Akringtrong
1 Kulkung nata Trongkha louamsa, che Trongkha Ringpu soh inruuia louamsa, che Trongkha Ringpu sa. 2 Amah in kulkunga Ringpu soh louamjousa; 3 Poot anaamte amah apaalla inseemkirsa, inseempot anaamte amah jaonoh a inkhatkho inseemnoh. 4 JAmahninga ringna louam, ringna chuva mii turel avaarna veisa. 5 Akvaar in inthim kaara amvaar, che anthim in akvaarta cheknoh. 6 Ringpu tingnata amthlah akming John ta an ong mii khat louam. 7 Amah in akvaarta sakhi aveinatu thlengsa, mah chuvah mii naamte in amah apaalla malot ancheknatu. 8 Amah atakvah akvaar khanoh, chuta akvaar khata asonnatu amah in thlengsa. 9 Mii naamteta amvaarnatu akchim akvaarkha tukleiramma thlengsa. 10 Amahvah tukleiramma louam, che tukleiramta amah apaalla aseempei, chuta tukleiram in amahta romnoh. 11 Amah ataktal in thlengsa, chuta amah amiiei in amahta loulounoh ei. 12 Chuta amah akminga malot a amahta aklou mii naamteta, Ringpu asa anveinatu amah in tuui amlannei; 13 Tunangkhat in amahninga akpok eiva, thiitingna khonoh nohle ruungtingna khonoh nohle mii in amdon tingna khonoh chuta Ringpu tingnasa. 14 Trongin ruung hukveisa, che malungsi leh akchim in ksip a ikaar a amsa; Pa tingna paarthra vei Asa kupa khalekru tingna apaarthrata imuhpei. 15 (John in mahmiita sakhi malanna onga ason, “Keiin ksonkha mahmii isa, kei kmaa a akthleng mii in keichunga kliin, alamva kei kiamnoh maa a amahvah louamsa.”) 16 Amah ningna aksip malungsi nata malungsi apumte inih naamte in iphahpei. 17 Alamva trongsuurkha Moses apaalla amlanpei, che malungsi leh akchimva Jisu Khrista apaalla thlengsa. 18 Tukhat inkho Ringpu ta loumuhnoh ei; Asa kupa khop in amuhning, Ringpu tingna khalekru vei Asa kupa apasoh annai amahta amrompei.
Aklup John vaa Trongraan
19 Judi ei thiimpu leh Levi eita Jerusalem nata mathlah a, “Nangi tucheme?” ta amiruilai John in aloumasang sakhisa. 20 Amah in indah tlohnoh, chuta seenga phoonga asonei, “Keiva Khrista noh ang.” 21 Che amahta anrui, “Chuleva nangva tucheme? Elaiah cheme?” Che amah in asonei, “Keiva amahnoh ang.” “Ringraan cheme?” Amah in amsangei, “Amahnoh ang.” 22 Chunna amahta anson, “Nangi tucheme? Kannih kankuunga kanimsangro alamva kannihta kanimthlahmii ankuunga kansonnatu. Nangva tunangang nitihme?” 23 in ason, “Keiva rapril kaara an onghou miikhasang, ringraan Isaiah in asonnanga, ‘Akpu vaa lamkha mathluunve.’ ” 24 Ipek anmahva Pharisi ankuungnata amithlah ei. 25 Che amahta anrui, “Chule nangva Khrista khonoh chele, Elaiah khonoh chele mahche ringraan khonoh chele, nilup eikha jarelname?” 26 John in amsang, “Keiin tuiia kiluppeichou, chuta nannih in nanromnoh nankaar a inkhat ngirra am, 27 kei kiknua akthleng miivaa akehkhraang arui majakho keiva kimtik amnoh ang.” 28 Mah anaamte i John in alupna Jordon araal Bethani a suuksa.
Ringpu vaa Sadam
29 Akhuvar a Jisu in amahkuunga thleng amuh a amah in ason, “Anve, Ringpu vaa Sadam, tuklairamna alehta akloukha! 30 Mahmii isa keiin kisonkha, ‘Kei kiknua akthleng mii ivah keichunga akliin, alamva amahvah kei kmaa a louamsa.’ 31 Kei kitak in amahta romnoh ang; chuta mairella keiin tuiia aklup thlengsang, mah chuvah amah atakta Israel ankuunga aphoongnatu.” 32 Che John in sakhi malanna ason, “Keiin ringramna Li ukthru nanga atrumche amah achunga am kimuh. 33 Kei kitak in amahta romnoh ang; chuta lupnatu keita kamthlah amah in keisonang, ‘Li in trumma achunga am nimuhna miital khanna nannihta Akseeng Li a naniluptu.’ 34 Kei kitak in muh a sakhi kamlanchou mah chuvah mah i Ringpu vaa Asa kupasa.”
Jisu vaa Matsahrem Aroiei
35 Akhuvar a John in aroi innihsoh ngirra amjou; 36 Jisu in asehlai amahta anna ason, “Anve, Ringpu vaa Sadam!” 37 Mah in asonta aroi innih in antheih, che anmah in Jisu aknuta anjuihpei. 38 Jisu in anheilai, amah aknuta anjuih amuh a ankuunga asonei, “Nannih in jangta nanjonme?” Amahkuunga anson, “Rabbi” (arthava Lulok), “Nang ramma amcheme?” 39 Anmah kuunga asonei, “Thlenga anve.” Anmah in thlenga ramma ammeta anmuhpei; che mahni chunna amahsoh amjousei, alamva mahchu pung somvak tlasa. 40 John atrong rungaia Jisu aknujuih mii innih inkhatva Simon, Pitar che anaokupa Andriu veisa. 41 Amah in matsah a amah ute Simon ta aktuuk a amahninga ason, “Inih in Miisa iktuukpei” (arthava Khrista). 42 Amahta Jisu kuunga athlenpei. Jisu in amahta anna ason, “Nangva John vaa asa kupa Simon che. Nangta Keiphas kiong uche (arthava Pitar).”
Jisu in Philip leh Nathanael ta Aong
43 Akhuvar a Jisu in Kalili a asehnatu arilla ngirsa. Che Philip ta aktuuk a amahkuunga ason, “Kei kiknu keijuihro.” 44 Philip vaa Andriu leh Pitar an amna khuuboom Bethsaida na. 45 Philip in Nathanel antuukpia akuunga ason, “Moses trongthuunna injih mahche ringraan in amijih, Najareth na Joseph asa kupa Jisu kantuukpei.” 46 Nathanel in amahta ason, “Najareth nata aktlei akthra inthruhsame?” Philip in amahta ason, “Thlenga anro.” 47 Nathanel in Jisu kuunga thlengta amuh a, amahta ason, “Anro, taktak a Israel mii, akuunga aril chimnoh amnoh.” 48 Nathanel in Jisu ta ason, “Keita khatloh a nakrom angme?” Jisu in amsang, “Philip in nangta nak ongnoh maa a nangin thotthing athuuia niamkha kimuhche.” 49 Nathanel in amsang, “Rabbi, nangva Ringpu Asa kupache! Nangva Israel ei kurungche.” 50 Jisu in akuunga amsang, “Keiin nangta thotthing athuuia kimuhche ta nikuunga kisonrelna namlotme? Maichung ralla anrolthlou nangin nimuh umang.” 51 Chela amahta ason, “Keiin nangta taktak a kisonche, nangin ringram inhoonga Ringpu vaa ringroi eiin miiva Asa kupa chunga trum kal nimuhtu.”
Kana a Changvaang
1 Nijanthum tihpia Kalili na Kana a changvaang inkhat am, Jisu anukho mahchunna injao. 2 Changvaang achunna Jisu kho, aroieikho ankouhpei. 3 Chunna ngangli atuii avaat inva Jisu anuin amahkuunga ason, “Anmah ngangli atuii thangsa.” 4 Chunna amahta ason, “Kumeio, nangleh keiin itlohtuphu jangamme? Keitu lai thlengnohmang.” 5 Amah anuin roijuih ankuunga asonei, “Amah in nankuunga nanison nanisonkha tlohve.” 6 Judi ei heikoh a maseengna khuuthloubeel kuruk mahchunna amithrun, beel inkhat khat a litar reijavak chal. 7 Jisu in anmahta asonei, “Khuuthloubeel anaamtea tuii masipve.” Che anmah in khuuthloubeel anaamteta tuii amisippei. 8 Che amah in ankuunga asonei, “Pekva nannih in suuk a buhdoon antong amrel mii ninga heivesa.” Che mahchu anheipei. 9 Mahchuta buhdoon antong amrel mii in amtem in ngangli tuii veisa, mahchu ramnata anthlenme romnoh (khuuthlou beelnata aksuuk roijuih khop in mahchuta anromning) buhdoon antong amrel mii in changrita aong, 10 che amahta ason, “Mii in matsah a aktuita ansemmaan; mahchuta inkhopseima antihlai tuinohbebta ansemmang; chuta nangva akthra nganglituiita pekphah nisihmang.” 11 Mah i Kalili vaa Kana a Jisu in matsahrem ampaang daangsa, chunna amah paarthrata amdangpei; che aroi in amahta amilotpei. 12 Mahchu aknua anu, anao mahche aroi eisoh Kaparnaum a jungsei; che ohkhanna anmah in nikhat ninih nichuunga amsei.
Jisu in Mathruunna Thlaamma Seh
13 Judi ei laalna buhdoon aphahlai, Jisu in Jerusalem a hangsa. 14 Mathruunna thlaamma siilchal, sadam, mahche khuinu juura khatkho inbok a baobeh khoia an amlaia antuukpiei. 15 Mahchunna Jisu in ruisung seemma, siilchal, sadam, mahche anaamteta mathruunna thlaamnata amnomei, che baobeh apum ankhoihna anmah tebor anaamteta achung athlang amlatpei. 16 Che khuinu akjuureita asonei, “Mah naamte i loukirve; nannih in Keipa innta baobeh malatna inn maveinohve. 17 Keiinna mah nantlohthlou irella kiril sok a kaangsang” ta ringjih a injihkha amah aroi in inthiehsei. 18 Mahchunna Judi ei in amahta anson, “Mah thlou nitloh in kankuunga jaknang daang nammuhsam ungme?” 19 Jisu in ankuunga amsangei, “Mah mathruunna thlaam i mamaangve, mahche keiin nithumma kiseemtu.” 20 Mahchunna Judi in anson, “Mah mathruunna thlaam i anseemna kum soplilei kuruk luut, mah chunangin nithum suunga niseemchek ume?” 21 Chuta Jisu inva amah akseeng aruungta asonna. 22 Alamchunna Jisu in thinata aringlai, amah aroi in maita asonna naita intheihsei; chunna anmah in ringjihkho mahche Jisu in asontrongta amilotpei.
Jisu in Miihoongta Arom
23 Ipek Jisu in Jerusalem a laalna buhdoon suunga amlai, amah in daang jikcha atlohta anmuh in, amah akminga mii jikcha in amahta amilotpei; 24 chuta Jisu atak inva anmah ankuunga malotna amnoh, 25 alamva annaamteta aromei che tunangkhat in aktleiturel sakhi malanna amnoh alamva amah in miiril suunga amkha jangme arom.
Nikodimas Khatkho Jisu
1 Ipek Pharisi ankaarna akming Nikodimas an ong Judi akpuui mii khat am. 2 Mahmii kupa in nikhat khulouh a Jisu kuunga thlenga ason, “Rabbi (Lulok) nangva Ringpu tingnata akthleng lulokcheta kanrom; Ringpu in inruuipinoh avah, nangin nitloh daang i tukhat inkho tloh cheknohtu.” 3 Mahchunna Jisu in akuunga amsang, “Taktak a keiin nikuunga kisonche, tunangkhat inta thar a poknoh leva, amah in Ringpu vaa kurungram muh cheknohtu.” 4 Nikodimas in Jisu ta ason, “Mii khat in atarche khatloh a inlenga pok achekume? Amah in anu poomsuung veinih inlenga luut a pok achekume?” 5 Jisu in amsang, “Atatak a keiin nikuunga kisonche, tunangkhat in tuiia mahche Li a poknoh avah, Ringpu kurung ramma luut cheknohtu. 6 Ruunga akpok in ruungsa, mahche Li a pok in lisa. 7 Nangin thar a poktu tlacheta nikuunga kson khanna salungkhou nohro. 8 Thli in araangja na a raanna seh, mahchuta nangin ahou nitheih, chuta mahchu ramnata thlengme nohle ramma sehme romnohche; mahchunang jimma Li ah akpokho veiningme.” 9 Nikodimas in amahkuunga ason, “Mah i khatloh a vei achekume?” 10 Jisu in amahkuunga amsang, “Nangin Israel ei lulok inkhatveia mah kisonita loutheinoh cheme? 11 Atatak a keiin nikuunga kisonche, inih in iromkhata trongningme, che inih in imuhkhata sakhi veiningme; chuta kannih in kanson sakhita nannih in lou indahschou. 12 Tukleiram a poot eita nankuunga kson in malotnoh choule, ringramna poot eita nankuunga son angleva khatloh a namilotchek ume? 13 Miivaa Asa kupa in ringramnata trum khanoh a tunangkhat inkho ringramma kalnohmang. 14 Moses in raprilla murulta akdomnanga, miivaa Asa kupata akdomtu tlasa, 15 mah chuvah tukhat in amahta malotle ache amnoh a ring anphahtu.” 16 Alamva Ringpu in tukleiramta maichah phah a arilvolsa mah chuvah amah Asa kupa inkhatru khata inimlanpei, chunna amahkhata amlot tukhat in kmaang krel amnoh a ache amnoh ringna aphahtu. 17 Alamva Ringpu in tukleiramta amlaalnatu Asa kupata mathlahnoh, chuta amah apaalla tukleiram in inkal aphahnatu Asa kupata amthlahpei. 18 Amahta amlot mii khata malaalnoh, amahta amlotnoh mii khata amlaalpei, alamva amah in Ringpu vaa Asa kupa akming khanna malotnoh 19 Mah pichaarchuva maisa, mah chuvah tukleiramma akvaar thlengsa, chuta mii invah akvaar khachunga anthimta thloia anditpei, alamva anmah anthloua thranoh seengsa. 20 Alamva thranoh aktloh miirel in akvaarta intirh ei, amah in atlohthlouta indangtuta akvaara thlengnoh ei. 21 Chuta tunangkhat akchim aktloh amahvah avaarna a thlengtu, jarelname tihva amah in Ringpu in atlohthlou khanna seenga andangnatu relna.
Jisu Khatkho Aklup John
22 Maiche aknua Jisu in aroi eisoh Judia ramma sehsa; mahchunna anmahsoh inruuia ohchunna nikhat ninih nichuunga anlupsei. 23 John inkho Salim akom Anon ah alup ei, alamva mah khanna tuiitam am; mii akthlengeita alup ei. 24 Alamva mahlaiva John va simma inthunnohmang. 25 Ipek John aroi leh Judi inkhat ankaar a maseengna rella trong inkharhna suuksa. 26 Che anmah in John kuunga thlenga anson, “Rabbi, Jordon araalla nangsoh amjou, nang sakhi namveikha onna amsa, amah in miita tui alup ei, miikha anro, che mii naamte in amahkuunga thlengei.” 27 John in amsang, “Ringram tingnata akphahkhop amahnoh avah tukhat inkho jakhatkho phah cheknoh ei. 28 Keiva Khrista khanoh ang, chuta amah amaa a keita kamthlah angta keiin kisonkhata nantak in keitu sakhi veisachou. 29 Tharei in aktuukha changrisa, mahkha thareivaa apaisa, ngirra amahta arungeih, changrivaa ahouta atheih in aroomthok hang; alamchunna mah roomthok inna kirilla sipsang. 30 Amahvah ahanraltu tla, chuta keiva inlengtu tla ang.”
Ringram tingna Akthleng Amahvah
31 Achung tingnata akthleng amah in achungtingna; tukhat thalei tingna in thaleivaa ata vei, amah in thalei rella trong, ringram tingnata akthleng amahvah apumte achungtinga. 32 Amah in amuhta che atheihta sakhi amlan, chuta amah aringtukna thaminta tukhat inkho lounoh ei; 33 amah aringtukna thaminta aklou miiva Ringpu i chimsa ta atak a chum innamsa. 34 Alamva Ringpu in amthlah mii khanna Ringpu atrongta trong, jarelna tihva Amahkuung aksip Li ta amlan; 35 Pa in Asa kupta arilvol, chunna poot anaamte amahkuunga amsilpei. 36 Asa kupata amlot tukhat in ache amnoh ring aphahpei; Asa kupa trongson amjuihnoh tukhat in ache amnoh ring phahnohtu, chuta Ringpu in inhaanga asaokha atakchung amtu.
Jisu Khatkho Samaria na Kumei
1 Jisu in John chunga ralla aroi seemma alupeita Pharisi in antheihta Akpu in aromlai 2 (tak a Jisu atak inva tukhatkho lupnoh, chuta aroi khopin anlupning), 3 amah in Judia mathlah a Kalili a sehlasa. 4 Che amah in Samaria vanna sehtu tlasa. 5 Chunna Saikhar antih Samaria vaa khuuboom Jakop in asa kupa Joseph kuunga amlanna ram akomma Jisu in thlengsa. 6 Mahchunna Jakop vaa tuiirum am. Chunna Jisu in lamsei asehna klah a tuiirum apanga inboksa. Mahchu suunjaivak atlaak laina. 7 Samaria na kumei inkhat in mahchunna tuiichoi thleng. Jisu in amahta ason, “Tuii ki iinnatu kamlan roba.” 8 Alamva amah aroieiva ansaak an iintu aklei khuuboomma sehsei. 9 Chunna Samaria kumei in Jisu ta ason, “Nangva Judi re chea che khatloh a Samaria kumei kei kuungnata tui ni iinnatu naknih angme?” alamva Judi in Samaria soh insamnoh ei. 10 Jisu in amahkuunga amsang, “Nanginta Ringpu vaa akutthol mahche ‘Tuii ki iinnatu kamlanro’ ta nikuunga tuii naknih i tumeta romchele, nangindom amahkuunga tuii nih a amah in nangkuunga akring tuii nikpek uta.” 11 Kumei khanna amahkuunga ason, “Lulok, mah tuii i nisuuknatu jakhatkho amnohche, che mah tuiirum i khalmo thuuk; chunna akring tuii ramnata niphah ume? 12 Mah tuiirum ita kanimlan kan pa Jakop chung nangin liincheme, amah atak inkho, asiil inkho onnata tuii an iinnohme?” 13 Jisu in amahkuunga ason, “Mah tuii ita ak iin miirel veikhat inlenga raaltuei, 14 chuta keiin kamlansam tuiita tukhat in ak iin miiva tikniakho tuiiraal amnohluung usei; keiin kamlansam tuiita ak iin mii khavah akuunga ache amnoh ringnaturel anthruh dop veitu.” 15 Kumei in amahkuunga ason, “Lulok, mah tuiichu kamlanro, chunna keiin tikniakho tuii kraal nanohtu che onna tuiichoi kithlengnoh natu.” 16 Jisu in amahkuunga ason, “Seh a namsal ongro, che onna thlengpiro.” 17 Kumei in amahkuunga amsang, “Keiva kamsalkho amnohre manga.” Jisu in amahkuunga ason, “Keivah kamsal amnohmang” ta chimma nisonpei; 18 “chuta nangva namsal ranga tihresa o, che ipek niampi ikho nang namsalnoh; nangin nison i chimpotsa.” 19 Kumei in amahkuunga ason, “Lulok, nangi ringraan cheta krompeiche. 20 Kan pa kanpu in mahmuul chunga Ringpu ta anlou mathruun; nang inva Ringpu amithruunna amunvah Jerusalem natu ta nison.” 21 Jisu in amahkuunga ason, “Kumeio, keita kamlotro, Pa ta mahmuul luung inkho mahche Jerusalem luungakho namithruunnoh natu pungkha thlengsa. 22 Nannih in nanromnohta namithruun, kannih inva kanromta kamithruun, alamva chaanring athlengna i Judi tingna. 23 Chuta ipek apungchu thlengsa, Pa ta amthruun mii in Li a mahche akchimma amithruuntu tlasa, alamva mah khananga amahta amthruun miita Pa in akdit 24 Ringpu vaa Li, chunna amahta amthruun mii in Li a mahche akchimma amithruuntu tlasa.” 25 Kumei in amahkuunga ason, “Misaiah (Khrista ta an ong) thlengtu antihkha krom; amah in athlenglaia bilam anaamte inihkuunga inisontu.” 26 Jisu in amahta ason, “Nangkuunga aktrongi amah khasang.” 27 Mahai talla amah aroi in thlengsei. Mah kumeisoh tronga a am in anmahva salungkhousei, chuta tukhat inkho “Jangnimdonme” nohle “Jarella amahsoh trongcheme” ta aksonchek amnohsei. 28 Mahchunna kumei in amah tuiipulta amahche, khuuboomma inlenga miita asonei, 29 “Keiin kitloh anaamteta keison mii i thlenga anve. Mahmii i Khrista antih khatame?” 30 Anmah in khuuboom nata inthruh a amahkuunga thlengsei. 31 Mahlaia aroi in amahta ngenna anson, “Raabi, buh saarosa.” 32 Chuta amah in ankuunga asonei, “Nannih in nanromnoh saakphu kisaaktuphu am.” 33 Mahchunna aroi in khatleh khat insonsei, “Tunangkhat in amah in asaaktuphu anthlen meio?” 34 Jisu in anmahta asonei, “Keita kamthlah amah in amdonta aktlohche amah athlouta thratea amche i keitu saakphusa. 35 ‘Ipek thla manlia amche lou luhna thla thlengusa ta nannih in insonnoh choume?’ Anve, keiin nankuunga kisonchou, ipek lou luhnatu kuunsa ta nankang domma lou anve. 36 Akvorh amah in akvaatsoh aroomthok jounatu akvaat amah in atlohman aphahche ache amnoh a ringnaturel akrah amhuung. 37 Alamva onna ason i achimna vei, ‘Inkhat in chi avorh mahche aktlei inkhat in avaat ta anson i akchimsa.’ 38 Nannih in nantlohnohta nanluhnatu; aktlei in antlohpei, che nannih in anmah anchekna kaar a luutsachou.” 39 Mah kumeivaa aringtukna thaminna, “Keiin kitloh naamte amah in keisonpei” ta asonkhanna Samaria khuuboomna miitam in amahta amilotpei. 40 Nga tloh a Samaria na mii in amahkuunga anthlenglai, anmahsoh an amjounatu amahta anngenpei; cheva ohkhanna ninih anmahsoh amjousa. 41 Amah atrongkhanna miitam in ral ralla amahta amilotpei. 42 Anmah in kumei kuunga anson, “Nangin kankuunga maita nisonrella kannih in malotnoh ung, alamva mah i kantak in kantheihpei, che mah i taktak a tukleiramta akkal Akpu sa ta kamrompei.”
Phrangki Khatvaa Asa kupata Jisu in Amthrat
43 Nijannih aknua Jisu in mah khannata Kalili a sehsa. 44 Alamva ringraan ta ataktal aramna mii in injahnoh eita Jisu ataktal in sakhi amlan. 45 Nga tloh a Jisu in Kalili a aseh inva buhdoonna a Jisu in atloh naamtekha Kalili na mii in Jerusalem a muh a Jisu ta anlohpei. Alamva anmahkho buhdoonna a sehsei. 46 Churella Jisu in tuiita ngangli tuii am olkha Kalili vaa Kana a veikhat sehsa. Che Kaparnaum a asa kupa kna phom aknai mi inkhat am. 47 Jisu in Juda nata Kalili a thlengsa ta amah in atheihlai amahkuunga seh a asa kupa aknata thlenga amthratnatu angen, alamva thisamma knasa. 48 Churella Jisu in akuunga ason, “Nangin salungkhouna daang muhnohchele malotnoh luung uche.” 49 Phrangki in ason, “Lulok, ksakupa in athihnoh maa a inthabeb a keiphahro.” 50 Jisu in amahta ason, “Inlengro nisakupa in ringtu.” Jisu in amahkuunga asontrongta malot a inlengsa. 51 Chunna amah in anlengsuunga, amah roijuih in lamma antuukpia nisakupa ringsa ta asonpei. 52 Anmahta aruiei jaknang laia naoin thrame, anmah in anson, “Majaan pung sirih atlaklai atlun in amahpei.” 53 Jisu in “Nisakupa thratu” ta amahkuunga asonna pungtalkha amah in arompei; chunna amah atak che ataploikuung apumtein amilotpei. 54 Jisu in Judia nata Kalili a athlengche daang ampaang maisoh veinih tihpisa.
Pukhri a Akna Amthrat
1 Mah i aknua Judi ei ujou hoongna athlengin, Jisu in Jerusalem a hangsa. 2 Ipek Jerusalem a Sadam Thong akomma pukhri inkhat am Hibru tronga Bethjatha antih akiing ranga vei thlaam kooia am. 3 Mahthlaam chunna akna aksa mitcho, kehtlik mahche anpangnem akthi tamkhaak intolh a ammei. 4 Alamva inromloua ringroi in pukhrisuunga trumma tuii amchektrang, mahlai tukhat in matsah a tuiikhanna trumle, anmah annat satna thraei. 5 Kum sopthumlei kirit kna atak solmi inkhat mahchunna am. 6 Mahmii chunna ohkhanna khalmo soot a kna intolh a am Jisu in amuh a amahkuunga ason, “Nang ninatna thra nikditme?” 7 Akna miikhan Jisu ta amsang, “Lulok, tui anchek ancheklaia pukhri a keitrumpinatu kimii amnoh, chunna keiin kitrumlaiva aktlei mii in keichung matsah a trummei.” 8 Jisu in amahkuunga ason, “Inthouro, nang nantolhnakha choia sehro.” 9 Chunna kak hanga mahmiikha thrasa, che amah in antolhnata choia sehsa. Pek mahchu sabat nina. 10 Chunna knathra mii khata Judi in anson, “Mah i sabatni, nangin nantolhnata choia sabat nia sehche i tlohphunoh.” 11 Chuta amah in ankuunga amsangei, “Keita kamthrat amah in keisonang, ‘Nang nantolh nata choia sehro.’ ” 12 Amahta anrui, Nikuunga “Nantolhnata choia sehro ‘ta naksonmiichu’ tunangme?” 13 Chuta keita tunang in kamthrat angme romnoh ang, alamva aphomchunna miitam ammeia Jisu va inlitsa. 14 Mahchu aknua Jisu in amahta mathruunna thlaam a antuukpia, ason, “Anro, nang thrakhem sache! ralla akthranoh nichunga atlaknoh natu veikhat aleh tlohnohrosa.” 15 Amahta amthratkha Jisu sa ta Judi ankuunga atongpei. 16 Churella Judi in Jisu ta andah a chut amithronpei, alamva amah in sabat nia thlou atlohpei. 17 Chuta Jisu in ankuunga amsangei, “Pa in pekphah i thlou atlohmang, keiinkho kitlohmang.” 18 Mairella Judi in Jisu ta thatnatu ralla anjonpei, alamva amah in sabat nita khoi khop noh a, Ringpu ta amah Apa tih akho aong, amah atakta Ringpu soh amtrim.
Asa kupa vaa Achek Amneh
19 Jisu in anmahta asonei, “Keiin nankuunga taktak a kisonchou, Apa in atlohkha muhnoh avah Asa kupa in akrou avah jakhatkho tlohcheknoh; alamva Akpu amah in atlohkha Asa kupa inkho mahchusoh intrimma atlohning. 20 Alamva Pa in Asa kupata arilvol, che amah atak in atlohthlou anaamte amahkuunga ammuh, che nannih in salungkhounatu oichungkho ralla anroolthlou amah in akuunga ammuh umang. 21 Alamva Pa in akthi miita amringche akring amlannanga, nga tloh a Asa kupa inkho madonna amring miita akring amlan. 22 Pa in tukhatkho pichaar tlohnoh, chuta Asa kupa akuunga pichaar tlohnatu amsilpei, 23 chunna anmah in Pa ta injah nanga, mii naamte in Asa kuptakho injah tupotchou. Tunangkhat in Asa kupata injahnohle, amahta amthlah Apa ta injahnoh ei 24 Keiin nankuunga taktak a kisonchou, keitrongta rungaia aktheih mahche keita kamthlah amahta amlot amah in ache amnoh a ring aphahpei; amah in pichaar tlohna a thlengnoh usa, chuta amahvah kthinata akring tinga akvanpei. 25 “Keiin nankuunga taktak a kisonchou, akthi mii in Ringpu vaa Asa kupa ahou antheihnatu pungkha thlengkho thlengsa, ipekho veimang, che ahoukha aktheih mii in ringusei. 26 Alamva Pa in ringa am khananga, amah in Asa kupa ningakho ringa amnatu amlanpei, 27 che amah in miivaa Asa kupa aveirella pichaar atlohnatu amahkuunga amtik amneh amlanpei. 28 Mah kson in salungkhou tlohnohve; alamva pungkha thlengsa, lai achunna rusuunna ak am naamte in amah ahouta antheihtu. 29 Thra aktlohmii in thinata ringa kiring aphatu, che thranoh aktlohmii in thinata aringche pichaar aphahtu.”
Jisu rel Sakhi Malan
30 “Keiin kichek kamnehruin jakhatkho tlohcheknoh ang; keiin ktheih nujuih a pichaar kitloh; che kei pichaarva akchim, alamva keita kamthlah amah in amdon khanoh a keiruin kamdonta jonnoh ang. 31 Kei kitak kikroutata sakhi malan angle, kei sakhi i chimnoh; 32 Keirella sakhi amlan aktlei inkhat am, che amah in keirella sakhi amlankha chimta krom. 33 John akuunga trongtong namithlah, che amah in akchimrella sakhi amlanpei. 34 Keiin kphah sakhi i miikuung nanoh chuta mah i nannih in inkal nanphahnatu nankuunga trongi kisonchou. 35 Amahvah antruung meiser khasa, che nannih in lai kakturel amahvaa akvaara roomthok nandit. 36 Chuta John khachunga ralla akliin sakhi keita am; alamva Pa in keikuunga amlanthlou tal khata kamchenatu tloh a ammang, Pa in keita kamthlah angta kthlou in sakhi veisa. 37 Che keita kamthlah Pa in kei turella sakhi amlanpei. Nannih in tikni akho amah ahou theinoh mangchou, amah ahoongkho tiknikho muhnoh mangchou; 38 che amah atrongkha nanrilsuunga amnohmang, alamva amah in amthlah khata nannih in malotnohchou. 39 Nannih in ringjihta nanjon, alamva mahsuung akhanna nannih in ache amnoh ring nanphahtuta namidon; che keitu sakhiva mah anjih khasei; 40 chuta nannih in ring nanphahnatu kikuunga thleng indah mangchou. 41 Keiin mii kuungnata paarthra lounoh ang. 42 Chuta nannih nanrilsuunga Ringpu ta rilvol i amnohchouta kromchou. 43 Keiin Pa akminga thlengsang, chuta nannih in keita keija a keilounohchou; aktlei inkhat in amahtal akminga thlengleva nannih in amahta nanloulohhtu. 44 Khalekruta akvei Ringpu tingnata paarthra nannih in lounoh a, inkhat in inkhatnata paarthra louva nannih in khatloh a malot nanchek ume? 45 Keiin nannihta Pa kuunga kamlaal uchouta madonnohve; nannih in matuura nansih Moses in nannihta maraal nanimlan. 46 Nannih inta Moses ta malotchoule, nannih in keita namilot tupot ang, alamva amah in keirella amjihpei. 47 Chuta amah in amjih khata nannih in malotnoh choule, nannih in kei kitrongta khatloh a namilot ume?”
Jisu in Mii Akpul Rangata Amsaak
1 Mah i aknua Jisu in Kalili tuiiboom Tiberias araalla sehsa. 2 Che mii khalmo tam in amah aknuta anjuihpei, alamva amah in akna mii ankuunga daang jikcha atlohkha anmuh. 3 Jisu in muulla akalche ohchunna aroisoh inbokjousei. 4 Pekva Juditu laalna ujouhoong chol jaonoh buhdoonna aknikha innaisa. 5 Intouva a an in, mii khalmo tam amahkuunga thleng amuh a, Jisu in Philip kuunga ason, “Anmah in ansaaktu ramnata tol ilei ume?” 6 Mah asonni amahta chaang annatu atlohning, alamva amah atak in kha atloh ume arom. 7 Philip in amahkuunga amsang, “Kutlang reija innih aman akho ansaaktuphu tol leinakho bangnohtu.” 8 Aroi ankaarna Simon Pitar anao Andriu in akuunga ason, 9 “Mah khanna niimtol ranga leh nga innih aksih nao kupasa inkhat am; chuta mii khalmo tam i kha itloh usa?” 10 Jisu in ason, “Mii naamteta mabok eive.” Amah amunchunna meiphul thratea moong; maiphul chunga annaam inboksei, anmahva kupa akpul rangavak ei. 11 Chunna Jisu in tol atumta louva ampaakche anbok miita ansempei; mahchunanga nga chukho anmah in anvon anvah nohmiil ansaakpei. 12 Che anmah naamte in anvon anvahche Jisu in aroita atih ei, “Jakhatkho mamaangnoh a anlei akirkaarkha chunve.” 13 Chunna anmah in mahchuta amichunpei, che mii in mahchuta ansaakche niimtol ranganata anlei akirkaarkha luktoong somlei innih sip a anthaal. 14 Amah in atloh daang khata anmuh in anson, “Tukleiramma akthleng ringraankha taktak a mahmii isa.” 15 Chunna amahta namma kurung amiveinatu kansuursam peiang ta arompeia, Jisu in veikhatla akroua muulla insengsa.
Jisu in Tuiichunga Akeh ah Seh
16 Cheva khulouhram athlengin, amah aroiva tuiiboomma trumsei, 17 anmah in muli chuunga tuiiboom vanna Kaparnaum phah a ansehnatu amithronpei. Cheva inthimsa, Jisu vah ankuunga thlengnohmang. 18 Thli tranga araangrella tuiiboomma tuiisolh thlengsa. 19 Anmah in kilomitar inthum nata rangavak mulita anthoh in, Jisu in tuiiboom chunga akeh ah seh a thlengsa mulikuung phah a innai anmuhpei. Chunna anmah in intrisei, 20 chuta anmah kuunga asonei, “Intrinohve; keisang.” 21 Cheva anmah in roomthok a amahta mulisuunga anloulohpei, che kak hanga anmah in antlungnasam tuiipaal khanna mulikha tlungsa.
Mii in Jisu ta Anjon
22 Akhuvar a tuiiboom araalla miitam in muli inkhatruta am anmuhningsa, che Jisu in aroisoh inruuia mulia chuungnohsa, chuta amah aroivah anroua sehningsei. 23 Chulata Akpu in mapaak a tol ansaakna amunkha naia Tiberias tingnata muli ste ankuunga thlengei. 24 Jisu kho aroikho mah khanna amnohseita anrompeia, anmah in muli chuunga Jisu akjon Kaparnaum a sehsei.
Jisu vah Ringna Tol
25 Che anmah in Jisu ta tuiiboom araalla antuuk a amahta anson, “Rabbi, tik a onna thlengcheme?” 26 Jisu in anmahta amsangei, “Keiin nankuunga taktak a kisonchou, nannih in keita nanjon angi daang nanmuh kharelnanoh, chuta nannih in niimtol nansaakche nanvon anvah kharelna. 27 Akmaangsam saakphu relna thlou tlohnohve, chuta miivaa Asa kupa in nankuunga nanimlansam ache amnoh ringna phah amsam saakphu kharella thlou tlohve alamva amahta Pa Ringpu in chum anampei.” 28 Chunna akuunga anson, “Ringpu athlou kantlohnatu kannih in jangthlouta kantlohtu tlame?” 29Jisu in ankuunga amsangei, “Akpu amah in amthlah amahta malot i Ringpu vah thloukhasa.” 30 Chunna ankuunga asonei, “Chuleva kannih in muh a kamilotnatu, jaknang daang nampaang ume?” 31 Kan pa kanpu in raprilla manna ansaak; nga tloh injih nangsa. “Amah in ringramna tol ankuunga amlannei” 32 Chunna Jisu in ankuunga asonei, “Keiin nankuunga taktak a kisonpeichou, ringramnata tol nanimlankha Moses noh, Pa in ringramnata akchim tolta nanimlanpei. 33 Alamva Ringpu vaa tolli maisa mah chuvah ringramnata trumma tukleiramma ringna nanimlanpei.” 34 Anmah in akuunga anson, “Akpu, lai amrella kannihta tol kanimlanro.” 35 Jisu in ankuunga asonei, “Keital i ringnatu tol khasang; keikuunga akthleng mii in traamnoh usa, che keita amlot mii in tikniakho atuii raalnoh usa. 36 Chuta keiin nankuunga kisonchou, nannih in keita nanmuh peiang chuphao keita kamlotnohchou. 37 Pa in keikuunga amlan anaamte keininga thlengtu; keikuunga akthleng miita tikniakho manomnohtung. 38 Keiin kamdonta kitlohnatu ringramnata thlengnoh ang, chuta keita kamthlah Akpu amah in amdonta kitlohnatu thlengsang; 39 che keita kamthlah Akpu amah in amdonkhavah maisa, amah in keikuunga amlan anaamteta keiin jakhatkho mamaangnoh a, chuta achena aknia amringna turelnasa. 40 Alamva Pa in amdonkhavah maisa, mah chuvah Asa kupata muh a amlot mii naamte in ache amnoh a ring anphahna turelnasa; che amah in keita achenia kamringtung.” 41 “Keiva ringramnata akthleng tol khasang” ta Jisu in asonkhanna Judi in amahkuunga anson. 42 Anmah in anson, “Mahmii i Joseph asa kupa Jisu khanohme, anuleh apava iromnohme? Che keiva ringramnata aktrum angta ipek khatloh a asonme?” 43 Jisu in ankuunga amsangei, “Nannih seeng nankaar a insonohve. 44 Keita kamthlah Pa in keichingnoh avah tukhat inkho kikuunga thleng cheknoh, che keiin amahta achena aknia kamringtu. 45 Mah i ringraan nirik a injih khasei, ‘Anmah naamteta Ringpu in amtheih tuei.’ Pa tingnata aktheih mahche tamma akrom mii naamte in keikuunga thlengei. 46 Tunangkhat in Pa ta nanmuhpei tihnoh ang Ringpu tingnakhop in Pa ta amuhning. 47 Keiin nankuunga taktak a kisonchou, amlot mii khanna ache amnoh a ring aphahpei. 48 Keiva ringnatu tol khasang. 49 Nanpa nanpuin raprilla manna kha sakho ansaak, thikho thisei. 50 Ringramnata akthleng tolkha maisa, mah chuvah tunangkhat in maita saaleva thinohtu. 51 Ringramnata aktrum akring saakphukha keisang; tunangkhat in mah tol ita saaleva, amah in ache amnoh a ring aphahtu; che tukleiram in ringna turella keiin kamlansam saakphukha kei kitaksa.” 52 Cheva Judi in khatleh khat trong indenseia, ansonpei, “Khatloh a amah atakta isaaknatu inihkuunga inimlan ume?” 53 Chunna Jisu in ankuunga asonei, “Keiin nannihta atak a kisonchou, nannih inta miivaa Asa kupa atakta saanoh choule che amahvaa athiita innohchoule, nantak a akring amnohtu; 54 kei kitakta aksaa mahche kei kithiita ak iin mii in ache amnoh ring aphahtu, che amahta keiin achena aknia kamringtu. 55 Alamva kei kitak i saakphu khasang, mahche kei kithii i iinphu khasa. 56 Kei kitakta aksaa mahche kei kithiita ak iin amahkuunga keiin amtung. Che keiin akuunga injomma amtung. 57 Akring Pa in keita kamthlah mahche keiin Pa rella kiring nangjimma, keita keisaamii in kei turella amahkho ringusa. 58 Ringramnata aktrum tolkha maisa, ipa ipuin ansaakche thieikha ohkhanangnoh saakphu ita aksaa amah in ache amnoh a ringtu.” 59 Amah in Kaparnaum a amtheih ei nanga, mahtrongi sinakok a asonei.
Ache Amnoh Ringna Trong
60 Amah aroi in maita antheih in akuunga anson, “Mah i aklutrongsa, tunang in arungeihchek ume?” 61 Chuta amah aroi in insoeita Jisu in aromma ankuunga asonei, “Mah kson in nannih nanril inlengna veime? 62 Jon Chuleva miivaa Asa kupa in matsah a a amna a akalkha nannih in muchoule khatloh a nanson ume? 63 Chaan amlankha Lisa, ruung inva jakhatkho akanana amnoh; keiin nankuunga kson trongeikha li leh chaan khasa.” 64 Chuta nannih nankaar a amlotnoh ste ammangchou. Alamva amlotnoh mii eikha che amahta akjuur miikha tunangmeta matsah a arompei. 65 Che amah in ason, “Churella keiin nankuunga kisonchou, Pa inta amahkuugna malannohle, tukhat inkho keikuunga thleng cheknohtu.” 66 Maiche aknua amah aroi aktam in inlengsei, che amahsoh veikhat sehjou nohsei. 67 Jisu in aroi somlei ihta asonei, “Nannihkho nanlengjasme?” 68 Simon Pitar in akuunga amsang, “Akpu, tukuunga seh usungme? Nangkuunga ache amnoh chaantrong am; 69 kannih in nangta malot a kanrompeiche mah chuvah Nangva Akseeng Ringpu khache.” 70 Jisu in ankuunga amsangei, “Keiin nannih somleinihta kcharnoh choume, nankaarna inkhatva rappu chuungsame?” 71 Simon Iskariot asa kupa Juda rella Jisu in mahtrongi asonpei, alamva somleinih ankaarna inkht in amahta ajurhsam.
Jisu leh Anaoei
1 Maiche aknua Jisu in Kalili a sehsa; amah in Judia a sehnoh, alamva Judi in amahta anthatnatu anjon. 2 Pek Judi ei Ramuk buhdoonnakha innaisa. 3 Chunna amah anao in akuunga anson, “Nangin nitlohthlou ei i niroi inkho anmuhnatu amah aphommi mah a Judia a sehrosa. 4 Alamva tukhat in amah atakta mii kuungah marom akdimii in inthup a atloh jakhatkho amnoh. Nangin mah ita nitlohche nitakta tukleiramma madangro.” 5 Alamva amah anaotak inkho amahta malotnoh mangei. 6 Jisu in anmahta asonei, “Keiturel lai ipek thlengnohmang, chuta nannihtu laiva aknirel onna am. 7 Tukleiram invah nannihta nantirh cheknoh ei, chuta amah inva keita kantirh alamva amah athlouva thranoh ta keiin sakhi kamlanrelna. 8 Nannihvah buhdoonna khanna sehve; keiva mah buhdoon khanna sehnohtung, alamva keiturel lai tlungnohmang.” 9 Mah ita asonche, atakvah Kalili a inmahsa.
Jisu in Ramuk Buhdoonna a
10 Maiche aknua amah anao in buhdoonna a ansehnua, amah atakho mii maromnoh a inruk a hangsa. 11 Judi in amahta buhdoonna a jonna anson, “Mahmiikha ramchesame?” 12 Miitam ankaar a amah relna chikchakta insosei. Arouin anson, “Amahvah akthra mii khame,” aktlei in anson, “Mahchunoh, amah in miita chimnoh a inhea aching.” 13 Chulata Judi ta antrih rella tukhat inkho amahrella indanga trongnohsei. 14 Buhdoonna laita ahanphah in Jisu in mathruunna thlaamma hanga amtheih ei. 15 Judi in salungkhoua anson, “Mahmii in tamnoh luunga atheih asingi khatloh a veime?” 16 Mahchunna Jisu in anmahta amsangei, “Keiin kamtheihchou i keitanoh, chuta keita kamthlahvaa ata; 17 tukhat in amah in amdonta atlohjale, amah in amtheihkha Ringpu tingname chunohle amah akroutu akchek amnehta trongme tihkha atak in aromtu. 18 Amah akroutu akchek amneh a trongle amah akroutu paarthrata ajon; chuta amahta amthlah akuungnata paarthrakha jonle mahkha akchim, amahkuunga chimnoh ansoi amnoh. 19 Moses in nankuunga trongthuun nanimlannoh peime? Chuta tukhat inkho trongthuunkha majuih nohchou. Nannih in keita jarelna keithat reita nanjonangme?” 20 Mii in amisang, “Nangva khousaar chuungsache! Nangta tunang in nakthatreita nakjonme?” 21 Jisu in ankuunga amsangei, “Keiin thloukhat kitloh, mah thlou khanna nannih nannaamte in salungkhoua amchou. 22 Moses in nankuunga avun tannatu nanimlan (Mahkha Moses tingnanoh, chuta pa pu tingnasa), che inngeihna aknia nannih in miita anvun nantan. 23 Moses trongthuunta akoihnoh nahtu inngeihna aknia miita anvun tanchoule keiin inngeih nia mii aknata kamthratkhem rella nannih in keichunga namilung inhaangnohme? 24 Miisak anna pichaar tlohnohve, chuta akchim pichaar tlohve.”
Mahmii i Misaiah me?
25 Alamchunna Jerusalem na mii arouin anson, “Anmah in thatreita anjonkha mahmii inohme?” 26 Che onna amah in indanglonga tronga amsa, cheva amahkuunga jakhatkho sonnohsei! “Mahmii i tak a Khrista sa ta anrompeime? 27 Chuta Khrista in tik a thlengume, ramnata thlengume tukhat inkho romnoh; chulata amahvah ramnata thlengme irom.” 28 Chunna Jisu in mathruunna thlaamma amtheih ei, “Nannih in keita nanromang, che ramnata thleng umeta nanromnoh angme? Chuta keiin kichek kamneh roua thlengnoh ang; keita kamthlah amahkha akchimsa, amahta nannih in romnohchou. 29 Keiinvah amahta kirom, alamva keita kamthlah amahkuung nata thlengsang.” 30 Chunna amahta suurnatu anjon; chuta tukhat inkho achunga kut thlaknoh mangei, alamva amah apung epekphah thlengnohmang. 31 Chulata miitam ankaar nata mii jikcha inva amahta malot a anson, “Mahmii in atloh daang chunga Khrista in athleng laia ralla atloh umang?”
Jisu Ansuurnatu Raalmii Amithlah
32 Jisu rella mii khalmo tamin chikchakta insoeita Pharisi in antheihpei, chunna akthloi thiimpu leh Pharisi in amahta ansuurnatu phrangkita amithlah ei. 33 Mahlai Jisu in ason, “Keiin nannihsoh kak soot a amjoutung, mahchuche keita kamthlah amahkuunga sehlatung; 34 Nannih in keita nanjontung chuta keituuknoh uchou; keiin kiamna a nannih in thlengcheknoh uchou.” 35 Judi in khatleh khat insonsei, “Inih in tuuk icheknoh natu ram amunna mahmii in sehsam reime? Kriik ankaar a inthek invorh ak am inih mii ankaar a seh a Kriik eita matheihtang atihmeio? 36 ‘Nannih in keita nanjontung chuta keituuknoh uchou,’ che ‘Keiin kiamna a nannih in thleng cheknoh uchou’, ta amah in atrongi jaknang trongsame?”
Ringna Chaan Amlan Tuii
37 Ujouhoong acheni akthloi nia, Jisu in ngirra rool inkaanga onga trong araan, “Tunangkhat in atuii raalle, amah in keikuunga thlenga iinso. 38 Keita amlot amah in, ringjih in asonnanga, ‘Amah arilsuunga akringvaa avaatuii luungtu.’ ” 39 Pek tunangkhat in amahta amlot mii in anphahsam Li kharella ason; alamva Likha malannohmang, mah chuvah Jisu kha paar mathratnoh mang.
Miikaara Inthrek Inbaak Suuk
40 Mahtrong chuta antheih in, mii arouin anson, “Amah i tak a ringraansa.” 41 Aktlei in anson, “Amah i Khrista khasa.” Chuta mii arouin anson, “Khrista in Kalili nata thlengume? 42 Khrista va Davit innsuungna, Davit in a amna khuu Bethlehem nata inthruhta ringjih in asonnohme?” 43 Chunna amahrella mii ankaar a inthrek inbaak suuksei 44 Arou inva amahta ansuurja hangsa, chuta tukhat inkho amah achunga kutthlak cheknohsei ak. Aktloh Akhal Judi in Amahta Amilotnoh 45 Anmah in anthlenglaia Pharisi in anlouson, “Nannih in amahta jarella thlennoh choume?” 46 Phrangki in amisang, “Tukhat inkho mahmiinanga trongnoh mangei!” 47 Pharisi in ankuunga amisang, “Nannihkho amahnoh lamtinga nanisehpi peime? 48 Amahta malotnatu tukhat in nankuungnata nohle Pharisi tingnata akchek amnehtrong inthruhsme? 49 Trongsuur romnoh miitamva phool anphahpei.” 50 Mah i matsah a Jisu kuunga seh a intuukpi anmah ankaarna Nikodimas in ankuunga asonei, 51 “Inih trongsuur nujuih a mii khat in jangthlouta atlohmeta matsah a rungaihnoh maanna miita pichaartloh ajame?” 52 Amahkuunga amisang, “Nangkho Kalili na miinohcheme? Majonna anve Kalili nata ringraan tukhatkho inthruhnoh.”
Kupa Laalrella Ansuur Kumei
53 Cheva anmah in inn inna inlengsei.
1 Chuta Jisu vah Chorphol muulla hangsa. 2 Juktiing inranga amah in mathruunna thlaamma veikhat thlenglasa; mii naamte in amahkuunga thlengsei che amah in inbok a anmahta amtheih ei. 3 Ringjih lulok mahche Pharisi ei in kupalaal kumei inkhatta, alaia amingirh 4 che anmah in akuunga anson, “Lulok, amah kumei i kupasoh inlaalla amlaitalla kansuurpei. 5 Moses trongsuur avah oinang miita lung denna thatnatu kankuunga trongthuun kanimlanpei. Amah kumei irella nang invah jangnisonjame?” 6 Amahta janoh a maraal amithlaknatu chaang anna mah ita akuunga anson. Jisu in inkhup a tukleichunga akut majung in amjih. 7 Amahta rui ruia an am in, amah in ngirjok a ankuunga asonei, “Nannih nankaar a aleh ak amnohluung miikhan matsah a amahta lung deenso.” 8 Che veikhatlakho inkhup a tukleichunga akut majung in amjih. 9 Anmah in ohchuta antheih in, anparem nata mathronna inkhat khat a inthrukirsei, che Jisu leh amaikuunga angir kumeikhopta inmahningsei. 10 Jisu in intouva anche amahta ason, “Kumeio, ramche seime?” Tukhat inkho nangta namlaalnoh seime? 11 Kumei in ason, “Akpu, tukhat inkho keita kamlaalnohsei.” Che Jisu in ason, “Kei inkho nangta namlaalnoh sang; inlengrosa, che veikhat inlenga aleh tlohnohronoh.”
Jisu in Tukleiramtu Akvaar Khasa
12 Veikhatla Jisu in ankuunga trong asonei, “Kei i tukleiramtu akvaar khasang; kei kiknu akjuih mii in inthim kaara sehnohtu, chuta akringvaa akvaarkha atak ah amtu.” 13 Mahchunna Pharisi in amahta anson, “Nang nikroutu sakhi namlan; nang sakhi i chimnoh.” 14 Jisu in amsang, “Kei kikroutu sakhi malan sanglakho, kei sakhikha chim, alamva keiin ramnata thleng angme mahche ramma sehtungme krom, chuta keiin ramnata thleng angme chuche ramma sehtungme nannihva romnohchou. 15 Nannihva miihoong aknujuih a pichaar nantloh, keiva tukhatkho pichaar tlohnoh ang. 16 Chulata keiin pichaar tloh angle, kei pichaar tlohva chim, alamva kei kikroua pichaar tlohnoh ang, chuta kei leh che keita kamthlah amahsoh kitlohjou. 17 Nannih trongsuur avah mii innihva sakhi in chimta injihsa; 18 Kei kikroutu sakhi kamlan, che keita kamthlah Pa in keitu sakhi amlan.” 19 Alamchunna anmah in akuunga anson, “Nangpa ram amme?” Jisu in amsang, “Nannih in keikho kei Pakho romnohchou; nannih in keita keiromchoule, kei Pakho nanrom utaning.” 20 Mahtrongi mathruunna thlaamsuung baobeh sihna thlaamma amah in amtheih ei, chuta tukhat inkho amahta suurnoh ei, alamva amahtu laikha tlungnohmang.
Keiin Kisehna a Seh Cheknoh Uchou
21 Veikhatlakho anmahta asonei, “Keiin seh usang, che nannih in keita nanjontung, mahche nannih in nanleh a thiuchou; keiin kisehna a nannih in thleng cheknoh uchou.” 22 Mahlaia Judi in anson, “Keiin kisehna samma nannih in thleng cheknoh uchou” ta asonni, amah akroua inthatsam meio? 23 Amah in ankuunga asonei, “Nannihva athlang nachou, keiva achungna ang; nannihva tukleiram nachou, keiva tukleiram nanoh ang. 24 Keiin nannihta kisonchou mah chuvah nannih nanleh khanna thiuchou, alamva nannih in keita amahsa ta kamlotnoh choule nannih nanleh khanna thiuchou.” 25 Amahta anson, “Nangi tunangcheme?” Jisu in anmahta asonei, “Matsah nata keiin nankuunga kisonkhasa. 26 Keiin nankuunga khalmo kisontuphu mahche pichaar kitlohnatu tam am; chuta keita kamthlah amahkhavah chim, keiin amahkuung nata ktheihta tukleiramma indanga kisonpei.” 27 Pa rella anmah kuunga kitrongkha anmah in lou theihnohsei. 28 Chunna Jisu in ason, “Nannih in miiva Asa kupa khata nandomlai akhanna kei i amahsang ta nanrom umang, keiin kichek kamneh khanna jakhatkho tlohnoh ang, chuta Pa in keikuunga kamtheih khata nga tloh a trongsang. 29 Che keita kamthlah amah in keisoh amjou, keita kikroua keimahnoh, amahta mapelnatu lai amrel keiin thlou kitloh.” 30 Amah in nga tloh a trongsa, che miitam in amahta amilotpei.
Thlaang thlaang mii Khatkho Naichi
31 Amahta amlot Judi kuunga asonei, “Nannih inta kei kitrongah injommata amchoule, atatak a nannihva kei kiroisachou, 32 che nannih in akchimkhata nanromtu, mahche akchim khanna nannihta thlaang thlaang nanimveitu.” 33 Anmah in akuunga amisang, “Kannihva Abraham atuteung, chunna kannihva tunangkhat miivaa naichi louveinoh mangung. Mahchuta khatloh a ‘Nannihva thlaang thlaang mii veiuchou,’ ” ta nakson ungme? 34 Jisu in ankuunga amsangei, “Keiin nankuunga a tak a kisonchou, tunangkhat alehthlou aktloh miiva alehvaa naichisa. 35 Naichi in inna ache amnoh a amma relnoh; asa kupa vaa ache amnoh a am. 36 Chunna Asa kupa inta nannihta ningtamna nanimphahle, nannih in atatak a aningtam mii vei uchou. 37 Nannihva Abraham atutechouta krom; chulata nannih inva keita thatreita nanjonnang, alamva kei kitrongi nanrilsuunga amnatu aphom amnoh. 38 Keiin Pa kuungnata kimuh kimuhkhata trongsang, che nannih inkho nanpa kuungnata nantheih nantheih khata nantlohpei.” 39 Anmah in akuunga amisang, “Abraham vah kannih kan pa.” Jisu in ankuunga asonei “Nannih inta Abraham asa veichoule, Abraham in atlohthloukha nantloh tupotsa, 40 chuta Ringpu tingna akchimta theih a nannih nankuunga akson keita, ipekva thatnatu nanjonnang; Abraham va mainangi tlohnoh. 41 Nannih nanpa in atlohthlouta nannih inkho nantloh.” Anmah in akuunga anson, “Kannihva kumei kupa inlaalla pok miinoh ung, kannih kan Pa inkhat am, mah chuvah Ringpu sa.” 42 Jisu in ankuunga asonei, “Ringpu ta nannih nan Pa maveichoule, nannih in keita nanrilvol tupotsang, alamva keiin Ringpu nata inthruh a thlengsang; kei kikrou kichek kamneh a thlengnoh ang, chuta amah in kamthlah ang. 43 Keiin nankuunga ksonni jarelnaru lou theihnoh sachoume? Mah i jarelname tihva nannih in kei kitrongta rungai cheknohchou. 44 Nannih nanpa seitan vaa atasachou, che nanpa in akditta tloh i nannih in namidon khasa. Amahvah akungnata mathronna miithat mii, amahkuunga akchim atlohnatu amnohluung, alamva amahkuuga akchimluung amnoh. Amah in amchinthivaa atronglaia, amah atak a am anono khata trong, alamva amahvah amchinthi, che amchin apasa. 45 Chuta keiin nankuunga akchimkhata kisonrel, nannih in keita kamlotnohchou. 46 Nannih nankaar a keita alehchel namithlaknoh angme? Keiin akchimta am angle, jarella kamlotnoh choume? 47 Ringpu ata akveimii in Ringpu trongson arungeih; jarelna, nannihva Ringpu atanohchou churella Ringpu atrongta rungainohchou.”
Jisu Khatkho Abraham
48 Judi in amahkuunga amisang, “Nangva Samaria na mii che chuche khousaar chuung miicheta nikuunga kansonni chimnoh ungme?” 49 Jisu in amsang, “Keiva kousaar chuung noh ang; chuta keiva Pa ta injah ang, nannih inva keita kanjahnoh chou. 50 Chuta kei kikroutu paarthratna jonnoh ang; mahchuta onna akjon Mii khat am amah in pichaar atlohtu. 51 Keiin nannihta taktak a kisonchou, tunangkhat in kei kitrongta ngaak a majuih choule, mahmii khavah tikniakho kthi muhnohluung usa.” 52 Judi in amahta anson, “Ipek inih in irompei mah chuvah nannihva khousaar chungsachou, Abraham in thisa, ringraankho thisei; chuta nangin nisonva, ‘Tunangkhat in keitrong ngaak a majuihleva, amah in kthi tiknikho matemnohtu.’ 53 Kan pa Abraham athihche nuaa nangin liinsacheme? Ringraankho thisei! Nang nikrouta tu angmeta insooncheme?” 54 Jisu in amsang, “Kei kikrouta paarthratna mavei angle, kipaar thratna i jakhat khonoh; keita paar kamthratva nannih in Pa ta nan ong keipa in paar kamthrat ang. 55 Chuta nannih inva amahta romnohchou; keiinva amahta krom. Keiin amahta romnoh angta sonangle, keikho nannih nanga chinthi veisang; chuta keiva amahta krom churella amah atrongta ngaak a kamjuih. 56 Nannih nanpa Abraham in kei kiknita kmuhtu ta aroomthok; amah in ohchuta amuh a aroomthoksa.” 57 Mahchunna Judi in akuunga anson, “Nangva kum sopngakho phahnoh mangche, che nangin Abraham ta nimuhpeime?” 58 Jisu in asonei, “Keiin nannihta taktak a kisonchou, Abraham apoknoh maa a kei louamsang.” 59 Chunna amahta andennatu lung anchunpei; chuta Jisu vah inthupsa, mahche mathruunna thlaamnata inthruhsa.
Amit Choa Pok Miikhatta Jisu in Amthrat
1 Amah in nga tloh a asehlai, amit choa pok mii khat amuh. 2 Chunna aroi in akuunga anrui, “Lulok, mahmii kupa in amit choa pok i tunangvaa aleh relname, chunohle anu apa eime?” 3 Jisu in amsang, “Mahkha atak in alehthlou atloh relna khonoh nohle anu apa khonoh, chuta Ringpu thlouta amahkuunga amdangna turelnasa. 4 Keita kamthlah amah athlouta kini amlaia itlohtu tlasa; khulouh veisle tukhat inkho thloutloh cheknohtu. 5 Keiin tukleiramma kiamlai sootva, keiin tukleiramtu akvaarsang.” 6 Mahchuta asonche, tukleia machilla philchop amnoiche philchuta amit ah ateipei, 7 amahta ason, “Seh a, Silom pukhri a chaamro” (Silom arthava Mathlah). Chunna amah in seh a achaampei, che amit muh a inlengsa. 8 Matsah avah doh a aksaa miita amit muh akchek inva anthringpi in ansonpei, “Mahmii i inbok doh a aksaa mii khanohme?” 9 Arouin anson, “Mahmii khasa” aktlei in ansonla, “Amahnoh, asak inloning” Amah in ason, “Kei i mahmii khasang.” 10 Anmah in akuunga anson, “Chule nang nimit khatloh a meenga nimuhchek peime?” 11 Amah in amsang, “Jisu ta an ong mii khanna philchop manoia kimit keiteiche keisonang, ‘Silom a seh a chaamro’; chunna keiin seh a kchaam inva kimit muh kichekpei.” 12 Amahta anson, “Amahvah ram amme?” Amah in asonei, “Romnohsang.” Mahmii Kupa Amthrat Khata Pharisi in Minna Ansuii 13 Anmah in mitcho khata Pharisi ankuunga anthlenpei. 14 Jisu in philchop balla amit ammuhna aknikha sabatni veisa. 15 Amah amitkha khatloh amuhmeta Pharisi inkho anruila. Ankuunga asonei, “Amah in kimitchunga philchop abal, mahchuta keiin kchaam in muh kichekpei.” 16 Pharisi arouin anson, “Mahmii i Ringpu tingnanoh, alamva amah in sabat ngaaknoh.” Chuta aktlei in anson, “Alehchel mii in oinang daang khatloh a atlohchek ume?” Anmah ankaar a inthrek inbaakna veisa. 17 Chunna anmah in mitchota veikhat ansonla, “Amah in nimit nammuh taningva amahturel nangin jangnisonjame?” Amah in ason, “Amahvah ringraan inkhat.” 18 Amit muh akphah miikha anu apa ta Judi in an ongnohsoot, amahvah amitcho chuta amuhpeita anmah in malotnoh lusei, 19 cheva anmah in anu apa ta anrui, “Amah i nansakupa khanohme, amit choa pokta nanson khanohme? Chuleva khatloh amah in muh achekpeime?” 20 Amah anu apa in amisangpei, “Amah i kansakupa, amit choa pokta kanrom; 21 chuta amah in khatloh a ipek amit amuhme, che tunang in amah amitta ammuhme romnoh ung, amah atak changsa atak in atak turel asontu, amahta ruive.” 22 Amah anu apa in Judi ta antrih rella mah i anson, alamva tunangkhat in Akpu ta Khrista ta phoongleva; amahta sinakok nata aminomtu ta Judi in matsah a anjana am. 23 Churella anu apa in anson, “Amah atak changsa, atakta ruive.” 24 Chela anmah in amitcho miita veinih inlenga onga anson, “Ringpu ta mapaakro; mahmii i alehchel miita kanrom.” 25 Amah in amsang, “Amah i alehchel miime chelnohme keiin romnohsang; keiin kiromva, kimit choangta ipekva muh kichekpei.” 26 Amahkuunga anson, “Amah in nangkuunga kha atlohme. Khatloh a nang nimitta amhoongme?” 27 Amah in amsangei, “Keiin nankuunga kisonpeichou, che nannih in keirungainoh sachou. Chela nannih in jarella veikhat nanrungeihja mangme? Nannihkho amah aroi nanveja taksame?” 28 Cheva amahta thikrak a saalla antipei, “Amah aroiva nangche, chuta kannihva Moses aroiung. 29 Ringpu in Moses kuunga trongsa ta kanrom, chuta mah kupa iva ramnata thlengme romnoh ung.” 30 Mahmii in amsang, “Amah in ramnata thlengme tihkho romnohchou, chuta kimitva amhoongpei. Mah i jarella salungkhouna veime. 31 Inih in irom mah chuvah Ringpu in alehchel miita rungainoh, chuta tunangkhat Ringpu ta injah a amthruun mii veile che amah in amdonkhata tlohle mahmii khata Ringpu in arungeih. 32 Tukleiram amthron lainata tukhat amit choa pokta amuhpeita anson lou theihnoh mangme. 33 Mahmii inta Ringpu tingnanoh leva, jakhatkho tloh cheknohtu.” 34 Amahkuunga amisang, “Nangva aleh in inlep a pokche, chela nangin kannihta kanimtheihla mangche?” Cheva amahta aminompei.
Li a Mitcho
35 Amahta aminompeita Jisu in atheihpei, cheva amahta antuukpia akuunga ason, “Nangin miivaa Asa kupata namlotme?” 36 Amah in amsang, “Lulok, mahmiikha tume, keiin kamlotnatu?” 37 Jisu in ason, “Nangin amahta nimuhpei, nangkuunga aktrongi amah khasang.” 38 Chunna amah in ason, “Akpu, keiin kamlot,” cheva amah in Jisu ta amthruunpei. 39 Jisu in ason, “Akmuhnoh mii in anmuhnatu che akmuh mii in mitcho anveinatu, tukleiramta pichaar tlohnatu keiin thlengsang.” 40 Jisu komma innaia am Pharisi arouin mahchuta antheihpei, cheva amahkuunga anson, “Mahchu kannihkho mitcho sungme?” 41 Jisu in ankuunga asonei, “Nannih inta mitchobeng chouleva, nanleh amnoh uta; ipek nannih in nanson, ‘Kannih in kanmuh,’ chuta nannih nanlehva nantaksoh am.”
Sadam Kemvaa Pandam
1 “Keiin nankuunga atatak a kisonchou, ‘Tunangkhat in sadamkon thonga luutnoh a, apangtinga kalla akluut miikha inru inraansa; 2 chuta thonga akluut miikhava sadam kemsa. 3 Amahturel thong akngaak in thong amhoong; sadam in amah ahou antheih, che amah sadam eita anminga a ongei. 4 Amah sadam eita ankonnata amthruhlai, anmah anmaa a seh, che sadam in amah aknuta anjuih, alamva amah ahouta anrom. 5 Aktleina akthleng miivaa aknu juihnohtuei, chuta aktlei mii ankuungnata tlaantuei, alamva anmah in aktleinata akthleng miiva ahou romnoh ei.’ ” 6 Mah pandam i Jisu in ankuunga huuina a asonei, chuta anmah kuunga asonkha loutheinoh ei.
Jisu vah Akthra Sadamkem Khasa
7 Chunna veikhat inlenga Jisu in ankuunga asonei, “Keiin nankuunga atatak a kisonchou, keiva Sadamkonvaa thong khasang. 8 Kei kmaa a akthleng annaamte inru inraan sengei; chuta anmah anhouta sadam in rungainoh ei. 9 Keiva thong khasang; tungangkhat in keikuunga luutleva, amahta kakaltu, che amah in sehloonna meiphul asaakna aktuuktu. 10 Inrumii in amruknatu, thatnatu mahche ammaangnatu noh a thlengnoh; anmah in akring anphahnatu keiin thlengsang, mahchu inleisolh a anphahnatu. 11 Keiva akthra sadamkem khasang. Akthra sadamkem in amah sadam turel achaan amthlah. 12 Baobeh akthrulh, sadamta kemnoh mii in, uiiramuiipii athleng amuh in sadamta eia atlaan; che uiiramuiipii in sadamta eita a atlaanei che heihei akthek ei. 13 Amah in tlaanna amah ei alamva amahvah baobeh akthrulh miining mahche sadam turelva akirkho aril maluutnoh. 14 Keiva akthra sadamkem khasang; kei sadam eita ansak kromei che anmah inkho keita kanromang, 15 Pa in keita keirom khananga, keiinkho Pa ta krom; chunna kei sadam turella kichaan kamthlah. 16 Kei sadam akonna ak amnoh aktleiakho kei sadam ammei; anmahkho keiin kithlentuei, che anmah in kei kihou antheihtu. Mahchunna sadamlom inkhat mahche sadamkem inkhat vei tuei. 17 Churella Pa in keita keirilvol, alamva kei kichaan kamthlahpei mahchuta veikhat inlenga kaphahnatu. 18 Tukhat inkho kikuungna chaan lounoh, mahchu kitakrouin ja a kamthlah. Kei chaanta kamthlahnatu kei kituui am, che mahchu veikhat inlenga klohnatu tuuikho am; mah trongthuun i Pa tingnata kphahpei.” 19 Mahtrong irella Judi ankaar a veikhat inthrek inbaak suuklasei. 20 Anmah aktam in anson, “Mahmii i khousaar chuunga innahsa; jarella atrongta nanrungeihme?” 21 Aktlei in anson, “Mah i khousaar chuung mii inkhatva atrongnoh. Khousaar in mitchota ammuhchek ume?”
Jisu ta Anjanoh
22 Aknu achunna maithruunna Thlaam Katna buhdoonkha Jerusalemma suuksa. 23 Mahchu phalbia tla, che Solomon vaa mathruunna thlaam innmuk a Jisu in sehsa. 24 Chunna Judi in Jisu ta kooia anngrihche anson, “Nangin kannihta jikcha soot a namsimna umangungme? Nangin Khrista chele kankuunga seenga kanisonrosa.” 25 Chunna Jisu in ankuunga amsangei, “Keiin nankuunga kisonpeichou, che nannih in keita kamlotnoh sachou. Keiin Pa akminga kitlohthlou anaamte, kei turella sakhi amlan; 26 chuta nannih in keita kamlotnoh sachou, alamva nannihva kei Sadam nohchou. 27 Kei Sadamtva kihou antheih, keiin anmahta kromei, che anmah in kei kiknuta kanjuih ang; 28 che anmahta ache amnoh akring kamlanei, mahche anmahva tikniakho maangnoh usei, che anmahta tukhat inkho kikutnata keisutnoh tuei. 29 Anmahta keikuunga amlan Pa in aktlei naamte chunga akliin, che tukhat inkho anmahta Pa kutnata sut cheknoh tuei 30 Pa leh keiva inkhat ningung.” 31 Veikhatla Judi in amahta andennatu lung anchunpei. 32 Jisu in ankuunga amsangei, “Pa tingnata akthra thlou jikcha nankuunga kammuh peichou; mahsuung akhanna jarella keita lung nandensam angme?” 33 Judi in amisang, “Akthra thlou nitloh kharella nangta lung nakdeennoh ung chuta Ringpu ta leem manuih a nitrong kharelna; alamva miikhatcheta nitakta Ringpu namvei.” 34 Jisu in ankuunga amsangei, “Mah i nannih trongsuura injhinohme, ‘Keiin kisonchou, nannihva rappunoh choume?’ 35 Ringpu trong akthlengta amah in rappu ta ongle (ringjihva koii cheknohtu), 36 keiturelva Pa in maseenga tukleiramma kamthlah peiang, che ‘Keiva Ringpu Asa kupa ang’ ta kisonlai khatloh a nannih inla nangva Ringpu ta leem manuih a trongche nantih angme? 37 Keiinta Pa athlouta tlohnoh angle, chuleva keita kamlotnohve; 38 mahchuta keiin tloh angle, nannih in keita kamlotnoh choulakho, Pa in keikuunga am mahche keiin Pa kuunga ammangta nanromnatu che romma amahkuunga nan amnatu kthloukha malotve.” 39 Veikhatla amahta ansuurnatu insuulsei, chuta ankutnata inlitsa. 40 Chunna Jisu in Jordon araalla John in matsah a alupna amunkhanna veikhat inlenga mahchunna amsa. 41 Amahkuunga mii khalmo thlengei; che anmah in anson, “John va daang jakhatkho tlonoh, chuta mahmii irella John in asonva chim.” 42 Ohkhanna miitam in Jisu ta amilotpei.
Lajaras in Thi
1 Pek Meri leh amah ute Martha ankhuu Bethani a mii khat Lajaras kna a am. 2 Akpu ta thao polh a Akpu akehta asamma aknuul Meri vaa atra Lajaras knasa. 3 Chunna aute in Jisu kuunga trong mathlah a ason, “Akpu, nangin nirilvol amahkha knasa.” 4 Jisu in mahchuta atheih in ason, “Aknakha thitangta knanoh; mah iva Ringpu paarthrata amliinna turelnaning, mah chuvah amah apaalla Ringpu Asa kupata paar amthratna turelna.” 5 Jisu in Martha leh anaosoh che Lajaras ta arilvolei. 6 Chunna amah knasata atheih in, amah in an amna khanna Jisu in ninih nichuunga amsa. 7 Mahchuche aknua Jisu in aroita asonei, “Inih in Judia a veikhat sehrei.” 8 Aroi in akuunga anson, “Lulok, Judi in nangta lung nakdenreita ipek nanjonnoh eime, chela veikhatla mah khanna sehsamla mangche?” 9 Jisu in amsang, “Nikhatsuunga pung somleinih amnohme? Tunangkhat in suunna sehloonle amah akeh masuihnohtu, alamva amah in tukleiramna akvaar ita amuh. 10 Chuta tunangkhat in khulouh a sehloonle, amah akeh amsuihtu, alamva akvaarkhan amahkuunga vaarnoh.” 11 Nga tloh a atrongche, ankuunga asonlaei, “Inih iruul Lajaras insa, chuta amahta kamthohnatu keiin sehtang.” 12 Aroi in amahkuunga anson, “Akpu, amah in inleva knathra usa.” 13 Pek Jisu vah Lajaras in athih rella atrongna veisa, chuta anmahva inna amtuta amidonpei. 14 Cheva Jisu in ankuunga seenga atihpei, “Lajaras thisa; 15 alamva nannih in namilotnatu keiin mah khanna amnoh angta nannih turel keiin roomthok ang. Chuta inih in amahkuunga sehrei.” 16 Pheipokta an ong Thomas in anruuipijou amah aroikuunga asonei, “Inihkho amahsoh sehreio, inih in amahsoh inruuia thijou khoromnohme.”
Jisu vah Thinata Veikhat Aringche Chaan Amlan Khasa
17 Pek Jisu in mahchunna athlenglai Lajaras rusuunna anphuumna nijan manli aphahpei. 18 Bethani vah Jerusalem nata mel innihvakta inlaning, 19 Chunna Judi jikcha in Martha leh Meri annao kupa athih rella bohnatu thlengei. 20 Martha in Jisu thlengsta atheih in, louseh a amahta antuukpipei, mahsuunga Meri va inna inbok a inmah. 21 Martha in Jisu ta ason, “Akpu nanginta onna amcheleva, kei kitrakha thinoh uta. 22 Che ipekho krom mah chuvah nanginta Ringpu kuunga jangmekhat ningenchu, Ringpu in nangkuunga amlantu.” 23 Jisu in amahkuuga ason, “Nang nitra veikhat ringtu.” 24 Martha in amahkuunga ason, “Achena aknia veikhat ringna akhanna amah in ringtuta krom.” 25 Jisu in amahkuuga ason, “Veikhat akring mahche akring chaankha keitalsang; keita kamlot mii khanna thislakho ringlatu, 26 che tunangkhat in ringa keita kamlot miikhan tiknikho thinoh usei. Mah i nangin namlotme?” 27 Martha in akuunga ason, “Akpu, oi; nangva Ringpu Asa kupa, Khrista tukleiramma thlengcheta kamlotche.”
Jisu in Trapsa
28 Mahchuta asonche, amah anaoeisoh Meri kuunga inlenga amahta inruktea onga ason, “Lulokha onna amsa, nangta nak ong.” 29 Mahchuta atheihsoh, inthademma anthohche amahkuunga sehsa. 30 Pek Jisu vah khuusuunga tlungnohmang, chuta Martha in antuukpina khanna ammang. 31 Amahta boh a, inna ak amjou Judi in, Meri in khalmo intha a inthoua anthruhkhata amuh in, rusuunna seh a trapsam naita anjuihpei. 32 Meri in Jisu amna a thlenga Jisu ta amuhsoh, amah akehkungah akhuk makamma ason, “Akpu, nanginta onna amcheleva, kei kitrakha thinoh uta.” 33 Amah in atrapta Jisu in amuh in, amasoh akthlengjou Judi kho trapsei, chunna amah akli leh aril khalmo asokpei; 34 chunna amah in ason, “Amahta ramma nanphuumme?” Akuunga anson, “Akpu, thlenga anro.” 35 Jisu in trapsa. 36 Cheva Judi in ansonpei, “Anve, jikcha amahta arilvolme!” 37 Chuta ankaarna arouin anson, “Mitchota anmuhchek amah in mii ikho athihnoh natu tlohcheknoh ume?”
Lajaras ta Akring Tinga Veikhat Athlen
38 Jisu in veikhatla aril khalmo sok a, rusuunna thlengsa; mahchu rusuunpiina, che lung inkhat inkhaar a am. 39 Jisu in ason, “Lungkha phongve.” Akthivaa aute Martha in akuunga ason, “Akpu, pekva innam usa, alamva athihna nimanli aphahpei.” 40 Jisu in akuunga ason, “Nanginta malotchele Ringpu va paarthra nimuhtuta naksonnoh angme?” 41 Chunna anmah in lungta anphongpei. Che Jisu in intoua a anche ason “Pa o, nangta kampaakche alamva nangin kei kitrongta naktheih ang. 42 Nangin keita anirel naktheih angta krom, chuta onna miitam ngirra ak am mii turella kisonche, mah chuvah nangin keita namthlah angta anmah in amilotnatu.” 43 Mahchuta asonche, housuuk a onga ason, “Lajaras, inthouro!” 44 Akeh akut puun inlep a, che amai puunna inthlomma akthi miikhan inthruhsa. Jisu in anmahta asonei, “Amahta majakve, che masehvesa.”
Jisu Thatnatu Inruk a Ansil
45 Alamchunna Meri soh akthlengjou Judi jikcha in, Jisu in atlohthlou khata anmuh in amahta amilotpei; 46 chuta arouinva Pharisi ankuunga seh a Jisu in atlohthlou khata antongpei. 47 Chunna akthloi thiimpu leh Pharisi in jamata maboomma, anson, “Inih in kha itloh usame? Alamva mahmii in daang jikcha ampaangpei. 48 Nga tloh a oinanga atloh ita maja maleva, mii naamte in amahta amilot usa, cheva Rome na akchek amneh in thlenga inihtu akseeng amunleh inih jaatboomta inimmaang usa.” 49 Chuta ankaarna inkhat mah kumma akthloi thiimpu akvei Kaiphas in ankuunga asonei, “Nannihva jakhatkho romnohchou; 50 mah chuvah nannaamte nanmaang ngutva mii khat athih in jaatboom anaam amaangchunga ralla thranohme.” 51 Mah i amah atak turellakhop sonnoh, chuta mahkum chunna akthloi thiimpu aveilai Jisu in jaatboom turella thituta matsah a alouphoongpei, 52 amah jaatboom relna khop noh, chuta inthek invorh a ak am Ringpu vaa asaeita veikhat inlenga athlenna turelna. 53 Chunna mahni khannata mathronna amahta khatloh a ithat umeta intelsei. 54 Machunna alamveia, Jisu in Judi ankaar a indanga sehloon tlohnohsa, chuta rapril komma am Ephraim khuupii aveella sehsa, aroi eisoh machunna amjousei. 55 Ipekva Judi ei laalna buhdoon innaisa, che mii aktamva anmah khuuboom nata laanna buhdoon aphahnoh amaa a antak maseengnatu Jerusalem a hangsei. 56 Anmah in Jisu ta jonna, mathruunna thlaamma ngirra khatleh khat insonsei, “Nannihva jangnamidonme? Amahvah laalna buhdoonna thlengnoh usa, thlengrei ume?” 57 Pekva akthloi thiimpu leh Pharisi ei in akthloi trong anmithruhpei, mah chuvah “Tukhat Jisu amna akrom mii in anmah kuunga marom eiso, chunna amahta ansuurnatu.”
Jisu ta Bethani ah Thao Atei
1 Laalna buh doonnatu niruk avatlai, Lajaras amna, amahta thinata amringna Bethani a Jisu in thlengsa. 2 Mah khanna anmah in buh saaknatu amichaangpei, Martha in amahta rou atloh, che Lajaras kho anmah ankaar a tebor a inbok. 3 Meri in amanchaal amrimtui akseeng nata ansoor thaochuta alohche, Jisu akeh a polh a asamma anuul; mah innchu thao anrim in sipsa. 4 Chuta amah aroi ankaarna Judas Iskariot in (amahta akjuursam mii) ason, 5 “Jarella amanchaal thao i reija inthum denaria juura anranriingta malannohme?” 6 Amah asonni, anranriingta madonna sonnoh, alamva amahvah inrumii; amah in skhao achoih, amah skhao nata loua ahuuina. 7 Jisu in ason, “Akroua mahro, keita kanphuumna turella machaang thlaangso. 8 Nannihva inranriingsoh injomma amjouchou, chuta nannihva injomma keisoh amjou nohchou.”
Lajaras Thatnatu Inruk a Ansil
9 Jisu in mah khanna amsa ta anrompeia Judi miitam in mahkhan thlengsei, Jisu khop relna noh a chuta Lajaras thinata amringkho annatu thlengsei. 10 Chunna Lajaras kho anthanatu akthloi thiimpu in inchaangsei, 11 jarelna tihva amah in alamveia Judi jikcha in ajea seh a Jisu ta amilotpei.
Jisu in Raalchek a Jerusalem Luut
12 Akhuvar a buhdoon turel akthleng miitam in Jisu Jerusalem a thlengsa ta antheihpei. 13 Chunna anmah in tuum abaak anchoihche amahta intuukpinatu inthruh a, onga anson, “Hosanna! Akpu minga akthlengkha, Ringpu in doi amlan! Israel Kurungta Ringpu in doi amlan!” 14 Anjihkha atlungnatu, Jisu in samong aruulchunga chuungsa; 15 “Intrinohro, Jaion vaa asakumei; Anro, nang kurung in samong aruulchung chuunga thlengsa!” 16 Amah aroi in matsahva mah i romnoh ei; chuta Jisu ta paar amthrat inva, anmah in intheihsei mah chuvah mah naamte i amahturel injihkhata akuunga suuksa. 17 Chunna akthi Lajaras rusuunata amring laia akmuh mii naamte in mahchuta sakhi amilan. 18 Amah in daang atlohkhata antheih rella mii khalmo tam in amahta intuukpi seh ei. 19 Pharisi in khatleh khat insonsei. “Nannihva jakhatkho tlohcheknoh sachou; anve tukleiram in amahta aknu anjuihpei.”
Kriik Arouin Jisu ta Anjon
20 Ipek buhdoonna a mathruunnatu akseh mii jikcha ankaar a Kriik aroukho jaoei. 21 Anmah in Kalili suunga am Bethsaida na Philip kuunga sehsei, che amahta anson, “Lulok, kannih in Jisu ta kanmuhja.” 22 Philip in seh a Andriu ta ason; Andriu in Philip soh sehjoua Jisu kuunga ansonpei. 23 Jisu in ankuunga amsangei. “Miivaa Asa kupakha paar amthratnatu laikha thlengsa. 24 Ta tak a keiin nankuunga kisonchou, kehu ahuui in thaleichunga atlaakche athihnohmiil ngata amning; chuta mahkhan athuuche ringa moonga akrahtam inrahning. 25 Tunangkhat in amah achaanta arilvole maangtu tlasa, che tunangkhat in mah tukleiramna chaan ita intirhle ache amnoh a am veitu. 26 Tunangkhat in keita rou keitlohle, amah in kei kiknuta ajuihtu tla; che keiin kiamna a, kei roijuikho amtuei; tunangkhat in keita rou keitlohle, Pa in amahta injahtu.
Jisu in Athihsam Relna Trong
27 “Ipekva kei kikli i klah suuksang. Che khatloh akson ume? ‘Pa, mah pung innata keikalrota ksonche?’ Nganoh, mairella mah pungin kei thlengsang. 28 Pa o, nang nikmingta paar kamthrat.” Cheva ringram tingna hou inkhat thlengsa, “Keiin maita paarthra kamveipei, che keiin veikhatlakho paarthra kamveitu.” 29 Akomma angir miitam in mahchuta antheihpei che anson, mah chuvah khuu inrining. Aktlei in anson, “Ringroi inkhat in amahkuunga trongsa.” 30 Jisu in amsang, “Mah hou i nannih turella thleng, kei turelna noh. 31 Pekva tukleiramta pichaar tlohnatu laikha thlengsa, pekva tuktleiram chunga akpaalta amnom usa; 32 che keita thaleinata achunga keidomlaia, miinaamtekho keikuunga kdomtuei.” 33 Amah in maita asonnava keiin thitungta amromna. 34 Miitam in akuunga amisang, “Trongsuur nata kannih in kantheihva Khrista va ache amnoh a amtu. Khatloh a miivaa Asa kupata achungting adomtu nitihme? Miivaa Asa kupachu khome?” 35 Jisu in ankuunga asonei, “Akvaar in nannihsoh inruuia kak amtu. Akvaar in nannihsoh amlai sehloon tlohve, chunohleva inthim in nanichektu; inthim kaara akseh mii in ramma seh angme tihkha romnoh. 36 Nankaar a akvaar in a amlai, akvaarta malotve, chunna nannih in akvaarvaa asa nanveinatu, akvaarta malotve.”
Amlotnoh Miiei
Jisu in mahchuta asonche, anmah ankuungnata insengsa. 37 Anmah anmaikunga daang jikcha tlohslakho, anmah in malotnoh ei; 38 Mah anaamte i ringraan Isaiah in asonkhata atlungna turelna: “Akpu, tunang in inih itrongsonta amilotpeime, che tukuunga Akpu kutbaangta amdang peime?” 39 Alamchunna anmah in malot cheknoh ei. Alamva Isaiah in inlenga ason, 40 “Amah in anmah anmitta amchohpei che anmah amilung amtrangpei, chunna anmit in anmuhnoh natu, che anmah anril in anromnoh natu, che kikuunga inhei tuveia kamthrattuei.” 41 Mahtrongi Isaiah in asonpei, alamva amah paarthra i amuhrella trongsa. 42 Chuslakho mii aktam aktloh akhal inkho amahta anmilotpei, chuta anmah in Pharisi eita antrih in alamveia seenga phoong cheknoh ei, chunohleva anmahta sinakok nata aminomtuei; 43 alamva Ringpu in amdon khachunga mii in andomta ralthloia anmah in andit.
Jisu Atronga Pichaar Atloh
44 Che Jisu in arool inkaanga onga ason, “Tunangkhat in keita kamlotle, keita kamlotnoh chuta keita kamthlah amahta amlotpei. 45 Che tunangkhat in keita keimuhle keita kamthlah amahta amuhpei. 46 Keiin tukleiramma akvaar veia thlengsang, chunna tunangkhat keita kamlot mii in anthimma amnohtu. 47 Tunangkhat in keiin kisonta atheihche arilla sihnohle, amahta keiin pichaar tlohnohtung; alamva keiin tukleiramta pichaar tlohnatu thlengnoh ang chuta tukleiramta kalnatu thlengsang. 48 Keita keijanoh mahche keiin kisonta roulounohle amahkuunga pichaar am; mah chuvah keiin kisontrong khanna achenia amahtu pichaar veitu. 49 Alamva kei kichek kamneh a trongnoh ang; chuta keiin jangta kisontu che trongtung tihkha keita kamthlah Pa atak in trongthuun keikuunga kamlanang. 50 Che amah trongthuunva ache amnoh chaansa ta krom. Alamchunna, keiin kson trongi Pa in kikuunga asonta trongsang.”
Jisu in Aroi Ankehta Achaam
1 Ipek laalna buhdoon amaa a, Jisu in tukleiram nata Apa kuunga ansehnatu pungkha thlengsa ta aromlai, tukleiramma ak am amiieita arilvolsei, achena phah a anmahta arilvolsei. 2 Che anmah in buhdoon ansaaksuunga, Simon asa kupa Judas Iskariot arilsuunga Jisu ta ajurhnatu seitan in chuungsa. 3 Jisu Apa in anaamte akut a amlanpei khatkho Ringpu kuungnata thlengsang che Ringpu kuunga sehla usang ta aromin, 4 buhdoonnata inthoua, apuunta akomma asihche amah anaamta puunthreh ah inraaksa. 5 Cheva kuteenga tuii asuungche, aroi ankehta chaam amthronpei, che anraakna puunthreh a anuulei. 6 Amah in Simon Pitar kuunga thlengsa; che Pitar in akuunga ason, “Akpu, nangin kikehta nichaam samme?” 7 Jisu in akuunga amsang, “Keiin kitlohsam i ipek nangin romnohche, chuta aknua nirom umang.” 8 Pitar in akuunga ason, “Nangin kilehta chaam janohluungtu.” Jisu in akuunga amsang, “Keiin nikehta nakchaamnoh angleva nangva kei kiroinohche.” 9 Simon Pitar in akuunga ason, “Akpu kikeh khop noh chuta kikutleh kikangkho.” 10 Jisu in akuunga ason, “Tuii insilche mii khavah chaamnatu darkaar amnoh, akeh khopta inchaam uning, chuta amahvah anaamtea seengsa; che nannihva seengsachou, chuta nannaamte vanohchou.” 11 Alamva amahta akjuursam atak in arom; mah kharella amah in ason, “Nannihva nannaamte seengnohchou.” 12 Anmah ankehta achaamche, apuunta alohpei, che anbokna a veikhat inbok a anmahta asonei, “Keiin nankuunga kitlohthloukha nanromme? 13 Nannih in keita Lulok mahche Akpu ta nan ongang; nannih chimchou, alamva kei i amahtalsang. 14 Chunna keiin nannihtu Akpu mahche Lulokho veia, nankehta chaamsangle, nannihkho khatleh khat nankeh inchaamve. 15 Alamva keiin nankuunga kitloh kikhal khananga, nannihkho nantloh nankhalnatu athlou veia kammuhpeichou. 16 Keiin nankuunga atak a kisonchou, ‘Roijuih inkhat in amah Akpuchunga ralla liinnoh; che akseh inkho amahta amthlah chunga ralla liinnoh.’ 17 Mah kisonita nannih in romchoule, che maita tloh chouleva nannihva doiphah veisachou. 18 Keiin nannaam turel trongnoh ang, keiin kacharkha keiin krom; mah chuvah ringjihkhata atlungnatu, ‘Keitol aksaa amah in keita kandah a kichunga akeh athoongpei.’ 19 Mah i asuuknoh maa a, ipek nankuunga kisonpeichou, chunna mahchu asuuklaiva keisang tihkha nannih in keita namilotnatu mah thloui kitlohpei. 20 Keiin nankuunga atatak a kisonchou, ‘Keiin tukhat kamthlahmii khata ja a aklou mii in keita kanloh peiang; che nannih inta keita keilou choule keita kamthlahmii khata nanlohpei.’ ”
Jisu Anjurhsam in Atakta Matsah Aphoong
21 Jisu in nga tloh a atronglai, amah akli khalmo lahsa, che sakhi malanna ason “Keiin taktak a kisonchou, nankaarna inkhat in keita keijurhtung.” 22 Amah in tukuunga trongme anromnoh in, aroi in khatleh khat in ansei. 23 Jisu in aroi ankaarna arilvol inkhat in Jisu avonna inbeia am. 24 Chunna Simon Pitar in akuunga inruk a ason, “Amah in turella trongme, ruiro.” 25 Chunna Jisu avonna inbeia am mii in akuunga ason, “Akpu, mahmiichu tume?” 26 Jisu in amsang, “Keiin tol akir phuumma kamlansam mii khasa.” Nga tloh a amah in tol akirta aphuumche, Simon Iskariot asa kupa Juda ta amlanpei. 27 Tol akirta amlanche aknua, seitan in akuunga luutsa. Jisu in akuunga ason. “Nitlohsamchu inthademma tlohrosa.” 28 Mah i jarella amahkuunga asonme ta ipek tebor a anbok tukhat inkho romnoh ei. 29 Alamva Juda vah skhao aksih taningva. “Ujou hoongna turella inihtu darkaar am leiro,” chunohle anranriing kuunga malanrota Jisu in akuunga asonbrata arouin amidon. 30 Chunna tol akirta alohche, kak hanga amah in inthruhsa; mahchu khulouh na.
Akthar Trongthuun
31 Amah in anthruhnua, Jisu in ason, “Ipek miivaa Asa kupata paar amthratpei, che amah apaalla Ringpu ta paar amthratpei; 32 Che Ringpu vaa paarthrata amah apaalla madangle, chuleva Ringpu in miiva Asa kupata atak in kak hanga paar amthrattu 33 Andih naoeio, lai kaksuunga nannihsoh amjousang. Nannih in keita nanjontung; che Judi ankuunga keiin kisonnanga keiin ipek kisonchou, ‘Keiin kisehna samma nannih in thlengcheknoh uchou.’ 34 Akthar trongthuun khat keiin nankuunga kamlanchou, mah chuvah keiin nannihta kirilvol nangchoua, nannih khatleh khat ril involve 35 Nannih inta khatleh khat ril involchoule, miinaam in nannih i kei kiroi chouta naniromtu.”
Pitar in Andahsam Jisu in Matsah Aphoong
36 Simon Pitar in amahta ason, “Akpu, ram sehsam cheme?” Jisu in amsang, “Keiin kisehna samma nangin keijuih cheknoh uche, chuta aknua nakjuih umang ang.” 37 Pitar in amahkuunga ason, “Akpu, jarelna keiin ipektal nakjuih cheknoh tungme? Nangturel keichaan kamthlahtu.” 38 Jisu in amsang, “Keiturel nichaan namthlahchek ume? Keiin nikuunga atak a kisonche, nangin keita nandahna veithum aphahnohmiil, aarkhong in khak inkhuungnohtu.”
Jisu ning Pa Phahnatu Lam
1 “Nannih nanril malah a insuk inhal tlohnohve, Ringpu ta malotve, keikho kamlotve. 2 Kei Pa inna khum tam am; chunohleva, keiin ksonche uchou mah chuvah keiin nannih turella amunkhat amchaang sehtung? 3 Che keiin nannih turella seh a amunkhat machaang sangleva, keiin veikhat thlenglatung che kei kiamna a nannikho nan amnatu kloh uchou, chunna keiin kiamna a nannihkho am uchou. 4 Che keiin ramma seh angme nannih in lamkha nanrom.” 5 Thomas in akuunga ason, “Akpu, nang ramma sehsam cheme kannih in romnoh ung, che khatloh a kannih in lamchu kanromchek ume?” 6 Jisu in akuunga ason, “Lam khakho, akchim khakho, mahche akring khakho keisang; keinoh avah tukhat inkho Pa kuunga thlengnoh tuei. 7 Nannih inta keita keirom chouleva, kei Pakho nanrom uta; ipekva nannih in amahta nanrompei che nanmuhpei.” 8 Philip in amahkuunga ason, “Akpu, Pa ta kanimmuhro, che kannih in peltu ung.” 9 Jisu in akuunga ason, “Khalmo soot a keiin nannihsoh inruuijousang, che ipekphah keita keiroomnoh mangchoume? Keita keimuh miikhan Pakho amuhpei; nangin khatloh a Pa ta kammuhro ta nisonmangme? 10 Keiin Pa kuunga ammangche Pa in keikuunga amta malotnoh cheme? Keiin nankuunga kisontrongi kei kikrou kichek kamneh a trongnoh ang, chuta keikuunga ak am Pa in athlouta atloh. 11 Keiin Pa kunga che Pa in keikuunga amta kamlotro; chunohle kei kthloukhanna malotro. 12 Keiin atatak a nankuunga kisonchou, keita kamlot amah in keiin ktlohthoukha amah inkho atlohtu; che maichunga akliin thloukho amah inkho atlohtu, alamva keiin Pa kuunga sehsang. 13 Bilam nannih inta keiminga nihchoule mahkha keiin kitlohtu, chunna Apa in Asakuunga paar amthrattu; 14 bilam nannih inta keiminga nihchoule, mahkha keiin kitlohtu.”
Akseeng Li vaa Trongchet
15 “Nannih in keita keirilvol choule, kei kitrongthuun namijuhtu. 16 Che keiin Pa kuunga kingentu, che nannihsoh ache amnoh a amjounatu amah in aktleikhat Nanichaaktu amthlahtu. 17 Tukleiram inkho phah acheknoh akchim Li, mah chuvah tukleiram inva muhkho muhnoh mahche romkho romnoh, chuta nannihva amahta nanrom; alamva amah in nannihsoh inruuia amtu che nanrilsuunga amtu. 18 “Keiin nannihta sarahsa naoleeng nanga nanimah nohtung; keiin nankuunga thlengtung. 19 JTukleiram in lai kak aknua keita keimuhnoh uchou, chuta nannih in keita nanmuh latung; alamva keiin ringsang, nannihkho ring uchou. 20 Mahni chunna keiin Pa ninga ammang, che keiin nannih ninga ammangta nanromtu. 21 Kei trongthuunta akjuih amah in, keita aril kamvol ang; che keita keirilvol amahta Pa inkho arilvoltu, che keiin amahta kirilvolla kitaktalta kammuhtu.” 22 Judas (Iskariot khanoh) in akuunga ason, “Akpu, khatloh a kankuunga nitaktalta nammuhsam ungme, tukleiram avah mamunohtung nitihme?” 23 Jisu in akuunga amsang, “Mii khat inta keita keirilvolle, amah in kitrong amjuihtu, che Pa in amahta aril involtu, che inih in amahkuunga thlenga che amahsoh inih in itloh ikhaljoutu. 24 Tunangkhat in keita keirilvolnohle kitrongta majuihnohtu; che nannih in nantheih trongi kei ningnanoh chuta keita kamthlah Pa kuungna.” 25 “Keiin nannihsoh kiamjoulai mah i trongsang. 26 Chuta keiminga Pa in nannihta Nanichaak Li Akseeng amthlahtu, amah in nannihta anaamte nanimtheih a keiin kson anaamte ikho nanrilla nantheihnatu atlohtu. 27 Leh oi nankuunga kmahchou; kei leh oi nankuunga kamlanchou; keiin kamlanchou i tukleiram in nanimlan khanangnoh. Nannih nanrilla insuk inhal tlohnohve, che intrikho intrinohve. 28 Nankuunga ksonkha nannih in nantheihpei, ‘Keiin sehtung, mahche nankuunga thlenglatung.’ Nannih in keita keirilvol choule, keiin Pa kuunga kisehsam i nanroomthoktu, alamva Pa in keichunga liin. 29 Che anaamte i asuuknoh amaa a keiin nankuunga kisonpeichou, chunna mah i asuuklai nannih in namilotnatu. 30 Keiin nannihsoh tam trongnoh usang, alamva tukleiram akpuui in thlengsa. Amah in keichunga ralla atuui amnoh; 31 chuta Pa in kikuunga trongthuun amlankhata kitlohning; chunna Pa ta kirilvol tih a tukleiram in anromtu. Inthouvesa onnata sehrasei.”
Jisu in Akseeng Ngangli Khasa
1 “Keiva akchim ngangli khasang, che ngangli thakbil akpu vah Pa. 2 Akrah amnoh keikuunga ak am abaak anaam amah in atan, anrahsam abaakva ralla anraahnatu amseengche ralla akrah inrah. 3 Keiin nankuunga kitrongin nannihva seengsachou. 4 Keikuunga amve, che keiin nankuunga amtung. Ngangli in akuungsoh inkeihnoh a abaak akroua inrah cheknoh nanga, nannih in keisoh nan amnohmiil inrah cheknoh uchou. 5 Keiva ngangli khasang, nannihva abaak sachou. Tukhat in keininga amleh, che keiin amahninga am angle, amahvah tam inrahtu, alamva keinoh a nannih in jakhatkho tlohcheknoh uchou 6 Tukhat in keininga amnohle, abaak tanna ilonche chaar nanga chaar uchou; che akchaar abaak eita matlonna meikaara thlaak a mahchu kaangsei 7 Nannih inta keininga amchoule, che kei kitrongta nankuunga amle, nannih in nannihja nihve, che mahchu nankuunga veitu. 8 Nannih in tam nanrah khanna Pa ta paar amthratpei; chunna nannih in kei kiroi veisachou ta seenga namimuhpei 9 Pa in keita aril kamvol khananga, keiinkho nannihta kiril involchou; kei rilvolkhanna inpotnoh a amve. 10 Keiin Pa trongthuun eita ngaak a che amah arilvolkhan kiam nanga, nannih inkho kitrongthuun eita ngaakchoule, kei rilvolkhan ipotnoh a am uchou. 11 Kei kroomthok asipnatu, mah ita nankuunga ksonpeichou. 12 “Mah i kei trongthuunsa, chunna keiin nannihta kirilvol nanga nannihkho khatleh khat ril involve. 13 Tukhat in amah apai turella achaan amthlahchung, ralla akliin rilvol tukhat kuungkho amnoh. 14 Kei trongthuun ita majuih choule, nannih i kei kipaichou. 15 Maicheva keiin nannihta roijuihta naniongnoh usang, alamva roijuih in amah akpu in jangthlouta atlohme romnoh; chuta keiinva nannihta kipaita kiongpeichou, alamva Pa kuungnata ktheih anaam nankuunga kamrom peichou. 16 Nannih in keita keichar nohchou, chuta keiin nannihta kcharpeichou mahche thlou kithun peichou chunna nannih in seh a akrah nanrahnatu che akrah in nannihsoh amjounatu; chunna bilam Pa kuunga keiminga nichoule, mahchu amah in nankuunga nanimlantu. 17 Mah i nankuunga kei trongthuunsa, nannih khatleh khat ril involve.”
Intirhsa Tukleiram
18 “Tukleiram in nannihta nantirhle, nannihta nantirhnoh amaa a keita kantirhseita romve. 19 Nannih inta tukleiramna choule, tukleiram in amah ata veia nannihta nanirilvoltu; alamva nannihva tukleiram nanohchou; chuta keiin nannihta tukleiram nata kichar peichou, churella tukleiram in nannihta nantirh. 20 ‘Roijuih inkhat in amah akpuchunga liinnoh’ ta nankuunga kson trongkha intheihve, anmah in keita keichut eileh, nannihta nanichutpei; anmah in kitrongta majuih eileh, nantrongkho amijuihtu. 21 Chuta mah naamte i keirella nankuunga antlohtu, alamva keita kamthlah amahta anmah in romnoh ei. 22 Keiinta thlengnoh a che ankuunga trongnoh angleva, anmah anleh amnoh uta, chuta ipekva anmah anlehva ip janoh usa. 23 Keita kantirh amah in Pakho intirhsa. 24 Tukhat inkho atlohnoh thlouta keiin ankaar a tloh sangleva, anmah anleh amnoh uta; chuta ipekva anmah in Pa leh keita muhkho kanimuhpei, che kannihta kanintirkho kanintihrsei. 25 Mah i anmah trongsuura anjih trongkhat a atlungnatu relnasa, mahchuva, ‘Jakhat khonoh ah anmah in keita kantirhsei.’ 26 Chuta Pa kuungnata keiin nankuunga kamthlahsam Nanimjoom athlenglai, akchimva Li inkho Pa kuungnata athlenglai, amah in keirella sakhi amlannatu, 27 che nannih inkho sakhichou, alamva mathron lainata nannihva keisoh inruuijoume.”
1 “Nankeh narilnoh natu mah i keiin nankuunga ksonpeichou. 2 Anmah in nannihta sinakok nata nanimnomtu, nannihta nanithatmii tunangkhat in Ringpu kuunga mathruunnatu kannihta kanimlan peita amidon laikha atak a thlengsa. 3 Chunna mah i antlohtu alamva anmah in Pa khatkho keita keiroomnoh ei. 4 Anmah anpungchu athleng laia nannih in nantheihnatu mah i ksonpeichou.
Akseeng Li vaa Athlou
“Alamva keiin nannihsoh kiamjou rella, mahlaiva trongi nankuunga sonnoh ang. 5 Chuta pekva keita kamthlah amahkuunga seh usang; chuta nankaarna tukhat inkho keita ‘Ram sehsam cheme’ ta keiruinoh noh uchou. 6 Chulata mah i nankuunga kisonrella nannih nanril klah a sipsachou. 7 Chuslakho keiin akchimta nankuunga kisonchou: nannihtu athratna veinatu keiin seh ang, keiin sehnoh angleva, nannihta Nanimjoom thlengnohtu; chuta keiin seh a mahkha nankuunga kamthlahtu. 8 Che amah in athlenglaia, tukleiramvaa aleh, akchimlamseh khatkho pichaar rella sonna bahap amthlaktuei: 9 alamva aleh amrella, anmah in keita kamlotnohsei; 10 akchimlamseh amrella, alamva Pa kuunga kei seh usang che veikhat keita keimuhnoh usachou; 11 trongtloh latloh rella, alamva tukleiram akpu ita amilotpei. 12 “Keiin nankuunga kisontu tam am, chuta mahchu nannih relva tammal usa. 13 Akchim Li khan athleng laia, mah akchim khanna nannihta nanichingtu; alamva amah akrou akchek amneh khanna trongnohtu, chuta amah in atheihkhata trongtu, che akthlengsam anaamte turel nankuunga nanimromtu. 14 Amah in keita paar kamthrattung, alamva amah in kikuungnata alohche nankuunga nanimromtu. 15 Pa in asih anaammte keita; alamchunna kisonpeichou keikuungna anaam alohche nankuunga mahchu nanimromtu.”
Klah Knang Khatkho Roomthokna
16 “Kak amche aknua, nannih in keita keimuhnoh usachou; che veikhatla kak amche aknua nanmuh latung.” 17 Chunna arouin khatleh khat insonsei, “Kak amche aknua nannih in keita keimuhnoh usachou, che veikhatla kak amche aknua nanmuh latung; ‘Alamva Pa kuunga sehsang.’ Amah i jaknang trongta asonna meio?” 18 Anmah in anson, “ ‘Kak amche aknua’ atihna i jaknang trongta asonname? Jarelna trongme kannihva romnohsung.” 19 Amahkuunga anruija khata Jisu in aromma, ankuunga asonei, “Kak amche aknua, nannih in keita keimuhnoh usachou, che veikhatla kak amche aknua nanmuh latungta keiin nankuunga kisonrel nanroua inrui sachoume?” 20 Keiin nankuunga atatak a kisonchou, nannih in marhuuia trap uchou, chuta tukleiram inva aroomthoktu; nannih in klah knang nanphahtu, chuta nannih in nanlah nannangkha roomthokting in oltu. 21 Kumei in nao amuhtumma klah, alamva amah apungkha thlengsa; chuta amah in nao apoknua, tukleiramma mii khat poksa ta aroomthok rella amah in alah anangkha veikhat intheihnoh. 22 Mainanga ipek nannihkho klah knang nanphah, chuta keiin nannihsoh veikhat inmuhlatung che nanril aroomthoktu, chuche nanroomthok kha tukhat inkho nankuungnata nanilounohtu. 23 Mah akni achunna nannih in keikuunga jakhatkho keinihnoh usachou. Keiin nankuunga atatak a kisonchou, nannih in keiminga Pa kuunga nannihja nihchoule, mahchu nanimlantu. 24 Ipekphah nannih in keiminga jakhatkho keinihnoh mangchou; nihve, che nanphahtu, chunna nannih nanroomthok kha atlungnatu.
Tukleiramta Raalchek
25 “Mah i nankuunga ahoong trong veia ksonpeichou; nankuunga ahoongtronga trongnoh a, Pa relna seengbenga keiin nankuunga kisonnatu laikha thlengsa. 26 Mahni chunna nannih in keiminga nannihtu. Keiin nannih turel kipakuunga kinihtuta sonnoh ang; 27 alamva nannih in keita nanringvolang chuche kei i Ringpu kuungnata thlengsang ta namilot. 28 Kei Pa kuungnata thlengsang che tukleiram a thlenglasang; veikhatla tukleiram kamthlahche kipakuunga sehlatung.” 29 Amah aroi in anson, “Oi, ipekva ahoong trongnoh a indanga trong sache. 30 Bilam anaamte nangin niromkir che tunang inkhat in nangkuunga nakrui amnohta ipekva kannih in kanrompei; ohchunna nangi Ringpu nata thlengcheta kamilotpeiche.” 31 Jisu in ankuunga amsang, “Ipekva namilot peime?” 32 Nannih in inthek invorh uchouva, keirouta nanmahnatu laikha thlengusa, atak a, thlengkho thlengsa. 33 Nannih in kikuunga leh oi nanphahnatu, mah i nankuunga kisonchou. Tukleiramma klah knang nanphah chuta nanril matrangve; keiin tukleiramta kichekpei.
Jisu in Aroi Turel Angen
1 Jisu in mah ita atrongche, ringramta intouva anche ason, “Pa, lai i thlengsa; Nisa kupata paarhtra maveiro mahche Nisakupa inkho nangta paarthra amveinatu, 2 nangin miinaamtetu tuui namlannanga, ache amnoh chaankho akuunga malanro. 3 Mahche akchim Ringpu inkhatruta che nangin namthlah Jisu Khrista ta anmah in anromnatu, mah i ache amnoh chaan khasa. 4 Keiin kitlohnatu thloukha kikuunga namlan angkha kimchepeia, thaleichunga nangta paarthra kamliin peiche; 5 Che ipekva Pa, tukleiram seemnoh amaa a nangsoh inruuia kei paarthra louam khanna nangkuunga keita paarthra kamveiro. 6 “Tukleiram nata kikuunga namlanmii ankuunga keiin nikmingla kamdangpei; anmahchuva nangtasei, mahche nangin anmahta kikuunga namlan peiang, che anmah in nitrongta antak ah ansihpei. 7 Ipekva nangin bilam kikuunga namlan anaamte; nangtingna ta anmah in anrom; 8 alamva nangin kikuunga namlan trong eita anmah kuunga kamlanpei, chuche anmah in mahchuta louloua, keiin nikuungnata thlengsang ta anmah inkho chimma anrompei, mahche nangin keita namthlah angta anmah inkho amilotpei. 9 Keiin anmah turella kingen; keiin tukleiram turella ngennoh ang, chuta nangin kikuunga namlan anmah turelna, alamva anmahva nangnitasei, 10 Kei kita anaamte i nang nitasa, che nang nimii eikho kei ktasei, che keiin anmahninga paarthra kphahpei. 11 Che ipekva kei tukleiramma amnoh usang, chuta anmahva tukleiramma am umangei, che kei nikuunga thlengsang. Akseeng Pa, inih in khalek iveinanga anmahkho anveinatu, kikuunga namlan anmahta nangminga kem eiro. 12 Keiin anmahsoh kiamlaiva, kikuunga namlanche anmahta nang nikminga kikemmei; che keiin anmahta kikoollei, ringjih trongkha atlungnatu akmaangvaa asa kupa khanoh a, anmah tukhatkho maangnoh ei. 13 Chuta ipekva kei nikuunga thlengsang, che anmah antak a kei kroomthok mathlungnatu keiin tukleiramma trongsang. 14 Keiin nang nitrongta ankuunga kamlanei; che tukleiram in anmahta intirhsei alamva keiva tukleiram nanoh ang mah khananga, anmahkho tukleiram nanoh ei. 15 Keiin anmahta tukleiram nata lou eirota nikuunga ngennoh ang, chuta anmahta thranoh khannata kem eirota kingenche. 16 Keiva tukleiram nanoh ang mah khananga, anmahkho tukleiram nanoh ei. 17 Anmahta akchimma maseeng eiro; nang nitrongva akchim. 18 Keita tukleiramma namthlah angkha mah khananga keiinkho anmahta tukleiramma kamthlah ei. 19 Alamva anmahta akchimma inkatnatu, anmah rella kei kitakho inkatsang. 20 “Anmah relna khop keiin ngennoh ang, chuta anmah antrong apaalla keita kamlot anmah turelnakho kingen, 21 Mahche anmah annaam khalek anveinatu; nangin keita namthlah angta tukleiram in amilotnatu, Pa o, nangin keikuunga che keiin nikuunga kiam nanga, anmah inkho nikuunga an amnatu keiin kingenche. 22 Inih in khalek iveinanga anmah inkho khalek anveinatu, kikuunga namlan paarthrakha keiin anmah ankuunga kamlanpei, 23 Keiin anmah kuunga che nangin kikuunga niam anmah in mapungpha a khalek veinatu relna, chunna nangin keita namthlah peiang che niril namvol peiang, mah khananga anmahta nangin nirilvolsei ta tukleiram in aromnatu relna. 24 Pa, tukleiram mathronnoh amaanata nangin keita niril namvol anga, nangin kikuunga namlan paarthra khata kikuunga namlanmii ankuungakho amnatu, kei kiamna aphomma anmahkho keisoh amjou kikdit. 25 Akchim Pa, tukleiram invah nangta nakromnoh ei, chuta keiinva krompeiche; che nangin keita namthlah angta anmah inkho anrompei. 26 Nangin keita niril namvol angkha anmah ankuungakho amnatu, che keiin anmah ankuungakho kiamnatu, nang nikminga anmahta kamrompei ei, chela kamromla umangei.”
Jisu ta Ansuur
1 Jisu in trong ita asonche, aroisoh inruuia Kidron phai vanna sehsei, machunna am thakbil asuunga amah leh aroisoh luutsei. 2 Ipek Akpu ta akjuur Judas inkho amunkha arom; alamva Jisu in amunchunna injomma aroisoh antuukna. 3 Chunna Judas in raalmii leh akthloi thiimpu tingnata aklok ste che Pharisi eisoh mitton khatkho chemsoh inruuia mahchunna sehsei. 4 Chunna Jisu in mah naamte i atakchunga suuksam aromrella, anmaatonga avache asonei, “Tuta nanjonme?” 5 Anmah in anmisang, “Najareth na Jisu.” Jisu in ankuunga asonei, “Keitalsang.” Amahta akjuur Judas kho anmahsoh ngirjoua am. 6 Amah in ankuunga, “Keitalsang,” ta asonlai annunga inlenga tukleichunga inriilsei. 7 Amah in veikhat inlenga ankuunga aruiei, “Tuta nanjonme?” Che anmah in ansonpei, “Najareth na Jisu.” 8 Jisu in amsang, “Keisangta, nankuunga ksonpeichou; nannih in keita keijonchoule, miiei i inlengeiso.” 9 Mahtrongi atlungna turel amah in trongsa, “Keita kamlan ankaarna tukhatta sulla mamaangnohtung.” 10 Chunna Simon Pitar in achoih chemta akjuukche, akthloi thiimpu vaa aroi akchangtong amkurta apheklokpei. Naichi chuva akmingva Malkhus. 11 Jisu in Pitar kuunga ason, “Nang chemkha akhumsuungah thunro; Pa in keikuunga amlan kammi keiin innohtupot angme?”
Jisu ta Annas Amaikuunga Anthlen
12 Chunna raalmii ruul, che raalmii reijapuui mahche Judi vaa phrangki akthloi ei in Jisu ta ansuurpei che amikaangpei. 13 Mansahremma amahta Annas kuunga anthlen; alamva mahkum achunna amahvah akthloi thiimpu Kaiphas vaa apu. 14 Kaiphas in Judi naamte thitu ngut ah mii khat athih in thloia thratuta akson miikhare.
Pitar in Jisu ta Andahna
15 Simon Pitar leh aktlei aroi in Jisu aknu anjuih. Mah aroi chuvah akthloi thiimpusoh inrom, akthloi thiimpu innmuk phah a Jisu ta juih a luutsa, 16 chuta Pitar vah thong apaalla ngirra am. Chunna akthloi thiimpusoh inrom aktlei aroi inkhat in inthruh a, che thong akngaak kumeikuunga asonche Pitar ta asuunga amluutpi. 17 Thong akngaak rungaakhan Pitar ta ason, “Nangkho amah aroi ankaarna inkhatnoh cheme?” Amah in ason, “Keiva amahnoh ang.” 18 Ipek roijuih leh phrangki eiva khalmo ksikrella meihol meita luh a inhiilla ngirra antak malumma amsei. Pitar kho anmahsoh jouta mei oh a am.
Akthloi Thiimpu in Jisu ta Trong Arui
19 Chunna akthloi thiimpu in Jisu ta aroi eisoh miita amitheihrella trong arui. 20 Jisu in akuunga amsang, “Keiin tukleiramma indanglonga trongsang; lai amrel Judi in anboom anboomna sinakok jikcha a mahche mathruunna thlaamma kamtheih ei, keiin inruk akson amnohluung. 21 Jarelna nakruiangme? Keiin jangta kisonme aktheih anmah in anromtu, anmah kuunga ruieive.” 22 Mah ita asonsoh, akomma akngir phrangki ankaarna inkhat in Jisu amaipiia akbeengche ason “Oinanga nangin akthloi thiimpu kuunga namsangtu phume?” 23 Jisu in amsang, “Keiin chimnohta trong khonoh ang, chimnoh a sonnoh ang; chuta keiin chimma trong sangleva, jarelna nakbeeng angme?” 24 Chunna Akpu ta khit a Annas in thiimpu aklok Kaiphas kuunga amthlahpei.
Veikhatla Pitar in Jisu ta Andahna
25 Ipek Simon Pitar in ngirra meiholmei oh a am. Amahkuunga anson, “Nangkho mahmii aroi ankaarnanoh cheme?” Mahchuta indah a ason, “Keiva amahnoh ang.” 26 Pitar in amkur apheklok roijuihvaa unao khat in arui, “Nangkho amahsoh inruuia thakbilla sehjoua kimuhmii khanohcheme?” 27 Mahchuta Pitar in veikhatla indahlasa, mah laitalla aarkhong inkhuungsa.
Jisu ta Pilat Kuunga Anthlen
28 Chunna anmah in Jisu ta Kaiphas kuungnata Pilat akoolla anthlenpei. Mahchu juktiingpina. Anmah in laalna buhdoon saak iinna antakta mabuurnoh natu anmahvah koolla luutnoh ei. 29 Chunna Pilat in inthruh a ankuunga asonei, “Mahmii i jaknang alaal amrelna nanthlenpeime?” 30 Amahkuunga amisang, “Mahmii in thranoh atloh amnohleh, nangkuunga thlennoh tu ung.” 31 Pilat in ankuunga asonei, “Nantaksaak in amahta phurh a, nannih trongsuur nujuih a pichaar tlohve.” Judi in amahkuunga anson “Tunangmii khatta that aja tih a kankuunga rai amnoh.” 32 Mah i Jisu in jaknang hoonga thi umeta ason trongkhata atlungnatu suuksa. 33 Chunna Pilat in amah koolla veikhat aluutche Jisu ta onga arui, “Nangi Judiei kurung cheme?” 34 Jisu in amsang, “Mah i nang niril suungnata nisonme, chunoh a aktlei in keirelna nikuunga ansonta trongcheme?” 35 Pilat in amsang, “Kei Judi angme? Nang jaatboom leh akthloi thiimpu in nangta keikuunga kanpek ang. Nangin jangnitloh relname?” 36 Jisu in amsang, “Kei kurung ramva tukleiram nanoh; kei kurung rammi tukleiram naleh, keita Judi ankut a kamlannoh tuei, kei roijuih in raal antlohpi tuei; chuta kei kurung rammi tukleiram nanoh.” 37 Pilat in akuunga ason, “Chule nangvah kurung cheme?” Jisu in amsang, “Keiva kurungang tih a nangin nisonpei. Akchimkhata sakhi kamlannatu mairelna keiin poksang, Akchim akveimii in kei kihou antheih.” 38 Pilat in akuunga ason, “Akchimmi khome?”
Jisu Thatnatu Rai Amithlak
Mah ita asonche, Judi ankuunga veikhat inthruh a asonei, “Keiin amahchunga jakhat amaraal tuuknoh ang khame. 39 Chuta laalna buhdoon aknia nannih turella keiin miikhatta mathlahnatu nannih kastam am; Judiei kurungi nannih turella keiin mathlah nanditme?” 40 Anmah in ong onga amisang, “Mahmii inoh chuta Barabbas ta” – Ipek Barabbas vah inrumii.
1 Mahlai Pilat in Jisu ta alohche khalmo amhaipei. 2 Che raalmii in kuling lukhum ansakche, akanga amikhumpei, che kdukpuun amisilh; 3 amahkuunga thlenga anson, “Judiei kurungo, kamithruunche!” Mahche amaia anbeeng. 4 Mahchun Pilat in veikhat apaal inthruh a ankuunga asonei, “Anve, mahmii in chimnoh thlou atloh jakhatkho tuuknoh ang tih a nanromnatu, nankuunga kithlenchou.” 5 Chunna Jisu in kuling lukhum khumma che kdukpuun silh a inthruhsa. Pilat in ankuunga asonei, “Anve, miikha onna amsa!” 6 Akthloi thiimpu leh phrangkiei in Jisu ta anmuh in ongsei, “Amahta mathluve, amahta mathluve!” Pilat in ankuunga asonei, “Mahmii i nannihtal in phurh a mathluve, alamva keiinva achunga jakhatkho amraal tuuknoh ang.” 7 Judi in amahkuunga amisang, “Kannih kantrongsuur doonung, che trongsuur aknujuih a mahmii i madaiphu, alamva amah atak akroua Ringpu Asa kupa vei.” 8 Pilat in mahchuta atheih in thloiralla intrisa; 9 Amah koolsuunga veikhat aluutche Jisu ta arui, “Nangi ramna cheme?” chuta Jisu in akuunga masangnohsa. 10 Chunna Pilat in akuunga ason, “Nangin kikuunga trongnoh ucheme? Nangta namthlahtang chunohle namthlahnohtang kikuunga tuui amta romnoh cheme?” 11 Jisu in akuunga amsang, “Nangkuunga achungnata tuui namlannoh leva, nangvah kichunga tuui jakhatkho amnoh uche; mairella keita nikuunga amlan miikhava ralla akliin aleh am.” 12 Chunnata Pilat in Jisu ta mathlahnatu insuulsa, alamva Judi in ongsei, “Nangin mahmii ita mathlahchele, nangva Keisaar aruulnohche. Nga tloh a Keisaar chunga trongsei.” 13 Mahtrong chuta Pilat in atheih a, Jisu ta apaalla amthruhche Intlaap a inthah lung Hibru tronga Kabbatha antih phompii ah inboksa. 14 Pekva mahchu Laalna Buhdoon inchaangna aknisa; mahchu pung kurukvak tlasa. Amah in Judi ankuunga asonei, “Anve nannih kurung!” 15 Anmah in ongsei, “Mahmiikha phurhvesa, mahmiikha phurhvesa, amahta mathluve!” Pilat in ankuunga asonei, “Nannih kurungta keiin kimthlu ume?” Akthloi thiimpu in amisang, “Kannihvah Keisaar noh a kurung aktlei amnoh.” 16 Machunna amahta amithlunatu ankuunga amsilei.
Jisu ta Amithlu
17 Chunna anmah in Jisu ta anlohpei, amah atak thingkharhta phurh a, Hibru tronga Kolkotha arthava Lukang (Latin tronga Kalvari) amunta thrulh a sehsei. 18 Mahmun chunna, Jisu soh inruuia aktlei mii innihta veichanga, che Jisu vah alaia, thingkharh a anjampei. 19 Pilat inkho mingkhat majih a thingkharh chunga ataar, mah chuvah ngata anpa, “Najareth vaa Jisu, Judi vaa Kurung.” 20 Mah anjih i Judi mii aktam in anpaapei, alamva Jisu ta thingkharh a amithlunatu akut akeh thirkit a hemma anjamna amunvah khuuboomsoh innai, chuche anjihva Hibru, Latin che Kriik tronga amijih. 21 Judi vaa akthloi thiimpu in Pilat kuung anson, “Judi vaa kurung,” tih a majihnohro chuta, “Mahmii in ason, Keivah Judiei kurungang.” 22 Pilat in amsang, “Keiin kimjihkha kimjihchepei.” 23 Raalmii in Jisu amithlulai anmah in apuunreita anlohche manli amisuukpei; inkhatrel anchangnatu, Jisu alungluutkho anloh. Amah alungluutva anthruina amnoh puun. 24 Chunna anmah in khatleh khat insonsei, “Mah i inih in threlnohrei, chuta irasi anna tunang in changume anrei.” Mah i ringjih in asonkha atlungnasa, “Anmah in kei kpuunreita anmahkhop in insemsei, che kei kpuunreita anmah in rasi an anpei.” 25 Churella raalmii in thloukha antlohpei. Mahkaar a Jisu in a amna thingkharh akomma ngirra ak am eiva amah anu, amah anuvaa anao, Klopas akmei Meri, che Makadalini ngirra ammei. 26 Jisu in anuleh arilvol aroi in akomma ngirra am amuh a anukuung ason, “Kumeio, nisa kupata anro.” 27 Chela amah in aroikuunga ason, “Anro, ninu onna am.” Mah pungchunna aroi in amahta innting anlengpipei.
Jisu in Thi
28 Maicheva Jisu in thlou anaamte i chekirsa ta arompeia (ringjih in asonkha atlungnatu) “Kei kituii raalsa.” 29 Mah khanna akthuur tuii sip beelkhat mangirh a ansih; chunna anmah in akthuur tuii sip hisop sung apaara putsi jemma ankhitche amah abaoa anthun. 30 Jisu in akthuur tuiita alohche ason, “Mah i chesa.” Che amah akang makhup a akli amthlahpei.
Jisu Apangneem Kusei Ankhoh
31 Alamva Inchaangnatu akni taningva, Judi in aruungta ingeihnia thingkharh chunga sih dinoh ei (alamva inngeihni i khalmo injah a ngaakna akni), churella thingkharh a amithlu miita ankeh thliknatu che anruungta mathrumnatu anmah in Pilat kuunga annih. 32 Chunna raalmii in thlenga matsahnakha akeh anthlikpei, che inkhatkhasoh jouta thingkharh a anbaangjoupei; 33 chuta anmah in Jisu kuung anthlenglai amahvah louthichesa, chunna amah akehva thliknohsei. 34 Chuta raalmii ankaarna inkhat in amah apanga kusei asun, che kak hanga thii leh tuii inthruhsa. 35 Mahchuta akmuh mii in sakhi veisei–amah sakhi i chim, che akchimta kison tiha atak in arom–chunna nannih inkho namilotnatu. 36 “Amah aruhva khalekho tliknohtu” ta ringjih in asonkha atlungnatu mah i suuksei. 37 Che veikhatla ringjih in aktlei trongjih a ason, “Amah in kusei ankhoh Akpu ta an antu.”
Jisu ta Anphuum
38 Maiche aknua Jisu aroi akvei Arimathia na Joseph in Jisu aruung amthrumnatu Pilat kuunga anihpei, chuta mah i Judi eita trihrella amah in inruk a anih; che mahchu Pilat in ajapei. 39 Chuche khulou khat a Jisu kuunga matsahrem a thlenga antuukpi Nikodimas in, Joseph soh inruuia, moroi amrimtuisoh inpool ser sopthumvak thlenna thlengsei. 40 Nga tloh a anmah in Jisu aruungta louva, Judiei annono mii phuumna ah anloutloh amrimtui thaosoh inruuia annaal bulapuunna amahta antuumpei. 41 Pek Jisu ta thingkharh ah amithluna amunkhanna thakbilkhat am, mah thakbil chunna tukhatkho anlouphuum nohna rusuun khat am. 42 Alamchunna Judi ei Inchaangni asuukrelna, innai rusuun khanna, anmah in Jisu ta ohkhanna ansihpei.
Aruuk Rusuun
1 Ipek kouhtu matsah akni anthim laia inranga Makadalini Meri in rusuunna thlengsa, ni inthimmang, che rusuun akhaar inhoonga am amuhpei. 2 Chunna amah in tlaanna, Simon Pitar mahche Jisu in arilvol aktlei aroi ankuunga seh a ansonei, “Anmah in Akpu ta rusuunnata anlohche ramma ansih peitame kannih in romnohsung.” 3 Chunna Pitar in aktlei aroisoh inthruh a anmah in rusuuntonga sehsei. 4 Anmah annih a tlaanjousei, chuta aktlei aroi in Pitar ta aralche matsah a rusuunna tlungsa; 5 che inkhup a ahunbirh in, amah in bulapuun am amuh, chuta asuungva luutnoh. 6 Cheva Simon Pitar thlenga, amah aknu juihveia rusuun suunga luutsa; anmah in bulapuun am anmuhpei, 7 che amah akang anthlomnava bulapuun soh amjounoh chuta ajea inlumma am. 8 Che matsah a rusuun akphah aktlei aroi in asuunga luutsa, che amuhpeia amlotpei; 9 alamva amah in ringtu ta Ringjih in asonkha, anmah in romnoh mangei. 10 Cheva aroi in innting inlengsei.
Jisu Atakta Meri Makadalini Kuunga Ammuh
11 Chuta Meri vah rusuun apaalla ngirra trapsa, che amah in trap malamma rusuun asuunga inkhup a a an; 12 chunna amah in inngoua inliing ringroi innih, Jisu aruung antolhna a inkhat in aluuthlunga che inkhat in akehthluunna inbok a am amuh ei. 13 Anmah in akuunga anson, “Kumei nang jarella trapcheme?” Amah in ankuunga asonei, “Alamva anmah in kei Akpu ta anlohpei, che amahta ramma ansihpeime romnohsang.” 14 Mahchuta asonche anhei in, Jisu ngirra am amuhpei, chuta amah invah mahkha Jisu sa tih a romnohsa. 15 Jisu in akuunga ason, “Kumei, jarella trapcheme? Tuta nijonme?” Amahta thakbil akngaak mii meta akuunga ason “Lulok, nangin amahta loucheleva keisonro, ramma nisihpeime, keiin amahta loutang.” 16 Jisu in akuunga ason, “Meri.” Amah in inheia akuunga Hibru tronga ason, “Rabboni!” (arthava Lulok). 17 Jisu in akuunga ason, “Keita kamtuhnohro, alamva Pa kuunga kalnoh ma ang; chuta kei kiuh kinao ankuunga seh a soneiro, keiin Pa kuunga khatkho nannih nan Pa kuunga, kei Ringpu kuunga khatkho nannih Ringpu kuunga kalsam ma ang.” 18 Chunna Meri Makadalini in seh a aroi ankuunga asonei, “Keiin Akpu ta kimuhpei” che amah in Meri Makadalili kuunga ason naamte anmah ankuunga atongpei.
Jisu in Atakta Aroikuunga Ammuh ei
19 Kouhtu matsahrem akni khulouhram a, Judi ta antrih rella, aroi in an amna innkhaarta ankhaarpei, Jisu in thlenga ankaar a ngirra anmahta asonei, “Leh oi in nannihta nanimruui veiso.” 20 Mahchu asonche, amah akut innihleh apangneemkho ammuh ei. Cheva aroi in Akpu ta anmuh in anroomthoksei. 21 Jisu in veikhat inlenga ankuunga asonei, “Leh oi in nannihta nanimruui veiso. Pa in keita kamthlah nanga, keiinkho nannihta kamthlahpeichou.” 22 Mahchuta asonche ankuunga akphuk seemma asonei, “Akseeng Li phahve. 23 Nannih in tunangkhatvaa alehta ipchoule, anmah anlehta in ipsei; anmahta nannih in ipnohchoule, anmah anlehta in ipnohsei.”
Jisu Khatkho Thomas
24 Ipek (pheipok takho an ong) Thomas somleinih ankaarna inkhatvah Jisu in athlenglaia anmahsoh louamnoh. 25 Chunna aktlei aroi in akuunga anson, “Kannihva Akpu kanmuhpei.” Chuta ankuunga ason, “Keiin amah akut a thirkit amun mahche thirkit akhur a kikut majungin kipuurnohmiil, keiva malotnohtung.” 26 Nirit aknua, amah aroi Thomas kho ankaar a injaosa. Inn ankhaar chuta Jisu in athlengche innkaar a ngirra asonei. “Nankuunga leh oi amso.” 27 Chunna Thomas kuung ason, “Nikut majungkha onna sihro che kikut i anro; nikutkha jamma kpangneemma puurro, malotnoh tlohnohro, chuta malotro.” 28 Thomas in akuunga amsang, “kei Akpu mahche kei Ringpu!” 29 Jisu in akuunga ason, “Nangin keita namlot angi keita nakmuhrelna angme? Muhnoh a amlot mii eikha doiphahsei.”
Mah Nirik ivaa Amuveiva
30 Ipek mah nirik in anjihnoh aktlei daang khalmo tam Jisu in anmaikunga atlohpei. 31 Chuta Jisu vaa Ringpu Asa kupa Khrista sa ta namilotnatu, che malot a nannih in amah akminga ring nanphahnantu amah i injihsei.
Jisu Atakta Aroi Sirih Ankuunga Ammuh ei
1 Maiche aknua Tiberias tuiiboomma Jisu in atakta veikhatla aroi ankuunga anmuh ei; amah ataksaakta oinanga ammuh ei. 2 Simon Pitar, pheipokta an ong Thomas, Kalili vaa Kana na Nathanael, Jebidi asa kupaei, che aktlei aroi innihsoh amjouei. 3 Simon Pitar in ankuunga asonei, “Kei ngaman sehtang.” Amahta anson, “Kannihkho nangsoh inruuia sehtu ung.” Anmah in inthruhseia mulisuunga chuungsei; chuta mah khulouhthlang chunna anmah in jakhatkho mannohsei. 4 Ram didata avaar in, Jisu in tuiikomma ngirra amsa; mahchu aroi inva Jisu sa ta romnohsei. 5 Jisu in ankuunga asonei, “Naoeio, nga injaochoume?” Akuunga amisang, “Injaonoh ung.” 6 Amah in ankuunga asonei, “Torokha muli nansihna akchangtonga denve, che nannih in nga ste nanmantu.” Chunna anmah in andenpei, cheva ipekva nga atammal inva, anmah in kai cheknohsei. 7 Jisu in arilvol aroi Pitar khata ason, “Amah i Akpu taksa!” Mahchuta Simon Pitar in atheih inva puunrei aveipei, amah in puunrei silhnoh a thloutloh a am cheva tuiiboom suunga choonga luutsa. 8 Chuta aktlei aroi in nga sip torota kaia muli chuunga thlengsei, alamva anmah in tuiipaal nata khalmo inlanoh ei, chuta kehkaar reija vakning. 9 Anmah in tuiipaal anphahsoh, meiholmei anmuhpei, che meichunga machaar a ansih ngaleh tolkho anmuhpei. 10 Jisu in asonei, “Nannih in nanmannga ste heive.” 11 Chunna Simon Pitar in muli amnatinga avaache nga aksip torota apaalting akaipei, anmahva mii reija sopngalei inthummei; mahchu ngatam slakho, torova inthritnoh. 12 Jisu in ankuunga asonei, “Thlenga saakphu saavesa.” Ipekva amah i Akpu sa ta anrompeia, “Nangi tucheme” ta tukhat inkho ruinohsei 13 Jisu in thlenga tolta alohche ankuunga ngasoh inruuia amlannei. 14 Ipek mah i Jisu in thinata aringche nua aroi ankuunga amunna veithum tihpisa.
Jisu Khatkho Pitar
15 Anmah in saakphu ansaakche nua, Jisu in Simon Pitar kuunga ason, “John asa kupa Simon, anmah chunga ralla nangin keita niril namvol angme?” Amah in akuunga ason, “Oi Akpu; Keiin nangta kirilvolche i nangin nakromang.” Amah in akuunga ason, “Kei sadamta masaak ma iin eiro.” 16 Veinih tihpi amah in akuunga ason, “John asa kupa Simon, Nangin keita niril namvol angme?” Amah in akuunga ason, “Oi, Akpu; keiin nangta kirilvolche i nangin nakromang.” Amah in akuunga ason, “Kei sadamta kem eiro.” 17 Veithum tihpila akuunga ason “John asa kupa Simon, nangin keita niril namvol angme?” “Nangin keita niril namvol angme?” ta veithumkhek amah in akuunga ason inva Pitar marhuuisa. “Akpu, nangin bilam niromkir; keiin nangta kiril involche i nangin nirom.” Jisu in akuunga ason, “Kei sadamta masaak ma iin eiro. 18 Taktak a keiin nikuunga kisonche, nangin nao niveilaiva, nikroua ninaam raak a che nangin nisehjana a sehche; chuta nangin nichang laiva, nangin nikut nijamtu, chuche aktlei in ninaam akraaktu che nangin niseh nandahna a nakphurhtu.” 19 (Maita Jisu in asonnava, Pitar i khatloh hoonga thitume che Ringpu ta khatloh hoonga paar amthrat ume amtheihna.) Mahtrong chuta asonche akuunga ason, “Kiknu keijuihro.”
Jisu Khatkho Aktlei Aroi
20 Pitar in anhei in che Jisu in arilvol aroi in aknu anjuihta amuhpei, buhdoon laia amah alukhe a innaia antolh in akuunga ason, “Akpu, nangta nandahsamchu tume?” 21 Pitar in amahta amuh a, amah in Jisu ta ason, “Akpu, mahmii iva khavei ume?” 22 Jisu in akuunga ason, “Mah i keiin kimdon veileva keiin kithlengnohmiil keininga amtu, mahchunang ningva khavei uche? Kei kiknu keijuihro!” 23 Amah aroi i thinoh uta tih a insonkha unao ankaar a inthangsa; Jisu inva akuunga amahta thinohtu talva tihnoh, chuta, “Mah i keiin kimdon veileva keiin kithlengnohmiil mahchu keininga amtu, mahchunang miiningva khavei ume?” 24 Amah aroichuva aksuuk thlourel sakhi amlan khare, che amah in aksuuk thlourel amjihpei; inih in irom mah chuvah amah ringtukna thamin i chim.
Achena
25 Chuta aktlei aksuukthlou jikcha Jisu in atloh khalmo tam am; bilam naamte tanga majih maeva, tukleiram a am nirik naamtekho mahchu imjih in bangnohtu ta keiin kamdon.