Klei Blŭ Hdĭp
1 Hlăk mphŭn dơ̆ng mâo leh Klei Blŭ, Klei Blŭ dôk mbĭt hŏng Aê Diê, leh anăn Klei Blŭ jing Aê Diê. 2 Klei Blŭ dôk mơ̆ng mphŭn mbĭt hŏng Aê Diê. 3 Hŏng Ñu Aê Diê hrih jih jang mnơ̆ng, leh anăn amâo mâo sa mta mnơ̆ng hlăm jih mnơ̆ng hrih leh jing ôh tơdah amâo mâo Ñu mbĭt. 4 Hlăm Ñu mâo klei hdĭp, leh anăn klei hdĭp anăn jing klei mngač kơ mnuih. 5 Klei mngač mtrang hlăm klei mmăt, leh anăn klei mmăt amâo mâo klei dưi hŏng klei mngač ôh. 6 Mâo sa čô mnuih Aê Diê tiŏ hriê, anăn gơ̆ Y-Yôhan. 7 Gơ̆ hriê leh čiăng hưn bi sĭt brei arăng thâo kral klei mngač, čiăng kơ jih jang mnuih dưi đăo. 8 Gơ̆ pô amâo jing klei mngač ôh, ƀiădah gơ̆ hriê hưn bi sĭt kơ klei mngač. 9 Klei mngač anăn jing klei mngač sĭt, tơdah Ñu truh ti lăn ala, Ñu mtrang kơ grăp čô mnuih. 10 Klei Blŭ dôk leh hlăm lăn ala, leh anăn hŏng Ñu mơh Aê Diê hrih leh lăn ala, ƀiădah lăn ala amâo thâo kral Ñu ôh. 11 Ñu hriê leh kơ čar Ñu pô, ƀiădah phung ƀuôn sang Ñu pô amâo jum Ñu ôh. 12 ƀiădah hlei pô jum Ñu, čiăng lač hlei pô đăo kơ anăn Ñu, Ñu brei kơ mnuih anăn klei dưi jing anak Aê Diê. 13 Phung anăn mâo klei kkiêng, amâo djŏ ôh tui si êrah, kăn djŏ tui si kđeh čiăng amâodah tui si klei ung čiăng rei, ƀiădah tui si klei Aê Diê pô čiăng. 14 Klei Blŭ bliư̆ jing kđeh leh anăn dôk mbĭt hŏng drei bŏ hŏng klei pap leh anăn klei sĭt nik. Hmei ƀuh leh klei guh kơang Ñu jing klei guh kơang Ama brei kơ Anak Ñu mâo knŏng sa čô. 15 Anei klei Y-Yôhan hưn djŏ kơ Ñu êjai iêu mthưr kơ phung lu, “Kơ Pô anei yơh kâo hưn leh snei, ‘Pô hriê êdei kơ kâo jing prŏng hĭn kơ kâo, kyuadah Ñu mâo leh êlâo hĭn kơ kâo.’ ” 16 Leh anăn mơ̆ng klei Ñu bŏ dlai hŏng klei pap, jih jang drei mă tŭ, leh klei pap anei lŏ thiăm klei pap mkăn. 17 Kyuadah Aê Diê brei leh klei bhiăn hŏng Y-Môis; ƀiădah klei pap leh anăn klei sĭt nik mâo hŏng Yêsu Krist. 18 Amâo mâo sa čô mnuih tuôm ƀuh Aê Diê ôh; Anak mâo knŏng sa čô, Gơ̆ jing Aê Diê mơh, Pô dôk ti djiêu Ama, Gơ̆ yơh bi êdah leh Aê Diê arăng amâo tuôm ƀuh ôh.
Klei Y-Yôhan Pô Ngă ƀaptem Hưn
19 Snei klei Y-Yôhan hưn tơdah phung Yuđa tiŏ nao phung khua ngă yang leh anăn phung Lêwi mơ̆ng ƀuôn Yêrusalem êmuh kơ ñu, “Hlei ih jing?” 20 Y-Yôhan hưn leh anăn amâo hngah ôh. Ñu hưn, “Kâo amâo jing Yang Krist ôh.” 21 Leh anăn digơ̆ êmuh ñu, “Snăn si ngă, ih jing Y-Êli mơ̆?” Ñu lač, “Kâo amâo jing Y-Êli ôh.” Digơ̆ lŏ êmuh, “Ih jing khua pô hưn êlâo mơ̆?” Ñu lŏ wĭt lač, “Hơăi.” 22 Snăn digơ̆ lač kơ ñu, “Snăn hlei ih jing lĕ? Brei hmei mâo klei dưi lŏ wĭt lač kơ phung tiŏ hriê hmei leh. Hlei ih lač kơ ih pô jing?” 23 Ñu lač, “Kâo jing asăp sa čô mnuih hưn kraih hlăm kdrăn tač, ‘Mkra bi dap êlan Khua Yang,’ tui si khua pô hưn êlâo Y-Êsai lač leh.” 24 Leh tinăn, mâo đa đa mnuih phung Pharisi tiŏ hriê, 25 digơ̆ êmuh kơ Y-Yôhan, “Tơdah ih amâo jing Yang Krist ôh, kăn djŏ Y-Êli, kăn djŏ khua pô hưn êlâo rei, snăn si ih dưi ngă ƀaptem lĕ?” 26 Y-Yôhan lŏ wĭt lač kơ digơ̆, “Kâo dê ngă ƀaptem hŏng êa, ƀiădah mâo sa čô dôk ti krah diih, Pô anăn diih amâo thâo kral ôh, 27 Pô anăn hriê êdei kơ kâo. Kâo amâo năng kleh klei klĭt juă Ñu ôh.” 28 ƀiădah jih klei anăn truh hlăm ƀuôn ƀêthani ti hang nah dih êa krông Yurdan, anôk Y-Yôhan dôk ngă ƀaptem.
Êđai Biăp Aê Diê
29 Hruê mgi Y-Yôhan lŏ ƀuh Yêsu hriê kơ ñu leh anăn ñu lač, “Nĕ anei, Êđai Biăp Aê Diê, Pô lăm hĕ klei soh lăn ala! 30 Ñu yơh jing Pô kâo hưn leh, lač, ‘Êdei kơ kâo mâo sa čô mnuih hriê, Pô prŏng hĭn kơ kâo, kyuadah mâo leh Ñu êlâo kơ kâo.’ 31 Kâo pô amâo tuôm thâo ôh Ñu jing Pô srăng truh, ƀiădah kyua klei anei kâo hriê ngă ƀaptem hŏng êa, čiăng bi êdah Ñu kơ phung Israel.” 32 Y-Yôhan hưn snei, “Kâo ƀuh leh Yang Mngăt Jăk trŭn mơ̆ng adiê msĕ si sa drei mgăm, dôk ti dlông Ñu. 33 Kâo pô amâo tuôm thâo ôh Ñu jing Pô srăng truh, ƀiădah Pô tiŏ hriê kâo ngă ƀaptem hŏng êa lač leh kơ kâo, ‘Pô ih ƀuh Yang Mngăt Jăk trŭn leh anăn dôk, Ñu yơh jing Pô ngă ƀaptem hŏng Yang Mngăt Jăk.’ 34 Kâo ƀuh leh, leh anăn kâo hưn leh Pô anei jing Anak Aê Diê.”
Phung ƀĭng Kna Yêsu Tal Êlâo
35 Tơl si mgi Y-Yôhan lŏ dôk mbĭt hŏng dua čô hlăm phung ƀĭng kna ñu; 36 ñu dlăng kơ Yêsu êjai Yêsu êbat, leh anăn ñu lač, “Duh adih, Êđai Biăp Aê Diê!” 37 Dua čô ƀĭng kna anăn hmư̆ klei ñu lač, leh anăn digơ̆ tui hlue Yêsu. 38 Yêsu wir dlăng leh anăn ƀuh digơ̆ tui hlue, snăn Yêsu lač kơ digơ̆, “Ya diih duah?” Digơ̆ lač kơ Ñu, “Rabi (čiăng lač Nai), ti anôk ih dôk?” 39 Yêsu lač kơ digơ̆, “Hriê dlăng bĕ.” Digơ̆ nao leh anăn ƀuh anôk Ñu dôk; leh anăn digơ̆ dôk mbĭt hŏng Ñu hruê anăn, kyuadah truh leh pă mông tlam. 40 Y-Andrê adei Y-Simôn Pêtrôs jing sa čô hlăm dua čô hmư̆ klei Y-Yôhan blŭ anăn leh anăn tui hlue Yêsu. 41 Êlâo hĭn ñu duah ayŏng ñu Y-Simôn, leh anăn lač kơ gơ̆, “Hmei ƀuh leh Yang Mêsi” (čiăng lač Yang Krist). 42 Ñu atăt ba Y-Simôn kơ Yêsu. Yêsu dlăng kơ gơ̆ leh anăn lač, “Ih jing Y-Simôn anak Y-Yôhan. Arăng srăng pia kơ ih Y-Sêphas” (čiăng lač Pêtrôs).
Yêsu Iêu Y-Philip leh anăn Y-Natanel
43 Hruê mgi Yêsu čiăng nao kơ čar Galilê. Ñu tuôm hŏng Y-Philip leh anăn lač kơ gơ̆, “Tui hlue kâo bĕ.” 44 Y-Philip jing sa čô mnuih ƀuôn Betsaida, ƀuôn Y-Andrê leh anăn Y-Pêtrôs. 45 Y-Philip duah Y-Natanel leh anăn lač kơ gơ̆, “Hmei ƀuh leh Pô Y-Môis čih hưn leh hlăm klei bhiăn, leh anăn Pô anăn phung khua pô hưn êlâo hưn msĕ mơh, jing Yêsu ƀuôn Nasaret, anak Y-Yôsep.” 46 Y-Natanel lač kơ ñu, “Mâo mơ̆ mnơ̆ng jăk kbiă hriê mơ̆ng ƀuôn Nasaret?” Y-Philip lač kơ gơ̆, “Hriê dlăng bĕ.” 47 Yêsu ƀuh Y-Natanel hriê kơ Ñu, leh anăn Ñu lač kơ gơ̆, “Nĕ anei, sa čô Israel sĭt, hlăm ñu amâo mâo klei wê ôh!” 48 Y-Natanel lač kơ Yêsu, “Si ih thâo kral kâo lĕ?” Yêsu lŏ wĭt lač kơ gơ̆, “Êlâo Y-Philip iêu ih, êjai ih dôk ti gŭ ana boh hra, kâo ƀuh ih leh.” 49 Y-Natanel lŏ wĭt lač kơ Yêsu, “Ơ Nai, ih jing Anak Aê Diê! Ih jing Mtao phung Israel!” 50 Yêsu lač kơ gơ̆, “Kyua klei kâo lač kâo ƀuh ih dôk ti gŭ ana boh hra anăn hĕ ih đăo? Ih srăng ƀuh lu klei prŏng hĭn kơ anăn.” 51 Leh anăn Yêsu lač kơ gơ̆, “Kâo lač kơ diih klei sĭt nik, diih srăng ƀuh adiê pŏk mdah, leh anăn phung dĭng buăl jăk Aê Diê đĭ leh anăn trŭn ti Anak Mnuih.”
Klei Bi Kuôl Ung Mô̆ Ti ƀuôn Kana
1 Tlâo hruê êdei kơ anăn mâo klei bi kuôl ung mô̆ ti ƀuôn Kana hlăm čar Galilê. Amĭ Yêsu tinăn mơh; 2 arăng jak wăt Yêsu mơh, mbĭt hŏng phung ƀĭng kna Ñu nao kơ klei bi kuôl anăn. 3 Tơdah jih leh kpiê, amĭ Yêsu lač kơ Yêsu, “Diñu amâo lŏ mâo kpiê ôh.” 4 Yêsu lač kơ amĭ Ñu, “Ơ amĭ, ya klei djŏ hĕ hŏng ih bruă kâo anăn? Mông kâo ka truh ôh.” 5 Amĭ Ñu lač kơ phung dĭng buăl, “Ngă bĕ tui si klei Ñu mtă kơ diih.” 6 Tinăn mâo năm boh čeh ngă hŏng boh tâo, pioh yua kơ klei bi doh tui si klei bhiăn phung Yuđa. Grăp boh čeh dưi mgơ̆ng hlăm brô sa êtuh lit êa. 7 Yêsu lač kơ diñu, “Bi bŏ jih čeh anăn hŏng êa.” Diñu bi bŏ ƀim jih boh čeh anăn. 8 Yêsu lač kơ diñu, “Tuah ba êa anei kơ pô kiă klei huă mnăm.” Snăn diñu tuah ba yơh. 9 Tơdah pô kiă klei huă mnăm djiêl êa anăn lŏ bliư̆ jing kpiê leh, leh anăn amâo thâo ôh mơ̆ng kbiă hriê kpiê anăn (ƀiădah phung dĭng buăl tuah êa anăn thâo leh), pô kiă klei huă mnăm iêu êkei dôk mô̆ 10 leh anăn lač kơ gơ̆, “Grăp čô mnuih mdơ̆ng brei arăng mnăm kpiê jăk êlâo; leh anăn tơdah arăng mnăm lu leh, ñu brei mnăm kpiê êdu. ƀiădah ih pioh kpiê jăk tơl ară anei.” 11 Anei yơh klei bi knăl mdê tal êlâo hĭn Yêsu ngă ti ƀuôn Kana hlăm čar Galilê, bi êdah klei guh kơang Ñu leh anăn phung ƀĭng kna đăo kơ Ñu. 12 Leh klei anăn Ñu trŭn nao kơ ƀuôn Kapernum mbĭt hŏng amĭ Ñu, phung adei, leh anăn phung ƀĭng kna Ñu; diñu dôk tinăn ƀiă hruê.
Yêsu Nao kơ Sang Kkuh Mpŭ
13 Hruê Knăm Klei Găn phung Yuđa giăm truh, leh anăn Yêsu đĭ nao kơ ƀuôn Yêrusalem. 14 Hlăm sang kkuh mpŭ Ñu ƀuh phung čhĭ êmô, biăp, leh anăn mgăm, leh anăn phung mlih prăk dôk mă bruă digơ̆. 15 Yêsu kuĭ klei hnuăt, leh anăn suôt jih jang phung anăn mơ̆ng sang kkuh mpŭ, wăt biăp leh anăn êmô. Ñu tuh hĕ asăr prăk phung bi mlih prăk leh anăn klư̆ hĕ jhưng digơ̆. 16 Ñu lač kơ phung čhĭ mgăm anăn, “Mă ba dŏ anei kơ tač. Đăm mjing sang Ama kâo jing sang mnia ôh.” 17 Phung ƀĭng kna Ñu hdơr kơ Klei Aê Diê Blŭ čih leh, “Klei hur har kơ sang ih čuh hlăm kâo msĕ si pui.” 18 Phung Yuđa lač kơ Ñu, “Ya klei yuôm bhăn ih bi êdah kơ hmei brei ih dưi ngă snăn?” 19 Yêsu lač, “Bi rai hĕ sang kkuh mpŭ anei, leh anăn kâo srăng lŏ mdơ̆ng ñu hlăm tlâo hruê.” 20 Snăn phung Yuđa lač, “Arăng mdơ̆ng sang kkuh mpŭ anei pă pluh năm thŭn leh, leh anăn ih srăng lŏ mdơ̆ng gơ̆ knŏng hlăm tlâo hruê mơ̆?” 21 ƀiădah Ñu blŭ kơ sang kkuh mpŭ anăn jing asei mlei Ñu pô. 22 Snăn yơh leh Ñu kbiă lŏ hdĭp mơ̆ng phung djiê, phung ƀĭng kna Ñu hdơr kơ klei Ñu lač anăn; leh anăn digơ̆ đăo kơ Klei Aê Diê Blŭ anăn leh anăn kơ klei Yêsu lač leh.
Yêsu Thâo Kral Jih Jang Mnuih
23 Êjai Yêsu dôk hlăm ƀuôn Yêrusalem ti hruê Knăm Klei Găn, lu mnuih đăo kơ anăn Ñu, tơdah digơ̆ ƀuh klei bi knăl yuôm bhăn Ñu ngă. 24 ƀiădah Yêsu amâo knang kơ digơ̆ ôh, kyuadah Ñu thâo kral jih jang mnuih, 25 leh anăn amâo yuôm ôh arăng hưn bi êdah ai tiê mnuih, kyuadah Ñu pô thâo leh si ai tiê mnuih jing.
Yêsu leh anăn Y-Nikôdem
1 Mâo sa čô hlăm phung Pharisi, anăn ñu Y-Nikôdem, sa čô khua hlăm phung Yuđa. 2 Ñu nao kơ Yêsu êjai mlam leh anăn lač kơ gơ̆, “Rabi, hmei thâo ih jing sa čô nai kbiă hriê mơ̆ng Aê Diê; kyuadah arăng amâo dưi ngă ôh klei yuôm bhăn ih ngă anei, knŏng tơdah Aê Diê dôk mbĭt hŏng ñu.” 3 Yêsu lŏ wĭt lač kơ ñu, “Kâo lač kơ ih klei sĭt nik, tơdah sa čô amâo mâo klei lŏ bi kkiêng mrâo, ñu amâo dưi ƀuh ƀuôn ala mtao Aê Diê ôh.” 4 Y-Nikôdem lač kơ gơ̆, “Si sa čô mnuih dưi mâo klei lŏ bi kkiêng tơdah ñu mduôn leh? Dưi mơ̆ ñu lŏ mŭt tal dua hlăm tian amĭ ñu leh anăn lŏ kkiêng?” 5 Yêsu lŏ wĭt lač, “Kâo lač kơ ih klei sĭt nik, tơdah sa čô mnuih amâo mâo klei kkiêng hŏng êa leh anăn hŏng Mngăt Myang, ñu amâo dưi mŭt hlăm ƀuôn ala mtao Aê Diê ôh. 6 Ya mnơ̆ng kkiêng hŏng kđeh jing kđeh, leh anăn ya mnơ̆ng kkiêng hŏng Mngăt Myang jing mngăt. 7 Đăm bi kngăr ôh kơ klei kâo lač kơ ih, ‘Brei diih mâo klei lŏ bi kkiêng mrâo+ bĕ.’ 8 Angĭn thut ti anôk ñu čiăng, leh anăn ih hmư̆ ênai ñu, ƀiădah ih amâo thâo mơ̆ng ñu kbiă hriê, kăn thâo ti anôk ñu nao rei. Msĕ snăn mơh kơ grăp čô kkiêng hŏng Yang Mngăt Jăk.” 9 Y-Nikôdem lač kơ gơ̆, “Si klei anei dưi jing lĕ?” 10 Yêsu lŏ wĭt lač kơ ñu, “Ih jing nai prŏng kơ phung Israel, ƀiădah ih amâo thâo săng ôh klei anei! 11 Kâo lač kơ ih klei sĭt nik, hmei blŭ ya klei hmei thâo, leh anăn hưn ya klei hmei ƀuh leh; ƀiădah diih amâo tŭ ôh klei hmei hưn. 12 Tơdah kâo hưn leh kơ diih klei hlăm lăn ala leh anăn diih amâo đăo ôh, si diih dưi đăo tơdah kâo hưn kơ diih klei hlăm adiê? 13 Amâo mâo sa čô tuôm đĭ nao kơ adiê ôh, ƀiădah knŏng Pô trŭn leh mơ̆ng adiê, jing Anak Mnuih. 14 Msĕ si Y-Môis yơr ala kông ti dlông hlăm kdrăn tač, msĕ snăn mơh arăng srăng yơr Anak Mnuih ti dlông, 15 čiăng kơ hlei pô đăo kơ Ñu dưi mâo klei hdĭp hlŏng lar.” 16 Kyuadah Aê Diê khăp êdimi kơ lăn ala, tơl Ñu brei Anak Ñu pô mâo knŏng sa čô, čiăng kơ hlei pô đăo kơ Anak Ñu anăn amâo rai tuč ôh, ƀiădah mâo klei hdĭp hlŏng lar. 17 Kyuadah Aê Diê tiŏ hriê leh Anak Ñu kơ lăn ala, amâo djŏ čiăng phat kđi lăn ala ôh, ƀiădah čiăng kơ lăn ala dưi mâo klei bi mtlaih hŏng gơ̆. 18 Hlei pô đăo kơ Anak anăn Aê Diê amâo phat kđi ôh. Aê Diê phat kđi leh kơ hlei pô amâo đăo ôh, kyuadah pô anăn amâo đăo ôh kơ anăn Anak Aê Diê mâo knŏng sa čô. 19 Snei jing klei phat kđi: klei mngač truh leh hlăm lăn ala, ƀiădah mnuih khăp kơ klei mmăt lu hĭn kơ klei mngač, kyuadah bruă diñu jing jhat. 20 Kyuadah grăp čô hlei pô ngă klei jhat bi êmut kơ klei mngač, leh anăn amâo hriê ôh kơ klei mngač, huĭ êdah hĕ bruă ñu ngă. 21 ƀiădah hlei pô ngă klei sĭt nik hriê kơ klei mngač, čiăng dưi bi êdah klă ñu ngă leh bruă tui si Aê Diê čiăng.
Yêsu leh anăn Y-Yôhan
22 Leh klei anăn Yêsu leh anăn phung ƀĭng kna Ñu nao kơ čar Yuđa. Tinăn Ñu dôk mbĭt hŏng digơ̆ leh anăn ngă ƀaptem. 23 Y-Yôhan dôk ngă ƀaptem msĕ mơh ti ƀuôn Ênôn giăm ƀuôn Salim, kyuadah mâo lu êa tinăn. Phung ƀuôn sang hriê leh anăn tŭ klei ƀaptem. 24 Arăng ka krư̆ Y-Yôhan ôh. 25 Phung ƀĭng kna Y-Yôhan bi mgăl hŏng sa čô Yuđa kơ klei bi doh. 26 Diñu nao lač kơ Y-Yôhan, “Ơ Nai, pô dôk leh hŏng ih ti hang nah dih êa krông Yurdan, kơ gơ̆ anăn ih hưn bi sĭt leh, nĕ anei gơ̆ dôk ngă ƀaptem, leh anăn jih jang mnuih nao kơ gơ̆ sơăi.” 27 Y-Yôhan lŏ wĭt lač, “Amâo mâo pô dưi mă tŭ sa mnơ̆ng ôh knŏng tơdah Aê Diê brei kơ ñu. 28 Diih pô thâo leh klei kâo hưn, kâo amâo jing Yang Krist ôh, ƀiădah Aê Diê tiŏ hriê kâo êlâo kơ gơ̆. 29 Hlăm klei bi kuôl, mniê dôk ung jing pô pioh kơ êkei dôk mô̆; ƀiădah mah jiăng êkei anăn dôk giăm leh anăn hmư̆ gơ̆, mâo klei mơak êjai hmư̆ asăp êkei dôk mô̆. Snăn yơh klei hơ̆k mơak kâo bŏ dlai. 30 Gơ̆ srăng jing prŏng hĭn, ƀiădah kâo srăng jing điêt hĭn.”
Pô Hriê Mơ̆ng Adiê
31 Pô hriê mơ̆ng dlông jing prŏng hĭn kơ jih jang. Pô kbiă mơ̆ng lăn ala jing pô ti lăn ala, leh anăn ñu blŭ klei lăn ala. Pô hriê mơ̆ng adiê jing ti dlông hĭn kơ jih jang. 32 Ñu hưn ya klei Ñu ƀuh leh anăn hmư̆ leh, ƀiădah amâo mâo pô tŭ ôh klei Ñu hưn. 33 Hlei pô tŭ klei Ñu hưn, bi sĭt kơ Aê Diê jing sĭt. 34 Pô Aê Diê tiŏ hriê leh hưn klei Aê Diê blŭ, kyuadah Aê Diê brei Yang Mngăt Jăk kơ Ñu amâo mâo klei mkă hnơ̆ng ôh. 35 Ama khăp kơ Anak leh anăn jao leh jih jang mnơ̆ng hlăm kngan Ñu sơăi. 36 Hlei pô đăo kơ Anak mâo leh klei hdĭp hlŏng lar; hlei pô amâo gưt kơ Anak amâo srăng ƀuh ôh klei hdĭp, ƀiădah klei Aê Diê ngêñ dôk leh ti ñu.
Yêsu leh anăn Mniê Čar Samari
1 Tơdah Yêsu thâo leh phung Pharisi hmư̆ hing Ñu mjing phung ƀĭng kna leh anăn ngă ƀaptem kơ digơ̆ lu hĭn kơ Y-Yôhan 2 (boh nik nak Yêsu pô amâo tuôm ngă ƀaptem kơ arăng ôh, knŏng phung ƀĭng kna Ñu ngă), 3 Yêsu kbiă mơ̆ng čar Yuđa lŏ wĭt kơ čar Galilê. 4 Êlan Ñu êbat găn čar Samari. 5 Snăn Ñu truh ti sa boh ƀuôn hlăm čar Samari bi anăn ƀuôn Sikar, giăm hma Y-Yakôp brei leh kơ anak gơ̆ Y-Yôsep. 6 Tinăn mâo kbăng êa Y-Yakôp. Yêsu êmăn êbat, snăn Ñu dôk gŭ ti djiêu kbăng êa. Truh leh năng ai pluh dua mông yang hruê dơ̆ng. 7 Mâo sa čô mniê Samari hriê djăt êa. Yêsu lač kơ gơ̆, “Brei êa kâo mnăm đa,” 8 (hlăk anăn phung ƀĭng kna Ñu nao leh kơ ƀuôn čiăng blei mnơ̆ng ƀơ̆ng huă.) 9 Mniê Samari lač kơ Ñu, “Si ngă ih, sa čô Yuđa, akâo mnăm êa kâo, sa čô mniê Samari lĕ?” (Kyuadah phung Yuđa amâo bi mguôp ôh hŏng phung Samari.) 10 Yêsu lŏ wĭt lač kơ gơ̆, “Tơdah ih thâo mnơ̆ng Aê Diê thiê brei, leh anăn tơdah ih thâo kral pô dôk blŭ hŏng ih, lač, ‘Brei êa kâo mnăm đa,’ snăn ih pô srăng akâo kơ Ñu, leh anăn Ñu srăng brei êa hdĭp kơ ih.” 11 Mniê anăn lač kơ Ñu, “Khua ơi, ih amâo mâo mnơ̆ng djăt êa ôh, leh anăn kbăng êa anei êlam; mơ̆ng anôk ih mâo êa hdĭp anăn lĕ? 12 Djŏ mơ̆ ih jing prŏng hĭn kơ aê hmei đưm Y-Yakôp, pô brei leh kơ hmei kbăng êa anei, leh anăn ñu pô wăt phung anak êkei ñu leh anăn êmô ñu mnăm êa anei sơăi?” 13 Yêsu lač kơ gơ̆, “Grăp čô hlei pô mnăm êa anei srăng lŏ mhao, 14 ƀiădah hlei pô mnăm êa kâo brei amâo srăng lŏ mhao ôh; êa kâo brei srăng jing hlăm ñu sa bĭt akŏ êa bluh truh kơ klei hdĭp hlŏng lar.” 15 Mniê anăn lač kơ Ñu, “Khua ơi, brei êa anăn kơ kâo, čiăng kơ kâo amâo lŏ mhao ôh, kăn lŏ hriê djăt tinei rei.” 16 Yêsu lač kơ gơ̆, “Nao iêu ung ih, leh anăn lŏ hriê tinei.” 17 Mniê anăn lŏ wĭt lač kơ Yêsu, “Kâo amâo mâo ung ôh.” Yêsu lač kơ gơ̆, “Djŏ leh ih lač, ‘Kâo amâo mâo ung ôh;’ 18 kyuadah ih mâo leh êma čô ung, leh anăn mnuih ih dôk ară anei amâo djŏ ung ih ôh. Djŏ leh ih lač snăn.” 19 Mniê anăn lač kơ Ñu, “Khua ơi, kâo mĭn ih jing sa čô khua pô hưn êlâo. 20 Phung aê hmei kkuh mpŭ ti dlông čư̆ anei; ƀiădah diih lač hlăm ƀuôn Yêrusalem jing anôk djŏ arăng kkuh mpŭ.” 21 Yêsu lač kơ gơ̆, “Ơ mniê, đăo bĕ kơ kâo, mông giăm truh leh diih amâo srăng kkuh mpŭ ôh kơ Ama ti dlông čư̆ anei, kăn djŏ ti ƀuôn Yêrusalem rei. 22 Diih kkuh mpŭ kơ pô diih amâo thâo kral ôh; bi hmei dê hmei kkuh mpŭ kơ Pô hmei thâo kral leh, kyuadah klei bi mtlaih kbiă hriê mơ̆ng phung Yuđa. 23 ƀiădah mông giăm truh, leh anăn truh leh, tơdah phung kkuh mpŭ sĭt nik srăng kkuh mpŭ kơ Ama hŏng mngăt leh anăn hŏng klei sĭt nik, kyuadah phung kkuh mpŭ msĕ snăn yơh Ama čiăng. 24 Aê Diê jing Mngăt Myang, leh anăn hlei pô čiăng kkuh mpŭ kơ Ñu, brei kkuh mpŭ hŏng mngăt leh anăn hŏng klei sĭt nik.” 25 Mniê anăn lač kơ Yêsu, “Kâo thâo leh Yang Mêsi srăng truh (Pô anăn arăng pia Yang Krist); tơdah Ñu truh, Ñu srăng bi êdah kơ drei jih jang klei.” 26 Yêsu lač kơ ñu, “Kâo gơ̆ yơh, pô dôk blŭ hŏng ih, jing Pô anăn.” 27 Hlăk anăn phung ƀĭng kna Ñu truh. Digơ̆ bi kngăr ƀuh hĕ Ñu dôk blŭ hŏng sa čô mniê, ƀiădah amâo mâo sa čô êmuh kơ Ñu ôh, “Ya ih čiăng?” amâodah, “Si ngă ih dôk blŭ hŏng gơ̆ lĕ?” 28 Snăn mniê anăn lui abŭ êa gơ̆, leh anăn nao kơ ƀuôn, lač kơ phung ƀuôn sang, 29 “Hriê bĕ, dlăng sa čô êkei lač kơ kâo jih jang klei kâo tuôm ngă leh. Pô anei hĕ jing Yang Krist?” 30 Diñu kbiă mơ̆ng ƀuôn leh anăn nao kơ Yêsu. 31 Êjai anăn phung ƀĭng kna mgô̆ Yêsu, “Ơ Nai, huă ƀơ̆ng bĕ.” 32 ƀiădah Ñu lač kơ digơ̆, “Kâo mâo leh sa mnơ̆ng ƀơ̆ng huă ƀiădah diih amâo thâo ôh.” 33 Snăn phung ƀĭng kna bi lač hdơ̆ng digơ̆ pô, “Si ngă, mâo pô ba leh mnơ̆ng ƀơ̆ng huă kơ Ñu hĕ?” 34 Yêsu lač kơ digơ̆, “Mnơ̆ng kâo ƀơ̆ng huă jing klei ngă tui si Pô tiŏ hriê kâo čiăng, leh anăn bi leh bruă Ñu. 35 Amâo djŏ hĕ diih lač, ‘Adôk pă mlan tơl truh yan puôt wiă’? ƀiădah kâo lač kơ diih, kngưr dlăng bĕ ală diih, leh anăn ƀuh hma mâo mdiê ksă man wiă leh. 36 Pô puôt wiă mă tŭ klei mưn, leh anăn mkăm mdiê pioh kơ klei hdĭp hlŏng lar; snăn pô buh leh anăn pô puôt wiă dưi hơ̆k mơak mđrăm mbĭt. 37 Kyuadah snei, klei arăng khăng lač jing sĭt, ‘Sa čô buh, leh anăn sa čô mkăn puôt wiă.’ 38 Kâo tiŏ nao diih puôt wiă mdiê diih amâo tuôm mă bruă ôh. Phung mkăn mă bruă leh, leh anăn diih mŭt leh hlăm bruă diñu.” 39 Mâo lu phung Samari hlăm ƀuôn anăn đăo kơ Yêsu kyua klei mniê anăn hưn, “Ñu hưn kơ kâo jih jang klei kâo ngă leh.” 40 Snăn tơdah phung Samari truh kơ Yêsu, digơ̆ akâo kơ Ñu dôk mbĭt hŏng digơ̆. Leh anăn Ñu dôk tinăn dua hruê. 41 Mâo lu hĭn mnuih đăo kyua klei Yêsu mtô. 42 Digơ̆ lač kơ mniê anăn, “Hmei đăo leh amâo djŏ kyua knŏng klei ih hưn ôh, ƀiădah kyua hmei pô hmư̆ leh, leh anăn hmei thâo sĭt Pô anăn jing Pô Bi Mtlaih lăn ala.” 43 Leh êgao dua hruê, mơ̆ng anăn Yêsu đuĕ nao kơ čar Galilê. 44 Kyuadah Yêsu pô tuôm lač leh arăng amâo mpŭ ôh kơ khua pô hưn êlâo hlăm čar ñu pô. 45 Snăn tơdah Ñu truh ti čar Galilê, phung Galilê jum Ñu, kyuadah digơ̆ ƀuh leh jih jang klei Ñu ngă leh hlăm ƀuôn Yêrusalem ti hruê knăm, kyuadah wăt digơ̆ mơh nao leh kơ hruê knăm anăn.
Yêsu Bi Hlao Anak Êkei Sa Čô Khua Prŏng
46 Snăn Ñu lŏ nao kơ ƀuôn Kana hlăm čar Galilê, anôk Ñu bi mbliư̆ êa jing kpiê. Ti ƀuôn Kapernum mâo sa čô khua prŏng mâo anak êkei dôk ruă. 47 Tơdah gơ̆ hmư̆ leh kơ Yêsu kbiă hriê mơ̆ng čar Yuđa truh ti čar Galilê, gơ̆ nao kwưh kơ Yêsu brei trŭn nao bi hlao anak êkei gơ̆, kyuadah anak êkei gơ̆ giăm djiê leh. 48 Snăn Yêsu lač kơ gơ̆, “Tơdah diih amâo ƀuh ôh klei bi knăl mdê leh anăn klei yuôm bhăn, diih amâo srăng đăo ôh.” 49 Khua anăn lač kơ Yêsu, “Khua ơi, trŭn hriê bĕ, huĭ êlâo kơ anak kâo djiê.” 50 Yêsu lač kơ gơ̆, “Nao bĕ ih; anak êkei ih ăt dôk hdĭp.” Êkei anăn đăo kơ klei Yêsu blŭ leh kơ gơ̆, leh anăn gơ̆ đuĕ wĭt. 51 Êjai gơ̆ êbat ti êlan, phung dĭng buăl gơ̆ bi tuôm hŏng gơ̆ leh anăn hưn kơ anak êkei gơ̆ ăt dôk hdĭp. 52 Snăn gơ̆ êmuh diñu ya mông anak êkei gơ̆ dơ̆ng lưh. Diñu lač kơ gơ̆, “Mbruê ti sa mông tlam gơ̆ hlao êngoh.” 53 Ama êkei anăn thâo jing djŏ mông anăn Yêsu lač leh kơ gơ̆, “Anak êkei ih dôk hdĭp.” Snăn gơ̆ pô leh anăn jih jang mnuih hlăm sang gơ̆ đăo sơăi. 54 Anăn jing klei bi knăl yuôm bhăn tal dua Yêsu ngă tơdah leh Ñu kbiă mơ̆ng čar Yuđa nao kơ čar Galilê.
Yêsu Bi Hlao Mnuih Ti Êa Ênao
1 Êdei kơ klei anăn mâo hruê knăm phung Yuđa, Yêsu đĭ nao kơ ƀuôn Yêrusalem. 2 Hlăm ƀuôn Yêrusalem giăm ƀăng jang Biăp mâo sa êa ênao mâo êma bĭt adring, hlăm klei Hêbrơ arăng pia ƀêtesđa. 3 Ti jih adring anăn mâo lu mnuih ruă duam dôk đih, đa êwiên, đa bum ală, đa đŭt jơ̆ng, đa khăng jơ̆ng kngan. 5 Mâo tinăn sa čô êkei ruă êjai tlâo pluh sa păn thŭn leh. 6 Tơdah Yêsu ƀuh ñu leh anăn thâo leh kơ mnuih anăn dôk đih tinăn sui thŭn leh, Yêsu lač kơ ñu, “Ih čiăng kơ hlao mơ̆?” 7 Mnuih ruă anăn lŏ wĭt lač, “Ơ Khua ơi, kâo amâo mâo mnuih ôh dưm kâo hlăm êa ênao êjai êa ktlăk; ƀiădah êjai kâo čiăng trŭn lŏ mâo mnuih mkăn trŭn hĕ êlâo hĭn ti kâo.” 8 Yêsu lač kơ ñu, “Kgŭ bĕ, mă ba añuê buk ih leh anăn êbat.” 9 Mtam mnuih anăn hlao yơh. Ñu mă ba añuê buk ñu leh anăn êbat. Hruê anăn jing hruê sabat. 10 Snăn phung Yuđa lač kơ mnuih mrâo hlao anăn, “Hruê anei jing hruê sabat, amâo bhiăn ôh kơ ih klam ba añuê buk ih.” 11 ƀiădah êkei anăn lŏ wĭt lač kơ diñu, “Pô bi hlao kâo lač kơ kâo, ‘Mă ba añuê buk ih leh anăn êbat.’ ” 12 Diñu êmuh kơ gơ̆, “Hlei lač kơ ih, ‘Klam ba añuê buk ih leh anăn êbat?’ ” 13 Mnuih mrâo hlao anăn amâo thâo kral ôh hlei pô bi hlao gơ̆, kyuadah Yêsu dêč đuĕ leh, kyuadah mâo phung lu tinăn. 14 Sui ƀiă tinăn Yêsu ƀuh êkei anăn hlăm sang kkuh mpŭ, leh anăn lač kơ gơ̆, “Nĕ anei, ih hlao leh. Đăm lŏ ngă soh ôh, huĭdah klei kjham hĭn srăng truh kơ ih.” 15 Êkei anăn đuĕ nao hưn kơ Phung Yuđa, Yêsu yơh bi hlao gơ̆ leh. 16 Phung Yuđa dơ̆ng ngă jhat kơ Yêsu kyua Ñu bi hlao leh mnuih anăn hruê sabat. 17 ƀiădah Yêsu lŏ wĭt lač kơ diñu, “Ama kâo ăt mă bruă nanao, leh anăn kâo mă bruă msĕ mơh.” 18 Kyua klei anăn, phung Yuđa duah ktang hĭn čiăng bi mdjiê Ñu, kyuadah amâo djŏ knŏng Ñu gao hruê sabat ôh, ƀiădah msĕ mơh Ñu pia Aê Diê jing Ama Ñu, Ñu bi mđơr Ñu pô hŏng Aê Diê.
Klei Kơhưm Anak Aê Diê
19 Yêsu lač kơ digơ̆, “Kâo lač kơ ih klei sĭt nik, Anak amâo dưi ngă sa mta bruă tui si Ñu pô čiăng ôh, ƀiădah knŏng msĕ si Ñu ƀuh Ama ngă. Kyuadah ya bruă Ama ngă, Anak ngă msĕ mơh. 20 Kyuadah Ama khăp kơ Anak, leh anăn bi êdah kơ Anak jih jang bruă Ñu ngă. Leh anăn Ñu srăng bi êdah kơ Anak bruă prŏng hĭn kơ anei, čiăng bi kngăr diih. 21 Kyuadah msĕ si Ama bi kbiă lŏ hdĭp phung djiê leh anăn brei klei hdĭp kơ diñu, msĕ snăn mơh Anak brei klei hdĭp kơ hlei pô gơ̆ čiăng. 22 Ama amâo phat kđi kơ arăng ôh, ƀiădah Ñu jao jih klei phat kđi kơ Anak Ñu, 23 čiăng kơ jih jang srăng mpŭ kơ Anak, msĕ si diñu mpŭ kơ Ama. Hlei pô amâo mpŭ kơ Anak, kăn mpŭ rei kơ Ama, Pô tiŏ hriê gơ̆. 24 Kâo lač kơ ih klei sĭt nik, hlei pô hmư̆ klei kâo blŭ leh anăn đăo kơ Pô tiŏ hriê kâo, mâo leh klei hdĭp hlŏng lar; ñu amâo srăng truh kơ klei phat kđi ôh, ƀiădah ñu găn leh klei djiê nao kơ klei hdĭp. 25 Kâo lač kơ ih klei sĭt nik, mông giăm truh leh anăn truh leh, tơdah phung djiê srăng hmư̆ asăp Anak Aê Diê; leh anăn phung hmư̆ asăp gơ̆ srăng hdĭp. 26 Kyuadah msĕ si Ama mâo klei hdĭp hlăm Ñu pô, msĕ snăn mơh Ñu brei leh kơ Anak mâo klei hdĭp hlăm gơ̆ pô. 27 Leh anăn Ama brei kơ Anak klei dưi phat kđi, kyuadah gơ̆ jing Anak Mnuih. 28 Đăm bi kngăr ôh kyua klei anăn; kyuadah mông srăng truh tơdah jih jang phung dôk hlăm msat srăng hmư̆ asăp gơ̆ 29 leh anăn kbiă. Hlei pô ngă jăk srăng kbiă lŏ hdĭp kơ klei hdĭp, ƀiădah hlei pô ngă jhat srăng kbiă lŏ hdĭp kơ klei phat kđi.”
Klei Hưn Bi Sĭt kơ Yêsu
30 “Hŏng klei dưi kâo pô kâo amâo dưi ngă sa mta klei ôh. Kâo phat kđi tui si kâo hmư̆; leh anăn klei kâo phat kđi jing kpă, kyuadah kâo amâo duah klei kâo pô čiăng ôh, ƀiădah tui si klei pô tiŏ hriê kâo čiăng. 31 Tơdah kâo hưn bi sĭt kơ kâo pô, klei kâo hưn amâo jing sĭt ôh. 32 Mâo sa čô mkăn hưn bi sĭt kơ kâo, leh anăn kâo thâo klei ñu hưn bi sĭt kơ kâo jing klei sĭt nik. 33 Diih tiŏ nao leh arăng êmuh Y-Yôhan, leh anăn gơ̆ hưn bi sĭt kơ klei sĭt nik. 34 Amâo djŏ ôh kâo čiăng mâo klei hưn bi sĭt mơ̆ng mnuih; ƀiădah kâo lač klei anăn čiăng kơ diih dưi tlaih. 35 Y-Yôhan jing pui kđen dôk trơ̆ng leh anăn mtrang mngač, leh anăn diih čiăng dôk mơak bhiâo hlăm klei mngač gơ̆. 36 ƀiădah klei hưn bi sĭt kâo mâo jing prŏng hĭn kơ klei Y-Yôhan hưn; kyuadah bruă Ama brei kâo bi leh, bruă anăn kâo mă ară anei hin, hưn bi sĭt kơ kâo kơ Ama tiŏ hriê kâo leh. 37 Leh anăn Ama, Pô tiŏ hriê kâo leh, hưn bi sĭt kơ kâo. Diih amâo tuôm hmư̆ asăp Ñu ôh, kăn diih tuôm ƀuh rup asei mlei Ñu rei; 38 leh anăn klei Ñu blŭ amâo dôk hlăm diih ôh, kyuadah diih amâo đăo ôh kơ Pô Ñu tiŏ hriê leh. 39 Diih ksiêm bi nik Klei Aê Diê Blŭ, kyuadah diih mĭn hlăm anăn diih mâo klei hdĭp hlŏng lar. Klei Aê Diê Blŭ anăn yơh hưn bi sĭt kơ kâo; 40 ƀiădah diih hngah amâo čiăng hriê kơ kâo ôh čiăng mă tŭ klei hdĭp. 41 Kâo amâo mă tŭ ôh klei guh kơang mơ̆ng phung mnuih. 42 ƀiădah kâo thâo diih amâo mâo klei Aê Diê khăp dôk hlăm diih ôh. 43 Kâo hriê leh hlăm anăn Ama kâo, leh anăn diih amâo jum kâo ôh; tơdah pô mkăn hriê hlăm anăn gơ̆ pô, diih srăng jum gơ̆. 44 Si diih dưi đăo, tơdah diih mă tŭ klei guh kơang hdơ̆ng diih pô, leh anăn amâo duah ôh klei guh kơang kbiă hriê mơ̆ng Aê Diê mâo knŏng sa čô? 45 Đăm mĭn ôh kâo srăng kčŭt kơ diih kơ Ama. Y-Môis yơh jing pô kčŭt kơ diih, kơ ñu anăn diih čang hmăng. 46 Tơdah diih đăo leh kơ Y-Môis, diih srăng đăo kơ kâo msĕ mơh, kyuadah ñu čih leh klei djŏ kơ kâo. 47 ƀiădah tơdah diih amâo đăo ôh kơ klei ñu čih, si diih srăng đăo kơ klei kâo blŭ lĕ?”
Yêsu Čiêm Êma Êbâo Čô Mnuih
1 Leh klei anăn Yêsu găn nao kơ hang nah dih êa ksĭ Galilê, lŏ bi anăn êa ksĭ Tiberias. 2 Mâo phung lu tui hlue Ñu, kyuadah digơ̆ ƀuh klei bi knăl yuôm bhăn Yêsu bi hlao leh phung ruă duam. 3 Yêsu đĭ čư̆ leh anăn dôk gŭ tinăn mbĭt hŏng phung ƀĭng kna Ñu. 4 Hruê Knăm Klei Găn phung Yuđa giăm truh leh. 5 Êjai Yêsu kngưr ală, Ñu ƀuh phung lu hriê kơ Ñu, snăn Yêsu lač kơ Y-Philip, “Ti anôk drei srăng blei kpŭng, čiăng kơ phung ƀuôn sang anei dưi ƀơ̆ng?” 6 Yêsu lač klei anei čiăng lông dlăng Y-Philip, kyuadah Ñu pô thâo leh ya Ñu srăng ngă. 7 Y-Philip lŏ wĭt lač kơ Ñu, “Blei kpŭng hŏng ênoh dua êtuh đơniê amâo djăp ôh kơ grăp čô dưi ƀơ̆ng ƀiă.” 8 Sa čô hlăm phung ƀĭng kna Ñu, Y-Andrê adei Y-Simôn Pêtrôs, lač kơ Yêsu, 9 “Mâo sa čô hđeh êdam tinei mâo êma klŏ kpŭng mdiê ôrgơ leh anăn dua drei kan; ƀiădah si dưi djăp kơ mnuih lu lĭn?” 10 Yêsu lač, “Brei phung ƀuôn sang dôk gŭ.” Mâo lu rơ̆k tinăn, snăn phung diñu dôk gŭ, mâo hlăm brô êma êbâo čô êkei. 11 Leh anăn Yêsu mă kpŭng anăn, leh anăn tơdah leh Ñu bi mni kơ Aê Diê, Ñu bi mbha kơ phung dôk gŭ tinăn. Ñu bi mbha wăt kan mơh dŭm digơ̆ čiăng. 12 Leh digơ̆ ƀơ̆ng tơl trei, Yêsu lač kơ phung ƀĭng kna Ñu, “Duñ bĕ djah kpŭng kan êbeh, đăm bi luč hơăi mang ôh.” 13 Snăn diñu hrui djah anăn leh anăn bi bŏ pluh dua bai hŏng djah mơ̆ng êma klŏ kpŭng mdiê ôrgơ, tơdah jih jang mnuih ƀơ̆ng leh. 14 Tơdah phung ƀuôn sang ƀuh klei bi knăl yuôm bhăn Yêsu ngă leh, digơ̆ lač, “Sĭt nik anei jing khua pô hưn êlâo Pô brei hriê kơ lăn ala!” 15 Tơdah Yêsu thâo digơ̆ srăng mă mgô̆ Ñu jing mtao, Ñu lŏ dêč đuĕ phă čư̆ dôk hjăn Ñu pô.
Yêsu Êbat Ti Dlông Êa
16 Tơdah adiê tlam leh, phung ƀĭng kna Ñu trŭn nao kơ êa ksĭ, 17 đĭ sa boh čhŏng, leh anăn dơ̆ng găn êa ksĭ čiăng nao kơ ƀuôn Kapernum. Adiê mmăt leh, leh anăn Yêsu ka truh kơ digơ̆ ôh. 18 Êa ksĭ dơ̆ng poh yă kyuadah mâo angĭn ktang thut. 19 Tơdah digơ̆ wah čhŏng leh hlăm brô dua pluh êma amâodah tlâo pluh stat, digơ̆ ƀuh Yêsu êbat ti dlông êlah êa leh anăn hriê giăm čhŏng. Digơ̆ huĭ. 20 ƀiădah Yêsu lač kơ digơ̆, “Kâo gơ̆ yơh; đăm huĭ ôh.” 21 Leh anăn digơ̆ mơak jum Yêsu hlăm čhŏng. Mtam čhŏng truh ti hang ti anôk digơ̆ čiăng nao.
Phung ƀuôn Sang Duah Yêsu
22 Tơl si mgi phung ƀuôn sang ăt dôk ti hang nah dih êa ksĭ ƀuh knŏng sa boh čhŏng tinăn, leh anăn Yêsu amâo đĭ ôh čhŏng mbĭt hŏng phung ƀĭng kna Ñu, ƀiădah phung ƀĭng kna Ñu đuĕ nao hjăn digơ̆ leh. 23 ƀiădah mâo lu boh čhŏng mơ̆ng ƀuôn Tiberias hriê giăm kơ anôk diñu ƀơ̆ng kpŭng leh Khua Yang wah lač bi mni kơ Aê Diê. 24 Snăn tơdah phung ƀuôn sang ƀuh Yêsu amâo lŏ dôk tinăn ôh, leh anăn phung ƀĭng kna Ñu kăn lŏ dôk rei, phung ƀuôn sang đĭ čhŏng leh anăn găn nao kơ ƀuôn Kapernum duah Yêsu.
Yêsu Jing Kpŭng kơ Klei Hdĭp
25 Tơdah digơ̆ ƀuh Yêsu ti hang nah dih êa ksĭ, digơ̆ lač kơ Ñu, “Ơ Nai, hbĭl ih truh tinei lĕ?” 26 Yêsu lŏ wĭt lač kơ digơ̆, “Kâo lač kơ ih klei sĭt nik, diih duah kâo, amâo djŏ ôh kyua diih ƀuh leh klei bi knăl yuôm bhăn, ƀiădah kyua diih ƀơ̆ng leh kpŭng tơl trei. 27 Đăm mă bruă ôh kơ mnơ̆ng ƀơ̆ng huă thâo rai, ƀiădah kơ mnơ̆ng ƀơ̆ng huă ăt dôk tơl truh kơ klei hdĭp hlŏng lar. Mnơ̆ng ƀơ̆ng huă anăn Anak Mnuih srăng brei kơ diih; kyuadah Ñu yơh Aê Diê Ama kđăm bi sĭt gơ̆ tŭ Ñu leh.” 28 Digơ̆ lač kơ Yêsu, “Ya hmei srăng ngă čiăng mă bruă Aê Diê?” 29 Yêsu lŏ wĭt lač kơ digơ̆, “Snei bruă Aê Diê: brei diih đăo hĕ kơ Pô Ñu tiŏ hriê leh.” 30 Snăn digơ̆ lač kơ Yêsu, “Snăn ya klei bi knăl yuôm bhăn ih ngă lĕ, čiăng kơ hmei dưi ƀuh leh anăn đăo kơ ih? Ya klei ih srăng ngă? 31 Phung aê hmei ƀơ̆ng kpŭng mana hlăm kdrăn tač, tui si klei čih leh, ‘Ñu brei digơ̆ ƀơ̆ng kpŭng mơ̆ng adiê.’ ” 32 Leh anăn Yêsu lač kơ digơ̆, “Kâo lač kơ ih klei sĭt nik, amâo djŏ ôh Y-Môis brei leh kơ diih kpŭng mơ̆ng adiê; ƀiădah Ama kâo brei kơ diih kpŭng sĭt mơ̆ng adiê. 33 Kyuadah kpŭng Aê Diê jing kpŭng trŭn mơ̆ng adiê leh anăn brei klei hdĭp kơ lăn ala.” 34 Digơ̆ lač kơ Yêsu, “Ơ Khua, brei bĕ kơ hmei kpŭng anei nanao.” 35 Yêsu lač kơ digơ̆, “Kâo jing kpŭng klei hdĭp; hlei pô hriê kơ kâo amâo srăng tuôm êpa, leh anăn hlei pô đăo kơ kâo amâo srăng tuôm mhao ôh. 36 ƀiădah kâo lač leh kơ diih, diih ƀuh leh kâo, ƀiădah ăt diih amâo đăo ôh. 37 Jih jang phung Ama brei kơ kâo srăng hriê kơ kâo; leh anăn hlei pô hriê kơ kâo, kâo amâo srăng suôt ôh. 38 Kyuadah kâo trŭn leh mơ̆ng adiê, amâo djŏ ngă klei kâo pô čiăng ôh, ƀiădah klei pô tiŏ hriê kâo čiăng. 39 Leh anăn snei klei pô tiŏ hriê kâo čiăng: kâo amâo srăng bi luč ôh sa čô đơ jih jang Ñu brei leh kơ kâo; ƀiădah srăng brei digơ̆ kbiă lŏ hdĭp ti hruê knhal tuč êdei. 40 Kyuadah snei klei Ama kâo čiăng: brei grăp čô hlei pô ƀuh Anak leh anăn đăo kơ Ñu srăng mâo klei hdĭp hlŏng lar; leh anăn kâo srăng bi kbiă lŏ hdĭp digơ̆ ti hruê knhal tuč êdei.” 41 Phung Yuđa blŭ dŭñ dŭñ kơ Yêsu, kyuadah Ñu lač, “Kâo jing kpŭng trŭn leh mơ̆ng adiê.” 42 Digơ̆ lač, “Amâo djŏ hĕ anei yơh Yêsu, anak Y-Yôsep, amĭ ama ñu drei thâo kral leh? Snăn si ngă ñu lač ară anei, ‘Kâo trŭn hriê leh mơ̆ng adiê?’ ” 43 Yêsu lŏ wĭt lač kơ digơ̆, “Đăm blŭ dŭñ dŭñ hdơ̆ng diih ôh. 44 Amâo mâo pô dưi hriê kơ kâo ôh, knŏng tơdah Ama, Pô tiŏ hriê kâo, êwak gơ̆; leh anăn kâo srăng bi kbiă lŏ hdĭp gơ̆ ti hruê knhal tuč êdei. 45 Mâo klei čih leh hlăm hdruôm hră phung khua pô hưn êlâo, ‘Leh anăn Aê Diê srăng bi hriăm jih jang diñu.’ Grăp čô hlei pô hmư̆ leh anăn hriăm leh mơ̆ng Ama, hriê kơ kâo. 46 Amâo mâo pô tuôm ƀuh Ama ôh, knŏng hlei pô hriê leh mơ̆ng Aê Diê, Ñu yơh ƀuh leh Ama. 47 Kâo lač kơ ih klei sĭt nik, hlei pô đăo mâo leh klei hdĭp hlŏng lar. 48 Kâo jing kpŭng klei hdĭp. 49 Phung aê diih ƀơ̆ng leh kpŭng mana hlăm kdrăn tač, leh anăn ăt digơ̆ djiê. 50 Anei jing kpŭng trŭn mơ̆ng adiê, čiăng kơ mnuih dưi ƀơ̆ng leh anăn amâo djiê ôh. 51 Kâo jing kpŭng klei hdĭp trŭn mơ̆ng adiê. Tơdah sa čô ƀơ̆ng kpŭng anei, ñu srăng dôk hdĭp hlŏng lar; leh anăn kpŭng kâo srăng brei pioh kơ klei hdĭp phung lăn ala jing kđeh kâo pô.” 52 Kyua klei anăn phung Yuđa bi tăng hdơ̆ng digơ̆, lač, “Si mnuih anei dưi brei drei ƀơ̆ng kđeh ñu pô lĕ?” 53 Snăn Yêsu lač kơ digơ̆, “Kâo lač kơ ih klei sĭt nik, tơdah diih amâo ƀơ̆ng kđeh Anak Mnuih leh anăn mnăm êrah Ñu, diih amâo mâo klei hdĭp hlăm diih ôh. 54 Hlei pô ƀơ̆ng kđeh kâo leh anăn mnăm êrah kâo mâo klei hdĭp hlŏng lar, leh anăn kâo srăng bi kbiă lŏ hdĭp gơ̆ ti hruê knhal tuč êdei. 55 Kyuadah kđeh kâo jing mnơ̆ng ƀơ̆ng huă sĭt nik, leh anăn êrah kâo jing mnơ̆ng mnăm sĭt nik. 56 Hlei pô ƀơ̆ng kđeh kâo leh anăn mnăm êrah kâo dôk hlăm kâo, leh anăn kâo dôk hlăm gơ̆. 57 Msĕ si Ama Pô hdĭp tiŏ hriê kâo leh, leh anăn kâo dôk hdĭp kyua Ama, msĕ snăn hlei pô ƀơ̆ng kđeh kâo srăng dôk hdĭp kyua kâo. 58 Anei yơh kpŭng trŭn mơ̆ng adiê, amâo djŏ msĕ si kpŭng mana phung aê diih ƀơ̆ng leh anăn djiê; hlei pô ƀơ̆ng kpŭng anei srăng dôk hdĭp hlŏng lar.” 59 Yêsu lač klei anei hlăm sang bi kƀĭn êjai Ñu mtô ti ƀuôn Kapernum.
Klei Blŭ kơ Klei Hdĭp Hlŏng Lar
60 Lu phung ƀĭng kna Ñu, tơdah digơ̆ hmư̆ leh klei anăn lač, “Klei blŭ anei dleh thâo săng. Hlei pô dưi dôk hmư̆ klei anăn?” 61 ƀiădah Yêsu thâo leh hlăm ai tiê Ñu kơ phung ƀĭng kna Ñu blŭ dŭñ dŭñ kơ klei anăn, snăn Yêsu lač kơ digơ̆, “Klei anei bi têč hnêč diih mơ̆? 62 Ya diih mĭn tơdah diih srăng ƀuh Anak Mnuih đĭ nao kơ anôk Ñu dôk êlâo? 63 Mngăt Myang yơh jing Pô brei klei hdĭp, kđeh amâo yuôm ôh; klei kâo blŭ leh kơ diih jing Mngăt Myang leh anăn klei hdĭp. 64 ƀiădah mâo đa đa hlăm phung diih amâo đăo ôh.” Kyuadah Yêsu thâo leh mơ̆ng êlâo hlei phung amâo đăo ôh, leh anăn hlei pô srăng lhiăr kơ Ñu. 65 Leh anăn Ñu lač, “Kyuanăn kâo lač leh kơ diih, amâo mâo mnuih dưi hriê kơ kâo ôh knŏng tơdah Ama brei klei dưi kơ gơ̆.” 66 Leh klei anăn lu phung ƀĭng kna Ñu wĭt kơ tluôn amâo lŏ hiu mbĭt hŏng Ñu ôh. 67 Yêsu lač kơ phung pluh dua čô, “Bi diih, srăng đuĕ wĭt msĕ mơ̆?” 68 Y-Simôn Pêtrôs lŏ wĭt lač kơ Ñu, “Ơ Khua Yang, kơ hlei pô mkăn hmei dưi nao lĕ? Ih yơh mâo klei blŭ kơ klei hdĭp hlŏng lar; 69 leh anăn hmei đăo leh, leh anăn truh leh kơ klei thâo săng kơ ih jing Pô Doh Jăk mơ̆ng Aê Diê.” 70 Yêsu lŏ wĭt lač kơ digơ̆, “Amâo djŏ hĕ kâo ruah diih leh, pluh dua čô, ƀiădah sa čô hlăm phung diih jing yang jhat?” 71 Ñu blŭ djŏ kơ Y-Yuđas anak êkei Y-Simôn Iskariôt, kyuadah gơ̆ jing sa čô hlăm phung pluh dua čô, pô srăng lhiăr kơ Yêsu.
Yêsu leh anăn Phung Adei Ñu
1 Êdei kơ klei anăn, Yêsu hiu tar čar Galilê. Ñu amâo hiu ôh hlăm čar Yuđa, kyuadah phung Yuđa duah bi mdjiê Ñu. 2 Klei Knăm Sang Čhiăm phung Yuđa giăm truh leh. 3 Snăn phung adei Yêsu lač kơ Ñu, “Kbiă bĕ mơ̆ng anôk anei leh anăn nao kơ čar Yuđa, čiăng kơ phung ƀĭng kna ih dưi ƀuh bruă ih dôk ngă. 4 Kyuadah amâo mâo ôh sa čô mă bruă hgăm tơdah gơ̆ čiăng kơ arăng thâo kral gơ̆. Tơdah ih ngă klei anei, bi êdah bĕ ih pô kơ phung mnuih ti lăn ala.” 5 Kyuadah wăt phung adei Ñu kăn đăo kơ Ñu rei. 6 Yêsu lač kơ digơ̆, “Mông kâo ka truh ôh, ƀiădah mông găl kơ diih mâo nanao. 7 Lăn ala amâo dưi bi êmut kơ diih ôh, ƀiădah lăn ala bi êmut kơ kâo kyuadah kâo hưn kơ bruă lăn ala jing jhat. 8 Diih nao bĕ kơ hruê knăm. Kâo ka nao ôh, kyuadah mông kâo ka truh sĭt ôh.” 9 Leh Ñu lač klei anăn, Ñu ăt dôk hlăm čar Galilê.
Yêsu Nao kơ Hruê Knăm Sang Čhiăm
10 Tơdah phung adei Ñu nao leh kơ hruê knăm, êdei kơ anăn Ñu pô nao mơh, ƀiădah amâo brei phung lu thâo ôh, Ñu nao hŏng klei hgăm. 11 Phung Yuđa duah Yêsu ti anôk klei knăm leh anăn lač, “Ti ñu lĕ?” 12 Lu phung ƀuôn sang blŭ mhač djŏ kơ Ñu. Êjai đa đa lač, “Ñu jing sa čô mnuih jăk,” phung mkăn lač, “Hơăi, ñu bi wơr êlan kơ phung ƀuôn sang.” 13 ƀiădah amâo mâo pô jhŏng blŭ klă kơ Yêsu kyua huĭ kơ phung khua Yuđa. 14 Ti krah wah klei knăm, Yêsu nao kơ sang kkuh mpŭ leh anăn mtô. 15 Phung Yuđa bi kngăr kơ klei anăn, lač, “Si mnuih anei dưi mâo klei thâo lu snăn, ñu amâo tuôm hriăm ôh?” 16 Yêsu lŏ wĭt lač kơ digơ̆, “Klei kâo mtô amâo djŏ klei kâo pô ôh, ƀiădah klei pô tiŏ hriê kâo. 17 Tơdah sa čô mnuih čiăng ngă tui si klei Aê Diê čiăng, gơ̆ srăng thâo thâodah klei kâo mtô kbiă hriê mơ̆ng Aê Diê amâodah kâo blŭ tui si klei dưi kâo pô. 18 Hlei pô blŭ tui si klei dưi ñu pô duah klei guh kơang kơ ñu pô; ƀiădah hlei pô duah klei guh kơang kơ Pô tiŏ hriê ñu jing sĭt, leh anăn hlăm ñu amâo mâo klei wê ôh. 19 Amâo djŏ hĕ Y-Môis brei leh klei bhiăn kơ diih? ƀiădah amâo mâo ôh sa čô hlăm phung diih gưt kơ klei bhiăn. Si ngă diih duah bi mdjiê kâo lĕ?” 20 Phung ƀuôn sang lŏ wĭt lač, “Ih mâo sa čô yang jhat. Hlei pô duah bi mdjiê ih?” 21 Yêsu lŏ wĭt lač kơ digơ̆, “Kâo ngă leh sa mta bruă, leh anăn jih jang diih dôk bi kngăr kyua bruă anăn. 22 Y-Môis brei kơ diih klei bhiăn khăt klĭt (klei anăn amâo kbiă mơ̆ng Y-Môis ôh, ƀiădah mơ̆ng phung aê diih), leh anăn diih khăt klĭt arăng ti hruê sabat. 23 Tơdah sa čô êkei tŭ klei khăt klĭt ti hruê sabat, čiăng amâo gao ôh klei bhiăn Y-Môis, si ngă diih ăl kơ kâo kyuadah ti hruê sabat kâo bi hlao leh kluôm asei mlei sa čô mnuih? 24 Đăm phat kđi tui si klei bi êdah ti êngao ôh, ƀiădah brei diih phat kđi hŏng klei kpă.”
Yêsu Jing Yang Krist Mơ̆?
25 Mâo đa đa hlăm phung ƀuôn sang Yêrusalem lač, “Amâo djŏ hĕ mnuih anei yơh arăng čiăng bi mdjiê? 26 Nĕ anei, ñu dôk mtô ti anăp jih jang, leh anăn arăng amâo lač sa klei kơ ñu ôh. Djŏ mơ̆ phung khua kiă kriê thâo sĭt mnuih anei jing Yang Krist? 27 ƀiădah drei thâo leh mơ̆ng mnuih anei kbiă hriê; bi Krist tơdah Ñu hriê, amâo mâo pô thâo ôh mơ̆ng Ñu kbiă hriê.” 28 Snăn Yêsu ur kraih êjai Ñu mtô hlăm sang kkuh mpŭ, “Diih thâo kral kâo leh, leh anăn diih thâo mơ̆ng kâo kbiă hriê. ƀiădah kâo amâo hriê ôh tui si kâo pô čiăng; Pô tiŏ hriê kâo jing Pô sĭt nik, leh anăn diih amâo thâo kral Ñu ôh. 29 ƀiădah kâo thâo kral Ñu, kyuadah kâo kbiă hriê mơ̆ng Ñu, leh anăn Ñu yơh tiŏ hriê kâo leh.” 30 Snăn diñu duah čiăng mă čăp Yêsu, ƀiădah amâo mâo pô ruêh gơ̆ ôh, kyuadah mông gơ̆ ka truh. 31 ƀiădah mâo lu mnuih đăo kơ gơ̆ leh anăn digơ̆ lač, “Tơdah Yang Krist srăng truh, Ñu srăng ngă klei bi knăl yuôm bhăn lu hĭn kơ mnuih anei ngă leh mơ̆?”
Arăng Tiŏ Nao Phung Kahan Mă Čăp Yêsu
32 Phung Pharisi hmư̆ phung lu blŭ mhač djŏ kơ gơ̆. Snăn diñu leh anăn phung knơ̆ng khua ngă yang tiŏ nao phung khua kahan mă čăp gơ̆. 33 Snăn Yêsu lač, “Kâo srăng dôk mbĭt hŏng diih sui ƀiă, leh anăn kâo srăng nao kơ Pô tiŏ hriê kâo leh; 34 diih srăng duah kâo, ƀiădah diih amâo srăng ƀuh kâo ôh; ti anôk kâo dôk diih amâo dưi nao ôh.” 35 Phung Yuđa lač hdơ̆ng diñu, “Ti êkei anei mĭn čiăng nao tơl drei amâo srăng ƀuh ñu ôh? Si ngă, ñu mĭn čiăng nao kơ phung bra đuĕ ti krah phung Grĕk leh anăn mtô kơ phung Grĕk mơ̆? 36 Si klei ñu lač anăn, ‘Diih srăng duah kâo, ƀiădah diih amâo srăng ƀuh kâo ôh,’ leh anăn ‘Ti anôk kâo dôk, diih amâo dưi nao ôh’?”
Êa Klei Hdĭp
37 Ti hruê knhal tuč hlăm klei knăm, hruê yuôm hĭn, Yêsu dôk dơ̆ng leh anăn ur kraih, “Hlei pô mhao êa, brei gơ̆ hriê kơ kâo leh anăn mnăm. 38 Hlei pô đăo kơ kâo, tui si Klei Aê Diê Blŭ lač leh, ‘Srăng mâo êa klei hdĭp đoh mơ̆ng ai tiê gơ̆.’ ” 39 Ñu lač klei anăn djŏ kơ Yang Mngăt Jăk hlei pô đăo kơ Ñu srăng mă tŭ; hruê anăn ka Aê Diê brei ôh Yang Mngăt Jăk, kyuadah Yêsu ka mâo klei guh kơang ôh.
Phung ƀuôn Sang Bi Kah Phung
40 Tơdah hmư̆ klei blŭ anei, đa đa hlăm phung ƀuôn sang lač, “Sĭt nik ñu anei yơh jing khua pô hưn êlâo.” 41 Phung mkăn lač, “Ñu anei yơh jing Yang Krist.” ƀiădah đa đa lač, “Yang Krist srăng kbiă hriê mơ̆ng čar Galilê mơ̆? 42 Amâo djŏ hĕ Klei Aê Diê Blŭ lač leh kơ Yang Krist jing anak čô Y-Đawit, leh anăn kbiă hriê mơ̆ng ƀuôn Betlêhem, ƀuôn Y-Đawit dôk leh?” 43 Snăn mâo klei bi kah phung ti krah phung ƀuôn sang kyua Yêsu. 44 Đa đa phung diñu čiăng mă čăp Yêsu, ƀiădah amâo mâo pô ruêh Ñu ôh.
Phung Khua Yuđa Amâo Đăo Ôh
45 Tơdah phung khua kahan lŏ wĭt, phung knơ̆ng khua ngă yang leh anăn phung Pharisi êmuh, “Si ngă diih amâo đoh ba ñu lĕ?” 46 Phung khua kahan lŏ wĭt lač, “Amâo mâo pô tuôm blŭ msĕ si mnuih anăn ôh!” 47 Phung Pharisi lŏ wĭt lač kơ digơ̆, “Wăt diih msĕ mơ̆ lĕ leh? 48 Mâo leh mơ̆ hlăm phung khua amâodah phung Pharisi đăo kơ ñu? 49 ƀiădah phung lu anei amâo thâo săng ôh klei bhiăn, jing phung arăng tăm pah leh.” 50 Y-Nikôdem, sa čô hlăm phung diñu, pô nao leh kơ Yêsu hlăk êlâo anăn, lač kơ diñu, 51 “Klei bhiăn drei phat kđi mơ̆ sa čô mnuih tơdah ka hmư̆ klei ñu blŭ leh anăn ka thâo klei ñu ngă ôh?” 52 Phung Pharisi lŏ wĭt lač, “Ih msĕ mơ̆ jing sa čô mnuih mơ̆ng čar Galilê? Ksiêm bĕ Klei Aê Diê Blŭ leh anăn ih srăng thâo amâo mâo ôh sa čô khua pô hưn êlâo kbiă hriê mơ̆ng čar Galilê.” 53 Leh anăn grăp čô wĭt kơ sang ñu pô.
Mniê Tlĕ Piu
1 Yêsu nao kơ Čư̆ Ôliwơ. 2 Aguah ưm Ñu lŏ nao kơ sang kkuh mpŭ. Jih jang phung ƀuôn sang nao kơ Ñu, leh anăn Ñu dôk gŭ mtô kơ digơ̆. 3 Phung khua čih hră leh anăn phung Pharisi atăt ba sa čô mniê arăng mâo mă êjai gơ̆ tlĕ piu, dưm gơ̆ ti krah phung lu, 4 leh anăn lač kơ Yêsu, “Ơ Nai, arăng mă mniê anei êjai ñu tlĕ piu. 5 Hlăm klei bhiăn Y-Môis mtă brei drei bhĭr boh tâo bi mdjiê pô ngă msĕ snăn. Bi ih, si ih lač kơ klei anăn?” 6 Diñu lač klei anei čiăng lông dlăng Yêsu, čiăng bi mâo klei dưi kčŭt kơ Yêsu. Yêsu kkui leh anăn čih hŏng kđiêng Ñu ti lăn. 7 Tơdah phung anăn lŏ êmuh Ñu nanao, Yêsu kgŭ dơ̆ng leh anăn lač kơ phung anăn, “Hlei hlăm phung diih amâo mâo klei soh ôh, brei ñu bhĭr boh tâo êlâo hĭn kơ mniê anei.” 8 Yêsu lŏ kkui leh anăn čih hŏng kđiêng Ñu ti lăn. 9 ƀiădah tơdah diñu hmư̆ klei anăn, đuĕ sa čô sa čô, dơ̆ng mơ̆ng pô mduôn hĭn; leh anăn Yêsu dôk hjăn mbĭt hŏng mniê anăn dôk dơ̆ng ti anăp Ñu. 10 Yêsu angưi dlăng leh anăn lač kơ mniê anăn, “Ơ mniê, ti phung kčŭt kơ ih lĕ? Amâo mâo pô bi kmhal ih ôh hĕ?” 11 Mniê anăn lač, “Amâo mâo ôh, khua ah.” Yêsu lač, “Kâo kăn bi kmhal ih rei. Nao bĕ, leh anăn đăm lŏ ngă soh ôh.”
Yêsu Jing Klei Mngač kơ Lăn Ala
12 Yêsu lŏ blŭ kơ phung diñu, lač, “Kâo jing klei mngač kơ lăn ala. Hlei pô tui hlue kâo amâo srăng êbat hlăm klei mmăt ôh, ƀiădah srăng mâo klei mngač kơ klei hdĭp.” 13 Phung Pharisi lač kơ Ñu, “Ih hưn kơ ih pô. Klei ih hưn amâo jing sĭt ôh.” 14 Yêsu lŏ wĭt lač, “Wăt tơdah kâo hưn kơ kâo pô, klei kâo hưn jing sĭt, kyuadah kâo thâo mơ̆ng kâo hriê leh anăn ti anôk kâo đuĕ nao; ƀiădah diih amâo thâo ôh mơ̆ng kâo hriê amâodah ti anôk kâo nao. 15 Diih phat kđi tui si kđeh; bi kâo amâo phat kđi arăng ôh. 16 ƀiădah wăt tơdah kâo phat kđi, klei kâo phat kđi jing sĭt, kyuadah kâo amâo phat kđi hjăn kâo pô ôh, ƀiădah kâo mbĭt hŏng Ama Pô tiŏ hriê kâo leh. 17 Hlăm klei bhiăn diih mâo klei čih leh, klei dua čô mnuih hưn jing sĭt. 18 Kâo hưn bi sĭt kơ kâo pô, leh anăn Ama Pô tiŏ hriê kâo hưn bi sĭt kơ kâo msĕ mơh.” 19 Snăn diñu lač kơ Yêsu, “Ti Ama ih?” Yêsu lŏ wĭt lač, “Diih amâo thâo kral kâo ôh, kăn diih thâo kral Ama kâo rei. Tơdah diih thâo kral kâo leh, diih srăng thâo kral Ama kâo msĕ mơh.” 20 Yêsu blŭ klei anei hlăm adŭ pioh ngăn êjai Ñu mtô hlăm sang kkuh mpŭ. ƀiădah amâo mâo pô mă čăp Ñu ôh, kyuadah mông Ñu ka truh ôh.
Diih Amâo Dưi Nao Ôh Ti Anôk Kâo Nao
21 Yêsu lŏ lač kơ diñu, “Kâo srăng đuĕ nao, leh anăn diih srăng duah kâo, ƀiădah diih srăng djiê hlăm klei soh diih. Ti anôk kâo nao, diih amâo dưi nao ôh.” 22 Snăn phung Yuđa lač, “Ñu srăng bi mdjiê ñu pô mơ̆, kyuadah ñu lač, ‘Ti anôk kâo nao, diih amâo dưi nao ôh’?” 23 Yêsu lač kơ diñu, “Diih kbiă hriê mơ̆ng gŭ, kâo trŭn hriê mơ̆ng dlông. Diih kbiă hriê mơ̆ng lăn ala anei, bi kâo amâo kbiă hriê mơ̆ng lăn ala anei ôh. 24 Kâo hưn leh kơ diih srăng djiê hlăm klei soh diih; kyuadah diih srăng djiê hlăm klei soh diih tơdah diih amâo đăo ôh klei kâo jing Pô Kâo Jing.” 25 Diñu êmuh Yêsu, “Hlei ih jing?” Yêsu lač kơ digơ̆, “Pô kâo lač leh kơ diih mơ̆ng mphŭn. 26 Kâo mâo lu klei čiăng lač djŏ kơ diih, leh anăn lu klei čiăng phat kđi; ƀiădah Pô tiŏ hriê kâo leh jing sĭt, leh anăn kâo hưn kơ lăn ala ya klei kâo hmư̆ leh mơ̆ng Ñu.” 27 Diñu amâo thâo săng ôh kơ Yêsu blŭ leh kơ diñu klei djŏ kơ Ama. 28 Snăn Yêsu lač, “Tơdah leh diih yơr Anak Mnuih ti dlông, hlăk anăn diih srăng thâo kơ kâo jing Pô Kâo Jing, leh anăn kơ kâo amâo ngă sa mta bruă hŏng klei dưi kâo pô ôh, ƀiădah kâo hưn snăn tui si klei Ama mtô leh kơ kâo. 29 Leh anăn Pô tiŏ hriê kâo leh dôk mbĭt hŏng kâo; Ñu amâo tuôm lui kâo dôk hjăn ôh, kyuadah kâo ngă klei bi mơak kơ Ñu nanao.” 30 Kyua Yêsu blŭ snăn, mâo lu mnuih đăo kơ Ñu.
Phung Êngiê leh anăn Phung Hlŭn
31 Leh anăn Yêsu lač kơ phung Yuđa đăo leh kơ Ñu, “Tơdah diih dôk kjăp hlăm klei kâo blŭ, diih jing ƀĭng kna kâo sĭt, 32 leh anăn diih srăng thâo klei sĭt nik, leh anăn klei sĭt nik srăng bi êngiê diih.” 33 Digơ̆ lŏ wĭt lač kơ Yêsu, “Hmei jing phung anak čô Y-Abraham, leh anăn hmei amâo tuôm jing hlŭn arăng ôh. Si klei ih lač, ‘Arăng srăng bi êngiê diih’?” 34 Yêsu lŏ wĭt lač kơ diñu, “Kâo lač kơ ih klei sĭt nik, grăp čô hlei pô ngă soh jing hlŭn kơ klei soh. 35 Hlŭn amâo dôk nanao hlăm sang ôh, ƀiădah anak pô dôk nanao. 36 Snăn tơdah Anak bi êngiê diih, diih srăng êngiê sĭt nik. 37 Kâo thâo leh diih jing phung anak čô Y-Abraham; ƀiădah diih duah bi mdjiê kâo, kyuadah diih amâo mă tŭ ôh klei kâo blŭ. 38 Kâo blŭ klei kâo ƀuh leh mbĭt hŏng Ama kâo, leh anăn diih ngă klei diih hmư̆ mơ̆ng ama diih.” 39 Diñu lŏ wĭt lač kơ Yêsu, “Y-Abraham jing ama hmei.” Yêsu lač kơ diñu, “Tơdah diih jing anak Y-Abraham, diih srăng ngă klei Y-Abraham ngă leh. 40 ƀiădah ară anei diih duah bi mdjiê kâo, sa čô mnuih hưn leh klei sĭt nik kơ diih, klei kâo hmư̆ leh mơ̆ng Aê Diê. Y-Abraham amâo ngă klei anăn ôh. 41 Diih dôk ngă klei ama diih ngă.” Diñu lač kơ Yêsu, “Hmei amâo jing anak ƀă pum ôh. Hmei mâo leh sa čô Ama, jing Aê Diê.” 42 Yêsu lač kơ diñu, “Tơdah Aê Diê jing Ama diih, diih srăng khăp kơ kâo, kyuadah kâo kbiă hriê leh mơ̆ng Aê Diê. Kâo amâo hriê tui si kâo pô ôh, ƀiădah Aê Diê tiŏ hriê kâo. 43 Si ngă diih amâo thâo săng ôh klei kâo lač? Kyuadah diih amâo dưi ôh hmư̆ klei kâo blŭ. 44 Diih kbiă hriê mơ̆ng ama diih yang jhat, leh anăn diih čiăng ngă tui si klei ama diih čiăng. Ñu jing pô bi mdjiê mnuih mơ̆ng mphŭn, leh anăn ñu amâo mâo sa kdrêč hlăm klei sĭt nik ôh, kyuadah amâo mâo ôh klei sĭt nik hlăm ñu. Tơdah ñu luar, ñu blŭ tui si knuih ñu pô, kyuadah ñu jing pô luar leh anăn ama klei luar. 45 ƀiădah kyuadah kâo blŭ klei sĭt nik, diih amâo đăo kơ kâo ôh. 46 Hlei pô hlăm phung diih dưi lač kơ kâo soh? Tơdah kâo hưn klei sĭt nik, si ngă diih amâo đăo kơ kâo lĕ? 47 Hlei pô kbiă hriê mơ̆ng Aê Diê dôk hmư̆ klei Aê Diê blŭ. Diih amâo dôk hmư̆ ôh klei blŭ anăn, kyuadah diih amâo kbiă hriê mơ̆ng Aê Diê ôh.”
Yêsu leh anăn Y-Abraham
48 Phung Yuđa êmuh Yêsu, “Jing djŏ mơ̆ tơdah hmei lač ih jing sa čô Samari leh anăn pô mâo yang jhat?” 49 Yêsu lŏ wĭt lač, “Kâo amâo mâo yang jhat ôh; ƀiădah kâo mpŭ kơ Ama kâo, leh anăn diih amâo mpŭ kơ kâo ôh. 50 Kâo amâo duah klei guh kơang kơ kâo pô ôh. Mâo sa čô duah klei anăn, leh anăn phat kđi. 51 Kâo lač kơ ih klei sĭt nik, tơdah sa čô djă pioh klei kâo blŭ amâo srăng tuôm hŏng klei djiê ôh.” 52 Phung Yuđa lač kơ Ñu, “Ară anei hmei thâo kơ ih mâo leh sa čô yang jhat. Y-Abraham djiê leh, msĕ si phung khua pô hưn êlâo djiê leh mơh, ƀiădah ih lač, ‘Tơdah sa čô djă pioh klei kâo blŭ amâo srăng tuôm hŏng klei djiê ôh.’ 53 Ih jing prŏng hĭn kơ ama hmei Y-Abraham, pô djiê leh mơ̆? Leh anăn phung khua pô hưn êlâo djiê leh mơh. Hlei ih mĭn ih jing?” 54 Yêsu lŏ wĭt lač, “Tơdah kâo bi guh kơang kơ kâo pô, klei guh kơang kâo pô jing hơăi mang. Ama kâo yơh jing Pô bi guh kơang kâo. Kơ Pô anăn diih lač leh jing Aê Diê diih. 55 ƀiădah diih amâo tuôm thâo kral Ñu ôh. Kâo thâo kral Ñu. Tơdah kâo lač, kâo amâo thâo kral Ñu ôh, kâo srăng jing sa čô luar msĕ si diih; ƀiădah kâo thâo kral Ñu yơh, leh anăn kâo djă pioh klei Ñu blŭ. 56 Ama diih Y-Abraham hơ̆k snăk tơdah ñu ƀuh hruê kâo. Ñu ƀuh leh, leh anăn ñu mơak.” 57 Snăn phung Yuđa lač kơ Yêsu, “Ih ka mâo êma pluh thŭn ôh, si ngă ih ƀuh leh Y-Abraham hĕ?” 58 Yêsu lač kơ diñu, “Kâo lač kơ ih klei sĭt nik, êlâo kơ mâo Y-Abraham, Kâo Jing.” 59 Snăn diñu mă boh tâo čiăng bhĭr Yêsu; ƀiădah Yêsu đuĕ dăp, leh anăn kbiă mơ̆ng sang kkuh mpŭ.
Yêsu Bi Hlao Sa Čô Mnuih Bum Ală
1 Êjai Yêsu găn tinăn, Ñu ƀuh sa čô êkei bum ală mơ̆ng hruê amĭ kkiêng. 2 Phung ƀĭng kna Ñu êmuh kơ Ñu, “Ơ Nai, hlei ngă soh leh tơl gơ̆ bum ală mơ̆ng hruê amĭ kkiêng, gơ̆ pô hĕ amâodah amĭ ama gơ̆?” 3 Yêsu lŏ wĭt lač, “Amâo djŏ êkei anei ôh ngă soh, kăn djŏ amĭ ama gơ̆ rei, ƀiădah čiăng kơ bruă Aê Diê bi êdah hlăm gơ̆. 4 Brei drei mă hĕ bruă kơ Pô tiŏ hriê kâo êjai hruê; tơ truh mlam, hlăk anăn amâo mâo sa čô dưi mă bruă ôh. 5 Êjai kâo dôk hlăm lăn ala, kâo jing klei mngač kơ lăn ala.” 6 Êjai Ñu lač klei anăn, Yêsu kčuh êa bah ti lăn, mñơr lăn hŏng êa bah Ñu jing lŭ, leh anăn tak ti ală êkei anăn. 7 Ñu lač kơ gơ̆, “Nao rao bĕ ti êa ênao Silôê” (Silôê čiăng lač “Tiŏ Nao”). Snăn gơ̆ nao, rao leh anăn lŏ wĭt dưi ƀuh mngač. 8 Phung riêng gah leh anăn phung ƀuh gơ̆ êlâo jing sa čô hiu dan lač, “Amâo djŏ hĕ êkei anei pô khăng dôk gŭ leh anăn akâo mnơ̆ng?” 9 Đa đa lač, “Gơ̆ yơh;” phung mkăn lač, “Hơăi, ƀiădah dlăng gơ̆ jing msĕ si pô anăn.” Gơ̆ lač, “Kâo yơh pô anăn.” 10 Diñu lač kơ gơ̆, “Snăn si ngă ală ih dưi lŏ ƀuh mngač?” 11 Gơ̆ lač, “Êkei arăng bi anăn Yêsu mñơr lăn, tak ti ală kâo leh anăn lač kơ kâo, ‘Nao rao bĕ ti êa ênao Silôê.’ Snăn kâo nao, rao leh anăn ƀuh mngač.” 12 Diñu lač kơ gơ̆, “Ti ñu ară anei?” Gơ̆ lač, “Kâo amâo thâo ôh.”
Phung Pharisi Êmuh Mnuih Mrâo Hlao
13 Diñu atăt ba êkei bum ală hlăk êlâo anăn kơ phung Pharisi. 14 Hruê Yêsu mñơr lăn bi mblang ală gơ̆ jing hruê sabat. 15 Snăn phung Pharisi lŏ êmuh kơ gơ̆ si ngă gơ̆ dưi ƀuh mngač. Gơ̆ lač kơ diñu, “Ñu tak lăn ti ală kâo, kâo rao, leh anăn kâo ƀuh mngač.” 16 Đa đa phung Pharisi lač, “Mnuih anei amâo kbiă hriê mơ̆ng Aê Diê ôh, kyuadah ñu amâo hdơr mpŭ ôh kơ hruê sabat.” ƀiădah phung mkăn lač, “Si sa čô mnuih soh dưi ngă klei bi knăl yuôm bhăn msĕ snăn?” Leh anăn mâo klei bi kah mbha hdơ̆ng diñu. 17 Snăn diñu lŏ êmuh kơ êkei bum ală, “Bi ih, si ih lač kơ ñu jing, kyuadah ñu bi mblang leh ală ih?” Gơ̆ lač, “Ñu jing sa čô khua pô hưn êlâo.” 18 Phung Yuđa amâo đăo ôh kơ klei gơ̆ bum ală leh anăn ƀuh mngač leh, tơl diñu iêu amĭ ama êkei lŏ ƀuh mngač anăn. 19 Leh anăn diñu êmuh kơ digơ̆, “Anei hĕ anak êkei diih lač jing bum ală mơ̆ng hruê amĭ kkiêng? Snăn si gơ̆ thâo ƀuh mngač ară anei lĕ?” 20 Amĭ ama gơ̆ lŏ wĭt lač, “Hmei thâo êkei anei jing anak êkei hmei, leh anăn gơ̆ bum ală mơ̆ng hruê kkiêng. 21 ƀiădah hmei amâo thâo ôh si gơ̆ thâo ƀuh mngač ară anei. Kăn hmei thâo rei hlei pô bi mblang brei leh ală gơ̆. Êmuh kơ gơ̆ pô. Gơ̆ khua leh. Gơ̆ dưi yăl dliê gơ̆ pô kơ diih.” 22 Amĭ ama gơ̆ lač klei anăn kyuadah diñu huĭ kơ phung Yuđa; kyuadah phung Yuđa bi tŭ ư leh tơdah hlei pô hưn kơ Yêsu jing Yang Krist, arăng srăng suôt hĕ pô anăn mơ̆ng sang bi kƀĭn. 23 Kyuanăn amĭ ama gơ̆ lač, “Gơ̆ khua leh, êmuh kơ gơ̆ pô.” 24 Snăn lŏ sa bliư̆ tal dua diñu iêu mnuih bum ală hlăk êlâo anăn, leh anăn lač kơ gơ̆, “Brei ih mpŭ mni kơ Aê Diê. Hmei thâo kơ êkei anăn jing sa čô mnuih soh.” 25 Gơ̆ lač, “Thâodah ñu jing sa čô mnuih soh, kâo amâo thâo ôh. Sa mta klei kâo thâo, êlâo kâo bum ală, ară anei kâo dưi ƀuh.” 26 Diñu lač kơ gơ̆, “Ya ñu ngă leh kơ ih? Si ñu ngă bi mblang ală ih?” 27 Gơ̆ lŏ wĭt lač kơ diñu, “Kâo lač leh kơ diih, ƀiădah diih amâo čiăng hmư̆ ôh. Si ngă diih lŏ čiăng hmư̆ klei anăn? Diih msĕ mơ̆ čiăng jing ƀĭng kna ñu?” 28 Diñu dlao wač kơ gơ̆, lač, “Ih yơh jing ƀĭng kna ñu, ƀiădah hmei jing ƀĭng kna Y-Môis. 29 Hmei thâo Aê Diê blŭ leh kơ Y-Môis, ƀiădah bi kơ êkei anei, hmei amâo thâo ôh mơ̆ng ñu kbiă hriê.” 30 Gơ̆ lŏ wĭt lač, “Hƀơih, kâo bi kngăr snăk! Diih amâo thâo ôh mơ̆ng ñu kbiă hriê, ƀiădah ñu bi mblang leh ală kâo. 31 Drei thâo Aê Diê amâo dôk hmư̆ ôh phung soh, ƀiădah tơdah sa čô kkuh mpŭ kơ Aê Diê leh anăn ngă klei ñu čiăng, Aê Diê dôk hmư̆ pô anăn. 32 Dơ̆ng mơ̆ng mphŭn mâo lăn ala arăng amâo tuôm hmư̆ ôh kơ sa čô dưi bi mblang ală mnuih bum ală mơ̆ng hruê amĭ kkiêng. 33 Tơdah êkei anei amâo kbiă hriê mơ̆ng Aê Diê, ñu amâo dưi ngă ôh.” 34 Diñu lŏ wĭt lač kơ gơ̆, “Arăng kkiêng leh ih hlăm klei soh, leh anăn ih čiăng mtô kơ hmei hĕ?” Leh anăn diñu suôt gơ̆.
Klei Bum Ală Hlăm Ai Tiê
35 Yêsu hmư̆ diñu suôt gơ̆ leh. Leh Yêsu lŏ bi tuôm hŏng gơ̆, Yêsu lač, “Ih đăo mơ̆ kơ Anak Aê Diê?” 36 Gơ̆ lŏ wĭt lač, “Hlei Ñu anăn, Ơ khua, čiăng kơ kâo dưi đăo kơ Ñu?” 37 Yêsu lač kơ gơ̆, “Ih ƀuh leh Ñu, leh anăn Ñu yơh Pô blŭ hŏng ih ară anei.” 38 Gơ̆ lač, “Ơ Khua Yang, kâo đăo yơh.” Leh anăn gơ̆ buôn kkuh ti anăp Yêsu. 39 Yêsu lač, “Kâo hriê leh ti lăn ala čiăng phat kđi, čiăng kơ mnuih amâo thâo ƀuh ôh dưi ƀuh, leh anăn čiăng kơ mnuih thâo ƀuh jing hĕ bum ală.” 40 Đa đa phung Pharisi dôk giăm Ñu hmư̆ klei anăn, leh anăn diñu êmuh kơ Yêsu, “Hmei msĕ mơ̆ bum ală?” 41 Yêsu lač kơ diñu, “Tơdah diih bum ală, diih amâo jing soh ôh; ƀiădah ară anei diih lač, ‘Hmei ƀuh,’ snăn yơh klei diih jing soh ăt dôk.”
Klei Bi Hriêng kơ War Biăp
1 “Kâo lač kơ ih klei sĭt nik, hlei pô amâo mŭt ôh ti ƀăng bhă war biăp, ƀiădah đĭ mŭt ti êlan mkăn, mnuih anăn jing sa čô knĕ leh anăn mnuih tlĕ mmiă. 2 ƀiădah pô mŭt ti ƀăng bhă war biăp, ñu yơh jing mgăt biăp. 3 Pô kiă ƀăng bhă srăng pŏk ƀăng bhă kơ ñu. Phung biăp hmư̆ asăp ñu, leh anăn ñu iêu phung biăp ñu pô hŏng anăn digơ̆, leh anăn atăt digơ̆ kbiă kơ tač. 4 Tơdah leh ñu atăt jih jang biăp ñu kbiă ti tač, ñu êbat ti anăp digơ̆, leh anăn phung biăp tui hlue ñu, kyuadah digơ̆ thâo kral asăp ñu. 5 Digơ̆ amâo srăng tui hlue sa čô tue ôh, ƀiădah digơ̆ srăng đuĕ kơ pô anăn, kyuadah digơ̆ amâo thâo kral asăp phung tue ôh.” 6 Yêsu blŭ klei bi hriêng anei kơ diñu, ƀiădah diñu amâo thâo săng ôh klei Yêsu lač kơ diñu.
Yêsu Jing Mgăt Biăp Jăk
7 Yêsu lŏ lač kơ diñu, “Kâo lač kơ ih klei sĭt nik, kâo jing ƀăng bhă kơ phung biăp. 8 Jih jang hriê êlâo ti kâo jing mnuih knĕ leh anăn mnuih tlĕ mmiă; ƀiădah phung biăp amâo tuôm dôk hmư̆ diñu ôh. 9 Kâo jing ƀăng bhă. Tơdah hlei pô mŭt ti kâo, ñu srăng tlaih, srăng mŭt leh anăn kbiă, leh anăn ƀuh rơ̆k ƀơ̆ng. 10 Mnuih knĕ hriê knŏng čiăng tlĕ, bi mdjiê, leh anăn bi rai. Kâo hriê leh čiăng kơ phung biăp dưi mâo klei hdĭp, leh anăn mâo klei hdĭp êbeh dlai. 11 Kâo jing mgăt biăp jăk. Mgăt biăp jăk jao klei hdĭp ñu pô kyua phung biăp. 12 Hlei pô jing mgăt arăng mưn amâo djŏ mgăt biăp ôh, kăn jing pô biăp rei, ƀuh asâo tan hriê, lui hĕ phung biăp leh anăn đuĕ mtam. Asâo tan mă phung biăp leh anăn prŭng digơ̆. 13 Ñu đuĕ kyuadah ñu jing mgăt arăng mưn, leh anăn amâo uêñ kơ phung biăp ôh. 14 Kâo jing mgăt biăp jăk. Kâo thâo kral phung biăp kâo, leh anăn phung biăp kâo thâo kral kâo, 15 msĕ si Ama thâo kral kâo, leh anăn kâo thâo kral Ama; leh anăn kâo jao klei hdĭp kâo pô kyua phung biăp. 16 Leh anăn kâo lŏ mâo phung biăp mkăn amâo dôk hlăm war anei ôh. Kâo srăng atăt ba wĭt phung anăn msĕ mơh, leh anăn digơ̆ srăng hmư̆ asăp kâo. Snăn srăng mâo sa phung biăp leh anăn sa čô mgăt. 17 Ama khăp kơ kâo, kyuadah kâo jao klei hdĭp kâo pô, čiăng kơ kâo dưi lŏ mă gơ̆. 18 Amâo mâo pô ƀlêč mă klei hdĭp kâo mơ̆ng kâo ôh, ƀiădah kâo jao gơ̆ tui si kâo pô čiăng. Kâo mâo klei dưi jao gơ̆, leh anăn kâo mâo klei dưi lŏ mă gơ̆. Klei mtă anăn kâo mă tŭ leh mơ̆ng Ama kâo.” 19 Kyua klei blŭ anăn lŏ mâo klei bi kah mbha hdơ̆ng phung Yuđa. 20 Lu hlăm phung Yuđa lač, “Ñu mâo yang jhat yơh. Ñu khŏ leh. Ya čiăng dôk hmư̆ ñu lĕ?” 21 Phung mkăn lač, “Klei blŭ anăn amâo djŏ ôh mơ̆ng sa čô mâo yang jhat. Yang jhat dưi mơ̆ bi mblang ală mnuih bum ală?”
Phung Yuđa Hngah Amâo Đăo Ôh kơ Yêsu
22 Ti ƀuôn Yêrusalem mâo Hruê Knăm Bi Leh Sang Yang. Hlăk anăn jing yan puih, 23 leh anăn Yêsu êbat hlăm Sang Kkuh Mpŭ ti Adring Salômôn. 24 Phung Yuđa bi kƀĭn jŭm Ñu leh anăn lač kơ Ñu, “Dŭm boh sui ih srăng brei hmei dôk guôn? Tơdah ih jing Yang Krist, hưn bĕ kơ hmei bi klă.” 25 Yêsu lŏ wĭt lač kơ phung anăn, “Kâo lač leh kơ diih, ƀiădah diih amâo đăo ôh. Bruă kâo mă hlăm anăn Ama kâo, bruă anăn hưn bi sĭt kơ kâo. 26 ƀiădah diih amâo đăo kyuadah diih amâo jing phung biăp kâo ôh. 27 Phung biăp kâo hmư̆ asăp kâo, kâo thâo kral digơ̆, leh anăn digơ̆ tui hlue kâo. 28 Leh anăn kâo brei kơ digơ̆ klei hdĭp hlŏng lar, leh anăn digơ̆ amâo srăng rai luč ôh, leh anăn amâo mâo pô srăng kdhăk mă digơ̆ mơ̆ng kngan kâo ôh. 29 Ama kâo, Pô brei leh digơ̆ kơ kâo, jing prŏng hĭn kơ jih jang, leh anăn amâo mâo pô dưi kdhăk mă digơ̆ mơ̆ng kngan Ama kâo ôh. 30 Kâo hŏng Ama jing sa.” 31 Phung Yuđa lŏ mă boh tâo čiăng bhĭr bi mdjiê Yêsu. 32 Yêsu lŏ wĭt lač kơ diñu, “Kâo bi êdah leh kơ diih lu bruă jăk mơ̆ng Ama. Kơ ya mta bruă anăn diih čiăng bhĭr boh tâo kơ kâo?” 33 Phung Yuđa lŏ wĭt lač kơ Yêsu, “Amâo djŏ kyua bruă jăk ôh hmei bhĭr ih hŏng boh tâo, ƀiădah kyua klei ih blŭ mgao hŏng Aê Diê. Kyuadah ih, sa čô mnuih, mjing ih pô Aê Diê.” 34 Yêsu lŏ wĭt lač kơ diñu, “Amâo djŏ hĕ arăng čih leh hlăm klei bhiăn diih, ‘Kâo lač diih jing phung yang’? 35 Tơdah ñu pia phung yang kơ phung mă tŭ Klei Aê Diê Blŭ, (leh anăn klei čih leh amâo dưi bi mlih ôh), 36 diih lač mơ̆ kơ Pô Ama pioh brei leh anăn tiŏ hriê leh kơ lăn ala, ‘Ih blŭ mgao hŏng Aê Diê,’ kyuadah kâo lač, ‘Kâo jing Anak Aê Diê’? 37 Tơdah kâo amâo ngă ôh bruă Ama kâo, snăn đăm đăo kơ kâo ôh. 38 ƀiădah tơdah kâo ngă bruă anăn, wăt tơdah diih amâo đăo kơ kâo dưn, đăo bĕ kơ bruă anăn, čiăng kơ diih dưi thâo săng kơ Ama dôk hlăm kâo, leh anăn kâo dôk hlăm Ama.” 39 Diñu lŏ čiăng mă čăp Yêsu, ƀiădah Yêsu đuĕ mơ̆ng kngan diñu. 40 Yêsu lŏ đuĕ nao găn kơ hang nah dih êa krông Yurdan ti anôk Y-Yôhan ngă ƀaptem mphŭn dô, leh anăn Ñu dôk tinăn. 41 Leh anăn lu mnuih nao kơ Yêsu, leh anăn digơ̆ lač, “Y-Yôhan amâo tuôm ngă sa klei bi knăl yuôm bhăn ôh, ƀiădah jih jang klei Y-Yôhan hưn kơ mnuih anei jing sĭt.” 42 Leh anăn lu mnuih đăo kơ Ñu tinăn.
Klei Y-Lasar Djiê
1 Mâo sa čô mnuih dôk ruă, anăn ñu Y-Lasar, ƀuôn ƀêthani, ƀuôn H'Mari leh anăn amai ñu H'Mart. 2 H'Mari anăn yơh trôč êa ƀâo mngưi ti Khua Yang leh anăn sut jơ̆ng Ñu hŏng ƀŭk gơ̆ pô. Ayŏng gơ̆ Y-Lasar dôk ruă. 3 Snăn dua čô amai adei anăn tiŏ nao mnuih kơ Yêsu, lač, “Ơ Khua Yang, pô ih khăp dôk ruă.” 4 Tơdah Yêsu hmư̆ klei anăn, Ñu lač, “Klei ruă anei amâo tơl djiê ôh, ƀiădah kyua čiăng bi guh kơang kơ Aê Diê, čiăng kơ Anak Aê Diê dưi mâo klei guh kơang kyua klei ruă anăn.” 5 Yêsu khăp kơ H'Mart leh anăn adei gơ̆ leh anăn Y-Lasar. 6 Leh Ñu hmư̆ Y-Lasar dôk ruă, Ñu lŏ dôk ti anôk anăn dua hruê. 7 Leh êgao dua hruê anăn Ñu lač kơ phung ƀĭng kna, “Brei drei lŏ nao kơ čar Yuđa.” 8 Phung ƀĭng kna lač kơ Ñu, “Ơ Nai, phung Yuđa mrâo čiăng bhĭr ih hŏng boh tâo, ya ih lŏ čiăng wĭt tinăn lĕ?” 9 Yêsu lŏ wĭt lač, “Amâo djŏ hĕ mâo pluh dua mông hlăm sa hruê? Tơdah sa čô êbat êjai hruê, ñu amâo têč hnêč ôh, kyuadah ñu ƀuh klei mngač lăn ala anei. 10 ƀiădah tơdah sa čô êbat êjai mlam, ñu têč hnêč, kyuadah klei mngač amâo dôk hlăm ñu ôh.” 11 Leh Yêsu blŭ snăn, Ñu lŏ lač kơ digơ̆, “Mah jiăng drei Y-Lasar pĭt leh, ƀiădah kâo nao čiăng êrâo gơ̆.” 12 Phung ƀĭng kna lač kơ Yêsu, “Ơ Khua Yang, tơdah gơ̆ pĭt, gơ̆ srăng hlao yơh.” 13 Yêsu blŭ kơ klei gơ̆ djiê leh, ƀiădah digơ̆ mĭn Yêsu blŭ kơ klei pĭt mdei. 14 Snăn Yêsu lač mngač kơ digơ̆, “Y-Lasar djiê leh; 15 leh anăn kyua diih yơh kâo mơak kyua kâo amâo dôk tinăn ôh, čiăng kơ diih dưi đăo. ƀiădah brei drei nao kơ gơ̆.” 16 Y-Thômas, arăng lŏ pia Anak ƀă kmar, lač kơ phung ƀĭng kna mkăn, “Brei drei nao msĕ mơh, čiăng kơ drei dưi djiê mbĭt hŏng Yêsu.”
Yêsu Jing Klei Kbiă Lŏ Hdĭp leh anăn Klei Hdĭp
17 Tơdah Yêsu truh, Ñu thâo kơ Y-Lasar dôk leh pă hruê hlăm msat. 18 ƀuôn ƀêthani giăm ƀuôn Yêrusalem, hlăm brô tlâo wang kilômet. 19 Mâo lu phung Yuđa nao kơ H'Mart leh anăn H'Mari čiăng bi juh digơ̆ kyua ayŏng digơ̆ djiê. 20 Tơdah H'Mart hmư̆ kơ Yêsu hriê, gơ̆ nao bi tuôm hŏng Ñu êjai H'Mari dôk ti sang. 21 H'Mart lač kơ Yêsu, “Ơ Khua Yang, tơdah ih tinei, ayŏng kâo amâo djiê ôh. 22 ƀiădah wăt ară anei hin kâo thâo ya mnơ̆ng ih akâo kơ Aê Diê, Aê Diê srăng brei kơ ih.” 23 Yêsu lač kơ gơ̆, “Ayŏng ih srăng kbiă lŏ hdĭp.” 24 H'Mart lač kơ Ñu, “Kâo thâo kơ gơ̆ srăng kbiă lŏ hdĭp tơdah truh klei kbiă lŏ hdĭp ti hruê knhal tuč êdei.” 25 Yêsu lač kơ gơ̆, “Kâo jing klei kbiă lŏ hdĭp leh anăn klei hdĭp. Hlei pô đăo kơ kâo, srăng hdĭp wăt tơdah ñu djiê dưn; 26 leh anăn hlei pô hdĭp leh anăn đăo kơ kâo amâo srăng tuôm djiê ôh. Ih đăo mơ̆ klei anăn?” 27 H'Mart lač kơ Ñu, “Sĭt, Ơ Khua Yang; kâo đăo kơ ih jing Yang Krist, Anak Aê Diê, Pô hriê hlăm lăn ala.”
Yêsu Hia
28 Tơdah leh H'Mart lač klei anei, gơ̆ đuĕ nao leh anăn iêu H'Mari adei gơ̆, leh anăn lač djơ djĕ, “Nai tinei, leh anăn Ñu iêu ih.” 29 Tơdah H'Mari hmư̆ klei anăn, gơ̆ kgŭ mtam leh anăn nao kơ Yêsu. 30 Yêsu ka mŭt hlăm ƀuôn ôh, ƀiădah Ñu ăt dôk ti anôk H'Mart bi tuôm leh hŏng Ñu. 31 Tơdah phung Yuđa hlăm sang dôk bi juh H'Mari ƀuh H'Mari ruăt kgŭ leh anăn kbiă, diñu tui hlue gơ̆, mĭndah gơ̆ nao čŏk hia ti msat. 32 Tơdah H'Mari truh kơ anôk Yêsu dôk leh anăn ƀuh Ñu, gơ̆ klăm ti jơ̆ng Yêsu leh anăn lač kơ Ñu, “Ơ Khua Yang, tơdah ih tinei, ayŏng kâo amâo djiê ôh.” 33 Tơdah Yêsu ƀuh H'Mari hia, leh anăn phung Yuđa hriê mbĭt hŏng H'Mari hia msĕ mơh, Ñu mâo klei kčŭt snăk leh anăn rŭng răng hlăm ai tiê Ñu. 34 Ñu êmuh, “Ti anôk diih dưm gơ̆ lĕ?” Phung anăn wĭt lač kơ Ñu, “Ơ Khua Yang, hriê dlăng bĕ.” 35 Yêsu hia. 36 Snăn phung Yuđa lač, “Dlăng bĕ, ñu khăp êdimi kơ Y-Lasar!” 37 ƀiădah đa đa phung Yuđa lač, “Pô tuôm mblang leh ală mnuih bum ală, amâo dưi hĕ ñu ngă kơ pô anei amâo brei djiê ôh?”
Yêsu Bi Hdĭp Y-Lasar
38 Yêsu lŏ mâo klei kčŭt snăk, leh anăn nao kơ msat. Msat anăn jing sa boh ƀăng čư̆, kđăl leh hŏng boh tâo. 39 Yêsu lač, “Bi klŭng mă hĕ boh tâo anei.” H'Mart adei ayang anăn lač, “Ơ Khua Yang, ƀâo brŭ leh, kyuadah ñu dôk tinăn pă hruê leh.” 40 Yêsu lač kơ H'Mart, “Amâo djŏ hĕ kâo lač leh kơ ih, tơdah ih đăo ih srăng ƀuh klei guh kơang Aê Diê?” 41 Snăn diñu bi klŭng hĕ boh tâo anăn. Yêsu angưi ală leh anăn lač, “Ơ Ama, kâo bi mni kơ ih kyuadah ih hmư̆ leh kâo. 42 Kâo thâo leh kơ ih hmư̆ kâo nanao, ƀiădah kâo lač klei anei kyua phung mnuih dôk giăm, čiăng kơ diñu dưi đăo kơ ih Pô tiŏ hriê kâo leh.” 43 Tơdah leh Ñu lač klei anăn, Ñu ur hŏng asăp kraih ktang, “Ơ Y-Lasar, kbiă bĕ!” 44 Mnuih djiê kbiă yơh, jơ̆ng kngan gơ̆ arăng păn leh hŏng čhiăm, leh anăn ƀô̆ mta gơ̆ arăng guôm leh hŏng čhiăm mơh. Yêsu lač kơ diñu, “Kleh gơ̆, leh anăn brei gơ̆ êbat.”
Klei Trông Čhai Čiăng Bi Mdjiê Yêsu
45 Mâo lu phung Yuđa hriê leh mbĭt hŏng H'Mari leh anăn ƀuh leh klei Yêsu ngă, đăo kơ Gơ̆. 46 ƀiădah đa đa nao kơ phung Pharisi leh anăn yăl dliê klei Yêsu ngă anăn. 47 Snăn phung knơ̆ng khua ngă yang leh anăn phung Pharisi iêu bi kƀĭn phung khua phat kđi leh anăn lač, “Ya drei srăng ngă lĕ, kyuadah mnuih anei ngă lu klei bi knăl yuôm bhăn? 48 Tơdah drei lui ñu ăt ngă, snăn jih jang mnuih srăng đăo kơ ñu, leh anăn phung Rôm srăng hriê bi rai anôk doh jăk drei leh anăn găp djuê drei.” 49 ƀiădah sa čô hlăm phung digơ̆, Y-Kaip, pô jing khua ngă yang prŏng thŭn anăn, lač kơ digơ̆, “Diih amâo thâo săng sa mta klei ôh. 50 Diih amâo thâo săng ôh jăk hĭn diih mâo sa čô mnuih djiê kyua jih jang phung ƀuôn sang kơ jih jang găp djuê srăng rai.” 51 Ñu amâo blŭ ôh klei anăn tui si klei mĭn ñu pô, ƀiădah kyua ñu jing khua ngă yang prŏng thŭn anăn, ñu hưn êlâo kơ Yêsu srăng djiê kyua jih jang găp djuê Yuđa, 52 leh anăn amâo djŏ knŏng kơ găp djuê Yuđa anăn ôh, ƀiădah wăt čiăng bi kƀĭn mbĭt hlăm sa phung jih jang phung anak Aê Diê bra đuĕ leh tar ƀar. 53 Snăn dơ̆ng mơ̆ng hruê anăn diñu bi trông čhai si dưi bi mdjiê Yêsu. 54 Kyuanăn Yêsu amâo lŏ hiu hŏng klei êngiê ôh ti krah phung Yuđa, ƀiădah mơ̆ng anôk anăn Ñu nao kơ ƀuôn Êphraim giăm kdrăn tač; leh anăn Ñu dôk tinăn mbĭt hŏng phung ƀĭng kna Ñu. 55 Hruê Knăm phung Yuđa ƀơ̆ng Knăm Klei Găn giăm truh leh, leh anăn lu mnuih mơ̆ng krĭng mdê mdê nao kơ ƀuôn Yêrusalem êlâo kơ hruê Knăm Klei Găn, čiăng bi doh diñu pô. 56 Diñu duah Yêsu, leh anăn êjai diñu dôk dơ̆ng hlăm sang kkuh mpŭ, diñu bi lač hdơ̆ng diñu, “Ya diih mĭn lĕ? Yêsu amâo srăng hriê ôh hĕ kơ klei knăm anei?” 57 Phung knơ̆ng khua ngă yang leh anăn phung Pharisi mtă leh tơdah hlei pô thâo anôk Yêsu dôk, brei pô anăn hưn kơ diñu thâo, čiăng kơ diñu dưi mă čăp Yêsu.
H'Mari Trôč Êa ƀâo Mngưi Ti Jơ̆ng Yêsu
1 Năm hruê êlâo kơ Knăm Klei Găn, Yêsu nao kơ ƀuôn ƀêthani, anôk Y-Lasar dôk, pô Yêsu bi kbiă lŏ hdĭp leh mơ̆ng phung djiê. 2 Tinăn arăng mkra mnơ̆ng ƀơ̆ng huă kơ Yêsu. H'Mart pŭ mdơ̆ng mnơ̆ng ƀơ̆ng huă, leh anăn Y-Lasar jing sa čô hlăm phung huă ƀơ̆ng mbĭt hŏng Ñu. 3 Hlăk anăn H'Mari mă sa mkrah lit êa ƀâo mngưi nard phŭn yuôm snăk, trôč ti jơ̆ng Yêsu, leh anăn sut jơ̆ng Yêsu hŏng ƀŭk gơ̆, leh anăn sang anăn bŏ hŏng mnâo ƀâo mngưi. 4 Y-Yuđas Iskariôt, sa čô hlăm phung ƀĭng kna Yêsu (ñu yơh pô lhiăr kơ Yêsu), lač, 5 “Si ngă amâo čhĭ hĕ êa ƀâo mngưi anăn kơ ênoh tlâo êtuh đơniê leh anăn brei kơ phung ƀun ƀin?” 6 Ñu lač klei anăn, amâo djŏ kyuadah ñu uêñ kơ phung ƀun ƀin ôh, ƀiădah kyuadah ñu jing mnuih knĕ, leh anăn ñu jing pô djă kdŭng prăk leh anăn khăng mă prăk arăng dưm hlăm kdŭng anăn. 7 Yêsu lač, “Lui măng ai gơ̆, brei gơ̆ pioh êa ƀâo mngưi anei kơ hruê dơr kâo. 8 Diih mâo phung ƀun ƀin mbĭt hŏng diih nanao, ƀiădah diih amâo srăng mâo kâo mbĭt hŏng diih nanao ôh.”
Klei Trông Čhai Čiăng Bi Mdjiê Y-Lasar
9 Mâo lu lĭn phung Yuđa thâo leh Yêsu ti ƀêthani, snăn diñu hriê, amâo djŏ knŏng kyua Yêsu tinăn ôh, ƀiădah msĕ mơh čiăng dlăng Y-Lasar, pô Yêsu bi kbiă lŏ hdĭp leh mơ̆ng phung djiê. 10 Snăn phung knơ̆ng khua ngă yang bi trông čhai bi mdjiê wăt Y-Lasar msĕ mơh, 11 kyuadah mâo lu phung Yuđa lui diñu kyua Y-Lasar, leh anăn đăo kơ Yêsu.
Yêsu Đĭ Aseh Dliê Mŭt Hlăm ƀuôn Yêrusalem
12 Hruê êdei kơ anăn phung lu hriê leh kơ hruê knăm hmư̆ kơ Yêsu dơ̆ng hriê kơ ƀuôn Yêrusalem. 13 Snăn diñu mă adhan ana guôl leh anăn nao drông Yêsu, êjai ur lač, “Hôsana!, mpŭ mni kơ Pô hriê hlăm anăn Khua Yang, jing Mtao phung Israel!” 14 Yêsu ƀuh sa drei êđai aseh dliê leh anăn đĭ gơ̆, tui si Klei Aê Diê Blŭ čih leh, 15 “Đăm huĭ ôh, Ơ anak mniê ƀuôn Siôn; nĕ anei, Mtao ih hriê, đĭ êđai aseh dliê!” 16 Phung ƀĭng kna Ñu amâo thâo săng ôh klei anăn êlâo; ƀiădah tơdah Aê Diê bi guh kơang leh Yêsu, hlăk anăn digơ̆ hdơr kơ Klei Aê Diê Blŭ čih leh klei anăn djŏ kơ Ñu, leh anăn klei arăng ngă leh kơ Ñu snăn. 17 Phung lu dôk mbĭt hŏng Yêsu tơdah Ñu iêu Y-Lasar kbiă mơ̆ng msat leh anăn bi kbiă lŏ hdĭp gơ̆ mơ̆ng phung djiê, hưn bi sĭt klei anăn. 18 Phung lu nao bi tuôm hŏng Yêsu, kyuadah diñu hmư̆ leh Yêsu ngă klei bi knăl yuôm bhăn anăn. 19 Snăn phung Pharisi bi lač hdơ̆ng digơ̆, “Dlăng bĕ, diih amâo srăng dưi ôh. Nĕ anei, jih lăn ala tui hlue ñu leh.”
Đa Đa Phung Grĕk Duah Yêsu
20 Hlăm phung nao čiăng kkuh mpŭ êjai hruê knăm mâo đa đa phung Grĕk. 21 Diñu nao kơ Y-Philip, ƀuôn Betsaida hlăm čar Galilê, leh anăn lač kơ gơ̆, “Ơ khua, hmei čiăng dlăng Yêsu.” 22 Y-Philip nao hưn kơ Y-Andrê, leh anăn Y-Andrê nao mbĭt hŏng Y-Philip hưn kơ Yêsu. 23 Yêsu lŏ wĭt lač kơ digơ̆, “Mông truh leh brei Anak Mnuih mă tŭ klei guh kơang. 24 Kâo lač kơ ih klei sĭt nik, tơdah sa asăr mdiê ƀlê amâo lĕ ôh ti lăn leh anăn djiê, ñu ăt dôk knŏng sa asăr; ƀiădah tơdah ñu djiê, ñu mboh lu. 25 Hlei pô khăp kơ klei hdĭp ñu pô srăng bi luč gơ̆, leh anăn hlei pô bi êmut kơ klei hdĭp ñu pô hlăm lăn ala anei srăng pioh gơ̆ hlŏng lar. 26 Tơdah sa čô mă bruă kơ kâo, brei ñu tui hlue kâo. Ti anôk kâo dôk, dĭng buăl kâo srăng dôk tinăn msĕ mơh. Hlei pô mă bruă kơ kâo, Ama kâo srăng mpŭ kơ ñu.”
Yêsu Blŭ Djŏ kơ Klei Ñu Srăng Djiê
27 “Ară anei mngăt kâo rŭng răng. Leh anăn ya kâo srăng lač, ‘Ơ Ama, bi mtlaih kâo mơ̆ng mông anei mơ̆’? Hơăi, kyua klei anei yơh kâo truh kơ mông anei. 28 Ơ Ama, brei klei guh kơang kơ anăn ih.” Leh anăn mâo asăp blŭ mơ̆ng adiê, “Kâo brei leh klei guh kơang kơ anăn kâo, leh anăn kâo srăng lŏ bi guh kơang anăn kâo mơh.” 29 Phung lu dôk giăm hmư̆ klei anăn leh anăn lač, “Mâo ênai grăm yơh.” Phung mkăn lač, “Sa čô dĭng buăl jăk blŭ kơ Ñu.” 30 Yêsu lŏ wĭt lač, “Asăp anei truh leh kyua diih, amâo djŏ kyua kâo ôh. 31 Ară anei klei phat kđi truh kơ lăn ala anei. Ară anei Aê Diê srăng suôt khua kiă kriê lăn ala anei. 32 Bi kâo, tơdah arăng yơr asei mlei kâo ti dlông lăn, kâo srăng êwak jih jang mnuih kơ kâo pô.” 33 Yêsu lač klei anăn čiăng bi êdah si Ñu srăng djiê. 34 Phung lu lŏ wĭt lač kơ Ñu, “Hmei hriăm leh hlăm klei bhiăn kơ Yang Krist dôk nanao hlŏng lar. Si ih dưi lač arăng srăng yơr Anak Mnuih ti dlông lĕ? Hlei Anak Mnuih anăn?” 35 Yêsu lač kơ diñu, “Klei mngač ăt dôk mbĭt hŏng diih knŏng bhiâo. Êbat bĕ êjai diih mâo klei mngač, huĭdah klei mmăt srăng hmao diih. Hlei pô êbat hlăm klei mmăt amâo thâo ôh ti anôk ñu nao. 36 Êjai diih mâo klei mngač, đăo bĕ kơ klei mngač anăn, čiăng kơ diih dưi jing phung anak klei mngač.”
Klei Phung Yuđa Amâo Đăo Ôh
Leh Yêsu blŭ klei anăn, Ñu đuĕ dăp mơ̆ng phung anăn. 37 Wăt tơdah Ñu ngă leh lu klei bi knăl yuôm bhăn ti anăp diñu, ăt diñu kăn đăo kơ Ñu rei. 38 Klei anăn čiăng bi sĭt klei khua pô hưn êlâo Y-Êsai blŭ leh, “Ơ Khua yang, hlei pô đăo leh kơ klei hmei hưn, leh anăn kơ hlei pô Khua Yang bi êdah leh păl Ñu?” 39 Snăn diñu amâo dưi đăo ôh, kyuadah Y-Êsai lŏ blŭ leh, 40 “Aê Diê bi bum ală digơ̆ leh anăn bi khăng ai tiê digơ̆, huĭdah digơ̆ ƀuh hŏng ală digơ̆, leh anăn thâo săng hŏng ai tiê digơ̆, leh anăn lŏ wĭt kơ kâo čiăng kơ kâo bi hlao digơ̆.” 41 Y-Êsai blŭ klei anăn kyuadah ñu ƀuh klei guh kơang Yang Krist, leh anăn hưn klei djŏ kơ gơ̆. 42 Mâo lu wăt hlăm phung khua đăo kơ gơ̆, ƀiădah diñu amâo hưn klei anăn ôh, kyua huĭ kơ phung Pharisi, huĭdah arăng suôt diñu mơ̆ng sang bi kƀĭn. 43 Kyuadah diñu khăp kơ klei mnuih mpŭ mni lu hĭn kơ klei Aê Diê mpŭ mni.
Klei Yêsu Blŭ Srăng Jing Khua Phat Kđi
44 Yêsu ur kraih, lač, “Hlei pô đăo kơ kâo, amâo djŏ đăo kơ kâo pô ôh, ƀiădah kơ Pô tiŏ hriê leh kâo. 45 Leh anăn hlei pô ƀuh kâo ƀuh leh Pô tiŏ hriê kâo. 46 Kâo jing klei mngač hriê leh kơ lăn ala, čiăng kơ hlei pô đăo kơ kâo amâo lŏ dôk hlăm klei mmăt ôh. 47 Tơdah sa čô hmư̆ klei kâo blŭ leh anăn amâo djă pioh ôh, kâo amâo phat kđi ñu ôh; kyuadah kâo hriê amâo djŏ čiăng phat kđi lăn ala ôh, ƀiădah čiăng bi mtlaih lăn ala. 48 Hlei pô hngah kơ kâo leh anăn amâo mă tŭ ôh klei kâo blŭ mâo leh sa čô pô phat kđi ñu; klei kâo blŭ leh srăng jing pô phat kđi ñu ti hruê knhal tuč êdei. 49 Kyuadah kâo amâo tuôm blŭ hŏng klei kơhưm kâo pô ôh; ƀiădah Ama, Pô tiŏ hriê kâo, mtă brei leh kơ kâo ya klei kâo blŭ leh anăn hưn. 50 Leh anăn kâo thâo klei Ñu mtă anăn jing klei hdĭp hlŏng lar. Kyuanăn ya klei kâo blŭ, kâo blŭ tui si Ama mtă leh kơ kâo.”
Yêsu Rao Jơ̆ng Phung ƀĭng Kna Ñu
1 Êlâo kơ hruê Knăm Klei Găn, Yêsu thâo mông truh leh brei Ñu kbiă đuĕ mơ̆ng lăn ala wĭt kơ Ama. Ñu khăp leh kơ phung Ñu hlăm lăn ala, leh anăn Ñu khăp kơ digơ̆ tơl knhal tuč. 2 Êjai diñu dôk huă ƀơ̆ng mlam, yang jhat dưm leh hlăm ai tiê Y-Yuđas Iskariôt, anak êkei Y-Simôn, klei mĭn lhiăr kơ Yêsu, 3 Yêsu thâo kơ Ama jao leh jih jang mnơ̆ng hlăm kngan Ñu, kơ Ñu hriê leh mơ̆ng Aê Diê, leh anăn srăng lŏ wĭt kơ Aê Diê, 4 snăn Ñu kgŭ mơ̆ng jhưng huă, toh hĕ ao jhung Ñu, mă čhiăm sut leh anăn hyuă ti kơiêng Ñu. 5 Ñu tuh êa hlăm sa boh hmăm, dơ̆ng rao jơ̆ng phung ƀĭng kna, leh anăn sut jơ̆ng digơ̆ hŏng čhiăm Ñu hyuă ti kơiêng. 6 Ñu truh kơ Y-Simôn Pêtrôs, snăn gơ̆ lač kơ Ñu, “Ơ Khua Yang, ih rao jơ̆ng kâo hĕ?” 7 Yêsu lŏ wĭt lač kơ gơ̆, “Ya kâo ngă ih amâo thâo săng ôh ară anei, ƀiădah êdei ih srăng thâo săng.” 8 Y-Pêtrôs lač kơ Ñu, “Hơăi, ih amâo srăng rao jơ̆ng kâo ôh.” Yêsu lŏ wĭt lač kơ gơ̆, “Tơdah kâo amâo rao ih, ih amâo mâo sa kdrêč hlăm kâo ôh.” 9 Y-Simôn Pêtrôs lač kơ Ñu, “Ơ Khua Yang, amâo djŏ knŏng jơ̆ng kâo ôh, ƀiădah rao wăt kngan leh anăn boh kŏ kâo msĕ mơh!” 10 Yêsu lač kơ gơ̆, “Hlei pô mnei leh, knŏng yuôm brei arăng rao jơ̆ng ñu, kyuadah asei mlei ñu doh leh. Leh anăn diih jing doh leh, ƀiădah amâo djŏ jih jang diih ôh.” 11 Kyuadah Ñu thâo leh hlei pô srăng lhiăr kơ Ñu. Kyuanăn Yêsu lač, “Amâo djŏ jih jang diih ôh jing doh.” 12 Leh Yêsu rao jơ̆ng digơ̆, lŏ hơô ao jhung Ñu, leh anăn lŏ dôk gŭ ti jhưng huă, Ñu lač kơ digơ̆, “Diih thâo săng mơ̆ ya kâo ngă leh kơ diih? 13 Diih pia kâo Nai leh anăn Khua Yang. Djŏ leh diih pia, kyuadah kâo gơ̆ yơh anăn. 14 Tơdah kâo, Khua Yang leh anăn Nai diih, rao leh jơ̆ng diih, snăn msĕ mơh brei diih bi rao jơ̆ng hdơ̆ng diih. 15 Kyuadah kâo ngă leh sa klei bi hmô kơ diih, čiăng kơ diih msĕ mơh ngă msĕ si kâo ngă leh kơ diih. 16 Kâo lač kơ ih klei sĭt nik, sa čô dĭng buăl amâo jing prŏng hĭn kơ khua ñu ôh; leh anăn pô arăng tiŏ nao amâo jing prŏng hĭn kơ pô tiŏ nao ñu ôh. 17 Tơdah diih thâo leh anăn ngă klei anăn, jăk mơak yơh kơ diih. 18 Kâo amâo blŭ djŏ kơ jih jang diih ôh. Kâo thâo hlei phung kâo ruah leh, ƀiădah čiăng bi sĭt Klei Aê Diê Blŭ čih leh, ‘Pô ƀơ̆ng kpŭng kâo yŏng leh kđul ñu čiăng čưng kâo,’ 19 kâo hưn klei anăn kơ diih êlâo klei anăn truh, čiăng kơ tơdah truh, diih dưi đăo kơ kâo gơ̆ yơh jing Pô Jing. 20 Kâo lač kơ ih klei sĭt nik, hlei pô jum mnuih kâo tiŏ nao msĕ si jum kâo mơh; leh anăn hlei pô jum kâo jum wăt Pô tiŏ hriê kâo msĕ mơh!”
Yêsu Hưn Klei Arăng Srăng Lhiăr kơ Ñu
21 Leh Yêsu blŭ klei anăn, mngăt Ñu rŭng răng, leh anăn Ñu lač, “Kâo hưn kơ diih klei sĭt nik, sa čô hlăm phung diih srăng lhiăr kơ kâo.” 22 Phung ƀĭng kna bi dlăng hdơ̆ng diñu, amâo mâo sa čô thâo ôh kơ hlei pô Yêsu blŭ klei anăn. 23 Sa čô hlăm phung ƀĭng kna, pô Yêsu khăp, knang boh kŏ ñu ti đah da Yêsu. 24 Snăn Y-Simôn Pêtrôs pưi kngan êmuh kơ pô anăn, lač, “Hưn bĕ kơ hmei kơ hlei pô Yêsu blŭ klei anăn.” 25 Snăn êjai knang ti đah da Yêsu, gơ̆ lač kơ Yêsu, “Ơ Khua Yang, hlei pô anăn?” 26 Yêsu lŏ wĭt lač, “Ñu yơh jing pô kâo srăng brei klŏ kpŭng tơdah leh kâo đrŭt anei.” Snăn tơdah Ñu đrŭt leh klŏ kpŭng anăn, Ñu brei gơ̆ kơ Y-Yuđas anak êkei Y-Simôn Iskariôt. 27 Leh Y-Yuđas mă klŏ kpŭng anăn, yang Satan mŭt hlăm Y-Yuđas. Yêsu lač kơ Y-Yuđas, “Ya klei ih ngă, ngă bĕ bi djăl.” 28 ƀiădah amâo mâo mnuih ti jhưng huă anăn thâo săng ya ngă Yêsu lač klei anăn kơ gơ̆. 29 Đa đa mĭn kyuadah Y-Yuđas djă hip prăk, Yêsu mtă kơ gơ̆, “Blei bĕ ya mnơ̆ng drei kƀah kơ hruê knăm;” amâodah čiăng kơ gơ̆ nao bi mbha mnơ̆ng kơ phung ƀun ƀin. 30 Snăn leh Y-Yuđas mă klŏ kpŭng anăn, gơ̆ kbiă đuĕ mtam; hlăk anăn mmăt mlam leh.
Klei Mtă Mrâo
31 Leh Y-Yuđas kbiă đuĕ, Yêsu lač, “Ară anei Anak Mnuih mâo klei guh kơang, leh anăn hlăm Ñu Aê Diê mâo klei guh kơang. 32 Tơdah Aê Diê mâo klei guh kơang hlăm Ñu, msĕ mơh Aê Diê srăng bi guh kơang kơ Anak Mnuih hlăm Aê Diê pô, leh anăn Aê Diê srăng ngă msĕ snăn mtam. 33 Ơ phung hđeh điêt, ăt dôk knŏng bhiâo kâo dôk mbĭt hŏng diih. Diih srăng duah kâo; leh anăn msĕ si kâo lač leh kơ phung Yuđa, ară anei kâo lač kơ diih msĕ mơh, ‘Ti anôk kâo nao, diih amâo dưi nao ôh.’ 34 Kâo brei klei mtă mrâo kơ diih: brei diih bi khăp hdơ̆ng diih pô; msĕ si kâo khăp leh kơ diih, brei diih bi khăp hdơ̆ng diih pô msĕ mơh. 35 Hŏng klei anei jih jang mnuih srăng thâo kơ diih jing phung ƀĭng kna kâo, tơdah diih bi khăp hdơ̆ng diih pô.”
Yêsu Hưn Êlâo Klei Y-Pêtrôs Srăng Hngah kơ Ñu
36 Y-Simôn Pêtrôs êmuh Yêsu, “Ơ Khua Yang, ti anôk ih nao?” Yêsu lŏ wĭt lač, “Ti anôk kâo nao ih amâo dưi tui hlue kâo ôh ară anei, ƀiădah ih srăng tui hlue êdei.” 37 Y-Pêtrôs êmuh Yêsu, “Ơ Khua Yang, si ngă kâo amâo dưi tui hlue ih ară anei lĕ? Kâo srăng jao klei hdĭp kâo pô kyua ih.” 38 Yêsu lŏ wĭt lač, “Ih srăng jao brei klei hdĭp ih pô kyua kâo mơ̆? Kâo lač kơ ih klei sĭt nik, mnŭ knô amâo srăng kdjô̆ ôh tơl ih hngah leh kơ kâo tlâo bliư̆.”
Yêsu Jing Êlan Nao kơ Ama
1 “Đăm brei ai tiê diih rŭng răng ôh; đăo bĕ kơ Aê Diê, leh anăn đăo kơ kâo msĕ mơh. 2 Hlăm sang Ama kâo mâo lu anôk dôk; tơdah amâo djŏ snăn ôh, kâo hưn leh kơ diih. Kâo srăng nao mkra sa anôk kơ diih. 3 Leh anăn tơdah kâo nao mkra sa anôk kơ diih, kâo srăng lŏ hriê leh anăn mă diih kơ kâo pô, čiăng kơ ti anôk kâo dôk diih dưi dôk msĕ mơh. 4 Leh anăn diih thâo leh êlan anăn ti anôk kâo nao.” 5 Y-Thômas lač kơ Ñu, “Ơ Khua Yang, hmei amâo thâo ôh ti anôk ih nao. Si hmei dưi thâo bĭt êlan anăn lĕ?” 6 Yêsu lač kơ gơ̆, “Kâo jing êlan, klei sĭt nik, leh anăn klei hdĭp; amâo mâo pô dưi nao kơ Ama, knŏng hŏng kâo. 7 Tơdah diih thâo kral leh kâo, diih thâo kral leh Ama kâo msĕ mơh. Mơ̆ng anei kơ anăp diih thâo kral Ñu leh, leh anăn diih ƀuh Ñu leh.” 8 Y-Philip lač kơ Yêsu, “Ơ Khua Yang, bi êdah bĕ Ama kơ hmei, dŭm anăn hmei čiăng.” 9 Yêsu lač kơ gơ̆, “Kâo dôk sui leh mbĭt hŏng diih, ƀiădah, Ơ Y-Philip, ăt ih amâo thâo kral kâo mơ̆? Hlei pô ƀuh leh kâo ƀuh leh Ama. Si ih dưi lač, ‘Bi êdah bĕ Ama kơ hmei’? 10 Ih amâo đăo hĕ kơ kâo dôk hlăm Ama, leh anăn kơ Ama dôk hlăm kâo? Klei kâo blŭ kơ diih kâo amâo lač hŏng klei kơhưm kâo pô ôh; ƀiădah Ama Pô dôk hlăm kâo ngă bruă Ñu. 11 Đăo bĕ kơ kâo dôk hlăm Ama leh anăn Ama dôk hlăm kâo; amâodah đăo bĕ kyua bruă kâo ngă anăn. 12 Kâo lač kơ ih klei sĭt nik, hlei pô đăo kơ kâo srăng ngă mơh bruă kâo ngă; leh anăn ñu srăng ngă bruă prŏng hĭn kơ bruă kâo ngă, kyuadah kâo đuĕ nao kơ Ama. 13 Ya klei diih akâo hlăm anăn kâo, kâo srăng ngă klei anăn, čiăng kơ Ama dưi mâo klei guh kơang hlăm Anak. 14 Tơdah ya klei diih akâo kơ kâo hlăm anăn kâo, kâo srăng ngă klei anăn.”
Klei Yêsu ƀuăn Brei Yang Mngăt Jăk
15 “Tơdah diih khăp kơ kâo, diih srăng djă pioh klei kâo mtă. 16 Leh anăn kâo srăng akâo kơ Ama, leh anăn Ñu srăng brei kơ diih Pô Đru mkăn dôk mbĭt hŏng diih nanao, 17 jing Mngăt Myang klei sĭt nik. Pô anăn lăn ala amâo dưi jum ôh, kyuadah lăn ala amâo ƀuh Gơ̆ ôh, kăn thâo kral Gơ̆ rei. Diih thâo kral Yang Mngăt Jăk, kyuadah gơ̆ dôk mbĭt hŏng diih, leh anăn srăng dôk hlăm diih. 18 Kâo amâo srăng lui diih anak êrĭt ôh; kâo srăng hriê kơ diih. 19 Adôk ƀiă leh anăn lăn ala amâo srăng lŏ ƀuh kâo ôh, ƀiădah diih srăng ƀuh kâo. Kyuadah kâo dôk hdĭp, diih srăng dôk hdĭp msĕ mơh. 20 Hlăm hruê anăn diih srăng thâo kơ kâo dôk hlăm Ama kâo, leh anăn diih dôk hlăm kâo, leh anăn kâo dôk hlăm diih. 21 Hlei pô mâo klei kâo mtă leh anăn djă pioh digơ̆, ñu anăn yơh jing pô khăp kơ kâo. Hlei pô khăp kơ kâo, Ama kâo srăng khăp kơ pô anăn, kâo srăng khăp kơ ñu leh anăn bi êdah kâo pô kơ ñu.” 22 Y-Yuđas (amâo djŏ ôh Y-Yuđas Iskariôt) lač kơ Yêsu, “Ơ Khua Yang, ya ngă ih srăng bi êdah ih pô kơ hmei leh anăn amâo bi êdah kơ lăn ala ôh?” 23 Yêsu lŏ wĭt lač kơ gơ̆, “Tơdah sa čô khăp kơ kâo, ñu srăng djă pioh klei kâo blŭ, leh anăn Ama kâo srăng khăp kơ ñu, leh anăn hmei srăng hriê kơ ñu leh anăn ngă anôk dôk mbĭt hŏng ñu. 24 Hlei pô amâo khăp kơ kâo amâo djă pioh ôh klei kâo blŭ. Leh anăn klei blŭ diih hmư̆ amâo djŏ klei kâo pô ôh, ƀiădah mơ̆ng Ama, Pô tiŏ hriê kâo. 25 Kâo lač klei anăn kơ diih êjai kâo ăt dôk mbĭt hŏng diih. 26 ƀiădah Pô Đru, jing Yang Mngăt Jăk, Pô Ama srăng tiŏ hriê hlăm anăn kâo, Ñu srăng mtô jih jang klei kơ diih, leh anăn Ñu srăng brei diih hdơr jih jang klei kâo lač leh kơ diih. 27 Kâo lui klei êđăp ênang mbĭt hŏng diih; kâo brei kơ diih klei êđăp ênang kâo pô. Kâo brei kơ diih amâo djŏ msĕ si lăn ala brei ôh. Đăm brei ai tiê diih rŭng răng ôh, kăn huĭ rei. 28 Diih hmư̆ leh kâo lač kơ diih, ‘Kâo đuĕ nao, leh anăn kâo srăng lŏ hriê kơ diih.’ Tơdah diih khăp leh kơ kâo diih mơak leh, kyuadah kâo nao kơ Ama; kyuadah Ama jing prŏng hĭn kơ kâo. 29 Leh anăn ară anei kâo hưn kơ diih êlâo klei anăn truh, snăn tơdah klei anăn truh, diih srăng đăo. 30 Kâo amâo srăng lŏ blŭ lu hŏng diih ôh, kyuadah khua kiă kriê lăn ala anei hriê. Ñu amâo mâo klei dưi hŏng kâo ôh; 31 ƀiădah kâo ngă tui si Ama mtă leh kơ kâo, čiăng kơ lăn ala dưi thâo kâo khăp kơ Ama. Kgŭ bĕ, brei drei nao.”
Yêsu Jing Ana Boh Kriăk ƀâo Sĭt
1 Kâo jing ana boh kriăk ƀâo sĭt, leh anăn Ama kâo jing pô pla. 2 Grăp adhan hlăm kâo amâo mboh ôh, Ñu mă khăt hĕ, leh anăn grăp adhan mboh, Ñu lŏ mkra khăt, čiăng kơ gơ̆ dưi mboh lu hĭn. 3 Diih jing doh leh kyua klei blŭ kâo mtô leh kơ diih. 4 Dôk bĕ hlăm kâo, leh anăn kâo dôk hlăm diih. Msĕ si adhan amâo dưi mboh hjăn ñu pô ôh, knŏng tơdah ñu dôk đuôm hŏng ana, msĕ snăn mơh kăn diih dưi mboh rei, knŏng tơdah diih dôk hlăm kâo. 5 Kâo jing ana boh kriăk ƀâo, diih jing adhan. Hlei pô dôk hlăm kâo leh anăn kâo dôk hlăm ñu, ñu anăn srăng mboh lu. Kyuadah tơdah amâo mâo kâo, diih amâo dưi ngă sa klei ôh. 6 Tơdah sa čô mnuih amâo dôk hlăm kâo ôh, Aê Diê hwiê ñu ti tač msĕ si arăng hwiê sa ƀĕ adhan, leh anăn ñu krô. Arăng bi kƀĭn adhan anăn leh anăn hwiê hlăm pui brei pui ƀơ̆ng jih. 7 Tơdah diih dôk hlăm kâo, leh anăn klei kâo blŭ dôk hlăm diih, akâo bĕ ya klei diih čiăng, leh anăn arăng srăng ngă brei kơ diih. 8 Kyuadah hlăm klei anei Ama kâo mâo klei guh kơang: tơdah diih mboh lu, snăn diih jing phung ƀĭng kna kâo. 9 Msĕ si Ama khăp kơ kâo leh, snăn mơh kâo khăp leh kơ diih. Dôk bĕ hlăm klei kâo khăp. 10 Tơdah diih djă pioh klei kâo mtă, diih srăng dôk hlăm klei kâo khăp, msĕ si kâo djă pioh leh klei Ama kâo mtă leh anăn dôk hlăm klei Ñu khăp. 11 Jih klei anăn kâo lač leh kơ diih, čiăng kơ klei mơak kâo dưi dôk hlăm diih, leh anăn čiăng kơ klei mơak diih dưi jing klă ênŭm. 12 Anei jing klei kâo mtă: Brei diih bi khăp hdơ̆ng diih msĕ si kâo khăp leh kơ diih. 13 Amâo mâo pô dưi mâo klei khăp prŏng hĭn kơ anei: klei sa čô mnuih djiê kyua phung mah jiăng ñu. 14 Diih jing phung mah jiăng kâo, tơdah diih ngă klei kâo mtă kơ diih. 15 Kâo amâo lŏ pia kơ diih dĭng buăl ôh, kyuadah dĭng buăl amâo thâo ôh ya klei khua ñu ngă. ƀiădah kâo pia kơ diih mah jiăng, kyuadah jih jang klei kâo hmư̆ mơ̆ng Ama, kâo bi êdah leh kơ diih. 16 Diih amâo tuôm ruah kâo ôh, ƀiădah kâo ruah leh diih leh anăn pioh brei diih čiăng kơ diih nao leh anăn mboh, leh anăn brei boh diih ăt dôk; čiăng kơ ya klei diih akâo kơ Ama hlăm anăn kâo, Ñu dưi brei klei anăn kơ diih. 17 Klei anei kâo mtă kơ diih: brei diih bi khăp hdơ̆ng diih.
Klei Phung Lăn Ala Bi Êmut
18 “Tơdah lăn ala bi êmut kơ diih, brei diih thâo kơ lăn ala bi êmut leh kơ kâo êlâo. 19 Tơdah diih jing phung lăn ala, lăn ala srăng khăp kơ phung ñu pô. ƀiădah kyuadah diih amâo jing ôh phung lăn ala, kâo ruah leh diih mơ̆ng lăn ala, kyuanăn lăn ala bi êmut kơ diih. 20 Hdơr bĕ klei kâo lač leh kơ diih, ‘Sa čô dĭng buăl amâo jing prŏng hĭn kơ khua ñu ôh.’ Tơdah diñu ngă jhat leh kơ kâo, diñu srăng ngă jhat kơ diih msĕ mơh. Tơdah diñu djă pioh klei kâo blŭ, diñu srăng djă pioh klei diih blŭ msĕ mơh. 21 ƀiădah diñu srăng ngă jih klei anăn kơ diih kyua kâo, kyuadah diñu amâo thâo kral ôh Pô tiŏ hriê kâo. 22 Tơdah kâo amâo hriê leh anăn blŭ kơ diñu, diñu amâo mâo klei soh ôh. ƀiădah ară anei diñu amâo dưi hngah klei soh diñu ôh. 23 Hlei pô bi êmut kơ kâo, bi êmut kơ Ama kâo msĕ mơh. 24 Tơdah kâo amâo tuôm ngă ti krah diñu bruă pô mkăn amâo tuôm ngă, diñu amâo mâo klei soh ôh. ƀiădah ară anei diñu ƀuh, leh anăn bi êmut leh kơ kâo wăt kơ Ama kâo. 25 Klei anăn truh leh čiăng bi sĭt klei blŭ čih leh hlăm klei bhiăn diñu, ‘Diñu bi êmut kơ kâo leh amâo mâo klei ôh.’ 26 Tơdah Pô Đru truh, Pô kâo srăng tiŏ hriê kơ diih mơ̆ng Ama, jing Mngăt Myang klei sĭt nik, Pô kbiă hriê mơ̆ng Ama, Ñu yơh srăng hưn bi sĭt kơ kâo. 27 Leh anăn diih msĕ mơh jing phung hưn bi sĭt, kyuadah diih dôk leh mbĭt hŏng kâo mơ̆ng mphŭn dơ̆ng.”
1 “Kâo lač leh kơ diih jih klei anei, čiăng kơ diih amâo têč hnêč ôh. 2 Arăng srăng suôt diih mơ̆ng sang bi kƀĭn. Sĭt nik, mông giăm truh tơdah hlei pô bi mdjiê diih srăng mĭn ñu đru bruă Aê Diê. 3 Diñu srăng ngă klei anăn, kyuadah diñu amâo tuôm thâo kral Ama ôh, kăn thâo kral kâo rei. 4 ƀiădah kâo lač leh klei anăn kơ diih, čiăng kơ tơdah mông diñu ngă snăn truh, diih dưi hdơr kâo hưn leh klei anăn kơ diih.”
Bruă Yang Mngăt Jăk
“Kâo amâo blŭ klei anăn mơ̆ng mphŭn ôh, kyuadah kâo ăt dôk mbĭt hŏng diih. 5 Ară anei kâo amra wĭt kơ Pô tiŏ hriê kâo, ƀiădah amâo mâo sa čô hlăm phung diih êmuh kơ kâo, ‘Ti anôk ih nao?’ 6 ƀiădah kyua kâo lač leh klei anăn kơ diih, ai tiê diih bŏ hŏng klei ênguôt. 7 Wăt tơdah snăn kâo hưn klei sĭt nik kơ diih: jing jăk hĭn kơ diih tơdah kâo đuĕ wĭt. Kyuadah tơdah kâo amâo đuĕ wĭt ôh, Pô Đru amâo srăng hriê kơ diih ôh. ƀiădah tơdah kâo wĭt, kâo srăng tiŏ hriê Ñu kơ diih. 8 Leh anăn tơdah Ñu truh, Ñu srăng kčŭt lăn ala kơ klei soh, kơ klei kpă ênô, leh anăn kơ klei phat kđi: 9 kơ klei soh, kyuadah diñu amâo đăo kơ kâo ôh; 10 kơ klei kpă ênô, kyuadah kâo đuĕ wĭt kơ Ama, leh anăn diih amâo srăng lŏ ƀuh kâo ôh; 11 kơ klei phat kđi, kyuadah khua kiă kriê lăn ala anei Aê Diê phat kđi leh. 12 Kâo ăt mâo lu klei čiăng lač kơ diih, ƀiădah diih amâo dưi thâo săng ôh ară anei. 13 Tơdah Mngăt Myang klei sĭt nik truh, Ñu srăng atăt diih hlăm jih jang klei sĭt nik. Kyuadah Ñu amâo srăng blŭ hŏng klei kơhưm Ñu pô ôh, ƀiădah Ñu srăng blŭ jih klei Ñu hmư̆, leh anăn Ñu srăng hưn kơ diih klei srăng truh êdei. 14 Ñu srăng bi guh kơang kâo, kyuadah Ñu srăng mă klei mơ̆ng kâo leh anăn hưn klei anăn kơ diih. 15 Jih jang mnơ̆ng Ama mâo, jing dŏ kâo sơăi; kyuanăn kâo lač leh Mngăt Myang srăng mă klei mơ̆ng kâo leh anăn hưn klei anăn kơ diih.”
Klei Ênguôt leh anăn Klei Mơak
16 “Ăt dôk bhiâo, diih amâo srăng lŏ ƀuh kâo ôh; leh anăn lŏ ăt dôk bhiâo, diih srăng lŏ ƀuh kâo.” 17 Đa đa hlăm phung ƀĭng kna Yêsu bi lač hdơ̆ng digơ̆, “Ya klei Ñu lač leh kơ drei, ‘Ăt dôk bhiâo, diih amâo srăng lŏ ƀuh kâo ôh; leh anăn lŏ ăt dôk bhiâo, diih srăng lŏ ƀuh kâo,’ leh anăn ‘Kyuadah kâo wĭt kơ Ama’?” 18 Digơ̆ lač, “Ya klei Ñu lač, ‘Ăt dôk bhiâo’? Drei amâo thâo săng klei anăn ôh.” 19 Yêsu thâo leh digơ̆ čiăng êmuh kơ Ñu, snăn Ñu lač kơ digơ̆, “Klei anei mơ̆ diih bi êmuh hdơ̆ng diih pô kơ klei kâo lač, ‘Ăt dôk bhiâo, diih amâo srăng lŏ ƀuh kâo ôh, leh anăn lŏ ăt dôk bhiâo, diih srăng lŏ ƀuh kâo’? 20 Kâo lač kơ ih klei sĭt, diih srăng hia leh anăn ênguôt, ƀiădah lăn ala srăng hơ̆k mơak. Diih srăng ênguôt, ƀiădah Aê Diê srăng mbliư̆ klei ênguôt diih jing klei hơ̆k mơak. 21 Êjai sa čô mniê ruă kkiêng ñu mâo klei ênguôt, kyuadah mông ñu kkiêng truh leh. ƀiădah leh ñu kkiêng kơ anak, ñu amâo lŏ hdơr klei ñu ruă ôh, kyua klei mơak ñu kkiêng leh anak hlăm lăn ala. 22 Snăn mơh ară anei diih mâo klei ênguôt, ƀiădah kâo srăng lŏ ƀuh diih, leh anăn ai tiê diih srăng hơ̆k mơak, leh anăn arăng amâo dưi mă ôh klei hơ̆k mơak anăn mơ̆ng diih. 23 Ti hruê anăn diih amâo srăng lŏ êmuh kâo sa mta klei ôh. Kâo lač kơ diih klei sĭt, ya klei diih akâo kơ Ama hlăm anăn kâo, Ñu srăng brei kơ diih. 24 Truh kơ ară anei diih ka akâo ôh sa klei hlăm anăn kâo. Akâo bĕ, leh anăn diih srăng mă tŭ, čiăng kơ klei hơ̆k mơak diih srăng jing klă ênŭm.”
Klei Dưi hŏng Lăn Ala
25 “Kâo lač leh jih klei anei kơ diih hŏng klei bi hmô. Mông truh, kâo amâo srăng lŏ blŭ ôh kơ diih hŏng klei bi hmô, ƀiădah kâo srăng bi êdah mngač Ama kơ diih. 26 Hlăm hruê anăn diih srăng akâo hlăm anăn kâo. Kâo amâo lač ôh kơ diih kơ kâo srăng akâo kơ Ama kyua diih; 27 kyuadah Ama Pô khăp kơ diih, kyuadah diih khăp leh kơ kâo leh anăn đăo leh kâo kbiă hriê mơ̆ng Ama. 28 Kâo kbiă leh mơ̆ng Ama leh anăn hriê hlăm lăn ala. Ară anei kâo kbiă mơ̆ng lăn ala leh anăn lŏ wĭt kơ Ama.” 29 Phung ƀĭng kna Ñu lač, “Ară anei ih blŭ mngač, leh anăn amâo blŭ bi hmô ôh. 30 Ară anei hmei thâo leh kơ ih thâo jih jang klei, amâo guôn mâo pô ksiêm êmuh ih ôh. Kyuanăn hmei đăo kơ ih kbiă hriê leh mơ̆ng Aê Diê.” 31 Yêsu lŏ wĭt lač kơ digơ̆, “Ară anei hĕ diih đăo? 32 Nĕ anei, mông truh, leh anăn truh leh, hlăk anăn diih srăng klah đuĕ mdê mdê, grăp čô kơ sang gơ̆ pô, leh anăn srăng lui kâo dôk hjăn. ƀiădah kâo amâo dôk hjăn ôh, kyuadah Ama dôk mbĭt hŏng kâo. 33 Kâo lač leh klei anei kơ diih, čiăng kơ diih dưi mâo klei êđăp ênang hlăm kâo. Hlăm lăn ala diih srăng mâo klei knap mñai; ƀiădah dôk kjăp bĕ, kâo dưi leh hŏng lăn ala.”
Yêsu Wah Lač Kyua Phung ƀĭng Kna Ñu
1 Tơdah Yêsu blŭ leh klei anăn, Ñu angưi ală phă adiê leh anăn lač, “Ơ Ama, mông truh leh; bi guh kơang bĕ Anak Ih, čiăng kơ Anak dưi bi guh kơang Ih; 2 kyuadah Ih brei leh kơ Ñu klei dưi kiă kriê jih jang mnuih, čiăng kơ Ñu dưi brei klei hdĭp hlŏng lar kơ jih jang phung Ih brei leh kơ Ñu. 3 Leh anăn anei jing klei hdĭp hlŏng lar: čiăng kơ diñu thâo kral Ih, knŏng hjăn Ih jing Aê Diê sĭt, leh anăn Yêsu Krist Pô Ih tiŏ hriê leh. 4 Kâo bi guh kơang Ih leh ti lăn ala hŏng klei kâo ngă bi jih leh bruă Ih brei kâo ngă. 5 Ară anei, Ơ Ama, bi guh kơang kâo ti anăp Ih hŏng klei guh kơang kâo mâo leh mbĭt hŏng Ih êlâo kơ klei hrih lăn ala. 6 Kâo bi êdah anăn Ih leh kơ phung mnuih Ih brei leh kơ kâo mơ̆ng lăn ala. Diñu jing phung Ih, leh anăn Ih brei diñu leh kơ kâo, leh anăn diñu djă pioh leh klei Ih blŭ. 7 Ară anei diñu thâo leh kơ jih jang klei Ih brei leh kơ kâo kbiă mơ̆ng Ih. 8 Kyuadah kâo brei leh kơ diñu klei blŭ Ih brei leh kơ kâo, leh anăn diñu mă tŭ leh klei blŭ anăn, leh anăn diñu thâo sĭt nik kơ kâo kbiă hriê mơ̆ng Ih. Leh anăn diñu đăo kơ Ih tiŏ hriê kâo leh. 9 Kâo wah lač brei kơ diñu. Kâo amâo wah lač brei kơ lăn ala ôh, ƀiădah kơ phung Ih brei leh kơ kâo, kyuadah diñu jing phung Ih. 10 Jih jang phung kâo jing phung Ih, leh anăn phung Ih jing phung kâo, leh anăn kâo mâo klei guh kơang hlăm diñu. 11 Ară anei kâo amâo lŏ dôk hlăm lăn ala ôh, ƀiădah diñu dôk hlăm lăn ala, leh anăn kâo wĭt kơ Ih. Ơ Ama Doh Jăk, răng kriê diñu hlăm anăn Ih, anăn Ih brei leh kơ kâo, čiăng kơ diñu jing sa, msĕ si drei jing sa. 12 Êjai kâo dôk mbĭt hŏng diñu, kâo răng kriê diñu hlăm anăn Ih, anăn Ih brei leh kơ kâo. Kâo kiă kriê diñu leh, leh anăn amâo mâo sa čô hlăm phung diñu luč ôh, knŏng anak kơ klei luč, čiăng bi sĭt Klei Aê Diê Blŭ čih leh. 13 ƀiădah ară anei kâo wĭt kơ Ih. Kâo lač klei anei hlăm lăn ala, čiăng kơ klei hơ̆k mơak kâo dưi bi sĭt hlăm ai tiê diñu. 14 Kâo brei leh klei Ih blŭ kơ diñu. Lăn ala bi êmut kơ diñu leh, kyuadah diñu amâo jing phung lăn ala ôh, msĕ si kâo amâo jing phung lăn ala ôh. 15 Kâo amâo akâo kơ Ih mă ba diñu kbiă mơ̆ng lăn ala ôh, ƀiădah čiăng kơ Ih kiă kriê diñu mơ̆ng pô jhat. 16 Diñu amâo jing phung lăn ala ôh, msĕ si kâo amâo jing phung lăn ala ôh. 17 Bi doh jăk diñu hŏng klei sĭt nik; klei Ih blŭ jing klei sĭt nik. 18 Msĕ si Ih tiŏ hriê leh kâo hlăm lăn ala, msĕ snăn mơh kâo tiŏ nao leh diñu hlăm lăn ala. 19 Leh anăn kyua diñu kâo bi doh kâo pô, čiăng kơ diñu msĕ mơh mâo klei bi doh hlăm klei sĭt nik. 20 Kâo amâo wah lač knŏng kơ phung anei ôh, ƀiădah kâo wah lač msĕ mơh kơ phung srăng đăo kơ kâo kyua klei diñu hưn, 21 čiăng kơ jih jang diñu jing sa; msĕ si Ih, Ơ Ama, dôk hlăm kâo, leh anăn kâo dôk hlăm Ih, čiăng kơ diñu msĕ mơh dôk hlăm drei; čiăng kơ lăn ala dưi đăo kơ Ih tiŏ hriê leh kâo. 22 Kâo brei leh kơ diñu klei guh kơang Ih brei leh kơ kâo, čiăng kơ diñu dưi jing sa msĕ si drei jing sa; 23 kâo hlăm diñu, leh anăn Ih hlăm kâo, čiăng kơ diñu dưi jing sa sĭt nik, čiăng kơ lăn ala dưi thâo kơ Ih tiŏ hriê leh kâo, leh anăn kơ Ih khăp leh kơ diñu msĕ si Ih khăp leh kơ kâo. 24 Ơ Ama, kâo čiăng kơ phung Ih brei leh kơ kâo msĕ mơh dưi dôk mbĭt hŏng kâo ti anôk kâo dôk, čiăng kơ diñu ƀuh klei guh kơang kâo, Ih brei leh kơ kâo kyua Ih khăp leh kơ kâo êlâo kơ klei hrih lăn ala. 25 Ơ Ama Pô Kpă, lăn ala amâo tuôm thâo kral Ih ôh, ƀiădah kâo thâo kral Ih leh. Leh anăn phung anei thâo kơ Ih tiŏ hriê kâo leh. 26 Kâo brei leh diñu thâo kral anăn Ih leh, leh anăn kâo srăng lŏ brei diñu thâo kral anăn Ih, čiăng kơ klei Ih khăp leh kơ kâo dưi dôk hlăm diñu, leh anăn kâo dưi dôk hlăm diñu mơh.”
Klei Arăng Mă Čăp Yêsu
1 Leh Yêsu wah lač, Ñu nao mbĭt hŏng phung ƀĭng kna Ñu găn tlung êa hnoh Kidrôn, tinăn mâo war mnga. Ñu mŭt tinăn mbĭt hŏng phung ƀĭng kna Ñu. 2 Y-Yuđas, pô lhiăr kơ Yêsu, thâo bĭt anôk anăn mơh; kyuadah Yêsu khăng bi tuôm jêñ jêñ tinăn mbĭt hŏng phung ƀĭng kna Ñu. 3 Snăn Y-Yuđas atăt sa phung kahan Rôm mbĭt hŏng đa đa phung kahan kiă mơ̆ng phung knơ̆ng khua ngă yang leh anăn phung Pharisi, nao tinăn djă pui kđen, pui kƀong, leh anăn mnơ̆ng bi blah. 4 Yêsu thâo leh êlâo jih jang klei srăng truh kơ gơ̆, snăn gơ̆ nao bi tuôm hŏng phung anăn leh anăn êmuh, “Hlei diih duah?” 5 Diñu lŏ wĭt lač kơ gơ̆, “Yêsu ƀuôn Nasaret.” Yêsu lač kơ diñu, “Kâo gơ̆ yơh.” Y-Yuđas, pô lhiăr kơ gơ̆, dôk mbĭt hŏng diñu. 6 Tơdah Yêsu lač kơ diñu, “Kâo gơ̆ yơh,” diñu kdŭn tluôn leh anăn lĕ buh ti lăn. 7 Yêsu lŏ êmuh kơ diñu, “Hlei diih duah?” Diñu lač, “Yêsu ƀuôn Nasaret.” 8 Yêsu lŏ wĭt lač, “Kâo lač leh kơ diih kâo gơ̆ yơh. Snăn tơdah diih duah kâo, brei phung anei đuĕ wĭt.” 9 Klei anăn čiăng bi sĭt klei gơ̆ blŭ leh, “Kâo amâo luč ôh sa čô đơ phung ih brei leh kơ kâo.” 10 Hlăk anăn Y-Simôn Pêtrôs mâo sa ƀĕ đao gưm, suê̆ koh dĭng buăl khua ngă yang prŏng djŏ ti knga hnuă tơl tloh; anăn dĭng buăl anăn Y-Malkus. 11 Yêsu lač kơ Y-Pêtrôs, “Lŏ hrô đao gưm ih hlăm hrŭm gơ̆. Kâo amâo srăng mnăm hĕ atŏ Ama kâo brei leh kơ kâo?”
Yêsu Ti Anăp Y-Anas
12 Snăn phung kahan Rôm, khua kahan, leh anăn phung kahan kiă Yuđa mă Yêsu leh anăn čăp gơ̆. 13 Êlâo hĭn diñu atăt ba Yêsu kơ Y-Anas; kyuadah Y-Anas jing kmha Y-Kaip. Y-Kaip jing khua ngă yang prŏng thŭn anăn. 14 Y-Kaip anăn mơh kčĕ leh kơ phung Yuđa: jing jăk hĭn tơdah sa čô mnuih djiê hrô kơ phung ƀuôn sang.
Klei Y-Pêtrôs Hngah kơ Yêsu
15 Y-Simôn Pêtrôs leh anăn sa čô ƀĭng kna mkăn tui hlue Yêsu. Kyuadah khua ngă yang prŏng thâo kral ƀĭng kna anăn, ñu mŭt hlăm wăl sang khua ngă yang prŏng mbĭt hŏng Yêsu. 16 ƀiădah Y-Pêtrôs ăt dôk dơ̆ng ti êngao ƀăng bhă. Snăn ƀĭng kna mkăn anăn, pô khua ngă yang prŏng thâo kral, kbiă nao blŭ hŏng dĭng buăl mniê kiă ƀăng bhă, leh anăn atăt Y-Pêtrôs mŭt. 17 Dĭng buăl mniê pô kiă ƀăng bhă anăn lač kơ Y-Pêtrôs, “Amâo djŏ hĕ ih msĕ mơh jing sa čô ƀĭng kna êkei anăn?” Ñu lač, “Hơăi, amâo djŏ ôh.” 18 Phung dĭng buăl leh anăn phung khua kahan răm leh pui hdăng, leh anăn dôk dơ̆ng mdang pui, kyuadah adiê êăt. Wăt Y-Pêtrôs mơh dôk mbĭt hŏng diñu, dôk dơ̆ng leh anăn mdang pui.
Khua Ngă Yang Prŏng Êmuh Yêsu
19 Hlăk anăn khua ngă yang prŏng êmuh Yêsu klei djŏ kơ phung ƀĭng kna Ñu leh anăn kơ klei Ñu mtô. 20 Yêsu lŏ wĭt lač kơ khua ngă yang prŏng, “Kâo blŭ mngač leh ti anăp jih jang mnuih, kâo mtô nanao hlăm sang bi kƀĭn leh anăn hlăm sang kkuh mpŭ, anôk jih jang phung Yuđa khăng bi kƀĭn. Kâo amâo tuôm blŭ sa klei hŏng klei hgăm ôh. 21 Si ngă ih êmuh kơ kâo lĕ? Êmuh bĕ kơ phung hmư̆ kâo leh, ya klei kâo lač leh kơ digơ̆. Phung anăn thâo klei kâo blŭ leh.” 22 Tơdah Yêsu lač leh klei anăn, sa čô hlăm phung kahan kiă dôk tinăn pah miêng Yêsu leh anăn lač, “Snăn hĕ ih lŏ wĭt lač kơ khua ngă yang prŏng?” 23 Yêsu lŏ wĭt lač kơ ñu, “Tơdah kâo blŭ soh leh, bi êdah klei soh anăn; ƀiădah tơdah kâo blŭ djŏ, si ngă ih čăm kâo lĕ?” 24 Leh anăn Y-Anas tiŏ nao Yêsu arăng kă leh ba kơ khua ngă yang prŏng Y-Kaip.
Y-Pêtrôs Lŏ Hngah kơ Yêsu
25 Hlăk anăn Y-Simôn Pêtrôs dôk dơ̆ng leh anăn mdang pui. Đa đa mnuih êmuh ñu, “Amâo djŏ hĕ ih msĕ mơh jing sa čô hlăm phung ƀĭng kna ñu?” Y-Pêtrôs hngah klei anăn leh anăn lač, “Hơăi, amâo djŏ ôh.” 26 Sa čô dĭng buăl khua ngă yang prŏng, sa čô găp djuê pô Y-Pêtrôs koh knga êmuh, “Amâo djŏ ih hĕ kâo ƀuh hlăm war mnga mbĭt hŏng ñu?” 27 Y-Pêtrôs lŏ hngah mơh; leh anăn mnŭ knô kdjô̆ mtam.
Yêsu Dôk Ti Anăp Aê Pilat
28 Mơ̆ng sang Y-Kaip diñu atăt ba Yêsu kơ sang phat kđi. Kyua aguah ưm, diñu pô amâo mŭt ôh hlăm sang khua čar, huĭ bi čhŏ diñu pô, čiăng dưi ƀơ̆ng Knăm Klei Găn. 29 Snăn Aê Pilat kbiă nao kơ diñu leh anăn lač, “Ya klei diih kčŭt kơ êkei anei?” 30 Diñu lŏ wĭt lač kơ Aê Pilat, “Tơdah êkei anei amâo jing ôh sa čô ngă jhat, hmei amâo jao ñu kơ ih ôh.” 31 Aê Pilat lač kơ diñu, “Brei diih pô mă ñu leh anăn phat kđi ñu tui si klei bhiăn diih pô.” Phung Yuđa lač kơ Aê Pilat, “Hmei amâo mâo klei bhiăn dưi bi mdjiê mnuih ôh.” 32 Klei anăn čiăng bi sĭt klei Yêsu blŭ leh čiăng bi êdah si êlan gơ̆ srăng djiê. 33 Aê Pilat lŏ mŭt hlăm sang phat kđi, iêu Yêsu, leh anăn lač kơ gơ̆, “Ih jing Mtao phung Yuđa mơ̆?” 34 Yêsu lŏ wĭt lač, “Ih blŭ klei anăn mơ̆ng ih pô mơ̆, amâodah phung mkăn hưn kơ ih klei kâo jing?” 35 Aê Pilat lŏ wĭt lač, “Kâo jing sa čô Yuđa mơ̆? Phung găp djuê ih pô leh anăn phung knơ̆ng khua ngă yang jao leh ih kơ kâo. Ya klei ih ngă leh?” 36 Yêsu lŏ wĭt lač, “ƀuôn ala mtao kâo amâo djŏ ti lăn ala anei ôh. Tơdah ƀuôn ala mtao kâo jing ti lăn ala anei, phung dĭng buăl kâo srăng bi blah, čiăng kơ arăng amâo dưi jao kâo kơ phung Yuđa ôh. Hơăi, ƀuôn ala mtao kâo amâo djŏ ti lăn ala anei ôh.” 37 Aê Pilat lač kơ Yêsu, “Snăn ih jing mtao hĕ?” Yêsu lŏ wĭt lač, “Ih lač djŏ leh kâo jing sa čô mtao. Kyua klei anăn arăng kkiêng leh kơ kâo, leh anăn kyua klei anăn kâo hriê leh hlăm lăn ala, čiăng hưn klei sĭt nik. Grăp čô hlei pô kbiă mơ̆ng klei sĭt nik hmư̆ asăp kâo.” 38 Aê Pilat lač kơ Yêsu, “Ya jing klei sĭt nik?”
Klei Phat Kđi Mdjiê kơ Yêsu
Leh Aê Pilat lač klei anăn, ñu lŏ kbiă nao kơ phung Yuđa leh anăn lač kơ diñu, “Kâo amâo ƀuh ôh klei soh hlăm gơ̆. 39 ƀiădah diih mâo klei mưng, kâo khăng pŏk kơ diih sa čô mnă êjai hruê Knăm Klei Găn. Diih čiăng mơ̆ kâo phưi kơ diih Mtao phung Yuđa?” 40 Diñu lŏ ur lač, “Amâo djŏ mnuih anei ôh, ƀiădah phưi Y-Barabas!” Y-Barabas jing sa čô mnuih knĕ.
1 Snăn Aê Pilat mă Yêsu leh anăn brei phung kahan čăm gơ̆ hŏng giê. 2 Phung kahan mñam sa boh đuôn mtao hŏng êruê, leh anăn bi mđua ti boh kŏ Yêsu, leh anăn diñu bi hơô gơ̆ hŏng ao jhung hrah jŭ. 3 Diñu nao kơ Yêsu leh anăn lač, “Kkuh kơ ih, Ơ Mtao phung Yuđa!” Leh anăn diñu pah miêng Yêsu. 4 Aê Pilat lŏ kbiă leh anăn lač kơ phung Yuđa, “Nĕ anei, kâo atăt ba gơ̆ kơ diih, čiăng kơ diih dưi thâo kâo amâo ƀuh ôh sa mta klei soh hlăm gơ̆.” 5 Yêsu kbiă đua đuôn êruê leh anăn hơô ao jhung hrah jŭ. Aê Pilat lač kơ diñu, “Nĕ anei, mnuih anăn!” 6 Tơdah phung knơ̆ng khua ngă yang leh anăn phung kahan kiă ƀuh gơ̆, diñu ur kraih, “Pơ̆ng ñu ti kyâo bi kal! Pơ̆ng ñu ti kyâo bi kal!” Aê Pilat lač kơ phung anăn, “Mă ba gơ̆ diih pô leh anăn pơ̆ng gơ̆ ti kyâo bi kal, kyuadah kâo amâo ƀuh ôh sa mta klei soh hlăm gơ̆.” 7 Phung Yuđa lŏ wĭt lač kơ Aê Pilat, “Hmei mâo sa klei bhiăn, leh anăn tui si klei bhiăn anăn ñu năng djiê, kyuadah ñu yap ñu pô Anak Aê Diê.” 8 Tơdah Aê Pilat hmư̆ klei blŭ anăn, ñu huĭ ktang hĭn. 9 Ñu lŏ mŭt hlăm sang phat kđi leh anăn lač kơ Yêsu, “Mơ̆ng ih kbiă hriê?” ƀiădah Yêsu amâo lŏ wĭt lač ôh. 10 Snăn Aê Pilat lač kơ gơ̆, “Ih amâo čiăng blŭ hŏng kâo hĕ? Ih amâo thâo hĕ kâo mâo klei dưi phưi ih amâodah pơ̆ng ih ti kyâo bi kal?” 11 Yêsu lŏ wĭt lač kơ Aê Pilat, “Ih amâo mâo klei dưi ngă kơ kâo ôh, tơdah Aê Diê amâo brei klei dưi anăn kơ ih. Kyuanăn hlei pô jao kâo kơ ih mâo klei soh prŏng hĭn.” 12 Leh hmư̆ klei anăn Aê Pilat duah klei čiăng phưi Yêsu, ƀiădah phung Yuđa ur kraih, “Tơdah ih phưi mnuih anei, ih amâo jing mah jiăng hŏng Sêsar ôh. Grăp čô hlei pô mjing ñu pô mtao bi kdơ̆ng hŏng Sêsar yơh.” 13 Tơdah Aê Pilat hmư̆ klei blŭ anăn, ñu atăt ba Yêsu ti tač leh anăn dôk gŭ ti jhưng phat kđi ti anôk arăng pia wăl tač Boh Tâo, leh anăn hlăm klei Hêbrơ arăng pia Gabatha. 14 Hruê anăn jing hruê mkra Knăm Klei Găn, hlăm brô yang hruê dơ̆ng. Aê Pilat lač kơ phung Yuđa, “Nĕ anei, Mtao diih!” 15 Diñu ur kraih, “Bi mdjiê hĕ ñu, bi mdjiê hĕ ñu, pơ̆ng ñu ti kyâo bi kal!” Aê Pilat lač kơ diñu, “Diih čiăng kâo pơ̆ng hĕ Mtao diih ti kyâo bi kal mơ̆?” Phung knơ̆ng khua ngă yang lŏ wĭt lač, “Hmei amâo lŏ mâo mtao mkăn ôh, knŏng hjăn Sêsar yơh.” 16 Snăn Aê Pilat jao Yêsu kơ diñu, brei diñu pơ̆ng gơ̆ ti kyâo bi kal.
Arăng Pơ̆ng Yêsu Ti Kyâo Bi Kal
Snăn diñu mă Yêsu. 17 Leh anăn Yêsu kbiă nao klam kyâo bi kal gơ̆ pô, truh kơ Anôk Klang Kŏ, arăng pia hlăm klei Hêbrơ Gôlgôtha. 18 Tinăn diñu pơ̆ng Yêsu ti kyâo bi kal, leh anăn mbĭt hŏng gơ̆ dua čô mkăn, sa čô tĭng điâo, sa čô tĭng hnuă, leh anăn Yêsu ti krah. 19 Aê Pilat čih ti sa pŏk mdhă leh anăn dưm ti dlông kyâo bi kal. Hră anăn čih snei, “Yêsu ƀuôn Nasaret, Mtao Phung Yuđa.” 20 Lu phung Yuđa dlăng hră anăn, kyuadah anôk phung kahan pơ̆ng Yêsu ti kyâo bi kal giăm ƀuôn prŏng; leh anăn arăng čih klei anăn hŏng klei Hêbrơ, klei Latin, leh anăn klei Grĕk. 21 Phung knơ̆ng khua ngă yang Yuđa lač kơ Aê Pilat, “Đăm čih ôh, ‘Mtao phung Yuđa’; ƀiădah brei čih ‘Êkei anei lač, Kâo jing Mtao phung Yuđa.’ ” 22 Aê Pilat lŏ wĭt lač, “Ya klei kâo čih leh, čih leh yơh.” 23 Leh phung kahan pơ̆ng Yêsu ti kyâo bi kal, diñu mă čhiăm ao gơ̆ leh anăn bi mbha pă kdrêč, sa kdrêč kơ grăp čô kahan. Diñu mă msĕ mơh ao jhung gơ̆. ƀiădah ao jhung anăn amâo mâo ênhĭt ôh, arăng mñam mơ̆ng dlông truh ti gŭ jing knŏng sa blah. 24 Snăn diñu lač hdơ̆ng diñu pô, “Đăm drei hiêk gơ̆ ôh, ƀiădah brei drei bi mđăo čiăng thâo hlei pô srăng bha.” Klei anăn čiăng bi sĭt Klei Aê Diê Blŭ čih leh, “Diñu bi mbha čhiăm ao kâo hdơ̆ng diñu, leh anăn diñu bi mđăo čiăng mâo ao jhung kâo.” 25 Snăn phung kahan ngă klei anăn. Dôk giăm kyâo bi kal Yêsu mâo amĭ Ñu leh anăn adei amĭ Ñu, H'Mari mô̆ Y-Klôpas, leh anăn H'Mari Madala. 26 Tơdah Yêsu ƀuh amĭ Ñu leh anăn ƀĭng kna Ñu khăp dôk giăm, Yêsu lač kơ amĭ Ñu, “Ơ mniê, nĕ anei anak êkei ih” 27 Leh anăn Ñu lač kơ ƀĭng kna anăn, “Nĕ anei amĭ ih” Leh anăn mơ̆ng mông anăn ƀĭng kna anăn atăt ba H'Mari kơ sang gơ̆ pô.
Klei Yêsu Djiê
28 Leh klei anăn, kyuadah Yêsu thâo jih jang bruă ênŭm leh, čiăng bi sĭt Klei Aê Diê Blŭ čih leh, Ñu lač, “Kâo mhao.” 29 Tinăn mâo sa boh êlŭ bŏ hŏng êa msăm. Snăn arăng kă djao bŏ hŏng êa msăm ti giê hisôp leh anăn myơr djao anăn kơ ƀăng êgei Yêsu. 30 Tơdah Yêsu mnăm leh êa msăm, Ñu lač, “Jih jang bruă ênŭm leh!” Leh anăn Ñu kkui boh kŏ leh anăn tuč ai.
Arăng Tlŏ Kju Ti Djiêu Yêsu
31 Kyuadah hruê anăn jing hruê mprăp kơ Knăm Klei Găn, leh anăn amâo čiăng lui asei mlei digơ̆ ăt dôk ti kyâo bi kal êjai hruê sabat (kyuadah hruê sabat anăn jing hruê arăng mpŭ snăk), phung Yuđa akâo kơ Aê Pilat brei arăng bi joh hĕ jơ̆ng digơ̆, leh anăn mă mđuĕ hĕ digơ̆ kơ anôk mkăn. 32 Snăn phung kahan hriê leh anăn bi joh hĕ jơ̆ng pô tal êlâo, leh anăn pô mkăn arăng pơ̆ng ti kyâo bi kal mbĭt hŏng Yêsu. 33 ƀiădah tơdah diñu truh kơ Yêsu leh anăn ƀuh gơ̆ djiê leh, diñu amâo bi joh ôh jơ̆ng gơ̆. 34 ƀiădah sa čô hlăm phung kahan tlŏ ti djiêu Yêsu hŏng kju, leh anăn êrah hŏng êa kbiă mtam. 35 Pô ƀuh klei anăn hưn, leh anăn klei ñu hưn jing sĭt, leh anăn ñu thâo kơ ñu blŭ sĭt, čiăng kơ diih dưi đăo msĕ mơh. 36 Kyuadah klei anăn truh čiăng bi sĭt Klei Aê Diê Blŭ čih leh, “Amâo mâo sa ƀĕ klang Ñu srăng joh ôh.” 37 Leh anăn lŏ mâo Klei Aê Diê Blŭ čih mkăn, lač, “Diñu srăng dlăng kơ pô diñu tlŏ leh.”
Klei Dơr Yêsu
38 Leh klei anăn Y-Yôsep ƀuôn Arimathê, jing sa čô ƀĭng kna Yêsu, ƀiădah hŏng klei hgăm kyua huĭ kơ phung Yuđa, akâo kơ Aê Pilat klei dưi mă asei mlei Yêsu. Aê Pilat brei mơh. Snăn ñu nao mă asei mlei Yêsu. 39 Msĕ mơh Y-Nikôdem, pô mphŭn dô nao kơ Yêsu êjai mlam, hriê djă ba hlăm brô tlâo pluh kilô êa drao phĭ ƀâo mngưi bi lŭk hŏng êa drao alôê. 40 Diñu mă asei mlei Yêsu, leh anăn păn hruôm asei mlei gơ̆ hŏng čhiăm kbuă mbĭt hŏng mnơ̆ng ƀâo mngưi, tui si klei bhiăn phung Yuđa dơr mnuih djiê. 41 Mâo war mnga ti anôk phung kahan pơ̆ng Yêsu ti kyâo bi kal, leh anăn hlăm war mnga anăn mâo sa boh msat mrâo ka mâo ôh mnuih arăng dơr hlăm anăn. 42 Snăn kyuadah hruê anăn jing hruê phung Yuđa mprăp kơ Knăm Klei Găn, diñu dưm Yêsu hlăm msat anăn, kyuadah msat giăm ti anôk anăn.
Msat Êhŏng
1 Hruê tal sa hlăm hruê kăm H'Mari Madala nao kơ msat aguah ưm êjai adiê adôk mmăt, leh anăn ƀuh boh tâo arăng bi klŭng leh mơ̆ng msat. 2 Snăn ñu êran nao kơ Y-Simôn Pêtrôs leh anăn kơ ƀĭng kna mkăn anăn, pô Yêsu khăp, leh anăn lač kơ digơ̆, “Arăng mă mđuĕ leh Khua Yang mơ̆ng msat, leh anăn hmei amâo thâo ôh ti anôk arăng bi mđih Ñu.” 3 Êdei tinăn Y-Pêtrôs kbiă mbĭt hŏng ƀĭng kna mkăn anăn, leh anăn digơ̆ nao kơ msat. 4 Jih dua digơ̆ êran, ƀiădah ƀĭng kna mkăn êran pral hĭn kơ Y-Pêtrôs leh anăn truh êlâo hĭn kơ msat. 5 Ñu kkui iêp dlăng hlăm msat, ƀuh čhiăm kbuă dôk tinăn, ƀiădah ñu amâo mŭt hlăm msat ôh. 6 Y-Simôn Pêtrôs truh êdei kơ ñu, leh anăn gơ̆ mŭt hlăm msat. Gơ̆ ƀuh čhiăm kbuă dôk tinăn, 7 leh anăn čhiăm arăng klŭm ti ƀô̆ mta Yêsu amâo dôk mbĭt hŏng čhiăm kbuă anăn ôh, ƀiădah klĭt leh, dưm mdê anôk. 8 Leh anăn ƀĭng kna mkăn anăn, pô truh êlâo ti msat, mŭt hlăm msat msĕ mơh. Ñu ƀuh leh anăn đăo. 9 Hlăk anăn diñu ka thâo săng ôh Klei Aê Diê Blŭ čih leh kơ Yêsu srăng kbiă lŏ hdĭp mơ̆ng phung djiê. 10 Leh anăn phung ƀĭng kna anăn lŏ wĭt kơ sang diñu pô.
Yêsu Bi Êdah Ñu Pô kơ H'Mari Madala
11 Bi H'Mari dôk dơ̆ng hia ti êngao giăm msat, leh anăn êjai ñu hia, ñu kkui iêp dlăng hlăm msat, 12 leh anăn ñu ƀuh dua čô dĭng buăl jăk hơô ao kô̆ dôk gŭ ti anôk arăng bi mđih leh asei mlei Yêsu. Sa čô dôk ti kŏ leh anăn sa čô dôk ti jơ̆ng. 13 Phung dua čô dĭng buăl jăk anăn lač kơ ñu, “Ơ mniê, si ngă ih hia lĕ?” H'Mari lač kơ digơ̆, “Kyuadah arăng mă mđuĕ leh Khua Yang kâo, leh anăn kâo amâo thâo ôh ti anôk arăng dưm gơ̆.” 14 Êjai ñu lač snăn, ñu wir dlăng leh anăn ƀuh Yêsu dôk dơ̆ng, ƀiădah ñu amâo thâo kral ôh gơ̆ jing Yêsu. 15 Yêsu lač kơ ñu, “Ơ mniê, si ngă ih hia lĕ? Hlei ih duah?” H'Mari mĭn kơ gơ̆ jing pô kiă war mnga, snăn H'Mari lač kơ gơ̆, “Ơ khua, tơdah ih mă mđuĕ leh gơ̆, hưn kơ kâo ti anôk ih dưm gơ̆ leh, leh anăn kâo srăng nao mă ba gơ̆.” 16 Yêsu lač kơ ñu, “Ơ H'Mari.” H'Mari wir dlăng leh anăn lač kơ ñu hlăm klei Hêbrơ, “Rabôni!” (čiăng lač “Nai”). 17 Yêsu lač kơ ñu, “Đăm ruêh kâo ôh, kyuadah kâo ka đĭ ôh kơ Ama kâo; ƀiădah nao bĕ kơ phung ayŏng adei kâo leh anăn lač kơ diñu, ‘Kâo đĭ nao kơ Ama kâo leh anăn kơ Ama diih, kơ Aê Diê kâo leh anăn kơ Aê Diê diih.’ ” 18 H'Mari Madala nao lač kơ phung ƀĭng kna, “Kâo ƀuh leh Khua Yang;” leh anăn ñu hưn kơ digơ̆ klei Yêsu lač leh kơ ñu.
Yêsu Bi Êdah Ñu Pô kơ Phung ƀĭng Kna Ñu
19 Ti tlam mmăt hruê anăn, jing hruê tal sa hlăm hruê kăm, anôk phung ƀĭng kna dôk kđăl leh ƀăng bhă kyua huĭ kơ phung Yuđa, Yêsu hriê leh anăn dôk ti krah phung digơ̆, lač, “Brei klei êđăp ênang dôk mbĭt hŏng diih.” 20 Tơdah leh Ñu lač klei anăn, Ñu bi êdah kơ digơ̆ kngan leh anăn djiêu Ñu. Phung ƀĭng kna hơ̆k mơak tơdah digơ̆ ƀuh Khua Yang. 21 Yêsu lŏ lač kơ digơ̆, “Brei klei êđăp ênang dôk mbĭt hŏng diih. Msĕ si Ama tiŏ hriê leh kâo, msĕ snăn mơh kâo tiŏ nao diih.” 22 Leh Yêsu lač klei anăn, Ñu ƀhur êwa Ñu kơ digơ̆ leh anăn lač, “Mă tŭ bĕ Yang Mngăt Jăk. 23 Tơdah diih pap brei klei soh arăng, digơ̆ srăng mâo klei pap brei; leh anăn tơdah diih djă pioh klei soh arăng, klei soh digơ̆ ăt dôk snăn.”
Yêsu leh anăn Y-Thômas
24 Y-Thômas, sa čô hlăm phung pluh dua čô, pô arăng pia Anak ƀă Kmar, amâo dôk mbĭt hŏng diñu ôh hlăk Yêsu hriê. 25 Snăn phung ƀĭng kna mkăn hưn kơ ñu, “Hmei ƀuh leh Khua Yang.” ƀiădah Y-Thômas lač kơ diñu, “Kâo amâo srăng đăo ôh knŏng tơdah kâo ƀuh gru msei kđĭn hlăm kngan Ñu, leh anăn dưm kđiêng kâo hlăm gru anăn, leh anăn dưm kngan kâo ti djiêu Ñu.” 26 Sa păn hruê êdei, phung ƀĭng kna Ñu lŏ dôk hlăm sang anăn, leh anăn Y-Thômas dôk mbĭt hŏng digơ̆. ƀăng bhă arăng kđăl leh, ƀiădah Yêsu hriê dôk dơ̆ng ti krah digơ̆ leh anăn lač, “Brei klei êđăp ênang dôk mbĭt hŏng diih.” 27 Leh anăn Yêsu lač kơ Y-Thômas, “Dưm kđiêng ih tinei, leh anăn dlăng kngan kâo; yơr kngan ih dưm ti djiêu kâo; đăm lŏ đing ôh, ƀiădah đăo bĕ.” 28 Y-Thômas lŏ wĭt lač kơ Ñu, “Ơ Khua Yang kâo leh anăn Aê Diê kâo!” 29 Yêsu lač kơ gơ̆, “Ih đăo kyuadah ih ƀuh leh kâo, djŏ mơ̆? Jăk mơak yơh kơ phung amâo tuôm ƀuh ôh ƀiădah đăo leh.”
Klei Kñăm Čih Hdruôm Hră Anei
30 Yêsu ngă leh lu klei bi knăl yuôm bhăn mkăn ti anăp phung ƀĭng kna Ñu, arăng amâo čih ôh hlăm hdruôm hră anei; 31 ƀiădah arăng čih leh klei anei, čiăng kơ diih đăo kơ Yêsu jing Yang Krist, Anak Aê Diê, leh anăn hŏng klei diih đăo diih dưi mâo klei hdĭp hlăm anăn Ñu.
Yêsu Bi Êdah Ñu Pô kơ Kjuh Čô Phung ƀĭng Kna
1 Êdei kơ klei anăn Yêsu lŏ bi êdah Ñu pô kơ phung ƀĭng kna ti hang êa ksĭ Tiberias. Klei Ñu bi êdah Ñu pô msĕ snei. 2 Y-Simôn Pêtrôs, Y-Thômas pô arăng pia Anak ƀă Kmar, Y-Natanel ƀuôn Kana hlăm čar Galilê, phung anak êkei Y-Sêbêdê, leh anăn dua čô ƀĭng kna mkăn dôk mbĭt. 3 Y-Simôn Pêtrôs lač kơ diñu, “Kâo nao dăng ñuăl.” Diñu lač kơ gơ̆, “Hmei srăng nao mbĭt hŏng ih.” Diñu kbiă leh anăn đĭ hlăm čhŏng. Diñu dăng mlam anăn, ƀiădah amâo djŏ kan ôh. 4 Tơdah adiê dơ̆ng mngač, Yêsu dôk dơ̆ng ti hang; ƀiădah phung ƀĭng kna amâo thâo kral ôh pô anăn jing Yêsu. 5 Yêsu lač kơ diñu, “Ơ phung hđeh, diih amâo mâo mnơ̆ng ƀơ̆ng hĕ?” Diñu lŏ wĭt lač kơ Yêsu, “Hơăi.” 6 Yêsu lač kơ diñu, “Dăng bĕ tĭng hnuă čhŏng, leh anăn diih srăng mâo kan.” Snăn diñu dăng, leh anăn diñu amâo dưi hrui ñuăl kyuadah djŏ kan lu đei. 7 ƀĭng kna pô Yêsu khăp anăn lač kơ Y-Pêtrôs, “Khua Yang yơh anăn!” Tơdah Y-Simôn Pêtrôs hmư̆ jing Khua Yang, ñu hơô čhiăm ao hyuă hdrăng kơiêng, kyuadah êlâo ñu dôk asei lưng, leh anăn ñu kdâo hlăm êa ksĭ. 8 ƀiădah phung ƀĭng kna mkăn hriê mbĭt hŏng čhŏng, hrui ñuăl êjai bŏ hŏng kan, kyuadah diñu kbưi mơ̆ng hang giăm sa êtuh met. 9 Tơdah diñu truh leh ti hang, diñu ƀuh tinăn pui hdăng, mâo kan ti dlông pui anăn, leh anăn kpŭng. 10 Yêsu lač kơ diñu, “Djă ba bĕ đa kan diih mrâo mă anăn.” 11 Snăn Y-Simôn Pêtrôs đĭ hlăm čhŏng leh anăn hrui ñuăl kơ hang, bŏ hŏng kan prŏng, sa êtuh êma pluh tlâo drei; wăt tơdah kan jing lu dưn, ñuăl amâo tĭ ôh. 12 Yêsu lač kơ diñu, “Hriê ƀơ̆ng bĕ.” Amâo mâo sa čô hlăm phung ƀĭng kna jhŏng êmuh kơ gơ̆, “Hlei ih jing?”, kyuadah diñu thâo leh kơ gơ̆ jing Khua Yang. 13 Yêsu hriê, mă kpŭng, brei kơ diñu, leh anăn brei wăt kan msĕ mơh. 14 Hlăk anăn jing bliư̆ tal tlâo Yêsu bi êdah Ñu pô kơ phung ƀĭng kna, leh Ñu kbiă lŏ hdĭp mơ̆ng phung djiê.
Yêsu leh anăn Y-Pêtrôs
15 Leh diñu ƀơ̆ng, Yêsu lač kơ Y-Simôn Pêtrôs, “Ơ Y-Simôn anak Y-Yônas, ih khăp kơ kâo lu hĭn kơ phung anei mơ̆?” Ñu lŏ wĭt lač kơ Yêsu, “Ơ Khua Yang, ih thâo leh kâo khăp kơ ih.” Yêsu lač kơ ñu, “Kiă bĕ phung êđai biăp kâo.” 16 Yêsu lŏ lač kơ ñu tal dua, “Ơ Y-Simôn anak Y-Yônas, ih khăp kơ kâo mơ̆?” Y-Pêtrôs lač kơ gơ̆, “Ơ Khua Yang, ih thâo leh kâo khăp kơ ih.” Yêsu lač kơ ñu, “Čiêm bĕ phung biăp kâo.” 17 Yêsu lač kơ ñu tal tlâo, “Ơ Y-Simôn anak Y-Yônas, ih khăp kơ kâo mơ̆?” Y-Pêtrôs ênguôt kyuadah Yêsu lač kơ ñu tal tlâo, “Ih khăp kơ kâo mơ̆?” Snăn Y-Pêtrôs lač kơ gơ̆, “Ơ Khua Yang, ih thâo jih jang klei. Ih thâo leh kâo khăp kơ ih.” Yêsu lač kơ ñu, “Čiêm bĕ phung biăp kâo. 18 Kâo lač kơ ih klei sĭt nik, êjai ih hlăk ai, ih hyuă kơiêng ih pô leh anăn nao ti anôk ih čiăng; ƀiădah tơdah ih mduôn, ih srăng yơr kngan, leh anăn sa čô mkăn srăng hyuă brei hdrăng kơiêng ih, leh anăn srăng atăt ba ih ti anôk ih amâo čiăng nao ôh.” 19 Yêsu blŭ klei anăn čiăng bi êdah hŏng ya êlan Y-Pêtrôs srăng djiê bi guh kơang kơ Aê Diê. Leh Yêsu blŭ klei anăn, Ñu lač kơ Y-Pêtrôs, “Tui hlue kâo bĕ.”
Yêsu leh anăn ƀĭng Kna Mkăn Anăn
20 Y-Pêtrôs wir dlăng ƀuh ƀĭng kna Yêsu khăp tui hlue diñu, pô anăn knang leh ti đah da Yêsu êjai diñu dôk ƀơ̆ng huă leh anăn lač kơ Yêsu, “Ơ Khua Yang, hlei pô srăng lhiăr kơ ih?” 21 Tơdah Y-Pêtrôs ƀuh gơ̆, ñu lač kơ Yêsu, “Ơ Khua Yang, bi kơ pô anei, ya srăng truh kơ ñu lĕ?” 22 Yêsu lač kơ ñu, “Tơdah kâo čiăng kơ ñu dôk hdĭp tơl kâo lŏ hriê, ya yuôm klei anăn kơ ih? Bi ih, brei ih tui hlue kâo!” 23 Arăng hmư̆ hing ti krah phung ayŏng adei đăo kơ ƀĭng kna anăn amâo srăng djiê ôh; Yêsu amâo tuôm lač ôh kơ ƀĭng kna anăn amâo srăng djiê, ƀiădah Yêsu lač, “Tơdah kâo čiăng kơ ñu dôk hdĭp tơl kâo lŏ hriê, ya yuôm klei anăn kơ ih?” 24 ƀĭng kna anei yơh jing pô hưn bi sĭt leh anăn čih leh jih klei anei; leh anăn drei thâo kơ klei ñu hưn jing sĭt. 25 Leh anăn lŏ mâo lu klei mkăn Yêsu ngă leh; tơdah arăng čih ênŭm jih jang klei anăn, kâo mĭn wăt lăn ala amâo dưi djăp anôk ôh pioh hdruôm hră anăn.