"ATUNGSHONGWUI KHANGACHON" Hi Bible akai kachungkhawui eina Tuipongbingli ngashit kapai Bible verse bingwui eina kachip kakhuina. Bible akhalatta hina phameithui kachi Bible wui otsok katongnga thei khangasaka (commentary) nada Ina shitsanga. Khamashung khangarongli rakachang kathaia wuklungbingwui vang Atungshongwui eina khara Varewui Tui hi kachangkhat ngachonlak kahaina. Mi akhana ningkhangatei chitharan, Morei chihohaora kala proho Jesu Christali wuklungli changpamgasaknaora. Kala proho Jesu Christali Awui huikhamianada wuklung tongchaoda shitsanga. Kala prohona Akhalatta mi chili chitheimira, kala shitkasangbingwui wuklungli Awui chingri kahai ringkapha chi mira. Ina hi 1937 li theisingkhuia, kala chiwui eina thuida matakhak kahaia khokharum chi machiholakmana. Chiwui vang eina Nana hikatha hi reda masarangsa akha Ami Proholi Nawui huikhamia lakada Ali nawui ningli mayachaokhavai Ina kakasona. - Watson Goodman

/1 VARIVARAWUI LEIKASHI Jeremiah 31:3 "Achalakha Israelli Prohona hanghaisai: 'Iwui mibingli ina leishilaka, ningtongda leishichinga.'" Phongkhami 1:5 Kala ningtongda shakhi sakhame, kathiwui eina phara khare kala okathuiwui awungabingli khamunga Jesu Christawui eina lukhamashan chingri kahai ngasaranu. John 13:1 Makankhami phanit sakida thangkha vatlakha, Jesuna okathui hi kanlaga Avavawuili vaki kachi atam rahaira kachi theihaowa. Ana okathuili khaleiya awui mibingli leishilaka, kala khanao eina tangda leishi. John 3:16 Khikhala jila Varena okathuili leishina kahaiwui vang awui Naoho chi miya. Nao chili shitkasanga mi kachiva mathila katang makhavai kharing samphangra. Romeli 5:8 Kha Varena ithumli kayakha leishikhala kachi chitheimi haira. Ithumna morei phungda leilakha Christana ithumwui vang thimi.

/2 JESU CHRISTA VARIVARANA John 1:1 kala 14 Haophok khareli Tui chi leihairasai. Tui chi Vareli ngasosai, kala Tui chi Varelaka. . . Tui china pliasa kada ithumwui ngachaili rapama. Ava khamashung eina lukhamashan pemtinghai. Avavawui eina khara Naoho chiwui tekhamatei chi ithumna theihaira. John 14:9, lOa Jesuna ngahankai, "Hirankha nathumli ngasopam haira, laga ili mathei rangla, Philip? Kachikathana ili theiakha Avavali theikahaina. Chitha akha khisada Avavali chitheilu da hangkhala. I Avavawuili lei kala Avava iwuili lei kachi hi mashitsang mala?"... Matthew 1:22,23 Prohona maranbingli hangngasak kahai saikora chi ungshung khavai ara rashok haira. Chiya, yanglu, mafakathuiva akhana nao mayarnao akha vaida pharara, kala awui ming Immanuel phokra (hiwui kakhalata Varena ithumli ngasomi). Micah 5:2 Kha, He Judah shangbingwui ngachaili kateowa Bethlehem Ephrathah, Nawui eina iwui vang Israelli mungki kaja akha shokra, awui haophok khavai chiya kharewuina, achalakhawuina.

/3 VAREWUI NAO JESU Colossaeli 2:9 Kaja Varewui khalalei katonga chi ishameiwuili leichupa. Isaiah 9:6 Kaja, ithumwui vang nao akha phara haira, naomayara akha mihaira kala shorkar ana phungra, awui ming, "Matakhakahai, Machinme, Pangshapa Vare, Katang makhavai Avava, kala Chingri kahai Wungnao, da hora. Luke 1:35 Chieina kazingrao china ali hanga, "Mangla Kathara china nali rada Chuikhamataiawui pangshap china nali rakhayin mira. Hiwui vang eina pharaki kache nao chili kathara Varewui Naomayara hora. I Johnwui 4:15 Jesu hi Varewui Naona da khamayaa chi Vareli lei, kala Vare ali lei. Matthew 3:17 Kala yanglu, kazingram eina akhon akha vaotada hanga, "Hi iwui khaluma inao mayarana, ina ali ningyang unglaka." Matthew 17:5 Ana hangmamanda khayang chitharan, horchamri kahai muiya chiwui eina akhon akha vaoshokta hanga, "Hi iwui khaluma Naomayarana, ali ina ningyang unglaka, awui kahang nganalu.

/4 JESU A KHIPAKHALADA ITHUMLI KAHANG John 9:5 "I okathuili leilakha okathuiwui kahorna." John 11:25 Jesuna ali hanga, "Ina ringkhalui eina kharingana; kachikathana ili shitsang akha thihaisalala ringra." John 10:7 Chieina Jesuna hanglui shita, "Ka-changhat eina Ina nathumli kahangna; I yaobingwui khamongna." John 6:35 Jesuna hanga, "I kharingawui khamuina, ili khara mi chi mathailak mara; ili shitkasanga mi chi marachanglak mara." John 13:13 "Nathumna ili oja kala Proho da hoi, chi mashunga, kaja I chilaka." John 8:58 Jesuna hanga, "Kachangkhat eina ina nathumli kahangna, Abraham maphararang lakha I leisai." John 8:23 Jesuna ngahankai, "Nathuma azing eina kashokna, iya atung eina katana. Nathum okathuiwuina, iya okathuiwui maningmana.

/5 JESUNA MATAKHAK KAHAI OT KASA Luke 5:4-6 Ana tamchitheichang hailaga Simonli hanga, "Nawui khailan chi kathukvak horsanglu." Chieina Simonna ngahankai, "Oja! Ithumna ngaya pongda ot panglak eina sai, kha khikha masamphang mana. Chithalala nawui kahang athi shurda khailan horsangluiga." Kala athumna khailan chi horkasang eina khai ngaseng kachungkha manda khailan kakkiji haowa. Matthew 14:19-21 Chiwui thili ana mi kachungkha chili khawotungli pamluda kasoi, kala khamuihang phanga eina khai khani chi singlaSa kazingramli yangkada ana somilaga serkhaida khamui chi sakhangathabingli mi kala sakhangathabingli mi kala sakhangathabingna mi kachungkha chili yarvai. Athum saikorana zalaga tholak haowa; kala athumna zaneng rutkhuilaga luk tharada khani leisai. Kala phakachizatli kazang athumbing chi, shanao naoshinao mazangla, thingphanga shakhaya. Matthew 20:30 kala 34 Kala yanglu, mik khangapeo mi khani shongfapheili pamsada Jesu rarali kachi kasha eina, "Davidwui naomayara, inili khalumashanmilu" da vaoda hanga. ... Chieina Jesuna lumashanhaida aniwui mikli sazaya; kala ngalangda kathei samphang haowa, Chieina anina awui thi shurthuwa.

/6 JESU CHRISTA KASA AKHAVA PROHONA John 1:3 Ot saikora awui manga eina kashokna kala sakahai saikora hi a mazangla kasa maleilak mana. Romeli 14:9 Hiwui vang Christana kathina kala ringkhaluina, chieina ishameina kathi kala kharingwui Prohona. Colossaeli 1:16 Khikhala jila kazingramlila okathuilila mik eina theikapai, matheikapai ot saikora, wungpambing nilala, wungrambing nilala, pangshap kasingbing nilala, akhava kasabing nilala ishameiwui eina kharana kala awui vang sera. Otsak 2:36 "Chiwui vang eina nathumna krushtungli shaokathat Jesu hili Varena Prohola, Christala, sangasak haira kachi hi Isreal shimkhur saikorana theikazakzak hairanu."

/7 JESU CHRISTA SAIKORAWUI BICHAR AKHAVANA John 5:22 "Avavana khipalikha bichar masamara, kha Anao Mayarali bichar saikora mihaira." Romeli 14:10 Nachinawui tungli khisada bichar sakhala? Kala khisada masashi khala? Ithum Varewui bicliar sakhavai karotli kanganingsera. Romeli 2:16 Miwui wuklungli ngathum kahai saikora, Varena, Jesu Christawui manga eina khamashung khangwui bichar sathanghon, ina paokhamatha tamkachithei hiwui athi shurda shokra. Otsak 10:42 Kala kharingabing eina kathebingli chan ngazek khavai ali mayamikahaina da shakhi sakhavai ithumli ningmi. Matthew 25:32 Awui mangali miyur saikorali kazipkhuira. Kala yao kahomana me eina yaoli ngatei khangasak chithada Isliamei ana athumli akhawui eina akhali ngatei ngasak haora." II Timothyli 4:1 Kharingabinglila kathebinglila chan ngazekki kaja Jesu Christa kala Varewui miktali ina saklak eina kahangna.

/8 CHRISTA MANGNA NGATANGKHAMIYANA John 10:9 "I khamongna; ili kazanga mi chili huimira; ana shokzangda seizatpam samphangra." John 14:6 Jesuna ngahankai, "I shongfana, khamashungana, kala kharingana; ili khara maningla Avavawuili khipakha marapai mana." John 8:24 "Hiwui vang eina nathum nathumwui moreili thira kachina. Kala 'I alaka' kachi mashitsang akha nathumwui moreili thihowra." Hebrewnaoli 5:9 Kapei-kahai chitharan awui kahang-khanganabing saikorawui huikhami shongfa ngasami haowa. Otsak 4:12 "Chieina kahui kaho hi khipakhawuili maleilui mana, kaja ithumli huiki kachi, okathui mibingwui ngachaili mikahai aming khangatei akhala maleilak mana." Hebrewnaoli 7:25 Chiwui vang awui ming eina Vareli kazang saikorali ridala naodala huimishapa.

/9 CHRISTA MANGNA NGATANGKHAMIYANA Luke 19:10 "Khikhala jila Miwui Naomayarana shiman kahaibingli phakhuida huimi khavai kharana." I Corinthli 1:30 Varena nathumli Jesu Christali zangngasakhaira, kala Christali ithumwui awor sangasakhaira, kala Christawui manga eina Vareli ngashik ngasakhaira. Colossaeli 1:12-14 Kahorwui nao vareshibingli ngasoda shimlui kakhavai nathumli kashung khangasaka Avava chili ningshilu. Ana ithumli tangkhamang apamwui eina ngatangkhuida ishameiwui khaluma Nao mayarawui wungramli zangngasakmi haira. Anao Mayarana morei pheomida ngatangkhuimi haira. Phongkhami 5:9 "Lairik chi khuishapa, mahor chi khalashapa nana. Khikhala jila, nali sliaothat haisai, kala nawui asheena mibingli, shang kachiva, tuiyur kachiva, miyur kachiva kala ngalei kachiva, eina Vareli khuiungmihaira." Titusli 2:14 Makapha makhayawui eina ngatangkhuida awui kathara kala khamareka mi sakhavai a khalatta ithumwui vang chikatmi.

/10 CHRISTAWUI ASHEE EINA THARKHAMI Kha ishameiwui thada ithumla kahorli okthui akha ithum akha eina akha ngashik ngaroka, kala Naomayara Jesuwui ashee chi eina ithumli morei saikora tharngasakmi. I Johnwui 1:7 Khikhala jila hi iwui tuingashitwui asheena, hi mi kachungkhawui vang morei pheokhavai heikatana. Matthew 26:28 Hebrewnaoli 9:14 Chithakha Christawui ashee eina kayakha mataida tharmira khala! Katang makhavai Mangla chieina chukhara maleila a khalatta Varivarali phami. Awui ashee eina ithumwui kaphaning kala makapha ot tharmi haida kharinga Vareli otram ngathapai khavai sami. Romeli 5:9 Chiwui vang eina ithumna awui manga eina malungvatki kachi li Ishameiwui ashee chieina mashungmihaowada huimira. I Peterwui 1:18, 19 Awo ayiwui eina shakhui khamaron makankhana mirinwui eina, nathumli kathada ngatangkhui khala kachi nathumna thei. Shiman kapai sinalupa eina maning mana; Kha achukkapeiya yaonao katha Christawui kasaka ashee eina ngatangkhui.

/11 CHRISTALI SHITKASANG MANGA EINA KAHUI SAMKAPHANG Romeli 5:1 Ara ithumli shitkasangwui manga eina mashungmi haoda Jesu Christana ithumli Vareli mashit ngasak haira. Galatiali 5:6 Christali leilakha eina tangda, ahui rimshok ranu, marimshok ranu, khikha khangatei malei mana. Leikashiwui alungli ot kasa shitkasang china khamataiyana. Ephesusli 2:8, 9 Shitkasang manga eina nathumli huikhami hi Varewui lukhamashanna. Nathumna sakakhui maning mana, kha Varewui sonkhamina. Nathum khalatta sakakhuina da langso khavai maleimana. John 20:31 Kha Jesu hi Varewui Naomayara, Messiah laka da shitsang khavaiwui vang, kala shitkasang chieina kharing samphang khavai hi kapi kahaina. John 6:28, 29 Chieina athumna ngahana, Varewui ot sakhavai khi sarakhala?" Jesuna ngahankai, "Varena sangasak khangai chi hina: Ana shirat kharapa chili shitsanglu."

/12 VARIVARAWUI LUKHAMASHAN Laa 103:17 Kha Prohowui makhangachei leikashi, ali khangachecbingwui vang katang mavai mana, kala awui khamashung khangarong naothot kachida lei. Chapchat 3:22, 23 Prohowui leikashi makhangachei, kala lukhamashan katang makhavai chi. Zingshot thada naning katong mangapat, ngathor kachi mathingrik. Titusli 3:5 Ithumli huimi. Ithumna khamashung khangarong ot kasawui vang maning mana; kha awui lukhamashan eina pheomi haida Mangia Katharana phara khangasak mirin kadhara chi ithumli thada mi. Laa 103:11 Ngaleiwui eina kazing kachui chiyakha ali khangacheebingli leishiya. Micah 7:18 Khayonkhamang pheokhami na katha Vare khipa lei? kala awui shimluikat akataiwui vang salangkahaili chihokha mi khipa lei? Awui malungkhavat katang makhavaiwui mavanla makaziphai mana. Kaja makhangachei leikashi chili ana ning tarai.

/13 VARENA ITHUMLI AWUILI RALUDA KASOI John 7:37 Phanitwui khanaowa kala khamataiya thang Jesuna nganingda panglak eina hanga, "Kachikathana rachang akha iwuili ramangkhui ranu. Haokaphok 7:1 Chiwui thili Prohona Noahli hanga, "Nala kala nashi katonga marikhong lungli zanglu, kaja mithot hili nana iwui mangali khamashung khangarongana da ina theihaira. Phonghami 22:17 Mangia eina Makhamkahaiva china hanga, "Ralu." Kasha mi kachivanala "Ralu" da hangranu. Rakachanga mi china ramangkhui ranu, kharingawui tara ningkachanga china aman mamila rakhui ranu. Isaiah 1:18 "Ralu, bhap tada ngazekkhuisa," da Prohona hanga; nathumwui more! hungping hailala, horam thada charshi howra; ashee thada hungshi hailala, vat kachar thahowra. Isaiah 55:1 He rakachanga kachiva, tara pamli ralu; kala pheisa makhaleibing, ralozalu. Lilpa mazangla kala aman mamila, drakhatheira eina seina ralolu.

/14 MI KATONGA VAREWUI NAO MANINGSHERMANA Philippili 2:15 Kaja makhamashung mashokhangachei miyurli okthuirumlala, nathum kathara, khayon makhalei Varenao sakhavai, sirana kahor thada, okathuili nathumna athumwui ngachaili horlu. Romeli 8:14, 15 Varewui Manglana kathana athum saikora Varewui naongarana. Kaja Varena mikahaiya Mangia china nathumli rao masangasak mana kala mangachee ngasakmana; kha Varewui naongara sangasaka, kala Mangla chiwui pangshap eina ithumna Vareli "Abba! Ishava!" da khangakaona. John 1:12 Kha awui mingli shitsangda khuikasanga saikorali ana Varewui naongara ngasa khavai pangshap mi. II Corinthli 6:17, 18 Chiwui vang "Athumwui eina ngateida yamshoklu; makathar ot masazalu, chitha akha ina nathumli mayara" da Prohona hanga; Kala I nathumwui avava sara, nathum iwui naongara sara da sashapa Prohona hanghaira."

/15 KHOR KHAMANGWUI PONGLI VARENA KHI HANGKHALA Chansam 20:1 Zam hi manakashena, khamarip khonkazarna, hina thanthui kahai mi thangkhamei maningmana. Chansam 23:31, 32 Hungda leilakha zamli mayangalu, khoramli maraoda inangachingrang lakha. Naoda phara thada makei, chaoshai thada phara. Galatiali 5:19-21 Phasana kasa ot chi theipailaka: Chiya, shuikhangarui, makathar, mitun makhangatun; meomali kaphaning, laiva kashon, yangshi khangarok, khangama mikpai kashi, mahingkhavat, kakharam, michang kakhom; kaikhangarok, yuikashi, khamarip, khamang kashaili akachang kasa, hikathatha. Rida hangkahai thada hanglui kachina: hikatha kasa mina Varewui wungramli mazanglak mara. Romeli 13:13, 14 Kahor lungli okkathui thada ithum khalatta mashungrik eina zatsa; kakharar, khamarip, ayat makasa, khamathang. Ngamakhangazai, kala mikpai kashi ot masasa. Kha Jesu Christali sari thada ngavaida phasawui ningkachang shongfa maphamisa.

/16 NINGKATHAR MANGNA MASHAPMANA Matthew 22:37, 38 Jesuna ali hanga, "Nana nawui Proho Vareli nawui wuklung, nawui mangla, kala nawui ning tongda leishiphalungra." Hina mataimeikap kaje khare ningkhamina. Mark 16:17-22 ..."Kapha Oja, makashiman kharing samphang khavai ina khi sara khala?" Jesuna hanga. Ili khisada kapha hokhala? Vare maningla khipakha kapha malei mana. Ningkhami chi nana thei: Shaothat shara. Phopha shara, Li Shara, Kapik shara, Minam shara, kala Nava navali khaya shilu." Mipa china ngahankai, "Oja, saikora hi ina nganuilakha wui eina thuida mayonra kahaina." Jesuna ali yangkalaga leishi haida hanga, "Nawui khavat akha lei; chiya nawui khalalei chi ungyor haida kachamabingli mihaolu, chitha akha kazingramli nawui lan kazipkhuira; kala ithi shuralu." Chi shalaga khakshingak haida maishiri eina thuihaowa, kaja awui shimlui kachungkha leisai. Chansam 16:25 Miwui mangali mashungrik kahai thada shongfa akha lei, kha chiwui akatangshong kathi pongna.

/17 MACHIPATALU Galatiali 6:3 Khikha matheilaga, theisera da kaphaningpa chi ali khalatta kachipatna. Ephesusli 5:6 Khipakhana nathumli makhaninga tui eina machipat ranu, hikathawui vang eina Varewui malungkhavat chi kahang makhangana naobingwui tungli katana. I Corinthli 6:9, 10 Makhamashungabingna Vare wungramwui shimlui makamara da nathum matheimala? Matheinguihai alu, shamkasabing, amali kaphabing, phokaphabing, khaya khangarumbing khangasham, khaliabing, kakharambing, khamaripbing, khamashatbing, kala phamakashaobing khipakha Vare wungramwui shimlui maka mara. I Johnwui 3:7, 8a Naoshinaobing, khipanakha maminam ranu, khamashung kasa mi chiya, ishameiwui thada ala khamashung khangarongana. Morei kasaa chiya kameowui mina; kaja kharewui eina thuida kameona morei sai... Jameswui 1:22 Na khalatta machipat khavai kashamang eina mavaila kashawui athi shurda otla salu.

/18 MOREINA KATHI KHUIRA Jameswui 1:15 Kala ningkachang chiwui nao vaikahai eina morei pharai, kala morei rarkahai eina kathi shoka. Romeli 5:12 Morei hi okathuili mi akhawui eina haophoka, kala morei china kathi khuirai. Hithada sada kathi hi mi saikorali rashung haowa, kachiwui vang khala kaja mi saikora morei phunga. Ezekiel 18:20 Morei kasa mangla chi thiki kajina. Avavawui moreiwui vang naona makhanangpai mana, naona morei kasawui vang avavana makhanangpai mana; khamashunga chili mashunwui saman mira, makapha mi chili makaphawui saman mira. Romeli 8:6 Phasawui ot mangli ningkasang eina kathi shoka, kha Manglawui ot mangli ningkasang eina kharing kala chingri kahai samphanga. Chansam 11:19 Khangarongli nganingtit kache china ringra, kha makaphali kakharoma chi thira. Luke 15:32 "Nagato hi thihairasai, kha ringlui haira; shimanhairsai, kha samphangluishit haira, chiwui vang mathanda ringpha ngayiya."

/19 CHRISTANA KATHILI YUIHAIRA I Corinthli 15:3, 4 Mataimeikap kachi chi ina nathumli mikhamaronna. Kapikahai thada Christana ithum moreiwui vang thimi. Kala chizanhaida kakathuma thang ringluishita. Phongkhami 1:18 Kala Kharinga chi ina; I thihailaga, yanglu ara mashimanda ringda lei, kala kathi eina kazeiramwui sho ina singda lei. John 10:17,18 "Ishavana ili leishi, kaja ina iwui mangia samphanglui khavai chikat shapa. Khipanakha iwui eina mangapaikhui mana, kha iningkhan eina kachikatana. Ina mangla chikatshapa kala chi ina khuiluishapa. Pangshap hi ishavawui eina samkaphangna." Luke 7:14, 15a Kala ana kathi pet chili sakaza eina ngazonkazatbing china nganingmi haowa. Jasuna hanglui, "He mayara! Ina nali kahangna, ngakarthuilu." Chieina kathe chi thuipamda chan matuiphokuwa... John 11:43,44 Chiwui thili panglak eina vaoda hanga, "Lazarus, shoklu." Kathe china aphei, apang kala amai kachon eina teiphinser hailaga shokrasai. Jesuna athumli hanga, "Khalami haida ali zatngasaklu."

/20 VARIVARAWUI NINGKHAMI Khalatlui 5:7-21 "I maningla kateili Varenada phaning shara. "Atungshong kazingramlila, azingshong okathuilila, ngaleizingwui ngayilila khaleiya ot akhali ngaraichada sakhuilaga kameoli shar sashara; athumli makhorumpai mana, otramla mangathapai mana... "Leimamangli Proho Varewui ming singphapha shara; aremali ming kasinga chili thada machiho mara. "Sabbath zimiksho kathar eina mayonlu, nathumwui Proho Varena kakaso thada. Tharuk thang ot salu, nathumwui ot saikora salu; khu kashine thang nathum Proho Varewui sabbathna, chi thang ot masalak alu... "Nava navali khaya shilu, kaja nathumwui Proho Varivarana khami lam chili sangmeida okthui khavai. "Mi shaothat shara. "Phopha shara. "Li shara. "Ngaso kapamali satkharat shara. "Khongnainaowui shim kahao shara; khongna preivali kahao shara, awui rao-mayarnao ranu, rao-shanao ranu, kala awui khikhakha ranu."

/21 NA VAREWUI EINA MANGATHUMRARLAKMARA Chansam 15:3 Prohowui mik apam kachivali lei, kaphahla makaphalila theisera. Otsak 17:27 Vare ithum kachivali nganailak eina leilala, athumna Vare leiya da theikhavai kala samphang khavai athumna phakhui phalungra kachiwui kachihan eina kasana. Laa 139:8 kala 12 Kazing kalala na chili lei! Kazeiramli apilala na chili lei!... tangkhamangla nale matangmang mana, ngayala ngashun thada hora; kaja tangkhamangla nawui vanga kahorna. Job 34:21, 22 Miwui kazatpam chi ana thei, pheikar saikora theisera. Makapha kasa mina ngathum khavai tangkhamang kala ngayating kahai malei mana. Jeremiah 23:24 Makathei pamli mi akhana ngathum haowada ina matheirarma rala? Okathuilila kazingramlila I maleiser mala? da Prohona hanga. Luke 8:17 Khikhala jila maphong shokki kache ngathum kahai khikha malei mana, ngathum haida matheiki kachi kala kahorli mashokki kachi ot akhala malei mana.

/22 MASHIT KASANGBINGWUI MAKASHIMAN KACHOT KACHANG Laa 9:17 Makapha kasabing kala miyur saikora Vareli malaihai akha ngalei zingshong vara. II Peterwui 3:7 Tui eina sakakhui arui leida khalei kazing eina ngalei hi meiwui vang kazip kahaina, kaja, mashitkasangbingli bichar sathang shiman ngasak khavai haikahaina. Matthew 18:8 Chiwui vang eina napangna nilala, napheina nilala nali morei sangasak akha katakhui laga horhaolu; khikhala jila pang khani phei khani kalaga kazeiramwui meifali zangki kachipale pheipang makalala kharingali kazangna nawui vang phamei. Matthew 13:41, 42 Miwui Naomayarana awui kazingraobing shivatvada, athumna awui wungramwui eina hapkhano khangasaka kala makapha makhaya kasa athum chili kazipkhuira. Kala meifalungli horsang howra; apani chili chotchanglak eina chapta ahala tarira. Matthew 25:46 Chieina athumna katang makhavai shongran pamli vara, kha kaphabing china katang makhavai kharingpamli vara.

/23 BICHAR LEILI Romeli 14:12 Chieina ithum kachichawui sakahai chi Vareli hangphatra. II Corinthli 5:10 Ithum saikora Christawui bicharli kanganingser phalungra, kala mi kachiva ringlakha ana sakahai chiwui athi shurda kapha nilala kashi nilala saman samphangra. Hebrewnaoli 9:27 Mi saikora akha shida kathiwui thili Varena bichar sara. Otsak 17:31 Kaja ishamei ana kapangkhui kahaiya mayarnao akhana apukapaga hi khamashung eina chan ngazek khavai zimiksho akha kakkahaina; kala chiwui pongli ali kathiwui eina ringlui ngasakta mi kachivali ning nganungkhavai sami. II Peterwui 2:9 Mashun eina kasa mili bicharwui eina Prohona paisor eina huimishapa; kala bichar mara ranglakha eina tangda tandi samphangki kachi mili narhaishapa. I Johnwui 4:17 Okathuili ithumna ishamei thada kharingwui vang, bichar sathanghon ningnganung khavai leikashina pongngasaka.

/24 JESU CHRIST WUI LUKHAMASHAN 11 Corinthli 9:15 Aman shanla makakhui sonkhami hiwui vang Vareli ningshisa. I Peterwui 5:5b ..."Langkasoli Varena mamaya mana kha khangahuipali lumashanmi." Otsak 4:33 Kala paokazatbingna sashap pangshap leilak eina Proho Jesuwui ringkhaluiwui shakhi mi, kala athum saikorawui atungli Varewui sokhami leirai. Romeli 5:15 Kha Varewui sonkhami eina Adamwui morei chi mangaraicha mana; kachiwui vangkhala kaja mi akhawui moreiwui vang mi kachungkha kathi samphanga. Kha Varewui lukhamashan hiya chili hakmeikhara, kala chithada sada Jesu Christa, mi akha, chiwui lukhamashan manga eina mi kachungkhali sonkhami mi. Romeli 9:16 Chieina hi miwui ningkachang, ot kasali maleila, Varewui lukhamashanli lei. II Corinthli 8:9 Proho Jesu Christawui lukhamashan nathumna thei; kaja ana shanglaklala nathumwui vang eina chamhaowa; awui kacham chieina nathum shangkhavaina.

/25 NING KHANGATEI Matthew 3:2 Kala ana hanga, "Ning ngateilu, khikhala jila kazingramwui wungram chi nganaihaira." Otsak 17:30 Matheithangkhamei mangkhama atamli Varena yangmi, kha ara Ishameina apam kachivali mikumo saikorali ning ngatei khavai kasoi. Luke 13:3 Maningmana, kha nathumla ning mangatei akha chithada shimanserra. Otsak 2:38 Chieina Peterna hanga, "Ningateilu, kala nathumwui morei pheomi khavai Jesu Christawui ming singda mi kachiva rahiklu, chithakha Varena khami Mangla Kathara chi nathumna samphangra. II Corinthli 7:10 Khamashung eina ning khangatei china huikhamili thanzangmi, kala ningkakatat malei mana, kha okathuiwui ningkachotna thingasaka. Otsak 3:19 Chiwui vang eina nathumwui morei shimitpai khavai mai ngareiungda ning ngateilu, chieina Prohowui eina ngasamkakhui ringkapha atam chi rapaira.

/26 MOREI PHEOKHAMI Phongkhami 3:20 "Yanglu, ina khamongli nganingda shaoda lei; kachikathana iwui khon shada khamong shomi akha ina ali zangra kala ini phazarumra." Matthew 6:14 Khikhala jila nathumna mibingwui khayon khamang chi pheomi akha kazingramli khaleiya nathumwui navanala nathumli pheomira. Isaiah 55:7 Makapha mina awui shongfa horhaida, ning makathar mina kaphaning chihohaida, lukhamashan samphang khavai Proholi latungranu, kala ithumwui Vareli latung akha ana ngahankami serra. Mark 2:5 Athumwui shitkasang chi theida Jesuna, "Inao mayara, nawui morei pheomi haira" da hanga. Ezekiel 18:21 "Kachikatha makapha mina awui morei kasawui eina ning-ngateida iwui shiyan chikan mayon akha kala ainwui athi shurda mashun eina sakha, chikatha mi chi mathimara; machithit mara."

/27 OK-KATHUI OT LI NGATEIDA KHALEI Ephesusli 5:11 Athei makhamathei tangkhamangwui ot saki kachiwui vanga chi phongshokthalu. Isaiah 1:16 Pang machikkazak haifalu; makapha ot imikwui eina khuithui haolu, zakashi ot masaluialu. Titusli 2:11, 12 Khikhala jila mi saikorali huimi khavai Varewui lukhamashan chitheimi haira. Vareyan makhavai kala okathuiwui ningkachang chi horhailaga ningkhamazing eina, khamashung eina Vareli theida okthui khavai lukhamashan china ithumli tamchitheimi haira. Colossaeli 3:2 Nathumwui ning okathuiwui otli mashaphaila atungshongwui otli ningsanglu. I Johnwui 2:15, 16 Okathuili kala chiwui alungli khalei otbing chili maleishilu. Okathuili leishi akha Avavali leikashi chi awuili maleimana. Okathuili khalei morei kasali ningkachang, mikwui kakahao, okathuiwui ot eina langso khangai, saikora hi Avavawui eina kashok maning mana, okathuiwui otsera.

/28 PHARALUISHIT KACHI John 3:3 Jesuna ngahankai, "Kachangkhat eina ina nali kahangna, 'Kachikatha mapharaluishit na akha Varewui wungram chi matheirar mara.'" II Corinthli 5:17 Chiwui vang eina Christali zangakha a midhar onkahaina; yanglu kachama ot thuihaida kadhara rakahaina. I Johnwui 2:29 Christava khamashung-khangarongna da nathum thei; chiwui vang eina khamashung ot kasa mi kachiva Varewui eina kaphara naona da theiphalungra. I Peterwui 1:23 Shiman kapai maningla kha mashiman kapai naongara thada katang makhavai kharing tui china nathumli phara miluishit haira. I Johnwui 5:18 Varewui naona moreili mangaphum mana kachi ithumna thei, kaja Nao Mayarana ali khikha matha khavai yangmi, kala makaphaa china khikha masathuk mana. Ezekiel 36:26 "Ina ning kadhar sangmira, manglala kadhar sangmira; kala ngalungwui malung chi khuishok haida asawui malung phonmira."

/29 MOREILI KATHICHRISTALI RINGKASHOK Galatiali 5:24 Kala Christawuili kazangbing china phasawui sakhangai kala ningkachang chili phasa eina ngasoda krushli shaothat ngarokhaira. Ephesusli 2:1 kala 6 Khare kachang kahang manganamada morei kaphungwui vang nathum manglali thida leisai... Jesu Christali kazangwui vang kazingram ngaleili mungkhavai ithumli ring ngasaka. I Peterwui 2:24 Moreili thihaida ithumna khamashung khangarong eina okthuipai khavai Christana ithumwui morei aphasali ngasoda thingtungli phungmi haira. Awui khamakaza chieina nathumli raimi haira. Romeli 6:2 kala 11 Ithum moreili thihaira, chitha akha kathada chiwui lungli ringching paira khala? ... Chithada sada nathumla moreili thihailaga Varewuili ringda lei kachi phaning phalungra. Colossaeli 3:1 Chiwui vang eina Christali ngasoda ringluishithaowada. Christana Varewui yashongli pamda khaleipam atungshong chiwui otmag phalu.

/30 KATANGMAKHAVAI MIRIN John 3:14, 15 Kala, Mosesna lamhangli phara khangkaka chithada Miwui Naomayaralila khangka phalungra. Kala ali shitkasangbing katang makhavai kharing samphangra. Romeli 6:23 Kachiwui vangkhala kaja moreiwui saman kathina, kha Varewui thada sonkhami chi ithumwui Proho Jesu Christawui lungli katang makhavai kharingna. John 3:36 Naomayara chili shitkasanga china katang makhavai kharing samphangra; kahang makhanganaa china kharing kaho matheimara, kha Varewui malungkhavat awui tungli lei. John 5:24 "Kachangkhat eina ina nathumli kahangna, kachikathana iwui tui nganada ili kashiratali shitsangakha katang makhavai kharing samphanghaira. Ali bichar masamara, kha kathiwui eina kanlaga kharingli shokkahaina." Galatiali 6:8 Phasawui ningkachang athi shurda lingsanghai akha, kashui hatkhuira; Manglawui athi shurda lingsanghai akha katang makhavai kharing samphangra.

/31 KAHUI SAMKAPHANGWUI THEISHINGKAKHUI John 14:21 "Iwui ningkhami mayon akha, a ili leikashena. Ili leikashe chili ishavanala leishira; Inala ali leishida ikhalatta ali phongmira." Isaiah 32:17 Kala khamashung-khangarongwui athei chingrikahai ngasara, khamashung khangarong athei chiya katang makhavai vari kahai kala shitkasangna. I Johnwui 3:18, 19 Inao ngara, male eina kala tui mang eina maleishi khaningla kha otsak eina ngashada khamashung eina leishi phahlungra, Ithum khamashungli zanghaira kala Varena ngasomida lei kachi hieina theipaira. Romeli 8:16 Hi Mangla china ithumwui manglali ngarumda, ithum Varewui naongarana kachi chitheikhamina. Galatiali 4:6 Ara awui nao sahaoda Varena Anao Mayarawui mangla ithum wuklungli sangmida, "Abba, Ava!" kahona. I Johnwui 4:13 Kachangkhat ithum Vareli okthui kala awui ithumli zangmi kachi hithada theikhui kaja ana Mangla Kathar ithumli mihaira.

/32 CHRISTA KACHANGWUI VANG RINGPHAKHAMI Isaiah 12:3 Huikhami rakhong eina tara sokkhuida, nana mathanthup mangra. John 15:11 "Ina nathumli kahang hi iwui ringkapha chi nathumli leikhavai kala nathumwui ringkapha chi kashungchao khavai kasana." John 17:13 Ara I nawuili rarali: kala ina okathuili kahang hiya athumna iwui ringkapha chi ningli pemting eina samphang khavaina. Romeli 14:17 Khikhala jila Varewui wungram hiya khamang kaza maningmana, kha Mangla Katharana khami khamashung khangarong, chingri kahai kala ringkapha china. Galatiali 2:20 I Christali ngasoda krushli thihaira; ringda khalei hi I maninglui mana, kha Christana ili kharingna. Arui ina ringda khalei hi Varewui Naomayara, ili leishida amangla chihokhame chili shitkasang manga eina kharingna. Laa 16:11 Nana ili kharinga shongfa chitheimi, nawui mangali khamathan pemtinghai, nawui ngalemli katang maleila nawui khangachonli ringkapha mang lei.

/33 PROHOWUI KAHANG NGANAPHALUNGKIKACHI Rao sara da nathumna mili mayahai akha, awui kahang khangana raonaona; moreiwui rao sa-akha kathili thansangra, kahang khanganali zang akha khangarongli zangra kachi nathum matheimala? Romeli 6:16 II Thessalonicali 1:7-9 Kachot kachang kaphung nathum ithumli ngasoda ngasamkhui ngasakra. Pangshap khalei kazingraoli ngasoda meiwon thada Prohona kazing eina kata chitharan: Vareli makatheibing kala Proho Jesu Christawui Paokaphali mashitkasangbing chili athut khuira. Katang niakhavai shongran chi athumna samphangda Prohowui eina kala sashap pangshapwui tekhamatei chili mazang mara. Khalatlui 11:26-28 "Yanglo, sokhami khuitha nika khoilkashi khuitha nikhala? Ina hangkahai Proho Varewui ningkhami ngana akha sokhami samphangra, kha ningkhami mangana mada, nathumna makatheiya kameoli phaning akha khonkashi ngasara. I Samuel 12:15 Chi maningla, awui kahang manganamada Prohowui ningkhami mamayon akha nathumwui tunglila, awungawui tunglila Prohowui kasaka tandi tara.

/34 CHRISTALI HANGPHAT PHALUNGKIKACHI Matthew 10:32, 33 Chieina ili mibingwui mangali khamaya mi kachivali kazingramli khaleiya Ishavawui mangali inala mayamira. Kha mi bingwui mangali ili makhamaya chili, inala kazingramli khaleiya Ishavawui mangali mainayami mara. Romeli 10:9, 10 Kaja nawui khamorna Jesu hi Proholaka da hangphatakha, kala nawui wuklungli Varena Ishamei ali kathiwui eina ringshok ngasaka da shitsangakha, nali huimira. Kaja mikumona awui wuklung eina shitkasangwui vang mashungmi, kala awui khamor eina hangphatta kahui samphang ngasaka. I Johnwui 2:23 Anao mayarali makhamaya mi kachivana Avavalila masamphang mana. Anao mayarali khamaya china Avavalila saniphanga. Luke 9:26 Kachikathana iwui vang kala iwui tuiwui vang khayak akha Miwui Naomayarana, awui avavawui kathara Kazingraowui tekhamatei eina rathanghon, alila lachahowra.

/35 ITHUMWUI YANGSHI KHAMATAIA SATAN Otsak 26:18 Athumwui mik rakngasak khavai, kala tangkhamangwui eina kahorli shokta satan pangshapwui eina Vareli ngareiungluida athumna morei kapheo samphangda, shitkasang manga eina tharmatheng kahaiya Varewui mibing chiwuili zangpaira. Matthew 4:1 kala 10, 11 Chiwui thili Jesuli chipeena suikhavaiwui vang manglana lamhangli thanvai... Chieina Jesuna ali hanga, "Thulu, Satan, khikhala jila hithada kapihaida lei, 'Nana nawui Proho Vareli khorumphalungra, kala amangli otram ngathaki kajina. Chieina chipee china awui eina thuihaowa, kala yanglu, kazingraobingna ishameili otram rangathamiya." I Peterwui 5:8 Ngaran kazaklu, kala ngasharlu. Nathumwui yanggashe chipee china kazingkha thada khonglaga kachikathali shaikida phazatta lei. II Thessalonicali 2:9 Sakashe chipeena Satanwui pangshap eina shokta mina masakharar ot makhamashung khudam kala matakkhakkhaka hai ot kachungkha sachitheira.

/36 SATANLI KHAYUI I Johnwui 3:8 Morei kasaa chiya kameowui mina; kaja kharewui eina thuida kameona morei sai... Hebrewnaoli 2:14 Ana 'Ichina' kahobing chi phasa-khavai ashee-kazang mi sathui haoda Jesula athum thada miwui khangacha chili zanga. Kala kathili khamunga Chipeeli yuikhavai kasana. Romcli 8:35 kala 37 Chitha akha ithumli khipana Christawui leikashi chieina ngatei ngasakshaprakhala? Kachot kachangnaka, ringkashinaka, rekakhareknaka, chamreinaka, kachon makhangavainaka kalakashinaka, raikhaina khala? ... Maningmana, ithumli leikashe chiwui manga eina ot saikorali ithum khayuiana. Jameswui 4:7, 8a Chiwui vang eina Vareli mayalu. Kameoli mamayalu, chieina nathumwui eina yamhowra. Vareli ngavapmeilu, ana nathumli ranganaimira... II Thessalonicali 2:8 Chieina sakashe akha chi kashok chitharan Prohowui khakkha eina kala awui kharawui tekhamatei china sathathaora.

/37 SAKHANGATHABINGWUI ALUNGLI LEIKASHI John 21:16 Jesuna all hangluishita, "Johnwui naomayara Simon, na ili leishila?" Ana "Mha, Proho, ina nali leishi kachi nana thei." Jesuna ali hanga, "iwui yaobingli homlu." I Corinthli 13:1 Ina tuiyur kachungkha themda, kazingraowui tui eina matuilala leikashi malei akha, kanta kashao kala kortar kakating kathana. Galatiali 5:22, 23a Kha Manglawui eina leikashi, khamathan, chingri kahai, jakhami, malungkhanim, kapha ot, ningtongda shitkasang, lumashan kathei, kala khalatta khangarin... I Johnwui 3:14 Ithum kathiwui eina kharingli kanshok haira kachi ithumna thei kaja ithumna ichina ngarali leishi, Maleikashebing chi aruila thida lei. I Johnwui 4:20 Kachikathana "Vareli leishi" jilaga achinali ningkachai akha a kakapikna. Kaja ana kathei achinali maleisha akha kathada makatheiya Vareli leishipairakhala?

/38 JESU CHRISTAWUI RINGKHALUI Mark 16:9 Jesuna ringlui kahaiwui thili, haptawui khare thang ngathorthakva ana Magdalawui Mary kaja kameo shini yamshokmi kahaipava chili rithuida rachitheiya. Otsak 10:39-41 Kala ana Jehudiwui ngaleilila Jerusalemlila sakahahai saikora chiwui shakhi ithumna. Ali athumna thingtungli khangkada shaothathaowa. Kha Varena kakathuma thang ringngasakta phonglak eina chitheimi haira. Mi saikorali maningmana, kha ana kathiwui eina ringkashokwui thili ali ngasoda phashak phaza khangaruma. shakhiwui vang Varena kapangkahaiya ithumli kachitheina. John 20:26-28 Hapta akha shanglaga sakhangathabing khamong shunghailaga kaziplui shita, kala Thomasla chili zanga. Khamong rarser kahaina, kha Jesuna athum wui ngachaili ranganingda hanga, "Nathumli chingrihai ranu." Kala Thomasli hanga, "Hivak napang ngaranrada ipang singyanglu; kala iwui arili khamayanglu. Ning khamaong maleila shitsanglu." Thomasna ngahankai, "Iwui Proho kala iwui Vare."

/39 ITHUMWUI TEK-KHAMATEI KACHIHAN RINGKHALUI Romeli 1:4 Kala tharkhamatheng Manglawui athi shurda kathiwui eina ringkashok pangshap chieina ali Varewui Naomayara hoi. Romeli 6:3-5 Ithumna Jesu Christali khangarumwui rakahik kasa chitharan, awui kathili khangarumwui rakahikla kasana da nathum matheimala? Chithada sada ithumwui rakahik chieina Christali ngasoda chifarum kahaina kala awui kathi chili ngarum haira. Avavawui tekhamatei pangshap china ali kathiwui eina ringshok khangasak thada, ithumla kathara mirin chi ringpaira. Ithumna awui kathi thada, thirum haiakha, ithumla awui ringkhalui thada ringluishitra. Matthew 16:21 Chiwui eina thuilaga Jesuna awui sakhangathabingli Jerusalemli vaphalungra, kala hangvanaobing, pangmon akhavabing kala ain kathembingwui eina kachot kachang tarakha samphangra kala shaokathatla shaothatra. kala kakathuma thang ringshok luishitra da tamchitheiphoka.

/40 PROHOWUI ALUNGLI KATHAR II Timothyli 2:15 Kachichawui otli khaya khamala maleila, Varewui tui mashungrik eina tamkachitheiya mi thada, Varena mayami khavai panglak eina hotnalu. Luke 1:74, 75 Ithumwui mirin peida khangachee maleila, kathar kala khamashung khangarong eina ali otram ngatha khavaina. I Peterwui 1:2 Avava Varena awui khangaran athi shurda, awui Manglana nathumli kathara mi sangasak khavai, kala Jesu Christawui ashee eina pheomi haida awui kahangngana khavai kapangkhui kahaina. Lukhamashan chingrikahai nathumli mataisangmi ranu. II Corinthli 7:1 Ivanao ngara, ot saikora hi ithumli ngashitmi haira. Chiwui vang eina phasalila manglalila mamakhao ngasakla Vareli khangachee eina ngasoda tharlak eina okthuisa. II Timothyli 2:21 Kachikatha mina makaphawui eina a khalatta tharngasakhai akha kasaka otwui vang shichinra, kaja khamatha ot sakhavai awui akhavali chikat kahaina.

/41 PROHOWUI ALUNGLI KATHAR Isaiah 35:8 Kala chili chanrei akha leira, chili kathara shongfa hora. Makathara yurna chili mazatpai mara, mangkhamabingna machonmakan paimara. Ephesusli 4:24 Varewui thada sami kahai kadhara manglawui sari ngavailu, kala china khamashung mirinli phongmi, chiya khangarong eina katharna. Matthew 3:11 "Ning khangateiwui vang ina nathumli tara eina rahik khamina, kha iwui thili khara a chiya ili reimei, ina awui pheihop phungkida matik machamana. Ana nathumli Mangla Kathara kala mei eina rahikmira." Hebrewnaoli 13:12 Chiwui vang Jesula keinungwui ayarli thimi, kaja awui ashee eina morei pheomi khavaina. Ephesusli 1:4 Okathui masarang lakha khamakhao maleila Christali ngasoda kathara sakhavai ithumli rida kapangkhui kahaina. I Johnwui 1:9 Ishameia ningkatonga, khamashung Vare sathuda, ithumna morei hangphat akha, khayon khamang pheomida morei tharmia.

/42 MANGLANA PEMTINGKAHAI MI Ezekiel 36:27 Kala iwui mangla sangmida iwui shiyan yang-ngasakra kala chikan ningkachang eina mayon ngasakra." Otsak 13:52 Kala sakhangathabing ringkapha kala Mangla Katharna pemting haowa. Romeh 8:9 Kha Varewui Manglana nathumwui wuklungli kachangkhat eina pamda leiakha, nathumna phasawui athi mashurla Manglawui athi shurda lei. Kachikathana Christawui Mangla chi malei akha Christawui maning mana. Luke 11:13 "Nathum maphalala, nathumwui naongarali khamatha ot mithei akha kazingramli khalei avava china ali kapobingli kayakha mataida Mangla Kathara mira khala?" Otsak l:8a Kha Mangla Kathara samkaphang chitharan, nathumna pangsnap samphanglakra... Otsak 4:31 Seiha sachangkahai eina athumna kazipkhavai pam chi nganuk haowa; kala athum saikora Mangla Katharana pemhaida Varewui tui pinglak eina matuiya.

/43 CHRISTIANBINGLI MATAKHAK KAHAI NGASHITMIKAHAIBING Laa 37:3 Proholi shitsangda kapha ot salu, chithada nana ram chili panra kala ning taphup haira. Isaiah 66:2 "Ot saikora ipang eina sakhui, chieina saikora hi iwuina da Prohona hanga. Kha malung nimla nihgkakashak, iwui tuili khangachee mi chili ina yangki kachina." I Peterwui 4:12, 13 Leikashebing, ngateihang kahai hangkhavai makhalei sipkasawui changkhayang ralala matakhak kabai masalu. Kha nathumna Christali chotchang khangarumna da mathanthalu, chieina awui tekhamatei phongkashok chitharan pongra. Phongkhami 21:4 "Athumwui chara ana mitmiserra; kathi, malungkharing, kachot, chapkhangachala maleilui mara, kaja kachama chi kanthui haira!" Hebrewnaoli 12:7 Avavana hangkhamachin chili va jilu: kakhanang samkaphang chi eina nathum Varewui naona kachi theikhui. Avavana mahangkhamachin nao khipa leikhala?

/44 KASUIYALI NGASHITMIKAHAIBING Hebrewnaoli 2:18 Alila suida kakhanang samphang kahaiwui vang, ara rakasuibing chili ana ngachonmi shapa. Laa 34:19 Khangarongawui sipkasa kachungkha lei, kha Prohona chiwui eina kanmi. I Corinthli 10:13 Mina mayuikharar kasui chi nathumli maralak rangli. Vare ningtonglaka, nathumwui kashap chili langda ishameina nathumli masui ngasak mana. Kha kasui khara eina nathumna nganingtitta yamshok khavaiwui shongfala ngaranmi. Romeli 16:20a Chieina chingrikahai Varena Satanli nathumwui phei eina naikazam ngasakra... Isaiah 43:2 "Tara lungli zatlala ina ngasomira, kongli kanlala makheithui mara; mei tungli zatlala machui mara, meiwonna machuitarar mara." Romeli 8:28 Vareli leikashebing, khayuibingwui khayuiya, kala awui ngaran kahai athi shurda hokhui kahaiya athumli ngasoda, ana kapha ot sangarumchingda lei kachi ithumna thei.

/45 KHAYUI BINGLI NGASHITMIKAHAIBING Phongkhami 21:7 "Hi khayuiawui shimluina kaja I awui avava sara, ana inao sara." Phongkhami 2.7 "Manglana churchbingli kahang chi khana kakana nganakhuilu. Khayuiya chili, Varewui Paradiseli khalei kharinga thingrongwui athei chi shaingasakra." Phongkhami 3:12 "Khayuiyapa chili iwui Varewui shimwui pakra akha sangasakra; ana chiwui eina ayar mashok luilak mara. Kala awui tungli iwui Varewui ming, iwui Varewui keinungwui ming, iwui Varewui eina kazingram eina taki kache kadhara Jerusalem chi ina kapi sangra; kala iwui kadhara mingla kapisangra." Phongkhami 3:21 "Khayuiyapa chi iwui Wungpamkhongli ili ngasopam khavai ina ngaranmira, inala yuihaida ishavali ngasoda, awui Wungpamkhongli, Ili chipamkahai thada." Phongkhami 3:5 "Khayuiyapa chili chithada kachara sari ngavaimira, ina awui ming kharinga lairikwui eina masashimitlak mara; kaja ishavawui kala awui raobingwui mangali ina hipawui ming hangmira."

/46 NGALA KAPANGWUI PONGLI VARENA ITHUMLI KAHANG Matthew 5:32 Kha ina nathumli kahang hina, kachikathana apreivana phokaphawui vang maningla khangateiwui vang panghai akha apreiva chili phopha ngasaka, kala kachikathana pangkahaiva chili ngakumakha mipa chi phokaphana. Romeli 7:2, 3 Fathui kahaiva shanaoli agahara ringlakha eina tangda ainna agaharawui azingli leingasaka; kha agahara thikahai eina awui azingli khalei ain chiwui eina ningkhan sahaowa. Hithada sada, shanao china agahara ringlakha mayarnao khangatei akhali aleihai akha, ali phokaphava hora. Kha agahara thihai akha ain chiwui eina chihomi haira, kala mayarnao khangatei akhali ngakumlala, phokapha maningmana. I Corinthli 7:10, 11 Ngakum kahaibingli ina kakasona, iwui tui maningmana, kha Prohowuina. Preivana gaharawui eina mayampai mana; thuihai akha rameipamphalungra; chimaningakha latungluira, kala gaharana preivali mapangpai mana.

/47 CHRISTAWUI RAKAKHANE Phongkhami 3:11 "Yanglu I thakta rara: nathumwui khalei chi singtitlu; nawui kuihon kateina makhuithui khavai." Mark 8:38 "Vareli makathei makapha thot hili kachikathana ili kala iwui tuili lachahai akha, Miwui Naomayarana Avavawui tekhamatei kathara kazingraobingli ngasoda khara tharan, alila lacha howra." Matthew 24:30 Atam chitharanli kazingramli Miwui Naomayarawui machutkakhui chi theira, chiwui thili okathuiwui miyur saikora sifada chapra kala athumna Miwui Naomayarali pangshap tekhamatei eina ngasoda kazingramwui muiyatungli khara chi theira. John 14:3 "Kala nathumwui vang pam angaran hailaga nathumli rahokhuiluira chieina I khalei pamli nathumla leira." Matthew 24:27 Khikhala jila zimikshoshong eina rikhan ngasheikhara china zimiktunshong vashungda horkhava thada, Miwui Naomayarana kharala chithara.

/48 CHRISTAWUI RAKAKHANE Luke 21:27 "Chiwui thili Miwui Naomayarana awui tekhamatai pangshap eina ngasoda muiya tungli khara chi theira." Phongkhami 16:15 (Yanglu, Ina khali thada rara, ning ngasharda khaleiapa chili kala mahairanu, khamasai eina yaothuilaga, awui kakhayak samphangpaishinada awui kachon manor kata chili kala mahairanu.) Otsak 1:11 Galileenaobing, nathum kachiwui vang eina kazingramli ngashankhayang khala? Nathumwui eina kazingramli khuika kahai, Jesu hi, arui kazingli kaka kathei hi takam eina ana latraluira." Matthew 16:27 "Khikhala jila Miwui Naomayarana awui kazingraobingli ngasoda avavawui tekhamatei eina raki kachina, chitharan ana mi kachivali kachichana sakahai ot chiwui saman mira." I Johnwui 3:2 Leikashebing, ithum ara Varewui naongarana, kha ithum kathasani khala kachi arui matheirar mana. Kha ithumna thei; Christana khara chitharan ithumla a thahaowa; kaja a hithai kachi ithum mik eina theira.

/49 VARIVARAWUI TUI Laa 119:105 Nawui tui ipheiwui thaomeina, iwui shongfawui kahorna. Laa 119:11 Nawui ain iningli phumhaira, nawui mangali morei masakhavai! Matthew 22:29 Kha Jesuna athumli ngahankada hanga, "Nathum yonhaira, khikhala jila nathumna kathara lairikwui tuila kala Varewui pangshapla niathei mana. II Timothyli 3:16 Kathara tui saikora hi Varena kasat khami tuina, chieina tamkachitheiwui vang, hangkhamachinwui vang, mashungkhangasakwui vang, kala khamashung khangarongli rakkhavaiwui vang kannai, kaja. Luke 21:33 Kazingram eina okathui shiman howra, kha iwui tui saikora hi mashimanlak mara. Laa 119:89 He Proho nawui tui chi, mangathalakla kazingramli katang mavaila leichingra. II Peterwui 1:21 Kaja, miwui ningli kaza chi maranphapha kachi maningmana, kha manglana kasatsangmida Varewui tui khamatuina.