Yohani Zuluba Osangtajung
1 Tetenzuk nung O liasu, aser O Tsungrem den liasu, aser O Tsungrem liasu. 2 Pa tetenzuk nung Tsungrem den liasu. Kechiasarena pa ajanga adok; 3 aser kechisa yangluogo pa meteni kecha meyanglu. 4 Pa dak takum liasu, aser takumji meimchir tesangwa liasu. 5 Aser tesangwa jagi ammang nung sangwar; saka ammangi aji mesepdaktsu.
6 Tsungrem nungi yokba nisung ka, tenung agi Yohan, aru. 7 Pa ajanga ajaki amangtsu asoshi, tesangwa indang kuli agutsutsu pa kuli asutsu aru. 8 Iba nisung tesangwaji masu; tesangwaji atema kuli agutsutsu pa aru. 9 Chichiba tesangwa, shibai ajak sangwatsur, pa alimai aruya liasu. 10 Pa alima nung liasu, aser alimaji pa ajanga adok, saka alimai pa meshitet. 11 Pa pei nubur dangi aru saka pei meyongi pa magizuk. 12 Saka kwikati pa agizuk, oda shiri pa tenung nung amang, parnok nem Tsungrem chirtem akumtsu pai ain agutsu; 13 parnok azu nungi maso, shii mulungba agi maso, nisungi mulungba agi maso, saka Tsungrem nungi aso.
14 Aser Oji shi akum aser taochi aser ochi agi sunga asenok rongnung ali; Tebu ajaso Chir sentsuwangshi kechi, iba sentsuwangshiji onoki angu. 15 Yohani pa atema kuli agutsu, aser ayimtena ashi, Shiba ku sulen arur pa ku dang tama akum, kechiaser pa ku dang tama liasu, ta shiba indang ni ashi ibaji pa. 16 Kechiaser pa teperiba nungi asenok ajaki shilem lemzuk, aser temoatsu madak temoatsu angu. 17 Kechiyong ozungji Mosa ajanga agutsu; saka taochi aser ochiba Yisu Khrista ajanga aru. 18 Nisung shingaia Tsungrem kechasudanga munguka; saka Tebu tuku nung aliba, ajaso Chiri pa jungkai adokdaktsuogo.
19 Kodang Yihuda nungen Yirusalem nungi pa dangi Na shiba? ta pa dang asungdangtsu putirtem aser Levitem yok, Yohani agutsuba kuli o ya: 20 pai nangzuk, aser menangzuki mali; aser pai nangzuka ashi, Khristaji ni masu. 21 Aser parnoki pa dang asungdang, Ajangia na Shiba? Na Elia asu? Aser pai ashi, Ni masu. Aihkarji na asu? Aser pai langzu, Nunga. 22 Anungji parnoki pa dang ashi, Onok tenyartem dang onoki langzutettsusa ajangla na shiba? Nai ne indang kechi ashitsu? 23 Pai ashi, Isaia ainkari ashiba ama, Kibuba lungkung metongmetonga yangluang, ta arem nung kati ayimtenba olaji ni.
24 Parnok Farisitem nungi yok. 25 Idangji parnoki pa dang asungdanga ashi, Na Khristaa masu, Eliaa masu, ainkarjia masu sura, ajangla nai kechiba baptitsur? 26 Yohani parnok dang langzua ashi, Ni tzu nung baptitsur, saka nisung ka shiba nenoki meshiteter, 27 oda pa ku sulen aruba, shiba tsungsem lisu salatsu ni tetemsu masu, pa nenok rongnung noktaka lir. 28 Yohani baptija alidak, Yordan kelen Bethani nung itemi adok.
29 Asungji pa dangi Yisu aruba ngua pai ashi, Alima temenen bener aoba, Tsungrem San chanu ajiang! 30 Ku sulen nisung ka arur shiba ku dang tama akum, kechiaser pa ku dang tama liasu, ta shiba indang ni ashi ibaji pa. 31 Ni pa meshitet; saka pa Israel madang jungkai adokdaktsutsu asoshi, ni tzu nung baptija aru. 32 Aser Yohani kuli aguja ashi, Tanela posu ama kotak nungi aluya ni nguogo, aser aji pa madak ali. 33 Ni pa meshitet; saka shibai tzu nung baptitsu ni yok, pai ku dang ashi, Shiba madak Tanela aluya aser lia ngudir, pai Tanela Temeshi nung baptitsur. 34 Ibai Tsungrem Chir ta ni nguogo aser kuli agutsuogo.
35 Ano asungji Yohan pei nutsung ana den noktaka liasu; 36 aser Yisu aodang Yohani pa reprang, aser ashi, Tsungrem San Chanu ajiang ! 37 Aser nutsung ana jagi pai ashibaji angashi, aser Yisu sulen anitak. 38 Aser Yisui tejak meyipa, pamok pa sulen anitakba ngua, parnok dang ashi, Nenoki kechi bushir? Aser parnoki pa dang ashi, Rabi (tetezu agi, Tesayur), na kechi nung alir? 39 Pai parnok dang ashi, Arung, aser nenoki angutsu. Anungji parnok aru, aser pa kechi nung ali aji angu; aser panuji parnoki pa den ali; aji pezu baji meta liasu. 40 Yohani jembiba angashir, Yisu sulen anitakba ana rongnungji kabo, Simon Peter tenu, Andria liasu. 41 Pal tamasa tedi Simon ngua, pa dang ashi, Onoki Mesia (tetezu agi, Khrista) nguogo, 42 Pai pa Yisu dangi anir aru. Yisui pa repranga ashi, Na Yona chir Simon. Ne nung Kefa (tetezu agi, Peter) ta ajatsu.
43 Asungji Yisu Galili onea liasu. Aser pai Filip angur, aser pai pa dang ashi, Ku sulen anitakang. 44 Tang Filipa Andria aser Peter aliba Bethsaida yimer liasu. 45 Filipi Nathanel angur, aser pa dang ashi, Yosef chir, Nazaret nunger Yisu, shiba indang Mosai ozung nung, aser ainkartemi zulu onoki pa nguogo. 46 Aser Nathaneli pa dang ashi, Nazaret nungi langka tajung adoktettsu ama? Filipi pa dang ashi, Arua ajiang. 47 Yisui Nathanel pa dangi aruba ngua, pa indang ashi, Tekelak maliba, chichiba Israel nunger ka ajiang! 48 Nathaneli pa dang ashi, Nai kechi koda ni metet? Yisui langzua pa dang ashi, Filipi na majadang, na mungu dong kubok alidang, ni na angu. 49 Nathaneli pa dang langzua ashi, Tesayur, na Tsungrem Chir; na Israel nunger Chuba. 50 Yisui langzua pa dang ashi, Ni na mungu dong kubok angu ta ni ne dang ashi nung, nai amanger asu? Item dangi tuluba mapa nai angutsu. 51 Aser pai pa dang ashi, Atangji, zungpung, ni nenok dang shidi, Aming lapoker Tsungrem tenyartem nisung Chir madak atuba aser aluba nenoki angutsu.
1 Aser asemnu buba Galil nung aliba Kana yimtak kiyir benjong ka liasu, aser Yisu tetzu yangji liasu; 2 aser kiyir benjong jagi Yisu aser pa nutsungtema aja. 3 Aser kodang yi agima, Yisu tetzui pa dang ashi, Parnok yi maka.
4 Aser Yisili la dang ashi, Tetzur, ni ne den inyaktsu kechi aka? Ku mapang ans matong. 5 Pa tetzui kilirtem dang ashi, Kechisa pai nenok dang shidir, aji inyakang. 6 Idakji Yihuda nunger temeshitetba yimsu agi, ka ka nung temok ana asem aiba, lung agi yangluba tzu mori trok amentaka liasu. 7 Yisui parnok dang ashi, Tzu moriji tzu agi sunga enokang. Anungji parnoki itemji tebang medema enok. 8 Aser pai parnok dang ashi. Tang tatetang, aser benjong kettangbuba dangi bener oang Aser parnoki aji bener ao. 9 Aser kodang benjong kettangbubai tang tzu agi akumba yiji menakdang, aser (kilir shiri tzuji tatet parnoki dang metet ashi) aji kong nungi ar memetet. 10 pai ki ayimbaji aja, aser pa dang ashi, Nisung ajaki tamasa yi tajungji angamir; aser nisungi aika jemer kelenang, tamajungbaji anganur: nai tang tonga yi taJungji ayu. 11 Pa temaitsu mapatem tenzukba ya Yisui Galil nung aliba Kana yimtak inyak, aser pa sentsuwangshi Jungkai adokdaktsu, aser pa nutsungtemi pa dak amang.
12 Ibakutsu pa, aser tetzu, aser tenu nunger, aser pa nutsungtem Kapernaunu alu: idakji parnoki ainu mali.
13 Tang Yihuda nunger Kumtettsu benjong anasa liasu, aser Yisu Yirusalemi atu. 14 Aser pai tenla kidang nashi, san aser posu ayokertem, aser sen melenertem mena angu; 15 aser pai tazuktsu lisu yanglu, aser san o nashi tena ajak tenla ki nungi aridok; aser pai sen melenertem sen toktoktsu, aser pamok langbang mekeptoktsu, 16 aser posu ayokertem dang pai ashi, Itemi yangnungi bener oang; ku Bu ki shishi ki tekumdaktsu. 17 Ne ki asoshi ni jangraba agi asungtsu, ta zulua aliba pa nutsungtemi bilemtet. 18 Anungji Yuda nungeri langzua pa dang ashi. Item mapa inyakba asoshi, nai onok dang kechi temaitsu sayur? 19 Yisui langzua parnok dang ashi, Iba tenia ki raksaang, aser asemnu ni ya mesotsu. 20 Anungji Yihuda nungeri ashi, Iba tenla ki kum lirirok yanglua liasu, aser nai aji asemnu nung mesotsu ama? 21 Saka pai pei mang tenla ki indang jembi. 22 Anungji kodang pa tasu nungi shia aru, pai ya jembi ta pa nutsungtemi bilemtet, aser parnoki laishiba o, aser Yisui ashiba o amang.
23 Tang Kumtettsu benjong mapang nung, pa Yirusalem nung alidang, pai inyakba temaitsutem ngua, pa tenung nung aikati amang. 24 Saka Yisui temulung lema pei sasa parnok nem magtitsu, 25 kechiaser pal nisung ajak metet, aser shingaia nisung atema kuli agutsutsu pa asoshi tenungdaktsu mali; kechiaser nisung dak kechi liasu pai pei sasa metet.
1 Farisi nunger Nikodima tenung agi Yihuda nunger yimsusur ka liasu. 2 Pai aonung Yisu dangi arua ashi Tesayur, na Tsungrem nungi aruba tesayur ka ta onoki metet; kechiaser Tsungrem metenra, nai inyakba temaitsutemi shingaia meinyaktet. 3 Yisui langzua pa dang ashi, Atangji, zungpung, ni ne dang shidi, Tanaben mesora, nisungi Tsungrem yimli mangutettsu. 4 Nikodimai pa dang ashi, Nisung tambur kumer pa kechi koda asotsu? Pa tetzu poki tanaben tur sotettsu no? 5 Yisui langzu, Atangji, zungpung, ni ne dang shidi, Nisungi tzu aser Tanela nungi mesora, Tsungrem yimlu aitsu makok. 6 Shi nungi kechi sodir aji shi; aser Tanela nungi kechi sodir aji tanela. 7 Nenoki tanaben asotsu tim, ta ni ne dang ashi nung tesungmang. 8 Mopung koleni onedir ilenji aener, aser nai iba olaji angashir, saka aji kolen nungi arur, aser koleni aor nai memetet: Tanela nungi asoba ajak yamaji lir. 9 Nikodimai langzua pa dang ashi, Itemi koda sutet? 10 Yisui langzua pa dang ashi, Na Israel nunger tesayur sur nung, itemi mangateter no? 11 Atangji, zungpung, ni ne dang shidi, Onoki kechi metet aji jembir, aser onoki kechi angu iba indangji kuli agutsur; saka nenoki onok kuli magir. 12 Ni alima otzu ashidang nenoki mamangra, kotak otzu shira nenoki koda amangtsu? 13 Aser kotak nungi shiba alu, oda nisung Chir shiba kotak nung lir, pa alema shinga kotaki matu. 14 Aser nisung Chir dak shirisa amangdir pa dak teti takum angutsu asoshi, 15 Mosai kechi koda arem nung per ajungket, yamaji nisung Chir ajungkettsula.
16 Kechiyong Tsungremi alima oda meim nung, shirisa pa dak amanger mesamatsu saka teti takum akatsti pai pei ajaso Chir agutsu. 17 Kechiaser meimchir nung tai agutsutsu asoshi masu, saka pa ajanga meimchir kumzuktsu asoshi, Tsungremi pei Chir alimai yok. 18 Shibai pa dak aroanger pa nung tai magutsur: shibai pa dak mamanger pa nung tai agujadokogo, kechiaser pai Tsungrem ajaso Chir tenung nung mamang. 19 Aser tai agutsuba oji ya, oda tesangwaji alimai aru, saka nisungi tesangwa masu, ammangang meim; kechiaser parnok mapa majung liasu. 20 Kechiaser shibai tamajung inyaker pai tesangwa sempar, aser pa mapa nung tai ngualir ta pai tesangwa dangi marur. 21 Saka shibai ochi mapa inyaker, pa mapa Tsungrem dak inyak ta jungkai adokdaktsutsu asoshi, pai tesangwa dangi arur.
22 Yaser Yisu aser par nutsungtem Yihuda limai aru: aser yangi pai parnok den ali, aser baptitsu. 23 Aser Yohania Salim anasa Enon yimtak baptija liasu, kechiaser yangji tzu jenti liasu; aser nisung arua baptitsu. 24 Kechiaser Yohan ano tsungden chiokdak mepuok liasu. 25 Anungji meshitettsuba indang Yihuda nunger kati Yohan nutsungtem den atettepa liasu. 26 Aser parnoki Yohan dangi arua pa dang ashi. Tesayur, Yordan kelen ne den shiba liasu, shiba indang nai kuli agutsur, ajiang, pai baptitsur, aser nisung ajak pa dangi arur. 27 Yohani langzua ashi, Kotak nungi nisung nem kechi agutsur iba dak alema, pai kecha angutsu makok. 28 Ni Khrista masu, saka ni pa dang tama yokba, ta ni ashiba, ku kuli nenokang lir. 29 Shiba asoshi ki ayimla lir pa ki ayimsang; saka ki ayimsang temba, shibai noktaker pa o angar, pai pa ola angashia kanga pelar: anungji ku tepela ya abensaogo. 30 Pa ulutsula, saka ni asotsula.
31 Shiba temalen nungi arur pa ajak dang temaba; shiba alima nungi lir pa alima meyong, aser pai alima indang jembir; shiba kotak nungi arur pa ajak dang temaba. 32 Pai kechi angu aser angashi, iba indangji pai kuli agutsur aser shingaia pa kuli magir. 33 shibai pa kuli agi, pai Tsungrem ochia ta temaitsu ajenogo. 34 Kechiaser shiba Tsungrem nungi yok pai Tsungrem o jembir: kechiaser pai Tanelaji odanga inagutsur. 35 Tebui Techit meimer, pa ket nung ajak bendanga agutsuogo. 36 Shibai Techir dak amanger pa teti takum kar; saka shibai Techir dang mangar pai takum mangutsu, saka Tsungrem terasaba pa madak lir.
1 (Yisui pei sasa mebaptitsui, saka pa nutsungtemiang baptitsuaka), 2 Yohan dangbo Yisui nutsung tali kumdaktsur aser baptitsur,ta Farisi nungeri angashiogo ta Kibubai kodang metet, 3 idangji pai Yihuda toktsur Galili tanaben aenshia ao. 4 Aser pa Samaria ajanga aotsu tenungdaktsu. 5 Anungji Yakobi pei chir Yosef nem kechi li tila ka agutsu, iba li anasa Samaria nung aliba Saikar tenung agi yim kati pai aru: aser Yakob tzubu yangji liasu. 6 Anungji Yisu lemang nung belemer, yamaji tzubu kumbang nung amen. Tang terina baji meta liasu. 7 Samaria tzur ka ajagi tzutai aru: Yisui la dang ashi, Ku nung tajemtsu kua. 8 Kechiaser pa nutsungtem yimtu chiyungtsu alitsu or liasu. 9 Anungji Samaria tzur jagi pa dang ashi, Na Yihuda nunger sur nung, ni Samaria tzur dang tajemtsu koda meshir? (Kechiaser Yihuda nungeri Samaria nunger den kin mechiteper.) 10 Yisui langzua la dang ashi, Tsungrem sempet kechi, aser ku nung tajemtsu kua ta shibai ne dang ashir, aji nai metet asubo, nai pa dang meshila, aser pai ne nung takumtsu tzu agutsula. 11 Tetztir jagt pa dang ashi, Tamarener, na tzu tatettsu kecha maka, aser tzubu tarok lir: ajangla na takumtsu tzuji kong nungi? 12 Ozu tebu Yakob shibai onok nem tzubuji agutsu, aser kecla nungi pei sasa, aser par chirnur, aser par shirurutem ajem, pa dang nungi na tuluba asu? 13 Yisui langzua la dang ashi, Shibaisa iba tzu jemdir tanaben tzuratsu: 14 saka shibaisa ni agutsuba tzu jemdir kodanga metzuratsu; saka ni pa nung agutsuba tzuji pa dak teti takumtsu pokteta tzulok akumtsu.
15 Tetzur jagi pa dang ashi, Tamarener, ni metzuratsu aser yagi tzutai marutsusa iba tzu ku nung kua. 16 Yisui la dang ashi, Oang, ne kinungpu jaang, aser yagi arung. 17 Tetzur jagi langzua pa dang ashi, Ku kinungpu mali. Yisui la dang ashi, Ku kinungpu mali ta nai tim shiogo; 18 kechiaser ne kinungpu pungu liasu, aser tang ne den shiba lir pa ne kinungpu masu: o ya nai atangji ashi. 19 Tetzur jagi pa dang ashi, Tamarener, na ainkar ka ta ni angur. 20 Ozu tetzu tebutemi iba tenem nung kulem; aser kechi nung nisungi kulemtsu tim aji Yirusalem ta nenoki ashir. 21 Yisui la dang ashi, Tetzur, ku o amangang, nenoki iba tenem nung sushia, Yirusalem nung sushia, Tebu dang mekulemtsu mapang arudagi. 22 Nenoki kechi memetet aji kulemer: onoki kechi metet aji kulemer; kechiaser tekumtettsu Yihuda nunger nungi lir. 23 Saka zungpung kulemertemi Tebu dang tanela nung aser atangji nung kulemtsu mapang arudagi, aser aji tang lir: kechiaser pa kulemertem asutsu Tebui ibala bushir. 24 Tsungrembo Tanela: aser shiri pa kulemdir tanela nung aser atangji nung kulemtsu tim. 25 Tetzur Jagi pa dang ashi, Mesia (shiba dang Khrista ta ajar) arudagi ta ni metet: pa kodang arudir, pai caok nem liak metetdaktsutsu. 26 Yisui la dang ashi, Ne den shibai jembir aji pa.
27 Idangji pa nutsungtem aru: aser pai tetzur denji sensak asemba ngur parnok sungmang; saka, Na kechi bushir? mesura, Kechiba nai tetzur denji sensak asemer? ta shingaia mashi. 28 Anungji tetzur jagi la tzu mori toktsur yimtii ao, aser nisungtem dang ashi, 29 Ni kechisa inyak, aji ajak kit dang shiogo, ibala nisung ka aruagi ajiang: ibai Khrista asu na? 30 Parnoki yimti nungi tugu, aser pa dangi aruya liasu. 31 Iba tsungda nungji nutsungtemi pa dang mepishia ashi, Tesayur, chiyungang. 32 Saka pai parnok dang ashi, Nenoki memetetba ku chiyungtsu kar. 33 Anungji nutsungtemi jembitepa ashi, Pa nung kari chiyungtsu langka bena arutsu asu? 34 Yisui parnok dang ashi, Ni tenyaba mulung chia inyaktsu, aser pa mapa atalokdaktsutsu, aji ku chiyungtsu. 35 Ano ita pezu lir, idangji aluruwa arutsu, ta nenoki mejembir no? Ajiang, ni nenok dang shidi, Roka asoa alulen ajiang, tang tarutsu junga mesunga lir. 36 Shibai arur pai taa angur, aser teti takum asoshi tejang bendener, anungji alu tenba aser alu ruba tena prungla kelemi pelateper. 37 Kechiaser kati atener, aser kati arur, ta ashiba o yangi putepa adoker. 38 Kechi nung nenoki belema meinyak aji arutsu ni nenok yok: tangari belema inyakogo, aser parnok belema inyakba rongnung nenok aten.
39 Ni kechisa inyak aji ajak pai ku dang shiogo, ta tetzurlai kuli aguja ashi nung, iba yimti nungjagi Samaria nunger aikati pa dak amang. 40 Anungji kodang Samaria nunger pa dangi aru, pa parnok den liang ta parnbki pa dang mepishi; aser pa yangji ananu ali. 41 Aser ano jenti pa o agi amang; aser parnoki tetzur dang ashi, 42 Tang onoki amanger, nai ashiba yong masu: kechiaser onoki onok sasa angashiogo, aser ibai atangji alima kumtetdakba ta onoki metet.
43 Aser anogo anaji suir kelen pai yang nungjagi Galili ao. 44 Kechiaser ainkar pei lima nung tenungsang maka ta Yisui pei sasa kuli agutsu. 45 Anungji pa kodang Galili aru, Galil nungeri pai Yirusalem nung benjong mapang nung inyakba ajak ngua pa agizuk: kechiaser parnoka benjong jagi ao.
46 Anungji Galil nung aliba Kana yim, kechi nung pai tzu agi yi kumdaktsu ajagi pa tanben aru. Iba mapang nungji tamarener jabaso ka Kapernaum nung shiranga liasu. 47 Kodang pai Yisu Yihuda nungi Galili aruogo ta angashi, pai pa dangi ao, aser pa alur par jabaso anebjang ta pa dang mepishi; kechiaser tanurji tasur liasu. 48 Anungji Yisui pa dang ashi, Nenoki temaitsu aser tesungmangtsu mungura, nenoki kechasudanga mamangtsu. 49 Tamarener jagi pa dang ashi, Tamarener, ozu chir masu jungi alung. 50 Yisui pa dang ashi, Oang, ne jabaso takum lir. Yisui pa dang ashiba o iba nisungi amang, aser pa ao. 51 Aser pa luya alidang, par kilirtemi par jabaso takum lir ta shia pa den ajurutep. 52 Anungji pai parnok dang pa kodang nungi jungtutsu tenzuk ta asungdang. Anungji parnoki pa dang ashi, Yashi ka baji meta nung rameni pa toktsu. 53 Anungji, Ne jabaso takum lir, ta Yisui pa dang iba mapang nungji ashi ta tebui metet: aser pai pei sasa, aser par kibong ajaki amang. 54 Ano ibai Yisu Yihuda nungi Galili arur inyakba temaitsu tanabuba lir.