Lukug Tugupui

Bekinnam

1

1 Ngo:g tumanam Thiopilas, Eija:g pota xe:nbo nyitulunge ngulug suucaso goml lyol mulungam xe:pul apgenkun. 2 Ngulam hog helaxe: otu:ja ho:ge tugupuiam tagab kaagabpel mubulug gekkel ga:nyiabo heki nyitulug bekinnam beru:kam mubule xe:pnum. 3 Hoggab bir ab otu:ja ho:ge ngoo so: beru: mulusam xixuja:b porinum. Xixuja:b poril centul no:g gab so: sam pu:tu pebu anja:b xe:pul ap nyilo:kam al kimpa hel ngoo muunum. 4 Nam hog helaxe: tomsurnum hoo pu:tu gorgu mulungam nam cemtis muune ngoo sam xe:gyun.

Juhon Baptistnen Durbu:dinarnmam Aogumtuge Pui dukinnam

5 Jihudi gedaho Herod rojag suucado hoo, Jexoria ngekkel Abija nyub ak doonum Muug nyuxuho: eminne Elijabeth. So: nyem aksi Horunug ko hosike. 6 So: nyuxu nyol enysi Isorg kaagaho nyidja:b suuba sunum. 7 Elijabeth turngumi dootakologe, bunyi gab ko ak jija:kam doomanum. Mue Ia Joxoria bunyie xox xux, nyekam komgu kunum. 8 Algolo muug bon nyicu moodam hengi Joxoria Isorg kaaga hoo nyubgob nyine bon nyidul doonum. 9 Nyub hedug nyucu mucuja:b muam Mondir nam urag detumho sulum mumdeb xuglu:num. Ho:gab mue Atug namub haanum. 10 Uraho mue sulum muduyun, nyitulunge agaho pratna mudul doonum. 11 Hoo aogumtu ak muug dookub haanesulum muduko detum lebu: dayaho do:dunum. 12 Muam kaapatel mue hog loomatu:b nyil bos sonum. 13 Hebmaabde aogumtu ake muam benum, "Joxoria akekam bos somabe, Isore no:g pratnangam loru: paku, ho:ge no:g nyuxu Elijabeth no:g gab ko ak dootain. Muam noo Juhon hel emin mindub nyitain. 14 Hoo noo hemp bela hunyur nyurdub nyunup, ho:ge muam ko beeikam nyie eigo hemp potain. 15 Atug kaagaho nyie yuukumdeb suutain. Mue opo gokam tuudub nyiram. Muam dur bulin tu:da:kalam muug legab deru:bo Yejyale doobatain. 16 Mue Israelug nyiam eija:g mubulug At Isorg dookub bookur jitain. 17 Mue nyu:rkaal suunbo Elijag hebkalam heju putub, haalo daatub nyil Isorg otu:-otu:b eecol abtulungam mubulug koam abi bomin sudub bugil suumabo nyitulungam nyedarbo nyitulug muula:sapa:ngam tal bugil suumdeb, At gab hange gexam xampol doonbo nyitulungam nyix nyial dootuk hel tomsurtain.

18 Joxoria aogumtungam toxnum, "Hebnyilo:kam ngoo sam hogub nyil centain? Ngoo nyekam kunbo nyi akub nyiaden ho:ge ngo:g nyuxungekam xox yaadkun. 19 "Ngoo lak Gabriel" hel aogumtu ake biru:num. "So:tugupui sam bekin taakkel kanambo Isorg kaagaho ngoo doodun. 20 Hebmaabde moode hetu:kalam nyidbo ngo:g puiam noo muju maankun. Ho:gab Ho:g al ja:kam no:g gab ngo:g dingnam dintu nyi:tuke dootain, ho: al xa:gub ecir gokam becin kumab goomab noo dootain."

21 Ho: hoo nyitulunge Joxorianen kaalya lyodul agaho doonyianum. Mondir uraho hekam bexe: oyul doikun hene nyitulunge muam muumosusu nyianum. 22 Kokuso mue beyurb lengei kukam, mue mubulam hog gokam gooru: nyok maanum Hoo Mondir nam uraho hog nekeyu koorgode mue kos peknago hel mubule cengnyia kunum.

23 Mondir nam uraho muug bonam nyiyum yukam, mue namub ukurnukun. 24 So: kokuso muug nyuxu Elijabeth ko gerob kune pool barng xa:gub hoglo jija:bekam caalinca maabja namho looxiam dooknum. 25 Kokuso Isore Ngam sija so:seb seka pakun" hel nyem ake benum Mue No:g raj rolu henyuharam naaxia genkun.

Jisun Dur bu:dinammam Aogumtunge put dukinnam

26 Kokuso Elijabethug ko genamme pool barx gob nyiduk hoo Isore aogumtu Gabrielun Galili geda hoo doonbo Nasorot nampumb kanamnum. 27 Dayud rojag ko hosi: Juseph gabukkel bega:l apnam nyem nyujur ak gab mue pui bilu:num. Ho : nyem nyujur ho:g eminne Moriam. 28 Aogumtu ake haane muam benum, "Sursomolonge no:g gab kula! Isore no:g legab doobal hindja:b le:c cignukun!" 29 Aogumtug puiam tatul hog loomatu:b nyine so: puisi sam hognek pago:gab beg yunyu hel muumosusnum. 30 Aogumtunge muam benum, "Moriam bos somabe, nam hename Isore hanglo pubu: muupa alden. 31 Noo ko gel ko ak beinup. Muam noo Jisu hel eminmindub nyiinup. 32 Mue nyia nyet radub suikukam, muam muluja:kam koi yaanbo Isorg koe hel bedub nyiinup. Muug at Dayud hebkalam, Isore ate muam rojab metain. 33 Nurba cetum xa:gub mue Jakub ko hosig roja akub nyiinup; muug lepunge nyulyungam bitaram."

34 Moriam aogumtu akam benum, "Ngoo nyol doomabo nyujur relak. Ho: nyilo:kam hogubyu so:si nyitain?" 35 Aogumtunge biru:num, "Deru: Yejyale no:g aoho ipo:tain; ho:ge Isorg atore no:g aoho dootain. So: pago:gab deru:bo koam Isorg koekel betain. 36 No:g luku Elijabethnen muupalaka. Nyitulunge muamnen ko dook ramukkel benum; hebmaabde xox xugu kuja:kam, sija muug ko gename pool barx yukun. 37 hoggab Isorg nyiny maanam hog bon lug jija:kam doomaden".

38 "Ngoo lak Atug pa:ne", hel Moriam benum. No:g heb hekub sam ngo:g legab nyilo nyika mose." Hoo Aogumtu ake muug ogum ho:ge eele: kunum.

Moriam Elijabethnen kaa tab eenum

39 Oyu maadab Moriam rudu re:xul nyix nyial Judia gedag yorn aoho doonbo nampum golo eenum. 40 Mue Joxoriag namub haane Elijabethnen alpa hel benum. 41 Elijabeth Moriamg alpa hel benammam tapayun, koe Elijabethugaie: uraho binum. 42 Deru: bo Yejyale muug legab doomin getakologe, Elijabeth ec alub benum. Nyemtulug pengkolo noo molo xinamja:ke! No:g ko beedinam hemolo xinamja:ke! 43 Hebmaabde hog gabyu ngo:g Atug an ake Ngam kaatab haadub doodun? 44 Hoggab kaato, Ngo:g alpa hel benam yale Ngo:g nyurulo hetu:kalam, Ngo:g numum neplo ko doonboe hemp pokne jarin jarob nukun. 45 Ate hog helaxe: nam dingnum ham muju jugumgab noo hog hedgo hempden!

Isoram pa:1 Moriamg bemin benam

46 Moriam benum, "Ngo:g hange Atun pa:dun, 47 Ngam yutyunbo Isor gab ngo:g yejyale hempden. 48 Hoggab Ngo:g sek muug pa:n aya kaapadeb nyinboam mue muupa pakun! Ho:ge kaato, sija galoke hotum tomxig nyimulunge Ngam xinam ja:ke hel betain, Ngo:g gab Atorbo Isore xitorbo bonam nyij pakun. Muug eminne Deru:bo;

50 Muam bos sonbo nyitulungam hotum hotum godab mue anyia nyiadun. 51 Mue bon xilongam muug ala:nge nyin genkun. At at hanglo xitor yagub muunyiabo nyitulungam mue cursa: bera: tu:b megnukun. 52 Koibo rojatulungam mubulug lepu ho:ge rupa; yumtul ximanam nyitulu yangam roja suumnum. 53 Kanobo nyitulungam xumdub mue albo des pootam jinum; Ho:ge ala:ke asar bele:deb nyetbo nyitulungam eem genkun. 54 Ngulug at apatulungam dingrul ap jinam hebkalam; 55 Abraham nela muug ko hositulungam, nurba cetum xa:gub anyiangam muupadeb mue muug nyera Israeltulungam sekatab haanum!" 56 Moriam Elijabethug legab pool borumgob dooba pekul namub ukur nukun.

Juhon Baptistnen ko Beenam

57 Kokuso Elijabethlig ko beed moode haikukam mue ko nyega ak beeknum. 58 Hoo muug gutu goralo ga nyitulunge muam dedija:b Ate ho: hedge muamnen anyia nyia kulanyi hel tapanum; ho:ge mubule mlilunge muug legab hemp poknum.

59 Al lopikalam pun denso mue ko nyega akam sunot metab haane ab eminnam mincul mubule muug eminnamkam Joxoria hel emin mindub muunum. 60 Hebmaabde muug ane benum, "Hebma, muug emine Juhon buslak dootain." 61 Mubule muam benum, "Hebmaabde no:g nyob lu pengkolo ho:hek emin mingnam nyi ak jija:kam dooma denlak." 62 Kokuso ko akam hognek eminja:kam mimb nyilo: kam altain hel mubule ab akam nyiyu nyima nyine toxnum. 63 Hoo Joxoria silet ak kone "Muug emine Juhon nek hel xe:num." Hoo mubule anyio bekam moonyia maanum. 64 Hoo dara Joxoria muug nexungela alie goon dukub nyiikukam mue Isoram alpa hel pa:rob kunum. 65 Hoo gutu gorag nyimulunge bos bulun sonyianum, ho:ge Judia yorn geda te:puho so: benam nyinam puisi uyu: eexe: nukun. 66 So: pago:kam mubulug hanglo muugab dumne toxnum, "So:ko aksi kokungam hogbexe: nyidboeyu?" Hoggab Atug atore muug legab dooba yubanyik hel mulunge cengnum.

Joxoriag Nyu:rkaanam

67 Deru:bo Yejyale muug ab Joxoriag legab doomin getakologe mue nyu:rkaanammam bekinnum. 68 "Kuj i, ngule Israel nyitulug At Isoram pa:nyiatuj! Hoggab mue muug nyitulungam sekatab haane mubulam melin kunum. 69 Ngulam atorja:b yutyudbo nyi ak mue muug nyera Dayudug ko hosi ak jipakun.

70 Kol otu:ja: ho:ge mue sam muug deru:bo nyu: rkaanbo nyitulungam begol apnum.

71 Mue ngulam ngulug cebo ba:nbo ho:ge la ngulam oyum yumnbo nyitulug ala: ho:ge yutyuta yunukkel dingnum. 72 Mue ngulug at abtulungam anyia tainek hel, ho:ge muug deru aldub goorminsnam mam muugabl da:tor tainek hel, benum. 73-74 Ngulam cebo ba:nbo nyitulug ala: ho:ge ecur gokam bos somaja:b ngulug suunam xa:gub 75 muug kaagalo muam deru: ja:b nyik eek kotainukkel ngulug at ab Abrahamnen mue dingma eram dingnum.

76 Ngo:g ko noo, nam muluja:kam koi yaanbo Isorg nyu:rkaanboe hel betain; Noo Atug eemada:b otu:b eecol lamtangam muug gab mepta. 77 Mubulug nyicnyiangam nyuyungam muupa kumab nyil mubulam yutyuta yunukkel muug nyitulungam bekinta. 78 Hoggab ngulug Isore anyia nyianbo Isore; Mue ngulug aoso muug ngulam nyedar tanam hutongam hurob menum, ho:ge sig dunyum kan uralo doonyiabo nyitulug aolo aoged-a tologe huuldeb jitain. 79 hoo mue ngulug alam sursomolo lamtab bool eegtain".

80 Kokuso ho: ko ake koi kune yejyal lo jiikam alub suurob bane Israel nyitulug rolu agaho lengnam al xa:gub mue dixarar ho doonum.

Jisun Dur Bu:nam

2