcpu zanc kiu Malkhus twna kaw e. 11 Khoutei Jisu rui Pitar khou sa the, "Nang tuang baeng tei kathuap khou lou dat kan o! Apu rui akhang tiimei buangc hei ai zangv nina hamh nah cho?"

Jisu Tingkuh Anna Daeng khou

12 Kaniw tuang rihpy rui nduanghmei Rommei ricmei nunc khatni Jihudimei rigaanv nunc rui Jisu ta nymna karakna, 13 Annas daeng khou zay guang rey the. Kamei hei, mi ganv khou tei Tingkuh sw bammei Kaiaphas now pu e. 14 Mi Kaiaphas hei, "meic geicna khang gaanv khat rui theicloumei gay e," twna Jihudimei kapy nunc khou sa kanmeipu tei e.

Pitar rui Jisu ta Thay Mak e Twna Samei

15 Simon Pitar lev baihmei ziap gaanv khat Jisu thei lay tat khwan e. Baihmei ziap gaanv khat tei Tingkuh rui zawthaymeipu khwan e. Kum lana kamei Jisu thei layna Tingkuh kai kaimav nganv guang tangc khwan e. 16 Pitar thu kapaengc thangc, kairaengv mun daeng thangc ding bam khwan e. Khoutei Tingkuh rui thaymei baihmei ziap gaanv khat tei pat datna kaimun nkhwanmei tunapui khou tei sana, Pitar ta kalungc khou nduangh gut the. 17 Kaimun nkhwanmei tunapui tei rui, "Nang ni mi pu tuang ziap akhat hamh nah cho?" twna sa the. Khoutei, "Ai kiuc hamh e," twna Pitar rui daw the. 18 Mi tei nchumei ganv khwan e, kum tina bangh nunc khatni rigaanv nunc tei maithyn mai swlouna ding huamcna nggaan bam khwan e. Pitar ni kaniw daeng khou guang dingna mai nggaan bam khwan e.

Tingkuh rui Jisu khou Lat Thanvmei

19 Tingkuh tei rui Jisu khou kaziap thow thow cho khatni kamei tabui nchamlou tu cho twna thanv the. 20 Jisu rui daw the, "Ai meic guay na khou ndauh phauna sa kan de; meic guang kaduaimei bamv sinagog khatni Ravkai khou nchamlou kan tuang de. Ai ramh khat na sini nkamhna sa zat mak e. 21 Tabui swna akhou thanv bam tu cho? Alat chumei nunc khou thanv tio. Ai rui kaniw khou tabui lat salou bu cho thanv tio; ai sa kanmei tei kaniw thay e." 22 Jisu rui mi kumcna sa tikhou, mi khou tei bammei rigaanv gaanv khat rui, "Nang tabui zaeng rui Tingkuh khou mi kumcna sa tu cho?" twna sana kaphi the. 23 Jisu rui mundawna sa the, "Ai nkhuaimei lat salou tuang nai e thei, salou o. Ai sa kanmei tei nchumh de tw e thei, tabui swna nang ata bai tu cho?" 24 Karaklou tanh tanna, Annas rui Jisu ta Tingkuh Kaiaphas daeng thangc ndiulou the.

Pitar rui Jisu ta Nuh Mak Datmei

25 Simon Pitar mai nggaanna ding bam khou kaniw rui, "Nang ni mi pu tuang ziap cho?" twna kakhou thanv the. Kamei mi tei nuh makna, "Ai kiuc hamh e," twna daw the. 26 Tingkuh bangc gaanv khat, Pitar rui kanu siap taploumeipu riangluaicmei gaanv khat rui, "Pikwan khou tei ai nang ta how kan mak nah cho?" twna sa the. 27 Kamei kiuc hamh e twna Pitar rui sa dat muai the. Mi dyng khou tei nruay khuangc the.

Jisu Pilat Daeng khou

28 Kumna laukhwan khwanzingh kaniw rui Jisu ta Kaiaphas kai khou rui guanghkhyn kai thangc zay tat the. Kaniw tei Kaanpatpui taektw tu khang kaniw ta sw-mphuam nii lamc makna, Jihudimei kapy nunc tei guanghkhyn kai lungc khou tei gut mak khe. 29 Kum tina Pilat tei kaizaeng khou patna, "mi pu hei tabui khuay naina cho?" twna kaniw khou thanv the. 30 "Mi pu hei rui simei taanv taanclou mak e thei, kata nang daeng khou zay guang bam ni tu hamh e," twna kaniw rui daw the. 31 "Kum e thei, nangniw kata zay tatna nangniw riak thei layna latzan sw tho," twna Pilat rui sa the. "Meic gaanv khat ta swluai khang aniw khang nuhlou mak e," twna kaniw rui daw the. 32 Mi hei kamei akumhmei ramthei theic puni cho twmei Jisu rui sa kasuakcloumei tei guang tangc khang e. 33 Pilat kai lungc khou gut datna, Jisu ta kawna, "Nang Jihudimei guangc kiu cho?" twna thanv the. 34 "Mi latthanv hei nang khou rui pat tu ni hamh e thei, meicnunc rui alam khou salou pwna cho?" twna Jisu rui sa the. 35 Khoutei Pilat rui mundawna sa the, "Ai hei Jihudimei e twna nang ningna cho? Nangniw zaat nunc khatni nangniw tuang amuh daihmei nunc rui nang ta akhou zay guang tuang de. Nang tabui swlou tina cho?" 36 Khoutei Jisu rui sa the, "Atuang guangcdic thu mi mbaanv tuang guangcdic hamh e. Mi mbaanv tuang khwan e thei ata nym mak khang amei nunc rui akhangv kan ni tuang de. Atuang guangcdic thu mi mbaanv tuang hamh e.!" 37 "Kum e thei nang guangh cho?" twna Pilat rui kakhou thanv the. Jisu rui mundawna sa the, "Ai hei guangh e twna nang rui sa the. Ai mbaanv khou puancloumei khatni guangmei hei nchumhmei lam khou salou khang e. Nchumhmei tuang mei kathuic rui alat nking e." 38 Khoutei, "Nchumhmei kiu tabui tei cho?" twna Pilat rui thanv the. Khoutei kapaengc thangc pat datna meicnunc khou tei sa the, "mi pu tuang khuay how mak e. 39 Kumna tat bammei riak thei layna, Kaanpatpui Ngai khou kangkai khou bammei gaanv khat ta ai mpatlou puni. Jihudimei guangc ta hei mpatlou tho cho?" 40 "mi pu ta hamh e! Barabbas ta mpatlou o," twna kaniw rui kauc the. (Barabbas hei kariak twanna taanhmeipu khwan e.)

John 19

1 Khoutei Pilat rui Jisu ta tizay tatna tibai the. 2 Rihmei nunc rui sauh pykhim kasiatcna, kapy khou runlou the. Kumna haengc ringhmei pheychuanh piulouna, 3 kadaeng khou guangna, "Kalum e, Jihudimei guangc!" twna sa the. Kumna kata kaphi the. 4 Khoutei Pilat kaizaeng khou pat datna, "Zauc lo, ai kakhuay how mak e twna nangniw khou zay pat dat tuang the." 5 Kumna Jisu sauh luai pykhim runna khatni haengc nrymmei pheychuanh piuna pat the. "Zauc tho! Mi pu ta hei!" twna Pilat rui kaniw khou sa the. 6 Amuh daihmei nunc khatni ravkai rigaanv nunc rui kata how lana, "Kata chouhthaengc o! Kata theihchouc khou thaengc luai o!" twna kauc the. "Kum e thei nangniw kata zay tatna swluai tat tho. Ai thu kakhuay how mak e," twna Pilat rui sa the. 7 Meic kangdai tei rui daw the, "Aniw tuang Riakdanv nai e; Riakdanv thei layna kamei theic nina di the. Kalam thu kamei karana kata Ravguangc Nac Mpouh e twna sa the." 8 Mi tei chu pwkhou Pilat ping ranv ranv the. 9 Kamei guanghkai lungc thangc gut datna, "Nang tabui thangc rui guang tu cho?" twna Jisu khou thanv the.

Tiki Jisu lat daw mak khe.

10 Pilat rui kakhou sa the, "Nang akhou lat daw lak nah cho? Nang ta mpat khang ni, chouhthaengh khang ni akhou ngamv nai e twmei nang thay mak nah cho?" 11 Khoutei Jisu rui sa the, "Ravguangc rui tiilou mak e thei, aruc khou nang ngamv maek e. Ata nang khou tii patloupui mei tei kapaap daic liang e." 12 Mi tei chu pwkhou, Jisu ta mpatlou khang Pilat kachaeng phu the. Tiki, "Nang kata mpatlou e thei, nang hei Kaisar pam hamh lana e! Thow pwni kamei guangh e twna sapui mei tei Kaisar ta adavpui mei e," twna kaniw rui sa the. 13 Mi lat guay hei chu pwkhou, Pilat rui Jisu ta kapaengc thangc zay patna, Ibri lat khou Gabbatha twna kawmei, Taulamdic kawmei bamv khou naimei latzan bamvpaeng khou dungc key the. 14 Mi tei nthuanh thauna Kaanpatpui Ngai nngay guang ni nungc laukhwan tingchung zaengc khou khwan e. Khoutei, "Mi hei nangniw guangc the!" twna Pilat rui kaniw khou sa the. 15 Khoutei, "Sw luai o! Sw luai o! Kata chouhthaengc o!" twna kaniw kauc the. "Ai rui nangniw guangc ta swluai o twna cho?" twna Pilat rui kaniw khou sa the. "Aniw guangc thu Kaisar de," twna amuh daihmei nunc tei rui daw the. 16 Khoutei chouhthaengh khang Pilat rui Jisu ta kaniw khou tii pat the.

Jisu ta Chouhthaenghmei

Kumna kaniw Jisu ta laa the. 17 Kamei patna katuang theihchouc puancna "Pyrou Bamv" twna kawmei bamv khou guang the. Mi tei Ibri lat khou "Golgotha" kaw e. 18 Kaniw rui mi khou tei Jisu ta chouhthaengc the. Meic baihmei gaanv nei ta ni Jisu tuang baanzat baandaw khou chouhthaengc khwan e. 19 "Nazareth mei Jisu, Jihudimei Guangc" twna hyna theihchouc khou tei Pilat rui ti daanclou khwan e. 20 Mi tei meic mpeyna rui pac khwan e. Kalam thu Jisu ta chouhthaenghmei bamv tei kaidai khou rui duh mak khwan e. Mi tei Ibri lat, Latin lat, khatni Grik lat khou hylou khwan e. 21 Khoutei, " 'Jihudimei Guangc' twna hylou rio, 'mi pu hei rui "Ai Jihudimei Guangc e" twna sa e' twna hylou o," twna amuh daihmei nunc tei rui Pilat khou sa the. 22 "Ai rui hylou kanmei tei hylou kan the," twna Pilat rui daw the. 23 Rihmei nunc tei Jisu ta chouhthaengclou lana, katuang pheybaan guay laana, kaphwam padeih khang damc patna, rihmei kathuic khang kaphwam khat khat laa the. Kaniw rui katuang alamvmei mun maekna phiancloumei pheychuanh tei ni laa the. 24 "Aniu mi hei siat kaek nangh khe; kasan khou pat patmei laa di kho," twna rihmei nunc tei kaphianh the. Mi hei, "Kaniw atuang pheybaan nzanh the, atuang pheychuanh khang san zauc the," twna Nthanmei Latrik khou hyloumei tei guang tangc khang patmei tuang the. Rihmei nunc rui mi kumna sw kan the. 25 Jisu pui, kaswanrey, Klopas now Meri, khatni Magdalamei Meri kaniw hei Jisu tuang theihchouc daeng khou ding tuanc bam khwan e. 26 Kapui khatni kamei nzianmei ziap tei kadaeng khou ding bammei ta how lana, "Pui, kamei hei nang nac the," twna Jisu rui kapui khou sa the. 27 "Mi hei nang pui the," twna kamei rui nzianmei ziap khou tei ni sa the. Mi khou tei rui kamei rui Meri ta kakai thangc nduangh tat kan the.

Jisu Theihmei

28 Ntaw thu ramh guayna luai the twmei Jisu thay lana, Nthanmei Latrik khou hyloumei tei guang tangc khang, "Ai tari e," twna sa the. 29 Khoutei, zoukhiangc lou padikmei buangc akhat mi khou tei nai bam khwan e. Langhpanv kumhmei akhat mi zoukhiangc khou tei ntinna hissop thing tang khou louna kamwang daeng khou laa guang the. 30 Jisu mi tei zangv lana, "Luai the!" twna sa the. Kumna kapy nkhum keyna kathiu mutlou kan the.

Jisu Naek khou Buy Biwmei

31 Mi tei neih key kan e thei, Sabbath pat kan nimei tingmik khwan e. Kaniw pumc Sabbath neic theihchouc khou thaengclou bam nuh mak khwan e. Mi guang nimei Sabbath tei daic dianghmei Sabbath ni khwan e. Kum tipui zaeng rui kaniw pumc tei laa key nuh khang kaniw phay sw bau khang Jihudimei kapy nunc rui Pilat khou sa the. 32 Kumna rihmei nunc tei tatna Jisu lev thaengc nchamclou bammeipu nei phay tei sw bau the. 33 Tiki Jisu daeng khou guang khou thu kamei theic tangv bam tii thena, kaphay sw bau mak khe. 34 Tiki rihmei gaanv khat rui Jisu naek khou buy rui kathuatc tina zei khatni dui luangc key the. 35 (Mi hei howpui mei rui mi lam khou hei salou the, mi kiu nangniw ni lwm khang e,a Kamei rui samei hei nchumh e, kumna kamei nchumhmei lat sa tuang e twmei kamei thay e.) 36 Mi hei, "Karou akhat na sini sw bau ni tu hamh e," twna hyloumei tei guang tangc khang e. 37 "Kaniw rui buy biwmeipu ta tei kaniw zauc puni," twna Nthanmei Latrik kabamv akhat khou ni hylou e.

Jisu ta Mbeihloumei

38 Mi tangv hei, Arimathaia Joseph rui Jisu pumc tei mbeih khang ney the. Mi pu hei Jihudimei kapy nunc ta pingna nkamhna Jisu ziap sw bammeipu e. 39 Nikodemas twna kawmeipu, kahu nungc Jisu daeng khou zingbangc khat guang kanmeipu tei ni mir lev alos lou kariumei puat kilogram tamruc dou phungcna Joseph thei lay guang khwan e. 40 Kaney Jisu pumc tei laana, Jihudimei tuang theic mbeihpui riak thei layna, kapumc tei pheynuaih rui maruai tei lev kazih binlou the. 41 Jisu ta chouhthaenghmei bamv daeng khou tei pikwan akhat nai khwan e, kumna mi khou tei meic gaanv khat na ta sini mbeihlou makmei tarou akhat nai khwan e. 42 Mi tei Sabbath mun khou na tipui zaeng rui na khou naimei tarou khou tei kaney rui Jisu pumc tei mbeihlou the.

John 20

Jisu Ringcthau Dat Kanmei

1 Neidak tuang reymei nungc, laukhwan khwanzingh tinggaanc nthan mak khou, Magdalamei Meri tarou khou guang the. Kumna tarou kaimun roukham tauc tei laa ganclou bammei ta how the. 2 Kamei Simon Pitar khatni Jisu nzianmei ziap daeng khou pak guangna, "Kaniw rui Poubauhmei ta laa tat kan the, tabui thangc lou kanna cho thay mak khe," twna sa the. 3 Pitar khatni baihmei ziap khat tei tarou thangc tei tat the. 4 Kaney tei pak tat nchamc tuang e, tiki baihmei ziap tei Pitar suangc pak huna, tarou khou tei guang rey the. 5 Kamei nkhum keyna zauc pwkhou pheynuaih tei how the; tiki kamei kalungc thu gut mak khe. 6 Kathei khou Simon Pitar pak guangna, kamei tarou lungc khou gut the. Mi khou tei pheynuaih tei keylou bammei ta how the. 7 Kapy khou kasiatcloumei pheyzai tei ni how the. Mi tei pheynuaih tei lev keylou kariu mak e, mi langv tei kazih langclou bam khwan e. 8 Mi tangv baihmei ziap, tarou khou guang reymeipu tei ni kalungc khou gut the, kumna mi tei howna lwm the. 9 Tiki kamei theihmei khou rui ringcthau dat puni twna Nthanmei Latrik khou hyloumei tei kabah thay mak he. 10 Kumna ziap nunc tei kaniw bamv thangc tat dat kan the.

Jisu rui Kata Magdalamei Meri khou Lyanloumei

11 Meri tei kapna tarou paengc khou ding bam khwan e. Kamei kapna kapna nkhum keyna tarou khou tei ntyn gut the. 12 Khoutei kauh baanchara gaanv nei phey mphwanmei piuna, Jisu pumc nziloumei bamv khou tei gaanv khat rui kapy biak thangc, gaanv khat rui kaphay biak thangc dungc bammei ta how the. 13 "Meicpui le, nang tabui swna kap bam tu cho?" twna kaney rui sa the. "Kaniw rui apoubauhmei ta laa tat kan the, kata tabui thangc lou kanna cho, ai thay mak khe," twna kamei rui daw the. 14 Khoutei kamei thei karih pat pwkhou, Jisu ding bammei ta how the; tiki mi tei Jisu e twmei kamei thay mak khwan e. 15 "Meicpui le, nang tabui swna kap bam tu cho? Nang thow ta phu bam tu cho?" twna Jisu rui kakhou sa the. Mi pu tei pikwan taanhmei lana khuangh e twna ningna, "Kaipouc, nang rui kata laa tat tuang e thei, kata tabui thangc lou kan tu cho dinclou o, ai kata laa dat kan ni e," twna sa the. 16 Khoutei Jisu rui, "Meri" twna kaw the. Kamei karih patna, "Rabboni" twna Ibri lat rui sa the. (Mi kabac kiu thu, "Dinhpouc" twna e.) 17 Jisu rui kakhou sa the, "Ata kahi rio, ai aPu daeng thangc ku mak he. Nang achana nunc daeng thangc tei tatna, aPu khatni kaniw Pu, aRacguangc khatni kaniw Racguangc daeng thangc ai ku dat puni the twna kaniw khou salou ti tho." 18 Kumna Magdalamei Meri tei tatna kamei rui Poubauhmei ta how kanmei khatni Poubauhmei rui kakhou saloumei guay tei ziap nunc khou raclou the.

Jisu rui Kata Kaziap nunc khou Lyanloumei

19 Mi neidak tuang reymei nungc zingbangc tei, ziap nunc tei, Jihudimei kapy nunc ta ping lana, kaikhamv mbanghlouna kainung khou bam khwan e. Khoutei Jisu guangna kaniw pang khou dingna, "Nangniw khou chuzaenghmei nai diu!" twna sa the. 20 Mi hei salou lana kabaanc kaney lev kanaek tei kaniw khou lyanlou the. Poubauhmei ta how lana ziap nunc tei neihlamei padik the. 21 Khoutei, "Nangniw khou chuzaenghmei nai diu! Apu rui ata ndiuloumei kumcna, ai ni nangniw ta ndiulou the," twna sa dat e. 22 Khoutei kaniw khou kathiu laa mbunlouna, "Bumaengh Nthanmei laa tho," twna sa the. 23 "Nangniw rui meicnunc paap kuaklou e thei, kaniw paap tei kuaklou the; nangniw rui kuaklou mak e thei, kaniw paap tei kuak mak e," twna sa the.

Jisu khatni Thomas

24 Ziap ruhna kanei pang khou gaanv khat, twmei thu Naphinhmei Thomas tei ziap nunc daeng khou Jisu guang khou tei bam mak khwan e. 25 Kum tina, "Aniw Poubauhmei ta how the!" twna baihmei ziap nunc tei rui kakhou sa the. Tiki, "Kabaanc khou thingmuy zam tei how mak e thei khatni mi zam khou tei khatni kanaek khou tei abaanc kahilou tangh mak e thei, ai lwm mak e," twna kamei rui kaniw khou sa the. 26 Zaeng tachat tangv, ziap nunc tei kainung khou bam dat khwan e, kumna mi pang khou tei Thomas ni bam khwan e. Kaikhamv guay tei taanlou de, tiki Jisu guangna kaniw pang khou dingna, "Nangniw khou chuzaenghmei nai diu!" twna sa the. 27 Khoutei Jisu rui Thomas khou sa the, "Mi khou hei nang baanc kahi tho, kumna abaanc ta hei zauc tho; nang baanc haemv patna anaek khou hei kahi tho. Lwmsi dat ri tho, lwm tho!" 28 Khoutei, "Apoubauhmei! A Racguangc!" twna Thomas rui sa the. 29 "Nang ata howpui zaeng rui lwm tu cho? Ata how makna lwmmei nunc tei sangaymei nunc e!" twna Jisu rui kakhou sa the.

Mi Gaychamv hei Hymei lam

30 Mi buk khou hylou makmei, Jisu rui kaziap nunc hu khou taanclou kanmei sw nchinmei taanv mpeyna nai he. 31 Tiki Jisu hei Khrista, Ravguangc Nac Mpouh e twmei nangniw lwm khang, kumna lwmmei paan rui nangniw kazanc khou ringhmei laa khang mi guay hei hylou tuang e.

John 21

Jisu rui Kata Ziap Gaanv Chanei khou Lyanloumei

1 Mi tangv hei, Jisu rui kata kaziap nunc khou Tiberia Zeiclat khou mi kumcna lyanlou dat khwan e. 2 Simon Pitar, Naphinhmei Thomas, Galili tuang Kanamei Nathanael, Zebedi nac nei khatni baihmei ziap gaanv nei bam nchamc bam khwan e. 3 Khoutei, "Ai khav nym tat ni he," twna Simon Pitar rui kaniw khou sa the. "Aniw ni nang thei lay tat ni," twna kaniw rui sa the. Kumna kaniw hih tuangcna tat the. Tiki mi nungc zingbangc tei kaniw ramh khat na sini nym tow mak khe. 4 Tinggaanc pat pwkhou, Jisu duikhuangc khou tei ding bam khwan the. Tiki mi tei Jisu e twmei ziap nunc tei thay mak khwan e. 5 Khoutei, "Alauc nunc, nangniw khang khav khat sini maek nah cho?" twna Jisu rui kaniw khou sa the. "Maek e," twna kaniw rui daw the. 6 "Nangniw tuang chiak tei hih tuang baanzat biak thangc tei phaic key tio, asaekc nym tow puni," twna Jisu rui sa the. Kumna kaniw chiakc tei phaic key the. Khoutei khav mpeyna manclouna chiakc tei kaniw zay tat dat ngam mak khe. 7 "Mi hei Poubauhmei de!" twna Jisu nzianmei ziap tei rui Pitar khou sa the. Mi tei Poubauhmei e twmei chu pwkhou, Simon Pitar katuang thiula nuna dui khou cham key the. Kalam thu kamei pumtang bam khwan e. 8 Baihmei ziap nunc tei khav manc padikloumei chiak tei zayna hih khou tei rui dui tin khou pat the. Kalam thu kaniw duikhuangc khou rui duh mak e, chowbuk phay nei dou na de. 9 Kaniw duikhuangc khou tei tat pat pwkhou, maithyn mai ruc khou khav lev ntyan asaekc lou bammei ta how the. 10 Khoutei, "Nangniw ntaw nym kanmei khav tei asaekc laa guang o," twna Jisu rui kaniw khou sa the. 11 Simon Pitar hih khou tei kuna, khav rui padikmei chiak tei duikhuangc khou zay pat the. Mi khou tei khav daihmei rana, phay khat na riaknguna kathumh rap khwan e. Kum sini kaniw tuang chiak kaek mak e. 12 "Guang tu tho," twna Jisu rui kaniw khou sa the. "Nang thow cho?" twna kaniw gaanv khat na sini thanv bauh mak khwan e. Mi tei Poubauhmei e twmei kaniw thay the. 13 Jisu guangna ntyan tei laana kaniw khang tii the; khav tei ni tii muai the. 14 Mi hei Jisu kamei ringcthau datmei tangv kaziap nunc khou lyanlou kathumhmei e.

Jisu khatni Pitar

15 Kaniw tu tangv pwkhou, "John nac mpouh Simon, mi guayna khang suangc nang ata nzian daih?" twna Jisu rui Simon Pitar khou sa the. "Ngguay, Poubauhmei, ai nang ta nzian e twmei nang thay e," twna kamei rui daw the. "Alauziu nac nunc ta makuatlou o," twna Jisu rui kakhou sa the. 16 "John nac mpouh Simon, nang ata nzian daih?" twna luan neimei swna Jisu rui kakhou sa the. "Ngguay, Poubauhmei, ai nang ta nzian e twmei nang thay e," twna kamei rui daw the. "Alauziu guay ta gaengclou o," twna Jisu rui kakhou sa the. 17 "John nac mpouh Simon, nang ata nzian daih?" twna luan thumhmei swna Jisu rui kakhou sa the. "Nang ata nzian daih?" twna thanv luan kathumh tikhou Pitar kalung katuakc thau the. Kumna, "Poubauhmei, nang ramh katana thay e; ai nang ta nzian e twmei nang thay e," twna kamei rui sa the. Jisu rui kakhou sa the, "Alauziu nunc ta makuatlou o. 18 Ai rui nang khou kaling salou tuang e: Nang alauc douc tei nang tuang sianlangv nang rana langvna, nang rui tat nii niimei bamv thangc tat e; tiki nang gaanvdaih key pwkhou, nang baanc kanei laemv ntyng patna meic baihmei rui nang tuang sianlangv langvlouna, nang tat nii makmei bamv thangc zay tat puni." 19 (Mi hei rui samei thu, Pitar kamei akumhmei ramthei theicna, Ravguangc hym tidaiclou puni cho twmei sa tuang e.) Mi tangv, "Athei lay o!" twna Jisu rui kakhou sa the.

Jisu khatni Baihmei Ziap Gaanv Khat

20 Pitar karih pat khou, Jisu nzianmei baihmei ziap—twmei thu, zingbangc nap tu tupui ganv khou tei, Jisu daeng khou dungc tuancna, "Poubauhmei, nang ta zuanctu nimeipu kiu thow cho?" twna thanv kanmeipu ta tei kathei khou how the. 21 Khoutei, "mi pu ta hei thu tabui sw puni?" twna Pitar rui Jisu khou thanv the. 22 "Ai guang mak saanv kamei ringc bam khang ai ningmei e thei, mi tei rui nang khang tabui sw buna cho?" twna Jisu rui kakhou daw the. 23 Kum tina, mi ziap tei theic ni tu hamh e twna chana punav pang khou tei rac lik sikh sik bam khwan e. Tiki Jisu rui samei thu kamei theic ni tu hamh e twna sa mak e; tiki "Ai guang mak saanv kamei ringc bam khang ai ningmei e thei, mi tei rui nang khang tabui sw buna cho?" twna sa tuang de. 24 Mi ziap kiu, mi guay hei sa bammeipu khatni hyloumeipu hei the. Kumna kamei rui sa bammei hei nchumhmei e twmei aniw thay e.

Latriaw

25 Jisu rui taancloumei baih baihmei mpeyna nai di he. Mi guayna tei akhat khat swna hylou e thei, hyloumei latrik buk tei mi mbaanv khou hei lou chan lak e twna ning e.