Johan

Nunnak Thu

1:1 Leipi seemsuah ahih laih ngawlin Thu cu um zo hi. Mah Thu cu Pathian tuah umkawm in mah Thu cu Pathian na hi hi. 2 A pattung in mah Thu cu Pathian tuah um zotoh hi. 3 Ama sung pen Pathian in i hempoh bawl hi; bawlmi naa hempoh sung pen amah tel ngawlin bawlmi pakhat no hei um ma hi. 4 Mah Thu cu nunnak tawpatnak hi aa mah nunnak cun mihing lakah vaaknak hengtiik hi. 5 Vaaknak cu khuathim sungah vaak in khuathim in mittiik zo ma hi. 6 Pathian in a kamtai Johan hah in, 7 Johan cu mitei lakah mah vaaknak thu hilh tukin hung hi. A hilhmi hempoh a theih haw tukin le a san haw tukin hung hi. 8 Amah cu mah vaaknak cu hi ma hi; vaaknak thu hilh tukin a hungmi hi saw hi. 9 Mah vaaknak cu vaaknak ngangai hi. Mahvaaknak cu leihum ah hungin mi hempoh a vaak tiiktu vaaknak hi. 10 Mah Thu cu leihum ah um in ama sung pen Pathian in leihum hi bawl naven leihum in amah cu thei ma hi. 11 Ama ngam sungah hungnaven, a mihing ten sang haw ma hi. 12 Mi hekkhat in saangin um haw hi; mahhangin Pathian cate hih theihnak thu pia hi. 13 Pathian cate ahihnak haw cu leihum daan, mihing ii hin mi hihnak tuah hi ma hi; Pathian amah tatak khi a Pa haw hi. 14 Mah Thu cu mihing in cang in eimu lakah um hi; hehpihnak le thutak tuah dim hi. A sunloihnak mu hung aa a Pan a Capa neihcalam lak aa a piak mi sunloihnak hi. 15 Johan in mah pai thu cu hibangin na hilh hi: “Amah cu keima nung ten hung hi; mahnaven amah cu kei saangin ngeng saw hi, itahimtitale amah cu ka suah laih ngawlin um zotoh hi tin ka hilh mi khi ama thu ka hilhmi hi,” tin ti hi. 16 A cangkim zet mi a hehpihnak tuah ohte cu muicu pia zo aa a muicu cu pakhat nung pakhat pia hi. 17 Pathian ii daan cu Moses lak pen pia hi; mahnaven hehpihnak le thutak cu Jesuh Khrih sung pen hung hi. 18 Kua mah in Pathian cu mu awng ma hi. A Pai Capa neihcalam, a aang sung aa a pommi, Pathian a hi mi in langtiik zo hi

Baptizam Piatu Johan ii Thuhilhmi

19 Jerusalem aa Judah lampui tu ten thiampi hekkhatte le Levi mite cu Johan lakah in hah haw in, “Nang hi a kua cim?” tin dong haw hi. 20 Johan cun a thu dot haw mi cu im ngawl in don in, “Kei cu Messiah hi mang hi,” tin ciang zet in mipi theih in hilh hi. 21 Amun, “A hitale a kua cim? Elijah hi cim maw?” tin dong haw hi. Johan in, “Hi mang hi,” tin ti hi.Amun, “Kamsang hi cim maw?” tin ti leleu haw in, “Hi mang hi,” tin ti leleng hi. 22 Amun, “Mah a hitale a kua cim, hilh hem in, Na thu don mi hi keimuh tiiktu tei lakah ka hilh leh uh kul hi. A kua ing tin ticop cim?” tin dong haw hi. 23 Johan in Kamsang Isaiah ii hilhmi la leh in: “Kei cu Topai hawhnak tuk lampi camtiik un,” tin phillawn pen a aumi aw khi ing hi,” tin ti hi. 24 Farasi tei hahmi kamtai ten, 25 Johan cu thu dong leh haw in, “Messiah le hi ma ci, Elijah le Kamsang hei na hi ma ta le, ita Baptizam pia cim?” tin ti haw hi. 26 Johan in, “Kei cun tui tuah baptizam pia ing, hinaven na lak uh ah na theih uh laih ngawl mi, mi pakhat um hi. 27 Amah cu ka nung ah hung laih hi; mahnaven kei cu a kedam khau duktu tuk hei in taak mang hi,” tih ti hi. 28 Hiti bang in a dotdunnak haw mun cu Johan in a Baptizamnak Jordan ngun pen ni tulnak lam aa a um mi Bethani khua ah hi.

Pathian Tuuno

29 A zing ten Johan in Jesuh a lak aa a hun lih laih cu mu in, “Leihum sualnak a hawhpihtu Pathian Tuuno khi zo un! 30 Ka nung ah mi pakhat hung hi, mahnaven kei saangin ngeng saw hi, itahimtitale ka suah laih ngawlin amah cu um zotoh hi,’ tin a thu le la ka hilh lih mi pa cu amah hi hi. 31 Amah hi a kua hi tuk him tih thei mang. Mahnaven amah hi Israel mitei a theihnak haw tuk in tui tuah baptizam ka piak lihnak cu na hihi,” tin ti hi. 32 Johan in tettikhan in, “Hawvang cu vancung pen khulo bangin kumsuk in a hum ah a kop khi mu ing hi. 33 Amah cu a kua him tih thei mang, mahnaven tui tuah baptizam pia tukin kei a hahtu Pathian in a Hawvang heng tuk aa mi pakhat humah a kop khi mu tuk ci; mahpa cu Hawvang Thiangtho tuah baptizam piatu na hi tuk hi,” tin hilh hi. 34 Mah pa cu mu ngah zo ing. Thu ngangai in hilh ing: Amah cu Pathian Capa hi,” tin ti hi.

Jesuh Nungzuitu Masabelte

35 A zing ten Johan le a nungzuitu panih cu mah laih mun ah ding leh haw in, 36 Jesuh a hawh khi amuh haw ten, “Pathian Tuuno khi zo un,” tin Johan in ti hi. 37 Mahtibangin a tih mi cu a nungzui panih ten thei in Jesuh lak ah cun hawh bok haw hi. 38 Jesuh cu a nunglam heek leh in a nung a zui haw khi a muh ten, “Ikaw na zei uh? tin dong hi. Amun, “Rabbi, i lai ah kaw na um?” tin don haw hi. (Rabbi tih cu Saya pa tihnak hi) 39 Jesuh in, “Hung unna zo un,” tin ti hi. (Mah a tih hun cu taaklam nazi palihawng hi) Hawh haw in a umnak cu mu haw in mahni cu a lak ah cun caam haw hi. 40 Mah mi panih lak pen pakhat cu Simon Piter ii nau Andru hi. 41 Thakhat in a u Simon cu zei in amuh ten, “Messiah cu mu zo ing,” tin ti hi. (Messiah tih cu Khrih tihnak hi) 42 Mahten Simon cu Jesuh lakah hawhpih hi. Jesuh in amah cu zo in, “Na min cu Johan capa Simon hi ci; mahnaven Sefas tin sam hi tuk toh ci,” ti hi. (Sefas tih cu Piter tih tuah bang ve in a tih nuam mi cu ‘suangpi’ tihnak hi)

Jesuh In Filip Le Nathanel Sam

43 A zing ten Jesuh cu Galilee ah hawh tum hi. Filip cu mu in a lakah, “Kei hi zui in,” tin ti hi. 44 (Filip cu Bethsaida khua mi hi aa Andru le Piter tei umnak khua hi bok hi) 45 Filip in Nathanel tawk in a lakah, “Moses ii Daan bu sungah a thula a ngat mite Kamsang te vangin a thula a ngat haw mi pa cu tawk zo ung. Amah cu Josef capa Jesuh, Nazareth khua mi hi.” tin ti hi. 46 Nathanel in, “Nazaret khua pen thilpha tul thei aa ni maw?” tin ti hi. Filip in, “Zo inna!” tin ti hi. 47 Jesuh in Nathanel a hung khi a muh ten, “Israel mi tatak hi zo hem un! A lungmu sungah i mah zol thu hihim um ma,” tin ti hi. 48 Nathanel in, “Itinkaw kei na theih?” tin dong hi. Jesuh in, “Filip in a sam laih ngawl thei pi kung nuai aa na khun laih khin mu ing,” tin ti hi. 49 Nathanel in, “Saya pa, nang cu Pathian Capa hi ci! Israel Kumpi ci,” tin ti hi. 50 Jesuh in, “Theipi kung nuai aa na khun laih mu ing ka tih hangin kei sang ci mei? Hi saangin thupi saw tampi mu tuk laih ci,” tin ti hi. 51 Mahten a venghawng haw lakah, “Thu dik hilh ing hi. Vancung khi hong tuk aa Mihing Capa hum ah in Pathian ii vancung mi a tolh le a kai khi mu tuk uh ci,” tin ti hi.

Kana Khua Zi Huainak Puai

2:1 Ninih nung ten Galilee peng Kana khua ah mopuai na um hi. Jesuh ii nu vang mahlai ah cun um bok in, 2 Jesuh le a nungzui te vang sam hok haw hi. 3 A sapit tui haw a bo ten a nu'n Jesuh lakah, “Sapit tui nei leh haw ma toh,” tin hilh hi. 4 Mahten Jesuh in, “Ka nu aw, hi bawl in, hi khi bawl in tin na tih tuk hi mang hi; ka hunkim malaih hi,” tin ti hi. 5 A nu cun umlawh tei lakah, “A hilh hempoh bawl un,” ti hi. 6 Mahlai mun ah Judah daan a ummi bangin a khut somnak haw tuk tuibeel ngengpi bel luk koih haw hi. Beel khat ah galan sawmnih pen sawmthum tian na vaa hi. 7 Jesuh in umlawh tei lak ah, “Hi beel te hi tui a dim in than un,” ti hi.Beel a leet tian in than haw in, 8 a lakhaw ah in, “Beel sung aa tui cu suak unna puai bawl nak a vaihawm tupai lakah na pia un,” tin ti hi. Tui cu pia haw hi. 9 Mah tui cu sapit tui ah cang in mahmi cu tep hi. Ilai pen hi sapit tui heng him tih cu thei ma hi; (tui a suaktu umlawhte cun na thei haw hi.) Mahhangin moneitupa cu sam in, 10 a lak ah in, “A kuakua hei in sapit phabel cu amasabel in pia meek haw hi, mi tampi a kham deuh haw nung ten sapit thawthong pawl pe thei meek haw hi; hinaven nang cu sapit a uukbel cu a tawp tian in pia thei ci,” tin ti hi. 11 Jesuh in hi nalamdang masabel hi Galilee peng Kana khua ah bawl hi. Mahlai ah a sunloihnak langtiik in a nungzui ten sang haw hi. 12 Mahnungten Jesuh le a nu, a nau le a nungzuitu te cu Kapernaum khua ah hawh haw in mahlaih ah nidawmlaih sung caam haw hi.

Biakinn-ah Jesuh Hawh

13 Kaltan puai hunkim awntoh in Jesuh cu Jerusalem ah hawh hi. 14 Biakinn a hen ten mahlaih mun ah cun khui le tuu le laileng a zuaktute le tangka thektute cabuai ah a khun haw khi mu hi. 15 Mahhangin khau cu ngolh ai in hual in, tuu hihen, khui hihen a zuakmi haw te cu vat in Biakinn sung pen hawlvawk khawng hi; sum theektu tei cabuaite vang linglet khawng in a sum nawi haw te cu thehkeh khawng hi. 16 Laileng a zuaktu te cu: “Hilai pen na laileng uhte cu taipih khawng un! Ka Pai inn cu na dawl bawlnak ah mang toh pahsuh un!” tin thu pia hi. 17 Mahten a nungzuitu ten, “Maw Pathian, na inn ka letsannak cu ka lungmu sungah mei-alh bangin sa hi,” tin Lai Thiangtho ii a tihmi phawk leh haw hi. 18 Judah hotu te cu hung haw in, “Hitibang naa bawl theih nak thu nei ing tih langtiik nak in ii nalamdang kaw na lak tuk?” tin dong haw hi. 19 Jesuh in, “Hi Biakinn hi phelet unna nithum sungin sakik leh thei tung,” tin ti hi. 20 Amuh ten, “Nithum sungin saleh thei ngai aa ni cim maw? Hi Biakinn saknak in kumsawmli le kumluk ngei haw hi,” tin ti haw hi. 21 Hinaven Jesuh ii hilhmi Biakinn cu ama taksa pumpi a tih nuammi na hi hi. 22 Mahhangin Jesuh thihnak pen a thawh leh ten a nungzui ten ama taksa pumpi thu hilh hi tih cu thei leh haw in Lai Thiangtho hilhmi le Jesuh hilhmi cu sang haw hi.

Jesuh In Mihing Umdaan Thei Khawng

23 Jesuh cu Kaltan Puai sung Jerusalem khua sungah a um laih in mi tampi ten nalamdang a bawl mite a muh haw hang in amah cu sang hawhi. 24 Hinaven, Jesuh in a lungmu venghawng in sang ma hi, itahimtitale mihing cu itibang haw him tih cu thei khawng hi. 25 A thu hawte cu midang tei hilh kul ma hi, itahimtitale a lungmu haw itibang him tih cu aman thei khawng hi.

Jesuh Le Nikodemas

3:1 Judah hotu pakhat, amin Nikodemas a tihmi haw na um hi; amah cu Farasi mi hi. 2 Zan khat cu Jesuh lakah hawh in Jesuh cu, ‘Rabbi’ nang cu Pathian ii hah mi saya hi ci, tih thei ung. Nalamdang na bawl mite hi Pathian telngawl cun kuaman bawl thei haw tuk mahi,” tin ti hi. 3 Jesuh in, “Thu ngangai in hilh ing: kua hei hi tahen hin leh ahi matale Pathian Uknak mu thei haw tuk ma hi,” tin ti hi. 4 Nikodemas in, “Itinkaw pasal cang cu a hin kik leh theih tuk? A nui pum sungah tum in veinih hin cu hi thei tuk ma hi,” tin don hi. 5 Jesuh in, “Thu ngangai in hilh ing hi: kua hei hitahen tui le Hawvang tuah hinkik ahimatale Pathian Uknak sungah tum thei tuk ma hi. 6 Mihing cu taksa lam pen a nu le a pai hin mi hi; hinaven Hawvang lam pen Hawvang ii hin mi hi. 7 Hinleh kul ci ka tih mi hi lamdangsa pahsun. 8 Huih cu a nuam mun pawpoh ah theu hi; a thawm thei ci, hinaven ilai pen hungin ilai lam ah hawh tuk him tih cu thei ma ci. Hawvang ii hinmi vang mahbang cun hi bok hi,” tin ti hi. 9 Nikodemas in, “Itinkaw mahtibang ahih theih tuk?” tin dong hi. 10 Jesuh in, “Nang cu Israel mi lak pen zilhtu saya pakhat hi ci, hihei thei zo ma cim? 11 Thu dik hilh ing: koh cu ka theih uh mi hilh ung, ka muh mi uh theitiik ung; hinaven a kua hei in ka thu hilh uh mi pom nuam ma uh ci. 12 Hi leihum thu le la hilh na veng in sang ma ci, mahtin a hitale itin kaw vancung thula ka hilh ten na san theih tuk? 13 Vancung pen a tolh suk mi Mihing Capa sial ngawl kuamah vancung ah a kaitu um haw ma hi,” tin ti hi. 14 “Moses in phillawn pen ngolh humah dalngul a khai bangin Mihing Capa vang khai hi bok tuk hi; 15 mahtihcun amah a sangtu hempoh cu kumkhua nunnak ngah haw tuk hi. 16 Ita him ti tale Pathian in leihum hi a ih leita hangin a Capa neihcalam pia in amah a sangtu hempoh cu thi ngawlin kumkhua nunnak nei haw tuk hi. 17 Itahimtitale Pathian in a Capa a hah ten leihum thukhentu tukin hah ma hi. Leihum Pantu tukin hah hi. 18 Akua hei hi ta hen Capa a sang tu cu thukhennak thuak tuk ma hi, hinaven a sang ngawltu cu Pathian ii Capa neihcalam a san ngawl hangin thukhennak thuak zo hi. 19 Thukhennak tihmi cu hi tin hi: leihum ah in vaaknak heng hi, hinaven miten vaaknak saangin thimnak deih saw haw hi; itahim titale a bawl mi haw a pha ngawl hang in hi. 20 Akua hei in thil pha ngawl a bawltu in vaaknak cu hua in vaaknak sung hei ah hung tuk ma hi, itahimtitale a pha ngawl a bawl mite lang suak kawn tih lauthawng hi. 21 Hinaven a manmi a bawltu cu vaaknak sungah hung in a bawl mi cu Pathian deihmi zui in a bawl mi hi tih cu mah vaaknak in langtiik hi,” tin ti hi.

Jesuh Le Johan

22 Mah nungten Jesuh cu a nungzuitu te tuah Judah peng ah hawh haw in mahlai ahcun amuhte tuah hun demno sung um in baptizam te pia hi. 23 Johan vang Aenon tihmi, Salim pen a khawla ngawl mun ah tui nipnak pia bok hi, itahimtitale mahlai ah cun tui tampi na um hi. Mitampi a lakah hung haw in baptizam pia hi. 24 (Hi thu hi Johan thawng a khiak haw laih ngawlin a piang mi thu hi.) 25 Johan nungzuitu hekkhatte le Judah mi pakhat pa cu thian thoh tiiknak thu ah in thu eeldun haw hi. 26 Mahhangin Johan lakah hawh haw in, “Saya pa Jordan ngun pen nitulnak lam aa nangmah tuah a ummi pa khi thei laih cim? A thu na son meek lih mi pa khi? Tu in baptizam pia li bokin mitampi a lakah hawh haw hi,” tin ti haw hi. 27 Johan in, “Pathian piakmi tih ngawl cun kuamah in imah co mi nei thei haw tuk ma hi. 28 Keimah rori in, “Kei cu Messiah hi mang; a mai aa a heng ham mi ing hi.” tin ka hilh mi a theitu cu nangmuhte uh ci. 29 Huaimi mothak ca huaitu tangvalpai ta hi; hinaven zihuai tu tangvalpai ngualcam, a ding in a aw thawm a ngaitu pa cu, tangvalpai aw a theih ten a lungdamnak cu cangkim hi. 30 Amah cu khangto tuk aa kei cu niamsuk tung,” tin ti hi.

Vancung Pen A Tolhsuk Mipa

31 Humlam pen a hungmi cu mi hempoh saangin ngengsaw hi. Leihum pen a hungmi cu Leihum i taa na hi aa leihum thu hilh hi; hinaven vancung pen a hungmi cu i hempoh ii hum ah in um hi. 32 Aman a muhmi le a theih mi thute hilh naven kuaman a thu cu pom haw ma hi. 33 Hinaven kuahei in a thu hilh mi a pomtu cu mahtibangin a pom hangin Pathian cu dik hi tih khohtiik hi. 34 Pathian ii hahmi cu Pathian in a Hawvang cangkim nak a piak hangin Pathian ii thu cu phuang hi. 35 A Pan a Capa cu it in ihempoh a khut sungah pia hi. 36 Capa a sangtu cu kumkhua nunnak nei hi; Capa ii thu a eeltu cu nunnak nei ngawl in Pathian ii bawlsiatnak a hum ah um tuk hi.

Jesuh Le Samaria Numei Nu

4:1 Jesuh cu Johan sang in nungzuitu tam saw nei in baptizam vang tam saw in pia hi tih Farasi ten thei haw hi. 2 (A ngangai ti ta cun Jesuh aman kuamah baptizam pia ma hi; a nungzuitute bek in pia haw hi.) 3 Mahtibangin a son leilui lih haw cu Jesuh in a theih ten Judah ngam pen tul in Galilee ah kikleh hi. 4 A kik thah in Samaria ngam pal vawk hi. 5 Samaria ngam aa a hawhlaih in Saikhar a tih haw mi khua pakhat ah heng hi. Mah Saikhar khua cu Jakob in a capa Josef lak ah a piakmi lo pen khuala ma hi. 6 Mahlaih ah cun Jakob tuikhuk um hi. Jesuh cu a khual zinnak a cawl lei ta hang in mah tuikhuk eel ah cun khung hi. A hun cu sun hawng pawl hi 7 Samaria numei nu pakhat cu tuicawi tuk in hungin Jesuh in a lakah, “In tuk tui pia in,” tin ngen hi. 8 (A nungzuitute cu an leituk in khuasung ah hawh haw hi.) 9 Mah numei nu cun, “Nang cu Judah mi hi ci aa kei cu Samaria mi ing hi; itinkaw tui in tuk na nget theih?” tin ti hi; (Judah mite in Samaria mitei man mi naa te mang nuam haw ma hi). 10 Jesuh in, “Pathian in a piakmi hi a ii him, tih le tui a ngentu hi a kuahim tih na thei a hin amah saw hi ngen tuk ci aa aman nunnak tui pia tuk naven!” tin ti hi. 11 Mah numei nu cun, “Topa, bingkhai le neima ci, man tuikhuk le thuk zet sih hi. Ilai pen kaw mah tui cu na in tuk? 12 Ka pu uh Jakob in hi tuikhuk cu pia hi, a mah le a capate hihen, a tuu hon le a khui honte hihen, hih tuikhuk pen tui ngah haw hi. Jakob saangin ngengsaw ing tin ngaisung duncop cim?” tin dong hi. 13 Jesuh in, “Hi tui a intu cu a dang haw dumleh tuk hi. 14 Hinaven ka piakmi tui a intu cu a dang haw dum leh tuk ma toh hi. Keima piak tuk mitui cu a sungah ciktui in cang tuk aa mahmi cun nunnak tui le kumkhua nunnak pia tuk hi,” tin ti hi. 15 Numei nu in, “Saya pa, mah tui cu pia in! Mahtihcun ka dangdum leh tuk ma in toh hilai ah tui cawi tuk vangin ka hunkul tuk ma toh hi,” tin ti hi. 16 Jesuh in, “Na hawh inna pasal sam in hung leh in,” tin ti hi. 17 Aman, “Pasal nei mang hi,” tin don hi. Jesuh in, “Pasal nei mang na tih mi cu thu maan hilh hi ci. 18 Pano panga pasal zotoh ci, tu na umpih mi pa cu na pasal ngangai hi ma hi. Thumaan hilh ci,” tin ti hi. 19 Numei nu in, “Saya pa, kamsang hi ci tih thei ing. 20 Koh Samaria mi ka pu ka pa uh ten hi mualhum ah in Pathian bia haw hi; hinaven noh Judah-te cun Pathian cu Jerusalem ah biak tuk hi, ti uh ci,” tin ti hi. 21 Jesuh in a lak ah, “Numei nu, ka hilhmi hi sang in: Miten Pathian cu hi mual ah hihen, Jerusalem hei ah hihen a biak haw ngawl hun heng tuk hi. 22 Noh Samaria ten na biakmi uh thei ngangai ma uh ci; hinaven koh Judah mite cun ka biak mi uh thei ung, itahim titale Judah mitei lak pen patnak heng hi. 23 Hinaven Pathian Hawvang ngilnak hangin Pathian a bia tatak ten Pa cu Hawvang le thudik tuah a biak haw hun heng tuk hi; mah hun cu tun hungzo hi. Mahtibang in biak tuk cu Pathian in a deihmi hi. 24 Pathian cu Hawvang hi aa a biatu ten Hawvang le thutak tuah bia haw tuk hi,” tin ti hi. 25 Numei nu in a lak ah, “Messiah cu hungtuk aa, a hun ten ihempoh aman hilh leh tuk hi,” tin ti hi. 26 Jesuh in, “Na lak aa a awnli tu hi mahpa cu hi ing hi,” tin ti hi. 27 Mahlaihtak in Jesuh nungzuitute cu kikleh haw in numei nu tuah a otpih dun lih haw cu a muh haw ten lamdangsa mah tak haw hi. Hinaven kuaman mah nu cu, “Ikaw na deih?” tin dong haw ma hi. Jesuh vang cu, “Ita hi nu otpih cim?” tin dong bok haw ma hi. 28 Mahten numei nu cu a tuithawl zam in khua sungah a hawh nung ten mipi tei lak ah, 29 “Tumasuan aa na ka bawlmi hempoh a hilh theitu pa hi zohem un! Amah hi Messiah hi nan tih maw?” tin ti hi. 30 Mahtihcun khuasung pen tul haw in Jesuh lakah in hawh haw hi. 31 Mahlaih in nungzuitu ten Jesuh cu, “Saya pa, an ei in” tintiik haw hi. 32 Aman, “Na theihuh ngawlmi an eih tuk nei ing,” tin ti hi. 33 Mahten a nungzuitu te cun, “Pa khakhat in an pia haw hi nantih maw,” tin pakhat le pakhat dongdun haw hi. 34 Jesuh in a lak haw ah, “Kei ka an cu kei a hahtu pai deihnak bawl le nadeh atiik mi bawl khawng hi hi. 35 Tehkipnak in, ‘Ha li nungten an cop hun,’ tin ti uh ci. Hinaven thu ngangai in hilh ing hi: lo sung khi zo hem un! Ante thak zo toh hi, mahhangin ankung cophun heng zo hi. 36 An a cawmtu pa cu a thaman piak hi aa an cu kumkhua a nunnak tukin cawm hi. Mahtihcun anci a cingtu le an a cawmtu langkhat in lungdam khawm haw tuk hi. 37 Itahimtitale thu santehnak in, ‘Mi pakhat in cing in; a dang pakhat in at hi,’ tih mi cu maan zet hi. 38 Nadeh awng uh ngawl mi lo sungah cang at tuk in nohte hah ing hi. Mahlaih mun mi dang tei a dehnak sa haw pen midang tei dehnak hangin a miat ngah uh ci,” tin ti hi. 39 Numei nu in, “Ka bawlsa mi hempoh hilh leh khawng tin a tih hang in mah khua sungaa a ummi Samaria mi tampi in Jesuh cu sang haw hi. 40 A lak ah Samaria mite hung haw in, “Keimu lakah caam hih in hi,” tin zawm haw in ninih caam hi 41 Jesuh ii thu hilhmi thei haw in mi tam dedeuh in sang haw hi. 42 Mahten numei nui lak ah in, “Tu cu nangma thu hilh mi hang hi ngawl in keimuh rori in a thu hilh mi thei ung aa sang ung hi; amah hi leihum Pantu hi tatak hi tih vang thei ung hi,” tin ti haw hi.

Jesuh In Bawi Pakhat ii Capa Damtiik

43 Mahlaih ah cun ninih a caam nungten Jesuh cu tul in Galilee ah hawh hi. 44 Itahimtitale amah rori in, “Kamsang cu ama umnak ngam ah upatnak co ma hi,” tin ti hi. 45 Galilee ah a hen ten mahlaih aa mipi ten muak haw hi, Itahimtitale Jerusalem khua Kaltan Puai ah hawh in mah puai sung aa a na bawlmi hempoh amuh zo haw toh hangin hi. 46 Mahten Jesuh cu tui sapit in a suah tiiknak Galilee peng Kana khua ah hawh leh hi. Mah laih ah acozah bawi pakhat um in a capa pakhat Kapernaum khua ah na hi. 47 Jesuh cu Judah ngam pen Galilee ah heng hi tih a theih ten a lak ah cun hawh in, Kapernaum khua ah hawh in a thi awndiak toh a capa damtiik tuk in hehpih ngen hi. 48 Jesuh in, “Na lamdang le thasiah huainate na muh uh tih ngawl cu kua man sang tuk ma uh ci,” tin ti hi. 49 Mah bawipa cun, “Saya pa, ka capa a thih laih ngawlin hung zazaal in,” tin ngen hi. 50 Jesuh in a lak ah in, “Hawh inna, na capa cu nung tuk hi,” tin ti hi. Mah pa cun Jesuh ii awn cu sang in hawh hi. 51 A hawhnak lampi pen a umlawh ten muak haw in, “Na capa cu nung tuk hi,” tin ti haw hi. 52 Aman, “Itiik hun in kaw ka capa cu a damdeuh?” tin a dot ten amun, “Zan taak taaklam nazi pakhat ten a nattun cawl hi,” tin ti haw hi. 53 Mah hun cu Jesuh in, “Na capa nung tuk hi,” tin a tih hun keek khin na hihi tih a pan thei leh hi. Mahtih cun amah le a innsang veng hawng in sang haw hi. 54 Hi hi Jesuh Judah ngam pen Galilee ah a hun nung a veinihnak nalamdang a bawlmi hi.

Tuiting Mawk aa Mina Damtiiknak

5:1 Mahnungten Jesuh cu Jerusalem ah Judah biaknak puai pakhat um in mahlaih ah in hawh hi. 2 Jerusalem khua ah in Tuu Kongka tihmi um in mah Kongka eel ah in tuiting pakhat um hi. Mah tuiting mawk ahcun deubuuk panga zaakmi na um hi. Mah tuiting cu Hebru awn in Bethzatha tin ti haw hi. 3 Mah deubuuk zaakmi sungah in mina tampi zau teptup haw hi. A hekkhat cu mitcaw, a hekkhat cu kebai, a hekkhat cu kut le ke zawng mite hi haw hi. 4 (Hun khakhat ten Topai vancung mi tolhsuk in tui cu phiatiik meek hi.) Mah tui a phia bek ten tuiting sungaa a dawk masa bel cu a natnak haw pen damnak ngah meek haw hi. Mahhang in minate cu mah tui a phia tuk cu ngak haw hi 5 Mahlaih mun ah cun mi pakhat kum sawmthum le kum liat sung a na mipa um hi. 6 Mahlaih mun ah a zau leleng cu Jesuh in mu in kum ngeipi na zotoh tih vang thei hi. Mahhangin Jesuh in, “Dam nuam cim?” tin dong hi. 7 Mah pa cun, “Topa, tui a phia ten tuiting sungah a nimtu tuk kuamah um haw ma hi. Tuiting sungah tolh tuk ka tih laih tak in midang ten makhelh leleng thong haw hi,” tin ti hi. 8 Jesuh in, “Tho inna na zauphah la in hawh in,” tin ti hi. 9 Thakhatin mah pa cu nadam hi; a zauphah cu la in hawh hi. Mahni cu Sabbath ni hi. 10 Mahhangin Judah huaitu pawl ten damnak a ngahtu pa cu, “Tu ni hi Sabbath ni hi, na zauphah na hawhpihmi hi a Daan uh in deihma hi,” tin ti haw hi. 11 Aman, “Keimah a damtiiktu pan na zauphah la inna hawhin ti si!” tin ti hi. 12 Amuh ten, “Mahtibangin a titu cu akuakaw?” tin dong haw hi. 13 Hinaven damnak a ngah tupa cun Jesuh cu a kua him tih thei ma hi, itahim titale mahlai ahcun mi honpi um haw in a lak haw pen Jesuh cu na hawh zo hi. 14 A nung ten mah pa cu Jesuh in biakinn sungah tawkin “Zo un! Tucun damzo ci. Mahhangin na sual toh pah sun. Mahmatale na humah thil phangawl heng dedeuh tuk hi,” tin ti hi. 15 Mahten mah pa cu hawh in Judah lampuitu tei lakah, “Kei a dam tiiktu cu Jesuh hi,” tin hilh hi. 16 Sabbath ni in mi a damtiik hangin Jesuh cu langpang haw hi. 17 Jesuh in a lak haw ah, “Ka Pa cu nadek leleng ahih hangin keivang ka deh kul bok hi,” tin ti hi. 18 Mahtibangin a tih hangin Judah lampuitu te cu a thin haw tok in a mah thah tum dedeuh haw hi. Sabbath dan palcat bek hi ngawlin Pathian cu ka Pa hi a tih hangin Pathian bangin a mah le mah bawlcop hi tin ngaisung haw hi.

Capa ii thuneihnak

19 Mahhangin Jesuh in a lak haw ah, “Thungai in hilh ing hi; Capa in a mah no in ii mah bawl theima hi. A Pai bawl a muhmite bek bawl hi. Pa'i bawlmi khi Capa hei in bawl bok hi. 20 Itahimtitale Pa'n a Capa cu it in a bawlmi hempohte lak khawng hi.Hi saangin bawltuk a nasia saw mi lak hih tuk aa, lamdang sa leh tuk uh ci. 21 Pa in mithi tho tiikin nunnak a piak bangin Capa hei in nunnak a deihtu lakah in pia bok hi. 22 Pa in a koi hum hei ah in thukhennak bawlma hi. Capa lakah thukhen theihnak pia zo hi. 23 Mahhangin Pa a upattu hempoh in Capa vang upat bok hawtuk hi. Kua hei hihen Capa a upat ngawltu cu a hahtu a Pa vang upat bok hawma hi. 24 Thungangai in hilh ing hi; kua hei hihen ka otmi thei in kei a hahtu a sang ahitale kumkhua nunnak nei hi. Thukhennak tawk tukma hi. Mahticun thihnak pen nunnakah tumzo hi. 25 Thungangai in hilh ing hi; mithi ten Pathian Capa ii aw thei hawtuk aa a theitu hempoh ten nunnak a ngah haw hun heng tuk in tu in hengli zo hi. 26 Pa amah rori khi nunnak bulpi hi. Mahhangin Capa vang nunnak bulpi in bawlzo hi. 27 Mahten Capa cu Mihing Capa ahih hangin thukhennak thu pia hi. 28 Hibang ahih hangin lamdangsa pahsun. Mithi hempoh ten a aw cu thei in, 29 a khaansung haw pen a tulnak haw hun heng tuk hi; thilpha a bawltute cu tholeh hawtuk aa nung hawtuk hi; mahten thilphangawl a bawltute cu tholeh bok hawtuk naven lawlmi hi hawtuk hi,” tin ti hi.

Jesuh Ca in Thukhentu

30 Jesuh in, “Keima thu in i mah bawlthei mang hi. Thukhennak ka bawl a hitale Pathian ii hilhmi bangin bawl ing; mahhangin ka thukhennak cu dik hi. Itahim titale ka deih mi bawltuk tum mang. Kei a hahtu ii deihmi bek bawl tum ing hi. 31 Keiman keima thubek ka hilh tacun ka thuhilhmi cu a maan ngangai hi tih theih tuk ma hi. 32 Hinaven keima ai in keima thuhilhtu tuk midang pakhat um in ka thu a hilhmi cu man hi tih thei ing hi. 33 Johan lakah na kamtai uh te hah uh ci, a man thumaan hilh hi. 34 Hibangin ka tih ten theihpihtu mihing neih kul ing ka tihnak hi ma hi. Patnak na ngahtheihnak tuk uh in ka hilhmi hi. 35 Johan cu alh in a vaakmi mei inn bang hi aa, a vaaknak cu hun comno sung bek pahcawi uh ci. 36 Hinaven keima ai in ka thu la tettikhantu um in Johan ii tettikhan mi saangin ngeng saw hi; mahmi cu Pa ii piak ka bawl mite hi. Mah ka bawlmi in Pa ii kei a hahnak thu langtiik hi. 37 Mahten kei a hahtu ka Pa hei in ka thu cu mite theitiik hi; a aw thei awngma uh ci. Amel vang mu awngma uh ci; 38 Mahten a thu hilhmi vang na lungmu sung uh ah koihma uh ci, itahimtitale a hahmi sangma uh ci. 39 Lai Thiangtho sialin cung uh ci; mahbangin na cunnak uh cu hi Lai Thiangtho sungah in kumkhua nunnak mutuk ung tin na ngaihsut uh hang hi. Hi Lai Thiangtho cu a veng hawngin keima thu a hilhtu hi. 40 Hinaven nunnak ngah tukin ka lakah hung nuam cuangma uh ci. 41 Mihing tei lak pen pahcoihnak ngah tukin zei mang. 42 Hinaven itabang uh cim tih thei ing aa, na lungmu sung uh ah in Pathian itnak ii mah umma hi. 43 Ka Pa ii thuneihnak tuah hung navengin saang nuamma uh ci. Hinaven mi pakhat ama thuneihnak tuah in hungin amah saw cu pom uh ci. 44 Pakhat le pakhat lak pan pahcoih tuk nuamzet uh ci. Hinaven a mah bek Pathian ummi lakpen pahcoihnak ngahtuk tumma uh ci. Mahtin a hi tale i tin kaw kei na san theih tuk uh? 45 Hinaven kei hi Pathian lakah nangmuh mawhsiattu hitukin ngaisung pah sun. A humah muansannak na neihzet uh mi Moses hihim khi nangmuh mawhsiattu na hi tuk hi. 46 Moses khi sang ngangai na hi uh ta a hin keimah vang hi sang bok tuk hi uh ci. Itahim titale Moses in keima thu ngan hi. 47 Hinaven ama ngatmi na san uh ngawl hangin ka hilhmi hi i tin him na san theih tuk uh?” tin ti hi.

Jesuh in Mi Thawngnga An Vaak

6:1 Mahnungten Jesuh cu Galilee Tuitingpi ngaalkhat lam ah hawh hi.. (Mah Tuitingpi cu Tiberius tih hei in sam haw hi.) 2 Mihonpi ten amah cu zui haw hi. Itahimtitale minaa te damtiik in, thasiahhuai nalamdang a bawl mite khi mu zo haw toh hi. 3 Jesuh cu mual hum ah kaito in a nungzui te tuah khungkhawm haw hi. 4 Judah tei Kaltan Puai cu naizet zotoh hi. 5 Jesuh cu a elkimte zo kawkawi in, mihon tampi ten amah zuanli khi mu hi. Mahten Filip lakah, “Hi mihonpi tei eih tukin ilai ah an lei kam nung?” tin dong hi. 6 (Mahtibangin a dotmi cu Filip lungmu a zonak thongpoh hi, a ngangai cu itin bawm kam nang tih cu ama in thei leng hi.) 7 Filip cun, “Mi hizong ngaitak cu demno teen a ei haw hei in tangka zanih vaal man cangho lei kul tuk hi,” tin don hi. 8 Mahten nungzuitu a dang Simon Piter ii naupa Andru in, 9 “Hilaiah naupang pakhat in cangho panga le ngasa panih nei hi. Mahnaven mihing hizong caa cun imah tingcak tuk ma hi,” tin ti hi. 10 Mahten Jesuh in, “Mihonpite khi hungtiik un,” tin ti hi. (Mahlai mun ah hampa tampi um hi.) Mahten mihonpite cu khung haw in, a venghawng haw in thawngnga laih kim hi. 11 Jesuh in cangho cu la in Pathian lakah lungdamnak thu a hilh cengten, a khungkhawm mihonpite cu sem hi. Mahbangbokin ngasa cu sem leleu in a venghawng haw cun kham-uk in ei haw hi. 12 A khamkhawng ceng haw ten Jesuh in nungzuite cu, “An khambaangte khi cawmleh khawng unna, thialkhatno hei thamthongtiik tuk ma hung hi,” tin ti hi. 13 A tihbangcun nungzui ten cawm leh haw in cangho panga le ngasa panih a eih khambaang haw cu kho sawm le kho nih kim hi. 14 Mahlai aa a um mihonpi ten, mahtibangin Jesuh ii thasiahhuai nalamdang a bawlte a muh haw ten, “Hipa hi, hi leihum ah hungtuk Kamsang a tih haw mi hi toh hi,” tin ti haw hi. 15 Mihonpi ten Jesuh cu a nuamvang nuam ngawlvang in kumpi bawi dektiik nuam haw hi. Mahnaven hibangin a lungtup hawmi cu Jesuh in a theihten amah nguakcangno in mualhum ah hawh leh hi.

Tuihum ah Jesuh Hawh

16 Taaklam ten nungzuite cu Galilee tuitingpi lam ah hawh suk haw hi. 17 Hawmkuang sungah khung haw in Kapernaum khua lam zuanin hawh haw hi. Khuathim li toh naven Jesuh cu amu lakah hung cuang ma laih hi. 18 Huihsia nasiazet theu in, tuihualpi khanglet dalh hi. 19 Nungzuite cu pengthum pengli laih, hawmkuang cu hotli haw hi. Mahten Jesuh cu tuipi humah amulam zuan in a hungli khi a muh haw ten lau mahtak haw hi. 20 Mahten Jesuh in, “Lau pahsuh un keimah ing hi,” tin ti hi. 21 Nungzui ten Jesuh cu hawmkuang sungah khungtiik haw hi. A ngeingawl no in a hen nuamnak haw mun ah heng paih haw hi.

Mipi Ten Jesuh Zei Haw

22 A zingten tuipi ngaalkhat lam aa mihonpi ten tui mawkah hawmkuang pakhat um leng khi mu haw hi. Nungzui tei hawh laih khin Jesuh tel kha ngawlin amuh nguakcangno hawh haw tih thu vang thei haw hi. 23 Mahlaihtakin Topa Pathian lakah lungdamnak thu a hilh ceng ten cangho a eihnak haw mun ah Tiberius lampen a hengmi hawmkuang dadangte vang cawl bok haw hi. 24 Mi hempoh ten mahlaiah Jesuh vang, nungzuite vang um leh haw matoh tih a theih haw ten, hawmkuang khungin Kapernaum lamah Jesuh cu zei haw hi.

Jesuh Cu Nunnak Cangho

25 Ngaalkhat lamah Jesuh cu tawk haw in, “Saya pa, ituklaihin hilai heng cim?” tin dong haw hi. 26 Mahten Jesuh in, “Thu ngangai in hilh ing hi. Nohten thasiahhuai nalamdang ka dehnak hangin keimah zei hi kha saw ngawlin, vonvah uk in an na eih uh hang keimah zei hi saw uh ci. 27 Hi a sia leh theimi an ca in naadek ta pahsuh un hi. Kumkhua a phaatmi nunnak an ca dek sawn un hi. Mahmi an cu Mihing Capa in nohte pia tuk hi. Itahimtitale Pa Pathian in a humah lungkimnak tacik khen zohtoh hi. 28 Mahten mihonpi ten, “Pathian in deh tuk a deihsakmi ka deh tuk uh a i um kam ni?” tin dong haw hi. 29 Mahten Jesuh in, “A tiikmi pa khi um un hi. Mahmi cu Pathian ii nohte a dehtiik nuammi nadeh hi,” tin don hi. 30 Mihonpi ten, “Mahahitale nangmah ka up theihnak tuk uh in, nalamdang thasiahhuai i bawl kam ni ci? 31 Lai Thiangtho sungah, ‘Eih tuk cangho van pen pia suk hi,’ tin a tihbangin ka pu pa uh ten phiilneel ngamkhing sung pen manaate ei ngangai haw hi,” tin ti haw hi. 32 Jesuh in, “Thu ngangai in hilh ing hi. Moses ii piakmi cu vanhum cangho hi kha ma hi. Vanhum cangho ngangai a piatu cu ka Pa bek hi. 33 Pathian ii piakmi cangho cu vanhum pen hungin leihum ah nunnak a piatu pa khi hi,” tin ti hi. 34 Mahten, “Topa mahmi cangho cu kohte pia leleng in hi,” tin ngen haw hi. 35 Jesuh in, “Keimah cu mahmi nunnak cangho ing hi. Keima lakah a hung mite cu i tuk mahten a ngilkial leh haw tuk ma toh hi. Keima a umtute cu i tuk man ten dangdum leh haw tuk matoh hi. 36 Mahnaven ka hilhsa bangin nohten kei cu mu zotoh nave uhcin um nuam ma uh ci. 37 Ka pa ii keimah a paikmi pawpoh cu kua heihihen ka lakah hung haw tuk hi. Keima lakah a hungmi pawpoh cu pakhat no hei kiik tuk mang hi. 38 Itahimtitale kei cu keima deihnak bang dek tukin hung hi ngawlin, keimah a tiiktu pai deihnak bang dek tukin van pen a hungsukmi ing hi. 39 Keimah a tiiktu pai deihnak cu ni nungdawlbel ni ten pakhat no hei paithong ngawlin nunnak ah thawhkiktiik theihnak tukin hi. 40 Itahimtitale Capa mu in a um ngangaitu hempohte kumkhua nunnak a ngah haw tuk khi ka pai deihnak hi, mahten ni dawlbel ni ten nunnak ah thokiktiik leh tung hi,” tin ti hi. 41 Jesuh in, “Kei cu vanhum pen a hungsukmi cangho ing hi,” a tih ten Judahte cu phu celculh haw hi. 42 Judahte cun, “Hipa hi Josef capa hi ma ta maw? A pa thei ung, a nu vang thei ung. A i ta vanhum pen a hungsukmi cangho ing hi! tin ti thei hum?” tin tili haw hi. 43 Jesuh in, “Phu celculh li pahsuh un hi! 44 Keimah a tiiktu pa in keima lakah heng tukin a huupsak ma ta cun ka lakah hung thei haw tuk ma hi; Mahten amuhte cu ni dawlbel ni ten nunnak ah thotiik tung hi. 45 Kamsang tei laibu sungah, ‘Mi hempohte cu Pathian in hilh tuklai hi,’ tin um hi. Pai thu za in a zuitu te cu keima lakah hung haw hi. 46 Mahtibangin tih ten a kuakua heihihen pa mutu um haw tihnak hi khama hi. Pathian lak pen a hungmi pa bek khin Pa mu awng hi. 47 Thu ngangai in hilh ing hi. A um a sangtu cun kumkhua nunnak nei hi. 48 Kei cu nunnak cangho ing hi. 49 Na pu na pa uh ten phiilneel ngamkhing pen manaa khi ei haw naven thi leleng haw hi. 50 Mahnaven vancung pen a hungsukmi cangho a eitute cu thi haw tuk ma hi. 51 Vancung pen a hungsukmi nunnak cangho cu keimah ing hi. Hi cangho a eitu pawpoh cu kumkhua in nung haw tuk hi. Ka piakmi cangho cu ka taksa hi hitoh hi. Ita pia hingngim titale leihum mitei nunnak tukin hi. 52 Hi thu hin Judah tei sungah thin-uukzet in thu nialnak piang pantiik hi. ”Hi pa hin itibangin a taksa cu eih tukin ohte a pia thei tuk him?” tin ti haw hi. 53 Jesuh in amuh tei lakah, “Thu ngangai in hilh ing hi. Mihing Capa ii taksa ei ngawl le thisan a in ngawlmi hempohte cu a sung haw ah nunnak nei haw tuk ma hi. 54 Ka taksa ei in ka thi a in tute cu kumkhua nunnak nei in nidawlbel ni ten nunnak ah tho lehtiik tung hi. 55 Itahimtitale an ngangai cu ka taksa hi, in tuk ngangai cu ka thi hi hi. 56 Ka taksa ei in ka thi a intute cu keima sungah nung haw in keihei amu sungah nung bok ing hi. 57 A nungmi Pa in keimahtiik in, ka nunnak hi amah hangin nung ing hi. Mahbangbok in keimah taksa a eitu cu keima hangin nungbok haw tuk hi. 58 Hihi van pen a hungsukmi cangho hi. Hi cangho cu na pu na pa uh tei eihmi tuah bang ve kha ma hi, na pu na pate uh cu ei haw naven thi leng haw hi. Mahnaven hi cangho a eitu cu kumkhua in nung haw tuk hi,” tin Jesuh in ti hi. 59 Hi thu cu Jesuh in Kapernaum khua Pumkhawminn pen a zilhlaih in a hilhmi hi.

Kumkhua Nunnak

60 Hi thu cu a nungzui ten a theih haw ten, “A thu zilhnak haksa leita a kua in pom thei tuk him?” tin ti haw hi. 61 Kuamah in hilh kha po ma naven a nungzui tei phuklih cu Jesuh in a lungmu sungno in thei hi. Mahhangin, “Hi thu hin na lungmu uh haksatiik in nungkik nuamli bang um si uh ci? 62 Tehkipnak in Mihing Capa hi a umnak sa-awng ah a kaito leh khi na mu uh bang ahin, itin ti kam ni uh ci? 63 Nunnak piatu cu Pathian ii Huavang Thiangtho hi. Mihing tei cah le ngilnak cu i mamah ma hi. Nohte ka hilhmi thu hi Hawvang le nunnak hi. 64 Mahnaven mi hekkhat ten um ma uh ci,” tin Jesuh in ti hi. (Jesuh in a pattung himpo in amah um ngawltu umtuk aa a kua in kei zuak tuk him tih thei ham leng hi.) 65 Jesuh in a awn cu bet lehleu in, “Hitibangcun ahih hangin hi. Ka Pan amu ca in lam a honsak ma ta cun kua mamah ka lakah heng thei haw tuk ma hi.” tin ti hi. 66 Hi thu hangin a nungzuitu mi tampite cu nungheek in amah zui ngam leh haw matoh hi. 67 Mahten Jesuh in nungzui sawm le panih tei lakah, “Noh aw taisan bok ni uh cim?” tin dong hi. 68 Simon Piter in, “Topa a koi lakah kaw ka hawh cuang tuk uh? Nang cu kumkhua nunnak thu neitu hi toh si ci? 69 Tu in nang cu Pathian lak pen a hung Mithiang pakhat hi ci tih cu umzet ung hi,” tin ti hi. 70 Jesuh in, “Noh sawm le panihte hi keimah rori in teng hi mang maw ai him? Mahnaven pakhat cu dawi ngilo na hi hi,” tin don hi. 71 Jesuh cun Simon Iskariot ii capa Juda Iskariot khi a tih nuamnak hi. Itahimtitale Juda Iskariot cu nungzui sawm le panih ah tel bok naven amah zuak lehtu tuk khi na hi hi.

Jesuh le A Naute

7:1 Mahcengten Jesuh cu Galilee ngam lamah zin hi. Judah ngam lam cu zin nuam ma hi. Itahimtitale mahlai mun aa a um Judah ten amah that nuam haw hi. 2 Judah tei Biakbuuk Puai cu naizet toh hi. 3 Mahhangin Jesuh cu a nauten, “Hilai pen Judah ngam ah hawh tenna na thil bawlnak le na nadehnakte na nungzui ten mubok haw ta hen. 4 Mi ten keimah mu bok haw nahen a ti nuam ten a nadehnak haw seelcip awng haw ma hi. Hibang dekli na hih ten lei buppi in na nadehnak thei bok haw ta hen,” tin ti haw hi. 5 (A suahpihte ngangcang hei in amah um kha haw ma hi.) 6 Jesuh in, “Ka hun heng malaih hi. Nohte cu man hilhial leleng uh ci. 7 Nohte cu leihumpi hin hua thei ma hi. Mahnaven kei cu hua hi. Itahimtitale na thil bawl dan uh pha ma hi tin ka hilh leleng hang hi. 8 Puainak ah hawh ta un hi. Kei ong cu hawh tuk mang. Ka huncaan kim malaih hi,” tin ti hi. 9 Jesuh cu Galilee ngam ah umhih hi.

Biakbuuk Puai ah Jesuh Hawh

10 A nau tei hawh ceng ten Jesuh cu puainak ah hawh leh bok hi. Mahnaven lang liauluau pi hawh ngawlin hawh kuh deen hi. 11 Judah upa pawl ten puainak ah zei haw in, “Ilai ah um him?” tin dong haw hi. 12 Jesuh ii thu cu mi zapi ten son kuh huhum li haw hi. Hekkhat ten, “Mipha hi,” tin ti haw. Hekkhat ten, “Pha ma, mizol kawkawi thong hi,” tin ti haw hi. 13 Mahnaven a thu cu kuamah in taangzaakzet in son ngam haw ma hi. Itahimtitale Judah upate a lau haw hang hi. 14 Hi puai a celh kuan haw ten Jesuh cu Biakinn ah hawh in thu zilhnak nei hi. 15 Judah upa pawl ten lamdangsa in, “Hipa hi tawng le kaai awng ma si; Itibangin hi zaza theithei nantim?” tin ti haw hi. 16 Mahten Jesuh in, “Tu aa nohte ka zilhmi hi keima zilh thong thu hi ngawlin keimah a hahsuktu Pathian lakpen a hengmi thu hi. 17 Pathian ii deihnak a bawl nuam ngangai pawl ten ka zilhmi thu pawl te hi Pathian lak pen a hengmi ngangai maw, keima lungmu thong him tih cu khenkhuai thiam haw tuk poh hi. 18 Mai deih zawng in mi a zilh thei pawl cu ngual tei pahcoih le thangphat tuk zei mite hi haw hi. Mahnaven a tiiktu ii minthannak tuk bek a deihtu cu thu maan son hi. A sungah zol thu um ma hi. 19 Moses in nohte thukham pia hi ma ta maw? Mahnaven kuamah in zui ma hi uh ci. I ta keimah lehlam that tukin ngaisungli uh cim?” tin Jesuh in ti hi. 20 Mi hempoh ten, “Na sungah ngamhuai um hi bel tuk hei! A kua nge him nang that tuk sawmtu?” tin don haw hi. 21 Jesuh in, “Thasiahhuai nalamdang pakhat ka deh ten lamdangsa khawng uh ci. 22 Moses in na canau uhte a vunceep haw tan tuk uh ci tin a hilh hangin tan hun a kim ten sabbath ni tuah a dengdun tavang in tan memeek uh ci. (A pan masabeltu cu Moses hi kha ngawl in na pupa uhte khi hi saw hi.) 23 Moses daan palcat ngawlnak tuk tin Sabbath ni in na capa uhte vunceep na tan uh ta cun Sabbath ni in mina pakhat ka dam tiiknak hum ah ita thin-uuk uh cim? 24 A pualam zohnak tuah bekin thukhen pahsuh un hi. Thudik ahihnak zo in khen uh hi,” tin ti hi.

Messiah Hi Maw?

25 Mahtecun Jerusalem khua aa mi hekkhat pawlte cun, “Thah tukin a zohlih hawmi hi pa hi maw? 26 Zo un! Langtaakzet in mipi maiah thuson li hi. Mahnaven kuamah in dodal po haw ma hi. Lampuitu upa pawl ten, hipa hi Messiah hi tih a theih ciang tatak haw hang hi nantih maw? 27 Messiah a hen ngangai ten ilai lam pen hung tuk him tih kuamah in thei tuk ma hi. Mahnaven hipa cu ilai pen heng hum tih cu thei khawng ung hi. 28 Jesuh in mahtibang thu a zilhlih laitak in ngingzet in, ”Keimah hi thei ngangai uh cim? Keima thu in a hung hi kha mang hi. Mahnaven Keimah a tiiktu cu up tukin a tak ngangai mi hi. Nohten keimah a tiiktu pa cu thei ma uh ci. 29 Kei cun thei ing hi. Itahimtitale ama lak pen hung ing aa, a tiiksuktu cu amah hi,” tin ngingzet in au hi. 30 Mahten amah cu man nuam haw hi. Mahnaven kuamah in a humah khut ha thei haw ma hi. Itahimtitale a hun caan kim ma laih hi. 31 Mahnaven mihonpi sung pen mi tampi ten amah um haw in, “Messiah i hen ngai ten hipa saangin thasiahhuai nalamdang tamsaw bawl thei a ni maw?” tin ti haw hi.

Jesuh Man Tukin Mitiik Haw

32 Farasi ten mihonpi tei hitibangin thu a son kuh huhum lih a zaak haw ten amuh le thiampi upate tuah Jesuh man tukin biakinn cingtu palik hekkhattetiik haw hi. 33 Mahten Jesuh in, “Demlaih sung cu nangmu lakah um hih tung hi. Mah nungten keimah tiiktu pai lakah hawh tung hi. 34 Keimah zeili tuk nave uhcin tawk tuk ma uh ci. Itahimtitale ka umnak tuk mun ah nohte hawh thei tuk ma uh ci?” tin ti hi. 35 Mahhangin Judah upa pawlte cu pakhat le pakhat, “Tawk theih ngawlnak mun ilai hawh tum nan him? A hawhnak theihtheih tuk uh ngawlnak mun ilai tawk kek ahkhin hawh tum hi nantim? Judah tei umnak khuapi pa khakhat ah hawh in, Grik mite zilh nuam hi nantih maw?” tin ti haw hi. 36 Hitihhin ti haw laih hi, “Keimah zei tuk nave uhcin tawk tuk ma uh ci. Ka umnak tuk munah nohte hawh kha thei tuk ma uh ci,” tin ti hi. “A i matlap nantim?” tin ti haw hi.

Nunnak Tui

37 Puainak ni dawltabel cu a thupibel ni hi. Mahnicun Jesuh in awn ngingzet in, “Akua abang dang a dum mite ka neel ah hungin in un. 38 Lai Thiangtho sungah, ‘Keimah a umtu hempoh tei sung pen nunnak ciktui put tuk hi’ tin a tihmi bang khin hi tuk hi,’ tin ti hi. 39 Jesuh hilh nuammi cu Hawvang Thiangtho thu hi. Mahmi Hawvang Thiangtho cu amah umtu hempoh tei ngahtukmi hi. Hi hunlaih khin Hawvang Thiangtho cu piak in um ma laih hi. Itahimtitale Jesuh cu sunloihnak tuah thawhtiik hi ma laih hi.

Mipite Khenkhek Haw

40 Hi thu a theih haw ten pawlkhat ten, “Hipa cu Kamsang ngangai hi,” tin ti haw hi. 41 A dang ten, “Messiah hi” tin ti haw. Mahnaven a dang pawlkhatte cun, “Messiah cu Galilee ngam lam pen piang tuk ma hi. 42 Lai Thiangtho in, ‘Messiah cu David casuante hi tuk aa David khua Bethlehem ah hing tuk hi’ tin ti si,” tin ti haw hi. 43 Amah i hangin mihonpi sungah khendunnak piang hi. 44 Pawlkhat ten man nuam haw. Mahnaven a humah khutha haw ma hi.

Judah Upa Ten Sangkha Haw Ma

45 Biakinn cingtu palikte cu kiik leh haw in, thiampi upa le Farasi ten, “Ita amah hunpih ma uh cim?” tin a dot haw ten, 46 “Hi pa bangin kuamah in thuphuang awng haw ma hi,” tin don haw hi. 47 Mahten Farasi ten, “Nangmuhte vang zol cih ngah zo bang um si?” tin dong haw hi. 48 Farasi pawl ten, “Judah upa pawl heihihen, Farasi pawlte heihihen, amah um in a umtu pakhat beek na theih uh um maw? 49 Mipite cu Moses ii thukham a theih haw ngawl hangin, Pathian ii tamsiat thuak haw hi,” tin ti haw hi. 50 Farasi mi Nikodemas in, 51 “Eimu daan ahcun, kuamah in ama thu a theih masak laih uh ngawl le, a bawlmi amuh uh laih ngawl cun, khial hi, tin ti thei tuk ma hung hi,” tin ti hi. Nikodemas cu Jesuh lakah a leeng awngtu pa khi hi. 52 Maten, amuh ten, “Pha hi. Nang hei Galilee lammi bok cim? Lai Thiangtho sial him po in hi. Galilee lam pen Kamsang hihim piangtuk ma hi,

A Sual Laitak Matmi Numei

8:1 Mi hempohte cu inn ah pin haw hi. Mahnaven Jesuh cu Olif mual humah hawh hi. 2 A zing ten zingtung no in Biakinn ah hawh leh hi. Mahtecun mihonpi ten amah cu kim pimpem haw in, Jesuh cu khung in thu hilh pan hi. 3 Daanthiam sayate le Farasi pawl ten numei pakhat pano dang tuah a suallih haw laihtakin a mat hawmi nu hunpih haw in mi tampi mai ah dingtiik haw hi. 4 Jesuh lakah hi tin ti haw hi, “Saya pa, hinu hi pano tuah a suallih haw laihtak keek in matmi hi. 5 Moses ii piakmi keimu daan bang ahitacun himi nu cu suang tuah sehhuptukmi hi. Nang itin ngaisung cim?” tin dong haw hi. 6 Hitihbangin thu a dothemlih haw cu a humah sual zei nuam in a thangsiah kuh nim haw hi. Mahnaven Jesuh cu khung in a khut in lei ah lai ngan hi. 7 Thu a dotzom pikpek haw taak cu Jesuh cu daakto leh in, “Nangmu sung pen sualnak a bawl awng hihim ngawlmi in suang tuah in sep masabel hen,” tin ti hi. 8 Mahcengten kun leh in lei ah lai ngan lehleu hi. 9 Hi thu a theih haw ten pakhat nung pakhat nungkik pepel in taai thetheuh haw hi. Upa deuh pawlte tai kuh pan masabel haw hi. 10 Mahten Jesuh cu daakto leh in, “Numei nu aw, ilai hawh khawng haw ta kaw?” tin dong hi. 11 Numei nu cun, “Topa, pakhat no hei um haw ma hi,” tin don hi. Mahten Jesuh in, “Kei hei in nang thukhen sak tuk mang hi. Hawhten na sual leh toh pahsun,” tin ti hi.

Jesuh Cu Leihum Vaaknak

12 Jesuh in amuh tei lakah, “Kei cu leihum vaaknak ing hi, Akuakua heihihen keimah a zuitute cu nunnak khuavak nei haw tuk aa khuathim sungah vaakvaai haw tuk ma hi,” tin ti hi. 13 Farasi ten, “Nangma thu lala son duncopli sisi. Na sonmi imah a matlap um ma hi,” tin ti haw hi. 14 Jesuh in don leh in, “Hikha ma hi. Keima thu lala ka son copli vangin ka sonmi thu cu dik hi. Itahimtitale ilai pen hung in, ilai ah hawh tuk hing ngim tihvang thei thei ing hi. Nohte cun ilai pen hung ing aa, ilai lamah hawh tuk hing ngim tih hei thei ma uh ci. 15 Nohten mihing daan zui in thukhen uh ci. Kei in kuamah i hum ah thukhen mang hi. 16 Mahnaven thu ka khen tuk bang ahin ka thukhennak cu thuman hi tuk hi. Itahimtitale hi thu ah keimah nguakcang hi mang hi. Kei a tiiksuktu ka Pa cu keimah tuah um kawm ung hi. 17 Nangmu thukham sungah mihing tetti panih a thu haw a cun tale a son hawmi cu thuman hi tin ngat in um hi. 18 Tulaihtak in kei ca in ka tetti cu keimah hitoh ing hi. Ka tetti a dang cu keimah a tiiktu ka pa khi hi,” tin ti hi. 19 Amuhten, “Na Pa cu ilai ah kaw a um?” tin dong haw hi. Jesuh in, “Keimah hei thei ma uh ci, Ka Pa hei thei ma uh ci. Keimah hi na thei uh bang ta a hin ka Pa heithei bok tuk nave uh cin,” tin don hi. 20 Jesuh ii thu a hilhnak mun cu, Biakinn sung a sumpi koihnak mun ahkhin hi. Ama hun a kim laih ngawl hangin kuamah in man haw ma hi.

Ka Hawhnak-ah Hawh Thei Tuk Ma Uh Ci

21 Jesuh in hitin ti lehleu hi, “Kei cu hawh tung hi, Kei cu zeituk uh ci, mahnaven na sualnak sung uh ah thi tuk uh ci. Ka hawhnak tuk mun ah hawh thei tukma uh ci,” tin ti hi. 22 Mahhangin Judah miten, “Ka hawhnak tuk mun ah hawh thei tuk ma uh ci, a tihmi khi amah le mah poh thatcop nuam hi nantih maw?” tin ti haw hi. 23 Mahten Jesuh in, “Nohte cu nuailam pen hung uh ci. Mahnaven kei cu humlam pen hung ing hi. Nohte cu hi leihum mi hi uhci. Kei cu hi lei mi hi kha mang hi. 24 Mahhangin na sualnak uh ah thi tuk uh ci tin ti ing hi. Mahten keimah cu Keimah ing hi ka tihmi na sang uh ma tale na sualnak sung uh ah thi ngangai tuk uh ci,” tin ti hi. 25 Mahten amuh ten, “Nang hi a kua nge cim?” tin dong haw hi. Jesuh in, “A pattung in ka hilh lelengmi khi ing hi. 26 Nangmu lakah thuson tuk le thuhilh tuk tampi nei ing hi. Keimah a tiiktu cu thuman hi aa, leihum ah amah lak pen ka zakmi thute bek hilh ing hi,” tin don hi. 27 Jesuh ii a pai thu a hilh mite cu amuh ten thei zo haw ma hi. 28 Mahhangin Jesuh in amuh tei lakah, “Mihing Capa na taaktoh uh ten a kua him tih thei tuk uh ci aa, keima thu in i mah bawl ngawl, Pa ii hilhnak bang bek in thuson ka hih lam thei tuk uh ci. 29 Keimah a tiiktu Pa hei cu keima lakah um hi. Ama deihnak bangin na ka deh hangin keimah nguakcang zamthong ma hi,” tin ti hi. 30 Hitibangin a thu zilh a zatu mi tampi ten amah um haw hi.

A Suakca mi Le Sila

31 Amah a umtu Judah mitei lakah Jesuh in, “Nohte ka thuhilhnak na zui uh tale ka nungzuitu taktak hi tuk uh ci. 32 Thutak thei tuk uh ci a ma, mahmi thutak cun nohte suakcatiik tuk hi,” tin ti hi. 33 Amuhten, “Kohte Abraham casuante hi ung hi. Kuamah ii sila in um awng ma ung hi, mahhangin suakca tuk hi uh ci na tihmi a i matlap hum?” tin dong haw hi. 34 Jesuh in, “Thu ngangai in hilh ing hi. A sual pawpoh cu sualnak ii sila hi. 35 Sila ten a umnak haw tei innsang ah um leleng haw ma hi. Mahnaven capa ngangai ong cu um leleng hi. 36 Capa in nohte a suakcatiik tacun a suakca ngangai mi hi tuk toh uh ci. 37 Abraham ii casuante na hih uh cu thei leng ing hi. Mahnaven ka thu hilhnakte na pom nuam uh ngawl hangin keimah that tukin sawmli uh ci. 38 Kei cu ka Pai laksami thute bek phuang ing hi. Mahnaven nohte cun na pa uh tei hilhsa bek bawl uh ci,” tin ti hi.

Na pa uh Dawimangpa

39 Amuhten, “Ka pa uh cu Abraham khi hi,” tin don haw hi. Mahten Jesuh in, “Abraham ii casuan ngangai na hi uh tacun ama bawlmi khi bawl bok tuk hi uh ci. 40 Hilh tukin ka tuptah lelengmi cu Pathian lak pen ka theihmi thutak khi hi. Mahnaven keimah lehlam thah tum uh ci. Abraham cun mahtibangin bawl awng ma hi. 41 Nohte cu napa uh tei bawlmi khi bawl bok uh ci,” tin don hi. Mahten amuhten, “Kohte cu casawn hi kha ma ung hi. Kohten Pa pakhat nei ung aa, Pathian amah hihim khi hi,” tin don haw hi. 42 Jesuh in, “Pathian cu na pa ngangai uh a hi tacun keimah it tuk uh ci. Itahimtitale kei cu Pathian lak pen hungin tu in hilai ah um ing hi. Keima thu in hungcawm mang hi. Keimah tiiktu pai thu in hung ing hi. 43 Ita ka hilhmi thu hi thei zo ma uh cim? Ka thu phuanmi na ngaih uh ngawl hangin hi. 44 Nohte cu na pa uh Satan ca hi uh ci. Na bawl nuam uhmi hei cu nangmu deihnak khi hi. Amah cu a pattung himpo in laithat hi. Thutak khi itiikmah in leen awng ma hi. Itahimtitale a sungah thudik um ma hi. Zolthu a son ten a bawllih sa meek bawl leh saal khi hi poh hi. Itahimtitale amah cu zolthu son theimi hi aa, zolthu hempoh ii pa hi. 45 Kei cun thutak phuang ing hi. Mahhangin sang ma uh ci. 46 Nangmu lak ahhin ka sualnak a mutu kua um uh cim? Thu ngangai in hilh ing hi. Ita sang nuam ma uh cim? 47 Pathian lak pen a hungmi cun Pathian ii thu cu ngai hi. Mahnaven nohte cu Pathian lakpen a hengmi na hih uh ngawl hangin a thu ngai nuam ma uh ci,” tin ti hi.

Jesuh Le Abraham

48 Judah miten, “Nang cu Samaria mi hi ci. Na sungah khuasia tum hi ka tih uhmi khi thu ngangai si mei?” tin ti haw hi. 49 Jesuh in, “Khuasia hei nei mang hi. Kei cu ka Pa khi upat ing hi. Mahnaven nohte cun keimah zawnsak uh ci. 50 Kei cun keimah le keimah sunloihnak zei kha mang hi. Mahnaven a zeisaktu pakhat um hi. A thukhen ten keima lam ah tang hi. 51 Thu ngangai in hilh ing hi. Ka thu zuitu te cu ituk mahten thi haw tuk ma hi,” tin ti hi. 52 Judah ten, “Tu ong cun khuasia nei ci tih a ciangzet in thei ung hi. Abraham cu thi zotoh hi. Kamsang pawl te hempoh vang thi khawng zo haw toh hi. Mahnaven nang cun, ‘Ka thu a zuitu cu ituk mahten thi tuk ma hi,’ tin ti ci. 53 Ka pa uh Abraham cu thi zotoh hi. Mahbangngai ahitacun Abraham saangin ngeng saw ing tin maw na ngaihsut? Mahten Kamsang hempote vang thi khawng zo haw toh hi. Nang a kua heng in um kam?” tin ti haw hi. 54 Jesuh in, “Keimah pahcawicop ka hi tacun keimah le keimah pahcawicopnak cu imah man nei tuk ma hi. Keimah a pahcawitu cu ka Pa khi hi. Mahmi cu ka Pathian hi na tih uhmi khi hi. 55 Nohten itukmah in thei awng ma uh ci. Mahnaven kei cun thei ing hi. Theimang ka ti a hin nangmuh bangin zolthu son hibok tung hi. Mahnaven amah cu thei ngangai ing aa, a thu vang mang ing hi. 56 Na pu uh Abraham in keima ni le hun a muh tuk khi ngakhelzet hi. Amuh ngangai ten lungdamzet hi,” tin don hi. 57 Judah miten, “Kum sawmnga hei kim laih ngawl ngen itibangin Abraham cu mu kha thei cim?” tin ti haw hi. 58 Jesuh in, “Thungai in hilh ing hi. Abraham pian laih ngawlin kei um zotoh ing hi,” tin don hi. 59 A sehnak haw tuk suang khul haw hi. Mahnaven Jesuh cu Biakinn pen tul in ngelh vawk hi.

Jesuh in Pianpih Mitcawpa Damtiik

9:1 Jesuh cu lampi ah a hawhlih laitak in pianpih mitcawpa pakhat mu hi. 2 A nungzui ten Jesuh lakah, “Saya pa, a nui pum sung pen mitcawsa in a piannak hi a kua sualnak him? Ama sualnak hang maw, a nu le pai sualnak hang him?” tin dong haw hi. 3 Jesuh in, “A mitcawtnak cu a ma sualnak hang hei hi ma, a nu le pai sualnak hang hei hi ma, Pathian thil titheihnak huham a lang theihnak tukin hi. 4 Sun khuavak sungzong cu keimah a tiiktu pai na khi ka deh leleng tukmi hi. Kuamah ii nadeh theih ngawl caan hengli toh hi. 5 Leihum aa ka um laih hin leihum mitei ca vaaknak ing hi,” tin don hi. 6 Hi thu a son cengten Jesuh cu leiah a cil sia in leiciak demlaino a bawl celh ten mahmi leiciak no cu la in mitcawpa mit ah noih hi. 7 A noih ceng ten, “Hawhtenna, Siloam tuiting ah na mai phiat in hi,” tin ti hi. (‘Siloam’ tih cu ‘tiik’ tihnak hi.) Mitcaw pa cu Jesuh ii tiiknak bangin a mai phiat ceng ten khuamu ciangin kik leh hi. 8 A inn neel te le a veidawhlih laih a mu awngtu ten, “A khung in veidawhli pa khi hi ma maw?” tin ti haw hi. 9 Hekkhat ten, “Mah zuh hi,” tin ti haw hi. Hekkhat ten, “Amah hi kha ma hi. Mahmi pa tuah khin bangve haw ngai hi,” tin ti haw hi. Mahten mahmi pa cun, “Keimah zuh ing hi,” tin don hi. 10 Amuh ten, “Itabangin na mit khuamu leh thei cim?” tin dong haw hi. 11 Mahmi pa cun, “Mi pakhat a min Jesuh a tih hawmi pan lei ciak la in ka mit ah noih hi. A noih cengten, ‘Hawhtenna Siloam tuiting ah na mai phiat ten hi,’ tintiik hi. A tiiknak bang hawh in ka mai ka phiat bek ten ka mit hak thei in khua mu ing hi,” tin don hi. 12 Amuh ten, “Tun amah ilai ah him?” tin a dot haw ten, “Thei mang,” tin don hi.

Farasi Ten A Damnak Kan

13 Mitcaw awng pa cu Farasi tei lakah hawh pih haw hi. 14 Jesuh ii leiciak bawl in mi a dam tiiknak ni cu Sabbath ni hi. 15 Farasi pawl ten, “Itibangin na mit khuamu thei kam?” tin dong leleu haw hi. Mahmi pa cun, “Leiciak demlaih la in ka mit ah noih hi. Mahcengten mai phiattiik in mai ka phiat le ka mit khuamu ing hi,” tin ti hi. 16 Farasi hekkhat pawl ten, “Himi thil bawltu pa cu Pathian lakpen a hungmi hi kha tuk ma hi. Itahimtitale Sabbath thukham daan palcat hi,” tin ti haw hi. Mahnaven hekkhat pawl ten, “Mah ahi ahin mi sualmi cu itibangin hibang nalamdang bawl thei tuk him?” tin ti bok haw hi. Mahhangin amu sung lala ah khendunnak piang hi. 17 Mahhangin mah pa cu Farasi ten veikhat dong thuah lehleu haw hi, “Na mit a damtiiktu hi a kua tukin ngaisung cim?” tin dong haw hi. “Amah cu Kamsang hi,” tin don hi. 18 Mahnaven Judah upa pawl ten amah cu a mitcaw naven tucun khuamu leh ta hi tih cu sang thei haw ma hi. Mahhangin mah pai nu le pa cu sam in, 19 “Hi pa hi na capa ngangai hi maw? Mitcawsa in hinmi ti si uh si. Tu in khuamu thei si,” tin dong haw hi. 20 A nu le pa te cun, “Amah hi ka ca ngangai uh hi, tih cu thei ung hi. A mitcawsa in hing tul hi tihvang cu thei ung hi. 21 Mahnaven tu in iti bangin khuamu leh thei him, tih le kua in a mit vaaktiik leh him tih cu thei ma ung hi. Amah upa zo a hi taak amah dong un hi. A man son thei khawng tuk hi,” tin don haw hi. 22 A nu le pa ten ita hitibangcun don haw himtitale, Judah upa pawl ten Jesuh cu Messiah hi tin a titu pawpoh cu biaknak inn pen hawlvawk tuk hung hi tin lungkimnak a neih sa haw mi a lau haw hangin hi. 23 Mahhangin, “Upa zotoh hi. Amah dong un,” a tihnak haw cu na hi hi. 24 Mitcawsa in hinmi pa cu sam leleu haw in, “Thudik thumaan hilh tung hi, tin Pathian mai ah thukam in hi. Itahimtitale Jesuh khi misual tih thei ung hi,” tin ti haw hi. 25 Mitcawsa in hinmi pa cun, “Misual ahih le hih ngawl thei mang. Mahnaven ka theihmi pakhat cu kei mitcaw awng ing hi. Mahnaven tucun ka mit khuamu ing hi,” tin don hi. 26 “Itibangin bawl him?” tin dong leleu haw hi. 27 “Hilh zotohsing, na ngaih nuam uh ngawl cu e! Ita thei nuam leleu nge uh cim? Nangmuh vang ama nungzui nuam bok uh cim maw?” tin don hi. 28 Mahten amah cu vapzaan in, “Nangmah saw sisi a nungzuitu! Koh cu Moses nungzui si ung. 29 Pathian in Moses lakah thu hilh tih thei ung. Mahnaven hipa khi cu ilai lam pen hung him tih thei ma ung hi,” tin don haw hi. 30 Mahmi pa cun, “Izahta lamdang him! Ilai pen hunghim tih na theih uh ngawl na pi, ka mitvaaktiik hi. 31 Pathian in misual tei thu cu ngai kha ma hi. Mahnaven amah a upattu le ama deihnak a bawltu tei thu ngai hi tih cu thei hung hi. 32 Lei pianpat pen pan mitcawsa in hinmi khi a kuamah in vaak lehtiik tih thu thei awng ma hung hi. 33 Hipa hi Pathian lak pen a hungmi a hi ma tacun hitih bangte bawl thei tukma hi,” tin don hi. 34 Mahten amuh ten, “Nang sualnak tuah a dim aa hinmi sualnak tuah a khangtomi in koh ngen thuhilh tukin ngaisung!” tin Pumkhawminn pen hawl vawk haw hi.

Hawvang Mitcaw

35 Jesuh in mahtibangin a hawlvawk haw cu thei hi. Amah cu Jesuh in mu in, “Mihing Capa cu um cim?” tin dong hi. 36 Mahpa cun, “Topa aw mahmi pa cu a kua him tih hilh in hi, amah ka up theihnak tukin,” tin don hi. 37 Jesuh in. “Amah cu mu zotoh ci. Tu aa nangmah tuah otpih dunli mi pa khi hi,” tin don hi. 38 Mahten mahpa cun Jesuh ii maiah khukdin in, “Topa um ing hi,” tin don hi. 39 Jesuh in, “Hi leihum ah thu kheh tuk in hung ing. Mitcaw te khuamutiik tukin le khua mute mit cawtiik tukin,” tin ti hi. 40 Hitibangin tihlih laihtak cun a eel a um Farasi hekkhat ten mahmi thu cu a zaak haw ten, “Mah a hitale keimuhte vang na mit uh caw hi tin na tih nuamnak ven maw?” tin dong haw hi. 41 Jesuh in, “Na mit uh a caw ta ahin sual tuk ma uh ci. Mahnaven noh ten, ‘khua mu leng ung hi’ na tih uh taak na sualnak uh taangleng laih hi,” tin don hi.

Tuu Khaltu Tehkipnak

10:1 Jesuh in, “Thu ngangai in hilh ing hi, Tuu inn sungah tuu kongka pen tum ngawlin kongka dang pen a tummi cu nguca le damiah hi. 2 A kongka pen a tumtu cu a cingkhawitu tuukhal hi. 3 Kongka cingtu cun kongka cu hon in, tuu pawl ten a aw khi thei haw hi. A tuu te cu amu min tek in sam in pualam ah tulpih hi. 4 A venghawng in a kaihsuah tul cengten a mailam ah hawh ham in, tuu ten a aw a theih haw hang a nungzui haw hi. 5 Midang cu zui nuam kha haw ma hi. Itahimtitale a aw thei haw ma hi,” tin ti hi. 6 Jesuh in tehkipnak tuah thu hilh naven amuhten itihnak him tih thei haw ma hi.

Tuukhal Pha Jesuh

7 Mahhangin Jesuh in hitin hilh lehleu hi, “Thu ngangai in hilh ing hi. Keimah cu tuu tei tumnak kongka ing hi. 8 Ka masuan aa a hungmi hempoh cu nguca le damiah ahih haw hangin tuu ten a aw ngai nuam haw ma hi. 9 Kei cu kongkapi ing hi. Keimah tawn in a hawhtu pawpoh cu luatnak ngah tuk hi. Tumtuak tultuak in ham hingdimdem mu haw tuk hi. 10 Ngucate cun ngu tuk, that tukin, le siatsuah tuk bek in hung haw hi. Mahnaven kei cu nunnak cangkim a neihtheih hawnak tukin hung ing hi. 11 Kei cu tuukhal pha ing hi. Tuukhal pha cun a tuu tei ca in a nunnak pia ngam hi. 12 Cialcop tuukhal pa cu tuukhal ngangai ahih ngawlnak hang le neitu ngai ahih ngawl tak cingne te hungli a muh ten tai masabel in, tuu te zamsan hi. Mahten tuu te cu cingne ten man in hilkeek khawng hi. 13 Cialcopmi cu cialcop ahih hangin le tuu tei ca a ngaihsut ngawl hangin taai thong hi. 14 -15 Tuukhal pha cu keimah ing hi. Pa khi ka theih bangin Pa hei in keimah thei bok hi. Mah hangbokin ka tuu ten keimah thei haw in keimah hei in ka tuute thei bok ing hi. Mahhangin amu ca tukin ka nunnak pia ngam ing hi. 16 Hi tuuhon sungah a tel kha ngawl tuu dang hei nei ing hi. Amuhte vang hunpih hihim bok tung hi. Ka aw khi thei haw tuk aa tuukhal pakhat i ang sungah tuu hon khat suak haw tuk hi. 17 Ka pan kei a ihnak cu ka nunnak ka piak ngam hangin hi. Hibangin ka phalnak cu ka co kik leh theih tuk hangin hi. 18 Ka nunnak cu kuamah in laaksak thei haw tuk ma hi. Keimah ka phalnak bangin ka piakmi hi. Piaknak tuk thu hei nei ing a, laak leh theihnak thu hei nei ing hi. Mahmi cu ka pan bawlhen tin thu a piakmi khi hi,” tin ti hi. 19 Hih thu hangin Judah mitei sungah khendunnak um leleu hi. 20 Mi tampi ten, “Ngamhuai nei hi, sil zotoh hi, ita a thu ngaili uh cim?” tin ti haw hi. 21 Mahnaven hekhat ten, “Ngamhuai a neimi in hitibangin thu son thei tuk ma hi. Itihnak in khuasia a neimi pan mitcawmi khuamutiik thei tuk him?” tin ti seem bok haw hi.

Jesuh Thu Saang Haw Ma

22 Jerusalem khua Biakinn apnak puai bawl laitak haw hi. Hi hun cu phalbi hun hi. 23 Jesuh cu Biakinn sung aa Solomon maaisaap a tihmi haw ahcun vak kawkawili hi. Mahlaitak in, 24 Judah ten kimvut in, “Kohte hi ituk tian thinkham le lungkham pia tuk cim? A ciang in son in hi. Messiah hi ngangai cim?” tin ti haw hi. 25 Mahten Jesuh in, “Nohte hilh zotoh navengin sang muam ma uh ci. Ka Pa ii thu a piaknak hangin ka bawlmi thil te khin keima hilh kul ngawlin langtiik haw poh hi. 26 Mahnaven nohte cu ka tuu na hih uh ngawl hangin sang ma uh ci. 27 Ka tuu ten ka aw khi ngai haw hi, amuh te vang thei ing aa, amuh hei in keimah zui haw hi. 28 Amuhte cu kumkhua nunnak pia ing hi. Ituk mahten thi leh haw tuk ma toh hi. Amuh te vang ka kut sung pen kuamah in lonsak thei haw tuk ma hi. 29 Keima lakah a piatu ka Pa cu i hempoh saangin ngengsaw hi. Mahhangin ka Pai cinkhawinak sungpen kuamah in lonsak thei haw tuk ma hi. 30 Ka Pa le kei cu pumkhat sakhat ung hi,” tin ti hi. 31 Mahten Judah ten Jesuh a sehnak haw tukin suang khul leleu haw hi. 32 Mahten Jesuh in, “Ka Pai tiikmi thilpha tamzet nohtei mai ah bawl ing hi. Hi thilte sung pen i hang bel in kei suang tuah sep nuamli bel uh cim?” tin ti hi. 33 Judah ten, “Suang tuah ka seh nuamnak uh cu thilpha na bawl hangin hi kha ma hi. Pathian na siatson hang hi. Nang cu mihing men thong poh ci. Mahnaven nangmah le mah Pathian bangin son dun cop ci,” tin don haw hi. 34 Jesuh in, “Nangmu Daan thukham laibu sungah, ‘Nohte cu pathiante hi uh ci,’ tin ngat in um hi. 35 Lai Thiangtho ii hilhmi cu kumkhua thudik hi leleng hi tih cu thei ung hi. Mahten pathian ii a thu a hilhmi mihingte cu ‘Pathian’ tin sam hi. 36 Kei cu ka Pa ii a tenmi le leihum ah a hahsukmi ing hi. Mahtihbang a hi hangin itakaw keimah hi Pathian ii capa ing ka tihnak hangin Pathian zawnsak ci, natih theihnak uh? 37 Ka Pai deihmi thilte ka bawl ngawl tacun sang nuam pahsuh un! 38 Mahnaven ka bawl a hitale keimah na sang nuam uh ngawl vangin ka bawlmi beek hi na sang uh an mawi hi; mahticun Pa cu ka sungah um in, Pai sungah kei um ing, tih na theih lelengnak tuk uh in hi,” tin ti hi. 39 Mahten man awn leleu haw naven amu khut sung pen Jesuh suak ngah hi. 40 Jesuh cu Jordan ngun ngaalkhat lam Johan ii baptizam a piaknak muh lam ah hawh in mahlai ah caam hi. 41 Mi tampite cu ama lakah hung haw hi, “Johan in thasiahhuai i mamah bawl ma hi, mahnaven hi pai thu a sonmi hempoh cu man khawng hi,” tin ti haw hi. 42 Mahlai mun pen mi tampi ten Jesuh cu sang haw hi.

Lazaras Thihnak

11:1 Bethani khua aa a um Lazaras cu a ti naa hi. Bethani cu Mary le a u Martha tei umnak khua hi. 2 (Mahmi Mary cu Topai ke zimui tui in a samtuah nawttu khi hi. A tinaa mi Lazaras cu a ningpa hi.) 3 Hi unau panih ten hitihhin Jesuh lakah thu dong haw hi, “Topa na ihmi na ngualcam pa tinaa hi,” tin cah haw hi. 4 Mah thu Jesuh in a theih ten, “Lazaras i nat a tawpnak cu thihnak hi kha tukma hi. Hi hangin Pathian Capa sunloihnak a langnak tuk hi,” tin ti hi. 5 Jesuh cun Martha, le a naunu le Lazaras khi itzet hi. 6 Lazaras a tinaa hi tih thu thei leng napiin a ma umnak mun ahkhin ninih caam bet laih hi. 7 Mahcengten a nungzui tei lakah, “Judah ngam ah hawh kik leh nung,” tin ti hi. 8 A nungzui ten, “Saya pa, nungno khin Judah mipi ten suang tuah sep nuamli haw toh si. Mahlai mun ah maw na hawh leh tuk,” tin ti haw hi. 9 Jesuh in, “Nikhat sungah nazi sawm le panih hi ma ta maw? Mahhangin mi pakhat sun ni cang cai a hawhtu cu bah awngtuk ma hi. Itahimtitale hi leihum khuavaknak khi mu hi. 10 Mahnaven zanlam in a vaaktaabang ahin bah tuk hi. Itahimtitale mahmi pai sungah khuavaknak um ma hi,” tin a tih cengten bet leh in, 11 “A ngualcam uh Lazaras cu hihbu zotoh hi. Mahnaven hawh in phong tung hi,” tin ti hi. 12 A nungzuitu ten, “Ahihbu tacun dam tuk hi,” tin ti haw hi. 13 Jesuh i sonnuammi cu Lazaras cu thi zotoh hi, a tihnopnak hi. Mahnaven nungzuitu ten ahihbu thong ngai in sa haw hi. 14 Mahhangin Jesuh in ciangzet in, “Lazaras cu thi zo hi, 15 Mahnaven ama lak aa ka um ngawl cu nangma ca in pha saw hi. Itahimtitale sang thei saw deuh tuk hi uh ci. Tu in ama lakah hawh ta nung,” tin ti hi. 16 Caphil a tih haw Thomas in, “Ama lakah thi bok tukin oh hei hawhbok ta nung,” tin ti hi.

Jesuh Cu Thawhlehnak Le Nunnak

17 Jesuh cu mahlai mun a hen ten Lazaras cu a phum sawng haw nili kim leh zotoh hi. 18 Bethani cu Jerusalem pen pengnih kim deuh ngawl ahih hangin 19 Judah mi tampi te cu Mary le Martha tei a ningpa haw ahihtak tohpih leh tukin hung haw hi. 20 Jesuh hungli hi tih thu Martha in a theih ten lampi ah a muak tukin hawh hi. Mary cu inn ah um hi. 21 Martha in Jesuh cu, “Topa aw, nangmah hilai ah na um bang ta a hin ka ningpa thi tuk ma hi. 22 Mahnaven a tu hei in na ngetmi pawpoh cu Pathian in pia tuk hi tih khi thei ing hi,” tin ti hi. 23 Jesuh in, “Na ningpa cu tholeh tuk hi,” tin ti hi. 24 Mahtecun Martha cun, “Hizuh hi, ni dawlbel ni ten tho leh tuk tih cu thei ing hi,” tin don hi. 25 Jesuh in Martha cu, “Kei cu thawhlehnak le nunnak ing hi. Keimah um in a sangtu cu a thihei in nung tuk hi. 26 A kuakua heihihen keima sungah a nungtu te le a um a sangtute cu ituk mahten thi haw tuk ma toh hi. Hi thu hi um cim?” tin ti hi. 27 Martha in, “Hizuh hi, um ing hi Topa, Nang cu Pathian Capa Messiah, leihum ah a hungtukmi hi ci tin um ing hi,” tin ti hi.

Jesuh Kap

28 Martha in hi thu a son ceng ten a nau Mary cu sam kuh deen hi, “Saya pa hilaiah hung zotoh hi, Nangmah hei cianli hi,” tin hilh hi. 29 Hi thu Mary in a theih ten Jesuh tawk tukin manlangzet in haw hi. 30 (Jesuh cu khuasung heng malai hi. Martha ii muaknak mun ahkhin na um lenglai hi.) 31 Mary a tohpihtu Judah mi pawl ten Mary dingvut in manlangzet in a tul ten a nungzui tul paih bok haw hi. Khan ah kap tukin hawh hi tuk hi tin ngaisung haw hi. 32 Jesuh ii umnak a hen ten Mary cu a kebul ah bok in, “Topa, hilai ah na um ta a hin ka ningpa thi tukma ta hi,” tin ti hi. 33 Jesuh cu Mary le a zuitu Judah tei kah amuhten a lungzul in khuangai pih zet hi. 34 “Ilai ah phum uh cim?” tin dong hi.Amuh ten, “Topa hungin zo in,” tin ti haw hi. 35 Jesuh cu kap hi. 36 Mahten Judah ten, “Izahtakin it him, zo un hi,” tin ti haw hi. 37 Mahnaven hekkhatte, “Mitcaw na ngawn a mit khuamutiik thei hi si, Lazaras hei cu thi ngawlin umtiik thei ma maw ai him?” tin ti haw hi.

Lazaras Nung Lehtiik

38 Jesuh cu a lungmu sukha mahtak leleu in khaanmual ah hawh hi. Khan cu suangkua hawmpi na hi aa suangpeek tuah khahcihmi na hi hi. 39 Jesuh in, “Suangpeek hi thawn un hi,” tin ti hi. Mithi pai celnu Martha cun, “Topa uih leita tuk toh hi. Ka phum sawng uh nili ngei zotoh hi,” tin ti hi. 40 Jesuh in Martha cu, “Na um tacun Pathian ii sunloihnak mu tuk hi ci, tin ti ma tang maw ai him?” tin ti hi. 41 Suangpeek cu thawn haw in, mahten Jesuh cu vandaak in, “Pa aw, ka thu na theihpih hangin lungdam ing hi. 42 Ka thu theihpih leleng ci tih cu thei ing hi. Mahnaven hi ka tihmi hi cu hilai aa a ummi pawl tei ca in hi. 43 Mahtin a tih ceng ten, “Lazaras aw, tul in hi,” tin ngingzet in au hi. 44 Mithi pa cu a khut le a ke miluang cuunnak puan le a mai khuhnak puanpi tuah cun tul hi. Mahten Jesuh in, “Duuk unna hawh tahen,” tin ti hi.

Jesuh Thahtuk Sawm Haw

45 Mary tohpih tukin a hungmi Judah mi tampite cu Jesuh ii hitibangin naa a dehnak a muh haw ten Jesuh um haw hi. 46 Mahnaven mi hekkhat ten Farasi tei lakah hawh in Jesuh ii thasiahhuai nalamdang bawl mite cu hilh haw hi. 47 Mahhangin thiampi upate le Farasite cu Khonsilte tuah tawk dun khawm in, “Itin bawl kam nung? Hipai nalamdang a bawl pepel lih te hi zo hem un! 48 Hibanghin a hahthong uh tacun mi hempoh ten amah um haw tuk hi. Mahbek sialngawlin Rom thu neitu pawl ten ngaimawh in a Biakinn pi uh le a ngam buppi uh hi siatsuah haw tuk hi,” tin ti haw hi. 49 Mahkum aa amu sung pen Thiampi Saang, a min Kaiafas a tih hawmi pa'n, “Imah thei ma uh ci.” 50 A miphun le nam uh hi, a pongpi a siat saangin, eimu miphun le nam caa in mi pakhat a thih tuk pha saw hi tih thei ma uh cim?” tin ti hi. 51 Thu ngangai in hi thu hi a mah thinthawh in a sonmi thu hi kha sap ma hi. Hi kum khi ama Thiampi Saang ahihnak bangin Jesuh cu Judah mitei ca in thi tuk hi tih thu a hilhnak khi hi. 52 Amu Judah mitei caa bek hei hi ngawlin Pathian canau a khen khek hempoh munkhat ah khoptuahnak tuk ah hei khin a thihnak khi hi tuk hi tih thu a hilh hamnak khi hi. 53 Mahni pen pan in Judah upa pawl ten Jesuh thihnak tuk thu ngeh vaihawm haw hi. 54 Mahhangin Jesuh khi Judah ngam ah khin langtaak zetin zin leh matoh hi. Mahlai ngam cu zam in phiilneel lawnlai el aa um Efraim tihmi khua ahkhin a nungzuite tuah in um haw hi. 55 Judah tei Kaltan Puai hun nai toh ahih bangin khuatenau lam pen mi tampite cu puai laih ngawlin thianthonak bawl tukin Jerusalem ah hawh haw hi. 56 Jesuh cu zei haw in Biakinn sung aa a khawmnak haw ah pakhat le pakhat, “Itin ngaisung kam? Puainak ah hung bok ni maw?” tin dong dunli haw hi. 57 Thiampi upate le Farasi pawl ten Jesuh umnak a theitu pawpoh in hilh un na, man tuk ung hi,” tin thu than haw hi.

Jesuh Cu Bethani Khua-ah Zimui Leih Haw

12:1 Kaltan Puai nak tuk ni luk i sap ten Jesuh cu Bethani khua Lazaras inn ah hawh hi. Bethani khua cu thihnak pen a thawhkik lehmi Lazaras ii khua hi. 2 Mahlaiah taakeih tuangtiim haw in, Martha in nadeh cu bawm hi. Mahlaitak in Lazaras cu Jesuh ii el ah khung hi. 3 Mary cun aman tambelmi zimui phun pha bel pawl khi cawi in Jesuh i ke noih hi. Mahten a sam tuah in nawt lalaih hi. Zimui ngim cu innsung hempoh nam hi. 4 Jesuh ii nungzuitu lakpen amah a zuaktu tuk pa Judah Iskariot in, 5 “Hi zimui hi zuak ahin tangka zathum laih man tuk hi si. Zuak in mica-ngah, mihaksa te pia ahin pha saw tuk ma maw?” tin ti hi. 6 Hibangin a thu a ngaihsutnak cu mica-ngahte a hehpih hangin hi khama hi. Amah khi nguca pa hi aa, tangka dip puatu hi. Tangkate cu zeelkuh meek hi. 7 Mahnaven Jesuh in, “Bawlhih hen! Ka luangvui ni ten a bawl tuk ca in bawl ta poh hen, 8 Mica-ngahte cu nohtei lakah um leleng haw tuk hi. Kei cu um leleng tuk mang hi,” tin ti hi.

Lazaras Thah Tum Haw

9 Judah mihonpi ten Bethani khua ah Jesuh um hi tih a theih haw ten mahlaiah hawh haw hi. Jesuh a um hang bek hei hi ngawlin thihnak pen a tholehmi Lazaras zo nuam hei hi bok haw hi. 10 Mahhangin Thiampi Saang ten Lazaras vang cu thatcih tukin thu ngaisung haw hi. 11 Itahimtitale Lazaras ii thu hangin amu lampuitu te lehlam nungheek in Jesuh khi a muan saw haw hangin hi.

Sunglawizet In Jerusalem-ah Tum

12 A zingten Kaltan Puai bawl tukin a heng mihonpi ten Jesuh cu Jerusalem khua ah hung tuk hi tih thu za haw hi. 13 Mahhangin tumcehte la in amah muak tuk cun hawh haw hi. “Pathian cu thangphat un hi. Topa min in a hungmi cu Pathian in muicu thupha pia ta hen. Pathian in Israel kumpi pa cu muicu thupha pia ta hen, Hosana tin ngingzet in au haw hi. 14 -15 Lai Thiangtho sungah, “Zion khuapi, na thinsu pahsun hi. Na kumpi pa hungli hi. Laakno hum khungin hungli hi,” tin a tih haw bangkeek khin Jesuh cu laakno hum khung hi. 16 Hi hunlaih khin a nungzuitu ten a i tihnak him tih thei haw ma hi. Mahnaven minthannak tuah a thawhleh nung tekhin, ama thu ah Lai Thiangtho in hibangin hilh in, a bawldaan haw te hei ama caa in bawlsak haw hi tih khi thei pheng haw hi. 17 Jesuh in Lazaras cu khansung pen tul in tin sam in, thihnak pen a thawhlehtiik laihkhin Jesuh ii el aa a um pawl ten hi thu um daante midang tei lakah hilh leh sawlawn pepel haw hi. 18 Nalamdang ngengpite a bawlnak hang in mi tampi ten amah cu na muak haw hi. 19 Mahte cun Farasi mi pawl ten, “Ka tih potoh, i mamah tileh thei ma toh si hung maw! Zo un na, lei buppi in Amah zui zotoh hi!” tin pakhat le pakhat ti dunli haw hi.

Grik Miten Jesuh Zei Haw

20 Puai sungah Pathian bia tukin Jerusalem aa a hawh mihonpi tei lakah Grik mi hekkhat tel kha bok haw hi. 21 (Galilee peng, Bethsaida khua mi) Fillip lakah, “Saya pa, Jesuh mu nuam ung,” tin ti haw hi. 22 Filip cu Andru lakah hawh in hilh hi. Mahten a panih haw cun hawh in Jesuh lakah hilh haw hi. 23 Mahten Jesuh in, “Mihing Capa cu minthannak ngengpi a ngahnak tuk hun heng zotoh hi. 24 Thu ngangai in hilh ing hi. Lei ah cinmi anci cu a muat hih ma ta cun amah cu mukhat bek no leng tuk hi. A thih hih taa bek ten anci a dang tampi piangtiik thei hi. 25 Akua abang a nunnak a it ngangai a hi tacun a nunnak bo tuk hi. Hi leihum aa a nunnak a huatu cun kumkhua nunnak co tuk hi. 26 Akua abang hei hitahen ka na a dek nuamtu cun ka nungzui tuk hi. Itahimtitale kana a dektu cu keimah tuah um kawm thei tuk hi. Keima naa a dektu cu ka Pan upatnak pia tuk hi.

Jesuh In A Thihnak Tuk Thuhilh

27 Jesuh in, “Tu in ka lungmu haksa hi. Itin ti kam nang? Pa aw hi huncaan ka humah hengtiik pahsun hi, ti tung maw? Itahimtitale hi cimnak hun le caan cu a thuak tukmah in ka hunnak cu hi zotoh hi. 28 Maw ka Pa, na minthangtiik in hi,” tin ti hi. Mahten van pen aw nging in, “Minthannak cu pia zo ing hi. Thangtiik nawm tuklaih ing hi,” tin ti hi. 29 Mahlai aa a um mihonpi ten mah aw cu a zaak haw ten, “Vanthum hi,” tin ti haw hi. A hekkhat ten, “Vancungmi in amah otpih hi,” tin ti haw hi. 30 Mahnaven Jesuh in, “Hi aw hin a hilhmi thu cu keima caa hi ngawlin nangmuh tei caa hi. 31 Tucun hi leihum thu a khen hun hi. Tu in hi leihum uktu neh huncaan hi tuk toh hi. 32 Leihum pen taaktoh in ka um ten mi hempoh ka lakah pui khawng tung hi,” tin ti hi. 33 (Hi a tihnak san cu a thih ten itibang thihnak thuak tuk him tih a langtiik nuamnak hi.) 34 Mihonpi ten, “Keimuh tei daan thukham in, ‘Messiah cu kumkhua catngawlin nung leng tuk hi,’ tin hilh hi. Mahahitacun itibangin Mihing Capa cu taaktoh in um tuk hi tin ti thei cim? Mihing Capa tihmi cu a kua him?” tin ti haw hi. 35 Jesuh in, “Nohtei lakah khuavaknak hun demno sung um tuk laih hi. khuavaknak nohtei lakah a um laih hin khuathimnak nohtei humah a hen tuk ngawlnak in mailam ah nawt leleng un hi. 36 Khuavaknak na neih uhlaih hin vaaknak i mi na hih theihnak tuk uh in vaaknak cu na um un hi,” tin don hi, Jesuh cu hi thu a hilh ceng ten amuh tei lak pen tul in ngelh deen hi.

Judah Mi Ten Sang Haw Ma

37 Mahtibangin nalamdang ngengpi tamzet a mitmuh haw hihim in bawlli naven amah cu sang haw ma hi. 38 Hihi cu Kamsang Isaiah ii, “Topa, ka hilh uhmi thu a kua in um him? A koi lakah him, Topai a huham a langtiik?” tin a hilhmi thu a cangkim nak tukin hi. 39 Mahhangin a up theih ngawlnak haw khi na hi hi. Itahimtitale Isaiah leleng cun, 40 “Pathian in a mit haw cawtiik hi, A lungmu haw bingtiik hi, Mahtih a hi ngawl tacun a mit haw in khuamu kha sual haw tuk aa, a lungmu haw in thei kha sual haw tuk hi. 41 Isaiah in hi thu a hilhmi cu Jesuh ii minthan sunloihnak co zotoh amuh hangin ama thu khi hilh hi. 42 Hitibangin hi thu a um vang cun Judahmi upa tampi ten Jesuh cu sang haw hi. Mahnaven Farasi mite hangin langtaakzet in awn ngam haw ma hi. Biakinn pen hawlvawk tuk khi a lau haw hangin hi. 43 Mihing tei mitmai pha muh tuk khi Pathian ii mitmaipha muh tuk saangin deih saw haw hi.

Jesuh Awnkam In Thukhennak

44 Jesuh in ngingzet in, “Kei a umtu cu keimah um hi ngawlin keimah a tiiktu Pa hei khi a umcih hi bok haw hi. 45 Keimah a mutu cu keimah a tiiktu Pa hei mu cih bok haw hi. 46 Akua abang keimah a umtute khuathim sung a um khakhaw ngawlnak tuk, vaaknak in hung zo ing hi. 47 Ka thu za leng napi in a ngaingawl mi cu kei cun thukhen tuk mang hi. Leipi thukhen tukin hung hi kha mang hi. Leipi luan tukin hung hi saw ing hi. 48 Keimah lawlin ka thu a pom nuam ngawltu i thukhentu tuk cu um leng hi. Ka hilhmi thu hi ninungdawlbel ten a thu khentu hi leh tuk hi. 49 Hi thu hi thudik hi. Itahimtitale keima thu in hilh hi mang hi. Keimah tiiktu pai thupiaknak bangin hilh ing hi. 50 Hilh tuk ci tin a tiikmi thu cu kumkhua nunnak piatu hi tih khi thei ing hi. Mahhangin ka hilhmi thu cu ka Pan hilh tuk ci tin a tihmi thu khi hi,” tin ti hi.

Jesuh In Nungzui Tei Kesom

13:1 Tucun Kaltan Puainak tuk nikhat bek in sam toh hi. Leihum zamsan in Pai lakah a hawh lehnak tuk hun heng zotoh tih thei hi. Hi leihum aa a ummi a mihing te khi it leleng hi. Amuhte a dawltawpnak tian in it hi. 2 Jesuh le a nungzuite takeih kuangkil haw hi. Dawingilo in Simon Iskariot ih capa Judah Iskariot ii thinlung sungah Jesuh zuak tuk tihmi thu ngaihsutnak um tiikzo hi. 3 Pan huham cangkim zetin pia zotoh hi tih cu Jesuh in thei cop leng hi. Pathian lak pen hungin, Pathian lakah hawhleh tung hi tihvang cu thei hi. 4 Mahhangin an a eih haw laihtak in cabuai pen dingto in a angki cualpi duk in a koih celhten khutnawtnak puan khi la hi. A puan cu a taai ah het in, 5 Kuang sungah tui sungsuk hi. Mahcelhten a nungzui tei ke cu somsak in khutnawtnak puan tuah in nawt sak hi. 6 Simon Piter el a hen ten Piter cun, “Topa, ka ke somsak tuk cim?” tin ti hi. 7 Jesuh in, “Ka bawlmi cu tu in a sullam thei malai ci. Mahnaven tunung lam ten thei leh tuk poh ci,” tin ti hi. 8 Piter in, “Ka ke cu somsak hihim tuk ma ci,” tin ti hi. Mahten Jesuh in, “Na ke ka somsak ma tacun ka nungzui hikha leh tuk ma ton ci,” tin don hi. 9 Simon Piter in, “Topa, mah ahihtale ka ke bek somsak ngawlin ka kut le ka lu vang somsak in hi,” tin ti hi. 10 Jesuh in, “Ti somsami cu a pumpi hawngin thiang zotoh hi aa, a ke tih ngawl som leh kul ma toh hi. Na venghawng uh in ciang uh ci, pakhat pa bek sial ngawl,” tin ti hi. 11 (Jesuh in, akua in kei zuak tuk him tih a theih hamsa taak cu, “Na venghawng uh in thiangkhawng uh ci pakhat pa sialngawl,” a tih sannak cu na hi hi.) 12 A ke haw a somsak celh ten a angki cualpi cu silh leh in Jesuh cu cabuai ahcun khung leh hi. Mahten, “Tu aa ka bawlsakmi thu um daante hi a sullam thei uh cim?” tin dong hi. 13 “Nohten keimah hi Topa, Saya pa, tin sam uh ci. Hi na sam daan uh cu a hi ngai ka hih hangin maan zuh hi. 14 Kei, na Topa uh le, na Saya pa uh in na ke uh somsak zotoh ing hi. Nohte hei pakhat le pakhat na ke uh na somsak dun tuk uh mi hi. 15 Notei ca in zui tuk le nazoteh tuk uh bawl sak zotoh ing hi. Nohtei ca ka bawlsaknak bangin, nohten na bawlbok tuk uhmi hi. 16 Thudik thumaan thu hilh ing hi. Sila cu a Topa saangin ngengsaw awng ma hi. Tiikmi pa hei a tiiktu pa saangin ngengsaw awng bok ma hi. 17 Tucun hi thudik thumaan thu thei ngah zotoh uh ci. Na bawl ngangai uh bang a hi ahin izahtak lungnop tuk nan ti uh cim?” 18 Nohtei thu sonli hi kha mang hi. Ka tensa mi cu thei ing hi. Mahnaven ka an a eitu cu ka ngaal na cang taa hi tin Lai Thiangtho sung thu a kim tuk sam hi. 19 Hi thu te nohtei lakah a hen laihngawlin tu in hilh ham ing hi. Itahimtitale hi thute a hen ngangai hun ten nohten, ‘Kei cu, Keimah,’ Ka hi lam na muan theih nak tuk uh in hi. 20 Thudik thumaan thu hilh ing hi. Katiik mitei zintunnak tuk kongka a hontu cu keimah kong hontu hi. Keimah zintunnak kong a hontu pawpoh cu, Keimah tiiktu pa kong hon hi,” tin ti hi.

Jesuh In A Zuaknak Haw Tuk Thu Hilhham

21 Hi thu a son celhten Jesuh cu lungsia zetin hi tin hilh ciang hi. “Thu ngangai in hilh ing hi. Nangmu sungpen mihing pakhakhat in keimah zuak tuk uh ci,” tin ti hi. 22 A nungzuitute cu pakhat le pakhat zodun in a kuabel tihsan li nantim tin lamdangsa mahtak haw hi. 23 Jesuh ii ihmi nungzui pakhat cu Jesuh neekbel in na khung hi. 24 Simon Piter in mahpa cu a mit-eh kuh in, “Akua bel him a tihsan dong keek in,” tin ti hi. 25 Mahhangin Jesuh cu a nungzuitu cun neek deuh in, “Akuakaw Topa ?” tin dong hi. 26 Jesuh in, “Kuang sungah cangho nimsuk in ka piakmi pa khi hi tuk hi,” tin don hi. Mahten Jesuh in cangho pakhat cu la in a nip celhten Simon Iskariot capa Juda khi pia hi. 27 Juda cu cangho a laak bekten a sungah Satan cu tumvut hi. Mahten Jesuh in, “Na bawl nuammi cu manlang in bawlvut in hi,” tin ti hi. 28 (Jesuh in hi thu a hilh ten cabuai aa a khungmi pawl ten kuamah in a matlap thei zo haw ma hi.) 29 Juda cu sumkeemtu ahihnak bangin Jesuh in puainak aa a kin canghote lei tukintiik hi beltuk tin nungzuitu a hekkhat ten ummawh haw hi. Mah ahimatale ca-ngah mite pakhat khat pia in hi tin Juda khitiik hibel tuk hi tin ngaisung haw hi. 30 Juda cu cangho a laak celhbek ten manlangzet in pualeu lam ah tul hi. Mahhun cu zan laihtak hi.

Thukham Thak

31 Judah ii pualam a tul nungbek ten Jesuh in, “Tucun Mihing Capa cu minthannak piak in um zotoh ing hi. Tuin keimah hangin Pathian cu thangphatnak co zotoh hi. 32 Pathian in keima hangin minthannak co a hi tacun Pathian hei in Mihing Capa cu minthannak piabok tuk aa mahmi cu ngeingawl no in bawl tuk hi. 33 Ka cate aw nohtei lakah ngeipi um lehtuk matoh ing hi. Nohten kei cu zeili tuk uhci. Mahhnaven Judah tei lakah ka hilhsa bangin nohte hilh ing hi, “Keima hawhnak munah nohte hawh kha thei tuk ma uh ci,” tin ti hi. 34 thukham Thak nohte pia ing hi. Pakhat le pakhat na itdun ta un hi. Keiman nangmuhte ka ih bangbok in nohte pakhat le pakhat na it dun bok ta un. 35 Pakhat le pakhat na itdun uh tacun mi hempoh ten nohte cu keima nungzui na hihlam thei haw tuk hi,” tin don hi.

Piter In Phaden Leh Tuk Thuhilh Hamnak

36 Simon Piter in, “Topa, ilai ah hawh tuk cim?” tin dong hi. Jesuh in, “Ka hawhnak tuk mun ah tucun zui thei tuk ma laih ci. Mahnaven tunung deuh ten zui leh tuk ci,” tin don hi. 37 Piter in, “Topa, tu in ita zui thei tuk ngawl hing ngim?” Nangma ca a thi tukin a ngaalling saa in um ing hi,” tin ti hi. 38 Jesuh in, “Kei ca in thih cu ngam ngai a ni cim? Thudik thumaan thu hilh ing hi. Ak khuang laihngawlin veithum tian hipa thei kha mang tin phaden tuk lai ci,” tin don hi.

Jesuh Cu Pai Lak Hen Theihnak Lampi Hi

14:1 Jesuh in, “Thinkham in ngaihsut haksa ta pahsun un hi. Pathian um un na keima hei um bok un hi. 2 Ka pai inn sungah umnak tampi um hi. Mahlaiah nangmu umnak tuk mun bawl ham tukin hawh tung hi. Hi thu hi thudik thumaan a hi ma tacun nohtei lakah hilh tuk mang hi. 3 Hawhtung aa nohtei umnak tuk mun ka bawl celh ten hungkik leh tung hi. Nohte cu keima lakah pui tung aa ka umnak ah nohte vang umbok tuk uh ci. 4 Ka hawhnak tuk mun hen theihnak tuk lampi cu thei leng poh uh ci,” tin hilh hi. 5 Thomas in, “Topa, ilai keek ah him na hawh tuk tih thei ma si ung. Itibangin mahlai mun hawhnak lampi thei tuk ung him?” tin ti hi. 6 Jesuh in, “Kei cu lampi le thutak le nunnak ing hi. Keimah tawn ngawlin kuamah ka Pai lakah heng thei haw tuk ma hi. 7 Tucun nohten keimah thei ngah zotoh na hih uh taak ka Pa hei thei bok tuk uh ci. Tu penpan in nohten amah cu thei zotoh hi uh ci. Amu hei mu zotoh uh ci,” tin ti hi. 8 Mahten Filip in, “Topa, na Pa cu keimuhte lak in hi,” tin ti hi. 9 Jesuh in, “Nohtei lakah ngeipi um zotoh hi sing. Mahnaven nangin keimah hi thei malaih cim? Filip? Keimah a mutu pawpoh cu ka Pa mu bok haw hi. Mahhangin ita na Pa lak hem in tin ti thei cim? 10 Kei cu ka Pai sungah um ing aa, ka Pa hei cu keima sungah umbok hi tih khi um ma cim maw ai him Filip? Nohte ka hilhmi thu te cu keima sung pen a tulmi hi kha ma hi, ka sung aa ummi ka Pai nadehnak hi. 11 Kei cu ka pai sungah um ing aa, ka Pa hei keima sungah umbok hi. Hithu hi na um poh un hi. Hi thu ke keek na um thei uh ngawl hei in ka nadehnak lamdang te na muh uh beekten um un hi. 12 Thudik thumaan hilh ing hi. Kei a umtu pawpoh cun ka bawl bangbokin bawlbok haw tuk hi. Hi saangin a ngeng saw deuh hei in bawl thei tuk hi. Itahimtiahin ka Pai lakah ka hawh tuk hangin hi. 13 Pa i minthannak cu Capa ii hule thawm tuah a lang theihnak tukin keima min in na nget uhmi hempoh cu bawlsak tung hi. 14 I hempoh keima min in na ngen uh tacun pia tung hi,” tin ti hi.

Hawvang Thiangtho Piatuk Tiam

15 Jesuh in, “Keimah na it uh tacun ka thukham pawl te zui tuk uh ci. 16 Ka pai lakah ngen tung aa bawmtu dang thudik Hawvang Thiangtho nohte pia tuk hi. Amah cu nohtei lakah kumkhua in um tuk hi. 17 Amah cu Hawvang hi ama Pathian thudik lang tiiktu hi. Leihumpi in amah pom thei ma hi. Itahimtitale a theih haw ngawl hangin le a muh bat haw ngawl hangin hi. Mahnaven nohten amah khi thei uh ci. Itahimtitale nangmu lakah um cih leng aa na sunguh ah amah a nun hang hi. 18 Nangmuh nguakcang zamthong tuk mang hi. Nohtei lakah hung leh tuk laih ing hi. 19 Imah can um ngawlin leihumpi hin kei cu muleh tukma toh hi. Mahnaven nohten kei cu mutuk uh ci. Mahbek sial ngawlin keimah ka nun bangbokin nohte hei nungbok tuk hi uh ci. 20 Mahmi ni le hun a henten kei cu ka pai sungah ka um lam thei tuk uh ci. Nangmuh hei keima sungah na um lam uh le nangmu sungah kei ka um lam thei bok tuk hi uh ci. 21 Ka thukham pom in a zuitu cu keimah ittu hi, Ama lakah keimah le keimah lang tung hi. 22 (Juda Iskariot kha ngawl) a dang Judah khin, “Topa, leihumpi ah langcop ngawlin ita keimu lak bek ah langcop tuk cim?” tin dong hi. 23 Mahten Jesuh in, “Kei a ittu pawpoh cun ka thu khi ngai tuk hi. Amah cu ka Pa in it bok tuk aa keimah le ka Pa cu hungin ama lakah um tuk ung hi. 24 Kei a it ngawltu pawpoh cun ka thu khi ngai tuk ma hi. Ka hilhmi thu na theihlih uh te khi keima thu hi kha ma hi. Keimah a tiiktu ka Pai thu hi. 25 Hi thu te hempoh nohtei lakah ka umlaih in hilh ing hi. 26 Mahnaven Ka Pan keima min in atiik tukmi Bawmtu, Hawvang Thiangtho in nohte cu i hempoh hilh tuk hi. Nangmuh ka hilhmi thu te hempoh ciinglengtiik tuk hi. 27 Lungmuannak nohte zam ing hi. Keima lungmuannak tatak khi pia ing hi. Leihum mitei piakmi bangin pia hikha mang hi. Lungmu haksa le lungbing in na um ta pahsuh un hi. Thinsuli hei in na um ta pahsuh un hi. 28 “Hawh hih tung hi. Mahnaven nohtei lakah hungleh tung hi,” tin ka hilhmi thu thei zotoh uh ci. Keimah na it ngangai uh a hi tacun ka Pai lakah ka hawh tuk hi lungdamzet tuk uh ci. Itahimtitale amah cu keimah saangin ngengsaw hi. 29 Ka hilhsa bangin a pian ngangai ten na up theihnak tuk uh in a pian laih ngawl in nohtei lakah hilh ing hi. 30 Hi leihumpi uktu pa hungli toh ahih hangin thu saupi sonpih man leh ma toh ing hi. Keima humah i mah thu neihnak nei ma hi. 31 Mahnaven leihumpi hin ka Pa ka ihlam thu a theihtheihnak tukin ka Pai tiiknak bangin i hempoh bawl khawng ing hi. Ding un, Hawh nung,” tin ti hi. 1416 Johan 15

Jesuh Cu Cabit Ngui Ngangai

15:1 Jesuh in, “Kei cu cabit nguipi ing hi. Cabit huan neitu cu ka Pa hi. 2 Ngah a ngah ngawl a kung hempohte cu tan khawng in ngah a ngahmi a kungte cu tam seseem in a ngahnak tuk thiang siuhseuh no in bawl hi. 3 Nohte cu ka hilhmi thu hangin thiangkhawng zotoh hi uh ci. 4 Keimah tuah in pehzom leleng unna keimah hei nangmuh tuah pehdun leleng tung hi. Cabit kung cu amah no in ngah cawm thei ma hi. Cabit nguipi ah a pehzom bek ten ngah thei hi. Mahbangbok in nohte hei keima sungah na um uh ngawl tacun ngah thei tuk ma uh ci. 5 Cabit nguipi cu keimah ing hi. Nohte cu a kangkaak te hi uh ci. Akua a bang keima sungah um in kei hei a sungah ka um bok tacun ngah tampi ngah thei tuk hi. Itahimtitale keimah tel ngawlin na na bawl theih uhmi imah umma hi. 6 Keima sungah a um ngawlmi cu cabit kung vawk in a komi bang haw hi. Mahtibang a kangko vawk pawlte cawmkhawm in meipual ah vawk haw in kaangtum khawng haw hi. 7 Keima sungah um in ka thu cu nohtei sungah a kholeng tale na deih uhmi na ngetuh hempoh ngah tuk uh ci. 8 Nohten ngah tampi na ngahnak uh ii hule thawm hangin ka Pai sunloihnak khi langtiik hi uh ci. Hitibangcun ka nungzui na hihnak uh langtiik hi. 9 Ka Pan keimah a ih bangkeek bokin nohte it bok ing hi. Ka ihnak sungah um leleng un hi. 10 Ka Pai thukhamte khi, zui in ama itnak sungah ka um bangbok khin ka thukhamte na ngai uh a hitale ka itnak sungah in umbok tuk uh ci. 11 Ka lungdamnak nohtei sungah um in, nohtei lungdamnak a cangkim theihnak tukin hi thu cu nohtei lakah hilh ing hi. 12 Kei thukham cu hi tih hin hi. Keiman nohte ka ihbangbok hin nohte pakhat le pakhat na it dun ta un hi. 13 Mi pakhat in a ngualcam tei ca a ihnak ngengbel a langtiik theihnak zawn cu, amuhtei ca a nunnak piakngamnak zawn khi hi. 14 Ka ngualcamte na hi uh tacun ka tiikmi naa te dek tuk uh ci. 15 Nohte cu silate tin samleh tuk matoh ing. Itahimtitale sila te a Bawipa tei bawlmi imah thei kha awng haw ma hi. Mahnaven ka Pai lak pen ka theihmi thu hempoh nohte ka hilh hangin nohte cu ngualcamte, tin sam ing hi. 16 Nohten keimah teng kha ma uh ci. Keiman nangmuhte teng hisaw ing hi. Mahhangin ka min in na nget uhmi hempoh pa'n pia tuk hi. 17 Mahhangin ka thukham piakmi cu hitih hin hi. Pakhat le pakhat itdun un tih khi hi.

Leihum In Hua Tuk

18 Lei humpi hin nangmuh te a hua tale keimah hua masa hi tih thu phawkngil ta pahsuh un hi. 19 Leipi ita, a hi uhta bang ahhin hi leipi in nohte cu itbok tuk ta naven. Mahnaven nohte cu hi leihum pen teng zotoh ing hi. Amata na hih leh un ngawl toh hangin hua hi. 20 ‘Sila cu a bawipa saangin ngengsaw awng ma hi,’ tih thu ka hilhmi khi cing leleng ta un hi. Keimah bawlsia haw a hitale nohte hei bawlsia bok haw tuk hi. Ka thu zilhmi a ngai haw a hitale nangmu zilhmi vang cu ngaibok haw tuk hi. 21 Mahnaven hi thute hempoh cu keima mihing na hih uh hangin nohtei humah bawl haw tuk hi. Itahimtitale keimah a tiiktu Pa khi a theih haw ngawl hang hi. 22 Amuhtei lakah hawh in thu ka hilh ngawl ta a hin a hum haw ah sualnak um tuk ma hi. Mahnaven tucun a sualnak haw seelcip leh theih ma toh hi. 23 Keimah a huatu pawpoh cun ka Pa khi huabok haw hi. 24 Kua mamah i bawl awng ngawl ka bawl mite bawl ngawlin ka umta ahin amuh tei humah sualnak um tuk ma hi. Mahnaven tu tiatian ahcun ka bawlmi khi mu leng haw naven ka Pa le Keimah hua haw hi. 25 Mahnaven hi thu cu hitih hin a hi tuk himpo hi. Itahimtitale amu thukham sung aa, ‘I mah thei ngawlin kei hua haw hi,’ tin a ngatmi thu a cangkim nak tukin hi. 26 Ka Pai lak pen Bawmtu thutak Hawvang heng tuk aa amah cu Pathian ii thutak lang tiiktu hi tuk hi. Ka Pai lak pentiik tung aa keima cungca ng hilh tuk hi. 27 Mahten nohte hei in keima lakah a pattung in thei zo toh na hih uh hangin ka thu cu hilh tuk uh ci.

16:1 Na bah kha sual tuk uh ngawlnak in hithu nohte hilh ing hi. 2 A Pumkhawmnak haw inn pen nangmuh hawlvawk haw tuk hi. Mahbek sialngawl in nangmuh te a thah haw tuk khi Pathian nadeh pakhat heng hi tin a ngaihsut hun haw heng tuk hi. 3 Ka Pa heihihen keimah heihihen a theih haw ngawl hangin hitih bangcun nohtei humah bawl haw tuk hi. 4 Hitibang in nohtei humah a bawl haw hun a henten hi thu te hi a hilh hamsami khi hi, tin na ciin leleng theihnak tuk uh in hilh ing hi,” tin ti hi.

Hawvang Thiangtho Nadeh

“Keimah nohtei lakah ka umleng hangin hi thu hi a tuunglaih in hilh mang hi.5 Mahnaven tucun keimah a tiiktu Pai lakah hawh tuk toh ing hi. Mahnaven kuamah in ‘ilai hawh tuk cim?’ tin a dongtu um malaih uh ci. 6 Tu in ka hilh zotoh hangin na lungmu sunguh ah a thasiatnak tuah in dim uh ci. 7 Mahnaven thudik thumaan hilh ing hi. Ka hawh hi nohtei ca in pha saw hi. Itahimtitale ka hawh ma a hin Bawmtu thutak Hawvang nohtei lakah hung tuk ma hi. Ka hawh a hi tacun amah cu nohtei lakah hah tung hi. 8 Amah a hunten, leihum mitei lakah sualnak thu ah ngaihsut a khialdaan haw, thumaan thu ah ngaihsut a khial daan haw le Pathian thukhennak thu a ngaihsut khial daan haw te khi thei ciangtiik tuk hi. 9 Keimah a muan haw ngawl hangin sualnak thu ah khial haw hi. 10 Dikcangnak humah a ngaihsut khial daan haw hilh ciang tung hi. Itahimtitale kei cu ka Pai lakah hawh tung aa na muh leh tuk uh ngawl toh hangin hi. 11 Mahten thukhennak thu ii humah a ngaihsut daan haw khial hi. Itahimtitale leihum uktu bawi cu thukhensa zotoh hangin hi. 12 Thu hilh tuk tampi neilaih ing hi. Mahnaven tu ong cun ciing khawng zo tuk ma uh ci. 13 Mahnaven Hawvang Thiangtho a hen ten Pathian ii thumaan lang tiiktu ahih hangin thutak hempoh sungah lam huai tuk hi. Ama thuthu in imah awn tuk ma hi. Mahnaven a zaakmi khi hilh tuk aa a heng tuk laihmi thu vang khi hilh tuk hi. 14 Aman sunloihnak pia tuk hi. Itahimtitale keima cungca ng ka hilhsami thu khi la in nangmu lakah hilh tuk hi. 15 Ka Pai neihmi hempoh te cu keima taa hi. Mahhangin Hawvang Thiangtho in ka piakmi cu la in nangmu lakah hilh tuk hi, tin ka tihnakcu na hi hi.”

Bawlsiatnak Le Lungdamnak

16 “Imah can um ngawlin kei cu mutuk ma toh uh ci. Mahten imah can um ngawlin keimah mu leh tuk uh ci. Itahimtitale kei cu Pai lakah hawh tung hi,” tin Jesuh in ti hi. 17 A nungzui hekkhat pawlten, “Hi thu hi a i matlap nantim? Imah can um ngawlin keimah mu leh tuk matoh uh ci, mahnung imah can um ngawlin keimah mu tuk uh ci tin a tih hi. Mahten, ‘Pai lakah ka hawh tuk hangin,’ tin ti lalaih si. 18 ‘Ngei can um ngawlin,’ tih hi a i a tih nuamnak nantim? A tih nuam san thei hihim ma si hung mei,” tin pakhat le pakhat ti dunli haw hi. 19 Jesuh in amah thudong nuam haw tih a theih ten, “‘Imah can um ngawlin kei cu mu leh tuk matoh uh ci. Mahnung imah can um ngawlin keimah mu tuk uh ci,’ ka tihmi thu khi maw nangmuh lala na son ham lih uh? 20 Thu ngangai hilh ing hi. Nohte cu kap in auli tuk hi uh ci. Mahnaven leipi cu a lungdam tuk hi; na tha uh sia in khawngai tuk uh ci. Mahnaven na khawngaihnak uh hempoh cu lungdamnak in suak tuk hi. 21 Numei pakhat cu nau a neih tuk ten haksat a thuaknak hun heng ahihnak bangin a thasia hi. Mahnaven nauno a hin ten nauthak pakhat leihum ah a piannak hangin a lungdam in a natnak hempohte phawkngil hi. 22 Mahbangbokin nohte hei hi bok tuk uh ci. Tu in na tha uh sia hi. Mahnaven nohte mu leh tuklaih ing aa, na thinsung uh lungdamnak tuah in dim tuk hi. Mahmi lungdamnak cu kua mamah i lonsak thei ngawl tohmi lungdamnak hi tuk hi. 23 Mahmi ni a henten kei cu imamah dong leh tuk ma toh hi uh ci. Thu ngangai in hilh ing hi. Ka pan keima min tuah na nget uhmi hempoh nohte pia tukhi. 24 Tuni tian in ka min suangin na nget uh i mamah um ma laih hi. Ngen un na, ngah tuk hi uh ci. Mahtecun na lungdamnak uh cangkim tuk hi.

Leihum Neh Zo Ing

25 Tuni tian in santehnak taangthu nawno tuah ngeh in hilh ing hi. Mahnaven ka Pai thu cu santehnak tel ngawl ciangzet in ka son hun heng tuk hi. 26 Mah hun a hen ten ama lakah ka min in ngen tuk uh ci, keiman ngetsak tung tin ti mang hi. 27 Itahimtitale ka Pa amah hihim in nohte it hi. Nohten keimah it in keimah hi Pathian lak pen hungmi hi tih na san uh hangin nohte it hi. 28 Ka Pai lak pen a hungmi taktak ing aa, leihum ah hin hung ing hi. Tu cun hi leihum pen tul in ka Pai lakah hawh tung hi,” tin ti hi. 29 A nungzui ten, “Tucun santehnak tel ngawlin ciangzet no in hilh ci. 30 Nangman i hempoh thei khawng ci, kuamah ii dotlih na kul ngawl lam tu in thei ciang ung hi. Hi thu hin nangmah cu Pathian lak pen a hungmi pa na hihzia um khotiik hi,” tin ti haw hi. 31 Jesuh in, “Tu hin keimah sang toh uhcim? 32 Ngai un hi. Na venghawng un taaikeh khawng in nangmu inn tek ah zuan tuk uh ci, keimah nguakcang na zam hun uh heng tuk hi. Mah hun cu tuin heng zo hi. Mahnaven Pa cu keima lakah a um hangin keimah nguakcang ngangai cu hi mang hi. 33 Nohte keimah tuah na pehzopnak uh ii hule thawm hangin lungmuannak na ngah theihnak tuk uh in hi thu hi nohte hilh ing hi. Leihum hin nohte cu haksatnak pia tuk hi. Mahnaven lau tapahsuh un hi. Leipi cu neh zotoh ing hi,” tin ti hi.

Jesuh In A Nungzui Tei Caa Thungen

17:1 Jesuh in hi thu a hilh cengten vandaak in, “Ka Pa, a hun heng zo hi. Capa in nangmah a sunloihnak le huham a piak theihnak tukin na Capa ii lakah sunloihnak pia toh in hi. 2 Capa ii lakah na piakmi mihing hempoh tei lakah kumkhua nunnak a piaktheihnak tukin leihum minam hempoh tei humah thuneihnak pia zotoh ci. 3 Mahmi kumkhua nunnak tihmi cu Pathian taktak nangmah theih le na hahmi Jesuh Khrih theih hi hi. 4 Na deh na piakmi dekkhawng zotoh ing aa, na sunloihnak cu leihum ah langtiik zotoh ing hi. 5 Maw ka Pa, leipi bawl laihngawl khin nangmah tuah ka neimi sunloihnak khi tun na mitmuh in pia in hi. 6 Leihum pen na samsuak mitei lakah na min cu langtiik zotoh ing hi. Mah mite cu nangma taa hi haw in, keima lakah na piak mite hi haw hi. Na thu zui haw hi. 7 Tucun i hempoh nangma lak pen keimah na piakmi hi tin thei haw hi. 8 Na piakmi na thu khi hilh ing a ma, a muhten pom zo haw toh hi. Nangma lak pen a hungmi ing hi tih thumaan hei cu thei haw in na hahmi tih hei khi sang haw hi. 9 Amuhtei caa in thungen ing hi. Leihum ii caa in ngen mang hi. Mahnaven na piak mitei caa in ngen ing hi. Itahimtitale nangma ta hi haw hi. 10 Ka neihmi hempoh te hi nangma taa hi, nangma neihmi hempoh hei cu keima taa bok hi. Mahten amu sung pen ka sunloihnak lang hi. 11 Tuin na lakah hung tung hi. Kei cu leihum ah um leh tuk matoh ing, mahnaven amuhte cu leihum ah um haw tuklaih hi. A thiangmi ka Pa, nangmah le keimah pakhat ahih uh bangin leihum ah a umlaih mite cu pakhat ahih theih hawnak tukin na piakmi na min i huham in humhim in hi. 12 Amuhtei lakah ka umlaih in nangma piakmi na min i huham in hup ing hi. Lai Thiangtho sung aa a ummi a kimnak tukin a thamthong tukmi pakhat sialngawl mi pakhat hei thamthong haw ma hi, humhim khawng ing hi. 13 Atucun nangma lakah hung tuk toh ing hi; leihum ah hi thu te ka hilhnak cu ka lungdamnak a mu lungmu sungah cangkim zet in a neih theihhawnak tukin hi. 14 Keimah cu hi leihum ita ka hih ngawl bangbokin, amuhte vang hi leihum ita hibok haw ma hi, mahhangin nathu cu amuhtei lakah ka hilh ten leihum in a huatnak cu na hi hi. 15 Amuhte khi leihum pen latul in tin ngen kha mang hi, mahnaven mipha ngawlmi pai lak pen hup in hi tin ngen ing hi. 16 Keimah hi leihum iita ka hih ngawl bangin, amuhvang leihum iita hibok haw ma hi. 17 Amuhte khi na lakah na thutak in thiangtiik in; na awnkam cu thutak hi. 18 Keimah hi leihum ah na hahsuk bangin amuh tevang hahbok ing hi. 19 Amuhte vang thutak in thiangtiik ahih theihnak haw tukin keimah vang thiangtiik cop zo ing hi. 20 Amuhtei caa bekin thungen hi kha mang hi; a thu hilh hawmi thei in keimah a um tuklaih tei ca tian in thungen ing hi. 21 A venghawng haw in pakhat ahih theihhawnak tukin ngen ing hi. Ka Pa, nangmah cu keima sungah um ci, keivang nangma sungah ka um bangbokin amuh vang cu eimu sungah umbok haw hen. Nangman kei na hahmi hi leihum in a san theihhawnak tukin amuhte pumkhat in cang zaal haw hen. 22 Nangmah le keimah cu pakhat ahih uh bangin amuh tevang pakhat a can theihboknak haw tukin nangma piakmi sunloihnak khi amuhvang pia bok ing hi. 23 Amuhte cu pakhat tatak hi haw in mahtihcun leihum in nangma hahmi ing tih a theihnak tukin le keimah na ih bangin amuh vang na ihlam a theihtheihnak haw tukin kei cu amu sungah um in, nangcu keima sungah um ci. 24 Ka Pa, nangma piakmi ka sunloihnak hi amuh theih hawnak tukin nangman a muhte cu ka khut sungah pia zo ci. Amuhte cu keima umnak pawpoh ah umbok haw tukin deih ing hi; itahimtitale leipi a pian laihngawl in it zotoh ci. 25 A maanmi ka Pa, nangcu leihum ten thei haw ma hi, mahnaven kei cun thei ing aa, amuhten nangmah hahmi hi tih thei haw hi. 26 Amu lakah na min cu than zotoh ing aa, ka humah itnak na neihmi hi amu sungah a um boknaktukin le keimah vang amu sungah ka umboknak tukin na min cu amu lakah than pepel tuklaih ing hi, tin thu ngen hi.

Jesuh A Matnak Haw

18:1 Mahtin Jesuh in thu a nget celh ten nungzuitute tuah cun tul in Kidron a tihhawmi lui ngaal ah haw haw hi. Mahlaiah huan pakhat um in Jesuh le a nungzuitute cu mah huan sungah tum haw hi. 2 Mahlai mun cu Jesuh le a nungzuitute a tawhdunmeknak haw ahih taak, a zuaktu Juda cun ilai ah um haw him tih khi thei hi. 3 Mahangin mahlai mun aa huan ahcun Juda cu Rom ngaalkap hon khat le Thiampi upa le Farasi mitei tiikmi Biakinn cingtu palikte tuah hawh haw hi; hiamnam te keng in mei inn le meilah te de in hawh haw hi. 4 Jesuh in a humah i thute piang tuk him tih a theihkhawng hangin mailam ahcun tuul in, “Akua kaw na zei uh?” tin dong hi. 5 Amuhten “Nazareth mi Jesuh e,” tin ti haw hi. Jesuh in, “Keimah toh ing hi,” tin ti hi. A zuaktu Juda cu a el ahcun ding hi. 6 Jesuh in, “Keimah toh ing hi.” a tihmi a theih haw ten nunglam ah hek in lei ah lum haw hi. 7 Jesuh cun, “A kuakaw na zei uh.” tin dong lehleu hi. Amuhten Nazareth mi Jesuh e,” tin ti leleu haw hi. 8 Jesuh in, “Keimah ing hi tin hilh zo sing, keimah na zei uh ahitale midangte beek hi cu hah un in hi,” tin ti hi. 9 (Hi tin a tihnak cu, “Ka Pa, ka khut sung aa na piakmi cu Pa khat no hei ka paihtiik um ma hi.” a tihmi kim tiiknak tuk in hi.) 10 Simon Piter cun ngaalnaam a kenmi cu dawk in Thiampi Saang pai umlawh pa i taklam beng saatvawk hi. Mah umlawh pai min cu Malkha hi. 11 Jesuh in Piter ii lakah, “Na ngaalnaam cu a kawng sungah thiat leh in hi; ka Pai piakmi khuat cu a in tuk ngawlin maw na ngaihsut?” tin ti hi.

Annas Mai-ah Jesuh Hawhpih Haw

12 Mahten Rom ngaalkap te cun a hotu ngaalbawi le Judahmi palikte tuah cun Jesuh cu man haw in; a keen ceng haw ten masabel 13 in Annas lakah hawhpih haw hi. Annas cu mahkum in Thiampi Saang dek hi, Kaiafas ii nupi ii pa hi. 14 Kaiafas cu mi zapi ai in mi pakhat i thih pha saw hi tin Judah huaitu tei lak aa ngaihsutnak piatu pa khi hi.

Piter In Jesuh Phadeen

15 Simon Piter le a dang nungzui pakhat in Jesuh khi zui haw hi. Mah nungzuitu cu Thiampi Saang tuah thei dun zetmi ahih taak Jesuh cu zui in Thiampi Saang ii inn tual ahcun hawh hi. 16 Mahnaven Piter cu kongka el pualam ah khin um hi. Mahten mah nungzui pa cu kikleh in kongka cingtu numei nu otpih in, Piter cu tumpih hi. 17 Kongka cingtu numeinu cun, “Nang hi a zuitu lakah telbok ci mei?” tin Piter cu ti hi. Piter in, “Hi kha mang,” tin ti hi. 18 Khuasik hangin umlawh te le cingtu palik ten meihol tuah meilam in a ding in mei awi haw hi. Piter vang cu amu lakah hawh in mei awi bok hi.

Thiampi Saang In Jesuh Thudong

19 Thiampi Saang cun Jesuh cu a nungzuitu tei thu le a zilhmi thu te cu dong het hi. 20 Jesuh in, “Langtaakzet in mipi tei maiah thu hilh leleng sing. Mitampi tei Pumkhawmnak ah le Biakinnpi ah thu zilh leleng sing. A kuh in imah thu hilh awng ma sing. 21 Mahtihbang hi napi in ita kaw thu na dotlih cu? Ka thu sonmi a zatu te khi dongsaw vele, ka thu hilhmi thei khawng leng haw si,” tin ti hi. 22 Mahtihbang cun a tih ten mahlai aa a um palik pakhat cun Jesuh cu beeng in, “Thiampi Saang lak ngan ah itin kaw mah tin na ot ngam!” tin ti hi. 23 Jesuh in, “Ka ot sualmi a um ahitale mah ka ot sualmi cu hilai aa a um mi hempoh tei lakah hilh in hi! Mahnaven ka otmi a maan leng napi in ita kei beeng thei cim?” tin don hi. 24 Mahtihcun Annas cun a keennak duuk cuang ngawlin Jesuh cu Thiampi Saang Kaiafas lak ah hawhtiik hi.

Piter In Jesuh Phadeen Lehleu

25 Piter cu mahlaiah meiawi in dingleng laih hi. Mahlaih tak cun midang ten, “Nangvang hi a nungzui tei lakah pakhat bok sisi maw?” tin ti haw hi. Piter cun, “Hi kha mang,” tin phadeen hi. 26 Thiampi Saang ii umlawh tei lak pen pakhat, Piter ii a beng a sahvawk pai unaupih pan, “Hipa hi Jesuh tuah hin huan sungah mu sing maw?” tin dong hi. 27 Mahnaven Piter cun, “Kei kha mang hi,” tin phadeen lehleu hi. Mahbekten ak khuang hi.

Pilat Lakah Jesuh Hawhpih Haw

28 Zingtuung no in Jesuh cu Kaiafas inn pen mangki bawipai inn ah hawhpih haw hi. Judah mi hotu te cu a mu daansa bangin thiangthozet in Kaltan Puai an a eih nuam haw hangin mangki bawipai inn sung ahcun tum haw ma hi. 29 Mahhangin Pilat bawipa cu tuul in amuhtei lakah, “Hipa hi a i sualnak kaw a neih?” tin dong hi. 30 Amuhten, “Sualnak a nei ngawl ahin nangma lakah hen tuk ma ung hi,” tin don haw hi. 31 Pilat cun amu lakah, “Mahtibangahitale nangmun pui unna nangmu daan bangin a thu na khen un hi,” tin ti hi. Mahten amuh ten, “Kohte cun mithah theihnak thu nei ma ung hi,” tin don haw hi. 32 (Jesuh in itibang thihnak nantim ka thuak tuk tin a sonsami awnkam a kimnak tuk hitihbangin a piannak cu na hi hi.) 33 Pilat cu a inn sungah tumleh in Jesuh cu sam hi, “Judah kumpi pa cim?” tin dong hi. 34 Jesuh in, “Hi thu na dotmi hi nangma thinthawh in maw, midang ten keima thu a hilh hangin kaw?” tin dong hi. 35 Pilat in, “Keima hi Judah mi hi tin maw na ngaihsut? Keima lakah a hentu hi na miphun le thiampi upate pah cuh! Na bawlmi thil cu a i kaw?” tin dong hi. 36 Jesuh in, “Kei ka uknak ngam cu hi leihum ahhin hi ma hi, hi leihum ah bang a hi ahin Judah mi hotu tei khutsung ah heng tuk ngawlin ka nungzuitu ten do haw tuk hi. Kei uknak ngam cu hi leihum ahhin hi ma hi,” tin ti hi. 37 Mahten Pilat cun, “Kumpi hi ngai a cim maw?” tin dong hi. Jesuh in, “Nang cun Kumpi pa ci tin ti ci. Leihum ah ka hensan le ka hunsannak cu thu pakhatbek hi. Mahmi cu thutak lamah tetti khan tukin hi. Thutak sung aa a ummi hempohte cun ka thu hilhmi ngai haw hi,” tin ti hi. 38 Mahten Pilat cun, “Thutak cu a i kaw?” tin dong hi. Mahten Pilat cu mipi tei lak ah tuul leh in amuh tei lak ahcun, “A humah thah tuk taak in a sualnak mu mang hi. 39 Mahnaven daan na neihmi uh bangin, Kaltan Puai ten thawngta pakhakhat hahsak mek ing hi. Judah Kumpi pa hi ka hahsak ahin awi uh cim,” tin dong hi.

Jesuh Thah Tukin Thu Khen

40 Amuhten, “Amah hah tukin awi ma ung Barabbas hah in hi,” tin au tawtok haw hi. (Barabbas cu nguca hi.)

19:1 Mahten Pilat in Jesuh cu kai tul in ngaalkapte vattiik hi. 2 Ngaalkap ten lingkung tuah phanmi lukhu khutiik in, puansan silhtiik haw hi. 3 A lakah hawh in, “Judah Kumpi pa hi a nun khua sau ta hen,” tin ti in beeng haw hi. 4 Pilat cu tuul leh in mipi tei lakah, “Ngai hem un! A humah thah tuk taakin sualnak mu mang hi, tih lang tiiknak in nangmu lakah hunpih tung hi,” tin ti hi. 5 Mahtihcun ling lukhu khu in le puansan silh in Jesuh cu tul hi. Pilat cun amuh tei lakah, “Zo hem un! Hilaihah na mihing pa uh cu um hi!” tin ti hi. 6 Thiampi upate le Biakinn cingtu palik pawlten amuh haw ten, “Thinglamteh ah that in hi! Thinglamteh ah that in hi,” tin au haw hi. Pilat cun amu lakah, “Nangmun pui unna thinglamteh ah that ta un! Kei cun a humah thihnak tham tianin a sualnak mu mang hi,” tin ti hi. 7 Mipite cun, “Daan nei ung hi. Mahmi daanbangin a thih kuul hi. Itahimtitale Pathian Capa ing hi tin ti hi,” tin don haw hi. 8 Mahmi cu Pilat in a theih ten lau deuh hi. 9 A inn sungah tum lehleu in Jesuh cu, “Ilai pen hung kam?” tin dong hi. Mahnaven Jesuh cun don ma hi. 10 Pilat cun, “Don tuk ma cim? Nangmah hah theihnak le thah theihnak thu ka neihlam hi thei ma cim?” tin ti hi. 11 Jesuh cun, “Ka hum aa thu na neih theihnak hi Pathian in a piak hangin hi. Mahhangin nang saangin nangma khut ah a heng tiiktu khi sual saw hi,” tin ti hi. 12 Mahmi cu Pilat in a theih ten Jesuh ii luat theihnak tuk lampi khi zei hi. Mahnaven mipite cun, “Hi pa na hah a hitale Rom kumpi pa Sizar ngualcam hi ma ci. A kuakua heihihen kumpi ing a ti dun coptu cu Rom kumpi pai ngaal hi,” tin au tawtok haw hi. 13 Mahmi awnkam cu Pilat in a theih ten Jesuh cu pualam ah tuulpih in, “Suangphah inntual,” tihmi thukhentu ii khunnak ah khung hi. (Mahlai mun cu Hebru awn in “Gabbatha” ti haw.) 14 Kaltan Puainak tuk nikhat sap mah a sun hawng ten Pilat cun mipite cu, “Na kumpi pa uh hi maw thinglamteh hum ah ka thah tuk?” tin dong hi. 15 Amuhten, “That in! That in! Thinglamteh humah that in hi,” tin au tawtok haw hi. Pilat cun, “Na kumpi pa uh hi maw thinglamteh humah ka thah tuk?” tin dong lehleu hi. Thiampi upa pawlten, “Kohtei kumpi pa cu Sizar bek hi,” tin ti haw hi. 16 Mahten Pilat in Jesuh cu thah tukin amu khut sungah pia hi. 17 Mahticun Jesuh cu hawhpih haw hi. A thinglamteh pua in tuul hi, “Lu-nguh mun a tih hawmi mun ah cun heng hi. (Mahlai mun cu Hebru awn in “Golgotha” tin sam haw hi.) 18 Mahlai ahcun Jesuh cu thinglamteh ah khen haw hi. A dangmi pa nih tevang khen bok haw in a laklawh ah Jesuh cu taak haw hi, 19 Pilat cun laingan in thinglamteh humah taaktiik hi. Mah lai a ngatmi cu, “Nazareth mi Jesuh, Judah kumpi pa,” tin ngan hi. 20 Jesuh a taaknak haw mun cu khuapi pen a khuala ngialngawl hangin mah laingat cu mitampi ten sial haw hi. 21 Thiampi upa pawlten Pilat cu, “‘Judah kumpi pa,’ tih hi ngawlin ‘Judah kumpi pa ing titu,’ tin ngan in hi,” tin ti haw hi.

Thinglamteh-ah Jesuh Khen Haw

22 Pilat in, “Ngan zo ing, ka ngatsa bangin um poh hen,” tin ti hi. 23 Ngaalkap ten Jesuh cu thinglamteh humah a khet celh haw ten, a puan cu la in pakhat tek co tukin khen li in khen haw hi. Mah ten cet in khui ngawl a tahmi a angki cualpi hei cu la haw hi. 24 Ngaalkapte cun, “Hi angki cualpi ong cu botkeek tuk ma hung. A kua in co tuk tih theihnak in awngbali sawk saw tuk hung,” tin ti haw hi. Hitibangin thil a piannak cu Lai Thiangtho sung aa, “Ka puan cu sem haw in, ka angki pi cu awngbali sawk haw,” tihthu a kimnak tukin hi. Mahtihbang kekek in ngaalkapte in bawl haw hi. 25 Jesuh ii thinglamteh el ah a nu le a nui naunu le Klopas ii zi Mary le Mary Magdalin-te ding leng haw hi. 26 Jesuh cun a nu le a ihmi a nungzuitu te mahlaiah a dinleng haw khi mu in a nui lak ah, “Ka nu hilaihah na capa zo in hi,” tin ti hi. 27 Mahten a nungzuitu tei lakah, “Amah cu nanu uh hi,” tin ti hi. Mahpen pan in nungzuitu pa cun a nu cu a neem in pin pih hi.

Jesuh Thi

28 Jesuh in i hempoh kim khawngzo hi tih khi thei hi. Lai Thiangtho sung ummi kimtiiknak tukin, “Ka dangdum,” tin ti hi. 29 Mahlaiah cabit tuithuuk beelkhat um hi. Mah tuithuuk sungah puansia tuah nim in ngolhleek ah keencih in Jesuh i kam ah noih haw hi. 30 Jesuh in mah tuithuuk cu cawp in, “Ceng zo,” tin ti hi. Mahten a lu kuunsuk in thi hi.

Jesuh Naak Pen Sun Haw

31 Mahten Judah mi hotute cu Pilat lakah hawh in thinglamteh humah a thah haw mitei ke ektuah tukin le a luang la tuk cun ngen haw hi. A nget ni haw cu tawngkai ninga ni hi. Ita ngenhaw him titale a thah hawmi miluang te cu Sabbath ni in thinglamteh humah zancaam tuk khi deih haw ma hi. Mah Sabbath ni cu ni thiangtho cuang hangin hi. 32 Mahhangin ngaalkapte hawh in Jesuh tuah a thah hawmi pakhat pai ke ektuah in mahcengten a dang pakhat pai kevang cu ektuah bok haw hi. 33 Mahnaven Jesuh lakah a hen haw ten thi ciang zo tih khi a muh haw hangin amah cu a ke ektuah haw ma hi. 34 Ngaalkap pa pakhat in Jesuh ii naak pen a ceipi tuah dawtin thakhat in thi le tuithiang luang tul hi. 35 (Mahmi thil a mutu amah rori ii otmi hi aa na uptheihnak tuk uh in hi. A hilhmi cu a dikmi hi, amah vangcun thudik son ing hi tih khi thei hi.) 36 Hitihbangin thil a piannak cu Lai Thiangtho sungah, “A nguh pakhat no hei ektuah haw tuk ma hi,” tin a ummi khi a kimnak tukin hi. 37 Mahten Lai Thiangtho mundang ah, “A dawh hawmi khi miten zo haw tuk hi,” tihvang in um hi.

Jesuh Phum Haw

38 Mahnung ten Arithmathea kuami Josef in Jesuh luang la tukin Pilat lak ah ngen hi. (Josef cu Jesuh nungzui pakhat hinaven Judah hotu te a lau hangin a kuh no in zuingut hi.) Pilat in Jesuh luang cu la thei ci, a tih ten Josef cun la hi. 39 Jesuh tawk tukin Zanlam in a hungtu Nikodemas vang Josef lakah telbok in zimui pawng zakhat hawng mura zimui le cingnai loihmi khi keng hi. 40 A panih haw cun Jesuh ii luangcu la in Judah mitei mithi phum daan bangin zimuituah puanngo neemno in cuun haw hi. 41 Jesuh a thahnak munah huan pakhat um in mah huan sungah kuamah phum awng ngawlnak khaanthak pakhat um hi. 42 Sabbath ni heng awndiak toh hangin mahlai ah phum haw hi.

A Thacang Mi Khaan

20:1 Sabbath ceng a zing khuavak lai ngawlin, Mary Magdalin cu khaan ah hawh in khaankhaknak suangpeekpi cu a thawnsa in mu hi. 2 Simon Piter le Jesuh ii ihmi nungzuitu a dang tei lakah taai in amu lakah, “Khaan pen Topa thiakkuh zo haw, ilai koih haw him tih thei ma hung hi,” tin hilh hi. 3 Mahten Piter le a dang nungzuitute cu khaan ahcun hawh haw hi. 4 A panih haw cun taai in a dang nungzuitu cu Piter saangin a taai caksawdeuh taak khaan ahcun heng masa deuh hi. 5 Khaan sung cu zo tum in luangtuamnak puanneem no cu mu hi. Mahnaven khaan sung cu tum ma hi. 6 A ma nungten Simon Piter cu hengin khaan sungah tum hi. Luangtuamnak puanneem no le Jesuh ii lukeennak cu mu hi. 7 Mahnaven a lukeennak puan cu luangtuamnak puanneemno lakah um kha ma hi. Mundang no ah zialtum deen no in um hi. 8 Mahten nungzuitu dang a heng masate vang cun khaan sungah tumbok in a muhbok taak sangbok hi. 9 (Thihnak pen tho leh tuk tin Lai Thiangtho ii tihmi cu a tihnopnak thei zo haw ma lai hi.) 10 Mahten nungzuitute cu a mu inn ah pinleh haw hi.

Mary Magdalin Lakah Jesuh Lang

11 Mary cu khaan pualam ah dingin kapli hi. Mahtihcun a kap thah in kuunin khaan sung cu zo tum hi. 12 Vanmi panih cu puanngo silh in Jesuh ii luang a koihnak haw ahkhin a lulam ah pakhat a kelam ah pakhat a khung leng khi mu hi. 13 Vanmi cun, “Ita kapli Cim?” tin Mary cu dong hi. Mahten, “Ka Topa a kua nantim a latu, i laiah koih haw nantim tih thei mang hi.” tin don hi. 14 Mahten Mary heekleh in mahlai ahcun Jesuh dingleng cu mu hi. Mahnaven Jesuh ahih lam thei ma hi. 15 Jesuh cun, “Numei nu, aita kapli cim hi. Akua kaw na zei?” tin dong hi. Mahtin a otpihtu cu huan cingtu bel tuk tin ngaisung in Mary cun, “Saya pa, nangman na la ahitale na koihnak khi hilh in na hawh in la tung hi,” tin ti hi. 16 Jesuh cun, “Mary” tin sam hi. Mary cun Jesuh ii lakah heek in, Hebru awn in, “Rabboni” tin ti hi.(Rabboni tih cu Saya pa tihnak hi.) 17 Jesuh in Mary cu, “Hi zen hih pahsun! Itahimtitale pai lakah heng malaih ing hi. Mahnaven ka unau tei lakah hilh tenna, Apa haw a hi bokmi ka Pa, a Pathian haw a hibokmi ka Pathian lakah hawh tung hi, tin hilh ten hi,” tin ti hi. 18 Mahtihcun Mary Magdalin cu hawh in Topa a muhnak thu le a lakah a otmi hempohte cu nungzuitu tei lakah hilh hi.

Nungzui Tei Lakah Jesuh Lang

19 Mah thawhlehni taaklam ten nungzuite munkhat ah tawkdun khawm haw hi. Judah mite a lau haw hangin kongka hempoh khak khawng haw hi. Mahten Jesuh cu langin amulak ah ding hi. Mahten, “Nohtei lakah daihnak um ta hen,” tin ti hi. 20 Mahtin a ot celh ten a khut le a naak lak hi. Nungzuitu te cu a Topa haw amuh haw ten a lungdam mahtak haw hi. 21 Jesuh cun amuh tei neel ahcun, “Nohtei lakah daihnak um tahen! Ka Pan atiik bangin nangmuhvang tiikbok ing hi,” tin ti hi. 22 A hum haw ahcun a haihawh cu hawl tul in, “Hawvang Thiangtho co ta un hi! 23 Mi sualnak na ngaidam uh tale ngaihdam hi haw tuk hi, na ngaidam uh ma a hitale ngaihdam ngawl hi haw tuk hi,” tin ti hi.

Jesuh Le Thomas

24 Nungzuitu sawm le panih lak pen pakhat a hi mi (Caphil tihmi) Thomas cu Jesuh a lang laih in a mu lakah um kha ma hi. 25 Mahhangin nungzuitu dang pawl ten, “Topa mu ung hi,” tin hilh haw hi. Thomas cun amu lakah, “A khut thik in a khetnak haw meimapawn mu in, ka khut in mah meima pawn zen in le a pang ka zen laih ngawl cun sang tuk mang,” tin ti hi. 26 A nung nipi khat lawi ten nungzuitu te cu innkhan sungah um haw in Thomas te vang cu um bok hi. Kong khak khawng haw naven Jesuh cu langin a laklawh ahcun dingin, “Nohtei lakah daihnak um tahen,” tin ti hi. 27 Mahten Thomas ii lakah, “Hilah na khutzung tuah zen in ka khut zo in hi, na khut tuah ka naak hi zen in hi. Ai can leh toh pahsun; sang toh in hi,” tin ti hi. 28 Thomas cun, “Ka Topa le ka Pathian,” tin ti hi. 29 Jesuh in, “Na muh hangin sang poh sisi? Keimah mu ngawl napi in a sangtu cu thupha ngah mi hi haw hi,” tin ti hi.

Hi Laingan Tu Pai Tuptahmi

30 A nungzuitu tei mitmuh ah, Jesuh ii nalamdang tampi a bawlmi hi laibu sungah ngat khak ngawl tampi um hi. 31 Mahnaven hizonghi ngan ing hi, ka ngatnak sullam cu nohten Jesuh cu Messiah, Pathian Capa hi tih saangin amah na sannak uh ii hangin nunnak na neihnak tuk uh in hi.

Galilee aa A Nungzui Tei Lakah Jesuh Lang

21:1 Mahnungten Jesuh cu a nungzuitu tei lakah Tiberius tuitingpi ah lang lehleu hi. A langnak cu hitihbang hin hi. 2 Simon Piter le Caphil tihmi Thomas le Galilee ngam Kana khua Nathanel le Zebedi ca te le Jesuh nungzuitu panih tevang munkhat ah tawkdun khawm haw hi. 3 Simon Piter in, “Kei cu suuk vawk tung,” tin ti hi. Midang tevang cun, “Kei telbok tung,” tin ti tek haw hi. Mahticun hawmkuang pakhat tuah in hawh haw hi? Mahnaven mahni taak cu imah man ngah haw ma hi. 4 Ni suak tuungno in Jesuh cu tui mawk ah ding hi. Mahnaven a nungzuitu ten Jesuh hi tih khi thei haw ma hi. 5 Jesuh in, “Tangval te, i poh beek man ma uh cim?” tin dong hi. Amuh ten, “Imah man ma ung,” tin don haw hi. 6 Jesuh in, “Na hawmkuang uh ii taklam deuh ah vawk le uh ci, dawm beek ngah tuk ve uh cin,” tin ti hi. Mahtihcun vawk ngangai haw in tamzet a vawk ngah haw hangin a suuk haw hei cu dok leh thei miau haw ma hi. 7 Jesuh ii ihbelmi a nungzuitu cun Piter ii lakah, “Topa hi,” tin ti hi. Piter in Topa hi tih a theih ten (a van te a duhsa khawng hangin) a angki puante khi manlangzet in silh in tui sungah dawk suk hi. 8 Nungzuitu dangte hei khin ngasa tuah a dimmi a suuk haw khi dok nguut in tuimawkah hen haw hi. Leihum pen a khawla ngialngawl pi zathum hawng ah in hi. 9 Tui mawk ah a kaih suak ngah haw ten meiling lak aa ngasa le cangho emsami khi mu haw hi. 10 Mahten Jesuh in amuh tei lakah, “Na matsa uh ngasa cu cawi hem un,” tin ti hi. 11 Simon Piter cu hawmkuang sung ahcun kaito in ngasa ngengpi za le sawmnga le pathum hi. Mahtizah cun tamnaven suuk cu balma hi. 12 Jesuh cun amu lakah, hung unna zingeih ei hem un,” tin ti hi. Nungzuitu tei lakpen kuamah in, “Nang a kua kam,” tih a dong ngamtu um haw ma hi. Itahimtitale Topa hi tih cu thei haw hi. 13 Jesuh cun hawh in cangho la in pia hi, ngasa vang cu pia bok hi. 14 Hihi cu Jesuh thihnak pen a thawhkik nungte a nungzui tei lakah veithum langnak hi.

Jesuh Le Piter

15 Zingeih a eih ceng haw ten Jesuh in Simon Piter cu, “Johan capa Simon, midang tei keimah a ih haw saangin nangin kei itsaw cim?” tin dong hi. Simon cun, “Topa, ka ih lam cu thei ci,” tin ti hi. Jesuh in a lakah, “Ka tuu no te cingkhawi in hi,” tin ti hi. 16 A veinihnak Jesuh cun, “Johan capa Simon, Keimah it cim?” tin dong lehleu hi. Simon cun, “Topa ka ihnak cu thei ci,” tin don hi. Jesuh in, “Ka tuute cing in hi,” tin ti hi. 17 Jesuh in, “Johan capa Simon, keimah it cim?” tin a veithumnak dong lehleu hi. Mahtin veithum tian Jesuh in, “Keimah it cim?” tin a dot hangin Piter cu a thasia in Jesuh ii lak ah, “Topa nang cun i hempoh thei khawng ci. It ing hi tihvang cu thei khawng poh sisi,” tin ti hi. Mahten Jesuh in, “Ka tuu te cawm in vak in hi. 18 Thu ngangai in hilh ing hi, na khanno lai cun na van silh cawm in na nuamnak mun ah hawh hi ci, mahnaven na teek te cun na ban zaak tuk ci aa, miten na van silhsak in na tai het sak haw tuk aa, na nuam ngawlnak mun ah hawhpih haw tuk hi,” tin ti hi. 19 (Hitin a tihten Piter itihbang thuak in itibangin Pathian lakah sunloihnak pia tuk him tih khi Jesuh ii theihtiiknak hi) Mahten Jesuh in, “Ka nung zui in hi,” tin ti hi.

Jesuh Le Nungzuitu Dang

20 Piter cu nungheek leh in a nunglam ah Jesuh ii ihzetmi nungzuitu pakhat mu hi. Hi nungzuitu pa cun an a eih haw lai in Jesuh neek in, “Topa zuaktu tuk cu a kua him? tin a dongtu khi hi. 21 Piter in mahpa khi a muhten, “Topa, hipa khi itibang kam ni?” tin Jesuh khi dong hi. 22 Jesuh in, “Ka hun leh laklawh tian nung tukin ka deih ta cun nangcaa i kaw a poi? Keimah zuipoh in hi!” tin ti hi. 23 Mahhangin hi nungzuitu pa cu thi tuk ma hi, tin Jesuh ii nungzuitu tei lak ahcun thuthan hi. Mahnaven Jesuh in, “Thi tukma hi a tihnak hi kha ma hi. Ka hun leh tian nung tukin ka deihmi a hi tacun nangcaa in i kaw poinak a um” a tihnak hi. 24 Hi nungzuitu pa cu hi thute a hilhtu hi aa, a ngantu hei hibok hi. Mahten a hilhmi cu dik hi tih thei hung hi.

Thu Bonak

25 Jesuh ii bawlmi thildang tampi um laih hi. Pakhat nung pakhat in ngan khawng bang a hin a ngatmi laibute cu leihum buppi hei ah va tuk ma hi tin ngaisung ing hi.