वचन मनू जुयाः झाःगु
1 दक्वसिबय् न्हापा हे वचन दु, अले थ्व वचन परमेश्वर नाप दु। थ्व वचन हे परमेश्वर खः। 2 वय्कः न्हापांनिसें हे परमेश्वर नाप दी। 3 फुक्कं सृष्टि यानादीगु वय्कलं हे खः। फुक्क सृष्टि परमेश्वरं वय्कःया पाखें हे यानादीगु खः। सृष्टि जूगुलिइ छुं नं वय्कः मदय्कं जूगु मदु। 4 जीवन वय्कःयाके दु। व हे जीवन मनूतय्त मदय्कं मगाःगु जः खः। 5 थ्व जः खिउँथाय् झः झः धाय्क थी, खिउँगुलिं थ्व जःयात त्वपुइ मफुत। 6 अबलय् परमेश्वरं छ्वया हःम्ह यूहन्ना धाःम्ह छम्ह मनू दु। 7 थ्व मनू जःयागु खँ थः हे साक्षी जुयाः फुक्कसितं कनाः विश्वास याकेत वःम्ह खः। 8 थ्व मनू थः हे जः मखु, बरु जः फुक्कसितं म्हसीका बीत वःम्ह खः। 9 फुक्क मनूतय्गु नुगलय् थीगु धात्थेंयागु जः ला संसारय् झाया च्वंगु दु। 10 वय्कः संसारय् दी, वय्कलं हे संसार सृष्टि यानादीगु जूसां संसारय् च्वंपिन्सं वय्कःयात म्हमसील। 11 वय्कः थः हे मनूतय्थाय् झाल। अय्नं थः मनूतय्सं वय्कःयात नाला मकाः। 12 वय्कःयात ग्रहण यानाः विश्वास याःपिन्त धाःसा परमेश्वरया सन्तान जुइगु हक बियादिल। 13 थुपिं मनूतय्पाखें बुइका तःपिं मखु, बरु परमेश्वरं बुइका तःपिं परमेश्वरया सन्तान खः। 14 वचन मनू जुयाः झीपिं नाप च्वं झाल। वय्कः दया माया, अले सत्यं जाःम्ह खः। जिमिसं वय्कःया महिमा खना, गुगु महिमा बाःया याकः काय्या थें च्वं। 15 वय्कःयागु खँ कँकं यूहन्नां थथे धाल – “जि स्वयाः लिपा झाइम्ह जि स्वयाः नं तःधंम्ह खः छाय्धाःसा वय्कः जि बुइ न्ह्यःनिसें दुम्ह खः। अले जिं धयाम्ह वय्कः हे खः।” 16 वय्कःयागु गुबलें मसुइगु दया मायायागु धुकुतिं झीसं यक्व दया माया काये खंगु दु। 17 व्यवस्था मोशायागु पाखें बियादिल, येशू ख्रीष्टयागु पाखें धाःसा परमेश्वरया दया माया व सत्य दत। 18 परमेश्वरयात सुनानं गुबलें हे खंगु मदु। अय्नं बाः नाप च्वंम्ह याकः काय्नं हे वय्कःयात क्यनादीगु दु।
यूहन्नां येशूयागु साक्षी ब्यूगु
19 यरूशलेमय् च्वंपिं यहूदी नायःतय्सं पुजाहारी व लेवीतय्त “यूहन्ना धाःम्ह सु खः” धकाः न्यंके छ्वया हल। यूहन्नां इन्कार मयासे स्वीकार यानाः लिसः बिल – 20 “जि मुक्ति बीम्ह ख्रीष्ट मखु।” 21 अले इमिसं वयाके न्यन – “अय्सा छ एलिया खः ला?” वं धाल – “मखु।” “अय्सा छ व अगमवक्ता खः ला?” वं लिसः बिल – “मखु।” 22 अले इमिसं वयात थथे धाल – “अय्सा छ सु खः लय्? जिमित न्यंके छ्वया हःपिन्त जिमिसं लिसः ब्यू वने मानि। छं थःत सु धकाः मतिइ तया?” 23 अले वं धाल – “यशैया अगमवक्तां धाःथें जि परमप्रभुया निंतिं लँ छिंका ब्यु धकाः मरुभूमिइ हाला जुइम्हय्सिया सः खः।” 24 थुपिं फरिसीतय्सं छ्वया हःपिं मनूतय्सं 25 हानं न्यन – “छ मुक्ति बीम्ह ख्रीष्ट नं मखु, एलिया नं मखु, अले व अगमवक्ता नं मखु धयागु जूसा छं छाय् बप्तिस्मा बियाच्वनागु?” 26 वं लिसः बियाः धाल – “जिं ला छिमित लखं बप्तिस्मा बिया, अय्नं छिमिगु पुचलय् छिमिसं हे म्हमस्यूनिम्ह छम्ह दनाच्वंगु दु। 27 जि स्वयाः लिपा झायादीम्ह वय्कः हे खः। वय्कःयागु लाकां पुतु फ्यनेत तकं जि मल्वः।” 28 यर्दन पारिइ बेथानिया धाःगु थासय् यूहन्नां बप्तिस्मा बिया च्वंथाय् थ्व खँ जूगु खः।
येशू परमेश्वरया भ्याःचा
29 कन्हय् खुन्हु यूहन्नां थःथाय् येशू झायाच्वंगु खनाः धाल – “संसारयागु पाप क्षमा यानादीम्ह परमेश्वरया भ्याःचा वय्कः हे खः। 30 जिं धया च्वनाम्ह मनू वय्कः हे खः – ‘जि स्वयाः लिपा झाइम्ह मनू जि स्वयाः तःधं, छाय्धाःसा वय्कः जि स्वयाः न्हापांनिसें हे दुम्ह खः।’ 31 जिं नं वय्कःयात म्हमस्यू, अय्नं वय्कःयात इस्राएलीतय्त म्हसीके बी माःगुलिं जिं लखं बप्तिस्मा बियाच्वनागु खः।” 32 अले वं थथे धकाः साक्षी बिल – “जिं पवित्र आत्मायात स्वर्गं सुकुभतु थें कुहां वयाः वय्कःया म्हय् जूगु खना। 33 जिं थः थःम्हं तुं वय्कःयात म्हमस्यू, अय्नं जितः लखं बप्तिस्मा बीके छ्वया हःम्हय्सिनं थथे धयादिल – ‘गुम्हय्सिके आत्मा क्वहां वयाः च्वनी, पवित्र आत्मां बप्तिस्मा बीम्ह व हे खः।’ 34 थ्व जिं खनागु दु, उकिं परमेश्वरया काय् वय्कः हे खः धकाः जिं साक्षी बियाच्वनागु खः।”
येशूया न्हापांयापिं चेलात
35 कन्हय् खुन्हु यूहन्ना हानं निम्ह चेलात नाप व हे थासय् दनाच्वन। 36 येशू झायाच्वंगु खनाः वं धाल – “का स्व, परमेश्वरया भ्याःचा।” 37 थ्व न्यनाः चेलात निम्हं येशूया ल्यू ल्यू वन। 38 वय्कलं लिफः स्वयादीबलय् इपिं वयाच्वंगु खनाः इमित धयादिल – “छिमिसं सुयात माला च्वनागु?” इमिसं धाल – “गुरूजु, छि गन च्वनादी?” 39 वय्कलं धयादिल – “जि नाप वा, अले खनी।” इपिं वय्कः नाप वन, अले इमिसं वय्कः च्वनिगु थाय् खन। इपिं अन थ्यंबलय् बहनिसिया चार बजे जूगुलिं इपिं वय्कः नापं अन हे बाय् च्वन। 40 यूहन्नां धाःगु खँ न्यनाः येशू नाप वंपिं मध्ये छम्ह मनू सिमोन पत्रुसया दाजु अन्द्रियास खः। 41 वं वनाः थः किजा सिमोनयात मात्तुमालाः नापलाना धाल – “जिमिसं मसीह धाःम्ह मुक्ति बीम्ह ख्रीष्टयात नाप लाये धुन।” 42 वं वयात येशूयाथाय् ब्वना हल। वय्कलं वयात स्वयाः धयादिल – “छ ला योआनेसया काय् सिमोन खः। आवंनिसें छन्त केफास धाइ।” केफास व पत्रुसया अर्थ “ल्वहं” खः।
फिलिप व नथानेलयात सःतादीगु
43 कन्हय् खुन्हु येशूं गालीलय् झायेगु मनं तुनादिल। वय्कलं फिलिपयात नाप लानाः धयादिल – “जि नाप वा।” 44 फिलिप नं अन्द्रियास व पत्रुसपिनिगु शहर बेथसेदायाम्ह हे खः। 45 फिलिपं नथानेलयात नापलानाः धाल – “मोशां व्यवस्थाय् धया थकूम्ह व अगमवक्तातय्सं च्वया थकूम्ह नासरतय् च्वंम्ह योसेफया काय् येशूयात जिमिसं नाप लाये धुन।” 46 नथानेलं वयात धाल – “नासरतं नं छुं भिंगु गतिलाःगु खँ वइ ला?” फिलिपं वयात धाल – “वयाः छं हे स्व।” 47 नथानेलयात थःथाय् वयाच्वंगु खनाः येशूं वयात धयादिल – “छ ला छम्ह तसकं स्वजाम्ह इस्राएली खः।” 48 वं धाल – “छिं जितः गथे म्हसील?” वय्कलं लिसः बियादिल – “फिलिपं छन्त सःते न्ह्यः हे जिं छन्त यःमरिमाया क्वय् खना।” 49 वं लिसः बिल – “गुरूजु, छि ला परमेश्वरया हे काय् खः। छि ला इस्राएलया जुजु हे खः।” 50 वय्कलं धयादिल – “जिं छन्त यःमरिमाया क्वय् खना धकाः धयागुलिं छं विश्वास यानागु ला? छं थ्व स्वयाः नं ततःधंगु खनीतिनि।” 51 अले वय्कलं वयात धयादिल – “धात्थें धात्थें हे जिं छन्त धाये – छिमिसं स्वर्ग चाःगु खनी, अले परमेश्वरया स्वर्गदूतत परमेश्वर व मनूया काय्या दथुइ थहां क्वहां जुयाच्वंगु खनी।”
काना शहरय् जूगु ब्याहा भ्वय्
1 कंस खुन्हु गालीलय् च्वंगु काना शहरया छखा छेँय् ब्याहा भ्वय् जुयाच्वन। येशूया मां नं अन हे दु। 2 येशू व चेलातय्त नं भ्वजय् सःतातःगु दु। 3 दाखमद्य फुगुलिं येशूया मांनं वय्कःयात धाल – “इमिके दाखमद्य मन्त।” 4 अले वय्कलं धयादिल – “मय्जु, जिं छु याये माःगु खः, व छिं धयाच्वने माःगु मदु। आःतक जिगु ई मवःनि।” 5 अय्नं वय्कःया मांनं च्यःतय्त धाल – “वय्कलं छु धयादी छिमिसं व हे या।” 6 यहूदीतय्गु चलन कथं च्वख यायेत अन सछि-सछि लिटर ति न्ह्यंगु ल्वहंयागु खुगः त्यप तयातःगु दु। 7 येशूं इमित धयादिल – “फुक्क त्यपय् जाय्क लः ति।” अले इमिसं फुक्क त्यपय् जाय्क लः तल। 8 वय्कलं इमित धयादिल – “आः भतिचा तुयाः मूभलिंयाथाय् यंकि।” अले इमिसं यंकल। 9 मूभलिंनं व लःया सवाः कयास्वःबलय् दाखमद्य जुयाच्वने धुंकल। वं थ्व गनं हःगु धकाः मस्यू। लः तःपिं च्यःतय्सं जक स्यू। अले वं जिचाभाजु जूम्हय्सित सःताः धाल – 10 “मनूतय्सं भिंगु दाखमद्य निं न्हापालाक त्वंकी, अले भचा भचा काये धुंकाःतिनि मभिंगु दाखमद्य त्वंकी। छिं धाःसा आःतक नं भिंगु दाखमद्य ल्यंका हे तलतिनि।” 11 वय्कलं गालील जिल्लाया काना शहरय् दक्कलय् न्हापांगु थ्व अजूचायापुगु ज्या यानाः थःगु महिमा क्यनादिल। थथे यानादीगुलिं चेलातय्सं वय्कःयात विश्वास यात। 12 अनं लिपा वय्कः थः मां, किजापिं व चेलात नाप कफर्नहुमय् झायाः अन हे छुं न्हि च्वनादिल।
येशूं देगः शुद्ध यानादीगु
13 यहूदीतय्गु छुत्काराया नखः न्ह्यःने थ्यंगुलिं येशू यरूशलेमय् झाल। 14 वय्कः देगलय् झाःबलय् द्वहं, फैचा, व सुकुभतु मियाच्वंपिं व धिबा हिलीपिं च्वनाच्वंगु खन। 15 अले वय्कलं खिपः छपु निलाः कोर्रा थें दय्काः इपिं फुक्कसितं पितिना छ्वयादिल। फैतय्त व द्वहंतय्त देगलं पिने ख्याना छ्वया दिल। अले धिबा हिलीपिनिगु धिबा थल प्वंकाः इमिगु टेबिल नापं ग्वतुइकाबिल। 16 सुकुभतु मिया च्वंपिन्त वय्कलं धयादिल – “थुपिं फुक्कं चिज थनं यंकि, जिमि बाःयागु छेँयात छिमिसं ब्यापारया छेँ याये मते।” 17 वय्कःया चेलातय्सं थ्व खँ च्वयातःगु लुमंकल – “हे परमेश्वर, छिगु देगःया जोश जि छ्वय्की।” 18 थथे यानादीगुलिं नायःतय्सं वय्कःयात धाल – “छु छिके थथे यानादीगु अधिकार दु ला? अथे जूसा छु छिं जिमित अजूचायापुगु ज्या व चिं क्यनादी फु?” 19 वय्कलं लिसः बियादिल – “थ्व देगःयात थुना बियादिसँ, जिं स्वन्हुं हे थुकियात हानं दय्का बी।” 20 थ्व न्यनाः इमिसं धाल – “थ्व देगः दय्केत पीखुदँ बित, छिं स्वन्हुं हे थ्व देगः दनादी फु ला?” 21 वय्कलं धयादीगु देगः ला वय्कःया थःगु हे म्ह खः। 22 वय्कः सिनाः हानं म्वाना वये धुंकाः चेलातय्सं थ्व खँ लुमंकल। थथे जूगुलिं इमिसं धर्मशास्त्र व येशूं नवानादीगु वचनय् विश्वास यात। 23 छुत्कारायागु नखःबलय् यरूशलेमय् वय्कलं यानादीगु अजूचायापुगु ज्या खंगुलिं यक्व हे मनूतय्सं वय्कःयात विश्वास यात। 24 वय्कलं धाःसा इमिके भरोसा तया मदी, छाय्धाःसा वय्कलं फुक्क मनूतय्त बांलाक म्हस्यू। 25 सुनानं वय्कःयात थ्व मनू थज्याःम्ह धकाः धया च्वने म्वाः। मनूतय्गु नुगलय् छु दु धकाः वय्कलं हे स्यू।
येशूं निकोदेमसयात स्यनादीगु
1 निकोदेमस नांयाम्ह छम्ह फरिसी दु। व यहूदीतय् छम्ह तःधंम्ह थकालि खः। 2 छन्हु चान्हय् व येशूयाथाय् वयाः धाल – “गुरूजु, छि परमेश्वरं छ्वया हयादीम्ह गुरू खः धकाः जिमिसं स्यू। परमेश्वर छि नाप दीगुलिं सुनानं याये मफुगु चिं छिं यानादी फु।” 3 वय्कलं लिसः बियादिल – “जिं छितः खःगु खँ धाये – न्हूकथं हानं जन्म मजुइकं मनूतय्सं परमेश्वरयागु राज्य खनी मखु।” 4 निकोदेमसं वय्कःयात धाल – “बुह्रा जुइ धुंकाः मनूत हानं गथे यानाः जन्म जुइ? हानं छकः मांयागु प्वाथय् दुहां वनाः जन्म जुइगु ला?” 5 वय्कलं लिसः बियादिल – “जिं छितः खःगु खँ धाये, मनूत लखं व परमेश्वरया आत्मां जन्म मजुइकं परमेश्वरयागु राज्यय् दुहां वने फइ मखु। 6 गथे लाहिं लाहि हे दुम्ह मनू जन्म जुइ, अथे हे आत्मां आत्मा हे जन्म जुइ। 7 थथे जिं न्हूकथं जन्म जुइ मानि धयागु खँय् छि छक्क जुइ म्वाः। 8 फय् थः मंदुथाय् न्ह्याइ, छिं उकियागु सः जक ताइ, व गनं वल, अले गन वनी धकाः छिं सी मखु। आत्मां बूपिं मनूत नं अथे हे जुइ।” 9 अले वं न्यन – “थथे नं जुइ फइ ला?” 10 वय्कलं लिसः बियादिल – “इस्राएलीतय् गुरू जुयाः छिं थुलि नं थुइके मफु ला? 11 जिं छितः खःगु हे खँ धाये – जिमिसं स्यूगु खँ धायेगु खः, अथे हे खंगु खँ साक्षी बीगु खः। अय्नं जिमिगु खँय् छिकपिं सुनानं विश्वास मयाः। 12 जिं छिकपिन्त संसारयागु खँ कनाः ला छिकपिन्सं विश्वास मयाः धाःसा स्वर्गयागु खँ कंसा झन गथे यानाः विश्वास यानादी? 13 स्वर्गं क्वहां वःम्ह मनूया काय् बाहेक सुं नं स्वर्गय् थहां वंगु मदुनी। 14 मरुभूमिइ मोशां धलोतं दय्का तःम्ह सर्पयात यख्खाःथें मनूया काय्यात नं यख्खाइतिनि। 15 अथेजूगुलिं वय्कःयात विश्वास याइपिन्त अनन्त जीवन दइ।” 16 “परमेश्वरं संसारयात यक्व माया यानादीगुलिं वय्कःयात विश्वास याःपिं मनूत नाश मजुइमा, बरु इमित अनन्त जीवन दयेमा धकाः थः याकः काय्यात तकं बियादिल। 17 परमेश्वरं संसारयात न्याय यायेत थः काय्यात छ्वया हयादीगु मखु, बरु वय्कःया पाखें संसार बचय् जुइमा धकाः खः। 18 “वय्कःयात विश्वास याःपिं मनूतय्गु न्याय जुइ मखु, परमेश्वरया याकः काय्यात विश्वास मयाःपिं मनूतय्गु धाःसा न्याय जुइ हे धुंकल। 19 जः संसारय् छ्वया हयादी धुंकूसां मनूतय्सं थ्व जःयात स्वयाः खिउँयात यय्कल, छाय्धाःसा इमिगु ज्या मभिं। थुकथं इपिं दोषी ठहरय् जुल। 20 दुष्ट ज्याखँ याना जुइपिं मनूतय्सं जःयात हेला याइ, अले जलय् वइ मखु। जलय् वल कि इमिसं याना जूगु दुष्ट ज्याखँ खनेदइ धकाः इपिं ग्याः। 21 अय्नं भिंगु सत्य ज्याखँ याना जुइपिं मनूत धाःसा जः दु थाय् वइ। अले इमिसं याना जूगु ज्याखँ परमेश्वरयापाखें हे यानादीगु खः धकाः बांलाक थुइके फइ।”
बप्तिस्मा बीम्ह यूहन्नां येशूयागु साक्षी ब्यूगु
22 अनं लिपा येशू व वय्कःया चेलात यहूदियाय् झाल। वय्कः अन हे इपिं नाप च्वनादिल, अले बप्तिस्मा नं बियादिल। 23 सालीमया लिक्कसं एनोन धाःगु थासय् यक्व लः दुगुलिं यूहन्नां नं अन हे बप्तिस्मा बियाच्वन। मनूत वयाः बप्तिस्मा काल। 24 थुबलय् तक यूहन्नायात झ्यालखानाय् मतःनि। 25 उबलय् यूहन्नाया चेलातय् छम्ह मनू नाप च्वख जुइगु खँय् जवाःसवाः जुल। 26 अले यूहन्नायाथाय् वनाः इमिसं थथे धाल – “गुरूजु, यर्दन पारिइ छि नाप दुम्ह, अले छिं हे साक्षी बियादीम्ह मनुखं बप्तिस्मा बियाच्वंगु दु। फुक्क मनूत वयाथाय् हे वनाच्वंगु दु।” 27 वं लिसः बिल – “परमेश्वरं मबीकं सुनानं छुं नं काये फइ मखु। 28 जि मुक्ति बीम्ह ख्रीष्ट मखु, अय्नं वय्कः स्वयाः न्हापालाक छ्वया हःम्ह खः धकाः जिं धयागु खँ छिमिसं हे धयाच्वंगु दु। 29 भम्चायात ब्याहा याःम्ह हे भाःतम्ह जुइ। ब्याहा याःम्ह मिजंया पासा वयागु खँ न्यनाः तसकं लय् ताइ। अथे हे जि नं आः लय् ताय् खन। 30 वय्कः तःधं जुइ, जि चिधं जुइ।” 31 “च्वय्नं वःम्ह फुक्क स्वयाः तःधंम्ह खः। अले संसारं वःम्ह संसारयाम्ह हे खः, थज्याःम्ह मनुखं संसारयागु हे खँ ल्हाइ। स्वर्गं वःम्ह फुक्क स्वयाः तःधं जू। 32 वय्कलं थःम्हं न्यनादीगु व खंगु खँ हे कनादिल, अय्नं सुनानं वय्कःयागु खँ मानय् मयाः। 33 वय्कःयागु खँय् विश्वास याःम्ह मनुखं धाःसा परमेश्वर सत्य खः धकाः दसि बी। 34 परमेश्वरं छ्वया हःम्हय्सिनं हे जक परमेश्वरयागु वचन नवाइ, छाय्धाःसा वय्कःयात पवित्र आत्मां जाय्कादीगु दु। 35 परमेश्वर बाःनं थः काय्यात माया यानादीगुलिं फुक्कं वय्कःयागु ल्हातिइ बियादीगु दु। 36 वय्कःया काय्यात विश्वास याइम्हय्सिके अनन्त जीवन दु। काय्नं धाःगु मानय् मजूम्हय्सिनं थज्याःगु जीवन काये खनी मखु, थज्याःम्हय्सित परमेश्वरं तं दिकादी।”
येशू व सामरी मिसा
1 यूहन्नां स्वयाः येशूं यक्व मनूतय्त चेला दय्काः बप्तिस्मा बियाच्वन धकाः फरिसीतय्सं नं सिल धयागु खँ 2 -3 प्रभुं सीकादीगुलिं वय्कः हानं यहूदियां गालीलय् झाल। वय्कः थःम्हय्सिनं हे बप्तिस्मा बियादीगु ला मखु, बरु वय्कःया चेलातय्सं ब्यूगु खः। 4 गालीलय् वनेत सामरिया जुयाः वनेमाः। 5 वय्कः याकूबं थः काय् योसेफयात ब्यूगु जगायागु लिक्क लाःगु सामरियायागु सुखार धाःगु शहरय् थ्यंकः झाल। 6 अन याकूबं दय्कातःगु तुं छगः दु। त्यानुसे च्वंगुलिं येशू तुंया क्वय् फ्यतुनादिल। थुबलय् बान्हि जाल। 7 अबलय् लाक्क हे छम्ह सामरी मिसा लः काः वल। वय्कलं वयात धयादिल – “जितः लः त्वनेत बियादिसँ।” 8 अबलय् वय्कःया चेलात नयेगु नसा न्यायेत शहरय् वनाच्वंगु खः। 9 सामरी मिसां वय्कःयात धाल – “छि छम्ह यहूदी जुयाः नं सामरी मिसाया ल्हातं लः त्वने ज्यू ला?” यहूदीतय्सं सामरीतय्गु ल्हातं नये त्वनेगु मयाः। 10 येशूं वयात धयादिल – “छिं परमेश्वरं बियादीगु दान स्यूगु जूसा, अले छिके लः फ्वंम्हय्सित म्हस्यूगु जूसा, छिं वयाके हे लः त्वनेत फ्वनादीगु जुइ। अले वं हे छितः जीवन दइगु लः बीगु जुइ।” 11 अले व मिसां धाल – “हजुर, तुं तसकं हे तःजाः, लः सालेत छिके छुं हे मदु। छिं जीवन दइगु लः गनं कयादी? 12 जिमित तुं दय्का ब्यूम्ह जिमि तापाःबाज्या याकूब खः। छु छि वय्कः स्वयाः नं तःधं ला? जिमि तापाःबाज्यां, वया काय्पिन्सं, अले वया सा, द्वहंतय्सं नापं थ्व हे तुंयागु लः त्वना वन।” 13 वय्कलं वयात धयादिल – “थ्व लः त्वनिपिं मनूतय्त हानं हानं प्याःचाइ। 14 तर जिं बियागु लः त्वनिपिं मनूतय्त गुबलें हे प्याःचाइ मखु। जिं बियागु लः हे व मनूयाके बुंगाःचा थें जुयाः अनन्त जीवन तक बुयावया च्वनी।” 15 व मिसां धाल – “हजुर, जितः नं थ्व लः बियादिसँ। अले जितः गुबलें हे लः त्वने प्याःचाइ मखु। अले हानं लः कायेत थन वये माली नं मखु।” 16 वय्कलं वयात धयादिल – “झासँ, छिं थः भाःतयात थन सःता हयादिसँ।” 17 वं लिसः बिल – “जिमि भाःत मदु।” वय्कलं धयादिल – “जिमि भाःत मदु धकाः छिं खःगु हे खँ धयादिल। 18 आः तकं छि न्याम्ह भाःत दये धुंकल, अले आः छि नापं दुम्ह मिजं नं छि थः भाःत मखु। छिं खःगु हे धयादिल।” 19 व मिसां धाल – “प्रभु, छि अगमवक्ता खः धकाः जिं सिल। 20 जिमि तापाःबाज्यापिन्सं थ्व पहाडय् पुजा याना वन, छिकपिन्सं धाःसा यरूशलेमय् मनूतय्सं परमेश्वरयात आराधना यायेमाः धकाः धयादिल।” 21 वय्कलं वयात धयादिल – “मय्जु, विश्वास यानाः बांलाक न्यना का। ई वयाच्वंगु दु, गुबलय् छिकपिन्सं परमेश्वर बाःयात आराधना यायेत न यरूशलेमय् न थ्व पहाडय् हे वने माली। 22 छिकपिं सामरियाय् च्वंपिन्सं म्हमस्यूम्हय्सित आराधना याइ। तर जिमिसं सुयागु आराधना यानाच्वना वय्कःयात जिमिसं बांलाक हे म्हस्यू, छाय्धाःसा मुक्ति ला यहूदीतय् पाखें वइ। 23 अय्नं ई वयाच्वंगु दु, व आः हे खः, बाःयात आराधना याइपिन्सं आत्मां व सत्यं याइ। वय्कःयात नं थुकथं आराधना याइपिं जक यः। 24 परमेश्वर आत्मा जुयादीगुलिं वय्कःयात आराधना याइपिन्सं सत्य व आत्मां आराधना यायेमाः।” 25 व मिसां वय्कःयात धाल – “मुक्ति बीम्ह ख्रीष्ट धाःम्ह मसीह झायादीतिनि धकाः जिं स्यू। वय्कः झाल कि वय्कलं हे झीत फुक्कं खँ कनादी।” 26 वय्कलं धयादिल – “छि नाप नवाना च्वनाम्ह जि, व हे खः।” 27 उबलय् हे चेलात थ्यंकः वल। वय्कः अथे छम्ह मिसा नाप खँ ल्हानाच्वंगु खनाः इपिं छक्क जुल। अय्नं सुनानं – “छिं छु मालादियागु” अले “व नाप छिं छाय् खँ ल्हाना दियागु?” धकाः मन्यं। 28 उबलय् हे लःघः त्वःताः व मिसां शहरय् वनाः मनूतय्त थथे धाल – 29 “वा, छम्ह मनूयात स्वः वा। वय्कलं जिं यानागु फुक्क खँ धयाबिल। व मनू मुक्ति बीम्ह ख्रीष्ट ला, मखु ला?” 30 थ्व न्यनाः अनच्वंपिं मनूत वय्कःयाथाय् वल। 31 अबलय् हे चेलातय्सं वय्कःयात थथे धाल – “गुरूजु, भपिया दिसँ।” 32 वय्कलं धयादिल – “जिके नयेत छिमिसं सि हे मस्यूगु नसा दु।” 33 थ्व न्यनाः इमि दथुइ थथे खँ जुल – “सुनानं वय्कःयात नसा हया बिल ला कि छु?” 34 वय्कलं धयादिल – “जितः छ्वया हया दीम्हय्सिगु ज्या सिधय्केगु, अले वय्कलं धाःथें याना जुइगु हे जिगु नसा खः। 35 ‘प्यला लिपा तिनि बालि लये त्यइ’ धकाः छिमिसं धया जुल। जिं छिमित धाये – ‘छकः बुँइ वनाः बांलाक स्व, अन्न सयाः नं लयेगु ई जुइ धुंकल।’ 36 सुनां बालि लइ, वयात ज्याला दइ, अले अनन्त जीवनया निंतिं फल मुंके खनी। थुकथं पुसा ह्वःम्ह नं, बालि लःम्ह नं लय् ताय् दइ। 37 छम्हय्सिनं पुसा ह्वली, अले मेम्हय्सिनं बालि लइ धकाः धयातःगु खँ थुकिं हे सत्य जुल। 38 छिमिसं बालि पिना मतःथाय् जिं छिमित लय्के छ्वया। बालि पिना तःपिं मेपिं खः, अय्नं इमिसं पिनातःगु बालि छिमिसं लये खन।” 39 “जिं यानागु फुक्क खँ वय्कलं धयादिल” धकाः व मिसां धाःगुलिं व शहरय् च्वंपिं यक्व हे सामरीतय्सं वय्कःयात विश्वास यात। 40 अय्जूगुलिं वय्कःयाथाय् वःबलय् इमिसं इमिथाय् हे च्वनादिसँ धकाः बिन्ति याःगुलिं वय्कः निन्हु तक अन च्वनादिल। 41 वय्कःयागु वचन न्यनाः यक्वसिनं हे वय्कःयात विश्वास यात। 42 इमिसं व मिसायात धाल – “आः छं धाःगुलिं जक जिमिसं विश्वास यानागु मखु, बरु जिमिसं हे वय्कःयागु खँ न्यनाः विश्वास यानागु खः। जिमिसं वय्कः हे संसारयाम्ह मुक्तिदाता खः धकाः सीके धुन।”
भारदारया काय्यात लाय्कादीगु
43 निन्हु लिपा येशू गालीलय् झाल। 44 अगमवक्तायात थःगु थासय् सुनानं मानय् याइ मखु धकाः वय्कलं थःम्हं हे धयादीगु खः। 45 अय्नं वय्कः गालीलय् झायादीबलय् अन च्वंपिं मनूतय्सं वय्कःयात लसकुस यात, छाय्धाःसा थुमिसं यरूशलेमय् वंबलय् वय्कलं अन नखःबलय् यानादीगु अजूचायापुगु ज्या खंगु खः। 46 वय्कः हानं गालीलय् च्वंगु काना शहरय् झाल। अन हे वय्कलं लःयात दाखमद्य दय्कादीगु खः। कफर्नहुमय् च्वंम्ह छम्ह भारदारया काय् म्हंमफया च्वन। 47 येशू यहूदियां गालीलय् झायाच्वन धकाः धाःगु न्यनाः वं वनाः सी थें च्वंम्ह थः काय्यात लाय्का बिया दिसँ धकाः वय्कःयात बिन्ति यात। 48 अले वय्कलं वयात धयादिल – “अजूचायापुगु ज्या व चिं मखंकं छिकपिन्सं विश्वास यानादी मखु।” 49 अले वं वय्कःयात धाल – “प्रभु, जिमि काय् सी न्ह्यः हे झासँ।” 50 वय्कलं लिसः बियादिल – “झासँ, छिकपिनि काय् मसीनि।” अले व वय्कलं धयादीगु खँय् विश्वास यानाः वन। 51 छेँय् वना च्वंबलय् वया दासतय्सं वयात नाप लानाः “छिकपिनि काय् लाये धुंकल” धकाः धाल। 52 गुबलय्निसें वयात ज्यूगु धकाः वं न्यन। अले “म्हिगः न्हिनय् एक बजे निसें ज्वर क्वलात” धकाः वया दासतय्सं धाल। 53 “छिकपिनि काय् म्वाइ” धकाः धयादीगु इलय् हे ज्यूगु धकाः वं सीकल। अले वं व वया छेँयापिं फुक्कसिनं विश्वास यात। 54 येशू यहूदियां गालीलय् झायाः यानादीगु अजूचायापुगु चिं थ्व नापं निकः जुल।
पुखूया लिक्कसं च्वंम्हय्सित लाय्कादीगु
1 अनंलि यहूदीतय्गु छगू नखः वःगुलिं येशू यरूशलेमय् झाल। 2 यरूशलेमय् फै ध्वाखाया लिक्कसं न्याखेरं फः दुगु छगू पुखू दु। थ्व पुखूयात हिब्रू भासं बेथेस्दा धाइ। 3 थ्व हे न्यागू सतलय् लः संगु स्वय्त पिया च्वनिपिं थी थी ल्वचं काःपिं मनूत – कांत, खुत, ल्हाःतुति मसंपिं दु। 4 इपिं अन गुबलय् लः सनी धकाः स्वयेत पिया च्वनीगु खः। छाय्धाःसा परमप्रभुया छम्ह दूत बरोबर वयाः पुखूया लः संकाबीगु जुयाच्वन। थथे लः संकूबलय् लाक्क दकलय् न्हापां पुखुलिइ कुहां वनिम्ह मनूयागु न्ह्याथेंज्याःगु ल्वय् नं लायावनिगु जुयाच्वन। 5 अन स्विच्यादँ न्ह्यःनिसें ल्वचं कयाच्वंम्ह छम्ह मनू दु। 6 येशूं वयात खनाः अले यक्व दँ न्ह्यःनिसें व अथे जुयाच्वंगु सीकाः धयादिल – “छु छितः ल्वय् लाय्के मास्तिवः ला?” 7 अले वं वय्कःयात धाल – “हजुर, पुखूयागु लः संकीबलय् जितः लखय् तया बीपिं सुं मदुगुलिं जि अन थ्यने न्ह्यः हे मेपिं थ्यनेधुंकिगु।” 8 वय्कलं धयादिल – “थःगु लासा ज्वनाः झासँ।” 9 उबलय् हे वयागु ल्वय् लन। अले व थःगु लासा ज्वनाः वन। उखुन्हु विश्रामबार खः। 10 अय्जूगुलिं यहूदीतय् नायःतय्सं व मनूयात धाल – “विश्रामबार खुन्हु लासा कुबी मज्यू।” 11 वं इमित लिसः बिल – “जितः लाय्का ब्यूम्ह मनुखं ‘लासा ज्वनाः हुँ’ धकाः धयादीगु खः।” 12 इमिसं न्यन – “छन्त लासा ज्वनाः हुँ धकाः धाःम्ह मनू सु खः?” 13 अन यक्व मनू दुगुलिं व येशू तुरुन्त झायादीगुलिं वय्कःयात वं म्हमसील। 14 लिपा येशूं वयात देगलय् नाप लानाः धयादिल – “स्वयादिसँ, छिगु ल्वय् लाये धुंकल। आवंनिसें पाप यानादी मते, अले छितः छुं नं जुइ मखु।” 15 अले व मनुखं इमिथाय् वनाः “जितः लायेका ब्यूम्ह येशू हे खः” धकाः धाः वन। 16 येशूं विश्रामबार खुन्हु थथे यानादीगुलिं यहूदीतय् नायःतय्सं वय्कःयात दुःख बियाहल। 17 अथेसां वय्कलं इमित धयादिल – “जिमि बाःनं न्ह्याबलें ज्या यानादी, उकिं जिं नं ज्या याना च्वने।” 18 वय्कलं थथे धयादीगुलिं इमिसं वय्कःयात स्यायेत झन अप्वः कुतः यात। छाय्धाःसा वय्कलं विश्रामबार मानय् मयाःगु जक मखु, अज्ज परमेश्वर नाप हे थःत ज्वलिंज्वः यानाः परमेश्वरयात वय्कःया बाः खः धकाः धयादिल।
काय्या अधिकार
19 येशूं इमित धयादिल – “जिं छिकपिन्त खःगु खँ धाये – काय्नं थःगु मनं लुइकाः छुं हे याये फइ मखु, बरु बाःनं याःगु खनाः हे जक याये सइ। थथे जूगुलिं बाःनं छु छु यानादी, काय्नं नं व हे याइ। 20 बाःनं काय्यात माया यानादीगुलिं बाःनं यानादीगु फुक्कं काय्यात क्यनादी। थ्व स्वयाः नं तःधंगु ज्या बाःनं काय्यात क्यनादी, गुकिं यानाः छिकपिं छक्क जुयादी। 21 गथे बाःनं सीपिन्त म्वाकाः जीवन बियादी, अथे हे काय्यात यःपिन्त नं काय्नं जीवन बियादी। 22 बाःनं सुयागुं न्याय यानादी मखु। न्याय यायेगु अधिकार काय्यात बियादी धुंकल। 23 अय्जूगुलिं गथे बाःयात फुक्कसिनं मानय् याः अथे हे काय्यात नं फुक्कसिनं मानय् याये माः। काय्यात मानय् मयाःम्हय्सिनं काय्यात छ्वया हःम्ह बाःयात नं मानय् मयाःगु जुइ। 24 “जिं छिकपिन्त खःगु खँ धाये – जिगु खँ न्यनाः जितः छ्वया हःम्हय्सित सुनां विश्वास याइ, वयात अनन्त जीवन दइ। थज्याःम्ह मनूयागु न्याय जुइ मखु, बरु सी म्वाय्क अनन्त जीवन दये धुंकी।” 25 “जिं छिकपिन्त खःगु खँ धाये – ई वयाच्वंगु दु, अले व ई थ्व हे खः – सीपिन्सं नापं परमेश्वरया काय्यागु सः ताइ, अले सुनां न्यनी, इपिं म्वाइ। 26 परमेश्वर बाः जीवनया मुहान खः, अथे हे वय्कलं थः काय्यात नं जीवनया मुहान यानादिल। 27 वय्कः मनूया काय् जूगुलिं वय्कःयात हे न्याय यायेगु अधिकार बियादिल। 28 थ्व खँय् अजूचायादी मते, सी धुंकूपिन्सं नापं वय्कःयागु सः ताइगु ई वयाच्वंगु दु। 29 अले थुपिं म्वाना वइ। भिं याःपिन्त अनन्त जीवन बियादी। अले मभिं याःपिन्त न्याय यानादी।”
येशूया साक्षी
30 “थः थःम्हं जिं छुं नं याये मफु, बाःनं जितः धयादीथें जिं न्याय जक यायेगु खः। अय्जूगुलिं जिं न्याय यानागु ठीक जू, छाय्धाःसा जितः यःथें जिं न्याय यायेगु मखु, बरु जितः छ्वया हःम्हय्सित यःथें यायेगु खः।” 31 “जिं तुं जिगु साक्षी ब्यूसा जिगु साक्षी सत्य जुइ मखु। 32 जिगु साक्षी बीम्ह मेम्ह हे दु, वय्कलं धयादीगु सत्य खः धकाः जिं स्यू। 33 छिकपिन्सं यूहन्नायाथाय् मनू छ्वया हल, अले वं ‘सत्य थ्व हे खः’ धकाः साक्षी बिल। 34 जिगु लागि सुनानं साक्षी बी म्वाः। अय्नं छिकपिं बचय् जुइमा धकाः जिं थथे धयाच्वनागु खः। 35 यूहन्ना ला च्याःगु व थीगु मत जक खः। वयागु जलय् छिकपिन्सं छुं ई तक जक जूसां लय्ताय्गु हे यय्कादिल। 36 तर यूहन्नां ब्यूगु साक्षी स्वयाः तःधंगु साक्षी जिके दु। बाःनं जितः पूवंकेत बियादीगु ज्या व जिं यानाच्वनागु ज्यां हे जितः बाःनं छ्वया हयादीगु खः धकाः सी दु। 37 जितः छ्वया हयादीम्ह बाःनं हे जिगु साक्षी बियादीगु दु। वय्कःयागु सः छिकपिन्सं गुबलें मताःनि, अले ख्वाः नं मखंनि। 38 वय्कलं छ्वया हःम्हय्सित छिकपिन्सं विश्वास मयाःगुलिं वय्कःयागु वचन छिकपिन्के थाइ मखु। 39 “अनन्त जीवन दइ धकाः छिकपिन्सं धर्मशास्त्र ब्वना जुइ। व हे धर्मशास्त्रं जिगु साक्षी बी, 40 अय्नं छिपिं जिथाय् अनन्त जीवन कायेत वइ मखु। 41 “मनूतय्सं तःधंकूगु जितः मयः। 42 छिकपिन्सं परमेश्वरयात माया मयाः धकाः जिं स्यू। 43 जितः बाःनं छ्वया हःगुलिं छिकपिन्सं जितः थः नाला कयामदी। थःगु हे नामय् मेपिं सुं वल धाःसा छिकपिन्सं इमित ग्रहण यानादी। 44 छिकपिन्स थःथवय् तःधंका च्वन, तर परमेश्वरं तःधंकीगुलिइ छिकपिन्सं वास्ता यानामदी। छिकपिन्सं गथे यानाः विश्वास यानादी फइ? 45 “जिं छिकपिन्त परमेश्वरया न्ह्यःने दोषी ठहरय् याइ धकाः मतिइ तयादी मते। छिकपिन्सं आशा तयाच्वंम्ह मोशां हे छिकपिन्त दोषी ठहरय् याइ। 46 छिकपिन्सं मोशायात धात्थें हे विश्वास यानाच्वंगु खःसा जितः नं विश्वास यानादी माःगु खः। छाय्धाःसा मोशां जिगु हे खँ च्वया थकूगु खः। 47 मोशां च्वया थकूगु खँय् हे छिकपिन्सं विश्वास मयासा जिगु खँय् गथे यानाः विश्वास यानादी फइ?”
न्याद्वः मनूतय्त नकादीगु
मत्ती १४:१३-२१; मर्कूस ६:३०-४४; लूका ९:१०-१७ 1 अनंलि येशू गालील समुद्र पारिइ झाल। थुकियात तिबेरियास समुद्र नं धाः। 2 वय्कलं यक्व ल्वय् लाय्कादीगु खनाः ग्वाः ग्वाः मनूत वय्कःया ल्यू ल्यू जुल। 3 अनं वय्कः पहाडय् झायाः चेलात नाप फ्यतुनादिल। 4 थुबलय् यहूदीतय्गु छुत्काराया नखः न्ह्यःने थ्यनाच्वंगु खः। 5 वय्कलं थः च्वनाच्वं थाय् हुल हुल मनूत वयाच्वंगु खनाः फिलिपयात धयादिल – “थुमित नकेत मरि गनं कया हये माली?” 6 वय्कलं थःम्हं छु यायेत्यंगु स्यूसां वयागु मन स्वयेत थथे धयादीगु खः। 7 अले फिलिपं वय्कःयात धाल – “थुलि मछि मनूतय्त भचा भचा जक नकूसां निसः दिनारया मरि नं गाइ मखु।” 8 वय्कःया चेला सिमोन पत्रुसया दाजु अन्द्रियासं वय्कःयात धाल – 9 “थन छम्ह मिजंमचायाके तछ्वया न्यापा मरि व निम्ह न्या दु। थुलि मछि मनूतय्त थुलिचां छु यायेगु?” 10 “मनूतय्त फ्यतुकि” धकाः वय्कलं धयादिल, अन यक्व घाँय् दुगु ख्यः दु। फुक्कं अन हे फ्यतुत। अन मिजंत जक हे न्याद्वःति दु। 11 अले वय्कलं मरि कयाः सुभाय् बियादी धुंकाः मनूतय्त इनादिल। थथे हे न्या नं कयाः इनादिल। थुकथं इमित यतले नकादिल। 12 मनूतय्सं प्वाः जाय्क नये धुंकाः वय्कलं चेलातय्त धयादिल – “इनाः ल्यंगु दुगु मरि छुं हे सितिं छ्वये मते।” 13 अले इमिसं नयाः ल्यंदुगु मुनाः मरि झिंनिगः दाला जाय्कल। थ्व फुक्कं तछ्वया न्यापा मरियागु ल्यं दुगु खः। 14 थुकथं वय्कलं यानादीगु चिं खनाः मनूतय्सं थथे धाल – “धात्थें, संसारय् वइ धाःम्ह अगमवक्ता ला थ्व हे खः।” 15 इमिसं वयाः थःत ज्वनाः बलजफतिं जुजु याइन धकाः सीकाः येशू हानं याकःचा पहाडय् तुं थहां झाल।
येशू लखय् द्यःने न्यासि झाःगु
16 बहनी जूबलय् चेलात समुद्र सिथय् वन। 17 इपिं नांचाय् च्वनाः पारिइ कफर्नहुमय् वनेत्यन। थुबलय् खिउँसे च्वने धुंकल। अय्नं येशू इमिथाय् मझाःनि। 18 ग्वःफय् वयाच्वंगुलिं समुद्रयागु लः उखेलाः थुखेलाः मदय्क सनाच्वन। 19 न्यागू-खुगू किलोमिटर नांचा न्ह्याका वने धुंकाः इमिसं येशूयात लखय् द्यःने न्यासि वयाः नांचाया लिक्क थ्यंकः झाःगु खन। अले इपिं तसकं ग्यात। 20 वय्कलं इमित धयादिल – “जि हे खः, ग्याये मते।” 21 अले इमिसं लय्तायाः वय्कःयात नांचाय् थकाल। अले इपिं याकनं हे थ्यने माःगु थासय् थ्यन। 22 कन्हय् खुन्हु समुद्र पारिइ च्वना च्वंपिं मनूतय्सं अन छगः हे जक नांचा दुगु, अले येशू चेलात नाप नांचाय् च्वना मदीगु, व चेलात जक वंगु खँ सिल। 23 उबलय् तिबेरियासं मेमेगु नांचा येशूं सुभाय् बियाः न्याद्वः मनूतय्त मरि नकूगु थासय् थ्यंकः वल। 24 अन येशू व चेलातय्त मखनाः इपिं नांचाय् च्वनाः वय्कःयात मामां कफर्नहुमय् वन।
येशू जीवनया मरि खः
25 समुद्र पारिइ येशूयात लुइकाः इमिसं धाल – “गुरूजु, छि थन गुबलय् झायागु?” 26 वय्कलं इमित लिसः बियादिल – “जिं छिकपिन्त खःगु खँ धाये – जिं यानागु चिं खनाः छिकपिन्सं जितः माः जुयादीगु मखु, बरु प्वाः जाय्क मरि नयेदुगुलिं जक जितः माः जुयादीगु खः। 27 सितिं वनिगु नसायागु निंतिं ज्या यानादी मते, बरु मनूया काय्नं बीगु अनन्त जीवन तक दयाच्वनिगु नसायागु निंतिं ज्या यानादिसँ। परमेश्वर बाःनं जितः थ्व हे ज्या यायेत छ्वया हयादीगु खः।” 28 अले इमिसं वय्कःयात धाल – “अय्सा परमेश्वरयागु ज्या यायेत जिमिसं छु यायेगु?” 29 वय्कलं लिसः बियादिल – “परमेश्वरं छ्वया हःम्हय्सित छिकपिन्सं विश्वास यायेगु हे परमेश्वरयागु ज्या खः।” 30 अले इमिसं धाल – “अय्सा छिं जिमित छु चिं क्यनादी? गुकिं यानाः जिमिसं छितः विश्वास याये फइ? छिं छु ज्या यानाः क्यनादी फु? 31 जिमि तापाःबाज्यापिन्सं मरुभूमिइ मन्ना नल धकाः थथे च्वयातःगु दु – ‘वय्कलं मनूतय्त नकेत स्वर्गं मरि बियादिल।’” 32 वय्कलं धयादिल – “जिं छिकपिन्त खःगु खँ धाये – मनूतय्त नकेत स्वर्गं मरि ब्यूम्ह मोशा मखु। जिमि बाःनं जक छिकपिन्त स्वर्गं धात्थेंयागु मरि बियादी। 33 स्वर्गं क्वहां वयाः मनूतय्त अनन्त जीवन बीम्ह हे परमेश्वरं बियादीगु मरि खः।” 34 इमिसं धाल – “प्रभु, थ्व मरि जिमित न्ह्याबलें बियादिसँ।” 35 वय्कलं धयादिल – “जीवन बीगु मरि जि हे खः। जिथाय् वइम्ह मनूयात गुबलें हे नयेपित्याइ मखु। अथे हे जितः विश्वास याइम्ह मनूयात गुबलें हे प्याःचाइ मखु। 36 अय्नं जिं छिकपिन्त धाये – छिकपिन्सं जितः खनाः नं विश्वास यानामदी। 37 बाःनं जितः बियादीपिं फुक्कं जिथाय् वइ। अले जिथाय् वःपिन्त जिं गुबलें हे त्वःते मखु। 38 जि जिगु इच्छा मखु बरु जितः छ्वया हःम्हय्सिगु इच्छा पूवंकेत स्वर्गं वयाम्ह खः। 39 बाःनं जितः बियादीपिं सुं हे मतनेमा बरु दकलय् लिपायागु दिनय् इपिं हानं म्वाना वये फयेमा धयागु हे जितः छ्वया हःम्ह बाःयागु इच्छा खः। 40 काय्यात खंपिं व विश्वास याःपिन्त अनन्त जीवन बीगु हे जिमि बाःयात यःगु खँ खः। अले जिं इमित दकलय् लिपायागु दिनय् म्वाका बी।” 41 “स्वर्गं ब्यूगु मरि जि हे खः” धकाः वय्कलं धयादीगुलिं व खँ न्यंपिन्सं वय्कःया विरोधय् खँ ल्हात। 42 इमिसं धाल – “थ्व योसेफया काय् येशू मखु ला? थ्वया मांबौपिन्त झीसं म्हमस्यू ला? थ्व मनुखं जि स्वर्गं वयाम्ह खः धकाः गथे धाये फत?” 43 वय्कलं इमित लिसः बिल – “छिकपिन्सं थःथवय् जिगु विरोध यानाः खँ ल्हानादी माःगु मदु। 44 जितः छ्वया हःम्ह बाःनं छ्वया हया मदीकं सुं नं जिथाय् वये फइ मखु। जिथाय् वःम्हय्सित दकलय् लिपायागु दिनय् जिं म्वाका बी। 45 थुपिं फुक्कं परमेश्वरं स्यना तःपिं जुइ धकाः अगमवक्तातय्सं च्वया थकूगु दु। बाःयागु खँ न्यनाः सय्का सीका काःपिं फुक्कं जिथाय् वइ। 46 परमेश्वरयाथासं वःम्हय्सिनं जक बाःयात खंगु दु, मेपिं सुनानं बाःयात खंगु मदु। 47 “जिं छिकपिन्त खःगु खँ धाये, सुनां विश्वास याइ, वयाके अनन्त जीवन दइ। 48 जीवन बीगु मरि जि हे खः। 49 छिकपिनि तापाःबाज्यापिन्सं मरुभूमिइ मन्ना नसां सिना वन। 50 तर स्वर्गं क्वहां वःगु थ्व मरि नःपिं सुनं सी मखु। 51 स्वर्गं वःगु अनन्त जीवन दुगु मरि जि हे खः। थ्व मरि सुनानं नल धाःसा व न्ह्याबलें म्वाना च्वनी। संसारयात जिं बी त्यनागु अनन्त जीवन बीगु मरि जिगु म्ह खः।” 52 अले यहूदीतय् नायः थःथवय् थथे धकाः कच कच हाल – “थ्व मनुखं थःगु म्ह झीत गथे यानाः नकेत बी फइ?” 53 उकिं वय्कलं इमित धयादिल – “जिं छिकपिन्त खःगु खँ धाये – मनूया काय्यागु ला व हि मनय्कं छिकपिन्के जीवन दइ मखु। 54 सुनां जिगु म्ह नइ, अले जिगु हि त्वनी, वयाके अनन्त जीवन दइ। अले वयात दकलय् लिपायागु दिनय् जिं म्वाका बी। 55 जिगु म्ह धात्थें हे नसा खः, अले जिगु हि धात्थें हे त्वनेगु खः। 56 सुनां जिगु म्ह नइ अले हि त्वनी, व मनू जिके दइ, अले जि वयाके दइ। 57 जितः छ्वया हयादीम्ह बाः गथे न्ह्याबलें म्वाना च्वनी, अथे हे बाःनं यानाः जि नं न्ह्याबलें म्वाना च्वनी। थुकथं जितः नःम्ह मनू नं जिं यानाः म्वाना च्वनी। 58 स्वर्गं वःगु मरि थ्व हे खः। छिकपिनि तापाःबाज्यापिन्सं मन्ना नयाः नं सिना वन, थ्व अज्याःगु मरि मखु, थ्व मरि नःम्ह मनू गुबलें हे सी मखु।” 59 वय्कलं थ्व कफर्नहुमय् धर्मशास्त्र स्यनिगु छेँय् स्यनेकने यानादीबलय् धयादीगु खः।
अनन्त जीवनया शिक्षा
60 थ्व न्यनाः वय्कःया चेलातय्सं धाल – “थ्व ला तसकं थाकुगु खँ खः, थज्याःगु खँ सुनां न्यने फइ?” 61 चेलात थःथवय् खुसखुस हालाच्वंगु सीकाः वय्कलं इमित थथे धयादिल – “थुकिं यानाः छिमित पंगलः वल ला कि? 62 मनूया काय् वय्कःया न्हापायागु थासय् तुं लिहां वंगु खन धाःसा छिमिसं छु यायेगु? 63 परमेश्वरयागु आत्मां हे जक अनन्त जीवन बी। शरीर छुं यायेत नं ज्यालगय् मजू। जिं छिमित धयाच्वनागु खँ जीवन बीगु परमेश्वरयागु आत्मा खः। 64 अय्नं छिपिं मध्ये गुम्हं गुम्हं विश्वास मयाइपिं नं दये फु।” सुनां सुनां वय्कःयात विश्वास मयाः, अले सुनां वय्कःयात धोखा बी धयागु खँ वय्कलं न्हापांनिसें हे स्यू। 65 अले वय्कलं धयादिल – “अय्जूगुलिं हे ला खःनि, बाःनं छ्वया हया मदीकं सुं नं वये फइ मखु धकाः जिं छिमित धयागु।” 66 थथेजूगुलिं वय्कःया चेलात मध्ये यक्वसिनं हे वय्कःयात त्वःताः वन। 67 उकिं वय्कलं झिंनिम्हय्सित नं न्यनादिल – “छिमिसं नं जितः त्वःताः वनेगु ला कि?” 68 सिमोन पत्रुसं लिसः बिल – “प्रभु, जिपिं सुयाथाय् वनेगु? अनन्त जीवन बीगु खँ छिके जक दु। 69 उकिं जिमिसं विश्वास यानाः परमेश्वरं छ्वया हयादीम्ह पवित्रम्ह मनू छि हे खः धकाः नं सीके धुन।” 70 वय्कलं इमित धयादिल – “छिपिं झिंनिम्हय्सितं जिं हे ल्ययागु, मखु ला? अय्नं छिपिं मध्ये छम्ह शैतानयाम्ह दु।” 71 वय्कलं थ्व सिमोन इस्करियोतया काय् यहूदायात धयादीगु खः, छाय्धाःसा झिंनिम्ह मध्ये छम्ह जुयाः नं वं वय्कःयात धोखा बीत्यंगु दु।
येशू व वय्कःया किजापिं
1 अनंलि येशू गालीलय् चाःहिलादिल। यहूदिया जिल्लाय् यहूदीतय् नायःतय्सं वय्कःयात स्यायेत स्वःगुलिं वय्कः अन झाया मदी। 2 थुबलय् यहूदीतय्गु बलचाबाय्या नखः थ्यंकः वये धुंकल। 3 उकिं वय्कःया किजापिन्सं थथे धाल – “थनं यहूदियाय् झासँ। अले छिं याःगु ज्या छिकपिनि चेलातय्सं नं खनी। 4 संसारय् तःधंम्ह मनू जुइ मास्ति वःम्हय्सिनं सुलाः सुलाः ज्या याइ मखु। छिं थथे यायेगु हे खःसा फुक्कसिनं सीके मा।” 5 वय्कःया किजापिन्सं हे नं वय्कःयात विश्वास मयाः। 6 उकिं वय्कलं इमित थथे धयादिल – “जिगु ई आः तक मवःनि। छिमिगु लागि न्ह्यागु ई नं ठीक जू। 7 संसारय् च्वंपिन्सं छिमित हेला याये फइमखु। जिं संसारय् च्वंपिन्सं याना जूगु ज्याखँ मभिं धकाः धयागुलिं इमिसं जितः हेला याइ। 8 छिपिं हे जक नखः मानय् याः हुँ। जिगु ई आः तक मवःनिगुलिं जि थ्व नखःतय् वने मखु।” 9 इमित थथे धयाः वय्कः गालीलय् तुं च्वनादिल। 10 वय्कःया किजापिं नखःतय् वने धुंकाः सुनानं मसीक वय्कः नं झाल। 11 नखःबलय् यहूदीतय् नायःतय्सं वय्कःयात थथे धाधां माः जुल – “व मनू गन दु हं?” 12 अले अन वय्कःयागु खँय् मनूतय् दथुइ भुनु भुनु खँ जुल। छखलःसिनं “वय्कः भिंम्ह मनू खः” धकाः धाःसा मेपिन्सं “मखु, व मनूतय्त स्यंका जुइम्ह खः” धकाः धाइगु। 13 अय्नं यहूदीत खनाः ग्याःगुलिं सुनानं वय्कःया बारे खुलस्त खँ ल्हायेगु आँट मयाः।
बलचाबाय्या नखःबलय् येशू देगलय्
14 नखः बच्छि सिधःबलय् येशूं देगलय् झायाः मनूतय्त स्यनेकने यानादिल। 15 नायःतय्सं छक्क जुयाः थथे धाल – “थ्व मनुखं ब्वँ हे मब्वंकं थुलिमछि खँ गथे यानाः सय्कल?” 16 अले वय्कलं इमित लिसः बियादिल – “जिं स्यनाच्वनागु खँ जिगु मखु, जितः छ्वया हयादीम्हय्सिगु खः। 17 सुनानं परमेश्वरयागु इच्छा पालन यायेगु मतिइ तःसा व मनुखं जिं स्यनाच्वनागु खँ परमेश्वरयागु खः ला कि जिगु थःगु हे खँ खः धकाः सीके फइ। 18 थःगु हे जक खँ ल्हाइम्ह मनू थः हे जक तःधं जुइत स्वइ। बरु थःत छ्वया हःम्हय्सित तःधंकेत स्वइम्ह मनू हे सत्यम्ह खः। अले वयाके मभिंगु छुं हे दइ मखु। 19 छिकपिन्त व्यवस्था बियादीम्ह मोशा मखु ला? छिपिं छम्हय्सिनं हे नं थ्व व्यवस्था पालन याःगु मदु। अय्नं छिकपिन्सं जितः छाय् स्यायेत स्वयाच्वना?” 20 अले मनूतय्सं लिसः बिल – “छंके भूत दुबिनाच्वंगु दु। सुनां छन्त स्यायेत स्वयाच्वन?।” 21 वय्कलं इमित लिसः बियादिल – “जिं छगू अजूचायापुगु ज्या याना, अले छिकपिं फुक्कं छक्क जुयादिल। 22 मोशां छिकपिन्त म्हय् चिं तय्केगु नियम बिया थकल। थ्व मोशां हे ब्यूगु ला मखु, तापाःबाज्यापिन्सं बियादीगु खः। अले विश्रामबार खुन्हु नं छिकपिन्सं मचायागु म्हय् चिं तय्का जुल। 23 छिकपिन्सं विश्रामबार नं मोशायागु व्यवस्था मानय् यायेगु धकाः म्हय् चिं तय्का जू धाःसा जिं छम्ह मनूयात विश्रामबार खुन्हु लाय्का बिल धकाः छिकपिन्स जि खनाः छाय् तं म्वयादी माःगु? 24 ख्वाः स्वयाः न्याय यानादी मते, बरु खःकथं न्याय यानादिसँ।” 25 यरूशलेमय् च्वंपिं गुम्हं गुम्हं मनूतय्सं थथे धाल – “इमिसं स्यायेत स्वया च्वंम्ह मनू थ्व हे, मखु ला? 26 आः ला थ्व मनुखं झन जक फुक्कसिया न्ह्यःने नवानाच्वन। अय्नं वयात सुनां छुं मधाः। नायःतय्सं थ्व हे मुक्ति बीम्ह ख्रीष्ट खः धकाः धात्थें हे सीके धुंकल ला कि छु? 27 थ्व मनू गनं वःम्ह धकाः झीसं स्यू। मुक्ति बीम्ह ख्रीष्ट झाइबलय् ला वय्कः गनं झाःम्ह धकाः सुनानं सी मखु।” 28 देगलय् स्यनादीबलय् येशूं तस्सलं थथे धयादिल – “छिकपिन्सं जितः म्हस्यू, जि गनयाम्ह धकाः नं छिकपिन्सं स्यू। जि यसें वयागु मखु, जितः छ्वया हयादीम्ह सत्य परमेश्वर खः, छिकपिन्सं धाःसा वय्कःयात म्हमस्यू। 29 जिं वय्कःयात म्हस्यू, छाय्धाःसा जि वय्कःयाथासं हे वयागु खः। वय्कलं हे जितः छ्वया हयादीगु खः।” 30 थ्व न्यनाः इमिसं वय्कःयात ज्वनेत स्वल। तर सुनानं ज्वने मफुत, छाय्धाःसा वय्कःयागु ई मवःनि। 31 अय्सां यक्व मनूतय्सं वय्कःयात विश्वास यात। इमिसं धाल – “मुक्ति बीम्ह ख्रीष्ट झाइबलय् वय्कलं थ्व मनुखं स्वयाः अप्वः अजूचायापुगु चिं क्यनादी ला?”
येशूयात ज्वंकेत देगःया सिपाइँत छ्वःगु
32 थथे यक्व मनूतय्सं वय्कःयागु खँ ल्हानाच्वंगु तायाः फरिसीतय्सं तःधंपिं पुजाहारीतलिसे मिलय् जुयाः वय्कःयात ज्वंकेत देगःया सिपाइँत छ्वल। 33 येशूं इमित धयादिल – “छुं ई तक जक जि छिमिथाय् दइतिनि, अले लिपा जि जितः छ्वया हयादीम्हय्सिथाय् तुं वने। 34 छिकपिन्सं जितः माः जूसां लुइके फइ मखु। जि दुथाय् छिकपिं वये फइ मखु।” 35 अले इमिसं थःथवय् थथे खँ ल्हात – “झीसं लुइके हे मफय्क थ्व मनू गन वनेत्यंगु जुइ? छु थ्व ग्रीकतय्गु दथुइ उखेलाः थुखेलाः जुयाच्वपिं यहूदीतय्थाय् वनाः ग्रीकतय्त स्यनेकने यायेत वनेत्यंगु ला मखु ला? 36 वं ‘छिकपिन्सं जितः माः जूसां लुइके फइ मखु’ अले ‘जि दुथाय् छिकपिं वये फइ मखु’ धकाः धाःगुया अर्थ छु जुइ?”
अनन्त जीवनया लः
37 नखः सिधइगु व मुख्यगु दिनय् येशूं दनाः तस्सलं थथे धयादिल – “सुं प्याःचाःम्ह मनू दुसा जिथाय् वयाः त्वँ वा। 38 अले धर्मशास्त्रय् च्वया तःथें – सुनां जितः विश्वास याइ, वयागु नुगलं अनन्त जीवन दुगु खुसि बाः वया च्वनी।” 39 वय्कलं पवित्र आत्मायागु खँ धयादीगु खः। वय्कःयात विश्वास याःपिन्त आत्मा बियादी। वय्कलं आः तक सीम्ह म्वाका मदीनि सुयातं आत्मा बियादीगु मदुनि। 40 थ्व खँ न्यंपिं गुम्हं गुम्हं मनूतय्सं थथे धाल – “थ्व ला धात्थें हे वइतिनि धाःम्ह अगमवक्ता खः।” 41 गुलिंसिनं थथे धाल – “थ्व ला मुक्ति बीम्ह ख्रीष्ट हे खः।” अले गुलिंसिनं थथे धाल – “गालीलं वःम्ह नं ख्रीष्ट जुइ ला? 42 मुक्ति बीम्ह ख्रीष्ट जुजु दाऊदया सन्तान जुइ, अले जुजु दाऊदयागु गां बेथलेहेमं वइ धकाः धर्मशास्त्रय् च्वयातःगु मस्यू ला?” 43 थुकथं वय्कःयागु खँय् ग्वाः ग्वाः मनूत बाल। 44 गुम्हं गुम्हं मनूतय्सं ला वय्कःयात ज्वनेत स्वल, अथेसां सुनानं ज्वने मफु।
यहूदीतय् नायःतय्सं विश्वास मयाःगु
45 अनंलि ज्वंवःपिं सिपाइँत तःधंपिं पुजाहारीत व फरिसीतय्थाय् लिहां वन। इमिसं सिपाइँतय्त थथे धाल – “छिमिसं छाय् वयात ज्वना महयागु?” 46 अले इमिसं लिसः बिल – “थ्व मनुखं थें सुनानं नवाःगु मदुनि।” 47 अले फरिसीतय्सं धाल – “छिमित नापं वं झंगःलात कि छु? 48 सुं शासकत व फरिसीतय्सं नं वं धाःगु खँय् विश्वास यात ला? 49 व्यवस्था मस्यूपिं थुपिं सराः लाःपिं खः।” 50 छकः बहनी येशूयात नापलाः वने धुंकूम्ह इमिगु हे पुचलय् च्वंम्ह निकोदेमसं इमित धाल – 51 “छु झीगु व्यवस्थां सुं मनूयात वयागु खँ मन्यंकं व वं छु यात धयागु मसिकं न्याय याइ ला?” 52 इमिसं वयात लिसः बिल – “छ नं गालीलयाम्ह हे ला कि छु? धर्मशास्त्र ब्वनाः स्व, सुं नं अगमवक्ता गालीलं वइ मखु।” गुलिं गुलिं हस्तलिपिइ यूहन्ना ७:५३ निसें ८:११ तक मदु 53 अले इपिं फुक्क थः थःगु छेँय् लिहां वन।
व्यभिचार यानाच्वंबलय् ज्वंम्ह मिसा
1 अनं येशू जैतून डाँडाय् झाल। 2 कन्हय् खुन्हु सुथ न्हापां वय्कः हानं देगलय् तुं लिहां झाल। फुक्क मनूत वय्कःयाथाय् मुं वःगुलिं इमित स्यनेकने यायेत वय्कः फ्यतुनादिल। 3 शास्त्री व फरिसीतय्सं व्यभिचार याना च्वंबलय् ज्वंम्ह छम्ह मिसायात हयाः सकसिगुं न्ह्यःने थनाः 4 वय्कःयात थथे धाल – “गुरूजु, थ्व मिसायात जिमिसं व्यभिचार यानाच्वंबलय् ज्वना हया। 5 व्यवस्थाय् मोशां झीतः थथे व्यभिचार याइम्ह मिसायात ल्वहँतं कय्काः स्या धकाः आज्ञा बियादीगु दु। अय्जूगुलिं आः थ्व मिसायात छु याये माली? छिं हे धयादिसँ।” 6 वय्कःयात जाँचय् यानाः दोषी ठहरय् यायेत इमिसं थथे न्ह्यसः याःगु खः। तर वय्कलं क्वछुनाः पतिंचां बँय् च्वयादिल। 7 इमिसं व हे खँ जक न्यनाच्वंगुलिं वय्कलं दनाः इमित थथे धयादिल – “छिकपिं मध्ये सुनां गुबलें पाप याना मदी, वय्कलं हे दकलय् न्हापालाक वयात ल्वहँतं कय्कादिसँ।” 8 वय्कलं हानं क्वछुनाः पतिंचां बँय् च्वयादिल। 9 थ्व न्यनाः इपिं तःधिकःम्हंनिसें कयाः चिधिकःपिं तकं छम्ह छम्ह यानाः अनं वन। अले अन येशू याकःचा जुल। व मिसा धाःसा वय्कःया न्ह्यःने हे दनाच्वन। 10 वय्कलं थस्वयाः व मिसायात धयादिल – “ग्वः, छितः पाः याःपिं? सुनानं छितः सजाँय मब्यू?” 11 अले व मिसां धाल – “सुनानं मब्यू, प्रभु।” अले वय्कलं धयादिल – “अय्सा जिं नं छितः सजाँय बी मखु, आः छि झासँ, हानं पाप यानादी मते।”
येशू संसारया जः
12 येशूं हानं मनूतय्त धयादिल – “जि संसारया जः खः। जि नाप जुइम्ह मनू खिउँथाय् जुइ माली मखु, बरु वयात जीवनया जः दइ।” 13 अले फरिसीतय्सं वय्कःयात धाल – “छं थःगु हे जक साक्षी बियाच्वन, छंगु साक्षी सत्य मखु।” 14 वय्कलं इमित लिसः बियादिल – “जिं जिगु हे खँय् साक्षी बिया च्वना सां जिगु साक्षी सत्य खः, छाय्धाःसा जि गनं वयाम्ह खः, अले गन वने त्यनाम्ह खः धकाः जिं स्यू, अय्नं छिकपिन्सं धाःसा जि गनं वइ, अले गन वनी धकाः सी मखु। 15 छिकपिन्सं मनू स्वयाः न्याय यानादी, तर जिं सुयागुं न्याय मयाना। 16 जिं न्याय या हे याःसां जिगु न्याय सत्यगु जुइ, छाय्धाःसा न्याय याइम्ह जि याकःचा जक मखु, जि नापं जितः छ्वया हयादीम्ह बाः नं दी। 17 छिकपिनिगु व्यवस्थाय् नं निम्हय्सिनं ब्यूगु साक्षी सत्य खः धकाः च्वयातःगु दु। 18 जिं थःम्हं हे जिगु साक्षी बियाच्वना, अले जितः छ्वया हयादीम्ह बाःनं नं जिगु साक्षी बियादी।” 19 अय्जूगुलिं इमिसं वय्कःयात थथे धाल – “छिमि बाः गन दु लय्?” वय्कलं लिसः बियादिल – “छिकपिन्सं न जितः म्हस्यू, न जिमि बाःयात म्हस्यू। छिकपिन्सं जितः म्हस्यूगु जूसा जिमि बाःयात नं म्हसी।” 20 थ्व खँ वय्कलं देगलय् स्यनेकने यानादीबलय् भेटी तइगु बाकसया न्ह्यःने धयादीगु खः। वय्कःयात सुनानं मज्वं, छाय्धाःसा वय्कःयागु ई मवःनि।
येशू संसारयाम्ह मखु
21 वय्कलं इमित हानं धयादिल – “जि वना छ्वये, अले छिकपिन्सं जितः माः जुइ, अय्नं छिकपिं पापय् लानाः सी। जि गन वनेगु खः, अन छिकपिं झाये फइ मखु।” 22 थ्व न्यनाः यहूदी नायःतय्सं धाल – “थ्व मनू थः थःम्हं सीत्यंगु ला मखु? ‘गन जि वनेगु खः अन छिपिं वये फइ मखु’ धकाः धाल नि।” 23 अले वय्कलं इमित धयादिल – “छिकपिं क्वय्च्वंपिं खः, जि च्वय्च्वंम्ह खः। छिकपिं थ्व संसारयापिं खः, जि संसारयाम्ह मखु। 24 छिकपिं पापय् लानाः सी माली धकाः जिं छिकपिन्त धाये धुन। जि व हे खः धकाः छिकपिन्सं विश्वास मयाःसा छिकपिं पापय् लानाः सी।” 25 इमिसं वय्कःयात धाल – “छ सु खः लय्?” वय्कलं लिसः बियादिल – “जि व हे खः धकाः जिं छिकपिन्त न्हापांनिसें हे धया वयाच्वनागु दु। 26 जिं छिकपिन्त यक्व धायेमाःगु व न्याय याये माःगु दु। अथेसां जितः छ्वया हयादीम्ह सत्य खः, उकिं वय्कलं जितः धयादिक्व जिं संसारयात धया बियागु दु।” 27 वय्कलं इमित बाःयागु खँ धयाच्वंगु धकाः इमिसं थुइके मफुत। 28 उकिं वय्कलं थथे धयादिल – “गुबलय् छिमिसं मनूया काय्यात यख्खाइ, अबलय् तिनि छिकपिन्सं जि सु खः धकाः सी। जिं थः यसें छुं नं मयाना, बरु बाःनं गुकथं स्यनादिल उकथं हे नवाना वन धकाः नं छिकपिन्सं थुइ। 29 जितः छ्वया हयादीम्ह जि नाप दी, जिं न्ह्याबलें वय्कःयात यःथें जक याना जुयागुलिं वय्कलं जितः याकःचा त्वःतामदी।” 30 वय्कलं थथे धयादीगुलिं यक्वसिनं वय्कःयात विश्वास यात।
अब्राहामया सन्तान व शैतानया सन्तान
31 येशूं थःत विश्वास याःपिं यहूदीतय्त धयादिल – “जिं धया थें छिकपिं च्वंसा छिकपिं धात्थें जिम्ह चेला जुयादी। 32 छिकपिन्सं सत्य छु खः धकाः सी, अले सत्यं छिकपिन्त स्वतन्त्र याइ।” 33 इमिसं वय्कःयात लिसः बिल – “जिपिं अब्राहामया सन्तान खः, जिपिं आःतक सुयां दास मजुयानि। छं गुकथं जिमित ‘छिपिं स्वतन्त्र जुइ’ धकाः धयागु?” 34 वय्कलं इमित धयादिल – “जिं छिकपिन्त खःगु खँ धाये – पाप याना जुइपिं फुक्कं पापया दास खः। 35 अले दास न्ह्याबलें छेँय् च्वने दइ मखु, काय्मचा जक न्ह्याबलें च्वने दइ। 36 अय्जूगुलिं परमेश्वरया काय्नं स्वतन्त्र याना ब्यूसा छिकपिं धात्थें स्वतन्त्र जुइ। 37 छिकपिं अब्राहामया सन्तान खः धकाः जिं स्यू। अय्नं जिं धयागु खँ छिकपिनिगु मनय् दुहां मवंगुलिं छिकपिन्सं जितः स्यायेत स्वःगु खः। 38 जिं जिमि बाःयाथाय् खं थें धयाच्वना, अथे हे छिकपिन्सं नं छिमि बाःनं धाःथें यानाच्वन।” 39 इमिसं वय्कःयात लिसः बिल – “अब्राहाम जिमि तापाःबाज्या खः।” अले वय्कलं धयादिल – “छिकपिं अब्राहामया सन्तान खः धयागु जूसा अब्राहामं यानाः वं थें छिकपिन्सं नं यानादी माःगु खः। 40 परमेश्वरं धयादीगु सत्य खँ धाल धकाः छिकपिन्सं जितः स्यायेत स्वल, थथे अब्राहामं याना मदी। 41 छिकपिनि बाःनं छु यात छिकपिन्सं नं व हे यानादी।” इमिसं धाल – “जिपिं व्यभिचारं बूपिं मखु, जिमि छम्ह हे अबु दु, वय्कः खः परमेश्वर।” 42 वय्कलं धयादिल – “परमेश्वर छिकपिनि बाः खः धयागु जूसा छिपिन्सं जितः माया यानादी माःगु खः, छाय्धाःसा जितः वय्कलं छ्वया हयादीगुलिं जि वया च्वनागु खः। जि थःगु हे इच्छां वयागु मखु, बरु वय्कलं हे जितः छ्वया हयादीगु खः। 43 जिं धयागु खँ छिकपिन्सं गथे मथूगु? जिगु खँ न्यने मास्ति मवःगुलिं छिकपिन्सं जिगु खँ मथूगु खः। 44 छिकपिं शैतानया सन्तान जूगुलिं गथे छिकपिनि बाःनं याना जुल, अथे हे छिकपिन्सं नं याना जुइ। न्हापांनिसें हे शैतान धाःम्ह ज्यानमारा खः। वयाके सत्य धयागु हे मदुगुलिं वं सत्य ज्याखँ याना जुइ फइ मखु। थःगु स्वभाव गथे खः अथे हे वं मखुगु खँ जक ल्हाना जुइ, छाय्धाःसा व मखुगु खँ जक ल्हाना जुइम्ह खः, अले मखुगु खँ ल्हाना जुइपिनि अबु खः। 45 जिं छिकपिन्त सत्य खँ धयागुलिं छिकपिन्सं जितः विश्वास यानामदीगु खः। 46 छिकपिं मध्ये सुनानं जिं पाप यात धकाः जितः दोष बियादी फु ला? जिं सत्य खँ धयागु खःसा छिकपिन्सं जितः छाय् विश्वास याना मदीयागु? 47 परमेश्वरया मनुखं जक परमेश्वरयागु खँ न्यनी। छिकपिं परमेश्वरयापिं मनूत मखुगुलिं छिकपिन्सं जिं धयागु खँ न्यनामदीगु खः।”
अब्राहाम स्वयाः येशू तःधं
48 अले यहूदी नायःतय्सं वय्कःयात धाल – “छ सामरी खः, अले छंके भूत दुबिनाच्वंगु दु धकाः जिमिसं धयागु धात्थें हे खः।” 49 वय्कलं लिसः बियादिल – “जिके भूत दुबिनाच्वंगु मदु। जिं जिमि बाःयात तःधंका च्वना, छिकपिन्सं जितः क्वह्यंकादिल। 50 जि थः थःम्हं तुं तःधं मजुया, तर जितः तःधंकेत स्वया च्वंम्ह ला छम्ह हे दु। अले वय्कलं हे थ्व खँ क्वःछिनादी। 51 जिं छिकपिन्त खःगु खँ धाये – जिगु वचन मानय् याइम्ह मनू गुबलें हे सी मखु।” 52 इमिसं धाल – “आः ला जिमिसं बांलाक हे सिल, छंके भूत दुबिनाच्वंगु हे दु। अब्राहाम व अगमवक्तात ला सिना वन धाःसा छं गथे यानाः छंगु वचन मानय् याइपिं मनूत गुबलें हे सी मखु धकाः धाये फुगु? 53 सी धुंकूम्ह तापाःबाज्या अब्राहाम स्वयाः नं छ तःधं ला कि छु? अगमवक्तात ला सिना वन धाःसा छं थःत सु ताय्का च्वना?” 54 वय्कलं लिसः बियादिल – “जि थः थःम्हं तःधं जुयागु जूसा जि तःधंम्ह मखु। तर छिकपिन्सं जिमि बाः धकाः धाःम्ह परमेश्वर जिमि बाःनं हे जितः तःधं यानादीगु खः। 55 वय्कःयात छिकपिन्सं म्हमस्यूनी, जिं धाःसा म्हस्यू। जिं वय्कःयात म्हमस्यू धकाः धाल धाःसा जि नं छिकपिं थें तुं मखुगु खँ ल्हाइम्ह जुइ। जिं वय्कःयात म्हस्यूगुलिं वय्कःयागु वचन मानय् यानाच्वना। 56 जि वइगु ई स्वयेत छिकपिनि तापाःबाज्या अब्राहामं तसकं इच्छा याःगु खः, अले खनाः तसकं लय्ताल।” 57 अले इमिसं धाल – “छ न्ययदँ ला मदुनि धाःसा छं अब्राहामयात गथे यानाः खन?” 58 वय्कलं इमित लिसः बियादिल – “जिं छिकपिन्त खःगु खँ धाये – अब्राहाम स्वयाः न्हापांनिसें हे जि दु।” 59 थ्व खँ न्यनाः इमिसं वय्कःयात कय्केत ल्वहं काल। तर वय्कः इमिसं मखंक सुरुक्क देगलं पिहां झाल।
येशू व कांम्ह मनू
1 येशूं लँय् झाया च्वंबलय् छम्ह बूसांनिसें हे कांम्ह मनूयात खन। 2 चेलातय्सं वय्कःयाके न्यन – “गुरूजु, थ्व मनू बूसांनिसें कां जूगु वयागु पापं यानाः ला कि वया मांबौपिनिगु पापं यानाः?” 3 वय्कलं लिसः बियादिल – “वय्कःयात अय् जूगु वय्कलं पाप यानादीगुलिं नं मखु, वय्कःया मांबौपिनिगु पापं नं मखु, बरु व वय्कलं यानाः परमेश्वरयागु ज्या फुक्कसिनं सीके फयेमा धकाः थथे जूगु खः। 4 झीसं न्हि दतले जितः छ्वया हःम्हय्सिगु ज्या याये माः, चान्हय् सुनानं ज्या याइ मखु। 5 संसारय् दतले जि संसारया जः खः।” 6 थथे धयाः वय्कलं बँय् ई फानाः चा न्हायाः कांम्हय्सिगु मिखाय् इलादिल। 7 अले वयात थथे धयादिल – “सिलोआम धाःगु पुखुलिइ वनाः सिला छ्वयादिसँ।” सिलोआमयागु अर्थ “छ्वःगु” खः। अले वं वनाः सिला छ्वःबलय् मिखां खन। 8 अले वयागु जःखः च्वंपिं व वयात न्हापांनिसें फ्वनाच्वंगु खंपिन्सं थथे धाल – “थ्व व हे फ्वगिं, मखु ला?” 9 गुम्ह गुम्हय्सिनं “थ्व व हे खः” धकाः धाल, गुलिंसिनं “मखु, व थें च्वंम्ह मेम्ह हे मनू खः” धकाः धाल। कांनं धाल – “व मनू जि हे खः।” 10 इमिसं वयात धाल – “अय्सा छंगु मिखा गथे चाल लय्?” 11 वं लिसः बिल – “येशू धाःम्ह मनुखं चा न्हायाः जिगु मिखाय् इलाः थथे धाल – ‘सिलोआमय् वनाः सिला छ्व।’ जि वनाः सिलाबलय् मिखां खन।” 12 इमिसं वयात धाल – “येशू धाःम्ह मनू गन दु लय्?” वं धाल – “जिं मस्यू।”
फरिसीतय्सं न्यनेकने याःगु
13 अले इमिसं व मनूयात फरिसीतय्थाय् यंकल। 14 येशूं चा न्हायाः वयात मिखां खंकादीगु विश्रामबार खुन्हु खः। 15 अय्जूगुलिं फरिसीतय्सं वयात हानं छकः गथे यानाः मिखां खन धकाः न्यन। अले वं इमित धाल – “वय्कलं जिगु मिखाय् चा न्हायाः इलादिल। चा सिला छ्वयाबलय् जिं मिखां खन।” 16 गुम्हं गुम्हं फरिसीतय्सं धाल – “विश्रामबार मानय् मयाःगुलिं थ्व मनू परमेश्वरयाम्ह मखु।” हानं गुलिंसिनं धाल – “छम्ह पापी मनुखं थपाय् धंगु चिं गथे याये फइ?” थुकथं इमि दथुइ खँ मिलय् मजुल। 17 इमिसं हानं वयाके न्यना स्वल – “वं छंगु मिखा चाय्का ब्यूगुलिं छं व सु धकाः बिचाः याना?” वं लिसः बिल – “व अगमवक्ता खः।” 18 अय्नं यहूदीतय्सं व मनू कांम्ह खः, आः वं मिखां खन धकाः वया मांबौपिन्त सःताः मन्यंतले विश्वास मयाः। 19 इमिसं थथे धकाः न्यन – “बूसांनिसें छिमि काय् कांम्ह खः ला? आः वं गथे जुयाः खन?” 20 वया मांबौपिन्सं लिसः बिल – “थ्व जिमि काय् खः, अले बूसानिसें थ्व कांम्ह खः धकाः जिमिसं स्यू। 21 आः जक गथे यानाः खन धकाः जिमिसं मस्यू। अले हानं सुनां वयागु मिखा चाय्का बिल व नं जिमिसं मस्यू। वयाके हे न्यनादिसँ। थ्व मचा मखय् धुंकल थ्वं थःम्हं हे धायेफु।” 22 सुनानं येशूयात मुक्ति बीम्ह ख्रीष्ट खः धकाः धाल धाःसा व मनूयात धर्मशास्त्र स्यनीगु छेँनं पितिना छ्वयेगु धकाः इमिसं सल्लाह यानातःगुलिं वया मांबौपिन्सं ग्यानाः थथे लिसः ब्यूगु खः। 23 उकिं हे वया मांबौपिन्सं “व मचा मखय् धुंकल, वयाके हे न्यनादिसँ” धकाः धाःगु खः। 24 इमिसं व कांम्ह मनूयात सःताः हानं धाल – “परमेश्वरया न्ह्यःने छं खःगु खँ ल्हाय् धकाः पाफ। छन्त लय्कूम्ह मनू पापी खः धकाः जिमिसं स्यू।” 25 वं लिसः बिल – “व मनू पापी खः कि मखु धकाः जिं मस्यू। छता हे जक खँ जिं स्यू, जि न्हापा कांम्ह खः, आः जिं मिखां खन।” 26 इमिसं वयात धाल – “वं छन्त छु यात? वं छंगु मिखा गथे यानाः चाय्का बिल?” 27 वं इमित लिसः बिल – “जिं छिकपिन्त न्हापा हे धाये धुन, छिकपिन्सं न्यना मदी। व हे खँ हानं छाय् न्यनादीयागु? छिकपिं वय्कःया चेला जुइ मास्ति वः ला कि छु?” 28 अले इमिसं वयात हक्काः थथे धाल – “छ हे खः का वया चेला। जिपिं ला मोशाया चेला खः। 29 परमेश्वरं मोशा नाप नवानादीगु खः धकाः जिमिसं स्यू। तर थ्व मनू गनं वःम्ह खः धकाः जिमिसं मस्यू।” 30 अले वं लिसः बिल – “थ्व हे ला खः, अजूचायापुगु खँ। वय्कः गनं झायादीम्ह खः धकाः छिकपिन्सं मस्यूसां वय्कलं जिगु मिखा चाय्कादिल। 31 पापीतय्गु खँ परमेश्वरं न्यनादी मखु धकाः जिमिसं स्यू। परमेश्वरयात मानय् यानाः वय्कलं धाःथें याना जुइम्हय्सिगु जक खँ न्यनादी। 32 संसार सृष्टि जूसांनिसें थौं तक बूसांनिसें कां जूम्हय्सिगु मिखा चाय्का ब्यूगु खँ न्यनागु मदुनि। 33 थ्व परमेश्वरयाम्ह मनू मखु धयागु जूसा थ्वं थज्याःगु चिं याये फइ मखु।” 34 इमिसं वयात धाल – “पापय् बुयाः पापय् हे ब्वलंम्ह छं जिमित स्यं वयागु ला?” थथे धयाः इमिसं वयात पितिना छ्वल। 35 व मनूयात फरिसीतय्सं पितिना हल धयागु न्यनाः येशूं वयात नाप लानाः थथे धयादिल – “छिं मनूया काय्यात विश्वास यानादिया ला?” 36 वं लिसः बिल – “जिं विश्वास याये माःम्ह वय्कः सु खः धयादिसँ।” 37 वय्कलं धयादिल – “छिं वयात खंगु दु, छि नाप खँ ल्हाना च्वंम्ह व हे खः।” 38 वं धाल – “प्रभु, जिं विश्वास याये।” अले वं वय्कःयात भागि यात। 39 वय्कलं धयादिल – “जि थ्व संसारय् न्याय यायेत वयागु खः। आवंनिसें कांपिन्सं खनी, अले मिखां खंपिं कां जुइ।” 40 थ्व न्यनाः अन दुपिं गुम्हं गुम्हं फरिसीतय्सं वय्कःयात थथे धाल – “अय्सा जिपिं नं कांपिं ला?” 41 वय्कलं इमित धयादिल – “छिकपिं कां जूगु जूसा पापी जुयादी मखुगु। अय्नं छिकपिन्सं ‘जिपिं कां मखु’ धकाः धाःगुलिं छिकपिन्के पाप दया हे च्वनी।”
भिंम्ह फैजवाः
1 “जिं छिकपिन्त खःगु खँ धाये – फैगलय् लुखां दुहां मवसे मेथासं वइम्ह मनू खुँ व दाखुँ खः। 2 फैजवाः धाःसा लुखां दुहां वइ। 3 फैजवाःयात लुखा पिवालं खापा चाय्का बी। फैतय्सं नं वयागु सः ताइ। अले वं फैचातयत् नां कयाः सःताः पिने ब्वना यंकी। 4 थुकथं फैतय्त पित हये धुंकाः व फैतय्गु न्ह्यः न्ह्यः वनी। वयागु सः म्हस्यूगुलिं फैत नं वयागु ल्यू ल्यू वनी। 5 म्हमस्यूम्हय्सिगु ल्यू ल्यू इपिं वनी मखु, बरु वयात खनाः ग्यानाः बिस्युं वनी। म्हमस्यूम्हय्सिगु सः इमिसं म्हमस्यू।” 6 वय्कलं थ्व खँ इमित धयादीगु खः। अय्नं इमिसं वय्कलं इमित छु धाल धकाः थुइके मफु। 7 अय्जूगुलिं वय्कलं इमित हानं धयादिल – “जिं छिकपिन्त खःगु खँ धाये – फैगःयागु लुखा जि हे खः। 8 जि स्वयाः न्हापा वःपिं फुक्कं खुँ व दाखुँत खः। अय्नं फैतय्सं इमिगु खँ मन्यं। 9 जि लुखा खः। जिगु लुखां दुहां वःम्ह बचय् जुइ, अले व दुने पिने जुइ दइ, वयात जयेत ख्यः नं दइ। 10 खुँ खुइत, स्यंकेत व स्यायेत जक वइ। तर जि इमित जीवन दयेमा, अले व गाक्वः जीवन दयेमा धकाः वयागु खः। 11 “जि भिंम्ह फैजवाः खः। भिंम्ह फैजवालं फैतय्गु निंतिं सीत तकं लिफः स्वइ मखु। 12 फै स्वयेत तया तःम्ह मनू फैथुवाः मखु, बरु फै जयेत तया तःम्ह च्यः जक खः, गुम्ह गुँखिचा वःगु खनेवं फैत फुक्क त्वःताः बिस्युं वनी। अले गुँखिचां फैतय्त ज्वनाः लुया यंकी, नापं अले छ्यालब्याल नं याना थकी। 13 व मनू फै जयेत तया तःम्ह च्यः जूगुलिं फैतय्गु वास्ता मयासे बिस्युं वनी। 14 “जि भिंम्ह फैजवाः खः। अथेजूगुलिं जिं जिम्ह फैचात फुक्कं म्हस्यू, अले फैतय्सं नं जितः म्हस्यू। 15 गथे बाःनं जितः म्हस्यू, अथे हे जिं नं बाःयात म्हस्यू। अले फैतय्गु निंतिं जि थः हे तुं सिना बी। 16 जिमि फैत थ्व फैगलय् जक मखु, मेथाय् नं दु। इमित नं जिं हये मानि। इमिसं नं जिगु सः ताइ। थुकथं फुक्क फैत छथ्वः जुइ, अले इमि फैजवाः नं छम्ह हे जुइ। 17 “जि हानं म्वाना वयेगु कथं सी त्यनागुलिं बाःनं जितः तसकं माया यानादी। 18 जितः सुनानं स्याये फइ मखु, बरु जि थः यसें सिना बीत्यनागु खः। जि थः थःम्हं तुं सीगु नं व हानं म्वाना वयेगु नं जिके अधिकार दु। जितः जिमि बाःनं बियादीगु आज्ञा नं थ्व हे खः।” 19 थ्व न्यनाः यहूदीतय् नायःत थःथः हे बाल। 20 इपिं मध्ये यक्वसिनं थथे धाल – “थ्व मनूयाके भूत दुबिनाच्वंगु दु। थ्व वें जुइ धुंकल। थज्याःम्हय्सिगु खँ छिमिसं छाय् न्यनागु?” 21 मेपिन्सं थथे धाल – “भूत दुब्यूम्ह मनुखं थज्याःगु खँ ल्हाइ मखु। कांम्ह मनूयागु मिखा भूत दुब्यूम्ह मनुखं चाय्का बी फइ ला?”
यहूदीतय् नायःतय्सं येशूयात मानय् मयाःगु
22 थुबलय् चिकुला खः। अले यरूशलेमयागु देगः देछाय्गु नखः खः। 23 येशू सोलोमन धाःगु दलानय् उखे थुखे जुयाच्वनादीबलय् 24 वय्कःयाथाय् मुनाः यहूदीतय् नायःतय्सं थथे धाल – “गुबलय् तक छिं जिमित थथे दोमन याका तयेगु? छि मुक्ति बीम्ह ख्रीष्ट हे खः धयागु जूसा जिमित तप्यंक धयादिसँ।” 25 वय्कलं लिसः बियादिल – “जिं छिकपिन्त धया नं छिकपिन्सं विश्वास यानामदी। जिमि बाःयागु नामं जिं यानाच्वनागु अजूचायापुगु ज्यां हे जिगु साक्षी बी। 26 छिकपिं जिमि फैत मखुगुलिं छिकपिन्सं जिं धयागु खँय् विश्वास यानादी मफुगु खः। 27 जिम्ह फैतय्सं जिगु सः ताइ, जिं इमित म्हस्यू, अले इपिं नं जिगु ल्यू ल्यू वइ। 28 इमित जिं अनन्त जीवन बी। इपिं गुबलें नाश जुइ मखु। जिगु ल्हातं इमित सुनानं लाका यंकी मखु। 29 इपिं जितः बियादीम्ह जिमि बाः दकलय् तःधंम्ह खः। बाःयागु ल्हातिं सुनानं इमित लाका यंके फइ मखु। 30 जि व जिम्ह बाः छम्ह हे खः।” 31 वय्कःयात ल्वहँतं कय्केत यहूदीतय् नायःतय्सं हानं ल्वहं काल। 32 वय्कलं इमित धयादिल – “बाःया पाखें जिं छिकपिन्त यक्व हे भिंगु ज्या यानाः क्यनागु दु, उकी मध्ये छुकिं यानाः छिकपिन्सं जितः ल्वहँतं कय्केत्यना?” 33 अले इमिसं वय्कःयात लिसः बिल – “भिंगु ज्या याःगुलिं जिमिसं छन्त ल्वहँतं कय्केत्यनागु मखु, बरु छं परमेश्वरयात क्वह्यंकाः खँ ल्हाःगुलिं कय्केत्यनागु खः। छं मनू जुयाः नं परमेश्वर धकाः धया जूगुलिं थथे यायेत्यनागु खः।” 34 वय्कलं लिसः बियादिल – “छिकपिनिगु व्यवस्थाय् नं थथे च्वयातःगु, मदु ला – ‘परमेश्वरं धयादिल – “छिपिं फुक्कं द्यः खः?”’ 35 सुनां परमेश्वरयागु वचन न्यना काइ, वयात वय्कलं द्यः धकाः धयादी। थथे धाल धकाः धर्मशास्त्र मानय् मयाःगु जुइ मखु। 36 बाःनं ल्ययाः थःम्ह हे यानाः संसारय् छ्वया हयादीम्हय्सित परमेश्वरयात क्वह्यंकल धकाः छिकपिन्सं धयादीया ला, छाय्धाःसा जिं ‘जि परमेश्वरया काय् खः’ धकाः धया? 37 जिमि बाःयागु ज्या जिं याना मच्वंगु जूसा छिकपिन्सं जितः विश्वास यानादीम्वाः। 38 जिं परमेश्वरयागु ज्या यानाच्वनागु खत धाःसा जितः विश्वास मयाःसां जिं यानागु ज्यायात विश्वास यानादिसँ। उकिं जिके बाः दी, अले जि बाःयाके दु धकाः छिकपिन्सं सीकादिसँ, थुइकादिसँ।” 39 इमिसं हानं वय्कःयात ज्वनेत स्वल। तर वय्कः इपिं पाखें बचय् जुयाः झाल। 40 वय्कः हानं यर्दन पारिइ यूहन्नां न्हापा बप्तिस्मा बिया च्वंथाय् झाल, अले अन हे च्वनादिल। 41 यक्व मनूतय्सं वय्कःयाथाय् वयाः थथे धाल – “यूहन्नां छुं नं चिं क्यना मवं, अय्नं यूहन्नां कंगु खँ फुक्कं थ्व मनू लिसे पाय्छि जू वः।” 42 अले अन यक्वसिनं वय्कःयात विश्वास यात।
लाजरसयात म्वाकादीगु
1 बेथानियाय् च्वंम्ह लाजरस धाःम्ह मनू म्हंमफय्का च्वन। वया निम्ह तता मार्था व मरियम दु। 2 थ्व हे मरियमं प्रभुयागु तुतिइ भिंगु नस्वाःगु चिकनं बुकाः थःगु सं हुया ब्यूगु खः। तसकं मफय्का च्वंम्ह लाजरस वया किजा खः। 3 उकिं मार्था व मरियमं वय्कःयात थथे धाय्के छ्वया हल – “प्रभु, छिं माया यानादीम्ह जिमि किजा तसकं मफय्का च्वन।” 4 थ्व न्यनाः वय्कलं धयादिल – “थ्व ल्वचं लाजरस सी मखु। परमेश्वरयागु महिमाया निंतिं व परमेश्वरया काय्यात तःधंकेत व थथे म्हंमफुगु खः।” 5 वय्कलं मार्था, वया केहेँ व लाजरसयात माया यानादी। 6 लाजरस म्हंमफय्का च्वन धयागु न्यनाः नं वय्कः निन्हु तक थः च्वनागु थासय् हे च्वनादिल। 7 निन्हु लिपा वय्कलं चेलातय्त थथे धयादिल – “झी हानं यहूदियाय् लिहां वने नु।” 8 अले चेलातय्सं धाल – “गुरूजु, उखुन्हु तिनि ला यहूदीतय् नायःतय्सं छितः ल्वहँतं कय्काः स्यायेत्यन। हानं अन हे झायादी त्यनागु ला?” 9 वय्कलं लिसः बियादिल – “छन्हुया झिंनिघौ दइगु मखु ला? संसारयागु जलं यानाः न्हिनय् जुइम्ह मनूयात लुफिं हाइ मखु। 10 तर जः मदुगुलिं यानाः चान्हय् जुइपिन्त लुफिं हाइ।” 11 वय्कलं हानं धयादिल – “झी पासा लाजरस द्यनाच्वंगु दु। जि वयात न्ह्यलं चाय्का ब्यू वनेत्यना।” 12 अले चेलातय्सं लिसः बिल – “प्रभु, व द्यनाच्वंगु जूसा दँ हे दनी नि।” 13 वय्कलं लाजरस सी धुंकल धकाः धयादीगु खः। तर इमिसं धाःसा व धात्थें हे द्यनाच्वन धयादीगु धकाः मतिइ तल। 14 उकिं वय्कलं इमित ध्वाथुइक धयादिल – “लाजरस सी धुंकल। 15 छिमिसं विश्वास याये फयेमा धकाः हे जि अन मवनागु खः, उकिं जि लय्ताः। न्ह्याथे जूसां झी आः अन वने नु।” 16 अले दिदुमस धाःम्ह थोमां थः चेला पासापिन्त धाल – “नु, झी नं वय्कः नाप वने सी माःसां सी।” 17 वय्कः अन थ्यंबलय् लाजरसयात सिनाः नं थुनातःगु हे प्यन्हु दये धुंकल। 18 बेथानिया यरूशलेमं तीन किलोमिटर ति तापाः। 19 यक्व हे यहूदीत मार्था व मरियमपिन्थाय् इमि किजा सीगुलिं बिचाः वयाच्वंगु दु। 20 वय्कः झायाच्वन धयागु सियाः मार्था वय्कःयात नाप लाः वन। मरियम जक छेँय् तुं च्वनाच्वन। 21 मार्थां येशूयात धाल – “प्रभु, छि थन दीगु जूसा जिमि किजा सी मखुगु। 22 आः तक नं छिं परमेश्वरयाके न्ह्यागु हे फ्वंसां छितः बियादी धकाः जिं स्यू।” 23 वय्कलं धयादिल – “छिमि किजा हानं म्वाना वइ तिनि।” 24 मार्थां धाल – “दकलय् लिपायागु दिनय् सीपिं म्वाना वइबलय् व नं म्वाना वइ धकाः जिं नं स्यू।” 25 वय्कलं धयादिल – “सीम्ह म्वाकीम्ह व जीवन बीम्ह जि हे खः। जितः विश्वास याःम्ह मनू सीसां म्वाना वइ। 26 अले म्वाना च्वंपिं मनूतय्सं जितः विश्वास याःसा गुबलें हे सी मखु। छिं थ्व खँय् विश्वास यानादिया ला?” 27 वं धाल – “खः प्रभु, संसारय् झायादी माःम्ह परमेश्वरया काय्, मुक्ति बीम्ह ख्रीष्ट छि हे खः धकाः जिं विश्वास यानागु दु।” 28 थथे धयाः मार्था लिहां वन। अले थः केहेँ मरियमयात सःताः न्हाय्पनय् तीजक थथे धाल – “गुरूजु झाये धुंकल, छन्त माला च्वनादीगु दु।” 29 थ्व न्यनाः मरियम काचाकाचां दनाः वन। 30 थुबलय् तक वय्कः गामय् थ्यंकः मझाःनि, मार्थां नाप लाःगु थासय् हे दनि। 31 बिचाः वया च्वंपिं यहूदीतय्सं थथे हथाय् चायाः मरियम पिहां वंगु खनाः लाजरसयात थुना तःथाय् वनाः ख्वः वंगु जुइ धकाः मतिइ तयाः इपिं नं वया ल्यू ल्यू वन। 32 थुकथं मरियम वय्कः दीथाय् थ्यन, अले वय्कःयात खनेवं वय्कःयागु पालिइ भ्वपुयाः थथे धाल – “प्रभु, छि थन दीगु जूसा जिमि किजा सी मखुगु।” 33 थुकथं मरियम व व नाप वःपिं यहूदीत ख्वयाच्वंगु खनाः वय्कःयात तसकं नुगः मछिन। 34 अले वय्कलं न्यनादिल – “छिमिसं वयात गन तयाः तया?” इमिसं लिसः बिल – “प्रभु, स्वः झासँ।” 35 येशू ख्वयादिल। 36 वय्कः थथे ख्वयादीगुलिं मनूतय्सं धाल – “स्व, वय्कलं वयात गपाय्सकं माया यानादी।” 37 इपिं मध्ये गुलिं गुलिंसिनं थथे धाल – “कांम्हय्सित खंका बी फुम्हय्सिनं लाजरसयात सी न्ह्यः छाय् बचय् याये मफुत?” 38 थुकथं तसकं नुगः मछिंकाः वय्कः चिहानय् झाल। थ्व चिहान छगू गुफाय् लाः। थुकियागु प्वाः ल्वहं छगलं तिनातःगु खः। 39 वय्कलं धयादिल – “ल्वहं चीकि।” लाजरसया तता मार्थां वय्कःयात धाल – “प्रभु, आः ला नवये धुंकल जुइ, सीगु हे प्यन्हु मछि दये धुंकल।” 40 वय्कलं वयात धयादिल – “छिं विश्वास यानादीसा, परमेश्वरयागु तःधंगु महिमा स्वये खनी धकाः जिं मधया ला?” 41 अले इमिसं ल्वहं चीकल। वय्कलं च्वय् स्वयाः धयादिल – “बाः, जिं छितः सुभाय् बी। जिगु खँ छिं न्यनादीगु दु। 42 छिं जिगु खँ न्ह्याबलें न्यनादी धकाः जिं स्यू। थन दना च्वंपिन्सं जितः छ्वया हयादीम्ह छि हे खः धकाः विश्वास याये फयेमा धकाः जिं थथे धयागु खः।” 43 थुलि धयाः वय्कलं तस्सलं सःतादिल – “अय् लाजरस, पिहां वा।” 44 अले सीम्ह लाजरस पिहां वल। वयात छ्यंनंनिसे तुतिइ तक सुतिकापतं हिनातःगु दु। येशूं इमित धयादिल – “कापः फ्यनाः वयात वनेब्यु।”
येशूयात स्यायेत ग्वसाः ग्वःगु
45 थ्व खनाः मरियम नापं वःपिं यक्व हे यहूदीतय्सं नं वय्कःयात विश्वास यात। 46 इपिं मध्ये सुं मनूतय्सं धाःसा फरिसीतय्थाय् वनाः वय्कलं यानादीगु खँ कना बिल। 47 उकिं तःधंपिं पुजाहारीत व फरिसीत मुनाः थथे धकाः सल्लाह यात – “आः झीसं छु यायेगु? थ्व मनुखं यक्व हे अजूचायापुगु चिं यानाः क्यनाच्वन। 48 थथे हे याका तल धाःसा फुक्कसिनं हे वयात विश्वास याइ। अले रोमीत वयाः झीगु देगः व झीगु जातियात हे नाश याना छ्वइ।” 49 इपिं मध्ये उगु दँयाम्ह दकलय् तःधंम्ह पुजाहारी कैयाफां थथे धाल – “छिमिसं छुं हे मस्यू। 50 देशय् च्वंपिं दक्व मनूत नाश जुइगु स्वयाः छम्ह मनू सीगु हे भिं जुइ धकाः छिमिसं मस्यू ला?” 51 थ्व खँ वं थःम्हं हे धाःगु मखु, बरु उगु दँयाम्ह दकलय् तःधंम्ह पुजाहारी जूगुलिं यहूदीतय्गु निंतिं येशू सी हे माः धकाः अगमवाणी नवाःगु खः। 52 यहूदीतय्गु निंतिं जक मखु, बरु छ्यालब्याल जुया च्वंपिं परमेश्वरया फुक्क सन्तानतय्त छथाय् मुंकेत नं खः। 53 उखुन्हुनिसें येशूयात गथे यानाः स्यायेगु धकाः इमिसं ग्वसाः ग्वल। 54 अय्जूगुलिं अबलय्निसें वय्कः यहूदीतय्सं खंक यहूदिया जिल्लाय् जुया मदी। तर अनं मरुभूमिया लिक्क लाःगु एफ्राइमय् झाल। वय्कः अन हे चेलात नाप च्वनादिल। 55 अबलय् यहूदीतय्गु छुत्काराया नखः न्ह्यःने थ्यंकः वःगुलिं नखः न्ह्यः हे थःथपिन्त च्वख यायेत यक्व हे मनूत गां गामं यरूशलेमय् वन। 56 इमिसं वय्कःयात माः जुल। अले देगलय् दना च्वंबलय् इमिसं थथे धकाः खँ ल्हात – “नखःबलय् व वइ ला कि वइ मखु, छिमिगु छु बिचाः दु?” 57 तःधंपिं पुजाहारीत व फरिसीतय्सं येशूयात सुनानं खंसा इमित वयाः कं धकाः मनूतय्त उजं बियातःगु दु। इमिसं वय्कः थन दी धकाः सीवं वनाः ज्वनेत थथे याःगु खः।
बेथानियाय् येशूयात चिकनं लूगु
1 छुत्काराया नखःया खुन्हु न्ह्यः येशू बेथानियाय् झाल। थ्व हे गामय् वय्कलं सी धुंकूम्हय्सित म्वाकादीम्ह लाजरस च्वनाच्वंगु दु। 2 इमिसं वय्कःयात भ्वय् ज्वरय् यात। मार्था भलिं जुयाच्वन। वय्कःनापं भ्वय् नयेत फ्यतुपिं मध्य लाजरस नं छम्ह खः। 3 मरियमं तसकं नस्वाःगु व थिकेगु जटामसीया बागू लिटर चिकनं येशूयागु पालिइ थाकाः थःगु सं वय्कःयागु पालि हुया बिल। चिकनं यानाः छेँ छखां हे मगमग नस्वाः वल। 4 वय्कःयात धोखा बीम्ह चेला यहूदा इस्करियोतं धाल – 5 “थ्व नस्वाःगु चिकंया मू स्वसः दिनार तुइ। थ्व मियाः नयेमखंपिन्त इना ब्यूगु जूसा गुलि ज्यूगु।” 6 वं थथे धाःगु नयेमखंपिन्त माया याना मखु, बरु खुँ जूगुलिं खः। धिबाया म्हिचा ज्वनाजुइम्ह जुइगुलिं वं म्हिचाय् च्वंगु धिबा कायेगु नं याः। 7 उकिं वय्कलं धयादिल – “व नाप हाले मते। वं थथे याःगु जितः थुनिबलय्सित खः। 8 नयेमखंपिं छिपिं नाप न्ह्याबलें दइ, तर जि छिपिं नाप न्ह्याबलें दया च्वनी मखु।” 9 येशू अन दी धकाः सीकाः यक्व हे यहूदीत अन वल। इपिं अन वय्कः स्वयेत जक वःगु मखु, बरु वय्कलं म्वाकूम्ह लाजरसयात नं स्वयेत वःगु खः। 10 उकिं तःधंपिं पुजाहारीतय्सं लाजरसयात नं स्यायेगु ग्वसाः ग्वल, 11 छाय्धाःसा वं यानाः यक्व हे यहूदीतय्सं इमित त्वःताः येशूयात विश्वास यात।
येशू यरूशलेमय् झाःगु
12 कन्हय् खुन्हु जुइगु छुत्काराया नखः हनेत वःपिं ग्वाः ग्वाः मनूतय्सं येशू यरूशलेमय् झायात्यंगु दु धकाः सीकल। 13 उकिं इमिसं ताय्गः सिमाया कचामचा ज्वनाः – “होसन्ना, इस्राएलयाम्ह जुजु परमप्रभुयागु नामं झाःम्हय्सिया जय जय जुइमा” धकाः हाहां वय्कःयात लसकुस याःवन। 14 छम्ह मचाम्ह गधा लुइकाः वय्कः उकी हे गयाः झाल। थ्व खँ थथे च्वयातःगु दु – 15 “हे सियोनया शहरय् च्वपिं, ग्याये मते, छिमि जुजु गधाया मचा गयाः झायाच्वंगु दु।” 16 न्हापां ला वय्कःया चेलातय्सं नापं थ्व खँ थुइके मफु। येशू सिनाः म्वानाः स्वर्गय् झाये धुंकाःतिनि इमिसं धर्मशास्त्रय् च्वयातःगु थ्व खँ व लसकुस याःगुया अर्थ थुल। 17 येशूं थुना तःम्ह लाजरसयात सःताः म्वाकादीबलय् न्ह्यःने दुपिं मनूतय्सं थ्व खँ जूगु हे खः धकाः धया जुल। 18 वय्कलं सीम्ह म्वाकादिल धकाः न्यनाः ग्वाः ग्वाः मनूतय्सं वय्कःयात नाप लाः वल। 19 उकिं फरिसीतय्सं थःथवय् खँ ल्हात – “का स्व, संसार फुक्क हे व नाप वन। आः ला झीसं वयात छुं हे याये फइ मखुत।” 20 अन नखःबलय् आराधना यायेत वःपिं मध्ये ग्रीकत नं दु। 21 थुपिं ग्रीकतय्सं गालीलयागु बेथसेदाय् च्वंम्ह फिलिपयाथाय् वनाः थथे धाल – “भाजु, जिमि नं येशूयात स्वये मास्ति वल।” 22 फिलिपं वनाः अन्द्रियासयात धाल। अले इपिं निम्हं येशूयात धाः वन। 23 अले वय्कलं इमित लिसः बियादिल – “मनूया काय्यात तःधंकीगु ई वल। 24 जिं छिमित खःगु खँ धाये – छ्व चाय् लानाः ध्वमगीसा अथें हे जुया च्वनी, चाय् लानाः ध्वगीसा जक यक्व छ्व सइ। 25 थःगु जीवनयात माया याइम्हय्सिनं अनन्त जीवन काये फइ मखु। सुनां थःगु जीवनयात माया याइ मखु, वयात अनन्त तकं म्वाका तइ। 26 सुयां जितः सेवा याये मास्ति वःसा जि नाप वयेमाः। अले जक जि दुथाय् जितः सेवा याइम्ह नं च्वने खनी। सुनां जितः सेवा याइ वयात बाःनं तःधं यानादी। 27 “जिगु नुगलय् तसकं दुःख जुयाच्वंगु दु। उकिं जिं छु धाये? ‘बाः, थ्व इलं जितः बचय् यानादिसँ’ धायेगु ला? मखु, थुलि हे जुइकेत जि वयाच्वनागु खः। 28 ‘बाः, छिगु नांयात तःधंका दिसँ।’” अले स्वर्गं थथे धया हल – “जिं तःधंके धुन, आः हानं तःधंके तिनि।” 29 अन दना च्वंपिं मनूतय्सं थ्व सः तायाः न न्यात धकाः धाल। मेपिन्सं धाल – “स्वर्गदूतं व नाप खँ ल्हाःगु जुइ।” 30 वय्कलं इमित धयादिल – “थ्व खँ धया हःगु छिकपिनिगु निंतिं खः, जिगु निंतिं मखु। 31 आः थ्व संसारयागु न्याय जुइ। आः थ्व संसारयाम्ह शासकयात पितिना छ्वइ। 32 जितः यख्खाइबलय् जिं फुक्क मनूयात थःथाय् सालाकाये।” 33 थुकथं वय्कलं थः गुकथं सी धकाः ध्वाथुइकेत थथे धयादीगु खः। 34 अले यक्व मनूतय्सं थथे धाल – “जिमिसं मुक्ति बीम्ह ख्रीष्ट न्ह्याबलें म्वाना च्वनी धकाः व्यवस्थाय् च्वयातःगु न्यनागु दु। छिं मनूया काय्यात यख्खाइ तिनि धकाः गुकथं धया दियागु? थ्व मनूया काय् धाःम्ह सु खः?” 35 वय्कलं इमित धयादिल – “छिकपिन्थाय् आः छुं ई तक जक जः खयाच्वनी, जः दतले छिकपिं सना जु, मखुसा छिकपिन्त खिउँगुलिं त्वपुइ। खिउँथाय् जुइपिन्सं थः गन वनाच्वना धयागु तकं सी मखु। 36 जः दुबलय् हे जःयात विश्वास यानादिसँ। अले जक छिकपिं जःया सन्तान जुइ।”
यहूदीतय्गु अविश्वास
थुलि धयाः येशू अन झाल अले इमिगु पाखें थःत सुचुकादिल। 37 इमिसं खंक खंक हे उलिमछि चिं वय्कलं यानाः क्यनादिल नं इमिसं वय्कःयात विश्वास मयाः। 38 यशैया अगमवक्तां धया थकूगु खँ सत्य जुइत थथे जूगु खः – “हे परमप्रभु, जिमिगु खँ सुनानं विश्वास मयाः। परमप्रभुं यानादीगु तःधंगु अजूचायापुगु ज्या खंसां विश्वास मयाः।” 39 अय्जूगुलिं नं इमिसं विश्वास याये मफुगु खः, छाय्धाःसा यशैयां हानं थथे धया थकल – 40 “परमेश्वरं इमिगु मिखा कां यानाः नुगः छाय्का बिल। थथेजूगुलिं इमिसं मिखां खनी मखु, अले मनं थुइके फइ मखु, अले लाय्केत जिथाय् लिफः स्वयाः वइ मखु।” 41 यशैयां येशू तसकं तःधं धकाः सीकाः वय्कःयागु खँ थुकथं धाःगु खः। 42 न्ह्यागु हे जूसां तःम्ह हे यहूदी शासकतय्सं नं वय्कःयात विश्वास यात। अय्नं फरिसीत खनाः ग्याःगुलिं इमिसं थ्व खँ सुयातं मकं, छाय्धाःसा फरिसीतय्सं सिल धायेवं इमित धर्मशास्त्र स्यनीगु छेँनं पितिना छ्वइ। 43 छाय्धाःसा इमित परमेश्वरं स्वयाः मनूतय्सं च्वछाइगु यः। 44 येशूं तस्सलं धयादिल – “जितः विश्वास याःपिन्सं जितः जक विश्वास याःगु मखु, बरु जितः छ्वया हयादीम्हय्सित विश्वास याःगु खः। 45 अथे हे जितः खंम्हय्सिनं जितः खंगु मखु, बरु जितः छ्वया हयादीम्हय्सित खंगु खः। 46 संसारय् जि जः जुया वयाम्ह खः, उकिं जितः विश्वास याःपिं मनूत खिउँथाय् जुइ माली मखु। 47 सुनानं जिं धयागु वचन न्यँ जक न्यनाः धया थें मयात धाःसा जिं वयात न्याय याये मखु, छाय्धाःसा जि संसारयात न्याय यायेत वयागु मखु, बरु बचय् यायेत वयागु खः। 48 जितः मयय्काः जिगु वचन मानय् मयाइम्ह मनूयागु न्याय जुइ। जिं नवानागु वचनं हे दकलय् लिपायागु दिनय् न्याय याइ। 49 जिं नवानाच्वनागु वचन जिगु थःगु हे मखु, बरु जिं छु छु धाये माःगु व नवाये माःगु खः जितः छ्वया हयादीम्ह बाःनं हे उजं बियादीगु खः। 50 वय्कःयागु उजं हे अनन्त जीवन खः धकाः जिं स्यू, उकिं जिं नवानागु खँ फुक्कं बाःनं धयादीथें हे नवानागु खः।”
येशूं चेलातय्गु तुति सिला ब्यूगु
1 छुत्कारायागु नखः न्ह्यः येशूं थ्व संसारं बाःयाथाय् वनेगु ई वल धकाः सीकाः संसारय् च्वंपिं थः चेलातय्त माया यानादिल। वय्कलं अन्त तक हे इमित माया यानादिल। 2 बहनी नया च्वंबलय् येशूयात धोखा बीगु खँ सिमोनया काय् यहूदा इस्करियोतयागु मनय् शैतानं तया बी धुंकल। 3 बाःनं फुक्कं वय्कःयागु ल्हातय् बियादीगु दु, अले वय्कः परमेश्वरयाथासं झाःगु खः, अले परमेश्वरयाथाय् तुं वने त्यइन धकाः वय्कलं स्यू। 4 उकिं नयेगु त्वःताः वय्कः दनादिल। अले गा त्वःताः रुमालं जँय् हिनादिल। 5 अनंलि वय्कलं बाताय् लः तयाः चेलातय्गु तुति सिलादिल, अले जँय् हिनातःगु रुमालं हुयादिल। 6 थुकथं वय्कः सिमोन पत्रुसयागु तुति सिलेत झाःबलय् वं वय्कःयात धाल – “प्रभु, छिं नं जिगु तुति सिलादीगु ला?” 7 वय्कलं लिसः बियादिल – “जिं छु यानाच्वना छं आः थुइ मखुनि, लिपा तिनि थुइ।” 8 वं धाल – “छिं जिगु तुति सिलादी जि हे मज्यू।” अले वय्कलं लिसः बियादिल – “जिं छंगु तुति मस्यूसा छ जिम्ह जुइ फइ मखु।” 9 अले सिमोन पत्रुसं धाल – “अय्सा प्रभु, जिगु तुति जक मखु, ल्हाः व छ्यं नं सिला बियादिसँ।” 10 वय्कलं धयादिल – “म्वःल्हुइ धुंकूपिन्सं तुति जक स्यूसा गाः, वयागु म्हछम्हं च्वख जुइ। छिपिं च्वख हे जू, तर फुक्कं मखु।” 11 वय्कलं थःत धोखा बीम्हय्सित म्हस्यूगुलिं “छिपिं फुक्कं च्वख मजू” धकाः धयादीगु खः। 12 थुकथं इमिगु तुति सिला बी धुंकाः वय्कः हानं गां न्ययाः थःगु थासय् फ्यतू झाल। अले वय्कलं इमित धयादिल – “जिं छु यानागु छिमिसं थुल ला? 13 छिमिसं जितः प्रभु व गुरू धकाः धाःगु ठीक हे खः, छाय्धाःसा जि प्रभु नं खः, अले गुरू नं खः। 14 छिमि गुरू व प्रभु जुयाः नं जिं छिमिगु तुति सिला बिया धाःसा छिमिसं नं थःथवय् छम्हं मेम्हय्सिगु तुति सिला बी माः। 15 जिं याना थें छिमिसं नं यायेमा धकाः जिं याना क्यनागु खः। 16 जिं छिमित खःगु खँ धाये – दास मालिक स्वयाः तःधं जुइ मखु। अथे हे खबर छ्वया हइम्ह स्वयाः ज्वना वइम्ह तःधं जुइ मखु। 17 थ्व खँ छिमिसं सीकाः यात धाःसा छिपिं धन्यपिं जुइ। 18 “जिं छिपिं फुक्कसितं धयाच्वनागु मखु। जिं ल्ययापिं मनूतय्त जिं म्हस्यू। अय्नं ‘जिगु हे नसा नःम्हय्सिनं जितः प्यंकेत तुति ल्ह्वन’ धकाः धर्मशास्त्रय् च्वयातःगु खँ पूवंकेत थथे जू वःगु खः। 19 जुइ न्ह्यः हे जिं थथे जुइ धकाः धयागुलिं थथे जुल धाय्वं जि व हे खः धकाः छिमिसं विश्वास याइ। 20 जिं छिमित खःगु खँ धाये – जिं छ्वया हयाम्हय्सित दुकाःम्हय्सिनं जितः हे दुकाःगुति ग्यनी। अथे हे जितः दुकाःम्हय्सिनं जितः छ्वया हयादीम्हय्सित दुकाःगुति ग्यनी।”
येशूं धोखा बीम्ह चेलायागु खँ धयादीगु
21 येशूं थथे धयादी धुंकाः तसकं नुगः मछिंकादिल, अले धयादिल – “जिं छिमित खःगु खँ धाये – छिपिं मध्ये छम्हय्सिनं जितः धोखा बी।” 22 सुयात थथे धयादीगु खः धकाः थुइके मफुगुलिं चेलात थःथवय् ख्वाः स्वयाः वातां जुयाच्वन। 23 वय्कलं यक्व माया यानादीम्ह छम्ह चेला नयाच्वंबलय् वय्कःयागु छातिइ लिधनाच्वंगु दु। 24 उकिं सिमोन पत्रुसं वयात मिखा भाय् यानाः धाल – “वय्कलं धयादीम्ह मनू सु खः, छं स्यू ला?” 25 अले येशूयागु छातिइ लिधना च्वंम्ह चेलां वय्कःयाके न्यन “प्रभु, व मनू सु खः?” 26 वय्कलं लिसः बियादिल – “जिं थ्व मरि कुचा ख्वलाय् थुनाः सुयात बी, व हे खः।” अले वय्कलं मरि कुचा ख्वलाय् थुनाः सिमोन इस्करियोतया काय् यहूदायात बियादिल। 27 मरि कुचा काये धुंकाः वयाके शैतान दुबित। अले येशूं वयात धयादिल – “छं यायेत्यनागु ज्या याकनं याः हुँ।” 28 अन दुपिं सुनानं हे वय्कलं थथे छाय् धयादीगु धकाः थुइके मफुत। 29 यहूदायाके धिबायागु म्हिचा दुगुलिं वयात नखःयात माःगु ज्वलं न्याके छ्वःगु जुइ, कि मखुसा नयेमखंपिन्त छुं बी यंकि धकाः धयादीगु जुइ धकाः इपिं मध्ये गुम्ह गुम्हय्सिनं मतिइ तल। 30 मरि कयाकथं यहूदा पिहां वना छ्वल। थुबलय् चान्हय् जुइ धुंकल।
छगू न्हूगु आज्ञा
31 यहूदा पिहां वने धुंकाः येशूं धयादिल – “आः मनूया काय् तःधन। वया पाखें परमेश्वर नं तःधनी। 32 वया पाखें परमेश्वर तःधनिगुलिं परमेश्वरं वयात थःलिसे तःधंकादी, याकनं हे तःधंकादी। 33 जि यःपिं मस्त, जि छिपिं नाप छुं ई तक जक दइ। अले जितः छिमिसं मात्तुमाली। जिं यहूदीतय् नायःतय्त धया थें छिमित नं धाये – ‘जि वनेत्यनाथाय् छिपिं वये फइ मखु।’ 34 छगू न्हूगु आज्ञा जिं छिमित बीत्यना। छिपिं थःथवय् माया याना च्वँ। गथे जिं छिमित माया यानागु खः, अथे हे छिमिसं थःथवय् माया याना च्वने माः। 35 छिपिं थःथवय् थथे माया याना च्वनाच्वन धाःसा छिपिं जिमि चेलात खः धकाः फुक्कसिनं सी।”
पत्रुसं येशूयात म्हमस्यू धकाः धाइ
36 सिमोन पत्रुसं वय्कःयात धाल – “प्रभु, छि गन झायादी त्यना?” वय्कलं लिसः बियादिल – “जि गन वनेत्यनागु खः छ आः ला अन जिगु ल्यू ल्यू वये फइ मखु, लिपा ला व हे वइ।” 37 पत्रुसं वय्कःयात धाल – “प्रभु, जि छिगु ल्यू ल्यू आः हे छाय् वये फइ मखु? छिगु निंतिं जिं सीत तक नं लिफः स्वये मखु।” 38 अले वय्कलं लिसः बियादिल – “छु जिगु निंतिं छ सीत तकं ग्याये मखु ला? जिं छन्त खःगु खँ धाये – जितः छं म्हमस्यू धकाः स्वकः तक मधातले खा हाली मखु।”
लँ, सत्य व जीवन
1 “छिमिसं नुगः मछिंके मते, परमेश्वरयात विश्वास याःथें जितः नं विश्वास या। 2 जिमि बाःयागु छेँय् च्वनेत यक्व थाय् दु। अथे मखुसा जिं छिमित धाये हे मखु नि। जि छिमित थाय् दय्केत वनाच्वना। 3 जि वनाः छिमित थाय् दय्के धुंकाः हानं वयाः छिमित जि च्वनेथाय् ब्वना यंके। अले छिपिं जि नापं च्वनी। 4 जि वनेत्यनागु थाय्यागु लँपु ला छिमिसं सि हे स्यू।” 5 थोमां वय्कःयात धाल – “प्रभु, छि गन झायादीत्यना धकाः हे जिमिसं मस्यू धाःसा गथे यानाः छि झाइगु लँपु सीके फइ?” 6 वय्कलं धयादिल – “लँ, सत्य व जीवन जि हे खः। जि पाखें हे जक बाःयाथाय् वने फइ। 7 छिमिसं जितः म्हस्यूगु जूसा जिमि बाःयात नं म्हसी। आवंलि छिमिसं वय्कःयात म्हसी अले खंगु नं दु।” 8 उकिं फिलिपं वय्कःयात धाल – “प्रभु, जिमित बाः छकः क्यनादिसँ। जिमित थुलि दयेवं गाः।” 9 वय्कलं धयादिल – “फिलिप, थुलिमछि दये धुंकल छ जि नाप जूगु, आः तक नं छं जितः म्हसीके मफु नि ला? सुनां जितः खन, वं बाःयात नं खने धुंकल धासेंलि हानं ‘जिमित बाः छकः क्यँ’ धकाः धाये मानि ला? 10 जि बाःयाके, अले बाः जिके दी धकाः छं विश्वास मयाना ला? जिं छिमित गुलि नं धया, व जिगु पाखें हे धयागु मखु, बरु जिके दीम्ह बाःनं हे थःगु ज्या यानादी। 11 जि बाःयाके, अले बाः जिके दी धकाः जिं धयागु खँय् विश्वास या। मखुसा जिं यानागु ज्या स्वयाः हे जितः विश्वास या। 12 “जिं छन्त खःगु खँ धाये – जितः विश्वास याःम्हय्सिनं जिं यानागु ज्या याइ। अज्ज ला जिं यानागु स्वयाः नं तःधंगु ज्या याइ। छाय्धाःसा जि बाःयाथाय् वनाच्वना। 13 जिगु नामय् छिमिसं न्ह्यागु फ्वंसां जिं छिमित बी। थुकथं काय्नं यानाः बाः तःधनी। 14 जिगु नामय् छिमिसं न्ह्यागु फ्वंसां जिं छिमित बी।”
पवित्र आत्मायागु बचं
15 “छिमिसं जितः माया याःसा जिगु आज्ञा नं मानय् यानाच्वनी। 16 जिं छिमित ग्वाहालि याइम्ह मेम्ह छ्वयादिसँ धकाः बाःयाके बिन्ति याना बी। अले व छिपिं नाप सदां च्वनी। 17 थ्व सत्य आत्मायात संसारयापिं मनूतय्सं ग्रहण याये फइ मखु, छाय्धाःसा इमिसं वय्कःयात खनी नं मखु, म्हसी नं मखु। छिमिसं धाःसा वय्कःयात म्हस्यू। वय्कः छिपिं नाप, अले छिमिके हे च्वनादी।” 18 “जिं छिमित मांबौ मदुपिं थें त्वःता वने मखु, जि छिमिथाय् हानं लिहां वये। 19 भचा जाय्काः संसारं जितः खनी मखुत। अय्नं छिमिसं धाःसा जितः खनी, छाय्धाःसा जि न्ह्याबलें दु, अले छिपिं नं न्ह्याबलें दइ। 20 उबलय् हे जक जि बाःयाके, छिपिं जिके, अले जि छिमिके दु धकाः छिमिसं सी। 21 जिगु आज्ञा न्यनाः मानय् याःम्हय्सिनं जितः माया याइ। जितः माया याःम्हय्सित बाःनं नं माया यानादी। जिं नं वयात माया याये, अले जिं हे वयात सु खः धकाः क्यना बी।” 22 यहूदां (इस्करियोत मखु) वय्कःयात धाल – “प्रभु, छु जुइत्यंगु दु धकाः छिं थःत संसारयात मखु, बरु जिमित जक म्हसीकादी धकाः धयादियागु?” 23 वय्कलं लिसः बियादिल – “जितः माया याइम्हय्सिनं जिगु वचन नं मानय् याइ। अले बाःनं नं वयात माया यानादी। अले जिपिं वयाथाय् वये व व नाप हे च्वने। 24 जितः माया मयाइम्हय्सिनं जिगु वचन नं मानय् याइ मखु। अले छिमिसं न्यनाच्वंगु जिगु वचन जिगु थःगु हे मखु, बरु जितः छ्वया हयादीम्ह बाःयागु खः।” 25 “छिपिं नाप दुबलय् हे जिं थ्व खँ छिमित धया बियागु दु। 26 छिमित ग्वाहालि याइम्ह पवित्र आत्मायात जिगु नामय् बाःनं छ्वया हयादी। वय्कलं हे छिमित माक्व खँ स्यनादी। अले जिं धयागु फुक्क खँ छिमित लुमंका बी। 27 “छिमित शान्ति बिया थके। जिं जिगु शान्ति छिमित बी। संसारं बीगु थज्याःगु शान्ति ला जिं छिमित बी मखु। छिमिसं नुगः मछिंके म्वाः, अले ग्याये नं म्वाः। 28 ‘जि वनाः हानं छिमिथाय् तुं वये’ धकाः जिं धयागु खँ ला छिमिसं न्यंगु हे दु। छिमिसं जितः माया यानागु खःसा जि बाःयाथाय् वने धकाः धयागु खँ न्यनाः, छिपिं लय्ताय् माःगु खः, छाय्धाःसा बाः जि स्वयाः तःधं। 29 जुइ न्ह्यः हे थथे जुइ धकाः जिं छिमित धया बिया, उकिं थथे जुल कि जिं धयागु खँ छिमिसं विश्वास याइ। 30 “थ्व संसारयात शासन याइम्ह वया च्वंगु दु, उकिं जि छिपिं नाप अप्वः खँ ल्हाना च्वने मखुत। वलिसे जिगु छुं स्वापु मदु। 31 जिं बाःयात माया यानाच्वनागु दु धकाः संसारं सीमा धकाः बाःनं आज्ञा यानादीथें जिं यानाच्वनागु खः। दँ, आः झी थनं वने नु।”
दाखमा जि हे खः
1 “धात्थेंयागु दाखमा जि हे खः, अले दाखमायात स्वइम्ह जिमि बाः खः। 2 जिके च्वंगु दाख मसःगु कचायात बाःनं धेना छ्वइ। अले सयाच्वंगु कचायात अझ यक्व सयेमा धकाः न्हायादी। 3 जिगु वचनं यानाः छिपिं न्हापा हे शुद्ध जुइ धुंकल। 4 छिपिं जिके च्वना च्वँ, जि नं छिमिके च्वने। गथे कचां दाखमाय् मच्वंकं दाख सय्के फइ मखु, अथे हे छिपिं नं जिके च्वना मच्वंसा फल सय्के फइ मखु। 5 “जि दाखमा खः, अले छिपिं दाखमाय् च्वंगु कचा खः। सु जिके च्वनाच्वनि, अले जि वयाके च्वने, वं हे जक यक्व दाख सय्की। जिलिसे तापानाः छिमिसं छुं नं याये फइ मखु। 6 जिके मच्वनिम्ह मनूयात त्वधूगु कचायात थें वांछ्वइ, अले व गना वनी। वयात मुंकाः मिइ तयाः च्याका छ्वइ। 7 छिपिं जिके च्वनाच्वन धाःसा व जिगु वचनयात नुगलय् तया तल धाःसा छिमिसं न्ह्यागु फ्वंसां छिमित बी। 8 छिमिसं यक्व फल सय्कल धाःसा उकिं हे जिमि बाः तःधनी। अले छिपिं जिमि चेलात जुइ। 9 “जितः जिमि बाःनं माया यानादी थें तुं जिं नं छिमित माया यानागु दु, उकिं छिमिसं नं जिं थें माया यायेगु त्वःते मते। 10 जिगु आज्ञा मानय् याःसा छिपिं जिगु मायाय् च्वनाच्वंनी, गथे जिं नं बाःयागु आज्ञा मानय् यानाः वय्कःयागु मायाय् च्वनाच्वना। 11 जिगु आनन्द छिमिके दयेमा, अले थ्व आनन्द यक्व दयावनेमा धकाः हे जिं थ्व खँ छिमित धयागु खः। 12 “गथे जिं छिमित माया याना, अथे हे छिमिसं नं थः थवय् माया याना च्वँ। थ्व हे जिगु आज्ञा खः। 13 पासायागु निंतिं सीगु ति तःधंगु माया मेगु मदु। 14 जिगु आज्ञा मानय् याःसा छिपिं धात्थें हे जिमि पासापिं खत। 15 आवंनिसें जिं छिमित दास धकाः धाये मखुत, छाय्धाःसा मालिकं याःगु ज्याखँ दासं सी मखु। जिं छिमित जिमि पासापिं धकाः धयागुलिं बाःनं जितः धयादिक्व खँ जिं छिमित धयागु दु। 16 छिमिसं जितः ल्यःगु मखु, बरु जिं छिमित ल्ययागु खः, उकिं थाय् थासय् वनाः छिमिसं फल सय्कि। छिमिगु फल सदां सयाच्वनेमा धकाः जिं छिमित ल्ययाः छ्वयागु खः। अले छिमिसं जिगु नामं बाःयाके न्ह्यागु फ्वंसां छिमित बियादी। 17 छिमिसं थःथवय् माया याना च्वँ – थ्व हे जिगु आज्ञा खः।”
संसारं याइगु हेला
18 “संसारं छिमित हेला याइ, छिमित स्वयाः न्हापालाक जितः हेला याःगु खः धकाः सीकि। 19 छिपिं संसारयापिं मनूत जूगु जूसा संसारं छिमित थःपिं धकाः माया याइगु, तर जिं छिमित संसारं ल्यये धुनागुलिं छिपिं संसारयापिं मखुत, उकिं इमिसं छिमित यय्की मखु। 20 ‘मालिक स्वयाः दास तःधं जुइ मखु’ धकाः जिं नकतिनि धयागु खँ लुमंकि। जितः हेलायानाः इमिसं दुःख बिल धाःसा छिमित नं दुःख बी। जिगु खँ इमिसं न्यन धाःसा छिमिगु खँ नं इमिसं न्यनी। 21 थुकथं जिगु नामं इमिसं छिमित सास्ति याइ। जितः छ्वया हःम्हय्सित म्हमस्यूगुलिं इमिसं थथे याना जूगु खः। 22 जि वयाः जिं इमित फुक्कं मकंगु जूसा इमित पाप लाइ मखुगु। तर आः धाःसा इमिगु पाप त्वपुइगु लँ हे मन्त। 23 सुनां जितः हेला याइ वं जिमि बाःयात नं हेला याइ। 24 सुनानं मयाःगु ज्या जिं इमिगु न्ह्यःने यानाः मक्यंगु जूसा इमित पाप लाइ मखुगु। तर इमिसं थ्व अजूचायापुगु ज्या स्वयाः नं जितः व जिमि बाःयात नं हेला यात। 25 व्यवस्थाय् थथे च्वयातःगु खँ पूवंकेत हे थथे जूगु खः – ‘छुं म्वाय्क हे इमिसं जितः हेला यात।’ 26 “जिं छिमिथाय् बाःया पाखें ग्वाहालि याइम्ह सत्य आत्मायात छ्वया हये। वय्कलं हे छिमित जिगु साक्षी बी। 27 छिपिं न्हापांनिसें हे जि लिसे दुगुलिं छिमिसं नं जिगु साक्षी बी।”
1 “छिपिं स्यना मवनेमा धकाः जिं थथे धयागु खः। 2 इमिसं छिमित धर्मशास्त्र स्यनिगु छेँनं पितिनाहइ। अले मनूतय्सं छिमित स्यानाः परमेश्वरयागु सेवा याना धकाः मतिइ तया जुइगु ई नं वइतिनि। 3 बाःयात व जितः म्हमस्यूगुलिं हे इमिसं थथे याइ। 4 इमिसं थथे याइ धकाः जिं धयागु खँ छिमिसं लुमंकेमा धकाः जिं थ्व खँ धयाच्वनागु खः। न्हापांनिसें हे जि छिपिं लिसे दुगुलिं जिं थ्व खँ मकनागु खः।”
पवित्र आत्मायागु ज्या
5 “अय्नं आः जि जितः छ्वया हयादीम्हय्सिथाय् तुं वने त्यनागु दु। जि वने त्यना नं छिपिं सुनानं हे ‘गन वने त्यना’ धकाः मन्यं। 6 जिं थथे धयागुलिं छिमित नुगः मछिन जुइ। 7 न्ह्यागु जूसां जिं सत्य खँ धाये, जि वनेगु हे छिमिगु निंतिं भिं जुइ। जि मवंकं छिमित ग्वाहालि बीम्ह छिमिथाय् झायादी मखु। अय्जूगुलिं जिं वनाः वय्कःयात छ्वया हया बी। 8 वय्कः झाये धुंकाः पाप छु खः, धार्मिकता छु खः व परमेश्वरया न्याय छु खः धयागु खँय् संसारय् च्वंपिनिगु दोष क्यनादी। 9 जितः विश्वास मयाःगु हे पाप खः धकाः वय्कलं इमित क्यनादी। 10 अले धार्मिकता छु खः धयागु नं वय्कलं छिमित क्यनादी, छाय्धाःसा जि बाःयाथाय् वनेत्यनागु दु। अले छिमिसं जितः गुबलें हे खनी मखु। 11 वय्कलं परमेश्वरया न्याय छु खः क्यनादी, छाय्धाःसा थ्व संसारया शासक न्हापा हे दोषी खः धकाः न्याय याये धुंकल।” 12 “जिं छिमित धाये मानिगु खँ ला यक्व हे दु। अय्नं छिमिसं आःयात थुइके फइ मखुनि। 13 गुबलय् सत्य आत्मा झायादी, अबलय् छिमित फुक्क सत्य खँ सीके फय्के बी। वय्कलं थःगु हे जक खँ कनादी मखु, बरु छु छु न्यनादिल व हे जक कनादी। वय्कलं लिपा जूवइतिनिगु खँ नं कनादी। 14 वय्कलं जिगु खँयात कयाः छिमित थथे कनाः जितः तःधंकादी। 15 बाःयाके दुगु फुक्कं जिगु हे खः। अय्जूगुलिं जिं जिगु खँयात कयाः सत्य आत्मां छिमित कनादी धकाः धयागु खः।”
चेलातय्गु दुःख सुखय् हिलावनी
16 “छुं ई लिपा छिमिसं जितः खनी मखु, अले छुं ई लिपा हे छिमिसं जितः हानं खनी।” 17 वय्कःया चेलात मध्ये गुम्ह गुम्हय्सिनं थःथवय् थथे धकाः खँ ल्हात – “वय्कलं – ‘छुं ई लिपा छिमिसं जितः खनी मखुत,’ अले ‘छुं ई लिपा हे छिमिसं जितः हानं खनी,’ अले हानं – ‘जिमि बाःयाथाय् वनेत्यना’ धकाः छु धयादीगु?” 18 इमिसं धाल – “वय्कलं – ‘छुं ई लिपा’ धकाः धयादीगु मतलब छु जुइ? वय्कलं छु धयादीगु खः झीसं छुं हे ध्वाथुइके मफुत।” 19 वय्कलं इमिसं छुं खँ न्यनेत्यंगु दु धकाः सीकाः थथे धयादिल – “छुं ई लिपा छिमिसं जितः खनी मखुत, अले छुं ई लिपा छिमिसं जितः हानं खनी धकाः जिं धयागु खँय् छिमि थः थवय् खँ ल्हानाच्वनागु ला? 20 जिं छिमित खःगु खँ धाये – छिपिं ह्वाँय् ह्वाँय् ख्वय् मालीतिनि, संसारयापिं मनूत धाःसा लय् लय् ताइ। छिमित दुःख जूसां, छिमित जूगु थ्व दुःख सुखय् हिलावनी। 21 प्वाथय् दुम्ह मिसायात ब्यथा जुइबलय् तसकं दुःख जुइ, तर मचा बुइ धुंकाः मचां यानाः वं थःत जूगु दुःख फुक्कं ल्वःमंका छ्वइ। 22 छिमित नं आः थथे हे दुःख ला जुइ। तर जि छिमित हानं नापलाः वये, अले छिपिं हानं लय्लय् ताइ। अले सुनानं छिमिगु आनन्द लाका काये फइ मखु। 23 अबलय् छिमिसं जिके छुं हे न्यनी मखु। जिं छिमित खःगु खँ धाये – छिमिसं जिमि बाःयाके जिगु नामं न्ह्यागु फ्वंसां छिमित बियादी। 24 आः तक छिमिसं जिगु नामं छुं हे मफ्वंनि। फ्वँ, अले छिमित दइ, थुकथं छिपिं आनन्दं जाइ।”
संसारयात त्याकूगु
25 “थ्व खँ फुक्कं जिं छिमित चाःहिकाः मेकथं धयाच्वना। व ई नं वइ गुबलय् जिं छिमित बाःयागु खँ चाःहिकाः मकंसे ध्वाथुइक कना बी। 26 उबलय् छिमिसं थःपिन्सं हे जिगु नामं बाःयाके फ्वनी। छिमिगु निंतिं जिं बाःयाके फ्वना बीमाली मखु। 27 छिमिसं जितः बाःनं छ्वया हयादीगु खः धकाः विश्वास यानाः जितः माया याना च्वंगुलिं बाःनं नं छिमित माया यानादी। 28 बाःया थासं जि थ्व संसारय् वयागु खः। आः थ्व संसारयात त्वःताः जि हानं बाःयाथाय् तुं लिहां वनेत्यना।” 29 वय्कःया चेलातय्सं धाल – “आः धाःसा छिं जिमित ध्वाथुइक हे धयादिल। ध्वामथुइक चाचाःहीकाः धया मदी। 30 आः जिमिसं सिल, छिं फुक्कं स्यू, छिं मस्यूगु छुं हे मदु। जिमिसं न्यने माःगु छुं हे मन्त। थुकिं यानाः नं छितः परमेश्वरं छ्वया हयादीम्ह खः धकाः जिमिसं विश्वास याना।” 31 वय्कलं लिसः बियादिल – “आः तिनि छिमिसं जितः विश्वास यानागु ला? 32 ई वइ, अले वये नं धुंकल, आः छिपिं फुक्कं जितः त्वःताः छ्यालब्याल जुयाः थः थःगु थासय् वनी। थुकथं जि याकःचा जुइ, अय्नं जि याकःचा जुइ मखु, छाय्धाःसा जि नाप बाः दी। 33 जिगु पाखें छिमित शान्ति दयेमा धकाः जिं थथे धयाच्वनागु खः। थ्व संसारय् छिमित दुःख जुइ, अय्नं साहास या, जिं संसारयात त्याके धुन।”
येशूं थःगु निंतिं प्रार्थना यानादीगु
1 थुलि धयादी धुंकाः येशूं स्वर्गय् थस्वयाः धयादिल – “बाः, ई वये धुंकल, छि काय्यात तःधंकादिसँ, अले काय्नं नं छितः तःधंकी। 2 छिं काय्यात बियादिक्व मनूतय्त अनन्त जीवन बीत फुक्क मनूतय्त वयागु ल्हातय् तयादीगु दु। 3 छि छम्ह हे जक सत्य परमेश्वरयात व छिं छ्वया हयादीम्ह येशू ख्रीष्टयात म्हसीकेगु हे अनन्त जीवन खः। 4 छिं जितः याके बियादीगु ज्या सिधय्काः जिं छितः पृथ्वीइ तःधंकागु दु। 5 बाः, गथे संसार दये न्ह्यः छि लिसे दुबलय् छिं जितः तःधंकादिल, आः नं अथे हे तःधंकादिसँ।”
येशूं थः चेलातय्गु निंतिं प्रार्थना यानादीगु
6 “छिं जितः बियादीपिं संसारय् च्वंपिं मनूतय्त छिगु नां जिं म्हसीका बिया। इपिं छिकपिनि हे मनूत खः, अले इपिं छिं जितः बियादिल। इमिसं नं छिगु वचन मानय् यानाच्वंगु दु। 7 छिं जितः बियादीगु फुक्कं छिगु हे खः धकाः इमिसं आः सीके धुंकल। 8 छिं जितः बियादीगु खँ जिं इमित बी धुन। अले इमिसं नं ग्रहण यात। जि छिथासं वयागु खः धकाः इमिसं बांलाक सीके धुंकल, अले छिं जितः छ्वया हयादीगु खः धकाः नं इमिसं विश्वास यानाच्वंगु दु। 9 “छिं जितः बियादीपिनिगु निंतिं जिं प्रार्थना यानागु खः, छाय्धाःसा इपिं फुक्कं छिकपिनि हे खः। जिं संसारयागु निंतिं प्रार्थना मयाना। 10 जिगु फुक्कं छिगु खः, छिगु फुक्कं जिगु खः। थुकथं इमिसं यानाः जि तःधं जूगु खः। 11 जि आः छिथाय् वयेत्यनागुलिं थ्व संसारय् दइ मखुत, थुपिं धाःसा थ्व संसारय् च्वनाच्वनी। पवित्रम्ह बाः, छिं जितः बियादीपिन्त छिगु हे नांयागु निंतिं बचय् यानातयादिसँ। झीपिं थें तुं इपिं नं छप्पँ जुया च्वनेमा। 12 संसारय् इपिं नाप च्वँतले जिं छिगु नामय् इमित बचय् याना तया। छिं जितः बियादीपिं सुं नं जिं तंकागु मदु। अय्नं धर्मशास्त्रय् च्वया तःथें नाश जुइ माःम्ह छम्ह जक नाश जुयावन, मेपिं सुं नं नाश मजू। 13 “आः जि छिथाय् वयेत्यना। इमिगु नुगः जिगु आनन्दं जायेमा धकाः संसारय् दनिबलय् हे जिं थथे धयागु खः। 14 छिगु वचन जिं इमित न्यंके धुनागुलिं गथे जि संसारयाम्ह मखु, अथे हे इपिं नं संसारयापिं मखुत, उकिं संसारं इमित हेला यात। 15 अय्जूसां छिं इमित संसारं यंकादिसँ धकाः मखु बरु इमित मभिंगु ज्याखँ मयाकुसे बचय् याना तयादिसँ धकाः जिं छितः बिन्ति यानागु खः। 16 गथे जि संसारयाम्ह मखु, अथे हे इपिं नं संसारयापिं मखुत। 17 छिगु सत्यं इमित पवित्र यानादिसँ, छाय्धाःसा छिगु वचन सत्य खः। 18 छिं जितः संसारय् छ्वया हयादीथें तुं जिं नं इमित संसारय् छ्वया। 19 सत्यं इमित नं पवित्र यायेमा धकाः जि थः हे तुं इमिगु निंतिं पवित्र जुया।”
येशूं फुक्क विश्वासीतय्गु निंतिं प्रार्थना यानादीगु
20 “थुमिगु निंतिं जक जिं बिन्ति यानाच्वनागु मखु, इमिगु खँ न्यनाः विश्वास याःपिनिगु निंतिं नं जिं बिन्ति यानाच्वनागु खः। 21 इपिं नं छप्पँ जुया च्वनेमा। यःम्ह बाः, गथे छि जिके, अले जि छिके दु, अथे हे इपिं नं झीके छप्पँ जुया च्वनेमा। थुकथं जूसा जक छिं जितः छ्वया हःगु खः धकाः संसारं विश्वास याइ। 22 “छिं जितः तःधं यानादी थें तुं जिं नं इमित तःधंकागु दु। झी छप्पँ जुया थें इपिं नं छप्पँ जुइमा। 23 छि जिके, अले जि इमिके दुगुलिं इपिं नं फुक्क छप्पँ जुइमा। थुकिं यानाः संसारं छिं जितः छ्वया हयादीगु खः धकाः सी, अले जितः थें इमित नं छिं माया यानादी धकाः नं सी।” 24 “बाः, संसार मदुनिबलय् निसें छिं जितः माया यानाः तःधंकादीगु खँ इमिसं थुइके फयेमा, अले जि गन दु, इपिं नं जि लिसे हे दयेमा धयागु जिगु इच्छा खः। 25 “सत्यम्ह बाः, संसारं छितः म्हसीके मफुनि। तर जिं छितः म्हस्यू। छिं हे जितः छ्वया हयादीगु खः धकाः थुमिसं स्यू। 26 जिं इमित छिगु नां म्हसीके बिया। अझ नं जिं सीके बीतिनि। छिं जितः माया यानादीथें इमिसं नं याये फयेमा, अले जि इमिके च्वने फयेमा।”
येशूयात ज्वंगु
मत्ती २६:४७-५६; मर्कूस १४:४३-५०; लूका २२:४७-५३ 1 थुलि धयाः येशू चेलात नाप किद्रोन खुसि पारिइ झाल। अले वय्कः छगू बगैचाय् थः चेलात नापं दुहां झाल। 2 थ्व थाय् वय्कःयात धोखा बीम्ह यहूदां नं स्यू, छाय्धाःसा येशू थः चेलात नापं थ्व थासय् बरोबर झायादीगु याः। 3 उकिं यहूदा तःधंपिं पुजाहारीतय्थाय् व फरिसीतय्थाय् वनाः छथ्वः सिपाइँत व हाकिमतय्त ब्वनाः चिलाख, लालतिन, व हतियार ज्वनाः अन वल। 4 वय्कलं जुइ त्यंगु फुक्क खँ सीकाः पिहां झायाः इमित धयादिल – “छिमिसं सुयात मालाच्वनागु?” 5 इमिसं वय्कःयात लिसः बिल – “नासरतयाम्ह येशूयात।” अले वय्कलं इमित – “व जि हे खः” धकाः धयादिल। वय्कःयात ज्वंकीम्ह यहूदा नं इपिं नाप दनाच्वंगु दु। 6 “व जि हे खः” धकाः धयादीगुलिं इपिं लिज्यां वनाः बँय् ग्वारातू वन। 7 वय्कलं इमिके हानं न्यनादिल – “छिमिसं सुयात माः वयागु?” अले इमिसं धाल – “नासरतयाम्ह येशूयात।” 8 वय्कलं लिसः बियादिल – “व जि हे खः धकाः जिं छिमित धाये हे धुन नि। छिमिसं जितः मालाच्वनागु खःसा थुमित वने ब्यु।” 9 वय्कलं थथे धयादीगु खँ पूवनेमा धकाः थथे जूगु खः – “छिं जितः बियादीपिं सुयातं जिं तंकागु मदु।” 10 सिमोन पत्रुसयाके तरवार दुगुलिं तरवार लिकयाः वं दकलय् तःधंम्ह पुजाहारीया छम्ह दासयागु जव न्हाय्पं च्वात्त ध्यना बिल। वयागु नां माल्खस खः। 11 वय्कलं पत्रुसयात धयादिल – “तरवार दापय् स्वथँ। बाःनं जितः त्वनेत बियादीगु दुःखयागु ख्वला छु जिं मत्वनेगु ला?”
हन्नासया न्ह्यःने येशू
12 अले सिपाइँत, इमि हाकिम व यहूदीतय् सिपाइँत जानाः येशूयात ज्वनाः चित। 13 उगु दँयाम्ह दकलय् तःधंम्ह पुजाहारी कैयाफा जूगुलिं इमिसं वय्कःयात वया ससःअबु हन्नासया थाय् निं यंकल। 14 झी मनूतय्गु निंतिं छम्ह मनू सीगु हे बांलाः धकाः यहूदीतय् नायःतय्त सल्लाह ब्यूम्ह कैयाफा हे खः।
पत्रुसं येशूयात म्हमस्यू धाःगु
15 सिमोन पत्रुस व मेम्ह छम्ह चेला नं येशूयागु ल्यू ल्यू वन। मेम्ह चेलां दकलय् तःधंम्ह पुजाहारीयात म्हस्यूगुलिं व नं वय्कः लिसे लिसे दकलय् तःधंम्ह पुजाहारीयागु चुकय् दुहां वन। 16 पत्रुस धाःसा लुखा पिनेसं तुं दनाच्वन। दकलय् तःधंम्ह पुजाहारीयात म्हस्यूम्ह मेम्ह चेला पिने वनाः मिसाम्ह ध्वाखा पिवाः नाप खँ ल्हानाः पत्रुसयात नं चुकय् दुने ब्वना हल। 17 ध्वाखा पिवालं पत्रुसयात धाल – “थ्व मनूया चेलात मध्ये छ नं छम्ह मखु ला?” वं धाल “जि मखु।” 18 तसकं चिकुसे च्वंगुलिं दासत व सिपाइँत ह्यंग्वाः च्याकाः मि पनाच्वन। पत्रुस नं इपिं नाप तुं दनाः मि पनाच्वंगु खः।
दकलय् तःधंम्ह पुजाहारीया न्ह्यःने येशू
19 दकलय् तःधंम्ह पुजाहारीं वय्कःया चेलातय्गु व वय्कलं स्यनादीगु खँय् न्ह्यसः यात। 20 वय्कलं लिसः बियादिल – “संसारया न्ह्यःने जिं धयागु दु, जिं न्ह्याबलें धर्मशास्त्र स्यनिगु थाय् थासय् व देगलय् च्वनाः स्यनेकने यानागु दु। जिं सुयातं गुप्त खँ ल्हाः मजुया। 21 जिके हानं न्यनादी माःगु हे मदु। जिं स्यनागु व नवानागु खँ न्यंपिन्के न्यनादिसँ। जिं छु धाल धयागु खँ इमिसं सि हे स्यू।” 22 वय्कलं थथे धयादीगुलिं लिक्कसं दना च्वंपिं मध्ये छम्ह देगलय् पिवाः च्वनिम्हय्सिनं थथे धाधां वय्कःयात दाल – “दकलय् तःधंम्ह पुजाहारी थेंज्याःम्हय्सित लिसः बीगु थथे खः ला?” 23 वय्कलं वयात लिसः बियादिल – “जिं मखुगु खँ धयागु जूसा क्यनादिसँ। मखुसा जितः छाय् दाये माःगु?” 24 अले हन्नासं वय्कःयात चीकाः दकलय् तःधंम्ह पुजाहारी कैयाफायाथाय् तुं छ्वया बिल।
पत्रुसं निक्वः खुसि व स्वक्वः खुसि येशूयात म्हमस्यू धाःगु
25 अबलय् सिमोन पत्रुस दनाः मि पनाच्वन। इमिसं वयात धाल – “छ नं वय्कःया चेलात मध्ये छम्ह मखु ला?” वं हानं थथे धाल – “जि मखु।” 26 पत्रुसं न्हाय्पं चाना ब्यूम्ह मनूया छम्ह थःथिति नं अन दु। व नं दकलय् तःधंम्ह पुजाहारीया च्यः खः। वं थथे धाल – “जिं छन्त वय्कः नाप बगैंचाय् खनागु मखु ला?” 27 पत्रुसं हानं “मखु” धकाः धाल। थुबलय् हे खा हाला हल।
रोमी बडा-हाकिम पिलातसया न्ह्यःने येशू
28 सुथ न्हापां हे इमिसं येशूयात कैयाफायागु छेँनं रोमी बडा-हाकिम पिलातसयागु दरबारय् यंकल। छुत्काराया नखः स्वये खनी मखु धकाः ग्यानाः थःपिं अशुद्ध मजुइमा धकाः दरबारय् दुहां मवं। 29 उकिं पिलातसं पिने वयाः इमित धाल – “थ्व मनूयात छिमिसं छु दोष बिया?” 30 इमिसं वयात लिसः बिल – “थ्व मनुखं मखुगु ज्या मयाःगु जूसा जिमिसं थन हये हे मखु नि।” 31 पिलातसं इमित धाल – “छिमिसं हे यंकाः थ्वयात छिमिगु व्यवस्थाकथं छु याये माःगु खः, या।” अले यहूदीतय् नायःतय्सं वयात लिसः बिल – “जिमित सुयातं स्यायेगु अधिकार बियातःगु मदु।” 32 थः गथे जुयाः सी मानि धकाः वय्कलं धयादीगु वचन पूवनेमा धकाः थथे जूगु खः। 33 पिलातसं लाय्कुलिइ दुहां वनाः वय्कःयात सःताः धाल – “छु छ यहूदीतय् जुजु खः ला?” 34 वय्कलं लिसः बियादिल – “थ्व खँ छिं हे धयादियागु ला कि छितः सुनानं जिगु खँ कना ब्यूगु खः?” 35 पिलातसं लिसः बिल – “छु जि यहूदी खः ला? छंगु हे जातयापिं मनूतय्सं व तःधंपिं पुजाहारीतय्सं ज्वनाः छन्त जिथाय् हःगु खः। छं छु याना?” 36 वय्कलं लिसः बियादिल – “जिगु राज्य थ्व संसारयागु थें मखु। जिगु राज्य थ्व संसारयागु थें खःसा जिमि चेलातय्सं ल्वानाः जितः यहूदीतय् नायःतय्गु ल्हातं बचय् याइगु खः। जिगु राज्य थनयागु थें मखु।” 37 पिलातसं वय्कःयात धाल – “अय्सा छ जुजु हे खः ला?” वय्कलं धयादिल – “जि जुजु खः धकाः ला छिं हे धयादिल। थुकियागु निंतिं हे जि बूगु खः, अले सत्य म्हसीका बीत जि संसारय् वयागु खः। सत्ययात म्हस्यूपिं फुक्कसिनं जिगु खँ न्यनी।” 38 पिलातसं वय्कःयात न्यन – “सत्य धयागु छु?”
येशूयात स्यायेगु फैसला याःगु
अले पिलातसं हानं यहूदीतय् नायःतय्थाय् वनाः थथे धाल – “जिं ला वयाके छुं हे दोष लुइके मफुत। 39 अय्नं छुत्कारायागु नखःबलय् छम्हय्सित त्वःताबीगु छिमिगु चलन दु, उकिं थुगुसी यहूदीतय् जुजुयात त्वःता बी ला?” 40 इपिं थथे धकाः हाला हल “थ्व मनूयात मखु, बरु बारब्बायात त्वःता ब्यु।” बारब्बा धाःम्ह मनू छम्ह दाखुँ खः।
1 अले पिलातसं येशूयात यंकाः कोर्रां दाय्कल। 2 सिपाइँतय्सं कंयागु श्रीपेच दय्काः वय्कःयागु छेनय् पुइका बिल। अले हानं वय्कःयात जुजुतय्गु थें प्याजीगु वसतं पुंका बिल। 3 थथे धाधां इपिं वय्कःयाथाय् वल “हे यहूदीतय् जुजु, जय जुइमा” धकाः हेपय् यानाः वय्कःयात न्यतालय् दाल। 4 पिलातसं हानं पिहां वयाः इमित थथे धाल – “का स्व, जिं वयाके छु नं दोष लुइके मफुगु खँ छिमिसं सीमा धकाः वयात छिमिगु हे न्ह्यःने छ्वया हयागु दु।” 5 अनं लिपा कंयागु श्रीपेच व प्याजीगु वसतं पुंकातःम्ह येशू पिहां झाल। अले पिलातसं – “का स्व, थ्व मनूयात” धकाः इमित धाल। 6 तःधंपिं पुजाहारीत व देगःया सिपाइँत वय्कःयात खनेवं थथे धकाः तस्सलं हाला हल – “वयात क्रूसय् यख्खाये माः, वयात क्रूसय् यख्खाये माः।” पिलातसं इमित धाल – “छिमिसं हे यंकाः वयात क्रूसय् यख्खा। जिं ला वयागु दोष लुइके मफुत।” 7 यहूदीतय्सं पिलातसयात लिसः बिल – “जिमिके नं व्यवस्था दु, थ्व व्यवस्था कथं थ्वयात स्याये हे माः, छाय्धाःसा थ्वं थःत परमेश्वरया काय् धकाः धया जुल।” 8 थ्व खँ न्यनाः पिलातस झन ग्यात। 9 वं हानं लाय्कुलिइ दुहां वनाः वय्कःयात धाल – “छ गनयाम्ह खः?” वय्कलं छुं हे धया मदी। 10 उकिं पिलातसं वय्कःयात धाल “जि नाप नं छं नवाये मखु ला? जिं छन्त त्वःते नं फु, क्रूसय् यख्खाये नं फु धकाः छं मस्यू ला?” 11 वय्कलं वयात लिसः बियादिल – “छितः थ्व अधिकार च्वय्नं मब्यूगु जूसा छिं जितः छुं नं याये फइ मखु। अय्जूगुलिं सुनां जितः ज्वनाः छिथाय् हल, वयात हे अप्वः पाप लाइ।” 12 थ्व न्यनाः पिलातसं वय्कःयात त्वःतेत स्वल। तर यहूदीत थथे धकाः हाला हल – “छिं थ्व मनूयात त्वःतल धाःसा छि कैसरया मनू मखुत। सुनां थःत जुजु धकाः धया जुइ वं कैसरयागु विरोध याःगु जुइ।” 13 थ्व न्यनाः पिलातसं वय्कःयात पिने हल, अले ल्वहँतं सियातःगु थासय् वनाः न्याय आसनय् फ्यतुत। थ्व थाय्यात हिब्रू भासं “गब्बथा” धाइ। 14 थथे जूगु छुत्कारायागु नखःयात ज्वलं ज्वरय् याये खुन्हु खः। उबलय् बान्हि ति जाल। पिलातसं यहूदीतय्त धाल – “छिमि जुजुयात स्व।” 15 अले इपिं फुक्कं तस्सलं हाला हल – “वयात स्याये यंकि, वयात स्याये यंकि, वयात क्रूसय् यख्खानाः स्याना छ्व।” पिलातसं इमित धाल – “छु छिमि जुजुयात जिं क्रूसय् यख्खायेगु ला?” अले तःधंपिं पुजाहारीतय्सं लिसः बिल – “कैसर स्वया जिमि मेम्ह जुजु मदु।” 16 अले पिलातसं वय्कःयात क्रूसय् यख्खायेत इमिगु ल्हातिइ लः ल्हाना बिल। अले सिपाइँतय्सं वय्कःयात यंकल।
येशूयात क्रूसय् यख्खाःगु
17 वय्कः थःगु क्रूस थःम्हं हे कुबियाः खप्परे धाःगु डाँडाय् झाल। थ्व थाय्यात हिब्रू भासं “गलगथा” धाइ। 18 अन थ्यंकाः इमिसं वय्कःयात क्रूसय् यख्खात। वय्कःयागु जवय् खवय् मेपिं निम्हय्सित नं क्रूसय् यख्खाना बिल। 19 पिलातसं क्रूसय् थथे धकाः च्वया बिल – “नासरतयाम्ह येशू, यहूदीतय् जुजु।” 20 यक्व हे मनूतय्सं थ्व ब्वन छाय्धाःसा वय्कः क्रूसय् यख्खाःगु थाय् शहर लिक्क लाःगु, व थ्व हिब्रू, ल्याटिन व ग्रीक भासं च्वयातःगु खः। 21 यहूदीतय् तःधंपिं पुजाहारीतय्सं पिलातसयात धाल – “यहूदीतय् जुजु धकाः च्वयादी मते, बरु थःम्हं थःत हे यहूदीतय् जुजु धकाः धाइम्ह मनू थ्व हे खः धकाः च्वयादिसँ।” 22 पिलातसं लिसः बिल – “म्वाःल, जिं च्वये धुन धुन।” 23 सिपाइँतय्सं वय्कःयात क्रूसय् यख्खाये धुंकाः वय्कःयागु वसःयात प्यब्व थल। छम्ह छम्ह सिपाइँनं छब्व छब्व काल। तपाःलं नं ब्वथय्त भू मदुगुलिं ज्या मछिन। 24 उकिं इमिसं थथे धकाः सल्लाह यात – “थ्व लंयात मखुसे चिट्ठा तये माल, सुयात चिट्ठा लाइ वयागु हे जुइ।” धर्मशास्त्रय् थथे च्वयातःगु पूवनेमा धकाः इमिसं थथे याःगु खः – “इमिसं जिगु लं चिट्ठा तयाः थःथवय् इनाकाइ।” 25 येशूयात यख्खाःगु थासं सत्तिक वय्कःया मां, चिह्रिमां, क्लोपासया कलाः मरियम व मरियम मग्दलिनी दनाच्वंगु दु। 26 वय्कलं थः मां व थःम्हं माया यानातःम्ह चेलायात थःगु न्ह्यःने दनाच्वंगु खनाः थः मांयात धयादिल – “हे नारी स्वयादिसँ, थ्व छिकपिनि काय् खः।” 27 अले चेलायात नं वय्कलं धयादिल – “स्व, व छिमि मां खः!” अबलय्निसें व चेलां वय्कःया मांयात थःगु छेँय् यंकल।
येशू सीगु
28 थुलि जुइ धुंकाः धर्मशास्त्रय् च्वयातःगु फुक्कं खँ पूवने धुंकल धकाः सीकाः येशूं “जितः प्याः चाल” धकाः धयादिल। 29 अन छगः थलय् जाय्क पाउँति तयातःगु दु। उकिं इमिसं हिसप मायागु कथिइ स्पन्ज चिनाः पाउँतिइ थुनाः वय्कःयागु म्हुतुइ ल्वसुकाबिल। 30 वय्कलं पाउँति त्वने धुंकाः थथे धयादिल “आः सिधल।” अले वय्कलं छ्यं क्वछुनाः थःगु प्राण त्वःतादिल। 31 कन्हय् खुन्हु छुत्कारायागु नखः व विश्रामबार जूगुलिं अले थ्व यहूदीतय् तःधंगु नखः जूगुलिं, क्रूसय् मनू यख्खाया तये मज्यूगुलिं यहूदीतय् नायःतय्सं पिलातसयात इमिगु तुति त्वथुलाः सीम्ह यंकि धकाः बिन्ति यात। 32 अले सिपाइँतय्सं वयाः न्हापालाक वय्कः नाप यख्खाःम्ह छम्हय्सिगु तुति त्वथुल, अले हानं मेम्हय्सिगु तुति नं त्वथुल। 33 येशूया थाय् वःबलय् वय्कः सी धुंकूगु खनाः इमिसं वय्कःयागु तुति त्वमथू। 34 अय्नं छम्ह सिपाइँनं ला वय्कःयागु बेक्वय् भालां सुया ब्यूगुलिं हि व लः बाः वल। 35 थ्व खंम्हय्सिनं हे थ्व साक्षी ब्यूगु खः। वयागु साक्षी सत्य खः। वं धाःगु खँ सत्य खः धकाः वं स्यू। छिमिसं नं विश्वास याये फयेमा धकाः वं थ्व साक्षी ब्यूगु खः। 36 धर्मशास्त्रय् च्वयातःगु थ्व खँ पूवनेमा धकाः थथे जूगु खः – “वय्कःयागु क्वँय् छकुचा हे नं त्वधुली मखु।” 37 मेथासय् नं थथे च्वयातःगु दु – “इमिसं भालां सूम्हय्सित इमिसं स्वये खनीतिनि।”
येशूयात चिहानय् तःगु
38 यहूदीतय् नायःत खनाः ग्यानाः दुनें दुनें जक विश्वास यानाच्वंम्ह अरिमाथियाय् च्वना च्वंम्ह योसेफ धाःम्ह छम्ह चेला दु। थ्व हे चेलां वयाः पिलातसयाके येशूयागु सीम्ह फ्वन। पिलातसं नं “ज्यू” धकाः धाल। अले वं वनाः वय्कःयागु सीम्ह क्वकयाः यंकल। 39 वय्कःयात छकः चान्हय् नापलाःवःम्ह निकोदेमस नं स्विस्वँगू किलोग्राम ति मूर्र व कुनुस्वां ल्वाकछ्याना तःगु मसला ज्वनाः योसेफ नापं वन। 40 निम्हय्सिनं वय्कःयागु सीम्हयात क्वकयाः यहूदीतय्गु चलन कथं भिंगु सुति कापतय् मसला ह्वलाः सीम्हयात हिन। 41 वय्कःयात क्रूसय् यख्खाःगु लिक्कसं छगू बगैंचा दु। अन सुनानं मछ्यःनिगु न्हूगु चिहान छगू दु। 42 छुत्कारायागु नखःयागु छन्हु न्ह्यः जूगुलिं व चिहान नं नापसं जूगुलिं इमिसं वय्कःया सीम्हयात अन हे तल।
खालीगु चिहान
1 आइतबार खुन्हु मरियम मग्दलिनी सुथ न्हापां खिउँ खिउँ धाःनिबलय् येशूयात तयातःथाय् स्वःवंबलय् प्वाः तिनातःगु ल्वहं चीकातःगु खन। 2 उकिं वं सिमोन पत्रुस व मेपिं चेलात व येशूं माया यानादीम्हय्सिथाय् ब्वाँय् ब्वाँय् वनाः थथे धाल – “इमिसं प्रभुयात तयातःगु थासं यंके धुंकल। इमिसं वय्कःयात गन तये यन, जिमिसं मस्यू।” 3 अले पत्रुस व मेम्ह चेला नं चिहानय् वन। 4 इपिं निम्हं नाप नापं ब्वाँय् वन। अय्नं मेम्ह चेलां पत्रुसयात लिलाकाः न्हापालाक चिहानय् थ्यंकल। 5 क्वछुनाः दुने स्वःबलय् वं सुति कापः अनसं तुं दुगु खन। अय्जूसां व दुहां मवं। 6 अबलय् लाक्क सिमोन पत्रुस थ्यंकः वल। व चिहानय् दुहां वन। वं नं सुति कापः अनसं त्वःतातःगु खन। 7 वय्कःयागु छेनय् हिनातःगु रुमाल धाःसा सुति कापः नाप मदु, तर मेथाय् हे छग्वारा चिनाः तयातःगु खन। 8 अले दकलय् न्हापालाक थ्यंम्ह चेला नं दुने वनाः स्वः वन। थ्व खनाः व पत्याः जुल। 9 अबलय् तक नं वय्कः सिनाः म्वाना वये माः धकाः च्वयातःगु धर्मशास्त्रयागु खँ इमिसं मथूनि। 10 अले चेलात थःथःगु छेँय् लिहां वन।
येशू मरियम मग्दलिनीयाथाय खनेदय्कः झाःगु
11 मरियम धाःसा चिहानया पिनेसं दनाः ख्वयाच्वन। वं ख्वख्वं क्वछुनाः दुने स्वःबलय् 12 त्वइसे च्वंगु वसतं पुना तःपिं निम्ह स्वर्गदूततय्त येशूयागु सीम्ह तया तःथाय् छम्ह छ्यं पाखे व मेम्ह तुति पाखे फ्यतुनाच्वंगु खन। 13 इमिसं वयात न्यन – “छाय् ख्वयाच्वनागु?” अले वं इमित धाल – “जिमि प्रभुयात इमिसं यंकल। इमिसं वय्कःयात गन तया तल जिं मस्यू।” 14 थुलि धयाः मरियमं लिफः स्वःबलय् दनाच्वंम्ह येशूयात खन। अय्नं वं येशू हे खः धकाः म्हमसील। 15 वय्कलं वयात धयादिल – “हे नारी, छि छाय् ख्वयादीयागु? सुयात मालादियागु?” वं वय्कःयात बगैंचाय् ज्या याइम्ह मनू जुइ धकाः मतिइ तयाः थथे धाल – “भाजु, छिं वय्कःयात यंकादियागु खःसा गन तयादिया जितः धयादिसँ। जिं वय्कःयात यंके।” 16 वय्कलं वयात धयादिल – “मरियम!” वं लिफः स्वयाः हिब्रू भासं वय्कःयात धाल – “रब्बोनी।” उकियागु अर्थ “गुरू” खः। 17 वय्कलं वयात धयादिल – “जितः थी मते, आः तक जि बाःयाथाय् थहां वनागु मदुनि। जिमि किजापिन्थाय् वनाः धाः हुँ – ‘जिमि बाःयाथाय् अले छिमि बाःयाथाय्, जिम्ह परमेश्वरयाथाय् अले छिमि परमेश्वरयाथाय् जि थहां वनाच्वना।’” 18 अले मरियम मग्दलिनीं वनाः चेलातय्त धाल – “जिं प्रभुयात खना।” अले वय्कलं धया हःगु खँ वं इमित कना बिल।
येशू चेलातय् दथुइ खनेदय्कः झाःगु
19 आइतबार खुन्हु बहनी चेलात यहूदीतय् नायःत खनाः ग्यानाः खापाखिपा तिनाः मुना च्वंबलय् येशू अन झायाः इमिगु दथुइ दनाः थथे धयादिल – “छिमित शान्ति दयेमा।” 20 थुलि धयाः वय्कलं इमित थःगु ल्हाः व बेक्व क्यनादिल। अले ला प्रभुयात खनाः चेलात फुक्कं लय् लय् ताल। 21 वय्कलं इमित हानं धयादिल – “छिमित शान्ति जुइमा। गथे बाःनं जितः छ्वया हयादीगु खः अथे हे जिं नं छिमित छ्वये।” 22 थुलि धयाः वय्कलं इमित फू यानाः धयादिल – “पवित्र आत्मा का। 23 छिमिसं सुयागु पाप क्षमा याना बी इमिगु पाप क्षमा जुइ। छिमिसं पाप क्षमा याना मब्यूसा इमिगु पाप क्षमा जुइ मखु।”
येशू हानं चेलातय् दथुइ खनेदय्कः झाःगु
24 दिदुमस धाःम्ह थोमा झिंनिम्ह चेलात मध्ये छम्ह खः। येशू चेलातय्थाय् झायादीबलय् व छम्ह मदु। 25 उकिं मेपिं चेलातय्सं वयात धाल “जिमिसं प्रभुयात खना।” तर वं धाल, “जिं थःम्हं हे वय्कःया ल्हातिइ नकिं ताःगु खू मखंकं, वय्कःयागु ल्हातिइ च्वंगु नकिंयागु प्वालय् पतिं दुमछ्वय्कं व बेक्वय् ल्हाः मतय्कं जि पत्याः जुइ मखु।” 26 च्यान्हु लिपा, वय्कःया चेलात हानं खापा तिनाः छेँय् मुनाच्वन। थुबलय् अन थोमा नं दु। खापा तिनातःथाय् हे दुहां झायाः येशूं इमिगु दथुइ दनाः थथे धयादिल – “छिमित शान्ति जुइमा।” 27 अले थोमायात धयादिल – “छंगु पतिं थन हजि, जिगु ल्हाः थिया स्वः। जिगु बेक्वय् ल्हाः ति। संका याये मते, बरु विश्वास या।” 28 अले थोमां वय्कःयात धाल – “जिम्ह प्रभु, जिम्ह परमेश्वर।” 29 वय्कलं वयात धयादिल – “जितः खंगुलिं छं विश्वास यात। जितः मखंकं विश्वास याइम्ह मनू तसकं धन्यम्ह खः।”
थ्व सफूयागु उद्देश्य
30 येशूं चेलातय् न्ह्यःने थ्व स्वयाः अप्वः हे अजूचायापुगु ज्या यानादीगु दु। थ्व सफुलिइ फुक्कं च्वयातःगु मदु। 31 अय्नं छिमिसं येशू परमेश्वरया काय्, मुक्ति बीम्ह ख्रीष्ट हे खः धकाः विश्वास याये फयेमा, अले विश्वास यानाः वय्कःयागु नामय् छिमित जीवन दयेमा धकाः थ्व च्वयातःगु खः।
येशू न्हय्म्ह चेलातय्थाय् खनेदय्कः झाःगु
1 अनंलि येशू हानं तिबेरियास समुद्र सिथय् चेलातय्थाय् खने दय्कः झाल। 2 सिमोन पत्रुस, दिदुमस धाःम्ह थोमा, गालीलय् च्वंगु काना धाःगु थासय् च्वंम्ह नथानेल, जब्दिया काय्पिं व मेपिं निम्ह चेलात नं नापं दु। 3 सिमोन पत्रुसं इमित धाल – “जि न्या लाः वनेत्यना।” इमिसं वयात धाल – “जिपिं नं छ नाप वये।” अले इपिं वनाः नांचाय् च्वन। तर व चान्हय् इमिसं छम्ह हे न्या लाये मफु। 4 सुथ जूबलय् येशू समुद्र सिथय् दना च्वनादिल। अथेसां वय्कः येशू हे खः धकाः चेलातय्सं म्हसीके मफुत। 5 उकिं वय्कलं इमित धयादिल – “पासापिं, छिमिके न्या दु ला?” इमिसं लिसः बिल – “मदु।” 6 अले वय्कलं धयादिल – “नांचायागु जवय् पाखे जाः ह्वा, अले न्या क्यनी।” वय्कलं धयादीथाय् हे इमिसं जाः ह्वात। यक्व न्या क्यंगुलिं इमिसं जाः साला काये तक नं मफुत। 7 वय्कलं माया याना तःम्ह चेलां पत्रुसयात धाल – “वय्कः प्रभु हे खः।” वय्कः प्रभु हे खः धकाः सिमोन पत्रुसं ताःगुलिं काचाकाचां लं फिनाः समुद्रय् तिन्हुल, छाय्धाःसा उबलय् वं लं त्वयातःगु खः। 8 मेपिं चेलातय्सं नांचाय् च्वनाः जालय् जाय्क क्यंपिं न्या सालाहल। इपिं सिथं तापाः मजू। सछिगू मिटर ति जक तापाः। 9 सिथय् थ्यंबलय् इमिसं अन च्याना च्वंगु ह्यंग्वालय् न्या व मरि तयातःगु खन। 10 वय्कलं इमित धयादिल – “नकतिनि लाना हयापिं न्या भचा थन हजि।” 11 उकिं सिमोन पत्रुसं नांचाय् वनाः जाः सिथय् सालाहल। जालय् सछि व न्ययस्वम्ह (१५३) ततःधिकपिं न्या क्यनाच्वन। थुलिमछि न्या क्यनं नं जाः मगू। 12 वय्कलं इमित धयादिल – “वा, नः वा!” वय्कः प्रभु खः धकाः सियाः नं चेलातय्के वय्कःयाके “छि सु खः” धकाः न्यनेगु आँट मवल। 13 वय्कलं मरि व न्या कयाः इमित इना बियादिल। 14 सिनाः म्वाना वये धुंकाः चेलातय्थाय् झायाः क्यनादीगु थ्व नापं स्वकः जुल।
येशू व पत्रुस
15 नयेनी धुंकाः येशूं सिमोन पत्रुसयात धयादिल – “यूहन्नाया काय् सिमोन, थुमिसं स्वयाः छं जितः अप्वः माया याना ला?” वं वय्कःयात धाल – “खः प्रभु, जिं छितः माया याः धकाः छिं स्यू।” अले वय्कलं धयादिल – “जिमि भ्याःचातय्त ज।” 16 वय्कलं हानं निक्वः खुसि धयादिल – “यूहन्नाया काय् सिमोन, छु छं जितः माया याना ला?” वं धाल “खः प्रभु, जिं छितः माया याः धकाः छिं सि हे स्यू।” वय्कलं धयादिल – “जिमि फैतय्गु बिचाः या।” 17 वय्कलं हानं स्वक्वः खुसि धयादिल – “यूहन्नाया काय् सिमोन, छं जितः माया याना ला?” “छं जितः माया याना ला” धकाः वय्कलं स्वकः तक न्यनादीगुलिं पत्रुसं नुगः मछिंकाः थथे धाल – “प्रभु, छिं फुक्कं स्यू, जिं छितः माया याः धकाः नं छिं स्यू।” अले वय्कलं धयादिल – “जिमि फैचातय्त ज। 18 “जिं छन्त खःगु खँ धाये – ल्याय्म्हबलय् छं थःम्हं हे वसः पुनाः थः यःथाय् वना जुल। बुह्रा जुल धाय्वं छं ल्हाः प्वःचिना च्वने माली। मेपिन्सं हे वसः पुंकाः छन्त मयःथाय् ब्वना यंकी।” 19 वय्कलं परमेश्वरयात तःधंकेत पत्रुस गुकथं सिना वने माली धकाः धयादीगु खः। थुलि धयादी धुंकाः वयात धयादिल – “जिगु ल्यू ल्यू वा।”
येशूया यःम्ह चेला
20 पत्रुसं लिफः स्वःबलय् येशूं माया यानातःम्ह चेला नं इपिं नाप वयाच्वंगु खन। बहनी भ्वय् नया च्वंबलय् वय्कःयागु छातिइ लिधनाः थथे धाःम्ह चेला व हे खः – “प्रभु, छितः धोखा बीम्ह सु खः?” 21 पत्रुसं वयात खनाः वय्कःयाके थथे धकाः न्यन – “प्रभु, वयात छु जुइ लय्?” 22 वय्कलं धयादिल – “जि मवतले व म्वाना च्वनेमा धयागु जिगु इच्छा दुसा छन्त छाय् माल?” छ जि नापं वा। 23 वय्कलं थथे धयादीगुलिं अबलय्निसें व चेला सी मखुत धकाः चेलातय्सं धया जुल। वय्कलं व सी मखुत धकाः धयादीगु मखु, बरु “जि मवतले व म्वाना च्वनेमा धयागु जिगु इच्छा खःसा छन्त छाय् माल?” धकाः जक धयादीगु खः। 24 थ्व फुक्क खँ सत्य खः धकाः साक्षी ब्यूम्ह चेला व हे खः। थ्व खँ च्वःम्ह चेला नं व हे खः। जिमिसं वं ब्यूगु साक्षी सत्य खः धकाः स्यू। 25 वय्कलं यानादीगु मेमेगु नं यक्व ज्या दु। वय्कलं यानादीगु छगू छगू दतले च्वल धाःसा जिं स्वयेबलय् ला अथे च्वया तःगु सफू थ्व संसारय् न्ह्यनी मखु।