The Old Testament of the Holy Bible

Pianchilna 1

Leitung-khuavannuai Siamna

1 A chilin Pathian in lei leh vaante a siam. 2 Ahihhangin, tui thukpi in lei a khuh a, lei pen lim leh mel neiin a dawk kei. Tua tuipi thukpi mial in a khuh a, tua tung ah Pathian' Kha in a opkhum hi. 3 Tua khitin Pathian in: Khawvak om hen, a schi a, khawvak hong om hi. 4 Pathian in tua khawvak a hoih chih a mu hi. Tua khitin Pathian in khawvak leh khawmial a kikhensak a, 5 khawvak pen, sun, chi-in a minvawh a, khawmial pen, zaan, chi-in a minvawh hi. Tua bangin nitaklam a om a, zingsang lam a om a, a ni khat ni ahi. 6 Tua khitin, Pathian in: Tuite kikal ah huihkhua zapi om henla, tuite kikhen hen, a chi a, tua bangin hong om hi. 7 Tua bangin, Pathian in huihkhua zapi a omsak a, huihkhua tunga tuite leh huihkhua nuaia tuite a kikhensak hi. 8 Pathian in tua huihkhua zapi pen, vaan, chi-in a minvawh hi. Tua bangin nitaklam a om a, zingsang lam a om a, a ni nih ni ahi. 9 Tua khitin, Pathian in: Huihkhua nuaia tui omte mun khat ah kigawm henla, gamhul hong dawk hen, a chi a, tua bangin hong om hi. 10 Pathian in tua gamhul pen Leitung, chi-in a minvawh a, tuipi kigawmkhawm pen Tuipite, chi-in a minvawh hi. Pathian in tua a hoih chih a mu hi. 11 Tua khitin, Pathian in: Leitung in sing-le-lou hingte pousak henla, tua sing-le-loute'n amau' chi tek chitang nei gahte suang hen, a chi a, tua bangin hong om hi. 12 Tua bangin, leitung in sing-le-lou hingte a pousak a, tuate'n amau' chi tek chitang nei gah a suang uh a, tua gahte sung ah chitangte a om hi. Pathian in tua a hoih chih a mu hi. 13 Tua bangin nitaklam a om a, zingsang lam a om a, a ni thum ni ahi. 14 Tua khitin, Pathian in: Sun leh zan kikhensak dingin vansang zapi ah vakte om henla, tuate mah khawhunte, nite leh kumte theih theihna chiamtehnate hi henla, 15 leitunga khawvak tangsak dingin vansang zapi-a vakte hi uhen, a chi a, tua bangin hong om hi. 16 Tua bangin, Pathian in vak lian nih a bawl a, sun hun uk dingin vak lianzaw pen a sep a, zan hun uk ding vak neuzaw pen a sep hi. Ama'n aksite zong a bawl hi. 17 Leitung tanvak dingin Pathian in vansang zapi ah, tuate a koih hi. 18 Tua bangin, sun hun leh zan hun uk ding leh, khawmial leh khawvak kikhensak dingin amaute a sep hi. Pathian in tua a hoih chih a mu hi. 19 Tua bangin nitaklam a om a, zingsang lam a om a, a ni li ni ahi. 20 Tua khitin, Pathian in: Tuipite sung ah ganhingte dim henla, tunglam ah, huihkhua zapi ah a leng thei ganhingte leng hen, a chi hi. 21 Tua bangin, Pathian in tuipi sunga ganhing lianpipite a siam a, tuia pai thei ganhingte zong a siam a, amau chitek suangthei ganhingtein tuipite sung a dim hi. Amau' chitek suang thei, kha neia leng thei ganhingte zong a siam hi. Pathian in tua a hoih chih a mu hi. 22 Pathian in amaute a vualzawl a: Chipha unla, hong pung unla, tuipi tuite' sung dim un. Tunga leng thei ganhingte zong hong pung unla, leitung hong dim un, a chi hi. 23 Tua bangin nitak lam a om a, zingsang lam a om a, a ni nga ni ahi. 24 Tua khitin, Pathian in: Leitung in amau chichi suang thei ganhingte suah henla, ganhonte, bokvak ganhingte, gamsate'n amau chi tek suang uhen, a chi a, tua bangin hong om hi. 25 Ahang bel, Pathian in amau chichi suang thei leitung gamsate leh ganhonte a bawla ahi. Leilaka bokvak ganhing, amau chitek suang theite khempeuh zong a bawl hi. Pathian in tua a hoih chih a mu hi. 26 Tua khitin, Pathian in: Eimah mel sun, i kibatpih mihing bawl ni. Ama'n tuipi sunga ngasate, huihkhua-a leng ganhingte, leitunga gamta gantate leh leilaka bokvak ganhingte khempeuh uk hen, a chi hi. 27 Tua bangin, Pathian in ama' kibatpihin mihing a siam hi. Pathian melsunin amah a siam a, pasal leh numei a siam hi. 28 Tua khitin, Pathian in amaute a vualzawl a: Chipha unla, hong pung unla, leitung hong dim unla, nuaisiah un. Tuipi sunga ngasate, huihkhua-a leng ganhingte, leitunga gamta ganhingte khempeuh uk un, a chi hi. 29 Tua khitin, Pathian in amaute kiang ah: En un, leitung maikaiha om louhing chitang nei khempeuh na an dingun kon pia ahi. Gah nei a, chitang nei singkung peuhmah zong kon pia hi. Noute dingin an ahi ding. 30 Leitunga gamsate khempeuh, huihkhua-a leng ganhingte khempeuh, leilaka gamta ganhingte khempeuh, nak thei khempeuhte' an dingin sing-le-lou hingte ka pia hi, a chi hi. Tua bangbangin hong om hi. 31 Pathian in a bawlsate khempeuh a mu a, hoih mahmah a sa hi. Tua bangin nitaklam a om a, zingsang lam a om a, a ni guk ni ahi.

Pianchilna 2

1 Tua bangin, Pathian in lei leh vante leh a sunga omte khempeuh a siamkhinta hi. 2 A ni sagih ni chiangin, Pathsian in a nasepte khempeuh a zoukhinta hi. Tua bang ahih manin, a ni sagih ni-in, a nasepte khempeuh apan a tawlngata hi. 3 Pathian in a thilsiamte khempeuh a zawhkhittak manin, tua ni sagih ni a vualzawl a, a septuamta hi.

Adam leh Evi

4 Pathian in lei leh vante a siam laia lei leh vante thu hiai ahi. Tangtawn Toupa Pathian in lei leh vante a bawl laiin, 5 leitung ah gamlak loupate a om nai kei a, sing-le-loute zong a pou nai kei hi. Ahang bel, Tangtawn Toupa Pathian in leitung ah vuah a zusak nai kei a, loukhou dingin mihing zong a om nai kei hi. 6 Ahihhangin, leitung apanin tuihu a pawttou a, tua in leitung khempeuh a nomsak hi. 7 Tangtawn Toupa Pathian in leilak leivui apanin mi a bawl a, a nakvangte ah hinna hu a naklut a, tua mi hinna nei mihing a hong suak hi. 8 Tangtawn Toupa' n suahlama Eden ah, huan khat a bawl a, tua ah a mi bawl pasal a koih hi. 9 Tangtawn Toupa Pathian in tua ah singkung chi chih, eta kilawm leh neka limte a pousak hi. Tua huan laizang ah, hinna singkung leh a sia a pha theihna singkung a pousak hi. 10 Eden apanin, tua huan tui buak dingin lui khat a luang a, tua apanin tua lui a ka a, luinak li a kisuah hi. 11 Lui khatna Pishon ahi a, Havila gam sung khempeuh ah a kawiluan hi. Tua gam ah kham sik a om hi. 12 Tua gam kham sik a hoih mahmah hi. Singnai namtui manpha leh Onik suangmanpha zong a om hi. 13 Lui nihna Gihon ahi a, Kush gam kimkot ah a luang hi. 14 Lui thumna Hidekel ahi a, Ashur gam suahlam ah a luang hi. Lui lina Iufratis ahi. 15 Tangtawn Toupa Pathian in tua pasal a pii a, Edena huan khoua kem dingin a koihta hi. 16 Tangtawn Toupa Pathian in tua pasal thu a pia a: Huana singkung khatpeuh apan gah na ne thei ding. 17 Ahihhangin, a sia a pha theihna singkung apan gah bel na nek louh ding ahi. Ahang bel, tua singkung apan gah na nek ni ni-in na si ngeingei ding hi, a chi hi. 18 Tangtawn Toupa Pathian in: Pasal amah kia-a tangom a hoih kei. Amah adingin a kituak huhmi ka bawl ding, a chi hi. 19 Tangtawn Toupa Pathian in leilak apanin gamlak gamsa chi chih a bawlta a, huihkhua-a leng ganhing chi chih a bawlta. Tuate minphuah dingin, tua pasal kiang ah hon paipih a, ama'n a na phuah min tek ganhing min a hidenta hi. 20 Tua bangin, pasal in gantate' min, huihkhua-a leng ganhingte, gama ta ganhingte' min a phuak vek hi. Ahihhangin, pasal adingin a kituak huhmi a om kei. 21 Tua bang ahih manin, Tangtawn Toupa Pathian in Adam ihmut limtakin a ihmusak a, a ihmut kalin, a Nakguhte khat a lakhia a, a lakkhiakna mun sain a dimsak kik hi. 22 Tangtawn Toupa Pathian in Adam' nakguh a lak apanin numei khat a bawl a, Adam kiang ah hon paipih hi. 23 Adam in: Hiai, ka guhte apana guh, ka sa apana sa ahi. Pathian in pasal apan a lakkhiak ahih manin, Numei chi-in ka minvawh ding, a chi hi. 24 Hiai hang mahin, pasal in a nu a pa a nuse ding a, a zi tawh a kigawm ding a, amaute sa pum khat hong suak ding uhi. 25 Adam leh a zi vuaktang ahi tuak uh a, ahihhangin, a maizum kei uhi.

Pianchilna 3

Mihing Zolna

1 Tangtawn Toupa Pathian in a siamsa gamsate lak ah gul a gitlouh pil pen hi. Tua gul in numei kiang ah: Huan sunga singkung peuhpeuh apan na nek louh ding uh ahi, Pathian in hon chi taktak maw? a chi hi. 2 Tua numei in gul kiang ah: Huan sunga sing gahte ne thei mah n'ung. 3 Ahihhangin, Pathian in: Huan laizanga sing pen bel a gah na nek louh ding uh ahi, khoih zong na khoih louh ding uh ahi, na nek uleh na si ding uh, hon chi ahi, a chi hi. 4 Tua gul in numei kiang ah: Si peuhmah kei n'u teh. 5 Tua sing gah na nek nini-un, na mitte uh hong vak ding a, a sia a pha theia Pathian bang ding na hi uh, chih Pathian in a theih man ahi zaw, a chi hi.

Mihing Pukna

6 Tua bangin, numei in tua sing gah nek dingin a duh a, a mitin a enlah a, amah pilsak dingin a lunggulh hi. Tua bangin, ama'n sing gah a lou a, a neta hi. Amah tawh omkhawm a pasal zong a pia a, a pasal in zong a neta hi. 7 A mitte uh hong vakta a, vuaktang ahih lam uh hong kiphawkta uh a, theipi tehte a khuikhawm uh a, kikhuhnain a nei uhi.

Mihing tunga Thukhenna

8 Tua khitin, Tangtawn Toupa Pathian, tua huan sung ah, nitaklam nineem laiin hong pai hi. Amaute'n a aw a za uh a, huan sunga sing lak ah Pathian apanin a kiseel uhi. 9 Tangtawn Toupa Pathian in tua pasal a sam a: Adam, koia om na hia? a chi hi. 10 Ama'n: Huan sunga nong pai laiin, na aw ka za a, vuaktang ka hih manin, ka lau a, ka kiseel hi, a chi hi. 11 Tangtawn Toupa Pathian in: Kua'n vuaktang na hi, chi-a hon hilh ahia? Nek louh ding, chi-a kon kham sing gah ne na hita maw? a chi hi. 12 Adam in: Ka ompih dinga non piak numei in sing gah hon pia a, ka neta ve, a chi hi. 13 Tangtawn Toupa Pathian in numei kiang ah: Bang hih na hita maia? a chi hi. Numei in: Gul in hon khemzou a, ka neta ve, a chi hi. 14 Tangtawn Toupa Pathian in gul kiang ah: Hiai thil na hih manin, ganta leh gamsa khempeuh sanga hamsiat zawk na hi. Na gilin na kitholhta ding a, na damsung teng leivui na neta ding. 15 Nang leh numei kal ah, na suan leh numei suan kal ah, kimelmakna ka koih. Numei' suan in na lutang a gawpsak ding a, nang a khetul na tu ding, a chi hi. 16 Tangtawn Toupa Pathian in numei kiang ah: Na lungkhamna leh na nau neih thuakgimna nakpitakin ka behlap ding a, natakin nau na nei ding. Na lunggulh na pasal ahi ding a, ama'n nang hon uk ding, a chi hi. 17 Tangtawn Toupa Pathian in Adam kiang ah: Na zi thu na mang a, Tua sing apan na nek hetlouh ding ahi, chi-a tua sing tawh kisaia kon kham sing gah na nek manin, nang ziakin lei ka hamsiatta. Na damsung teng gimtak leh tawltakin lei gah na neta ding. 18 Lei in nang adingin lingte leh loulingneite a suah ding a, gamlak louhingte na neta ding. 19 Leia na kiknawn mateng, na maitanga khawul luangin an na neta ding. Lei apan lakkhiak leivui na hih manin, leivui ah na kiknawn ding, a chi hi. 20 Adam in a zi, mihing teng khempeuh' nu hong hi ding ahih manin, a min dingin Evi a sa hi. 21 Tua khitin, Tangtawn Toupa Pathian in Adam leh a zi adingin, savun puanakte a bawlsak a, amaute a silhsak hi. 22 Tua baan ah, Tangtawn Toupa Pathian in: Ngai un, tua mihing, a sia a pha theiin eite laka khat a bangta. A khuta sawk in hinna sing gah louin a ne kha ding a, tua banga a hinden louh nadingin hih ni, a chi hi. 23 Tua bangin, Tangtawn Toupa Pathian in amah a lakkhiakna lei mah khou dingin, tua Eden huan sung apanin Adam a hawlkhia hi. 24 Tangtawn Toupa Pathian in amah a hawlkhiak nungin, hinna sing kung zotna lampi veng dingin, Edena Huan suahlam pang ah Cherubte leh namsau kuang zualzual, lehlam lehlama kipei thei khat a koih hi. Judall.

Pianchilna 4

Kaina leh Abel

1 Adam in a zi Evi a luppih a, a zi a gai a, a nau a suak a, Evi in: Tangtawn Toupa' huhnain ta pasal ka neita, chi-in Kaina a sa hi. 2 Tua nungin Kaina' sanggampa Abel zong a nei hi. Abel bel belam vulmi ahi a, Kaina bel loukhou mi ahi. 3 Hun bangtan hiam nungin hibang thil hong om hi. Kaina in a lou apan haigahte hon tawi a, Tangtawn Toupa' mai ah thawnpiak thillatin a laan hi. 4 Abel in bel a belam hon laka piang masate apan, a thau beute a laan hi. Tangtawn Toupa'n Abel leh a thillat a sang a, 5 ahihhangin, Kaina leh a thillat bel a sang kei hi. Tua bang ahih manin, Kaina a heh mahmah a, a maigumta hi. 6 Tangtawn Toupa'n Kaina a houpih a: Banghanga heh mahmah a, banghanga maigum na hia? 7 A dik hih lechin, saana om lou ding na hi maw? A dik na hih kei leh bel, khelhna kongkhak bula kual a, nang hon uk nuam gige ahi. Nang amah na uk zawk ding ahi vo oi, a chi hi. 8 Kaina in a sanggampa Abel a zolkhia a, gamlaka a om laiun, a sanggampa Abel a sual a, a that hi. 9 Tangtawn Toupa'n Kaina kiang ah: Na sanggampa Abel koia om ahia? a chi hi. Kaina in a dawng a: Thei ke'ng. Ka sanggampa donpa ka hi-a hia? a chi hi. 10 Tangtawn Toupa'n: Bang hih na hita maia? Ngai in! Na sanggampa' sisan in leilak apan kei hon sam hi. 11 Tuin lei in nang hon hamsiatta. Na khut tung apan, na sanggampa' sisan saang dingin lei a kamka hi. 12 Lou na khawh chiangin, lei in nang adingin gah a suah nawn kei ding. Leitung ah galtai leh vakvai na hi gige ding, a chi hi. 13 Kaina in Tangtawn Toupa kiang ah: Non gawtna ka thuak zawh ding ahi kei. 14 En in, tuni'n hiai gam apan non hawlkheta. Kei apan na mai na selta ding a, leitung ah galtai leh vakvai ka suakta ding. Kei hon mu kuapeuh in hon that ding hi, a chi hi.

Pathian Phawklou Kaina Khanggui

15 Tangtawn Toupa'n amah kiang ah: Kaina that mi kuapeuh a leh sagihin ka thuk ding, a chi a, Kaina mu peuhmah in a thah louh nadingin, Kaina' sa tung ah chiamtehna khat a koih hi. 16 Tua bangin, Kaina, Tangtawn Toupa' ompihna apan a paikhia a, Eden suahlam ah Nod gama teng dingin a paita hi. 17 Kaina in a zi a luppih a, a zi a gai a, Enokh a nei hi. Kaina in khawpi khat a lam a, tua khawpi min dingin, a tapa tamin Enokh a sa hi. 18 Enokh in tapa Irad a nei a, Irad in Mehujael a nei a, Mehujael in Methushael a nei a, Methushael in Lamekh a nei hi. 19 Lamekh in zi nih a nei a, khat' min Ada ahi a, a dang khat' min Zila ahi. 20 Ada in tapa Jabal a nei a, Jabal bel puanbuka teng mite leh panvulmite laka mi masa ahi. 21 Jabal' sanggampa Jubal ahi. Jubal bel kaihging leh tamngai tum siamte laka mi masa ahi. 22 Zila in zong tapa a nei a, Tubal Kaina ahi. Amah sumsan leh sik hiamhei sekmi ahi. Tubal Kaina' sanggamnu Naama ahi. 23 Lamekh in a zite kiang ah: Ada leh Zila, ka thu ngai un, Lamekh' zite aw, ka thute ngai un: Pasal khat in hon liamsak manin, amah ka that. Tangvalnou khat in hon liamsak manin, amah ka that. 24 Tangtawn Toupa'n Kaina' phuba a lehsagiha a lak leh, Lamekh' phuba a leh 77-in a la ding, a chi hi.

Pathian Phawk Seth Khanggui

25 Adam in a zi a luppih kik a, a zi in tapa khat a nei hi. Pathian in Kaina' thah Abel tangin suan dang khat hon peta, chi-in Seth a sa hi. 26 Seth in zong tapa a nei a, haksapi-in Enosh a piang hi. Tua hun laiin, Seth in dahna hangin Tangtawn Toupa' min a lou panta hi.

Pianchilna 5

Adam' Suante Noa dong

1 Adam' suante khangthu hiai ahi. Pathian in mihing a siam laiin, Pathian batpihin amah a bawl hi. 2 Ama'n pasal leh numeiin amaute a siam a, amaute a vualzawl hi. Amaute a siam ni-in, amaute mihing" chi-in a minvawh hi. 3 Adam bel kum 130 a nuntak nungin, amah batpih amah bangbang tapa khat a nei a, a min dingin Seth a sa hi. 4 Seth a pian nungin Adam kum 800 a nungta lai a, tapa dangte leh tanu dangte zong a nei lai hi. 5 Adam' nuntak sung khempeuh kum 930 ahi a, tua khitin a sita hi. 6 Seth kum 105 a nuntak nungin tapa Enosh a nei hi. 7 Enosh a neih nungin Seth kum 807 a nungta lai a, tapa dangte leh tanu dangte zong a nei lai hi. 8 Seth nuntak sung khempeuh kum 912 ahi a, tua khitin a sita hi. 9 Enosh kum 90 a nuntak nungin tapa Kenan a nei hi. 10 Kenan a neih nungin, Enosh kum 815 a nungta laia, tapa dangte leh tanu dangte zong a nei lai hi. 11 Enosh' nuntak sung khempeuh kum 905 ahi a, tua khitin a sita hi. 12 Kenan kum 70 a nuntak nungin tapa Mahalalel a nei hi. 13 Mahalalel a neih nungin, Kenan kum 840 a nungta lai a, tapa dangte leh tanu dangte zong a nei lai hi. 14 Kenan' nuntak sung khempeuh kum 910 ahi a, tua khitin a sita hi. 15 Mahalalel kum 65 a nuntak nungin tapa Jared a nei hi. 16 Jared a neih nungin, Mahalalel kum 830 a nungta lai a, tapa dangte leh tanu dangte zong a nei lai hi. 17 Mahalalel' nuntak sung khempeuh kum 895 ahi a, tua khitin a sita hi. 18 Jared kum 162 a nun tak nungin tapa Enokh a nei hi. 19 Enokh a neih nungin, Jared kum 800 a nungta lai a, tapa dangte leh tanu dangte zong a nei lai hi. 20 Jared' nun tak sung khempeuh kum 962 ahi a, tua khitin a sita hi. 21 Enokh kum 65 a nuntak nungin tapa Methusela a nei hi. 22 Methusela a neih nungin, Enokh kum 300 sung Pathian tawh kikhawlin a nungta a, tapa dangte leh tanu dangte zong a nei lai hi. 23 Enokh' nuntak sung khempeuh kum 365 ahi. 24 Enokh bel Pathian tawh kikhawla nungta gige a hih laitakin, Pathian in a lamang a, leitung ah a om nawn kei hi. 25 Methusela kum 187 a nuntak nungin tapa Lamekh a nei hi. 26 Lamekh a neih nungin, Methusela kum 782 a nungta lai a, tapa dangte leh tanu dangte zong a nei lai hi. 27 Methusela' nuntak sung khempeuh kum 969 ahi a, tua khitin a sita hi. 28 Lamekh kum 182 a nuntak nungin tapa khat a nei a, 29 ama'n: Tangtawn Toupa'n lei a hamsiatna hanga i khut nasep leh sepgimna apan hiai tapa in hon khamuan ding hi tah, chi-in, a tapa' min dingin Noa a sa hi. 30 Noa' pian nungin, Lamekh kum 595 a nungta lai a, tapa dangte leh tanu dangte zong a nei lai hi. 31 Lamekh' nuntak sung khempeuh kum 777 ahi a, tua khitin a sita hi. 32 Noa kum 500 a nuntak nungin tapate Shem, Ham leh Jafeth a nei hi.

Pianchilna 6

Tuichiimpi-a Gawtna

1 Leitung ah mihing hong tam semsem a, tanute tampi hon neih chiangun, hibang thu hong tung hi: 2 Pathian' tapate'n mihing' tanute melhoih a sa uh a, a deih peuh uh a kitenpih uhi. 3 Tua bang ahih manin, Tangtawn Toupa'n: Mihing a si thei si-le-sa ahih manin, ka Kha in buan nilouh lou ding a, a nite kum 120 hi ding hi, a chi hi. 4 Tua hun lai leh a nungin zong, Pathian' tapate'n mihing tanute a luppih ua, tate a nei uh a, a tate uh Nefilimte, tanglai galhat minthangte ahi uhi.

Pathian Limsakloute Gawt ding

5 Tangtawn Toupa'n mihing' gitlouhna hong khan dan a mu a, a lungsim suangtuahte uh a gilou lam kia ahi gige, chih a thei hi. 6 Tua bangin leitunga mihing a bawl thu ah Tangtawn Toupa a lungkham a, a lungtang a na mahmah hi. 7 Ama'n: Mihing ka na siamta a, leitung maikaih apan amaute ka nulmang mai ding. Mihing leh gamsa leh bokvaka kitholhte leh huihkhua-a leng ganhingte peuhmah ka nulmang vek ding. Amaute ka siamna thu ah ka lungkham hi, a chi hi.

Pathian Limsakte Hotdam ding

8 Ahihhangin, Noa in Tangtawn Toupa' mitmuhin deihsakna a tang hi. 9 Noa' suante' khangthu laibu hiai ahi. Noa midiktat ahi a, ama' hunlaia mite laka gensiat baanglou ahi a, Pathian tawh kikhawlin a nungta hi. 10 Noa in tapa thum a nei a, amaute Shem, Ham leh Jafeth ahi uh. 11 Pathian' mitmuhin mihingte'n leitung ninsakin a segawpsak uh a, hiamgamna tawh a kidimsak uhi. 12 Mihingte' gamtat nina kisia ahih manin, leitung a sekhinta, chih Pathian in a mu hi. 13 Tua bangin, Pathian in Noa kiang ah: Mihingte hanga leitung hiamgamna tawh kidimta ahih manin, hinna nei khempeuh ka beisak ding. Ngai in, tuin, amaute leitung tawh ka hihsekhawm ding. 14 Tua bang ahih manin nang adingin gofar singin longpi bawl inla, a sung ah dantante bawl in. A sung leh a pua alkatara in zut in. 15 Hibangin long na bawl ding ahi: A dunglam tong 300-a sau, a vailam tong 50-a lian, a sanlam tong 50-a sang ahi ding ahi. 16 A inntung khuhna leh a baang dawn kikal ah, khawvak lutna tawhlet, tong khata lian na bawl paisuak ding ahi. A pang ah kongkhak na bawl ding a, longpi chial thum neiin, chial khatna, chial nihna, chial thumna a om ding ahi. 17 Vaan nuaia thilsiam khempeuh, hinna neia nak thei khempeuh hihmang dingin tuichimpi ka tungsak ding a, leitunga hinna nei khempeuh a mangthang ding. 18 Ahihhangin nang tawh kal ah ka thukhun ka kipsak ding. Nang bel, na tapate, na zi leh na tapate' zite tawh longpi ah na lut ding uh ahi. 19 Ganhing khempeuh kop khat zel, a nu leh a pa, na lutpih ding a, nang hinna leh amaute hinna longpi sung ah na humbitkhawm ding hi. 20 Vasa nam kim, ganta leh leia bokvak ganhing nam kim kop khat zel na kiang ah hong pai ding uh a, nang amaute' nuntakna na humbit ding ahi. 21 Nang leh amaute' nek ding an tuamtuam na kaikhawm ding a, amaute leh nang adingin an ahi ding hi, a chi hi. 22 Tua bangin, Pathian' thupiak bangbangin Noa in bangkim a hihvek hi.

Pianchilna 7

Longpi Sung Lutna

1 Tangtawn Toupa'n Noa kiang ah: Na khawpihte laka, ka maia na diktatna ka muhtak manin, nang leh na inkawte longpi sung ah hong lut un. 2 Ganhing sa siangte lak ah kop sagih tek, a nu leh a pa, tua khit chiangin, ganhing sa siangloute lak ah kop khat tek, a nu leh a pa, hon lutpih in. 3 Tua baan ah, huihkhua-a leng ganhingte zong, leitunga a nam nama a kisuansawn theih nadingin, kop sagih tek hon lutpih in. 4 Ahang bel, tu apan ni sagih nung chiangin, letung ah ni 40 leh zan 40 sung vuah ka zusak ding a, ka bawlsa, a nak thei thilhing peuhmah leitung maikaih apan phiatmang ding ka hi, a chi hi. 5 Tua bangin, Noa in Tangtawn Toupa' thupiak bangbangin a hih vek hi. 6 Leitunga tuichimpi a tun laiin, Noa kum 600-a upa ahita. 7 Noa leh a zi leh a tapate leh a tapate' zite, tuichimpi apan a bit nadingun longpi sung ah a lut uhi. 8 Ganhing sa siangte leh sa siangloute zong a kopkopin longpi sung ah a lut uhi. Huihkhua-a leng ganhingte leh leia bokvaka kitholh ganhingte zong long sung ah a lut uhi. 9 A nu leh a pa, a kopkopin Noa kiang ah, Pathian in Noa thu a piak bangin, longpi sung ah a lut uhi. 10 Ni sagih nungin, tuichimpi leitung ah hong tung panta hi. 11 Noa kum 600 ahih kum, a kha nihna, a ni sawmlenih ni-in, tuichimpi hong tung panta hi. Tua ni mahin Pathian in tui thukpi apan tuinakte a phultousak a, van vuah kongpite a hong a, 12 leitung ah ni 40 leh zan 40 sung vuahpi a chiinin a chiin hi. 13 Tua ni mah-in, Noa leh a tapate Shem, Ham leh Jafeth, tua banin, a zi leh a tapate' zite thum tawh longpi sung ah a lut uhi. 14 Amaute leh gamsa peuhmah, ganta peuhmah, leia bokvak ganhing peuhmah, lengthei ganhing peuhmah, khanei vasa peuhmah a nam namin a lut uhi. 15 Tua bangin, nak thei ganhing namkim, a kop kopin longpi sung ah Noa kiang ah a lut uhi. 16 Noa kianga Pathian' thupiak bangbanga longpi sunga lut ganhing namkimte a nu leh a pa ahi. Tua khitin, Tangtawn Toupa'n amah long kongkhak a khakkhum hi. 17 Ni 40 sung, leitung ah tuichimpi a khang a, tui a saan semsem chiangin, tui in lei tunglam ah longpi a laamtou tou hi. 18 Tui a sang semsem a, leitung ah a tam semsem a, tui tung ah longpi a kilaam tou hi. 19 Leitung ah tui a tam law mahmah a, vannuai mualsangte khempeuh a tum hi. 20 Mualsangte tung nangawn ah tong sawmlenga sanga sangzaw nangawn dongin tui a vung hi. 21 Tua bangin, leitunga paithei ganhingte, lengthei ganhingte, gantate, gamsate, leitunga bokvaka kitholh ganhingte leh mihing teng khempeuh a si hi. 22 Leihula om, nakvanga nakthei ganhingte khempeuh a si uhi. 23 Leitung maikaiha ganhing khempeuh phiatmang ahi vek hi. Mihingte, ganhingte, leia bokvak ganhingte, huihkhua-a leng ganhingte khempeuh leitung apan phiatmang ahi vek hi. Noa leh longpi sunga amah tawh omte kia a bit uhi. 24 Tua bangin ni 150 sung leitung ah tuichimpi a uang mahmah hi.

Pianchilna 8

Tuichimpi Kiam

1 Pathian in Noa leh longpi sunga a ompih gamsate leh gantate a phawk gige a, leitung ah huih a nungsak a, tuite hong kiam panta hi. 2 Tui thukpi apan tuinakte leh vana vuah kongkhakte a khaak a, vuah a zusak nawn kei hi. 3 Leitung apan tui a kiam hiaihiai a, ni 150 sung a kiam nungin, 4 a kha sagihna, a ni sawmlesagih ni-in, tua longpi, Ararat mualte tung ah a kinga hi. 5 Tui a kiamsuk lailai a, kha sawmna, a ni khat ni-in mualdawnte a dawk panta hi. 6 Ni 40 a bei nungin, Noa in long tawhlet a bawl a hong a, 7 va-ak khat a khah a, leitunga tui a kan mateng tua va-ak a lengkhe zel a, hong kik zel hi. 8 Tua nungin ama'n leitung ah tui a kiamta hiam, chih theih nadingin, vakhu khat a khah leuleu hi. 9 Ahihhangin, leitung teng tui in a khuh lai manin, tua vakhu in khengak nading a mu kei a, longpi ah amah kiang ah hong kilehkik nawn hi. Ama'n a khut a nazankhia a, tua vakhu longpi sung ah amah kiang ah a lalut hi. 10 Ama'n ni sagih dang a ngak nungin, longpi apanin vakhu khat a khah kik leuleu hi. 11 Nitaklam in tua vakhu hong kik nawn a, a mukin oliv singteh khat hon tuah hi. Tua bangin, Noa in leitung apan tui a kiamta, chih a thei hi. 12 Ama'n ni sagih dang a ngak nungin, vakhu khat a khah kik leuleu a, ahihhangin, tua vakhu amah kiang ah hong kilehkik nawn kei hi. 13 Noa' upat kum 601-na, a kha khatna, a ni khat ni-in, hibang thil hong tung hi: Leitung apan tui a kangta a, Noa in a longpi tung a hawkkhia a, a khawdak a, leitung apan tui a kangta, chih a mu hi. 14 A kha nihna, a ni 27 ni-in lei a hulta hi. 15 Pathian in Noa kiang ah: 16 Long apan pawtkhia inla, na zi, na tapate leh na tapate' zite pawt-khiakpih in. 17 Na ompih ganhing teng khempeuh, a leng thei ganhingte, gantate, leia bokvaka kitholh ganhingte pawtkhesak in. Leitung ah a kithehdalh ding uh a, chiphatakin leitung ah hong pung ding uhi, a chi hi. 18 Tua bangin, Noa, a tapate tawh, a zi tawh, a tapate' zite tawh a pawtkhia uhi. 19 Leitunga a pai thei ganhingte khempeuh, a leng thei ganhingte khempeuh, a nam namin, longpi apan a pawtkhia uhi.

Noa in Pathian Bia

20 Tua chiangin, Noa in Tangtawn Toupa' mai ah maitam a dawh a, ganhing sa siangte leh leng thei ganhing sa siangte khempeuh apan la-in, maitam tung ah haltum thillatte a laan hi. 21 Tangtawn Toupa'n tua haltum thillat gim namtui a za a, a lungsung ah: Mihing a neu apan gilou ngenta suangtuah hi mah leh, mihing hangin lei ka hamsiat nawn kei ding a, tu-a hinna khempeuh ka phiatmang bangin ka phiatmang ngei nawn kei ding hi. 22 Leitung a om lai teng, hai pawi hun leh anlak hun, nipi khawlum hun leh phalbi khawvot hun a om ding a, sun leh zan a bei kei ding, a chi hi.

Pianchilna 9

Noa tawh kala Pathian' Thukhun.

1 Tua nungin, Pathian in Noa leh a tapate a vualzawl a, amaute kiang ah: Hong chipha unla, hong pung unla, leitung luahdim un. 2 Noute launa leh kihtakna, leitung gamsate leh huihkhua-a leng thei ganhingte leh leia bokvaka kitholh ganhingte leh tuipi sunga ganhingte tung ah a om ding. Amaute khempeuh, noute' khut sung ah kon pia a, 3 hinna neia nak thei leh leitunga gamta ganhingte khempeuh na an uh ahi ding. Louhingte kon piak bangin, tuate a vekin kon pia ahi. 4 Ahihhangin, sa peuhpeuh a hinna sisan tawh na nekkhawm peuhmah louh ding uh ahi. 5 Na hinna sisan taangin ditna sisan ka ngiat ding. Ganhing khempeuh tung ah zong ka ngiat ding a, mihing tung ah zong, a sanggam' sisan taangin ama' sisan ka ngiat ding hi. 6 Pathian in ama' batpiha mihing a bawl a hih manin, mihing' sisan suah mi' sisan mihing mah in a suah ding. 7 Noute bel hong chipha unla, hong pung un. Leitung ah hong pung unla, leitung luahdim un, a chi hi. 8 Tua khitin, Pathian in Noa leh a ompih a tapate kiang ah: 9 Ngai un, noute leh na suante uh tawh kal ah ka thukhun ka kipsak ding. 10 Na ompih ganhing, longpi apan na pawtkhiakpih khempeuh uh, a leng thei ganhingte, gantate, leh gamsa khempeuh, leitunga ganhing khempeuh tawh kala thukhun zong ahi ding hi. 11 Noute tawh kal ah ka thukhun ka kipsakta: Tuichim tuite'n hinna nei khempeuh a mangthangsak ngei nawn kei ding a, leitung hihse dingin tuichimpi a tung ngei nawn kei ding hi, a chi hi. 12 Tua chi-in, Pathian in: Noute leh na ompih ganhing khempeuh tawh kala thukhun ka bawl, khangsawn sawna thukhun hi ding chiamtehna hiai ahi: 13 Meikaite lak ah ka sakhituihup ka koihta, leitung leh kei kala thukhun chiamtehna ahi ding hi. 14 Leitunga meite ka kaisak a, tua meikaite laka sakhituihup hong kilat peuhmah chiangin, 15 nang leh ganhing namkim tawh kei kala ka thukhun ka thei gige ding. Hinna neite mangthangsak dingin tuite, tuichimpi a suak ngei nawn kei ding. 16 Meikaite laka sakhituihup hong kilat chiangin, ka en ding a, leitunga hinna nei namkim leh Pathian kala Tangtawn thukhun ka thei gige ding, a chi hi. 17 Tua bangin, Pathian in Noa kiang ah: Leitunga hinna nei khempeuh leh kei kala ka kipsak thukhun chiamtehna hiai ahi, a chi hi.

Noa' Tapate

18 Long apan hong pawtkhia Noa' tapate Shem, Ham leh Jafeth ahi. Ham bel Kanan' pa ahi. 19 Hiaite Noa' tapa thumte ahi uh a, amaute apanin leitung luah mihingte hong piang ahi.

Ham' Khelhna

20 Noa bel loukhou mi ahi a, grep huan a bawl hi. 21 Tua grepzu a dawn takin a kham a, a puanbuk sung ah puan beiin a lum hi. 22 Kanan' pa Ham in a pa' vuaktanna a mu a, a inn pua-a a sanggam nihte a hilh hi. 23 Shem leh Jafeth in bel puan khat a la uh a, a liangkou tuak uah a zawng uh a, nungtawnin a pa uh vuaktanna a vakhuh uhi. A pa uh vuaktanna mu lou dingin lehlam a nga uh a, a pa uh vuaktanna a mu kei uhi. 24 Noa zukham a khanlawh takin, a tapa naupangpen in ama' tunga a thilhih a thei hi.

Kanan Hamsiatna

25 Noa in: Kanan ka hamsiat hi! A sanggamte nuaia sila niampen ahi ding, a chi hi.

Shem leh Jafeth Vualzawlna

26 Tua khitin, Noa in: Tangtawn Toupa, Shem' Pathian phatin om hen! Kanan zaw Shem' silain om hen. 27 Pathian in Jafeth' gam keklian henla, Shem puanbukte ah amah teng henla, a silain Kanan om hen, a chi hi.

Noa' Sihna

28 Tuichimpi tun nungin, Noa kum 350 a nungta lai hi. 29 Noa nuntak sung khempeuh kum 950 ahi a, tua khitin a sita hi.

Pianchilna 10

Leitunga Minamte Kipatna

1 Noa tapate Shem' Ham leh Jafeth khangthu hiai ahi. Tuichimpi tun nungin, amaute'n tapate a nei uhi.

Jafeth' Suante

2 Jafeth' tapate Gomer, Magog, Madai, Javan, Tubal, Meshek leh Tiras ahi. 3 Gomer' tapate Ashkenaz, Rifath leh Togarma ahi. 4 Javan' tapate Elisha, Tarshish, Kitim leh Dodanim ahi. 5 Pathian in hiaite lak ah tuipi gei gamte a hawm a, a nam nam, a beh beh leh a innkuan kuanin gam a nei uh a, amau' pau tekin a pau uhi.

Ham' Suante

6 Ham' tapate Kush, Mizraim, Put leh Kanan ahi. 7 Kush' tapate Seba, Havila, Sabta, Raama leh Sabteka ahi. Raama' tagate Sheba leh Dedan ahi. 8 Kush bel Nimrod' pa hong hi ahi. Nimrod bel leitunga galhat khawkheng hong hi ahi. 9 Amah Tangtawn Toupa' mai ah sabengmi hattak ahi a, mite'n: Amah zaw Tangtawn Toupa' maia sabeng mihat Nimrod ahi, chi-in paunakin a nei hiai uhi. 10 Shinar gama Nimrod vaihawmna khawpi masate Babel, Erek, Akad leh Kalne ahi. 11 Amah tua gam apanin Asuria gam ah a pai a, Ninevi, Rehoboth, Ir, Kala khawpite a lam hi. 12 Ninevi leh Kala kikala Resen khawpi zong a lam hi. Tua bel, khawpi thupi mahmah khat ahi. 13 Mizraim bel Ludte, Anamte, Lehabte leh Naftute, 14 Pathruste, Kaslute leh Kaftorte' pu bul ahi. Kaslute apan Filistiate hong piang ahi.

Kanan' Suante

15 Kanan' tapa upapen Sidon ahi a, a nihna Heth ahi. 16 Tua baan ah Kanan bel Jebuste, Amorte, Girgaste, 17 Hivte, Arkate, Sinte, 18 Arvadte, Zemarte leh Hamathte' pa ahi. Tua nunglamin Kanan' suante a kithehdalh uhi. 19 Tua bangin, Kanante gamgi, Sidon apan Gerar lam ah Gaza dong ahi a, tua baan ah, Sodom, Gomora, Adma leh Zeboim lam ah Lasha dong ahi. 20 Hiaite Ham' suante, a nam a nam, a beh a beh leh a innkuan kuan ua kikhen ahi uh a, amau' pau tekin a pau uhi.

Shem' Suante

21 Shem in zong tapate a nei hi. Amah Eber suante' pu bul ahi. Amah Jafeth upa ahi. 22 Shem' tapate Elam, Ashur, Arfaksad, Lud leh Aram ahi. 23 Aram' tapate Uz, Hul, Gether leh Mesh ahi. 24 Arfaksad' tapa Shela ahi a, kichihna zong om. Shela' tapa Eber ahi. 25 Eber in tapa nih a nei a, khat min Peleg ahi. Ama' huna leitung gam kikhen ahih mana tua min kisa ahi. Peleg' sanggampa' min Joktan ahi. 26 Joktan bel Almodad, Shelef, Hazarmaveth, Jera, 27 Hadoram, Uzal, Dikla, 28 Obal, Abimael, Sheba, 29 Ofir, Havila leh Jobab pa hong hi ahi. Hiaite khempeuh Joktan' tapate ahi. 30 Amaute tenna gam Mesha khawpi apan suahlam tanggama Sefar lama kizalh ahi. 31 Hiaite Shem' tapate, a khang a khang, a nam a nam leh a beh a beh-a kikhente ahi uh a, amau' pau tekin a pau uhi. 32 Hiaite Noa' tapate, amau nam nama khang kisuansawn dan ahi. Tuichimpi tun nungin, hiaite apanin leitung namte, leitung ah a kithehzak uhi.

Pianchilna 11

Babel Inn-sang

1 Leitung mi khempeuh pau khat neia, pau khata pau a na hi uhi. 2 Mite suahlam apan a kikhinsuk laiun, Shinar gam ah phaizang khat a mu uh a, tua ah a teeng uhi. 3 Amaute'n: Kisa ni, teklei vel ni-in, haltak ve ni, a kichi uhi. Tua bangin, suang taangin teklei a zang uh a, a belhkip nadingin simen taangin alkatara a zang uhi. 4 Tua baan ah, amaute'n: Kisa ni, leitung gam tenga i kithehzak louh nadingin, khawpi khat leh van sun ding innsang khat lamin i min thangsak ve ni, a kichi uhi. 5 Tua khitin, mihing tate' khawpi lam leh innsang lam en dingin, Tangtawn Toupa hong paisuk hi. 6 Tangtawn Toupa'n: En dih ua, amaute minam khat, pau khata pau ahi uh a, hibang thil hih kipanta ahi uh. A tup peuh uh hih zou mawk ding a hita uh. 7 Kisa ni, paisukin, pau a kitheihtuah louh nadingun a pau uh hihbuai ni, a chi hi. 8 Tua bangin, Tangtawn Toupa'n amaute tua apanin leitung gam teng ah a kithehzaksak a, khawpi lam a tawpsan uhi. 9 Tua banga Tangtawn Toupa'n leitung pau a hihbuai manin, tua khawpi min dingin Babel a sa uhi. Tangtawn Toupa'n tua apanin amaute leitung gamteng ah a kithehzaksakta hi.

Shem' Suante Abraham dong

10 Shem' suante khangthu hiai ahi. Tuichimpi tun nung kum nihin, Shem in tapa Arfakshad a nei a, tua laiin, amah kum 100-a upa ahita. 11 Arfakshad a neih nungin, kum 500 a nungta lai a, tapa dangte leh tanu dangte zong a nei lai hi. 12 Arfakshad kum 35 a hihin, tapa Shela a nei hi. 13 Shela a neih nungin, kum 403 a nungta lai a, tapa dangte leh tanu dangte zong a nei lai hi. 14 Shela kum 30 a hihin, tapa Eber a nei hi. 15 Eber a neih nungin, kum 403 a nungta lai a, tapa dangte leh tanu dangte zong a nei lai hi. 16 Eber kum 34 a hihin, tapa Peleg a nei hi. 17 Peleg a neih nungin, kum 430 a nungta lai a, tapa dangte leh tanu dangte zong a nei lai hi. 18 Peleg kum 30 a hihin, tapa Reu a nei hi. 19 Reu a neih nungin, kum 209 a nungta lai a, tapa dangte leh tanu dangte zong a nei lai hi. 20 Reu kum 32 a hihin, tapa Serug a nei hi. 21 Serug a neih nungin, kum 207 a nungta lai a, tapa dangte leh tanu dangte zong a nei lai hi. 22 Serug kum 30 a hihin, tapa Nahor a nei hi. 23 Nahor a neih nungin, kum 200 a nungta lai a, tapa dangte leh tanu dangte zong a nei lai hi. 24 Nahor kum 29 a hihin, tapa Tera a nei hi. 25 Tera a neih nungin, kum 119 a nungta lai a, tapa dangte leh tanu dangte zong a nei lai hi. 26 Tera kum 70 a hih nungin, tapate Abram, Nahor leh Haran a nei hi.

Tera' Suante

27 Hiai Tera' suante' khangthu ahi. Tera' tapate Abram, Nahor leh Haran ahi. Haran' tapa Lot ahi. 28 Tera' nuntak lai mahin, Haran bel a pianna gam, Kaldai mite gama Ur khua ah a si hi. 29 Abram leh Nahor in zi a nei tuak uh a, Abram' zi Sarai ahi a, Nahor' zi Milka ahi. Milka bel Haran' tanu ahi. Haran in tanu Milka leh Iska a nei hi. 30 Sarai bel a chiing a, ta a nei kei hi. 31 Tua nungin, Tera in a tapa Abram tawh, Haran' tapa, ama' tupa Lot tawh, a tapa Abram' zi, ama' mou Sarai tawh a tonpih a, Kaldaite gam Ur khua apan Kanan zuanin a pempih hi. Ahihhangin, Haran gam hong tun takun, tua ah a teeng uhi. 32 Tera nuntak sung khempeuh kum 205 ahi a, tua khitin, Haran gam ah a si hi.

Pianchilna 12

Abram Sapna

1 Tangtawn Toupa'n Abram kiang ah: Na gam leh na mite apan hong paikhia in. Na pa' innkawte apan hong paikhia inla, kon etsak ding gam zuan in. 2 Nam thupitakin kon bawl ding a, kon vualzawl ding. Na min ka liansak ding a, vualzawlna na hi ding. 3 Nang hon vualzawlte ka vualzawl ding a, nang hon hamsiatte ka hamsiat ding. Nang tungtawnin leitung mite khempeuh ka vualzawl ding a na-chi khinta hi. 4 Tangtawn Toupa'n amah a na-hilhtak bangin, Abram a kipankhia a, Lot in a zui hi. Haran apan a paikhiak laiin, Abram bel kum 75 a hita. 5 Abram in a zi Sarai leh a sanggampa' tapa Lot a tonpih a, ama'n Harana neih leh lam a khopte leh mihing a neihte khempeuh tawh a paipih hi. Amaute Kanan gam zuanin hong pai uh a, tua bangin Kanan gam a tung uhi. 6 Abram Kanan gam sung ah a pai a, Shekhem muna More' tawsaw sing lianpi dong a pai hi. Tua gam ah Kanan mite a na teeng uhi. 7 Tangtawn Toupa, Abram kiang ah hong kilaak a: Na suante kiang ah hiai gam ka pia hi, a chi hi. Abram in tua mun ah, amah kianga hong kilaak Tangtawn Toupa' mai ah maitam khat a dawh hi. 8 Tua khitin, amah tua mun apan a paikhia a, Bethel khawpi suahlama mual lam ah a pai a, tumlama Bethel khawpi leh suahlama Ai khawpi kikal ah puanbuk a kai hi. Tua mun ah Tangtawn Toupa' mai ah maitam khat a dawh a, Tangtawn Toupa' min a lou hi. 9 Tua khitin, Abram a kipankhia a, Negev lam manawhin a pai hi.

Aigupta Gama Abram

10 Tua nungin, tua gam ah kial a kia hi. Tua kial a nat mahmah manin, Abram bel Aigupta gam ah a paisuk a, mikhualpi-in a va-teeng hi. 11 Aigupta gam sung a lut ding kuanin, hibang thu hong tung hi: Ama'n a zi Sarai kiang ah: Ngai dih, na mel lah hoih tabuang a, 12 Aigupta mite'n nang hon muh chiangun: Hiai a zi hi a, a kichi ding uh a, kei hon that maimah ding uh a, nang hon hinghawi ding uhi. 13 Nangma' vaanga ka tunga a siam ua, ka hinna a bit theih nadingin, Ka sanggamnu kichi mai ve aw, a chi ni. 14 Abram, Aigupta gam sung hong tun takin, Aigupta mite'n Abram' zi a mu uh a, melhoih a sa mahmah uhi. 15 Kumpipa Faro' uliante'n zong amah a mu uh a, Faro kiang ah a phat uh a, Faro' inn ah a tonpih uhi. 16 Faro bel Abram tung ah, a zi hangin a siam mahmah a, Abram in belamte, bawngtalte, sabiltungte, sabiltungnute, sangawngsaute, sila pasalte leh sila numeite a neihlawh hi. 17 Ahihhangin, Tangtawn Toupa'n, Abram' zi Sarai hangin Faro leh a innkawte tung ah hi nasetak a tungsak hi. 18 Tua khitin, Faro in Abram a samsak a: Ka tunga bang hih na hita mai ale? Banghanga amah na zi a hih lam hon hilh lou na hia? 19 Banghanga: Ka sanggamnu ahi, chi peuhmah na hia? Ka zi dinga na pii ka hi vele! En aw na zi! Pii inla, paikhia in! a chi hi. 20 Tua khitin, Faro in a mite kiang ah Abram tawh kisaiin thu a pia a, amaute'n amah, a zi tawh, a neih teng tawh a khakhia uhi.

Pianchilna 13

Abram leh Lot Kikhenna

1 Tua khitin, Abram bel a zi tawh a neih khempeuh tawh, Aigupta gam apan a paikhia a, Lot a tonpih a; Negev ah a paitou uhi. 2 Abram in gantate leh ngun leh kham a hau mahmah hi. 3 Amah, Negev ah a vialpai pai a, Bethel dong a pai a, Bethel leh Ai kikala a puanbuk kaihna mun hong tung hi. 4 Tua mun bel, hun paisa-a maitam a dawhna mun ahi. Abram in tua mun ah Tangtawn Toupa' min a lou hi. 5 Abram tawh ton Lot in zong belamte, gantate leh puanbukte a nei hi. 6 Ahihhangin, amaute' khawsak khawm nadingin gam a kiching kei hi. A neih a lam uh a tam manin, a tengkhawm thei kei uhi. 7 Ahang bel, Abram' ganchingte leh Lot' ganchingte kal ah kinak kiselna hong pianga ahi. Tua hun laiin, tua gam ah Kanante leh Perizte zong a teeng uhi. 8 Tua bang ahih manin, Abram in Lot kiang ah: Ka ganchingte leh na ganchingte kal ah kinakkiselna omsak kei ni. Eite unau sanggam i hi. 9 Na mai ah gam lianpi om hi lou hiam, kikhen mai ni. Nang veilama na pai leh kei taklam ah ka pai ding a, taklama na pai leh kei veilam ah, a chi hi. 10 Lot a khawdak a, Jordan lui phaizang teng a en a, tua gam in tui hoih a neih dan a mu hi. Tangtawn Toupa' huan mah a bang a, Zoar zotna lam lah Aiguta gam mah a bang hi. Hiai bel, Tangtawn Toupa'n Sodom khawpi leh Gomora khwpi a hihsiat ma ahi. 11 Tua bang ahih manin, Lot in Jordan lui phaizang teng a teel a, suahlam manawhin a paita a, amaute a kikhenta uhi. 12 Abram, Kanan gam ah a teeng a, Lot bel phaizang khawpite ah a teeng a, Sodom khawpi kiang ah puanbuk a kai hi. 13 Sodom khawmite bel a gilou mahmah uh a, Tangtawn Toupa tung ah nakpitakin a khial uhi. 14 Abram leh Lot a kikhen nungun, Tangtawn Toupa'n Abram kiang ah: Na omna apan khawdak inla, simlam, mallam, suahlam, tumlam en in. 15 Na muh gam teng, nang leh na chisuan adingin kon peden ding hi. 16 Na chisuan leia leivui zah ka phasak ding a, mi'n leia leivui a sim zawh leh na suante a sim zou ding. 17 Thou inla, gam sung teng, a dung a vaiin tuansuak in, nang hon pia ding ka hi, a chi hi. 18 Tua bangin, Abram in Hebron-a om, Mamre' singkung lianpipite kianga teeng dingin a puanbukte a tuah hi. Tua ah Tangtawn Toupa' mai ah maitam khat a dawh hi.

Pianchilna 14

Abram in Lot a Hutkhiakna

1 Shinar kumpipa Amrafel nuntak laiin, hibang thu hong om hi. Amah tawh Elasar kumpipa Ariokh tawh, Elam kumpipa Khedorlaomer tawh, Goim kumpipa Tidal tawh a pangkhawm uh a, 2 Sodom kumpipa Bera, Gomora kumpipa Birsha, Adma kumpipa Shinab, Zeboim kumpipa Shemeber leh Bela kumpipa tung ah gal a bawl uhi. Bela bel Zoar kichi ahi. 3 Hiai kumpipa ngate, Sidim Phaizang ah a pangkhawm uhi. Sidim bel Chi Tuipi kichi ahi. 4 Hiai kumpipate bel kum sawmlenih sung Khedorlaomer' ukna nuai ah a toukai uhi. A kum sawmlethum kumin a kiphin uhi. 5 A kum sawmleli kumin, Khedorlaomer leh a pankhawmpihte hong kuan uh a, Ashteroth Karnaim khawpi-a teeng Refaimte, Ham muna teeng Zuzte leh Shave Kiriathaim khawta-a teeng Emte a dou uh a, a zou uhi. 6 Tua baan ah, Seir mual tunga Horte, gamdai-gamkeu geia Elparan dongin a zou uhi. 7 Tua khitin, amaute hong kilehkik uh a, En Mispat hong tung uhi. En Mispat bel Kadesh kichi ahi. Amalekte' gam khempeuh leh Hazazon Tamara teeng Amorte zong a zou uhi. Tua Amalekte leh Amorte bel, Hazazon Tamara teeng ahi uhi. 8 Tua bangin, Sodom kumpipa, Gomora kumpipa, Adma kumpipa, Zeboim kumpipa leh Bela kumpipa a kuankhia uh a, Sidim Phaizang ah galdou dingin a pang uhi. Bela bel Zoar ahi. 9 Amaute bel Elam kumpipa Khedorlaomer, Goim kumpipa Tidal, Shinar kumpipa Arafel leh Elasar kumpipa Ariokh dou dinga pang ahi uhi. Tua banga kumpipa li dou dinga kumpipa nga kisa ahi uhi. 10 Sidim Phaizang bel alkatara khuka dim ahi. Sodom leh Gomora kumpipate a taikek takun, mi pawlkhat tua alkatara khuk ah a kia uh a, midangte bel mual tung lam ah a taisuak uhi. 11 Kumpipa lite'n Sodom leh Gomora neih-le-lam teng leh an teng a la uh a, a chiahkikta uhi, 12 Abram' sanggampa' tapa Lot zong Sodom khawpi-a teeng ahih manin, amah zong a neih teng tawh a kaimang uhi. 13 A suakta mi khat hong pai a, Hebru mi Abram kiang ah thu a tun hi. Abram bel, Amor mi Mamre' singkung lianpipite kiang naia teeng ahi. Mamre bel, Eshkhol leh Aner' sanggampa ahi. Hiai mite Abram tawh pangkhawmte ahi uhi. 14 Galte'n a tanau nai salin a kaita uh, chih Abram in a zak takin, ama' innsunga piang, galvan tawimi 318 tawh a kuankhia a, Dan dongin galte a delh uhi. 15 Zan khangin, Abram in gaalte dou dingin a mite a pawlpawlin a khen a, Damaska khawpi mallam panga om Hoba khawpi dong amaute a delh a, galte a zougawp hi. 16 Neih-le-lamte khempeuh a sutkik a, a tanau nai Lot leh a neihsa khempeuh, numeite leh midangte tawh, hon piikik vek hi. 17 Khedorlaomer leh a pankhawm-pih kumpipate zoua Abram hong kiknawn lamin, amah dawn dingin Sodom kumpipa, Shave Phaizang ah hong kuan hi. Shave Phaizang bel, Kumpipa' Phaizang kichi ahi. 18 Tua lai ah Salem kumpipa Melkhisedek in tanghou leh grepzu hon tawi hi. Amah bel, Pathian Tungnungpen' siampi ahi. 19 Ama'n Abram a vualzawl a: Lei leh van Siampa Pathian Tungnungpen in Abram hon vualzawl hen. 20 Na galte na khut sunga hon pepa Pathian Tungnungpen phatin om hen, a chi hi. Tua laiin, Abram in a gallak thil bangkim sawma khat amah a pia hi. 21 Sodom kumpipa'n Abram kiang ah: A mihingte hon pia inla, neih-le-lam teng zaw nang tang in, a chi hi. 22 Ahihhangin, Abram in Sodom kumpipa kiang ah: Lei leh van kipsakpa Pathian Tungnungpen, Tangtawn Toupa' mai ah kichiamin khut ka liikta. 23 Nang' neihsa peuhmah bangmah kei adingin ka la kei ding. Khau zang khat nangawn, khedap khau khat nangawn ka la kei ding. Tua bang hi kei leh, Abram ka hihhauhsa ahi, na chi kha ding. 24 Tangvalte' neksa teng bel ka lak ahi dia, tua baan ah, kei hon zui Aner, Eshkhol leh Mamre in a tan uh la uhen, a chi hi.

Pianchilna 15

Abram tawh Kala Pathian' Thukhun

1 Hiai thilte nungin, Tangtawn Toupa'n mengmuhna tung-tawnin Abram a houpih a: Abram, lau ken, keimah mah na lum ka hi ding a, na pahtakman thupi mahmah ka hi ding hi, a chi hi. 2 Ahihhangin, Abram in: Toupa, Tangtawn Pathian aw, bang hon pe ding na hia? Kei lah ta neilouin ka om lailai a, Damaska mi Eliezer mah ka gouluahpa ding hilou ding maw? a chi hi. 3 Tua khitin, Abram in: Ta lah non pe kei a, ka innsunga piang pen mah ka gouluahpa hi ding ahi, a chi hi. 4 Tua nungin, Tangtawn Toupa' thu amah kiang ah hong tung a: Hiai pa na gouluahpa ahi kei ding a, nangma' ta mahmah na gouluahpa ahi zaw ding, a chi hi. 5 Tua khitin, ama'n amah innpua ah a pawtkhiakpih a: Vante en inla, aksite sim dih, na sim seng hiam. Na chisuan hibang zah pha ding ahi, a chi hi. 6 Abram in Tangtawn Toupa a um a, ama'n tua a upna a diktatnain a simsak hi. 7 Ama'n amah kiang ah: Hiai gam na gouluah dinga hon pe dingpa, Kaldai mite gama Ur apan hon piikhepa Tangtawn Toupa kei ka hi, a chi lai hi. 8 Ahihhangin, Abram in: Toupa, Tangtawn Pathian aw, hiai gam ka luah ding, chih bangchi-a thei ding ka hia? a chi hi. 9 Tangtawn Toupa'n amah kiang ah: Bawngla khat, keltal khat leh belamtal khat kum thuma upa ngen hon la inla, vakhu khat leh kawl vakhu vual khat zong hon la in, a chi hi. 10 Abram in hiaite amah kiang ah a hon la a, tuate a kimlai ah a phelkhap a, a phelte kimaituahin a vualin a koih a, vasate bel tua bangin a phelkhap kei hi. 11 Tua khitin, sasialne vasate'n tua saluangte a bawhsuk chiangun, Abram in a hawlkhe zel hi. 12 Ni a tumsuk dektakin, Abram ihmut limtakin a ihmu hithit a, mial lauhuaitakin amah a khuhta hi. 13 Tangtawn Toupa'n Abram kiang ah: Na suante amau' gam hilou ah, mikhualin a om ding uh a, tua gam mite'n kum 400 sung suak leh salin gentheitakin a bawl ding uh, chih thei in. 14 Ahihhangin, keimah in amaute sala nei nam ka gawt ding a, tua nungin, na suante hauhna thupitak tawh hong paikhe ding uh. 15 Ahihhangin, nang bel, lungmuangtakin, na pu na pate kiang ah na pai ding a, teekkunin na kivui ding hi. 16 A khang Una ah na suante hiai mun ah hong kik ding uhi. Ahang bel, Amorte' khelhna a buchin nai louh man ahi, a chi hi. 17 Ni a tum a, khua a mial takin, meichihna bel khu lunglung leh meisel kuang zuapzuap hong kilang a, tua saluang phelte kal ah a pai uhi. 18 Tua ni-in, Tangtawn Toupa'n Abram tawh kal ah thukhun a bawl a: Na suante kiang ah hiai gam pekhin ka hi. Tua bel, Aigupta luipi leh lui lian Iufratis lui kal, 19 Kente, Kenizte, Kadmonte, 20 Hitte, Perizte, Refaimte, 21 Amorte, Kanante, Girgaste leh Jebuste gam teng ahi, a chi hi.

Pianchilna 16

Mihing' Lemtheihna' Ta

1 Abram' zi Sarai in Abram adingin ta a nei kei hi. Ahihhangin, Aigupta numei khat Hagar kichi, innsung nasemin a nei hi 2 Sarai in Abram kiang ah: En mah mah dih. Tangtawn Toupa'n lah tabeia hon koih a, hiai ka nasemnu luppih mai in. Ama' tungtawnin innkuan kon bawl thei khamawh dia hia, a chi hi. Abram in Sarai' thu a mang a, 3 Abram Kanan gama kum sawm a teen nungin, Sarai in a silanu, tua Aigupta numei Hagar a tonpih a, a pasal Abram kiang ah a zi dingin a pia hi. 4 Abram in Hagar a luppih a, a gaita hi. Hagar in a gaita, chih a kitheih takin, a tounu a simmawh panta hi. 5 Tua bang ahih takin, Sarai in Abram kiang ah: Nang' mawhna hanga thuak ka hi ve. Ka silanu na kawi dingin kon pia a, a gai, chih a kitheih takin, kei hon simmawh mahmahta ve. Tangtawn Toupa'n nang leh kei kal ah thu khen hen aw, a chi hi. 6 Abram in Sarai kiang ah: En in, na silanu na khut sunga om ahi. Hoih na sak bangbangin hih in, a chi hi. Tua bangin, Sarai in Hagar a hihgenthei a, amah apan Hagar a taikhia hi. 7 Tua khitin, Tangtawn Toupa' vansawltak in gamdai-gamkeua Shur zotna lampi kianga om tuikhuk kiang ah Hagar a mu hi. 8 Ama'n: Sarai' silanu Hagar, koi apan hong pai a, koia hawh dek na hia? a chi hi. Hagar in: Ka tounu Sarai mai apan tai ka hi, a chi hi. 9 Tangtawn Toupa' vansawltak in: Na tounu kiang ah kik nawn inla, a nuai ah lut in, a chi hi. 10 Tua Tangtawn Toupa' vansawltak in: Na suante nakpitakin ka tamsak ding a, a tam mahmah ding uh a, simseng ahi kei ding uhi, a chi lai hi. 11 Tangtawn Toupa' vansawltak in Hagar kiang ah: Tuin nau pai na hi a, tapa khat na nei ding hi. Na gentheihna Tangtawn Toupa'n a zaktak manin, na tapa' min dingin, Ishmaef na sa ding ahi. 12 Amah, gamlak sabiltung bangin, mi genhak ahi ding a, mi chih a dou ding a, a sanggamte khempeuh tawh kihou theilouin a nungta ding, a chi lai hi. 13 Hagar in: Mutheipa muta a, nungtalai hilou ka hi hiam, a chi a, amah houpihpa Tangtawn Toupa' min dingin El Roi a sa hi. 14 Tua bang ahih manin, tua tuikhuk, Beer Lahai Roi, a kichi hi. Kadesh leh Bered kal ah tua tuikhuk a om lai hi. 15 Tua khitin, Hagar in Abram adingin tapa khat a nei a, Abram in Hagar' neihsak a tapa' min dingin Ishmael a sa hi. 1 Amah adinga Hagar in Ishmael a neih laiin, Abram kum 86 ahita hi.

Pianchilna 17

Thukhun Chiamtehna

1 Abram kum 99 a hih kumin, Tangtawn Toupa ama' kiang ah hong kilaak a, a kiang ah: Kei, Pathian Vanglianpen ka hi. Ka mai ah gamtat hoihin nungta inla, paubannain om ken. 2 Nang leh kei kal ah ka thukhun ka kipsak dinga, nakpitakin kon tamsak semsem ding, a chi hi. 3 Abram, a maia lei si-in a bok a, Pathian in amah a houpih a: 4 Kei lampang ah hibang ahi ding: Nang tawh kala ka thukhun hiai ahi ding a, mi tampite' pa na hi dinga, 5 na min Abram a kichi nawn kei ding a, Abraham ahita ding. 6 Chipha mahmahin kon bawl ding a, nam tampi-in kon bawl ding a, nang apanin kumpipate hong piang ding. 7 Khang sawn sawn dongin, nang leh na suante leh kei kal ah ka thukhun ka kipsak ding a, Tangtawn thukhun ahi ding. Nang leh na nunga na suante' Pathian ka hi ding hi. 8 Tu-a mikhuala na omna Kanan gam buppi, nang leh na suante' tandet dingin kon pe ding a, na Pathian ka hi ding hi, a chi hi. 9 Tua khitin, Pathian in Abraham kiang ah: Nang lam pang ah hibang ahi ding: Ka thukhun na zuih ding ahi a, nang leh na nunga na suante'n khangsawn sawna na zuih ding uh ahi. 10 Nang leh na nunga na suante'n na zuih ding uh ka thukhun hiai ahi: Na lak ua pasal peuhmah zeksum ding ahi. 11 Zekmuk vun na sum ding uh a, noute leh kei kala thukhun chiamtehna ahi ding. 12 Khangsawn sawn dongin, na tate uh, pasal peuhmah, ni giata upa chiang tunglam leh, na innsunga piang hilou, dangka suma na lei uh gamdang mi nangawn tawh, zeksum vek ding ahi. 13 Na innsunga piang hita leh, gamdang mi dangka suma na lei hita leh, a vekun, zeksum ding ahi. Ka thukhun pen, Tangtawn thukhun hi dingin na satung ah a om ding ahi. 14 Zeksum louh pasal peuhmah, a sa tunga zeksum louh peuhmah, ka thukhun palsat ahih manin, a mite lak apan satkhiak ahi ding, a chi hi. 15 Tua baan ah, Pathian in Abraham kiang ah: Na zi a hih leh, Sarai chi-in na sam nawn kei ding a, a min Sara ahita ding hi. 16 Amah ka vualzawl ding a, amah tungtawnin tapa khat kon pe ding. Amah, namte' nu ahih nadingin ka vualzawl ding a, amah apanin, kumpipate hong piang ding, a chi lai hi. 17 Tua khitin, Abraham lei si-in a bok a, a nui hi. Ama'n a lungsung ah: Kum 100 phata mi in tapa ka nei tel dia hia? a chi hi. 18 Tua khitin, Abraham in Pathian kiang ah: Ishmael in na vualzawlna tang mai leh chi na'ng e! a chi hi. 19 Pathian in bel: Na zi Sara mahmah in nang ading tapa khat nei ding a, a min dinga Isak na sak ding ahi. Ke'n ama' nunga a suante tawh kala Tangtawn thukhun hi dingin amah tawh kala ka thukhun kipsak ding ka hi. 20 Ishmael ahih leh, na nget ka zata a, amah ka vualzawl ngeingei ding. Amah ka chiphasak ding a, nakpitakin ka pungsak ding. Amah, vaihawmmi sawmlenihte' pa ka hisak ding a, amah nam thupitak ka suah ding. 21 Ahihhangin, ka thukhun zaw, kum nawn tubang huna, Sara in nang adinga a neih ding Isak tawh kal ah ka kipsak ding, a chi hi. 22 Pathian in Abraham a houpih khitin amah a nuseta hi. 23 Pathian in amah a hilh bangbangin, Abraham in tua ni mahmah-in a tapa Ishmael leh, innsunga piang hita leh, dangka suma a leite hita leh, pasal khempeuh zek a sumsak vek hi. 24 Abraham sa-a zeksum ahih laiin, kum 99 a phata hi. 25 A tapa Ishmael bel a sa-a zeksum a hih laiin kum sawmlethum a phata hi. 26 A ni kibangin, Abraham leh a tapa Ishmael zeksum ahi uhi. 27 Abraham' innsunga teeng pasal khempeuh, a innsunga piang hita leh, dangka suma a lei gamdang mi hita leh, amah tawh zeksum ahi vek uhi.

Pianchilna 18

Thuchiam Tapa

1 Tua nungin, Mamre-a singkung lianpipite omna ah, Tangtawn Toupa Abraham kiang ah hong kilaak hi. Abraham bel, sun nisa nuaia a puanbuk kongkhaka a tut laitak ahi. 2 Abraham a dak touh leh, a kianga mi thum ding a mu hi. Amaute a muh takin, amaute muak dingin a puanbuk kongkhak apan a vatai a, amaute' mai ah lei si-in a bok hi. 3 Abraham in: Ka toupa aw, na mit muha deihsakna non tansak leh, kei na silapa hon kheng ken. 4 Tui kon la ding a, sing nuaia tawlngain na khe uh sil un. 5 Na silapa kianga hong hawh na hih buang chiangin, an kon lui ding a, tamnemin ne un aw, tua khit chiangin, amaban na sawn kei ding ua hia, a chi hi. Amaute'n: Na gen bangin hon hih ve, a chi uhi. 6 Tua bangin, Abraham a puanbuk sung ah, Sara kiang ah a lut pah a: Kinawh inla, anvui neel sea thum hon meek zok inla, tanghou hon kang in, a chi hi. 7 Abraham in, a bawnghon laka vatailutin, bawngtuai khat hon kai a, tangval nou khat kiang ah a pia a, ama'n tua bawngtuai sa a vabawl hi. 8 Abraham in bawngnawi dat thuuk leh bawngnawi tawh, tua bawngsa tawh amaute mai ah a lui hi. Amaute' annek sung teng, Abraham amaute kiang ah, sing nuai ah a ding hi. 9 Amaute'n: Na zi Sara koia om ahia? chi-in a dong uh a, ama'n: Puanbuk sung ah a om, a chi hi. 10 Tangtawn Toupa'n: Ngai in, hinna hunbi ngeina bangbangin, na kiang ah kong pai kik ngeingei ding a, na zi Sara in tapa khat a nei ding, a chi hi. Ama'n puanbuk kongkhak nungngat hi ven, Sara in tua kongkhak ah, tua thu a na ngaikhia hi. 11 Abraham leh Sara bel a upata uh a, a teekta uhi. Sara in zong numei ta neih theih ngeina hun a khengta hi. 12 Tua ahih manin, Sara in: Kei lah teekta, ka pasal lah teekta a, ta neih lungnopna mel ka mu nawn tel dia hia? a chi a, a lungsung ah a nui hi. 13 Tangtawn Toupa'n Abraham kiang ah: Banghanga Sara in: Ka teek nungin ta ka nei taktak tel dia hia? chi-a nui ahia? 14 Tangtawn Toupa adingin thil haksa lua a om thei ahia? Ka hun seh a tun chiangin, na kiang ah kong hawh kik ding a, hinna hunbi ngeina bangbangin, Sara in tapa khat a nei ding, a chi hi. 15 Sara bel a lau a, zuau genin: Nui kei veng e, a chi hi. Ahihhangin, Ama'n: Nui mah teh, a chi hi. Sodom ading Abraham ngetsakna 16 Tua khitin, tua mite a dingkhia uh a, Sodom khawpi lam a ensuk uhi. Abraham in amaute a zui a, a vakha hi. 17 Tua laiin, Tangtawn Toupa'n: Ka thilhih dek Abraham ka im dia hia? 18 Amah lah nam lian leh nam thupi hong suak ding a, ama' tungtawna leitung namte khempeuh kivualzawl taktak ding hi a. 19 Ahang bel, ke'n Abraham ka teltak man hi a, tua lah, ama'n a tate leh a nunga a suante a thuhilh theih nading hi a, tua baana, amaute'n Tangtawn Toupa' lampi tawna, a dik a tanga a gamtat nading ua a thuhilh nading leh, Tangtawn Toupa'n a chiamsa ama' tungtawna a tangtunsak nading ngimna hi sawnsawn hiven, a chi hi. 20 Tua baan ah, Tangtawn Toupa'n: Sodom leh Gomora mawhsakna kikouna a thupi mahmah a, amaute' khelhna lah a nase mahmah hi. 21 Tu'n ka paisuk ding a, mawhsakna kikou ka kiang hong tung banga gamta hi uhiam ka vaen ding. Tua banga gamta ahih kei uleh lah ka thei ding, a chi hi. 22 Tua mite, tua apan a paikhia uh a, Sodom leh Gomora manawhin a paisuk uhi. Ahihhangin, Abraham bel, Tangtawn Toupa' mai ah a ding nilouh hi. 23 Abraham in amah a vanaih a: Mi diktatte, migiloute tawh na mangthangkhawmsak taktak tel dia hia? 24 Tua khawpi sung ah mi diktat 50 om leh, mi diktat 50-te hangin, tua khawpi hihse louin, na hawi kei dia hia? 25 Mi diktatte migiloute tawh thatkhawm mahmah ken. Nang tel in zaw, migiloute tunga na hih bangbangin mi diktatte tung ah hih ken! Leitung teng khempeuh tunga Thukhenpa'n a dik a tangin thu khen lou ding maw? a chi hi. 26 Tangtawn Toupa'n: Sodom khawpi sunga mi diktat 50 ka muh leh, amaute hangin tua khawpi ka hawi ding, a chi hi. 27 Abraham in a dawng a: Ngai dih, kei lah leivui leh meivu leltak ka hi a, hinapi-in, Tangtawn Toupa kon houpihta mawk a! 28 Ahih leh, mi diktat 50 a chin louhna ngain samta leh, nga a sap manin, tua khawpi na hihse veve dia hia? a chi hi. Tangtawn Toupa'n: Tua khawpi-a mi diktat 45 ka muh leh, tua khawpi ka hihse kei ding, a chi hi. 29 Abraham in amah a houpih kik a: Tua khawpi ah mi diktat 40 kia muta lete lah! a chi hi. Tangtawn Toupa'n: Mi diktat 40-te hangin, tua khawpi ka hihse kei ding, a chi hi. 30 Tua khitin, Abraham in: Tangtawn Toupa aw, heh kenla, hon gensak lai in. Tua khawpi ah mi diktat 30 kia muta lete lah? a chi hi. Tangtawn Toupa'n: Mi diktat 30 ka muh leh, tua khawpi ka hihse kei ding, a chi hi. 31 Tua khitin, Abraham in: Ngai dih, Tangtawn Toupa kon houpih ngamta mawk a, tua khawpi ah mi diktat 20 kia muta lete lah? a chi hi. Tangtawn Toupa'n: Mi diktat 20-te hangin, tua khawpi ka hihse kei ding, a chi hi. 32 Tua khitin, Abraham in: Tangtawn Toupa aw, heh kenla, khatvei ka gen lai aw. Tua khawpi ah mi diktat sawmkhat kia muta lete lah? a chi hi. Tangtawn Toupa'n: Mi diktat sawmkhatte hangin, tua khawpi ka hihse kei ding, a chi hi. 33 Abraham kianga thu a gen khitin, Tangtawn Toupa a paikhia hi. Abraham zong a inn ah a kilehkikta hi.

Pianchilna 19

Sodom Gitlouhna

1 Nitak lamin, tua vansawltak nihte Sodom khawpi hong tung uhi. Lot bel, Sodom kongpi ah a tu a, amaute a muh takin, amaute muak dingin a dingkhia a, a maitanga lei si-in a kun hi. 2 Ama'n amaute kiang ah: Toute aw, na silapa uh' inn ah hong lut unla, zan giak unla, na khete uh sil un. Zingsang beltakin na kipankhe kik ding uhi, a chi hi. Amaute'n: Hi lou e, konglak ah zan giak n'ung, a chi uhi. 3 Ahihhangin, Lot in amaute a chial ngutngut a, amaute'n inn sung ah amah a zuilut uhi. Ama'n amaute ading tanghou silngou sawh louh bawlin ankuang a lui a, amaute'n tua a ne uhi. 4 Amaute a lup maun, tua khawpi mite, Sodom pasalte a teek a khang, mi khempeuh in tua in kimkot ah a umchip uhi. 5 Amaute'n: Lot kiang ah: Tuzana na inna hong tungte koia om ahi ua? Amaute ka luppih dingun hon piikhia in, a chi uhi. 6 Lot bel, kongkhaka pawtin amaute kiang ah a vapusuak a, kongkhak a khak hi. 7 Ama'n amaute kiang ah: Ka sanggamte aw, hehpihtakin, hibang lawmlawmin gilou dah ve ua. 8 Ngai un, pasal' luppih ngei louh tanu nih ka nei hi. Hon hehpih unla, amaute kon piikhe ding a, na lawh lawh uh lawh un. Ka innsung hong beel hiaite zaw bangmah lawh mahmah kei un, a chi hi. 9 Sodom khaw mite'n: Lam dalin om ken, a chi uhi. Tua khitin: Hiai mipa, mikhual leltaka hong lut hinapi-in, thukhenpa bangin a gamta gige maw! Amaute tunga ka hih sang ua nase zawin, nang tung ah ka hih ding uh, a chi uhi. Tua bangin, Lot a phu phei uh a, kongkhak tuanhong dingin a naih uhi. 10 Ahihhangin, inn sunga mite'n khuta sawkin, inn sung ah Lot a kailut uh a, kongkhak a khak uhi. 11 Amaute'n kongkhaka omte' mit, a tek a khangin, a tawsak uh a, kongkhak a zong mu zou kei uhi. Sodom leh Gomora Hihsiatna 12 Tua khitin, tua mite'n Lot kiang ah: Hiai ah mi dang himhim na nei hia  makpate, tapate, tanute leh khawpi sunga tanau laina himhim? Amaute khempeuh hiai mun apan taikhiakpih vek in! 13 Ahang bel, hiai khaw mite mawhsakna kikou Tangtawn Toupa' maia a ot luat mahmah tak manin, hiai mun hihse ding ka hita uh, a chi uhi. 14 Tua khitin, Lot a paikhia a, a tanu kitenpih dinga kham a makpate kiang ah thu a gen a: Kisa unla, hiai mun apan taikhia un. Tangtawn Toupa'n hiai khawpi hihse ding ahi! a chi hi. Ahihhangin, a makpate ngaihin amah chiamnui bang lei ahi. 15 Zingsang phalvakin, tua vansawltakte'n Lot a nawh uh a: Kinawh in! Na zi leh hiaia om na tanute gel taikhiakpih in. Tua ahih keileh, hiai khawpi gawtna ah na mangthangkhawm ding uhi, a chi uhi. 16 Ahihhangin, Lot a thaduai mahmah hi. Tangtawn Toupa'n amah a lainat mahmah manin, tua mite'n amah, a zi tawh, a tanute gel tawh, bantangin a kaikhia uh a, khawpi pawlam ah a koih uhi. 17 Lot a paikhiakpih nungun, hibang hong tung hi. Khat pen in: Na hinna humbit dingin taikhia in! Nunghei het kenla, phaizang ah zong khawl het ken. Mual tung lam ah tai in. Na tai kei leh, gawtna in hon phiatmang petmah ding ahi! a chi hi. 18 Ahihhangin, Lot in amaute kiang ah: Toute aw, hibang hi peuhmah kei hen! 19 Na sila in na mitmuhun deihsakna ka tang a, ka hinna huin zahngaihna na liansakta uhi. Tu'n kei hua mual tung lama tai zoulou ding hi'ng. Tai leng, siatna khattou in hon lap ding a, ka si kha ding hi. 20 En un, hiai ah tun zawh nadinga nai khua khat a om a, neu zong a neu hi. Hiai khua neu mahmah hilou hia? Hiai ah hon taisak mai un, ka bit ding, a chi hi. 21 Ama'n a kiang ah: Ngai in, nang kon sangta. Hiai na ngetna zong kon sang ding a, na gen tua khua ka hihse kei ding hi. 22 Ahihhangin, kintakin tua ah tai meng in, tua khua na tun mateng, bangmah hih thei lou hi'ng, a chi hi. Hiai hang ahi, tua khua Zoar a kichih. 23 Lot, Zoar khua a tun takin, leitung ah ni hong suakta hi. 24 Tua khitin, Tangtawn Toupa'n van apanin, Sodom leh Gomora tung ah kaat kaang a zusak a, 25 hiai khawpite, a kimkot phaizang teng tawh, tua khawpite sunga teng mi khempeuh leh leitunga pou sing leh lou teng tawh a hihse vek hi. 26 Ahihhangin, Lot' zi bel a nunghei a, chi khuampi a suak hi. 27 A zingchiangin, Abraham bel, Tangtawn Toupa' maia a dinna mun ah a ding kik hi. 28 Ama'n Sodom leh Gomora leh a kimkot phaizang gam teng a gal et a, haltuina meiphualpi khu bangin, tua gam meikhu a kitungtou lunglung hi. 29 Tangtawn Toupa'n tua phaizang khawpite a hihsiat laiin, Abraham a phawk gige a, Lot' tenna khawpite a hihsiat laiin zong, a siatna lak apanin Lot a piikhia hi.

Lot' Khelhna

30 Tua nungin, Lot bel a lau manin, Zoar apan a taikhia a, a tanute gel tawh mual tung ah, kawkhuk sung khat ah a teeng hi. 31 Nikhat bel, a tanu uzaw pen in, a nauzaw pen kiang ah: I pa lah teekta a, leitung dana hon luppih ding lah leitunga pasal khat zong om lou a, 32 i pa zu dawn khamsakin luppih lehang, i pa suanmang loua koih ding hi hang, a chi hi. 33 Tua zanin, amaute'n a pa uh zu a dawnkhamsak uh a, a tanu uzaw in amah a valuppih hi. A pa'n lah a tanu' luppih lai leh a thawhkhiak lai a phawk himhim kei hi. 34 A zing chiangin, a tanu uzaw in a nauzaw kiang ah: Zan zanin ka pa valuppih ka hi ve. Tuzanin, amah zu i dawnkhamsak kik ding a, nang valuppih in aw, hi leh, i pa suanmang loua koih ding hi hang, a chi hi. 35 Tua bangin, tua zanin zong a pa uh zu a dawnkhamsak uh a, a tanu nauzaw in a valuppih hi. A pa'n a tanu' luppih lai leh a thawhkhiak lai a phawk himhim kei hi. 36 Tua bangin, Lot' tanute gel in a pa uapan nau a pai tuak uhi. 37 Tanu uzaw in tapa a nei a, ama'n a min dingin, Moab a sa hi. Amah tulai Moabte' pubul hong hi ahi. 38 Tanu nauzaw in zong tapa a nei a, a min dingin Ben Ami a sa hi. Amah tulai Amonte' pubul hong hi ahi.

Pianchilna 20

Abimelekh Ze-etna

1 Tua nungin, Abraham Negev zuanin a pai a, Kadesh khawpi leh Shur khawpi kikal ah a teeng a, hun bangtan hiam, Gerar gam ah a taam hi. 2 Tua ah Abraham in a zi Sara. Ka sanggamnu ahi, a chi hi. Tua bangin, Gerar kumpipa Abimelekh in mi a sawl a, Sara a piisakta hi. 3 Ahihhangin, zan khat, Abimelekh' mangin Pathian amah kiang ah hong pai a: Na numei pii pen mi' zi ahih manin si ding na hi, a chi hi. 4 Abimelekh in Sara a luppih nai louh manin, Pathian kiang ah: Toupa, nang mawh neilou nam na hihmangthang dia hia? 5 Amah mah in ka kiang ah: Amah ka sanggamnu ahi, chi hilou maw? Numei in zong: Amah ka sanggampa ahi, chi hilou maw? Hibanga amah ka pii laiin, ka sia-le-pha theihna a siang a, ka khut zong mawh lou ahi, a chi hi. 6 Pathian in Abimelekh mang mahin: Ahi, hibanga amah na pii laiin, na sia-le-pha theihna a siang a, na khut zong a mawh kei, chih ka thei a, ka tunga na khelh louh nadingin kon kham a, amah na khoih ding ka phal kei. 7 Tu'n hiai mipa' zi pe kik in. Amah kamsang khat ahi a, nang hon thumsak ding a, na hing ding. Ahihhangin, amah na piak kik kei leh bel, nang leh na innkawte na si vek ding uh chih thei in, a chi hi. 8 Abimelekh zingkhangpi-in a thou a, a silate khempeuh a sam a, hiai thute khempeuh a hilh a, amaute a lau mahmah uhi. 9 Tua khitin, Abimelekh in Abraham a samlut a: Route tunga bang hih na hita maia? Na tung ah bang ka hih a, nang kei leh ka gam tunga khelhna thupi hon tun na hia? Hih louh dingpi ka tunga hih na hi ve, a chi hi. 10 Tua baan ah, Abimelekh in Abraham kiang ah: Hibang na hih peuhmah, asan a haang bang ahia? a chi lai hi. 11 Abraham in: Hiai muna Pathian launa lah om lou a, ka zi hangin hon that mahmah ve unchin, ka chi a, hibanga hih ka hi. 12 Amah ka sanggamnu zong hi taktak eive. Amah ka pa' tanu hi a, ka nu' tanu bel hilou lei hi a, tu-a ka zi hong hi hi lei zaw ahi. 13 Hibang dan ahi. Pathian in ka pa' inn apan hon paikhiaksak laiin, ka zi kiang ah: Ka tung ah siamna hibangin hon langsak in aw. I paina peuh a, Amah ka sanggampa ahi, non chi ding aw, ka na chihsa mawng ahi, a chi hi. 14 Tua khitin, Abimelekh in belamte, bawngtalte, sila pasalte leh sila numeite Abraham a pia a, a zi Sara zong a pe kik hi. 15 Tua tham louin, ama'n: En in, na mai ah ka gam kiphah hilou hia, na ut nana ah teeng in, a chi hi. 16 Tua baan ah, Sara kiang ah: En in, na sanggampa khut ah ngun tang shekel 1,000 ka pia. Na ompihte khempeuh' mai ah, na zumselna ahi ding a, nang na dik chih genna ahi ding, a chi hi. 17 Abraham Pathian kiang ah a thum a, Pathian in Abimelekh leh a zi leh a sila numeite a damsak a, tate a nei thei kik uhi. 18 Ahang bel, Tangtawn Toupa'n Abraham' zi Sara hanga Abimelekh' innkawte peuhmah ta nei theiloua, na koih khinta hiven.

Pianchilna 21

Isak Pianna

1 Tua nungin, Tangtawn Toupa'n a gensa bangin, Sara tung ah hehpih a siam a, Sara adinga a chiamsa a hihsak hi. 2 Sara hong gai a, Abraham' tek nungpi-in tapa khat a neihsak hi. Pathian in hun a seh, amah a hilh bang geiha tangtung ahi. 3 Abraham in Sara' neihsak tapa min dingin Isak a sa hi. 4 Isak ni giata upa a hih-in, Pathian' thupiak bangin Abraham in a zek a sumsak hi. 5 A tapa Isak a pian laiin, Abraham kum 100-a upa a hita hi. 6 Sara in: Pathian in hon nuisakta a, a zakha peuhmah in hon nuihpih ding, a chi hi. 7 Amah mah in: Kua'n Abraham kiang ah, Sara in tate hon pom ding ahi! Na chi nuam mahmah ding ahia? A tek nungpi-a tapa kineihsak hi a! a chi lai hi.

Silanu Hagar Hawlkhiakna

8 Naungek Isak hong khang a, Sara in nawinek a tawpsakta hi. Isak nawinek a tawp ni-in, Abraham in ankuang thupitak a lui hi. 9 Aigupta numei Hagar in Abraham adinga a neihsak tapa in Isak a simmawh, chih Sara in a mu hi. 10 Tua bangin, Abraham kiang ah: Hiai sila numei leh a tapa hawlkhia in. Sila numei' tapa inka tapa Isak tawh gou a luahkhawm ngei kei ding, a chi hi. 11 A tapa mahmah tawh kisai thu a hih manin, Abraham in hiai thu a lungzinpih hi. 12 Ahihhangin, Pathian in amah kiang ah: Isak tungtawna na chisuan kisim ding ahih manin, naupang leh sila numei lungzinpih ken. Sara in na kianga a gen khempeuh zui in. 13 Silanu' tapa zong na suan ahih manin, amah nam thupi-in ka bawl ding, a chi hi. 14 Abraham zingkhangpi-in a thou a, tanghou leh savun tuithawl a la a, Hagar liangkou ah a suan a, naupangpa tawh amah a sawlkhia hi. Tua bangin, Hagar a paikhia a, Beersheba gamdai-gamkeu ah a vialpai hi. 15 Savun tuithawla tui a bei takin, Hagar in naupangpa sawlbawk nuai khat ah a nusia a: 16 Naupang si ding ka en ngam kei, a chi a, a pai a, gamla lou, thala kap phakna ah a tu a, a kapkhia hi. 17 Pathian in tua naupang' aw a za a, Pathian' vansawltak in van apanin Hagar a sam a, a kiang ah: Hagar, bang chi na hia? Pathian in naupang omna apan a aw za ahi, lau ken. 18 Dingkhia inla, naupang phong inla, a banin len in. Amah nam thupi-a bawl ding ka hi, a chi hi. 19Tua khitin, Pathian in Hagar mit a vaksak a, tuikhuk khat a mu hi. Tua bangin, amah a vapai a, savun tuithawlin tui a vadim a, naupang a dawnsak hi. 20 Pathian in tua naupang a ompih a, naupang hong khanglian a, gamdai-gamkeu ah a teeng a, thalkap siam hong hi hi. 21 Amah Paran gamdai-gamkeua a teen laiin, a nu'n Aigupta gam apan zi a piisak hi.

Beersheba-a Kilemna

22 Tua laiin, hibang thu hong om a: Abimelekh in a sepaihhon makaipa Fikol a tonpih a, Abraham a houpih a: Pathian in na thil hih ieuhmah ah hon ompih hi. 23 Keima' tung hiam, ka tapa tung hiam, ahih kei leh, ka suante' tung hiama lepchiah taka gamta lou ding leh, na tunga siam ka suah banga, kei tung leh, na khualtamna hiai gam tunga siam suah dingin tuin Pathian mai ah ka kiang ah kichiam in, a chi hi. 24 Aw, ka kichiam ding, a chi hi. 25 Ahihhangin, Abimelekh' silate'n a tuileh khat a laksakna thu uah, Abraham in Abimelekh a tai hi. 26 Abimelekh in: Hibanga thil hih kua ahia ka thei kei. Nang lah ka theih nadingin non hilh kei a, tuni-a hibang thu ka zak pat ahi ve, a chi hi. 27 Abraham in belamte leh bawngtalte a kai a, Abimelekh a pia a, amau gel kal ah thukhun a bawl uhi. 28 Abraham in belamhon lak apan belamnounu sagih a tuamkoih hi. 29 Abimelekh in amah kiang ah: Hiai belamnounu na tuamkoihte bang na chihna ahia? a chi hi. 30 Abraham in: Hiai tuileh kei tawhsa ahi, chih theihpihna hi dingin hiai belamnounu sagih ka khut apan sang in, a chi hi. 31 Tua bangin, amau gel in tua laia kichiamna a bawlkhawm manun, tua mun min dingin Beersheba" a sa uhi. 32 Hibanga thukhun a bawl khitin, Abimelek leh a sepaihhon makai Fikol bel, Filistia gam ah a paita uhi. 33 Abraham in Beersheba ah tawsaw sing a suan a, tua ah Tangtawn Toupa, a nungtaden Pathian' min a lou hi. 34 Tua bangin, Abraham Filistia gam ah hun sawtpi a teeng hi.

Pianchilna 22

Isak Latna

1 Hiai thilte nungin, hibang thu hong om a: Pathian in Abraham a ze-et a, a kiang ah: Abraham, a chi hi. Ama'n: Hiai ah ka om, a chi hi. 2 Pathian in: Na tapa tang neihsun, na it mahmah Isak tonpih inla, Moria gam ah pai inla, tua mualte laka khat kon hilh ding pen tung ah, haltum thillatin lan in, a chi hi. 3 A zingchiang, zingkhangpi-in, Abraham a thou a, a sabiltung tung ah tuanphah a phah a, a silate nih leh a tapa a tonpih hi. Haltum thillat ading sing a ehkhitin, Pathian in a hilhna mun zuanin a kipankhia hi. 4 A ni thum ni-in, Abraham a khawdak a, gamlapi ah, a hawh nading mun a galmuh hi. 5 Ama'n a silate kiang ah: Noute gel hiai ah, sabiltung tawh na om unla, kei leh naupang hua lai ah ka vahawh ding uh a, Pathian ka vabe ding uh. Tua khit chiangin koute gel kong kilehkik ding uhi, a chi hi. 6 Abraham in haltum thillat nading sing a dom a, a tapa Isak a suan a, ama'n mei leh temta a tawi a, a nihun a ton uhi. 7 Tua banga a ton laiun, Isak in a pa Abraham a houpih a: Pa, a chi hi. Ama'n: Ka tapa aw, hiai ah ka om, a chi hi. Isak in: Mei leh sing om a, haltum thillat ding belam koia om ahia? a chi hi. 8 Abraham in: Ka tapa aw, Pathian mahmmah in haltum thillat ding tua belam hon ngaihtuah tawm na ding ahi, a chi hi. Tua bangin, amau gel tonin a paipai uhi. 9 Tua bangin, amau gel, Pathian in amah a hilhna mun hong tung uhi. Abraham in tua ah maitam a dawh a, maitam tung ah sing a chiangkhawm hi. Tua khitin, ama'n a tapa Isak a hen a, maitama sing tung ah a sial hi. 10 Tua khitin, Abraham in a khut in a sawk a, a tapa that dingin temta a la hi. 11 Ahihhangin, Tangtawn Toupa' vansawltak in van apanin amah a sam a: Abraham, Abraham, a chi hi. Abraham in: Hiai ah ka om, a chi hi. 12 Tua khitin, Tangtawn Toupa' vansawltak in: Naupang tung ah khut kha ken, amah bangmah lawh ken. Na tapa, na tapa tang neihsun nangawn na siit louh manin, Pathian na lau, chih tu'n ka theita, a chi hi. 13 Abraham a daktouh leh, a nunglama singbawk laka a ki-a awk belamtal khat a mu hi. Abraham a vapai a, tua belamtal a la a, a tapa sik leh tangin, haltum thillatin a lan hi. 14 Abraham in tua mun min dingin, Jehova Jire chih a sa hi. Tuni dongin, Tangtawn Toupa' Mual ah piak hi na-ve, a kichi lai hi. 15 Tua nungin, Tangtawn Toupa' vansawltak in van apanin, a nihveina dingin, Abraham a houpih a: 16 Tangtawn Toupa'n: Na tapa, na tapa tang neihsun siit lou a, hiai thil na hihtak manin, 17 nang kon vualzawl ngeingei ding, chi-in keimah mah ka kichiamta. Na suante vana aksi zah leh, tuipi piaua sehnel zahin nakpitakin ka pungsak ding. Na suante'n a melmate uh' kongpi a tang ding uh. 18 Ka aw na ngaihkhiak manin, na chisuan tungtawnin leitung namte khempeuh ka vualzawl ding, a chi hi. 19 Tua bangin, Abraham a silate kiang ah a kilehkikta a, tua apan a kipankhia uh a, Beersheba lam manawhin a ton uhi. Abraham bel, Beersheba ah a teeng hi.

Nahor' Tapate

20 Hiai thilte nungin, kua hiam khat in Abraham kiang ah: Ngai dih, Milka in zong na sanggampa Nahor adingin tapate a neita. 21 Amaute, Nahor' tapa upapen Uz tawh, a sanggampa Buz tawh, Aram' pa Kemuel tawh, 22 tua ban ah, Kesed, Hazo, Pildash, Jidlaf leh Bethuel tawh ahi uh, a chi hi. 23 Bethuel in tanu Rebek a nei hi. Milka in Abraham' sanggampa Nahor adinga a neih hiai tapa giatte ahi uhi. 24 Nahor' mei in zong tapate a nei a, Teba, Gaham, Tahash leh Maaka ahi. Nahor' meinu bel Reuma ahi.

Pianchilna 23

Sara Sihna leh Kivuina

1 Sara kum 127 a nungta hi. 2 Amah Kanan gama Kiriath Arba ah a si hi. Kiriath Arba bel Hebron kichi ahi. Abraham zong Sara vasuun ding leh vakah dingin a vahawh hi. 3 Tua nungin, a zi sisa kiang apan a dingkhia a, Hit' suante a houpih a: 4 Kei mahmah zong gamdang mi ka hi a, noute laka khualtam lei ka hi. Ka muh phak louha ka misi ka vuikhiak nading, noute lak ah gam hon leisak un aw, a chi hi. 5 Hit' suante'n Abraham a dawng uh a, a kiang ah: 6 Pu aw, ka thu uh na ngai in. Nang, koute lak ah Pathian' kumpi tapa na hi. Ka hankhukte uh a hoih penpen ah na misi vui in. Koute laka kuama'n sivui nading hankhuk hon it lou ding hi, a chi hi. 7 Tua bangin, Abraham a dingkhia a, tua gam mi Hit' suante' mai ah a kun a, 8 amaute a houpih a: Ka misi ka muh phak louha ka vuikhiak ding non deihsak uleh, kei tangin Zohar' tapa Efron kiang ah hon ngetsak un. 9 Ama' gam bana ama' neihsa mah Makhpela kawkhuk hon leisak hen aw, noute laka han muna ka neih dingin tua mun a man kimsip sipin hon leisak hen, a chi hi. 10 Tua Hit mi Efron in, a mite laka tuin a khawpi kongpi-a hong lut Hit' suante khempeuh zakin, Abraham a dawng a: 11 Hilou e, toupa hon ngaikhia in. Tua gam kon pia a, a sunga kawkhuk hon pekhawm ka hi. Ka mite' theihpiha kon piak ahi. Kon pia a, na misi vui in! a chi hi. 12 Abraham tua gam mite mai ah a kun kik a, 13 amaute zakin Efron a houpih a: Tua gam non piak nop leh, ka thu hon ngaihkhiaksak in. Gam man ding sum kon pe ding a, saang inla, tua ah ka misi ka vui ding, a chi hi. 14 Efron in Abraham a dawng a, a kiang ah: 15 toupa aw, ngaidih. Tua gam man ngun tang shekel 400 lei hi a, nang leh kei kal adingin gentham ahi-a hia? Na misi vui mai in, a chi hi. 16 Abraham in Efron' gen a zui a, Hit' suante zaka a gen zah, amah adingin ngun tang a buk a, tua hun laia sumsinmf zat bukna-a buk shekel 400 ahi. 17 Tua bangin, Efron in, Mamre zawna Makhpela tawh kizom gam, a sunga kawkhuk tawh, gamgi sunga singkung teng tawh a peta hi. 18 Abraham khut ah, a gou dingin, Hit' suante, a khawpi kongpi-a lut khempeuhte' mai ah tua gam a peta hi. 19 Hiai nungin, Abraham in Kanan gama Mamre kianga Makhpela gam sunga kawkhuk ah a zi Sara a vui hi. Mamre bel, Hebron-a om ahi. 20 Tua bangin, tua gam leh a sunga kawkhuk bel, Hit' suante'n Abraham in han mun dinga a neih dinga a piakkhiak uh ahi.

Pianchilna 24

Isak' Zineihna

1 Abraham hong upata a, hong teekta a, ahihhangin, Tangtawn Toupa'n lam chiteng ah amah a vualzawl hi. 2 Abraham in a innsunga a sila upapen, a neih a lam khempeuh kempa kiang ah thu a gen a: Hehpihtakin, na khut ka pheipi kal ah golh in. 3 Tangtawn Toupa, van Pathian leh, lei Pathian' min siala hon kichiamsak ding ka hi. Ka tenna gama Kanante' tanute laka mi peuhmah ka tapa zi dinga pii lou ding, 4 ahihhanga, ka gama ka tanaute kianga pai a, ka tapa Isak zi ding pii zaw dinga na kichiam ding ahi, a chi hi. 5 Tua silapa'n Abraham kiang ah: Numei in hiai gam lam ah kei hon zui nuam kei taleh, nong kipatna gama na tapa ka piikik ding ahi diam? a chi hi. 6 Abraham in: Ka tapa tua lama na piikik het louh ding ahi. 7 Ka pa' innkawte leh, ka pianna gam apan hon piikhepa leh, hon houpih a, kichiama thu hon chiampa Tangtawn Toupa van Pathian ahi. Ama'n: Na chisuan kiang ah hiai gam ka pe ding, chi-a hon chiam ahi. Ama'n tuin a vansawltak na mai ah a na sawl ding a, tua gam apan ka tapa' zi ding na pii ding hi. 8 Numei in nang hon zuih nop kei leh, kon kichiamsakna apan na siang ding hi. Ka tapa bel tua gam ah piikik kei peuhmah in, a chi hi. 9 Tua bangin, tua silapa'n a Toupa Abraham pheipi kal ah a khut a golh a, hiai thu tawh kisaiin a kichiam hi. 10 Tua khitin, tua silapa'n a toupa' sangawngsau sawmkhat kaiin, a kipankhia hi. A toupa' van hoih namkim a pua a, Nahor' khawpi zuanin, Aram Naharaim lam ah a kuanta hi. 11 Nitaklama numeite' tuitawi hunin, ama'n tua khawpi geia tuileh kiang ah, a sangawngsaute a khukdinsak hi. 12 Tua khitin, ama'n: Tangtawn Toupa, ka toupa Abraham' Pathian aw, hehpihtakin, tuni-in hon lawhchingsak in. Nitaklam, numeite' tuitawi hun ahi. 13 En in, hiai tuikhuk gei ah ka ding a, khawpi mite' tanute tui tawi dingin hong kuan uhi. 14 Hibang hi hen: Hehpihtakin, ka dawn dingin na tuibel hon niamsak dih ve, ka chih a, aman: Dawn inla, na sangawngsaute zong tui pia ning, chi-a hon dawng nungak pen, na sila Isak adinga na teel hi hen aw. Hibangin, ka pu tung ah zahngaihna na langsak, chih ka thei ding hi, a chi hi. 15 Tua banga a genkhit main, Rebek, a liangkoua tuibel puain hong pai hi. Amah, Bethuel' tanu ahi a, Bethuel bel, Abraham' sanggampa Nahor' zi Milka' tapa ahi. 16 Rebek bel, nungak melhoih mahmah, nungak siangthou, pasal tawh lumkhawm ngei nailou ahi. Amah tuikhuk ah a paisuk a, a tuibel dima tui a dip khitin hong paikhetou hi. 17 Tua laitakin, tua silapa a vatai pah a, nungak kiang ah: Hehpihtakin na tuibel apan tui hon dawnsak zek ve aw, a chi hi. 18 Ama'n: toupa aw, dawn in, a chi a, a tuibel a kisangkhe pah a, a khut apan a dawnsak hi. 19 Tua banga a dawnsak khitin: Na sangawngsaute'n zong a dawnkham mateng tui ka tawi ding, a chi a, 20 gan tuipiakna kuang ah a tuibela tui a sungkhe pah a, sangawngsaute dawn ding kiching tui tawi dingin tuikhuk ah a taikik hi. 21 Tua silapa'n bel, pau sese louin, Tangtawn Toupa'n a zinna a lawhchingsak hia, lawhchingsak lou, chi-in nungaknu gamtat a enen hi. 22 Sangawngsaute'n tui a dawnkhit takun, tua silapa'n, kham nakbah khat shekel kimkhata gik leh, a khut ading kham tau nih, shekel sawma gik a lakhia a: 23 Nang kua' tanu na hia leh, hehpihtakin, hon hilh dih ve. Na pa' inn ah koute' giah nading om diam? a chi hi. 24 Nungaknu'n a dawng a: Milka in Nahor adinga tapa a neihsak Bethuel' tanu ka hi, a chi hi. 25 Tua baan ah: Buhpawl zong, ganan zong a kiching ka nei uh a, giah nading mun awng zong a om, a chi lai hi. 26 Tua khitin, tua silapa a kun a, Tangtawn Toupa a bia a: 27 Ka toupa tunga a zahngaihna leh thutak lakik ngeilou, Tangtawn Toupa, ka toupa Abraham' Pathian phatin om hen. Kei mahmah zong, hiai lama ka zinna ah, Tangtawn Toupa mah in ka toupa' tanute' inn hon tun hi, a chi hi. 28 Tua nungaknu a tai vengveng a, a nu' inkawte kiang ah, hiai thilte tawh kisai thu a tun hi. 29 Rebek in bel, sanggam pasal khat a nei a, a min Laban ahi. Amah, tua silapa muak dingin tuikhuk lam ah a vatai a, 30 a sanggamnu' naka nakbah leh, a khuta taute a mu a, a sanggamnu' thugen: Tua mipa'n hibanga ka kianga thu gen ahi, a chih a zak pheta vatai ahi. Tua silapa, tuikhuk kiang ah a sangawngsaute tawh a na-ding a, 31 Laban in: Tangtawn Toupa' vualzawlpa, hong lut in. Banghanga hiai mun peka ding nilouh na hia? Keimah mah in inn ka na awngsak a, sangawngsaute adingin zong mun om ahi, a chi hi. 32 Tua bangin, tua silapa tua inn ah a vapai a, sangawngsaute' vante a sangkhia a, Laban in sangawngsaute ading buhpawl leh ganan a pia a, tua silapa leh a tonpihte' khesil nading tui zong a pia hi. 33 Tua khitin, nek ding an a mai ah a lui hi. Ahihhangin, tua silapa'n: Ka hong hawhna san ka gen main bangmah ne kei ning, a chi a, Laban in: Hon gen vele, a chi hi. 34 Tua bangin, silapa'n: Kei Abraham' silapa ka hi. 35 Tangtawn Toupa'n ka toupa nakpitakin a vualzawl a, amah hong thupita mahmah hi. Ama'n belamhonte, bawnghonte, ngun leh kham sikte, sila pasalte leh sila numeite, sangawngsaute leh sabiltungte amah a pia hi. 36 Ka toupa' zi Sara in a teek nungpi-in, ka toupa adingin tapa khat a nei a, ka toupa'n tua a tapa kiang ah a neihsa khempeuh a pia hi. 37 Hibang ahi a, ka toupa'n hon kichiamsak a: Ka tapa zi dingin ka tenna gam Kanante' tanute laka mi na piisak louh ding ahi. 38 Ka pa' innkawte leh, keima behte mahmah kiang ah pai zaw inla, ka tapa' zi ding piisak in, hon chi hi. 39 Ke'n ka toupa kiang ah: Numei in kei hon na zui nuam kei kha ding, ka chi hi. 40 Ahihhangin, ka toupa'n: A thu ka man Tangtawn Toupa'n, a vansawltak hon sawl ding a, nang tawh hon tonsak ding a, hon lawhchingsak ding a, ka pa' innkawte leh ka behte laka panin, ka tapa' zi ding na pii ding hi. 41 Ka behte lak na tun chiangin, a tanu uh hon na pe nuam kei kha thei uhi. Tua bang a hih leh, hiai na kichiamna apan na siang ding, hon chi hi. 42 Hibangin, tuin, tuikhuk kong tun takin: Ka toupa Abraham' Pathian, Tangtawn Toupa aw, na deihlam ahih leh, tuin, ka zinna hon lawhchingsak in. 43 Ngai in, tuikhuk kiang ah ka ding hi. Nungak siangthou tuitawi dingin hong kuan ding a, ke'n amah kiang ah: Hehpihtakin na tuibel apan tui hon dawnsak zek ve aw, ka chi ding hi. 44 Ama'n: Dawn in, na sangawngsaute ading zong tui tawi ning, a chih leh, tua nungak mah ka toupa' tapa adinga Tangtawn Toupa' teel hi hen aw, chi-in ka thum hi. 45 Ahihhangin, ka lungsunga ka thum khit main, Rebek a liangkoua tuibel puain hong pai a, tuikhuka kumsukin tui a thai hi. Tua laitakin ke'n: Hehpihtakin tui hon dawnsak ve aw, ka chi hi. 46 Ama'n a liangkou apanin a tuibel a kisangkhe pah a: Dawn in. Na sangawngsaute zong tui ka dawnsak ding, a chi hi. Tua bangin, ke'n tui ka dawn a, sangawngsaute zong a dawnsak hi. 47 Tua nungin, ke'n: Kua tanu na hia le? ka chi a, ama'n: Nahor adinga Milka in tapa a neih, Bethuel' tanu ka hi, a chi hi. Tua bangin, a nak ah nakbah ka batsak a, a khut ah taute ka bunsak hi. 48 Tua khitin, ka kun a, Tangtawn Toupa ka bia a, ka toupa Abraham' Pathian, Tangtawn Toupa ka phat hi. Amah zaw, ka pu' tapa adinga, a sanggampa' tanu pii dinga lamdika hon piipa Pathian ahi 49 Taklam hiam, veilam hiama ka kihei theih nadingin ka toupa tunga na muanhuaina leh deihsakna na latsak nop leh hon hilh in, ka chi hi, a chi hi. 50 Tua banga a gen khitin, Laban leh Bethuel in a dawng uh a: Hiai thil Tangtawn Toupa apan hong piang ahi. Koute'n a hoih leh hoihlou banglam mah kon hilh thei kei uhi. 51 Ngai in, hiai ah Rebek na mai ah a om. Amah paipih inla, paita in. Tangtawn Toupa' gen bangin, na toupa' tapa zi hita hen, a chi uhi. 52 Abraham' silapa'n amaute' thugen a zak takin, lei si-in a kun a, Tangtawn Toupa a bia hi. 53 Ama'n numei kizepna van ngun sika bawlte, kham sika bawlte leh, puansilhte a lakhia a, Rebek a pia hi. Rebek' sanggampa leh a nu zong thawnpiak manphapipi a pia hi. 54 Tua bangin, ama'n ama' mite tawh, nein a dawn a, tua ah a zan giak uhi. A zing chiangin zingsanga hong thawhkhiak takun, ama'n: Ka toupa kiang ah hon paisakta ve ua le, a chi hi. 55 Ahihhangin, Rebek sanggampa leh a nu'n a dawng uh a: Nungaknu, ni sawm khawng beek hon ompihsak lai in, tua khit chiangin, hon zui na'nte, a chi uhi. 56 Ahihhangin, ama'n amaute kiang ah: Tangtawn Toupa'n hon lawhchingsakta ahih chiangin, hon zekaisak dah unla, hon paisakta un, ka toupa kiang ah paita ning, a chi hi. 57 Amaute'n: Nungaknu ka sam ding uh a, amah mah kon dong ding uh, a chi uhi. 58 Tua bangin, Rebek a sam uh a: Hiai mipa na zui nuam ding maw? a chi uh a, He, ka zui nuam, a chi hi. 59 Tua khitin, amaute'n a sanggamnu uh Rebek tawh, amah donnu tawh, Abraham' silapa leh ama' mite tawh, a khakhia uhi. 60 Amaute'n Rebek a vualzawl uh a: Ka sanggamnu uh aw, sangsawma sim sang tampite' nu hong hi inla, na suante'n amau mudahte' kongpite laksakin tang uhen, a chi uhi. 61 Tua khitin, Rebek bel, ama' nasem numeite tawh a kisa uh a, a sangawngsaute uh tunga tuangin, tua mipa a zui uhi. Tua bangin, tua silapa'n Rebek a pii a, a kipankhia uhi. 62 Isak bel, Simlam gama teeng ahih manin, Beer Lahai Roi apan hong pai a, 63 nitaklama gamlaka Pathian thu suta thum dinga hong paikhia ahi. Amah a dakkhiak leh, ngai dih, amah lama hong pai sangawngsaute a mu hi. 64 Rebek zong a dakkhia a, Isak a mu a, sangawngsau tung apan hong kumkhia hi. 65 Ama'n tua silapa kiang ah: Eite muak dinga gamlaka hong pai hiai mi kua ahia? a chi hi. Tua silapa'n a dawng a: Amah ka toupa ahi ve, a chi hi. Tua a zak takin, Rebek in maikhuh puan a la a, a kikhuh hi. 66 Tua silapa'n a thilhih khempeuh Isak a hilh hi. 67 Isak in a nu Sara' puanbuk sung ah Rebek a piilut a, zi-in a neita a, a it mahmah hi. Tua bangin, Isak in a nu sih nungin, kihehnepna a muta hi.

Pianchilna 25

Abraham Sihna

1 Abraham in zi a neih beh kik a, a min Ketura ahi. 2 Ama'n Abraham' tapate Zimran, Jokshan, Medan, Midian, Ishbak leh Shua a nei hi. 3 Jokshan in tapate Sheba leh Dedan a nei hi. Dedan' suante bel, Ashurte, Letushte leh Leumte ahi, 4 Midian' tapate bel, Efa, Efer, Hanok, Abida leh Eldaa ahi. 5 Abraham in a neihsa khempeuh Isak a nutsiat hi. 6 Ahihhangin, a meite' tate kiang ah thawnpiakte a pia a, a dam sung mah-in, Isak apanin amaute suahlam gam ah a sawlkhia hi. 7 Abraham' nuntak sung khempeuh kum 175 ahi. 8 Tua khitin, Abraham a sita hi. Amah teekkun a, kum tampi damin, lungkimtakin a sita a, a mite kiang ah pii ahita hi. 9 A tapate Isak leh Ishmael in Mamre kianga Makhpela kawkhuk ah amah a vui uhi. Makhpela bel, Hit mi Zohar tapa Efron' gam sunga om ahi a 10 Abraham in Hitte khut apan a na leikhiak ahi. Tua ah, Abraham a zi Sara kiang ah a kivui hi. 11 Abraham sih nungin, Pathian in Abraham tapa Isak a vualzawl a, Isak bel, Beer Lahai Roi ah a teeng lailai hi.

Ishmael' Suante

12 Ishmael' suante hiaite ahi. Amah bel, Abraham in Sara' silanu, tua Aigupta numei Hagar tawh kala a neih ahi. 13 Hiaite Ishmael' tapate ahi uh a, amaute kisuan danin, a minte uh hiaite ahi: Ishmael' tapa upen Nebaioth ahi a, tua ban ah Kedar, Adbeel, Mibsam, 14 Mishma, Duma, Masa, 15 Hadad, Tenia, Jetur, Nafish leh Kedema ahi. 16 Hiaite Ishmael' tapa kumpi sawmlenihte' minte, a nam dan leh a khawpi dan leh, giahphual dana genin ahi. 17 Ishmael' nuntak sung khempeuh kum 137 ahi. Tua khitin, a laitatta a, a sita a, a mite kiang ah pii ahita hi. 18 Ishmael' suante bel Aigupta suahlam, Ashur zotna lam panga Havila leh Shur gamdai-gamkeu kikal ah a teeng uhi. Amaute bel a sanggamte khempeuh uh tunga helin a nungta uhi.

Isak' Innkawte

19 Abraham' tapa Isak khangthu hiai ahi: Isak bel, Abraham' suan ahi. 20 Zi dinga Rebek a neih laiin, Isak kum 40 ahi. Rebek bel Bethuel' tanu ahi. Bethuel bel Padan Arama teeng, Aram mi ahi. Tua ahi a, Rebek lah Aram mi Laban' sanggamnu ahi. 21 Isak bel, a zi chiing ahih manin, Tangtawn Toupa kiang ah a thum hi. Tangtawn Toupa'n a thumna a dawng a, a zi Rebek a gai hi. 22 Ahihhangin, Rebek sung ah naungekte a kisual uhi. Ama'n: Bangkim hoih ahih leh, banghanga hibanga om ka hia? a chi a, Tangtawn Toupa dong dingin a kuan hi. 23 Tangtawn Toupa'n amah kiang ah: Na sul ah minam nih a om a, na gil apan minam nih a kikhen ding. Minam khat pen a dang khat Sangin a hatzaw ding a, a uzaw in a nauzaw' nna a sem ding, a chi hi. 24 Ama' nau suah hun hong tungta a, ngai in, a sul ah tapa phik a om petmah hi. 25 A suak masapen a san a, a pum tangin puansilh mul bangin a mul hi. Tua bang ahih manin, a min dingin Esau a sa uhi. 26 A den chiangin, a sanggampa, a khuta Esau' khetul lenin hong suakkhia hi. Tua bang ahih manin, a min dingin Jakob a sa uhi. Rebek in amaute a neih laiin, Isak kum 60-a upa ahita hi. 27 Tua naupangte hong khanglian uh a, Esau bel sabeng siamtak, gamvak mi hong hi a, Jakob ahih leh, mi om hiathiat, puanbuk khawnga khawsa mi ahi. 28 Isak in gamlak sa lim a sa a, Esau a it hi. Ahihhangin, Rebek in bel Jakob a it hi. 29 Khatvei, Jakob in bechim a huan laitakin, Esau gamlak apan gilkial mahmahin hong tung hi. 30 Ama'n Jakob kiang ah: Ka gil kial lua! Na besan chiim hon nesak zek zok ve! a chi hi. Hiai hangin, amah Edom, chi-in zong a minvawh uhi. 31 Ahihhangin, Jakob in: Tu mahmahin ta masa na hihna hon leisak in, a chi hi. 32 Esau in: En dih, si dinga kisa ka hita, kei adinga ta masa hih bang phatuam ahia? a chi hi. 33 Ahihhangin, Jakob in: Tu mahmahin ka mai ah kichiam in, a chi hi. Tua bangin, Esau in Jakob' maia kichiamin, a tamasa hihna Jakob kiang ah a khawngta hi. 34 Tua khitin, Jakob in Esau kiang ah, tanghou leh bechim a pia hi. Esau in ne a, a dawn khitin, a dingkhia a, a paikheta hi. Hibangin, Esau in a tamasa hihna a simmawh hi.

Pianchilna 26

Isak' Lawhsapna

1 Abraham' nuntak laia kial ke masapen chih louh, tua gam ah kial hong ke kik hi. Tua bangin, Isak bel, Gerar gam ah, Filistiate' kumpipa Abimelekh kiang ah a va-hawh hi. 2 Tangtawn Toupa, Isak kiang ah hong kilaak a: Aigupta gam ah paisuk kenla, Teeng in, kon chihna gam ah teeng in. 3 Hiai gam ah om tadih in. Kon ompih ding a, kon vualzawl ding. Nang leh na suante kianga hiai gam khempeuh hon pia ka hi. Na pa Abraham kianga ka kichiamna tangtungsak ding ka hi. 4 Na suante vana aksi zahin ka pungsak ding a, hiai gam khempeuh na suante ka pe ding. Na chisuan tungtawnin, leitung namte khempeuh nakpitakin ka vualzawl ding. 5 Ahang bel, Abraham in ka aw ngaikhia a, ka thu mang a, ka thupiakte, ka thusehte leh ka dankhunte zui hi ven, a chi hi. 6 Tua bangin, Isak bel, Gerar gam ah a taam lai hi. 7 Tua nungin, tua muna teeng mite'n a zi tungthu a dong uh a, ama'n: Amah ka zi ahi, a chih ding a lau manin, Amah ka sanggamnu ahi, a chi hi. Ahang bel, ama'n: Ka zi Rebek melhoih lua ahih chiangin, ama' hangin hiai mite'n hon that kha un teh, chi-in a ngaihsuna ahi. 8 Tua muna Isak sawtpi a teen nungin, Filistiate' kumpipa Abimelekh bel khatvei a tawhleta a dakkhiak leh, Isak in a zi Rebek a zawt thiamthiam lai a mu hi. 9 Abimelekh in Isak a samsak a: Ngai dih, amah lah na zi ahi tawk a, banghanga: Amah ka sanggamnu ahi, chi peuhmah na hia? a chi hi. Isak in amah kiang ah: Ama' hangin si kha mahmah ning, ka chih mana hibanga hih ka hi ve, a chi hi. 10 Abimelekh in: Ka tung ua bang hih na hita maia? Hiai mite khat peuh in na zi luppih mawk leh, ka tung ua mawhna hon tungsak ding na hi vele, a chi hi. 11 Tua khitin, Abimelekh in a mite khempeuh thu a pia a: Hiai mi hiam, a zi hiam tunga tatsia peuhmah thah ngeingei ding ahi, a chi hi. 12 Isak in tua gam ah hai a pawi a, Tangtawn Toupa'n nakpitaka a vualzawl manin, tua kum mahin a lehza a at hi. 13 Tua bangin, amah hong mavang semsem a, hong hau mahmahta hi. 14 Belamhonte, bawnghonte leh silate a hau mahmah a, Filistiate'n amah a haza mahmah uhi. 15 A pa Abraham dam laia, a silate' tawhsa tuikhukte khempeuh Filistiate'n lei a va-vukdim uh a, a kangsak vek uhi. 16 Tua bang nungin, Abimelekh in Isak kiang ah: Koute sangin lah nong hatzawta a, hon paimangsan mai in, a chi hi. 17 Tua bangin, tua mun apan Isak a kikhinkhia a, Gerar phaizang mah ah giahphual a sat a, tua ah a teeng hi. 18 Ama'n a pa Abraham damlaia kitou tuikhukte, a sih nunga Filistiate'n a na vuhdim ua, a kansaksate uh a tou thak vek a, a pa'n tuikhuk min a phuahte mah a minvawh kik tek hi. 19 Isak' silate'n zong tua phaizang ah tuikhuk khat a tou uh a, tua ah tuinak khat a mu uhi. 20 Ahihhangin, Gerar ganchingte'n, Isak' ganchingte a tuh uh a: Hiai tui koute'-a ahi, a chi uhi. Tua banga, tuikhuk a kituhpih manun, Isak in tua tuikhuk min dingin Esek a sa hi. 21 Tua nungin, Isak' silate'n tuikhuk dang khat a tou leuleu uh a, ahihhangin, Gerar ganchingte'n tua zong a tuh uhi. Tua bang ahih manin, Isak in tua tuikhuk min dingin Sitna a sa hi. 22 Isak bel tua apan a peem a, tuikhuk dang khat a tou a, tua bel a tuh nawn kei uhi. Tua bang ahih manin, ama'n: Tu'n zaw Tangtawn Toupa'n eite adingin mun hon peta a, hiai gam ah i chiphata ding, chi-in, tua tuikhuk min dingin Rehoboth a sa hi. 23 Tua apanin, Isak bel Beersheba ah a kisuantou hi. 24 Tua zanin, Tangtawn Toupa amah kiang ah hong kilaak a: Kei na pa Abraham' Pathian ka hi. Lau ken, kon ompih hi. Ka sila Abraham' hangin kon vualzawl ding a, na suante ka pungsak ding, a chi hi. 25 Tua bangin, ama'n tua ah maitam khat a dawh a, Tangtawn Toupa' min a lou a, tua ah puanbuk a kai hi. Isak' silate'n tua ah tuikhuk khat a tou uhi. 26 Tua nungin, Abimelekh amah huhpipen Ahuzath tawh, a sepaihhon makaipa Fikol tawh Gerar apanin amah kiang ah hong hawh uhi. 27 Isak in amaute kiang ah: Banghanga ka kianga hong hawh na hi ua, hon mudah a, noute apan hon hawlmang hilou na hi umaw? a chi hi. 28 Amaute' n: Tangtawn Toupa'n nang hon ompih chih kiteltakin ka muta uh a, tua bang ahih manin, i kal ah, nang leh koute kal ah, kichiamna om hen, ka chi ua ahi. Nang tawh kal ah thukhun hon bawlsak ve. 29 Hi leh, na tunga tatse lou a, a hoih lam lou ngai na tunga bangmah hihlou a, khamuangtaka kon paikhiaksak bangin, nang zong koute tung ah na tatse kei ding hi. Tuin, Tangtawn Toupa' vualzawlpa na hi mahmah hi, a chi hi. 30 Tua bangin, Isak in amaute ankuang a lui a, amaute'n a ne uh a, a dawn uhi. 31 A zing chiang zingkhangpi-in a thou uh a, thu a chiamkhawm uh a, tua bangin, Isak in amaute a khakhia a, khamuangtakin a paita uhi. 32 Tua ni mahin, Isak' silate hong pai uh a, a tuikhuk tawh thu uh hong hilh uhi. Amaute'n: Tui ka muta uh! a chi uhi. 33 Ama'n tua tuikhuk min dingin Shiba a sa a, tuni dongin, tua khawpi min Beersheba ahi.

Esau' Lawhsapna

34 Esau kum 40-a upa a hihin, Hit mi Beri' tanu Judith leh, Hit mi Elon' tanu Basemath zi-in a nei hi. 35 Isak leh Rebek adingin amaute lunggimna bul ahi uhi.

Pianchilna 27

Jakob in Esau' Vualzawlna Tang

1 Isak hong tekta a, a mit a mial a, khua a mu thei nawn kei hi. Ama'n a tapa uzawpen Esau a sam a, a kiang ah: Ka tapa aw, a chi hi. A tapa in a dawng a: Hiai ah ka om, a chi hi. 2 Isak in amah kiang ah: Ngai in, tu'n putek ka hita a, ka sih ni ding thei lou lei ka hi. 3 Tu'n na gamvak vante, na thalbawm leh na thalphel tawiin gam vavak inla, gamsa hon vamatsak in, 4 Ka duh lam takin, meh limtak hon bawlsak inla, ka nek dingin hon tawi in. Ka sih main hon vualzawl nuam ka hi, a chi hi. 5 Isak in a tapa Esau tua banga a houpih lai Rebek in a naza hi. Tua banga Esau gamsa benga a paw dinga a gamkuan khiak kalin, 6 Rebek in a tapa Jakob kiang ah: Ngai dih, na pa'n na sanggampa Esau a houpih lai ka za: 7 Gamsa hon matsak inla, a sa limtakin hon huansak in. Ka ne ding a, ka sih main Tangtawn Toupa' maia hon vualzawl nuam ka hi, chi eive. 8 Tua bang ahih manin, ka tapa aw, kon thupiak ding ngaikhia inla, ka thu mang in. 9 Ganhon lak ah vapai inla, kei vual sahoih nih hon la in. Na pa' duh lamtakin mehlim ka bawl ding a, 10 a sih ma-a, nang hon vualzawl theih nadingin, nang na pa kiang ah a nek dingin na vape ding aw, a chi hi. 11 Jakob in a nu Rebek kiang ah: Nu, ngai dih ka sanggampa Esau mul haupi hi a, kei, mul hau loua mai ka hi. 12 Ka pa'n hon na zawt kha dia a mitmuhin mikhem ka suak ding a, vualzawlna ngah naksangin hamsia ka kibuak zaw kha mahmah ding, a chi hi. 13 Ama'n a kiang ah: Ka tapa aw, hamsia na thuak taang kei tung ah tung hen. Ka thu mangin vapai inla, kelvualte hon la zok mai in, a chi hi. 14 Tua bangin, Jakob a va-pai a, kelvualte a nu kiang ah hon la hi. A nu'n a pa' duh lamtakin mehlim a bawlsak hi. 15 Tua khitin, Rebek in a tapa uzaw Esau' puansilh hoihpente, innsunga ama' kianga om, a va-la a, a tapa nauzaw Jakob a silhsak hi. 16 Tua baan ah, ama'n tua kei vualte' vuntein Jakob' khutte leh, a mul omlouhna a ngawng a khuh hi. 17 Tua khitin, a mehlim bawl leh tanghou Jakob khut ah a pia hi. 18 Tua bangin, Jakob a pa kiang ah a vapai a: Pa aw, a chi a, a pa'n: Hiai ah ka om. Ka tapa kua pen na hia? a chi hi. 19 Jakob in a pa kiang ah: Na tapa uzaw Esau ka hi. Non sawl bangbangin ka hih khinta. Hehpihtakin, thou inla, tu inla, non vualzawl theih nadingin ka sakhi sa neta in, a chi hi. 20 Isak in a tapa kiang ah: Ka tapa aw, bangchi dan ahia, vaman baih na maizen chia? a chi hi. Ama'n bel: Tangtawn Toupa, na Pathian in hon pia ahi, a chi hi. 21 Isak in Jakob kiang ah: Hehpihtakin hon naih dih ve, ka tapa kon zawt nuam. Ka tapa Esau na hi taktak hia, hi taktak lou, ka thei nuam vele, a chi hi. 22 Tua bangin, Jakob in a pa Isak a naih a, Isak in amah a na zawt a: A aw lah Jakob' aw hitah, a khutte lah Esau' khutte hitah, a chi hi. 23 Jakob' khutte bel, a sanggampa Esau' khutte banga a mul om ahih manin, Isak in Jakob a theitel kei hi. Tua bang ahih manin, Isak in Jakob a vualzawlta hi. 24 Ahihhangin, ama'n: Ka tapa Esau na hi taktak maw? a chi phapha a, Jakob in: Hi mah ing, a chi hi. 25 Tua khitin, Isak in: Ka tapa aw, nang kon vualzawl theih nadingin na sa hon tawi in, a chi a, Jakob in a sa hon tawi a, Isak in a ne hi. Grepzu zong hon tawi a, Isak in a dawn hi. 26 Tua khitin, a pa Isak in amah kiang ah: Ka tapa aw, hon naih inla, hon tawp in, a chi hi. 27 Jakob in amah a naih a, a tawp hi. Isak in a puansilh gim a za a, amah a vualzawl a: Ka tapa' gim zaw, Tangtawn Toupa' vualzawl gam gim a nam. 28 Pathian in van daitui hon pia henla, lei hoih hon pia henla, buh tampi leh grepzu tampi hon pia hen. 29 Namte'n na nna sem henla, namte na mai ah kun hen. Nang na sanggamte tunga thuneiin om inla, na nu' tapate na mai ah kun hen. Nang hon hamsiatte hamsiatin om henla, nang hon vualzawlte vualzawlin om hen, a chi hi. 30 Isak in Jakob a vualzawl khita Jakob in a pa Isak nusia a, sangkil a kan khit phetin, a sanggampa Esau sabeng gamvak hong tung hi. 31 Esau in zong mehlim a bawl a, a pa kiang ah hon tawi a, a pa kiang ah: Pa aw, thoutou inla, non vualzawl theih nadingin na tapa' samat sa ne in, a chi hi. 32 A pa Isak in amah kiang ah: Nang kua na hia? a chi a, Esau in: Na tapa uzaw Esau ka hi, a chi hi. 33 Isak bel nakpitakin a ling a: A hih leh, gamsa vaman a, a sa ka kianga hon tawipa kua ahia? Nong tun ma-a na nekhin a, amah na vualzawl khinta ka hih manin, Pathian in amah vualzawl taktak ding ahi, a chi hi. 34 Esau in a pa' thugen a zak takin, khase mahmahin a kapkhia a, a pa kiang ah: Pa aw, hon vualzawl mahmah in, kei zong hon vualzawl sam in! a chi hi. 35 Isak in: Na sanggampa'n kei hon khem a, na vualzawlna hon laksak ahita ve! a chi hi. 36 Esau in: A min Jakob ahi namah a, nihvei tak hon kheemta eive! Tamasa ka hihna hon laksak a, tuin ka vualzawlna nangawn hon laksakta! a chi hi. Tua khitin, a pa kiang ah: Kei adinga vualzawlna siit lou maw? a chi hi. 37 Isak in Esau a dawng a: Ngai in, amah nang tunga thunei dingin ka koihta a, a sanggamte khempeuh a sila dingin ka peta. Buh leh grepzu ka peta. Nang ading bang hon hihsak thei mahmah ding ka hia, ka tapa aw! a chi hi. 38 Esau in a pa kiang ah: Pa aw, vualzawlna khat kia nei na hi maw? Pa aw, kei zong hon vualzawl sam mahmah in, chi-in khasetakin a kap hi. 39 A pa Isak in a dawng a, amah kiang ah: Ngai in, lei hoihna mun apan gamla ah na teeng ding a, van daitui kiakna mun apan gamla ahi dia, 40 Na namsau pansanin na nungta ding a, ahihhangin, na sanggampa' nna na sem ding. Ahihhangin, chimtaaka na kitutkhiak chiangin, na ngawng apan a hakkol na paikhe ding, a chi hi. 41 A pa'n Jakob a vualzawl manin, Esau in Jakob a mudah a, a lungsung ah: Ka pa ka suun hun hong tung dekta, tua khit chiangin, ka sanggampa Jakob ka that ding, a chi hi. 42 Rebek tapa uzaw Esau' thugente, Rebek kiang ah mi kua hiam khat in a hilh a, Rebek in a tapa nauzaw Jakob a sam a, a kiang ah: Ngai in, na saanggampa Esau, nang hon thah sawmin a kihehnem dek hi. 43 Ka tapa aw, ka thugen ngaikhia in. Thou inla, Haran gam ah, ka sanggampa Laban kiang ah tai pah in. 44 Na sanggampa' hehna a dam mateng, Laban kiang ah ni bangzah hiam vatam inla, 45 na sanggampa na tunga a hehna a dam a, a tunga na thilhih a mangngilh mateng tua ah va taam in. Tua khit chiangin, nang kon samsak ding a, kon piisak ding. Banghanga ni khat thu-a na nih ua hon mansuaha dah ding ka hia? a chi hi. 46 Tua khitin, Rebek in Isak kiang ah: Hit mite' tanute hangin hin ka chimtak mahmah hi. Jakob in Hit mite' tanu, hiai gam numei khat zi-in hon nei zel leh, kei adingin hin bang phatuam ding ahia? a chi hi.

Pianchilna 28

1 Tua bangin, Isak in Jakob a sam a, a vualzawl a: Kanan numei zaw kitenpih ken. 2 Padan Aram ah hawh pah inla, na nu' pa Bethuel' inn ah hawh inla, na nu' sanggampa Laban' tanute khat na zi dingin pii in, chi-in thu a pia hi. 3 Tua baan ah, ama'n: Pathian Vanglianpen in nang hon vualzawl henla, chiphatakin hon bawl henla, nam tampi na phak mateng hon pungsak hen, 4 tu-a mikhuala na tenna gam na tan theih nadingin, Abraham kianga a piak vualzawlna nang leh na suante hon pia hen. Pathian in hiai gam Abraham kianga a piak ahi, a chi hi. 5 Tua bangin Isak in Jakob a kuankhesak a, Padan Aram gam ah, Aram mi Bethuel' tapa Laban kiang a vatung hi. Laban bel, Rebek' sanggampa ahi a, Rebek lah Esau leh Jakob' nu ahi. Esau' Zineihna 6 Isak in Jakob a vualzawl a, Padan Aram lam ah zi zong dingin a sawl a, Kanan numei kitenpih ken, chi-in thu a pia, chih leh, 7 Jakob in a nu leh pa' thu a mang a, Padan Aram zuanin a kuankhia, chih Esau in a thei hi. 8 A pa Isak in Kanan numeite a deih het kei, chih Esau in a theita a, 9 Ishmael kiang ah a hawh a, Ishmael' tanu Nebaioth' sanggamnu Mahalath a kitenpih hi. Ishmael bel Abraham' tapa ahi a, Esau in Mahalath a kitenpih bel, a zi neihsate bana a neihbeh ahi. Bethel-a Jakob' Thuchiam 10 Jakob in Beersheba a nusia a, Haran zuanin a kuankhia hi. 11 Mun khat a tunin, ni a tumtak manin, tua ah a giak hi. Suang khat a la a, a kham a, a ihmu hi. 12 Ama'n mang khat a man a, a mangin, leia kinga kellei khat, a dawn van suntou a mu a, tua ah Pathian' vansawltakte a suk a tunga kileh a mu hi. 13 Tua kellei dawn ah, Tangtawn Toupa a ding a: Kei Tangtawn Toupa, na pa Abraham' Pathian leh Isak' Pathian ka hi. Tu-a na lupna gam nang leh na suante adingin kon pia hi. 14 Na suante leia leivui zah a pha ding a, suahlam, tumlam, mallam leh simlam ah na kizalh ding uh. Nang ah leh na suan ah leitunga innkuante khempeuh ka vualzawl ding. 15 Ngai in, ke'n nang kon ompih a, na paina peuh ah kon veng ding. Nang kon hilhsa ka tangtunsak mateng, kon nutsiat louh ding manin, hiai gam ah kon piikik ding, a chi hi. 16 Jakob a ihmu a khanglou a: Tangtawn Toupa hiai laia om taktak ahi a, ke'n lah ka na phawk kei a, chi-in a ngaihsun hi. 17 Tua bang a ngaihsut leh, a lauta a: Hiai mun lauhuai na maizen e! Hiai mun, mun dang ahi kei a, Pathian' inn a na hi! Hiai mun van kongpi ahi! a chi hi. 18 Zingsang beltakin Jakob a thou a, lukhama a zat tua suang a la a, suangphuhin a phut a, a tung ah sathau a buak a, 19 tua mun min dingin, Bethel a sa hi. Tua khawpi min masa bel Luz ahi. 20 Tua khitin, Jakob in kichiamna a bawl a: Nang Pathian in non ompih a, ka paina lampi-a non ven a, nek ding an non piak a, silh ding puan non piak a, ^ittaka ka pa' inn ka tun kik leh, nang Tangtawn Toupa ka Pathianin kon nei ding. 22 Tua baan ah, hiaia suangphuh ka phuh, Pathian' inn ahi ding a, non piak ding teng khempeuh sawma khat kon pe ding, a chi hi.

Pianchilna 29

Jakob leh Rakhel

1 Tua nungin, Jakob a zinna lam ah a pai a, suahlam mite' gam a tung hi. 2 Amah a khawdak a, gamlak ah a kitousa tuikhuk khat a mu hi. Tua tuikhuk kiang ah belamhon hon thum a kual uhi. Tua tuikhuk bel, belamte tui piakna ahi. Tua tuikhuk tung sitna suang lianpi ahi a, 3 belamhonte khempeuh tua muna a hawlkhawm chiangun, belamchingte'n tua tuikhuk sitna suang a khukkhia uh a, belamte tui a pia uhi. Tua khit chiangin, tuikhuk a sin kik zel uhi. 4 Jakob in belamchingte kiang ah: Ka sanggamte aw, koi akipan na hi ua? a chi hi. Amaute'n: Haran khua akipan ka hi uh, a chi uhi. 5 Ama'n amaute kiang ah: Nahor' tapa Laban na thei uhia? a chi hi. Amaute'n: He, amah ka thei uh, a chi uhi. 6 Jakob in amaute a dong a: Amah a dam hia? a chi hi. Amaute'n: He, dam mah e. Hiai ah, a tanu Rakhel, a belamte tawh hong pai ve le, a chi uhi. 7 Ama'n: Ngai dih ua. Ni sang lai a, belamte hawi hun nai lou hi. Tui pia unla, gamtasak lai ve ua, a chi hi. 8 Amaute'n a dawng uh a: Tua bangin hih thei kei n'ung. Belam-honte khempeuh hong paikhawm a, tuikhuk sitna suang a kikhukkhiak chiangin, tui ka pe thei phet ding uh, a chi uhi. 9 Tua banga amaute tawh a kihou sungun, Rakhel, a pa' belamte tawh hong tung hi. Amah belamching numei ahi. 10 Jakob in a nu' sanggampa Laban' tanu Rakhel leh, Laban' belamte a muh takin, a vapai a, tuikhuk sitna suang a khukkhia a, a nu' sanggampa Laban' belamte tui a pia hi. 11 Tua khitin, Jakob in, Rakhel a tawp a, a kapkhia hi. 12 Ama'n Rakhel kiang ah, amah a pa' tanau leh Rebek' tapa a hih lam a hilh hi. Tua khitin, Rakhel a tai a, a pa a vahilh hi. 13 Laban in a sanggamnu' tapa Jakob thu a zak takin, amah muak dingin kintakin a vatai hi. Ama'n amah a pom a, a tawp a, inn ah a paipih hi. Jakob in Laban kiang ah, hiai thute khempeuh a hilh a, 14 Laban in amah kiang ah: Nang ka sa leh ka sisan mahmah na hive, a chi hi.

Jakob in Lea leh Rakhel Kitenpih

Laban kianga Jakob kha khat a om nungin, 15 Laban in amah kiang ah: Ka tanau na hih man lelin, amawknain ka nna na sem dia hia? Na thaman ding bang hi ding hiam, hon hilh in, a chi hi. 16 Laban in tanu nih a nei a, a uzawpen Lea ahi a, a nauzawpen Rakhel ahi. 17 Lea mit a haat kei a, Rakhel bel a duang a ching a, a mei a hoih hi. 18 Jakob in Rakhel a it a, Laban kiang ah: Na tanu nauzaw Rakhel thalawhin, na nna kum sagih ka sem nuam, a chi hi. 19 Laban in: Amah mi dang ka piak sangin, nang hon pe leng hoihzaw mah inte, ka kiang ah om in, a chi hi. 20 Tua bangin, Jakob in Rakhel thalawh dingin, Laban' nna kum sagih a sem a, ahihhangin, Rakhel a it manin, ni tawmchik bangin a thei hi. 21 Tua nungin, Jakob in Laban kiang ah: Ka zi hon peta in. Ka nasep hun sung chingta hi. Amah luppih nuamta ing, a chi hi. 22 Laban in tua khawmite a samkhawm a, ankuang a lui hi. 23 Ahihhangin, nitak hong hih takin, a tanu Lea a tonpih a, Jakob adingin a pia a, Jakob in amah a luppih hi. 24 Laban in a sila numei Zilpa, a tanu Lea' silanu dingin a pia hi. 25 Zing khua hong vak takin, ngai in, Lea a na hi maimah hi. Jakob in Laban kiang ah: Bang hon lawh na hita maia? Rakhel thalawh dinga na nna sem hilou ka hi maw? Banghanga hon khem na hia? a chi hi. 26 Laban in a dawng a: Tanu uzaw ma-a tanu nauzaw pasal neihsak ka ngeina uh hilou hi, 27 Hiai ka tanu' mouthak hun nipikal zatbeipih inla, tua khit chiangin, kum sagih dang sem lai lechin, a nauzaw pen zong hon pe ding hi'ng, a chi hi. 28 Tua bangin Jakob in a hih a, Lea' mouthak hun nipikal a zatbeipih a, Laban in Jakob' zi dingin a tanu Rakhel zong a pia hi. 29 Laban in a silanu Bilha, a tanu Rakhel' silanu dingin a pia hi. 30 Jakob in Rakhel zong a luppih a, Lea sangin Rakhel a itzaw hi. Tua bangin Jakob in Laban adingin kum sagih dang nna a sem hi.

Jakob' Tate

31 Lea in itna a tan louh dan, Tangtawn Toupa'n a mu a, a sul a honsak a, ahihhangin, Rakhel bel a chiing hi. 32 Lea a gai a, tapa a nei a, Lea in: Tangtawn Toupa'n ka lunggimna a muta. Tu'n zaw ka pasal in hon itta ding, chi-in, a tapa min dingin Reuben a sa hi. 33 Amah a gai kik a, tapa a neih takin: Itna ka tan louh dan Tangtawn Toupa'n a mu a, hiai zong hon pia ahi, chi-in, a min dingin Simeon a sa hi. 34 Amah a gai kik leuleu a, tapa a neih takin: Ka pasal adingin tapa thum ka neihsaktak manin, tu'n zaw ka pasal in hon deihthawh tain teh, chi-in, a min dingin Levi a sa hi. 35 Amah a gai kik leuleu a, tapa a neih takin: Tutung zaw, Tangtawn Toupa ka phat ding, chi-in, a min dingin Judah a sa hi. Tua nung siah ama'n ta a nei nawn kei hi.

Pianchilna 30

1 Rakhel in Jakob ading ta nei lou a hihna theiin, a sanggamnu a haza a, Jakob kiang ah: Tate hon pia in, non piak kei leh zaw ka si ding, a chi hi. 2 Jakob bel Rakhel tung ah a heh a: Nang ta neilou dinga hon bawlpa Pathian' muna ding ka hi-a hia? a chi hi. 3 Rakhel in: Hiai ah ka silanu Bilha a om. Ama'n kei adinga tate hon neihsak a, amah tungtawna innkuan ka bawl theih sam nadingin, amah luppih in, a chi hi. 4 Tua bangin, Rakhel in Jakob zi dingin Bilha a pia a, Jakob in amah a luppih hi. 5 Bilha a gai a, tapa a nei a, 6 Rakhel in: Pathian in a dikin vai hon hawmsak a, ka ngetna hon za a, tapa hon peta, a chi a, a min dingin Dan a sa hi. 7 Rakhel' silanu Bilha a gai kik a, Jakob adingin tapa nihna a nei a, 8 Rakhel in: Ka sanggamnu tawh nakpitakin ka kibuan uh a, kei ka vualzouta, a chi a, tua tapa' min dingin Naftali a sa hi. 9 Lea in ta a nei nawn kei, chih a kithei a, a silanu Zilpa a tonpih a, Jakob zi dingin a pia hi. 10 Lea' silanu Zilpa in Jakob adingin tapa a nei a, 11 Lea in: Vangpha na-maizen ing e! a chi a, tua tapa' min dingin Gad a sa hi. 12 Lea' silanu Zilpa in Jakob adingin, tapa nihna a nei a, 13 Lea in: Lungdam na maizen ing e! Tanu teng khempeuh in mi nunnuam hon chi ding, a chi a, tua tapa' min dingin Asher a sa hi. 14 Huit buh lak laiin, Reuben in gamlak ah zawl-ai gahte a mu a, a nu Lea kiang ah hon pua hi. Rakhel in Lea kiang ah: Na tapa' zawl-ai gahte hon hawm in, a chi hi. 15 Ahihhangin, Lea in Rakhel kiang ah: Ka pasal non suh bawn thil neu liai na sa-a hia? Ka tapa' zawl-ai gahte nangawn hon sut nuam zel na hi maw? a chi hi. Rakhel in: Ahih leh, na tapa' zawl-ai gahte hon pe lechin, tuzan ka pasal in hon luppih na ke, a chi hi. 16 Tua bangin, tua nitak lama Jakob gamlak apan hong tun takin, Lea in a vamuak a, a kiang ah: Tuzan non luppih ding ahi. Ka tapa' zawl-ai gaha kon khelhsa na hi, a chi hi. Jakob in tua zan Lea a luppih hi. 17 Pathian in Lea' thumna a ngaikhia a, Lea a gai a, Jakob adingin tapa ngana a nei hi. 18 Lea in: Ka pasal adinga ka silanu ka piak manin, Pathian in pahtakman hon pia ei ve, a chi a, a tapa' min dingin Isakhar a sa hi. 19 Lea a gai kik a, Jakob adingin tapa gukna a nei a: 20 Pathian in thawnpiak manpha khat hon pia ei ve, a chi a, a tapa' min dingin Zebulun a sa hi. 21 Hun bangtan hiam nungin, Lea in tanu khat a nei a, a min dingin Dina a sa hi. 22 Tua nungin, Pathian in Rakhel a phawk a, a thumna a ngaikhia a, a sul a honsak hi. 23 Amah a gai a, tapa khat a nei a: Pathian in ka zahlakna a lamangta, a chi a, 24 a tapa' min dingin Josef a sa a, Tangtawn Toupa'n tapa khat hon piakbeh hen aw, a chi hi.

Jakob leh Laban' Kithukimna

25 Rakhel in Josef a neih nungin, Jakob in Laban kiang ah: Ka gam lama ka pai theih nadingin hon paisakta in. 26 Na nna sema ka thalawhsa, ka zite leh ka tate hon pia inla, ka paita ding. Na nna bangzah semta ka hi hiam, na thei hi, a chi hi. 27 Ahihhangin, Laban in amah kiang ah: Na mitmuha deihsakna ka ngah leh hehpihtakin taam lai in. Nangma' hanga Tangtawn Toupa'n kei hon vualzawl ahi, chih ka thei hi. 28 Na thaman ding gen in, hon pia ning, a chi hi. 29 Tua bangin, Jakob in: Na nna bangzah semta ka hi hiam, chih leh, na ganhonte ka kepna nuai ah bang suak uhiam, chih na thei hi. 30 Kong tun main tawmchik na nei a, kong tun nungin, Tangtawn Toupa'n hon vualzawl a, tawmchik na neihte nakpitakin a pung hi. Hita mah leh, ke'n ka innkawte ading bang chik chianga sem ding ka hia? a chi hi. 31 Laban in: Bang hon pe ding ka hia? a chi hi. Jakob in: Hiai thil khat kei adingin hon hihsak lechin, bangmah dang non piak kul kei. Hiai non hihsak leh, na ganhonte ka ching ding a, ka veng nawn ding. 32 Tuni-in, na belamhonte lak ah hon paisak inla, na belamte laka a gial iim iam peuhmah, ahih kei leh, a bema gialte leh, a san thiuthiaute, tua baan ah, na kelte laka a gial iim iam, ahih kei leh, a bem a gialte ka khenkhe ding a, ka thaman hi uhen. 33 Hi leh, tunung chianga, ka thaman gante na et chiangin, amaute'n ka diktatna hon lak ding uhi. Ka kelte laka a gial iim iam hilou, ahih kei leh, a bema gial hilou, ahih kei leh, belam nou a san thiuthiau hilou a om leh, tuate a kiguk thawh ahi, chi-in sim in, a chi hi. 34 Laban in: Hi mah hen. Na gen bangbang hi hen, a chi hi. 35 Tua ni mah-in, kelpate, a gial iim-iam, ahih kei leh, a bema gialte, a kaang bema gial zek peuhmah, tua baan ah, belarnnou san thiuthiaute a khenkhia a, Jakob' tapate a chingsak hi. 36 Amah leh Jakob kikal, ni thum lama kihal dingin, a paisak a, Jakob in bel Laban' ganhonte a ching hi. 37 Ahihhangin, Jakob in hiangzau sing leh, makha sing leh, se sing hiang satkhiakte a la a, a kimvela atin a hawng a khok a, a sung ngoute dawksakin, chianggelhte a bawl hi. 38 Tua chianggelhte, ganhonte'n tui a dawn chiangua a maizawn ua om dingin tuikuang ah a koih hi. Ganhonte a huk laia, tui dawn dinga hong pai chiangun, 39 tua chianggelhte mai ah a talte'n a bawh uhi. Tua hangin, a nou gial hiikheekte, gial iim iamte, a bema gialte a nei uhi. 40 Jakob in ganhonte a tuam koih a, ahihhangin, gannou pa a gialte leh san thiuthiaute bel, Laban ganhonte lam a ngasak hi. Ama' gante bel a tuamin a koih a, Laban' gante tawh a koihkhawm kei hi. 41 Gannu a hatzawte a huk chianga, a talte'n a chianggelhte' maia a bawh ding uh deihin, tua chianggelhte tuikuang ah a koih zel hi. 42 Ahihhangin, gan hatloute leh zawngkhalte' mai ah bel chianggelhte a koih kei hi. Tua bangin, gan hatlou zawngkhalte Laban in a tang a, a hatte Jakob in a tang hi. 43 Hibangin, Jakob hong lawhching a, ganhonte, sila numei leh sila pasal leh, sangawngsaute leh sabiltungte a hauta hi.

Pianchilna 31

Laban apan Jakob Tai

1 Laban' tapate'n: Jakob in i pa' neihsa teng khempeuh sut a, a hauhna khempeuh i pa apan a ngah ahi, a chih uh Jakob in a za hi. 2 Tua bangin, Jakob in amah lama Laban' lungput a ngei a bang nawn kei, chih a mu hi. 3 Tua nungin, Tangtawn Toupa'n Jakob kiang ah: Na pa' gam ah leh, na tanaute kiang ah chiah kikta inla, kon ompih ding, a chi hi. 4 Tua bangin, Jakob in Rakhel kiang leh Lea kiang ah, a belamhonte omna gamlaka hong paikhe dingin thu a khak hi. 5 Amaute kiang ah: Kei lama na pa uh' lungput a ngei a bang nawn kei, chih ka mu. Ahihhangin, ka pa' Pathian in hon ompih hi. 6 Ka tha neih tengin na pa uh' nna ka sem, chih na thei uhi. 7 Hinapi-in, na pa un hon khem a, ka thaman sawmvei tak a khengkheng hi. Ahihhangin, ama'n kei hon hihsiat ding Pathian in a phal kei hi. 8 Ama'n: A gial iim iam teng na thaman ahi ding, a chih chiangin, belamte'n nou a gial iim iam a nei uh a, a gial hiikheek teng na thaman ahi ding, a chih chiangin, belamte'n nou gial hiikheek a nei zel uh. 9 Tua bangin, Pathian in na pa uh' ganhonte laksakin kei hon pe zel hi. 10 Gantate a gai hun laiin, khatvei mang ka nei a, ka dak tou a, ganhonte bawh a take a gial hikheek, a gial iim iam leh a bema gial liante a na hi uhi. 11 Tua ka mangin, Pathian' vansawltak in ka kiang ah: Jakob, hon chi a, ke'n: Hiai ah ka om, ka chi hi. 12 Ama'n: Daktou inla, ganhonte bawh keltalte, a gial hiikheekte, a gial iim iamte, a bema gialte ahi, chih chiamteh in. Laban in nang hon bawldan khempeuh ka muta. 13 Suang na phuhna leh, ka kianga kichiamna na bawlna Bethela na tuah tua Pathian kei ka hi. Tuin, hiai gam nuse meng inla, na pianna gam ah kilehkik in, hon chi ahi, a chi hi. 14 Tua khitin, Rakhel leh Lea in a dawng uh a: Ka pa uh' inn ah goutan ka nei lai ua hiam? 15 Ama'n koute gamdang mi bawla hon bawl hilou maw? Koute hon khotkhiak chih thamlouh, koute adinga piaksate nangawn gaikhin hilou maw? 16 Ataktakin, Pathian in ka pa uh' hauhna a laksakte khempeuh eite'-a ahi ve le. Tua bang ahih manin, Pathian in hon hilh peuhmah hih mai in, a chi uhi. 17 Tua khitin, Jakob in a tate leh a zite sangawngsau tung ah a tuangsak a, 18 a ganhonte leh Padan Arama a kaihkhawm vante khempeuh a mai ah a paisak a, Kanan gama a pa Isak kiang zuanin a kipankhia hi. 19 Laban, a belam mulmet dinga a kuan kalin, Rakhel in a pa' innsung milim pathiante a guksak hi. 20 Jakob bel, tua Aram mi Laban hilh louin a simtai hi. 21 Tua bangin, Jakob a neih teng khempeuh tawh a tai a, Luipi a kan a, Gilead tanggam a manawh hi.

Laban in Jakob Nungdelh

22 Jakob a taita, chih Laban kiang ah a ni thum ni-in a hilh uhi. 23 Laban in a sanggamte a tonpih a, ni sagih lam a delh nungin, Gilead tanggam ah, Jakob a delhpha hi. 24 Ahihhangin, tua Aram mi Laban kiang ah, a mangin, Pathian a kilaak a, amah kiang ah: Jakob kiang ah a sia hita leh, a pha hita leh, bangmah gen lou dingin pilvang in, a chi hi. 25 Tua bangin, Laban in Jakob a delhpha a, Jakob in tanggam ah a puanbuk a na kai a, Laban leh a sanggamte'n zong Gilead tanggam ah puanbuk a kai uhi. 26 Laban in Jakob kiang ah: Bang hih na hita mai a, ka theih louh kala na simtai a, ka tanute gallak taka na lakmang? 27 Banghanga simtai a, hon taisan a, hon hilh lou mahmah na hia? Ke'n lungnuamtaka, late, tumgingte leh, kaihgingte tawh hon kha nuam mah hi vengin. 28 Ka tute leh ka tanute nangawn hon tawpsak lou a, haihuaipi-a gamta na hi ve. 29 Nang hon hihsiat ut leng, hon hihse thei ka hi. Ahihhangin, na pa' Pathian in zan zanin hon houpih a: Jakob kiang ah a sia hita leh, a pha hita leh, bangmah gen lou dingin pilvang in, hon chi hi. 30 Na pa' inn na ngaih mahmah mana tai zaw na hi peuhmah a, hita mah leh, banghanga ka pathiante hon guksak na hia oi? a chi hi. 31 Jakob in a dawng a, Laban kiang ah: Thagumin na tanute non sut kha ding ka chi a, ka laua ahi. 32 Na pathiante ahih leh, na muhna mi penpen hinghawi ken. I tanaute' mitmuhin ka neih ka lam teng vel inla, nang'-a ka lak khak om leh lakik in, a chi hi. Jakob in bel Rakhel in tua pathiante a guk lam a thei kei hi. 33 Tua bangin, Jakob' puanbuk ah, Lea' puanbuk ah leh, tua sila numei nihte' puanbuk ah Laban a lut a, ahihhangin, a pathiante a mu kei. Lea puanbuk apan a pawtkhia a, Rakhel' puanbuk ah a lut hi. 34 Rakhel in tua innsung pathiante a la a, sangawngsau tuanphaha selin, a tung ah a tu hi. Laban in puanbuk teng a mai a, ahihhangin, tua pathiante a mu kei hi. 35 Rakhel in a pa kiang ah: Na maia ka din theih louh, ka toupa'n zadah ken aw, numei' ngeina ka neih laitak ahi-a ahi, a chi hi. Tua bangin, Laban in zong mah leh, tua innsung pathiante a mu kei hi. 36 Jakob a heh a, Laban a sal a, a kiang ah: Ka helna bang ahia? Ka khelhna bang ahia, hibanga non nungdelh? 37 Ka van teng na pheklek a, na innsung van bang na mu-a eita? Na tanaute leh, ka tanaute' mai ah na muh pen hon koih inla, amaute'n eite gel kal ah thu khen uhen aw. 38 Na kiang ah kum 20 sung vingveng ka omta a, na belampite leh, na kelpite'nou a se ngei kei. Na ganhon laka belampate zong kon neksak ngei kei. 39 Na gantate gamsa keihlupin zong kon tun ngei kei. Ke'n manna ka thuak zaw zel. Sun laia kigu hita leh, zan khanga kigu hita leh, kei non dinsak zel. 40 Ka thuak hibang ahi ve: Sun nisa ka thuak a, zan khawdam ka thuak a, ihmut ka mu ngei kei. 41 Kum 20 na inn sunga ka om sung, ka thuak hibang ahi tawntung ahi. Na tanute thalawhin kum sawmleli na nna ka sem a, na gante thalawhin kum guk nna ka sem a, ka thamante sawmvei non kheksak hi. 42 Ka pa' Pathian, Abraham' Pathian leh Isak' Kihtakpa in hon na ompih lou hi leh, khutvuaka hon paisak ding na hi vele. Ahihhangin, Pathian in ka haksatna leh ka khut sepgimna a muta a, zanni zaanin nang hon tai ahi ve, a chi hi. 43 Laban in Jakob a dawng a: Hiai tanute ka tanute ahi a, hiai naupangte ka tute ahi a, hiai gantate ka gantate ahi. Na muh teng khempeuh kei'-a ahi. Tuni-in, hiai ka tanute, ahih kei leh, a ta neihte uh ading bang hihsak thei ding ka hia? 44 Tua bang ahih manin, kisa inla, nang leh ke'n thukhun khat bawl ni, i kal ah theihpihna hi hen, a chi hi. 45 Tua bangin, Jakob in suang khat a la a, suangkhuam dingin a phut a, 46 a tanaute kiang ah: Suang hon tomkhawm un, a chi hi. Tua bangin, amaute'n suangte hon tomkhawm uh a, tuate a chiangkhawm uh a, tua suang chiankhawm kiang ah an a ne uhi. 47 Laban in tua suangchian, Jegar Sahadutha, chi-in a minvawh a, Jakob in bel, Galeed, chi-in a minvawh hi. 48 Laban suangchian, theihpihna bangin, tua in: Tuni-in, hiai nang leh kei kala ahi, a chi hi. Tua suangchian, Galeed, a kichi a, 49 Mizpa zong a kichi hi. Ahang bel, Laban in: Eite i kikhen sung teng, Tangtawn Toupa'n nang leh kei hon veng tuak hen. 50 Ka tanute tunga na tatsiat a, a hih kei leh, amaute lou zi dangte na neih leh, eite kiang ah kuamah om kei mah leh, nang leh kei kala theihpihna Pathian ahi, a chi-a ahi. 51 Laban in Jakob kiang ah: Hiai ah suangchian a om a, hiai ah suangkhuam a om. Nang leh kei kala ka koih ahi. 52 Nang hon hihse dingin hiai suangchian khengin nang lam ah kong pai kei ding a, kei hon hihse dingin hiai suangchian leh suangkhuam khengin kei lam ah nong pai kei ding, chihnain hiai suangchian, theihpihna ahi a, hiai suangkhuam, theihpihna ahi. 53 Abraham' Pathian leh Nahor' Pathian leh, a pa uh' Pathian in eite kal ah thu khen hen, a chi lai hi. Tua bangin, a pa Isak' Kihtakpa' min louin, Jakob a kichiam hi. 54 Ama'n tua tanggam ah kithoihna a lan a, an ne dingin a tanaute a chial hi. Amaute'n an a nek khitun, tua mun ah tua zaan a taam uhi. 55 A zing chiang, zingsang beltakin, Laban in a tute leh a tanute a tawp a, amaute a vualzawl hi. Tua khitin, a kipankhia a, inn ah a kilehkikta hi.

Pianchilna 32

Esau Tuak dinga Jakob Kisa

1 Jakob zong a pai a, Pathian' vansawltakte' n amah a na-tuak uhi. 2 Jakob in amaute a muh takin: Hiai lah Pathian' giahphual ahi! a chi a, tua mun min dingin, Mahanaim a sa hi. 3 Jakob in Edom gam, tua Seir gam ah a sanggampa Esau kiang ah, thangkoute a sawl masa a, 4 amaute a thuhilh a: Ka toupa Esau kianga hiai na gen ding uh ahi. Na silapa Jakob in: Laban kianga tutan dong om ka hi a, 5 bawnghonte leh sabiltungte, belamte leh kelte, sila pasalte leh sila numeite ka nei hi. Tuin ka toupa' maipha ka muh theih nadingin, na kiang ah thangkoute kon sawl ahi, a chi, va-chi un, a chi hi. 6 Tua thangkoute, Jakob kiang hong tun kik takun: Na sanggampa Esau kiang ka vatung uh a, tuin amah nang muak dingin mi 400 tawh hong pai ding ahi, a chi uhi. 7 Jakob a lau a, a patau mahmah a, a tonpihte pawl nihin a khen a, a belam leh kelhonte leh sabiltungte zong tua bangin a khen hi. 8 Ahang bel, ama'n: Esau hong pai a, pawl khat a sual leh, pawl dang khat pen a suakta thei khamawh ding hiam, chi-in a ngaihsuna ahi. 9 Tua bangin, Jakob a thum a: Ka pa Abraham' Pathian, ka pa Isak' Pathian aw, ka kianga: Na gam lam leh na tanaute kiang ah kilehkikta in, kon lawhchingsak ding, chipa Tangtawn Toupa aw, 10 kei na silapa tunga na chitna leh muanhuaina khempeuh tang taak ka hi kei. Hiai Jordan lui ka kan laiin, ka chiangkhun kia lei ka nei a, tuin mi pawl nih tak kong phata. 11 Kon ngen ahi. Ka sanggampa Esau khut apan hon hinghawi in. Amah hong paiin, kei leh ka tate leh, a nute uh hon sual kha ding, chih ka lau ahi. 12 Ahihhangin, nang ka kiang ah: Kon lawhchingsak ngeingei ding a, tuipi-a sehnel simsenglouh bangin, na suante ka tamsak ding, non chita hi, a chi hi. 13 Tua mun ah, tua zan a giak a, a neihsa lak ah, a sanggampa Esau adingin thawnpiak ding a telkhia hi: 14 Kelpi 200 leh keltal 20, belampi 200 leh belamtal 20, 15 sangawngsaupi nawisuklai 30 leh a noute tawh, bawngpi 20 leh bawngtal sawmkhat, sabiltung 20 leh sabiltung nou sawmkhat a telkhia hi. 16 Hiaite a honhonin a silate a hawlsak a, amaute kiang ah: Ka mai ah na pai masa unla, ganhonte kal kihalsak un, a chi hi. 17 Ama'n amasapen a thuhilh a: Ka sanggampa Esau in nang hon tuah chianga: Nang kua-a na hia? Koia hawh dek na hia? Hiai gantate khempeuh kua-a ahia? hon chih chiangin, 18 nang: Hiaite na silapa Jakob-a ahi a, ka toupa Esau adinga thawnpiak hon piak ahi a, amah koute nunga hong pai ahi, na chi ding ahi, a chi hi. 19 Tua bangin, a nihna, a thumna leh ganhon hawi dangte zong a thuhilh a: Esau na tuah chiangun, tua bang teng mah na gen ding uh ahi. 20 Na silapa Jakob koute nunga hong pai ahi, chi khial kei un, a chi hi. Ahang bel, ama'n: Hiai thawnpiakte ka paisak masaktein amah ka lungtaisak ding a, tua nungin, amah ka tuah hun chiangin, kei hon sang nante, chi-in a ngaihsuna ahi. 21 Tua bangin, Jakob' thawnpiakte a pai masa a, amah bel giahphual ah a giak lai hi.

Jakob in Pathian Buan

22 Tua zanin Jakob a thou a, a zite gel, sila numeite gel leh, a tapa sawmlekhatte a tonpih a, Jabok lui ngahna ah a galkah hi. 23 Amaute lui a kansak nungin, a neihsate khempeuh zong a kha galkai vek hi. 24 Tua khitin, Jakob amah kiain a om a, mi khat in zing khawvak dong amah a buan nilouh hi. 25 Tua mipa'n amah a zou kei, chih a theih takin, Jakob pheipi leh ngum kituahna kuak a khoihsak a, Jakob in tua mipa a buan laiin, a pheipi leh ngum kituahna a kilawi hi. 26 Tua mipa'n: Hon khah in, khua vak ahita, a chi hi. Ahihhangin, Jakob in: Non vualzawl kei leh, kon khah kei ding, a chi hi. 27 Tua mipa'n: Na min bang ahia? chi-in a dong hi. Jakob in a dawng a: Jakob, a chi hi. 28 Tua mipa'n: Na min Jakob ahi nawn kei ding a, Israel ahita ding. Ahang bel, Pathian leh mihing na buan a, na zouta hi, a chi hi. 29 Jakob in: Hehpihtakin, na min hon hilh in, a chi hi. Ahihhangin, tua mipa'n a dawng a: Banghanga ka min hon dong na hia? a chi a, tua mun ah amah a vualzawlta hi. 30 Tua khitin, Jakob in: Pathian kimaituahin ka muta a, hinapi-in, ka hinna hon hawisak lai, chi-in, tua mun min dingin, Peniel a sa hi. 31 Ama'n Peniel a khen takin, ni a suakta hi. A ngum guhtuah kilawi ahih manin a bai hi. 2 Tuni dongin, Israelte'n gamsa leh sa peuhpeuh, a pheipi leh ngum guhtuaha thaguipi leh satak kizom a ne ngei kei uhi. Ahang bel, Pathian in Jakob' pheipi leh ngum guhtuaha thaguipi leh satak kizopna a khoih man ahi.

Pianchilna 33

Jakob leh Esau Kituahna

1 Jakob a khawdak a, Esau, a mi 400-te tawh hong pai a mu hi. Ama'n a tate teng, Lea, Rakhel leh sila numeite lak ah a hawm a, 2 sila numeite leh a tate uh a masasak a, tua nung ah, Lea leh a tate a zomsak a, Rakhel leh Josef a nunungsak hi. 3 Amah madawkin a vapai a, a sanggampa lam ngain, sagihvei leisi-in a kun hi. 4 Ahihhangin, Esau bel, Jakob tuak dingin hong tai a, amah a pom a, a ngawngkawi a, a tawp a, a nihun a kap uhi. 5 Tua khitin, Esau a khawdak a, tua numeite leh tate a mu a: Hiai na tonpihte kuate ahi ua le? a chi hi. Jakob in a dawng a: Pathian in hehpihtaka na silapa a piak tate ahi uhi, a chi hi. 6 Sila numeite leh a tate un hon naih uh a, Esau' mai ah hong kun uhi. 7 Tua khitin, Lea leh a tate hong pai uh a, tua bangin hong kun uhi. A nunungpenin Josef leh Rakhel hong pai uh a, amaute zong Esau' mai ah hong kun uhi. 8 Esau in: Hiai ganhon hong kihawl kon tuahte bang na chihna ahia? a chi hi. Jakob in: Ka toupa aw, na maipha ka zonna ahi, a chi hi. 9 Ahihhangin, Esau in: Ka sanggam aw, ke'n ganhon hauta veng e. Na neih teng nang adingin neiden in, a chi hi. 10 Jakob in: Hehpihtakin tua zaw hi kei hen aw. Na maipha hon musak na hih leh, hiai ka thawnpiakte hon sang in. Deihsakna tawh kei non santak manin, na maitang ka muh, Pathian' maitang mu bang ka hi. 11 Pathian ka tung ah a siam a, ka deihkhop ka nei a, hehpihtakin, thawnpiak hong kipia sang mahmah in, a chi hi. Tua banga Jakob in a piak teitei manin, Esau in thawnpiakte a sang hi. 12 Tua khitin, Esau in: Paita ni. Ken hon makaih ning, a chi hi. 13 Ahihhangin, Jakob in amah kiang ah: Naupangte lah a neu lai uh a, noungek nei belampi leh kelpite leh ganpite ka kep a kul, chih ka toupa'n na thei hi. Ni khat lei zong kihatpaipih leh, ganhonte si ding uhi. 14 Tua bang ahih manin, na silapa' mai lam ah, ka toupa na pai masa in. Kei zaw Seir muala ka toupa kon tuah mateng, ganhonte leh naupangte hat dandanin, awlawlin hong pai ning, a chi hi. 15 Esau in: Tua bang ahih leh, ka mite pawl khat hon nutsiat ning, a chi hi. Jakob in: Bang kul se ding ahia? Ka toupa'n na maipha non muhsak kiching khin lei hi, a chi hi. 16 Tua ni-in, Seir lam zuan kik dingin Esau a kipankhia hi. 17 Ahihhangin, Jakob bel, Sukoth ah a pai a, tua ah amah adingin in a lam a, a gantate adingin buktate a lam hi. Tua hang mah ahi, tua mun Sukoth a kichih. 18 Tua banga Jakob, Padan Aram apan hong paikhiak nungin, Kanan gama Shekhem khawpi bittakin a tung a, tua ah khawpi kigalmuhna ah, giahphual a sat hi. 19 Ama'n Hamor' tate apanin, nguntang 100 in mun khat a lei a, tua ah puanbuk a kai hi. Hamor bel, Shekhem' pa ahi. 20 Tua ah maitam a dawh a, tua mun min dingin, El Elohe Israel a sa hi.

Pianchilna 34

Dina leh Shekhemte

1 Jakob in Lea tawh kala tanu a neih Dina ahi. Amah tua gam nungakte veh dingin a vapawtkhia hi. 2 Hamor' tapa Shekhem in Dina a muhtakin, a tonpih a, a luppih hi. Hamor bel Hiv mi ahi a, tua gam kumpipa' tapa ahi. 3 Jakob' tanu in Shekhem' lungtang a lazou mahmah a, Shekhem in tua nungak a it a, kamsiam takin a houpih hi. 4 Shekhem in a pa Hamor kiang ah: Hiai nungak ka zi dingin hon piisak in, a chi hi. 5 Jakob in a tanu hihbuahin a om, chih a zak laiin, a tapate gamlak ah, a ganhonte utawh a om uhi. Amaute inn hong tun mateng uh bangmah gen louin a om hi. 6 Tua sungin, Jakob houpih dingin Shekhem' pa Hamor hong kuan hi. 7 Jakob' tapate'n thu a zak takun, gamlak apan hong pai uhi. Shekhem in Jakob' tanu luppih a, ahih louh dingpi, thil zahlakhuaipi Israel gama a hih manin amaute'n a ngaidah lua uh a, a heh mahmah uhi. 8 Ahihhangin, Hamor in amaute kiang ah: Ka tapa Shekhem in na tanu uh lunggulh mahmah a, hehpihtakin a zi dingin hon pia un. 9 Koute tawh kitentuahna bawl unla, na tanute uh hon pia unla, noute adingin ka tanute uh pii un. 10 Hi leh, koute lak ah na teeng ding uh a, nou adingin gam a awng ding hi. Teeng unla, sum sin unla, a sung ah neih leh lam khawm un, a chi hi. 11 Shekhem in Dina' pa leh sanggamte kiang ah: Na deihsakna uh hon musak unla, non nget peuhmah uh hon pia ning. 12 Mou man ding leh thawnpiak ding na ut zah zah uh gen unla, na gen dandan uh hon pia ning. Nungaknu bel ka zi dingin hon pe mahmah un, a chi hi. 13 Shekhem in a sanggamnu uh Dina hihbuahta ahih manin, Jakob' tate'n Shekhem leh a pa Hamor tawh a kihou laiun, zekhemin a dawng uhi. 14 Amaute kiang ah: Tua bangin hih thei kei n'ung. Zeksumlouh pasal adingin ka sanggamnu uh pe thei kei n'ung. 15 Ka lemsak theihna uh thil khat kia a om. Koute bangin pasal khempeuh in zeksum un. 16 Tua hi leh, ka tanute uh kon pe ding uh a, na tanute uh ka nei sam ding uh. Tua khit chiangin, noute lak ah ka teeng ding uh a, noute tawh minam khat ka suak ding uh. 17 Ahihhangin, zeksum dinga ka thu uh na ngaihkhiak nop kei uleh bel, ka sanggamnu uh tonpihin ka pai ding uh, a chi uhi. 18 Tua banga a thu sawm uh, Hamor leh a tapa Shekhem in pha a sa uhi. 19 Tua tangvalpa, a pa' innsunga pahtawipen in Jakob' tanu deih mahmah ahih manin, amaute' gen bangin a hih pah hi. 20 Tua bangin, Hamor leh a tapa Shekhem in, amaute' khawpi kongpia paiin, a khawmite uh a houpih uh a: 21 Hiai mite'n eite hon lawmbawl uh a, i gam ah teeng uh henla, sumsin uhen. Amaute adingin gam kiching mahmah hi. A tanute uh eite'n zi dinga nei thei ding a, eite' tanute zong amaute'n zidinga nei thei ding uhi. 22 Ahihhangin, thil khat ngiat a nei uh a, eite laka pasalte, amaute banga zeksum ding, hi leh eite laka teeng a, eite tawh minam khat suak ding, chi uhi. 23 Tua hileh, amaute' gante, amaute' neih leh lamte leh, ganta dangte khempeuh eite'-a hi ding hilou maw? Tua bang ahih manin, a thusawm uh lemsakpih ni. Tua hi leh, amaute eite laka teeng ding uhi, a chi uhi. 24 Tua khawpi kongpi apana paikhia pasal teng khempeuh in Hamor leh a tapa Shekhem a kithukimpih uh a, khawpi-a pasal teng khempeuh zek a sumsak uhi. 25 Ni thum nungin, amaute khempeuh in na a thuak laitakun, Jakob' tapa nih, Dina' sanggamte Simeon leh Levi in a namsaute uh tawiin, tua khawpi bangmah lau ding omlou, galmuangtaka om a buluh uh a, pasal teng khempeuh a that uhi. 26 Hamor leh a tapa Shekhem zong namsauin a that uh a, Shekhem' inn apanin Dina a piikhia uh a, a paikhia uhi. 27 Jakob' tapa dangte'n mithah luangte a mu uh a, a sanggamnu uh hihnit a hihna tua khawpi a lok uhi. 28 Amaute' belamhon leh kelhonte leh, bawnghonte leh sabiltungte leh, tua khawpi sung leh gamlaka om, amaute'-a ahi khempeuh a la uhi. 29 Amaute' hauhnate khempeuh, amaute' numeite leh tate khempeuh leh, innsunga om van khempeuh, gallakin a pawmang vek uhi. 30 Jakob in Simeon leh Levi kiang ah: Hiai gama teeng Kanante leh Perizte' mai ah kihhuai non suaksakta uhi. Kei leh ka innkawte lah tawm mahmah a, amaute khempeuh pangkhawmin kei hon dou ding uh a, kei leh ka innkawte hon thatgam ding uhi, a chi hi. 31 Ahihhangin, amaute'n a dawng uh a: Ama'n ka sanggamnu uh kizuak bawlin a bawl thei vial dia hia? a chi uhi.

Pianchilna 35

Bethel ah Jakob Kiknawn

1 Tua nungin, Pathian in Jakob kiang ah: Bethel ah paitou inla, tua ah teeng in. Na sanggampa Esau apan na taai laia, na kianga hong kilaak Pathian adingin tua ah maitam dawh in, a chi hi. 2 Tua bangin, Jakob in a innkawte leh a ompihte khempeuh kiang ah: Gamdang pathian na kepte khempeuh uh paimang unla, kihahsiangthou unla, na puansilhte uh khek un. 3 Tua khit chiangin, kisa ni-in, Bethel ah paitou ni. Ka mangbat laia hon dawng a, ka paina peuha hon ompihpa Pathian adingin tua ah maitam dawh ni, a chi hi. 4 Tua bangin, amaute'n gamdang pathian a kepte uh leh a bilbahte uh, Jakob' khut ah a pia uh a, ama'n Shekhema tawsaw sing nuai ah tuate a phum hi. 5 Tua khitin, amaute a kisa uh a, a paikhia uhi. Amaute' kimkota khuate khempeuh tung ah Pathian lauluatna a tung a, amaute a delh kei uhi. 6 Jakob leh a tonpihte khempeuh, Luz kichi mun hong tung uhi. Tua khawpi bel Bethel ahi a, Kanan gama om ahi. 7 Tua ah, ama'n maitam khat a dawh a, tua mun min dingin El Bethel a sa hi. Ahang bel, a sanggampa apan a tai laia, a kianga Pathian a kilaakna mun ahih man ahi. 8 Rebek donnu Debora a sita a, Bethel khanga tawsaw sing nuai ah a kivui hi. Tua mun min dingin Alon Hakhut a kisa hi. 9 Padan Aram apan Jakob a kilehkik nunga, amah kianga Pathian hong kilaak kik laiin amah a vualzawlta hi. 10 Pathian in amah kiang ah: Na min Jakob ahi. Ahihhangin, Jakob na hi nawn kei ding a, na min Israel ahita ding, a chi a, tua bangin, Pathian in a min dingin Israel a sata hi. 11 Pathian in amah kiang ah: Kei Pathian Vanglianpen ka hi. Hong chipha inla, hong pung in. Nang apanin minam khat leh minam tampi hong piang ding a, na pumpi apanin kumpipate hong piangkhe ding hi. 12 Abraham leh Isak kianga ka piak gam, nang kiang ah zong kon pia a, na nunga hong om ding na suante kiang ah zong ka pia hi, a na chita hi. 13 Tua khitin, amah a houpihna mun apanin Pathian in a paitouhsanta hi. 14 Pathian in amah a houpihna mun ah, Jakob in suang a phut a, tua tung ah dawn thillat a sung a, sathau zong a buak hi. 15 Pathian in amah a houpihna mun min dingin Jakob in Bethel a saksa ahi.

Rakhel leh Isak Sihna

16 Amaute Bethel apanin a kipankhia uh a, Efrath mun tun ma, gamla lou a tun laiun, Rakhel in haksapi-in nau a nei hi. 17 Ama'n nau neih haksa a sak mahmah takin, naudomnu'n amah kiang ah: Lau ken, tapa dang khat nei na hi, a chi hi. 18 Amah si dek a, laitat dinga a kisak laiin, a tapa' min dingin Ben Oni a sa hi. Tua khitin, Rakhel a si hi. Ahihhangin, a pa'n bel, a min dingin Benjamin a sa hi. 19 Tua bangin, Rakhel a sita a, Efrath lampi ah a kivui hi. Efrath bel, Bethlehem ahi. 20 Rakhel' han tung ah, Jakob in suang a phut a, tuni dongin Rakhel' han chiamtehna ahi. 21 Israel a kipankhe kik a, Migdal Eder khen ah a puanbuk a kai hi. 22 Tua gama Israel a om laiin, Reuben in a pa' mei Bilha a valuppih a, Israel in tua thu a za hi. Jakob in tapa sawmlenih a nei hi. 23 Lea tawh kala a tapate: Jakob' tamasa Reuben, Simeon, Levi, Judah, Isakhar leh Zebulun ahi. 24 Rakhel tawh kala a tapate: Josef leh Benjamin ahi. 25 Rakhel' silanu Bilha tawh kala a tapate: Dan leh Naftali ahi. 26 Lea' silanu Zilpa tawh kala a tapate: Gad leh Asher ahi. Hiaite Padan Aram-a a om laia piang, Jakob tapate ahi. 27 Mamre-a Kiriath Arba ah, Jakob bel a pa Isak kiang ah, inn hong tungta hi. Kiriath Arba bel, Hebron ahi a, Abraham leh Isak a nakhualtamna mun ahi. 28 Isak kum 180 a nungta a, 29 tekkuna damin a laitat a, a sita hi. Tua bangin, ama' mite kianga pii-in a om samta a, a tapate Esau leh Jakob in a vui uhi.

Pianchilna 36

Esau' Suan leh Khakte

1 Hiai Esau' khangthu ahi. Amah bel, Edom ahi. 2 Esau in Kanan numeite zi-in a nei a, amaute Hit mi Elon' tanu Ada tawh, Hiv mi Zibeon' tapa Ana' tanu Oholibama tawh, 3 tuate ban ah, Ishmael' tanu Nebaioth' sanggamnu Basemath tawh zong ahi. 4 Ada in Esau adingin Elifaz a nei a, Basemath in Reuel a nei a, 5 Oholibama in Jeush, Jalam leh Kora a nei hi. Hiaite Kanan gama piang Esau' tapate ahi. 6 Esau in a zite, a tapate leh a tanute leh innkawte khempeuh tawh a gantate leh a gan dangte khempeuh tawh, Kanan gama a lamkhiak vante khempeuh tawh, a sanggampa Jakob apan gamla sim ah a pem hi. 7 Neih leh lam a hauh manun, amaute a tengkhawm thei kei uhi. Ahang bel, a gantate uh hangin, a khualtamna gam un amaute a vak zou keia ahi. 8 Tua bangin, Seir tanggam ah Esau a teng hi. Esau bel Edom ahi. 9 Seir Muala Edomte' pa Esau khangthu hiai ahi: 10 Esau' tapate hiaite ahi. Ada tawh kala a tapa Elifaz ahi a, Basemath tawh kala a tapa Reuel ahi. 11 Elifaz' tapate hiaite ahi: Teman, Omar, Zefo, Gatam leh Kenaz ahi. 12 Esau' tapa Elifaz in zong Timna kichi, mei khat a nei a, tua tawh kal ah Amalek a nei hi. Hiaite bel, Esau' zi Ada' tapate ahi. 13 Reuel' tapate hiaite ahi: Nahath, Zera, Shama leh Miza ahi. Hiaite, Esau' zi Basemath tapate ahi. 14 Oholibama, Esau' zi ahi a, Ana' tanu ahi. Ana lah Zibeon' tanu ahi. Oholibama in Esau adinga a neih tapate Jeush, Jalam leh Kora ahi. Edom Makaipente 15 Hiaite Esau' suante laka makaipente ahi: Esau' tamasa Elifaz' tapate: Makaipente Teman, Omar, Zefo, Kenaz, 16 Kora, Gatam leh Amalek ahi. Hiaite, Elifaz' suante laka makaipente, Edom gama piangte ahi a, Ada' tapate ahi. 17 Esau' tapa Reuel' tapate: Makaipente Nahath, Zer, Shama leh Miza ahi. Hiaite Reuel' suante laka makaipente ahi a, Esau' zi Basemath' tapate ahi. 18 Esau' zi Oholibama' tapate: Makaipente Jeush, Jalam leh Kora ahi. Hiaite Esau' zi Oholibama' tapate laka makaipente ahi. Oholibama bel Ana' tanu ahi. 19 Hiai Esau' tapate ahi a, hiaite amaute laka makaipente ahi. Esau bel Edom ahi.

Seir' Tapate

20 Hiaite Hor mi Seir' tapate, tua gama teengte ahi: Lotan, Shobal, Zibeon, Ana, 21 Dishon, Ezer leh Dishan. Edom gama Seir' tapa Horte' makaipente ahi uhi. 22 Lotan' tapate: Hori leh Hemam ahi, Lotan' saggamnu bel Timna ahi. 23 ShobaL tapate: Alvan, Manahath, Ebal, Shefo leh Onam ahi, 24 Zibeon' tapate: Aia leh Ana ahi. Hiai Ana ahi gamdai-gamkeua a pa Zibeon' sabiltungte a chin laia, tuilum nakte mukhepa. 25 Ana' tate: Dishon leh Ana tanu' Oholibama ahi. 26 Dishon' tapate: Hemdan, Eshban, Ithran leh Reran ahi. 27 Ezer' tapate: Bilhan, Zaavan leh Akan ahi. 28 Dishan' tapate: Uz leh Aran ahi. 29 Hiaite Horte' makaipente ahi: Lotan, Shobal, Zibeon, Ana, 30 Dishon, Ezer leh Dishan ahi. Seir gama a pawlpawla a kikhen dan ua, Horte' makaipente ahi.

Edom Kumpipa

31 Israel kumpipa kuamah in vai a hawm ma-a, Edom gama vaihawm kumpipate hiaite ahi: 32 Beor' tapa Bela, Edom kumpipa hong hi a, a khawpi Dinhaba a kichi hi. 33 Bela a sih takin, Bozra khawmi Zera' tapa Jobab in a kumpi hihna a luah hi. 34 Jobab a sih takin, Teman gam mi Husham in a kumpi hihna a luah hi. 35 Husham a sih takin, Bedad' tapa Hadad in a kumpi hihna a luah a, a khawpi Avith a kichi hi. Bedad bel Moab gama Midian zoupa ahi. 36 Hadad a sih takin, Masreka khawmi Samla in a kumpi hihna a luah hi. 37 Samla a sih takin, luipi geia om Rehoboth khawmi Shaul in a kumpi hihna a luah hi. 38 Shaul a sih takin, Akbor' tapa Baal Hanan in a kumpi hihna a luah hi. 39 Akbor' tapa Baal Hanan a sih takin, Hadad in a kumpi hihna a luah hi. A khawpi Pau a kichi. A zi' min Mehetabel ahi a, Matred' tanu ahi. Matred bel Me Zahab' tanu ahi. 40 Esau' suan makaipente' minte, a beh a beh, a gam a gamin, hiaite ahi: Timna, Alva, Jetheth, 41 Oholibama, Ela, Pinon, 42 Kenaz, Teman, Mibzar, 43 Magdiel leh Iram. Hiaite Edom makaipente, a luah gam ua a tenna mun uh bang zela a min uh ahi. Hiai Esau ahi Edomte' pa hong hi.

Pianchilna 37

Josef Mang

1 Jakob a pa' khualtamna Kanan gam ah a teeng hi. 2 Hiai Jakob' suante khankhiak dan ahi: Josef kum sawmlesagih a hih laiin, a sanggamte tawh gan a ching uhi. A sanggamte bel a pa' zite Bilha leh Zilpa' tapate ahi uhi. Ama'n amaute tawh kisai thuthang hoihlou a pa kiang a tun hi. 3 Israel in a teek nunga Josef a neih ahih manin, a tapa dangte sangin a itzaw a, amah adingin puanaktual gial kilawm mahmah a bawlsak hi. 4 A pa un amaute sangin Josef a itzaw, chih a sanggamte'n a muh takun, amah a mudah uh a, kampha khatin zong a houpih thei kei uhi. 5 Josef in mang a man a, a sanggamte kianga a hilh takin, amah a mudah semsem uhi. 6 Ama'n amaute kiang ah: Hiai ka mang ngai dih uh: 7 Eite'n lou ah buhphal i na hen a, i na koih a, ngai dih ua, kei' buhphal hong dingtang tou a, noute' buhphalte a kimkot ah hong ding uh a, kei' buhphal mai ah a kun uh, a chi hi. 8 A sanggamte'n amah kiang ah: Nang maw koute tunga vaihawm na sawm? Nang maw koute non uk peuhmmah ding? a chi uhi. Tua bangin, amaute'n a mang leh a thugente hangin amah a mudah semsem uhi 9 Tua nungin, Josef in mang dang khat a man leuleu a, a sanggamte kiang ah a hilh hi. Ama'n: Ngai dih uh, mang dang khat ka man a, ka mangin ni leh khapi leh aksi sawmlekhatte ka mai ah a kun uh, a chi hi. 10 Ama'n a pa leh a sanggamte kianga a mang a hilh takin, a pa'n amah a taai hilh a: Bang mang man na hi maizen a? Na nu leh kei leh na sanggamte maw na maia ka kun taktak ding uh? a chi hi. 11 A sanggamte'n amah a haza uh a, ahihhangin, a pa'n bel hiai thu a lungsimin a chiamteh hi.

Josef, a Sanggamte' Zuakna

12 Tua nungin, a sanggamte'n Shekhem ah a pa uh' belamhon a ching uhi. 13 Israel in Josef kiang ah: Na sanggamte'n Shekhem ah ganhon a ching uhi, kisa inla, amaute kiang ah kon sawl ding, a chi hi. Josef in: Hiai ah ka om, a chi hi. 14 Tua bangin, Israel in amah kiang ah: Vapai inla, na sanggamte leh ganhonte bang chichi'n a om uhiam vaen inla, ka kiang ah hong gen kik in, a chi hi. Tua bangin, Hebron Phaizang apanin amah a sawlkhia hi. Josef, Shekhem hong tun takin, 15 mi khat in amah gamlaka vialvak a mu a, amah kiang ah: Bang zong na hia? a chi hi. 16 Ama'n a dawng a: Ka sanggamte zong ka hi. Ganhonte koia ching uhiam, non hilh thei diam? a chi hi. 17 Tua mipa'n a dawng a: Hiai apanin a paikhia uh a: Dothan ah pai ni, a kichih lamtak uh ka za, a chi hi. Tua bangin, Josef in a sanggamte a nungdelh a, Dothan ah amaute a mu hi. 18 Amaute'n amah a na galmuh uh a, amaute kiang a tun main, amah thah ding a na sawm uhi. 19 Amaute'n: Hiai ah mangneipa hong pai e! 20 Kisa ni-in, amah thatin, kawkhuk khat ah khia ni-in, gamsa gilou in a ne, chi ni. A mang bang a suak na hiam en ni, a kichi uhi. 21 Reuben in hiai thu a zak takin, amaute khut apan Josef hutkhiak a sawm a: A hinna zaw la kei ni, a chi a, 22 tua khitin, amaute kiang ah: Sisan suah kei un. Gamdai-gamkeua om hiai tuikul ah khia unla, a tung ah khut kha kei un, a chi hi. Reuben' in bel, amaute khut apan amah hinghawi a, a pa kianga piikik ding a tup mana hiai thu gen ahi. 23 Tua bangin, Josef a sanggamte kiang hong tun takin, amaute'n a puanaktual zemtampi-a gial, a silhlai a suahsak uh a, 24 amah tonpihin tuikul khat ah a khia uhi. Tua tuikul bel a vuak ahi a, tui a om kei hi. 25 Amaute an ne dingin a tu uh a, a khawdah uleh, Ishmaelte pawlkhat hong pai a galmuh uhi. Tua Ishmaelte bel, Gilead apan hong paia, sangawngsautea thil gimnamtui tuamtuam, singnai damdawite leh murate pua-a Aigupta gama paisuk dinga hong pai ahi uhi. 26 Judah in a sanggamte kiang ah: I sanggampa that a, a sisan i ima bang lawhtak ding i hi ua? 27 Khai, Ishmaelte kiang ah amah zuak ni, a tung ah khut kha kei ni, amah i sanggampa, i si leh sa mahmah hi buang lou maw, a chi hi. Tua bangin, a sanggamte'n a thugen a mang uhi. 28 Tua Midian sumsin mite amaute kiang hong tun takun, Josef sanggamte'n tua tuikul apanin amah a kaikhetou uh a, tua Ishmaelte kiang ah ngun dangka Shekel 20-in a khawngta uh a, Ishmaelte'n amah Aigupta gam ah a paipih uhi. 29 Reuben tua tuikula hong pai takin, tua ah Josef a na omta kei hi. Ama'n a puansilhte a botkek a, 30 a sanggamte kiang ah hong pai a: Naupangpa lah tuikul ah om nawn kei a, kei koilam ngata ding ka hia! a chi hi. 31 Tua nungin, amaute'n Josef puanaktual a la uh a, kei khat gouin a sisan ah tua puanaktual a diah uhi. 32 Amaute'n tua puanaktual gial a pa uh kiang ah hon tawi uh a: Hiai ka muh uh ahi. Na tapa' puanaktual ahi hiam, hi lou vel in, a chi uhi. 33 Ama'n tua puanaktual a meltheih a: Ka tapa' puanaktual ahi mah ve! Gamsa gilou in neta ahi ve! Josef kibalzanta ahi mahmah ve! a chi hi. 34 Tua bangin, Jakob in a puansilhte a botkek a, sai ip puan a silh a, ni tampi sung a tapa a suun hi. 35 A tapate leh a tanute khempeuh hong paiin, amah a nem uh a, ahihhangin, nep zawh ahi kei hi. Ama'n: Khakham veiin misikhua ah ka tapa kiang ah ka pai ding hi, a lankhuk chi a, a tapa suunin a kap kap mai hi. 36 Tua sungin, Midiante'n Aigupta gama Potifar kiang ah, Josef a khawng uhi. Potifar bel, Faro' nasem ulian, vengmite laka makai khat ahi.

Pianchilna 38

Judah leh Tamar

1 Tua hun lai khawng mahin, Judah in a sanggamte nusiain, Adulam khawmi Hira kichi beel dingin a kuan hi. 2 Tua ah, Kanan mi Shua' tanu a kitenpih hi. Ama'n a zi a luppih a, 3 a zi a gai a, tapa a nei a, a min dingin Er a sa hi. 4 A zi a gai kik a, tapa a nei a, a min dingin Onan a sa hi. 5 A zi in tapa dang khat a nei leuleu a, a min dingin Shela a sa hi. A zi in Shela a neih laiin, Judah bel Kezib-a a om lai ahi. 6 Judah in a tapa upapen Er adingin zi a piisak a, a min Tamar ahi. 7 Ahihhangin, Judah' tamasapen Er bel, Tangtawn Toupa' mitmuhin migiloupi ahi a, amah a that hi. 8 Tua khitin, Judah in Onan kiang ah: Na sanggampa tunga na mawhpuakna tangtun dingin na sanggampa' zi luppih inla, na sanggampa ading chisuan neihsak in, a chi hi. 9 Ahihhangin, Onan in tua banga ta a neihsak ding pen, ama' gouluahpa hi tuan lou ding ahi, chih a theih manin, a sanggampa' zi a luppih takin, a sanggampa ading chisuan a pian louh nadingin, leilak ah a chi a bung vek maimah hi. 10 10 Tangtawn Toupa' mitmuhin Onan' thilhih a gilou a, amah zong a that hi. 11 Tua bang teng nungin, Judah in a mounu Tamar kiang ah: Ka tapa Shela a pichin mateng, na pa' innsung ah meigongin na om phot in, a chi hi. Ama'n: A sanggamte mah bangin Shela zong si khamawh lou ding hi a, chi-in a ngaihsun hi. Tua bangin, Tamar a nawkik a, a pa' inn sung ah a om hi. 12 Hun sawtpi nungin, Shua' tanu, Judah' zi a si hi. Judah' sisuun hun a bei takin, Timna-a a belam mulmette kiang ah a hawhtou a, a lawmpa Adulam mi Hira in amah a zui hi. 13 Mi'n Tamar kiang ah: Na pasal' pa a belam mulmet dingin Timna ah a hawhtou dek, chi-in a hilh uhi. 14 Tamar in a meigong puante a hawkkhia a, meltheih louh dingin, maikhuhna a kikhuh a, Timna lampi-a gam daihna khat ah a na tu hi. Ama'n Shela pichingta napi, ama' zi dingin amah piak ahi kei, chih a mu gige hi. 15 Judah in Tamar a muh takin, a mai kikhuh ahih manin, kizuak khat a sa hi. 16 A mounu a hih lam phawk louin, lampi pam ah a vanaih a: Khai hon luppih ning aw? a chi hi. Tamar in: Non luppih ding manin, bang non pe dia eita? a chi hi. 17 Judah in: Ka ganhonte laka kelnou khat hong koihsak na-ning, a chi hi. Tamar in: Kelnou nong piaksak ma adingin, kichiamna thil bang non pe dia? a chi hi. 18 Judah in: Kichiamna thil bang kon pe dia eita? a chi hi. Ama'n a dawng a: Na suainamna zungbuh leh na khaupumphan leh na khuta na chiangkhun, a chi hi. Tua bangin, Judah in tuate a pia a, amah a luppih a, a gaita hi. 19 Tamar a paikhiak nungin, a maikhuhna a hawk a, a meigong puan a silh kik hi. 20 Tua nungin, Judah in tua numeinu apan, a kichiamna thilte la kik dingin a lawmpa Adulam mi tungtawnin kelnou khat a pesak hi. Ahihhangin, Adulam mi in tua numeinu a vamu kei hi. 21 Ama'n tua muna omte kiang ah: Enaim-a lam kianga tu, kizuaknu koia om ahia? a chi hi. Amaute'n: Hiaia kizuak a om louhpi, a chi uhi. 22 Tua bangin, amah Judah kiang ah a vapai kik a: Numeinu ka mu kei. Tua tham louin, tua muna omte'n: Hiaia kizuak a om louhpi, a na chi uhi, a chi hi. 23 Judah in: A thil lakte tang mai hen aw. Tuachi louin zaw, mi' nuihzabuk suak kha ni. Kelnou hon pesak ing a, amah vamu lou hi ve chin, a chi hi. 24 Kha thum khawng nungin, mi'n Judah kiang ah: Na mounu Tamar kizuak veh aw, nau pai zawmah veh, chi-in a hilh uhi. 25 Amah hon pikhiak takun, ama'n a pasal' pa kiang ah, a thilkepte a khak a: Hiai thilte neipa apan naupai ka hi. Hiai suainamna leh khaupumphan leh chiangkhun kua-a hi hiam, na meltheih hiam, a chisak hi. 26 Judah in tuate a meltheih a: Ka tapa' Shela' zi dinga amah pelou ka hih manin, kei sanga amah diktatzaw ahi ve, a chi a, amah a luppih nawn kei hi. 27 Tamar nau suah hun hong tun takin, ngai un, a sula phik om a na hi. 28 Naungekte hong suah takin, khat in a khut hon golhkhia hi. Naudomnu'n: Hiai pen a suak masa, chi-in tua naungek khut ngawng ah khausan a na bunsak hi. 29 Ahihhangin, tua naungek in a khut a doktum kik a, a sanggampa hong suak masa hi. Naudomnu'n: Bangchi dana nang hon phusuak mawk na hia? A mawh khu awh! a chi hi. Tua bangin, Judah in a min dingn, Perez a sa hi. 30 Tua nungin, a sanggampa, a khut ngawnga khausan bun pen hong suakkhia a, Judah in a min dingin Zera a sa hi.

Pianchilna 39

Aigupta-a Josef

1 Josef bel, Aigupta gama paipihsuk ahita a, Aigupta mi Potifar in Ishmaelte khut apan a na-lei hi. Aigupta gama Josef paipihsukte amaute mah ahi. Potifar bel, Faro' nasem ulian, innpi veng sepaih makai ahi, 2 Josef a toupa tua Aigupta mi' inn sung ah a om a, Tangtawn Toupa'n amah khut ah bangkim a lawhchingsak hi. 3 A toupa in, Tangtawn Toupa'n amah a ompih, chih leh, Tangtawn Toupa'n ama' sep peuhmah a lawhchingsak, chih a mu hi. 4 Josef in a toupa' deihsakna a tang a, a nna a sem hi. Potifar in ama' inn sung leh, a neih khempeuh ama' khut ah a koih a, 5 tua banga a inkuan leh a neih khempeuh tunga amah a koih apanin, Josef hangin Tangtawn Toupa'n a inn sung leh gama a neihte khempeuh zong a vualzawl hi. 6 Tua bangin, Potifar in a neih khempeuh Josef khut ah a koih a, a nek a dawnte loungal bangmah ah a kikum nuam se kei hi. Josef bel pianpha mahmah leh melhoih mahmah ahi. 7 Hun sawtlou nungin, a toupa' zi in amah a ngaih-et panta a, a kiang ah: Hong luppih in! a chi hi. 8 Ahihhangin, Josef in a nial a: Ka toupa'n a neih khempeuh ka khut ah a koih a, a inn sung ah bangmah ah a kikum nuam se kei hi. 9 Hiai inn sung ah kei sanga lianzaw om kei. Ka toupa'n nang lou ngai, kei adingin it a nei kei. Nang bel a zi na hi. Hibang thil gilou hihin bangchi'n Pathian tung ah ka khial thei dia? a chi hi. 10 Potifar' zi in a nisimin kun mah leh, Josef in a luppih nuam kei a, a kiang nai ah zong a om nuam kei hi. 11 Ni khat bel, nasep ding neiin, Josef tua inn sung ah a valut a, silate lah kuamah a om kei hi. 12 Potifar' zi in a puanaktualin a na-man a: Hon luppih mahmah in! a chi hi. Ahihhangin, Josef bel puanaktual nusiain inn sung apan a taikhia hi. 13 Josef a puanaktual nusiain a tai, chih Potifar' zi in a muh takin, 14 silate a sam a: En dih uh, Potifar in eite hon zahlaksak dingin hiai Hebru mi hon piilut a, tu'n hon luppih sawmin hong lut hi. Ahihhangin, nakpi-in ka kikou a, 15 ka kikou a zak takin, a puanaktual nusia-in, inn sung apan a taikhia hi, a chi hi. 16 Tua bangin, ama'n Josef puanaktual, a toupa hong tun mateng a kem a, 17 Josef toupa inn hong tun takin, hibangin thu a na tun hi: Tua Hebru sal non piilut in hon zahlaksak sawmin, ka kiang ah hong pai hi. 18 Ahihangin, nakpitaka ka kikou takin, a puanaktual ka kianga nusia-in, inn sung apan a taikhia hi, a chi hi. 19 Josef toupa'n a zi' thugen, Hibanga na silapa'n hon bawl ahi, a chih a zak takin, a hehna a kuang hi. 20 Tua bangin, Josef a man a, kumpipa' hentate kikhumna suangkul sung ah a khum hi. Tua bangin, Josef suangkul sung ah a om a, 21 Tangtawn Toupa'n amah a ompih a, a tung ah a zahngaihna a langsak hi. Tua bang mahin, suangkul ukpa' deihsakna a tangsak hi. 22 Suangkul ukpa'n suangkultangte khempeuh tunga heutuin Josef a bawl a, suangkul sunga thilhih peuhmah ah mawhpuakna a pia hi. 23 Tangtawn Toupa'n Josef a ompih a, a sep a bawl khempeuh a lamzangsak a, Josef khuta om peuhmah ah suangkul ukpa a kikum ngei kei hi.

Pianchilna 40

Suangkultangte' Mang

1 Ni bangzah hiam nungin, kumpipa' zupepa leh tanghou bawlpa'n Aigupta kumpipa a hihlungkim kei uhi. 2 Faro a nasemte nih, zu pepa lianpen leh tanghou bawlpa lianpen tung ah a heh a, 3 vengmite makaipa' inn ah amaute a khum hi. Tua bel, Josef kikhumna suangkul mah ahi. 4 Vengmite makaipa'n amaute Josef khut ah a koih a, Josef in amaute a kem hi. 5 Aigupta kumpipa' zu pepa leh tanghou bawlpa, suangkula tangte'n zan khat thuin mang a nei tuak uhi. Tua mangte a khiakna nei tuak ahi. 6 A zingsanga Josef amaute kianga hong hawh takin, amaute dah mei taka om a mu hi. 7 Tua bangin, ama'n Faro' nasem ulian, suangkultangte kiang ah: Bang achia tuni-a hibanga na mai uh dahmel ahia le? a chi hi. 8 Amaute'n a dawng uh a: Mang ka nei tuak uh a, hon khiaksak thei lah kuamah om keia, a chi uhi. Josef in amaute kiang ah: Mang khiaknate Pathian-a ahi kei-a hia? Na mang uh hon hilh dih ve ua, a chi hi. 9 Tua bangin, zu pepa lianpen in a mang Josef a hilh a: Ngaidih, ka mangin ka mai ah grepgui khat ka na mu a, 10 tua grepgui ah kahiang thum a om uh a, hong pakmuum uh a, hong pakpalh a, tua ah gahbomte hong om hi. 11 Ke'n Faro' nou ka tawi a, grepgahte ka lou a, Faro' nou sung ah ka suk a, tua nou Faro' khut ah ka na pia, a chi hi. 12 Josef in amah kiang ah: Na mang khiakna hiai ahi: Tua grep kahiang thumte ni thum ahi. 13 Ni thum sungin Faro in na lutang a domkang ding a, na dinmun hon pe kik ding a, ni danga a zu pepa na hih lai bangin, Faro' nou a khut ah na pe ding. 14 Ahihhangin, na tan a hoih hun chiangin, kei hon thei gige inla, Faro kianga ka tungthu tunin hiai inn apan kei hon lakhia in aw. 15 Kei Hebrute' gam apan thagum hata puakmanga om ing a, hiaia zong suangkula hon khum nading un bangmah hihkhial lou ka hi, a chi hi. 16 Tanghou bawlpa lianpen in zong, Josef in tua mang a hoih lam takin a hilhchian chih a mu a, Josef kiang ah: Ke'n zong mang ka nei. Ka mangin, ka lutung ah tanghou lawh thum thuapin ka na khu hi. 17 Tua lawh tungnungpen ah, Faro ading tanghou emsa nam kim a om hi. Ahihhangin, vasate'n ka lutunga lawh apan, tua tanghoute a na negai vek uh, a chi hi. 18 Josef in a dawng a: na mang khiakna hiai ahi. Lawh thumte ni thum ahi. 19 Ni thum sungin, Faro in nang apan na lutang a domkhe ding a, singkung ah hon khai ding a, vasate'n na sa a negai vek ding uh, a chi hi. 20 A ni thum ni bel, Faro' pianni hun tunni ahi a, ama'n a nasemte adingin ankuang a lui hi. Ama'n a nasemte' mai ah a zu pepa lianpen lutang a domkang a, a tanghou bawlpa lianpen lutang a domkhia hi, 21 A zu pepa lianpen bel, a dinmun ngei ah a koih kik a, ama'n Faro' khut ah zu nou a pia hi. 22 Ahihhangin, a tanghou bawlpa lianpen bel, Josef in amaute' mang a khiak bangbangin a khailum hi. 23 Tua bang teng hinapi-in, zu pepa lianpen in Josef a thei gige kei a, a mangngilhta hi.

Pianchilna 41

Faro Mangte

1 Kum nih vingveng a bei nungin, Faro in mang khat a man a: A mangin, Nail Luipi gei ah a na ding hi. 2 Tua luipi apanin, bawngpi hoih leh thau mahmah sagih hong paikhetou uh a, luipi gei loupa mun ah a gamta uhi. 3 Tuate nungin, bawngpi sangsia leh gawng mahmah sagih dang hong paikhetou uh a, tua bawngpi hoih leh thaute kiang ah hong ding uhi. 4 Tua bawngpi sangsia leh gawngte'n bawngpi hoih leh thaute a negai uhi. Tua khitin, Faro a khanglou hi. 5 Faro a ihmu kik a, a nihvei nadingin mang a man kik a: A mangin, buhkung khat ah buhvui hoih leh gahpha mahmah sagih a om hi. 6 Tua nungin buhvui sia leh suahlam huih in a mut geu semsom sagih dang hong om hi 7 Tua buhvui sia leh geu semsomte'n buhvui hoih gahphate a valh uhi. Tua khitin, Faro a khanglou a, a mang a nahi hi. 8 Zingsang hong hi a, Faro a lungnuam kei mahmah hi. Tua bangin, Aigupta gam sunga mitkhialdawi siam leh mipil teng khempeuh a samsak hi. Ama'n amaute kiang ah a mangte a gen a, ahihhangin, kuama'n ama' adingin tua mangte a khiaksak thei kei uhi. 9 Tua laitakin, Faro zu pepa liapen in amah kiang ah: Tuni-in ka khelhna ka phawk khia. 10 Khatvei, Faro a silate tung ah a heh a, kei leh tanghou bawlpa lianpen tangveng makaipa' inn ah hon khum hi. 11 Koute gel in zan khat thuin mang ka nei tuak uh a, tua mangte'n a khiakna a nei tuak uhi. 12 Tua tangveng makaipa' sila, Hebru tangval khat zong koute kiang ah a taang hi. Koute'n ka mangte uh amah kianga ka gen uleh, ama'n ka mangte uh hon khiaksak a, ka mang tuak uh khiakna hon hilh hi. 13 Ama'n ka mangte uh hon khiaksak bangbangin hong tung taktak a, kei pen ka dinmun ngei piakin ka om a, tua tanghou bawlpa lianpen bel khailupin a om, a chi hi. 14 Tua khitin, Faro in Josef a samsak a, amah suangkul apan kintakin hon tonpih uhi. Josef in a mul a met a, a puansilhte a kheng a, Faro' mai ah hong pai hi. 15 Faro in Josef kiang ah: Mang khat ka nei a, kuama'n lah hon khiaksak thei kei a, ahihhangin, nang bel mang na zak chiangin na khe thei, chih ka za hi, a chi hi. 16 Josef in Faro a dawng a: Ke'n zaw ka khe thei kei a, ahihhangin, Pathian in Faro adingin a khiakna kim hon pe ding, a chi hi. 17 Faro in Josef kiang ah: Ka mangin, Nail Luipi gei ah ka na ding a, l8 tua luipi apanin bawngpi hoih leh thau mahmah sagih hong paikhetou a, tua luipi gei loupa mun ah a gamta uhi. 19 Tuate nungin, bawngpi sangsia leh gawng mahmah sagih dang hong paikhetou uhi. Aigupta gam sung teng ah, tua banga bawngpi melsia ka mu ngei kei hi. 20 Tua bawngpi melsia leh gawngte'n bawngpi thau hong paikhe masate a negai uhi. 21 Tua banga a nekgaih hangun a nek ma uh bangin, a melse lai veve uh a, a nek uh a kithei tuan kei hi. Tua nungin, thakhatin ka khanglou hi. 22 Tua baan ah, mang ka nei kik a, ka mangin, buhkung khata buhvui hoih leh gahpha mahmah sagih om ka mu hi. 23 Tuate nungin, buhvui sia leh suahlam huih in a mut geu semsom sagih dang hong om hi. 24 24 Tua buhvui siate'n, buhvui hoih sagihte a valh uhi. Hiai mangte dawisiamte kiang ah ka gen a, ahihhangin, amaute kuamah in a khiakna a gen thei kei uhi, a chi hi. 25 Tua khitin, Josef in Faro kiang ah: Faro' mangte khat ahi a, a kibang ahi. Pathian in a thilhih dek, Faro kianga theisak ahi. 26 Bawngpi hoih sagihte kum sagih ahi a, buhvui hoih sagihte zong kum sagih ahi. Mang khat leh kibang ahi. 27 Tua nunga hong paikhia, bawngpi gawng leh melsia sagihte kum sagih ahi a, buhvui sia leh suahlam huih mut keu sagihte zong kum sagih ahi. Tuate kial kum, kum sagih ahi. 28 Faro kianga ka gen bangbang ahi: Pathian in a thilhih dek, Faro kianga theisak ahi. 29 Aigupta gam sung teng ah, hauh kum, kum sagih a om ding a, 30 ahihhangin, kial kum, kum sagih in a zui ding. Tua hun chiangin, Aigupta gama hauh kumte a kimangngilh ding a, tua kialpi in a gam a negawp khin ding. 31 A nunga kial nase mahmah ding ahih manin, gam sunga hauhna kuama'n a thei gigeta kei ding. 32 Faro kianga nam niha mang a kipiakna hang bel, Pathian in hiai thu kiptaka a sehsa ahi a, Pathian tak in ahih pah ding man ahi. 33 Tuin, Faro in mi thil theisiam leh pii khat zong henla, Aigupta gam tung ah thu neisak hen. 34 Faro in hiai hih henla, tua baan ah, gam sung ah nasem uliante sep henla, hauh kum, kum sagih sunga Aigupta gama buh piangte seh nga-a seh khat kaikhawmsak hen. 35 Amaute'n hauh kumte-a buh piangte kaikhawmin, Faro thuneihna nuai ah, khawpite ah an koihching uhen. 36 Aigupta gama tung ding kial kum, kum sagih sung nek dingin, gam buppi adingin tuate kisiit hen. Tua bangin, kial hun sunga gambup a manthat louh nading ahi ding hi, a chi hi. 37 Faro leh a nasem uliante'n hiai thusawm hoih a sa uhi. 38 Tua bangin, Faro in amaute kiang ah: Pathian' Kha omna hibang mi peuhmah mu zou ding i hi maw? a chi hi. 39 Tua khitin, Faro mah in Josef kiang ah: Pathian in hibang teng nang hon theisak ahih chiangin, nang banga thil theisiam leh pii dang om lou hi. 40 Nang ka innpi ukpa na hi ding a, ka mite khempeuh in na kama thupiakte a man ding uh ahi. Kumpitutphah tawh kisai kia ah, nang sangin ka lianzaw ding hi, a chi hi.

Josef in Aigupta Gam Uk

41 Tua bangin, Faro in Josef kiang ah: En in, Aigupta gambup tunga thuneiin kon koih hi, a chi a, 42 a khut apan a suainamna zungbuh a lakhia a, Josef khut ah a bunsak hi. Puan malngata kibawl kumpi puanaktual a silhsak a, a ngawng ah khama kibawl khainiang a oksak hi. 43 Ama'n kangtalai ah anuaia thuneipen nihna hi-in Josef a tuangsak a: A mai ah khukdin un! chi-in mi a tangkousak hi. Tua bangin, Aigupta gam bup ukpain Josef a bawl hi. 44 Faro in Josef kiang ah: Kei Faro ka hi. Ahihhangin, nang' thu louin Aigupta gambup ah kuama'n khut hita leh khe hita leh a lik kei ding, a chi hi. 45 Faro in Josef min dingin Zafenath Panea a sa a, zi zong a guan a, On khua siampi Potifera' tanu Asenath a pia hi. Tua khitin, Josef in Aigupta gambup a tawnsuak hi. 46 Aigupta kumpipa Faro' nna a sep chil laiin, Josef kum 30-a upa ahi. Amah Faro kiang apan a kipankhia a, Aigupta gam sung teng ah a zin hi. 47 Hauh kum, kum sagih sungin, gam sung ah buh tampi mahmah a piang hi. 48 Aigupta gama hauh kum, kum sagih sung buh piangte Josef in a kaikhawm a, khawpite ah a koihching hi. Khawpi teng ah, a kimkot loua buh piangte a koih hi. 49 Josef in buh tampi mahmah a koihching a, tuipi piaua sehnel bang mai ahi. Buh a tamluat manin, teh seng zong ahi kei a, a chiamteh nawn se kei hi. 50 Kial kumte hong tun main, Josef in, On siampi Potifera' tanu Asenath tawh kal ah tapa nih a nei hi. 51 Josef in: Pathian in ka lungkhamnate khempeuh leh ka pa' innkawte hon mangngilhsakta, chi-in a tamasapen' min dingin, Manase a sa hi. 52 A tapa nihna a hih leh: Pathian in ka thuakgimna gam ah hon chiphasakta, chi-in a min dingin, Efraim a sa hi. 53 Aigupta gam ah, hauh kum, kum sagih a beita a, 54 Josef in a genkholh bangbangin, kial kum, kum sagih a kipanta hi. Gam teng khempeuh ah kial a kia a, ahihhangin, Aigupta gam sung khempeuh ah an a om hi. 55 Tua bangin, Aigupta gam khempeuh in kial a thuak takin, Faro kianga an ngenin mite a kikou uhi. Faro in Aigupta mite kiang ah: Josef kiang ah pai unla, hon hilh bangbangin gamta un, a chi hi. 56 Gam sung khempeuh ah kial a kia a, Josef in buhbukte khempeuh a hong a, Aigupta mite kiang ah buh a zuak hi. Aigupta gam sung khempeuh ah kial a na mahmah hi. 57 Gam tenga kial nakpitaka a kiak manin, Josef apan buh lei dingin gam teng apan mi Aigupta gam ah hong kuan uhi.

Pianchilna 42

Josef Sanggamte Aigupta ah

1 Aigupta gam ah buh a lu om, chih Jakob in a theih takin, a tapate kiang ah: Banghanga noute kientuah maimah na hi ua? 2 Aigupta gam ah an a om, chih ka za hi. Eite i nuntak theih a, i sih louh nadingin kuan unla, eite ading buh valei un, a chi hi. 3 Tua bangin, Josef sanggamte sawm, Aigupta-a buh lei dingin a kuansuk uhi. 4 Ahihhangin, Jakob in Josef sanggampa Benjamin bel, a sanggamte a zuisak kei hi. Ahang bel, Benjamin in tuahsia khattou a tuak kha ding, a chi-a ahi. 5 Kanan gama zong kial kia a hih manin, buh lei dinga kuante lak ah Israel' tapate zong a kuan uhi. 6 Josef bel, tua gam ukpipa ahi a, tua gam mite khempeuh kianga buh zuakpa amah ahi. Tua bangin, Josef sanggamte hong pai uh a, a mai ah leisi-in hong kun uhi. 7 Josef in a sanggamte a muh takin, amaute a meltheih a, ahihhangin, a kitheihmawhbawl a, amaute aw khauhtakin a houpih a: Koi apana hong pai na hi ua? a chi hi. Amaute'n a dawng uh a: Buh lei dinga Kanan gam apan hong pai hi ung, a chi uhi. 8 Josef in a sanggamte meltheih mah leh, amaute'n bel amah a meltheih kei uhi. 9 Ama'n amaute tungthu, a manga a matte a theikhia a, amaute kiang ah: Noute enkhemi na hi ve ua! Ka gam uh koi lailai venlouha om hiam, chih ensim dinga hong pai na hi tawk ve ua! a chi hi. 10 Amaute'n a dawng uh a: Toupa aw, hi peuhmah kei ve ung e. Na silate, buh lei dinga hong pai hi zaw ve ung aw. 11 Koute khempeuh mi khat' tapa ngen ka hi uh a, na silate mi muanhuai ka hi uh a, enkhemi ka hi kei uhi, a chi uhi. 12 Ama'n: Hi kei uteh! Ka gam uh koi lailai venlouha om hiam, chih ensim dinga hong pai hi uteh, a chi hi. 13 Ahihhangin, amaute 'n: Na silate, Kanan gama teng mi khat' tate, unau pasal sawmlenih pha ka hi uh a, a nautum pen ka pa uh kiang ah a om a, khat ahih leh a om nawn kei, a chi uhi. 14 Josef in amaute kiang ah: Enkhemi hi mah uteh! Ka chih bangbang hi mah uteh! 15 Tu'n hibanga ettel na hi ding uhi: Na nautum pen uh hiaia hong pai kei leh, Faro' hinna louin kon hilh ahi: Hiai mun na nuse kei hiai ding uhi. 16 Thutak gen na hina uhiam, chih a kitel nadingin na lak ua mi khat kisawl unla, na sanggampa uh vapi hen. A dang teng hiai ah suagkul na taang ding uhi. Tua bang ahih kei leh, Faro' hinna louin kon hilh ahi: Enkhemi na hi taktak uh, chihna ahi mai! a chi hi. 17 Tua bangin, amaute khempeuh suangkul ah ni thum a khum hi. 18 A ni thum ni-in, Josef in amaute kiang ah: Ke'n Pathian kihta ka hih manin, hibangin hih unla, hing un. 19 Mi muanhuai na hih uleh, na lak ua khat hiai ah suangkul ah tang henla, a dang teng pai unla, gilkiala om na inkawte uh an vapuak un. 20 Ahihhangin, na nautum pen uh ka kianga non pii ngeingei ding uh ahi. Tua hi leh, na thugente uh ettelna ahi ding a, na si kei ding uhi, a chi a, amaute'n tua bangin a hih panta uhi. 21 Amaute'n bel: I sanggampa hanga gawtna thuak i hi taktakta ve. A hinna hondam dinga hon nget ngutngut laiin, dahin a lungkham mahmah a, hinapi-in, eite'n a ngetna i ngaikhe nuam kei ua, tu'n ama' mangbatna eite tunga tu ahita ve! a kichi uhi. 22 Reuben in a dawng a: Naupang tung ah khial kei un, kon chi tawk hi lou maw? Ahihhangin, na ta kei teitei uh a, tu'n a sisan man eite tunga hong kisik a hita ve! a chi hi. 23 Josef in bel kamlet zang ahih manin, a thugen uh a thei, chih lam himhim amaute'n a phawk kei uhi. 24 Josef in lehlam a nga a, a kap a, ahihhangin, amaute' lam ngain amaute a houpih kik hi. Ama'n Simeon a tuamin a piikhia a, amaute' mitmuhin a hen hi. 25 Josef in amaute' buh ip teka buh guansak a, a sumte uh a ip tek ua guankiksak ding leh, a lam an ding uh piak ding thu a pia hi. Hibanga a hihsak khitin, 26 amaute'n a sabiltungte uh, buh ipte a suan uh a, a kipankhia uhi. 27 Amaute a zan giahna mun uah, amaute laka khat in, sabiltung an pe dinga kisain, a buh ip a phel a, a buh-ip sung ah a sum a na om hi. 28 Ama'n a sanggamte kiang ah: Ka Amaute diphawmin a om uh a, Rom lauin a kientuah uh a: Pathian in eite bang hon lawh ahita maia? a kichi uhi. 29 Amaute Kanan gama a pa uh Jakob kiang hong tun takun, amaute tunga thil tungte khempeuh amah a hilh uhi. 30 Amaute'n: Tua gam khempeuh tunga toupa a hipa'n koute aw khauhtakin hon houpih a, a gam enkhemi bangin hon bawl hi. 31 Ahihhangin, koute'n amah kiang ah: Koute mi muanhuai ka hi uh a, enkhemi ka hi zenzen kei uh. 32 Koute pa khat suan unau pasal sawmlenih ka hi uh. Khat bel a om nawn kei a, ka nautum pen uh Kanan gam ah, ka pa uh kianga om ahi, ka chi uhi. 33 Tua khitin, tua gam toupa a hipa'n koute kiang ah: Mi muanhuai na hina uhiam, chih hibanga theitel ding ka hi. Na sanggamte uh khat, hiai ah ka kiang ah nusia unla, gilkiala om na innkawte uh ading buh puain a dang teng pai un. 34 Ahihhangin, na nautum pen uh ka kiang ah hon pii un, hi leh, noute enkhemi hilouin, mi muanhuai na hi uh, chih ka theitel ding. Tua khit chiangin, na sanggampa uh kon pe kik ding a, hiai gam ah sum na sin thei ding uh, hon chi mawk hi, a chi uhi. 35 Tua banga a buh ip tek uh a but uleh, a buh ip uah a dangka ip uh a om tek hi. Amaute leh a pa un, a dangka ipte uh a muh takun, a lau mahmah uhi. 36 A pa uh Jakob in amaute kiang ah: Noute'n ka tate non taansakta ve ua le! Josef lah om nawn lou, Simeon lah om nawn lou, tu'n Banjamin tonpih ding na sawm lai uh, bang teng kei adinga hoihlou ngen a hita ve! a chi hi. 37 Reuben in a pa kiang ah: Amah kon tonpih kik kei ngeingei leh ka tapate gel that in. Amah ka mawhpuaknain koih inla, na kiang ah kon tonpihkik teitei ding, a chi hi. 38 Ahihhangin, Jakob in: Ka tapa in noute hon zuisuk peuhmah ken teh. A upa lah sita a, amah kia ka neih hita. Ama' tung ah tuahsiatna hong tung leh, ka samkangpi tawh, khakham veia misikhua hon zuansak ding hi uteh, a chi hi.

Pianchilna 43

Josef Sanggamte Aigupta Hawhkik

1 Gam sung ah kial a na mahmah lai hi. 2 Aigupta gam apan a puak uh buh a gaih takun, a pa un amaute kiang ah: Kuansuk kik unla, buh va-lei zek un, a chi hi. 3 Ahihhangin, Judah in amah kiang ah: Tua mipa'n khauhtaka hon vau a: Na sanggampa uh non tonpih kei uleh, ka maitang na mu nawn kei ding uh, hon chi mawk ahih chiangin, 4 ka sanggampa uh non zuihsak nop ding leh, ka kuansuk ding uh a, nang ading buh ka valei ding uh. 5 Ahihhangin, ka sanggampa uh non zuihsak nop kei ding lebel, tua mipa'n: Na sanggampa uh non tonpih kei uleh, ka maitang na mu nawn kei ding uh, hon chi mawk ahih chiangin, ka kuansuk kei ding uh, a chi hi. 6 Israel in: Banghanga sanggam dang na neih uh, tua mipa vahilh sese a, ka tunga thil hoihlou hon tun na hi mahmah ua? a chi hi. 7 Amaute'n a dawng uh a: Tua mipa'n koute leh, ka innkuan sung thu uh hon teldot lua a: Na pa uh dam lai maw? Sanggam dang na nei uhia? hon chi a, koute'n a dotnate ka dawn uh hi lei a, Na sanggampa uh hiai ah hon tonpih un, a chih se ding lam bangchi-a thei chitchiat ding ka hi ua? a chi uhi. 8 Tua khitin, Judah in a pa Israel kiang ah: Naupangpa kei hon zuisak in, kuan pah n'ung. Hi leh, koute leh nang leh, ka tate uh nungta ding a, si lou ding hi hang. 9 Ama' tungthu ah, keimah mahin mawhpua ning. Amah na kianga kon tonpih kik kei a, hiaia na mai kon tut kei leh, na mai ah a mawh khuden ning. 10 Kizekai lou hi leh, tuin a nihveina hong tungkik khinta ding hi ung, a chi hi. 11 Tua bangin, a pa uh Israel in: Tua bang hilou theilou ahih leh, hibangin hih un: Gamsung theigah hoihpente na ip sung uah guang unla, tua mipa kiang ah thawnpiak dingin pia un. Tua baan ah, singnai damdawi tawmkha, khuaizu, thil namtui tuamtuam mura khawng, makha tang leh almon tang tawmkha tek tawh pua un. 12 Na ip sung ua dangka kikoihkikte na ditkik uh kul ding ahih manin, dangka sum a lehniha tam keng un. Theihkhelh hi mahmah ding hi. 13 Na sanggampa uh zong tonpih unla, tua mipa kiang ah hawhsuk pah un. 14 Ama'n na sanggampa uh khatpen leh Benjamin hon zuihkiksak nadingin, Pathian Vanglianpen in amah mai ah, noute zahngaihna hon musak hen aw. Kei zaw, ka tate taana ka dah leh dah hita mai ning, a chi hi. 15 Tua bangin, amaute'n tua thawnpiakte tawh, dangka sum a lehniha tam tawh a tawi uh a, Benjamin zong a tonpih uhi. Amaute Aigupta gam ah, kintakin a kuansuk uh a, Josef mai ah a vakilak uhi. 16 Josef in amaute tawh omkhawm Benjamin a muh takin, a innsung kempa kiang ah: Hiai mite ka inn ah pii inla, gan gou inla ankuang lui dingin na kisa in. Tusuna hiai mite'n kei tawh ankuang umkhawm ding uh ahi, a chi hi. 17 Tua mipa'n Josef hilh bangbangin a hih a, tua mite, Josef inn ah a tonpih hi. 18 Tua banga Josef inna tonpih ahih takun, amaute a lau mahmah uhi. Amaute'n: Hun masa-a, i buh ipte dangka sum kikoih kikte hanga hiaia hon tonpih ahi peuhmah uh. Ama'n eite hon sual a, i sabiltungte tawh hon man a, sala hon bawl theih na'ng hunlem zong a hita, a kichi uhi 19 Tua bangin, amaute Josef inn sung kempa' mai ah a hong pai uh a, inn sung lutna kong bul ah, amah a houpih uhi, 20 Amaute'n: Toupa aw, hiaia kong pai masak laiun, buh lei dinga hong pai ka hi uhi. 21 Ahihhangin, zan giak dinga ka khawlna mun ua, mi chih in ka ipte uh ka phel uleh, ka ip gong tek uah ka dangka sum uh, a ngei zahzah ka mu uhi. Tua bang ahih manin, tuin tua dangka sumte kon pua uhi. 22 Tua baan ah, buh lei nading dangka sum kon puak beh uhi. Koumau' dangka sumte mah, kua'n ka ip sung ua na koih kik hi mahmah ding hiam, ka thei zou kei uhi, a chi uhi. 23 Ama'n: Khamuangtakin om unla, lau kei un. Noute' Pathian, na pa uh' Pathian in na ip sung ua gou hon na koihsak ahi ve. Na dangka sumte uh lah ke'n zangkhinta ing a, a chi hi. Tua khitin, ama'n Simeon amaute kiang ah hon piikhia hi. 24 Tua inn sung kempa'n Josef inn sung ah amaute a lutpih a, khe sil nading tui a lui a, a sabiltungte uh gan  an a pia hi. 25 Amaute'n tua laia an ne ding ahi uh, chih zakhin ahih manun, Josef hong pai chianga thawnpiak a piak dingte uh a na bawlkhol uhi. 26 Josef inn hong tun takin, amaute'n tua inn sunga thawnpiak hon tawilutte uh, amah kiang ah a pia uh a, a mai ah leisi-in a kun uhi. 27 Josef in amaute' chidamna thu khawng a kan a, tua baan ah: A thu non hilh uh, na pa teek uh bang a chi a, dam lai ahi-na maw? a chi hi. 28 Amaute'n a dawng uh a: Na sila ka pa uh dam lai a, chidam mahmah eive, a chi uhi. Tua bangin, amaute'n amah zahna piain, a mai ah a khukdin uhi. 29 Josef a dakkhia a, a sanggampa, a nu' tapa a laigui zom Benjamin a mu a: A thu non hilh uh, na sanggampa uh hiai ahi maw? a chi a, tua khitin, Benjamin kiang ah: Ka tapa aw, Pathian na tung ah hehpihsiam hen, a chi hi. 30 Josef bel a sanggampa a muhin a khase mahmah a, kah nading mun zongin kintakin a paikhia hi. Ama' inndan tuam sung ah a lut a, a vakap hi. 31 Josef in a mai a phiat khitin, hong pawtkhia a, a ki-ip teitei a: An hon luita un, a chi hi. 32 Josef a tuamin an a lui uh a, a sanggamte a tuamin, amaute ankuang umpih Aiguptate a tuamin, a lui uhi. Aiguptate'n bel Hebrute tawh ankuang umkhawm ngeilou uh ahi. Amau adingin thil sianglou ahi. 33 Josef sanggamte'n Josef mai ah ankuang a um uh a, a upat danun, a upapen apan a naupangpen dongin a kivual uhi. Amaute bel lamdangsain a ki-entuah uhi. 34 Josef dawhkan apan amaute' tan ding a kihawmsak laiin, Benjamin' tan bel midangte' tan lehnga ahi. Tua bangin, amaute'n Josef tawh nuamtaka nein a dawnkhawm uhi.

Pianchilna 44

Josef Nou

1 Josef in a innsung kempa kiang ah thu a pia a: Hiai mite' ipte ah, a puakzawh zahzah uh buh guang inla, a ip gong tek uah a dangka sumte tek uh guang in. 2 Tua khit chiangin, a naupangpen' ip gong ah, nguna kibawl ka nou leh a buh leina dangka sum guangkhawm in, a chi hi. Tua bangin, Josef gen bangbangin, a innsung kempa'n a hih hi. 3 Zingkhua hong vak phetin, tua mite, a sabiltungte uh tawh a kipankhia uhi. 4 Khawpi apan gamla a pai maun, Josef in innsung kempa kiang ah: Tua mite delh mengmeng inla, na phak chiangin, amaute kiang ah: Banghanga noute'n hoihna gilou-a thuk na hi ua? 5 Hiai nou ka pu zudawnna nou, a aisanna-a a zat mahmah hilou maw? Na thilhih uh thil gilou mahmah ahi, chi in, a chi hi. 6 Josef insung kempa'n amaute a phak takin, hiai thute amaute kiang ah a gen a, 7 ahihhangin, amaute'n: Banghanga ka toupa un hibang thute gen na hia? Na silate'n hibang thil hih peuhmah lou e! 8 Ka ip gong ua dangka sum ka muh laiun zong, Kanan gam apan kon pawkik uhi. Banghanga na pu' inn sung apan, kham hita leh ngun hita leh, gu nuam peuhmah ding ka hi ua oi? 9 Na silate laka khat peuh zong, tua nou na muhna penpen a si ding ahi. Adangte khempeuh zong ka toupa uh' silain taang pah n'ung, a chi uhi. 10 Ama'n: Na gen bangbang uh hita hen. Hiai nou kimuhna penpen ka salin a taang ding a, midangte'n mawh na paw kei ding uh, a chi hi. 11 Amaute'n a ipte uh leilak ah a ngakhe pah uh a, amaua tek a phel uhi. 12 Tua bangin, Josef innsung kempa'n, a upapen' ip apan a naupangpen' ip sung a zong a, tua nou pen, Benjamin' ip sung ah a na om hi. 13 Hibang thu a theih takun, amaute'n a puansilhte uh a botkek uhi. Tua khitin, a sabiltungte uh van a suan uh a, khawpi ah a kilehkik uhi. 14 Judah leh a sanggamte, Josef inn hong tun laiun, Josef bel inn sung ah a na om lai hi. Amaute a mai ah lei si-in a bok uhi. 15 Josef in amaute kiang ah: Bang hih na hita mai ua? Kei bang, ai saana hiai bang thilte mukhe thei mi ka hi, chih na thei kei ua hia? 16 Judah in a dawng a: Ka toupa kianga bang gen ding ka hita mai ua? Bang gen mahmah ding! Bangchi-a koute kihahsiang thei ding? Pathian in na silate' lungsimsiatna hon mukhia a hita. Ka toupa' sal ka hita uh, koute leh tua nou a kimuhnapa tawh, a chi hi. 17 Ahihhangin, Josef in: Ke'n hibang hih maizen lou e! Nou kimuhnapa kia ka sal ahi ding. A dangte bel, lungmuangtakin na pa uh kiang ah na pai thei ding uh, chi hi. 18 Judah in Josef a va-naih a: Ka toupa aw, hehpihtakin, thu kamkhat hon gensak in, kon ngen ahi. Faro tawh kikim himah lechin, na silapa tung ah heh ken. 19 Ka toupa'n na silate kiang ah non dong a: Pa na nei uhiam, sanggam na nei uhiam? non chi a, 20 koute'n kon dawng uh a: Pa ka nei uh a, puteek a hita. A teek nunga a neih tapa naupang lai khat a om. A sanggampa a sihtak manin, a nu' tapate laka omsun amah kia a hita a, a pa'n amah it mahmah ahi, chi-in kon hilh uhi. 21 Tua khitin, nang na silate kiang ah: Ka mit mahmah-a ka muh dingin, tua naupangpa ka kiang ah hon tonpih un, non chi a, 22 koute'n ka toupa uh kiang ah: Naupangpa'n a pa nuse leh a pa si zou ding hi. Ama'n a pa nuse thei lou ding ahi, chi-in kon dawng uhi. 23 Ahihhangin, nang na silate kiang ah: Na nautumpen uh, noute tawh hong ton kei leh, ka maitang na mu nawn kei ding uh, chi-in hon hilh hi. 24 Tua bang ahi a, na sila, ka pa uh kianga ka paitouh takun, ka toupa un koute kianga na thugente amah ka hilh uhi. 25 Ka pa un: Kuansuk kik unla, eite ading buh tam deuh va-lei beh un, hon chi hi. 26 Ahihhangin, koute'n: Kuansuk thei lou e. Ka nautumpen un hon zuih leh, ka kuansuk ding ua, ka nautumpen utawh ka hih kei ding uleh, tua mipa' maitang mu thei lou ding hi ungj, ka chi uhi. 27 Tua khitin, na sila, ka pa un: Ka zi in kei adingin tapa nih hon neihsak, chih noute'n na thei uhi. 28 Khat in kei hon nusia a, ke'n: Balzana om ahita mahmah ve maw, ka chi hi. Tua nung himhim amah ka mu nawn kei hi. 29 Hiai tapa pen zong hon lakmangsak zel le uchin, tuahsia khat tuak zel leh, ka samkangpi tawh, khakham veia misikhua hon zuansak ding hi uteh, a chi hi. 30 Tu'n kei na silapa, ka pa kianga vatungin hiai naupangpa koute kiang ah om kei leh, hiai naupangpa hinna leh a pa' hinna kizom ahih chiangin, 31 hiai tangvalnou a om nawn kei, chih a muh tak chiangin amah si mahmah ding ahi. Tua hi leh, na silate'n, na sila ka pa uh, a samkangpi tawh khakham veia misikhua tun petmah ding hi ung. 32 Kei na silapa mahmah in naupangpa tungthu-a mawhpaw dinga kipia ing a, ka pa kianga: Amah na kiang kon tut kei leh, nang ka pa mai ah, ka damsung teng a mawh khuden ning! chi ka hi. 33 Tua bang ahih manin, hiai naupangpa taangin kei na silapa mah hiai ah ka toupa' sal hiden dingin hon omsak inla, hiai naupangpa zaw a sanggamte tawh tonsak mahmah in. 34 Hiai naupangpa tonpih loua, kei ka pa kiang bangchi tun mahmah ding ka hia? Hi thei lou hi. Ka pa tunga lungkham-sinkham tung ding hon musak mahmah ken, a chi hi.

Pianchilna 45

Josef Kipulakna

1 Tua khitin, Josef a maia dingte' mai ah a ki-ip zou nawn kei a, a kikoukhia a: Ka mai apan michih pawtkhesak un, a chi hi. Tua bangin, Josef a sanggamte kianga a kipulak laitakin mi dang kuamah a om kei hi. 2 Josef nakpitakin a kapkhia a, Aiguptate leh Faro' innkawte'n a za uhi. 3 Josef in a sanggamte kiang ah: Kei Josef ka hi! Ka pa damlai maw? a chi hi. Ahihhangin, a sanggamte bel a mai ah lau luain a om uh a, a dawng thei himhim kei uhi. 4 Josef in a sanggamte kiang ah: Hon naih un, a chi a, tua banga amaute'n a naih takun, ama'n: Kei Aigupta gama na zuak uh, na sanggampa uh Josef ka hi! 5 Ahihhangin, tuin lungkhamin mangbang kei unla, hiai gama non zuakkhiak manun zong kihehsan sam kei un. Ahang bel, hinnate hu dinga Pathian in noute ma-a kei hon na-sawl masa ahi zaw. 6 Tuin, kum nih sung kial a keta a, tu baan kum nga sung zong leileh leh buhlaak omlou lai ding ahi. 7 Ahihhangin, gam sunga noute adinga a khangsawn ding hon hawisak ding leh, hutkhiakna thupitaka noumau' hinna hon hutkhiak nadinga Pathian in noute ma-a kei hon na-sawl masa ahi. 8 Tua bang ahih manin, hiaia hon sawlsuk noute na hi kei uh a, Pathian ahi zaw. Ama'n, Faro adinga pa hi ding, a innsung adinga toupa hi ding leh, Aigupta gam sung teng vaihawmpa hi dingin kei hon bawlta hi. 9 Tuin, ka pa kiang ah paikik mengmeng unla, a kiang ah: Na tapa Josef in hiai a gen a: Pathian in Aigupta gam sung teng toupain kei hon bawlta. Zekai louin, ka kiang ah hong paisuk meng in. 10 Goshen gam ah na teeng ding a, nang leh na tate leh, na tute tawh, na belamhonte leh na ganhonte leh na neih khempeuh tawh, ka kiang nai ah na om ding. 11 Kum nga dang kial ke lai ding ahih manin, tua ah noute adingin nek ding kon suktuahsak ding. Tua hi kei leh, nang leh na innkawte leh na mite khempeuh na kialgawp ding uhi, a chi, chi un. 12 Noute kianga thugenpa kei mah ka hi, chih noute mahmah in mitin non mu uh a, Benjamin in zong hon mu hi. 13 Aigupta gama pahtawina khuksaka ka om thu khempeuh leh, mita na muhte khempeuh uh ka pa hilh unla, amah hiai ah hon piisuk pah un, a chi hi, 14 Tua bangin, ama'n a sanggampa Benjamin a ngawngkawi a, a kap hi. Benjamin in zong amah a ngawngkawi a, a kap hi. 15 Ama'n a sanggamte khempeuh zong a tawp a, amaute a kahkhum hi. Tua nungin, a sanggamte'n amah a houpih ngamta uhi. 16 Josef sanggamte, Aigupta gam ah hong paisukta uh, chih thu Faro' innpi a tung a, Faro leh a nasem uliante khempeuh a kipak uhi. 17 Faro in Josef kiang ah: Na sanggamte kiang ah: Hibangin hih un: Na gante uh buh puakkhopin pawsak unla, Kanan gam ah kilehkik un. 18 Na pa uleh na innkuante uh ka kiang ah hon piisuk un. Aigupta gam hoihna pen kon pe ding a, a gam hoihna na ne ding uhi, chi-in hilh in, a chi hi. 19 Tua baan ah, hibanga amaute hilh dingin thu kon pia hi: Hibangin hih un. Na tate uleh na zite uleh, na pa uh adingin Aigupta apanin kangtalaite keng unla, na pa uh vapii unla, hong pai un. 20 Na neih na lamte uh khelah kei un. Aigupta gam teng noute-a hi ding ahi, chi un, a chi lai hi. 21 Tuachi-in, Israel' tapate'n tua bangin a hih uhi. Josef in Faro' thupiak bangin, a sanggamte kiang ah kangtalaite a pia a, a lam an ding uh zong a guan hi. 22 Amaute puansilh thakte a pe tek a, Benjamin bel ngun sik shekel 300 leh a kikhen nading puansilh kop nga a pia hi. 23 Josef in a pa adinga a khakte hiaite ahi: Aigupta van hoihte puakkhopa pua sabiltung sawm khat, a hong paina-a a lam an ding buh leh tanghou puakkhopa pua sabiltungnu sawm khat. 24 Tua bangin, Josef in a sanggamte a khakhia a, amaute a kipatkhiak ding laiun amaute kiang ah: Lampi ah kina-kiselin om kei un aw! a chi hi. 25 Tua bangin, amaute Aigupta apanin a kipankhia uh a, Kanan ah a pa uh Jakob kiang hong tung uhi. 26 Amaute'n a pa uh kiang ah: Josef damlai ahi! Tham louin, Aigupta vaihawmpa-a pang ahi, chi-in a hilh uhi. Jakob in bel a thugente uh a um ngam zawzen kei a, a lungtang vana khai a bang hi. 27 Ahihhangin, Josef in amaute a hilhte khempeuh amah a hilh takun leh, amah puak nadinga Josef in kangtalai a khakte a muh takin, a pa uh Jakob' lungtang a halhta hi. 28 Tua bangin, Israel in: Tu'n ka taksangta! Ka tapa Josef damlai ahi. Ka sih main ka paisuk ding a, amah ka vamu ding, a chi hi.

Pianchilna 46

Jakob Aigupta Gam Tung

1 Tuachi-in, Israel, a neih teng tawh a kipankhia hi. Amah Beersheba a tun takin, a pa Isak' Pathian mai ah kithoihna a bawl hi. 2 Tua zanin, Pathian in mengmuhna tungtawnin Israel a houpih a: Jakob! Jakob! chi-in a sam hi. Jakob in a dawng a: Hiai ah ka om, a chi hi. 3 Pathian in: Kei Pathian tak, na pa' Pathian ka hi. Aigupta gama paisuk ding lau ken. Tua ah minam thupi khata hon bawl ding ka hi. 4 Aigupta gama na paisukna ah kon ompih ding a, tua apanin kon pikik ngeingei ding. Na sih chiangin, na tapa Josef khut mahmah in na mit hon mitsisak ding hi, a chi hi. 5 Tua nungin, Jakob in Beersheba a nusia a, Israel' tapate'n a pa uh Jakob leh, amaute' tate leh, a zite uh, kangtalaite ah a tuangsak uhi. Tua kangtalaite bel, Faro in ama' tuan nading maha a khakte ahi. 6 Amaute'n a gantate uh zong hon kai uh a, Kanan gama neih leh lam a khopte uh zong hon pua uhi. Tua bangin, Jakob leh a suante khempeuh Aigupta gam hong tung uhi. 7 Ama'n a suante khempeuh, a tapate leh tupate leh, a tanute leh a timute hon paipih hi. 8 Aigupta gama paisuk, Jakob leh a suante, tua Israel' tapate' minte hiaite ahi: 9 Jakob' tamasa Reuben' tapate: Hanokh, Palu, Hezron leh Karmi ahi. 10 Simeon' tapate: Jemuel, Jamin, Ohad, Jakhin, Zohar leh Kanan numei' tawh kala a neih tapa Shaul ahi. 11 Levi' tapate: Gershon, Kohath leh Merari ahi. 12 Judah' tapate: Er, Onan, Shela, Perez leh Zera ahi. Ahihhangin, Er leh Onan bel Kanan gam ah a si uhi. Perez' tapate: Hezron leh Hamul ahi. 13 Isakhar' tapate: Tola, Pua, Jashub leh Shimron ahi. 14 Zebulun' tapate: Sered, Elon leh Jaleel ahi. 15 Hiaite bel, Padan Aram-a Jakob in Lea tawh kala a neih, a tanu Dina simlouh a, a tapate ahi. A tapate leh tanute a vekun 33 ahi. 16 Gad' tapate: Zefon, Hagi, Shuni, Ezbon, Eri, Arodi leh Areli ahi. 17 Asher' tapate: Imna, Ishva, Ishvi leh Beria ahi. Amaute' sanggamnu Sera ahi. Beria' tapate: Heber leh Malkiel ahi. 18 Hiaite bel, Jakob in Zilpa tawh kala a neih tate ahi. Zilpa bel, Laban in a tanu Lea a piak silanu ahi. Avekun sawmleguk ahi. 19 Jakob' zi Rakhel' tapate: Josef leh Benjamin ahi. 20 Aigupta gama Josef in Asenath tawh kala a neih Manase leh Efraim ahi. Asenath bel, On khua siampi Potifera' tanu ahi. 21 Benjamin' tapate: Bela, Beker, Ashbel, Gera, Naaman, Ehi, Rosh, Mupim, Hupim leh Arda ahi. 22 Hiaite bel, Jakob in tawh kala a neih tapate avekun sawmleli ahi. 23 Dan' tapa: Hushim ahi. 24 Naftali' tapate: Jaziel, Guni, Jezer leh Shilem ahi. 25 Hiaite bel, Jakob in Bilha tawh kala a neih tapate ahi. Bilha bel, Laban in a tanu Rakhel a piak silanu ahi. Avekun sagih ahi. 26 Aigupta gama Jakob tawh paisuk, ama' suan mahmah, a tupate' zite sim louhin, mi 66 ahi. 27 Aigupta gama Josef tapa nihte tawh simin, Aigupta gama gaisuk Jakob' innkuan mi, a vekun, 70 ahi. 28 Goshen gam tun nading lampi dong dingin Jakob in Josef kiang ah Judah a sawl masa hi. Tua bangin, amaute Goshen gam hong tung uhi. 29 Josef in a kangtalai kisasakin, a pa Israel mu dingin Goshen gam ah hong hawh hi. Josef a pa' maia a va-kilat takin, a pa a ngawngkawi a, a kap nilouh hi. 30 Israel in Josef kiang ah: Nang damlai chin a, ka mit mahmah-a kon muhtak manin si dingin ka kimanta, a chi hi. 31 Tua khitin, Josef in a sanggamte leh a pa' innkawte kiang ah: Ka paitou ding a, Faro ka vahoupih ding a, a kiang ah: Kanan gama teeng ka sanggamte leh ka pa' innkawte ka kiang hong tung uhi. 32 Amaute belamchingte, ganvul mite ahi uh a, a ganhonte uleh gantate leh a neih khempeuh utawh hong pai uh ahi, ka chi ding. 33 Ama'n noute hon sap a: Na nekzonna nasep uh bang ahia? chi-a hon dot chiangin, 34 noute'n: Ka pu ka pate uh bangin, na sila koute zong, ka neu ua-pan ganvulmi ka hi uh, chi-a na dawn ding uh ahi. Belamchingte zaw Aiguptate' mitmuha kihhuai ahih manin, Goshen gama hon teengsak ding ahi, a chi hi.

Pianchilna 47

1 Tua bangin, Josef a pai a, Faro a vahilh a: Ka pa leh ka sanggamte, a belamhonte uleh ganhonte utawh, a neih khempeuh utawh, Kanan gam apan hong pai uh a, tuin Goshen gam ah a om uhi, a chi hi. 2 Josef in a sanggamte nga a telkhia a, Faro' mai ah a lak hi. 3 Faro in tua sanggamte kiang ah: Na nekzonna nasep uh bang ahia? chi-in a dong hi. Amaute'n Faro a dawng uh a: Ka pu ka pate uh bangin, na sila koute, belamchingte ka hi uh, a chi uhi. 4 Tua baan ah, amaute'n: Kanan gama kial a nat mahmah man leh, na sila koute' belamte nek ding loupa om nawnlouh manin, hiai laia teeng tadih dinga hong pai hi ung. Tua bang ahih manin, na sila koute Goshen gam ah hon teengsak in, a chi lai uhi. 5 Faro in Josef kiang ah: Na pa leh na sanggamte, na kiang hong tungta uh hiven, 6 Aigupta gam kiching mahmah lei ahih chiangin, na pa leh na sanggamte, gam hoihna laitak ah teengsak inla, Goshen gam ah teeng uhen aw. Amaute laka siamna tuam nei na theih leh, keima' ganhonte kepna mawh paw dingin bawl in, a chi hi. 7 Tua khitin, Josef in a pa Jakob a piilut a, Faro' mai ah a lak hi. Jakob in Faro a vualzawl khitin, 8 Faro in Jakob kiang ah: Kum bangzaha upa na hita a? chi-in a dong hi. 9 Jakob in Faro kiang ah: Ka damsung khualzin sung kum 130 a hita. Ka damsung kumte a tawm a, a haksa mahmah a, ka pu ka pate' khualzin sung kum zah a pha het kei hi, a chi hi. 10 Tua khitin, Jakob in Faro a vualzawl kik a, Faro kiang apanin a paikhia hi. 11 Tuachi-in, Josef in a pa leh a sanggamte, Aigupta gam ah a teengsak hi. Faro' thupiak bangin, Aigupta gam hoihna pen Rameses gam sehkhen sung ah gam a pia hi. 12 Josef in a pa leh a sanggamte leh a pa' innkawte kiang ah, a innkuante uh tam dan bang zelin an a pia hi.

Kial tawh kisai Josef Nasep

13 Kial a nat mahmah manin, tua gam bup ah an a om kei hi. Tua kialpi hang mahin, Aigupta gam leh Kanan gam ah bangmah a om nawn kei hi. 14 Tua bang ahih manin, Josef in Aigupta gam leh Kanan gama sum om teng, buh manin a khawmkhinta a, Faro' innpi ah hon koih hi. 15 Tua banga Aigupta gam mite leh Kanan gam mite' sum a om nawn louh takin, Aigupta gam mite khempeuh Josef kiang ah hong tai uh a: An hon pia in. Banghanga na muh gegu-a koute si ding ka hi ua oi? Ka sum uh beita ahi, a chi uhi. 16 Josef in amaute kiang ah: Tua bang ahih leh, na gantate uh hon la un. Na sumte uh beita ahih manin, gantatein buh kon leisak ding, a chi hi. 17 Tua bangin, amaute'n a gantate uh, Josef kiang ah hon la uh a, ama'n amaute' sakolte, belamte, bawngte leh, sabiltungte kheknain buh a pia hi. Tua bangin, tua kumin, a gantate uh kheknain amaute anin a vak hi. 18 Tua kum hong bei takin, a kum nawnin, amaute Josef kiang ah hong pai uh a: Koute'n ka toupa uh hon im thei lou hi ung. Ka sum ulah beita, ka gantate ulah nanga suak vekta. Nang ka toupa uh mai ah, ka pumpi uleh ka gamte uh loungal bangmah om nawn lou hi. 19 Banghanga na muh gegu-a koute, ka gamte utawh mangthang ding ka hi ua oi? Koute leh ka gamte uh anin hon lei mai in. Koute, ka gamte utawh, Faro nuai ah salin tang mai n'ung. Koute ka nuntak theih ua, ka sih louh nading uleh gam a siat louh nadingin, khaichi hon pia in, a chi uhi. 20 Tua bangin, Josef in Aigupta gama gam khempeuh Faro adingin a lei vekta hi. Kial a nat mahmah manin, Aigupta mite khempeuh in a gamte uh a khawngkhe vek uh a, gamteng Faro-a a suakta hi. 21 Josef in mite khempeuh, Aigupta gamgi langkhat apan langkhat dong khawpite ah a pemlutsak hi. 22 Ahihhangin, siampite bel Faro in a tan ding uh an sehsaksa a nei a, nek khop a nei uhi. Tua ahih manin, Josef in amaute' gam a leikhiaksak kei hi. Amaute'n zong gam a zuak uh a kul kei hi. 23 Josef in mite kiang ah: Tuni-a noute leh na gamte uh, Faro adinga hon leikhin ka hita. Hiai ah noute adingin khaichi a om. Gam ah hai na ching thei ding uh. 24 Ahihhangin, buhlak chiangin, Faro kiang ah sehnga-a seh khat na pe ding uh a, sehli noute ading ahi ding. A chi ding leh, noute leh na innkawte uh leh na tate uh adinga nek ding ahi ding, a chi hi. 25 Amaute'n: Nang koute' nuntakna non hukheta. Toupa aw, na mitmuhin deihsakna hon tangsak inla, Faro nuai ah silain om n'ung, a chi uhi. 26 Tuachi-in, Josef in Aigupta gam sunga gam tawh kisai dan a bawl a, tuni dong a kizang hi. Tua dan bel hibang ahi: Gama piang peuhmah sehnga-a sehkhat Faro tan ahi ding. Siampite' gamte bel, Faro-a ahi kei ding, chih ahi. 27 Israelte bel Aigupta-a Goshen gam ah a teeng uhi. Tua ah, amaute'n neih leh lam a khawm uh a, chipha takin a om uh a, nakpitakin a hong pung uhi. 28 Jakob zong, Aigupta gam ah kum sawmlesagih a nungta lai a, a damsung khempeuh kum 147 ahi. 29 Israel' sih hun hong naita a, ama'n a tapa Josef a samsak a, a kiang ah: Na mitmuha deihsakna tang ka hih leh, na khut ka pheipi kal ah golh inla, siamna leh muanhuaina hon musak dingin thu chiam in. Aigupta gam ah hon vui het ken. 30 Ka pu ka pate kianga ka tawlngak chiangin, Aigupta gam apan hon pua inla, ka pu ka pate kivuina hankhuk ah kei zong hon vui in, a chi hi. Josef in: Na gen bangbangin ka hon hih ding, a chi hi. 31 Israel in: Ka kiang ah kichiam in, a chi a, Josef a kichiam hi. Tua bangin, Israel in a lupna khunga kunin Pathian a bia hi.

Pianchilna 48

Jakob in Josef Tapate Vualzawl

1 Hiaite nungin, Josef kiang ah: Na pa china ahi, chih thu a hilh uhi. Josef in a tapa nihte Manase leh Efraim a tonpih a, 2 Jakob kiang ah: Na tapa Josef na kianga hong hawh eive, chi-in a hilh uhi. Israel a kihalhsak a, lupna tunga lum, a tutou hi. 3 Jakob in Josef kiang ah: Kanan gama Luz khua ah Pathian Vanglianpen ka kiang ah hong kilak a, hon vualzawl a, ka kiang ah: 4 Chiphatakin kon bawl ding a, kon pungsak ding. Nang apanin mi tampi ka bawl ding a, na nunga na suante'n hiai gam a neihden dingun ka pe ding, hon chi ahi. 5 Aigupta gama na kiang kong tun ma-a na neih na tapa nihte keia ahi ding uh. Reuben leh Simeon keia ahih bangbangin, Efraim leh Manase keia ahi ding. 6 Amaute na neih nunga na neih tate bel nanga ahi ding. Amaute' luahgam ah a sanggamte uh lak ah a min uh a kisimtel ding hi. 7 Padan Aram apan kong kilehkik a, lampi-a ka pai laiin, Efrath apan gamla lou ah Rakhel in hon sihsan a, Efrath lampi gei ah amah ka vui hi, a chi hi. Efrath bel Bethlehem ahi. 8 Israel in Josef tapate a muh takin: Hiaite kuate ahi ua? a chi hi. 9 Josef in a pa kiang ah: Amaute, hiai laia Pathian hon piak ka tapate ahi ve ua, a chi hi. Israel in: Hehpihtakin amaute ka kiang ah hon pii in, amaute ka na-vualzawl ding, a chi hi. 10 Israel bel teekta ahih manin a mit a mial a, khua a mu thei kei hi. Josef in a tapate amah kiang ah hon pii a, a pa'n amaute a tawp a, a na ngawngkawi hi. 11 Israel in Josef kiang ah: Na mei muh kik ding kinem lou mah hi vengin, tu'n Pathian in na tate nangawn tawh hon musakta, a chi hi. 12 Tua khitin, Josef in amaute Israel' khuk kal apan a hemkhia a, amah lei si-in a kun hi. 13 Tua khitin, Josef in amaute gel a kai a, Efraim pen ama' taklam, tua bel Israel' veilam ah, Manase pen ama' veilam, tua bel Israel' taklam ah, Israel' mai ah hon pii nai hi. 14 Ahihhangin, Israel in a khut taklam a zan a, a nauzaw Efraim lutung ah a nga hi. Manase uzaw hi mah leh, Israel in a khutte a sawkkalh a, a khut veilam Manase lutung ah a nga hi. 15 Tua bangin, Israel in Josef a vualzawl a: Ka pu ka pate Abraham leh Isak in a nna a sep uh Pathian, ka dam sung teng, tuni donga kei hon Chingpa tua Pathian, 16 gitlouhna khempeuh apana kei hon tankhia tua Vansawltak in hiai naupangte vualzawl hen aw. Amaute'n keima' min leh, ka pu ka pate Abraham leh Isak' min pu uhenla, leitung ah mi tampitak hong pha uhen, a chi hi. 17 Josef in, a pa'n a khut taklam Efraim lutunga a koih a muh takin, a lungkim kei a, a pa' khut a len a, Efraim lutunga om Manase' lutunga koih a sawm hi. 18 A pa kiang ah: Hi lou e, pa aw, hiai pen tamasa ahi a, na khut taklam a lutung ah nga in, a chi hi. 19 Ahihhangin, a pa a ut kei a: Ka thei hi, ka tapa aw, ka thei hi. Amah zong nam khat hong suak veve ding a, hong lian ding ahi. Ahihhangin, amah sangin a naupa a lianzaw ding a, a suante nam tampi a suak ding, a chi hi. 20 Ama'n tua ni-in, amaute a vualzawl a: Israel in vualzawlna a gen chiangin, Pathian in Efraim leh Manase bangin nang hon vualzawl hen, chi-in noute min louin mi a vualzawl ding, a chi hi. Tua bangin, ama'n Manasesanga masazawin Efraim a koih hi. 21 Tua khitin, Israel in Josef kiang ah: Ngai in, kei si ding ka hita, ahihhangin, Pathian in nang hon ompih ding a, na pu na pate' gam ah hon piikik ding ahi. 2 Tua thamlouin, na sanggamte' tan sanga tantuan khata tamzaw tuin kon pia hi. Tua bel, ka namsau leh ka thalphel, Amorte apana gam ka lak pen ahi tantuan kon piak, a chi hi.

Pianchilna 49

Jakob' Thu Nunungte

1 Tua nungin, Jakob in a tapate a sam a: Hong paikhawm un, tunung chianga na tung ua thil tung dingte kon hilh ding: 2 Nou Jakob' tapate aw, hong paikhawm unla, ngai un. Na pa uh Israel' thugen ngai un. 3 Reuben, nang ka tamasa na hi. Ka vangletna hi chin a, ka hatna gah masa hi na hi. Ka zahtakhuaina tungnung, ka vangletna tungnung hi na hi. 4 Om kinken theilou tui bang hi chin a, tungnung nawn lou ding na hi. Ahang bel, na pa' lupnapi-a kal a, ka lupna na buahsak hi vechin. 5 Simeon leh Levi unau hi uh a, a namsaute uh sisan suahna vanzatte hi ahi. 6 A vaihawmna uah kihel lou ding ing a, a kikhopna ua tel lou ding hi'ng A ut-ut ua bawngtal zapigui sattat uhi. 7 A hehna uh hamsiatin om hen: A hehna uh lauhuai a, a thangpaihna uh kihtakhuai hi. Amaute Jakob lak ah khenzak ding ing a, Israelte lak ah thehthang ding hi'ng. 8 Judah, nang na sanggamte' phatlawhpa hi ding na hi. Na galte gawlmek ding chin a, na pa' tate na mai ah kun ding hi. 9 Judah aw, humpinelkai nou bang hi na hi: Ka tapa aw, na sa matsa apan kilehkik na hi. Amah humpinelkai bangin bok a, humpinelkainu bangin kualsuk a, kua'n amah tokthou ngam ding? 10 Kumpi chiangin Judah nuse ngei lou ding a, a neipa Shilo hong tun masiah, a suan a khakte laka ukpa' kumpichiang kisam ngei lou ding a, minam dangte'n a thu mang ding hi. 11 Ama'n a sabiltung grepgui ah khih ding a, a sabiltungnou grepgui hoihpen ah khih ding a,a puansilhte greptuiin sawp ding a, a kumpipuante grep sisan ah sawp ding hi. 12 A mitte zu sangin dup zaw ding a, a hate nawitui sangin ngou zaw ding hi. 13 Zebulun, tuipi gei ah teng ding a, longte khawlna mun hi ding a, Sidon tawh kigamgi-in om ding hi. 14 Isakhar, sabiltung thahat bang hi a, vangik nih kikal ah kual hi. 15 A tawlngakna mun hoih dan mu a, a gam nop dan a muh chianga, vangikte paw dinga a liang niamsak ding a, saltang banga nna sem ding hi. 16 Dan in Israelte laka nam khat banga a mite tunga thu khen ding hi. 17 Dan bel, lampi geia gulpi bang hi ding a, lampi geia gul dekpak bang hi ding hi. Sakol khetul tu ding a, sakol tungtuangpa thalkiak ding hi. 18 Tangtawn Toupa aw, ke'n na hut- khiakna ngak hi'ng. 19 Gad bel, galsimpawl in dou ding a, ahihhanga a tawpa amaute delhzak ding hi. 20 Asher apan nek leh tak hoih ding a, ama'n kumpi adinga kilawm ante piangsak ding hi. 21 Naftali sazukpi khahkhiak bang hi ding a, thu hoihpi pi gen ding hi. 22 Josef sing gahpha bang hi a, tuiluang kianga sing gahpha bang hi ding hi. A hiangte kulhbaang tunga zam bang hi ding hi. 23 Thaltawite'n mudah mahmaha amah dou uh a, heh mahmaha kaap uhi. 24 Ahihhanga a thalphel khauh a, a bantha hat hi. Tua bel Jakob' Mihatpa' khut hang leh, Belamchingpa tua Israel Suangpi' hang leh, 25 na pa' Pathian, nang hon huhpa hang hi a, nang hon vualzawlpa a Vanglianpen' hang hi ahi. Ama'n tung vanlama vualzaawlnate leh nuailam tuipi-a vualzawlnate leh, nawi leh sula vualzawlnatein nang hon vualzawl ding hi. 26 Na pa' vulzawlnate'n ka pu ka pate vualzawlnate khup a, tanglai tangte leh mualte' vualzawlnate khup hi. Hibang vualzawlnate khempeuh Josef lutung ah om ding a, a sanggamte laka vaihawma ompa' lutung ah om ding hi. 27 Benjamin ahih leh, a samat botzan ngia duhgawl bang hi ahi. Zingsangin a samat ne ding a, nitaklamin a gallak hawm ding hi, a chi hi. 28 Hiaite khempeuh, Israel namte ahi uh a, hiaite amaute kianga a pa un a gen ahi. Ama'n amaute a vualzawl a, amaute tawh kituakin a vualzawl tek hi.

Jakob' Sihna

29 Ama'n a tate thu a nutsiat a: Ka mite kianga laak ding ka hita. Hit mi Efron' gam sung ah, ka pu ka pate kivuina hankhuk ah hon vui un. 30 Tua kawkhuk bel, Kanan gama Mamre zawna, Makhpela' gam sunga om ahi. Tua gam, hanmun dinga Abraham in Hit mi Efron apan a leikhiak ahi. 31 Tua ah Abraham leh a zi Sara a kivui a, Isak leh a zi Rebek a kivui a, tua ah ke'n Lea ka vui hi. 32 Tua gam leh tua-a om kawkhuk, Hit' tapate apan kileikhia ahi, a chi hi. 33 Jakob in a tapate thu a hilh khitin, lupna ah a khete a liktou a, a laitata, a mite kianga lakin a omta hi.

Pianchilna 50

1 Josef in a pa' mai ah kunsukin, a kah a, a tawp hi. 2 Tua khitin, ama'n a pa Israel' luang muat thei lou dinga bawlsak dingin a nuaia sem daktorte thu a pia hi. Tua bangin, tua daktorte'n amah muat thei lou dingin a bawl uhi. 3 Tua banga bawl nadingin ni 40 sung a kul hi. Tua bangin Aiguptate'n ni 70 sung amah a suun uhi. 4 Sisuun nite a bei takin Josef in Faro' innkawte a houpih a: Na mitmuh ua maipha non muhsak uleh, hehpihtakin, Faro kiang ah kei adingin thu hon ngetsak un. 5 Ka pa'n hon kichiamsak a: Kei si ding ka hita a, Kanan gama kei adinga kawkhuk ka laih ah hon vui un, a chi hi. Tua bang ahih manin, Faro in hon paitousak henla, ka pa vavui ning. Tua khit chiangin hong kilehkik ning, a chi hi. 6 Faro in: Paitou inla, na pa'n hon kichiamsak bangin amah vavui in, a chi hi. 7 Tua bangin Josef a paitou a, a pa a vavui hi. Faro' nasem uliante khempeuh in Josef a zuitou uhi, Amaute, Faro' vaihawm uliante, Aigupta gam uliante ahi uhi. 8 Josef innkawte leh a sanggamte leh a pa' innkawte baan ah, hiai uliante'n a zuitou uhi. A taneute uleh a belamhonte uleh a ganhonte uh bel, Goshen gam ah a nusia uhi. 9 Kangtalai leh sakol tungtuangte'n zong amah a zuitou uh a, a vekun mi tampi a pha uhi. 10 Amaute Jordan lui gala om Atad' buhphual a tung uh a, nakpitaka khasia-a kahna a om hi. Tua mun ah Josef in a pa suunna hun ni sagih a tang hi. 11 Kanan mite'n Atad' buhphuala sisuunna a muh takun: Hiai Aigupta' sisuunna thupi mahmah ahi, a chi uhi. Tua bang ahih manin, tua mun min dingin Abel Mizraim chih a kiphuak hi. Tua bel, Jordan lui gala om ahi. 12 Tua bangin Jakob' tapate'n ama' thupiak bangbangin a hih uhi: 13 Amaute'n a luang a pua uh a, Makhpela gam sunga kawkhuk ah a vui uhi. Tua bel Mamre kianga om ahi a, hanmun dinga Abraham in Hit mi Efron apan a gam tawh a leikhawm ahi. 14 Josef in a pa a vui khitin, a sanggamte leh a pa vui dinga zuitoute khempeuh tawh, Aigupta gam ah a kiksuk hi.

Josef In a Sanggamte Khamuan

15 Josef sanggamte'n a pa uh a sita, chih a muh takun: Josef eite tung ah lungkim lou nilouhin, ama' tunga i tatsiatna khempeuh hon thuk kha ding ahi, a kichi uhi. 16 Tua bang ahih manin, amaute'n Josef kiang ah thu a khak uh a: Na pa'n a sih main hibangin thusiah hon nutsiat ahi: 17 Josef kiang ah: Na sanggamte na tunga tatsia a, a gitlouhna uleh a khelhna uh na ngaihdam ding kon ngen hi, chi ahi. Tuin, hehpihtakin, na pa' Pathian' silate' tatlekna ngaidamta in, a chi uhi. Hiai thu Josef in a zak takin a kap hi. 18 A sanggamte hong pai uh a, a mai ah a bok uh a: Ngai in, koute na silate ka hi uh, a chi uhi. 19 Ahihhangin, Josef in amaute kiang ah: Lau kei un. Kei, Pathian muna ding ka hi-a hia? 20 Noute'n bel ka siat nading na tum uh a, ahihhangin, Pathian in a hoih lamin a zang a, tuni-a hong tung bangbang mi tampite' nuntakna hut nadingin a zang hi. 21 Tuin lau kei un. Noute leh na tate uh nek ding tak ding kon suktuahsak ding, a chi hi. Ama'n tua bangin amaute a khamuan a, kamdamin a houpih hi.

Josef Sihna

22 Josef a pa' innkawte teng tawh, Aigupta gam ah a teeng lai hi. Kum 110 a nungta a, 23 Efraim' tate a khang thum dong a mu hi. Makir' tate zong Josef khuk tung ah a piang uhi. Makir bel Manase' tapa ahi. 24 Tuate nungin, Josef in a sanggamte kiang ah: Kei si ding ka hita. Ahihhangin, Pathian in noute hong veh ngeingei ding a, hiai gam apan hon piikhe ding a, Abraham kiang, Isak kiang leh Jakob kianga piak dinga a chiamsa gam hon tun ding ahi, a chi hi. 25 Tua bangin Josef in Israel' tapate a kichiamsak a: Pathian in noute hong veh ngeingei ding a, hiai mun apan ka guhte na puaktouh ding uh ahi, a chi hi. 26 Tua bangin Josef kum 110-a upa ahihin a sita hi. Amaute'n damdawi zangin a luang muat thei lou dingin a bawl uh a, Aigupta gam ah hankuang sung ah a koih uhi.

Pemkhiakna 1

Israelte Nuaisiahna

1 Innkuan kuana Jakob tawh Aigupta gama paisuk Israel' tapate hiaite ahi: 2 Reuben, Simeon, Levi leh Judah, 3 Isakhar, Zebulun leh Benjamin, 4 Dan leh Naftali, Gad leh Asher. 5 Jakob' suante avekpiun 70 a pha uhi. Josef ahih leh Aigupta gam ah a na omkhinta hi. 6 Josef leh a sanggamte leh amau khanga mite khempeuh hong sita uhi. 7 Ahihhangin, Israel' tate a chipha uh a, nakpitakin a pung uh a, hong hat mahmah uh a, tua gam hong dim uhi. 8 Tua hun laiin, Aigupta gam ah Josef theilou kumpipa dang khat hong lian a, 9 ama'n a mite kiang ah: En dih ua, eite adingin Israel tate a tam lawta uh. 10 Kisa ni-in, piltakin amaute tung ah gamta ni. Tua banga i hih kei leh, hong tam semsem lai ding uh a, sa leh gal kidouna khat hong om henla, amaute i galte lam ah pang kha le uh, eite hon douin, i gam a nuse kha ding uh, a chi hi. 11 Tua bang ahih manin, Aiguptate'n Israel tate nagum semsak a, zawhthawhna tawh gimsak dingin amaute tung ah sila heutute a sep uh a, Israelte'n Faro adingin an koihna khawpite Pithom leh Rameses a lam uhi. 12 Ahihhangin, zawhthawhna uang semsem mah leh, Israel tate a pung semsem uh a, hong kithehdalh semsem uhi. Aiguptate'n Israel tate a lau mahmah uh a, 13 dawm louin nna a semsak uhi. 14 Teklei leh buanmante bawlsakin, lou khawnga nna tuamtuam gimtakin a semsak uh a, a hinna uh a hihgenthei mahmah uhi. Tua banga a sepgim laiun, Aiguptate'n amaute a dawm mahmah kei uhi. 15 Tua laiin, Aigupta kumpipa'n Hebru naudomte Shifra leh Pua kiang ah: 16 Hebru numeite' nau na dop chiangun, nausuahna toukhom ah na pang unla, nausuak pen pasal a hih leh, na that unla, numei ahih lebel hinghawi un, a chi hi. 17 Ahihhangin, Hebru naudomte'n Pathian a lau uh a, Aigupta kumpipa' thupiak bangin a hih kei uh a, pasal naungekte zong a hinghawi uhi. 18 Aigupta kumpipa'n tua naudomte a sam a: Banghanga hibang hih na hi ua? Banghanga pasal naungekte hinghawi na hi ua? a chi hi. 19 Naudomte'n a dawng uh a: Hebru numeite zaw Aigupta numeite bang lou uh a, chidama thahat uh a, naudomte tun ma-a, nau suakkhin pahpah hi, a chi uhi. 20 Tua bang ahih manin, Pathian in tua naudomte a deihsak a, Israel tate hong pung uh a, hong tam semsem lai uhi. 21 Tua banga naudomte'n Pathian lau uh ahih manin, Ama'n amaute adingin innkuante a bawlsak hi. 22 Tua nungin, Faro in a mite khempeuh thu a pia a: Pasal naungek piang peuhmah Nail luipi-a na paih zel ding uh, numei naungek peuhmah bel na hinghawi ding uh ahi, a chi hi.

Pemkhiakna 2

Mosi Pianna

1 Tua laiin, Levi innkawte pasal khat in Levi numei khat zi-in a nei hi. 2 Tua nu hong gai a, tapa a nei hi. Ama'n tua tapa a pianhoih mahmah chih a muh takin, kha thum sung a sel hi. 3 Ahihhangin, a sel theih nawn louh takin, phaiphek lawh khat a la a, buanman leh alkatara in a zut a, tua sung ah tua naungek a sial a, Nail luipi geia pumpeng lak ah a koih hi. 4 Tua naungek' sanggamnu'n tua naungek bang hong suak hiam, chi-a gal etin gamla kuam ah a ding hi. 5 Tua nungin, Faro' tanu Nail luipi-a kisil dingin hong paisuk a, ama' sila numeite luipi gei zuiin a pai uhi. Faro' tanu in pumpeng laka lawh om a mu a, tua lawh vala dingin a sila numei khat a sawl hi. 6 Ama'n tua lawh a hong a, tua naungek a mu hi. Tua naungek a kap a, ama'n amah a lainat a: Hiai Hebru naungekte laka khat hi mahmah e, a chi hi. 7 Tua khitin, naungek' sanggamnu'n Faro' tanu kiang ah: Nang adinga naungek hon donsak dingin Hebru numei khat kon vasapsak diam? a chi hi. 8 Ama'n: He, vakuan in, a chi hi. Tua nungaknou a va-kuan a, a naungek' nu mah a vasam hi. 9 Faro' tanu in tua nu kiang ah: Hiai naungek la inla, kei adingin hon donsak in, na thaman hon pia ning, a chi hi. Tua nu'n tua naungek a la a, a donta hi. 10 Tua naungek hong khanlet deuh takin, ama'n Faro' tanu kiang ah hon paipih a, Faro' tanu' tapa hong hita hi. Faro' tanu in: Amah tui apan ka lakkhiak ahi, chi-in, a min dingin Mosi a sa hi.

Mosi Midian Gama Taina

11 Mosi hong pichin takin, ni khat, ama' mite omna mun ah hong pawtkhia a, amaute sepgim dan a vamu hi. Tua hunin, Aigupta mi khat in ama' mi Hebrute khat a vuak lai a mu hi. 12 Mosi in a sak a khang a en a, kuamah a muh louh takin, tua Aigupta mi a that a, sehnel lak ah a luang a phuum hi. 13 A zingchiangin, Mosi a vapawtkhia a, Hebru mi nih kisual a mu hi. Ama'n a gilou zawpa kiang ah: Banghanga nang na sanggam Hebru mi tum na hia? a chi hi. 14 Tua pa'n: Koute tunga kumpi thukhen dinga kua'n nang hon sep a zenzen a? Aigupta mi na thah banga hon thah sawm na hi maw? a chi hi. Tua a zak takin, Mosi a lau a: Ka thilhih kiphawkkhia hita mahmah veh e, chi-in a ngaihtuah hi. 15 Faro in tua thu a zak takin, Mosi thah a sawm hi. Mosi bel Faro apan a tai a, Midian gama teng dingin a pai hi. Tua gam ah tuileh khat kiang ah a tu hi. 16 Tua hun laiin, Midian siampi khat a om a, ama'n tanu sagih a nei hi. Tua siampi' tanute tuikhuka tuikuang sunga a pa uh' belamhonte tui pe dingin tua ah hong kuan uhi. 17 Tua lai mahin, belamching pawlkhat hong pai uh a, tua belamhonte a hawlmangsak uhi. Ahihhangin, Mosi a dingtou a, tua nungakte a hukhia a, a belam honte uh tui a pia hi. 18 Tua nungakte a pa uh Reuel kiang hong tunkik takun, ama'n: Tuni-a bang achi-a, hong hichi tun baih na hi ua le? a chi hi. 19 Amaute'n a dawng uh a: Aigupta mi khat in belamchingte' khut apan koute hon humbit a, tui hawng dipsak a, belamhonte tui a pe lai hi, a chi uhi. 20 Ama'n a tanute kiang ah: Amah koia om ahia? Banghanga amah hon nusia na hi ua? An ne dingin vachial ve ua, a chi hi. 21 Mosi bel tua mipa kianga ten a lungkim a, tua mipa'n a tanu Zipora a zi dingin a pia hi. 22 Zipora in tapa a nei a, Mosi in: Gamdang ah, melmak mi-in ka om, chi-in tua tapa min dingin Gershom a sa hi. 23 Tua hun sawtpi sungin, Aigupta kumpipa a sita hi. Israelte bel saltanna nuaia thuum leh mauin a kikou kou uh a, saltanna hanga huhna ngen-a a kikou uh Pathian kiang a tungtou hi. 24 Pathian in amaute' thum leh mau a za a, Abraham leh Isak leh Jakob tawh kala a thukhun a phawk gige hi. 25 Tua hangin, Pathian in Israel tate a en a, amaute a awlmawh hi.

Pemkhiakna 3

Mosi leh Loupabuk Kuang

1 Mosi in a sungpa Jethro, tua Midian siampi' belamhonte a ching a, gamdai-gamkeu khenlam ah belamhonte a paipih a, Horeb kichi, Pathian' Mual hong tung hi. 2 Tua ah, Tangtawn Toupa' vansawltak amah kiang ah loupabuk meia kuang lak apan hong kilaak hi. Mosi in tua loupabuk kuang a, ahihhanga kangtum lou a mu hi. 3 Tua bang ahih manin, Mosi in: Ka vanaih ding a, hiai thillamdang kimu ka vaen ding. Banghanga loupa kangtum lou ahia, chi-in a ngaihtuah hi. 4 Mosi in a vanaih, chih Tangtawn Toupa'n a muh takin, loupa lak apan amah a sam a: Mosi! Mosi! a chi hi. Mosi in a dawng a: Hiah ka om, a chi hi. 5 Ama'n: Hiai baan hon naih ken. Na khedapte suah in, na dinna mun, mun siangthou ahi, a chi hi. 6 Tua khitin, Ama'n: Kei na pa' Pathian, Abraham' Pathian, Isak' Pathian leh Jakob' Pathian ka hi, a chi hi. Hiai a zak takin, Mosi in Pathian a et ngam louh manin a maitang a hum hi. 7 Tangtawn Toupa'n: Aigupta gama ka mite' gimna ka muta. Amaute sala kaia nasemsakte hanga a kikou husa uh ka zata. A thuakna uh hangin ka awlmawh hi. 8 Tua bang ahih manin, Aiguptate khut sung apan amaute hinna hawi ding leh, tua gam apan amaute piikhia a, gam lianpi, nawitui leh khuaizu-a luang gama piilut dinga hong paisuk ka hi. Tua gam bel Kanante, Hitte, Amorte, Perizte, Hivte leh Jebuste tenna gam ahi. 9 Tuin, Israelte' kikouna ka kiang hong tungta a, Aiguptate'n amaute a zawhthawh dan uh ka muta. 10 Tua bang ahih manin, kuan inla, Aigupta gam apan ka mi Israel tate piikhe dingin, Faro kianga hon sawl ka hi, a chi hi. 11 Ahihhangin, Mosi in Pathian kiang ah: Faro kianga hawh ding leh Aigupta gam apan Israel tate piikhe dingin kei kua ka hia? a chi hi. 12 Pathian in: Nang kon ompih ngeingei ding a, nang hon sawlpa kei ka hi, chih chiamtehna hiai ahi ding: Aigupta gam apan Israelte na piikhiak khit chiangin, hiai Mual ah Pathian na be ding, a chi hi.

Jehova' Min

13 Tua khitin, Mosi in Pathian kiang ah: En dih, kei Israel tate kiang ah vahawh lengla, amaute kiang ah: Na pu na pate uh' Pathian in noute kianga kei hon sawl ahi, vachi lengla, amaute'n: A min bang ahia? hon chi le uh, ke'n bang gen ding ka hia? a chi hi. 14 Pathian in Mosi kiang ah: KEIMAH A OMPA KA HI. Israelte kiang ah: A OMPA in kei noute kianga hon sawl ahi, na chi ding ahi, a chi hi. 15 Tua baan ah, Pathian in Mosi kiang ah: Israel tate kianga na gen ding hiai ahi: Tangtawn Toupa, na pu na pate uh' Pathian, tua Abraham' Pathian, Isak' Pathian leh Jakob' Pathian in kei noute kianga hon sawl ahi. Hiai ka min ahi tawntung a, a khang a khanga kei theih gigena min ahi ding hi. 16 Kuan inla, Israel upate kaikhawm inla, amaute kiang ah: Tangtawn Toupa, na pu na pate uh' Pathian, Abraham' Pathian, Isak' Pathian leh Jakob' Pathian ka kiang ah hong kilaak a, ka kiang ah: Noute kong veh ngeingei ding. Aigupta gama hon engbawl dan uh ka muta a, 17 Aigupta gama na gimna uapan kon piikhe ding. Kon piikhe ding a, Kanante, Hitte, Amorte, Perizte, Hivte leh Jebuste gam, nawitui leh khuaizu-a luang tua gam kon tun ding, ka na chita, a chi, chi in. 18 Israel upate'n na aw a ngaikhe ding uh. Kuan inla, nang leh Israel upate Aigupta kumpipa kiang ah hawh unla, amah kiang ah: Tangtawn Toupa, Hebrute' Pathian in Amah tawh koute hon kimusak hi. Tuin, Tangtawn Toupa, ka Pathian uh kianga kithoihna laan dingin, ni thum lam gamdai-gamkeu ah, hehpihtakin koute hon paisak in, chi in. 19 Ahihhangin, Aigupta kumpipa'n noute hon paisak dingin phalna nang hon pe kei ding. Ban thahata nawh louh ngalin noute hon paisak dingin, nang phalna hon pe kei ding, chih ka thei. 20 Tua bang ahih manin, ka khut ka likkhe ding a, Aigupta gama thillamdangte ka hih dingte khempeuhin Aiguptate ka dou ding. Tua khit chiangin, ama'n noute hon paisak ding. 21 Aiguptate' mit ah hiai Israelte deihsakna ka neisak ding a, na paikhiak chiangun, khutvuakin na paikhe kei ding uh. 22 Israel numei peuhmah in a innveng kiang ah leh a inn sunga mikhuala teeng kiang ah, ngun leh khama kibawl vante leh puansilhte a ngen ding ahi. Tuate na tapate uleh, na tanute uh tung ah na baat ding uh a, tua bangin, Aiguptate na lok ding uh, a chi hi.

Pemkhiakna 4

Mosi' Niaina

1 Tua khitin, Mosi in a dawng a: Ahihhangin, ngai dih, amaute'n kei hon um kei ding uh a, ka aw zong a ngaikhe kei ding uh. Tangtawn Toupa na kiang ah hong kilaak kei, a chi tham ding uh, a chi hi. 2 Tua khitin, Tangtawn Toupa'n amah kiang ah: Na khuta om bang ahia? a chi hi. Mosi in a dawng a: Chiangkhun, a chi hi, 3 Tangtawn Toupa'n: Leilak ah paai in, a chi hi. Mosi in leilaka tua chiangkhun a paih leh, gul hong suak a, Mosi a taai hi. 4 Tua khitin, Tangtawn Toupa'n Mosi kiang ah: Na khutin sawk inla, a meiin man in, a chi hi. Mosi in a khuta sawka, tua gul a mat leh, a khut ah chiangkhun a suak nawn hi. 5 Tangtawn Toupa'n: Kei Tangtawn Toupa, a pu a pate uh' Pathian, Abraham' Pathian, Isak' Pathian, leh Jakob' Pathian na kiang ah hong kilaak, chih amaute'n a up nadingun hiai hih ka hi, a chi hi. 6 Tua baan ah, Tangtawn Toupa'n amah kiang ah: Na puanak nuai na awm ah na khut golh in, a chi a, Mosi in a puanak nuai ah a khut a golh a, a dawhkhiak takin, ngai dih, a khut a phak a, vuk bangin a ngou hi. 7 Tua khitin, Tangtawn Toupa'n: Na puanak nuai na awm ah na khut golh kik in, a chi a, Mosi in a puanak nuai ah a khut a golh a, a dawhkhiak takin, ngai dih, a damkik a, a sa ngei a pu kik hi. 8 Tua khitin, Tangtawn Toupa'n: Amaute'n nang hon up kei uleh, ahih kei leh, chiamtehna masa theihpihna a up kei uleh, chiamtehna nihna theihpihna a um ding uhi. 9 Amaute'n hiai chiamtehna nihte' theihpihnate a up kei uleh, ahih kei leh, na aw a ngaihkhiak kei uleh, Nail luipi apan tui la inla, leikeu tung ah sung in, tua tui leilak ah sisan a suak ding, a chi hi. 10 10 Mosi in Tangtawn Toupa kiang ah: Toupa aw, kei zaw mi dangnal hi ngeilou ka hi. Kei na sila nidanga zong, tu-a non houpih nunga zong mi dangnal hi tuan lou ka hi. Dangawkpi leh thugen siamloupi ka hi, a chi hi. 11 Tangtawn Toupa'n amah kiang ah: Mihing adia kam bawlpa kua ahia? Ahih kei leh, mihing pauthei loua bawlpa, ahih kei leh nangongsakpa, ahih kei leh mittawsakpa kua ahia oi? Tua banga bawlpa Keimah Tangtawn Toupa ka hi keia hia? 12 Tu'n kuan mai in. Keima'n na kam ka ompih ding a, na gen ding kon hilh ding, a chi hi. 13 Ahihhangin, Mosi in: Toupa aw, hehpihtakin, midang na sawl nopnop sawl zaw mai in, a chi hi. 14 Tua a zak takin Mosi tung ah Tangtawn Toupa' hehna a kuang a, amah kiang ah: Levi' suan Aron, na upa hilou maw? Amah thugen thei mahmah ahi chih ka thei. Amah nang tuak dingin hong paikhe ding a, nang hon muh chiangin a lungnuam mahmah ding. 15 Amah na houpih ding a, a thugen ding na muam ding ahi. Ke'n na nih-ua' kam ka ompih ding a, na hih ding uh kon hilh ding. 16 Nang' sik leh tangin ama'n Israelte kiang ah thu a gen ding a, amah na kam bang ahi ding a, nang amah adingin Pathian bang na hi ding. 17 Na khutin hiai chiangkhun tawi inla, hiai chiangkhunin thillamdangte na hih ding ahi, a chi hi.

Aigupta Gama Mosi

18 Tua khitin, Mosi a sungpa Jethro kiang ah a kilehkik a, amah kiang ah: Aigupta gama ka sanggamte damlai uhiam ka mu nuam a, hehpihtakin hon paisak in, a chi a, Jethro in Mosi kiang ah: Khamuangtakin paita in, a chi hi. 19 Tua khitin, Tangtawn Toupa'n Midian gam ah Mosi kiang ah: Pai inla, Aigupta gam ah kik in. Na hinna lak sawmte khempeuh sita uhi, a chi hi. 20 Mosi in a zi leh a tapate a tonpih a, sabiltung tung ah a tuangsak a, Aigupta gam lam ah a kilehkik a, tua Pathian' chiangkhun zong a khutin a tawi hi. 21 Tangtawn Toupa'n Mosi kiang ah: Aigupta gam na tun chiangin, na khuta thillamdang ka koihte khempeuh Faro' mai ah hih in. Ahihhangin, Ke'n a lungtang ka khauhsak ding a, Israel tate a paisak kei ding. 22 Tua khit chiangin, nang Faro kiang ah: Tangtawn Toupa'n hiai a gen: Israel ka tapa masapen ahi. 23 Ka tapa in kei hon biak theih nadingin amah paisak in, hon chi ahi. Ahihhangin, amah paisak ding na nial leh, ngai in, na tapa masapen ka that ding, chi ahi, chi in, a chi hi. 24 Tua banga Mosi a khualzin laiin, a giahphual ah Tangtawn Toupa'n Mosi a na tuak a, amah thah a sawm hi. 25 Tua bang thil a om takin, Zipora in meisah suang hiam khat a la a, a tapa' zek a sumsak a, tua zekvun sumkhiak Mosi' khebul ah a khia a: Kei adingin sisan kai pasal na hi taktak ve, a chi hi. 26 Tua hangin, Tangtawn Toupa'n Mosi thah a sawm nawn kei a, Zipora in Mosi kiang ah: Zeksum sisan kai pasal na hi ve, a chi hi. 27 Tua nungin, Tangtawn Toupa'n Aron kiang ah: Mosi tuak dingin, gamdai-gamkeu ah vapai in, a chi a, Aron zong tua bangin a vapai a, Pathian' Mual ah Mosi a tuak a, amah a tawp hi. 28 Tua ah Mosi in, Tangtawn Toupa'n amah a sawl dan khempeuh leh hih dinga a thupiak chiamtehnna lamdangte khempeuh Aron a hilh hi. 29 Mosi leh Aron in Israel upate khempeuh a kaikhawm uh a, 30 Mosi kianga Tangtawn Toupa' thugente khempeuh Aron in amaute a hilh a, Mosi in Israelte' mai ah chiamtehnate a hih a, 31 amaute'n a um uhi. Tangtawn Toupa'n amaute a phawk gige a, haksatna a thuakte khempeuh uh a mu chih Israelte'n a za uhi. Tua bang ahih manin, kunin Pathian a bia uhi.

Pemkhiakna 5

Buhpawl bela Teklei Velna

1 Tua nung lamin, Mosi leh Aron a pai uh a, Faro kiang ah thu a gen uh a: Israelte' Pathian ahipa Tangtawn Toupa'n: Gamdai-gamkeua ka maia ankuang a lui theih nadingun, ka mite paikhesak in, chi ahi, a chi uhi. 2 Ahihhangin, Faro in: A thu ka ngaihkhiak a, Israelte ka paisak nading, Tangtawn Toupa kua ahia? Ke'n Tangtawn Toupa thei keng. Israelte zong paikhesak kei ning, a chi hi. 3 Tua khitin, Mosi leh Aron in: Hebrute' Pathian in koute amah tawh hon kimusak ahi. Gamdai-gamkeua ni thum lam pai dingin hon phal in. Tangtawn Toupa ka Pathian uh maia kithoihna laan dingin pai nuam hi ung. Tua banga ka pai kei uleh, ama'n natna hiam, namsau hiamin koute hon that kha ding ahi, a chi uhi. 4 Aigupta kumpipa'n amaute kiang ah: Mosi leh Aron aw, Israelte nasem lai banghanga thadahsak ding na hi ua? Na nasepna uah kuan un! a chi hi. 5 Tua khitin, Faro in: En un, Aigupta gam sunga Israelte a tamtam utawh, noute'n amaute nasem loua koih ding maw! a chi hi. 6 Tua ni mahin Faro in, Israel tate tunga nasep guan ding leh uliante seh ding thu a pia a: 7 Nidanga na piak bangun buhpawl pe nawn kei un. Amaute kuanin buhpawl kizon uhen. 8 Ahihhangin, nidanga teklei a vel zah mah uh a vel teitei ding uh, na kiamsak louh ding uh ahi. Ahang bel, amaute hong thadah ua: Ka Pathian uh maia kithoihna laan dingin koute hon paisak in, chi-a a kikou uh hiai hang ahi. 9 Amaute'n na sem a, Mosi leh Aron' zuauthu peuh a limsak louh nadingun, na haksa semsem guan un, a chi hi. 10 Tua bangin, Israel tate' tunga nasep guante leh uliante a kuan uh a, amaute kiang ah thu a gen uh a: Faro in: buhpawl hon pe lou ding ka hi. 11 Kuan unla, na muh theihna-na uah buhpawl kizon un, ahihhangin, na nasep uh kikiamsak tuan het lou ding ahi, chi ahi, a chi uhi. 12 Tua bang ahih manin, Israel tate buhpawl taanga zat theih loupa keu zongin, Aigupta gam sung teng ah a kithehdalh uhi. 13 Amaute tunga nasep guan heutute'n amaute thagumin a nawh uh a: Buhpawl na neih lai ua, ni khata na sepkhiak zah mah uh, tuni'n semkhia un, a chi uhi. 14 Tua thamlouin, Faro in nasep guan heutu-a a sehte'n Israel nasep makaite kiang ah: Zan leh zanhal khawnga teklei na vel zah uh, tuni-a banghanga vel lou na hi ua? a chi uh a, nakpipi-in a vua uhi. 15 Tua banga nasem makai Israel tate Faro' mai ah a vapai uh a, a vakap uh a: Banghanga na silate hibang lawmlawma hon bawl na hia oi? 16 Nasep guan heutute'n buhpawl lah hon pe lou uh a: Teklei vel un! chi-a, na silate hon vuavua uh a, nangma' mite khelhna hi zaw ahi, a chi uhi. 17 Ahihhangin, Faro in: Thadah na hi ve ua, zongzaw na hi ve ua! Na thadah man ua: Tangtawn Toupa' maia kithoihna laan dingin hon paisak in, chi na hi ve ua! 18 Tu'n kuan unla, nasem un. Ahihhangin, buhpawl hon kipe lou ding ahi. Teklei bawl ding chiam zah na vel veve ding uh ahi, a chi hi. 19 Faro in: Ni khata teklei vel ding zah na kiamsak louh ding uh, chi-a amaute a hilh a zaktakun, Israel nasem makaite'n a dinmun uh haksat dan a kiphawk uhi. 20 Faro kiang apan a paikhia uh a, Mosi leh Aron bel amaute ngakin a na ding uhi. 21 Amaute'n Mosi leh Aron kiang ah: Tangtawn Toupa'n noute gel hon en henla, na tung uah thu khen hen! Faro leh a uliante mai ah koute kihhuai non suaksak uh a, na thilhih-un koute thah nading namsau a khut uah na koihta uhi, a chi uhi.

Hutkhiak nading Thuchiam

22 Tua bang ahih manin, Mosi bel Tangtawn Toupa kiang ah a kilehkik a: Toupa aw, bang dinga hiai mite tunga hibang thil haksa hon tun na hia? Hiai dinga kei hon sawl na hi maw? 23 Faro' maia na mina thu gen dinga ka vahawh apan, ama'n hiai na mite tunga thil gilou ngen hih a, nang lah amaute hukhe lou china! a chi hi.

Pemkhiakna 6

1 Tua khitin, Tangtawn Toupa'n Mosi kiang ah: Faro tunga ka thilhih ding na mu ding. Ka ban thahat ziakin, ama'n amaute a paisak ngeingei ding. Ka ban thahatna hangin, ama'n amaute a gam sung apan a hawlkhiak thawh din^, a chi hi. 2 Pathian in Mosi a houpih lai a: Kei Tangtawn Toupa ka hi. 3 Abraham kiang leh Isak kiang leh Jakob kiang ah Pathian Vanglianpen ka hihna minin ka kilaak a, ahihhangin, Tangtawn Toupa ka hihna minin ka kitheisak nai kei. 4 Khualtaam bang leia a ten takdihna gam uh, Kanan gam piak dingin, amaute tawh kal ah ka thukhun zong ka bawl lai hi. 5 Tua ban ah, Aiguptate'n sala a kaihna uh hanga Israel tate' thuum leh mauna ka zata a, ka thukhun ka phawk gige hi. 6 Tua bang ahih manin, Israel tate kiang ah gen unla, Tangtawn Toupa'n: Kei Tangtawn Toupa ka hi. Aiguptate nuaia saltanna koi apan noute kon pikhe ding. Amaute' nuaia saltanna gimna apan kon hawi ding a, ka ban thahat likin, thukhenna thupitaktein kon tankhe ding. 7 Keima' mite mahmah hi dingin kon la ding a, noute' Pathian ka hi ding. Tua hun chiangin, Aiguptate nuaia saltanna apan hon pikhepa, Kei Tangtawn Toupa na Pathian uh ka hi, chih na thei ding uh. 8 Banzaka ka kichiama Abraham leh Isak leh Jakob kianga piak ding ka chih gam kon tun ding. Na goutan dingun tua gam kon pe ding. Kei Tangtawn Toupa ka hi, chi ahi, chi-in gen un, a chi hi. 9 Mosi in Israelte kiang ah hiai thu a gensawn a, ahihhangin, a saltanna uh haksa a, lungkia uh ahih manin, Mosi' thugen a ngaikhe kei uhi. 10 Tua khitin, Tangtawn Toupa'n Mosi a houpih a: 11 Pai inla, Aigupta kumpipa Faro kiang ah a gam apan Israelte a paisak ding ahi, chi-in thu vagen in, a chi hi. 12 Ahihhangin, Mosi in Tangtawn Toupa' mai ah thu a gen a: Ngai dih, Israel tate'n ka thugen a ngaihkhiak kei uleh, kei muk sumlouhpi bangchi-a Faro in ka thugen ngaikhe ding ahia? a chi hi.

Mosi leh Aron Khangthu

13 Tua khitin, Tangtawn Toupa'n Mosi leh Aron a houpih a, Israel tate leh Faro tawh kisai amaute thu a pia a, Aigupta gam apan Israelte piikhe dingin amaute thu a pia hi. 14 Hiaite a pu a pate uh' innkawte lutangte ahi uhi: Israel' tapa masapen Reuben' tapate Hanokh, Palu, Hezron leh Karmi ahi. Hiaite Reuben nama beh omte ahi. 15 Simeon' tapate Jemuel, Jamin, Ohad, Jakhin, Zohar leh Kanan numei' tapa Shaul ahi. Hiaite Simeon nama beh omte ahi. 16 Levi' tapate minte leh suante hiai ahi: Gershon, Kohath leh Merari. Levi damsung khempeuh kum 137 ahi. 17 Gershon' tapate a behbehin Libni leh Shimei ahi. 18 Kohath' tapate Amram, Izhar, Hebron leh Uziel ahi. Kohath damsung khempeuh kum 133 ahi. 19 Merari' tapate Mali leh Mushi ahi. Hiaite Levi nama beh omte ahi. 20 Amram in a pa' sanggamnu Jokhebed zi-in a nei a, tua in Amram adingin Aron leh Mosi a nei hi. Amram dam sung khempeuh kum 137 ahi. 21 Izhar' tapate Kora, Nefek leh Zikri ahi. 22 Uziel' tapate Mishael, Elzafon leh Sithri ahi. 23 Aron in Aminadab' tanu Nahshon' sanggamnu Elisheba a kitenpih a, tua in Aron adingin Nadab, Abihu, Eleazar leh Ithamar a nei hi. 24 Kora' tapate Azir, Elkana leh Abiasaf ahi. Hiaite Kora suana beh omte ahi. 25 Aron' tapa Eleazar in Putiel' tanute khat a kitenpih a, tua in Eleazar adingin Fineha a nei hi. Hiaite Levi nama beh omte ahi. 26 Hiai Aron leh Mosi mah ahi, Tangtawn Toupa'n a houpih a: Noute'n Aigupta gam apanin Israelte a nam namin piikhia un, a chih. 27 Amaute mah ahi, Aigupta gam apan Israelte piikhiak ding thu, Aigupta gam kumpipa Faro kianga vagente. Hiai Mosi leh Aron mah ahi uhi.

Tangtawn Toupa'n Mosi Houpih

28 Tangtawn Toupa'n Aigupta gama Mosi a houpih laiin a kiang ah: 29 Kei Tangtawn Toupa ka hi. Na kianga ka gen peuhmah Aigupta kumpipa Faro kiang ah gen in, a chi hi. 30 Ahihhangin, Mosi in Tangtawn Toupa kiang ah: Ngai dih, kei muk sumlouhpi, banghanga Faro in ka thugen ngaikhe ding ahia? a chi hi.

Pemkhiakna 7

1 Tangtawn Toupa'n Mosi kiang ah: En dih, ke'n nang Faro' mai ah Pathian bangin kon bawl ding a, na upa Aron nang adingin kamsang ahi ding. 2 Kon thupiak peuhmah na gen ding a, na sanggampa Aron in Faro kiang ah, a gam sung apan Israelte sawlkhe dingin tua a gen ding hi. 3 Ahihhangin, ke'n Faro' lungtang ka khauhsak ding a, Aigupta gam ah ka chiamtehnate leh thillamdangte tam semsem ka hih ding. 4 Faro in na thugen a ngaikhe kei ding a, tua chiangin, ke'n Aigupta gam tung ah khut ka kha ding a, gawtna thupitak pansanin ka mi Israel tate a pawlpawlin Aigupta gam apan ka piikhe ding. 5 Aigupta gam tunga khut kha a, amaute lak apan Israel tate ka piikhiak chiangin, Aiguptate'n, kei Tangtawn Toupa ka hi, chih a thei ding uh, a chi hi. 6 Tua khitin, Mosi leh Aron in Tangtawn Toupa' thupiak bangbangin a hih uhi. 7 Faro' maia thu a gen lai un Mosi kum 80-a upa ahi a, Aron kum 83-a upa ahi.

Chiangkhun Gul Suak

8 Tangtawn Toupa'n Mosi leh Aron kiang ah: 9 Faro in: Na thillamdang uh hih un, a chih chiangin, Mosi aw, Aron kiang ah: Na chiangkhun la inla, Faro mai ah leilak ah khia in, gul hong suak ding, na chi ding ahi, a chi hi. 10 Tua khitin, Mosi leh Aron, Faro kiang ah a va-hawh uh a, Tangtawn Toupa' thupiak bangbangin a hih uhi. Aron in Faro leh a uliante' mai ah, leilak ah a chiangkhun a khia a, gul a suak hi. 11 Faro in zong a mipilte leh dawi aisansiamte leh mitkhialdawi tawite a samsak a, Aigupta dawisiamte'n zong dawisiamna zangin tua bangbang a hih uhi. 12 Tua dawisiamte'n a chiangkhun uh leilak ah a khe tek uh a, gul hong suak uhi. Ahihhangin, Aron' chiangkhun in amaute' chiangkhun a valh hi. 13 Hinapi-in, Tangtawn Toupa' gen bangin, Faro lungtang a khauh a, amaute' thu a ngaikhe kei hi.

Sisana Gawtna

14 Tua khitin, Tangtawn Toupa'n Mosi kiang ah: Faro' lungtang a khauh a, Israel tate a paisak nuam kei. 15 Zingsangin, Faro kiang ah vahawh in. Ngai dih, amah Nail luipi-a vahawh ding ahi. Tua chiangkhun gul hong suak pen tawi inla, amah tuak dingin tua luipi gei ah na ngak in. 16 Amah hong pai chiangin amah kiang ah: Tangtawn Toupa, Hebrute' Pathian in na kiang ah kei hon sawl a: Ka mite'n gamdai-gamkeua kei hon biak theih nadingun paisak in hon chisak a, ahihhangin tu dongin na ngaikhe kei lai. 17 Tangtawn Toupa'n hiai a gen: Kei Tangtawn Toupa ka hi, chih hiai in na thei ding. Ngai in, tu mahmahin, ka khuta chiangkhunin Nail luipi tui ka sat ding a, Pathian in tua lui sisan a suaksak ding. 18 Tua hun chiangin, luipi-a ngasate a si ding a, tua luipi a uih ding a, Aiguptate'n a tui a dawn thei kei ding uh, a chi hi. 19 Tua khitin, Tangtawn Toupa'n Mosi kiang ah: Aron houpih inla: Na chiangkhun la inla, Aigupta tuite sisan hong suah nadingin luite, tuilamte, dilte leh tuikholkhawmte tung ah lik in. Aigupta gam sung teng ah sisan a om ding a, singbelte leh suangbelte sung ah a om ding, chi in, a chi hi. 20 Mosi leh Aron in Tangtawn Toupa' thupiak bangbangin a hih uhi. Aron in Faro leh a uliante' mitmuhin chiangkhun a lik a, tua Nail luipi tuite a sat a, Pathian in tua luipi tuite khempeuh sisan a suaksak hi. 21 Nail luipi-a ngasate a si a, tua luipi a uih a, Aiguptate'n tua tui a dawn thei kei uhi. Aigupta gam sung teng ah zong sisan a om hi. 22 Ahihhangin, Aigupta dawisiamte'n zong aisan-in tua bang mahin a hih uhi. Tangtawn Toupa' gensa bangin, Faro' lungtang a khauh sem a, Mosi leh Aron' thugen a ngaikhe kei hi. 23 Faro a kihei a, a innpi ah a pai a, hiai thu a ngaihtuah pha mahmah kei hi. 24 Aigupta mi khempeuh in Nail luipi tui dawn thei lou ahih manun, tui dawn ding zongin luipi dung tawnin, tuilehte a tou uhi. 25 Tu'n Tangtawn Toupa'n Nail luipi a sat nung ni sagih a beita hi.

Pemkhiakna 8

Upite-a Gawtna

1 Tua khitin, Tangtawn Toupa'n Mosi kiang ah: Faro kiang ah vahawh inla: Tangtawn Toupa'n hiai a gen: Ka mite'n kei hon biak theih nadingun, sawlkhia in. 2 Amaute na sawlkhiak nop kei lai leh, ngai in, na gam sung khempeuh upitein ka gawt ding. 3 Tua luipi upitein a dim ding a, hong paikhetouin na innpi sung khawng leh na lupna indan sung leh lupna a dim ding. Na uliante leh na mite' innsung khawng ah a lut ding uh a, na thukkhuk khawng leh na anvuinel mekna kuang sung khawng a dim ding uh. 4 Na satung ahte, na mite satung ahte, na uliante' satung ahte a kal ding uh, chi ahi, chi in, a chi hi. 5 Tua khitin, Tangtawn Toupa'n Mosi kiang ah: Aron houpih inla: Na khuta chiangkhun Nail luipi tung leh luite leh tuilamte leh dilte tung ah lik inla, Aigupta gam teng upite dimsak in, chi in, a chi hi. 6 Tua bangin, Aron in Aigupta tuite tung ah a khut a lik a, upite hong pawt touin Aigupta gam sung teng a dim uhi. 7 Ahihhangin, Aigupta dawisiamte'n zong aisanin tua bangin a hih uh a, Aigupta gam tung ah upite a pawttousak uhi, 8 Tua khitin, Faro in Mosi leh Aron a sam a: Kei leh ka mite apan upite lakhe dingin Tangtawn Toupa kiang ah hon thumsak un. Tangtawn Toupa' maia kithoihna laan dingin Israel tate ka paisak ngeingei ding, a chi hi. 9 Mosi in Faro kiang ah: Nang leh na innte apan upite ka lakmang nadinga nang leh na uliante leh na mite adinga kon thumsak nading hun seh ding nang thuneihnain ka koih hi, a chi hi. 10 Faro in: Zing chiang hi heh, a chi hi. Tua khitin, Mosi in: Tangtawn Toupa ka Pathian uh bang kuamah dang om lou ahi, chih na theih nadingin, na deih bangbang ahi ding. 11 Upite'n nang leh na mite leh na uliante leh na mite a nuse ding uh a, Nail luipi kia ah a om ding uh, a chi hi. 12 Tua khitin, Mosi leh Aron, Faro omna apan a paikhia uh a, Faro tunga upite a tunsak thu tawh kisaiin, Tangtawn Toupa kiang ah Mosi thuumin a tau hi. 13 Tangtawn Toupa'n Mosi nget bangin a hih a, innsungte leh huangsungte leh loute apan upite a si uhi. 14 Mite'n tua upi site a vuma vum venvona, a gam a gama uih vengvung a mu uhi. 15 Faro in a tung a zangta, chih a theihin, Tangtawn Toupa' gensa bangin, a lungtang a khauhsak a, Mosi leh Aron' thu a ngaikhe kei hi.

Thouvaia Gawtna

16 Tua khitin, Tangtawn Toupa'n Mosi kiang ah: Aron houpih inla: Na chiangkhun lik inla, leilak leivui sat in, leivuite Aigupta gam sung teng ah, thouvai hong suak ding, chi in, a chi hi. 17 Tua bangin Aron in a hih a, a khuta chiangkhun a lik a, leilak leivui a sat hi. Aigupta gam sung teng ah, tua leivuite thouvai a suak a, mihingte leh gantate tung ah a dim hi. 18 Ahihhangin, dawisiamte'n aisana tua banga hih a sawm uleh, thouvaite a omsak thei kei uh a, tua thouvaite mihingte leh gantate tung ah a dimin a dim lailai hi. 19 Tua dawisiamte'n Faro kiang ah: Hiai zaw Pathian khut zung apan ahi, a chi uhi. Ahihhangin, Tangtawn Toupa' gensa bangin, Faro' lungtang a khauhsak a, Mosi leh Aron thu a ngaikhe kei hi.

Chippi-a Gawtna

20 Tua khitin, Tangtawn Toupa'n Mosi kiang ah: Zingkhangpi-in thou inla, Faro Nail luipi-a hawh ding mai tuah inla, a kiang ah: Tangtawn Toupa'n hiai a gen: Kei hon biak theih nadingun, ka mite paisak in. 21 Ka mite na paisak kei leh, ngai in, na tung ah leh na uliante tung ah leh na mite tung ah leh na innpi sung ah chippihon kon sawl ding a, Aiguptate' innte leh leilak teng a dim ding uh. 22 Ahihhangin, kei Tangtawn Toupa, Aigupta gam sung ah ka om, chih na theih nadingun, ka mite' tenna Goshen gam ka hum tuam ding a, tua ah chippite a om kei ding. 23 Na mite leh ka mite kal ka deidan ding a, zing chiangin, hiai chiamtehna hong tung ding, a chi, chi in, a chi hi. 24 Tua bangin, Tangtawn Toupa'n a hih a, Faro' innpi sung ahte, a uliante' innsung ahte leh Aigupta gam sung teng ah chippihon a lut uh a, gam sung teng a susia uhi. 25 Tua khitin, Faro in Mosi leh Aron a sam a: Pai un! Hiai gam sung ah na Pathian uh mai ah kithoihna laan un, a chi hi. 26 Ahihhangin, Mosi in: Tua banga hih theih ahi kei. Tangtawn Toupa, ka Pathian uh maia kithoihna ka lat ding uh, Aiguptate mitmuha kihhuai hi ding ahi. Aiguptate adinga kihhuai kithoihna ka latun, suanga hon deng lou ding uhia? 27 Gamdai-gamkeu ah ni thum lama pai ding hon phal in. Tangtawn Toupa ka Pathian un ka kiang ua a gen bangin, tua ah a mai ah kithoihna ka laan dinguh, a chi hi. 28 Faro in: Gamdai-gamkeua Tangtawn Toupa na Pathian uh maia kithoihna laan dingin kon paisak ding. Ahihhangin, gamla pai kei peuhmah unla, tu'n kei adingin hon thuumsak malam un, a chi hi. 29 Mosi in a dawng a: Nang apan ka paikhiakphet chiangin, Tangtawn Toupa kiang ah ka thuum ding a, zing chiangin, Faro apan leh a uliante apan leh a mite apan chippi honte a bei ding. Tangtawn Toupa' maia kithoihna a lat theih nadingun Israelte paisak louin, Faro zuautat nawn kei peuhmah hen, a chi hi. 30 Tua khitin, Mosi in Faro a nusia a, Tangtawn Toupa kiang ah a thuum a, 31 Tangtawn Toupa'n a nget bangin a hih hi. Chippi honte'n Faro leh a uliante leh a mite a nusia uh a, khat lei zong a om nawn kei hi. 32 Ahihhangin, Faro in tua hunin zong a lungtang a khauhsak a, Israel tate a paisak kei hi.

Pemkhiakna 9

Gantate a Gawtna

1 Tua khitin, Tangtawn Toupa'n Mosi kiang ah: Faro kiang ah valut inla, a kiang ah: Tangtawn Toupa, Hebrute' Pathian in hiai a gen: Ka mite'n kei hon biak theih nadingun, amaute paisak in. 2 Amaute na paisak nop kei lai a, na lettang lai leh, 3 ngai in, gama na gantate uh tung ah Tangtawn Toupa'n khut a kha ding. Na sakolte, na sabiltungte, na sangawngsaute, na bawnghonte uleh na belamhonte uh tune ah gawtna nasetak a tung ding. 4 Kei, Tangtawn Toupa'n Israel tate' gantate leh Aiguptate' gantate kal ka deidan ding a, Israel tate' gantate a si kei ding, chi ahi, chi in, a chi hi. 5 Tangtawn Toupa'n hun khat a sep a: Zing chiangin gam sung ah hiai a tung ding, a chi hi. 6 A zing chiangin, Tangtawn Toupa'n hiai a hih a, Aiguptate' gantate khempeuh a si a, Israel tate' gantate bel khat zong a si kei hi. 7 Faro in mi sawlin a ensak a, ngai dih, Israel tate' gantate khat zong a si kei hi. Hinapi-in, Faro' lungtang a khauh a, Israelte a paisak kei hi.

Meimatuma Gawtna

8 Tua khitin, Tangtawn Toupa'n Mosi leh Aron kiang ah: Haltuina meiphualpi apan meivu khut dimin pham unla, Faro muhin vanlam ah thehtou un. 9 Aigupta gam sung teng ah leivui a suak ding a, mihingte leh gantate tung ah meimatum nasetakin a leng ding, a chi hi. 10 Tua bangin, amaute'n haltuina meiphualpi apan meivu a pham uh a, Faro' mai ah a ding uhi. Mosi in vanlam ah a thehtou a, mihingte leh gantate tung ah meimatum a leng hi. 11 Tua meimatumte dawisiamte leh Aiguptate khempeuh in a vei uh a, dawisiamte Mosi' mai ah a ding thei kei uhi. 12 Ahihhangin, Tangtawn Toupa'n Faro lungtang a khauhsak a, Tangtawn Toupa' gensa bangin, Mosi leh Aron' thu a ngaikhe kei hi.

Gialpi-a Gawtna

13 Tua khitin, Tangtawn Toupa'n Mosi kiang ah: Zingkhangpi-in thou inla, Faro' mai ah va-ding inla: Tangtawn Toupa, Hebrute' Pathian in: Ka mite'n kei hon biak theih nadingun, amaute paisak in. 14 Tutunga tua banga na hih kei leh, leitung khuavannuai ah kei bang kuamah a om kei, chih na theih nadingin, nangma' tung ah leh mite tung ah a nasetawpkhawk ka hipi ka tungsak ding. 15 Ahang bel, tu'n zong ka khut khain, nang leh na mite hon gawt leng, leitung apan hon phiatmang vek khin tham ding ka hi. 16 Hinapi-in, hiai dingin kon hinghawi a, ka vangletna kon etsak nading leh leitung khempeuha ka min a kiphuanzak nadingin kon hinghawi a, kon kembit hi. 17 Tu'n zong ka mite douin na kiliansak lailai a, amaute na paisak nuam kei hi. 18 Tua bang ahih manin, ngai in, zing chiang tubang hunin, gialpi lianpipi, Aigupta gam a din apan tudonga ke ngeilou, ka zusak ding. 19 Tuin thu pia inla, gama om na gantate leh na neih khempeuh a bitna mun ah kaikhawmsak in, Tua bangin gama om na mite leh gantate tung ah gialpi a ke ding a, a si ding uhi, chi ahi, chi in, a chi hi. 20 Tangtawn Toupa' thugen lau thei Faro' uliante peuhmah in, kintakin, a silate uleh a gantate uh inn ah a kaikhawm uhi. 21 Ahihhangin, Tangtawn Toupa' thugen ngeingaihloute'n bel a silate uleh gantate uh lou ah leh gam ah a nusia uhi. 22 Tangtawn Toupa'n Mosi kiang ah: Aigupta gam sung khempeuha gialpi a kiak nadingin, na khut vanlam ah liktou in. Aigupta gama mihingte, gantate leh gama sing leh louhing khempeuh tung ah gialpi a ke ding, a chi hi. 23 Mosi in a chiangkhun vanlam ah a liktou a, Tangtawn Toupa'n vanpiging leh gialpi a sawl a, kekkia in leilak a sunsuk zolzol hi. Tua bangin Tangtawn Toupa'n Aigupta gam ah gialpi a zusak a, 24 gialpite kiain khawphia a phe zolzol hi. Aigupta gam a dinkhiak apan tu dong tua gama huihpi nasepen ahi lai hi. 25 Aigupta gam sung khempeuha mihing leh gantate hita leh, lou leh gama sing leh louhing hita leh gialpi in a deng a, singte khempeuh a geukhin vek hi. 26 Gialpi kiak louhna Israel tate' tenna Goshen gam kia ahi. 27 Tua khitin, Faro in Mosi leh Aron a samsak a, amaute kiang ah: Tutung in zaw ka khial ahi. Tangtawn Toupa a diktat a, kei leh ka mite ka gilou uh ahi. 28 Vanpiging leh gialpi ka thuak gimta uh. Tangtawn Toupa kiang ah hon thuumsak un. Hiai ah na om nawn kei ding uh, kon paisakta ding, a chi hi. 29 Mosi in a dawng a: Khawpi apan ka pawtkhiak chiangin, thumin Tangtawn Toupa lam ah ka khut ka zak ding a, leitung Tangtawn Toupa-a ahi, chih na theih nadingin vanpiging a dai ding a, gialpi a ke nawn kei ding. 30 Ahihhangin, nang leh na uliante'n Tangtawn Toupa Pathian lauh nadan na thei nai kei uh, chih ka thei, a chi hi. 31 Ziza leh barli buh a segawp vek hi. Ahang bel, barli buh a vuihsan laitak ahi a, ziza zong a pak san laitak ahi. 32 Huitbuh leh huitbuh ham bel a gei deuh ahih manin a se kei hi. 33 Tua khitin, Mosi in Faro a paisan a, khawpi a nusia a, Tangtawn Toupa lam ah a khut a zak hi. Tua khitin, vanpiging a dai a, gialpi a thengta a, gam sung ah vuahpi a zu nawn kei hi, 34 Faro in, vuah leh gialpi leh vanpiging a beita, chih a muh takin, a khial lai lai a, amah leh a uliante'n a lungtang uh a khauhsak uhi. 35 Tua bangin, Tangtawn Toupa'n Mosi tungtawna a gensa bangin, Faro' lungtang a khauhsak a, Israelte a paisak nuam kei hi.

Pemkhiakna 10

Khaupete-a Gawtna

1 Tua khitin, Tangtawn Toupa'n Mosi kiang ah: Faro kiang ah valut in, amaute laka hiai ka chiamtehna lamdangte ka hih theih nadingin, Faro leh a uliante' lungtang ka khauhsakta. 2 Tua bel, Aiguptate mihai ka suahsak dan leh, amaute laka ka chiamtehnate ka hih dan, na tate uleh na tute uh zaka na gensawn theih nading uleh, kei Tangtawn Toupa ka hi, chih na theih nading uh ahi, a chi hi. 3 Tua bangin, Mosi leh Aron Faro kiang ah a valut uh a, a kiang ah: Tangtawn Toupa, Hebrute' Pathian in: Ka maia bangtan kiniamkhiak nuam lou ding na hia? Kei hon biak theih nadingun, ka mite paisak in. 4 Ka mite na paisak nop kei lai leh, ngai in, zing chiangin na gamsung ah khaupete kon sawllut ding. 5 Lei mai a tuam dim ding uh a, leilak a kimu kei ding. Gialpi den-gawp bang omsunte, lou leh gama sing-le-lou, anteh-louhing pou sunte nangawn a ne gai ding uh. 6 Na innpite leh na uliante' innte leh Aiguptate' innte a dim ding uh. Na pu na pate uh hiai gama a ten uapan tuni dong, tua bang himhim a muh ngei nai louh uh ahi ding, chi ahi, a chi uhi. Tua khitin, Mosi a kihei a, Faro a paisan hi. 7 Faro' uliante'n Faro kiang ah: Hiai mipa bangtan eite adinga thang hi ding ahia? Tangtawn Toupa, a Pathian uh a biak theih nadingun Israel tate paisak mai in. Aigupta gam segawpta ahih lam phawk nailou na hi hiam? a chi uhi. 8 Tua khitin, Mosi leh Aron bel Faro' maia piikikin a om uh a, Faro in amaute kiang ah: Pai unla, Tangtawn Toupa, na Pathian uh vabia un. Ahihhangin, kua teng pai ding na hi ua? a chi hi. 9 Mosi in a dawng a: Tangtawn Toupa' ankuang lui ding ka hih manun, a tek a khang, ka vekun ka tapate uleh ka tanute utawh, ka bawnghonte uleh ka belamhonte utawh ka pai ding uh ahi, a chi hi. 10 Faro in amaute kiang ah: Na numeite uleh na taneute utawh kon paisak hiai leh, Tangtawn Toupa'n hon ompih hen aw. Ahihhangin, a selam khat sawm hi peuhmah uteh. 11 Hibang hi thei ken teh! Pasalte kia na pai ding uh. Na ngetnget uh ahih chiangin, Tangtawn Toupa vabia un, a chi hi. Tua khitin, Faro in Mosi leh Aron a hawlkhesak hi. 12 Tua khitin, Tangtawn Toupa'n Mosi kiang ah: Aigupta gama khaupe a dim a, gialpi hihsiat bang omsun leh gama pou khempeuh a nek gaih nading-un Aigupta gam tung ah na khut lik in, a chi hi. 13 Tua bangin, Mosi in Aigupta gam tung ah a chiangkhun a lik a, Tangtawn Toupa'n, tua ni nitumin leh zankhawvakin, suahlam huih a nungsak a, zingsang hong hih takin tua suahlam huih in khaupete a na tunkhin hi. 14 Khaupete'n Aigupta gam khempeuh a tuam uh a, mun chih ah a om noinoi uhi. Tua bang lawmlawma khaupe tam a om ngei nai kei a, om zong a om nawn kei ding hi. 15 Lei lak a tuam dim uh a, a vomin a vom muimui uh a, gialpi den-gawp bang, lou leh gama sing leh anteh louhing leh sing gah khempeuh a negai uhi. Aigupta gam ah sing hing louhing himhim a omta kei hi. 16 Faro in Mosi leh Aron kintakin a samsak a, amaute kiang ah: Tangtawn Toupa na Pathian uleh, noute tung ah ka khial ahi. 17 Tutung beek ka khelhna hon ngaidam unla, kei apan hiai sihna gawtna lakhe dingin Tangtawn Toupa na Pathian uh kiang ah hon thuumsak peuhmah un, a chi hi. 18 Mosi in Faro a paisan a, Tangtawn Toupa kiang ah a thuum hi. 19 Tangtawn Toupa'n tua suahlam huih, tumlam huih hattak a suaksak a, tua in khaupete a lenmang a, Tuipi San a tun a, Aigupta gam ah khaupe khat lei zong muh ding a om nawn kei hi. 20 Ahihhangin, Tangtawn Toupa'n Faro lungtang a khauhsak a, Faro in Israel tate a paisak nuam kei hi.

Khawmiala Gawtna

21 Tua khitin, Tangtawn Toupa'n Mosi kiang ah: Aigupta gam khawmial in a khuh a, khoih theih hiaia mial a sah nadingin, vanlam ah na khut liktou in, a chi hi. 22 Tua bangin, Mosi in vanlam ah a khut a liktou a, ni thum sung, Aigupta gam khempeuh a mial bikbek hi. 23 Aiguptate ni thum sung, khat leh khat a kimu thei kei uh a, om mun zong a suan thei kei uhi. Ahihhangin, Israel tate' tenna ah khua a vak hi. 24 Tua khitin, Faro in Mosi a samsak a, a kiang ah: Pai unla, Tangtawn Toupa vabia un. Na numeite uleh na taneute'n zong hon zui thei ding uh. Ahihhangin, na belamhonte uleh na bawnghonte uh bel nusia un, a chi hi. 25 Mosi in: Tangtawn Toupa ka Pathian uh maia lat ding kithoihna leh haltum thillat ding non phalsak ding ahi. 26 Ka gantate un zong koute hon zuih ding ahi. Gan khechin khat lei zong nutsiat ahi ding ahi kei hi. Ganta pawlkhat Tangtawn Toupa ka Pathian uh biakna-a zat ding ahi a, a mun ka tun mateng uh, Tangtawn Toupa biakna ding bang ganta zang ding ka hi uhiam, ka thei kei uhi, a chi hi. 27 Ahihhangin, Tangtawn Toupa'n Faro' lungtang a khauhsak a, ama'n amaute a paisak nuam kei hi. 28 Faro in Mosi kiang ah: Ka muh phakna ah om ken! Ka maia hong kilang nawn lou dingin pilvang in! Ka maitang na muh ni-ni na sih ni ahi ding, a chi hi. 28 Mosi in a dawng a: Na gen bang bangin, na maitang ka mu nawn kei ding, a chi hi.

Pemkhiakna 11

Tamasa-a Gawtna

1 Tangtawn Toupa'n Mosi kiang ah: Faro leh Aigupta gam tung ah gawtna khat ka tungsak lai ding. Tua nung chiangin, Faro in hiai apan noute hon paisak ding a, na vek sipsipun, hon hawlkhiak thawh ding, a chi hi. 2 Ama'n: Israel tate kiang ah thu gen inla, michih in a mei apain, a innveng kiang ah ngun leh khama kibawl vante ngen uhen, a na chikhinta hi. 3 Tua bangin, Tangtawn Toupa'n Aiguptate' mit ah Israelte deihsakna a neisak a, Mosi mahmah zong Aigupta gam ah Faro' uliante leh midangte'n a ngaisang mahmah uhi. 4 Tua bangin, Mosi in Faro kiang ah: Tangtawn Toupa'n hiai a gen: Zankim lai khawngin Aigupta gam sung teng ka tawnsuak ding a, 5 Aigupta gama tamasa peuhmah a si ding. Kumpitutphah tunga tu Faro' tamasa apan buhhek sila numei' tamasa leh ganta piang masa dong a si ding. 6 Aigupta gam sung teng ah kahna mauna thupitak a om ding, Tua bang himhim a om ngei nai kei a, om zong a om ngei nawn kei ding. 7 Ahihhangin, Israelte lak ah bel, ui in zong mihing leh ganta nangawn a na kei ding, Tangtawn Toupa'n Israelte leh Aiguptate a deidantuam, chih na thei ding, chi ahi, a chi hi. 8 Tua hun chiangin, na uliante khempeuh ka kiang ah hong pai ding uh a, ka mai ah hong kun ding uh a: Pai un, pai un, nang leh nang hon zuite khempeuh pai un, hong chi ding uh. Tua chiangin ka paikhe ding, a chi a, heh mahmah in Faro a paikhiaksanta hi. 9 Tua khitin, Tangtawn Toupa'n Mosi kiang ah: Ke'n Aigupta gam ah ka thillamdangte tamsem sem ka hih nadingin, Faro in na thu a ngaikhe kei ding, a na chi khin hi. 10 Mosi leh Aron in Faro' mai ah hiai thillamdangte khempeuh a hih uh a, ahihhangin, Tangtawn Toupa'n Faro' lungtang a khauhsak a, a gam apan Israelte a paisak nuam kei hi.

Pemkhiakna 12

Paikan Ankuang

1 Tangtawn Toupa'n Aigupta gam ah Mosi leh Aron kiang ah: 2 Noute adinga tu kha, kha masa kum khata kha khatna hi ding ahi. 3 Israel tate khempeuh kiang ah thu gen unla, tu kha a ni sawm ni-in, michih in a pa' innkawte tek adingin belamnou khat la hen. 4 Belamnou pum khat ne dinga innkuan tawm lua om leh, innkuan mi tam leh tawm thu enin, a innveng nai tawh tua belamnou kikop hen. Michih kham khop ding ngaihtuaha belamnou teel ding ahi. 5 Tua banga belamnou na teel chiangun, a pa, kum khata upa, melhemnabei ahi ding ahi. Belamhon lak apan hiam, kelhon lak apan hiam na teel ding uh ahi. 6 Tua belamtuai, tua kha a ni sawmleli dong hoihtakin na kem ding uh a, a ni a chin chiangin, Israelte, mi khempeuh in nitak khawmuiin a gou ding uh ahi. 7 Tua belam sisan bang zah hiam a la ding uh a, tua belam a sa a nekna innte uh kong biang tuak leh kong tung, a pawlam ah a tat ding uh ahi. 8 Tua zan mahmahin, tua belam sa meia haimin, loukha tawh, silngou sawh louh tanghou tawh a ne ding uh ahi. 9 Tua belam a sa a sialin hiam, tuia huanin hiam na ne ding uh ahi kei. A lu, a khete leh a sungkua tawh meia haiminkhawm ahi ding ahi. 10 Zingsang dong khamval na koih ding uh ahi kei. Khamval zingsang donga a om leh, haltum ding ahi. 11 Na nek ding dan uh hibang ahi: Kawnggak gaksain, na khe ua khedap bunsain, na khut ua chiangkhun tawi kawmin, kintakin na ne ding uh ahi. Tangtawn Toupa' Paikan Ankuang ahi. 12 Tua zan mahmahin, Aigupta gam sung ka tawnsuak ding a, tamasa ding peuhmah, mihing hita leh, ganta hita leh, ka that ding. Aigupta pathiante khempeuh tung ah gawtna tun ding ka hi, kei Tangtawn Toupa ka hi. 13 Tua sisan, na omna innte uah, noute adingin chiamtehna ahi ding a, tua sisan ka muh chiangin, kon paikan ding. Aigupta gam ka gawt chiangin, tua gawtna in noute hon khoih kha kei ding. 14 Tua ni noute adingin theihgigena ahi ding a, a khang a khanga Tangtawn Toupa' maia ankuangluina ahi ding a, danthuseha na neihden ding uh ahi. 15 Ni sagih sung silngou sawh louh tanghou na ne ding uh ahi. A ni khatna ah na innte uapan silngou paimang vek un. Ni khatna apan ni sagih ni dong sung peuhmaha silngou sawh ne peuhmah Israelte lak apan satkhiak ahi ding ahi. 16 A ni khat ni-in khawmpi siangthou na nei ding uh a, a ni sagih ni-in zong khawmpi siangthou na nei nawn ding uh ahi. Tua ni sagih sung peuhmah nek bawl louh ngai nna dang himhim na sep louh ding uh ahi. 17 Tua ni-in Silngou Sawhlouh Tanghou Ankuang na lui pan ding uh ahi. Ahang bel, tua ni mahmaha Aigupta gam apan noute a pawlpawla hon piikhe ding ka hi. Akhang akhanga thuseh omden dingin hiai ni-in ankuang lui un. 18 A kha khatna, a ni sawmleli ni, nitak apan ni sawmnihlenikhat nitak dong silngou sawhlouh tanghou na ne ding uh ahi. 19 Ni sa gih sung peuhmah na innte uah silngou a kimuh louh ding ahi. Tua sunga silngou sawh ne peuhmah Israelte lak apan satkhiak ahi ding ahi. 20 Silngou sawh bangmah ne kei un. Na tenna peuh uah silngou sawh louh tanghou na ne ding uh ahi, a chi hi. 21 Tua khitin, Mosi in Israel upate khempeuh a samkhawm a, amaute kiang ah: Kintakin kisa unla, na innkuan kuan ua ding gantate vateelkhia unla, na Paikan Belamnou uh gou un. 22 Husop sawl la unla, kuanga belamnou sisan ah diah unla, kong biang tuak leh kong tung ah taat un. Zingsang masiah kuamah kong pua-a pusuaka na pawtkhiak louh ding uh ahi. 23 Aiguptate that dinga Tangtawn Toupa'n Aigupta gam sung a totsuak chiangin, na kong biang uleh, na kong tungte ua sisan a mu ding a, tua bang a muhna kongkhakte a paikan ding a, hihmangthangpa na inn sung ua hong lut a, noute hong thah a phal kei ding hi, 24 Noute leh na suante uh adinga thuseh omden hi dingin, hiai thu zui un. 25 Tangtawn Toupa'n hon chiamsa banga hon piak ding gam na lut chiangun, hiai biakna thilzekin hih gige un. 26 Na tate un: Hiai biakna thilzeka na hih uh, bang na chihna uh ahia? chi-a hon dot chiangun, noute'n: 27 Tangtawn Toupa'n Aiguptate a thah laia, Aigupta gama Israelte' innte paikan a, ka innkuante uh hinna hon hawisakpa, Tangtawn Toupa' maia Paikan kithoihna ahi, chi-in na hilh ding uh ahi, a chi hi. Tua khitin, Israelte'n kunin Pathian a bia uhi. 28 Tua bangin, Tangtawn Toupa'n Mosi leh Aron thu a piak bangbangin, Israel tate'n a hih uhi. 29 Zankim laiin, Tangtawn Toupa'n Aigupta gama tamasa khempeuh a that a, kumpitutphah tunga tu Faro' tamasa apan suangkul sunga henta kolbuna om mi' tamasa leh ganta khempeuh' tamasa dong a that hi, 30 Faro leh a uliante khempeuh leh Aiguptate khempeuh zankhang laiin a thou uh a, misi omlouhna inn khat beek zong om lou ahih manin, Aigupta gam sung ah nakpitaka kahna leh mauna a om hi.

Pemkhiakna

31 Zan laiin, Faro in Mosi leh Aron a samsak a, amaute kiang ah: Kisa zok un! Noute leh Israelte'n ka mite nusia un! Pai unla, na nget bangun, Tangtawn Toupa bia un. 32 Na gen bangun, na belamhonte uleh na ganhonte uh tonpih unla, pai un. Kei zong hon vualzawl malam un, a chi hi. 33 Aigupta gam nuse meng dingin Aiguptate'n Israelte a nawh uh a: Na paikhiak zok kei uleh, sikhin vek petmah hita ung, a chi uhi. 34 Tua bangin, Israel tate'n a anvui nei mekmante uh silngou sawh louhin, anvuinel mekna kuang tawh puana tunin a kisuan uh a, a pua uhi. 35 Israel tate'n Mosi' thuhilh bangin, Aiguptate kiang ah, ngun leh khama kibawl vante leh puansilhte a ngen uhi. 36 Tangtawn Toupa'n Aiguptate' mit ah Israelte deihsakna a neisak a, a ngette uh a pia uhi. Tua bangin, Israel tate'n Aiguptate lok ahi mai uhi. 37 Israelte Rameses apan pemkhiain Sukoth a tung uhi. Amaute, numei leh naupang sim louhin pasal hat khe-a pai 6,00,000 a pha uhi. 38 Mikihel Arabmi tampi in zong amaute a zuitou uh a, belamhon leh bawnghon, ganta tampi zong a hawi uhi. 39 Aigupta gam apan hon puak uh anvui nei mekmanin silngou sawhlouh tanghou peite a bawl uhi. Aigupta gam apan a hawla hawlkhiak thawh ahih manun, anvui nei mekmante silngou a sawh man kei uh a, tanghou zong a kibawl man kei uhi. 40 Israel tate Aigupta gama a khualtam sung uh kum 430 ahi. 41 Tua kum 430 a bei ni geihin Tangtawn Toupa' mite'n a pawl pawlin Aigupta gam a nusia uhi. 42 Tangtawn Toupa'n amaute Aigupta gam apan pikhe dinga, zankhua-a amaute pilvangtaka ching ahih manin, Tangtawn Toupa pahtawinain Israelte khempeuh in zong a khang a khangin tua zan pilvangtaka a tan ding uh ahi.

Paikan tawh kisai Dante

43 Tangtawn Toupa'n Mosi leh Aron kiang ah: Paikanankuang tawh kisai dante hiaite ahi: Gamdang mi kuamah in a ne ding ahi kei. 44 Sumtanga na lei uh sila peuhmah in bel, zek na sumsak khit chiangun a ne thei ding uh. 45 Ahihhangin, na lak ua khualtam lei leh goih nasem mi in a ne thei kei ding. 46 Inn sunga na nek teitei ding uh ahi a, innpua-a a sa bangmah tawikhiak louh ding ahi. A guhte sattan louh ding ahi. 47 Israel mipite peuhmah in Paikanankuang a um ding ahi. 48 Na lak ua om gamdang mi in Tangtawn Toupa' Paikanankuang a lui nop leh, a innkuan sunga pasal khempeuh zek a sum ding ahi. Tua khit chiangin, gamsunga piang bangin Paikanankuang a lui thei ding hi. Zeksum louh pasal peuhmah in a nek ding ahi kei. 49 Hiai dan, gamsunga piangte leh na lak ua teng gamdang mite tung ah a kibangin a kizang ding ahi, a chi hi. 50 Tangtawn Toupa'n Mosi leh Aron thu a piak bangbangin, Israel tate khempeuh in a hih uhi. 51 Tua ni mahin, Tangtawn Toupa'n Aigupta gam apanin Israelte a pawl pawlin a piikhia hi.

Pemkhiakna 13

Tamasa Sehtuamna

1 Tua khitin, Tangtawn Toupa'n Mosi a houpih a: 2 Kei adingin Israel suante laka tamasa, sul hong peuhmah, mihing hi-in ganta hita leh, siangthouin hon sehtuamsak un, keia ahi, a chi hi.

Silngou Sawhlouh Tanghou-ankuang

3 Mosi in Israel tate kiang ah: Aigupta gam leh saltanna apan na pemkhiak ni uh tuni theih gigena bawl un. Ahang bel, Tangtawn Toupa'n ban thahata hon piikhiak na hi uhi. Silngou sawh tanghou peuhmah na nek louh ding uh ahi. 4 Abib kha, tuni-in paikhe ding na hi uhi. 5 Tangtawn Toupa'n na pu na pate uh kianga a chiamsa, nawitui leh khuaizu-a luang gam, Kanante, Hitte, Amorte, Hivte leh Jebuste gama hon piilut chiangin, hiai ankuang lui lui gige un. 6 Ni sagih sung silngou sawh louh tanghou na ne ding uh a, a ni sagih ni Tangtawn Toupa adingin ankuang lui ni ahi ding ahi. 7 Tua ni sagih sung silngou sawh louh tanghou ne unla, ahihhangin, silngou sawh thil himhim na gam sung uah a kimu ding ahi kei. 8 Tua ni-in na tapa kiang ah: Aigupta gam apan kong paikhiak laia Tangtawn Toupa'n kei adinga hon hihsak thil ziaka hiai hih ka hi, chi-in na hilh ding uh ahi: 9 Tangtawn Toupa' dan na kama a om gige theih nadingin, na khuta velh chiamtehna banvial ahi ding a, na mit kikala khip theihgigena bawm ahi ding. 10 A hun kon sehsak ah, a kum akumin hiai thuseh na hih ngeingei ding uh ahi.

Tamasa tawh kisai Dan

11 Noute leh na pu na pate uh kianga a kichiam bangin, Tangtawn Toupa'n noute Kanan gam ah hon pnlut ding a, tua gam hon pe ding. 12 Ganta tamasa, sul hong peuhmah Tangtawn Toupa' maia lat ding ahi. Na gantate laka a nou, 13 sabiltung nou piang masa peuhmah belamnou khata na tat ding ahi. Na tat nop kei leh, a ngawng na hektan ding ahi. Ahihhangin, na tapate' tamasa peuhmah na tat ding ahi. 14 Tunung chianga, na tapa in: Hiai bang chihna ahia? chi-a hon dot chiangin, Tangtawn Toupa'n ban thahatin Aigupta saltanna apan koute hon piikhia ahi. 15 Faro in genhaktaka, koute hon paisak noplouh laiin, Tangtawn Toupa'n Aigupta gama tamasa khempeuh mihing hita leh, ganta hita leh, a that hi. Hiai hang ahi, ganta piang masa, sul hong a pa peuhmah Tangtawn Toupa kianga ka lat a, ka tapate' tamasa peuhmah ka tat, na chi ding ahi. 16 Tangtawn Toupa'n ban thahata, Aigupta gam apan koute hon piikhia ahih manin, hiai na khuta velh theihgigena banvial ahi ding a, na mitkala khip theihgigena bawm ahi ding, a chi hi.

Gamdai-gamkeu Lampi

17 Faro in Israel tate a paikhiaksak laiin, Filistiate' gam tawna paina nai zaw hi napi-in, Pathian in tua lam tawnin a pii kei hi. Ahang bel, Pathian in: Kidouna tuak le uh, lungheiin Aigupta gam ah a kilehkik kha ding uh, a chi-a ahi. 18 Tua bang ahih manin, Pathian in Tuipi San lam ah, gamdai-gamkeu tawnin amaute a pii hi. Tua bangin, Aigupta gam apanin Israel tate a pawl pawla kizomin a piitou hi. 19 Josef in Israel suante a na kichiamsak a: Pathian in noute hong veh ngeingei ding a, tua hun chiangin, ka guhte hiai apan na puaktouh ding uh ahi, a na chih manin, Mosi in Josef guhte a pua hi. 20 Amaute'n Sukoth a nutsiat nungun, gamdai-gamkeu gei Etham ah giahphual a sat uhi. 21 Sun chiangin, Tangtawn Toupa amaute' mai ah, meipi khuampi dinga paiin ama uh a kai a, zan chiangin, amaute taan dingin meikuang khuampi dingin a pai hi. Tua bangin, sun leh zanin a pai uhi. 22 Suna meipi khuampi ding in zong, zana meikuang khuampi ding in zong, Israel tate' mai a paina a nuse ngei kei hi.

Pemkhiakna 14

Tuipi San Kanna

1 Tangtawn Toupa'n Mosi kiang ah: 2 Kinungheia Migdol leh tuipi kala Pihahiroth kiang naia giahphual sat dingin Israel tate hilh in. Tuipi gei, Baal Zefon gal taka giahphual a saat ding uh ahi. 3 Faro in: Gamdai-gamkeu umtuah sung ah Israel tate gammangta, buaigawpta uh e, chi-in a ngaihtuah ding. 4 Ke'n Faro' lungtang ka khauhsak ding a, amaute a nungdelh ding. Ahihhangin, ke'n Faro leh a sepaihte tungtawnin pahtawina ka kilak ding. Tuachi-in, kei Tangtawn Toupa ka hi, chih Aiguptate'n a thei ding uh, a chi hi. Israelte'n tua bangin a hih uhi. 5 Israel tate taikheta uh, chih Aigupta kumpipa kianga a hilh takun, Israelte tawh kisaiin Faro leh a uliante lungtang a kihei a: Israel tate i nasem kimlai i paisak, bang hih i hita maia! a kichi uhi. 6 Tua bangin, Faro in a kangtalaite leh a sepaihte a kisasak a, 7 a kangtalai hoihpen pente 600 leh a Aigupta gam kangtalai khempeuh leh, kangtalai tungtuang sepaih makaite tawh, 8 Israelte a nungdelh hi. Ahang bel, Tangtawn Toupa'n Aigupta kumpipa Faro' lungtang a khauhsaka ahi, Israel tate bel hangsantakin a pai uhi. 9 Tua bangin, Aiguptate'n Faro' sakolte leh kangtalaite, sakol tungtuangte leh sepaihhon tawh, Israelte a delh uh a, Baal Zefon gala tuipi geia Pi Hahiroth kianga a giahphual uah a delhpha uhi. 10 Faro hong nai takin, Israelte a daktouh uleh, ngai in, Aiguptate a nung uah hong pai uhi. Israel tate a lau mahmah uh a, patauin Tangtawn Toupa kiang ah a toukou uhi. 11 Amaute'n Mosi kiang ah: Aigupta gama hankhuk a om louh mana, hiai gamdai-gamkeua si dinga hon piikhia na hi maw? Aigupta gam apan non piikhiak, bang hon lawh na hia? 12 Aigupta gama ka om laiun: Hong hihbuai se ke'n, Aiguptate' nna sem n'ung ka chi uh hilou maw? Gamdai-gamkeua sih sanga Aiguptate nasep koute adinga hoih zaw tham ding hi! a chita mawk uhi. 13 Mosi in Israel tate kiang ah: Lau kei un. Tuni-a Tangtawn Toupa' hon hotdam nading ngakin ding kinken un. Tuni-a Aiguptate na muh uh, na mu ngei nawn kei ding uhi. 14 Tangtawn Toupa'n noute adinga gal hon dousak ding ahi, ding kinken lei un, a chi hi. 15 Tangtawn Toupa'n Mosi kiang ah: Banghanga pataua ka kianga toukou na hia? Israel tate mainawta pai dingin hilh in. 16 Na chiangkhun liktou inla, tuipi tung ah na khut zak inla, kikhensak in. Israel tate tuipi laizang leihul ah a pai ding uh. 17 Ngai in, ke'n Aiguptate' lungtang ka khauhsak ding a, Israel tate a delhzui ding uh. Ke'n Faro leh a sepaihhonte, a kangtalaite leh sakol tungtuangte tung ah pahtawina ka kilak ding. 18 Tua banga Faro leh a sepaihhonte leh a kangtalaite leh sakol tungtuangte tunga pahtawina ka kilak chiangin, Kei Tangtawn Toupa ka hi, chih Aiguptate'n a thei ding uh, a chi hi. 19 Tua khitin, Israel tate' maia pai Pathian' Vansawltak a nungkik a, amaute nung ah a pai hi. Tua meipi khuampi ding zong, mailam apanin a kisuan a, amaute nunglam ah a ding hi. 20 Tua bangin, Aiguptate' giahphual leh Israel tate' giahphual kikal ah a om a, lang khat adingin meipi leh mial a omsak a, lang khat adingin zana vak a omsak a, zan khawvakin a kinaih thei zawsam a om kei uhi. 21 Tua khitin, Mosi in tuipi tung ah a khut a lik a, zan khawvakin Tangtawn Toupa'n tua tuipi suahlam huih hattak a lehmutsak a, tuipi tui a kikhensak a, a laizang ah leihul a dawksak hi. 22 Tua bangin, Israel tate tuipi laizang ah lei hul ah a pai uh a, tua tuite a taklam uleh a veilam uah tui baang a suak hi. 23 Aiguptate'n Faro' sakolte, kangtalaite leh sakol tungtuangte khempeuh tawh, tuipi laizang ah Israel tate a delhzui uhi. 24 Zinglam hong hih takin, Tangtawn Toupa'n meipi khuampi ding leh meikuang khuampi ding apanin Aigupta sepaihte a ensuk a, a buaizaksak hi. 25 A kangtalai peite uh a kitolkhesak a, haksapi-in a hawi uhi. Aiguptate'n: Israel tate' mai apan tai ni, Tangtawn Toupa'n amaute adinga Aiguptate dou ahi, a kichi uhi. 26 Tua khitin, Tangtawn Toupa'n Mosi kiang ah: Aiguptate leh a kangtalaite uleh, sakol tungtuangte tunga tuite a kichih kik nadingin, tuipi tung ah na khut lik in, a chi hi. 27 Mosi in tuipi tung ah a khut a lik a, zingsang phalvakin, Aiguptate tuipi sunglama a tailut laiun, tuipi tuite a ngeiin a kichih kik hi. Tua bangin, Tangtawn Toupa'n Aiguptate tuipi sung ah a phiatlut vek hi. 28 Tuipi tuite hong kichih kik takin, Israel tate delha tuipi sung hong tung Faro' kangtalaite, sakol tungtuangte leh sepaihhonte khempeuh tui in a tummang vek a, khat lei zong a suakta kei uhi. 29 Ahihhangin, Israel tate bel, a taklam uleh a veilam ua tui baang omte kal ah, leihul ah a paisuak uhi. 30 Tua bangin, tua ni-in, Tangtawn Toupa'n Aiguptate' khut apan Israel tate a hukhia a, 31 Israel tate'n tuipi piaua Aiguptate luangte a mu uhi. Israel tate'n Aiguptate tunga Tangtawn Toupa' vangletna lianpi kilang a mu uh a, Tangtawn Toupa a lau uh a, Tangtawn Toupa leh a sila Mosi a muangta uhi.

Pemkhiakna 15

Mosi' La

1 Tua khitin, Mosi leh Israel tate'n Tangtawn Toupa' mai ah hiai la a sa uh a: Tangtawn Toupa sangpi-a tawisanga om a hih manin, a mai ah la sa ding hi'ng. Sakol leh a tungtuangte tuipi ah pailutta. 2 Tangtawn Toupa ka thahatna leh ka la hi ahi. Amah ka hotdamna ahi. Amah ka Pathian hi a, amah phat ding hi'ng, amah ka pu ka pate' Pathian hi a, tawisang ding hi'ng 3 Tangtawn Toupa galhat hi a, a min Tangtawn Toupa hi ahi. 4 Ama'n Faro kangtalaite leh sepaihhonte tuipi ah pailutta. Faro' sepaih makaite Tuipi San ah kelumta, 5 Tui thukpi in amaute tum a, suang bangin tui thuk ah tumta uhi. 6 Tangtawn Toupa aw, na khut taklam vangletna khusak chin a, Tangtawn Toupa aw, na khut taklam in melma satzanta. 7 Na kumpi thupina lian in nang hon doute zouta. Na thangpaihna kuangsak chin a, amaute buhpawl bangin kangtumta. 8 Na nak na phit leh, tuite kivum hi. Tuipi luanglai baang bangin dingkip a, tuipi laia tuite datta. 9 Melmapa ki-uangsak a: Ka delh ding a, amaute ka pha ding. Gallakte ka hawmzak ding, amaute hangin ka lungkimna ka mu ding. Ka namsau ka phawi ding a, ka khutin amaute ka hihmangthang ding, chi hi. 10 Ahihhanga, nang na hu-a na mut chin a, tui in amaute tumta. Tui thukpi ah ngen bangin tumsuk uhi. 11 Tangtawn Toupa aw, pathiante lak ah, nang bang kua om hiam? Siangthouna-a thupi, thupina-a lauhuai, thillamdangte hih nang bang kua om hiam? 12 Nang na khut taklam likkhia chin a, lei in amaute valhkhinta. 13 Nang na zahngaihna nou ngiingeia na tatsate pii ding chin a, nang na thahatna-a na tenna mun siangthoua, amaute tun ding na hi. 14 Namte'n za ding uh a, ling ding uh a, Filistiate launa in man ding hi. 15 Tua hun chianga, Edom kumpipate lausak ding chin a, Moab mihatte linna'n man ding a, Kanante zulmang ding hi. 16 Amaute tung ah launa leh mulkimna tung ding a, Tangtawn Toupa aw, na mite a paisuak mateng, na leisa mite a paisuak mateng, na ban thahatna in amaute suang bangin daisak dide ding hi. 17 Tangtawn Toupa aw, na gouluah mual siangthou ah, na tenna mun dinga na bawl ah, Tangtawn Toupa aw, na khuta na bawl, na mun siangthou ah, na mite piilut ding chin a, sing bangin suan ding na hi. 18 Tangtawn Toupa'n Tangtawn, Tangtawnin vai hawm ding hi, a chi uhi. 19 Ahang bel, Faro' sakolte, kangtalaite leh a tungtuangte tuipi sung ah a paisuk uh a, Tangtawn Toupa'n amaute tung ah tui a kichihsak a, ahihhangin, Israel tate bel tuipi sung ah leihul ah a pai uhi.

Miriam' La

20 Tua khitin, Aron sanggamnu, tua kamsang numei Miriam in khuangta a la a, numeite khempeuh in khuangtate tawia lamin a zui uhi. 21 Miriam in mipite lain a dawng a: Tangtawn Toupa' mai ah la sa un, amah thupitakin vualzouta! Sakol leh a tungtuangte tuipi sung ah pailutta! a chi hi.

Tuikha Tuilim Suahsakna

22 Mosi in Israel tate Tuipi San apan a kipankhesak a, Shur gamdai-gamkeu ah ni thum a pai uh a, tui a mu kei uhi. 23 Mara mun hong tung uh a, Mara tuite kha ahih manin a dawn thei kei uhi. Tua hangin, tua mun Mara a chi uhi. 24 Tua ah Israel tate Mosi demin a phun uh a: Bang dawn ding ka hi ua? a chi uhi. 25 Mosi in Tangtawn Toupa a sam a, Tangtawn Toupa'n sing them khat a ensak a, Mosi in tua sing them tui laka a khiak leh, tua tuite hong lim hi. Tua mun ah Tangtawn Toupa'n dan thukhun leh thuseh khat a bawl a, amaute a ze-et hi. 26 Ama'n: Tangtawn Toupa na Pathian uh' aw pilvangtaka na ngaihkhiak uh a, a mitmuha thildik na hih ua, a thupiakte na limsak ua, a dankhunte khempeuh na zuih uleh, Aiguptate tunga ka tunsak natnate koimah noute tung ah ka tungsak kei ding. Kei Tangtawn Toupa, noute hon damsakpa ka hi, a chi hi. 27 Tua khitin, Israel tate tuinak sawmlenih leh tum sing 70 a omna mun Elim hong tung uh a, tua tuite gei ah giahphual a sat uhi.

Pemkhiakna 16

Van apan Tanghou

1 Israel suan mipite Elim apan a kipankhia uh a, Sin gamdai-gamkeu a tung uhi. Tua bel, Elim leh Sinai kikala om ahi. Amaute Aigupta apan hong pemkhiak nung uh kha nihna, ni sawmlenga ahita hi. 2 Israel suan mipite gamdai-gamkeu ah Mosi leh Aron tung ah a phun uh a: 3 Aigupta gama sabel bula ka tut ua, gihvah-a an ka nek laiun Tangtawn Toupa khut thuakin na si zawta mahmah mai le-ung maw! Tu'n lah gilkiala si dingin hiai gamdai-gamkeu ah hon piikheta ve uchin! a chi uhi. 4 Tangtawn Toupa'n Mosi kiang ah: Ngai in, noute adingin van apan an kon zusak ding. Israelte'n nisimin a kiching lei a valakhawm ding uh ahi. Hibangin, ka dan a zui uhiam, zuilou, amaute ka ze-et ding. 5 A niguk ni-in a lakkhawm zahzah uh nek dingin a bawl ding uh a, tua bel nidanga a khop zah nih uh ahi ding ahi, a chi hi. 6 Tua khitin, Mosi leh Aron in Israel suan mipite kiang ah: Aigupta gam apan noute hon pikhepa Tangtawn Toupa ahi, chih nitaklam in na thei ding uh a, 7 zingsangin, Tangtawn Toupa' thupina na mu ding uh. Ama'n Tangtawn Toupa' tunga na phunna uh a zata hi. Ahihhangin, koute tunga na phun uh, koute kua ka hi ua ahia? a chi uhi. 8 Mosi in zong: Tangtawn Toupa'n nitaklama sa hon piak a, zingsanga tanghou na duh zahzah uh na nek chiangun, Tangtawn Toupa thilhih ahi, chih na mu ding uh. Ama'n ama' tunga na phunna uh a zata. Koute zenzen bang ka hi ua? Koute tunga phun na hi kei uh a, Tangtawn Toupa tunga phun na hi zaw uhi, a chi lai hi. 9 Tua khitin, Mosi in Aron a houpih a: Israel suan mipite khempeuh kiang ah: Tangtawn Toupa'n na phunna uh a zata a, ama' mai ah hong paikhawm un, chi-in, a chi hi. 10 Tua banga Aron in Israel suan mipite khempeuh kianga thu a gen laiin, gamdai-gamkeu lam a et uleh, meipi laka Tangtawn Toupa' thupina hong kilang a mu uhi. 11 Tua khitin, Tangtawn Toupa'n Mosi kiang ah: 12 Israel tate' phunna ka zata. Amaute houpih inla: Khawmui chiangin sa na ne ding uh a, zingsangin kei Tangtawn Toupa na Pathian uh ka hi, chih na thei ding uh, Tangtawn Toupa'n a chi, chi in, a chi hi. 13 Tua nitaklamin vengkengte hong tung a, giahphual a dim uh a, zingsangin giahphual kimkot teng ah daitui thuahkhatin a kia hi. 14 Tua daitui a kap takin, gamdai-gamkeu leilak tengkhempeuh ah thil neu chikchik, a bema pek leilaka vuk kia bang a om hi. 15 Israel tate'n tua a muh takun, bang hi hiam, chih theilou uh ahih manun: Bang ahia? a kichi uhi. Mosi in amaute kiang ah: Tangtawn Toupa'n noute' nek dinga hon piak tanghou hiai ahi. 16 Tangtawn Toupa' thupiak hiai ahi: Michih in ama' nekkhop tek, mi khat adinga omer khat, ama' innkuan mi zah ading khawm henla, michih in a puanbuka omte ading lakkep hen, a chi hi. 17 Israel tate'n tua bangin tua a lakhawm uh a, pawlkhat in tam deuh, pawl khat in a tawm deuh a lakhawm uhi. 18 Tuate omer-in a teh uh a, a lakhawm tamin a vai a nei kei a, a lakhawm tawmin zong a tasam kei hi. Michih in a nekkhop tek a lakhawm hi. 19 Tua khitin Mosi in amaute kiang ah: Kuama'n zingsang dongin valsak kei hen, a chi hi. 20 Ahihhangin, mi pawlkhatte'n Mosi' thugen a limsak kei uh a, zingsang donga sit pawl a nei uhi. Ahihhangin, tua a sitte uh a than a, a uih hi. Tua bang ahih manin, amaute tung ah Mosi a heh hi. 21 Zingsang tengin, michih in a nekkhop a lakhawm tek uh a, ni hong sat chiangin, lei laka omlaite a tuimang zel hi. 22 A niguk ni-in, an a lehnih, tua bel, mi khat adinga omer nih, a lakhawm uh a, mipite' makaite'n Mosi kiang ah a vagen zel uhi. 23 Ama'n amaute kiang ah: Tangtawn Toupa' thupiak hiai ahi: Zingchiang Tangtawn Toupa adinga Sabbath siangthou hi ding ahi. Tua an tanghoua na kan nop uleh na ut zah uh kang unla, na huan nop zah uh huan un. Avalte zingsang dong sit un, a chi, a chi hi. 24 Tua bangin Mosi thupiak bangin, zingsang dong a sit uh a, a than kei a, uih zong a uih kei hi. 25 Mosi in: Tuni Tangtawn Toupa adinga Sabbath ahih manin, tuni'n tua ne un. Gamlaka bangmah lakkhawm ding om lou ding ahi. 26 Ni guk sung an na lakhawm ding uh a, a ni sagih ni, Sabbath ni-in lakkhawm ding bangmah omlou ding ahi, a chi hi. 27 Hinapi-in, Israel tate laka pawlkhat an lakhawm dingin Sabbath ni-in a kuankhia uh a, ahihhangin, bangmah a mu kei uhi. 28 Tua khitin, Tangtawn Toupa'n Mosi kiang ah: Ka thupiakte leh ka dante zui nuamloua bangtan om ding na hi ua? 29 En un. Tangtawn Toupa'n noute adingin Sabbath hon pia. Tua bang ahih manin, ni guk ni-in ni nih ading an hon pia ahi. Ni sagih ni-in, michih ama' inn ah om henla, pawtkhe kei hen, a chi hi. 30 Tua bangin, ni sagih ni-in amaute a khawl tawlnga uhi. 31 Israel tate'n tua an Mana, a chi uhi. Koriandar tang bangin a ngou a, a limna bel khuaizu sawh tanghou kan pei neu a bang hi. 32 Mosi in: Tangtawn Toupa' thupiak hiai ahi: Aigupta apan kon piikhiak laia, gamdai-gamkeua na nek ding ua an kon piak hiai ahi, chih khangsawnsawnte' muh dingin, tua mana omer khat la unla, koihching un, a chi, a chi hi. 33 Tua bangin, Mosi in Aron kiang ah: Bel khat la inla, a sung ah mana omer khat koih in. Tua bel khangsawn sawnte adingin koihching ahi ding a, Tangtawn Toupa' mai ah koih in, a chi hi. 34 Tangtawn Toupa'n Mosi a thupiak bangin, Aron in Theihpihna' mai ah tua mana a koihching hi. 35 Israel tate mihing tenna gam a tun mateng uh, kum 40 sung tua mana a ne uh a, Kanan gamgi hong tun mateng uh, tua mana a ne uhi. 36 Omer khat bel, ephah khat seh sawm suah seh khat ahi.

Pemkhiakna 17

Suangpi apan Tui

1 Tua nungin, Tangtawn Toupa' thupiak bangin, Israel suan mipite khempeuh Sin gamdai-gamkeu apan a kipankhe kik uh a, Refidim ah giahphual a sat uhi. Ahihhangin, tua ah tui dawn ding a om kei hi. 2 Tua bang ahih manin, amaute'n Mosi a tawng uh a: Tui dawn ding hon pia in, a chi uhi. Mosi in amaute kiang ah: Banghanga kei hon tawng na hi ua? Banghanga Tangtawn Toupa ze-et na hi ua? a chi hi. 3 Ahihhangin, tui om lou, mipite lah dangtak uh ahih manin, Mosi tung ah a phun uh a: Dangtaka hon sisak dinga banghanga koute, ka tate uh leh ka gantate utawh Aigupta gam apan hon pikhetou se na hia? a chi hi. 4 Mosi bel Tangtawn Toupa' maia thuumin a mau a: Hiai mite bang lawh ding ka hia? Suanga hon deng nuam phial uh hilou maw! a chi hi. 5 Tangtawn Toupa'n Mosi a dawng a: Mipite' mailam ah pai inla, Israel upate pawlkhat tonpih inla, Nail lui na satna chiang tawi inla paiin. 6 Ngai in, na maia Horeb ah suangpi tung ah ka na ding ding. Mipite' dawn ding tui hong pawt nadingin tua suangpi sat in, a chi hi. Tua bangin, Mosi in Israel tate' mitmuhin a hih hi. 7 Israel tate'n Tangtawn Toupa tawngin, a ze-et uh a: Tangtawn Toupa eite laka om hia, om lou? a chih manun, tua mun min dingin, Masa leh Meriba a sa hi.

Amalekte Zawhna

8 Tua laiin, Amalekte hong kuan uh a, Refidim ah Israel tate hong dou uhi. 9 Mosi in Joshua kiang ah: I mite laka pawlkhat telkhia inla, Amalekte vadou in. Zing chiangin, Pathian' chiangkhun ka khuta tawiin mual tung ah kei ka na ding ding, a chi hi. 10 Tua bangin, Joshua in Mosi' thupiak bangin, Amalekte a dou a, Mosi leh Aron leh Hur, tua mual tung ah a kaltou uhi. 11 Mosi in a ban a lik laiteng, Israel tate a vualzou uh a, a ban a khiaksuk chiangin, Amalekte a vualzou uhi. 12 Mosi ban hong kham a, amaute'n suang khat a la uh a, Mosi nuai ah a koih uh a, a tung ah Mosi a tu hi. Aron leh Hur in Mosi ban langtuak a dom uh a, ama'n ni tum dong a bante a lik hi. 13 Tua bangin, Joshua in Amalek leh a mite namsauin a vatmai vek hi. 14 Tangtawn Toupa'n Mosi kiang ah: Hiai theih gige ding laibuzial ah gelh inla, Joshua zakin sim in. Ke'n vannuai apan Amalekte theih gigena phiatmang ding ka hi, a chi hi. 15 Mosi in tua ah maitam a dawh a, a min dingin, Jehova Nisi a sa hi. 16 Ahang bel, Tangtawn Toupa' a kichiam a, Tangtawn Toupa'n Amalekte a khang a khangin a dou gige ding, a chi hi.

Pemkhiakna 18

Jethro in Mosi Veh

1 Tua laiin, Mosi' sungpa, tua Midian siampi Jethro in, Mosi leh a mi Israel tate adinga Pathian' thilhih, Aigupta gam apan amaute a piikhiak dan a na za hi. 2 Mosi in a zi Zipora a sawlkhiak laiin, a sungpa Jethro in Zipora leh 3 a tapa nihte a na kem hi. Mosi in: Gamdang mi' gam ah melmakmi-in ka om, chi-in a tapa khat min dingin Gershom a sa hi. 4 Tua baan ah: Ka pu ka pate' Pathian kei hon huhpa ahi a, ama'n Faro' namsau apan hinna hon hawisak, chi-in, a tapa khat pen' min dingin Eliezar a sa hi. 5 Jethro bel, Mosi' tapate leh Mosi zi tawh hong pai a, Pathian' Mual kianga, gamdai-gamkeu Mosi in giahphual a satna mun ah, Mosi kiang ah hong hawh hi. 6 Jethro in Mosi kiang ah: Kei na sungpa Jethro, na zi leh na tapa nihte tonpihin, na kiang ah kong hawh dek, a chi hi. 7 Mosi in a sungpa a vamuak a, a kun a, a tawp hi. Dam leh dam louh thu khawng kidongin, puanbuk sung ah a lut uhi. 8 Mosi in a sungpa kiang ah, Israel tate tungtawna Tangtawn Toupa'n Faro leh Aiguptate tunga a thil hih khempeuh, lampi-a haksa a tuahte khempeuh uleh, Tangtawn Toupa'n amaute hinna a hawisak dan a hilh hi. 9 Tangtawn Toupa'n Israelte adinga thil hoih a hih khempeuh leh Aiguptate khut sung apan Israel tate a hutkhiak dan Jethro in a zak takin a lungnuam mahmah a: 10 Aiguptate khut sung apan leh Faro khut sung apan nang hon hukhepa Tangtawn Toupa nunnuam hen. 11 Tangtawn Toupa'n Israel tate tunga kisathei taka gamtate tunga hiai a hih tak manin, pathian dangte sanga tungnung zaw ahi, chih tu'n ka theita, a chi hi. 12 Tua khitin, Mosi' sungpa Jethro in haltum thillat leh thillat dangte Pathian' mai ah a laan a, Pathian maia ankuang umkhawm dingin Aron leh Israel upate khempeuh hong pai uhi. 13 A zing chiangin, Israel tate tunga thukhen dingin Mosi a tu a, Israel tate a kimkot ah, zingsang apan nitak dong a ding uhi. 14 Mosi in Israel tate tunga a hih khempeuh a sungpa'n a mu a: Israel tate tunga na thil hih bangchi dan ahia? Banghanga nang kia tu a, Israel tate khempeuh na maia zingsang apan nitak donga ding uh ahia? a chi hi. 15 Mosi in a sungpa kiang ah: Pathian apan thukhenna dik zong dinga mite 16 Thubuai hong pai uh hiven. a neih chiang ua, kei kianga hong pai uh a, ke'n mi kikhingte kala thu na khen ing a, Pathian' thusehte leh dante na hilh zel ka hi, a chi hi. 17 Mosi' sungpa'n Mosi kiang ah: Na thil hih dan hoih lou ahi. 18 Nang zong na tawlgawp ding a, na kianga hong paite zong a tawlgawp ding uh. Nang kia adingin nna a gik lua. Nang kia'n na sem zou kei ding. 19 Tu'n ka thu ngai in, kon thu hilh ding. Pathian in hon ompih hen: Pathian' mai ah nang mipite' palai na hi ding a, a thubuaite uh Pathian' mai ah na tun ding a, 20 Pathian' thusehte leh dante hilhin amaute na vauhilh ding a, tua dante zuia bangchi nuntak ding, a mawhpuakna uh bangchi hih ding, chihte na lak ding a, na sinsak ding ahi. 21 Ahihhangin, mipite khempeuh laka chinna nei, Pathian lau leh muanhuai, golhgukna sum enlahloute na telkhe ding a, 1000 pawlpawl tunga makaite, 100 pawlpawl tunga makaite, 50 pawlpawl leh sawm khat pawlpawl tunga uliante hi dingin na sep ding ahi. 22 Amaute mipite tunga hunbita thukhentein koih inla, thu haksate kia na kiang hong tun uhen. Thu haksaloute amau kikhen uhen. Tua bangin hon puakpih le uh, na puak zang ding ahi. 23 Hibanga na hih a, Pathian in zong tua banga thu hon piak leh, puakgik na paw zou ding a, mipite khempeuh zong lungkim takin innlam a zuan ding uhi, a chi hi. 24 Mosi in a sungpa' thugen a ngaikhia a, a gen teng khempeuh a hih a, 25 Israel tate khempeuh lak apan chinna neite a telkhia a, mipite tunga makai ding, 1,000 pawlpawl, 100 pawlpawl, 50 pawlpawl leh sawm khat pawlpawl tunga vaihawm dingin a sep hi. 26 Amaute'n mipite adinga thukhenin hunbitin a pang uh hi. Thu haksate Mosi kiang a tun uh a, thu haksa loute amau a khen uhi. 27 Tua khitin, Mosi in a sungpa Jethro a paisak a, amah kia-in a gam lam ah a kilehkikta hi.

Pemkhiakna 19

Sinai Mual ah

1 Israel tate Aigupta gam apan a pemkhiak nung uh a kha thumna a hita a, tua ni-in, Sinai Gamdai-gamkeu a tung uhi. 2 Refidim apan kipankhiain Sinai gamdai-gamkeu sung a lut uh a, tua Mual zawn ah giahphual a sat uhi. 3 Mosi in Pathian a naih tou a, Tangtawn Toupa'n tua Mual apanin amah a houpih a: Jakob innkawte kianga na gen ding leh Israel tate kianga na hilh ding hiai ahi: 4 Aiguptate tunga ka thil hih na muta uh a, muvanlai kha tunga kon puak a, keima kianga kon pii dan na muta uh. 5 Tu'n ka aw pilvangtakin ngaikhia unla, ka thukhun zui un. Namte laka ka gou manpha na hi ding uhi. Leitung khempeuh keia hi mah leh, 6 noute kei adingin siampi kumpigam leh nam siangthou na hi ding uhi, chi in. Hiai thute Israel tate kianga na hilh ding ahi, a chi hi. 7 Tua bangin, Mosi a pai a, Israel upate a samkhawm a, Tangtawn Toupa'n amah kianga a thupiak hiai thute khempeuh amaute' mai ah a luikhia hi. 8 Israel tate khempeuh in kituak takin a dawng uh a: Tangtawn Toupa' gen peuhmah ka hih ding uh, a chi uhi. Mosi in a dawnna uh Tangtawn Toupa kiang ah a tunkik hi. 9 Tua khitin, Tangtawn Toupa'n Mosi kiang ah: Ngai in, meipi sahtakin na kiang ah kong pai ding a, Israel tate zak dingin nang kon houpih ding a, nang hon muang gige ding uh, a chi hi. Tua khitin, Mosi in Israel tate' thugente Tangtawn Toupa kiang a tun hi. 10 Tua baan ah, Tangtawn Toupa'n Mosi kiang ah: Mipite kiang ah hawh inla, tuni leh zing chiangin amaute siangthoua sehtuamna bawl in. A puansilhte uh sawpsiang uhen-la, 11 a ni thum ni adingin kisakhol uhen. Tua ni chiangin, mipite khempeuh' muhin, Tangtawn Toupa Sinai Mual ah hong kumsuk ding ahi. 12 Mipite kimkot ah gamgi khung inla, amaute kiang ah: Mual tunga kaltou lou ding leh, a khoih zong khoih lou dingin pilvang un. Tua mual khoih peuhmah a si ngeigngei ding. 13 Kuama'n tua Mual a khoih louh ding ahi, a khoih mi peuhmah suanga denlup hiam, thala kap pailet hiam, teia sut pailet hiam, ahi ding ahi. Mihing hita leh, ganta hita leh, tua Mual khoih peuhmah, hinghawi louh ding ahi. Pengkul saugin a kimut zonzon chiang kiain Mual a naih thei ding uhi, a chi hi. 14 Mosi tua Mual apan mipite kiang ah a paisuk a, mipite siangthoua sehtuamna a bawl a, a puansilhte uh a sawp siang uhi. 15 Tua khitin, ama'n mipite kiang ah: Ni thum ni adingin kisakhol un. Numei naih kei un, a chi hi. 16 Ni thum ni, zingsangin, Mual tung ah vanpi gingte, khawphiate, meipi sahtakte hong om a, pengkul ngaihtakin a ging a, giahphuala om michih a liing uhi. 17 Tua khitin, Pathian tuak dingin, Mosi in mipite a piikhia a, Mual bul ah a ding uhi. 18 Tangtawn Toupa tua Mual tunga meikuanga hong kumsuk manin, tua Mual meikhuin a dim hi. Tua meikhu, haltuina meiphualpi khu bangin a kitungtou a, tua Mual nakpitakin a liing a, 19 pengkul ging a ngaih semsem hi. Tua laitakin, Mosi in Pathian a houpih a, Pathian in awin a dawng hi. 20 Tangtawn Toupa Sinai Mual tung ah hong kumsuk a, Mosi a samtou a, Mual tung ah Mosi a kaltou hi. 21 Tangtawn Toupa'n Mosi kiang ah: Kumsuk inla, mipite vauhilh in. Tangtawn Toupa en dingin hon phu paisuak kha ding uh a, tampi'n a sihlawh kha ding uh. 22 Tangtawn Toupa naih zel siampite nangawn siangthoua a kisehtuam ding uh ahi. Tua banga a hih kei uleh, Tangtawn Toupa' hehna amaute tung ah a kuang kha ding, a chi hi. 23 Mosi in Tangtawn Toupa kiang ah: Nang koute hon vauhilhta na hih chiangin, mipite Mual tung ah hong kaltou thei lou ding uhi. Nangma'n: Mual kimkot ah gamgi khung inla, siangthoua sehtuamin bawl in, non chita, a chi hi. 24 Tangtawn Toupa'n a dawng a: Paisuk inla, Aron hon tonpihtou in. Ahihhangin, siampite leh mipite'n zaw Tangtawn Toupa naih dingin hon phu paisuak kei uhen. Tangtawn Toupa hehna amaute tung ah a kuang kha ding, a chi hi. 25 Tua bangin, Mosi a paisuk a, mipite kiang ah thu a gen hi.

Pemkhiakna 20

Thupiak Sawmte

1 Tua khitin, Pathian in hiai thute khempeuh a pia hi: 2 Kei Tangtawn Toupa na Pathian ka hi. Aigupta gam saltanna apan hon pikhepa ka hi. 3 Kei loungal pathian dang ka mai ah na nei ding ahi kei. 4 Tung vana thil hiam, nuai leia thil hiam, nuaia tui sunga thil hiam, batpih milim na kibawl ding ahi kei hi. 5 Amaute biain a mai ua na kun ding ahi kei hi. Kei Tangtawn Toupa na Pathian, thikthusia Pathian ka hi. Kei hon mudahte laka pate tatkhelhnate, tate tunga a khang thumna, a khang lina donga gawta thukpa, 6 ahihhanga, kei hon it a, ka thupiakte zui mi bel khang sang tampi tunga chitna suahpa ka hi. 7 Tangtawn Toupa na Pathian' min na mawkzat ding ahi kei hi. Tangtawn Toupa'n a min mawkzat peuhmah mawhtangin a koih ding hi. 8 Sabbath ni siangthoua sehtuam ding thei gige in. 9 Ni guk sung na nna sem inla, 10 ahihhangin, a ni sagih ni bel, Tangtawn Toupa na Pathian' Sabbath ahi. Nna na sep louh ding ahi. Nang zong, na tapa in zong, na tanu in zong, na silapa'n zong, na silanu'n zong, na ganhon in zong, na huang sunga om mikhual in zong, nna himhim na sep louh ding uh ahi. 11 Ahang bel, ni guk sung Tangtawn Toupa'n lei leh vante leh tuipi leh a sunga omte khempeuh a bawl a, nna a sem a, a ni sagih ni-in a tawlnga hi. Tua hangin, Tangtawn Toupa'n Sabbath a vualzawl a, siangthouin a septuam ahi. 12 Na nu leh na pa zahtakin in. Tangtawn Toupa'n nang hon piak ding gama na khankhua a sawt theih nadingin, amaute pahtawi in. 13 Tual na that ding ahi het kei. 14 Ang na kawm ding ahi het kei. 15 Guk na gu ding ahi het kei. 16 Na innveng tung ah theihpihna zuau na gen ding ahi het kei. 17 Na innveng' inn na deihgawh ding ahi het kei. Na innveng' zi hita leh, a silapa hita leh, a silanu hita leh, a sabiltung hita leh, a neihsa bangpeuh na deihgawh ding ahi het kei, a chi hi. 18 Israel tate khempeuh in tua vanpigingte leh khawphiate mu a, pengkul ging za a, tua Mual khu lunglung a muh takun, lauin a liing uhi. Gamlapi-a dingin, 19 Mosi kiang ah: Nang koute kiang ah thu gensawn in, ka ngaikhe ding uh. Pathian zaw ka kiang uah thu gensak ken, ka si kha ding uh, a chi uhi. 20 Mosi in mipite kiang ah: Lau kei un. Pathian laudan na theih ua, na khelh louh nading ua, noute hon ze-et dinga Pathian hong pai ahi, a chi hi. 21 Mosi in Pathian' omna tua mial sahtak a va-naih laiin, mipite bel gamlapi ah a ding uhi.

Militate leh Maitamte

22 Tua khitin, Tangtawn Toupa'n Mosi kiang ah: Israel tate hiai hilh in: Vantung apanin noute kon houpih, chih noumau mah in na muta uh. 23 Kei lou pathian dang kibawl kei un. Kei tawh non biakkhawm ding in, kham leh ngunin pathiante kibawl beh kei un. 24 Leitangin kei ading maitam dawh inla, tua tung ah, na haltum thillatte leh na lemna thillatte laan in. Ka min na theih gige nading uh mun kon sehsak peuh ah, na bawngte leh na belamte laan in. Na kiang ah kong pai ding a, kon vualzawl ding. 25 Kei adinga suang maitam na dawh leh, suang sekthawhin dawh ken. Vanzata suang na sek leh, na ninsak ding hi. 26 Ka maitam ah kalbi dawhin kaltou ken, na savuakna a dawk kha ding hi, Tangtawn Toupa'n a chi, chi in.

Pemkhiakna 21

Dan Tuamtuamte

1 Dan tuamtuam amaute' maia na lui ding hiaite ahi:

Hebru Silate

2 Hebru mi sila dinga na lei chiangin, kum guk sung na nna a sem ding a, a kum sagihna ah sum liau louin, noplenin a paikhe thei ding ahi. 3 Amah kia-a hong lut ahih leh, amah kia mahin noplenin a paikhe ding ahi. A zi tawh hong lutkhawm a hih leh a zi tawh noplenin a paikhekhawm ding ahi. 4 A toupa in zi a got ahih a, a toupa' innsunga tapate, tanute a neih leh, a zi leh a tate a toupa-a ahi ding a, silapa amah kiain noplenin a paikhe ding ahi. 5 Ahihhangin, tua silapa'n: Ka toupa kon it a, ka zi leh ka tate zong ka it a, noplenin ka paikhe kei ding, a chih leh, 6 a toupa'n thukhente' mai ah hon tonpih ding a, kongkhak ah hiam, kongbiang ah hiam, a toupa'n tukkilhin a bil a vuhsak ding a, a damsung teng a toupa' nna a sem ding hi. 7 Mi'n a tanu sila dinga a zuak leh, sila pasal bangin, noplenin a paikhe thei kei ding. 8 A toupa'n zi dinga a neih a, a toupa a lungkimsak kei leh, a pa a tankiksak thei ding hi. Ama' tunga muanhuai loutaka gamta ahih leh, gamdang mi kiang ah a zuak thei kei ding hi. 9 A toupa'n, a tapa' zi dinga tua sila numei a piisak leh, a toupa'n a tanute khat banga a bawl ding ahi. 10 Ama'n zi dang a neih thuah leh, a zi masa nek leh tak, silh leh ten a piak tawm tuan louh ding, a piak dinga kilawm a piak tuak ding ahi. 11 Hiaite a hihsak kei leh, tua silanu, sum liau louin noplenin a paikhe thei ding hi.

Satung Liamnate

12 Mi'n midang khat a vuak a, a sih leh, tua mi thah ngeingei ding ahi. 13 Mi'n midang khat thah sawma, a buk ahih kei a, Pathian in ama' khut sunga thah dinga a piakkhiak ahih leh, keima'n a tai nading mun khat ka sehsak ding. 14 Ahihhangin, mi khat peuh a innveng tunga heh a, gitlouh piltaka a thah leh, ka maitam apan amah lakhia inla, that teitei in. 15 A nu hiam, a pa hiam, that peuhmah na thah teitei ding ahi. 16 Mi'n midang khat guin zuak leh, ahih kei leh, a khuta muhin om leh, amah na thah teitei ding ahi. 17 A nu hiam, a pa hiam hamsiat peuhmah na thah teitei ding ahi, 18 Mi nih kinain, khat in a khat pen suanga deng hiam, ahih kei leh, khuttumin tuum henla, silouin lupna ngakin om leh, 19 thoua chiangkhun khuna a vakkhiak zawh nak leh, amah deeng hiam, tuum hiam pen in gawtna a thuak kei ding. Ahihhangin, a liam pen a damkik matenga a hun mansak hu a din ding ahi. 20 Mi'n a silapa hiam, a silanu hiam, chianga a sat a, tua sila a sih leh, ama' tunga phuba na lak teitei ding ahi. 21 Ahihhangin, tua sila ni nih, ni thum nunga dama a thawhkhiak zawh lebel, a toupa' vanneih hi lei ahih manin, phuba lak louh ding ahi. 22 Mi nih kisual a, numei gailai hihkhain a nau tolh leh, liamna thupitak bel om kei leh, tua nu hiam, a pasal hiam in a ngiat zah bangbang, a hihkhapa liausak inla, thukhente tungtawna a piak teitei ding ahi. 23 Ahihhangin, siatna thupitak a om leh, hinna tanga hinna, 24 mit tanga mit, ha tanga ha, khut tanga khut, khe tanga khe, 25 meia hal tanga meia hal, liamma tanga liamma, satna sat golh tanga satna golh na lak teitei ding ahi. 26 Mi'n a silapa hiam, a silanu hiam' mit a tupsak a, a mit a siat leh, a mit tangin a toupa in amah a khah a, a noplensak ding ahi. 27 Mi'n a silapa hiam, a silanu hiam, ha a tupkhiaksak leh, a ha tangin a toupa'n amah a khah a, a noplensak ding ahi. 28 Bawngtal in pasal hiam, numei hiam, a sik a, a sih leh, tua bawngtal na denlup teitei ding a, kuama'n a sa a nek louh ding ahi. Bawngtal neipa bel gawt louhin a suakta ding ahi. 29 Ahihhangin, tua bawngtal in mi na si ngeita ahih a, mi'n a neipa a na-vauhilh a, ahihhanga ama'n a bawng ching loua khahzana, pasal hiam, numei hiam, silum ahih leh, a bawngtal na denlup teitei ding a, a neipa zong na thah teitei ding ahi. 30 Ahihhangin, a hinna tat nadinga sum a kingiat leh, a kingiat zahzah piain a hinna a tan thei ding. 31 Tua bawngtal in tanu hiam, tapa hiam a sik leh, hiai dan a kizang ding a, thukhente' khen bangin na hih ding ahi. 32 Tua bawngtal in sila pasal hiam, sila numei hiam a sik leh, bawngtal neipa'n tua sila' toupa kianga ngun shekel 30 a piak ding ahi. A bawngtal zong denlup teitei ding ahi. 33 Mi khat peuh in gum sitna lakhia hiam, kawkhuk touin sin kei henla, tua ah bawngtal hiam, sakolneu hiam kia hita leh, 34 tua kawkhuk neipa in a dit teitei ding, gan neipa kianga sum a piak teitei ding ahi. A gan bel a liaupa'n a tan ding ahi. 35 Mi khat' bawngtal in a innveng' bawngtal a siklup leh, a bawngtal hinglai pen a kizuak ding a, a ma'n a kimhawm ding uh ahi. A bawng si pen sa zong a kikimhawm ding uh ahi. 36 Ahihhangin, tua bawngtal gan sik hat ahi, chih a kitheih a, a neipa'n a chin kei leh, bawngtal tangin bawngtal a liau ding a, a siklup sa bel a man a tang ding hi.

Pemkhiakna 22

Neihsa Hutna

1 Mi'n bawngtal hiam, belam hiam a guk a, gou hiam, zuak hiam ahih leh, bawngtal tangin bawngtal nga a liau ding a, belam tangin belam li a liau ding ahi. 2 Guta inn luh lai a kimat a, a kivuak a, a sih leh, a vawpa pen sisan suah chi-a mawhtansak theih ahi kei ding hi. 3 Ahihhangin, ni suah nung a hih lebel, sisan suah chi-a mawhtansak ahi ding hi. Guta thah ahih kei leh, ditna a piak teitei ding ahi. Piak ding a neih kei leh, a van guk man dinga amah zuak ding ahi. 4 Mi'n ganta a guk a, a khuta ganta hinga a kimuh leh, bawngtal hi-in, sabiltung hi-in, belam hita leh, a leh nih-a a dit teitei ding ahi. 5 Mi'n a ganta lou hiam, grephuan hiama a tatsak a, midang loua a lutsak leh, ama' lou hiam, ama' grephuan hiam apan gah hoihpena a dit teitei ding ahi. 6 Mi'n gama mei a khah a, gam kang a, buh hiam, hai dinglai hiam, lou hiam a kat leh, mei khahpa'n a dit teitei ding ahi. 7 Mi'n sumtang hiam, tuium belsuan hiam, a innveng a kepsak a, mi'n tua a kempa' inn apan a guksak a, guta a kimat leh, guta in a leh niha a dit teitei ding ahi. 8 Ahihhangin, guta a kimat kei leh, tua innneipa'n thukhente' maia a tut a, ama'n a innveng van gu hiam, chih chet ding ahi. 9 Bawngtal hiam, sabiltung hiam, belam hiam, puansilh hiam mang kituhna thubuai a om a, mi nih in: Hiai keia ahi, a chih tuak uleh, a nihun Pathian maia thu hon tut ding uh ahi. A mawh zawzaw in a innveng kianga a leh nih-a a dit teitei ding ahi. 10 Mi'n sabiltung hiam, bawngtal hiam, belam hiam, ganta khat peuh, a innveng a kepsak a, muh louh a, si hiam, Ham hiam, kikaimang hiam, ahih leh, 11 a kempa'n a innveng thil neih khoih lou ahi, chi-a Tangtawn Toupa' maia a kichiamna tawh a thu khen ahi ding ahi. A neipa'n zong tua bang thukhenna a san ding ahi a, a kempa'n a liau kei ding hi. 12 Ahihhangin, a kempa apan ganta kigu ahih leh a kempa'n a dit teitei ding ahi. 13 Tua ganta gamsa nek a hih leh, a kitelna dinga a sa hiam beek hon tawi ding a, a dit a kul kei ding hi. 14 Mi'n a innveng' ganta a khelh a, a neipa om louh kala liam hiam, si hiam a hih leh, a khelpa'n a dit teitei ding ahi. 15 A neipa om gegu a hih lebel, a dit a kul kei. Tua ganta khelh ding mawnga koih ahih leh, a khelh man piakin a dinkhin lei hi.

Mihing Kal Thu

16 Mi'n khamlouh nungak siangthou zolin, luppih leh, mou man a piak teitei a, a kitenpih ding ahi. 17 A nungak pa'n a phal het kei leh, a luppihpa'n nungak siangthou man a liau veve ding ahi. 18 Dawisiamnu na hinghawi louh ding ahi. 19 Ganta luppih peuhmah na thah teitei ding ahi. 20 Tangtawn Toupa hilou pathian dang' maia kithoihna laan peuhmah na hihmanthat teitei ding ahi. 21 Gamdang mi mikhual na mawkbawl ding ahi kei a, na zawhthawhbawl ding ahi kei. Noute zong Aigupta gama mikhuala om na hi uhi. 22 Meigong hiam, pabei hiam na neksiat louh ding ahi. 23 Tua banga na neksiat leh, amah ka mai ah hong toukou ding a, a kahna ka ngaikhe mahmah ding hi. 24 Ka hehna a kuang ding a, namsauin kon that ding a, na zite uh meigong a suak ding uh a, na tapate uh pabei a suak ding uhi. 25 Ka mite laka tasam khattou sum na leitawisak leh, sum leitawisakte hih banga sumpung na nek louh ding ahi. 26 Kichiam nadana na innveng' puanak na lak leh, ni tum chianga na piakkik teitei ding ahi. 27 A pumpi khuhna dinga a neihsun ahi. Bang silha ihmu ding ahia? Ka kiang ah hong toukou ding a, kei hehpih siam ka hi a, a kahna ka ngaikhe mahmah ding hi. 28 Pathian na gense ding ahi kei. Na mite tunga vaihawmmi zong na hamsiat ding ahi kei. 29 Na buh na bal apan hiam, na greptui apan hiam thillat ding it a, na khut na kiksak ding ahi kei. 29 Na tapa piang masa kei non piak ding ahi. 30 Na bawngte leh na belamte zong tua banga non piak ding ahi. Ni sagih sung a pi tawh kithuahsak inla, a ni giat ni-in hon pia in. 31 Noute kei adinga mi siang-thoute na hih ding uh ahi. Tua bang ahih manin, gamlaka gamsa nek bang sa himhim na nek het louh ding uh, uite na piak zawk ding uh ahi.

Pemkhiakna 23

Dika Thukhenna leh Zahngaihna

1 Thutut zuau na thehzak ding ahi kei. Theihpih zuaua panga migilou na gup ding ahi kei. 2 Thil gilou hih dinga mi tam lamlam na zuih ding ahi kei. Thubuaia kihekna theihpiha na pan chiangin, thudika vaihawmna kaikawi dinga mi tam lamlam na gup ding ahi kei. 3 Thubuai genna ah mi zawng douin, guptuam na nei ding ahi kei. 4 Na melmapa' bawngtal hiam, sabiltung hiam vakmang na muh leh, a neipa kiang na tut kik teitei ding ahi. 5 Nang hon mudahpa' sabiltung vanlela puk na muh leh, taisan loua na huh teitei ding ahi. 6 Thubuaia kihekna ah mizawngte adinga thukhenna na kaihkawi ding ahi kei. 7 Zuauthu-a kingawhna ah na kikum ding ahi kei a, mawhna neilou hiam, midiktat hiam na that ding ahi kei. Migilou himhim diktangsak lou ding ka hi. 8 Golhgukna na la ding ahi kei. Golhgukna in mitvak a tawsak a, midiktat' thugen a kaikawi hi. 9 Gamdang mi mikhual na zawhthawh bawl ding ahi kei. Gamdanga mikhuala om bangchi hiam, chih na thei hi. Nang zong Aigupta gama mikhuala omta na hi.

Sabbath Dante

10 Kum guk sung na loute ah hai na pawi ding a, a gah na kaikhawm ding ahi. 11 Ahihhangin, a kum sagihna ah na lou khawhlouh-a na koih ding ahi. Na mite laka mi zawngte'n tua lou apan hong poute a na ne ding uh ahi. Amaute' nek vai gamsate'n a ne ding uh ahi. Na grephuan hita leh, na oliv huan hita leh tua bang maha na nutsiat ding ahi. 12 Ni guk sung nna na sep ding, a ni sagih ni-a na tawlngak ding ahi. Na bawngtal leh na sabiltung leh na silanu' tapa leh na inn-a mikhual zong a tawldam nadingin a ni sagih ni-a na tawlngaksak ding ahi. 13 Noute kianga ka thugen peuhmah zui dingin pilvang in. Pathian dangte' min kouin na thum ding ahi kei. Na kam ah a min uh a kiza ding ahi kei.

Ankuanglui Thumte

14 Kum khat sungin ankuang lui thumvei na bawl ding ahi. 15 Silngou Sawhlouh Tanghou ankuang luina bawl inla, kon thupiak bangin, ni sagih sung silngou sawhlouh tanghou na ne ding ahi. Abib kha, a hun seh ah hiai hih in, tua kha-a Aigupta gam apan hong pemkhia na hi. Kuamah ka maia khutvuaka hong kilat louh ding ahi. 16 Na loua na pawi haigah masate-in Buhlak Ankuanglui na bawl ding ahi. Lou apan an na kaihkhawm chiangin kum tawp ah, An Puaklut Ankuanglui na bawl ding ahi. 17 Pasal teng khempeuh kum khata thumvei Toupa, Tangtawn Toupa' maia hong kilat ding uh ahi. 18 Ka maia kithoihna sisan, silngou sawh tanghou tawh na lat louh ding ahi. Ka ankuangluina sathaute zingsang dong na koih louh ding ahi. 19 Na loua gah masa hoihpente Tangtawn Toupa na Pathian' inn-a non puaklut ding ahi. Kelnou a pi' nawituia na huan louh ding ahi.

Pathian' Vansawltak

20 En in, lampi-a nang hon veng dingin, na mai ah vansawltak khat ka sawl ding. Ama'n nang adinga ka bawlkholh mun a hon tun ding hi. 21 Ama' mai ah pilvang inla, a aw ngaikhia in. Ama' tung ah hel ken. Amah-a ka min om a hih manin, na tatlekna hon ngaidam lou ding ahi. 22 A aw limtaka na ngaihkhiak a, ka gen khempeuh na zuih leh, na melmate' melma ka hi ding a, nang hon doute ka dou ding. 23 Ka vansawltak na mai ah a pai ding a, Amorte, Hitte, Perizte, Kanante, Hivte leh Jebuste' gam hon tun ding. Ke'n amaute ka phiatmang vek ding. 24 Amaute' pathiante mai ah na kun ding ahi kei a, biak zong na be ding ahi kei. Amaute tat dan zong na zui ding ahi kei. Amaute' milimte na phelzak ding a, a suang milimte uh na hihsiat dimdem ding ahi. 25 Tangtawn Toupa na Pathian bia in, Ama'n na an leh na tui a vualzawl ding. Ke'n na lak uapan chinatna peuhmah ka lamang ding a, 26 na gam ah nausiat leh chiinna a om kei ding. Ke'n na hinkhua ka sawtsak ding. 27 Ke'n na mai ah kei launa leh mulkimna ka sawl ding a, na tuah ding uh mite khempeuh lak ah buaizakna ka omsak ding a, na melmate ka taikeksak ding. 28 Na mai ah tunpite ka sawl ding a, Hivte leh Kanante leh Hitte na mai ah a hawlkhe ding uh. 29 Ahihhangin, kum khat thuin amaute ka hawlkhe kei ding. Gam luah louha om a, noute adinga gamsate a pun luat louh nading ahi. 30 Nong pun ua gam na luah mateng uh, amaute na mai ah tawmtawmin ka hawlkhe ding. 31 Na gamgi ding Tuipi San apan Filistia Tuipi dong, Gamdai-gamkeu apan Luipi dong ka hisak ding. Tua gama teengte na khut ah kon pe ding a, amaute na mai ah na hawlkhe ding. 32 Amaute leh a pathiante utawh kal ah thukhun na bawl ding ahi kei. 33 Na gam sung ah amaute na tengsak ding ahi kei. A pathiante uh na be kha ding a, nanga dingin a pathiante uh thang a suak kha ding a, ka tung ah noute hon khialsak kha ding uh, a chi hi.

Pemkhiakna 24

Thukhun Hihkipna

1 Tua nungin, Pathian in Mosi kiang ah: Tangtawn Toupa' mai ah hong paitou inla, Aron tawh Nadab leh Abihu tawh Israel upa 70-te hon tonpih in. Gamlapi apan Pathian bia unla, 2 Mosi kia in Tangtawn Toupa naih hen, a dangte'n hon naih kei uhen. Mipite'n Mosi hon zuitou kei uhen, a chi hi. 3 Tua khitin, Mosi a pai a, Tangtawn Toupa' thugente leh dante mipite a hilh hi. Mipite khempeuh in aw khata kituakin a dawng uh a: Tangtawn Toupa' gente khempeuh ka hih ding uh, a chi uhi. 4 Mosi in Tangtawn Toupa' thugente khempeuh a gelh vek hi. Mosi zingkhangpi-in a thou a, tua mual bul ah maitam a dawh a, Israel nam sawmlenihte adingin theihgigena suangkhuam sawmlenih a phut hi. 5 Tua khitin, Israel tuailaite a sawl a, haltum kithoihnate a laan uh a, Tangtawn Toupa' mai ah lemna thillatin bawngtalte a laan uhi. 6 Mosi in tua thillat sisan kimkhat a la a, bel sung ah a koih a, a kimkhat dangin maitam a theh hi. 7 Tua khitin, Thukhun Laibu a la a, mipite zakin a sim hi. Mipite'n: Tangtawn Toupa' gensa khempeuh ka hih ding uh a, ka zui ding uh, a chi uhi. 8 Tua khitin, Mosi in tua sisan a la a, mipite a theh a: En un, hiai thute tawh kisaia Tangtawn Toupa'n noute tawh kala a thukhunna sisan hiai ahi, a chi hi. 9 Mosi, Aron, Nadab, Abihu leh Israel upa 70-te a paitou uh a, 10 Israelte' Pathian a mu uhi. A khepek nuai ah safaiar suang kiphaha kibawl lampi bangbang khat a om a, van bangin a siang hi. 11 Ahihhangin, Pathian in Israel upate douin a khut a lik kei. Amaute'n Pathian mu napi-in hingdama omin a neun a dawn uhi. 12 Tangtawn Toupa'n Mosi kiang ah: Ka mai ah mual tung ah hong paitou inla, amaute adinga ka gelh dan leh thupiakte gelhna suangpekte kon pe ding, a chi hi. 13 Tua khitin, Mosi leh amah huhpa Josua a dingkhia uh a, Pathian' mual tung ah Mosi a kaltou hi. 14 Mosi in upate kiang ah: Koute gel kong kilehkik mateng uh hiaia tuin hon na ngak un. Ngai un, Aron leh Hur in noute hon ompih ding uh a, thubuai nei na om uleh, amaute kiang ah na pai un, a chi hi. 15 Mosi mual tunga a kaltouh takin, meipi in tua mual a khuh a, 16 Tangtawn Toupa' thupina, tua Sinai Mual ah a om a, ni guk sung tua bangin a om hi. Tangtawn Toupa'n a ni sagih ni-in tua meipi lak apanin Mosi a sam hi. 17 Tua mual tunga Tangtawn Toupa' thupina Israel tate'n a muh uh, meikuang zuazua a bang hi. 18 Mosi, tua mual tunga meipi lak ah a luttou a, tua mual tung ah ni 40 leh zan 40 a taam hi.

Pemkhiakna 25

Biakbuk ading Thillatte

1 Tua khitin, Tangtawn Toupa'n Mosi a houpih a: 2 Israel tate kiang ah thu gen inla, kei adingin ut thillatte hon puak uhen. 3 Amaute apan lungtanga tup leh ut bangbanga thillat na san ding kham leh ngun leh sumsan, 4 khau dum leh sandup leh sanau leh ziza khau zangngat, tua baan ah kelmul, 5 belamtal vun huansan leh sahamvun leh akasia sing, 6 tua baan ah, det ding oliv thau leh nilh sathau ading leh hal ding gimnamtui ading singgah namtuite, 7 tua baan ah, siampi puanakzem leh awmphaw ading oniks suangte leh suang manpha dangte ahi ding ahi. 8 Amaute laka ka teen theih nadingin, mun siangthou hon bawlsak uhen. 9 Biakbuk leh a sunga vanzat khempeuh etteh ding kon lak ding a, tua ettehte bangbanga na bawl ding ahi.

Thukhun Singkuang

10 Akasia singin singkuang khat bawl inla, a dunglam tong nih leh a kim, a vailam tong khat leh a kim, a sanlam tong khat leh a kim ahi ding ahi. 11 Tua singkuang sunglam leh pawlam khamsik siang pekin na tuam ding a, kham sikin a geivual na bawl ding ahi. 12 Tua baan ah, khamsik bil li sung inla, a kiu lite ah, pang khat ah nih, pang lehlam ah nih, vawh in. 13 Akasia singin zawl nih bawl inla, khamsik siang pekin tuam inla, 14 tua zawl nihte tua singkuang pang tuaka a bilte ah khum in, a zawn nading ahi ding hi. 15 Tua zawlte tua singkuang bilte ah a om gige ding uh a, kuama'n a lakkhiak louh ding ahi. 16 Tua singkuang sung ah kon piak ding Theihpihna koih in. 17 Khelhna khuhna sin hi dingin tua singkuang sin, kham sik siangin bawl inla, a dunglam tong nih leh a kim, a vailam tong khat leh a kim ahi ding ahi. 18 Tua baan ah sekthawh kham sikin cherub nih bawl in. Thoihdamna mun tua singkuang sin mong tuak ading ahi ding. 19 Singkuang sin mong khat ading cherub khat, mong lehlam ading cherub khat mah bawl inla, tua singkuang mong tuak ah na koih ding ahi. 20 Tua cherubte, tunglama kha zakin, khelhna khuhna sin zakkhumin tua singkuang sin lam ngasuka kimaituahin a om ding uh ahi. 21 Nang kon piak ding Theihpihna, tua singkuang sung ah na koih ding a, khelhna khuhna sin, tua singkuang sinin tua singkuang na sin ding ahi. 22 Tua thoihdamna mun, Theihpihna singkuang sin monga cherubte kikal ah nang kon kimuhpih ding a, kon houpih ding hi. Israel tate tawh kisaia kon thupiak dingte tua ah kon hilh ding hi.

Dawhkan

23 Akasia singin dawhkan khat bawl inla, a dunglam tong nih, a vailam tong khat, a sanlam tong khat leh a kim ahi ding ahi. 24 Kham sik siang pekin tua dawhkan tuam inla, kham sikin a geivel bawl in. 25 Tua dawhkan geivel, a kimvel suaka khutpek chia-a sangin na bawl ding a, tua geivel in geivel a neisawn ding ahi. 26 Tua dawhkan ading kham sikbil li bawl inla, dawhkan khete katkhiakna kiu lite ah bulh in. 27 Tua a bilte dawhkan geivel nuai ah bulh inla, dawhkan zawnna zawl nihte khum nading ahi ding ahi. 28 Akasia singin zawl nihte bawl inla kham sik siangin tuamin, dawhkan zawn nading ahi ding hi. 29 Kham sik siangin kuangte, belkuangte, tuidopna bel gonggekte, thillat sunbuak nading keupite na bawl ding ahi. 30 Ka mai ah tua dawhkan tung ah Ompihna Tanghoubeute na koih gige ding ahi.

Meivak Mung

31 Kham sik siang sekthawhin meivak mung khat na bawl ding a, meivak mung bul, a mungpi, a kahiangte, a noute leh a pakte leh a nun bulbawkte zong na bawl ding ahi. 32 Meivak mungpi kahiang guk, a pang tuak ah kahiang thum tuak na bawl ding ahi. 33 Kahiang khat zel ah almon pak bang leh a nunbulbawk bang nou thum, na bawl ding ahi. A kahiang zom ah tua bangin thum mah na bawl ding ahi. Tua bangin meivak mung apan kakhia hiang gukte ah a om ding ahi. 34 Tua meivak mungpi ah almon pak bang, a nunbulbawk tawh kithuah, nou li a om ding ahi. 35 Meivak mung kahiang kop khatna bul nuai tak ah almon paknun-bulbawk khat a om ding a, paknun bulbawk nihna kahiang kop nihna bul nuai tak ah pak-nunbulbawk khat kahiang kop thumna bul nuai tak ah, paknunbulbawk khat mah a om ding ahi. A vekin kahiang gukte kikatna nuai tak ah na koih ding ahi. 36 Meivak munga pak nunbulbawkte leh a kahiangte sakhata kizomin sekthawh kham sik siangin na bawl ding ahi. 37 Tua ban ah, meivak sagih na bawl ding a, tua meivak mung ah na koih ding a, a kimkot a tanvak ding ahi. 38 Kham sik siangin meivu siak nading leh meivu khol nading kuangdai na bawl ding ahi. 39 Tua meivak mung leh hiai a vanzatte khempeuh bawl nading kham sik siang talen khat na zang ding ahi. 40 Ngai in, mual tunga etteh kon etsak bangbanga tuate khempeuh na bawl ding ahi.

Pemkhiakna 26

Biakbuk

1 Biakbuk, khuhna puanzak sawm neiin na bawl ding ahi. Tua puanzakte ziza khau zangngat khuk, khau dum, a sandup, leh a sanau kigan puan ahi ding ahi. Tua puanzakte tung ah khutsiamtaka khui cherubte na bawl ding ahi. 2 Tua puanzakte tong 28-a sau, tong 4-a za, a kikim ahi ding ahi. 3 Tua puanzakte nga tuakin a dunglamin, bup nihin na bup ding ahi. 4 Puanzakte gei ah khau dumin a bilte na bawl ding a, tua a bilte khihkhawma, puanzakte kibuptuah nading ahi ding hi. Tua bangin, kibuptuah puanzak nawlnungte ah zong a bil na bawl ding ahi. 5 Puanzak bup khat zel ah bil 50, bup dang pen ah zong 50 mah, a kizawnin na bawl ding a, tuatein puanzakte na khihkhawm ding a, na bup ding ahi. 6 Tua baan ah, kham sikin mekkilh 50 na bawl ding a, tuatein puanzak bup khat leh a bup dang khat pen na khihkhawm ding a, biakbuk tung khuhna puanzak khat hong suak ding ahi. 7 Tua baan ah, biakbuk tung khuh nading kelmulin puanzak sawmlekhat na bawl ding ahi. 8 Tua puanzakte tong 30-a sau, tong 4-a za, kikim chiat ahi ding ahi. 9 Tua puanzakte nga na buptuah ding a, a dang gukte zong a tuamin na buptuah ding ahi. Puanzak gukna pen, biakbuk lutna tung ah khepnih-a khepa khuhna ahi ding ahi. 10 Tua puanzak bupa a nawlnung gei ah a bil 50 na bawl ding a, tua bang mahin a bup khat pena a nawlnung ah zong a bil 50 mah na bawl ding ahi. 11 Sumsanin mekkilh pin 50 na bawl ding a, tuatein puanzak bilte na khihkhawm ding a, biakbuk tung khuhna puanzak khat hong suak ding ahi. 12 Tua biakbuk khuhna puanzak kimkhat valkhia pen, biakbuk nunglam ah a kaikhesuk ding ahi. 13 Tua puanzak mong valte, biakbuk pang khat ah tong khat a kaikhe ding ahi. Tua bangin, apang lang nih ah a kaikhe ding puanzakte na bawl ding a, 14 biakbuk tung khuh nadingin belamtal vun huansan na bawl ding a, saham vunin zong biakbuk tung khuhna puanzakte na bawl sawn lai ding ahi. 15 Akasia singin singpek tun dingte na bawl ding a, 16 tua singpekte tong sawma sau, tong khat leh a kima za ahi ding ahi. 17 Tua singpek khat zel ah, a tun nadingin, a mong dawk nih chiat a kizawmin na bawl dine ahi. 18 Biakbuk simlam pang ading singpek tun dingte 20 na bawl ding a, 19 tua singpekte tun nading ngunsik khuakkuak 40 na bawl ding ahi. Singpek khat zela mong dawk nih tun nading khuakkuak nih, tua bangin a bana singpekte tun nading zong na bawl vek ding ahi. 20 Biakbuk lehlam, mallam pang ading singpek 20 mah na bawl ding a, 21 tua singpek tunna ding ngunsik khuakkuak 40 mah na bawl ding ahi. Singpek mong dawk nih tunna ding, khuakkuak nih ahi ding ahi. 22 Biakbuk phaitam lam, tumlam pang ading singpek guk na bawl ding a, 23 tua phaitam lam kiute ading singpek nih tuak na bawl ding ahi. 24 Tua phaitam lam kiu nihte-a singpekte thuah nih ahi ding a, a bul apan a khung dong khat bang ahi ding a, sikbil khata henkhawm ahi ding ahi. 25 Tua bangin, singpek giat leh a tunna ngun khuakkuak sawmleguk, singpek khat nuaia nih zel, a om ding ahi. 26 Biakbuk pang khat ading, singpekte khilkhawm nading akasia sing zawl nga na bawl ding ahi. 27 Tua bang mahin, biakbuk pang lehlam ading zawl nga, biakbuk phaitam lam, a tumlam ading zawl nga mah na bawl ding ahi. 28 A zawl laita pen in singpekte laizang ah, mong langkhat apan mong lehlam dong a khil paisuak ding ahi. 29 Singpekte ading kham sikbil kualte na bawl ding a, a zawlte khum nading ahi ding hi. Tua zawlte zong kham sikpekin na tuam ding ahi. 30 Mual tunga etteh kon etsak bangbangin biakbuk na tungkhe ding ahi.

Dantanna Puanzak

31 Khau dum, khau sandup leh khau sanau ziza khau zangngat khuk kigan puanzak sah, a tunga khutsiamtaka khui cherubte na bawl ding ahi. 32 Akasia sing khuam li, kham sik peka tuam, ngun khuakkuak li tunga tunte ah kham sikkawite na vawh ding a, tua sikkawite ah tua puanzak na khai ding ahi. 33 Tua puanzak pen a mekkilhte apan khai inla, tua puanzak liah ah Theihpihna singkuang na koih ding ahi. Tua puanzak pen Mun Siangthou leh Mun Siangthoupen kikal dantanna ahi ding ahi. 34 Tua Mun Siangthoupena Theihpihna singkuang tung ah a sin, tua Thoihdamna mun, na koih ding ahi. 35 Tua puanzak pua ah biakbuk mallam pang ah, tua dawhkan na koih ding a, a kizawnin a simlam pang ah meivak mung na koih ding ahi. 36 Biakbuk lutna kongkhak dingin puanzak khat na bawl ding ahi. Tua bel, khau dum leh sandup leh sanau ziza khau zangngat khuk kigan siamtaka zep ahi ding ahi. 37 Tua puanzak khai nading kham sikin sikkawite na bawl ding a, kham sikpeka tuam akasia khuam nga leh a tunna sumsan sun khuakkuak nga na bawl ding ahi.

Pemkhiakna 27

Haltum Thillatna Maitam

1 Akasia singin maitam Ld I khat na bawl ding a, a dunglam tong nga, a vailam tong nga, a dung a vai kikim, pang li nei, a sanlam tong thum ahi ding ahi. 2 A kiu li ah a ki lite na bawl ding a, a maitam leh a kite a kizom, sa khat ahi ding ahi. Tua maitam sumsan sikpekin na tuam ding ahi. 3 Tua baan ah, meivu kholna belte leh suahdulte, sisan thehna keupite, sa suahna sikkhutte leh, meiluahna kuangdaite na bawl ding a, tua vanzatte sumsanin na bawl vek ding ahi. 4 Maitam adinga sumsan siklen na bawl ding a, tua sumsan leen kiu lite ah a bil lite na bawl ding ahi. 5 Tua maitam geivel nuai, a sung lam ah tua sumsan leen na koih ding a, a kim chiang phatouin a om ding ahi. 6 Maitam adingin akasia sing zawlte na bawl ding a, sumsan sikpekin na tuam ding ahi. 7 Tua zawlte maitam pang tuaka bilte ah na khum ding a, a zawn nading ahi ding ahi. 8 8 Singpekin tua maitam a sung hawmin na bawl ding a, mual tunga etteh kon etsak bangbangin na bawl ding ahi.

Biakbuk Huang

9 Biakbuk huang na bawl ding ahi. Pang khat, a simlam pang huang um nading, ziza khau zangngat khuk kigan puanzakte na bawl ding ahi. Tua puanzakte tong 100-a sau ahi ding ahi. 10 A khuam 20 leh a tunna khuakkuak 20, sumsanin na bawl ding ahi. Khuam tunga sikkawite leh a gaknate, ngun sik ahi ding ahi. 11 Tua mah bangin, a mallam pang huang umna puanzakte tong 100-a sau ahi ding ahi. A khuam 20 leh a tunna 20 sumsan ahi ding a, khuam tunga sikkawite leh a gaknate ngun sik ahi ding ahi. 12 Tumlam pang huang umna puanzakte tong 50-a sau ahi ding a, khuam sawm leh a tunna khuakkuak sawm a om ding ahi. 13 Suahlam pang, ni suahna lam pang huang umna puanzakte tong 50-a sau ahi ding ahi. 14 Kongpi pang khat ah, tong 15-a sau huang umna puanzakte, a khuam thum leh a tunna khuakkuak thum a om ding ahi. 15 Kongpi pang lehlam ah, tong 15-a sau huang umna puanzakte, a khuam thum leh a tunna khuakkuak thum mah a om ding ahi. 16 Huang sung lutna kelkong adingin, tong 20-a sau khau dum, a sandup leh a sanau, ziza khau zangngat a khuka kigan, khutsiam-taka zep puanzakte a om ding ahi. Tua puanzakte'n khuam li leh a tunna li a nei ding ahi. 17 Huang umna khuamte khempeuh in nguna bawl, a hennate leh sikkawite a nei ding a, khuam tunnate sumsana bawl ahi ding ahi. 18 Huang sung tong 100-a sau, tong 50-a za, ahi ding a, a puanzakte tong nga-a sang, ziza khau zangngat khuk kigan ahi ding a, khuam tunna sumsana bawl ahi ding ahi. 19 Biakbuka vanzatte, a kizatna bang teng na hita leh, a kaihna khetphimte khempeuh leh, huang umna kaihna khetphim khempeuh sumsana bawl ahi ding ahi.

Meivakmung Kep ding Dan

20 Meivak a kuan gige theih nadingin, Israel tate'n oliv thau sukthawh, a siang bangmah hellouh, na kianga hon tawi dingun, thu na pe ding ahi. 21 Kihoupihna Puanbuk sunga Theihpihna maia dantanna puanzak pua ah, Aron leh a tapate'n nitak apan zingsang dong, Tangtawn Toupa' mai ah tua meivakte a kuangsak gige ding uh ahi. Israel tate lak ah, a khang a khangin, hiai thuseh a omden ding ahi.

Pemkhiakna 28

Siampi Puansilhte

1 Israel tate lak apan, na sanggampa Aron leh a tapate, siampi-a panga ka nna a sep theih nadingun la in. Aron leh a tapate Nadab, Abihu, Eleazer leh Ithamar la in. 2 Na sanggampa Aron adingin, dinmun sanna leh pahtawina hi dingin, puansilh siangthoute bawl in. 3 Aron siampi-a panga ka nna a sep theih nadinga sehtuam ahih theih nadingin, pilna kha-a ka dimsak khutsiamte khempeuh houpih inla, amaute'n Aron ading puansilh siangthoute bawl uhen. 4 Puansilh a bawl dingte uh hiaite ahi ding ahi: awmphaw, siampi puanakzem, puanaktual, khutsiamtaka gat puanak sungsilh, dialkhip, leh puanduang kawnggak ahi ding ahi. Tua bangin, na sanggampa Aron leh a tapate'n siampi-a panga ka nna a sep theih nadingun amaute ading puansilh siangthoute a bawl ding uh ahi. 5 Amaute'n kham khau, khau dum, a sandup leh a sanau leh ziza khau zangngat kigan a zang ding uh ahi.

Siampi Puanakzem

6 Siampi puanakzem dingin, kham khau leh khau dum, khau sandup leh khau sanau ziza khau zangngat khuk khutsiamtaka gat a zang ding uh ahi. 7 A liangzanga kaihtuah nadingin, a nunglam leh a malam pang ah khihna nih a om ding ahi. 8 Siampi puanakzem gakna, puanduang kawnggak, kham khau tawh, khau dum, khau sandup leh khau sanau khutsiamtaka gat puanmalngatin a bawl ding uh ahi. 9 Tua baan ah, oniks suang manpha nih na la ding a, a tung ah Israel' tapate' min, a khuakin na gelh ding a, 10 tua suang manpha khat ah min guk, suang manpha dang khat ah min guk mah, a upat dan ua kizomin na gelh ding hi. 11 Suainamna zungbuh khuaka kigelh bangin, suang manpha khuaka gelhsiamte' gelh, tua suang manpha nihte ah, Israel' tapate' min na gelh ding a, tua suang manphate kham sik khuak sunga phum ahi ding ahi. 12 Israel' tapate theih gigena hi dingin, tua suang nihte, siampi puanakzem liangzang kaihtuahna ah na suang ding ahi. Tua bangin Aron in, Tangtawn Toupa' mai ah a minte uh theih gigena hi dingin, a liangzang ah a paw ding ahi. 13 Tua baan ah, suang manphate phum nading khamsik phanthawh nih na bawl ding a, 14 kham sik siang mahin, khainiang phek nih na bawl ding a, tua suang manphate phumna kham sikte ah na khih ding ahi.

Siampi Awmphaw

15 Thu khentatna bawlna-a zat dingin, siampi awmphaw na bawl ding a, khutsiamtaka bawl ahi ding ahi. Siampi puanakzem bawl bangin na bawl ding a, kham khau leh khau dum, khau sandup leh khau sanau ziza khau zangngat khuk kigan na bawl ding ahi. 16 Khep niha kikhep ding, a khepa a dung a vai kikim, khap khata sau, khap khata za ahi ding ahi. 17 Tua tung ah suang manphate vual li-in na suang ding a, vual khatna ah suang manpha nam thum, rubi suang, topaz suang leh beril suang ahi ding ahi. 18 A vual nihna ah, suang manpha sardi suang, safaiar suang leh daimon suang ahi ding ahi. 19 A vual thumna ah, suang manpha zasin suang, ageit suang leh amethi suang ahi ding ahi. 20 A vual Una ah, suang manpha khrusolait suang, oniks suang leh jaspar suang ahi ding ahi. 21 Tua suang manphate ah Israel' tapa sawmlenihte' minte khat chiat a tuang ding ahi. Suainamna zungbuh khuaka kigelh bangin a khuaka gelh, Israel nam sawmlenihte' minte ahi ding ahi. 22 Kham sik siangin khainiang phek nih na bawl ding a, tua siampi awmphaw tunglam kiu nihte-a khih ding ahi ding hi. 23 Tua khainiang khih nading, siampi awmphaw tunglam kiu nih ah kham sikbil nih na bawl ding ahi. 24 Tua khit chiangin, tua siampi awmphaw tunglam kiu nih-a sikbil nihte ah, tua kham sik khainiang phek nihte na khih tuak ding ahi. 25 Tua khainiang phek mong langkhatte suang manpha kiphumna khamsik phanthawh nihte ah na khih ding a, siampi puanakzem kibaatna khau ah, a anglama kimu dingin na khai ding ahi. 26 Kham sik siangin kham sikbil nih dang bawl inla, tua awmphaw nuailam kiu nih ah, siampi puanakzem tawh khihkhawm nadingin na bulh ding ahi. Tua bel siampi puanakzem anglam panga koih ding ahi. 27 Tua ban ah, kham sikbil nih dang na bawl ding a, siampi puanakzem Hang kituahna khau mong, a sunglam ah, siampi puanakzem leh puanduang kawnggak kimatna tung tak ah na koih ding ahi. 28 Siampi awmphaw-a sikbilte leh siampi puanakzema sik bilte khau dumin na khihkhawm ding ahi. Tua bangin, siampi awmphaw pen siampi puanakzem tung ah a om ding a, siampi awmphaw pen siampi puanakzem apan tolhkhe louin a om ding ahi. 29 Mun Siangthou sunga Aron a lut chiangin, Tangtawn Toupa' maia theihgigena hiden dingin, a lungtang zawn tak ah, thukhentatna awmphaw tung ah, Israel' tapate' minte a paw gige ding ahi.

Urim leh Thumim

30 Tua baan ah, tua thu khentatna awmphaw ah, Urim leh Thumim na koih ding ahi. Tua bangin, Tangtawn Toupa' maia Aron a lut chiangin, tua Urim leh Thumim, a lungtang zawn tak ah a om ding a, Tangtawn Toupa' maia, Israel tate adinga thukhentatna a bawl chiangin a lungtang zawn tak ah a paw gige ding ahi.

Siampi Puanaktual

31 Siampi puanaktual, a vekpi-a dum na bawl ding ahi. 32 Tua puanaktual laizang ah, a lutang khum nading a ngawng vang a om ding ahi. Tua puanaktual ngawng vang gei a kikek louh nadingin, a kual suaka pehna puanak ngawng gat thawh ahi ding ahi. 33 Tua puanaktual mong ah, khau dum, khau sandup leh khau sanaua kibawl mimthei gah bangbang, a vangkimin na khai ding a, tuate kal ah kham sika bawl long na khai ding ahi. 34 Tua kham longte leh mimtheite puanaktual mong ah, a kikalhelhin a om ding uh ahi. 35 Aron in nna a sep chiangin, tua puanaktual a silh ding a, Mun Siangthoua Tangtawn Toupa' maia a lut chiangin leh, a pawtkhiak chiangin, tua long ging a kiza ding a, a si kei chih a kithei ding hi.

Siampilukhu Siangthou

36 Tua baan ah, kham sik siangin sikpek na bawl ding a, suainamna zungbuh khuak banga khuakin, SIANGTHOUNA Tangtawn TOUPA-A AHI chih na gelh ding ahi. 37 Tua laigelhna sikpek pen siampi dialkhip ah, a mailam ah khau dumin na khihbelh ding ahi. 38 Tua pen Aron' taltang ah a om ding a, ama'n Israelte thillat siangthou tawh kisaia, Israel' tate' mawhna a paw ding ahi. Tua pen, Aron' taltang ah a om gige ding a, thillat siangthoute Tangtawn Toupa' maia san ahi ding hi.

Siampi Puanak Sungsilh

39 Siampi puanaktual sungsilh, ziza khau zangngat khut siamtaka gat, na bawl ding ahi. Ziza khau zangngat mahin, dialkhip na bawl ding a, tua baan ah, a gat thawh puanduang kawnggak na bawl ding ahi. 40 Aron' tapate adingin, puanaktual sungsilhte leh puanduang kawnggakte, dialkhipte na bawl ding a, amaute' dinmun sanna pahtawina ahi ding hi. 41 Tua bangin, na sanggampa Aron leh a tapate, siampi-a panga ka nna a sep theih nadingun, tuatein na zem ding a, amaute thaunilhin siangthoua sehtuamna na bawl ding ahi. 42 Amaute' vuaktanna khuh ding, ziza khau zangngat-in pheituam tomte na bawl ding a, a kawng uapan a pheipizum chiang uh a khuh ding ahi. 43 Aron leh a tapate, Kihoupihna Puanbuk sunga hong lut chiang uh hiam, ahih kei leh, Mun Siangthoua nasem dinga maitam a naih chiangun mawhna khattou nei a, a sih louh nadingun, tuate a sa tung uah a om gige ding ahi. Aron leh a nunga suante adingin hiai thusehin a omden ding ahi.

Pemkhiakna 29

Aron leh a Tapate Siangthoua Sehtuamna

1 Siampi-a panga ka nna a sep theih nadingun, Aron leh a tapate siangthoua sehtuamna na bawl ding dan hibang ahi: Bawnghon lak apan bawngtal tuai khat leh belamtal nih, genbaanglou, na la ding ahi. 2 Tua baan ah, huit vui nei, silngou sawh louhin tanghou beute, sathau tawh kihel tanghou pei tawh, silngou sawh louh, sathau nuh tanghou pei neu tawh, na bawl ding ahi. 3 Tuate lawh sung khat ah na koih ding a, tua lawh tawh, tua bawngtal tuai tawh, tua belamtal nihte tawh biakbuk ah non la ding ahi. 4 Aron leh a tapate tua Kihoupihna Puanbuk kongkhak ah non paipih ding a, tuiin amaute na sil ding ahi. 5 Tua khit chiangin, siampi puansilhte na la ding a, puanaktual sungsilh, Aron na silhsak ding a, tua khitin, siampi puanaktual leh siampi puanakzem leh, awmphaw na silhsak ding a, khutsiamtaka kigan puanduang kawnggak na gaksak ding ahi. 6 A lutang ah dialkhip na khimsak ding a, dialkhip tung ah siampilukhu siangthou na khihbelh ding ahi. 7 Tua khitin, thaunilh sathau na la ding a, a luzanga buakin thau na nilh ding ahi. 8 Tua khitin, a tapate non paipih ding a, puanak sungsilhte na silhsak ding ahi. 9 Tua khitin, dialkhipte na khimsak ding a, tua khitin, puanduang kawnggakte Aron leh a tapate na gaksak ding ahi. Thuseh omden ding pansanin, siampi hihna amaute-a ahi ding ahi. Hibangin, Aron leh a tapate sehtuamna na hihkip ding ahi. 10 Kihoupihna Puanbuk mai ah tua bawngtal tuai non la ding a, tua bawngtal tuai lutung ah Aron leh a tapate'n khut a nga ding uh ahi. 11 Tua khit chiangin, Tangtawn Toupa' mai ah, tua Kihoupihna Puanbuk kongvang kiang ah, tua bawngtal tuai na gou ding ahi. 12 Tua bawngtal tuai sisan bangzah hiam na la ding a, na khuttal in maitam kite na nuh ding a, tua sisan khempeuh maitam bul ah na sung ding ahi. 13 A sungthau khempeuh, a sin leh a kailing nihte-a a thaute tawh na la ding a, tua maitam tung ah na haltum ding ahi. 14 A sa bel a vun tawh, a sungkua leh a ek tawh, giahphual pawlam ah meiin na haltum ding ahi. Hiai khelhna thillat ahi. 15 Tua belamtalte laka khat na la ding a, a lutung ah Aron leh a tapate'n khut a nga ding uh ahi. 16 Tua belamtal na gou ding a, a sisan na la ding a, tua maitam pang, a kimkotin na theh ding ahi. 17 A sa na at nen ding a, a sungkua leh a khete na silsiang ding a, a sate leh a lutang tawh na koihkhawm ding ahi. 18 Tuate khempeuh, a vekpi-in, maitam tung ah na haltum ding ahi. Tangtawn Toupa' maia haltum thillat ahi a, Tangtawn Toupa' maia gim namtui, meia thillat ahi. 19 Tua baan ah, tua belamtal dang khat pen zong na la ding a, Aron leh a tapate'n a lutung ah khut a nga ding uh ahi. 20 Tua belam tai na gou ding a, a sisan bangzah hiam na la ding a, Aron leh a tapate' taklam bilteep mong leh taklam khutpite na nuh ding a, tua sisanin maitam pang, a kimkotin na theh ding ahi. 21 Tua baan ah, maitam tunga sisan leh nilh sathau bangzah hiam na la ding a, Aron leh a tapate leh a puansilhte uh na theh ding ahi. Tua bangin, Aron leh a tapate leh a puansilhte uh siangthoua sehtuam ahita ding hi. 22 Tua belamtal thaute, a mei thau, a sungthau, a sin leh a kailing nihte leh a thaute, a taklam phei tawh, na la ding ahi. Hiai bel, siangthoua sehtuamna belam tai ahih man ahi. 23 Tua baan ah, Tangtawn Toupa' maia lawhbeua om silngou sawh louh tanghou kikoihte laka tanghou beu khat tawh, sathaua kikang tanghou pei khat tawh, tanghou kan pei neu khat tawh na la ding a, 24 tuate khempeuh Aron leh a tapate' khut ah na koih ding a, Tangtawn Toupa' mai ah vei thillatin na veisak ding ahi. 25 Tua khitin, amaute' khut apan tuate na la ding a, Tangtawn Toupa' maia gim namtui hi dingin, maitam ah na haltum ding ahi. Tangtawn Toupa' maia meia thillat ahi. 26 Tua khitin, Aron siangthoua sehtuamna belamtal awmsa na la ding a, Tangtawn Toupa' mai ah vei thillatin na vei ding a, tua sa pen nangma' tan ahi ding ahi. 27 Tua siangthoua sehtuamna belamtal apan, vei thillata veisa a awm tawh, vei thillata veisa a phei tawh, Aron' tan leh a tapate' tante na hihsiangthou ding hi. 28 Hiai Israel suante apana Aron leh a tapate' tan ngeina ahi gige ding ahi. Tua bel, Israel suante'n a lemna thillatte uapan Tangtawn Toupa adinga a piak ding uh ahi. 29 Aron' puansilh siangthoute, ama' nunga a suante ading ahi suksuk ding a, tuate silha thaunilhna tawh seh kip ahi ding uh ahi. 30 Ama' tapate laka, ama' muna siampi hong hi a, Mun Siangthoua nasem dinga Kihoupihna Puanbuk sunga lut penpen in tua puansilhte ni sagih sung a silh ding ahi. 31 Sehkipna belamtal na la ding a, mun siangthou khat ah na huan ding ahi. 32 Aron leh a tapate'n Kihoupihna Puanbuk kongkhak kiang ah, tua belamtal sa leh, lawhbeua tanghou a ne ding uh ahi. 33 Amaute sehkip nading leh hihsiangthou nadinga khelhna thoihna thillatte a nek ding uh ahi. Thil zek leh siangthou ahih manin, kuamah dangin tuate a ne ding ahi kei hi. 34 Tua namkipna belamtal sa leh tanghou nekbangte, zingsang donga om a om leh, meia haltum ding ahi. Thil zek leh siangthou ahih manin, nek ding ahi kei hi. 35 Thu kon piak bangbangin, Aron leh a tapate tung ah na hih ding ahi. Amaute namkipna saina in ni sagih sung a daih ding ahi. 36 Tua ni sagih sung, khelhna khuhna hi dingin, nisimin bawngtal khat, khelhna thillatin na laan ding ahi. Maitam ading khelhna thoihdamna bawlin, maitam na siansuah ding a, siangthoua sehtuam hi dingin, tua maitam sathau na nilh ding ahi. 37 Ni sagih sung tua maitam ading, khelhna thoihna bawlin, siangthoua sehtuamna na bawl ding ahi. Tua khit chiangin, tua maitam a siangthou penpen ahi ding a, tua maitam tawh kisukha peuhmah siangthou a hita ding hi.

Siampite' Thillat-gigete

38 Nisima maitam tunga na lat gige ding hiai ahi: Kum khata upa belamnou nih, 39 zingsangin khat, nitaklam khawmuiin khat na laan ding ahi. 40 Zingsanga belamnou khat na lat chiangin, anvui nei ephah khat seh sawm suah seh khat, leh sukthawh oliv thau hin khat seh li suah sehkhat tawh kihel na laan ding a, grepzu hin khat sehli suah seh khat, dawn thillatin na laan ding ahi. 41 Nitak lam khawmuiin, belamnou khat pen zong, zingsang thillata bangin an thillat leh dawn thillat tawh na laan ding ahi. Hiai Tangtawn Toupa' maia, meia thillat gim namtui ahi. 42 Kihoupihna Puanbuk kongkhaka, Tangtawn Toupa' maia thillat, a khang a khanga na bawl gige ding uh ahi. Tua ah, nang kon kimuhpih ding a, kon houpih ding. 43 Tua ah, Israel tate zong ka kimuhpih ding a, ka thupina in tua mun a hihsiangthou ding hi. 44 Tua bangin, Kihoupihna Puanbuk leh maitam ka hihsiangthou ding a, Aron leh a tapate zong siampi-a panga ka nna sem dingin ka hihsianghtou ding. 45 Tuachi-in, Israel tate lak ah ka teeng ding a, amaute' Pathian ka hi ding. 46 Amaute'n amaute laka ka teen theih nadinga, Aigupta gam apan amaute piikhepa Tangtawn Toupa, a Pathian uh kei ka hi, chih hon thei ding uh. Tangtawn Toupa, a Pathian uh kei ka hi.

Pemkhiakna 30

Gimnamtui Halna Maitam

1 Gimnamtui hal nading maitam khat, akasia singin na bawl ding ahi. 2 Tua maitam dung lam tong khat, a vailam tong khat, a dung leh a vai kikim, a sanlam tong nih ahi ding ahi. A kite zong a maitam tawh sakhata kizom ahi ding ahi. 3 A tung leh a pang teng leh a kite, kham sik peka na tuam ding ahi. A gei kimvel ah khamsikin a geivel na bawl ding ahi. 4 Kham sik bilkual nih, a pang nih ading na bawl ding a, maitam pang nih ah na bulh ding a, a zawnna zawlte khum nading ahi ding ahi. 5 A zawnna zawlte akasia singin na bawl ding a, kham sik pekin na tuam ding ahi. 6 Theihpihna singkuang, a tung sin, thoihdamna mun kichi, maia dantan puanzak mai ah, tua gimnamtui halna maitam na tung ding ahi. Tua thoihdamna mun ah nang kon kimuhpih ding hi. 7 Aron in zingsang tengin, meivakte a kep chiangin, tua maitam tung ah gimnamtui a hal ding ahi. 8 Aron in nitaklam khawmuia meivakte a det chiangin, tua maitam tung ah gimnamtui a hal ding a, a khang a khanga Tangtawn Toupa' maia gimnamtui a nam gige ding ahi. 9 Tua maitam tung ah, gimnamtui dang himhim hiam, haltum thillat hiam, an thillat hiam na laan ding ahi kei a, dawn thillat zong na sung ding ahi kei. 10 Aron in kum khatin khatvei tua maitam kite ah, khelhna khuhna thillat sisan a tat ding a, thoihdamna a bawl ding ahi. A khang a khanga lat ding, Tangtawn Toupa adinga thil siangthou penpen ahi ding ahi, a chi hi.

Tatna Sum

11 Tua baan ah, Tangtawn Toupa'n Mosi a houpih lai a: 12 Israel tate a tam dan uh theih nading kisimpina na bawl chiangin, pasal chih in a hinna tatna sum, Tangtawn Toupa kiang ah a laan ding ahi. Hiai bel, amaute na sim chianga, amaute laka hipi a len louh nading ahi ding hi. 13 Simtela om mi chih in, tatna sum a piak ding ahi: Mun Siangthou sum shekel kimkhat ahi ding ahi. Shekel bel gera 20-a gik ahi. Tua shekel kimkhat, Tangtawn Toupa' maia thillat ahi ding ahi. 14 Simtela om, kum 20-a upa leh a tunglam kuapeuh in, Tangtawn Toupa' maia thillat a lat ding ahi. 15 Noute adinga hinna tatna bawl a, Tangtawn Toupa' maia thillat na lat chiangin, a haute'n shekel kimkhat sanga tam a laan kei ding a, a zawngte'n zong shekel kimkhat sanga tawm a laan kei ding ahi. 16 Israel tate tatna sum na la ding a, Kihoupihna Puanbuka nasep nadingin, na sep ding ahi. Noute' hinna tatna hi dingin, Tangtawn Toupa' mai ah, Israel tate adingin, theihgigena ahi ding ahi, a chi hi.

Tuikuang

17 Tua baan ah, Tangtawn Toupa'n Mosi a houpih lai a: 18 Kisil nadingin sumsanin tuikuang na bawl ding a, a tunna khete zong sumsanin na bawl ding ahi. Tua tuikuang pen Kihoupihna Puanbuk leh maitam kikal ah na koih ding a, a sung ah tui na sung ding ahi. 19 Aron leh a tapate'n tua tuikuang ah a khut a khe uh a sil ding uh ahi. 20 Kihoupihna Puanbuk sung a lut ding chiang uhiam, nna sem dinga Tangtawn Toupa' maia, meia thillat laan dinga maitam a naih ding chiang uhiam, tuiin a kisil ding uh ahi, tua ahih kei leh, a si ding uhi. 21 Tua banga a sih louh nadingun, a khut a khe uh a sil ding uh ahi. Hiai, Aron leh a tate ading a khang kizang English a atonement, khuhna chi a kilet sek kammal ahi. akhanga thuseh hi tawntung ding ahi, a chi hi.

Nilh Sathau Siangthou

22 Tua baan ah, Tangtawn Toupa'n Mosi a houpih lai a, Tangtawn Toupa'n: 23 Thil namtuite mura tui shekel 500 tawh, singguithak namtui tua zah kimkhat, shekel 250 tawh, sialluang namtui shekel 250 tawh, 24 nahnam, munsiangthou shekel 500 tawh, oliv thau hin khat tawh na la ding ahi. 25 Tuate-in gimnamtui bawl siamte' hel banga helin, nilh sathau siangthou na bawl ding a, nilh sathau siangthou ahi ding ahi. 26 Tua sathau siangthouin Kihoupihna Puanbuk leh Theihpihna singkuang, 27 tua dawhkan leh a vanzatte, meivak mung leh a vanzatte, tua gimnamtui halna maitam, 28 haltum thillatna maitam leh a vanzatte khempeuh, tuikuang leh a tunna khete, na nilh ding ahi. 29 Tuate, tua banga a siangthoua sehtuamna na bawl ding a, thil siangthou penpen hong hi ding ahi. Tuate tawh kisukhate peuhmah siangthou a hita ding hi. 30 Aron leh a tapate'n siampi-a panga ka nna a sep theih nadingun, amaute nilh sathau na nilh ding a, siangthoua sehtuamna na bawl ding ahi. rTua bangin, Israel tate kiang ah thu na gen ding a: Hiai a khang akhanga kei adinga nilh sathau siangthou hi gige ding ahi. 32 Mihing satung hiam ah na sung ding uh ahi kei a, a kihel dan bangbangin, a batpih dang zong na bawl ding uh ahi kei. Nilh sathau siangthou ahi a, noute adinga siangthou ahi ding hi. 33 Hiai bangbanga hel a, a batpih sathau bawl hiam, siampi hilou mi dang tunga zang hiam peuhmah a mite lak apan ka satkhe ding, chi ahi, chi in, a chi hi.

Gimnamtui

34 Tua baan ah, Tangtawn Toupa'n Mosi kiang ah: Thil namtuite' singnaite leh onichate leh galbanamte leh, begawte a kikim chiat la in. 35 Hiaite apan gimnamtui na bawl ding ahi. Gimnamtui bawl siamte' hel bangin na hel ding ahi. Chi sawh, a siang leh a zeka siangthou hi ding hi. 36 Tua gimnamtui kihel bangzah hiam na la ding a, na gawi nei dimdem ding a, bangzah hiam tawiin, nang kon kimuhpih nading puanbuk sunga Theihpihna singkuang mai ah na koih ding ahi. Noute adingin thil siangthou penpen ahi ding. 37 Hiai gimnamtui na bawl ding tawh kisaiin, a hel dana a batpih noute aituam ding na kibawl ding uh ahi kei. Noute adingin, Tangtawn Toupa' maia thil siangthou ahi ding ahi. 38 A gimnam diik dinga a batpih bawl mi peuhmah a mite lak apan ka satkhe ding, a chi hi.

Pemkhiakna 31

Biakbuk Lam Khutsiamte

1 Tua baan ah, Tangtawn Toupa'n Mosi a houpih a: 2 En in, Judah nama Hur' tapa Uri' tapa Bezalel, a minin ka samta. 3 Pathian' Kha leh pilna leh theihsiamna leh theihna leh, khutsiamna namkimin amah ka luahdimsakta. 4 Ama'n khutsiamna thil lim leh mei neiin a gel ding a, kham sik, ngun sik leh sumsan siktein thil a bawl ding. 5 Tua baan ah, suangmanphate a at ding a, singte lim leh mei neiin, khutsiamtakin a bawl ding. 6 Ama' seppih dingin, Dan nama mi Ahisamak' tapa Aholiap ka septa. Khutsiamna neite khempeuh zong pilna lungtang ka pia a, amaute'n nang kon thupiak bangin thil khempeuh a bawl ding uhi: 7 Kihoupihna Puanbuk, Theihpihna Singkuang leh a tunga Thoihdamna Mun leh biakbuk sung vanzatte khempeuh, 8 dawhkan leh a vanzatte, kham sianga bawl meivak mung leh a vanzatte khempeuh, gimnamtui halna maitam, 9 haltum thillatna maitam leh a vanzatte khempeuh leh tuikuang leh a tunna khete, 10 siampi puansilhte, siampi-a panga nna sem ding siampi Aron' puansilh siangthoute leh a tapate' puansilhte leh, 11 nilh sathau leh mun siangthou ading gimnamtui a bawl ding uh a, kon thupiak khempeuh bangin a bawl ding uh ahi, a chi hi.

Sabbath

12 Tua baan ah, Tangtawn Toupa'n Mosi a houpih a: 13 Israel tate kiang ah thu gen inla: Ka Sabbath na tan teitei ding uh ahi. Noute siangthoua hon septuam Tangtawn Toupa kei ka hi, chih na theih nadingun, noute leh kei kala chiamtehna, a khang a khanga omden ding ahi ding ahi. 14 Tua bang ahih manin, Sabbath, noute adinga siangthou ahi a, na tan ding uh ahi. Sabbath hihbuah kuapeuh noute lak apan ka satkhe ding. Sabbath ni-a nasem peuhmah, a mite lak apan ka satkhe ding. 15 15 Ni guk sung nna na sem ding uh a, ahihhangin, ni sagih ni bel tawlngakna Sabbath, Tangtawn Toupa adinga siangthou ahi. Sabbath ni-a nasem peuh-mah a si teitei ding ahi. 16 Tua bang ahih manin, Israel tate'n a khang a khanga thukhun omden hi dingin, Sabbath siangthouin a tang ding uh ahi. 17 Sabbath bel, Israel tate leh kei kala omden ding chiamtehna ahi. Ahang bel, Tangtawn Toupa'n ni guk sungin lei leh vante a bawl a, ni sagih ni-in nnasep a tawlnga a, a tawldamta hi, chi in, a chi hi. 18 Tangtawn Toupa'n Sinai Mual tunga Mosi houpih a, thu a genkhit-in, tua Theihpihna suangpek nih, Pathian in khuttala a gelh, Mosi a pia hi.

Pemkhiakna 32

Khamsika Bawl Bawngnou

1 Tua mipite'n, Mual tung apan Mosi hong paisuk zekai a theih takun, Aron kiang ah hong paikhawm uh a: Kisa inla, koute' maia pai ding pathiante hon bawlsak in. Aigupta gam apan hon piikhia hiai Mosi lah bang suakta hiam, ka thei kei uh, a chi uhi. 2 Aron in amaute kiang ah: Na zite uleh na tapate uleh, na tanute uh' bil apan kham bilbahte suahkhia unla, ka kiang ah hon tawikhawm un, a chi a, 3 mi khempeuh in a bil ua kham bilbahte sutin, Aron kiang ah hon tawikhawm uhi. 4 Ama'n amaute khut apan tua kham bilbahte a sang a, a sun thawh-in bawngnou lim a bawl a, tua bangin khamsik bawngnou limin a sung hi. Tua khitin, amaute'n: Israel aw, Aigupta gam apan nang hon piikhia na pathian hiai ahi! a kichi uhi. 5 Aron in tua a muh tak in, tua bawngnou mai ah maitam khat a dawh a, thu a phuang a: Zing chiangin, Tangtawn Toupa' maia ankuang luina om ding ahi, a chi hi. 6 A zingchiang zingkhangin, amaute beltakin a thou uh a, haltum thillatte a laan uh a, lemna thillatte a laan uhi. Mipite ne ding leh dawn dingin a tu uh a, noptal dingin a ding uhi. 7 Tua bang ahih manin, Tangtawn Toupa'n Mosi kiang ah: Vapaisuk in! Aigupta gam apan na piikhiak na mite kisegawp uhi. 8 Ka thupiak pialsan pah uhi. Sunthawh bawngnou lim kibawlin bia uh a, a mai ah thillatte laan uh a: Israel aw, Aigupta gam apan hon piikhia na pathian hiai ahi, kichi uhi! a chi hi. 9 Tua baan ah, Tangtawn Toupa'n Mosi kiang ah: Hiai mite ka muta a, mi genhak ahi taktak uhi! 10 Tua bang ahih manin, amaute tunga ka thangpaihna a kuang a, ka kattum theih nadingin, ka ut uta gamta dingin hon khahzan in. Nang apanin nam thupi ka bawl ding, a chi hi. 11 Tua khitin, Mosi in Tangtawn Toupa, a Pathian a ngen ngutngut a: Tangtawn Toupa aw, banghanga Aigupta gam apan vangletna thupitak leh khut hattaka na piikhiak na mite tunga na thangpaihna kuangsak dek na hia? 12 Banghanga Aiguptate'n: Amaute siat nading deih a, mual tung khawnga that ding leh leitung apan chiman dinga piikhia aka, hon chi peuhmah ding uh ahia? Na thangpaihna lauhuai apan lunghei inla, na mite' siat nading na gel lakik mahmah in. 13 Na suante vana aksi zahin ka pungsak ding a, hiai gam khempeuh na suante kiang ah ka pe ding a, a luahden ding uh, chi-a nangma' min kiloua na kichiamna, na silate Abraham leh Isak leh Israel theigige in, a chi hi. 14 Tua bangin, a mite tunga siatna tut a sawm apan Tangtawn Toupa a lungheita hi. 15 Tua khitin, Mosi a kihei a, mual tung apan a kumsuk a, Theihpihna suangpek nihte a tawi hi. Tua suangpek nihte a pang langnih-a kigelh ahi a, a mailam leh nunglam kigelh ahi. 16 Tua suangpekte Pathian' nasep ahi a, a kigelh zong suangpeka khuaka Pathian' gelh ahi. 17 Joshua in tua mite kikou husa a zak takin, Mosi kiang ah: Giahphual ah kikou husa a om, a chi hi. 18 Mosi in: Vualzawh husa hi kei veh aw, vuallelh husa zong hi kei veh. Ka zak zaw, lasa aw hi veh, a chi hi. 19 Mosi tua giahphual naih hong tun takin, tua bawngnou leh laam a mu hi. Mosi' hehna a kuang a, a khut apan tua suangpekte a paikhia a, tua mual bul ah a paitam hi. 20 Amaute'n a na-bawl uh bawngnou a la a, meiphual ah a khul a, a gawivui a, tui tung ah a theh a, Israel tate a dawnsak hi. 21 Tua khitin, Mosi in Aron kiang ah: Hiai mite'n bang hon lawh a, amaute tunga hibang khelhna thupi tun tamai na hia? a chi hi. 22 Aron in: Ka toupa aw, na hehna kuangsak ken. Mipite na thei a, thilse lama a awn gige dan uh na thei hi. 23 Ka kiang ah: Koute' maia pai ding pathiante hon bawlsak in, Aigupta gam apan hon piikhia hiai Mosi lah bang suakta hiam, chih ka thei kei uh, chi uhi. 24 Ke'n amaute kiang ah: Khama kibawl kizepna neite peuhmah in hon suahkhia un, ka chi a, tua bangin hon pia uh a, ke'n meikhuk ah ka khul a, hiai bawngnou hong suak ahi, a chi hi. 25 Aron in ututa om dinga mipite a taizak uh a phal a, nuihzabuk hong suakta uh, chih Mosi in a mu hi. 26 Giahphual kongpi ah a ding a: Tangtawn Toupa lama pang peuhmah ka kiang ah hong pai hen, a chi hi. Tua bangin, Levi' tapate khempeuh amah kiang ah, a kimkot ah hong paikhawm uhi. 27 Mosi in amaute kiang ah: Tangtawn Toupa, Israel Pathian in: Pasal chih in a namsau kuah henla, giahphual kongpi lang khat apan kongpi lehlam dong paisuak henla, mi chih in a sanggam, mi chih in a lawm, mi chih in a innveng that hen, chi ahi, a chi hi. 28 Tua bangin, Levi' tapate'n Mosi thugen bangin a hih uhi. Tua ni-in, mipite laka mi 3,000 a si uhi. 29 Tua khitin, Mosi in: Michih in a tapate leh a sanggam douta ahih manin, Tangtawn Toupa adingin kihihsiangthou un, a chi hi. 30 A zing chiangin, Mosi in mipite kiang ah: Khelhna thupitak hih na hita uh. Tangtawn Toupa' mai ah ka va-paitou peuhmah ding a, noute' khelhna thoihdamna ka bawl thei khamaithei hi, a chi hi. 31 Tua khitin, Mosi Tangtawn Toupa kiang ah a kilehkik a: Hiai mite'n khelhna thupi hih na maizen uh e! Kham pathiante lah a kibawl tazen ua! 32 Hinapi-in, tuin amaute' khelhna ngaidam in. Na ngaihdam kei ding leh, na gelhsa laibu apan ka min thaimang mai in, kon ngen ahi, a chi hi. 33 Tangtawn Toupa'n Mosi kiang Ka tunga khial peuhmah ka laibu apan a min ka thaimang ding. 34 Tuin pai inla, kon hilhsa gam ah mipite pii in. Ngai in, ka vansawltak na maia pai ding ahi. Ahihhangin, ka gawt hun hong tun chiangin, a khelhna uh hangin amaute ka gawt ding, a chi hi. 35 Aron' bawlsa bawngnou maia a thillatte uh hangin, Tangtawn Toupa'n mipite hipi-in a gawt hi.

Pemkhiakna 33

Sinai Nuse dinga Thupiak

1 Tua khitin, Tangtawn Toupa'n Mosi kiang ah: Abraham, Isak leh Jakob kiang ah ka kichiam a: Na suante kiang ah gam ka pe ding, ka na chi hi. Tu'n paikhia unla, nang leh Aigutpa gam apan na piikhiakte tawh ka chiam gam ah paitou un. 2 Na mai ah vansawltak ka sawl ding a, Kanante  Amorte leh Hitte leh Perizte leh Hivte leh Jebuste ka hawlkhe ding. 3 Nawitui leh khuaizu-a luang tua gam ah paitou un. Mi genhakte na hih manun, kon kangtum kha ding a, na lak uah zaw ka paitou kei ding, a chi hi. 4 Mipite'n tua thu lungkhamhuai a zak takun, a dah uh a, kuama'n buh leh bah kizepnate a zang kei uhi. 5 Ahang bel, Tangtawn Toupa'n Mosi kiang ah: Israel tate kiang ah thugen inla: Mi genhakte na hi uh a, na lak uah pai leng, mitphialkal louin kon kangtum kha ding. Tua bang ahih manin, buh leh bah na kizepnate uh suahkhia un, bang hon lawh ding ka hiam, ka ngaihtuah ding, a chi, chi in, a na chikhinta hi. 6 Tua bangin, Israel tate'n Horeb Mual ah, a kizepnate uh a suahkhevek uhi.

Mosi in Tangtawn Toupa Kimuhpih

7 Mosi in puanbuk puain, giahphual pawlam gamlapi ah, tua puanbuk a kai zel a, tua puanbuk pen Kihoupihna Puanbuk chi-in a minvawh hi. Tangtawn Toupa apan thu dong nuam peuhmahte giahphual pawlam ah tua Kihoupihna Puanbuk ah a vapai zel uhi. 8 Tua Puanbuka Mosi a vapai peuhmah chiangin, mipite khempeuh a ding uh a, Mosi tua Puanbuk sung a lut mateng a en uhi. 9 Mosi, tua Puanbuk sung a lut peuhpeuh chiangin, meipi khuampi hong niamsuk a, Puanbuk kongvang ah a ding a, Tangtawn Toupa'n Mosi a houpih hi. 10 Mipite khempeuh in tua Puanbuk kongvanga tua meipi khuam ding a mu uh a, a ding uh a, michih in ama' puanbuk kongvang ah a bia uhi. 11 Tangtawn Toupa'n kimaituahin Mosi a houpih a, mi'n a lawm a houpih bangin a houpih hi. Mosi bel, giahphual ah a kik zel a, a huhpa Nun' tapa tangval Joshua in bel tua Puanbuk a nuse ngei kei hi.

Pathian' Ompihna Thuchiam

12 Mosi in Tangtawn Toupa kiang ah: En dih, hiai mite piitou in, non chi gige a, ahihhangin, kei tawh tona kua hon sawl ding na hia, chih non theisak nai kei. Hinapi-in, nang ka kiang ah: Na minin kon thei a, ka mitmuhin deihsakna na tang, non chi hi. 13 Tua banga na mitmuha deihsakna tang ka hih leh, nang kon theih nading leh na deihsakna ka tan lailai nadingin, na lampite hon sinsak in, kon ngen hi. Hiai nam nangma' mite ahi, chih theigige in, a chi hi. 14 Tua khitin, Tangtawn Toupa'n: Keimah mah' Ompihna in hon tonpih ding a, tawlngakna kon pe ding, a chi hi. 15 Mosi in: Nangmah mah' Ompihna in hon tonpih kei ding leh, hiai apan hon piitou se ken. 16 Non tonpih kei leh, bangchi-a na mite leh ke'n na deihsakna ka tang uh, chih kithei ding ahia? Leitung maikaiha nam dangte apan, na mite leh kei a tuam ka hi uh, chih bang thilin kitelsak ding ahia? a chi hi. 17 Tangtawn Toupa'n Mosi kiang ah: Ka mitmuhin deihsakna na tang a, na minin kon theita a, hiai na nget pen mahmah zong kon hihsak ding, a chi hi. 18 Tua khitin, Mosi in: Na thupina hon ensak in, a chi hi. 19 Tangtawn Toupa'n: Na mai ah ka hoihna khempeuh ka kilangsak ding a, na mai ah Tangtawn Toupa' min ka phuang ding. Ka zahngaih nopna mi tung ah zahngaihna ka nei ding a, ka lainat nopna mi tung ah lainatna ka nei ding. 20 Ahihhangin, ka maitang bel na mu thei kei ding. Kei hon mu a hing om thei kei hi, a chi hi. 21 Tua khitin, ama'n: Ka kiang ah mun khat a om a, tua ah suangpi tung ah na ding in. 22 Ka thupina in hon khen sungin, tua suangpi khi sung ah nang kon koih ding a, kon khen sungin, ka khutin kon hum ding. 23 Tua khit chiangin, ka khut ka lakhe ding a, ka nunglam na mu ding. Ahihhangin, ka maitang bel muh ahi het kei ding hi, a chi hi.

Pemkhiakna 34

Mosi' Bawl Suangpek Thakte

1 Tua nungin, Tangtawn Toupa'n Mosi kiang ah: Suangpek nih, a masate bangbang, sek inla, tuate tung ah na suktap suangpeka thu kigelhte bangbang ke'n ka gelh ding. 2 Zingsangin kisa inla, Sinai Mual ah hong paitou inla, ka mai ah hong kilak in. 3 Kuama'nnang hon zuih louh ding, kuamah mual tung koimaha a kimuh louh ding ahi. Belamhon zong, bawnghon zong tua mual mazawna a gamtat louh ding ahi, a chi hi. 4 Tua bangin, Mosi in suangpek nih, a masate bangbang, a sek hi. Zingsangin, beltakin a thou a, Tangtawn Toupa' thupiak bangin, Sinai Mual tung ah a paitou a, tua suangpek nihte a tawitou hi. 5 Tua khitin, Tangtawn Toupa, meipi lak ah hong kumsuk a, Mosi kianga dingin, Tangtawn Toupa' min a phuang hi. 6 Tangtawn Toupa, Mosi' mai ah a pai a: Tangtawn Toupa, Tangtawn Toupa Pathian zahngaithei leh hehpihsiam, hehhak, hoihna leh thutaka dim, 7 sang tampite tunga zahngai, lungsimsiatna leh tatlekna leh khelhna ngaidampa ahi. Hinapi-in, a mawhte gawtlouin a hawi kei a, pate' lungsimsiatna tate tung ah leh a tate uh tate tung ah, khang thum khang li dongin a thuk, chi-in a phuang hi. 8 Mosi kintakin lei si-in a kun a, khupbawhin amah a bia a: 9 Toupa aw, tuin na mitmuha deihsakna ka tan leh, Toupa aw, kon ngen hi: Mi genhakte hi mah le-ung, ka Toupa koute lak ah pai hen. Ka lungsimsiatna uleh ka khelhna uh ngaidam inla, na gou dingin hon sang in, a chi hi.

Thukhun Piakthakna

10 Tangtawn Toupa'n: Ngai in, noute tawh kal ah thukhun ka bawl ding a, leitung koimaha kihih ngeilou leh nam kuamah laka kihih ngeilou thillamdangte na mite khempeuh mai ah ka hih ding. A lak ua na omna mite khempeuh in, kei Tangtawn Toupa'n nou adinga thil lauhuai ka hih dingte a mu ding uh. 11 Tuni-a thu kon piak zui in. Noute' mai ah Amorte leh Kanante leh Hitte leh Perizte leh Hivte leh Jebuste ka hawlkhe ding. 12 Na pem nading gam ua mipi tawh kal ah thukhun na bawl kha ding ua, noute adingin thang ahi kha ding uh, pilvang un. 13 Amaute' maitamte na sawichim ding uh, a milim suangphuhte uh na hihtam ding uh, Ashera songte na phuk ding uh ahi. 14 Ahang bel, Tangtawn Toupa' min Thikthusia ahi a, thikthusia Pathian ahi a, pathian dang na biak louh ding uh ahi. 15 Tua gama tengte tawh kal ah thukhun na bawl kha mahmah ding uh ahi. A pathiante uh adinga kizuak a, a pathiante uh maia kithoihnate a lat chiangun, khattei in noute hon chial ding a, tua kithoihna sa na ne kha mahmah ding uh ahi. 16 Na tapate uh adingin, a tanute uh na pii kha mahmah ding uh a, a pathiante uh adinga a kizuak chiangun, na tapate uh zong amaute hih banga, a milim pathiante uh be dingin a khempuk kha mahmah ding uh ahi. 17 Sun thawh pathiante na kibawl ding uh ahi kei hi. 18 Silngou Sawhlouh Tanghou Ankuanglui na bawl ding uh ahi. Kon thupiak bangin, Abib khain, ka hun seh ah, ni guk sung, silngou sawhlouh tanghou na ne ding uh ahi. Ahang bel, Abib khain, Aigupta gam apan hong pemkhia na hi uhi. 19 Sul hong ta masa peuhmah keia ahi. Na gantate uh, bawng hita leh, belam hita leh, a pa piang masa peuhmah keia ahi. 20 Sabiltung piang masa peuhmah belamnoua na tat ding uh ahi. Na tat nop kei uleh, a ngawng na hektan ding uh ahi. Na tapate uh laka piang masate na tat ding uh ahi. Na tapate uh kuamah ka maia khutvuaka hong kilat ding uh ahi kei hi. 21 Ni guk sung nna na sem ding uh a, ahihhangin, ni sagih ni-in na tawlnga ding uh ahi. Lou kaih laiin zong, anlak laiin zong na tawlnga ding uh ahi. 22 Nipikalte Ankuanglui leh huitbuh lak gahmasa Buhlak Ankuanglui leh kumtawpa Anpuak-lut Ankuanglui na bawl ding uh ahi. 23 Kum khat sungin, thumvei Tangtawn Toupa Thuneipen, Israel Pathian' mai ah pasal peuhmah na kilang ding uh ahi. 24 Noute' mai ah namte ka hawlkhe ding a, na gamgi uh ka keeklian ding. Kum khata thumvei, Tangtawn Toupa na Pathian uh maia kilang dinga na kuantouh sungun, na gam uh kuama'n hon deihgawh kei ding hi. 25 Ka maia kithoihna thillat sisan ah silngou helin na lankhawm ding uh ahi kei. Paikan Ankuang thillat zong, zingsang dong na koih ding uh ahi kei. 26 Na gam gah masate laka a hoihpen, Tangtawn Toupa na Pathian' inna non tawi ding uh ahi. Kelnou, a pi' nawituiin na huan ding uh ahi kei hi, a chi hi. 27 Tua khitin, Tangtawn Toupa'n Mosi kiang ah: Hiai thute gelh in. Ahang bel, hiai thute bangbanga noute leh Israel tawh kala thukhun bawl ka hi, a chi hi. 28 Mosi tua ah ni 40 leh zan 40 sung, an ne lou, tui dawn louin, Tangtawn Toupa tawh a omkhawm hi. Tangtawn Toupa'n tua suangpekte tung ah a thukhun thute, tua Thupiak Sawmte mah a gelh hi.

Mosi' Maitang Taang

29 Sinai Mual tung apan, tua Theihpihna suangpek nihte tawia Mosi hong kumsuk takin, Tangtawn Toupa tawh a kihou sungin, a maitang a taang, chih a phawk kei hi. 30 Aron leh Israel suante khempeuh in Mosi a muh takun, ngai dih, a maitang a taang a, amah a naih ngam kei uhi. 31 Ahihhangin, Mosi in amaute a sam a, Aron leh tua Israel mipite' makaite khempeuh amah kiang ah hong hawh kik uh a, ama'n amaute a na houpih hi. 32 Tua nungin, Israel tate khempeuh in hong naih uh a, a ma'n, Tangtawn Toupa'n Sinai Mual tunga amah kianga a piak thupiakte khempeuh amaute a pia hi. 33 Mosi in amaute a houpih khitin, khuhnain a maitang a khuh hi. 34 Ahihhangin, Tangtawn Toupa houpih dinga a maia a lut peuhmah chiang-in, a hong pawtkhiak kik mateng, a maitang khuhna a hawkkhia hi. Amah hong pawtkhia a, ama' kianga thupiakte, Israel tate a hilh peuhmah chiangin, 35 Israel tate'n Mosi maitang taang a mu uhi. Tua bang ahih manin, Mosi in Tangtawn Toupa houpih dinga a lut kik mateng a maitang a khuh zel hi.

Pemkhiakna 35

Sabbath tawh kisai Dante

1 Tua khitin, Mosi in Israel mipite khempeuh a sam-khawm a: Tangtawn Toupa'n noute hon thupiak na zuih ding uh hiaite ahi: 2 Ni guk sung nna na sem ding uh a, ahihhangin, ni sagih ni nou adinga siangthou ahi ding ahi. Tangtawn Toupa' Sabbath tawlngakna ahi. Sabbath ni-a nna sem peuhmah thah ding 3 Sabbath ni-in na tenna ahi. ni-in na tenna sung khempeuh uah mei na chih ding uh ahi kei, a chi hi.

Biakbuk ading Thilpiakte

4 Tua khitin, Israel mipite khempeuh kiang ah: Tangtawn Toupa'n noute hon thupiak hiai ahi: 5 Tangtawn Toupa adingin na lak uah thilpiakte lakhawm un. Lungtanga utna nei peuhmah in Tangtawn Toupa adingin thilpiakte kham leh ngun leh sumsan, 6 khau dum, khau sandup leh khau sanau, ziza khau zangngat leh kelmul, 7 belamtal vun huan sante, saham vunte leh akasia sing, 8 meivaka det ding sathau, thaunilhna ading thil gah namtuite leh gim namtui hal ding leh, 9 oniks suangte, siampi puanakzem leh awmphaw ading suang manphate hon tawikhawm uhen.

Biakbuk ading Vante

10 Na lak ua khutsiamte khempeuh hong pai uh henla, Tangtawn Toupa'n bawl ding, chi-a hon thupiak khempeuh bawl uhen: 11 Biakbuk, a puanbuk, a tungkhuhna, a mekkilhte, a singpekte, a zawlte, a khuamte, leh a tunna khuakkuakte bawl uhen. 12 Singkuang leh a zawnna zawlte, a tungsin thoihdamna mun leh dantanna puanzak bawl uhen. 13 Dawhkan leh a zawnna zawlte leh, a vanzatte, Ompihna tanghou, 14 meivak sak ding meivak mung leh a vanzatte, meivakte leh meivak ading sathau bawl uhen. 15 Gimnamtui halna maitam, a zawnna zawlte, thaunilh ding sathau leh gimnamtui bawl uhen. Biakbuk kongpi puanzak bawl uhen. 16 Haltum thillat halna maitam, a sumsan len tawh, a zawnna zawlte leh vanzatte khempeuh leh tuikuang leh a tunna khete bawl uhen. 17 Huang umna puanzakte, a khuamte, a tunna khuakkuakte, huang kongpi puanzak, 18 biakbuk khetphimte, huang umna khetphimte leh a kaihna khaute bawl uhen. 19 Mun Siangthoua nasep nading puansilh, siampi-a panga nasepna ding Aron leh a tapate' puansilh siangthoute bawl uhen, a chi hi.

Biakbuk ading Thilpiakte Latna

20 Tua khitin, Israel mipi omkhawmte, Mosi kiang apan a paikhia uhi. 21 Tua khitin, a lungtang uh tawhthawha om peuhmah, lungtanga utna nei peuhmah hong pai uh a, Kihoupihna Puanbuk lam nading leh a sunga nasepna ding leh puansilh siangthoute bawl nading, Tangtawn Toupa kianga thilpiak hon tawi uhi. 22 Lungtanga utna nei numeite leh pasalte hong pai uh a, khama kibawl thil tuamtuam bilbahte, nakbahte, zungbuhte, awh leh but kizepnate hon tawi uh a, amaute khempeuh in Tangtawn Toupa' mai ah khama kibawl thilte hong laan uhi. 23 Khau dum, khau sandup, khau sanau, ahih kei leh ziza khau zangngat, kelmul leh belamtal vun huansan, saham vun nei michih in hon tawi uhi. 24 Thilpiak dinga ngun hiam, sumsan hiam, nei peuhmah in Tangtawn Toupa' maia thilpiak dingin hon tawi uhi. Akasia sing zat theih nei peuhmah in zong hon tawi uhi. 25 Numei khutsiam khempeuh in khutin khau a khek uh a, khau dum, khau sandup leh khau sanau leh ziza khau zangngat hon tawi uhi. 26 Lungtang tawhthawh numei khempeuh in kelmul a khek uhi. 27 Makaite'n oniks suang manphate leh siampi puanakzem leh awmphaw-a koih ding suang manphate hon tawi uh a, 28 gimnamtui hal ding sing gah namtui leh det ding meivak leh nilh sathaua zat ding leh gimnamtuia hel ding sathau hon tawi uhi. 29 Tangtawn Toupa'n Mosi' khut tungtawna thu a piak a, van bawl ding, a chih khempeuh bawl nadingin, Israel tate numei leh pasal khempeuh in amau utthu-a thilpiakte, Tangtawn Toupa' mai ah hon tawi uhi.

Pathian' Sap Khutsiamte

30 Tua khitin, Mosi in Israel tate kiang ah: En un, Tangtawn Toupa'n Judah nama Hur' tapa Uri' tapa Bezalel a minin a sam a, 31 Pathian' Kha leh theihsiamna leh theihna leh khutsiamna namkimin amah a luahdimsak hi. 32 Tua bel, khutsiamtaka bawl dingte, a zia gel siamna, kham leh ngun leh sumsana thilbawl siamna ahi a, 33 bulh ding suang manphate at siamna, singlam siamna leh khutsiam silbawl namkima siamna ahi. 34 Tua baan ah, amah leh Dan nama Ahisamak' tapa Aholiab zong midangte sinsak siamna a pia a, 35 amaute khempeuh khuakthawha silbawl siamna namkim leh, khau dum, khau sandup leh khau san-au, ziza khau zangngat gat zep siamna, gat siamna, ze tuamtuam gel siamna nei dingin amaute pilna a pia hi.

Pemkhiakna 36

1 Tua bangin, Bezalel leh Aholiab leh mun siangthou vanzatte bawl ding dan thei dinga Tangtawn Toupa'n pilna leh theihsiamna a piak khutsiamte'n, Tangtawn Toupa' thupiak bangin vanzatte a bawl ding uh ahi, a chi hi.

Mite'n a Kichingval Pia

2 Tua khitin, Mosi in Bezalel leh Aholiab leh Tangtawn Toupa'n pilna a piak, a lungtang uh a tawhthawh khutsiam peuhmah hong pai ding leh na sem dingin a sam hi. 3 Amaute'n, mun siangthou vanzat dingte bawl dinga Israel tate' thilpiakte, Mosi' khut apanin a sang uhi. Ahihhangin, Israel tate'n zingsang tengin, tua bang thilpiakte hon tawi lailai uhi. 4 Tua khitin, mun siangthou vanzatte bawl khutsiamte'n a nasep uh nusiain hong pai chiat uh a, 5 Mosi a houpih uh a: Tangtawn Toupa'n thil bawl dinga hon thupiak banga bawl nadinga mipite' hon tawite a kichingvalta, a chi uhi. 6 Tua khitin, Mosi in thu a pia a, amaute'n giahphual sung teng ah a phuangsuak uh a: Numei hiam, pasal hiam in mun siangthou ading thilpiak pe nawn kei hen, a chisak uh a, mipite'n thilpiak hon tawi nawn kei uhi. 7 Ahang bel, thil khempeuh bawl nadinga vanzat a neihte uh a kichingta a, a kichingval zawmah hi.

Biakbuk Lamna

8 Tua khitin, nasemte' laka khutsiamte'n biakbuk khuh nading khutsiamtakin a khui cherubte lim tuanna puanzak sawm, khau dum, khau sandup leh khau sanau khukin a bawl uhi. 9 Tua puanzakte a kikim chiat, tong 28-a sau, tong li-a za ahi. 10 Puanzak nga a buptuah uh a, nga dang zong a buptuah uhi. 11 Tua puanzak bup khata nawlnung gei ah khau dumin a bilte a bulh uh a, a bup dang khata nawlnung gei ah zong tua bangin a bilte a bulh uhi. 12 Puanzak khat ah a bil 50, a bup danga puanzak nawlnung ah a bil 50 mah, a bilte a kizawnin a bawl uhi. 13 Khamsikin mekkilh pin 50 a bawl uh a, tuatein tua puanzak bup nihte a buptuah uh a, a bulh uh a, biakbuk khat a suak hi. 14 Tua biakbuk tung khuh nadingin, kelmulin puanzak sawmlekhat a bawl uhi. 15 Puanzakte tong 30-a sau, tong li-a za hi chiat, puanzak sawmlekhatte kikim chiat ahi. 16 Puanzak nga a buptuah uh a, puanzak dang suk zong a tuamin a buptuah uhi. 17 Tua puanzak bup khata nawlnung gei ah a bil 50, a bup dang khata nawlnung gei ah zong a bil 50 mah a bawl uhi. 18 Tua puanzak bupte buptuaha bup khat suaksak dingin, sumsanin mekkilh pin 50 a bawl uhi. 19 Tua baan ah, biakbuk tung khuhsawn nadingin, belamtal vun huansan puanzakte a bawl uh a, tua tung khuhsawn nadingin saham vun puanzakte a bawl lai uhi. 20 Biakbuk ading akasia singin singpek tun dingte a bawl uh a, 21 singpekte tong sawm-a sau, tong khat leh a kima za ahi chiat hi. 22 Singpek khat zel ah atun nading a mongdawk nih chiat a kizawnin a bawl uh a, hibangin singpek 20 a bawl uhi. 23 Biakbuk simlam pang adingin, singpek 20 a bawl uh a, 24 tua singpek 20-te tun nading ngun khuakkuak 40 a bawl uh a, singpek khat nuaia a monglawk nihte tun nading khuakkuak nih zel, tua bangin singpek dang teng ading khuakkuak nihnih a bawl uhi. 25 Biakbuk pang langkhat, a mallam pang ading, singpek 20 mah, 26 tua baan ah, tuate tun nading ngun khuakkuak 40, singpek khat nuaia khuakkuak nihnih a bawl uhi. 27 Biakbuk tumlam, a phaitam mong ading singpek guk a bawl uh a, 28 biakbuk phaitam kiu nih ading singpek nih a bawl uhi. 29 Tua singpekte a taw apan a dawn dong kithuap dingin sikkualin a gakkhawm uh a, a kiu nih tuak tua bangin a bawl uhi. 30 Tua bangin, singpek giat leh a tunna ngun khuakkuak 16, singpek khat ading khuakkuak nih zel a om hi. 31 Singpek khil nading akasia singzawlte a bawl uh a, biakbuk pang khata zawl nga, 32 apang langkhat ading zawl nga mah, leh tumlam pang, a phaitam lam ading zawl nga mah a bawl uhi. 33 Tua baan ah, a sung vuh, a laizang, mong khat apan mong khat dong khil paisuak nading zawl laita a bawl uhi. 34 Tua singpekte kham sik pekin a tuam uh a, a zawlte khum nading khamsik bilte a bawl uh a, a zawlte zong kham sikpekin a tuam uhi. 35 Khau dum, khau sandup leh khau sanau khuk leh ziza khau zangngat khuk kigan a tunga khutsiamte khui cherub tawh dantanna puanzak a bawl uhi. 36 Dantanna puanzak zak nading akasia khuam li, kham sikpeka tuam leh a khai nading kham sikkawite tawh a bawl uhi. Tua khuamte tun nading ngun khuakkuak sun thawh zong a bawl uhi. 37 Biakbuk kongkhaka puankhai ding khat, khau dum, khau sandup leh khau sanau a khuk ziza khau zangngat gat khutsiamtaka zep a bawl uh a, 38 a khuam 5-te, puanzak khai nading sikkawite tawh a bawl uhi. Tua khuam lukhu leh a sikkawite kham sikpekin a tuam uh a, a tunna khuakkuakte bel sumsanin a bawl uhi.

Pemkhiakna 37

Theihpihna Singkuang Bawlna

1 Tua khitin, Bezalel in akasia singin Theihpihna singkuang a bawl a, a dunglam tong nih leh a kima sau, a vailam tong khat leh a kima za, a sanlam tong khat leh a kim a bawl hi. 2 Kham siksiang pekin a sung leh pua a tuam a, a gei kimvel ah kham geivel a bawl suak hi. 3 Kham sikbil li a sung a, tua singkuang khe li ah, pang khat ah nih, pang langkhat ah nih, a bulh hi. 4 Akasia singin zawlte a bawl a, kham sik pekin a tuam hi. 5 Tua zawlte, singkuang panga sikbilte ah a zawn nadingin a khum hi. 6 Ama'n kham siangin khelhna khuhna sin zong a bawl hi. A dunglam tong nih leh a kima sau, a vailam tong khat leh a kima za ahi. 7 Kham sekthawhin cherub nih a bawl a, khelhna thoihna sin mong tuak ah, tua tawh kizoma sakhatin a bawl hi. 8 Cherub khat a mong khat ah, cherub dang, mong langkhat ah, thoihdamna mun tawh kizom sakhatin a bawl hi. 9 Tua cherubte, khelhna khuhna sin khazak khumin, a maitang uh thoihdamna mun lam ngasuka kimaituahin a om uhi.

Pathian Ompihna Tanghou Koihna Dawhkan

10 Ama'n akasia singin dawhkan khat a bawl a, a dunglam tong nih-a sau, a vailam tong khata za, a sanlam tong khat leh a kima sang ahi. 11 Tua dawhkan kham sik pekin a tuam a, kham sikin geivel a bawlsuak hi. 12 Tua baan ah, a gei kimvel ah khutpek chia geivel kisuangsawn a bawl a, tua ah zong khamin a geivel a bawlsuak lai hi. 13 Khamin sikbilte a sung a, dawhkan khe li omna kiu lite ah, a bulh uhi, 14 ahihhangin a geivel nehin a bulh a, tuate dawhkan zawn nading zawlte khumna ahi. 15 Tua dawhkan zawn nadingin, akasia zawlte a bawl uh a, kham sikpekin a tuam hi. 16 Tua dawhkana zat tuium belsuan, kuangte, noute, belkuangte leh dawn thillat sunna bel gonggek khamin a bawl uhi.

Kham Meivak Mung

17 Kham siangin sekthawhin meivak mung zong a bawl hi. A mungpi, a kahiangte, a noute, a nun bulbawkte leh a pakte a kizoma sakhatin a bawl hi. 18 Meivak mungpi kahiang guk a kakhia a, a pang tuak ah thum tuak a kakhia hi. 19 Kahiang khat ah, almon pak bang leh nun bilbawk bang nou thum a om a, tua bangin kahiang dangte ah zong a om a, a mungpi apan kakhia kahiang gukte ah tua bangin a om vek hi. 20 A mungpi pen ah nou li almon pak banga bawl, paknun bulbawk leh pakpalh kithuah a om hi. 21 Kahiang kop khatna kikatna nuai takah a paknun bulbawk khat a om a, kahiang kop nihna kikatna nuai tak ah a paknun bulbawk khat mah a om a, kahiang kop thumna kikatna nuai tak ah paknun bulbawk khat mah a om hi. Kahiang gukte a mungpi apan a kakhia uhi. 22 A paknun bulbawkte leh kahiangte sakhata kizoma kibawl, kham sik siang sekthawha kibawl ahi. 23 Tua baan ah, meivak sagih, meivu siaknate leh meivu kholnate, khamsik siangin a bawl hi. 24 Tua meivak mung leh a vanzatte khempeuh bawl nadingin khamsik siang talen khat a zang hi.

Gimnamtui Halna Maitam

25 Ama'n akasia singin gimnamtui halna maitam a bawl a, a dunglam tong khata sau, a vailam tong khata za, a dung a vai kikim, a sanlam tong niha sang ahi a, a kite tawh kizoma sakhata kibawl ahi, 26 Kham sik siang pekin maitam tung, a pangte leh a kite a tuamvek hi. Khamsik mahin a kimvelin a geivel a bawlsuak hi. 27 A pang nih-a a kizawnin, a kiu nihte ah, a geivel nuai ah, kham sikbil nih nih a bawl a, tuate gimnamtui halna maitam zawnna zawlte kikhumna ahi. 28 Akasia singin tua zawlte a bawl a, kham sikpekin a tuam hi.

Nilh Sathau leh Gimnamtui

29 Ama'n nilh sathau siangthou a bawl a, gimnamtui siangthou leh namtui mahmah a bawl a, gimnamtui bawlsiamte bawl bangbangin a bawl hi.

Pemkhiakna 38

Haltum Thillatna Maitam

1 Ama'n akasia singin, haltum thillatna maitam a bawl a, a dunglam tong nga-a sau, a vailam tong nga-a za, a dung a vai kikim, a sanlam tong thum ahi. 2 A kiu lite ah a kite a bawl a, tua a kite leh a maitam kizomin sakhat ahi. Tua maitam bel sumsan sikpekin a tuam hi. 3 Ama'n tua maitama tuium belsuan khempeuh, suahdulte, sisan thehna keupite, sikkhutte leh meiluah kuangte sumsanin a bawl hi. 4 Maitam adingin meichihna sumsan len a bawl a, a gei nuai, a taw apan a kimchiang ah a koih hi. 5 Tua meichihna sumsan len kiu lite ading, a zawlte khum nadingin, sunthawh sumsan sikbil li a bawl hi. 6 Akasia singin zawnna zawlte a bawl a, sumsan pekin a tuam hi. 7 Tua zawlte bel, maitam panga sikbiltea khuma a zawnna ahi. Singpekin a sung hawmin tua maitam a bawl hi.

Sumsan Tuikuang

8 Kihoupihna Puanbuk kongkhaka nasem numeite' sumsan limlangte apanin sumsan tuikuang leh a tunna sumsan khete a bawl hi.

Biakbuk Huang

9 Tua baan ah, ama'n biakbuk huang a bawl hi. A simlam pang tong 100-a sau ahi a, huang umna puanzakte bel ziza khau zangngat khuk kigan ahi. 10 Tua huang umna puanzak adingin khuam 20 leh a tunna sumsan 20 a om a, khuama puanzak khaina sikkawite leh a khuam hennate nguna kibawl ahi. 11 A mallam pang huang tong 100-a sau ahi a, puanzak khaina khuam 20 leh a tunna sumsan 20 a om hi. Khuama puanzak khaina sikkawite leh khuam hennate nguna kibawl ahi. 12 Tumlam pang huang tong 50-a za ahi a, puanzak khaina khuam sawm leh a tunna sawm a om hi, Khuama puanzak khaina sikkawite leh khuam hennate nguna kibawl ahi. 13 Suahlam pang huang tong 50-a za ahi. 14 Huangsung lutna kong vang pang khat puanzak khaite tong sawmlenga-a sau ahi a, khuam thum leh a tunna thum a om hi. 15 Kongvang pang lang khat ah tua bang mahin puanzak khaite tong sawmlenga a sau ahi a, khuam thum leh a tunna thum a om hi. 16 Huang kimvela a umna puanzak khaite khempeuh gat thawh puanmalngat ahi. 17 Khuam tunnate sumsan ahi a, khuama puanzak khaina sikkawite leh khuam hennate nguna bawl ahi a, khuam lukhute ngun sikpeka tuam ahi. Tua huang umna khuam hennate zong nguna bawl ahi. 18 Huangsung lutna kelkong puanzak pen khau dum, khau sandup, khau sanau leh ziza khau zangngat khuk kigan ahi a, khutsiamtaka zep ahi. A kongvang puanzak tong 20-a sau ahi a, a sanlam, huang umna puanzak khaite bangin tong nga ahi. 19 Tua baan ah, khuam li leh a tunna sumsan li a om a, a sikbilte leh a hennate ngun ahi a, khuam lukhute ngun sikpeka tuam ahi. 20 Biakbuk kaihna khetphimte leh a huang kaihna khetphimte khempeuh sumsan ahi.

Biakbuk Lamna Vanzatte

21 Biakbuk, tua Theihpihna puanbuk lamna-a vanzatte tam dan hibang ahi. Levite kama Mosi thupiak, siampi Aron' tapa Ithamar makaihna nuaia kichiamteh ahi. 22 Tangtawn Toupa'n bawl ding chi-a Mosi kianga a thupiakte khempeuh, Judah nama Hur' tapa Uri' tapa Bezalel in a bawl hi. 23 Amah tawh semkhawm Dan nama Ahisamak' tapa Aholiab ahi a, amah a khuak lam siam leh thil pian ding dan a zia gelsiam, khau dum leh sandup leh a sanau leh ziza khau zangngat gan siam ahi. 24 Mun siangthou lam nadinga kizang kham thilpiakte talen 29 leh mun siangthou shekel bukna dana shekel 730 ahi. 25 Kisimpina-a kisim mipite lak apan kingah, ngun ahih leh talen 100 leh mun siangthou shekel bukna dana shekel 1,775 ahi. 26 Kisimpina-a kisim, kum 20 chiang tunglam pasal khat zela kila beka khat ahi. Beka khat bel mun siangthou shekel bukna dana shekel kim khat ahi. Pasal 603,550 apan kila ahi. 27 Ngun talen 100 apanin biakbuk khuam tunna khuakkuakte leh dantanna puanzak tunnate sunthawh ahi a, a vekin talen 100-in khuakkuak 100 a kisung a, talen khat zelin khuakkuak khat a bawl hi. 28 Tua ban ah, ngun shekel 1,775 apanin khuama vankhai sikkawite, khuamlukhu tuamna leh gaknate a kibawl hi. 29 Sumsan thilpiakte talen 70 leh shekel 2,400 ahi. 30 Tua apanin, Kihoupihna Puanbuk kongpi khuam tunnate, sumsan maitam leh tua ading sumsan len leh tua maitam tuium belsuante khempeuh a kibawl hi. 31 A kimkot huang umna khuam tunnate, huang kongpi khuam tunnate, biakbuk kaihna khetphimte leh a huang umna kaihna khetphimte khempeuh sumsana kibawl ahi.

Pemkhiakna 39

Siampi Puansilhte

1 Khau dum leh khau sandup leh a san-au kiganin mun siangthoua nasep nading siampi puansilhte a bawl uh a, Aron' puansilh siangthoute a bawl uhi. Tangtawn Toupa'n Mosi thu a piak banga kibawl ahi.

Siampi' Puannakzem

2 Kham khau leh khau dum, khau sandup leh khau sanau leh, ziza khau zangngat a khuka kigan siampi puanakzem a bawl uhi. 3 Tua khamsik pachikin a sek uh a, zang ngat chikchikin a phelkhap uh a, tua khaudum, khau sandup leh khau sanau leh ziza khau zangngat kigan ah, khutsiamtakin, a zem uhi. 4 A nunglam leh malam tawh kaih-khawm nading, a liangzang ah a kaihna a bawl uh a, a tunglam gei tuak a khihkhawm uhi. 5 Siamneltaka gat, siampi puanakzem tunga puanduang kawnggak zong kham khau leh khau dum leh khau sandup leh khau sanau leh ziza khau zangngat khuka kigan a bawl uhi. Tangtawn Toupa'n Mosi thu a piak banga kibawl ahi. 6 Oniks suangte, a phum nadinga kibawl kham kuakte ah a bulh uhi. Tuate tung ah suai namna zungbuh khuak banga khuakin Israel tapate' minte a gelh uhi. 7 Bezalel in tuate siampi puanakzem liangzang ah a khih a, Tangtawn Toupa'n Mosi thu a piak bangin, Israel' tapate theih gigena ahi uhi.

Siampi Awmphaw

8 Amaute'n siampi puanakzem bangin, khutsiamte'n siamneltaka bawl awmphaw a bawl uh a, kham khau leh khau dum leh khau sandup leh khau san-au leh ziza khau zangngat a khuka kigan a bawl uhi. 9 Tua awmphaw bel, a khepa a dung a vai kikimin a bawl uh a, a khepin khutpek chia ahi. 10 Tua tung ah vual li-in suangmanphate a koih uh a, vual khatna ah rubi suang, topaz suang leh beril suang a koih uhi. 11 A vual nihna ah sardi suang, safaiar suang leh daimon suang a koih hi, 12 A vual thumna ah, zasin suang, ageit suang leh amethi suang a koih uhi. 13 A vual lina ah, khrusolait suang, oniks suang leh jaspar suang a koih uhi. 14 Israel tapate' min zah banga suang sawmlenih kikoih ahi a, suai namna zungbuh khuak banga khuaka, Israel nam sawmlenih, suang khat tunga min khat chiat, kigelh ahi. 15 Tua awmphaw adingin, kham siang khainiang phek bangbang, khainiangte a bawl uhi. 16 Kham kuak nih leh kham sikbil nih a bawl uh a, tua sikbilte, awmphaw tunglam kiu nih ah a bulh uhi. 17 Tua awmphaw tunglam kiute-a om sikbilte ah tua khainiang phek nihte a khum uhi. 18 Khainiang phek mong nihte, tua kham kuak nihte ah a khih uh a, siampi puanakzema liang-kaihna ah, a anglam pang ah a koih uhi. 19 Tua baan ah, kham sikbil nih dang a bawl uh a, awmphaw nuailam kiu nih dang ah a sunglam, siampi puanakzem tawh kisukha lam ah a bulh hi. 20 Tua baan ah kham sikbil nih dang mah a bawl uh a, liangkaihna khaute tung ah, a anglam ah, siampi puanakzem nuai ah, puanakzem kawnggak hoihtaka kigan tawh a kimatna tak ah a bulh uhi. 21 Awmphaw-a sikbilte leh siampi puanakzema sikbilte, khau dumin a khihkhawm uh a, siampi puanakzem kawnggak hoihtaka kigan tung tak ah a om a, siampi puanakzem apan awmphaw a kiveikhiak louh nading ahi. Tangtawn Toupa'n Mosi thu a piak banga kibawl ahi.

Siampi Puansilh Dangte

22 Bezalel in siampi puanaktual, a veka dum suaka kigan a bawl hi. 23 Tua puanaktual laizang ah a ngawngvang, a keklouh nadinga a ngawngpehna nei, a bawl hi. 24 Tua puanaktual mong ah khaudum leh khau sandup leh khau sanau khukin mimthei gahte a bawl hi. 25 Kham sik siangin longte a bawl uh a, tua puanaktual monga mimthei gahte kal ah, a koih uh a, 26 long khat leh mimthei khat kikalhelhin, puanaktual mong ah a om suak hi. Tangtawn Toupa'n Mosi thu a piak banga, siampi nasep chianga silh ding puanaktual kibawl ahi. 27 Aron leh a tapate adingin, puanmalngat siamneltaka kiganin, puanaktual tungsilhte a bawl uhi. 28 Puan malngat dialkhipte, puan malngat lugakna dialte, puanmalngat pheituam tomte zong a bawl uhi. 29 Tua lugakna dialte bel khaudum, khau sandup leh khau sanau leh ziza khau zangngat a khuka kigan puan malngata kibawl, kilawmtaka zep ahi. Tangtawn Toupa'n Mosi thu a piak banga kibawl ahi. 30 Khamsik siang pekin siampi-lukhu siangthou a bawl uh a, suainamna zungbuh khuak bangin khuakthawhin: SIANGTHOUNA Tangtawn TOUPA-A AHI chiin a gelh uhi. 31 Tua kham sik pek ah khaudum a khih uh a, tuain dialkhip tung ah tua siampilukhu a henbelh uhi. Tangtawn Toupa'n Mosi thu a piak banga a bawl uh ahi.

Mosi in Biakbuk Vel

32 Tua bangin, Kihoupihna Puanbuk bawlna khempeuh zawh ahita a, Tangtawn Toupa'n Mosi thu a piak bangin, Israel tate'n bangkim a bawl vek uh a, a zousiangta uhi. 33 Amaute'n tua biakbuk, Mosi' mai ah hon pua uh a, a puanbuk leh a vanzatte khempeuh, mekkilhte, singpekte, zawlte, khuamte, a tunnate, 34 a tungkhuhna belamtal vun huansante, a tungkhuhna saham vunte, a tungkhuhna puanzak, 35 Theihpihna singkuang leh a zawnna zawlte leh thoihdamna mun, 36 dawhkan leh a vanzatte, Pathian Ompihna tanghou, 37 kham siang meivak mung leh meivakte tawh lep ding bangtaka kilemsa, a vanzat khempeuhte leh a det sathau, 38 kham maitam, nilh sathau, gimnamtui, biakbuk kongkhak puanzak, 39 sumsan maitam leh a sumsan len, a zawnna zawlte, a vanzat tuium belsuante khempeuh, tuikuang leh a tunna khete, 40 huang umna puanzakte, a khuamte leh a tunnate, huang umna puanzak, a khaute, a sik khetphimte, biakbuk, tua Kihoupihna Puanbuk sung nasep nading vanzatte khempeuh, 41 mun siangthoua zat ding siampi nasepna puansilhte, siampi Aron' puansilh siangthoute leh a tapate' siampi nasepna puansilh gat thawhte tawh, a vekin hon pua uhi. 42 Tangtawn Toupa'n Mosi thu a piak bangbangin, Israel tate'n na khempeuh a semkhinta uhi. 43 Tua khitin, Mosi in na khempeuh a vel a, Tangtawn Toupa' thupiak bangbangin a semkhin taktak uh, chih a mu hi. Tua khitin, Mosi in amaute a vualzawl hi.

Pemkhiakna 40

Biakbuk Tunkhiakna

1 Tua teng khitin, Tangtawn Toupa'n Mosi a houpih a: 2 Kha khatna, ni masapen ni-in, biakbuk, tua Kihoupihna Puanbuk na tungkhe ding ahi. 3 A sung ah Theihpihna singkuang na koih ding a, dantanna puanzakin tua singkuang na deidan ding ahi. 4 Dawhkan na lalut ding a, a tung ah bangkim a kilep ding bangtakin na lem ding ahi. Meivak mung na lalut ding a, meivakte na tung ding ahi. 5 Theihpihna singkuang mai ah, gimnamtui halna kham maitam na koih ding a, biakbuk kongkhak puanzak na khai ding ahi. 6 Tua khit chiangin, biakbuk, tua Kihoupihna Puanbuk kongkhak mai ah, haltum thillatna maitam na tung ding ahi. 7 Kihoupihna Puanbuk leh tua maitam kal ah, tuikuang na koih ding a, a sung ah tui na sung ding ahi. 8 A kimkotin huang na um ding a, huang sung lutna kelkong ah puanzak na khai ding ahi. 9 Tua khit chiangin, nilh sathau na la ding a, biakbuk leh a sunga om thil bangkim thau na nilh ding a, tua biakbuk siangthoua sehtuamna na bawl ding ahi. 10 Haltum thillatna maitam leh a vanzat tuium belsuante khempeuh nilh sathau na nilh ding a, siangthoua sehtuamna na bawl ding ahi. Tua bangin, maitam siangthou a suak ding hi. 11 Tuikuang leh a tunna khete nilh sathau nilhin, siangthoua sehtuamna na bawl ding ahi. 12 Tua khit chiangin, Aron leh a tapate, Kihoupihna Puanbuk kongkhak ah na paipih ding a, tuiin amaute na sil ding ahi. 13 Puansilh siangthoute Aron na silhsak ding a, nilh sathau amah na nilh ding a, siangthoua sehtuamna na bawl ding a, tua bangin, siampi-a pangin ka nna a sem ding ahi. 14 Aron' tapate na paipih ding a, puansilh siangthoute na silhsak ding ahi. 15 A pa uh nilh sathau na nilh bangin, amaute zong nilh sathau na nilh ding a, kei adingin siampite ahi ding uh a, ka nna a sem ding uhi. Ahang bel, nilh sathau nilh a tanna uh khangsawn sawna siampi hihdenna ahi ding ahi, a chi hi. 16 Tua bangin, Mosi in a hih a, Tangtawn Toupa'n thu a piak khempeuh a hih vek hi. 17 Tua bangin, a kum nihna, a kha khatna, a ni masapen ni-in, Mosi in biakbuk a tungkhia hi. 18 Mosi in biakbuk a tungkhia a, a khuakkuakte a omna ding munte ah a koih a, singpekte a tung a, a zawlte a khum a, a khuamte a phut hi. 19 Tua khitin, biakbuk tung ah puanzak a zak a, tua tung ah biakbuk tung khuhsawnna a khuh a, Tangtawn Toupa'n thu a piak bangbangin a hih hi. 20 Mosi in Theihpihna suangpekte a la a, singkuang sung ah a koih hi. A zawnna zawlte tua sikbilte ah a khum a, singkuang tung ah a sin, thoihdamna mun a koih hi. 21 Tua singkuang biakbuk sung ah a lalut a, dantanna puanzak a khai a, Tangtawn Toupa' thupiak bangin Theihpihna singkuang a deidan hi. 22 Mosi in Kihoupihna Puanbuk sung ah, a mallam pang ah, dantanna puanzak pua ah, dawhkan a koih a, 23 Tangtawn Toupa' thupiak bangin tua dawhkan tung ah, Tangtawn Toupa' mai ah, tua tanghoute a vualin a koih hi. 24 Kihoupihna Puanbuk sung ah, dawhkan zawn ah, a simlam pang ah, meivak mung a tung a, 25 Tangtawn Toupa'n Mosi thu a piak bangin, Tangtawn Toupa' mai ah meivakte a de hi. 26 Kihoupihna Puanbuk sung ah, dantanna puanzak mai ah, kham maitam a koih a, 27 Tangtawn Toupa'n Mosi thu a piak bangin, gimnamtui a hal hi. 28 Tua khitin, biakbuk kongkhak ah puanzak a khai hi. 29 Kihoupihna Puanbuk kongkhak mai ah, haltum thillat maitam a koih a, tua tung ah, Tangtawn Toupa'n Mosi thu a piak bangin, haltum thillat leh anvui nei thillat a lan hi. 30 Kihoupihna Puanbuk leh maitam kal ah tuikuang a koih a, a sung ah kisil nading tui a sung a, 31 tua tui ah Mosi leh Aron leh a tapate'n khut leh khe a sil uhi. 32 Amaute Kihoupihna Puanbuka va-hawh leh maitam vanaiha a lut ding chiangun, Tangtawn Toupa'n Mosi thu a piak bangin, a kisil uhi. 33 Tua khitin, biakbuk leh maitam kimkot ah, huang a bawl a, huangsung lutna kelkong puanzak a khai hi. Tua bangin, Mosi in tua nasep a semkhinta hi.

Pathian' Thupina

34 Tua khitin, meipi in Kihoupihna Puanbuk a khuh a, Tangtawn Toupa' thupina in biakbuk a luahdimsak a, 35 Kihoupihna Puanbuk tung ah meipi a om hi. Tua banga Tangtawn Toupa' thupina in biakbuk sung a luahdimsak manin, biakbuk sung ah Mosi a lut thei kei hi. 36 Biakbuk tung apan tua meipi a tungkah chiangin, Israel tate a khualzinna uah maban a sawn uhi. 37 Meipi a tungkah louh chiangin, a tungkahni a tun mateng khualzin louin a om uhi. 38 Amaute' khualzin sung khempeuh, Israel mipite khempeuh' mitmuhin, sun chiangin Tangtawn Toupa' meipi biakbuk tung ah a om a, zan chiangin meikuang a om hi.

Siampilaibu 1

Haltum Thillat

1 Tangtawn Toupa'n Mosi a sam a, Kihoupihna Puanbuk apan amah a houpih a: 2 Israelte kiang ah thu gen inla: Na lak ua kuapeuh in Tangtawn Toupa maia thillat hon tawi chiangin, tua thillat dingin bawnghon laka hiam, belam leh kelhon lak apan hiam ganta hon tawi ding ahi. 3 Tua thillat pen bawnghon lak apan haltum thillat a hih leh, a pa genbaanglou a lan ding ahi. Tua Kihoupihna Puanbuk lutna ah a lan ding ahi, tuachi-in Tangtawn Toupa' san theih ahi ding. 4 Thillanpa in tua haltum thillat ganta lutung ah a khut a nga ding ahi, tuachi-in, ama' adinga khelhna khuhna bawl nadingin, ama' sik leh tangin a kisang ding hi. 5 Ama'n Tangtawn Toupa' mai ah tua bawngtaltuai a gou ding ahi. Aron' tapa siampite'n a sisan hon tawiin, tua Kihoupihna Puanbuk lutna a maitam pangte a theh ding uh ahi. 6 Ama'n tua haltum thillat ganta a vunhawk ding a, a sa a sem ding ahi. 7 Aron' tapa siampite'n maitam tung ah mei a tawh ding uh a, tua mei tung ah sing a lem ding uh ahi. 8 Tua khit chiangin, Aron' tapa siampite'n tua sa semnente a lu leh a thau tawh maitam tunga meia kuang sing tung ah a lem ding uh ahi. 9 Ama'n a sungkua teng leh a khete tuiin a sawpsiang ding a, siampi in tuate a vekpi-in maitam tung ah a haltum ding hi. Haltum thillat, meia hal thillat, Tangtawn Toupa' lungkimna gim namtui ahi. 10 Tua thillat pen belam leh kelhon lak apan belam hi-in kei hita leh, haltum thillat ahih leh, a pa genbaanglou ahi ding ahi. 11 A laanpa'n Tangtawn Toupa' mai ah, maitam mallam pang ah tua ganta a gou ding ahi. Aron' tapa siampite'n maitam pang kimkot tua sisanin a theh ding uh ahi. 12 Ama'n a sa a semnen ding a, siampi in tuate, a lu leh a thau tawh, maitam tunga meia kuang sing tung ah a lem ding ahi. 13 A sungkua teng leh a khete tuiin a sawpsiang ding a, siampi in a vekpi-in, maitam tung ah a haltum ding ahi. Haltum thillat, meia hal thillat, Tangtawn Toupa' lungkimna gim namtui ahi. 14 Tangtawn Toupa' maia thillat pen vasa haltum thillat a hih leh, vakhu hiam, kawlvakhu nou hiam a lan ding ahi. 15 Siampi in tua vasa maitam ah hon tawi ding a, a lu a hektankhe ding a, maitam tung ah a haltum ding ahi. A sisan bel maitam pang ah a kaikangsak ding ahi. 16 A gongkholh bel, a sunga om teng tawh, maitam suahlam panga vut buakna ah a pai ding ahi. 7 Tua vasa a kha tuak laikhe siang louin, a laiphel ding a, siampi in maitam tunga meia kuang sing tung ah a haltum ding ahi. Haltum thillat, meia hal thillat, Tangtawn Toupa' lungkimna gim namtui ahi.

Siampilaibu 2

An thillat

1 Mi khat peuh in Tangtawn Toupa' maia an thillat hon tawi chiang in, a thillat pen anvui nei dimdem ahi ding ahi. Sathau a buak ding a, a tung ah gim namtui a koih ding a, 2 Aron' tapa siampite kiang ah hon tawi ding ahi. Siampi in tua anvui nei leh sathau kihel leh gim namtui teng tawh, khutdim khat a pham ding a, maitam tung ah theihgigena hi dingin a haltum ding ahi. Hiai meia thillat Tangtawn Toupa' lungkimna gim namtui ahi. 3 Tua an thillat vai teng Aron leh a tapate' tan ding ahi. Hiai bel, Tangtawn Toupa' maia meia thillat apan sehkhiak siangthoupen ahi. 4 An thillat, thukkhuka em non tawi leh, anvui nei dimdem apan silngou sawh louh, sathau tawh kihel, a beua bawl ahi ding ahi. Ahih kei leh, a peineu silngou sawh louh sathaua zut ahi ding ahi. 5 Na an thillat pen belsunga kan ahih leh, anvui nei dimdem, sathau tawh kihel, silngou sawhlouh ahi ding ahi. 6 Balnen inla sathau buak in An thillat ahi. 7 Na an thillat pen bela kihuan ahih leh, anvui nei dimdem, sathau tawh kihel ahi ding ahi. 8 Hibanga kibawl an thillat, Tangtawn Toupa' mai ah hon tawi inla, siampi khut ah pia in. Ama'n maitam ah a tawi ding ahi. 9 Ama'n tua an thillat apan theihgigena sehkhiak a lakhe ding a, maitam tung ah, meia thillatin a haltum ding ahi. Tua bel, Tangtawn Toupa' lungkimna gim namtui ahi. 10 Tua an thillat vai teng bel Aron leh a tapate tan ding ahi. Tangtawn Toupa' maia meia thillat apan sehkhiak siangthoupen ahi. 11 Tangtawn Toupa' maia an thillat non tawi peuhmah, silngou sawh louh ahi ding ahi. Ahang bel, Tangtawn Toupa' maia meia thillat peuhmah ah silngou hiam, khuaizu hiam hel ding ahi kei hi. 12 Tuate, Tangtawn Toupa' mai ah gahmasa thillatin non tawi thei, ahihhangin, gim namtui hi dinga maitam tunga hal ding ahi kei hi. 13 Na an thillatte bel, chi na sawh vek ding ahi. Na an thillat apan na Pathian thukhun' chi na pawsiah ding ahi kei. Na thillatte chi sawh in. 14 Tangtawn Toupa' maia an thillat, gahmasa thillata non tawi leh, a tangte sukpek, meia haimin hiam, ahih kei leh aminsa hiama na hon tawi ding ahi. 15 Tuate tung ah sathau leh gim namtui zong koih in, an thillat ahi, 16 Siampi in tua buhtang sukpek lak apan theihgigena sehkhiak, sathau leh gim namtui tawh, a lakhe ding a, Tangtawn Toupa' mai ah meia thillatin a lan ding ahi.

Siampilaibu 3

Lemna Thillat

1 Mi khat peuh' thillat pen, lemna thillat ahih a, bawnghon lak apan ganta khat, a pa hi-in, a nu hiam hita leh, Tangtawn Toupa' mai ah ganta genbaanglou a lan ding ahi. 2 Ama'n a ganta lu tung ah a khut a nga ding a, Kihoupihna Puanbuk lutna ah a gou ding ahi. Tua khit chiangin, Aron' tapa siampite'n a sisanin maitam pang a kimkotin a theh ding uh ahi. 3 Tua lemna thillat apan Tangtawn Toupa' maia meia thillat ding a hon tawi ding ahi, Tua dingin, a sungthau teng, a hih kei leh, tuate tawh kizom teng, 4 a kailing nihte leh a phuka tuate tuam a thaute leh a sin tuam teng, a kailing tawh lakkhiak khawm teng ahi ding ahi. 5 Tua khit chiangin, Aron' tapate'n maitam tunga meia kuang sing tung ah a haltum ding uh ahi. Hiai meia thillat ahi a, Tangtawn Toupa' lungkimna gim namtui ahi. 6 Belam leh kelhon lak apan ganta, Tangtawn Toupa' maia lemna thillat ding a lat leh, a pa hiam, a nu hiam, genbaanglou ahi ding ahi. 7 Belamnou a lat leh, Tangtawn Toupa' maia tawi ding ahi. 8 Ama'n a ganta' lutung ah a khut a nga ding a, Kihoupihna Puanbuk mai ah a gou ding ahi. Tua khit chiangin, Aron' tapate'n a sisanin maitam pang teng, a kimkotin a theh ding uh ahi. 9 Tua lemna thillat apan Tangtawn Toupa' maia meia thillat ding a hon tawi ding ahi. Tua dingin, a thau, a ngum guh apan atkhiak a mei tuam teng, a sungthau teng, ahih kei leh, tuate tawh kizom teng, 10 a kailing nihte leh a phuk sunga tuate tuam a thaute leh a sin tuam teng, a kailingte tawh lakkhiak khawm teng ahi ding ahi. 11 Siampi in tuate maitam tung ah an thillatin a haltum ding ahi. Hiai Tangtawn Toupa' maia thillat ahi. 12 Tua thillat pen kei a hih leh, Tangtawn Toupa' maia hon tawi ding ahi. 13 Tua ganta lu tung ah a khut a nga ding a, Kihoupihna Puanbuk mai ah a gou ding ahi. Tua khit chiangin, Aron' tapate'n a sisanin maitam kimkot ah a theh ding uh ahi. 14 Tua thillat apan Tangtawn Toupa' maia meia thillat ding a lakhe ding ahi. Tua dingin, a sungthau teng, ahih kei leh tuate tawh kizom teng, 15 a kailing nihte leh a phuk sunga tuate tuam a thaute leh a sin tuam teng, a kailingte tawh lakkhiak khawm teng ahi ding ahi. 16 Siampi in tuate maitam tung ah an thillatin a haltum ding ahi. Hiai Tangtawn Toupa' lungkimna gim namtui ahi. A thau khempeuh Tangtawn Toupa a ahi. 17 Hiai na tenna peuh ua, khangsawn sawn adinga omden ding thuseh ahi. A thau hiam, sisan himhim hiam na ne ding uh ahi kei hi, chi in, a chi hi.

Siampilaibu 4

Khelhna Thillat

1 Tangtawn Toupa'n Mosi a houpih a: 2 Israelte kiang ah thu gen inla: Mi khat peuh, tup mawng hilou a, a khelh khak a, Tangtawn Toupa' thupiakte khat peuh in a kham thil khat peuh a hih khak chiangin 3 Thaunilhsa siampi in a khelh a, mipite tunga tua khelhna a tut leh, a khelhna thillat dingin bawngtaltuai genbaanglou khat, Tangtawn Toupa' maia hon tawi ding ahi. 4 Kihoupihna Puanbuk lutna ah tua bawngtaltuai hon keng ding ahi. Tua ganta lutung ah a khut a nga ding a, Tangtawn Toupa' mai ah a gou ding ahi. 5 Tua khit chiangin, thaunilhsa siampi in tua bawngtal sisan bangzah hiam a la ding a, Kihoupihna Puanbuk sung ah a tawi lut ding ahi. 6 A khut zung sisan ah a diah ding a, tua mun siangthou puanzak mai ah, Tangtawn Toupa' mai ah sagihvei a theh ding ahi. 7 Tua baan ah, tua siampi in sisan bangzah hiamin Kihoupihna Puanbuk sunga Tangtawn Toupa' maia om gim namtui halna maitam kite ah a tat ding ahi. Bawngtaltuai sisan om lai teng bel, Kihoupihna Puanbuk lutna-a haltumna maitam bul ah a sungbaw ding ahi. 8 Ama'n khelhna thillat bawngtal apan a thau teng a sungthau, ahih kei leh, tuate tawh kizom teng, 9 a kailing nihte leh a tuam a thaute leh a sin tuamte, a kailingte tawh a lakhe khawm ding ahi. 10 Lemna thillata lat bawngtal apan a thau lakkhiak bangin a lakhe ding ahi. Tua khit chiangin, siampi in tuate haltum thillatna maitam tung ah a haltum ding ahi. 11 Ahihhangin, bawngtal vun leh a sa teng, a lu leh a khete, a sungkua leh a ek tawh, 12 tua bel, tua bawngtal sa om lai teng chihna ahi a, giahphual pawlama Mun Siangthoua ngaih tua vut buakna tung ah sing chih-in a haltum ding ahi. 13 Israelte'n a vekpi-un tup mawng hiloua Tangtawn Toupa' thupiakte khat peuh in a kham thil khat peuh a hih khak uleh, tua thil amaute'n phawk kei mah le uh, a mawh veve uhi. 14 Tua khelhna ahih khak uh a phawkkhiak chiangun, tua mipite'n khelhna thillat dingin bawngtaltuai hon keng ding uh a, Kihoupihna Puanbuk mai ah a pe ding uh ahi. 15 Tua mipite' upate'n Tangtawn Toupa' mai ah, tua bawngtal lu tung ah khut a nga ding uh a, Tangtawn Toupa' mai ah a kigou ding ahi. 16 Tua khit chiangin, seh-a om siampi pen in tua bawngtal sisan bangzah hiam, Kihoupihna Puanbuk sung ah a tawilut ding ahi. 17 Tua sisan ah a khutzung diah in, tua puanzak mai ah, Tangtawn Toupa' mai ah sagihvei a theh ding ahi. 18 Tua sisan bangzah hiam mah, Kihoupihna Puanbuk sunga Tangtawn Toupa' maia om maitam kite ah a tat ding ahi. Sisan omlai teng bel Kihoupihna Puanbuk lutna ah, haltum thillatna maitam bul ah a sungbaw ding ahi. 19 Bawngtal thau teng a lakhe ding a, maitam tung ah a haltum ding a, 20 khelhna thillat bawngtal a sai bangin, tua bawngtal zong a sai ding ahi. Hibangin, siampi in amaute adingin khelhna khuhna a bawlsak ding a, amaute ngaihdam ahi ding uhi. 21 Tua khit chiangin, tua bawngtal pen giahphual pawlam ah a pawkhe ding a, bawngtal masa a haltum bangin a haltum ding ahi. Hiai mipite adinga khelhna thillat ahi. 22 Makai khat in tupmawng hilou-a a khelh a, Tangtawn Toupa a Pathian' thupiakte khat peuh in a kham thil khat peuh a hih khak leh, a mawh ahi. 23 Khelhna a hih pen phawksaka a om chiangin, a thillat dingin keltal genbaanglou khat hon kai ding ahi. 24 Ama'n keltal lutung ah a khut a nga ding a, Tangtawn Toupa' maia haltum thillat latna mun ah a gou ding ahi. Khelhna thillat ahi. 25 Tua khit chiangin, siampi in khelhna thillat sisan bangzah hiam a khuttal-in a la ding a, haltum thillat latna maitam kite ah a tat ding a, a dang teng tua haltumna maitam bul ah a sungbaw ding ahi. 26 Ama'n a 27 thau teng lemna thillat thau a haltum bangin, maitam tung ah a haltum ding ahi. Hibangin, siampi in tua mipa' khelhna adingin khuhna a bawlsak ding a, amah ngaihdam ahi ding hi. Mipite laka mi khat peuh tup mawng hilou-a a khelh a, Tangtawn Toupa' thupiakte khat peuh in a kham thil a hih leh, a mawh ahi. 28 A khelhna thilhih phawksak ahih chiangin, khelhna thilhih adinga a thillat dingin, kelpi genbaanglou a hon kai ding ahi. 29 Ama'n tua khelhna thillat lutung ah a khut a nga ding a, haltum thillatna mun ah khelhna thillat a gou ding ahi. 30 Tua khit chiangin, siampi in a khuttal in a sisan a la ding a, haltum thillatna maitam kite ah a tat ding a, a dang teng bel, tua maitam bul ah a sungbaw ding ahi. 31 Lemna thillat apan a thaute a kilakkhiak bangin, a thau teng a lakhe ding a, siampi in Tangtawn Toupa' maia gim namtui hi dingin maitam tung ah a haltum ding ahi. Hibangin, siampi in ama' adingin khuhna a bawlsak ding a, ngaihdam ahi ding hi. 32 Khelhna thillat dinga belamnou a hon tawi leh, a nu genbaanglou a hon tawi ding ahi. 33 Ama'n tua thillat lutung ah a khut a nga ding a, khelhna thillat hi dingin, haltum thillat kigawhna mun ah tua gan a gou ding ahi. 34 Tua khit chiangin, siampi in a khuttal-in tua khelhna thillat sisan a la ding a, haltum thillat latna maitam kite ah a tat ding a, a dang teng bel, tua maitam bul ah a sungbaw ding ahi. 35 A thau teng, lemna thillat belam apan a thau teng a kilakkhiak bangin, a lakhe ding a, siampi in Tangtawn Toupa' maia maitam tunga meia thillat tung sawn ah a haltum ding ahi. Hibangin, siampi in, tua mipa adingin khelhna khuhna a bawlsak ding a, amah ngaihdam ahi ding hi.

Siampilaibu S

1 Mi khat peuh in mi khat khelhna tawh kisaia vantang' hekna thu a zak a, a muh gegu leh a zak gegu tawh kisaia theihpihna thu gen khe loua a khelh leh tua genkhiak louhna mawh a khu din|; ahi. 2 Ahih kei leh, mi khat peuh in thil siangloua ngaih thil khatpeuh, gamsa sianglou luang hiam, ganta sianglou hiam, leia bokvak ganhing sianglou luang hiam a lawnkhak leh, ama'n phawk kei mah leh, a sianglou a suak a, a mawh ahi. 3 A hih kei leh, mihing' sianlouhna  amah sianglou suaksak thei thil zong a lawnkhak leh, ama'n phawk kei mah leh, a phawk chiangin a mawh ahi ding ahi. 4 Mi khat peuh in thil khat peuh, a sia hiam, a pha hiam hita leh, hih dinga pilvanglou taka kichiamna a bawl leh, pilvanglou taka kichiam theihna thil peuhpeuh ah, ama'n phawk kei mah leh, tua thil a phawk chiangin a mawh ahi ding ahi. 5 Hibangte-a mi khat peuh a mawh leh, bangchi banga na khial hiam, chih a kiphuang ding ahi. 6 Tua bang khelhna a na hihtak manin, ama'n belam leh kelhon lak apan belamnou nu hiam, kei nou hiam, a mawhna thillat dingin Tangtawn Toupa' mai ah a hon tawi ding ahi. Siampi in ama' khelhna ading, ama' adingin khuhna a bawlsak ding ahi. 7 Ama'n belamnou a neih zawh kei leh, vakhu nih hiam, kawl vakhu nih hiam, Tangtawn Toupa' mai ah a hon tawi ding a, a khelhna gawtna ahi ding hi. Khat pen khelhna thillat ding ahi ding a, a dang khat pen, haltum thillat ding ahi ding hi. 8 Ama'n tuate siampi' mai ah a hon tawi ding a, siampi in khelhna thillatin khat a lan masa ding ahi. A ngawng hektankhiak louhin a hektan ding a, 9 tua khelhna thillat sisan khenkhat maitam pang a theh ding ahi. Sisan dangte tua maitam bul ah a kaikangsak ding ahi. Khelhna thillat ahi. 10 Siampi in a dang teng bel, a lat ding dan seh bangbangin, haltum thillatin a lan ding a, khelhna a na hihtak tawh kisaiin, amah adingin khuhna a bawlsak ding a, amah ngaihdam ahi ding hi. 11 Ahihhangin, ama'n vakhu nih, ahih kei leh, kawlvakhu nih a neih zawh kei leh, a khelhna thillat dingin, anvui nei ephah khat sehsawm suah seh khat a hon tawi ding ahi. A tung ah sathau a koih ding ahi kei a, gim namtui zong a koih ding ahi kei. Khelhna thillat ahih man ahi. 12 Ama'n siampi' mai ah hon tawi ding a, theihgigena hi dingin tua anvui khutdim khat a phamkhe ding a, Tangtawn Toupa' maia meia thillat tung sawn ah, maitam tung ah a haltum ding ahi. Khelhna thillat ahi. 13 Hibangin khelhna hibang khat peuh a na hih tawh kisaiin, siampi in ama' adingin khuhna a bawlsak ding a, ngaihdam ahi ding hi. Tua thillat vai teng, an thillat mah bangin, siampi tan ding ahi, chi in, a chi hi.

Mawhna Thillat

14 Tangtawn Toupa'n Mosi a houpih a: 15 Mi khat peuh muanhuailou-a a om a, Tangtawn Toupa' thil siangthou khat peuh tawh kisaia, tup mawng hiloua a khelh leh, a mawhna-a dingin belamhon lak apan belamtal khat, genbaanglou aman dinga seh diktak, mun siangthou shekela tuat ngun, Tangtawn Toupa' mai ah hon tawi ding ahi. Mawhna thillat ahi. 16 Thil siangthou tawh kisaia a khelhna ditna a bawl ngeingei ding ahi. Tua baan ah, tua man seh nga suah seh khat a behlap lai ding a, a vekpi-in siampi khut ah a pe ding a, ama'n mawhna thillatin tua belam a lan ding a, ama' adingin khuhna a bawlsak ding a, ngaihdam ahi ding hi. 17 Mi khat peuh in a khelh a, Tangtawn Toupa' thupiakte khat peuh in a kham a hih leh, ama'n phawk kei mah leh, a mawh ahi a, ama' mawhpuak hi veve ahi. 18 Tua bang mi in mawhna thillat dingin belamhon lak apan belamtal khat, genbaanglou, aman dia seh diktak zah man, siampi' mai ah hon tawi ding ahi. Hibangin, ama'n a tup mawng hiloua a phawklouh thilhih khelh tawh kisaiin, siampi in ama' adingin khuhna a bawlsak ding a, ngaihdam ahi ding hi. 19 Mawhna thillat ahi. Tangtawn Toupa' tung ah thil hihkhialin a mawh ahi, a chi hi.

Siampilaibu 6

1 Tangtawn Toupa'n Mosi a houpih a: 2 Mi khat peuh khial a, a innveng in amah a kepsak thil hiam, kichiamna thil hiam, guktak thu hiam tawh kisaia a innveng khem hiam, thil laksuh hiama om a, Tangtawn Toupa' tunga a muanhuai kei leh, 3 a hih kei leh, van mang khat peuh a muh a, tua tawh kisaia zuau a gen leh, ahih kei leh zuauthu-a a kichiam leh, ahih kei leh, mihing khelh theihna thil hibang khat peuh-a a khelh leh, 4 hibanga khiala a mawh chiangin, a van guk hita leh, a laksuh hita leh, amah kepsak hita leh, van mang a muh hita leh, 5 ahih kei leh zuauthu-a a kichiamna thil hita leh, a piakkhiak ngeingei ding ahi. A mana tuat seh nga suah seh khat behlap a, a dit vek ding, mawhna thillat a lat ni a, a neipa khuta a vekpi-a a piak ding ahi. 6 Ama'n gawtna danin siampi' mai ah, tua bel, Tangtawn Toupa' mai ah, a mawhna thillat, belamhon lak apan belamtal khat, genbaanglou, gan man dinga seh zah man gan a tawi ding ahi. 7 Hibangin, siampi in Tangtawn Toupa' mai ah, ama' adingin khuhna a bawlsak ding a, amah mawhsak hiai thilte khatpeuh apan amah ngaihdam ahi ding hi, a chi hi.

Haltum Thillat

8 Tangtawn Toupa'n Mosi a houpih a: 9 Aron leh a tapate kiang ah hiai thupiak pia in: Hiaite haltum thillat tawh kisai dan ahi: Haltum thillat pen maitam tunga meichihna ah zan khawvakin zingsang dongin a om ding ahi. Maitam tunga mei zong a kuan nilouh ding ahi. 10 Siampi in a puan malngat puansilh, ama' sa tawh kisukha ding puan malngat puannuaisilh tawh a silh ding ahi. Tua khit chiangin, maitam tunga haltum thillat, mei in a kattum vu vutte a luakkhe ding a, maitam kiang ah a koih ding ahi. 11 Tua khit chiangin, a puansilhte a suahkhe ding a, puansilh dang a silh ding a, tua vut pen giahphual pawlam ah mun siang a seh ah a baw ding ahi. 12 Maitam tunga mei a kuan nilouh ding ahi a, a mih ding ahi kei hi. Kawla nisuak simin siampi in sing a khul thuah ding a, haltum thillat tua tung ah a lem ding a, tua tung ah lemna thillat thaute a haltum ding ahi. 13 Maitam tunga mei a kuan gige ding ahi a, a mih ding ahi kei hi.

An Thillat

14 Hiaite an thillat tawh kisai dan ahi: Aron' tapate'n Tangtawn Toupa' mai ah, maitam mai ah, an thillat hon tawi ding uh ahi. 15 Siampi in tua anvui nei leh sathau, an thillat tunga gim namtui teng tawh, khutdim khat a pham ding a, Tangtawn Toupa' lungkimna gim namtui dingin tua theihgigena hi dinga sehkhiak tawh maitam tung ah a haltum ding ahi. 16 Aron leh a tapate'n a vai teng a ne ding uh ahi. Ahihhangin, mun siangthou khat ah silngou sawh louh-in a ne ding uh ahi. Kihoupihna Puanbuk huang sung ah a ne ding uh ahi. 17 Silngou sawh-a em ding ahi kei hi. Ka maia meia thillat apan amau tan dinga ka piak ahi. Khelhna thillat leh mawhna thillata bangin a siangthou penpen ahi. 18 Aron' suan pasal peuh peuh in a ne thei ding hi. Tangtawn Toupa' maia meia thillat apan ama' tantuan ahi. A khang akhanga omden thuseh ahi den ding ahi. Tuate tawh kisukha peuhpeuh a siangthou hong suak ding hi, a chi hi. 19 Tua baan ah, Tangtawn Toupa'n Mosi kiang ah: 20 Aron leh a tapate'n Aron thaunilh-a a om ni-in, Tangtawn Toupa' mai ah hiai thillat hon tawi ding uh ahi: Anvui nei dimdem ephah khat seh sawm suah seh khat, ngeina-a an thillat dingin, a kim khat zingsang lamin, a kim khat nitak lamin, a hon tawi ding uh ahi. 21 Sathau-in kuangdai sung ah na kang ding a, sathaua a tawksuak chiangin, na balnen ding a, Tangtawn Toupa' lungkimna gim namtui hi dingin an thillatin non lalut ding ahi. 22 Ama' thakheng ding, thaunilhna tang tapa in tua a lan ding ahi. Tangtawn Toupa' tantuan a khang a khanga omden thuseh ahi ding a, haltum sipsip ding ahi. 23 Siampi' an thillat peuhmah haltum sipsip ding ahi a, nek ding ahi kei hi, a chi hi.

Khelhna thillat

24 Tangtawn Toupa'n Mosi a houpih a: 25 Aron leh a tapate kiang ah hiai gen in: Hiai khelhna thillat tawh kisai dan ahi: Tua khelhna thillat pen, haltum thillat a kigawhna mun ah, Tangtawn Toupa' maia gawh ding ahi. 26 Hiai khelhna thillat a lanpa siampi in a ne ding ahi. Kihoupihna Puanbuk huang sunga mun siangthou khat-a a nek ding ahi. 27 Hiai sa tawh kisukha thil peuhmah a siangthou a suak ding hi. A sisan in puansilh a theh khak leh, mun siangthou khat-a na sawpsiang ding ahi. 28 A sa huanna leibel sattap ngei ngei ding ahi. Sumsan bela a kihuan leh bel, hoihtaka kiat siang a, tuia silsiang ding ahi. 29 Siampi innkuan sunga pasal peuhmah in a ne thei ding hi. A siangthou penpen ahi. 30 Ahihhangin, khelhna thillat peuhmah, khuhna bawlsak nadinga a sisan, Kihoupihna Puanbuk sunga Mun Siangthoua a kitawilut leh, a sa nek louh ding ahi a, haltum ngeingei ding ahi.

Siampilaibu 7

Mawhna Thillat

1 Hiaite mawhna thillat tawh kisai dante ahi a, a siangthou penpen ahi: 2 Mawhna thillat bel, haltum thillat a kigawhna muna gawh ding ahi a, a sisan zong maitam pang, a kimkota theh ding ahi. 3 A thau teng lat ding ahi: A mei thau leh a sung thau teng, 4 a kailing, a phuk sunga a thau, a kailing tuam teng, a sin tuam teng, a kailingte tawh lakkhiak khawm a vekpi-a lat ding ahi. 5 Siampi in Tangtawn Toupa' maia meia thillat hi dingin, tuate maitam tung ah a haltum ding ahi. Hiai mawhna thillat ahi. 6 Siampi innkuan sunga pasal peuhmah in hiai thillat a ne thei ding hi. Ahihhangin, a siangthou penpen ahih manin, mun siangthou khata nek ding ahi. 7 Khelhna thillat leh mawhna thillat ah dan kibang a kizang ding ahi: Khelhna khuhna bawlsakpa siampi' tan hiaite ahi: 8 Mi khat peuh adinga haltum thillat lanpa siampi in a vun a tang ding ahi. 9 An thillat, thukkhuka kiem, ahih kei leh, bela kihuan, peuhmah a lanpa siampi tan ding ahi. 10 An thillat, sathau tawh kihel hi-in, kihel lou hita leh, Aron' tapate'n kikim chiata a tan ding uh ahi.

Lemna Thillat

11 Hiaite Tangtawn Toupa' maia lemna thillat, mi khat peuh in a lat tawh kisai dan ahi: 12 Mi khat peuh in lungdamthu genna dana a lat leh, hiai lungdamthu genna thillat tawh kitonin, silngou sawh louh tanghou beu sathau tawh kihel, tua baan ah, tanghou pei, silngou sawh louh, sathaua zut, tua baan ah, anvui nei, hoihtaka mekman, sathau tawh kihel a lan khawm ding ahi. 13 Lungdamthu genna-a lemna thillat tawh kitonin, silngou sawh tanghou beu a lan ding ahi. 14 Hiaite a chi kimin khat chiat, Tangtawn Toupa kianga thilpiak hi dingin, a lan ding ahi. Hiai thillatte bel, lemna thillat sisan thehpa siampi in a tang ding ahi. 15 Hiai lungdamthu genna lemna thillat sa pen, thillat kilat ni mah a nek khit teitei ding ahi. Zingsang dongin a vai bangmah nutsiat ding ahi kei hi. 16 Ahihhangin, a thillat pen, kichiamna tangtunsakna hiam, ahih kei leh, utthu-a thillat hiam, ahih leh, tua thillat pen a kilat ni maha nek ding ahi a, a vai a om leh, a zing chianga nek theih ahi ding ahi. 17 Thillat sa pen a ni thum ni donga a vai a om leh, haltum ding ahi. 18 Lemna thillat sa, a ni thum ni-a a kinek leh, a sianglou a hih manin, tua thillat a kisang kei ding a, a lanpa zong a lana sim ahi kei ding a, a sa ne kuapeuh zong a mawhkhuksak ahi ding hi. 19 Siangloua ngaih thil sukha sa peuhmah nek ding ahi kei a, haltum ding ahi. Sa dang peuhmah bel, a sianga ngaih mi khat peuh in a ne thei ding hi. 20 Ahihhangin, a sianglou mi peuhmah in, lemna thillata Tangtawn Toupa' tan sa a nek leh, tua pa a mite lak apan satkhiak ahi ding ahi. 21 Mi khat peuh in a sianglou thil, mihing sianlouhna, ganta sianlouhna hi-in, thil sianglou kihhuai peuhmah hita leh, a sukkhak a, lemna thillata Tangtawn Toupa' tan sa a nek leh, tua pa a mite lak apan satkhiak ahi ding ahi, chi in, a chi hi.

Sathau leh Sisan Khamna

22 Tangtawn Toupa'n Mosi kiang ah: 23 Israelte kiang ah thu gen inla: Bawngte, belamte, ahih kei leh, kelte' thau himhim ne kei un. 24 Ganta a sisa-a kimu, ahih kei leh gamsa keih ganta' thau peuhmah thildang adingin zat theih ahi a, nek bel na nek het louh ding uh ahi. 25 Tangtawn Toupa' maia meia thillat ganta apan a thau ne mi peuhmah, a mite lak apan satkhiak ahi ding ahi. 26 Tua baan ah, na tenna peuh uah, vasa hiam, ganta hiam sisan peuhmah na ne ding uh ahi kei hi. 27 Mi kua peuh in sisan a nek leh, a mite lak apan satkhiak ahi ding ahi, chi in, a chi hi.

Siampite' Tan

28 Tangtawn Toupa'n Mosi kiang ah, 29 Israelte kiang ah thu gen inla: Tangtawn Toupa' maia lemna thillate hon tawi kuapeuh in tua a thillat apan bangzah hiam Tangtawn Toupa' maia kithoihna thillat hi dingin hon tawi ding ahi. 30 Ama' khut mah mahin tua Tangtawn Toupa' maia meia thillat pen hon tawi ding ahi. A thau leh a awm hon tawi ding a, a awm pen Tangtawn Toupa' mai ah vei thillatin a vei ding ahi. 31 Siampi in tua a thau pen maitam tung ah a haltum ding a, a awm pen ahih leh Aron leh a tapate' tan ahi ding hi. 32 Tua na lemna thillat ganta taklam pheipi siampi kiang ah thilpiakin na pe ding ahi. 33 Lemna thillat sisan leh thau lanpa siampi, tua Aron' tapa in tua thillat taklam pheipi ama' aituam dingin a tang ding ahi. 34 Israelte' lemna thillatte apanin tua vei thillata kivei a awm leh a kilansa a pheipi ka la a, siampi Aron leh a tapate ka peta a, Israelte apan a tan gige ding uh ahi, chi in, a chi hi. 35 Aron leh a tapate siampi-a panga tua Tangtawn Toupa' nasem dinga sehtuam a hih ni ua, amau' aituam dinga kipia, Tangtawn Toupa' maia meia thillat apan sehkhiak hiai ahi. 36 Amaute thaunilh ahih ni un, Tangtawn Toupa'n Israelte kiang ah, hiai siampite' aituam hi dingin a khangsawn sawn donga a piak dingun thu a pia hi. 37 Tuachi-in, hiaite haltum thillat, an thillat, khelhna thillat, mawhna thillat, namkipna thillat leh lemna thillat tawh kisai dante hong hita hi. 38 Tuate mah Sinai Gamdai-gamkeua Tangtawn Toupa' maia a thillatte uh hon tawi dinga Tangtawn Toupa'n Israelte thu a piak ni-a Sinai Muala Mosi a piak ahi.

Siampilaibu 8

Aron leh a Tapate Namkipna

1 Tangtawn Toupa'n Mosi kiang ah: 2 Aron leh a tapate, a puansilhte uh, nilh sathau, khelhna thillat ding tua bawngtal, tua belamtal nih leh silngou sawhlouh tanghou koihna lawhbeu hon tawi inla, 3 Kihoupihna Puanbuk lutna ah mipite khempeuh samkhawm in, a chi hi. 4 Tangtawn Toupa' thupiak bangin Mosi in a hih a, Kihoupihna Puanbuk lutna ah mipite khempeuh hong paikhawm uhi. 5 Mosi in mipi kikhawmte kiang ah: Tangtawn Toupa'n hih dinga hon thupiak hiai ahi, a chi hi. 6 Tua khitin, Mosi in mailam ah Aron leh a tapate hon tonpih a, tuiin amaute a sil hi. 7 Puanak sungsilh tuai Aron a silhsak a, puanduang a vetsak a, puanakpi a silhsak a, siampi puanak a silhsak hi, Siamneltaka gat puanduang kawnggakin tua siampi puanak tung ah a khihkip hi. Tuachi-in, ama' tung ah tua siampi puanak khihkip a hita hi. 8 Awma belh a belhsak a, tua tung ah Urim leh Thumim a khihkip hi. 9 Tua khitin, Aron lutang ah dialkhip a khimsak a, tua tung ah, kham sikpek a bulh a, tua mailam ah siampilukhu siangthou a khihbelh hi. Hiai bel, Tangtawn Toupa'n Mosi thu a piak bangbanga a hih ahi. 10 Tua khitin, Mosi in nilh sathau a la a, biakbuk leh a sunga om thil khempeuh sathau nilhin, sehtuam siangthouin a bawl hi. 11 Tua sathau bang zah hiam a la a, tua maitam sagihvei a theh a, tua maitam leh a tuium belsuante leh a tuikuang dai leh a khete, sehtuam siangthoua bawlin, sathau a nilh hi. 12 Tua sathau bang zah hiam Aron luzang ah a sung a, amah sehtuam siangthouin a bawl hi. 13 Tua khitin, Aron' tapate hon tonpih a, puanaksungsilh tualte a silhsak a, awmgakna puanduang a vetsak a, lugaknain a gaksak hi. Hiai bel, Tangtawn Toupa'n Mosi thu a piak bangbanga a hih ahi. 14 Tua khitin, ama'n khelhna thillat dingin bawngtal a hon la a, Aron leh a tapate'n tua khelhna thillat bawngtal lutung ah a khut uh a nga uhi. 15 Mosi in tua bawngtal a gou a, a sisan bangzah hiam a la a, a khuttal in tua maitam kite khempeuh ah a tat hi. Tua bel, tua maitam siansuahna ahi. Bawngtal sisan dangte bel, maitam bul ah a sungbua hi. Tua bangin, maitam sehtuam siangthouin a bawl a, maitam adingin khuhna a bawlsak hi. 16 Mosi in tua gan sungthau khempeuh, a sin tuamte leh a kailing tuamte leh a thaute a la a, maitam tung ah a haltum hi. 17 Ahihhangin, tua bawngtal, a vun tawh, a sa tawh, a ek tawh, giahphual pawlam ah a haltum hi. Hiai bel, Tangtawn Toupa'n Mosi thu a piak bangbanga a hih ahi. 18 Tua khitin, haltum thillat dingin, belamtal pen hon la a, Aron leh a tapate'n tua belamtal lutung ah a khut uh a nga uhi. 19 Tua khitin, Mosi in tua belamtal a gou a, a sisanin tua maitam pangte a kimkotin a theh hi. 20 Mosi in tua belamtal a semnen a, tuate a lutang tawh, a thau tawh a haltum hi. 21 A sungkua leh a khete tuiin a silsiang a, tua belamtal a pumin haltum thillatin maitam ah a haltum hi. Tangtawn Toupa' maia meia thillat, a lungkimna gim namtui ahi. Hiai bel, Tangtawn Toupa'n Mosi thu a piak bangbanga a hih ahi. 22 Tua khitin, Mosi in belamtal dang khat pen, tua namkip nading belamtal hon la hi. Aron leh a tapate'n tua belamtal lutung ah a khut uh a nga uhi. 23 Mosi in tua belamtal a gou a, a sisan bang zah hiam a la a, Aron' taklam bilteep, a taklam khutpi leh a taklam khepi a nuh hi. 24 Mosi in Aron' tapate zong hon tonpih a, sisan bang zah hiamin a taklam bilmong uh, a taklam khutpi uh leh a taklam khepi uh a nuh hi. Tua baan ah, maitam pangte a kimkotin sisan a theh hi. 25 A thaute, a mei thau, a sungthau, a sin leh a kailingte leh tua-a a thaute leh a taklam pheipi a la hi. 26 Tua khitin, Tangtawn Toupa' maia om, silngou sawh louh tanghou lawh apan tanghou pei khat a la a, sathau tawh kihel pei khat leh sathau hellouh pei neu khat tawh a la a, gan thaute leh a taklam pheipi tung ah a koih hi. 27 Hiaite khempeuh, Aron leh a tapate' khut ah a koih a, Tangtawn Toupa' mai ah vei thillatin Mosi in a vei hi. 28 Tua khitin, Mosi in amaute' khut apan tuate a la a, maitam tunga haltum thillat tunga koihin a haltum hi. Hiai namkipna thillat ahi a, Tangtawn Toupa' maia meia thillat, a lungkimna gim namtui ahi. 29 Namkipna belamtal apan Mosi' tan, a awm a la a, vei thillatin Tangtawn Toupa' mai ah a vei hi, Hiai bel, Tangtawn Toupa'n Mosi thu a piak bangbanga a hih ahi. 30 Tua khitin, Mosi in nilh sathau bang zah hiam leh maitam apan sisan bang zah hiam a la a, tuatein Aron leh a puansilhte leh a tapate leh a puansilhte uh a theh hi. Tua bangin, Aron leh a puansilhte leh a tapate leh a puansilhte uh sehtuam siangthouin a bawl hi. 31 Tua khitin, Mosi in Aron leh a tapate kiang ah: Aron leh a tapate'n a nek ding uh ahi, chi-a thu ka piak bangin, Kihoupihna Puanbuk lutna ah, a sa huan unla, tua ah namkipna thillat lawhbeu sunga tanghou tawh ne un. 32 Nek vai sa leh tanghou bel, haltum un. 33 Noute kinamkipna ni sagih sung hi ding ahih manin, noute kinamkipna nite a kim mateng, ni sagih sung peuhmah Kihoupihna Puanbuk lutna nuse kei un. 34 Tuni-a thil kihih bel, noute adinga khuhna a kibawl nadinga Tangtawn Toupa' thupiak ahi. 35 Ni sagih sung, sun leh zanin Kihoupihna Puanbuk lutna ah na om ding uh a, Tangtawn Toupa' ngiat bangbang na hih ding uh ahi. Tuachi-in na si kei ding uhi. Ahang bel, tua mah kei kianga thupiak ahi, a chi hi. 36 Tua bangin, Tangtawn Toupa'n Mosi tungtawna thu a piak bangbangin, Aron leh a tapate'n hih ding khempeuh a hih uhi.

Siampilaibu 9

Siampite' Nasep Patna

1 A ni giat ni-in, Mosi in Aron leh a tapate leh Israel upate a sam hi. 2 Ama'n Aron kiang ah: Na khelhna thillat ding bawngnou pa khat, na haltum thillat ding belamtal khat, a niha genbaanglou, Tangtawn Toupa' mai ah hon kai in. 3 Tua baan ah, Israelte kiang ah: Khelhna thillat ding keltal khat, haltum thillat ding bawngnou khat leh belamnou khat, a niha kum khata upa leh genbaanglou, 4 tua baan ah, Tangtawn Toupa' maia lat ding sathau tawh kihel an thillat tawh latkhawm ding, lemna thillata lat dingin bawngtal khat leh belamtal khat hon kai un. Tuni a Tangtawn Toupa na kiang ua hong kilang ding ahi, chi-in gen in, a chi hi. 5 Amaute'n Mosi' thupiak thilte Kihoupihna Puanbuk mai ah hon tawi uh a, mipite khempeuh in hon naih uh a, Tangtawn Toupa' mai ah a ding uhi. 6 Tua khitin, Mosi in: Tangtawn Toupa' thupina noute kianga hong kilak theih nadingin, Tangtawn Toupa'n noute hih dinga thu hon piak hiai ahi, a chi hi. 7 Mosi in Aron kiang ah: Maitam ah hong pai inla, na khelhna thillat leh na haltum thillat lan inla, nang leh mipite adingin khuhna bawl in. Tangtawn Toupa' thupiak bangin, mipite adingin khelhna thillat lan inla, amaute adingin khuhna bawlsak in, a chi hi. 8 Tuachi-in, Aron in maitam hon naih a, amah adingin khelhna thillat bawngnou a gou hi. 9 A tapate'n tua gan sisan amah kiang ah hon tawi uh a, ama'n tua sisan ah a khuttal a diah a, tua maitam kite ah a tat hi. Sisan dangte bel, maitam bul ah a sungbua hi. 10 Tangtawn Toupa' thupiak bangbangin, tua khelhna thillat thaute, a kailingte leh a sin tuamte, tua maitam tung ah a haltum hi. 11 A sa leh a vun bel giahphual pawlam ah meiin a haltum hi. 12 Tua khitin, haltum thillat ganta a gou hi. Aron' tapate'n tua gan sisan amah a pia uh a, ama'n tua-in maitam pangte, a kimkotin a theh hi. 13 Amaute'n tua haltum thillat ganta a beubeu-in, a lutang tawh a pia uh a, ama'n tuate maitam tung ah a haltum hi. 14 A sungkua leh a khete tuiin a silsiang a, maitam tunga haltum thillat tung ah a haltum hi. 15 Tua khitin, Aron in mipite ading thillat hon la hi. Mipite ading khelhna thillat dingin tua kei a la a, a gou a, amasa a lat bangbangin, khelhna-a dingin a lan hi. 16 Haltum thillat zong a hon la a, lat ding dan bangbangin a lan hi. 17 An thillat zong a hon la a, tua apan khutdim khat a phamkhia a, zingsang thillat baan ah, tuate maitam tung ah haltum thillatin a haltum hi. 18 Tua baan ah, mipite adinga lemna thillat hi dingin, tua bawngtal leh tua belamtal a gou hi. A tapate'n tua ganta' sisan a pia uh a, ama'n tua-in maitam pangte, a kimkotin a theh hi. 19 Ahihhangin, tua bawngtal leh belamtal thaute, a mei thau, a gil thaute, a kailingte leh a sin tuamte bel, 20 a awmte tung ah a koih uh a, Aron in maitam tung ah tua thaute a haltum hi. 21 Aron in Mosi' thupiak bangbangin, a awmte leh a taklam pheipite Tangtawn Toupa' mai ah vei thillatin a vei hi. 22 Tua khitin, Aron in a khutte mipi lam ah a liktou a, amaute a vualzawl hi. Khelhna thillat, haltum thillat leh lemna thillatte lankhin-in Aron hong kumsuk hi. 23 Tua khitin, Mosi leh Aron, tua Kihoupihna Puanbuk sung ah a lut uhi. Hong pusuah takun, mipite a vualzawl uhi. Tua khitin, Tangtawn Toupa' thupina mipite khempeuh muhin hong kilang hi. 24 Tangtawn Toupa' omna apan meikuang hong paikhia a, maitam tunga haltum thillat leh a thaute a kangtum hi. Mipite khempeuh in tua a mu uh a, lungnuam lua-in a awng uh a, maitangin lei a si uhi.

Siampilaibu 10

Nadab leh Abihu Sihna

1 A Aron tapate Nadab leh Abihu in a gim namtui halna kuang uh a la uh a, mei am luakin gim namtui a sunkhum uhi. Tangtawn Toupa' mai ah, a thupiak tawh kikalhin, phallouh mei a lan uhi. 2 Tuachi-in, Tangtawn Toupa' omna apan mei hong paikhia a, amaute a kangtum a, Tangtawn Toupa' mai ah a si uhi. 3 Mosi in Aron kiang ah: Hiai Tangtawn Toupa' thugen ahi: Kei hong naih mite lak ah, a siangthouin ka kilaak ding. Mi khempeuh mitmuhin pahtawiin ka om ding, a chi, a chi a, Aron bel a dai dide hi. 4 Mosi in Aron' pangak Uziel' tapate Mishael leh Elzafan a samsak a, amaute kiang ah: Hiai ah hong pai unla, mun siangthou mai apan giahphual pawlam ah na sanggamte uh pawkhia un, a chi hi. 5 Tuachi-in, amaute hong pai uh a, Mosi thupiak bangin a sanggamte uh puanaknuai tuai silhsain giahphual pawlam ah a pawkhia uhi. 6 Tua khitin, Mosi in Aron leh a tapate Eleazar leh Ithamar kiang ah: Lukhuhna beiin om kei unla, na puansilhte uh botkek kei un. Tuachi louin zaw na si ding uh a, Israel mi khempeuh tung ah Tangtawn Toupa a heh kha ding. Na tanaute uleh Israel innkawte khempeuh in bel, tua Tangtawn Toupa'n meia a hihmanthatte a kah thei ding uhi. 7 Kihoupihna Puanbuk lutna nuse kei un. Tua chilouin zaw Tangtawn Toupa' thaunilh na hih manun, na si ding uhi, a chi hi. Tuachi-in, amaute'n Mosi gen bangin a hih uhi. 8 Tua khitin, Tangtawn Toupa'n Aron kiang ah: Nang leh na tapate'n Kihoupihna Puanbuk sunga na lut ding chiangun, zu hita leh, silngou sawh dawn theih himhim na dawn ding uh ahi kei hi. Tua chilouin zaw na si ding uhi. 9 Hiai suansawn sawna a khang a khang adinga thuseh omden ding ahi. 10 A siangthou leh a nautaang na khen ding uh a, a nin leh a siang zong na khen ding uhi. 11 Tua bangin, Tangtawn Toupa'n Mosi tungtawna thuseh a piakte khempeuh Israelte na sinsak ding uh ahi, a chi hi.

Eleazar leh Ithamar' Khelhna

12 Mosi in Aron leh a tapa omlaite Eleazar leh Ithamar kiang ah: Tangtawn Toupa' maia meia an thillat laka a valte la unla, silngou sawh louha kibawl, maitam kiang ah ne un, thil siangthoupen ahi. 13 A sianga seh mun khat peuh ah ne un, Tangtawn Toupa' maia meia thillat apan noute' tan leh na tapate uh' tan ahi. Tua bang dingin thu kon pia ahi. 14 Ahihhangin, thillat ganta' awm vei thillata kilan leh, a pheipi latsa bel, noute leh na tapate uleh na tanute un na ne thei ding uh. Mun sianga ngaih khat peuh ah tuate ne un. Israelte' lemna thillatte apan noute leh na tate uh tan dinga piak ahi. 15 A pheipi hong kitawi pen leh a kiveisa a awm bel, meia thillat thaute tawh, Tangtawn Toupa' maia vei ding ahi. Hiai bel Tangtawn Toupa' thupiak banga noute leh na tate uh tan hi gige ding ahi, a chi hi. 16 Mosi in khelhna thillat kei a kan leh, a kihaltumta, chih a thei a, Aron' tapa omlaite Eleazar leh Ithamar tung ah a heh a: 17 Banghanga mun siangthou huang sunga tua khelhna thillat ne lou na hi ua? A siangthou penpen ahi vele. Tangtawn Toupa' maia mipite adinga khuhna bawlsak a, amaute' mawhna na lakmang nading ua noute kianga hong kipia ahi vele. 18 A sisan Mun Siangthou sunga kilalut lou ahih manin, thu kon piak banga mun siangthou huang sunga tua kei sa na nek ding uh ahi, a chi hi. 19 Aron in Mosi a dawng a: Tuni-in a khelhna thillat uleh a haltum thillat uh, Tangtawn Toupa' mai ah a lan uh a, ahihhangin, hibang thil ka tung ah hong tungta. Tuni-in tua khelhna thillat sa na ne taleng, Tangtawn Toupa a lungkim diam? a chi hi. 20 Mosi in hiai a zak takin, a lungkimta hi.

Siampilaibu 11

An siang leh Sianglou

1 Tangtawn Toupa'n Mosi leh Aron kiang ah: 2 Israelte kiang ah gen un: Leia gamta ganhingte lak ah, hiaite na ne thei ding uh. 3 Ganhing khechin niha ka paisuak, eknel hai ganhing khat peuh na ne thei ding uh. 4 Ganhing pawl khat, eknel hai kia hiam, khechin niha ka paisuak kia hiam a om. Tuate na nek ding uh ahi kei hi. Sangawngsau in eknel hai mah leh, khechin niha ka paisuak ahi kei. Noute adingin sangawngsau sa sianglou ahi. 5 Sakik in eknel hai mah leh, khechin niha ka paisuak ahi kei. Noute adingin sakik sa sianglou ahi. 6 Bilpi in eknel hai mah leh, khechin niha ka paisuak ahi kei. Noute adingin bilpi sa sianglou ahi. 7 Vok chin niha ka paisuak himahleh eknel a hai kei. Noute adingin vok sa sianglou ahi. 8 Tua bangte' sa na ne ding uh ahi kei a, a siluang zong na lawng ding uh ahi kei. Noute adinga a sianglou ahi.

Tuia Gamta Sa Siang leh Sianglou

9 Tuipite hiam, luite hiama gamta ganhingte lak ah, a pheh leh a lip neite khat peuh na ne thei ding uhi. 10 Ahihhangin, tuipite leh luitea gamta ganhing, pheh leh lip neiloute khempeuh tui liau thei hita leh, tuia teng peuhmah na kih ding uh ahi. 11 Tuate na kih ding uh a hih manin, a sa na ne ding uh ahi kei a, a si luang zong na kih ding uh ahi. 12 Tuia teeng pheh leh lip neilou ganhing peuhmah noute adingin kihhuai ahi.

Huihkhua a Gamta Sa Siang leh Sianglou

13 Noute adinga kihhuai a hih mana na kih ding uh vasa hiaite ahi: Muvanlai, musane, musane vom, 14 musi san, musi vom peuhpeuh, 15 va-ak peuhpeuh, 16 simbu kinei, simbu ham ngaih, tuiva awmpak, mu himhim, 17 simbu tanglit, nga gal, simbupi, 18 simbu kang, gamdai simbu, tui vapi, 19 tuiva kengsang, tuiva himhim, huihtun leh bak.

Kha nei Ganhingte

20 A lengthei ganhing neu, khe li neia vakte khempeuh noute adinga kihhuai ahi. 21 Ahihhangin, a lengthei ganhing neu, kheli neia vak pawl khat bel, na nek theih ding uh a om. Tuate bel, lei laka a tawm theih nading ua kheguh taang neite ahi. 22 Tuate lak ah khaupe chi peuhmah, kelkum, khuangbai, ahih kei leh, khaukhup. 23 Ahihhangin, khanei ganhing, khe li nei dangte peuhmah na kih ding uh ahi.

Ganhing Sisa Siangloute

24 Hiaite hangin a sianglou na suak thei uhi: Hiai ganhing siangloute sisa tawh kisukha peuhmah nitak lam dongin a sianglou ahi ding, 25 Hiai ganhingte a sisa khuta la peuhmah in a puansilhte a sawp ngeingei ding ahi. Nitak lam dongin a sianglou ahi ding ahi. 26 Khechin ka hinapi-a niha ka paisuak lou, ahih kei leh, eknel hai lou peuhmah noute adingin a sianglou ahi ding. Hibang ganhingte a siluang khat peuh tawh kisukha mi peuhmah a sianglou a suak ding. 27 Khe li neia pai ganhingte lak ah, a khechin boma paite peuhmah noute adingin a sianglou ahi. Tua bangte si luang tawh kisukha mi peuhmah nitak lam dongin a sianglou ahi ding hi. 28 Tua bang ganhing siluang khuta la mi peuhmah in a puansilhte a sawp ngeingei ding ahi. Nitak lam dongin a sianglou ahi ding ahi. Hiaite noute adinga sianglou ahi.

Bokvak Ganhingte

29 Leitunga bokvaka pai ganhingte noute adingin a sianglou ahi. Tuate bel, bui, zusa, tang chi peuhmah, 30 inhik, thankik, tangteuh, gamkeu thankik, thankik ngawngsan ahi. 31 Bokvaka pai ganhingte lak ah hiaite noute adinga sianglou ahi. Hiaite a sisa sukha mi peuhmah nitaklam dongin a sianglou ahi ding. 32 Hiaite khat peuh a sih a, vanzat bang peuh tunga a kiak leh, a zatna bang peuh na hita leh, singa kibawl, puana kibawl, savuna kibawl hi-in, saiip puana kibawl hita leh, a sianglou a suak hi. Tua bang vanzat pen tui ah diah in. Nitak lam dongin a sianglou ahi ding, tua khit chiangin a siang ding. 33 Tua ganhingte kiakna leibel leh, tua leibel sunga om peuhmah a sianglou a suak ding a, a bel na khettap ding ahi, 34 Tua bel sianglou sunga tui in nek theih an khat peuh a sukkhak leh, tua an a sianglou ahi. Tua bang mah in, dawn theih tui a sukkhak leh, tua tui a sianglou ahi. 35 Tua bang ganhing sisa in a kiakkhum thil peuhmah a sianglou ahi. Thuk hi-in, anhuan bel hita leh, khettap ding ahi. A sianglou ahi a, a sianglou a na ngaih ding uh ahi. 36 Ahihhangin, tuinak, ahih kei leh, tui kholna khuk hiam a hih leh bel, a siang gige ding. Ahihhangin, tua bang ganhing sisa sukha mi bel, a sianglou ahi ding. 37 Tua bang ganhing sisa pen pawi ding khaichi khat peuh tunga a kiak leh, noute adingin tua khaichi a sianglou ahi. 38 Ahihhangin, tua bang khaichi tui a kibuah a, tua nunga ganhing sisa a tunga kia ahih leh zong, noute adingin tua khaichi a sianglou ahi. 39 Noute adinga nek siang ganhing peuh a sih leh, tua a siluang tawh kisukha mi peuhmah a nitak lam dongin a sianglou ahi ding. 40 Tua siluang apan nekha peuhmah in a puansilhte a sawp ding ahi. Nitaklam dongin a sianglou ahi ding. Tua ganhing sisa khuta tawi peuhmah in a puansilhte a sawp ding ahi, amah nitak lam dongin a sianglou ahi ding hi.

Nek leh Tak tawh kisai Dante' Thil tup

41 Leia bokvak ganhing peuhmah kihhuai ahi. Nek ding ahi kei hi. 42 Leia bokvak ganhing peuhmah na ne ding ahi kei hi, a gila kitholh hiam, khe li a pai hi-in, khe tampi-a pai hita leh, kihhuai ahi. 43 Hiai ganhingte apan kisunin kei un. Hiai ganhingte apanin a sianglou kisuaksak kei unla, ahih kei leh, hon sianglousak dingin kiphal kei un. 44 Kei Tangtawn Toupa na Pathian uh ka hi. Kei a siangthou ka hih manin, noute sehtuam siangthoua kibawlin siangthou un. Leia bokvak ganhingtein a sianglou kisuaksak kei un. 45 Kei Tangtawn Toupa, na Pathian uh hi dinga Aigupta gam apan hon piikhetoupa ka hi. Tua hangin, kei ka siangthou manin, noute siangthou un. 46 Hiai ganhingte, vasate, tuia gamta ganhingte leh leikeu tunga gamta ganhingte tawh kisai dante ahi. 47 A sianglou leh a siang na khen ding uh a, nek theih ding ganhingte leh nek louh ding ganhingte na khen ding uh ahi, chi-in gen un, a chi hi.

Siampilaibu 12

Nausuah nunga Siansuahna

1 Tangtawn Toupa'n Mosi a houpih a: 2 Israelte kiang ah thu gen inla: Numei a gai a, tapa a neihkhiak leh, tua numei, ni sagih sung a siangloua ngaih ahi ding, tua bel, a kha teng si neih-a sianglou ahih bangbang ahi ding hi. 3 A ni giat ni-in, tua tapa zeksum ding ahi. 4 Tua khit chiangin, tua numei in a si pawtna apan siansuah nadingin, ni 33 a ngak ding ahi. A siangthou thil himhim a lawng ding ahi kei a, a kisiansuahna nite a kim masiah mun siangthou ah zong a hawh ding ahi kei hi. 5 Numei in tanu a neihkhiak leh bel, nipikal nih sung a siangloua ngaih ahi ding hi. Tua bel, a khateng si neih-a a sianglou ahih bangbang ahi ding hi. Tua khit chiangin, a si pawtna apan kisiansuah nadingin, ni 66 a ngak ding ahi. 6 Tapa hiam, tanu hiam neihna hanga siansuahna nite a bei chiangin, Kihoupihna Puanbuk lutna ah, siampi kiang ah, haltum thillat dingin belamnou kum khata upa leh khelhna thillat dingin vakhu hiam, kawlvakhu nou hiam a hon tawi ding ahi. 7 Ama' adinga khuhna bawl nadingin, Tangtawn Toupa' mai ah tuate a lan ding a, tua khit chiangin, sisan pawtna apan tua numei a sianga ngaih ahi ding hi. Tapa hiam, tanu hiam neikhia numei adingin dan hiaite ahi. 8 Belamnou a neih zawh kei leh, vakhu nih hiam, kawlvakhu nou nih hiam a hon tawi ding ahi. Khat pen haltum thillat ding ahi ding a, a dang khat pen khelhna thillat ding ahi ding hi. Hibangin, siampi in tua numei adingin khuhna a bawlsak ding a, a siang ding hi, chi in, a chi hi.

Siampilaibu 13

Vun Natna tawh kisai Dante

1 Tangtawn Toupa'n Mosi leh Aron a houpih a: 2 Mi khat peuh in a vuna chibawk hiam, a dulh hiam, a kaang tuam hiam, kilawh theih a neih leh, siampi Aron kiang ah hiam, ahih kei leh, siampi nasem a tapate laka khat peuh kianga paipih ding ahi. 3 Siampi in tua mipa' vuna natna a vel ding a, tua natna muna a mul a kaan a, a natna zong a vun sanga thukzaw hi-a a kilat leh, kilawh theih vun natna ahi. Siampi in a vel khit chiangin, tua mipa a siangloua ngaih ahi, chi-in a phuang ding ahi. 4 Tua a vuna mun khat a kaang tuam a hih a, vun sanga thukzaw hi-a a kilat kei a, a mul zong a kaan kei leh, siampi in tua mipa ni sagih sung a khumtuam ding ahi. 5 A ni sagih ni-in, siampi in amah a vel kik ding a, a vun natna kilamdang tuan loua, a om a, vuna a ban a peh tuan kei leh, ni sagih dang a khumtuam kik ding ahi. 6 A ni sagih ni-in, siampi in amah a vel kik ding a, a natna a kiam a, a vuna a kizalh kei leh, siampi in tua mipa a sianga ngaih ahi, a dulh maimai ahi, chi-in a phuang ding hi. Tua mipa'n a puansilhte a sawp ding a, amah a siang ding hi. 7 Ahihhangin, a siang ahi, chi-a phuan dinga siampi' maia a kilak nunga, tua a dulh pen a vuna a ban peh-a a om leh, siampi' maia a kilah kik ding ahi. 8 Siampi in amah a veel ding a, tua a dulh pen a vuna a ban peh a na hih leh, tua mipa a sianglou ahi, chi-in a phuang ding ahi. Kilawh theih natna khat ahi. 9 Mi khat peuh in kilawh theih vun natna a neih leh, siampi' maia paipih ding ahi. 10 Siampi in amah a vel ding a, tua vun natna pen a kaanga a bawk a, a mul a kaan a, tua a bawkna dulha a keh leh, 11 vun natna dam thei lou ahi a, siampi in tua mipa a sianglou ahi, chi-in a phuang ding ahi. A sianglou hi khin ahih manin, a khumtuam ding ahi kei hi. 12 Tua natna pen a vun tenga a kithehzak leh, siampi muh dana tua vun natna neipa a khe apan a luzang donga a vun tenga a om leh, 13 siampi in a vel ding a, tua mipa a pumpi-a tua natna in a khuh leh, a siang ahi, chi-in a phuang ding ahi. A pumpi-a a kaang vek ahih manin, a siang ahi. 14 Ahihhangin, tua banga dulha kehna a satunga hong kilat peuhpeuh chiangin, a sianglou ahi ding hi. 15 Siampi in tua banga dulha keh a muh chiangin, tua mipa a sianglou ahi, chi-in a phuang ding ahi. Dulha keh pen kilawh theih natna ahih manin a sianglou ahi. 16 Tua dulha chikeh mei hong lamdang a, hong kaan leh, siampi a naih ding a, 17 siampi in a vel ding a, tua a meimatna hong kaang ahih leh, tua mipa a siang ahi, chi-in a phuang ding a, a siang ahi ding hi. 18 Mi khat peuh in a vuna meimatum a vei a, a dam chianga, 19 tua meimatum omna mun a bol a, a kaang hiam, a sansim hiam hong kilat leh, siampi kianga a kilah teitei ding ahi. 20 Siampi in tua a natna mun a vel ding a, a vun sanga thukzaw hi-a a kilat a, a mul zong a kaan leh, siampi in amah a sianglou ahi, chi-in a phuang ding ahi. Meimatum omna muna kilawh theih vun natna hong om ahi. 21 Ahihhangin, siampi in a vel a, a mul kaang lah om lou, tua natna a vun sanga thukzaw lah hilou ahih leh, siampi in ni sagih sung amah a khumtuam ding ahi. 22 Tua natna in a ban a peh leh, siampi in amah a sianglou ahi, chi-in a phuang ding ahi. Kilawh theih natna ahi. 23 Ahihhangin, tua a natna mun a mei a kikhek kei a, a ban lah a peh kei leh, meimatum pawn ahi lei a, siampi in amah a siang ahi, chi-in a phuang ding hi. 24 Mi khat peuh' vun mei in a kat a, a katna keh a, san sima kaang sim hiam, a kaang hiam hong kilat leh, 25 siampi in tua a katna mun a vel ding a, a mul hong kaang a, a vun sanga thukzawa pehsuk leh, tua a kaatna muna kilawh theih natna hong piang ahi. Siampi in amah a sianglou ahi, chi-in a phuang ding ahi. Kilawh theih vun natna ahi. 26 Ahihhangin, siampi in a vel a, a mul kaang lah a om kei a, a vun sanga thukzaw lah peh lou ahih a, ahihhanga ama sipa mual ahih leh, siampi in ni sagih sung amah a khumtuam ding ahi. 27 A ni sagih ni-in, siampi in amah a vel ding a, a ban a peh leh, siampi in amah a sianglou ahi, chi-in a phuang ding ahi. Kilawh theih vun natna ahi. 28 Tua a natna mun a mei kikheng tuan lou, a ban lah peh lou a, a ma sipa mual ahih leh, siampi in amah a siang ahi, chi-in a phuang ding ahi. A kaatna pawn lei ahi ahi. 29 Pasal hiam, numei hiam khat peuh in a lutang ah hiam, a khabe ah hiam meima a vei leh, 30 siampi in tua meima a vel ding a, a vun sanga thukzaw hi-a a kilat a, tua-a a mul hiam, a sam hiam zong eng a, a ngaat leh, siampi in amah a sianglou ahi, chi-in a phuang ding ahi. Vunthak, kilawh theih natna a lutang hiam, a khabe hiama om ahi. 31 Ahihhangin, siampi in hibang meima a vel khit nunga, a vun sanga thukzaw hi-a a kilat kei a, tua muna mul vom a om kei leh, siampi in ni sagih sung tua bang vunthak meima vei pen a khumtuam ding ahi. 32 A ni sagih ni-in, siampi in tua meima a vel ding a, tua chithak in a ban a peh kei a, a mul eng a om kei a, a vun sanga thukzaw hi-a a kilat kei leh, 33 a meimatna mun chih louh peuh mul hiam, sam hiam metmai ding a, ni sagih dang amah a khumtuam lai ding ahi. 34 A ni sagih niin siampi in tua vunthak a vel kik ding a, a ban peh lou a, a vun sanga thukzaw hi a a kilat kei leh, siampi in amah a siang ahi, chi-in a phuang ding ahi. Ama'n a puansilhte a sawp ding a, amah a siang ding. 35 Ahihhangin, amah a siang ahi, chi-a a kiphuan nunga, tua vunthak in a ban a peh leh, 36 siampi in amah a vel ding a, tua chithak in a ban peh ahih leh, siampi in mul eng a om hiam, chi-a a zon a kul kei. Tua mipa a sianglou ahi. 37 Ahihhangin, siampi et dana a mei kikhekna a om kei a, a muna mul vom a pou tak leh, tua vunthak damta ahi. Amah a siang ahi a, siampi in amah a siang ahi, chi-in a phuang ding ahi. 38 Pasal hiam, numei hiam khat peuh in a vuna a kaan tuamna a neih leh, 39 siampi in tuate a vel ding ahi. Tua a kaannate a mual pian ahih leh, a vun a dulh maimai a lauhuai lou ahi. Tua bang mi a siang ahi. 40 Mi khat peuh sam a pulh a, a lu a giau leh, amah a siang ahi. 41 A sam a pulh a, a mailam a giau a, talkolha a om leh, amah a siang ahi. 42 Ahihhangin, tua a lu giauna hiam, a tai kolhna hiama sansim ngousim meima a om leh, a lutang hiam, a tai hiam apan kilawh theih natna om ahi. 43 Siampi in amah a vel ding a, tua a lutang hiam, taltang hiama a dulha meimatna a bawk a, kilawh theih natna banga sansim ngousim a om leh, 44 tua natna veipa a sianglou ahi. A lutanga meima hangin amah a sianglou ahi, chi-in siampi in a phuang ding ahi. 45 Tua banga kilawh theih natna vei mi in, puan sesa a silh ding a, sam gumsakin, a mai nuailam puan khuhin: Siang lou! Siang lou! chi-in a kikou ding ahi. 46 Kilawh theih natna a vei sung teng, amah a sianglou ahi. Amah kia in a token ding a, giahphual pawlam ah a teeng ding ahi.

Apna tawh kisai Dante

47 Apna in puansilh khat peuh a neksiat leh samul puan hi-in, ziza puan hita leh, 48 gatthawh hi-in phanthawh ziza hiam, samul hiam hita leh, ahih kei leh, savun hiam, savuna kibawl van khat peuh, 49 tua puansilh hiam, savun van hiam, gat thawh himhim hiam hita leh, a kineksiatna hing zelhzulh pian hiam, san sim pianin om ta leh, a ban peh thei apna ahih leh, siampi kianga etsak teitei ding ahi. 50 Siampi in tua apna a vel ding a, ni sagih sung tua puansilh a tuam koih ding ahi. 51 A ni sagih ni-in, siampi in a vel kik ding a, tua apna in a ban a peh leh, tua gat thawh ahih keileh phanthawh puansilh, ahih kei leh savun puansilh a kizatna bang teng hita leh zong, nesia thei apna ahi a, tua puan a sianglou ahi. 52 Tua apna, thil nesia thei apna ahih manin, tua apna in a lawh puansilh, gat thawh hi-in, phanthawh hita leh, ziza khau hiam, samul khau hiam, savun van hiam a haltum ding ahi. Tua vanzat haltum ngeingei ding ahi. 53 Ahihhangin, siampi in tua puansilh a vel chiangin, a apna in tua gat thawh ahih kei leh phanthawh puansilh hi-in, savuna bawl van hita leh, a ban a peh kei leh, 54 tua ap thil pen sawp dingin thu a pe ding ahi. Tua khit chiangin, ni sagih dang a tuam koih lai ding ahi. 55 Tua a ap puan a kisawp khit chiangin, siampi in a vel ding a, tua apna mei a kikhen tuan kei leh, a ban peh kei mah leh, a sianglou ahi. Tua apna in pang khat peuhpeuh peh ahih nak leh, meiin haltum un. 56 Siampi in a vel chiangin, apna in a nek pen a kisawp nunga na mualta ahih leh, tua puansilh gat thawh hiam, phanthawh ziza puan hiam, samul puan hiam, savun hiam hita leh, a apna teng a atkhia ding ahi. 57 Ahihhangin, puansilh ah hiam, gat thawh ahih kei leh phanthawh puan hiam, savun puan hita leh, apna hong kilat kik leh, a ban peh ahi a, tua banga ap puan peuhmah meia haltum ding ahi. 58 A kisawpsa tua puansilh, gat thawh hi-in phanthawh, ahih kei leh savuna kibawl van khat peuh, a apna beisa zong sawp kik teitei ding ahi. Tua khit chiangin, a siang ahi ding hi, chi-in gen in, a chi hi. 59 Hiai dante, samul puan hi-in, ziza khau zangngat puan hita leh, gat thawh hi-in phanthawh hita leh, ahih kei leh, savuna kibawl van khat peuh, apna in a nitsakte, a siang hiam, a siang lou hiama phuan ding dan tawh kisai ahi.

Siampilaibu 14

Vun Natna apan Mihing Siansuahna

1 Tangtawn Toupa'n Mosi a houpih a: 2 Chinatna vei mi, siampi' maia hong kipaipih a, a kisiansuah chianga zat ding dan hiaite ahi. 3 Giahphual pawlam ah siampi a paikhe ding a, tua natna vei mi a vel ding ahi. Tua natna vei mi, kilawh theih vun natna apan a damtaak leh, 4 siampi in a kisiansuah nadingin vasa siang, a hing nih, sidar sing them bang zah hiam tawh khausan leh husawp hon tawi dingin thu a pe ding ahi. 5 Tua khit chiangin, siampi in lei bel sunga tui thak siang tunga tua vasate khat gawh dingin thu a pe ding ahi. 6 Siampi in vasa hing lai pen a la ding a, tua tui siang tunga kigou vasa sisan ah, tua sidar sing them tawh, tua khausan tawh, tua husawp tawh a diah ding ahi. 7 Tua-in kilawh theih natna vei mi sagihvei a theh ding a, amah a siang ahi, chi-in a phuang ding ahi. Tua khit chiangin, vasa hing lai pen gampalak ah a khah ding ahi. 8 Siansuah ding mi in a puansilhte a sawp ding a, a sam a metmai ding a, tuiin a kisil ding ahi. Tuachi-in, amah a sianga ngaih ahi ding hi. Hiai nungin, giahphual sung ah hong lut thei ding a, ahihhangin, ama' puanbuk pua ah ni sagih sung a giak ding ahi. 9 A ni sagih ni-in, a mul a metmai ding ahi. A lu tunga sam, a khamul, a mitkhu mul leh a mul khempeuh a metmai ding ahi. A puansilhte a sawp ding a, tuiin a kisil ding a, a siang ahita ding hi. 10 A ni giat ni-in, ama'n belamnoupa nih leh belamnounu khat, kum khata upa, genbaanglou chiat tawh, an thillat ding anvui nei ephah seh sawm suah seh thum, sathau tawh kihel leh sathau log khat hon tawi ding ahi. 11 Amah a siang ahi, chi-a phuangpa siampi in siansuah ding mipa leh a thillatte Kihoupihna Puanbuk lutna ah, Tangtawn Toupa' mai ah a paipih ding ahi. 12 Tua khit chiangin, siampi in tua belamnoupate laka khat a la ding a, tua sathau log khat tawh, mawhna thillatin a lan ding ahi. Tuate mah vei thillatin, Tangtawn Toupa' mai ah a vei ding ahi. 13 Ama'n mun siangthou, khelhna thillat leh haltum thillat a kigawhna mun ah, tua belamnou a gou ding ahi. Khelhna thillat bang mahin, mawhna thillat pen siampi' tan ahi. A siangthou penpen ahi. 14 Siampi in tua mawhna thillat a sisan bang zah hiam a la ding a, siansuah ding mipa' taklam bilteep, a taklam khutpi leh a taklam khepite a nuh ding ahi. 15 Tua khit chiangin, siampi in tua sathau log khat apan sathau bang zah hiam a la ding a, a veilam khutpek sung ah a sung ding a, 16 a taklam khuttal, tua sathau ah a diah ding a, Tangtawn Toupa' mai ah sagih vei a theh ding ahi. 17 Tua khit chiangin, a khut pek sunga sathau om lai apan bang zah hiam, tua siansuah ding mipa' taklam bilteep, a taklam khutpi, a taklam khepi ah, tua mawhna thillat sisan kitatte tung ah a tat ding ahi. 18 Siampi in tua khutpek sunga sathau omlai tengin, siansuah ding mipa' luzang ah a tat ding a, Tangtawn Toupa' mai ah, ama' adingin khuhna a bawlsak ding ahi. 19 Tua khit chiangin, tua khelhna thillat a lan ding a, siansuah ding mipa adingin, sianlouhna khuhna a bawl sak ding ahi. Tua khit chiangin, siampi in haltum thillat a gou ding a, 20 maitam tung ah, an thillat tawh a lan ding a, ama' adingin khuhna a bawlsak ding a, amah a siang ahita ding hi. 21 Ahihhangin, amah pen a zawng a hih a, hiaite a neih zawh kei leh, mawhna thillat dingin belamnoupa khat hon tawi ding a, amah adinga khuhna bawlsak nadinga vei ding ahi. Hiai tawh kitonin, an thillat anvui nei dimdem ephah seh sawm suah seh khat, sathau tawh kihel, sathau log khat leh 22 vakhu nih, ahih kei leh, kawl vakhu nou nih, ama' neih zawh dan dan, veikhawm ding ahi. Vasa khat pen khelhna thillat ding ahi ding a, a dang khat pen haltum thillat ding ahi ding hi. 23 A ni giat ni-in, a kisiansuah nadingin, Kihoupihna Puanbuk lutna ah, Tangtawn Toupa' mai ah, siampi kiang ah hiaite hon tawi ding ahi. 24 Siampi in mawhna thillat belamnou a la ding a, tua sathau log khat tawh, Tangtawn Toupa' mai ah vei thillatin a vei ding ahi. 25 Ama'n mawhna thillat dingin tua belamnou a gou ding a, a sisan bang zah hiam a la ding a, siansuah ding mipa' taklam bilteep, a taklam khutpi, leh a taklam khepi ah a tat ding ahi. 26 Siampi in tua sathau bang zah hiam a veilam khutpek sung ah a sung ding a, 27 a taklam khuttalin tua sathau, Tangtawn Toupa' mai ah sagih vei a theh ding ahi. 28 A khut pek sunga bang zah hiam lain, mawhna thillat sisan a tatna munte, siansuah ding mipa' taklam bilteep, taklam khutpi leh taklam khepi ah a tat ding ahi. 29 A khutpek sunga sathau om laite, siampi in siansuah ding mipa' luzang ah a tat ding a, Tangtawn Toupa' mai ah, amah adingin khuhna a bawlsak ding ahi. 30 Tuachi-in, tua vakhute, ahih kei leh kawl vakhu, tua mipa' neih zawh dan dan, a lan ding ahi. 31 Vasa khat khelhna thillat ding, a dang khat haltum thillat ding ahi ding, an thillat tawh latkhawm ding ahi. Hibangin, siampi in, siansuah ding mipa adingin, Tangtawn Toupa' mai ah, khuhna a bawlsak ding ahi, a chi hi. 32 Hiai dante, kilawh theih vun natna vei a, a kisian suah nadinga thillat ngeinate nei zouloute mi khat peuh' kisiansuahna dan ahi.

Apna apan Inn Siansuahna

33 Tangtawn Toupa'n Mosi leh Aron a houpih a: 34 Na luah ding ua kon piak ding Kanan gam na lut chiang ua, tua gama inn khat peuh a, a pehlawh thei apna ka koih chiangin, 35 tua inn neipa, siampi kianga va paiin: Ka inn ah apna hileh kilawm khat ka mu hi, chi-in a va hilh ding ahi. 36 Siampi in tua apna a vel main, inn awngsak dingin thu a pe ding ahi. Tua bel, tua inn-a thil khat peuh a siangloua phuan ahih louh nading ahi. Hiai nungin, siampi, tua inn ah a lut ding a, inn a vel ding ahi, 37 Baangte-a apte a vel ding a, a hing zelhzulh pian hiam, a san pian 38 kong vang ah siampi a pawtkhe ding a, ni sagih sung tua inn a khakchip ding ahi. 39 A ni sagih ni-in, tua inn vel dingin tua siampi hong pai kik ding ahi. Tua baangte-a apna in a baan a peh leh, 40 a pehlawh suangte lakkhiak a, khaw pawlama a sianglou muna paih dingin thu a pe ding hi. 41 Tua inn sung lam baangte kiat siang ding leh a kikiatkhete, khaw pawlama a sianglou muna buakkhiak dingin thu a pe ding ahi. 42 Tua khit chiangin, suang dangin a kilakkhiakna munte kihuin, leiman thakin inn a kizut thak ding ahi. 43 Suangte a kilakkhiak a, a kikiatsiang a, a kizut thak nung a, tua inn-a apna hong kilat kik leh, 44 siampi in va paiin, a va vel ding ahi, tua ap in a ban peh ahih leh, hihse thei apna ahi. Tua inn a siang lou ahi. 45 Tua inn phei ding a, a suangte, a singzawlte leh baangzutnate, phelkhiak vek ding, khaw pawlama a sianglou muna paih ding ahi. 46 Tua inn a kikhak chip sunga mi khat peuh a va lut leh, amah nitak lam dong a sianglou ahi ding hi. 47 Tua inn sunga va lum hiam, an va ne hiam peuhmah in a puansilhte a sawp ding ahi. 48 Ahihhangin, siampi hong pai a, tua inn a vel a, tua inn baangte a kizut nunga apna in a ban peh lou ahih leh, tua apna damta ahih manin, tua inn a siang ahi, chi-in a phuang ding ahi. 49 Tua inn siansuah dingin, vasa nih leh sidar singthem i Kum bang zah hiam tawh khausan leh husawp a tawi ding ahi. 50 Tua vasa khat, leibel sunga tui siang thak tung ah a gou ding ahi. 51 Tua khit chiangin, sidar sing them, husawp leh khausan leh vasa hing, vasa sipen' sisan leh tui siang ah a diah ding a, tua inn sagih vei a theh ding ahi. 52 Tua vasa sisan, tua tui siang, tua a hing lai vasa, tua sidar sing them, tua husawp leh tua khausanin tua inn a siansuah ding ahi. 53 Tua khit chiangin, tua a hing lai vasa pen, khaw pawlam gam lak ah a khah ding ahi. Hibangin, tua inn adingin khuhna a bawlsak ding a, a siang hong hi ding hi, a chi hi.

Vun Natna tawh kisai Dan Thiltup

54 Hiai dante, kilawh theih vun natna khempeuh, chithak, 55 puansilh hiam, inn hiama apna leh, 56 chi bawk, dulh, ahih kei leh, chikaang chihte tawh kisaia, 57 thil khat peuh a siang leh a siang lou theih nading dan ahi. Hiai, kilawh theih vun natna leh apna tawh kisai dan ahi.

Siampilaibu 15

Sa a Thilpawta Nitna

1 Tangtawn Toupa'n Mosi leh Aron a houpih a: 2 Israelte kiang ah thu gen unla: Mi khat peuh in a sa apan thilpawt a neih leh, tua thil pawt a sianglou ahi. 3 Tua thilpawt a sa apana luang lailai hiam, luang nawn lou hita leh, amah a sianglou a suaksak veve ding hi. A sa apan thilpawtin amah a sianglou a suahsak dan hibang ahi: 4 A sa apan thilpawt nei mi' lupna peuhpeuh a sianglou a suak hi. A tutna peuhpeuh zong a sianglou a suak hi. 5 Tua a lupna va sukha peuhmah in a puansilhte a sawp ding, amah zong tuia a kisil ding ahi a, nitaklam dong a sianglou ahi ding ahi. 6 Tua banga thilpawt nei mi' tutna-a va tukha peuhmah in a puansilhte a sawp ding a, tuia a kisil ding ahi. Amah nitaklam dong a sianglou ahi ding hi. 7 Tua bang thilpawt nei mi lawngkha mi peuhmah in a puansilhte a sawp ding a, tuia a kisil ding ahi. Amah nitaklam dong a sianglou ahi ding hi. 8 A sianglou mi in a siang mi khat peuh a chilphih leh, tua a chilphih mi in a puansilhte a sawp ding a, tuia a kisil ding ahi. Amah nitaklam dong a sianglou ahi ding hi. 9 Tua bang mi sakol tunga a tuan leh, a tutna peuhmah a sianglou a suak ding hi. 10 Tua banga a sianglou mi nuaia om thil khat peuh sukha mi peuhmah, nitaklam dong a sianglou ahi ding hi. Tua bang thil khuta la mi in a puansilhte a sawp ding a, tuia a kisil ding ahi. Amah nitak lam dong a sianglou ahi ding hi. 11 Tua banga thilpawt nei mi in khutsil loua a lawnkhak mi peuhmah in a puansilhte a sawp ding a, tuia a kisil ding ahi. Amah nitaklam dong a sianglou ahi ding hi. 12 Tua banga a sianglou mi in a lawnkhak leibel peuhmah sattap ding ahi. Singa kibawl vanzat peuhmah tuia sil ding ahi. 13 Thilpawt apan mi a kisiansuah khit chiangin, a sianga ngaih ahih nadingin, ni sagih a sim ding ahi, A puansilhte a sawp ding a, tui siangin a kisil ding a, a siang ahi ding hi. 14 A ni giat ni-in, vakhu nih hiam, kawl vakhu nou nih hiam, Kihoupihna Puanbuk lutna ah, Tangtawn Toupa' mai ah, hon tawi ding a, siampi khut ah a pe ding hi. 15 Siampi in tuate a lan ding a, khat khelhna thillat ding, a dang khat pen haltum thillat ding ahi ding. Hibangin, thilpawt nei mi adingin, Tangtawn Toupa' mai ah khuhna a bawlsak ding ahi. 16 Pasal in bawtui pawt a neih leh, tuiin a kipumsil ding a, nitaklam dong a sianglou ahi ding hi. 17 Tua bawtui banna puansilh khat peuh hiam, savun khat peuh, tuia sil ding ahi a, nitaklam dong a sianglou ahi ding hi. 18 Pasal in numei a luppih a, bawtui pawt a om leh, nitaklam dong a sianglou ahi ding uhi.

Numei' Sa a Thilpawta Nitna

19 Numei in a khateng si neih a neih chiangin, a khateng sianlouhna in ni sagih a daih ding a, tua bang numei lawngkha peuhmah, nitaklam dong a sianglou ahi ding hi. 20 Tua bang numei in khateng sineih a neih sunga a lupna peuhmah a sianglou a suak a, a tutna peuhmah zong a sianglou a suak hi. 21 A lupna lawngkha peuhmah in a puansilhte a sawp ding a, tuia a kisil ding ahi. Nitaklam dongin amah a sianglou ahi ding hi. 22 A tutna lawngkha peuhmah in a puansilhte a sawp ding a, tuia a kisil ding ahi. Amah nitaklam dong a sianglou ahi ding hi. 23 A lupna hiam, a tutna hiam bang peuh hita leh, mi khat peuh in a lawnkhak leh a lawngkha mi a nitak lam dongin a sianglou ahi ding hi. 24 Pasal in amah a luppih a, a sineih siluang in amah a sukkhak leh, tua pasal ni sagih sung a sianglou ahi ding a, a lupna peuhmah zong a sianglou a suak ding hi. 25 Numei in a sineih ngeina bang hilou, khatvei thu-a ni tampi sung si pawt a neih chiangin, ahih kei leh, a sineih ngei sung sanga sawt zaw sipawt a neih chiangin, a sineih ngeina sung bang mahin, tua sipawt a neih sung teng, amah a sianglou ahi ding hi. 26 Tua bang sipawt a neih sunga a lupna peuhmah, a sineih ngeina sunga bang mahin, a sianglou a suak ding hi. Tua bang mahin a tutna peuhmah zong a sianglou a suak ding hi. 27 Tuate lawngkha peuhmah a sianglou a suak ding a, tua bang mi in a puansilhte a sawp ding a, tuia a kisil ding ahi. Nitaklam dong a sianglou ahi ding hi. 28 A thilpawt apan siansuah ahih chiangin, ni sagih a sim ding a, tua nungin a sianga ngaih ahi ding hi. 29 A ni giat ni-in, vakhu nih hiam, ahih kei leh kawl vakhu nou nih, Kihoupihna Puanbuk lutna ah, siampi kiang ah a hon tawi ding ahi. 30 Siampi in tua vasa khat, khelhna thillatin a lan ding a, a dang khat pen, haltum thillatin a lan ding ahi. Hibangin, a thilpawt hanga sianlouhna tawh kisaiin, siampi in amah adingin, Tangtawn Toupa' mai ah khuhna a bawlsak ding ahi.

Thilpawt tawh kisai Dan Thiltup

31 Amaute laka ka tenna mun ninsak a, a sianlouhna ua a sih louh nading-un, amaute a ninsak thei thil peuhmah apan Israelte na kisehtuam ngei ngei ding uh ahi, chi un, a chi hi. 32 Hiai dante, sa apan thilpawt mi ading, bawtui pawta a sianglou suak mi khat peuh ading, 33 khateng sineih nei numei ading, pasal hi-in, numei hita leh, sa apan thilpawt nei mi ading leh, a siangloua ngaih numei luppih pasal ading ahi.

Siampilaibu 16

Khelhna Khuhna Ni

1 Aron' tapa nihte'n Tangtawn Toupa a va naih ua, a sih nungun, Tangtawn Toupa'n Mosi a houpih hi. 2 Tangtawn Toupa'n Mosi kiang ah: Na sanggampa Aron hilh inla, puanzak liah a, tua thukhun singkuang tung sin, Khelhna khuhna sin maia Mun Siangthoupen sung ah a ut hun peuhin lut mawk mawk kei hen, tua chilouin zaw a si mahmah ding hi. Ahang bel, tua khelhna khuhna sin tunga meipi laka kei hong kihil ka hi. 3 Mun Siangthou sunga Aron a lut ding dan hibang ahi: Khelhna thillat ding bawngtaltuai khat leh haltum thillat ding belamtal khat kengin a lut ding ahi. 4 Puan malngat tungsilh tuai, a zeka siangthou a silh ding ahi. Puan malngat duang a vet ding a, puan malngat dialkhip a khim ding ahi. Hiaite puansilh a zeka siangthou ahi. Hiaite a silh main, tuiin a kisilsiang ding ahi. 5 Israel mite lak apanin khelhna thillat ding keltal nih leh haltum thillat ding belamtal khat a la ding ahi.

Thillat Dingte

6 Aron in ama' ading leh a innkawte adinga khelhna khuhna bawl nadingin, ama' aituam khelhna thillat dingin, tua bawngtal a lan ding ahi. 7 Tua khit chiangin, tua keltal nihte a la ding a, Kihoupihna Puanbuk lutna ah, Tangtawn Toupa' mai ah, a kai ding ahi. 8 Tua keltal nihte tung ah ai a san ding a, ai khat Tangtawn Toupa' ading ahi ding a, ai dang khat pen thuaksik thuak kei ading ahi ding hi. 9 Aron in tua Tangtawn Toupa' adinga ai a tukna kei pen a la ding a, khelhna thillatin a lan ding ahi. 10 Thuaksik thuak kei adinga ai a tukna kei pen bel, Tangtawn Toupa' mai ah, a hingin hon kai ding ahi. Tua bel, tua kei pen thuaksik thuak kei hisak a, gamdaia kha mangin, khelhna khuhna bawlnain a kizang ding ahi.

Siampi ading Khelhna Khuhna

11 Aron in ama' aituama khelhna thillat dingin, tua bawngtal hon kai ding ahi. Tua bel, amah leh a innkawte adinga khuhna bawlsak nading ahi ding hi. Tuachi-in, ama' aituam khelhna thillat dingin, tua bawngtal a gou ding ahi. 12 Tangtawn Toupa' maia maitam apan meiam kila-a hihdim, gim namtui kuangdai leh gim namtui gawivui nei dimdem khutdim nih a la ding a, puanzak liah ah a lutpih ding ahi. 13 Tua ah, Tangtawn Toupa' mai ah, tua meiamte tung ah, gim namtui vui a buak ding a, tua gim namtui khu in Theihpihna singkuang tunga khelhna khuhna sin a liah ding a, tuachi-in, amah a si kei ding hi. 14 Tua bawngtal sisan bangzah hiam a la ding a, a khuttalin tua khelhna khuhna sin tung leh mai a theh ding ahi. Tua khit chiangin, a khuttalin khelhna khuhna sin mai zawn ah sagih vei a theh ding ahi.

Kihoupihna Puanbuk ading Khuhna

15 Tua khit chiangin, mipite adinga khelhna thillat dingin, tua keltal a gou ding a, puanzak liah ah a sisan a lutpih ding a, bawngtal sisan ahih bangbangin, tua sisan a hih ding ahi. Khelhna khuhna sin tung leh mai a theh ding ahi. 16 Israelte' sianlouhna leh helna, a khelhna uh bang teng hita leh, tuate hangin, hibangin Mun Siangthoupen adingin siansuahna a bawlsak ding ahi. 17 Mun Siangthoupena siansuahna bawl dinga, Kihoupihna Puanbuk sunga Aron a lut apan, ama' ading, a innkawte ading leh Israel mipi khempeuh adinga khelhna khuhna bawlkhin a, a hong pusuah kik mateng, Kihoupihna Puanbuk sung ah kuamah a om ding ahi kei hi. 18 Tua khit chiangin, hong pusuak ding a, Tangtawn Toupa' maia maitam a naih ding a, tua maitam adingin siansuahna a bawl ding ahi. Tua bawngtal sisan bangzah hiam leh kei sisan bang zah hiam a la ding a, tua maitam kite ah a tat kimvek ding ahi. 19 Israelte' sianlouhna apan tua maitam siansuaha, sehtuam siangthou hisak ding a, ama'n tua sisan khuttala lain, maitam tung sagih vei a theh ding ahi.

Mipite ading Khuhna

20 Aron in Mun Siangthoupen, Kihoupihna Puanbuk leh maitam adinga siansuahna a bawl khit chiangin, a hing lai kei pen hon kai ding ahi. 21 Tua a hing lai kei lutung ah a khut lang nih a nga ding a, a tung ah Israelte' gitlouhna leh helna-a khelhna khempeuh a pulak ding a, tua kei lutung ah a nga ding ahi. Tua nasem dinga seh mipa khuta pekhiain, tua kei gamdai ah a khamang ding ahi. 22 Tua mipa'n tua kei gamdai kuamah om louhna mun ah a khamang ding a, tua kei in amaute' khelhna khempeuh a pawmang ding hi. 23 Tua khit chiangin, Aron, Kihoupihna Puanbuk sung ah a lut ding a, Mun Siangthoupen sung a lut ma-a a silh tua a puan malngat puansilhte a suahkhe ding a, tua ah a nuse ding ahi. 24 Mun siangthou khat ah, tuiin a kisil ding a, a puansilh ngeinate a silh ding ahi. Tua khit chiangin, hong pusuak ding a, ama' ading leh mipite adinga khuhna bawl dingin, ama' ading haltum thillat, mipite ading haltum thillat a lan ding ahi. 25 Khelhna thillat thau zong maitam tung ah a haltum ding ahi. 26 Tua thuaksikthuak kei va khahpa'n a puansilhte a sawp ding a, tui-a a kisil ding ahi. Tua nungin, giahphual sung a lut thei ding hi. 27 Tua khelhna thillat ding bawngtal leh kei, khelhna khuhna bawl nadinga a sisan Mun Siangthoupen sunga kitheh, giahphual pawlama puakkhiak a, a vunte, a sate leh a ek haltum ding ahi. 28 Tua a haltumpa'n a puansilhte a sawp ding a, tuia a kisil ding ahi. Tua nungin, giahphual sung a lut thei ding hi.

Khuhna Ni Thiltup

29 Hiai noute adinga a omden ding thuseh ahi; A kha sagihna, a ni sawm ni-in, noute na kizangsak ding uh a, nna himhim na sem ding uh ahi kei hi  a gama piang hi-in, gamdang mi na lak ua tengte hita leh, kuama'n nna a sem ding ahi kei hi. 30 Ahang bel, hiai ni-in, noute' kisiansuah nadingin, noute adingin khuhna kibawl ding ahi. Tua khit chiangin, Tangtawn Toupa' mai ah, noute na khelhnate khempeuh uapan na siang ding uhi. 31 Sabbath khawlni ahi a, noute na kizangsak ding uh ahi. A omden ding thuseh ahi. 32 Thaunilhsa leh namkipsa siampi, siampilian nasem dinga a pa' thakhengpa in khelhna khuhna a bawl ding ahi. Ama'n puan malngat puansilh a zeka siangthoute a silh ding a, 33 Mun Siangthoupen ading, Kihoupihna Puanbuk ading leh maitam ading, tua baan ah, siampite ading leh mipite khempeuh adingin khuhna a bawl ding ahi. 34 Hiai noute adinga a omden ding thuseh ahi. Israelte' khelhnate khempeuh adingin kum khatin khatvei khuhna a kibawl ding ahi, a chi hi. Tangtawn Toupa'n Mosi thu a piak bangin, a kihih hi.

Siampilaibu 17

Thillat Latna Mun

1 Tangtawn Toupa'n Mosi a houpih a: 2 Aron leh a tapate leh Israelte khempeuh kiang ah thu gen inla: Tangtawn Toupa' thupiak hiai ahi: 3 Giahphual sung hiam, a pua hiama bawngtal, belamnou, ahih kei leh, kei lan Israel mi khat peuh in, 4 Tangtawn Toupa' biakbuk maia, Tangtawn Toupa' maia lat dinga Kihoupihna Puanbuk lutna a hon kai ahih kei leh, tua mipa, sisan suah a mawha ngaih ahi ding hi. Amah sisan suah ahi a, a mite lak apan satkhiak ngeingei ding ahi. 5 Tua bel, Israelte'n tu-a gampalak peuha kithoihna a bawlte uh, Tangtawn Toupa' maia hon kaih ding uh deihna ahi. Amaute'n tua kithoihna thillatte siampi' maia hon kaih ngeingei ding uh ahi. Tua bel, Tangtawn Toupa' mai ah, Kihoupihna Puanbuk lutna ah, lemna thillata a lat ding uh ahi, chihna ahi. 6 Siampi in tua thillat sisanin Kihoupihna Puanbuk lutna ah, Tangtawn Toupa' maitam a theh ding a, Tangtawn Toupa' lungkimna gim namtui hi dingin, a thaute a haltum ding ahi. 7 Amaute a kizuakna uh kei limte mai ah, kithoihnate himhim a lan nawn ding uh ahi kei hi. Hiai amaute leh a suante uh adinga omden ding thuseh ahi, chi in. 8 Amaute kiang ah: Israel mi khat peuh hi-in, amaute laka teng gamdang mi khat peuh hita leh, haltum thillat hiam, kithoihna hiam, 9 Tangtawn Toupa' maia lan dinga Kihoupihna Puanbuk lutna-a hon tawi lou peuhmah a mite lak apan satkhiak ding ahi, chi in.

Sisan Zatna Dan

10 Israel mi khat peuh hi-in, amaute laka teeng gamdang mi khat peuh hita leh, sisan ne peuhmah  tua banga sisan ne mi peuhmah tung ah ka maigum ding a, a mite lak apan ka satkhe ding hi. 11 Ahang bel, ganhing peuhmah hinna a sisana om hi a, noute ading maitam tunga khelhna khuhna bawl nadinga kon piak sisan ahi. Mihing' hinna tatna bawlna sisan ahi. 12 Tua bang ahih manin, Israelte kiang ah: Na lak ua kuamah in sisan na ne thei kei ding uh, na lak ua teeng gamdang mi in zong sisan a ne thei kei ding, ka chi ahi. 13 Israel mi khat peuh hi-in, na lak ua teeng gamdang mi hita leh, nek siang gamsa hiam, vasa hiam a mat aleh, a sisan a kaikangsak ding a, leivui a vuk ding ahi. 14 A hang bel, ganhing hinna a sisana om ahi. Hiai hang ahi, Israelte kiang a: Ganhing hinna a sisan ahih manin, ganhing sisan na ne ding uh ahi kei, sisan ne peuhmah satkhiak ahi ngeingei ding, ka chih. 15 Gam sunga piang khat peuh hi-in, gamdang mi hita leh, ganhing sisa hiam, gamsa thahsa ne mi peuhmah in a puansilhte a sawp ding a, tuia a kisil ding ahi. Nitaklam dong a siangloua ngaih ahi ding a, tua khit chiangin a siang ding. 16 Ahihhangin, a puansilhte a sawp kei a, tuia a kisil kei leh, mawh a paw ding, chi in, a chi hi.

Siampilaibu 18

Lupkhawmna Sianglou tawh kisai Dante

1 Tangtawn Toupa'n Mosi a houpih a: 2 Israelte kiang ah thu gen inla: Kei Tangtawn Toupa na Pathian uh ka hi. 3 Na vakhualtamna uh Aigupta gam mite' hih bangin na hih ding uh ahi kei. Kon pilut nading Kanan gama a hih bangun na hih ding uh ahi sam kei. Amaute' gamtat zui kei un. 4 Ka dan piakte na zui ngeingei ding uh ahi. Ka thusehte zui dingin pilvang un. Kei Tangtawn Toupa na Pathian uh ka hi. 5 Ka thusehte leh dan piakte zui un. Hiaite zui mi peuhmah hiaite tungtawnin a nungta ding ahi, kei Tangtawn Toupa ka hi. 6 Kuamah in luppih dingin tanau nai a naih ding ahi kei. Kei Tangtawn Toupa ka hi. 7 Na nu luppihin na pa na zahlaksak ding ahi kei. Amah na nu ahi, luppih ken. 8 Na pa' zi luppih ken, tua in na pa zahlaksak ding ahi. 9 Na pa' tanu hiam, na nu' tanu hiam, innsung khata na pianpih hi-in, mun danga piang hita leh, tua na sanggam nu luppih ken. 10 Na tapa' tanu hiam, na tanu' tanu hiam luppih ken, na zahlakna ahi ding hi. 11 Na pa' zi' tanu, na pa' suan luppih ken, na sanggamnu ahi. 12 Na pa' sanggamnu luppih ken, na pa' tanau nai ahi. 13 Na nu' sanggamnu luppih ken, na nu' tanau nai ahi. 14 Luppih dinga na pa' sanggampa' zi naihin na pa zahlaksak ken. Amah na nungak ahi. 15 Na tapa' zi luppih ken. Na tapa' zi ahi. Amah tawh lumkhawm kei un. 16 Na sanggampa' zi luppih ken, na sanggampa zahlaksak na hi ding hi. 17 Numei khat leh a tanu luppih tuaktuak ken. Tua nu' tapa' tanu hiam, a tanu hiam luppih ken. Amaute kitanau nai ahi uh. Tua bang gamtat gilou ahi. 18 Na zi dam sungin, a sanggam nu tawh neikhawmin luppih ken. 19 Numei khateng sineih neia a sianlouh sungin, luppih dingin naih ken. 20 Na innvengpa' zi ang kawm kenla, nang leh nang kininsak ken. 21 Na tate kuamah Molekh kianga lat dingin pe ken. Na Pathian' min ninsak ding na hi. Kei Tangtawn Toupa ka hi. 22 Numei luppih bangin pasal luppih ken, thil kihhuai ahi. 23 Ganta khat peuh luppihin nang leh nang kihihnin ken. Ganta tawh lumkhawm dingin numei a kipe ding ahi kei. Tatsiatna ahi. 24 Na mai ua ka hawlkhiak dingte hibanga gamta-a, kihihnin uh ahih manin, hibangte peuhmahin noute kihihnin kei un. 25 A gam nangawn hihnit ahi a, tua gam a khelhna hangin ka gawt a, a sunga teengte a lawkhia hi. 26 Ahihhangin, noute'n zaw ka thusehte leh ka dan piakte na zuih ding uh ahi. Gam sunga piang hi-in, na lak ua teeng gamdang mite hita leh, kuama'n hibang thil kihhuai na hih ding uh ahi kei hi. 27 Na mai ua gama teengte'n hibangte a hih uh a, a gam hihnitin a om hi. 28 Gam na hihnit uleh, na mai ua namte a luakkhiak bangin, noute zong hon lawkhe ding ahi. 29 Hibang thil kihhuai hih mi peuhmah, tua bang mite peuhmah a mite uh lak apan satkhiak ahi ngeingei ding uhi. 30 Ka ngiatte hih unla, nong pai ma ua kihhuai tatdan ngeina a neihte uh khat beek zui kei unla, tuatein kihihnin kei un. Kei Tangtawn Toupa na Pathian uh ka hi, chi-in gen in, a chi hi.

Siampilaibu 19

Khawtang ading Dante

1 Tangtawn Toupa'n Mosi a houpih a: 2 Israel kikhawmte khempeuh kiang ah thu gen inla, Tangtawn Toupa'n: kei Tangtawn Toupa na Pathian uh ka siangthou bangin siangthou un. 3 Noute kuapeuh in a nu leh a pa a zah ding ahi. Ka Sabbathte na tan ding uh ahi. Kei Tangtawn Toupa na Pathian uh ka hi. 4 Milimte lam ah kihei nawn kei unla, sunthawh sikin zong pathiante kibawl kei un. Kei Tangtawn Toupa na Pathian uh ka hi. 5 Tangtawn Toupa' maia lemna thillat na lat chiangun, noute taanga a kisan theih nading dana na lat ding uh ahi. 6 Na lat ni-un hiam, a zing chiangin hiam, a sa a kinek ding ahi. A ni thum ni chianga a vai om peuhmah haltum ding ahi. 7 A ni thum ni-a a kinek leh, a sianglou ahi a, a kisang kei ding hi. 8 Tua bang ne mi peuhmah in Tangtawn Toupa a siangthoupa siangthoulousak ahih manin, mawhkhuksak ahi ding hi. Tua bang mi, amaute lak apan satkhiak ahi ding ahi. 9 Na lou ua buh na lak chiangun, na lou nawl dong uh la kei un, ahih kei leh, a sang zong khawm kei un. 10 Na grephuan uah zong a sang zong kei un, ahih kei leh, a pulhte zong tawm kei un. Mizawngte leh gamdang mite adingin siit un. Kei Tangtawn Toupa na Pathian uh ka hi. 11 Gu ken. Zuau gen ken. Kikhemtuah kei un. 12 Zuauthu-a ka mina kichiamin na Pathian' min ninsak ken. Kei Tangtawn Toupa ka hi. 13 Na veeng na pam khem kenla, lok ken. Sum thalawh mi' thaman zan khat zong hen ken. 14 Nangongte hamsiat kenla, mittawte' mai ah kisuih na'ng koih ken. Na Pathian lau in. Kei Tangtawn Toupa ka hi. 15 Thudika thukhen kaikawi kenla, mizawngte lam ah thukhenna leisak kenla, miliante lah deihsak tuam ken. Na veeng na pam tung ah thutangin vai hawm in. 16 Na mite lak ah gensiatna thu leengsak ken. Na veeng na pam' hinna thawmhausak dingin bangmah hih ken. Kei Tangtawn Toupa ka hi, 17 Na lungsung ah na sanggampa mudah ken. Na veeng na pam a langtangin taihilh in, tua hi leh, a khelhna ah na kihel kei ding. 18 Phu la ken. Na mite laka kuapeuh tung ah lungkimlouhna paai ken. Nang na ki -it bangin na veeng na pam it in. Kei Tangtawn Toupa ka hi. 19 Ka thusehte zui in. Ganta chi tuam kibahsak ken. Na lou ah khaichi chi nih pawikhawm ken. Khau chi tuam nih kigankhawm puan silh ken. 20 Pasal khat peuh in sila nungak, midang tawh kikhamsa, ahihhanga tat nai louh, ahih kei leh, noplenna ngah nailou, a luppih leh gawtna a kituak piak ding ahi. Ahihhangin, ama'n noplenna ngah nailou ahih manin, amaute thah ding ahi kei uhi. 21 Pasal pen in bel, Tangtawn Toupa' maia mawhna thillat dingin, Kihoupihna Puanbuk lutna ah, belamtal khat hon kaih ding ahi. 22 Tua mawhna thillat belamtalin siampi in amah adingin, khelhna a na hihtak tawh kisaiin, Tangtawn Toupa' mai ah khuhna a bawlsak ding ahi. Tuachi-in, a khelhna ngaihdam ahi ding hi. 23 Tua gam na lut chiang ua, theikung bangpeuh na suan chiangun, a gah pen a sianglouin ngai un. Kum thum sung tua bangin, a sianglouin na ngai ding uh a, 24 a kum lina ah a gah khempeuh a siangthou, Tangtawn Toupa' maia phatna thillat ahi ding ahi. 25 Ahihhangin, a kum ngana ah, a gah na ne thei ding uhi. Hibangin, na sep gah uh a pung ding hi. Kei Tangtawn Toupa na Pathian uh ka hi. 26 Sa peuhmah a sisan tawh na nekhawm ding uh ahi kei hi. Aisan ching kei unla, bum zong ching kei un. 27 Na sam uh haizek tan ah met kei unla, na khamul uh zong sumkhe sam kei un. 28 Misite hangin na sa uh kiatkeh kei unla, ahih kei leh, na sa tung uh gelhgial kei un. Kei Tangtawn Toupa ka hi. 29 Na tanute uh kizuaka bawlin thanghuaisak kei un. Tua a hih kei leh, gam pen kizuak a suak ding a, gitlouhna tawh a kidim ding hi. 30 Ka Sabbathte tang unla, ka mun siangthou zah un. Kei Tangtawn Toupa ka hi. 31 Dawi zawlte lam ah awn kei unla, aisansiamte naih kei un. Amaute'n hon ninsak ding uhi. Kei Tangtawn Toupa na Pathian uh ka hi. 32 A teekte' maia na om chiangun, ding unla, upate zahna pia un. Tua bangin na Pathian uh zah un. Kei Tangtawn Toupa ka hi. 33 Na gam ua gamdang mi tawh na tenkhawm chiangun, amah mawkbawl kei un. 34 Na kiang ua teng gamdang mi, gamdanga piang bangin en kei un. Nang na ki it bangin amah it in. Ahang bel, noute zong Aigupta gam ah gamdang mi, mikhualin na om uhi. Kei Tangtawn Toupa na Pathian uh ka hi. 35 Sau dan, gik dan, ahih kei leh, tam dan na teh chiangun, tehna diklou zang kei un. 36 Tehna dik, bukna dik, ephah dik leh hin dik zang un. Kei Aigupta gam apan noute hon piikhia, Tangtawn Toupa na Pathian uh ka hi, ka thusehte khempeuh leh ka dante khempeuh kem unla, zui un, chi ahi, chi in, a chi hi.

Siampilaibu 20

Molekh Bete Gawtna

1 Tangtawn Toupa'n Mosi a houpih a: 2 Israelte kiang ah: Israelte khat peuh, ahih kei leh, Israel gama teeng gamdang mi khat peuh, a tate Molekh kianga pe peuhmah thah ding ahi. Mipite'n suangin amah a denglum ding uh ahi. 3 Ke'n tua bang mi tung ah ka mai ka gumsak ding a, a mite lak apan ka satkhe ding hi. Ahang bel, ama'n a tate Molekh kianga pia a, ka mun siangthou ninsak a, ka min siangthou ninsak hiven. 4 Tua bang mi in a tate Molekh kianga a piak laia mipite tua mu lou dinga a mitsin uh a, amah a thah kei uleh, 5 ke'n tua mipa leh a innkawte tung ah ka mai ka gumsak ding a, amah leh Molekh kianga kizuak dinga amah zuite, a mite uh lak apan ka satkhe ding hi.

Dawi aisan Gawtna

6 Dawizawlte leh aisansiamte lama awn a, amaute zui dinga kizuak mi tung ah ka mai ka gumsak ding a, a mite lak apan ka satkhe ding hi. 7 Kei Tangtawn Toupa na Pathian uh a siangthou ka hih manin, noute a siangthoua sehtuamin kibawl unla, siangthou un. 8 Ka thusehte lenkip unla, zui un. Kei noute hon hihsiangthoupa Tangtawn Toupa ka hi. Nu leh Pa Hamsiatte Gawtna 9 Mi khat peuh in a nu hiam, a pa hiam, a hamsiat leh, amah thah ngeingei ding ahi. A nu hiam, a pa hiam a hamsiat manin, a sisan mawh ama' lutung a tu ding hi.

Angkawmna Gawtna

10 Pasal khat peuh in midang, a veng a pam zi' ang a kawm leh angkawmpa leh angkawmnu thah ding ahi. 11 Pasal khat peuh in a pa' zi a luppih leh, a pa a zahlaksak ahi. Tua mipa leh tua numei thah ding ahi. A sisan mawh uh amau' lutung a tu ding hi. 12 Pasal khat peuh in a tapa' zi a luppih leh, a nih ua thah ding ahi. A thilhih uh tatsiatna ahi. A sisan mawh uh amau' lutung a tu ding hi. 13 Pasal khat peuh in, numei luppih banga pasal mah a luppih leh, a nih ua tatsia ahi uhi. A nih un thah ding ahi. A sisan mawh uh amau' lutung a tu ding hi. 14 Pasal khat peuh in, numei khat peuh a tanu tawh a kitenpih leh, gitlouhna ahi. Na lak ua gitlouhna a om louh nadingin, amah leh amaute meia hallup ding ahi. 15 Pasal khat peuh in, ganta a luppih leh, amah thah ding ahi. Tua ganta zong thah ding ahi. 16 Numei khat peuh in, luppih dinga ganta a naih leh, tua numei leh tua ganta that un. Amaute thah ngeingei ding ahi uhi. A sisan mawh uh amau' lutung a tu ding hi. 17 Pasal khat peuh in, a sanggamnu a pa' tanu hiam, a nu' tanu hiam hita leh a kitenpih a, a lupkhawm uleh, zahlakna ahi. A mite uh mitmuh apan satkhiak ding ahi uhi, Tua pasal in a sanggamnu zahlaksak ahi a, mawh khuksak ahi ding hi. 18 Pasal khat peuh in, numei a khateng sineih a neih laia a luppih leh, a si luanna nak phoulak ahi a, tua numei in zong phoulak ahi. A nih-un a mite uh lak apan satkhiak ding ahi uhi. 19 Na nu' sanggamnu hiam, na pa' sanggamnu hiam na luppih ding ahi kei. Tua in na sanggam nai zahlaksak ahi ding hi. Na nih-un mawh khuksak na hi ding uhi. 20 Pasal khat peuh in, a nungak a luppih leh, a pa' sangampa zahlaksak ahi. A nih un a khelhna uh khuksak ahi ding uh a, suan leh khak beiin a om ding uhi. 21 Pasal khat peuh in, a sanggampa' zi a kitenpih leh, sianlouhna thilhih ahi. A sanggampa a zahlaksak ahi. A nih un suan leh khak beiin a om ding uhi.

Hihsiangthoua Sehtuamna in a Thiltup

22 Ka thusehte leh ka dan piakte khempeuh lenkipin zui un. Tuachi-in, na luah ding ua kon piilutna gam in hon lawkhe kei ding hi. 23 Noute maia ka hawlkhiak ding namte tatdan ngeinate na zui ding uh ahi kei. Amaute'n hiai thilte khempeuh a hih manun, amaute ka kih ahi. 24 Ahihhangin, noute kiang ah bel: Amaute' gam na tang ding uh. Ke'n tua nawitui leh khuaizu-a luang gam na goutan dingun kon pe ding, ka chi hi. Kei namte lak apan noute hon septuampa Tangtawn Toupa na Pathian uh ka hi. 25 Tua bang ahih manin, ganhing siang leh sianglou na khen kak ding uh a, vasa siang leh sianglou na khenkak ding uh ahi. Noute adingin a sianglou chi-a ka khenkhiak tua bang ganhing, vasa, ahih kei leh, leia bokvaktein kihihnin kei un. 26 Kei Tangtawn Toupa a siangthou ka hih manin, noute a siangthou na hih ding uh ahi. Noute keia hi dingin, namte lak apan kon sehtuam na hi uhi. 27 Na lak ua dawizawl, ahih kei leh, aisansiam, pasal hi-in numei hita leh, thah ding ahi, Tua bang mite na denlup ding uh ahi. A sisan mawh uh amau lutung a tu ding hi, chi in, a chi hi.

Siampilaibu 21

Siampite tawh kisai Dante

1 Tangtawn Toupa'n Mosi a houpih a: Siampite, Aron' tapate kiang ah thu gen inla: Siampi in a mite laka misi khat peuh hangin, a siangloua ngaihin a kibawl ding ahi kei hi. 2 A tanau, a nu hiam, a pa hiam, a tapa hiam, a tanu hiam, a sanggampa hiam, 3 pasal nei nailou a sanggamnu hiam ama' vaksa a hih leh bel, a sianglouin a kibawl thei ding hi. Tua sanggamnu'n pasal neilou a hih manin, ama' adingin bel, a sianglouin a kibawl thei ding hi. 4 Kitenna hanga a kitanaupih mi adingin bel, a sianglouin a kibawl ding ahi kei hi. 5 Siampite'n a sam uh a metmai ding uh ahi kei a, a khamul uh zong a mettom ding uh ahi kei a, a satung uh zong a at keh ding uh ahi kei hi. 6 A Pathian uh adingin a siangthou ding uh ahi a, a Pathian uh' min a ninsak ding uh ahi kei hi. Tangtawn Toupa' maia meia thillatte, a Pathian uh' an laan ahih manun, amaute a siangthou ding uh ahi. 7 Siampite bel, Pathian adinga siangthou ahih manun, kizuaka kihihnin hiam, maksa numeite hiam, a kitenpih ding uh ahi kei hi. 8 Amaute'n na Pathian uh an lan a hih manun, amaute siangthoua na ngaih ding uh ahi. Kei Tangtawn Toupa a siangthou ka hih manin, amaute a siangthouin ngai un. Kei noute a siangthoua hon bawlpa ka hi. 9 Siampi' tanu kizuaka, a kihihnit leh, a pa a zahlaksak ahi. Tua bang numei meia hallup ding ahi.

Siampiiian tawh kisai Dante

10 A sanggampate laka siampiliana pang, a luzanga sathau kisung a, thaunilhna tang, siampi puansilhte silh dinga namkip pen in, a lukhu a lakhe ding ahi kei a, a puansilhte zong a botkek ding ahi kei hi. 11 Misi luang khat peuh omna ah a lut ding ahi kei. A pa hiam, a nu hiam nangawn hangin zong a sianglouin a kibawl ding ahi kei hi. 12 Amah a Pathian' thaunilhna tungtawna kinamkip ahih manin, a Pathian' mun siangthou a nuse ding ahi kei hi. Nin zong a ninsak ding ahi kei hi. Kei Tangtawn Toupa ka hi. 13 Numei a kitenpih zong nungak siangthou ahi ding ahi. 14 Meigong a kitenpih ding ahi kei a, maksa numei hiam, ahih kei leh, kizuaka kihihnin numei a kitenpih ding ahi kei. Ama' mite laka nungak siangthou kia a kitenpih ding ahi. 15 Tuachi-in, a mite lak ah, a suan a khakte a ninsak kei ding hi. Kei amah hihsiangthoupa Tangtawn Toupa ka hi, chi in, a chi hi.

Siampi Nasem Theilou Mite

16 Tangtawn Toupa'n Mosi a houpih a: 17 Aron kiang ah thu gen inla: Hong tung ding khangsawn sawnte lak ah zong, na suan na khakte laka melhemna nei mi peuhmah in a Pathian' an lan dingin hon naih ding ahi kei hi. 18 Melhemna nei kuamah, a mittaw hiam, a khebai hiam, a mei kisia hiam, poihlong hiam kuamah in hon naih kei hen. 19 Khe kitan hiam, khut kitan hiam, 20 ahih kei leh, nungkul hiam, neupian tuam hiam, mit sia hiam, meima dam theilou tuikai huphup hiam, chiltang kitam hiam kuamah in thillan dingin hon naih kei hen. 21 Siampi Aron' suan, melhemna nei kuamah in Tangtawn Toupa' maia meia thillat dinga kisa dingin hon naih ding ahi kei. Melhemna nei ahi a, a Pathian' an lan dingin hon naih ding ahi kei hi. 22 A Pathian an siangthoupen leh an siangthou bel a ne thei ding. 23 Ahihhangin, a melhemna hangin, puanzak kaanin a lut ding ahi kei a, maitam zong a naih ding ahi kei hi. Tua banga paiin ka mun siangthou a ninsak ding ahi kei. Kei tuate hihsiangthoupa Tangtawn Toupa ka hi, chi in, a chi hi. 24 Tuachi-in, Mosi in Aron leh a tapate leh Israelte khempeuh kiang ah tua bangin thu a gen hi.

Siampilaibu 22

Siampi' Hih Siangthou

1 Tangtawn Toupa'n Mosi a houpih a: 2 Aron leh a tapate hilh inla, Israelte'n ka maia thillat siangthou, kei adinga seh siangthou a latte uh zahtak takin sai uhen. Ka min siangthou a hihnin kha ding uhi. Kei Tangtawn Toupa ka hi. 3 Amaute kiang ah gen inla: Khangsawn sawn dongin, na suan na khakte uh laka khat peuh, siangloua ngaih a om a, tua bang mi in, Israelte'n Tangtawn Toupa adinga a sehtuam uh thillat siangthou a naih leh, ka mai apan amah satkhiak ding ahi. Kei Tangtawn Toupa ka hi. 4 Aron' suan leh khak khat peuh in, kilawh theih vun natna a vei leh, ahih kei leh, sa-a thilpawt a neih leh, amah siansuah ahih mateng, thillat siangthoute a ne thei kei ding hi. Siluang in a nitsak thil a lawnkhak leh, ahih kei leh, bawtui pawt in a nitsak thil a lawnkhak leh, amah zong a sianglou a suak ding hi. 5 Ahih kei leh, amah sianglou suaksak thei, bokvak ganhing a lawn khak leh, bangchi bang sianlouhna na hita leh zong, amah a sianglou a suak ding hi. 6 Tua bang thil lawngkhapa pen, nitaklam dong a sianglou ahi ding. Amah tuia a kisil masak kei leh, thillat siangthoute a ne ding ahi kei hi. 7 Ni a tum chiangin, amah a siang ding. Tua nungin, thillat siangthoute a ne thei ding, ama' an hiven. 8 A sisa a kimu thil peuhmah, ahih kei leh, gamsate' thahsa ganhing hiam, a ne ding ahi kei a, tua bang nein sianglou a kisuaksak ding ahi kei. Kei Tangtawn Toupa ka hi. 9 Siampite'n ka thil ngiatte simmawh taka saia, khelhna hanga a sih louh nadingun, ka ngiat bangbanga a hih ding uh ahi. Kei amaute hihsiangthoupa Tangtawn Toupa ka hi. 10 Siampi innkuan sung pawlam mi kua mah in thillat siangthou a ne ding ahi kei. Siampi' inn-a om mikhual hiam, a inna sum thalawha nasem mi in zong a ne ding ahi kei hi. 11 Ahihhangin, siampi in suma a lei sila khattou hiam, ahih kei leh, a innsunga piang sila in bel siampi an a ne thei ding. 12 Siampi' tanu in, siampi hilou midang a kitenpih leh, a zek thilpiakte khat beek a ne thei kei ding. 13 Ahihhangin, siampi' tanu meigong hong suak hiam, a pasal mak hiam a hih a, tate neiloua a nungak lai mah banga a pa' inn-a om dinga hong nawkik ahih leh, a pa' an a ne thei ding hi. Ne dinga phalna nei lou mi in bel a ne thei kei ding hi. 14 Mi khat peuh in theihlouha thillat siangthou a nek khak leh, tua thillat taang tua siampi kiang ah a din ding a, a man zah seh nga suah seh khat a behlap ding ahi. 15 Israelte'n Tangtawn Toupa' maia thillat siangthou a latte uh siampite'n 16 amaute nesakin tua thil siangthoute a ninsak ding uh ahi kei. Tua bang a neksakte uh tung ah mawhna a tungsak kha ding uhi. Kei tuate hihsiangthoupa Tangtawn Toupa ka hi, chi in, a chi hi.

Saan Theihlouh Kithoihnate

17 Tangtawn Toupa'n Mosi a houpih a: 18 Aron leh a tapate leh Israelte khempeuh kiang ah thu gen inla: Na lak ua mi khat peuh in Israel mi hi-in, na lak ua teeng gamdang mi hita leh thuchiam tangtunsak nading hiam, ahih kei leh, ut thillat ding hiama Tangtawn Toupa' maia haltum thillat ding thawnpiak na piak uleh, 19 noute taanga a kisaan theih nadinga bawnghon lak apan hiam, belam leh kelhon lak apan hiama ganta a pa, genbaanglou, na piak ding uh ahi. 20 Gensiat baang himhim na piak louh ding uh ahi. Noute taanga kisaang lou ding ahi. 21 Mi khat peuh in, a thuchiam tangtunsak nading hiam, ahih kei leh, ut thillat ding, bawnghon lak apan hiam, belam leh kelhon lak apan hiam ganta hon tawi chiangin, a kisaan theih nadingin, genbaanglou leh melhemna bei ahi teitei ding hi. 22 Tangtawn Toupa' mai ah a mittaw peuh, a liamsa peuh, a poihlong peuh, chivom nei peuh, meima leh meima tui huphup nei peuh na lan ding uh ahi kei hi. Tangtawn Toupa' maia meia thillatin tua bang peuhmah koih kei un. 23 Ahihhangin, ut thillat dingin bel, bawngtal hiam, belam hiam a pianchinglou leh a poihlong zong na lan thei ding uhi. Thuchiam tangtunsak nadingin bel, a kisaang thei kei ding hi. 24 Tangtawn Toupa' mai ah ganta, a chiltang dulh hiam, a kitam hiam, a hem hiam, a ki-atkeh hiam na lan ding uh ahi kei. Na gamsung uah hibang peuhmah na hih ding uh ahi kei. 25 Gamdang mi khut apan hibang ganta saangin na Pathian uh an dingin na lan ding uh ahi kei. A piangchinglou leh a melhem ahih manun, tua bang gantate na sik na taangun a kisaang kei ding hi, chi in, a chi hi. 26 Tangtawn Toupa'n Mosi a houpih a: 27 Bawngnou hiam, belamnou hiam, kelnou hiam a suah chiangin, ni sagih sung a pi tawh a omkhawm ding ahi. A ni giat ni apanin, Tangtawn Toupa' maia meia thillat dingin a saan theih ding hi. 28 Bawng hiam, belam hiam, a nou tawh ni khat thuin na goukhawm ding uh ahi kei hi. 29 Tangtawn Toupa' maia lungdamthu genna thillat na lat chiangun, noute taanga a kisaan theih ding danin lan un. 30 Tua thillat a ni maha a nek ding uh ahi a, a zing chiang dong a vai sit louh ding ahi. Kei Tangtawn Toupa ka hi. 31 Ka thupiakte lenkip unla, zui un. 32 Ka min siangthou ninsak kei un. Israelte'n ka min a siangthouna banga a saan ding uh ahi. Kei noute hon hihsiangthoupa Tangtawn Toupa ka hi a, 33 na Pathian uh hi dingin, Aigupta gam apan hon piikhepa ka hi. Kei Tangtawn Toupa ka hi, chi in, a chi hi.

Siampilaibu 23

1 Tangtawn Toupa'n Mosi a houpih a: 2 Israelte kiang ah thu gen inla: Hiaite hunbinei ankuanglui Tangtawn Toupa' ankuanglui hunbite ahi. Hiaite kikhawmpi siangthoute hi dinga na phuan ding uh ahi.

Sabbath

3 Ni guk sung nna na sem ding uh a, ahihhangin, a ni sagih ni Sabbath khawlna ahi a, khawmpi siangthou neih ni ahi. Na nna ngeinate uh na sem ding uh ahi kei. Na teenna peuh uah, Tangtawn Toupa' Sabbath ahi.

Paikan Ankuang leh Silngou sawhlouh Tanghou

4 Hiaite Tangtawn Toupa' ankuanglui hunbite, a hun huna na phuan ding uh khawmpi siangthoute ahi: 5 Tangtawn Toupa' Paikanankuang a kha khatna, a ni sawmleli ni, khawmuia kipan ahi. 6 Tua kha, a ni sawmlenga ni-in, Tangtawn Toupa' Silngou sawhlouh Tanghou-ankuang a kipan hi. Ni sagih sung silngou sawhlouh tanghou na ne ding uh ahi. 7 A ni khat ni-in, kikhawmpi siangthou nei unla, nna sem kei un 8 Ni sagih sung Tangtawn Toupa mai ah meia thillat lan un. A ni sagih ni-in, khawmpi siangthou nei unla, na nna ngeinate uh sem kei un, chi in, a chi hi.

Gah masa Ankuang

9 Tangtawn Toupa'n Mosi a houpih a: 10 Israelte kiang ah thu gen inla: Noute kon piak ding gam na lut chiang ua, a gam gah na khop chiangun, na buhvui lak masak uh, phal khat siampi mai ah non tawi ding uh ahi. 11 Ama'n Tangtawn Toupa' mai ah tua buhphal a vei ding a, noute taangin a kisaang ding hi. Siampi in tua buhphal, Sabbath zing chiangin, a vei ding ahi. 12 Tua buhphal na vei ni-un, Tangtawn Toupa' mai ah, belamnou kum khata upa, genbaanglou khat, haltum thillatin na lan ding uh ahi. 13 Tua thillat tawh kitonin, an thillat dingin anvui nei dimdem ephah seh sawm suah seh nih, sathau tawh kihel, na lankhawm ding uh ahi. Hiai Tangtawn Toupa' maia meia thillat, a lungkimna gim namtui ahi. Tua tawh kitonin, grepzu hin khat seh li suah seh khat, dawn thillatin na lankhawm ding uh ahi. 14 Na Pathian uh maia hiai thillat na lat ni uh a tun mateng, tanghou himhim, a hih kei leh, kan thawh hi-in, an thak hita leh, na ne ding uh ahi kei. Hiai na tenna peuh ua, khangsawn sawn donga a omden ding thuseh ahi.

Nipikalte Ankuang: Pentikos

15 Sabbath zing chiang, buhphal vei thillat ni apan nipikal sagih ching sipsip sim un. 16 Sabbath sagihna chiang dong ni 50 sim unla, Tangtawn Toupa' mai ah an thak thillat lan un. 17 Na tenna mun ua panin, anvui nei dimdem ephah seh sawm suah seh nih, silngou sawh-a kiem tanghou beu nih hon tawi unla, Tangtawn Toupa' mai ah gah masa vei thillatin lan un. 18 Hiai tanghou tawh, belamnou a pa sagih, kum khata upa genbaanglou chiat tawh, bawngtaltuai khat tawh, belamtal nih tawh haltum thillatin lan un. Tangtawn Toupa' maia an thillatte leh dawn thillatte tawh latkhawm tuate haltum thillat ahi ding ahi. Meia thillat Tangtawn Toupa' lungkimna gim namtui ahi. 19 Tua khit chiangin, khelhna thillat ding keltal khat leh lemna thillat ding belamnou nih, kum khata upa tuak lan un. 20 Siampi in Tangtawn Toupa' mai ah, tua belamnou nihte vei thillatin, gah masa apan tanghou tawh, a veikhawm ding ahi. Tuate siampi adingin, Tangtawn Toupa' maia thillat siangthou ahi. 21 Tua ni mahin, khawmpi siangthou na phuang ding uh a, nna na sem ding uh ahi kei hi. Hiai na tenna peuh ua, khangsawn sawnte adinga omden ding thuseh ahi. 22 Na gam gah uh na khop chiangun, lou nawl dong khawm kei unla, buh sang nangawn zong kei un. Mizawngte leh gamdang mite adingin siit un. Kei Tangtawn Toupa na Pathian uh ka hi, chi in, a chi hi.

Pengkulte Ankuang

23 Tangtawn Toupa'n Mosi a houpih a: 24 Israelte kiang ah thu gen inla: Kha sagihna, a ni khat ni-in, tawlngakna na nei ding uh a, pengkul muta theih gige khawmpi siangthou na zang ding uh ahi. 25 Nna sem kei unla, Tangtawn Toupa' maia meia thillat lan un, chi in, a chi hi.

Khuhna Ni

26 Tangtawn Toupa'n Mosi kiang ah thu a gen a: 27 Hiai kha sagihna, a ni sawm ni Khelhna Khuhna Ni ahi. Khawmpi siangthou nei unla, noumau kizangsak unla, Tangtawn Toupa' maia meia thillat lan un. 28 Tangtawn Toupa na Pathian uh maia noute adinga khuhna kibawl ni, Khelhna Khuhna Ni ahih manin, tua ni-in nna sem kei un. 29 Tua ni-a amah kizangsak lou mi peuhmah a mite lak apan satkhiak ahi ding hi. 30 Tua ni-a nna sem peuhmah a mite lak apan ka hihmangthang ding hi. 31 Nna himhim na sem ding uh ahi kei hi. Hiai na tenna peuh ua, khangsawn sawn hong om dingte adinga omden ding thuseh ahi ding ahi. 32 Noute adinga tawlngakna Sabbath ahi a, noute na kizangsak ding uh ahi. Tua kha, a ni kua ni nitaklam apan a zingchiang nitaklam dong na Sabbath uh na tang ding uh ahi, chi in, a chi hi.

Bawktate Ankuang

33 Tangtawn Toupa'n Mosi a houpih a: 34 Israelte kiang ah thu gen inla: Kha sagihna, a ni sawmlenga ni-in, Tangtawn Toupa' Biakbukte Ankuanglui a kipan a, ni sagih sung a daih hi. 35 A ni khat ni khawmpi siangthou ahi. Nna sem kei un. 36 Ni sagih sung Tangtawn Toupa' maia meia thillatte lan unla, a ni giat ni-in khawmpi siangthou nei unla, Tangtawn Toupa' maia meia thillatte lan un. Khawmpi bei ni ahi. Nna sem kei un. 37 Hiaite a hunbi bi a ankuangluite, Tangtawn Toupa-a ahi. Tangtawn Toupa' maia meia thillatte lan dingin khawmpi siangthoute na phuan ding uh ahi. Tuate bel, nisima lat dinga ngiat haltum thillatte, an thillatte, kithoihnate leh dawn thillatte ahi. 38 Hiai thillatte bel Tangtawn Toupa' Sabbathte adinga thillatte leh na thawnpiakte uh leh na chiamsa uh khatpeuh leh Tangtawn Toupa' maia ut thillat na latte uh bana a behlapna ahi. 39 Kha sagihna, na ni sawmlenga ni apanin, gam gah na khop khit nungun, ni sagih sung Tangtawn Toupa' mai ah ankuanglui na bawl ding uh ahi. A ni khat ni tawlngakni ahi a, a ni giat ni zong tawlngakni ahi. 40 A ni khat ni-in, theikungte apan thei gah hoih hoih, tua baan ah, nisuh hiang khawng, tawsaw sawlbawk pha khawng leh muisum hiang khawng na tawi ding uh a, Tangtawn Toupa na Pathian uh mai ah ni sagih sung, nuamsain na om ding uh ahi. 41 Kumsimin, ni sagih sung, Tangtawn Toupa' mai ah ankuanglui na bawl ding uh ahi. Hiai khangsawn sawn adinga a omden ding thuseh ahi ding ahi. A kha sagihna ah hiai ankuanglui bawl un. 42 Ni sagih sung bawktate ah teeng un: Gam sunga piang Israelte khempeuh bawktatea a teen ding uh ahi. 43 Tuachi-in, na suan na khakte un, Aigupta gam apan Israelte ka piikhiak laiin, bawktate ah ka teengsak, chih a thei ding uhi. Kei Tangtawn Toupa na Pathian uh ka hi, chi in, a chi hi. 44 Tua bangin Mosi in a hunbi bi-a Tangtawn Toupa' ankuangluite Israelte kiang ah a phuang hi.

Siampilaibu 24

Meivak ading Sathau

1 Tawngtawn Toupa'n Mosi a houpih a: 2 Meivak a kuan gige theih nadingin, meivak ading a sukthawh oliv thau siang hon tawi dingin Israelte thu pia in. 3 Kihoupihna Puanbuk sunga Theihpihna puanzak pua ah, Aron in nitaklam apan a zingsang dong, Tangtawn Toupa' mai ah meivakte a kuangsak gige ding ahi. Hiai khangsawn sawnte adinga omden ding thuseh ahi ding ahi. 4 Tangtawn Toupa' maia kham sianga kibawl meivak mung tunga meivakte a kuang gige ding ahi.

Theihgigena Tanghoute

5 Anvui nei dimdem la inla, tanghou beu sawm leh nih em in. Beu khat adingin anvui ephah seh sawm suah seh nih ahi ding ahi. 6 Tuate vual nihin, vual khata guk zel, tua Tangtawn Toupa' maia, kham sianga kibawl dawhkan tung ah koih in. 7 Tua vual tegel ah gim namtui koih in. Tua tanghoute tunga theihgigena tantuan hi ding leh, Tangtawn Toupa' maia meia thillat hi ding ahi. 8 Hiai tanghou, Tangtawn Toupa' maia om gige ding, Sabbath tenga koih thak zel ding ahi. Hiai tanghou, Israelte taanga a omden ding thukhun ahi ding ahi. 9 Hiai Aron leh a tapate tan ahi a, Tangtawn Toupa' maia meia thillatte apan a tantuan gige uh laka a siangthou penpen ahi a, mun siangthou khat ah a ne ding uh ahi, chi in, a chi hi.

Pathian' Min Siangthou tawh kisai Dan

10 Hichi hong hi a, Israel numei leh Aigupta pasal' tapa khat Israelte lak ah a va hawh a, tua giahphual ah amah leh Israel pasal khat a kisual uhi. 11 Tua Israel' numei' tapa in hamsia louin, Tangtawn Toupa' min a gensia a, amah Mosi kiang ah a paipih uhi. A nu' min bel, Shelomith ahi. Shelomith bel, Dan mi Dibri' tanu ahi. 12 Amaute'n Tangtawn Toupa' deihlam a theih mateng uh, amah a khum uhi. 13 Tua khitin, Tangtawn Toupa'n Mosi a houpih a: 14 Pathian' min gensepa giahphual pawlam ah kaikhia un. Ama' kampau zate khempeuh in a lutung ah khut nga uh henla, mite khempeuh in amah suangin denglum uhen. 15 Israelte kiang ah thu gen inla: Mi khat peuh in a Pathian a hamsiat leh, a khelhna puaksak ahi ding. 16 Mi khat peuh in Tangtawn Toupa min a gensiat leh, thah teitei ding ahi. Mite khempeuh in amah suangin a denglum ding uh ahi. Gamdang mi hi-in, gam sunga piang hita leh, Tangtawn Toupa' min gensia peuhmah thah ding ahi. 17 Mi khat peuh in mihing' hinna a lak leh, amah thah ding ahi. 18 Midang' ganta' hinna la peuhmah in ditna a bawl ding ahi, hinna taanga hinna ahi ding ahi. 19 Mi khat peuh in, a veng a pam a sukliam leh, ama' hih bangbang ama' tunga hih ding ahi. 20 Guh kitan taanga guh suktan, mit taanga mit, ha tanga ha ahi ding ahi. Ama'n midang a liamsak bangbanga amah liamsak ahi ding ahi. 21 Ganta that peuhmah thah ding ahi. 22 Gamdang mi leh gam sunga piang mi adingin daan kibang na zang ding uh ahi. Kei Tangtawn Toupa na Pathian uh ka hi, chi in, a chi hi. 23 Tua khitin, Mosi in Israelte kiang ah thu a gen a, tua Pathian gensepa, giahphual pawlam ah a kaikhia uh a, suangin a denglum uhi. Tangtawn Toupa'n Mosi thu a piak bangbangin, Israelte'n a hih uhi.

Siampilaibu 25

Kum Sabbath tawh kisai Dan

1 Tangtawn Toupa'n Sinai Mual ah Mosi a houpih a: 2 Israelte kiang ah thu gen inla: Noute kon piak ding gam na lut chiangun, a gam in zong Tangtawn Toupa' mai ah Sabbath a tang ding ahi. 3 Kum guk sung na loute uah hai na pawi ding uh a, kum guk sung na grepguite uh na heuh ding uh a, a gahte na khawm ding uh ahi. 4 Ahihhangin, a kum sagihna ah bel, gam in Tangtawn Toupa' mai ah Sabbath khawlna a nei ding ahi. Na loute uah hai pawi kei unla, na grepguite uh hah kei un. 5 Amaha gahte khawm kei unla, kep louh na grep gahte uh zong khawm kei un. Gam in khawl kum a nei ding ahi. 6 Kum sabbath sunga gam in gah a suahte noute adingin an ahi ding, noute leh na sila pasalte uh leh numeite, sum thalawha nasemte leh, na lak ua hong khualtamte leh, 7 na gante uh leh, na gam ua gamsate' an ahi ding. Gam in gah a suah peuhmah an ahi ding hi.

Jubili Kum

8 Kum Sabbath sagih, kum sagih mun sagih simtou le uchin, kum 49 a pha ding hi. 9 Tua khit chiangin, a kha sagihna, a ni sawm ni-in koi peuh ah, belamki pengkul mutsak un. Khuhna Ni in na gam sung teng uah belamki pengkul mutsak un. 10 A kum 50-na sehtuam siangthou kumin bawl unla, gam sung khempeuh ah, gam sunga teengte khempeuh kiang ah, noplenna phuang un. Noute adingin Jubili ahi ding ahi. Noute tek noumau' innkaw' gam ah, noumau' behte kiang ah na kik nawn ding uh ahi. 11 A kum 50-na Jubili kum ahi ding a, noute ading ahi ding hi. Hai lah pawi kei unla, amaha poute lah a gah khawm kei unla, kep louh grep gahte lah khawm kei un. 12 Jubili ahi a, noute adinga siangthou ahi ding ahi. Na lou tui uapan piangte kia na ne ding uh ahi. 13 Hiai Jubili Kumin mi chih ama' gam neihsa ah a kiknawn ding ahi. 14 Na chi na sa khat peuh kianga bangpeuh na zuak hiam, ahih kei leh, amah apan na lei leh, kuama'n kinekna lemtanga na zat ding uh ahi kei hi. 15 Na chi na sa khat peuh apan na lei ding leh, Jubili apan a kum tam dan tuatin na lei ding ahi. Ama'n kum bang zah a gam gah kikhop lai ding hiam, chih tuatin hon zuak ding ahi. 16 A kum a tam lai leh, ama'n na khangsak ding a, a kum a tawmtak leh, a man na kiamsak ding ahi. Na kianga hon zuak pen a gam gah kikhop ding kum zah ahi lei hi. 17 Kinekna lemtangin zang kei un, na Pathian uh lau zaw un. Kei Tangtawn Toupa na Pathian uh ka hi. 18 Ka thusehte zui unla, ka dan piakte zui dingin pilvang un. Hi leh, gam ah bitin na teeng ding uhi. 19 Gam in zong gah a suah ding a, niang leh taiin na ne ding uh a, bitin na teeng ding uhi. 20 Kum sagihna-a hai pawi lou, gama gah lah khawm louin, bang ne ding ka hi ua? na chi mai thei uhi. 21 Ke'n a kum gukna ah vualzawlna kon sawl ding a, gam in kum thum kham ding gah a suah ding hi. 22 A kum giatna a, hai na pawi sungun, buhlui na ne ding uh a, a kum kuana buh lak hun dong na ne lai ding uhi, 23 Gam keia ahi a, noute gam dang mi lei, a khawhlawh lei na hih man un, a denden dingin gam na khotkhiak ding uh ahi kei hi. 24 Na gam luah teng uh gam tatkik nading kong na hong ding uh ahi. 25 Na chi na sate khat peuh hong zawng gawp a, a gam bang chia hiam a zuak leh, a tanau naipen tua gam tan dinga hong pai leh, a chi a sa' gam zuak a tan ding ahi. 26 Tua banga tatsak ding mi nei kei mah leh amah hong mavang a, tua gam tankik thei dinga hong om leh, 27 a zuakkhiak nung kum sim touin aman ding a tuat ding a, aman om lai teng, a zuakna pen kiang ah a leh ding ahi. Tua bangin, ama' gam a tankik thei ding hi. 28 Ahihhangin, dit kik nading neih leh lam a neih kei leh, tua gam pen a leipa khut ah Jubili kum a tun mateng a om ding hi. Jubili-in tua gam piak kik ahi ding a, ama' gam ah a kik thei ding hi. 29 Kulhbaang nei khawpi sunga mi khat peuh in a inn a zuak leh, a zuak kum khat sunga tat kik theihna hamphatna a nei hi. Tua sungin a tan kik thei ding hi. 30 Tua kum khat a bei ma-a a kitat kik kei leh, tua kulhbaang nei khawpi sunga inn, a leipa leh a suante'n a tangden ding uh ahi. 31 Ahihhangin, kulhbaang neilou khawtate bel, gam awnga ngaih ahi. Tat kik theih ahi ding a, tua baan ah Jubili-a piak kik ahi ding hi. 32 Levite'n, Levite' khawpite-a inn a neihte uh tat kik theih nading hamphatna a nei uhi. 33 Hiai Levite' gou neihte tat kik theih ahi. Chih bel, Levite' luah khawpite-a innte, Israelte laka a zuakte uh genna ahi. Tua zong Jubili chianga amaute kianga piak kik ding ahi. 34 Ahih-hangin, tua a khawpite ua, gantatna gamte bel zuak ding ahi kei. A neih den ding uh ahi. 35 Na chi na sate uh laka khat peuh hong zawng gawp a, noute laka a kivak zawh kei leh, na lak ua a teen lai theih nadingin, gam dang mi hiam, hong khualtam mi hiam, na huh ding zah mahun, amah huh un. 36 Na lak ua na chi na sa uh a teen theih nadingin, amah apan a pung la kei unla, na Pathian uh lau zaw un. 37 A pung delhin amah sum leitawisak kei unla, a pung delhin amah an leisak kei un. Kei na Pathian uh hi dinga, Kanan gam hon tun dinga Aigupta gam apan hon piikhepa, Tangtawn Toupa na Pathian uh ka hi. 39 Na chi na sate uh khat peuh na lak ua hong zawng gawp a, na kianga amah hong kizuakkhiak leh, sila bangin nna semsak ken. 40 Sum thalawh a nasem na goih bangin en in. Ahih kei leh, tom khat hong khualtam bangin en in. Ama'n Jubili dong na nna a sem ding hi. 41 Tua khit chiangin, amah leh a tate khahkhiak ding ahi. Amah a behte lak leh a pu a pa gam ah, a kik nawn ding ahi. 42 Israelte, Aigupta gam apan ka piikhiak ka silate ahih manun, sala zuakkhiak ding ahi kei uhi. 43 Amaute tung ah huhamtakin gamta kei unla, na Pathian uh lau zaw un. 44 Na sila pasalte uh leh sila numeite uh bel, na kim na pam ua namte lak apan na lakte uh ahi ding ahi. Amaute apan silate lei un. 45 Na gam sung ua khualtamte leh na gam sung ua piang a behte uapan zong na lei thei ding uhi. Amaute na van neih uh a suak ding uhi. 46 Gouluaha luah dingin na tate uh kiang ah amaute na pesawn thei ding uh a, damsung silain na bawl thei ding uhi. Ahihhangin, na Israel mipihte uh tung ah bel, huham takin na gamta ding uh ahi kei hi. 47 Noute laka gamdang mi hiam, hong khualtam mi hiam, hong hau a, na chi na sate uh khat peuh hong zawnggawp a, tua na lak ua teeng gamdang mi hiam, a behte hiam khat peuh kianga a kizuakkhiak leh, 48 a kizuakkhiak khit nungin zong kitatkik theihna hamphatna a nei hi. A tanaute khat peuh in amah tankhe thei ding hi. 49 A pa' sanggampa hiam, a pa' sanggampa' tapa hiam in amah a tan thei ding, ahih kei leh, a behte laka tanau khat peuh in amah a tan thei ding hi. Ahih kei leh, amah mah zong a hong mavan leh, amah a kitan thei ding hi. 50 Amah leh a leipa'n a kizuakkhiak kum apan Jubili kum dong a sim tou ding uh ahi. Amah a kikhahkhiak nading man bel, a kum om lai zah ading, nasema goih mi, sum thalawh dana tuat ahi ding ahi. 51 Kum tam a sap lai leh, ama' man dinga kipia lak ah, a kitat nading sum a tam lai ding. 52 Jubili kum dong ading kum tawm a sap lai leh, tua kum zah ading tuatin, a kitatna man a pe ding ahi. 53 Tua bang mi pen, a kum a kuma sum thalawha goih banga et ding ahi. Amah neipa a tunga huham taka na gamtatsak louh ding uh ahi. 54 Hibang lampite khat beeka zong amah tatkhiak ahih kei leh, amah leh a tate Jubili kuma khahkhiak ding ahi uhi. 55 Ahang bel, Israelte kei silate ahi uhi. Ka silate ahi uh a, Aigupta gam apan ka piikhiakte ahi uhi. Kei Tangtawn Toupa na Pathian uh ka hi.

Siampilaibu 26

Thumanna Pahtakman

1 Milimte kibawl kei unla, batpih milim kitunkhiak kei unla, suang zek siangthou zong kitunkhiak kei un. A mai ua kuna na biak dingun, na gam sung uah khuakthawha kigelh suang koih kei un. Kei Tangtawn Toupa na Pathian uh ka hi. 2 Ka Sabbathte tang unla, ka mun siangthou zah un. Kei Tangtawn Toupa ka hi. 3 Ka thuseh na zuih ua, ka thupiakte zui dinga na pilvang uleh, 4 a hun hunin vuah kon sawl ding a, lei in gah a suah ding a, gama singte'n gah a suang ding. 5 Phuala na buh chil un grep gah lawh hun a banpha ding a, na grep gah lawh un, a suan hun a banpha ding. Na duh zahzah uh an na ne ding uh a, na gam uah bitin na teeng ding uhi. 6 Gam sung ah galmuanna ka omsak ding a, lungmuangin na lum pihpeh ding uh a, kuama'n hon lausak kei ding. Gam sung apan gamsa giloute ka hawlmang ding a, na gam sung uah namsau a leng kei ding. 7 Na galte uh na delh ding uh a, na mai uah namsauin a puk ding uh. 8 Mi nga in mi 100 khat na delhzak ding uh a, mi 100 khat in mi 10,000 khat na delhzak ding uh. Na melmate uh na mai uah namsauin a puk ding uhi. 9 Noute deihsak takin kon en ding a, chipha takin kon bawl ding a, kon pungsak ding. Noute tawh kala ka thukhun ka lenkip ding hi. 10 Buh thak koih nadinga buhlui na hepkhiak dong uh, kumlui buh na ne lai ding uh. 11 Noute lak ah ka tenna mun ka koih ding a, noute kon kih kei ding. 12 Noute lak ah ka pai ding a, noute' Pathian ka hi ding a, noute ka mite na hi ding uhi. 13 Kei Tangtawn Toupa, na Pathian uh Aigupta gam apan hon piikhepa ka hi. Aiguptate' salin na om nawn kei ding uhi. Na hakkolte uh ka tansak a, dingtangin kon paisak hi.

Thumanlouhna Gawtna

14 Ahihhangin, ka thu na ngaihkhiak kei ua, hiai thupiakte na zuih kei ua, 15 ka thusehte na nial ua, ka dan piakte na kih ua, ka thupiakte khempeuh na zuih kei ua, ka thukhun na palsat uleh bel, 16 16 na tung uah hiai ka hih ding: Na tung uah thakhata laua mulkimna, kumzawnna leh nattunna kon tun ding a, tua chinatnate'n hon mittawsak ding a, na hinna uh a kaikangsak ding. A mawknain khaichi na pawi ding uh. Ahang bel, na melmate un ne ding uh hiven. 17 Na tung uah ka maigum ding a, na galte un hon zougawp ding. Nou hon mudahte'n na tung uah vai a hawm ding uh a, kuamah delh louhpi-in zong na tai ding uhi. 18 Hibang teng nunga ka thu na ngaihkhiak kei lai uleh, na khelhnate uh hangin sagih vei kon gawt tuantuan ding. 19 Na kisaktheihna uleh genhakna uh ka gawpsak ding a, na tung ua van sik bangin, na nuai ua lei sumsan bangin ka bawl ding. 20 Na thahatna uh a mawkna-in kigawp ding a, na lei un gah suah lou ding a, gama singte'n gah suang lou ding hive-un. 21 Ka tunga na helhat lailai ua, ka thu na ngaihsak nop kei uleh, na khelhnate uh tawh kikhomin na thuakgimna uh sagih vei ka behlap ding. 22 Gamsa giloute kon dousak ding a, na tate uh hon laksak ding uh a, na ganhonte uh a hihmangthang ding uh. Noute nong tawm mahmah ding uh a, na lampite uh a kitaisan ding hi. 23 Hibang teng nunga, ka bawlhoihna na saan kei ua, ka tunga na helhat lailai uleh, 24 kei mahmah na tung uah ka helhat ding a, na khelhnate uh hangin, sagih vei kon gimsak tuantuan ding hi. 25 Thukhun na palsat uh phu lain, na tung uah namsau ka lengsak ding. Na khawpite ua na tailut chiangun, hipi kon delhsak ding a, na melmate uh khut sunga piakkhiak na hi ding uh. 26 Na ante uh ka beisak chiangin, numei sawm in thuk khat ah na tanghou uh a emkhawm ding uh a, teh detdetin tanghou a hawm ding uh. Na ne ding uh a, na kham zou kei ding uhi. 27 Hiai nunga, ka thu na ngaihkhiak kei lai ua, ka tunga na helhat lai uleh, 28 heh in na tung uah ka helhat ding a, kei mahmah in na khelhnate uh hangin sagih vei kon gawt tuantuan ding. 29 Na tapate uleh na tanute uh' sa na ne ding uh. 30 Na mun sangte uh ka hihmangthang ding a, na gim namtui halna maitamte uh ka phukpai ding. Hinnabei na milimte uh tung ah na luangte uh ka sevum venvon ding a, noute kon kih ding. 31 Na khawpite uh ka chimgawpsak ding a, na mun siangthoute uh ka segawpsak ding a, lungkimsak nadinga na thillat gim namtuite uh ka kipahpih kei ding. 32 Gam ka hihse ding a, tua-a teeng na melmate un lamdang a sa ding uhi. 33 Namte lak ah kon thehzak ding a, ka namsau phawiin kon delh ding. Na gam uh a se dimdem ding a, na khawpite uh a segawp ding. 34 Tua hun chiangin, gam in a siat sung teng leh na melmate uh gama na teen sung teng uh, sabbath kumte a zang ding a, gam a khawl tawlnga ding a, sabbathte a zang ding. 35 Gam sunga na teen sung ua, gam in sabbath khawlna a ngah louh hu, tuin gam siat dimdem sungin a ngahta ding hi. 36 Noute laka khawsuak omsunte lah, a melmate uh gam ah a lungtangte uh launain ka dimsak ding a, nahthel huihmut ging nangawn in amau a taisak ding a, kuamah delh louhpi-in, namsau apan tai bangin a tai ding uh a, a puk ding uhi. 37 Kuamah delh louhpi-in, namsau apan tai bangin a tai ding uh a, a kipalpuk lemlum ding uh. Tuachi-in, na melmate uh maia ding zou na om kei ding uh. 38 Na melmate uh lak ah na mangthang ding uh a, na melmate uh' gam in noute hon nawmvalh ding. 39 Noute laka a khawsuak omsunte, a khelhnate uh hangin, a melmate uh' gam ah a muih huaihuai ding uh. A pu a pate uh' khelhnate hangin, a muih mang ding uhi.

Tundingkikna Thuchiam

40 Ahih hangin, amaute' khelhnate leh a pu a pate uh' khelhnate tua ka tunga a lepchiahnate uh, ka tunga a helhatnate uh a pulak nop uleh 41 kei tunga a helhatna un kei amaute tunga hon helhatsak a, a melmate uh gama amaute khamang hi vengin tua baan ah, a lungtang sum louhnate uh a niamkhiak ua, a khelhna man uh a piak chiangun, 42 ke'n Jakob tawh kala ka thukhun leh, Isak tawh kala ka thukhun leh, Abraham tawh kala ka thukhun ka thei gige ding a, tua gam ka thei gige ding. 43 Ahang bel, tua gam amaute' taisana om ding a, amaute om lou a, gam a siat sunga gam in a sabbathte ngah ding hiven. Amaute'n ka dan nial a, ka thusehte kih a hih manun, a khelhnate uh man a pe ding uh. 44 Hibang hinapi-in, ke'n a melmate uh gama a om sungun, amaute ka nial kei ding a, ka kih kei ding. Amaute tawh kala ka thukhun palsat a, amaute hihmangthang sipsip dingin amaute ka nialin ka kih kei ding. Kei Tangtawn Toupa a Pathian uh ka hi. 45 Ahihhangin, amaute hangin, a pu a pate uh tawh kala thukhun ka thei gige ding. A Pathian uh hi dingin, namte' mitmuhin, Aigupta gam apan a pu a pate uh ka piikhia hi. Kei Tangtawn Toupa ka hi, chi in, a chi hi. 46 Hiaite, Tangtawn Toupa'n Sinai Mual tunga Mosi tungtawna, amah leh Israelte tawh kala a hihkip thusehte, dante leh makaihna dante ahi.

Siampilaibu 27

Mihing Lat Dan

1 Tangtawn Toupa'n Mosi a houpih a: 2 Israelte kiang ah thu gen inla: Mi khat peuh in, midangte Tangtawn Toupa adinga sehtuama lan ding a, a man gun pia a, thuchiam a bawl leh, 3 kum 20 leh kum 60 kikala upa pasal man dingin ngun dangka, mun siangthou shekela buk, ngun shekel 50-in bikhiah un. 4 Numei ahih leh, ngun dangka shekel 30-in bikhiah un. 5 Tua mihing pen kum nga leh kum 20 kikala upa ahih leh, pasal adingin ngun shekel 20-in bikhiah unla, numei adingin ngun shekel sawmin bikhiah un. 6 Tua mihing pen kha khat leh kum nga kikala upa ahih leh, pasal adingin ngun dangka shekel nga-in bikhiah unla, numei adingin ngun dangka shekel thumin bikhiah un. 7 Tua mihing pen kum 60 hiam, a sanga tamzaw hiama upa ahih leh, pasal adingin shekel sawm leh ngain bikhiah unla, numei adingin shekel sawmin bikhiah un. 8 Tua mihing thuchiam bawl pen in sum bikhiah pe zou lou zaha zawng ahih leh, ama'n a mi lat ding pen siampi' mai ah hon tonpih ding a, siampi in a man a bikhiah ding a, tua thuchiam bawlpa piak zawh zahin a bikhiah ding ahi.

Ganta Lat Dan

9 Tua a chiam ganta ahih a, Tangtawn Toupa' maia thillat a saan theih ganta a hih leh, Tangtawn Toupa' maia piak ganta pen, a siangthou a suak hi. 10 Ganta dang tawh a khek tuah ding ahi kei a, a phain a sia a khek ding ahi kei: A sia-a a pha a khek ding zong ahi kei hi. Ganta khata ganta dang a khek leh tua ganta leh a khekna ganta, a nihin a siangthou a suak uhi. 11 A chiam pen a siangloua ngaih ganta ahih a, Tangtawn Toupa' maia thillata saan theih louh ganta ahih leh, tua ganta siampi' maia piak ding ahi. 12 Ama'n a siat a phat thu a khentel ding ahi. Siampi in a man ding a bikhiah dandan a man ahi ding. 13 A neipa'n tua ganta a tat nop leh, a man seh nga suah seh khat a behlap ding ahi.

Inn Lat Dan

14 Mi'n a inn, Tangtawn Toupa adinga thil siangthou hi dinga a lat leh, siampi in a siat a phat a khentel ding ahi. Siampi in a man dinga a bikhiah dandan a man ahi den ding hi. 15 A inn lanpa'n a tat kik nop leh, a man seh nga suah seh khat a behlap ding a, tua inn ama-a a suak kik ding hi.

Gam Lat Dan

16 Mi'n a innkuan' gam khenkhiak bangchia hiam, Tangtawn Toupa adinga a lat leh, tua gam adinga buh chi bei zah tuat a, tua gam man bikhiah ding ahi. Barli buh chi homer khat man ngun dangka shekel 50-a bikhiah ding ahi. 17 Ama'n Jubili kum sunga a lou a lat leh, aman kibikhiahsa bangbang ahi ding. 18 Ahihhangin, a lou lanpa'n, Jubili nunga lan a hih leh, siampi in, Jubili nawn tawh kal zah tuatin a man a bikhiah ding a, a man a kiamsak ding hi. 19 A lou lanpa'n a tat kik nop leh, a man seh nga suah seh khat a behlap ding a, tua lou ama-a a suak kik ding hi. 20 Ahihhangin, a lou a tatkik kei leh, ahih kei leh, mi dang kianga a zuakkhiak leh, tua lou tat kik theih ahi kei ding hi. 21 Jubili-a tua lou a kikhahkhiak chiangin, a siangthou a suak ding. Tangtawn Toupa adinga gam lat tawh a kibang ding a, siampite' tan ahi ding hi. 22 Mi'n a leisa lou, a innkaw gam hilou, Tangtawn Toupa adinga a lat, 23 siampi in Jubili Kum dong a man a tuat ding a, Tangtawn Toupa adinga thil siangthou bangin, tua ni mahin, a man a pe ding ahi. 24 Jubili Kumin a leinapa, a lou nei masapa kiang ah tua lou a kik ding ahi. 25 Thillat man peuhmah, mun siangthou shekel tawh kituaka bikhiah ding ahi. Tua bel, shekel khat gera 20 ahi.

Ganta Suak Masa

26 Ganta suak masapen bel, Tangtawn Toupa-a sa ahih manin, kuama'n a lan thei kei ding hi. Bawngpi hi-in, belam hita leh, Tangtawn Toupa-a ahi. 27 Ganhing sianglou khat a hih leh, a man ding bikhiah zahin a tat kik theih ding a, ahihhangin, a man seh nga suah seh khat a behlap ding ahi. Ama'n a tat kik kei leh, a man kibikhiah zaha zuak ding ahi.

Thilzek a Sehtuam

28 Ahihhangin, mi'n a neihsa, Tangtawn Toupa adinga a lat mihing hiam, ganta hiam, innkaw gam hiam hita leh, zuak theih ahi kei ding a, tat theih zong ahi kei ding ahi. Tua banga thillatsa peuhmah, Tangtawn Toupa adinga a siangthoupen a hita hi. 29 Hihmanthat dinga mawhtansak mihing peuhmah, tat theih ahi kei ding. Thah teitei ding ahi.

Sawma Khat

30 Gam apana thilpiang peuhmah laka sawma khat, leia gah buh hi-in, sing apan gah hita leh, Tangtawn Toupa-a ahi. Tangtawn Toupa adinga a siangthoupen ahi. 31 Mi'n a sawma khat a tat kik nop leh, a man seh nga suah seh khat behlapin a tan ding ahi. 32 Ganhon leh belam leh kelhon apan sawma khat, ganching mi' chiang nuaia pai a sawm chinna peuhmah, Tangtawn Toupa adinga siangthou ahi ding. 33 Ama'n a sia lak apan a pha a tengkhe ding ahi kei a, a khek tuah ding zong ahi kei hi. A khek tuah leh, a khekna leh a khek pen a nihin a siangthou a suak a, tat kik theih ahi kei ding hi, chi in, a chi hi.

Thukhitna

34 Hiaite Tangtawn Toupa'n Israelte adinga Sinai Mual tunga Mosi kianga thupiak a piakte ahi.

Kisimna 1

Kisimpina

1 Aigupta gam apan Israelte hong paikhiak nung un, a kum gukna, a kha nihna, a ni khat ni-in, Sinai Gamdai-gamkeua Kihoupihna Puanbuk ah, Tangtawn Toupa'n Mosi a houpih a: 2 Israel mipite khempeuh, a beh beh, a innkuan kuanin simpina bawl inla, a min min-un, khatkhatin minkhumna bawl in. 3 Nang leh Aron in Israel pasalte khempeuh sepaih-a pang thei kum 20 leh a tunglam peuhmah a pawlpawlin sim un. 4 Nam khat laka mi khat zel, ama' behtuulpite'n noute hon huh ding uh ahi. 5 Noute hon huh ding mite' min hiaite ahi: Reuben nam apan Shedeur' tapa Elizur; 6 Simeon nam apan Zurishadai' tapa Shelumiel; 7 Judah nam apan Aminadab' tapa Nashon; 8 Isakhar nam apan Zuar' tapa Nathanel; 9 Zebulun nam apan Helon' tapa Eliab; 10 Josef tapate lak apan: Efraim nam apan Amihud' tapa Elishama; Manase nama apan Pedazur' tapa Gamaliel; 11 Benjamin nam apan Gideoni' tapa Abidan; 12 Dan nam apan Amishadai' tapa Ahiezer; 13 Asher nam apan Okran' tapa Pagiel; 14 Gad nam apan Deuel' tapa Eliasaf; 15 Naftali nam apan Enan' tapa Ahira, a chi hi. 16 Hiai mipite lak apan sehkhiak pasalte ahi uh a, a behbul lak ua makaite ahi uh a, Israel behte laka a tuulpite ahi uhi. 17 Mosi leh Aron in hiai min kigente a tonpih uh a, 18 amaute'n tua kha nihna, a ni khat ni-in, mipite khempeuh a kaikhawm uhi. Mipite a khanggui ua a beh behin, a innkuan kuanin a gen uh a, pasal kum 20 leh a tunglam teng, a min minun, khat khatin min a khum uh a, 19 Tangtawn Toupa'n Mosi thu a piak bangin a hih uhi. Tuachi-in, Sinai Gamdai-gamkeu ah amaute a sim hi. 20 Israel tapa piang masapen Reuben' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaih-a pang thei khempeuh khat khatin min a kikhum a, 21 Reuben nam apan tua bang pasal 46,500 a pha hi. 22 Simeon' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a kisim a, khat khatin min a kikhum a, 23 Simeon nam apan tua bang pasal 59,300 a pha hi. 24 Gad' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 25 Gad nam apan tua bang pasal 45,650 a pha hi. 26 Judah' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 27 Judah nam apan tua bang pasal 74,600 a pha hi. 28 Isakhar' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 29 Isakhar nam apan tua bang pasal 54,400 a pha hi. 30 Zebulun' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 31 Zebulun nam apan tua bang pasal 57,400 a pha hi. 32 Josef suante lak apan: Efraim suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 33 Efraim nam apan tua bang pasal 40,500 a pha hi. 34 Manase' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 35 Manase nam apan tua bang pasal 32,200 a pha hi. 36 Benjamin' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 37 Benjamin' nam apan tua bang pasal 35,400 a pha hi. 38 Dan' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa sepaiha pang thei khempeuh a min minun a kikhum a, 39 Dan nam apan tua bang pasal 62,700 a pha hi. 40 Asher' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 41 Asher nam apan tua bang pasal 41,500 a pha hi. 42 Naftali' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a minminun a kikhum a, 43 Naftali nam apan tua bang pasal 53,400 a pha hi. 44 Hiaite Mosi leh Aron leh Israel makai sawm leh nihte'n a sim uh pasalte ahi uh a, tua makaite amau' innkuan chiat taangin a ding uhi. 45 Israel pasalte, kum 20 leh a tunglama upa, sepaiha pang theite amau innkuan bang zelin a kisim hi. 46 Avekpi-un 603,550 a pha hi. 47 Levi nama innkuante ahih lebel, midangte tawh a kisim khawm kei hi. 48 Tangtawn Toupa'n Mosi kiang ah: 49 Levi nam na sim ding ahi kei a, Israel dangte' minkhumna ah zong na khumkhawm ding ahi kei. 50 Levite zaw Theihpihna biakbuk sunga vanzat khempeuh leh tua tawh kisai van dangte khempeuh mawhpuain na sep zaw ding ahi. Amaute'n biakbuk leh a sunga vanzatte khempeuh a paw ding uh a, a keem ding uh a, a kimkot ah giahphual a sat ding uh ahi. 51 Biakbuk a kisuan ding peuhpeuh chiangin, Levite'n a phei ding uh a, akilam ding peuhpeuh chiangin, amaute'n a lam ding uh ahi. 52 Israelte'n a pawlpawlin a puanbukte uh a kai ding uh a, mi chih in ama' giahphual ah, ama' puanlap nuai ah a kai ding ahi. 53 Levite'n bel Theihpihna biakbuk kimkot ah a puanbukte uh a kai ding uh ahi. Tuachi-in, Israelte tung ah hehna a tung kei ding hi. Levite zaw, Theihpihna biakbuk kepna mawhpuain a om ding uh ahi, a na chikhinta hi. 54 Tangtawn Toupa'n Mosi thu a piak bangbangin Israelte'n a hih uhi.

Kisimna 2

Giahphual Lepdan

1 Tangtawn Toupa'n Mosi leh Aron kiang ah thu a gen a: 2 Israelte'n Kihoupihna Puanbuk kimkot, bangtan hiama gamla ah, Kihoupihna Puanbuk lam ngain giahphual a sat ding uh a, michih ama' puanlap nuai ah a innkuan chiamtehna tawh a om ding uh ahi, a chi hi. 3 Nisuahna lam, suahlam pang ah Judah giahphuala giak ding pawl, amau' puanlap nuai ah, giahphual a sat ding uh ahi, Judah nam makai Aminadab' tapa Nashon ahi. 4 Ama' pawl mi 74,600 a pha hi. 5 Amaute zomin Isakhar nam in giahphual a sat ding uh ahi. Isakharte' makai Zuar' tapa Nethanel ahi. 6 Ama' pawl mi 54,400 a pha hi. 7 A zomin Zebulun nam ahi ding hi. Zebulunte' makai Helon' tapa Eliab ahi. 8 Ama' pawl mi 57,400 a pha hi. 9 Judah giahphuala giak dingte a pawlpawlin, mi 186,400 a pha hi. Amaute a kipankhe masa ding uh ahi. 10 Simlam pang ah, Reuben giahphuala giak ding pawl, amau puanlap nuai ah, a om ding uh ahi. Reuben' pawl makai Shedeur' tapa Elizur ahi. 11 Ama' pawl mi 46,500 a pha hi. 12 Amaute zomin Simeon nam in giahphual a sat ding uh ahi. Simeonte' makai Zurishadai' tapa Shelumiel ahi. 13 Ama' pawl mi 59,300 a pha hi. 14 Tua ban ah, Gad nam in a zom ding ahi. Gadte' makai Deuel' tapa Eliasaf ahi. 15 Ama' pawl mi 45,650 a pha hi. 16 Reuben giahphuala giak dingte, a pawlpawlin mi 151,450 a pha hi. Amaute a kipankhe zom ding uh ahi. 17 Kihoupihna Puanbuk leh Levite giahphuala mite a laizang ah a pai ding uh ahi. Giahphual sat dana kizomin a kipankhe ding uh a, michih ama' mun ah, ama' puanlap nuai ah a pai ding ahi. 18 Tumlam pang ah Efraim giahphuala giak ding pawl, amau puanlap tawh a om ding ahi. Efraimte' makai Amihud' tapa Elishama ahi. 19 Ama' pawl mi 40,500 a pha hi. 20 Amaute zomin, Manase nam ahi ding ahi. Manasete' makai Pedazur' tapa Gamaliel ahi. 21 Ama' pawl mi 32,200 a pha hi. 22 A zomin Benjamin nam ahi ding ahi. Benjaminte' makai Gideoni' tapa Abidan ahi. 23 Ama' pawl mi 35,400 a pha hi. 24 Efraim giahphuala giak dingte, a pawlpawlin, mi 108,100 a pha hi. Amaute a thumna-a pangin a kipankhe ding uh ahi. 25 Mallam pang ah Dan giahphuala giak ding pawl, amau puanlap nuai ah a om ding uh ahi. Dante makai Amishadai' tapa Ahiezer ahi. 26 Ama' pawl mi 62,700 a pha hi. 27 Amaute zomin Asher nam in giahphual a sat ding ahi. Asherte' makai Okran' tapa Pagiel ahi. 28 Ama' pawl mi 41,500 a pha hi. 29 Naftali nam in a zom ding ahi. Naftalite' makai Enan' tapa Ahira ahi. 30 Ama' pawl mi 53,400 a pha hi. 31 Dan giahphuala giak dingte a pawlpawlin mi 157,600 a pha hi. Amaute amau' puanlap nuai ah, a nunung penin a kipankhe ding uhi. 32 Hiaite, a innkuankuana kisim Israelte ahi uhi. Giahphuala om khempeuh, a pawlpawlin mi 603,550 a pha hi. 33 Tangtawn Toupa'n Mosi thu a piak bangin, Levite bel Israel dangte tawh simkhawm ahi kei uhi. 34 Tuachi-in, Tangtawn Toupa'n Mosi thu a piak peuhmah a hih uhi. Amaute giahphuala amau puanlapte nuaia a giah dan uh tua bang ahi a, tua bang mahin a kipankhia uh a, michih ama' beh leh ama' innkuan tawh a ton hi.

Kisimna 3

Levite' Mawhpuakna

1 Tangtawn Toupa'n Sinai Muala Mosi a houpih laia, Aron leh Mosi innkuan tangthu hiai ahi: 2 Aron' tapate hiaite ahi: Nadab a piang masapen ahi a, tua baan ah Abihu, Eleazar leh Ithamar ahi. 3 Aron' tapate' min tuate ahi. Amaute thaunilh siampite ahi uh a, siampi nasem dinga namkip ahi uhi. 4 Nadab leh Abihu bel Gamdai-gamkeua, Tangtawn Toupa' maia, phallouh meia thillat a lat laiun Tangtawn Toupa' mai ah a si uhi. Tapate a neih louh manun, a pa uh Aron dam sung teng Eleazar leh Ithamar kiain siampi nna a sem uhi. 5 Tangtawn Toupa'n Mosi kiang ah: 6 Levi nam hon tonpih inla, siampi' Aron huh dingin a mai ah pia in. 7 Aron ading leh Israel mi khempeuh adingin Kihoupihna Puanbuk ah, biakbuk nna a sem ding uh ahi. 8 Tua banga biakbuk nna semin, Israelte hih ding khempeuh hihin Kihoupihna Puanbuk vanzat khempeuh a keem ding uh ahi. 9 Aron leh a tapate mai ah Levite pia in. Amaute zaw ama' maia pumpiak ding Israelte ahi uhi. 10 Siampi nasem dingin Aron leh a tapate sep in. Midang himhim in mun siangthou a naih leh tuabang mi thah teitei ding ahi, a chi hi.

Kisimna

11 Tangtawn Toupa'n Mosi a houpih lai a: 12 Israel numei apan pasal piang masapen sik leh tangin, Israelte lak apan Levite ka lata hi. Levite keia ahi uh. 13 Tapa piang masapen khempeuh keia hiven. Aigupta gama tapa piang masapente ka satlup laiin Israelte laka tapa piang masapen peuhmah mihing hi-in ganta hita leh, kei adingin ka septuam hi. Amaute keia ahi ding uh ahi. Kei Tangtawn Toupa ka hi, a chi hi. 14 Tangtawn Toupa'n Sinai Gamdai-gamkeu ah Mosi a houpih a: 15 Levite a innkuan kuanun a beh behin sim in. Pasal peuhmah kha khat leh a tunglama upa sim in, a chi hi. 16 Tuachi-in, Mosi in Tangtawn Toupa' thupiak bangin, amaute a sim hi. 17 Levi' tapate min hiaite ahi: Gershon, Kohath leh Merari. 18 Gershon behte minte hiaite ahi: Libni leh Shimei. 19 Kohath behte minte hiaite ahi: Amram, Izhar, Hebron leh Uziel. 20 Merari behte minte hiaite ahi: Mali leh Mushi. Hiaite Levi behte, a innkuan kuana kiminlawh ahi.

Gershon Suante Simna

21 Libni behte leh Shimei behte bel Gershon suante ahi uh a, Gershon behte kichi ahi uhi. 22 Gershon behte laka pasal kha khat leh a tunglama upa khempeuh 7,500 a pha hi. 23 Gershon behte'n tumlam ah biakbuk nung ah giahphual a nei ding uh ahi. 24 Gershon behte laka makai Lael' tapa Eliasaf ahi. 25 Kihoupihna Puanbuk ah, Gershonte' mawhpuakna bel, biakbuk, tua baan ah, puanbuk leh a tungkhuhnate, Kihoupihna Puanbuk lutna-a puanzak, 26 kongtual umna puanzakte, biakbuk kimkot kongtual lutna puanzak leh maitam leh a khauhualte leh a zatna tawh kisai khempeuh kep ahi. 27 Amram behte, Izhar behte, Hebron behte leh Uziel behte bel Kohath suante ahi uh a, Kohath behte kichi ahi uhi. 28 Kohath behte, pasal kha khat leh a tunglama upa khempeuh 8,600 a pha hi. Kohathte' mawhpuak bel, mun siangthou kep ahi. 29 Kohath behte giahphual biakbuk simlam pang ah a om ding ahi. 30 Kohath behte laka makai bel Uziel' tapa Elizafan ahi. 31 Amaute' mawhpuak bel thukhun singkuang, meivak mung, maitamte, mun siangthou, tua-a nasepna tawh kisai vanzatte, puanzak leh tuate zatna tawh kisai khempeuh kep ahi. 32 Levite laka makaipipen bel siampi Aron' tapa Eleazar ahi. Mun Siangthou kema mawhpawte tunga makaia seh ahi.

Merari Suante Simna

33 Merari suante laka behte Malite leh Mushite ahi a, Merari behte kichi ahi uhi. 34 Pasal kha khat leh a tung lama upa khempeuh 6,200 a pha hi. 35 Merari behte laka makai bel, Abihail' tapa Zuriel ahi. 36 Merari behte bel, biakbuk guhgelte, a zawlte, a khuamte, khuamtunnate, a vanzatte leh hiaite zatna tawh kisai thilte, 37 a huang umna khuamte leh a tunnate, puanbuk khetphimte leh a khauhualte kepna mawhpaw dinga seh ahi uhi.

Kisimna Lakkhawm

38 Mosi leh Aron leh a tapate'n bel, Kihoupihna Puanbuk maia biakbuk suah lampang nisuahna lam ah giahphual a nei ding uh ahi. Israel sik leh tangin, munsiangthou kepna amaute' mawhpuak ahi. Midang, mun siangthou vanaih peuhmah thah ding ahi. 39 Mosi leh Aron tungtawna Tangtawn Toupa' thupiak banga a behbeh-a kisim pasal kha khat leh a tunglama upa 22,000 a pha hi.

Tamasate taanga Levite Lakna

40 Tangtawn Toupa'n Mosi kiang ah: Israelte' tamasa pasal kha khat leh a tunglama upa khempeuh sim inla, a min minun khum in. 41 Kei adingin Israel suan' tamasa khempeuh taangin Levite la inla, Israel suante' ganta piang masate taangin Levite' gantate la in, Kei Tangtawn Toupa ka hi, a chi hi. 42 Tuachi-in, Tangtawn Toupa'n amah thu a piak bangin, Mosi in Israel suan tamasapente khempeuh a sim a, 43 tamasa pasal kha khat leh a tunglama upa khempeuh, a min mina kikhum 22,273 a pha hi. 44 Tangtawn Toupa'n Mosi kiang ah: 45 Israel suan tamasa khempeuh taangin Levite la inla, Israel suante' gantate taangin Levite' gantate la in. Levite keia ahi. Kei Tangtawn Toupa ka hi. 46 Levite sanga Israel suan tamasate tamzawkna 273 tat nadingin, 47 mi khat zel ah mun siangthou shekel buk shekel nga la in. Shekel khat bel gera 20 buk ahi. 48 Israel suan tamasa tamzawkna tatna sum pen Aron leh a tapate khut ah pia in, a chi hi. 49 Tuachi-in, Levite' tat zah valte tatna sum Mosi in a la hi. 50 Israel suante' tamasa tatna a lak ngun shekel 1,365 buk a hi a, tua bel mun siangthou shekel buk zah ahi. 51 Tangtawn Toupa'n thu a piak bangin, Mosi in tua tatna sum, Aron leh a tapate' khut ah a pia hi.

Kisimna 4

Kohath-te' Nasep

1 Tangtawn Toupa'n Mosi leh Aron kiang ah thu a gen a: 2 Levite laka Kohath suante a behbehin, a innkuan kuanin sim in. 3 Kihoupihna Puanbuk sunga nasem dinga kisa, pasal kum 30 apan kum 50-a upate khempeuh sim in. 4 Kihoupihna Puanbuk sunga Kohath suante' nasep ding hiai ahi: Thil siangthoupente kep. 5 Giahphual a kisuan ding chiangin, Aron leh a tapate a lut ding uh a, dantanna puanzak a lakhe ding uh a, Theihpihna singkuang a khuh ding uhi. 6 Tua khit chiangin, saham vunin a khuh ding uh a, tua tung ah puan dumin a khuh ding uh a, a zawlte a khum ding uh ahi. 7 Ompihna tanghou dawhkan tung ah puan dum a phah ding uh a, tua tung ah kuangte, beldaite, belkuangte, dawn thillat sunna bel gonggekte, tua-a om gige ding tanghoute a koih ding uh ahi, 8 Hiaite tung ah puan sandup in a khuh ding uh a, saham vunin a khuh ding uh a, a zawlte a khum ding uh ahi. 9 Puan dum a la ding uh a, det ding meivak koihna meivak mung leh a meivakte, a eksiakna leh meivu kholnate, det ding sathau koihna bel gonggek khempeuhte tawh a khuh ding uh ahi. 10 Tua khit chiangin, tua meivak mung leh a vanzatte khempeuh tua saham vunin a tuun sawn ding uh a, a zawn nading laang tung ah a koih ding uh ahi. 11 Kham maitam tung ah puan dum a phah ding uh a, tua pen saham vunin a khuh ding uh a, a zawnna zawlte a khum ding uh ahi. 12 Mun siangthou sunga nasepna vanzatte khempeuh lain, puan dumin a tuun ding uh a, tua tung ah saham vunin a tuun sawn ding uh a, a zawnna laang tung ah a koih ding uh ahi. 13 Sumsan maitam apan meivute a luakkhe ding uh a, puan sandupin tua maitam a khuh ding uh ahi. 14 Tua tung ah maitama kizang tuium belsuante khempeuh, meiluah kuangdaite, sikkhutte, suahdulte leh, tui thehna belkuangte tawh a koih vek ding uh ahi. Tuate, saham vunin a khuh ding uh a, a zawnna zawlte a khum ding uh ahi. 15 Aron leh a tapate'n vanzat siangthoute leh tuium belsuan siangthoute a khuh khit chiangun leh giahphual kisuan dinga a kisakkhit chiangun Kohathte a paw dingin a kisa ding uh ahi, Ahihhangin, tua thil siangthoute a lawng ding uh ahi kei. A lawn uleh a si ding uhi. Tua Kihoupihna Puanbuk sunga vante Kohathte'n a paw ding uh ahi. 16 Siampi Aron' tapa Eleazar in meivak ading sathau, gim namtui, an thillat ngeinate leh nilh sathau a kern ding ahi. Biakbuk leh a sunga vante, a vanzat siangthoute leh tuium belsuan siangthoute ama' mawhpuak ahi ding ahi, a chi hi. 17 Tangtawn Toupa'n Mosi leh Aron kiang ah: 18 Levite lak apan Kohath behte satkhiak a hih louh nadingun ching un. 19 Thil siang-thoupente a naih chiang ua, si lou a, a hin theih nadingun amaute adingin hibangin hih un: Aron leh a tapate Mun Siangthou sung ah a lut ding uh a, michih sep ding, michih puak ding a hawm ding uh ahi. 20 Kohathte' bel valutin thil siangthoute mitphiat kal lei zong a va en ding uh ahi kei. A et uleh a si ding uhi, a chi hi.

Gershonte' Nasep

21 Tangtawn Toupa'n Mosi kiang ah: 22 Gershonte zong a innkuan kuan leh a beh behin sim in. 23 Pasal kum 30 apan kum 50-a upa, Kihoupihna Puanbuka nasem dinga hong kuan khempeuh sim in. 24 Hiai Gershonte' nasep leh vante puak a nasep uh ahi. 25 Kihoupihna Puanbuk, tua biakbuka puanzakte, a tungkhuhna tungnung saham vun, Kihoupihna Puanbuk lutna kongkhak puanzakte, 26 biakbuk huang leh maitam umna puanzakte leh Kihoupihna Puanbuk lutna puanzak, khauhualte leh biakna vanzatte khempeuh a puak ding uh ahi. Gershonte'n hiai thilte tawh kisai sep ding khempeuh a sem ding uh ahi. 27 A nasepte khempeuh uh, van puak hi-in nasep dang hita leh, Aron leh a tapate' vaisai bangbanga a sep ding uh ahi. A van puak ding khempeuh uh, a mawhpuakna uh amaute lak ah na hawm ding ahi. 28 Hiaite Kihoupihna Puanbuka Gershon behte' nasep ahi. A uh siampi Aron' tapa vaisaina nuaia a sep ding nasepte Ithamar' uh ahi.

Merarite' Nasep

29 Merarite a beh beh leh a innkuan kuanin sim in. 30 Pasal kum 30 apan kum 50 chianga upa, Kihoupihna Puanbuka nasem dinga hong kuan khempeuh sim in. 31 Kihoupihna Puanbuka nasep ding a mawhpuak uh hiaite ahi: Amaute'n biakbuk guhgel, a zawlte, a khuamte leh a tunnate, 32 a huang umna khuamte leh a tunnate, khetphimte, khauhualte a paw ding uh ahi, Michih in a puak ding nang sehsak in. 33 Hiai Merari behte' nasep, siampi Aron' tapa Ithamar' vaisaina nuaia Kihoupihna Puanbuk-a a sep uh ahi, a chi hi.

Levi Behte Simna

34 Mosi, Aron leh nam makaite'n Kohathte a behbeh, a innkuan kuanin a sim uhi. 35 Kihoupihna Puanbuk-a nasem dinga hong kuan pasal kum 30 apan kum 50-a upa khempeuh 36 a behbeha simin mi 2,750 a pha hi. 37 Kihoupihna Puanbuka nasem Kohath behte a vekpi-in hiai zah ahi. Tangtawn Toupa'n Mosi tungtawna thu a piak bangin, Mosi leh Aron in amaute a sim uhi. 38 Gershonte a behbeh leh a innkuan kuanin a kisim hi. 39 Kihoupihna Puanbuka nasem dinga hong kuan pasal kum 30 apan kum 50-a upa, 40 a beh beh leh a innkuan kuana kisim 2,630 a pha hi. 41 Kihoupihna Puanbuka nasem Gershon behte a vekpi-in hiai zah ahi. Tangtawn Toupa' thupiak bangin Mosi leh Aron in amaute a sim uhi. 42 Merarite a behbeh leh a innkuan kuanin a kisim hi. 43 Kihoupihna Puanbuka nasem dinga hong kuan pasal kum 30 apan kum 50-a upa, 44 a beh beh leh a innkuan kuana kisim 3,200 a pha hi. 45 Merari behte a vekpi-in hiai zah ahi. Tangtawn Toupa'n Mosi tungtawna thu a piak bangin, Mosi leh Aron in amaute a sim uhi. 46 Tua bangin, Mosi, Aron leh nam makaite'n Levite, a behbeh leh a innkuan kuanin a sim uhi. 47 Kihoupihna Puanbuka nasem dinga hong kuan pasal kum 30 apan kum 50-a upa 48 kisim mi 8,580 a pha hi. 49 Mosi tungtawna Tangtawn Toupa' thupiakin michih kiangah bang sep ding, bang puak ding chih mawhpuakna a kipia hi. Tangtawn Toupa'n Mosi thu a piak bangin, amaute a kisim hi.

Kisimna 5

Giahphual Siangthouna

1 Tangtawn Toupa'n Mosi kiang ah thu a gen a: 2 Israelte thu pia inla, kilawh theih vun natna vei hiam, sa apan thilpawt khat peuh nei hiam, siluang tawh kisaia siangloua ngaih hiam, mi khat peuh giahphual apan sawlkhia uhen. 3 Amaute laka ka tenna a giahphual uh a buahsak louh nadingin, numei hi-in pasal hita leh tua bang mi, giahphual apan sawlkhia in, a chi hi. 4 Israelte'n tua bangin a hih uh a, tua mite giahphual pawlam ah a sawlkhia uhi. Tangtawn Toupa'n Mosi a thuhilh bangbanga a hih uh ahi.

Khelhna Ditna

5 Tangtawn Toupa'n Mosi kiang ah: 6 Israelte thu pia inla: Numei hi-in pasal hita leh, mi khat peuh in midang tunga khelhna a hih a, Tangtawn Toupa tunga muanhuai lou-a a om leh, tua mi a mawh ahi. 7 Ama'n manna tun khelhna a hih pen a phuankhiak ding ahi. A mawhna in manna a tut ditna kim a bawl ding a, seh nga suah seh khat a behlap ding a, a tunga a mawhna mi a pe ding ahi. 8 Ahihhangin, tua mi in ditna piak nading tanpa tanau nai a neih kei leh, tua ditna pen Tangtawn Toupa' a ahi ding a, tua ditna leh a khialpa adinga khuhna bawlsakna belamtal siampi kianga piak ding ahi. 9 Israelte'n siampi kianga thilpiak siangthou a piakte khempeuh uh siampi-a ahi. 10 Michih in thawnpiak siangthou a neih ama-a ahi. Ahihhangin, siampi kianga a piakte bel siampi-a ahi, chi in, a chi hi.

Zi Muanhuailou Ettelna

11 Tangtawn Toupa'n Mosi kiang ah: 12 Israelte kiang ah thu gen inla: Pasal khatpeuh' zi a lampial a, ama' adinga muanhuailou a suah a, 13 pasal dang tawh a lupkhawm a, a pasal in a phawk kei a, tua numei' sianthoulouhna phawkkhiak ahih kei a, tua bel a theihpih mi omlou, a khelh laitak lah mat hilou a hih a, 14 ahihhanga a pasal thikthu hong siat a, a zi a muanmawh a, a zi lah a siangthou lou mah ahih leh, ahih kei leh, thikthusiatna muanmawhna nei mah leh a zi a siangthou ahih leh, 15 pasal in a zi siampi kiang ah a paipih ding ahi. Tua nu taangin barli anvui nei ephah seh sawm suah seh khat zong a laan ding ahi. Tua anvui nei tung ah sathau a buak ding ahi kei a, gim namtui zong a koih ding ahi kei hi. Thikthusiatna tawh kisai thillat ahih man leh mawhna ngaihtuah-a phawkthaksakna thillat ahih man ahi. 16 Siampi in tua numei a tonpih ding a, Tangtawn Toupa' mai ah a dingsak ding ahi. 17 Tua khit chiangin, leibel daiin tui siangthou bangzah hiam a la ding a, biakbuk suai leivui bangzah hiam tua tui lak ah a hel ding ahi. 18 Tangtawn Toupa' maia tua numei a dinsak khit chiangin, a sam a phelsak ding a, numei khut sung ah tua phawkthaksakna thillat, tua thikthusiatna an thillat a koih ding a, ama'n tua hamsia tun tui kha a tawi ding ahi. 19 Tua khit chiangin, siampi in tua numei a kichiamsak ding a: Na pasal tawh na kiten sunga pasal dang tawh lumkhawm lou, lampial lou, kibuahsak lou na hih leh, hamsia tun hiai tui kha in bangmah hon lawh kei hen. 20 Ahihhangin, na pasal tawh na kiten sunga, lampial a, na pasal hilou, pasal dang tawh lumkhawm a, na kibuahsak na hih leh  21 hiai chi kawmin siampi in tua numei kichiamna hamsia nuai ah a koih ding ahi.  Tangtawn Toupa'n na pheipi teemsak a, na gil a puaksak dinga, na mite'n zong hon hamsiatin, mawh hon tangsak uhen aw. 22 Hamsia tun hiai tui kha na pumpi sung ah lut henla, na gil puaksak henla, na pheipi teemsak hen, a chi ding ahi. Tua khitin, numei in: Amen. Tua bang hita hen, a chi ding ahi. 23 Siampi in hiai hamsiate laibuzial ah a gelh ding a, tua tui kha in a silkhe ding ahi. 24 Tua hamsia tui kha tua numei a dawnsak ding a, tua tui a sung ah a lut ding a, gimthuakna thupitak a tun ding hi. 25 Siampi in tua numei' khut apana thikthusiatna om thillat a la ding a, Tangtawn Toupa' mai ah a vei ding a, maitam ah hon tawi ding ahi. 26 Siampi in tua an thillat apan theih gigena thillat dingin khutdim khat a pham ding a, maitam tung ah a haltum ding ahi. Tua nungin, a tui tua numei a dawnsak ding ahi. 27 Tua numei na kibuahsak a, a pasal adinga muanhuailou a na hih leh, tua hamse tun tui dawnsak ahih chiangin, a sung ah a lut ding a, gimthuakna thupitak a tun ding hi. A gil a puaksak ding a, a pheipi a teem ding a, a mite lak ah hamsethuak ahi ding hi. 28 Ahihhangin, tua numei na kihihbuah lou, sianlouhna neilou ahih leh, mawhna neiloua siansak ahi ding a, tate a nei thei ding hi. 29 Hiai bel, numei pasal nei gegu lampial a, a kihihbuah chianga thikthusiatna tawh kisai dan, 30 ahih kei leh, pasal in a zi muangmawh a, a thikthusiatna tawh kisai dan ahi. Siampi in tua numei, Tangtawn Toupa' mai ah a dingsak ding a, hiai dan khempeuh a tung ah a zang ding ahi. 31 A pasal thil gilou hih ahi kei ding, ahihhangin, numei in a khelhna gah a khu ding hi, chi in, a chi hi.

Kisimna 6

Nazir Suaka Kisehtuamna

1 Tangtawn Toupa'n Mosi kiangah thu a gen a: 2 Israelte kiang ah thu gen inla: Pasal hiam numei hiam in thuchiam poimawh, Tangtawn Toupa adinga nasem mi suak dinga kisehtuamna thuchiam bawla Nazirmi a suah nop leh, 3 zu hi-in, silngou sawh dawn thil hiam hita leh, tuate apan a kihemkhe ding a, greptui thuk zong a dawn ding ahi kei hi. Greptui a dawn ding ahi kei a, grep gah leh grepgah keu zong a ne ding ahi kei hi. 4 Nazirmi a hih lai teng grepgui apan thil himhim, a tang leh a hawng zong, a ne ding ahi kei hi. 5 Tua banga kisehtuamna thuchiam a om sung teng, a lu ah mulmet tern himhim zat louh ding ahi. Tangtawn Toupa adinga sehtuam a hihna a bei mateng, amah a siang ahi ding a, a lu-a sam a hawisau ding ahi. 6 Tangtawn Toupa adinga a kisehtuam sung teng siluang naihin a pai ding ahi kei. 7 Ama' pa mahmah, a nu mahmah, a sanggampa mahmah, a sanggamnu mahmah zong a sih leh, tuate hanga siangloua ngaih dingin a kikoih ding ahi kei hi. Pathian adinga sehtuam a hihna chiamtehna a lutunga om ahi. 8 A kisehtuam sung khempeuh, Tangtawn Toupa adinga sehtuam siangthou ahi. 9 Ama' omna muna mi khatpeuh a sih guih a, tua in, a latsa a sam a hihbuah leh, a kisiansuah ni, a ni sagih ni-in a metkhiak ding ahi. 10 A ni giat ni-in Kihoupihna Puanbuk lutna ah, siampi kiang ah vakhu nih, ahih kei leh, kawl vakhu nih a hon tawi ding ahi. 11 Siampi in khelhna thillat dingin khat a laan ding a, haltum thillat dingin khat pen a laan ding hi. Misi luang omna-a om a hih mana khial ahih manin, tua bangin ama' adingin khuhna a bawlsak ding ahi. Tua ni mahin, a lutang sehtuam siangthouin a bawl ding ahi. 12 Amah a kisehtuam sung teng adingin Tangtawn Toupa' mai ah a kilaan ding ahi. Tua dingin, mawhna thillat dingin belamnoupa kum khata upa hon kai ding ahi. Amah a kisehtuam sunga kihihbuah ahih manin, a malam nite a kisim kei ding hi. 13 Nazirmi adingin, a kisehtuam hun a bei chianga zat ding hiai daan ahi. Amah Kihoupihna Puanbuk lutna-a tonpih ding ahi. 14 Ama'n Tangtawn Toupa' mai ah haltum thillat ding belamnoupa kum khata upa khat, khelhna thillat ding belamnounu kum khata upa genbaanglou khat, lemna thillat ding belamtal khat, thillatin a pe ding ahi. 15 Tuate tawh kitonin an thillatte, dawn thillatte leh silngou sawhlouh tanghou lawhbeu khat, tua bel, anvui nei, sathau tawh kihel tanghou peite leh tanghou pei neu, sathaua zut tawh a laankhawm ding ahi. 16 Siampi in hiaite Tangtawn Toupa' mai ah a laan ding a, khelhna thillat leh haltum thillat a bawl ding ahi. 17 An thillat tawh kitonin Tangtawn Toupa' mai ah silngou sawh louh tanghou lawhbeu a lui ding a, tua belamtal lemna thillatin a laan ding ahi. 18 Tua khit chiangin, Kihoupihna Puanbuk lutna ah tua Nazirmi in a latsa a sam a metkhe ding ahi. Tua sam a la dinga lemna thillat nuaia mei ah a khul ding ahi. 19 Tua Nazirmi in a kilatna sam a met khit chiangin, siampi in tua belamtal liang kihuan tawh, lawhbeu sunga tanghou pei leh a pei neu silngou sawhlouh tuak tawh, tua mipa khut ah a pe ding ahi. 20 Siampi in Tangtawn Toupa' mai ah vei thillatin tuate a vei ding ahi. Hiaite a siangthou ahi a, a kiveisa a awm tawh, a kilaansa a phei tawh siampi' tan ahi. Tua khit chiangin, tua Nazirmi in zu a dawn theita ding hi. 21 Nazirmi in a piak theih khatpeuh bana a kisehtuamna banga Tangtawn Toupa' maia thillat ding chiampa Nazirmi tawh kisai dan hiai ahi. Ama'n a chiamsa thil pen, Nazirmi a kisehtuamna dan bangbanga a tangtun teitei ding ahi, chi in, a chi hi.

Siampi' Vualzawlna

22 Tangtawn Toupa'n Mosi kiang ah: 23 Aron leh a tapate kiang ah thu gen inla: Israelte na vualzawl dingdan uh hibang ahi: Amaute kiang ah: 24 Tangtawn Toupa'n noute hon vualzawl henla, hon ching hen. 25 Tangtawn Toupa'n noute tung ah a mai taangsak henla, na tung uah hehpih siam hen. 26 Tangtawn Toupa noute' lam hong nga henla, lungmuanna hon pia hen, chi-in hilh in. 27 Tuachi-in, Ka min Israelte tung ah a koih ding uh a, ke'n amaute ka vualzawl ding hi, a chi hi.

Kisimna 7

Israelte' Thilpiakte

1 Mosi in biakbuk a tunkhiak khit takin, sathau a nilh a, biakbuk vanzatte khempeuh tawh sehtuam siangthouin a bawl hi. Maitam leh a tuium belsuante khempeuh zong sathau a nilh a, sehtuam siangthouin a bawl hi. 2 Tua khitin, Israel makaite, a kisimte laka nam makai, tua innkuan lutangte'n thilpiakte a laan uhi. 3 Tangtawn Toupa' maia a thawnpiak dingun, tungkhuhna nei kangtalai guk leh bawngtal sawmlenih, makai khat zel apan bawngtal khat leh makai nih zel apan kangtalai khat hon paipih uhi. Hiai thilpiakte biakbuk mai ah hong pia uhi. 4 Tangtawn Toupa'n Mosi kiang ah: 5 Amaute apanin hiaite na sang in, Kihoupihna Puanbuka nasep nadinga zat ding ahi ding hi. Michih' nasep nadinga kisam bang zelin tuate Levite khut ah pia in, a chi hi. 6 Tuachi-in, Mosi in tua kangtalaite leh bawngtalte a la a, Levite khut ah a pia hi. 7 Gershonte khut ah kangtalai nih leh bawngtal li a pia a, amaute' nasep nadinga kisam bangbanga a piak ahi. 8 Merarite khut ah kangtalai li leh bawngtal giat a pia a, a nasep nading ua kisam bangbanga a piak ahi. 9 Ahihhangin, Kohathte mawhpuak bel, liangkoua thil siangthoute puak ding ahih manin, Mosi in amaute khut ah piak a nei kei hi. 10 Maitam, sathau a kinilh takin, a lat nadingin makaite'n a thilpiakte uh hon tawi uh a, maitam mai ah a laan uhi. 11 Tangtawn Toupa'n Mosi kiang ah: Ni khatin makai khat in maitam lat nadinga thilpiak a piak zel ding ahi, a na chikhin hi. 12 A ni khat ni-a a thilpiak hon tawipa Aminadab' tapa Nashon ahi. Amah Judah nama mi ahi. 13 Ama' thilpiak bel ngun kuang khat, shekel 130-a gik, tui thehna ngun belkuang khat, shekel 70-a gik ahi. Tua shekelte Mun Siangthou shekel buk zah ngen ahi. Tuate in thillat ding anvui nei, sathau tawh kihela dim ahi. 14 Tua baan ah gimnamtuia dim kham kuang shekel sawma gik ahi. 15 Tua baan ah, haltum thillat ding bawngtal khat, belamtal khat leh belamnoupa kum khata upa khat ahi. 16 Tua baan ah, khelhna thillat ding keltal khat, 17 tua baan ah, lemna thillat ding bawngtal nih, belamtal nga, keltal nga leh belamnoupa kum khata upa khat ahi. Hiai bel, Aminadab' tapa Nashon' thilpiak ahi. 18 A ni nih ni-in, Zuar' tapa Nathanel in a thilpiak hon tawi hi. Amah Isakharte makai ahi. 19 Ama' thilpiak bel ngun kuang khat, shekel 130-a gik leh tui thehna ngun belkuang khat, shekel 70-a gik ahi. Tua shekelte munsiangthou shekel buk zah ngen ahi. Tuate an thillat ding anvui nei, sathau tawh kihela dim tuak ahi. 20 Tua baan ah, kham kuang shekel sawma gik, gim namtuia dim ahi. 21 Tua baan ah, haltum thillat ding bawngtaltuai khat, belamtal khat, belamnoupa kum khata upa khat ahi. 22 tua baan ah, khelhna thillat ding keltal khat, 23 tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Zuar' tapa Nathanel' thilpiak ahi. 24 A ni thum ni-in, Helon' tapa Eliab in a thilpiak hon tawi hi. Amah Zebulunte makai ahi. 25 Ama' thilpiak bel, ngun kuang khat, shekel 130-a gik leh tui thehna ngun belkuang khat, shekel 70-a gik ahi. Tuate munsiangthou shekel gik dana buk ahi tuak hi. Tua thilpiakte an thillat ding anvui nei, sathau tawh kihela dim ahi. 26 Tua baan ah, kham kuang khat shekel sawma gik, gimnamtuia dim ahi. 27 Tua baan ah haltum thillat ding bawngtaltuai khat, belamtal khat leh belamnoupa kum khata upa khat ahi. 28 Tua baan ah, khelhna thillat ding keltal khat ahi. 29 Tua baan ah, lemna thillata gawh ding bawngtal nih, belamtal nga, keltal nga leh belamnoupa kum khata upa nga ahi. Hiai Helon' tapa Eliab' thilpiak ahi. 30 A ni li ni-in, Shedeur' tapa Elizur in a thilpiak hon tawi hi. Amah Reubente' makai ahi. 31 Ama' thilpiak bel, ngun kuang khat, shekel 130-a gik leh tui thehna ngun belkuang khat, shekel 70-a gik ahi. Tuate munsiangthou shekel gik dana buk ahi. Tuate an thillat ding anvui nei, sathau tawh kihela dim ahi. 32 Tua baan ah, kham kuang shekel sawma gik khat, gim namtuia dim ahi. 33 Tua ban ah, haltum thillat ding bawngtaltuai khat, belamtal khat leh belamnoupa kum khata upa khat ahi. 34 Tua baan ah, khelhna thillat ding keltal khat ahi. 35 Tua baan ah, lemna thillata gawh ding bawngtal nih, belamtal nga, keltal nga leh belamnoupa kum khata upa nga ahi. Hiai Shedeur' tapa Elizur' thilpiak ahi. 36 A ni nga ni-in, Zurishadai' tapa Shelumiel in a thilpiak hon tawi hi. Amah Simeonte makai ahi. 37 Ama' thilpiak bel, ngun kuang khat shekel 130-a gik leh tui thehna ngun belkuang khat, shekel 70-a gik ahi. Tuate munsiangthou shekel gik dana buk ahi. Tuate an thillat ding anvui nei, sathau tawh kihela dim ahi. 38 Tua baan ah, kham kuang shekel sawma gik khat, gimnamtuia dim ahi. 39 Tua baan ah, haltum thillat ding bawngtaltuai khat, belam-tal khat, belamnoupa kum khata upa khat ahi. 40 Tua baan ah, khelhna thillat ding keltal khat ahi. 41 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Zurishidai' tapa Shelumiel' thilpiak ahi. 42 A ni guk ni-in, Deuel' tapa Eliasaf in a thilpiak hon tawi hi. Amah Gadte' makai ahi. 43 Ama' thilpiak bel, ngun kuang khat, shekel 130-a gik leh tui thehna ngun belkuang khat, shekel 70-a gik ahi. Tuate munsiangthou shekel gik dana buk ahi. Tuate an thillat ding anvui nei, sathau tawh kihela dim ahi. 44 Tua baan ah, ngun kuang khat shekel sawma gik, gimnamtuia dim ahi. 45 Tua baan ah, haltum thillat ding bawngtaltuai khat, belamtal khat, belamnoupa kum khata upa khat ahi. 46 Tua baan ah, khelhna thillat ding keltal khat ahi. 47 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Deuel' tapa Eliasaf thilpiak ahi. 48 A ni sagih ni-in, Amihud' tapa Elishama in a thilpiak hon tawi hi. Amah Efraimte' makai ahi. 49 Ama' thilpiak bel, ngun kuang khat, shekel 130-a gik, tuithehna ngun belkuang khat, shekel 70-a gik ahi. Tuate munsiangthou shekel gik dana buk ahi. Tuate an thillatte ding anvui nei, sathau tawh kihela dim ahi. 50 Tua baan ah, kham kuang shekel sawma gik khat, gimnamtuia dim ahi. 51 Tua baan ah, haltum thillat ding bawngtaltuai khat, belam tai khat, belamnoupa kum khata upa khat ahi. 52 Tua baan ah, khelhna thillat ding keltal khat ahi. 53 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Amihud' tapa Elishama' thilpiak ahi. 54 A ni giat ni-in, Pedazur' tapa Gamaliel in a thilpiak hon tawi hi. Amah Manasete' makai ahi. 55 Ama' thilpiak bel, ngun kuang khat, shekel 130-a gik, tuithehna ngun belkuang khat, shekel 70-a gik ahi. Tuate munsiangthou shekel gik dana buk ahi.Tuate an thillat ding anvui nei, sathau tawh kihela dim ahi. 56 Tua baan ah, kham kuang shekel sawma gik khat, gimnamtuia dim ahi. 57 Tua baan ah, haltum thillat ding bawngtaltuai khat, belamtal khat, belamnoupa kum khata upa khat ahi. 58 Tua baan ah, khelhna thillat ding keltal khat ahi. 59 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Pedazur' tapa Gamaliel thilpiak ahi. 60 A ni kua ni-in, Gideoni' tapa Abidon in a thilpiak hon tawi hi. Amah Benjaminte' makai ahi. 61 Ama' thilpiak bel, ngun kuang khat, shekel 130-a gik leh tuithehna belkuang khat, shekel 70-a gik ahi. Tuate munsiangthou shekel gik dana buk ahi. Tuate an thillat ding anvui nei, sathau tawh kihela dim ahi. 62 Tua baan ah, kham kuang khat shekel sawma gik, gimnamtuia dim ahi. 63 Tua ban ah, haltum thillat ding bawngtaltuai khat, belamtal khat leh belamnoupa kum khata upa khat ahi. 64 Tua baan ah, khelhna thillat ding keltal khat ahi. 65 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Gideon' tapa Abidon' thilpiak ahi. 66 A ni sawm ni-in, Amishadai' tapa Ahiezer in a thilpiak hon tawi hi. Amah Dante' makai ahi. 67 Ama' thilpiak bel, ngun kuang khat, shekel 130-a gik leh tuithehna ngun belkuang khat, shekel 70-a gik ahi. Tuate munsiangthou shekel gik dana buk ahi. Tuate an thillat ding anvui nei, sathau tawh kihela dim ahi. 68 Tua baan ah, kham kuang shekel sawma gik khat, gimnamtuia dim ahi. 69 Tua baan ah, haltum thillat ding bawngtaltuai khat, belamtal khat leh belamnoupa kum khata upa khat ahi. 70 Tua baan ah, khelhna thillat ding keltal khat ahi. 71 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Amishadai' tapa Ahiezer' thilpiak ahi. 72 A ni sawmlekhat ni-in, Okran' tapa Pagiel in a thilpiak hon tawi hi. Amah Asherte' makai ahi. 73 Ama' thilpiak bel, ngun kuang, khat shekel 130-a gik leh tuithehna ngun belkuang shekel 70-a gik ahi. Tuate munsiangthou shekel gik dana buk ahi. Tuate, an thillat ding anvui nei, sathau tawh kihela dim ahi. 74 Tua baan ah, kham kuang shekel sawma gik, gimnamtuia dim ahi. 75 Tua baan ah, haltum thillat ding bawngtaltuai khat, belamtal khat, belamnoupa kum khata upa khat ahi. 76 Tua baan ah, khelhna thillat ding keltal khat ahi. 77 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Okram' tapa Pagiel' thilpiak ahi. 78 A ni sawmlenih ni-in, Enan' tapa Ahira in a thilpiak hon tawi hi. Amah Naftalite' makai ahi. 79 Ama' thilpiak bel, ngun kuang khat, shekel 130-a gik leh tuithehna belkuang khat shekel 70-a gik ahi. Tuate munsiangthou shekel gik dana buk ahi. Tuate an thillat ding anvui nei, sathau tawh kihela dim ahi. 80 Tua ban ah, kham kuang shekel sawma gik, gimnamtuia dim ahi. 81 Tua baan ah, haltum thillat ding bawngtaltuai khat, belamtal khat, belamnoupa kum khata upa khat ahi. 82 Tua baan ah, khelhna thillat ding keltal khat ahi. 83 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Enan' tapa Ahira' thilpiak ahi. 84 Hiaite, maitam, sathau a kinilh laia maitam lat nadinga Israel makaite' thilpiak ahi. Ngun kuang sawmlenih, tuithehna ngun belkuang sawmlenih, leh kham kuang sawmlenih ahi. 85 Ngun kuangte shekel 130-a gik chiat, tuithehna belkuang shekel 70-a gik chiat ahi. Avekpi-in ngun kuangte shekel 2,400 a pha hi. Tuate munsiangthou shekel gik dana buk ahi. 86 Gimnamtuia dim kham kuang sawmlenihte, munsiangthou shekel gik dana buk, shekel sawma gik chiat ahi. Avekpi-in, kham kuangte shekel 120 a pha hi. 87 Haltum thillat ding ganta avekpi-in an thillatt tawh bawngtaltuai sawmlenih, belamtal sawmlenih leh belamnoupa kum khata upa sawmlenih a pha hi. Khelhna thillat ding ganta keltal sawmlenih a kizang hi. Tuate an thillat tawh ahi. 88 Lemna thillat kithoihna ading ganta avekpi-in bawngtal 24, belamtal 60, keltal 60 leh belamnoupa kum khata upa 60 a pha hi. Hiaite khempeuh maitam, sathau a kinilh nunga a lat nadinga thilpiakte ahi. 89 Tangtawn Toupa tawh kihoupih dinga Kihoupihna Puanbuk sunga Mosi a lut takin, Theihpihna singkuang tunga khelhna khuhna mun tunga cherubte kikal apan amah houpih aw a za a, amah tawh a kihou uhi.

Kisimna 8

Meivakte Tunkhiakna

1 Tangtawn Toupa'n Mosi a houpih a: 2 Aron houpih inla: Tua meivak sagihte na tunkhiak chiangin, meivak tunna mailam teng a tanvak ding ahi, chi in, a chi hi. 3 Aron in tua bangin a hih hi. Tangtawn Toupa'n Mosi thu a piak bangin, meivak mung teng ah a mailam ngain meivakte a tangkhia hi. 4 Tua meivak mung a kibawl dan hibang ahi: Meivak mung a bul apan a pakte tanin sekthawh khama kibawl ahi. Tangtawn Toupa'n Mosi a lah bangbanga kibawl ahi.

Levite Sehtuamna

5 Tangtawn Toupa'n Mosi a houpih a: 6 Israel dangte apan Levite khenkhia inla, a sianga ngaih dinmun neiin bawl in. 7 Amaute siansuah nadingin hiai hih in: Amaute tung ah siansuahna tui theh in. Tua khit chiangin a pumpite ua mul metsiangsak uhenla, a puansilhte uh sawp uhen la, kisiansuah uhen. 8 Bawngtaltuai khat, an thillat ding annel vui, sathau tawh kihel tawh, lasak in. Tua khit chiangin, khelhna thillat ding bawngtaltuai dang khat la in. 9 Kihoupihna Puanbuk mai ah Levite hon tonpih inla, Israelte khempeuh kaikhawm in. 10 Tangtawn Toupa' mai ah Levite non tonpih ding a, Israelte'n amaute tung ah khut a nga ding uh ahi. 11 Amaute'n Tangtawn Toupa' nna a sep theih nadingun, Israelte apan vei thillatin Aron in Tangtawn Toupa' mai ah amaute a lan ding ahi. 12 Levite'n tua bawngtalte lutunga khut a ngak khit chiang-un, khat pen Tangtawn Toupa' maia khelhna thillat dingin zang in. A dang khat pen bel, Levite adinga khelhna khuhna bawlsak nadingin, haltum thillat dingin zang in. 13 Aron leh a tapate mai ah Levite dingsak inla, Tangtawn Toupa' mai ah vei thillatin amaute laan in. 14 Hibangin, Israel dangte apan Levite na septuam ding a, Levite kei-a ahi ding uhi. 15 Levite na siansuah khit a, vei thillata na lat khit chiangin, Kihoupihna Puanbuk ah nasem dingin hong kuan ding uh ahi. 16 Amaute keia dinga pumpiakkhiak Israelte ahi ding uh ahi. 17 Israela ta pasal piang masa peuh mah, mihing hi-in, ganta hita leh, keia ahi. Aigupta gama tamasa khempeuh ka satlup laiin, amaute kei adingin ka septuamta hi. 18 Israela ta pasal piang masate khempeuh taanga Levite ka lak ahi. 19 Israel khempeuh lak apana Levite zaw Israel taanga Kihoupihna Puanbuka nasem ding leh amaute adinga khelhna khuhna bawlsak dingin Aron leh a tapate kiang ah thawnpiakin ka pia hi. Tua bel, Israelte'n mun siangthou a naih chiang ua hipi bangmah in amaute a thah louh nading ahi, a chi hi. 20 Tangtawn Toupa'n Mosi thu a piak bangbangin, Mosi, Aron leh Israelte khempeuh in Levite tung ah thil a hih uhi. 21 Levite a kisiansuah uh a, a puansilhte uh a sawpsiang uhi. Tua khitin, Aron in amaute Tangtawn Toupa' mai ah vei thillatin a pia a, amaute siansuah dingin amaute adingin khuhna a bawlsak hi. 22 Tua nungin, Aron leh a tapate vaisaina nuai ah, Kihoupihna Puanbuka nasem dingin Levite hong kuan uhi. Tangtawn Toupa'n Mosi thu a piak bangbangin, Israelte'n Levite tung ah thil a hih uhi. 23 Tangtawn Toupa'n Mosi kiang ah: 24 Hiai Levite' nasep ding dan ahi: Pasal kum 25 apan a tunglama upate Kihoupihna Puanbuka nasepna ah a pang ding uh ahi. 25 Ahihhangin, kum 50 a phak chiangun nasep ngeina apan a tawlnga ding uh a, a sem nawn kei ding uh ahi. 26 A sanggamte un, Kihoupihna Puanbuka a sep ding uh a sepna uah bel a huh thei ding uhi. Ahihhangin, amau mah a sempipenin bel a pang ding uh ahi kei hi. Levite mawhpuakna na got ding dan hibang ahi, a chi hi.

Kisimna 9

Paikan Ankuang

1 Aigupta gam apan hong paikhiak nung uh a kum nihna, a kha khatna ah, Tangtawn Toupa'n Sinai Gamdai-gamkeu ah Mosi a houpih a: 2 A hun seh ah Israelte Paikan Ankuang luisak in. 3 A hun seh ah, hiai kha, a ni sawmleli ni nitak khawmuiin a dan bang tektekin tua ankuanglui uhen, a chi hi. 4 Tuachi-in, Mosi in Israelte khempeuh Paikanankuang lui dingin a hilh a, 5 amaute'n a kha khatna, a ni sawmleli ni, nitak khawmuiin tua Sinai Gamdai-gamkeu ah Tangtawn Toupa'n Mosi a thupiak bangbangin, ankuang a lui uhi. 6 Ahihhangin, amaute pawlkhat siluang tawh kisaia siangloua ngaih ahih manun, tua ni-in Paikan Ankuang lui theilouin a om uhi. Tuachi-in, tua ni mah-in, amaute Mosi leh Aron kiang ah hong pai uh a, 7 Mosi kiang ah: Siluang tawh kisaiin koute a siangloua ngaih ka hi uhi. Ahita zongin, banghanga koute'n a hun seh-a, Israel dangte tawh Tangtawn Toupa' thillat laan thei lou ding ka hi ua oi? a chi uhi. 8 Mosi in amaute a dawng a: Noute tawh kisaia Tangtawn Toupa'n bang thute pia hiam, chih ka theih mateng na ngak un, a chi hi. 9 Tua khitin, Tangtawn Toupa'n Mosi kiang ah: 10 Israelte hilh inla: Noute laka khatpeuh, ahih kei leh, na suante uh siluang tawh kisaia a siangloua ngaih a hih uleh, ahih kei leh, khualtama zinkhia hiam ahih aleh, Tangtawn Toupa' Paikan Ankuang a lui thei vek ding uhi. 11 A kha nihna, a ni sawmleli ni, nitak khawmuiin Paikan Ankuang a lui ding uh ahi. Silngou sawhlouh tanghou tawh, loukha tawh, tua Paikan belamnou a ne ding uh ahi. 12 Nek bang himhim a zingsang dong a sit ding uh ahi kei a, a guh himhim zong a sattan ding uh ahi kei. Paikan Ankuang a lui chiangun, a dan bang tektek a zui ding uh ahi. 13 Ahihhangin, khualtama zinkhia hilou a sianga ngaih, khat peuhin Paikan Ankuang a lui kei leh, a hun seha Tangtawn Toupa' thillat laan lou ahih manin, amaute lak apan satkhiak teitei ding ahi. Tua bang mi in a khelhna gah a paw ding ahi. 14 Na lak ua om gamdang mi in Paikan Ankuang a lui nop leh, a dan bang tektek a zui ding ahi. Gamsung mi leh gamdang mi adingin dan kibang na nei ding uh ahi, chi in, a chi hi.

Biakbuk tunga Meipi

15 Biakbuk, tua Theihpihna Puanbuk a kitunkhiak ni-in, meipi in a khuh hi. Nitaklam apan zingsang dongin tua biakbuk tunga meipi pen meikuang a bang hi. 16 A omdan tua bang ahi. Meipi in biakbuk a khuh a, zan chiangin meikuang a bang hi. 17 Tua Puanbuk tung apan meipi a tungkah peuhpeuh chiangin, Israelte a kipankhia uh a, tua meipi a niamkiak chiangin Israelte'n giahphual a sat zel uhi. 18 Tangtawn Toupa' thupiakin Israelte a kipankhia uh a, a thupiakin giahphual a sat uhi. Biakbuk tunga meipi a om lai teng giahphual ah a taam uhi. 19 Biakbuk tunga meipi a sawt om chiangin Israelte'n Tangtawn Toupa' thupiak mangin, a kipankhe kei uhi. 20 Khatvei vei tua meipi biakbuk tung ah ni tawmchik kia a om hi. Tua bang hun chiangin Tangtawn Toupa' thupiakin giahphual a sat uh a, Ama' thupiak mah-in a kipankhia uhi. 21 Khatvei vei tua meipi, nitak lam apan zingsang chiang lei a taam hi. Zingsanga a tungkah chiangin, a kipankhia uhi. Sun hi-in, zan hita leh, meipi a tungkah peuhpeuh chiangin, a kipankhia uhi. 222 Tua meipi, biakbuk tung ah ni nih hita leh, kha khat hita leh, kum khat hita leh, a taam sung teng Israelte giahphual ah a taam uh a, a kipankhe kei uh a, a tungkah peuhpeuh chiangin a kipankhia uhi. 23 Tangtawn Toupa' thupiakin giahphual a sat uh a, Tangtawn Toupa' thupiakin a kipankhia uhi. Mosi' tungtawna a thupiak bangbangin Tangtawn Toupa' thupiak a zui uhi.

Kisimna 10

Ngun Pengkulte Zatna

1 Tangtawn Toupa'n Mosi kiang ah: 2 Ngunsik sekthawhin pengkul nih bawl inla, mipite sapkhawm nading leh giahphual kisuankhiak nadingin zang in. 3 A niha a kimut chiangin, mipite khempeuh na maia Kihoupihna Puanbuk lutna ah hong paikhawm ding uh ahi. 4 Khat kia a kimut chiangin, makaite, Israel beh tuulpite na maia hong paikhawm ding uh ahi. 5 Pengkul saugina a gin chiangin suahlam pang giahphual sat namte a kipankhe ding uh ahi. 6 Pengkul saugin a nihveina a gin chiangin, simlam panga giahphual sat namte a kipankhe ding uh ahi. Pengkul sauginte kipatkhiak ding genna ahi ding hi. 7 Mipite kaihkhawm nadingin pengkulte mut in. Ahihhangin, gin dan kibangin na mut ding ahi kei hi. 8 Aron tapa siampite'n tua pengkulte a mut ding uh ahi. Hiai noute leh khangsawn sawnte adinga omden ding thuseh ahi. 9 Noute hon nuaisiahte tawh noumau' gamsunga na kidou chiangun pengkulte sauginin mut un. Tangtawn Toupa na Pathian un noute hon theigige ding a, na melmate uapan hon hukhe ding hi. 10 Na kipah hunte uh  a hunhuna ankuangluite leh Kha Thak ankuangluite ah  na haltum thillatte uleh lemna thillatte uh tung ah pengkulte mut un. Na Pathian uh mai ah noute adingin theihgigena ahi ding hi. Kei Tangtawn Toupa na Pathian uh ka hi, a chi hi.

Sinai apan Kipatkhiakna

11 A kum nihna, a kha nihna, a ni 20 ni-in, Theihpihna biakbuk tung apan meipi a tungkah hi. 12 Tua bangin, Israelte Sinai Gamdai-gamkeu apan a kipankhia uh a, tua meipi Paran Gamdai-gamkeua hong niamkiak masiah mun khat apan mun dang ah a vialzin uhi. 13 Mosi tungtawna Tangtawn Toupa' thupiak bangin, a kipatkhiakna masapen uh ahi. 14 Judah giahphuala apawl pawla kikhente amau' puanlap nuai ah a pai masa uhi. Amaute' makaiin Aminadab' tapa Nashon a pang hi. 15 Isakhar nama pawlpi makai in Zuar' tapa Nethanel a pang hi. 16 Zebulun nama pawlpi makaiin Helon' tapa Eliab a pang hi. 17 Tua khitin, biakbuk a kiphelkhia a, tua biakbuk van pua Gershonte leh Merarite a kipankhia uhi. 18 Judah nam zomin Reuben giahphuala apawl pawla kikhente, amau puanlap nuai ah, a pai uhi. Amaute' makaiin Shedeur' tapa Elizur a pang hi. 19 Simeon nama pawlpi makai in Zurishadai' tapa Shelumiel a pang hi. 20 Gad nama pawlpi makaiin Deuel' tapa Eliasaf a pang hi. 21 Tua khitin, Kohathte, thil siangthoute puain a kipankhia uhi. Amaute hong tun ma-a biakbuk tunkhiak ding ahi. 22 A zomin Efraim giahphuala a pawl pawla kikhente amau puanlap nuai ah a pai uhi. Amaute' makaiin Amihud' tapa Elishama a pang hi. 23 Manase nama pawlpi makaiin Pedazur' tapa Gamaliel a pang hi. 24 Benjamin nama pawlpi makaiin Gideoni' tapa Abidan a pang hi. 25 A tawpin, pawl dangte nungdalin Dan giahphuala pawl tuamtuamte, amau puanlap nuai ah a kipankhia uhi. Amaute' makaiin Amishadai' tapa Ahiezer a pang hi. 26 Asher nama pawlpi makaiin Okran' tapa Pagiel a pang hi. 27 Naftali' nama pawlpi makaiin Enan' tapa Ahira a pang hi. 28 Israelte a pawl pawla kizoma a pai dan uh hibang ahi. 29 Mosi in Midian mi Reuel' tapa Hobab a houpih hi. Reuel bel Mosi' sungpa ahi. Ama'n a kiang ah: Tangtawn Toupa'n: Gam kon pe ding, a chihna mun zuana kipankhia ka hi uh a, hon zui in, Tangtawn Toupa'n Israelte kianga thil hoih chiamta hiven, na tung ah siam ka suah mahmah ding uhi, a chi hi. 30 Hobab in a dawng a: Hilou e, kon zui dah mai ding. Keima' gam ah ka mite kiang ah ka kik nawn ding, a chi hi. 31 Ahihhangin, Mosi in: Koute hon nuse ken. Gamdai-gamkeua koi mun ah giahphual sat le-ung hoih ding hiam chih nang thei zaw na hih chiangin, koute adinga ka mit uh hi ding na hi. 32 Non zuih leh bel, Tangtawn Toupa'n thil hoih hon piak peuhmah kon hawm sam ding uhi, a chi hi. 33 Tua bangin, Tangtawn Toupa' mual apan a kipankhia uh a, ni thum a pai uhi. Tua ni thum sung teng Tangtawn Toupa' Thukhun singkuang amaute maia paiin amaute adingin tawlngakna mun a zong hi. 34 Giahphual apan a kipatkhiak chiangun, sun in Tangtawn Toupa' meipi amaute tung ah a om hi. 35 Tua singkuang a kipatkhiak chiangin Mosi in: Tangtawn Toupa aw, kisa in! Na melmate thehzakin om uhen, na mai ah na galte taikek uhen, a chi hi. 36 Singkuang a khawl chiangin, ama'n Tangtawn Toupa aw, hong kik in. Simsenglouh Israel sang tampite kiang ah hong kik in, a chi hi.

Kisimna 11

Tangtawn Toupa apan Meikuang

1 Mipite Tangtawn Toupa zakin a phun uhi. Tua a phunna uh Tangtawn Toupa muhin thil gilou ahi. Ama'n amaute phunna a zak takin a hehna a kuang hi. Tangtawn Toupa' mei amaute lak ah a kuang a, giahphual nawlnung pawlkhat a kang hi. 2 Mipite'n Mosi a sam uh a, amah Tangtawn Toupa' mai ah a thum a, mei a mit hi. 3 Tua bang ahih manin, tua mun min dingin Tabera a sa uhi. Tangtawn Toupa' mei in amaute a kat man ahi.

Tangtawn Toupa apan Vengkengte

4 Amaute' laka pawl khat in an dang a lunggulh uh a, Israelte lak ah phunna hong kipan a: Nek ding sa nei beek lehang zaw! 5 Aigupta gama manbeia ngasa i nekte ngaina hang e  tangmaite, dawnpawlte, phulun dawngte, phulun bulbalte, phulun thakte khawng tawh. 6 Tu'n lah i anduh tha suakta kei. Hiai mana lou lah bangmah muphata kei hang! a chi uhi. 7 Mana bel koriandar tang bang leh grepgah keu bang ahi. 8 Mite'n a tomkhawm uh a, buhgawinain a gawivui uh a, ahih kei leh, sum ah a suvui uh a, beiin a huan uhi. Ahih kei leh tanghou peiin a bawl uhi. A lim dan bel oliv thaua kan bang ahi. 9 Zan kala, giahphuala daitui a kiak chiangin, mana zong hong kesuk ahi.

Mosi Phunna

10 Michih a puanbuk kongbula a phunnate Mosi in a za hi. Tangtawn Toupa a heh mahmah a, a hehna a hong kuangkhia hi. Mosi lungkhamin a mangbang hi. Tangtawn Toupa kiang ah: 11 Banghanga na silapa tunga hiai lungkham mangbatna hon tungsak na hia? Ke'n na mit tunlahna bang ka hih-a ahia, hiai mite puakgika non got? 12 Hiaite khempeuh ka paaisa ahi ua hia? Ka suan ka khakte ahi ua hia? Banghanga naungek don banga angsunga pom a, a pu a pate uh kianga kichiama piak ding na chiam gama pii dinga hon hilh na hia? 13 Mi hiai zahzah ading sa koi ah ka la dia ahia? Ka kiang ah a kapkap uh a: Nek ding sa hon pia in, a chi ve ua le! 14 Hiai mite kei kia'n paw zoulou ka hi. Kei adinga puakgik lua ahi. 15 Non bawl dan hibang ding a hih leh, tu mahmahin hon that mai in. Na mitmuha deihsakna tang ka hih leh, ka siatna hon maituahsak ken, a chi hi. 16 Tangtawn Toupa'n Mosi kiang ah: Mipite laka makai leh ulian ding hi-a na theih Israel upate laka mi 70 hon tonpih in. Nang tawh dingkhawm dingin, Kihoupihna Puanbuk ah amaute hon paisak in. 17 Kong kumsuk ding a, tua ah kon houpih ding a, na tunga Kha om apan ka la ding a, amaute tung ah tua Kha ka koih ding. Hiai mipite tawh kisaia puakgik nang kia-a paw louin amaute'n hon puakpih ding uhi. 18 Mipite hilh inla: Zingchiangin sa na ne ding uh. Tua dinga kisakholin ki siangsak un, Tangtawn Toupa'n na kah ua: Nek ding sa nei beek leng zaw! Aigupta gam ah nuam i sa zaw! na chih uh a zata. Tangtawn Toupa'n sa hon pe ding a, na ne ding uh. 19 Ni khat kia, ni nih kia, ahih kei leh, ni nga, ni sawm, ni 20 kia na ne kei ding uh. 20 Kha khat sung na nakvang uapan a pawt a, na kih mateng uh na ne ding uh. Na lak ua om Tangtawn Toupa nial a, a maia kap zawzena: Banghanga Aigupta gam nuse peuhmah i hia? chi hi ve uchin, chi in, a chi hi. 21 Ahihhangin, Mosi in: Ka ompih mite khea pai thei 600,000 ahi, Nang kha khat sung a nek ding uh sa ka pe ding, na chi a! 22 Belam leh kelte leh bawngtal a honhonin kigou leh zong a kham ding ua hia? Tuipi-a ngasate a vekpi-in amaute adingin kiman leh zong a kham ding ua hia? a chi hi. 23 Tangtawn Toupa'n Mosi a dawng a: Tangtawn Toupa' baan a tom lua ahia? Ka gente na muhin a tangtung hia, tangtung lou na mu ding, a chi hi. 24 Tuachi-in, Mosi a paikhia a, Tangtawn Toupa' thugen mipite a hilh hi. A upate uh 70 a kaikhawm a, tua Puanbuk kimkot ah a dingsak hi. 25 Meipi lak ah Tangtawn Toupa hong kumsuk a, amah a houpih hi. Ama' tunga om Kha apan a la a, upa 70-te tung ah tua Kha a koih hi. Amaute tunga Kha a om takin kamsang thugenin thu a gen uhi. Tua bangin bel a gengen nawn kei uhi. 26 Ahihhangin, mi nih Eldad leh Medad kichite bel giahphual ah a om lailai uhi. Upate laka minkhum ahi uh a, ahihhangin tua Puanbuk ah a va-pai kei uhi. Hinapi-in amaute tung ah zong Kha a om a, giahphual ah kamsang thugenin thu a gen uhi. 27 Tangval khat a tai a, Mosi a vahilh a: Eldad leh Medad in giahphual ah kamsang thugenin thu a gen uh, a chi hi. 28 Nun' tapa Joshua, a tuailai hun apan Mosi panpihpa'n thu a gen a: Ka toupa Mosi aw, amaute khou in, a chi hi. 29 Ahihhangin, Mosi in a dawng a: Kei guma na thikthu sia ahi maw? Tangtawn Toupa' mite khempeuh kamsang hi uhenla, Tangtawn Toupa'n amaute tungah a Kha koih leh ka chi tel ve! a chi hi. 30 Tua khitin, Mosi leh Israel upate, giahphual ah a kik uhi.

Vengkeng Piakna

31 Hichi hong hi a, Tangtawn Toupa apan huih hong nung a, tuipi lam apan vengkeng hon hawi hi. Giahphual kimkot, ni khat lam dongin, tong niha sahin vengkengte hon mutkhesuk hi. 32 Tua ni sun nitum leh a zan khawvak, a zing chiang sun nitum in, mipite a kuankhia uh a, vengkengte a tomkhawm uhi. Mi khat in homer sawm sanga tawmzaw lou a tomkhawm hi. Tua khitin, giahphual ah a zalh zezua uhi. 33 Tua sa a kam sung ua a om laitakin, a valhkhit maun, mipite tung ah Tangtawn Toupa' thangpaihna a kuang a, amaute hipi in a nuai hi. 34 Tua bang ahih manin, tua mun min dingin Kibroth Hatava a sa uhi. Ahang bel, tua muna an dang lunggulh mite kivui hi ve-un. 35 Kibroth Hatava apan mipite Hazeroth dong a pai uh a, tua ah a giak uhi.

Kisimna 12

Miriam leh Aron' Helna

1 Mosi in Kush numei zi-a nei hiven, tua a Kush zi hangin, Miriam leh Aron in Mosi a gense panta uh a: 2 Tangtawn Toupa'n Mosi tungtawn kia-a thu gen hia? Eite tungtawna zong thu gen lou hia? a chi uhi. Tangtawn Toupa'n hiai a za hi. 3 Mosi bel mi kingainiam mahmah ahi a, leitung maikaiha midang teng sangin zong a kingainiam zaw hi. e hihna.

Miriam Gawtna

4 Tangtawn Toupa'n Mosi, Aron leh Miriam kiang ah thu a gen pah a: Na thumun hong paikhia unla, Kihoupihna Puanbuk ah hong pai un, a chi hi. Tuachi-in, a thumun a vapai uhi. 5 Tua khitin, Tangtawn Toupa' meipi khuamin hong kumsuk a, Puanbuk lutna ah a ding a, Aron leh Miriam a sam hi. Amau gel in hon naih takun, 6 Ama'n: Ka thugen ngai un: Noute laka Tangtawn Toupa' kamsang a om chianga, a kianga mengmuhnate tungtawna kilak ing a, mangte-a houpih hi'ng. 7 Ahihhanga, ka sila Mosi tawh kisaia tua bang hi lou hi. Amah zaw ka insung khempeuha muanhuai ahi. 8 Amah zaw kimaituah-a houpih ing a, thu theihhak hi lou-a, kiteltaka thu gen zel hi'ng. Ama'n zaw Tangtawn Toupa lim leh mei mu hi. Banghanga ka sila Mosi gensiat ding lau lou na hi ua? a chi hi. 9 Amaute tung ah Tangtawn Toupa hehna a kuang a, amaute a nusia hi. 10 Tua Puanbuk tung apan meipi a tungkah takin, Miriam, a dinna ah a phaak a, vuk bang maiin a ngou hi. Aron amah lam ah a kihei a, Miriam a phaak ahi chih a mu hi. 11 Mosi kiang ah: Ka toupa aw, haihuaipi-a ka na khelhna uh mawh hon khusak ken. 12 Naungek a nu sung apan sisa-a suak, a sa kimkhat kinegaisa bangin amah omsak ken, a chi hi.

Mosi' Thumsakna

13 Tuachi-in, Mosi in Tangtawn Toupa' mai ah a ngen a: Pathian aw, amah damsak in! a chi hi. 14 Tangtawn Toupa'n Mosi a dawng a: A pa'n a maitang ah chilphih leh, ni sagih sung zahlakin om lou ding hiam? Ni sagih sung giahphual pawlam ah amah khum tuam in. Tua khit chiangin amah laklut theih ahi ding, a chi hi. 15 Tuachi-in, ni sagih sung Miriam, giahphual pawlam ah khumtuamin a om a, laklut kik a hih masiah mipite a kisuankhe kei uhi. 16 Tua nungin, mipite'n Hazeroth a nusia uh a, Paran Gamdai-gamkeu ah giahphual a sat uhi.

Kisimna 13

Kanan Gam Velna

1 Tangtawn Toupa'n Mosi a houpih a: 2 Israelte ka piak ding Kanan gam va vel ding pawl khat sawl in. Nam khat laka a makaite uh laka khat zel sawl in, a chi hi. 3 Tuachi-in, Tangtawn Toupa' thupiak bangin Mosi in Paran Gamdai-gamkeu apan amaute a sawlkhia hi. Amaute Israel makaite ngen ahi uhi. 4 A minte uh hiaite ahi: Reuben nam apan Zakur' tapa Shamua, 5 Simeon nam apan Had' tapa Shafat, 6 Judah nam apan Jefune' tapa Kaleb, 7 Isakhar nam apan Josef tapa Igal 8 Efraim nam apan Nun' tapa Hoshea, 9 Benjamin nam apan Rafu' tapa Palti, 10 Zebulun nam apan Sodi' tapa Gadiel, 11 Manase nam apan Susi' tapa Gadi, Manase bel Josef nam khat ahi. 12 Dan nam apan Gemali' tapa Amiel, 13 Asher nam apan Mikhael' tapa Sethur, 14 Naftali nam apan Vofsi' tapa Nabi, 15 Gad nam apan Maki' tapa Geuel. 16 Gam vel dinga Mosi in a sawlte' min hiaite ahi. Mosi in Nun' tapa Hoshea' min dingin Joshua a phuak hi. 17 Mosi in Kanan gam vel dinga a sawlkhiak laiin, amaute kiang ah: Negev tawnin paitou unla, tanggam ah lut un. 18 A gam bang chi bang hi hiam, tua-a tengte mihat hi uhiam, hat lou, tam uhia, tawm uhiam chihte en un. 19 A tenna uh bangchi bang gam hi hiam, gam hoih hi hiam, hoihlou chihte, a gam khawpite bangchi bang hi hiam, kulhbaang nei hiam, neilou chihte, 20 a leitang bangchi bang hi hiam, lei hoih hi hiam, hoih lou chihte, singkungte a pou hiam, pou lou chihte en un. A gam gah hon paw teitei un, a chi hi. Tua hun bel, grep gah masate min hun ahi. 21 Tuachi-in, a kuantou uh a, Zin Gamdai-gamkeu apan Lebo Hamath lampanga Rehob dong a vel uhi. 22 Negev tawnin a paitou uh a, Hebron a tung uhi. Tua ah Anak suante Ahiman, Sheshai leh Talmai a teng uhi, Hebron bel Aigupta gama Zoan a kilam ma kum sagiha kilam ahi. 23 Amaute Eshkol Phaizang a tun takun grep hiang khat, grep gah bom khat gah a sattan uh a, mi nih in singzawlin a zawng uhi. Mimthei leh theipi bangzah hiam tawh a pua uhi. 24 Tua mun bel Israelte'n tua laia grepgah bom a satkhiak manua Eshkol Phaizang kiminvawh ahi. 25 Ni 40 a bei takin gam velna apan a chiahkik uhi.

Gam Velna Thutut

26 Amaute, Paran Gamdai-gamkeua Kadesh mun ah Mosi, Aron leh Israel mipite khempeuh kiang hong tungkik uhi. Tua ah, amaute leh mipite kiang ah thu a tun uh a, a gam gah zong a lak uhi. 27 Mosi kiang ah hiai thu a tun uhi: Non sawlna gam ah ka valut uh a, nawitui leh khuaizuin a luang taktak hi! Hiai ah a gam gah a om. 28 Ahihhangin, tua-a teng mite a hat uh a, khawpite kulhbaang nei lianpipi ahi. Anak suante nangawn tua ah ka mu uhi. 29 Negev ah Amalekte a teng uh a, tanggam teng ah Hitte, Jebuste leh Amorte a teng uh a, tuipi gei leh Jordan lui dung teng ah Kanante a teng uhi, a chi uhi. 30 Tua laitakin, Kaleb in Mosi mai ah mipite a khamdai a: Kuantouin a gam i valuah ding uh ahi. Hih zou mahmah ding i hi, a chi hi. 31 Ahihhangin, amah tawh kuantoukhawmte'n: Tua mite dou zou talou zen ni ei! Eite sanga hat zaw hi uh, a chi uhi. 32 Tua bangin a vavel uh tua gam thu Israelte lak ah a selamin a thangsak uhi. Amaute'n: Ka vavel uh tua gam zaw a sunga tengte' nawmvalh gam ahi. Ka vamuh uh mite zong mi lianpipi ahi uh. 32 Tua ah Nefilimte ka mu uhi. Anak' suante bel Nefilimte apan hong khangkhia ahi uhi. Koumau' mitmuhin khaukhup bang lelin ka kimu uh a, amaute' mitmuh in zong tua bang mah ka hi uhi, a chi uhi.

Kisimna 14

Mipite' Helna

1 Tua zanin, mipite khempeuh ngaihtakin a kap uhi. 2 Israelte khempeuh Mosi leh Aron tung ah a phun uh a, mipite khempeuh in amaute kiang ah: Aigupta gam ah sita houh lehang hoih zaw ding! Ahih kei leh, hiai gamdai-gamkeu ah sita houh lehang! 3 Namsaua si ding leia banghanga Tangtawn Toupa'n hiai gam hon tun ahia? I zite leh i tate gallaaka puakmanga om ding ahita ve ua! Aigupta gam ah kilehkik nawn lehang eite adingin hoih zaw lou ding hiam? a chi uhi. 4 Tua baan ah: Makai khat teelkhiain Aigupta gam ah kilehkik ni, a kichi uhi. 5 Tua bang hong hih takin, Mosi leh Aron bel tua laia Israel kikhawmte khempeuh mai ah a khupbawh uhi. 6 Gam vela kuantoute laka kihel Nun' tapa Joshua leh Zefune' tapa Kaleb in a puansilh uh a botkek uh a, 7 Israel kikhawmte khempeuh kiang ah: Ka vatotsuak uleh ka vavel uh gam hoih law mahmah ahi. 8 Tangtawn Toupa' mittunna a hih peuhmah leh, ama'n tua gam nawitui leh khuaizu-a luang gam hon tun ding a, eite kianga hon pe ding ahi. 9 Tangtawn Toupa tung ah hel kei peuhmah phot un. Tua gam mite lau kei un, nawmvalh nading i hi. A kihutna uh beita a, Tangtawn Toupa'n eite hon ompih ahi. Amaute lau kei un, a chi uhi. 10 Ahihhangin, kikhawmte khempeuh in amaute suanga den a sawm uhi. Tua laitakin Tangtawn Toupa' thupina Israelte khempeuh kiang ah, tua Kihoupihna Puanbuk ah hong kilang hi. 11 Tangtawn Toupa'n Mosi kiang ah: Hiai mite'n kei bangtan hon simmawhbawl lai ding uh ahia? Amaute laka chiamtehna thillamdang hizahta ka hih nunga bangtan kei hon um nuamlou lai ding uh ahia? 12 Hipi-in amaute ka that ding a, ka hihmangthang ding. Amaute sanga hatzaw leh thupizaw namin nang kon bawl ding, a chi hi. 13 Mosi in Tangtawn Toupa kiang ah: Tua banga na hih leh, Aiguptate'n za mahmah ding uhi! Na khut thahata amaute lak apan hiai mite na pikhiaktouh ahi. 14 Amaute'n hiai thu, hiai gama tengte a hilh ding uh. Tuin zong Tangtawn Toupa aw, hiai mite na ompih chih leh, Tangtawn Toupa aw, kimaituah-a melmuh in na om a, amaute tung ah na meipi a om gige chih leh, amaute' mai ah sun chiangin meipi khuampi-in, zan chiangin meikuang khuampi-in na pai chih a zakhinta uhi. 15 Sikkhat thu-a hiai mite na thah siang leh, nangma' thu zakhin namte'n: 16 Tangtawn Toupa'n kichiam zena a chiamsa gam ah hiai mite a piilut thei kei a, gamdai-gamkeu ah a that vekta ve, hon chi ding uhi, a chi hi. 17 Tu'n na gensa bangbangin Toupa' thahatna hong kilang hen, 18 Nang: Tangtawn Toupa zaw hehhak lungnel, itna hau, khelhna leh helna ngaidam ahi. Hinapi-in, a mawhte lah gawt louhin a nuse kei a, khang thum, khang li dongin pate' khelhna hangin tate a gawt zel, na chikhin vele. 19 Aigupta gam a nutsiat uapan tu dong amaute na ngaihdamtak bangin, na itna thupina zahzahin hiai mite' khelhna ngaidam in, a chi hi. 20 Tangtawn Toupa'n a dawng a: Na nget bangin, amaute ka ngaidamta. 21 Ahihhangin, kei a nungta ka hih bangbangin leh, Tangtawn Toupa' thupina in leitung a kidimsak bangbangin, 22 ka thupina leh, Aigupta gam leh gamdai-gamkeua ka hih thillamdangte mu a, ahihhanga sawmveitak ka thu manglou a, hon ze-et kua mah, 23 a lak ua khat lei in zong, a pu a pate uh kianga kichiama piak ka chiam gam a mu ngei kei ding uh. Kei, simmawhtaka hon bawl kuamah in a mu ngei kei ding. 24 Ahihhangin ka sila Kaleb in lungsim tuam neia, lungtang teng khempeuh tawh kei hon zuih manin, a va lutna gam ah ka pilut ding a, a suante'n a luah ding uh. 25 Phaizanga Amalekte leh Kanante teeng uh ahih manin, zing chiangin kihei inla, Tuipi San lam manawhin, gamdai-gamkeu lam ah kipankhia in, a chi hi. 26 Tangtawn Toupa'n Mosi leh Aron kiang ah: 27 Hiai nam gilou bangtan ka tunga phun ding ahi ua? Hiai Israel phunhatte' phunnate ka zata. 28 Amaute hilh unla: A nungta ka hih bangbangin, na gen uh ka zak bangbang na tung uah ka hih ding, chi-in Tangtawn Toupa'n a phuang a: 29 Hiai gamdai-gamkeu ah na luangte uh a puk ding. Na lak ua kum 20 leh a tunglama upa, kisimna-a min khum, ka tunga phun peuhmah a puk ding. 30 Na lak ua khat lei zong, Jefune' tapa Kaleb leh Nun' tapa Joshua chih louh siah, banzaka ka chiam gam lutin na teeng kei ding uh. 31 Na tate uh, gallaaka kipawmang ding, na chihte uh bel noute'n na nolh uh gam ah ka piilut ding a, a gamgah a ne ding uh. 32 Noute na hih uleh, na luang uh hiai gamdai-gamkeu ah a puk ding. 33 Na tate uh hiai ah kum 40 sung belam chingin a om ding uh a, noute laka a si nunungpen' luang gamdai-gamkeua a lup mateng, noute' muanhuai louhna hangin a thuak ding uh. 34 Gam vela na taam sung uh ni 40-te, ni khat zel kum khata tuatin, kum 40 sung, na khelhna uh hangin, na thuak ding uh a, noute' lang panga non neih uh bangchi bang hi hiam, chih na thei ding uh, a chi, chi un. 35 Kei, Tangtawn Toupa'n thu ka genta a, kei hon dou-a kikaikhawm hiai giloute tung ah hiai thilte ka hih taktak ding hi. Hiai gamdai-gamkeu ah a beina uh a tuak ding uh a, hiai ah a si ding uh, a chi hi. 36 Tuachi-in, Mosi in gam vel dinga a sawlte a hong kik nawn tak ua, thutut a siasia-a thangsak a, mipite Mosi tunga phunsakte, 37 gamthu thutut a selama thangsaka, mawhpawte Tangtawn Toupa' maia phukpaihin a om uh a, hipi-in a si uhi. 38 Gam vel dinga kuantoute lak ah Nun' tapa Joshua leh Jefune' tapa Kaleb kia a suakta uhi. 39 Mosi in hiai thu Israelte khempeuh kianga a tut takin nakpitakin a kap uhi. 40 A zing chiang zingkhangpi-in tanggam saang lam ah a paitou uh a: I na khialta uh. Tangtawn Toupa' chiamsa mun ah i kuan ding, a chi uhi. 41 Ahihhangin, Mosi in: Banghanga Tangtawn Toupa' thupiak manglou na hi ua? Hiai lawhching ken teh! 42 Tangtawn Toupa'n noute hon ompih lou a hih manin, kuantou kei un. Na melmate uh zawhin na om ding uh. 43 Amalekte leh Kanante'n hon na maituah ding uh ahi. Tangtawn Toupa apan kiheimang na hih manun ama'n hon ompih lou dinga, namsaua puk ding hi uteh, a chi hi, 44 Hinapi-in, Mosi hita leh, Tangtawn Toupa' thukhun singkuang hita leh, giahphual apan kisuan loupi, amau kimawk muanin tanggam saang lam ah a kuantou uhi. 45 Tanggama teeng Amalekte leh Kanante hong kuansuk uh a, amaute a dou uh a, Horma dongin amaute a zougawp suk uhi.

Kisimna 15

Thillat Dangte

1 Tangtawn Toupa'n Mosi a houpih a: 2 Israelte kiang ah thu gen inla: Teen nadinga kon piak ding gam na lut kik chiang un leh, 3 Tangtawn Toupa' maia belam leh kelhon lak, ahih kei leh, bawnghon lak apan meia thillatte, tua Tangtawn Toupa' lungkimna gim namtui, thuchiam tangtunna haltum thillatte hi-in, kithoihnate hita leh, ahih kei leh, ut thillatte hi-in ankuang luina thillatte hita leh, na lat chiangun, 4 a thillatte laanpa'n Tangtawn Toupa' mai ah an thillat anvui nei ephah khat sehsawm suah seh khat, sathau hin khat sehli suah seh khat tawh kihel, a laan ding ahi. 5 Haltum thillat ding hiam, kithoih nading hiam belamnou tawh kitonin dawn thillat ding zu hin khat sehli suah seh khat tawh na bawl ding uh ahi. 6 Belamtal tawh kitonin an thillat ding anvui nei ephah khat seh sawm suah seh nih, sathau hin khat seh thum suah seh khat tawh kihel, 7 tua baan ah dawn thillat ding zu hin khat sehthum suah seh khat bawl un. Tangtawn Toupa' lungkimna gim namtui hi dingin tua laan un. 8 Tangtawn Toupa' maia thuchiam tangtun nading hiam, haltum thillat ding hiam, kithoih nading hiama bawngtaltuai na bawl chiangun, 9 tua bawngtaltuai tawh an thillat, anvui nei ephah khat sehsawm suah sehthum, sathau hin kimkhat tawh kihel hon tawi un. 10 Tua baan ah, dawn thillat dingin zu hin kimkhat zong hon tawi un. Tangtawn Toupa' lungkimna meia thillat gimnamtui ahi ding hi. 11 Tua bawngtaltuai, belamtal, belamnou, ahih kei leh kelnou, tua bang taka bawl ding ahi. 12 Amaute na lat ding zahzah uh tua bangin bawl un. 13 Gam sunga piang kuapeuh in Tangtawn Toupa' lungkimna gimnamtui hi dingin meia thillat hon tawi chiangun, hiaite hibangin a hih ding uh ahi. 14 Khangsawn sawnte adingin gamdang mi hiam, midang na lak ua teeng khatpeuh in, Tangtawn Toupa' lungkimna gim namtui hi dinga meia thillat a lat chiangin noute hih bangbanga a hih ding ahi. 15 Mun khata tengkhawmte'n noute ading leh na lak ua teeng gamdang mi adinga hibang dan a neih ding ahi. Hiai khangsawn sawn dong adinga omden ding thuseh ahi. Tangtawn Toupa' mai ah noute leh gamdang mite a kibang na hi ding uh ahi. 16 Dante leh kimakaihna dante a kibangin, noute leh na lak ua teeng gamdang mite tung ah a kizang ding ahi, chi in, a chi hi. 17 Tangtawn Toupa'n Mosi kiang ah: 18 Israelte kiang ah thu gen inla: Noute kon pii nading gam na lut chiangun, leh 19 tua gam an na nek chiangun, bangzah hiam Tangtawn Toupa' maia thillatin na laan ding uh ahi. 20 Na anvui nei masapen uapan tanghou pei khat, buhphual apan thillat hi dingin na laan ding uh ahi. 21 Hong om ding khangsawn sawn dongin, na anvui nei masapen uapan hiai thillat Tangtawn Toupa' mai ah na lan ding uh ahi, chi in, a chi hi.

Khut Khelhna Thillat

22 Tangtawn Toupa'n Mosi kianga a piak hiai thupiakte laka khat peuh, tup mawng hilou-a, zuihkhak louh na neih uleh, 23 ama' tungtawna Tangtawn Toupa'n noute hon piak thupiakte khatpeuh, Tangtawn Toupa'n hon piak ni apan hong om lai ding khangsawn sawn dongin chihna ahi. 24 Tup mawng hilou-a, mipite' phawk louh a, hibang na hih khak uleh, mipite'n Tangtawn Toupa' lungkimna gimnamtui hi dingin, haltum thillat bawngtaltuai a laan ding uh ahi. Tua tawh kitonin, sehsa bangin an thillat leh dawn thillat, tua baan ah, khelhna thillat ding keltal khat a laan ding uh ahi. 25 Siampi in Israel nam buppi khuhna a bawlsak ding a, tuachi-in ngaihdam ahi ding uhi. Ahang bel, tup mawnga thil hih hi loua, a thil hih khelh uh banga Tangtawn Toupa' maia meia thillat leh khelhna thillat laanta uh hiven. 26 Tua tup mawng hilou khelhna-a kihel vek ahih manun, Israel nam buppi leh a lak ua teeng gamdang mite ngaihdam ahi vek ding uhi. 27 Ahihhangin, mimal khat in tup mawng hiloua a na khelh leh, khelhna thillat dingin kelnou, kum khata upa khat hon tawi ding ahi, 28 Mi khatpeuh in Tangtawn Toupa mai-a tup mawng hilou-a a khelh leh siampi in tup mawng hiloua khialpa adingin, Tangtawn Toupa' mai ah khuhna a bawlsak ding ahi. Ama' adinga khuhna a kibawlsak khit chiangin, amah ngaihdam ahi ding hi. 29 Israel mi a gam sunga piang hi-in, gamdang mi hita leh, tup mawng hiloua khialte adingin dan khat leh a kibang a kizang ding ahi. 30 Ahihhangin, tup mawnga khial mi khatpeuh, gamsunga piang hi-in, gamdang mi hita leh, Tangtawn Toupa gensia ahi a, tua bang mi pen a mite lak apan satkhiak teitei ding ahi. 31 Ama'n Tangtawn Toupa' thu simmawh a, a thupiakte palsat ahih manin, tua bang mi satkhiak teitei ding ahi. A mawhna ama' tung ah a thamden hi, chi in, a chi hi.

Sabbath Tanlouh Gawtna

32 Gamdai-gamkeua Israelte a om lai un, mi khat Sabbath ni-a singtom a kiman hi. 33 A singtom lai mute'n amah Mosi, Aron leh kikhawmte mai ah hon paipih uhi. 34 Amah bang lawh ding hiam, chih a kitel louh manin, amah a khum uhi. 35 Tua khitin, Tangtawn Toupa'n Mosi kiang ah: Tua mi a sih teitei ding ahi. Kikhawmte'n giahphual pawlam ah amah suangin a denglum ding uh ahi, a chi hi. 36 Tuachi-in, kikhawmte'n amah giahphual pawlam ah a pikhia uh a, Tangtawn Toupa'n Mosi a thupiak bangin, amah suangin a denglum uhi.

Puanmong Nelkai

37 Tangtawn Toupa'n Mosi kiang ah: 38 Israelte kiang ah thu gen inla: Hong om ding khangsawn sawn dongin na puansilhte uh a mong kiute ah nelkai na bawl ding uh, tua nelkaite-a khau dum na hen ding uh ahi. 39 Hiai puanmong nelkaite na et ding uh, na et chiang ua Tangtawn Toupa' thupiakte na theihgige nading uh ahi. Thupiakte theigige-a na zuih ua, na lungtang uleh na mit uh' duhgawlna zuia na kizuak louh nading uh ahi. 40 Tuachi-in, ka thupiakte khempeuh zuih ding na thei gige ding uh a, na Pathian uh adinga sehtuam siangthou na hi ding uhi. 41 Kei Tangtawn Toupa na Pathian uh, na Pathian uh hi dinga Aigupta gam apan noute hon pikhepa ka hi. Kei Tangtawn Toupa na Pathian uh ka hi, chi in, a chi hi.

Kisimna 16

Kora, Dathan leh Abiram

1 Izhar' tapa Kora ahi. Izhar bel Kohath' tapa ahi a, Kohath lah Levi' tapa ahi. Kora tawh Reubente pawlkhat, Dathan leh Abiram leh On a kisathei uhi. Dathan leh Abiram bel Eliab' tapate ahi uh a, On lah Peleth' tapa ahi. 2 Hiai mite'n Mosi a dou uhi. Amaute lam ah Israelte nam makai ngen, vaihawm pawla pang ngenta 250 a pang uhi. 3 Amaute a hon-a pangin, Mosi leh Aron a khing uh a: Na uang lua uh! Minam buppi a siangthou uh a, a vekun a siangthou uh a, Tangtawn Toupa'n amaute a ompih hi. Banghanga Tangtawn Toupa' mi kikhawmte tunga kikoih na hi ua? a chi uhi. 4 Mosi in hiai a zak takin, a maia lei si-in a bok a, 5 Kora leh a nungzuite khempeuh kiang ah: Zingsang chiangin Tangtawn Toupa'n amah-a kua hi a, kua siangthou hiam, chih hon lak ding a, tua mi amah kiang a naihsak ding. Ama' teelpa pen amah naihin a paisak ding. 6 Noute, Kora leh na nungzuite khempeuh in hiai hih un. Gim namtui halna kuang la unla, 7 zingchiangin Tangtawn Toupa' mai ah meiam luak unla, tuate tung ah gim namtui koih un. Tangtawn Toupa'n a teelpa pen a siangthoupa ahi ding. Nou Levite na uang lua uhi! a chi hi. 8 Tua baan ah, Mosi in Kora kiang ah: Nou Levite'n ngai un! 9 Israel Pathian in Israel dangte lak apan hon septuam a, Tangtawn Toupa' biakbuka nasem ding leh mipite maia dinga amaute' nna sepsak dinga, ama' kiang hon naihsak kiching lou hia? 10 Nang leh na Levipihte khempeuh ama' kiang hon naihsak a, ahihhangin, tu'n siampi hihna zong suh na sawm lai uh. 11 Nang leh na nungzuite na pankhawm uh Tangtawn Toupa douna ahi. Na phunsan vial ding uh Aron kua ahia? a chi hi. 12 Tua khitin, Mosi in Eliab' tapate Dathan leh Abiram a sam a, ahihhangin, amaute'n: Kong pai kei ding uh! 13 Gamdai-gamkeua thah dinga nawitui leh khuaizu-a luang gam apan non pikhiak kiching lou lai hia? Tu'n koute tunga kiletsak na sawm lai. 14 Tua kia hilouin, nawitui leh khuaizu-a luang gam ah non piilut kei. Gou-a luah ding loute leh grephuante non pe kei. Hiai mite' mittang khelkhiak sawm na hi maw? Pai lou e, kong pai kei ding uh, a chi uhi.

Kora Gawtna

15 Mosi a heh mahmah a, Tangtawn Toupa kiang ah: Amaute' thillat sang ken. Amaute apan sakolneu khat zong ka la kei, amaute khatpeuh tung ah zong ka khial kei, a chi hi. 16 Mosi in Kora kiang ah: Nang leh na nungzuite khempeuh  nang leh amaute leh Aron, zing chiangin Tangtawn Toupa' maia kilang dingin kisa un. 17 Michih in a gimnamtui halna kuang tawi chiat henla, a sung ah gim namtui koih chiat uhen. Avekin gimnamtui halna kuang 250 ahi. Tua gimnamtui Tangtawn Toupa' mai ah laan uhen. Nang leh Aron in gim namtui halna kuang tawi un, a chi hi. 18 Tua bangin, michih in a gim namtui halna kuang a tawi chiat uh a, mei leh gim namtui a koih chiat uh a, Kihoupihna Puanbuk lutna ah Mosi tawh Aron tawh a dingkhawm uhi. 19 Kora, amaute doua nungzuite kaikhawm a, Kihoupihna Puanbuk lutna-a a din takin Tangtawn Toupa' thupina tua kikhawm mipite khempeuh kiang ah hong kilaak hi. 20 Tangtawn Toupa'n Mosi leh Aron kiang ah: 21 Amaute ka beisak pah theih nadingin hiai kikhawmte apan kihem un, a chi hi. 22 Ahihhangin, Mosi leh Aron bel maitanga lei si-in a bok uh a: Pathian, mihing khempeuh' khate' Pathian aw, mi khat kia khelhna ah, kikhawmte khempeuh tung ah na heh dia hia? chi-in a kikou uhi. 23 Tua khitin, Tangtawn Toupa'n Mosi kiang ah: 24 Kikhawmte kiang ah thu gen inla: Kora, Dathan leh Abiram' puanbukte apan kihem un, chi in, a chi hi. 25 Mosi a thoutou a, Dathan leh Abiram kiang ah a va pai a, Israel upate'n amah a zui uhi. 26 Kikhawmte a vauhilh a: Hiai migiloute' puanbukte apan kihem un! Amaute' neihsa bangmah lawng kei un. Tuachilou-in zaw, amaute khelhnate hanga phiatmang khawmin na om ding uhi, a chi hi. 27 Tuachi-in, Kora, Dathan leh Abiramte' puanbukte apan amaute a kihemkhia uhi. Dathan leh Abiram hong pawt khia uh a, a puanbuk lutna uah a zite uh, a tate uleh tanaute utawh a dingkhawm uhi. 28 Tua khitin, Mosi in: Hiai thilte hih dinga Tangtawn Toupa'n kei hon sawl ahi a, keima' ngaihdan hilou ahi, chih na theih nading uh hibang ahi: 29 Hiai mite sih dan ngeina-a a sih ua, mihingte tunga thiltung zelte bang lei a tung ua a tun leh, Tangtawn Toupa'n kei hon sawl lou ahi ding. 30 Ahihhangin, Tangtawn Toupa'n thil thak khat a hih a, lei hong kamka a, amaute leh a neihsa khempeuh uh a valh a, hankhuka a hinga a lutsuk uleh bel, hiaia omte'n Tangtawn Toupa a simmawh uh, chih na thei ding uh, a chi hi. 31 Hiai teng a gen khit phetin, amaute nuaia lei a khi a, 32 lei a kamka a, amaute, a innkuante utawh, Kora' mite khempeuh leh a neihsa khempeuh utawh, avekun a valh hi. 33 Amaute, a neihsa khempeuh utawh hankhuk ah a lutsuk uh a, lei a kichih kik a, amaute a mangthang uh a, tua nam apan a beita uhi. 34 Amaute kikou aw zain, amaute kim leh pama om Israel khempeuh a tai uh a: Lei in eite zong hon valh ding hita! chi-in a kikou uhi. 35 Tangtawn Toupa apan meikuang hong pawt a, tua gim namtui laan mi 250-te a kangtum hi. 36 Tangtawn Toupa'n Mosi kiang ah: 37 Tua thil kangte lak apan gimnamtui halna kuangte la a, a meiamte gamla kuama thehzak dingin Aron tapa siampi Eleazar hilh in. Tua gim namtui halna kuangte thil siangthou ahi. 38 A hinna uh mansuah hiaia khialte' gimnamtui halna kuangte a siangthou ahi. Tua gim namtui halna kuangte sek inla, maitam tuamnain zang in. Tangtawn Toupa' maia kilaansa, a siangthou ahi uhi. Israelte adingin chiamtehnain omta hen, a chi hi. 39 Tuachi-in, siampi Eleazar in sumsana kibawl tua gim namtui halna kuang, a kangtum mite' hon tawite a lakhawm a, maitam tuam nadingin a sek hi. 40 Tangtawn Toupa'n Mosi tungtawna amah a hilh banga a hih ahi. Hiai bel Tangtawn Toupa' maia gim namtui hal dingin Aron suante loungal kuamah a kuan ding ahi kei, chih Israelte theihsakna ahi. Tua hi kei leh Kora leh a nungzuite a hing ding uhi. Israelte' Helna leh Gawtna 41 A zing chiangin, Israel nam buppi Mosi leh Aron tung ah a phun uh a: Tangtawn Toupa' mite na thatta ve ua, a chi uhi. 42 Ahihhangin, kikhawmte Mosi leh Aron doua a kikhop ua, Kihoupihna Puanbuk lam a ngat laiun thakhatin meipi in tua Puanbuk a khuh a, Tangtawn Toupa' thupina hong kilang hi. 43 Tua khitin, Mosi leh Aron tua Kihoupihna Puanbuk mai ah a va pai uhi. 44 Tangtawn Toupa'n Mosi kiang ah: 45 Hiai kikhawmte apan kihem un, amaute thakhatin ka beisak ding, a chi hi. Amaute bel lei si-in a bok uhi. 46 Tua khitin, Mosi in Aron kiang ah: Na gim namtui halna kuang la inla, a sung ah gim namtui leh maitam apan mei hon la inla, kikhawmte kiang delh in, Tangtawn Toupa apan thangpaihna a pawtkhiaa, hipi a kipanta, a chi hi. 47 Tuachi-in, Aron in Mosi gen bangin a hih a, kikhawmte lak ah a tailut hi. Mipite lak ah hipi a kipankhin a, ahihhangin, Aron in gim namtui a laan a, amaute adingin khelhna khuhna a bawlsak hi. 48 Amah a site leh a hingte kal ah a ding a, hipi a khawlta hi. 49 Ahihhangin, Kora hanga site baan ah, mipite lak apanin mi 14,700 hipi-in a si man uhi. 50 Tua khitin, hipi khawlta ahih manin, Aron zong Mosi kiang ah a kilehkikta hi.

Kisimna 17

Aron9 Chiangsel

1 Tangtawn Toupa'n Mosi kiang ah: 2 Israelte kiang ah thu gen inla, amaute apan chiang sawmlenih la in, nam khat makai apan chiang khat zel ahi ding ahi. Tuate' min a chiang tung chiat uah gelh in. 3 Levi' chiang tung ah Aron' min gelh in. Nam khat tuulpi adinga chiang khat chiat hi ding ahi. 4 Kihoupihna Puanbuk sung ah nang kon kimuhpihna Theihpihna mai ah tua chiangte koih in. 5 Ka teelpa' chiang a sel ding a, Israelte nang dema a phun gigena uh kei apan ka koihmang ding, a chi hi. 6 Tuachi-in, Mosi in Israelte kiang ah thu a gen a, a makaite un chiang sawmlenih a pia uhi. Nam khat makai apan chiang khat zel ahi a, tuate lak ah Aron' chiang zong a om hi. 7 Mosi in tua chiangte Theihpihna Puanbuk sung ah Tangtawn Toupa' mai ah a koih hi. 8 A zing chiangin, tua Theihpihna Puanbuk sung ah Mosi a lut a. Levi' innkuan tanga ding Aron' chiang a sel kia hilouin a pakmum a, a pakpalh a, almon gahte a suah chih a mu hi. 9 Tua khitin, Mosi in Tangtawn Toupa' omna apan Israelte khempeuh mai ah tua chiangte hon lakhia hi. Amaute'n tua chiangte a en uh a, michih in ama' chiang a la hi. 10 Tangtawn Toupa'n Mosi kiang ah: Helhatte adinga chiamtehna hi dingin, Aron chiang, Theihpihna mai ah koih kik in. Hiai in ka tunga amaute' phunna a beisak ding a, a si kei ding uh, a chi hi. 11 Mosi in Tangtawn Toupa' thupiak bangbangin a hih hi. 12 Israelte'n Mosi kiang ah: Koute ka si ding uh! Mangthang ka hita uh, ka vekpi-un mangthang ka hita uh. 13 Tangtawn Toupa' biakbuk naiha hong pai peuhmah nangawn a si ding. Ka vekpi-ua si ding ka hita uh maw? a chi uhi.

Kisimna 18

Siampite leh Levite' Mawhpuakna

1 Tangtawn Toupa'n Aron kiang ah: Nang leh na tapate leh na pa' inkawte'n mun siangthou tunga khelhna tawh kisaia mawhpuakna na lak ding uh ahi. Nang leh na tapate kia in siampi hihna tawh kisaia thil hihkhelhte-a mawhpuakna na puak ding uh ahi. 2 Nang leh na tapate'n Theihpihna Puanbuk maia nna na sep chiang ua noute tawh pangkhawma hon huh dingin na beh lak uapan na Levipihte hon tonpih in. 3 Amaute nang nuaia sem mawhpua ahi ding uh a, Puanbuka sep ding khempeuh a sem ding uh ahi. Ahihhangin, munsiangthou vanzatte hiam, maitam hiam, a naih ding uh ahi kei. Tua banga a naih uleh amaute leh nang na si ding uhi. 4 Amaute'n nang hon kithuahpih ding uh a, Kihoupihna Puanbuk kepna ah mawh a paw ding uh ahi. Puanbuka nasepna khempeuh ah mawh a paw ding uh, chihna ahi. Na omna mun ah kuamah dang hong pai nai ding ahi kei hi. 5 Israelte tunga thangpaihna a tun nawn louh nadingin, munsiangthou leh maitam kepna ah mawh na paw ding ahi. 6 Kei mahmah in Israelte lak apan na Levi-pihte ka teel a, na kianga thawnpiak bangin Kihoupihna Puanbuka nna sem dinga Tangtawn Toupa' maia ka lat ahi uh. 7 Ahihhangin, maitam ah leh puanzak sunga thil peuhmah tawh kisaiin bel nang leh na tapate kia in siampi' nna na sem thei ding uhi. Hiai siampi nasepna na kiang uah thawnpiakin kon pia ahi. Munsiangthou hon naih mi dang peuhmah thah teitei ding ahi, a chi hi.

Siampite leh Levite ding Thillatte

8 Tua khitin, Tangtawn Toupa'n Aron kiang ah: Ka kianga thillatte tawh kisaia thuneiin kei mahmah in nang kon koih ahi. Israelte'n thil siangthou kei hon piak khempeuh uh nang leh na tapate' tantuan dingin leh a ngeina-a na tan gige dingun kon pia ahi. 9 Mei apan keptuam thillat siangthoupente laka tan na neih ding uh ahi. Thillat siangthoupen ka kianga hon tawi uh thawnpiakte khempeuh apan, an thillat hi-in, khelhna thillat khempeuh hi-in, mawhna thillat khempeuh hita leh, tantuan nang leh na tapatea ahi. 10 Thil siangthoupenin ne un. Pasal peuhmah in a ne ding uh a, a siangthouin na ngai ding uh ahi. 11 Hiai zong noutea ahi: Israelte' vei thillat khempeuha thawnpiakte apana koihtuam bang peuh noutea ahi. Nang leh na tapate leh na tanaute'n na tan gige dingun kon pia hi. Na innkuan sung ua a sianga ngaihte teng in na ne thei ding uhi. 12 Anlaak laka gah masate banga Tangtawn Toupa kianga a piak uh oliv thau hoihpente, zu thak hoihpente leh an khempeuh nang kon pia ahi. 13 Tangtawn Toupa kianga hon tawi uh gam gah masate nanga ahi ding. Na insunga a sianga ngaihte teng in a ne thei ding uhi. 14 Israel gama Tangtawn Toupa kianga piak thil teng nanga ahi. 15 Sula piang masa mihing hi-in ganta hita leh, Tangtawn Toupa kianga lat peuhmah nanga ahi. Ahihhangin, tapa masa peuhmah na tat teitei ding uh, tua baan ah, ganta sianglou apan a pa piang masa peuhmah na tat teitei ding uh ahi. 16 Kha khata a upat chiangun tatna man ding kisep ngun shekel nga zela tat ding ahi. Tua shekel bel, munsiangthou shekel gik dana buk ahi a, shekel khat lah gera 20 ahi. 17 Ahihhangin, bawngtal hi-in, belam hi-in, kei hita leh a piang masa na tat het louh ding uh ahi. A siangthoua ngaih ahi uhi. A sisan uh maitam tung ah theh un. A thau uh meia thillatin haltum un, Tangtawn Toupa' lungkimna gim namtui ahi. 18 Vei thillat a awm leh a taklam pheipi noua ahih bangin, tua gantate' sa noua ahi. 19 Tangtawn Toupa' maia Israelte'n a piak uh thillat siangthou apan koihkhiak peuhmah na tan gige dingun nang leh na tapate na tanute kiang ah kon pia hi. Tua bel, nang leh na suan adinga Tangtawn Toupa' maia Tangtawn chithukhun ahi, a chi hi. 20 Tangtawn Toupa'n Aron kiang ah: Amaute' gam ah goutan na nei kei ding a, amaute lak ah zong tan na nei kei ding hi. Israelte laka na tan leh na goutan keimah ka hi. 21 Levite'n Kihoupihna Puanbuka a sep sung ua, a nasep manun, Israela sawma khat khempeuh Levite ka pia ahi. 22 Tua kipanin Israelte, Kihoupihna Puanbuk naihin a pai ding uh ahi kei. Tua ahih kei leh, a khelhna uh thaman a paw ding uh a, a si ding uhi. 23 Kihoupihna Puanbuka nasem ding leh tua tunga khelhna tawh kisaiin mawhpuakna la ding Levite ahi uh. Hiai khangsawn sawn dong adinga thuseh omden ding ahi. Israelte lak ah goutan a ngah kei ding uhi. 24 Tua hi louin, Levite' goutan dingin, Israelte'n Tangtawn Toupa kianga thillata a piak uh tua sawma khatte ka pe zaw hi. Hiai hang ahi amaute tungthu-a: Israelte lak ah goutan a nei kei ding uh, ka chih, a chi hi. 25 Tangtawn Toupa'n Mosi kiang ah: 26 Levite kiang ah thu gen inla: Gouluah dinga kon piak Israelte apan sawma khat na saan chiangun tua sawma khat laka sawma khat mah thillata Tangtawn Toupa na piak teitei ding uh ahi. 27 Na thillat uh, buhphual apan an hiam, ahih kei leh, grep sukna khuka theitui hiam bangin a kisim ding ahi. 28 Hibangin, Israelte apan sawma khat na saan khempeuh uapanin Tangtawn Toupa' maia thillat na pe ding uh ahi. Hiai sawma khatte apan Tangtawn Toupa' tantuan pen siampi Aron na pe ding uh ahi. 29 Noute kianga thilpiak peuhmah apan a hoihpen leh siangthoupen zel Tangtawn Toupa' tantuanin na pe teitei ding uh ahi, chi in, a chi hi. 30 Levite kiang ah: Tua banga a seh hoihpen na piak chiangun, noute adingin buhphual apan piang, ahih kei leh grep sukna khuk apan piang bangin a kisim ding hi. 31 Noute leh na sungte un a vai teng koi mun peuh ah na ne thei ding uh. Tua bel, Kihoupihna Puanbuka na nasep thaman uh ahi. 32 A seh hoihpen piakna tungtawnin, hiai thu-a a khiallou na hi ding uhi. Tuachi-in, Israelte' thillat siangthoute a siangthou lou na suaksak kei ding uh a, na si kei ding uh, chi in, a chi hi.

Kisimna 19

Kisiansuahna Tui

1 Tangtawn Toupa'n Mosi leh Aron a houpih a: 2 Hiai Tangtawn Toupa' thupiak tua dan in a ngiat ahi: Noute kianga bawngla san, melhem lou leh genbaanglou, hakkol zong paw ngeilou hon pe dingin Israelte hilh un. 3 Siampi Eleazar kiang ah tua bawngla san pia un. Giahphual pawlama koih a, amaute maia gawh ding ahi. 4 Tua khit chiangin, siampi Eleazar in a khuttal in a sisan bangzah hiam a la ding a, Kihoupihna Puanbuk mailam sagihvei a theh ding ahi. 5 Ama' et sungin tua bawngla  a vun, a sa, a sisan leh a ek tawh a kihaltum ding ahi. 6 Siampi in sidar sing them bangzah hiam leh husawp leh samul khau san a la ding a, tua bawngla kihalna ah a pailut ding ahi. 7 Tua nungin siampi in a puansilhte a sawpsiang teitei ding a, amah zong tuiin a kisilsiang ding ahi. Tua khit chiangin, giahphual sung ah hong lut thei ding a, ahihhangin, nitaklam mateng a siangloua ngaih ahi ding hi. 8 Tua bawngla halpa in zong a puansilhte a sawpsiang ding a, tuiin a kisilsiang ding ahi. Amah zong nitaklam mateng a sianglou-a ngaih ahi ding hi. 9 A sianga ngaih mi khat in, tua bawngla vute a khawm ding a, giahphual pawlam ah a siangthoua ngaih mun khat ah a koih ding ahi. Israelte'n siansuahna tui laka zat dingin tua meivute a kem ding uh ahi. Khelhna apan siansuahna-a zat ding ahi. 10 Tua bawngla vute lakhawmpa in zong a puansilhte a sawpsiang ding a, amah zong nitaklam ahih mateng a sianglou-a ngaih ahi ding hi. Hiai Israelte leh a lak ua teeng gamdang mite adinga thuseh omden ahi ding ahi. 11 Siluang khat peuh lawngkha kuapeuh ni sagih sung a sianglou ahi ding. 12 A ni thum ni leh a ni sagih ni-in tuiin a kisiansuah ding ahi. Tua khit chiangin a siang ahi ding hi. 13 Siluang khat peuh lawngkha kua peuh a kisiansuah kei leh, Tangtawn Toupa' biakbuk a buahsak ahi. Tua bang mi pen Israelte lak apan satkhiak teitei ding ahi. Siansuahna tui ama' tunga kitheh lou ahih manin, amah a sianglou ahi. A sianlouhna ama' tunga omden ahi. 14 Puanbuk sunga mi a sih chiangin hiai dan a kizang hi: Tua puanbuk sunga valut leh a sunga omsa peuhmah ni sagih sung a sianglou a suak ding a, 15 van koihna sinbei kihongsa peuhmah zong a sianglou a suak ding hi. 16 Gamlaka om a, namsaua si khat peuh, sih ngeina-a si khat peuh lawngkha hiam, mihing guh hiam, hankhuk hiam lawngkha hiam peuhmah ni sagih sung a sianglou ahi ding hi. 17 Mi sianglou adingin, khelhna siansuahna thillat haltum apan a vu bang zah hiam beldai khat sung ah koih unla, a tung ah tui siang sung un. 18 Tua khit chiangin, a sianga ngaih mi khat in husawp hiangte a la ding a, tua tui ah a diah ding a, tua puanbuk leh a vanzatte leh a sunga mi omte a theh ding ahi. Mihing guh hiam, hankhuk hiam, sih ngeina-a si hiam lawngkha kuapeuh zong a theh ding ahi. 19 A siang mi in a sianglou mi, a ni thum ni leh a ni sagih ni-in a theh ding a, a ni sagih ni-in a siansuah ding ahi. Tua banga siansuaha ompa in a puansilhte a sawpsiang ding a, amah zong tuiin a kisilsiang ding a, tua nitak lamin a siang ding hi. 20 Ahihhangin, a sianglou mi a kisiansuah kei leh, ama'n Tangtawn Toupa' munsiangthou buahsak ahih manin, a mite lak apan satkhiak teitei ding ahi. Siansuahna tui ama' tung ah a kitheh kei a, amah a sianglou ahi. 21 Hiai amaute adinga omden ding thuseh ahi. Siansuahna tui thehpa in zong a puansilhte a sawpsiang ding ahi. Tua siansuahna tui lawngkha peuhmah, a nitaklam dongin a sianglou ahi ding. 22 A sianglou mi in a lawnkhak thil peuhmah a sianglou a suak a, tua lawng kha mi peuhmah a nitaklam dongin a sianglou a suak hi, a chi hi.

Kisimna 20

Miriam' Sihna

1 A Kha khatna ah, Israel nam mipite khempeuh Zin Gamdai-gamkeu hong tung uh a, Kadesh ah a giak uhi. Tua ah Miriam a si a, vui-in a om hi.

Israelte' Khelhna

2 Mipite adingin tui a om kei a, Mosi leh Aron langa pang dingin mipite a kikhawm uhi. 3 Amaute'n Mosi a kinakpih uh a: Tangtawn Toupa' maia ka sanggamte uh a sih laiun si tei mai le ung hoih ding! 4 Koute leh ka gantate uh hiaia si ding leia banghanga Tangtawn Toupa' mite hiai gamdai-gamkeua hon piilut na hia? 5 Hiai mun mulkimhuai dong banghanga Aigupta gam apan hon piikhetou na hia? Buh hiam, theipi hiam, grep hiam, mimthei hiam lah om lou a, dawn ding tui lah omlou hi! a chi uhi. 6 Mosi leh Aron, mipite apan paikhia-in Kihoupihna Puanbuk lutna ah a pai uh a, a khupbawh uh a, amaute kiang ah Tangtawn Toupa thupina hong kilang hi. 7 Tangtawn Toupa'n Mosi kiang ah: 8 Tua chiang la inla, nang leh na sanggampa Aron in kikhawmte kaikhawm unla, amaute mitmuhin tua suangpi houpih in. Ama'n a tui a pawtkhesak ding. Amaute leh a gantate un tui a dawn theih nadingun, tua suangpi apan tui na lakhe ding hi, a chi ahi.

Mosi' Khelhna

9 Tuachi-in, Tangtawn Toupa'n thu a piak bangin Mosi in Tangtawn Toupa' omna apanin chiang a la hi. 10 Amah leh Aron in tua suangpi mai ah kikhawmte a kaikhawm uh a, Mosi in amaute kiang ah: Nou helhatte'n ngai un. Hiai suangpi apan tui kon piak uh kul hia? a chi hi. 11 Tua khitin, Mosi in a khut a liktou a, a chiangin suangpi nihvei a sat hi. Tui a hong pawt a, mipite leh a gantate un a dawn uhi. 12 Ahihhangin, Tangtawn Toupa'n Mosi leh Aron kiang ah: Israelte' mitmuha a siangthoua kei non pahtawi ding zaha non muan louh manun hiai mite, gam ka piakna ah amaute na piilut kei ding uh, a chi hi. 13 Israelte'n Tangtawn Toupa a kinakpihna mun uleh amaute laka amah siangthoua a kilahna mun hiai Meriba tuite ahi.

Edomte'n Israelte Paisak lou

14 Mosi in Kadesh apanin Edom kumpipa kiang ah thupawte a sawl a: Hiai na sanggampa Israel in a gen ahi: Koute tunga haksatna hong tungte khempeuh thu na thei hi. 15 Ka pu ka pate uh Aigupta gam ah a paisuk uh a, tua ah kum tampi ka taam uhi. Aiguptate'n koute leh ka pu ka ate uh hon mawkbawl uhi. 16 Ahihhangin, Tangtawn Toupa' maia thuma ka kikou takun, ama'n ka kikouna uh a za a, vansawltak khat hon sawlin, Aigupta gam apan hon piikhia hi. Tuin, hiai Kadesh, na gamgi geichin ua, khawpi ah ka om uhi. 17 Hehpihtakin na gam ua paisuak ding hon phal in. Lou tawnin hiam, grephuan tawnin hiam ka pai kei ding uh a, tuileh khatpeuh apan zong tui ka dawn kei ding uh. Kumpi Lamlianpi tawnin ka pai ding uh a, na gam uh ka khen mateng uh taklam hiam, veilam hiam ah zong ka pial kei ding uh, a chisak hi. 18 Ahihhangin, Edom in a dawng a: Hiai ah na paisuak thei kei ding uh. Paisuak na sawm leh, kong kuan ding uh a, namsauin kon dou ding uh, a chi uhi. 19 Israelte'n a dawng uh a: Lam taangpi tawnin ka pai ding uh a, koute hiam, ka gantate uh hiam in na tui uh khat peuh ka dawn uleh, aman kon pe ding uh. Khea paisuak ut lei ka hi uh a, bangmah dang ka deih kei uhi, a chi uhi. 20 Amaute'n a dawng kik uh a: Na paisuak thei kei ding uh, a chi uhi. Tua khitin, Edomte' sepaihhon tampi leh hattak tawh hong kuankhia uhi. 21 Edom in a gam ua amau paisuaksak ding a nial manin, Israelte amaute apan a kiheikhia uhi.

Aron Sihna

22 Israel mipite a vekpi-un Kadesh apan a kipankhia uh a, Hor Mual hong tung uhi. 23 Hor Mual ah Edom gamgi kiang ah, Tangtawn Toupa'n Mosi leh Aron kiang ah: 24 Aron a mite kianga laak ahi ding. Meriba tuitea na nih ua ka thupiak na helsan manun, Israelte ka piak gam ah na lut kei ding uh. 25 Aron leh a tapa Eleazar tonpih inla, Hor Mual ah paitoupih in. 26 Aron' puansilhte suahkhiaksak inla, a tapa Eleazar silhsak in. Aron zaw a mite kianga pii hi ding ahi. Hiaia si ding ahita, a chi hi. 27 Mosi in Tangtawn Toupa' thupiak bangin a hih a: Mipite' muhin, Hor Mual ah a kaltou uhi. 28 Mosi in Aron' puansilhte a suahkhia a, a tapa Eleazar a silhsak hi. Tua Mual ah Aron a sita hi. Tua khitin, Mosi leh Eleazar tua Mual tung apan hong kumsuk uh a, 29 mipite'n Aron a sita chih a theih takun, Israel innkuan buppi in ni 30 sung amah a suun uhi.

Kisimna 21

Kanante tunga Vualzawhna

1 Arad kumpipa, tua Kanan mi, Negev-a teeng in, Atharim sun lampi ah Israelte hong pai uh, chih a zak takin, Israelte a dou a, a lak ua bangzah hiam a man hi. 2 Tua khitin, Israel in Tangtawn Toupa' mai ah hiai kichiamna a bawl hi: Hiai mite ka khutsung ua non piak leh, a khawpite uh ka hihgawp dimdem ding uhi, a chi uhi. 3 Tangtawn Toupa'n Israel' ngetna a ngaikhia a, Kanante amaute' khut sung ah a pia hi. Israelte'n amaute leh a khawpite uh a hihgawp dimdem uh a, tua mun min dingin Horma a kiphuak hi.

Israel' Phunna

4 Hor Mual apan a kipankhia uh a Edom paikual khum dingin Tuipi San zawtna lampi zuiin a zin uhi. Ahihhangin, mipite'n lampi ah thuakzawhna a tasam uh a, 5 Pathian tunga phun leh Mosi tunga phunin thu a gen uh a: Banghanga gamdai-gamkeua si dinga Aigupta gam apan hon piikhetou se na hia? An lah om lou! Tui lah om lou! Hiai an thulim lou lah ka kih uhi! a chi uhi.

Sumsan Gul

6 Tua khitin, Tangtawn Toupa'n a lak uah gul guneite a sawl a, mipite a tu uh a, Israelte tampitak a si uhi. 7 Mipite Mosi kiang ah hong pai uh a: Tangtawn Toupa' tunga phun a, nang tunga ka phun uh, ka khial uh ahi. Tangtawn Toupa'n ka lak uapan gulte a lakkhiak nadingin hon thumsak in, a chi uhi. Tuachi-in, mipite adingin Mosi a thum hi. 8 Tangtawn Toupa'n Mosi kiang ah: Gul bawl inla, chiang dawn ah suang in. Gultuk kuapeuh in a en thei ding a, a hing ding hi, a chi hi. 9 Tuachi-in, Mosi in sumsan gul a bawl a, chiang dawn ah a suang hi. Mi kuapeuh gul in a tuk chianga tua sumsan gul a et chiangin, a hing zel hi.

Moab-a Zinna

10 Israelte mailam nawtin a pai zel uh a, Oboth ah giahphual a sat uhi. 11 Oboth apan a kipankhia uh a, Ije Abarim ah giahphual a sat uhi. Ije Abarim bel, suahlam panga Moab gala gamdai-gamkeua om ahi. 12 Tua apan mailam nawtin a pai uh a, Zered Phaizang ah giahphual a sat uhi. 13 Tua apan a kipankhia uh a, Amon zawn ah giahphual a sat uhi. Amon bel, Amor gam sun gamdai-gamkeua om, Moab leh Amorte kala Moab gamgi ahi. 14 Tua hang ahi Tangtawn Toupa' Galdouna Laibu sung a: Sufa-a Vaheb leh kawlkal guamte, Amon leh 15 Ar dong tung a, Moab gamgi-a om, tua guamgal keente, a chih. 16 Amaute tua apan Beer ah a pai uh a, tua bel tuileh ahi a, Tangtawn Toupa'n Mosi kianga: Mipite kaikhawm in, amaute tui ka pe ding, a chihna mun ahi. 17 Tua khitin, Israelte'n hiai la a sa uhi: Tuileh aw, hong phulkhetou in! A thu lain sa un, 18 Makaite'n a leh uh tuileh, mipite laka miliante laih, mipite laka miliante'n kumpi chiangte leh khetbukte tawi kawma a tawh uh, chi-in. Tua khitin, tua gamdai-gamkeu apan Matana ah, 19 Matana apan Nahaliel ah, Nahaliel apan Bamoth ah, 20 Bamoth apan Moab gama phaizang dong a pai uhi. Tua ah, Pisga Mualdawn in gamsia a depsuk hi.

Sihon leh Og Zawhna

21 Israelte'n Amorte' kumpipa Sihon kianga hiai thu gen dingin thupawte a sawl uh a: 22 Na gam uh kantanin koute hon paisuaksak in. Lou hiam, grephuan hiam ah pial lou ding hi ung. Tuileh koimaha tui dawn lou ding hi ung. Na gam sung uh ka khen mateng uh, Kumpi' Lamlianpi zui ding hi ung, a chisak uhi. 23 Ahihhangin, Sihon in Israelte a gam sung ah a paisuaksak nuam kei hi. A sepaihhonte khempeuh a khawm a, Israel dou dingin gamdai-gamkeu ah a kuankhia hi. Jahaz a tun takin, Israel a dou hi. 24 Ahihhangin, Israel in amah namsauin a sat a, a gam Amon apan Jabok dong a la hi. Ahihhangin, Amonte' gamgi kulhnei a hih manin, Amonte' gam chiang lei a la hi. 25 Israel in Amor gam khawpite khempeuh a la a, Heshbon leh a kima khuate khempeuh a luah hi. 26 Heshbon bel, Amor kumpipa Sihon' khawpi ahi. Ama'n Moab kumpipa masa a na dou a, a gam khempeuh, Amon dong a na laak ahi. 27 Tua hang ahi laphuakpa in: Heshbon ah hong pai in, kilamthak hen. Sihon' khawpi kilamthak hen. 28 Heshbon apan mei pawtkhia a, Sihon' khawpi apan meikuang pawtkhia a, Moaba Ar kangtum a, Amon vumtea teengte kangtum hi. 29 Moab aw, na tung gik hi! Khemosh mite aw, hihmanthat na hi uhi! Ama'n Amorte kumpipa Sihon kianga a tapate galtaite banga, a tanute saltangte banga pia hi. 30 Ahihhanga koute'n amaute lumlet ung a, Dibon donga Heshbon hihsiat hita. Nofa donga amaute phelzak ung a, tua lah Medeba donga kizalh ahi, a chih. 31 Tuachi-in, Amorte' Israel a teeng hi. 32 Mosi in gam enkhete Jazera a sawl nungin, Israelte'n a kim a kiang khuate a la uh a, tua-a om Amorte a hawlkhia uhi. 33 Tua khitin a kihei uh a, Bashan lam zuan lampi a zuitou uhi. Bashan kumpipa Og leh a sepaihhon khempeuh amaute Edreia kidoupih dingin a kuankhia uhi. 34 Tangtawn Toupa'n Mosi kiang ah: Amah lau ken, amah, a sepaihhon tawh, a gam tawh, na khuta hon pekhin ka hi. Heshbona vaihawmpa Amorte' kumpipa Sihon na bawl bangin amah bawl in, a chi hi. 35 Tuachi-in, amah, a tapate tawh, a sepaihhon tawh, a satlum uh a, a suakta khat beek a hawi kei uhi. A gam a tang uh a, a luahta uhi.

Kisimna 22

Balak leh Balaam

1 Tua khitin, Israelte Moab phaizang zuanin a zin uh a, Jerikho gal ah, Jordan lui dung ah giahphual a sat uhi. 2 Zipor' tapa Balak in Amorte tunga Israel thilhih khempeuh a mu a, 3 Isaelte a tam mahmah manun, Moab a lauta hi. Israelte hangin, Moab lau chihtakin a lau hi, 4 Moabte'n Midian upate kiang ah: Bawngtal in gampalak loupa a nek gaih banga hiai mihonpite'n i kim i pama thil khempeuh ne gai ding uh ahi, a chi uhi. Tuachi-in, Zipor' tapa Balak bel tua hun laiin Moab kumpipa ahi. 5 Ama'n Beor' tapa Balaam sam dingin mite a sawl hi. Balaam bel, ama' gam ah, tua Luipi kianga Pethor ah a om hi. Balak in: Aigupta gam apan mi nam khat hong paikhia uh a, leitung maikaih a tuam dim uh a, kei zomin hong teeng uhi. 6 Amaute kei adinga hat lua uh ahih manin, hong pai inla, amaute hamsiat in. Tua hi leh, amaute ka zou mai thei a, gam apan ka hawlkhe thei mai thei hi. Na vualzawlte vualzawlna tangin om uh a, na hamsiatte hamse thuakin a om uh, chih ka thei hi, a chisak hi. 7 Moab leh Midian upate a kuankhia uh a, aisan man ding a keng uhi. Balaam kiang hong tun takun, Balak thugen amah a hilh uhi. 8 Balaam in amaute kiang ah: Hiai ah zan giak unla, Tangtawn Toupa' dawnna hon piak kon hilh kik ding, a chi hi. Tuachi-in, Moab makaite amah kiang ah a taam uhi. 9 Balaam kiang ah Pathian hong pai a: Na kianga om hiaite kuate ahi ua? a chi hi. 10 Balaam in Pathian kiang ah: Zipor' tapa Balak, Moab kumpipa'n hiai thu hon khak a: 11 Aigupta gam apan nam khat hong paikhia uh a, leitung maikaih a dim uh. Hong pai inla, kei adingin amaute tung ah hamsia lou in. Tua hi leh, amaute ka dou thei mai ding a, ka hawlmang thei kha ding, chi ahi, a chi hi. 12 Ahihhangin, Pathian in Balaam kiang ah: Amaute zui ken. Tua mite vualzawlsa ahih manun, amaute tung ah hamsia na lou ding ahi kei, a chi hi. 13 A zingchiangin, Balaam a kisa a, Balak' makaite kiang ah: Na gam uah kik nawnta un, Tangtawn Toupa'n noute kon zuih ding nial ahi, a chi hi. 14 Tuachi-in, Moab makaite Balak kiang ah a kilehkik uh a: Balaam in koute hon zuih ding a nial hi, a chi uhi. 15 Tua khitin, Balak in a maute sanga tamzaw leh zahtakhuai zaw makaite a sawl kik a, 16 Balaam kiang ah hong pai uh a: Zipor' tapa Balak in hiai a gen: Ka kianga nong pai ding bangmah kidalsak ken. 17 A kilawm thaman pahtakman hon pe ding ing a, na chih chih hih nading ka hi. Hong pai inla, kei adingin hiai mite tung ah hamsia lou in, chi ahi, a chi uhi. 18 Ahihhangin, Balaam in amaute a dawng a: Balak in a inpi, ngun leh khama dimin hon pe mahleh, Tangtawn Toupa ka Pathian' thupiak baan bangmah a neu a lian ka hih thei kei. 19 Midangte bangin tuzan hiai ah taam unla, Tangtawn Toupa'n hon hilh nop dang om hiam ka zongkhe ding, a chi hi. 20 Tua zanin, Balaam kiang ah Pathian hong hawh a: Hiai mite nang sam dinga hong hawh a hih manun, amaute zui in. Ahihhangin, nang kon hilh kia hih in, a chi hi.

Balaam' Sakolneu Pau

21 Balaam, zingsangin a thou a, a sakolneu tung ah tuanphah a phah a, Moab makaite a zui hi. 22 Ahihhangin, amah a kuankhiak takin, Pathian a heh a, amah dai dingin, Tangtawn Toupa' vansawltak lampi ah a ding hi. Balaam bel a sakolneu tunga tuang ahi a, a silate nih in amah a zui uhi, 23 Tua sakolneu in Tangtawn Toupa' vansawltak, a khuta namsau phawisa tawi kawmpi-a ding a muh takin, lampi apan a pialkhia a, gamlak ah a paita hi. Balaam in a sakolneu lampi-a paikik dingin a sat hi. 24 Tua khit in, tua Tangtawn Toupa' vansawltak bel, grephuan nih baanga kium kikal lam kawchik ah a ding hi. 25 Tua sakolneu in Tangtawn Toupa' vansawltak a muh takin, baang nehin a pai a, Balaam' khe baang tawh a nehden hi. Tuachi-in, Balaam in a sakolneu a sat kik hi. 26 Tua khitin, Tangtawn Toupa' vansawltak mailam ah a pai a, veilam hiam, taklam hiama kihei nading omlouhna mun kawchik ah a ding hi. 27 Tua sakolneu in Tangtawn Toupa' vansawltak a muh takin, Balaam nuai ah a lumsuk a, Balaam a heh a, a chiangin a sakolneu a sat hi. 28 Tua khitin, Tangtawn Toupa'n sakolneu kam a honsak a, sakolneu in Balaam kiang ah: Kei thumvei tak non sat nadingin na tung ah bang ka hih-a ahia? a chi hi. 29 Balaam in sakolneu a dawng a: Mihai non suaksak mawk ve le! Ka khuta namsau tawi hileng, tumah mah-in kon that ding, a chi hi. 30 Tua sakolneu in Balaam kiang ah: Na sakolneu ka hi keia hia, tuni donga na tuanna gige ka hi keia hia? Hibanga na tunga hih ding ka hih dan ngeina ahi-a hia? a chi hi. Ama'n: Hilou, a chi hi. 31 Tua khitin, Tangtawn Toupa'n Balaam mit a vaksak a, Tangtawn Toupa' vansawltak, a khuta namsau phawisa tawia lampi-a ding a mu hi. Tuachi-in, nakpitakin a kunsuk a, maitangin lei a si hi. 32 Tangtawn Toupa' vansawltak in amah a dong a: Banghanga na sakolneu thumvei sat na hia? Na gamtat dan kei adinga ngongtatna ahih mana nang hon dai dinga hiaia hong pai ka hi. 33 Sakolneu in kei hon mu a, thumvei kei apan kiheikhia ahi ve. Tua banga kiheikhe lou hi leh, tu'n nang hon that khinta ding ing a, amah bel hawi ding ka hi, a chi hi. 34 Balaam in Tangtawn Toupa' vansawltak kiang ah: Ka na khialta. Kei hon dai dinga lampi-a nang ding na hih lam ka phawk keia ahi. Tu'n nang lungkimlou na hih leh ka kik ding, a chi hi. 35 Tangtawn Toupa' vansawltak in Balaam kiang ah: Hiai mite tawh ton in. Ahihhangin, kon hilh kia gen in, a chi hi. Tuachi-in, Balaam bel, Balak' makaite tawh a ton hi. 36 Balaam a hong pai, chih Balak in a zak takin, ama' gamgi mong Amon gamgi-a om Moab khawpi ah amah tuak dingin a kuan hi. 37 Balak in Balaam kiang ah: Kintaka hon sam hilou ka hi maw? Banghanga ka kianga hong pai lou? Kei, nang pahtakman hon pe taktak theilou mi ka hi ahia? a chi hi. 38 Balaam in a dawng a: Tu-a hong pai ka hi ve. Ahihhangin, thil khat peuhpeuh gen thei ka hi-a hia? Pathian in ka kama a koih kia gen ding ka hi, a chi hi. 39 Tua khitin, Balaam in Kiriath Huzoth ah Balak a zui hi. 40 Balak in bawngte leh belamte a laan a, Balaam leh a kianga om makaite zong bangzah hiam a pia hi. 41 A zingchiangin, Balak in Bamoth Baal ah Balaam a tonpih a, tua apanin tua a mi gente' tamdan bangzah hiam a mu hi.

Kisimna 23

Balaam' Thugen Khatna

1 Balaam in: Hiai ah maitam sagih hon dawhsak inla, kei adingin bawngtal sagih leh belamtal sagih hon suktuahsak in, a chi hi. 2 Balak in Balaam gen bangin a hih a, amaute gel in maitamte tung ah bawngtal khat leh belamtal khat tek a laan uhi. 3 Tua khitin, Balaam in Balak kiang ah: Hiah na thillat kiang ah na om inla, kei ka vapaikhe tuam ding, Tangtawn Toupa kei tuak dingin hong pai mai thei ahi. Kei kianga hon latsak peuhmah nang kon hilh ding, a chi a, tua khitin, amah mual giau khat ah a hawh tuamta hi. 4 Pathian in amah a tuak a, Balaam in amah kiang ah: Maitam sagih ka dawh a, tuate tung ah bawngtal khat leh belamtal khat tek ka laanta, a chi hi. 5 Tangtawn Toupa'n Balaam' kam ah thupuak khat a koih a: Balak kiang ah paikik inla, hiai thupuak amah pia in, a chi hi. 6 Tuachi-in, amah Balak kiang ah a paikik a, amah a thillat kianga, Moab makaite tawh ding a mu hi. 7 Tua khitin, Balaam in a thupuak a genkhia a: Moab kumpipa Balak in, Aram apan kei hon tonpih a, suahlam mualte apan ahi, Hong pai inla, kei adingin Jakob hamsiat in, Israel gensia in! a chi. 8 Pathian in a hamsiat louh ke'n bangchi-a hamsiat thei ding ka hia? Tangtawn Toupa'n a gensiat louh ke'n bangchi-a gense thei ding ka hia? 9 Mualdawn suangpite apan amaute mu ing a, mualsangte apan amah en ing a, tua ah nam khat tuamteen a, namte laka kisimkhawm lou hi. 10 Jakob leivuite kua'n simseng ding, ahihkei leh, Israel sehli suah seh khat kua'n sim thei ding? Midiktat sihna bangin hon sisak inla, ka tawpna midiktat tawpna bangsak in! a chi hi. 11 Tua khitin, Balak in: Kei adinga bang hon hihsak na hita maia? Ka melmate hamsiat dingin kon tonpih a, ahihhangin vualzawlna loungal bangmah na hih kei a! a chi hi. 12 Balaam in a dawng a: Tangtawn Toupa'n ka kama a koih gen teitei lou ding ka hi maw? a chi hi.

Balaam' Thugen Nihna

13 Tua khitin, Balak in amah kiang ah: Amaute na muh theih nading mun dang ah hon zui in. Amaute pawlkhat na mu ding a, a vekun bel na mu kei ding. Tua apanin, kei adingin, amaute hamsiat in, a chi hi. 14 Tuachi-in ama'n Pisga mual tunga Zofim' lou ah amah a tonpih hi. Tua ah, maitam sagih a dawh a, maitamte tung ah bawngtal khat leh belamtal khat tek a laan hi. 15 Balaam in Balak kiang ah: Hiah na thillat kiang ah na om in, ke'n hua lai ah Tangtawn Toupa ka vatuak ding, a chi hi. 16 Tangtawn Toupa'n Balaam a na tuak a, a kam ah thupuak khat a koih a: Balak kiang ah kik inla, hiai thupuak pia in, a chi hi. 17 Tuachi-in, Balaam, Balak kiang ah a pai a, a thillat kianga Moab makaite tawh dingin a om hi. Balak in amah kiang ah: Tangtawn Toupa'n bang a gen a? chi-in a dong hi. 18 Ama'n a thupuak a genkhia a: Balak, thou inla, ngaikhia in, Zipor' tapa aw, ka thugen za in. 19 Pathian zaw zuau gen ding mi hilou hi. A lungsim khel ding mi zong hilou hi. Thu gen napi-a semkhe lou ding hia? Thu chiam napi-a tangtun lou ding hia? 20 Vualzawl dinga thupiak ngah hi ve'ng. Ama'n vualzawlta a, ke'n kheng thei lou. 21 Jakob ah mawhna kimu lou, Israel ah muanhuailouhna kimu lou, Tangtawn Toupa, a Pathian un amaute ompih a, Kumpipa' kikouna amaute' laka om hi. 22 Pathian in amaute Aigupta gam apan lakhia a, amaute'n gam bawngtal tha pu uhi. 23 Jakob doua bumna om lou, Israel doua aisan om lou. Tu'n Jakob leh Israel tawh kisaia: Pathian in a hih en dih ua! kichi ding hi. 24 Tua mipite humpinelkai nou banga thou uh a, humpinelkai a samat a gaih mateng leh a matsate' sisan a dawn khit mateng khawl lou banga amau kitokthou uhi, a chi hi. 25 Tua khitin, Balak in Balaam kiang ah: Amaute hamsiat lah hamsiat kenla, vualzawl lah vualzawl dah mai awh! a chi hi. 26 Balaam in a dawng a: Tangtawn Toupa' gen peuhmah ka hih ding, chi-in kon hilh keia hia? a chi hi.

Balaam' Thugen Thumna

27 Tua khitin, Balak in Balaam kiang ah: Hong pai in, mun dang ah hon paipih ning. Tua apan kei adinga amaute na hamsiat ding Pathian lungkimna ahi mawh ding hia, a chi hi. 28 Tuachi-in, Balak in Peor mual tung ah gamsia etsukna mun ah Balaam a tonpih hi. 29 Balaam in: Hiai ah maitam sagih hon dawhsak inla, kei adingin bawngtal sagih leh belamtal sagih hon suktuahsak in, a chi hi. 30 Balak in Balaam gen bangin a hih a, maitamte tung ah bawngtal khat leh belamtal khat tek a laan hi.

Kisimna 24

1 Israel vualzawl ding Tangtawn Toupa' lungkimna ahi, chih Balaam in a muh takin, hun dang bangin, bumna zat a sawm kei a, gamdai-gamkeu lam a nga zawta hi. 2 Balaam a dakkhia a, Israelte a nam a nama giahphual sat a muh takin, ama' tung ah Pathian Kha hong tung a, 3 a thupuak a genkhia a: Beor' tapa Balaam' thugen, a mita teltaka mupa' thugen, 4 Pathian' thute zapa, Vanglianpen mupa, khupbawhpa leh a mitvakpa' thugen: 5 Jakob aw, na puanbukte, Israel aw, na tenna munte, kilawm na mah e! 6 Phaizang bangin kiphalh uh a, lui geia huante bang hi uhi. Tangtawn Toupa' suansa tawsaw singte bang, tuite geia sidar singte bang hi uhi. 7 Amaute' baltin apan tuite luangkhe ding a, a khaichite un tui tampi mu ding uhi. A kumpipa uh Agag sanga lianzaw ding a, a kumpipa uh tawisanga om ding hi. 8 Pathian in Aigupta gam apan amaute piikhia a, amaute'n gam bawngtalte hatna nei uhi. Helhat namte nawmvalh uh a, a guhte uh hihzan uhi. A thalte-un amaute kap pailet uhi. 9 Humpinelkai banga bok uh a, lumsuk uhi. Humpinelkainu bang amaute kuan tokthou ngam ding eita? Nou hon vualzawlte vualzawlin om uh henla, nou hon hamsiatte hamsiatin om uhen! a chi hi. 10 Tua khitin, Balaam tunga Balak hehna a kuang a, a khutte a nuai tuah a, amah kiang ah: Ka melmate hamsiat dingin kon sam a, thumvei tak amaute na vualzawl zawsopta. 11 Tu'n kintakin paikhia inla, inn ah pai in! Thupitakin pahtakman kon pe ding, ka chi a, ahihhangin, Tangtawn Toupa'n pahtakman piaka na om ding hon dai ahi, a chi hi. 12 Balaam in Balak a dawng a: Thupua non sawlte ka hilh keia hia: 13 Balak in a inpi ngun leh khama dimin hon pe mah leh, Tangtawn Toupa' thupiak ban paiin, bangmah a sia zong, a pha zong ka hih thei kei. Tangtawn Toupa' gen kia ka gen teitei ding, ka chi keia hia? 14 Tu'n ka mite lak ah ka kilehta ding. Ahihhangin, hong pai dih, hun hong tung dingtea hiai nam in na mite tunga a hih ding uh hon hilhkhol ning, a chi hi.

Balaam' Thugen Una

15 Ama'n a thugen a genkhia a: Beor' tapa Balaam' thugen, a mittea teltaka mupa' thugen, 16 Pathian' thute zapa' thugen, Tungnungpen apan theihna neipa, Vanglianpen apan mengmuh mupa, khupbawhpa, a mit vaksaka ompa' thugen: 17 Ke'n amah mu hi'ng, tuin bel hi kei. Ke'n amah mu hi'ng, a naiin bel hi kei. Jakob apan aksi khat hong suak ding a, Israel apan kumpi chiang khat hong dingkhe ding hi. Ama'n Moab taltangte leh Seth' tapate' luguhte gawpsak ding hi. 18 Edom zawhin om ding a, a meima Seir zawhin om ding hi. 19 Jakob apan ukpa khat hong pawt ding a, ama'n khawpi-a suaktasunte hihmangthang ding hi, a chi hi.

Balaam' Thugen Nunung

20 Tua khitin, Balaam in Amalek a mu a, a thugen a genkhia a: Amalek zaw namte laka masapen hi ahi. Ahihhanga hong se khongkhong ding hi, a chi hi. 21 Tua khitin, Kente a mu a, a thugen a genkhia a: Na tenna mun bit a, na bu suangpi henga seh hi a, 22 ahihhanga, Ashur in sala hon mat chianga, Kente hihmanthata om ding hi uteh, a chi hi. 23 Tua khitin, ama'n a puakgik thu a genkhia a: Maizen aw! Pathian in hiai a hih chianga, kua nungta zou ding? 24 Kitim tuipi gei apan longte hong pai ding a, Ashur leh Eber zou ding hi. Ahihhanga amaute zong hong segawp ding uhi, chi hi. 25 Tua khitin, Balaam a dingkhia a, inn ah a kik a, Balak zong a paita hi.

Kisimna 25

Moab in Israel Puksak

1 Israel, Shitim-a a taam sungin, pasalte'n Moab numeite tawh lupkhawm a thangsak uhi. 2 Moab numeite'n a pathiante uh maia kithoihna ah amaute a chial pahpah uhi. Tua mite'n bel tua pathiante mai ah an a ne uh a, a mai uah a kun uhi. 3 Tuachi-in, Israelte Peor' Baal biakna ah a kihelta uhi. Tua hangin amaute tung ah Tangtawn Toupa' hehna a kuangta hi. 4 Tangtawn Toupa'n Mosi kiang ah: Tangtawn Toupa' hehna Israelte apan heimanga a om theih nadingin, hiai mite' makaite kaikhawm inla, Tangtawn Toupa' mai ah sun tanglai khawvak ah amaute that inla, Tangtawn Toupa' mai ah phoulak in, a chi hi. 5 Tuachi-in, Mosi in Israel vaihawmte kiang ah: Noute'n Peor' Baal biakna-a kihel na mite uh na thah chiat ding uh ahi, a chi hi.

Fineha in Hipi Lentang

6 Tua khitin, Israelte Kihoupihna Puanbuk lutna-a kapa a om laitakun, Israel pasal khat in, Mosi leh Israel kikhawmte mitmuhin Midian numei khat a inn ah hon piilut hi. 7 Siampi Aron' tapa Eleazar hi a, Eleazar' tapa Fineha hiven, hiai Fineha in hiai thil a muh takin, kikhawmte a nusia a, a khutin teipi khat a tawi a, 8 tua Israel mipa a puanbuk sung ah a zuilut hi. Ama'n amaute gel, Israel pasal leh tua numei pumpi a dawt pailet tuak hi. Tua khitin, Israelte tunga' hipi a tawp hi. 9 Ahihhangin, hipi-a si mi 24,000 a pha hi. 10 Tangtawn Toupa'n Mosi kiang ah: 11 Eleazar' tapa Fineha in Israelte apan ka hehna a heimangta. Eleazar zong siampi Aron' tapa ahi. Fineha zong ka zahtakhuaina guma ka thikthusiatna bangin a thikthusia a, tuachi-in, ka thikthusiatna in amaute a kangmangta kei hi. 12 Tua ahih manin, amah tawh kal ah ka lemna thukhun ka bawl chih amah hilh in. 13 Amah a Pathian zahtakhuaina guma thikthusia hi a, Israelte adinga khelhna khuhna a bawlsak manin, amah leh a suante'n siampi hihdenna thukhun a nei ding uhi, a chi hi. 14 Tua Midian numei tawh thahkhawm, Israel mipa' min Zimri ahi a, Salu' tapa ahi. Salu bel Simeon' inkawte' makai ahi. 15 Tua thah-a om Midian numei' min Kozbi ahi a, Zur' tanu ahi. Zur bel, Midian innkuan khata nam makai ahi. 16 Tangtawn Toupa'n Mosi kiang ah: 17 Midiante zaw meima bangin sai inla, amaute that in. 18 Amaute'n Peor thu leh a sanggamnu uh, Midian makai' tanu Kozbi tawh kisaia noute hon khem laiun meima banga hon sai ahi uhi. Peor ziaka tua hipi hong tun takin Kozbi thahin a om ahi, a chi hi.

Kisimna 26

Kisimna Nihveina

1 Tua hipi nungin, Tangtawn Toupa'n Mosi leh siampi Aron' tapa Eleazar kiang ah: 2 Israel nam khempeuh a innkuan kuanin, kum 20 apan a tunglama upa, Israel sepaiha pang thei khempeuh sim un, a chi hi. 3 Tuachi-in, Jerikho gal Jordan lui kiang, Moab phaizang ah, Mosi leh siampi Eleazar in amaute a houpih uh a: 4 Tangtawn Toupa'n Mosi thu a piak bangin, pasal kum 20 leh a tunglama upate sim un, a chi uhi. Hiaite Aigupta gam apan hong paikhia Israelte ahi uhi: 5 Israel' tapa masapen Reuben' suante hiaite ahi: Hanokh tungtawnin Hanokh beh; Palu tungtawnin Palu beh; 6 Hezron tungtawnin Hezron beh; Karmi tungtawnin Karmi beh; 7 Hiaite Reuben' suan behte ahi uh a, 43,730 a pha uhi. 8 Palu tapa Eliab ahi a, 9 Eliab' tapate Nemuel, Dathan leh Abiram ahi. Hiai Dathan leh Abiram mah ahi a mite uh laka miliante tua Kora nungzuite Tangtawn Toupa tunga a hel lai ua Mosi leh Aron tunga helna laka pang. 10 Lei a kamka a, amaute, Kora tawh a valhkhawm hi. Kora nungzuite bel mei in mi 250 a kattum laiin a si uhi. Amaute bel vauhilh nadinga chiamtehnain a pang uhi. 11 Kora khang gui bel a subei kei hi. 12 Simeon' suante, a beh behin hiaite ahi: Nemuel tungtawnin Nemuel beh; Jamin tungtawnin Jamin beh; Jakin tungtawnin Jakin beh; 13 Zera tungtawnin Zera beh; Shaul tungtawnin Shaul beh. 14 Hiaite Simeon behte ahi uh a, 22,200 a pha uhi. 15 Gad' suante, a beh behin hiaite ahi: Zefon tungtawnin Zefon beh; Hagi tungtawnin Hagi beh; Shuni tungtawnin Shuni beh; 16 Ozni tungtawnin Ozni beh; Eri tungtawnin Eri beh; 17 Arodi tungtawnin Arodi beh; Areli tungtawnin Areli beh. 18 Hiaite Gad behte ahi uh a, 40,500 a pha uhi. 19 Er leh Onan bel Judah' tapate ahi uh a, ahihhangin, Kanan gam ah a si uhi. 20 Judah suante a beh behin hiaite ahi: Shela tungtawnin Shela beh; Perez tungtawnin Perez beh; Zera tungtawnin Zera beh. 21 Perez suante hiaite ahi: Hezron tungtawnin Hezron beh; Hamul tungtawnin Hamul beh. 22 Hiaite Judah behte ahi uh a, 76,500 a pha uhi. 23 Isakhar' suante, a beh behin hiaite ahi: Tola tungtawnin Tola beh; Pua tungtawnin Pua beh; 24 Jashub tungtawnin Jashub beh; Shimron tungtawnin Shimron beh. 25 Hiaite Isakhar behte ahi uh a, 64,300 a pha uhi. 26 Zebulun suante, a beh beh-in hiaite ahi: Sered tungtawnin Sered beh; Elon tungtawnin Elon beh; Jaleel tungtawnin Jaleel beh. 27 Hiaite Zebulun behte ahi uh a, 60,500 a pha uhi. 28 Josef suante, Manase leh Efraim tungtawnin a beh beh-in hiaite ahi: 29 Manase' suante a beh behin hiaite ahi: Makir tungtawnin Makir beh. Makir bel Gilead' pa ahi. Gilead tungtawnin Gilead beh. 30 Gilead' suante a beh behin hiaite ahi: Iezer tungtawnin Iezer beh; Helek tungtawnin Helek beh; 31 Asriel tungtawnin Asriel beh; Shekhem tungtawnin Shekhem beh; 32 Shemida tungtawnin Shemida beh; Hefer tungtawnin Hefer beh; 33 Hefer' tapa Zelofehad in tapa a nei kei a, tanute kia a nei hi. A minte uh Mala, Noa, Hagla, Milka leh Tirza ahi. 34 Hiaite Manase behte ahi uh a, 52,700 a pha uhi. 35 Efraim' suante, a beh behin hiaite ahi: Shuthela tungtawnin Shuthela beh; Beker tungtawnin Beker beh; Tahan tungtawnin Tahan beh. 36 Hiaite Shuthela suante-a beh ahi: Eran tungtawnin Eran beh. 37 Hiaite Efraim behte ahi uh a, 32,500 a pha uhi. Hiaite Josef suana beh ahi uhi: 38 Benjamin suante, a beh beh-in hiaite ahi: Bela tungtawnin Bela beh; Ashbel tungtawnin Ashbel beh; Ahiram tungtawnin Ahiram beh; 39 Shufam tungtawnin Shufam beh; Hufam tungtawnin Hufam beh. 40 Ard leh Naaman tungtawna Bela suante hiaite ahi: Ard tungtawnin Ard beh; Naaman tungtawnin Naaman beh. 41 Benjamin behte hiaite ahi uh a, 45,600 a pha uhi. 42 Dan suante, a beh beh-in hiaite ahi: Shuham tungtawnin Shuham beh. Dan behte hiaite ahi. 43 Avekpi un Shuham behte ahi vek uh a, 64,400 a pha uhi. 44 Asher suante, a beh behin hiaite ahi: Imra tungtawnin Imra beh; Ishvi tungtawnin Ishvi beh; Beria tungtawnin Beria beh; 45 Beria suante tungtawna behte hiaite ahi uh: Heber tungtawnin Heber beh; Malkiel tungtawnin Malkiel beh. 46 Asher in tanu khat a nei a, a min Sera ahi. 47 Asher behte hiaite ahi uh a, 53,400 a pha uhi. 48 Naftali suante, a beh behin hiaite ahi: Jazeel tungtawnin Jazeel beh; Guni tungtawnin Guni beh; 49 Jezer tungtawnin Jezer beh; Shilem tungtawnin Shilem beh. 50 Hiaite Naftali behte ahi uh a, 45,400 a pha uhi. 51 Israelte pasal a vekpi-un 601,730 a pha uhi. 52 Tangtawn Toupa'n Mosi kiang ah: 53 Amaute kiang ah goutan dingin gam hawm ding ahi a, a min zahzah uh bang zela hawm ding ahi. 54 Pawl tamzawte kiang ah goutan gam za zaw, pawl tawmzawte kiang ah goutan gam neu zaw piak ding ahi. Min kikhum zah bang zelin, gou tan a tan ding uh ahi. 55 Gam bel aisana hawm ding kiteltakin hih in. Pawl chih in a pu a pa khanga nam min bang zela goutan luah ahi ding ahi. 56 Goutan peuhmah pawl tamzaw leh pawl tawmzawte lak ah aisana hawm ding ahi, a chi hi. 57 Levite, a beh beha kisim hiaite ahi: Gershon tungtawnin Gershon beh; Kohath tungtawnin Kohath beh; Merari tungtawnin Merari beh. 58 Hiaite zong Levi behte ahi: Libna beh; Hebron beh; Mali beh; Musha beh; Kora beh. Kohath bel Amram' pu ahi. 59 Amram' zi' minjokhebed ahi a, Levi suan leh khak khat ahi a, Aigupta gama Levite apana piang ahi. Amram adingin Aron, Mosi leh a sanggamnu uh Miriam a neihsak hi. 60 Aron bel Nadab leh Abihu, Eleazar leh Ithamar pa ahi. 61 Ahihhangin, Nadab leh Abihu in Tangtawn Toupa' maia phallouh mei tawh a, thil a lat laiun a si uhi. 62 Levite pasal kha khat hiam, a tamzaw hiama upa khempeuh 23,000 a pha hi. Israelte laka goutan gam tang lou uh ahih manun, Israel dangte tawh simkhawm ahi kei uhi. 63 Jerikho gal, Jordan lui kiang, Moab phaizanga Mosi leh siampi Eleazar in Israelte a sim lai ua kisimte hiaite ahi uhi. 64 Mosi leh siampi Aron in Sinai Gamdai-gamkeua Israelte a sim laiun, a kisimte lak ah amaute khat beek a om kei uhi. 65 Banghang hiam chih leh, Tangtawn Toupa'n tua Israelte kiang ah, gamdai-gamkeu ah a si ngeingei ding uh, chi-in a na hilhkhin a, Jefune' tapa Kaleb leh Nun' tapa Joshua loungal amaute a khawsuak khat beek a om kei uhi.

Kisimna 27

Zelofehad' Tanute

1 Zelofehad' tanute bel Josef tapa Manase behte ahi uhi. Zelofehad bel Hefer' tapa ahi. Hefer bel Gilead' tapa ahi a, Gilead bel Manase' tapa ahi. Tua tanute' minte Mala, Noa, Hogla, Milka leh Tirza ahi. Amaute'n 2 Kihoupihna Puanbuk lutna a naih uh a, Mosi, Siampi Eleazar, makaite leh kikhawmte mai ah a ding uh a: 3 Ka pa uh gamdai-gamkeu ah a si hi. Amah zaw Tangtawn Toupa tunga hel dinga mite kaikhawmpa Kora nungzuite lak ah a pang kei a, ahihhangin, ama' khelhna hangin a si a, tapate a nuse kei hi. 4 Ama'n tapa a neih louh mana, banghanga a beh lak apan a min mang ding ahia oi? Ka pa uh' tanaute lak ah goutan koute hon pia un, a chi uhi. 5 Tuachi-in, Mosi in a thu uh Tangtawn Toupa' mai a tun a, 6 Tangtawn Toupa'n amah kiang ah: 7 Zelofehad' tanute' thugen a dik ahi. A pa uh' sanggamte laka goutan na piak teitei ding ahi a, a pa uh' gou mahmah amaute na piakkhiak ding ahi. 8 Israelte kiang ah: Pasal khat peuh tapa neiloua a sih leh, a goutan a tanute kiang ah pekhia un. 9 Ama'n tanu zong a neih kei leh a goutan a sanggam pasalte kiang ah pia un. 10 Ama'n sanggam pasalte a neih kei leh, a pa' sanggam pasalte kiang ah pia un. 11 A pa'n sanggam pasalte a neih kei leh, a beh laka tanau naipen kiang ah a goutan pia un, ama'n a tang thei ding hi. Tangtawn Toupa'n Mosi thu a piak bangin, Israelte adingin hiai danthuseh ahi ding ahi, chi in, a chi hi.

Mosi Thakheng ding Joshua

12 Tua khitin, Tangtawn Toupa'n Mosi kiang ah: Abarim taanga hiai mual ah paitou inla, Israelte kianga gam ka piak en in. 13 Na muh khit chiangin na sanggampa Aron bangin nang zong na mite kianga pikhawm na hita ding hi. 14 Ahang bel, Zin Gamdai-gamkeua tuite omna-a mipite a hel laiun, amaute' mitmuhin ka min siangthoua pahtawi ding ka thupiak na nihun na mang kei ua ahi, a chi hi. Hiaite bel, Zin Gamdai-gamkeua Meriba Kadesh tuite ahi. 15 Mosi in Tangtawn Toupa kiang ah: 16 Tangtawn Toupa, mihing khempeuhte' khate' Pathian in hiai mihonte tung ah mi khat sep hen, 17 Amah amaute maia pawtkhia a, lut dingpa hi hen. Tangtawn Toupa' mite, a ching ding neilou belamte bang a hih louh nading-ua, amaute piikhia a, piilut dingpa hi hen, a chi hi. 18 Tuachi-in, Tangtawn Toupa'n Mosi kiang ah: Nun' tapa Joshua, Kha omnapa tonpih inla, a tung ah na khut nga in, 19 Siampi Eleazar leh kikhawmte khempeuh mai ah amah dingsak inla, amaute' mitmuhin, amah nna guan in. 20 Israel minam in a thu a man theih nadingin, na thuneihna amah hawm in. 21 Amah siampi Eleazar maia a din ding ahi. Eleazar in Tangtawn Toupa' maia Urim dongin Joshua adingin thupuknate a la ding ahi. Joshua' thupiakin Israelte khempeuh a pawtkhe ding uh a, ama' thupiakin hong lut ding uh ahi, a chi hi. 22 Tangtawn Toupa'n thu a piak bangin Mosi in a hih hi. Joshua a tonpih a, siampi Eleazar leh kikhawmte khempeuh mai ah a dingsak a, 23 tua khitin, ama'n a tung ah a khut a nga a, Tangtawn Toupa'n Mosi tungtawna thuhilhna a piak bangin, nna a guan hi.

Kisimna 28

Nisim Thillatte

1 Tangtawn Toupa'n, Mosi kiang ah: 2 Hiai thupiak Israelte pia inla, amaute kiang ah: Ka lungkimna gim namtui hi dingin meia lat thillatte hi ding an, a hun seh ah, hon pia un, chi in. 3 Tua baan ah, amaute kiang ah: Tangtawn Toupa' maia na piak ding uh meia thillat hiai ahi: Belamnou kum khata upa genbaanglou nih, nisima haltum thillat gige hi dinga na piak ding uh ahi. 4 Belamnou khat zingsanga lat ding, nitak khawmuia a dang khat lat ding ahi. 5 Tuate tawh kitonin, an thillat anvui nei dimdem ephah khat sehsawm suah seh khat, oliv thau hin khat sehli suah seh khat tawh kihel latkhawm ding ahi 6 Hiai bel haltum thillat gige ding Tangtawn Toupa' maia meia thillat a lungkimna gim namtui hi ding chi-a Sinai Muala kisepsa ahi 7 Belamnou khat tek tawh kilaan khawm ding dawn thillat bel silngou sawh dawn thil hin khat ahi. Mun siangthou ah, Tangtawn Toupa' mai ah tua dawn thillat sungbua in. 8 Nitak khawmuiin, belamnou nihna pen zingsanga na bawl an thillat leh dawn thillat bangbang tawh, lan in. Hiai meia thillat, Tangtawn Toupa' lungkimna gim namtui ahi.

Sabbath Thillatte

9 Sabbath ni-in, belamnou, kum khata upa, gen baanglou nih, a dawn thillat tawh, an thillat anvui nei ephah khat sehsawm suah seh nih, sathau tawh kihel tawh, laan in. 10 Hiai Sabbath nisim ading, haltum thillat ahi. Hiai bel, haltum thillat ngeina-a dawn thillat tawh kiton gige behlapna ahi.

Khasim Thillatte

11 Kha sima a ni khat ni-in, Tangtawn Toupa' mai ah haltum thillat, bawngtaltuai nih, belamtal khat leh belamnoupa, kum khata upa sagih, genbaanglou chiat, laan un. 12 Bawngtal khat zel tawh latkhawm ding an thillatte, anvui nei ephah khat sehsawm suah seh thum, sathau tawh kihel ahi. Belamtal tawh latkhawm ding an thillat, anvui nei ephah khat sehsawm suah seh nih, sathau tawh kihel ahi ding ahi. 13 Belamnou khat zel tawh latkhawm ding an thillat, anvui nei ephah khat sehsawm suah seh khat, sathau tawh kihel ahi ding ahi. Hiai bel, Tangtawn Toupa' maia meia thillat gim namtui hi dinga, haltum thillat ahi. 14 Bawngtal khat zel tawh latkhawm ding dawn thillat, grepzu hin kimkhat ahi ding ahi. Belamtal tawh latkhawm ding dawn thillat grepzu hin khat sehthum suah seh khat ahi ding ahi. Belamnou khat zel tawh latkhawm ding dawn thillat grepzu hin khat sehli suah seh khat ahi ding ahi. Hiai khasim thillat ahi a, kum khat sunga kha thak ni zela haltum thillat ding ahi. 15 Haltum thillat gige, a dawn thillat tawh latkhawm baan ah, keltal khat, Tangtawn Toupa' maia khelhna thillata lat ding ahi.

Paikan Ankuang

16 A kha khatna, a ni sawmleli ni-in Tangtawn Toupa' Paikan zat ding ahi. 17 Hiai kha, a ni sawmlenga ni-in, ankuang luina a om ding ahi. Ni sagih sung silngou sawhlouh tanghou ne un. 18 A ni khat ni-in khawmpi siangthou nei unla, nna ngeina sem kei un. 19 Tangtawn Toupa' mai ah meia thillat haltum thillat bawngtaltuai nih, belamtal khat leh belamnoupa, kum khata upa, genbaanglou sagih lan un. 20 Bawngtal khat zel tawh an thillat, anvui nei ephah khat sehsawm suah seh thum, sathau tawh kihel a om ding ahi. Belamtal tawh anvui nei ephah khat sehsawm suah seh nih ahi ding ahi. 21 Belamnou sagih, khat zel tawh anvui nei ephah sehsawm suah seh khat ahi ding ahi. 22 Noute adinga khuhna bawl nadingin keltal khat khelhna thillat laan un. 23 Hiaite zingsang haltum thillat ngeinate baana behlapnain hih un. 24 Ni sagih sung hibangin nisim meia thillat Tangtawn Toupa' lungkimna gim namtui haltum thillat dingin an bawl un. Hiai bel, haltum thillat ngeina leh a dawn thillat behlapnain hih un. 25 A ni sagih ni-in, khawmpi siangthou nei unla, nna ngeina sem kei un.

Nipikalte Ankuang

26 Gahmasate ni-in, Nipikalte Ankuang lui sunga Tangtawn Toupa' maia an thak na lat chiangun, khawmpi siangthou nei unla, nna ngeina sem kei un. 27 Haltum thillat, bawngtaltuai nih, belamtal khat, belamnoupa, kum khata upa sagih Tangtawn Toupa' lungkimna gim namtui hi dingin laan un. 28 Bawngtal khat zel tawh an thillat, anvui nei ephah khat sehsawm suah seh thum, sathau tawh kihel ahi ding ahi. 29 Belamnou sagihte khat zel tawh anvui nei ephah khat sehsawm suah seh khat ahi ding ahi. 30 Noute adinga khuhna bawl nadingin keltal khat telsak un. Haltum thillat ngeina leh a an thillat baan ah, hiaite a dawn thillatte tawh bawl un. Gantate genbaanglou hisak ngeingei un.

Kisimna 29

Pengkulte Ankuang

1 A Kha sagihna, a ni khat ni-in, khawmpi siangthou nei unla, nna ngeina sem kei un. Noute adinga pengkulte mut ni ahi. 2 Tangtawn Toupa' lungkimna gim namtui hi dingin, haltum thillat, bawngtaltuai khat, belamtal khat leh belamnoupa, kum khata upa, genbaanglou sagih laan un. 3 Tua bawngtal tawh, an thillat, anvui nei ephah khat sehsawm suah seh thum, sathau tawh kihel bawl un. Belam tawh, anvui nei ephah khat sehsawm suah seh nih ahi ding ahi. 4 Belamnou sagihte khat zel tawh, anvui nei ephah khat sehsawm suah seh khat ahi ding ahi. 5 Noute adinga khuhna bawl nading khelhna thillat dingin keltal khat telsak un. 6 Hiaite bel, a kisehsa banga khasim leh nisim haltum thillatte leh a an thillatte leh dawn thillatte baana behlapna ahi. Tangtawn Toupa' maia thillatte a lungkimna gim namtui ahi uhi.

Khelhna Khuhna Ni

7 Hiai Kha sagihna, a ni sawm ni-in khawmpi siangthou nei un. Noute kizangsakin, nna bangmah sem kei un. 8 Tangtawn Toupa' lungkimna gim namtui hi dingin, haltum thillat bawngtaltuai khat, belamtal khat leh belamnou kum khata upa genbaanglou sagih laan un. 9 Tua bawngtal tawh an thillat, anvui nei ephah khat sehsawm suah seh thum, sathau tawh kihel ahi ding ahi. Belamtal tawh, anvui nei ephah khat sehsawm suah seh nih ahi ding ahi. 10 Belamnou sagihte khat zel tawh anvui nei ephah khat sehsawm suah seh khat ahi ding ahi. 11 Khelhna khuhna bawl nading khelhna thillat leh haltum thillat ngeina leh a an thillat leh a dawn thillatte behlapna in khelhna thillat ding keltal khat telsak un.

Bawktate Ankuang

12 A kha sagihna, a ni sawmlenga ni-in, khawmpi siangthou nei unla, nna ngeina sem kei un. Ni sagih sung Tangtawn Toupa' mai ah ankuanglui bawl un. 13 Tangtawn Toupa' lungkimna gim namtui hi ding, meia thillat, tua haltum thillat, bawngtaltuai sawmlethum, belamtal nih leh belamnoupa kum khata upa, genbaanglou sawmleli laan un. 14 Bawngtal sawmlethumte laka khat zel tawh an thillatte, anvui nei ephah khat sehsawm suah seh thum, sathau tawh kihel ahi ding ahi. Belamtal nihte laka khat zel tawh anvui nei ephah khat sehsawm suah seh nih ahi ding ahi. 15 Belamnou sawmlelite laka belamnou khat zel tawh, anvui nei ephah khat sehsawm suah seh khat a hi ding ahi. 16 Haltum thillat ngeina leh a an thillat leh dawn thillat baan ah, khelhna thillat ding keltal khat telsak un. 17 A ni nih ni-in, bawngtaltuai sawmlenih, belamtal nih leh belamnoupa, kum khata upa genbaanglou sawmleli laan un. 18 Tua bawngtalte, belamtalte leh belamnoute tawh, an thillat leh dawn thillat, a pha ding zah sehsa bangin laan un. 19 Haltum thillat ngeina leh a an thillat leh dawn thillatte baan ah, khelhna thillat ding keltal khat telsak un. 20 A ni thum ni-in, bawngtal sawmlekhat, belamtal nih leh belamnoupa, kum khata upa genbaanglou sawmleli laan un. 21 Tua bawngtalte, belamtalte leh belamnoute tawh a an thillatte leh dawn thillatte, a pha ding zah sehsa bangin laan un. 22 Haltum thillat ngeina leh a an thillat leh dawn thillat baan ah, khelhna thillat ding keltal khat telsak un. 23 A ni li ni-in, bawngtal sawm, belamtal nih leh belamnoupa, kum khata upa genbaanglou sawmleli laan un. 24 Tua bawngtalte, belamtalte leh belamnoupa tawh a an thillatte leh dawn thillatte, a pha ding zah sehsa bang in laan un. 25 Haltum thillat ngeina leh a an thillat leh dawn thillat baan ah, khelhna thillat ding keltal khat telsak un. 26 A ni nga ni-in, bawngtal kua, belamtal nih leh belamnoupa, kum khata upa, genbaanglou sawmleli laan un. 27 Tua bawngtalte, belamtalte leh belamnoute tawh, a an thillatte leh dawn thillatte, a pha ding zah sehsa bangin laan un. 28 Haltum thillat ngeina leh a an thillatte leh dawn thillat baan ah, khelhna thillat ding keltal khat telsak un. 29 Ani guk ni-in, bawngtal giat, belamtal nih leh belamnoupa, kum khata upa, genbaanglou sawmleli laan un. 30 Tua bawngtalte, belamtalte leh belamnoute, a an thillatte leh dawn thillatte, a pha ding zah sehsa bang in laan un. 31 Haltum thillat ngeina leh a an thillat leh dawn thillatte baan ah, khelhna thillat ding keltal khat telsak un. 32 A ni sagih ni-in, bawngtal sagih, belamtal nih leh belamnoupa, kum khata upa, genbaanglou sawmleli laan un. 33 Tua bawngtalte, belamtalte leh belamnoute tawh, a an thillatte leh dawn thillatte, a pha ding zah sehsa bangin laan un. 34 Haltum thillat ngeina leh a an thillat leh dawn thillatte baan ah, khelhna thillat ding keltal khat telsak un. 35 A ni giat ni-in khawmpi siangthou nei unla, nna ngeina sem kei un. 36 Tangtawn Toupa' lungkimna gim namtui hi dingin meia thillat, tua haltum thillatte bawngtal khat, belamtal khat leh belamnoupa kum khata upa, genbaanglou sagih laan un. 37 Tua bawngtal, belamtal leh belamnoute tawh a an thillatte leh a dawn thillatte, a pha ding zah sehsa bangin laan un. 38 Haltum thillat ngeina leh a an thillat leh dawn thillat baan ah, khelhna thillat ding keltal khat telsak un. 39 Na chiamsa uh leh na ut thillatte uh baan ah, sehsa na ankuangluite uah Tangtawn Toupa adingin hiaite, na haltum thillatte uh, an thillatte, dawn thillatte leh lemna thillatte laan un, chi in, a chi hi. 40 Tangtawn Toupa' thupiak khempeuh Mosi in Israelte a hilh hi.

Kisimna 30

Thuchiamte tawh kisai Dante

1 Mosi in Israel namte' lutangte kiang ah: Hiai Tangtawn Toupa' thupiak ahi: 2 Pasal khat peuh in Tangtawn Toupa kianga thuchiam a bawl chiangin, ahih kei leh, thuchiam zanga a kihen chiangin, ama' thu mah a palsat ding ahi kei a, a gensa peuhmah a tangtun teitei ding ahi. 3 Nungak khat peuh in a pa' insunga a om laia Tangtawn Toupa' maia thuchiam a bawl chiangin, ahih kei leh, thuchiam hiam, kichiamna a bawla, 4 a kichiamna hiam, thuchiam hiam a pa'n a zak a, a kianga bangmah a gen kei leh, a kichiamna khempeuh leh a thuchiam peuhmah a paisuak ding ahi. 5 Ahihhangin, a pa'n tua a zak chianga a kham leh bel, tua nu' kichiamna, ahih kei leh, thuchiama a kihenna khat beek a paisuak kei ding hi. A pa'n kham ahih manin, Tangtawn Toupa'n amah a khahkhe ding hi. 6 Ama'n kichiamna a bawl hiam, thunung khuallou hiaia amuk in thuchiam a bawl hiama amah a kihen nunga pasal a neih a, 7 a pasal in tua thu thei napi-a bangmah a gen kei leh, a kihenna tua kichiamna hiam, thuchiam hiam a kip dinga a paisuak ding hi. 8 Ahihhangin, a pasal in tua thu a zak laia, a kham lehbel tua a kihenna kichiamna hiam, thunung khuallou hiaia thuchiam a bawl hiam bangmahlou suaksak ahi a, Tangtawn Toupa'n amah a khahkhe ding hi. 9 Meigong hiam, maksa numei hiam in kichiamna hiam, batneia a kibawlna peuhmah, ama tung ah a kipden ding hi. 10 A pasal tawh omkhawm numei khatpeuh in kichiamna hiam, kichiam zena thuchiam hiam zanga kihenna a neih a, 11 a pasal in tua thu za napi-a ama' kianga bangmah a gen kei a, a kham kei leh a thuchiam khempeuh, ahih kei leh a kihenna a kipden ding hi. 12 Ahihhangin, a pasal in tuate a zak taka bangmah loua a beisak leh bel, a thuchiamte, ahih kei leh, a kama a genkhiak thuchiamte khat beek a paisuak kei ding hi. A pasal in tuate bangmahloua bawlsak ahih manin, Tangtawn Toupa'n amah tuate apan a khahkhe ding hi. 13 Thuchiam a bawl khempeuh, ahih kei leh, amah kizangsak dinga kichiam zena a thugen khempeuh a pasal in a kipsak thei a, bangmahlou a suaksak thei hi. 14 Ahihhangin, a pasal in tua tawh kisai bangmah gen a neih kei leh, a kichiamna, ama' kihenna a kipsak ahi. Tuate a zak laia bangmah gen loua tuate kipsak ahi. 15 Hinapi-in, tuate a zak nung bangtan hiama tuate bangmahloua bawl ahih leh bel, tua nu' mawhna a pasal in a khu hi, a chi hi. 16 Hiaite pasal leh a zi kitanauna leh pa leh a inn-a om lai a tanu nungak kitanauna tawh kisai, Tangtawn Toupa'n Mosi kianga dan a piak ahi.

Kisimna 31

Midiante' tunga Phulakna

1 Tangtawn Toupa'n Mosi kiang ah: 2 Israelte adingin Midiante tung ah phuba la in. Tua nung chiangin, na mite laka lakkhawm na hita ding hi, a chi hi. 3 Tuachi-in, Mosi in mipite kiang ah: Midiante dou ding leh amaute tunga Tangtawn Toupa' phuba la dingin na pasalte uh bangzah hiam galvan un. 4 Israel namte apan mi 1,000 khat chiat galdou dingin sawl un, a chi hi. 5 Tuachi-in, pasal 12,000 galdou dingin a kigalvan uhi. Nam khat apan 1,000 zel Israel behte apan piakkhiak ahi uhi. 6 Mosi in nam khat laka 1,000 zel kidouna phual ah a sawl a, siampi Eleazar' tapa Fineha in mun siangthou apan vante leh thu theihsak nading pengkulte a la a, amaute tawh a ton hi. 7 Tangtawn Toupa'n Mosi thu a piak bangin, amaute'n Midiante a dou uh a, pasal peuhmah a that uhi. 8 A thahte uh lak ah Evi, Rekem, Zur, Hur leh Reba, tua Midian kumpipa ngate a tel uhi. Beor' tapa Balaam zong namsauin a that uhi. 9 Israelte'n Midian numeite leh naupangte salin a man uh a, Midiante' bawnghonte, belam leh kelhonte khempeuh leh vante gallak sumin a la uhi. 10 Midiante' tenna khawpi khempeuh leh a giahphualte uh a haltum vek uhi. 11 Gallak sum khempeuh leh vansuhte khempeuh mihingte leh gantate tawh a la uhi. 12 Tua salmatte, gallakte leh vante hon pua uh a, Jerikho gal, Jordan lui dung, tua Moab phaizang ah, Mosi leh siampi Eleazar leh Israel kikhawmte kiang ah giahphual ah hon tun uhi. 13 Mosi, siampi Eleazar leh nam makaite, giahphual pua-a amaute vatuak dingin a kuankhia uhi. 14 Mosi bel galmun apan hong kik tua sepaihhon makaite, tua 1,000 pawlpawlte' makaite leh 100 pawlpawlte' makaite tung ah a heh hi. 15 Ama'n amaute kiang ah: Numeite khempeuh nungta dinga phal na hi umaw? 16 Balaam' thuhilhna zuite amaute ahi uh a, Peora thiltung ah Tangtawn Toupa apan Israelte piimang dinga vanzatte ahi uh a, hipi in Tangtawn Toupa' mite a nuai hi. 17 Pasal naupangte khempeuh that unla, pasal tawh lumkhawmsa numei peuhmah that un, 18 pasal tawh lumkhawm ngei nailou nungak peuhmah bel noute adingin hinghawi un.

Israelte Siansuahna

19 Mi khat peuh that, ahih kei leh, thahsa khat peuh lawngkha khempeuh, ni sagih sung giahphual pua ah giak un. A ni thum ni leh ni sagih ni-in noute leh na salmatte uh na kisiansuah ding uh ahi. 20 Puansilh peuhmah leh savun, kelmul, ahih kei leh singa kibawl van peuhmah siansuah un, a chi hi. 21 Tua khitin, siampi Eleazar in galdoua kuan sepaihte kiang ah: Tangtawn Toupa'n Mosi a piak Dan in a ngiat hiai ahi: 22 Kham sik, ngun sik, sumsan sik, tiin sik, haak sik leh 23 thil dang mei kattum theihlouh van khempeuh meia paisuaksak ding ahi. Tua khit chiangin, a siang ahi ding. Ahihhangin, siansuahna tuia zong paisuaksak ding ahi. Mei kattum theih van peuhmah tua tuia paisuaksak ding ahi. 24 A ni sagih ni-in na puansilhte uh sawp un, a siang na hita ding uh. Tua khit chiangin giahphual sung ah nong lut thei ding uh, a chi hi.

Gatiakte Hawmna

25 Tangtawn Toupa'n Mosi kiang ah: 26 Nang leh siampi Eleazar leh nam-a innkuan lutangte'n matsa mihingte khempeuh leh gantate sim un. 27 Kidouna-a pang sepaihte leh nam sunga midangte lak ah gallakte hawm un. 28 Kidouna-a pang sepaihte lak apan, mihingte, bawngte, sabiltungte, belamte hi-in, kelte hita leh 500 zela khat, Tangtawn Toupa kianga siah piak dingin sepkhia un. 29 Amaute'n kimkhat a tan uh lak apan hiai siah la unla, Tangtawn Toupa' tan hi dingin siampi Eleazar kiang ah pia un. 30 Israelte'n kim khat a tan uh lak apan mihing, bawng, sabiltung, belam hi-in, kei hita leh, 50 laka khat telkhia unla, Tangtawn Toupa' biakbuk kema mawhpua Levite kiang ah pia un, a chi hi. 31 Tuachi-in, Tangtawn Toupa'n Mosi thu a piak bangin, Mosi leh siampi Eleazar in a hih uhi. 32 Sepaihte'n gallak a lakte uh belam 675,000 leh, 33 bawng 72,000 leh, 34 sabiltung 61,000 leh, 35 pasal tawh lumkhawm ngei nailou numei 32,000 ahi. 36 Galphuala galdou sepaihte'n a kimkhat a tan uh: Belam 337,500 ahi a, 37 tua lak apan Tangtawn Toupa ading siah 675 ahi. 38 Bawng 36,000 ahi a, tuate lak apan Tangtawn Toupa ading siah 72 ahi. 39 Sabiltung 30,500 ahi a, tuate lak apan Tangtawn Toupa ading siah 61 ahi. 40 Mihing 16,000 ahi a, tuate lak apan Tangtawn Toupa ading siah 32 ahi. 41 Mosi in tua siah Tangtawn Toupa' tan siampi Eleazar kiang ah a pia hi. Tua bel, Tangtawn Toupa'n Mosi thu a piak bangbang ahi. 42 Israelte'n a kim khat a tan uh, Mosi in galdoute apan 43 a sehkhiak, mipite'n a kimkhat a tan uh, belam 337,500 leh, 44 bawng 36,000 leh, 45 sabiltung 30,500 leh, 46 mihing 16,000 ahi. 47 Tangtawn Toupa'n Mosi thu a piak bangin Israelte'n a kimkhat a tan uh lak apanin Mosi in mihing leh ganta 50 lak ah khat chiat a telkhia a, Tangtawn Toupa' biakbuk kema mawhpua Levite kiang ah a pia hi. 48 Tua khitin, sepaihhon a pawlpawlte tunga makaite, 1,000 pawlpawl tunga makaite, leh 100 pawlpawl tunga makaite Mosi kiang ah a vapai uh a, 49 a kiang ah: Na silate'n na thu nuaia om sepaihte ka sim uh a, khat lei zong kimlou a om kei. 50 Tuachi-in, koute chiat in ka muhkhiak uh khama kibawl banbuhte, taute, suainamna zungbuhte, bilbahte leh khite Tangtawn Toupa' maia thillat dingin kon tawi uhi, a chi uhi. 51 Mosi leh siampi Eleazar in amaute apan tua kham, tua khutsiam silbawlte khempeuh a saang uhi. 52 1,000 pawlpawl tunga makaite leh 100 pawlpawl tunga makaite apan khamte khempeuh Mosi leh Eleazar in Tangtawn Toupa' maia thawnpiaka a piakte uh shekel 16,750-a gik ahi. 53 Sepaihte'n gallak amau ading a la tek uhi. 54 Mosi leh siampi Eleazar in tua khamte, 1,000 pawlpawl tunga makaite leh 100 khat pawlpawl tunga makaite apan a sang uh a, Tangtawn Toupa' maia Israelte adinga theihgigena hi dingin, Kihoupihna Puanbuk sung ah hon tawilut uhi.

Kisimna 32

Jordan Suahlam Gamhawmna

1 Reubente leh Gadte, bawnghonte, belam leh kelhonte hau ahi uh a, Jazer leh Gilead gamte ganhonte adingin a hoih, chih a mu uhi. 2 Tuachi-in, Mosi leh siampi Eleazar leh nam makaite kiang ah hong pai uh a: 3 Ataroth, Dibon, Jazer, Nimra, Heshbon, Eleale, Sebam, Nebo leh Beon, 4 Tangtawn Toupa'n Israelte maia a zawhna gam, gantate adingin a hoih a, na sila koute'n lah ganhonte ka nei uhi. 5 Na mitmuha deihsakna ka tan uleh, ka tan dingun na sila koute kiang ah hiai gam hon pia un. Jordan lui gal hon kansak kei un, a chi uhi. 6 Mosi in Gadte leh Reubente kiang ah: Noute hiaia na tut maimai sung ua, na gammi hihpihte uh galdoua kuan ding uhia? 7 Tangtawn Toupa'n amaute a piaksa gam sunga va galkaia lut dinga banghanga Israelte lungkesak na hi ua? 8 Gam vel dinga Kadesh Barnea apan na pu na pate uh ka sawl laia a thilhih uh hiai ahi. 9 Eshkol Phaizanga paitoua gam a vel khitun, Tangtawn Toupa'n amaute gou a piaksa-a lut lou dingin amaute a lungkesak uhi. 10 Tua ni-in, Tangtawn Toupa' hehna tawhthawhin a om a, hibangin a kichiam hi: 11 Lungtang teng khempeuh tawh kei hon zuih louh manun pasal kum 20 leh a tunglama upa khat lei zong Abraham, Isak leh Jakob kianga kichiam zena ka chiam gam a lut kei ding. 12 Keniz mi Jefune' tapa Kaleb leh Nun' tapa Joshua, lungtang teng tawh Tangtawn Toupa zuite loungal khat mahmah zong a lut kei ding, a chi hi. 13 Israelte tung ah Tangtawn Toupa' hehna a kuang a, a mitmuha thil gilou hih tua khang buppi a bei mateng amaute tua gamdai-gamkeu ah kum 40 sung a vakthapsak hi. 14 Hiai ah nou, mikhialte' suante, na pu na pate uh dinmun ah na ding uh a, Israelte tung ah Tangtawn Toupa na hehsak sem uhi. 15 Amah zuihna apan na pialmang uleh, hiai mite khempeuh gamdai-gamkeu ah a nuse ding a, amaute' manthatna omsak noute na hi ding uh, a chi hi. 16 Tua khitin, amaute a kiang ah hong paitou uh a: Ka ganhonte uh ading gankulte hiai ah ka bawl nuam uh a, ka numeite uleh tate adingin khawpite, innte ka lam nuam uh. 17 Ahihhangin, Israelte amau' mun ka lutpih mateng uh koute kigalvan a, amaute ma-a pai masa dingin koute kimansa ka hi uh. Tua sung tengin, ka numeite uleh tate uh hiai gama teengte apan kihumbit nadingin kulhnei khawpite ah a teeng ding uh. 18 Israel michih in gouluah gam a ngah mateng koute ka inn uah ka kik kei ding uh. 19 Koute' gouluah ding Jordan suahlama hong om ahih manin, Jordan gal lam ah amaute tawh gouluah gam ka saang kei ding uh, a chi uhi. 20 Tua khitin, Mosi in amaute kiang ah: Hiai banga hih ding na hih ua, galdou dinga Tangtawn Toupa' maia na kigalvan ding ua, 21 Tangtawn Toupa'n a melmate a hawlkhiak mateng, na vek ua kigalvansa-a Jordan gal vakai ding na hih uleh, 22 Tangtawn Toupa' maia tua gam a kizawh chiangin na kik thei ding uh a, Tangtawn Toupa tung leh Israelte tunga na mawhpuakna uapan na siangta ding uh. Tangtawn Toupa' mai ah hiai gam noutea ahi ding. 23 Ahihhangin, hiai na hih kei uleh, Tangtawn Toupa tunga khial na hi ding uh a, na khelhna un hon mukhe ding, chih thei mahmah un. 24 Na numeite uleh tate uh adingin khawpite lam unla, na belam uleh kelhonte uh adingin huang bawl unla, ahihhangin, hih dinga na chiamsa uh hih teitei un, a chi hi. 25 Gadte leh Reubente'n Mosi kiang ah: Ka toupa un thu non piak bangbangin, na sila koute'n ka hih ding uh, 26 Ka tate uleh zite uh leh, ka belam leh kelhonte leh bawnghonte uh hiai ah Gilead khawpite ah a om ding uh. 27 Na sila koute bel galdou dinga kigalvan chiatin, ka toupa un na gen bangin, Tangtawn Toupa' maia galdou dingin ka galkah ding uh, a chi uhi. 28 Tua khitin, Mosi in siampi Eleazar leh Nun' tapa Joshua leh Israel namte' beh tuulpite kiang ah amaute tawh kisaiin thupiakte a pia hi. 29 Amaute kiang ah: Gad leh Reubente pasal khempeuh galdou dinga a kigalvan ua, Tangtawn Toupa' maia noute tawh Jordan gal a kah uleh, noute' maia tua gam a kizawh chiangin, Gilead gam a tan dingun pia un. 30 Ahihhangin, kigalvana noute tawh a galkah kei uleh, noute tawh Kanan gam ah goutan a pom teitei ding uh ahi, a chi hi. 31 Gadte leh Reubente'n a dawng uh a: Tangtawn Toupa' gensa na sila koute'n ka hih ding uh. 32 Tangtawn Toupa' mai ah, kigalvansain Kanan gam ah ka galkah ding uh, ahihhangin, ka goutan uh bel Jordan gal hiai lam pang ah ahi ding hi, a chi uhi. 33 Tua khitin, Mosi in Gadte, Reubente leh Josef tapa Manase nam kimkhat kiang ah, Amorte kumpipa Sihon' gam leh Bashan kumpipa Og' gam tua kumpigamte a buppi-in, a khawpite leh a khawtate' gamte a pia hi. 34 Gadte'n Dibon, Ataroth, Aroer, 35 Ataroth Shofan, Jazer, Jogbeha, 36 Beth Nimra leh Beth Haran kulhbaang nei khawpitein a lam uh a, a belam uleh kelhonte uh ading huangte a bawl uhi. 37 Reubente'n Heshbon, Eleale leh Kiriathaim a lamthak uhi. 38 Tua baan ah, Nebo leh Baal Meon leh Sibma zong a lamthak uhi. Nebo leh Baal Meon minte a kikhek a, amaute'n a khawpi lamthakte uh minte a phuak uhi. 39 Manase' tapa Makir' suante, Gilead gam ah a kuan uh a, a la uh a, tua muna om Amorte a hawlkhia uhi. 40 Tuachi-in, Mosi in Manase suan Makirte kiang ah Gilead a pia a, tua ah a teeng uhi. 41 Manase suan khat Jair in a tennate uh a zou a, tuate' min dingin Havoth Jair a sa hi. 42 Noba in Kenath leh a kimkota khuate a la a, a min dingin, amah kitamsakin Noba a sa hi.

Kisimna 33

Israelte Khualzinna: Aigupta apan Sinai

1 Israelte, Mosi leh Aron' makaihna nuaia, Aigupta gam apan a pawlpawla hong paikhiak lai ua, hong khualzinna uh abanbanin hiaite ahi. 2 Tangtawn Toupa' thupiakin Mosi in a khualzinna uh a gelhlut ahi. A banbana a khualzinna uh hiai ahi: 3 A kha khatna, a ni sawmlenga ni, Paikan zing chiangin, Israelte Rameses apan a kipankhia uhi. Aiguptate' muh geguin hangsantakin a paikhia uhi. 4 Aiguptate bel Tangtawn Toupa'n a lak ua piang masa khempeuh a thahte a om uhi. Ahang bel, Tangtawn Toupa'n a pathiante uh tung ah gawtna thukhenna a tun-a ahi. 5 Israelte'n Ramase a nusia uh a, Sukoth ah giahphual a sat uhi. 6 Sukoth a nusia uh a, gamdai-gamkeu mong Etham ah giahphual a sat uhi. 7 Etham a nusia uh a, Pihahiroth ah a kik uh a, Migdol kiang ah giahphual a sat uhi. Pihahiroth bel Baal Zefon suahlama om ahi. 8 Pihahiroth a nusia uh a, tuipi kana gamdai-gamkeua ni thum sung a zin nungun, Mara ah giahphual a sat uhi. 9 Mara a nusia uh a, tuinak sawmlenih leh tum sing 70 omna Elim a tung uh a, tua ah giahphual a sat uhi. 10 Elim a nusia uh a, Tuipi San kiang ah giahphual a sat uhi. 11 Tuipi San a nusia uh a, Sin Gamdai-gamkeu ah giahphual a sat uhi. 12 Sin Gamdai-gamkeu a nusia uh a, Dofka ah giahphual a sat uhi. 13 Dofka a nusia uh a, Alush ah giahphual a sat uhi. 14 Alush a nusia uh a, mipite adinga dawn ding tui om louhna Refidim ah giahphual a sat uhi. 15 Refidim a nusia uh a, Sinai Gamdai-gamkeu ah giahphual a sat uhi.

Sinai apan Kadesh

16 Sinai Gamdai-gamkeu a nusia uh a, Kibroth Hataava ah giahphual a sat uhi. 17 Kibroth Hataava a nusia uh a, Hazeroth ah giahphual a sat uhi.

Gamdai-gamkeua Vakthapna

18 Hazeroth a nusia uh a, Rithma ah giahphual a sat uhi. 19 Rithma a nusia uh a, Rimon Perez ah giahphual a sat uhi. 20 Rimon Perez a nusia uh a, Libna ah giahphual a sat uhi. 21 Libna a nusia uh a, Risa ah giahphual a sat uhi. 22 Risa a nusia uh a, Kehelatha ah giahphual a sat uhi. 23 Kehelatha a nusia uh a, Shefer Mual ah giahphual a sat uhi. 24 Shefer Mual a nusia uh a, Harada ah giahphual a sat uhi. 25 Harada a nusia uh a, Makheloth ah giahphual a sat uhi. 26 Makheloth a nusia uh a, Tahath ah giahphual a sat uhi. 27 Tahath a nusia uh a, Tera ah giahphual a sat uhi. 28 Tera a nusia uh a, Mithka ah giahphual a sat uhi. 29 Mithka a nusia uh a, Hashmona ah giahphual a sat uhi. 30 Hashmona a nusia uh a, Moseroth ah giahphual a sat uhi. 31 Moseroth a nusia uh a, Bene Jaakan ah giahphual a sat uhi. 32 Bene Jaakan a nusia uh a, Hor Hagidgad ah giahphual a sat uhi. 33 Hor Hagidgad a nusia uh a, Jotbatha ah giahphual a sat uhi. 34 Jotbatha a nusia uh a, Abrona ah giahphual a sat uhi. 35 Abrona a nusia uh a, Ezion Geber ah giahphual a sat uhi. 36 Ezion Geber a nusia uh a, Zin Gamdai-gamkeua Kadesh ah giahphual a sat uhi.

Kadesh apan Moab

37 Kadesh a nusia uh a, Edom gamgi-a om Hor Mual ah giahphual a sat uhi. 38 Tangtawn Toupa' thupiakin, Hor Mual ah siampi Aron a paitou a, tua ah a si hi. Tua bel, Aigupta gam apan Israelte hong paikhiak nung uh, a kum 40-na, a kha ngana, a ni khat ni ahi. 39 Aron, Hor Muala a sihin, kum 123-a upa ahi. 40 Kanan gam Negev-a teeng, Kanan mi, Arad kumpipa'n Israelte hong pai uh chih a za hi. 41 Hor Mual a nusia uh a, Zalmona ah giahphual a sat uhi. 42 Zalmona a nusia uh a, Punon ah giahphual a sat uhi. 43 Punon a nusia uh a, Oboth ah giahphual a sat uhi. 44 Oboth a nusia uh a, Ije Abarim ah giahphual a sat uhi. Ije Abarim bel Moab gamgi-a om ahi. 45 Ije Abarim a nusia uh a, Dibon Gad ah giahphual a sat uhi. 46 Dibon Gad a nusia uh a, Almon Diblathaim ah giahphual a sat uhi. 47 Almon Diblathaim a nusia uh a, Nebo kianga Abarim mualte ah giahphual a sat uhi. 48 Abarim mualte a nusia uh a, Jerikho gal, Jordan lui kiang, Moab phaizang ah giahphual a sat uhi. 49 Tua Moab phaizang ah Beth Jeshimoth apan Abel Shitim dong, Jordan lui zuiin giahphual a sat uhi.

Kanan Gam Zawh ding Hilhna

50 Tua Jerikho gal, Jordan lui kiang, Moab phaizangte ah Tangtawn Toupa'n Mosi a houpih a: 51 Israelte kiang ah thu gen inla. Jordan lui kana Kanan gam na lut chiangun, 52 tua gama tengte khempeuh na mai uah hawlkhia un. Suihthawha kibawl a milimte uleh sunthawh milimte khempeuh hihgawp unla, a munsangte khempeuh uh hihchim gawp vek un. 53 Tua gam tang unla, a sung ah teeng un. Tua gam na luah ding ua hon pekhin ka hi. 54 Na beh dandanun aisanin tua gam hawm un. Pawl tam zawte'n goutan zazaw a tang ding ua, pawl tawm zawte'n goutan neu zaw a tan ding uh ahi. Aisana amau tan dinga kiakia amaua ahi ding ahi. Na pu na pate uapana na namte uh dandana na hawm ding uh ahi. 55 Ahihhangin, tua gama teengte na hawlkhiak kei uleh bel, na tensak laite uh, na mitte uleh na pangte uh adingin lingte a suak ding uh a, na tenna gam uah buaina hon pe ding uhi. 56 Tua hun chiangin, amaute tunga hih ka sawm noute tung ah ka hih ding, chi in, a chi hi.

Kisimna 34

Kanan Gamgi

1 Tangtawn Toupa'n Mosi kiang ah: 2 Israelte thu pia inla, amaute kiang ah: Kanan gam na lut chiangun, goutan dinga hong kipe ding gam in hiai gamgite a nei ding hi.

Simlam

3 Na simlam pang uh Edom gamgi zui Zin Gamdai-gamkeu apan ahi ding a, suahlam panga paitouin Chi Tuipi dong ahi ding. 4 Na gamgi uh Akrabim kaltouhna simlam apan kiheiin Zin a sun ding a, Kadesh Barnea simlam ah a pai ding. Tua apan Hazar Adar dong a pai ding a, Azmon a sun ding. 5 Azmon apan gamgi a kihei ding a, Aigupta Luipi dong a pai ding a, Tuipi ah a tawp ding hi.

Tumlam

6 Na tumlam gamgi uh Tuipi Lian gei ahi ding. Hiai na tumlam gamgi uh ahi ding hi.

Mallam

7 Na mallam gamgi uh hiai ahi ding: Tuipi Lian apan Hor Mual dong na gamgi uh a pai ding a, 8 Hor Mual apan Lebo Hamath ah a pai ding a, Zedab ah a pai ding a, Zifron ah a pai lai ding a, Hazar Enan ah a mong ding hi. Hiai na mallam gamgi uh ahi ding hi.

Suahlam

10 Na suahlam gamgi uh Hazar Enan apan Shefam dong a pai ding. 11 Tua Shefam apan Ain suahlam Ribla ah a paisuk ding a, Kinereth Tuipi suahlama gamken zuiin a pai ding hi. 12 Tua apan Jordan lui a zuisuk ding a, Chi Tuipi ah a mong ding hi. Hiai gam a kimkota gamgite tawh, na gam uh ahi ding, chi in, a chi hi. 13 Mosi in Israelte thu a pia a: Hiai gam gouluah dingin aisanin pia in. Tangtawn Toupa'n nam kua leh nam kimkhat kianga piak dingin thu a peta hi. 14 Ahang bel, Reuben nam, Gad nam leh Manase nam kimkhata innkuante'n goutan nei khin ahih man uh ahi. 15 Hiai nam nih leh nam kimkhatte'n nisuahna lam, Jerikho gala Jordan lui suahlam pang ah goutan a sangta uhi, a chi hi.

Kanan Gam Hawm Uliante

16 Tangtawn Toupa'n Mosi kiang ah: 17 Nang taanga goutan gam hawm dingte' min hiaite ahi: Siampi Eleazar leh Nun' tapa Joshua ahi. 18 Gam hawmna huh dingin nam khat laka makai khat zel sep in. 19 Hiaite a minte uh ahi: Judah nam apan Jefune' tapa Kaleb; 20 Simeon nam apan Amihud' tapa Shemuel; 21 Benjamin nam apan Kislon' tapa Elidad; 22 Dan nam apan makai Jogli' tapa Buki; 23 Josef' tapa Manase nam apan makai Efod' tapa Haniel; 24 Josef' tapa Efraim nam apan makai Shiftan' tapa Kemuel; 25 Zebulun nam apan makai Parnakh' tapa Elizafan; 26 Isakhar nam apan makai Azan' tapa Paltiel; 27 Asher nam apan makai Shelomi' tapa Ahihud; 28 Naftali nam apan makai Amihud' tapa Pedahel, a chi hi. 29 Kanan gama, Israelte kianga gam pe dinga Tangtawn Toupa'n thu a piakte hiaite ahi uhi.

Kisimna 35

Levite ading Khawpite

1 Jerikho gal, Jordan lui kiang, Moab phaizangte ah, Tangtawn Toupa'n Mosi a houpih a: 2 Israelte' tan ding goutan apanin, Levite' teen nading khawpite pe dingin Israelte thu pia in. Tua khawpite' kimkot ah gantatna gam zong pia un. 3 Tuachi-in teen nading khawpite leh gantatna gamte, a bawnghonte uh, belam leh kelhonte leh a ganta khempeuh uh tat nading a nei ding uhi. 4 Levite kianga na piak uh khawpite' kimkota gantatna gamte bel, khawpi kulhbaang apan tong 1,500 tan kizalh ahi ding ahi. 5 Khawpi pua ah, suahlam pang ah tong 3,000, simlam pang ah tong 3,000, tumlam pang ah tong 3,000, mallam pang ah tong 3,000 teh unla, a laizang taka khawpi om ding ahi. Amaute'n khawpite apan hiai chia gam gantat nading a nei ding uh ahi.

Bukna Khawpite

6 Levite kianga na piak khawpite laka guk bukna khawpite ahi ding ahi. Mi khatpeuh that kha mi tuate ah a tai thei ding hi. Tuate baan ah khawpi 42 amaute pia un. 7 Avekpi-in, Levite na piak uh khawpi 48 leh gantatna gamte ahi ding ahi. 8 Israelte tan gam apan Levite kianga khawpi na piakte uh bel, nam chih' goutan chiat tawh kikhom ahi ding ahi: Khawpi tam nei nam apan khawpi tam la unla, khawpi tawm nei nam apan tawm la un, a chi hi. 9 Tua khitin, Tangtawn Toupa'n Mosi a houpih a: 10 Israelte kiang ah thu gen inla: Jordan lui kana Kanan gam na lut chiangun, 11 na bukna khawpite uh hi dingin khawpi pawl khat telkhia un. Tua ah khut khiala mi that kha mi a tai thei ding hi. 12 Tuate phula mi apan bukna munte ahi ding. Tua bel, tualthata ngawha om mi, kikhawmte maia thu ettelna a om ma-a a sih louh nading ahi. 13 Na piak uh khawpi gukte na bukna khawpite uh ahi ding. 14 Bukna khawpite hi dingin, Jordan gal hiai lam pang ah khawpi thum pia unla, Kanan gam ah thum pia un. 15 Israelte, gamdang mite leh a lak ua teeng midangte adingin, hiai khawpi gukte, bukna munte ahi ding. Tuachi-in, khut khiala mi that kha peuh mah tuate ah a tai thei ding hi. 16 Mi khat peuh in, kua hiam khat siikin sat henla, tua mi si taleh, a satpa tualthat ahi. Tualthat mi thah ding ahi. 17 Ahih kei leh, mi khat peuh in, mi that thei suang tawi henla, kua hiam khat dengin tua mi si taleh, a dengpa tualthat ahi. Tualthat mi thah ding ahi. 18 Ahih kei leh, mi khat peuh in, mi that thei sing tawi henla, kua hiam khat satin, tua mi si taleh, a satpa tualthat ahi. Tualthat mi thah ding ahi. 19 Sisan phula mi in amah a thah ding ahi. Amah a tuah khak chiangin a that ding ahi. 20 Mi khat peuh in, muhdahna tawh tupkholhna neiin, midang khat sawn henla, ahih kei leh tup mawngin bang hiam khatin deng henla, tua mi si taleh, 21 ahih kei leh, kimelmakna neiin a khuttumin tum henla, tua mi si taleh, a hihlumpa thah ding ahi. Amah tualthat ahi. Sisan phula mi in amah a tuah khak chiangin a thah ding ahi. 22 Ahihhangin, kimelmakna nei hiloua kua hiam khat in midang a sawn khak a, ahih kei leh, tupmawng hiloua amah a den khak a, 23 ahih kei leh, amah muloua amah that thei suang a tunga a khiak a, amah a sih leh, a meima lah hilou, hihnat tum lah hilou ahih manin, 24 kikhawmte'n amah leh sisan phula mi kal ah hiai dante dungzuiin thu a khen ding uh ahi. 25 Tua kikhawmte'n sisan phula mi apan, tualthata ngawha ompa a humbit teitei ding uh ahi a, a taina tua bukna khawpi ah a khakik ding uh ahi. Sathau siangthou nilha om siampilian a sih mateng tua ah a om dine ahi. 26 Ahihhangin, ngawha ompa, a taina, bukna khawpi gamgi pawlama a piikhiak a, 27 sisan phula mi in tua khawpi pua-a amah a muh leh, sisan phula mi in, ngawha om mi a that thei ding a, tualthata mawh ahi kei ding hi. 28 Siampilian sih mateng, tua bukna khawpi ah, tua ngawha ompa a om teitei ding ahi. Siampilian sih nung kiain ama' gam ah a kik thei ding hi. 29 Na tenna peuh uah, hong om ding khangsawn sawn donga noute adinga danin a ngiat hiaite ahi. 30 Mi that mi khat peuh, theihpih mite' theihpihna pansan kia-a tualthata thah ding ahi. Mi khat kia theihpihna pansana bel kuamah thah ding ahi kei hi. 31 A si taak tualthat mi' hinna ading tatna saang kei un. Amah thah teitei ding ahi. 32 Bukna khawpi-a tailut mi kuapeuh, siampilian sih ma-a ama' gam sunga a teen theih nadinga sawlkik dingin tatna sum saang kei un. 33 Noute' omna gam buahsak kei un. Sisan suahna in gam a buahsak a, sisan suah mi' sisan mah suah louhin, sisan suahna gam adingin khuhna a kibawl thei kei hi. 34 Noute teenna gam, tu-a ka tenna ninsak kei un. Ahang bel, Kei, Tangtawn Toupa Israel laka teeng ka hi, chi in, a chi hi.

Kisimna 36

Zelofehad Tanute' Goutan

1 Makir' tapa Gilead beha innkuan lutangte tua, Josef suante' behte hong pai uh a, Mosi leh makaite leh Israel innkuan lutangte mai ah thu a gen uhi. Makir bel Manase' tapa ahi. 2 Amaute'n: Israelte kianga goutan dinga, aisana gam pe dinga Tangtawn Toupa'n nang ka toupa uh thu hon piak laiin, ka sanggampa uh Zelofehad' gam a tanute pe dingin nang thu hon pia hi. 3 Tua numeite'n Israel laka namdang pasalte kitenpihta le uh, ka pu ka pa uapan a goutante uh lakkika om dinga, a kitenpih uh namte' goutana behlap ding a suak hi. Tua hi leh, koute kianga piak goutan laka bangzah hiam lakmanga om ding ahi. 4 Israelte adinga Jubili kum hong tun chiangin,a goutan uh a kitenpih uh namte goutana kibehlap ding ahi a, ka pu ka pate uh nam gouluah apan amaute' gouluah kilakhe ding ahi, a chi uhi. 5 Tua khitin, Tangtawn Toupa' thupiakin, Mosi in Israelte kiang ah hiai thupiak a pia hi: Josef suante beh in a thugen uh a dik ahi. 6 Zelofehad' tanute adinga Tangtawn Toupa' thupiak hiai ahi. A pa uh' nam beh sunga a ut peuh uh a kitenpih thei ding uh. 7 Israel michih in a pu a pate apan nam gouluah gam nei ding ahih manun, Israel gam gouluah gam peuhmah nam khat apan nam dang ah a paisawn ding ahi kei hi. 8 Israel nam khat peuh sunga gouluah gam luah tanu peuhmah in a pa' nam sunga beh kua hiam khat a kitenpih teitei ding ahi. Tuachi-in, Israel mi peuhmah in a pu a pa apan gouluah gam tang thei ding hi. 9 Israel nam peuhmah in a gouluah gam a tandet ding ahih manin, gouluah gam pen nam khat apan nam dang ah a paisawn kei ding hi, a chi hi. 10 Tuachi-in, Tangtawn Toupa'n Mosi thu a piak bangin, Zelofehad' tanute'n a hih uhi. 11 Zelofehad' tanute, Mala, Tirza, Hogla, Milka leh Noa in a pa uh lampanga a sanggam uh hikhate a kitenpih uhi. 12 Josef tapa Manase suante laka behte sunga mite a kitenpih uh a, a gouluahte uh a pa' beh leh nam ah a omden hi. 13 Hiaite Jerikho gal, Jordan lui kiang Moab phaizangtea, Tangtawn Toupa'n Mosi tungtawna thu a piakte leh dante ahi.

Danpiakthakna 1

Horeb Nutsiat ding Thupiak

1 Jordan lui suahlam gamdai-gamkeu Araba-a, Israelte khempeuh kianga Mosi' thugente hiaite ahi. Hiai gamdai-gamkeu bel, Tuipi San gala phaizang, Paran leh Tofel, Laban, Hazeroth leh Dizahab kikala om ahi. 2 Seir Mual lampi tawna paiin, Horeb apan Kadesh Bernea dong, ni sawm leh ni khat lam ahi. 3 Tangtawn Toupa'n Israelte tawh kisaia, Mosi thu a piak khempeuh, Mosi in amaute kiang ah a kum 40-na, a kha sawm leh khatna, a ni khat ni-in, a phuang hi. 4 Hiai bel, ama'n Heshbona vaihawmpa, Amor kumpipa Sihon leh Ashtaroth leh Edreia vaihawmpa Bashan kumpipa Og, a zawh nung ahi. 5 Mosi in Jordan lui suahlama Moab gam ah hiai dan a genchian panta a: 6 Horeb ah, Tangtawn Toupa i Pathian in eite kiang ah thu a gen a: Hiai mual ah na om sawt huntawk uh. 7 Kisa unla, giahphual suanin, Amorte' tanggam, Araba kim-le-kiang teng, tua mualtung gamte, Negev leh tuipi geite, Kanante' gam leh Lebanon leh lufratis luipi donga teeng namte kianga lut-in pai un. 8 Ngai un! kon piak gam na mai uah a om. Tangtawn Toupa'n na pu na pate uh, Abraham, Isak leh Jakob leh amaute nunga a chi suante uh kianga pe ding chi-a a kichiamna tua gam ah valut unla, va luah un, a chi hi.

Makaite Sehna

9 Tua hun laiin, ke'n noute kiang ah: Noute kei kia puak dingin van gik lua na hi uh. 10 Tangtawn Toupa' na Pathian un noute hon pungsak a, ngai un, tuni-in vana aksi zahin na tamta uh. 11 Tangtawn Toupa, na pu na pate uh' Pathian in noute a leh 1,000 khat sanga tam zawin hon pungsak henla, a hon chiamsa bangin, hon vualzawl hen aw, 12 Ahihhangin, na buainate uh, na puakgikte uh leh na thubuaite uh kei kia'n bangchi-in ka paw zou dia? 13 Na namte uh laka a pii, a theisiam leh mite' zahtak bang zah hiam teelkhia unla, amaute, noute tunga makaiin ka koih ding, ka chi hi. 14 Noute'n non dawng uh a: Na thu sawm a hoih ahi, na chi uhi. 15 Tuachi-in, na namte uh laka makai a pii a theisiam leh mi suanhuaite ka la a, noute tunga thunei ding, 1000 pawlpawl tunga makai, 100 pawlpawl tunga makai, sawmnga nga tunga makai leh sawmkhat khat tunga makai hi dingin leh nam uliante hi dingin ka sep hi. 16 Tua hun laiin, noute' thukhente thu ka pia a: Na sanggamte uh kala thubuaite ngaikhia unla, Israel sanggamte kal hi-in, amaute laka khat leh gamdang mi khat kal hita leh, a diktakin thu khen un. 17 Thukhenna ah deihsaktuam nei kei un. A neu a lian zong ngaikhe tuak un. Thukhenna Pathian-a a hih manin, mihing kuapeuh zong lau kei un. Noute adinga thu haksa lua peuhmah ka kiang hon tun un. Ke'n ka na ngaikhe ding, ka chi hi. 18 Tua hun laiin, na hih ding peuhmah uh kon hilh hi.

Enkhete Sawlna

19 Tua khitin, Tangtawn Toupa, i Pathian in eite thu hon piak bangin, Horeb apan i kipankhia uh a, na muhsa uh tua gamdai-gamkeu lianpi leh lauhuai khempeuh tawnsuakin, Amorte' tanggam manawh-in i pai uh a, Kadesh Barnea i tung uhi. 20 Tua khitin, noute kiang ah: Tangtawn Toupa i Pathian in eite hon piak ding Amorte tanggam na tungta uhi. 21 Tangtawn Toupa na Pathian un na mai uah tua gam a koih en un. Tangtawn Toupa, na pu na pate uh' Pathian in noute hon hilh bangin, valut unla, gam va luah un. Lau kei un. Lungke sam kei un, kon chi hi. 22 Tua khitin, noute navekun ka kiang ah nong pai uh a: Eite adinga gam va vel ding leh, zuih ding lampi leh i tun nading khawpite tawh kisai thu hon tun kik dingin i mai ah mite sawl ni, na chi uhi. 23 Tua ngaihdan hoih dingin ka um a, tuachi-in, na lak ua mi sawmlehnih, nam khat laka khat zel, ka telkhia hi. 24 Amaute a kuankhia uh a, tua tanggam ah a paitou uh a, Eshkol Phaizang hong tung uh a, a gam a vel uhi. 25 Tua gamgah bang zah hiam hon pua uh a, eite kiang hon tun uh a, thu hon tunin: Tangtawn Toupa i Pathian in eite gam hon piak gam hoih ahi, a chi uhi.

Tangtawn Toupa tunga Helna

26 Ahihhangin, noute na kuantou nuam kei uh a, Tangtawn Toupa na Pathian uh thupiak na helsan uhi. 27 Na puanbukte uah na phun uh a: Tangtawn Toupa'n eite hon mudah a, Amorte' hihmanthat dinga amaute khut sunga hon pe dinga, Aigupta gam apan hon piikhia ahi maimah! 28 I sanggamte'n: Tua mite eite sanga hatzaw leh sang zaw ahi uh. Tua khawpite zong lian a, vaan sun kulhbaangte nei ahi uh. Anakte nangawn tua ah ka mu uh, chi uh a, hon lungkesak uh hiven, koia paitou thei ding i hia? na chi uhi. 29 Ahihhangin, ke'n noute kiang ah: Amaute lauin liing kei un. 30 Tangtawn Toupa, na Pathian uh noute' maia pai dingpa'n noute adingin Aigupta gam leh Gamdai-gamkeua na mitmuh ua a hih banga, noute adinga hon dousak ding ahi. 31 Pa in a tapa a puak banga, hiai mun na tun dong uh, lamtawna Tangtawn Toupa'n noute hon puakna na muta uhi, kon chi hi. 32 Hibang hinapi, Tangtawn Toupa na Pathian uh na muang kei uh. 33 Na zinna ua zana meikuang, suna meipi-a na mai ua pai a, noute' giahphual sat nading munte zong ding leh, na pai nading uh lampi hon lak dinga paipa amah na muang kei uh. 34 Tangtawn Toupa'n na thugen uh a zak takin, a heh a, a kichiam a: 35 Hiai khang giloute lak apan kuamah in, na pu na pate uh kianga piak ding chi-a ka chiam, tua gam hoih a mu kei ding. 36 Jefune' tapa Kaleb loungal kuamah in a mu kei ding. Ama'n bel, a mu ding. Ama'n Tangtawn Toupa a lungtang khempeuh-a a zuih manin, a khe-a a sikna chiang chiang gam, amah leh a suante kiang ah ka pe ding, a chi hi. 37 Noute hangin Tangtawn Toupa kei tung ah zong a heh a: Nang zong tua gam sung na lut kei ding. 38 Ahihhangin, nang hon huhpa, Nun' tapa Joshua a lut ding. Ama'n tua gam luah dinga Israel makaih ding ahih manin, amah hanthawn in. 39 Sal-a kaih hi ding na chih uh na taneute uh, tuni-a a sia a pha khen thei nailou na tapate uh tua gam a lut ding uh. Amaute kiang ah tua gam ka pe ding a, amaute'n a luah ding uh. 40 Ahihhangin, noute zaw kihei unla, Tuipi San lam manawh lampi zuiin gamdai-gamkeu lam zuanin kipankhia un, a chi hi. 41 Tua khitin, non dawng uh a: Tangtawn Toupa tung ah ka khialta uh. Tangtawn Toupa'n koute thu hon piakte khempeuh bangin, ka kuantou ding uh a, ka dou ding uh, na chi uhi. Tuachi-in, tanggama kuantouh ding pen baihlam ding sain noute na kigalvan chiat uhi. 42 Ahihhangin, Tangtawn Toupa'n ka kiang ah: Amaute kiang ah: Noute hon ompih lou ding ka hih manin, kuantou kei unla, va-dou kei un. Na melmate uh zawha om ding na hi uh, chi-in amaute hilh in, hon chi hi. 43 Tua bangin, noute kon hilh a, ahihhangin, na ngaikhe nuam kei uh. Tangtawn Toupa' thupiak na helsan uh a, kisatheiin tanggam ah na kuantou uhi. 44 Tua tanggama teeng Amorte noute dou-in hong kuankhia uhi. Khuailal bangin noute hon delh uh a, Seir apan Horma dongin hon phukpai uhi. 45 Noute nong kik uh a, Tangtawn Toupa' mai ah na kap uhi. Ahihhangin, ama'n na kahnate uh a ngaihsak kei a, noute hon bilhumsan hi. 46 Tuachi-in, Kadesh ah ni tampi na taam uh a, tua laia na hun zatbei sung teng uh a sawt hi.

Danpiakthakna 2

Gamdai-gamkeua Vaakthapna

1 Tua khitin, i kinunghei uh a, Tuipi San lam lampi zuiin, gamdai-gamkeu lam ah i kipankhia uhi. Tangtawn Toupa' hon thuhilh bangbang ahi. Ni tampi sung Seir tanggam kimvelin i pai uhi. 2 Tua khitin, Tangtawn Toupa'n ka kiang ah: 3 Hiai tanggam kimvela na pai sung uh a sawtta. Tu'n mallam ah kihei un. 4 Mipite kiang ah hiai thupiakte pia in: Na sanggamte uh, Esau suan Seir tanggama teengte' gama paisuak dek na hi uh. Amaute'n noute hon lau ding uh, ahihhangin, pilvang mahmah un. 5 Amaute gal bawl dingin hehsak kei un. Ahang bel, amaute' gam noute hon pe lou ding, na khepek ngakna khop uh zong hon pe lou ding ka hi. Esau kianga, a tan dinga tua Seir tanggam ka piaksa ahi. 6 Amaute apan na annekte uh ngun dangka in lei unla, na tuidawnte uh zong ngun dangkain lei un, a chi hi. 7 Tangtawn Toupa, na Pathian un na khut nasepte khempeuh uh hon vualzawl hi. Hiai gamdai-gamkeu zapi-a na zin sung uh noute hon veng a, hiai kum 40 sung, Tangtawn Toupa na Pathian un noute hon ompih a, bangmah na tasam kei uhi. 8 Tuachi-in, i sanggamte, Esau' suante, tua Seir tanggama teengte i paikheng uhi. Elath leh Ezion Geber apan hong paiin, Araba lampi apan i kihei uh a, Moab gamdai-gamkeu zuiin i khualzin uhi. 9 Tangtawn Toupa'n ka kiang ah: Moabte hihbuai kei unla, gal bawl dingin hehsak kei un. A gam uh neukha zong hon pe lou ding ka hi. Lot' suante kianga, a tan ding ua, Ar gam ka piaksa ahi, a chi hi. 10 Tua-a na teengte Emimte ahi uh a, mi hat leh tamte, Anakte banga din sangte ahi uhi. 11 Anakte bangin, miliante ahi uh a, Moabte'n amaute Emimte, a chi uhi. 12 Seir ah Horte a na teeng uh a, ahihhangin, Esau' suante'n amaute a hawlkhia uhi. A mai uah Horte a hihmangthang uh a, amaute mun ah a teeng uhi. Tangtawn Toupa'n Israelte luah dinga a piak gama Israelte' hih bangbanga hih uh a hi ve. 13 Tua khitin, Tangtawn Toupa'n: Tuin kisa unla, Zered Phaizang kaan un, hon chi a, tuachi-in, tua phaizang i kaan uhi. 14 Kadesh Barnea i nutsiat a, Zered Phaizang i kaan nung, kum 38 a beita hi. Tua hun sungin, Tangtawn Toupa amaute kianga a kichiam bangin, tua khanga galdou thei pasal khempeuh giahphual apan a mangthang vekta uhi. 15 Tangtawn Toupa'n giahphual apan amaute a beisiangsak sipsip mateng, ama' khut in amaute dou ahi mahmah hi.

Amonte

16 Hiai mipite laka galdou thei pasalte a sihbei takun, 17 Tangtawn Toupa'n ka kiang ah thu a gen a: 18 Tuni-in, Moab gamgi na kaan ding uh a, Ar Khawpi ah na pai ding uh ahi. 19 Amonte kiang na tun chiangun, amaute buaisak kei unla, galbawl dingin zong hehsak kei un. Ahang bel, Amonte gam peuhmah na tan ding ua hon pe lou ding ka hi. Lot' suante' luah dinga ka piaksa ahita, a chi hi.

Miliante

20 Tua gam zong, tua gama na teeng masa miliante gama ngaih ahi. Amonte'n bel amaute Zamzumte, chi-in a minvawh uhi. 21 Amaute bel mihatte ahi uh a, tam zong a tam uhi. Anakte banga din sang ahi uhi. Tangtawn Toupa'n amaute, Amonte' mai apan a hihmangthang a, Amonte'n amaute a hawlkhia uh a, amau' mun ah a teeng uhi. 22 Tangtawn Toupa'n Esau' suante' maia Horte a hawlkhiak a, tua Seir-a teeng Esau' suante adinga a hihsak bangbang hihsak ahi. Esau' suante'n Horte hawlkhiain amaute' mun ah tu dong a teeng uhi. 23 Gaza donga khawtate-a teeng Avimte ahih leh, Kaftor apan hong paikhia Kaftorte'n a hihmangthang uh a, amaute' mun ah a teeng uhi.

Heshbon Kumpipa Sihon Zawhna

24 Tangtawn Toupa'n: Tuin kisa unla, kuankhia unla, Amon Lui kaan un. Ngai in, na khut sung uah Heshbon kumpipa, tua Amor mi Sihon leh a gam kon peta hi. Tua gam luah panta unla, amah dou un. 25 Tuni mahmahin vannuaia namte khempeuh tung ah noute launa leh mulkimna ka koih panta ding. Noute tawh kisai thu a za ding uh a, a liing ding uh a, noute hangin a mangbang ding uhi, a chi hi. 26 Ke'n Kedemoth gamdai-gamkeu apanin, Heshbon kumpipa Sihon kiang ah thupawte sawlin kilemna ka tah a: 27 Na gam sung kantanin koute hon paisuaksak in. Lamlian taangpi ka zui ding uh a, veilam hiam taklam hiam ah zong ka pial kei ding uh. 28 Nek ding an leh dawn ding tui hon leisak unla, a man ngun dangka-in kon pe ding uh. Khein hon paisuaksak lei un. 29 Seir-a teeng Esau' suante leh Ar-a teeng Moabte'n koute hon paisak bangun, Tangtawn Toupa'n koute hon piak gam ka tun ua, Jordan lui ka kaan mateng uh hon paisak un, ka chisak hi. 30 Ahihhangin, Heshbon kumpipa Sihon in hon paisuaksak nuam kei hi. Ahang bel, Tangtawn Toupa na Pathian un noute khutsunga amah hon piak nop man ahi a, Ama'n tuni-a na muh bangun, ama' lungsim a khauhsak a, a lungtang a genhaksak-a ahi. 31 Tangtawn Toupa'n ka kiang ah: Ngai in, na khut sung uah Sihon leh a gam kon pe-panta. Tuin, a gam la panta unla, luah panta un, a chi hi. 32 Sihon leh a mite khempeuh Jahaz muna eite hon tuak a, hon dou dinga hong kuankhiak laiun, 33 Tangtawn Toupa i Pathian in eite khut sung ah amah hon pia a, amah leh a tapate leh a mite khempeuh tawh i thatvek uhi. 34 Tua hunin a khawpite khempeuh i la uh a, i hihse vek sipsip a, numei, pasal leh naupang tawh i hihmangthang khawm vek hi. A suakta himhim i hawi kei hi. 35 Ahihhangin, i laksa khawpite apan ganhonte leh gallak vante bel eima' tan dingin i paw mang uhi. 36 Amon Kuam geia om Aroer khawpi apan tua lui phaia om Gilead gam donga khawpite khat beek zong eite adinga hat lua a om kei hi. Tangtawn Toupa i Pathian in tuate khempeuh hon pevek hi. 37 Ahihhangin, Tangtawn Toupa i Pathian in thu hon piak bangin, Amonte gam koimah, Jabok lui dong hi-in, mualtunga khawpite' kim leh pam gam hita leh na naih kei uhi.

Danpiakthakna 3

Bashan Kumpipa Og Zawhna

1 Tua khitin, i kihei uh a, Bashan zotna lampi zuiin i paitou uh a, Bashan kumpipa Og, a mite khempeuh tawh Edrei-a eite hon dou dingin hong kuan uhi. 2 Tangtawn Toupa'n ka kiang ah: Amah lau kei un. Amah leh a mite khempeuh leh a gam na khut sung ua hon peta ka hi. Heshbon-a vaihawmpa Amorte kumpipa Sihon na bawl bangun amah bawl un, hon chi hi. 3 Tuachi-in, Tangtawn Toupa i Pathian un Bashan kumpipa leh a mite khempeuh i khut sung ah hon pia hi. Amaute i that vek a, a suakta hawi i nei kei uhi. 4 Tua hun laiin, a khawpite khempeuh i la uh a, khawpi 60-te lak ah, amaute apan lak louh a om kei. Argob gam bup, Bashan gam Og' kumpigam i la vek uhi. 5 Hiai khawpite khempeuh kulhbaang sangpipi leh kongpite leh a kaihna zawlte nei ahi uh a, kulhbaang neilou khawta tampi mahmah zong a om hi. 6 Heshbon kumpipa Sihon i bawl bangbangin amaute i hihmangthang vek a, khawpite i hihgawp a, numei pasal leh naupang i hihmangthang hi. 7 Ahihhangin, gantate khempeuh leh khawpite apan gallak vante bel eite adingin i pawmang vek hi. 8 Tua bangin, tua hun in, hiai Amor kumpipa nihte apanin Jordan lui suahlam gam, Amon Kuam apan Hermon Mual dong i la uhi. 9 Hermon bel Sidonte'n Sirion a chih uh ahi a, Amorte'n Senir a chih uh ahi. 10 Phaizanga khawpite khempeuh, Gilead gam khempeuh leh Bashan gam khempeuh, Saleka khawpi leh Edrei khawpi dong i la uhi. Hiai khawpite bel Bashana teeng Og in a uk ahi. 11 Milian a sibangte laka khawsuak sun bel Bashan kumpipa Og kia ahi. A lupna sika kibawl ahi a, tong kua-a sau, tong li-a za ahi. Tua lupna, Amonte' khua Raba ah om lai hi lou hia?

Nam Nih leh Akimtekianga Gam Piak

12 Tua huna i gam lak thak apan, Amon Kuam kianga om Aroer mallam gam teng Reubente leh Gadte kiang ah ka pia hi. Tua ah Gilead tanggam kimkhat leh a khawpite tawh a tel hi. 13 Gilead gam omlai teng leh Og' kumpigam, tua Bashan gam khempeuh bel, Manase nam kimkhat kiang ah ka pia hi. Bashan gama Argob gam khempeuh bel, miliante' gam a kichi sek hi. 14 Manase' suan Jair in Argob gam khempeuh, Geshurte leh Maakathte' gamgi dong a la hi. Amah tamin a gam min a kiphuak a, tuni dongin Bashan earn teng Havoth Jair a kichi hi. 15 Tua baan ah, Gilead gam Makir ka pia hi. 16 Ahihhangin, Reubente leh Gadte kiang ah Gilead apan Amon Kuam leh Jabok lui dong gam ka pia hi. Tua Amon Kuam laizang tak gamgi ahi. Jabok lui lah Amonte gamgi ahi. 17 A tumlam gamgi bel Araba-a Jordan lui, Kinereth apan Araba Tuipi dong, Pisga mualpang ken nuaia pai ahi. Araba Tuipi bel Chi Tuipi ahi. 18 Tua hun laiin, noute thu kon pia a: Tangtawn Toupa na Pathian un hiai gam na luah dingun hon peta. Ahihhangin, a thaching, kidou dinga kigalvante khempeuh, na Israel sanggamte uh mai ah na galkah masa ding uh ahi. 19 Na zite uleh na tate uleh na gantate uh bel, kon piaksa khawpite ah a om thei ding uh. Ganta lah na hau uh chih ka thei hi. 20 Tangtawn Toupa'n noute banga na sanggamte uh tawlngakna a piak a, amaute'n zong Tangtawn Toupa na Pathian un Jordan gal gam a piak ding a laak sam mateng uh, tua khawpite ah a om thei ding uh. Tua nung chiangin, noute gamluah ding hon piak ah na paikik chiat ding uh ahi, kon chi hi.

Makai Kikhekna

21 Tua hunin, Joshua thu ka pia a: Tangtawn Toupa na Pathian un hiai kumpipa nihte tunga a hihtak khempeuh na mitin na muta. Tangtawn Toupa'n na pai nading kumpigamte khempeuh tung ah zong tua bang mahin a hih ding. 22 Amaute lau ken. Tangtawn Toupa na Pathian mahmah un noute adinga hon dousak ding ahi, ka chi hi. 23 Tua hunin, Tangtawn Toupa kiang ah ka ngen ngutngut a: 24 Toupa, Tangtawn Pathian aw, na sila kiang ah na thupina leh na bantha hat non musak panta. Na thilhihte leh nasep hattak na septe bang hih thei, vantung leh leitung ah bang pathian a om a? 25 Kon ngen ahi, hon galkahsak inla, Jordan gala gam hoih tanggam hoih leh Lebanon hon musak in, ka chi hi. 26 Ahihhangin, noute hangin Tangtawn Toupa ka tung ah a heh a, kei hon ngaikhe kei hi. Tangtawn Toupa'n ka kiang ah: Tua teng kichingta. Hiai thu ka kiang ah gen ngei nawn ken. 27 Pisga Mual dawn ah kahtou inla, tumlam, mallam, simlam leh suahlam en in. Hiai Jordan lui kan lou ding na hih manin, na mitin tua gam en in. 28 Ahihhangin, Joshua nna guan inla, hanthawn inla, hatsak in. Ama'n hiai mite makaih ding a, na muh ding tua gam luahsak ding ahi, a chi hi. 29 Tuachi-in, Beth Peor kianga luiphai ah i taam hi.

Danpiakthakna 4

Thukhun leh Thumanna

1 Israel aw, tuin noute zuih dinga kon sinsak ding danthusehte leh dante za un. Na hin theih nading uleh, Tangtawn Toupa na pu na pate uh Pathian in hon piak ding tua gam lut a, na luah theih nadingun tuate zui un. 2 Noute kon thupiak behlap kei unla, khiam sam kei un. Tangtawn Toupa na Pathian uh' thupiak kon piakte zui un. 3 Tangtawn Toupa'n Baal Peor-a a hih na mit-un na muta uhi. Tangtawn Toupa na Pathian un, Baal Peor zuite peuhmah na lak ua pan a hihmangthang a, 4 ahihhangin, Tangtawn Toupa lenkip noute khempeuh bel tuni dongin na nungta lai uhi. 5 Ngai un, Tangtawn Toupa ka Pathian in kei hon thupiak bangin, danthusehte leh dante kon sinsakta, tuate mah, valut a, na luah dek uh tua gam sunga na zuih ding uh ahi. 6 Hiai danthusehte tawh kisai khempeuh za a: Hiai nam thupi, a pii leh a theisiam mite ahi taktak uh, chi ding namte kiang ah hiai in na pilna uleh na theihsiamna uh lak ding ahih manin, pilvangtakin tuate zui un. 7 Tangtawn Toupa i sap tenga i kiang naia om tua Tangtawn Toupa i Pathian banga, amaute kiang naia om pathian nei nam thupi dang kua oma eita? 8 Tuni-a na mai ua ka koih hiai danthusehte leh dan diktat khempeuh bang nei nam thupi kua oma eita? 9 Pilvang photphot unla, na mit ua na muhtakte uh na mangngilh louh nadingun, ahih kei leh, na nuntak sung teng ua na lungtang uapan na tolhmangsak louh nadingun, nou leh nou hoihtakin kikem un. Na tate uleh amaute nunga a tate uh kiang ah tuate theisak un. 10 Horeba Tangtawn Toupa na Pathian uh maia na din ni uh thei gige un. Tua ni-in Ama'n ka kiang ah: Mipite'n gam sunga a teen sung teng uh kei hon zahtak dan a sin theih nading uleh, a tate uh kianga a sinsak theih nadingun, ka thute za dingin mipite kaikhawm in, hon chi hi. 11 Non naih uh a, tua mual bul ah na ding uhi. Tua laiin, mei in van sun zen-in tua mual a kaang a, meipi vom leh mial in a khuh lai hi. 12 Tua hun laiin, Tangtawn Toupa'n meikuang lak apan noute kiang ah thu a gen a, a thugen gingte na za uh a, lim leh mei bel na mu kei uh. Aw ging kia a om a, 13 Ama'n a thukhun na zuih dingun na kiang uah a phuang a, tua Thupiak Sawmte ahi suangpek nih tunga a gelh. 14 Galkaha na luah dek uh gama na zuih ding uh, tua danthusehte leh dante sinsak dingin, Tangtawn Toupa'n tua hun mahin kei hon hilh ahi,

Milim Biak Khamna

15 Horeba meikuang lak apan Tangtawn Toupa'n noute kianga thu a gen ni-in, lim leh mei bangmah na mu kei uh. Tua ahih manin, na hinna uh pilvangtakin kem un. 16 Hong segawp a, khuakthawh milim himhim bawl lou dingin pilvang un. Numei batpih hiam, pasal batpih hiam bawl kei un. 17 Leitunga ganhing khatpeuh batpih bawl kei un. Huihkhua-a leng vasa khatpeuh batpih bawl kei un. 18 Leilaka bokvak ganhing khatpeuh batpih bawl kei un. Nuailam tui sunga ngasa khatpeuh batpih bawl kei un. 19 Vanlam ena na daktouh chiangun, ni leh kha leh aksite na mu ding uhi. Hiaite vanlam thilhonpi ahi uhi. Hiai vanlam thilhonpi Tangtawn Toupa na Pathian un vannuaia namte khempeuh kianga a piak ahi. Hiaite' maia kun ding leh a nna uh sem dinga zolzawh-a na om louh nadingun, pilvangtakin kikem un. 20 Noute na hih uleh, Tangtawn Toupa'n sik haltuina meiphual Aigupta apan hon lakhia a, tu-a na hihna bang ua, a goutan nam hi dinga hon piikhiak na hi uhi. 21 Na thugente uh hangin kei tung ah zong Tangtawn Toupa a heh a, Jordan lui ka kan kei ding chih leh, Tangtawn Toupa'n na gouluah ding ua hon piak dek tua gam hoih ka lut kei ding chih kiptaka kichiamin a genta hi. 22 Hiai gam ah ka si ding a, Jordan lui ka kaan kei ding a, ahihhangin, noute'n bel kaan dek a, tua gam hoih luah dek na hi uhi. 23 Tangtawn Toupa'n noute tawh kala a bawl thukhun mangngilh lou dingin pilvang un. Tangtawn Toupa'n a kham thil khat peuh lim leh mei neiin milim kibawl kei un. 24 Ahang bel, Tangtawn Toupa na Pathian uh zaw kangmang thei mei, thikthusia Pathian ahi. 25 Tate leh tute na neih khit chiang uleh, tua gama sawt na teen chiang ua, nong tat siatgawp uh a, milim khat peuh na bawl uleh, Tangtawn Toupa na Pathian uh' mitmuha thil gilou hih a, amah na hehsak uleh, 26 gam luah dinga Jordan lui na kaan dek uh tua gam apan hihmanthatin na om pah ding uh, chih theihpihte hi dingin lei leh vaan tuni-in ka sam hi. Tua gam ah sawt na teeng het kei ding uh a, hihmanthat sipsipin na om ding uhi. 27 Tangtawn Toupa'n namdangte lak ah hon thehthang ding a, Tangtawn Toupa'n hon hawlmangna tua namte lak ah tawmchik kia na suakta ding uhi. 28 Tua ah mihing' bawltawm sing leh suang pathiante, muh lah mu thei lou, zak lah za thei lou, nek lah ne thei lou, nap lah nam theiloute' nna na sem ding uhi. 29 Ahihhangin, tua apan Tangtawn Toupa na Pathian uh na zon uleh bel, na lungtang khempeuh uleh na hinna khempeuh utawh Amah na zon naak uleh, amah na mu ding uhi. 30 Ni nunungte-a hibang teng hong tunga na mangbat chiangun, Tangtawn Toupa na Pathian uh kiang ah na kik ding uh a, a thu na mang ding uhi. 31 Ahang bel, Tangtawn Toupa na Pathian uh zahngaithei Pathian ahi-a ahi. Noute hon taisan hiam, hihmangthang hiam, na pu na pate uh tawh kala thukhun, amaute kianga kichiam zena a hihkip mangngilh hiamin a om kei hiai ding hi.

Tangtawn Toupa Pathian

32 Ni masa lam, noute' hun ma thu, Pathian in leitunga mihing a siam ni apan thu tu'n dong un. Hibanga thil thupi himhim a tung ngei hia, ahih kei leh, tua bang a kiza ngei hia? Vaante mong khat apan mong lang khat dongin dong un. 33 Noute'n na zak ua na hin bangun, meikuang lak apan Pathian' aw nam dang in zatain a hing ua hia? 34 Pathian dang himhim in ze-etnate, chiamtehna lamdangte leh thillamdangte, kidounate leh khut hat leh banzakin namte lak apan nam khat amah adingin a la ngei ahia? Tangtawn Toupa na Pathian un thilhih thupi leh lauhuai zanga, noute adinga, na mitmuh ua Aigupta-a a hih bang a hih ngei ahia? 35 Noute'n, Tangtawn Toupa, Pathian ahi, chih na theih nading ua hiai thilte noute kianga laha om ahi. Amah lou a dang om lou ahi. 36 Noute hon thunun dingin vaan apan a aw hon zasak a, leitung ah ama' meikuang thupi hon lak a, tua meikuang lak apan a thugente na za uhi. 37 Na pu na pate uh a it manin amaute nunga a suante uh hon teel a, amah mah in hon ompihna leh hatna thupi-in Aigupta gam apan hon piikhia ahi. 38 Tua bel, noute' mai apan, noute sanga lianzaw leh hatzaw namte hawlkhia a, amaute gam sung hon tun a, tuni-a banga na gouluah ding ua hon piak a tup man ahi. 39 Tangtawn Toupa zaw tung vaan ah leh nuai lei ah Pathian ahi, chih tuni-in sang unla, lungtang ah vom un. A dang kuamah om lou ahi: 40 Noute ading leh noute nunga na tate uh adinga a hoih nadingin leh, noute-a hiden dinga Tangtawn Toupa, na Pathian un gam hon piak sunga na dam sawt theih nadingun, tuni-a noute kon piak a danthusehte leh thupiakte zui un, a chi hi.

Bukna Khawpite

41 Tua khitin, Mosi in Jordan suahlam ah khawpi thum a septuam hi. 42 Tuate bel, mi khat peuh in, muhdahna nei masa leh tup mawng hi lou a, a innveng a thah khak leh, a tai theih nading ahi. Hiai khawpite khat peuh ah a tailut thei ding a, a hing thei ding hi. 43 Tua khawpite hiaite ahi: Reubente' gam gamdai-gamkeua Bezer khawpi, Gadte gam Gileada Ramoth khawpi leh, Manasete' gam Bashana Golan khawpi ahi.

Dan

44 Mosi in Israelte' maia a lui Dan hiai ahi. 45 Hiaite Mosi' piak theihsaknate, danthusehte leh dante ahi. Tua bel, Aigupta gam apan hong paikhiak lai uleh, 46 Sihon' gam, Jordan lui suahlama Beth Peor kiang luiphaia a om lai ua a piak ahi. Sihon bel, Amorte kumpipa, Heshbona vaihawmpa, Mosi leh Israelte'n Aigupta gam apan hong paikhiak lai ua a zawhpa uh ahi. 47 Amaute'n Sihon gam leh Bashan kumpipa Og' gam a luah uhi. Amaute gel bel, Jordan lui suahlama Amor kumpipa nihte ahi uhi. 48 Hiai sam bel Amon Kuam geia Aroer apan Sion Mual donga kizalh ahi. Sion Mual in min dang a nei a, Hermon ahi. 49 Tua gam in Jordan lui suahlama Araba luiphai khempeuh, Pisga mual pang nuaia Araba Tuipi dong a uap hi.

Danpiakthakna 5

Dan Sawmte Piakna

5 Mosi in Israelte khempeuh a sam a, a kiang uah: Israel aw, tuni-a na zak ua ka phuan danthusehte leh dante ngai un. Sin unla, zui ngeingei dingin pilvang un. 2 Tangtawn Toupa eite Pathian in Horeb ah eite tawh kal ah thukhun khat a bawl hi. 3 Tangtawn Toupa'n hiai thukhun, i pu i pate tawh kala a bawl ahi kei a, tuni-a hiaia oma nungta lai eite khempeuh tawh kala a bawl ahi zaw. 4 Tangtawn Toupa'n tua mual tung ah, meikuang laka pan noute kiang ah kimaituahin thu a gen hi. 5 Tua laiin, meikuang lau a, muala na paitouh louh manun, Tangtawn Toupa' thugen noute kianga phuang dingin, Tangtawn Toupa leh noute kal ah kei ka ding hi. Ama'n: 6 Kei Tangtawn Toupa, na Pathian Aigupta gam, saltanna gam apan hon piikhepa ka hi. 7 Ka maia keimah lou pathian dangte na neih het louh ding ahi. 8 Tung vaan ah hiam, nuai lei ah hiam, nuai tuite ah hiam, thil khatpeuh lim leh mei nei batpih milim na kibawl het louh ding ahi. 9 Amaute' maia na kuun het louh ding, a nna uh zong na sep het louh ding ahi. Ahang bel, kei Tangtawn Toupa, na Pathian thikthusia Pathian, kei hon mudah pate' khelhna a tate uh a khang thumna leh khang lina chiang dong gawtpa, 10 ahihhanga kei hon it a, ka thupiakte zuite bel a a sang a sang tunga itna muanhuai langsakpa ka hi, 11 Tangtawn Toupa na Pathian' min na mawk zat hetlouh ding ahi. Ahang bel, Tangtawn Toupa'n ama' min mawk zat khat peuh mawhneilouin koih lou ding ahi. 12 Tangtawn Toupa na Pathian uh' hon thupiak bangin, Sabbath ni siangthoua zangin na tang ding ahi. 13 Ni guk sung sem gimin, na nna na sem ding ahi. 14 Ahihhangin, a ni sagih ni bel Tangtawn Toupa na Pathian adinga Sabbath ni ahi. Tua ni-in nna himhim na sem ding ahi kei. Na tapa hiam, na tanu hiam, na sila pasal hiam, na sila numei hiam, na bawngtal hiam, sabiltung hiam, gantate khat peuh hiam, na kongpite sunga gamdang mi hiam in zong nna a sem ding uh ahi het kei. 15 Aigupta gama sala om na hih lam uleh, Tangtawn Toupa na Pathian un khut hattak leh baan zaka tua apan hon piikhia ahih lam thei gige in. Tua bang ahih manin, Tangtawn Toupa na Pathian in Sabbath ni tang dinga thu hon pia ahi. 16 Tangtawn Toupa'n thu hon piak bangin, na nu leh na pa zahtak in, tuachi-in na khankhua sawt ding a, Tangtawn Toupa na Pathian in hon piak ding gam ah nang adingin a hoih thei ding hi. 17 Tual na that ding ahi het kei. 18 Ang na kawm ding ahi het kei. 19 Guk na gu ding ahi het kei. 20 Na innveng tung ah theihpih taklouin na pang ding ahi het kei, 21 Na innvengpa' zi na deihgawh ding ahi het kei. Na innveng' inn hiam, gam hiam, a sila pasal hiam, a sila numei hiam, a bawngtal hiam, a sabiltung hiam, ama' van neih hiam deihgawhin na haza ding ahi het kei, a chi hi.

Israelte' Dawnna

22 Mual tunga kikhawm noute khempeuh kianga, meikuang, meipi leh mial bibek apan aw ngaihtaka Tangtawn Toupa'n a phuankhiak thupiakte hiaite ahi. Ama'n hiaite baan ah, bang mah a behlap kei hi. Tua khitin, suangpek nih tung ah tuate a gelh a, kei hon pia hi. 23 Tua mual meia a kuan laia, tua mial lak apan aw hong pawt noute'n na zak laiun, na nam makaite uleh na upate khempeuh uh ka kiang ah hong hawh uhi. 24 Noute'n ka kiang ah: Ngai in, Tangtawn Toupa koute Pathian in a thupina leh letna hon ensak a, meikuang lak apan a aw ka zata uhi. Pathian in mi a houpih leh zong tua mi a nungta thei lai, chih tuni-in, ka muta uhi. 25 Ahihhangin, tu-a banghanga si ding ka hi ua? Hiai meikuang thupi in koute hon kangtum ding a, Tangtawn Toupa koute' Pathian' aw za kik lai le ung, ka si ding uhi. 26 Ahang bel, Pathian hing' aw, meikuang lak apan thugen, koute zak banga za a nungta lai, mihing lak ah kua om ngei ahia? 27 Naih inla, Tangtawn Toupa eite' Pathian' gen khempeuh ngaikhia in. Tua khit chiangin, Tangtawn Toupa eite Pathian in nang hon hilh peuhmah koute hon hilh in. Ka ngaikhe ding uh a, ka zui ding uh, na chi uhi.

Pathian' Dawnna

28 Kei non houpih laiun, Tangtawn Toupa'n a za a, Ama'n ka kiang ah: Hiai mite'n na kianga a gen uh ka za hi. A gen peuhmah uh a hoih hi. 29 A tawntunga amaute leh a tate uh adinga a hoih nadingin leh kei hon laudan a siam nadingun, a lungtangte uh keilam hong nga le uh aw! 30 Pai inla, a puanbuk ua kik dingin amaute hilh in. 31 Ahihhangin, amaute luah dinga ka piak ding gama a zuih ding ua na sinsak ding thupiakte, danthusehte leh dante khempeuh kon piak theih nadingin nang zaw hiah om tadih in, a chi hi. 32 Tua bang ahih manin, Tangtawn Toupa noute' Pathian in, noute hon thupiak zui dingin pilvang un. Taklam ah hiam, veilam ah hiam pialsan kei un. 33 Na nuntak ua, na mavan ua, na luah ding uh gama na khantou nadingun, Tangtawn Toupa na Pathian un noute hon thupiak lampi khempeuh zui suak un.

Danpiakthakna 6

Dan Sinsak dinga Thupiak

1 Galkai a, na luah ding uh tua gama zui dinga noute hon sinsak dinga, Tangtawn Toupa na Pathian un kei hon thupiak tua thupiakte, danthusehte leh dante hiaite ahi. 2 Tua bel, noute leh na tate uleh, amaute nunga a tate un, na nuntak sung teng ua na zuih ding ua, kon piak dante leh thupiakte ahi. Na nuntak sung teng ua tuate na zuih uleh Tangtawn Toupa na Pathian uh laudan na siam ding uh a, na khantou ding uhi. 3 Israel aw, za inla, zui dingin pilvang in, Tua bel, noute na mavan nading uleh, Tangtawn Toupa, na pu na pate' uh Pathian in noute kianga a gen banga nawitui leh khuaizu-a luang gama nakpitaka nong pun theih nading uh ahi. 4 Israel aw, za in: Tangtawn Toupa i Pathian uh Tangtawn Toupa khat omsun ahi. 5 Na lungtang khempeuh uleh na hinna khempeuh uleh, na hatna khempeuh un Tangtawn Toupa na Pathian uh it un. 6 Tuni-a noute kon piak hiai thupiakte na lungtang ua a om ding ahi. 7 Na tate uh sinsak un. Inn-a na tut chiang uleh, lampi-a na pai lai uleh, na lup chiang uleh na thawh chiangun, tuate gen un. 8 Chiamtehna hi dingin na khut uah bun unla, na taltang uah khim un. 9 Na inn kongbiangte uleh na kongpite uah tuate gelh un. 10 Tangtawn Toupa na Pathian un noute hon piak ding chi-a na pu na pate uh, Abraham, Isak leh Jakob kianga a chiam gam ah hon pilut ding a, noute' lamsa hi lou khawpi lianpipi, 11 noute sepkhiak hi lou thil hoihpipi-a dim innte, noute tawhsa hi lou tuilehte, noute' suansa hi lou grephuante leh oliv singte na luah ding uhi. Ama'n tua gam ah hon piilut a, nea na tai chiangun, 12 Aigupta gam, saltanna mun apan hon piikhepa Tangtawn Toupa mangngilh lou dingin pilvang un. 13 Tangtawn Toupa, na Pathian uh lau dan siam unla, ama' nna sem unla, ama' min louin kichiam un. 14 Pathian dangte, na kiim na pam ua namte' pathiante zui kei un. 15 Ahang bel, Tangtawn Toupa na Pathian uh, noute laka ompa zaw thikthusia Pathian ahi a, na tung uah a hehna a kuang ding a, leitung apan hon hihmangthang kha ding hi. 16 Masa-a na hih bangun, Tangtawn Toupa na Pathian uh ze-et kei un. 17 Tangtawn Toupa, na Pathian uh' thupiakte leh noute hon piak a thu theihsakte leh a danthusehte zui teitei dingin pilvang un. 18 Noute adinga a hoih nading leh, Tangtawn Toupa'n na pu na pate uh kianga kichiam zena a chiam, tua gam hoih na luah zawh nadingun, Tangtawn Toupa' mitmuha a dik leh a hoih hih un. 19 Tua bel, Tangtawn Toupa gen banga, na mai ua na melmate khempeuh uh hawlkhia a, tua gam na luah theih nading uh ahi. 20 Tunung chianga na tapate un: Tangtawn Toupa i Pathian in thupiak noute hon piak a thu theihsakte, a danthusehte leh dante bang genna ahia? chi-a hon dot chiangun, 21 amaute kiang ah: Aigupta gam ah Faro' sila ka na hi uh a, ahihhangin, Tangtawn Toupa'n a baan thahat-in Aigupta gam apana hon piikhia ahi. 22 Koute' mitmuhin, Tangtawn Toupa'n chiamtehna lamdangte leh a thupi leh mulkimhuai thillamdangte, Aigupta gam leh Faro leh a innkawte khempeuh tung ah a sawl hi. 23 Ahihhangin, ka pu ka pate uh kianga piak ding chi-a kichiam zena a chiam gama hon piilut ding leh hon pe dingin, Aigupta gam apan hon piikhia hi. 24 Tuni-a banga eite adinga a hoih nading leh, hawia nungta-a i om nadingin, Tangtawn Toupa'n hiai danthusehte khempeuh zui ding leh, Tangtawn Toupa i Pathian uh lau dan siam dingin thu hon pia. 25 Ama'n thu hon piak banga, Tangtawn Toupa i Pathian' maia hiai dante khempeuh zui dinga i pilvan leh, tua mah eite' diktatna hi ding ahi, chi-in hilh un.

Danpiakthakna 7

Gam La dinga Thupiakna

1 Tangtawn Toupa na Pathian un noute' lut dekna gam luah dinga hon piilut a, nam tampi noute sanga hatzaw Hitte, Girgaste, Amorte, Kanante, Perizte, Hivte, leh Jebuste, hiai nam sagih noute' maia a hawlkhiak chiangin leh, 2 Tangtawn Toupa na Pathian un noute' khut sunga tuate hon piak chiangin, amaute na that ding uh a, na hihmangthang sipsip ding uh ahi. Amaute tawh kal ah thukhun bawl kei unla, zahngaihna zong lak kei un. 3 Amaute tawh kiteengtuah kei un. Na tanute uh amaute' tapate adingin pe kei unla, amaute' tanute zong na tapate uh adingin pii kei un. 4 Ahang bel, pathian dangte' nasem dingin na tapate uh, kei apan a piimang ding uh a, Tangtawn Toupa' hehna na tung uah a kuang ding a, noute hon hihmangthang pah ding ahi. 5 Amaute tunga na hih ding uh hiai ahi: Amaute' Ashera songte phukpai unla, amaute' milimte meiin haltum un. 6 Ahang bel, noute, Tangtawn Toupa na Pathian uh adinga nam siangthou na hi uhi. Tangtawn Toupa na Pathian un ama' mite, ama' gou manphate hi dinga, leitung maikaiha namte khempeuh lak apan hon teelkhiak na hi uhi. 7 Tangtawn Toupa'n nam dangte sanga na tamzawk man ua hon deihthawh a, hon teel ahi kei hi. Noute zaw namte khempeuh laka a tawmpen na hi uhi. 8 Ahihhanga Tangtawn Toupa'n noute hon it a, na pu na pate uh kianga a thuchiam a letkip mana, saltanna mun, Aigupta kumpipa Faro' vangletna apan a baan thahata hon tankhia a, hon tankhia ahi zaw hi. 9 Tua bang ahih manin, Tangtawn Toupa na Pathian uh, Pathian khat om sun ahi chih thei un. Amah zaw Pathian muanhuai ahi a, amah itte leh a thupiak zuite tunga a thukhun leh a zahngaihna khang 1,000 donga lenkippa ahi. 10 Ahihhangin, Amah mudahte bel, a langtangin manthatnain a thuk ding. Amah mudahte a langtanga thuk dingin a zekai kei ding hi. 11 Tua bang ahih manin, zuih dinga tuni-a kon piak thupiakte, danthusehte leh dante zui un. 12 Hiai dante na ngaihkhiak ua, na letkip ua, na zuih uleh, Tangtawn Toupa na Pathian un, na pu na pate uh kianga a thuchiam bangin noute tawh kala a thukhun zahngaihna a lenkip ding hi. 13 Ama'n noute hon it ding a, hon vualzawl ding a, hon pungsak ding hi. Ama'n na pu na pate uh piak ding chi-a kichiam zena a chiam gam sung ah na gil ua gah a vualzawl ding a, na gam gahte uh, buh leh zu thak leh sathau, na bawngnoute uh, na belam uleh kelnoute uh a pungsak ding hi. 14 Nam dang khempeuh sangin noute vualzawl zawkin na om ding uh a, na pasalte uleh na numeite uh kuamah tabeiin a om kei ding uh a, na gantate uh zong nou neilou-in a om kei ding. 15 Tangtawn Toupa'n chinatna khempeuh noute apan a hemkhe ding. Aigupta gama na theih uh natna mulkimhuaite hon thuaksak kei ding a, nou hon mudahte a thuaksak zaw ding hi. 16 Tangtawn Toupa na Pathian un, noute hon piak namte khempeuh na hihmangthang vek ding uh ahi. Lainatna mitin amaute en kei unla, amaute' pathiante' nna zong sem kei un. Ahang bel, tuate noute adinga thaang hi ding uh hiven. 17 Na lungsung uah: Hiai namte eite sanga tam zaw uh hi a, bangchi-a hawlkhe thei ding i hia? na chi mai thei uhi. 18 Ahihhangin, amaute lau kei un. Tangtawn Toupa na Pathian un Faro leh Aigupta gam khempeuh tunga a hih thei gige zaw un. 19 Tangtawn Toupa na Pathian un ze-etna thupite, chiamtehna lamdangte leh thillamdangte zanga, khut thahat leh banzaka noute hon piikhiak dan na mitun na mu uhi. Tangtawn Toupa na Pathian un, tu-a maituah ding na lau uh' namte khempeuh tung ah tua bang mah a hih ding hi. 20 Tua baan ah, noute apan kiselte leh a khawsuak sunte nangawn a manthat vek masiah uh Tangtawn Toupa na Pathian un a lak uah khuaizantate a sawl ding hi. 21 Amaute lauin liing kei un. Noute laka om, Tangtawn Toupa na Pathian uh, thupi leh a lauhuai Pathian ahi. 22 Tangtawn Toupa na Pathian un tua namte, noute' mai ah khat khatin a hawlkhe ding hi. Thakhata a vekpi ua hihmangthang dingin phal na hi kei ding uh, tuachi louin zaw, na kim na kiang uah gamsate a pung kha ding hi. 23 Ahihhangin, Tangtawn Toupa na Pathian un, noute' khut sung ah amaute hon pe ding a, hihmanthat vek ahih mateng uh, nakpitaka manthatnain a mangthangsak ding hi. 24 A kumpipate uh, noute' khut sung ah hon pelut ding a, khua vannuai apan amaute' min na thaimang ding uhi, Amaute na hihmanthat vek mateng uh kuama'n noute hon nang zou kei ding. 25 A khuakthawh milim pathiante uh meia na haltum ding uh ahi. Tuate tunga ngun leh khamte deihgawh kei unla, kilaak kei un. Tua bang na hih uleh, noute hon thangawksak kha ding uhi. Ahang bel, tua mah Tangtawn Toupa na Pathian uh adinga kihhuai ahi. 26 Thil kihhuai na inn sung uah lalut kei un, tua banga na hih uleh, tuate banga hamsiatin na om ding uhi. A kiha kihin a huatin hua un. Ahang bel, tuate hamsiat thil ahi uhi.

Danpiakthakna 8

Tangtawn Toupa Theih Gige ding

1 A nuntak theih nading uh, na pun theih nading uh leh, Tangtawn Toupa'n na pu na pate uh kianga kichiam zena a chiamsa gam na lut ua na luah theih nadingun, tuni-a kon thupiak peuhmah zui dingin pilvang un. 2 A thupiakte na zui ding uhia, zui lou ding, chih na lungtangte uh thei nuama Tangtawn Toupa na Pathian un hon kingainiam a, hon ze-et a, hiai kum 40 sung, gamdai-gamkeu tawnsuaka hon pii dan thei gige un. 3 Noute hon kingainiamsak a, hon gilkialsak a, tua khitin noute leh na pu na pate un na theih ngeilouh uh manain hon vaak hi. Tua bel, mihing tanghou kiain a nungta kei ding a, Tangtawn Toupa' kam apan hong pawt thu peuhmah in a nungta zaw ding, chih hon sinsak nop man ahi. 4 Hiai kum 40 sungin, na puansilhte uh luiin a se kei a, na khete uh zong a bawk kei hi. 5 Mi'n a tapa a thunun bangin, Tangtawn Toupa na Pathian un noute hon thunun ahi, chih lungtangin thei un. 6 Tangtawn Toupa na Pathian uh' lampi tawnin leh amah laudan siamin a thupiakte zui un. 7 Ahang bel, Tangtawn Toupa na Pathian un gam hoiha hon piilut ding ahi. Tua gam bel, luite leh tuikhukte, luiphaite leh mualte, tuinakte omna ahi. 8 Huitbuh leh barlibuhte, grepguite leh theipikungte, mimtheite, oliv thau leh khuaizu pianna gam ahi. 9 Tanghou taksap louhna gam ahi a, tua ah bangmah na tasam kei ding uhi. A suangte sik ahi a, a mualte apan dalsik na laikhe ding uhi. 10 Na nek ua na tai chiangun, Tangtawn Toupa na Pathian un gam hoih hon piakna gam ah, amah phat un. 11 Tuni-a noute hon piak a thupiakte, a dante leh a danthusehte zui lou a, Tangtawn Toupa na Pathian uh na mangngilh louh nadingun pilvang un. 12 Tuachi louin zaw, na nek ua na tai chiangun, inn hoihte na lam ua, na teen chiangun leh, 13 na bawnghonte uleh na belamhonte uleh kelhonte uh hong pun a, na kham leh ngunte uleh na neih na lam uh hong pun chiangin, 14 na lungtang uh hong kisathei ding a, Aigupta gam, saltanna mun apan hon piikhepa Tangtawn Toupa na Pathian uh na mangngilh kha ding uhi. 15 Ama'n tua gamdai-gamkeu, gam dangtak leh tui om louhna gam zapi leh lauhuai, gul guneite leh aikamte omna gam tawnin hon pii a, meisah suangpi apan tui hon pia hi. 16 Gamdai-gamkeu ah nek dingin mana hon pia a, na pu na pate uh theih ngeilouh an ahi. A tawpin noute adinga a hoih nadingin hon kiniamkhiaksak a, hon ze-et ahi. 17 Noute'n: Ka vangletna leh ka bantha hatin hiai hauhna ka lamkhiak ahi, na chi mai thei uh. 18 Ahihhangin, Tangtawn Toupa na Pathian uh thei gige un. Amah ahi hauhna lamkhiak theihna hon pia a, na pu na pate uh kianga kichiama a thukhun tuni-a banga hihkippa. 19 Tangtawn Toupa na Pathian uh na mangngilh ua, pathian dangte zui a, a nna uh sem a, a mai ua na kun peuhmah uleh, hihmanthatin na om ngeingei ding uh chih, tuni'n noute kiang ah theihpihna ka gen ahi. 20 Tangtawn Toupa'n na mai ua a hihmanthat namte bangin, noute zong Tangtawn Toupa na Pathian uh thu na man louh manun, hihmanthatin na om ding uhi.

Danpiakthakna 9

Israel Helna Genkikna

1 Israel aw, ngai in. Tuin Jordan lui gal kai a, valut a, kulhbaang vansunte nei tua khawpi thupite nei noute sanga thupizaw leh hatzaw namte va suankhe dek na hi uhi. 2 A mite a hat uh a, a saang uh. Anakte ahi uhi! Amaute' tungthu na thei uh. Kua'n amaute nang zou ding ahia? a kichih na zata uh. 3 Ahihhangin, tuni-in thei un. Tangtawn Toupa, na Pathian uh, a kangtum thei meikuang banga noute' maia na pai masa ahi. Ama'n noute' mai ah amaute a hihmangthang ding a, a zou gawp ding. Tangtawn Toupa'n noute hon chiamsa bangin, noute'n amaute na suankhe ding uh a, na hihchimit pah ding uhi. 4 Tangtawn Toupa na Pathian un, noute' maia amaute a paihkhiakkhit chiangin: Ka diktatna hanga Tangtawn Toupa'n hiai gam luah dinga hon piilut ahi, kichi het kei un. Hiai namte' gitlouhna hanga Tang-tawn Toupa'n noute' maia amaute hawlkhe ding ahi zaw. 5 Noute na diktatna uh, ahih kei leh, na lungtang uh takna sakhatna hanga, amaute' gam luah dek na hi kei uh. Hiai namte' gitlouhna hang ahi zaw, Tangtawn Toupa na Pathian un na mai ua amaute a suankhiak dek. Tua bel, na pu na pate uh Abraham, Isak leh Jakob kianga thu a chiam tangtunsak nadingin ahi. 6 Noute' diktatna hanga, Tangtawn Toupa na Pathian un hiai gam hoih na luah ding ua hon pe dek ahi kei, chih thei un. Noute zaw nam genhak na hi uhi.

Bawngnou Lim

7 Hiai thei gige unla, gamdai-gamkeua Tangtawn Toupa na Pathian uh na totheh dan uh mangngilh kei un. Aigupta gam na nutsiat ni uapan, hiai mun nong tun dongun, Tangtawn Toupa tunga hel na hiden uhi. 8 Horeb ah, Tangtawn Toupa na hehsak uh a, noute hon hihmangthang ding khopin a heh hi. 9 Suangpekte, Tangtawn Toupa'n noute tawh kala a bawl thukhun suangpekte mah sang dinga tua mual tunga ka kaltouh laiin, tua mual tung ah ni 40 leh zan 40 sung ka taam hi. Tua sungin an ka ne kei a, tui zong ka dawn kei hi. 10 Tangtawn Toupa'n, Pathian khut zung in a gelh suangpek nih hon pia hi. Tuate tung ah, Tangtawn Toupa'n kikhopkhawm ni-a tua mual tunga, meikuang laka pan noute kianga a phuankhiak thupiakte khempeuh a om hi. 11 Tua ni 40 leh zan 40 a bei takin, Tangtawn Toupa'n tua suangpek nihte, thukhun sawm pekte kei hon pia hi. 12 Tua khitin, Tangtawn Toupa'n ka kiang ah: Aigupta gam apan na piikhiak na mite segawpkhin ahih manun, kisa inla, hiai apanin paisuk pah in. Amaute ka thupiak apan a kiheimang pah uh a, a sunthawh milim khat kibawl uh ahi, a chi hi. 13 Tua baan ah, Tangtawn Toupa'n ka kiang ah: Hiai mite ka muta. Mi genhakte ahi taktak uhi! 14 Amaute ka hihmanthat a, khuavan nuai apan a minte uh ka nulmang theih nadingin, hon kham ken. Amaute sanga nam hatzaw leh tamzawin nang kon bawl ding, a chi lai hi. 15 Tuachi-in, ka kihei a, tua mual tung apanin tua mual meia a kuan lai mahin, ka kumsuk hi. Ka khutte ah tua thukhun suangpek nihte a om hi. 16 Kon et takin, ngai un, Tangtawn Toupa na Pathian uh tung ah na khialta uh, chih ka mu hi. Bawngnou leh mei neia kisung milim na nakibawlta uhi. Tangtawn Toupa'n hon thupiak lampi apan na kiheimang pah uhi. 17 Tuachi-in, tua suangpek nihte ka la a, ka khut apan ka paikhia a, na mitmuhun ka hihtam vek hi. 18 Tua khitin, Tangtawn Toupa' mai ah khatvei, ni 40 leh zan 40 sung ka khupbawh kik hi. Noute'n Tangtawn Toupa' mitmuha thil gilou hih-a amah na hehsak ua, khelhna na hih khempeuh uh hangin, an ka ne kei a, tui zong ka dawn kei hi. 19 Noute hon hihmangthang ding zaha na tung ua a heh manin, Tangtawn Toupa' hehna leh thangpaihna ka lau hi. Ahihhangin, tua hunin Tangtawn Toupa'n kei hon ngaikhe kik hi. 20 Tua baan ah, Aron tung ah amah hihmangthang ding zahin, Tangtawn Toupa'n hehna a langsak hi. Ahihhangin, tua laitakin, Aron adingin zong ka thuumsak hi. 21 Na khelhna thil uh, bawngnou na kibawl uh zong ka la a, meiphual ah ka khul hi. Tua khitin ka hihtam a, leivui banga neiin ka hihvui a, tua a vuite, tua mual apan luangsuk luitui ah ka pailut hi. 22 Noute'n Tabera ah leh Masa ah leh Kibroth Hatava ah zong, Tangtawn Toupa na hehsak uhi. 23 Tangtawn Toupa'n Kadesh Barnea apan noute hon sawlkhiak laiin, noute kiang ah: Paitou unla, kon piaksa gam va luah un, hon chi hi. Ahihhangin, Tangtawn Toupa, na Pathian un hon thupiak na helsan uhi. Amah na muang kei uh a, amah na thuman kei uhi. 24 Noute kon theih nungsang, Tangtawn Toupa tunga hel na hiden uhi. 25 Tangtawn Toupa'n noute hon hihmangthang ding a chih manin, kei bel leilak ka kidenna a, tua ni 40 leh zan 40 sung, Tangtawn Toupa' mai ah ka khupbawh hi. 26 Tangtawn Toupa' mai ah ka thuum a: Toupa Tangtawn Toupa aw, na mite na vangletna thupi-a na tatkhiaksa, khut thahata Aigupta gam apan na tatkhiak na goute hihmangthang ken. 27 Na silate Abraham, Isak leh Jakob thei gige in. Hiai mite' genhakna, a gitlouhna uleh a khelhna uh kimuhmawhbawl in. 28 Tuachi louin zaw, non piikhiakna gam mite'n: Tangtawn Toupa'n amaute a chiamsa gama a piilut theih louh manin leh, amaute a muhdah manin, gamdai-gamkeua amaute thah dinga piikhia ahi, hon chi ding uhi. 29 Amaute lah na mite, na gouluahte, na vangletna thupitak leh na baan zaka na piikhiakte ahi mahmah uhi, ka chi hi.

Danpiakthakna 10

Pathian Zahngaihna Suutkikna: Suangpek Thakte Piakna

1 Tua 'aiin' Tangtawn Toupa'n ka kiang ah: Suangpek thak nih amasate bangbang kisek inla, tua mual tung ah, ka kiang ah hong paitou in. Singa bawl singkuang khat zong ki bawl in. 2 Tua suangpekte tung ah, na hihtap suangpek masate tunga kigelh thute ka gelh ding. Tua khit chiangin, tuate, tua singkuang sung ah koih in, hon chi hi. 3 Tuachi-in, akasia singin singkuang ka bawl a, amasate bangbang suangpek nih ka sek a, tua suangpek nihte khuta tawiin, tua mual tung ah ka paitou hi. 4 Tangtawn Toupa'n hiai suangpekte tung ah, a masa-a a gelh tua Thupiak Sawmte, kikhopkhawm ni-a tua mual tunga meikuang lak apan noute kianga a phuankhiakte a gelh hi. Tangtawn Toupa'n tua suangpekte kei hon pia a, 5 tua khitin, tua mual tung apanin kong kumsuk a, singkuang ka bawl sung ah tua suangpekte ka koih hi. Tangtawn Toupa'n kei hon thupiak banga ka hih ahi a, tuin tua ah a om uhi. 6 Israelte, Jaakante' tuilehte apan a kipankhia uh a, Mosera ah a pai uhi. Tua ah Aron a si a, tua ah a kivui a, a tapa Eleazar in siampi hihna mun a luah hi. 7 Tua apanin Gudgoda ah a pai uh a, tua apanin Jotbatha gam ah a pai lai uhi. Jotbatha gam bel, luituite luanna gam ahi. 8 Tua laiin, Tangtawn Toupa'n, Tangtawn Toupa' thukhun bawm singkuang paw ding, nasema Tangtawn Toupa' maia ding ding leh, Ama' mina vualzawlnate gen dingin Levi nam a sepkhe tuam hi. Tuni dongin tua nna a sem lai uhi. 9 Tua hang ahi, Levite'n a sanggamte uh laka tan, ahih kei leh, goutan a neih louh uh. Tangtawn Toupa, na Pathian un amaute a hilh bangin, amaute' goutan zaw Tangtawn Toupa ahi. 10 Hun masa-a bangin, tua mual tung ah ni 40 leh zan 40 sung ka taam a, Tangtawn Toupa'n hiai hunin zong kei hon ngaikhia hi. Noute hon hihmanthat ding a deihlam ahi keia ahi. 11 Tangtawn Toupa'n ka kiang ah: Paita inla, na pu na pate uh kianga piak ding ka chiam gam lut a, luah dingin hiai mite a lampi uah pii in, hon chi hi.

Tangtawn Toupa Jt-a Lau ding

12 Israel aw, tu in Tangtawn Toupa na Pathian un bang hon ngiata eita, Tangtawn Toupa na Pathian uh lauh ding, a lampi khempeuh zuih ding, amah it ding, na lungtang khempeuh uleh na hinna khempeuh utawh Tangtawn Toupa na Pathian uh' nna sep ding leh, 13 noute hoih nadinga tuni-a kon piak, Tangtawn Toupa' thupiakte leh thusehte zuih ding loungal? 14 Ngai un, vaante, vaan sangpente nangawn, leitung leh a sunga omte khempeuh Tangtawn Toupa na Pathian uh-a ahi. 15 Hinapi-in, Tangtawn Toupa'n na pu na pate uh tung ah deihthawhna a nei a, amaute a it a, tuni-a bangin, namte khempeuh tung ah amaute' chi suan noute hon teel hi. 16 Tua bang ahih manin, na lungtangte uh suum unla, genhakin om nawn kei un. 17 Ahang bel, Tangtawn Toupa na Pathian uh, pathiante' Pathian, toute' Toupa, Pathian thupi, thahat leh mulkimhuai, deihsaktuam nei lou, golhguknate ne lou ahi. 18 Ama'n pabeite leh meigongte adingin dikin vai a hawmsak a, gamdang mite a it a, nek leh tak leh silh leh teen a pia hi. 19 Noute'n zong gamdang mite na it ding uh ahi. Ahang bel, noute zong Aigupta gam ah gamdang mite va hi hi ve uchin. 20 Tangtawn Toupa na Pathian uh lau unla, a nna sem un. Amah lenkip unla, ama' minin thu chiamte bawl un. 21 Amah noute' phatlawhna ahi. Amah noute' Pathian, noute adinga tua thil thupi leh mulkimhuaite na mitmuh ua hihpa ahi. 22 Aigupta gama paisuk na pu na pate uh, avekpiun 70 ahi uh a, tuin Tangtawn Toupa na Pathian un vaana aksite bangin noute hon tamsakta hi.

Danpiakthakna 11

Thupiakte Sin ding, Zuih ding

1 Tangtawn Toupa na Pathian uh it unla, a thupiakte'ngiatte, a dante, leh thupiakte zui gige un. 2 Tangtawn Toupa na Pathian uh' taihilhna mu lou leh thei lou na tate uh houpih ka hi kei, chih tuni-in thei un. Amaute'n ama' thupina, a khut hat leh a banzak a mu kei uh. 3 Aigupta gam sunga Aigupta kumpipa Faro tung leh a gam sung mite khempeuh laka chiamtehna a lakte leh a thilhihte a mu kei uh. 4 Aigupta sepaihte'n noute hon delh lai ua, a sakolte uleh kangtalaite uh tunga a thilhih, Tangtawn Toupa'n Tuipi San tuite-a amaute a tupmang dan leh amaute tunga siatdenna tuni donga a tut dan a thei kei uh. 5 Hiai mun nong tun mateng ua, gamdai-gamkeua noute adinga a thilhih mute na tate uh ahi kei uh. 6 Israelte khempeuh laka lei kamka a, Reuben mi Eliab' tapate Dathan leh Abiram, a innkawte utawh, a puanbukte uleh a neih a lamte utawh a valh laia, amaute tunga a thilhih mute na tate uh ahi kei uh. 7 Tangtawn Toupa' thilhih thupite khempeuh mute zaw noute' mitte ahi zaw hi. 8 Tua bang ahih manin, tuni-a noute kon piak thupiakte khempeuh zui un, tua bel, Jordan lui galkah a, tua gam lut a, luah dinga thahatna na neih nading uh ahi. 9 Tua baan ah, Tangtawn Toupa'n na pu na pate uh kiang leh a chisuante uh kianga piak ding chi-a a chiam, nawitui leh khuaizu-a luang gama na damsawt nading uh ahi. 10 Gam la dinga na lut dekna uh zaw, na pawtkhiaksan uh Aigupta gam, tua anteh louhing chiinna huan banga, na khaichite uh chiing a, khe-a pai a, na tuibuahna uh bang ahi kei. 11 Galkaha, na va luah ding gam uh zaw, mualte leh luiphaite omna gam, vaan vuahtui dawn gam ahi. 12 Tangtawn Toupa na Pathian un a kep gam ahi a, kum kipat chil apan kumtawp dong, Tangtawn Toupa, na Pathian uh' mit a tuk gigena ahi. 13 Tuachi-in, tuni-a thupiak kon piakte Tangtawn Toupa na Pathian uh it ding, lungtang khempeuh leh hinna khempeuha a nna sep ding chih, muanhuaitaka na zuih uleh, 14 tua chiangin, Tangtawn Toupa'n noute' gam tung ah, a hunhun-in vuahtui, vuah masa leh vuah nunung, hon sawl ding a, tuachi-in na buhte uh, na zuthakte uh, na sathaute uh na nawnlut ding uhi. 15 Na bawnghonte uh adingin gamlak loupate hon pe ding a, tuachi-in, ne leh ta-in na tai ding uhi. 16 Pilvang un, tuachi louin zaw khemkhiakin na om ding uh a, lampiala, pathian dangte' nna semin, a mai uah na kuun ding uhi. 17 Tua hun chiangin, noute tung ah Tangtawn Toupa' hehna a kuang ding a, vuah zuk louh nadingin vaante a khakbing ding a, lei in gah a suah kei ding a, Tangtawn Toupa'n hon piak ding gam hoih ah na mangthang pah ding uhi. 18 Tua bang ahih manin, na lungtangte uleh na lungsimte uah hiai ka thute keem tinten un. Na khutte uah chiamtehna hi dingin bun unla, na taltangte uah khim un. 19 Na tate uh kiang ah sinsak unla, inna na tut lai uleh, lampi-a na pai laiun, na lup chiangun leh na thawh chiangun tuate genin sinsak un. 20 Na inn kongkhak biang uahte leh na kongpite uah tuate gelh un. 21 Tuachi-in, Tangtawn Toupa'n na pu na pate uh kianga piak ding a chiam gam sung ah, lei tunga vaante om sung nite tama a sawt bangin noute damsung nite leh na tate uh damsung nite a sawt ding hi. 22 Noute zuih dinga kon piak hiai thupiakte khempeuh zui dinga na pilvan uh a, Tangtawn Toupa na Pathian uh it ding, a lampite khempeuh tot ding leh, amah letkip ding, chih na zuih uleh, 23 tua chiangin, Tangtawn Toupa'n noute' mai ah hiai namte khempeuh a hawlkhe ding a, noute sanga lianzaw leh hatzawte na vuak-suaksak ding uhi. 24 Khenuaia na sikna khempeuh uh noutea ahi ding. Na gam uh, gamdai-gamkeu apan Lebanon dong leh, Iufratis luipi apan tumlam tuipi dongin a kizalh ding hi. 25 Kuama'n noute hon nang zou kei ding. Tangtawn Toupa na Pathian un noute hon chiamsa bangin, leitung na paina peuhmah uah noute launa leh mulkimna a koih ding hi. 26 Ngai un, tuni-in noute' mai ah vualzawlna leh hamsia ka koih hi. 27 Tuni-a noute kon piak Tangtawn Toupa na Pathian uh' thupiakte na zuih uleh, vualzawlna na tang ding uh a, 28 Tangtawn Toupa na Pathian uh' thupiakte na zuih kei ua, na theihsa uh hilou pathian dangte zui a, tuni-a kon thupiak lampi na kiheisan uleh bel hamsia na tang ding uhi. 29 Luah dinga na lut dekna gam ua Tangtawn Toupa na Pathian un hon piilut chiangin, Gerizim Mual tung ah vualzawlnate na phuang ding uh a, Ebal Mual tung ah hamsiate na phuang ding uh ahi. 30 Na theih bangun, hiai mualte bel, Jordan lui gala, ni tumna lama paisuk lampi tumlam, Gilgal kiang leh More-a tawsaw singte kianga, Araba-a teeng Kanante gama om ahi. 31 Tangtawn Toupa na Pathian un noute hon piak ding gam luah dinga lut dek a, Jordan lui galkah dek na hi uhi. Tua gama lut a, na teen chiangun, 32 tuni-a noute' maia ka koih danthusehte leh dante khempeuh zui ngeingei dingin pilvang un.

Danpiakthakna 12

Teeltuam Biaknamun

1 Tangtawn Toupa, na pu na pate uh Pathian in noute luah dinga hon piak gama na teen sung teng ua, pilvangtaka na zuih ngeingei ding uh danthusehte leh dante hiaite ahi. 2 Tua na hawlkhiak ding uh namte'n mualsang tungte, mual niam tungte leh singhing nuai tenga, a pathiante uh a biakna munte uh na hihsiat sipsip ding uh ahi. 3 Amaute' maitamte hihchim unla, amaute' suang zek siangthoute khentam unla, amaute' Ashera songte meiin haltum un. Amaute' suihthawh milimte phuk unla, tua munte apan a minte uh phiatmang vek un. 4 Amaute' pathian biak dana Tangtawn Toupa, na Pathian uh na biak het louh ding uh ahi. 5 Tangtawn Toupa na Pathian un a teen nadinga, ama' Min a koih nading na beh na phungte khempeuh uh lak apan a teelkhiak ding mun na zongkhe ding uh ahi. Tua ah na hawh ding uh a, 6 tua ah na haltum thillatte uleh, kithoihnate, na sawma khatte uh leh na veithillatte uh, piak dinga na chiamsate uleh, ut thillatte leh ganhonte leh belam leh kelhonte apan piang masate non tawi ding uh ahi. 7 Tangtawn Toupa' na Pathian un noute hon vualzawlta ahih manin, Tangtawn Toupa mai ah, noute leh na inkawte un na khut sepgim gahte uh na ne ding uh a, na lungnuam ding uhi. 8 Tuni-a mi chih in hoih na sak bangbang ua, hiaia na hih dan bangun zaw na hih ding uh ahi het kei hi. 9 Tu'n bel, khawl tawldamna mun leh, Tangtawn Toupa na Pathian un hon piak ding gamgou luah ding mun na tun nai louh manun, hibanga hih tadih na hi uhi. 10 Ahihhangin, Jordan lui na kaan ding uh a, Tangtawn Toupa na Pathian un gouluah dinga hon piak ding gam ah na teeng ding uh a, na kim na pam ua na melmate khempeuh uapan tawlngakna hon pe ding a, bittakin na nungta ding uhi. 11 Tua hun chiangin, Tangtawn Toupa na Pathian un ama' Min tenna dinga a teel ding mun ah, noute' tawi ding chi-a hon thupiak peuhmah non tawi ding uh ahi. Tuate bel, na haltum thillatte uleh, na kithoihnate uh, na sawma khatte uleh, na vei thillatte uleh, Tangtawn Toupa kianga na chiamsa uh na neih na lam uh a hoihpente khempeuh non tawi ding uh ahi. 12 Tua ah, noute leh na tapate uleh, na tanute uh, na sila pasalte uh, na sila numeite uh leh, na khawpite ua teeng noute laka tantuan leh goutan neilou Levite tawh, Tangtawn Toupa na Pathian uh mai ah lungnuam un. 13 Noumau' utna mun muna na haltum thillatte uh laan mawkmawk lou dingin pilvang un. 14 Tangtawn Toupa'n na beh na phungte uh khat gama a teel ding mun kia ah, tuate laan zaw unla, noute zuih dinga kon thupiak peuhmah zui zaw un. 15 Na gante uh gawh thu ah bel, Tangtawn Toupa na Pathian un vualzawlna hon piak bangbangin, na khawpite uh khat peuh ah na gou thei ding uhi. Sazate hiam, sazukte hiam na mat ua na nek bangbangun na ne ding uhi. Daan banga a sianga ngaihte leh a siang loua ngaihte'n zong a ne thei ding uhi. 16 Ahihhan gin, gan sisan na ne ding uh ahi kei hi. Gan sisan zaw lei laka tui sunbuak bangin na sungbaw ding uh ahi. 17 Na buh uh, na zu thak uh, na sathau uh sawma khat noumau khawpite ah na ne ding uh ahi kei. Ahih kei leh, na ganta uh leh na belam leh na kelhonte uapan piang masate, ahih kei leh, piak ding na chiamsa uh, ahih kei leh, na ut thillatte uh, ahih kei leh, na vei thillatte uh, noumau' khawpite ah na ne ding uh ahi kei. 18 Tuate bel, Tangtawn Toupa na Pathian un a teel ding mun ah, noute, na tapate uh, na tanute uh, na sila pasalte uh, na sila numeite uleh na khawpite ua teeng Levite tawh na ne ding uh ahi. Na sepgim gahte peuhmah uh Tangtawn Toupa na Pathian uh mai ah nuamin na ne ding uh ahi. 19 Noumau' gama na teen sung peuhmah uh, Levite ngaihsak louha koih lou dingin pilvang un. 20 Tangtawn Toupa na Pathian un hon chiamsa banga, na gam uh a keeklet chianga sa lunggulh a: Sa duh nang e, na chih chiangun, na duh bangbang uh na ne thei ding uhi. 21 Tangtawn Toupa na Pathian un a Min koih nadinga a teelna mun, noute adinga a gamlat luat leh, kon thupiak bangin, Tangtawn Toupa' hon piaksa ganhonte leh belam leh kelhonte lak apan gante na gou thei ding uh a, noumau' khawpite ah na duh zahzah uh na ne thei ding uhi. 22 Sasante leh sazukte na nek bangun ne un. Dan banga a sianga ngaihte leh a siangloua ngaihte'n zong a ne thei ding uhi. 23 Ahihhangin, a sisan bel ne kei peuh le uchin. Ahang bel, sisan pen hinna hi a, a sa tawh a sisan nekkhawm louh ding ahi. 24 Sisan zaw na nek ding uh hilou ahi. Tui bangin leilak ah sung bua un. 25 Sisan ne kei un. Hi leh, noute leh na nung ua na tate uh adingin a hoih ding hi. Ahang bel, Tangtawn Toupa' mitmuha a dik hih hi ding hi ve uchin. 26 Ahihhangin, na sehtuam siangthousate uleh lat dinga na chiamsate peuhmah uh tawi unla, Tangtawn Toupa'n a teel ding mun ah paipih un. 27 Na haltum thillatte uh na lan ding uh ahi. Tangtawn Toupa na Pathian uh' maitam tung ah, a sa leh a sisan non tawi ding uh a, siampite'n a sisan pen Tangtawn Toupa' maitam pang ah a sungbaw ding uh a, a sa bel, na ne thei ding uhi. 28 Hiai thupiak kon piakte khempeuh zui dingin pilvang un. Hi leh, noute leh na nung ua na tate uh adingin a hoih gige ding hi. Ahang bel, Tangtawn Toupa na Pathian uh' mitmuh-a a dik leh a hoih hih hi ding hi ve uchin.

Milim Biak Khamna

29 Tangtawn Toupa na Pathian un, luah dinga na lut dekna gam ua namte noute' maia a satkhiak chiangin a gam uh na luah ding uhi. 30 Amaute na hihmanthat nung chiangun, amaute' pathiante' thu kana thangawk lou dingin pilvang un: Hiai namte'n a pathiante uh bangchi biak ahi ua? Eite'n zong amaute hih bangbangin hih ni, chi lou dingin pilvang un. 31 Amaute biak danin Tangtawn Toupa na Pathian uh be kei un. Ahang bel, amaute'n a pathiante uh bia a, Tangtawn Toupa' kih thil tampi hih uh ahi. A tapate uleh a tanute uh, a pathiante uh maia meia hal nangawn hal uh a, laan uhi. 32 Kon thupiak khempeuh zui teitei dingin pilvang unla, behlap lah behlap kei unla, khep lah khiam kei un.

Danpiakthakna 13

Pathian Dang Biak Kikhamna Dan

1 Noute laka kamsang hiam, mang nei mi hiam hong om a, chiamtehna lamdang hiam, thillamdang hiam a genkholh a, 2 tua a gente hong tun taktak a: I theih ngeilouh pathiante zui ni, amaute bia ni, a chih leh, 3 tua kamsangpa hiam, mang neipa hiam' thugen na ngaihkhiak hetlouh ding uh ahi. Tangtawn Toupa na Pathian un lungtang khempeuh leh hinna khempeuh-in amah na it uhiam, chih hon ze-etna ahi. 4 Tangtawn Toupa na Pathian uh ahi na zuih ngeingei ding uh. Amah mah zahtaaka na lau ngeingei ding uh ahi. Ama' thupiak zui unla, ama' thu mang un. Ama' nna sem unla, amah lenkip un. 5 Tua kamsang hiam, tua mang neipa hiam thah ngeingei ding ahi. Ahang bel, ama'n Aigupta apan hon piikhia a, saltanna apan hon tankhepa tunga hel ding thu gen hiven. Ama'n, Tangtawn Toupa na Pathian un zuih dinga hon thupiak lampi apan noute hon pialmangsak sawm ahi. Noute lak apan thil gilou na phiatsiang ngeingei ding uh ahi. 6 Na nu' tapa na sanggampa mahmah, na tapa mahmah, na tanu mahmah hi-in, na it na zi, ahih kei leh, na lawm naipen nangawn hita leh, tua bang mi in a sima hon zol a: Kisa ni-in, pathian dangte' nna vasem ni, a chih leh mang kei un. Noute hiam, na pu na pate uh hiam in na theih ngei louh uh pathiante, 7 na kim na pam ua, lei mong khat apan lei mong dang donga om namte' pathiante mah gen ahi. 8 Tua banga hon zol mi zui kei unla, ngaih zong ngaikhe kei un. Tua bang mi zaw lainat zong lainat kei un. Hinghawi kei unla, gup zong gum kei un. 9 Tua naksanga tua bang mi na thah ngeingei ding uh ahi. Amah that dinga khut lik masa-a na pan ding uh, tua khit chianga mi dang khempeuh in khut a lik ding uh ahi. 10 Tua bang mi in saltanna mun Aigupta gam apan noute hon piikhepa, Tangtawn Toupa na Pathian uapan hon piimang sawm ahih manin, suangin denglum un. 11 Tua khit chiangin, Israelte khempeuh in a za ding uh a, a lau ding uh a, noute laka kuamah in tua bang thil gilou a hih nawn kei ding hi. 12 Tangtawn Toupa na Pathian un na teen nading uh khawpite hon pe ding hi. 13 Noute laka migiloute hong om a, na theih louh uh pathian dangte gen a: Kisa ni-in, pathian dangte' nna sem ni, chi-a khawpi mipite piimang om ahi, chi-a kigen na zak uleh, 14 tua thu na kantel ngeingei ding uh ahi. A dik mah a na hih a, noute laka hibang thil kihhuai kihih ahi, chih kitelna kimu a hih peuhmah leh, 15 tua khawpi-a teengte khempeuh namsaua na thah ngeingei ding uh ahi. Tua khawpi leh a sunga omte khempeuh, a mihingte leh gantate tawh hihmangthang vek sipsip un. 16 Tua khawpi-a neih leh lam omte khempeuh, khawpi laizang ah koihkhawm unla, tua khawpi haltum un. Tua khawpi sunga neih leh lam kaihkhawmte bel, Tangtawn Toupa na Pathian uh mai ah haltum sipsip un. Tua khawpi zaw, khawpi sia-a omden dinga hamsiat ahi. 17 Tua hamsiat thil bangmah na khut uah a kimu ding ahi kei. Tua bel, Tangtawn Toupa'n a thangpaihna kuang lauhuai a kiheisan theih nading ahi. Tuachi-in, na pu na pate uh kianga a chiamsa bangin, ama'n zahngaihna hon musak ding a, na tung uah lainatna a nei ding a, noute hon pungsak ding hi. 18 Ahang bel, tuni-a noute kon piak Tangtawn Toupa na Pathian uh' thupiakte khempeuh zuia a thu na man uleh, Tangtawn Toupa na Pathian uh' mitmuha a dik hih na hi ding uhi.

Danpiakthakna 14

An tawh kisai Dan

1 Noute zaw, Tangtawn Toupa na Pathian uh' tate na hi uh ahi. Misite hangin na sa uh ki-at kei unla, na maibawk sam uh zong tan kei un. 2 Ahang bel, Tangtawn Toupa na Pathian uh adinga nam siangthou hi uchin a, leitung maikaih-a namte khempeuh lak apan Tangtawn Toupa'n ama' gou manpha hi dinga hon teelkhiak hi ve uchin. 3 Thil kihhuai himhim ne kei un. 4 Na nek theih ding uh ganhingte hiaite ahi: Bawngtal, belam leh kei, 5 sazuk, saza, sakhi, gam kei, sathak, gam bawngtal leh gam belam. 6 Khechin niha ka, eknel hai ganhingte sa na ne thei ding uhi. 7 Ahihhangin, eknel hai hi lei hiam, khechin ka hi lei hiam na nek louh ding uh ahi. Tuate lak ah, sangawngsau, bilpi leh sakik a tel uhi. Tuate bel eknel hai hi napi-in, khechin niha ka ahi kei uh a, noute adinga a sianglou ahi. 8 Vok zong noute adinga sianglou ahi. Khechin niha ka a hih hangin, eknel hai lou ahi. A sa na nek louh ding uh, a siluang zong na lawnkhak louh ding uh ahi. 9 Tui laka teeng ganhing na nek theih ding uh hiaite ahi: Pheh leh lip neite na ne thei ding uhi. 10 Ahihhangin, pheh leh lip nei lou peuhmah na ne thei kei ding uhi. Noute adingin a sianglou ahi uhi. 11 Vasa sa siang peuhmah na ne thei ding uhi. 12 Ahihhangin, hiaite na ne thei kei ding uhi: Muvanlai, musane, musane vom, 13 musi san, musi vom, mupi vom nam khempeuh, 14 va-ak nam khempeuh, 15 gamdai vapi, mu meika, tuiva, mu meika peuhmah, 16 simbutanglit, simbupi, simbu kaang, 17 gamdai simbu, sasial ne vasa, tui mu, 18 lui vakengsang, tuivapi nam peuhmah, va-singdangtu leh baak. 19 Ahona ta, a lengthei ganhing neute peuhmah noute adinga a sianglou ahi. Tuate ne kei un. 20 Ahihhangin, ganhing siangte bel na ne thei ding uhi. 21 Ganhing amaha sisa-a kimu peuhmah ne kei un. Na khawpite uh khat peuha teeng gamdang mi na pe thei ding uh a, ama'n a ne thei ding hi. Ahih kei leh, mikhual kiang ah na zuak thei ding uhi. Ahihhangin, noute zaw Tangtawn Toupa na Pathian uh adinga nam siangthou tuam na hi uhi. Kelnou, a pi nawituiin huan kei un.

Sawma Khat tawh kisai Dan

22 Kumsimin na lou ua na haichin ua pana piang khempeuh laka sawma khat koihkhia teitei un. 23 Na damsung teng ua, Tangtawn Toupa na Pathian uh zahtaka lau dan na siam theih nadingun, ama'n a Min om nadinga a teel mun ah, na buhte uh, zuthakte, sathaute, na gantate uh leh belam leh kelte laka piang masate laka sawma khatte Tangtawn Toupa na Pathian uh mai ah ne un. 24 Ahihhangin, tua mun pen noute adinga gamla lua ahih a, Tangtawn Toupa na Pathian un lah hon vualzawl mahmah a hih a, Tangtawn Toupa'n a Min om nadinga a teel mun noute adinga gamla lua ahih mana na sawma khatte uh va paw zoulou na hih uleh bel, 25 na sawma khatte uh sum suah unla, tua sum tawiin, Tangtawn Toupa na Pathian un a teel mun ah hawh un. 26 Na lunggulh peuh uh lei nadingin tua sum zang un. Bawng, belam, zu, ahih kei leh silngou sawh dawn theih, ahih kei leh, na lunggulh peuh peuh uh lei un. Tua khit chiangin, noute leh na innkawte un, tua mun ah, Tangtawn Toupa na Pathian uh mai ah tuate na ne ding uh a, na lungnuam ding uh ahi. 27 Na khawpite ua teeng Levite na mangngilh louh ding uh ahi. Ahang bel, amaute'n gam piak tan, ahih kei leh, noute banga goutan tuam nei lou uh hiven. 28 Kum thum chin kum a bei tengin, tua kuma piang laka sawma khatte khempeuh hon pua unla, na khawpite uah koihkhawm un. 29 Tua bel, na lak ua gam piak tanglou, ahih kei leh, amau' gou tan tuam neilou Levite leh gamdang mite, pabeite leh meigongte, tua na khawpite ua teengte hong pai a, a nek ua a tai nading uleh, Tangtawn Toupa na Pathian un noute na khut nasepte khempeuh ua hon vualzawl theih nading ahi.

Danpiakthakna 15

Leibat tawh kisai Dan

1 Kum sagih a chin kum tengin, leibatte na maisak ding uh ahi. 2 A hih ding dan hibang ahi: A leitawisak mi peuhmah in, a Israel mi hihpih a leitawisak a, a batsak peuhmah a maisak ding ahi. Leibatte maisak nading Tangtawn Toupa'n phuangkheta a hih manin, ama'n a Israel mi hihpih hiam, a sanggam hiam in a dit ding a ngiat ding ahi kei hi. 3 Mikhual apan bel leibat dit ding na ngiat thei hi. Ahihhangin, na sanggam in hon bat peuhmah bel na maisak ding ahi. 4 Ahihhangin, Tangtawn Toupa na Pathian un, goutana na luah ding ua hon piak ding gama, nakpitaka noute hon vualzawl ding a hihmanin, na lak uah a tasam a om kei ding hi. 5 Tua bel, Tangtawn Toupa na Pathian uh' thu na man taktak uh a, tuni-a kon piak hiai thupiakte khempeuh pilvangtaka na zuih peuhmah uleh chihna ahi. 6 Ahang bel, Tangtawn Toupa na Pathian un hon chiamsa banga, noute hon vualzawl ding a, namdang tampite leitawisak ding uchin a, kuamah apan leitawi lou ding na hi uhi. Nam tampi uk ding uchin a, kuama'n noute hon uk lou ding ahi. 7 Tangtawn Toupa na Pathian un, noute hon piak ding gam sunga khawpi khatpeuha, na sanggamte uh laka tasam a om leh, tua a tasam na sanggam tung ah, lungtang taak leh sumchiilin om ken. 8 A tung ah thilphal inla, a taksap awng hu ding leitawisak in. 9 Leibat maisak nading kum sagih naita, chi-a lungsim gilou pu om lou dingin pilvang un. A tasam sanggam tunga tua bang deihsak louhna lungsim pu a, bangmah pe loua na om louh ding uh ahi. Tua chi louin zaw, ama'n na lang pang lamin Tangtawn Toupa kiang ah a thuum kha ding a, mi khial na hi ding uhi. 10 Itpipi hilouin, phaltakin pia in. Tua hi leh, hiai hanga Tangtawn Toupa na Pathian un, na nasep khempeuh uleh na khut ngakna khempeuh uh hon vualzawl ding ahi. 11 Na gam sung ua lah a zawngte om gige ding ahih mana, na gam sung ua na sanggamte uh, a zawngte, a tasamte lama thilphal dinga thu hon pia ka hi.

Silate tawh kisai Dan

12 Na Hebru mi hihpih uh, pasal hi-in, numei hita leh, na sal hi dinga hong kikhotkhiak a, tua banga na nna kum guk sung a sep leh, a kum sagihna-a na noplensak a, na suahtaksak ngeingei ding ahi. 13 Tua banga na khahkhiak chianga, khutvuaka na paisak louh ding ahi. 14 Thilphaltakin na belamhonte lak apan, na buhphual apan leh na grep sukna khuk apan thil na piak ding ahi. Tangtawn Toupa na Pathian un hon vualzawl bangbanga, amah na piak ding ahi. 15 Noute zong Aigupta gama sala omte na hih dan uleh, Tangtawn Toupa na Pathian un hon tat dan thei gige un. Tua hang mah ahi, tuni-a hiai thupiak noute kon piak. 16 Ahihhangin, na sila in nang leh na innkawte hon it a, noute tawh om nuam a sak a: Noute kon nuse nuam kei, a chih leh, 17 tukkilh khat lain, a bil teep, kongkhaka phahin na vut pailet ding a, tuachi-in, a damsung teng na sila a hiden ding hi. Sila numei ahih leh zong tua bang mahin hih in. 18 Na sila in kum guk sung na nna a sep pen, sum thalawha goih mi' nasepkhiak zah lehnihin kithaman mahleh, amah khaha noplensak ding thil haksain ngaihsun ken. Tangtawn Toupa na Pathian un na sep peuhmah-a hon vualzawl na ding ahi.

Ganta Piangmasa tawh Kisai

19 Na bawnghon leh, na belam leh kelhon laka piang masa peuhmah, Tangtawn Toupa na Pathian uh adingin koihkhia in. Na bawngtal piang masa zaw nna semsak ken. Na belam piang masa zong a mul met ken. 20 A kumsimin tuate Tangtawn Toupa na Pathian uh mai ah, ama' teel ding mun ah, nang leh na innkawte'n na nek ding uh ahi. 21 Na ganta melhemna nei a, a khebai hiam, a mittaw hiam ahih a, chinlahna nasetak nei ahih peuhmah leh, Tangtawn Toupa na Pathian uh maia thillata na lat louh ding uh ahi. 22 Noumau' khawpite ah na ne ding uh ahi. Dan banga a siangloua ngaih leh a sianga ngaihte'n, saza leh sazuk bangin, tuate a ne thei tuak ding uhi. 23 Ahihhangin, a sisan bel na nek louh ding uh ahi. Leilak ah tui sunbuak bangin sung bua un.

Danpiakthakna 16

Ankuangluite tawh kisai Dante: Paikan Ankuang

1 Abib kha tang unla, Tangtawn Toupa na Pathian uh' Paikan ankuang lui un. Ahang bel, tua Abib kha, zan laitaka Tangtawn Toupa na Pathian un, Aigupta gam apan noute hon piikhia hiven. 2 Tangtawn Toupa na Pathian uh mai ah Paikan kithoihna thillat dingin, na belamhon lak uapan hiam, na bawnghon lak uapan hiam, gan khat laan un. Tua bel, Tangtawn Toupa'n Ama' min om nadinga a teel ding mun ah na laan ding uh ahi. 3 Tua Paikan Ankuang bel, silngou sawh tanghou tawh ne kei un. Ni sagih sung, silngou sawhlouh tanghou, thuakna haksatna tanghou, ne un. Ahang bel, kin leh buanga Aigupta gam nusia na hi uhi. Aigupta gam apan na pemkhiak hun uh, na damsung teng ua na theih gige nading uh ahi. 4 Ni sagih sung peuhmah, na gamsung khempeuh uah silngou himhim na lak uah kimu het kei hen. Ni khat ni nitaklama na kithoihna sa himhim uh, a zing chiang zingsang donga siit omsak het kei un. 5 Tangtawn Toupa na Pathian un noute hon piak ding khawpi khatpeuh peuha, Paikan kithoihna na lat mawkmawk het louh ding uh ahi. 6 Ama'n ama' Min om nadinga a teel ding mun loungal ah lan kei un. Tua ama' teel ding mun ah, nitaklam nitum chiangin, Aigupta apan nong pemkhiak uh hunchin ni-in, tua Paikan kithoihna thillat laan un. 7 Tangtawn Toupa na Pathian un a teel ding mun ah, tua kithoihna sa em unla, ne un. Tua khit a zingsang chiangin na puanbukte uah chiahkik un. 8 Ni guk sung, silngou sawhlouh tanghou ne unla, a ni sagih ni-in, Tangtawn Toupa na Pathian uh mai ah khawmpi siangthou nei unla, nna sem kei un.

Nipikalte Ankuang

9 Buh at dinga kawite na golh ni uapan, tua nipikal sagih na simtou ding uh ahi. 10 Tua khit chiangin, Tangtawn Toupa'n noute hon vualzawl dandan apan ut thillat lanin, Tangtawn Toupa na Pathian uh mai ah, Nipikalte Ankuang na lui ding uh ahi. 11 Tangtawn Toupa na Pathian un, ama' Min om nadinga a teelna mun ah, ama' mai ah nuamin om un. Tua ah, tua hunin noute leh na tapate uleh na tanute uh, na sila pasalte uleh na sila numeite uh, na khawpite ua teeng Levite, na lak ua om gamdang mite, pabeite leh meigongte tawh nuamin kipak un. 12 Aigupta gama sala na om na hi uh, chih thei gige unla, hiai danthusehte pilvangtakin zui un.

Bawktate Ankuang

13 Na buhphual ua ante leh na grepsukna khuk ua thilpiangte na khopkhawm khit chiangun, ni sagih sung Bawktate ankuang lui un. 14 Tua Ankuang ah, noute leh na tapate uleh na tanute uleh na sila pasalte uleh na sila numeite uh, na khawpite ua teeng Levite, gamdang mite, pabeite leh meigongte tawh nuam un. 15 Tangtawn Toupa'n a teel ding mun ah, Tangtawn Toupa na Pathian uh mai ah, ni sagih sung tua ankuang lui un. Ahang bel, Tangtawn Toupa na Pathian un na an lak khempeuh uleh na khut nasep khempeuh uah noute hon vualzawl ding a, na lungnopna uh kim ding ahi. 16 Tangtawn Toupa na Pathian un a teel ding mun ah, kum khatsungin thumvei, Ama' mai ah pasal khempeuh nong kilang ding uh ahi. Tuate bel, Silngou sawhlouh Tanghou Ankuang, Nipikalte Ankuang, Bawktate Ankuang lui hunte ahi. Tangtawn Toupa' mai ah, kuamah khutvuakin nong kilang ding uh ahi kei. 17 Tangtawn Toupa na Pathian un vualzawlna hon piak dan tawh kikhomin, thawnpiak non tawi tek ding uh ahi. Thukhen Vaihawmte tawh kisai Dan 18 Tangtawn Toupa na Pathian un hon piak ding khawpite khempeuh ah, na namte tek uh ading thukhen mite leh uliante sep un. Amaute'n na mite uh tunga, a dik a tanga vaihawmin thu a khen ding uh ahi. 19 Dika thukhenna kaikawi kei un. Deihsaktuam zong nei kei un. Golhgukna sum ne het kei un. Golhgukna in mipilte' mit tawsak a, mi diktatte' thu kaikawi ahi. 20 Tangtawn Toupa na Pathian un noute hon piak ding gama teeng a, na luah theih nadingun, thudika vaihawm, ahi, thudika vaihawm kia zui un.

Pathian Dang Biak Khamna

21 Tangtawn Toupa na Pathian uh maia nou adinga na dawh uh maitam kiang ah, nou ading Ashera song himhim kiphuh kei unla, 22 biak ding suang himhim zong kiphuh kei un. Tangtawn Toupa na Pathian un hiaite kih ahi.

Danpiakthakna 17

1 Tangtawn Toupa na Pathian uh mai ah, melhemna hiam, genbaanna hiam nei bawngtal hiam, belam hiam laan kei un. Tua bangte Tangtawn Toupa' adinga kihhuai hi ding ahi. 2 Tangtawn Toupa'n hon piak ding khawpite khat peuha teeng pasal hiam, numei hiam khatpeuh in, Tangtawn Toupa na Pathian uh mitmuha thilgilou hih a, a thukhun manglou a kimuh leh, 3 kon thupiak tawh kikalh-a pathian dangte' nna sem a, a biak leh, ahih kei leh, ni hiam khapi hiam, vana aksite hiam bia a kimuh a, 4 na kiang ua hong kigen leh, limtakin na kankhe ding uh ahi. Na kankhiak ua, a tak a na hih a, Israela hibang thil kihhuai kihih taktak ahih leh, 5 hiai bang thil gilou hih pasal hiam, numei hiam, na khawpi kongpi uah piikhia unla, suangin denglum un. 6 Ahihhangin, mi thah ding bel, theihpih mi nih hiam thum hiam theihpihna thu pansana thah ding ahi. Theihpih mi khat kia theihpihna thu pansana kuamah thah ding ahi kei hi. 7 Tua banga mi thah ahih chiangin, theihpih mi-a pangte mah khut kha masain a pang ding uh a, tua khit chiangin midangte khempeuh in khut a kha ding uh ahi. Noute lak apan thil gilou na koihkhiak ding uh ahi.

Thukhenna Mun

8 Na khawpite ua, noute adinga thukhen ding haksa lua thubuai na mai ua hong tun leh sisan suahna thu, kihek kipeina thu hi-in, kivuak thu hita leh, Tangtawn Toupa na Pathian un a teelna mun na tun ding uh ahi. 9 Siampi-a pang Levite kiang hiam, tua hun laia thukhena tumi hiam kiang ah thukhen dingin tun un. Amaute dong le uchin, amaute'n thukhenna ding hon hilh ding uhi. 10 Tua banga Tangtawn Toupa'n a teelna muna thukhenna bangbang na zuih ding uh ahi. Thil hih dinga hon piakte peuhmah uh hih teitei dingin pilvang un. 11 Hon sinsak uh dan bangbang leh, thukhenna hon piak bangbang-un gamta un. Noute hon piak uapan taklam ah hiam, veilam ah hiam pial kei un. 12 Tangtawn Toupa na Pathian uh maia a nna sema ding thukhen mi hiam, siampi hiam thuman lou a, kisathei taka gamta mi peuhmah thah ding ahi. Israel gamsung apan hibang thil gilou na koihmang ding uh ahi. 13 Mi khempeuh in tua a za ding uh a, a lau ding uh a, kisathei takin a gamta nawn kei ding uhi.

Kumpipa Vaihawmna Dan

14 Tangtawn Toupa na Pathian un hon piak ding tua gam sung lut a, luah a, na teen chiang ua: I kim i kianga namte khempeuh bangin eite tung ah kumpipa khat tungkhia ni, na chih chiangun, 15 Tangtawn Toupa na Pathian uh' teel mi mahmah noute tunga kumpipa hi dingin tungkhe teitei un. Tua bang mi bel, noute' sanggam khat a hih peuhmah ding ahi. Na Israel mi hihpih uh hilou, mikhual peuh noute tunga om dinga na tunkhiak het louh ding uh ahi. 16 Tua ban ah, kumpipa'n ama' adingin sakol tampi a kaikhawm ding ahi kei. Ahih kei leh, sakol zong dinga Aigupta gama kik dingin mite a sawl ding ahi kei. Ahang bel, Tangtawn Toupa'n: Tua lama na kik nawn louh ding uh ahi, chi-a noute hon hilhkhin hiven. 17 Ama'n zi zong tampi a neih ding ahi kei. Tuachi louin zaw, a lungtang piimangin a om ding hi. Ngun leh kham zong tampi a khawm ding ahi kei hi. 18 A kumpigama kumpitutphah tunga a tut chiangin, siampi-a pang Levite apan kila hiai dan teisawna, amah adinga laibuziala a gelh ding ahi. 19 Tua dan ama' kianga a om gige ding, a damsung teng a sim gige ding ahi. Tuachi-in, Tangtawn Toupa a Pathian lau dan a sin thei ding a, hiai dan thute khempeuh leh danthusehte pilvangtakin a zui thei ding a, 20 a sanggamte sanga hoihzawin a kingai kei ding a, dan apan taklam hiam, veilam hiam ah a pial kei ding hi. Tua nungin, a kumpigam Israel tung ah amah leh a suante'n sawtpi vai a hawm ding uhi.

Danpiakthakna 18

Siampite leh Kamsangte

1 Levi mi, siampi-a pang Levi nam khempeuh in Israel ah gam piak, ahih kei leh, goutan a nei kei ding uhi. Ahang bel, Tangtawn Toupa' maia meia thillatte-a kivak ding uh a, tuate mah amaute' goutan hi ding hiven. 2 A sanggamte uh lak ah goutan a nei kei ding uhi. Amaute kianga gensa bangin, Tangtawn Toupa mah amaute' goutan ahi ding ahi. 3 Bawngtal hiam, belam hiam laante apana siampite' tan ding na piak dingte uh hiai ahi: a Hang, a biangte gel leh a sungkuate. 4 Na buh na bal uh gahmasate, na zu thak uleh na sathau thak uleh, na belam mulmet khiak masak uh, amaute na piak ding uh ahi. 5 Ahang bel, Tangtawn Toupa na Pathian un, amaute leh a tapate uh, Tangtawn Toupa maia dinga a mina nasem gige dinga, na namte uh khempeuh lak apan teel hiven. 6 Levi mi khat, Israel gamsunga khawpite koipeuha a teenna apan a peemkhiak a, Tangtawn Toupa' teelna muna lunglawptaka hong pai leh, 7 tua muna Tangtawn Toupa' maia dinga a nasemsa, a Levi hihpihte khempeuh bangin, Tangtawn Toupa a Pathian' minin a sem thei ding hi. 8 A innsung thil neihte zuakna sum na muta mah leh, a hong tunna-a Levite' hamphatnate ah tan a nei sam ding ahi.

A Kihhuai Gamtatnate

9 Tangtawn Toupa na Pathian un hon piak ding gam sung na lut chiangun, tua gama namte' thilhih kihhuaite zui kei un. 10 Noute lak ah a tapa hiam, a tanu hiam meia paisaka laan hiam, mang aisan chiing hiam, mitkhialdawi tawi hiam, bum hiam, vaang et chiing hiam, 11 dawiai tawi hiam, misisa houpih hiam, khate zawl hiam, misisate thu dong thei hiam, muhin a om ding ahi kei hi. 12 Hiai thilte hih mi peuhmah Tangtawn Toupa adinga kihhuai ahi. Hiai kihhuaite a hih man ua, Tangtawn Toupa na Pathian un amaute na mai ua hawlkhe ding ahi. 13 Noute zaw, Tangtawn Toupa na Pathian uh maia gensiatbei leh genbaangloua na om ding uh ahi.

Kamsang

14 Na hawlkhiak ding uh namte bel, bum chiingte, ahih keileh, mang aisan chiingte ngaihsakte ahi uhi. Noute zaw, Tangtawn Toupa na Pathian un hibangte hih dinga hon phallou ahi. 15 Tangtawn Toupa na Pathian un, na sanggam mahmahte uh lak apan kei bangbang kamsang khat noute adinga tungkhe ding ahi. Amah na ngaihkhiak ngeingei ding uh ahi. 16 Ahang bel, Horeba khawmpi a om laia, Tangtawn Toupa na Pathian uh kianga na nget uh hiai mah hiven. Tua lai ah noute'n: Tangtawn Toupa ka Pathian uh' aw hon zasak nawn ken, hiai meikuang thupi hon musak nawn ken, ka si kha ding uh, na chi uhi. 17 Tangtawn Toupa'n ka kiang ah: A thugen uh a hoih hi. 18 A sanggamte uh lak apan nang bangbang kamsang khat ka tungkhe ding a, a kam ah ka thute ka koih ding a, amah ka thupiak peuhmah ama'n amaute a hilh ding hi. 19 Tua kamsang in keima' mina a genkhiak thute ngaikhe lou mi peuhmah, keima'n ka ngaihtuah ding hi. 20 Keima' mina thugen kichi kamsang a om a, gen ding ka piak hilou a gen a, ahih kei leh, pathian dangte' mina thugen kamsang kichi a om leh, tua bang kamsang thah teitei ding ahi, chi ahi. 21 Thu kigen pen Tangtawn Toupa apan hilou ahi, chih bangchi-a theithei ding i hia na chi mai thei uhi. 22 Tangtawn Toupa' min siala kamsang in thu a phuan tung taktak lou hiam, hong diklou hiam ahih leh, tua thu Tangtawn Toupa' gen hilou ahi ding. Tua kamsang in kisathei taka a upmawh thu gen ahi lei a, amah lau het kei un.

Danpiakthakna 19

Bukna Khawpite

1 Tangtawn Toupa na Pathian un a hon piak ding gama namte a hih manthat khit chiangin leh, amaute hawlkhia a, a khawpite uleh a innte uh na luah chiangun, 2 tua hun chiangin, Tangtawn Toupa na Pathian un na luah ding ua hon piak ding gamsung laizang deuha om, khawpi thum septuam un. 3 Tuate zot nading lampite sial unla, Tangtawn Toupa na Pathian un gouluah dinga hon piak ding gam sehthum suah un. Tuachi-in, mi that kha kuapeuh tua mun ah a taailut thei ding hi. 4 Midang that a hinna hu dinga tua muna taailut mi tawh kisai dan hiai ahi. Tua bel, tupkholhna gilou hilou a, tupkholh louha a inveng that kha mi chihna ahi. 5 Etsak nadingin, mi khatpeuh, a inn vengpa tawh sing sat dingin gamlak ah a hawh thei hi. Sing phuk dinga a heipi a liik takin, a heitang kitolin a innvengpa dengkhain a that kha thei hi. Tua bang mi pen, hiai khawpite khat peuha taailutin a hinna a hu thei hi. 6 Tua bang hi kei leh, sisan phulami in, heh lua-in tua mipa delh leh, gamla lua ahih manin, sitak hilou napi-in, muhdahna gilou nei masa-a a innvengpa that hi lou napi-in, tua sisan phulapa'n amah that kha ding hi. 7 Hiai hang ahi, noute adinga khawpi thum kisehkhiak tuam dinga thu kon piak. 8 Tangtawn Toupa na Pathian un, na pu na pate uh kianga kichiam zena a na chiamsa banga na gam uh a keklet a, amaute a na chiamsa tua gambup hon piak leh, 9 chih bel, Tangtawn Toupa na Pathian uh it ding leh, ama' lampite zuih gige ding thu, tuni-a hon piak dante khempeuh pilvangtaka na zuih uleh, chihna ahrhiai khawpi thumte baan ah noute adingin khawpi thum dang behlap un. 10 Tuachi-in, Tangtawn Toupa na Pathian un gouluah dinga hon piak gam sung ah, na lak uah mawh neilou' sisan a kisuah kei ding a, sisan mawh noute tung ah a om kei ding hi. 11 Ahihhangin, a innveng mudah mi khatpeuh omin, ama'n tua a innveng buka sualin that henla, tua khitin hiai khawpite khat ah taai taleh, 12 tua khawpi upate'n mi sawlin amah a kaikhesak ding uh a, amaute'n tua mipa a sih theih nadingin, sisan phula mi khut sung ah a pekhe ding uh ahi. 13 Amah na lainat ding uh ahi kei a, noute adinga a hoih nadingin, Israel gam apan mawhneilou' sisan suahna na hihsiang ding uh ahi. 14 Tangtawn Toupa na Pathian un, na luah ding ua hon piak na goutan uh sunga na pu na pate' goutana koihsa, na innveng tawh kala gamgi suang na suan ding ahi kei hi.

Theihpihmi tawh Kisai

15 Mi khat thulimlouhna thu, ahih kei leh, khelhna khat peuh a na hih thu ah, mi khat kia theihpihna pansana mawhtansak ding ahi kei. Theihpih mi nih hiam, thum hiam pansan kiain thu a kikipsak ding ahi. 16 Mi khatpeuh thil hihkhiala ngawh dinga, tup gilou nei theihpih mi a din leh, 17 tua bang kingawhna neite gel, Tangtawn Toupa' maia tua huna semlel siampite leh thukhenmite' mai ah a ding tuak ding uh ahi. 18 Thukhenmite'n tua kingawhna thu limktakin a kantel ding uh ahi. Ngai in, theihpihmia ding pen theihpih taklou a hih a, a sanggam dikloupi-a ngawh a hih leh, 19 ama'n a sanggam tunga hih a tup bangbang, ama' tunga na hih ding uh ahi. Tua bangin, na lak uapan thil gilou na hihsiang ding uh ahi. 20 Midangte'n tua zain a lau ding uh a, na lak uah tuabang thil gilou a hih kei ding uhi. 21 Tua bang thu ah lainatna na lah ding uh ahi kei: Hinna taanga hinna, mit taanga mit, ha taanga ha, khut taanga khut, khe taanga khe ahi ding ahi.

Danpiakthakna 20

Kidouna tawh Kisai

1 Na melmate uh dou dinga na kuan chiang ua, sakolte, kangtalaite leh noute sanga tamzaw mite na muh chiangun, amaute lau kei un. Ahang bel, Aigupta gam apan noute hon piikhepa Tangtawn Toupa na Pathian un noute hon ompih hiven. 2 Hichi hong hi ding a, na kidou dek laitakun, siampi in mipite va naihin a kiang uah thu a gen ding ahi. 3 Ama'n amaute kiang ah: Israel aw, ngai in, tuni-in na melmate uh dou dek na hi uhi. Na lungtang uh patau kei hen. Lau kei unla, liing kei un. Ahih kei leh, amaute hanga lau lua-a lungdong om kei un. 4 Ahang bel, noute hon tonpih a, na melmate uh nou adinga hon dousak a, noute hon hukhe dingpa Tangtawn Toupa na Pathian uh ahi, a chi ding hi. 5 Ulian makaite'n sepaihhonte kiang ah: Mi kuapeuh, inn lamthak a, laan nai lou a om hiam? A om leh, inn ah va pai hen. Tuachi louin zaw kidouna ah a si kha ding a, midang in a laan kha ding hi. 6 Mi kuapeuh, grephuan bawl a, a gah ne nai lou a om hiam? A om leh, inn ah va pai hen. Tuachi louin zaw kidouna ah a si kha ding a, midang in a grep gah a ne kha ding hi. 7 Mi kuapeuh, numei tawh kikham a, a kiteng nailou a om hiam? A om leh inn ah va pai hen. Tuachi louin zaw, kidouna ah a si kha ding a, mi dangin a numei khamsa a kitenpih kha ding hi, a chi ding uh ahi. 8 Tua khit chiangin, tua makaite'n: Mi kuapeuh patau lungdong a om hiam? A om leh, a sanggamte patau-a a lungdonsak louh nadingin inn ah pai hen, a chi lai ding uh ahi. 9 Makaite'n tua banga sepaihhonte kianga thu a genkhit chiangun, sepaihhonte tunga makai dingte a sep ding uh ahi. 10 Khawpi khatpeuh sim dinga na naih chiangun, tua khawpi mite kiang ah lemna thu tah masa un. 11 Tua lemna thu a saan uh a, kongpite a hon hon uleh, tua khawpi sunga mite khempeuh nna na sepsak teitei theih nadingun, noute nasemin a om ding uhi. 12 Tua lemna bawl ding a nial uh a, noute hon dou uleh bel, tua khawpi sim un. 13 Tangtawn Toupa na Pathian un noute' khut sunga tua khawpi hon piak chiangin, a sunga pasal khempeuh namsauin that un. 14 Numeite, naupangte leh gantate leh khawpi sunga thil dang omte khempeuh bel, noute' tan dingin gallakin na nei ding uhi. Tangtawn Toupa na Pathian un na melmate uapan gallak sum hon piakte noute adingin na zang thei ding uhi. 15 Na kiang nai ua namte hilou, gamlapi-a om khawpite khempeuh na sai ding dan uh hibang ahi. 16 Ahihhangin, noute' gouluah dinga Tangtawn Toupa na Pathian un hon piak ding na kiang nai ua namte' khawpite sung ah, a nak thei hinna nei peuhmah hinghawi kei un. 17 Tangtawn Toupa na Pathian un hon thupiak bangin, amaute hihchimit vek sipsip un. Amaute bel, Hitte, Amorte, Kanante, Perizte, Hivte leh Jebuste ahi uhi. 18 Tua banga na hihchimih kei uleh, amaute' pathiante bia a, thil kihhuai a hihte uh zui dingin hon sinsak ding uh a, Tangtawn Toupa na Pathian uh tung ah na khial ding uhi. 19 Hun sawttak sung khawpi khat na sim uh a, laak zawh sawma na dou chiangun, singkung omte, a gah na nek theihte uh phuk kei un. Tua khawpi douna-a zat dingin zong phuk kei un. Ahang bel, gamlak sing gahte mihing nek dinga om hiven. 20 Ahihhangin, a gah neilou singte bel phukin na suse thei ding uh a, tua khawpi na dou uh na lak zawh mateng uh, a douna vanzat dingin tua singte na zang thei ding uhi.

Danpiakthakna 21

Tualthah Suikhiak Zawhlouh Khelhna

1 Tangtawn Toupa na Pathian un na luah ding ua hon piak ding gam sunga mi khatpeuh thahsa-a gampalaka lum a kimuh a, kua thah hiam, chih a kitheih kei leh, 2 na upate uleh thukhenmite a kuan ding uh a, tua siluang omna apan a kiang naipena khawpite tawh kal a teh ding uh ahi. 3 Tua khit chiangin, tua siluang tawh kinaipen khawpi upate'n, nasem ngeinailou leh hakkol paw ngei nailou bawngla khat hon kai ding uh a, 4 lei leh ngeilouh, ahih kei leh, haichiin ngeilouhna, luiluang omna phaizang khat ah, tua bawngla ngawng a hek tan ding uh ahi. 5 Levi' tapa siampite, Tangtawn Toupa na Pathian un, Tangtawn Toupa' mina nasem ding leh, vualzawlna thu sam ding leh, thubuai khempeuh leh kivuak kisat thu-a thukhen dinga a teelkhiakte'n hon naih ding uh hi. 6 Tua khit chiangin, tua siluang kiang naipen khawpi-a upate khempeuh in, tua phaizanga a ngawng hektansa bawngla tung ah a khut uh a sil ding uh a: 7 Koute' khutte'n hiai sisan suah lou ahi, sisan a kisuah lai zong ka mitte un mu lou ahi. 8 Tangtawn Toupa aw, na tatsa na mi Israelte adingin hiai khelhna khuhna hon saansak inla, na mi Israelte mawhneilou sisan mawh hon khusak ken, a chi ding uhi. 9 Tua bangin, Tangtawn Toupa' mitmuh-a a dik a tang na hih chiangun, noute laka mawhneilou sisan suahna mawhna na koihmang ding uh ahi.

Salmat Kitenpihna

10 Na melmate uh dou dinga na kuankhiak chiang ua, Tangtawn Toupa na Pathian un amaute na khut sung ua hon piak a, amaute sala na kaih chiangun leh, 11 tua salmatte laka nungak melhoih na muh a, enlah a, zi-a na neih nop chiangin na nei thei hi. 12 Tua bang numei na inn ah pii inla, a sam metsak inla, a chinte tan inla, 13 amah na mat lai ua, a puansilhte khekkhiaksak in. Na inn sunga kha khat sung a nu leh pa a suun khit chiangin, amah na luppih thei ding a, a pasal na hi ding a, amah na zi ahi ding hi. 14 Amah-a na lungtun kei leh a utna na-a a pai na phal ding ahi. Amah mindaisakta na hih manin, na zuak ding ahi kei hi.

Tapa Masa' Hamphatna

15 Pasal khat in zi nih a neih a, khat it a, a khat a muhdah a, tapa lah a neihsak tuak ua, a muhdah pen' ta tamasa ahih zawk mah leh, 16 ama'n a tapate tan ding gou a hawm chiangin, a muhdah zi pen' tapa, tamasa hihna hamphatna laksakin, a zi it pen' tapa a pe ding ahi het kei hi. 17 A zi muhdah zawk pen' tapa, tamasa ahihna gumin, a gou neih khempeuh tan nih a piak ding ahi. Tua tapa bel a pa' thahatna chiamtehna masa hi a, tamasa' hamphatna amah-a hiven.

Tapa Hel

18 Pasal khatpeuh in tapa genhak leh helhat, a nu leh pa thu mang lou a neih a, tua tapa in amaute' thununna a zuih nop kei leh, 19 a nu leh a pa'n amah a man ding uh a, a khawpi uh kongpi ah upate mai ah hon tonpih ding uh ahi. 20 Amaute'n tua upate kiang ah: Hiai ka tapa uh genhak a, helhat ahi. Ama'n koute hon thuman lou ahi. A uangtat leh zukhamhat ahi, a chi ding uhi. 21 Tua khit chiangin tua khawmi pasalte khempeuh in suangin a mah a denglum ding uh ahi. Tua bangin na lak uapan thil gilou na hihsiang ding uh ahi. Israel mi khempeuh in tua thu za-in a lau ding uhi.

Dan Tuamtuam

22 Sihna khawp khelhna liana mawh mi pen thah ding ahi a, a pumpi singtunga khai ding ahi. 23 Sing tunga khai peuhmah Pathian' hamsia thuak ahih manin, tua banga thahpa, tua ni maha vui ding ahi. A luang zan khua-a singtunga a om louh ding ahi. Tangtawn Toupa na Pathian un na gouluah ding ua hon piak ding gam tua banga na suknit het louh ding uh ahi.

Danpiakthakna 22

Sanggamte' Neih-le-lam

1 Na sanggampa' bawngtal hiam, belam hiam vakmang na muh leh, ngaihsak louin om kenla, ama' kiang tunkik teitei in. 2 Tua sanggampa na kiang naia om lou hiam, ahih kei leh, tua gan nei kua hi hiam, chih na theih kei leh, nang inn ah kai inla, a neipa'n hong zon mateng na kern in. Tua chiangin, na pekik in. 3 Na sanggampa' sabiltung hiam, puanakpi hiam, ahih kei leh, a mansak van khatpeuh na muh leh, tua bang mahin hih in. Ngaihsak louin om ken. 4 Na sanggampa' sabbiltung hiam, bawngtal hiam lampi-a puk na muh leh, ngaihsak louin om ken. Kaidingin phong teitei in.

Kideidanna

5 Numei in pasal silh leh teen a silhin a teeng ding ahi kei. Pasal in zong numei' silh leh teen a silhin a teeng ding ahi kei. Ahang bel, Tangtawn Toupa na Pathian un tua banga hih mi kih hiven. 6 Lam kiang khawng ah singkung hi-in leilak hita leh, vasabu na muh a, a pi in a noute hi-in, a tuite hita leh a opkhum lai a hih leh, a pi leh a nou lakhawm ken. 7 A nou na la thei hi, ahihhangin, a pi bel khah teitei in. Tua hi leh, nang adingin a hoih ding a, na khantou ding hi. 8 Inn thak na lam chiangin, na inn tung apan mi khattei kia-in sisan suahna mawh na khu kha ding a, inn tung ah a umna zawl khung teitei in. 9 Na grephuan sung ah khaichi nam tuam nih pawikhawm ken. Tua banga na pawikhawm leh, a khaichite gentaak louh, a gahte zong a sianglou a suak ding hi. 10 Sabiltung leh bawngtal hakkol pawkhawmsakin lei let ken. 11 Samulkhau leh ziza khau zangngat gatkhawm puante silh ken. 12 Na silh na puanakpi mong lite ah a neelkai bawl in.

Kitenna Dan Palsatna

13 Pasal khatpeuh in zi a neih a, a luppihkhit nunga, amah deihlou a, 14 gensia a, a mindaisak a: Hiai numei ka kitenpih a, ahihhangin, ka luppih takin nungak siangthou a hihna ka mu kei, a chih leh, 15 tua nungak nu leh pa'n kongpi ah, khawsung upate' mai ah, amah nungak siangthou ahi, chih kitelna hon tawi ding uh ahi. 16 Tua nungak pa'n tua upate' mai ah: Hiai mipa' kitenpih dingin ka tanu ka pia a, ahihhangin, ama'n a deih kei hi. 17 Tuin amah a gensia a: Na tanu nungak siangthou a hihna ka mu kei, a chi hi. Ahihhangin, ka tanu hiai nungak siangthou hihna kitelna a om, a chi ding hi. Tua khitin, tua nungak' nu leh pa'n tua khawsung upate kiang ah tua puan a ensak ding uh ahi. 18 Tuachi-in, tua upate'n tua mipa a paipih ding uh a, a gawt ding uh ahi. 19 Ama'n Israel nungak siangthou mindaisak ahih manin, amaute'n amah ngun dangka shekel 100 a liausak ding uh a, tua nungak' pa a pe ding uh ahi. Tua numei bel, tua mipa' zi ahi lailai ding a, a damsung teng a ma thei kei ding hi. 20 Ahihhangin, tua ngawhna a dik a hih a, tua nungak a siangthou ahihna kitelna a kimuh theih kei leh bel, 21 tua numei a pa' kongkhaka tonpih ahi ding a, a khawpi-a pasalte'n suangin amah a denglum ding uh ahi. Ahang bel, ama'n a pa inn sunga a om laia, midang tawh a na-mawh a, Israel sunga zahlakna thil tun hiven. Na lak uapan thil gilou na hihsiang ding uh ahi. 22 Pasal khatpeuh in midang' zi a luppih a kimuh leh, tua banga amah luppihpa leh tua numei, a nihun a si teitei ding uh ahi. Israel apan tua bang gitlouhna na hihsiang ngeingei ding uh ahi. 23 Khawpi sunga pasal khatpeuh in pasal nei dinga khamsa nungak siangthou a tuahkhak a, a luppih leh, 24 tua khawpi kongpi ah a nihun na tonpih ding uh a, na denglum ding uh ahi. Tua nungak pen khawpi sunga om hi napi-a panpihna zonga a kikou louh man leh tua pasal pen in mi zi a zahlak sak man ahi. Na lak uapan tua bang gitlouhna na hihsiang ngeingei ding uh ahi. 25 Ahihhangin, gamlaka pasal in nungak pasal nei dinga khamsa a tuah a, a pawngsual leh, hibang hih tua pasal pen kia a si ding ahi. 26 Tua nungak bel bangmah lawh louh ding ahi. Ama'n sihna khop khelhna bangmah hih lou ahi. Hibang thu ahih leh, mi'n a innveng suala a thah tawh kibang ahi. 27 Ahang bel, tua pasal in tua nungak gamlaka tuak hi a, tua khamsa nungak kikou mah leh, amah hukhe ding kuamah om lou hiven. 28 Pasal khatpeuh in khamsa hilou nungak a tuah a, a pawng suai a, theihkhiak ahih uleh, 29 tua pasal in tua nungak' pa ngun dangka shekel 50 a piak ding ahi. Tua baan ah, tua nungak mindaisak a hih manin, a kitenpih ding ahi. A damsung teng amah a ma thei kei ding hi. 30 Pasal in a pa' zi a kitenpih ding ahi kei. A pa' lupna a buahsak ding hilou ahi.

Danpiakthakna 23

Kikhawmte laka Kihelthei leh Kiheltheiloute

1 Chiltang kitam, ahih kei leh, chiltang atkhiak mi kuamah, Tangtawn Toupa' mi kikhawmte lak ah a kihel thei kei ding hi. 2 Zawlta, sawn peuhmah, a khang sawn dongin, Tangtawn Toupa' mi kikhawmte lak ah a lut thei kei ding hi. 3 Amon mi, ahih kei leh, Moab mi, ahih kei leh, a suante uh kuamah, a khangsawn sawn dongin, Tangtawn Toupa' mi kikhawmte lak ah a lut thei kei ding hi. 4 Ahang bel, noute Aigupta apan nong pai lai-un, lampi ah an leh tui tawh hon tuak dingin amaute hong kuan kei uh a, noute hon hamsiat dingin Mesopotamia-a Pethor apan Beor' tapa Balaam a guai zaw uhi. 5 Ahihhangin, Tangtawn Toupa na Pathian un Balaam' thu a ngaikhe kei a, a hamsia noute adingin vualzawlna a suaksak zaw hi. Tangtawn Toupa na Pathian un noute hon it man ahi. 6 Na dam sung teng uh, amaute tawh kilemna, a hoihna ding ua kilawmbawlna bangmah na bawl het louh ding uh ahi. 7 Edom mi bel kih kei un, na sanggampa uh ahi. Aigupta mi zong kih kei un, a gama mikhuala om na hi uhi. 8 Amaute' tate, a khang thumna ah Tangtawn Toupa' mi kikhawmte lak ah a lut thei ding uhi.

Giahphual Sianlouhna

9 Na melmate uh dou dinga giahphual na sat chiangun, a sianglou thil peuhmah apan kihemkhia un. 10 Noute laka khatpeuh, zankala bawtui pawt a om leh, giahphual pawlama paikhiain a vaom tuam ding ahi. 11 Nitak lamin a kisil ding a, nitum chiangin giahphual sung a lut thei ding hi, 12 Giahphual pua ah zun leh ek nawn nading mun na septuam ding uh ahi. 13 Na galvante uh baan ah, kawkhuk tawh nading vanzat na nei ding uh ahi. Kawkhuk touin zun leh ek na nawn ding uh a, tua khit chiangin na vuk kik ding uh ahi. 14 Ahang bel, Tangtawn Toupa na Pathian uh noute hinna hon humbit ding leh, na melmate uh na khut sung ua hon pe dinga noute' giahphual sunga vialpai pai hiven. Na giahphual uh a siangthou ding ahi. Na lak ua thil zahlakhuai khatpeuh mu a, noute hon kiheisan louh nading ahi.

Dan Tuamtuamte

15 Sila khatpeuh noute laka hong buk leh, a pu khut ah pekhe kei un. 16 Na lak uah, a utna peuh ah leh a teel khawpi khatpeuh ah teengsak un. Amah nuaisiah kei un. 17 Israel mi kuamah, numei hi-in pasal hita leh, biakna muna kizuak na om louh ding uh ahi. 18 Numei kizuak hiam, hibanga gamta-a pasal kizuak hiam in a lawhkhiak peuhmah, thuchiam khatpeuh tangtun nadinga, Tangtawn Toupa na Pathian uh' inna non tawilut het louh ding uh ahi. Ahang bel, Tangtawn Toupa na Pathian un tuate a nihnih-a kih ahi. 19 Sum hi-in, an hi-in, a pung lak theih thil dang himhim zong, na sanggam tung ah a pung la ken. 20 Gamdang mi tung ah bel sumpung na la thei ding hi. Ahihhangin, na sanggam Israel mi tung ah zaw sumpung la ken. Tua hi leh, Tangtawn Toupa na Pathian un, luah dinga na lutna gam ua na khut nasep peuhmah hon vualzawl ding hi. 21 Tangtawn Toupa na Pathian uh kianga na chiam peuhmah tangtun dingin zekai ken. Tangtawn Toupa na Pathian un hon ngiat ngeingei ding a, khiala mawh tang kha ding hiteh. 22 Bangpeuh chiam lou dinga na kiven leh, na khial kei ding hi. 23 Na muk in a genkhiak peuhmah hih teitei in. Ahang bel, nangma' utthu-a, nangma' kama Tangtawn Toupa na Pathian tunga na chiam hiven. 24 Na innveng' grephuana na lut leh, na deih zahzah grep gah na ne thei ding hi. Ahihhangin, na seng sunga koih bel nei het ken. 25 Na innveng buhleia na lut leh, buhvui na zut thei ding hi. Ahihhangin, kawitein buh dinglai at het ken.

Danpiakthakna 24

1 Pasal khatpeuh in numei khat kitenpih henla, tua numeia thil zahlakhuai khat muin lungtung kei henla, maakna lai gelhin pia henla, a inn apan nawkiksak leh, 2 tua baan ah, tua numei in a inn a nutsiat nungin, pasal dang khat nei henla, 3 a pasal nihna zong amaha lungtung louin, maakna lai gelhin pia henla, a inn apan nawkiksak leh, ahih kei leh, tua pasal in sihsan leh, 4 tua amah ma-a a pasal masapen in amah a kitenpih kik thei kei ding hi. Amah pen hihnitsa hita hiven. Tua bang thil bel Tangtawn Toupa' mitmuha kihhuai hi ding ahi. Tangtawn Toupa na Pathian un gouluah dinga hon piak ding gam tung ah khelhna tun kei un. 5 Pasal khatpeuh in a zi neihna a nai lai leh, kidouna muna sawl louh ding ahi. Ahih kei leh, sep ding got louh ding ahi. Kum khat sung inn-a noplena om a, a kitenpihtaak a zi a lungnopsak ding ahi. 6 Leibat taangin buhgawina sumhek suang a bupin hiam, a tunglam kia hiam zong la ken. Tua banga na hih leh, a kivakna laksak suak ding na hi. 7 Mi khatpeuh in a sanggam hihpih Israel khat pawmang a, suak leh sal zata a zat hiam, a zuak hiam a hih a, a kimuhkhiak leh, tua banga hihpa a sih ngeingei ding ahi. Na lak uapan thil gilou na hihsiang ding uh ahi. 8 Phaak natna thu ahih leh, siampi Levite hon hilh bangbanga pilvangtaka sai ding ahi. Amaute thu ka piak pilvangtaka na zuih ding uh ahi. 9 Noute Aigupta apan nong paikhiak lai ua, lampi-a Tangtawn Toupa na Pathian un Miriam tunga a hih thei gige un. 10 Na innveng kianga bang peuh na leitawisak chiangin, a kichiamna dinga a tah thil la dingin a innsung ah lut ken. 11 Inn pua ah ding inla, na leitawisakpa'n a kichiamna thil hon tawikhia henla, hon pia hen. 12 Amah mi zawng a hih leh, a kichiamna thil keemin zan giahpih ken. 13 A kichiamna puanaktual silh-a a ihmut theih nadingin, ni tum chiangin tua a kichiamna puanakpi pekik in. Tua hileh, amah na tung ah a kipak ding a, Tangtawn Toupa na Pathian' ngaih-in tua na thil hih, diktatna thil hih ahi ding hi. 14 Mizawng leh tasam na goihte, na Israel mi hihpih uh sanggam hi-in, na gam sung ua khawpite khatpeuha teeng gamdang mi hita leh, nang adinga nuamtak sain mawkbawl ken. 15 Amah a zawng a tasam a hih manin, a sum thalawh bangbang, a nisimin nitum main pia in. Tua banga na hih kei leh, nang hon hekin Tangtawn Toupa a sam kha ding a, khelhna mawh na tang kha ding hi. 16 Tate hangin pate na hihlum ding uh ahi kei a, pate hangin zong tate na hihlum ding uh ahi kei hi. Michih ama' khelhna hangin a si ding hi. 17 Gamdang mi hi-in, pabeite hita leh, thudika thukhenna taansakin na zaangsak ding ahi kei. Ahihkei leh, thuchiam nadingin meigongte' puanakpi na laksak ding ahi kei hi. 18 Noute zong Aigupta gama sala om a, Tangtawn Toupa na Pathian un tua apan hon tankhia ahi, chih thei gige in. Hiai hang ahi hibanga hih dinga noute thu kon piak. 19 Na loua buh na lak chianga, buhphal khat na lak khak louh a om leh, a sang zong dingin va kik ken. Gamdang mite leh pabeite leh meigongte adingin nusia in. Tua hi leh, Tangtawn Toupa na Pathian un na khut nasepte khempeuh uh hon vualzawlsak ding ahi. 20 Na oliv gahte na lawh chiangin, a nihvei nadingin a hiangte ah a sang zong ken. A sang omlaite, gamdang mite leh pabeite leh meigongte adingin nusia in. 21 Na grephuan-a grep gah na lawh chiangin, grep guite a nihvei nadingin a sang zong ken. A sang omlaite, gamdang mite leh pabeite leh meigongte adingin nusia in. 22 Noute zong Aigupta gama sila-a om na hi uh, chih thei gige in. Hiai hang ahi hibanga hih dinga noute thu kon piak.

Danpiakthakna 25

1 Mite'n thubuai a neih uleh, thukhenna inn a tut ding uh, thukhente'n thu khen a, a mawhlou a dik pen a dika a phuan ding uh, a mawh pen a mawhpaih ding uh ahi. 2 Tua a mawh pen vuak thuak taak ahih leh, thukhenpa'n amah a boksak ding a, a mawhna in a gitlouhna thaman a lawkhiak kibikhiah zahvei, ama' mitmuh mahmahin a satsak ding ahi. 3 Ahihhangin, 40-vei sanga tamzaw a satsak ding ahi kei. Tua sanga tamvei zaw ahih leh, na mitmuh uah na sanggam uh a zahlaak lua ding hi. 4 Bawngtal in buh a chil laiin a muk na hensak ding ahi kei. 5 Unau sanggam teengkhawmte laka khat tapabeia a sih leh, a zi meigong in tua innkuan pawlam ah pasal a nei ding ahi kei hi. A pasal sanggam in amah kitenpih-in, ama' tunga sanggam pasal' mawhpuakna a tangtun ding ahi. 6 Tua sanggam si pen' min Israelte lak apan thaimanga a om louh nadingin, tua nu' tapa piang masapen in tua a sipa min a puak ding ahi. 7 Ahihhangin, mi'n a sanggampa' zi a kitenpih nop kei leh, tua nu, khawpi kongpi ah upate kiang ah a pai ding a: Ka pasal' sanggampa'n Israel ah a sanggampa' min puak ding nial ahi. Ka tunga pasal sanggampa hihna mawhpuakna tangtun nuam lou ahi, a chih ding ahi. 8 Tua khit chiangin, tua khawpi upate'n tua sanggampa samin a houpih ding uh ahi. Ama'n: Amah kitenpih nuam lou ka hi, a chih teitei leh, 9 a sanggampa' meigongnu, tua upate mai ah, tua sanggampa kiang ah a va pai ding a, tua mipa' khe apan khedap khat a suahkhe ding a, a maitang a chilphih ding a: A sanggampa' innkuan khanggui lamtou nuamlou mi tung ah hibang kihih ahi, a chi ding ahi. 10 Tua mi' innkuan khanggui bel, Israel gam sung ah Khedap Suahsaksa Innkuan, chi-a theih ahi ding hi. 11 Mi nih a kisual a, khat pen' zi hong pai a, a pasal sualpa apan a pasal humbit sawm a, tua mipa sawk a, a zahmawh a mat leh, 12 tua nu' khut na tankhiak ding uh ahi. Amah na lainat louh ding uh ahi. 13 Na ip sung ah bukna suang kibang lou nih, khat a gik, khat lah a zang na koihkhawm louh ding ahi. 14 Na innsung ah, tehna ephah kibanglou nih, khat a lian, khat a neu na koihkhawm louh ding ahi. 15 Tangtawn Toupa na Pathian un hon piak ding gam sunga na khantou theih nading-in, buknate leh ephahte a dik leh a kituak na neih ding ahi. 16 Ahang bel, Tangtawn Toupa na Pathian un hibang hih mi, diktat-loutaka thil hih kuapeuh kih hiven. 17 Aigupta gam apan nong paikhiak lai ua, lampi-a Amalekte hon na bawl dan thei gige un. 18 Tawla na bah laitakun, na zinna uah hon na lamtuah uh a, nunglama mi pha zouloute khempeuh hon na satkhia uhi. Pathian launa neilou ahi uhi. 19 Tangtawn Toupa na Pathian un gouluah dinga hon piak ding gam sunga, na kim na pam ua melmate khem-peuh apan tawlngakna hon piak chiangin, Amalekte theihgigena, vanni nuai apan na nulmang ding ahi. Mangngilh het ken!

Danpiakthakna 26

Gahmasate leh Sawma khatte

1 Tangtawn Toupa na Pathian un, gouluah ding, luah ding leh a sunga tenna dinga hon piak ding gam sung na lut chiangin hichi hong hi ding hi. 2 Tangtawn Toupa na Pathian un hon piak ding gam apan lei gahsuah masa khempeuh laka khenkhat na la ding a, gam apan hon tawiin, seeng ah na koih ding a, Tangtawn Toupa na Pathian un a min om nadinga a teel ding mun ah na koih ding ahi. 3 Tua hun laitaka siampi nasema pangpa kiang ah na vapai ding a, a kiang ah: Tangtawn Toupa'n eite kianga piak dinga i pu i pate kianga a chiam gam kong tungta, chih Tangtawn Toupa ka Pathian kiang ah tuni'n ka phuang hi, na chi ding ahi. 4 Tua siampi in na khut apanin, tua seeng a la ding a, Tangtawn Toupa na Pathian uh' maitam mai ah a nga ding hi. 5 Tua khitin nang, Tangtawn Toupa na Pathian uh mai ah: Ka pa, Aram mi, vialpem pem mi ahi a, mangthang dinga kisa ahi. Aigupta gam ah a paisuk a, tua ah a khualtam hi. Ahihhangin, tua ah a thupi, a hat leh a tam mahmah nam hong hi hi. 6 Ahihhangin, Aiguptate'n koute hon mawkbawl uh a, hon thuakgimsak uh a, ka tung uah saltanna haksatak hon nga uhi. 7 Tua bang a hihtakin, Tangtawn Toupa ka Pathian uh kiang ah ka kikoukhia uh a, Toupa'n ka aw uh zain ka thuakgimna uleh, ka sepgimna uleh, nuaisiaha ka omna uh a en hi. 8 Tuachi-in, Tangtawn Toupa'n khut hat leh baan zakin, mulkimna lianpi leh chiamtehnate leh thillamdangte tawh, Aigupta gam apanin koute hon piikhia hi. 9 Ama'n hiai mun hon tun a, hiai gam, nawitui leh khuaizu-a luang gam hon pia hi. 10 Tu-in, ngai in, Tangtawn Toupa aw, nangma'n non piak gam gah masate kon tawi hi, na chi ding hi. Tua khit chiangin, Tangtawn Toupa na Pathian uh mai ah kuunin na be ding ahi. 11 Tuachi-in, nang leh na innkawte leh Levite leh na lak ua gamdang mi omte, Tangtawn Toupa na Pathian un hon piak thil hoihte peuhmah ah na nuam ding uh ahi. 12 A kum thumna bel sawma khat piak kum ahi. Tua kuma na sepkhiak apan sawma khat khempeuh na koihkhiak khit chiangin leh, Levite, gamdang mite, pabeite leh meigongte'n na khawpite ua ne a, a vah theih na ding ua, amaute kianga na piak ding ahi. 13 Tua khit chiangin, Tangtawn Toupa na Pathian uh kiang ah: Na thupiak bangin, ka innsung apanin tantuan siangthou ka sepkheta a, Levite, gamdang mite, pabeite leh meigongte ka peta. Na thupiakte ka manglou kei a, tuate laka khat zong ka mangngilh kei. 14 Sisuuna ka om sungin tua tantuan siangthou khat beek zong ka ne kei a, ka sianlouh sungin zong tuate khat beek zong ka lakhe kei a, tuate khat beek zong misite kiang ah ka laan kei a, Tangtawn Toupa ka Pathian uh thu ka mang hi. Thu non piak peuhmah ka zuikhinta. 15 Na teenna siangthou apan hon ensuk inla, na mi Israelte leh, ka pu ka pate uh piak ding chi a, kichiam zena na chiam banga koute non piak gam, nawitui leh khuaizu-a luang gam vualzawl in, na chi ding ahi.

Thupiakte Zuih ding

16 Tangtawn Toupa na Pathian un hiai danthusehte leh dante na zuih dingun tuni-in hon pia hi. Na lungtang khempeuh uleh, na hinna khempeuhin, pilvangtakin zui in. 17 Tangtawn Toupa na Pathian uh ahi, chih leh, a lampite na tawn ding uh, chih leh, a danthusehte, a thupiakte leh a dante na zui ding a, ama' thu na mang ding, chih na phuangkheta hi. Tangtawn Toupa'n zong a thuchiam bangin, ama' mi, ama' gou manphate na hi uh, chih leh, a thupiakte na zuih ding uh ahi, chih tuni-in a phuang hi. 19 Ama' siamsa namte khempeuh tunga phatlawh ding, minthang ding leh thupi dinga hon tungkhe ding ahi, chih leh, a thuchiam banga Tangtawn Toupa na Pathian uh adinga nam siangthou sehtuam hi ding na hi uh, chih a phuang hi, a chi hi.

Danpiakthakna 27

Ebal Mual tunga Maitam

1 Mosi leh Israel upate'n mipite kiang ah thu a pia uh a: Tuni-a kon piak hiai thupiakte khempeuh zui un. 2 Jordan lui kana Tangtawn Toupa na Pathian un hon piak ding gam na lut chiangun, suang lianpipi chiang unla, belhkipnain zut un. 3 Tangtawn Toupa, na pu na pate uh' Pathian in, noute hon chiam bangbanga Tangtawn Toupa na Pathian un hon piak ding gam, tua nawitui leh khuaizu-a luang gam lut dinga na galkah khit chiangun, tua suangte tung ah hiai dante khempeuh gelh un. 4 Tua baan ah, Jordan lui na kaan khit chiangun, tuni-a kon thupiak bangin, Ebal Mual tung ah hiai suangte chiang unla, a belhkipnain zut unla, 5 tua ah Tangtawn Toupa na Pathian uh' mai ah suang maitam dawh un. Tua suangte tung ah sik vanzat zang kei un. 6 Gamlak suangte zangin, Tangtawn Toupa na Pathian uh' maitam dawh unla, tua tung ah Tangtawn Toupa na Pathian uh mai ah haltum thillat laan un. 7 Tua ah lemna thillat lan unla, Tangtawn Toupa na Pathian uh maia nein nuam un. 8 Tua baan ah, tua na suang chiante uh tung ah, hiai dante khempeuh kiteltakin na gelh ding uh ahi, a chi hi.

Ebal Muala Hamsiatna

9 Tua khitin, Mosi in, tua Levi mi siampi hite tawh, Israelte khempeuh kiang ah: Israel aw, daai dide unla, ngai un! 10 Tuni-in noute, Tangtawn Toupa na Pathian uh' mite na hi uhi. Tangtawn Toupa na Pathian uh' thu mang unla, tuni-a kon piak a thupiakte leh thusehte zui un, a chi hi. 11 Tua ni mahin Mosi in mipite thu a pia a: 12 Jordan lui na kaan khit chiangun, mipite vualzawl dingin hiai namte Gerizim Mual ah a ding ding uh ahi: Simeon, Levi, Judah, Isakhar, Josef leh Benjamin. 13 Hamsiatnate gen dingin Ebal Mual ah hiai namte a ding ding uh ahi: Gad, Asher, Zebulun, Dan leh Naftali. 14 Levite'n aw ngaihtakin Israelte khempeuh mai ah hiai a gen ding uh ahi: 15 Khuak thawh milim hiam, milim sun thawh hiam tua khutsiamte' bawl Tangtawn Toupa' kih thil a sima kem mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 16 A nu hiam, a pa hiam simmawh mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 17 A innveng' gamgi suang khiin mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 18 Lampi-a mittawte kaia lampialsak mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 19 Gamdang mite, pabeite leh meigongte apan thudika thukhenna lamang mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 20 A pa' zi luppih a, a pa' lupna zahtaklou mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 21 Ganta peuh luppih mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 22 A sanggamnu, a pa' tanu hiam, a nu' tanu hiam luppih mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 23 A zi' nu luppih mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 24 A sima a innveng that mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 25 Mawhneilou mi that dinga golhgukna sum ne mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 26 Hiai dan thute zuia lenkip lou mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi.

Danpiakthakna 28

Thumanna Vualzawlnate

1 Tangtawn Toupa na Pathian uh thu na man sipsip ua, tuni-a kon piak a thupiakte khempeuh pilvangtaka na zuih leh, Tangtawn Toupa na Pathian un leitung namte khempeuh tung ah hon liiksang ding hi. 2 Tangtawn Toupa na Pathian uh' thu na man uleh, hiai vualzawlnate khempeuh in hon zui ding a, na tung uah hong tung ding hi: 3 Khawpi sunga a nunnuam na hi ding a, gamsung ah a nunnuam na hi ding hi. 4 Na sul apana piang a nunnuam ahi ding a, na gam ua haichiinte leh na ganta noute uh  na bawng noute leh na belam noute vualzawl ahi ding hi. 5 Na seeng, na lawh leh na annel vui mekna kuang vualzawl ahi ding hi. 6 Nong lut chiangin, a nunnuam na hi ding a, na pawtkhiak chiangin a nunnuam na hi ding uhi. 7 Tangtawn Toupa'n nou hon dou melmate na mai uah hon zousak ding hi. Lam khat apan hong kuanin hon dou ding uh a, lam dang sagih ah a taikeek ding uhi. 8 Tangtawn Toupa'n na buhpang a vualzawl ding a, na khut ngakna thil peuhmah a vualzawl ding hi. Tangtawn Toupa na Pathian un hon piak ding gam sung ah nang hon vualzawl ding hi. 9 Tangtawn Toupa na Pathian uh thupiakte na zuih uh a, a lampite na tot uleh, kichiam zena hon chiam bangbangin, ama' nam siangthou hi-in Tangtawn Toupa'n hon hihkip ding hi. 10 Tua hun chiangin, Tangtawn Toupa' mina sap na hi uh, chih leitung namte khempeuh in hon thei ding uh a, hon lau ding uhi. 11 Tangtawn Toupa'n noute kianga piak dinga, na pu na pate uh kianga a chiam gam sung ah lawhchinna tampi hon pe ding na sul uapan piang, na ganta noute leh lei gahsuah ah hon lawhchingsak ding hi. 12 Tangtawn Toupa'n a hunhuna vuah hon pe ding leh, na khut nasepte khempeuh hon vualzawl dinga a goubawm hoih, tua vaante nang adingin hon hong ding ahi. Nam tampite kiang ah na leitawisak ding uh a, noute'n bel na leitawi kei ding uhi. 13 Tangtawn Toupa'n a mei hilouin, a lutang hon hisak ding hi. Tuni-a noute hon piak Tangtawn Toupa na Pathian uh' thupiakte na limsak ua, zui dinga na pilvang uleh, a nuainung hilouin a tungnunga koih hi ding na hi uh. 14 Tuachi-in, tuni-a noute kon piak thute khatpeuh kiheisan loua taklam hiam, veilam hiama pialsan a, pathian dangte nna sem dinga na naih louh ding uh ahi.

Thumanlouhna Hamsiatna

15 Ahihhangin, Tangtawn Toupa na Pathian uh thu na man kei ua, a thupiakte khempeuh tuni-a kon piak danthusehte na zuih kei uleh bel, hiai hamsiate khempeuh na tung hong tung ding a, hon nuselou ding ahi: 16 Khawpi sung ah hamsiatin na om ding uh a, gamsung ah hamsiatin na om ding uhi. 17 Na seeng uleh na anvui nei mekna kuang uh hamsiatin a om ding hi. 18 Na suul uapan piang hamsiatin a om ding a, gama na haichinte, na bawng noute leh na belam leh kei noute hamsiatin a om ding uhi. 19 Nong lut chiang uh leh nong pawtkhiak chiangun hamsiatin na om ding uhi. 20 Tangtawn Toupa'n na khut ngakna khempeuh uh tung ah hamsiate, buainate leh salhnate hon sawl ding a, tua lah hihmanthatna leh thakhata na siatna na tun mateng uh na thuak ding uhi. Amah nusia a, thil gilou na hih man uh ahi ding hi. 21 Gam luah dinga na lut dekna uah Tangtawn Toupa'n natna hite hon thuaksak ding hi. 22 Nattun leh meima tawh kithuah kumzawn natna in hon sawi ding a, nisapi leh keuna, nget leh ap hon sawl ding a, na manthat mateng uh na thuak ding uhi. 23 Na lutung ua vaante, sumsan a suak ding a, na khenuai ua lei lah sik a suak ding. 24 Tangtawn Toupa'n na gam vuah uh leivui leh vut a suaksak ding a, hihsiat na hih mateng uh, vaan apan na tung uah hong zusuk ding hi. 25 Tangtawn Toupa'n na melmate uh mai ah hon vuallelsak ding a, lam khat apan amaute na dou ding uh a, lam dang sagih ah na taikeek ding uh a, leitung kumpigamte' mulkimna na hi ding uhi. 26 Na saluangte uh huihkhua vasate khempeuh leh leitung gamsate' an ahi ding a, amaute hawlmang ding kuamah a om kei ding hi. 27 Tangtawn Toupa'n Aigupta meimatumte leh meimasiate, meima tuikai huphupte leh chithak hon thuaksak ding a, tuate apan hihdam theih na hi kei ding uhi. 28 Tangtawn Toupa'n haina, mittawtna leh lungsim buaina hon thuaksak ding. 29 Suntang laiin miallaka mittaw pai bangin na kimai poppop ding uhi. Na sep peuhmah uah na lawhsam ding uh a, nisimin nuaisiah leh buluhin na om ding uh a, hon hukhe ding lah kuamah a om kei ding hi, 30 Numei khat tawh kiteng dingin na kikhaam ding a, ahihhangin, midang in a luppih ding. Inn na lam ding a, ahihhangin a sung ah na teeng kei ding. Grephuan na bawl ding a, ahihhangin, a gah chep zong na chiam kha kei ding. 31 Na mitmuhin na bawngtal a kigou ding a, ahihhangin, a sa na ne kha kei ding. Na sabiltung laksuhin na om ding a, na kianga piakkik ahi kei ding. Na belamte na melmate kianga piak ahi ding a, kuama'n amaute a hukhe kei ding. 32 Na tapate leh tanute namte khuta piak ahi ding uh a, amaute hukhe dingin khutlik theihna vangletna na nei kei ding a, nisima amaute enin na mitte a segawp ding. 33 Na theih louh uh mite'n na gam uapan na sepgim gah a ne ding uh a, na damsung teng nuaisiahna leh siatna loungal bangmah na nei kei ding a, 34 na thil muhte'n hon haisakgawp ding. 35 35 Tangtawn Toupa'n na khukte leh na khete, hihdam theihlouh meimatum nasetakte a thuaksak ding a, tua meimatumte na khenuai apan na luzang dong a dim ding. 36 Tangtawn Toupa'n nang leh na tung ua na koih uh kumpipa, noute leh na pu na pate un a theih louh uh nam kiang ah hon hawlkhe ding. Tua mun ah pathian dangte na be ding uh a, tuate lah sing pathian peuh, suang pathian peuh ahi ding. 37 Tangtawn Toupa'n hon hawlkhiak nading namte' mitmuhin, mulkimhuai, simmawhhuai paunak leh nuihzabuuk na suak ding uhi. 38 Lou ah buhchi tampi na pawi ding a, ahihhangin, khaupete' n negai ding ahih manin tawmchik kia na la ding. 39 Grephuante na bawl ding a, hoihtakin na keem ding a, ahihhangin, lungte'n negai ding ahih manin, a zu na dawn kei ding a, grepgah zong na lou kei ding. 40 Na gamsung teng ah oliv singkungte na nei ding a, ahihhangin, oliv gahte pulh bei ding ahih manin, a thau na zang kei ding. 41 Tapate leh tanute na nei ding a, ahihhangin, amaute sala piimanga om ding ahih manun, na ompih kha kei ding. 42 Na gama singkungte khempeuh leh haichiinte khempeuh khaupete'n a negai ding hi. 43 Na lak ua teeng gamdang mi na tunga sangsem semin a khangtou ding a, ahihhangin, nang bel na niamkiak semsem ding hi. 44 Ama'n nang hon leitawisak ding a, nang bel, a leitawisakin na pang kei ding. Amah a lutangin a pang ding a, nang bel a mei na hi ding. 45 Hiai hamsiate khempeuh na tunga hong tung ding ahi. Hihmanthata na om mateng nang hon nungdelh ding a, hon nuse kei ding hi. Ahang bel, nang Tangtawn Toupa na Pathian thu mang lou a, a hon piak thupiakte leh thusehte na zuih louh man hi ding ahi. 46 Tuate bel, nang leh na suante adinga chiamtehna leh thillamdang hi tawntung ding ahi. 47 Na lawhchin laitaka lungnuamtak leh kipaktaka Tangtawn Toupa na Pathian nna na sep louh man ahi ding. 48 Tangtawn Toupa'n nang hon dou ding a, hon sawl melmate' nna sem ding chin a, gilkialpi leh dangtakpi, savuak leh tasampi-a om ding na hi ve. Ama'n hon hihmanthatkhit masiah, na ngawnga sik hakkol hon batsak ding eive. 49 Tangtawn Toupa'n hon dou dingin nam khat gamlapi leimong apanin muvanlai thil bawhsuk guih bangin hon pii ding hi. Tua nam' pau na theih louh ahi ding a, 50 kihtakhuai melpu, a upa lah zahtak tuanlou, a naupang lah lainat tuanlou ahi ding. 51 Hihsiat dimdem na hih mateng, na gan tuailaite uleh na lou haichiinte uh, amaute'n negai ding uh ahi. Buh hi-in, zuthak hi-in, sathau hita leh, bangmah hon nutsiat nei lou ding uhi. Bawnghon laka a noute hi-in, belam leh kelhon laka a noute hita leh, hon nutsiat nei lou ding uhi. 52 Na muan mahmah uh kulhbaang sangte a puk masiah, na gamsung ua khawpite khempeuh uum a, hon dou nilouh ding uhi. Tangtawn Toupa'n hon piak ding gam sung khempeuha khawpite khempeuh, tua banga hon dou ding uhi. 53 Tua banga hon dou sung ua, na melmate un na tung ua thuakna hon tun ding uh ahih mana, na sul uapana piangte, Tangtawn Toupa'n hon piak tapate leh tanute' sa ne ding na hi uh. 54 Noute laka pasal chingkampen leh lungnempen nangawn in ama' sanggampa ahih kei leh, a zi it, ahih kei leh a ta khawsuaksunte nangawn lainat zou lou ding a, 55 a tanaute' sa a nek lai nangawn, amaute khat beek hawm lou ding ahi. Na melmate un na khawpite khempeuh uh hon umchip lai ua, noute tunga thuakna hon tut man ua, a neihsun tua hi ding hiven. 56 Noute laka numei chingkampen leh lungnempen a khenuaia leilak sik ngam lou zah-a lungnemin zong a pasal it leh ama' tapa leh tanu ngeelngeel, 57 ama' sula piang masa leh a neih a tate nangawn lainatlou ding hi. Ahang bel, a melmate un na khawpite uh hon uum sunga, na tung ua lungzinna hon tut ding mana, ama'n a sima tuate nek sawm ding hiven. 58 Hiai laibu-a kigelh hiai dante khempeuh pilvangtaka na zuih kei ua, hiai min thupi leh lauhuai Tangtawn Toupa na Pathian uh na zahtak kei ua leh, 59 Tangtawn Toupa'n noute tung leh na suan na khakte uh tunga hiai gawtna lauhuai, tuahsiatna khauh leh sawt daih leh, chinatna dailou leh sawt daih hon tun ding ahi. 60 Ama'n na lauh mahmah uh Aigupta natnate khempeuh na tung ua hon tun ding a, na tung ua belhden ding ahi. 61 Hihmanthat-a na om mateng uh, Tangtawn Toupa'n hiai Dan Laibu sunga kigelh lou chinatna leh tuahsiatna a namkim zong na tung ua hon tun ding ahi. 62 Tangtawn Toupa na Pathian uh thu na man louh man ua, vaana aksi zah-a tam noute laka tawm chik kia nutsiata om ding na hi uh. 63 Hon lawhchinsak leh noute tamlama hon punsak Tangtawn Toupa' kipahlam ahih banga, noute hon hihsiat leh hon hihmanthat a kipahlam hita ding ahi. Luah dinga na lut dekna gam uapan bulkalha om ding na hi uhi. 64 Tua hun chianga, Tangtawn Toupa'n leitung mong khat apan mong langkhat donga, namte khempeuh laka hon thehzak ding ahi. Tua munte-a pathian dangte be ding uchin a, sing pathiante leh suang pathiante, noute hi-in na pu na pate uh hita leh, na theih ngei louh uh pathiante ahi uhi. 65 Tua namte laka tawlngak himhim mu lou ding, na khe ngak nading uleh tawlngakna mun zong mu lou ding na hi uh. Tua munte-a Tangtawn Toupa'n lungzinna, lunggulhna hanga mit tawlna leh lungtang mangbatna hon pe ding ahi. 66 Diphawmna omden ding, a sun a zana launa tawh kidim den ding, na hinna uh lungmuang lou ding a hi. 67 Zingsang chianga: Nitak hita mai leh aw! chi ding uchin a, nitak chianga: Zingsang hita mai leh aw! chi ding na hi uh. Hiai bel, na lungtang ua mulkimna-a kidimna leh mita na muhte uh hang hi ding ahi. 68 Ke'n zin nawn kei un ka chihna lam, Aigupta lama longtea, Tangtawn Toupa'n hon sawlkik ding ahi. Tua muna numei sila leh pasal silate hi dinga na melmate uh laka va kizuak ding uchin a, lah kuama'n hon na lei lou ding hi.

Danpiakthakna 29

Pathian' Vangletna tunga Kinga Thukhun

1 Tangtawn Toupa'n Horeba Israelte tawh kala thukhun a bawl baana, Moab gama Israel suante tawh kala thukhun bawl dinga Mosi a thupiak, tua thukhun thute hiaite ahi. 2 Mosi in Israelte khempeuh a samkhawm a, amaute kiang ah: Tangtawn Toupa'n Aigupta gama Faro leh a silate khempeuh leh a gam khempeuh tunga, na mitmuh ua, a hih khempeuh na muta uhi. 3 Tuate bel, na mit ua na muh uh ze-etna lianpite, chiamtehnate leh thillamdang thupite ahi. 4 Hinapi-in, Tangtawn Toupa'n tuni dongin, theihsiam nading lungtangte, muh nading mitte leh zakna ding bilte noute hon pe nai kei hi. 5 Ke'n gamdai-gamkeua kum 40 sung noute kon pii sungin na pumpi ua pan na puansilhte uh a se kei a, na khete uapan na khedapte uh a se kei hi. 6 Tanghou na ne kei uh a, zu hiam, a batpih hiam na dawn kei uh. Tua bel, kei Tangtawn Toupa na Pathian uh ka hi, a chipa na theih nading uh ahi. 7 Hiai mun nong tun takun, Heshbon kumpipa Sihon leh Bashan kumpipa Og in eite hon na kidoupih uh a, amaute i zou uhi. 8 A gam uh i laksak a, Reubente, Gadte leh Manase nam kimkhat kiang ah goutanin i pia uhi. 9 Tua bang ahih manin, na hih khempeuh ua na mavan nading-un hiai thukhun thute kem unla zui un.

Thukhuna Kihelte

10 Tuni-in na vekun na makaite uh, na miliante uh leh na upate uleh na uliante uh tawh, Israel pasalte khempeuh Tangtawn Toupa na Pathian uh mai ah na ding uhi, 11 na taneute uleh na zite uh na giahphual ua om gamdang mite, singpua-a na zatte uleh tuitawia na zatte utawh. 12 Tua bel, Tangtawn Toupa na Pathian uh tawh kala thukhun bawl khawm ding leh, tuni-a Tangtawn Toupa'n noute tawh kala a kichiamna-a pang dingin ahi a, 13 tuni-a ama'n noute ama' nam tuam hi dinga hon bawl ding leh, noute kianga a gensa bang leh na pu na pate uh kiang leh Abraham, Isak leh Jakob kianga a chiamsa bangbanga amah noute' Pathian ahih nading ahi. 14 Hiai thukhun, kichiamna tawh noute tawh kal kia ading a hi kei a, 15 tuni-a Tangtawn Toupa' maia hiaia ding leh tuni-a eite kianga omloute ading zong ahi.

Israelte Kithehthangna

16 Eite, Aigupta gama teeng hang a, namte laka hong paisuak hang a, paikheng i hi, chih noute mahmah in na thei uhi. 17 Amaute' laka thil kihhuaite, sing leh suang leh ngun leh kham milimte na mu uhi. 18 Tuni-a noute laka pasal leh numei hi-in, innkuan leh beh hi-in, nam hita leh, kuama'n tua namte' pathiante be dinga Tangtawn Toupa i Pathian na kiheisan het louh ding uh ahi chih thei gige un. Tua bang sihna gu kha mahmah omsak thei thil peuhmah na lak ua zung na kaihsak louh ding uh ahi. 19 Tua bang mi in hiai kichiamna a zak takin, a lungsunga kivualzawl tawm in: Ka lungtang deihlam zuiin pai teitei leng zong bit na-veng, chi-in kingaihtuah mai thei hi. Hiai in gam sung ah, tui omna hi-in, a keuna hita leh, siatna tun ding hi. 20 Tangtawn Toupa'n tua bang mi ngaidam nuam ngeilou ding hi. Tua bang mi tunga a hehna leh thikthusiatna kuang ding a, hiai laibu sunga kigelh hamsiate khempeuh ama' tunga tung ding a, Tangtawn Toupa'n vaan ni nuai apan a min nulmang ding hi. 21 Tangtawn Toupa'n hiai Dan Laibu-a kigelh thukhun hamsiate khempeuh banga, tuahsiatna thuak dinga Israel namte khempeuh lak apan amah malmat ding hi. 22 Tua bel, noute hon zui ding khangsawn sawn, na tate uleh, gam gamlapi apan hong pai nam dangte'n Tangtawn Toupa' tunsak gam tunga a siatna leh natnate mu ding uhi. 23 A gambuppi mei katsiat leh chi leh kaata dim, khaichi lah kipawi lou, bangmah pou lou, sing leh lou bangmah omlou hi ding. Tangtawn Toupa'n heh leh thangpaia Sodom leh Gomora, Adma leh Zeboim a lumlet laia siatna bang hi ding. 24 Namte khempeuh in: Banghang hi tel ahia, Tangtawn Toupa'n hiai gam tunga hibang a hih? Hiai hehna nasia banghanga kuang hi tel ahia? chi ding uhi. 25 A dawnna bel, Tangtawn Toupa Pathian in, a pu a pate uh Aigupta gam apan a piikhiak laia amaute tawh kala a thukhun a kiheisan man uh ahi ve. 26 Amaute lampial uh a, a theih ngeilouh uh, Tangtawn Toupa'n amaute a piak louhpi pathian dangte bia-a kun uh hiven. 27 Tua bang ahih mana hiai gam tunga Tangtawn Toupa' hehna kuang a, hiai laibu sunga kigelh hamsiate khempeuh tungsak ahi. 28 Tangtawn Toupa heh a, thangpai mahmah a, hiai gam apan amaute bulkalh a, tuni-a banga gamdang pek tun ahi, chih hi ding hi. 29 Thil kiseelte, Tangtawn Toupa i Pathiana hi a, a kilaakkhete bel eite leh i tate-a hiden hi. Tuachi-a, hiai dan thute khempeuh i zuih theih nading ahi.

Danpiakthakna 30

Israel Tundingkikna

1 Tangtawn Toupa na Pathian un namte khempeuh laka hon thehzakna munte peuhmaha, noute' maia ka koih hiai vualzawlnate khempeuh leh, hamsiate khempeuh na tung ua hong tung a, lungtanga na vei chiangun leh, 2 noute leh na tate uh, Tangtawn Toupa na Pathian uh kianga nong kik ua, tuni-a thu kon piakte bangbanga na lungtang khempeuh uleh na hinna khempeuh utawh, a thu na man chiangun, 3 tua chiangin, Tangtawn Toupa na Pathian un, na saltanna uapan hon piikik ding a, hon lainat ding a, na kithehzakna uh namte khempeuh lak apan hon kaikhawm ding hi. 4 Vaanni nuaia gam gamlapena sawlmang na hita le uchin zong, Tangtawn Toupa na Pathian un tua gam apan hon kaikhawm ding a, hon piikik ding hi. 5 Ama'n na pu na pate uh' gam hiai ah hon piikik ding a, na luah ding uh a, na pu na pate uh sanga mavang zaw leh tamzawin hon bawl ding hi. 6 Tangtawn Toupa na Pathian un, na lungtangte uh leh na tapate uh' lungtangte hon sumsak ding a, tuachi-in, na lungtang khempeuh utawh, na hinna khempeuh utawh amah na it ding uh a, na nungta ding uhi. 7 Tangtawn Toupa na Pathian un, na melmate uleh, noute hon mudaha hon gelgawtte tung ah zong hiai hamsiate khempeuh a koih ding hi. 8 Tua khit chiangin, Tangtawn Toupa' aw na mang thak ding uh a, tuni-a kon piak, a thupiakte khempeuh na zui ding uhi. 9 Tua hun chiangin, Tangtawn Toupa na Pathian un na khut nasepte khempeuh uah hon mavangsak ding a, na suan na khakte uleh, na gantate uh a pungsak ding a, na gam gah uh zong a pungsak denta ding hi. Ahang bel, Tangtawn Toupa na Pathian uh, na pu na pate uh tunga a lungnop banga noute tunga lungnuam kik denta ding hiven. 10 Hiai Dan Laibu-a kigelh, a thupiakte zui dinga Tangtawn Toupa na Pathian uh' aw na man ua, Tangtawn Toupa na Pathian uh kianga na lungtang khempeuh uleh, na hinna khempeuh utawh na kik nawn uleh, tua banga noute tunga lungnuam kik ding a, hon mavangsak ding hi.

Hinna leh Sihna Tahna

11 Ahang bel, tuni-a noute kon piak hiai thupiak, noute adinga theihhak dinga kisel ahi kei a, gamlapi-a om zong ahi kei hi. 12 Vaantunga om ahi kei a: I zaka i zuih theih nadinga, eite adinga vantunga kua kaltou a, hon valaksak ding hiam? na chih uh kul lou ahi. 13 Ahih kei leh, tuipi gal peka om zong ahi kei a: I zaka i zuih theih nadinga, eite adinga tuipi gala kua va pai a, hon valaksak ding hiam? na chih uh zong kul lou ahi. 14 Tua thu na zuih theih nading ua, naichika om a, na kamsung uleh na lungsung ua om ahi. 15 En un, tuni-in na mai uah hinna leh thil hoih, tua baan ah, sihna leh thil hoihlou ka koih a, 16 tua bel, na hin ua na pun theih nading ua, Tangtawn Toupa na Pathian uh na it ding uh, a lampite na zuih ding uh, tua ban a, a thupiakte, a danthusehte leh a dante na zuih ding ua, tuni-a thu hon pia ka hi. Tua hi leh, Tangtawn Toupa na Pathian un, luah dinga na lutna gam ua, noute hon vualzawl ding ahi. 17 Ahihhangin, na lungtang uh lampial a, na ngaihkhiak kei ua, piimanga na om ua, pathian dangte bia a, a nna uh na sep uleh bel, 18 mangthang ngeingei ding na hi uh, chih tuni-in noute kiang ah ka phuang hi. Jordan lui kaan a, lut a, na va luahna gam uah na khantou kei ding uhi. 19 Noute' mai ah hinna leh sihna, vualzawlna leh hamsia ka koih chih, noute tunga hon theihpihte hi dingin, lei leh vaan ka sam hi. Tua bang ahih manin, noute leh na suan na khakte uh na hin theih nadingun, hinna teel un. 20 Tua hi leh, Amah na hinna uleh na khantouna uh hipa Tangtawn Toupa na Pathian uh na it thei ding uh a, ama' aw na ngaikhe ding uh a, amah na lenkip thei ding uhi. Tua baan ah, Tangtawn Toupa'n na pu na pate uh, Abraham, Isak leh Jakob kianga kichiam zena, piak ding a na chih gam sung ah na teeng ding uhi, a chi hi.

Danpiakthakna 31

Joshua leh Israelte Mawhpuakna Gawtna

1 Tua khitin, Mosi a pai a, Israelte khempeuh kiang ah hiai thute a gen hi. 2 Amaute kiang ah: Tuni-in kei kum 120-a upa ka hita a, hong pai a, hong lutpih thei ka hi nawn kei hi. Tangtawn Toupa'n zong ka kianga: Hiai Jordan lui gal na kah kei ding, hon chikhin ahi. 3 Tangtawn Toupa na Pathian mahmah uh na mai ua na pai masa ding ahi. Ama'n hiai namte na mai ua hihmangthang a, noute'n amaute' gam luah ding na hi uh. Tangtawn Toupa' gensa banga Joshua mahmah noute' maia galkah masa ding ahi. 4 Tangtawn Toupa'n, Amor kumpipate Sihon leh Og leh a gamte uh a hihmanthat a, a hih bangbanga hiai namte tunga hih ding ahi. 5 Noute thu kon piaktak banga, amaute tunga na hih theih nading ua, Tangtawn Toupa'n noute' khut sunga amaute hon pe ding ahi. 6 Hattak leh hangsantakin om unla, amaute kihtain lau kei un. Ahang bel, Tangtawn Toupa na Pathian uh, amah ahi noute hon tonpihpa. Ama'n noute hon nusia a, hon taisan lou ding ahi, a chi hi. 7 Tua khitin, Mosi in Joshua a sam a, Israelte khempeuh mitmuhin a kiang ah: Hattak leh hangsantakin om in. Ahang bel, Tangtawn Toupa'n a pu a pate uh piak ding a chiam gama, hiai mite tawh na pai ngeingei ding ahi a, amaute na luahsak ding ahi. 8 Tangtawn Toupa ahi na maia paipa. Ama'n nang hon ompih ding a, hon nusia-a hon taisan lou ding ahi. Lau kenla, lunglel het ken, a chi hi.

Dan Piakkhiakna

9 Tuachi-in, Mosi in hiai Dan a gelh a, siampite, tua Tangtawn Toupa' singkuang zawng Levi tapate leh, Israel upate khempeuh khut ah a pia hi. 10 Tua baan ah, Mosi in amaute thu a pia a: Kum sagih bei tengin, tua bat thaimang kum hun seh ah, tua Bawktate ankuang lui hunin, 11 Tangtawn Toupa na Pathian un a teel muna, ama' maia Israelte khempeuh hong kilaak chiangun, Israelte khempeuh zakin hiai dan na sim ding ahi. 12 Mite, numei pasal leh naupang neute leh na kongpi sung ua mikhual omte kaikhawm vek in, amaute'n a zak ua, Tangtawn Toupa na Pathian uh laudan a sin ua, hiai dante khempeuh pilvangtaka a zuih theih nading uleh, 13 hiai thei nailou a tate un a zak ua, Jordan lui galkah a, na va luah ding gam ua na teen sung teng uh, Tangtawn Toupa na Pathian uh laudan a sin theih nading uh ahi, a chi hi.

Pathian in Israelte a Ngawhna

14 Tua khitin, Tangtawn Toupa'n Mosi kiang ah: Ngai in, na sih hun hong naita hi. Joshua sam inla, Kihoupihna Puanbuk ah hong om un, amah nna guan ding ka hi, a chi hi. Tuachi-in, Mosi leh Joshua a va pai uh a, Kihoupihna Puanbuk ah a va om uhi. 15 Tangtawn Toupa tua Puanbuk ah meipi khuamin hong kilak a, tua Puanbuk lutna ah a ding hi. 16 Tangtawn Toupa'n Mosi kiang ah: Ngai in, na pu na pate kiang ah na khawlta ding hi. Hiai mite bel, a kisa ding uh a, a va om nading gam ua mite laka teengin, tua gamdang mite' pathiante tawh ang kikawma kizuak a suak ding uh a, kei hon nusiain amaute tawh kala ka thukhun a palsat ding uhi. 17 Tua ni chiangin, amaute tunga ka hehna a sou ding a, amaute ka taisan ding a, amaute apan ka mai ka seel ding a, nawmvalhin a om ding uhi. Amaute tung ah thil hoihlou leh buaina tampi a tung ding a, tua ni chiangin: Eite laka i Pathian a om nawn louh mana hiai thil hoihloute i tunga hong tung hi lou hia? a kichi ding uhi. 18 Amaute' thil gilou hihte khempeuh leh, pathian dangte lama a kihei manun, ke'n lah tua ni chiangin, amaute apanin ka mai ka seel taktak ding hi. 19 Tua bang ahih manin, tu'n noute adingin hiai la gelh inla, Israelte dema kei adinga theihpihna-a a pan theih nadingin, hiai la amaute kam ah guang in. 20 A pu a pate uh kianga ka chiamsa, nawitui leh khuaizu-a luang gama amaute ka piilut a, amaute'n ne-a dawna, a tai ua, hong mavan chiangun, pathian dangte lam a nga ding uh a, amaute' nna a sem ding uhi. Kei hon pampaihin ka thukhun a palsat ding uhi. 21 Tua hun chianga, amaute tunga tuahsiatna leh haksatna leh buaina a tun chiangin, a suante un mangngilh lou ding a hih manun hiai la amaute dema theihpihnain a pang ding hi. Ahang bel, tuni-a amaute' lungput dan thei ing a, amaute piak ding ka chiam gama, amaute ka piilut ma nangawna theikhin ka hi, a chi hi.

Dan Laibu Kikoihching

22 Tua bang ahih manin, Mosi in tua ni mah-in hiai la a na phuak a, Israel tate a sinsak hi. 23 Tua khitin, Nun' tapa Joshua kiang ah Tangtawn Toupa'n hiai thupiak a pia hi: Hattak leh hangsantakin om in. Israelte ka chiam gam ah amaute na piilut ding a, ke'n kon ompih ding hi, a chi hi. 24 Mosi in hiai dante a bul apan a tawp dong, laibu sunga a gelhkhit takin, 25 Mosi in Tangtawn Toupa' thukhun singkuang pua, tua Levite thu a pia a: 26 Hiai Dan Laibu la unla, noute dema theihpihna-a a pan den theih nadingin, Tangtawn Toupa na Pathian uh' thukhun singkuang kiang ah koih un. 27 Ahang bel, na helna uleh na genhakna uh thei hi vengin. Tuni-a noute kianga hing leh dama ka om laia bawn, Tangtawn Toupa tunga hel na hih chiangun, ka sih nung chianga bangzahta-a hel zawsem ding na hi ua? 28 Na nam upate khempeuh uleh, na makaite uh sam khawma hiai thute ka gen a, amaute dema hon theihpih dinga lei leh vaan ka sap theih nadingin, amaute khempeuh ka kiang ah hon kaikhawm un. 29 Ahang bel, hiai kiteltaka thei ka hi: Ka sih nung chianga amau leh amau kisusegawp ding uh a, noute kon thupiak lampi pialmangsan ding uhi. Na khut nasepte uh tungtawna amah hehsak dinga, Tangtawn Toupa' mitmuha thil gilou hih ding na hih man ua, ni nunungte-a na tung ua siatna hong tung ding ahi, a chi hi. 30 Tua khitin, Mosi in Israel kikhawmte zakin hiai la thu, a bul apan a tawp dong a gen hi:

Danpiakthakna 32

Mosi' La

1 Vaante aw, bil dawh un, thu gen ding hi'ng. Lei aw, ka kama thu za in. 2 Ka sinsakna vuah bangin taaksuk henla, ka thugen daitui siang bang hen. Lounou tunga vuahmal taaksuk bang henla, loupa tunga vuahphin bang hen. 3 Tangtawn Toupa' min phuang ding ka hi. I Pathian thupina phat un aw! 4 Amah tua Suangpi hi a, a nasep hoihkim hi. A lampite dika thukhenna hi a, amah thutak Pathian hi a, amah zaw diktat leh tang hi ahi. 5 Amaute ama' mai ah kihihsegawp uh a, a maizum nading ua, ama' tate hi nawnlou uhi. Amaute zaw khang tatsia leh gilou hi uhi. 6 Nou mihai leh mipilloute'n Tangtawn Toupa na ditna uh hibang hi maw? Amah noute' Pa, noute hon leipa hilou maw? Ama'n noute hon bawl a, hon tungding hilou maw? 7 Tanglai nite thei gige unla, khang tampite khanlai nite suut un. Na pa uh dong un, ama'n hon hilh ding hi. Na upate uh dong un,amaute'n hon hilhchian ding uhi. 8 Tungnungpen in namte laka a goutante uh a hawmsak laia, mite a khenzak laia, Israel tate tamdan zuia, namte gamgite khung hi. 9 Ahang bel,Tangtawn Toupa' tantuan a mite hi a, Jakob lah a goutan hi ahi. 10 Ama'n gamdai-gamkeu ah amah mukhhia a, gamsia leh gam vuak, a daihsip sipna ah amah mukhia hi. Ama'n amah hum a, amah don a, a mitnauta banga kem hi. 11 Muvanlai in a bu thaidalh a, a noute tunga phe velvela leng a, amaute dom dinga kha zak a, a kha tunga amaute a puak bang hi ahi. 12 Tua banga Tangtawn Toupa kia in amah pii a, ama' kianga gamdang pathian khat beek om lou hi. 13 Ama'n leitung a sanna munte-a amah tuangsak a, gam gahtein vak a, suangpi apan khuaizu in taisak a, meisah suang heng apan sathauin thausak hi. 14 Bawnghonte apan bawngnawi dat, belam leh kelhonte apan nawitui, belamnou thaute tawh pia hi. Bashan belamtalte leh kelte, huit buh hoihpente tawh pia hi. Zu, tua grepte sisan banga san nang dawn na hi. 15 Ahihhanga, Jeshurun hong thau a, hong kipek hi. Hong vah a, hong gik a, hong mam hi. Tua chianga ama'n amah siampa Pathian taisan a, a hotdamna Suangpi nolh hi. 16 Amaute'n gamdang pathiante pansana ama' thikthu sesak uh a, thil kihhuai zanga hehsak uhi. 17 Pathian hilou dawite' mai ah kithoihna laan uh a, a theih louh uh pathiante, hong kilang tawm thak pathiante, na pu na pate un a lau louh uh pathiante' mai ah kithoihna laan uhi. 18 Noute ta-a hon nei tua Suangpi taisan hi uteh, noute hon bawlpa Pathian mangngilh hi uteh. 19 Tangtawn Toupa'n tua mu a, amaute nolh hi. A tapate leh tanute'n amah a hehsak man uh ahi. 20 Ama'n: Amaute apan ka mai seel ding hi'ng, khang tatsiate, upnabei tate a hih man ua, a beina uh tungsak ding hi'ng. 21 Pathian hiloute zanga ka thikthu sesak uh a, a mannabei a milimte uh zanga hon hehsak uhi. Ke'n nam hiloute zanga hazatna amaute neisak ding ing a, theihsiamna bei nam khat zanga amaute hehsak ding hi'ng, 22 Ahang bel, ka hehna mei kuang a, gawtmun nuainungpen donga kaang ding hi. A kuang semsem in leitung leh a gahte kangtum ding a, mualte kingakna suangphumte kaang ding hi. 23 Amaute tunga tuahsiatna vumsak ding ing a, amaute tunga ka thaltangte zang ding hi'ng. 24 Amaute gilkiala gawnggawp ding uh a, hipi leh siatna khatak in amaute negai ding hi. Amaute suai dinga gamsate' hate sawl ding ing a, leilaka bokvak thangtom gute sawl ding hi'ng. 25 Kongzing khawnga namsau in amaute tabeia koih ding a, a inn sung uah mulkimna leng ding hi. Tangvalnou leh nungaknoute, nawi nelai naungekte leh a teek samkangte mangthang ding uhi. 26 Amaute thehzak ding ing a, amaute theih gigena mihingte lak apan beisak ding hi'ng, chikhin hi'ng. 27 Ahihhanga, melmapa' totna lau ing a, tua hi kei leh, langpangpa'n theikhial a: I khut vualzouta e, hiaite khempeuh hihpa Tangtawn Toupa hi kei, chi kha ding hi, chi hi. 28 Ahang bel, amaute pilna neilou nam hi uh a, amaute sunga theihsiamna om lou hiven. 29 Amaute pilin hiai theisiam nuam hi liai uh henla, a tawpna ding uh thei le uh zaw! 30 Bangchi-a mi khat in mi sang khat delhzaak thei ding, bangchi-a mi nih in mi sangsawm taaikeeksak thei ding, a Suangpi un amaute khawngkhia a, Tangtawn Toupa'n amaute pekhia ahih kei ngalleh? 31 Ahang bel, amaute' suangpi lah eite Suangpi bang hilou a, i langpangte mahmah nangawn in, ahi, theihpih uh hiven. 32 Ahang bel, a grepgui uh Sodom grepgui hi a, a loute uh Gomora loute hiven. A grepgahte uh gu tawh kidim a, a gahbawkte kha vek hiven. 33 A zute uh gulgu hi a, sokval gu hat hi ahi. 34 Ama'n: Hiai kei kianga kholkhawm, ka goubawma khumchip ahi kei ahia? 35 Phulakna keia hi a, ditna keia hi ahi. A hun taka amaute' khe taal ding hi. 36 Ahang bel, a tuahsiat ni uh naita a, tua thilte amaute tunga tungpahta ding hi, chi hi. Ahang bel, Tangtawn Toupa'n a mite tunga thu khen ding a, a silate lainat ding hi. Amaute' vangletna beita, chih a muh chianga, 37 ama'n: Amaute' pathiante koia omta a, buk nadinga a zon uh suangpi koia omta hiam? 38 Tua a kithoihna sathaute uh ne a, a dawn thillatte uh dawnte koia omta hiam? Thou-in noute hon huh le uh a kei dia, na bukna uh hi le uh a kei dia! 39 Tu'n thei in, kei, keimah amah hi'ng, Kei lou pathian dang om lou hi. Ke'n that ing a, hingsak ing a, ke'n liamsak ing a, damsak ing a, ka khut apan amaute kuama'n humbit thei lou ding hi. 40 Ahang bel, ke'n ka khut vanlama liiktou ing a: Kei a hingden ka hih takpi mana, 41 ka namsau tathiam ing a, ka khutin dika thukhenna a tawi chianga ka langpangte thuk ding ing a, kei hon mudahte dinkik ding hi vengin. 42 Ka thaltangte sisan dawnkhamsak ding ing a, ka namsau in sa ne ding a, thahte leh matte' sisante leh melmapa' makaite' lutang sate hi ding hi, chi ding hi. 43 Namte aw, ama' mite tawh lungnuamkhawm un. Ahang bel, ama'n a silate' sisan phuba la ding a, a melmate tunga phulakna tun ding a, ama' gam leh ama' mite, adinga khuhna bawlsak ding hiven, chi-in. 44 Tuachi-in, Nun' tapa Joshua tawh Mosi hong pai a, mipite zakin hiai lathute khempeuh a gen hi. 45 Mosi in hiai thute khempeuh Israelte kianga a genkhit-in, 46 amaute kiang ah: Tuni-a noute laka theihpihna thu ka gente khempeuh lungtanga na kep ding uh, hiai dante pilvangtaka zui dinga na tate uh thu na piak ding uh ahi. 47 Ahang bel, hiai noute adinga bangmah lou maimai hi zenzen lou a, na hinna uh hi ahi. Jordan luigal kaha na va luah ding uh gamsunga hiai thute pansana na damsung nite uh sausak ding na hi uhi, a chi hi.

Nebo Muala Mosi

48 Tua khitin, Tangtawn Toupa'n tua ni mahmah-in Mosi a houpih a: 49 Jerikho gala Moab gama Abarim mual, tua Nebo Mual kichi ah kahtou in. Tua apanin Kanan gam, Israel tate a goutan ding ua ka piak gal-et inla, 50 Hor Muala na sanggampa Aron a sih a, a mite kianga khopkhawm ahih bangin, nang zong na kaltouhna tua mual ah sita inla, na mite kianga khop-khawmin omta in. 51 Ahang bel, Zin Gamdai-gamkeua, Meriba Kadesh tuite muna Israel tate laka kei hon pahtawi lou a, amaute laka ka tunga na tatlek hang ahi. 52 Hinapi-in, na maia gam na mu ding a, Israel tate ka piak ding tua gamsung ah bel na lut kei ding hi, a chi hi.

Danpiakthakna 33

Israel Namte Vualzawlna

1 Pathian in Mosi a sih ma-a Isreel tate vualzawlna hiaite ahi. Ama'n: 2 Tangtawn Toupa, Sinai Mual ah hong pai a, Seir apanin amaute tung ah phalvakin hong vaak hi. Paran Mual apan hong taangkhia a, a misiangthou sangsawmte tawh hong ton hi. A khut taklam apanin amaute adingin, meikuang bang dan hong tung hi. 3 Ahi, tua nam itpa nang hi chin a, a siangthoute khempeuh Nang khut sunga om hi ahi: Amaute khempeuh na khebula tu uh a, michih in na thute saang uhi. 4 Mosi in koute adinga dan hon pia a, tua mah Jakob kikhawmte' goutan hi ahi. 5 Nam makaite khempeuh hong kikhopkhawm chiang ua, amah Jeshurun tunga kumpipa hi ahi. 6 Ama'n: Reuben hing henla, si kei hen, a mite zong tawm kei hen, chi hi. 7 Ama'n Judah' tungthu ah hiai gen a: Tangtawn Toupa aw, Judah' aw za inla, amah a mite kiang ah hon pii in. A khutte ama' kiven nadingin kiching henla, nang a melmate doua huhpa hi in aw, chi hi. 8 Ama'n Levi tungthu ah: Na Thumim leh na Urim, na deihsakpa-a hi a, amah, Masa-a na ze-et hi a, Meriba tuite muna na Kilangpih hi ahi. 9 Ama'n a nu leh pa tungthu gen a: Amaute zahtaak tuan keng, chi hi. Ama'n a sanggamte zong mei theihlou a, ama'tate mahmah nangawn deihsak tuam lou hi. Ahang bel, ama'n na thu veeng a, na thukhun kem hiven. 10 Ama'n na thukhennate Jakob sinsak a, na dan Israel sinsak hi. Na maia gimnamtui hal a, na maitam tunga haltum thillat laan hi. 11 Tangtawn Toupa aw, a khut nasep siamnate vualzawl inla, ama' khut nasep sang in. Amah doute leh amah mudahte a thawhzawh nawn louh nadingun, a taai uah sat in, chi hi. 12 Ama'n Benjamin tungthu ah: Tangtawn Toupa' itpa zaw ama'kiang ah bitin teeng hen. Ama'n sun nitum tuma amah hum a, seel a, Tangtawn Toupa' itpa a liangkou kikala khawltawldam hi, chi hi. 13 Ama'n Josef tungthu ah: Tangtawn Toupa'n ama' gam vaan daitui leh nuailam thuka tuitein vualzawl hen. 14 Ni apan gah manphapente leh, khapi apan gahsuah manphapentein vualzawl henla, 15 tanglai mualte apan thilhoihpentein vualzawl henla, Tangtawn mualte apan thil manphatein vualzawl hen. 16 Leitung apan thawnpiak hoihpente leh gah hoihpente leh loupa buk kuanga teengpa' deihsaknain vualzawl hen. Hiaite khempeuh Josef lutung leh a sanggamte laka makaite' tai ah khuksakin om hen aw. 17 Ama' thupina zaw bawngtal nou piang masa bang hi a, ama' kite zaw gam bawngtal kite bang hi ahi. Ama'n tuate-a namte si ding a, leimong donga omte nangawn si ding hi. Tuate bel, Efraim suan sangsawm sawma simte hi uh a, Manase suan a sang sanga simte hi uhi, chi hi. 18 Ama'n Zebulun tungthu ah: Zebulun aw, na paikhiak laiin lungnuam in. Nang Isakhar, na puanbukte ah lungnuam in! 19 Minamte mualtung lama samkhetou ding uh a, amaute'n diktatna thillatte laan ding uhi. Ahang bel, tuipite-a hauhnate tang ding uh a, sehnel laka kisel goute tang ding uhi, chi hi. 20 Ama'n Gad tungthu ah: Gad vaihawmna gam liansakpa mi nunnuam ahi. Tua ah humpinelkai bangin Gad teeng a, ama'n khut leh lutang balzak ding hi. 21 Ama'n ama' adinga gamhoihpen kilaak a, makai' tan dingte ama' adinga kisiit hi. Nam makaite' hong kikhop chianga Israel tawh kisaia, thukhennate, Tangtawn Toupa' deihna semkhia hi, chi hi. 22 Ama'n Dan tungthu ah: Dan zaw humpinelkai nou hi a, Bashan apan hong tawmkhia hi ahi, chi hi. 23 Ama'n Naftali tungthu ah: Naftali, Tangtawn Toupa' deihsakna tawh kidimpa, a vualzawlna tawh kidimpa hi a, ama'n simlam ah Tuipi dong gam luah ding hi, chi hi. 24 Ama'n Asher tungthu ah: Tapate laka a nunungpen Asher hi ahi. Ama'n a sanggamte' deihsakna tang henla, a khepek zong sathau ah kidiah hen. 25 Na kongpi kalhnate sik leh sumsan hi henla, na damsung teng na tha hat hen. 26 Jeshurun' Pathian bang kuamah omlou hi. Amah zaw nang hon huh dinga vaante tunga tuang hi. A thupina tawh meipi tunga tuang hi. 27 Tangtawn Pathian bukna hi a, a taangtawn baante'n na nuailama hon dom hi. Ama'n na mai apan meima hawlkhe ding a, Hihmangthang in! chi ding hi. 28 Tua banga Israel kia bita teeng ding a, buh leh zu tamna gama Jakob tuikhuk om ding a, a vaante'n daitui kesuksak ding hi. 29 Israel aw, a nunnuam na hi! Nang bang kua om ahia, nang Tangtawn Toupa' hotdam nam? Nang kihutna leh panpihna, na thupina namsau Tangtawn Toupa hi ahi! Na melmate na nuaia lut ding a, nang amaute' munsangte tuanchil ding na hi, chi hi.

Danpiakthakna 34

Mosi in Gamchiam Gal-et

1 Tua khitin, Moab phaizang apanin, Jerikho gala Nebo Mual a sanna Pisga mualvum ah Mosi a kaltou hi. Tua apanin Tangtawn Toupa'n Gilead gam khempeuh, Dan gam dong, 2 Naftali gam khempeuh, Judah gam khempeuh Tumlam Tuipi dong, 3 tua baan ah Simlam Negev, Jerikho Phaizang Zoar dong, amah a ensak hi. Jerikho bel, Tumsing Khawpi kichi ahi. 4 Tua khitin, Tangtawn Toupa'n amah kiang ah: Abraham leh Isak leh Jakob kianga: Na suante uh kiang ah ka pe ding, chi-a ka chiamna hiai gam ahi. Tu'n na mit mahmaha hon musak ka hi. Ahihhangin, tua mun tung dinga galkah lou ding na hi, a chi hi.

Mosi Sihna

5 Tuachi-in, Tangtawn Toupa' sila Mosi, Moab gam ah, Tangtawn Toupa' gen bangin a sita hi. 6 Ama'n Moab gama phaizang ah amah a vui hi. Tua bel, Beth Peor gal ahi. Ahihhangin, tuni dong kuama'n a haan a thei kei hi. 7 Mosi a sih-in, kum 120-a upa ahi. Hinapi-in, a mit a mial nai kei a, a hatna tha zong a kiam kei hi. 8 Israel tate'n tua Moab phaizang ah, ni 30 sung Mosi a kah uhi. Tua bangin, Mosi suunna leh kahna nite hong beita hi.

Joshua in Mosi' Tha Kheng

9 Tuin Nun' tapa Joshua bel, Mosi in a tunga khut nga a hih manin, pilna kha in a luahdim ahi. Tua bang ahih manin, Israel tate khempeuh in a thu a limsak uh a, Tangtawn Toupa'n Mosi a thupiak bangin a hihta uhi.

Israel Gama Mosi Pahtawina

10 Tua nungsang, Israel gam ah, Tangtawn Toupa'n kimaituaha a theih Mosi bang kamsang dang a omta kei hi. 11 Tangtawn Toupa'n Aigupta gama Faro leh a silate mai leh, a gamsung khempeuha hih dinga a piak chiamtehnate leh thillamdangte khempeuh a piak kamsang dang a om kei hi. 12 Mosi in Israelte khempeuh mitmuha vangletna thupi khempeuh leh, lau-a mulkimna thupi Mosi in a hihte khempeuh bang a hih thei kuamah dang a om kei hi.

Joshua 1

1 Tangtawn Toupa' sila Mosi sih nungin, Tangtawn Toupa'n Nun' tapa Joshua, Mosi panpihpa kiang ah thu a gen a: 2 Ka sila Mosi a sita. Thou inla, hiai mite khempeuh tawh Jordan lui galkah a, Israelte ka piak ding gama lut dingin kisa in. 3 Mosi kianga ka chiamsa bangin, na khepek ua na sikna gam chiangchiang uh kon pe dek hi. 4 Na gam uh, gamdai-gamkeu apan hiai Lebanon mual dung dong ahi ding a, tua chiangin, tua lui lian Iufratis luipi apan tumlam Tuipi Lian dong, Hitte gam khempeuh ahi ding hi. 5 Na damsung teng nang kuama'n hon nang zou kei ding. Mosi ka ompihtak bangin nang kon ompih ding. Kon zuausan ngei kei ding a, kon taisan ngei kei ding. 6 A pu a pate uh kianga piak ding, chi-a kichiam hiaia ka chiamsa gam luah dinga hiai mite pii ding na hih manin, thahat leh hangsan suah in. 7 Tha hat leh hangsan suah in. Ka sila Mosi in hon piak dan khempeuh zui dingin pilvang in. Na paina peuha na lawhchin theih nadingin, tua dan, taklam hiam, veilam hiam ah, pialsan ken. 8 Hiai Dan Laibu na kam nusesak ken. A sunga thu kigelhte peuhmah pilvangtaka na zuih theih nadingin, a sun a zanin na sut ding ahi. Tua hileh, na paina ah na lamzang ding a, na lawhching ding hi. 9 Ke'n thu kon peta hilou hiam? Thahat leh hangsan suah in. Lau kenla, lunglel ken. Na paina peuh ah, Tangtawn Toupa'n hon ompih ding ahi, a chi hi. 10 Tua bangin, Joshua in mite' makai liante thu a pia a: 11 Giahphual vasiksuak unla, mipite kiang ah: Nek leh tak kaikhawm un. Tu apan ni thumin, Tangtawn Toupa, na Pathian un noute adinga hon piak ding gam lut a, la a, luah dingin hiai Jordan lui na galkah ding uhi, chi un, a chi hi. 12 Joshua in, Reubente, Gadte leh Manase nam kimkhatte kiang ah bel, 13 Mosi, Tangtawn Toupa' nasempa'n noute hon thupiak thei gige un: Tangtawn Toupa, na Pathian un noute khawlna hon pe ding. Ama'n noute hiai gam hon pia ahi! 14 Mosi in Jordan lui suahlam gam hon piakna ah na zite uh, na tate uh leh na gantate uh a na teng ding uh a, ahihhangin, nou galdou mite bel kigalvanin na sanggamte uh ma ah na galkah ding uh ahi. 15 Tangtawn Toupa'n noute hon piak banga, na sanggamte uh zong tawlngakna a piak a, Tangtawn Toupa, na Pathian un a piak ding gam la a, a luah mateng uh, amaute na huh ding uh ahi. Tua nung chiangin, Mosi, Tangtawn Toupa' nasempa'n nisuahna lam a, Jordan lui suahlam gam hon piak ah, na kik ding uh a, noumau' gam na luah ding uhi, a chi hi. 16 Amaute'n Joshua a dawng uh a: Hih dinga koute non thupiak peuhmah ka hih ding uh. Non sawlna peuhmah ah ka pai ding uh. 17 Mosi' thu ka man bangun, nang thu zong ka mang ding uh. Tangtawn Toupa, na Pathian in, Mosi a ompih bangin, nang hon ompih peuhmah phot hen. 18 Na thu sel a, na thupiak mang lou mi peuhmah thah ahi ding. Thahat leh hangsan suah peuhmah phot in, a chi uhi.

Joshua 2

Rahab leh Enkhemite

Tua nungin, Nun' tapa Joshua in, Shitim luiphai apan enkhemi nih a simin a sawl hi: Vakuan unla, gam vaveel unla, a diakin Jerikho khawpi vavel un, a chi hi.

Tuachi-in, amaute a vakuan uh a, kizuaknu Rahab inn ah a valut uh a, tua ah a vazintung uhi. 2 Kua hiam khat in: Ngai in! Israelte pawlkhat gam enkhe dingin, tuzanin hiai ah hong pai uhi, chi-in Jerikho kumpipa a vahilh hi. 3 Tua khitin, Jerikho kumpipa'n Rahab kiang ah mi a sawl a: Na kianga hong pai a, na inn-a hong lut mite hon pekhia in. Gam sung khempeuh enkhe dinga hong pai ahi uh, a chisak hi. 4 Ahihhangin, tua numei in tua mi nihte a paipih a, a na sel hi. Ama'n: Ahi, mi nih ka kiang ah hong pai ngut uhi. Ahihhangin, koi apan hong pai uhiam, chih ka thei kei. 5 Khawpi kongpi khak hun, khawmuiin a paikheta uhi. A paina lam uh zong ka theih louhpi. Kintakin delh un, na pha lai ding uhi, a na chi hi. 6 Ahihhangin, amaute bel, numei in inntung lama paipih a, inntunga a siatkhawm ziza kungte nuaia a na sel ahi. 7 Tua bangin, tua mite'n Jordan kaimun zotna lampi lam ah, enkhemite delh dingin a kipankheta uhi. Mi delhte a pawtkhiak khitun, kongpi a khak uhi. 8 Enkhemite zana a lup maun, Rahab, inntung ah a paitou a, amaute kiang ah: 9 Tangtawn Toupa'n hiai gam noute' khut sung ah hon pekhin, chih ka thei. Noute launa in koute hon khuhta. Hiai gama tengte khempeuh, noute launain a zulkhinta uhi. 10 Noute Aigupta apan nong paikhiak laiun, Tangtawn Toupa'n na mai uah, Tuipi San tuite a kangtatsak, chih ka na za uhi. Jordan suahlama Amor kumpipate, Sihon leh Og tunga na thilhih uh, amaute na suksiat dimdem dan uh, ka na za uhi. 11 Tua thu ka zak takun, ka lungtangte uh a zulkhinta a, noute lauin, michih hansanna a beikhinta. Tangtawn Toupa, na Pathian uh, tunga van Pathian leh nuaia lei Pathian a hih man a na hi. 12 Tua bang a hi a, tu'n noute tunga siamna ka suah manin, kei leh ka innkawte tunga siamna suah dingin, hehpihtakin, Tangtawn Toupa' min sialin ka kiang ah kichiam ve ua aw. 13 Ka pa leh ka nu leh ka sanggampate, leh ka sanggamnute leh a neih khempeuh uh' hinna non hutkhiaksak ding ua, sihna apan koute non hinghawi ding uh, chih chiamtehna kip hon pe ve ua aw, a chi hi. 14 Tua mite'n: Koute' hinna in noute' hinna sawng hen! Ka thilhih uh na genkhiak kei peuhmah naak leh, Tangtawn Toupa'n koute gam hon piak chiangin, noute tung ah siamna leh muanhuaina ka suah ding uh, a chi uhi. 15 Rahab' tenna inn bel, khawpi kulhbang tunga kilam ahi a, ama'n tawhlet apan khauhualin amaute a khaikhesuk hi. 16 Ama'n: Hon delhte'n hon muh louh nadingun mual tung lam ah tai un. Amaute hong kik nawn mateng, ni thum sung tua ah vabu unla, tua khit chiangin, na pai nading uah na pai ding uhi, a chi hi. 17 Tua mite'n amah kiang ah: Hiai kichiamna non kichiamsak tawh kisaiin, koute'n amawknain mawh paw lou hiai ding ka hi uh aw. 18 Ngai in, hiai gam kong lut tak chiangun hiai non khaikhiakna tawhlet ah hiai khauhual san na khih inla, na innsung ah na pa leh na nu leh na sanggampate, na sanggamnute leh na innkawte khempeuh na na kaikhawm in. 19 Noute kuapeuh, innsung apan konglaka a na paikhiak leh ama' sisan mawh ama' lutung ah a om ding. Koute'n mawh ka paw kei ding uh. Inn sunga nang tawh omkhawm mi peuhmah ahih leh, ama' tunga khut a kikhak peuhmah leh, ama' sisan mawh koute' lutung ah a om ding. 20 Ahihhangin, koute thilhih na genkhiak lebel, non kichiamsakna mawh apan ka siang ding uhi, a chi uhi. 21 Ama'n a dawng a: Na gen bang teekteek uh hita hen, a chi a, amaute a khakheta a, a paita uhi. Ama'n tua tawhlet ah tua khauhual san khihsain a koih hi. 22 Amau a paikhia uh a, amau delhte'n lamtawna vazong a, lah mu loua hong kik mateng uh, ni thum sung, mual tung lam ah a vatam uhi. 23 Mual tung apan amaute gel hong paisuk kik uh a, Lui a galkah uh a, Nun' tapa Joshua kiang hong tung uh a, a thiltuahte khempeuh uh amah a hilh uhi. 24 Joshua kiang ah: Tangtawn Toupa'n eite' khut ah tua gam khempeuh hon pekhin taktak ahi. Eite lauin mi khempeuh a zulkhinta hi, a chi uhi.

Joshua 3

Jordan Lui Galkahna

1 Zingkhangpi-in Joshua a thou a, Israelte khempeuh tawh Shitim luiphai apan a kipankhia uh a, Jordan lui a tung uhi. Tua mun ah, lui galkah ma-in, giahphual a sat uhi. 2 Ni thum nungin, makaite'n giahphual a veh suak uh a, mipite kiang ah thupiakte a pia uhi: 3 Tangtawn Toupa, na Pathian uh' thukhun singkuang leh tua singkuang zawng siampite, Levite na muh chiangun, na omna uapan kipankhiain, tua singkuang na zui ding uh ahi. 4 Singkuang leh noute kal tong 2,000-a a kihal ding ahi. Singkuang na naih luat louh ding uh ahi. Tua bangin, koilama pai ding ahia, chih na thei ding uhi. Hiai lama pai ngei nai lou na hih manun hibanga na hih ding uh ahi, a chi uhi. 5 Joshua in mipite kiang ah: Noute kisiansuah un. Tangtawn Toupa'n zing chianga noute laka thillamdangpipi hih ding ahi, a chi hi. 6 Joshua in siampite kiang ah: Thukhun singkuang kisuan unla, mipite mai lam ah pai un, a chi hi. Tua bangin, amaute thukhun singkuang a kisuan uh a, mipite mai lam ah a pai uhi. 7 Tangtawn Toupa'n Joshua kiang ah: Mosi ka ompih banga nang hon ompih gige ka hi, chih mipite'n a theih nadingun, tuni-in Israelte khempeuh mai ah nang hon pahtawi panta ding ka hi. 8 Thukhun singkuang zawng siampite kiang ah: Jordan lui gei na tun chiangun, tui sikkhain ding un, chi-in thupia in, a chi hi. 9 Joshua in Israelte kiang ah: Hon naih unla, Tangtawn Toupa, na Pathian uh thute ngaikhia un. 10 Pathian Hing noute laka om ahi, chih hiai pansanin na thei ding uh. Ama'n noute mai apan Kanante, Hitte, Hivte, Perizte, Girgaste, Amorte leh Jebuste a hawlkhe ngeingei ding hi. 11 En un, leitung khuavannuai Toupa' thukhun singkuang na mai uah Jordan lui sung a lut ding hi. 12 Tu'n Israel namte lak apan mi sawmlenih, nam khat apan mi khat zel telkhia un. 13 Tangtawn Toupa, leitung khempeuh Toupa' thukhun singkuang zawng siampite'n Jordan tui khepeka a sik tak chiangun, luinak lam apan tui hong luangsuk pen, a kikhentat ding a, a kichingkhawm ding hi, a chi hi. 14 Hichi hong hi a, mipite'n, Jordan lui galkah dingin a giahphual uh a nusia uh a, thukhun singkuang zawng siampite amaute mai lam ah a pai uhi. 15 Jordan lui bel anlak hun sung teng a khansan laitak ahi. Hinapi-in, singkuang zawng siampite Jordan lui a tung uh a, a khepekun tuigei a sik uhi. 16 Tua laitakin, tua tui pen luinak lam apan luang louin a khawlta hi. Gamlapi ah, Zarethan kiang naia khua khat, Adam kichi mun ah tui vum venvonin a khawl a, luitaw lama Araba Tuipi, tua Chi Tuipi, lama luangsuk chiang chiang a kikhentat hi. Tua bangin, mipite Jerikho zawn ah a galkah uhi. 17 Israelte khempeuh, a nam buppi-a leihula a galkah sung teng uh, Tangtawn Toupa' thukhun singkuang zawng siampite bel, Jordan lui laizang ah, leihul ah kiptakin a ding uhi,

Joshua 4

1 Tua nam buppi in Jordan lui a galkah khit takun, Tangtawn Toupa'n Joshua kiang ah thu a gen a: 2 Mipite lak apan mi sawmlenih, nam khat apan khat zel, telkhia inla, amaute thu pia inla: 3 Siampite' khe in a sikna mun, Jordan lui laizang apan suang sawmlenih lain pua unla, tuzan na giah nading uh giahphual ah nga un, chi-in hilh in, a chi hi. 4 Tua bangin, Joshua in Israelte lak apan a sehsa mi sawmlenihte, nam khat apan khat zel, a samkhawm a, 5 amaute kiang ah: Tangtawn Toupa, na Pathian uh' singkuang mai ah, Jordan lui laizang ah vapai unla, mi chih in suang khat tek, Israel nam zahzah, na liangun vapua un. 6 Tua bel, noute laka chiamtehna ahih den theih nading ahi. Tunung chiangin, na tate un: Hiai suangte bang na chihna uh hiam? chi-in hon dong ding uhi. 7 Tua hun chiangin, noute'n: Pathian in Tangtawn Toupa' thukhun singkuang mai ah Jordan luite a sattan hi. Jordan lui a galkah laia Pathian in Jordan tuite a kantatsak manin, Israel suante adinga theihgigena hiden dinga hiai suangte ka koih uh ahi, chi-in amaute na hilh ding uhi, a chi hi. 8 Tua bangin, Israel suante'n Joshua, thupiak bangbangin a hihta uhi. Tangtawn Toupa'n Joshua a hilh bangbangin, Jordan lui laizang apan suang sawmlenih, Israel nam zahzah, a pua uh a, a giahphual uah a nga uhi. 9 Joshua in thukhun singkuang zawng siampite dinna Jordan lui laizang ah suang sawmlenih dang a chiangkhawm hi. Tua suangte tua lai ah tuni dongin a om uhi. 10 Mipite' hih dinga Tangtawn Toupa'n Joshua a thupiak peuhmah a kim sipsipa mipite'n a hih khit mateng uh, singkuang zawng siampite bel Jordan lui laizang ah a ding uhi. Mosi in Joshua a thuhilh bangbanga kihih ahi. Tua bangin, mipite a kinawh uh a, Jordan lui a galkahta uhi. 11 Amaute khempeuh a galkah khitun, Tangtawn Toupa' singkuang leh siampite, mipite' mitmuhin a galkahta uhi. 12 Reuben' suante apan, Gad' suante apan, leh Manase suan nam kimkhat apan mite bel Mosi in amaute a thuhilh bangin, Israel suante mai ah a galkah uh a, galdou dingin a kigalvan uhi. 13 Kigalvansa mi 40,000, Tangtawn Toupa' mai ah gal dou dingin, Jerikho phaizang ah a galkah uhi. 14 Tua ni-in, Tangtawn Toupa'n Israelte khempeuh' mitmuhin Joshua a pahtawi hi. Amaute'n Mosi a zahtak bangun Joshua zong a damsung teng a zahtak uhi. 15 Tangtawn Toupa'n Joshua kiang ah: 16 Theihpihna singkuang zawng siampite, Jordan lui apan hong paitou dingin thu pia in, a na chita hi. 17 Tua bangin, Joshua in siampite kiang ah: Jordan lui apan hong paitou un, chi-in thu a napia hi. 18 Tua khitin, Tangtawn Toupa' thukhun singkuang zawng siampite, Jordan lui apan hong paitou uhi. Siampite' khete'n leihul a sik takin, Jordan lui tui hong kichih kik a, a ma-a bangin luipiau dimletin tui a luang hi. 19 Kha khatna, a ni sawm ni-in, mipite Jordan lui apan a paitou uh a, Jerikho suahlam panga om, Gilgal mun ah giahphual a sat uhi. 20 Gilgal ah Joshua in, Jordan lui apan a puakkhiak uh, tua suang sawmlenihte a chiangta hi. 21 Israelte kiang ah: Tunung chianga na suante un a pate uh kianga: Hiai suangte bang na chihna uhiam? chi-a a dot chiangun, 22 Israelte leihula hiai Jordan lui galkah uh eive, chi-in amaute na hilh un. 23 Tangtawn Toupa, na Pathian un noute na galkah mateng uh, na mai uah Jordan tui a kangtatsaka ahi. Tangtawn Toupa, na Pathian un i galkah mateng uh, i maia Tuipi San a na kantatsak bangbangin, Jordan lui a kangtatsak hi. 24 Leitung mi khempeuh in, Tangtawn Toupa' khut thahat dan a theih nading uleh, noute'n Tangtawn Toupa, na Pathian uh na lau den theih nadingun, Ama'n hiai a hih ahi, a chi hi.

Joshua 5

Gilgala Zeksumna 1 Tua khitin, hichi hong hi a, Tangtawn Toupa'n eite khempeuh i galkah mateng, Israelte mai ah Jordan lui a kangtatsak, chih, Jordan tumlama om Amorte' kumpipate khempeuh leh tuipi geia Kanante' kumpipate khempeuh in a zaktakun a lungtangte uh a zulkhinta a, Israelte maituah dingin, hangsanna himhim a neita kei uhi. 2 Tua hun laiin, Tangtawn Toupa'n Joshua kiang ah: Meisahsuang temtate bawl inla, Israelte a nihveina zeksum kik in, a chi hi. 3 Tua bangin, Joshua in meisahsuang temtate a bawl a, Gibeath Haaraloth ah, Israelte zek a sum hi. 4 Hibanga a hihna hang hiai ahi: Aigupta apan hong paikhia, galdou thei pasal khempeuh, gamdai-gamkeu lampi ah a sivekta uh a, 5 tua Aigupta apan hong paikhete lah, Mosi in a zeksumsa ahi uhi. zekmukvun mual, Ahihhangin, Aigupta apan a khualzinna ua piangte bel, zeksum louh ahi uhi. 6 Aigupta apan hong paikhiak lai ua galdou thei pasal teng a sih vek dong uh, Israelte, gamdai-gamkeu ah kum 40 sung a vialzin uhi. Tua lah, Tangtawn Toupa' thu a man louh man uh ahi. Tangtawn Toupa'n eite kianga piak dinga i pu i pate kianga a chiamsa, tua nawitui leh khuaizu-a luang gam mu kei unteh, chi-in a na kichiamkhinta hi. 7 Ama'n tuate tangin a tate uh a khangliansak a, tuate ahi Joshua in zek a sumsak. Lamkala kuamah zek kisum lou ahih manin, zeksum louhin a na om nilouh uhi. 8 A nam buppi-a zeksum ahih nungun, a damsiang mateng uh, giahphual ah a nituang uhi. 9 Tua nungin, Tangtawn Toupa'n Joshua kiang ah: Tuni-in, Aigupta zahlakna noute apan ka khukmangta, a chi hi. Tua ahih manin, tuni dongin tua mun, Gilgal a kichi hi. 10 Jerikho phaizang, Gilgala a giah sungun, tua kha, a ni sawmleli ni, nitakin paikan ankuang a lui uhi. 11 Paikan khit, a zing chiang mahmahin tua gam gah, tanghou silngou sawhlouh leh an kan a ne uhi. 12 Tua gam gah a nek ni zing uapanin mana a ke nawn kei hi. Israelte adingin mana a om nawn kei a, tuachi-in, tua kumin Kanan gam gah a neta uhi.

Jerikho Pukna

13 Jerikho khawpi kianga Joshua a om laitakin, hichi hong om hi: Amah a daktouh leh, a mai ah pasal khat, a khuta namsau phawisa tawia ding a mu hi. Joshua in tua pa a vanaih a: Nang koute lama pang na hi hia, ka melmate uh lama pang? chi-in a dong hi. 14 Ama'n a dawng a: A koilam mah hi lou. Tangtawn Toupa' sepaihhon Makaipa hihna tawh hong pai ka hi, a chi hi. Tua a zak phetin, Joshua in lei si-in, amah a bia a: Ka Toupa'n a nasempa kianga bang gen ding nei hiam? chi-in a dong hi. 15 Tangtawn Toupa' sepaihhon Makaipa'n Joshua kiang ah: Na khedap suah in. Na dinna mun siangthou ahi, a chi hi. Tua bangin, Joshua in a khedap a suah hi.

Joshua 6

1 Israelte kihtak manin Jerikho khawpi kongpi a kikhakchip bikbek hi. Kuamah a pawtkhe kei a, kuamah a lut kei hi. 2 Tua chiangin, Tangtawn Toupa'n Joshua kiang ah: En in, Jerikho khawpi na khut sung ah kon pekhinta hi. A kumpipa leh a sepaih galhatte kon pekhinta hi. 3 Galvan tawite khempeuh tawh khawpi kimvelin khatvei pai in. Hibangin ni guk sung hih in. 4 Singkuang mai ah siampi sagih, belamtal ki pengkul sagih tawiin paisak in. A ni sagih ni in, siampite pengkul mut kawmin, sagihvei khawpi kimvelin pai un. 5 Amaute'n belamtal ki, ngaihtak leh saugintaka a mut uh na zak chiangun, mipite ngaihtakin a awng zua zua ding uh ahi. Tua laitakin, khawpi kulhbang, amahin a chim ding hi. Tua bangin, mi chih ama' mazawn ah a lut ding ahi, a chi hi. 6 Nun' tapa Joshua in siampite a samkhawm a, amaute kiang ah: Tangtawn Toupa' Thukhun singkuang kisuan un. Tua singkuang mai ah siampi sagih, belamtal ki, pengkul sagih tawiin paisak un! a chi hi. 7 Tua khitin, siampite kiang ah: Kipankhia un! Khawpi kimvelin pai unla, galvan tawite, Tangtawn Toupa' thukhun singkuang mai ah masa uhen, a chi hi. 8 Joshua in mite kianga thu a genkhitin, Tangtawn Toupa' maia belamtal ki, pengkul sagih tawi siampi sagihte, pengkul mut kawmin a pai uhi. Amaute nung ah Tangtawn Toupa' thukhun singkuang in a zui hi. 9 Pengkul mut siampite mai ah galvan tawi galdou mite a pai uh a, nungdal siampite'n pengkul mut kawmin singkuang a zui uhi. 10 Joshua in mipite thu a pia a: Noute awng dinga thu kon piak mateng awng kei un. Na aw uh sangsak kei unla, pau zong pau kei un. Awng un! Ka chih chiangin bel, awng un, a chi hi. 11 Tuachi-in, ama'n Tangtawn Toupa' singkuang, khawpi khatvei kimvelin a zawngsak hi. Tua khitin, mipite giahphuala kik-in a zangiak uhi. 12 Joshua bel, a zing chiang zingkhangin a thou a, siampite, Tangtawn Toupa' singkuang a kisuan kik uhi. 13 Pengkul sagih tawi siampi sagihte, pengkul mut kawmin, Tangtawn Toupa' singkuang mai ah a pai uhi. Galvan tawite, amaute mai ah a pai uh a, nungdal pawl in Tangtawn Toupa' bawm a zui uh a, pengkul a mutging tawntung uhi. 14 A ni nih ni-in, khawpi kimvelin khatvei a pai uh a, giahphual ah a kik uhi. Tua bangin ni guk sung a hih uhi. 15 A ni sagih ni-in, hichi hong hi a, phalvak-in amaute a thou uh a, a hih ngei bangun khawpi kimvelin a pai uhi. Tua a ni sagih ni kiain sagihvei, khawpi kimvelin a pai uhi. 16 Sagih vei a kimvelna ua, siampite'n pengkul a mut takun, Joshua in mipite thu a pia a: Awng un! Tangtawn Toupa'n noute khut sung ah khawpi hon peta hi. 17 Khawpi sunga omte khempeuh Tangtawn Toupa' hamsiat ahi. Kizuaknu Rahab leh a innkawte kia na hawi ding uh ahi. Tua bel, ama'n enkhemi i sawlte a na sel man ahi. 18 Ahihhangin, hamsiat thu khat peuh la lou dingin, tua hamsiat thilte apan kiveng tek un. Tua chi louin zaw, Tangtawn Toupa'n hon hamsiat ding a, Israel giahphual hamsiat suaksakin, buaisiatna na tun kha ding uhi. 19 Ngun leh khamte khempeuh, sumsan leh sika kibawl van khempeuh, Tangtawn Toupa adinga sehtuam siangthou ahi. Tangtawn Toupa' gou kholhna-a na koih vek ding uh ahi, a chi hi. 20 Tua khitin, siampite'n pengkul sauginin a mut uh a, mipite'n a zak takun a awng uhi. Pengkul gin leh mipite ot tawh kitonin khawpi kulhbang a chimta hi. Tuachi-in, michih amau' mazawn tek ah a lut uh a, khawpi a lata uhi. 21 Khawpi leh a sunga omte khempeuh a hihse vek uh a, pasal, numei, a teek a khang, ganhon, belamhon leh sabiltungte a vekin namsauin a satlum uhi. 22 Joshua in gam enkhemi nihte kiang ah: Kizuaknu' inn ah lut unla, ama' kianga na kichiam bangun, amah, ama' mite leh a neih khempeuh tawh hon lakhia un, a na chita hi. 23 Tua bangin, enkhia-a kuan tangvalte a valut uh a, Rahab leh a pa leh nu leh sanggampate leh ama' mite khempeuh hon lakhia uhi. A innkawte khempeuh hon lakhia uh a, Israelte giahphual pua ah amaute a koih uhi. 24 Tua khitin, khawpi buppi leh a sunga omte khempeuh meiin a haltum uhi. Ngun leh khamte leh sumsan leh sika kibawl belte kia a hawi uh a, tuate Tangtawn Toupa' inn-a goukholna ah a koih uhi. 25 Kizuaknu Rahab leh a pa' innkawte leh ama' mite khempeuh bel, Joshua in a hinghawi hi. Tua bel, Joshua in enkhe dinga Jerikho-a a sawl mite, ama'n a na sel man ahi. Tuachi-in, amah tuni dongin Israelte lak ah a tengta hi. 26 Tua hun laitakin, Joshua in hamselawhna thu a khung hi: Hiai khawpi Jerikho lamthak peuhmah, Tangtawn Toupa'n hamsiat hen: Tua bang mi in, a suangphum a phum chiangin, a tapa upapen in sawng hen. A kongpite a bawl chiangin, a tapa tumpen in sawng hen, a chi hi. 27 Tua bangin Tangtawn Toupa'n Joshua a ompih a, a minthanna in gamteng a thawn hi.

Joshua 7

Akhan' Khelhna

1 Ahihhangin, hamsiat thilte tawh kisaiin, Israelte muan-huailoutakin a gamta uhi. Judah nam-a mi khat Zera' tapa Zabdi' tapa Karmi ahi a, Karmi' tapa Akhan ahi. Akhan in hamsiat thilte a na la hi. Tuachi-in, Israelte tung ah Tangtawn Toupa' hehna a kuangta hi. 2 Joshua in Jerikho apan Ai khua ah mite a sawl hi. Ai khua bel, Bethel khawpi suahlam Beth Aven khawpi kianga om ahi. Joshua in a misawlte kiang ah: Paitou unla, gam vaenkhia un, a chi hi. Tuachi-in, amaute a paitou uh a, Ai khua a vaenkhia uhi. 3 Amaute Joshua kiang ah hong kik nawn uh a: Mi tengteng na kuansak vek a kul kei. Ai khua la dingin mi 2,000 hiam, 3,000 hiam sawl in. Mi tengteng tawlsak dah in. Ai khua ah mi tawmchik kia om hi, a chi uhi. 4 Mi 3,000 khawng a kuantou uh a, ahihhangin, Ai khawmite mai ah amaute a taikek uhi. 5 Ai khawmite'n mi 36 a na that uh a, khawpi kongpi apan Shebarim dong a delhsuk uh a, mun ken lak ah amaute a that uhi. Tua in mite a lungkesak a, tui bang lei a zui a hong hita uhi. 6 Tua bang ahih manin, Joshua in a puansilh a botkek a, Tangtawn Toupa' singkuang mai ah lei si-in, nitaklam tanpha a bok hi. Amah leh Israel upate leilaka bok-in, a luzang uah leivui a kibuak uhi. 7 Joshua in: Maizen, Toupa Tangtawn Pathian aw, banghanga hiai mite, Amorte khut-a mangthang dinga Jordan lui gal kahsak himhim na hia? Jordan lui gal langkhat lam ah lungkimtakin om hiathiat houh le ung maw! 8 Toupa aw, Israelte a melmate uh maia a taikek nung uh, ke'n bang genta ding ka hia? 9 Kanante leh hiai gama tengte'n hiai thu a na za ding uh a, koute hon umchipin, leitung apan ka min uh a thaimangta ding uhi. Tua khit chiangin, nang na min thupi hu dingin bang na hihta dia le? a chi hi. 10 Tangtawn Toupa'n Joshua kiang ah: Thou in! Banghanga bok nilouh na hia? 11 Israel in a khialta-a ahi! Ka thukham, amaute ka thupiak a mangkei uhi. Hamsiat thilte apan lak a nei uh a, a gu uh a, a im uh a, amau' van lak ah a sel uhi. 12 Hiai hangin ahi, Israelte, a melmate uh maia a din zawh louh uh. Amaute hamsiat thil hong suakta uh ahih manin, a melmate uh mai ah a taikek uhi. Noute laka hamsiat thil peuhmah na hihsiat kei uleh, noute kon ompih nawn kei ding hi. 13 Thou inla, mipite hihsiangthou in. Amaute kiang ah: Zing chiang adingin kihihsiangthou un. Tangtawn Toupa, Israel' Pathian in, Israel aw, noute lak ah hamsiat thil om ahi. Tua na koihmang mateng uh, na melmate uh mai ah na ding thei kei ding uh, chi ahi. 14 Zingsangin a nam a nama hong kilat ding uh ahi. Tangtawn Toupa'n a mat nam pen, a beh a beh-a hong kilat ding uh ahi. Tangtawn Toupa'n a mat beh pen, a innkuan kuana hong kilat ding uh ahi. Tangtawn Toupa'n a mat inkuan pen, a mi mai mala hong kilat ding uh ahi. 15 Tangtawn Toupa'n hamsiat thil tawh a matkhawm mi pen, a neih teng tawh Israelte'n a haltum ding uh ahi. Tangtawn Toupa' thukhun a manlouh manin leh Israelte laka khelhna zumhuaitak a hih manin, hibanga a tunga a hih ding uh ahi! a chi hi. 16 A zing chiang zingkhangin Joshua a thou a, Israelte a nam anamin hon painaisak a, Judah nam matin a om hi. 17 Judah nam, a beh a behin hon painaisak a, Zera beh matin a om hi. Zera beh, a innkuan kuanin hon painaisak a, Zabdi inkuan matin a om hi. 18 Joshua in Zabdi innkuan, a mi mai malin hon painaisak a, Akhan matin a om hi. Akhan bel, Karmi' tapa ahi. Karmi bel, Zabdi' tapa ahi. Zabdi bel, Zera' tapa ahi. Zera lah Judah nama mi ahi. 19 Tua khitin, Joshua in Akhan kiang ah: Ka tapa aw, Tangtawn Toupa, Israel Pathian, thupina pia inla, ama' kiang ah kiphuang in. Na thilhih hon hilh in, hon im ken, a chi hi. 20 Akhan in a dawng a: A dik ahi! Tangtawn Toupa, Israel Pathian tung ah ka na khialta hi. Hichi khachi-a ka hih ahi: 21 Gallak thilte lak ah Shinar puanaktual khat ka mu hi. Tua baan ah ngun tang, Shekel 200 leh kham khetphim tang shekel 50 zong ka mu a, ka enlah a, ka lata hi. Ka puanbuk sung, suai leinuai ah tuate ka sel a, tua nuai ah ngun tang a om hi, a chi hi. 22 Tua khitin, Joshua in mite a sawl a, amaute tua puanbuk ah a vatai uhi. Ngai in, tua puanbuk suai nuai ah puanaktual, a nuaia ngun tang tawh a na kisel petmah hi. 23 Amaute'n tua puanbuk apan tua thilte hon la uh a, Joshua leh Israelte khempeuh kiang ah hon pua uh a, Tangtawn Toupa mai ah a zalh uhi. 24 Tua khitin, Joshua leh Israelte khempeuh in Zera' tapa Akhan a kaikhia uhi. Tua ngun tawh, tua puanaktual tawh, tua kham khetphim tang tawh, a tapate, a tanute, a ganhonte, a sabiltungte, leh a belamte, tua chiangin, a puanbuk leh a neih teng tawh, amah Akhor Phaizang ah a paipih uhi. 25 Joshua in: Banghanga nang hibang lungzinna eite khempeuh tunga hon tun na hia? Tangtawn Toupa'n tuni in nang tung ah lungzinna hon tun ding ahi, a chi hi. Tua bangin, Israelte khempeuh in amah suang-in a deng uh a, amaute'n suanga a den khitun, meiin a haltum uhi. Hibang ahi amaute'n a denlup dan uh. 26 Akhan tung ah suang lianpi-in a chiang uh a, tuni dongin tua a om lai hi. Tua bangin, Tangtawn Toupa, a hehna mulkimhuai apan a lungheita hi. Tua ahih manin, tuni dongin tua mun, Akhor Phaizang a kichi hi.

Joshua 8

Ai Khua Hihsiatna

1 Tua nungin, Tangtawn Toupa'n Joshua kiang ah: Lau kenla, lungke ken. Galdou pawlpi khempeuh tonpih inla, vakuantou inla, Ai khua vasim in. En in, Ai kumpipa leh a mite, a khawpi leh a gam na khut sung ah kon peta hi. 2 Jerikho leh a kumpipa tunga na hih bangbangin, Ai leh a kumpipa tung ah hih in. Gallak thil leh a ganhonte uh bel, noumau adingin na la thei ding uhi. Khawpi nunglam ah galbuk pawl koih in, a chi hi. 3 Tua bangin, Joshua leh galdou khempeuh Ai khua sim dingin a kuankhia uhi. A galhat penpente 30,000 a telkhia a, zankhangin a sawlkhia hi. 4 Amaute thu a pia a: En un, noute, khawpi nunglam ah galbukin na om ding uh ahi. Khawpi apan gamlapi ah pai kei unla, mansain om un. 5 Kei leh ka ompihte'n khawpi ka vanaih ding uhi. Hichi hong hi ding a, tuma-a mah bangin, koute dou dingin amaute hong kuankhe ding uhi. Hong kuankhiak tak chiangun, amaute mai ah ka tai ding uhi. 6 Khawpi apan amaute ka zolkhiak mateng uh koute hon delh ding uh a, amaute'n: Tuma-a mah bangin, amaute eite mai ah taikek uh e, a kichi ding uhi. Tua banga, amaute maia ka tai chiangun, 7 noute na galbukna mun uapan ding khiain khawpi na la ding uhi. Tangtawn Toupa, na Pathian un noute khut sung ah tua khawpi hon pe ding hi. 8 Khawpi na lak khit chiangun, meiin na haltum ding uh ahi. Tangtawn Toupa' thupiak bangbangin na hih ding uh ahi. Ngai un, ke'n thu kon peta hi, a chi hi. 9 Joshua in a amaute a sawlkhia a, amaute galbuk nading mun ah a kuanta uhi. Ai khua tumlam pang, Ai leh Bethel kikal ah gal a buk uhi. Ahihhangin, Joshua bel mipite lak ah tua zan a giak hi. 10 A zing chiang, zingkhangpiin Joshua a thou a, a mite a kaikhawm a, Israel upate tawh Ai khua lam manawhin mipite ma a kai hi. 11 Galdoumi khempeuh amah tawh a kuantou uh a, khawpi a naih uh a, khawpi mazawn naichik a vatung uhi. Ai mallam pang ah giahphual a sat uhi. Ai leh amaute kikal ah phaizang a om hi. 12 Amain, Joshua in mi 5,000 khawng sawlin, Ai tumlam pang ah Ai leh Bethel kikal ah galbukin a koihkhinta hi. 13 Khawpi mallama giahphuala om, galdoumi khempeuh in mallam ah panmun a khawh uh a, tumlam ah galbuk pawl a pang uhi. Tua zanin, phaizang ah Joshua a paisuk hi. 14 Ai kumpipa'n tua a muh takin, khawpi mite tawh zingkhangpi-in a thou uh a, kintakin Araba zawn mun khat ah Israelte dou dingin a kuankhia hi. Ahihhangin, khawpi nunglam ah galbuk pawl a om, chih a thei kei hi. 15 Joshua leh Israelte bel kumpipa' galdoumite maia vuallel bangin, gamdai-gamkeu lampi ah a tai uhi. 16 Kumpipa'n amaute delh dingin, khawpi-a om teng khempeuh a samkhawm a, Joshua a delh uhi. Joshua in khawpi apan amaute a zolkhiak ahi uhi. 17 Ai ah hita leh Bethel ah hita leh, mi khat lei zong a omta kei uhi. Khawpi pen venlouha nusiain, Israelte a delhta uhi. 18 Tua khitin, Tangtawn Toupa'n Joshua kiang ah: Na khuta teipi Ai khualam ngatin lik in. Khawpi nang khut sunga hon pe ding ka hi, a chi hi. Tua bangin, Joshua in a teipi Ai khua lam ngatin a lik hi. 19 Hibanga a hih takin, galbukte, a panmun uapan hong dingkhe pah uh a, khawpi sunga lutin khawpi a lata uh a, a hal pah uhi. 20 Ai khua mite'n nunglam a nga uh a, khawpi kang khu vanlama kitungtou a mu uhi. Ahihhangin, amaute adingin koilam maha suahtak nading lampi a omta kei hi. Ahang bel, gamdai-gamkeu lama tai Israelte'n lah amaute delhte a na-lehdouta uhi. 21 Galbukte'n khawpi a lata uh, chih leh khawpi kangkhu kitungtou a muhtakun, Joshua leh Israelte khempeuh in kilehheiin Ai khua mite a na-sual uhi. 22 Galbukte zong khawpi apan hong taikhiain amaute a suai uh a, tua chi-in, Israelte'n amaute a langtuak ah a kalteh uhi. Israelte'n amaute hinghawi neilouin a that vek uh a, suakta khat leltak zong a om kei hi. 23 Ahihhangin, Ai kumpipa bel a hingmat uh a, Joshua kiang ah hon paipih uhi. 24 Israelte'n Ai khaw mite khempeuh, giahphual ah leh gamdai-gamkeua amaute a delhna mun uah, namsauin a na that chimit uhi. Tua nungin, Israelte Ai khua ah a kik uh a, a sunga omte namsau-in a that uhi. 25 Tua ni-in, Ai khua-a teng khemppeuh pasal leh numei 12,000 a si uhi. 26 Joshua in lah Ai khua-a tengte khempeuh a thah vek mateng, a teipi tawina khut a dokkik kei hi. 27 Ahihhangin, Tangtawn Toupa'n Joshua thu a piak bangin, Israelte'n tua khawpi-a gantate leh gallakte amau adingin a kilak uhi. 28 Tua bangin, Joshua in Ai khua a halta a, a sesa kivum lei a suaksak a, tuni dong kuama'n a luah kei hi. 29 Ai kumpipa bel singkung ah a khailum a, nitaklam dongin a khai hi. Ni a tum takin, Joshua in singkung apan a luang lakkhiak dingin thu a pia a, a lakhia uh a, khawpi kongpi lutna ah a paai uhi. A tung ah suang lianpi-in a chiang uh a, tuni dongin tua suangte a om lai hi.

Ebal Muala Thukhun Thaksakna

30 Tua nungin, Joshua in Ebal Mual ah, Tangtawn Toupa, Israel' Pathian adingin maitam a dawh hi. 31 Tua bel, Tangtawn Toupa' sila Mosi in Israelte kianga a thupiak tangtunna ahi. Tua bangin, Mosi' Dan Laibu sunga kigelh bangbangin, sik vanzat kizat louhna, sek louh suangtein ama'n tua maitam a dawh hi. Tua tung ah amaute'n Tangtawn Toupa adingin haltum thillatte leh lemna thillatte a lan uhi. 32 Tua ah, Joshua in Israelte mitmuhin, Mosi' dan gelhsa tua suangte tung ah a teisawn hi. 33 Israelte khempeuh, gamdang mi hi-in, tualsung mi hita leh, a vekpiun, a upate uh, a makaite uh leh thukhenmite tawh, Tangtawn Toupa' thukhun singkuang pang tuak ah a ding uhi. Amaute, tua singkuang zawng Levi siampite mai ah tua bangin a ding uhi. Amaute kikimkhenin, a kimkhat Gerizim Mual mazawn ah a ding uh a, a kimkhat dang Ebal Mual mazawn ah a ding uhi. Tangtawn Toupa' sila Mosi in, Israelte vualzawl dinga amaute thu a hilh laiin, hibanga hih dingin thu a na pekhin hi. 34 Tua nungin, Joshua in dan thute khempeuh vualzawlnate leh hamsiate, Dan Laibu sunga kigelh bangbangin, a simkhia hi. 35 Joshua in, Mosi' thupiak peuhmah, Israel kikhawmte, numei leh naupang leh amaute laka teeng gamdang mite nangawn zak-a simkhiak louh bangmah a om kei hi.

Joshua 9

1 Jordan tumlam panga kumpipate khempeuh, tanggama omte, phaizang a omte, leh Tuipi Lian gei gam tengteng, Lebanon chiang donga omte'n Jerikho leh Ai zawhna thu a na za uhi. Amaute bel, Hitte, Amorte, Kanante, Perizte, Hivte leh Jebuste' kumpipate ahi uhi. 2 Amaute, Joshua leh Israelte dou dingin kithutuaktakin hong kikaikhawm uhi. 3 Ahihhangin, Joshua in Jerikho leh Ai a bawl dan Gibeonte'n, a na zak takun, 4 lepchiahpiltakin a gamta uhi. Palaia kibawlin, ip luipipi, zuthol luipipi a sesa kithuap nemnum khawng, sabiltungtea puain a kisawl uhi. 5 Khedap sesa, kithuap nemnum khawng a bun uh a, puan luipipi a silh uhi. A tanghou beute uh zong a keugawp leh a apgawpsa ngen ahi. 6 Amaute, Gilgal giahphual ah Joshua kiang ah a vapai uh a, amah leh Israelte kiang ah: Gamlapi apan hong pai ka hi uh. Koute tawh lemna thu khung un aw, a vachi uhi. 7 Israelte'n tua Hivte kiang ah: Ka kiang ua teng hi kha ni uteh. Tua hi leh, noute tawh lemna thu ka khung thei ding uhia! a chi uhi. 8 Amaute'n Joshua kiang ah: Koute, na silate ka kei ua hia, a chi hi. Ahihhangin, Joshua in amaute kiang ah: Kuate na hi ua? Koi apan hong pai na hi ua? a chi hi. 9 Amaute'n a dawng uh a: Tangtawn Toupa, na Pathian uh min ka zak manun, gam gamlapi apan hong pai ka hi uh. A minthanna kigensawn ka na za uh a, Aigupta-a a thilhih khempeuh ka na za uhi. 10 Jordan suah lama Amor kumpipa nihte Heshbon kumpipa Sihon leh Bashan kumpipa, Ashtaroth khua-a vaihawmpa Og a bawl dante ka na za uhi. 11 Tua bang ahih manin, ka upate uh leh ka gam ua tengte khempeuh in koute hon sawl uhi: Lampi-a nek ding an pua unla, amaute vahoupih un. Koute na silate hi ung, koute tawh lemna thu khung un, vachi un, hon chi uhi. 12 Noute kianga hong pai dingin, inn apan kong kipatkhiak laiun, hiai ka tanghoute uh a lum laia kon tun uh ahi a, en un, tuin a apgawpta. 13 Hiai zuthawlte zu ka thun laiun, a thak ahi a, en un, tuin a khaanggawpta. Kong paina uh a gamlat luat manin ka puansilhte uh leh ka khedapte uh a luigawpta, a chi uhi. 14 Israelte'n tua mite' an a chiam uh a, Tangtawn Toupa dongin thu a kan masa kei uhi. 15 Tuachi-in, Joshua in amaute hinghawi dingin, amaute tawh lemna thu khung a, kikhawm mipite' makaite kichiamin thukhun a hihkipsak hi. 16 Gibeonte tawh lemna a bawl nung uh ni thum khitin a kilempihte uh, amau kiang naia teng, a khawhiangte ahi uh, chih Israelte'n a za uhi. 17 Tua bangin, Israelte a kipankhia uh a, a ni thum ni-in, amaute khawpite hong tung uhi. Tuate Gibeon, Kefira, Beeroth leh Kiriath Jearim ahi. 18 Ahihhangin, Israel kikhawmte' makaite'n, amaute kianga Tangtawn Toupa, Israel Pathian' min siala a na kichiamtak manun, amaute a dou kei uhi. Ahihhangin, kikhawmte, avekpiun a makaite uh tung ah a phun uhi. 19 Ahihhangin, makaite'n a dawng uh a: Tangtawn Toupa, Israel Pathian' min sialin i thuchiam amaute kiang ah i peta. Tu-in amaute i khoih a siang kei hi. 20 Amaute tunga i hih ding hiai ahi: Amaute kianga i kichiamna palsata eite tunga thangpaihna hong tun louh nadingin, amaute i hinghawi ding hi, a chi uhi. 21 Amaute'n: Amaute hing uhen. Ahihhangin, nam buppi khempeuh adingin singpua tuitawiin pang uhen, a chi uhi. Tua bangin makaite'n amaute kianga thuchiam a bawl uh a zui uhi. 22 Tua bangin, Joshua in Gibeonte a sam a: Banghanga koute kiang naia teeng hinapi, Gamlapi-a teeng ka hi uh, chi-a hon khem na hi ua? 23 Tu-in noute hamsethuak na hi uhi. Ka Pathian uh inn ading singpua tuitawia nasep na tawp ngei kei ding uh, a chi hi. 24 Amaute'n Joshua a dawng uh a: Tangtawn Toupa, na Pathian un a sila Mosi thu a piak dan, gam buppi noute hon piak dan leh, a gama teengte na mai ua hihchimih ding thu a piak dan kiteltaka hilhin ka om uhi. Tua banga, noute hanga ka hinna uh mansuah ding ka lau mahmah manun, hibanga hih ka hi uhi. 25 Tu-in, noute khut sunga om ka hi mai uh a, kilawm leh dik na sak bangbangun ka tung uah hih mai un, a chi uhi. 26 Joshua in Israelte khut apan amaute a humbit a, amaute a that kei uhi. 27 Tu ni-in, amaute ading leh Tangtawn Toupa'n a sehna muna Tangtawn Toupa' maitam ading, singpua tuitawi dingin Joshua in Gibeonte a bawlta hi. Tuni dongin, tua bangin a pang uhi.

Joshua 10

Nileh Kha a Khawlna

1 Joshua in Ai khua a la a, a hihgawp vek a, Jerikho khua leh a kumpipa tunga a hih bangin, Ai khua leh a kumpipa tung ah a hih chih thu Jerusalem kumpipa Adoni Zedek in a na za hi. Tua baan ah, Gibeonte'n Israelte tawh lemna thu khung uh a, amaute lak ah a teeng uh, chih zong a na za hi. 2 Amah leh a mite'n hiai thu a zak takun a patau mahmah uhi. Ahang bel, Gibeon kichi, kumpipa' khawpite laka khat banga lian, Ai khua sanga lianzaw ahi a, a mite zong galhat ahi uh chih a theih man uh ahi. 3 Tua bang ahih manin, Jerusalem kumpipa Adoni Zedek in, Hebron kumpipa Hoham, Jarmuth kumpipa Piram, Lakhish kumpipa Jafia leh Eglon kumpipa Debir kiang ah ngetna a bawl a: 4 Hong kuantou unla, Gibeon dou dingin hong huh un. Gibeon in Joshua leh Israelte tawh kilemna a bawl ahi, a chi hi. 5 Tua bangin, tua Amor kumpipa ngate a pangkhawm uhi. Amaute, Jerusalem, Hebron, Jarmuth, Lakhish leh Eglon kumpipate ahi uhi. A sepaihte khempeuh utawh a kuantou uh a, Gibeon dou dingin panmun a khawh uh a, a douta uhi. 6 Tua chiangin, Gibeonte'n Gilgal giahphual ah Joshua kiang ah thu a khak uh a: Na silate hon taisan ken. Hong kuantou meng inla, hong hunkhia in! Tanggama Amor kumpipate khempeuh koute dou dingin a pangkhawm uh, koute hong huh meng in, a chi uhi. 7 Tuachi-in, a sepaih honpi tawh, a galhat muanhuaite tawh, Gilgal apanin Joshua a kuantouta hi. 8 Tangtawn Toupa'n Joshua kiang ah: Amorte kihta ken. Amaute na khut sung ah kon pekhinta. Amaute kuamah in nang hon nang zou kei ding, a chi hi. 9 Gilgal apan zan khawvaka a pai touh nungun, Joshua in amaute, a theihkholh louhun, a dou guih hi. 10 Tangtawn Toupa'n amaute Israelte mai ah a buaigawpsak a, Gibeon ah tampitak a that hi. Israelte'n Beth Horon paitouhna lampi ah amaute a delh uh a, Azeka leh Makeda dongin lamtawnin a that uhi. 11 Amorte, Beth Horon apan Azeka dong, Israelte mai-a a taisukna uah, Tangtawn Toupa'n van apan gialpi-in a dengsuk a, Israelte' namsaua si sangin gialpi denlup a tamzaw uhi. 12 Tangtawn Toupa'n Israelte khut sunga Amorte a piak ni-in, Joshua in Tangtawn Toupa kiang ah thu a gen a, Israelte mai ah: Ni aw, Gibeon tung ah dingchip in, Kha aw, Aijalon Kuam tung ah dingchip in, a chi hi. 13 Tua bangin, Israelte'n a melmate uh tunga phuba a lak zawh mateng uh ni a khawl a, kha a khawl hi. Hiai thu Jashar' Laibu sung ah kigelh mah hilou hia? Van laizang ah ni a khawl a, ni khat sung vingveng tum ding a thudon kei hi. 14 Tua ma hileh, tua nung hi leh, chikmahin tua ni banga Tangtawn Toupa'n mi khat thumna a ngaihkhiak ni a om ngei kei hi. Tangtawn Toupa'n Israelte adingin gal a dou taktak hi! 15 Tua khitin, Joshua leh Israelte khempeuh Gilgal giahphual ah a chiahkik uhi.

Amor Kumpipa Ngate Thahna

16 Tua kumpipa ngate bel a na tai uh a, Makeda ah, kawkhuk ah a na- Phat Phat bu uhi. 17 Mi pawlkhat in: Kumpipa ngate ka muta uh. Makeda ah, kawkhuk ah a bu uh, chi-in Joshua a hilh uhi. 18 Ama'n amaute kiang ah: Suang lianpi khuk unla, tua kawkhuk hu unla, mi pawlkhat vengsak un. 19 Ahihhangin, noute tua muna khawl louin na galte uh delh unla, a nunglam ua pan suai unla, a khawpite uh tungsak kei un. Tangtawn Toupa, na Pathian un noute' khut sung ah amaute hon pekhinta ahi, a chi hi. 20 Tua bangin, Joshua leh Israelte'n amaute a zougawp ngiingei uh a, thah bang tawmchik kia kulhnei khawpite a tung uhi. 21 Tua nungin, sepaihhonte Makeda ah, giahphual ah, Joshua kiang ah galmuangin a kik uhi. Kuamah in Israel demna thu a gen kei hi. 22 Joshua in: Kawkhuk hong unla, tua kumpipa ngate ka kiang ah hon kai un, a chi hi. 23 Tua bangin, kawkhuk apan tua kumpipa ngate hon kai uhi. Amaute, Jerusalem, Hebron, Jarmuth, Lakhish leh Eglon kumpipate ahi uhi. 24 Amaute, Joshua kiang hon tut takun, ama'n Israelte khempeuh a samkhawm a, amaute hon kai sepaih makaite kiang ah: Hiai ah hong pai unla, hiai kumpipate' ngawng ah na khe-un sik un, a chi hi. Tua bangin, amaute hong pai nai uh a, amaute' ngawng ah a sik uhi. 25 Joshua in amaute kiang ah: Lau kei un. Lungke kei un. Thahat leh hangsan suah un. Gal na dou dingte uh tung ah Tangtawn Toupa'n hibanga hih ding ahi, a chi hi. 26 Tua khitin, Joshua in namsauin kumpipate a dawt a, a that a, singkung nga dawn ah a khai a, nitaklam dongin a kikhaisak hi. 27 Ni hong tum takin, Joshua in amaute, singkungte apan lakkhiak a, a bukna uh kawkhuk sunga paihlut ding thu a pia hi. Suang lianpipiin tua kawkhuk a hu uh a, tuni dongin tua suangte a om lai hi. 28 Tua ni-in, Joshua in Makeda a la hi. Tua khawpi-a teengte leh a kumpipa namsauin a that vek sipsip a, khat lei zong hinghawi a nei kei hi. Jerikho kumpipa tunga a hih bangin, Makeda kumpipa tung ah zong a hih hi.

Simlam Khawpite Zawhna

29 Tua nungin, Joshua Israelte khempeuh tawh Makeda apan Libna ah a pai uh a, tua khua a sim uhi. 30 Tangtawn Toupa'n tua khua leh a kumpipa Israelte khut sung ah a pia hi. Joshua in tua khua-a teengte khempeuh namsauin a that a, hinghawi a nei kei hi. Ama'n Jerikho kumpipa tunga a hih bangin, Libna kumpipa tung ah zong a hih hi. 31 Tua nungin, Joshua, Israelte khempeuh tawh, Libna apan Lakhish ah a pai uhi. Lakhish sim dingin panmun a khawh uh a, a sim uhi. 32 Tangtawn Toupa'n Israelte khut sung ah Lakhish a pia a, Joshua in a ni nih ni-in, tua khua a la hi. Libna tunga ahih bangin, Lakhish-a teengte khempeuh namsauin a that hi. 33 Lakhish huh dingin Gezer kumpipa Horam hong kuantou a, ahihhangin, Joshua in Horam leh a sepaihhon a zou a, hinghawi a nei kei hi. 34 Tua nungin, Joshua, Israelte khempeuh tawh, Lakhish apan Eglon ah a pai uhi. Eglon sim dingin giahphual a sat uh a, a sim uhi. 35 Tua ni mah-in tua khua a la uh a, Lakhish tunga a hih bangbangun Eglon-a teengte khempeuh namsauin a that uhi. 36 Tua nungin, Joshua, Israelte khempeuh tawh, Eglon apan Hebron ah a pai uh a, tua khua a sim uhi. 37 Hebron a la uh a, a kumpipa tawh a mite khempeuh tawh, a khawtatea teengte khempeuh tawh namsauin a that uh a, hinghawi a nei kei uhi. Eglon tunga ahih bangbangun, Hebron leh a sunga teengte a hihchimit uhi. 38 Tua nungin, Joshua, Israelte khempeuh tawh a kihei uh a, Debir a sim uhi. 39 Tua khawpi a la uh a, kumpipa a that uhi. A khawtate a la uh a, a mite khempeuh namsauin a that uh a, hinghawi a nei kei uhi. Libna leh a kumpipa tunga a hih uleh, Hebron tunga a hih bangbangun, Debir leh a kumpipa tung ah zong a hih uhi. 40 Tuachi-in, Joshua in hiai gam buppi, tanggam, simlam gam Negev kichi, phaizang leh muangpang keen teng, a kumpipate khempeuh utawh a zou a, hinghawi a nei kei hi. Tangtawn Toupa, Israel Pathian' thupiaksa bangbangin, a nak thei khempeuh a hih chimit hi. 41 Joshua in Kadesh Barnea apan Gaza dong leh Goshen gam khempeuh apan Gibeon dong a zou vek hi. 42 Joshua in hiai kumpipate leh a gam uh khatvei kuanin a zou vek hi. Tua bel, Tangtawn Toupa, Israel Pathian in Israel adinga gal a dou man ahi. 43 Tua nungin, Joshua leh Israelte khempeuh Gilgal giahphual ah a chiahkik uhi.

Joshua 11

Mallam Kumpipate Zawhna

1 Hazor kumpipa Jabin in hiai thu a na za a, Madon kumpipa Jobab leh Shimron leh i Akshaf kumpipate kiang ah thu a I khak hi. 2 Mallam tanggamte, Galili tuipi simlama om Araba-a teengte, tumlam phaizang apan Dor tanggam donga teengte' kumpipate kiang ah zong thu a khak hi. 3 Tua baan ah, suahlam leh Kanante' kumpipate leh tanggama teeng Amorte, Hitte, Perizte, Jebuste' kumpipate leh Hermon Mual nuai Mizpa gama Hivte' kumpipate kiang ah zong thu a khak hi. 4 Amaute, a sepaihhon khempeuh utawh, sakol leh kangtalai tampi tawh, sepaihhon tampi mahmah hong kuankhia uhi. A tamdan uh tuipi piaua sehnel zah ahi. 5 Hiai kumpipate kigawmin Merom Tuite kichihna mun ah giahphual a sat uh a, Israelte sim dingin a kisa uhi. 6 Tangtawn Toupa'n Joshua kiang ah: Amaute lau ken. Zing chiang tubang hunin, amaute khempeuh Israelte khutsung ah thahsa-a hon pe ding ka hi. A sakolte uh zapiguite na sattatsak ding a, a kangtalaite uh na haltumsak ding ahi, a chi hi. 7 Tua bangin, Joshua leh a sepaihhon Merom Tuite kichihna mun ah hong kuan guih uh a, amaute a sim uhi. 8 Tangtawn Toupa'n Israelte khut sung ah amaute a peta a, amaute a zou uhi. Sidon Lianzaw dong, Misrefoth Maim dong, tua chiangin, suahlama Mizpa Kuam dong amaute a delh uh a, hinghawi nei louin, a that vek uhi. 9 Tangtawn Toupa' thupiak bangin Joshua in amaute' sakolte' zapiguite a sattatsak uh a, a kangtalaite uh a haltumsak uhi. 10 Tua hun laiin, Joshua a nungkik a, Hazor khua a la a, namsauin a kumpipa a that hi. Hazor bel, hiai kumpigamte lutang a na hi ngeita ahi. 11 Tua khua-a tengte khempeuh namsauin a that chimit uhi. A nakthei khempeuh zong hinghawi a nei kei uh a, Hazor khua mahmah zong a haltum uhi. 12 Joshua in hiai kumpipate' khawpite khempeuh a la a, a kumpipate uh namsauin a that hi. Tangtawn Toupa'n a sila Mosi thu a piak bangin, amaute a hihchimit vek hi. 13 Ahihhangin, Israelte'n khawpi sesa tunga kilam khawpite zaw, Hazor chih louh siah, a hal kei uhi. Hazor bel, Joshua in a haltum hi, 14 Israelte'n gallakte khempeuh, hiai khawpitea gantate tawh, amau adingin a kipuak uhi. Ahihhangin, a mihingte bel namsauin a that vek uh a, a nak thei khempeuh hinghawi a nei kei uhi. 15 Tangtawn Toupa'n a sila Mosi thu a piak bangin, Mosi in Joshua thu a pia a, Joshua in a semkhia hi. Tangtawn Toupa'n Mosi a thupiakte khempeuh Joshua in sepkhiak zawh louhin bangmah a nuse kei hi. 16 Tua bangin, Joshua in hiai gam a vekpi-in a la hi: Tuate tanggam khempeuh Negev khempeuh, Goshen gam khempeuh ahi. Tumlam gam niam gamte leh Araba phaizang niam lam leh Israel tanggam leh a phaizang gamte tawh a la hi. 17 Seir Mual vasun tou Halak Mual giau apan Hermon Mual nuai lama Lebanon Phaizanga om, Baal Gad dong a zou vek hi. A kumpipate uh a man a, a sat a, a that hi. 18 Joshua in ni tampi sung hiai kumpipate a dou hi. 19 Gibeona teeng Hivte chih louh siah, khawpi khat lei in zong Israelte tawh lemna a bawl kei hi. Israelte'n amaute khempeuh douin a la vek uhi. 20 Tangtawn Toupa mahmah in Israelte dou dingin amaute lungtang a khauhsak hi. Tua bel, Tangtawn Toupa'n Mosi a thupiak banga Israelte'n amaute zou dimdem a, zahngaihna beia, a hihmanthat theih nading uh a na hi. 21 Tua hun lai mahin, Joshua a kuan a, tanggam apan Anakte a hihchimit hi. Tua bel, Hebron, Debir leh Anab tanggam khempeuh apan, Judah tanggam khempeuh apan, leh Israel tanggam khempeuh apan amaute a hihchimit chihna ahi. Joshua in amaute leh a khawpite uh a hihchimit vek a, 22 Israel gam ah Anakte nutsiat a om nawn kei hi. Gaza, Gath leh Ashdod kia ah a suakta tawmchik a om uhi. 23 Tua bangin, Tangtawn Toupa'n Mosi a thupiak bangin, Joshua in tua gam khempeuh a la a, Israel nam chih kiang ah, goutan gam a hawmsak hi. Tua nungin, gam in galkidouna apan tawlngakna a ngahta hi.

Joshua 12

Zawhsa Kumpipate

1 Israelte'n, Jordan lui suahlam Amon phaizang apan Hermon Mual dong, Araba suahlam pang teng tawh, gam a lakte uh leh tua gam kumpipa a zawhte uh hiaite ahi: 2 Sihon bel Amorte kumpipa ahi a, Hesbona vaihawm ahi: Ama' uk sung bel, Amon phaizang laizanga om Aroer apan Jabok Lui dong ahi. Tua Jabok Lui bel, Amonte gamgi ahi. Hiai gam in Gilead kimkhat a uap hi. 3 Tua baan ah, Araba suahlam pang teng, Kinereth Tuipi leh tua Chi Tuipi kichi Araba Tuipi dong leh Beth Jeshmoth dong, leh simlam panga Pisga pang kham suk teng tawh zong ama' uk ahi. 4 Sihon in Bashan kumpipa Og' gamgi dong a uk hi. Og bel, Refaim nam omsunte laka khat ahi. Ashtaroth leh Edrei ah vai a hawm hi. 5 Hermon Mual, Saleka leh Bashan a uk a, Geshur leh Maaka gamgi dong a gam ahi. Tua in Gilead gam kimkhat, Heshbon kumpipa Sihon' gamgi dong a uap hi. 6 Tangtawn Toupa' sila Mosi leh Israelte'n amaute a zou uhi. Tuachi-in, Tangtawn Toupa' sila Mosi in amaute' gam Reubente, Gadte leh Manase nam kimkhatte tan dingin a pia hi. 7 Joshua leh Israelte'n Jordan lui tumlam gam kumpipa a zawhte uh hiaite ahi: Jordan lui tumlam gamte bel, Lebanon phaizang Baal Gad apan Seir Mual suntou Halak Mual dong ahi. Joshua in hiai gamte, Israelte kiang ah a nam a nama kihawm dingin a pia hi. 8 Hiai kumpipate'n tanggam teng, tumlam phaizang gam teng, Araba, mual pang kham teng, gamdai-gamkeu leh Negev teng a luah uhi. Amaute, Hitte, Amorte, Kanante, Perizte, Hivte leh Jebuste ahi uhi. 9 Jerikho kumpipa khat ahi a, Bethel kianga Ai kumpipa khat ahi. 10 Jerusalem kumpipa khat ahi a, Hebron kumpipa khat ahi. 11 Jarmuth kumpipa khat ahi a, Lakhish kumpipa khat ahi. 12 Eglon kumpipa khat ahi a, Gezer kumpipa khat ahi. 13 Debir kumpipa khat ahi a, Gedar kumpipa khat ahi. 14 Horma kumpipa khat ahi a, Arad kumpipa khat ahi. 15 Libna kumpipa khat ahi a, Adulam kumpipa khat ahi. 16 Makeda kumpipa khat ahi a, Bethel kumpipa khat ahi. 17 Tapua kumpipa khat ahi a, Hefer kumpipa khat ahi. 18 Afek kumpipa khat ahi a, Lasharon kumpipa khat ahi. 19 Madon kumpipa khat ahi a, Hazor kumpipa khat ahi. 20 Simron Meron kumpipa khat ahi a, Akshaf kumpipa khat ahi. 21 Tahanak kumpipa khat ahi a, Megido kumpipa khat ahi. 22 Kadesh kumpipa khat ahi a, Karmela Jokneam kumpipa khat ahi. 23 Dor gam sanga Dor kumpipa khat ahi a, Gilgal a Goim kumpipa khat ahi. 24 Tirza kumpipa khat ahi a, A vekin kumpipa sawmthumlekhat ahi.

Joshua 13

Gam Lak ding Omlaite

1 Joshua, a kum hong tam a, hong teekta hi. Tangtawn Toupa'n amah kiang ah: Nang lah na tek mahmahta a, gam lianpipi lak ding lah a om lai hi. 2 Israelte'n gam a lak nai louh uh, Filistiate leh Geshurte gamte ahi. 3 Tuate'n Aigupta suahlama Sihor Lui apan mallama Ekron gam dong a uap hi. Mi'n amaute khempeuh, Kanante lak ah a simtel uhi. Filistia vaihawmpa ngate bel, Gaza, Ashdod, Ashkelon, Gath, Ekron leh Avima vaihawmpate ahi uhi. 4 Simlam apan Kanante gam khempeuh Sidonte' Ara apan Afek dong, Amorte gam teng, 5 tua chiangin, Gebalte gam teng leh suahlama Lebanon gam khempeuh, Hermon Mual nuaia Baal Gad apan Hamath lutna dong zong a uap hi. 6 Lebanon apan Misrefoth Maim donga tanggama teengte khempeuh ahih leh, keima'n Israelte mai ah ka delhkhe ding hi. Tua bel, Sidon mi ngen ahi uhi. Kon thupiaksa bangin, Israelte' goutan dingin hiai gam pe ngeingei in. 7 Nam kuate leh Manase nam kimkhatte kiang ah a goutan dingun hawm in, a chi hi.

Jordan Suahlam Gam Hawmna

8 Tangtawn Toupa' sila Mosi in amaute adinga a sehsak bangin, Reuben suante leh Gad suante'n bel, Manase nam kimkhat dangte tawh, Mosi' piaksa Jordan suahlam gam ah goutan a neita uhi. 9 Tua gam bel, Amon Kuam geia om Areor apan leh tua Kuam laizanga khawpi apan, Medeba mual tung gam teng uapin, Dibon dong ahi. 10 Heshbona vaihawmpa, Amorte kumpipa Sihon khawpite khempeuh uapin, Amon gamgi dong ahi. 11 Gilead, Geshur leh Maaka mite gam, Hermon Mual khempeuh leh Bashan gam khempeuh, Saleka dong zong a uap hi. 12 Tua bel, Bashana Og' kumpigam khempeuh ahi. Og in Ashtaroth leh Edrei ah vai a na hawm hi. Amah bel, Refaimte laka khawsuaksunte laka nunungpen ahi. Mosi in amaute a zou a, a gam uh a laksak hi. 13 Ahihhangin, Israelte'n Geshurte leh Maakate a hawlkhe kei uh a, tuni dongin amaute Israelte lak ah a teeng uhi. 14 Mosi in Levi suante kiang ah bel goutan a pe kei hi. Ahang bel, amaute a chiamsa bangin, amaute' goutan zaw Tangtawn Toupa, Israel Pathian kianga meia hal thillatte ahi. 15 Mosi in Reuben suante, a beh a beha gam a piakte hiaite ahi: 16 Amon Kuam geia om Aroer Guam geia apan leh tua Kuam laizanga khawpi apan leh Medeba mualtung khempeuh apan, 17 Heshbon leh tua mualtunga a khawpite khempeuh chiang dong ahi. Tua in Dibon, Bamoth Baal, Beth Baal Meon, 18 Jahaz, Kedemoth leh Mefaath, 19 Kiriathaim, Sibma, phaizang kianga mualtunga om Zeret Shahar zong a uap hi. 20 Beth Peor, Pisga mual pang kham teng, leh Beth Jeshmoth uap ahi. 21 Hiai gamte bel, phaizanga khawpi khempeuh leh Heshbona vaihawmpa, Amorte' kumpipa Sihon' gam teng zong uap ahi. Mosi in Amor kumpipa Sihon nuaia vaihawm Evi, Rekem, Zur, Hur leh Reba, tua chiangin, Midian hausate tawh a na zoukhin hi. 22 Kidouna muna a thahte uh baan ah, Israelte'n Beor' tapa Balaam, tua aisanpa zong namsauin a that uhi. 23 Reubente' gamgi, Jordan lui ahi. A khawpite leh khawtate, Reuben suante'n goutan dinga a beh a beha a hawm uh ahi. 24 Mosi in Gad suante kianga, a beh a beha gam a piak hiaite ahi: 25 Jezer gam, Gilead khawpite khempeuh leh Amorte gam kimkhat, Raba kiang naia Aroer chiang dong ahi. 26 Tua chiangin, Heshbon apan Ramath Mizpa leh Betonim chiang dong leh Mahanaim apan Debir gamgi chiang dong ahi. 27 Phaizang ah, Beth Haram, Beth Nimra, Sukoth leh Zafon dong ahi. Tua bel, Heshbon kumpipa Sihon' gam om laite ahi. A gamgi, Jordan lui apan suahlama Khinereth Tuipi chiang dong ahi. 28 A khawpite leh khawtate, Gadte'n, goutan a beh a behin a hawm uhi. 29 Mosi in Manase nam kimkhat, tua bel, Manase suante, a beh a beha gam a piak hiaite ahi: 30 Manase gamgi, Manahaim apan ahi. Bashan gama om Jair khawpite khempeuh a uap a, khawpi teng a vekin 60 ahi. 31 Gilead kimkhat, leh Bashan gam Og kumpipa' khawpite Ashtaroth leh Edrei bel, Manase' tapa Makir suante kimkhat in a beh a beha a tan uh ahi. 32 Mosi in suahlama Jordan gala Moab phaizanga a om lai a, goutan a hawm hiaite ahi. 33 Ahihhangin, Mosi in Levite kiang ah goutan a pe kei. Amaute' goutan bel, a gensa bangin, Tangtawn Toupa, Israel Pathian ahi.

Joshua 14

Gam Lak ding Omlaite

1 Kanan gama Israelte'n goutan a ngah gam uh hiaite ahi. Tua bel, siampi Eleazar leh Nun' tapa Joshua leh Israel nam behtuulpite'n amaute laka a hawmsak uh ahi. 2 Tangtawn Toupa'n, Mosi tungtawna thu a piak bangin, nam kua leh a kimkhatte kiang ah aisanin goutante a hawm uhi. 3 Mosi in Jordan suahlam ah nam nih leh a kimkhatte goutan a pekhinta a, ahihhangin, Levite lah goutan a hawm kei hi. 4 Ahang bel, Josef tapate nam nih hong suak uh a, Manase nam leh Efraim nam ahi uhi. Levite'n gam tan a nei kei uh a, ahihhangin, tenna ding khawpite leh a kima gam belamte leh bawngte tat nading tawh kia a tang uhi. 5 Tua bangin, Tangtawn Toupa'n Mosi kianga a thupiak bangin Israelte'n gam a hawm uhi.

Kaleb ading Hebron

6 Tua chiangin, Judah suante'n Gilgal ah Joshua a vanaih uh a, Keniz mi Jefune' tapa Kaleb in a kiang ah: Tangtawn Toupa'n Pathian' mi Mosi kianga Kadesh Barnea-a nang leh kei tungthu a gen na thei hi. 7 Mosi in Kadesh Barnea apan gam enkhe dinga hon sawl laiin, kum 40 ka hita. A dika ka theih bangbangin amah kiang ah thu ka tun kik hi. 8 Ahihhangin, ka kuanpih ka sanggamte'n mipite' lungtang a lausak uhi. Ke'n bel, Tangtawn Toupa, ka Pathian, ka lungtang teng khempeuhin ka zui hi. 9 Tuachi-in, tua ni mahin, ka kiang ah Mosi a kichiam a: Nang, na lungtang teng khempeuh tawh Tangtawn Toupa, ka Pathian na zuih manin, na khea na vasikna gam nang leh na tate' goutan ahi tawntung ding, a chi hi. 10 Tangtawn Toupa'n hon chiamsa bangbang ahi. Ama'n, Mosi kianga hiai thu a gen bangin, Israelte gamdai-gamkeua a vialvak nung-un, ka hinna kum 45 hon hawisak hi. En in, tuin, kum 85 ka hita! 11 Hinapi-in, Mosi in hon sawlkhiak ni-a ka tha bang tu'n ka pu lai. Tua laia kidou dinga ka hat bangin, tu'n sep ding teng sem dingin ka hat lai hi. 12 Tu-in, Tangtawn Toupa'n tua ni-a hon chiamsa hiai tanggam kei hon pia in. Tua laiin, tua gam ah Anakte a teeng uh a, a khawpite uh a lian a, kulhbaang nei ngen ahi, chih nang mahmah in na za hi. Ahihhangin, Tangtawn Toupa'n hon ompih ding a, Ama' gensa bangin amaute ka hawlkhe ding hi, a chi hi. 13 Tua bangin, Joshua in Jefune' tapa Kaleb a vualzawl a, a goutan dingin Hebron a pia hi. 14 Tua nungsang peuhmah, tuni dongin, Hebron pen Keniz mi Jefune' tapa Kaleba a hidenta hi. Ahang bel, ama'n a lungtang teng khempeuha Tangtawn Toupa, Israel Pathian a zuih man ahi. 15 Hebron bel, nidang laiin Kiriath Arba kichi ahi. Anakte laka thupipen Arba' min tama kiphuak ahi. Tua nung, tua gam in galmuanna a ngahta hi.

Joshua 15

Judah adinga Gam Sehkhiak

1 Judah suante, a beh a beh adinga sehkhiak gam bel, Edom gamgi dong, simtawpa Zin Gamdai-gamkeu dongin a kizalh suk hi. 2 Simlam gamgi bel, Chi Tuipi simtawpa gamgeng apan ahi. 3 Tangkanna simlam ah a pai a, Zin dong a pai hi. Kadesh Barnea simlam apan a paitou a, Hezron kiang ah a pai a, Adar ah a paitou a, Karka dong a kikual hi. 4 Tua baan ah, Azmon dong a pai a, Aigupta-a Luiguamkeu a kaan a, Tuipi Lian ah a mong hi. Hiai simlam gamgi ahi. 5 Suahlam gamgi bel, Chi Tuipi ahi a, Jordan Lui dong ahi. Mallam bel, Jordan suaha tuipi apan ahi. 6 Beth Hogla dong a paitou a, Beth Araba mallam ah, Reuben' tapa Bohan' Suang kichi dong a pai hi. 7 Akhor Phaizang apan Debir ah a paitou a, mallam manawhin, Gilgal lam ah a kihei hi. Gilgal bel, Adumim Tangkanna gala om ahi. Adumim bel, tua luita simlama om ahi. Tua ban ah, En Shemesh tuite zuiin a pai a, En Rogel ah a suakkhia hi. 8 Tua baan ah, Ben Hinom phaizang mallam mong tak ah a kahtou a, Jebuste' Khawpi pang kham a zuitou hi. Tua Khawpi bel Jerusalem hong kichi ahi. Tua apanin Hinom Phaizang tumlama mual vum ah, Refaim Phaizang maltawp tak ah a paitou hi. 9 Tua mual apanin Neftoa luinakte manawhin a pai a, tua apan Efron muala khawpite ah a suakkhia a, Baala lam ah a paisuk hi. Baala bel, Kiriath Jearim kichi ahi. 10 Tua baan ah, Baala apan tumlam manawhin Seir Mual dong a kuisuk a, Jearim mual mallam kham zuiin a pai a, Beth Shemesh dong a paisuk a, Timna ah a galkah hi. Jearim mual bel, Kesalon zong kichi ahi. 11 Ekron mallam kham zuiin a pai a, Shikeron lam ah a kihei a, Baala Mual zuiin a pai a, Jabneel ah a suak a, tuipi a sun hi. 12 Tumlam gamgi ahih leh, Tuipi Lian geigei zuia pai ahi. Hiaite bel, Judah suante' gamgi, a beh a beha uap ahi. 13 Tangtawn Toupa'n a kianga thu a piak bangin, Joshua in, Jefune' tapa Kaleb ading, Judah gam sung ah, tan khat a pia hi. Tua bel, Kiriath Arba ahi. Kiriath Arba bel Hebron zong kichi ahi. Arba bel, Anak suangpa ahi. 14 Kaleb in, Hebron apanin Anakte thum a hawlkhia hi. Amaute, Sheshai, Ahiman leh Talmai ahi. Amaute Anak suante ahi uhi. 15 Tua apanin Debira teengte a vasim hi. Debir bel, nidang laiin Kiriath Sefer kichi ahi. 16 Kaleb in: Kiriath Sefer sim a, la zoupa kiang ah, a zi dingin ka tanu Aksa pia ning, a na chi hi. 17 Kenaz' tapa Othniel in a la zou hi. Kenaz bel, Kaleb' sanggampa ahi. Tua bangin, Kaleb in a tanu Aksa, Othniel zi dingin a pia hi. 18 Hichi hong hi a, Aksa, Othniel kiang ah hong pai a, a pa kianga lou khat ngen dingin amah ana kun hi. Aksa, a sabiltung apan a kumkhiak takin, Kaleb in amah kiang ah: Nang bang na deih a? a chi hi. 19 Aksa in a dawng a: Deihsakna tuam khat hon pia inla, Negeva gam non piaktak ngai leh, tua tuinakte zong hon pia in, a chi hi. Tua bangin, Kaleb in tuinak saknungte leh tuinak khangnungte amah a pia hi. 20 Judah suante'n a beh a beha a goutan uh hiai ahi: 21 Simlam tawpa Edom gamgi zula Judah suante'n a neih khawpite hiaite ahi: Kabzeel, Eder, Jagur, 22 Kina, Dimona, Adada, 23 Kadesh, Hazor, Ithnan, 24 Zif, Telem, Bealoth, 25 Hazor Hadata, Kerioth leh Hezron. Hezron bel Hazor ahi. 26 Tua baan ah, Amam, Shema, Molada, 27 Hazar Gada, Heshmon, Beth Pelet, 28 Hazar Shual, Beersheba, Biziothia ahi. 29 Tua ban ah, Baala, Iim, Ezem, 30 Eltolad, Kesil, Horma, 31 Ziklag, Madmana, Sansana, 32 Lebaoth, Shihim, Ain leh Rimon ahi. Avekin, khawtate baan ah khawpi 29 ahi. 33 Tumlam gam niam ah: Eshtaol, Zora, Ashna, 34 Zanoa, En Ganim, Tapua leh Enam, 35 Jarmuth, Adulam, Soko leh Azeka, 36 Shaaraim, Adithaim, Gedera. Gendera bel Gederothaim zong a kichi hi. Avekin, khawtate baan ah khawpi sawmleli ahi. 37 Zenan, Hadasha, Migdal Gad, 38 Dilean, Mizpa, Joktheel, 39 Lakhish, Bozkath, Eglon, 40 Kabon, Lamas, Khitlish, 41 Gederoth, Beth Dagon, Naama leh Makeda. A vekin, khawtate baan ah khawpi sawmleguk ahi. 42 Tua chiangin, Libna, Ether, Ashan, 43 Ifta, Ashna, Nezib, 44 Keila, Akzib, leh Maresha zong a uap hi. Avekin, khawtate baan ah khawpi kua ahi. 45 Ekron, a kimkota tennate gam leh a khawtate tawh, 46 Ekron tumlam panga Ashdod kiang naia khawpite leh khawtate zong a uap hi. 47 Ashdod, a kimkota tennate leh khawtate tawh, Gaza, a kimkota tennate leh khawtate tawh, Aigupta lui leh Tuipi Lian dong a gamgi in a uap ahi. 48 Tanggam ah: Shamir, Jatir, Soko, 49 Dana, Debir kichi Kiriath Sana, 50 Anab, Eshtemo, Anim, 51 Goshen, Holon leh Gilo a uap hi. Avekin, khawtate baan ah sawmlekhat ahi. 52 Arab, Duma, Eshan, 53 Janim, Beth Tapua, Afheka, 54 Humta, Hebron kichi Kiriath Arba leh Zior zong a uap hi. Avekin, khawtate baan ah khawpi kua ahi. 55 Maon, Karmel, Zif, Juta, 56 Jezreel, Jokdeam, Zanoa, 57 Kain, Gibea, leh Timna zong a uap hi. Avekin, khawtate baan ah khawpi sawmkhat ahi. 58 Halul, Beth Zur, Gedor, 59 Maarath, Beth Anoth leh Eltekon zong a uap hi. Avekin, khawtate baan ah khawpi guk ahi. 60 Kiriath Jearim kichi Kiriath Baal leh Raba zong a uap hi. Avekin, khawtate baan ah khawpi nih ahi. 61 Gamdai-gamkeu ah: Beth Araba, Midin, Sekaka, 62 Chi khawpi Nibshan leh En Gedi zong a uap hi. Avekin, khawtate baan ah khawpi guk ahi. 63 Judah suante'n Jerusalema teeng, Jebuste a hawlkhe zou kei uhi. Tuni dongin Jebuste, Jerusalem ah, Judah suante lak ah a teeng uhi.

Joshua 16

Efraim leh Manase ading Gam Sehkhiak

1 Josef' suante adinga gam sehkhiak gamgi Jerikho zawn, Jordan apan Jerikho tuinakte suah lama paitou, gamdai-gamkeu tawnin Bethel tanggam ah a pai hi. 2 Luz kichi Bethel apan, Arki gamgi a tawn a, Ataroth ah a pai hi. 3 Tumlam ah a paisuk a, Jafelet' suante gamgi ah, Beth Horon khangnung gamgi ah a pai a, Gezer ah a pai a, tuipi a sun hi. 4 Josef' suante Manase leh Efraim in a goutan uh hibang in a ngah uhi. 5 Efraim' suante gam, a beh a beh-a a hawm uh hiai ahi: Simlam ah a gamgi uh Ataroth Adar apan Beth Horon saknung ah a pai a, 6 tumlama kiheisukin tuipi a sun hi. Mikmethath simlama paiin suahlam manawhin a kawi a, Taanath Shilo ah a pai a, Janoa suahlam ah a pai hi. 7 Janoa apan Ataroth ah leh Naara ah a paisuk a, Jerikho hetkhain Jordan lui a sun hi. 8 Tapua apan tumlam ah Kana Kuam ah a pai a, tuipi a sun hi. Efraim suante'n a beh a beha a goutan uh hibang ahi. 9 Manase suante' goutan sunga Efraim suante adinga sehkhiak khawpite leh a khawtate zong a uap hi. 10 Ahihhangin, amaute'n Gerara teeng Kanante a hawlkhia kei uhi. Tuni dongin Kanante, Efraim suante lak ah a teeng uh a, Efraim suante' sal-in a om uhi.

Joshua 17

1 Josef' tapa masa Manase ahi a, Manase nam adinga gam sehkhiak hibang ahi. Manase' tamasa Makir ahi. Makir lah Gileadte' pubul ahi. Makir suante sepaih galhatte ahih manun, Gilead leh Bashan a tang uhi. 2 Tuachi-in, hiai goutan bel Manase suan dangte kianga piak ahi. Amaute bel, a beh behin, Abiezer, Helek, Asriel, Shekhem, Hefer leh Shemida beh ahi uhi. Hiaite Josef tapa Manase suan pasalte, a beh beha gen ahi uhi. 3 Manase' tapa Makir, Makir' tapa Gilead, Gilead' tapa Hefer, Hefer' tapa Zelofehad ahi. Zelofehad in tapa a nei kei a, tanu vive a nei hi. Amaute Mala, Noa, Hogla, Milka leh Tirza ahi uh. 4 Amaute, siampi Eleazar, leh Nun' tapa Joshua leh behtulpite kiang ah hong pai uh a: Ka saggam pasalte uh laka koute zong goutan hon pe dingin Tangtawn Toupa'n Mosi thu a pia hi, a chi uhi. Tua bangin, Tangtawn Toupa' thupiak bangin, Joshua in amaute a pa uh' sanggam pasalte tawh goutan a pekhawm hi. 5 Manase suante' goutan bel, Jordan suahlam Gilead leh Bashan simlouhin, gam sehkhiak sawmkhat ahi. 6 Ahang bel, Manase suante' tanute'n a tapate uh lak ah goutan a ngah tei ua ahi. Gilead gam bel, Manase tapa dangtea ahi. 7 Manase gamgi ahih leh Asher apan Mikmethath chiang dong ahi. Mikmethath bel, Shekhem gala om ahi. Mikmethath apan simlam ah gamgi a pai a, En Tapua-a teengte a uap hi. 8 Manase suante'n Tapua gam a tang uh a, ahihhangin, Tapua khawpi bel Manase gamgi tak ah a om a, Efraim suante'n a tang uhi. 9 Tua baan ah, Manase gamgi simlam manawhin Kana Kuam ah a pai a, Efraim suante' khawpite dong a pai hi. Efraim khawpite pawlkhat, Manase suante' khawpite lak ah a om hi. Ahihhangin, Manase gamgi bel, tua Kana Kuam mallam pang ah a pai a, tuipi a sun hi. 10 Simlama gam Efraima ahi a, mallama gam Manasea ahi. Manase gamgi in tuipi a sun a, mallam ah Asher tawh a kigamgi a, suahlam ah Isakhar tawh a kigamgi hi. 11 Isakhar leh Asher gam sung ah, Manase suante'n Beth Sheen leh a kim gam a vanei uh a, Ibleam leh a kim gam leh Dor leh a kim gam zong a vanei uhi. Endor leh a kim gama teengte leh Taanak leh a kim gama teengte zong a vanei uh a, Megidoa teengte leh a kima teengte zong a va-nei uhi. Gam sehkhiak thum a tang uhi. 12 Kanante'n hiai gama teen teitei a sawm manun, Manase suante'n hiai khawpite a luah zou kei uhi. 13 Ahihhangin, Israelte hong hat zawk takun, Kanante silain a zang uh a, a hawlkhe vek kei uhi. 14 Josef suante'n Joshua kiang ah: Banghanga koute goutan khat kia, gam khat kia hon khenkhiak na hia? Koute, Tangtawn Toupa'n hon vualzawl a, a tama tam kei ve ua, a chi uhi. 15 Joshua in amaute a dawng a: Noute a tama tam na hih man-un leh, Efraim tanggam noua dinga neu lua ahih manin, gammang ah kuantou unla, Perizte leh Refaite gam nou adingin vavat ve ua, a chi hi. 16 Josef suante'n a dawng uh a: Tua tanggam koute adingin kiching lou lai hi. Phaizanga teeng Kanante lah sik kangtalaite nei hi uh a, Beth Shaan leh a kim gama teengte leh Jezreel phaizanga teengte'n zong sik kangtalaite a nei uhi, a chi uhi. 17 Ahihhangin, Joshua in Josef suante Efraim nam leh Manase nam kiang ah: Ahi, noute na tam uh a, hat lah na hat uh a, gam sehkhiak khat kia na tang kei ding uh. 18 Tanggam gammang zong na tang ding uh. Vavat un, a gam mong dong na tang ding uhi. Kanante'n sik kangtalaite neiin, hat mah le uh, amaute na hawlkhe zou ding uhi, a chi hi.

Joshua 18

Gam Omlaite Hawmna

1 Tua nungin, Israel kikhawmte khempeuh Shilo ah a paikhawm uh a, tua ah Kihoupihna Puanbuk a lam uhi. Gam khempeuh a zoukhinta uh a, 2 ahihhangin, goutan ngah nailou Israel nam sagih a om lai hi. 3 Joshua in Israelte kiang ah: Tangtawn Toupa, na pu na pate uh Pathian in noute gam hon peta. Luah loua bangtan ngak ding na hi ua? 4 Nam teng apan mi thum tek sep unla, gam vavel unla, a gam goutante uh omdan gelha tawiin, ka kiang ah hong kik nawn uhen. 5 Gam seh sagih na suah ding uh ahi. Judah innkawte bel, simlam ah a gam uah a omden ding uh a, Josef inkawte zong mallam ah a gam uah a omden dng uhi. 6 Gam seh sagihte omdan na gelh khit chiangun, kei kiang ah hon tawi le uchin, ke'n Tangtawn Toupa, i Pathian' mai ah, noute adingin ai kon sansak ding hi. 7 Levi suante'n bel, noute lak ah goutan a nei kei uhi. Tangtawn Toupa' maia siampi na a sep uh' amaute' goutan ahi. Gad, Reuben leh Manase nam kimkhatte'n Jordan suahlam ah goutan a ngah khin uhi. Tangtawn Toupa' sila Mosi in amaute a piak ahi, a chi hi. 8 Tua mite gam vel dinga a kuankiak takun, Joshua in amaute a thuhilh a: Pai unla, gam vavel unla, a omdan hon gelh un. Tua khit chiangin, hong kik unla, Shilo ah Tangtawn Toupa' mai ah noute adingin, ai kon sansak ding hi, a chi hi. 9 Tua bangin, tua mite a kuankhia uh a, gamsung teng a paisuak uhi. A gam seh sagih a suah uh a, a khua a khua-in a omdan a gelh uh a, Shilo giahphual ah Joshua kiang ah hong chiahkik uhi. 10 Joshua in, Shilo ah, Tangtawn Toupa' mai ah, amaute adingin ai a san a, Israelte kiang ah gam sehkhiak bangbangin gam a hawmsak hi.

Benjamin ading Gam Sehkhiak

11 Aisan masa pen Benjamin suante, a beh a beh tung ah a tu hi. Amaute adinga gam sehkhiak bel, Judah nam leh Josef namte kikal ah a kia hi. 12 Mallam ah a gamgi uh, Jordan apan Jerikho mallam kham ah a pai a, tumlam tanggam ah a pai a, Beth Aven gamdai-gamkeu ah a suakkhia hi. 13 Tua apan Luz simlam kham ah a galkah hi. Luz bel, Bethel kichi ahi. Tua apanin, Beth Horon khangnung simlam mual ah a pai a, taroth Adar chiang dong a paisuk hi. 14 Simlama Beth Horon gal mual apan tua gamgi simlam manawhin tumlam pang ah a pai a, Kiriath Baal ah a suakkhia hi. Kiriath Baal bel, Kiriath Jearim kichi ahi. Tua bel, Judah suante' khawpi ahi. Hiai a tumlam gamgi ahi. 15 Simlam gamgi bel, tumlama Kiriath Jearim khua gei apan a kipan a, Neftoa tuinakte ah a suakkhia hi. 16 Tua baan ah, Refaim Phaizang mallama Ben Hinom Phaizang gala mualbul zuisukin, Jebuste khawpi simlam kham ah, En Rogel chiang dong a pai hi. 17 Tua baan ah, mallam ah a kui a, En Shemesh ah a pai a, Adumim Tangkanna gala Geliloth ah a pai a, Reuben' tapa Bohan' Suang ah a pai a, 18 Beth Araba ah a pai lai a, Araba ah a paisuk hi. 19 Tua ban ah, Beth Hogla mallam kham ah a pai a, Chi Tuipi mallam pang geng ah a suakkhia a, simlama Jordan suah a sun hi. Hiai simlam gamgi ahi.20 Suahlam gamgi bel Jordan lui ahi. 20 Hiaite Benjamin suante, a beh a beha, a goutan uh kualkhum gamgi ahi. 21 Benjamin suante'n, a beh a beha a tan uh khawpite hiaite ahi: Jerikho, Beth Hogla, Emek Keniz, 22 Beth Arba, Zemarin, Bethel, 23 Avim, Para, Ofra, 24 Khefar Amoni, Ofni leh Geba ahi. A vekin, khawtate ban ah, khawpi sawmlenih ahi. 25 Gibeon, Uma, Beeroth, 26 Mizpa, Khefira, Moza, 27 Rekem, Irpeel, Tarala, 28 Zela, Jebus khawpi Helef, dong ahi. Jebus bel Jerusalem kichi ahi. Tua baan ah, Gibea leh Kiriath zong ahi. Avekin, khawtate ban ah khawpi sawmleli ahi. Benjamin suante'n, a beh a beha a goutan uh hibang ahi.

Joshua 19

Simeon ading Gam Sehkhiak

1 Aisan nihveina pen Simeon suante, a beh a beh tung ah a tu hi. Amaute' goutan bel, Judah gam sung ah a om hi. 2 Tua khawpite bel, Beersheba, Sheba kichi leh Molada, 3 Hazar Shual, Bala, Ezem, 4 Eltolad, Bethul, Horma, 5 Ziklag, Beth Markaboth, Hazar Susa, 6 Beth Labaoth leh Sharuhen ahi. Khawtate baan ah khawpi sawmlethum ahi. 7 Tua baan ah, Ain, Rimon, Ether leh Ashan zong a tang uhi. Khawtate ban ah, khawpi li ahi. 8 Tua baan ah, hiai khawpite kima khawtate khempeuh, Baalath Beer chiang dong ahi. Baalath Beer bel simlam Negeva Rama ahi. Simeon suante'n, a beh a beha a goutan uh hibang ahi. 9 Judah suante' goutan, amaute kisap zah sanga a let zawk manin, amaute' goutan apan Simeon suante' goutan ding kisepkhia ahi. Tua bangin, Simeon suante'n Judah gam sung apan goutan a ngah uhi.

Zebulun ading Gam Sehkhiak

10 Aisan thumveina pen Zebulun suante, a beh a beh tung ah a tu hi: Amaute' goutan gamgi Sarid chiang dong ahi. 11 Tumlam ah Marala ah a pai a, Dabesheth a sun a, tua baan ah, Jakneam kianga luita dong a sun hi. 12 Sarid apan suahlam, ni suahna lam ah, Kisloth Tabor gam ah a pai a, Daberath ah a suak a, tua chiangin, Jafia ah a paitou hi. 13 Tua baan ah, suahlam manawhin, Gath Hefer ah leh Eth Kazin ah a pai a, Rimon ah a suakkhia a, Nea lam ah a kihei hi. 14 Tua apanin mallam pang ah a pai kual a, Hanathon ah a pai a, Ifta El Phaizang a sun hi. 15 Tua gamgi in Katath, Nahalal, Shimron, Idala leh Bethlehem zong a uap hi. Avekin, khawtate baan ah khawpi sawmlenih ahi. 16 Hiai khawpite leh khawtate, Zebulun suante'n, a beh a beha goutan a hawm uh ahi.

Isakhar ading Gam Sehkhiak

17 Aisan liveina pen Isakhar suante, a beh a beh tung ah a tu hi. 18 A gamgi un hiaite a uap hi: Jezreel, Khesaloth, Shunem, 19 Hafaraim, Shion, Anaharath, 20 Rabith, Kishion, Ebez, 21 Remeth, En Ganim, En Hada leh Beth Pazez. 22 A gamgi un Tabor, Shahazuma leh Beth Shemesh a tawn a, Jordan a sun hi. A vekin, khawtate baan ah khawpi sawmleguk ahi. 23 Hiai khawpite leh khawtate, Isakhar suante'n, a beh a beha goutan a hawm uh ahi.

Asher ading Gam Sehkhiak

24 Aisan ngana pen Asher suante, a beh a beh tung ah a tu hi. 25 A gamgi uh hibang ahi: Helkath, Hali, Beten, Aksaf, 26 Alamelek, Amad leh Mishal ah a pai hi. Tumlam pang ah a gamgi un Karmel a tawn a, Sihor Libnath lui a sun hi. 27 Tua baan ah, suahlam ah Beth Dagon lam manawhin a kihei a, Zebulun a sun hi. Tua ban ah, Ifta El Phaizang ah a pai a, mallam ah Beth Emek leh Neiel sunin a pai a, veilam ah Kabul ah a suak hi. 28 Tua baan ah, Abdon, Rehob, Hamon leh Kana ah a pai a, Sidon Lianzaw chiang dong a pai hi. 29 Tua baan ah, Rama lam ah a kihei kik a, kulhbang nei Tura ah a pai a, Hosa lam ah a kihei a, Akzib gam ah tuipi ah a suak hi. 30 Tua baan ah, Uma, Afek leh Rehob ah a pai hi. Avekin, khawtate baan ah khawpi sawmnihlenih ahi. 31 Hiai khawpite leh a khawtate Asher suante'n, a beh a beha goutan a hawm uh ahi.

Naftali ading Gam Sehkhiak

32 Aisan gukna pen Naftali suante, a beh a beh tung ah a tu hi: 33 A gamgi uh, Helef leh Zaananim a singkung lianpi apan leh Adami Nekeb leh Jabneel khengin Lakum dong a pai a, Jordan lui ah a suak hi. 34 Tua baan ah, tumlam ah Aznoth Tabor ah a pai a, Hukok ah a suak hi. Simlam ah Zebulun, tumlam ah Asher, suahlam ah Jordan lui ah Judah gam a sun hi. 35 Naftali suante' khawpi kulhbang neite, Zidim, Zer, Hamath, Rakath, Kinereth, 36 Adama, Rama, Hazor, 37 Kedesh, Edrei, En Hazor, 38 Iron, Migdal El, Horem, Beth Anath leh Beth Shemesh ahi. Avekin, khawtate baan ah khawpi sawmlekua ahi. 39 Hiai khawpite, a khawtate tawh, Naftali suante'n, a beh a beha a hawm uh ahi.

Dan ading Gam Sehkhiak

40 Aisan sagihna pen Dan suante, a beh a beh tung ah a tu hi. 41 A goutan uh gamgi in hiai khawpite a uap hi: Zorak, Eshtaol, Ir Shemes, 42 Shaal Abin, Aijalon, Ithla, 43 Elon, Timna, Ekron, 44 Elteke, Gibethon, Baalath, 45 Jehud, Bene Barak, Gath Rimon, 46 Me Jarkon leh Rakon uap hi a, Jopa gal gam dong ahi. 47 Ahihhangin, Dan suante'n a gam goutan neu a sa uhi. Tua bangin, a kuantou uh a, Leshem a vasim uh a, namsauin a vala uh a, a luahta uhi. Leshem ah a teeng uh a, a min dingin a pu uh min tamin Dan a sa uhi. 48 Hiai khawpite, a khawtate baan ah, Dan suante'n a beh a beha goutan a hawm uh ahi.

Joshua ading Gam Sehkhiak 49 Israelte'n gam sehkhiak banga a hawm khit-un, amau lak ah Nun' tapa Joshua zong goutan a pia uhi. 50 Tua bel, Tangtawn Toupa'

thupiak banga a hih uh ahi. Ama' nget khawpi a pia uhi. Tua khawpi bel, Efraim tanggama Timnath Sera ahi. Ama'n tua khawpi a puah a, tua ah a teeng hi. 51 Hiaite, Shilo-a Kihoupihna Puanbuk kongpi-a Tangtawn Toupa maia siampi Eleazar, Nun' tapa Joshua leh Israel behtulpite'n aisana goutan gam a hawm uh ahi. Tua bangin, gam hawm a zouta uhi.

Joshua 20

Bukna Khawpite

1 Tua nungin, Tangtawn Toupa'n Joshua kiang ah thu a gen a: 2 Mosi tungtawna kon thuhilh bangin, nou adinga bukna khawpite bawl a, septuam dingin, Israelte hilh in. 3 Mi kuapeuh in tup khoih hiloua, khutkhiala mi khat peuh a thah khak leh, tua bang khawpi ah a tailut ding hi. Tua bang khawpite bel, tanau nai sisan phulami apan na bukna uh ahi ding hi. 4 Hiai khawpite laka khat peuha tua bang mi a tailut chiangin, khawpi kongpi lutna ah a ding ding a, khawpi upate' mai ah a thu a tun ding ahi. Tua khit chiangin, amaute'n a khawpi uah amah a lutsak ding uh a, amaute laka a ten nading mun a pe ding uh ahi. 5 Tanau nai sisan phulami in mithat a delh leh, phulami khut sunga tua mi that khapa a piak khiak louh ding uh ahi. Ahang bel, tupkholh louh leh mudah lungsim nei masa hiloua a innveng that kha a hih man ahi. 6 Kikhawmte' maia, thu khentel dinga a din masiah leh, tua hun laia siampiliana pang pen a sih masiah, tua khawpi ah a teng ding ahi. Tua khit chiangin, a taisan khawpi ah ama' inn ah a chiahkik thei ding hi, a chi hi. 7 Tua bangin, amaute'n Naftali tanggam, Galili gam sung ah Kadesh a septuam uhi. Tua baan ah, Efraim tanggam ah Shekhem a septuam uh a, Judah tanggam ah Hebron kichi Kiriath Arba a septuam uhi. 8 Jerikho gala Jordan suahlam ah bel, Reuben suante lak ah mualtung gamdai ah Bezer, Gad suante lak ah, Gilead gam sung ah Ramoth, tua baan ah, Manase suante lak ah Bashan gam sunga Golan a septuam uhi. 9 Hiai khawpite bel, Israelte leh amaute laka teeng gamdang mite ading ahi. Mi khat peuh in, khutkhiala kuapeuh a thah khak leh, hiai sehtuam khawpite ah a tailut thei ding hi. Hiai bel, amah kikhawmte thukhentatna maia a din ma-a, tanau nai sisan phulami in a thah louh nading ahi.

Joshua 21

Levite ading Khawpite

1 Siampilian Eleazar leh Nun' tapa Joshua leh Israel suan dangte' behtulpite kiang ah, Levi suante' behtulpite hong pai uhi. 2 Kanan gam Shilo ah amaute kiang ah: Koute teen nading khawpite leh ka gan tat nading uh loupa gam non piak dingun, Tangtawn Toupa'n Mosi tungtawnin noute kiang ah thu hon pia hi, chi-in a gen uhi. 3 Tua bangin, Tangtawn Toupa' thupiak bangin, Israelte'n amau' goutan apan gantatna gamte Levi suante a pia uhi. 4 Aisan masapen bel Kohath behte, a beh a beh tung ah a tu hi. Judah leh Simeon leh Benjamin suante gam apan, siampi Aron suan Levite adingin aisana sehkhiak khawpi sawmlethum ahi. 5 Efraim leh Dan leh Manase nam kimkhatte' behte' gam apan, Kohath beh dangte adinga aisana sehkhiak khawpi sawmkhat ahi. 6 Isakhar leh Asher leh Naftali leh Manase nam kimkhatte laka behte gam apan, Gershon behte adinga aisanna sehkhiak khawpi sawmlethum ahi. 7 Reuben leh Gad leh Zebulun suante' gam apan, Merari behte, a beh a beh adinga aisana sehkhiak khawpi sawmlenih ahi. 8 Tangtawn Toupa'n Mosi tungtawna thu a piak bangin, Israelte'n Levi suante adingin, aisanin hiai khawpite leh gantatna gamte hibangin a sepkhia uhi. 9 Judah leh Simeon suante gam apan sehkhiak hiai khawpite ahi: 10 Hiai khawpite bel, Aron suante, Kohath beh Levite adinga aisana sehkhiak ahi, Ahang bel, aisan masapen amaute tunga tu ahi. 11 Amaute adingin, Judah tanggam ah Kiriath Arba leh a kima gantatna gam tawh a pia uhi. Kiriath Arba bel, Hebron kichi ahi. Arba bel Anak suangtubul ahi. 12 Ahihhangin, tua khawpi kima gamte leh khawtate bel, Jefune' tapa Kaleb' goutan dingin a pia uhi. 13 Tua bangin, siampi Aron suante adingin, Hebron leh a kima gantatna gam a pia uhi. Hebron bel, mithat mi adinga bukna khawpi khat ahi. Tua baan ah, Libna leh a kima gantatna gam, 14 Jatir leh a kima gantatna gam, Eshtemoa leh a kima gantatna gam, 15 Holon leh a kima gantatna gam, Debir leh a kima gantatna gam. 16 Ain leh a kima gantatna gam, Juta leh a kima gantatna gam, leh Beth Shemesh leh a kima gantatna gam a pia uhi. Avekin, hiai nam nihte' gam apan a piak uh khawpi kua ahi. 17 Benjamin suante gam apan Gibeon leh a kima gantatna gam, Geba leh a kima gantatna gam, 18 Anathoth leh a kima gantatna gam, Almon leh a kima gantatna gam a pia uhi. Avekin khawpi li ahi. 19 Aron suan siampite adinga piak khawpite a vekin sawmlethum leh a kima gantatna gamte ahi. 20 Levi suan Kohath beh omlaite adingin Efraim suante gam apan khawpite a sepkhia uhi: 21 Efraim tanggam ah, Shekhem leh a kima gantatna gam a pia uhi. Shekhem bel, mithat mi bukna khawpi khat ahi. Gezer leh a kima gantatna gam zong a pia uhi. 22 Kibzaim leh a kima gantatna gam, Beth Horon leh a kima gantatna gam tawh, amaute adingin a pia uhi. Avekin khawpi li ahi. 23 Tua louin, Dan suante apan Elteke leh a kima gantatna gam, Gibethon leh a kima gantatna gam, 24 tua chiangin, Aijalon leh Gath Rimon a kima gantatna gamteng tawh a pia uhi. Avekin khawpi li ahi. 25 Manase nam kimkhatte' gam apan Taanak leh Gath Rimon, a kima gantatna gam teng tawh a pia uhi. Avekin khawpi nih ahi. 26 Hiai khawpi sawmte leh gantatna gamte, Kohath beh dangte adinga a piak uh ahi. 27 Levi suan Gershon behte adingin: Manase nam kimkhatte gam apan Bashan gama Golan, a kima gantatna gamte tawh a pia uhi. Golan bel, mithat mi bukna khawpi khat ahi. Tua baan ah, Beth Eshtera leh a kima gantatna gam teng tawh a pia uhi. Avekin khawpi nih ahi. 28 Isakhar suante gam apan Kishion, a kima gantatna gam tawh, Daberath a kima gantatna gama tawh, 29 Jarmuth leh En Ganim, a kima gantatna gam teng tawh a pia uhi. Avekin khawpi li ahi. 30 Asher suante gam apan Mishal, akima gantatna gam tawh, Abdon, akima gantatna gam tawh, 31 Helkath leh Rehob, a kima gantatna gam teng tawh a pia uhi. Avekin khawpi li ahi. 32 Naftali suante gam apan, Galili gama Kadesh a kima gantatna gam tawh a pia uhi. Kadesh bel, mithat mi bukna khawpi khat ahi. Tua baan ah, Hamoth Dor leh Kartan, a kima gantatna gam teng tawh a pia uhi. Avekin khawpi thum ahi. 33 Gershon behte khawpite a vekin, a gantatna gamte tawh, sawmlethum ahi. 34 Levi suan dang, Marari behte adingin hiai khawpite a pia uhi: Zebulun suante gam apan Jokneam leh a kima gantatna gam, Karta leh a kima gantatna gam, 35 Dimna leh akima gantatna gam leh Nahalal leh a kima gantatna gam a pia uhi. Avekin khawpi li ahi. 36 Reuben suante gam apan Bezer leh a kima gantatna gam, Jahaz leh a kima gantatna gam, 37 Kedemoth leh a kima gantatna gam, leh Mefaath leh a kima gantatna gam a pia uhi. Avekin khawpi li ahi. 38 Gad suante gam apan Gilead gama Ramoth, a kima gantatna gam tawh a pia uhi. Ramoth bel mithat mi bukna khawpi khat ahi. Tua baan ah, Manahaim leh a kima gantatna gam, 39 Heshbon leh Jazer, a kima gantatna gam teng tawh a pia uhi. Avekin khawpi li ahi. 40 Levi suan dang Merari behte adinga sehkhiak khawpite, avekin sawmlenih ahi. 41 Israelte gama Levi suante khawpi, a gantatna gam teng utawh, a vekin 48 ahi. 42 Hiai khawpite'n a kim ah gantatna gam a nei tek uhi. Tua bangin khawpite khempeuh in gantatna gam a nei tek uhi. 43 Tangtawn Toupa'n Israelte, a pu a pate uh kianga a na chiamsa gam khempeuh a peta a, amaute'n tuate a luah uh a, a teeng uhi. 44 Tangtawn Toupa'n a pu apate uh kianga a na chiamsa bangin, amaute mun chih ah tawlngakna a peta hi. A galte uh kuamah in amaute a nang zou kei uhi. Tangtawn Toupa'n amaute' khut sung ah a galte khempeuh uh a peta hi. 45 Tangtawn Toupa'n Israel suante kianga thil hoih a chiamte, a tangtung lou khat beek a om kei a, a tung kim sipsip hi.

Joshua 22

Suahlam Namte' Chiahkikna

1 Tua nungin, Joshua in Reubente, Gadte leh Manase nam kimkhatte a samkhawm a, amaute kiang ah: 2 Tangtawn Toupa' sila Mosi' thupiak khempeuh na zuita uh a, kei hon thupiak khempeuh ah ka thu na mangta uhi. 3 Hun sawtpi apan tu hun dong, na sanggamte uh na taisan kei uh a, Tangtawn Toupa, na Pathian un sep ding hon got peuhmah na semkhinta uhi. 4 Tu-in, Tangtawn Toupa, na Pathian un a thuchiam bangin, na sanggamte uh tawlngakna a peta. Noute na puanbuk uah chiahkikta unla, Tangtawn Toupa' sila Mosi in Jordan suahlama gam hon piakna ah paita un. 5 Tangtawn Toupa' sila Mosi' hon piak thupiak leh dan zui dingin pilvang un. Na lungtang khempeuh uleh, na mihinna khempeuh utawh, Tangtawn Toupa, na Pathian uh it ding, a lampite tawn ding, a thupiakte zui ding, amah lenkip ding leh, a na sem dingin pilvang mahmah un, a chi hi. 6 Tua bangin, Joshua in amaute a vualzawl a, a khakheta a, amaute a puanbuuk uah a chiahta uhi. 7 Mosi in Manase nam kimkhatte kiang ah Bashan gam ah goutan a pia hi. Manase nam kimkhat dang kiang ah bel, Joshua in amaute a puanbuuk lam ua a sawlkhiak laiin, amaute a vualzawl hi: 8 Na hauhna uh thupitak, ganhon tampi, kham leh ngun, sumsan leh sikte leh puansilh niktente utawh na puan buukte uah chiahta un. Galte apan na gallakte uh, na sanggamte uh hawm un, a chi hi. 9 Tua bangin, Tangtawn Toupa'n Mosi tungtawna a thupiak banga a ngah uh, amau' gam Gileada chiah dingin, Reubente, Gadte leh Manase nam kimkhatte'n Kanan gama Shilo ah, Israelte a nuseta uhi. 10 Amaute, Kanan gama Jordan geia Geliloth mun hong tung uhi. Tua ah, Reubente, Gadte leh Manase nam kimkhatte'n Jordan lui gei ah, mideep tham maitam lianpi a dawh uhi. 11 Tua bangin, Israel lam pang, Kanan gamgi, Jordan lui geia om Geliloth mun ah, maitam a dawh uh, chih Israelte'n a theih takun, 12 amaute dou dingin Israel mipite khempeuh Shilo ah a kikaikhawm uhi. 13 Tua apanin, Israelte'n, Gilead gam ah, Reubente, Gadte, leh Manase nam kimkhatte kiang ah, siampi Eleazar' tapa Fineha a sawl uhi. 14 Amah tawh tonin, Israel nam sawmte laka nam makai sawm khat, nam khat apan mi khat tek, a sawl uhi. Amaute bel, Israel sangsawm tampite laka makai ngen ahi uhi. 15 Amaute, Gilead gama Reubente, Gadte, leh Manase nam kimkhatte kiang hong tung uhi. Amaute kiang ah: 16 Israel kikhawmte'n na kiang uah: Bang chi dana Israel Pathian adinga hibanga muanhuai loua om thei na hi ua oi? Bang chi dana tu-a Tangtawn Toupa kiheisan a, Ama' tunga hel a, noute ading maitam kidawhtuam thei na hi ua oi? 17 Tua ni-in Tangtawn Toupa' mite tung ah hipi tung mahleh, tuni dong, Peor-a ginatlouhna apan i sian nai louhpi. Tua khelhna kiching lou lai hia? 18 Tu-a noute'n Tangtawn Toupa kiheisan ding maw? Tuni-a Tangtawn Toupa tunga na hel uleh, zingchiangin, amah Israel nam buppi tung ah a heh ding hi. 19 Na goutan gam uh buah ahih leh, Tangtawn Toupa' gam neih lam ah hong pai lei ve ua. Tua gama Tangtawn Toupa' biakbuk om a, koute tawh gam i kikop lei kei dia. Tangtawn Toupa, i Pathian' maitam lou, noute ading maitam tuam dang khat bawlin, Tangtawn Toupa tung ah hel peuhmah kei un. 20 Zera' tapa Akhan in, hamsiat thil tawh kisaia muanhuai loutaka a gamtat laiin, Israel nam buppi tunga thangpaihna hong tung hilou maw? Ama' khelhna hi mah leh, amah kia'n a sihlawh kei hi, hon chi uhi, a vachi uhi. 21 Tua bangin, Reubente, Gadte leh Manase nam kimkhatte'n tua Israel nam makaite a dawng uh a: 22 Pathian, Vanglianpen Tangtawn Toupa ahi! Pathian, Vanglianpen Tangtawn Toupa ahi! Ama'n a thei! Israel in thei hen! Hiai ka thilhih uh, Tangtawn Toupa tunga helna ahih a, ahih kei leh, thumanlouhna a hih peuhmah leh, ama'n a thei ding hi. Ahi, Israel in zong thei hen. Tuni-in, koute hon hondam kei hen. 23 Tangtawn Toupa kiheisan nadinga koumau maitam tuam kidawh a, a tunga haltum kithoihnate leh an thilpiakte, a hih kei leh, lemna kithoihna thillatte lat sawm ka hih uleh, Tangtawn Toupa mahmah in ka tung uah thu khen hen. 24 Hi lou hiai hi! Denchiangin, na suante un, ka suante uh kiang ah: Noute'n Tangtawn Toupa, Israel Pathian tawh bang kisaina nei na hi uhiam? 25 Tangtawn Toupa'n noute leh koute kikal ah gamgi dinga Jordan koih hilou hiam, nou Reubente leh Gadte! Tangtawn Toupa ah tan na nei kei uh, a chi kha ding uh a, na suante un ka suante uapan Tangtawn Toupa launa a beisak khading uh, chih ka lau manua, hibang hih ka hi zaw uhi. 26 Hiai hang ahi: Kisa ni, maitam khat kidawh ni haltum thillat hiam, kithoihna thillat hiam lat nading bel hilouin, ka chih uh. 27 Tua naksangin, koute'n haltum thillatte, kithoihnate leh kithoihna thillatte tawh, Tangtawn Toupa, a mun siangthou ah ka bia uh, chih noute leh koute kikal ah khangsawnte adinga theihpihna hi dinga ka deih uh ahi zaw. Tua hi leh, tununga na suante un, ka suante uh kiang ah, Tangtawn Toupa ah tan na nei kei uh, a chi thei kei ding uhi. 28 Hibanga koute kiang hiam, na suante uh kiang hiama, hon chih himhim uleh, koute'n: Tangtawn Toupa' maitam batpih, ka pu ka pate un a na dawh uh en ve ua. Haltum thillat leh kithoihna thil lat nading bel hilouin, noute leh koute kala theihpihna hi zaw dingin, ka chi ding uhi. 29 A biakbuk maia ding, Tangtawn Toupa, i Pathian' maitam pen loungal, haltum thillat, an thillat leh kithoihna thillat lat nading, maitam dang khat dawhin, Tangtawn Toupa' tunga helin, amah kiheisan peuhmah lou ding hi ung, a chi uhi. 30 Siampi Fineha leh Israel nam makaite, tua Israel behtulpite'n Reubente, Gadte leh Manase nam kimkhatte' thugen a zak takun, a lungkimta uhi. 31 Tua bangin, siampi Eleazar' tapa Fineha in, Reubente, Gadte leh Manase nam kimkhatte kiang ah: Hiai thu-a noute'n Tangtawn Toupa' tunga muanhuailou taka hibang hih na hihlouh manun, Tangtawn Toupa eite laka om ahi, chih tuni'n ka thei uhi. Tuin, Tangtawn Toupa khut' apan Israelte na humbitta uhi, a chi hi. 32 Tua nungin, siampi Eleazar' tapa Fineha leh nam makaite bel, Gilead gama Reubente leh Gadte tawh kimuhna apanin Kanan gam ah a chiahkik uh a, Israelte kiang ah thu a tun uhi. 33 Israelte'n tua thutut a kipahpih uh a, Pathian a phat uhi. Reubente leh Gadte dou a, a tenna gam uh gamsak ding thu a gen nawn kei uhi. 34 Tua bangin, Reubente leh Gadte'n tua maitam, EITE KALA THEIHPIHNA TANGTAWN TOUPA PATHIAN AHI, chih min a phuah uhi.

Joshua 23

Joshua' Mangphakhakna

1 Tangtawn Toupa'n Israelte, a kim a kiang ua a galte khempeuh uapan tawlngakna a piak nung kum tampi a paita hi. Joshua zong a kum hong tamta a, hong teekta hi. 2 Ama'n Israelte, upate, nam makaite, thukhente leh uliante a sam khawm a, amaute kiang ah: Kei lah ka kum hong tamta a, kong teekta hi. 3 Noute guma, Tangtawn Toupa, na Pathian uh hiai Zentel namte khempeuh tunga, noute hanga a hih khempeuh, noute mahmah in na muta uhi. Noute adinga gal hon dousakpa Tangtawn Toupa, na Pathian uh ahi. 4 Jordan lui leh tumlam Tuipi Lian kikala nam omlaite ka zawh a, noute' goutan dinga, a nam a nama kon hawmsak dan thei gige un. 5 Tangtawn Toupa, na Pathian mahmah un tua nam omlaite, na mai uah hon hawlkhiaksak ding hi. Tangtawn Toupa, na Pathian un hon chiamsa bangin, noute'n a gam uh na luahta uhi. 6 Thahat mahmah suah un. Mosi' Dan Laibu-a kigelhte, veilam hiam, taklam hiama pialsan lou ding, ahihhanga tuate zui zaw dingin pilvang mahmah un. 7 Noute laka omlai hiai Zentel namte tawh kizopna nei peuhmah kei un. A pathiante uh min sam kei unla, amaute minin kichiam sam kei un. Amaute nna sem kei un. Amaute biain a mai uah kun kei un. 8 Tu donga na hih bangun, Tangtawn Toupa, na Pathian uh lenkip zaw un. 9 Tangtawn Toupa'n noute' mai ah nam lian leh hatte a hawlkheta. Tuni dongin, na mai uah kuamah a ding zou kei hi. 10 Noute laka mi khat lei in zong, 1,000 a delhzak hi. Ahang bel, Tangtawn Toupa, na Pathian un a hon chiamsa bangin, noute adinga hon dousak man ahi. 11 Tua bang ahih manin, Tangtawn Toupa, na Pathian uh it dingin pilvang mahmah un. 12 Hiai Zentel namte tawh kizopna nei kei un. Na kizop uleh, na lak ua teeng laite' gamtat na zui ding uh a, zi-le-tain na kilatuah ding uh a, kingaihna niin ah na lut ding uhi. 13 Tua banga na hih uleh, Tangtawn Toupa, na Pathian un, hiai namte na mai uah a hawlkhe nawn kei ding, chih thei kilkel un. Tua naksangin, Tangtawn Toupa, na Pathian un hon piaksa, hiai gam hoihtak apan na manthat vek masiah uh, amaute noute adingin thang leh pial, na nungzang ua dinga zepna khauhual leh na mit ua dinga lingte a suak zaw ding hi. 14 En un, tu-in, kei leitung dan banga pai ding ka hita. Tangtawn Toupa, na Pathian un, thil hoih hon chiamsate khempeuh, khat leltak zong a vuaksuak kei, chih na lungtang uleh, na mihinna-un na thei uhi. Thuchiam peuhmah a tungkim a, khat leltak zong a vuaksuak kei hi. 15 Ahihhangin, Tangtawn Toupa, na Pathian un thil hoih hon chiamsate a tunkim vek bangin, hiai gam hoih hon piaksa apan hon hihmanthat vek masiah, a hon vauna thil hoihloute zong, Tangtawn Toupa'n na tung uah a tungkimsak ding hi. 16 Tangtawn Toupa, na Pathian un hon piak, a thukhun na manlouh ua, pathian dang zuana a nna uh sem a, na biak himhim uleh, Tangtawn Toupa' thangpaihna na tung uah a kuang ding. Hon piaksa gam hoih apan na mangthang pah ding uhi, a chi hi.

Joshua 24

Shekhem ah Thukhun Kithaksak

1 Tua khitin, Joshua in Israel namte khempeuh, Shekhem ah a samkhawm hi. Upate, nam makaite, thukhente leh Israel uliante a sam a, Pathian mai ah amaute hong kilak uhi. 2 Joshua in amaute khempeuh kiang ah: Tangtawn Toupa, Israel Pathian in hibang a gen a: Tanglaiin, na pu na pate uh Abraham' pa Tera leh Nahor zong telin, Iufratis Lui khen lam ah a teng uh a, pathian dangte a bia uhi. 3 Ahihhangin, na pa uh Abraham, tua Eufratis Lui khenlam gam apan ka lakhia a, Kanan gam dung leh vai ah ka pi hi. Suan leh khak tampi amah ka pia a, amah adingin Isak ka pia a, 4 Isak adingin Jakob leh Esau ka pia hi. Esau adingin Seir tanggam ka sehsak a, ahihhangin, Jakob leh a tate bel Aigupta gam ah a paisuk uhi. 5 Tua khitin, Mosi leh Aron ka sawl a, Aigupta gam sunga ka thilhihte Aigupta ka thuaksak hi. Noute bel, tua gam apan kon pikhia hi. 6 Aigupta apan na pate uh ka pikhiak laiin, tuipi nong tung uh a, Aiguptate'n amaute, Tuipi San dong, kangtalaite leh sakoltungtuangte tawh a delh uhi. 7 Na pate uh, Tangtawn Toupa kiang ah panpihna ngenin a kikou uhi. Ama'n noute leh Aiguptate kal ah mial a koih hi. Amaute tung ah tuipi a luangsak a, amaute a tumsak hi. Aiguptate tunga ka thilhih noute'n na mitun na mu uhi. Tua nungin, gamdai-gamkeu ah sawtpi na tam uhi. 8 Noute, Jordan suahlama teeng Amorte gam kon tun hi. Amaute'n hon na dou uh a, ahihhangin, amaute, noute' khut sung ah kon pia a, amaute na mai uah ka hihmangthang a, a gam uh na tang uhi. 9 Zipor' tapa Balak, Moab kumpipa, Israelte dou dingin a kisa hi. Noute hon hamsiat dingin Beor' tapa Balaam a samsak a, 10 ahihhangin, Balaam thu ka ngaikhe kei hi. Tua nungin, ama'n noute hon vualzawl zihzeh zaw hi. Ama' khut apan noute kon hinghawi hi. 11 Tua khitin, Jordan na galkah uh a, Jerikho nong tung uhi. Jerikho-a teengte leh Amorte, Perizte, Kanante, Hitte, Girgaste, Hivte leh Jebuste'n noute hon dou uhi. Ahihhangin, amaute, noute' khut sung ah kon pia hi. 12 Noute' mai ah tunpite ka sawl a, noute' mai ah Amorte kumpipa nihte a hawlkhia uhi. Noute'n na namsau uleh na thai ua na hawlkhiak uh ahi kei hi. 13 Tua bangin, na sepgim louhna uh gam leh na lam louh uh khawpite kon pia hi. Tua ah na teeng uh a, na suan louh uh grep huante leh oliv huante apan na ne uhi, a chi hi. 14 Tu-in, lungtang chihtakna leh thutakna tawh Tangtawn Toupa lau un. Iufratis Lui gal leh Aigupta-a na pu na pate un a biak uh pathiante paimang unla, Tangtawn Toupa' nna sem un. 15 Ahihhangin, Tangtawn Toupa' nna sep ding, noute adinga hoihloua a kilat leh, kua nna ahia na sep ding uh, tuni-in teel un. Na pu na pate un Iufratis Lui gala a nna a sep uh pathiante' nna hia, ahihkei leh, na tenna gam ua Amorte' pathiante' nna hia na sep ding uh! Ahihhangin, kei leh ka innkawte'n zaw, Tangtawn Toupa nna ahi ka sep ding uh, a chi hi. 16 Tua a zak takun, mipite'n a dawng uh a: Koute'n pathian dangte' nna sem dingin, Tangtawn Toupa taisan ngei peuhmah lou ding hi ung! 17 Tangtawn Toupa, i Pathian mahmah ahi Aigupta apan i pate leh eite hon pikhia. Amah ahi tua i saltanna gam apan hon pikhia a, i mitmuh-a chiamtehna lamdangte hihpa. I khualzinna lam tawntung leh i khualzinna gama namte khempeuh lak ah ama'n eite hon humbit hi. 18 Tangtawn Toupa'n eite' mai ah namte khempeuh a hawlkhia a, tuate lak ah tua gama teeng Amorte zong a pang uhi. Koute'n zong Tangtawn Toupa' nna mah sem ding hi ung. Ahang bel, Amah kia i Pathian ahi, a chi uhi. 19 Joshua in mipite kiang ah: Tangtawn Toupa' nna sem thei kei ni uteh! Amah zaw Pathian siangthou ahi a, thikthusia Pathian hi a, na helna uleh na khelhnate uh hon ngaidam lou ding ahi. 20 Tangtawn Toupa taisanin gamdang' pathiante' nna na sem ding uh a, tua hun chiangin, noute' tunga hoihkhinta napi-in, kiheiin hon thuaksak ding a, hon kangtum ding ahi aw! a chi hi. 21 Ahihhangin, mipite'n Joshua kiang ah: Hibang hi peuhmah lou ding! Koute'n Tangtawn Toupa' nna mah sem ding hi ung, a chi uhi. 22 Joshua in: Tangtawn Toupa' nna sem ding chi-a na teel uleh, noumau mah, noute tunga theihpihte na hita uhi, a chi hi. Amaute'n a dawng uh a: Hi mah ung, theihpihte hi ung, a chi uhi. 23 Joshua in: Tua bang ahih nungsang, tu-in, noute' laka om gamdang' pathiante paimang unla, Tangtawn Toupa, Israel Pathian kiang ah na lungtangte uh pekhia un, a chi hi. 24 Mipite'n Joshua kiang ah: Koute'n Tangtawn Toupa' nna ka sem ding uh a, a thu ka mang ding uhi, a chi uhi. 25 Tua ni mahin, Joshua in mipite adingin thukhun a bawl a, tua Shekhem ah thusehte leh dante a pia hi. 26 Joshua in Pathian' Dan Laibu sung ah tua thute a gelh hi. Tua khitin, ama'n suang lianpi a la a, Tangtawn Toupa' mun siangthou kianga tawsaw sing nuai ah a phut hi. 27 Mipite khempeuh kiang ah ama'n: En un! Hiai suang eite tunga theihpihna ahi ding hi. Tangtawn Toupa'n eite kianga a gente khempeuh hiai suang in a zata hi. Noute'n na Pathian uh na zuausan uleh, noute tunga theihpihna hiai ahi ding hi, a chi hi. 28 Tua khitin, Joshua in mipite a sawlkhia a, amau' goutan gam tek ah a paisak hi.

Gamchiam ah Joshua Kivui

29 Hiai thilte nungin, Nun' tapa Joshua, Tangtawn Toupa' sila a sita hi. A sih-in amah kum 110-a upa ahi. 30 Gaash Mual mallama Efraim tanggam, ama' goutan sung ah, Timath Sera kichi mun ah, amah a vui uhi. 31 Joshua damsung teng, Israelte'n Tangtawn Toupa' nna a sem uhi. Tangtawn Toupa'n Israelte adinga a hihsak khempeuh mu, Joshua sanga damsawt zaw upate' damsung teng zong, Israelte'n Tangtawn Toupa' nna a sem uhi. 32 Israelte'n Aigupta apan hon puak uh, Josef guhte zong Shekhem mun ah a vui uhi. Shekhem bel, Jakob in Shekhem' pa Hamor' tate apan Shekel 100-a gam a leina sunga om ahi. Hiai gam, Josef suante' goutan a hong hita hi. 33 Tua khitin, Aron' tapa Eleazar a si a, Gibea ah a vui uhi. Tua bel, a tapa Fineha' goutan dinga a sehkhiak uh ahi a, Efraim tanggama om ahi.

Vaihawmte 1

Kanan Gam Lak Masawnna

1 Joshua sih nungin Israel tate'n Tangtawn Toupa kiang ah: Koute adinga Kanante dou ding kua kuan masa ding ahia? a chi uhi. 2 Tangtawn Toupa'n a dawng a: Judah nam a kuan masa ding ahi. Ngai un, amaute khutsung ah gam ka pia hi, a chi hi. 3 Tua khitin, Judah nam in a sanggam uh Simeon nam kiang ah: Kanante hong doupih dingin, kou adia seh gam ah hong kuantou sam un. Koute zong nou adia seh gam ah kong kuan sam ding uh, a chi uhi. Tua bangin, Judah nam zuiin Simeon nam a kuantou uhi. 4 Judah nam a kuan uh a, Tangtawn Toupa'n amaute' khut sung ah Kanante leh Perizte a pia a, Bezek khua ah mi 10,000 a zou uhi. 5 Tua Bezek khua ah Adoni Bezek a mu uh a, amah a dou uh a, Kanante leh Perizte a zougawp uhi. 6 Adoni Bezek a tai a, amaute'n delhin a man uh a, a khutpite gel leh a khepite gel a tankhiaksak uhi. 7 Adoni Bezek in: Ke'n ka khatehnen tawm kumpipa 70-te' khutpite leh khepite ka tankhiaksak a, amaute tunga ka gamtat bangbanga Pathian in hon thuk a hita ve, a chi hi. Judah suante'n amah Jerusalem ah a paipih uh a, tua ah a si hi. 8 Judah suante'n Jerusalem khawpi a sim uh a, namsauin a mite a that uh a, tua a la uh a, meiin a hal uhi. 9 Tua nungin, tanggam leh Negev gamdai-gamkeu leh mual niam gama teng Kanante dou dingin Judah suante a kuan uh a, 10 Hebron khawpi-a teengte a dou uh a, Sesai tawh Ahiman tawh, Talmai tawh a zou uhi. Hebron min masa bel, Kiriath Arba ahi. 11 Tua apanin a kuan uh a, Debir khawpi-a teengte a dou uhi. Debir min masa bel Kiriath Sefer ahi. 12 Kaleb in: Kiriath Sefer dou a, la zou om leh, a zi dingin ka tanu Aksa ka pe ding, chi-in thu a chiam hi. 13 Kenaz' tapa Othniel in tua khawpi a la zou a, Kaleb in a tanu Aksa a zi dingin a pia hi. Kenaz bel Kaleb' naupa ahi. 14 Aksa, Othniel kiang hong tun takin, ni khat bel, a pa kianga lou khat ngen dingin amah a sawl teitei hi. Aksa a sabiltung apan a kumkhiak takin, Kaleb in: Bang deih na hia? a chi hi. 15 Aksa in: Deihsakna tuam khat hon pia inla, Negev gamdai-gamkeua gam non piaktak ngai leh, tua tuinakte zong hon pia in, a chi a, Kaleb in tuinak saknung leh tuinak khangnung a pia hi. 16 Tua laiin, Mosi' sungpa' suante, Tumsing Khawpi kichi apan, Arad simlama Judah gamdai-gamkeu ah, Judah suante kiang ah a pemtou uh a, amaute lak ah a teeng uhi. Mosi' sungpa bel Ken mi ahi. 17 Tua nungin, Judah nam leh a sanggamte uh Simeon nam in, Zefath khawpi-a teeng Kanante a sim uh a, a khawpi a hihgawp dimdem uh a, Horma chi-in tua khawpi a minvawh uhi. 18 Tua baan ah, Judah nam in Gaza khawpi leh a khawtate leh, Ashkelon khawpi leh a khawtate leh, Ekron leh a khawtate zong a la uhi. 19 Tangtawn Toupa'n Judah nam a ompih a, tanggama teengte a hawlkhia uhi. Ahihhangin, phaizanga teengte'n sik kangtalaite a neih manun a hawlkhe zoukei uhi. 20 Mosi' chiamsa bangin, Kaleb adingin Hebron a pia uh a, Kaleb in Anak' tapa thumte tua apan a hawlkhia hi. 21 Benjamin suante'n bel Jerusalema teeng Jebuste a hawlkhe kei uh a, tuni dongin Benjamin' suante lak ah amaute a teeng lai uhi. 22 Tua bang mah in, Josef innkawte Bethel sim dingin a kuan uh a, Tangtawn Toupa'n amaute a ompih hi. 23 Bethel min masa bel Luz ahi. Bethel enkhe dinga enkhemi a kisawl laiun, 24 enkhemite'n khawpi apan hong paikhia mi khat a mu uh a, amah kiang ah: Khawpi sung lutna non hilh leh, na tung ah zahngaih ka suah ding uh, a chi uh a, 25 ama'n amaute kiang ah khawpi sung lutna a hilh a, amaute'n namsauin tua khawpi mite a that uh a, tua mipa leh a innkawte khempeuh bel a hawi uhi. 26 Amah Hitte gam ah a pem a, tua ah khawpi khat a lam a, a min dingin Luz a sa a, tuni dongin tua min a puden hi.

Gam Lakbeilouhte

27 Manase nam in Beth Shan leh a khawtatea teengte leh, Taanak leh a khawtatea teengte leh, Dor leh a khawtatea teengte leh, Ibleam leh a khawtatea teengte leh, Megido leh a khawtatea teengte a hawlkhe kei uhi. Ahang bel Kanante'n tua gama teen a tum tinten ua ahi. 28 Israelte hong hat takun, Kanante siah a liausak teitei uhi. Siah liausak mah le uh, Kanante a hawlkhe vek kei uhi. 29 Efraim nam in zong Gezer khua-a teeng Kanante a hawlkhe kei uh a, Gezer ah amaute lak ah Kanante a teeng uhi. 30 Zebulun nam in zong Kitron-a teengte hita leh, Nahalola teengte hita leh a hawlkhe kei uh a, Kanante amaute lak ah a teeng uh a, ahihhangin, siah a liausak uhi. 31 Asher nam in Ako khua-a teengte leh Sidon khua-a teengte leh, Alab khua-a teengte leh, Akzib khua a teengte leh, Helba khua-a teengte leh, Afek khua-a teengte leh, Rehob khua-a teengte a hawlkhe kei uhi. 32 Tua banga hawlkhiak louha a hawi manun, tua gama teeng Kanante lak ah Asherte a teeng uhi. 33 Naftali nam in zong Beth Shemesh khua-a teengte leh, Beth Anath khua-a teengte siah a liausak uhi. 34 Amorte'n Dan suante tanggam ah a nawhkhetou uh a, phaizanga a hong paisuk ding uh a phal kei uhi. 35 Amorte'n Heres Mual leh Aijalon leh Shaalbim a nuse nuam kei uh a, ahihhangin, Josef innkawte hong hat semsem takun, Amorte siah a liausak uhi. 36 Amorte' gamgi bel Akrabim Taangkanna apan, Sela apan a tunglama paitou ahi.

Vaihawmte 2

Israel Thumanlouhna

1 Tua hun laiin, Gilgal apan Bokim ah Tangtawn Toupa' vansawltak a paitou a, Israelte kiang ah: Noute Aigupta gam apan kon pikhetou a, na pu na pate uh kianga gam piak ding chi-a ka nakichiamna hiai gam ah kon piilutta hi. Na kiang uah: Noute tawh kala ka thukhun ka palsat ngei kei ding. 2 Noute'n zong hiai gama teengte tawh kala thukhun na bawl het louh ding uh, a maitamte uh na hihchip vek ding uh, chi-in kon nahilh tawk a, ahihhangin, ka thu na mang kei uh. Banghanga hibanga om na hi ua? 3 Tua thamlouin: Na mai uah amaute ka hawlkhe kei ding a, na pang uah ling ahi ding uh a, a pathiante uh noute adingin thang antah ahi ding uh, chi-in zong kon hilh tawk ve, a chi hi. 4 Tua Tangtawn Toupa' vansawltak in Israelte khempeuh kianga hibanga thu a gen takin, amaute nakpitakin a kap uhi. 5 Tua bang ahih manin, tua mun min dingin Bokim a phuak uh a, tua ah Tangtawn Toupa' mai ah kithoihnate a lan uhi.

Joshua Sihna

6 Joshua in Israelte a kikhensak khitin, amaute a goutan gam tek uh luah dingin a kuan uhi. 7 Joshua damsung teng leh, Joshua sanga damsawt zaw, nidang laia Israelte adinga Tangtawn Toupa' nasep thupi mu pha upate' damsung teng bel, Israelte'n Tangtawn Toupa' thu a mang uhi. 8 Ahihhangin, Nun' tapa Joshua, Tangtawn Toupa' sila, kum 110-a upa ahihin a si a, 9 Goash Mual mallama ama' goutan Efraim tanggam sunga Timnath Heres mun ah a vui uhi. 10 Tua khanga mi khempeuh, a pu a pate uh kianga a kivui khit vek nungun, khangthak hong omte'n Tangtawn Toupa a meltheih taktak kei uh a, Israelte adinga ama'n bang hihsak hiam, chih zong a thei kei uhi.

Israel Muanhuailouhna

11 Tua nungin, Tangtawn Toupa' mitmuhin thil gilou ahih uh a, Baal pathiante a bia uhi. 12 Tangtawn Toupa, a pu a pate uh' Pathian, Aigupta gam apan amaute pikhepa a taisan uh a, a kim a kiang ua nam dangte' pathiante lunggulhin a delh uh a, kunin a bia uh a, Tangtawn Toupa a thangpaisak uhi. 13 Tua bangin, Tangtawn Toupa a taisan uh a, Baal pathiante leh Ashtoreth pathiante a bia uhi. 14 Israelte tung ah Tangtawn Toupa' hehna a kuang a, amaute lok gigete khut ah a pia a, tuate'n amaute a lok uhi. Tua baan ah, Ama'n a kim a kiang ua a melmate uh khut sung ah amaute a khawngkhia hi. Tua bang ahih manin, Israelte, a melmate uh nuai ah a ding zou nawn kei uhi. 15 A gal kuankhiak chiangun, Tangtawn Toupa'n thu a chiam a, kichiam zena amaute kianga a gensa bangbangin, Tangtawn Toupa' khut in amaute tuahse dingin a dou a, lungzingin a mangbang thei mahmah uhi. 16 Tua nungin, Tangtawn Toupa'n Israelte lak ah makaite a tungkhesak a, tuate'n amau lok zelte khut apan amaute a hukhe zel uhi. 17 Hinapi-in, Israelte'n a makaite uh thu a ngaikhe kei uh a, pathian dangte kianga kizuakin a mai uah a kun uhi. A pu a pate uh' lampi a pialsan pah uh a, a pu a pate un Tangtawn Toupa' thupiakte a zuih bangun amaute'n a zui kei uhi. 18 Tangtawn Toupa'n amaute adinga makaite a bawlsak chiangin, Tangtawn Toupa'n tua bang makaite a ompih a, a damsung teng uh, a melmate uapan amaute a hukhe zel hi. Ahang bel, amaute sikdena gimsakte khut nuaia thum leh maua a om chiangun, Tangtawn Toupa'n amaute a lainat mahmah zela ahi. 19 Tua bang makai a sih peuhpeuh chiangin, amaute a kilehhei uh a, a pu a pate uh sangin a tatse zaw zel uhi. Pathian dangte a zui uh a, a nna uh semin a mai uah a kun uh a, a tatsiatna uleh genhakna uh a tawp kei uhi. 20 Tua bang hun chiangin, Israelte tung ah Tangtawn Toupa' hehna a kuang a: Hiai nam mahmah, a pu a pate uh kianga ka piak ka thukhun a zui kei uh a, ka aw a ngaikhe kei uh. 21 Joshua a sih laia, a nutsiat nam omlaite ke'n zong amaute' mai apan ka hawlkhe nawn kei ding. 22 Amaute ka hawi khe kei ding a, Israelte ze-etna'n ka zang ding a, a pu a pate uh zuih bangin Tangtawn Toupa' lampi zuiin a tawn zelna uhiam tawn lou ka en ding, a chi hi. 23 Tua bangin, Tangtawn Toupa'n tua nam dangte sikkhat thu-a hawlkhe lou dingin a phutkip a, Joshua khut sung ah zong a na-pevek kei hi.

Vaihawmte 3

Nam Omlaite

1 Kanan gama kidounate thei khalou Israelte ze-et nadingin, Tangtawn Toupa'n hiai namte a phutkip hi. 2 A tup a ngim bel, kidou dan thei nailou Israel suante kidou dan a sinsak nop man ahi lei hi. 3 Tua namte bel, Filistia' vaihawmpa ngate leh Kanante khempeuh leh, Sidonte leh Lebanon tanggama Baal Hermon apan Lebo Hamath donga teeng Hivte khawng ahi uhi. 4 Tangtawn Toupa'n Mosi' tungtawna a pu a pate uh kianga a thupiakte a zui na uhiam zui lou chih thei nuama Israelte ze-et nadinga tua namte na phutkip ahi. 5 Tua bangin, Israelte tua Kanante kichi Hitte, Amorte, Perizte, Hivte leh Jebuste lak ah a teeng uh a, 6 a tanute uh a kitenpih uh a, amaute' tanute hiai namte' tapate' zi dingin a pia uh a, a pathian uh a bia uhi.

Othniel

7 Israelte'n Tangtawn Toupa, a Pathian uh mangngilhin Baalte leh Asherate biain, Tangtawn Toupa' mitmuhin thil gilou ahih uhi. 8 Tua bang ahih manin, Israelte tung ah Tangtawn Toupa' hehna a kuang a, Mesopotamia gama Aram kumpipa Kushan Rishathaim khut sung ah amaute a khawngkhia a, tua kumpipa' thunuai ah kum giat sung a om uhi. 9 Ahihhangin, Tangtawn Toupa kianga Israelte a toukou takun, Tangtawn Toupa'n amaute hukhepa Othniel a tungkhia a, ama'n amaute a hukhia hi. 10 Tangtawn Toupa' Kha Othniel tung ah a tung a, Israelte' ma a kai hi. Othniel in gal a dou a, Tangtawn Toupa'n Aram kumpipa Kushan Rishathaim a khut sung ah a pia a, a zou hi. 11 Tua bangin Israel gam in kum 40 sung galmuanna a nei a, tua khit-in Kenaz' tapa Othniel a si hi.

Ehud

12 Tua nungin, Israelte'n Tangtawn Toupa' mitmuhin thil gilou a hih kik uh a, tua hangin Israelte nuaisiah ding, Tangtawn Toupa'n Moab kumpipa Eglon khut a hatsak hi. 13 Eglon in Amonte leh Amalekte a kaikhawm a, Israel a sim uh a, Tumsing Khawpi kichi a la uh a, 14 Moab kumpipa Eglon nuai ah Israelte silain a om uhi. 15 Tua khitin, Israelte, Tangtawn Toupa kiang ah a toukou uh a, Ama'n amaute hukhepa dingin Ehud a tungkhia hi. Amah bel, Benjamin nama Gera' tapa ahi a, veilong ahi. Ama' khut tungtawnin, Israelte'n Moab kumpipa Eglon kiang ah thawnpiak a pia uhi. 16 Ehud in namsau hiamtuah, tong khata sau khat a sek a, a puan nuai ah, a taklam pheipi ah a henbelh hi. 17 Eglon bel mi thau mahmah khat ahi. Ehud in Moab kumpipa Eglon khut ah tua thawnpiak a pia a, 18 a piak khitin tua thawnpiak pawte a paikiksak hi. 19 Amah bel Gilgal kianga suang milim omna a tunin, a kihei a, kumpipa kiang ah a kik a: Kumpipa aw, na kianga gen ding thuguk khat ka nei, a chi hi. Kumpipa'n: Dai sipsip un! a chi a, a silate khempeuh a pusuaksak hi. 20 Kumpipa bel a inndan tungnung, a votna ah amah kiain a tu a, Ehud in amah a vanaih a: Nang ading Pathian thupuak khat ka nei, a chi hi. Kumpipa a kumpitutphah apan a dintouh laitakin, 21 Ehud in a khut veilamin a sawk a, a taklam pheipi-a namsau a dok a, kumpipa' gil ah a dawt hi. 22 A namsau bul dongin a tum a, a kalkaal lam ah a pailet hi. Ama'n a namsau a dokkik kei a, a thau in a tuamkhum a, a kalkaal ah a ek a tolhkhia hi. 23 Tua khitin, Ehud innlim ah a pawtkhia a, tua inndan tungnung kongkhakte a khak a, a kaih hi. 24 Ehud a paikhiak nungin, kumpipa' silate'n a va en uh a, inndan tungnung kongkhakte kikalhsain a mu uhi. Innsung lama daileng hinte, a kichi uhi. 25 Ningkitel hiaia a ngak nung ua, kong a kihon louh takin, chabi a la uh a, kong a hong uhi, Tua ah, a toupa uh, pialkhang ah a sisain a nalum hi. 26 Tua banga a zia uh a sawt sungin, Ehud a suakta khin a, suang milim omna a kheng a, Seir a tung hi. 27 Tua lai a tun takin, Efraim tanggam teng ah belamtal ki pengkul a mut a, tanggam apan Israelte a kuansuk uh a, ama'n, amaute' maia paiin ma a kai hi. 28 Ehud in amaute kiang ah: Tangtawn Toupa'n na meima uh Moabte na khut sung ua hon peta ahi, hon zui un, a chi hi. Tua bangin, amaute'n amah a zuisuk uh a, Moab gam zotna Jordan lui kanna a la zou uh a, ahihhangin, kuamah luigal kai ding a phal kei uhi. 29 Tua ni-in, Moabte mi hat hangsan ngenta 10,000 khawng a that uh a, khat lei zong a suakta kei hi. 30 Tua ni mah-in, Israelte'n Moabte a nuaisiah uh a, tua hun apan Israel gam in kum 80 sung galmuanna a nei hi.

Shamgar

31 Ehud nungin, Anath' tapa Shamgar in ma a kai a, Israel hukhe dingin, bawngtal sutna chiangzumin Filistiate 600 a that hi.

Vaihawmte 4

Debora

1 Ehud a sita a, Israelte'n Tangtawn Toupa' mitmuhin thil gilou a hih kik uhi. 2 Tangtawn Toupa'n Hazor-a vaihawmpa tua Kanan kumpipa Jabin khut ah Israelte a khawngkhia hi. Jabin sepaih makai Sisera bel, Harosheth Hagoim ah a teeng hi. 3 Jabin in sik kangtalai 900 a nei a, kum 20 sung Israelte nakpitaka sikdenin a gimsak hi.Tua hun laiin Israelte Tangtawn Toupa kiang ah huhna ngenin a toukou uhi. 4 Tua hun mahin, kamsangnu khat Debora a om a, Israelte tunga makaiin a pang hi. Amah bel Lapidoth' zi ahi. 5 Ama'n a hih ngeina bangin Rama leh Bethel kikal Efraim tanggam ah, Debora' Nisuh kung nuai ah a tu sek a, Israelte ama' thukhensak dingin a mai ah hong pai zel uhi. 6 Ama'n Naftali gama Kedesh apanin Ahinoam' tapa Barak a samsak a, a kiang ah: Tangtawn Toupa, Israelte' Pathian in na kianga thu hon pia hilou hia? Ama'n: Pai inla, na mite kaikhawm inla, Naftalite leh Zebulunte 10,000 Tabor Mual ah kuanpih in. 7 Ke'n Jabin' sepaih makai Sisera, a kangtalaite leh a sepaihte tawh Kishon Luia hong kuan dingin ka na zolkhe ding a, na khut sung ah kon pe ding, chi ahi, a chi hi. 8 Barak in Debora kiang ah: Nang nong kuanpih ding leh, ka kuan ding a, nong kuanpih kei ding leh zaw ka kuan kei ding, a chi hi. 9 Debora in: Hong kuanpih mahmah ning. Ahihhangin, na kuanna lam ah minphatna na tang kei ding. Ahang bel, Tangtawn Toupa'n numei' khut sunga Sisera khawng ding hiven, a chi hi. Tua bangin, Debora a kisa a, Kedesh ah Barak tawh a kuankhawm hi. 10 Barak in Kedesh ah Zebulunte leh Naftalite a samkhawm a, ama' makaihna nuai ah mi 10,000 a kuan uh a, Debora in amah a kuanpih hi. 11 Tua hun laiin, Mosi' sungpa Hobab suante laka khat Ken dangte lak apan a kituamkoih a, Kedesh kianga Zaananim muna tawsaw sing kiang ah a puanbuk a kai hi. 12 Kente'n Sisera kiang ah: Ahinoam' tapa Barak, Tabor Mual ah a kuantou, chi-in a hilh uhi. 13 Tua a zak takin, Sisera in a sik kangtalai 900-te leh, Harosheth Hagoim apan Kishon luikuam donga om mi khempeuh a kaikhawm hi. 14 Debora in Barak kiang ah: Kisa in! Tuni, Tangtawn Toupa'n Sisera na khut sunga hon piak ni ahi. Tangtawn Toupa na mai ah paita hilou hia, a chi hi. Barak in a mi 10,000-te Tabor Mual apan a makaihsuk hi. 15 Tangtawn Toupa'n Barak' mai ah Sisera leh a kangtalai taisanin khein a tai hi. 16 Barak in Sisera' kangtalaite leh sepaihte Haroseth Hagoim dong a delh zui a, Sisera' sepaihhon khempeuh namsauin a si uh a, khat lei zong a suakta kei hi. 17 Sisera bel, khein a tai a, Ken mi Heber' zi Jael' puanbuk ah a tailut hi. Hazor kumpipa Jabin leh Ken mi Heber' innkawte kala galmuanna a om manin, Sisera bel tua muna tailut ahi. 18 Jael bel Sisera tuak dingin hong pusuak a: Ka toupa aw, hiah hong pai inla, hong lut in, lau ken, a chi hi. Tua bangin, Jael' puanbuk ah Sisera a lut a, ama'n puanin amah a na khuh hi. 19 Sisera in Jael kiang ah: Ka dangtak mahmah a, tui dawn ding hon pe ve, a chi a, Jael in bawngnawi savun thawl a hong a, dawn ding a pia a, puanin amah a khuh kik hi. 20 Sisera in Jael kiang ah: Puanbuk kongkhak ah na ding inla, mi khat peuh in hong kan a: Mi hong lut om hia? hong chih uleh, Om lou, na chi in aw, a chi hi. 21 Ahihhangin, Heber' zi Jael in puanbuk khetphim khat leh sek a la a, Sisera baha ihmu hithiat lai a vanaih denden a, a haizek ah tua puanbuk khetphim a khenlut a, lei tawh a kilhdensuk a, a si hi. 22 Barak in Sisera a delh a, tua lai a hong tung hi. Jael hong pusuakin amah a natuak a: Hong pai dih, na mi zon kon lak ding, a chi hi. Barak a valut takin, ngai dih, Sisera si a, a haizeka puanbuk khetphim tai vengvong a mu hi. 23 Tua ni-in, Pathian in Israel suante' mai ah Kanan kumpipa Jabin a nuaisiah a, 24 a tawptawpa Ken kumpipa a nuaisiah dimdem mateng uh, Israel suante a hat semsem uhi.

Vaihawmte 5

Debora' La

1 Tua ni-in, Debora leh Ahinoam' tapa Barak in hiai la a sa uhi: 2 Milian miphate'n Israelte laka ma a kaih laiun, mipite'n amau utthu-a a zuih laiun- Tangtawn Toupa tung ah kipahthu gen un! 3 Kumpipate aw, na za un! Vaihawm thuneite aw, na ngai un! Tangtawn Toupa' mai ah, keimah in la sa ding hi'ng. Tangtawn Toupa, Israel Pathian phatna kaihgingin sa ding hi'ng. 4 Tangtawn Toupa aw, Seir Mual apan na kuankhiak laiin, Edom gamsang apan kal na suan laiin, lei ling a, vante'n tui sungbua, ahi, mei vomte'n vuah zusak hi. 5 Tangtawn Toupa' mai ah mualte'n hawktui luangsak buabua a, Tangtawn Toupa, Israel Pathian' mai ah, Sinai Mual ah hawktui luangsak. 6 Anath' tapa Shamgar khan laiin, ahi, Jael a khan laiin, lamliante nutsiatin om a, khualzinte'n lampelh suk leh toute tawn uhi. 7 Kei Debora ka kisak mateng, kei Israela nu khat ka kipat mateng, khawta-a khawsak beita, Israel gama khawta-a khawsak tawpta. 8 Israel in pathian thakthakte a teel sungin, a kongpite ah kidouna om a, ahihhangin, Israel gama sepaih 40,000-te lak ah, lum leh tei a kimu-a hia! 9 Israel ukpite lam ah, amau utthu-a kuan mipite lam ah ka lungtang om hi. Tangtawn Toupa' tung ah lungdamthu gen un! 10 Nou sabiltung kaang tunga tuangte, nou suala puanphah tunga tute, nou lampi-a paite, ngaihtuah un. 11 Gan tuipiakna muna thalkapte' awte ngaihtuah un, Tangtawn Toupa' thilhih diktatte gen uh a, Israel khawtate adinga thilhih diktatte gen uhi. Tua khitin, khawpi kongpite lam ah, Tangtawn Toupa' mipite paisuk uhi. 12 Debora aw, khanglou in, khanglou in! Khanglou in, khanglou inla, la sa in! Barak aw, thou in, Ahinoam' tapa Barak aw, kisa inla, na salmatte pimang in! 13 Tua khitin, a sibangte milian miphate kiang ah hong pai uh a, galhat khawkhengte tawh, kei lama pang dingin Tangtawn Toupa hong kuan hi. 14 Amalek gama zungkai Efraim nam apan, nang Benjamin nong kuan a, nang khitin, Efraim hong kuan a, nang Benjamin, na mite tawh nong kuan hi. Makir apan sepaih makaite hong kuan a, Zebulun apan sepaih makaailian' chiangtawite hong kuan. 15 Isakhar sepaih makaite Debora tawh ton uh a, Barak zong Isakhar bangin, Debora tawh ton hi. Ama' makaihna nuai ah, phaizang ah ama' nung ah kuan uh a, Reuben sepaih pawlte bel nakpitakin kingaihtuah lai uh. 16 Banghanga noute belam huang kikal khawnga tu mawk? Belamte adia tamngai kitum ngai maw? Reuben sepaih pawlte nakpitakin kingaihtuah lai uh. 17 Gileadte Jordan suah lama om lai uh a, banghanga Dante long kiang khawnga omom ahi ua? Tuipi geia Asherte om uh a, tuipi kahiang gei khawng ah om uh. 18 Zebulunte sih lauhuaina muna om uh a, Naftalite zong kidouna phual mual tung khawng ah om uh. 19 Kumpipate hong kuan uh a, gal dou uh. Kanan kumpipate'n Taanak ah, Megido tuite kiang ah, gal dou uh a, gallak sumte paw lou uh. 20 Van apan van asksite'n a paina uah Sisera dou uh. 21 Kishon, tua tanglai lui Kishon tuikhang in amaute taimangta. Ka hinna aw, hattakin kalsuan in. 22 Sakol khete'n lei tuan ging a, sakol hatte tawmtawmin tai. 23 Tangtawn Toupa' vansawltak in: Tangtawn Toupa huh dinga hong kuan louh manin, Meroz khua hamsiat in. Galhatte dou dinga Tangtawn Toupa a huh louh manun, nakpitakin amaute hamsiat in, chi. 24 Numei lak ah Jael mi nunnuampen hi, amah Ken mi Heber' zi hi. Puanbuka teeng numeite lak ah, amah mi nunnuam hi. 25 Sisera in tui ngen a, Jael in bawngnawi pia a, belkuang manphatakin bawngnawi dat pia. 26 Jael khut in puanbuk khetphim sawk a, a taklam in nasemmi' sek a la. Sekin Sisera sek a, a lutang a satzan. A haizek khenzan a, sun pailet. 27 Jael' khebul ah Sisera op a, puka lumden. A khebul ah opsuk a, puk a, a opsukna ah si. 28 Sisera' nu tawhlet ah dakkhia a, vathangkalha enin kap a: Banghanga kangtalai hong tung hak ahia? Banghanga kangtalai ging Zekai-a hia? chi. 29 Ama' nungak pilte'n dawng uh a, ama'n lah a gen ngeingei gen tah. 30 Gallakte mu a, hawm uh hilou ding hia! Michih in nungak khatkhat hiam, nihnih hiam nangawna hawm uh hilou ding hia! Sisera in puansilh zem phapha tang hi lou ding hia! Puanzep kilawm, gallak puan kilawm, a thuah thuaha zep puansilhte ka ngawnga velh ding hon puak nalou ding hia? chi. 31 Tangtawn Toupa aw, na galte khempeuh tua bangin mangthang uhen. Nang hon itte bel, zing nisuak taangpha bangin taang uhen, a chi uhi. Tua nung kum 40 sung Israel gam in galmuanna a nei hi.

Vaihawmte 6

Midiante' Nuaisiahna

1 Israelte'n Tangtawn Toupa' mitmuhin thil gilou a hih uh a, Tangtawn Toupa'n kum sagih sung Midiante' khut sung ah amaute a pekhia hi. 2 Midiante' nuaisiahna amaute tung ah a gik mahmah a, Israelte'n tenna bukna dingin mual tung kawlhawm khawng, kawkhuk khawng, kulh khawng kibawl uhi. 3 Israelte'n khaichi a chiin chiangun, Midiante leh Amalekte leh Suahlam mi midangte hong kuan pahpah uhi. 4 Israelte doua giahphualte a sat chiangun, Gaza dongin, loua buh leh balte a susia uh a, Israelte adingin nek leh tak ding leh, ganta belam leh kei, bawngtal leh sabiltungte nangawn a hawi kei uhi. 5 Amaute lah a gante uleh a puanbuk khawng utawh khaukhuphon mah bangin hong paitou pahpah uhi. Mihingte leh a sangawngsaute uh simseng louh tawh hong paiin, gam a sugawp uhi. 6 Midiante'n gam a nezawng gawp uh a, Israelte, Tangtawn Toupa kiang ah huhna ngenin a toukou uhi. 7 Midiante hanga Israelte, Tangtawn Toupa kianga a toukou takun, hichi hong hi a, 8 Tangtawn Toupa'n kamsang kua hiam khat a sawl a, tua kamsangpa'n: Tangtawn Toupa Israelte Pathian in: Keimah mah in Aigupta gam apan kon piikhetou a, saltanna mun apan kon piikhia hi. 9 Aiguptate leh noute hon sikdente khempeuh khut sung apan kon humbit a, na mai uah amaute ka hawlkhia a, a gam uh noute kon pia hi. 10 Noute kiang ah: Kei Tangtawn Toupa, na Pathian uh ka hi. Na tenna gam ua Amorte' pathiante na lau ding uh ahi kei, kon chi a, ahihhangin, ka aw na ngaikhe kei uh, a chi, a chi hi.

Gideon

11 Tua khitin, Tangtawn Toupa' vansawltak hong pai a, Ofra muna tawsaw sing nuai ah a tu hi. Tua muna lou om bel, Abiezer mi Joash' lou ahi. Tua lou ah a tapa Gideon buhchilin a om a, Midiante muh louh dingin, grep sukna khuk sung ah buh a chil hi. 12 Tua Tangtawn Toupa' vansawltak Gideon kiang ah a kilaak a: Galhat hangsan aw, Tangtawn Toupa'n nang hon ompih hi, a chi hi. 13 Gideon in a dawng a: Ka Toupa aw, Tangtawn Toupa'n koute hon ompih ahih leh, ka tung ua hibang teng banghanga tung ahia oi? Ka pu ka pate un hon na hilh thillamdangte khempeuh koia omta uh ahia? Amaute'n: Tangtawn Toupa'n Aigupta gam apan eite hon na piikhia ahi, chi-a hon na hilh uh hilou maw? Tun lah Tangtawn Toupa'n koute hon taisan a, Midiante' khut sung ah hon pekhia hi! a chi hi. 14 Tua khitin, Tangtawn Toupa amah lam ah a kihei a: Hatna na neih tawh kuan inla, Midiante' khut sung apanin Israelte hukhia in, nang hon sawlpa keimah hi lou ka hi hia? a chi hi. 15 Gideon in: Ka Toupa aw, ke'n Israelte bangchi-a hukhe thei ding ka hia? Ngai dih, kei Manase suana beh hatloupen, ka pa' innkaw sunga neupen ka hi lai, a chi hi. 16 Tangtawn Toupa'n a dawng a: Ke'n kon ompih ding a, Midiante mi khat bang leia zougawp ding na hi, a chi hi. 17 Tua khitin, Gideon in amah kiang ah: Na mitmuha deihsakna tangta ka hih leh, nang mahmah in non houpih, chih a kitheih nading chiamtehna hon pia in. 18 Tu'n thawnpiak ding tawia kong kileh kik mateng, hehpihtakin na paimang ken aw, a chi hi. Tangtawn Toupa'n: Nong kileh kik mateng kon na ngak ding, a chi hi. 19 Gideon inn sung ah a valut a, kelnou khat leh anvui nei ephah khat a la a, silngou sawhlouh tanghou a bawl a, tua sa pen lawh ah a koih a, a satui belkuang ah a sung a, tuate hon tawikhia a, tua gel sing nuaia tua vansawltak' mai ah a lui hi. 20 Tua Pathian' vansawltak in amah kiang ah: Sa leh silngou sawhlouh tanghou hiai suangpi tung ah koih inla, satui sunkhum in, a chi a, Gideon in tua bangin a hih hi. 21 Tangtawn Toupa' vansawltak in a khuta chiangkhun dawnin tua sa leh silngou sawhlouh tanghou a khoih a, tua suangpi apan mei hong kuang a, tua sa leh silngou sawhlouh tanghou a kangtum hi. Tua khitin, tua Tangtawn Toupa' vansawltak in Gideon a paimangsan hi. 22 Gideon in amah Toupa' Tangtawn Pathian ahi, chih a phawkkhiak takin a lau a: Maizen, Tangtawn Toupa Pathian aw! Kimaituahin Tangtawn Toupa' vansawltak ka muta mawk a! a chi hi. 23 Ahihhangin, Tangtawn Toupa'n amah kiang ah: Khamuangtakin om inla, lau ken! Na si kei ding, a chi hi. 24 Gideon in tua ah, Tangtawn Toupa ading maitam a dawh a, tua maitam min dingin Jehova Shalom a sa hi. Tuni dongin, Abiezerte gama Ofra ah tua mun a om lai hi. 25 Tua zan mahin, Tangtawn Toupa'n Gideon kiang ah: Na pa' bawngtalte laka nihna, kum sagiha upa la inla, na pa' dawh Baal maitam phelgawp inla, a kianga Ashera song zong phukpai in. 26 Hiai kulh tung ah, Tangtawn Toupa na Pathian ading maitam diktak dawh in. Tua Ashera song na phuk pen singkhul dingin zang inla, tua bawngtal nihna haltum thillatin lan in, a chi hi. 27 Tua bangin, Gideon in a nasemte laka sawm khat a tonpih a, Tangtawn Toupa' hilh bangin a hih a, ahihhangin, ama' innkawte leh khawpi mite a lau manin, sunlaia hih louin, zankhangin a hih hi. 28 Zingsanga khawpi mite a thawhkhiak takun, ngai dih, Baal maitam chimsa tawh a kianga Ashera song kiphuk tawh, maitam kidawh thak tunga bawngtal nihna haltum thillata kilan tawh a na om hi. 29 Amaute lak ah a kikan uh a: Hiai kua hih ahia? a kichi uhi. Limtaka kana a kidot nungun: Joash' tapa Gideon hih ahi, chi-in mi'n a hilh uhi. 30 Tua khawpi mite'n Joash kiang ah: Na tapa thah dingin hon pekhia in. Baal maitam a phelgawp a, a kianga Ashera song a phuk manin, a sih teitei ding ahi, a chi uhi. 31 Ahihhangin, Joash in a kim a kianga heha dingte khempeuh kiang ah: Noute'n maw Baal na gup ding uh? Baal hut sawm na hi umaw? Baal gum mi peuhmah zingsang main thah hi hen! Baal, pathian taktak ahih leh, a maitam kiphelgawp hiven, amah kigum leh ake! a chi hi. 32 Tua ni-in, Gideon in Baal maitam phelgawp a: Baal amah leh amah kigum hen, a chih manin, Gideon' min dingin Jerub Baal a sa uhi. 33 Tua khitin, Midiante khempeuh leh Amalekte leh suah lam mite a pangkhawm vek uh a, Jordan lui a kaan uh a, Jezreel Phaizang ah giahphual a sat uhi. 34 Tua hunin, Tangtawn Toupa' Kha in puan bangin Gideon a thuam a, Gideon in belamtalki pengkul a mut a, Abiezerte amah zui dingin a kisamkhawm uhi. 35 Tua baan ah, Gideon in Manase gam leh Asher gam leh Zebulun gam leh Naftali gam khempeuh ah zong thangkoute a sawl a, kigalvan dingin a hilhsak hi. Amaute zong amah tuak dingin hong kuankhia uhi. 36 Gideon in Pathian kiang ah: Non chiamsa bangin ka khut tungtawnin Israelte na hukhe taktak ding maw? 37 En in, buhphual ah belam mul ka koih ding a, samul tung kia-a daitui a na kiak a, leilak mun dang teng a hul leh, na gen bangin ka khut tungtawnin Israelte na hukhe ding, chih ka thei ding, a chi hi. 38 A chih bangbangin hong om a, zingsang beltakin Gideon a thou a, belam mul a suk leh belkuang dim tui a taakkhia hi. 39 Tua khitin, Gideon in Pathian kiang ah: Ka tung ah heh kenla, khatvei thu hon gensak lai in. Samul zangin etna khat hon phalsak lai in, kon ngen ahi. Tutungin, samul hulsak inla, leilak ah daitui kesak in a chi hi. 40 Tua zanin, Pathian in tua bangin a hih a, samul kia a hul a, leilak mun dang teng ah daitui a kia hi.

Vaihawmte 7

Gideon in Midiante Zou

1 Zingkhangpi-in, Jerub Baal, tua bel Gideon hiven, leh a mite khempeuh a kisa uh a, Harod tuinak ah giahphual a sat uhi. Amaute' giahphual mallam More mual kianga phaizang ah, Midiante'n giahphual a sat uhi. 2 Tangtawn Toupa'n Gideon kiang ah: Midiante na khut sunga kon piak nadingin na tam lua uh. Israelte'n: Ka khut ua kihukhia ka hi uh, chi-in ka tung ah a kisathei kha ding uh. 3 Tu'n mipite zakin thu phuang inla: Laua ling peuhmah kik henla, Gilead Mual apan inn ah chiah pah hen, chi in, a chi hi. Tua bangin, mi 22,000 a kik uh a, mi 10,000 a om lai uhi. 4 Ahihhangin, Tangtawn Toupa'n Gideon kiang ah: Mi na tam law lai uh. Amaute lui ah piisuk inla, tua ah ke'n amaute ka entel ding. Hichi ahi ding a, Hiai mi in nang hong zui hen, ka chih pen a kuan ding a, Hiai in zaw nang hon zui kei hen, ka chih pen a kuan kei ding, a chi hi. 5 Gideon in tua mite lui ah a piisuk a, Tangtawn Toupa'n Gideon kiang ah: Ui tuiliah banga leia liah thawha tui dawnte a tuamin khenkhia inla, khukdina hupte a tuamin koih in, a chi hi. 6 Khuta tui luaka leia liah thawha tui dawn mi 300 a pha uh a, a dang teng in khukdin in tui a hup uhi. 7 Tangtawn Toupa'n Gideon kiang ah: Liah thawha tui dawn mi 300 zangin na mite ka hukhe ding a, Midiante na khut sung ah kon pe ding. Mi dang teng a inn tek uah kik uhen, a chi hi. 8 Tua bangin, Gideon in mi 300-te a siit a, tuate'n a kikte apanin nek dingte leh belamtal ki pengkulte a la uhi. Israel mi dang teng a puanbuk tek uah a sawlkik hi. Midiante bel Gideon omna khang phaizang ah, giahphual ah a om uhi. 9 Tua zanin, Tangtawn Toupa'n Gideon kiang ah: Kisa inla, Midiante' giahphual sim dingin kuansuk in, na khut sunga hon pe ding ka hi. 10 Tua giahphual vasim ding na lau leh, na silapa Pura tonpih inla, 11 ngiahphual ah a thugen uh vasimngaih in. Tua in giahphual sim ngam dingin nang hon hangsansak ding, a chi hi. Tua bangin, Gideon leh a silapa Pura, Midiante' giahphual pua-a galvilte kiang ah a kuansuk uhi. 12 Tua phaizang ah Midiante, Amalekte leh suah lam mite, khaukhup hon banga sahin a om uh a, a sangawngsaute uh tuipi piaua sehnel sanga tamzaw, simsenglouh ahi. 13 Gideon hong kuansuk a, mi khat in a mang a gen laitakin a tungsuk a, tua mipa'n a lawmpa kiang ah: Ngai dih, mang ka man a, ka mangin barli tanghou beu khat Midiante giahphual ah hong tuklut a, puanbuk khat a deng a, tua puanbuk a puk a, a kilumlet a, a chim ka chi, a chi hi. 14 A lawmpa'n: Hiai peuhmah, tua Israel mi, Joash' tapa Gideon' namsau hilou mawh kenteh! Pathian in Midiante leh giahphual bup a khut sunga peta ahi ve, a chi hi. 15 Gideon in hiai mang leh a khiakna a zak takin Pathian a bia hi. Israel giahphual ah hong kilehkik a: Kisa un! Tangtawn Toupa'n Midiante' giahphual na khut sung ua hon peta ahi, a chi hi. 16 Ama'n mi 300 pawl thumin a khen a, michih khut ah belamtal ki pengkul leh belhawm leh a sunga meisel tawh a pe tek hi. 17 Tua khitin, amaute kiang ah: Kei hon en unla, ka hih bangbangin hih un. Giahphual gei ka tun chiangin, ka hih bangbangin hih un. 18 Kei leh ka tonpihte'n ka pengulte uh ka mut chiangun, giahphual kimkot ah noute'n zong na pengkulte uh mut unla: Tangtawn Toupa leh Gideon adingin, chi-in awng un, a chi hi. 19 Gideon in mi 100 tawh Midiante giahphual a naih uh a, zan ven laita kipat, galvilte kikhen laitakin a tung uh a, pengkul a mut uh a, a khut ua belte a khentam uhi. 20 Tua pawl thumte'n zong pengkul mutin, a khut ua belte a khentam uhi. Veilam khuta meisel tawiin, taklam khuta pengkul a mut uh a: Tangtawn Toupa leh Gideon' ading namsau! chi-in a awng uhi. 21 Michih giahphual kimkot ah a pang uh a, Midiante a taikek uh a, laua kikou vengvungin a tai uhi. 22 Mi 300-te'n pengkul kitonin a mut uh a, Tangtawn Toupa'n giahphual sunga Midiante amau namsauin a kithattuahsak a, Zerera lam ah Beth Shita ah, Tabath kianga Abel Mehola dong a tai uhi. 23 Gideon in Naftalite, Asherte leh Manasete a samkhawm a, Midiante a delh uhi. 24 Gideon in Efraim tanggam teng ah thangkoute a sawl a: Midiante dou dingin hong kuansuk unla, amaute main Jordan lui kannate, Beth Bara dong na la un a chisak hi. Tua bangin Efraimte khempeuh a kisamkhawm uh a, Beth Bara dong, Jordan lui kannate a lazou uhi. 25 Midian sepaih makai nihte Oreb leh Zeeb zong a man uh a, Oreb pen Oreb suangpi ah a that uh a, Zeeb bel Zeeb grepsukna ah a that uhi. Midiante a delh zui uh a, Oreb leh Zeeb' lutangte Jordan lui gal ah Gideon kiang ah hon pua uhi.

Vaihawmte 8

Zeba leh Zalmuna

1 Tua hun laiin, Efraimte'n Gideon kiang ah: Banghanga koute hibanga hon bawl na hia? Banghanga Midiante dou dinga na kuan laia, koute hon sam tei lou na hia? chi-in amah nakpitakin a dem uhi. 2 Ahihhangin, ama'n amaute a dawng a: Noute tawh tehkak dingin ke'n bang ka hih zoua eita? Abiezerte' grep gah hoihte sangin Efraimte' grep sang mah hoih zaw hi lou maw? 3 Pathian in Midian makaite Oreb leh Zeeb na khut ua hon pia a, noute tawh tehin ken bang ka hih zoua eita? a chi hi. Hiai a zak takun, Gideon tunga a hehna a nemta hi. 4 Gideon leh a mi 300-te tawi mah le uh, Midiante a delh lailai uh a, Jordan lui a tung uh a, a galkah uhi. 5 Gideon in Sukoth khaw mite kiang ah: Kei hon zuite a bahta uh a, hehpihtakin, amaute ading tanghou beute hon pia un aw, Midian kumpipate Zeba leh Zalmuna delh lai ding ka hi, a chi hi. 6 Ahihhangin, Sukoth kha'W makaite'n: Zeba leh Zalmuna na khut sunga omkhin ahi ua hia, tua banga na sepaihte tanghou beute ka piak pah zawzen ding uh? a chi uhi. 7 Gideon in a dawng a: Tua banga thu na gen manun, Tangtawn Toupa'n Zeba leh Zalmuna ka khut sunga hon piak chiangin, gamdai-gamkeu ling leh loulingneitein na sa uh ka kuikek mahmah ding, a chi hi. 8 Tua mun apanin amah Penuel ah a paitou a, tua khaw mite kiang ah, tua mah bangin tanghou a ngen a, amaute'n Sukothte dawn bangin a dawng uhi. 9 Ama'n Penuel khaw mite kiang ah zong: Galmuanga kong kilehkik chiangin, hiai inn sang ka laichim ding, a chi hi. 10 Tua hun laiin, Zeba leh Zalmuna, sepaih 15,000 tawh Karkor muna giahphual ah a om uhi. Tuate bel, suah lam sepaihte laka dama khawsuak omsun ahi uhi. Namsau tawi sepaih 120,000 bel a si uhi. 11 Gideon bel, Noba leh Jogbeha suah lama paitou vialpem namte lampi ah a paitou a, galmuangtaka om tua sepaihhonte a dou guih hi. 12 Midian kumpipa Zeba leh Zalmuna a tai uh a, ahihhangin, Gideon in amaute a delh a, a man a, tua sepaihhonte zong a delhzak hi. 13 Tua khitin, Joash' tapa Gideon, galphual apan, Heres mual kanna lamlian toupai zuiin a lehkik hi. 14 Sukoth mi tangval khat a man a, thu a dong a, tua tangval in Gideon adingin Sukoth upate leh sepaih makai 77-te min a gelhkhiaksak hi. 15 Tua khitin, Gideon tua Sukoth khaw mite kiang ah hong pai a: En ua le, hiai ah Zeba leh Zalmuna a om uh. Amaute tawh kisaia non tot ua: Zeba leh Zalmuna na khut sunga omkhin ahi ua hia, banghangin maw sepaih bahte tanghou ka piak pah zawzen ding uh? non chi uh, a chi hi. 16 Tua khitin, tua khaw upate a man a, khaw pam lam ah a kai a, gamdai-gamkeu ling leh loulingneite a la a, tuate in Sukothte sinsakna a pia hi. 17 Penuel inn sang zong a laichim a, tua khaw mite a that hi. 18 Tua khitin, Zeba leh Zalmuna kiang ah: Tabor muala na thahte uh bangchi bang mi ahi ua? a chi hi. Amaute'n: Nang bangbanga kumpi tapa bang ahi uh, a chi uhi. 19 Gideon in: Ka nu' tapa ka sanggamte ahi ve ua le. Tangtawn Toupa' hinna louin ka kichiam ahi: Amaute na hinghawi le uchin zaw, noute hon that lou mah ding hi vengin, a chi a, 20 kiheiin a tapa upapen Jether kiang ah: Amaute that in, a chi hi. Ahihhangin, Jether bel tangval nou lei ahi a, a lau a, a namsau a dok kei hi. 21 Zeba leh Zalmuna in: Kisa inla, nang mahmah in hon that suk in. Mi a pasalphatna, a hangsanna-a kilang hilou maw, a chi uhi. Gideon in a naih a, amaute a that a, a sangawngsaute uh ngawng apan kizepna khite a la hi.

Gideon' Siampi-puanak zem

22 Tua khitin, Israelte'n Gideon kiang ah: Nang Midiante' khut apan koute non hutkhiak manin, koute tung ah vaihawm inla, na tapa leh na tupa zong koute tung ah vaihawmin pang uhen, a chi uhi. 23 Ahihhangin, Gideon in amaute kiang ah: Noute tung ah vaihawmin ka pang kei ding a, ka tapa zong a pang kei ding. Tangtawn Toupa'n noute tung ah vai a hawm zaw ding, a chi hi. 44 Tua khitin, Noute apan nget khat bel kon nei hi. Noute tek in gallak na tante uapan bilbah khat tek hon pe le uchin, a chi hi. A galzawhte ubel, Ishmaelte ahi uh a, bilbah batte ahi uhi. 25 Amaute'n: Bilbahte hon pe mah n'ung, a chi uh a, puanza khat a phah uh a, a gallak uh bilbahte hon kaikhawm uhi. 26 Sangawngsau ngawnga khite, khi-awh vawhsawnte, khainiangte leh Midian kumpipate' kumpipuan sandupte sim louh, Gideon in bilbah a ngetkhiakte khamsik shekel 1,700 a pha hi. 27 Gideon in tuatein siampi puanak zem a bawl a, a khawpi Ofra ah a koih a, Israelte khempeuh in tua biain a kizuak uhi. Gideon leh a innkawte adingin, tua siampi puanak zem thang antah a suak mawkta hi.

Gideon' Sihna

28 Tua nungin, Midiante Israelte' nuaisiahin a omta uh a, lu a phongkhe zou nawn kei uh a, Gideon dam sungin, Israel gam in kum 40 sung galmuanna a nei hi. 29 Joash' tapa Jerub Baal a inn ah a kilehkikta hi. 30 Ama'n zi a hau a, ama' ta mahmah tapa 70 a nei hi. 31 Shekhema om a meinu'n zong tapa a nei a, Gideon in a min dingin Abimelek a sa hi. 32 Joash' tapa Gideon teekkunin a dam a, tua nungin, a si a, Abiezerte gama Ofra ah, a pa Joash' hankhuk ah a kivui hi. 33 Gideon a sih takin, Israelte a nungtolh kik uh a, Baal pathiante delhin a kizuak uh a, a pathian dingun Baal Berith a tungkhia uhi. 34 Tua bangin, a kim a kiang ua a melmate uh' khut apan Israelte humbitpa Tangtawn Toupa, a Pathian uh a thei gige nawn kei uh a, 35 Jerub Baal in amaute adinga thil hoih a hihte mangngilhin, a innkawte tung ah zong muanhuaiin siam a suah kei uhi.

Vaihawmte 9

Abimelekh

1 Tua nung lamin, Jerub Baal' tapa Abimelekh, Shekhema a nu' sanggamte kiang ah a hawh a, amaute kiang ah leh, a nu' pa' behte khempeuh kiang ah thu a gen a: 2 Shekhem makaite khempeuh kiang ah thu gen unla: Jerub Baal' tapa 70-te'n na tung ua vai a hawm uh hia hoih na sak uh, ahih kei leh, mi khat in na tung ua vai a hawm? Kei na guh uapan guh, na sa uapan sa ka hih lam theigige un, chi un, a chi hi. 3 A nu' sanggamte'n Shekhem makaite khempeuh kiang ah tua thute khempeuh a gen uh a, Abimelekh zui dingin a lunghei uh a: Amah i sanggampa ahi mah vele, a chi uhi. 4 Amaute'n Baal Berith biakinn apan ngun sik shekel 70 Abimelekh a pia uhi. Abimelekh in tua sumtein mi ngongtat leh namanlou teng a guai a, amaute'n amah a zui uhi. 5 Tua khitin, amah Ofra khua-a a pa' inn ah a hawh a, a pa Jerub Baal' tapa ama' sanggam pasal 70-te suangpi tung khat ah a that vek hi. Ahihhangin, Jerub Baal' tapa naupangpen Jotham bel a bu a, a suakta kha hi. 6 Tua khitin, Shekhem leh Beth Milo khawmite, Shekhem song kianga tawsaw sing omna ah a kikaikhawm uh a, Abimelekh kumpi lukhu a khusak uhi.

Singkung Gentehna

7 Mi'n hiai thu Jotham kianga a hilh takun, amah Gerizim Mual tung ah a kaltou a, ngaihtakin a kikou a, amaute kiang ah: Shekhem makaite aw, Pathian in na thu uh a ngaihkhiak theih nadingin, ka thugen na ngai un: 8 Khatvei, singkungte'n amaute uk ding kumpipa thaunilh dingin a kisa uh a, oliv singkung kiang ah: Nang ka kumpipa-un hong pang in, a chi uhi. 9 Ahihhangin, oliv singkung in a dawng a: Pathian leh mihing pahtawi nadinga kizang ka sathau namtui suah ding tawpsanin, singkung dangte tung ah ka kivialzak dia hia? a chi hi. 10 Tua khitin, singkungte'n theipi kung kiang ah: Nang kisa inla, ka kumpipa-un hong pang in, a chi uhi. 11 Ahihhangin, theipi kung in a dawng a: Ahoih mahmah ka gah suah ding leh ka khumna tawpsanin, singkung dangte tung ah ka kivial- zak dia hia? a chi hi. 12 Tua khitin, singkungte'n grepgui kiang ah: Nang kisa inla, ka kumpipa-un hong pang in, a chi leuleu uhi. 13 Ahihhangin, grepgui in a dawng a: Pathiante leh mihing kipaksak ka grepzu thakte tawpsanin singkung dangte tung ah ka kivialzak dia hia? a chi hi. 14 A tawpin, singkung teng khempeuh in lingkung kiang ah: Nang kisa inla, ka kumpipa un hong pang in, a chi uhi. 15 Ling kung in singkungte kiang ah: Noute tunga kumpipa dinga non thaunilh nop taktak uleh, ka liim ah hong bu ve ua. Tua bang na ut kei uleh lah, lingkung apan mei hongpawt henla, Lebanon sidar singkungte kangtum hen, a chi hi. 16 Na kumpipa ding ua Abimelekh na bawl ua, lungsim dik leh phathuaia gamta na hih ua, Jerub Baal leh a innkawte tunga gamtat kilawma gamta na hih ua, tan dia kilawm pia na hih nak uleh, Abimelekh tawh nuamsa le uteh ake. 17 Ka pa'n noute adingin gal a dou a, ama' hinna phalin Midiante' khut apan hon humbit ahi. 18 Ahihhangin, ka pa' innkawte' tung ah na hel uh a, suangpi tung ah a tapa 70-te, a banbanin na that uh a, a silanu tawh a ta Abimelekh, na sanggampa uh ahih manin, Shekhemte tunga kumpipain na bawl uh. 19 Tuni-a kilawmtak leh phathuaitaka Jerub Baal tunga gamta na hih nak uleh, Abimelekh tung ah kipakin lungnuam unla, amah zong noute tunga kipakin lungnuam hen. 20 Ahihhangin, tua banga gamta na hih kei uh lebel, Abimelekh apan mei hong pawt henla, Shekhem khaw mite leh Beth Milo khaw mite kangtum henla, Shekhem mite leh Beth Milo mite apan mei hong pawt henla, Abimelekh kangtum hen! a chi hi. 21 Tua khitin, Jotham a taimang a, Beer a tung a, a sanggampa Abimelekh a lau manin tua ah a teeng hi.

Abimelekh Pukna

22 Abimelekh in kum thum sung Israelte a makaih nungin, 23 Pathian in Abimelekh leh Shekhemte kal ah kha gilou a koih a, Shekhemte, Abimelekh tung ah lepchiahtakin a gamta uhi. 24 Ahang bel, Jerub Baal' tapa 70-te tunga sisan suahna mawhna, Pathian in Abimelekh tung ah leh a sanggamte that dinga amah panpih Shekhem makaite' tunga a but nop man ahi. 25 25 Shekhem makaite'n mual tung ah Abimelekh buk dingin mi a koih uh a, lampi-a paite peuhmah a lok zel uhi. Hiai thu Abimelekh kiang ah mi'n a hilh uhi. 26 Ebed' tapa Gaal in a sanggamte a tonpih a, Shekhem makaite lama pang dingin hong kuan a, Shekhem makaite'n amah a na muang uhi. 27 Amaute grephuan ah a hawh uh a, grep gahte khawmin, a tui a suk uh a, a pathian uh biakinn ah nopbawlin a om uhi. Tua banga nea a dawn laiun Abimelekh a hamsiat uhi. 28 Ehed' tapa Gaal in: Abimelekh kua hi a, Shekhem kua hi ahia ama' nuaia i om ding? Amah Jerub Baal' tapa hi lou maw? Ama' nuaia sepaih makai Zebul hi lou maw? Shekhem' pa Hamor' mite nna sem ve ua. Banghanga Abimelekh nna sem ding i hia? 29 Hiai mite ka thu nuaia om hi le uh ut nang e. Hi leh, Abimelekh ka hawlmang ding, a chi hi. Tua bangin, Gaal in Abimelekh kiang ah: Na sepaih honte behlap inla, hong kuan in! a chi hi. 30 Tua khawpi ukpipa Zebul in Ebed' tapa Gaal' thugente a zak takin, a hehna a kuang a, 31 Abimelekh kiang ah a simin mi a sawl a: Ngai dih, Ebed' tapa Gaal leh a sanggamte Shekhem ah hong pai uh a, nang hon pawsiahta uh. 32 Nang leh na sepaihte tu zanin kuankhia unla, gamlak ah amaute bukin ngak un. 33 Zingsang beltakin, ni suah phetin thou unla, khawpi la un. Ngai dih, Gaal leh a sepaihte nang dou dingin hong kuankhe ding uh ahi, a tung uah na hih theih bangbang hih in, a chisak hi. 34 Abimelekh leh a sepaihte khempeuh zan laiin a thou uh a, Shekhemte buk dingin pawl li a kisuah uhi. 35 Ebed' tapa Gaal paikhia a, khawpi lutna kongpi-a a din laitakin Abimelekh leh a sepaihte a mibukna uapan hong kuan uhi. 36 Gaal in tua mite a muh takin, Zebul kiang ah: En dih, mual tungte apanin mi hong kuan uh! a chi hi. Ahihhangin, Zebul in: Mual sang liimte mihing banga mu na hi ve, a chi hi. 37 Gaal in: En dih, gam laizang apanin mite hong kuan. Pawl khat lah aisansiampa' tawsaw sing lam apan hong kuan uh, a chi hi. 38 Zebul in: Abimelekh kua ahia a nna i sep ding, na chihna kam kaw' omta ahia le? Tua hong kuante na simmawhte hilou u maw? Kuan inla amaute dou ve leh! a chi hi. 39 Gaal in Shekhem makaite' ma a kai a, Abimelekh a dou hi. 40 Abimelekh in amaute a delh a, Gaal a taisia a, kidouna phual apan khawpi kongpi dongin tampi liamin a puk uhi. 41 Abimelekh bel Aruma ah a taam a, Zebul in Gaal leh a sanggamte Shekhema teng lou dingin a hawlkhia hi. 42 A zing chiangin, Shekhem makaite gamlak ah a paikhia uh a, a paikhiak thu uh, mite'n Abimelekh kiang a tun uhi. 43 Abimelekh in a sepaihte a tonpih a, pawl thumin a khen a, gamlak ah Shekhemte a buk uhi. Khawpi apan mite hong paikhia a muh takin amaute dou dingin a dingkhia a, a dou hi. 44 Abimelekh leh a na ompih sepaihte'n Shekhem lutna kongpi a delh uh a, tua ah a pang uhi. Sepaih pawl dang nihte'n gamlaka omte a delh uh a, a that uhi. 45 Tua ni, sun nitumin Abimelekh in khawpi a dou a, a la zou a, a sunga mite a that a, khawpi a hihsia a, a sung ah chi a theh hi, 46 Hiai thu a zak takin, Shekhem kulhpi-a teeng makaite El Berith biakin sung bitna mun ah a tai uhi. 47 Shekhem kulhpi-a teengte tua lai ah a kikhum uh, chih Abimelekh in a za a, 48 a sepaihte tawh Zalmon Mual ah a paitou hi. Abimelekh in heipi-in singhiang khat a sat a, a liangzang ah a pua a, a mite kiang ah: Ka hih dan na muh bangbangun kintakin hih tek un, a chi hi. 49 Tua bangin, amaute khempeuh in singhiang a sat tek uh a, Abimelekh hih bangin a pua uhi. Kulhpi kimkot ah singhiangte a sekhawm uh a, meiin a hal uh a, kulhpi sunga omte a halkhum uhi. Tua Shekhem kulhpi sung ah numei leh pasal 1,000 khawng a si uhi. 50 Tua khitin, Abimelekh bel, Thebez khawpi lam ah a pai a, a dou a, a lata hi. 51 Tua khawpi sung laizang ah kulhpi innsang khat a om a, numei pasal, tua khawpi-a teengte tua lai ah a taikhawm uh a, kong a kikhakkhum uh a, innsang intung lam ah a kaltou uhi. 52 Abimelekh in tua kulhpi innsang a dou a, a kongpi meia hal dingin a naih hi. 53 Tua laitakin, numei khatin Abimelekh lutung ah buhhek suang tungnung a khiakkhum a, a luguh a kitam hi. 54 Abimelekh in a galvan pua tangval kintakin a sam a: Mi'n numei' thahsa hon chi kha ding, nangma' namsau dok inla, hon that in, a chi a, tua tangval in namsauin amah a sun a, a sita hi. 55 Israelte'n Abimelekh a sita, chih a theih takun, michih in ah a paita uhi 56 Abimelekh in a sanggam 70-te that a, a pa tunga a tatsiat, Pathian in a thuk a, 5 Shekhem gitlouhna khempeuh zong a thuk hi. Tua bangin, Jerub Baal' tapa Jotham' hamsia amaute tung ah a tungkimta hi.

Vaihawmte 10

Tola

1 Abimelekh sih nungin, Israel hukhe dingin Isakhar nama Tola hong dingkhia hi. Amah Pua' tapa ahi a, Pua bel Dodo' tapa ahi. Amah Efraim tanggama Shamir khua-a teeng ahi. 2 Ama'n kum 23 sung Israelte' ma a kai a, a sih takin, Shamir khua ah a kivui hi.

Jair

3 Tola nungin, Gilead mi Jair hong dingkhia a, kum 22 sung Israelte' ma a kai hi. 4 Ama'n tapa 30 a nei a, amaute sabiltung 30 tung ah a tuang uh a, Gilead gama khawpi 30 a lam uhi. Tua khawpite tuni dongin Havoth Jair a kichi hi. 5 Jair a sih takin, Kamon khua ah a kivui hi.

Israelte Khelhna

6 Israelte'n Tangtawn Toupa' mitmuhin thil gilou a hih kik zel uh a, Baal leh Ashtoreth tua Aramte' pathiante, Sidonte' pathiante, Moabte' pathiante, Amonte' pathiante, Filistiate pathiante a bia uhi. Tangtawn Toupa taisan a, amah a biak nawn louh manun, 7 Tangtawn Toupa' hehna Israelte tung ah a kuang a, Filistiate' khut ah leh Amonte khut ah amaute a khawngkhia hi. 8 Tua kum apan kum sawm leh giat sung, tua mite'n Jordan gala Gilead kichi, Amonte' gama teeng Israelte a nuaisiah uh a, a hihgenthei mahmah uhi. 9 Tua baan ah, Judahte, Benjaminte leh Efraim inkawte hong dou dingin, Amonte Jordan lui gal hong kah uh a, Israelte a lungzingsak mahmah uhi. 10 Tua bang hong hih takin, Israelte Tangtawn Toupa kiang ah huhna ngenin a toukou uh a: Na tung ah ka na-khialta uh. Nang ka Pathian uh hon taisanin Baal pathiante ka na-beta uh, a chi uhi. 11 Tua khitin, Tangtawn Toupa'n Israelte kiang ah: Aigupta gam apan, Amorte apan, Amonte apan leh Filistiate apan kon hukhia a, 12 Sidonte, Amalekte leh Moabte'n hon nuaisiah laiun, huhna ngenin nong toukou uh a, amaute khut sung apan kon hukhia hi. 13 Ahihhangin, noute mahmah in kei non taisan uh a, pathian dangte na bia uh. Tu'n zaw kon hukhe nawn kei ding. 14 Pai unla, na teel uh pathiante kiang ah huhna ngenin toukouta un. Na lungzin laiun hon hukhe le uh ake! a chi hi. 15 Ahihhangin, Israelte'n Tangtawn Toupa kiang ah: Ka na khialta uh ahi. Na mitmuha hoihpen bang zel ka tung uah hih inla, ahihhangin, tuni'n zaw ka hinna uh humbit pah peuhmah in, a chi uhi. 16 Tua khitin, amaute laka gamdang' pathiante a koihkhia uh a, Tangtawn Toupa a bia uhi. Ama'n Israelte' lungzinna a thuak zou nawn kei hi. 17 Amonte galdou dingin a kikaikhawm uh a, Gilead gam ah giahphual a sat uhi. Israelte zong a kikhawm uh a, Mizpa ah giahphual a sat uhi. 18 Tua banga thil a om takin, Gilead gama teengte leh a makaite uh a kikum uh a: Amonte dou dinga kua kipan masa ding ahia? A kipan masapen pen Gileada teengte khempeuh tunga lutangin pang hen, a kichi uhi.

Vaihawmte 11

Jeftha

1 Gilead mi Jeftha bel, galhat hangsan ahi a, a nu bel kizuak numei khat ahi. 2 Gilead zi in Gilead adingin tapate a nei a, amaute a pichin takun, Jeftha a hawlkhia uh a: Nang numei tuam khat tapa na hih manin, koute lak ah ka pa uh' gou na luah kei ding, a chi uhi. 3 Jeftha bel, a sanggamte apanin a tai a, Tob gam ah a teeng hi. Mi huhamte'n amah a zui uh a, mi lokin a kuan pahpah uhi. 4 Tua nung lamin, Amonte'n Israelte a dou uhi. 5 Tua banga Amonte'n Israelte a dou takun, Gilead upate Tob gam apana Jeftha pii dingin a kuan uh a: 6 Hong pai inla, Amonte dou dingin, ka makaiun hong pang in, a chi uhi. 7 Jeftha in Gilead upate kiang ah: Kei na muhdahpa uh ka hi keia hia? Ka pa' inn apan non hawlkhia uh a, banghanga na buai tak ua ka kianga hong hawh na hi ua? a chi hi. 8 Gilead upate'n amah kiang ah: A na hita zongin, tu-a nang kianga hong pai kik hi ung. Hong pai inla, Amonte hong doupih in. Gileadte' lutang hi dinga hon deih hi ung, a chi uhi. 9 Jeftha in Gilead upate kiang ah: Amonte dou dingin hon piikik le uchin la, Tangtawn Toupa'n ka khut sung ah amaute hon peta leh, noute' lutangin ka pang taktak dia hia? a chi hi. 10 Gilead upate'n Jeftha kiang ah: Na thu banga ka gamtat kei ua leh, Tangtawn Toupa eite kala theihpihpa hi hen, a chi uhi. 11 Tua banga a chih takun, Jeftha in Gilead upate a zui a, amaute'n amaute' lutang hi ding leh, amaute' tunga sepaih makai lianpen hi dingin a bawl uhi. Ama'n Mizpa ah Tangtawn Toupa' mai ah tua a thugente mah a gen hi. 12 Tua khitin, Jeftha in Amon kumpipa kiang ah mi a sawl a: Ka tunga bang lungkimlouhna nei a, ka gam sunga kei dou dinga hong kuan na hia? a chisak hi. 13 Amon kumpipa'n Jeftha' misawlte a dawng a: Aigupta gam apan Israel hong paitouh lai a, ka gam Amon apan Jabok leh Jordan lui dong hon suh, tu'n gal bawl se louin hon pekik hen, a na chi hi. 14 Jeftha in Amon kumpipa kiang ah mi a sawl kik a, 15 Jeftha in hiai a gen a: Israel in Moab gam a sut kei. Amonte' gam zong a sut kei. 16 Ahihhangin, Aigupta gam apan hong paitouh laiin, gamdai-gamkeu tawnin Tuipi San ah a pai a, Kadesh gam a tung hi. 17 Tua khitin, Israel in Edom kumpipa kiang ah mi a sawl a: Na gam sung tawnin hon paisak in, a chisak hi. Ahihhangin, Edom kumpipa'n a za nuam kei hi. Tua khitin, Moab kumpipa kiang ah a sawl a, ahihhangin, ama'n zong a gama pai ding a phal kei a, Israel Kadesh ah a taam hi. 18 Tua khitin, Israel Edom gam leh Moab gam pelin, gamdai-gamkeu tawnin a pai uh a, Amon gal khat lam ah giahphual a sat uhi. Ahihhangin, Moab gam sung a lut kei uh. Amon kuam zaw Moab gamgi ahi lei hi. 19 Tua khitin, Israel in Heshbon khawpi-a vaihawmpa Sihon kiang ah mi a sawl a: Na gam ua pai dingin na gam sung ka tot uh hon phalsak ve, a chisak hi. 20 Ahihhangin, Sihon in Israel a muang kei a, a sepaihte khawmin Jahaz ah giahphual a sat a, Israel a douta hi. 21 Tangtawn Toupa, Israel Pathian in Sihon leh a sepaihhonte Israel' khut sung ah a pia a, amaute a zou uhi. Israel in Amorte' tenna gam khempeuh a luah hi. 22 Amaute'n Amorte' tenna gam teng a luah uh a, tua bel Amon kuam apan Jabok lui kuam dong leh, gamdai-gamkeu apan Jordan lui dong ahi. 23 Tangtawn Toupa, Israel Pathian in, a mi Israelte' mai ah Amorte a hawlkhia hi. Banghanga nang tua-a gam luah thei ding na hia? 24 Na pathian Khemosh in hon piak teng na luah lei kei ding hia? Tua mah bangin, koute'n zong Tangtawn Toupa, ka Pathian un koute' maia gam a lak teng ka luah kei ding ua hia? 25 Moab kumpipa Zipor' tapa Balak sangin na hoih zaw tuama hia? Ama'n Israel kinakpihin a dou ngei ahia? 26 Heshbon khawpi leh a khawtate, Aroer khawpi leh a khawtate leh Amon kuam kima khuate, kum 300 sung Israel in a tan sunga banghanga tua hun sung teng tuate lakik lou na hia leh? 27 Na tung ah ka khial kei. Nang bel koute hon douin ka tung uah na khial hi. Tangtawn Toupa, Thukhenpa'n tuni-in Israel suante leh Amonte kal ah thu khen hen, a chi, a chisak hi. 28 Ahihhangin, Amonte kumpipa'n Jeftha' thukhah thu a ngaihsak kei hi.

Jeftha' Kichiamna leh Vualzawhna

29 Tua khitin, Tangtawn Toupa' Kha Jeftha tung ah hong tung a, ama'n Gilead gam leh Manase gam a kaan a, Gilead gam Mizpa a kheng a, tua apanin Amonte dou dingin a kuan hi. 30 Jeftha in Tangtawn Toupa' mai ah kichiamna khat a bawl a: Ka khut sunga Amon non piak leh, 31 hibang ahi ding a, Amonte apan galmuanga kong kilehkik chiangin, ka inn apan kei hon na muak masapen pen Tangtawn Toupa-a ahi ding a, haltum thillatin ka lan ding, a chi hi. 32 Tua khitin, Jeftha, Amonte dou dingin a kuan a, Tangtawn Toupa'n a khut sung ah amaute a pe taktak hi. 33 Aroer apan Minith lutna dong leh, Abel Keramim kala khawpi 20 a zou vek a, mi tampi a that hi. Tua bangin, Israel suante'n Amonte a nuaisiah uhi.

Jeftha' Tanu

34 Mizpa-a a inna Jeftha hong kilehkik takin, ngai dih, a inn apan amah na muak masapen a tanu ahi a, khuangta tawh lamin hong paikhia hi! A ta neihsun a hi behlap a, tanu dang leh tapa zong a nei kei hi. 35 Ama'n a tanu a muh takin, a puansilh a botkek a: Maizen aw, ka tanu! Hon lainiam namai chia! Hon lunggimsakte laka khat lah nong hi mawk a! Ka phei theih louh, Tangtawn' Toupa' maia thu na genkhin ka hi vele! a chi hi. 36 A tanu in a dawng a: Pa aw, Tangtawn Toupa' maia thu genkhinta na hih chiangin, Tangtawn Toupa'n lah na meima Amonte tunga phuba hon laksakta a, Tangtawn Toupa' maia na kama na gensa, na thuchiam bangbangin, ka tung ah hih in, a chi hi. 37 Tua khitin, ama'n a pa kiang ah: Hiai ka nget khat bel hon hihsak in: Ka lawmte tawh, mual tung khawnga a suk a toua pai a, ka nungak siangthouna ka kah nading kha nih sung hun hon pia in, pasal nei ngeilou ding lah ka hi ngai a, a chi hi. 38 Ama'n: Tua bangin na pai thei ding, a chi a, kha nih sung a sawlkhia hi. A tanu bel, a lawmte tawh mual tung khawng ah a suk a touin a vak a, a nungak siangthouna a kah hi. 39 Kha nih a bei takin, a pa kiang ah hong kik a, a pa'n a thuchiam bangin a tung ah a hih hi. A tanu bel nungak siangthou a hiden a, pasal tawh a lumkhawm ngei kei hi. 40 Israel tanute'n Gilead mi Jeftha' tanu suunna kumsimin ni li sung a nei zel uh a, Israelte lak ah ngeinain a omta hi.

Vaihawmte 12

Jeftha leh Efraim Nam

1 Tua nungin, Efraimte a kikaikhawm uh a, Zefon ah a galkah uh a, Jeftha kiang ah: Banghanga Amonte dou dinga galkah a, koute hon sam lou na hia? Na lutunga na inn haltum ding ka hi uh aw, a chi uhi. 2 Jeftha in amaute a dawng a: Kei leh ka mite, Amonte tawh kikhinga nakpitaka ka pan laiun, noute kon sam tawk a, Amonte' khut apan nong hukhe nuam kei ua ahi zaw. 3 Nong hukhe nuam kei uh, chih ka theih takin, sih leh sih, chi-in Amonte dou dingin ka galkah a, Tangtawn Toupa'n amaute ka khut sung ah hon pia hi. Tuni-a kei dou dinga nong kuan zawsop uh banghang ahia? a chi hi. 4 Jeftha in Gilead gama mite khempeuh a kaikhawm a, Efraimte a dou uhi. Efraimte'n: Nou Gileadte, Efraim leh Manase laka galtai vakvaite leltak, a chih manun, Gileadte'n Efraimte a zougawp uhi. 5 Gileadte'n Efraim gam zotna Jordan lui kanna a la uh a, tua ah a pang uhi. Efraim galtai vakvai khatpeuh in: Lui hon kansak ve ua, a chih chiangin, Gileadte'n: 6 Efraim mi na hi hia? a chi uh a, ama'n: Hilou, a chi hi. Tua bang hun chiangin, Gileadte'n: Shiboleth, hon chi mah dih, a chi uhi. Ama'n diktakin a chi thei kei a: Siboleth, a chi zel hi. Gileadte'n tua bang mi a man uh a, lui kanna mun ah a that zel uhi. Tua hunin, Efraimte 42,000 a si uhi. 7 Jeftha in kum guk sung Israelte a makaih a, tua khitin a si a, Gilead khawpite khat ah a kivui hi.

Ibzan, Elon leh Abdon

8 Jeftha nungin, Bethlehem mi Ibzan in Isrelte a makaih hi. 9 Ama'n tapa 30 a nei a, tanu 30 tak beh dang lak ah a kha a, a tapate ading mou 30 mah beh dang lak apan a pii hi. Ama'n kum sagih sung Israelte a makaih a, 10 tua nungin a si a, Bethlehem ah a kivui hi. 11 Ibzan nungin, Zebulun mi Elon in kum sawm sung Israelte a makaih a, 12 a sih takin, Zebulun gama Aijalon ah a kivui hi. 13 Elon nungin, Pirathon khaw mi, Hilel' tapa Abdon in Israelte a makaih hi. 14 Ama'n tapa 40 leh tupa 30 a nei a, amaute sabiltung 70 tung ah a tuang uhi. Abdon in kum giat sung Israelte a makaih hi. 15 Tua nungin, tua Pirathon mi Hilel' tapa Abdon a si a, Amalek tanggam ah, Efraimte gama Pirathon khua ah a kivui hi.

Vaihawmte 13

Samson Pianna

1 Israelte'n Tangtawn Toupa' mitmuhin thil gilou a hih kik zel uh a, Tangtawn Toupa'n amaute Filistiate khut sung ah kum 40 sung a pia hi. 2 Zora khua-a teng Dan nama mi khat a om a, a min Manoa ahi. A zi bel a chiing ahi a, ta a nei kei hi. 3 Manoa' zi kiang ah Tangtawn Toupa' vansawltak a kilaak a: Ngai in, nang a chiing ta nei ngeilou na hi, ahihhangin, tu'n na gai ding a, tapa na nei ding. 4 Grepzu himhim, ahih keileh, silngou sawha kibawl dawn thil himhim dawn lou ding leh, a sianglou himhim ne lou dingin kiveng in. 5 Ahang bel, ngai in, gai dek na hi a, tapa nei dek na hi. Na tapa sam met louh ding, sula a omlai apan Pathian adia sehtuam Nazir mi hi ding ahi. Ama'n Filistiate khut sung apan Israelte hutkhiak a pan ding, a chi hi. 6 Tua numei hong pai a, a pasal a hilh a: Pathian' mi khat ka kiang ah hong hawh a, amah Pathian' vansawltak melpu khat ahi a, a zahtakhuai mahmah hi. Koi apana hong pai hiam, chih ka dong kei a, a min zong hon hilh kei hi. 7 Ama'n ka kiang ah: Ngai in, gai dek na hi a, tapa nei dek na hi. Amah sula a omlai apan, a sih dong Pathian adia sehtuam Nazir mi hi ding ahih manin, grepzu himhim, silngou sawh dawn thil himhim na dawn louh ding, a sianglou himhim na nek louh ding, hon chi ahi, a chi hi. 8 Tua khitin, Manoa Tangtawn Toupa kiang ah a thum a: Ka Toupa aw, ka hon ngen ngutngut ahi. Non sawl Pathian' mi hehpihtakin hon sawl kik thak in, ama'n hong piang ding naungek ka khoilet ding dan uh hon sinsak hen, a chi hi. 9 Pathian in Manoa' thumna a ngaikhia a, tua numei loua a tut laiin, Pathian' vansawltak a kiang ah hong hawh kik hi. Ahihhangin, a pasal Manoa bel amah kiang ah a om kei a, 10 kintakin, a pasal hilh dingin a vatai pah a, a kiang ah: Ngai dih, zan hala ka kianga hong kilaakpa ka kiang ah hong kilaak nawn! a vachi hi. 11 Manoa a dingkhia a, a zi a zui a, tua hong kilaakpa kiang ah: Numei kianga thugenpa na hi hia? a chi a, ama'n: Ka hi, a chi hi. 12 Manoa in: Ahih leh, na thugente hong tangtun chiangin, naupang pen bang dan in a nuntakna uk ding ahia? a chi hi. 13 Tangtawn Toupa' vansawltak in Manoa kiang ah: Na zi, amah ka hilhsa teng zui dinga a kiven ding ahi. 14 Grepzu apan bangmah a nek louh ding, grepzu leh silngou sawh dawn thil himhim a dawn louh ding, a sianglou bangmah a nek louh ding, ka thupiak bangbang a zuih ding ahi, a chi hi. 15 Manoa in Tangtawn Toupa' vansawltak kiang ah: Kelnou khat kon gawh nuam a, hehpihtakin hon phal inla, kon khoutang uh aw, a chi hi. 16 Tangtawn Toupa' vansawltak in a dawng a: Hon khou mah le uchin na an ka ne kei ding. Ahihhangin, haltum thllat dinga na bawl nop lebel, Tangtawn Toupa' mai ah bawl lechin, a chi hi. Manoa in bel, amah Tangtawn Toupa' vansawltak ahih lam a thei kei hi. 17 Tua khitin, Manoa in tua Tangtawn Toupa' vansawltak kiang ah: Na thugente hong tangtun chianga kon pahtawi theih nadingin, na min banga le? a chi hi. 18 Tangtawn Toupa' vansawltak in: Banghanga ka min hon dong na hia? Theih theih louh lamdang ahi, a chi hi. 19 Tua khitin, Manoa in kelnou khat a la a, tua tawh an thillat a bawl a, suangpi tung ah Tangtawn Toupa' mai ah a laan hi. Manoa leh a zi in a et laiun, Tangtawn Toupa'n thillamdang khat a hih a, 20 maitama meikuang vanlam ah a lengtou a, tua meikuang lak ah Tangtawn Toupa' vansawltak, vanlam ah a kaltou hi. Hiai a muh takun, Manoa leh a zi lei si-in a kuun uhi. 21 Tua Tangtawn Toupa' vansawltak, Manoa kiang ah hita leh, a zi kiang ah hita leh, a kilaak nawn kei a, Manoa in tua laitak mahin, amah Tangtawn Toupa' vansawltak ahi, chih a thei hi. 22 Tua khitin, Manoa in a zi kiang ah: Pathian mu i hi mawk a, i si mahmah ding! a chi hi. 23 Ahihhangin, a zi in a dawng a: Tangtawn Toupa'n hon thah tum hi leh, i haltum thillat leh an thillatte i khut apan a sang kei ding, ahih kei leh, hiai thilte hon lak kei ding, ahih kei leh, hibang hunin, hibang thilte hon hilh kei ding, a chi hi. 24 Tua numei in ta pasal a nei a, a min dingin Samson a sa hi. Tua pasal naupang hong khanglian a, Tangtawn Toupa'n a vualzawl hi. 25 Tangtawn Toupa' Kha in Zora leh Eshtaol kala, Mahane Dana a om laiin, amah a tokthou panta hi.

Vaihawmte 14

Samson' Zineihna

1 Samson bel Timna khua ah a hawhsuk a, tua ah Filistia nungak khat a mu hi. 2 Inn lama hong kilehkik takin, a nu leh a pa kiang ah: Timna khua ah Filistia nungak ka mu a, ka zi dingin hon piisak un, chi-in a ngen hi. 3 A nu leh a pa'n: Na tanaute' tanu hiam, ahih kei leh, ka mi ka sate' tanute laka neih theih om lou ahi maw, Filistia zeksumlouhte laka zi zonga na kuan? a chi uhi. Ahihhangin, Samson in a pa kiang ah: Tua nu mah hon piisak mai un, amah ka deih dan tak ahi, a chi teitei hi. 4 Tangtawn Toupa'n Filistiate tunga phulak nading lem zonga hibang thil om ahih lam a nu leh a pa'n bel a thei kei uhi. A hang bel, tua laia Filistiate nuaia Israelte om uh hiven. 5 Samson leh a nu-le-pa Timna khua ah a hawhsuk uh a, grephuan lak a tun takun, humpinelkai lunlai khat in humhamin amah a naih hi. 6 Samson' tungah Tangtawn Toupa' Kha vangliantakin a hong tung a, ama'n a khutvuakin tua humpinelkai, kelnou balzantakin a balzan hi. Ahihhangin, Samson in a thilhih pen a nu leh a pa a hilh kei hi. 7 Tua khitin, a paisuk a, tua numei a houhpih a, a mit a tung mahmah hi. 8 Hun bangtan hiam nungin, tua nu innlama pii dingin Samson hong kuan kik a, lampi ah tua humpinelkai saluang en dingin a vapial a, tua saluang sung ah khuai a nakai a, a zu zong a om hi. 9 Ama'n tua khuaizu bangzah hiam khutin a khuatkhia a, a pai kawmin a ne hi. A nu leh a pa kiang a tun takin, khuaizu a pia a, amaute'n zong a ne uhi. Ahihhangin, ama'n humpinelkai saluang apan a lak a hih lam amaute a hilh kei hi. 10 Samson' pa tua nungak en dingin a vahawh a, tua hun laia mou pii dingte ngeina bangin, Samson in tua ah ankuang a lui hi. 11 Samson a muh takun, amaute'n a lawm ding 30 a teel uhi. 12 Ama'n a lawmte kiang ah: Tu'n noute thuhaksa khat kon dong aw. Ankuanglui ni sagih sunga na suut theih uleh, puanmalngat silh 30 leh puanak kop 30 kon pe ding. 13 Ahihhangin, tua thuhaksa na sut theih kei uleh bel, puanmalngat silh 30 leh puanak kop 30 kei non pe ding uh, a chi hi. Amaute'n: Na thuhaksa hon gen daw le, ka za nuam uh, a chi uhi. 14 Ama'n: A ne thei apan nek ding om a, a thahat apan a khum om, a chi hi. Ahihhangin, amaute'n ni thum sungin tua thuhaksa a suut thei kei uhi. 15 A ni lini-in, amaute'n Samson' zi kiang ah: Na pasal in a thuhaksa suutna hon hilh nadingin, amah na zawl in. Tua banga na hih kei leh, nang leh na pa' inn meia hal ding ka hi uh. Koute non lok nop man ua hon chial na hi ua hia? a chi uhi. 16 Samson' zi a liangkou-a luaiin a kap a: Kei hon mudah na hi! Hon it taktak lou na hi. Na thuhaksa ka mite kiang ah na gen a, a suutna kei non hilh nuam kei, a chi hi. Ama'n a dawng a: Ka nu ka pa zong ka hilh louhpi, banghanga nang hon hilh ding ka hia? a chi hi. 17 A zi in bel ankuanglui ni sagih sung teng kapin a dong a, a phuutphuut manin, a ni sagih ni-in a hilh khong hi. A zi in a mite kiang ah a hilhsawn hi. 18 Ni sagih ni, ni tum main, tua khawmite hong pai uh a: Khuaizu sanga khumzaw bang ahia? Humpinelkai sanga thahat zaw bang ahia? a chi uhi. Samson in amaute kiang ah: Ka bawngla-a leilet hi kei le uchin, ka thuhaksa na suut theih louh hiai ding uh, a chi hi. 19 Tua khitin, Samson' tung ah vangliantakin Tangtawn Toupa' Kha a hong tung a, amah Ashkelon ah a hawhsuk a, tua khaw mi 30 a that a, a puansilhte uh kop 30 a la a, a thuhaksa suutte kiang ah a pia hi. Tua khitin, heh mahmah-in a pa' inn ah a paita hi. 20 Samson' zi bel a pa'n, a kitenna ua theihpih-a pang Samson' lawmpa kiang ah zi dingin a pia hi.

Vaihawmte 15

Filistiate tunga Samson' Phulakna

1 Tua nung lamin, huit buh lak laiin, Samson a zi veh dingin a kuan a, kelnou khat a pua hi. Ka zi' indan sung ah ka lut nuam, a chih leh, a zi pa'n a lutsak nuam kei hi. 2 A zi pa'n: Amah mudah mahmah kon sa a, na lawmpa' zi dinga na pia ka hi ve. A naunu ama' sanga melhoih zaw hilou maw. Amah nei zaw mai in, a chi hi. 3 Samson in amaute kiang ah: Tutung in zaw, Filistiate thuk leng zong kei' mawhna hita ken teh, a chi hi. 4 Tua bangin, a kuan a, sihal 300 a man a, a mei uh nihnihin a pehkhawm a, meisel khat tek a henkhawm hi. 5 Tua meiselte a halkuang a, Filistiate' buh lak ah tua sehalte a khah a, buhpawlte leh buh dinglaite grephuan leh oliv kungte dongin a kang vek hi. 6 Filistiate'n: Hiai kua hih ahia? chi-in a kidong uh a, Timna mipa' makpapa Samson hih a ka, tua Timna mipa'n Samson zi a lawmpa zi dinga a piak man a ka, a kichi uhi. Tua bang ahih manin, Filistiate a kuantou uh a, Samson' zi leh a zi' pa a haltum uhi. 7 Samson in amaute kiang ah: Ka tunga tua bang hih nuam na hih chiangun, ke'n zong na tung ua phuba ka lak mateng ka tawp kei ding, a chi hi. 8 Tua bangin, amaute dawm het louin a suai a, tampi a that a, tua khitin, a paisuk a, Etam suangpi heng ah a om hi. 9 Filistiate a kuantou uh a, Judah gam ah giahpual a sat uh a, Lehi dou dingin gam teng ah a kiphalh uhi. 10 Judah gam mite'n: Banghanga koute dou dinga hong kuan na hi ua? a chi uhi. Amaute'n a dawng uh a: Samson man dinga hong kuan ka hi uh. Ka tung ua a hih bangbang ama' tunga hih ding ka hi uh, a chi uhi. 11 Tua khitin, Judah gam apan mi 3,000, Etama suangpi heng ah a kuansuk uh a, Samson kiang ah: Filistiate'n i tunga hon uk uh a hih lam na thei kei ahia, koute bang hon lawh na hia? a chi uhi. Ama'n a dawng a: Ka tunga a hih bangbang ua, amaute tunga hih ka hi lei ve, a chi hi. 12 Amaute'n: Nang hon hentom a, Filistiate khuta hon pekhe dinga hong kuan ka hi uh, a chi uhi. Samson in: Noumau' khuta hon that zen lou ding na hina uh, chih kichiam phot un, a chi hi. 13 Amaute'n: That lou e. Kon hentom lei ding uh a, amaute khut ah kon pekhe lei ding uh, koute'n zaw kon that het kei ding uh, a chi uhi. Tua bangin khauzen thak nihin amah a hentom uh a, tua suangpi heng apan a kaikhia uhi. 14 Amah Lehi gam hong tun takin, Filistiate'n nakpitaka awngin a na tuak uhi. Tua laitakin, Samson' tung ah vangliantakin Tangtawn Toupa' Kha a hong tung a, a khuta henna khauzente a phutat a, ziza khau kangtat bangin a khutte apan a tolkhia hi. 15 Sabiltung khaguh thak khat a mu a, a la zok a, mi 1,000 a satlum hi. 16 Tua khitin, Samson in: Sabiltung khaguhin a vum tunga vumin chiang venvon ing, Sabiltung khaguhin mi 1,000 satlum ing! a chi hi. 17 Tua banga a genkhitin, sabiltung khaguh a pai a, tua mun min dingin Ramath Lehi a phuak hi. 18 Samson a dangtak mahmah a, Tangtawn Toupa a sam a: Nangmah mah in ka khut tungtawnin hutkhiakna thupi non peta. Ahihhangin, dangtaka si ding ka hita a, zeksum louhte' khut sung tung ding ka hi maw? a chi hi. 19 Pathian in tua Lehi gam ah leikuak a khisak a, tui a hong pawt hi. Ama'n tua tui a dawn a, hong halh a, a tha a tungkikta hi. Ama'n tua mun min dingin En Hakore a phuak a, tuni dongin Lehi gam ah tua mun a om lai hi. 20 Samson in Filistiate' khan laiin, kum 20 sung Israelte a makaih hi.

Vaihawmte 16

Samson leh Delalla

1 Ni khat, Samson Gaza khawpi-a a vahawhsuk leh, numei kizuak khat a vamu a, a valuppih hi. 2 Kua hiam khat in, Samson hiai ah a om! chi-in Gazate a hilh hi. Gazate'n tua mun a um uh a, zan khawvakin khawpi kongpi a ching uhi. Zingsang dong i ngak ding a, phalvakin amah i that ding, a kichi uhi. 3 Samson bel zankim dong tua ah a lum a, zankim laiin a thou a, khawpi kongpi kongkhak, a khuam tawh, a kaihna zawl tawh a phawikhia a, a liangkoua puain Hebron khawpi gala mual tung a tuntou hi. 4 Tua nung lamin, Samson in Delaila kichi Sorek Phaizanga numei khat a it hi. 5 Filistia vaihawmte tua nu kiang ah a vahawh uh a: Samson na zawl inla, a thahatna vangletna thuguk na zongkhia inla, amah man zou a, hentoma ka zahlaksak theih nading uh na zong in, ngun dangka shekel 1,100 hon pena n'ung, a chi uhi. 6 Tua khitin, Delaila in Samson kiang ah: Na thahatna vangletna thusim hon hilh in. Mi'n bang chi'n hon hentomin hon zahlaksak thei dia? a chi hi. 7 Samson in: Savun khau thak nom lai sagihin hon hen le uh, mi dang bangin hatnabei ka hi ding, a chi hi. 8 Tua bangin, Filistia makaite'n Delaila kiang ah savun khau thak nomlai sagih a pia uh a, tuatein Samson a hen hi. 9 Amah kiang ah inndan sung ah, pasalte a buksak uhi. Delaila in Samson kiang ah: Samson, Filistiate'n hon man dek uh eih! a chih leh, Samson in khauzang kangtat bang maiin tua savun khau thakte a phutat a, a thahatna vangletna thuguk a theikhe kei uhi. 10 Delaila in Samson kiang ah: Ngai dih, non mawkbawl a, non zekhem a, ka kiang ah zuau na gen. Bangchi-a hentoma om thei ding na hia, hon hilh in, a chi hi. 11 Ama'n: Khauzen thak zat nailouh ngenin hon hen le uh, mi dang bangin thahatnabei ka hi mai ding, a chi hi. 12 Tua bangin, Delaila in khauzen thak ngenin Samson a hen a, inndan sung ah pasalte a buksak a: Samson, Filistiate'n hon man dek uh eih! a chi hi. Ahihhangin, ama'n khauzang bang maiin a baan apan henna khauzente a phutat hi. 13 Delaila in Samson kiang ah: Tu dongin non mawkbawl a, non zekhem a, ka kiang ah zuau na gen. Bangchi-a hentoma om thei ding na hia, hon hilh in, a chi hi. Ama'n a dawng a: Ka samphek sagihte siambu-a khihna khau tawh hekkhawm uhenla, siambu khetphim in kilhchip le uh, a chi hi. 14 Delaila in tua bangin, siambu-a khau tawh Samson' sam hekkhawmin, siambu khetphim in a kilhchip hi. Tua khitin: Samson, Flistiate'n hon man dek uh eih! a chi hi. Samson ihmu hong khanglou a, siambu khetphim tawh, siambu khau tawh a phawikhekhawm vek hi. 15 Tua khitin, Delaila in Samson kiang ah: Na lungtang in lah hon muang loupi bangchi dana: Kon it, chichi thei na hia? Thumvei mahmah non mawkbawl a, na thahatna vangletna thuguk non hilh kei, a chi hi. 16 Si ding hiaia a chimtakluat masiah, nisimin tua bangin a phuphu mai hi. 17 Tua khitin, Samson in a lungsima om teng a hilh vek a: Ka pian chil apan Pathian adinga sehtuam Nazir mi ka hi a, ka sam met ngeilouh ahi. Ka sam kimet leh, ka thahatna bei ding a, midang banga hatnabei hi mai ding ka hi, a chi hi. 18 Samson in bangkim a hilhta, chih Delaila in a theih takin, Filistia vaihawmte a samsak a, amaute kiang ah: Samson in a lungsima om teng hon hilh vekta. Khatvei hong pai lai un, a chi a, Filistia vaihawmte sum tawiin hong kuan uhi. 19 Delaila in a khuk tung ah Samson a ihmusak a, mi khat samin, Samson luzanga samphek sagihte a metkhiaksak hi. Tua bangin, Delaila in Samson a nuaisiahin a gimsak panta a, Samson lah a thahatna in a nuseta hi. 20 Tua khitin, Delaila in: Samson, Filistiate'n hon man dek uh eih! a chi hi. Samson ihmu hong khanglou a: Nidanga bangin ka taikhe dia, ka kitungkhe nawn mai ding, chi-in a kingaihtuah hi. Tangtawn Toupa'n amah a nusekhinta, chih himhim a phawk kei hi. 21 Tua bangin, Filistiate'n Samson a man uh a, a mittangte a khelkhia uh a, Gaza khawpi ah a kai uh a, sumsan sikkol a bunsak uh a, suangkul sunga buh hekin a pangta mai hi. 22 Ahihhan gin, a sam a metsak uh hong saukikta hi.

Samson Sihna

23 Filistia vaihawmte, a pathian uh Dagon' maia kithoihna thupitak laan ding leh nopbawl dingin a kikaikhawm uh a: I Pathian in eite khut sung ah i melmapa Samson hon peta hiven, a kichi uhi. 24 Mipite'n Samson a muh takun, a pathian uh a phat uh a: I Pathian in i melmapa i khut sung ah hon peta, i gam hihsepa i galhat site pungsakpa, a chi uhi. 25 Tua banga amaute lunglawpa a om laiun: Mipite' etnop dingin, Samson hon kaikhia un, a chi uhi. Tua bangin, suangkul apan Samson a kaikhia uh a, amaute' mai ah etnop bawlna'n a pang hi. Amaute'n khuampite kal ah amah a dingsak uhi. 26 Samson in ama' khut len tangvalpa kiang ah: Hiai biakinn dou khuampite-a kingai dingin, khuampite ka khoih phak nading mun ah hon pii in, a chi hi. 27 Tua inn ah numei leh pasal leh Filistia vaihawmte a dim uh a, inn tung ah numei leh pasal 3,000 a om uh a, Samson etnop bawla om a en uhi. 28 Tua laitakin, Tangtawn Toupa kiang ah Samson a thuum a: Toupa Tangtawn Pathian aw, kei hon theigige in. Tutung kia ka thahatna hon pekik inla, ka mitte' phuba lak ding khatvei hon phal teitei in, a chi hi. 29 Tua khitin, Samson tua inn dou khuampi laitate kal ah a ding a, a taklam leh veilama tua khuampite a kawi a: 30 Filistiate hon sihchilhsak in, a chi a, a thahatna khempeuhin tua khuampite a sawn a, vaihawmte leh tua mipi omte khempeuh tung ah inn a chimsuk hi. A dam sunga a thah sangin, a sihna-a a thah a tamzaw hi. 31 Tua khitin, a sanggamte leh a pa' innkawte khempeuh hong kuansuk uh a, a luang hong la uhi. Amah a pua uh a, Zora leh Eshtaol kala a pa Manoa' hankhuk ah a vui uhi. Ama'n kum 20 sung Israelte a makaih hi.

Vaihawmte 17

Mika' Milimpathiante

1 Tua hun laiin, Efraim tanggam ah Mika kichi mi khat a om hi. 2 Ama'n a nu kiang ah: Na ngunsik tang shekel 1,100 kilamang a, tua sum tunga hamsia na koih thu ka bilin a za a, ngai dih, tua ngunsik tangte ka khuta om ahi, kei laak ahi, a chi hi. A nu'n: Ka tapa, Tangtawn Toupa'n hon vualzawl hen, a chi hi. 3 Ama'n tua ngunsik tang shekel 1,100 a nu khut ah a pekik a, a nu'n: Ka tapa in milim khuak thawh leh sun thawh a bawl nadinga, Tangtawn Toupa kianga ka ngunsik ka latsa ahi. Tua ngunsik tangte kon pekik ding, a chi hi. 4 Mika in tua ngunsik tangte a nu kiang ah a pekik a, a nu'n ngunsik tang shekel 200 a la a, ngun siksek khat kiang ah a pia a, tua siksekpa'n milim khuak thawh leh sun thawhte a bawl a, tuate Mika' inn sung ah a om hi. 5 Hiai Mika in milim pathian biakinnneu khat a nei a, siampi puanakzem leh innsung milim pathiante a bawl a, a tapate khat a siampi dingin a bawl hi. 6 Tua hun laiin, Israel in kumpi a nei kei a, michih ama' hoihsak bangin a gamta tek uhi. 7 Judah gama Bethlehem khawpi apan Levi tangval khat a om a, amah Judah innkawte laka teeng ahi. 8 Amah teen nading mun dang zong dingin, Judah gama Bethlehem nusiain a pemkhia a, a pemna lam ah Efraim tanggama Mika' inn hong tung hi. 9 Mika in amah kiang ah: Koia hong kipan na hia? a chi hi. Ama'n: Judah gama Bethlehema teeng Levi mi khat ka hi a, teen nading mun zong ka hi, a chi hi. 10 Mika in amah kiang ah: Ka kiang ah teeng inla, ka pa ding leh ka siampi dingin pang in, kum khat in ngun tang shekel sawmkhat tawh, puansilhte leh na taksap teng hon pia ning, a chi hi. 11 Tua Levi mi in ama' kianga teen ding a lungkim a, Mika tate khat bangin a om hi. 12 Mika in tua Levi tangval siampi-in a bawl a, a inn ah a teeng hi. 13 Mika in: Hiai Levi mi ka siampi-a pang a hih chiangin, Tangtawn Toupa'n ka tung ah thilhoih a hih ngei ding, chih tu'n ka thei, a chi hi.

Vaihawmte 18

Laish-a Dante Teeng

1 Tua hun laiin, Israelte'n kumpi a nei kei uhi. Dante'n zong tua hun dong, Israel namte lak ah goutan a nei nai kei uh a, amaute'n teen nading mun a zong uhi. 2 Tua bangin, Dante'n Zora leh Eshtaol apan galhat mi nga, gam enkhe dingin a sawl uhi. Hiaite Dan nama behte khempeuh taanga kuan ahi uh a, Dante'n amaute kiang ah: Kuan unla, gam vavel un, a chi uhi. Tua enkhete Efraim tanggam a lut uh a, Mika' inn ah hong kinga uh a, zan khat a giak uhi. 3 Mika' inn hong tun dek kuanun, tua Levi mi' aw a za uh a, a meltheih uhi. Tua inna valutin: Nang kua'n hiaia hon tun ahia? Hiaia bang hih na hia? Banghanga hiaia om na hia? a chi uhi. 4 Ama'n ama' tunga Mika' thilhih teng amaute a hilh a: Ama'n hon guai a, a siampi-a pang ka hi, aka a chi hi. 5 Tua khitin, amaute'n: Ka zinna uh ka lawhching nading uhia, ka thei nuam uh a, hehpihtakin, Pathian hon dotsak ve, a chi uhi. 6 Tua Levi siampi in a dawng a: Khamuangtakin pai un. Tangtawn Toupa'n na zin dekna uh pha hon sakpih hina, a chi hi. 7 Tua mi ngate Laish khawpi a tun mateng uh a pai uh a, tua khaw mite galmuangtakin a om uh, Sidonte bangin galmuang leh bitin a om hithiat uh, chih a mu uhi. Amaute nuaisiah a, amaute tunga vaihawm ding a om kei a, Sidonte tawh lah a kigamla uh a, kuamah dang tawh zong a kikawm kei uhi. 8 Amaute Zora leh Eshtaol-a a sanggamte uh kiang a tunkik takun, a sanggamte un: Bang na vamu ua? a chi uhi. 9 Amaute'n: Kisa ni-in amaute dou ni. A gam uh ka mu uh a, a hoih mahmah hi. Banghanga om maimai ding? Tua gama valuta valuah ding saik kei un. 10 Tua gam na tun chiangun, gallau lou hiaia muangtaka omte na vamu ding uh a, taksap omlouhna gam lianpi Pathian in na khut sung ua hon piak ahi, a chi uhi. 11 Zora leh Eshtaol apanin, Dan behte 600, kidou dinga kigalvansa, a kuankhia uhi. 12 Lampi ah Judah gama Kiriath Jearim ah giahphual a sat uhi. Hiai hang ahi tuni donga Kiriath Jearim tumlama mun khat Mahane Dan' a kichih. 13 Tua apanin Efraim tanggam ah a pai uh a, Mika' inn hong tung uhi. 14 Tua khitin, Laish gam vaenkhete'n a sanggamte uh kiang ah: Hiai mite khuta siampi puanakzem leh innsung milim pathiante, khuakthawh milimte leh sunthawh milim a om lam na thei uhia? Tu'n bang lawh ding hiam na thei uhi, a chi uhi. 15 Tua ah a kihei uh a, Levi mi omna Mika' inn ah a vapai uh a, amah chibai a buk uhi. 16 Kidou dinga kigalvansa Dan mi 600-te kongpi lutna ah a pang uhi. 17 Amaute tua siampi tawh kongpi-a kihoua a om kalun, tua gam enkhemi ngate inn sung ah a lut uh a, khuakthawh milim leh siampi puanakzem leh innsung milim pathiante leh sunthawh milim a la uhi. 18 Amaute'n Mika' inn sunga lut a, suihthawh milim pathian leh siampi puanakzem leh inn sung milim pathiante leh sunthawh milim pathian a lak takun, tua siampi in: Bang hih na mai ua! a chi hi. 19 Amaute'n amah kiang ah: Dai mai inla, kamsin in! Pau louin hon zui inla, koute' pa leh siampi-in hong pang in. Israelte laka nam khat leh beh khat adinga siampi-a pan, innkuan khat kia' siampi-a pan sanga hoihzaw hilou maw? a chi uhi. 20 Tua siampi a kipak a, siampi puanakzem leh innsung milim pathiante leh khuakthawh milim a la a, amaute a zui a, amaute laizang ah a pai hi. 21 Amaute a paikhia uh a, a taneute uh, a ganhonte uleh a neih a lamte uh a masasak uhi. 22 Amaute Mika' inn apan gamla kuam a tun takun, Mika' inn kianga teengte a kisamkhawm uh a, kigalvanin a delh uh a, Dante a delhpha uhi. 23 Dante a galsap uh a, Dante hong kiheiin a na maituah uh a, Mika kiang ah: Koute dou dinga na kigalvan bangchi na hia? a chi uhi. 24 Mika in: Ka pathian bawlsate leh ka siampi na la uh a, na paimangpih ve ua le. Ke'n bang dang ka neia ahia? Bangchi na hia? non chih himhim uh, a chi hi. 25 Dante'n a dawng uh a: Hon kiselpih se dah un, mi lungtom deuhte'n hon sualin nang leh na innkawte hon that kha unte, a chi uhi. 26 Dante a pai zel uh a, Mika in lah amaute ama' dou vual ahi kei uh, chih a thei a, a inn ah a kilehkikta hi. 27 Tua bangin, Dante'n Mika' bawlsa milimte leh a siampi a laksak uh a, Laish-a kigalging loua muangtaka omte namsauin a dou uh a, a khawpi uh a haltum uhi. 28 Laish bel Beth Rehob kiang phaizanga om, Sidonte apan gamlapi-a om ahih manin leh amaute humbit ding om lou, midang kuamah tawh zong kizopna nei lou ahih manun, Dante'n tua khawpi a lamthak uh a, a luahta uh a, 29 tua khawpi min dingin a pu uh tamin Dan a sa uhi. Tua khawpi min masa bel Laish ahi. 30 Tua ah Dante'n khuakthawh milim pathiante a kitunkhiak uh a, sala kaihmang ahih dong uh, Mosi' tapa Gershon' tapa Jonathan leh a tate, Dante adingin siampitein a pang uhi. 31 Shilo-a Pathian' inn a om sung teng Mika' bawlsa milim pathian a zang lailai uhi.

Vaihawmte 19

Levi Mi Khat leh a Mei

1 Tua hun laiin, Israeite'n kumpi a nei kei uhi. Efraim tanggam singtang kawm ah Levi mi khat a om a, Judah gama Bethlehem mi khat meiin a nei hi. 2 Tua a mei bel numei paktatpi khat ahi a, a pasal adingin a muanhuai kei a, a pasal nusiain kha li sung bang a nawlam ah, Bethlehem ah a om zel hi. 3 A pasal a kisa a, a nungdelh a, kamsiamtaka vapiikik dingin a kuan a, a silapa tawh sabiltung nih tawh a tonpih hi. A mei in a pa inn ah a na piilut a, tua numei pa'n tua a pasal a namuh takin, kipaktakin a nadawn hi. 4 Tua Levi' sungpa, tua numeinu' pa'n amah a na khou a, ni thum a taam a, nea dawnin tua ah a giak hi. 5 A ni li ni-in hichi ahi a, zingsang beltakin, amaute a thou uh a, malam sawn dingin a kisa hi. Tua numei' pa'n a makpapa kiang ah: Tanghou nein kihihhalh phot unla, tua khit chiangin pai un, a chi hi. 6 Amau gel zong nea dawnin a tu uhi. Tua khitin, tua numei pa'n: Tuzan taam lai mahmah unla, nuamtakin tawldam phot un, a chi hi. 7 Pai dinga a kisak leh a sungpa'n a khou a, tua zan a tam zel hi. 8 A ni ngani zingsang beltaka pai dingin a kisa a, tua numei pa'n: An ne zek beek unla, sunnung ngak un, a chi a, anihun an a ne uhi. 9 Tua khitin, a mei tawh a silapa tawh a kipankhe dek uh a, a sungpa'n: En dih ua, nitaklam a hita. Tuzan giak phot un. Khua mial hita, tuzan giak unla, tawldam phot un, zingsang beltakin pai na nute, a chi hi. 10 Ahihhangin, amah a taam nuam nawn kei a, kisain a kipankheta hi. Jebus gala phaizang a tung hi. Jebus bel Jerusalem ahi. A sabiltung nihte, tuanphah phahsain a om uh a, a meinu zong a kiang ah a om hi. 11 Jebus khua a tun dekun, ni a tum dektak hi. Silapa'n a pu kiang ah: Jebuste kiang ah khawlin tuzan giak mai ni, a chi hi. 12 Ahihhangin, a pu'n a dawng a: Israelte omlouhna, melmak khua-a giak dingin khawl kei ni. Gibea khua dong pai teitei ni, a chi hi. 13 Tua khitin, a silapa kiang ah: Gibea khua hiam Rama khua hiam delh ni, a koi zawsam hiam ah giak ni, a chi hi. 14 A pai nawn uh a, Benjamin gama Gibea khua a tung uh a, tua hunin ni a tumta hi. 15 Tua-a giak dingin Gibea khaw sung a lut uhi. A lut takun, khawlai sumsinna mun ah a tu uh a, kuama'n a inn-a giak dingin a samlut kei uhi. 16 Tua laitakin, putek khat loukuan, nitak lamin lou apan hong pai a, amah bel Efraim tanggam mi, Gibea khua-a teeng ahi. Tua khaw mite bel Benjamin nam ahi uhi. 17 Amah a khawdah leh, khawlai sumsinna muna tu khualzinpa a mu a: Koia pai dek na hi ua? Koia hong kipan na hi ua? a chi hi. 18 Tua Levi mi in: Judah gama Bethlehem khua apan Efraim tanggam gamlapi-a pai dekin hon tawn ka hi uh. Kei zaw Efraim tanggam mi ka hi. Judah gama Bethlehem khua-a hawh, tu-a Tangtawn Toupa' inn zuana pai ka hi. Ahihhangin, kuama'n hon zintun kei. 19 Buhpawl leh sabiltung ading gan-an ka nei a, tanghou leh grepzu zong kei ading, na silanu ading, na silapa tangval ading kiching ka nei. Bangmah taksap ka nei kei uh, a chi hi. 20 Tua putek in: Khamuangtakin om inla, ka inn ah hong kinga in. Na taksap teng kei tung ah nga inla, konglak ah zaw giak mahmah ken, a chi hi. 21 Tua bangin a inn ah a piiluut a, a sabiltung an a pia hi. Khe khawng a sil khitun, nein a dawn uhi. 22 Tua banga nuamsa-a a om laiun, khawpi mi namanlou pawlkhat in tua inn a vaum uh a, kongkhak vatumin, inn neipa putek kiang ah: Na inna hong lutpa ka ih dingun hon pekhia in, a chi uhi. 23 Inn neipa a vapusuak a, amaute kiang ah: Hilou e, sanggamte, hibanga gilouin gamta kei un. Hiai mipa ka zinpa, ka inna hong tung ahi a, tua bang thil zahlakhuai a tung ah hih kei un. 24 En un, ka tanu nungak siangthou a om a, ka zinpa' meinu zong a om. Amaute kon piak ding hon phal unla, amaute zahlaksakin na utut uh lawh un. Hiai mipa zaw zahlakhuai takin bawl kei uh, a chi hi. 25 Ahihhangin, tua mite'n a thugen a ngaihkhiak nop louh takun, mikhualpa'n a meinu a kaikhia a, tua mite kiang ah a pia hi. Amah zankhawvaka luppihin a pawngsual uh a, zing khawvakin a khah uhi. 26 Zing khua hong vak takin, tua nu, a pasal omna inn hong tung a, kongkhak ah a puk a, ni suah dong a lum hi. 27 Tua nu' pasal zingsangin a thou a, kong a hong a, pai dingin a pusuak dek hi. Tua ah a meinu, a khutte innsung lam nga-a kongkhak bula lum a mu hi. 28 Ama'n a meinu kiang ah: Thou in, paita ni! a chi hi. Ahihhangin, a meinu'n a dawng kei hi. Ama'n a sabiltung tung ah a meinu a koihtou a, inn lam zuanin a paipihta hi. 29 Inn a tun takin, temta a la a, a meinu a la a, seh sawmlenih suahin a phei a liangin a sem a, Israel gam teng ah a khak vek hi. 30 A mu peuhmah in: Aigupta gam apan Israel suante hong pemkhiak uapan tuni dong, hibang mahmah kimu ngei kei, hih zong kihih ngei kei! Ngaihtuah unla, kikum unla, gen un, bang lawh ding! a chi uhi.

Vaihawmte 20

Israelte'n Benjaminte Dou

1 Tua khitin, Israelte khempeuh Dan apan Beersheba dong leh Gilead apan Mizpa ah Tangtawn Toupa' mai ah mi khat bang maiin, tua sapkhawmte hong paikhawm uhi. 2 Makaite leh Israel namte khempeuh Pathian' mi kikhawmte lak ah hong pai uh a, hong kilaak uh a, khe sepaih namsau tawi 400,000 a pha hi. 3 Benjamin suante'n, Israel tate Mizpa ah a kikhawm uh, chih a naza uhi. Israelte'n: Gamtat gilou mulkimhuai bangchi banga hong om ahia, hon hilh un, a chi uhi. 4 Numei a thah uh' pasal, tua Levi mi in a dawng a: Ka meinu leh kei, Benjamin gam, Gibea khua ah zan giak dingin ka lut uhi. 5 Zanin Gibea mite kei dou dingin hong kuan uh a, kei hon thah sawmin inn hong um uh a, ka meinu pawngsualin a luppih uh a, a si hi. 6 Ke'n ka meinu ka la a, ka semzak a, tuate Israel luah gam khempeuh ah ka khak hi. Ahang bel, Israel gam sunga hibang thil kilawm lou leh zahlakhuai a hih man uh ahi. 7 Nou Israelte'n tu'n na thukhenna uh gen un, a chi hi. 8 Israel suan mipite mi khat bang maiin, a kisa uh a: Eite kuamah inna kik lou ding, khat lei zong a inna chiah kik lou ding. 9 Gibea tunga i hih ding hiai ahi: Ai i san ding a, aisan bangbangin tua khua i sim ding. 10 Israel nam chih lak apan 100 laka sawmkhat, 1,000 laka 100 zel, 10,000 laka 1,000 zel, sepaihhonte nek ding i kaikhawmsak ding. Sepaihhonte Benjamin gama Ginbea hong tun chiangun, Israel gam sunga gitlouhna a hih bangbang uh amaute tung ah i hih ding uh, a chi uhi. 11 Tua bangin, Israelte khempeuh, mi khat banga pheikhai kilualtakin Gibea sim dingin hong kuan uhi. 12 Tua khitin, Israel namte'n Benjamin namte teenna gam teng ah mi a sawl uh a, amaute'n: Na lak ua thil gilou kihih bangchi dan ahia? 13 Gibea-a tua bang mi namanloute tu'n hon pekhe zok un. Amaute ka that ding uh a, Israel gama gitlouhna ka halsiang ding uh, a chi uhi. Ahihhangin, Benjaminte'n a sanggam uh Israel suante' thugen a ngaikhe nuam kei uhi. 14 Tua baan ah, Israelte dou dingin, a khawpite uapan Gibea ah hong kuan uh a, 15 Benjaminte a khawpite uapan namsau tawi 26,000 a kingah uhi. Tuate baan ah, Gibea khua in sepaih teltuam 700 a kaikhawm hi. 16 Hiai sepaihhonte lak ah sepaih teltuam veilong ngen 700 a om uh a, amaute'n suanglot in samzang nangawn a khial kei uhi. 17 Israelte'n Benjaminte tellouin, namsau tawi galhat ngen 400,000 a kaikhawm uhi. 18 Israel suan mipite Bethel ah a hawh uh a, Pathian kiang ah: Benjaminte dou dinga kuan masa ding kua ka hi ding ua? chi-in a dong uhi. Tangtawn Toupa'n: Judah nam kuan masa uhen, a chi hi. 19 A zing chiangin, Israelte a kisa uh a, Gibea gal ah giahphual a sat uhi. 20 Tua bangin, Israelte Benjamin nam dou dingin a kuantou uh a, Gibea ah amaute dou dingin panmun a khawh uhi. 21 Benjaminte, Gibea apan hong kuankhia uh a, tua ni-in kidouna phual ah Israelte 22,000 a vatpai uhi. 22 Ahihhangin, Israelte a kihanthawn uh a, tua mun mah ah a zanni-a bangin panmun a khawh uhi. 23 Tua bangin Israelte a kuantou uh a, Tangtawn Toupa' mai ah nitaklam dong a kap uh a: Ka sanggam uh Benjamin nam dou dingin ka kuan kik ding uhiam? a chi uhi. Tangtawn Toupa'n a dawng a: Amaute dou dingin kuan un, a chi hi. 24 A ni nih ni-in Israelte'n Benjaminte dou dingin, a naih kik uhi. 25 Tutungin zong Israelte dou dinga Benjaminte Gibea apanin hong kuankhia uh a, Israelte namsau tawi ngen 18,000 a vatpai nawn uhi. 26 Israelte a vekpi mahmah-un Bethel ah a hawhtou kik uh a, Tangtawn Toupa' maia tuin a kap uh a, nitak lam dongin an a ngawl uhi. Tua ah Tangtawn Toupa' mai ah haltum kithoihnate leh lemna thillatte a lan uhi. 27 Israelte'n Tangtawn Toupa' dawnna a ngak uhi. Tua hun laia, Pathian' thukhun singkuang bel Bethel khua-a om a, 28 Aron' tapa Eleazer tapa Fineha in thukhun singkuang maia siampi nna sem hiven, Israelte'n: Ka sanggam uh Benjamin nam dou nawn dinga kuan kik ding ka hi uhiam, ahih kei leh tawp ding? a chi uhi. Tangtawn Toupa'n a dawng a: Zing chiangin Benjaminte na khut sung ua hon pe ding ka hih manin, amaute dou dingin kuan kik un, a chi hi. 29 Tua khitin, Israelte'n Gibea kimkot ah galbuk pawl a kibawl uhi. 30 A ni thum ni-in, Benjaminte dou dingin a kuantou uh a, a hih ngeina uh bangin, panmun a khawh uhi. 31 Benjaminte amaute dou dinga hong kuankhiak takun, Israelte'n khua apan amaute a zawlkhia uhi. Benjaminte'n ni danga bangin, Israelte a dou uh a, a that pan nawnta uh a, kidouna phual ah leh lampi dung khawng ah mi 30 khawng a that uhi. Tua lampi khat bel Bethel khua zotna ahi a, a dang khat bel Gibea khua zotna ahi. 32 Benjaminte'n: Kidou masak banga amaute zougawp hita hang eih! a kichi uhi. Ahihhangin, Israelte'n: Khawpi apan lampi dung tenga amaute i zawlkhiak theih nadingin, tai phot ni, a kichi uhi. 33 Israelte a panmunte uapan hong dingkhia uh a, Baal Tamar khua ah panmun a khawh uh a, galbuk pawlte, Gibea phaizanga a panmun uapan hong dingkhiain hong kuan uhi. 34 Israelte laka sepaih teltuam 10,000 in Gibea mazawn ah tangtakin a dou uh a, kidouna a huaise mahmah mai hi. Benjaminte'n a vuallelhgawpna ding uh a nai dan a phawk kei uhi. 35 Tangtawn Toupa'n Israelte' mai ah Benjaminte a zou a, tua ni-in Israelte'n Benjaminte, namsau tawi ngen 25,100 a that uhi. 36 Tua khitin, Benjaminte'n vuallel uh ahi, chih a kiphawk uhi. Israelte bel Gibea kianga galbuka a koihte uh muangin, Benjaminte' maia tai ahi uh a, 37 galbuk pawl in thakhatin Gibea lam delhin a lut uh a, khawpi sung khempeuh namsauin a vatmai uhi. 38 Israelte'n galbuka tangpang pawlte tawh kigal-houpih nading, khawpi apan meikhu kitungsak ding, chi-in a kithukimsa uh ahi a, 39 tua a muh chiang ua, Israel tai dalhte kilehheia galdou ding, a chih uh ahi. Benjaminte'n Israelte a dou pan nawn uh a, 30 khawng a thatta uh a: Kidou masak banga amaute zawh hi nawn taktakta uh eih! a kichi uhi. 40 Tua banga khawpi apan meikhu a kituntouh takin, Benjaminte a kihei uh a, khawpi apan meikhu vanlama kitungtou a mu uhi. 41 Tua laitakin, Israelte'n amaute a dou uhi, Benjaminte n a vuallelh uh hong tungta, chih a phawk takun lauin a linggawp uh a, 42 Israelte' mai ah gamdai-gamkeu lam ah a taikek uh a, ahihhangin, kidouna in amaute a lap hi. 43 Amaute'n Benjaminte a umchip uh a, a delh uh a, Gibea suahlam pang ah a delhpha uh a, 44 Benjaminte galhat ngenta 18,000 a vatmai uhi. 45 Kiheia gamdai-gamkeu lama Rimon suangpi dong a taina uah, lampi dung teng ah Israelte'n mi 5,000 a that uhi. Benjaminte Gidom dong a delh uh a, 2,000 dang a that lai uhi. 46 Tua ni-in, Benjaminte namsau tawi, galhat ngenta 25,000 a si uhi. 47 Ahihhangin, mi 800, gamdai-gamkeu lam ah Rimon suangpi dong a tai uh a, tua ah kha li sung a om uhi. 48 Israelte a kilehkik uh a, Benjamin naupangte namsau in a that uh a, khawpi teng ah mihing leh gantate leh a muh peuhpeuh uh namsauin a that vek uhi. Khawpi a totkhak peuhmah uh a haltum lai uhi.

Vaihawmte 21

Benjaminte Zigotna

1 Israelte'n Mizpa ah kichiamna a bawl uh a: Eite kuamah in Benjaminte' zi dinga a tanu a piak louh ding, a kichi uhi. 2 Amaute Bethel ah a hawh uh a, nitaklam dongin Pathian' mai ah a tu uh a, nakpitaka khasiain a kap uh a: 3 Tangtawn Toupa, Israel Pathian aw, banghanga Israelte tunga hibang teng hong tung a, tuni-a Israelte laka nam khat kimlou hita mai ahia? a chi uhi. 4 A zing chiangin, amaute beltakin a thou uh a, maitam dawhin, haltum thillat leh lemna thillatte a lan uhi. 5 Tua khitin, Israel suan mipite'n: Tangtawn Toupa' maia kikhawmte laka Israelte kua ahia hong kihel lou? a chi uhi. Ahang bel, Mizpa-a hong hawh loulou, chi-in kichiamna thupitak a bawl uh a: Tua bang mi thah ngeingei ding, a nachita ua ahi. 6 Israelte laka a sanggam uh Benjaminte adingin Israelte dahin a kisik uh a: Tuni-in Israelte lak apan nam khat satkhiak ahita. 7 A dama khawsuak sunte bangchi-a zi guan ding i hia, kuama'n a tanu amaute' zi dinga piak louh ding, chi-a kichiamkhinta hanga! a kichi uhi. 8 Tua khitin, Mizpa ah, Tangtawn Toupa' maia Israel suante koi pen hong hawh lou ahia? a kichi uhi. Kikhopna-a pang dingin Jabesh Gilead apanin kuamah, giahphual ah hong hawh kei, chih a theikhia uhi. 9 Ahang bel, a kisim takun, Jabesh Gilead apan kuamah hong hawh kei, chih a mu ua ahi. 10 Tua khitin, kisamkhawmte'n galhat ngenta 20,000 Jabesh Gilead khua ah a sawl uh a: Kuan unla, Jabesh Gileada teengte namsauin vathat un, numei leh naupang nangawn. 11 Na hih ding uh hiai ahi: Pasal khempeuh leh nungak siangthou hi nawnlou peuhmah that vek un, chi-in thu a pia uhi. 12 Jabesh Gileada teengte lak ah nungak nou 400, pasal tawh lumkhawm ngei nailou, a mu uh a, tuate Kanan gama Shilo khawpi-a giahphual ah a tonpih uhi. 13 Tua kisamkhawmte'n Rimon suangpi-a Benjamin pasal omte kiang ah thu a khak uh a, kilemna bawl dingin a chial uhi. 14 Tua hunin Benjaminte hong kikta uh a, amaute zi dingin Jabesh Gileada a hinghawi uh nungakte a pia uhi. Ahihhangin, tua nungakte amaute adingin a kiching kei hi. 15 Tangtawn Toupa'n Israel namte kala kimlouhna awng a omsak manin, Israel suan mipite'n Benjaminte adinga dahin a kisik mahmah uhi. 16 Tua kisamkhawmte laka upate'n: Benjamin' numeite khempeuh thatkhin hang a, pasal damsunte bangchi-a zi guan ding i hia? 17 Israel laka nam khat suanmanga a om louh nadingin, Benjaminte'n gouluah ding suante a neih uh kul ahi. 18 Ahihhangin, Israelte'n kichiamna bawl a, Bejaminte zi guan peuhmah hamsiatin om hen, chikhin a, i tanute lah a zi ding ua pe thei lou hita hanga! 19 Ahihhangin, ngai dih ua, tu-a kipan hun sawt loua, Shilo khua-a Tangtawn Toupa' maia ankuang luina om ding hi a, a kichi uhi. Shilo bel, Bethel mallam, Lebona khawpi simlam, Bethel leh Shekhem kala lampi suahlam panga om ahi. 20 Tua bang ahih manin, Israelte'n Benjaminte kiang ah: Kuan unla, grephuan ah na kibu un. 21 Na en gige unla, Shilo nungakte laam dinga hong kuan ding uh ahi. Tua banga hong pai chiangun michih in na zi ding uh na kimat chiat unla, Benjamin gam ah paipih un. 22 A pate uhiam, a sanggamte uhiam in koute kianga lungkim-louhna thu hong tut uleh koute'n: Koute hangin amaute tung ah zahngai un. Kidou sungin lah amaute zi ka guan thei kei ua, noute'n lah na tanute uh na piak thawh uh hilou a, kichiamna-a mawhtang lou ding hi uteh, ka chi ding uh, a chi uhi. 23 Tua bangin, Benjaminte'n a hih uh a, amaute adinga kiching nungakte tua a laamte lak apan khat chiat manin, a zi dingun a taipih uhi. Tua khitin, a gouluah gam uah a kilehkik uh a, khawpite lam thakin, a luah uhi. 24 Tua hunin, Israelte tua mun nusiain, amau' behte leh innkawte tek kiang ah, amau gouluah gama a inn uah a paita uhi. 25 Tua hun laiin, Israel gam ah kumpi a om kei a, michih ama' hoihsak bangin a gamta hi.

Ruth 1

Elimelekh-te Innkuan

1 Vaihawmte'n vai a hawm laiun, tua gam ah kial a kia a, Judah gama Bethlehem apan pasal khat, a zi tawh, a tapa nihte tawh Moab gama vateeng tadih dingin a kuan uhi. 2 Tua mipa' min Elimelekh ahi a, a zi' min Naomi ahi a, a tapa nihte' min Malon leh Khilion ahi. Judah gama Bethlehem khua-a teng Efratha beh ahi uhi. Amaute Moab gam ah a lut uh a, a teeng uhi. 3 Naomi' pasal Elimelekh hong sita a, Naomi bel a tapa nihte tawh nutsiatin a om hi. 4 Tua tapa nihte'n Moab numeite zi-in a nei uh a, khat min Orpa ahi a, a khat pen min bel Ruth ahi. Tua gama kum sawm a ten nungun, 5 Malon leh Khilion zong hong si tuak uh a, Naomi bel a tapa nihte leh a pasal' sihsan ahita hi. 6 Naomi in Moab gama a om laiin, Tangtawn Toupa'n a mite a veh a, amaute an a pia, chih thu a za a, a mou nihte tawh tua gam apan inn lam zuan kik dingin a kisa uhi. 7 A mou nihte tawh a teenna uapan a kipankhia uh a, Judah gam zuanin a pai uhi. 8 Naomi in a mou nihte kiang ah: Paita unla, na nute uh inn ah kik tuak mai un. Na misite uleh keima tunga siamna na suah bangun, Tangtawn Toupa'n na tung uah siam hon suah hen. 9 Tangtawn Toupa'n na nih-un, pasal dangte inn ah tawldamna hon musakta hen, a chi hi. Tuachi-in, ama'n amaute a tawp a, amaute nakpitakin a kapkhia uhi. 10 Amaute'n amah kiang ah: Hilou e, na mite kiang ah kon zui kik ding uh, a chi uhi. 11 Ahihhangin, Naomi in: Ka tanute aw, na inn uah kik un. Banghanga kei hon zui ding na hi ua? Na pasal dingun ke'n tapate ka paai lai dia hia? 12 Ka tanute aw, na inn uah kik un, pasal dang nei dingin ka tekta hi. Kei adingin lamet om lai, chi dek lengla, tuzan mahmahin pasal nei lengla, tapate nei tazen leng zong, 13 a pichin uh na ngak nuam ding ua hia? Amaute ngakin pasal beiin na om nuam ding ua hia? Hilou e, ka tanute aw. Noute sangin ke'n ka thuak zaw. Tangtawn Toupa'n ka tunga a khut kha ahi, a chi hi. 14 Hiai thu a zak takun, amaute a kap nawn uhi. Tua khitin, Orpa in a nu mangpha khakin a tawp a, Ruth in bel a nu a len tinten hi. 15 Naomi in: En in, na sanggamnu a mite kiang ah leh a pathiante kiang ah a chiahkikta. Nang zong amah zuiin kik in, a chi hi. 16 Ahihhangin, Ruth in a dawng a: Nang nuse ding hiam, nang apan chiahkik ding hiamin hon kunkun ken. Na paina-na ah ka pai ding a, na giahna na ah ka giak ding. Na mite ka mite ahi ding a, na Pathian ka Pathian ahi ding. 17 Na sihna na ah ka si ding a, tua ah ka kivui ding. Sihna loungal thil dang in nang leh kei hon khen leh, Tangtawn Toupa'n a lawh lawh hon lawh hen, a nase pen zong hon lawh hen, a chi hi. 18 Ruth in amah zuih a sawm tinten chih Naomi in a theih takin, chiahkik dingin amah a kun nawn kei hi. 19 Tuachi-in, tua numeite gel Bethlehem hong tun dongun, hong ton uhi. Bethlehem hong tun takun, amaute hangin, tua khawpi-a mite a kising souhsouh uhi. Tua khua numeite'n: Hiai Naomi ahi zenhouh maw? a chi uhi. 20 Naomi in amaute kiang ah: Naomi hon chi nawn kei un, Mara hon chi zaw un. Ahang bel, Vanglianpen in ka nuntakna khasak hita ven. 21 Buchingtaka kuankhia ing a, ahihhanga Tangtawn Toupa'n a hawma hon paikiksak hiven, banghanga Naomi hon chi lai ding na hia? Tangtawn Toupa'n hon thuaksak a, Vanglianpen in ka tunga vangsiatna hon tun hiven, a chi hi. 22 Tua bangin, Naomi hong kilehkik a, a mounu tua Moab numei Ruth in Moab gam apan hon zui a, barli buh lak kipat laiin Bethlehem khua hong tung uhi.

Ruth 2

Ruth leh Boaz

1 Naomi in a pasal lam ah, Elimelekh behte laka mi suanhuai mahmah khat, tanau a nei a, tua pasal' min Boaz ahi. 2 Tua Moab numei Ruth in Naomi kiang ah: Lou ah vakuanin, hon deihsak ka muh peuhpeuh nung ah buhsang ka vazong ding aw! a chi hi. Naomi in amah kiang ah: Ka tanu aw, vakuan ve, a chi hi. 3 Tua bangin a vakuan a, buhlate nung ah buhsang a khawm hi. Tua bangin Ruth in Elimelekh behte khat Boaz' lou ah buhsang a vakhawmkha zenzen hi. 4 Tua laitak mahin, Bethlehem apanin Boaz a hong tung a, buhlate chibai a buk a: Tangtawn Toupa'n noute hon ompih hen aw! a chi hi. Amaute'n zong a dawng uh a: Tangtawn Toupa'n nang hon vualzawl hen aw, a chi nawn uhi. 5 Boaz in buhla makaipa kiang ah: Hua laia kua' tanu ahia? Chi-in a dong hi. 6 Tua buhla makaipa'n a dawng a: Moab gam apan Naomi tawh hong ton Moab numeinu ahi. 7 Ama'n: Hehpihtakin buhsang hon zongsak inla, buhlate nunga buhphal lak khawng ah buhsang hon khawmsak ve maw, a chi a, loubuka tomchik a khawl sung chih louh, zingsang apat tu dong lou laia nna semsem mai ahi, a chi hi. 8 Tuachi-in, Boaz in Ruth kiang ah: Ka tanu aw, ka thu ngaikhia in. Midang' lou ah kuanin buhsang vazong kenla, hiai apan paikhe nawn ken. Hiai ah ka sila numeite kiang ah om gige in, 9 Buhla pasalte' buhlakna en gige inla, amaute nungnung zui in. Nang hon khoih lou dingin pasalte ka hilhsa ahi. Na dangtak chiangin pai inla, pasalte' dipsa thawla tui vadawn in, a chi hi. 10 Hibang thu a zak takin, Ruth lei si-in a kun a: Kei gamdang mi hinapi, hibanga non deihsaka non phawk banghang ahia? a chi hi. 11 Boaz in a dawng a: Na pasal sih nungsiaha na nu adinga na thilhih teng khempeuh leh na pianna nulehpa leh na gam nusia a, midang na theih ngeilouh mite tawh teengkhawm dinga nong paikhiak dan khawng hon hilh uhi. 12 Tangtawn Toupa'n na thilhih hon din henla, a khalim bel dinga nong kisaknapa Tangtawn Toupa, Israel Pathian in nakpitakin hon vualzawl hen, a chi hi. 13 Ama'n: Ka toupa' mitmuhin deihsakna tang lailai nuam ing. Nang non khamuanta a, na sila numeite khat tawh zong teh tham hi kei mah leng, kei na sila kamphain non houpihta, a chi hi. 14 Annek hun takin, Boaz in Ruth kiang ah: Hiah hong pai inla, tanghou bangzah hiam beek grep tuithuka diahin hong ne in, a chi hi. Amah tua banga buhlate tawh a tutkhawm takin, Boaz in ankan bangzah hiam a pia hi. Ama'n a deih zah a nek khitin a vai lai hi. 15 Amah buhsang khawm dinga a dinkhiak nawn takin, Boaz in a sila numeite thu a pia a: Buhphalte lak ah buhsang a zon leh zong kisuanglahsak kei un. 16 Tua sangsikin, buhphal gaksa lak apan nangawn buhkung dokin ama' khop dingin nutsiat unla, tai kei un, a chi hi. 17 Tua bangin, Ruth in nitaklam dongin lou ah buhsang a khawm hi. Tua khitin, barli buh a khopte a chil a, ephah khat phial a ngah hi. 18 Ama'n tua a pua a, khua ah a pai a, a nu'n a buhsang khopzah a mu hi. Ruth in a nek khamval zong a suahkhia a, a nu a pia hi. 19 A nu'n amah kiang ah: Tuni-in koi ah buhsang na vazong a? Koi ah na vasema eita? Nang hon na phawkphapa nunnuamta hen aw! a chi hi. Ruth in a vasepna lou neipa' thu a nu a hilh a: Tuni-a ka va sepnapa' min Boaz ahi, a chi hi. 20 Naomi in a mounu kiang ah: Tangtawn Toupa'n amah vualzawl hen! Ama'n a damlaite leh a sisate tunga siamna suah tawp lou lai hiven, a chi hi. Tua baan ah, ama'n: Tua pa i tanau nai ahi a, tanpa tanaunai i neihte laka khat ahi, a chi lai hi. 21 Tua khitin, tua Moab numei Ruth in: Ka buh a lakkhit masiah uh ka nasemte lak ah om gige in, nangawn hon chi lai eive, a chi hi. 22 Naomi in a mounu Ruth kiang ah: Ka tanu aw, ama' nungakte tawh na tonkhawm leh nang adinga hoih ding ahi, midang lou ah siatna na tuak kha ding, a chi hi. 23 Ruth bel barli buh leh huit buh lakkhit mateng, buhsang zong dingin Boaz' sila numeite naihin a om gige hi. Tuachi-in, Ruth, a nu tawh a teengkhawm hi.

Ruth 3

Buhphuala Ruth leh Boaz

1 Ni khat bel, a nu Naomi in amah kiang ah: Ka tanu aw, nang adinga hoih tawlngakna, taksap bangkim awng hukna na neih theih nading innkuan kon zonsak kei dia hia? 2 Boaz, a sila numeite tawh na omkhawmnapa uh, i tanau nai ahi kei maw? Ngai dih, tu zanin ama'n buhphuala barli buh zapsiang ding ahi. 3 Kisil siang inla, gim namtui kinuh inla, na puansilh hoihpen silh in. Tua khit chiangin, buhphual ah hawhsuk in. Ahihhangin, ama'n a neka a dawn khit mateng, tua muna na om lam kiphawksak ken. 4 Amah a lup chiangin, a lupna mun chiamteh in. Tua khit chiangin, vanaih inla, a khe vahawk inla, valum in. Ama'n na hih ding hon nahilh ding ahi, a chi hi. 5 Ruth in a dawng a: Na gen peuhmah ka hih ding, a chi hi. 6 Tuachi-in, amah buhphual ah a hawhsuk a, a nu'n a hih dinga a hilh peuhmah a hih hi. 7 Boaz in a nek-a a dawn khitin, lungnuamtakin a om a, buhvum pang gamla lamsang ah a lum hi. Ruth in a vanaih deendeen a, Boaz' khe hawkin a valum hi. 8 Zankhang laiin hichi hong hi a, banghiam khat in tua mipa a phawng guih a, a kihei leh, a khekhuana numei khat lum a phawk hi. 9 Ama'n: Kua na hia? a chi hi. Ruth in a dawng a: Na sila Ruth ka hi. Tanpa tanau nai hi vechin, na puanmong hon zawn ve, a chi hi. 10 Ama'n a dawng a: Ka tanu aw, Tangtawn Toupa'n hon vualzawl hen. Siamna na hon latsaksa sangin hiai na siamna a lianzaw lai. Pasal naupang zawte, a zawng hi-in a hau hita leh na delh kei a! 11 Ka tanu aw, lau ken. Na nget khempeuh kon hihsak ding. Ka khawpihte khempeuh in nunhoih numei na hih dan a thei vek uhi. 12 Tanpa tanaunai hi mah leng, kei sanga tanpa tanau nai zaw a om hi. 13 Tuzan hiai ah giak inla, zingsang chiangin ama'n tatna hon bawl nop leh pha, tatna bawl hen. Ama'n tatna a bawl nop kei leh, Tangtawn Toupa a hing ahihna sialin ke'n tatna ka bawl ding. Zingsang dong hiai ah lum in, a chi hi. 14 Tua bangin, amah Boaz' khekhuan ah zingsang dong a lum a, sanggam melmak theih mial laiin a thou hi. Boaz in amah kiang ah: Buhphual ah numei khat hong hawh chih kitheisak ken, a chi hi. 15 Ama'n: Na lukhum hon la inla, hon dawh in, a chi lai hi. Ruth in a lukhum a dawh a, Boaz in barli buh, tehna guk dim a sun a, amah a suan hi. Tua khitin, Boaz khawpi lam ah a kilehkik hi. 16 Ruth, a nu kiang hong tun takin, Naomi in: Ka tanu aw, bang achi ale? chi-in a dong hi. Ruth in amah adinga Boaz hihsak khempeuh a hilh a: 17 Hiai barli buh tehna guk tak hon pia a: Na nu kiang ah khutvuakin kik ken, hon chi eive, nu, a chi lai hi. 18 Tua khitin, Naomi in: Ka tanu aw, bang thil hong tung hiam chih na theih mateng na ngak in. Boaz in tuni-a hiai thil a hih vaiveng mateng amah om maimai lou hiai ding ahi, a chi hi.

Ruth 4

Boaz leh Ruth Kitenna

1 Tua sungin, Boaz khawpi kongpi ah a hawhtou a, tua ah a tu hi. Tua tanpa tanaunai, a thu a nagensa pen tua laia hong pai takin, Boaz in: En dih vaw, hiah hong pai inla, hong tu dih aw lawm, a chi hi. Tuachi-in, amah hong pai a, hong tu hi. 2 Boaz in khawpi upa sawm khat a samkhawm a: Hiah hong tu dih ua, a chi a, amaute zong a tu uhi. 3 Tua khitin, ama'n tanpa tanaunai kiang ah: Moab gam apan hong kilehkik Naomi in, i sanggampa Elimelekh gam a zuak a, 4 hiai thu nang kon hilh a, hiaia tute mai leh ka mite' upate mai ah tan in, kon chih ding thil kilawm hi-in ka thei hi. Na tat nop leh tan inla, na tat nop kei leh lah hon hilh lechin. Nang lou a tan ding dang om kei a, nang nungin kei ka hi lei hi, a chi hi. Tua tanpa tanau bul in: Tan mah ning e, a chi hi. 5 Tua khitin, Boaz in: Naomi apan tua gam na tat ni ni-in, misipa' meithai tua Moab numei Ruth apan lei na suak hi. Misipa' gam tunga a min pu ding suan a om nadingin, tua misipa' meithai, Moab numei zong na tangkhawm teitei chihna ahi, a chi hi. 6 Hiai a zak takin, tua tanpa tanaunai in: Tua bang ding ahih leh, tan thei kei ning, keima' goutan mansuah kha ning. Nang adingin tan zaw mai in, ke'n tan thei lou hi'ng, a chi hi. 7 Tua hun laiin, Israel gam ah, gam tat leh kipiaksawnna om chiangin, khat in a khedap suahkhiain a khatpa a pia hi. Hiai bel Israel gama gou kitatna a kikipsakna daan ahi. 8 Tua bangin, hiai tanpa tanaunai in: Nang adingin tan in, chi-in a khedap a suahkhia hi. 9 Tua khitin, Boaz in tua upate leh mite khempeuh kiang ah: Naomi apanin Elimelekh, Khilion leh Malon' gam khempeuh ka leita, chih tuni-in noute a theihpihte na hi uhi. 10 Malon' meithai, Moab numei Ruth zong ka zi dingin ka tangta hi. Misisa' gam tunga a min pu ding suan a om nading leh a sanggamte apan a min man louh nading leh khawpi laibute apan a min a man louh nading ahi. Tuni-in noute a theihpihte na hi uhi! a chi hi. 11 Tua khitin, upate leh kongpi-a omte khempeuh in: Theihpihte hi mah ung. Tangtawn Toupa'n na inn sunga hong lut dingnu Rakhel leh Lea bangin bawlta hen. Amaute'n a kigawmun Israel innkawte tungding uh hiven. Efratha ah mi suanhuai hong suak inla, Bethlehem ah hong minthangta in. 12 Tua ban ah, Tangtawn Toupa'n hiai numei tawh kala chisuan nang hon piak ding tungtawnin na innkuan zong, Judah leh Tamar tawh kala chisuan Perez' innkuan mah bang hen aw, a chi uhi.

Khangthu

13 Tuachi-in, Boaz in Ruth a pi a, a zi honghita hi. Boaz in amah a luppih a, Tangtawn Toupa'n nau pai theiin amah a bawl a, tapa a nei hi. 14 Numeite'n Naomi kiang ah: Tangtawn Toupa phatin om hen. Ama'n tuni-in tanpa tanau bul beiin nang hon koih kei hi. Amah Israel gam sung khempeuh ah minthangta hen! 15 Amah na hinna halhthaksak dinga na tek na vuai chianga hon vakpa hi hen. Ahang bel, na mou nang hon itnu leh nang adinga tapa sagih sanga hoihzawnu in amah neikheta hiven, a chi uhi. 16 Naomi in naungek a la a, a pheitung ah a tusak a, a donnu hong hita hi. 17 Innveng numeite'n naungek min' a phuak uh a: Naomi in tapa neita e! chi-in a min dingin Obed a sa uhi. Amah Jese' pa hong hi a, Jese lah David' pa ahi. 18 Hiaite Perez' suante ahi: Perez in Hezron a suang a, 19 Hezron in Ram a suang a, Ram in Aminadab a suang hi. 20 Aminadab in Nashon a suang a, Nashon in Salmon a suang hi. 21 Salmon in Boaz a suang a, Boaz in Obed a suang a, 22 Obed in Jese a suang a, Jese in David a suang hi.

1 Samuel 1

Samuel Pianna

1 Efraim tanggam ah khua khat Ramathaim a om hi. Tua khua ah pasal khat, Zuf behte khat a om a, a min Elkana ahi. Amah bel, Jeroham' tapa ahi. Jeroham bel Elihu' tapa ahi a, Elihu lah Tohu' tapa ahi a, Tohu lah Zuf tapa ahi. Zuf bel Efraim nama mi ahi. 2 Elkana in zi nih a nei a, khat pen Hana ahi a, adang khat pen Penina ahi. Penina in tate a nei a, Hana in bel a nei kei hi. 3 Kum simin hiai mipa, ama' teenna khua apan Shilo ah Tangtawn Toupa Vanglianpen be ding leh a maia kithoihna laan dingin hong kuan hi. Shilo bel Tangtawn Toupa' siampi Hofni leh Fineha omna ahi. Amaute lah Eli' tapa nihte ahi uhi. 4 Elkana in kithoihna a lat ni ding hong tun chiangin a zi Penina leh a tapate leh a tanute khempeuh kiang ah satan khat chiat a pe zel a, 5 ahihhangin, Hana bel a it manin leh Tangtawn Toupa'n a suul a khaakbing manin, tan nih a pe zel hi. 6 Tangtawn Toupa'n Hana suul a khaakbing manin, a langnu Penina in lung nopmawha a liin hiai nadingin a totbawl sek hi. 7 Hibangin kum tampi a pai hi. Hana, Tangtawn Toupa' inn-a a hawhtouh chiangin a langnu'n a kah mateng a tawng sek a, ama'n an a ngawl sek hi. 8 A pasal Elkana in a kiang ah: Hana, banghanga kap na hia? Banghanga an ne lou na hia? Banghanga dahmel na hia? Nang adinga tapa sawmkhat sanga kei manpha zaw ka hi kei-a hia? a chi hi. 9 Khatvei bel, Shilo-a ne-a a dawn khitun, Hana a dingkhia hi. Siampi Eli bel, Tangtawn Toupa' tempul kong bul ah, tutna tung ah a tu hi. 10 Hana lah lungkham mahmah kawma naktak a kap in, Tangtawn Toupa' mai ah a thuum hi. nKichiamna khat a bawl a: Tangtawn Toupa Vanglianpen aw, na silanu' thuakgimna en a, non phawk gige a, na silanu hon mangngilh lou a, tapa khat non piak peuhmah leh, a dam sung teng Tangtawn Toupa Vanglianpen adingin amah ka pe ding a, a lutung ah sammet tern a kizang ngei kei ding hi, a chi hi. 12 Tua banga Tangtawn Toupa' maia Hana a thuum laiin, Eli' in a mukphun a mu hi. 13 Hana bel a lung sung ah a thuum a, a muuk kia a phun a, aw gingkhia bel a kiza kei hi. Eli in amah zukham a sa a, 14 a kiang ah: Bangtan zukhama om ding na hia? Na zudawn tawpsan taven, a chi hi. 1 Hana in: Hilou ahi, toupa aw, a lungkham mahmahnu khat ka hi. Zu hita leh, kham theih peuhmah hita leh dawn lou ka hi. Tangtawn Toupa' maia ka hinna sungbua ka hi zaw. 16 Na silanu, numei mannabei hon sa ken. Lunggimna leh dahna lianpi neia hiaia thuum ka hi, a chi hi. 1 Eli in a dawng a: Khamuang-takin paita inla, Israel Pathian in na nget hon lawhchingsak hen aw, a chi hi. 18 Hana in: Na mitmuhin na silanu deihsakna hon tangsak in, a chi hi. Tua khitin, a pai a, an a ne zek a, a dahmel nawn kei hi. 19 A zingchiangin, beltakin a thou uh a, Tangtawn Toupa a bia uh a, Rama khua-a a inn uah a chiahkikta uhi. Elkana in a zi Hana a luppih a, Tangtawn Toupa'n Hana a thei gige hi. 20 Hun hong pai zel a, Hana a gai a, tapa khat a nei hi. Ama'n: Amah zaw Tangtawn Toupa apan ka nget ahi, chi-in, a min dingin Samuel a sa hi. Hana in Tangtawn Toupa kianga Samuel Pia 21 Tua mipa Elkana leh a sungte khempeuh tawh Tangtawn Toupa' maia kumsim kithoihna laan ding leh a kichiamna tangtun dinga a kuantouh takin, 22 Hana bel a vakihel kei hi. Ama'n a pasal kiang ah: Naungek in nawinek a tawp masiah kong hawh kei ding. Nawinek a tawp chiangin, amah tonpihin, Tangtawn Toupa' mai ah ka pe ding a, tua ah a omdenta ding, a chi hi. 23 A pasal Elkana in: Hoih na sak bangbangin hih in. Amah nawinek na tawpsak mateng hiai ah om in. Tangtawn Toupa'n a thu kipsak hen aw, a chi hi. Tua bangin, tua numeinu inn ah a om a, a tapa nawinek a tawp mateng a don hi. 24 Ama'n naupangpa nawinek a tawpsak takin bawngtal kum thuma upa khat tawh, anvui nei ephah khat tawh, zu thawl khat tawh a keng a, naupangpa neulai mahleh a tonpih a, Shilo-a Toupa' inn ah a paipih hi. 25 Tua bawngtal a gawhkhit takun, tua naupangpa Eli kiang ah a paipih uh a, 26 tua numeinu'n a kiang ah: Ka toupa aw, na hinna sialin ka gen ahi. Na kianga dinga Tangtawn Toupa' maia thuumnu ka hi. 7 Hiai naupang ngenin ka thuum a, Tangtawn Toupa'n ka nget hon peta. 2 Tuin, ke'n amah Tangtawn Toupa ka pia hi. A damsung teng Tangtawn Toupa kianga piak ahi den ding hi, a chi hi. Ama'n tua ah Tangtawn Toupa a bia hi.

1 Samuel 2

Hana' Thuumna

1 Tua khitin, Hana a thuum a: Tangtawn Toupa ah ka lungtang nuamin kipak hi, Tangtawn Toupa ah ka kiite tawisangin om hi. Ka melmate tung ah ka kam kisial hi, na hutkhiakna-a kipak ka hih man ahi. 2 Tangtawn Toupa banga siangthou kuamah om lou hi. Nang lou kua dang om lou hi. Koute' Pathian loungal Suangpi dang om lou hi. 3 Kisathei takin paupau ke'n, na muk in kiotsakna thu zong gen kei hen, Tangtawn Toupa lah a theipa Pathian hi a, ama'n thilhih khempeuh buuk hiven. 4 Galhatte' thalphelte hihtana om a, a kisuite lah thahatna-a kigalvan uhi. 5 A niang leh taite zong an thalawh dinga kipia uh a, a kialte lah kial nawn lou uhi. A chiingnu'n ta sagih nei a, tapa tampi neinu lah bahta hi. Tangtawn Toupa'n that a, hihhing zel hi. Sheol ah paisuksak a, tua apan kaithou zel hi. 7 Tangtawn Toupa'n zawnna leh hauhna tun a, ama'n niamsak a, tawisang zel hi. 8 Ama'n a zawngte leivui apan dingkhesak a, a tasamte meivu lak apan domkangtou a, kumpi tapate tawh tukhawmsak a, pahtawina kumpitutphah luahsak hi. Ahang bel, leitung suangphumte Tangtawn Toupa-a hi a, tuate tunga leitung nga hiven. 9 Ama'n a misiangthoute' khe ching ding a, ahihhanga, migiloute bel miallaka daihsak didea om ding uhi. Thahatnain kuamah vualzou lou ding hi. Tangtawn Toupa' melmate hihzaan dimdem hi ding a, vantung apan ama'n vanpiging bangin amaute dou ding a, Tangtawn Toupa'n lei mong dong thu khen ding hi. Ama'n a kumpipa thahatna pe ding a, a thaunilhpa' kii tawisang ding hi, a chi hi. 11 Tua khitin Elkana bel Rama-a a inn ah a chiahkikta hi. Ahihhangin, tua naupangpa bel siampi Eli' mai ah Tangtawn Toupa' nasemin a om hi.

Eli Tapa Giloute

12 Eli' tapate bel, mannabei ahi uh a, Tangtawn Toupa theihna a nei kei uhi. 13 Siampite' hih dan ngeina khat a om a, mi khatpeuh in kithoihna a lat chiangin, tua kithoihna sa a kihuan laitakin, siampi' sila khat, sikkhut ka thum nei tawiin hong pai a, 14 tua sikkhut in tua sa huanna beel dai hi-in, beel pum hi-in, beelpi hi-in, beel neu hita leh, a sunsuk a, a sutkhiak khak teng siampi in a tang hi. Tua bangin, Shilo-a hong pai Israelte khempeuh tung ah siampite'n a hih uhi. 15 Kithoihna sa athaute a kihaal ma nangawnin siampi' sila hong pai a, kithoihna laanpa kiang ah: Siampi in sa minsa hon saang lou ding ahi, a sial, emmin ding sa hon pia in, a chi pahpah hi. 1 Kithoihna laanpa'n: A thaute beek kihaal masa phot hen aw, tua khit chiangin na deih deih la in, chita le zong, tua siampi' sila in: Hi thei lou ding. Tu'n hon pekhia in, non piak kei leh thaguma la veve ding hi'ng, a chi hi. Tua bang ahih manin, tua tangvalte' khelhna, Tangtawn Toupa' mitmuhin a nase mahmah hi. Ahang bel, Tangtawn Toupa' maia thillat pen kihhuai suaksak uh hiven. 18 Ahihhangin, Samuel in bel, naupang chik himahleh, siampi' puanak, puanmalngat silhin Tangtawn Toupa' mai ah nna a sem hi. 1 Kum simin a nu'n a puanaktual neu a bawlsak a, kumsim kithoihna laan dinga a pasal tawh a kuan chiangin, tua bang puanaktual a puak zel uhi. 20 Eli in Elkana leh a zi a na vualzawl zel a: Hiai numei in a nget a, Tangtawn Toupa piak ding a chih mun luah dingin, Tangtawn Toupa'n hiai numei apanin chisuan hon pia hen aw, a chi hi. Tua khit chiangin inn lam ah a kilehkik zel uhi.2 Tangtawn Toupa, Hana tunga hehpihsiam ahih manin, Hana in nau a paai kiik a, tapa thum leh tanu nih a nei hi. Tua bang sungin, Tangtawn Toupa' ompihin Samuel hong khanglian hi. 2 Eli bel hong teekta mahmah hi. A tapate'n Israelte khempeuh tunga a thilhihte uh leh, Kihoupihna Puanbuk kongkhak bula hong paikhawm numeite a na luppih dan uh zong a za hi. 23 Amaute kiang ah: Banghanga tua bang thilte hih na hi ua oi? Hiai na thilhih giloute uh mite khempeuh apan za ka hi. 24 Ka tapate aw, hi bang ding hilou ahi! Tangtawn Toupa' mite na thumangsak kei uh chih thuthang ka zakte thu hoih hilou ahi. 25 Mi khatpeuh midang tunga a khelh leh, ama' adinga Pathian vakikum thei ahi. Ahihhangin, mi khatpeuh Tangtawn Toupa tunga a khelh leh, ama' adinga kua kikumta ding ahia? a chi hi. Ahihhangin, a tapate'n a pa uh' taihilhna a ngeingaih kei uhi. Ahang bel, amaute hihlup ding Tangtawn Toupa' deihlam a nahi-a ahi. 26 Naupang Samuel bel hong khanglian a, Pathian leh mihingte' deihsakna ah zong a khangtou hi.

Eli Innkawte Mawhpaihna

27 Tuabang hun laiin, Pathian' mi khat Eli kiang ah hong hawh a: Hiai Tangtawn Toupa' thugen ahi: Na pa' innkawte Aigupta gama Faro' nuaia a om lai ua, amaute kianga a kiteltaka Keimah vakilaak hilou ka hi maw? 28 Amah ka siampi-a pang a, ka maitama vapaitou a, ka maia gim namtui vahal ding leh siampi puanak silh dinga, Israel namte khempeuh lak apan na pa na teelkhia ka hi. Tua baana, Israete'n meia a thillatte khempeuh uh na pa' innkawte' tan dinga pia ka hi. 2 frKa tenna muna kithoih nading leh thillat dinga ka sehte banghanga simmawh na hia? Banghanga, Israel mipite' thillat khempeuh apan a sa hoih lailai la a, noute kihihthaua kei sanga na tapate pahtawi zaw na hia? chi ahi. 30 Tua bang ahih mana, Tangtawn Toupa, Israel Pathian in: Na innkawte leh na pa' innkawte'n ka maia nna sem gige ding uh ahi, chi-a, thu na chiamkhinta ka hi, chi ahi. Hinapi-in, tu'n Tangtawn Toupa'n: Tua bang hi peuhmah kenteh! Kei hon pahtawi peuhmah ka pahtawi ding a, kei hon simmawh neuhmah lah ngaihneuin a om ding. Ngai in, na banthahat leh na pa' innkawte banthahatte ka satkhiak hun hong tung ding hi. Tua hun chiangin, nang' khanggui ah teekkuna dam om lou ding a, 32 ka tenna mun ah lungdonna mu ding na hi. Israel tung ah thil hoih kihih mah leh, nang' khanggui ah teekkuna dam om lou ding hi. 33 Ka maitam apan ka satkhiak louh, na lak ua omsun peuhmah lah, na khitui luangsaka hon mitmialsak leh na lungtang dahsak dinga hawi hi lei ding uh a, na suan leh khakte khempeuh khansih ding uhi. 34 Na tapa nihte, Hofni leh Fineha, nang adingin chiamtehna suak ding uh a, a nih ua nikhat thu-a si ding uh ahi. 35 Kei adingin siampi muanhuai khat ka tungkhe ding a, ama'n ka lungtang leh ka lungsim deih bangbangin a sem ding hi. Ama' innkawte ka tungding ding a, ama'n ka thaunilhpa' mai ah nna a seem gige ding hi. 36 Tua hun chiangin, nang' khangguia nutsiata omsun peuhmah, tua pa' mai ah ngunsik them leh an kamkhat ngen dingin hong paiin hong kuun ding a, hong thuum ding a: Nek ding an ka neih theih nadingin siampi' nna sem dingin hon sep mahmah in, chi-in hong ngen ngutngut ding hi, chi ahi, a chi hi.

1 Samuel 3

Tangtawn Toupa'n Samuel Sam

1 Naupang Samuel bel, Eli nuai ah, Tangtawn Toupa' maia nasemin a om hi, Tua hun laiin, Tangtawn Toupa' thu a vaang a, mengmuhna a tam kei hi. 2 Eli' mit a bahta a, khua a mu thei khopteek hi. Zan khat, Eli ama' muna a lup laiin, Samuel zong Pathian' thukhun singkuang omna, Tangtawn Toupa' tempul sung ah a lum hi. 3 Pathian' meivak kide zong a mit nai kei hi. 4 Tua laiin, Tangtawn Toupa'n Samuel a sam hi. Samuel in a dawng a: Hiah ka om, a chi a, 5 Eli kianga va-taaiin: Non sam a, hiah ka om, a chi hi. Ahihhangin, Eli in: Hon sam lou ka hi. Vapai inla, valum in, a chi hi. Samuel a vapai a, a valum hi. Tangtawn Toupa'n: Samuel! chi-in a sam kiik hi. Samuel a thou a, Eli kiang ah a vapai a: Non sam a, hiah ka om, a chi hi. Eli in: Ka tapa aw, hon sam lou ka hi. Vapai inla, valum in, a chi hi. 7 Samuel in bel Tangtawn Toupa a meltheih nai kei hi. Tangtawn Toupa' thu lah ama' kianga laakkhiaksak ahi nai kei hi. 8 Tangtawn Toupa'n a thumvei nadingin Samuel a sam a, Samuel a thou a, Eli kiang ah a vahawh a: Hiah ka om, na hon sam a, a chi hi. Tua bang a hihtakin, Eli in, Tangtawn Toupa'n naupang sam ahi, chih a phawkkhia hi. tuachi-in, Eli in Samuel kiang ah: Vapai inla, valum inla, ama'n hon sap leh, Tangtawn Toupa, thu gen in, na sila in ngaikhia ka hi, na chi in, a chi hi. Tua bangin Samuel a vapai a, ama' mun ah a lum hi. 10 Tangtawn Toupa hong pai a, tua ah hong ding a, hun danga bangin: Samuel! Samuel! chi-in hong sam hi. Samuel in: Thu gen in, na sila in ngaikhia ka hi, a chi hi. nTangtawn Toupa'n Samuel kiang ah: Ngai in, Israel ah thil khat hih ding ka hi. A za peuhmahte' bil khawng ding ahi. 12 Tua hun chiangin, Eli' innkawte dema ka thugen peuhmah, a bul apan a tawp dongin, Eli' tunga tungsak ding ka hi. Ahang bel, a phawk mahmah khelhna hanga Eli innkawte gawt denden ding ka hi, chih ka hilhta hi. Tua bel, a tapate kihhuai kisuaksak uh a, ama'n lah amaute khou a, kham lou ahihna ahi. 14 Tua bang ahih mana, Eli' innkawte' tunga kichiamta ing a: Kithoihna hi-in, thillat in hita leh, Eli' innkawte' khelhna khuh ngei lou ding hi, chita hi'ng, a chi hi. 1 Samuel bel zingsang dong a lum a, tua khitin, Tangtawn Toupa' inn kongkhakte a hong hi. Ama'n a mengmuh pen Eli a hilh ngam kei hi. 1 Ahihhangin, Eli in amah a sam a: Samuel, ka tapa aw, a chi hi. Samuel in a dawng a: Hiah ka om, a chi hi. 17 Eli in: Tangtawn Toupa'n na kianga bang gen ahia? Kei apan iim ken. Nang hon hilhte thumal khat dong hon iim na neih peuhmah leh, Pathian in nang hon lawh dandan hon lawh hen, a nase zaw zong hon lawh hen, a chi hi. 18 Tuachi-in, Samuel in iim nei louin, a hilh vek sipsip hi. Tua khitin, Eli in: Amah Tangtawn Toupa hiven, a mitmuha hoih a sak bangbang hih hen, a chi hi. 19 Samuel hong khanlet bangbangin Tangtawn Toupa'n a ompih a, ama'n a thugen lei a dengsak kei hi. 20 Tuachi-in, Dan apan Beersheba dongin, Israelte khempeuh in, Samuel zaw Tangtawn Toupa' kamsang khata hihkip ahita, chih a meltheih uhi. 21 Shilo ah Tangtawn Toupa a kilaak zom zel a, a thu tungtawnin Samuel kiang ah amah kipulaakin a kitheisak hi.

1 Samuel 4

1 Tuachi-in, Samuel' thugen Israelte khempeuh kiang hong tung hi.

Filistiate'n Pathian' Thukhun Singkuang Laksak

Hichi hong hi a, Israelte, Filistiate dou dingin a kuankhia uhi. Israelte'n Ebenezer ah giahphual a sat uh a, Filistiate'n Afek ah giahphual a sat uhi. 2 Israelte maituah dingin, Filistiate'n panmun khawhin a na kibukhin uhi. Tua banga kidouna hong natsiat takin, Israelte bel Filistiate' zawhin a om uh a, Filistiate'n tua kidouna phual ah Israelte 4,000 khawng a that uhi. 3 Israel sepaihte giahphuala a kiik takun, Israel upate'n: Banghanga Tangtawn Toupa'n tuni-a Filistiate' maia hon vuallelsak ahia? Tangtawn Toupa' thukhun singkuang in eite hon zuih theih nading leh i melmate khut apan hon hutkhiak theih nadingin, Shilo apan paw ni, a chi uhi. 4 Tuachi-in, mipite'n Shilo ah mi a sawl uh a, tua mite'n cherubte' kala tupa Tangtawn Toupa Vanglianpen' thukhun singkuang hon pua uhi. Eli' tapa nihte Hofni leh Fineha in tua ah Pathian' thukhun singkuang a ompih uhi. 5 Tangtawn Toupa' thukhun singkuang tua giahphual hong tun takin, Israelte khempeuh a awng uh a, lei a liing zou hiai hi. 6 Filistiate'n tua awng husa a zak takun, Hebru giahphuala hiai awng husa bang a maia? a chi uhi. Tangtawn Toupa' singkuang giahphual hong tung ahi, chih a theih takun, 7 Filistiate a lau uhi. Giahphuala pathian khat hong tung ahi. I tung gik e! Hibang mahmah om ngei nai kei. 8 I tung gik e! Hiai pathian hatte' khut apan kua'n i hinna hon humbit ding ahia? Gamdai-gamkeua hipi namkima Aiguptate thuaksak hiai pathiante ahi. Thahat suah un, Filistiate aw! Pasal suah un, noute nuaia amaute a om bang ua, amaute nuaia noute om ding na hi uh. Pasal suah unla, gal dou un! a kichi uhi. 10 Tua bangin Filistiate a pang uh a, Israelte a vuallel uh a, a puanbuk uah a tailut tek uhi. Gala si a tam mahmah a, Israelte'n zong khe sepaih 30,000 a mansuah uhi. nFilistiate'n Pathian' singkuang a laksak uh a, Eli' tapa nihte Hofni leh Fineha zong a si uhi.

Eli' Sihna

12 Tua ni mahin, Benjamin mi khat, kidouna apan hong tai a, Shilo ah a vahawh hi. A puansilhte khempeuh a keekgawp a, a luzang ah leivui a khu hi. 13 Amah hong tun laitakin, Eli zong lam gei ah tutphah tunga tuin a na om hi. Pathian singkuang tawh kisaia lunglau ahih mana, thu ngaka na om ahi. Tua khualtaipa khawpi sung hong lut a, bang thiltungta hiam chih a gen takin, khawpi bupin a kikou vengvung uhi. 14 Eli in tua kikou husa a zak takin: Hiai kikou husa bang hang hiam, chi-in a kan hi. Tua khualtaipa Eli kiang ah kinawhtakin hong taai hi. 15 Eli bel kum 98-a upa ahita a, a mit a mialta a, khua a mu thei nawn kei hi. 16 Tua khualtaipa'n Eli kiang ah: Kidouna phual apan hong tung phet mah ka hi. Tuni mahmaha kidouna phual apan hong taai ka hi, chi-in a hilh hi. Eli in: Ka tapa, bang thil a tunga? chi-in a dong hi. Thu hon pua khualtaaipa'n: Filistiate' maia Israelte taaikekta a, mi tampitak si ahi. Na tapa nihte Hofni leh Fineha zong si uh a, Pathian' singkuang zong hon laaksak uh ahi, a chi hi 18 Pathian' singkuang hong kigen khak takin, Eli, kongpi geia a tutna apan a thalkiak hi. Amah teekta a, gik mahmah ahih manin, a ngawng a kitan a, a si hi. Amah Israelte vaihawma a pan sung kum 40 ahi. 19 A mounu, Fineha' zi a gailai ahi a, a nausuah hun dekta ahi. Pathian' singkuang kilaaksak thu, a pasal' pa leh ama' pasal sih thu a zaaktakin nauvei natna in a pha a, a nau a suak hi. Ahihhangin, nauvei natna a thuak zou kei hi. Si dingin a kisa a, amah khoi numei in lah: Lungke ken, tapa nei na hi, a chi hi. Ahihhangin, dawn lah a dawng kei a, ngaihsak zong a ngaihsak kei hi. 21 Ama'n: Thupina in Israel nuseta hi, chi-in, tua pasal naungek' min dingin, Ikhabod a phuak hi. Tua bel, Pathian' singkuang kilaaksakna, a pasal' pa leh ama' pasal sihna hang ahi.2 Ama'n: Pathian' singkuang laaksak-a omta a, thupina in Israel nuseta hiven, a chi hi.

1 Samuel 5

Ashdod leh Ekron-a Pathian' Singkuang tunga Filistiate' Mawhna 1 Filistiate'n Pathian' singkuang a laaksak nungun, Ebenezar apan Ashdod ah a pua uhi. 2 Tua nungin Dagon' tempul sung ah a pawlut uh a, Dagon kiang mahmah ah a koih uhi. 3 Ashdod mipite a zingchiang zingsang beltaka a thawhkhiak takun, ngai in, Tangtawn Toupa' singkuang maia Dagon khuppuk a na om hi! Amaute'n Dagon a phong uh a, a mun ngei ah a koih kik uhi. 4 Ahihhangin, a zing nawna a thawhkhiak takun, ngai in, Tangtawn Toupa' singkuang maia Dagon khuppukin a na om zel hi! Dagon' lutang leh a khut