Naga: Konyak Scripture OCHINA HA N CHOKAO. MESAO JI Limha to kyou vanthakcho yolo tswpotso jijo nzyu 33 tssoathwng jaktoni chwthukcho. Ombona nochonori jiang emyicho, echwi jiang phanthilan thukcho, mhikjung jiang bochiyicho, kyon othwng tsoyuthukcho osi kuta na ombo thwngi rocho sana ombona khochaki pia nzancho. Mmen na chwmzhwa vamo kyon jiang shom ji ombo tssocho. Potsow na mmen kyon nzamo ji ombona topvw thwngi pwngnoa elhi lona ejwcho. Ombo na motsw lo ndungkae shancho yithen ji pwng-nocho khatola potsow ekhwm kyon jiang na mmyantae ombo chwthukcho. Kyon na n khichowo Mesaoji ekwm lo hoto tssocho. Jisu ji chwthukle to methakala Pilate na pvwti tswpoe jiang, esopvwi jiang tona kyon jiang to tsarhyui engacho, "Ntena kyon shina oyam sosora la to phyoa a thwngi sosi rocho. Ana ombo ji nte mhadungo na ojang tssoe zethaka, tole ntena n lan ombo pio jiang motswnga tia otsotso to n yanche. Herod na ha ntia n lan n yancheyio jina a thwngi yithuklan cho. Kyon shina echw mana ntia tssosoracho n yancheo ji tswkona ana ombo erhwpsi vachi sivka." Tole okho jina twngkachia phyotacho, "Lwngthae ombo sisi e tswkona jo Barabas e vachiyia!" (Barabas jo yantswi ninyang sokae osi mwnghan tsso jina vwngi licho). Pilate na jo Jisu vachihungo jina elani okho ji engalancho, tole ontena twngkachia phyotacho, "Doni ombo sia, doni ombo sia!" Pilate na yenjo ethwmoto onte engacho, "Tole ombo na ntio n lan tssochola? Ombona echw mana tssosoracho ana n yanche! Ana ombo erhwpsi vachi sivka." Tokhatola ontena pvwkhyung twngkachia Jisu ji doni sile to phyotacho osi hojito beni sicho. Hoji tswkona Pilate na kyon jiangna chomo ji eswa yitan picho. Kyon jiangna jwpomo kyon ji ombona vachisi Jisu jo kyon jiang lwm erwng ephani na doni sicho. Lk 23:13-25 Jisu ji donala Omwng ehan otswk eni ha Jisu nzo donhyacho. Ontena meta motswnga "Kuriryu" to tsao ji janale jilona Jisu tona Ombo hayihamen mwnghan otswk eni to doni sitacho. Hojithwng Jisu na phyocho, "Opo, Ontena ntio elhia sana n tsiv elhiaka n lan onte siyia." Ontena ombo sw ji phyalyu zetasi jantae khitacho. Jew esopvwi jiangna Jisu yikvua phyotacho, "Ombona oyam shanchoaka otsotso Potsow na ethwngcheo shanchopvwi ji ombo tssona ombobo shanchothuka!" Okho jina ha jilo mangrae zeta vancho. Rasan jiangna ha ombo yikvwtacho: ontena oro zwki woshaku ombo pikachia ezocho, "Ni ji Jew jiang Mesao ji tssona nipopo shanchoa!" Ombo donphen kuri heto eranicho: "Shijo Jew jiang Mesao ji." Hojilo donhyae vamo mwnghan tswka jina ha heto ombo ezocho, "Nino shanchopvwi ji mekcho ke? Nipopo shanchosi enaha e shanchoa!" Tole mwnghan tswka jina ombo shom ji maka ezocho, "Nino Potsow ni n kyuake? Niha ombo chwthukato ni chwthukala; tokha-tola enio eni elhi man e picho tae; tokhatola ombona woricho ntia n li." Tosi ombona Jisu ezocho, "Jisu, nina Mesao tssoa roana a nchwmchekhe!" Jisu na ombo ezocho, "Ana ni ezoala, nchwngna nina a nzo potswwoe vamka." Lk 23:32-43 Shiang etssov nzyu nzo tiza liathwngna zenkhying Isaia na Jisu ji Potsow methak ephanina heto tssov to phyoe licho: Ombona ete mmen tswkona chwcho Etena ezwp ekhiv thung ombona e zwpicho, Ete enov ji ombo nothukcho. Tole etena jo ombo ji Potsow na khangshia tsayita vancho. Tokhatola ete mmen tswkona ombo tssatssocho, Etena n mhom tsso ji man ombo erhwpcho. Ombona ezhwp hamo ji man e miyiracho, Osi ombo kfw jiang yakchia e kwmchelanthukcho. Ete topvw olyuden moni yirathakcho to e monrathakcho, Otswk aku na etancho yirathakcho. Tokhatola hoji jokheman ezwp jijo opvwi na ombobo hani e siyicho; ete topvw na eham etwmthao ezwp ji. Ombo ji elwmoto haruka khangshicho khatola ombona enyiproa. Khichoe hancho; Ombona yitswnga tia n kochicho. Olyuro tatswngu vanathwng eswa, olyu epansovsa thung eswa, Ombona yitswnga tia n kosochicho. Ombo ji swyae n lan pia, chwthuku sosi yicho, Toaha ochina ha ombo tswkona emhukicho n licho. Ete shi mmen tswkona ombo chwthukcho. Kyon n mhon jiang nzo ombo shothecho, Osi ejweli kyon jiang nzo ombo shothecho, Tolia ombona woricho jo ntia n licho, ejwng phyocho ha n licho. OPVUI na phyoala, "Ombo ezwpvw ji a methak ephan tssoala; ombo chwo ji n lan siyio than tssoa chwv. Hoji tswkona ombona ombo tsoronichen hungjana harishia vam, Hojitoli a etwm jiang benchethuku. Ezwp ekwm ji swlo jo ombona ematha hunglam; Osi ombona ejwngona ezwp khicho mek to swlani ti ntsiv. A longtswkaro phajae ocholo ana emathacho sana jina kyon elwmoto ezwp ha ji haniv osi hoji yakchia ana n lan onte siyirav. Hoji tswkona ana yikrachi vanphen ombo piv, hoji jo kyon etho eli osi tswpoe jiang yolo vanphen ombo piv. Ombona chokatswnga ombo ekwm pia kyon n mhom jiang swkhying ji shwmchoe khyiyicho. Ombona mmen kyon elwmoto othung tssoyia onte n lan siyithuku randanicho. Isaiah 53:4-12. Jisu ji donphen lona chwi lungkui shothei sicho. Ombo swrwi jiangna onte ekwm nkoa tsanrae sicho. Tokhatola ontena emhukta sanrhyulancho. Jisu ji phanthilan thukcho Emung enyathwng eloe jiangna ontena methaki vao mozhwrhwm ji bentasi nyazwngi na olwpi wotacho. Olwp ji elhwp lungpyak ji khoe sithako ji hungi onte emhuka ochungi rhowotacho; tokhatola ontena Jisu n hungcho. Ontena hojilo emhuktswnga vantathwng kyon otswk eni npensw e razhwa ekatasi onte ndwngo mangkachicho. Ekyu lona ontena nkhumtherale onina onte ezocho, "Nteno ekwm vamo kyon ji echwi yolo yantake? Ombo helo n van, ombo phanthithuk thaka. Ombona Galilee, lo vanathwng heto nte ezowo ji nchwmchetava: "Kyontsoe ji mmen kyon khelo the yivka, osi tsungon ethwm swlo jo ombo phanthilan thukuka." Tole eloeden jiangna ombo yi jiang nchwmchecho, osi olwpi na elani oyi Ombo swrwi taro ekha jiang tona kyon thanpoe jiang to thwngi shiang hetopvw ezotacho. Magdalene, Joana, tona James oyo Mary ji to; shiang tona elopvwi thanpoe jiang to na ontena ntio hungcho sana wothung jiang ezotacho. Tokhatola wothung jiangna jo elopvw jiang yi ji ejwng tsayia n longtswtacho. Tole Peter na phanthi olwpi yunga owo nkfwthei lungku jilo zethechile swnyipvw ji yaka ntia n hungcho. Tole omboha hoji na emhuktswnga oki yicho. Lk 24:1-12 Ho, otsotso ombona echw lona phanthilani nchwngo ekwm vana. Yithen jina ombo swrwi jiang emhuktswnga dungphirae sio ji eswa yithentswk shina nte dungphithuka. N lungtswkuko eswa e mhuka khatola otsotso Jitopvw opvwi Jisu na onte yolo phanthi ezocho, "Nte lo noying lithuku ka." Ontena omon hungcho tsayia ekhentswngracho. Tole ombona onte ezocho, "Ntioli nte ekhenala? Ntioli nte lwmbwmi hetvw woewolan hantala? A khe osi ojo shiang zetasi a longtswtava. Epyanphi a zetava, omon najo oso oryu jwa mek, tolea aiyo hojiang jwa to ntena hungala." Ombona heto phyoa okhe jiang onte ejwcho. Toaha ontena n lungtswkukcho, osi longshi tona emhuk to na onte pyingi vanathwng ombona onte engacho, "Ntena helo ntia etsoyu leli?" Ontena ongo tswkcho teriv khi ombo pile ombona onte ehungo na tsocho. Tole ombona onte ezocho, "Shiang hetopvw ana nte ndwngo ekwm vanathwng nte ezoracho tae: Moses shikvw lo, zenkhying kako lo osi ethwng khen lo a tswkona erani lio jiang topvw benchev licho." Jitosi ombona onte engathethuku nchwmri chonchiyicho, osi ezocho, "Heto erani lia, shanchopvwi jina ezwp nduku osi tsungon ethwm swlo echw lona phanthilam. Osi ombo mying jilo lwmbwm khophi tona n lan siyi to jwo ji Jerusalem lona benkae jipo topvw thwngi pwngnov. Shiang hetopvw ehungpvwi jo nte shi tssovka. Lk 24:36b-38