Akang Yu
1 Adikehdi Yu licho, ko Yu tsü Tsingrangba te licho, ko Yu tsü Tsingrangba thsacho. 2 Adikehdi abi Tsingrangba te licho. 3 Abi khu Tsingrangbanü lüpcho külüpcho; athricho la tusü abi müzehpü mükülüp. 4 Ko akang tsü amüi tsurü atsingse licho. 5 Atsingse tsünü amala vire, ko ama tsünü hütsü khodesü mümehsohre. 6 Tsingrangba chahnü müthehcho nyitsarü khüdu, anengnü Johan licho. 7 Apümnü yusi tsü yuchi yudsisohnung nyitsarü te atsingse nengdang tsü yonung müthehcho. 8 Abi atsingse tsü mah; abi atsingse nengdang yonung rocho. 9 Yuje atsingse tsü limih la ro amüi tsurü atümung chah vijüre. 10 Yu tsü limih la licho, ko abi khu limih tsü külüpcho, ta liminü abi mümüdhecho. 11 Abi apu limih yang rocho, ta anyitsarünü abi mükhyüchocho. 12 Ta abi khyüchorü atümung, sürünü abi nengla yudsicho, arüh khyang abinü Tsingrangba tsurü kangnung zii jücho; 13 sürü ashüh mahkhang shutsa mahkhang nyitsarü lümcho la müsuro ta Tsingrangba chahnü surocho. 14 Yu tsü nyitsarü kangpü achomang ko yujenü jeng Ihsa yola licho; Au chahnü Atsudhre ahechi tsü Ihsanü nguko. 15 Johan-nü abi nengdang chocho. Abinü züde yocho, “Abi I khanglang rore, ta abi I tenü adiuba, tunüo abi ‘Ih müsuro denü lijungcho ko sü nengdang Ihnü yocho, abi tsü hivie.’ ” 16 Abi akükyüh achomang lanü Ihsa atümungnü amüwa khüdu khanglang khüdu nguko. 17 Tsingrangbanü Yuzeng tsü Mosa khu jücho, ta achomang ko yuje tsü Jisu Khrista khunü rocho. 18 Sünüsü Tsingrangba khodesü müngudheng. Ta atsudhre, sü Au dreng chah liro, abinü mishajücho.
Baptijüba Johan Yusi
19 Jerusalem la Jihudarü zirünü Johan yanglang abi te, “Nüh süo?” pü tsingdhengnung Bebürü ko Levirü khürü müthehcho. 20 Johan-nü lalingnung mütütohnyünyeh, ta mishanü tsitsa yocho, “Ih Mesia tsü mah.” 21 Arühnü tsingcho, “Khang, nüh süo?” “Nüh Elija mah-o?” Johan-nü lalingcho, “Ih mah.” Arühnü tsingcho, “Nüh azikehrü tsü mah-o?” Abinü lalingcho, “Mah.” 22 Arühnü tsingcho, “Khang nüh sünang ihrü te young. Sürünü ihrü rosohcho arüh yang alalingba khüdu hiwünungbae. Nühnü nüpu nengdang tu yonung?” 23 Johan-nü Isaya azikehrü yu hironü lalingcho, “Lipilih la züdeba yuva tsü Ih, Abüdongba lang tsü müchongkhüti külüpm!” 24 Hütsüde Farisirünü müthehba yusi hirü tsünü Johan te tsingdhengcho, 25 “Nüh Mesiasü, Elijasü, ko azikehrüsü mahkhang, nühnü tuepü baptijüro?” 26 Johan-nü lalingcho, “Ihnü kih la baptijüre, ta nührünü mümüdhepü nührü yola nyüh khüdu lile. 27 Abi I khanglang tsehle, Ihlü abi jingkhüm lehchehnung mii müdekheng.” 28 Hiri apüm Bethany la Johan-nü baptijo rachiba Jordan yongkhi khüulang tikehcho.
Tsingrangba Sanza
29 Nyümong khüu tsü, Johan-nü Jisu abi yanglang rochi ngu yocho, “Alimih münyi hitsibong Tsingrangba Sanza tsü dheng! 30 ‘Abi I khanglang tsehle, ta abi I tenü adiuba, tunüo abi Ih müsuro denü lijungcho ko sü nengdang Ihnü yocho, abi tsü hivie.’ 31 Abi sü donang Ihnü mii mümüdhe, ta abi Israelrü khyang müdhesohnung nengdang Ihnü kih la baptijo rocho.” 32 Johan-nü yuzi hi jo yocho: “Anbü tsü mümüdhrü kyo ninglangnü jüro abi chah püm Ihnü ngucho. 33 Ihnü ade yingcheh hütsü abiepü mümüdhe, ta Tsingrangba sünü kih la baptijünung Ih müthehcho, abinü I te yocho, ‘Anbü tsü jüro nyüh khüdu chah püm nühnü ngunung; hütsü sünü Anbü Amüsa la baptijüro abi tsü lile.’ 34 Johan-nü yocho, Ihnü hütsü nguko ko Ihnü nührü te abi Tsingrangba Tsurüepü yore.”
Akhudiba Jisu Monoti
35 Nyümong khüu Johan hütsüla apu mono anyüh yola yacho, 36 ko abinü Jisu tsicho ngu yocho, “Tsingrangba Sanza tsü dheng!” 37 Mono anyüh tsünü abinü yocho tsü yuchi Jisu khanglang iiwücho. 38 Jisunü ximüla arüh abi khanglang rocho ngu yocho, “Nührü tu yangchiro?” Arühnü lalingcho, “Nüh khüde liro, Rabbi?” (adüzü “Adorü”). 39 Abinü lalingcho, “Rung ko dheng.” (Hütsü anyüzehlang müyü mücheh licho.) Ko arüh abi iiwücho, ko abi lichah tsü ngucho. Hütsüla nyümong chang abi yola licho. 40 Anyüh yola khüdu tsü Simon Peter ani Andreu thsacho. 41 Akhudiba abinü amung Peter ngu abi te yocho, “Ihrünü Mesia tsü nguko.” (adüzü “Khrista”) 42 Hütsüpü abinü Jisu yanglang Simon nowücho. Jisunü abi chah dheng yocho, “Nüh Johan tsurü Simon, ta nü te Kefas pü dsinung.” (Adüzü “lung”)
Jisunü Filip ko Nathanael Dsicho
43 Nyümong khüu Jisunü Galil lang wünung dhrongchehcho. Abinü Filip shiro abi te yocho, “I yola rung!” 44 (Filip tsü Andreu ko Peter nyüh liba Bethsaida town lanü licho.) 45 Filipnü Nathanael shiro abi te yocho, “Mosanü Yuzeng vakha la ko azikehrütinü sü nengdang thrahcho hütsü ihrünü nguko. Abi Nazaret lanü Josef tsurü Jisu.” 46 Nathanaelnü tsingdhengcho, “Nazaret lanü mii lango atsa chürochehnung mah-o?” “Rung ko dheng,” Filipnü lalingcho. 47 Khode Jisunü Nathanael abi yangro ngucho, abinü abi nengdang yocho, “Hila Israelrü khung khüdu lile; abi chah tu mülang müle!” 48 Nathanaelnü abi te tsingdhengcho, “Nühnü khüta Ih müdhero?” Jisunü lalingcho, “Filipnü nüh müdsiede, nüh ngurüsih dong pohki pümdenü, Ihnü nüh nguchoe.” 49 Nathanaelnü lalingcho, “Adorü, nüh Tsingrangba Tsurü! Nüh Israelrü Yangthsaba!” 50 Jisunü yocho, “Ihnü nüh ngurüsih dong pohki püm nguchoepü yochonü nühnü yudsirü mah-o? Hi tenü dee adiu nühnü ngunung!” 51 Ko abinü arüh te yocho, “Ihnü nührü te yutsatsa yore: Ning khangthrupü Tsingrangba riwürüti Nyitsarü Tsurü michah jüroli-tuwüli ko nührünü ngunung.”
Kana la kukangba
1 Asangu nyümong Galil la Kana yang kukangba thsüti khüdu licho. Hütsüla Jisu atpasü licho, 2 ko Jisu ko amonotisü thsüti la tsü dsiyohcho. 3 Khode cikih khyükhangcho, Jisu atpanü abi te yocho, “Arüh cikih thümpehko.” 4 Jisunü lalingcho, “Tu nguchinung nühnü I te müyobae, Ih akyang müchie.” 5 Hütsüpü Jisu atpanü kulirüti te yocho, “Abinü nührü te tu yonang nguching.” 6 Jihudarü ayahmütsah yuzeng licho, ko hütsü nengdang lung di dhüroh, khüdu la liter thsih khüdu yohba licho. 7 Jisunü kulirüti te yocho, “Hiri di la tsü kih lieng.” Arühnü jengkhang liicho, 8 hütsüpü abinü arüh te yocho, “Kih tsü aza khacheh khehthsithsaba khyang hiwüng.” Arühnü kih khüi 9 adelü cikih kangsohpü liba kih tsü arühnü abi yang hiwücho ko abinü hütsü müjangdhengcho. Hiba cikih tsü khüdenü rocho hütsü abinü mümüdhe (ta, kulirü sürünü kih tsü khachehcho arünülü müdhecho); achotsü abinü kukangbong tsü dsinü 10 abi te yocho, “Ledenü cikih akyüba tsü akhu chahlare ko shirü tsü kükyo yongpü du amükyü tsü chahlare. Ta nühnü ade yingcheh cikih akyüba tsü yohpüko.” 11 Jisunü hiba akhudiba thsayahiya tsü Galil lih Kana la nguchicho; hütsüla abi ahechi mishacho, ko monotinü abi chah yudsicho. 12 Hütsüpü, Jisu ko atpa, anirüti ko amonoti Kapernaum lang wü hütsüla akhikyah chah licho.
Jisu Amübükuh lang Wücho
13 Hütsü Phungkhu Thsüti bekhüm chihcho, hütsünü Jisu Jerusalem lang wücho. 14 Amübükuh la tsü misü san ko, kuh-mümüdhrü irü, ko thsi mülihrü arüh tsingthsang chah püm abinü ngucho. 15 Hütsünü abinü axüpyonü xüp amübükuh lanü kanglungrü tsü iipehcho; abinü thsi mülihrü tsingthsang dümtsujo thsi zingthohpehjücho; 16 ko abinü kuh-mümüdhrü irü te yuzeng jo yocho, “Hiri hilanü hitsieng! I U kuh shithsabhüleh chah tükangsoh!” 17 “Nü kuh nengdang mükhyahba tsünü, O Tsingrang, michangnü kyo Ih trüpre, pü amüsa yunü yocho monotinü lümchehcho” 18 Jihudarü yangbenü tsingdhengcho, “Nü chah hiri nguchinung tase lilepü müdhenung nühnü ihrü te tu thsayahiya nguchinung?” 19 Jisunü lalingcho, “Amübükuh hi tphünahng, ko nyümong asang la Ihnü thali thsachehnung.” 20 Arühnü abi te tsingdhengcho, “Nühnü nyümong asang la hi thali thsachonung ang?” “Hiba amübükuh hi kang yürepü dhüroh khyo thsachoba lile!” 21 Ta Jisunü yoba amübükuh tsü apu fü nengdang chocho. 22 Hütsünü khode abi asücho lanü kangchehli rocho, hütsüde du monotinü abinü chocho lümchehcho, ko arühnü amüsa yunü ko Jisunü tu yocho hütsü yudsicho.
Jisunü Nyitsarü Saying Müdhecho
23 Phungkhu Thsüti bekhyah Jisu Jerusalem la lide, abinü thsayahiya nguchicho ngu adrongnü abi chah yudsicho. 24 Ta Jisu apunü arüh chah longmülangcho, tunüo abinü arüh atümung müdhecho. 25 Sünüsü abi te arüh nengdang yonung müdhsütahcho, tunüo arüh lasih la tu liro apunü müdhecho.
Jisu ko Nikodemus
1 Farisirü mülung lanü Jihudarü langnürü khüdu anengnü Nikodemus licho. 2 Romang khüdu abinü Jisu yanglang wüpü abi te yocho, “Adorü, nüh Tsingrangbanü müthehcho adorü khüduepü ihrünü müdhere; tunüo Tsingrangba müzehkhang, nühnü nguchiba thsayahiya hi sünüsü münguchicheh.” 3 Jisunü lalingcho, “Ihnü nü te yutsatsa yonung: anyüpili müsurokhang sünüsü Tsingrangba yanglih müngunung.” 4 Nikodemusnü tsingdhengcho, “Azirü khüdu khüta anyüpili suronung?” “Abinü atpa mi la anyüpili züdupü suronung mükoh!” 5 Jisunü lalingcho, “Ihnü nü te yutsatsa yore,” “Kih ko Anbü la müsurokhang, sünüsü Tsingrangba yanglih la züdunung mükoh. 6 Shutsa lanü tu suronang hütsü shutsa, Anbü lanü tu suronang hütsü Anbü. 7 Nüh anyüpili asi kang surobaepü Ihnü nü te yochonü nüh tünyemüyang. 8 Nyübong khüilang fünyünang hütsülang füre; nühnü yuva tsü yuchire, ta hütsü khüdenü roro ko khüilang tsiro hütsü mümüdhe. Anbü lanü surorü atümung hütsü roh-i lile.” 9 Nikodemusnü tsingdhengcho, “Hi khüta akohnung?” 10 Jisunü lalingcho, “Nüh Israel la adorü atsa khüdu, ko nühnü hi mümüdherü ang? 11 Ihnü nü te yutsatsa yore: Ihrünü tu müdhero hütsü chore ko ihrünü tu ngucho hütsü nengdang yuzi jüre, ta nührü sünüsü ihrü yusi mükhyüchonyüre. 12 Ihnü nührü te hiba limih nengdang yonye nührünü müyudsikhang, Ihnü nührü te ninglang nengdang yode nührünü khüta yudsinung? 13 Ko nyitsarü Tsurü, sü ninglangnü jürocho, abi chah khu sünüsü ninglang mütuwodheng.” 14 Mosanü tu khüta lipilih la imüyeng mürü dhikehcho, hütsü roh-i Nyitsarü Tsurüsü dhikehbae. 15 Hütsüeko Nyitsarü Tsurü chah sürünü yudsinang lede akang ngunung. 16 Tunüo Tsingrangbanü limih khura müichonü sürünü abi chah yudsiro müsünung, ta lede akang ngunung abinü apu amüi tsurü jücho. 17 Tunüo limih mülang jünung nengdang mah, ta abi khu limih khümchonung nengdang Tsingrangbanü apu tsurü limih yang müthehcho. 18 Sürünü Atsudhre chah yudsiro abi mümülangjüre; ta sünü müyudsiro abi mülangjopehko, tunüo abinü Tsingrangba amüiba tsurü chah müyudsi. 19 Yukhaba tsü hiroh-i khare: atsingse tsü limih la roko, ta nyitsarünü atsingse tenü ama du müire, tunüo arüh nguchi tsü amütsa. 20 Sünü amütsa nguchiro abinü atsingse thrünyire ko atsingse yang müronung, tunüo abinü amütsa nguchiti tsü müngusohnyüre. 21 Ta sünü tu yuje hütsü nguchiro abinü nguchiba tsü Tsingrangba te ayocho nyi nguchicho ngusohnung abinü atsingse yang rore.
Jisu ko Johan
22 Hütsüpü, Jisu ko amonoti Judea lih lang rocho ko hütsüla arüh te azachah li baptijücho. 23 Johansü Salim amünyeh Aenon la baptijo licho, tunüo hütsüla kih thangchi licho. Nyitsarünü abi yang wücho ko abinü arüh baptijo licho. 24 (Hi Johan mürangyoh-ede thsacho.) 25 Johan mono khürünü Jihudarü khüdu te ayahmütsah nengdang rehta licho. 26 Achotsü arühnü Johan yanglang wünü yocho, “Adorü, Jordan khüulang nü te liba nyitsarü, sü nengdang nühnü chocho, hütsü nühnü mülümkeh-o? Dheng, abinü baptijüre ko nyitsarü atümungnü abi yang wole!” 27 Johan-nü lalingcho, “Tsingrangbanü müjükhang, süsü tu linung mükoh. 28 ‘Ih Mesia tsü mah, ta abi müngu Ih tsehleh müthehchoe’ pü Ihnü yocho I yuzi nührübürü lile. 29 Axengtpü tsü kuthribong yo; ta kuthribong shangrü, sü abi müshüm yapü abi yu nyiro, abinü kuthribong yuva yuchide künyangre. Hütsü roh-i I akünyang kükyüsohko. 30 Abi dinungbae; ta Ih sümnungbae.”
Ninglangnü Roba
31 Sü ninglangnü roro abi atümung tenü adiuba. Sü alimih lanüo abi limih yo ko abinü limih nengdang chore, ta sü ninglangnü roro abi atümung tenü adiuba. 32 Abinü tu ngucho ko yuchicho hütsü nengdang yore, ta sünüsü abi yusi mükhyüchore. 33 Ta sünü abi yusi khyüchoro hütsünü Tsingrangba tsü yuje-epü müdhere. 34 Tsingrangbanü müthehbong tsünü Tsingrangba yu chore, tunüo Tsingrangbanü abi khyang Anbü ajeng jüre. 35 Aunü atsudhre müire ko lüpcho abi khehla yohjüko. 36 Sünü atsudhre chah yudsiro abi müchangkaba akang lile; sünü atsudhre te münyiro, abinü akang müngunung, ta Tsingrangba rihlong abi michah linung.
Jisu ko Samarialarü
1 Johan tenü Jisunü adrongu mono kangsoh baptijülepü Farisirünü yuchicho. 2 (Amonotinü baptijücho chah khu; Jisu apu nülü süsü mübaptijü.) 3 Achotsü khode hütsü roh-i chochicho tsü Jisunü yuchicho, abinü Judea pehjüpü Galil lang thali wücho; 4 ko hütsülang wünung tsü Samaria bong tsinung kangcho. 5 Achotsü Jakobnü atsudhre Josef khyang jüba lih shündhün Samaria la yangdi khüdu anengnü Saikar la abi rocho. 6 Hütsüla Jakob kihkong licho, ko Jisu lang tsehchonü kyahsehpü, kihkong te tsü pümcho. Hütsü nyüthung koh thsacho. 7 Samarialarü khüdu kih khanung rocho, ko Jisunü abükyü te yocho, “I khyang kih ayongnung khülo.” 8 (Amonoti yangdi lang tsuyongnung lihnungba wüpü licho.) 9 Khingkutpü tsünü lalingcho, “Nüh Jihudarü khüdu ko Ih Samarialarü khüdu, nühnü khütapü I te ayongnung chingro?” Tunüo Jihudarünü Samariarü te tsanghi mütsutare. 10 Jisunü lalingcho, “Tsingrangbanü tu jüro ko nü te ayongnung chingba tsü nühnü müdherelanglü, nühnü abi te chingbae, ko abinü nü khyang akangnung kih jübae.” 11 Khingkutpü tsünü yocho, “Adirü, nüh yükohsü müli ko kihkong hi asoh-e. Khang nüh khüdenü akangnung kih tsü ngunung he? 12 Hiba kihkong hi ihrü jümürü Jakobnü ihrü khyang jücho; abi ko abi tsurüti ko abi thsitsurüti atümungnü yongcho. Nüh Jakob tenü adiu mah-o?” 13 Jisunü lalingcho, “Sürünü hiba kih yongro thali xonung, 14 ta sürünü Ihnü jüba kih yongro khodesü müxonung. Ihnü jünungba kih tsünü abi chah kihnatung kangnung, khüi khu abi khyang akangnung kih ko müchangkaba akang jünung.” 15 Khingkutpünü yocho, “Adirü, Ih müxonung ko hila kih khanung müronungthsa I khyang hütsüba kih tsü khülo!” 16 Jisunü abükyü te yocho, “Wüng ko nü nii dsipü thali rung.” 17 Abükyünü lalingcho, “Ih Inii müle.” Jisunü lalingcho, “Inii mülepü nühnü yuje yoko. 18 Nüh nyüh münga kuhla xengko, ko ade nü te liba tsü nü nii mah.” Nühnü ade yuje tsatsa yoko. 19 Khingkutpünü yocho, “Nüh azikehrü khüduepü Ihnü ngure.” 20 “Ihrü jümürü Samariarünü hiba zong la Tsingrangba mübo rocho, ta nührü Jihudarünü Jerusalem la du Tsingrangba mübübaepü yore.” 21 Jisunü abükyü te yocho, “Khingkurü, I yu yudsing, nührünü hiba zong la nye, Jerusalem la nye Au mümübünung shikhe ronung. 22 Nührü Samariarünü sü mübüro hütsü mütsüp; ta ihrü Jihudarünü sü mübüro hütsü müdhele, tunüo akangcheh tsü Jihudarü khu rore. 23 Ta yuje mübürütinü anbü la ko yuje la Au mübünungthsa bekhyah tsü tsehle, ko hütsü ade lile, tunüo Aunü abi mübürü hitari yangchire. 24 Tsingrangba tsü Anbü, ko sürünü abi mübonang Anbü la ko yuje la mübünung athsalang.” 25 Khingkutpünü abi te yocho, “Mesia ronungepü Ihnü müdhele, ko khode abi ronang, abinü ihrü te lüpcho yonung.” 26 Jisunü lalingcho, “Nü te sünü chotaro hütsü abi-e.” 27 Hütsüde Jisu monoti tsü thalicho, ko khingkurü khüdu te abinü chota yacho ngu arühnü nyemüyangcho. Ta sünüsü abükyü te, “Nüh tu khyünyüro? mahkhang Tuepü nüh abi te chotaro? pü müyochehcho.” 28 Hütsüpü khingkutpü tsünü abükyü kih shinga pehjüpü yangdi lang wücho, ko nyitsarüti te yocho, 29 “I nguchicho lüpcho yochehba nyitsarü hi ro dheng. Hi Mesia tsü mah-o?” 30 Achotsü arüh atümung yangdi pehjüpü Jisu dhengnung wücho. 31 Hütsüde tsü monotinü, “Adorü, yangtsung,” pü kihchicho. 32 Ta abinü lalingcho, “Nührünü mümüdheba I tsuyongnung lile.” 33 Achotsü monotinü arühbürü chotacho, “Abi khyang khüroronü tsuyongnung hirojücho mah-o?” 34 Jisunü arüh te yocho, “I tsuyongnung tsü,” “I riwüsohba yocho nyinung ko I khyang jücho nguchi thüm nguchinung. 35 ‘Choo müyü lipü maxa kyang chinung’ pü nührü choyoh yu khüdu lile. Ta Ihnü nührü te yore, nührünü tsungmüsu dheng, luh tsü nyithohko ko maxakyang chihko! 36 Sünü xaro abinü amii ngure, ko lede akang nengdang asih khyübülungre; hütsüta ashuba ko axaba anyüding künyangtare. 37 ‘Nyüh khüdunü shure ko aparü khüdunü xare’ pü choyoh yunü yoba tsü yuje. 38 Nührünü müyuthsahcho xanung Ihnü nührü müthehcho; aparünü nguchicho ko arüh nguchicho lanü nührü jingchocho.” 39 “Ihnü tuturü nguchicho lüpcho abinü I te yoko, ko khingkutpünü yuzi jüde, hütsüba yangdi la Samariarü adrongnü Jisu chah yudsicho.” 40 Hütsünü khode Samariarü abi yang rocho, abi arüh yola lieng pü arühnü kihchicho, ko abi hütsüla nyümong anyüh mungcho. 41 Abi yusi khunü aparü adrongnü yudsicho, 42 ko arühnü khingkutpü te tsü yocho, “Nühnü yochonü mah, ta ihrübürünü yuchicho khu ade ihrünü yudsire, ko yuje abi tsü limih Kangchehjübaepü ihrünü müdhele.”
Jisunü Adirü Khüdu Tsurü Kyangjüre
43 Hütsüla nyümong anyüh mungpü, Jisu Galil lang wücho. 44 Tunüo apunü yocho, “Azikehrü tsü palu lih lalü jengreng müjüre.” 45 Khode abi Galil lang rocho, hütsüla lirünü abi khyüchocho, tunüo Jerusalem la Phungkhu Thsüti la tsü arühsü wü zehcho ko thsüti shikhe la abinü nguchicho apüm arühnü ngucho. 46 Hütsüpü Jisunü Galil la liba Kana yang khüde abinü kihnü cikih kangsohcho hütsülang abi thalicho. Hütsüla adirü khüdu licho sü tsurü Kapernaum la füthsa licho. 47 Khode abinü Jisu Judea lanü Galil lang rocho yuchicho, abinü abi yang wücho, ko abi te wü Kapernaum la sünungthsa liba atsudhre tsü kyangjüng pü kihchicho. 48 Jisunü abi te yocho, “Thsayahiya ko anyemüyangnung münguchidelü nührü sünüsü müyudsinung.” 49 Adiba tsünü yocho, “Abüdongba, I tsurü müsü denü I yola rung.” 50 Jisunü abi te yocho, “Wüng, nü tsudhre kyangpehnung!” Abinü Jisu yu tsü yudsicho ko wücho. 51 Abi woyade akulirünü yusi hiro abi mütohnü yocho, “Nü tsudhre kyangpehko!” 52 Achotsü abinü arüh te khode tinü abi kyangcho pü tsingdhengcho ko arühnü lalingcho, “Atü anyüzehlang khüdu bekhyah la rihminü abi pehjücho.” 53 Hütsüde au tsünü hütsüba bekhyah la tsü Jisunü abi te, “Nü tsudhre kyangpehnung,” pü yocho lümchehcho. Hütsünü abi ko kukhi shünü yudsicho. 54 Hiba hi Jisu Judea lanü Galil lang ropü nguchicho thsayahiya anyüuba lile.
Changtphü la Kyangjücho
1 Hütsüpü, Jisunü Jerusalem lang Jihudarü thsüti khüdu lang wücho. 2 Jerusalem la san tbükhüm müshüm, Ibri yunü Bethzatha ko dsiba pümshang münga liba, changtphü khüdu lile. 3 Pümshang la tsü füthsarü khütango nahtohrü, jingjahrü, dsidsisürüti licho. Arüh tsü kih shühchicho yingnü licho, 4 (tunüo Abüdongba riwürü khüdu khüpipi changtphü la tsü jüronü kih tsü shühchijücho. Kih shühchide sü akhu kih la mütrahrangnang, tunü füthsaro apüm kyangcho.) 5 Hütsüla kang sangrepü keh füthsarü nyüh khüdu licho. 6 Jisunü abi hütsüla yüpjocho ngu ko abi hütsüdoi nyahli füthsacho müdhe, abinü abi te tsingdhengcho, “Nüh kyangnyürü mah-o?” 7 Füthsaba tsünü lalingcho, “Adirü, kih shühchide changtphü la tsü Ih nüyohchürü sü müle; Ih züdunung yade, aparü akhu züdu pehpü lire.” 8 Jisunü abi te yocho, “Yamüsung, nü yüpji dhieng ko tsehng.” 9 Hütsüdenü abi kyangpehcho; ko ayüpji dhipü tsehnung dikehcho. Hütsü Sabath nyümong thsacho, 10 achotsü Jihudarü yangbenü akyangba nyitsarü te tsü yocho, “Chünye Sabath nyümonge ko nü yüpji dhinung tsü yuzeng nyüm lile.” 11 Abinü lalingcho, “Ih kyangjüba nyitsarü tsünü I te I yüpji dhinung ko tsehnung yocho.” 12 Arühnü abi te tsingdhengcho, “Nü te hita nguchinung yoba nyitsarü tsü süo?” 13 Ta akyangba nyitsarü tsünü Jisu tsü sünang mümüdhecho, tunüo hütsü chah nyitsarü sühdi lichonü Jisu shehmüi tsipehpü licho. 14 Akhanglang Jisunü abi amübükuh la ngu abi te yocho, “Nyieng, adelü nüh kyangpehko; amütsauba suronü nüh müchinungthsa adelü amünyi tüshitbah.” 15 Hütsüde nyitsarüba tsü tsicho ko abi kyangjüba tsü Jisuepü Jihudarü yangbe te yocho. 16 Hütsünü arühnü Jisu dhsümthsenung dikehcho, tunüo abinü hi Sabath nyümong nguchicho. 17 Jisunü arüh te lalingcho, “I Unü lede nguchire ko Ihnüsü nguchibae.” 18 Abinü Sabath nyümong thsangnyangcho du mah, ta Tsingrangba tsü Au khungepü dsiba tsünü apu jangjang Tsingrangba kangrepü khüsha Jihudarünü abi mapsehnung dhrongcho.
Atsudhre Tase
19 Hütsünü Jisunü arüh te lalingcho, “Ihnü nührü te yutsatsa yore: Aunü nguchi ngucho chah khu Atsudhrenü apu jangjangthsa tusü münguchicheh. Aunü tu nguchinang, Atsudhre nüsü hütsü du nguchire. 20 Tunüo Aunü atsudhre müire ko apunü tu nguchiro apüm abi te ngusohre. Abinü hi tenü adiu nguchinung abi te ngusohnung, ko nührü atümung nyemüyangnung. 21 Aunü asürü kanglisoh akang lisohcho kyo, atsudhrenü abinü lümrüti khyang akang jüre. 22 Mahkhang Aunü sü yu mükhare. Arühnü Au jengreng drücho roh-i Atsudhre jengreng drüsohnung nengdang, 23 abinü atsudhre khyang yukhanung tase apüm jopehko. Sünü Atsurü jengreng müdrüro, abinü abi riwüsohba Au jengreng müdrüre. 24 “Ihnü nührü te yutsatsa yonung: Sünü I yu nyiro ko I riwüsohbong chah yudsiro abi lede akang lile. Abi yu mükhanung, ta asü lanü akang langi wopehko. 25 Ihnü nührü te yutsatsa yonung: Bekhyah chii role, ko hütsü ade lile, khode asürünü Tsingrangba Tsurü yuva yuchinung, ko sürünü hütsü yuchiro arüh kangli ronung. 26 Au apu chah khüta akang liro, hütsü roh-i abinü Atsudhre khyangsü apu chah akang linung jüko. 27 Ko abinü Atsudhre khyang yukhanung tase jüko, tunüo abi Nyitsarü Tsurü tsü lile. 28 Hinü tünyemüyang; asürü atümungnü abi yuva yuchinung 29 ko arüh kong lanü chüronung shikhe chii role; sürünü atsa nguchiko arüh kangli ronung ko linung; ko sürünü mütsa nguchiko arüh kangli ronung ko mülangjünung. 30 “Ihnü I jangjang tusü münguchicheh; Tsingrangbanü I te yocho roh-i du Ihnü khare, hütsünü I yukhaba tsü yuje, tunüo Ihnü I khyünyücho roh-i mah, ta I riwüsohbanü khyünyücho du nguchinung müküpre. 31 “Ihnü Ipu nengdang yuzi jükhang, I yuzi tsü yuje mah. 32 Ta I nengdang yuzi jürü nyüh khüdu lile, ko abinü I nengdang yuzi jüba tsü yuje-epü Ihnü müdhele. 33 Nührünü Johan yanglang nührü yusi hirü müthehcho, ko abinü yuje nengdang yuzi jücho. 34 Ihnü nyitsarü yuzi khyünung yorü mah; Ihnü yoba hi nührü khümchonung nengdang yore. 35 Johan tsü trunü visaba dsi khüdu kyo licho, ko abi atsingse la linung azachah nengdang nührünü longphicho. 36 Ta Johan-nü jücho yuzi tenü I yuzi adiu lile: 37 Ihnü tu nguchiro hütsü I Unü I khyang nguchinung jücho nguchire, hiri khunü aunü Ih müthehcho yuzi jüre. Nührünü khodesü abi yuva müyuchi mahkhang abi romih müngudheng, 38 ko abi nührü lasih la müyohbü, tunüo abinü müthehba chah nührünü müyudsi. 39 Nührünü Amüsa yu yangchire, tunüo hütsüla nührünü lede akang ngunungepü longdire. Ko hiri Amüsa yu tsünü I nengdang yuzi jüre. 40 Ta akang ngunung nengdang nührünü I yanglang ronung mülümre. 41 “Ihnü nyitsarü nengse müyangchire. 42 Ta nührü khütari nyitsarü nang Ihnü mümüdhe. Ko Tsingrangba müiba nührü lasih la mülepü Ihnü müdhele. 43 Ih I U nengla rocho, ta nührünü Ih mükhyücho; ta nyüh khüdu apu nengla rolang, nührünü abi khyüchonung. 44 Nührünü khüdunü khüdu chahnü nengse khyünyüre, ta Tsingrangba, sü khüdu du liro; abi chahnü nengse ngunung mümüküpre; hütsükhang, khüta nührünü I chah yudsinung? 45 I U jingte Ihnü nührü mülang jünungepü tülüm. Mosa, sü chah nührünü alongdi yohpücho, abinü nührü mülangjünung. 46 Nührünü Mosa chah yujenü yudsirelang, I chahsü yudsibae, tunüo abinü I nengdang thrahcho. 47 Ta abinü thrahcho chah nührünü müyudsikhang, Ihnü yocho chah khüta yudsinung?”
Nyüh Hajar Münga Yangtüpcho
1 Hütsüpü Jisu Galil kihdi keh tsicho (Tiberia kihdi püsü dsire). 2 Ko amülung amülah abi khanglang iiwücho, tunüo füthsarü chah abinü tu thsayahiya nguchicho hütsü arühnü ngucho. 3 Jisunü azonglang tuwücho ko amonoti yola pümcho. 4 Ade Phungkhu Thsüti shikhe chii rocho. 5 Jisunü dhengmükangde amülung amülah abi yang rocho ngu Filip te yocho, “Nyitsarü hidoi yangtüpnung Ihsanü tsuyongnung khüdenü lihnung?” 6 (Abinü hi Filip thsatsodhengnung yocho; amalü tu nguchinung abinü müdhecho.) 7 Filipnü lalingcho, “Nyitsarü müipi azikyükyah du jeh nye denari thsih anyünü mii mükükyünung.” 8 Mono yola khüdu, Simon Peter ani Andreunü yocho, 9 “Hila azarü khüdu khehla lüdi hümthse münga ko ngu anyüh lile. Ta nyitsarü hidoi nengdang hütsü tushi müthsanung.” 10 Jisunü arüh te yocho, “Nyitsarüti tsü pümsohng.” (Hütsüla zanu khütango licho.) Achotsü nyitsarü atümung pümcho; adhrerü dunü nyüh hajar münga-o thsacho. 11 Jisunü hümthse tsü bipü Tsingrangba khyang anengse jücho, ko hütsüla pümrüti khyang chahla jücho. Abinü ngu tsüsü hütsüta chahla jücho, ko arüh atümung thangchi tsucho. 12 Khode arüh mi jengcho, abinü amonoti te yocho, “Anyingcho tsü throbülung; Ihsanü tusü mümüzangnung.” 13 Achotsü arühnü hütsüri throbülungcho, ko lüdi hümthse münga lanü tsupü anyingcho nümnümdada loh dhüre-anyüh jengcho. 14 Jisunü nguchicho thsayahiya hi ngu, hütsüla nyitsarütinü yocho, “Limih lang aronung liba azikehrü tsü yuje hivie!” 15 Arühnü ro abi rangpü khingnü arüh yangthsarü kangsohnung licho tsü müdhe apu jangjang azonglang thali tuwücho.
Kih Michah Tsehcho
16 Nyüzeh rode, amonotinü kihdi lang jowü 17 kihtang khüdu la züducho, ko Kapernaum lang thali kihdi tsü kehnü wücho. Mapehcho, ta Jisu arüh yanglang müroecho. 18 Hütsüdelü nyübong amülah fonü kihmülüm chüro yacho. 19 Monoti tsü lutri münga dhüroh wüko khanglang Jisu kih michah tsehnü kihtang amünyethsa rocho arühnü ngucho, ko arüh drüsehcho. 20 Jisunü arüh te yocho, “Ih-e! Tüdrü.” 21 Hütsüpü du arühnü künyang kihtang la nüyohcho, ko hütsüde tsünü arühnü chihnung liba lih tsü kihtang tsünü chihcho.
Nyitsarünü Jisu Yangchicho
22 Nyümong khüu kihkeh lang pehjüba sühdi tsünü hütsüla kihtang khüdu licho lümchehcho. Jisu tsü amonoti yola müzehpü arüh müleng tsichoepü arühnü müdhecho. 23 Abüdongbanü anengse jüpü sühdinü hümthse tsuba müdüm shündhün Tiberia lanü kihtang khürü rocho. 24 Khode sühdi tsünü hütsüla Jisu ko amonotisü müzeh pü müdhecho, arühnü kihtangti la tsü züdu abi yangchi Kapernaum lang wücho.
Jisu Akang Tsuyongnung
25 Khode kihkeh khüulang arühnü Jisu ngucho, arühnü abi te yocho, “Adorü, nüh hila khode ro chihcho?” 26 Jisunü lalingcho, “Ihnü nührü te yutsatsa yore: nührünü thsayahiya nyichehchonü mah, ta hümthse mi jeng tsuxah tsuchonü Ih yangchire. 27 Sühtpah pehba tsuyongnung nengdang tünguchi, ta müchangkaba akang tsuyongnung nengdang nguching. Hiba tsuyongnung tsü Nyitsarü Tsurünü nührü khyang jünung, tunüo Au Tsingrangnü abi chah akhyüchoba amüdhethsa shingkehjüko.” 28 Achotsü arühnü abi te tsingdhengcho, “Tsingrangbanü lümcho nguchinung tsü Ihrünü tu nguchibao?” 29 Jisunü lalingcho, “Tsingrangbanü müthehba chah yudsinung tsü abinü nguchisohnyüba tsü lile.” 30 Achotsü arühnü abi te yocho, “Ihrünü ngupü yudsinungthsa nühnü tu thsayahiya nguchinung? Nühnü tu nguchinung? 31 Ihrü jümürünü lipilih la mana tsucho; amüsa yunü yocho kyo, ‘Abinü arüh khyang ninglangnü atsunung jücho.’ ” 32 Jisunü yocho, “Ihnü yutsatsa nührü te yore: Nührü khyang ninglangnü tsuyongnung jüba tsü Mosa mah; ta ninglangnü yuje tsuyongnung jüba tsü I Unüe. 33 Tunüo sü ninglangnü jüroro ko limih khyang akang jüro, hütsü Tsingrangbanü jüba tsuyongnung tsü lile.” 34 Arühnü abi te tsingdhengcho, “Abüdongba, hiba tsuyongnung ihrü khyang müsüla khülo.” 35 Jisunü arüh te yocho, “Akang tsuyongnung tsü Ih, sü I yanglang ronang abi khodesü müyangnung; ko sünü I chah yudsinang abi khodesü müxonung. 36 Nührünü Ih nguko, ta müyudsinungepü Ihnü nührü te yoko. 37 I Unü I khyang jürü müipi I yanglang ronung. Ko I yanglang rorüh süsü Ihnü müpehnung, 38 tunüo Ipu lümcho nguchinung mah, ta I riwüsohba lümcho nguchinung nengdang Ih ninglangnü jürocho. 39 I khyang jücho süsü müchahsohnung, ta achangka nyümong la arüh atümung kanglisohnung tsü I riwüsohba lümcho lile. 40 Tunüo atsudhre ngurü ko abi chah yudsirü atümung müchangkaba akang ngunung tsü I Unü khyünyücho lile. Ko Ihnü achangka nyümong la arüh kanglisohnung. 41 “Ih ninglangnü jürocho tsuyongnung” pü abinü yochonü Jihudarünü abi te jümjümnung dikehcho. 42 Hütsünü arühnü yocho, “Hivi hi Josef tsurü Jisu mahrü do? Au e atpa nyüh Ihsanü müdhele. Akhang abinü khüta abi ninglangnü jürochoepü yoro?” 43 Jisunü lalingcho, “Nührübürü yola tüjümjüm. 44 I riwüsohba Aunü I yang mütphahkhang süsü I yanglang mürocheh; ko achangka nyümong la Ihnü abi kanglisohnung. 45 Azikehrütinü thrahcho, ‘Atümung te Tsingrangbanü thsingyunung.’ Sünü Au te nyiro ko abi chahnü nyichoro abinü Ih yang rore. 46 Nyitsarü khürünü Au ngukorü mah, sü Tsingrangba chahnü liro abi dunü Au nguko. 47 Ihnü yutsatsa nührü te yore: Sünü yudsiro abi müchangkaba akang lile. 48 Ih akang tsuyongnung tsü. 49 Nührü jümürünü lipilih la mana tsucho, ta arüh sücho. 50 Ta ninglangnü jüroba tsuyongnung tsülü sünü hütsü tsunang müsünung. 51 Ninglangnü jüroba akang tsuyongnung tsü Ih. Khürünü hiba tsuyongnung tsukhang, abi lede akang linung. Ihnü jünung tsuyongnung tsü Ipu shuh, khüi limih akang linung nengdang Ihnü jüre.” 52 Hi khu arüh yola yujita chürocho. Arühnü tsingdhengcho, “Hiba nyitsarünü khüta Ihsa khyang apu shuh atsunung jünung?” 53 Jisunü yocho, “Yutsatsa Ihnü nührü te yore: Nührünü Nyitsarü Tsurü shuh mütsukhang ko abi shüh müyongkhang, nührübürü chah akang müle. 54 Sünü I shuh tsuro ko I shüh yongro abi müchangkaba akang lile, ko achangka nyümong la Ihnü abi kanglisohnung. 55 Tunüo I shuh yuje atsuba; ko I shüh yuje ayongba. 56 Sünü I shuh tsuro ko I shüh yongrü abi I chah lire, ko Ih abi chah lire. 57 Akang liba Aunü Ih rosohcho, ko abi khu Ihsü lire. Hütsü kyo sünü Ih tsuro, Ih khu abi akang linung. 58 Hütsünü, hiba hi ninglangnü jürocho tsuyongnung; nührü jümürünü tsupü akhanglang süba tsuyongnung roh-i tsü mah. Sünü hiba tsuyongnung tsunang abi lede akang linung.” 59 Jisunü hi Kapernaum la Sinagog la dode yocho,
Müchangkaba Akang Yu
60 Amono adrongnü hi yuchi yocho, “Adoba hilü sohrale. Sünü hi nyichehnung?” 61 Müyoe, hütsü nengdang jümjümrepü Jisunü richeh ngu arüh te yocho, “Hirinü nührü müthikehsohrü mah-o? 62 Akhang Nyitsarü Tsurü abi akhudi licho lang tuwüchi ngure lang khüta? 63 Akang jüba tsü Tsingrangba Anbü lile; shutsalü amükang. Ihnü nührü te yoba yu tsü anbü ko akang lile. 64 Ta nührü yola khürünü müyudsire.” (Adikeh lanü sürünü müyudsinung ko sünü abi kihyochüjünung Jisunü müdhejung licho.) 65 Ko abinü yocho, “Hitacho khu, Aunü mümülakhang sünüsü I yang mürochehnungepü Ihnü nührü te yoko.” 66 Hütsü khu, Jisu mono adrong abi yola müwüpü thali tsipehcho. 67 Achotsü abinü mono dhüre-anyüh te tsingdhengcho. “Nührüsü tsipehnyürü mah-o?” 68 Simon Peternü abi te lalingcho, “Abüdongba, ihrü sü yang wünung? Müchangkaba akang yu jüba nü chah lile. 69 Ko nüh Tsingrangba chahnü rocho Amüsaba tsü-epü ihrünü adelü müdhele ko yudsire.” 70 Jisunü lalingcho, “Ihnü nührü dhüre-anyüh müthrochehcho do? Ta nührü yola nyüh khüdu motsing lile.” 71 Abinü Simon Iskariot tsurü Judas nengdang chocho. Tunüo Judas tsü mono dhüre-anyüh yola khüdu thsanye, abinü Jisu kihyochü jünungba licho.
Jisu ko anirü
1 Hütsüpü khanglang, Jisunü Galil la rachicho; ta Judea la lü mürachinyücho, tunüo Jihudarünü abi mapsehnung yangchicho. 2 Ade Mütpahvi Thsüti amünyethsa licho, 3 ko anirütinü abi te yocho, “Nü monotinü nü nguchicho ngunungthsa hilanü shehmüi Juda lang wüng. 4 Sünü adangchi khüdu kangnyüro, abinü rangnü tu münguchire. Nühnü hiri nguchide liküpnü nüh müdhesohng!” 5 (Anirütinü mii abi chah yumüdsicho.) 6 Jisunü arüh te yocho, “I nengdang akyang müchie. Ta nührü bekhyahlü lede lile. 7 Liminü nührü thrünyirü mah, ta Ih thrünyire, tunüo arüh münyi nguchi nengdang Ihnü yuzi jüre. 8 Thsüti lang tsü nührü wüng. Hiba thsüti lang tsü Ihlü müwünung, tunüo I nengdang akyang müchie.” 9 Abinü hütsüta yopü Galil la du licho.
Mütpahvi Thsüti la Jisu
10 Anirü thsüti lang tsü wüko khanglang, abisü rangnü thsüti lang tsü wücho. 11 Jihudarü langnürütinü thsüti la tsü abi yangchi yocho, “Abi khüde liro?” 12 Sühdi la tsü abi nengdang dee jümjümta licho. Khürünü yocho, “Abi nyitsarü atsae,” aparünü yocho, “Mah, abinü nyitsarü amünülang nüre.” 13 Ta sünüsü abi nengdang mishanü müchocho, tunüo arühnü Jihudarü langnürü drücho. 14 Thsüti bhülong Jisunü Amübükuh la tuwü donung dikehcho. 15 Jihudarü langnürütinü dee nyemüyangnü yocho, “Hiba nyitsarü hi tu mükhipü khüta hitoh-i müdhero?” 16 Jisunü lalingcho, “Ihnü tu doro hi I adoba mah, ta I riwüsohbong Tsingrangba chahnü lile. 17 Sünü Tsingrangba lümcho nguchiro abinü Ihnü doba hi Tsingrangba chahnü a mahkhang Ipu lümyunü chorünang müdhenung. 18 Sünü apu lümyunü chorünang abinü palu nengse yangchire. Ta sünü abi riwüsohbong nengse yangchiro abi tsü yuje ko abi chah tu mülang müle. 19 Mosanü nührü khyang Yuzeng müjücho do? Ta nührü sünüsü yuzeng tsü mübichi. Tuepü nührünü Ih mapsehnung müküpro?” 20 Sühdi tsünü lalingcho, “Nü chah motsing lile. Sünü nüh mapsehnung yangchiro?” 21 Jisunü lalingcho, “Ihnü thsayahiya khüdu nguchicho, ko nührü atümung nyemüyangcho. 22 Nührü tsurüti müjüp-pehnung Mosanü Yuzeng jücho (Hütsü Mosa chahnü mahpü nührü jümürü chahnüe), ko nührünü Sabath nyümong azarü müjüp-pehjücho. 23 Sabath nyümong azarü müjüp-pehchonü Mosa yuzeng müthsangnyangkhang, Ihnü Sabath nyümong nyüh khüdu kyangjüchonü nührü I te zichürorü mah-o? 24 Tsahdheng yu tükha, ta yujenü yukhang.”
Abi Mesia tsü Mah-o?
25 Jerusalemrü khürünü yocho, “Langnürütinü mapsehnung yangchiba nyitsarü tsü hi mahrü do? 26 Dheng! Abinü mishanü cho rachile, ta arühnü abi nyüm tu müyore! Abi tsü Mesia tsüepü arühnü yuje müdherü mah-o? 27 Ta khode Mesia ronang, abi khüdenünang sünüsü mümüdhenung. Ta hiba nyitsarülü khüdenünang Ihsa atümungnü müdhele.” 28 Hütsünü Jisunü amübükuh la dode züdenü yocho, “Yuje nührünü Ih müdherü mah-o, ko Ih khüdenünang müdherü mah-o? Ih Ipu lümyunü müro. Sünü Ih riwüsohcho abi yuje. Nührünü abi mümüdhe, 29 ta Ihnülü abi müdhele, tunüo Ih abi chahnü rocho ko Ih abinü müthehcho.” 30 Hütsüde arühnü abi rangnung müküpcho, ta sünüsü abi chah kheh müthahcho, tunüo abi becho müchiecho. 31 Ta sühdi la tsü adrongnü abi chah yudsi yocho, “Khode Mesia ronang, hiba nyitsarünü nguchicho tenü alaa nguchinung mah-o?”
Anyahrüti Jisu Rangnung Müthehcho
32 Sühdi tsünü Jisu nengdang jümjümcho Farisirünü yuchicho, hütsünü arüh ko bebü ayingtinü Jisu rangnung anyahrü khürü müthehcho. 33 Hütsüde Jisunü yocho, “Nührü te Ih adesü azachah linung, hütsüpü Ih müthehbong yang tsinung. 34 Nührünü Ih yangchinung, ta Ih müngunung, tunüo Ih linung la tsü nührünü müwüchehnung.” 35 Jihudarü langnürünü arühbürü yola chotacho, “Ihsanü abi müngunungthsa abi khüde wünungbao? Abinü Ihsa nyitsarü liba Greek yangditi lang wünü Greekrü donung mah-o? 36 Ihsanü abi yangchinung ta abi müngunung, ko abi linung la tsü Ihsanü müwüchehnung yoba hi tu adüzüo?”
Akang Jüba Yongna
37 Thsüti achangka dizangba nyümong la Jisunü yapü züde yocho, “Sü xoro abi I yanglang ro young. 38 Amüsa yunü yocho roh-i, Sünü I chah yudsinang alasih lanü akangnung kih yongna pohnung.” 39 Sürünü abi chah yudsicho arühnü ngunung liba Anbü nengdang Jisunü chocho. Hütsütade Anbü tsü müjüecho, tunüo Jisu mühechiecho.
Nyitsarü Yola Achangnah
40 Sühdi la nyitsarü khürünü yu hiri yuchi yocho, “Hiba nyitsarü hi yuje azikehrü tsü-e!” 41 Aparünü yocho, “Abi Mesia tsü-e!” Ta aparü khürünü yocho, “Mesia tsü Galil lanü müronung! 42 Mesia tsü David tsutpu lanü ko David liba yangdi Bethlehem lanü ronung Amüsa yunü yo lile.” 43 Hütsüta Jisu thsacholanü sühdi yola tsü achangnah chürocho. 44 Khürünü abi rangnyücho, ta sünüsü abi chah kheh müthahcho.
Müyutsiba Jihudarü Langnürü
45 Khode anyahrüti thali tsicho, bebü ayingti ko Farisirünü arüh te tsingdhengcho, “Tuepü nührünü abi müno rocho?” 46 Anyahrütinü lalingcho, “Nyitsarü hinü chocho kyo sünüsü müchodheng!” 47 Farisirünü arüh te tsingdhengcho, “Abinü nührü mii nümülacho mah-o?” 48 “Langnürüti ko Farisirü khürünü dusü abi chah yudsicho nührünü mütsüp-o? 49 Sühdi hinü Mosa yuzeng mümüdhe, hütsünü arüh Tsingrangba chokehchola pohki lile!” 50 Farisirü yola khüdu Nikodemus, sü akhulang Jisu dhengnung wücho abisü hütsüla zeh licho. Abinü aparü te yocho, 51 “Ihsa yuzengnü nyüh khüdu yu münyidhengpü ko abinü tu nguchicho mürangchehpü yu mükhare.” 52 Arühnü lalingcho, “Tsale, nüh mii Galilrü mah-o? Amüsa yu tsü khidheng, Galil lanü tu azikehrü müchüronung ko nühnü ngunung.”
Nahtrahnaxengla Rangchoba Khingkurü
1 Hütsüpü arüh atümung kuh lang tsicho, ta Jisu Olive zong lang tuwücho. 2 Nyangnyü khüu mütoh abinü Amübükuh lang thali wücho. Nyitsarü atümung abi mükang shibülungcho, ko abinü pümpü arüh te donung dikehcho. 3 Ko Yuzeng adorü e Farisirünü khingkurü khüdu nahtrahnaxeng yade rangchoba norocho, ko arüh atümung bete yasohcho. 4 Arühnü Jisu te yocho, “Adorü, Hiba khingkurü hi nahtrahnaxeng yade rangcho. 5 Hitari khingkurü tsü lungnü mapsehnung Mosa yuzeng la yo lile. Ade, nühnüsü tonung?” 6 Abi xohsohpü mülangjünung nengdang hi tsingdhengcho. Ta abinü mükhurangcho ko amüyungzanü alih la thrahcho. 7 Arühnü hütsüta abi te tsingdheng yade, abinü tsungmüsu arüh te yocho, “Nührü yola sü amünyi müshitpahdhengcho, abinü akhu abükyü chah lungnü müpm.” 8 Hütsüpü abinü anyüpiu mükhurang alih la thrahcho. 9 Arühnü hi yuchide, azibarünü müxüpü arüh atümung khüdu khüdunü tsipehcho. Hütsüla Jisu müleng te khingkutpü tsü ayashüshü pehjüpü tsicho. 10 Abinü tsungmüsu abükyü te yocho. “Arüh khülo-o? Sünüsü nüh mümülangjücho do?” 11 Abükyünü yocho, “Abüdongba, sünüsü mümülangjü.” Achotsü Jisunü yocho, “Ihnüsü nüh mümülangjüre. Wüng, ta hiko tinü amünyi tübichi.”
Jisu Limih Atsingse
12 Jisunü Farisirü te anyüpiusü yocho, “Ih limih atsingse, sünü I khanglang ronang abi amala mütsehnung ta akang atsingse ngunung.” 13 Farisirünü abi te yocho, “ade nühnü nüpu nengdang yuzi jüre; nü yuzi tsü arahkheh.” 14 Jisunü lalingcho, “Ihnü Ipu nengdang yuzi jünyesü, Ihnü yoba tsü yuje, tunüo Ih khüdenü rocho ko khüde wünung hütsü Ihnü müdhele. Ih khüdenü rocho mahkhang Ih khüde wünung hütsü nührünü mümüdhe. 15 Nührünü shutsa phi yukhare; ta Ihnü sü yusü mükhare. 16 Ta Ihnü yukharelang, I yukhaba yuje thsanung; tunüo hütsüla I müleng mah; Au sünü Ih müthehcho abi I yola zehle. 17 Khode nyüh anyüh yuzi linang, hütsü yuje-epü nührü yuzeng la thrah lile. 18 Ihnü Ipu nengdang yuzi jüre, ko Au sünü Ih müthehcho abinü I nengdang yuzi jüre.” 19 Arühnü abi te tsingdhengcho, “Nü U khüde liro?” Jisunü lalingcho, “Nührünü Ihsü mümüdhe ko I Usü mümüdhe. Nührünü Ih müdherelang I Usü müdhebae.” 20 Jisunü hiri apüm amübükuh la dode amübü Singdi yohpüji la chocho. Ko sünüsü abi mürangcho, tunüo abi akyang müchiecho.
I Wücho lang Nührünü Müwüchehnung
21 Jisunü arüh te anyüpiu yocho, “Ih tsipehnung; ko nührünü Ih yangchinung, ta nührü palu münyi la sünung. I wücho lang nührünü mürochehnung.” 22 Hütsüpü Jihudarü langnürünü yocho, “Abi khüde würünang Ihsanü müwüchehnungepü abinü yore. Hi apu jangjang mapsehnung khu mah-o?” 23 Jisunü lalingcho, “Nührü hiba limih lanü, Ih ninglangnü; Nührü hiba limih yo, Ihlü limih yo mah. 24 Hütsünü Ihnü nührü te palu münyi la sünungpü yocho. Ko nührünü Ih tsü ‘Abi-e’ ” pü yumüdsikhang, nührübürü münyi la sünung. 25 Arühnü abi te tsingdhengcho, “Nüh süo?” Jisunü lalingcho, “Ihnü adikehdinü nührü te tu yocho, hütsüe. 26 Nührü nengdang Ihnü ayonung ko mülangjünung khütango lile. Ta sünü Ih müthehcho abi Yuje lile, ko abi chahnü tu nyisicho hütsü du Ihnü alimih te yore.” 27 Jisunü arüh te Au nengdang chorepü arühnü münyichehcho. 28 Hütsünü abinü arüh te yocho, “Khode nührünü Nyitsarü Tsurü dhikehnang, nührünü ‘Ih tsü Abi’ epü müdhenung; hütsüde Ihnü I lümyunü tu müchore, ta I Unü yocho du yorepü nührünü müdhenung. 29 Ko sünü Ih müthehcho abi I te lile; abinü I müleng müpehjü, tunüo abi künyangnungthsa Ihnü lede nguchire.” 30 Jisunü hiri chocho yuchi adrongnü abi chah yudsicho.
Nyüje ko Ayurü
31 Achotsü Jisunü abi chah yudsirü te yocho, “Nührünü I adoba nyikhang, nührü ajüje I monoe; 32 nührünü yuje tsü müdhenung, ko Yuje tsünü nührü nyüje kangsohnung.” 33 Arühnü lalingcho, “Ihrü Abraham chahnü trahchocho, ko khodesü ihrü sü yurü müthsadheng. Akhang, ‘Nühnü nyüje kangsohnung pü yoba tsü tu khuo’?” 34 Jisunü arüh te yocho, “Ihnü nührü te yutsatsa yore: Sünü amünyi shitpahro abi amünyi yurü. 35 Ayurü khüdu tsü kuhla lede mülire, ta atsurü khüdulü lede nengdange. 36 Atsudhre tsünü nührü nyüje kangsohkhang, nührü nyüjekhung linung. 37 Nührü Abraham chahnü sihchochoepü Ihnü müdhele. Ta I adoba nührünü mükhyüchochonü, nührünü Ih mapsehnung yangchire. 38 I Unü I te tu ngusohcho hütsü nengdang Ihnü chore, ta nührünü nührü tpurünü tu yocho hütsü nguchire.” 39 Arühnü abi te lalingcho, “Abraham tsü ihrü au.” Jisunü arüh te yocho, “Nührü Abraham tsurüelang abinü nguchicho kyo nguchinung. 40 Ihnü nguchiba apümnü, Tsingrangba chahnü Ihnü yuchicho yuje tsü nührü te yonung du lile, ta nührünü Ih mapsehnung müküpre. Abrahamnü hi kyo tu münguchi! 41 Nührü aunü tu nguchicho nührünü hütsü nguchire.” Arühnü yocho; “Ihrü Au tsü Tsingrangba apu due, ko ihrü abi tsurü khung.” 42 Jisunü arüh te yocho, “Tsingrangba tsü Yuje nührü Auelang, nührünü Ih müibae, tunüo Ih Tsingrangba chahnü rocho, ko hila lile. Ipu lümyunü müro, ta Ih abinü müthehcho. 43 Tuepü nührünü I yu münyichehro? Hütsü nührünü I yu rangcho münyichonü. 44 Nührü, nührü au motsing tsurüti ko nührünü nührü au lümcho la du tsehnyüre. Abi adikehdinü amüpsehrü ko khodesü yuje la müle, abinü arahkheh choba tsü abi susuh, tunüo abi arahkhehrü ko arahkheh apüm au. 45 Ta Ihlü yuje chore, hütsünü nührünü I yu müdsire. 46 Nührü sünü Ih amünyirüepü yuzi jüchehnung? Ihnü yuje tsü yokhang tuepü I yu müdsiro? 47 Sü Tsingrangba chahnü roro abinü Tsingrangba yu nyire.Ta nührü Tsingrangba chahnü müthsachonü nührünü münyire.”
Jisu ko Abraham
48 Arühnü Jisu te tsingdhengcho, “Nüh Samariarü ko nü chah motsing zehlepü Ihrünü yoba tsü ihrü athsalang mah ang?” 49 Jisunü lalingcho, “I chah motsing müle, Ihnü I U jengreng drüre, ta nührünü I jengreng müdrüre. 50 Ihnü Ipu nengse müyangchire, hütsü yangchiba ko yukhaba khüdu lile. 51 Ihnü nührü te yutsatsa yonung: Sünü I yu nyiro abi khodesü müsünung.” 52 Arühnü abi te yocho, “Nü chah motsing zehlepü ade Ihrünü tsüptsi müdhele. Abraham ko azikehrüti sü süko, ta nühnü nü yu nyirülü khodesü müsünungepü yore. 53 Ihrü au Abraham süko; nüh Abraham tenü adiuepü yorü mah-o? Ko azikehrütisü süko. Nüh tsü süero?” 54 Jisunü lalingcho, “Ihnü Ipu jangjang hechikhang, ahechi hütsü tu mah, sünü Ih hechiro abi tsü nührünü nührü Tsingrangepü yoba I U lile. 55 Nührünü abi khodesü mümüdhe, ta Ihnü abi müdhele. Ihnü abi mümüdhepü yokhang, nührü kyo Ih arahkhehrü. Ta Ihnü abi müdhele, ko Ihnü abi yocho nyire. 56 Nührü au Abrahamnü Ih roba nyümong ngunung künyangcho; ko abinü hütsü ngucho ko künyangcho.” 57 Arühnü abi te yocho, “Nüh kang dhünyang mii müjungepü nühnü Abraham ngucho ang?” 58 Jisunü arüh te lalingcho, “Ihnü nührü te yutsatsa yore: Abraham müsuroedenü Ih licho.” 59 Hütsüde arühnü abi chah mapnung lung throcho, ta Jisunü Amübükuh lang rang tsicho.
Anahtohjungpü Surocho Kyangjücho
1 Jisunü lahkhu tside, anahtohjungpü surocho nyüh khüdu abinü mütohcho. 2 Amonotinü abi te tsingdhengcho, “Adorü, sü münyinü abi nahtohjungpü suronungthsa kangcho? Apu münyinü a mahkhang tpurü münyi nüo?” 3 Jisunü lalingcho, “Abi nahtohba tsü apu münyi mahkhang tpurü münyi nüsü mah, ta abi chah Tsingrangba zii mishanung nengdang. 4 Atsingse la Ihsanü I riwüsohba nguchi nguchinung; tunüo sünüsü münguchichehnungthsa ama tsü tsehle. 5 Ih limih la lide, Ih limih atsingse.” 6 Abinü hütsüta yoko khanglang, Jisunü alih la müjü müchohcho ko müjü tsünü lishe külüpcho; ko lishe tsü anahtse la müyühjüpü 7 abi te yocho, “Wüng ko Siloam (adüzü ‘müthehcho’) kihting la nü romih müpieng.” Achotsü nyitsarüba tsünü wücho ko aromih müpipehcho ko ngunü thali rocho. 8 Hütsüde, kurümrü, ko amüngu abi chingkichingnang ngurünü tsingdhengcho, “Pümpü chingkichingnang pümbasü hivi mahrü do?” 9 Khürünü yocho, “Hütsüvi süe,” ta aparü khürünü yocho, “Abi mah, kyotarü due.” Hütsüde apu jangjang yocho, “Ih hütsüvi süe.” 10 Arühnü abi te tsingdhengcho, “Nüh ade khüta nguro?” 11 Abinü lalingcho, “Jisu dsiba nyitsarü tsünü lishe külüp I nahtse la müyühjücho, ko I te wü Siloam la I romih müpipehnung yocho. Achotsü Ihnü wücho, ko müpipehyeng Ihnü ngunung kohcho.” 12 Arühnü tsingdhengcho, “Abi khüde liro?” Abinü lalingcho, “Ihnü mümüdhe.”
Farisirünü Akyangcho tsü Yangchicho
13 Achotsü arühnü Farisirü yang amüngu nahtohko liba tsü nowücho. 14 Jisunü lishe külüp anah trahsohba tsü Sabath nyümong thsacho. 15 Hütsüde Farisirünü nyitsarüba te tsü abinü khütapü ngucho ko tsingdhengcho. Abinü arüh te yocho, “Abinü I nahtse la lishe müyükehjücho, Ihnü I romih müpipehcho, ko Ihnü ade ngunung kohre.” 16 Farisirü khürünü yocho, “Hi nguchiba nyitsarü tsü Tsingrangba chahnü müthsanunge, tunüo abinü Sabath nyümong yuzeng mübichi.” Ta aparünü yocho, “Amünyi nyitsarü khüdunü khüta thsayahiya hiroh-i nguchichehnung?” Hütsüta arüh yola achangnah chürocho. 17 Hütsünü Farisirünü adesü nyitsarüba te tsü yocho, “Nü nahtoh abinü kyangjüchoepü nühnü yore, khang nühnü abi nengdang tu yoro?” Abinü yocho, “Abi azikehrü khüdu.” 18 Ta Jihudarü langnürünü abi tpurü dsiro “Hi nührü tsurü mah-o? pü arüh te mütsingdhengde yu müdsicho. 19 Abi nahdohjungpü surochoepü nührünü yore, khang, ade abinü khütapü nguro?” 20 Abi tpurünü lalingcho, “Abi ihrü tsurüe ko abi nah tohjungpü surochoepü ihrünü müdhele. 21 Ta ade abinü khütapü ngunung kohro, mahkhang sünü abi nahtse khangthrujücho ihrünü mümüdhe. Apu te tsingdheng; abi lümjingko, abinü apu nengdang lalingnung kohnung!” 22 Jihudarü langnürü drüchonü abi tpurünü hütsüta yocho, tunüo sünü Jisu tsü Mesia epü yudsinang Sinagog lanü iipehnung arüh yutrümpü licho. 23 Hütsünü abi tpurünü yocho, “Abi lümjingko; apu te tsingdheng!” 24 Anyüpiusü arühnü abi dsipü yocho, “Nühnü yuje du chonungepü Tsingrangba te nyengchoung! Nüh kyangjüba nyitsarü hi münyirü khüduepü ihrünü müdhele.” 25 Nyitsarübanü lalingcho, “Abi amünyi nyitsarü a mahnang Ihnü mümüdhe. Ihnü lango du müdhele: I nah tohcho, ade Ihnü ngure.” 26 Arühnü tsingdhengcho, “Abinü nü chah tu nguchicho? Abinü nü nah khüta trahsohcho?” 27 Abinü lalingcho, “Ihnü nührü te yopehko, ta nührünü münyi. Tuepü thali nyinyüro? Nührüsü abi mono kangnyürü mah-o?” 28 Arühnü abi münyüjo yocho, “Nüh hütsüvi monoe, ta ihrülü Mosa monoe. 29 Tsingrangbanü Mosa te chotachoepü ihrünü müdhele, ta hivilü khüdenünang ihrünü mümüdhe!” 30 Nyitsarübanü lalingcho, “Hi khüta anyemüyangnungo! Abi khüdenünang nührünü mümüdhe, ta abinü I nah trahsohko! 31 Tsingrangbanü münyirü te münyire; ta abi jengreng drürü ko abi lümcho nguchirü te du nyirepü Ihsanü müdhele. 32 Limih thridinü sünüsü nahtohrü trahsohcho müyuchidheng. 33 Hiba nyitsarü hi Tsingrangba chahnü rocho müthsakhang, abinü tu münguchichehnung” 34 Arühnü lalingcho, “Nüh amünyi la nümüsucho ko nühnü ihrü thsingyunung mah-o?” Ko arühnü abi Sinagog lanü iipehcho.
Anbü Nahtoh
35 Khode Jisunü atikehcho tsü yuchicho, abinü nyitsarüba tsü shiro abi te yocho, “Nühnü Nyitsarü Tsurü chah yudsirü mah-o?” 36 Nyitsarüba tsünü lalingcho, “Adirü, Ihnü abi chah yudsinungthsa abi süo?” 37 Jisunü abi te yocho, “Nühnü abi nguko, ko ade nü te sünü chotaro hütsü abi-e.” 38 Nyitsarüba tsünü yocho, “Abüdongba Ihnü yudsire!” ko Jisu jingte mükhukehcho. 39 Jisunü yocho, “Nahtohrünü ngunung ko sürünü nguro arüh nah tohnungthsa yukhanung Ih hiba limih yang rocho.” 40 Farisirü khürü hütsüla abi te yarünü hütsü yuchi abi te tsingdhengcho, “Ihrü mii nahtohrü mah-o?” 41 Jisunü lalingcho, “Nührü nahtohlanglü, nührü mümülangbae; ta nührünü ngurechonü, nührü mülangre.”
San Nyahrü Yukita
1 Jisunü yocho, “Ihnü nührü te yutsatsa yore: Nyitsarü sünü trahtri khunü San kuhla müzüropü lang palangnü züronang, abi aführü ko fükhohrü. 2 Ta sünü trahtri khu züroro abi San anyahrü. 3 Abi khyang trahtri nyahbanü kukhang khangthrujüre; ko abinü apu Santi anengnü dside arühnü abi yuva nyichehre, ko abinü arüh nücheh tsire. 4 Khode abinü arüh nüchehnang, abinü arüh belang würe, ko santinü abi khanglang iiwüre, tunüo arühnü abi yuva müdhele. 5 Arühnü aparü khanglang mü-iiwünung; ta hitari nyitsarü tenü arühnü tsicho tsinung, tunüo arühnü abi yuva mümüdhe.” 6 Jisunü arüh te yukita hi yocho, ta abinü yonyüba tsü arühnü münyichehcho.
Jisu San Nyahrü Atsa
7 Achotsü abinü anyüpiusü yocho, “Ihnü nührü te yutsatsa yore: Ih San trahtri. 8 I müngu rorüh atümung aführü ko fükhohrüti, ta santinü arüh yu münyi. 9 Ih trahtri. Sünü Ih khu züroro abi khümchonung; abi züroli chüdulinung ko tsuyongchah ngunung. 10 Aführünü afühnung, amapsehnung ko thsangnyangjünung du rore. Nührü akang ajeng ngusohnung Ih rocho. 11 “Ih San nyahrü atsa. San nyahrü atsanü santi nengdang apu akang jüre. 12 Sü san nyahrü mahro, ta shehsherü du, abinü rangfü ro ngunü santi pehjüpü rang tsire; hütsüde rangfü tsünü santi tsü tphah tsire ko arüh iishore. 13 Shehsherünü rang tsiba tsü abinü santi tsü müi müle, tunüo abi shehsherü khüdu du. 14 Ih San nyahrü atsa. Aunü Ih müdhe ko Ihnü Au müdhecho roh-i, Ihnü I santi müdhere ko arühnü Ih müdhere. 15 Ko Ihnü arüh nengdang sünung mii khyangre. 16 San kuhla müzehcho adesü I yo san apasü lile. Ihnü arühsü norobae; arühnü I yuva nyinung, ko arüh anyahrü khüdu pohki atii khüdu kangnung. 17 “Aunü Ih müire tunüo anyüpiu ngulinung nengdang Ihnü I kang jünung khyangre. 18 Sünüsü I chahnü I kang khyünung mükoh. Hütsü Ipu lümyunü jüre. Hütsü jünung, ko khyülinung I chah tase kehle. Hi nguchinung I Unü I khyang yuzeng jüko.” 19 Yu hiri khu adesü arüh yola achangnah chürocho. 20 Arüh adrongnü yocho, “Abi chah motsing zehle! Abi amükyangrüe! Nührü tuepü abi yu nyiro?” 21 Ta aparünü yocho, “Motsing zehcho nyitsarü khüdunü hita müchochehnung! Motsingnü anahtohrü khüta trahsohnung!”
Jisu Mükhyüchore
22 Hütsü tsingkang bekhyah ko Jerusalem la amübükuh Müsacheh Thsüti khyo licho. 23 Amübükuh la Jisu Solomon Kekhüm la rachicho. 24 Hütsüde nyitsarütinü abi mükang shibülungnü abi te tsingdhengcho, “Ihrü khüdoi nyahli lümdhamasohnung? Ihrü te tsitsa young: Nüh Mesia tsü mah-o?” 25 Jisunü lalingcho, “Ihnü nührü te yopehko, ta nührünü müyudsire. I U nengla Ihnü tu nguchiro, hütsünü I nengdang yuzi jüre; 26 ta nührünü I yu müdsire, tunüo nührü I santi mah. 27 I santinü I yuva nyire; Ihnü arüh müdhele, ko arühnü I khanglang iirore. 28 Ihnü arüh khyang müchangkaba akang jüre, ko arüh khodesü müsünung. Ko I kheh lanü sünüsü arüh rohcho mühitsinung. 29 I Unü I khyang jüba tsü lüpcho tenü adiuba, ko sünüsü I U kheh lanü arüh rohcho mütsicheh. 30 I U Ihjü khüdu du.” 31 Hütsüde nyitsarütinü abi chah mapnung lung throcho. 32 Jisunü arüh te yocho, “I Unü I khyang nguchinung jücho nguchi atsa adrong Ihnü nührü yola nguchiko; arüh yola nguchi khüiba nengdangnü nührünü I chah mapnyüro?” 33 Arühnü lalingcho, “Nguchi atsa nengdang Ihrünü nü chah mapnyürü mah, ta Tsingrangba müchümükehcho ngang! Nüh nyitsarü khüdu du, ta nühnü Tsingrangba kangnyüre!” 34 Jisunü lalingcho, “Nührübürü yuzeng la Tsingrangbanü, ‘Nührü tsingrangrütiepü’ yocho thrah zehle. 35 Amüsa yunü tu yoro hütsü lede yuje-epü Ihsanü müdhele, ko sürü khyang abi yusi jücho, arüh te Tsingrangbanü tsingrangrüti pü dsicho. 36 Ihlü Tsingrangbanü throchehcho ko hiba limih yang müthehcho. Khang, Ihnü Ih Tsingrangba Tsurüechonü khütapü Tsingrangba müchümükehrepü nührünü yoro? 37 Ihnü I U nguchi münguchikhang, I chah tüyudsi. 38 Ta Ihnü hütsüri nguchikhang, nührünü I chah müyudsi nye, I nguchi tsü yudsing, hütsünü Au I chah lire, ko Ih Au chah lirepü lede nengdang nührünü müdhenung.” 39 Adesü arühnü Jisu rangnung müküpcho, ta arüh kheh lanü bücheh tsipehcho. 40 Hütsüpü Jisunü thali Jordan yongkhi keh wünü Johan-nü akhulang baptijüba müdüm la tsü licho. 41 Ko nyitsarü adrong abi yang ronü yocho, “Johan-nü thsayahiya tu münguchi, ta tuturü Johan-nü hiba nyitsarü nengdang chocho apüm yuje lile.” 42 Ko hütsüla lirü adrongnü abi chah yudsicho.
Lazarus Sücho
1 Bethany la liba nyüh khüdu anengnü Lazarus füthsa licho. Bethany tsü Mary ko afü Martha nyüh liba yangdi tsü licho. 2 (Mary hinü Abüdongba jing chah axümlichi tuji tungkehjüpü abükyü kuvanü nipehjücho; füthsaba tsü abükyü ani Lazarus licho.) 3 Afü nyüh tsünü Jisu yang yusi mütheh yocho: “Abüdongba, nühnü müibong füthsa lile.” 4 Khode Jisunü hütsü yuchicho, abinü yocho, “Hiba füthsa hi asünungthsa mah; hi Tsingrangba hechinung nengdang, ko hi khunü Tsingrangba Tsurü hechisohnung.” 5 Jisunü Martha ko ani ko Lazarus müicho. 6 Ta khode abinü Lazarus füthsalepü yusi yuchicho, abinü hütsüla nyümong anyüh alaa pümcho. 7 Hütsüpü abinü monoti te yocho, “Ihsanü Judea lang thali wonung.” 8 Monotinü lalingcho, “Adorü, atüzitü du tsü hütsüla lirütinü nü chah lungnü mapnung yangchicho; ko nüh hütsülang thali wünyürü ang?” 9 Jisunü yocho, “Nyümong khüdu la rehtseh dhüre-anyüh mahrü do? Sünü atsingse la rachinang jing mümüthire, tunüo abinü hiba limih atsingse ngure. 10 Ta abinü amala rachikhang jing müthire, tunüo abi atsingse müle.” 11 Jisunü hütsü yopü hi lahkehcho, “Ihsa müyangba Lazarus yüpseh tsiko, ta Ih wünung ko abi khamüsunung.” 12 Monotinü lalingcho, “Abi yüpseh tsicho thsakhang, Abüdongba, abi kyangpehnung.” 13 Jisunü yoba tsü Lazarus sücho nengdang, ta aje yüpsehcho nengdang abinü yorepü arühnü lümcho. 14 Achotsü Jisunü arüh te khohcheh yocho, “Lazarus süko, 15 ta Ih abi te mülicho tsü nührü nengdang Ih künyangre, hütsü dunü nührünü yudsinung. Ihsanü abi yang wonung” 16 Thomas (arüp tsurü dsiba) nü arüh müyangrü monoti te yocho, “Abi te sünungthsa Ihsa atümung adoba yola wonung!”
Kangli Roba ko Akang
17 Jisu ro chihde, Lazarus merangpü nyümong müyü tsipü thsacho. 18 Bethany tsü Jerusalem lanü Lutri asang mii müthsacho, 19 ko ani sücho nengdang Martha e Mary nyüh lüm kihchonung Judearü adrong ro licho. 20 Khode Marthanü Jisu tsehlepü yuchicho, abükyünü abi mütohnung wücho, ta Marylü kuhla pümcho. 21 Marthanü Jisu te yocho, “Abüdongba, nüh hila lirelang, Ini müsüba thsako! 22 Ta ade mii nühnü tu chingnang Tsingrangbanü nü khyang jünungepü Ihnü müdhele.” 23 Jisunü abükyü te yocho, “Nüni kangli ronung.” 24 Abükyünü lalingcho, “Abi achangka nyümong kangli ronungepü Ihnü müdhele.” 25 Jisunü abükyü te yocho, “Ih kangli roba ko akang. Sünü I chah yudsiro abi sünye akang linung; 26 ko sü akang linang ko I chah yudsinang khodesü müsünung. Nühnü hi yudsirü mah-o?” 27 Abükyünü lalingcho, “Ho, Abüdongba! Alimih yang ronung liba Tsingrangba Tsurü Mesia tsü nüh-epü Ihnü yudsire.”
Jisunü Tracho
28 Marthanü hi yopü khanglang, abükyünü wü ani Mary rang dsinü yocho, “Adoba hila lile ko abinü nüh yangchile.” 29 Marynü hi yuchi, zah shemüsu abi shirünung dhsüthsa wücho. 30 (Jisu ro yang tsü müchie, Marthanü mütohba müdüm la du tsü licho.) 31 Nyitsarü sürü Mary te kuhla abükyü lümkihcho licho, Mary shemüsu dhsüthsa tsicho ngu abükyü khanglang iiwücho. Abükyü tsü kong lang atranung würepü arühnü lümcho. 32 Hütsüde Marynü Jisu licho ro chihcho, ko abi ngu dunü ajing te mükhukeh yocho, “Abüdongba, nüh hila lirelang, Ini müsüba thsachoe!” 33 Khode Jisunü abükyü ko abükyü yola rorüh tra ngucho; alasih la thahpücho, ko dee thsa lümcho. 34 Abinü arüh te tsingdhengcho, “Nührünü abi khüde dhrürangcho?” Arühnü lalingcho, “Abüdongba, Rung ko dheng.” 35 Jisunü tracho. 36 Nyitsarütinü yocho, “Dheng, abinü khütoh-i abi müiro!” 37 Ta khürünü yocho, “Abinü anahtohba mükyangjücho do? Khang, abinü Lazarus müsüsohnung mükohcho ang?”
Lazarus Kanglisohcho
38 Jisunü adesü amüsithsa lümnü kong lang tsü wücho, hütsü Lungkhi kong ko trahtri la lung khüdunü dhitipücho. 39 Jisunü yuzeng jo yocho, “Lung tsü dhipehng!” Asüba afü Marthanü yocho, “Abüdongba, adelü asüh xümnung, tunüo dhrürangpü amüyü nyümonge!” 40 Jisunü abükyü te yocho, “Nühnü yudsikhang Tsingrangba ahechi ngunungepü Ihnü nü te müyocho mah-o?” 41 Hütsüde arühnü lung tsü dhipehcho. Jisunü ninglang dhengnü yocho, “Uwa, nühnü I yu yuchichonü Ihnü nü nengsere. 42 Ko nühnü lede I yu nyirepü Ihnü müdhele, ko hila yarütinü nühnü Ih müthehchoepü yudsinung nengdang Ihnü hi yore.” 43 Abinü hütsüta choko khanglang, yuva athsengnü dsi yocho, “Lazarus chürung!” 44 Hütsüde ajing akheh meshünü yüpü ko aromih shünü müshütipü abi chürocho. Jisunü arüh te yocho, “Abi lehchehjüng ko tsisohng.”
Jisu Nyüm Arah
45 Mary xodhengnung roba nyitsarütinü Jisunü nguchicho ngu abi chah yudsicho. 46 Ta khürünü Farisirü yang wünü Jisunü tu nguchicho hütsü arüh te yocho. 47 Hütsünü Farisirü ko bebü ayingtinü ashimükhong li yocho, “Ihsanü tu nguchinung? Hiba nyitsarünü nguchiba thsayahiyati apüm tsü dhingdheng! 48 Ihsanü abi hita du pehjükhang, atümungnü abi du yudsinung ko Roman tasenü Ihsa nyümnung ko Ihsa Amübükuh ko Ihsa yanglih thsangnyangjünung!” 49 Arüh yola nyüh khüdu, anengnü Kaifas, sü hütsü kang Bebü Amungthriba licho abinü yocho, “Nührünü tu mümüdhe! 50 Yanglih apüm changnung tenülü apüm nyükheh nyüh khüdu sünung nührü nengdang atsauepü mülümchehrü ang?” 51 Hi abinü alümyunü müyo, ta hütsü kang abi amungthriba bebü thsachonü, abinü Jisu tsü Jihudarü nengdang sünungbae, 52 ko arüh nengdang du mah, ta shupishuza liba Tsingrangba tsurüti afü khüdu la nübülungnung nengdang abinü hi chocho. 53 Hütsü nyümong tinü Jihudarünü Jisu süsohnung arah külüpcho. 54 Hütsünü Jisunü Judea la misha mürachicho, ta abinü Efraim dsiba yangdi lang lipilih shündhün wü hütsüla amonoti yola licho. 55 Phungkhu Thsüti shikhe amünyeh licho ko thsüti bekhu arüh jangjang müsachehnung Jerusalem lang khütango tuwücho. 56 Arühnü Jisu yangchicho, ko arühnü Amübükuh la shibülungde, khüdunü khüdu te tsingdhengtacho, “Nührü nüsü tu lümro? Abi thsüti lang yuje müronung mah-o?” 57 Arühnü abi rangnung nengdang, Jisu khüde lirünang khürünü müdhekhang, hütsü youngpü bebü ayingti ko Farisirütinü yuzeng jücho.
Bethany la Jisu Chah Müyühjücho
1 Phungkhu Thsüti nyümong dhüroh linü, Lazarus, sü asücho lanü kanglisohcho abi liba Bethany yang Jisu wücho. 2 Hütsüla arühnü abi nengdang tsuyongnung rungnümjücho, ko Marthanü chahlacho; ko Lazarus mii Jisu yola tsuyong chah pümrü yola zehcho. 3 Hütsüde Marynü angang athsah axümlichi tuji liter achangsho hiro Jisu jing chah tungkehjo akuvanü nipehjücho. Axümlichi tsünü kuh jengcho. 4 Jisu mono yola khüdu, Judas Iskariot, sü abi kihyochüjünung libanü yocho, 5 “Hiba axümlichi tuji hi tuepü denari thsih asang ngang ipü thsi tsü ailümrü khyang müjücho?” 6 Hi abinü ailümrü rahtahchonü yocho mah, ta abi aführü thsachonü yocho. Abi tsü thsi zahkehrü thsacho ko hütsü lanü apu thsütah khyo bichicho. 7 Ta Jisunü yocho, “Yah pehjüng! Abükyü liba tsü I merang nyümong nengdang yohpüsohng. 8 Ailümrü lede nührü te linung, ta Ihlü nührü te lede mülinung.”
Lazarus Nyüm Arah
9 Nyitsarü atümungnü Jisu Bethany la lilepü yuchicho, ko arühnü Jisu nengdang du mah, ta Lazarus, sü Jisunü asü lanü kanglisohcho abi dhengrithsa wücho. 10 Hütsünü Bebü ayingtinü Lazarus mii mapsehnung arah külüpcho, 11 tunüo abi thsacholanü Jihudarü adrongnü arüh pehjüpü Jisu chah yudsicho.
Jerusalem la Akoh Ngu Züducho
12 Nyümong khüu tsü sühdi arangcheh sürü Phungkhu Thsüti lang rocho arühnü Jisu Jerusalem lang tsehlepü yuchicho. 13 Achotsü arühnü Seva khung bipü abi mütohnung hita züde wücho, “Hosana! Abüdongba nengla sü roro Tsingrangbanü abi müwajüng! Tsingrangbanü Israel Yangthsaba müwajüng!” 14 Jisunü Gaduza khüdu ngu hütsü chah pümcho, amüsa yunü yocho roh-i, 15 “Tüdrü, Zion Yangdi! Dheng, nü Yangthsaba Gaduza khüdu chah pümpü tsehle.” 16 Monotinü akhudilü hi münyichehcho; ta khode Jisu hechicho, hütsüde du yu hi abi nengdang thrahchoepü arühnü abi chah hi nguchikopü lümchehcho. 17 Jisunü kong lanü Lazarus dsimüsu asücho lanü kanglisohde abi yola zehrütinü atikehcho nengdang tsü yuzi jücho. 18 Hütsü ngangnü sühdi tsünü wü abi shirücho, tunüo abinü thsayahiya hütsü nguchichoepü arühnü yuchicho. 19 Hütsüde Farisirünü arühbürü chotanü yocho, “Dheng, Ihsanü seh mükohjungre! Liküpshünü abi khanglang wole!”
Greekrü Khürünü Jisu Yangchicho
20 Jerusalem lang thsüti bekhyah la mübünung würü yola Greekrü khürü zehcho. 21 Arühnü Filip yanglang wü (abi Galil la Bethsaida lanü licho) yocho, “Adirü, Ihrünü Jisu shirünyüre.” 22 Filipnü wünü Andreu te yocho, ko anyünü wü Jisu te yocho. 23 Jisunü arüh te lalingcho, “Nyitsarü Tsurü ahechi arangcheh khyüchonung becho chihko. 24 Ihnü nührü te yutsatsa yore: Fürü püm-o tsü alih la long müsühkhang anabi du jore, ta abi sühkhang abinü asih khütango sihre. 25 Sünü palu akang müiro hütsü changnung; sünü hiba limih la palu akang thrünyiro abinü hütsü müchangkaba akang nengdang yohpüre. 26 Sünü Ih dikehnyüro, abinü I khanglang iirobae, hütsünü Ih khüde linang I dikehrüsü hütsüla linung. Ko sünü Ih dikehro I Unü abi dhichinung.
Jisunü apu Sünung Nengdang Chocho
27 “Adelü I lasih thsangnyangre, Ihnü tu yonung? ‘Uwa, hiba shikhe hi I chah türosoh pü yonung mah-o’? Ta hiba chongcha shikhe hi khunung nengdang du Ih rocho. 28 Uwa, nü neng hechisohng!” Hütsüde ninglangnü yuva khüdunü chotacho, “Ihnü hechijüko ko Ihnü adesü hechijünung!” 29 Hütsüla yaba sühdi tsünü yuva tsü yuchicho, ko khürünü yocho, hütsü ningki, ta khürünü yocho, “Riwürü khüdunü abi te chotako!” 30 Ta Jisunü arüh te yocho, “Hiba yuvanü chotaba tsü I nengdang mah, ta nührü nengdang lile. 31 Ade hiba limih yukhanung bekhyah; ade hiba limih yangthsaba iipehnung. 32 Khode Ih alih lanü dhikehnang, Ihnü atümung Ipu yanglang no khyünung.” 33 (Hi yochonü khütari chongchanü abi sünung hütsü ngusohcho.) 34 Sühdi tsünü lalingcho, “Mesia tsü müchangkapü linungepü ihrü yuzengnü yore. Khang nühnü khütapü Nyitsarü Tsurü tsü dhikehnung pü yoro? Hiba Nyitsarü Tsurü tsü süo?” 35 Jisunü lalingcho, “Atsingse tsü nührü yola azachah du linung. Amanü nührü mübhünüpnungthsa nührü te atsingse lidenü tsehng; tunüo sü amala tsehro abi khüde würünang abinü mümüdhe. 36 Atsingse nührü te lidenü nührü atsingse tsurü kangnungthsa atsingse chah yudsing.”
Nyitsarünü Müyudsicho
Jisunü hi yopü, abinü shehmüi arüh tenü rangkhucho. 37 Abinü arüh bete amüdhethsa hütsüdoi nguchinyesü, arühnü abi chah müyudsicho; 38 hütsü azikehrü Isayanü chocho tikehnung nengdang licho: “Abüdongba, sünü ihrü yusi yudsicho? Sürü te Abüdongbanü abi zii mishacho?” 39 Hütsünü arühnü müyudsichehcho, tunüo Isayanüsü yocho, 40 “Tsingrangbanü arüh nah tohsohcho, ko arüh lüm shütijücho. Hütsünü arüh nahnü müngunung, ko arüh lümlongnü münyichehnung, ko arühnü I yanglang arüh kyangsohnung müximülanung pü Abüdongbanü yore.” 41 Isayanü hi yocho, tunüo abinü Jisu ahechi ngucho ko abi nengdang chocho. 42 Jihudarü langnürü adrongnü Jisu chah yudsicho; ta arüh Sinagog lanü iipehkhang mütsapü Farisirü drülangnü arühnü misha münyengchocho. 43 Tunüo arühnü Tsingrangba nengse tenülü nyitsarü nengse du alaa müicho.
Jisu Yunü Yukhacho
44 Jisunü züdenü yocho, “Sünü I chah yudsiro, I chah du mah ta I riwüsohbong chahsü yudsire. 45 Sünü Ih nguro abinü I riwüsohbong sü ngure. 46 I chah yudsirü müipi amala mülisohnung nengdang, Ih atsingse roh-i limih yang rocho. 47 Khürünü I yusi yuchipü mübichikhang, Ihnü abi yu mükhanung. Tunüo, Ih limih yukhanung müro, ta hütsü khümchonung rocho. 48 Sünü Ih mükhyüchoro ko I yusi mükhyonang, abi yukharü khüdu lile. Achangka nyümong la Ihnü choba tsünü abi yu khanung. 49 Hi yuje, tunüo Ipu lümyunü mücho, ta Ihnü tu yonung ko tu chonung hütsü Au sünü Ih müthehcho apunü I khyang yuzeng jücho. 50 Ko abi yuzi tsünü müchangkaba akang jürepü Ihnü müdhele. Hütsünü Ihnü tu choro, hütsü Aunü I te chonung yochoba lile.”
Jisunü Mono Jing Thsüthohjücho
1 Hütsü Phungkhu Thsüti bekhu nyümong thsacho. Jisunü hiba limih pehjüpü Au yanglang wünung becho chihkopü müdhecho. Abinü limih la sürü apu yo licho arüh lede müicho, ko abinü arüh achangchi müicho. 2 Jisu ko amonoti aromang yangtsu chah pümcho. Jisu kihyochünung lümlong tsü motsingnü Simon Iskariot tsurü Judas lüm la yohjopehcho. 3 Jisunü abi khyang Aunü zii apüm jükopü müdhecho; abi Tsingrangba chahnü rocho ko Tsingrangba yang würepü müdhecho. 4 Achotsü abinü yangtsu chah tsünü shemüsu ashü amixi phungcheh yohpüpü fünising shü khüdunü akih rümcho. 5 Hütsüpü abinü mütpah-tbhü khüdu la kih tungyohcho ko monoti jing thsüthohjücho ko akih rümba fünising tsünü nikungjünung dikehcho. 6 Abinü Simon Peter yanglang rocho, ko Peternü abi te yocho, “Abüdongba, nühnü I jing thsüthohjünung do?” 7 Jisunü abi te lalingcho, “Ihnü tu nguchiro nühnü adelü münyichehnung, ta akhanglang du nyichehnung.” 8 Peternü khohcheh yocho, “Khodesü nühnü I jing müthsüthohsohnung!” Jisunü lalingcho, “Ihnü nü jing müthsüthohjükhang, nüh I mono mükangcheh.” 9 Simon Peternü lalingcho, “Abüdongba, khang, I jing du mahpü, I kheh ko I thah mii thsüthohjüng!” 10 Jisunü yocho, “Sü mütsahko abi jing chah khu thsüthohnung thsütah müle abi müsakhüti lile. Nyüh khüdu chah khu nührü atümung müsa lile.” 11 (Sünü abi kihyochüjünung hütsü Jisunü müdhejung lichonü, abinü yocho, “Nyüh khüdu chah khu nührü atümung müsa lile.”) 12 Jisunü arüh jing thsüthohjüpü, abinü abi shü amixiba tsü thali khyüpü apu pümjilang thalicho. Abinü yocho, “Ihnü ade tsatsa nührü te tu nguchicho hütsü nührünü münyicheh-o?” 13 “Nührünü I te Adorü ko Abüdongba pü dsire, ko nührünü athsalang dsire, tunüo Ih hütsüe. 14 Ih, nührü Abüdongba ko Adobanü ade tsatsa nührü jing thsüthohjüko. Khang, nührünü khüunü khüu jing thsüthohjütang. 15 Ihnü nührü te nguchicho roh-i nührünü nguchinung nengdang, Ihnü adüzü khüdu ngusohko. 16 Ihnü nührü te yutsatsa yore: ayurü süsü Abüdongrü tenü adiuba mah, ko yusi hirü süsü riwüsohbong tenü adiuba mah. 17 Adelü nührünü hiba yuje tsü müdheko, nührünü hütsü bichikhang nührü khüdoi akünyang thsanung! 18 “Ihnü nührü atümung nengdang müchore; Ihnü throchehrü Ihnü müdhele. Ta amüsa yunü hita yocho tikehnungbae, ‘I te marita tsuba tsü Ih nyüm yacho.’ 19 Khode hi tikehnang nührünü ‘Ih tsü Abi-e’ pü müdhenung nengdang Ihnü hi mütikeh-e yojungre. 20 Ihnü nührü te yutsatsa yore: Sünü Ihnü riwüsohba nyitsarü khyüchonang abinü Ih khyüchore; ko sünü Ih khyüchoro abinü I riwüsohbong khyüchore.”
Jisunü Abi Kihyochünung Yojungre
21 Jisunü hi yoko khanglang, alüm dee tohchonü abinü khohcheh yocho, “Ihnü nührü te yutsatsa yore; nührü yola nyüh khüdunü Ih kihyochünung.” 22 Abinü sükhu yorünang nyekanü monotinü arüh-e arührü dhengtacho. 23 Mono yola khüdu, sü Jisunü müicho, abi Jisu chidong pümcho. 24 Simon Peternü abi chah nahmakejo yocho, “Sükhu chorünang abi te tsingdheng.” 25 Hütsünü abinü Jisu yanglang khü hapkeh wüpü tsingdhengcho, “Abüdongba, hütsü süo?” 26 Jisunü lalingcho, “Ihnü hikih la hümthse thsangpü sü khyang jünang hütsü abi thsanung.” Hütsüpü abinü hümthse azikyah khyo thsangcho, ko hütsü Simon Iskariot tsurü Judas khyang jücho. 27 Judasnü hümthse tsü khyüyeng abi chah Satan züducho. Jisunü abi te yocho, “Nüh tu nguchinung lirünang zah nguching!” 28 Tuepü Jisunü abi te hi yorünang yangtsu chah pümrü aparü sünüsü münyichehcho. 29 Judas tsü thsibong yohpürü thsachonü, Jisunü abi te thsüti nengdang arüh thsütah wü lihnung mahkhang ailümrü khyang lango jünung yorepü mono yola khürünü lümcho. 30 Judasnü hümthse tsü khyücho ko hütsüde tsünü tsipehcho. Hütsü amala thsacho.
Yuzeng Asi
31 Judas tsiko khanglang Jisunü yocho, “Ade Nyitsarü Tsurü ahechi mishako; ko abi chah Tsingrangba mishako; 32 ko Tsingrangba ahechi abi chah mishakhang, Tsingrangbanü Nyitsarü Tsurü ahechi tsü apu chah mishanung, ko abinü khüdupinü hechijünung. 33 I tsurüti, Ih nührü te anyahli mülinung. Nührünü Ih yangchinung, ta Ihnü Jihudarü langnürü te yocho roh-i, ade Ihnü nührü te yore, ‘Ih khüilang würo hütsülang nührünü mürochehnung.’ 34 Ko Ihnü ade nührü khyang yuzeng asi khüdu jüre: Nührü khüdunü khüdu te müitaang. Ihnü nührü müicho roh-i nührü khüunü khüu te müitaang. 35 Nührü khüdunü khüdu te müitakhang, atümungnü nührü I monoepü müdhenung.”
Peternü münyengchonung Jisunü Yojungre
36 Simon Peternü abi te tsingdhengcho, “Abüdongba, nüh khüilang wünung?” Jisunü lalingcho, “Ih khüilang wonang nühnü adelü mürochehnung; ta akhanglang du iirochehnung.” 37 Peternü tsingdhengcho, “Abüdongba, khütapü ade Ihnü nüh mü-iirochehnung? Nü nengdang sünung Ih rungnüm lile!” 38 Jisunü lalingcho, “Nühnü I nengdang sünung yuje rungnüm lirü ang? Ihnü nü te yutsatsa yore: Hüna mükhongde nühnü Ih mümüdhepü asangpili yonung.”
Au Yanglang Wünung Lang
1 Jisunü arüh te yocho, “Nührü tülongri; nührünü Tsingrangba chah yudsing ko I chahsü yudsing. 2 I U kuhla alichah khütang lile, ko Ih nührü nengdang alichah rungnümnung würe. Hütsüta mahrelang Ihnü nührü te yobae. 3 Ko Ih wü nührü nengdang alichah rungnümko khanglang, Ih khüde linang hütsüla nührüsü linungthsa, Ih anyüpiu ro nührü nünung. 4 Ih khüde würo hütsüba lang tsü nührünü müdhele.” 5 Thomasnü abi te yocho, “Abüdongba, nüh khüilang würo Ihrünü mümüdhe; hütsükhang Ihrünü lang tsü khüta müdhenung?” 6 Jisunü abi te lalingcho, “Lang, yuje ko akang tsü Ih; Ih mükhupü süsü Au yanglang müwücheh. 7 Abinü arüh te yocho, Adelü nührünü Ih müdheko, nührünü I Usü müdhenung, ko ade tinü nührünü abi müdhele ko abi nguko.” 8 Filipnü abi te yocho, “Abüdongba, ihrü te Au ngusohng; ihrü nengdang hütsü akükyüe.” 9 Jisunü lalingcho, “Filip, Ih nührü te hidoi nyahli liko; ta nühnü Ih mümüdherü ang? Sünü Ih ngucho abinü Au nguko. Khang khütapü nühnü, ‘Ihrü te Au ngusohng pü yoro’? 10 Ih Au chah ko Au I chah lirepü nühnü yumüdsirü do?” Ihnü nührü te yoba yu hiri I lümyunü yorü mah, ta Au, sü I chah liro, abinü apu nguchi nguchire. 11 Ih Au chah, ko Au I chah lirepü yoba yu tsü yudsing. Hütsüta mahnye Ihnü nguchicho chah dusü yudsing. 12 Ihnü nührü te yutsatsa yore: Sünü I chah yudsiro Ihnü tu nguchiro abinü hütsü nguchinung, ho, abinü adiu mii nguchinung, tunüo Ih Au yanglang würe. 13 Ko nührünü I nengla tuturü chingnang Ihnü nguchinung, hütsünü Au ahechi tsü Atsurü khu ngusohnung. 14 Nührünü I neng lanü lango chingkhang, hütsü Ihnü nguchinung.
Anbü Amüsa Nyengchocho
15 “Nührünü Ih müikhang, I yuzeng bichinung. 16 Ihnü Au te chingnung ko nührü te lede linung nengdang abinü nührü khyang aparü atrorü khüdu jünung. 17 Abi tsü Tsingrangba yuje mishajübong Anbü. Liminü abi mükhyüchore, tunüo liminü abi müngure mahkhang mümüdhe. Ta nührünülü abi müdhele, tunüo abi nührü te lire ko nührü chah lile. 18 “Ihnü nührü mürümürang müpehjünung; Ih nührü yang thali ronung. 19 Akhikyah chah lipü liminü Ih müngupehnung, ta nührünü Ih ngunung; ko Ih akang lichonü, nührüsü akang linung. 20 Khode hütsüba nyümong tsü ronang, Ih I U chah, nührü I chah ko Ih nührü chah lirepü nührünü müdhenung. 21 “Sünü I yuzeng khyüchoro ko hütsüri bichiro abinü Ih müire. Sünü Ih müiro; I Unü abi müinung ko Ihnüsü abi müinung ko abi te Ipu mishanung.” 22 Judasnü (Judas Iskariot mah) yocho, “Abüdongba, khütapü nüpu jangjang limih te mümishapü ihrü te mishanung?” 23 Jisunü abi te lalingcho, “Sünü Ih müiro abinü I adoba bichinung. I Unü abi müinung, ko I U ko Ih abi yang ro abi te linung. 24 Sünü Ih mümüiro abinü I yu mübichire. Ko nührünü yuchiba yu tsü I yu mah, ta I riwüsohba Au yue. 25 “Ih nührü te lidenü hi nengdang nührü te yoko. 26 Atrorü, Anbü Amüsa, sü Aunü I nengla müthehnung, abinü nührü te lüpcho donung ko Ihnü nührü te yochoba atümung lümchehsohnung. 27 “Ihnü nührü te atbachi yohpüjüre; Ihnü Ipu atbachi nührü khyang jüre. Ihnü hütsü liminü jücho kyo müjüre. Nührü tülongri ko tüwah; ko tüdrü. 28 ‘Ih tsire, ta nührü yang thali ronungepü nührü te yocho nührünü yuchiko.’ Nührünü Ih müire langlü, Ih Au yanglang wüba tsü nührünü künyangbae, tunüo abi I tenü adiuba. 29 Khode hi tikehnang nührünü yudsinung nengdang, hiri mütikehdenü Ihnü nührü te yore. 30 Ihnü nührü te anyahli müchotacheh, tunüo hiba limih yangthsabong tsü tsehle. Abi I chah tu tase müle, 31 ta Ihnü Au müirepü liminü müdhenung nengdang abinü I khyang yuzeng jücho roh-i; Ihnü lüpcho nguchire. “Rung, Ihsanü hilanü tsinung.
Jisu Shükusishü khung
1 “Ih shükusishü khung, ko tbü thsaba tsü I U lile. 2 I chah liba asih müsihba ajengza tsü abinü kyopehre, ko asih sihba jengza tsü asih alaa sihsohnung abinü hütsü dhrükehjüre. 3 Nührülü Ihnü jücho adoba khu müsachehpehko. 4 I chah lieng, ko Ih nührü chah linung. Ajengzanü ashü chah mülikhang ajangjang asih müsihcheh. Hütsü kyo nührünü I chah mülikhang asih müsihcheh. 5 “Ih shükusishü, ko nührü ajengza. Sü I chah liro, ko Ih sü chah liro, abinü asih khütang sihre; tunüo Ih müzehpü nührünü tu münguchicheh. 6 Sü I chah müliro abilü ajengza kyopehre ko mükupehre; hitari ajengza tsü khyübülung michang la yoh tahpehre. 7 Nührü I chah likhang ko I yu nührü chah likhang; nührü khyünyücho ching, ko hütsü nührünü ngunung. 8 Nührünü asih khütango sihcho khu I U ahechi ngusohre; ko hütsüta nührü I monoti kangre. 9 I Unü tu khüta Ih müiro, Ihnü hütsü roh-i nührü müire; I müi la lieng. 10 Ihnü tu khüta I U yuzeng bichiro, ko abi amüi la liro; hütsü roh-i nührünü I yuzeng bichikhang, nührüsü I müi la linung. 11 “I akünyang nührü chah linung ko nührü akünyang ajeng kangnung nengdang, Ihnü nührü te hi yoko. 12 I yuzeng tsü hi: Ihnü nührü müicho kyo, nührü khüdunü khüdu te müitaang. 13 Nyüh khüdunü müyangrü khüdu nengdang apu akang jüba tenü adiu amüi müle. 14 Ko Ihnü nührü te tu mülaro hütsü nührünü nguchikhang, nührü I müyangrü. 15 Ihnü adelü nührü te kulirü pü müdsire, tunüo kulirü khüdunü abüdongrünü tu nguchiro hütsü mümüdhere. Hütsü mahpü, Ihnü nührü te müyangrü pü dsire, tunüo I U chahnü yuchicho lüpcho Ihnü nührü te yoko. 16 Nührünü Ih throchehcho mah; ta Ihnü nührü throchehcho ko nührünü wünü singsih khütango sihsohnung Ihnü nührü jehsohcho. Hütsünü nührünü I nengla tuturü chingnang Aunü hütsü nührü khyang jünung. 17 Hütsüeko, Ihnü nührü te hi mülare: Nührünü khüdunü khüdu te müitaang.
Liminü Thrünyicho
18 “Liminü nührü thrünyikhang, hinü Ih akhu thrünyichoepü nührünü lümchehng. 19 Nührü limih yoerelang, abi yo roh-i nührü müiba thsako. Ta hiba limih lanü Ihnü nührü throchehcho, ko nührü abi yo mah; hütsünü liminü nührü thrünyire. 20 Ihnü nührü te yoba yu lümchehng: ‘Ayurü süsü abüdongrü tenü adiuba mah.’ Arühnü Ih dhsümthsekhang, nührüsü dhsümthsenung: arühnü I yu nyikhang, nührü yusü nyinung. 21 Ta arühnü hi apüm nührü chah nguchinung; tunüo nührü I yo ko arühnü Ih müthehbong mümüdhe. 22 Ih ronü arüh te müyore langlü, arüh amünyi müliba thsako; ta adelü arüh münyi nengdang mülang pehba mülinung. 23 Sünü Ih thrünyiro abinü I Usü thrünyire. 24 Ihnü arüh yola sünüsü münguchicho nguchi tsü münguchirelang arüh münyi müliba thsacho; ta adelü Ihnü tu nguchicho; arühnü nguko, arühnü I U Ihjüding thrünyire. 25 Ta hütsü arüh yuzeng la thrah licho tikehnungba licho: ‘Arühnü amükangnü Ih thrünyicho’ 26 “Atrorü, Anbü sünü Tsingrangba yuje mishajüro abi Tsingrangba chahnü ronung. Ihnü abi Au chahnü nührü yang müthehnung, ko abinü I nengdang yuzi jünung. 27 Ko nührü mii I yuzi thsanung, tunüo adikeh lanü nührü I yola licho.
1 “Nührü yudsi lanü müshehlisohnung nengdang Ihnü nührü te hi yopehko. 2 Sinagog lanü nührü iipehnung, ko sünü nührü mapsehnang abinü Tsingrangba dikehrepü lümnungba bekhyah tsehle. 3 Arühnü I U thsanye Ih thsanye mümüdhechonü nührü chah hiri nguchinung. 4 Khode arühnü hiri nguchinung nyümong chii ronang, Ihnü nührü te yochoeko nührünü lümchehnung nengdang Ihnü nührü te hi yoko.
Anbü Amüsa Nguchi
“Ihnü adikeh la nührü te hiri müyo, tunüo Ih nührü te licho. 5 Ade I riwüsohbong yanglang Ih würe, ta nührü sünüsü Ih khüde würünang mütsingdhengre. 6 Ko ade Ihnü nührü te yochonü, nührü lasih awahnü jeng lile. 7 Ta Ihnü nührü te yutsatsa yore: Ih tsicho tsü nührü nengdang atsau, tunüo Ih mütsikhang, atrorü tsü nührü yang müronung. Ta Ih wükhang, Ihnü abi nührü yang müthehnung. 8 Ko khode abi ronang, amünyi nengdang, amüsaba nengdang ko Tsingrangba yukhaba nengdang alimih la nyitsarü te amülanglang yuzi jünung. 9 Amünyi nengdang arüh amüthsalang licho, tunüo arühnü I chah yumüdsi; 10 amüsaba nengdang arüh amüthsalang thsacho, tunüo Ih Au yanglang würe ko nührünü adelü Ih müngunung; 11 ko yukhaba nengdang arüh amüthsalang licho, tunüo hiba limih yangthsaba yu tsü khapehko. 12 “Nührü te yonung adesü yu khütango lile, ta ade nührünü mükoh hinung. 13 Ta khode Tsingrangba yuje mishajübong Anbü tsü ronang, abinü nührü yuje apümlang nünung. Abinü alümyunü tu müchonung, ta abinü tu yuchicho, hütsü nengdang chonung ko aronung tu liro hütsüri nengdang nührü te yonung. 14 Abinü Ih hechinung, tunüo Ihnü tu yonang abinü hütsü du nührü te müdhesohnung. 15 I U licho apüm I yo; hütsünü Ihnü tu jünang Anbünü hütsü khyünung ko nührü te müdhesohnung.
Awah ko Akünyang
16 “Akhikyah chah liko nührünü Ih müngupehnung, ko adesü akhikyah chah liko nührünü Ih ngunung.” 17 Amonoti yola khürünü arühbürü yola tsingdhengtacho, “akhikyah chah liko Ihsanü abi müngunung, ko akhikyah chah liko Ihsanü abi ngunungepü abinü yoba tsü tu khu-o? Ko abinü hitasü yorü, ‘Hi Ih Au yanglang wücho khunüe.’ 18 ‘Akhikyah chah’ hi tu khu o? Abinü tu khu chorünang Ihsanü mümüdhe!” 19 Arühnü abi te tsingdhengririepü müdhe Jisunü arüh te yocho, “Akhikyah chah liko nührünü Ih müngunung, ko akhikyah chah liko nührünü Ih ngunungepü Ihnü nührü te yoko.” Hi nengdang nührü yola tsingdhengtarü mah-o? 20 Ihnü nührü te yutsatsa yore: Nührünü tranung, wahnü me tranung, ta limilü künyangnung; nührü wahnung, ta nührü awah tsü akünyang kangnung. 21 Khingkurünü zatbünung thsade, abükyü wahre tunüo abükyü chongchanung becho chihre; ta khode azarü tsü mülimülanang, abükyü adhsa tsü nbüchüre, tunüo limih la azarü khüdu surocho tsünü abükyü künyangre. 22 Nührü nengdangsü hütsü kyo lile: Ade nührü wahre, ta Ihnü thali nührü shirünung, ko akünyang khüi sünüsü nührü chahnü mühitsichehnung, hütsü akünyangnü nührü lasih jengnung. 23 “Khode hütsüba nyümong ronang, nührünü tu nengdangsü I te mütsingdhengnung. Ihnü nührü te yutsatsa yore: nührünü I nengla Au te tuturü chingnang, abinü nührü khyang jünung. 24 Ade yingcheh I nengla nührünü tusü müching; nührü akünyang ajeng kangnung nengdang ching ko nührünü ngunung.
Limih Chah Akohba
25 “Ihnü nührü te hiri yonung nengdang adüzü bichicho. Ta Ihnü adüzü mübichipü Au nengdang tsitsa chonung shikhe ronung. 26 Khode hütsüba nyümong ronang, nührünü abi te I nengla chingnung; ko nührü nengla Ihnü Au te kihchijünungpü nührü te müyore, 27 tunüo Au apunü nührü müire. Nührünü Ih müirü ko Ih Tsingrangba chahnü rochoepü yudsichonü abinü nührü müire. 28 Ih Au chahnü limih yang rocho; ko ade Ih limih pehjüpü Au yang würe.” 29 Hütsüde monotinü abi te yocho, “Adelü nühnü adüzü mübichipü tsitsa chore. 30 Nühnü lüpcho müdhelepü ade ihrünü müdhere; nü te sünüsü tu tsingdhengnung müdhsüdah. Hinü nüh Tsingrangba chahnü rochoepü ihrü khyang yudsisohre.” 31 Jisunü arüh te lalingcho, “Ade nührünü yudsirü mah-o? 32 Nührü shupishuza palu kuh lang I müleng pehjüpü tsishonung shikhe tsehle, ko hütsü chipehko. Ta I müleng tsatsa mah, tunüo Au I te lile. 33 Nührü I te li atbachi ngunung nengdang Ihnü hi nührü te yoko. Limih la nührü chongcha roto lile. Ta re zehng! Ihnü limih kohko!”
Monoti Nengdang Dangkhidangnangcho
1 Jisunü yu hiri chopü, ninglang dhengnü yocho, “Uwa, becho chihko. Atsurünü nüh hechinungthsa, nü Tsudhre hechisohng. 2 Nühnü abi khyang jübati khyang abinü müchangkaba akang jünungthsa, nühnü amüi tsurü atümung michah abi khyang zii jüko. 3 Ko müchangkaba akang adüzü yujeba Tsingrang, ko nühnü riwüsohba Jisu Khrista müdhenung. 4 Nü ahechi Ihnü limih la hechisohko; ko nühnü I khyang nguchinung jücho nguchi tsü thümko. 5 Uwa, limih müthride Ih nü te lide tu ahechi licho, hütsü ade nüpu linü hechisohng. 6 “Limih lanü nühnü I khyang jübati khyang Ihnü nüh müdhesohko. Arühnü yo licho, ko nühnü arüh I khyang jücho. Arühnü nü yu nyicho, 7 ko nühnü ade I khyang jücho lüpcho tsü nü chahnü rorepü arühnü müdhele. 8 Nühnü I khyang jüba yu tsü Ihnü arüh khyang jücho, ko arühnü hütsü khyüchocho; ko Ih nü chahnü roba tsü yuje Ih nühnü müthehchoepü arühnü yudsicho.” 9 “Ihnü arüh nengdang kihchire. Ihnü limih nengdang mükihchire, ta nühnü jübati nengdang kihchire, tunüo arüh nüyo lile. 10 I licho apüm nüyo ko nü licho apüm I yo; ko I ahechi tsü hütsüri khu ngusohre. 11 Ko Ih ade nüh yang rore; Ih limih la mülinung, ta arühlü limih la lile. Amüsa Uwa! Ihjü tu khüta khüdu liro, hütsü roh-i arühsü khüdu kang linungthsa, nü neng zii khüiba nühnü I khyang jücho, hütsünü arüh khümcho yohpüjüng. 12 Ih arüh te lide nühnü I khyang jüba nü neng zii tsünü arüh khümcho yohpücho. Ihnü arüh tsungticho, ko amüsa yu tikehsohnung sü chahnung licho, abi chah khu arüh süsü müchah. 13 Ko Ih ade nüh yang rore, ko I akünyang arüh chah ajeng linung nengdang Ihnü limih la yu hiri chore. 14 Ihnü arüh khyang nü yu jüko, ko liminü arüh thrünyicho, tunüo Ih khüta limih yo mahro, hütsü kyo arühsü limih yo mah. 15 Arüh limih lanü no tsiengpü Ihnü nü te mükihchire, ta arüh amünyi chahnü khümcho yohpüngpü kihchire. 16 Ih khüta limih yo mahro, hütsü kyo arühsü limih yo mah. 17 Yuje tsünü arüh müsachehjüng; nü yu yuje lile. 18 Nühnü Ih khüta limih yang müthehcho, hütsü roh-i Ihnü arüh limih yang müthehko. 19 Arühsü nü te yuje la müsachehsohnungthsa, arüh khyanglangnü nü te Ipu jangjangthsa müsachehre. 20 “Ihnü arüh nengdang du kihchirü mah, ta arüh yusi khu sürünü I chah yudsiro arüh nengdangsü kihchire. 21 Uwa! Nüh I chah ko Ih nü chah licho kyo, arüh Ihsa chah lisohng. Ih nühnü müthehchoepü liminü müdhenungthsa, arüh khüdu kang lisohng. 22 Ihsa khüta khüdu liro, hütsü roh-i arüh khüdu du linung; 23 Ih arüh chah ko nüh I chah; hütsünü arüh khüdu du kangnung, ko nühnü Ih müthehcho ko müicho kyo arüh mii müirepü liminü müdhenung nengdang, ahechi nühnü I khyang tu jücho Ihnü arüh khyang jüko. 24 “Uwa! Nühnü arüh I khyang jücho, hütsünü Ih khüde linang arüh hütsüla lisohnyüre; ko nühnü I khyang jüba Ih ahechi tsü arühnü ngunung, tunüo limih müthridenü nühnü Ih müicho. 25 Amüsa Uwa! Liminü nüh mümüdhe, ta Ihnü nüh müdhele, ko nühnü Ih müthehchoepü hirinü müdhele. 26 Ihnü arüh khyang nüh müdhesohcho, ko nühnü Ih müiba tsü arüh chah linung, hütsünü Ihsü arüh chah linung nengdang, Ihnü mütozah hütsü roh-i nguchinung.”
Jisu Rangcho
1 Jisunü hütsüta dangkhidangnangpü khanglang, monoti te Kidron yongkhi kehnü wücho. Hütsüba müdüm la tbü khüdu licho, ko Jisu ko amonoti hütsüla züducho. 2 Kihyochüjübong Judasnü hütsü müdhe licho, tunüo Jisunü amonoti te hütsüla adrongpi shirütacho. 3 Achotsü Judasnü Bebü ayingti ko Farisirü chahnü rothsarü mülung dsibhong ko thsunohrü bipü wücho. 4 Jisunü abi chah tikehnung lüpcho müdhe licho, hütsünü bekhu chüdu arüh te tsingdhengcho, “Nührü sü yangchiro?” 5 Arühnü lalingcho, “Nazaret-rü Jisu yangchire.” Abinü yocho, “Ih abi-e.” Kihyochüjübong Judas mii arüh yola yacho. 6 Jisunü arüh te, “Ih abi-e.” pü yode, arüh khanglang shehli wünü alih la khülucho. 7 Anyüpiu Jisunü arüh te tsingdhengcho, “Nührü sü yangchiro?” Arühnü yocho, “Nazaret-rü Jisu yangchire.” 8 Jisunü yocho, “Ih abi-e” pü nührü te yopehko. “Nührü Ih yangchirü thsakhang, aparülü tsisohng.” 9 (Hiba hi abinü: “Uwa, nühnü I khyang jücho yola süsü müchah pü abinü yocho tikehnung nengdang licho.”) 10 Hütsüde, Simon Peter, sü nohsheng khüdu biyacho, abinü hütsü tohcheh Amungthriba bebü kulibong tsalang nangku thsüp-pehjücho. Kulibong neng tsü Malkas thsacho. 11 Jisunü Peter te yocho, “Nü nohsheng tsü nohtrüp la yohng! I Unü jüba shing tsü Ihnü müyongnung do?”
Jisu Anas Bete
12 Hütsüpü Roman rothsarü arüh nüchibong zehnü ko Jihudarü anyahrünü Jisu rangnü rahpü, 13 Anas yang akhu nowücho. Tunüo abi Kaifas aku ko hütsü kang Kaifas tsü Amungthriba bebü licho. 14 Jihudarü langnürü te nyitsarü atümung nengdang nyüh khüdu sünung tsü atsaubaepü thsüchiba tsü Kaifas thsacho.
Peternü Jisu Münyengchocho
15 Simon Peter ko aparü mono khüdunü Jisu khanglang iiwücho. Aparü mono tsü Amungthriba Bebünü müdhe licho, hütsünü abi Jisu te Amungthriba bebü kekhüm la züducho, 16 ta Peter trahtri mihlang yacho. Hütsüde aparü mono tsünü thali chüdu trahtri nyahtpü te tsü chotapü Peter nüyohcho. 17 Trahtri nyahtpü tsünü Peter te yocho, “Nühsü hivi mono yola khüdu mahrü ang?” Peternü lalingcho, “Ihlü mah.” 18 Thsahchonü kulirüti ko anyahrüti tsü miha michang thsapü hütsü mükang he yacho. Achotsü Peternü arüh yola wü mih he yacho.
Amungthriba Bebübanü Jisu te Tsingcho
19 Bebü Amungthribanü Jisu te abi monoti ko abi adoba shulüm tsingcho. 20 Jisunü lalingcho, “Ihnü atümung te lede misha choko; ko I adoba apüm nyitsarü atümung shibülung chah Sinagog ko amübükuh la du docho. Ihnü khodesü rang tusü müyo. 21 Khang tuepü I te tsingdhengro? I yu yuchirü te tsingdheng. Ihnü tu yocho arühnü müdhele, arüh te tsingdheng.” 22 Jisunü hütsüta yode, anyahrü khüdunü abi chah tangcho ko yocho, “Bebü amungthriba te hütsüta lalingrü mah-o?” 23 Jisunü abi te yocho, “Ihnü lango chomeh yo likhang, yuzi tsü hila lirü atümung te young. Ta Ihnü yoba tsü athsalang thsakhang, tuepü nühnü I chah tangro?” 24 Hütsüpü Anasnü abi arahshüshü Kaifas Bebü Amungthriba yang müthehcho.
Peternü Anyüpiu Jisu Münyengchocho
25 Peter hütsüla ade yingcheh mih he yacho. Hütsünü aparünü abi te yocho, “Nühsü hivi mono yola khüdu mahrü ang?” Ta Peternü münyengchonü yocho, “Ihlü mah.” 26 Peternü anangku thsüp-pehjüba tsutpurü Bebü amungthriba kulirü yola nyüh khüdunü yocho, “Ihnü nüh abi te tbü la müngucho do?” 27 Adesü Peternü “Mah” pü yocho, ko hütsütade tsü hüna khongcho.
Jisu Pilat Bete
28 Anyangnyü mütoh arühnü Kaifas kuh lanü Governor yangnü Jisu nowücho. Ko Jihudarü langnürülü kuh yonglang tsü müzüducho, tunüo Phungkhu tsuyong tsuchehnungthsa arühnü mümünyinyücho. 29 Achotsü Pilatnü dongkhu chüdu arüh te tsingdhengcho, “Nührünü hiba nyitsarü tunü mülangjüro?” 30 Arühnü lalingcho, “Abinü müthsamehrelang ihrünü nüh yang münorobae.” 31 Pilatnü arüh te yocho, “Khang nührübürünü nowü nührü yuzengnü abi yu khaang.” Arühnü yocho, “Nyitsarü mapsehnung ihrü yuzengnü mümülare.” 32 (Hiba hi Jisunü abi khütari asübanü sünung chocho, hütsü tikehnung nengdang.) 33 Pilatnü thali Yangthsaba pümji lang züducho ko Jisu dsinü tsingdhengcho, “Nüh Jihudarü Yangthsaba mah-o?” 34 Jisunü lalingcho, “Hi nü lümyunü a mahkhang aparünü I nengdang nü te yocho?” 35 Pilatnü lalingcho, “Ih Jihudarü khüdu mah-o? Nührübürü nyitsarü ko bebü ayingtinü nüh I khyang khakhuchüjücho. Nühnü tu nguchicho?” 36 Jisunü yocho, “I yanglih hiba limih yo mah; I Yanglih hiba limih yoerelang, Jihudarü khehla Ih müjünung nengdang I mononü khatabae; ta I Yanglih tsü hiba limih yo mah!” 37 Hütsünü Pilatnü abi te tsingdhengcho, “Khang nüh yangthsarü khüdu mah-o?” Jisunü lalingcho, “Ih Yangthsabaepü nühnü yore. Ih yujeba nengdang yuzi jünung surocho, ko hütsü nengdang Ih limih la rocho. Sü yuje yo liro abinü I yu nyire.” 38 Pilatnü tsingdhengcho, “Yuje tsü tuo?”
Jisu Süsohcho
Achotsü Pilatnü thali dongkhu nyitsarüti yanglang chüdu arüh te yocho, “Ihnü abi mülangjünungthsa yuzi tu müngure. 39 Ta Phungkhu Thsüti shikhe la Ihnü nührü khyang nyitsarü khüdu müthehnung nührü yangthsa khüdu lile. Hütsüeko nührü khyang Jihudarü Yangthsaba tsü müthehsohnyürü mah-o?” 40 Arühnü abi te züdenü lalingcho, “Abi mah!, ta Barabas!” (Barabas tsü afüashi thsacho.)
1 Hütsüpü Pilatnü Jisu nümüi xüpsohcho. 2 Ko rothsarünü zengshünü kuthri khüdu chehpü hütsü athah la thrijücho; hütsüpü arühnü abi chah meyü-mohba shü khüdu phakehjücho 3 ko ronü yocho, “Jihudarü Yangthsaba kutsüp lieng!” Ko arühnü küdu abi chah tangcho. 4 Pilatnü adesü chüdu sühdi te tsü yocho, “Dheng, Ihnü abi süsohnungthsa tu yuzi müngu pü nührü khyang ngusohnung nengdang hila nührü yang abi no chüronung.” 5 Hütsüta Jisu tsü zeng kuthri thripü meyü-mohba shü tsü müpipü chürocho. Ko Pilatnü arüh te yocho, “Dheng, nyitsarü tsü hila lile!” 6 Khode bebü ayingti ko amübükuh nyahrütinü abi ngucho, arühnü züdenü yocho, “Abi khala chah hamkehng! Abi khala chah hamkehng!” Pilatnü arüh te yocho, “Nührü jangjang abi nowüng, ko hamkehng; tunüo Ihnü abi süsohnungthsa tu yuzi müngure.” 7 Sühdi tsünü lalingcho, “Ihrü yuzeng khüdu lile ko hütsünü abi sübae, tunüo apunü abi Tsingrangba Tsurüepü yore.” 8 Khode Pilatnü hi yuchicho, abi khüsha drücho. 9 Abinü Yangthsaba pümji lang thali züdu Jisu te tsingdhengcho, “Nüh khüdenü rocho?” Ta Jisunü mülalingcho. 10 Pilatnü abi te yocho, “Nühnü I te müchotarü ang? Nüh müthehnung mahkhang hamkehsohnung I chah tase kehle ko nühnü mümüdherü do?” 11 Jisunü lalingcho, “Amilangnü nü khyang müjürelang, I michah nüh tu tase mülinung. Hütsüeko nü khyang sünü Ih khakhuchüjücho, abi amünyi adiuba.” 12 Khode Pilatnü hi yuchicho, abinü Jisu müthehnung lang yangchicho. Ta sühdi tsünü züde yocho, “Nühnü abi müthehkhang nüh Kaisar shangrü mah! Sünü apu tsü yangthsarüe ro abi Kaisar nyümrü lile.” 13 Khode Pilatnü yu hiri yuchicho, abinü Jisu dongkhu no chüducho ko “Lungtpah khyang müdüm,” yukharü pümji chah tsü pümcho. (Hütsüba te Ibri yunü “Gabbatha” pü dsire.) 14 Hütsütadelü Phungkhu Thsüti bekhu nyüthung la kangcho. Pilatnü amülung te yocho, “Nührü Yangthsaba tsü hila lile!” 15 Arühnü züdeli yocho, “Abi mapsehng, abi mapsehng! Abi khala chah hamkehng!” Pilatnü arüh te yocho, “Nührünü I khyang nührü Yangthsaba hamkehsohnyürü mah-o?” Bebü ayingtinü lalingcho, “Ihrü Yangthsaba tsü Kaisar due!” 16 Hütsüde Pilatnü khala chah hamkehsohnung arüh khyang Jisu khakhuchüjücho.
Jisu Hamkehcho
Hütsüta arühnü Jisu khakhuchü khyücho. 17 Abinü apu khala dhipü, “Thahrü lih” pü dsiba lang wücho. (Ibri yu la “Golgotha” dsire). 18 Hütsüla arühnü abi khala chah hamkehcho. Arühnü aparüsü nyüh anyüh anyüdinglang khüdu-khüdu, Jisu tsü alongla thsapü hamkehcho. 19 Pilatnü amüdhenung khüdu thrah khala kube tangkehjücho. Abinü thrahba tsü “NAZARETRÜ JISU, JIHUDARÜ YANGTHSABA” 20 Nyitsarü adrongnü hütsü khicho, tunüo Jisu hamkehba müdüm tsü yangdi shündhün thsacho. Amüdhenung yu tsü, Ibri, Latin ko Greek yu la thrahcho. 21 Bebü ayingtinü Pilat te yocho, “Jihudarü Yangthsaba pü tüthrah, ta ‘Jihudarü Yangthsaba’ pü hiba nyitsarünü yochoepü thrahng.” 22 Pilatnü lalingcho, “Ihnü tu thrahko hütsü thrahko.” 23 Rothsarütinü Jisu hamkehpü khanglang, arühnü abi shü khyüjo, müyüshi kang changnahnü rothsarü müipi khüdu-khüdu jeh khyücho. Arühnü axücho mükehba abi bongrikhüm tsüsü khyüchocho. 24 Rothsarütinü arüh-e arüh-rü chotacho, “Ihsanü hilü mürehnahnung; ta zii thsadhengpü sü chah thsakehnang abi khyünung. Hiba hi amüsa yu tikehsohnung nengdang licho: “Arühnü I shü arüh yola changtacho, ko I pümkhüm nengdang zii thsadhengcho.” Hütsüta rothsarütinü nguchicho. 25 Jisu khala müshüm atpa, atpa ani Klopas nitpü Mary, ko Mary Magdalin yacho. 26 Jisunü atpa ko abinü müiba mono hütsüla ya ngunü abinü atpa te yocho, “Khingkurü, nü tsurü dheng!” 27 Hütsüpü abinü mono te tsü yocho, “Nü tpa dheng!” Hütsüde tsünü mono tsünü abükyü abi kuh lang notsicho.
Jisu Sücho
28 Jisunü adelü lüpcho thümkopü müdhe, Amüsa yu tikehsohnung abinü yocho, “Ih xole.” 29 Hütsüla acikihnü jeng mütpah-tbhü khüdu licho; achotsü acikih la tsü münuh thsangcho, ko hyssop dong chah throhkehpü abi be la thükehjücho. 30 Jisunü hütsü yongcho ko yocho, “Hi thümpehko.” Hütsüpü aku yahlüp sücho. Jisu Thringxang la Thracho. 31 Hütsüde Jihudarü langnürünü Pilat te ahamkehrü jing khyahsahjüpü khala chah tsünü arüh me khyüchonung mülajüngpü tsingdhengcho. Hütsü Sabath nyümong bekhu thsachonü arühnü me tsü Sabath nyümong khala chah mükehsohnyücho, tunüo hütsüba nyümong tsü dee amüsa licho. 32 Achotsü rothsarütinü wünü Jisu te hamkehba nyüh jing tsü khyahsahjücho. 33 Ta khode arühnü Jisu chii rocho, arühnü Jisu müsi longpü nguchonü, abi jinglü mükhyahsahjücho. 34 Ta rothsarü yola nyüh khüdunü athsuhnü Jisu thringxang la thrarangjücho, ko hütsüdenü ashüh ko kih pohchehcho. 35 (Nührünü yudsisohnung nengdang hi sünü tikeh ngucho abinü yuzi jüre. Abi yuzi yuje lile ko abinü yuje chorepü apunü müdhele.) 36 Amüsa yunü “Abi chah arüh khüdusü müthsangnyang” pü yocho tikehsohnung hi nguchicho. 37 Ko amüsa yu apa khüdunü sü yore, “Süchah arühnü thracho arühnü abi chah dhengnung.”
Jisu Merangcho
38 Hütsü khanglang, Arimathiarü Josefnü ro Pilat te Jisu me khyünung tsingdhengcho. (Josef tsü aranglangnü Jisu mono thsacho, tunüo abinü Jihudarü langnürü drücho.) Me tsü hitsinung abi khyang Pilatnü mülacho, achotsü Josefnü wünü hütsü hitsicho. 39 Nikodemus, sü akhulang Jisu yangnü aromang rocho, abisü Josef yola müchiji ko axümlichi kehba süreh sangre-o bipü wücho. 40 Anyünü Jisu me tsü khyo Jihudarü merangba yangthsa roh-i axümlichi yohnü shü anana la yühcho. 41 Jisu süsohba müdüm la tsü tbü khüdu licho, ko hütsüla süsü mürangdhengchoba kong asi khüdu licho. 42 Sabath nyümong bekhu thsachonü ko kong tsü shündhün thsachonü, arühnü Jisu me tsü hütsüla rangcho.
Kong Adeng
1 Bari nyangnyü mütoh mütsingse-ede, Mary Magdalin kong lang tsü wücho ko kong trahtri lanü lung tsü dhipehpü ngucho. 2 Abükyünü Simon Peter ko Jisunü müiba mono nyüh yanglang shang wünü yocho, “Arühnü Abüdongba kong lanü dhitsipehko, ko khüde yohpürünang ihrünü mümüdhe.” 3 Achotsü Peter ko aparü mono nyühnü kong lang tsü wücho. 4 Anyüdingnü shangcho, ta aparü mono tsünü Peter tsohkhu kong tsü akhu chihcho. 5 Abinü mükhupü yohchü dhengde shünana du ngucho, ta abinü müzüdu. 6 Akhanglang Simon Peter ro chihcho, ko müchongkhüti kong la tsü züducho. Abinü shünana 7 ko Jisu thah yühcho jo ngucho. Hütsülü shünana te tsü mah, ta ajangjangthsa nüpbülungpü jocho. 8 Hütsüde aparü mono, sü kong akhu chihcho, abisü züducho; ko abinü ngucho ko yudsicho. 9 (Arühnü ade yingcheh amüsa yunü abi asü lanü kanglinungeba tsü münyicheh-echo.) 10 Hütsüpü monoti tsü kuh lang thali tsicho.
Mary Magdalin te Chüro Ngucho
11 Marynü kong te tra yacho. Abükyünü tranü mükhupü kong yonglang tsü yohchü dhengülü 12 ninglang riwürü anyüh jengki athru khyüpü Jisu me yohpücho te, khüdu akulang ko khüdu ajinglang püm ngucho. 13 Arühnü abükyü te tsingdhengcho, “Khingkurü, nüh tuthsa traro?” Abükyünü lalingcho, “Arühnü I Büdongba dhi tsipehko, ko abi khüde yohpürünang Ihnü mümüdhe.” 14 Hütsüpü abükyünü ximülade, Jisu ya ngucho; ta hütsü Jisu-epü mütsüpcho. 15 Jisunü abükyü te tsingdhengcho, “Khingkurü, nüh tuthsa traro? Nüh sü yangchiro?” Abükyünü abi tsü tbü nyahrüepü lümnü abi te yocho, “Adirü, nühnü abi dhi tsiko likhang, abi khüde yohpürünang I te young, Ihnü wü abi dhi tsinung.” 16 Jisunü abükyü te yocho, “Mary!” Abükyünü ximüla Ibri yunü yocho, “Raboni!” (Hi adüzü “Athsingyurü”) 17 Jisunü abükyü te yocho, “I chah tüthahpü, tunüo Ih Au yanglang mütuwüe. Ta I jünirüti yanglang wüng ko arüh te I U ko arüh Au, I Tsingrang ko arüh Tsingrang yanglang thali würe pü young.” 18 Achotsü Mary Magdalin-nü wücho ko abükyünü Abüdongba nguko, ko abinü abükyü te tu yocho hütsü arüh te yocho.
Monoti te Chüro Ngucho
19 Hütsüba bari romang, Jihudarü langnürü drüchonü monoti tsü kuh khangtipü müjang pümcho. Hütsüde Jisu züro arüh long la yacho ko arüh te yocho, “Nührü te atbachi lieng.” 20 Hütsü yoko khanglang abinü arüh te akheh ko athringxang ngusohcho. 21 Jisunü arüh te anyüpiusü yocho, “Nührü te atbachi lieng. Aunü Ih müthehcho kyo, Ihnü nührü müthehre.” 22 Hütsüpü abinü arüh chah mehkehjo yocho, “Nührünü Anbü Amüsa khyüchoung. 23 Nührünü sürü münyi pehjüro arüh khyang pehjünung; nührünü arüh münyi müpehjükhang, arüh khyang müpehjünung.”
Jisu ko Thomas
24 Mono dhüre-anyüh yola khüdu Thomas, (süte arüp tsurü dsicho) Jisu rode arüh yola mülicho. 25 Hütsünü monotinü abi te yocho, “Ihrünü Abüdongba nguko!” Thomasnü arüh te yocho, “Ihnü apu müyo la imühi iha müngude, ko arah la tsü I müyungza müthsi dhengde, ko apu thringxang la I müyonü mümarangde, Ihnü yu müdsinung.” 26 Nyükhih khüdu khanglang monoti tsü adesü müjang kuh yonglang pümcho, ko arüh yola Thomas sü zehcho. Kukhang khangti licho, ta Jisu arüh long la yacho ko arüh te yocho, “Nührü te atbachi lieng.” 27 Hütsüpü abinü Thomas te yocho, “Hila nü müyungza thsirang, ko I müyotpah dhingdheng; ko nü kheh müyungchü I thringxang la mayohchüng. Tütohnyünyeh tüli ta yudsing!” 28 Thomasnü abi te lalingcho, “I Büdongba ko I Tsingrang!” 29 Jisunü abi te yocho, “Nühnü Ih nguchonü yudsirü mah-o? Sürünü Ih müngupü yudsiro arüh khüdoi akünyangnung!”
Hiba Vakha Alümcho
30 Hiba vakha la müthrahyohcho amüdhethsa adrong Jisunü amonoti yola nguchiko. 31 Ta nührünü Jisu tsü Mesia, Tsingrangba Tsurü pü yudsisohnung, ko abi chah nührü yudsi khu akang ngunung nengdang hiri thrahcho.
Mono Dhünyeh te Chüro Ngucho
1 Hütsüpü Jisunü anyüpiu amonoti te Tiberia kihdi te chüro ngucho. Hütsü hita tikehcho. 2 Simon Peter, Thomas (arüp tsurü dsiba), Nathanael (Galil la Kana lanü), Zebedi tsurüti, ko Jisu mono aparü anyüh, arüh müjang licho. 3 Simon Peternü aparü te yocho, “Ih ngurangnung würe.” Arühnü abi te yocho, “Ihrüsü nü yola ronung.” Achotsü arühnü kihtang khüdu lanü wücho, ta hütsü romang ayung arühnü tusü mürang. 4 Tsingselang, Jisu kihbekhüm la yacho, ta hütsü Jisuepü monotinü mütsüpcho. 5 Hütsüde abinü arüh te tsingdhengcho, “Dhrezarüti, tusü mürangcho mah-o?” Arühnü lalingcho, “Tusü mürang.” 6 Abinü arüh te yocho, “Nührü yojeh tsü kihtang tsalang tsü phayohchüng, nührünü rangnung.” Achotsü arühnü yojeh tsü phayohchücho ko ngu khütango phatipü arühnü yojeh tsü mükoh tphahchehcho. 7 Jisunü müiba mono tsünü Peter te yocho, “Hütsü Abüdongbae!” Khode Peternü hütsü Abüdongba epü yuchicho, abinü pümkhüm khümcho, (tunüo abi jengki khohpehpü licho) ko kih la tsohyoh züducho. 8 Aparü monoti tsü ngunü jeng zehba yojeh tsü tphahpü kihtang la tsünü kihbekhüm lang rocho. Arüh kihbekhüm lanü ashu mah, lang dhünyango du zehcho. 9 Khode arüh kihbekhüm la mütrahchocho, miha michang chah ngu ko hümthse keh ngucho. 10 Hütsüde Jisunü arüh te yocho, “Nührünü ade rangba ngu lanü khürü hirung.” 11 Simon Peternü kihtang la küducho ko ngu adidi thsihpü dhünyangpü asangnü jeng zehpü yojeh tsü athringlang tphahchehcho; ko ngu hütsüdoi zeh nye, yojehlü mürohrüp. 12 Jisunü arüh te yocho, “Ro tsung.” Hütsü Abüdongba epü müdhenü, “Nüh süo?” pü abi te tsingdhengnung monoti sünüsü müsi mümülahcho. 13 Achotsü Jisunü wü hümthse ko ngu khyonü arüh khyang jücho. 14 Jisu asücho lanü kangchehli ropü hinü asangpiu monoti te chüro ngure.
Jisu ko Peter
15 Arüh tsuyongchopü, Jisunü Simon Peter te yocho, “Johan tsurü Simon, hiri tenü alaa nühnü Ih müirü mah-o?” Abinü lalingcho, “Ho, Abüdongba,” “Ihnü nüh müirepü nühnü müdhele.” Jisunü abi te yocho, “I Sanzati kaang.” 16 Jisunü anyüpiusü abi te yocho, “Johan tsurü Simon, nühnü Ih müirü mah-o?” Abinü lalingcho, “Ho, Abüdongba, Ihnü nüh müirepü nühnü müdhele.” Jisunü abi te yocho, “I Santi xüküm.” 17 Asangpiusü Jisunü yocho, “Johan tsurü Simon, nühnü Ih müirü mah-o?” Ko Jisunü asangpili, “Nühnü Ih müirü mah-o?” pü yochonü Peter longyücho. Hütsünü abinü abi te yocho, “Abüdongba, nühnü lüpcho müdhele; Ihnü nüh müirepü nühnü müdhele!” Jisunü abi te yocho, “I Santi xüküm. 18 Ihnü nü te yutsatsa yore: Nüh dhrezade, nü jangjangthsa shü rapü nü wünyücho lang wücho; ta nüh khode ashirü kangnang, nühnü nü kheh müyungchünung ko aparünü nü shü rajünung ko nüh müwünyücholang nowünung.” 19 (Jisunü Peter khütari asünü Tsingrangba hechisohnung hütsü thongunü yocho.) Hütsüpü Jisunü abi te yocho, “Ih iirung!”
Jisu ko Aparü Mono
20 Peternü ximüla akhang te aparü mono, sü Jisunü müicho ko yangtsude Jisu chah ngakehpü, “Abüdongba, sünü nüh khakhuchüjünung? pü tsingdhengba mii ngucho.” 21 Khode Peternü abi ngucho, abinü Jisu te tsingdhengcho, “Abüdongba, Hivi hi khüta?” 22 Jisunü abi te lalingcho, “Ihnü abi Ih müro yingcheh lisohnyücho ngang hütsü nühnü tonung? Yah Ih iirung!” 23 Hütsünü hütsüba monolü müsünungepü ajünirü yola yusi tsü sobhocho. Ta hütsü Jisunü abi müsünungepü yochoba mah, ta “Ihnü abi Ih müro yingcheh lisohnyücho ngang, nühnü tu yonung mülepü yochoba due.” 24 Hiri choba ko thrahba mono tsü abi-e; ko abi yuje-epü Ihsanü müdhele.
Yuzika
25 Adesü Jisunü nguchicho khütango lile. Hütsüri apüm thrahlanglü, athrahcho vakha liminü müzuba thsakopü Ihnü lümre.