1 Mòngkà nø nvmlat nv̀mpv́ng kèní àv́lshaq íe. Vrá, Mòngkà nø Gvray nvng tiqdø àv́lshaq í nø, Mòngkà nø Gvray ni íe. 2 Mòngkà nø nv̀mlat nv̀mpv́ngø Gvray nvng tiqdø àv́lshaq íe. 3 Vl dv́ngte shvngbe nø A:ngí pá:nò nø, pá:nò dv́ngte taq Ang màbá dø tiq pv̀n gø mvpv́n yà:- ngò. 4 Ang vdòng taq nø Gønshaq v̄le; vrá Gønshaq yalòng nø vsvng dvpvt Gálòng íe. 5 Gálòng nø dø vdòngø svr daqì kvt, dølu:ngí gálong svng mvdv́ngkéò. 6 Gvrayí dvzv́r daqà we vsvng tiq pè tuq daqì; ang bø̀ng nø Yohan íe. 7 Yapè di daqì lòng nø, vsvng shvngbe nø Ang taqkèní lvkv́m ra dø Gálòng dvpvt shvkse wáshìlv́m dvpvt íe. 8 Ang vdè nø Gálòng mø̀í; Iwe Gálòng dvpvt shvkse wáshìlv́m dì daqì we íe. 9 Vsvng í dv́ngte svng vwanalv́m Gálòng mvdø̀ng nø rvgaq tø̀m svng tuq daqì. 10 Rvgaq nø ang kà taq kèní pv́n yà:ngà we ínìgø rvgaq tø̀m svng Ang dì daqì kvt rvgaqí nø Ang svng mvsháò. 11 Ang nø Ang vdè vsvng rì yv́ng di daqì nìgø, Angò vsvng rìí Ang svng màtoò. 12 Iwe Ang bø̀ng kaq kv́m nø, Ang svng vtoò dv́ngte svng nø Gvray angcè ílv́m vmíng vkv́ng A:ngí zíòe. 13 Gvray angcè ílv́m nø shing shvwi v̄l vsa:ngí gà:lò yv́ng kèní mø̀í. Vsvng nøt kèní gø mø̀í, Gvrayí shvza:tnò we taqkèní wa íe. 14 Mòngkà nø shagóng í daqì nø, nøngmaq nvng tiqdø v̀l daqi. Ang pòngbàng ngø̀r we svng gø nøngmaqí yv̀ng yv̀ngshà. Welòng nø jejú nvng dìnglòng dv̀nzø̀ng we, Vpè Gvray Angcè lòngzà pèò ngø̀r dvgùng íe. 15 Yohan nø Ang dangø shvkse wáshì nø yadø vkiqe. “Ngà mèpvng di daq pè Ang nø, ngà mvdv̀m té ring pè íe, wvng nø vzv̀ng kèní shø̀nò pè nø yapè íe. Kadø íe wani ngà shini màvl dvgvp kèní Ang nø àv́lshaq íe,” wae. 16 Kadø íe wani Ang dv̀n shóng we jejú taqkèní nøngmaq shvngbeí nø, jejú mvdv̀m jejú lún bǿshà. 17 Kadø íe wani Dvrá lòng nø Moshi taqkèní èzí yv̀ngshà. Jejú nvng dìnglòng nø Yesu Kristu taqkèní tuq daqì we íe. 18 Gvray kaq yv̀ng dá:rò vsvng nø kagǿ gø màvl. Vpè pøtpúmø vl we Gvray Longzà pèí mv̀ng Gvray nø kadø í pè í we chaqdvp dètan daqshà. 19 Yuda vsvng rìí Yerusalem kèní shvrúngshúrì nvng Lewirì Yohan yv́ng svng dvzá:rò nø, “Nà nø kagǿ èíe?” wa røt bǿà kvt, Yohan nø yadø shvkse wáshìe. 20 Ang nø mvmāshì dèdè shǿnshì nø, “Ngà nø Kristu mvǿngà,” wae. 21 Wekvt angmaqí, “Ini, kagǿ èíe? Eliya èí ma? wa rø:tnò kvt à:ngí, “Mvǿngà,” a:lòe. “Kàdvtutshú tiq pè èí ma?” a:lò kvt à:ngí, “Mvǿngà,” a:lòe. 22 Wervt angmaqí, “Nøngmaq svng dèzv́rvtsha rì svng kà vwv̀nglv́m dvpvt, nà nø kagǿ èí ma? Nà vdè nø kadø èvlshìe ma?” wa rø:tnòe. 23 Wekvt Yohaní, “Kàdvtutshú Esayaí shø̀n yà:ngà dø, ‘Vkàngpè tvrà mèdóngānøng,’ wa nø, rvgaq mvgūng móngø vkiq we kàshaq nø ngà ǿngàe,” a:lòe. 24 Vrá, Farisi mvdò kèní dvzv́rshaq tiqmaqí, 25 ang svng rø:tnò nø, “Wedø ini, nà nø Kristu wepè gø mèí, Eliya gø mèí, Kàdvtutshú wepè gø mèí nìnø, nàí pàwálv́m tìløp èløpmaòe?” a:lòe. 26 Yohaní angmaq svng vtà:ngò nø, Ngàí nø tì taq tìløp løpmangòe. Namaqí mèshánøng we tiq gǿ nø namaq dvhø̀ø ripme. 27 Ang nø ngà mèpvng dìlv́m vdv́nshaq pè í nø, ngà nø Ang híshvnam sv̄nhǿng pǿnālv́m gø màpǿng,” a:lòe. 28 Yadv́ng pv̀n nø Yordan tì kupa Betani rvwá Yohaní tìløp løpmaò yv́ng í yà:ngì. 29 Mèpvng ni taq, Yesu nø ang yv́ng svng di ráì we Yohaní yv̀ng bǿà nø, “Eyv̀ngnø̀ng, rvgaq tø̀m mvrà lúashú pè Gvray Ang Vyv̀ngcè nø yapè íe! 30 ‘Ngà mèpvng di daq pè Ang nø ngà mvdv̀m té ring pè íe, wvng nø shø̀nò pè nø yapè ni íe. Kadø íe wani Ang nø ngà màvl vzv̀ng kèní àv́lshaq í yà:ngì. 31 Ang kagǿ í we ngàí gø mvshángò. Iwe, Ang nø Israel dvcì kaq dvtanlv́m rvt ngàí nø tì taq tìløp løpmangò nø dø̀ng rángà,” a:lòe. 32 Vrá, Yohan shvkse wáshì nø yadø gø wae. “Pvlacè nø kāø dø muqlàng kèní lashì daqì nø Ang mvdv̀m narshi daqì we ngàí yv̀ngòe," a:lòe. 33 Vzv̀ng nø Ang svng ngàí mvshángò we, ngà svng tì taq tìløp løp dèzv́r Pè A:ngí ngà svng yadø èv̄le. ‘Pvlacè nø kagǿ mvdv̀mø lashì daq nø nārshì daq we svng nàí èyv̀ng bǿò nìnø, wegǿ nø Shànshér Pvlàcèí tìløp løpmashú pè íe,’ èv̄le. 34 Yalòng svng ngàí yv̀ngò rvtnø yapè nø Gvray Angcè pè íe, wvng ngà shvkse wv́nghø̀nge,” a:lòe. 35 Mèpvng ni taq rá Yohan nø ang coqcv́n vní pè nvng rip la:ngí, 36 Yesu dïvm we svng yv̀ng bǿà nø, “Eyv̀ngshò, Gvray Ang Vyv̀ngcè!” a:lòe. 37 Coqcv́n wepè níí Yohan shø̀nka tá bǿà kvt, angníí Yesu mèpv̀ng cv̀n bǿà. 38 Yesu wv́l pōshì nø angní lvngàí cv̀na:tnà we svng yv̀ng bǿà kvt, “Nàníí pà èláshòe?” a:lòe. Angní lvngàí, Rabbiá, Nà kayv́ng èv̄le ma?” a:lòe. (Rabbi, wakà nø svra, wakà íe.) 39 A:ngí angní lvngà svng, “Edi ráshì nø èyv̀ngvtshò,” a:lòe. Angní lvngàí cv̀na:tnà nø, Ang kayv́ng vl we yv̀ng bǿà. (Wervtø̀ nø tvné nv̀mtān vbì nari íá:mì rvtnø), weni nø Ang nvng tiqdø v́ldv̀ng wae. 40 Yohan kà tá bǿà nø Yesu svng cv̀n bǿà pèní tiq pè nø, Simon Piter angnvm pè Anderu íe. 41 Yapèí angnvm pè Simon svng vzv̀ng lá lún bǿà nø ang svng, “Ni lvngàí nø Meshia svng lá lún bǿshà,” a:lòe. (Meshia, wakà nø Kristu, wakà íe.) 42 A:ngí Simon svng Yesu yv́ng shøla:tnà. Yesuí ang svng dvjaqò sórí, “Nà nø Yohan angcè Simon èí we, Kefa tǿlv́m èí longe,” a:lòe. (Kefa wakà èlí:ngò nìnø, Piter, wakà í nø lóng, wa kà íe.) 43 Mèpvng ni taq Yesu nø Galili móng svng búnglv́m dvdūshì bǿì. Wekvt Filip svng A:ngí lá lún bǿà nø ang svng, “Ngà mèpvng ècv̀n ra,” a:lòe. 44 Filip nø, Anderu nvng Piter vl mvrìng Betsayda kèní íe. 45 Filipmí Nataniel svng lá lún bǿà nø ang svng, “‘Moshií gø Dvrá lega taq, vrá Kàdvtutshúrìí gø tvnuò nø vrū yà:ngà pè, Yosep angcè, Nazaret pè Yesu svng nøngmaqí lá lún bǿshà,” a:lòe. 46 Wekvt Natanielí ang svng, “Nazaret mvrìng kèní nø shvla we kapv̀n bung long ni ma?” a:lòe. Filipmí, “Yv̀ngv́mshò lè,” a:lòe. 47 Nataniel Ang yv́ng di ráì we Yesuí yv̀ng bǿà kvt ang dang tvnuò nø, “Ku, dvgoqnøt mvzvng we Israel vjø̀ng tiq pè,” wae. 48 Natanielí Ang svng, “‘Naí kayv́ng kèní ngà èshángà ma?” a:lòe. Yesuí vtà:- ngò nø, “Filipmí nà svng shini mègo dvgvp, nv̀mgwè tøng lv̀ngpv̄ngø nà èvl dvgvp ni, Ngàí nà svng yv̀ng bǿngà,” a:lòe. 49 Natanielí Ang svng vtà:ngò nø, “Rabbiá, Nà nø Gvray Angcè pè, Israel Koqkv́m pè èíe,” a:lòe. 50 Yesuí ang svng, “Nv̀mgwè tø̀ng lv̀ngpv̄ngø Ngàí nà svng yv̀ng bǿngà, wvng kà rvtnø nà èkv́me ó? Ya mvdv̀mø té ring pv̀n nàí èyv̀ng lú:ngòe,” a:lòe. 51 Vrá Yesuí, “Ngàí kàdøng tiqka v̄la:tnìni, muqlàng vtánvm nø, Gvray Ang muqlàng dvzv́rrì nø, Vsvng Angcè pè mvdv̀m taq rvlv́ng mv̄nshì yøt mvnshì we svng namaqí èyv̀ng lóngnønge,” a:lòe.
1 Vshø̀m ni mèpvng, Galili móng Kana rvwáø zvmì shvzøng bóy tiq lòng v̄le. Yesu angmè gø weyv́ngø vbáe. 2 Zvmi shvzøng bóy taq nø Yesu nvng Ang coqcv́nrì svng gø vgoshaq íe. 3 Wekvt bìmtì dvbévm daqà dvgvp, Yesu angmèí nø Ang svng, angmaq bìmtì béaá:mà,” a:lòe. 4 Wekvt Yesuí ang svng, “Svmaré mèá, welòng rvt nà pàwá dèréshìe? Ngà rvtø̀ shini mvhøqò,” a:lòe. 5 Angmèí nø dvzø̄mshúrì svng, “A:ngí namaq svng kadø èv̄lvtnøng nìnø wedø èwànø̀ng,” a:lòe. 6 Yuda vsvng rì angmaq shǿlshilv́m vtóng cà:nò ke lá:ngò we, vnícé vshø̀mcé galan cv́ng we lóng chúng vchuq chv̀ng gø weyv́ngø shvrúngshaq v̄le. 7 Yesuí angmaq svng, “Chúng werì taq tì dv̀n èzv́ngnøng,” a:lòe. Wekvt angmaqí chúngrì nø mvkā vrá dø tì dv̀n zv́ng bǿà. 8 Wekvtrá A:ngí angmaq svng, “Akvt nø èdōnøng nø, bóy vgō pè svng èlv́nga bǿnø̀ng,” a:- lòe. Wekvt angmaqí lv́nga bǿà. 9 Ti kèní bìmtì shvlè bǿà lòng svng bóy vgo pèí tin bǿà kvt, (kayv́ng kèní í we nø tì kvp dárà we dvzø̄mshúrìí sháò we ínìgø à:ngí nø mvsháò rvtnø) à:ngí lvngàshv́rpè svng goò nø, 10 “Vsvng kagǿí gø bìmtì shvla lòng vzv̀ng shvaqò nø, aq vrv̄mvm dvgvp wa màshvla lòng tù:nòe. Nàí nø bìmtì shvla lòng akvt høq legv̀l dárà,” a:lòe. 11 Yesuí shálv́m mvshv́lpvrá wá pà:ngò we yalòng nø Galili móng Kana rvwá taq í nø, yadø Ang ngø̀r dvgùng dvta:nò yv́ng kèní Ang coqcv́nrì gø Ang svng kv́m bǿi. 12 Wemèpvng Yesu nø angmè ó angnvmrì, Ang coqcv́nrì nvng tiqdø Kapèrnum mvrìng svng yøtshìá:mì nø, weyv́ngø tiqnila v̀lá:mì. 13 Wekvt Yuda vsvng rìò shvlē bóy tuq yùl ráì nø, Yesu nø Yerusalem svng ngāngá:mì. 14 Noqngø̀m tø̀ngnø wáng vdòng taq, nungwà, vyv̀ng nvng kāø nvmke vsvng gø, gv̀msùng chèòrì rūng da we svng gø A:ngí yv̀ng bǿà. 15 A:ngí bv̀nri mvship tiq lòng wàò dá:ngí, angmaq shvngbe svng gø, vyv̀ngrì nvng nungwàrì svng gø, Noqngø̀m tø̀ngnø wáng kèní A:ngí lù:ngò nø, gv̀msùng chèòrì gv̀msùngrì gø upmāò nø, angmaq hapjv̀mrì gø ngaqa bǿà. 16 Kāø nvmke rì svng gø A:ngí, “Yarì yayv́ng kèní èlv́ngke bǿnø̀ng. Ngà Vpè chø̀m nø namaqò wùlaq chø̀m wàlv́m mø̀í,” a:lòe. 17 Wekvt Ang coqcv́nrìí, “Nà chø̀m dvpvt nøtlø̀m lù:- ngí Ngà svng èlúmkeng longe,” wa vrū yà:ngà kà svng dvdvm rǿna:tnà. 18 Wedø í rvtnø Yuda vsvng rìí Ang svng, “Yadv́ng pv̀n nàí wàlv́m vmíng èvl we nøngmaqí shálv́m, mvshv́lpvrá Nàí kapà dètānshàni ma?” a:lòe. 19 Yesuí angmaq svng, “Shànshér tø̀ngnø yachø̀m ècatnøng; vshø̀m ni taq rá Ngàí shvrip lóngòe,” a:lòe. 20 Wervtnø Yuda vsvng rìí, “Shànshér tø̀ngnø yachø̀m nø vbìcé chuq nǿng wàò ke wa dv́ng yà:ngà. Vshø̀m ni cèí Nàí kadø wá ledá:ngò ni?” a:lòe. 21 Iwe A:ngí shø̀:nò we Shànshér tø̀ngnø nø Ang vdè góng svng tvnushì we íe. 22 Shì yv́ng kèní Ang svng dvzun lú:ngà mèpvng wa, A:ngí shø:nò we yakà svng Ang coqcv́nrìí dvdvm rǿ:nò nø, Shànshér Kàru svng gø, Yesuí shø̀n ráà kà svng gø angmaq kv́me. 23 Shvle bóy nila taq Yerusalem Ang vl dvgvp A:ngí wàò we shálv́m mvshv́lpvrárì yà:ngò yv́ngkèní vsvng mvme nø Ang bø̀ng svng kv́m ráì. 24 Wedø ínìgø Yesuí nø, vsvng shvngbe svng sháò rvtnø, Ang vdè góng angmaq svng màtvlēshì. 25 Vsvng nøt vdòngø kapà zv́ngshì we A:ngí dǿ:mò rvtnø, vsvng kagǿ dang kagǿí shvkse wàò we gø Ang zǿm mvdv̀ng.
1 Farisi vsvng, Nikodimu tǿò we Yuda vsvng rì øpshú tiq pè v̄le. 2 Wepè nø yaqdø̀:ngí Yesu yv́ng dì ráì nø, Rabbiá, Nà nø Gvray yv́ng kèní èdì daqì we shvngøtshú èí we svng sháìe. Kadø íe wani, Nàí èwàò we shálv́m mvshv́lpvrá yarì nø Gvray ang nvng vl we vsa:ngí wa mø̀í ni kagǿí gø wá mvngu:tnò,” a:lòe. 3 Yesuí vtà:ngò nø, “Ngàí kàdø̄ng vlvtnøng, kagǿ gø angshv́r tiq kvt màgv́lshaq nø, Gvray móngdàn yv́ng mvlúnshì,” a:lòe. 4 Nikodimuí rá Ang svng, “Vsvng tiq gǿ nø cvrǿngv̄m ke kadøwa vrá gv́l shvla ma? Angmè puqwá svng vrá tiq kvt gòng nø̀ gv́l nø da mvlúnshì ni!” a:lòe. 5 Yesuí vtà:ngò nø, “Ngàí kàdø̄ng v̄lvtnøng, tì nvng Pvlàcèí màgv́lshaq vsvng kagǿ í nìgø, Gvray móngdàn svng góng mvlúnshì. 6 Shagú:ngí gà:lò we nø shagóng íe. Pvlàcèí gà:lò we nø pvlàcè íe. 7 Ngàí nà svng ‘Nà nø angshv́r gv́lshì ràe,’ wvng nø vl bǿngà rvtnø mènàtiqni. 8 Nv̀mbø̀ng nø ang wá mvyǿ yv́ng svng wa nø, angshaq nàí ètáò we ínìgø, kayv́ng kèní wà ráì we nvng kayv́ng svng wavm we nø mèsháò. Pvlàcèí vgv́lshaq vsvng gǿ vrv̀m gø welòng dø íe,” a:lòe. 9 Nikodimuí Ang svng, “Yadv́ng pv̀n nø kadøwa bǿn lvdaq ni?” a:lòe. 10 Yesuí vtà:ngò nø ang svng, “Nà nø Israel dvci kaq shvngøtshú tiq pè èí we, yadv́ng pv̀n svng mèrà:lò má? 11 Ngàí kàdø̄ng v̄lvtnøng, nøngmaqí nø sháì lòng shø̀:nì nø, yà:ngì lòng dang shvkse wáshàì we, nøngmaq shvksekà svng namaqí mènàtōashà. 12 Namaq svng Ngàí rvgaq tø̀m taq írì shø̀nò nø dv́ng mèkv́mnøng nìnø, muqlàng taqlap nvng sing rì shø̀nò nø téwa kadøwa lekv́mnøngni? 13 Muqlàng taqlapmø vl yv́ng kèní lashi daqì we Vsvng Angcè pè wa mø̀í nìnø, muqlàng taqlap svng rvlv́ng lú:nò we kagǿ gø màvl. 14 Rvgaq mvgūng móngø Moshií vbø̀ hàng yà:ngà dø tiqdvchá, Vsvng Angcè pè gø wedøni hà:ngò we vhǿm ràe. 15 Pawálv́m wani Ang kaq kv́m vsvng í dv́ngte nø dvciq lvpvt gønshaq lúnlv́m dvpvt íe. 16 Ang kaq kv́m vsvng kagǿ ínìgø màmvng nø dvciq lvpat gø̀nshaq lúnlv́m dvpvt, Angcè Lòngzàpè zi daqì høqshaq ni Gvray nø rvgaq tø̀m vsvng kaq shóngshìe. 17 Kadø íe wani Gvrayí Angcèpè rvgaq tø̀m svng dvzv́r daqà lòng nø, rvgaq tø̀m svng kàngélv́m dvpvt mø̀í, rvgaq tø̀m nø Ang taq kèní gø̀nshaq shvlut lúnlv́m dvpvt mv̀ng íe. 18 Ang kaq kv́m gǿí nø kàngé we màhǿ:mò; Ang kaq mvkv́m vsvng kaq nø, Gvray Angcè Lòngzà pè bø̀ng svng mvkv́m rvtnø kà vngéshaq íá:mì. 19 Kàngé we angciq nø yaciq íe: “Gálòng nø rvgaq tø̀m svng gòng daqì nìgø, vsà:ngí wàòrì nø mvgvm màshvla we í rvt, angmaq nø gálong svng màshóngshìshaq dølòng svng lè shóngshìe. 20 Mvgvm màshvla we wàò gǿ vrv̀m nø, gálong svng shvngōshì nø, ang bv̀nlì svng vchaq nø ngv̄n ra we laq màhǿmò wanø, gá yv́ng svng mvdi ra. 21 Iwe dìnglòng bv̀nlì wàò gǿ mv̀ng nø, à:ngí wàò bv̀nlì ri nø Gvray vdòng taq wàò we í we dèdè shvyvnglv́m dvpvt, gá yv́ng svng di rāe,” a:lòe. 22 Yadv́ng pv̀n mèpvng Yesu nø Ang coqcv́nrì nvng Yuda móng svng gòng ráì nø, angmaq nvng weyv́ngø vl sórí tiløp løpmaòe. 23 Wedvgvp Yohaní gø, Salim shvnvng Enon yv́ngø tì mvme luq rvtnø, weyv́ngø tìløp løpma ma:nòe. Vsvng rì gø mànārnār di ra nø tìløp løpma we lún ma:nòe. 24 Yalòng nø Yohan svng tung taq shini mvrú:ngò dvgvp íe. 25 Yohan coqcv́nrì nø Yuda vsvng tiq gǿ nvng tì zv́lshìlv́m vtóng dang vzø̀ng lú:ngì. 26 Angmaq nø Yohan svng di ráì nø ang svng, “Rabbiá, Yordan tìwàng kupaø nà nvng èvlvp shà pè, nà shvkse èwáshìa:pmì pè A:ngí, ku, tìløp løpmaò nø vsvng shvngbe Ang yv́ng svng wa die,” a:lòe. 27 Yohaní vtà:ngò nø, “Vsvng kagǿ gø muqlàng kèní ang svng vzíshaq lòng wa lún daq we íe. 28 ‘Ngà nø Kristu mvǿngà. Ngà nø Ang vzv̀ngzv̀ng dèzv́r dakngà pè mv̀ng ǿngàe,’ wvng nø shø̀nvpmà we ètávpshà rvt namaq nø ngà dvpvt shvkse èínønge. 29 Zvmìshv́r mè nø lvngàshv́rpèò íe. Inìgø lvngàshv́rpè rv̀mnvng pè nø rip nø lvngàshv́rpè kà táò yv́ng kèní laqlaqni dvbùe. Welòng dø ngà gø dvbònge. 30 Ang nø té mvnshì ràe; ngà mv̀ng nø cv́m mv̄nshì rànge. 31 Mvdv̀m kèní dì daqì pè Ang nø, shvngbe mvdv̀mø ringe. Rvgaq kèní í pè ang nø, rvgaqò pv̀n í nø, rvgaq dang wa shø̀ne. Muqlàng kèní dì daqì pè Ang mv̀ng nø, vsvng shvngbe mvdv̀mø ringe. 32 A:ngí vyv́ngshaq vtáshaq rì shø̀:nò nìgø, A:ngí shø̀:nò kà svng kagǿí gø màtōò. 33 Iwe A:ngí shø̀:nò kà svng vtoò gǿí nø, Gvray nø dìnge, wa lòng svng shálv́m zangkwè ga:pmò we íe. 34 Gvrayí dvzv́r daqà pè svng nø Shànshér Pvlacè dv̀n vlim dø vzíshaq í rvt A:ngí nø Gvray kàrì shø̀:nòe. 35 Angpèí nø Angcè pè svng shù:- ngò rvtnø, vl dv́ngte nø Ang wur taq vzíshaq íe. 36 Angcè pè svng kv́m gǿ nø dvciq lvpat gø̀nshaq lúne; Angcè pè svng mvkv́m gǿí mv̀ng nø, gø̀nshaq yv́ng mvlú:nò. Gvray shv̀mná høpnøt nø ang mvdv̀mø vhap dv̀ng wae,” a:lòe.
1 Yesuí nø Yohan mvdv̀m té coqcv́n lá lú:nò nø tìløp løpmaòe, wa nø Farisi mvdòí táa:pmà we svng Vkàngpèí shá bǿà. 2 (Iwe Yesu Ang vdèí nø tìløp mvzíò, Ang coqcv́nrìí wa zíòe.) 3 Wervt Ang nø Yuda móng kèní búng nø Galili móng svng vrá vtv́ngá:mi. 4 Yesu nø Samari móng dangdang léshi vdu rvtnø, 5 Ang nø Yakuí angcè Yosep svng zi yà:ngà rvgaq shvnvng Sikar tǿò mvrìng svng tuq lú:ngì. 6 Weyv́ng nø Yaku tìdùng tiq lòng v̄le. Yesu nø tvrà dí mvjòr lú:ngì rvt tìdùng yv́ng runge. Welvng nø tvné vyang rvwè íe. 7 Samari tiqmè tì kvpshi ráì dvgvp Yesuí ang svng, “Ngà svng aqlv́m tì èzǿngà,” a:lòe. 8 (Welvng Ang coqcv́nrì nø v́mpà wvnv́m nvng mvrìng svng dìá:mì.) 9 Samari mèí Yesu svng, “Nà nø Yuda vsvng èí we, kadø í nø Samari mè kèní tì èrøtnvm ma?” a:lòe. (Kadø íe wani Yuda vsvng rì nø Samari rì nvng vzø̀mlv́m vtóng màvl.) 10 Yesuí ang svng vtà:ngò nø, “Gvray gønpaq lòng svng èsháò nø nà svng, ‘Aqlv́m tì èzǿngà,’ èv̄la:tnì pè kagǿ í we svng la èsháò nìnø, nà mv̀ng Ang kèní èrøtshi nø, A:ngí nà svng cúnshi we tì èzivt ni we íe,” a:- lòe. 11 Svmaré mèí Ang svng, “Vshaq pèá, Nà nø tì shv̀llv́m pà gø mènàdá, tìdùng gø rvnaq ke, cúnshi we tì nø kayv́ng kèní lèlú:nò ni? 12 Nà nø nøngmaq svng tìdùng yalòng èzí yv̀ngshà pè nøngmaq vkop vkang Yaku mvdv̀m nø dèmèringni. Wedvgvp ang nø tìdung yalòng kèní ang nvng angcèrì gø, ang nìnàrì gø aq yà:ngì," a:lòe. 13 Yesuí vtà:ngò nø, “Tì yalòng aq we kagǿ ínìgø vrá bál longe. 14 Ngàí zǿngò we tì lòng aq we kagǿ ínìgø kadvgvp gø mvbál long. Dvshàshà Ngàí zǿngò we tì nø ang vdòngø, dvciq lvpat gø̀nshaq yv́ng høq bor we tìbor í longe,” a:lòe. 15 Svmaré mèí Ang svng, “Vshaq pèá, ngà mvbállv́m dvpvt gø, ya yv́ng høq tì kvp nvng dí mvràlv́m dvpvt gø, welòng tì èzǿngà,” a:lòe. 16 Yesuí ang svng, “Ediv̄m; nvchø̀mpè svng ègoá:mò nø ya yv́ng èshøla: tnò,” a:lòe. 17 Svmaré mèí vtà:ngò nø, “Ngà nø chø̀mpè màdáng,” a:lòe. Yesuí ang svng, “Ngà chømpè màdáng èwa kà nø shǿn vdūe. 18 Kadø íe wani nvchø̀mpè pungwà gǿ èv́la yà:ngì. Akvt nà nàdá pè gø nvchø̀mpè mø̀í; ya kà nø nà dìng dø èshø̀ne,” a:lòe. 19 Svmaré mèí ang svng, “Vshaq pèá, Nà nø kàdvtutshú èí we ngàí dǿm bǿngà. 20 Nøngmaq vkop vkàng maqí nø ya shìgùng taq noq yà:ngà. Iwe namaq Yuda vsvng rì nø, ‘Gvray kaq noqngǿm rà nø Yerusalem taq wa íe,’ èwànø̀nge,” a:lòe. 21 Yesuí ang svng, “Svmaré mèá, Ngà svng èkv́m; Vpè svng namaqí noqlv́m nø ya shìgùng taq gø mø̀í, Yerusalem taq gø mø̀í we rvtø̀ tuq ràe. 22 Samari vsvng namaqí nø mèshánø̀ng pv̀n svng ènoqnønge. Nøngmaqí nø nøngmaqí sháì pv̀n svng noqìe. Kadø íe wani gø̀nshaq lúnlv́m tvrà nø, Yuda dvci taqkèní tuq daq we íe. 23 Vpè svng dø̄ngdø̄ng wa noqò rìí nø pvlàcè nvng nøtdøng nø:tní noqlv́m rvtø̀ tuq rae, akvt gø íe. Kadø íe wani Vpèí nø Ang svng wedø ku noqò rì kaq láòe. 24 Gvray nø Pvlacè í rvtnø, Ang svng noqò rìí nø pvlàcè nvng nøtdøng nø:tní noq ràe,” a:lòe. 25 Svmaré mèí Ang svng, ‘Kristu tǿò pè Meshia Ang di daq we nø ngàí shángòe. Ang di daq kvt, A:ngí nøngmaq svng shvngbe dètá daqìe,” a:lòe. 26 Yesuí ang svng, “Nà svng kà dvmv̀n pè Ngà nø wepè ni ǿngàe,” a:- lòe. 27 Yadø dvmv̀n la:ngí coqcv́nrì tuq ráì nø, Ang nø svmaré tiqmè nvng kà dvmv̀n da rvt angmaq dàá: mì. Iwe wemè svng, “Nàí pa èrø:tnòe? mø̀íni Ang nvng pawálv́m kà dèmv̀ne?” wa nø tiq gǿí gø mvrø:tno. 28 Svmaré mèí nø ang chúng chv̀ng weyv́ng ca là:ngò nø mvrìng kaq vtv́ngá:mì nø, vsvng rì kaq, 29 ngàí wv̀ng yv̀ngà rì shvngbe ngà svng dètáng bǿngà we vsvng tiq pè èyv̀ngvtnø̀ng. Yapè nø Kristu wa pè í we màsha!” a:lòe. 30 Wekvt angmaq nø mvrìng kèní búng ráì nø Ang yv́ng svng di ráì. 31 Wedø íá:mì dvhø̀í coqcv́nrìí Ang svng, “Rabbiá, v́mpà èvm ra,” a:lòe. 32 A:ngí angmaq svng, “Ngà nø namaqí mèshánøng we v́mlv́m vdánge,” a:lòe. 33 Coqcv́nrì nø, "Kagǿí Ang svng v́mlv́m lv́nga bǿà ma?” wa vrùnge. 34 Yesuí angmaq svng, “Ngà svng dèzv́r dakngà pè Ang nøt cv̀nò nø wv̀ngò lòng nvng Ang bv̀nlì wá dvdv́nglv́m lòng nø Ngà v́mpà èǿngange. 35 ‘Akvt vbì shvlá dv́ngte taq nø v̄m dvkøm rvtø̀ tuq ràe,” wa nø èshø̀nnøng we mø̀í má? Ngàí v̄la:tnìni, hv́ng rì nø akvtni gōng ráì nø, shvrvt vrvmá: mì we svng èyv̀ngnøng. 36 Wø:- nò gǿ nvng shvra:tnò gǿ nø tiq dø dvbú lúnlv́m rvt, shvra:tnò gǿí gø akvtni zibe lú:nò nø, dvciq lvpat gø̀nshaq dvpvt angshí dvkømv́m ma:nòe. 37 Pàwá wani, 'Wø:no gǿ nø tiq gǿ, shvra:tnò gǿ gø dvgá tiq gǿ,’ wa we kàshvgøp nø yadø dìnge. 38 Namaqí màwáshaq rvmá taq shvrvt dvkømlv́m Ngàí namaq svng dvzv́r bǿshà. Dvgá rìí wà bǿà we rvmá tvmū taq namaqí dvkømv́m èlún bǿshà,” a:lòe. 39 Svmaré mèí, “Ngàí wv̀ng yv̀ngà rì shvngbe A:ngí ngà svng dè táng bǿngà,” wa nø shø̀:nò we shvksekà rvtnø, we mvrìng kèní Samari vsvng mvme Ang svng kv́m bǿì. 40 Samari vsvng rì Ang yv́ng tuq ráì kvt, angmaq nvng v̀llv́m dvpvt angmaqí Ang svng rø:tnò rvtnø, weyv́ngø Yesu nø vní ni v̄le. 41 Vrá, Yesu kà kèní dvgá gø mvme gǿ kv́m ráì. 42 Angmaqí svmaré mè svng a:lò we nø, “Akvt nøngmaq kv́m bǿshà we nø nà kà rvt mø̀í, nøngmaq vdèí Ang kà tashì lún bǿshà rvtnø ká:mìe. Jø̀ngjǿng yapè nø rvgaq tø̀m svng chv́ngshú pè ni í we svng shá bǿshà,” wae. 43 Vní ni mèpvng Yesu nø weyv́ng kèní búngá:mì nø Galili móng svng gòngá:mì. 44 Kàdvtutshú svng nø vdè rvgaq rìí màpǿò, wa nø Yesu Ang vdèí ni vshǿnshaq í we; 45 Galili rì Yerusalem bóy svng dìa:pmì nø, Yerusalem bóy taq Yesuí wàò rì shvngbe yv̀ng a:pmà rvtnø, Galili móng svng Yesu gòng lú:ngì dvgvp angmaqí Ang svng vtōòe. 46 Yesu nø A:ngí tì kèní bìmtì shvlèa:pmà we Galili móng Kana rvwá svng vrá tiq kvt tuq ráì. Wekvt Kapèrnum mvringø dù tiq pè v̄l we, angcè pè zae. 47 Yesu nø Yuda móng kèní Galili móng svng tuq ráì wa kà à:ngí tá bǿà kvt, Ang yv́ng svng dìá:mì nø, shìlv́m dv́nshi we Angcè pè svng Yesu di daq nø dvbanalv́m dvpvt røtshìe. 48 Yesuí ang svng, “Namaqí nø shálv́m mvshv́lpvrá nvng vtiqrà ni mèyv̀ngnøng kèní nø, kadø ínìgø mèkv́mnøng,” a:- lòe. 49 Dù pèí Ang svng, “Vkàngpèá, ngàcè shini mvshì dvgvp èdía daqshà,” a:lòe. 50 Yesuí ang svng, “Nàtv́ng da, nvcèpè nø cúnshìe,” a:lòe. Yesuí a:lò kà svng wepè kv́m nø vtv́ngá:mì. 51 Wekvt ang yøt mv̄nshì daqì dvgvp, ang vshuqrìí ang svng vhǿma:tnà nø, Angcè pè baná:mì we dvtáòe. 52 Ang ka rvtø̀ kèní ban bǿì we angmaq svng rø:tnòe. Angmaqí ang svng, “Cáni vyáng mèpvng tiq nari taq ang vkatshi lòng shø̀má:mì,” a:lòe. 53 Wervtnø Yesuí, “Nvcè pè nø cúnshìe,” wa nø, ang svng v̄la:pmà rvtø̀ taq í we angpèí shá bǿà nø, ang gø angmaq rvp rvpkøp gø kv́m bǿì. 54 Yalòng nø Yuda móng kèní Galili móng svng Ang vtv́ng ráì mèpvng Yesuí wàò we shálv́m mvshv́lpvrá vní pv̀n wapv̀n íe.
1 Yadv́ng pv̀n mèpvng Yuda vsvng rì bóy tiq lòng v̄l rvtnø Yesu nø Yerusalem svng ngāngá:mì. 2 Yerusalem Vyv̀ng bv́ngkà tiq lapmø, kùngjv̀m pungwà lòng vl nø, Hebru kaí Betzata, wa tǿò we tìdøm tiq lòng v̄le. 3 Weri kùngjv̀m taq nø zari, nede, hize rì, hí wur shì rì loksok tiq mvdò vyálshì nø, (tì bvlōngshi long we svng caòe. 4 Kadø íe wa nìnø rvtø̀ vhøm ra dvgvp, Vkàngpè Ang muqlàng dvzv́r tiq gǿ tidøm svng lashì daq weí tì bvlong lú:ngò kvt kagǿ vzv̀ng vzv́lshìvm nìnø, ang kapà: ní za nìgø banvme.) 5 Weyv́ngø, vshø̀mcé vshvt nǿng zà daqì we vsvng tiq gǿ vbáe. 6 Ang vyálshì da we svng Yesuí yv̀ng bǿà nø, gvzà vlé dø ang zà yà:ngì we shá bǿà kvt, wepè svng A:ngí, “Nà ban mèyǿ ma?” a:lòe. 7 Za pèí Ang svng vtà:ngò nø, “Vshaq pèá, tì bvlong lú:ngò dvgvp, tìdøm svng ngà kaq zv́nglv́m vsvng màvl. Ngà shøtshø̀ng dvgvp, ngà vzv̀ng dvgá vsvng lè zønshivme,” a:lòe. 8 Yesuí ang svng, “Ekungshì; nà pvlu èlvngshì nø èdi,” a:lòe. 9 Wela:ngí wepè zǿmá:mì nø, ang pvlu lvngshi nø dìá:mì. Weni nø Narni íe. 10 Wervtnø dvbanshaq pè svng Yuda vsvng rìí, "Dèni nø Narni íe, nà pvlu lvngshilv́m dvrá màvl,” a:lòe. 11 Iwe à:ngí angmaq svng, “Ngà svng dèban bǿngà pèí, ‘Nà pvlu èlvngshì nø èdi,’ èv̄le," a:lòe. 12 Angmaqí, “Nà svng pvlu èlvngshì nø èdi,’ èvl pè nø kagǿ íe?” wa rø:tnoe. 13 Iwe wezàngø vsvng gø luq nø, Yesu gø yilshìá:mì rvt, ang kaq dvban bǿà pè nø kagǿ í we mvshá bǿà. 14 Wemèpvng, Noqngø̀m tø̀ngnø taq ang svng Yesuí yv̀ng bǿà kvt, “Eyà:ngò, nà nø dvbanshaq èíá:- mì. Yamvdv̀m té mvgvm we màhǿmlv́m rvt akvt kèní mvrà mèwani,” a:lòe. 15 Vsvng wepè dìá:mì nø, Yuda vsvng rì kaq, ang svng dvbana: pmà pè nø Yesu í we dvtáòe. 16 Yesuí Narni taq yarì wàò rvtnø, Yuda vsvng rì Ang svng vré mvnshìe. 17 Yesuí angmaq svng vtà:ngò nø, “Vpèí nø akvt høq bv̀nlì wá ma:nò rvt, Ngàí gø wá mvnòe,” a:- lòe. 18 A:ngí nø Narni dvrá svng ca:tnò we wa mvtaq, Gvray kaq gø Angpè tǿò nø, Ang nø Gvray nvng dvchá sūnshì rvtnø téwa, Yuda vsvng rìí Ang svng shvtlv́m vjø:nòe. 19 Wervtnø Yesuí angmaq svng vtá:nò we nø, "Ngàí kàdøng v̄la:tnìni, Angcè pèí nø Angpèí wàò pv̀n yà:- ngò dv́ngte wa mø̀í nìnø, Ang nøt waí nø tiq pv̀ncè gø wá mvlú:nò. Kadø íe wani Angpèí kapv̀n wàò nìnø, Angcè pèí gø wedø tiqdvchá wàòe. 20 Angpè nø Angcè pè svng shóngshì rvtnø, A:ngí wàò dv́ngte nø angcè pè svng shvya:ngòe. Vrá, namaq svng dá dvzv́rlv́m dvpvt, yarì mvdv̀mø ring we bv̀nlì gø A:ngí Ang svng dvtan daqòe. 21 Vpèí shìrì svng dvzū:nò nø gø̀nshaq dvcú:nò dø tiqdvchá, Angcè pèí gø welòng døni dvcún mvyǿ dv́ngte svng dvcú:nòe. 22 Vpèí nø kagǿ svng gø kà mvngéò. Wedø ínìgø kàngélv́m vmíng shvngbe nø Angcè pè svng vzíshaq íe. 23 Yalòng nø angmaqí Vpè svng vpǿò dø Angcè pè svng gø vpǿlv́m dvpvt íe. Angcè pè kaq màpǿò gǿí nø Ang kaq dvzv́r daqà pè Vpè svng màpǿò we ni íe. 24 Ngàí kàdøng v̄la:tnìni, Ngà kà tashi nø Ngà svng dèzv́r dakngà pè svng kv́m gǿí nø dvciq lvpat gø̀nshaq lú:nò nø, kàngé we màhǿ:mò. Ang nø shìlv́m lòng kèní léshi nø gø̀nshaq cúnshìlv́m yv́ng svng gòngvm we íe. 25 Ngàí kàdøng v̄la:tnìni, shìrìí nø Gvray Angcè pè kà tá lú:ngò we rvtø̀ tuq rae, akvt gø íe. Ang kà svng táòrì nø zun longe. 26 Kadø íe wani Vpè vdòng taq gø̀nshaq vl dø tiqdvchá, Angcè pè vdòng taq gø gø̀nshaq v̀llv́m dvpvt, Vpèí Ang svng vzíshaq íe. 27 Vrá, Ang nø Vsvng Angcè pè í rvtnø, kàngélv́m vmíng Gvrayí Ang svng vzíshaq íe. 28 Yalòng svng mènàtiqnøngni. Pawálv́m wani dvgv̀m vdòng taq vl rì shvngbeí Ang kà táò nø búng long we tiq rvtø̀ tuq rae. 29 Shvla dø wàò rì nø, gø̀nshaq lúnlv́m yv́ng svng zūn longe, mvgvm dø wàò rì nø, kàngélv́m yv́ng svng zun longe. 30 Ngà vdè vmíng kèní nø pà gø wá mvlúnò. Vpèí Ngà svng kapà shø̀n daq nìnø wedø ku wa kà rvtnòe. Ngàí nø Ngà nøt svng màcv́nshaq Ngà svng dèzv́r dakngà pè Ang nøt svng cv̀nò rvtnø, Ngàí kà rvtnò lòng gø døngmane. 31 Ngà nø Ngà dvpvt shvkse wv́ngshø̀ng we í nìnø, Ngà shvksekà nø mvdìng. 32 Ngà dvpvt shvkse wáashú nø dvgá tiq gǿ èv́lange. Ang Ngà dvpvt shvkse wáshì lòng gø dìng we Ngàí shángòe. 33 Namaqí Yohan svng røt dèzv́r bǿshà ke, ang gø dìng lòng dvpvt shvkse wáshì bǿì. 34 Iwe Ngà yadø wvng we nø rvgaq tø̀m vsà:ngí Ngà dvpvt shvkse wáa rà rvt wvng we mø̀í, namaq gø̀nshaq chutchv́ng lúnlv́m dvpvt lè Ngàí shø̀nò we íe. 35 Yohan nø gá we svmigwìn tiq lòng dø í nø, namaq gø ang gálong taq tiq chàmcè dèbù bǿshà. 36 Iwe Yohaní shvkse wàò lòng mvdv̀m té ring we shvkse kà nø Ngà yv́ng v̄le. Wá dvdv́nglv́m Vpèí Ngà svng èzøng we bv̀nlì nvng Ngàí wv̀ngò bv̀nlì rìí Ngà nø Vpèí dèzv́r dakngà pè ǿngà we shvkse èwv́ngange. 37 Ngà svng dèzv́r dakngà pè Vpè gø Ngà dvpvt shvkse wáshì bǿì. Ang kà svng namaqí kadvgvp gø mètá dv́rnøng; Ang mv̀rshv̀m svng gø mèyv̀ng dv́rnøng. 38 Ang Mòngkà gø namaq nøt vdòngø mèrínøng rvtnø, A:ngí dvzv́r daqà pè svng gø namaq mèkv́mnøng. 39 Namaqí dvciq lvpat gønshaq nø Shànshér Kàru vdòng taq v̄le èlv́nnøng nø, welòng svng nàjángnø̀nge. Iwe Shanshér Kàru welòng nø Ngà dang shvkse wáshì we wa íe. 40 Dvciq lvpat gø̀nshaq lúnlv́m dvpvt namaq nø Ngà yv́ng svng dí mètánø̀ng. 41 Ngàí nø vsa:ngí dvgùng èzøngvt we svng lá:ngò we mø̀í. 42 Iwe Gvray shóngnøt nø namaq nøt taq màvl we Ngàí shángòe. 43 Ngà nø Vpè bø̀ng kèní dø̀ng dakngà we, namaqí ngà svng mènatoshà. Dvgá tiq gǿ nø ang vdè bø̀ng kèní di ra nìnø, ang svng nø namaqí nàto lóngnønge. 44 Namaq nø tasv̀ng dvgùng vzíkelv́m lòng svng wa èlánø̀ng nø, Ang tiq gǿ wa vl pè Gvrayí zi ra we dvgùng svng nø mèlánø̀ng rvtnø, namaqí kadøwa Ngà svng lekv́mshà ni? 45 Vpè yv́ngø namaq svng Ngàí èko bǿìe mèlv́nnø̀ngni. Namaq svng kolv́m pè nø namaqí nàlǿmnøng pè Moshi mv̀ng íe. 46 Moshií nø Ngà dang tvnuò nø vrū yà:ngà rvtnø, namaq Moshi svng èkv́mnøng nìnø, Ngà svng gø kv́m rà we íe. 47 Inìgø à:ngí vrū yà:ngà lòng svng namaq mèkv́mnøng we í nø, Ngà kàrì svng namaq kadøwa lekv́m nøngni?” a:- lòe.
1 Yadv́ng pv̀n mèpvng Yesu nø, Tiberia tǿò we, Galili tìnúng kupa svng dìá:mì. 2 A:ngí zarì dvbanaò we vtiqlv́mrì svng yv́ng lú:nò rvtnø, vsvng loksu:kngí gø Ang mèpvng cà:nòe. 3 Yesu nø shìgùng svng ngangá:mì nø Ang coqcv́nrì nvng weyv́ngø rūnge. 4 Wedvgvp nø Yuda vsvng rìò Shvle Bóy gø tuq yul ráì. 5 Vsvng loksok Ang yv́ng svng di ráì we Yesuí yv̀ng bǿà nìnø, Filip svng, “Vsvng yadv́ngte v́mlv́m dvpvt, nøngmaqí kayv́ng kèní v́mpà wvnlvm?” a:lòe 6 A:ngí yadø a:lò we nø, Filip svng vlø:tnò we wa íe. Kadø íe wani A:ngí kadø wàlv́m nø Ang sháshìe. 7 Wekvt Filipmí Ang svng vtà:ngò nø, “Nøngmaqí gv̀msùng vníyá denari dvpǿ la wa:nì nìgø tamǿrcè gø vpvt na mø̀í,” a:lòe. 8 Wekvt Ang coqcv́nrì kèní tiq pè í we, Simon Piter angnvm pè Anderuí ang svng, 9 “Zongshar zidòng pungwà gø̀m nvng ngacè vnígo vdá we lvngàsvré tiq pè nø yayv́ngø vl we; ínìgø vsvng yadv́ngte luq dvhø̀ taq nø yarì pà shǿn tv́mshì má?” a:- lòe. 10 Yesuí, “Vsvng rì rúng dèzv́rnøng,” a:lòe. Wezàng nø shønlat mvme yoe. Wekvt angmaq rúng bǿì; lvngàré rì røbø̀ng nø pungwà kíng dv́ngte íe. 11 Wekvt Yesuí Zidòngrì lùò nø, Gvray kaq oqà wa dá:ngí, rúng bǿì rì svng túnaòe. Welòng dø ngārì gø angmaq shòng dv́ngte túnaòe. 12 Angmaq vgàá:mì kvt, Yesuí Ang coqcv́nrì svng, “Tiqhvn gø màmv́nglv́m dvpvt, v́m vchéò we mvzarì rèkulnøng,” a:lòe. 13 Wervtnø angmaqí rvku:lò nø, zongshar zidòng pungwà gø̀m kèní v́m bǿì rìí vchéò we mvzari nø, tiqcé vní jvng dvzǿng bǿà. 14 A:ngí wà bǿà we shálv́m mvshv́lpvrá yalòng svng vsvng loksu:kngí yv̀ng bǿà kvt, "Yapè nø jø̀ngjǿng ni rvgaq tø̀m svng dìlv́m vdv́nshaq pè, kàdvtutshú wepè ni íe," wae. 15 Weyv́ng kèní angmaqí, Ang svng mvdø̀ng mvdaq koqkv́m zv́nglvm wàò we svng Yesuí dǿm bǿà rvtnø, Ang nø vrá tiq kvt Ang wawa shìgùng svng yilshìá:mì. 16 Dørø̀m høqa:tnà dvgvp, Ang coqcv́nrì nø tìnúng svng shúngshìá: mì nø, 17 kùngshí tiq gø̀m taq zv́ngshì dá:ngí, tìnúng kupa Kapernum svng rvpshìe. Wedvgvp nv̀m døá:mì nìgø Yesu nø angmaq yv́ng svng shini mvtuq ra. 18 Nv̀mbø̀ng mvrù mut ráì nø tìma gø búng mvnshì lú:ngì. 19 Angmaq nø ming vshø̀m vbì dv̀m dv́ngte rvpshi bǿì dvgvp, Yesu nø tìnúng mvdv̀mdv̀m di nø, kùngshí gø̀m shvnvngø tvp níshì ráì we svng angmaqí yv̀ng bǿà nìnø shérvkaq svre lú:ngì. 20 Yesuí angmaq svng, “Ngà ǿngàe, mèsèrenøngni,” a:lòe. 21 Wekvt wa angmaqí Ang svng kùngshí vdòng svng dvgòng bǿà nìnø, kùngshí nø wela:ngí chàng angmaq di yv́ng svng tuqá:mì. 22 Mèpvng ni taq, tìnúng kupaø ngø̀ma:pmì vsvng loksok mvdòí nø, weyv́ngø kùngshí tiq gø̀m wa mø̀í nìnø dvgá kùngshí màv̀lap we nvng kùngshí wegø̀m taq Yesu nø mvzv́ngshì, Ang coqcv́nrì wa zv́ngshìa: pmì we svng dǿm bǿà. 23 Wekvt Tiberia kèní di ráì we kùngshí tiqmaq nø, Vkàngpèí Gvray kaq oqà wa dá:- ngí angmaq zidòng v́ma:pmì zàng shvnvng yv́ngø koqshi ráì. 24 Vsvng loksokrìí nø, Yesu gø, Ang coqcv́nrì gø weyv́ngø màvl we svng dǿm bǿà kvt, angmaq gø kùngshí we rì taq zv́ngshì nø, Kapèrnum pa svng Yesu láa:tnà. 25 Tìnúng kupaø angmaqí Ang svng lá lún bǿà nìnø, “Rabbiá, Nà nø ya yv́ng svng kadvgvp ètuqa:pmì?” wa rø:tnòe. 26 Yesuí angmaq svng vtà:ngò nø, “Ngàí angjǿng dìng dø v̄la:tnìni, namaqí Ngà svng èlásha long nø, shálv́m mvshv́lpvrárì èyv̀ngvpsha rvt mø̀í, zidù:ngí nàgàvpshà rvt mv̀ng íe. 27 Gvyaq mv̄nshì we v́mlv́m dvpvt wa mèdèzaqshìnø̀ngni. Vsvng Angcè pèí namaq svng zí daqì we, dvciq lvpat gø̀nshaq høq zá:nò we v́mlv́m svng mv̀ng lá dèzaqshìnø̀ng. Kadø íe wani Vpè Gvrayí ni Ang taq Angò dvzik dvcaqshaq íe,” a:lòe. 28 Wervt angmaqí Ang svng, “Nøngmaqí Gvray bv̀nlì wá lúnlv́m dvpvt kapà wa ráìe ma?” a:lòe. 29 Yesuí angmaq svng, "Gvray bv̀nlì nø, A:ngí dvzv́r daqà pè svng namaqí kv́mlv́m lòng yalòng íe,” a:lòe. 30 Wekvt angmaqí Ang svng, “Wedø íni nøngmaqí yà:ngì nø Nà svng kv́mlv́m dvpvt kapà shálv́m mvshv́lpvrá èwàòni ma? Pà tiqpv̀n èwàò ni ma? 31 Kàru taq ‘A:ngí muqlàng kèní zidòng angmaq svng zi yà:ngà,’ wa nø vrū yà:- ngà dø, nøngmaq vkop vkàngmaq nø rvgaq mvgūng móngø manna zidòng v́m yà:ngì,” a:lòe. 32 Wekvt Yesuí angmaq svng a:lò we nø, “Ngàí kàdøng v̄la:tnìni, muqlàng kèní zidòng èzí yv̀ngshà pè nø Moshi mø̀í; muqlàng kèní zidòng mvdø̀ng lòng èzínø̀ng pè nø Ngà Vpè mv̀ng íe. 33 Kadø íe wani muqlàng kèní lashi daqì nø, rvgaq tø̀m vsvng kaq gø̀nshaq dvcúnaò pè wepè nø Gvray Ang zidòng íe,” a:lòe. 34 Wervt angmaqí Ang svng, “Vkàngpèá, akvt kèní nø zidòng welòng nøngmaq svng mànārnār èzísha lè,” a:lòe. 35 Wekvt Yesuí angmaq svng, “Ngà nø gønshaq zidòng lòng ǿngàe. Ngà kaq di ra vsvng wegǿ nø kadvgvp gø svri mvshì long; Ngà svng kv́m gǿ ang gø, dvciqciq mvbál long. 36 Iwe Ngàí v̄lvpshà dø namaqí Ngà svng èyv̀ngshà nìgø, mèkv́mshà. 37 Vpèí Ngà svng èzøngvt dv́ngte nø Ngà yv́ng svng di rae. Ngà svng di ra dv́ngte svng nø, kadø ínìgø Ngàí mvgurò. 38 Kadø íe wani muqlàng kèní Ngà lángshø̀ng dakngà lòng nø, Ngà nøt cv́nshìlv́m dvpvt mø̀í; Ngà svng dèzv́r dakngà pè Ang nøt cv̀nlv́m dvpvt íe. 39 Ngà svng dèzv́r dakngà pè Ang nøt nø, A:ngí Ngà svng vzíshaq dv́ngte shvngbe, tiq gǿ gø màshvmv́ngò dø lv̀ngdø̀m angni taq angmaq svng Ngàí dvzunlv́m yalòng íe. 40 Kadø íe wani, Angcè pè svng yà:ngò nø, kv́m vsvng gǿ vrv̀m nø dvciq lvpat gø̀nshaq lúnlv́m, yalòng mv̀ng Ngà Vpè Ang nøt íe. Vrá, tìsi lv̀ngdø̀m ni weni taq Ngàí ni wegǿ svng dvzunlv́m íe,” a:lòe. 41 Yesuí, “Ngà nø muqlàng kèní langshø̀ng dakngà we zidòng ǿngàe,” wakà rvtnø, Yuda vsvng rì nø Ang kaq vbønshì lú:ngì. 42 Wekvt angmaq nø, “Yesu yapè nø Yosep Angcè pè ni mø̀í ma? Angpè angmè gø nøngmaqí sháì we mø̀í ma? Akvt Ang kadø í nø, ‘Ngà nø muqlàng kèní langshø̀ng dakngà,’ wa shø̀ne ma?” wae. 43 Yesuí angmaq svng, “Namaq mènàbønshìnøngni. 44 Ngà svng dèzv́r dakngà pè Vpèí cøpma:tnò gǿ wa mø̀í nìnø, Ngà yv́ng svng kagǿ gø dí mvlúnshì. Ngà yv́ng di ra gǿ svng nø lv̀ngdø̀m ni taq Ngàí dvzunlv́m íe. 45 Kàdvtutshúrì kàru taq, ‘Angmaq shvngbe nø Gvrayí shvngøtshaq í longe,’ wa nø vrū yà:- ngà. Vpè kèní tá lú:nò nø cvnshi lú:nò gǿ vrv̀m nø Ngà yv́ng svng di rae. 46 Gvray yv́ng kèní dì daqì pè A:ngí wa mø̀í nìnø, Vpè svng yà:ngò we tiq gǿ gø màvl. Ngàí nø Vpè svng vyv́ngshaq íe. 47 Ngàí kàdøng v̄la:tnìni, Ngà svng kv́m gǿ ang nø dvciq lvpat gø̀nshaq lúne. 48 “Ngà nø gønshaq zidòng ǿngàe. 49 Namaq nvkop nvkàng maq nø rvgaq mvgūng móngø manna zidòng v̄m nìgø wedøni shì yà:ngì. 50 Muqlàng kèní la daqà we zidòng vm gǿ mv̀ng nø mvshì long. 51 Ngà nø muqlàng kèní la daqà we cúnshi we zidòng lòng ǿngàe. Zidòng yalòng v́m bǿò gǿ nø dvciq lvpat cúnshìlv́m íe. Vrá rvgaq tø̀m vsvng gø̀nshaq cúnshilv́m dvpvt Ngàí zílv́m Zidòng lòng nø, Ngà vsha íe,” a:lòe. 52 Wervtnø Yuda vsvng rì nø tasv̀ng vzø̀ng sórí, “Yapèí kadøwa Ang vsha nø nøngmaq svng dvkélv́m èwàì má?” wae. 53 Wervtnø Yesuí yadø a:lòe. “Ngàí kàdøng v̄la:tnìni, namaq nø Vsvng Angcè pè Ang vsha mèkénøng, Ang shvwi mèaqnøng nìnø namaq vdòng taq gø̀nshaq màvl. 54 Ngà vsha ke nø Ngà shvwi aq vsvng wegǿ nø dvciq lvpat gø̀nshaq v̄le. Vrá, tìsi lv̀ngdø̀m ni taq Ngàí wegǿ svng dvzunlv́m íe. 55 Pàwá wani Ngà vsha nø v́mlv́m mvdø̀ng íe; Ngà shvwi gø aqlv́m mvdø̀ng íe. 56 Ngà vsha ke nø Ngà shvwi aq vsvng wegǿ nø, Ngà vdòngø v́l døng nø, Ngà gø ang vdòngø v́l dønge. 57 Cúnshi pè Vpèí Ngà svng dèzv́r dakngà nø, Vpè taq kèní Ngà gø cúnshø̀ng dø tiqdvchá, Ngà svng èvm we wegǿ gø welòng døni Ngà taqkèní cúnshìlv́m íe. 58 Yalòng nø muqlàng kèní la daqà we zidòng lòng íe. Nvkop nvkàng maq nø Manna v̄m nìgø shì yà:ngì. Inìgø zidòng yalòng vm gǿ mv̀ng nø dvciq lvpat cúnshìlv́m íe,” a:lòe. 59 Yadv́ng pv̀n nø Yesuí Kapèrnum mvrìng júrøt chø̀m taq shvngø:tnò dvgvp shø̀n yà:ngà rì íe. 60 Yakà tá bǿà kvt, Ang coqcv́nrì mvme tiqmaq nø, “Kà yalòng nø vtvngshaq cíng rvzaqe; kagǿí vto jòre ma?” wae. 61 Ang coqcv́nrì nø kà yalòng dang vbønshi we Yesuí dǿ:mò rvtnø angmaq svng, “Ngà kà yalù:ngí namaq svng nøt vtøp dèzv́rnøng ma? 62 Vsvng Angcè pè nø vzv̀ng Ang v́lrà yv́ng svng rvlv̀ngvm we svng èyv̀ng lóngnøng kvt nà? Kadø èí lóngnøng ma? 63 Gønshaq zíshú nø Gvray Pvlacè íe, shagú:ngí nø zí mvlú:nò. Ngàí namaq svng shø̀nvpmà kàrì nø, Pvlacè nvng gø̀nshaq íe. 64 Iwe namaq mèkv́mnøng we tiqmaq èv̀lnønge,” a:lòe. Kadø íe wani mvkv́m rì nø kagǿ gǿ í we nvng Ang svng nvmv́mlv́m pè nø kagǿ í we svng nø Yesuí nvmlat kèní sháòe. 65 A:ngí rá, “Yalòng rvtnø Ngàí namaq svng, ‘Vpèí ang svng dí dvzá: rò we mø̀í nìnø, Ngà yv́ng svng dí lú:nò we nø tiq gǿ gø màvl,’ lvv̄lvpshà,” a:lòe. 66 Weyv́ng kèní Ang coqcv́n mvme gǿ rv́lshìá:mì nø Ang mèpvng rá mvzv̀ná:mì. 67 Wervtnø Yesuí we tiqcé vní pè svng, “Namaq gø èlonø̀ngni ma?” a:lòe. 68 Simon Piterí Ang svng vtá:nò nø, “Vkàngpèá, nøngmaq nø kagǿ yv́ng svng lvlōìni? Dvciq lvpat gø̀nshaq kàri nø Nà yv́ng wa v̄le. 69 Nà nø Gvray Ang Shanshér pè èí we svng nøngmaq kv́m gø kv́m bǿshà nø shá gø shá bǿshà,” a:- lòe. 70 Yesuí Angmaq svng vtà:ngò nø, “Namaq tiqcé vní pè nø, Ngàí rvcv̀ng yv̀ngshà pèla, èínønge. Iwe namaq taq vbá we tiq pè nø cáng íe,” a:lòe. 71 A:ngí yadø shø̀:nò we nø, Iskariot vsvng Simon angcè Yuda svng wa we íe. Ang nø we tiqcé vní pè taq vbá we, mèpvng Yesu svng nvmv́mlv́m pè íe.
1 Yadv́ng pv̀n mèpvng Yesu nø Galili móng taq tvríshìá:mì. Yuda vsvng rìí Ang svng shvtlv́m wàò rvtnø, Ang nø Yuda móng dí mvneshi. 2 Wedvgvp nø Yuda vsvng rì Shiyat Bóy tuq yùl ráì. 3 Angnvm pèlaí Ang svng, “Nàí èwàò we bv̀nlì rì nø, Nà coqcv́nrìí gø yv́ng lúnlv́m rvt, ya yv́ng kèní èbúng nø, Yuda móng svng èdiv̄m. 4 Kadø íe wani vdè dvgùng lvshv̀ngv̄m dø wáshì mvyǿ vsvng kagǿí gø, kapà gø mvyø̀:ní mvwàò. Nàí yadv́ng pv̀n èwàò rì mònggàng shvngbe svng dètánshi,” a:lòe. 5 Kadø íe wani angnvm rì gø Ang svng mvkv́m. 6 Wekvt Yesuí angmaq svng, “Ngà rvtø̀ shini mv høqò, namaq rvtø̀ nø, kadvgvp gø tvlú èíanø̀nge. 7 Rvgaqí nø namaq svng mèshèngonøng; Ngà svng nø shèngonge. Pawálv́m wani angmaqò bv̀nlì mvgv́m rì Ngàí dvta:nò rvt íe. 8 Namaq nø bóy svng èngāngv́mnø̀ng. Ngà rvtø̀ nø shini mvhøqò rvtnø, yabóy svng Ngà mvdøng,” a:lòe. 9 Yesuí angmaq svng yadv́ng pv̀n vl bǿà dá:ngí, Ang nø Galili móng taq v̀l ráì. 10 Iwe angnvm rì bóy svng dìá: mì mèpvng, Ang gø mvyø̀n cèí ngāngá:mì. 11 Yuda vsvng rìí nø, bóy taq Ang svng láò nø, Ang kayv́ng vl ma?” wa vrøtkee. 12 Vsvng loksokrì dvhø̀ taq Ang dang vrùng nø tiqmaq nø, “Ang nø vsvng shvlá íe,” wae; dvgá tiqmaq nø, “Mø̀í, A:ngí nø bashà rì kaq shvmà: nòe,” wae. 13 Iwe angmaq nø Yuda vsvng rì kaq svre rvtnø, Ang dang dèdè nø mvshø̀:nò. 14 Yesu nø bóy pv̀nglà ni taq, Noqngø̀m tø̀ngnø svng ngangá:mì nø shvngø:tnòe. 15 Wekvt Yuda vsvng rì dà nø, “Vsvng yapè nø kadvgvp gø kàru màcvnshishaq í we, kayv́ng kèní yadv́ngte sháò ma?” wae. 16 Yesuí angmaq svng vtá:nò nø, “Ngàí shvngøtnò kà nø Ngàò mø̀í, Ngà svng dèzv́r dakngà pè Angò íe. 17 Gvray nøt svng cv́n mvyǿ we kagǿ ínìgø Ngà shvngøtkà yalòng nø Gvray yv́ng kèní í mø̀í we; mø̀íni Ngà nø:- tní shø̀n we í mø̀í we svng shá daqòe. 18 Vdè nø:tní shø̀:nò gǿ ang nø, vdè dvgùng láshì we íe. Ang svng dvzv́r daqà pè dvgùng láò gǿ mv̀ng nø, døngman we í nø mvdìng we pàgø Ang vdòng taq màvl. 19 Moshií namaq svng Dvrá èzí yv̀ngshà we mø̀í ma? Iwe namaq nø dvrá cv̀n we tiq gǿ gø mèv̀lnøng. Namaqí Ngà svng pàwá shvtlv́m èwàshàe?” a:lòe. 20 Vsv̀ng loksokrìí vtá:nò nø, “Nà nø cáng èzv́ngshìe. Kagǿí Nà svng shvtlv́m èdv́ne ma?” a:lòe. 21 Yesuí, “Ngàí bv̀nlì tiqpv̀n wv̀ng bǿngò nøngnø, bv̀nlì welòng rvtnø namaq shvngbe èdànønge. 22 Moshií namaq svng rvmøl vtóng èzí yv̀ngshà. Rvmø̄l vtóng welòng nø Moshi taq kèní nø mø̀í. Vkop vkàngmaq kèní lè íe. Wervtnø namaqí nø vsvng kaq Narni taq rèmølnønge. 23 Moshi dvrá màcatlv́m dvpvt, vsvng tiq gǿ kaq Narni taq dv́ng rvmøl daq we í kvtkèní nø, Narni taq Ngàí vsvng tiq gǿ góngkøp dvzǿm bǿngà lòng rvt, namaq nø pàwá Ngà svng shv̀mná èrínøng ma? 24 Namaqí nø mvdv̀m lap yv́ngshi pv̀n taqkèní wa kà mèrvtnøngni. Døngman dø mv̀ng kà èrvtnøng,” a:lòe. 25 Wekvt Yerusalem rì tiqmaq nø, “Angmaqí shvtlv́m wàò pè nø, yapè ni mø̀í ma? 26 Iwe èyv̀ngnøng, Ang nø dèdè chaqdvp yv́ngø kà shø̀n nìgø, Ang svng angmaqí pàgø mva: lò. Yapè nø Kristu ni í we svng, dù rìí jø̀ngjǿng dǿ:mò we dv́ng mø̀í? 27 Inìgø yapè kayv́ng kèní í we nø nøngmaqí sháìe; Kristu di daq kvt nø, Ang kayv́ng kèní í we kagǿí gø mvshá lú:ngò,” wae. 28 Yesuí nø Noqngø̀m tø̀ngnø taq vkiq sórí mvshǿl shø̀:nò nø, “Ngà kagǿ ǿngà we nvng Ngà kayv́ng kèní ǿngà we svng namaqí jø̀ngjǿng èsháshà ma? Ngà nø Ngà nø:tní dø̀ng dakngà we mø̀í. Ngà svng dèzv́r dakngà pè nø dìng Pè í we namaqí Ang kaq mèshánøng. 29 Ngà nø Ang yv́ng kèní dø̀ng dakngà rvtnø, Ngàí Ang svng shángòe; vrá A:ngí ni Ngà svng dèzv́r dakngà,” a:lòe. 30 Wekvt angmaqí Ang svng tvplv́m wàoe. Wedø ínìgø Ang rvtø̀ shini mvhøqò rvtnø, kagǿ gø Ang svng wur zúshi màshvla. 31 Vsvng loksokrì taqkèní mvme gǿ Ang svng kv́m ráì. Angmaq nø, “Kristu wepè tuq daq kvt gø, yapèí wàò we shálv́m mvshv́lpvrá rì mvdv̀m nø damvwà daqòni,” wae. 32 Vsvng loksokrì Ang dang yadø shø̀n we svng Farisirìí tá bǿà kvt shvrúngshú vjìrì nvng Farisirìí nø, Ang svng tvplv́m cìlcèrì dvzv́r bǿà. 33 Wervtnø Yesuí, “Ngà nø namaq nvng tiq lvngcè wa v̄l dá:- ngí, Ngà svng dèzv́r dakngà Pè yv́ng svng vtv́ngv̄me. 34 Namaqí Ngà svng èlásha nìgø lá mèlún lóngshà; Ngà v̄l yv́ng svng gø namaqí dí mèlún lóngnøng,” a:lòe. 35 Wekvt Yuda vsvng rì vrùng nø, “Vsv̀ng yapè nø Ang svng nøngmaqí lá mvlún høq, kayv́ng svng dìlv́m wa ma? Ang nø Helenirì dvhø̀ taq vshin yà:ngì rì yv́ng svng di nø, mø̀íni Helenirì svng shvngøtlv́m wa ma? 36 A:ngí, ‘Namaqí Ngà svng èlásha nìgø, lá mèlún lóngshà; Ngà vl yv́ng svng gø namaqí dí mèlún lóngnøng,’ wa kà nø kadø wa we í ma?” wa vrøt kee. 37 Bóy lv̀ngdø̀m ni, té vchvk we weni taq, Yesu rip nø vkiq sórí, “Bál vsvng vl nìnø, Ngà yv́ng kèní laqaq ra. 38 Ngà kaq kv́m gø nø, Shànshér Kàru taq vshǿnshaq dø tiqdvchá, ang vdòngrv́m kèní cúnshi tì angwàng vyø̄ longe,” a:lòe. 39 A:ngí yadø shø̀:nò lòng nø, Ang kaq kv́m rìí lúnlv́m í we Pvlacè svng wa kà íe. We rvtø̀ taq Yesu nø ngø̀r dvgùng shini màshvringshaq í rvtnø, Pvlacè gø shini màdvzv́r daqò rvtø̀ íe. 40 Vsvng loksok tiqmaqí kà yarì tá bǿà kvt, “Yapè nø jø̀ngjǿng ni Kàdvtutshú wepè íe,” wae. 41 Dvgá maq nø, “Yapè nø Kristu ni íe,” wae. Iwe tiqmaq nø, “Kayv́ng! Kristu nø Galili kèní bunglv́m mø̀í. 42 Kristu nø Dawi ang dvgøng dvyø̀ kèní bung long nø, Dawi vl yàng we Betlehem rvwá kèní mv̀ng bung longe wa nø, Shànshér Kàru taq shø̀:nò we mø̀í ma?” wae. 43 Wervt vsvng loksokrì nø Yesu rvt ta mvdò vwálshilv́m bung lú:ngì. 44 Wekvt angmaq tiqmaq nø Ang svng tvp mvyǿ we ínìgø, tiq gǿ gø wur mvzúshi. 45 Cìlcèrì vtv́ng ráì kvt shvrúngshú vjìrì nvng Farisirìí kadø í rvt Ang svng mètvpmvtnøng má, wa rø:tnòe. 46 Cìlcèrìí vtá:nò nø, “Vsvng yapè shø̀n dø nø kagǿ gø mvshø̀n dvr,” a:- lòe. 47 Farisirìí angmaq svng, “Namaq svng gø we pèí shemànv́m bǿshà ma? 48 Vgo zǿmshúrì dvhø taq, mø̀íni Farisirì taqkèní, Ang svng kagǿ kv́me lè? 49 Dvrá lòng svng gø mvsháò we, vsvng loksok yamvdò nø, mvtv́nshaq íe,” wae. 50 Angmaq mvdò taq vbá we, vzv̀ng Yesu yv́ng svng di ráì pè Nikodimuí angmaq svng, 51 “Vsvng tiq gǿ svng nø, ang kà svng shini vzv̀ng màtáshaq, à:ngí wàò lòng gø shini màgúnshaq nø kà rvtlv́m dvrá màvl we mø̀í ma?” a:lòe. 52 Angmaqí ang svng, “Nà gøni Galili kèní èíe ma? Galili kèní nø kàdvtutshú tiq pè gø mvbūng dvr we svng, kàru rì taq ègù:nò, wekvt èshá lú:ngòe,” a:lòe. 53 Wedá:ngí angmaq nø vdèdè chø̀m svng loá:mì.
1 (I we, Yesu nø Zanlún pung svng dìá:mì. 2 Mèpvng sháng mvgágá Yesu nø Noqngø̀m tø̀ngnø svng gòngá:mì ke vsvng rì shvngbe Ang yv́ng dvkǿmshi ráì. Wekvt Ang rung nø angmaq svng mvshǿl shvngø:- tnòe. 3 Dvrá svra mvdò nvng Farisirìí nø dàchapke da yv́ngø tvp bǿà we svmaré tiqmè shøla:tnà nø shvngbe dvhø̀ø shvri:pmò dá:ngí, 4 “Svra pèá, yamè svng nø dàchapke da yv́ng ni tvp bǿshà we íe. 5 Moshi Dvrá taq nø, yadø í rì svng lú:ngí wvp nø shvtlv́m dèkvm yv̀ngshà. Nà nø kadø èwa ma?” a:lòe. 6 Angmaq yadø shø̀n lòng nø, Ang svng cèlv́m dvpvt vlø:tnò we íe. Yesu nø ngǿmshì sórí Ang wurhà:mí vba tø̀mø vruòe. 7 Angmaqí Ang svng wedø røt ma:nò rvtnø, Ang kang ngángshi nø angmaq svng, “Namaq vdòng taq mvrà màvl gǿí vzv̀ng ang svng lú:ngí laq wa:pmò,” a:lòe. 8 Wedá:ngí rá Ang ngǿmshì nø wurhà:mí vba tø̀m vruòe. 9 Angmaqí wekà tá bǿà kvt, shaqré rì kèní pv́ngshì nø tiq gǿ mèpvng tiq gǿ loá:mì. Lvngdø̀m nø Yesu wa lang ráà nø, svmaré mè gø to yv́ngø rip dv̀ng wae. 10 Yesu nø vrá ngángshì lú:ngì nø ang svng, “Svmaré mèá, angmaq kayv́ng íá:mì? Nà svng kagǿí gø kà mèrvt ra ma?” a:- lòe. 11 A:ngí, “Vkàngpèá, kagǿí gø kà mèrvt rang,” a:lòe. Wervt Yesuí, “Ngàí gø nà svng kà mvrvt. èlov̄m; akvt kèní kukaq mv̀ng mvrà mèwani,” a:lòe.) 12 Yesuí rá bashà rì svng yadø a:lòe, "Ngà nø rvgaq gálong ǿngàe. Ngà mèpvng cv̀n vsvng nø gø̀nshaq gálong vdá rvtnø dø vdòngø mvdi,” a:lòe. 13 Wervtnø Farisirìí Ang svng, “Nà nø Nà dvpvt shvkse èwáshí rvtnø, nà shvksekà nø mvdìng,” a:lòe. 14 Yesuí angmaq svng vtà:- ngò nø, "Ngà nø Ngà dvpvt shvkse wv́ngshø̀ngnøng gø, Ngà shvksekà nø dìnge. Pàwá wani Ngà kayv́ng kèní dø̀ng dakngà we nvng kayv́ng svng dø̄ngvm we Ngà shángshø̀nge. Iwe namaqí nø, Ngà kayv́ng kèní dø̀ng dakngà we nvng kayv́ng svng dø̄ngvm we mèshánøng. 15 Namaqí nø sv́ngzàcè vtóng dvrá ku kà èrvtnønge. Ngàí nø kagǿ svng gø kà mvrvtnò. 16 Ngàí la kà rvt lóngònøng nø, Ngàí kà rvtno lòng nø dìnge. Kadø íe wani Ngà nø Ngà tiq gǿ wa mvǿngà; Ngà svng dèzv́r dakngà pè Vpè nø Ngà nvng v̄le. 17 Namaq dvrá taq gø, vsvng vní gǿ shvkse wáshì lòng nø shvdøng lúnshìe, wa nø vrūshaq íe. 18 Ngà nø vdè dvpvt shvkse wv́ngshø̀ng we ínìgø Ngà svng dèzv́r dakngà pè Vpè gø Ngà dvpvt ni shvkse wáshìe,” a:lòe. 19 Wekvt angmaqí Ang svng, “Nvpè nø kayv́ng v̄le ma?” a:lòe. Yesuí vtà:ngò nø, “Ngà svng gø, Ngà Vpè svng gø, namaqí mèshásha. Namaqí Ngà svng èsháshà nìnø, Ngà Vpè svng gø èshánøng ni we íe,” a:lòe. 20 Kà yarì nø Noqngø̀m tø̀ngnø taq A:ngí shvngø:- tnò dvgvp, gv̀msùng shøpdik dvbǿ:- mò zàngø shø̀:nò kàrì íe. Iwe Ang rvtø̀ shini màhø̄mra rvtnø Ang svng tiq gǿí gø mvta:pmò. 21 Vrá tiq kvt Yesuí angmaq svng, “Ngà nø døngvme. Namaqí nø Ngà èláshà we ínìgø namaq nø namaq mvrà taq èshi lóngnønge. Ngà døngvm yv́ng svng namaqí dí mèlúnnøng,” a:lòe. 22 Wervtnø Yuda vsvng rì nø, “Ngà døngvm yv́ng svng namaqí di mèlúnnøng,’ wa kà nø Ang nø Ang shvtshìlv́m dv́nshi rvtnø wae ma?” wae. 23 Wervt Yesuí angmaq svng, “Namaq nø pv̄ngtø̀m kèní èínønge; Ngà nø taqlap kèní ǿngae. Namaq nø rvgaq yalòng kèní èínønge; Ngà nø rvgaq yalòng kèní mvǿngà. 24 Wervtnø Ngàí namaq svng, ‘Namaq mvrà taq namaq èshì lóngnønge,’ vl bǿshà. Kadø íe wani Ngà nø Kristu wepè ǿngà we svng mèkv́msha kvtkèní nø, namaq nø namaq mvrà taq èshì lóngnønge,” a:lòe. 25 Wervtnø Ang svng angmaqí, “Ini, Nà nø kagǿ èíe ma?” a:lòe. Yesuí angmaq svng, “Ngàí nvmlat kèní ni namaq svng dvtá bǿshà pè wepè ni ǿngàe. 26 Ngà nø namaq svng shø̀nlv́m nvng dvràlv́m mvme pv̀n vdánge. Iwe Ngà svng dèzv́r dakngà pè nø kv́mv́m daq pè í nø, Ang yv́ngkèní tángò dv́ngte wa Ngàí rvgaq tø̀m svng dvtángò we íe,” a:lòe. 27 Inìgø Yesuí Angpè dang shø̀:nò we svng angmaqí mvcí:ngò. 28 Wervtnø Yesuí a:lòe. “Namaqí Vsvng Angcè pè svng èhàng bǿnø̀ng dá:- ngí wa, Ngà nø Kristu wepè ǿngà we gø, Ngà nø Ngà nø:tní pàgø mvwv̀ngo, Vpèí Ngà svng shèngøt dø tiqdvchá shø̀:nò we svng gø, namaqí èshá lóngnønge. 29 Ngà svng dèzv́r pè nø Ngà nvng v̄le. Ngà wawa A:ngí mèlàng. Pàwálv́m wani Ngàí kadvgvp gø Ang wv́mshì dø wa wv̀ngoe,” a:lòe. 30 Yadv́ng pv̀n A:ngí shø̀n bǿà kvt vsvng mvme Ang svng kv́m ráì. 31 Wervtnø Yesuí Ang svng kv́m ráì we Yuda vsvng rì svng, “Ngà kà svng namaqí nàpǿnøng nø ècv̀nnøng kvt kèní nø, namaq nø jø̀ngjǿng Ngà coqcv́n èínønge. 32 Dìnglòng svng namaqí èshá lóngnøng nø, dìng lù:- ngí namaq svng shèlutnvtnønge,” a:- lòe. 33 Angmaqí Ang svng vtá:nò nø, "Nøngmaq nø Abraham dvcì cèrì íshà nø kadvgvp gø kagǿ vshuq gø mvwáshì dá:rì we; ‘Namaq svng nø shvlutlv́m íe,’ nø kadø í nø èvlsha ma?” a:lòe. 34 Yesuí angmaq svng, “Ngàí kàdø̄ng v̄la:tnìni. Mvrà wàò dv́ngte shvngbe nø mvrà vshuq íe. 35 Vrá, vshuq nø tiq rvp vdòngø tiqdvciq v́l døng we mø̀í; Angcè mv̀ng nø dvciqciq v́l døng we íe. 36 Wervtnø Angcè pèí namaq svng shèlàng bǿnø̀ng kvtnø, namaq nø jø̀ngjǿng shvlángshaq èí lóngnønge. 37 Namaq nø Abraham dvcì cèrì èínøng we Ngàí shángòe. Iwe namaq vdòng taq Ngà kàrì v́lrà màvl rvtnø namaqí Ngà svng shvtlv́m èwàshàe. 38 Ngà nø Vpè nvng v̀lshì ke Ngàí vyv́ngshaq rì shø̀nòe. Namaqí gø nvpè maq kèní ètánøng rì èwànø̀nge,” a:lòe. 39 Angmaqí vtá:nò nø Ang svng, “Nøngmaq angpè nø Abraham íe,” a:lòe. Yesuí rá, “Namaq nø Abraham pvlí pvlaq rì èínøng kèní nø, Abrahamí wàò rì namaqí èwànø̀ng ni we íe. 40 Iwe akvt nø, Gvray yv́ng kèní Ngàí tángò we dìnglòng namaq svng dvtá daqshà pè Ngà svng lè namaqí shvtlv́m èwàshàe. Abraham nø yadø mvwa yv̀ng. 41 Namaqí nø namaq nvpèí wàò rì lè èwànø̀nge,” a:lòe. Angmaqí Ang svng, “Nøngmaq nø gømpàncè mø̀ísha; nøngmaq vpè nø Gvray tiq pè wa èíaìe,” a:lòe. 42 Yesuí angmaq svng, “Gvray nø namaq nvpè èíanøng nìnø, namaqí Ngà svng èshòngshà ni we íe. Kadø íe wani Ngà nø Gvray yv́ng kèní būng dakngà pè ǿngàe. Ngà nø:tní dø̀ng dakngà we mø̀í, A:ngí dèzv́r dakngà we íe. 43 Namaqí kadø í rvt Ngà shø̀nkà svng mèràlnøng ma? Ngà kà svng namaq tá mèwáshìnø̀ng rvt íe. 44 Namaq nø nvpè cáng pèò èínøng nø, nvpè mvlánøt svng namaq cv́n mèyǿnønge. Ang nø nvmlat nv̀mpv́ng kèní vsvng shvt pè í nø, ang taq nø dìnglòng màvl rvt, dìnglòng A:ngí wá mvlú:nò. Ang nø vyá í rvt vyá kà wa shø̀n nø vyá rìò angpè íe. 45 Iwe Ngàí kàdøng shø̀nò rvt, Ngà svng namaq mèkv́mnøng. 46 Namaq kagǿí Ngà taq mvrà v̄le wa dètānshàni ma? Ngàí kàdøng shø̀nò we í nìnø namaqí kadø í rvtnø Ngà svng mèkv́mshà ma? 47 Gvrayò vsvng nø, Gvray kà tae. Namaq nø Gvrayò mèínøng rvtnø Ang kà mètánøng,” a:lòe. 48 Yuda vsvng rìí vtá:nò nø Ang svng, “Nà nø Samari vsvng èí nø, cáng èzv́ngshìe, wàì kà nø shǿn vdu we mø̀í ma?” a:lòe. 49 Yesuí vtá:nò nø, “Ngà nø cáng mvzv́ngshø̀ng; Ngà Vpè kaq mv̀ng vpǿ shvringòe. Namaqí lè Ngà svng mènàpǿshà. 50 Ngà nø Ngà vdè dvgùng lángshø̀ng we mø̀í; Ngà dvpvt dvgùng láāshú tiq gǿ vl nø, Ang nø kàngéshú íe. 51 Ngàí kàdøng v̄la:tnìni, Ngà kà cv́n døng we kagǿ í gø shìlong nø dvciq lvpat mvyv̀ng lú:ngò,” a:lòe. 52 Yakà kèní Yuda vsvng rìí Ang svng, “Nà cáng èzv́ngshì we nø akvtni shá bǿshà. Abraham gø, kàdvtutshúrì gø shì yà:ngì. Nàí nø, ‘Ngà kà cv́n døng we kagǿ í gø, shilòng nø dvciq lvpat mvtin lú:ngò,’ èwae. 53 Nà nø shi yà:ngì we nøngmaq vkop Abraham mvdv̀m té èring ma? Ang gø shi yà:ngì; kàdvtutshúrì gø shì yà:ngì. Nà nø Nà pà ǿnge èlv́nshíe ma?” a:lòe. 54 Yesuí vtà:- ngò nø, “Ngà nø Ngà vdè dvgùng shvringshø̀ng nøngnø, Ngà dvgùng nø pàgø mø̀í. Iwe namaqí, ‘Ang nø nøngmaq Gvray èíaìe,’ èwanøng pè mv̀ng nø Ngà ngø̀r dvgùng shèringang pè Ngà Vpè ni íe. 55 Namaqí nø Ang svng mèshánø̀ng; Ngàí nø Ang svng shángòe. Ngàí Ang svng mvshángò ladv́ng wvng nøng nø, Ngà gø namaq døni vyá pè ǿngà we íe. Inìgø Ang svng Ngàí shá jǿng shángò nø, Ang kà svng gø vpǿngò we íe. 56 Namaq nvkop Abraham nø, Ngà angni svng yv́ng lúnlv́m dvpvt mvyǿ yà:ngì. A:ngí yv́ng lún bǿà nø nøt shø̀m yà:ngì,” a:lòe. 57 Wekvt Yuda vsvng rìí Ang svng, “Nà nø pungwàcé nǿng gø shini mèhøqò we, Abraham svng Nàí èyv̀ng yà:ngà a?” a:lòe. 58 Yesuí angmaq svng, “Ngàí kàdøng v̄la:tnìni, Abraham shini màvl dvgvp kèní ni Ngà nø àv́lshaq ǿngàe,” a:lòe. 59 Wekvt angmaqí Ang svng wvplv́m lóng tǿòe. Wedø ínìgø Yesu nø máshi nø Noqngø̀m tø̀ngnø kèní léshìá:mì.
1 Ang di chàng, gv̀l daqà ni kèní nemàn í we tiq pè A:ngí yv̀ng bǿà. 2 Wekvt Ang coqcv́nrìí Ang svng rø:tnò nø, “Rabbiá, vsvng yapè gà:lò ni kèní ne vmàn long nø, kagǿ mvrà rvt í ma? Ang mvrà rvt í ma? Mø̀íni angpè angmèní mvrà rvt í ma?” a:- lòe. 3 Yesuí vtà:ngò nø, “Yapè mvrà rvt gø mø̀í, angpè angmení mvrà rvt gø mø̀í, ang taq kèní Gvray bv̀nlì dvtanlv́m dvpvt mv̀ng íe. 4 Angni shini gá dvgvp Ngà svng dèzv́r dakngà pè bv̀nlì rì nøngmaqí wá mvn ràe. Kagǿ gø bv̀nlì wá mvlúnshì we yaqdø̀ng tuq ràe. 5 Rvgaq tø̀mø Ngà vl dv́ngte taq, Ngà nø rvgaq gálong ǿngàe,” a:lòe. 6 Yadø shø̀:nò dá:ngí, vba tø̀m svng Ang tø̄l tø̄lshi sórí tø̄:lí vbā dvshaqò nø, welù:ngí wepè vne taq ma:tnaò dá:ngí, 7 ang svng, “Silom tìdøm taq èzv́lshìvm,” a:lòe. (Silom wakà lvjøm nø, Dvzvrshaq, wakà íe.) Ang wedø dìá:mì nø, zv́lshì bǿì kvt, vne yv̄ngshì bǿì nø loá:mì. 8 Wekvt mvrìng cèrì nvng vzv̀ng ang nø røtnvm pè í we vyv́ngshaq rìí nø, “Yapè nø rúng dv̀ng wa nø røtnvm yv̀ng pè mø̀í ma?” wae. 9 Tiqmaq nø, “Wepè íe,” wae; dvgá tiqmaq nø, “‘Mø̀í, ang dø vshv́m we tiq pè lè íe,” wae. Ang nø, “Ngà ni ǿngàe,” wa nø shǿn mvnshìe. 10 Wervtnø angmaqí ang svng, “Ini, nà vne nø kadøwa dègv́rà bǿì ma?” wa rø:tnòe. 11 A:ngí vtá:nò nø, “Yesu a:lò pèí vba dvshaqò nø, ngà vne taq èmatnang dá:ngí, ngà svng, 'Silom tìdøm taq èzv́lshìvm,’ èv̄le. Wervtnø ngà døngv́mà nø zv́lshø̀ng chàng yv̄ngshø̀ng lóngà,” a:lòe. 12 Wekvtnø angmaqí ang svng, “Ang kayv́ng vl má?” wa rø:tnòe. A:ngí, “Ngàí mvshángò,” a:lòe. 13 Wekvt angmaqí vzv̀ng nemàn í yà:ngì pè nø, Farisi mvdò yv́ng svng shø̄l bǿà. 14 Yesuí vba dvshaqò weí ang vne dvgv́raò nï nø, Narni í dá:rì. 15 Wervt Farisirìí gø, vrá tiq kvt ang kadøwa vne yv́ngshìa: pmì lòng rø:tnòe. A:ngí angmaq svng, “Tikwèí ngà vne taq A:ngí èmatnang bǿngà nø, zv́lshø̀ng bǿngà kvt ngà vneí yv̀ng lóngà,” a:lòe. 16 Wervtnø Farisiri tiqmaq nø, “Vsvng yapè nø Narni dvrá mvcv̀n rvtnø, Gvray yv́ng kèní nø mø̀í,” wae. Iwe dvgá tiqmaq nø, “Yadø í we vtiqlv́m bv̀nlì nø mvrà vl vsà:ngí kadøwa wá ngutshì ma?” wae. Wekvt angmaq dvhø̀ vzø̀ng lú:ngì. 17 Angmaqí vrá tiq kvt nemàn pè svng, “Nà èwa we nø Yesuí vne dègv́rang bǿngà èwae. I ni nàí Ang nø kapà íe, dèda:mò ma?” a:lòe. Wepèí rá, “Ang nø kàdvtutshú íe,” a:lòe. 18 Yuda vsvng rì nø wepè svng nemàn í we yv̄ngshì lú:ngì lòng svng mvkv́m rvtnø, wepè angpè angmè ní svng goò dá:ngí, 19 “Gv̀l daqà ni kèní ni nemàn í we yapè nø nàní angcè ni íe ma? Ini kadøwa ang vneí akvt yv̀ng lú:ngà?” wa rø:tnòe. 20 Angpè angmè níí vtà:ngò nø, “Yapè nø ngàní cè ni íe, ang nø gv̀l daqà ni kèní nèmàn í we gø sháshòe. 21 Inìgø ang kadø wa akvt ne yv̄ngshì lú:ngì we nø ngàníí mvsháshò. Kagǿí ang vne dvgv́ra bø̀a we gø mvsháshò. Ang svng èrøtnø̀ng lè, ang nø vbat téá:mì we í rvt ang vdè shǿnshì longe,” a:lòe. 22 Angpè angmè ní yadø shø̀n we nø, “Yuda vsvng rì kaq svre rvt íe. Kadø íe wani Yesu nø Kristu í we svng vchà:ngò we kagǿ ínìgø júrøt chø̀m kèní lùnglv́m rvt, Yuda vsvng rì vrashishaq íe. 23 Wervtnø angpè angmè níí, “Ang nø vbat téá:mì we í rvt ang svng èrøtnø̀ng lè,” a:lò we íe. 24 Wedø í rvtnø, nemàn í yà:ngì pè svng angmaqí vrá tiq kvt goa:tnà nø, ang svng, “Gvray dvgùng mv̀ng shèri:ngò; vsv̀ng yapè nø mvrà vl vsvng í we nøngmaqí sháìe,” a:lòe. 25 A:ngí vtá:nò nø, “Ang nø mvrà vl vsvng í mø̀í we nø ngàí mvshángò. Inìgø ngà vne vmàn yv̀ngà yv́ngkèní akvt ngà vneí yv̀ng lóngà we yalòng mv̀ng ngàí shángòe,” a:lòe. 26 Wekvt angmaqí ang svng, “A:ngí kadødø èwáa nø nà nē yvngshi dèzv́ra:pmì ma?” a:lòe. 27 A:ngí vtá:nò nø, “Akvtni namaq svng dvtá bǿshà nìgø namaqí mètánø̀ng, pàwá vrá tiq kvt èrøtshàe? Namaq gø Ang coqcv́n wáshì mèyǿnøng má?” a:lòe. 28 Wekvt angmaq dvrøq taqsórí, “Nà mv̀ng Ang coqcv́n èíe. Nøngmaq nø Moshi coqcv́nrì íshàe. 29 Gvray nø Moshi svng kà shø̀n yà:ngì we nøngmaqí sháìe. Iwe yapè nø, Ang kayv́ng kèní í we gø mvsháì,” a:lòe. 30 Wepèí angmaq svng vtá:nò we nø, “A:ngí ngà vne dègv́rang bǿngànø̀ng gø, Ang kayv́ng kèní í we namaqí mèshánøng rvt yalòng mv̀ng vtiqrà íe dvwvng lá! 31 Mvrà vl vsvng kaq nø Gvrayí mvtáa we sháìe. Gvray kaq vpǿ svre nø Ang nøt cv̀n gǿ svng mv̀ng A:ngí táāòe. 32 Gv̀l daqò ni kèní ne vmàn we tiq gǿ svng ne dvgv́raò we nø muqlàng rvgaq pá:nò ni kèní, kagǿí gø kadvgvp gø mvtá dá:rì. 33 Vsvng yapè nø Gvray yv́ng kèní mø̀í nìnø, A:ngí kapà gø wá mvlú:nò,” a:lòe. 34 Wekvt angmaqí ang svng, “Nà nø mvrà vdòngø ègv̀l daqì we tiq dvra:tní nøngmaq svng shèngøtshàe ma?” a:lò nø ang svng lùng bǿà. 35 Wepè svng angmaqí lùng bǿà we svng Yesuí tá bǿà nø ang svng lá lún bǿà kvt A:ngí, “Vsvng Angcè pè svng nà èkv́me ma?” a:lòe. 36 A:ngí vtá:nò nø, “Vkàngpèá, Ang svng ngà kv́mlv́m dvpvt Ang kagǿ í we ngà svng dètángà,” a:lòe. 37 Yesuí ang svng, “Nàí Ang svng vyv́ngshaq èíe; nà nvng kà dvmv̀n pè nø wepè ni íe,” a:lòe. 38 Wekvt A:ngí, Vkàngpèá, ngà kv́me,” wa nø Ang svng noqòe. 39 Yesuí, “Rvgaq tø̀m svng Ngà dø̀ng dakngà we nø vne mvyv̄ngshì rì yv̄ngshìlv́m nvng vne yv́ngshì rì nø ne vmànlv́m dvpvt, kàngélv́m rvt dø̀ng dakngà,” a:lòe. 40 Farisi ri kèní Ang yv́ng zv̀n rìí yadv́ng pv̀n tá bǿà kvt Ang svng, “Ini, nøngmaq gø nemàn íshà ma?” a:lòe. 41 Yesuí angmaq svng, “Namaq nemàn èínøng pà í nìnø, namaq nø mvrà mèv̀lnøngni we íe. Inìgø akvt namaq nø, ‘Nøngmaq vne yvngshàìe,’ wa èshø̀nnøng rvtnø, namaq mvrà nø v́ldv̀ng wae," a:lòe.
1 Ngàí kàdøng namaq svng v̄la: tnìni, vyv̀ng wáng vdòng svng, bv́ngkà chit kèní mvgòng nø, shø̀ngshang tiqchit kèní rvlv̀ng ra we wegǿ nø vkǿ nvng tølv́mshú íe. 2 Bv́ngkà chit kèní gòng ra gǿ mv̀ng nø vyv̀ngrì svng roqò gǿ íe. 3 Ang svng nø bv́ngkà vsóngshú gǿí bv́ngkà tánāòe; vyv̀ngrì gø ang kà tae; A:ngí nø ang vyv̀ngrì bø̀ng tǿò sórí goò nø vtv́ng lap svng shø:lòe. 4 Angò rì shvngbe léshi dvzá:rò dá:ngí, angmaq vzv̀ngzv̀ng ang di nø, vyv̀ngrìí ang kà zaò rvtnø, ang mèpvng cà:nòe. 5 Iwe màmv́r gǿ mèpvng nø angmaqí mvcà: nò, dvshàshà lè ang yv́ng kèní vtnvme. Pàwá wani angmaqí màmv́r rì kà svng màmvshá:lò,” a:lòe. 6 Kàshvbóng yalòng Yesuí angmaq svng shø̀:nò we ínìgø, A:ngí shø̀:nò kàrì nø kapà svng shø̀:nò we angmaqí mvcí:ngò. 7 Yesuí angmaq svng vrá tiq kvt yadø a:lòe. “Ngàí kàdøng v̄la:tnìni, Ngà nø vyv̀ng bv́ngkà lòng ǿngàe. 8 Ngà vzv̀ngzv̀ng di ráì dv́ngte shvngbe nø vkǿ nvng tø̄lvmrì íe. Iwe vyv̀ngrìí nø angmaq kà mvtáāò. 9 Ngà nø Bv́ngkà chit lòng ǿngàe. Ngà taqkèní gòng ra vsvng kagǿ ínìgø gø̀nshaq shvlut we lún nø, góng mvnshì lé mvnshì sórí shønriqtø̀m lávm lún lú:ngòe. 10 Vkǿ nø, kǿ gø kø nø, shvt gø shvt nø catnv́mlv́m dvpvt wa mø̀í nìnø mvdi ra. Ngà mv̀ng nø, angmaq kaq gø̀nshaq lún dvzv́rlv́m dvpvt nvng dvnglún lún dvzv́rlv́m dvpvt dø̀ng dakngà. 11 Ngà nø shvla we vyv̀ng roqshú pè ǿngàe. Shvla we vyv̀ng roqshú pè nø, vyv̀ngrì dvpvt Ang gø̀n shaq zíshìe. 12 Lv̀ngzv̄ng gǿ nø, vyv̀ng roqshú mvdø̀ng mø̀í. Vyv̀ng rì gø angò mø̀íaò rvtnø, vyit di ra we yv̀ng bǿò kvt, vyv̀ngrì chut gu:rò nø vtnvme. Wekvt vyitrìí nø vyv̀ngrì svng mvgaqkéò nø bv̀ng dvka:ngòe. 13 Wepè nø lv̀ngzv̄ng í rvtnø, vyv̀ngrì svng màmvkok nø vtshiv̄me. 14 Ngà nø shvla we vyv̀ng roqshú pè ǿngàe. Vpèí Ngà svng èsháng nø, Ngàí gø Vpè svng shángò døni, 15 Ngà vyv̀ngrì svng Ngàí shángòe. Ngà vyv̀ngrìí gø Ngà svng èshánge. Vrá Ngà gø̀nshaq nø vyv̀ngrì dvpvt dvbǿm rángòe. 16 Ya wáng taqkèní mø̀í we vyv̀ngrì dvgá dø gø Ngà vdánge. Werì svng gø Ngàí shøl ràe. Wekvt angmaq nø Ngà kà ta long weí, angmaq nø tiqré wa ívm nø, vyv̀ng roqshú gø tiq gǿ wa ívme. 17 Ngà gø̀nshaq tv́n tiq kvt vtvngshilv́m dvpvt, Ngàí Ngà gø̀nshaq dvbǿmòe. Wervtnø Vpèí Ngà svng èshòng we íe. 18 Ngà vdèí màtvlengò kèní Ngà gønshaq shvt lú:nò vsvng màvl. Tvlelv́m vmíng vkv́ng gø Ngà vdange. Vtvngshilv́m vmíng vkv́ng gø Ngà vdánge. Vmíng yalòng nø Ngà Vpè yv́ng kèní lúnò we íe,” a:lòe. 19 Kà yarì rvtnø vrá tiq kvt Yuda vsvng rì vgv̀ng lú:ngì. 20 Angmaq mvme tiqmaq nø, Ang nø cáng zv́ngshì nø dvrūe; pàwá Ang kà ètánøng ma?” wae. 21 Dvgá maqí nø, yarì kà nø cáng dvchøp vsvng kà nø mø̀í. Vcá:ngí nø nemàn rì vne dvgv́ra mvngu:tnò we mø̀í ma?” wae. 22 Wenila nø Yerusalemø Chømgun Bóy wàò nila í nø rv̀ngtúng gø íe. 23 Yesu nø Noqngø̀m tø̀ngnø Solomon Kùngjv̀m taq di ke, 24 Yuda vsvng rì nø Ang gùrgùr dvtǿngshì ráì nø Ang svng, “Nàí nøngmaq svng kadvgvp høq vtiq dèzv́rsha ni ma? Nà nø Kristu ni èí nìnø, dèdè dètáshà,” a:lòe. 25 Yesuí angmaq svng vtá:nò nø, “Ngàí dvtá vdv́ngshaq í we, namaq lemèkv́mnøng ni! Ngà Vpè bø̀ng kèní wv̀ngò we bv̀nlì ya rì nø Ngà dvpvt shvkse íe. 26 Iwe namaq nø, Ngà vyv̀ngrì mèínøng rvtnø, mèkv́m dv́rshà. 27 Ngà vyv̀ngrìí nø Ngà kà tá sháòe. Ngàí gø angmaq svng shángò nø, angmaq nø Ngà mèpvng cv̀ne. 28 Angmaq svng Ngàí dvciq lvpat gø̀nshaq zǿngòe. Angmaq nø kadvgvp gø màmv̄ngv̄m; Ngà wur kèní kagǿí gø angmaq svng tøl mvlú:nò. 29 Ngà svng angmaq èzǿng dakngà pè Vpè nø, shvngbe mvdv̀m te pè í nø, Vpè Ang wur taq kèní kagøí gø angmaq svng tøl mvdá: ngò. 30 Ngà nvng Vpè nø tiq gǿ wa íshàe,” a:lòe. 31 Yuda vsvng rìí vrá tiq kvt Ang svng wvplv́m lóng tǿòe. 32 Yesuí angmaq svng, “Vpè kèní bv̀nlì shvlá mvme Ngàí namaq svng dvtana bǿshà. Bv̀nlì yarì taqkèní kalòng rvtnø Ngà svng lú:ngí wvplv́m èdv́nshà ma?” a:lòe. 33 Yuda vsvng rìí vtá:- nò nø, “Bv̀nlì shvlá rvtnø nà svng wvplv́m dá:nì we nø mø̀í; Nà nø shǿn màdu kà èshø̀n nø, Nà nø vsvng ni èí ke, vdè nø Gvray í ra dø èshǿnshì weí Gvray kaq shvyǿm kà èshø̀n rvt íe,” a:lòe. 34 Yesuí angmaq svng vtá:nò nø, ‘Namaq nø dvmø̀rì èínønge, wvng nø vl bǿngà,’ wa nø namaq Dvrá lega taq ni màru ma? 35 Shànshér Kàru nø dìng we nøngmaqí sháìe. Gvray Mòngkà vzíshaq rì svng A:ngí, ‘Dvmø̀rì,’ v̄l yà:- ngà nìnø; 36 Vpèí shànshér dø shègak nø rvgaq tø̀m svng dèzv́r dakngà pè Ngàí, Ngà nø Gvray Angcèpè ǿngae, wvng shǿnshø̀ng rvt namaqí nø, ‘Nà nø Gvray kaq shvyǿm kà èshø̀ne,’ wa pàwá èzershàe? 37 Ngà Vpè bv̀nlì mvwv̀ngò kvtkèní nø, Ngà svng mèkv́mnøngni. 38 Ngàí Ang bv̀nlì wv̀ngò we ni í kvtkèní nø, Ngà svng mèkv́mnøng nìgø vtiqlv́m bv̀nlì yarì svng dvbvng èkv́mnøng lè! Weyv́ng kèní Vpè nø Ngà vdòng taq vl nø, Ngà gø Vpè vdòng taq vl we svng namaqí èshá bǿnø̀ng nø ècíng lóngnønge,” a:lòe. 39 Angmaqí vrá Ang svng tvplv́m wàò we Ang nø angmaq yv́ng kèní léshìá:mì. 40 Ang nø Yordan tì kupa, Yohaní nvmlat tìløp løpma yà:ngà yv́ng svng tuqá:mì nø weyv́ngø v̀lá:mì. 41 Wekvt Ang yv́ng vsvng mvme dì ráì nø, “Yohaní nø jø̀ngjǿng pà shálv́m mvshv́lpvrá gø mvwàò we; yapè dang à:ngí shø̀n yà:ngà dv́ngte shvngbe nø dìng dá:rì,” wae. 42 Weyv́ngø vsvng mvme Ang svng kv́m bǿì.
1 Wekvt Mari nvng angnvm mè Marta vl we Betani rvwá taq Lazaru tǿò we tiq pè zae. 2 Mari nø Vkàngpè svng ngórdorcìí vdø:rò nø, Ang hí svng Ang vgonií shøqaò mè íe. Za pè Lazaru nø angnvmpè íe. 3 Wervtnø angnvm mèníí Yesu yv́ng svng vsvng dvzá:rò nø, “Vkàngpèá, èyà:- ngò, Nà èshóngshi pè Lazaru nø zae,” a:lòe. 4 Iwe Yesuí tá bǿà kvt, “Za we yalòng nø shìlv́m høq nø mø̀í; Gvray Angcè pè ngø̀r dvgùng nvng Gvray ngø̀r dvgung nø welòng taqkèní shvring lúnlv́m dvpvt lè íe,” a:lòe. 5 Yesu nø Marta nvng angnvm mè ó Lazaru kaq shóngshìe; 6 Lazaru za we tá bǿà nìgø Yesu nø wedøni weyv́ngø vní ni shini v̄le. 7 Wemèpvng A:ngí coqcv́nrì svng, “Yuda móng svng vrá tiq kvt dìì,” a:- lòe. 8 Coqcv́nrìí Ang svng, “Rabbiá, Yuda vsvng rìí Nà svng cáyaq ni lú:ngì wvplv́m èwàa:pmì we, Nà nø vrá tiq kvt weyv́ng svng dìlv́m èwa ma?” a:lòe. 9 Yesuí vtá:nò nø, Tiqni taq tiqcé vní nari vl we mø̀í ma? Vsvng nø vyá:ngí tvrà di nìnø, rvgaq gálong taqkèní yvngshi rvt, ang màtøpshìvm. 10 Inìgø yaqdø̀:ngí tvrà di gǿ nø, ang taq gálong màvl rvtnø ang vtøpmvme,” a:lòe. 11 Yadv́ng pv̀n shø̀:nò dá:ngí, angmaq svng vrá A:ngí, “Nøngmaq shóngshàì pè Lazaru yøpme. Ngàí ang svng dvshatlv́m dvpvt dønge,” a:lòe. 12 Wervt coqcv́nrìí Ang svng “Vkàngpèá, ang nø yøp we í nìnø tv́n angwa vshat longe,” a:lòe. 13 Yesuí nø Lazaru shì we svng shø̀:nò we, angmaqí nø angwà yøp dø yøp we svng wae, lá:nòe. 14 Wervtnø Yesuí angmaq svng dèdè chaqdvp dvtáò nø, “Lazaru nø shìa:pmì. 15 Ngà weyv́ngø màvlvp lòng nø namaq kv́mnøt té lúnlv́m dvpvt í rvtnø Ngà dvbònge. Akvt ang yv́ng svng diì,” a:lòe. 16 Wekvt Didimu tǿò pè Tomaí coqcv́nrì svng, “Ang nvng tiqdø shí nvngsvng nøngmaq gø diì,” a:lòe. 17 Yesu tuq á:mì kvt, lóngdùng dvgv̀m vdòngø Lazaru kǿ:mò we nø vbì ni ía:pmì we svng A:ngí shá bǿà. 18 Betani rvwá nø Yerusalem kèní tvné vní ming dv́ngte wa vrúme. 19 Yuda vsvng mvme nø angnvm pè rvtnø Marta nvng Mari svng nøt shvlø̀mlv́m dvpvt di dá:rì. 20 Yesu dì ráì we svng Martáí tá bǿà kvt, ang búngá:mì nø Yesu svng vtoá:mà. Mari nø chø̀mø rúngdv̀ng wae. 21 Wekvt Martáí Yesu svng, “Vkàngpèá, Nà ya yv́ng èvlvp pa í nìnø, vnvmpè nø mvshì ni we íe. 22 Iwe Gvray kaq Nàí kapà èrø:tnò nìnø, wepà Gvrayí Nà svng akvt ínìgø èzi daq we ngàí shángòe,” a:lòe. 23 Yesuí ang svng, “Nvnvmpè nø vrá zun longe,” a:lòe. 24 Martáí Ang svng, “Tisi lv̀ngdø̀m zunlong ni taq ang vrá zun long we nø ngàí shángòe,” a:lòe. 25 Yesuí ang svng, “Zunlòng nvng gø̀nshaq nø Ngà ǿngàe. Ngà kaq kv́m gǿ ang nø, shì nìgø wedøni zun longe. 26 Vrá, cúnshi nø Ngà kaq kv́m we kagǿ gø, kadvgvp gø mvshivm. Yalòng svng èkv́m ma?” a:- lòe. 27 Martaí Ang svng, “Íe, Vkàngpèá, Nà nø rvgaq tø̀m svng èdi daqì pè, Gvray Angcè Kristu wepè ni èí we svng ngà kv́m bǿngà,” a:lòe. 28 Yadø shø̀n dá:ngí, ang vtvngá:mì nø, angnvm mè Mari svng mvyø̀:ní gōò nø, “Svrapè ya yv́ng vl nø, nà svng ègōe,” a:lòe. 29 Marií yakà tá bǿà kvt, ang tiqshaqí búng nø, Ang yv́ng svng dìá:mì. 30 Yesu nø rvwá vdòng svng shini mvgòng dø, Martáí Ang svng vtoa:tnà yv́ngø v́ldv̀ng wae. 31 Wedvgvp chø̀mø vl nø ang svng nøt shvlø̀:mò we Yuda vsvng rìí, Mari nø tiqdvshaqí búng nø dìá:mì we svng yv̀ng bǿà kvt, ang nø dvgv̀m yv́ngø ngǿlv́m dìá:mì lá:nò nø, ang mèpvng cà:nòe. 32 Yesu vl yv́ng Mari tuq ráì nø, Ang svng yv̀ng bǿà kvt, Ang hí yv́ngø kǿng kupshi sórí Ang svng, “Vkàng pèá, Nà ya yv́ngø èvlvp pa í nìnø, vnvmpè nø mvshìni we íe,” a:- lòe. 33 Ang ngø we nvng ang ó dì ráì we Yuda vsvng rì gø ngø we svng Yesuí yv̀ng bǿà kvt, Ang nøt vdòngø mvgø̀r nø nøt dvsha sórí, 34 “Ang svng namaqí kayv́ngø èhùlvpshà ma?” a:lòe. Angmaqí, “Vkàngpèá, có, yv̀ngá:mì,” a:lòe. 35 Wekvt Yesu gø ngø̄e. 36 Wervtnø Yuda vsvng rì nø, “Eyv̀ngnøng, A:ngí ang svng kadvngshìni shòng dá:ra!” wae. 37 Iwe angmaq tiqmaqí nø, “Nemàn pè svng vne dvgv́raò we yapèí nø, Lazaru svng gø lamvshì dø wá lú:nò we mø̀í ma?” wae. 38 Vrá Yesu nø nøt vdòngø mvgø̀r sórí dvgv̀m svng tuq ráì. Dvgv̀m nø lóngdùng í nø, lóngkø̀:mí wa:- mòe. 39 Yesuí, “Lóngkø̀m gø̀m èlùnøng,” a:lòe. Shia:pmì pè angnvm mè Martáí nø Ang svng, “Vkàngpèá, ang shìa:pmì we vbì ni í ráì; akvt nø davngàvpni,” a:lòe. 40 Yesuí ang svng, “Nà èkv́m nìnø Gvray ngø̀r dvgùng nàí èyv̀ng lú:ngòe, wvng nø nà svng màvl bǿngà ma?” a:lòe. 41 Wekvt angmaqí lóng gø̀m lù bǿà. Yesu nø Ang vne muqlàng kaq dvjaq sórí, “Vpèá, Nàí Ngà kà ètángang bǿngà rvt Nà svng oqà. 42 Kadvgvp gø Nàí Ngà kà ètángangà we svng Ngà nø shángshø̀ng we, Nàí Ngà dèzv́r dakngà we svng gùrgùr rip we loksokrì angmaq kv́mlv́m rvtnø Ngà yadø shø̀n we íe,” wae. 43 A:ngí kà yarì shø̀n bǿà dá:ngí, serwa vkiq nø, “Lazaruá, èléshì long,” a:lòe. 44 Wekvt shìa:pmì pè Lazaru nø, nàngmøq laqtu:ní hí wur vdøpshaq, ang mv́rdaq gø paqzi:tní vzvpshaq léshi lú:ngì. Yesuí angmaq svng, “Epǿnanøng nø ang svng shèlàngnø̀ng,” a:lòe. 45 Wekvt, Mari yv́ng svng di ráì we Yuda vsvng rì mvme nø Yesuí wa bǿà lòng yà:ngò nø Yesu svng kv́m bǿi. 46 Inìgø angmaq taqkèní tiqmaq nø Farisirì yv́ng dìá:mì nø, Yesuí wà bǿà rì angmaq svng dvtáòe. 47 Wekvt shvrúngshú vjìrì nvng Farisirìí Shaqré lìpòngmè dvkø̀:mò nø yadø wae. “Kadø wàlv́m í ráì? Kadø íe wani vsvng yapèí nø shálv́m mvshv́lpvrá mvme wàòe. 48 Ang svng nøngmaqí yadøni shvlángdv̀ng wàì kvt nø, vsvng shvngbe Ang svng kv́mv̄me. Wekvt Roma vsvng rì di daq nø, “Nøngmaq Shanshér tø̀ngnø nvng dvcì gø, ètølv́m bǿìe,” wae. 49 Angmaq taqkèní wenǿng taq shvrúngshú vgo wáshì pè Kayafasí angmaq svng, “Namaqí pàgø mèshánøng. 50 Nøngmaq dvcì køp màmv́nglv́m dvpvt, bashà rì tvle vsvng tiq gǿ shì lòng nø namaq dvpvt té shvla we svng mèdaknø̀ng ma?” a:- lòe. 51 Ang yadø shø̀n lòng nø, ang nø:tní shø̀n we mø̀í; ang nø wenǿng taq shvrúngshú vgo wáshì rvtnø, Yuda vsvng rì tvle Yesu shìlv́m í we à:ngí kàdvtu:tnò we íe. 52 Iwe tiqdvcì dvpvt wa mvtaq, kayv́ng màyv́ng vshin we Gvray angcèrì svng tiqpóng dvkǿm lúnlv́m dvpvt gø Ang shí vdu we íe. 53 Wervtnø weni kèní angmaqí nø, Ang svng shvtlv́m gvcvt vjøn ma:nòe. 54 Wervtnø Yesu nø weni kèní kukaq Yuda vsvng rì dvhø̀ø neyv́ng negv̀m nø màgwanshìá:mì. Weyv́ng kèní Ang búngá:mì nø rvgaq mvgung, Efraim tǿò mvrìng yv́ngø, Ang coqcv́nrì nvng v́ldv̀ng wae. 55 Yuda vsvng rì Shvle bóy tuq yùl ráì dvgvp, vsvng mvme nø angmaq góng dvshàn dvshérshìlv́m dvpvt, Shvle bóy mvwàò vzv̀ng, vtv́r rvwá rvgaq kèní Yerusalem svng ngangá:mì. 56 Angmaqí Yesu svng láò nø, Noqngø̀m tø̀ngnø taq rip sórí tiq gǿ nø tiq gǿ vrùng nø, “Kadø dèdvmnøng ma? Ang nø yabóy svng bvttut mvdìlv́m dø í ma?” wae. 57 Shvrúngshú vjìrì nvng Farisirìí nø, Ang svng tvp lúnlv́m dvpvt, Ang kayv́ng vl we kagǿí sháò nìnø, dvtá ràe, wa nø vmíng vzíshaq íe.
1 Yesu nø, Shvle bóy mvhøqò vzv̀ng vchuqni taq A:ngí shiyv́ng kèní dvzuna:pmà pè Lazaru vl we Betani rvwá svng tuq ráì. 2 Wekvt angmaqí Ang dvpvt dørø̀m v́mpà dvgǿaò nø, Martaí dvzø:mòe. Ang nvng tiqdø v́mpà v́mlv́m námrung rì taq Lazaru gø vbáe. 3 Wekvt Marií nø, vtvng kèní vpǿ nø nardu mvdø̀ng ngódorcì tiq dvláng lùò nø, Yesu hí vdø:rò dá:- ngí, ang vgonií shøqāòe. Wekvt nø welòng ngódorcì dor weí chø̀mkøp taq zø̀ngá:mì. 4 Iwe mèpvng Ang svng nvmvmlv́m pè, Ang coqcv́n Iskariot pè Yuda nø yadø wae; 5 Ngórdorcì yalòng nø gv̀msùng vshø̀myá gø̀m taq nvmdv̀ng dvshà vsvng kaq zílv́m pàwá mvwàò ma?” wae. 6 Ang yadø shø̀n kà nø dvshà vsvng kaq à:ngí nøtnaò rvt mø̀í. Ang nø gv̀msùng yǿng rvdashú í nø weyv́ng kèní kǿ mū:no pè í rvtnø wa we íe. 7 Wervtnø Yesuí, “Mènàgámni; Ngà svng kǿmlv́m ni dvpvt à:ngí ngórcì yalòng gà:lò we íe. 8 Dvshà vsvng rì nø namaq nvng kadvgvp gø v̄le. Ngà nø namaq nvng kadvgvp gø vl we mø̀í,” a:lòe. 9 Yesu Betani yv́ng vl we svng Yuda vsvng rì loksu:kngí shá bǿà. Wekvt angmaq nø Yesu rvtnø wa mø̀í dø, A:ngí shì yv́ngkèní dvzuna:pmà pè Lazaru svng gø yv́ng lúnlv́m dvpvt di ráì. 10 Iwe shvrúngshú vjìrì nø Lazaru svng gø shvtlv́m dvpvt vrāshìe. 11 Kadø íe wani Lazaru rvtnø Yuda vsvng rì mvme nø angmaq kèní rv́lshi nø Yesu svng kv́m mvnshìe. 12 Mèpvng ni taq, bóy lúm nvng kø̀m ráì we vsvng loksokrìí, Yesu nø Yerusalem svng di ra we tá bǿà kvt, 13 zǿr dvgv̀ng rì lá:ngò sorí, Ang svng vto nvng búngá:mì nø, “Hosanna, Vkàngpè bø̀ng kèní di daqì pè, Israel Koqkv́mpè nø ìshøt ìgv̀n v̄le,” wa nø vkiqe. 14 Wekvt Yesu nø, lozè tiqgo lá lún bǿà nø zúnshìe. 15 Yalòng nø, “Zion angcè mèá, mèsèrēni; èyà:ngò nà Koqkv́mpè nø lozè tiqgo taq zúnshì nø di rae,” wa nø vrūshaq dø tiqdvchá íe. 16 Nv̀mlat dvgvp Ang coqcv́nrìí nø yadv́ng pv̀n mvrà:lò we ínìgø Yesu Ang ngø̀r dvgùng shvring daqà mèpvng, yadv́ng pv̀n nø Ang svng tvnuò nø vrū yà:ngà we nvng angmaqí Ang svng yadv́ng pv̀n wáāò we mvtú svng gø angmaqí dvdvm rǿn lú:ngà. 17 Wekvt, Lazaru svng A:ngí dvgv̀m vdòng kèní gōò nø, shìyv́ng kèní ang svng dvzun lú:ngà dvgvp, Ang nvng tiqdø v̀la:pmì we vsvng loksokrìí nø yalòng dvgá vsvng rì kaq dvsha:ngòe. 18 Vrá, vsvng loksokrìí Ang svng vtoá:mà we nø, A:ngí shálv́m mvshv́lpvrá yalòng wàa:pmà we svng táò rvt íe. 19 Wervt Farisirì nø tasv̀ng vrùng nø, “Nøngmaqí kadø gø wá mvdv́ng bǿshà. Eyv̀ngnøng. móng dø̀ngtá:ngí Ang mèpvng cv̀n bǿà,” wae. 20 Bóy yv́ng noqngǿm nvng ngang lú:ngì rì taq, Heleni vsvng gø tiqmaq vbáe. 21 Wemvdò nø Galili móng Betsayda pè Filip yv́ng di ráì nø, Vshaq pèá, Yesu svng nøngmaq yv́ng mvyǿìe,” a:lòe. 22 Wervt Filipmí Anderu svng dvtáò nø, Anderu nvng Filip dì ráì nø Yesu svng dvtáòe. 23 Wekvt Yesuí vtá:nò nø, “Vsvng Angcè pè ngø̀r dvgùng shvringlv́m rvtø̀ tuq rái. 24 Ngàí kàdøng v̄la: tnìni, vzongshí tiqchv̀ng nø vba rv́m svng vløpmv̄m dá:ngí mvshì nìnø, wechv̀ng wa v́ldv̀ng wae. Inìgø shìv̄m nìnø, angshí mvme zí longe. 25 Vdè gø̀nshaq svng mvpáshì gǿ nø, ang gø̀nshaq vmvngv̄me. Rvgaq yalòng taq vdè gø̀nshaq svng màmvpáshì gǿí nø, dvciq lvpat gø̀nshaq shøpshì lú:nòe. 26 Ngà svng dvzøm mvyǿ gǿ nø Ngà mèpvng laq cv̀n ra. Ngà kayv́ng v̄lnøng nø, Ngà svng dèzøm gǿ gø̄ weyv́ng v́l lúnlv́m íe. Ngà svng dèzøm gǿ svng nø, Vpèí gø vpǿ shvringlv́m íe. 27 “Akvt Ngà nvrø̀m bùme; í we Ngà kadø shø̀nlvm? Vpèá, rvtø̀ yalòng kèní Ngà svng shèlut dakngà, wvng nø shø̀nlv́m í ma? Iwe rvtø̀ yalòng rvtnø ni Ngà nø dø̀ng dakngà we íe. 28 Vpèá, Nà bø̀ng ngø̀r dvgùng shèring daqò,” wae. Wekvt muqlàng kèní kà tiq lòng shø̀n daqì nø, “Ngàí ngø̀r dvgùng shvringshaq íe, tv́n gø shvringlv́m íe,” wae. 29 Weyv́ng rip nø welòng tá bǿà we vsvng loksokrì nø, “Muq gøme,” wae. Dvgá maq nø, “Muqlàng dvzv́r tiq gǿ Ang svng kà tv́ngshì daqi,” wae. 30 Yesuí, “Kà yalòng shø̀n daqì we nø Ngà dvpvt mø̀í, namaq dvpvt íe. 31 Rvgaq yalòng svng kàra: tnò we nø akvt kèní íá:mì. Rvgaq yalòng øpshú dùpè svng gø akvt kèní lùnglv́m íá:mì. 32 Inìgø Ngà svng rvgaq kèní èhàng bøng kvt nø vsvng shvngbe nø Ngà yv́ng svng Ngàí cøplv́m íe,” a:lòe. 33 A:ngí yadø shø̀:nò kà nø, Ang kadødø shìlv́m í we svng tvnūò nø shø̀:nò we íe. 34 Wekvt vsvng loksokrìí Ang svng, “Kristu nø dvciq lvpat v́ldv̀ng wae,” wa nø, Dvrá lega taqkèní nøngmaqí vtáshaq íe. Iwe Nà nø, ‘Vsvng Angcè pè svng nø háng ràe,’ nø kadø èwa we íe? Vsvng Angcè wepè nø kagǿ íe le?” a:lòe. 35 Yesuí angmaq svng, “Gálòng nø namaq nvng tiqlvngcè wa v̄le. Dølù:ngi namaq svng mèzíkevtnøng dvgvp, gálong shini èlúnnøng ke tvrà èdìnøng. Dø vdòngø di gǿ nø ang kakaq svng di we mvsháshì. 36 Namaq nø gálong angcèrì í lúnlv́m dvpvt gálong shini èlúnnøng dvgvp gálong svng èkv́mnøng,” a:lòe. Kà yarì shø̀:nò dá:ngí, Yesu nø angmaq yv́ng kèní máshìá:mì. 37 Yesuí angmaq mv́rdv̀ngø shálv́m mvshv́lpvrá wedv́ngte wà bǿà nìgø angmaq nø Ang svng mvkv́m. 38 Yalòng nø kàdvtutshú Esayaí, “Vkàng pèá, nøngmaqí dvshā:ngì kà svng kagǿ kv́m bǿì ma? Vkàngpè Ang jòr we wurtùng gø kagǿ svng dvtanshaq íe ma?” wa nø shø̀n yà:- ngà kà dvhø̀mlv́m dvpvt íe. 39 Yalòng rvtnø angmaq mvkv́m we íe. Esayaí, 40 “Gvrayí, angmaqí mvyv̀nglv́m nezøq dvzá:rò nø, angmaqí mvcínglv́m angmaq nøt svng zaq dvzá: ròe. Mø̀íni angmaq neí yà:ngò nø angmaq nøt taq cíng lú:ngò nø vwv́ngshì ra kvt nø Ngàí angmaq svng dvbāna vdu longe," wae. 41 Esayaí nø Vkàngpè Ang ngø̀r dvgùng yv̀ng yà:ngà rvt nø, Ang dang yadv́ng pv̀n shø̀n yà:ngà we íe. 42 Dù rì taqkèní gø Ang svng kv́m we mvme v̄l we, Farisirìí angmaq svng júrøt chø̀m kèní lùng ra we svng svre rvt màchángshi. 43 Kadø íe wani angmaq nø, Gvrayí shvring rā lòng mvdv̀m, vsà:ngí shvring rā lòng svng tété shóngshie. 44 Wervt Yesu vkiq nø yadø wae, “Ngà kaq kv́m gǿ nø, Ngà kaq wa kv́m we mø̀í, Ngà svng dèzv́r dakngà pè svng kv́m we íe. 45 Ngà svng èyv̀ng gǿí gø Ngà svng dèzv́r dakngà pè svng yà:ngò we íe. 46 Ngà kaq kv́m we kagǿ ínìgø dø vdòngø v́ldv̀ng mvwàlv́m dvpvt, Ngà nø rvgaq tø̀m svng gálong wv́ngshø̀ng nø dø̀ng dakngà. 47 Ngà kàrì táò dá:ngí cv́n mvdøng we kagǿ svng gø Ngàí kà mvngéngò. Kadø íe wani Ngà nø rvgaq svng kàngélv́m dø̀ng dakngà we mø̀í. Rvgaq svng chv́nglv́m dvpvt mv̀ng dø̀ng dakngà. 48 Ngà svng èngál nø Ngà kàrì svng vto mvwáshì rì svng kàngéshú tiq gǿ v̄le. Ngàí shø̀nò kà welù:ngíni, tìsi lv̀ngdø̀m ni taq ang svng kàngé daqòe. 49 Kadø íe wani Ngà nø Ngà nø:tní shø̀n we mø̀í; Ngà svng dèzv́r dakngà pè Vpèí Ngàí kapà shvngøtlv́m nvng kapà shø̀nlv́m gø, Ngà svng dvkv́mshaq ǿngàe. 50 Ang dvkv́mkà nø dvciq lvpat gø̀nshaq í we Ngàí shángòe. Wervtnø Vpèí Ngà svng dèkv́m dø tiqdvchá wa shø̀nò we íe.
1 Shvle bóy shini mvpà:ngò vzv̀ng, Yesu nø rvgaq yalòng kèní búng nø Angpè yv́ng svng lolv́m rvtø̀ tuq ráì we sháshìe. Rvgaq tø̀mø vl we Angò rì svng A:ngí shù:ngò nø lv̀ngdø̀m høq angmaq svng shù:ngò we A:ngí akvt dvta:nòe. 2 Wedvgvp angmaq nø dørø̀m v́mpà v́mlv́m runge. Yesu svng nvmv́mlv́m nøt nø, Simon angcè Iskariot pè Yuda vdòng taq cá:ngí vzv́ngashaq íe. 3 Wekvt Yesu nø, vl we í dv́ngte shvngbe nø Vpèí Ang wur taq vzíshaq í we nvng Ang nø Gvray yv́ngkèní dì daqì nø Gvray yv́ng svngni vtv́nglv́m í we sháshì rvtnø; 4 dørø̀m v́mpà v̄m yv́ngkèní tv̀mbúng nø, Ang belaq chutshi nø paqzit tiqdù:ngí Ang vjuq dvchvtshìe. 5 A:ngí kung tiqgø̀m taq tì zá:ngò dá:ngí Ang coqcv́nrì hí zv́laò nø Ang dvchvtshì we paqzit dù:ngí shøqāòe. 6 Simon Piter yv́ng høqa:tnà kvt wepèí, “Vkàngpèá, ngà hí svng Nàí zv́llv́m èwa ma?” a:lòe. 7 Yesuí vtà:ngò nø, “Ngàí kapà wv̀ngò we akvt nàí mèsháò. Iwe tv́n mèpvng nø èshá lú:- ngòe,” a:lòe. 8 Piterí Ang svng, “Kadø ínìgø ngà hí nø Nàí zv́l màdvzv́rshø̀ng,” a:lòe. Yesuí ang svng vtà:ngò nø, “Nà svng Ngàí hí mvzv́lnø̀ngnø, Ngà nvng nà nø pà vbamshì lv́m màvl,” a:lòe. 9 Simon Piterí Ang svng, “Vkàng pèá, í ni ngà hí wa mø̀í, ngà wur gø, vgo gø èzv́la,” a:lòe. 10 Yesuí ang svng, “Góng vzv́lshishaq gǿ nø, hí zv́lshi bø kvt nø góngkøp shèrvme. Namaq dvhø̀ kèní tiq gǿ wa mø̀íni shvngbe nø èshèrnø̀nge,” a:lòe. 11 Kadø íe wani Ang kaq nvmv́mlv́m pè svng A:ngí sháòe. Wervt A:ngí, “Namaq dvhø̀ kèní tiq gǿ wa mø̀íni shvngbe nø èshèrnø̀nge,” a:lò we íe. 12 Yesuí angmaq hí zv́l bǿà dá:- ngí ang belaq gwashì nø vrá námrung bǿì dá:ngí angmaq svng, “Ngàí namaq svng kapà wáa bǿshà lòng èshánøng ma? 13 Namaqí Ngà svng, “Svrapè gø, Vkàngpè gø, èv̄lshàe. Namaqí wedø èvlshà lòng nø vdue. Kadø íe wani Ngà nø wedøni ǿngàe. 14 Ngà nø namaq nvkàngpè nvng svra pè ǿngà pèí dv́ng, namaq hí zá:lì nìnø, namaq gø welòng døni hí vzv́lké ràe. 15 Pawálv́m wani Ngàí namaq svng wáaì dø namaq gø cv̄nshìlv́m, namaq shvbóng shvmvtshirà Ngàí wáa bǿshà we íe. 16 Ngàí kàdøng v̄la:tnìni, vshuq nø angkàng mvdv̀m ring we mø̀í. Dvzv́r gø ang kaq dvzá:rò pè mvdv̀m ring we mø̀í. 17 Yadv́ng pv̀n svng namaqí èshánøng nø, ècv̀nnøng nìnø, ìshøt ìgv̀n èlún lóngnønge. 18 Namaq shvngbe svng shø̀n we mø̀í. Ngà rvcvngshìshaq rì svng Ngàí shángòe. Iwe Shànshér Kàru taq, ‘Ngà v́mpà vmpè ang híí Ngà svng pèlōnge,’ wa ciq dvhø̄mlv́m rvt íe. 19 Wedø í long dvgvp, Ngà nø Kristu ǿngà we svng namaqí kv́mlv́m dvpvt, shini mvbø̀n ra dvgvp namaq svng Ngàí dvtáì we íe. 20 Ngàí kàdøng v̄la:tnìni, Ngàí dvzv́rò gǿ svng vtoò gǿí nø Ngà svng nàtong we íe. Ngà svng nàtong gǿí nø Ngà dèzv́r dakngà pè svng vtōò we íe,” a:lòe. 21 Yadv́ng pv̀n shø̀n bǿà dá:ngí Yesu nø vtvngshaq nøt dvshà lú:ngì nø, shvkse wáshì sórí, “Ngàí kàdøng v̄la:tnìni, namaq taqkèní tiq gǿí Ngà ènv̄mv̄m bønge,” a:lòe. 22 Coqcv́nrì nø, Ang kagǿ svng wa we mvsháò rvtnø dvtiqshi sórí dàjaq kee. 23 Wedvgvp Yesu Ang shóngshi we coqcv́n pè nø, Yesu shvnvngø námrunge. 24 Wervt Simon Piterí wur vwatshì nø wepè svng, “A:ngí shø̀:nò gǿ kagǿ í we dètáshà, wa røt dvzá: ròe. 25 Wepè nø todø Yesu shvnvng námrung nø Ang svng, “Vkàngpèá, kagǿ íe?” a:lòe. 26 Yesuí vtà:ngò nø, “Ngàí zidòng yamǿr zønò nø zǿng lóngò gǿ íe,” a:lòe. Wekvt zidòng mǿr zøndv̀ng A:ngí Simon angcè Iskariot pè Yuda svng zíòe. 27 Zidòng wemǿr ang tvpshi nø v́m bǿà chàng, ang svng Satan dvchøpmá: mi. Wervtnø Yesuí ang svng, “Nàí wàlv́m èdá:nò lòng bò èwàò,” a:lòe. 28 A:ngí pàwá ang kaq yadø a:lò we svng weyv́ngø rung rì tiq gǿí gø mvsháò. 29 Yuda nø gv̀msùng yǿng vnù:ngò pè í rvtnø, Yesuí ang svng, “Bóy dvpvt nøngmaq lv́ngdv̀ng pv̀n èwvná:mò,” a:lò pà íe; mø̀íni dvshà rì kaq tiqpv̀npv̀n zí ràe, a:lò pà íe, wa nø tiqmaqí lá:nòe. 30 Wervt ang nø zidòng wemǿr v́m dá:ngí chàng búngá:mì. Wedvgvp nø yaqdø̀ng íá:- mì. 31 Yuda búngá:mì kvt Yesuí, “Vsvng Angcè pè ngø̀r dvgùng nø akvt kèní dvtan daqòe. Gvray ngø̀r dvgùng gø Ang taqkèní shvring daqòe. 32 Gvray ngø̀r dvgùng nø Vsvng Angcè pè taqkèní shvring daqò we í kvtkèní nø, Gvrayí Vsvng Angcè pè svng gø ngø̀r dvgùng shvring daqò nø, akvtni shvringlv́m dá:nòe. 33 Cv̀mré rìé, Ngà nø namaq nvng tiq lvngcè wa v̄le. Namaqí Ngà svng èlá lóngshàe. Yuda vsvng rì kaq Ngàí àvlshaq dø tiqdvchá, namaq svng gø akvt wedøni a:líe. Ngà døngvm yv́ng svng namaqí di mèlúnnøng. 34 Namaq tiq gǿ nø tiq gǿ nàshòngkénøng, wvng dvkv́mkà angshv́r tiq lòng Ngàí namaq svng zí ráìe. Ngàí namaq svng shù:ngì dø, namaq gø tiq gǿ nø tiq gǿ nàshòng kénø̀ng. 35 Namaq tiq gǿ nø tiq gǿ nàshòngkénøng we yalòng taqkèní namaq nø Ngà coqcv́n èínøng we vsvng shvngbeí shá bǿòe,” a:lòe. 36 Simon Piterí Ang svng, “Vkàngpèá, Nà nø kayv́ng svng dìlv́m èwa ma?” a:lòe. Yesuí vtá:nò nø, “Ngà døngvm yv́ng svng akvt nàí cv́n mèlú:nò. Iwe mèpvng nø nàí cv́n rà longe,” a:lòe. 37 Piterí Ang svng, “Vkàngpèá, kadø í nø akvt Nà svng ngàí cv́n mvlúnò ma? Nà dvpvt gø̀nshaq dvbǿmshilv́m høq gø ngà kvmshø̀nge,” a:lòe. 38 Yesuí vtá:nò nø, “Ngà dvpvt nà gø̀nshaq dvbǿm kvmshø̀nge nàyà lá? Ngàí kàdøng nà svng v̄lvtnøng, dv̀nggú shini mvgi dvgvp, nàí Ngà svng vshø̀m kvt èmang lóngngàe,” a:lòe.
1 Namaq nøt mèdeshànøngni; Gvray kaq èkv́mnøng, Ngà svng gø èkv́mshà. 2 Ngà Vpè chø̀m taq nø, v́lrà gvzà v̄le. Wedø màvl pà í nìnø Ngàí namaq svng vzv̀ng kèní dvtáì ni we íe. Kadø íe wani Ngà nø namaq dvpvt v́lrà dvgǿa nvng longvme. 3 Ngà longvm nø namaq dvpvt v́lrà dvgǿ dv́ng bǿngò kvt, Ngà vrá tiq kvt vtv́ng dak nø, Ngà vl yv́ngø namaq gø v́l lúnlv́m dvpvt, Ngàí namaq svng lù daqìe. 4 Ngà v̄l yv́ng tuqvm we tvrà lòng nø namaqí èshánønge,” a:lòe. 5 Tomaí Ang svng, “Vkàngpèá, Nà kayv́ng svng èdivm we dv́ng nøngmaqí mvsháì nìnø, tvrà nø kadøwa lvsháì ni?” a:lòe. 6 Yesuí ang svng, “Ngà nø tvrà nvng dìng lòng nvng gø̀nshaq ǿngàe. Ngà taqkèní wa mø̀í nìnø, Vpè yv́ng svng kagǿí gø dí mvlú:nò. 7 Namaqí Ngà svng èshásha rvtnø, Ngà Vpè svng gø èshánønge. Akvt kèní kukaq namaqí Ang svng vsháshaq í nø, yv́ng gø vyv́ngshaq íe,” a:lòe. 8 Filipmí Ang svng, “Vkàngpèá, Vpè nøngmaq svng dètānshà, wekvt nø nøngmaq nøt shø̀:- mìe,” a:lòe. 9 Yesuí ang svng, “Filipmá, Ngà nø namaq nvng yadv́ngte vlé dø à:lì we, nàí Ngà svng shini mèshángà ma? Ngà svng vyv́ngshaq gǿí nø Vpè svng vyv́ngshaq íe. Nàí kadøwa, ‘Vpè nøngmaq svng dètanshà,’ èwa ma? 10 Ngà nø Vpè vdòng taq vl nø, Vpè gø Ngà vdòng taq vl we svng nà mèkv́m ma? Ngàí namaq svng shø̀nò we kàrì nø, Ngà nø:tní shø̀nò we mø̀í, Ngà vdòng taq vl pè Vpèí Ang bv̀nlì wàò we mv̀ng íe. 11 Ngà nø Vpè vdòng taq, Vpè gø Ngà vdòng taq v̄le, wv̄ng kà svng èkv́mnøng. Mø̀íni Ngàí wv̀ng bǿngà we vtiqlv́m bv̀nlì rì rvtnø dvbvng Ngà svng èkv́mnøng. 12 “Ngàí kàdøng namaq svng v̄la:tnìni, Ngà kaq kv́m gǿ à:ngí nø, Ngàí wv̀ngò bv̀nlì rì wà lú:ngòe. Yamvdv̀m té ring we bv̀nlì gø à:ngí wà lú:ngòe. Pàwálv́m wani Ngà nø Vpè yv́ng svng longvme. 13 Vpè nø Angcè pè taqkèní ngø̀r dvgùng lúnlv́m dvpvt, Ngà bø̀ng taqkèní namaqí kapà èrøtnø̀ng nìgø welòng Ngàí wáa daqìe. 14 Ngà bø̀ng taqkèní namaqí kapv̀n èrøtnø̀ng nìnø, wepv̀nni Ngàí wáa daqìe. 15 Ngà svng namaqí èshòngshà nìnø, Ngà dvkv́m kàrì namaqí ècv̀n lóngnønge. 16 Vpèí nøt shvlǿmshú shø̀ngshang tiq gǿ namaq svng zílv́m rvt Ngàí Ang svng røtnalv́m íe. Ang nø namaq nvng dvciq lvpat vl daqe. 17 Ang nø dìnglòng Pvlacè íe. Rvgaqí nø Ang svng yv́ng gø mvyà:ngò, shá gø mvsháò rvtnø Ang svng vto mvngu:tnò. Iwe namaqí nø Ang svng èshánønge. Kadø íe wani Ang nø akvt namaq nvng v̄l nø, namaq vdòngø vl daqe. 18 Ngàí namaq svng dvrvtcè dø màme ráì; namaq yv́ng svng vrá Ngà døng daknge. 19 Tiqlvngcè kèní nø, rvgaqí Ngà svng mèyv̀ng long. Namaqí nø Ngà svng èyv̀ng lóngshàe. Ngà cúnshø̀ng rvtnø namaq gø ècúnshì lóngnønge. 20 Weni taq, Vpè vdòng taq nø Ngà vl we, Ngà vdòng taq nø namaq èv̀lnøng we, namaq vdòng taq nø Ngà vl we svng namaqí èshá lóngnønge. 21 Ngà dvkv́mkà svng vtoò nø̀ cv̀n gǿ nø, Ngà svng èshòng gǿ íe. Ngà svng èshòng gǿ svng nø, Vpèí gø shù:ngòe. Ngàí gø ang svng shòngò nø, Ngà vdè gø ang svng dvtánshìlv́m íe,” a:lòe. 22 (Iskariot pè mø̀í we) Yudaí Ang svng, “Vkàngpèá, kadø í rvt Nà góng nø rvgaq svng màdvtánshishaq nøngmaq svng wa dvtánshìlv́m èwa ma?” a:lòe. 23 Yesuí vtá:nò nø, “Ngà svng èshòng gǿ kagǿí gø, Ngà kà svng cv̀n lú:ngòe. Vpèí ang svng shù:ngò nø, Ngàní pè nø wegǿ yv́ng di daqshì nø, ang nvng v̀llv́m íe. 24 Ngà svng mèshòng gǿ nø, Ngà kà svng gø mvcv̀n. Namaqí ètánøng we kàrì nø Ngà kèní mø̀í, Ngà svng dèzv́r dakngà pèò kà íe. 25 “Yadv́ng pv̀n nø, namaq nvng shini à:lì dvgvp Ngàí dvtá bǿsha. 26 Iwe Vpèí Ngà bø̀ng taqkèní dvzv́rlv́m dá:nò we nøt shvlǿmshú Shànshér Pvlàcèí namaq svng shvngbe shèngøtnvtnøng nø, Ngàí namaq svng dvtá bǿsha rì í dv́ngte gø dvdvm rǿn dèzv́rvtnønge. 27 Ngàí namaq svng mòngzø̀l long lánga ráìe. Ngà mòngzø̀l lòng namaq svng zí ráìe. Ngàí namaq svng zíì we mòngzø̀l lòng nø rvgaqí zi we mòngzø̀l lòng dø mø̀í. Namaq nøt mè deshànøngni, svre gø mèsèrenøngni. 28 Ngàí namaq svng, ‘Ngà nø longvme, wvng kà nvng; vrá namaq yv́ng svng Ngà vtv́ng daknge,’ wvng nø shø̀nkà namaqí ètá bǿsha. Namaqí Ngà svng èshòngshà we í nìnø, Vpè yv́ng svng Ngà longvm rvt namaq dèbunøng ni we íe. Kadø íe wani Vpè nø Ngà mvdv̀m té ringe. 29 Wedø í long dvgvp namaq kv́mlv́m rvt, akvt shini mø̀í dvgvp namaq svng Ngàí dvtáì we íe. 30 Akvt kèní kukaq Ngà nø namaq svng kà kadv́ngte shǿn màmø. Kadø íe wani rvgaq yalòng øpshúpè nø tuq ráì. Ang nø Ngà mvdv̀m nonggun jòr we nø mø̀í. 31 Iwe, Ngà nø Vpè svng shóngshø̀ng nø, A:ngí dèkv́m dø wv̀ngò we svng rvgaqí shálv́m rvt íe. Có, yayv́ng kèní bú:ngì,” a:lòe.
1 “Ngà nø Bìmrøng mvdø̀ng ǿngàe. Ngà Vpè nø vshv́ngshú pè íe. 2 Ngà vdòng taq caqshi nìgø angshí mvzí we dvgv̀ng í dv́ngte svng A:ngí tu:tnò nø, angshí zí we dvgv̀ng í dv́ngte nø, angshi té zílv́m rvt A:ngí dvshè:ròe. 3 Namaq nø Ngàí shø̀nò we Mòngkà rvtnø akvtni èshèrv́mshà. 4 Namaq nø Ngà vdòng taq èv̀lnøng; Ngà gø namaq vdòng taq v̀llv́m íe. Angrø̄ng taq mvcaqshi we dvgà:ngí nø angshí zí mvlú:nò dø, namaq gø Ngà vdòng taq v́ldv̀ng mèwànø̀ng kèní nø, angshí mèzí lóngnøng. 5 Ngà nø bìmrø̄ng ǿngàe, namaq nø dvgv̀ngrì èínønge. Ngà vdòng taq v̄l nø Ngà gø ang vdòng taq vl we wegǿ mv̀ng nø angshí gvzà zíe. Pàwá wani Ngà taq mècaqshìnø̀ng nìnø namaqí pà gø wá mèlúnnøng. 6 Ngà vdòng taq màvl gǿ nø dvgv̀ng dø gur bǿò nø shúngvme. Werì svng mvshù:mò nø svmi svng gur bǿò nø, vkatnvme. 7 Namaq nø Ngà vdòng taq v́l dv̀ng èwànø̀ng nø, Ngà kà gø namaq vdòng taq vl kvt kèní nø, namaq èshòngnøng we kapà gø èrøtshìnøng; wekvt namaq svng èzí daqnø̀nge. 8 Namaq nø angshí gvzà èzínø̀ng we yalòng kèní Ngà Vpè ngø̀r dvgùng shvring lú:ngòe. Welòng kèní namaq nø Ngà coqcv́n jǿng èínøng we dvtánshì longe. 9 “Vpèí Ngà svng èshòng dø, Ngàí gø namaq svng shù:ngìe. Ngà shóngnøt vdòng taq namaq v́ldv̀ng èwànø̀ng. 10 Vpè dvkv́mkà Ngàí cv̀nò nø, Ang shóngnøt vdòng taq v̄l dø tiqdvchá, namaq gø Ngà dvkv́mkà cv́n èdøngnøng kvt nø, Ngà shóngnøt vdòng taq v́ldv̀ng èwà lóngnønge. 11 Ngà dvbù nøt namaq vdòng taq vl yv́ng kèní namaq dvbùnøt dv̀n zø̀nglv́m dvpvt, Ngàí namaq svng yadv́ng pv̀n dvtá bǿshà we íe. 12 Ngàí namaq svng shù:ngì dø, namaq tiq gǿ nø tiq gǿ vshóngké ràe, wvng we yakà nø Ngà dvkv́mkà íe. 13 Vsvng tiq gǿ nø ang shóngshì rv̀mnvng dvpvt ang gø̀nshaq dvbǿmshì we yalòng mvdv̀m té ring we shóngnøt nø kagǿ gø̄ màvl. 14 Ngàí dvká:mì dv́ngte namaq cv́n èdøngnø̀ng kvtnø, namaq nø Ngà rv̀mnvngrì èínønge. 15 Akvt kèní kukaq Ngàí namaq svng vshuq màa:lì. Kadø íe wani vshuqí nø angkà:ngí kapà wàò we mvsháò. Namaq svng nø Ngàí rv̀mnv̄ng, a:lìe. Kadø íe wani Vpè yv́ng kèní Ngàí tángò rì shvngbe, Ngàí namaq svng shá dvzv́r bǿsha. 16 Namaqí Ngà svng rècv̀ngshà we mø̀í, Ngàí mv̀ng namaq svng rvcv̀ng bǿshà. Namaq èdinøng nø mvtìn mvbøp we angshí zílvm dvpvt Ngàí namaq svng rvcv̀ng bǿshà we íe. Wekvt namaqí Ngà bø̀ng kèní Vpè svng kapà èrøtnø̀ng nìgø A:ngí namaq svng èzí daqnø̀nge. 17 Namaq tiq gǿ nø tiq gǿ vshòngké ràe. Yalòng nø Ngà dvkv́mkà íe. 18 “Rvgaqí namaq svng shèngovtnø̀ng kvt nø, namaq svng shini mèshèngōnøng dvgvp, Ngà svng shèngong we svng èshánøng. 19 Namaq nø rvgaqò èínøng pa í nìnø, rvgaq nø angò rì svng shóngshi døni namaq svng gø èshòngnøng ni we íe. Inìgø namaq nø rvgaqò rì mèínøng. Ngàí namaq svng rvgaq kèní rvcv̀ng bǿshà rvt, rvgaqí namaq svng shèngonøng we íe. 20 ‘Vshuq nø angkàng mvdv̀m té ring we mø̀í,’ wvng namaq svng Ngàí vl bǿshà kà svng mèsøngnøng. Angmaqí Ngà svng dv́ng nàrèngnøng nø, namaq svng gø nàrevtnønge. Angmaqí Ngà kà svng cà:nò nìnø, namaq kà svng gø cv̀n lúngòe. 21 Inìgø, Ngà svng dèzv́r dakngà pè svng angmaqí mvsháò rvt, Ngà bø̀ng rvtnø yadv́ng pv̀n shvngbe angmaqí namaq svng èwàvtnønge. 22 Ngà la mvdøng nø angmaq svng mvshø̀nò pà í nìnø, angmaq nø mvrà zì màvl ni we íe. Akvt nø, angmaq mvrà dangø pà dvpéshìlv́m màv̀lá: mì. 23 Ngà kaq shèngong gǿ nø, Vpè svng shvngoshi we íe. 24 Kagǿí gø mvwà dá:rò we bv̀nlì Ngàí angmaq dvhø̀ taq mvwv̀ng yv̀ngò pà í nìnø, angmaq nø mvrà màvl ni we íe. Dvdvm vtiqlv́m yadv́ng pv̀n angmaqí yv́ng lún bǿà nìgø, akvt nø Ngà svng gø, Vpè svng gø angmaq shvngōshìe. 25 Iwe yalòng nø angmaq Dvrá lega taq vrū yà:ngà we, ‘Mvtú màdáshaq angmaq Ngà svng shvngōshìe,’ wakà dvhø:mò we íe. 26 Wedø ínìgø Vpè yv́ng kèní bung daq nø namaq yv́ng svng Ngàí dvzv́ralv́m í we dìnglòng Pvlacè, Nøt shvlǿmshú tuq daq kvt nø, Ngà dvpvt shvkse Ang wáshì daqe. 27 Nv̀mlat kèní Ngà nvng tiqdø à:lì rvtnø namaq gø shvkse èwáshì lóngnønge.
1 “Ngàí namaq svng yadv́ng pv̀n dvtáì we nø namaq nøt mvtìnlv́m rvt íe. 2 Angmaqí namaq svng júrøt chø̀m kèní èlùngnøng nø, èshvtnvtnønge. Namaq svng èshvtnø̀ng rì nø, angmaqí yadø wàì lòng nø Gvray kaq dvzø:mì we íe, wa dvda:mò we rvtø̀ tuq rae. 3 Angmaqí nø Vpè svng gø, Ngà svng gø, mèsháshi rvtnø yadv́ng pv̀n wà lú:ngoe. 4 Ngàí namaq svng yadv́ng pv̀n dvtáì we nø werì bø̀n long dvgvp Ngàí yarì dang vgám dvtúì rì svng namaqí dvdvm rǿnlv́m dvpvt íe. Yadv́ng pv̀n dang namaq svng nv̀mlat kení mvshø̀nò we gø Ngà nø namaq nvng shini à:lì rvt íe. 5 Inìgø akvt Ngà nø, Ngà svng dèzv́r dakngà Pè yv́ng svng longvme. Iwe namaq kagǿí gø, Nà kayv́ng èdivme?’ wa nø Ngà svng lemèrøtshà ni? 6 Ngàí namaq svng yadv́ng pv̀n shø̀n bǿngà rvtnø, namaq taq nøt dvshà lòng èzø̀ngv́msha. 7 Inìgø, Ngàí namaq svng kàdøng v̄la:tnìni, Ngà døngvm lòng nø namaq dvpvt té shvla we íe. Ngà mvlong kèní nø, nøt shvlǿmshú Ang nø namaq yv́ng svng mvdi daq. Ngà longvm kvt mv̀ng Ang svng Ngàí namaq yv́ng svng dvzv́r dakngòe. 8 Ang tuq daq kvtnø, rvgaq tø̀m vsvng kaq A:ngí, mvrà vl dang gø, døngman dang gø, kàngélv́m dang gø, vchaqò nø dvshat lú:ngòe. 9 Mvrà vl dang vchaqò lòng nø, angmaq Ngà svng mvkv́m rvtnø íe. 10 Døngman dang dvta:nò lòng nø, Vpè yv́ng svng Ngà longvm nø namaqí Ngà svng mèyv̀ng lóngshà rvtnø íe. 11 Kàngélv́m dang dvta:nò lòng nø, rvgaq yalòng øpshú dùpè svng kà vrvtshaq íá:mì rvtnø íe. 12 Ngàí namaq svng shø̀nlv́m kà nø gvzà vl nìgø akvt nø namaqí vto mèdv́ngnøng. 13 Inìgø dìnglòng Pvlacè Ang tuq daq kvt nø, A:ngí namaq svng dìnglòng í dv́ngte taq èshølvtnønge. Ang nø Ang nø:tní mvshø̀n. Iwe A:ngí táò dv́ngte wa shø̀:nò nø, dvgáni ílv́m dv́nshi rì gø A:ngí namaq svng dètá daqnø̀nge. 14 Kadø íe wani A:ngí nø Ngà kàrì lá:ngò nø, namaq svng dètá daqnø̀ng yv́ngkèní Ngà ngø̀r dvgùng shvring lú:ngòe. 15 Vpè vdá dv́ngte shvngbe nø Ngàò èǿngànge. Wedø í rvtnø, Pvlàcèí nø Ngà kàrì lá:ngò nø namaq svng dètá daqnø̀nge, vl bǿshà we íe. 16 “Tv́n tiqlvng kèní nø namaqí Ngà svng mèyv̀ng lóngshà. Tiqlvng mèpvng nø vrá namaqí Ngà svng èyv̀ng lóngshàe,” a:lòe. 17 Ang coqcv́nrì tiqmaq vrùng nø, “A:ngí nøngmaq svng, ‘Tv́n tiqlvng kèní nø namaqí Ngà svng mèyv̀ng lóngshà. Tiqlvng mèpvng nø vrá namaqí Ngà svng èyv̀ng lóngshàe,” wa nø; vrá, ‘Vpè yv́ng svng Ngà longvme,’ wa kà nø kadø wa kà í ma?” wae. 18 A:ngí, ‘Tv́n tiqlvng kèní,’ wakà nø kadø shø̀nkà í ma? Ang kapà shøn we nøngmaqí mvsháì,” wa vrúng mvnshìe. 19 Angmaqí Ang svng røt mvyǿ we svng Yesuí sháò rvtnø, “Ngàí, ‘Tv́n tiqlvng kèní namaqí Ngà svng mèyvng lóngshà. Tiqlvng mèpvng nø vrá Ngà svng èyv̀ng lóngshàe,’ wvng we yakà svng namaq nàrøtkénøng ma? 20 Ngàí kàdø̄ng v̄la:tnìni, namaq nø rv̀ngshvng èwànø̀ng nø dèyúrshìnø̀ng ke, rvgaq nø dvbù longe. Namaq nø nøt vtvng dèsha lóngnøng nìgø, namaq nøt dvshàlòng nø dvbùlv́m vpōvme. 21 Svmaré nø, angcè gv̀llv́m rvtø̀ vhøm ra kvt puqnøn za weí nøt dvshà we vhǿ:mò nìgø gv̀l bǿò dá:ngí nø, rvgaq tø̀m taq cv̀mré tiq gǿ yv́ngshì daqì rvtnø dvbù weí mvhøt bǿì rì svng à:ngí vná bǿòe. 22 Welòng dø namaq gø akvt nøt dvshà we nàhǿmnønge. Iwe namaq svng Ngàí vrá yv̀ng lú:ngì kvt namaq dèbù lóngnønge. Namaq dvbùnøt svng nø kagǿí gø mèlúa bǿnø̀ng. 23 Weni taq namaqí Ngà svng røtlv́m tiqkà gø màvlvm. Ngàí kàdø̄ng v̄la:tnìni, Vpè svng namaqí Ngà bø̀ng taqkèní kapà èrøtnø̀ng nìgø, A:ngí namaq svng èzí daqnø̀nge. 24 Akvt høq namaq nø Ngà bø̀ng taqkèní tiqpv̀n gø shini mèrøtshìnø̀ng. Erøtshìnøng kvt nø èlún daqnø̀nge. Wekvt namaq nø dvbù nø:tní dv̀n èzø̀ng lóngnø̀nge. 25 “Yadv́ng pv̀n nø Ngàí namaq svng kàshvbóng kèní shø̀n bǿngà. Inìgø Ngàí namaq svng kàshvbóng kèní vrá tiq kvt màshǿnshaq, Vpè dang nø dèdè chaqdvp namaq svng dvtálv́m rvtø̀ tuq rae. 26 Weni taq namaq nø Ngà bø̀ng taqkèní èrøtshì lóngnønge. Wekvt namaq dvpvt nø Ngàí Vpè svng røt dvbvnglv́m íe, wvng we mø̀í. 27 Pawálv́m wani namaq nø Ngà svng èshóngshìnø̀ng nø, Ngà nø Vpè yv́ng kèní dø̀ng dakngà we svng gø èkv́m bǿshà rvtnø, Vpèí namaq svng èshòngnønge. 28 Ngà nø Vpè yv́ng kèní dø̀ng dakngà nø, rvgaq tø̀m svng gòng dakngà. Vrá Ngà nø rvgaq kèní rv́lshø̀ng nø Vpè yv́ng svng longvme,” a:lòe. 29 Ang coqcv́nrìí, “Eyà:ngò, akvt nø Nàí kàshvbóng kèní mèshø̀:nò, chaqdvp èshø̀:nòe. 30 Akvt mv̀ng Nàí nø í dv́ngte shvngbe èsháò we nvng tiq gǿí gø Nà svng røt mvrà we nøngmaqí shá bǿshà. Wervt Nà nø Gvray yv́ng kèní èdì daqi we nøngmaq ká:mìe,” a:lòe. 31 Yesuí angmaq svng vtá:nò nø, “Namaq nø akvt wa èkv́mnønge ma? 32 Eyv̀ngnøng, namaq nø vdèdè chø̀m svng nàkangv́mnø̀ng nø, Ngà wa ègur ráshà we rvtø̀ tuq rae, akvt ni tuq ráì. Inìgø Vpè nø Ngà nvng tiqdø v̄l rvt, Ngà nø Ngà wa mø̀ǿngà. 33 Ngàí namaq svng yadv́ng pv̀n dvtá bǿshà we nø, Ngà vdòng taq mòngzø̀l lòng namaqí lúnlv́m dvpvt íe. Rvgaq tø̀mø nø namaqí dvshà mvhøt lòng nahǿm lóngnø̀nge. Inìgø shaqshaqwa èv̀lnøng, rvgaq svng Ngà jorv́mà,” a:- lòe.
1 Yesuí yadv́ng pv̀n shø̀:nò dá:- ngí, muqlàng kaq dvjaq sórí yadø wae. “Vpèá, rvtø̀ nø tuq ráì. Nvcèpè Ngàí Nà ngø̀r dvgùng shvring lúnlv́m dvpvt Nvcèpè ngø̀r dvgùng shèring dakngà. 2 Kadø íe wani Nàí Ang svng vzíshaq rì shvngbe svng, dvciq lvpat gø̀nshaq zílv́m dvpvt, Nàí nø vsvng shvngbe mvdv̀m vmíng vkv́ng Ang svng èzí yà:ngà. 3 Tiq gǿ wa èí pè Gvray mvdø̀ng Nà svng gø, Nàí dèzv́r daqà we Kristu í pè Yesu svng gø sháò lòng nø, dvciq lvpat gønshaq íe. 4 Nàí Ngà svng èzǿngà bv̀nlì Ngàí wá dvdv́ng bǿngà lù:ngí rvgaq tø̀mø Nà ngø̀r dvgùng Ngàí shvring bǿngà. 5 Wervtnø Vpèá, rvgaq shini màvl dvgvp Nà nvng tiqdvchá vdá yv̀ngshà we Ngà ngø̀r dvgùng welù:- ngí Nà mv́rdv̀ngø akvt Ngà svng shèring dakngà. 6 Nàí rvgaq tø̀m kèní Ngà svng èzǿng bǿngà we vsvng rì kaq Nà bø̀ng Ngàí dvtan bǿngà. Angmaq nø Nàò rì èía we, Nàí Ngà svng èzǿng bǿngà nø, angmaq gø Nà kà svng cv́n døngá:mì. 7 Ngà svng èzǿngà rì shvngbe nø, Nà yv́ng kèní í we akvt angmaqí shá bǿà. 8 Kadø íe wani Nàí Ngà svng vzíshaq kàrì nø, Ngàí angmaq svng zǿng bǿngà. Angmaqí gø vtoò nø, Ngà nø Nà yv́ngkèní bung dakngà we gø jø̀ngjǿng shá bǿà nø, Nàí Ngà dèzv́r dakngà we svng gø angmaq kv́m bǿì. 9 Angmaq dvpvt Ngàí røtnòe; rvgaq tø̀mòri dvpvt nø mvrøtnangò. Nàí Ngà svng vzíshaq rì angmaq dvpvt mv̀ng røtnāngòe. Pàwálv́m wani angmaq nø Nàò ēíae. 10 Vrá Ngàò èǿngàng rì shvngbe nø Nàò ni èía nø, Nàò rì gø Ngàò rì ni èǿngānge; Ngàí gø angmaq taqkèní dvgùng shvring we lún bǿngà. 11 Akvt kèní Ngà nø rvgaq tø̀mø màv̄lvm. Yarì nø rvgaq tø̀mø vl ra nø, Ngà nø Nà yv́ng svng long longe. Shanshér we Vpèá, Ngàní pè nø tiq lòng íshà dø angmaq gø tiq lòng wa ílv́m rvt, Nàí Ngà svng vzíshaq, Nà jórnònggùn bø̀ng taqkèní angmaq kaq èroqò. 12 Ngà nø Nàí Ngà svng èzǿngà rì nvng tiqdø a:lì dvgvp Nàí Ngà svng èzǿnga we Nà bø̀ng taqkèní angmaq svng rok bǿngà. Shànshér Kàru kà dvhø̄mlv́m dvpvt, vmv́nglv́m cèpè ang wa mø̀í nìnø angmaq tiq gǿ gø màmv̄ng dø Ngaí gar bǿngà. 13 Akvt Ngà nø Nà yv́ng svng long longe. Rvgaq tø̀mø shini vl dvgvp yadv́ng pv̀n Ngàí shø̀n bǿngà we nø Ngà dvbòng nøt angmaq vdòng taq dv̀nzø̀nglv́m dvpvt íe. 14 Nà Mòngkà nø Ngàí angmaq svng zǿng bǿngà. Ngà nø rvgaqò mvǿngà dø tiqdvchá angmaq gø rvgaqò mø̀í rvt, rvgaq nø angmaq svng shvngōshìe. 15 Nàí angmaq svng rvgaq tø̀m kèní lùlv́m dvpvt Ngà mvrøt. Mvgvm pè wepè wur taqkèní angmaq svng garlv́m dvpvt mv̀ng røtne. 16 Ngà nø rvgaqò mø̀ǿngà dø tiqdvchá, angmaq gø rvgaqò mø̀í. 17 Nà dìnglòng kà taqkèní angmaq svng dèshè:rò. Kadø íe wani, Nà Mòngkà nø dìnglòng íe. 18 Nàí Ngà rvgaq tø̀m svng dèzv́r dakngà døni, Ngàí gø angmaq kaq rvgaq tø̀m svng dvzv́r bǿngà. 19 Angmaq nø dìnglòng dvpvt shànshér dø shvgaq we lúnlv́m rvt, Ngà gø Nà dvpvt shànshér dø shvgakshønge. 20 Ya mvdò dvpvt wa Ngàí røtnangò we mø̀í, angmaq kà taqkèní Ngà svng kv́m ra rì dvpvt gø røtnangòe. 21 Ngà nø Nàí dèzv́r dakngà we svng rvgaqí kv́mlv́m rvt, angmaq shvngbe nø tiq lòng wa ívm nø; Vpè Nà nø Ngà vdòng taq èv̄l nø, Ngà gø Nà vdòng taq vl dø, angmaq gø Nøngmaq vdòng taq v̀llv́m dvpvt Ngà røtne. 22 Vrá, Nøngmaq nø tiq lòng wa íshà dø, angmaq gø tiqlong wa ílv́m rvt, Naí Ngà svng èzǿng yv̀ngà ngø̀r dvgùng nø angmaq svng zǿng bǿngà. 23 Ngà svng Naí dèzv́r dakngà we nvng Ngà svng Nàí èshònga dø tiqdvchá, angmaq svng gø wedøni vshóngshaq íwe svng, rvgaqí shálv́m dvpvt Ngà nø angmaq vdòng taq v̄l nø, Nà gø Ngà vdòng taq èvl yv́ngkèní, angmaq nø tiqgóng tiqnøt taq wa kø̀mgø̄m vrv́m vrálv́m rvt Ngà ngø̀r dvgùng angmaq svng zǿngòe. 24 Vpèá, Nàí Ngà svng vzíshaq rì angmaqí, Nàí èzǿngà we Ngà ngø̀r dvgùng yv́ng lúnlv́m dvpvt nvng Ngà vl yv́ngø angmaq gø v́l lúnlv́m lòng svng Ngà shònge. Pàwálv́m wani rvgaq angké shini màshvzøngshaq vzv̀ng kèní Nàí Ngà svng èshòngae. 25 Døngman pè Vpèá, rvgaqí Nà svng mèshá nìgø, Ngàí Nà svng shánge. Yarìí gø Ngà nø Nàí dèzv́r dakngà we svng shá bǿà. 26 Nàí Ngà svng èshòngà we shóngnøt angmaq vdòng taq v̀llv́m dvpvt nvng Ngà gø angmaq vdòng taq v̀llv́m dvpvt, Nà bø̀ng nø Ngàí angmaq svng shá dvzv́r bǿngà. Tv́n gø shá dvzv́rlv́m íe,” wae.
1 Kà yadv́ng pv̀n shø̀:nò dá:ngí, Yesu nø Ang coqcv́nrì nvng tiqdø, Kidron vkung kupa svng léshìá:mì nø, Ang nvng coqcv́nrì nø weyv́ng kùlwàng tiq lòng svng gòngá:mì. 2 Yesu nvng coqcv́nrì nø kadvgvp màdvgvp weyv́ngø dvkǿmshi dvr we í nø, Ang svng nvmá:mò pè Yudaí gø wezàng sháòe. 3 Wekvt Yuda nø, shvrúngshú vjìrì nvng Farisirì taqkèní cìlcè tiqmvdò shø:lò nø angmaq nø cìldvm gø, svmigwìn nvng svmi mvdø̀m gø lá:ngò nø tø̀m ráì. 4 Yesu nø, A:ngí kapà vhǿmlv́m írì shvngbe sháshì rvt, tv̀m búng nø angmaq svng, “Namaqí kagǿ èlánø̀nge?” a:lòe. 5 Angmaqí Ang svng, “Nazaret pè Yesu láìe,” wa nø vtá:nòe. Yesuí angmaq svng, Ngà ǿngàe,” a:lòe. Ang svng nvmá:mò pè Yuda gø werì nvng tiqdø ripme. 6 Yesuí angmaq svng, “Ngà ǿngàe,” vl bǿà kvt, angmaq nø mèpvng lap svng shøtshi sórí vba tø̀m svng vngaqá:mì. 7 Vrá tiq kvt A:ngí, “Kagǿ èlánø̀nge?” wa rø:tnò kvt angmaqí rá, “Nazaret pè Yesu láìe,” wae. 8 Yesuí vtá:nò nø, “Ngà ǿngàe, lavl bǿshà. Ngà svng èlásha nìnø, yarì nø shèlonøng,” a:lòe. 9 Yalòng nø, “Nàí Ngà svng vzíshaq rì angmaq nø tiq gǿ gø màmvngvm,” wa nø A:ngí shø̀:nò kà dvhø̄mlv́m dvpvt íe. 10 Wekvt Simon Piter nø, shv̀m tiqka pēshì we, rit shà:lò nø shvrúngshú vgo pè Ang dvzømshú pè svng vtuq bǿà kvt, ang vbàng pa vnà lip cv́nga bǿà. Dvzømshú pè ang bø̀ng nø Malku íe. 11 Wedø ínìgø Yesuí Piter svng, “Shv̀m nø ang dø̀nggàng taq èzá:ngò. Vpèí Ngà svng vzíshaq gwìn nø Ngàí mvaqlv́m í ma?” a:lòe. 12 Wekvt cìl tiqkíng øpshú pèó ang cìlcè mvdò nvng Yuda vsvng dvzv́rshúrìí Yesu svng ta:pmò nø dù:ngò dá:- ngí, 13 Annas yv́ng svng vzv̀ng shøl bǿà. Wepè nø wenǿng taq shvrúngshú vgo wáshìpè Kayafas angkø̀ pè íe. 14 Kayafas nø, basha rì tvle nø vsvng tiq gǿ shì lòng té shvlae, wa nø Yuda vsvng rì kaq vra a:pmà pè íe. 15 Simon Piter ó coqcv́n dvgá tiq pèí nø Yesu mèpvng cv̀n bǿà. Coqcv́n wepè nø, shvrúngshú vgo pèí sháò we í nø, Yesu nvng tiqdø shvrúngshú vgopè chø̀m gùrpuq svng gòngá:mì. 16 Piter mv̀ng nø vngámlap bv́ngkà yv́ng ripmè. Wekvt shvrúngshú vgo pèí sháò we coqcv́n pè búng daqì nø, bv́ngkà vsóngshú chø̀myoré mè svng a:lò nø Piter svng dvgòng lú:ngà. 17 Wekvt bv́ngkà vsù:ngò mèí Piter svng, “Nà gø wepè coqcv́n tiq pè mèí ma?” a:lòe. A:ngí, mvǿngà,” a:lòe. 18 Weyv́ngø vshuq rì nvng cìlcèrì nø, zø̀ng rvtnø shø̀l svmì wvrshì nø, lǿmshì sórí ripme. Piter gø angmaq nvng rip nø svmi lǿmshìe. 19 Welvng nø shvrúngshú vgo pèí, Ang coqcv́nrì nvng A:ngí shvngø: tnò mvshǿl dang Yesu svng rø:tnòe. 20 Yesuí ang svng vtá:nò nø, “Ngàí nø rvgaq tø̀m svng dèdè chaqdvp shø̀n bǿngà. Ngàí nø kadvgvp gø Yuda vsvng rì shvngbe dvkǿmshi we júrøt chø̀m taq gø, Noqngø̀m tø̀ngnø taq gø shvngøtshaq íe; mvyø̀:ní tiqpv̀n gø Ngàí mvshø̀nò. 21 Ngà svng pàwá èrøtnàe? Ngàí kapà shø̀nò we táa:pmà rì svng èrø:tnò lè. Ngàí shø̀nò rì shvngbe angmaqí sháòe,” a:lòe. 22 A:ngí yakà shø̀n bǿà kvt, shvnvngø rip we cìlcè tiq pèí Yesu svng mv́r vpaqò nø, “Shvrúngshú vgo pè svng Nà yadø vtv́nshi daq ma?” a:- lòe. 23 Yesuí ang svng, “Ngàí shǿn vléngònøng nø vléngò kà nàchakngà, shǿn vdu we kà shø̀nònøng nø pàwá Ngà svng nàpakngàe?” a:lòe. 24 Wekvt Annasí Ang nø wedø vdóngshaq, shvrúngshú vgo pè Kayafas yv́ng svng shøl dvzv́r bǿà. 25 Simon Piter nø wedøni rip nø svmi lǿmshi ke, angmaqí ang svng, “Nà gø Ang coqcv́nrì kèní tiq gǿ èí we mø̀í ma?” a:lòe. Ang māshì nø, “Ngà mvǿngà,” wae. 26 Piterí vnà sv́ng dárà pè ang rì angyang í we shvrúngshú vgo pè vshuq tiq gǿí ang svng, Kulwàng yv́ngø Ang nvng èv̀lshi dvgvp nà svng ngàí yv̀ng dv́rà we mø̀í ma?” a:lòe. 27 Wervt vrá tiq kvt Piter māshìe; wela:ngí dv̀nggú gì daqì. 28 Wekvt angmaqí Yesu svng Kayafas yv́ngkèní Gamzø kàciq rvtrà tø̀ngnø yv́ng svng shøla:tnà. Welvng nø sháng mvgágá íe. Iwe Yuda vsvng rì nø, mvshér dvzv́r we màhǿmshaq Shvle bóy v́mpà v́m lúnlv́m dvpvt, Gàmzø kàciq rvtrà tø̀ngnø svng mvzv́ngshì. 29 Wervt Pilat nø angmaq yv́ng svng léshi daqì nø, "Vsv̀ng yapè svng namaqí pà shvràlv́m v̄le ma?” wa rø:tnòe. 30 Angmaqí vtá:nò nø, “Vsvng yapè nø màshvla we mvwàò nìnø, nøngmaqí nà svng màtvleì,” a:lòe. 31 Pilatní angmaq svng, “Namaqí Ang svng èshølnø̀ng nø namaq dvrá vl dø Ang svng kà èngēshi bǿnø̀ng,” a:lòe. Yuda vsvng rìí ang svng, “Nøngmaq nø kagǿ svng gø shvtlv́m dvrá màvl,” a:lòe. 32 Yalòng nø Yesuí, Ang nø kadøwa shìlv́m í we, angmaq svng shø̀na:pmà tvrà dvhø̄mlv́m dvpvt íe. 33 Wekvt Pilat nø vrá tiq kvt Gàmzø kàciq rvt rà tø̀ngnø vdòng svng gòngá:mì dá:ngí, Yesu svng goa: tnà nø Ang svng, “Nà nø Yuda vsvng rì Koqkv́m èí ma?” wa rø:tnòe. 34 Yesuí vtá:nò nø, “Yakà nø nà nø:tní èshø̀:nò we í ma? Mø̀íni vsà:- ngí Ngà dang nà svng dètá we í ma?” a:lòe. 35 Pilatní vtá:nò nø, “Ngà nø Yuda vsvng ǿngàe ma? Nà dvci cèrì nvng shvrúngshú vjìrìí Nà shvtlv́m Ngà svng tèle bǿì we íe. Nàí kapà èwàa: pmà ma?” a:lòe. 36 Yesuí vtá:- nò nø, “Ngà móngdàn nø rvgaq yalòng taq mø̀í; Ngà móngdàn nø rvgaq yalòng taq la í nìnø, Ngà nø Yuda vsvng rì wur taq màtvlelv́m rvt ngà dvzv́rrìí mvzàn wà lú:ngò ni we íe. Iwe Ngà móngdàn nø rvgaq yalòng taq mø̀í,” a:lòe. 37 Wervtnø Pilatní Ang svng, “Wedø íni Nà nø koqkv́m ni èí ma?” a:lòe. Yesuí vtá:nò nø, ‘Nàí èshø̀:nò døni Ngà nø koqkv́m ǿngàe. Yalòng rvtnø ni Ngà svng ègv̀l dakngà nø dìnglòng dvpvt shvkse wáshìlv́m rvt Ngà nø rvgaq tø̀m svng gòng dakngà. Dìnglòng lap kaq wáshì rì kagǿ gø Ngà kà tae,” a:lòe. 38 Pilatní Ang svng, “Dìnglòng, èwalòng nø pà íe?” wa rø:tnò dá:ngí ang rá Yuda vsvng rì yv́ng svng léshìá: mì nø, “Yapè taq ngàí pà mvrà gø lá mvlúnò. 39 Iwe Shvle bóy rvtø̀ taq ngàí namaq svng tiq gǿ shvlángālv́m vtóng èv́lanøng dø ngàí namaq svng Yuda vsvng rì Koqkv́m yapè shvlángàì we svng èshòngnøng ma?” a:lòe. 40 Wekvt angmaq vrá tiq kvt vkiq nø, “Yapè nø mø̀í, Baraba mv̀ng shèlángasha,” a:lòe. Baraba nø tø̄lv́mshú tiq pè íe.
1 Wervtnø Pilatní Yesu svng shv́l dv̀ng vdip dvzá:ròe. 2 Cilce rìí gø, bv̀nghǿ vmō za:tnò nø Ang vgo taq shvmōò sórí shvmoq belaq yvnggúng tiq dùng Ang svng dvgwaòe. 3 Angmaqí, Yuda vsvng rì Koqkv́m pèá, gǿngzø̀l leq v̄l dvr, a:lò nø Ang svng mvwa vpaqòe. 4 Wekvt Pilat vrá tiq kvt léshìá:mì nø Yuda vsvng rì svng, “Eyv̀ngnøng, Yapè taq ngàí pà mvrà gø gún mvlú:nò we namaqí shálv́m rvt, Ang nø namaq yv́ng svng ngàí shøl dakngòe,” a:lòe. 5 Wekvt Yesu nø bv̀nghǿ vmō shvmōshaq, shvmoq belaq gø dvgwashaq léshì dvzv́r daqà nø, Pilatní angmaq svng, “Vsv̀ng yapè svng èyv̀ngnøng!” a:- lòe. 6 Shvrúngshú vjìrì nvng cìlcèrìí Ang svng yv̀ng bǿà chang angmaq vkiq lú:ngì nø, “Nàtaqò, nàtaqò,” wae. Iwe Pilatní angmaq svng, “Namaqí lè Ang svng èshv̀lnøng nø nàtaq bǿnø̀ng. Ngàí nø Ang taq pàmvrà gø gún mvlúnò,” a:lòe. 7 Yuda vsvng rìí ang svng vtá:nò nø, “Nøngmaq dvrá tiq lòng èv́lāìe. Ang nø Ang vdè svng Gvray Angcè pè v̄lshì rvtnø, dvrá welòng cv̀n nø Ang shí ràe,” a:lòe. 8 Pilatní yakà tá bǿà kvt téwa svre lú:ngì nø, 9 Gamzø̀ kàciq rvtrà tø̀ngnø vdòng svng vrá tiq kvt gòngá:mì nø Yesu svng, “Nà nø kayv́ng kèní èíe ma?” wa rø:tnòe. Inìgø Yesuí ang svng tiqkà gø màtá: nò. 10 Wervtnø Pilatní Ang svng, “Ngà svng Nàí kà mènàtv́nà ma? Yalà, Nà svng shvlànglv́m vmíng gø, Nà svng vtaqlv́m vmíng gø ngà vl we Nàí mèshánga ma?” a:lòe. 11 Yesuí ang svng vtá:nò nø, “Taqlap kèní èzí daqì we mø̀í nìnø, Ngà mvdv̀m nà nø pà vmíng vkv́ng gø mèvl. Wervtnø Ngà svng ètvp nø nà svng tèleng bǿngà pè mv̀ng mvrà té teē,” a:- lòe. 12 Yakà rvtnø Pilatní Ang svng shvlànglv́m mvtú láòe. Inìgø Yuda vsvng rì vkiq mvnshì nø, “Yapè svng nàí shèlà:ngò nìnø, nà nø Kesar rv̀mnvng mèí; vdè svng koqkv́m í dvzv́rshì we kagǿ gø Kesar dani pè svng poshú íe,” a:lòe. 13 Pilatní kà yarì tá bǿà rvt, Yesu svng shvlé daqà nø, Hebru kàí Gabbata, tǿò we Lóng pvlū tø̀m, kàngé rúngtv̀ng taq runge. 14 Wedvgvp nø Shvlebóy dvgǿshìlv́m angni í nø, tvné vyáng rvwè í ráì. Wekvt à:ngí Yuda vsvng rì kaq, “Eyv̀ngnøng, namaq Koqkv́mpè,” a:- lòe. 15 Wekvt rá angmaq vkiq lú:- ngì nø, “Esha:tnò, èsha:tnò, Ang svng nàtaqò,” wae. Pilatní angmaq svng, “Namaq Koqkv́mpè svng ngàí vtakngònøng ma?” a:lòe. Shvrúngshúrìí vtá:nò nø, “Kesar dani pè wa mø̀í nìnø dvgá koqkv́m mèv́lāì,” a:- lòe. 16 Wervtnø Pilatni, Yesu nø wurgáng taq vtaqlv́m, angmaq svng tvle bǿà. 17 Weyv́ng kèní angmaqí Yesu svng shv̀l bǿà. Wekvt Yesu nø Ang wurgáng tø̀ng Ang baqshì taqsórí, Vgō sharø zàng, a:lò yv́ng svng búngá:mì. Wezàng nø Hebru kàí, Golgota, tǿòe. 18 Weyv́ngø Ang svng angmaqí vtaqò nø, dvgá vní gǿ gø Ang nvng tiqdø talap tagǿ, Yesu nø dvhø̀ø vtaqòe. 19 Pilatní rugø̀m tiq gø̀m taq, YUDA VSVNG RÌ KOQKV́M, NAZARET PÈ YESU, wa vruò nø wurgang taq dvcaqòe. 20 Rugø̀m wegø̀m taq nø Hebru kàí gø, Latin kàí gø, Heleni kàí gø vrūshaq í rvtnø, Yuda vsvng mvmeí røòe. Kadø íe wani Yesu svng vtaqò zang nø wamà nvng tvp íe. 21 Wervtnø Yuda shvrúngshú vjìrìí Pilat svng, “Yuda vsvng rì Koqkv́mpè,” wa nø mènarūni; ‘Ngà nø Yuda vsvng rì Koqkv́mpè ǿngàe wa, Ang shǿnshíe’ wa nø mv̀ng nàruò,” a:- lòe. 22 Pilatní vtá:nò nø, "Ngàí kadø vrongònø̀ng nø wedø ídv̀ng wae,” a:-lòe. 23 Cìlcèrìí Yesu svng vtaq bǿà dá:ngí, Ang mvdv̀m bèlaq rì lushi nø vbi wál wádv̀ng, cìlcèrì tapè tawál vwalshìe. Vdòng belaq dùng gø íwe, wedùng nø taqmvtú kèní be høq dvpuq màdá raq yà:ngà we í dá:rì. 24 Wedø í rvtnø angmaq vrùng nø, “Laq mvdi:ngì; yadùng kagǿ vpvtlv́m í we shvwøn dóì,” wae. Yalòng nø Shànshér Kàru taq, “Ngà belaq rì nø angmaq vwālshì bǿì. Ngà bèlaq dùng dvpvt gø angmaq shvwøn doshì bǿì,” wa nø shøn yà:ngà kà dvhø̄mlv́m dvpvt íe. Wervtnø cìlcèrìí wedø wàò we íe. 25 Yesu Ang wurgáng shvnvngø angmè gø, angmè ang nvm mè Klopa ang chø̀mmè Mari gø, Makdala Mari gø ripme. 26 Yesuí angmè nvng Ang shóngshi we coqcv́n pè nø shvnvng yv́ng rip we yv̀ng bǿà kvt, A:ngí angmè svng, “Svmaré mèá, èyà:ngò, nvcèpè,” a:lòe. 27 Wedá:- ngí A:ngí coqcv́n wepè svng, “Eyà: ngò, nvmè,” a:lòe. Wervtø̀ kèní Mari svng nø coqcv́n wepèí, ang chø̀m svng shøl bǿà. 28 Yesuí bv̀nlì shvngbe wá dv́ng bǿà we svng sháshi rvtnø, Shànshér Kàru kàri dvgø̄mlv́m dvpvt, “Ngà tì bále,” wae. 29 Weyv́ng nø mvcattì dv̀n zvng we chúng tiqchv̀ng runge. Wervtnø angmaqí Husop tvmùm taq mvcattì vzønshaq tìrvmøt tiqpù dvcaqò dá:ngí, Ang nònggøp svng shvmø̄:ròe. 30 Yesuí mvcattì welòng aq bǿà kvt, “Dv́ng bǿngà,” wa nø, Ang vgo køt vngǿm nø, Ang shaq dvtná:mì. 31 Weni nø pungwà ni í nø, mèpvng ni nø Narni íe. Yuda vsvng rìò Narni nø shànshér we angni í rvt wurgang taq màchúng dø, hí giqò nø vnàng rì kalv́m dvpvt Yuda vsvng rìí Pilat svng rø:tnòe. 32 Wervtnø cìlcèrì di ráì nø, Yesu nvng tiqdø vtaqò we nvmlat pè nvng wápè hírì giqòe. 33 Iwe Yesu yv́ng tuq ráì nìnø, Ang nø to shi dá:rì we angmaqí yv̀ng bǿà rvt, Ang hí nø mvgiqò. 34 Iwe, cìlcè tiq pèí nø mvngjø:ngí Ang svràm pa yaq bǿà nìnø, shvwi nvng tìshø̀l chàng vyǿ daqì. 35 Namaq gø kv́mlv́m dvpvt, yarì yv̀ng yà:ngà pèí shvkse wàòe; ang shvksekà nø dìnge. Vrá, à:ngí shø̀:nò rì dìng we gø à:ngí sháòe. 36 Yadv́ng pv̀n íá:mì long nø, Shànshér Kàru taq, “Ang sharø tiq tancè gø mvgiqvm,” wakà dvhø̄mlv́m dvpvt íe. 37 Vrá Shànshér Kàru dvgá tiq ciq taq gø, “Angmaqí yaq bǿà pè svng angmaqí yv̀ng lu:ngòe,” wae. 38 Yadv́ng pv̀n mèpvng, Yuda vsvng kaq svre rvt mvyø̀ncèí Yesu coqcv́n wáshì we, Arimatia pè Yosep nø, Yesu vnàng rvdalv́m rvt Pilat svng røtshìe. Pilatní vmíng zí bǿà kvt, ang di nø Yesu vnàng kaòe. 39 Vzv̀ng tiq kvt Yesu yv́ng yaq dø̀:ngí di ráì pè Nikodimu gø, muraci nvng vjoci vshú we tvné vshø̀mcé joy dv́ngte lá:ngò nø dì ráì. 40 Wekvt angníí Yesu vnàng lùò nø, Yuda vsvng rì kǿmshi vtóng vl dø, ngórcì nvng laqtu:ní dø:pmoe. 41 Yesu svng vtaqò zàng taq nø kùlwàng tiq lòng vl we; kùlwàng welòng taq rá vsvng tiq gǿ gø shini mvkǿ:mò we lóngdùng dvgv̀mshv́r tiq lòng v̄le. 42 Weni nø, Yuda vsvng rì dvgǿshìlv́m angni í rvt, lóngdùng dvgv̀m lòng gø we shvnvngø ni í nø, angmaqí weyv́ngø Yesu svng vyà:lòe.
1 Wenár nvmlat ni taq, shini mvgá dvgvp, Makdala Mari nø lóngdùng dvgv̀m yv́ng svng sháng mvgágá dìá:mì kvt, dvgv̀m shø̄ lóng gø̀m vlúshaq í da we svng yv̀ng bǿà. 2 Wervt ang kvlv̀ngá:mì nø, Simon Piter nvng Yesu shóngshi we coqcv́n pè yv́ng svng tuq ráì nø, “Dvgv̀m kèní angmaqí Vkàngpè svng lùa:pmà, kayv́ng gv̀la:pmà we nøngmaqí mvsháì, wa angni lvngà svng dvtáòe. 3 Wervt Piter nvng coqcv́n wepè bungá:mì nø dvgv̀m svng dìá:mì. 4 Angní lvngà tiqdø kvlv̀ngá:mì we, coqcv́n wepèí Piter svng dvjunke bǿà nø, dvgv̀m yv́ng ang vzv̀ng tuqá:mì. 5 Ang ngúshì nø dvjaqò nìnø, laqtūnri wa vyálshì we yà:ngòe. Inìgø vdòng rv́m svng nø ang mvgòng. 6 Simon Piter nø ang mèpvng tuq ráì kvt lóngdùng dvgv̀m vdòng svng gòngá:mì. Wekvt laqtūnri wa vyálshì da we nvng, 7 Yesu vgo møqò we paqzit dung gø, laqtun rì nvng tiqyv́ngø mø̀í dø, rvdulshaq shènv̀ng zin we svng à:ngí yà:ngòe. 8 Dvgv̀m svng vzv̀ng tuq bǿì we coqcv́n wepè gø gòngá:mì nø yv̀ng bǿà rvt kv́m bǿi. 9 Inìgø Yesu nø shiyv́ng kèní vrá zun ràe, wa we Shànshér Kàru kà svng angní lvngàí shini mvrà:lò. 10 Wekvt coqcv́n wepèní nø chø̀m svng loá:mì. 11 Mari nø lóngdùng dvgv̀m vdàm lapmø rip nø ngøe. Ang wedø ngø sórí ngúshì nø dvgv̀m vdòng svng dvjaqò nìnø, 12 Yesu vnàng vyàla:pmà yv́ngø, belaq mùng gwashì we muqlàng dvzv́r vnígǿ nø, vgo lap tiq gǿ, hí lap tiq gǿ rung we svng yà:ngòe. 13 Wegǿ níí ang svng, “Svmaré mèá, pàwá èngøe?” a:lòe. A:ngí angni svng, “Ngà Vkàngpè angmaqí baqò nø kayv́ng gv̀la:pmà we mvshángò rvt ngønge,” a:lòe. 14 Wedø shø̀n dá:ngí ang lv́mposhì nìnø, Yesu weyv́ng rip we svng yv̀ng bǿà. Inìgø Yesu í we svng màmvshá: lò. 15 Yesuí, “Svmaré mèá, pàwá èngøe? Nàí kagǿ svng èláòe?” a:- lòe. Marií wepè nø kùlwàng vsòngpè íe lá:nò nø Ang svng, “Vshaq pèá, nàí Ang svng èbaqa:pmà nìnø, kayv́ng nàyàla:pmà we dètángà, ngàí baqlv́m íe,” a:lòe. 16 Yesuí ang svng, “Maria,” a:lòe. Ang lv́mposhi taqsórí Hebru kaí Ang svng, “Raboni,” a:lòe. Yakà nø, Svra pè, wa kà íe. 17 Yesuí ang svng, “Ngà svng mèzø̀mànøng; kadø íe wani Ngà nø Vpè yv́ng svng shini màrvlv́ngshaq ǿngàe. Iwe Ngà vnvmri svng èdivm nø angmaq svng, ‘Ngà nø, Ngà Vpè nvng namaq Angpè, Ngà Gvray nvng namaq Gvray yv́ng svng rvlv̀ngvme wae,’ èvlá:mò,” a:lòe. 18 Makdala Mari di ráì nø coqcv́nrì svng, Vkàngpè svng ngàí yv̀ng bǿngà, a:lòe. Vrá, A:ngí ang svng vl dá:ràrì shvngbe dvtáòe. 19 Nar nv̀mlat ni weni dørø̀m taq, coqcv́nrì nø Yuda vsvng rì kaq svre rvtnø bv́ngkà kvlaqshi nø vl dvgvp, Yesu nø angmaq dvhø̀ø̄ zvng rip ráì nø, “Mòngzø̀l lòng leq lúnnøng,” a:- lòe. 20 A:ngí wedø a:lò dá:ngí, angmaq svng Ang wur nvng Ang svràm pa dvtanshìe. Wervtnø coqcv́nrì nø Vkàngpè svng yv́ng lún bǿà rvt gvzà dvbù lú:ngì. 21 Yesuí rá angmaq svng, “Mòngzø̀l lòng leq lúnnøng; Vpèí Ngà svng dèzv́r dakngà dø, Ngàí gø namaq svng dvzárìe,” a:lòe. 22 A:ngí wedø a:lò dá:ngí, angmaq svng shaqí vhe:rò nø Shànshér Pvlacè nàtōnø̀ng. 23 Namaqí kagǿ svng mvrà èchutnanø̀ng nìnø, ang mvrà nø vchutshaq ívme. Namaqí kagǿ mvrà mèzaa nø̀ng nìnø, wegǿ mvrà nø v́ldv̀ng wae,” a:lòe. 24 Iwe Yesu weyv́ng di ráì dvgvp, tiqcé vní pè taqkèní Didimu tǿo we Toma nø angmaq nvng tiqdø màvl. 25 Wervtnø dvgá coqcv́nrìí ang kaq, “Vkàngpè svng nøngmaqí yv̀ng bǿshà,” a:lòe. A:ngí angmaq svng, “Ang wur taq shv̀mshi dv̄mmá yv̀ngò nø, dvmmá taq ngà wurhàm màrvzǿngshøng dv́ngte, Ang svràmpa dvmmá vdòng svng ngà wu:ri màmvnokngò dv́ngte nø, kadø ínìgø ngà mvkv́m,” a:lòe. 26 Tiqnár mèpvng, coqcv́nrì nø chø̀m vdòngø vrá mvngushi ke, Toma gø vbáè. Bv́ngkà gø kvlaqshaq yv́ngø, Yesu nø angmaq dvhø̀ø zvng rip ráì nø, “'Mòngzø̀l lòng leq lúnnøng,” a:lòe. 27 Wekvt Yesuí Toma svng, “Nà wurhàm èzúshi ra nø, Ngà wur svng èshupmà. Vrá nà wur èzúshi ra nø, Ngà svràmpa mènokngà, màkv́m mèwáshìni, èkv́m,” a:lòe. 28 Tomaí vtá:nò nø, “Ngà Vkàngpè nvng Ngà Gvrayé,” a:lòe. 29 Wervtnø Yesuí, “Nàí nø Ngà svng èyv̀ng bǿngà rvtnø wa èkv́me ma? Mvyà:ngò nìgø kv́mrì angmaq nø ìshøt igvn v̄le,” a:lòe. 30 Ang coqcv́nrì negv̀mø Yesuí wà yà:ngà we shálv́m mvshv́lpvrá dvgá dø mvme pv̀n kàru yabok taq màrushaq rì v̄le. 31 Iwe Yesu nø Gvray Angcè pè Kristu wepè ni í we svng namaq kv́m lúnlv́m rvt nvng èkv́mnø̀ng yv́ng kèní Ang bø̀ng vdòng taq namaqí gø̀nshaq lúnlv́m dvpvt yadv́ng pv̀n vrūaì we íe.
1 Yadv́ng pv̀n mèpvng Yesu nø, Tiberia tìnúng yv́ng coqcv́nrì svng vrá tiq kvt dvtánshìe. Dvtánshì lòng nø yadø íe. 2 Simon Piter nvng Didimu tǿò pè Toma nvng Galili móng Kana rvwá pè Nataniel nvng Zebedi angcè pèní nvng Ang coqcv́n dvgá vní pè gø tiqdø v̄l ke, 3 Simon Piterí angmaq svng, “Ngà nø ngā gøpkengvme,” a:lòe. Angmaqí ang svng, “Nøngmaq lvngà gø nà nvng dìlv́m íe,” a:lòe. Angmaq nø kùngshí taq zv́ngshìá:mì. Weyaq nø angmaqí pàgø gøp mvlú:nò. 4 Gá daqì dvgvp, Yesu nø tì vdàm pa ripme. Inìgø coqcv́nrìí nø Yesu í we màmvshá:lò. 5 Wekvt Yesuí angmaq svng, “Cv̀mré rìé, ngā tvp mèlúnnøng ma?” a:lòe. Angmaqí, “Mvlú:nì,” wa vtá:nòe. 6 Wekvt A:ngí angmaq svng, “Kungshi vbàng pa svng shǿmgún dègupnø̀ng, wekvt ngā èlún daqnø̀nge,” a:lòe. Angmaqí shǿmgún dvgup bǿà nìnø, shv́l gø mvdá:ngò høq ngā gvzà lún bǿà. 7 Wekvt Yesu shóngshi we coqcv́n pèí Piter svng, “Vkàngpè lvínì,” a:lòe. Wekvt Simon Piterí, Vkàngpè í we tá bǿà chang, ang góngsér írvt, ang mvdv̀m bèlaqí dvchvtshi nø, tìnúng vdòng svng dvgupshìá:mì. 8 Coqcv́n wápèla nø, ngā dv̀n í we shømgún shà:lo sórí, kùngshícè taq rvpshia:tni. Kadø íe wani angmaq nø tìrin kèní gvzà màsar, tvné vníyá rvdùng dv́ngte wa íe. 9 Vdàm svng angmaq kvngshì lú:ngì kvt, weyv́ngø shø̀l svmi taq, ngā gø, zidòng gø dvgángshaq v̄l da we angmaqí yà:ngòe. 10 Yesuí angmaq svng, “Namaqí akvt ègøp bǿshà ngā taqkèní tiq gola èluvtnøng,” a:lòe. 11 Wekvt Simon Piter nø kùngshí svng zv́ngshiá:mì nø, ngākàng tiqya pungwàcé vshøm go dv̀n vdeq we, shømgún long vdàm kaq shvla:tnà. Ngā wedv́ngte luq nìgø, shømgún lòng nø mvdíng. 12 Yesuí angmaq svng, “Sháng v́mpà èv́m ránø̀ng,” a:lòe. Ang nø Vkàngpè í we sháò rvtnø, coqcv́nrì tiq gǿí gø, ‘Nà nø kagǿ èíe?’ wa nø røt mvkā:mò. 13 Wekvt Yesuí zidòng nvng ngā lùò nø̀ angmaq svng zíòe. 14 Yalòng nø Yesu shìyv́ng kèní zun lú:ngì mèpvng, coqcv́nrì svng Ang dvtanshì we vshø̀m kvt wakvt íe. 15 Angmaq sháng v́mpà v́m bǿì dá:ngí, Yesuí Simon Piter svng, “Yohan angcè Simoná, yarì mvdv̀mø té Ngà svng nà èshóngshìe ma?” a:lòe. A:ngí ang svng, “Ie, Vkàngpèá, ngàí Nà svng shòng we Nàí èshángae,” a:lòe. A:ngí ang svng, “Ngà vyv̀ngrì shèv́māngà,” a:lòe. 16 Mèpvng vrá tiq kvt Yesuí ang svng, “Yohan angcè Simoná, Ngà svng nà èshóngshìe ma?” a:lòe. A:ngí Ang svng, “Ie, Vkàng pèá, ngàí Nà svng shòng we Nàí èshángàè,” a:lòe. Yesuí ang svng, “Ngà vyv̀ngcèrì èrokngāngà,” a:lòe. 17 Vshø̀m kvt wakvt Yesuí ang svng, “Yohan angcè Simoná, Ngà svng nàí èshònga ma?” a:lòe. Yesuí ang svng vshø̀m kvt wa kvt, “Ngà svng nàí èshòngà ma?” a:lò rvtnø Piter nøt dvshà lú:ngì nø Ang svng, “Vkàngpèá, í dv́ngte shvngbe Nàí èsháoe, Ngàí Nà svng shòng we nø Nàí èshángàe,” a:lòe. Yesuí ang svng, “Ngà vyv̀ngrì shèv́mangà. 18 Ngàí nà svng kàdøng v̄lvtnøng, nà gùchàngré èí dvgvp nø, nà nø nà wa juqnv́m ènv́mshì nø, kayv́ng di mèyǿ nìnø weyv́ng dí èlú:nòe. Iwe nà cèrǿng ra dvgvp nø, nà wur nàgàng nø, vsà:ngí nà svng juqnv́m ènv́mavt nø, nà di mèmèyǿ yv́ng svng èshøl bøe,” a:lòe. 19 (A:ngí yadø shø̀:nò we nø, Piter nø kadødø shì weí Gvray ngø̀r dvgùng shvring lúnlv́m í we gø̀mla dvta:nò kà íe.)Yakà shø̀n bǿà dá:ngí Yesuí ang svng, “Ngà mèpvng ècv̀n ra,” a:lòe. 20 Piter lv́mposhì nìnø, cáyaq dørøm vmpà vm dvga:pmí Yesu pøtpúm svng dø̀mkùng námshì sórí, “Vkàngpèá, Nà svng ènv̄mv̄m pè nø kagǿ íe ma? wa rø:tnò pè Yesu shóngshi we coqcv́n pèí cv̀na:tnà we svng yà:ngòe. 21 Piterí ang svng yv̀ng bǿà nìnø à:ngí Yesu svng, “Vkàngpèá, yapè nà, kadø í long ma?” a:lòe. 22 Yesuí ang svng, “Ang svng nø Ngà døng dak ni høq la v́l dvzv́r mvyǿngnø̀ng gø, nà pà shǿnrà vl ma? Nà mv̀ng nø Ngà mèpvng ècv̀n ra,” a:lòe. 23 Weyv́ng kèní, coqcv́n wepè nø mvshìlong, wakà yalòng nø, vnvm vchvng rì dvhø̀ø shv̀ngá:mì. Iwe Yesuí nø wepè svng, ang nø mvshì long, nø màa:lò. “Ang svng nø Ngà døng dak ni høq la v́l dvzv́r mvyǿng nønggø, nà pa shǿnrà vl ma?” mv̀ng a:lò we íe. 24 Yadv́ng pv̀n dvpvt shvkse wáshì nø vruò pè nø, coqcv́n yapè ni íe. Ang shvksekà nø dìng we svng nøngmaqí sháìe. 25 Yesuí wà yà:ngà we dvgá gø mvme pv̀n v̄le. Iwe we rì mvti mvni shvngbe la nàruò nìnø, nàruò we kàrurì nø rvgaq yalòng taq gø damvcv́ngni, wvng dvdv̄mòe.