Ngam Ṙô Nö Nômö
1 Mi-im raneh An ngam Ṙô; hol ngam Tēv An ngam Ṙô; Tēv An inrē ngam Ṙô. 2 Anga-aṅ mi-im raneh, nö hol ngam Tēv. 3 Vahīlö Ò në taṙòkhöre chehen; öt hĕng hang, töt vahīlö Ò, nö i në tövīlöngö. 4 In Ò an ngam nômö; ngam nômö nö Hanātö tarik. 5 Yang ngam Hanātö nö el sinngūlö; ngaich ngam sinngūlö, nö öt kô tö e. 6 Hĕng taka ök umuh tarik tahīntö ngam Tēv, ök töminënyu tö Yôhan. 7 Ang-aṅ yamih nö eū-a; pòn hōtu nö ameūkö ngam Hanātö, hôiṅ ṙòkhöre, lökten in ò, ṙātö ellōnre. 8 Röön anga-aṅ an Hanātö, yih pöri anga-aṅ nö ameūkö ngam Hanātö. 9 Tökô-en An nö Hanātö, maha-athölö nö i tarik, vē yamih nö ing panam, nö ṙòkhöre. 10 Ing panam Anga-aṅ; lökten Ò ngih panam nö vīlöngö; ngaich öt akahakūö ngih panam tö Ò. 11 Yih Anga-aṅ nö ing Anga-aṅre; ngaich vē Anga-aṅ Ò nö öt hōḵen Ò. 12 I tum taka vē hamôḵen Ò pöri, kē-ĕkūö cha Anga-aṅ tö kanô-òṅ nö vīngöre nö kūön ngam Tēv, cha-a yip ṙamātö ellōnre nö i Mine-eny Ò. 13 Yip töfötnyuvö, röön aṅ i mahām, öt rēhĕn nö lōn ngam alaha, öt rēhĕn nö lōn tarik; aṅ i ngam Tēv pöri. 14 Ngaich ngam Ṙô nö vīngöre nö tarik; ngaich iyöng in hī, tööḵlö tö hanāngenlōn kanô-en inrē. Ngaich meuk kanôlò Ò ayī-ö, sā kanôlò ngam töng hĕng maneuk kūön ngam Tēv. 15 Eūken Ò Yôhan, nö ngö ṙô nö pōitô, Anga-aṅ Ön Ngòh ṙô chu, ngaich urĕh tö chu; pòn mu-urĕh tö chu. 16 Pò hī ṙòkhöre teūngen tö inlōnti, tömörit tö inlōnti, aṅ im tanööḵlö Ò. 17 Pò ngam chöngö nö lökten in Môsös, nö kētu; inlōnti, kanô-en inrē, yih nö lökten in Yēsū Kristū. 18 Rö-ö nö hĕng tak tarik mameuk ngam Tēv nö ngaich. Ngam töng hĕng maneuk Kūön, ngam mi-im Yöng, Anga-aṅ vame-eny.
Ṙô Yôhan Ök Vamôk
19 Hē yik Yahūti nö tīnngö yik kūönṙô, yik kūön Lēvī inrē, nö ṙā-ang Yerūsalem, nö hatönö Yôhan, nö ngö ṙô, Achīö öm me-eṅ? 20 Ngaich ngih ṙô Yôhan nö halööknyôre, öt mahangre, Rö-ö chin Chū-ö Kristū. 21 Ngaich hatönan cha-a nö ngö ṙô, Asuh pöri? Ēlaicha ömeh? Ngaich ngö ṙô anga-aṅ, Hö-ö chin. Ngam pròfĕt öm me-eṅ? Hö-ö, ngö anga-aṅ nö sapṙô cha. 22 Ngaich lökten cha nö ngö ṙô tö ò; Achīö öm me-eṅ? Hòṅ ih sapṙô yip tamīnngöre. Sitih ṙô öm töre? 23 Ngaich ngö ṙô anga-aṅ, Chū-ö chin ṙô öp hamūḵa nö el-inchōn, Hachipkö talöökö ngam Mā Tēv, sā ṙô ngam pròfĕt Isayā. 24 Aṅ i yik Feresī yik tötīni. 25 Ngaich hatönan cha-a, nö ngö ṙô tö ò, Kūöyòh pömri me-eṅ vōk, yĕm öt Kristū, öt rēhĕn öm Ēlaicha, öt rēhĕn öm ngam pròfĕt? 26 Ngaich ngö ṙô Yôhan nö sapṙô cha, Aṅtī tö mak chin Chū-ö vōk. Hĕng tak pöri Ap samökhaka nö el ṙôngö yīö, Ap tötmikahkūö yīö. 27 Anga-aṅ Ap mu-unôichrit Chu; sönen Chū-ö öt rēhĕn kô luhnyö nup rehen kunröpö Ò. 28 I Petenī hē nun anū-ö, lāmuh tö Yôtön, i chūök Yôhan nö vōk.
Pököre Ngam Tēv
29 Im huṙöich anga-aṅ meūkö Yēsū nö yihtöre nö in ò; ngaich ngö ṙô, Yĕh meuk, ngam pököre ngam Tēv, ngam kamëḵngö tökööl ngih panam. 30 Anga-aṅ An ṙô chu, Hĕng taka ap tarik yamih nö unôich tö chu, ngaich urĕh tö chu; pòn mu-urĕh tö chu. 31 Öt akahakūö Chū-ö tö Ò sin. Yih chin Chū-ö vōk aṅtī tö mak, pòn hōtu Anga-aṅ nö hameuktu nö i yip Israĕl. 32 Eū-a inrē Yôhan, nö ngö ṙô, Meuk ngam Töhet Fanöinylö chin, nö sā nyö-öṅ, nö ṙā-ang el halīöngö; ngaich i kui Ò Anga-aṅ nöngngöh. 33 Öt akahakūö chin sin tö Ò; ngö ṙô pöri Ap tamīnngen chu vōk, öich aṅtī tö mak, Ngam töng meūkö aṅ kui tö meh, tö ngam Töhet Fanöinylö nö yônti, ngaich höngngöh nö i kui Ò, Anga-aṅ An vamôk nö aṅtī tö ngam Töhet Fanöinylö. 34 Ngaich Chū-ö meuk eū-a tö Ò nö Anga-aṅ Kūön ngam Tēv.
Yik Raneh Mahaköp Nö In Yēsū
35 Hēk im huṙöich sökhaka ang Yôhan, nët tak inrē nak haköptö ò. 36 Ngaich hatīönken Yēsū anga-aṅ, hē Ò nö kiröönngöre, ngaich ngö ṙô, Yĕh meuk ngam pököre ngam Tēv. 37 Hang ṙô ò nak tö nët tak mahaköp, ngaich tömrit Yēsū. 38 Havöölökūöre Yēsū, ngaich meūkö cha nö tömrit Ò; ngaich ngö ṙô tö cha, Asuh ap lōn nāṅ? Ngaich ngö ṙô cha-a tö Ò, Rappī (ngam tö ngö Mahaköphöti), iyöng yih Öm? 39 Ngaich ngö ṙô Anga-aṅ tö cha, Ta-a, hòṅ nāṅ min meuk. Yihtöre cha-a, ngaich meuk chūök Ò nöngngöh. In Ò cha-a, ngaich nöngngöh im sakāmö; finën köṅny ṙô angū-ö, tö harap. 40 Hĕng tak ök aṅ i nak tö nët tak hamang ṙô Yôhan ngaich tömrit Yēsū, ang Antarū, ök kahëm Sīmōn Pītör. 41 Urĕh anga-aṅ nö chöh ök mëmre Sīmōn; ngaich ngö ṙô tö ò, Kôtökūö an tö Mesayā, (ngam tö ngö Kristū;) 42 Ngaich ngôṅten ò anga-aṅ nö in Yēsū. Hatīönken ò ngaich Yēsū; ngaich ngö ṙô Sīmōn man me-eṅ, kūön Yôna; Kīfös invëka man min, (ngam töngö Pītör).
Havëten Nā Filip Naṅ Netënīöl Ang Yēsū
43 Im huṙöich Anga-aṅ nö hòṅ chuh Kelelī, ngaich kôtökūö tö Filip; ngaich ngö ṙô Yēsū tö ò, Ta-a, in Chu. 44 Aṅ Petsēitā ök Filip, aṅ panam nāṅ Antarū, nāṅ Pītör. 45 Kôtökūö ang Filip tö Netenīĕl, ngaich ngö ṙô tö ò, Kôtökūö in ngaich, tö ngam ṙô Môsös nö im chöngö, ṙô yik pròfĕt inrē, Yēsū ngam aṅ Nāsaret, kūön Yôsĕf. 46 Ngaich ngö ṙô Netenīĕl tö ò, Tölööku hòng kô-òren, ṙamā-ang Nāsaret? Ngaich ngö ṙô Filip tö ò, Ta-a, ngëicha. 47 Meūkö Netenīĕl Ang Yēsū, nö yihtöre nö in Ò; ngaich ngö ṙô, Yĕh meuk, ngòh kūön Israĕl takô, ngam töt aṅhaṅv-in tö michīl. 48 Ngaich ngö ṙô Netenīĕl tö Ò, Sitih mikahkūö Öm tö chu? Ngaich ngö ṙô Yēsū nö sapṙô ò, Meūköm Chin, hē meh elkatòh ap anychīr chōn, urēhĕkūö ṙô Filip nö havëken meh. 49 Ngaich Netenīĕl nö ngö ṙô tö Ò. Rappī; Kūön ngam Tēv Man; Rāchakūö Israĕl Man. 50 Ngaich Yēsū nö ngö ṙô tö ò, Ṙātö ellōnre ömeh, pò chu ngö ṙô tö meh, Meūkö meh Chin, elkatòh ap anychīr chōn? Möḵlö maheuṅk man min tö u. 51 Ngaich hēk ngö ṙô Anga-aṅ tö ò, Tökô-ò ṙô Chin tö meh, meuk ngam halīöngö man min nö löpnyörekūö; ngaich yip ma-ahānga, aṅ im Tēv nö yônlö, yônti inrē nö i kui ngòh Kūön Tarik.
Ngam Inpīhö I Kānā
1 Ik linūöi sumkam ök inpīhö i Kānā i Kelelī; umuh inrē ök yöng Yēsū kikānö. 2 Ngöönka inrē Yēsū, tö yik mahaköp inrē nö in Ò, nö im inpihö. 3 Ngaich hē ök vāin nö keuheūt, ngö ṙô ök yöng Yēsū kikānö tö Ò, Ngāichen vāin yin. 4 Ngaich Yēsū nö ngö ṙô tö ò, Suh ap lōn meh, la-en Chu? Öltö yihih an ngam ṙētak Chu. 5 Ngaich ngö ṙô ök yöng Ò kikānö tö yik mahalanṙen, Höng hōḵ pöichö, yē ṙô Ò tö yīö. 6 Tafūöl nuk ihong neū-euṅ umuh, tinīöchhaka; sā fālen vē Yahūti nö söichöre; nët, lūöi kinlaha aṅ tö hĕng. 7 Ngaich Yēsū nö ngö ṙô tö cha, Hatööḵlö minë neū-euṅ yin tö mak. Ngaich cha-a nö taṙēchi tī nö hatööḵöl u. 8 Ngaich ngö ṙô Anga-aṅ tö cha, Yĕh pöchö fòkhöl: kē-ĕkūö ngam yōm nāhaṅl. 9 Ngaich kētö e cha-a. Ngaich hē ngam yōm nāhaṅl nö kalah ngam mak tövingöre nö vāin, (öt akahalōn pöri yik mahalanṙen, yik famòklö mak;) ngaich ngam yōm nāhaṅl nö havëtö ngam kikōnyö töhapīhö; 10 Ngaich ngö ṙô ò, Urĕhtö tī yin ṙung vē tarik tö tökuchik vāin; ngaich yē tarik nö tööḵöng kūö, ngaich möl ngam tökunyah. Ngaich me-eṅ söl ing töngamuh tī öm halinngen ngam tökuchik vāin. 11 Ngih ön raneh minkahngö tī Yēsū, nö i Kānā, i Kelelī, nö hameuktö kanôlòre; ngaich ṙātö ellōnre yik mahaköp nö in Ò. 12 Unôichrit e Anga-aṅ nö chuh Kafarnahum, Anga-aṅ tök yöng Ò kikānö inrē; holtö yik mëmre, kahëmre, tö yik mahaköp inrē. Öt ṙōl sumkam cha-a nö umuh.
Chuh El Ngam Töhet Chūök Ang Yēsū
13 Ngaich ngam pasaka yik Yahūti nö röhten; ngaich chuh Yerūsalem Ang Yēsū. 14 El ök töhet chūök Anga-aṅ nö meuk yik mi-inyihkö nuā, pököre, nyö-öṅ inrē; ūichhak inrē yik mahaṙīkö rupīö. 15 Ngaich vī fanòhre Anga-aṅ tö kupāt; ngaich ahōngen cha, nö ṙā-ang ël ök töhet chūök tö nuk pököre, nuā inrē. Hōngngö nuk töhaṙīka Anga-aṅ rupīö; kuringngö nuk mīs cha inrē. 16 Ngaich ngö ṙô Anga-aṅ tö yik mī-inyihkö nyö-öṅ, Kēḵngö u, nö ṙā-ang ihih. Un vītu ngih patī ngam Yöng Chu, nö chūök mi-inyih. 17 Fëḵĕlre ngaich yik mahaköp tö ṙô ngam töhet līpöre, Ngeūktu Chin min, tö ngam kumlēḵlōn töm patī Meh. 18 Lökten yik Yahūti nö ngö ṙô tö Ò, Asuh ap minkahngö hameuktö Meh in ih, Öm ngatī la-en tö u? 19 Ngaich Yēsū nö ngö ṙô nö sapṙô cha, Tiṙōlngö ngih töhet chūök; ngaich Chū-ö min asöklö e i tö lūöi sumkam. 20 Lökten yik Yahūti nö ngö ṙô, Fën anāi tafūöl samyeūheu rô-òten vinī-i an ngam töhet chūök; ngaich kô-òren hòng Me-eṅ höng lūöi sumkam asöklö e? 21 Ṙôtö ngam alahare pöri Anga-aṅ, nö töhet chūök. 22 Lökten hē Ò nö choholre, nö ṙā-ang i yik tökapah; fēḵĕlre ngaich yik haköptö Ò, tö ngam ṙô Ò, ngaich ṙātö ellōnre nö i ṙô ngam töhet līpöre, tö ṙô Yēsū inrē tö cha.
Akāhalōn Ang Yēsū Tö Ellōn Taṙòkhöre
23 Hē Ò nö i Yerūsalem nö ik paska parātin, maṙôngö yik mameuk nuk minkahngö tī Ò, ngaich nö ṙātö ellōnre nö i Mine-eny Ò. 24 Rö-ö pöri Yēsū nö nyātölōn nö in cha pòn akahalōn tö taṙòkhöre tarik; 25 Öt hòṅ kusīknyô tö hĕng tak Anga-aṅ nö eūkö inlahen tarik; pò Ò Anga-aṅ nö akahalōn tö ellōn tarik.
Yēsū Nāṅ Nikòtimös
1 Hĕng taka ök tarik, aṅ i yik Feresī. Nikòtimös ök minënyö ò, mākūö yik Yahūti. 2 Anga-aṅ yamihtöre nö in Yēsū, tö hatööm, ngaich ngö ṙô tö Ò, Rappī; akahalōn in tö Meh Öm mahaköphöti ṙamā-ang im Tēv; tön öt tarīku tökô nö la-evṙen, nö sā Meh, tö në minkahngö, yē Ò nö öt īnu tö ngam Tēv. 3 Ngaich Yēsū nö ngö ṙô, nö sap ṙô ò. Tökô-ò ṙô Chin tö meh, yē ngòh tarik nö öt tumfömlöng finötnyi, öt kô anga-aṅ nö meuk ngam pūlngö ngam Tēv. 4 Ngaich ngö ṙô ang Nikòtimös tö Ò. Sitih kanô-òṅ ang ngòh tarik nö fötnyu, yē ò nö köiny nö ngaich? Kô-òren ang nö kuhēthötre nö ellōn yöngre, ngaich fötnyu nö hēk? 5 Ngaich ngö ṙô Yēsū, nö sapṙô ò, Tökô-ò ṙô Chin tö meh, yē ngòh tarik nö öt fötnyu tö ngam mak, ngam {Töhet} Fanöinylö inrē, öt kô min anga-aṅ nö kuhēthötre nö im pūlngö ngam Tēv. 6 Pò ngòh töfötnyu tö ngam alaha, ngaich nöng alaha; ane inrē ngòh töfötnyu tö ngam Ma-alaha, ngaich nöng ma-alaha. 7 Uh man pingangkūö tö ṙô Chu, tö tinfömlö finötnyö yīö. 8 Lahööṙa an yih ngam kuföt nö kū-ötö kū-öre; ngaich me-eṅ höng hang ṙô e; rö-ö pöri akahalōn töp löktö e nö yih; ap chuhu e inrē. Ngatī pöchö ngòh töfötnyu tö ngam {Töhet} Fanöinylö, 9 Ngaich ngö ṙô ang Nikòtimös, nö sapṙô Ò nö hēk, Sitih kanô-òṅ ön anū-ö? 10 Ngaich Yēsū nö sap ṙô ò, nö ngö ṙô, Mahaköphöti öm me-eṅ i Israĕl, ngaich öt akahalōn hòng tö u? 11 Tökô-ò ṙô Chin tö meh, Ṙôtö nup mikahlōnre in īhö; eūkö nuk maheuṅkre inrē; ngaich rö-ö yī-ö hōḵ tö nup aheūkö ih. 12 Yē Chu ṙôtö aṅ el tumlat in yīö, ngaich öt ṙātö ellōnre yī-ö; Sitih kanô-òṅ öi ṙātö ellōnre, yē Chu ṙôtö aṅ el halīöngö, in yīö? 13 Öt hĕng tak tarik nö töngaich nö yônlö nö el halīöngö, höng Anga-aṅ yamônti nö ṙā-ang el halīöngö, ngam Kūön Tarik, ngam me-el halīöngö. 14 Sā Môsös nö el-inchōn nö hatamlö ök pēch, hòṅ ngatī min ngòh Kūön Tarik nö hatamlöngö; 15 Hòṅ ngòh ṙamātö ellōnre nö in Ò nö nômuvö tö ngam tö-örheūheu nö aṅ in Ò. 16 Tölngö hanāngenlōn An ngam Tēv töng panam, tön uroh nö kēngö ngam töng hĕng maneuk Kūönre; pòn sōtu vē ṙamātö ellōnre nö in Ò, nö ötkôlò; hōtu pöri ngam nômö tö-örheūheu-aṅ nö in cha. 17 Pò ngam Tēv nö öt tīnten ngam Kūönre nö öthakôlò ngih panam; hōtu pöri ngih panam nö lökten in Ò nö hayöökaṙen. 18 Hakôlòngṙô ön ngòh ṙamātö ellōnre nö in Ò; ngòh tötṙamātö ellōnre, ha-ehangen ötinkôlò, pò ò nö öt ṙātö ellōnre nö im töng hĕng maneuk Kūön ngam Tēv. 19 Ngih öng yih lökten ötinkôlò, pò ngam Hanātö nö yih nö ing panam ngaich hāngenlōn tarik tö sinngūlö, nö mötlö töm Hanātö; pò nup la-en cha nö tötlöök. 20 Pò ngam tötlöök la-en nö surīkhö ngam Hanātö; öt yihtöre inrē nö im Hanātö; pòn sōtu nup la-en ò nö vëka. 21 Ngòh töla-evṙen pöri tö kanô-en, yihtöre nö im hanātö; pòn hōtu nup la-en ò nö hameuktu nö aṅ im Tēv.
Nā Yēsū Nāṅ Yôhan
22 Unôichrit në, Ang Yēsū nö chuh i panam Yūtā, nö holtö yik mahaköp; ngaich in e Anga-aṅ nöngngöh nö holten cha; ngaich vōk tarik. 23 Vōk tarik inrē ang Yôhan nö i Ainōn, röhta nö i Sālim; pòn pōyen mak nö umuh. Ngaich yihtöre cha-a nö vōkö. 24 Pò Yôhan nö öl nö kalonghötvö. 25 Ngaich ve-ekūöre yik haköptö Yôhan, tök tö hĕng tak Yahūti inrē, tö inlahen inhetlö. 26 Yihtöre cha-a nö in Yôhan, ngaich ngö ṙô tö ò, Rappī; vōk tarik Ap Anga-aṅ inrē; Ap hol meh lāmuh tö Yôtön Ap aheūkö meh, ngaich ṙòkhöre vē tarik nö chuh in Ò. 27 Ngaich sapṙô cha Yôhan nö ngö ṙô, Öt tarīkuvö tökô nö kahe-evö, yē e nö öt ṙamā-ang el halīöngö nö kine-eṅkūö ò. 28 Yī-ö yin ameū-a tö chu ngö ṙô, Rö-ö chin Chū-ö Kristū; tötīntu pöri, urēhĕnkūö Ò. 29 Ngam tö īnu tö ngam kikānö töhapīhö, ngaich anga-aṅ kikōnyö töpīhövö. Ngam hol ngam kikōnyö pöri töhapihö ngam samökhaka nö hang ṙô ò, pōyen ṙanāmölōn tö kūöṙô ngam kikōnyö töhapīhö. Ngaich chin tööḵlö, tö e, angū-ö ṙanāmölōn. 30 Ṙamuhölre An Anga-aṅ, ṙamūöngenre Chū-ö.
Angā-aṅ Ngam Yamih Nö Lök Tö Elhalīöngö
31 Ngam yamih nö ṙā-ang lātulöng, lātulöng Anga-aṅ tö taṙòkhöre. Ngam aṅ ing panam, aṅ ing panam. Ngam ṙamā-ang el halīöngö nö yih, latulöng Anga-aṅ tö taṙòkhöre. 32 Nup maheuṅk Ò inrē, ngaich eūkö u Anga-aṅ; öt tarīku pöri hamôḵòṅ aheūkö Ò. 33 Ngam hamôḵòṅ aheūkö Ò, haköpngöre ngaich tö ngam Tēv nö tökô-en. 34 Pò ngam tötīntu tö ngam Tēv nö ṙôtö ṙô ngam Tēv, Pò Ò nö ötkinlahav tī nö kētö ngam {Töhet} Fanöinylö. 35 Hāngenlōn ngam yöng töm Kūön; ngaich kētö eltī Ò tö taṙòkhöre. 36 Ngòh ṙamātö ellōnre nö im Kūön, nômuvö tö ngam tö-örheūheu-aṅ. Ngòh töthamangṙô ngam Kūön pöri, öt meuk ngam nômö min; höngngöh pöri ngam lanīnö ngam Tēv nö in Ò.
Yēsū Tö Ök Kikānö Aṅ Samarīa
1 Lökten hē ngam Mā nö akahalōn tö yik Feresī nö hang, tö Yēsū nö maṙôngö haköptö, vahōk inrē, tö Yôhan. 2 (Öt hakôtenre pöri Yēsū nö vōk tarik; höng yik mahaköp.) 3 Ṙā-ang Anga-aṅ tö Yūtā, ngaich hēk nö chuh Kelelī. 4 Ngaich öt kô Anga-aṅ nö öt lök Samariā. 5 Yih ngaich Anga-aṅ nö ip tö kiröng elpanam Samariā, i Sīkör; ranghö ap taṙeū kahëtö Yāköp nö ik kūön Ò, Yôsĕf. 6 Umuh ök mak Yāköp. Uichngöre Yēsū ngaich, nö i kui ök mak, nöng ngatī; pòn chei töm kinröönngöre. 7 Hĕng tak ök kikānö aṅ Samariā, yamihtöre nö fòk mak; ngaich Yēsū nö ngö ṙô tö ò, Kētö òk Chu man. 8 Pò yik haköptö Ò nö chuh im panam, nö havah nya-aṅkūö cha. 9 Lökten ngam aṅ Samariā kikānö nö ngö ṙô tö Ò, Sitih Ömeh havëkö òkre in chu, öich kikānö aṅ Samariā, yē Meh öm Yahūti? (Pò vē Yahūti nö öt holre tö aṅ Samariā.) 10 Ngaich ngö ṙô Yēsū, nö sapṙô ò, Yē meh akahalōn tö ngam tö ngö ṙô inrē, tö meh, Kētö òk Chu man, havë-a öre me-eṅ in Ò; ngaich kô-òren Anga-aṅ nö kē-ĕkūö meh tö tö-aṅ mak. 11 Ngaich ngö ṙô ngam kikānö tö Ò, Mā! Öt chūökutī Man fòk mak; aṙū-uti inrē ngam mak, Aṅ yih aṅ-in Öm tö tö-aṅ mak? 12 Tömööḵlö Öm me-eṅ tök muvöhngö ih, Yāköp, ök kamëtö ngih mak nö in ih; òk aṅ e inrē anga-aṅ, tö yik kūön ò, tö nuk nūā ò inrē. 13 Ngaich ngö ṙô Yēsū, nö sapṙô ò, Haṙëhe nômö yip min nö hēk, amòk ngih mak. 14 Öthētu pöri nö haṙëhe nômö, yip amòk öp kahëtö Chu min mak. Ngam mak kahëtö Chu in ò, vīngöre nö töhëmlö nö ellōn ò, nö mak ngam nômö tö-örheūheu-aṅ. 15 Ngaich ngö ṙô ngam kikānö tö Ò, Mā! Kētö e Man; angū-ö mak, in chu; hòṅ chu öt haṙëhe nômö, öt yihtöre inrē öich ngih rô-òlkūö fòk mak. 16 Ngaich ngö ṙô Yēsū tö ò, Kuṙòh, havëkö ap pīhöre man; ngaich yihtöre hēk. 17 Hö-ö chin pīhövö, ngö ṙô ngam kikānö, nö sapṙô Ò. Ngaich ngö ṙô Yēsū tö ò, Huveū-eu ṙô man, öm ngatī ṙô, Hö-ö chin pihövö; 18 Pò meh öm tö taneui tak pihö sin; ngaich ap mi-in meh töngamuh, nö öt pihö meh. Angū-ö an kanô-òṅ ṙô meh. 19 Ngö ṙô ngam kikānö tö Ò, Mā, akahalōn chin ngaich tö Meh Öm pròfĕt. 20 I kui ngih rôngö yik muvöhngö ih nö ve-ekūötēv; ngaich ngö ṙô yī-ö tö tarik nöng i Yerūsalem chūök nö ve-ekūötēv. 21 Ngaich Yēsū nö ngö ṙô tö ò, Me-eṅ kikānö; haköp ṙô Chu man; yih an ngam ṙētak, hē yīö min ve-ekūö ngam Yöng, öt i kui ngih rôngö, öt rēhĕn i Yerūsalem. 22 Öt akahakūö yin yī-ö tö ngam vahe-ekūöre. Ve-ekūö ngam mikahkūöre in īhö; pò ngam inyööken nö lamökten yip Yahūti. 23 Yih pöri ngam ṙētak, ngaich an töngamuh, hē yip tökô-en ve-ekūö ngam Yöng min, nö ve-ekūö Ò nö holtö ellōnre, kanô-en inrē. Pò yip töngatī nö lōn ngam Tēv nö vame-eṅkūö Ò. 24 Ötmaneūken (Ma-alaha) An ngam Tēv; ngaich yip vame-eṅkūö Ò, nö hòṅ holtö ellōnre, kanô-en inrē nö ve-ekūö Ò. 25 Akahalōn chin, ngö ṙô ngam kikānö tö Ò, tö Mesayā min nö yih, Öp tö Kristū invëḵa; ve-eny nang ih Öp min tö taṙòhöre, yē Ò nö yih. 26 Chū-ö Chin Anga-aṅ, vame-eṅkūö meh, ngö ṙô Yēsū tö ò. 27 Hē e, yik haköptö Ò nö yih, ngaich cha-a nö uṙeh tö Ò nö ve-ekūö kikānö; örhĕng tak pöri, tö ngö ṙô, Asuh ap lōn meh? Hēk, Kūöyòh Öm ve-ekūö ngam kikānö? 28 Ṙāngö ök chūök mak ngaich ngam kikānö; ngaich chuh im panam; ngaich ngö ṙô tö yik tarik, 29 Ta-a ngëichkö Öp tarik. Öp tökeuheūtnyöre ṙô tö fālen chu. Röh Ap nö Kristū? 30 Ngaich kunyī-inyre yik tarik, nö ṙā-ang im panam; ngaich yihtöre nö in Ò. 31 Hē e yik mahaköp nö ve-ekūö Ò, nö ngö ṙô, Rappī; nyā Man yēḵ. 32 Ngö ṙô pöri Anga-aṅ tö cha, Nyahaṅav Chin tö nya-aṅkūö, öp öt mikahlōn yīö. 33 Ngaich ngö ṙô yik mahaköp tö höö, Tarīku hòng uvöh kamëtö nya-aṅkūö Ò? 34 Ngaich ngö rô Yēsū tö cha, Ngam la-en lōn ngam tamīnten Chu, angū-ö an nya-aṅ Chu; ngam kinheūṅtngen ngam la-en Ò inrē. 35 Röh öi ṙung ngö ṙô, Fëntöre chumngëṅtö ap, ngaich yih ngam kanöinyö? Yĕh meuk, ve-eny nang yīö Chin, Môklökūöre yin ngëichkö elngāṙö, tö u nö ngaich nö isoh nö köiny. 36 Teūngen an ngam mahamūl nö ngaich tö raneushöre; ngaich hamūl ṙòng nö im nômö tö-örheūheu-aṅ; hòṅ ngam tameūich, tö ngam mahamūl inrē, nö ṙāmölōnnyöre. 37 In e an ngam inchōḵoṙô nö teungta, Hĕng tak ngam tameūich; tahëng ngam mahamūl. 38 Tīnten yīö Chin hamūl nup tötla-en yīö; tahëng tak yik töla-evṙen, ngaich yī-ö höng yihtöre i nup la-en cha. 39 Maṙôngö yik ṙamātö ellōnre aṅ im panam Samariā, nö in Ò; kūö ṙô ngam kikānö, ngam ameū-a, nö ngö ṙô, Ve-eny nang chu An, tö nup taṙòkhöre fālen chu. 40 Lökten hē yik aṅ Samariā nö yihtöre nö in Ò, ngaich ve-ekūö Ò cha-a, nöngngöh nö in cha. Ngaich nët sumkam Anga-aṅ nö iyöng umuh, 41 Ṙuhölre ṙôngö hēk yik ṙamātö ellōnre nö in Ò, tökūö ṙô Ò; 42 Ngaich ngö ṙô cha-a tök kikānö, Ṙātö ellōnre in ngaich, öt kūö ṙô meh; pò ih īhö ngaich hang, ngaich akahalōn tö Ò nö kô nö Anga-aṅ Mahayööken ngih panam.
Halanken Kūön Ök Mākūö Kumyung
43 Unôichrit tö nët sumkam, Anga-aṅ nö ṙā-ang umuh, nö chuh Kelelī; 44 Pò Yēsū nö ve-eny tö ngòh pròfĕt nö öt kanôluṙô nö i panamre. 45 Ngaich hē Ò nö yih nö i Kelelī, ṙòkhöre ngaich yik aṅ Kelelī nö ha-öiny tö yīhih Ò pòn meuk nuk tī Ò nö i Yerūsalem, nö ik paratīn; pò cha cha-a inrē nö chuh im paratīn. 46 Yihtöre Anga-aṅ hēk nö i Kānā i Kelelī, i chūök Ò nö vīngö mak nö vāin. Hĕng taka ök umuh, tarik ök rācha ök tökūönu tök tövahavö, i Kafarnahum. 47 Ngaich hē Ò nö hāngö Yēsū, nö yih nö i Këlelī, nö ṙā-ang Yūtā, chuh in Ò ngaich anga-aṅ; ngaich ve-ekūö Ò nö hōten Ò nö yihtöre nö halanken ök kūön ò; pòn hòṅ kapah anga-aṅ. 48 Lökten Yēsū nö ngö ṙô tö ò, Öt hōḵ yin ṙātö ellōnre, yē yīö öt meuk minkahngö, pinngangkūö inrē. 49 Ngaich ngö ṙô ök tarik ngam rācha tö Ò, Mā yih tal Man urēhĕkūö ap kūön chuh nö kapah. 50 Ngaich Yēsū nö ngö ṙô tö ò, Kuṙòh ngaich man; aṅ ap kūön meh. Ṙātö ellōnre ngam tarik, tö ṙô Yēsū nö ve-ekūö ò; ngaich kiröönngöre. 51 Ngaich hē ò nö ngaich nö peūtöre, asaha ngaich anga-aṅ tö yik mahalanṙenre, yik tö ngö ṙô, Aṅ ap kūön meh. 52 Ngaich hatönö cha anga-aṅ, tö ṙētak ranehten ò nö ĕhten. Ngaich ngö ṙô cha-a tö ò, Ik sinat köṅny ṙô, ök anūöyö ò nö ṙāngen ò, vahë. 53 Ngaich akahalōn ngam yöng ò tö e, nö angū-ö ṙētak Yēsū, nö ngö ṙô, Aṅ ap kūön meh. Ṙātö ellōnre ngaich anga-aṅ, ṙòkhöre yik aṅ patī ò inrē. 54 Innëtö minkahngö ön ngih, tī Yēsū, hē Ò nö yih nö i Këlelī, nö ṙa-ang Yūtā.
Halanken Ip Tö Hachūöki Mak
1 Unôichrit në, ök paratīn yik Yahūti; ngaich chuh Yerūsalem Ang Yēsū. 2 Ngaich i Yerūsalem ap mak töhachūöki, ranghö lökhöt pököre, Pĕtsata ap, tö ṙô yip Yahūti, tö taneūyö rittūi. 3 Ël u nö hulalhaka yik tömaṙôngö tö vahavö, tötmeuk, tökaròk, tölum; hökkö kintövö ngam mak. 4 Pòn ip ṙētak, nö hĕng tak ap ma-ahānga yāmônti nö el ngam mak, nö kitöv ngam mak. Ngaich unôichrit kintövö ngam mak, ap mu-urĕhti nö yôkti nö el ngam mak, ngaich lööken tö nup töng vahre. 5 Hĕng taka ök umuh tarik tölūöi anāi hëvhör samyeūheu nö vahavö. 6 Hē Yēsū nö meūkan nö hulalhaka, ngaich akahalōn tö ò nö ngaich nö marô-òten nö ngatī, ngö ṙô Anga-aṅ tö ò, Hòṅ lööken ömeh? 7 Ngaich ngam tövahavö nö ngö ṙô, nö sapṙô Ò, Mā! Öt tarīku chamālten chu ël ngam mak, yē ngam mak nö kitövö; ṙòngmö yihtöre lang Chū-ö, ngaich hĕng tak mu-urēhĕkūö tö yamôkti. 8 Ngaich ngö ṙô Yēsū tö ò, Choholre man; kēḵ ngam chamamre; kiröönngöre. 9 Ilööṙen ngaich ngam tarik nö lööken; kēḵ ngam chamamre, ngaich kiröönngöre. 10 Töhet ök angū-ö sakāmö; lökten yik Yahūti nö ngö ṙô tö ò, ök tölööken nö ngaich, Töhet ön ngih sakāmö. Öt kô man kēḵ ngam chamamre. 11 Ngö ṙô pöri anga-aṅ, nö sapṙô cha, Ngö ṙô Ap taheui, tölööken tī tö chu, Kēḵ ngam chamamre; ngaich kiröönngöre. 12 Ngaich ngö ṙô cha-a nö hatönan, Achīö ap taheui tarik tö ngö ṙô tö meh, Kēḵ ngam chammre man; ngaich kiröönngöre? 13 Öt akahakūö pöri ngam tölööken nö ngaich, tö Ò; pò Yēsū nö kiröönngöre; maṙôngö inrē yik tarik umuh. 14 Unôichngöre Yēsū nö kôktökūö tö ò nö el ök töhet chūök; ngaich ngö ṙô tö ò, Yĕh meuk: ngaich man lööken; uh pömchö hēk köölö fālen hòṅ meh öt ṙūöngenre. 15 Kiröönngöre ngaich ngam tarik, ngaich ve-eny nang yik Yahūti, tö Yēsū nö Anga-aṅ tölööken tī tö ò. 16 Angū-ö lökten yik Yahūti, nö öthakôlò Yēsū, pòn la-evṙen Anga-aṅ hē el töhet sakāmö, nö ngatī. 17 Ngaich ngö ṙô Yēsū tö cha, La-evṙen An ngam Yöng Chu nö örheūheu, ngatī Chū-ö la-evṙen. 18 Angū-ö lökten yik Yahūti nö ṙuhöllōnre nö hòṅ fëlngen Ò; pò Ò nö öt höng filalngö ngam töhet sakāmö, tön Yöngrevö ṙô tö ngam Tēv, vīlöre inrē nö sā ngam Tēv.
Ngam Kanò-òṅ In Ngam Kūön
19 Lökten Yēsū nö ngö ṙô tö cha, Tökô-ò ṙô Chin tö yīö, Öt kô An ngam Kūön nö kanahnguṙen tö la-enre, nup la-en ngam Yöng pöri maheuṅk Ò, ngatī ngam Kūön, nö sā ngam Yöng. 20 Pò ngam Yöng nö hāngenlōn tö ngam Kūön; ngaich hameukhömat Ò tö nup taṙòkhöre la-enre. Mööḵlö nup la-en min hameuktö Ò nö im Kūön, hòṅ yīö min pingangkūö. 21 Pòn sā ngam Yöng nö hachohlö tökapah, ngaich ha-aṅhaṅ cha, ngatī ngam Kūön inrē nö ha-aṅ yip lōnre. 22 Pò ngam Yöng nö öt kahòkken tarik, i ngam Kūön tī pöri Anga-aṅ tö nup taṙòkhöre kinṙôka; 23 Pòn hōtu taṙòkhöre tarik nö ha-öiny ngam Kūön, sā cha nö ha-öiny ngam Yöng. 24 Tökô-ò ṙô Chin tö yīö, Ngòh hamang ṙô Chu ane inrē ṙamātö ellōnre nö im tamīnngen Chu, nômuvö anga-aṅ tö ngam tö-örheūheu-aṅ; öt yihtöre inrē nö im ötinkôlò; chööḵngö ngam kinpaha pöri; nö im nômö. 25 Tökô-ò ṙô Chin tö yīö, Yih an ngam ṙētak, ihih an töngamuh; hē vē tökapah min nö hang ṙô ngam Kūön ngam Tēv; ngaich cha-a yip hamang nö aṅ min. 26 Pòn sā ngam Yöng nö in re nômö; ngati tī Anga-aṅ inrē nö kē-ĕkūö ngam Kūön nö nômuvö nö in re. 27 Ngaich pòn Kūön Tarik Anga-aṅ, ngaich kē-ĕvkūö tö Ò tö chöngö nö kahôka. 28 Ui pingangkūö tö ngih, tön yih an ngam ṙētak, hē yip taṙòkhöre el anūlö nö hang ṙô Ò min, ngaich kunyī-inyre. 29 Yip tölöökö la-en ngaich im invanlö nômö; yip tötlöökö la-en pöri, im invanlö kinṙôka.
Vamënyen Yēsū
30 Öt kô Chin Chū-ö kanahnguṙen tö la-enre; kahôka Chin sā inköptö Chu; tökô-en an ngam kinṙôka Chu, pò Chu öt kēḵ lōnre, tön lōn Ò pöri ngam tamīnten chu. 31 Yē Chu kahangenre eūköre, ngaich ngam aheūkö Chu nö tötkô-en, 32 Tahëngö ameūka Chin; ngaich akahalōn Chū-ö tö ngam aheūkö ò nö tökô-en. 33 Tīnhang yin yih yī-ö in Yôhan; ngaich anga-aṅ nö eū-a im kanô-en. 34 Rö-ö pöri nö aṅ i tarik, ngam ineūkö Chu; ṙô Chu pöri në, hòṅ yīö hayöökaṙen. 35 Anga-aṅ ap ëāṅvö tö hū, yang inrē; ngaich yī-ö sin ṙāmölōn rahëchtaṙen hōḵ im yanāngö ò. 36 Mööḵlö pöri ngam ineūkö Chu, tö ngam aheūkö Yôhan; pò në la-en në kahëtö ngam Yöng Chu la-en Chu, minë la-en Chu ameū-a tö Chu tīntu tö ngam Yöng. 37 Ngam yöng, ngam tamīnten chu eūken Chu Anga-aṅ, Örhĕng heuh yin yī-ö hang ṙô Ò; öt rēhĕn meūkan. 38 Ngaich ngam ṙô Ò inrē nö öt köp nö in yīö; pò yīö ötṙātö ellōnre im tahīntö Ò. 39 Chöh nup töhet līpöre yī-ö, pò yīö in u tö lōnre öi nômu tö tö-örheūheu-aṅ; anū-önun inrē ameūken Chu. 40 Ngaich öt hòṅ yihtöre yī-ö in Chu, hòṅ yīö nômu. 41 Rö-ö Chin Chū-ö aṅ i tarik ineū-euṅ. 42 Akahalōn Chū-ö tö yīö, öi öt īnu tö hanāngenlōn ngam Tēv. 43 Yih Chū-ö i Mine-eny ngam Yöngre; ngaich rö-ö yī-ö hōḵen Chu. Tahëng öre yamih nö i mine-enyre; ngaich hōḵen ò yī-ö. 44 Sitih kanô-òṅ öi ṙātö ellōnre, yē yīö höng kö eū-eu höö, ngaich yī-ö öt hōḵ tö ngam ineū-euṅ aṅ im töng hĕng Tēv. 45 Uh yin ngö lōn tö Chu min vënyen yīö im Yöng; hĕng taka ap vamënyen yīö, ang Môsös, ngam chūök yīö hayönglenre. 46 Yē yīö öre ṙātö ellōnre im Môsös, ngaich ṙātö ellōnre öre yī-ö in Chu; pòn kūichö Chu anga-aṅ. 47 Yē yīö pöri öt ṙātö ellōnre i nup kahūich ò, Sitih kanô-òṅ öi ṙātö ellōnre i në ṙô Chu?
Hanëḵlen Yik Tö Taneui Köṅny Tarik Ang Yēsū
1 Unôichrit u, Yēsū nö chuh i tahëng lā ap mai Keleli; mai Tipĕriös minënyö ap inrē. 2 Maṙôngö yik tarik tamömrit Ò, pò cha nö meuk nuk pinngangkūö tī Ò, nö i yik tövahav. 3 Ngaich yônlö Yēsū nö i kui ṙôngö, ngaich ūichngöre nö holtö yik mahaköp. 4 Ngaich ngam paratīn yik Yahūti nö röhta, ngam tö paska invëka. 5 Chingôhòl kūöre Yēsū, ngaich ngëichkö yik tömaṙôngö nö yihtöre nö in Ò; ngaich ngö ṙô tö Filip, Isuh öivöh havah ròtī, hòṅ vē nö nyā? 6 Ṙô Ò an angū-ö nö kalahan; pòn akahalōn Anga-aṅ töp tīre. 7 Ngaich ngö ṙô Filip, nö sapṙô Ò, Nëtòng nup öre rupīö, ṙāi ròtī, ngaich öt kô-òrekūö cha-a, nöng kö rahëchvat öre. 8 Hĕng taka ök mahaköp nö in Ò, Antarū, kahëm Sīmōn Pītör, tö ngö ṙô tö Ò. 9 Hĕng taka öp ihih nyīö, tö taneūyö aṅ-in tö parli ròtī, nët nòng kun kāḵ inrē. Asuh nup anū-ö nö i töngatī ṙôngö? 10 Ngaich ngö ṙô Yēsū, Tölṙô më tarik nö ūichngöre. Töpōyen nuk umuh tingūyö in e, Ūichngöre ngaich më tarik; taneūi köṅny tum taka. 11 Kēḵ minë ròtī ngaich Yēsū, keuheūthëṙô ngaich nö ha-öiny ngam Tēv, ngaich katölhökūö cha yik tö ūichhaka, i ṙôken lōn cha. 12 Ngaich hē cha nö tööḵngen, ngaich ngö ṙô Anga-aṅ tö yik mahaköp. Hamūl nup tölaköla, nup chööḵkūö, hòn öt tömëchiyö. 13 Ngaich hamūlö u cha-a, nët sīön kumvôkö, nuk nö tööḵlö tö nuk tölaköla, aṅ i nuk tö taneui parli ròtī, nuk chööḵkūö yik tö ngaich nö nyā. 14 Ngaich hē më tarik nö meuk ngam minkahngö tī Ò, ngö ṙô cha-a, Kô ön ngòh nö pròfĕt, ngòh yamih nö ing panam. 15 Akahalōn Ang Yēsū tö cha nöng hòṅ kētöre tö Ò, nö vīlen Ò nö rācha; lökten Anga-aṅ nö ṙūöhöngre nö hēk, nöng hĕng taka, nö i kui rôngö.
Kiröön Kūi Mai Ang Yēsū
16 Haraptöre ngam harap, ngaich chuh ik mai yik mahaköp. 17 Ngaich yôklö cha-a nö el kupòk, hòṅ havāngngöre nö i Kafarnahum. Sangūla angū-ö; ngaich nöng öl Yēsū nö yihtöre nö in cha. 18 Ëlu inrē ngam mai; pòn kalēḵ ök kuföt. 19 Ngaich hē cha nö lūöi, fën mail rô-òlkūö nö keūtöre; meūkö Yēsū cha-a nö kiröönngöre nö i kui mai; ngaich haröhtöre nö im kupòk; ngaich pa-ekūö cha-a. 20 Ngö ṙô pöri Anga-aṅ tö cha, Chū-ö Chini; ui pa-ekūö. 21 Hòṅ hayôklen Ò cha-a ngaich nö el kupòk; ngaich iṙūö im panam ngam kupòk, ngam chahuhu cha.
Chööhö Yēsū Yik Tömaṙôngö Tarik
22 Im huṙöich yik tömaṙôngö töngngöh nö im tahëng lā kaha ngam mai, nö öt maheūṅku tö tahëng nòng kupòk umuh, höng humeng nòng; rö-ö pöri Yēsū nö ël ò, nö i yik mahaköp; öt hōlu pöri tö Ò yik mahaköp nö ngaich. 23 (Yih pöri nuk kupòk nö ṙā-ang Tipĕriös röhta nö ik chūök cha nö nyā ròtī, unôichrit ngam Mā nö ha-öiny ngam Tēv.) 24 Ngaich hē më tömaṙôngö nö öt meūkö Yēsū nö umuh, öt rēhĕn yik haköptö Ò; yôklö cha-a ngaich nö el kupòk, ngaich yih nö i Kafarnahum, nö chöhö Yēsū.
Ṙòtī Nômö Ang Yēsū
25 Ngaich hē cha nö kôtökūö tö Ò, nö ik tahëng lā kaha ngam mai; ngaich ngö ṙô cha-a tö Ò, Rappī! Ĕhē tö yihih Öm ihih? 26 Ngaich ngö ṙô Yēsū tö cha, Tökô-ò ṙô Chin tö yīö, Chöhö Chu yin, öt kūö yīö meuk nuk minkahngö, tön kūö yīö nyā nuk ròtī, ngaich tööḵngen. 27 Un harëtnyö elmatre tökūö chamuhngöre nya-aṅkūö; harëtnyö elmatre pöri tökūö ngam töngngöh nya-aṅkūö, im nômö tö-örheūheu-aṅ, ngam kahëtö ngam Kūön Tarik min nö in yīö; pòkūö Ò An ngam Yöng, ngam Tēv nö minkahngö. 28 Ngaich ngö ṙô cha-a tö Ò, Asuh ap la-en ih, hòṅ ih la-evṙen tö la-en ngam Tēv? 29 Ngaich ngö ṙô Yēsū, nö sapṙô cha, Ngih ön yih la-en ngam Tēv, Ṙātö ellōnre yin im tahīntö Ò. 30 Ngaich ngö ṙô cha-a tö Ò, Asuh ap tī Meh minkahngö, hòṅ ih meuk, ngaich ṙātö ellōnre in Meh? 31 Asuh ap la-en Meh? Nyā manna yik muvöhngö ih, nö el-inchōnngö; sā kinūichngö e, nö ngö Kētö nya-aṅkūö cha Anga-aṅ, nö ṙā-ang el halīöngö. 32 Lökten Yēsū nö ngö ṙô tö cha, Tökô-ò ṙô Chin tö yīö, Rö-ö ök nö Môsös kamëtö nya-aṅkūö yīö, nö ṙā-ang el, halīöngö; tön ngam Yöng Chu kamëtö ngam tökô-en nya-aṅkūö, aṅ el halīöngö. 33 Ngih ön nya-aṅ aṅ im Tēv, yamih nö ṙā-ang el halīöngö, ngaich kētö nômö nö ing panam. 34 Ngaich ngö ṙô cha-a tö Ò, Mā! Örheūheu Man yēḵ, kētö e angū-ö nya-aṅ in ih. 35 Ngaich ngö ṙô Yēsū tö cha, Chū-ö Chin Ròtī nômö. Ngòh yamihtöre nö in Chu, öt kapahare min; ngòh ṙamātö ellōnre nö in Chu inrē, öt haṙëhe nômö min. 36 Sā ṙô Chu an ngaich tö yīö, Meūkö Chu yin ngaich, ngaich rö-ö ṙātö ellōnre, 37 Ṙòkhöre yip kahëtö ngam Yöng nö in Chu, nö yihtöre min nö in Chu, öt löktu nö havööṙökūö. 38 Pò Chu yih ṙā-ang el halīöngö, öt töla-evṙen tölōnre, höng lōn Ò ngam tamīnten Chu. 39 Ngih ön lōn Ò ngam tamīnten Chu, tö yip taṙòkhöre kahëtö Ò nö in Chu, nö öt hĕng tak tölöhlö; hachohlöng pöri mīnö ip manā-aṅ sakāmö. 40 Pò e nö lōn ngam Yöng Chu, tö yip taṙòkhöre mameuk ngam Kūön, ṙātö ellōnre inrē nö in Ò, nö nômuvö tö ngam tö örheūheu-aṅ, ngaich hachohlen cha Chū-ö min, ip manā-aṅ sakāmö. 41 Angū-ö lökten yik Yahūti nö uyëken Ò, pò Ò nö ngö ṙô, Chū-ö Chin Ròtī yamônti, ṙā-ang el halīöngö. 42 Ngaich ngö ṙô cha-a, Röh Ang ngòh nö Yēsū, nö Kūön Yôsĕf; akahakūö in tö nap Yöng Ò? Sitih Ang nö ngö ṙô, Yônti Chin, ṙā-ang el halīöngö? 43 Ngaich Yēsū nö ngö ṙô tö cha, Uh yin uyëḵa in re. 44 Öt hĕng tak tarik tö kô nö yihtöre nö in Chu, yē ngam Yöng ngam tamīnten Chu, nö öt tūökten ò, ngaich hachohlen ò Chū-ö min ip manā-aṅ sakāmö. 45 Ngö kinūichngö an, tö ṙô yip pròfĕt, Ngaich ṙòkhöre min cha-a nö haköptu tö ngam Tēv Ṙòkhöre yip hamang ṙô ngam Yöng, ngaich haköp, nö yihtöre nö in Chu. 46 Öt hĕng tak tö ngaich nö meuk ngam Yöng; höng Anga-aṅ ngam ṙamā-ang im Tēv, mameuk ngam Yöng. 47 Tökô-ò ṙô Chin tö yīö, Ngòh ṙamātö ellōnre nö in Chu, nômuvö tö ngam tö örheūheu-aṅ. 48 Chū-ö Chin Ròtī nômö. 49 Ṙòkngöre yik muvöhngö yīö nö kapah, yik nyamā manna nö el-inchōn. 50 Ngih ön Ròtī yamih nö ṙā-ang el halīöngö, nyahāṅ ngòh tarik, ngaich öt hōḵ nö kapah. 51 Chū-ö Chin tö-aṅ Ròtī, yamônti ṙā-ang el halīöngö. Yē öp tarik nyamā ngih Ròtī, örheūheu min nö aṅ. Alaha Chu an ngam kahëtö Chu min Ròtī, nö nômö ngih panam. 52 Hē e yik Yahūti nö lā-alkūö höö, nö ngö ṙô, Sitīh kanô-òṅ Ang ngòh tarik nö kētö nya-aṅkūö hī tö Alahare? 53 Lökten Yēsū nö ngö ṙô tö cha, Tökô-ò ṙô Chin tö yīö, yē yīö öt nyā Alaha ngam Kūön Tarik, òk Mahām Ò inrē, öt nômuvö yī-ö in re. 54 Ngòh nyamā ngih Alaha Chu, òk Mahām Chu inrē, nômuvö tö ngam tö örheūheu-aṅ; ngaich hachohlen ò Chū-ö min, ip manā-aṅ sakāmö. 55 Pò ngih Alaha chu nö nya-aṅkūö takô; ngih Mahām Chu inrē nö òk takô. 56 Ngòh nyamā ngih Alaha Chu, òk ngih Mahām Chu inrē, köp nö in Chu, in ò Chū-ö inrē. 57 Sā ngam tö-aṅ Yöng nö tīnten Chu, ngaich sā Chu Chū-ö aṅ im Yöng; ngatī ngòh nyamā-aṅ Chu, nö aṅ lökten in Chu. 58 Ngih ön Ròtī yamônti nö ṙā-ang el halīöngö; öt sā nya-aṅ yik muvöhngö yīö, yik tökapah nö ngaich. Ngòh nyamā ngih Ròtī, örheūheu min nö aṅ. 59 Ṙô Yēsū nun anu-ö, hē Ò nö el chūök vine-eṅkūötēv, nö i Kafarnahum.
Minë Ṙô Im Nômö Tö-örheūheu Aṅ
60 Maṙôngö yik haköptö Ò tö ngö ṙô, hē cha nö hāngö e, Tökihngen ön ngih ṙô. Achīö öp tökô nö hāngö e? 61 Akahaiṙen pöri Yēsū, tö yik haköptö Ò nö uyëkö e; ngaich ngö ṙô tö cha, Angū-ö öng insökngö yīö? 62 Sitīh öi min, yē yīö meuk ngòh Kūön Tarik nö yônlö nö im chūökre nö lā-urĕh? 63 Ngam ma-alaha an tö aṅhaṅ tī; öt kanôluṙô an ngam alaha. Ma-alaha nun në ṙô Chu tö yīö, nômö inrē. 64 Rēvre pöri yip in yīö, töt ṙamātö ellōnre. Pò Yēsū nö ha-eheten mikahlōn tö yik tötṙamātö ellōnre, tö öp kamëḵngen Ò inrē. 65 Ngaich ngö ṙô Anga-aṅ tö cha, Angū-ö an löknyö ṙô Chu tö yīö. Öt hĕng tak tarik tö kô nö yihtöre nö in Chu, yĕn öt kine-eṅkūö ò tö ngam Yöng. 66 Maṙôngö yik haköptö Ò ṙamāngen Ò, unôichrit e; ngaich öt holröön Ò nö kiröönngöre. 67 Lökten Yēsū nö ngö ṙô tö yik tö nët sīön, Hòṅ ṙāngen Chu öi yī-ö inrē? 68 Ngaich ngö ṙô Sīmōn Pītör, nö sapṙô Ò, Mā! Chuh in chīö öi min? I minë ṙô Meh, an ngam nômö tö örheūheu-aṅ. 69 Ṙātö ellōnre īhö ngaich, akahalōn inrē, tö Meh Öm Töhet aṅ im Tēv. 70 Ngaich ngö ṙô Yēsū tö cha, Röh Öich katöllen yīö, yī-ö tö nët sīön tak? Ngaich hĕng tak öp aṅ in yīö nö sī-ö. 71 Ṙôten Yūtā Anga-aṅ ök kūön Sīmōn Iskaryôt; pòn anga-aṅ kamëḵngen Ò, tö hĕng tak aṅ i yik tö nët sīön.
Yēsū Tö Yik Kahëm Ò
1 Lök i Kelelī Ang Yēsū, unôichrit u pòn sōḵ nö lök i Yūtā, pò yik Yahūti nö lukkenre nö hòṅ fëlngen Ò. 2 Röhta ök paratīn yik Yahūti, paratīn Inrūkui invëka. 3 Lökten yik mëm Ò, kahëm Ò inrē, nö ngö ṙô tö Ò, kiröönngöre Man, kuṙòh, chuh Yūtā, hòṅ yip haköptö Meh nö meuk nup la-en Meh. 4 Pòn öt tarīkuvö mu-ulāikenre nö la-evṙen, ngaich lukkenre nö hòṅ eūka. Yē Meh la-evṙen tö u, hameuktöre Man yēḵ ing panam. 5 Pò yik mëm Ò, kahëm Ò inrē, nö öt rĕhēn nö ṙātö ellōnre nö in Ò. 6 Ngaich ngö ṙô Yēsū tö cha, Öl ap ṙētak Chu nö yih, tö örheūheu pöri ngam ṙētak yīö ihih. 7 Öt kô ön ngih panam nö surīkhen yīö; surīkhen Chu pöri angū-ö; pò Chu hameukhömat e tö nup la-en e nö tötlöök. 8 Kuṙòh, kiröönngöre yin yī-ö im paratīn; öl Chin Chū-ö kiröönngöre, i ngih paratīn; pòn öl tö yihih ngam ṙētak Chu. 9 Keuheūthëṙô Anga-aṅ tö cha, ngaich nöngngöh nö i Kelelī.
Ik Tökiröng Sakāmö Nuk Inrūkui In-e Yēsū
10 Hē yik mëm Ò kahëm Ò inrē, nö ngaich nö chuh im paratīn, ngaich möl Anga-aṅ nö kiröönngöre, öt hangāṅlkenre, höng ulāikenre. 11 Lökten yik Yahūti nö chöhan, nö im paratīn; ngaich ngö ṙô, Isuh Apa? 12 Ngaich ulāikôre yik tömaṙôngö; rēvre yik tö ngö ṙô, Tömaṙôngö; rēvre yik tö ngö ṙô, Tölöök An nö tarik. Hö-ö, ngö ṙô yik inrē; hachōḵngö vē tö maṙôngö An, nö lō-ongkūö. 13 Öt hĕng tak tarik mahangāṅlnyôre tö Ò; pòn pa-ekūö tö yik Yahūti. 14 I ranòngti ngam paratīn pöri, Ang Yēsū nö chuh ël ök töhet chūök; ngaich haköphöti. 15 Ngaich pingang kūö yik Yahūti, ngö ṙô cha-a, Sitih huneū-euṅ ṙô Ang ngòh Tarik, nöng töt mahaköp? 16 Ngaich sapṙô cha Yēsū, nö ngö ṙô, Öt aṅ in Chu an ngam inköphöti; tön aṅ im tamīnten Chu. 17 Yĕn tarīkuvö tö hōḵ nö la-ev-ṙen tö lōn Ò; ngaich kô-òren Anga-aṅ nö akahalōn tö ngam inköphöti, yĕn aṅ im Tēv, hēk yĕn ṙô Chu kahngenre. 18 Ngòh töng ṙô töre, lamukkenre nö hòṅ eū-eu. Ngòh lamukkö ineū-euṅ ngam tamīntöre, anga-aṅ tökô-en; öt īnu anga-aṅ tö michūṙen. 19 Röh ang nö Môsös kame-eṅkūö yīö tö ngam chöngö? Ngaich öt hĕng tak tö yīö, tö la-evṙen tö e, kūöyòh öi lukkenre hòn fëlö Chu? 20 Ngaich ngö ṙô yik tö maṙôngö, Sī-u aṅ-in Man. Achīö ap lamukkenre nö hòṅ fëlö Meh? 21 Ngaich ngö ṙô Yēsū tö cha, Hĕng ök la-en Chu; ngaich yī-ö ṙòkhöre pinngangkūö. 22 Angū-ö an lökten Môsös nö kē-ĕkūö yīö tö ngam tunnyinyngö; (Rö-ö pöri angū-ö nö aṅ i Môsös; tön aṅ i yik muvöhngö hī;) ngaich hē el sakāmö yī-ö tunyinyngö tarik. 23 Yē ngòh tarik nö tunyīnyi hē el töhet sakāmö, pòn sōtu ngam chöngö Môsös nö filāli; līn öi in Chu, pò Chu lööken tī tö tarik hē el töhet sakāmö? 24 Ui kahôka sā matre; ngam tötmichūṙen pöri kinṙôka.
Angā-aṅ Ang Ngòh Misāyā?
25 Hē e yik rēvre aṅ Yerūsalem nö ngö ṙô. Röh Ang nö ngòh tarik, ngòh lōn cha nö fahël cha? 26 Yĕh meuk; hangāṅlnyöṙôre An; ngaich cha-a nö öt ṙô-òvö tö Ò. Akahalōn yip vöh mahayöng tö Ò, nö Anga-aṅ Kristū? 27 Akahalōn in yih ayī-ö tö ṙāngö ngòh tarik; hē Kristū pöri nö yih, öt hĕng tak tö-akahalōn tö ṙeūngö Ò. 28 Lökten Yēsū nö ngö ṙô, nö pōitô nö haköphöti, nö ël ök töhet chūök, Akahakūö yin tö Chu; hĕnghöre akahalōn inrē tö ṙeūngö Chu. Rö-ö Chin kahngenre yih; tökô-en pöri ngam tamīnten Chu, ngam öt mikahkūö yīö. 29 Akahakūö Chū-ö tö Ò; pò Chu ṙā-ang in Ò; Anga-aṅ tamīnten Chu. 30 Ngaich hòṅ kēḵ An cha-a; öt tarīku pöri lamūöltö tīre nö in Ò; pòn öl ngam ṙētak Ò nö yih. 31 Maṙôngö pöri yik ṙamātö ellōnre aṅ i yik tömaṙôngö; ngaich ngö ṙô cha-a, Yē Kristū min nö yih; mööḵlö tī Öp min Anga-aṅ tö minkahngö, tö në tī ngòh tarik?
Tīni Yik Kumyung Nö Kē-ě Yēsū
32 Hang ṙô yik tömaṙôngö yik Feresī, nö ulāikôre tö inlahen Ò; lökten yik mākūö kūönṙô, yik Feresī inrē, nö tīnngö tösökhak nö kamëḵ an. 33 Ngaich ngö ṙô Yēsū, Rahëchtören Chin in yīö; ngaich chuh im tamīntöre. 34 Chöhö Chu yin min; ngaich öt kôtökūö min tö Chu; öt kô yin yih im Chūök Chu. 35 Lökten yik Yahūti nö ngö ṙô nö in re, Chuh yih Angvöh min ngòh tarik, töp lökten hī öt kôtökūö min tö Ò? Chuh i yip töparāti Angvöh min, i yip tahëng mihëṅṙö tarik, nö haköpten cha? 36 Asuh öng ngih ṙô Ò, Chöhö Chuh yin min; ngaich öt kôtökūö min tö Chu. Öt kô yin yih im chūök Chu?
Töhëmlö Mak Nômö
37 Im manā-aṅ tökiröng sakāmö ngam paratīn sökhaka Ang Yēsū, ngaich pōitô nö ngö ṙô, Yĕn tarīkuvö töhaṙëhe nômö, hökngen ò nö yihtöre nö in Chu, nö òk. 38 Ngòh ṙamātö ellōnre nö in Chu, sā ṙô ngam tö het līpöre, lök nyö ellōn ò nup min tahël tö hëmnyi nö tö aṅ mak. 39 Ṙô Ò ön ngih tö ngam Töhet Fanöinylö, ngam taneūngen yip ṙamātö ellōnre nö in Ò. Pò ngam Töhet Fanöinylö nö öl nökētu; pòn öl Yēsū nö hapōilöngö.
Harēvöre Yik Tömaṙôngö Tarik
40 Rēvre yik tömaṙôngö tö ngö ṙô, hē cha nö hang në ṙô; Kô Ön ngòh nö ngam pròfĕt. 41 Ngö ṙô yik tahëng tak, Anga-aṅ An Kristū. Rēvre pöri yik tö ngö ṙô, Löknyö i Kelelī ap Kristū. 42 Röh öng ngam töhet līpöre nö ngö ṙô, tö Kristū nö lamökngörit in Tāvit, nö ṙā-ang Petlihem, ngam panam Tāvit, misī? 43 Ngaich yik tömaṙôngö nö kö harēvngöre tö pòkūö Ò. 44 Rēvre tö cha yik tö hòṅ kēḵ An, öt tarīku pöri lamūöltö tīre nö in Ò.
Öt Ṙinātulōn Yik Yahūti Mahayöng
45 Hē yik tösökhaka nö yih nö i yik mākūö kūönṙô, yik Feresī inrē; ngaich ngö ṙô cha-a tö cha, Kūöyòh öi öt kumten Ò? 46 Ngaich ngö ṙô yik tösökhaka, Öt tarīkuvö töngatī ṙô, nö kahôka. 47 Ngaich ngö ṙô yik Feresī tö cha, Ngaich öi yī-ö inrē halō-oikūö? 48 Mā-av hòng ṙamātö ellōnre nö in Ò? Feresīṙu hòng? 49 Tötkôlò yip tömaṙôngö, yip tötakahalōn tö ngam chöngö. 50 Ngaich ngö ṙô Nikòtimös tö cha, ök yamihtöre nö in Yēsū tö hĕng tak nö aṅ in cha, 51 Kahòkken tarik öng ngih chöngö hī yĕn öl nö hang, akahalōn inrē töp inlahen ò? 52 Ngaich ngö ṙô cha-a tö ò, Aṅ Kelelī öm me-eṅ inrē? Ngëicha man yēḵ, tön öt pròfĕt tu lamöknyö i Kelelī, 53 Ngaich cha-a nöng kö chuh patīre.
Kikānö Tökôti Nö Fāluṙen
1 Ngaich Yēsū nö chuh kui ap Rôngö Ôliv, 2 Ngaich ka-euilökūö tö peuheū Anga-aṅ nö hēk nö yihtöre nö el ök töhet chūök; ngaich ṙòkhöre yik tarik nö yihtöre nö in Ò. Ngaich ūichngöre Anga-aṅ nö haköpten cha. 3 Ngaich yik mahaköptö chöngö, tö yik Feresī inrē, nö kēḵ tök kikānö tökôti nö asĕhka; ngaich asöklen ò nö ellōn; 4 Ngaich ngö ṙô cha-a tö Ò, Mahaköphöti; tökôti ön ngòh kikānö nö asĕhka, ṙònghöichṙen. 5 Ngaich Môsös nö im chöngö nö hōten ih kulehngökui töngatī; Sitih ṙô Öm Me-eṅ tö e? 6 Angū-ö ṙô cha nö kalahan; pòn hòṅ löknyuṙô nö vënyen Ò. Sōntöre pöri Yēsū, ngaich kūich el tumlat, nö aṅtī tö kuntīre. 7 Höng iṙuhöṙô cha-a nö hatönan; hōklöre Anga-aṅ, ngaich ngö ṙô tö cha. Öp tötfāluṙen nö in yīö, höktö tī ò yēḵ, nö urēhĕ tī nö kulëhan. 8 Ngaich hēk Anga-aṅ nö sōntöre, nö kūich el tumlat. 9 Ngaich hē cha nö hāngö e, kö chanuhure cha-a ngaich, urĕh yik maṙöinylö, ngaich hēk yik ṙālö. Höng ṙā-ai Yēsū nöng hĕng tit tak, i chūökre ök kikānö nö sökhaka nö ellōn. 10 Hōklöre Ang Yēsū, ngaich ngö ṙô tö ò, Me-eṅ kikānö; isuh yip vamënyen meh? 11 Ngaich ngö ṙô anga-aṅ Hö-ö, Mā. Ngaich ngö ṙô Yēsū, Öt rēhĕn Chin Chū-ö kahòkken meh. Kuṙòh ngaich man; töngamuhangen um hēk köölö fālen.
Yēsū An Hanātö Ngih Panam
12 Hēk Yēsū nö ve-ekūö cha, nö ngö ṙô, Chū-ö Chin Hanātö ngih Panam; ngòh tamömrit Chu öt lök el sinngūlö; hanātuvö pöri tö ngam nômö. 13 Ngaich ngö ṙô yik Feresī tö Ò. Höng kahngôre Man eūköre, öt tökô-en an ngam aheūkö Meh. 14 Ngaich ngö ṙô Yēsū, nö sapṙô cha, Yē Chu pòrô kahngôre eūköre, tökô-en an ngam aheūkö Chu, pò Chu akahalōn tö ṙāngöre, chuhure inrē. Öt akahalōn pöri yī-ö tö ṙāngö Chu, hēk chuhu Chu. 15 Kahôka yin yī-ö, sā matre; öt kahòkken tarik Chin Chū-ö. 16 Yē Chu öre kahôka, tökô-en ngam kinṙôka aṅ in Chu; pò Chu öt höng hĕng tak, tön Chū-ö tö ngam Yöng inrē, ngam tamīnten Chu. 17 Kūichi an inrē nö im chöngö yīö, tö aheūkö tönët tak nö tökô-en. 18 Chū-ö Chin ameūköre kahngôre, eūken Chu inrē ngam Yöng, ngam tamīnten Chu. 19 Ngaich ngö ṙô cha-a tö Ò; I suh Ap Yöng Meh? Ngaich ngö ṙô Yēsū, nö sapṙô Cha, Öt rēhĕn yin ahakūö töm Yöng Chu. Yē yīö akahakūö tö Chu, ngaich kô-òren öi akahakūö töm Yöng inrē. 20 Anū-ö ṙô Ò nö el chūök tökētuvö, hē Ò nö haköphöti nö el ök töhet chūök. Ngaich öt tarīku kamëḵ an; pòn öl tö yihih ök ṙētak Ò.
Öt Kôyin Chuh Ip Chaheūhu Chu
21 Ngaich hēk Anga-aṅ nö ngö ṙô tö cha, Kiröönngöre Chin; chöhö Chu min yī-ö; ngaich kapah i nup tököölre; öt kô yin chuh ip chahūhu Chu. 22 Ngaich ngö ṙô yik Yahūti, Fëlngöre Angvöh min, töp lökten Ò nö ngö ṙô, Öt kô yin chuh ip chahūhu Chu? 23 Ngaich ngö ṙô Anga-aṅ tö cha, Ṙama-ang lataṙeū yin yī-ö; ṙamā-ang lātulöng Chū-ö Aṅ ngih panam yin yī-ö; rö-ö Chū-ö aṅ ngih panam. 24 Lökten Chu ngö ṙô tö yīö, Kapah yin min i në tököölre. Pò yīö, yē yīö, öt ṙātö ellōnre tö Chu Öich Anga-aṅ, kapah yī-ö min i nup tököölre. 25 Ngaich ngö ṙô cha-a nö hatönan, Achīö Öm Me-eṅ? Ngö ṙô Ang Yēsū tö cha, Höng sā ngam ṙô Chu ngaich tö yīö. 26 Pōitöre ṙô Chin in yīö, kahôka inrē. Tökô-en An ngam tamīnten Chu; nup ahang Chu in Ò, anū-ö ṙô Chu ing panam. 27 Öt akaha elnang cha-a tö Ò nö ṙô tö ngam Yöng. 28 Lökten Yēsū nö ngö ṙô; Yē yīö min hatamlö ngòh Kūön Tarik, ngaich möl yī-ö min akahalōn tö Chu Öich Anga-aṅ, öt kanahnguṙen Chin tö la-enre; sā ṙô ngam Yöng pöri nö haköpten Chu, ngatī ṙô Chū-ö tö në. 29 Holtöṙah Chu An ngam tamīnten Chu; rö-ö An nö ṙāngen Chu höng hĕng taka; pò Chu örheūheu la-evṙen tö nup lōn Õ. 30 Hē ṙô Ò tö u, maṙôngö ngaich yik ṙamātö ellōnre nö in Ò.
Töt Hakövö Hēk Töhakövö
31 Lökten Yēsū nö ngö ṙô tö yik Yahūti, ṙamātö ellōnre nö in Ò, Yē yīö ngöhören ing ṙô Chu, ngaich yī-ö tökô-en mahaköp in Chu. 32 Akahalōn yī-ö min tö ngam kanô-en, ngaich ngam kanô-en, min nö luhnyen yīö. 33 Ngö ṙô cha-a, nö sapṙô Ò, Kūön Aprahām in ihö; öt hĕng heuh inkövö in tö töng tarik. Sitih Öm ngö ṙô, Luhnyu yin min? 34 Ngaich sapṙô cha Yēsū, nö ngö ṙô, Tökô-òṙô Chin tö yīö, Ṙòkhöre yin vē tököölö fālen, nö töhakövö töm tökööl. 35 Rö-ö an ngam töhakövö nö örheūheu nöngngöh nö i patī; ngam kūön pöri tö-örheūheu nöngngöh. 36 Lökten yē ngam Kūön nö luhnyen yīö, ngaich luhnyu takô yī-ö. 37 Akahalōn Chin tö yīö kūön Aparahām; ngaich sönngenre yī-ö hòṅ fëlö Chu, pò ngam ṙô Chu nö öt chūöku nö ellōn yīö. 38 Ṙô tö nup maheuṅkre Chin Chū-ö im Yöngre; ngatī inrē yī-ö la-evṙen tö nup ahang yīö ip yöng yīö. 39 Ngaich ngö ṙô cha-a nö sap ṙô Ò, Aprahām ap yöng ih. Ngaich ngö ṙô Yēsū tö cha, Yē yīö öre kūön Aprahām, ngaich la-evṙen öre yī-ö, tö la-en Aprahām. 40 Ngaich pöri yī-ö töngamuh hòṅ fëlngen Chu, pöich vame-eny nang yīö töm kanô-en, ngam ahang Chu im Tēv. Öt ngatī ök Aprahām. La-evṙen yin yī-ö tö la-en ap yöngre. 41 Ngaich ngö ṙô cha-a tö Ò, Rö-ö in ihö kūön tö ṙōl tak; höng hĕng tak An ngam Yöng ih, ngam Tēv. 42 Ngaich Yēsū nö ngö ṙô tö cha, Yē ngam Tēv öre nö Yöng yīö, ngaich öre yī-ö hāngenlōn tö Chu; pò Chu yih ngaich, ṙā-ang im Tēv. Öt rēhĕn Chin kahngenre yih; tön tīnten Chu Anga-aṅ. 43 Kūöyòh öi öt akaha elnang tö ṙô Chu? Tön kūö yīö öt kô hang ṙô Chu. 44 Ngam sī-ö an yöng yīö; ngaich la-evṙen yī-ö tö nup lōn ngam yöngre. Famël tarik an ik raneh; öt mi-im kanô-en, pòn öt kanô-envö nö in ò. Ṙô-òvö anga-aṅ nö minyôiny-aṅ, yōm minnyôiny-aṅ inrē. 45 Ṙô tö ngam kanô-en Chū-ö; lökten yīö öt ṙātö ellōnre in Chu. 46 Achīö öp tö yīö, vamënyö tökööl in Chu? Yē Chu Öich kô-ò ṙô, kūöyòh öi öt ṙātö ellōnre in Chu? 47 Ngòh aṅ im Tēv, hang ṙô ngam Tēv anga-aṅ; angū-ö an lökten yīö yī-ö öt hang, pò yīö öt aṅ im Tēv.
Yēsu Nāṅ Aprāham
48 Ngaich ngö ṙô yik Yahūti tö Ò, Röh öi huveū-eu ṙô tö Meh, Öm aṅ Samariā, tö sī-u aṅ in? 49 Ngaich sapṙô cha Yēsū, nö ngö ṙô, Öt sī-u aṅ in Chin. Milēḵṙen pöri tö ngam Yöng re; ngaich yī-ö öt milēḵṙen tö Chu. 50 Rö-ö Chin lukkö kanôlòre; hĕng taka An ngam lamūka, kamhôṅka inrē. 51 Tökô-ò ṙô Chin tö yīö, Yĕn hĕng tak tarik mahaköp ṙô Chu, öt hōḵ min anga-aṅ nö kapah. 52 Ngaich ngö ṙô yik Yahūti tö Ò, Akahalōn takô in ngaich, tö Meh sī-u aṅ in. Kapah ök yih Aprahām tö yik pròfĕt inrē; ngaich Me-eṅ ngö ṙô, Yĕn hĕng tak tarik mahaköp ṙô Chu, öt hōḵ min anga-aṅ nö kapah. 53 Tömööḵlö ṙôkö Öm Me-eṅ tök yöng ih Aprahām, ök tökapah? Kapah inrē yik pròfĕt. Achīö Öm Me-eṅ vī-ilre? 54 Ngaich sapṙô cha Yēsū, nö ngö ṙô, Yē Chu eū-eure, höng tö rö-ö ngam ineū-euṅ Chu. Ngam Yöng Chu An ameū-euṅ Chu, ngam Tēv yīö, tö ṙô yīö. 55 Ngaich rö-ö yī-ö akahakūö tö Ò; akahakūö pöri Chū-ö tö Ò. Yē Chu öre ngö ṙô, öt akahkūö Chin tö Ò; ngaich Chū-ö öre, sā yīö, töminyôiny-aṅ, Tön akahakūö Chin tö Ò; ngaich haköp ṙô Ò. 56 Töṙāmölōn ök yöng yīö Aprahām, nö meuk ngih sakāmö Chu. Ngaich meūkö e anga-aṅ ngaich ṙāmölōn. 57 Lökten yik yahūti nö ngö ṙô tö Ò, Öl Man taneui anāi samyeūheu; ngaich Öm meūkö Aprahām hòng? 58 Ngaich Yēsū nö ngö ṙô tö cha, Ngaich Chin misī, urēhĕkūö finötnyö Aprahām. 59 Kēḵ ihong cha-a ngaich nö hòṅ kulehan; hanyatngöre ngaich Yēsū, ngaich kunyī-inyre, nö ṙā-ang el ngam töhet chūök.
Halanken Ök Tö Nehngenren Tötmeuk
1 Ngaich hē Ò nö chööḵöng muh, hĕng taka ök tarik maheuṅk Ò, töt meuk tö finötnyöre. 2 Ngaich yik haköptö Ò nö hatönan, nö ngö ṙô, Rappī; achīö öp tököölö fālen, ngòh tarik? Nap yöng ò ṙöng? Töp lökten ò nö ötmeuk, nö fötnyu? 3 Ngaich ngö ṙô Yēsū, nö sapṙô cha, Ötrēhĕn nö ngòh tarik, rö-ö nö rēhĕn nap yöng ò, tököölö fālen. Hōtu pöri minë la-en ngam Tēv nö hameuktu nö in ò. 4 Hòṅ la-evṙen in ayī-ö tö la-en ngam tamīnten Chu, yē e nö ṙòngmö sakāmö. Yih an ngam hatööm, hē tarik nö öt kô nö la-evṙen. 5 I saha Chu ing panam, Chū-ö Chin Hanātö ngih panam. 6 Keuheūthëṙô Anga-aṅ tö e, ngaich kösnyö pēngöre nö el tumlat; ngaich kalūöich ök tilin tö e; ngaich lūöp tö mat ò tö ngam tilin. 7 Ngaich ngö ṙô tö ò, Kuṙòh; söich matre man, el ap mak Sīlōm. (Ngam töngö, Tīniyö.) Lökten ò nö kiröönngöre, ngaich söich matre; ngaich yih nö meuk. 8 Ngaich ngö ṙô yik hol ò, yik mameūkan nö lā-urĕh nöng havëḵa, Röh ang nö ngòh amūichhak, nöng havëḵa? 9 Anga-aṅ an, ngö ṙô yik tahëng; Rö-ö höng sā ò an, ngö yik inrē. Chū-ö chini, ngö ṙô pöri anga-aṅ. 10 Sitih lökten pömri, löpnyörekūö mat? Ngö ṙô cha-a, nö hatönan. 11 Ngaich ngö ṙô anga-aṅ nö sapṙô cha, Yēsū Minënyö öp tarik, vamī tilin; ngaich lūöp tö mat chu; ngaich ngö ṙô tö chu, Kuṙòh; söich matre man i Sīlōm. Kiröönngöre Chū-ö ngaich öich söich matre, ngaich meuk. 12 Ngaich hatönan cha-a, nö ngö ṙô, Isuh Apa? Hö-ö chin akahlōn, ngö ṙô anga-aṅ.
Chöh Inlāha Lanööken Yik Feresī
13 Ngaich kēten ò cha-a, nö i yik Feresī, ök tötmeuk nö lā-urĕh. 14 Töhet ök nö sakāmö, hē Yēsū nö vī tilin nö löpnyökūö mat ò. 15 Lökten yik Feresī nö hēk nö hatönan, töp lökten ò nö meuk. Ngaich ngö ṙô anga-aṅ tö cha, Hapātö mat chu öp tö tilin; söich matre Chū-ö; ngaich meuk. 16 Rēvre yik Feresī tö ngö ṙô, Rö-ö öp tarik Anga-aṅ, nö aṅ im Tēv; tön öt haköp töhet sakāmö ap. Ngö ṙô pöri yik tahëng, Sitih kanô-òṅ ang ngòh tarik tököölö fālen, nö ngatī la-en tö minkahngö? 17 Ngaich cha-a nö kö harīkngöre lōn. Lökten cha nö ngö ṙô nö hēk, tök tötmeuk sin tarīk, Sitih ṙô öm me-eṅ tö Ò, i tī Ò nö löpnyökūö mat meh? Ngaich ngö ṙô anga-aṅ Lohten Öp nö pròfĕt. 18 Öt nyātölōn yik Yahūti tö ò sin nö tötmeuk, ngaich meuk nö hēk; höng havëtö nak yöng ò cha-a. 19 Ngaich hatönö cha, nö ngö ṙô, Kūön nāṅ ang ngòh, ngòh töfötnyu nö ötmeuk, tö ṙô yīö? Sitih lökten ang nö meuk töngamuh? 20 Ngaich ngö ṙô nak yöng ò, nö sapṙô cha, Akahakūö an, tö ngòh nö kūön ai; tö ò inrē nö fötnyu nö öt meuk. 21 Öt akahlōn pöri töngamuh töp lökten ò nö meuk. Hatönan; pōyö an; kô-òren nö kahngôre. 22 Pa-ekūö nak yöng ò tö yik Yahūti; lökten cha nö ngatī ṙô; pò yik Yahūti nö ha-ehangen, nö hōtö ngòh tarik ma-akahngen Yēsū nö Kristū, ngaich ahōṙi anga-aṅ nö ṙā-ang ik māṅ cha. 23 Lökten nak yöng ò nö ngö ṙô, Pōyö an; hatönan. 24 Lökten cha nö havëtö ök tötmeuk sin tarik, nö hēk; ngaich ngö ṙô tö ò, Ha-öiny ngam Tēv man; akahalōn in töp tarik anga-aṅ nö tököölö fālen. 25 Ngaich ngö ṙô anga-aṅ nö sapṙô cha, Öt akahalōn chin Chū-ö, yē ò nö tököölö fālen. Höng hĕng öp mikahlōn chu, tö chu sin tötmeuk, ngaich meuk töngamuh. 26 Lökten cha nö ngö ṙô tö ò, Sitih tī öp tö meh? Sitih inlahen öp nö löpnyökūö mat meh? 27 Ngaich ngö ṙô anga-aṅ nö sapṙô cha, Fömngöre ṙô chin taheui tö yīö; ngaich yī-ö öt hang. Kūöyòh öi hòṅ hāngö e hēk? Hòṅ mahaköp öi yī-ö inrē in Ò? 28 Me-eṅ man mahaköp in Ò, ngö ṙô cha-a, nö miyëḵṙô, mahaköp in ihö, in Môsös. 29 Akahalōn in tö ngam Mā Tēv nö ṙô-òv nö in Môsös; öt akahalōn pöri tö ṙāngö ngòh tarik. 30 Ngaich ngö ṙô ök tarik, ngö sapṙô cha, Tötohhë ön ngih, tö yīö öi öt akahalōn tö ṙāngö Ò; ngaich yih Anga-aṅ nö löpnyökūö mat chu. 31 Akahalōn in, tö ngam Tēv nö öt hang ṙô tököölö fālen, Yē ngòh tarik pöri nö töpa-ekūö tö ngam Tēv, lök lōn Ò inrē, anga-aṅ töhāngö ṙô tö Ò. 32 Hēten tö ranehlö ngih panam, öt hĕng heuh öi hang tö hĕng tak nö löpnyukūö mat, töfötnyu nö ötmeuk. 33 Yē öp tarik öre nö öt aṅ im Tēv, ngaich öt kanô-òṅvö. 34 Ngaich ngö ṙô cha-a, nö sapṙô ò; Höng töfötnyu man me-eṅ i tökööl; ngaich öm haköpten ih hòng? Ngaich ahōngen ò cha-a, nö ṙā-ang ik māṅre.
Töhet Ötmaneukö
35 Hāngö cha Ang Yēsū, nö ahōngen ò; ngaich kôtökūö tö ò, ngaich ngö ṙô, Ṙātö ellōnre ömeh i ngòh Kūön Tarik? 36 Ngaich ngö ṙô anga-aṅ nö sap ṙô Ò, Achīö Öp Anga-aṅ Mā? Hòṅ chu ṙātö ellōnre in Ò. 37 Ngaich ngö ṙô Yēsū tö ò, Meūkan man ngaich; Anga-aṅ An vame-eṅkūö meh töngamuh. 38 Ngaich ngö ṙô anga-aṅ Mā; ṙātö ellōnre chin. Ngaich sōntökūöre, nö i kūö Ò. 39 Ngaich ngö ṙô Yēsū, Kamlah Chin yih ing panam, hòṅ yip tötmeuk nö meuk; hòṅ yip tömeuk inrē nö vīngöre nö öt meuk. 40 Ngaich ngö ṙô tö Ò, yik rēvre Feresī, hamang në ṙô Ò, Öt meuk öi ihö inrē? 41 Ngaich ngö ṙô Yēsū tö cha, Öt inu yin öre tö tökööl, yē yīö öt meuk. Ngö ṙô pöri yī-ö töngamuh; Meuk in; ngaich höngngòh ngam tökööl yīö.
Inchōḵoṙô Tö Ngam Yōmpököre
1 Tökô-ò ṙô Chin tö yīö. Ngòh tötkumhēthötre nö lökhötkūö inkūp ngam kinlōngö minë pököre. Tahëngö talöökö pöri nö yôkhöt, mu-ulāyö an anga-aṅ, tötūmu inrē. 2 Yōm minë pököre an anga-aṅ, ngam kumhēthötre nö lökhötkūö inkūp. 3 Anga-aṅ tölöpnyukūö tö ngam yōm inkūp; hang ṙô ò minë pököre: minënyu ṙô anga-aṅ inrē, nö havëkö minë pököre ò, ngaich hachōḵoiny u. 4 Yē ò nö ṙòkhöre tī, tö minë pököre, urēhĕkūö u ngaich anga-aṅ; ngaich tömrit ò minë pököre; pò u nö akaha el nang tö ṙô ò. 5 Öt hōḵ anū-ö nö tömrit tahëng; falngöre pöri, nö ṙā-ang in ò; pòn öt akaha elnang tö ṙô yip tahëng. 6 Angū-ö ön ngih inchōḵoṙô Yēsū tö cha; öt akaha el nang pöri cha-a tö u, minë ṙô Ò tö cha.
Yēsū Tö Akāha Nö Yōmpököre
7 Lökten Yēsū nö hēk nö ngö ṙô tö cha, Tökô-ò ṙô Chin tö yīö, Chū-ö Chin inkūp minë pököre. 8 Ṙòkhöre yip mu-urĕh tö Chu, nö mu-ulāyö, tötūmu inrē; öt hang ṙô cha pöri në pököre. 9 Chū-ö Chin inkūp; ngòh kumhēthötre nö lökhöt in Chu, hayöökaṙen min anga-aṅ; ngaich kuhēt hötre, kunyī-inyre inrē, ngaich kôtökūö tö nya-aṅkūöre. 10 Höng yamih pöri ngòh mu-ulāyö nö ulāyö, fëlhanga inrē. Yih Chū-ö, hòṅ cha nö nômu, ṙuhölre ṙôken angū-ö. 11 Chū-ö Chin tö-akaha Yōmpököre. Pòkūö në pököre, ngòh tö akaha Yōm nö kēḵngö nômöre. 12 Ngòh töreushu, rö-ö nö yōm, öt tö pökörevö; ngaich hē ò nö meuk ngam am aṅ el-inchōn nö yihtöre, ṙā-ang tö minë pököre, ngaich falngöre. Ngaich ngam am aṅ el-inchōn nö kāpö u, ngaich pirātngö u. 13 Kūö re anga-aṅ nöng töreushu, lökten ò nö öt chumkūöṙen tö minë pököre. 14 Chū-ö Chin tö-akaha Yōmpököre. Akahakūö chin tö nup Chū-öre; akahakūö nup Chū-ö inrē tö Chu. 15 Sā ngam Yöng nö akahakūö tö Chu; akahakūö Chū-ö inrē töm Yöng. 16 Kēḵngö nômöre Chin kūö në pököre. Pökörevö Chin tö tahëng; nup töt aṅ ngih kiteūm. Anū-ö nup inrē hachōkūö Chu, ngaich hang ṙô Chu min anū-ö; ngaich hĕng kiteūm nö elkatòh ngam töhĕng tak Yōmpököre. 17 Lökten An ngam Yöng nö hāngenlōn tö Chu; pò Chu kēḵngö nômöre; hòṅ Chu kē-ĕ e hēk. 18 Öt hĕng tak kamëḵngö e, nö ṙā-ang in Chu; kēḵngö e pöri Chū-ö kahngenre. Mihôiṅ Chin kēḵngö e; mihôiṅ öich kē-ĕ e hēk. Angū-ö an chöngö taneūngen Chu, aṅ im Yöng. 19 Ngaich hēk yik Yahūti nö harēvngöre, kūö në ṙô. 20 Ngaich maṙôngö yik tö ngö ṙô, aṅ in cha, Sī-u aṅ in An; kulō-ov inrē; kūöyòh öi hang ṙô Ò? 21 Ngaich rēvre yik töngö ṙô. Hö-ö nun në, nö ṙô tö sī-u aṅ in. Kô-òren ṙöng ang ngòh sī-ö nö löpnyökūö mat vē tötmeuk?
Sō-ovö Ang Yēsū
22 Hē e ök paratīn Tinfömlö, i Yerūsalem; laneūichö angū-ö hē e. 23 Ngaich lök ël ök töhet chūök Ang Yēsū; ël ök rittūi, tö Sòlòmön minënyi. 24 Yihtöre yik Yahūti, nö kiteūmtöre nö in Ò, ngaich ngö ṙô, I rô-òten Öm Me-eṅ kitöngkölōn ih? Halöökṙôre Man yēḵ; ve-eny nang ih, yē Meh Öm Me-eṅ Kristū. 25 Ngaich ngö ṙô Yēsū, nö sapṙô cha, Ngaich chin ve-eny nang yīö; ngaich rö-ö yī-ö ṙātö ellōnre. Eūken Chu nun inrē në la-en Chu, i mine-eny ngam Yöng Chu. 26 Öt ṙātö ellōnre pöri yī-ö; pò yīö öt aṅ i në pököre Chu. 27 Hang ṙô chu, nun në pököre Chu; akahakūö Chū-ö inrē tö u: tömrit Chu anū-ö inrē, 28 Ngaich kē-ĕkūö u Chū-ö tö ngam nômö tö-örheūheu-aṅ ngaich öt hōḵ min anū-ö nö ötkôlò; öt hĕng tak min fumlinynyö u, nö ṙā-ang eltī Chu. 29 Mööḵlö tī An ngam Yöng Chu nö kē-ĕkūö Chu, tö taṙòkhöre. Öt hĕng tak tökô nö filinynyö u, nö ṙā-ang eltī ngam Yöng. 30 Hĕng An Āyö, tö ngam Yöng. 31 Ngaich yik Yahūti nö kēḵ ihong nö hēk, nö hòṅ kulehan. 32 Ngaich ngö ṙô Yēsū tö cha, Pōyen nuk tölöök la-en Chu, hameuktö Chu in yīö, aṅ im Yöng. Öp yòh öp in u, lökten yīö hòṅ kulehe Chu? 33 Ngaich yik Yahūti nö ngö ṙô, nö sapṙô Ò, Rö-ö in kūö tölöök la-en, hòṅ kulehe Meh; tön kūö ötlinëkô; pò Meh Me-eṅ, höng tarik, ngaich vī-ire Öm Tēv. 34 Ngaich ngö ṙô Yēsū nö sapṙô cha, Röh öng nö ngö kinūichngö nö im chöngö yīö, Ngö ṙô Chin, Yī-ö yin tēv. 35 Yē cha nö tēv invëka, yip lööṙö ngam Tēv, (ngaich ngam töhet līpöre nö öt finlalken;) 36 Ngö ṙô yī-ö tö Ò, ngam ahetlö ngam Yöng, ngaich tīntu nö ing panam, Ötlēkôre Mana; pò Chu ngö ṙô, Kūön ngam Tēv Chin Chū-ö? 37 Ui ṙātö ellōnre in Chu, yē Chu öt la-evṙen tö në la-en ngam Yöng. 38 Yē Chu pöri la-evṙen tö u, pòrô yī-ö öt ṙātö ellōnre in Chu; ṙātö ellōnre pöri i nëla-en; hòṅ yīö haköp. Akahalōn inrē tö ngam Yöng nö in Chu, im Yöng Chū-ö inrē. 39 Ngaich hēk cha-a nö hòṅ kēḵ an; ngaich öt kô-òngvah Anga-aṅ tö tī cha. 40 Kiröönngöre Anga-aṅ nö hēk nö chuh lāmuh tö Yôtön, i chūök Yôhan nö vōk nö urĕh; ngaich höngngöh nö u muh. 41 Maṙôngö yik yamihtöre nö in Ò; ngaich ngö ṙô cha-a, Öt tī-ivö ök Yôhan tö minkahngö; kô-en pöri nö ṙòkhöre nuk ṙô Yôhan tö ngòh tarik. 42 Ngaich maṙôngö yik umuh ṙamātö ellōnre nö in Ò.
Kinpaha Lāsörös
1 Ngaich hĕng taka ök umuh tarik tövahavö, Lāsörös, aṅ Petenī, i tuhēt nak kanānö ò, nāṅ Mariā, Mārta inrē. 2 Anga-aṅ ök Mariā, famòh alaha ngam Mā tö tötahūsa tavī-i, chūt röön Ò inrē tö keūyöre, tö kanônyuvö tök tövahavö Lāsörös. 3 Lökten nak kanānö ò, nö tīnngö vame-eny nang Ò, nö ngö ṙô, Mahaköphöti; vahavö ap hol Meh. 4 Ngaich ngö ṙô Yēsū, hē Ò nö hāngö e, Rö-ö ap vah nö kinpaha; tön kanôlò ngam Tēv, hòṅ ngam Kūön ngam Tēv nö kôlò nö in e. 5 Töhāngenlōn Ang Yēsū tö nāṅ Mārta, tö kahëmre, Lāsörös inrē. 6 Hē Ò nö hāngan nö vahavö, ngaich nët sumkam Anga-aṅ nöngngöh nö i chūökre. 7 Ngö ṙô Anga-aṅ tö yik mahaköp, nö unôich, Ta-a, töi chuh Yūtā hēk. 8 Ngaich ngö ṙô yik mahaköp tö Ò, Rappī; hòṅ kulehe Meh yip Yahūti fömngöre; ngaich hēk hòng Me-eṅ hòṅ chuh in e. 9 Ngaich sapṙô cha Yēsū, nö ngö ṙô, Röh öng nö nët sīön köṅny ṙô i tö hĕng sakāmö? Öt fukngö ön ngòh tarik yĕn kiröönngöre tö sakāmö; pò ò nö meuk ngam Hanātö ngam panam. 10 Fukngö pöri ngòh tarik, yĕn kiröönngöre tö hatööm; pòn öt in ò ngam Hanātö. 11 Keuheūthëṙô Anga-aṅ, ngaich ngö ṙô tö cha, Haṙòh ap hol hī, Lāsösrös, hòṅ kiröönngöre Chū-ö, Öich kilanglen ò. 12 Ngaich ngö ṙô yik mahaköp tö Ò, Lööken ap min, yē ò nöng haṙòh. 13 Ṙôtö kinpaha ò pöri Yēsū, ngaich ṙôten ò Anga-aṅ nöng heūheure nö haṙòh, tö lōn cha. 14 Lökten Yēsū nö halöökṙôre, nö ngö ṙô tö cha, Kapah ap Lāsörös. 15 Ṙāmölōn Chū-ö töre öt umuh, töpò kūö yīö; hòṅ yīö ṙātö ellōnre, Ta-a, töi ngaich Chuh in ò. 16 Ngö ṙô Tômös, ök tö Titimös invëka, tö yik holre mahaköp, Ta-a, töi in ayī-ö inrē; hòṅ hī anòngngen Ò kapah.
Invanlö Nômö Inrē Ang Yēsū
17 Chalô Ang Yēsū ngaich kôtökūö tö ò nö ngaich nö fën hata sumkam nö el anūlö. 18 Höng nët mëil rôvat ap Petenī tö Yērusalem; 19 Maṙôngö yik Yahūti Yamihtöre nö in nā Mārta, nāṅ Mariā, nö mahaṙamkölōn cha, pò ök kanônyö cha nö kapah. 20 Hē Mārta nö hāngö Yēsū nö yih, ngaich kiröönngöre Anga-aṅ nö höngkūö Ò; höngngöh pöri Mariā nö i patī. 21 Ngaich ngö ṙô Mārta tö Yēsū, Mā; öt hōḵ ök öre kanônyö chu nö kapah, yē Meh ihih. 22 Akahalōn chinri tö Meh kô-òren kē-ĕvkūö tö ngam Mā, tö nup töng havëkö Meh im Tēv. 23 Ngaich ngö ṙô Yēsū tö ò, Choholre ap min kanônyö meh, nö aṅ nö hēk. 24 Ngaich ngö ṙô Mārta, nö sapṙô Ò, Akahalōn Chin tö ò min nö choholre nö aṅ, hē öp invanlö ip manā-aṅ sakāmö. 25 Ngaich ngö ṙô Yēsū, Chū-ö Chin invanlö, nômö inrē. Ngòh ṙamātö ellōnre nö in Chu, pòrô anga-aṅ nö kapah, sönen anga-aṅ nö aṅ. 26 Yē ngòh töngngöh ṙamātö ellōnre nö in Chu, öthēṙu min nö kapah, Ṙātö ellōnre öm tö e? 27 Ngaich ngö ṙô anga-aṅ tö Ò Hòṅ, Mā; ngaich chin ṙātö ellōnre tö Meh Öm Kristū, Öm Kūön ngam Tēv, Öm yamih ing panam.
Peuiny Ang Yēsū
28 Keuheūthëṙö anga-aṅ tö e, ngaich kiröönngöre, nö hiṙeūtkôre nö have-erö ök kahëmre Mariā; nö ngö ṙô, Ihih Ap Mahaköphöti; havëken meh Apa. 29 Iṙūö choholre anga-aṅ, hē ò nö hāngö e; ngaich chuh in Ò. 30 Ṙòngmö im chūökre Ang Yēsū nö meūkökūö tö Mārta; öl nö kuhēt nö im tuhet, 31 Ngaich yik Yahūti, yik me-el patī, nö mahaṙamkölōn ò, nö tömkörit ò, hē cha nö meūkö Mariā nö ka-eūyen nö hōklöre, ngaich kiröönngöre; chamuh kui kupah anga-aṅ tö lōn cha, nö harāmöre nö umuh. 32 Hē Mariā nö yihtöre nö i chūök Yēsū; ngaich meūkan; ngaich afukngöre nö i röön Ò, nö ngö ṙô, Mā; öt hōḵ öre kanônyö chu nö kapah, yē Meh ihih. 33 Hē Yēsū nö meūkan nö peuny, peuny inrē yik Yahūti hol ò; afil uhôṅmöre ngaich Anga-aṅ nö haṙivlōn. 34 Ngaich ngö ṙô Anga-aṅ, Isuh tī öi ulngen ò? Ngaich ngö ṙô cha-a tö Ò, Mā; ta-a, meuk Man. 35 Taṙēchköṅny mak mat ngaich Yēsū. 36 Ngaich ngö ṙô yik Yahūti, Yĕh meuk; i ṙôkö hanāngenlōn Ang tö ò! 37 Ngaich ngòh tarik, ngòh lamöpnyökūö mat tötmeuk, nö tī-ivö tök tarik nö öt kapah?
Havanlöngö Nômö Ang Lāsörös
38 Hēk Ang Yēsū nö afil unhôṅmöre; ngaich yihtöre nö ik anūlö. Höng kinluhu öku; hĕng ök ihong i kūö e, 39 Ngaich ngö ṙô Yēsū, Kēḵngö ngam ihong yin. Ngaich ngö ṙô Mārta tö Ò, ök kanānö ngam tökapah, Mā; hangeūtu takô an nö ngaich; pòn ngaich nö fën hata sumkam. 40 Ngaich ngö ṙô Yēsū tö ò, Röh Öich ngö ṙô tö meh, Yē meh ṙātö ellōnre, ngaich meuk ngam kanôlò ngam Tēv min me-eṅ? 41 Ngaich cha-a nö kēḵngö ök ihong; ngaich môklökūöre Yēsū, nö ngö ṙô, Kayöngö; ha-öinyö Meh Chin, pò Meh hang ṙô Chu. 42 Akahalōn Chin tö Meh tö-örheūheu hang ṙô Chu; kūö vē tömaṙôngö pöri samökhaka, nö havīlen Chu, Öich ngatī ṙô; hòṅ cha nö ṙātö ellōnre tö Chu öich tīntu tö Meh. 43 Keuheūthëṙô Anga-aṅ tö e, ngaich ngö ṙô, nö pōitô nö hūḵa, Lāsörös; kunyī-inyre man. 44 Ngaich ngam tökapaha nö kunyī-inyre; nyëk hak kël kalröön inrē, tö nuk inṙung. Haṙūngi ök kūö ò inrē, tö kun hilā. Ngaich ngö ṙô Yēsū tö cha, Luhlen ò, hökngen ò nö kiröönngöre.
Chöh Talöökö Tīre Tö Yēsū
45 Maṙôngö yik Yahūti yik yamih nö in Maṙiā, ṙamātö ellōnre nö in Ò, hē cha nö meuk tī Ò. 46 Rēvre pöri tö cha, chamuh i yik Feresī, ngaich ve-eny nang cha tö tī Yēsū. 47 Lökten yik mākūö kūönṙô, yik Feresī inrē, nö hamūl yik kamhôṅka; ngaich ngö ṙô, Sitih inlahen öi, tö ngòh tarik nö pōihöl tö minkahngö? 48 Yē Ò min nö hökiṙen tö hī, nö ngatī; ṙòkhöre min vē tarik nö ṙātö ellōnre nö in Ò; ngaich yip aṅ Rōma min nö yih, nö kēḵngö ngih panam hī, vē tarik hī inrē. 49 Hĕng tak ök umuh, aṅ in cha, Kaifas, ök mākūö kūönṙô ik samyeūheu angū-ö, töngö ṙô tö cha, Höng öt akaha yin. 50 Öt rēhĕn yin afēḵa tö e nö tölöök, yĕn hĕng hang tak öp tarik tökapah, töpòkūö vē tarik, hòṅ cha nö öt keuheūngöre nö ötkôlò. 51 Öt ṙô ò an angū-ö nö kahngôre; tön pò ò nö mākūö kūönṙô ik samyeūheu angū-ö, ngaich ve-eny tö Yēsū nö hòṅ kapah tö pòkūö yik tarik. 52 Öthöng pòkūö yik tarik, tön hōtu Anga-aṅ inrē nö hamūl yip kūön ngam Tēv nö hĕng, yip töparāta. 53 Hēten tö e, cha-a ngaich nö ve-ekūöre nö hòṅ kumpahan. 54 Lökten Ang Yēsū nö öt hangāṅlkenre nö kiröönköre nö i yik Yāhūti ṙuhöngre pöri Anga-aṅ nö i tavat, röhta ip tönyalnyi, ip panam Ifrēm. In e Anga-aṅ ngaich nöngngöh, nö holtö yik mahaköp. 55 Ngaich ngam Paska yik Yahūti nö röhten; ngaich maṙôngö yik aṅ ngam panam, chamuh Yerūsalem, urēhĕkūö ngam paska, nö halööklöre. 56 Ngaich cha-a nö chöhö Yēsū; ngaich ngö ṙô tö höö, hē cha nö sökhaka nö ël ök töhet chūök, Sitih lōn öi? Yih Öp min nö ing paratīn? 57 Ngaich yik mākūö kūönṙô, yik Feresī inrē, nö kētö chöngö; hōtu ngòh tarik nö hameuktö chūök Ò, yē ò nö akahalōn; hòṅ cha nö kēḵ An.
Hachāmökui Yēsū Nö I Petenī
1 Yih Ang Yēsū nö i Petenī tafūöl sumkam urēhĕkūö ngam Paska, i chūök Lāsörös, ök hachohlö Yēsū, nö ṙā-ang i yip tökapah. 2 Halankaṙen nya-aṅkūö ngaich Anga-aṅ; Mārta mameuk ṙen nya-aṅkūö, ūichhak Lāsörös nö holkūö yik nyamā. 3 Hĕng paôn ök kahëḵ Mariā tötahūsa tavī-i, tö pōi ṙāi; ngaich fòh röön. Yēsū, ngaich chūt röön Ò tö keūyöre. Ngaich ngam patī nö löpngö ël tö tinhūṅsö. 4 Hĕng tak ök aṅ i yik haköptö Ò ang Yūtā Iskaryôt, ök tö hòṅ kēḵngen Ò, tö ngö ṙô, 5 Kūöyòh öng ngih tötahūsa tavī-i nö öt inyihiyö, nö lūöi höt ṙòng tö rupīö; ngaich kētu nö i yāich? 6 Ṙô ò angū-ö öt kūö ò nö chumkūöṙen tö yāich; tön pò ò nö mu-ulāyö, ngaich īnu tök inyul rupīö; ngaich nöng kēḵ nup tö chaphötvö aṅ e, 7 Ngaich ngö ṙô Yēsū, Hökngen ò, nö haköpkö e hanöng saha öp sakāmö inulngö Chu. 8 Örheūheu yin yī-ö holtuṙah tö yāich, rö-ö pöri Chū-ö örheūheu in yīö.
Hòṅ Kumpāha Lāsörös
9 Akahalōn yik töng tarīka aṅ i yik Yahūti tö Ò nö umuh; yihtöre cha-a ngaich, öt höng kūö Yēsū tön pò cha nö hòṅ meukkūö Lāsörös inrē, ök hachohlö Ò nö ṙā-ang i yip tökapah. 10 Ve-ekūöre yik mākūö kūönṙô, pòn hòṅ kumpaha Lāsörös inrē; 11 Pòn pòkūö ò nö maṙôngö yik Yahūti ṙamāngenre, ngaich ṙātö ellōnre nö in Yēsū.
Kunhëthöt Ngam Tömihòiṅ Nö I Yeruselem
12 Ngaich im huṙöich, maṙôngö yik tarik, yamih nö im paratīn, ngaich hē cha nö hāngö Yēsū nö yih nö i Yerūsalem, 13 Kēḵ rōi kachūr cha-a ngaich; ngaich kiröönngöre nö höngkūö Ò; ngaich ngö ṙô, nö pōitô, Hōsanna, tökôlò An ngam yamih nö i Mine-eny ngam Mā Tēv, ngam Rācha Israĕl. 14 Kôtökūö Ang Yēsū tök kūön köttö, ūichlöre ngaich nö i uk ò; sā kinūichngö e, nö ngö, 15 Um pa-ekūö, me-eṅ kikānö, kūön Siyôn, yĕh meuk, ngam Rācha meh nö yih; ūichhaka nö i uk kūön köttö. 16 Öt akahalōn sin nö urĕh yik haköptö Ò; hē Yēsū pöri nö hapōilöngö ngaich fēḵĕlre cha-a tö u, nö kinūichngö Ò tö cha inrē nö ngatī tī tö Ò, 17 Eūkömatre yik tömaṙôngö mi-in Ò, hē Ò nö haveḵnyen Lasörös nö ṙā-ang el anūlö, nö hachohlen ò, nö ṙā-ang i yik tökapah. 18 Angū-ö inrē lökten yik tö maṙôngö nö höngkūö Ò, pò cha nö hang ök tī Ò minkahngö. 19 Lökten yik Feresī nö ngö ṙô tö höö, Yēsū meuk, öt kanô-òṅre yin, ngaich ön ngih panam nö tömrit Ò.
Chöhö Yēsū Yik Krīk
20 Rēvre yik umuh Tahëng mihëṅṙö tarik, i yik yamih nö ve-ekūötēv, nö im paratīn. 21 Yihtöre cha-a nö in Filip, ök aṅ Petsaita i Kelelī, ngaich ve-ekūö ò, nö ngö ṙô, Mā hòṅ meukkūö Yēsū in. 22 Yihtöre ang Filip, nö ve-eny nang Antaru; ngaich nā Antaru, nāṅ Filip, nö yihtöre nö ve-eny nang Yēsū, 23 Ngaich ngö ṙô Yēsū tö cha, Yih an ngam ṙētak, hē ngòh Kūö Tarik nö hapōilöngö. 24 Tökô-ò ṙô Chin tö yīö, Yē ngam kulöl saīny nö fuk el tumlat, nö öt chahū-uyö; ngaich höngngöh angū-ö, min nöng kahngenre. Yē e pöri nö chahū-uyö, ngaich pōyen ṙòng. 25 Löhöl tī ön ngòh tö nômöre, ngòh tö hāngenlōn tö e; ngòh tötahāngenlōn pöri töng nômöre, nö ing panam, ngaich haköpngö e anga-aṅ min nö im nômö tö-örheūheu-aṅ 26 Yĕn tarīkuvö tö hòṅ lök la-en Chu, hökngen ò yēḵ nö tömrit Chu; ngaich i chūök Chu, in e min ngam kūön Chu inrē. Yĕn tarīkuvö tö hòṅ lök la-en Chu, hakôlöng ṙô min anga-aṅ tö ngam Yöng.
Ṙô Tö Inlaha Ök Kinpāhare Ang Yēsū
27 Haṙīvö ellōn Chin töngamuh. Sitih inlahen Öich min? Kayöngö; laklen Chu i ngih ṙētak. 28 Kūö e Chinri yih i ngih ṙētak. Kayöngö; hakôlò ngam Mine-enyre Man. Hē e, ök ṙô lamöktö el halīöngö, tö ngö, Ngaich Chin hakôlò e; hēk min inrē Öich hakôlò e, 29 Hāngö e yik tömaṙôngö samökhaka; ngaich kunṙôkö, tö ṙô cha, Rēvre yik tö ngö ṙô, 30 Ve-evkūö An tö ma-ahānga. Ngaich ngö ṙô Yēsū, Rö-ö an ngam ṙô nö pòkūö Chu nö yih: tön pòkūö yīö. 31 Ngih ön ngaich kinṙôkken ngih panam; ngaich ön min ngòh mākūö panam nö ahōṙi. 32 Ngaich Chū-ö yē Chu hatamlöngö, ṙā-ang el tumlat, Öich tūöktö taṙòkhöre tarik nö in re. 33 Ṙô Ò ön angū-ö nö hameuktö inlahen kinpahare min nö kapah. 34 Ngaich yik tömaṙôngö nö ngö ṙô tö Ò, Töt chanūhuvṙen Öp Kristū, nö hāngö tö ih, nö im chöngö. Kūöyòh Öm ngö ṙô, Hatamlöngö Ön min ngòh Kūön tarik? 35 Ngaich ngö ṙô Yēsū tö cha, Höng rahëchtören an ngam Hanātö nö in yīö. Kiröönngöre yin i saha yīö īnu töm Hanātö, hòṅ ngam sinngūlö nö öt kô-òl nö in yīö. Öt akahalōn ön tökū-öre, ngòh kumröönngöre nö lök el sinngūlö. 36 I saha yīö īnu töm Hanātö, ṙātö ellōnre im Hanātö; hòṅ yīö kūön ngam Hanātö.
Töt Ṙinātölōn Yik Tömaṙôngö Tarik
Keuheūthëṙô Yēsū tö u, kiröönngöre ngaich, nö hayunngöre tö cha. 37 Pòrô Anga-aṅ nö pōyen la-en tö minkahngö nö i kūö cha, ngaich cha-a nö öt ṙātö ellōnre nö in Ò; 38 Nö kinheūṅtngö ṙô ngam pròfĕt Isayā tö ngih tö ngö, Mā; achīö öp ṙamātö ellōnre nö i në ṙô ih? In chīö ang ngam Mā Tēv nö hameuktu? 39 Ngih ön inrē lökten cha nö öt kô nö ṙātö ellōnre, ṙô Isayā nö hēk, 40 Tilupngö mat cha Anga-aṅ, hangëḵngö ellōn cha inrē; pòn sōtu nup mat cha nö meuk, sōtu nö akaha ellōn inrē, ngaich havöölökūöre; ngaich halanken cha Chū-ö. 41 Ṙô Isayā nun anū-ö; pò ò nö meuk kanôlò Ò, ngaich ṙôten Ò anga-aṅ. 42 Maṙôngö pöri yik aṅ i yik mā, ṙamātö ellōnre nö in Ò; kūö yik Feresī pöri cha-a nö öt ve-eny e, pòn sōḵ nö ahōṙi, nö ṙā-ang ik māṅre; 43 Pò cha nö hāngenlōn tö kanôlò aṅ i tarik, mööḵlö tö kanôlò aṅ im Tēv.
Ṙô Ṙahônyö Yēsū
44 Ngaich pōitô Yēsū, nö ngö ṙô, Ngòh ṙamātö ellōnre nö in Chu, öt ṙātö ellōnre nö in Chu, tön im tamīnten Chu. 45 Ngòh mameūkö chu, ngaich meuk ngam tamīnten Chu inrē. 46 Hanātö Chin Chū-ö yih ing panam; hòṅ ngòh ṙamātö ellōnre nö in Chu, nö öt ngöh nö el sinngūlö, 47 Yĕn tarīkuvö hamang ṙô Chu, ngaich öt haköpö e, öt kahòkken ò Chū-ö, pò Chu öt yih, kahòkken ngih panam tön mahayööken ngih panam. 48 Ngòh samôḵen Chu, öt hōḵo në ṙô Chu inrē, hĕng öp kamhòkken ò, ngih ṙô ṙahônyö Chu, angū-ö min kamhòkken ò, ip manā-aṅ sakāmö, 49 Pò Chu öt kahngenre ṙô-òv tö e; tön ngam Yöng, ngam tamīnten Chu Anga-aṅ kamëtö chöngö Chu, ṙô Chu inrē ahānga. 50 Akahalōn Chin, tö ngam nômö tö-örheūheu-aṅ nö i inköpö ngam chöngö, lökten Chu ṙô-òvö, sā ṙô ngam Yöng nö tölṙô Chu.
Söich Röön Yik Haköptöre Ang Yēsū
1 Urēhĕkūö ngam Paska paratīn akahalōn ang Yēsū tök ṙētakre nö yih hē Ò nö ṙāngö ngih panam, nö chuh im Yöng. Hāngenlōn Anga-aṅ tö yik Anga-aṅ re ing panam; hāngenlōn Anga-aṅ tö cha, nö söl ik manā-aṅ. 2 Ha-eheten tī ngam sī-ö nö kēhöt ellōn Yūtā Iskaryôt, ök kūön Simōn, nö kēḵngen Ò. 3 Akahalōn Yēsū tö ngam Yöng nö kētö taṙòkhöre nö eltī Ò, tö Ò inrē nö yamih, nö ṙā-ang im Tēv; ngaich chuh im Tēv. 4 Ngaich hē ngam nyina-aṅ, Anga-aṅ nö choholre, ṙātö nuk hilāre Anga-aṅ, ngaich kēḵ ök chanūt ngaich nyëk ṙatre. 5 Asënyö mak ngaich Anga-aṅ nö ël ök chūök mak; ngaich söich röön yik haköptöre; chūtö u ngaich, nö aṅtī tö ök chanūt nyanëkṙat Ò. 6 Yihtöre anga-aṅ nö in Sīmōn Pītör, ngaich ngö ṙô Pītör tö Ò, Mā; söich röön chu Ömeh? 7 Ngaich ngö ṙô Yēsū, nö sapṙô ò, Öt akahalōn man töngamuh, tö ngih la-en Chu; uhē-ĕren man min akahalōn. 8 Ngaich ngö ṙô Pītör tö Ò, Uh takô Man yēḵ söich röön chu. Ngaich ngö ṙô Yēsū, nö sapṙô ò, Yē Chu öt söichö meh, öt mi-in Chu me-eṅ. 9 Ngaich ngö ṙô Pītör tö Ò, Mā, uh chĕi nöng minë röön chu; në kuntī chu, kui chu inrē. 10 Ngö ṙô Yēsū tö ò, Löök ön ngòh tö keuheūtö kaha nö vōk; höng minë kalröön tö hòṅ söichö. Löök yin yī-ö; rö-ö pöri ṙòkhöre. 11 Pòn akahalōn Anga-aṅ tök kamëḵngöre: lökten Ò nö ngö ṙô, Rö-ö yin ṙòkhöre löök. 12 Keuheūthë tī Anga-aṅ nö söich röön cha, ngaich kēḵ nuk hilāre, ūichngöre hēk; ngaich ngö ṙô tö cha, Akahalōn öi tö tī Chu tö yīö? 13 Mahaköphöti, Mā, ngö yin ṙung tö Chu, öi huveū-eu ṙô pò Chu ngatī. 14 Yē Chu Chū-ö Öich Mā, Mahaköphöti inrē, Öich söich röön yīö, hòṅ kö ngatī-i yin yī-ö söich röön höö. 15 Mahachōten yīö Chin, hòṅ yīö ngatī, sā tī Chu tö yīö. 16 Kô-ò ṙô Chin tö yīö Öt pōyö ön ngòh mahalenṙen tö ngam yöngṙenre; ngatī ngòh tötīni nö öt pōyö tö ngam tamīngöre. 17 Akahalōn yin yih ngaich tö u; tökôlò yin, yē yīö la-evṙen tö u. 18 Rö-ö Chin ṙôten yīö ṙòkhöre. Akahalōn Chin tö yik katöllöre; kinheūṅtngö ṙô ngam töhet līpöre an, Ngòh nyamā nya-aṅkūö Chu, ngaich kichöötlö röönre nö lā-al Chu. 19 Töngamuhöten Chin ve-eny nang yīö, urēhĕkūö yanihih e; hòṅ e yē e nö yih, ngaich ṙātö ellōn re yī-ö, tö Chu Öich Anga-aṅ. 20 Tökô-ò ṙô Chin tö yīö, Ngòh hamôḵòṅ tahīntö chu, hōḵen Chu anga-aṅ, ngòh hamôḵen Chu, hōḵo ngam tamīnten Chu.
Ṙô Tö-ök Kamëngöre Ang Yēsū
21 Keuheūthë ṙô Yēsū tö e, ngaich haṙivö ellōn Anga-aṅ ngaich hameukhöti, nö ngö ṙô, Tökô-ò ṙô Chin tö yīö, Hĕng taka öp tö yīö, kamëḵngen Chu min. 22 Kö ngëichkökūö höö yik mahaköp, öt akahalōn tö ök ṙô Ò tarik. 23 Ranghen Yēsū nö lahāmö, hĕng tak ök mahaköp, ök hanāngen lōn Ò. 24 Lökten Sīmōn Pītör nöng inlavah nö ve-ekūö ò, Ve-eny nang ih man, tö öp ṙô Ò. 25 Harôntöre anga-aṅ nö in Yēsū, ngaich ngö ṙô Yēsū, ngaich ngö ṙô, Mā; achīö apa? 26 Ngaich ngö ṙô Yēsū, nö sapṙô ò, Anga-aṅ öp kaheḵekūö Chu min tö ngih kasumtö Chu ròtī. Keuheūthë tī Anga-aṅ nö kasumtö e, ngaich kē-ĕ e; kētö e ngaich nö in Yūta Iskaryôt. 27 Kuhēthötre Sātan ngaich nö in ò, tö kinheūṅtökūö ò nö nyā. Ngaich ngö ṙô Yēsū tö ò, Ka-eūyen man ngaich töp la-enre. 28 Öt hĕng tak tarik aṅ i yik nyamā, tö-akahalōn tö lökten Yēsū nö ngatī ṙô tö ò. 29 Rēvre yik tö ngö lōn, tö Yēsū nö ngö ṙô tö ò, Havah nup tö-öltöre man in hī, ing paratīn; hēk, ma-alōntö yāich anga-aṅ, tö lōn cha; pò Yūtā nö īnu tök inyul rupīö. 30 Keuheūthëkūö anga-aṅ tö ngam ròtī, iṙūö kunyī-inyre ngaich; hatööm angū-ö nö ngaich.
Ngam Tufömngöre Chöngö
31 Ngaich hē ò nö ngaich nö kiröönngöre; ngö ṙô Ang Yēsū, Ngaich ön ngòh Kūön Tārik nö hapōilöngö, in Ò inrē ngam Tēv nö hapōilöngö. 32 Hapōilen Ò An min ngam Tēv nö in re; iṙūö hapōilen Ò An min. 33 Yī-ö nyīö; höng rahëchtören Chin in yīö. Chöhö Chu yin min; ngaich sā ṙô Chu tö yik Yahūti, Ip kū-ö Chu kiröönngöre, öt kô yī-ö in; ngatī ṙô Chin tö yīö töngamuh. 34 Hĕng ön ngih tufömngöre chöngö, kahëtö Chu in yīö, Hāngenlōn yin tö höö; sā hanāngenlōn Chu tö yīö, ngatī yī-ö kö hāngenlōn tö höö. 35 In e inkaha yin min tö taṙòkhöre tarik, öi mahaköp in Chu, yē yīö kö hāngenlōn tö höö.
Vënyu Pītör Nö Mahngen Yēsū
36 Ngaich ngö ṙô Sīmōn Pītör tö Ò, Chuh yih Ömeh? Ngaich ngö ṙô Yēsū, nö sapṙô ò, Öt kô man in Chu töngamuh, ip kū-ö chu kiröönngöre, Unôich man min tömkörit Chu. 37 Ngaich ngö ṙô Pītör tö Ò, Mā kūöyòh öich öt kô in Meh töngamuh. Kô-òren chin kapah töpòkūö Meh. 38 Ngaich ngö ṙô Yēsū tö ò, Kô-òren öm kapah töpòkūö Chu? Tökô-òṙö Chin tö meh, Öl nup min hayöm nö takeūk hanöng saha meh lūöi heuh ṙô mahngen Chu.
Talöökö Chamuh Im Yöng An Yēsū
1 Uh yin röingö ellōn. Ṙātö ellōn re yin im Tēv; in chu inrē. 2 Pōyen nup chūökö i patī ngam Yöng Chu. Yĕn öt ngatī öre, ngaich ve-eny nang yīö Chū-ö; tön kiröönngöre Chin halēnkö chūök yīö. 3 Ngaich yē Chu kiröönngöre, halēnkö chūök yīö; yih Chū-ö min hēk, ngaich kē-ĕ yīö in re. 4 Akahalōn yin tö ngam talöökö, kū-ö Chu kiröönngöre. 5 Ngaich ngö Ṙô Tômas tö Ò, Öt akahalōn in töp chahuhu Meh; Sitih kanô-òṅ öi akahalōn tö ngam talöökö? 6 Ngaich Yēsū nö ngö ṙô tö ò, Chū-ö Chin Talöökö, Kanô-en, Nômö inrē. Öt hĕng tak yamihtöre nö im Yöng, höng lökten in chu. 7 Yē yīö akahakūö tö Chu, ngaich yī-ö öre akahakūö töm Yöng inrē. Töngamuhöten yin akahakūö tö Ò; ngaich yin meūkan. 8 Mā; ngö ṙô Filip; hameukhömat ih man tö ngam Yöng; ngaich ngāichölōn īhö. 9 Ngaich Yēsū nö ngö ṙô tö ò, Röh Öich ngaich marô-òten in yīö, ngaich öl hòng me-eṅ akahakūö tö Chu Filip? Ngòh mameūkö Chu, ngaich meuk ngam Yöng inrē. Sitih öm ngö ṙô Hameukhömat ih töm Yöng? 10 Öt ṙātö ellōnre ömeh tö Chu im Yöng, in Chu inrē ngam Yöng? Rö-ö Chin kahngôre tö nup ṙô Chu tö yīö: ngöh pöri ngam Yöng nö in Chu, ngaich la-evṙen Anga-aṅ tö në la-en re. 11 Ṙātö ellōnre yin in Chu tö Chu im Yöng, in Chu inrē ngam Yöng, ngaich yĕn rö-ö, ṙātö ellōnre pöri tökūö në la-en. 12 Tökô-òṙô Chin tö yīö, Ngòh ṙamātö ellōn re nö in Chu, la-evṙen min anga-aṅ inrē tö në la-en Chu; mötlö ṙôkö la-en min anga-aṅ tö në, pò Chu chuh im Yöng. 13 Nup töng havëkö yīö i Mine-eny Chu, kēkö u Chū-ö min; hòṅ ngam Yöng nö ha-öinyö nö im Kūön. 14 Yē yīö havëkuvö i Mine-eny Chu kēkö u Chū-ö min la-evṙen chū-ö min tö u.
Tinīn Töm Töhet Fanöinylö
15 Yē yīö hāngenlōntö Chu, haköp në chöngö Chu min yī-ö. 16 Ngaich ve-ekūö ngam Yöng Chū-ö min; ngaich kētö tahëng Mahangëken min Anga-aṅ, hòṅ Ò nö örheūheu nö holtöṙah yīö; 17 Ngam Töhet Fanöinylö kanô-en, ngam töt kô nö kahëḵ ngih panam; pò e nö öt meūkan, öt rēhĕn nö akahan. Akahakūö pöri yī-ö tö Ò, pò Ò nö höngngöh nö hol yīö, ellōn yīö inrē. 18 Öt ṙāngen yīö Chin, höng kayööyaṙen. 19 Yih Chin min in yīö. Rahëchtören ngaich ngih panam nö öt ngöhöre mat nö meūkö Chu; meūkö Chu pöri yī-ö. Pò Chu aṅ, aṅ yī-ö min inrē. 20 Im sakāmö angū-ö min yī-ö akahalōn tö Chu im yöngre, in Chu yī-ö, in yīö Chū-ö inrē. 21 Ngòh tö-īnu tö në chöngö Chu, ngaich haköpö u, anga-aṅ an tö hāngenlōn tö Chu. Anga-aṅ ngam töhāngelōn tö Chu, hanghuṙen min tö ngam Yöng Chu; ngaich hāngenlōn Chū-ö min tö ò, ngaich hameuktöre Öich in ò. 22 Ngö ṙô ang Yūtā tö Ò, (rö-ö nö Iskaryöt,) Mā; Sitih Öm höng in ih hameuktöre, ngaich rö-ö ing panam? 23 Ngaich ngö ṙô Yēsū tö ò, Yĕn tarīkuvö tö hāngelōn tö Chu, haköp ngih ṙô Chu min anga-aṅ; ngaich hāngenlōn ngam yöng chu tö ò; ngaich yihtöre min āyö in ò, ngaich iyöng in ò. 24 Ngòh töt hāngenlōn tö Chu, öt haköp në ṙô Chu. Ngam ṙô ahang yīö, rö-ö an nöng ṙô Chu, tön ṙô ngam Yöng ngam tamīnten Chu. 25 Ṙô Chu nun në tö yīö i saha Chu ṙòngmöng ngöh hol yīö. 26 Ngam Mahangëken pöri ngam Töhet Fanöinylö, ngam tahīntö ngam Yöng min nö i Mine-eny Chu, Anga-aṅ min mahaköpten yīö tö taṙòkhöre, ane inrē fēḵlen yīö tö taṙòkhöre, ane inrë fēḵlen yīö tö nup ṙô Chu tö yīö. 27 Ṙā-akūö yīö Chin tö ngam kumchikṙen. Kētö ngam kumchikṙenre Chin in yīö. Öt sā tī ngih panam Chin kē-ĕkūö yīö. Uh yin röiyö ellōn; Ui rēhĕn pa-ekūö lōn. 28 Hang ṙô Chu yin ngaich tö yīö, Kiröönngöre Chin; ngaich yih min in yīö. Yē yīö hāngenlōn tö Chu, ṙamölōn yī-ö öre, pò Chu chuh im Yöng; pò ngam Yöng nö mööḵlö tö Chu. 29 Ve-eny nang yīö Chin ngaich töngamuh, urēhĕkūö yanihih e; hòṅ yīö ṙātö ellōnre, yē e nö ngaich nö yih. 30 Rö-ö Chin kô iṙuhö ṙô ve-ekūö yīö, pò ngam mā ngih panam nö yih. Rö-ö an nö törahëchyen nö in chu. 31 Yih pöri anga-aṅ, hòṅ ngih panam nö akahalōn tö Chu hāngenlōn töm Yöng; ngaich sā ngam Yöng; nö tölṙô Chu, ngatī Chū-ö Choholre; ta-a töi ngaich.
Yēsū An Tökò-en Vāīn
1 Chū-ö Chin tökô-en vāin; ngam Yöng Chu An vamī panô-òṅ. 2 Ngih pak in Chu tötṙônguvö, fāngi angū-ö tö Ò; ngih pak töṙônguvö ahatlöng tö Ò, pòn hōtu nö ṙuhölre ṙòng. 3 Ngaich yih yī-ö ahatlöngö, kūö ngam ṙô Chu tö yīö, 4 Höngngöh yin in chu; in yīö Chū-ö inrē. Sā ngam pak nö öt kô nö kahngenre nö ṙôngu, yē e nö öt ngöh nö im vāin, ngatī yī-ö öt kô, yē yīö öt ngöh in Chu. 5 Chū-ö Chin vāin; pak yin yī-ö. Ngòh töngngöh nö in Chu, in ò Chū-ö inrē, anga-aṅ tö pōyen ṙòng; pò yīö öt kanô-òṅvö, yē yīö köhngen tö Chu. 6 Yĕn hĕng tak ngòh tötngöh nö in Chu, fāngi anga-aṅ nö sā pak, ngaich nyangngö; hamūlö ngaich, kavalhötvö nö i kūö tameūyö; ngaich ṙāpngö. 7 Yē yīö ngöh in Chu, ngöh minë ṙô Chu inrē nö in yīö, havë-a yī-ö tö nup töng lōnre; ngaich kô-òren yī-ö teūngen tö u. 8 I ṙôken ṙòng yīö i yīö mahaköp in Chu inrē, ngam Yöng Chu nö eū-eu. 9 Sā ngam Yöng nö hāngenlōn tö Chu, ngatī Chū-ö inrē hāngenlōn tö yīö; höngngöh yin im hanāngenlōn Chu tö yīö. 10 Yē yīö haköp në chöngö Chu, höngngöh min yī-ö im hanāngenlōn Chu; sā Chu Chū-ö haköp në chöngö ngam Yöngre ngaich höngngöh im hanāngenlōn Ò tö Chu. 11 Ngāchô Chin tö yīö tö u, hòṅ ngam ṙanāmölōn Chu nö in yīö, hòṅ ngam ṙanāmölōn yīö inrē nö teungta. 12 Ngih ön chöngö Chu, Hāngenlōn yin tö höö sā hanāngenlōn Chu tö yīö. 13 Öt hĕng tak tömööḵlö hanāngenlōntö ngih, tö ngòh kamëḵngö nômöre töpòkūö holre. 14 Hol chu yin yī-ö, yē yīö la-evṙen tö nup tinöölô yīö tö Chu. 15 Rö-ö Chin ngöhöreṙô kūönkūö ngö tö yīö; pò ngòh kūönkūö nö öt akahalōn tö la-en ngam yöngṙenre, pò Chu Chū-ö ngaich mikahtölōn yīö tö nup taṙòkhöre ahang Chu im Yöng. 16 Rö-ö yin yī-ö kamtöllen Chu; Chū-ö Chin kamtöllen yīö, ngaich hōten yīö kiröönngöre, öi ṙônguvö; ngaich höngngöh ngam ṙòng yīö; hòṅ nup havëkö yīö min i Mine-eny Chu, im Yöng, nö kētu nö in yīö min tö Ò. 17 Kē-ĕkūö yīö Chin tö në chöngö, hòṅ yīö kö hāngenlōn tö höö.
Surīkhu Tö Ngih Panam
18 Yē ngih panam nö surīkhen yīö, akahalōn tö e nö surīkhen Chu, urēhĕkūö e nö surīkhen yīö. 19 Yē yīö öre aṅ ngih panam, hāngenlōn öre ngih panam tö aṅkūöre. Kūö yīö pöri öt aṅ ngih panam, pò Chu katöllen yīö ing panam; lökten ngih panam nö surīkhen yīö. 20 Köpölōn tö ṙô Chu tö yīö Rö-ö ön ngòh kūönkūö nö pōyö tö ngam yöngṙenre. Yē cha nö öthakôlò Chu, öt hakôlò yīö min cha-a inrē; yē cha nö haköp ṙô Chu, haköp ṙô yīö min cha-a inrē. 21 Tī cha pöri min në, nö in yīö, tö pòkūö Mine-eny Chu; pò cha nö öt akahakūö tö ngam tamīnten Chu. 22 Yē Chu öre Öich öt yih, Öich ve-ekūö cha, öt tököölu in öre cha-a. Ngaich pöri cha-a töngamuh nö öt huveū-euṙô tö kūö nup tököölre. 23 Ngòh tö sumrīk tö Chu, tö sumrīk tö ngam Yöng Chu inrē. 24 Yē Chu öre öt ngaichngö tī tö në la-en, Öich in cha, në la-en töthĕng tak nö ngaich; ngaich öt tököölu in öre cha-a. Tön ngaich pöri cha-a nö hĕnghöre meuk, hĕnghöre surīkhen Chu, töm Yöng Chu inrē. 25 Ngaich keuheūten ngam ṙô, tökūichiyö im chöngö cha tö ngö, Öt löknyu chööḵnyi cha-a nö surīkhen Chu. 26 Hē ngam Mahangëken pöri nö yih, ngam tahīntö Chu in yīö nö ṙā-ang im Yöng, ngam Töhet Fanöinylö kanô-en; ngam lamöknyö im Yöng, Anga-aṅ min ameūken Chu. 27 Eū-a yī-ö inrē, pò yīö in Chu tök ranehten.
1 Ngāchô Chin tö u in yīö, hòṅ yīö min öt kavē-ĕre. 2 Hakösiṙen yin min tö yip māṅre. Yih an ngam ṙētak, tö yip famëlngen yīö min nö tö la-en tö la-en ngam Tēv, tö lōnre. 3 Ngatī tī yip min; pò cha nö öt akahakūö tö ngam Yöng, öt rēhĕn tö Chu. 4 Ngāichô Chin tö u in yīö, hòṅ yīö köpölōn tö u, nö ṙô chu tö yīö,
La-en Ngam Töhet Fanöinylö
Yĕn yih ap ṙētak u. Rö-ö Chin ṙô-òv tö yīö tö u, ik raneh; pò Chu in yīö. 5 Kiröönngöre Chin töngamuh i ngam tamīnten Chu; öt hĕng tak tö yīö mahatönö Chu, Chuh yih Öm Me-eṅ. 6 Pò Chu pöri ṙô-òv tö yīö tö në, haṙīvö ellōn yin. 7 Kô-ò ṙô pöri Chū-ö tö yīö; kanôlò yīö an yē Chu kiröönngöre; pò Chu yē Chu öt kiröönngöre, öt yih min ngam Mahangëken nö in yīö. Yē chu pöri kiröönngöre, tīnten Ò min Chū-ö nö in yīö. 8 Ngaich Anga-aṅ, yē Ò nö yih, nö hameukhömat ngih panam min tö tökööl, lanöökö, kinṙôka inrē. 9 Tökööl, pò cha nö öt ṙātö ellōnre nö in Chu. 10 Lanöökö, pò Chu chuh im Yöng; ngaich öt meūkö Chu yī-ö. 11 Kinṙôka, pò ngam mā ngih panam nö ngaich nö kahòkkaṙen. 12 Pōitöre ṙô chin tö yīö; öt kô pöri yī-ö töngamuh kē-ĕ u. 13 Yĕn yih pöri Anga-aṅ, ngam Töhet Fanöinylö kanô-en, hachōkūö yīö min Anga-aṅ, i nup taṙòkhöre kanô-en; pòn öt kahngôre min Anga-aṅ; tön nup töhāngö tö Ò, anū-ö min ṙô Ò. Ngaich Anga-aṅ min nö ahangken yīö tö nup yamih. 14 Hapōilen Chu An min; pò Ò min nö aṅ in Chu kahëḵ; ngaich ahangka min nö in yīö. 15 Ṙòkhöre nup chehen im Yöng nö Chū-ö; lökten Chin ngö ṙô, tö Ò min nö kēḵ aṅ in Chu, ngaich ahangken yīö min tö e.
Miṙīvlōn Töm Ṙanamlōn
16 Rehëchhangkūö, ngaich yi-ö öt meūkö Chu; ngaich hēk rahëchhangkūö, ngaich yi-ö min meūkö Chu; pò Chu Chuh im Yöng. 17 Lökten nö rēvre yik mahaköp nö in Ò, tö ngö ṙô tö höö, Asuh öng ngih ṙô Ò nö in hī, Rahëchhangkūö, ngaich yī-ö öt meūkö Chu; ngaich hēḵ rahëchhangkūö, ngaich yī-ö min meūkö chu; ane inrē, Pò Chu chuh im Yöng? 18 Lökten cha-a nö ngö ṙô, Asuh öng ngih ṙô Ò, Rahëchhangkūö? Öt akaha elnang in tö ṙô Ò. 19 Akahalōn ang Yēsū tö cha nö hòṅ hatönö Ò; ngaich ngö ṙô Anga-aṅ tö cha, Hatöntöre öyih, in höö, tökūö ngih ṙô Chu, Rahëchhangkūö, ngaich yī-ö öt meūkö Chu, ngaich hēk rahëchhangkūö, ngaich yī-ö min meūkö Chu? 20 Tökô-ò ṙô Chin tö yīö, tö yīö min peuny harāmöre inrē; ṙāmölōn pöri min ngih panam, havāngtöre pöri min ngam miṙivlōn yīö, nö im ṙanāmölōn. 21 Haṙivlōn ön ngòh kikānö, yē ò nö hòṅ kayôḵ; pòn yih ngam ṙētak ò. Yē ngam nyīö pöri nö ngaich nö kayôḵnyu: öt köpölōn anga-aṅ tö ngam chanöököre, kūö ṙanāmölōnre tö tarik nö fötnyu nö ing panam. 22 Ngatī miṙivlōn yin yī-ö; meukkūö yīö pöri Chū-ö min hēk; ngaich ṙāmö ellōn min yī-ö; öt hĕng tak min kamëḵngö ngam ṙanāmölōn, nö in yīö, 23 Öt havëkuvö yin min in Chu, hē e. Tökô-ò ṙô Chin tö yīö, Yē yīö min havëkuvö im Yöng, kētö e min Anga-aṅ nö in yīö, nö i Mine-eny Chu. 24 Ölu yin havëkuvö i Mine-eny Chu. Havë-a; ngaich teūngen min yī-ö; hòn hateūngi ngam ṙanāmölōn yīö.
Mihôiṅ Töng Panam
25 Anū-ö nun ṙô Chu inchōḵovṙô tö yīö. Yih pöri nö ngaich ngam ṙētaka, hē Chu öt ngöhören inchōḵovṙô tö yīö; halöökṙôre pöri, ve-eny nang yīö tö ngam Yöng. 26 Ip sakāmö angū-ö min, yī-ö have-a i Mine-eny Chu. Rö-ö Chin ṙô-òv tö yīö, tö Chu min ve-ekūö ngam Yöng töpòkūö yīö. 27 Pò ngam Yöng nö hāngenlōn tö yīö; pò yīö hāngenlōn tö Chu, ane inrē ṙātö ellōnre tö Chu ṙamā-ang im Yöng. 28 Ṙā-ang im Yöng Chin, ngaich yih ing panam. Hēk Chin ṙāngö ngih panam, ngaich chuh im Yöng. 29 Yĕh meuk; ngö ṙô yik mahaköp nö in Ò; möl Man halöökṙôre; Öm öt inchōḵovṙô. 30 Ngaich in akahalōn tö Meh tökeuheūttöre mikahlōn; öt kusīknyô tarik Man, nö hatönö Meh. In e in ṙātö ellōnre tö Meh ṙamā-ang im Tēv. 31 Ngaich Yēsū nö ngö ṙô tö cha, Ngaich öi ṙātö ellōnre? 32 Yĕh meuk; yih an ngam ṙētak; hôṅ; ihih an ngaich, hē yīö min pirātī; höng kö kahngenre; ngaich ṙāngen Chu min, höng hĕng taka. Rö-ö pöri Chū-ö höng hĕng taka, pò ngam Yöng nö holtöṙah Chu. 33 Ṙô Chu nun në tö yīö, hòṅ yīö in Chu kumchikṙen. Kihngen yin min ing panam; ui pa-ekūö pöri; ngaich Chin mihôiṅ töng panam.
Ve-elkūi Yik Haköptöre Ang Yēsū
1 Anū-ö në ṙô Yēsū; ngaich môklökūöre nö el halīöngö nö ngö ṙô, Kayöngö yih an ngam ṙētak. Hapōilö ngam Kūönre Man; hòṅ ngam Kūön nö hapōilen Meh. 2 Sā tī Meh kē-ĕkūö Ò tö inyöngö taṙòkhöre tarik, hòṅ Ò nö kē-ĕkūö cha tö ngam nômö tö-örheūheu-aṅ, i yip töng kahëtö Meh in Ò. 3 Ngih ön nômö tö-örheūheu-aṅ, ngam mikahkūö cha tö Meh, Öm tökô-en Tēv; akahakūö inrē tö ngam tahīntö Meh, Yēsū Kristū. 4 Hapōilen Meh Chin ngaich ing panam, i kinheūṅtngen ngam kahëtö Meh, la-en Chu. 5 Yĕh pöchö, Ō Kayöngö, hapōilen Chu man inrē, tö ngam kanôlò Chu misī in Meh, urēhĕkūö ranehlö ngih panam. 6 Ngaich Chin hameuktö ngam Mine-eny Meh i vē tarik, vē kahëtö Meh in Chu, aṅ ing panam; Me-eṅ yin; ngaich kēten cha Me-eṅ in Chu; ngaich yin nö haköp ngam ṙô meh. 7 Akahalōn yin nö ngaich, töngamuh, tö nup taṙòkhöre kahëtö Meh in Chu, nö ṙamā-ang in Meh. 8 Ngaich Chin kē-ĕkūö cha tö në ṙô, në kahëtö Meh in Chu; ngaich cha-a nö hōḵo u. Akahalōn takô inrē, tö Chu yih, ṙā-ang in Meh; ṙātö ellōnre cha-a inrē, tö Meh Öm tīnten Chu. 9 Ve-elkui cha Chin; öt ve-elkui ngih panam; höng yip kahëtö Meh in Chu, pò cha nö Me-eṅ. 10 Ṙòkhöre nup Chū-ö inrē, nö Me-eṅ; Chū-ö nup Me-eṅ inrē. Ngaich in u Chū-ö hakôlöngṙô. 11 Rö-ö Chin ngöhöre ing panam; yih Chin in Meh, höngngöh vē nö ing panam. Töhet Kayöngö; haköpö cha Man i Mine-eny re, vē kahëtö Meh in Chu; hòṅ cha nö hĕng, sā hī ayī-ö. 12 I saha Chu in cha, haköpö cha Chū-ö i ngam Mine-eny Meh, vē kahëtö Meh in Chu, aṅten cha Chin inrē. Öt hĕng tak tö cha tö ötkôlò höng ngam kūön ötkanôlò, nö kinheūṅtngen ṙô ngam töhet līpöre. 13 Yih Chin Chū-ö in Meh. Ngatī ṙô Chin ngaich, i saha Chu ing panam, hòṅ cha nö tööḵlö töp ṙanāmölōn Chu, nö in cha, Ngaich Chin kē-ĕkūö cha tö ngam ṙô Meh. 14 Ngaich surīkhu cha-a töng panam; pò cha nö öt aṅ ngih panam; sā Chu Chū-ö öt aṅ ngih panam. 15 Rö-ö Chin ve-ekūö Meh, Öm kēḵngen cha, ṙāngö ngih panam; aṅten cha pöri, tö ngam tö-ötlöök. 16 Rö-ö yin nö aṅ ngih panam; sā Chu Chū-ö öt aṅ ngih panam. 17 Ahetlen cha Man yēḵ im kanô-en. Ngam ṙô Meh an kanô-en. 18 Sā tī Meh, tīnten Chu ing panam; ngatī Chū-ö tīnngen cha ing panam. 19 Pò kūö cha Chin ahetlöre, hòṅ cha cha-a inrē nö ahetlöngö, nö im kanô-en. 20 Rö-ö yin nöng vē vahe-elkui Chu; tön ṙòkhöre yip ṙamātö ellōnre min inrē, nö lökten i ṙô cha. 21 Hòṅ cha nö ṙòkhöre nö hĕng; sā Meh Me-eṅ Kayöngö in Chu; in Meh Chū-ö; hòṅ cha cha-a inrē nö in hā; hòṅ ngih panam nö ṙātö ellōnre tö Meh Öm tīnten Chu. 22 Kē-ĕkūö cha Chin ngaich, tö ngam kanôlò, ngam kahëtö Meh in Chu; hòṅ cha nö hĕng, sā hā aya-a hĕng; 23 In cha Chū-ö, in Chu Me-eṅ; hòṅ cha nö teungten nö höng hĕng; hòṅ ngih panam nö akahalōn tö Meh Öm tīnten Chu; Öm, hāngenlōn inrē tö cha, sā hanāngenlōn Meh tö Chu. 24 Kayöngö; hōten cha Chin, vē kahëtö Meh in Chu, nö i chūök Chu; hòṅ cha nö meuk ngam kanôlò Chu, ngam kahëtö Meh in Chu; pò Meh töhāngenlōn tö Chu, urēhĕkūö ranehlö ngih panam. 25 Ō Kayöngö tölöök, öt akahakūö ön ngih panam tö Meh; akahakūö pöri Chū-ö tö Meh; akahalōn vē inrē, tö Meh Öm tīnten Chu. 26 Mikahtölōn cha Chin ngaich, tö ngam Minënyö Meh; hēk min inrē Öich mikahtölōn cha tö e; hòṅ ngam hanāngenlōn nö in cha, ngam hanāngenlōn Meh tö chu; hòṅ Chu Chū-ö in cha inrē.
Kinë-eṅ Yēsū
1 Keuheūthë ṙô Ang Yēsū tö u; kiröönngöre ngaich Anga-aṅ nö holtö yik haköptöre; nö havāngngö ök kun töhëm mak Kītrōn, nö ik panô-òṅ, i chūök Ò nö kuhēthötre, Anga-aṅ tö yik haköptö Ò inrē. 2 Akahakūö ang Yūtā, ök kamëḵngen Ò, tö e; pòn ṙōl heuh Yēsū nö in e, nö holtö yik mahaköp. 3 Keuheūthëṙen ang Yūtā nö ngôṅ yik kumyung yik tösökhak inrē; yihtöre ngaich nö in e, nö kanrīöṙu, tanyukngu, aṅhaṅv tī inrē. 4 Akahalōn Ang Yēsū tö nup taṙòkhöre yamihen Ò; kunyī-inyre ngaich, ngaich ngö ṙô tö cha, 5 Achīö ap chahöh yīö? Chöhö Yēsū in, öp aṅ Nāsaret, ngö ṙô cha-a, nö sapṙô Ò. Ngaich ngö ṙô Yēsū tö cha, Chū-ö Chini. Sökhak inrē nö in cha, ang Yūtā, ök kamëḵngen Ò. 6 Hē Yēsū nö ngö ṙô tö cha, Chū-ö Chini, heūlngöre cha-a ngaich; ngaich afukngöre nö el tumlat. 7 Ngaich hēk Anga-aṅ nö hatönö cha, nö ngö ṙô, Achīö ap chahöh yīö? Chöhö Yēsū in, öp aṅ Nāsaret, ngö ṙô cha-a. 8 Ngaich ngö ṙô Yēsū, Ngaīchô Chin taheui tö yīö, tö Chu Öich Chū-ö, Yē yīö chöhö Chu, hökngen vē yēḵ nö kiröönngöre. 9 Kinheūṅtngen ngam ṙô Ò an angū-ö, töngö, Öt hĕng hang tak tö löhlö tö tī Chu, i yip kahë tö Meh in Chu. 10 Hē e ang Sīmōn Pītör nö hōknyö ök sanëtre, ngaich fang ök mahalanṙen mākūö kūönṙô; ngaich tökngö tī tök lahāmö nang ò. Malkös minënyi ök mahalanṙen. 11 Ngaich ngö ṙô Yēsū tö Pītör, Hayulhöt ngam sanëtre man; sōtu ṙöng Öich òkkūö ngam kulah, ngam kahëtö ngam Yöng Chu?
I kūö Annās Ang Yēsū
12 Ngaich yik kumyung, ök yöngṙen cha, tö yik tösökhaka inrē, aṅ i yik Yahūti, nö kē-ĕ Yēsū, ngaich nyëkan. 13 Ngaich kēḵngen Ò nö urĕh nö in Annas; yöng pīhö Kaifas anga-aṅ. Ök mākūö kūönṙô ik samyeūheu angū-ö. 14 Anga-aṅ Kaifas, famëḵlö yik Yahūti tö e nö tölöök, yĕn hĕng tak öp tarik tökapah, töpòkūö vē taṙòkhöre tarik.
Mahngen Yēsū Ang Pītör
15 Tömkörit Yēsū ang Sīmōn Pītör, ngatī inrē ök tahëng mahaköp. Mikahkūö ök mākūö kūönṙô ök anga-aṅ mahaköp; kuhēthötre anga-aṅ nö anònghöt Yēsū nö el patī ök mākūö kūönṙô. 16 Höng sökhak pöri Pītör nö lā-uk, nö i kūö inkūp. Lökten ök tahëng mahaköp, ök mikahkūö ök mākūö kūönṙô, nö kunyī-inyre, ngaich ve-ekūö ök kikānö yōmkūö inkūp, ngaich ngô-òṅ Pītör nö kuhēthötre. 17 Ngaich ngö ṙô ök yōmkūö inkūp kikānö tö Pītör. Me-eṅ man röh inrē tö hĕng tak aṅ i yip mahaköp i ngòh tarik? Ngaich ngö ṙô anga-aṅ, Rö-ö chin. 18 Ngaich yik mahalanṙen, yik tösökhak inrē, nöng sökhaka, hameui tameūyö tö ta-ök; pò e nö laneūchö. Ngaich hameūyöre cha-a; in cha inrē ang Pītör nö sökhaka, nö hameūyöre.
Hatönö Yēsū Tök Mākūö Kūönṙô
19 Ngaich ngam mākūö kūönṙô nö hatönö Yēsū tö yip mahaköp in Ò, töp ṙô Ò inrē inköphöti. 20 Ngaich ngö ṙô Yēsū tö ò, Höng hangāṅlnyöṙô re Chin ing panam; el chūök vine-eṅkūötēv Chin haköphöti, el ngam töhet chūök inrē, i chūök vē Yahūti nö ṙòkhöre nö mūl. Rö-ö Chin ulāikôre. 21 Kūöyòh Öm hatönö Chu Hatön yip hamang ṙô Chu man yēk, tö ṙô Chu tö cha. Akahalōn yin vē tö ṙô Chu. 22 Ngaich hē Ò nö ngatī ṙô, hĕng tak ngaich ök tösökhak, famôhan, nö ngö ṙô, Ngatī ṙô Öm sapṙô ngam mākūö kūönṙô? 23 Ngaich ngö ṙô Yēsū tö ò, Yē Chu Öich chōchö ṙô, ngaich ameūkö ngam tö chōich. Yē Chu pöri löökô, kūöyòh öm fōhoh Chu? 24 Ngaich ang Annas nö tīnngen Ò, nöng nyëkö, nö in Kaifas, ök mākūö kūönṙô.
Hēk Pītör Nö Mahngen Yēsū
25 Höng sökhak ang Pītör nö hameūyöre; ngaich ngö ṙô cha-a tö ò, Röh öm me-eṅ inrē, mahaköp in Ò? Mahangre ngaich anga-aṅ, nö ngö ṙô, Rö-ö Chin Chū-ö. 26 Hĕng tak ök aṅ i yik mahalanṙen ök mākūö kūönṙô, hanöng kisānö ök töfāngi nang tö Pītör, töngö ṙô, Röh öich meūkö meh, hol Ò, el panô-òṅ? 27 Mahangre hēk ang Pītör; ngaich iṙūö takeūk hayöm.
Kētu Yēsū Nö I Kūö Pailět
28 Ngaich kēḵngen Yēsū cha-a, nö ṙā-ang in Kaifas, nö i patī mahayöng. Ka-euilökūö angū-ö tö peuheū. Öt kuhēthötre cha-a nö el patī mahayöng; pòn sōtu nö kuvīö, kūö nyinā-aṅ ngam paska. 29 Lökten Pailĕt nö kunyī-inyre nö in cha, ngaich ngö ṙô, Asuh ap falngen ngòh tarik, vahënyö yīö? 30 Ngaich ngö ṙô cha-a nö sapṙô ò, Yē ngòh tarik öre nö tötchōchö la-en, ngaich öt kēten Ò öre ihö in meh. 31 Ngaich ngö ṙô Pailĕt tö cha, Kēḵ An yin yī-ö; kahòkken Ò kahngenre, asā ngam chöngöre. Ngaich ngö ṙô yik Yahūti tö ò, Öt kô in ihö kumpah tarik. 32 Hòn kinheūṅten ngam ṙô Yēsū, ngam ṙô Ò nö hameūktö inlahen kinpahare Anga-aṅ. 33 Kuhēthötre hēk ang Pailĕt, nö el patī mahayöng; ngaich havëten Yēsū, ngaich ngö ṙô tö Ò, Rāchakūö Yahūti Öm Me-eṅ? 34 Ngaich ngö ṙô Yēsū, nö sapṙô ò, Höng kahngôre öm tö e? Vënyu nang ṙöng öm tö tahëng tö inlahen Chu. 35 Ngaich ngö ṙô Pailĕt, Yahūti Öich Chū-ö? Yip aṅ panam Meh, tö yip mākūö kūönṙô inrē, kamëten Meh nö in chu. Asuh ap falngen Meh? 36 Ngaich ngö ṙô Ang Yēsū, Öt aṅ ngih panam an ngam pūlngö Chu; yē e öre nö aṅ ngih panam, ngaich kô-òren yip mahalanṙen nö kiyung, hòṅ Chu öt kētu i vē Yahūti. Rö-ö pöri ngam pūlngö Chu nö aṅhih. 37 Ngaich ngö ṙô Pailĕt tö Ò, Rācha Man chēi Me-eṅ röh? Ngaich ngö ṙô Yēsū, nö sapṙô ò, Rācha Chin ngaich, sā ṙô meh. Ameūkö ngam kanô-en Chin; lökten Chu fötnyu; kūö e inrē Öich yih ing panam. Ṙòkhöre vē aṅ im kanô-en, nö hangṙô Chu. 38 A Ngaich ngö ṙô ang Pailĕt. Asuh öng ngam kanô-en?
Kumpāhaivah Ang Yēsū
38 Keuheūthë ṙô anga-aṅ tö e; ngaich kunyī-inyre nö hēk nö i yik Yahūti; ngaich ngö ṙô tö cha. Öt maheūṅku chin tö falngen in Ò. 39 Tö hĕng tak lahuhlö pöri Chū-ö, hē el paska; pò e nö ngatī. Hōten chu öi öich luhlö ngòh Rāchakūö Yahūti? 40 Ngaich hūḵa cha-a, nö ngö ṙô, Röön Anga-aṅ; Parapas pöri Tötūmu ök Parapas.
1 Ngaich Pailĕt nö kē-ĕ Yēsū, ngaich fōhan. 2 Ngaich yik kumyung nö vī sapīöv Ò tö tö chökhukūö, ngaich sumpīövlen Ò. Hayutlen Ò inrē tök laturë hilā. 3 Yihtöre cha-a nö in Ò, ngaich ngö ṙô, Rāchakūö Yahūti; Salām. Ngaich cha-a nö fōhan. 4 Kunyī-inyre hēk ang Pailĕt, ngaich ngö ṙô tö cha, Yĕh meuk, kēḵnyö ngòh tarik chin in yīö, hòṅ yīö akahalōn tö chu öt kanôtukūö tö falngen in Ò. 5 Kunyī-inyre Ang Yēsū nöng sapīövu tö nuk töchökhukūö, inyūtu tök laturë hilā inrē. Ngaich ngö ṙô Pailĕt tö cha, Meuk ngam tarik? 6 Ngaich hē më mākūö kūönṙô, yik tösökhak inrē, nö meūkan, ngaich hūḵa cha-a nö ngö ṙô, Harāten Ò! Harāten Ò! Ngaich ngö ṙô Pailĕt tö cha, Kahngenre yin kēḵ An, harāten Ò ngaich, tön rö-ö chin kanôtukūö tö falngen in Ò. 7 Ngaich ngö ṙô yik Yahūti, nö sapṙô ò, Chöngu in īhö; hòṅ kumpaha Anga-aṅ nö ip chöngö ih; pò Ò nö vī-ilre nö Kūön ngam Tēv. 8 Ngaich hē Pailĕt nö hāngö e, ṙuhölre pinhe-eṅkūö anga-aṅ. 9 Kuhēthötre hēk anga-aṅ nö el ök patī mahayöng ngaich ngö ṙô tö Yēsū, Aṅ yih Öm Me-eṅ? Ngaich nöng öt sapṙô ò Yēsū. 10 Lökten Pailĕt nö ngö ṙô tö Ò, Öt hòṅ ve-ekūö chu Ömeh? Öt akahalōn Ömeh tö chu mihôiṅ ṙānyen Meh, mihôiṅ inrē harāten Meh? 11 Ngaich Yēsū nö ngö ṙô, nö sapṙô ò, öt minhôinyu man in chu, yĕn Öt aṅ lātulöng nö kinëḵeṅkūö meh. Lökten öp kamëten Chu nö in meh, nö töpōyen tökööl. 12 Ngaich Pailĕt nö lukkenre nö ṙāngen Ò, kūö e. Hūḵa pöri yik Yahūti, nö ngö ṙô, Yē meh ṙālö ngòh tarik, öt hol Kaisör me-eṅ. Ngòh tö hòṅ vī-il re nö rācha, ngaich tökunyahaṅelmat anga-aṅ tö Kaisör. 13 Hē Pailĕt nö hang minë ṙô, kēḵngen Yēsū ngaich anga-aṅ, ngaich ūichngöre nö el chūök kamhôṅka, ök Tö-ihōngu Ël invëka; Kapata pöri, tö ṙô Heprai. 14 Inlēnken ngam Paska angū-ö; nët sīön köṅny ṙô hē e. Ngö ṙô anga-aṅ tö yik Yahūti, Meuk ngam Rācha yin. 15 Lökten cha nö hūḵa, nö ngö ṙô, Hachuhngen Ò; hachuhngen Ò, harāten Ò! Ngaich ngö ṙô Pailĕt tö cha. Harātö ngòh Rācha yīö, öich kòh? Ngaich ngö ṙô yik mākūö kūönṙô, Öt rāchavö in īhö, tö tahëng, höng Kaisöör. 16 A Lökten anga-aṅ nö kēten Ò, nö harātu.
Harātuvö Ang Yēsū
17 Ngaich kēḵngen Yēsū cha-a. 17 Kunyī-inyre ngaich anga-aṅ, keun ök töhakālöre, nö chuh ip chūök kui kupah; ök Kòlkòta, tö ṙô Heprai. 18 I chūök cha, nö harāten Ò, nët tak nak tahëng hol Ò; ahëmlen Yēsū cha-a. 19 Ngaich Pailĕt nö kūich ngih ineūkö, nö i rōi ök töhakālö, Yēsū, an Nāsaret; Rāchakūö Yahūti, ngö ök tökūichi. 20 Ngaich ve-evkūö angū-ö tö yik tömaṙôngö Yahūti; pò ök chūök Yēsū nö harātu, nö röhta nö im panam. Kūichi angū-ö inrē, nö i ṙô Heprai, Rōma, Krīk inrē. 21 Lökten yik mākūö kūönṙô, yik Yahūti inrē, nö ngö ṙô tö Pailĕt, Rāchakūö Yahūti, um ngö tī; kūich ṙô Ò pöri, nö ngö, Rāchakūö Yahūti Chin Chū-ö. 22 Ngaich ngö ṙô Pailĕt. Ngaich tī chin tö ngam kahūichre. 23 Ngaich yik kumyung, hē cha nö harāten Yēsū, nö kēḵ nuk hilā Ò; ngaich fën it tī, kö kahĕng vat më kumyung. Kēḵĕ inrē ök inyut Ò; ök töt taseūṙu inyut, tökupātö nö löktökūö lātulöng nö keuheūtngöre. 24 Lökten cha nö ngö ṙô tö höö, Ta-a, ui tikāchö e. Kalah öp töteūngen pöri tö e, öp töchehevṙen min tö e. Hòn kinheūṅtngen ṙô ngam töhet līpöre, tö ngö Katölhökūöre cha-a tö nuk hilā Chu; kalah taneūngenre tök in yut Chu. Ngaich yik kumyung nö ngatī tī. 25 Sökhaka nö umuh, nö ranghö ök töhakālö Yēsū, ök kikānö yöng Ò, ök kahëm ök kikānö yöng Ò kikānö inrē, Mariā ök pihö Klopas, Mariā aṅ Mektelā inrē. 26 Lökten hē Yēsū nö meuk ök yöngre, sökhaka inrē ök mahaköp, ök hanāngenlōn Ò, nö ranghen ò, ngö ṙô Anga-aṅ tök yöngre, Meuk ngam kūönre man. 27 Ngaich ngö ṙô Anga-aṅ tök mahaköp, Meuk ngam yöngre man. Hēten tö e ök mahaköp nö kēḵ an nö in re.
Kinpaha Yēsū
28 Keuheūthëṙen angū-ö, akahalōn ngaich Yēsū tö nup taṙòkhöre nö keuheūten, ngaich ngö ṙô, Haṙëhe nômö Chin. Nö kinheūṅtngen ṙô ngam töhet līpöre. 29 Hĕng milöichö ök neū-euṅ umuh, tötööḵlö tö töhikīölhu vāin. Ngaich cha-a nö lòktö ök ṙòng ihong tö-aṅhaṅv alaha tö töhikīölhu vāin, nö i kūö ök chōn hissòp; ngaich kētu angū-ö nö elvāng Ò. 30 Keuheūthëkūö Ang Yēsū tö ngam töhikīölhu vāin ngaich ngö ṙô Anga-aṅ, Keuheūten an nö ngaich. Sōntökūöre Anga-aṅ; ngaich kēḵngö ök ma-alahare.
Sapnyu Elkël Ang Yēsū
31 Inlēnken angū-ö, lökten yik Yahūti nö sōtö nuk alaha cha nöngngöh nö i rōi nuk töhakālö, hē ngam töhet sakāmö, pò ngam töhet sakāmö nö tökiröng nö sakāmö. Ngaich ve-ekūö Pailĕt nö hōtö nuk kalröön cha nö liköli, ngaich kē-ĕyö cha-a. 32 Yihtöre ngaich yik kumyung; ngaich likölngö kalröön ök mu-urĕh, ök tahëng inrē, töharātu nö hol Ò. 33 Hē cha pöri nö yihtöre nö in Yēsū, ngaich meūkö Anga-aṅ nö ha-ehangen nö kapah; ngaich öt likölngö kalröön Ò cha-a. 34 Hĕng tak pöri ök kumyung tö aṅtī tö vöi nö sapnyö elkël Ò; ngaich ilöö hëmnyi nuk mahām, holtö mak. 35 Ngaich ök mameūkö e nö eū-a; tökô-en an ngam aheūkö ò, Akahalōn ang-aṅ töre nö kô-ò ṙô; hòṅ yīö inrē ṙātö ellōnre. 36 Pò u anū-ö nö ngaichngen nö kinheūṅtngen ṙô ngam töhet līpöre, tö ngö, Öt hĕng min tangëḵ Ò töliköli. 37 Ngö ṙô inrē ngam tahëng līpöre, Ngëichkökūö ngam sahapngöre yip min.
Lāpiyö Ang Yēsū
38 Keuheūthëṙen anū-ö ngaich Yôsĕf aṅ Arimatiā, nö havëtôre nö in Pailĕt, pòn hòṅ kēḵngö ök alaha Yēsū; ök mahaköp nö in Yēsū, höng ulāikenre pöri, pòn pa-ekūö tö yik Yahūti Ngaich Pailĕt nö halöngten ò. Kēḵngö ök alaha Ò ngaich anga-aṅ. 39 Yih inrē ang Nikòtimös, ök yamihtöre nö in Yēsū tö hatööm, kumtö tökatēhĕ mūr, tö alō, hēngòng kinlaha. 40 Kēḵ ök alaha Yēsū cha-a ngaich; ngaich haṙūngö e tö hilā, nö holtö tötahūsa; sā falngen tī Yahūti, nö lāpö. 41 Röhta ök panô-òṅ, nö i chūök Yēsū nö harātu, ök tö-aṅhavö tök tufömngöre anūlö, tö-öluvö nö chaphötvö aṅ tö kupah. 42 Pò e nö Inlēnken yik Yahūti, röhta ök anūlö inrē; ngaich cha-a nö chaphöt Yēsū nö in e.
Öt Aṅhāvö Ök Anūlö
1 Im ranehtökūö minë tö sat sumkam, ka-euilökūö ang Mariā aṅ Mektelā, nö yihtöre nö ik anūlö, ṙòngmö sangūla angū-ö. Ngaich meuk ök ihong nö kē-ĕyö nö ṙā-ang i kūö ök anūlö. 2 Faltöre anga-aṅ ngaich; ngaich yihtöre nö in Sīmōn Pītör, ik tahëng inrē mahaköp, ök hanāngenlōn Yēsū; ngaich ngö ṙô tö cha, Kē-ĕyö Ök Mā nö ṙā-ang ël öp anūlö. Ötakahalōn ihö tö chūök tī cha nö ṙāten Ò. 3 Kiröönngöre ngaich Pītör, tök tahëng inrē mahaköp, ngaich kū-ö tö ök anūlö cha-a. 4 Kö fālönyöre cha-a; ngaich ök tahëng mahaköp nö urĕh tö Pītör; urĕhtö yihih ngaich nö ik anūlö 5 Môkhötkūöre anga-aṅ, ngaich meuk nuk hilā nö hulalhaka; öt kuhēthötre pöri. 6 Tömrit ò ang Pītör, kuhēthötre anga-aṅ ngaich nö ël ök anūlö; ngaich meuk nuk hilā nö hulalhaka. 7 Ök mi-i kui Ò inrē hilā, öt hulalhaka nö i nuk tahëng; lömi pöri angū-ö, nöng hĕng. 8 Ngaich kuhēthötre ngam tahëng mahaköp, ngam mu-urĕhtö yihih nö ik anūlö; ngaich meuk anga-aṅ, ngaich ṙātö ellōnre. 9 Pò cha nö öl nö akahalōn tö ṙô ngam töhet līpöre, tö Ò nö chamôhòlre nö hēk, nö ṙā-ang yip tökapah. 10 Havantöre ngaich nak mahaköp nö in yik holre.
Meūkö Yēsū Tö Mërī Mëktëlin
11 Höng sökhak pöri Mariā, nö elkahôyö, ranghö ök anūlö, nöng peuny. Hē ò nö ṙòngmö peuny, ngaich môktökūöre nö ël ök anūlö. 12 Ngaich nët tak nak ma-ahānga, maheuṅk ò, tö isōho inyut, nöng ūichhaka; hĕng taka lā kui, hĕng taka lā röön, i chūök ök alaha Yēsū nö ṙātu. 13 Ngaich ngö ṙô cha-a tö ò, Kūöyòh öm peuny? Ngaich ngö ṙô anga-aṅ, nö sapṙô cha, Pò cha nö kēḵngö ök Mā chu; öt akahalōn Chū-ö tö chūök tī cha nö ṙāten Ò. 14 Keuheūthëṙô anga-aṅ, havöölökūöre ngaich; ngaich meūkö Yēsū nö sökhaka; öt akahakūö pöri anga-aṅ tö Ò nö Yēsū. 15 Ngaich ngö ṙô Yēsū tö ò, Me-eṅ kikānö; kūöyòh öm peuny? Achīö ap chahöh meh? Yōm panô-òṅ Anga-aṅ, tö lōn Mariā, ngaich ngö ṙô tö Ò, Mā; yē Meh kēḵngen Ò nö ṙā-ang hih, ve-eny nang chu Man yēk, tö chūök tīre ṙāten Ò; hòṅ chu kēḵ an. 16 Mariā! Ngö ṙô Ang Yēsū tö ò. Ngaich havöölökūöre anga-aṅ, ngaich ngö ṙô tö Ò, nö i ṙô Heprai, Rapponi! Ngam tö ngö, Mahaköphöti. 17 Ngaich ngö ṙô Yēsū tö ò, Uh Chin lūölka, tön öl Chin yônlö im yöng. Kiröönngöre pöri, kuṙòh; ve-eny nang yip hol Chu tö Chu yônlö im Yöngre, Yöng yīö inrē; im Tēv Chu, Tēv yīö inrē. 18 Yihtöre ngaich Mariā aṅ Mektelā nö ve-eny nang yik mahaköp, tö ò nö meukkūö ngam Mā, tö Ò inrē nö ṙô tö në nö in ò.
Meūkö Tö Yik Haköptöre
19 Ngaich hē e nö harap, im ranehtökūö minë tö sat sumkam öphakkūö nuk inkūp, i chūök yik mahaköp, pòn pa-ekūö tö yik Yahūti; yihtöre Ang Yēsū, ngaich söklöre nö ellōn cha; nö ngö ṙô tö cha, Kumchikṙen yēḵ in yīö. 20 Keuheūthëṙô Anga-aṅ tö e, ngaich hameuktö eltīre, elkëlre inrē nö in cha. Lökten yik mahaköp nö ṙāmölōn, hē cha nö meuk ngam Mā. 21 Ngaich hēk Ang Yēsū nö ngö ṙô tö cha, Kumchikṙen yēḵ in yīö. Sā ngam Yöng nö tīnngen Chu, ngatī Chū-ö tīnngen yīö. 22 Keuheūthë ṙô Anga-aṅ tö e, uhômnyökui cha Anga-aṅ tö e, nö ngö ṙô tö cha, Kē ngam Töhet Fanöinylö yin. 23 Vē tö-aṙēlöng tökööl tö yīö, aṙēlöngö cha-a nö ngaich; vē tö haköpi tökööl tö yīö, haköpiyö anū-ö nö in cha.
Yēsū Nāṅ Tômös
24 Rö-ö pöri ang Tômös, ök aṅ i yik tö nët sīön, ök tö Titimös invëka, nö hol cha, hē Yēsū nö yih. 25 Lökten yik tahëng mahaköp nö ngö ṙô tö ò, Meuk Ök Mā in īhö taheui. Ngö ṙô pöri anga-aṅ tö cha, Yē chu öt meuk chūökkūö nuk kīny eltī Ò, sëphöt kuntīre inrē i kūö nup chūökkūö nuk kīny; sëphö tīre inrē i elkël Ò, hö-ö chin hòṅ ṙātö ellōnre. 26 Unôichrit töhëvhör sumkam hēk, yik mahaköp nö el patī, in cha inrē Tômös. Yihtöre Ang Yēsū höng löphakkūö nuk inkūp; söklöre ngaich nö ellōn: ngaich ngö ṙô Kumchikṙen yēḵ in yīö. 27 Ngaich ngö ṙô Anga-aṅ tö Tômös, Ṙēptö kuntīre man ihih; ngëichkö eltī Chu, ṙēptö tīre inrē, sëphöt tīre i elkël Chu. Um öt mikahavö; ṙātö ellōnre pöri. 28 Ngaich ngö ṙô Tômös, nö sapṙô Ò, Mā Chu, Tēv chu inrē! 29 Ngaich ngö ṙô Yēsū tö ò, Kūöre man me-eṅ ngaich meūkö Chu, ngaich öm ṙātö ellōnre röh? Tökôlò yip cha-a, yip töt mameuk, ngaich nöng ṙātö ellōnre.
Chööḵ-nyö Ngih Līpöre
30 Pōyen nup tahëng minkahngö tī Yēsū nö i kūö yik mahaköp, nup töt kūichiyö nö i mat ngih līpöre. 31 Kūichyö pöri në, hòṅ yīö ṙātö ellōnre tö Yēsū nö Kristū, ngam Kūön ngam Tēv, hòṅ yīö inrē, lökten im ṙinātö ellōnre i Mine-eny Ò, öi nômuvö.
Meūkö Tö Yik Tö Sattak Mahaköp
1 Unôich hēk Ang Yēsū nö hameuktöre nö i yik mahaköp nö ip mai Tipēriös. Ngö inlahen Anga-aṅ nö hameuktöre; 2 Hēḵ Sīmōn Pītör yik umuh; Tômös inrē ök tö Tītimös invëka, Netenīel ök aṅ Kānā i Kelelī, nak kūön Sepetī, nët tak nak tahëng inrē mahaköp. 3 Ngö ṙô Sīmōn Pītör tö cha, Kiröönngöre chin el mai. Ngaich ngö ṙô cha-a tö ò, In meh in īhö inrē. Kiröönngöre cha-a, ngaich yôklö nö el kupòk; ngaich im hatööm cha-a nöng öt pô-òv. 4 I hanatlö ngam peuheū, sökhaka Ang Yēsū nö i kuyāyö; rö-ö pöri cha-a nö akahakūö tö Ò nö Yēsū. 5 Ngaich ngö ṙô Yēsū tö cha, Yī-ö nyīö; nya-aṅvkūö öi yih? Ngaich ngö ṙô cha-a nö sapṙô Ò, Hö-ö. 6 Ngaich ngö ṙô Anga-aṅ tö cha, Kavalngö ngam inhāṅl, lāhāmö ngam kupòk; ngaich pô-òvö yī-ö min. Kavalhang cha-a ngaich; ngaich öt kô nö tūökö e, kūö ṙôken nuk kāḵ. 7 Ngaich ök mahaköp, ök hanāngenlōn Yēsū, nö ngö ṙô tö Pītör, Ngam Mā An. Ngaich hē Sīmōn Pītör nö hāngan nö ngam Mā, kafanlöre anga-aṅ ngaich; pò ò sin nö öt hilāṙu; ngaich sūtöre nö el mai. 8 El kun kupòk pöri yik tahëng mahaköp nö kuhēt, nö tūök ök inhāṅl, nö tööḵlö tö kāḵ. Öt marô-òiny cha-a, höng taneui anāi tasöm rô-òiny. 9 Hē cha nö ngaich nö el tanyô, ngaich meuk nuk ta-ök kūö tameūyö cha-a; kāḵ nuk i kūö e, ròtī inrē. 10 Ngaich ngö ṙô Yēsū tö cha, Kētö nup pôre yin kāḵ. 11 Yôklö ngaich Sīmōn Pītör, ngaich tūökhöt ök inhāṅl nö el tanyô, tööḵlö tö tökiröng kāḵ, hēngòng taneui anāi lūöi tum nòng. Öt takaich ngam inhāṅl, pòrô anū-ö nö pōyen. 12 Ngaich ngö ṙô Yēsū tö cha, Ta-ih; nyā yin. Öthĕng tak tö yik mahahöp, tö hòṅ hatönan, nö ngö, Achīö Öm Me-eṅ? Pò cha nö akahakūö tö Ò nö ngam Mā. 13 Yihtöre Ang Yēsū; ngaich kēḵ ṙòtī, ngaich kē-ĕkūö cha; ngatī inrē tö nuk kāḵ. 14 Linūöi heuh Yēsū an angū-ö, nö hameuktöre nö i yik mahaköp, unôichrit chanôhòl Ò, nö ṙā-ang i yip tökapah.
Yēsū Nāṅ Pītör
15 Keuheūthëkūö cha-a nö nyā, ngaich ngö ṙô Yēsū tö Sīmōn Pītör, Sīmōn, me-eṅ kūön Yôna; mööḵlö hanāngenlōn öm tö Chu, tö vē? Ngaich ngö ṙô anga-aṅ tö Ò, Hòṅ; Mā; akahalōn Man tö chu hāngenlōn tö Meh. Ngaich ngö ṙô Anga-aṅ tö ò, Ha-aṅlö në kun pököre Chu man. 16 Ngö ṙô hēk Ang-aṅ tö ò, im innët heuh, Sīmōn, me-eṅ kūön Yôna; hāngenlōn öm tö Chu? Ngaich ngö ṙô anga-aṅ tö Ò, Hôṅ; Mā; akahalōn Man tö chu hāngenlōn tö Meh. Ngaich ngö ṙô Anga-aṅ tö ò, Meukkö në pököre Chu man. 17 Ngö ṙô Yēsū tö ò, īm linūöi heuh, Sīmōn, me-eṅ kūön Yôna; hāngenlōn öm tö Chu? Haṙivlōn ngaich ang Pītör, pòn linūöi heuh ṙô Ò, nö ngö, Hāngenlōn öm tö Chu? Ngaich ngö ṙô Pītör tö Ò. Mā! Tökeuheūttöre mikahlōn Man; akahalōn Man, tö chu hāngenlōn tö Meh. Ngaich ngö ṙô Ang Yēsū tö ò, Ha-aṅlö në pököre Chu man. 18 Tökô-ò ṙô Chin tö meh, Hē meh misī ayal, kahngenre me-eṅ kafanlöre; kiröönngöre inrē ip kū-ö lōn meh. Yē meh pöri min ngaich köṅny, hateutnyö minë këlre min me-eṅ; ngaich kafānö min tö tahëng tak; kēḵngen meh inrē ip töt kū-ö lōn meh. 19 Ṙô Yēsū an angū-ö nö hameuktö inlahen kinpaha ò, nö ha-öiny ngam Tēv. Keuheūthë ṙô Yēsū tö e, ngaich ngö ṙô tö ò Tā-a, tömrit Chu.
Yēsū Tö Yik Tahëng Mahaköp
20 Havöölökūöre Pītör, ngaich meuk ök mahaköp, ök hanāngelōn Yēsū nö tömrit cha; ök maharônlöre nö in Ò, hē ök nyinā-aṅ, ngaich ngö ṙô, Mā; achīö ap kamëḵngen Meh? 21 Höng meuktöre Pītör tö ò, ngaich ngö ṙô tö Yēsū Mā; Sitih min ngòh tarik ngòh? 22 Ngaich Yēsū nö ngö ṙô tö ò, Yē Chu lōnuvö tö ò nöngngöh hanöng saha yanīhih Chu, asuh öng angū-ö nö in meh? Ta-a tömrit Chu man me-eṅ. 23 Ngaich a ngū-ö nö hāngö tö yik hol cha, tö ò anga-aṅ mahaköp nö töthōḵ nö kapah. Rö-ö pöri Yēsū nö ṙô-òv tö ò nö töthōḵ nö kapah, tön höng ngö ṙô. Yē Chu lōnuvö tö ò nöngngöh hanöng saha yanīhih Chu, asuh öng angū-ö nö in meh? 24 Anga-aṅ ön ngòh mahaköp ameūkö në taṙòkhöre, kūichngö u inrē. Akahalōn īhö tö ngam aheūkö ò nö tökô-en.
Manāngörit Ngam Līpöre
25 Pōyen nup inrē tahëng tī Yēsū, kūichi öre anū-ö nö ṙòkhöre, ngaich öt kô ngih panam, tö lōn chu, nö chūök nup līpöre tökūichiyö.