Nissi Luke /1 Ngoqg tumanam Thiopilas, Eijaqg pota xeqnbo nyitulungv ngulug swwcaso goml lyol mwlwngam xeqpwl apgvnkun. Ngulam hog hvlaxeq otuqja hoqge tugupuiam tagab kaagabpel mwbulug gvkkvl gaqnyiabo hvki nyitulug bekinnam bvrwqkam mwbule xeqpnum. Hoggab bir ab otuqja hoqgv ngoo soq bvrwq mwlwsam xixwjaqb porinum. Xixwjaqb poril centwl noqg gab soq sam puqtu pvbw anjaqb xeqpwl ap nyiloqkam al kimpa hvl ngoo mwwnum. Nam hog hvlaxeq tomswrnum hoo puqtu gorgu mwlwngam nam cemtis mwwne ngoo sam xeqgywn. Jihudi gvdaho Herod rojag swwcado hoo, Jexoria ngvkkvl Abija nyub ak doonum Mwwg nywxwhoq eminnv Elijabeth. Soq nyem aksi Horunwg ko hosikv. Soq nywxw nyol vnysi Isorg kaagaho nyidjaqb swwba sunum. Elijabeth twrnguml dootakologv, bunyi gab ko ak jijaqkam doomanum. Mwe Ia Joxoria bunyie xox xux, nyekam komgu kunum. Algolo mwwg bon nyicw moodam hengl Joxoria Isorg kaaga hoo nyubgob nyinv bon nyidul doonum. Nyub hvdug nywcw mwcwjaqb mwam Mondir nam urag detumho sulum mwmdvb xuglwqnum. Hoqgab mwe Atwg namwb haanum. Uraho mwe sulum muduywn, nyitulungv agaho pratna mudul doonum. Hoo aogumtw ak mwwg dookub haanvsulum muduko detum lvbwq dayaho doqdunum. Mwam kaapatvl mwe hog loomatwqb nyil bos sonum. Hvbmaabde aogumtw akv mwam benum, "Joxoria akvkam bos somabv, Isore noqg pratnangam lorwq paku, hoqgv noqg nywxw Elijabeth noqg gab ko ak dootain. Mwam noo Juhon hvl emin mindwb nyitain. Hoo noo hemp bvla hwnywr nywrdwb nywnup, hoqgv mwam ko bvvikam nyie vigo hemp potain. Atwg kaagaho nyie yuukumdvb swwtain. Mwe opo gokam twwdwb nyiram. Mwam dwr bwlin twqdaqkalam mwwg lvgab dvrwqbo Yejyalv doobatain. Mwe Israelwg nyiam vijaqg mwbulug At Isorg dookub bookur jitain. Mwe nywqrkaal swwnbo Elijag hvbkalam hvju pwtwb, haalo daatwb nyil Isorg otuq-otuqb vvcol abtulungam mwbulug koam abi bomin sudub bugil swwmabo nyitulungam nyedarbo nyitulug mwwlaqsapaqngam tal bugil swwmdvb, At gab hangv gexam xampol doonbo nyitulungam nyix nyial dootwk hvl tomswrtain." Joxoria aogumtwngam toxnum, "Hvbnyiloqkam ngoo sam hogub nyil centain? Ngoo nyekam kunbo nyi akwb nyiaden hoqgv ngoqg nywxwngvkam xoxyaadkun." "Ngoo lak Gabriel" hvl aogumtw akv birwqnum. "Soqtugupui sam bekin taakkvl kanambo Isorg kaagaho ngoo doodwn. Hvbmaabde moodv hvtwqkalam nyidbo ngoqg puiam noo mwjw maankun. Hoqgab Hoqg al jaqkam noqg gab ngoqg dingnam dintw nyiqtukv dootain, hoq al xaqgub ecir gokam becin kumab goomab noo dootain." Hoq hoo nyitulungv Joxorianvn kaalya lyodul agaho doonyianum. Mondir uraho hvkam bvxeq oyul doikun hvnv nyitulunge mwam mwwmoswsw nyianum. Kokwso mwe bvywrb lengei kukam, mwe mwbulam hog gokam goorwq nyok maanum. Hoo Mondir nam uraho hog nvkvyu koorgodv mwe kos peknago hel mubule cengnyia kunum. Mondir nam uraho mwwg bonam nyiyum ywkam, mwe namwb ukurnukun. Soq kokwso mwwg nywxw Elijabeth ko gvrob kunv pool barng xaqgub hoglo jijaqbvkam caalinca maabja namho looxiam dooknum. Kokwso Isore Ngam sija soqsvb svka pakun" hvl nyem akv benum. Mwe Noqg raj rolu hvnywharam naaxia gvnkun. Kokwso Elijabethwg ko gvnammv pool barx gob nyidwk hoo Isore aogumtw Gabrielwn Galili gvda hoo doonbo Nasorot nampumb kanamnum. Dayud rojag ko hosiq Juseph gabwkkvl begaql apnam nyem nywjwr ak gab mwe pui bilwqnum Hoq nyem nywjwr hoqg eminnv Moriam. Aogumtw akv haanv mwam benum, "Swrsomolongv noqg gab kula! Isore noqg lvgab doobal hindjaqb lvqc cigukun!" Aogumtwg puiam tatwl hog loomatwqb nyinv soq puisi sam hognvk pagoqgab beg ywnyu hvl mwwmoswsnum. Aogumtwngv mwam benum, "Moriam bos somabv, nam hvnamv Isore hanglo pwbwq mwwpa aldvn. Noo ko gvl ko ak beinwp. Mwam noo Jisu hvl eminmindub nyiinwp. Mwe nyia nyet radwb swikukam, mwam mwlwjaqkam koi yaanbo Isorg kov hvl bedwb nyiinwp. Mwwg at Dayud hvbkalam, Isore atv mwam rojab mvtain. Nwrba cetum xaqgub mwe Jakub ko hosig roja akwb nyiinwp, mwwg lvpwngv nywlywngam bitaram." Moriam aogumtw akam benum, "Ngoo nyol doomabo nywjwr rvlak. Hoq nyiloqkam hogubyu soqsi nyitain?" Aogumtwngv birwqnum, "Dvrwq Yejyalv noqg aoho ipoqtain; hoqgv Isorg atorv noqg aoho dootain. Soq pagoqgab dvruqbo koam Isorg kovkvl betain. Noqg lwkw Elijabethnen mwwpalaka. Nyitulungv mwamnen ko dook ramwkkvl bvnum; hvbmaabde xox xugu kujaqkam, sija mwwg ko gvnamv pool barx ywkun. hoggab Isorg nyiny maanam hog bon lug jijaqkam doomadvn." "Ngoo lak Atwg paqnv", hvl Moriam benum. "Noqg hvb hekub sam ngoqg lvgab nyilo nyika mose." Hoo Aogumtw akv mwwg ogum hoqgv vvleq kunum. Oyu maadab Moriam rudw rvqxwl nyix nyial Judia gvdag yorn aoho doonbo nampum golo vvnum. Mwe Joxoriag namwb haanv Elijabethnvn alpa hvl benum. Elijabeth Moriamg alpa hvl benammam tapaywn, kov Elijabethugaieq uraho binum. Dvrwq bo Yejyalv mwwg lvgab doomin gytakologv, Elijabeth ec alwb benum. Nyemtulug pengkolo noo molo xinamjaqke! Noqg ko bvvdinam hvmolo xinamjaqke! Hvbmaabde hog gabyu ngoqg Atwg an akv Ngam kaatab haadwb doodwn? Hoggab kaato, Ngoqg alpa hvl benam yalv Ngoqg nyurulo hvtwqkalam, Ngoqg numum nvplo ko doonbov hemp poknv jarin jarob nukun. Atv hog hvlaxeq nam dingnum ham mwjw jwgwmgab noo hog hvdgo hempdvn! Moriam benum, "Ngoqg hangv Atwn paqdwn, Ngam ywtywnbo Isor gab ngoqg yejyalv hempdvn. Hoggab Ngoqg svk mwwg paqn aya kaapadvb nyinboam mwe mwwpa pakun! Hoqgv kaato, sija galokv hotum tomxig nyimwlwngv Ngam xinam jaqkv hvl betain, Ngoqg gab Atorbo Isore xitorbo bonam nyij pakun. Mwwg eminnv Dvrwqbo; Mwam bos sonbo nyitulungam hotum hotum godab mwv anyia nyiadwn. Mwe bon xilongam mwwg alaqngv nyin gvnkun. at at hanglo xitor yagub mwwnyiabo nyitulungam mwe cwrsaq bvraq twqb mvgnukun. Koibo rojatulungam mwbulug lvpw hoqgv rupa; yumtwl ximanam nyitulu yangam roja swwmnum. Kanobo nyitulungam xumdwb mwe albo dvs pootam jinum; Hoqgv alaqkv asar beleqdvb nyetbo nyitulungam vvm gvnkun. Ngulug at apatulungam dingrwl ap jinam hvbkalam; Abraham nvla mwwg ko hositulungam, nwrba cetum xaqgub anyiangam mwwpadvb mwe mwwg nyera Israeltulungam svkatab haanum!" Moriam Elijabethwg lvgab pool borumgob dooba pekul namwb ukur nukun.