यूहन्‍ना 1

कोन्‍छ्‍योककी सुङ मी जुजमला फेवु

1 थल्‍माला जम्‍बुलिङ ज्‍येङ्‍गुप सिनाङ गोमाला कोन्‍छ्‍योककी सुङ नोक, ती सुङ ति कोन्‍छ्‍योककी मुला नोक। तमा ती सुङ ति वुतुङ के कोन्‍छ्‍योक राङ यिनोक। 2 ती सुङ ति थल्‍मा नेज्‍यु कोन्‍छ्‍योककी मुला नोक। 3 तमा ती सुङ नेसुर राङ कोन्‍छ्‍योककी तेरी जम्‍बुलिङ ज्‍ये नाङ्‍सुङ, ज्‍येवु ति च्‍यिक साङ खोकी मिसिन माजोवु यिन। 4 खोरे ज्‍ये नङ्‍गुपतिवा तेरीकी ती सुङ नेसुर मिजी थोप्‍सुङ, ती मिजी ति मीतिवी वोसिर यिनोक। 5 ती वोसिर ति नक्‍तोमी वुङ्‍ला ग्‍यकिनोक, यिने ती नक्‍तोमीकी ती वोसिरला हाक्‍को माथुप। 6 तमा कोन्‍छ्‍योककी तङ्‍गुप मी मिरा च्‍यिक नोक, तीकी मिङ ति यूहन्‍ना यिनोक। 7 तीकी ती वोसिरकी कोर्ला पङ्‍बु तेरुप ताङ ती पङ्‍बु नेसुर तेरी मीतिवी ती वोसिरला तेपा किशी सिनी वावु यिन। 8 ती ति खुरुङ राङ वोसिर मिन, यिने ती वोसिरकी कोर्ला पङ्‍बु तेरुपला तिराङ वावु यिन। 9 तमा मीतिवा तेरीला ठछ्‍येली तेरुप ती वोसिर टेङ्‍बु ति जम्‍बुलिङला फेपिन नोक। 10 खो ति जम्‍बुलिङला राङ ज्‍युनोक, तमा दी जम्‍बुलिङ ति खोकी राङ ज्‍ये नाङ्‍सुङ, यिन्‍सिनाङ जम्‍बुलिङकी मीतिवी खोला ङो माशेनोक। 11 खो खोरे लुङ्‍बाला फेप्‍सुङ, यिने खोरे मीतिवी राङ खोला सेमला माला। 12 यिने सु सुकी खोला खोरो सेमला लानी खोला तेपा क्‍यावे, खोकी तिवाला कोन्‍छ्‍योककी पुज्‍युङपुम च्‍युङ्‍गुप ओङ्‍ज्‍येन नाङ्‍सुङ। 13 तमा तिवा ति मीकी ठक याङ्‍ना सेम नोजु याङ्‍ना मीकी नोवा नेसुर क्‍येवु मिन, यिने कोन्‍छ्‍योककी नोवा नेमा क्‍येवु यिन। 14 तमा ती सुङ ति मी जुजमला दाक्‍पी पर्ला ज्‍युसुङ। खोकी मोवा ङ्‍यिरा थोङ्‍सुङ, तमा ती मोवा ति कोन्‍छ्‍योककी च्‍यिक राङ वोतुप खोकी सेवुकी मोवा यिनोक। खो ति छासे कटिन ताङ टेङ्‍बुकी क्‍येङ नोक। 15 यूहन्‍नाकी खोकी कोर्ला थोर ग्‍यप्‍नी दुक सिनी मीतिवाला पङ्‍बु बिन्‍सुङ, “दी मी तीकी कोर्ला ‘ङ सिनाङ ज्‍युक्‍ला मिरा च्‍यिक फेप्‍कितो, खो ति ङ सिनाङ चोछ्‍ये वे, च्‍यिलासिसिन खो ति ङ क्‍येप सिनाङ गोमाला के ज्‍युनोक।’ सिनी ङे सिक्‍यावु ति खो राङ यिन।” 16 खोकी छाछिङी नेमा दाक्‍पुला नरीकी नरी कटिन मङ्‍मु थोप्‍नी वे। 17 कोन्‍छ्‍योककी ठिम ति मोशा नेमा राङ ङ्‍येतुप यिन, यिने कटिन ताङ टेङ्‍बु ति येशू ख्रीष्‍ट नेमा वावु यिन। 18 सी साङ नाम्‍साङ कोन्‍छ्‍योकला माथोङ वे। यिने पपा कोन्‍छ्‍योककी मुला च्‍यिक राङ वोतुप खोकी सेवुकी कोन्‍छ्‍योक सु यिन सिरुप ति दाक्‍पुला छ्‍या तेन्‍सुङ।

बप्‍तिस्‍मा तेरुप यूहन्‍नाकी पङ्‍बु बिन्‍दुप

19 यहूदीतिवी यरूशलेम नेसुर कोङ्‍यार छ्‍येतिवा ताङ लेवीतिवाला यूहन्‍नाकी चाला ताङ्‍नी तीला “ख्‍युरुङ सु यिन?” सिनी टि च्‍यिसुङ। 20 तमा यूहन्‍नाकी ताम्‍ङे माबावा क्‍यानी, “ङ ति ख्रीष्‍ट मिन।” सिनी टेङ्‍बो सिक्‍यासुङ। 21 तमा तिवी तीला “तुकै यिन्‍सिन ख्‍युरुङ सु यिन? ख्‍युरुङ एलिया यिन?” सिनी टिसुङ। तीकी “मिन।” सिनी सिक्‍यासुङ। येलुङ तिवी “ख्‍युरुङ कोन्‍छ्‍योककी लुङ्‍तेम्‍बा यिन?” सिनी टिसुङ। तमा तीकी “मिन।” सिनी सिक्‍यासुङ। 22 तमा येलुङ तिवी तीला “तुकै यिन्‍सिन ख्‍युरुङ सु यिन ङ्‍यिराङला सी। ङ्‍यिराङला टि तोङ्‍गुपतिवाला ङि्‍यरा टिलेन तेर गोकिवी। ख्‍युरुङ खुरुङला सु यिन सिनी सिवी?” सिनी टिसुङ। 23 तमा यूहन्‍नाकी कोन्‍छ्‍योककी लुङ्‍तेम्‍बा यशैयाकी सिक्‍यावु दोके “ङ ति दासा पाङ्‍थेरीला ‘चोवो फेवुकी थोक्‍ला लाम थेकाङ जो।’ सिनी थोर ग्‍यकुप वोरु यिन।” सिनी सिक्‍यासुङ। 24 यूहन्‍नाला ताम्‍ङे टेपला फरिसीतिवी तङ्‍गुपतिवी पर्ला ललाइकी येलुङ यूहन्‍नाला 25 “दोजो ख्‍युरुङ ख्रीष्‍ट साङ मिन, एलिया साङ मिन, कोन्‍छ्‍योककी लुङ्‍तेम्‍बा साङ मिन्‍सिन ख्‍योरो च्‍यिला मीतिवाला बप्‍तिस्‍मा बिन्‍दुप यिन?” सिनी टिसुङ। 26 तमा यूहन्‍नाकी “ङ याङ छ्‍यु थ्‍वोनी बप्‍तिस्‍मा तेरुप यिन। यिने ख्‍यिरा पर्ला मी मिरा च्‍यिक टङी लानी वे, खो सु यिन सिनी ख्‍यिरा ङो राङ मेशेवी। 27 खो ङे ज्‍युक्‍ला फेपुप यिन, यिन्‍सिनाङ ङ याङ खोकी शप्‍चेकी र्‍हाम्‍डोक डोलुप साङ पोमु मे।” सिनी सिक्‍यासुङ। 28 दी तेरी ताम्‍ङे ति यूहन्‍नाकी बप्‍तिस्‍मा बिन्‍दुप यर्दन चङ्‍बी फर्केन बेथानियाला च्‍युङ्‍गुप यिन।

कोन्‍छ्‍योककी लुक रुक येशू

29 ती सला तीला यूहन्‍नाकी येशू खोरो चाला फेपिन कितुप थोङ्‍नी, “ल्‍हो ताङ, जम्‍बुलिङ तेरीकी मीतिवाला दिक्‍पा ने थर ज्‍यितुप कोन्‍छ्‍योककी लुक रुक! 30 गोमाला ङे, ‘ङ सिनाङ ज्‍युक्‍ला मी मिरा च्‍यिक फेप्‍किवी। खो ङ सिनाङ छ्‍ये वे, च्‍यिलासिसिन खो ङ क्‍येवु सिनाङ गोमाला के ज्‍यु वोतुप यिन।’ सिनी सिक्‍यावु ति खो राङ यिन। 31 खो सु यिन सिनी ङे साङ ङो माशे, यिने ङ छ्‍यु थ्‍वोनी मीतिवाला बप्‍तिस्‍मा तेरुप ति इस्राएलकी मीतिवाला खो सु यिन सिनी ङो शे ज्‍यितुपला यिन।” सिनी सिक्‍यासुङ। 32 येलुङ यूहन्‍नाकी दुक सिनी पङ्‍बु बिन्‍सुङ, “देवाच्‍येन नेमा कोन्‍छ्‍योककी थु चाङ्‍मा ति गम्‍देर दोके क्‍यानी पाप्‍नी खोकी खला ज्‍यु वोतुप ति ङे थोङ्‍सुङ। 33 ङे साङ खोला ङो माशे, यिने छ्‍यु थ्‍वोनी बप्‍तिस्‍मा तेरुपला ङला तङ्‍गुप तीकी ‘चुका मी तीकी खला कोन्‍छ्‍योककी थु चाङ्‍मा पाप्‍नी ज्‍यु वोतुप ख्‍योरो थोङ्‍गिवे, ती ति कोन्‍छ्‍योककी थु चाङ्‍मा नेमा बप्‍तिस्‍मा नङ्‍गुप मी यिन सिनी ख्‍योरो हाक्‍कोकितो।’ सिनी ङला सुङ्‍सुङ। 34 ती ताम्‍ङे ति ङे थोङ्‍सुङ, तुक क्‍यानी खो ति कोन्‍छ्‍योककी सेवु यिन सिनी ङे पङ्‍बु बिनिन।”

येशूकी लोमा तङ्‍बुतिवा

35 ती सला तीला येलुङ यूहन्‍ना ति खोरो लोमा मिरा ङ्‍यीकी मुला लानी देन वोतुप पेला 36 येशू तिवी चा नेसुर फेपिन कितुप थोङ्‍नी तीकी “ल्‍हो ताङ, कोन्‍छ्‍योककी लुक रुक ति दी राङ यिन!” सिनी सिक्‍यासुङ। 37 यूहन्‍नाकी तुक सिक्‍यासिमा तीकी मुला वोतुप खोरो लोमा मिरा ङ्‍यी येशूकी तिङ्‍ला तिङ्‍यासुङ। 38 ती थोङ्‍सिमा येशू तिवी थाकाला ग्‍युर्नी, “ख्‍यिराङ काङ छोल्‍गिवी?” सिनी टिन नाङ्‍सुङ। तमा तिवी खोला “रब्‍बी, कनी ज्‍युकिवी?” सिनी सिक्‍यासुङ। (दी रब्‍बी सिक्‍यावु तेन्‍दोक ति गेकेन यिन।) 39 खोकी तिवाला “ख्‍यिराङ शोक, तमा ख्‍यिरा थोङ्‍गिवी।” सिनी सुङ्‍सुङ। तमा तिवा खोकी मुला राङ गल्‍नी खो ज्‍युवु दासा ति ल्‍हानी ती छेर्मु ते राङ शासा देसुङ। ती पेला ति गोमी छ्‍युजी ज्‍यी चोयी गाल्‍नोक। 40 यूहन्‍नाकी ताम्‍ङे थोनी येशूकी तिङ्‍ला तिङ्‍योकुप मिरा ङ्‍यीकी पर्ला मिरा च्‍यिक ति सिमोन पत्रुसकी नुप अन्‍द्रियास नोक। 41 तीकी येशूला ठेसिमा तेरी सिनाङ गोमाला खोरो उज्‍यु सिमोनकी चाला गल्‍नी, “ङ्‍यिरा याङ मसीहला ठेसुङ।” सिनी सिक्‍यासुङ। (ती मसीह सिक्‍यावु तेन्‍दोक ति ख्रीष्‍ट यिन।) 42 तमा तीकी खोरो उज्‍यु सिमोनला येशूकी चाला टिनी वासुङ। सिमोनला थोङ्‍नी येशूकी तीला “ख्‍युरुङ ति योआनेसकी पुज्‍युङ सिमोन यिन, यिने त याङ ख्‍युरुङला केफास सिनी मिङ ज्‍योकितो।” सिनी सुङ्‍सुङ। (केफासकी ग्रीक ताम्‍ङे ति पत्रुस यिन।)

येशूकी फिलिप ताङ नथानेलला कतङ्‍गुप

43 ती सला तीला येशू गालील लुङ्‍बाला फेपुप सिनी तेन्‍तेन क्‍यासुङ। ती पेला खोकी फिलिप सिरुप मी यीला ठेनी तीला “ङे तिङ्‍ला तिङ्‍यो।” सिनी सुङ्‍सुङ। 44 ती फिलिप ति अन्‍द्रियास ताङ पत्रुसकी युल बेथसेदा ग्‍येसाकी मी यिनोक। 45 तमा फिलिप तीकी नथानेलला ठेनी, “मोशाकी कोन्‍छ्‍योककी सुङला टिवु ताङ कोन्‍छ्‍योककी लुङ्‍तेम्‍बातिवी टिवु ती मी तीला ङ्‍यिरा ठेसुङ। खो याङ नासरत नेसुर फेवु योसेफकी पुज्‍युङ येशू के यिनोक।” सिनी सिक्‍यासुङ। 46 तमा ती थोनी नथानेलकी फिलिपला “नासरत नेसुर काङ ल्‍यामु वुङ थुप्‍किवी रो?” सिनी सिक्‍यासुङ। यिने फिलिपकी “वानी ल्हो ताङ।” सिनी सिक्‍यासुङ। 47 तमा नाथनेल ति खोरो चाला वुङ्‍यिन कितुप थोङ्‍नी येशूकी तीला “ल्‍हो ताङ, ती ति वुतुङ के टेङ्‍बु वोतुप इस्राएलकी मी यिनोक। तीकी मुला काङ साङ जिनोक मे।” सिनी सुङ्‍सुङ। 48 तमा नथानेलकी येशूला “गेकेनकी ङला चुक क्‍यानी ङो शेसुङ?” सिनी टिसुङ। तमा येशूकी तीला “फिलिपकी ख्‍युरुङला कतोङ्‍गुप सिनाङ गोमाला के ङे ख्‍युरुङला अन्‍जीरकी दोङ्‍बी वोक्‍ला वोतुप थोङ्‍सुङ।” सिनी सुङ्‍सुङ। 49 तमा नथानेलकी येशूला “रब्‍बी, रब्‍बी याङ कोन्‍छ्‍योककी सेवु के यिन, तमा इस्राएलकी ग्‍येल्‍वु के यिनोक।” सिनी सिक्‍यासुङ। 50 तमा येशूकी तीला सुङ्‍सुङ, “काङ ङे ख्‍युरुङला अन्‍जीरकी दोङ्‍बी वोक्‍ला वोतुप थोङ्‍सुङ सिनी सिक्‍यावु तप्‍की ख्‍योरो ङला तेपा क्‍यावु यिन? ख्‍योरो दी सिनाङ मङ हलेवु लाकातिवा थोङ्‍गितो।” 51 तमा येशूकी तीला “वुतुङ के ङ ख्‍युरुङला टेङ्‍बो सिरिन, ख्‍योरो देवाच्‍येन सेङ्‍गुप ताङ देवाच्‍येनकी लेन क्‍योलुप थुतिवा ङ मी पुज्‍युङकी खला येर जेकुप ताङ मर पपुप थोङ्‍गितो।” सिनी सुङ्‍सुङ।

यूहन्‍ना 2

काना ग्‍येसाला जेन्‍दीकी डेन

1 तेमी ङि्‍यमा सुमकी छेर्मु गालील लुङ्‍बाकी काना सिरुप ग्‍येसाला जेन्‍दी यी नोक। ती जेन्‍दीला येशूकी आमा साङ वानोक। 2 येशू ताङ खोकी लोमातिवाला साङ ती जेन्‍दीला केच्‍या क्‍यानी खोतिवा ते राङ फेप्‍नोक। 3 तमा डेन्‍बुतिवाला तेरुप गुन्‍डुम छ्‍याङ सिन्‍दुप थोङ्‍नी येशूकी आमा तीकी खोला “जेन्‍दीकी मीतिवी मुला गुन्‍डुम छ्‍याङ सिन्‍नोक।” सिनी सिक्‍यासुङ। 4 तमा येशूकी खोरो आमाला “ममो, च्‍यिला ङला ती ताम्‍ङे किवी? तन्‍दा सेक ङे तुजे मालेप वे।” सिनी सुङ्‍सुङ। 5 ती ज्‍युक्‍ला येशूकी आमा तीकी तेकी लावातिवाला “खोकी ख्‍यिराङला काङ सुङ्‍गिवे, तुकै राङ किसा।” सिनी सिक्‍यासुङ। 6 ते तो मिसिन छ्‍यु लिटर सयी शोङ्‍गुप दो पुङ्‍नी जोवु छ्‍यु देकुप दोजुम टुक चोके ज्‍याक्‍नोक। ती दोजुम ति यहूदीतिवी खोप्‍राङ चाङ्‍मा जोप लुक्‍सु तेन्‍दुपला थोकिनोक। 7 तमा येशूकी लावातिवाला “ती दोजुमतिवी नाङ्‍ला छ्‍यु क्‍येङ।” सिनी सुङ्‍सुङ। खोकी तुक सुङ्‍सिमा लावातिवी ती दोजुमतिवी नाङ्‍ला खाटेक छ्‍यु क्‍येङ्‍सुङ। 8 येलुङ खोकी तिवाला “त दोजुम नाङगी छ्‍यु ति चेयी पुनी डेन टडिक कितुप मी छ्‍येला खुर्नी बिन।” सिनी सुङ्‍सुङ। तमा तिवी खोकी सुङ्‍गुप दोके राङ क्यासुङ। 9 तमा डेन टडिक कितुप मी छ्‍ये तीकी ती गुन्‍डुम छ्‍याङला ग्‍युरुप छ्‍यु ति थुनी ल्‍हासुङ। यिने तीला ती गुन्‍डुम छ्‍याङ ति कनी नेसुर वासुङ सिनी छ्‍या मिन्‍दुक, यिने छ्‍यु खुन वावु लावातिवाला ति छ्‍या नोक। तमा ती डेन टडिक कितुप मी छ्‍ये तीकी माक्‍पाला कताङ्‍नी दुक सिक्‍यासुङ, 10 “तेरी मीतिवी गोमाला गुन्‍डुम छ्‍याङ कर्मा ति तेर्किवी, यिने डेन्‍बुतिवा अलायी जिसिमा छ्‍याङ ज्‍यपु ति तेर्किवी। यिने अच्‍युकी याङ दुका तेरी सिनाङ गुन्‍डुम छ्‍याङ कर्मा ति तन्‍दा सेक लु च्‍यिनोक।” 11 दी हलेवु त ति गालील लुङ्‍बाकी काना सिरुप ग्‍येसाला येशूकी थल्‍माला छ्‍या तेन्‍दुप त यिन। खोकी खोरुङला वोतुप मोवा ति छ्‍या तेन्‍सिमा खोकी लोमातिवी खोला तेपा क्‍यासुङ। 12 ती ज्‍युक्‍ला येशू खोरो आमा ताङ नुपतिवा ताङ लोमातिवी मुला मर कफर्नहुम ग्‍येसाला फेप्‍नी ङ्‍यिमा चेयी ते राङ ज्‍युसुङ।

येशूकी यहूदी ल्हङाङ चाङ्‍मा जो नङ्‍गुप

13 ती पेला यहूदीतिवा थरुप तुछ्‍येन वानिङ सिन्‍नोक। तुक क्‍यानी येशू तेसुर येर यरूशलेमला फेप्‍सुङ। 14 ते यहूदी ल्‍हङाङकी लेङाङला खोकी लाङ ताङ लुक ताङ गम्‍देर चोङ्‍गुप मीतिवा ताङ च्‍योक्‍ची खला देनी टङ्‍गा ज्‍येयी वोतुप मीतिवा थोङ्‍सुङ। 15 ती थोङ्‍सिमा खोकी थाक्‍पा लानी तल्‍च्‍येक जोनी लुक ताङ लाङ मुला तिवा तेरीला ल्‍हङाङ तेसुर तेन्‍नी ताङ्‍सुङ। तमा खोकी टङ्‍गा ज्‍येप मीतिवी टङ्‍गातिवा थरा थुरा ताङ्‍नी च्‍योक्‍चीतिवा आलोक ग्‍यप्‍सुङ। 16 खोकी गम्‍देर चोङ्‍गुपतिवाला “देसुर दिवा टाक्‍टुक खुर्नी ग्‍युक। तफेन्‍ला ख्‍यिरा ङे पपी खाङ्‍बाला छोङ कितुप हाट माजोवा।” सिनी सुङ्‍सुङ। 17 ती थोङ्‍सिमा खोकी लोमातिवी कोन्‍छ्‍योककी सुङ नाङ्‍ला “चोवोकी ल्‍हङाङकी थोक्‍ला ङे सेम ति छासे छिकिनोक।” सिनी टि वोतुप ति नासाम शार्सुङ। 18 खोकी तुक क्‍यावु थोङ्‍सिमा यहूदी गोमा कितुप मी छ्‍येतिवा खोकी चाला वानी, “काङ ख्‍युरुङला दुकै कितुप ओङ्‍ज्‍येन वे? वोसिन ङ्‍यिराङला चुका त छ्‍या देन्गिवी?” सिनी खोला टिसुङ। 19 तमा येशूकी तिवाला “दी ल्‍हङाङ ति र्‍होम, तमा ङ ङ्‍यिमा सुमला राङ दीला येलुङ येर लोङ्‍यिन।” सिनी सुङ्‍सुङ। 20 तमा यहूदीतिवी खोला “दी ल्‍हङाङ जोपला लो खल ङ्‍यी ताङ टुक सेक थोवु यिन। ख्‍योरो चुक क्‍यानी दीला ङ्‍यिमा सुमला राङ येर लोङ थुप्‍किवी रो?” सिनी सिक्‍यासुङ। 21 यिने खोकी सुङ्‍गुप ल्‍हङाङकी तेन्‍दोक ति खोरो जुकी कोर्ला सुङ्‍गुप यिन। 22 तमा खो टुङ्‍नी ङोसु लासिमा तिराङ लोमातिवाला खोकी तुक सुङ्‍गुप ति नासाम शार्नोक। तमा तिवी कोन्‍छ्‍योककी सुङ ताङ येशूकी सुङ्‍गुप सुङला तेपा क्‍यासुङ।

येशूला तेरी मीतिवा छ्‍या वे

23 यहूदीतिवा थरुप तुछ्‍येनला येशू यरूशलेमला राङ ज्‍युनी नोक। ते मीतिवा बङीकी खोकी क्‍यावु हलेवु ततिवा थोङ्‍सुङ, तमा तिवी खोला तेपा क्‍यासुङ। 24 यिने येशूकी तिवाला लो राङ मातेन, च्‍यिलासिसिन खोकी मीतिवा तेरीला छ्‍या नोक। 25 मीतिवा चुकै वे सिनी सी साङ खोला लोप मोगोनोक, च्‍यिलासिसिन मीतिवी सेमला काङ वे सिरुप ति खोला छ्‍या नोक।

यूहन्‍ना 3

येशूकी निकोदेमसला येन्‍देन नङ्‍गुप

1 ते फरिसी छ्‍योक्‍पाकी मीतिवी पर्ला निकोदेमस सिरुप यहूदीतिवाला गोमा कितुप मी मिरा च्‍यिक नोक। 2 ती निकोदेमस ति ङ्‍यिम्‍ज्‍यिक नुपला येशूकी चाला वानी, “गेकेन, गेकेन याङ कोन्‍छ्‍योककी तङ्‍गुप यिन सिरुप ति ङ्‍यिराङला छ्‍या वे। च्‍यिलासिसिन कोन्‍छ्‍योक गेकेनकी मुला मेतुप यिन्‍सिन गेकेनकी क्‍या नङ्‍गुप हलेवु ततिवा ति सी साङ छ्‍या देन मुथुपी।” सिनी सिक्‍यासुङ। 3 तमा येशूकी तीला “वुतुङ के ङ ख्‍युरुङला सिरिन, मीतिवा लोङ माक्‍येसुङ सिसिन सु साङ कोन्‍छ्‍योककी ग्‍येल्‍खाप थोङ मुथुपी।” सिनी सुङ्‍सुङ। 4 निकोदेमसकी खोला “मी गावा गल्‍सिमा चुक क्‍यानी क्‍ये थुप्‍किवी रो? काङ आमी खोकला शुनी येलुङ क्‍येकिवी रो?” सिनी टिसुङ। 5 तमा येशूकी तीला सुङ्‍सुङ, “वुतुङ के ङ ख्‍युरुङला सिरिन। छ्‍यु ताङ कोन्‍छ्‍योककी थु चाङ्‍मा नेमा माक्‍येसुङ सिसिन सु साङ कोन्‍छ्‍योककी ग्‍येल्‍खापला शुक मुथुपी। 6 जु नेमा क्‍येवु ति जु यिन, यिने कोन्‍छ्‍योककी थु चाङ्‍मा नेमा क्‍येवु ति थु यिन। 7 तुक क्‍यानी ङे ख्‍युरुङला लोङ क्‍ये गोकिवी सिनी सिक्‍यावु ताम्‍ङेला हलेवा माकी। 8 वुर्तुक ति खोरो नोवाला राङ ग्‍यकिवी। ख्‍योरो वुर्तुक ग्‍यपुप वोरु ति थोकिवी, यिने ती वुर्तुक कनी नेसुर वावु ताङ कनिवा डिवी सिरुप ति हाक्‍मोकोवी। कोन्‍छ्‍योककी थु चाङ्‍मा नेमा क्‍येवु मी ति तेरी तुकै राङ यिन।” 9 तमा निकोदेमसकी येशूला “ला! चुक क्‍यानी तुकै वुङ थुप्‍किवी रो?” सिनी टिसुङ। 10 येशूकी तीला सुङ्‍सुङ, “ख्‍युरुङ इस्राएलकी गेकेन यिन्‍सिनाङ ती ताम्‍ङे ति हाक्‍मोकोवी? 11 वुतुङ के ङ ख्‍युरुङला सिरिन, ङि्‍यरा काङ शेवु ति सिरिन, तमा काङ थोङ्‍गुप ति पङ्‍बु तेरिन। यिन्‍सिनाङ ङ्‍यिरा पङ्‍बु बिन्‍दुप ति ख्‍यिरा मेङ्‍येन्‍दिवी। 12 ङे ख्‍यिराङला जम्‍बुलिङकी ताम्‍ङे सिक्‍यासिनाङ तेपा मिकिनोक, तुकै यिन्‍सिन चुक क्‍यानी देवाच्‍येनकी ताम्‍ङे सिक्‍यासिन तेपा कि थुप्‍किवी रो? 13 देवाच्‍येन नेमा वावु ङ मी पुज्‍युङ मिसिन यम्‍बा सु साङ देवाच्‍येनला मागाल वे। 14 दासा पाङ्‍थेरीला मोशाकी सेर्मी रुल जोनी जोवाकी लोला लङ्‍गुप दोके मी पुज्‍युङ साङ लोङ गोकिवी। 15 ती ति खोला तेपा कितुप तेरीला नाम्‍साङ मिशिवु मिजी थोपुपला यिन। 16 कोन्‍छ्‍योककी जम्‍बुलिङकी मीतिवाला दुका ङ्‍यिङ्‍ज्‍ये क्‍या नाङ्‍नी खोकी च्‍यिक राङ वोतुप सेवु ति जम्‍बुलिङला ताङ्‍सुङ। ती ति सी खोला तेपा किवे, तिवा ङ्‍येलाला मोडोशी, यिने नाम्‍साङ मिशिवु मिजी थोप्‍शी सिनी यिन। 17 कोन्‍छ्‍योककी खोरे सेवु जम्‍बुलिङला तङ्‍गुप ति जम्‍बुलिङला ठिम कितुपला मिन, यिने खोकी सेवु नेसुर जम्‍बुलिङला र्‍होकुपला यिन। 18 सी खोला तेपा किवे, तीला ठिम मोफोकिवी। यिने तेपा मिकिवुतिवाला ति गोमाला के ठिम फोक्‍नी वे, च्‍यिलासिसिन तिवी कोन्‍छ्‍योककी च्‍यिक राङ वोतुप सेवुला तेपा माक्‍यावु तप्‍की यिन। 19 ती ठिम फोकुप ति दी यिन, कोन्‍छ्‍योककी जम्‍बुलिङला वोसिर तङ वे, यिने मीतिवा दुक्‍टा गलुप तप्‍की वोसिरला सिनाङ नक्‍तोमीला मङ सेमला गाल। 20 दुक्‍टा कितुप तेरी मीतिवा वोसिरला गा मिकिवी, तमा वोसिरकी चाला मेङ्‍गिवी। च्‍यिलासिसिन तिवा खोरो क्‍यावु दुक्‍टा ति मीतिवी थोङ्‍गिवी सिनी ज्‍यिवा किवी। 21 यिने टेङ्‍बु कितुपतिवा वोसिरकी चाला गिवी, च्‍यिलासिसिन तिवी क्‍यावु लाका ति वुतुङ के कोन्‍छ्‍योक नेमा राङ क्‍यावु यिन सिनी मी यम्‍बाला ठछ्‍येली हाक्‍को ज्‍यितुपला यिन।”

यूहन्‍नाकी येशूकी कोर्ला पङ्‍बु बिन्‍दुप

22 ती सुङ्‍सिमा येशू खोरो लोमातिवा ताङ मुला यहूदिया लुङ्‍बाला फेप्‍नी ते ङ्‍यिमा चेयी पर सेक ज्‍युनी मीतिवाला बप्‍तिस्‍मा नाङ्‍सुङ। 23 तमा यूहन्‍नाकी साङ सालीम सिरुप दासाकी चाला वोतुप एनोनला मीतिवाला बप्‍तिस्‍मा तेर्किनोक, च्‍यिलासिसिन ते छ्‍यु बङी वोतुप तप्‍की यिन। मीतिवा ङ्‍यिमी टेङ यूहन्‍नाकी चाला वानी बप्‍तिस्‍मा लङ्‍गिनोक। 24 ती पेला सेक यूहन्‍ना ति चोन्‍खाङला माशोर्नोक। 25 तमा यूहन्‍नाकी लोमातिवा ताङ ललाइ यहूदी मी यीकी पर्ला जु चाङ्‍मा जोप यहूदी लुक्‍सुकी कोर्ला लप्‍सिर ग्‍यक्‍टी चेसुङ। 26 ती ज्‍युक्‍ला यूहन्‍नाकी लोमातिवा यूहन्‍नाकी चाला वानी, “गेकेन, गोमाला गेकेन ताङ मुला यर्दन चङ्‍बी फर्केनला वोतुप गेकेनकी पङ्‍बु बिन्‍दुप ती मी ति मीतिवाला बप्‍तिस्‍मा तेरिन नोक, तमा मीतिवा तेरी खोकी चाला डिनोक।” सिनी सिक्‍यासुङ। 27 तमा यूहन्‍नाकी तिवाला दुक सिक्‍यासुङ, “कोन्‍छ्‍योककी देवाच्‍येन नेमा मानाङ्‍सिन मीकी काङ साङ ङ्‍ये मुथुपी। 28 ‘ङ ति ख्रीष्‍ट मिन, यिने खो सिनाङ गोमाला तङ्‍गुप ति यिन।’ सिनी ङे सिक्‍यावु ताम्‍ङेला पङ्‍बु तेरुप ति ख्‍यिराङ राङ यिन। 29 नमाला जेन्‍दी कितुप ति माक्‍पा यिन, यिने माक्‍पी क्‍योल्‍मिन ति माक्‍पी चाला लान देनी माक्‍पी वोरु थोसिमा छासे गा किवी। तुक राङ क्‍यानी ङला छासे गा ला वे। 30 खो ति मङ मङ फेल गोकिवी, ङ ति मङ मङ ङ्‍युङ गोकिवी।”

देवाच्‍येन नेमा फेवु सेवु

31 “देवाच्‍येन नेमा फेवु ति तेर ताङ सिनाङ चोछ्‍ये वे। जम्‍बुलिङकी मी ति जम्‍बुलिङकी मी राङ यिन, तमा जम्‍बुलिङकी थोक्‍ला तिराङ ताम्‍ङे किवी। यिने देवाच्‍येन नेमा फेवु ति तेरी सिनाङ चोछ्‍ये वे। 32 तमा खोकी देवाच्‍येन नेमा काङ थोङ्‍गुप ताङ काङ थोवु ति पङ्‍बु नङ्‍गिवी। यिन्‍सिनाङ सी साङ खोकी सुङ्‍गुप पङ्‍बुला तेपा मिकिवी। 33 यिने सी खोकी पङ्‍बुला तेपा किवे, तीकी कोन्‍छ्‍योक ति टेङ्‍बु वे सिनी तेन्‍तेन किवी। 34 कोन्‍छ्‍योककी तङ्‍गुप तीकी कोन्‍छ्‍योककी सुङ लप्‍किवी, च्‍यिलासिसिन कोन्‍छ्‍योककी तीला खोकी थु चाङ्‍मा छासे मङ्‍मु नङ्‍गुप तप्‍की यिन। 35 पपा कोन्‍छ्‍योककी खोरे सेवुला ङ्‍यिङ्‍ज्‍ये क्‍या नाङ्‍नी तेरी ओङ्‍ज्‍येन ति खोला चेक तेन नाङ्‍सुङ। 36 सी कोन्‍छ्‍योककी सेवुला तेपा किवे, तीला नाम्‍साङ मिशिवु मिजी थोप्‍किवी। यिने सी कोन्‍छ्‍योककी सेवुला तेपा मिकिवे, तीला ती मिजी मोथोपिवी, बोरु कोन्‍छ्‍योककी पर्च्या तीकी खला ख्‍येल्‍गिवी।”

यूहन्‍ना 4

येशूकी सामरी पुम्‍पेजी मुला अरा उरा सुङ्‍गुप

1 येशूकी यूहन्‍नाकी सिनाङ मङ लोमातिवा जोवु ताङ बप्‍तिस्‍मा नङ्‍गुप ताम्‍ङे फरिसीतिवी थोवु ति येशूकी हाक्‍कोनोक। 2 यिने बप्‍तिस्‍मा नङ्‍गुप ति येशूकी मिन, खोकी लोमातिवी तेर्किनोक। 3 ती ताम्‍ङे हाक्‍कोनी येशू खोकी लोमातिवा ताङ मुला यहूदिया लुङ्‍बा क्‍युर ज्‍याक्‍नी येलुङ गालील लुङ्‍बाला लोक्‍नी फेपिन नोक। 4 खो फेपुप पेला सामरिया लुङ्‍बा नेवा क्‍यानी फेप गोकिनोक। 5 खो फेप्‍सालेन्‍सिन सामरिया लुङ्‍बाकी सुखार सिरुप ग्‍येसाला लेप्‍सुङ। ती ग्‍येसा ति याकूबकी खोरो पुज्‍युङ योसेफला बिन्‍दुप शिङगी चिप्‍ला राङ ख्‍येल्‍गिनोक। 6 तमा ते याकूबकी जोवु टोम्‍बा यी नोक। येशू युक्‍सा युक्‍सा येन छ्‍येतुप तप्‍की ती टोम्‍बी चाला ज्‍युसुङ। ती पेला ङ्‍यिमी गुङगी छ्‍युजी च्‍यिङ्‍ङी चोयी गाल्‍नोक। 7 ते सामरी पुम्‍पेजा यी छ्‍यु च्‍यकुपला वानोक। तमा येशूकी तीला “ङला थुङ्‍गुप छ्‍यु चेयी नाङ्‍नी।” सिनी सुङ्‍सुङ। 8 ती पेला खोकी लोमातिवा ति साप समा ङ्‍योपला ग्‍येसाला गाल्‍नोक। 9 तमा पुम्‍पेजा तीकी खोला “अच्‍यु ति यहूदी यिन, ङ ति सामरी पुम्‍पेजा यिन। चुक क्‍यानी अच्‍यी ङला छ्‍यु नाङ सिनी सुङ्‍गुप यिन?” सिनी सिक्‍यासुङ। (यहूदीतिवा सामरीतिवी मुला काङ साङ ख मिडिक्‍नोक।) 10 तमा येशूकी ती पुम्‍पेजा तीला सुङ्‍सुङ, “ख्‍युरुङ कोन्‍छ्‍योककी ङ्‍येम्‍बा ताङ ख्‍युरुङला छ्‍यु लोङ्‍गुप मी ति सु यिन सिनी ङो शेसिन तीला ख्‍योरे लोङ्‍गुप्‍जा, तमा खोकी ख्‍युरुङला मिजी तेरुप छ्‍यु तेरुप्‍जा।” 11 तमा ती पुम्‍पेजा तीकी येशूला “अच्‍यी लोला याङ छ्‍यु च्‍यकुप नेक्‍योक साङ मे, दी टोम्‍बा साङ तिङ्‍मु वे। तुक क्यानी अच्‍यी कनी नेसुर मिजी तेरुप छ्‍यु ति खुर्नी वुङ थुप्‍किवी रो? 12 काङ अच्‍यु ङ्‍यिरा हङ्‍गावा याकूब सिनाङ छ्‍ये यिन रो? तीकी दी टोम्‍बा ति ङ्‍यिरा थोक्‍ला जोनी बिन्‍दुप यिन। तमा ती ताङ तीकी पेजातिवा ताङ तीकी रा छ्‍युङ्‍मातिवा तेरीकी दी छ्‍यु थुवु यिन।” सिनी सिक्‍यासुङ। 13 तमा येशूकी तीला दुक सुङ्‍सुङ, “दी छ्‍यु थुङ्‍गुपतिवा तेरीला येलुङ कोम्‍बा लङ्‍गिवी, 14 यिने ङे तेरुप छ्‍यु थुङ्‍गुपतिवाला नाम्‍साङ कोम्‍बा मालङ्‍गिवी। तमा ती छ्‍यु ति तिवी मिजी नेमा नरी दोलुप छ्‍यी पुङ दोके च्‍युङ्‍नी तिवाला नाम्‍साङ मिशिवु मिजी तेर्किवी।” 15 तमा ती पुम्‍पेजा तीकी खोला “अच्‍यो, ती छ्‍यु ति ङला नङ्‍नी ङला नाम्‍साङ कोम्‍बा मालङ्‍शी, तमा ङ दे छ्‍यु च्‍यकुपला नरी वुङ साङ मोगोशी।” सिनी सिक्‍यासुङ। 16 तमा खोकी तीला “ख्‍युरुङ गल्‍नी ख्‍योरो ख्‍योवाला कताङ्‍नी दे टि शोक।” सिनी सुङ्‍सुङ। 17 तमा तीकी “ङे ति याङ ख्‍योवा राङ मे।” सिनी सिक्‍यासुङ। येशूकी तीला सुङ्‍सुङ, “ख्‍योरो ख्‍योवा मे सिक्‍यावु ति टेके राङ यिन। 18 च्‍यिलासिसिन ख्‍योरो ति ख्‍योवा मिरा ङ चोके च्‍युङ्‍नोक, तमा तन्‍दा ख्‍योरो मुला वोतुप ति ख्‍योरो ख्‍योवा मिन। तुक क्‍यानी ख्‍योरो टेके राङ सिक्‍यासुङ।” 19 तमा ती पुम्‍पेजा तीकी सिक्‍यासुङ, “अच्‍यो, अच्‍यु याङ कोन्‍छ्‍योककी लुङ्‍तेम्‍बा यिनोक सिनी ङे हाक्‍कोसुङ। 20 ङ्‍यिरा सामरी हङ्‍गावातिवी दी पम्‍दोकला राङ कोन्‍छ्‍योकला सोवा तेक्‍सुङ। यिने अच्‍यु यहूदीतिवी याङ कोन्‍छ्‍योकला सोवा देक गोवु दासा ति यरूशलेमला राङ वे सिनी सिनोक।” 21 तमा येशूकी तीला सुङ्‍सुङ, “ओ नुमो, ङला तेपा की। तुजे यी गितो, ती तुजेला ख्‍यिराङ दी पम्‍दोकला साङ यरूशलेमला साङ कोन्‍छ्‍योकला सोवा मेदेकिवी। 22 ख्‍यिराङ सामरीतिवी याङ ङो मेशेवु तीला सोवा देकिवी, यिने ङ्‍यिराङ यहूदीतिवा ति ङो शेवु तीला सोवा देकिवी, च्‍यिलासिसिन दिक्‍पा ने थर ज्‍यितुप ति यहूदीतिवा नेसुर राङ गिवी। 23 कोन्‍छ्‍योकला सोवा देकुपतिवी कोन्‍छ्‍योककी थु चाङ्‍मा ताङ सेम टेङ्‍बो क्‍यानी खोला सोवा देकुप तुजे वुङ्‍यिन वे, तमा ती तुजे ति तन्‍दा राङ यिन। पपा कोन्‍छ्‍योककी टेङ्‍बो क्‍यानी खोला सोवा देकुपतिवाला छोल्‍गिवी। 24 कोन्‍छ्‍योक ति थु यिन, तुक क्‍यानी खोला सोवा देकुपतिवी खोकी थु चाङ्‍मा ताङ सेम टेङ्‍बु क्‍यानी सोवा देक गोकिवी।” 25 तमा ती पुम्‍पेजा तीकी येशूला “ख्रीष्‍ट सिरुप मसीह फेपुप ति ङला छ्‍या वे। खो फेप्‍सिमा खोकी राङ ङि्‍यराङला तेरी ताम्‍ङेतिवा शेकिवी।” सिनी सिक्‍यासुङ। 26 तमा येशूकी तीला सुङ्‍सुङ, “तन्‍दा ख्‍योरो मुला ताम्‍ङे कियी वोतुप ङ ति ती राङ यिन।” 27 ती पेला राङ खोकी लोमातिवा लेसुङ, तमा येशूकी ती पुम्‍पेजा ताङ मुला ताम्‍ङे कियी वोतुप थोङ्‍नी तिवा छासे हलेवा लासुङ। यिन्‍सिनाङ तिवी नाङ ने सी साङ “गेकेनला काङ गोसुङ?” याङ्‍ना “च्‍यिला गेकेनकी ती पुम्‍पेजा ताङ मुला अरा उरा सुङ्‍गुप यिन?” सिनी येशूला माटी। 28 तमा ती पुम्‍पेजा ति खोरो दिङ्‍गर क्‍युर ज्‍याक्‍नी खोरो युलला छ्‍योङ्‍बाल ग्‍यम लोङ गल्‍नी युलकी मीतिवाला 29 “दे फेप्‍नी दी मी तीला ल्हो ताङ! ती मी तीला ङे क्‍यावु लाकातिवा तेरी छ्‍या नोक। खो ति ख्रीष्‍ट राङ मिन?” सिनी सिक्‍यासुङ। 30 तमा मीतिवा युल नेसुर थेन्‍नी येशूला ल्‍हापला वुङ्‍यिन नोक। 31 मीतिवा वुङ्‍यिन कितुप पेला येशूकी लोमातिवी खोला “गेकेन, सोल शे।” सिनी खोला गोङ्‍बा शुसुङ। 32 यिने खोकी “ङे मुला याङ ख्‍युरुङला छ्‍या मेतुप साप समा वे।” सिनी तिवाला सुङ्‍सुङ। 33 खोकी तुक सुङ्‍सिमा लोमातिवा च्‍यिककी च्‍यिकला “मी ललाइकी सोल खुर्न वानी खोला शुते यिन्‍दे?” सिनी सिक्‍यासुङ। 34 तमा येशूकी लोमातिवाला सुङ्‍सुङ, “ङे समा ति ङला तोङ्‍गुप कोन्‍छ्‍योककी नोवाला वोतुप दोके कितुप ताङ खोकी ङला कि ज्‍यितुप लाका तेरी कितुप यिन। 35 ख्‍यिरा ‘सप्‍ले दुतुपला तरोङ साङ ल ज्‍यी लु वे।’ सिनी मिसिरी रो? यिने ङ ख्‍यिराङला सिरिन, ख्‍यिराङ सप्‍ले छोवु शिङला ल्‍यामो क्‍यानी ल्हो, सप्‍ले छोनी साङ दुतुप पेला लेप्‍नी वे। 36 सप्‍ले दुतुपतिवाला ल थोप्‍किवी, तमा तिवी ति नाम्‍साङ मिशिवु मिजी थोपुप डुमा दुकिवी। तमा सप्‍ले देपुप ताङ दुतुप ङ्‍यिकर मुला राङ गा किवी। 37 तुक क्‍यानी ‘मिरा च्‍यिककी सप्‍ले देप्‍किवी, तमा यम्‍बा तीकी सप्‍ले दुकिवी।’ सिनी सिक्‍यावु ति टेके डिकिवी। 38 ङे ख्‍यिराङला मी यम्‍बी हुर्ताक क्‍यानी तपुप सप्‍ले दुतुपला तङ्‍यिन। ख्‍यिरा याङ हुर्ताक माक्‍या, यिने मी यम्‍बी हुर्ताक क्‍यानी ङ्‍येतुप नेसुर ख्‍येप्‍साङ ङ्‍येन वे।”

सामरीतिवा बङीकी येशूला तेपा क्‍यावु

39 ती सामरी पुम्‍पेजा तीकी “ङे काङ क्‍या वे, ती तेरी खोकी ङला सुङ्‍सुङ।” सिनी येशूकी कोर्ला पङ्‍बु बिन्‍दुप तप्‍की ती युलकी सामरीतिवा बङीकी खोला तेपा क्‍यासुङ। 40 तुक क्‍यानी तिवा खोकी चाला वानी तिवी मुला राङ ज्‍यु सिनी खोला गोङ्‍बा शुसुङ। तमा खो ङ्‍यिमा ङ्‍यी सेक तिवी मुला राङ ज्‍युसुङ। 41 ते मीतिवी मङ मङ खोकी सुङ थोनी खोला तेपा क्‍यासुङ। 42 तमा तिवी ती पुम्‍पेजाला “तन्‍दा ङ्‍यिरा तेपा क्‍यावु ति ख्‍योरे सिक्‍यावु तप्‍की मिन, ङ्‍यिरा राङ खोकी सुङ थोनी खो ति वुतुङ के जम्‍बुलिङकी मीतिवाला दिक्‍पा ने थर ज्‍यितुप यिनोक सिनी हाक्‍कोवु तप्‍की यिन।” सिनी सिक्‍यासुङ।

मी छ्‍ये यीकी पुज्‍युङला येशूकी टेक च्‍यितुप

43 तमा ते येशू ङ्‍यिमा ङ्‍यी ज्‍युसिमा तेसुर गालील लुङ्‍बाला फेप्‍सुङ। 44 गोमाला थेङ्‍मा यी येशूकी “कोन्‍छ्‍योककी लुङ्‍तेम्‍बाला खोरो लुङ्‍बा नेसुर मीतिवी ताङ्‍देन मिकिवी।” सिनी सुङ्‍नोक। 45 तमा खो गालीलला फेप्‍सिमा गालीलकी मीतिवी खोला गासो शुसुङ, च्‍यिलासिसिन तिवा साङ यहूदी थरुप तुछ्‍येनला यरूशलेमला गलुप पेला खोकी क्‍या नङ्‍गुप तेरी हलेवु लाका थोङ्‍नोक। 46 तमा येशू गालील लुङ्‍बाकी काना सिरुप ग्‍येसाला लोङ फेप्‍सुङ। ती ग्‍येसा ति गोमाला खोकी छ्‍यु ति गुन्‍डुम छ्‍याङला ग्‍युर च्‍यितुप दासा यिन। ते लुङ्‍बाकी मी छ्‍ये यी नोक, तीकी पुज्‍युङ ति कफर्नहुमला ना नोक। 47 ती मी छ्‍ये तीकी येशू यहूदिया नेसुर गालीलला फेम वे सिरुप ताम्‍ङे थोनी येशूकी चाला वानी, “गेकेन, ठाकुरे फेप्‍नी ङे पुज्‍युङला टेक च्‍यिनी।” सिनी खोला गोङ्‍बा शुसुङ। च्‍यिलासिसिन ती पेला तीकी पुज्‍युङ ति नानी शिला के नोक। 48 तमा येशूकी तीला “ख्‍यिरा ततिवा ताङ हलेवु लाकातिवा माथोङा सेक्‍ला नाम्‍साङ तेपा मिकिवी।” सिनी सुङ्‍सुङ। 49 ती मी तीकी “ओ गेकेन, ङे पुज्‍युङ शेप सिनाङ गोमाला के मर फेप्‍नी तीला टेक च्‍यिनी।” सिनी खोला मङ गोङ्‍बा शुसुङ। 50 तमा येशूकी तीला “ख्‍युरुङ खाङ्‍बा ग्‍युक, ख्‍योरो पुज्‍युङ सेन्‍बु लङ्‍गिवी।” सिनी सुङ्‍सुङ। खोकी तुक सुङ्‍गुप ताम्‍ङेला तेपा क्‍यानी ती मी ति खोरो खाङ्‍बा नेवा गाल। 51 ती मी ति मर डोयी कितुप पेला तीकी लावातिवी तीला लामला ठेनी तीकी पुज्‍युङ सेन्‍बु लासुङ सिनी सिक्‍यासुङ। 52 तमा तीकी खोरो पुज्‍युङ चो पेला टेक्‍सुङ सिनी लावातिवाला टिसालेन्‍सिन तिवी “दाङ ङ्‍यिमी गुङगी छ्‍युजी च्‍यिक चोयीला टेक्‍सुङ।” सिनी सिक्‍यासुङ। 53 तमा ती पुज्‍युङकी पपा तीकी ती तुजे ति येशूकी खुरुङला “ख्‍योरो पुज्‍युङ सेन्‍बु लङ्‍गिवी।” सिनी सुङ्‍गुप तुजे यिन सिरुप ति हाक्‍कोसुङ। तुक क्‍यानी खुरुङ ताङ खोरो मिछाङतिवा तेरीकी येशूला तेपा क्‍यासुङ। 54 दी त ति येशू यहूदिया नेसुर गालीलला लोङ फेप्‍सिमा छ्‍या तेन नङ्‍गुप हलेवु त ङ्‍यिवा यिन।

यूहन्‍ना 5

येशूकी चे गारीला नेर्पु यीला टेक च्‍यितुप

1 ती ज्‍युक्‍ला यहूदीतिवी तुछ्‍येन यी नोक, तमा ती तुछ्‍येनला येशू येर यरूशलेमला फेप्‍सुङ। 2 ते यरूशलेम नाङ्‍ला लुककी गो सिरुप गे चाला चो च्‍यिक नोक। ती चोला ति हिब्रू ताम्‍ङेला बेथस्‍दा सिनी सिनोक, तमा ती चे गारी गुरीला कज्‍युकी खला थोक कपुप दलान ङ चोके नोक। 3 ती दलानला मिक शर्वातिवा ताङ थेङ्‍बातिवा ताङ लाक्‍पा काङ्‍बा शोरुपतिवा ताङ नेर्पुतिवा बङी ङ्‍यिलोक्‍नी देनोक। तिवा तेरी ती चो ति नम पेला योकिते सिनी गुनी देकिनोक। 4 च्‍यिलासिसिन पर्चिक पर्चिक कोन्‍छ्‍योककी लेन क्‍योलुप थु ति ते वानी ती चो ति योकिनोक, तमा चो योसिमा सु गोमाला ती चे नाङ्‍ला शुकिवे, तीला चुकै राङ नेजु वोसिनाङ टेकिवी सिनी सिनोक। 5 तमा ते वोतुप नेर्पुतिवी नाङ ने लो खल्‍ज्‍यिक ताङ च्‍याप्‍ग्‍ये नेज्‍युन नावु मी यी नोक। 6 ती नेर्पु ति सला ङ्‍यिलोक्‍नी देतुप येशूकी थोङ्‍सुङ। तमा खोकी तीला लो बङी ना नोक सिरुप हाक्‍कोनी, “ख्‍युरुङला टेकुप नो वे?” सिनी टि नाङ्‍सुङ। 7 ती नेर्पु तीकी येशूला “चोवो, ती चो योकुप पेला ङला तेक्‍नी चे नाङ्‍ला लुङ तेरुप मी सु साङ मे। तमा ङ शुकुप छोलुप पेला मी यम्‍बा राङ ङ सिनाङ गोमाला के चे नाङ्‍ला शुकिनोक।” सिनी सिक्‍यासुङ। 8 तमा येशूकी तीला “ख्‍युरुङ खोक लानी ख्‍योरो दिङ्‍ज्‍ये खुर्नी यु।” सिनी सुङ्‍सुङ। 9 खोकी तुक सुङ्‍लुङ्‍मे ती नेर्पु ति शार्क्येक टेक्‍नी खोरो दिङ्‍ज्‍येतिवा खुर्नी युसुङ। ती छेर्मु ति यहूदीतिवी ङासोप ङ्‍यिमा ख्‍येल्‍गिनोक। 10 ती तप्‍की यहूदी गोमा कितुप मी छ्‍येतिवी ती टेकुप मी तीला “हारिङ याङ ङासोप ङ्‍यिमा यिन, तुक क्‍यानी ख्‍योरो दी दिङ्‍ज्‍ये खुरुप ति दाक्‍पी यहूदी ठिमला मेवी।” सिनी सिक्‍यासुङ। 11 यिने तीकी “ङला टेक च्‍यितुप मी तीकी ङला दिङ्‍ज्‍ये खुर्नी यु सिनी सुङ्‍सुङ।” सिनी सिक्‍यासुङ। 12 येलुङ तिवी तीला “ख्‍युरुङला ख्‍योरो दिङ्‍ज्‍ये खुर्नी यु सिनी सिरुप मी ति सु यिन?” सिनी टिसुङ। 13 यिने ती टेकुप मी तीकी खुरुङला टेक च्‍यितुप ति सु यिन सिनी ङो मेसेनोक, च्‍यिलासिसिन ते मी मङ्‍छ्‍योक नोक, तमा येशू तेसुर खरक्‍पा सोक थेन्‍नी फेप्‍नोक। 14 ती ज्‍युक्‍ला येशूकी ती मी तीला यहूदी ल्‍हङाङला ठेसुङ, तमा तीला “ल्‍होसा, त ख्‍युरुङ टेक्‍सुङ, तफेन्‍ला दिक्‍पा माकिता। मिसियाङ ख्‍युरुङला मङ मेलोक्‍पा ख्‍येल्गितो।” सिनी सुङ्‍सुङ। 15 ती थोसिमा ती मी ति यहूदी गोमा कितुप मी छ्‍येतिवी चाला गल्‍नी खुरुङला टेक च्‍यितुप ति येशू यिनोक सिनी सिक्‍यासुङ। 16 ती तप्‍की यहूदीतिवी येशूला छेटाङ तेरुप छाल्‍सुङ, च्‍यिलासिसिन खोकी ङासोप ङ्‍यिमाला तुका लाकातिवा क्‍यासुङ। 17 यिने येशूकी तिवाला दुक सुङ्‍सुङ, “ङे पपी त सेक नरी लाका कियी वे, तुक क्‍यानी ङ साङ लाका कियी वे।” 18 ती ताम्‍ङे थोनी यहूदीतिवी येशूला मङ सेतुप नो क्‍यासुङ, च्‍यिलासिसिन खोकी ङासोप ङ्‍यिमा मेतेन्‍दुप तिराङ मिन, खुरुङ ति कोन्‍छ्‍योक ताङ च्‍यिक्‍पा राङ जोनी कोन्‍छ्‍योकला ति खोरे पपा यिन सिनी सुङ्‍नोक।

कोन्‍छ्‍योककी सेवुकी ओङ

19 तमा येशूकी तिवाला सुङ्‍सुङ, “ङ ख्‍यिराङला टेङ्‍बो सिरिन, पुज्‍युङ खोरो राङ काङ साङ कि मुथुपी, यिने पपी काङ कितुप थोङ वे, पुज्‍युङकी साङ तुकै राङ किवी। 20 पपी खोरो पुज्‍युङला ङ्‍यिङ्‍ज्‍ये क्‍यानी खोकी क्‍या नङ्‍गुप लाकातिवा तेरी खोरो पुज्‍युङला छ्‍या देन्‍गिवी। यिन, खोकी ती सिनाङ मङ लाका ग्‍येर्पुतिवा खोरो पुज्‍युङला छ्‍या तेन नङ्‍गिवी, ती थोङ्‍नी ख्‍यिराङ हलेवा लङ्‍गितो। 21 पपी शेपतिवाला सेन्‍बु लङ च्‍यिनी तिवाला नाम्‍साङ मिशिवु मिजी नङ्‍गुप दोके खोकी पुज्‍युङकी साङ सुला मिजी तेरुप नोवा नोके, तीला नाम्‍साङ मिशिवु मिजी तेर्किवी। 22 तोजोयी तिराङ मिन, पपा खोरे राङ सुला साङ ठिम मिकिवी, यिने तेरी ठिम कितुप ओङ ति खोकी पुज्‍युङला चेक तेन नङ वे। 23 ती ति तेरीकी पपाला ताङ्‍देन कितुप दोके खोकी पुज्‍युङला साङ ताङ्‍देन किशी सिनी यिन। सी खोकी पुज्‍युङला ताङ्‍देन मिकिवे, पुज्‍युङला तोङ्‍गुप पपाला साङ ताङ्‍देन मिकिवी। 24 ङ ख्‍यिराङला टेङ्‍बु सिरिन, सी ङे सुङला ङ्‍येन्‍नी ङला तोङ्‍गुप तीला तेपा किवे, तीला नाम्‍साङ मिशिवु मिजी थोप्‍किवी। तीला पर्च्या मोफोकिवी, तमा शेप ने थर्नी मिजी ङ्‍येकिवी।” 25 “ङ ख्‍यिराङला टेङ्‍बो सिरिन, तुजे यी वुङ्‍यिन वे। ती तुजे ति वानिङ सिन वे। ती तुजेला शेपतिवी कोन्‍छ्‍योककी पुज्‍युङकी वोरु थोकिवी, तमा ती वोरु थोवुतिवा ति शेप ने सेन्‍बु लङ्‍गिवी। 26 पपा खोरे मुला मिजी वोतुप दोके खोकी खोरे पुज्‍युङला साङ मिजी वोतुप जो नाङ्‍सुङ। 27 तमा पपी खोरे पुज्‍युङला दी जम्‍बुलिङकी मीतिवा तेरीला ठिम कितुप ओङ नाङ्‍सुङ। ती ति खोकी पुज्‍युङ ति मी पुज्‍युङ यिन्‍दुप तप्‍की यिन। 28 दी ताम्‍ङे थोनी ख्‍यिराङ हलेवा माकी। शेप मीला ज्‍योकुप टककी फुककी नाङ ने शेपतिवा तेरीकी खोकी पुज्‍युङकी वोरु थोवु तुजे वुङ्‍यिन वे। 29 ती तुजेला टेङ्‍बु क्‍यावुतिवा ति मिजी ङ्‍येतुपकी थोक्‍ला सेन्‍बु लङ्‍गिवी, तमा मेटेङ्‍बु क्‍यावुतिवा ति पर्च्याला ख्‍येलुपकी थोक्‍ला शेप ने सेन्‍बु लङ्‍गिवी।” 30 “ङ ङरा राङ काङ साङ कि मुथुपी, यिने पपी ङला काङ क नङ वे, ती दोके क्‍यानी ठिम कितिन। ङे कितुप ठिम ति टेङ्‍बु वे, च्‍यिलासिसिन ङ ङे नोवाला मिन, यिने ङला तोङ्‍गुप तीकी नोवाला दोके कितुप तप्‍की यिन।”

येशूकी कोर्ला पङ्‍बु नङ्‍गुप

31 “दोजो ङे ङरा थोक्‍ला राङ पङ्‍बु बिन्‍दुप यिन्‍सिन ङे बिन्‍दुप पङ्‍बु ति टेङ्‍बु मेङ्‍गिवी। 32 ङे थोक्‍ला पङ्‍बु नङ्‍गुप ति यम्‍बा यी वे, खोकी ङे कोर्ला नङ्‍गुप पङ्‍बु ति टेङ्‍बु यिन सिरुप ति ङला छ्‍या वे। 33 बप्‍तिस्‍मा तेरुप यूहन्‍नाला ताम्‍ङे टेपला ख्‍यिरा मीतिवा ताङ्‍सुङ, तमा तीकी तिवाला दी टेङ्‍बुकी कोर्ला पङ्‍बु बिन्‍सुङ। 34 तन्‍दा ङे दी ताम्‍ङे सिक्‍यावु ति ङे थोक्‍ला मी नेसुर पङ्‍बु गोवु तप्‍की मिन, यिने ख्‍यिराङला पर्च्या नेमा र्‍होकुपला यिन। 35 यूहन्‍ना ति बर्नी ठछ्‍येली जोप दिप्‍ली दोके यिन, तमा ख्‍यिरा चेयी पर सेक तीकी ठछ्‍येलीला गा क्‍यासुङ। 36 यिने ङे मुला याङ यूहन्‍नाकी बिन्‍दुप पङ्‍बु सिनाङ पङ्‍बु छ्‍ये वे। पपी ङला तेरी सिन्‍दा कि सिनी ङला नङ्‍गुप दी लाका कियी वोतुप ति खोकी ङला तङ्‍गुप यिन सिनी छ्‍या तेन्‍दुप पङ्‍बु यिन। 37 तमा ङला तोङ्‍गुप पपा खोरे राङ ङे थोक्‍ला पङ्‍बु नङ वे। ख्‍यिरा याङ नाम्‍साङ खोकी वोरु माथो वे, खोला थोङ्‍गुप साङ माथोङ वे, 38 तमा खोकी सुङ साङ ख्‍यिरा सेमला माला वे, च्‍यिलासिसिन खोकी तङ्‍गुप तीला ख्‍यिरा तेपा माक्‍यावु तप्‍की यिन। 39 ख्‍यिरा कोन्‍छ्‍योककी सुङ लोपुप ति ती सुङ नेमा नाम्‍साङ मिशिवु मिजी ङ्‍येकिवी सिनी नासाम ताङ्‍नी यिन। तमा ती सुङगी ङे कोर्ला पङ्‍बु तेर्किवी। 40 यिन्‍सिनाङ ख्‍यिराङ ती नाम्‍साङ मिशिवु मिजी ङ्‍येतुपला ङे चाला वुङ्‍गुप नो माक्‍या। 41 ङ ति मीतिवा नेसुर मोवा ङ्‍येतुप मोछोल। 42 यिने ख्‍यिराङ चुका पारकी मी यिन सिरुप ति ङला छ्‍या वे, ख्‍यिरा सेमला कोन्‍छ्‍योकला ङ्‍यिङ्‍ज्‍ये कितुप नो मेतुप साङ ङला छ्‍या वे। 43 ङे पपी मिङला ङ दी जम्‍बुलिङला वायी, यिने ख्‍यिरा ङला सेमला माला। यिने दोजो मी ललाइ खोरो ओङ्‍ज्‍येनला वासुङ सिसिन ख्‍यिरा तीला सेमला लङ्‍गिवी। 44 ख्‍यिराङ च्‍यिककी च्‍यिक नेमा ताङ्‍देन ङ्‍येतुपला गा किवी, यिने च्‍यिक राङ वोतुप कोन्‍छ्‍योक नेमा वुङ्‍गुप मोवा ति मोछोली सिसिन ख्‍यिरा चुक क्‍यानी तेपा कि थुप्‍किवी रो? 45 यिने ङे पपी दोङ्‍ला ख्‍यिराङला क्‍येन तेरुप ति ङ यिन सिनी ख्‍यिराङ नासाम मातोङ। ख्‍यिराङला क्‍येन तेरुप याङ ख्‍यिरा रेवा क्‍यावु मोशा के यिन। 46 दोजो ख्‍यिरा मोशाला तेपा क्‍यावु यिन्‍सिन ङला तेपा कि गोवुजा, च्‍यिलासिसिन मोशाकी याङ ङे कोर्ला राङ टि वे। 47 यिने ख्‍यिरा मोशाकी टिवु ठिमला साङ तेपा माक्‍यासुङ सिसिन चुक क्‍यानी ङे सिक्‍यावु ताम्‍ङेला तेपा किवी रो?”

यूहन्‍ना 6

येशूकी मी तोङ्‍डा ङला समा नङ्‍गुप

1 ती ज्‍युक्‍ला येशू गालील ग्‍येम्‍छोकी फर्केन फेप्‍सुङ। ती ग्‍येम्‍छोला ति तिबेरियास ग्‍येम्‍छो साङ सिनोक। 2 ते मी माङ्‍छ्‍योककी खोकी तिङ्‍ला तिङ्‍यासुङ, च्‍यिलासिसिन खोकी नेर्पुतिवाला टेक च्‍यितुप हलेवु ततिवा तिवी थोङ्‍नोक। 3 तमा येशू खोकी लोमातिवी मुला येर पम्‍दोकला जेनी ते राङ ज्‍युसुङ। 4 ती पेला यहूदीतिवी थरुप तुछ्‍येन वुङ्‍ला के नोक। 5 येशूकी मी माङ्‍छ्‍योक खोकी चिप्‍ला वुङ्‍यिन कितुप थोङ्‍नी खोरो लोमा फिलिपला “दाक्‍पु दी मीतिवा तेरीला तेरुपला कनी नेसुर शुब्‍ज्‍याङ ङ्‍योप्‍जा?” सिनी टि नाङ्‍सुङ। 6 खोकी फिलिपला सेम ल्‍हापला तिराङ तुक सुङ्‍नोक, च्‍यिलासिसिन खोकी काङ कितुप छल वे, ती ति वुतुङ के खोला राङ छ्‍या नोक। 7 तमा फिलिपकी “दिवा तेरीला चे चेयी राङ स ज्‍यितुपला साङ ङुलकी डप्‍बु सयी ङ्‍यीकी शुब्‍ज्‍याङ ङ्‍योसिनाङ मलङ्‍गिवी।” सिनी खोला सिक्‍यासुङ। 8 ती पेला येशूकी लोमातिवी पर्ला सिमोन पत्रुसकी नुप अन्‍द्रियास तीकी येशूला दुक सिक्‍यासुङ, 9 “दे पेजा यीकी लोला जौकी शुब्‍ज्‍याङ ङ चोके ताङ ङ्‍या ङ्‍यी चोके वे, यिने दोजोयीकी याङ दोजो मी मङ्‍मुला कङगी लङ्‍गुप्‍जा?” सिनी सिक्‍यासुङ। 10 तमा येशूकी “मीतिवाला दे च्‍यी।” सिनी लोमातिवाला सुङ्‍सुङ। ते च बङी वोतुप दिङ्‍मा नोक, तमा मीतिवा तेरी ती दिङ्‍माला देसुङ। ते तो मिसिन ख्‍योक्‍पेजा मिरा तोङ्‍डा ङ नोक। 11 तमा येशूकी ती शुब्‍ज्‍याङ ति लानी कोन्‍छ्‍योकला थुचिछे पुल्‍सिमा ते देतुप मीतिवा तेरीला गोनी तेर च्‍यिसुङ। तुक राङ क्‍यानी ङ्‍या साङ तिवा तेरीला डाता सेक गोनी तेर च्‍यिसुङ। 12 मीतिवी डाता सेक सो सिन्‍सिमा येशूकी लोमातिवाला “ल्‍हकुप पुर्मातिवा तेरी रु, तिवा च्‍यिक साङ माक्‍युर।” सिनी सुङ्‍सुङ। 13 तमा तिवी जौकी शुब्‍ज्‍याङ ङ नेमा मीतिवी सोसिमा ल्‍हकुप पुर्मातिवा रुसुङ, तमा ती पुर्मातिवा ति तोलुम च्‍यिङ्‍ङी नाङ्‍ला क्‍येङ्‍सुङ। 14 खोकी क्‍या नङ्‍गुप हलेवु लाका थोङ्‍नी मीतिवी “खो याङ वुतुङ के जम्‍बुलिङला फेप्‍किवी सिनी सिक्‍यावु कोन्‍छ्‍योककी लुङ्‍तेम्‍बा यिनोक।” सिनी सिक्‍यासुङ। 15 तमा येशूकी मीतिवी खोरुङला उर्च्युम ग्‍यप्‍नी टि गल्‍नी ग्‍येल्‍वु जोप छोलिन नोक सिरुप हाक्‍कोनी खो खरक्‍पा सोक सिरा तेसुर थेन्‍नी च्‍यिक राङ पम्‍दोक नेवा लोक्‍नी फेप्‍सुङ।

येशू छ्‍यी खला युवु

16 ती गोमु नाम ल्‍होसिमा येशूकी लोमातिवा मर ग्‍येम्‍छो गारीला गल्‍नी 17 टुला जेनी ग्‍येम्‍छो फर्केन कफर्नहुम ग्‍येसा नेवा डोप गाल्‍सुङ। यिने नक्‍तोमी गल्‍सिमा साङ येशू तिवी चाला माफेप्‍नोक। 18 ती पेला राङ छासे लुङ ग्‍यप्‍नी ग्‍येम्‍छोकी बालाप कशेन ल्‍हानोक। 19 ते नेसुर लोमातिवा टु ग्‍यप्‍नी किलोमिटर ङ टुक चोयी डोसालेन्‍सिन येशू ग्‍येम्‍छो ख नेसुर युनी टी चाला फेपुप तिवी थोङ्‍सुङ। ती थोङ्‍सिमा तिवा पर्नी छासे ज्‍यिवा क्‍यासुङ। 20 यिने येशूकी तिवाला “ङ राङ यिन, ज्‍यिवा माकी।” सिनी सुङ्‍सुङ। 21 तमा लोमातिवा गा क्यानी येशूला टी नाङ्‍ला गासो शुसुङ, तमा टु ति तिवा डोप नो क्‍यावु दासाला शार्क्येक लेप्‍सुङ।

मिजी तेरुप शुब्‍ज्‍याङ ति येशू यिन।

22 ती सला तीला ग्‍येम्‍छो छुर्केन वोतुप मीतिवी ते टु ति च्‍यिक तिराङ नोक, तमा येशू ति लोमातिवी मुला ती टुला जेनी माफेप्‍नी खोकी लोमातिवा तिराङ गलुप यिन सिरुप ति छ्‍या नोक। 23 तमा तिबेरियास नेसुर वावु यम्‍बा टुतिवा ति गोमाला चोवोकी कोन्‍छ्‍योकला थुचिछे पुल्‍नी मी माङ्‍छ्‍योकला शुब्‍ज्‍याङ नङ्‍गुप दासाकी चाला राङ लेप्‍नोक। 24 तमा तिवी ते येशू साङ ज्‍यु मेतुप ताङ लोमातिवा साङ मेतुप थोङ्‍नी टुतिवाला जेनी येशूला छोलुपला कफर्नहुम ग्‍येसा नेवा गाल्‍सुङ। 25 तिवा ग्‍येम्‍छोकी फर्केन लेप्‍सिमा येशूला ठेसुङ। तमा खोला ठेसिमा तिवी “गेकेन, गेकेन दे नम फेवु?” सिनी टिसुङ। 26 तमा येशूकी तिवाला सुङ्‍सुङ, “वुतुङ के ङ ख्‍यिराङला सिरिन, ख्‍यिरा ङला छलुप ति ङे क्‍यावु हलेवु ततिवा थोङ्‍गुप तप्‍की मिन, यिने ख्‍यिरा डाता सेक शुब्‍ज्‍याङ सोवु तप्‍की यिन। 27 ख्‍यिराङ रुल्‍नी डोप समी थोक्‍ला लाका माकी, बोरु नाम्‍साङ मिशिवु मिजी तेरुप समी थोक्‍ला लाका की। ती मिजी ति ङ मी पुज्‍युङकी ख्‍यिराङला तेर्किवी, च्‍यिलासिसिन पपा कोन्‍छ्‍योककी ती मिजी तेरुप ओङ ति ङला नाङ्‍सुङ।” 28 तमा तिवी खोला “कोन्‍छ्‍योककी नो क्‍यावु लाकातिवा कितुपला ङ्‍यिरा काङ कि गोकिवी?” सिनी टिसुङ। 29 तमा खोकी तिवाला “कोन्‍छ्‍योककी तङ्‍गुप तीला तेपा कितुप ति कोन्‍छ्‍योककी लाका यिन।” सिनी सुङ्‍सुङ। 30 येलुङ तिवी खोला सिक्‍यासुङ, “ख्‍योरे ङ्‍यिराङला चुका त छ्‍या तेन्‍नी ङ्‍यिरा ती त ल्‍हानी ख्‍युरुङला तेपा कि ज्‍यिकिवी? ख्‍योरे काङ लाका किवी? 31 कोन्‍छ्‍योककी सुङगी नाङ्‍ला ‘खोकी देवाच्‍येन नेमा शुब्‍ज्‍याङ पप च्‍यिनी तिवाला स च्‍यिसुङ।’ सिनी टिवु दोके ङ्‍यिरा पगावा हङ्‍गावी याङ दासा पाङ्‍थेरीला मन्‍न सोसुङ।” 32 तमा येशूकी सुङ्‍सुङ, “ङ ख्‍यिराङला टेङ्‍बु सिरिन, देवाच्‍येन नेमा शुब्‍ज्‍याङ तेरुप ति मोशा मिन, यिने देवाच्‍येन नेमा ख्‍यिराङला शुब्‍ज्‍याङ टेङ्‍बु नङ्‍गुप ति ङे पपा यिन। 33 कोन्‍छ्‍योककी शुब्‍ज्‍याङ ति देवाच्‍येन नेमा वानी जम्‍बुलिङकी मीतिवाला नाम्‍साङ मिशिवु मिजी नङ्‍गुप ती यिन।” 34 तमा तिवी खोला “चोवो, दी शुब्‍ज्‍याङ ति ङ्‍यिराङला नरी नङ्‍नी।” सिनी सिक्‍यासुङ। 35 यिने येशूकी तिवाला सुङ्‍सुङ, “नाम्‍साङ मिशिवु मिजी तेरुप शुब्‍ज्‍याङ ति ङ राङ यिन। ङे ते वुङ्‍गुपतिवा नाम्‍साङ ल्‍होवा मलङ्‍गिवी, तमा ङला तेपा कितुपतिवा नाम्‍साङ कोम्‍बा मलङ्‍गिवी। 36 यिने ङे ख्‍यिराङला सिक्‍यावु दोके ख्‍यिरा ङला थोङ्‍सिनाङ ङला तेपा माक्‍या। 37 ङे पपी ङला चेक तेन नङ्‍गुप मीतिवा तेरी ङे ते वुङ्‍गिवी, तमा ङे ते वुङ्‍गुपतिवाला ङ नाम्‍साङ लोक्‍नी मोतोङ। 38 च्‍यिलासिसिन ङ ति ङे नोवा छे ज्‍यितुपला देवाच्‍येन नेमा वावु मिन, यिने ङला तोङ्‍गुप कोन्‍छ्‍योककी नोवा छे ज्‍यितुपला वावु यिन। 39 ङला तोङ्‍गुप खोकी नोवा ति खोकी ङला चेक तेन नङ्‍गुपतिवा सु साङ मोतोर्शी, यिने जम्‍बुलिङकी तिङ्‍मी तुजेला तिवा तेरी सेन्‍बु लङ ज्‍यितुपला यिन। 40 तमा खोकी पुज्‍युङला ल्‍हानी तीला तेपा कितुपतिवा तेरीकी नाम्‍साङ मिशिवु मिजी थोपुप ति ङे पपी नोवा यिन। तमा जम्‍बुलिङकी तिङ्‍मी तुजेला ङ तिवा तेरीला सेन्‍बु लङ ज्‍यितिन।” 41 येशूकी “ङ देवाच्‍येन नेमा पाम वावु शुब्‍ज्‍याङ यिन।” सिनी सुङ्‍सिमा यहूदीतिवा मुक्‍तम देन्‍दुप छाल्‍सुङ। 42 तमा तिवी “दी याङ योसेफकी पुज्‍युङ येशू मिन रो? दीकी पपाआमा याङ दाक्‍पी ङो मेशेवी रो? च्‍यिला दीकी ‘ङ देवाच्‍येन नेमा पाम वावु यिन।’ सिनी सिक्‍यावु यिनाङ?” सिनी सिक्‍यासुङ। 43 तमा येशूकी तिवाला सुङ्‍सुङ, “ख्‍यिरा पर्ला मुक्‍तम मादेन, 44 ङला तोङ्‍गुप पपी मीतिवाला ङे ते वुङ्‍गुप सेम माबिन्‍सुङ सिसिन सु साङ ङे ते वुङ मुथुपी, तमा ङे ते वुङ्‍गुपतिवाला ङ जम्‍बुलिङकी तिङ्‍मी तुजेला सेन्‍बु लोङ्‍यिन। 45 ‘तेरी मीतिवी कोन्‍छ्‍योककी सुङ नेमा लोप्‍किवी।’ सिनी कोन्‍छ्‍योककी लुङ्‍तेम्‍बातिवी टि वे। सी पपी सुङ ङ्‍येन्‍नी खोकी सुङ्‍गुप सुङ लोप्‍किवे, तिवा तेरी ङे ते वुङ्‍गिवी। 46 सी साङ पपाला माथोङ वे, यिने कोन्‍छ्‍योक नेमा वावु तीकी तिराङ पपाला थोङ वे। 47 वुतुङ के ङ ख्‍यिराङला सिरिन, सी ङला तेपा किवे, तीला नाम्‍साङ मिशिवु मिजी थोप्‍किवी। 48 तमा नाम्‍साङ मिशिवु मिजी तेरुप शुब्‍ज्‍याङ ति ङ राङ यिन। 49 ख्‍यिरा हङ्‍गावातिवी दासा पाङ्‍थेरीला मन्‍न सोसिनाङ तिवा शिसुङ। 50 यिने देवाच्‍येन नेमा वावु शुब्‍ज्‍याङ ति दुकै यिन, सी दीला सेवे, तिवा नाम्‍साङ मिशिवी। 51 ङ ति देवाच्‍येन नेमा पाम वोवु सेन्‍बु वोतुप शुब्‍ज्‍याङ यिन। सी दी शुब्‍ज्‍याङ सेवे, तिवा नाम्‍साङ मिशिवी। ती शुब्‍ज्‍याङ ति ङे जु यिन, तमा ती जुकी जम्‍बुलिङकी मीतिवा तेरीला मिजी तेर्किवी।” 52 खोकी तुक सुङ्‍सिमा यहूदीतिवी “दी मी तीकी चुक क्‍यानी खोरो जु दाक्‍पुला स ज्‍यि थुप्‍किवी ताङ?” सिनी खोप्‍राङ पर्ला ताम्‍ङे क्‍यासुङ। 53 तमा येशूकी तिवाला सुङ्‍सुङ, “ङ ख्‍यिराङला टेङ्‍बो सिरिन, ख्‍यिरा ङ मी पुज्‍युङकी जु मासोसिन ताङ ङ मी पुज्‍युङकी ठक माथुसिन ख्‍यिराङला नाम्‍साङ मिशिवु मिजी मोथोपिवी। 54 ङे जु साप ताङ ङे ठक थुङ्‍गुपतिवाला ति नाम्‍साङ मिशिवु मिजी थोप्‍किवी, तमा जम्‍बुलिङकी तिङ्‍मी तुजेला तिवाला ङ शेप ने सेन्‍बु लोङ्‍यिन। 55 च्‍यिलासिसिन ङे जु ति वुतुङ्‍की साप समा यिन, तमा ङे ठक ति वुतुङ्‍की थुङ्‍गुप ति यिन। 56 ङे जु साप ताङ ङे ठक थुङ्‍गुप तीकी ङे मुला देकिवी, तमा ङ साङ तीकी मुला देतिन। 57 ङोसु ज्‍यु वोतुप ङे पपी ङला ताङ्‍सुङ, तमा ङ खो नेसुर मिजी क्‍योङ्‍गिवी। ती दोके ङला साप तीकी साङ ङ नेसुर मिजी क्‍योङ्‍गिवी। 58 ती ति देवाच्‍येन नेमा पाम वावु शुब्‍ज्‍याङ यिन। ती ति ख्‍यिरा हङ्‍गावातिवी सोसिनाङ शेप समा दोके मिन। दी शुब्‍ज्‍याङ सापतिवाला ति नाम्‍साङ मिशिवी।” 59 दी ताम्‍ङेतिवा ति येशूकी कफर्नहुमला वोतुप यहूदी छ्‍योखाङ नाङ्‍ला येन्‍देन नङ्‍गुप पेला सुङ्‍गुप यिन।

लोमातिवा बङीकी येशूला क्‍युन ज्‍यकुप

60 ती ताम्‍ङे थोनी येशूकी लोमातिवी पर्ला बङीकी “दी सुङ याङ छासे कले नोक, सी हाक्‍को थुपुप्‍जा?” सिनी सिक्‍यासुङ। 61 येशूकी तिवा मुक्‍तम देन्‍दुप हाक्‍कोनी तिवाला सुङ्‍सुङ, “दी ताम्‍ङेकी ख्‍यिराङला ग्‍येकिवी? 62 तुकै यिन्‍सिन ङ मी पुज्‍युङ ति गोमाला खुरुङ वोतुप ते राङ तेक्‍नी डोप थोङ्‍सिन ख्‍यिराङ काङ किवी? 63 नाम्‍साङ मिशिवु मिजी नङ्‍गुप ति कोन्‍छ्‍योककी थु चाङ्‍मा यिन, तमा जु ति काङ साङ फेन मोथोवी। ङे ख्‍यिराङला सिक्‍यावु दी ताम्‍ङे ति कोन्‍छ्‍योककी थु चाङ्‍मा ताङ नाम्‍साङ मिशिवु मिजीकी कोर्ला यिन। 64 यिने ख्‍यिरा पर्ला मी ललाइ ति ङला तेपा राङ मिकिवी।” तमा गोमाला नेज्‍युन खोरुङला तेपा मिकिवुतिवा सु सु यिन, तमा क्‍येन तेरुपतिवा सु सु यिन सिनी खोला छ्‍या नोक। 65 येशूकी येलुङ दुक सुङ्‍सुङ, “तुक क्‍यानी ङे पपी सेम माबिन्‍सुङ सिसिन सु साङ ङे ते वुङ मुथुपी सिनी ङे ख्‍यिराङला सिक्‍यावु यिन।” 66 खोकी तुक सुङ्‍गुप तप्‍की खोकी लोमातिवा बङीकी खोला क्‍युर ज्‍याक्‍नी ती पेला नेज्‍युन खोला तिङ माङ्‍या। 67 तमा येशूकी खोरो लोमा मिरा च्‍यिङ्‍ङीतिवाला “ख्‍यिरा साङ ङला क्‍युर ज्‍याक्‍नी डोप नो वे?” सिनी टि नाङ्‍सुङ। 68 खोकी तुक सुङ्‍सिमा सिमोन पत्रुस तीकी “ओ चोवो, चोवोकी मुला याङ नाम्‍साङ मिशिवु मिजी तेरुप सुङ वे। तुक क्‍यानी ङ्‍यिराङ सी चाला डोप्‍जा? 69 चोवो याङ कोन्‍छ्‍योककी चाङ्‍मा वोतुप मी यिन सिनी ङ्‍यिरा तेपा क्‍यानी हाक्‍को वे।” सिनी सिक्‍यासुङ। 70 तमा येशूकी तिवाला “काङ ङे ख्‍यिराङ मिरा च्‍यिङ्‍ङीतिवाला राङ पेतुप मिन रो? यिन्‍सिनाङ ख्‍यिरा पर्ला मिरा च्‍यिक ति शैतान यिन।” सिनी सुङ्‍सुङ। 71 खोकी दुक सुङ्‍गुप ति सिमोन इस्‍करियोतकी पुज्‍युङ यहूदाकी कोर्ला सुङ्‍गुप यिन, ती ति खोकी लोमा मिरा च्‍यिङ्‍ङी नङगी ति यिन्‍सिनाङ ज्‍युक्‍ला येशूला जिम तेरुप मी यिनोक।

यूहन्‍ना 7

येशूकी नुपतिवी खोला तेपा माक्‍यावु

1 ती ज्‍युक्‍ला येशू गालील लुङ्‍बाला राङ फार छुर युनी ज्‍युसुङ, च्‍यिलासिसिन यहूदीतिवी खोला सेतुप छलुप तप्‍की खो यहूदिया लुङ्‍बाला फेपुप नो माक्‍या। 2 तमा ती पेला यहूदीतिवी बर्केङ जोनी देतुप तुछ्‍येन वुङ्‍ला के नोक। 3 ती तप्‍की येशूकी नुपतिवी खोला “च्‍युच्‍यो, दी लुङ्‍बा क्‍युर ज्‍याक्‍नी यहूदिया लुङ्‍बाला फेप, तमा ते देतुप च्‍युच्‍युकी यम्‍बा लोमातिवी साङ च्‍युच्‍युकी क्‍यावु हलेवु लाकातिवा थोङ च्‍यी। 4 सी मी यम्‍बी खुरुङला ङो शेशी सिनी नो किवे, ती ति यिप्‍नी लाका मिकिवी। च्‍युच्‍युकी दुका लाकातिवा किवी सिसिन जम्‍बुलिङकी मीतिवा तेरीकी च्‍युच्‍युला ङो शे च्‍यी।” सिनी सिक्‍यासुङ। 5 च्‍यिलासिसिन खोकी नुपतिवी साङ खो कोन्‍छ्‍योककी तङ्‍गुप यिन सिरुप ति तेपा माक्‍या नोक। 6 तमा येशूकी तिवाला सुङ्‍सुङ, “ङे तुजे ति मालेप वे, यिने ख्‍यिरा तुजे याङ चो पेला साङ टडिक वे। 7 जम्‍बुलिङकी मीतिवी ख्‍यिराङला ङ्‍यिङ्‍मर कि मुथुपी, यिने ङला याङ ङ्‍यिङ्‍मर किवी, च्‍यिलासिसिन जम्‍बुलिङकी मीतिवी किताङ नालु दुक्‍टा वे सिनी ङे पङ्‍बु बिनिन। 8 ख्‍यिराङ ति तुछ्‍येन तेन्‍दुपला ग्‍युक। ङ ति मोडो, च्‍यिलासिसिन ङे तुजे तरोङ साङ मालेप वे।” 9 तुक सुङ्‍सिमा खो गालील लुङ्‍बाला राङ ज्‍युसुङ।

येशू तुछ्‍येनला फेपुप

10 यिने येशूकी नुपतिवा तुछ्‍येनला गल्‍सिमा खो साङ मीतिवी हाक्‍माकोवा क्‍यानी ती तुछ्‍येनला फेप्‍सुङ। 11 ती तुछ्‍येनला यहूदी गोमा कितुप छ्‍येतिवी येशूला छोलिन सिरा “ती मी ति कनी नोक?” सिनी टिनोक। 12 तमा मी मङ्‍छ्‍योक खोकी कोर्ला ताम्‍ङे बङी क्‍यासुङ। मी ललाइकी “ती ति मी ल्‍यामु यिन।” सिनी सिनोक, तमा ललाइकी “दी याङ मीतिवाला जिनोक जोप मी यिन।” सिनी सिनोक। 13 यिने तिवा यहूदी गोमा कितुप छ्‍येतिवाला ज्‍यिवा लानी खोकी कोर्ला सी साङ मी मिङ्‍गाला ताम्‍ङे अला माक्‍या।

येशूकी तुछ्‍येनला येन्‍देन नङ्‍गुप

14 तमा तुछ्‍येनकी तुजे फेका यी सिन्‍सिमा येशू यहूदी ल्‍हङाङला फेप्‍नी तेकी मीतिवाला येन्‍देन लोपुप छाल्‍सुङ। 15 खोकी नङ्‍गुप येन्‍देन थोसिमा यहूदी गोमा कितुप छ्‍येतिवा हलेवा लानी, “दी मी तीकी काङ मालाप सिनाङ चुक क्‍यानी दोजो येन्‍देन शेवु यिनाङ?” सिनी सिक्‍यासुङ। 16 तमा येशूकी तिवाला “ङे तेरुप येन्‍देन ति ङरा राङ तेरुप मिन, यिने ङला तोङ्‍गुप तीकी येन्‍देन यिन। 17 चुका मी तीकी कोन्‍छ्‍योककी नोवाला दोके युकिवे, तीकी ङे तेरुप येन्देन ति कोन्‍छ्‍योक नेमा वावु यिनाङ की, ङे राङ तेरुप यिन सिनी हाक्‍कोकिवी। 18 खोरो राङ लापुप मी तीकी मीतिवा नेसुर ताङ्‍देन छोल्‍गिवी, यिने खोरुङला तोङ्‍गुप तीला मोवा कितुप नो वोतुप मी ति टेङ्‍बु वे, तीकी काङ साङ जिनोक मोजोवी। 19 काङ मोशाकी ख्‍यिराङला कोन्‍छ्‍योककी नङ्‍गुप ठिम बिन्‍दुप मिन रो? यिने ख्‍यिरा पर्ला सु साङ ती ठिमला मेङ्‍येन्‍दिवी। ख्‍यिराङ च्‍यिला ङला सेतुपला छोल्‍गिवी?” सिनी सुङ्‍सुङ। 20 खोकी तुक सुङ्‍सिमा मी माङ्‍छ्‍योककी खोला “ख्‍युरुङला र्‍हेन्‍डी ग्‍यम वे। सी ख्‍युरुङला सेतुपला छोल्‍गिनोक?” सिनी सिक्‍यासुङ। 21 तमा येशूकी तिवाला दुक सुङ्‍सुङ, “ङे हलेवु लाका यी क्‍यायिन, तमा ख्‍यिराङ तेरी हलेवा क्‍यासुङ। 22 मोशाकी ख्‍यिराङला यहूदी च्‍येतुप लुक्‍सु कितुप ठिम बिन वे। वुतुङ के ती ठिम ति मोशाकी बिन्‍दुप मिन, यिने ख्‍यिरा पगावा हङ्‍गावातिवा नेसुर वावु यिन। तुक क्‍यानी ख्‍यिरा ङासोप ङ्‍यिमाला साङ ख्‍यिरा पुज्‍युङतिवाला यहूदी च्‍येतुप लुक्‍सु किनोक। 23 ख्‍यिराङ मोशाकी ठिम तेन्‍दुपला ङासोप ङ्‍यिमाला साङ यहूदी च्‍येतुप लुक्‍सु किवी सिसिन ङे ङासोप ङ्‍यिमाला नेर्पु यीकी जु तेरी टेक च्‍यितुप तप्‍की ख्‍यिराङ च्‍यिला ङला ङ्‍यिर्मु किवी? 24 ख्‍यिरा मी ङो ल्‍हानी तिराङ ठिम माकी, यिने ठिम टेङ्‍बो की।”

येशू ति ख्रीष्‍ट यिन?

25 तमा यरूशलेमकी मीतिवा ललाइकी “यहूदी गोमा कितुप छ्‍येतिवी सेतुपला छोलुप ति दी राङ मिन रो? 26 ल्हो ताङ, दीकी याङ मी मिङ्‍गाला राङ सुङ लप्‍किनोक, यिन्‍सिनाङ तिवी तीकी तेन्‍दोकला काङ साङ मिसिर्नोक। तिवी दी मी ति वुतुङ के ख्रीष्‍ट यिन सिनी हाक्‍कोते? 27 यिने दी मी ति कनी नेसुर वावु यिन सिनी दाक्‍पुला छ्‍या वे। ख्रीष्‍ट फेप्‍सियाङ खो कनी नेसुर फेवु यिन सिनी सी साङ हाक्‍मोकोवी।” सिनी सिक्‍यासुङ। 28 ती पेला येशूकी ते यहूदी ल्‍हङाङ नाङ्‍ला येन्‍देन लाप नङ्‍यिन नोक, तमा खोकी कशेन थोर ग्‍यप्‍नी सुङ्‍सुङ, “ख्‍यिरा ङला ङो शे वे, तमा ङ कनी नेसुर वावु यिन सिरुप साङ छ्‍या वे। यिने ङ ङरा नोवाकी राङ वावु मिन। ङला तोङ्‍गुप ति टेङ्‍बु यिन। ख्‍यिरा खोला ङो राङ मेशेवी, 29 यिने ङे याङ खोला ङो शेकिवी। च्‍यिलासिसिन ङ खो नेमा वावु यिन, तमा खोकी ङला तङ्‍गुप यिन।” 30 येशूकी तुक सुङ्‍सिमा मीतिवी खोला जिम्‍बुप नो क्‍यासुङ, यिने सी साङ खोला जिम माथुप, च्‍यिलासिसिन ती पेला सेक खोकी तुजे मालेप्‍नोक। 31 ते वोतुप मीतिवी पर्ला बङीकी खोला तेपा क्‍यासुङ। तमा तिवी सिक्‍यासुङ, “ख्रीष्‍ट फेप्‍सिनाङ दी मी तीकी क्‍यावु हलेवु ततिवा सिनाङ मङ छ्‍या देन्‍गिवी रो?”

येशूला जिम्‍बुप छलुप

32 मी मङ्‍छ्‍योककी येशूकी कोर्ला तुका मुक्‍तम तेन्‍दुप ति फरिसीतिवी थोसुङ। तमा ती फरिसीतिवी ताङ कोङ्‍यार छ्‍येतिवी येशूला जिम्‍बुपला ल्‍हङाङ र्‍हेन्‍दुप मक्‍मीतिवा ताङ्‍सुङ। 33 तमा येशूकी सुङ्‍सुङ, “तरोङ ङ चेयी पर सेक तिराङ ख्‍यिरा मुला देतिन, तमा ती ज्‍युक्‍ला ङ ङला तोङ्‍गुप तीकी ते लोक्‍नी डोयी। 34 ख्‍यिरा ङला छल्‍सिनाङ ङला मेङ्‍येवी। तमा ङ कनी गाल वे, ते ख्‍यिराङ वुङ साङ मुथुपी।” 35 तमा यहूदी गोमा कितुप छ्‍येतिवा खोप्‍राङ नाङ्‍ला च्‍यिककी च्‍यिकला “ला, दी मी ति कनी डोप नो किताङ? दीला दाक्‍पी ठे मुथुपी सिरुप ति काङ यिनाङ? काङ दी मी ति ग्रीककी लुङ्‍बाला टम्‍नी देतुप यहूदीतिवी पर्ला गल्‍नी येन्‍देन तेरुप नो किते की? 36 दीकी याङ दाक्‍पुला ‘ख्‍यिरा ङला छल्‍सिनाङ मेङ्‍येवी। तमा ङ कनी गाल वे, ते ख्‍यिराङ वुङ साङ मुथुपी।’ सिक्‍यावु तेन्‍दोक ति काङ यिनाङ?” सिनी सिक्‍यासुङ।

मिजी तेरुप छ्‍यी पुङ

37 तमा ती तुछ्‍येनकी तिङ्‍मा ताङ तेरी सिनाङ खक्‍छ्‍येवु ङ्‍यिमाला येशू मी माङ्‍छ्‍योककी पर्ला शेङ्‍नी कशेन थोर ग्‍यप्‍नी दुक सुङ्‍सुङ, “सुला कोम्‍बा लावे, ती ङे चाला वानी ङे बिन्‍दुप ति थुङ। 38 सी ङला तेपा किवे, तीकी सेम नेमा कोन्‍छ्‍योककी सुङला टि वोतुप दोके मिजी तेरुप छ्‍यु नरी दोल्‍गितो।” 39 खोकी तुक सुङ्‍गुप ति खोला तेपा कितुपतिवाला ज्‍युक्‍ला थोपुप कोन्‍छ्‍योककी थु चाङ्‍माकी कोर्ला सुङ्‍गुप यिन। ती पेला सेक कोन्‍छ्‍योककी थु चाङ्‍मा मीतिवाला माथोप्‍नोक, च्‍यिलासिसिन येशू ती पेला सेक देवाच्‍येन ने तेक्‍नी खोला मोवा माङ्‍येवु तप्‍की यिन।

मीतिवी पर्ला ताम्‍ङे माडिकुप

40 खोकी तुक सुङ्‍गुप थोनी मीतिवा ललाइकी “दी याङ वुतुङ के कोन्‍छ्‍योककी तङ्‍गुप लुङ्‍तेम्‍बा राङ यिनोक।” सिनी सिक्‍यासुङ। 41 तमा ललाइकी “दी याङ ख्रीष्‍ट यिनोक।” सिनी सिक्‍यासुङ। यिने ललाइकी “काङ ख्रीष्‍ट ति गालील नेसुर वुङ्‍गिवी रो? 42 कोन्‍छ्‍योककी सुङला ख्रीष्‍ट याङ ग्‍येल्‍वु दाऊदकी गिपा नेसुर गितो, तमा दाऊदकी युल बेथलेहेमला क्‍येकितो सिनी सुङ्‍गुप मिन रो?” सिनी सिक्‍यासुङ। 43 दुक राङ क्‍यानी येशूकी तेन्‍दोकला मी माङ्‍छ्‍योककी पर्ला ख्‍ये पेनोक। 44 तमा तिवी पर्ला ललाइकी येशूला जिम्‍बुप छल्‍सिनाङ सी साङ खोला जिम माथुप।

यहूदी गोमा कितुप छ्‍येतिवी येशूला तेपा माक्‍यावु

45 तमा ल्‍हङाङ र्‍हेन्‍दुप मक्‍मीतिवी येशूला जिम माथुप्‍नी कोङ्‍यार छ्‍येतिवा ताङ फरिसीतिवी चाला लोक्‍नी वासिमा तिवी ती मक्‍मीतिवाला “ख्‍यिरा च्‍यिला तीला जिम्‍नी टि माङु?” सिनी टिसुङ। 46 तमा तिवी “ती मी दोके ताम्‍ङे लपुप ति त सेक सु साङ मिन्‍दुक।” सिनी सिक्‍यासुङ। 47 तमा फरिसीतिवी तिवाला “ख्‍यिराङ साङ तीकी जिनोक जोवु ताम्‍ङेला शोर्सुङ? 48 ङ्‍यिरा यहूदी गोमा कितुप छ्‍येतिवा याङ्‍ना फरिसीतिवी पर्ला मी मिरा च्‍यिककी साङ तीला तेपा क्‍यासुङ रो? 49 ती ठिम काङ साङ हाक्‍मोकोवु मी माङ्‍छ्‍योकतिवाला कोन्‍छ्‍योककी मोताप सुकिवी।” सिनी सिक्‍यासुङ। 50 तमा ते वोतुप फरिसीतिवी पर्ला गोमाला येशूला ठेतुपला खोकी चाला गलुप निकोदेमस नोक। 51 तीकी तिवाला “काङ दाक्‍पी ठिमला याङ गोमाला ती मी तीकी ख नेमा माथोवा क्‍यानी ताङ तीकी काङ क्‍या वे, ती हाक्‍माकोवा क्यानी तीला क्‍येन तेर्किवी रो?” सिनी सिक्‍यासुङ। 52 तमा तिवी निकोदेमसला “काङ ख्‍युरुङ साङ गालीलकी मी यिन? ख्‍युरुङ कोन्‍छ्‍योककी सुङ ल्‍यामो क्‍यानी लोप। तुक क्‍यासिन गालील लुङ्‍बा नेसुर कोन्‍छ्‍योककी लुङ्‍तेम्‍बा मेङ्‍गिवी सिरुप ति हाक्‍कोकिवी।” सिनी सिक्‍यासुङ। 53 ती ज्‍युक्‍ला ती तेरी मीतिवा दाक दाक्‍पी खाङ्‍बा लोक्‍नी गाल्‍सुङ।

यूहन्‍ना 8

शम्‍डेन कितुप पुम्‍पेजाला जिम्‍नी टि वावु

1 तमा येशू जैतुन पम्‍दोकला फेप्‍सुङ। 2 ती सला टोपला टेताङ खो लोङ यहूदी ल्‍हङाङला फेप्‍सिमा मीतिवा खोकी गारी गुरीला जोम्‍सुङ। तमा खो तिवी पर्ला ज्‍युनी तिवाला कोन्‍छ्‍योककी सुङ लाप नाङ्‍सुङ। 3 ती पेला राङ यहूदी छ्‍योकी गेकेनतिवा ताङ फरिसीतिवी शम्‍डेन कियी वोतुप पुम्‍पेजा यीला जिम्‍नी येशूकी चाला टि वासुङ, तमा तीला तेरी मीतिवी दोङ्‍ला लानी दे च्‍यिसुङ। 4 तमा तिवी येशूला “गेकेन, दी पुम्‍पेजा ति शम्‍डेन कियी वोतुप पेला जिम्‍नोक। 5 मोशाकी ठिमला दुका पुम्‍पेजातिवाला दो पोप्‍नी से गोकिवी सिनी क बिन वे। त गेकेनकी काङ सुङ्‍गिवी?” सिनी टिसुङ। 6 तिवी दुक सिनी टिवु ति येशूला खोक्‍पा ल्‍हानी खोकी सुङ्‍गुप ताम्‍ङेला क्‍येन तेरुपला यिन। यिने येशूकी कुक क्‍यानी सला लाक्‍पी थेप्‍तोक थ्‍वोनी टिसुङ। 7 तमा तिवी खोला टिवु ति टितोक क्‍यासिमा खो शेङ्‍नी तिवाला “ख्‍यिरा पर्ला सु दिक्‍छेन मेवे, तीकी गोमाला राङ दी पुम्‍पेजाला दो पोप।” सिनी सुङ्‍सुङ। 8 तुक सुङ्‍सिमा खोकी येलुङ कुक क्‍यानी सला लाक्‍पी थेप्‍तोक थ्‍वोनी टिसुङ। 9 ती ताम्‍ङे थोसिमा गोमाला गावागामातिवा नेसुर गो चुनी मी नाज्‍युङतिवा सेक तेरी रे ताङ रे क्‍यानी गाल्‍सुङ, तमा ते येशू तिराङ लुसुङ। ती पुम्‍पेजा ति तुक राङ लानी देनोक। 10 तमा येशूकी शेङ्‍नी ती पुम्‍पेजा तीला “ओ नुमो, तिवा कनी गाल? सी साङ ख्‍युरुङला ठिम माक्‍या?” सिनी टि नाङ्‍सुङ। 11 तमा ती पुम्‍पेजा तीकी “मिन, चोवो, सी साङ माक्‍या।” सिनी सिक्‍यासुङ। तमा येशूकी तीला “ङ साङ ख्‍युरुङला ठिम मिकी। ख्‍युरुङ ग्‍युक, तमा तफेन्‍ला येलुङ दिक्‍पा माकी।” सिनी सुङ्‍सुङ।

येशू जम्‍बुलिङकी वोसिर यिन

12 येलुङ येशूकी मीतिवाला “ङ जम्‍बुलिङकी मीतिवाला मिजी तेरुप वोसिर यिन। ङला तिङ्‍योकुपतिवा तफेन्‍ला नक्‍तोमीला मुयुकिवी, यिने तिवाला मिजी तेरुप वोसिर थोप्‍किवी।” सिनी सुङ्‍सुङ। 13 ती ताम्‍ङे थोनी फरिसीतिवी “ख्‍युरुङ ख्‍योरो कोर्ला राङ पङ्‍बु तेर्किनोक, तुक क्‍यानी ख्‍योरो पङ्‍बु ति टेङ्‍बु मिन।” सिनी खोला सिक्‍यासुङ। 14 तमा येशूकी तिवाला सुङ्‍सुङ, “ङे ङरा कोर्ला पङ्‍बु बिन्‍सिनाङ ङे पङ्‍बु ति टेङ्‍बु वे, च्‍यिलासिसिन ङ कनी नेमा वावु ताङ कनी डिवी सिरुप ति ङला छ्‍या वे। यिने ख्‍यिराङला ङ कनी नेमा वावु ताङ कनी डिवी सिरुप ति छ्‍या मे। 15 ख्‍यिराङ ति मीतिवी नासाम नेसुर ठिम तोङ्‍गिवी, यिने ङ याङ सुला साङ ठिम मोतोङ्‍गिवी। 16 यिने दोजो ङे मीतिवाला ठिम ताङ्‍सिनाङ ङे तङ्‍गुप ठिम ति टेङ्‍बु वे। च्‍यिलासिसिन ङ च्‍यिकला राङ ठिम तोङ्‍गुप मिन, यिने ङला तोङ्‍गुप पपा ङे मुला राङ ठिम कियी वे। 17 ख्‍यिरा ठिमला साङ ‘मिरा ङ्‍यीकी पङ्‍बु बिन्‍सिन ती पङ्‍बु ति टेङ्‍बु वे।’ सिनी टि वे। 18 ङे थोक्‍ला ङरा राङ पङ्‍बु तेर्किवी, तमा ङला तोङ्‍गुप पपी साङ ङे थोक्‍ला पङ्‍बु नङ्‍गिवी।” 19 तमा तिवी खोला “ख्‍योरो पपा ति कनी वे?” सिनी टिसुङ। तमा येशूकी तिवाला “ख्‍यिरा ङला साङ ङो माशे, ङे पपाला साङ ङो माशे। दोजो ख्‍यिरा ङला ङो शेसिन ङे पपाला साङ ङो शेवुजा।” सिनी सुङ्‍सुङ। 20 दी ताम्‍ङे ति येशूकी यहूदी ल्‍हङाङला येन्‍देन नङ्‍यिन वोतुप पेला ते वोतुप बुल्‍वा बुलुप गाम ज्‍यकुप दासाला सुङ्‍गुप यिन। यिने ती पेला सी साङ खोला माजिम्‍नोक, च्‍यिलासिसिन खोकी तुजे ति तरोङ साङ मालेप्‍नोक।

ङ डोप ते ख्‍यिराङ डो मुथुपी सिनी येशूकी सुङ्‍गुप

21 येलुङ येशूकी तिवाला सुङ्‍सुङ, “ङ डोयी वोतो, तमा ख्‍यिरा ङला छोल्‍गितो, तमा ख्‍यिराङ ति ख्‍यिरा क्‍यावु दिक्‍पाला राङ शिवितो। ङ कनी गाल्‍वे, ते ख्‍यिराङ वुङ मुथुप्‍तो।” 22 ती थोनी यहूदी गोमा कितुप छ्‍येतिवी “तीकी ‘ङ कनी गाल्‍वे, ते ख्‍यिराङ वुङ मुथुप्‍तो।’ सिनी सिनोक। दीकी तेन्‍दोक ति खोरुङ राङ शेपला यिन्‍दे?” सिनी सिक्‍यासुङ। 23 तमा येशूकी तिवाला सुङ्‍सुङ, “ख्‍यिराङ ति मलाकी ति यिन, यिने ङ ति यायु नेमा वावु यिन। ख्‍यिराङ ति दी जम्‍बुलिङकी मी यिन, यिने ङ ति दी जम्‍बुलिङकी मी मिन। 24 तुक क्‍यानी ख्‍यिराङ ति ख्‍यिरा क्‍यावु दिक्‍पाला राङ शिवितो सिनी ङे ख्‍यिराङला सिक्‍यावु यिन। दोजो ख्‍यिरा ‘ङ सु यिन, ती राङ यिन।’ सिरुप तीला तेपा माक्‍यासिन ख्‍यिराङ ख्‍यिरा दिक्‍पाला राङ शिवितो।” 25 तमा तिवी खोला “ख्‍युरुङ सु यिन?” सिनी टिसुङ। येशूकी “ङ सु यिन सिनी थल्‍मा नेज्‍युनी ख्‍यिराङला सिक्‍यावु ति यिन। 26 ख्‍यिरा थोक्‍ला ङे ताम्‍ङे कितुप ताङ ठिम कितुप याङ बङी वे, यिने ङला तोङ्‍गुप ति वुतुङ के टेङ्‍बु वे। ङ ति ङला तोङ्‍गुप तीकी नेमा थोवु ताम्‍ङे तिराङ जम्‍बुलिङकी मीतिवाला लपिन।” सिनी सुङ्‍सुङ। 27 खोकी ती ताम्‍ङे ति पपा कोन्‍छ्‍योककी कोर्ला सुङ्‍गुप यिन सिनी तिवी हाक्‍माको। 28 ती तप्‍की येशूकी तिवाला सुङ्‍सुङ, “ख्‍यिरा ङ मी पुज्‍युङला येर देकुप पेला ‘ङ सु यिन, ती राङ यिन’ सिरुप ताङ ङरा राङ काङ माक्‍यावा क्‍यानी पपी ङला काङ सुङ्वे, ती दोके ङे तेरी सिक्‍यावु यिन सिरुप ति ख्‍यिरा हाक्‍कोकितो। 29 ङला तोङ्‍गुप ति ङे मुला ज्‍यु वे। खोकी ङला च्‍यिक राङ क्‍युन माज्‍याक वे, च्‍यिलासिसिन ङ नरी खोला गा लङ्‍गुप लाका कितिन।” 30 खोकी तुक सुङ्‍गुप ताम्‍ङेतिवा थोनी मीतिवा बङीकी खोला तेपा क्‍यासुङ।

टेङ्‍बुकी ख्‍यिराङला थर ज्‍यिकिवी

31 तमा येशूकी खोला तेपा कितुप यहूदीतिवाला सुङ्‍सुङ, “ख्‍यिराङ ङे येन्‍देनला लुसुङ सिसिन ख्‍यिराङ वुतुङ के ङे लोमातिवा यिनो। 32 तमा ख्‍यिरा टेङ्‍बुकी कोर्ला हाक्‍कोकितो, तमा ती टेङ्‍बुकी ख्‍यिराङला पि तोङ्‍गितो।” 33 ती थोसिमा तिवी खोला “ङ्‍यिराङ याङ अब्राहामकी गिपा यिन, त सेक ङ्‍यिराङ सी योक्‍पु साङ माच्‍युङ, यिने ख्‍योरे च्‍यिला ङ्‍यिराङला पि तोङ्‍गितो सिनी सिक्‍यावु यिन?” सिनी सिक्‍यासुङ। 34 तमा येशूकी तिवाला सुङ्‍सुङ, “वुतुङ के ङ ख्‍यिराङला सिरिन, दिक्‍पा कितुप ति दिक्‍पाकी योक्‍पु यिन। 35 योक्‍पु ति नरी ज्‍यिन्‍दाककी खाङ्‍बाला मुलुवी, यिने ज्‍यिन्‍दाककी पुज्‍युङ ति नरी लुकिवी। 36 तुक क्‍यानी कोन्‍छ्‍योककी पुज्‍युङकी ख्‍यिराङला पि तोङ्‍गिवी सिसिन ख्‍यिराङ वुतुङ के पितोङ्‍गिवी। 37 ख्‍यिराङ अब्राहामकी गिपा यिन सिरुप ति ङला छ्‍या वे। यिन्‍सिनाङ ख्‍यिरा ङला सेतुप छोल्‍गिवी, च्‍यिलासिसिन ङे सिक्‍यावु ताम्‍ङे ति ख्‍यिरा सेमला मोज्‍योकिवी। 38 ङ ङे पपा नेसुर थोङ्‍गुप ति ख्‍यिराङला लपिन, यिने ख्‍यिराङ ति ख्‍यिरा पपा नेसुर थोवु दोके राङ किवी।”

ख्‍यिरा पपा ति डे यिन

39 तमा तिवी येशूला “ङ्‍यिरा पपा याङ अब्राहाम यिन।” सिनी सिक्‍यासुङ। येशूकी तिवाला सुङ्‍सुङ, “दोजो ख्‍यिराङ वुतुङ के अब्राहामकी गिपा यिन्‍सिन अब्राहामकी काङ किवे, ख्‍यिरा साङ तुकै राङ कितुप्‍जा। 40 ङे ख्‍यिराङला कोन्‍छ्‍योक नेमा थोवु सुङ टेङ्‍बु ति सिक्‍यायी, यिन्‍सिनाङ ख्‍यिरा ङला सेतुप छोल्‍गिनोक। अब्राहामकी याङ तुकै माक्‍या। 41 ख्‍यिरा पपी काङ किवे, ख्‍यिरा साङ तुकै राङ कियी वे।” सिनी सुङ्‍सुङ। येलुङ तिवी खोला “ङ्‍यिराङ याङ शम्‍डेन क्‍यानी क्‍येवु मिन। ङ्‍यिरा पपा याङ कोन्‍छ्‍योक च्‍यिक राङ यिन।” सिनी सिक्‍यासुङ।

शैतानकी गिपा

42 येलुङ येशूकी तिवाला सुङ्‍सुङ, “दोजो कोन्‍छ्‍योक ति ख्‍यिरा पपा यिन्‍सियाङ ख्‍यिरा ङला ङ्‍यिङ्‍ज्‍ये कितुप्‍जा, च्‍यिलासिसिन ङ कोन्‍छ्‍योक नेमा वानी तन्‍दा दे राङ वे। तमा ङ ङराङ वावु मिन, यिने खोकी ङला ताङ्‍सुङ। 43 ख्‍यिराङ च्‍यिला ङे सिक्‍यावु ताम्‍ङेला हाक्‍मोकोवी? ती ति ख्‍यिरा ङे सिक्‍यावु ताम्‍ङे ख्‍यिरा ङ्‍येन मुथुपी। 44 ख्‍यिराङ ति ख्‍यिरा पपा शैतानकी गिपा यिन। ख्‍यिरा पपी काङ सिक्‍यावे, ख्‍यिराङ साङ तुक राङ कितुप नो किवी। ती शैतान ति थल्‍मा नेज्‍युनी शेन्‍बा यिन। तीकी नाम्‍साङ टेङ्‍बुला ङ्‍याम मिकिवी, च्‍यिलासिसिन तीकी सेमला काङ साङ टेङ्‍बु मे। तीकी जिनोक जोप पेला खोरो किताङ नालुला राङ जिनोक जेवी, च्‍यिलासिसिन ती ति जिनोक्‍पा यिन, तमा तेरी जिनोककी पपा यिन। 45 ङे ख्‍यिराङला ताम्‍ङे टेङ्‍बु सिक्‍यायिन, तुक क्‍यानी ख्‍यिरा ङे ताम्‍ङेला मेङ्‍येन्‍दिवी। 46 ख्‍यिरा पर्ला सी ङला दिक्‍पा वे सिनी तेन्‍तेन कि थुप्‍किवी रो? ङे ताम्‍ङे टेङ्‍बु लाप्‍सिन ख्‍यिरा च्‍यिला ङला तेपा मिकिवी? 47 सु कोन्‍छ्‍योककी गिपा नोके, तीकी खोकी सुङला ङ्‍येन्‍गिवी। ख्‍यिराङ ति खोकी सुङला मेङ्‍येन्‍दिवी, च्‍यिलासिसिन ख्‍यिराङ कोन्‍छ्‍योककी गिपा मिन्‍दुप तप्‍की यिन।”

येशू अब्राहाम सिनाङ गोमाला के वे

48 तमा यहूदीतिवी येशूला “ङ्‍यिरा ख्‍युरुङ सामरी यिन, तमा ख्‍युरुङला डे ग्‍यप्‍नोक सिनी सिक्‍यावु ति टेके मिन रो?” सिनी सिक्‍यासुङ। 49 तमा येशूकी सुङ्‍सुङ, “मिन, ङला डे ग्‍यपुप मिन, यिने ङ ङे पपाला ताङ्‍देन कितिन। यिन्‍सिनाङ ख्‍यिरा याङ ङला मो बेप्‍किवी। 50 ङ ङरा थोक्‍ला राङ मीतिवी नेमा ताङ्‍देन मोछोल, यिने ङे थोक्‍ला ताङ्‍देन छोलुप ताङ ठिम कितुप ति च्‍यिक वे। 51 वुतुङ के ङ ख्‍यिराङला सिरिन, सु ङे सुङला ङ्‍येन्‍गिवे, ती ति नाम्‍साङ मिशिवी।” 52 तमा यहूदीतिवी येशूला सिक्‍यासुङ, “त ख्‍युरुङला वुतुङ के डे ग्‍यप्‍नोक सिनी ङ्‍यिरा तेन्‍तेन हाक्‍कोसुङ। अब्राहाम साङ शिसुङ, कोन्‍छ्‍योककी लुङ्‍तेम्‍बातिवा साङ शिसुङ, यिने ख्‍योरो याङ ‘ङे सुङ ङ्‍येन्‍दुपतिवा नाम्‍साङ मिशिवी।’ सिनी सिनोक। 53 काङ ख्‍युरुङ शिनी गलुप दाक्‍पी पगावा अब्राहाम सिनाङ छ्‍ये यिन रो? खो साङ शिसुङ, कोन्‍छ्‍योककी लुङ्‍तेम्‍बातिवा साङ शिसुङ। ख्‍युरुङ ति खुरुङला राङ सु यिन सिनी नासाम तोङ्‍गिवी?” 54 तमा येशूकी सुङ्‍सुङ, “दोजो ङे ङराङला मोवा छलुप यिन्‍सिन ती मोवा ति तेर्मे यिन। ङला मोवा ङ्‍ये ज्‍यितुप ति ङे पपा यिन। खो ति ख्‍यिरा रङगी कोन्‍छ्‍योक सिनी सिक्‍यावु ति यिन। 55 ख्‍यिरा खोला ङो माशे वे, यिने ङे याङ खोला ङो शे वे। दोजो ङे खोला ङो माशे वे सिनी सिक्‍यासिन ङ साङ ख्‍यिराङ दोके जिनोक्‍पा च्‍युङ्‍गिवी। यिने ङे खोला ङो शे वे, तमा खोकी सुङला ङ्‍येन्‍गिवी। 56 ख्‍यिरा पगावा अब्राहामकी ङ वुङ्‍गुप तुजे ल्‍हाप नोनी सेमला छासे गा लासुङ, तमा तीकी ङ वुङ्‍गुप ति ल्‍हानी गा क्‍यासुङ।” 57 तमा तिवी खोला दुक सिक्‍यासुङ, “काङ ख्‍युरुङ लो खाल ङ साङ मालेपाला के चुक क्‍यानी अब्राहामला थोङ्‍सुङ सिनी सिवी?” 58 तमा येशूकी तिवाला “वुतुङ के ङ ख्‍यिराङला सिरिन, अब्राहाम क्‍येप सिनाङ गोमाला के ङ वोतुप यिन।” सिनी सुङ्‍सुङ। 59 खोकी तुक सुङ्‍सिमा तिवी दो लानी खोला बेपुप छाल्‍सुङ। यिने येशू यिप्‍नी ते यहूदी ल्‍हङाङ नेसुर थेन्‍नी पाङ्‍ला फेप्‍सुङ।

यूहन्‍ना 9

क्‍येप पे नेज्‍युन मिक मोथोङ्‍गुप मीला येशूकी थोङ च्‍यितुप

1 तेसुर येशू फेपिन कितुप पेला क्‍येप पे नेज्‍युन मिक मोथोङ्‍गुप मी मिरा च्‍यिकला थोङ्‍सुङ। 2 ती थोङ्‍सिमा खोकी लोमातिवी खोला “गेकेन, दी मी ति क्‍येप पे नेज्‍युन मिक मोथोङ्‍गुप ति सी दिक्‍पा क्‍यावु तप्‍की यिन? तीकी दिक्‍पा क्‍यावु तप्‍की यिनाङ की, तीकी पपाआमी दिक्‍पा क्‍यावु तप्‍की यिनाङ?” सिनी टिसुङ। 3 तमा येशूकी तिवाला सुङ्‍सुङ, “दीकी दिक्‍पा क्‍यावु साङ मिन, दीकी पपाआमी दिक्‍पा क्‍यावु साङ मिन। यिने दीकी मिजी नेमा कोन्‍छ्‍योककी हलेवु लाका ति मीतिवी थोङ्‍शी सिनी तुकै च्‍युङ्‍गुप यिन। 4 ङ्‍यिमी गुङला राङ ङला तोङ्‍गुप तीकी लाकातिवा दाक्‍पी कि गोकिवी। नुपला याङ सी साङ लाका कि मुथुपी। 5 जम्‍बुलिङला वोता सेक ङ ति जम्‍बुलिङकी वोसिर यिन।” 6 तुक सुङ्‍सिमा खोकी सला च्‍येमाक क्‍युर्नी थला ताङ मुला नुप्‍सिमा ती नुपुप ति ती मिक मोथोङ्‍गुप तीकी मिकला कुसुङ। 7 तमा खोकी तीला “ख्‍युरुङ सिलोआम चोला गल्‍नी ख्‍योरो मिक ति शोल।” सिनी सुङ्‍सुङ। (दी सिलोआमकी तेन्‍दोक ति तङ्‍गुप यिन।) खोकी तुक सुङ्‍सिमा ती मी ति गल्‍नी मिक शाल्‍सुङ, तमा तीकी मिक ति थोङ्‍गुप गल्‍नी खाङ्‍बा लोक्‍नी गाल्‍सुङ। 8 तमा तीकी युल्‍वातिवा ताङ गोमाला तीला लाङ सयी वोतुप थोङ्‍गुपतिवी “दी याङ गोमाला देनी लाङ्‍साप ती मी ति मिन?” सिनी टिसुङ। 9 यम्‍बातिवी “यिन, दी मी ति ती राङ यिन।” सिनी सिक्‍यासुङ। तमा ललाइकी “मिन, दी ति ती दोके राङ थोङ्‍गिनोक।” सिनी सिक्‍यासुङ। यिने ती मिक थोङ थुपुप गलुप मी तीकी तिवाला “यिन, ती मी ति ङ राङ यिन।” सिनी सिक्‍यासुङ। 10 तमा मीतिवी “तुकै यिन्‍सिन ख्‍युरुङ चुक क्‍यानी मिक थोङ्‍गुप गाल्‍सुङ?” सिनी तीला टिसुङ। 11 तमा तीकी “येशू सिरुप मी यीकी थला नुप्‍नी ङे मिकला कुन बिन्‍सुङ। तमा ङला सिलोआम चोला गल्‍नी शोल सिनी सुङ्‍सुङ। तमा ङ गल्‍नी ङे मिक शलिन, शल्‍लुङ्‍मे ङे मिक थोङ थुपुप गाल्‍सुङ।” सिनी सिक्‍यासुङ। 12 तुक सिक्‍यासिमा मीतिवी तीला “ती मी ति कनी वे?” सिनी टिसुङ। तमा तीकी “ङला याङ छ्‍या मे।” सिनी सिक्‍यासुङ।

फरिसीतिवी मिक थोङ थुपुप मीला टिवु

13 तमा मीतिवी ती गोमाला मिक मोथोङ्‍गुप तीला फरिसीतिवी चाला टि गाल्‍सुङ। 14 येशूकी थला नुप्‍नी ती मी तीला मिक थोङ च्‍यितुप ङ्‍यिमा ति ङासोप ङि्‍यमा यिनोक। 15 फरिसीतिवी तीला येलुङ चुक क्‍यानी तीकी मिक थोङ थुपुप गाल्‍सुङ सिनी टिसुङ। तमा तीकी “खोकी थला नुप्‍नी ङे मिकला कुसिमा ङे मिक शलिन, तमा ङे मिक थोङ थुपुप गाल्‍सुङ।” सिनी सिक्‍यासुङ। 16 फरिसीतिवी पर्ला ललाइ ललाइकी “ती मी ति याङ कोन्‍छ्‍योक नेमा वावु मिन, च्‍यिलासिसिन तीकी ङासोप ङ्‍यिमा मेतेन्‍नोक।” सिनी सिक्‍यासुङ। तमा यम्‍बातिवी “मी दिक्‍छेनकी चुक क्‍यानी दुका हलेवु ततिवा छ्‍या देन थुप्‍किवी रो?” सिनी सिक्‍यासुङ। तुक क्‍यानी तिवी पर्ला ताम्‍ङे माडिक। 17 येलुङ फरिसीतिवी गोमाला मिक मोथोङ्‍गुप मी तीला “ती मी तीकी ख्‍योरो मिक थोङ थुपुप जोसुङ सिनी ख्‍योरे सिक्‍यासुङ। त ख्‍युरुङ तीकी कोर्ला काङ नासाम तोङ्‍गिवी?” सिनी टिसुङ। तमा तीकी “खो याङ कोन्‍छ्‍योककी लुङ्‍तेम्‍बा यिन।” सिनी टिलेन बिन्‍सुङ। 18 यिने यहूदी गोमा कितुप छ्‍येतिवी ती मी ति गोमाला मिक मोथोङ्‍गुप नोक, तन्‍दा ति मिक थोङ्‍गुप गाल्‍नोक सिरुप ति लो मातेन। तुक क्‍यानी तिवी ती मी तीकी पपाआमाला कताङ्‍सुङ। 19 कताङ्‍सिमा तिवी तिवाला “दी ति क्‍येप पे नेज्‍युन मिक मोथोङ्‍गुप ख्‍यिरा पुज्‍युङ यिन? तन्‍दा चुक क्‍यानी दीकी मिक थोङ थुपुप गाल्‍सुङ?” सिनी टिसुङ। 20 तमा तीकी पपाआमा तीकी “दी ङ्‍यिरा पुज्‍युङ यिन, दी ति क्‍येप पे नेज्‍यु मिक मोथोङ्‍गुप वे सिनी ङ्‍यिराङला छ्‍या वे, 21 यिने चुक क्‍यानी दीकी मिक थोङ थुपुप गाल्‍सुङ सिरुप ति ङ्‍यिराङला छ्‍या मे। तमा सी दीकी मिक थोङ थुपुप जोसुङ, ती साङ ङ्‍यिराङला छ्‍या मे। दीला राङ टी। दी ति ज्‍येन्‍दा यिन, दीकी खोरो राङ लप्‍किवी।” सिनी सिक्‍यासुङ। 22 तीकी पपाआमा ति यहूदी गोमा कितुप छ्‍येतिवाला ज्‍यिवा लावु तप्‍की तुक सिक्‍यानोक, च्‍यिलासिसिन येशूला ख्रीष्‍ट यिन सिनी सिरुपतिवा सुला साङ यहूदी छ्‍योखाङ नेमा तेन तोङ्‍गुप सिनी तिवी तेन्‍तेन क्‍यानोक। 23 तुक क्‍यानी तीकी पपाआमी खोप्‍रे पुज्‍युङ ति ज्‍येन्‍दा यिन, तीला राङ टि सिनी सिक्‍यावु यिन। 24 येलुङ तिवी गोमाला मिक मोथोङ्‍गुप मी तीला कताङ्‍नी, “कोन्‍छ्‍योकला मोवा की, ती मी ति दिक्‍छेन यिन सिरुप ति ङि्‍यराङला छ्‍या वे।” सिनी सिक्‍यासुङ। 25 तमा तीकी तिवाला “खो दिक्‍छेन यिन्‍दे मिन्‍दे सिनी ङला छ्‍या मे, यिने ङला छ्‍या वोतुप ताम्‍ङे च्‍यिक ति तोङ्‍ला ङे मिक मोथोङ्‍गुप वे, तन्‍दा ति मिक थोङ थुपुप गाल्‍सुङ।” सिनी सिक्‍यासुङ। 26 येलुङ तिवी तीला “तीकी ख्‍युरुङला काङ क्‍यासुङ? चुक क्‍यानी तीकी ख्‍योरो मिक थोङ थुपुप जोसुङ?” सिनी टिसुङ। 27 तमा तीकी तिवाला “ख्‍यिराङला ङे हानाके सिक्‍यायी, यिने ख्‍यिरा ङे ताम्‍ङे लो मातेन। ख्‍यिराङ च्‍यिला येलुङ ती ताम्‍ङे ङ्‍येन्‍दुप नो किवी? काङ ख्‍यिराङ साङ खोकी लोमातिवा च्‍युङ्‍गुप नो किवी?” सिनी टिसुङ। 28 तमा तिवी तीला मारे तोङ्‍यिन सिरा “ख्‍युरुङ ति तीकी लोमा यिन, यिने ङ्‍यिराङ याङ मोशाकी लोमा यिन। 29 कोन्‍छ्‍योककी मोशाला ताम्‍ङे सुङ्‍गुप ति ङ्‍यिराङला छ्‍या वे, यिने दी मी ति कनीकी मी यिन सिरुप ति ङ्‍यिराङला छ्‍या राङ मे।” सिनी सिक्‍यासुङ। 30 तमा तिवाला तीकी सिक्‍यासुङ, “कङ ग्‍या, मिच्‍यिक्‍पा ताम्‍ङे यी! खोकी ङे मिक थोङ थुपुप जोसुङ, यिन्‍सिनाङ खो कनी नेसुर फेवु यिन सिनी ख्‍यिराङला छ्‍या मिन्‍दुक। 31 कोन्‍छ्‍योककी दिक्‍छेनतिवी ताम्‍ङे ति मेसेन्‍दी, यिने खोला ज्‍यिवा क्‍यानी सोवा देकुप ताङ खोकी नोवाला युकुपतिवी ताम्‍ङे सेन्‍गिवी सिरुप ति ङ्‍यिराङला छ्‍या वे। 32 क्‍येप पे नेज्‍युन मिक मोथोङ्‍गुप मीला मिक थोङ थुपुप जोवु ताम्‍ङे याङ जम्‍बुलिङ ज्‍येङ्‍गुप पे नेज्‍यु तन्‍दा सेक सी साङ नाम्‍साङ माथो वे। 33 दोजो ती मी ति कोन्‍छ्‍योक नेमा वावु मिन्‍सिन तुका लाका ति कि राङ मुथुपी।” 34 तमा तिवी तीला “ख्‍युरुङ याङ क्‍येप पेला नेज्‍युनी दिक्‍पाला ख्‍येलुप वुतुङ के दिक्‍छेन यिन, यिन्‍सिनाङ ख्‍योरो के ङ्‍यिराङला लोपुप छोल्‍गिवी?” सिनी तीला यहूदी छ्‍योखाङ नेमा तेन्‍नी ताङ्‍सुङ।

वुतुङ के मिक मोथोङ्‍गुप मी

35 ती मी तीला यहूदी छ्‍योखाङ नेमा तेन ताङ्‍नोक सिरुप ताम्‍ङे येशूकी थोसिमा खोकी तीला ठेनी, “काङ ख्‍युरुङ मी पुज्‍युङला तेपा किवी?” सिनी टिसुङ। 36 तमा तीकी “ओ चोवो! खो ति सु यिन? ङला सुङ्‍नी, तमा ङ खोला तेपा कितिन।” सिनी सिक्‍यासुङ। 37 तीकी तुक सिक्‍यासिमा येशूकी तीला “ख्‍योरो तीला गोमाला के थोङ सिन्‍सुङ, तमा तन्‍दा ख्‍योरो मुला ताम्‍ङे कियी वोतुप ति ती राङ यिन।” सिनी सुङ्‍सुङ। 38 तमा तीकी येशूला “ओ चोवो, ङ चोवोला तेपा कितिन।” सिनी खोला शावा क्‍यासुङ। 39 येशूकी तीला “ङ दी जम्‍बुलिङकी मिक मोथोङ्‍गुपतिवाला मिक थोङ्‍गुप जोप ताङ मिक थोङ्‍गुपतिवाला मिक मोथोङ्‍गुप जोपला वावु यिन।” सिनी सुङ्‍सुङ। 40 ती ताम्‍ङे थोसिमा येशूकी चिप्‍ला वोतुप फरिसीतिवा ललाइ ललाइकी येशूला “काङ ङ्‍यिराङ साङ मिक मोथोङ्‍गुप मी यिन सिनी ख्‍योरो सिक्यावु यिन?” सिनी टिसुङ। 41 तमा येशूकी तिवाला सुङ्‍सुङ, “दोजो ख्‍यिराङ मिक मोथोङ्‍गुप यिन्‍सिन ख्‍यिराङला दिक्‍पाकी क्‍येन मोफोकुप्‍जा। यिने ख्‍यिराङ मिक थोङ्‍गिवी सिनी सिक्‍यासुङ, तुक क्‍यानी ख्‍यिरा क्‍यावु दिक्‍पाकी क्‍येन ति तुक राङ लुनी वे।”

यूहन्‍ना 10

लुक गोठालाकी पे

1 ती ज्‍युक्‍ला येशूकी तिवाला सुङ्‍सुङ, “वुतुङ के ङ ख्‍यिराङला सिरिन, चुका मी ति लुकतिवा ज्‍योकुप खोरकी नाङ्‍ला शुकुप पेला ती खोरकी गे नाङ नेसुर माशुवा क्‍यानी यम्‍बा थाका नेसुर जेनी शुकिवे, ती ति कुर्मेन ताङ च्‍याक्‍पा यिन। 2 यिने खोरकी गे नाङ नेसुर क्‍यानी खोरकी नाङ्‍ला शुकुप मी ति लुकतिवी गोठाला यिन। 3 खोरकी गोला देनी र्‍हेन्‍दुप मी तीकी गोठालाकी थोक्‍ला खोरकी गो बेकिवी, तमा लुकतिवी खोरो गोठालाकी वोरु हाक्‍कोकिवी। गोठालाकी खोरो लुकतिवा रे रेकी मिङ तेन्‍नी लुकतिवाला पाङ्‍ला देन्‍गिवी। 4 तीकी लुकतिवा तेरी पाङ्‍ला तेन्‍सिमा खोरुङ ति तिवी गोमा गोमाला डिवी, तमा लुकतिवा तीकी तिङ्‍ला तिङ्‍योकिवी, च्‍यिलासिसिन लुकतिवी खोरो गोठालाकी वोरु ङो शेकिवी। 5 यिने मी यम्‍बी तिङ्‍ला याङ तिवा तिङ मोङ्‍योकी, बोरु ती नेसुर तिवा टोनी डिवी, च्‍यिलासिसिन मी यम्‍बी वोरु ति तिवी ङो मेशेवी।” 6 येशूकी तिवाला दी पे सुङ्‍सुङ, यिने तिवी ती पेकी तेन्‍दोक ति हाक्‍माकोनोक।

येशू गोठाला ल्‍यामु

7 तुक क्‍यानी येशूकी येलुङ तिवाला दुक सुङ्‍सुङ, “वुतुङ के ङ ख्‍यिराङला सिरिन, लुक शुकुप खोरकी गो ति ङ राङ यिन। 8 ङ सिनाङ गोमाला वुङ्‍गुपतिवा तेरी कुर्मेन ताङ च्‍याक्‍पा यिन, यिने लुकतिवी तिवी ताम्‍ङे माङ्‍येन। 9 लुक शुकुप गो ति ङ राङ यिन। सु ङ नेसुर नाङ्‍ला शुकिवे, ती ति र्‍होकिवी, तमा फिला नाङ्‍ला डोप वुङ्‍गुप ताङ चरिन ङोर्मुला च साप ङ्‍येकिवी। 10 कुर्मेन याङ कुन कितुप ताङ सेतुप ताङ ना तोङ्‍गुपला तिराङ गिवी। यिने ङ याङ लुकतिवाला मिजी ङ्‍येशी, तमा छाछिङी ङ्‍येशी सिनी वावु यिन। 11 ङ गोठाला ल्‍यामु यिन। गोठाला ल्‍यामुकी खोरो लुकतिवा र्‍होकुपला खुरुङ शि राङ गोसिनाङ शिवी। 12 यिने ल बिन्‍नी लाका कि च्‍यितुपतिवा ति गोठाला मिन, तमा लुकतिवा साङ खोरो लुक मिन्‍दुप तप्‍की खटमुतिवा वुङ्‍गुप थोङ्‍सिमा लुकतिवाला क्‍युर ज्‍याक्‍नी टोनी डिवी। खटमुतिवा वानी लुकतिवाला जिम्‍नी डिवी, तमा लुकतिवा थरा थुरा जेवी। 13 ती ति टोनी डिवी, च्‍यिलासिसिन ती ति ल बिन्‍नी लाका कि च्‍यितुप मी यिन्‍दुप तप्‍की लुकतिवाला ङ्‍याम मिकिवी। 14 ङ ति गोठाला ल्‍यामु यिन। ङे याङ ङरा लुकतिवाला ङो शेकिवी, ङे लुकतिवी साङ ङला ङो शेकिवी। 15 ती ति पपी ङला ङो शेवु ताङ ङे पपाला ङो शेवु दोके यिन। ङ रङगी लुकतिवी थोक्‍ला शि राङ गोसिनाङ शिवी। 16 ङे मुला दी खोरकी नाङ्‍ला मेतुप यम्‍बा लुकतिवा साङ वे। ङे तिवाला साङ टिनी वुङ गोकिवी। तिवी साङ ङे वोरु थोकिवी, तमा तिवा तेरी गोठाला च्‍यिककी मयी च्‍यिक राङ च्‍युङ्‍गिवी। 17 पपी ङला ङ्‍यिङ्‍ज्‍ये क्‍या नङ्‍गिवी। च्‍यिलासिसिन ङ ङरा राङ शि ज्‍यितिन, तमा येलुङ ङे मिजी ति छुर लोकिन। 18 ङे मिजी ति ङ नेमा सी साङ ठोनी डो मुथुपी, यिने ङ ङरा नोवाकी राङ शि ज्‍यितिन। ङे मिजी शि ज्‍यितुप ओङ साङ ङे मुला वे, येलुङ लङ्‍गुप ओङ साङ ङे मुला वे। ती ति ङे पपी ङला कि सिनी क नङ्‍गुप यिन।” 19 येशूकी तुक सुङ्‍गुप थोसिमा यहूदीतिवी पर्ला येलुङ ठका ठुका गाल्‍सुङ। 20 च्‍यिलासिसिन तिवी पर्ला मी बङीकी “दीला ति र्‍हेन्‍डी ग्‍यप्‍नी ङ्‍येन्‍बु गाल्‍नोक। ख्‍यिराङ च्‍यिला दीकी ताम्‍ङे ङ्‍येन्‍गिवी?” सिनी सिक्‍यासुङ। 21 तमा यम्‍बातिवी “र्‍हेन्‍डी ग्‍यपुप मीकी याङ दुकै ताम्‍ङे मिकिवी। र्‍हेन्‍डीकी चुक क्‍यानी मिक मोथोङ्‍गुप मीला थोङ्‍गुप जो थुप्‍किवी रो?” सिनी सिक्‍यासुङ।

यहूदीतिवी येशूला तेपा माक्‍यावु

22 तमा यरूशलेमला यहूदी ल्‍हङाङ रप्‍ने क्‍यावु तेन्‍दुप तुछ्‍येन वानोक, ती तुछ्‍येन ति गुन्‍बी लला ख्‍येल्‍नोक। 23 येशू ति ल्‍हङाङ नाङ्‍ला वोतुप सोलोमन दलान नेवा यरा युरा कियी ज्‍युनोक। 24 ती पेला मीतिवा खोकी गारी गुरीला जोम्‍नी दुक सिक्‍यासुङ, “नम सेक ख्‍युरुङ ङ्‍यिराङला यिसिक मिसिक जेवी? काङ ख्‍युरुङ कोन्‍छ्‍योककी तोङ्‍गुप ख्रीष्‍ट यिन्‍सिन ङ्‍यिराङला टेङ्‍बो सी।” 25 तमा येशूकी तिवाला सुङ्‍सुङ, “ङे ख्‍यिराङला गोमाला के सिक्‍यायी, यिने ख्‍यिरा ङला तेपा माक्‍या। ङे पपी मिङला ङे क्‍यावु ती हलेवु लाकातिवा नेसुर राङ ङ सु यिन सिनी पङ्‍बु तेर्किवी। 26 यिन्‍सिनाङ ख्‍यिरा ङला तेपा मिकिवी, च्‍यिलासिसिन ख्‍यिराङ ङे लुकतिवा मिन्‍दुप तप्‍की यिन। 27 ङे लुकतिवी ङे वोरु थोकिवी। ङ तिवाला ङो शेतिन, तमा तिवा ङे तिङ्‍ला तिङ्‍योकिवी। 28 तिवाला ङ नाम्‍साङ मिशिवु मिजी तेरिन, तमा तिवा नाम्‍साङ ना मोडोवी। सी साङ ङे नेसुर तिवाला ठोनी डो मुथुपी। 29 ङला तिवा नङ्‍गुप पपा ति तेरी सिनाङ चोछ्‍ये वे। सी साङ पपा नेसुर तिवाला ठोनी डो मुथुपी। 30 ङ ताङ पपा ति च्‍यिक राङ यिन।” 31 खोकी तुक सुङ्‍सिमा यहूदीतिवी येलुङ खोला दो बेपुपला दो लासुङ। 32 तमा येशूकी तिवाला “पपी ओङ नेमा ङे लाका ल्‍यामुतिवा बङी ख्‍यिराङला छ्‍या तेनिन, ती लाकातिवी नाङ्‍ला चुका लाकाकी तेन्‍दोकला ख्‍यिरा ङला दो बेपुप छोल्‍गिवी?” सिनी सुङ्‍सुङ। 33 तमा यहूदीतिवी खोला दुक सिक्‍यासुङ, “ख्‍योरो लाका ल्‍यामु क्‍यावु तप्‍की ङ्‍यिरा ख्‍युरुङला दो बेपुप छलुप मिन, यिने कोन्‍छ्‍योकला मारे तङ्‍गुप तप्‍की यिन। ख्‍युरुङ मी यिन्‍सिनाङ खुरुङला राङ ङ कोन्‍छ्‍योक यिन सिनी सिनोक।” 34 तमा येशूकी तिवाला सुङ्‍सुङ, “ख्‍यिरा ठिमकी नाङ्‍ला ‘ङ ख्‍यिराङला ल्‍हतिवा यिन सिनी सिरिनो।’ सिनी माटि वे रो? 35 कोन्‍छ्‍योककी सुङ थोपुपतिवाला खोकी ल्‍हा यिन सिनी सुङ्‍सुङ, तमा कोन्‍छ्‍योककी सुङ ति टेङ्‍बु वे। 36 तुकै यिन्‍सिन पपी पेनी दी जम्‍बुलिङला तङ्‍गुप तीकी ‘ङ कोन्‍छ्‍योककी पुज्युङ यिन।’ सिनी सिक्‍यावु ताम्‍ङेला ख्‍यिरा च्‍यिला दीकी कोन्‍छ्‍योकला मारे तङ्‍गुप यिन सिनी क्‍येन बिन्‍दुप यिन? 37 दोजो पपी ङला कि सिनी नङ्‍गुप लाका ङे माक्‍यावु यिन्‍सिन ख्‍यिराङ ङला तेपा माकी। 38 यिने ङे ती लाका क्‍यावु यिन्‍सिन ङला तेपा माक्‍यासिनाङ ती लाकातिवाला ति तेपा की। तुक क्‍यासिन पपा ङे मुला वे, तमा ङ पपी मुला वे सिरुप ति ख्‍यिरा हाक्‍कोकिवी।” 39 खोकी तुक सुङ्‍सिमा येलुङ तिवी खोला जिम्‍बुप छाल्‍सुङ, यिने खो तिवी पर नेसुर थेन्‍नी फेप्‍सुङ। 40 तेसुर येशू येलुङ यर्दन चङ्‍बी फर्केन फेप्‍सुङ। ती दासा ति थल्‍माला यूहन्‍नाकी मीतिवाला बप्‍तिस्‍मा बिन्‍दुप दासा यिनोक। तमा खो ते राङ ज्‍युसुङ। 41 ते मीतिवा बङी खोकी चाला वानी, “यूहन्‍नाकी याङ हलेवु ततिवा च्‍यिक साङ छ्‍या मातेन, यिने यूहन्‍नाकी ती मीकी कोर्ला सिक्‍यावु ताम्‍ङेतिवा ति तेरी टेङ्‍बु नोक।” सिनी सिक्‍यासुङ। 42 तमा ते मीतिवा बङीकी येशूला तेपा क्‍यासुङ।

यूहन्‍ना 11

लाजरस शेप

1 बेथानिया युलला लाजरस सिरुप मी यी नानोक। ती युलला राङ तीकी अज्‍यीतिवा मरियम ताङ मार्था साङ देनोक। 2 ती मरियम ति ज्‍युक्‍ला येशूकी शापला टि जङ्‍बु खाप नुम पुनी खोरो र्‍ह थ्‍वोनी पिन तेरुप पुम्‍पेजा यिनोक। ती नावु लाजरस ति तीकी नुप यिनोक। 3 लाजरस नासिमा तीकी अज्‍यी मार्था ताङ मरियम तीकी येशूला “चोवो, चोवोकी ङ्‍यिङ्‍ज्‍येवु दाल्‍जा ति नानी वे।” सिनी लेन ताङ्‍नोक। 4 ती लेन थोसिमा येशूकी सुङ्‍सुङ, “ती लाजरस नावु ति शेपकी थोक्‍ला मिन, यिने कोन्‍छ्‍योककी मोवा छ्‍या तेन्‍दुपकी थोक्‍ला यिन। तमा ती नेसुर राङ कोन्‍छ्‍योककी पुज्‍युङला मोवा ङ्‍येकिवी।” 5 येशूकी मार्था ताङ मरियम ताङ तिवी नुप लाजरसला ङ्‍यिङ्‍ज्‍ये किनोक। 6 यिने लाजरस नान वे सिरुप लेन थोसिमा साङ खो खोरुङ ज्युवु दासाला राङ ङ्‍यिमा ङ्‍यी ल्‍हक्‍पा ज्‍युसुङ। 7 तमा ती ज्‍युक्‍ला खोकी खोरे लोमातिवाला “लो, त दाक्‍पु येलुङ यहूदियाला राङ लोक्‍नी डोप।” सिनी सुङ्‍सुङ। 8 तमा लोमातिवी खोला “मिन गेकेन, दाङ मलोक तेकी यहूदीतिवी गेकेनला दो बेपुप छाल्‍सुङ। यिन्‍सिनाङ येलुङ गेकेन तेराङ फेपुप नो किवी?” सिनी सिक्‍यासुङ। 9 तमा येशूकी तिवाला सुङ्‍सुङ, “ङ्‍यिमा शरुप ति ङ्‍यिमाला घण्‍टा च्‍यिङ्‍ङी मेवी रो? सु ङ्‍यिमी गुङला युकिवे, तीला नर्तुक मग्‍यकिवी, च्‍यिलासिसिन तीकी ङ्‍यिमी गुङगी ठछ्‍येली थोङ्‍गिवी। 10 यिने नुपला युकुपतिवा याङ नर्तुक ग्‍यकिवी, च्‍यिलासिसिन तीकी मुला ठछ्‍येली मेवी।” 11 खोकी दुक सुङ्‍सिमा तिवाला “दाक्‍पी दाल्‍जा लाजरस ङि्‍य गल वे, ङ गल्‍नी तीला ङि्‍य चेतिन।” सिनी सुङ्‍सुङ। 12 तमा लोमातिवी खोला “ओ चोवो, ती ङ्‍यी गलुप यिन्‍सिन नावु ने टेकिवी।” सिनी सिक्‍यासुङ। 13 येशूकी तुक सुङ्‍गुप तेन्‍दोक ति लाजरस शिनोक सिनी सुङ्‍गुप यिन, यिने लोमातिवी नासामला ति लाजरस वुतुङ ङ्‍यी गलुप यिन सिनी नो क्‍यानोक। 14 तुक क्‍यानी खोकी तिवाला ल्‍यामु हाक्‍कोशी सिनी वुतुङ के सुङ्‍सुङ, “लाजरस शिन वे। 15 ङ लाजरसकी ते मेतुप ति ख्‍यिरा थोक्‍ला ल्‍यामु च्‍युङ्‍सुङ, तुक क्‍यानी ङ गा लावे। ती ति ख्‍यिरा ङला तेपा किशी सिनी यिन। त दाक्‍पु तीकी ते डोप।” 16 तमा लोमातिवी पर्ला दिदुमस साङ सिरुप थोमा तीकी यम्‍बा लोमातिवाला “लो, दाक्‍पु साङ गेकेनकी मुला डोप, तमा खोकी मुला शिराङ गोसिनाङ शेप।” सिनी सिक्‍यासुङ।

शेप ने सेन्‍बु लोङ्‍गुप ताङ मिजी नङ्‍गुप ति येशू यिन

17 येशू बेथानियाला लेप्सुङ, तमा खोकी लाजरस ति शिनी तीकी रो ति शेप मीला ज्‍योकुप टककी फुकला ज्‍यकुप ति ङ्‍यिमा ज्‍यि गलुप ति हाक्‍कोसुङ। 18 बेथानिया ति यरूशलेम नेसुर तो मिसिन किलोमिटर सुम चोयी थाक्‍रिङ्‍बु ख्‍येल्‍गिनोक। 19 तमा यहूदीतिवा बङी मार्था ताङ मरियमला तिवी नुप शेपकी कोर्ला टोङ्‍गु तेरुपला वानोक। 20 मार्था ति येशू फेपिन वोतुप ताम्‍ङे थोनी खोला ठेतुपला पाङ्‍ला थेन्‍सुङ, यिने मरियम ति खाङ्‍बी नाङ्‍ला राङ देसुङ। 21 तमा मार्था ति येशूला ठेनी, “ओ चोवो, चोवो दे जुवु यिन्‍सियाङ ङे नुप ति मिशिवुजा। 22 यिन्‍सिनाङ तरोङ साङ चोवोकी कोन्‍छ्‍योकला काङ लाङ्‍सिनाङ खोकी चोवोला नङ्‍गिवी सिरुप ति ङला छ्‍या वे।” सिनी सिक्‍यासुङ। 23 तमा येशूकी मार्थाला “ख्‍योरो नुप येलुङ सेन्‍बु लङ्‍गिवी।” सिनी सुङ्‍सुङ। 24 ती थोसिमा मार्थाकी खोला “शेप मीतिवा शेप ने सेन्‍बु लङ्‍गुप जम्‍बुलिङकी तिङ्‍मी तुजेला ङे नुप येलुङ सेन्‍बु लङ्‍गिवी सिरुप ति ङला छ्‍या वे।” सिनी सिक्‍यासुङ। 25 तमा येशूकी मार्थाला “शेप ने सेन्‍बु लोङ्‍गुप ताङ मिजी तेरुप ति ङ राङ यिन। सी ङला तेपा किवे, ती ति शिसिनाङ सेन्‍बु लङ्‍गिवी। 26 तमा सी सेन्‍बु वोतुप पेला ङला तेपा किवे, तिवा नाम्‍साङ मिशिवी। काङ ख्‍युरुङ दी ताम्‍ङेला तेपा किवी?” सिनी सुङ्‍सुङ। 27 तमा तीकी खोला “लसे चोवो, चोवो याङ दी जम्‍बुलिङला फेपुप कोन्छ्‍योककी सेवु ख्रीष्‍ट यिन सिनी ङ तेपा कितिन।” सिनी सिक्‍यासुङ। 28 तोजोयी सिक्‍यासिमा मार्था ति खाङ्‍बा लोङ गल्‍नी खोरो नुम मरियमला खरक्‍पा सोक सिरा कताङ्‍नी, “गेकेन फेप्‍सुङ, तमा ख्‍युरुङला कतोङ्‍यिन वे।” सिनी सिक्‍यासुङ। 29 ती थोनी मरियम शार्क्येक लानी येशूकी चाला गाल्‍सुङ। 30 ती पेला सेक येशू तिवी युलला माशु नोक, यिने मार्थाला ठेतुप दासाला राङ ज्‍युनी नोक। 31 मरियमकी खाङ्‍बाला टोङ्‍गु तेरुपला वावु यहूदीतिवी मरियम शार्क्येक लानी पाङ्‍ला थेन्‍नी डोप थोङ्‍सिमा तीकी तिङ्‍ला तिङ्‍यासुङ। तिवी मरियम ति खोरो नुपकी रो ज्‍यकुप टककी फुकला ङोपला गलुप यिन्‍दे सिनी नासाम ताङ्‍नोक। 32 मरियम येशू ज्‍यु वोतुप ते लेप्‍नी खोला ठेलुङ्‍मे खोकी शापला खवुतुङ्‍मा देनी, “ओ चोवो, चोवो दे ज्‍युवु यिन्‍सियाङ ङे नुप ति मिशिवुजा।” सिनी सिक्‍यासुङ। 33 तमा मरियम ङुप्‍राङ कितुप ताङ तीकी मुला वावु मीतिवा साङ ङुप्‍राङ कियी वोतुप खोकी थोङ्‍नी खोकी सेमला छासे सेम्‍दुक लानोक। 34 खोकी तिवाला “ख्‍यिरा तीला कनी ज्‍यकुप?” सिनी टि नाङ्‍सुङ। तमा तिवी “चोवो, फेप्‍नी जी ताङ।” सिनी सिक्‍यासुङ। 35 तमा येशू ङुसुङ। 36 येशू ङुवु थोङ्‍सिमा यहूदीतिवी “ल्‍हो ताङ, खोकी लाजरसला चुका ङ्‍यिङ्‍ज्‍ये किनोक।” सिनी सिक्‍यासुङ। 37 यिने तिवी पर ने ललाइ ललाइकी “शर्वाला साङ मिक थोङ थुपुप जोवु दीकी लाजरसला शेप ने र्‍होक माथुप्‍नोक?” सिनी सिक्‍यासुङ। 38 येलुङ येशू छासे सेम्‍दुक लानी शेप मीला ज्‍योकुप टककी फुककी चाला फेप्‍सुङ। ती फुककी खला दो ग्‍येर्पु यी थ्‍वोनी उम ज्‍याक्‍नोक। 39 येशूकी “दी दो ति फर दो।” सिनी सुङ्‍सुङ। यिने ती शेप लजरसकी अज्‍यी मार्था तीकी खोला “चोवो, त याङ टेमा ग्‍यकिवी, च्‍यिलासिसिन तीला शेप मीला ज्‍योकुप टककी फुकला ज्‍यकुप ति हारिङ ङ्‍यिमा ज्‍यी गाल्‍सुङ।” सिनी सिक्‍यासुङ। 40 येशूकी तीला “ख्‍योरो ङला तेपा क्‍यासिन कोन्‍छ्‍योककी मोवा ति थोङ्‍गितो सिनी ङे ख्‍युरुङला सि माक्‍या?” सिनी सुङ्‍सुङ। 41 तमा तिवी ती शेप मीला ज्‍योकुप टककी फुककी खला उम ज्‍यकुप दो ति दोसुङ। ती ज्‍युक्‍ला येशूकी देवाच्‍येन ने केला ल्‍हानी, “ओ पपा, ङ पपाला थुचिछे बुलिन, च्‍यिलासिसिन पपी ङे गोङ्‍बा शुवु ति सेन्‍सुङ। 42 ङे गोङ्‍बा शुवु ति पपी नरी सेन्‍गिवी सिनी ङला छ्‍या वे। यिने पपी ङला तङ्‍गुप यिन सिनी दे देतुप मीतिवी तेपा किशी सिनी तिवी थोक्‍ला ङे दी गोङ्‍बा शुवु यिन।” सिनी सुङ्‍सुङ। 43 तोजोयी सुङ्‍सिमा खोकी कशेन थोर ग्‍यप्‍नी, “ओ लाजरस, पाङ्‍ला थेन शोक!” सिनी सुङ्‍सुङ। 44 तमा ती शेप लाजरस ति लाक्‍पा काङ्‍बा रा नेङेन थ्‍वोनी टा टावा ताङ ङुतुङ ति रा थ्‍वोनी तुम तुम्‍वा राङ पाङ्‍ला थेन्‍सुङ। तमा येशूकी “तीला टावु ति टोल, तमा तीला डो च्‍यी।” सिनी मीतिवाला सुङ्‍सुङ।

येशूला सेतुप च्‍यु छलुप

45 मरियमकी खाङ्‍बाला वावु यहूदीतिवा बङीकी येशूकी क्‍या नङ्‍गुप हलेवु लाका थोङ्‍नी खोला तेपा क्‍यासुङ। 46 यिने तिवी पर्ला ललाइ ति फरिसीतिवी चाला गल्‍नी येशूकी काङ क्‍या नङ वे, तीकी कोर्ला सिक्‍यासुङ। 47 तमा कोङ्‍यार छ्‍येतिवा ताङ फरिसीतिवी यहूदी छोक्‍पाकी मी छ्‍येतिवी मुला जोम च्‍यिनी, “त दाक्‍पु चुक कितुप? ती मी तीकी हलेवु लाकातिवा बङी किनोक। 48 दोजो दाक्‍पी तीला तुक राङ क्‍या क्‍यावा दे च्‍यिसिन मी तेरीकी तीला तेपा किवी, तमा रोमीतिवा वानी दाक्‍पी यहूदी ल्‍हङाङ ताङ मिरिकतिवा ङ्‍यिकरला ना तोङ्‍गिवी।” सिनी सिक्‍यासुङ। 49 यिने तिवी पर्ला कैयाफा सिरुप मिरा च्‍यिक नोक, ती ति ती लोकी थोक्‍ला तेरी सिनाङ कोङ्‍यार छ्‍ये यिनोक। तीकी यम्‍बातिवाला “ख्‍यिरा काङ मेशेनोक। 50 दाक्‍पी मिरिककी मीतिवा तेरी ना डोप सिनाङ बोरु मी मिरा च्‍यिक मीतिवा तेरीकी थोक्‍ला शेप ति ल्‍यामु यिन सिरुप ति ख्‍यिराङला छ्‍या मे?” सिनी सिक्‍यासुङ। 51 तीकी तुक सिक्‍यावु ति खोरो नोवाला राङ सिक्‍यावु मिन, यिने खोरुङ ति ती लोकी तेरी सिनाङ कोङ्‍यार छ्‍ये यिन्‍दुप तप्‍की तेरी यहूदीतिवी थोक्‍ला येशू टुङ्‍गिवी सिरुप ताम्‍ङे ति नम्‍दर शेतुप यिन। 52 ती ताम्‍ङे ति यहूदीतिवी थोक्‍ला तिराङ मिन, यिने जम्‍बुलिङला थरा थुरा टम्‍नी देतुप कोन्‍छ्‍योकला तेपा कितुप तेरी मीतिवाला जोम्‍नी च्‍यिक राङ जोपला येशू शिवी सिनी सिक्‍यावु यिन। 53 ती छेर्मु नेज्‍यु तिवी येशूला सेतुपला केवुल क्‍यासुङ। 54 ती तप्‍की येशू येलुङ यहूदीतिवी पर्ला तेरीकी थोङ्‍गुप क्‍यानी अला मायु, यिने तेसुर एफ्राइम सिरुप युलला फेप्‍नी लोमातिवी मुला ते राङ ज्‍युसुङ। ती युल ति दासा पाङ्थेरीकी चाला ख्‍येल्‍गिनोक। 55 ती पेला यहूदी थरुप तुछ्‍येन वुङ्‍गुप छाल्‍नोक। तमा तुछ्‍येन वुङ्‍गुप सिनाङ गोमाला मीतिवा बङी दाक दाक्‍पुला चाङ्‍मा जोपला युल युल नेसुर यरूशलेम ने केला गाल्‍सुङ। 56 ते तिवी येशूला छाल्‍सुङ, तमा यहूदी ल्‍हङाङ नाङ्‍ला जोम्‍नी खोप्‍राङ नाङ्‍ला च्‍यिककी च्‍यिकला दुक सिनी टिसुङ, “ख्‍यिरा नासामला चुकै वे? ती मी ति दी तुछ्‍येनला गिते यिन्‍दे?” 57 कोङ्‍यार छ्‍येतिवा ताङ फरिसीतिवी येशूला जिम्‍बुपला येशू कनी नोक सिनी हाक्‍कोसिन खुरुङला सिसा सिनी मीतिवाला योक कुसुङ।

यूहन्‍ना 12

येशूला टि जङ्‍बु खाप नुम कुवु

1 यहूदी थरुप तुछ्‍येन सिनाङ ङ्‍यिमा टुक गोमाला येशू बेथानियाला फेप्‍सुङ। ती बेथानिया ति गोमाला येशूकी शेप ने सेन्‍बु लङ्‍गुप लाजरसकी युल यिनोक। 2 येशू ती युलला फेप्‍सिमा मीतिवी खोकी थोक्‍ला गोमी समा टडिक क्‍यासुङ। तमा मार्थाकी समा तेरुप लाका कियी नोक, लाजरस ति येशूकी मुला समा सापला देतुप मीतिवी पर्ला नोक। 3 ती पेला मरियम तीकी छासे गोङ कुर्मु नावु टी जङ्बु खाप जटामसीकी नुम लिटर फेका चोयी खुर वानी येशूकी शापला पुनी खोरो र्‍ह थ्‍वोनी खोकी शाप पिसुङ। तमा ती टी जङ्बु खाप नुमकी टेमा ति खाङ्बा काङ टाम्‍सुङ। 4 ती पेला खोकी लोमातिवी नाङ्ला ज्‍युक्‍ला खोला जिम तेरुप यहूदा इस्‍करियोत तीकी 5 “च्‍यिला दी टी जङ्बु खाप नुम ति तुक क्‍यानी ना तङ्‍गुप यिन? ती ति ङुलकी डप्‍बु सयी सुमला चोनी ती टङ्‍गा ति पेराङ्बुतिवाला बिन्‍सिन ल्‍यामु वुङ्‍गुप्‍जा।” सिनी सिक्‍यासुङ। 6 तीकी तुक सिक्‍यावु ति पेराङ्‍बुतिवाला नासाम ताङ्‍नी सिक्‍यावु मिन, यिने खोरुङ राङ कुर्मेन यिन्‍दुप तप्‍की यिन। ती ति टङ्‍गा ज्‍योकुप मी यिन्‍सिनाङ तीकी पर्चिक पर्चिक टङ्‍गा ज्‍योकुप छयी नङ नेसुर खोरो थोक्‍ला टङ्‍गा थेन्‍गिनोक। 7 तमा येशूकी सुङ्सुङ, “दीला काङ साङ मासिर। दीकी ङे फुङ्बु कल्‍दोक कितुप तुजेकी थोक्‍ला दी टी जङ्‍बु खाप नुम ति टडिक क्‍यान ज्‍याक्‍नी वे। 8 पेराङ्बुतिवा याङ ख्‍यिरा मुला नरी लुकिवी, यिने ङ याङ ख्‍यिरा मुला नरी मुलुवी।” 9 येशू बेथानियाला ज्‍यु वोतुप हाक्‍कोनी मी माङ्‍छ्‍योक ते वानोक। तिवा खोला ल्‍हापला तिराङ मिन, यिने खोकी शेप ने सेन्‍बु लङ्‍गुप लाजरसला साङ ल्‍हापला वानोक। 10 ती तप्‍की कोङ्‍यार छ्‍येतिवी लाजरसला साङ सेतुप सिनी केवुल क्‍यानोक, 11 च्‍यिलासिसिन लाजरसकी जोसालेन्‍सिन यहूदीतिवा बङीकी तिवाला क्‍युर ज्‍याक्‍नी येशूला तेपा क्‍यानोक।

येशू यरूशलेमला फेवु

12 ती सला तीला यहूदी थरुप तुछ्‍येनकी थोक्‍ला यरूशलेमला वावु मी माङ्छ्‍योककी येशू ते फेपिन वे सिरुप ति थोनोक। 13 तमा मीतिवा खजूरकी येल्‍का च्‍येनी खोप्‍रे लकला खुर्नी खोला गासो शोपला पाङ्‍ला थेन्‍नी, “होसन्‍ना! कोन्‍छ्‍योककी मिङला फेपुप इस्राएलकी ग्‍येल्‍वुला नरी मोलाम वुङ्‍सिता!” सिनी वोरु तेन्‍सुङ। 14 तमा येशू खोकी थोक्‍ला टि वावु पुङ्‍गोक तिवुकी खला शेन्‍सुङ। तीकी कोर्ला कोन्‍छ्‍योककी सुङ नाङ्‍ला दुक सिनी टि वे, 15 “ओ सियोनकी मीतिवा, ज्‍यिवा माकी। ल्‍होसा, ख्‍यिरा ग्‍येल्‍वु ति पुङ्‍गोक तिवुकी खला शेन्‍नी ख्‍यिरा ते फेपिन वोतो।” 16 खोकी लोमातिवी गोमाला ती ताम्‍ङेकी तेन्‍दोक ति काङ यिन सिनी हाक्‍माकोनोक, यिने तिङ्‍ला येशू शेप ने ङोसु लानी देवाच्‍येनला फेम सिन्‍सिमा तिराङ ती ताम्‍ङे ति खोकी कोर्ला टिवु यिन, तमा मीतिवी साङ खोला तुक क्‍यावु यिन सिनी हाक्‍कोसुङ। 17 तमा येशूकी लाजरसला शेप मीला ज्‍योकुप टककी फुक नेमा कताङ्‍नी शेप ने सेन्‍बु लोङ्‍गुप पेला खोकी मुला वोतुप मीतिवी ती च्‍युङ्‍गुप ताम्‍ङे ति मीतिवाला नरीकी नरी पङ्‍बु बिन्‍सुङ। 18 खोकी ती हलेवु लाका क्यावु ति थोवु तप्‍की मी माङ्छ्‍योक खोला ठेतुपला गाल्‍नोक। 19 तमा फरिसीतिवा च्‍यिककी च्‍यिकला “ल्‍हो ताङ, खोइ! दाक्‍पी याङ काङ साङ कि माथुप। तेरी मीतिवा तीकी तिङ्‍ला तिङ्‍यासुङ।” सिनी सिक्‍यासुङ।

ग्रीककी मीतिवी येशूला ठेतुप नो क्‍यावु

20 यहूदी थरुप तुछ्‍येनकी पेला कोन्‍छ्‍योकला सोवा देकुपला यरूशलेमला वावु मीतिवी पर्ला ललाइ ललाइ ग्रीककी मीतिवा साङ नोक। 21 तिवा गालीलकी बेथसेदा युल नेसुर वावु येशूकी लोमा फिलिपकी चाला गल्‍नी, “अच्‍यो, ङ्‍यिराङ येशूला ठेतुप नो वे।” सिनी सिक्‍यासुङ। 22 तुक सिक्‍यासिमा फिलिप ति अन्‍द्रियासकी चाला गल्‍नी ती ताम्‍ङे सिक्‍यासुङ। तमा तिवा ङ्‍यिकर येशूकी चाला गल्‍नी ग्रीकतिवी खोला ठेतुप नो क्‍यावु ताम्‍ङे ति खोला सिक्‍यासुङ। 23 तमा येशूकी सुङ्सुङ, “मी पुज्‍युङला मोवा ङ्‍येतुप तुजे लेम वे। 24 ङ ख्‍यिराङला टेङ्‍बो सिरिन, दोजो टे सेन च्‍यिक थलाला ख्‍येल्‍नी माशिसिन ती सेन ति च्‍यिक राङ लुकिवी, यिने ती ति थली नाङ्‍ला ख्‍येल्‍नी शिसुङ सिसिन डुमा बङी ग्‍यकिवी। 25 तुक राङ क्‍यानी खोरो मिजीला ङ्‍यिङ्‍ज्‍ये कितुप मी तीकी रङगी मिजी तोर्किवी, यिने दी जम्‍बुलिङला खोरो मिजी ति काङ साङ मिन नोनी ङ्‍यिङ्‍ज्‍ये मिकिवु तीकी नाम्‍साङ मिशिवु मिजी र्‍होक्‍नी ज्‍योकिवी। 26 चुका मी तीकी ङला शब्‍ज्‍यी कितुप नो किवे, ती ति ङे तिङ्‍ला तिङ्‍योक गोकिवी। तमा ङ कनी नोके, ङला शब्‍ज्‍यी कितुप ती साङ ङे मुला राङ तेराङ गिवितो। सी ङला शब्‍ज्‍यी किवे, तीला ङे पपी छ्‍ये जेवितो।”

येशूकी खुरुङ टुङ्‍गुप कोर्ला सुङ्‍गुप

27 येलुङ येशूकी दुक सिनी सुङ्सुङ, “त याङ ङे सेम ति छासे सेम्‍दुक गल वे, त ङ काङ सिरुप? ‘ओ पपा, ङला दी छेटाङकी तुजे नेसुर र्‍होक्‍टे की।’ सिनी सिरुप? मिन, ङ ति ती छेटाङकी तुजेकी थोक्‍ला राङ वावु यिन। 28 ओ पपा, पपी मोवा ति मीतिवाला छ्‍या तेन।” ती पेला राङ देवाच्‍येन नेमा दुक सिरुप वोरु यी ग्‍यप्‍सुङ, “ङे मोवा लायिन, तमा येलुङ लङ्‍यिन।” 29 तमा ते लानी देतुप मी माङ्‍छ्‍योककी ती वोरु थोसिमा तिवी पर ने ललाइकी “दी याङ सम्‍डुक ग्‍यपुप यिन।” सिनी सिक्‍यासुङ। तमा यम्‍बातिवी “देवाच्‍येनकी लेन क्‍योलुप थुकी तीकी मुला ताम्‍ङे क्‍यावु यिन।” सिनी सिक्‍यासुङ। 30 यिने येशूकी तिवाला “दी ख्‍यिरा थोवु वोरु ति ङे थोक्‍ला मिन, यिने ख्‍यिरा थोक्‍ला राङ यिन। 31 तन्‍दा ति कोन्‍छ्‍योककी दी जम्‍बुलिङला ठिम कितुप तुजे यिन, त कोन्‍छ्‍योककी दी जम्‍बुलिङला ओङ्ज्‍येन कितुप शैतानला तेन तोङ्‍गिवी। 32 तमा ङ जम्‍बुलिङ ने येर तेकुप पेला तेरी मीतिवाला ङे थाकाला वुङ ज्‍यितिनो।” सिनी सुङ्‍सुङ। 33 ती ताम्‍ङे ति खो चुक क्‍यानी टुङ्‍गिवी सिरुपकी कोर्ला खोकी सुङ्‍गुप यिन। 34 ती ताम्‍ङे थोसिमा मी माङ्‍छ्‍योककी येशूला “दाक्‍पी यहूदी ठिमला याङ ख्रीष्‍ट ति नरी सेन्‍बु लुकिवी सिनी टि वे, यिने ख्‍योरो चुक क्‍यानी मी पुज्युङ जम्‍बुलिङ ने येर तेकिवी सिनी सिक्‍यावु यिन? दी मी पुज्‍युङ ति सु यिन?” सिनी टिसुङ। 35 तमा येशूकी तिवाला सुङ्सुङ, “तरोङ चेयी पर सेक वोसिर ख्‍यिरा पर्ला लुकिवी, ख्‍यिराङ ती वोसिर वोता सेक फार छुर यु। तुक क्यासिन नक्‍तोमीकी ख्‍यिराङला उप मुथुपी। नक्‍तोमीला युकुपतिवी खुरुङ कनी डोयी वे सिरुप ति हाक्‍मोकोवी। 36 ती वोसिर ख्‍यिरा मुला वोतुप पेला राङ ख्‍यिराङ ती वोसिरला तेपा की, तमा ख्‍यिराङ ती वोसिरकी गिपा च्‍युङ्‍गिवी।” सिनी सुङ्सुङ। तोजोयी सुङ्‍सिमा येशू तेसुर फेप्‍सुङ, तमा मीतिवी हाक्‍मोकोवु दासाला यिप्‍नी ज्‍युसुङ।

यहूदीतिवी येशूला तेपा माक्‍यावु

37 येशूकी यहूदीतिवी थोङ्‍दाङला राङ तुका हलेवु ततिवा बङी छ्‍या तेन्‍सिनाङ तिवी खोला तेपा माक्‍या। 38 तिवी तुक क्‍यावु ति कोन्‍छ्‍योककी लुङ्तेम्‍बा यशैयाकी “ओ चोवो, ङ्‍यिरा ख्‍याप्‍टाक क्‍यावु कोन्‍छ्‍योककी सुङला सी तेपा क्‍यासुङ रो? चोवोकी खोरो ओङ्‍ज्‍येन सुला छ्‍या तेन्‍सुङ रो?”

सिनी सिक्‍यावु ति तेरी च्‍युङ्‍गुपला यिन।

39 मीतिवी तेपा माक्‍यावु तेन्‍दोक ति कोन्‍छ्‍योककी लुङ्तेम्‍बा यशैयाकी येलुङ दुक सिक्‍या वे, 40 “कोन्‍छ्‍योककी तिवी मिक ति मोथोङ्‍गुप जो वे, तिवी सेम ति क्‍योङ्बु जो वे। तुक क्‍यानी तिवी मिककी मोथोङ्‍गिवी, सेमगी साङ हाक्‍मोकोवी, तमा ङे थाकाला लोक्‍नी मेङ्‍गिवी। मिसियाङ ङे तिवाला टेक ज्‍यितुप्‍जा।” 41 कोन्‍छ्‍योककी लुङ्तेम्‍बा यशैयाकी येशूला मोवा ङ्‍येकिवी सिरुप ति गोमाला के थोङ्‍गुप तप्‍की खोकी कोर्ला दी ताम्‍ङे टिवु यिन। 42 यहूदी गोमा कितुपतिवी पर्ला साङ मी बङीकी खोला तेपा क्‍यासुङ। यिने फरिसीतिवी जोसालेन्‍सिन तिवी ती ताम्‍ङे ति मीतिवी मिङ्‍गाला सि माथुप, च्‍यिलासिसिन फरिसीतिवी खोप्‍राङला यहूदी छ्‍योखाङ नेमा तेन तोङ्‍गिवी सिनी ज्‍यिवा क्‍यासुङ। 43 तिवा कोन्‍छ्‍योक नेमा वुङ्‍गुप मोवा छोलुप सिनाङ मीतिवी खोप्‍राङला ताङ्देन क्‍यावु ति मङ गा किनोक।

येशूकी सुङगी ठिम तोङ्‍गुप

44 तमा येशूकी मीतिवाला थोर ग्‍यप्‍नी दुक सुङ्सुङ, “सी ङला तेपा किवे, तीकी ङला तिराङ तेपा कितुप मिन, यिने ङला तोङ्‍गुप तीला तेपा कितुप यिन। 45 सी ङला थोङ्‍गिवे, तीकी ङला तोङ्‍गुप तीला थोङ्‍गिवी। 46 ङ दी जम्‍बुलिङला वावु वोसिर यिन। ती ति ङला तेपा कितुपतिवा सु साङ नक्‍तोमीला लु मिज्‍यिवुला यिन। 47 चुका मी तीकी ङे सुङ थोनी ती सुङला माङ्‍येन्‍सिनाङ ङ तीला ठिम मोतोङ। च्‍यिलासिसिन ङ जम्‍बुलिङकी मीतिवाला ठिम तोङ्‍गुपला वोवु मिन, यिने र्‍होकुपला वावु यिन। 48 ङला क्‍येन तेरुप ताङ ङे सुङला मेङ्‍येन्‍दुपतिवाला ठिम कितुप ति यम्‍बा राङ वे। ङे सिक्‍यावु दी ताम्‍ङेकी राङ जम्‍बुलिङकी तिङ्‍मी तुजेला तिवाला ठिम तोङ्‍गिवी। 49 दी ताम्‍ङे ति टेङ्‍बु यिन, च्‍यिलासिसिन दी ति ङे राङ सिक्‍यावु मिन, यिने ङला तोङ्‍गुप पपी ङे काङ सि गोकिवी, काङ लप गोकिवी सिनी ङला क नङ्‍गुप यिन। 50 खोकी कला ङ्‍येन्‍दुपतिवाला नाम्‍साङ मिसिवु मिजी थोप्‍किवी सिरुप ति ङला छ्‍या वे। तुक क्‍यानी पपी ङला काङ सुङ्‍गिवे, तुकै राङ ङ लपिन।”

यूहन्‍ना 13

येशूकी खोरो लोमातिवी काङ्‍बा टुवु

1 यहूदी थरुप तुछ्‍येनकी गोमी ङ्‍यिमा नोक। येशूकी खुरुङ दी जम्‍बुलिङ क्‍युर ज्‍याक्‍नी पपी चाला फेपुप तुजे लेपुप ति हाक्‍कोनी खोला तेपा कितुप जम्‍बुलिङला वोतुप खोरो मीतिवाला ङ्‍यिङ्‍ज्‍ये क्‍या नङ्‍गिनोक, तमा खो माटुङा सेक तिवाला मङ ङ्‍यिङ्‍ज्‍ये क्‍या नाङ्‍सुङ। 2 येशू खोरे लोमातिवी मुला गोमी सोल शेयी वोतुप पेला शैतानकी सिमोन इस्‍करियोतकी पुज्‍युङ यहूदाकी सेमला येशूला जिम तेरुप नासाम शर च्‍यिसुङ। 3 पपा कोन्‍छ्‍योककी जम्‍बुलिङकी तेरी ओङ्‍ज्‍येन खुरुङला नङ्‍गुप ताङ खुरुङ कोन्‍छ्‍योक नेमा वानी येलुङ कोन्‍छ्‍योककी चिप्‍ला राङ लोक्‍नी डोप ताम्‍ङे येशूकी हाक्‍कोसुङ। 4 तमा खो सोल शेवु दासा ने शेङ्‍नी खोरो फिला कोन्‍दुप नम्‍सा ति पिन ज्‍याक्‍नी खोकी केल्‍दाङला रुमाल यी टिल्‍सुङ। 5 तमा तोङ्‍मेन नाङ्‍ला छ्‍यु पुनी खोरो लोमातिवाला रे ताङ रे क्‍यानी तिवी काङ्‍बा टुनी खोकी केल्‍दाङ लोला टिलुप रुमाल थ्‍वोनी पिन बिन्‍सुङ। 6 तुक राङ क्‍यानी खो सिमोन पत्रुसकी चाला लेप्‍सिमा पत्रुसकी खोला “अम्‍माइ चोवो, चोवोकी ङे काङ्‍बा टुकिवी?” सिनी सिक्‍यासुङ। 7 तमा येशूकी तीला सुङ्‍सुङ, “ङे काङ कियी वे, ती ति ख्‍योरो तन्‍दा हाक्‍मोकोवी, यिने ज्‍युक्‍ला ति हाक्‍कोकिवी।” 8 येलुङ पत्रुसकी खोला “चोवोकी ङे काङ्‍बा नाम्‍साङ टुतुप मेवी।” सिनी सिक्‍यासुङ। तमा येशूकी तीला “दोजो ङे ख्‍योरो काङ्‍बा माटुसिन ख्‍युरुङ ङ ताङ मुला काङ तम्‍जी मेवी।” सिनी सुङ्‍सुङ। 9 तमा सिमोन पत्रुसकी खोला “ओ चोवो, तुकै यिन्‍सिन ङे काङ्‍बा तिराङ मिन, ङे लाक्‍पा ताङ गो साङ टुनी नाङ्‍नी।” सिनी सिक्‍यासुङ। 10 येशूकी तीला “सी जु टु वे, तीकी तेरी जु ति चेङ्‍गा च्‍युङ्‍नी वे। तुक क्‍यानी त याङ काङ्‍बा तिराङ मिसिन यम्‍बा टु मोगोवी। ख्‍यिराङ याङ चेङ्‍गा राङ वे, यिने ख्‍यिराङ तेरी चेङ्‍गा वोतुप ति मिन।” सिनी सुङ्‍सुङ। 11 येशूकी खोरुङला क्‍येन तेरुप ति सु यिन सिनी ङो शेनोक, ती तप्‍की खोकी तिवाला “ख्‍यिराङ तेरी चेङ्‍गा वोतुप ति मिन।” सिनी सुङ्‍गुप यिन। 12 खोकी तिवी काङ्‍बा टुन सिन्‍सिमा येलुङ खो खोरे नम्‍सा नुम्‍नी गोमाला ज्‍युवु दासाला राङ ज्‍युसुङ। तमा तिवाला “ङे मलोक क्‍यावु ति काङ यिन सिनी ख्‍यिराङला छ्‍या वे? 13 ख्‍यिराङ ङला गेकेन याङ्‍ना चोवो सिनी सिवी, ती ति टेके यिन, च्‍यिलासिसिन ङ वुतुङ के ख्‍यिरा सिक्‍यावु दोके राङ यिन। 14 ङ ख्‍यिरा चोवो ताङ गेकेन यिन्‍सिनाङ ख्‍यिरा काङ्‍बा टुयी। तुक क्‍यानी ख्‍यिरा साङ च्‍यिककी च्‍यिकला काङ्‍बा टु गोकिवी। 15 ङे ख्‍यिराङला दी नमुना छ्‍या तेन्‍दुप तेन्‍दोक ति ङे ख्‍यिरा थोक्‍ला काङ क्‍या वे, ख्‍यिरा साङ तुक राङ किशी सिनी यिन। 16 ङ ख्‍यिराङला टेङ्‍बो सिरिन, लावा खोरो ज्‍यिन्‍दाक सिनाङ छ्‍ये मेवी, तमा लेन क्‍योलुप मी ति तीला तोङ्‍गुप ति सिनाङ छ्‍ये मेवी। 17 ख्‍यिरा दी ताम्‍ङे हाक्‍कोनी ती दोके क्‍यासुङ सिसिन ख्‍यिराङला मोलाम थोप्‍किवी। 18 ङे ख्‍यिराङ तेरीकी कोर्ला सिक्‍यावु मिन, ङे पेतुप मीतिवा चुका पारकी यिन सिनी ङ ङो शेकिवी। यिने ‘ङ ताङ मुला देनी शुब्‍ज्‍याङ साप तीकी राङ ङला क्‍येन तेर्किवी।’ सिनी टिवु कोन्‍छ्‍योककी सुङ ति तेरी छेकिवी। 19 ती ताम्‍ङे च्‍युङ्‍गुप सिनाङ गोमाला के ङे ख्‍यिराङला सिक्‍यावु ति ती ताम्‍ङे च्‍यङ्‍गुप पेला ख्‍यिरा ङ ति कोन्‍छ्‍योक नेमा वावु यिनोक सिनी तेपा कि ज्‍यितुपला यिन। 20 वुतुङ के ङ ख्‍यिराङला सिरिन, सी ङे तङ्‍गुप तीला खोरो सेमला लिङ्‍गिवे, तीकी ङला सेमला लिङ्‍गुप यिन। तमा सी ङला खोरो सेमला लिङ्‍गिवे, तीकी ङला तोङ्‍गुप कोन्‍छ्‍योकला सेमला लिङ्‍गुप यिन।”

खोरुङ जिम्‍बुप कोर्ला येशूकी नम्‍दर शेतुप

21 येशूकी तुक सुङ्‍सिमा खोला छासे सेम्‍दुक लानोक। तमा खोकी खोरो लोमातिवाला दुक सिनी सुङ्‍सुङ, “वुतुङ के ङ ख्‍यिराङला सिरिन, ख्‍यिरा पर्ला मिरा च्‍यिककी ङला जिम तेर्किवी।” 22 खोकी ती ताम्‍ङे ति सी कोर्ला सुङ्‍गुप यिन सिरुप ति हाक्‍माकोनी खोकी लोमातिवा च्‍यिककी च्‍यिकला ल्‍हटी चेसुङ। 23 तमा लोमातिवी पर्ला येशूकी मङ ङ्‍यिङ्‍ज्‍ये क्‍यावु ती लोमा ति खोकी छेकोकला ङ्‍यिम्‍बुर क्‍यानी देसुङ। 24 ती पेला सिमोन पत्रुसकी ती लोमा तीला खोकी तुक सुङ्‍गुप ति सी थोक्‍ला यिन खोला टि सिनी लाक्‍पी छ्‍याक्‍के क्‍यासुङ। 25 तमा तीकी येशूकी छेकोकला मङ ङ्‍यिम्‍बुर क्‍यानी, “ओ चोवो, चोवोला जिम तेरुप ति सु यिनाङ?” सिनी खोला टिसुङ। 26 तमा येशूकी “सुला ङे शुब्‍ज्‍याङ कोरी नाङ्‍ला पानी तेर्किवे, ती राङ यिन।” सिनी तीला सुङ्‍सुङ। ती ज्‍युक्‍ला खोकी शुब्‍ज्‍याङ च्‍याक्‍नी कोरी नाङ्‍ला पानी सिमोन इस्‍करियोतकी पुज्‍युङ यहूदाला नाङ्‍सुङ। 27 ती शुब्‍ज्‍याङ लालुङ्‍मे यहूदाकी सेमला शैतान शुसुङ। तमा येशूकी तीला “ख्‍योरो काङ कितुप छल वे, ती ति शार्क्येक की।” सिनी सुङ्‍सुङ। 28 यिने येशूकी तीला च्‍यिला तुकै सुङ्‍गुप यिन सिरुप ति ते देनी समा सापतिवा सी साङ हाक्‍माको। 29 तमा ललाइकी यहूदाकी लोला लोमातिवी टङ्‍गी छयी ज्‍यकुप तप्‍की येशूकी तीला “तुछ्‍येनकी थोक्‍ला तिवाला गोवु च्‍यालक ङ्‍योप याङ्‍ना पेराङ्‍बुतिवाला काङ रे च्‍यिक रे बिन।” सिनी सुङ्‍गुप यिन्‍दे सिनी नो क्‍यानोक। 30 तमा यहूदाकी शुब्‍ज्‍याङ लालुङ्‍मे शार्क्येक पाङ्‍ला थेन गाल्‍सुङ। ती पेला नाम ल्‍होनिङ सिन्‍नोक।

येशूकी क सम्‍बा नङ्‍गुप

31 यहूदा पाङ्‍ला थेन गल्‍सिमा येशूकी सुङ्‍सुङ, “त याङ मीतिवी ङ मी पुज्‍युङला मोवा वोतुप थोङ्‍गितो, तमा मी पुज्‍युङ नेमा कोन्छ्‍योक छासे मोवा वोतुप ति थोङ्‍गितो। 32 दोजो कोन्‍छ्‍योक छासे मोवा वोतुप ति मी पुज्‍युङ नेमा छ्‍या तेन्‍सुङ सिसिन कोन्‍छ्‍योककी साङ मी पुज्‍युङला मोवा वोतुप ति छ्‍या देन्‍गिवी। ती ति खोकी ङमु राङ क्‍या नङ्‍गिवी। 33 ङे ङ्‍यिङ्‍ज्‍येवु आङातिवा, ङ चेयी पर सेक तिराङ ख्‍यिरा मुला लुकितो। ती ज्‍युक्‍ला ख्‍यिरा ङला छोल्‍गिवी, तमा ङे गोमाला यहूदी गोमा कितुपतिवाला सिक्‍यावु दोके तन्‍दा ख्‍यिराङला सिरिन, ‘ङ कनी डिवे, ते ख्‍यिराङ वुङ मुथुप्‍तो।’ 34 ङ ख्‍यिराङला क सम्‍बा यी तेरिन, ख्‍यिराङ च्‍यिककी च्‍यिकला ङ्‍यिङ्‍ज्‍ये की। ङे ख्‍यिराङला ङ्‍यिङ्‍ज्‍ये क्‍यावु दोके ख्‍यिरा साङ च्‍यिककी च्‍यिकला ङ्‍यिङ्‍ज्‍ये की। 35 दोजो ख्‍यिराङ च्‍यिककी च्‍यिकला ङ्‍यिङ्‍ज्‍ये क्‍यासिन ती ल्‍हानी ख्‍यिराङ ङे लोमा यिन सिरुप ति मीतिवी हाक्‍कोकिवी।”

पत्रुसकी येशूला ङो मेशेवी सिक्‍यावु

36 तमा सिमोन पत्रुसकी येशूला “ओ चोवो, चोवो कनी फेप्‍किवी?” सिनी टिसुङ। तमा येशूकी तीला “ङ कनी डिवे, ते ख्‍युरुङ तन्‍दा वुङ मुथुप्‍तो, यिने ज्‍युक्‍ला ति ङला तिङ्‍योकितो।” सिनी सुङ्‍सुङ। 37 येलुङ पत्रुसकी खोला “चोवो, ङ च्‍यिला तन्‍दा राङ तिङ्‍योक मुथुपी? ङ याङ चोवोकी थोक्‍ला शि राङ गोसिनाङ शेयिन।” सिनी सिक्‍यासुङ। 38 तमा येशूकी तीला “वुतुङ के ख्‍युरुङ ङे थोक्‍ला शिराङ गोसिनाङ शिवी? ङ ख्युरुङला टेङ्‍बो सिरिन, ख्‍योरो हारिङ च्‍यवु कुकुरी देन्‍दुप सिनाङ गोमाला थेङ्‍मा सुम ङला ङो मेशेवी सिवी।” सिनी सुङ्‍सुङ।

यूहन्‍ना 14

येशू कोन्‍छ्‍योककी ते लेपुप लाम यिन

1 येलुङ येशूकी लोमातिवाला सुङ्सुङ, “ख्‍यिराङ सेम्‍दुक माकी। कोन्‍छ्‍योकला तेपा की, तमा ङला साङ तेपा की। 2 ङे पपी खाङ्बाला देतुप दासा बङी वे। तुकै मिन्‍सिन ङ ख्‍यिरा थोक्‍ला देतुप दासा टडिक कितुपला डोयी सिनी ख्‍यिराङला च्‍यिला सिवी रो? 3 ङ गल्‍नी ख्‍यिरा थोक्‍ला दासा टडिक क्‍यासिमा लोङ वानी ख्‍यिराङला ङे ते टिनी डोयिनो, तमा ङ देतुप ते ख्‍यिराङला साङ देतुप ङ्‍येकितो। 4 ङ कनी डिवे, ते डोप लाम ति ख्‍यिरा ङो शेकितो।” 5 तमा थोमा तीकी खोला “ओ चोवो, चोवो कनी फेप्‍किवी ङ्‍यिराङला छ्‍या मे, तुक क्‍यानी ङ्‍यिरा चुक क्‍यानी चोवो फेपुप लाम ति ङो शेकिवी?” सिनी सिक्‍यासुङ। 6 येशूकी तीला सुङ्सुङ, “लाम ताङ टेङ्‍बु ताङ मिजी ति ङ राङ यिन। ङ नेसुर मिसिन सु साङ पपी ते डो मुथुपी। 7 दोजो ख्‍यिरा ङ सु यिन सिनी वुतुङ के ङो शेसिन ङे पपाला साङ ङो शेवुजा। तफेन्‍ला ख्‍यिरा खोला ङो शेकिवी, तमा ख्‍यिरा खोला थोङ्‍नी वे।” 8 तमा फिलिपकी येशूला “ओ चोवो, ङ्‍यिराङला पपा छ्‍या तेन नाङ, तोजोयी वोसिन ङ्‍यिराङला लो दिकिवी।” सिनी सिक्‍यासुङ। 9 येशूकी तीला सुङ्‍सुङ, “फिलिप, दोजोयी पेला सेक ङ ख्‍यिरा मुला वोसिनाङ ख्‍योरो ङला ङो मेशेवी? सी ङला थोङ वे, तीकी पपाला थोङ्‍गुप यिन। यिने च्‍यिला ख्‍युरुङ ‘ङ्‍यिराङला पपा छ्‍या तेन।’ सिनी सिवी? 10 ङ पपी मुला वोतुप ताङ पपा ङे मुला वोतुप ति ख्‍युरुङ तेपा मिकिवी? ङे ख्‍यिराङला सिक्‍यावु ताम्‍ङे ति ङे राङ सिक्‍यावु मिन, यिने ङे मुला ज्‍यु वोतुप पपी राङ खोरे लाका क्‍या नङ्‍यिन वे। 11 ङ पपी मुला वे, पपा ङे मुला ज्‍यु वे सिनी ङे सिक्‍यावु ताम्‍ङेला ख्‍यिराङ तेपा की। मिसियाङ ङे क्‍यावु लाकातिवा ल्‍हानी ती लाकाला तेपा की। 12 वुतुङ के ङ ख्‍यिराङला सिरिन, सी ङला तेपा किवे, तीकी ङे क्‍यावु हलेवु लाकातिवा साङ किवी, तमा ती सिनाङ मङ लाका छ्‍ये साङ किवी, च्‍यिलासिसिन ङ पपी चाला डोयी वे। 13 ख्‍यिरा ङे मिङला काङ लाङ्‍सिनाङ ङ ख्‍यिराङला ती तेरी च्‍युङ ज्‍यितिन। ती ति पुज्‍युङ नेमा पपाला मोवा च्‍युङ्‍शी सिनी यिन। 14 ख्‍यिरा ङे मिङला काङ लाङ्‍सिनाङ ती ति ङ च्‍युङ ज्‍यितिन।”

येशूकी थाक्‍छ्‍येन नङ्‍गुप थु चाङ्‍मा

15 “दोजो ख्‍यिरा ङला ङ्‍यिङ्ज्‍ये क्‍यावु यिन्‍सिन ङे कला ङ्‍येन्‍गिवी। 16 ङ पपाला गोङ्‍बा शोयी, तमा पपी ख्‍यिराङला यम्‍बा टोङ्‍गु तेरुप यी ताङ्‍नी ख्‍यिरा मुला नरी लु ज्‍यिकितो। 17 खो ति कोन्‍छ्‍योककी थु टेङ्‍बु यिन। जम्‍बुलिङकी मीतिवी खोला सेमला मिलिङ्‍गिवी, च्‍यिलासिसिन तिवी खोला थोङ्‍गुप साङ मोथोङ्‍गिवी, ङो साङ मेशेवी। यिने ख्‍यिरा याङ खोला ङो शेकिवी। च्‍यिलासिसिन खो ख्‍यिरा मुला वे, तमा खो ख्‍यिरा सेमला ज्‍युकिवी। 18 ङ ख्‍यिराङला तप्‍रुक दोके क्‍युर्नी मोज्‍योकिवी, ङ ख्‍यिरा चाला येलुङ लोक्‍नी वुङ्‍यिनो। 19 चेयी ज्‍युक्‍ला जम्‍बुलिङकी मीतिवी ङला येलुङ मोथोङ्‍गितो, यिने ख्‍यिरा याङ ङला थोङ्‍गितो। च्‍यिलासिसिन ङ सेन्‍बु वे, तमा ख्‍यिराङ साङ सेन्‍बु लुकिवी। 20 ती छेर्मु ङ पपी मुला वोतुप ताङ ख्‍यिराङ ङे मुला वोतुप ताङ ङ ख्‍यिरा मुला वोतुप ति ख्‍यिरा हाक्‍कोकितो। 21 सी ङे कतिवाला ङ्‍येन्‍नी ती कतिवाला युकिवे, ती ति ङला ङ्‍यिङ्‍ज्‍ये कितुप मी यिन। सी ङला ङ्‍यिङ्‍ज्‍ये किवे, ङे पपी तीला ङ्‍यिङ्ज्‍ये क्‍या नङ्‍गिवी। तमा ङ साङ तीला ङ्‍यिङ्‍ज्‍ये क्‍यानी तीला ङ सु यिन सिरुप छ्‍या देनिनो।” 22 येशूकी तुक सुङ्‍सिमा यहूदा इस्‍करियोत मिन्‍दुप यम्‍बा यहूदा तीकी खोला “चोवो, चोवोकी च्‍यिला खोरुङ ति ङ्‍यिराङला छ्‍या देन्‍गिवी, यिने जम्‍बुलिङकी मीतिवाला ति छ्‍या मेदेन्‍वी?” सिनी टिसुङ। 23 तमा येशूकी तीला सुङ्‍सुङ, “सी ङला ङ्‍यिङ्‍ज्‍ये किवे, तीकी ङे सिक्‍यावु ताम्‍ङेला ङ्‍येन्‍गिवी। तमा ङे पपी तीला ङ्‍यिङ्ज्‍ये क्‍या नङ्‍गिवी, तमा ङे पपा ताङ ङ ति तीकी चाला गल्‍नी तीकी मुला राङ देतिनो। 24 ङला ङ्‍यिङ्‍ज्‍ये मिकिवु तीकी ङे ताम्‍ङे मेङ्‍येन्‍दिवी। दी ख्‍यिरा थोवु ताम्‍ङे ति ङे ति मिन, यिने ङला तोङ्‍गुप पपी नङ्‍गुप सुङ यिन। 25 ङ ख्‍यिरा मुला वोतुप पेला दी ताम्‍ङेतिवा ति ख्‍यिराङला सिरिन वे। 26 यिने पपी ङे मिङला तङ्‍गुप टोङ्‍गु तेरुप थु चाङ्माकी राङ ख्‍यिराङला तेरी ताम्‍ङेतिवा लोप्‍किवी, तमा ङे ख्‍यिराङला सिक्‍यावु तेरी ताम्‍ङेतिवा खोकी ख्‍यिराङला येलुङ टेन्‍सो लोङ्‍गिवी। 27 ङ ख्‍यिराङला लोदिमु बिन्‍नी डोयी, ङ ङरा लोदिमु ति ख्‍यिराङला तेरिन। ङे ख्‍यिराङला तेरुप लोदिमु ति जम्‍बुलिङकी तेरुप लोदिमु दोके मिन। तुक क्‍यानी ख्‍यिराङ सेम्‍दुक माकी, ज्‍यिवा साङ माकी। 28 ङे, ‘ङ डोयी वे, तमा येलुङ ख्‍यिरा ते लोक्‍नी वुङ्‍गिवी।’ सिनी सिक्‍यावु ति ख्‍यिरा थोनी वे। ख्‍यिरा ङला ङ्‍यिङ्ज्‍ये क्‍यावु यिन्‍सिन ङ पपी ते डोप ति ख्‍यिराङ गा कितुप्‍जा, च्‍यिलासिसिन पपा ङ सिनाङ चोछ्‍ये वे। 29 दी ताम्‍ङे च्‍युङ्‍गुप सिनाङ गोमाला के तन्‍दा ङे ख्‍यिराङला सिक्‍यावु तेन्‍दोक ति ती ताम्‍ङे च्‍युङ्‍गुप पेला ख्‍यिराङ ङला तेपा किशी सिनी यिन। 30 त याङ ङ ख्‍यिरा मुला ताम्‍ङे अला मलाप, च्‍यिलासिसिन दी जम्‍बुलिङला ओङ्ज्‍येन कितुप शैतान ति वुङ्‍यिन नोक। तीकी ङला काङ साङ ओङ्ज्‍येन कितुप ङार मे। 31 यिने ङे पपाला ङ्‍यिङ्‍ज्‍ये कितुप ताङ पपी ङला काङ सुङ वे, तुकै राङ ङे क्‍यावु ति जम्‍बुलिङकी मीतिवी हाक्‍कोशी सिरुप ङे नोवा वे। लोसा, त याङ दाक्‍पु दे नेसुर डोप।”

यूहन्‍ना 15

येशू वुतुङ्‍की गुन्‍डुम दोङ्‍बु यिन

1 येलुङ येशूकी खोरो लोमातिवाला दुक सुङ्‍सुङ, “वुतुङ्‍की गुन्‍डुम दोङ्‍बु ति ङ राङ यिन, तमा ङे पपा ति ती दोङ्‍बु ल्हाप मी यिन। 2 ङे लोला वोसिनाङ डेलु मोगोरुप येल्‍कातिवा रे रेला खोकी च्‍येकिवी, तमा डेलु गोरुप येल्‍कातिवाला ति मङ डेलु गोर्शी सिनी सेप्‍किवी। 3 ख्‍यिराङ ति ङे ख्‍यिराङला सिक्‍यावु ताम्‍ङे नेमा राङ टेङ्‍बु गल वे। 4 ख्‍यिराङ ङे मुला दे, तमा ङ ख्‍यिरा मुला देतिन। येल्‍का गुन्‍डुम दोङ्‍बी लोला मालुसिन तीकी खोरो राङ काङ डेलु मोगोर्वी। ती दोके ख्‍यिराङ साङ ङे मुला मादेसिन खोरो राङ डेलु गोर मुथुपी। 5 ङ ति गुन्‍डुम दोङ्‍बु यिन, ख्‍यिराङ ति तीकी येल्‍का यिन। सु ङे मुला देकिवे, तमा ङ तीकी मुला देसिन तीकी डेलु बङी गोर्किवी। ङ नेसुर क्‍येङ्‍सु गल्‍सिन ख्‍यिरा काङ साङ कि मुथुपी। 6 सु ङे मुला मेदेवे, ती ति डेलु मोगोरुप येल्‍का दोके च्‍येनी क्‍युर्किवी, तमा ती ति कम्‍बु डिवी। मीतिवी तुका येल्‍कातिवा दुम्‍नी मेला क्‍युर्नी र्‍हेकिवी। 7 दोजो ख्‍यिराङ ङे मुला देतुप ताङ ङे सुङ ख्‍यिरा सेमला लुसुङ सिसिन ख्‍यिरा काङ लाङ्‍सिनाङ तुकै राङ च्‍युङ्‍गितो। 8 ख्‍यिराङ डेलु बङी गर्नी ङे लोमातिवा यिन्‍दुप छ्‍या तेन्‍सिन ती ति ङे पपाला मोवा वुङ्‍गिवी। 9 पपी ङला ङ्‍यिङ्‍ज्‍ये क्‍यावु दोके ङे साङ ख्‍यिराङला ङ्‍यिङ्‍ज्‍ये क्‍यायी। ख्‍यिराङ ङे ङ्‍यिङ्‍ज्‍येला राङ देता। 10 ङ पपी कला ङ्‍येन्‍नी खोकी ङ्‍यिङ्‍ज्‍येला देतुप दोके ख्‍यिराङ ङे कला ङ्‍येन्‍सुङ सिसिन ङे ङ्‍यिङ्‍ज्‍येला देकिवी। 11 ङे ख्‍यिराङला दी ताम्‍ङे सिक्‍यावु ति ङला वोतुप लोदिमु ति ख्‍यिराङला लुशी, तमा ख्‍यिरा लोदिमु ति छाछिङी च्‍युङ्‍शी सिनी यिन। 12 ङे क ति दी राङ यिन। ङे ख्‍यिराङला ङ्‍यिङ्‍ज्‍ये क्‍यावे दोके ख्‍यिरा साङ च्‍यिककी च्‍यिकला ङ्‍यिङ्‍ज्‍ये की। 13 रङगी दाल्‍जी थोक्‍ला खोरुङ राङ शेप सिनाङ मङ ङ्‍यिङ्‍ज्‍ये छ्‍ये ति मे। 14 दोजो ख्‍यिरा ङे कला ङ्‍येन्‍सुङ सिसिन ख्‍यिराङ ङे दाल्‍जातिवा यिनो। 15 तफेन्‍ला ङ ख्‍यिराङला लावा मिसिर, च्‍यिलासिसिन ज्‍यिन्‍दाककी काङ किवे, तीकी लावा तीकी ङो मेशेवी। बोरु ङ ख्‍यिराङला दाल्‍जा सिनी सिरिन, च्‍यिलासिसिन पपा नेमा ङे काङ थोवे, ती तेरी ङे ख्‍यिराङला सिक्‍यायिन। 16 ख्‍यिरा ङला पेतुप मिन, यिने ङे ख्‍यिराङला पेतिन। ती ति ख्‍यिराङ गल्‍नी नरी लुवु डेलु गोर्शी सिनी यिन। तुक क्‍यानी ख्‍यिरा ङे मिङला काङ लाङ्‍सिनाङ पपी ख्‍यिराङला नङ्‍गिवी। 17 दी ति ङे क यिन, ख्‍यिराङ च्‍यिककी च्‍यिकला ङ्‍यिङ्‍ज्‍ये की।”

जम्‍बुलिङकी मीतिवी लोमातिवाला ङ्‍यिङ्‍मर क्‍यावु

18 “दोजो जम्‍बुलिङकी मीतिवी ख्‍यिराङला ङ्‍यिङ्‍मर क्‍यासिन तिवी ख्‍यिराङला सिनाङ गोमाला ङला ङ्‍यिङ्‍मर क्‍यावु यिन सिनी ख्‍यिरा नासाम तोङ। 19 ख्‍यिराङ जम्‍बुलिङकी ति यिन्सिन जम्‍बुलिङकी मीतिवी ख्‍यिराङला खोरो मी यिन सिनी ङ्‍यिङ्‍ज्‍ये कितुप्‍जा। यिने ख्‍यिराङ ति जम्‍बुलिङकी ति मिन, ङे ख्‍यिराङला दी जम्‍बुलिङ ने पेतिन। ती तप्‍की जम्‍बुलिङकी मीतिवी ख्‍यिराङला ङ्‍यिङ्‍मर किवी। 20 ‘चुका लावा साङ तीकी ज्‍यिन्‍दाक सिनाङ छ्‍ये मेवी।’ सिनी गोमाला ङे ख्‍यिराङला सिक्‍यावु ति ख्‍यिरा टेन्‍सो की। तिवी ङला छेटाङ बिन्‍सुङ सिसिन ख्‍यिराङला साङ छेटाङ तेर्किवी, यिने तिवी ङे सुङला ङ्‍येन्‍सुङ सिसिन ख्‍यिरा सिक्‍यावु ताम्‍ङेला साङ ङ्‍येन्‍गिवी। 21 तमा ख्‍यिराङ ङे तिङ्‍ला तिङ्‍योकुप तप्‍की तिवी ख्‍यिराङला तुका छेटाङ तेर्किवी। ती ति ङला तोङ्‍गुप तीला तिवी ङो माशेवु तप्‍की यिन। 22 दोजो ङ जम्‍बुलिङला वानी तिवाला सिमाक्‍यावु यिन्‍सिन तिवाला दिक्‍पाकी क्‍येन मोफोकुप्‍जा, यिने त याङ तिवी खोप्‍रे दिक्‍पी थोक्‍ला काङ साङ खुङ कि मुथुपी। 23 सी ङला ङ्‍यिङ्‍मर किवे, तीकी ङे पपाला साङ ङ्‍यिङ्‍मर किवी। 24 दोजो ङे सी साङ माक्‍यावु लाका ति तिवी पर्ला माक्‍यावु यिन्‍सिन तिवाला दिक्‍पाकी क्‍येन मोफोकुप्‍जा। यिने त याङ तिवी ङे क्‍यावु ती हलेवु लाकातिवा थोङ्‍सुङ, यिन्‍सिनाङ तिवी ङ ताङ ङे पपा ङ्‍यिकरला ङ्‍यिङ्‍मर क्‍यासुङ। 25 यिने ती ति कोन्‍छ्‍योककी तिवाला नङ्‍गुप ठिमला ‘तिवी तेन्‍दोक मेताला ङला ङ्‍यिङ्‍मर क्‍यासुङ।’ सिनी टिवु ति तेरी छेवुला यिन। 26 ङे पपा नेमा ख्‍यिराङला तङ्‍गुप टोङ्‍गु तेरुप थु चाङ्‍मा फेप्‍कितो। ती टेङ्‍बु वोतुप थु चाङ्‍मा ति पपा नेमा फेप्‍सिमा ती थु चाङ्‍माकी ङे थोक्‍ला पङ्‍बु नङ्‍गितो। 27 तमा ख्‍यिराङ साङ ङे थोक्‍ला पङ्‍बु तेरुप डितो, च्‍यिलासिसिन थल्‍माला ङे लाका गो चुवु पेला नेज्‍युन ख्‍यिराङ ङे मुला वे।”

यूहन्‍ना 16

1 “ङे ख्‍यिराङला दी ताम्‍ङे सिक्‍यावु ति ख्‍यिरा ङला तेपा क्‍यावु ति येर मर मोडोशी सिनी यिन। 2 मीतिवी ख्‍यिराङला यहूदी छ्‍योखाङ नेमा तेन तोङ्‍गितो। वुतुङ के तुजे यी गितो, ती तुजेला ख्‍यिराङला सेतुपतिवी तुकै कितुप ति कोन्‍छ्‍योकला शब्‍ज्‍यी कितुप लाका यिन सिनी नासाम तोङ्‍गिवी। 3 तिवी तुक क्‍यावु ति तिवी ङे पपाला साङ ङो माशे वे, ङला साङ ङो मेशेवु तप्‍की यिन। 4 ङे ख्‍यिराङला दी ताम्‍ङे सिक्‍यावु ति ज्‍युक्‍ला ती तेरी च्‍युङ्‍गुप पेला ङे ख्‍यिराङला सिक्‍यावु ताम्‍ङे ति ख्‍यिरा नासाम शर्शी सिनी यिन। ङे दी ताम्‍ङे गोमाला ख्‍यिराङला सिमाक्‍यावु ति ङ ख्‍यिरा मुला राङ वोतुप तप्‍की यिन।”

कोन्‍छ्‍योककी थु चाङ्‍माकी लाका

5 “त याङ ङ ङला तोङ्‍गुप तीकी ते डोयी वे। यिन्‍सिनाङ ख्‍यिरा पर्ला सी साङ ङला कनी डिवी सिनी मिटिनोक। 6 बोरु ङे ख्‍यिराङला सिक्‍यावु ताम्‍ङेतिवा थोसिमा ख्‍यिरा सेमला छासे सेम्‍दुक लानी वे। 7 यिने ङ ख्‍यिराङला टेङ्‍बो सिरिन, ङ डोप ति ख्‍यिरा थोक्‍ला ल्‍यामु यिन। ङ मागल्‍सिन टोङ्‍गु तेरुप थु चाङ्‍मा ति ख्‍यिरा ते मेफेवी। यिने ङ गल्‍सिन टोङ्‍गु तेरुप थु चाङ्‍मा ति ख्‍यिरा पर्ला तोङ्‍यिनो। 8 खो फेप्‍सिमा दिक्‍पा ताङ कोन्‍छ्‍योककी टेङ्‍बु ताङ कोन्‍छ्‍योककी ठिमकी कोर्ला हाक्‍माकोवुतिवाला खोकी हाक्‍को ज्‍यिकिवी। 9 दिक्‍पाकी कोर्ला ति ङला तेपा मिकिवु ति दिक्‍पा यिन सिनी खोकी हाक्‍को ज्‍यिकिवी। 10 टेङ्‍बुकी कोर्ला ति ङ ङे पपी ते डोयी, तुक क्‍यानी ख्‍यिरा ङला येलुङ मोथोङ्‍दो सिनी खोकी हाक्‍को ज्‍यिकिवी। 11 कोन्‍छ्‍योककी ठिमकी कोर्ला ति दी जम्‍बुलिङला ओङ्‍ज्‍येन कितुप शैतानला कोन्‍छ्‍योक नेमा पर्च्या ङ्‍येसुङ सिनी हाक्‍को ज्‍यिकिवी। 12 ङे ख्‍यिराङला सि गोवु ताम्‍ङे याङ तरोङ बङी वे, यिने तन्‍दा ति ख्‍यिरा ती ताम्‍ङे ति सेमला ज्‍योक मुथुपी। 13 यिने टेङ्‍बु वोतुप थु चाङ्‍मा फेप्‍सिमा खोकी ख्‍यिराङला कोन्‍छ्‍योककी टेङ्‍बुकी कोर्ला हाक्‍को ज्‍यिकितो, तमा ख्‍यिराङला ती टेङ्‍बुकी लाम नेवा टिकितो। खोकी खोरो ताम्‍ङे मुसुङ्‍गिवी, यिने कोन्‍छ्‍योक नेमा काङ थोवे, ती ताम्‍ङे तिराङ सुङ्‍गितो, तमा ज्‍युक्‍थमाला वुङ्‍गुप ताम्‍ङेतिवा साङ ख्‍यिराङला सुङ्‍गितो। 14 खोकी ङे सिक्‍यावु ति ङ्‍येन्‍नी ख्‍यिराङला हाक्‍को च्‍यितुप तप्‍की ङला मोवा वोतुप ति खोकी छ्‍या देन्‍गिवी। 15 पपी मुला वोतुप ति तेरी ङे ति यिन। तुक क्‍यानी ङे काङ सिक्‍यावे, खोकी थु चाङ्‍माकी ती थोनी ख्‍यिराङला सुङ्‍गिवी सिनी ङे सिक्‍यावु यिन। 16 त चेयी ज्‍युक्‍ला ख्‍यिरा ङला मोथोङ्‍तो, तमा येलुङ चेयी ज्‍युक्‍ला ख्‍यिरा ङला थोङ्‍गितो।”

लोमातिवी सेम्‍दुक ति गाला ग्‍युरुप

17 ललाइ ललाइ लोमातिवा खोप्‍राङ नाङ्‍ला “खोकी दाक्‍पुला ‘चेयी ज्‍युक्‍ला ख्‍यिरा ङला मोथोङ्‍तो, तमा येलुङ चेयी ज्‍युक्‍ला ख्‍यिरा ङला थोङ्‍गितो।’ सिनी सुङ्‍गुप ताङ येलुङ खोकी ‘ती ति ङ पपी चाला डोयी वोतुप तप्‍की यिन।’ सिनी सुङ्‍गुप ति काङ यिनाङ? 18 खोकी ‘चेयी ज्‍युक्‍ला’ सिनी सुङ्‍गुप तेन्‍दोक ति काङ यिनाङ? खोकी काङ सुङ्‍गुप यिन सिनी ङि्‍यरा हाक्‍माको।” सिनी सिक्‍यासुङ। 19 येशूकी लोमातिवी खोला टिवा टेप नो क्‍यावु ति हाक्‍कोनी खोकी तिवाला सुङ्‍सुङ, “‘चेयी ज्‍युक्‍ला ख्‍यिरा ङला मोथोङ्‍तो, तमा येलुङ चेयी ज्‍युक्‍ला ख्‍यिरा ङला थोङ्‍गितो।’ सिनी ङे सिक्‍यावु ताम्‍ङेकी कोर्ला ख्‍यिरा पर्ला केवुल क्‍यावु यिन? 20 वुतुङ के ङ ख्‍यिराङला सिरिन, ख्‍यिराङ ङोप ताङ ङुप्‍राङ कितो, यिने जम्‍बुलिङकी मीतिवा ति गा कितो। ख्‍यिराङला छासे पप लानी सेम्‍दुक लङ्‍गितो, यिने ख्‍यिरा सेम्‍दुक ति गाला ग्‍युर्कितो। 21 पुम्‍पेजाला आङा क्‍येप पेला लेप्‍सिमा छेटाङ वुङ्‍गुप तप्‍की तीला छासे पप किवी। यिने आङा क्‍येसिमा तीकी ती छेटाङ ति टोक ज्‍येकिवी, च्‍यिलासिसिन आङा क्‍येवु तप्‍की तीकी सेमला छासे गा लङ्‍गिवी। 22 ख्‍यिराङला साङ दी दोके राङ च्‍युङ्‍गिवी। तन्‍दा ख्‍यिरा सेमला सेम्‍दुक किवी, यिने ङ ख्‍यिराङला येलुङ ठेतुप पेला ख्‍यिरा सेम ति छासे गा लङ्‍गितो। तमा ती गा ति सी साङ ख्‍यिराङ नेसुर ठोक मुथुप्‍तो। 23 ती तुजेला ख्‍यिरा ङला काङ ताम्‍ङे साङ मिटितो। ङ ख्‍यिराङला टेङ्‍बो सिरिन, ख्‍यिरा ङे मिङला ङे पपाला काङ लाङ्‍सिनाङ खोकी ख्‍यिराङला नङ्‍गितो। 24 त सेक ख्‍यिरा ङे मिङला काङ साङ मालाङ वे। त लोङ, तमा ख्‍यिराङला थोप्‍कितो। तमा ख्‍यिराङला लोदिमु तेरी च्‍युङ्‍गितो।”

येशूकी जम्‍बुलिङकी खला ग्‍येलुप

25 “त सेक ती ताम्‍ङेतिवा ङे ख्‍यिराङला पे नेसुर सिक्‍यायी। यिने तुजे यी वुङ्‍यिन वे, ती तुजेला ङ येलुङ पे नेसुर मिसिर, यिने पपी कोर्ला ल्‍यामो हाक्‍कोवा क्‍यानी ख्‍यिराङला सिरिनो। 26 ती तुजेला ख्‍यिरा ङे मिङला पपाला लोङ्‍गितो, ती ति ङे ख्‍यिरा थोक्‍ला पपाला लोङ्‍गिवी सिरुप ताम्‍ङे मिन। 27 पपी राङ ख्‍यिराङला ङ्‍यिङ्‍ज्‍ये क्‍या नङ्‍गिवी, च्‍यिलासिसिन ख्‍यिरा ङला ङ्‍यिङ्‍ज्‍ये क्‍यासुङ, तमा ङ पपा नेमा वावु यिन सिनी ख्‍यिरा तेपा क्‍यावु तप्‍की यिन। 28 ङ पपा नेमा दी जम्‍बुलिङला वायिन, त ङ जम्‍बुलिङ क्‍युर ज्‍याक्‍नी पपी ते लोक्‍नी डोयी वोतो।” 29 येशूकी तुक सुङ्‍सिमा लोमातिवी खोला सिक्‍यासुङ, “त याङ गेकेनकी पे नेसुर मासुङ्‍नी ङ्‍यिराङला ल्‍यामो हाक्‍कोवा क्‍यानी सुङ्‍गिनोक। 30 गेकेनला तेरी ताम्‍ङे छ्‍या वोतुप ताङ गेकेनला काङ टिवा टि मोगोनोक सिरुप ति तके ङ्‍यिरा हाक्‍कोसुङ। ती तप्‍की गेकेन याङ कोन्‍छ्‍योक नेमा फेपुप यिनोक सिनी ङि्‍यरा तेपा क्‍यायिन।” 31 तमा येशूकी लोमातिवाला सुङ्‍सुङ, “त के ख्‍यिराङ ङला तेपा किनोक! 32 यिने तुजे यी गिवी, ती तुजे ति वानिङ सिन वे। ती तुजेला ख्‍यिरा तेरी थरा थुरा गल्‍नी दाक दाक्‍पी खाङ्‍बाला डितो, तमा ख्‍यिरा ङला च्‍यिक राङ क्‍युन ज्‍योकितो। यिने ङ च्‍यिक राङ मे, च्‍यिलासिसिन पपा ङे मुला ज्‍यु वे। 33 ङे दी ताम्‍ङे ख्‍यिराङला सिक्‍यावु ति ख्‍यिराङ ङे मुला लुनी ख्‍यिरा सेमला लोदिमु ङ्‍येशी सिनी यिन। जम्‍बुलिङला ख्‍यिराङला छेटाङ ख्‍येल्‍गितो, यिने ख्‍यिराङ ङाडेङ की। च्‍यिलासिसिन जम्‍बुलिङकी ओङ्‍ज्‍येन खला ङे ग्‍येल्‍निङ सिन वे।”

यूहन्‍ना 17

येशूकी खोरो थोक्‍ला मोपोर क्‍या नङ्‍गुप

1 येशूकी ती ताम्‍ङेतिवा सुङ सिन्‍सिमा देवाच्‍येन ने केला ल्‍हानी दुक सिनी मोपोर क्‍या नाङ्‍सुङ, “ओ पपा, तुजे वानिङ सिन वे। पपी ङ ख्‍योरे पुज्‍युङला मोवा वोतुप ति छ्‍या तेन्‍नी ङ पुज्‍युङकी साङ पपाला मोवा वोतुप ति छ्‍या देन्‍शी। 2 पपी ङ पुज्‍युङला जम्‍बुलिङकी मीतिवा तेरीला ओङ्‍ज्‍येन कितुप ओङ नाङ्‍सुङ। ती ति पपी ङ पुज्‍युङला तेपा कि च्‍यितुप मीतिवा तेरीला ङ नेसुर नाम्‍साङ मिशिवु मिजी थोप्‍शी सिनी यिन। 3 तमा नाम्‍साङ मिशिवु मिजी ति च्‍यिक राङ वोतुप कोन्‍छ्‍योक टेङ्‍बुला ङो शेवु ताङ पपी तङ्‍गुप येशू ख्रीष्‍टला ङो शेवु यिन। 4 पपी ङला कि च्‍यितुप लाका ति ङे तेरी सिन्‍दा क्‍यानी पपा छासे मोवा वोतुप ति दी जम्‍बुलिङकी मीतिवाला छ्‍या तेनिन। 5 ओ पपा, जम्‍बुलिङ ज्‍येङ्‍गुप सिनाङ गोमाला पपा ताङ ङे मुला वोतुप ती मोवा नेसुर पपी थोङ्‍दाङला ङला मोवा च्‍युङ च्‍यी।”

लोमातिवी थोक्‍ला येशूकी मोपोर क्‍या नङ्‍गुप

6 “पपी जम्‍बुलिङ नेसुर पेनी ङला तेपा कि च्‍यितुप मीतिवाला पपा सु यिन सिनी ङे ङो शे च्‍यितिन। तिवा ति गोमाला पपी ति यिन, तमा पपी ङला नङ्‍गुप यिन। तिवी पपी सुङला ङ्‍येन्‍सुङ। 7 त याङ पपी ङला नङ्‍गुप ति तेरी पपा नेमा राङ वावु यिन सिरुप ति तिवी हाक्‍कोसुङ। 8 च्‍यिलासिसिन पपी ङला नङ्‍गुप सुङ ति ङे तिवाला लापिन, तमा तिवी ती सुङला ङ्‍येन्‍सुङ। ङ पपा नेमा वावु यिन सिरुप ति वुतुङ के तिवी हाक्‍को वे, तमा पपी ङला तङ्‍गुप यिन सिरुप ति तिवी तेपा क्‍यासुङ। 9 ङ तिवी थोक्‍ला मोपोर कितिन। ङ जम्‍बुलिङकी मीतिवी थोक्‍ला मोपोर मिकिवी, यिने पपी ङला नङ्‍गुपतिवी थोक्ला मोपोर कितिन, च्‍यिलासिसिन तिवा पपी ति यिन। 10 ङे मुला वोतुप ति तेरी पपी ति यिन, पपी मुला वोतुप ति तेरी ङे ति यिन। तमा तिवा नेसुर ङला मोवा ङ्‍ये वे। 11 ङ याङ जम्‍बुलिङला अला मुलुवी, यिने दिवा याङ जम्‍बुलिङला लुकिवी। त याङ ङ पपी ते वुङ्‍यिन वे। ओ चाङ्‍मा वोतुप पपा, पपी ङला नङ्‍गुप ङार वोतुप मिङ नेमा तिवाला र्‍होक्‍टे क्‍यानी पपा ताङ ङ च्‍यिक राङ वोतुप दोके तिवा साङ च्‍यिक राङ च्‍युङ्‍शी। 12 ङ तिवी मुला वोता सेक याङ पपी ङला नङ्‍गुप ङार वोतुप मिङला तिवाला ङे र्‍होक्‍नी ज्‍याकिन। तुक क्‍यानी तिवी पर्ला ङ्‍येलाला डो गोवु तीला मिसिन यम्‍बा सु साङ ङ्‍येलाला माख्‍येल वे। ती ति कोन्‍छ्‍योककी सुङला टिवु ति तेरी छेवुला यिन। 13 त याङ ङ पपी ते वुङ्‍यिन वे। यिने ङ जम्‍बुलिङला वोतुप पेला तिवाला दी ताम्‍ङेतिवा सिक्‍यावु ति ङे लोदिमु ति तिवी सेमला तेरी च्‍युङ्‍शी सिनी यिन। 14 पपी ङला सुङ्‍गुप सुङ ति ङे तिवाला सिक्‍यायिन, तमा जम्‍बुलिङकी मीतिवी तिवाला ङ्‍यिङ्‍मर क्‍यासुङ। च्‍यिलासिसिन ङ जम्‍बुलिङकी मी मिन्‍दुप दोके तिवा साङ जम्‍बुलिङकी मी मिन्‍दुप तप्‍की यिन। 15 ङे मोपोर क्‍यावु ति पपी तिवाला दी जम्‍बुलिङ ने टि फेप सिनी मिन, यिने तिवाला दुक्‍टा शैतान नेसुर र्‍होक्‍टे कि सिनी यिन। 16 ङ दी जम्‍बुलिङकी मिन्‍दुप दोके तिवा साङ दी जम्‍बुलिङकी ति मिन। 17 पपी सुङ ति टेङ्‍बु वे, ती टेङ्‍बु वोतुप सुङ नेसुर राङ तिवाला चाङ्‍मा जो नाङ। 18 पपी ङला जम्‍बुलिङला तङ नङ्‍गुप दोके ङे साङ तिवाला जम्‍बुलिङला तङ्‍यिन। 19 तिवी थोक्‍ला ङे ङरा राङ चाङ्‍मा जोयिन, ती ति तिवा साङ सुङ टेङ्‍बु नेसुर चाङ्‍मा च्‍युङ्‍शी सिनी यिन।”

तेपा कितुपतिवा तेरीकी थोक्‍ला येशूकी मोपोर

20 “ङ तिवी थोक्‍ला तिराङ मिन, यिने तिवी लापुप सुङ ङ्‍येन्‍नी ङला तेपा कितुपतिवी थोक्‍ला साङ मोपोर कितिन। 21 ओ पपा, पपा ङे मुला वोतुप ताङ ङ पपी मुला वोतुप दोके तिवा तेरी च्‍यिक राङ च्‍युङ्‍नी तिवा साङ दाक्‍पी मुला राङ च्‍युङ्‍शी, तमा पपी ङला तङ्‍गुप यिन सिरुप ति जम्‍बुलिङकी मीतिवी तेपा किशी। 22 पपी ङला नङ्‍गुप मोवा ति ङे तिवाला थोप च्‍यितिन। ती ति पपा ताङ ङ च्‍यिक राङ यिन्‍दुप दोके तिवा साङ च्‍यिक राङ च्‍युङ ज्‍यितुपला यिन। 23 ङ तिवी मुला वोतुप ताङ पपा ङे मुला वोतुप ति तिवा तेरी च्‍यिक राङ च्‍युङ्‍गुपला यिन। तमा ती ति पपी ङला तङ्‍गुप ताङ पपी ङला ङ्‍यिङ्‍ज्‍ये क्‍या नङ्‍गुप दोके तिवाला साङ ङ्‍यिङ्‍ज्‍ये क्‍या नङ्‍गिवी सिरुप ति जम्‍बुलिङकी मीतिवाला हाक्‍को ज्‍यितुपला यिन। 24 ओ पपा, पपी ङला नङ्‍गुपतिवा साङ ङ वोतुप ते ङे मुला राङ देतुप ङ्‍येशी। तमा जम्‍बुलिङ ज्‍येङ्‍गुप सिनाङ गोमाला के पपी ङला ङ्‍यिङ्‍ज्‍ये क्‍यानी नङ्‍गुप मोवा ति तिवी थोङ्‍शी सिरुप ङे नोवा वे। 25 ओ ठिम टेङ्‍बु क्‍या नङ्‍गुप पपा, जम्‍बुलिङकी मीतिवी पपाला ङो माशे, यिने ङ याङ पपाला ङो शेतिन, तमा ङला तेपा कितुपतिवी साङ पपी ङला तङ्‍गुप यिन सिनी हाक्‍कोनी वे। 26 पपा सु यिन सिनी ङे तिवाला ङो शे च्यितिन, तमा तरोङ साङ ङो शे ज्‍यितिन। ती ति पपी ङला क्‍या नङ्‍गुप ङ्‍यिङ्‍ज्‍ये ति तिवी मुला लुशी, तमा ङ साङ तिवी सेमला देतुप ङ्‍येशी सिनी यिन।”

यूहन्‍ना 18

येशूला क्‍येन बिन्‍नी जिम्‍बुप

1 येशूकी तुक सुङ्‍नी मोपोर क्‍या सिन्‍सिमा खोरे लोमातिवी मुला किद्रोन सिरुप टोक्‍पी फर्केन फेप्‍सुङ। ते दुम्‍डोक यी नोक, तमा खो खोरे लोमातिवा ताङ मुला ते शुसुङ। 2 तमा खोला क्‍येन तेरुप यहूदाला साङ ती दासा ति छ्‍या नोक, च्‍यिलासिसिन येशू लोमातिवी मुला माङ्‍शोक ते राङ ठेकिनोक। 3 ती पेला यहूदाकी रोमी मक्‍मीतिवी मुला कोङ्‍यार छ्‍येतिवा ताङ फरिसीतिवी तङ्‍गुप यहूदी ल्‍हङाङला र्‍हेन्‍दुप मीतिवाला टिनी ते वासुङ। तिवी पेक्‍टुल ताङ बाशिङ ताङ मक्‍मीकी लक्‍च्‍येतिवा खुर्नी वानोक। 4 तमा येशूकी खुरुङला त च्‍युङ्‍गुप ताम्‍ङेतिवा तेरी हाक्‍कोनी तिवी दोङ्‍ला फेप्‍नी तिवाला “ख्‍यिराङ सुला छोलुपला वावु यिन?” सिनी टि नाङ्‍सुङ। 5 तमा तिवी “नासरतकी येशूला छोलुपला।” सिनी सिक्‍यासुङ। येशूकी तिवाला “ती ति ङ राङ यिन।” सिनी सुङ्‍सुङ। ती पेला खोला क्‍येन तेरुप यहूदा साङ तिवी मुला राङ लानी देन नोक। 6 येशूकी तिवाला “ती ति ङ राङ यिन।” सिनी सुङ्‍सिमा तिवा फिल्‍दुङ्‍मा गल्‍नी तला ग्‍यप्‍सुङ। 7 येलुङ येशूकी तिवाला “ख्‍यिराङ सुला छोल्‍गिवी?” सिनी टि नाङ्‍सुङ। तमा तिवी “नासरतकी येशूला।” सिनी सिक्‍यासुङ। 8 तमा येशूकी तिवाला “ती ति ङ राङ यिन सिनी ङे ख्‍यिराङला सिक्‍यायी, दोजो ख्‍यिरा ङला छोलुप यिन्‍सिन ङे मुला वोतुप दी यम्‍बातिवाला ति डो च्‍यी।” सिनी सुङ्‍सुङ। 9 येशूकी तुक सुङ्‍गुप ति खोकी गोमाला के “ओ पपा, पपी ङला नङ्‍गुपतिवी नाङ्‍ला च्‍यिक साङ मातोर वे।” सिनी सुङ्‍गुप सुङ ति तेरी छेवुला यिन। 10 तमा सिमोन पत्रुस तीकी खोरो लोला वोतुप खुर्पा थेन्‍नी तेरी सिनाङ कोङ्‍यार छ्‍येकी लावा यीकी यावी थाकाकी नम्‍ज्‍योक टेप च्‍येसुङ। ती लावाकी मिङ ति माल्‍खस नोक। 11 ती थोङ्‍नी येशूकी पत्रुसला सुङ्‍सुङ, “ख्‍योरो खुर्पा ति शुपकी नाङ्‍ला च्‍यी। काङ पपी ङला खुर च्‍यितुप छेटाङ ति ङे मुखुर्वी रो?”

येशूला हन्‍नासकी दोङ्‍ला टि गलुप

12 तमा रोमी मक्‍मीतिवा ताङ तिवी मुला वावु मक्‍मी छ्‍ये ताङ यहूदी ल्‍हङाङला र्‍हेन्‍दुपतिवी येशूला जिम्‍नी टासुङ। 13 तमा तिवी खोला गोमाला हन्‍नासकी ते टिनी गाल्‍सुङ। ती हन्‍नास ति ती लोकी तेरी सिनाङ कोङ्‍यार छ्‍ये यिन्‍दुप कैयाफाकी मेम यिनोक। 14 ती कैयाफा तीकी “मी मिरा च्‍यिक तेरी मीतिवी थोक्‍ला शेप ति बोरु ल्‍यामु यिन।” सिनी यहूदी गोमा कितुपतिवाला टोङ्‍गु बिन्‍दुप मी यिनोक।

पत्रुसकी येशूला ङो मेशेवी सिक्‍यावु

15 येशूला जिम्‍नी टि डोप पेला सिमोन पत्रुस ताङ यम्‍बा लोमा च्‍यिक ति येशूकी तिङ तिङ्‍ला तिङ्‍यासुङ। ती यम्‍बा लोमा ति तेरी सिनाङ कोङ्‍यार छ्‍येकी मुला ङो शेवु तप्‍की येशूकी तिङ तिङ्‍ला तिङ्‍यानी तेरी सिनाङ कोङ्‍यार छ्‍येकी खाङ्‍बी लेङाङ खला सेक गाल्‍सुङ। 16 यिने पत्रुस ति पाङ्‍ला गे चाला राङ लानी देनोक। तमा ती तेरी सिनाङ कोङ्‍यार छ्‍येकी मुला ङो शेवु लोमा तीकी येलुङ लोक्‍नी वानी गोला र्‍हेन्‍दुप पुम्‍पेजा यीला ताम्‍ङे क्‍यानी पत्रुसला नाङ्‍ला टिनी गाल्‍सुङ। 17 तमा ती पेला राङ गोला र्‍हेन्‍दुप ती पुम्‍पेजा तीकी पत्रुसला “काङ ख्‍युरुङ साङ तीकी लोमातिवी पर्ला मिरा च्‍यिक मिन?” सिनी टिसुङ। यिने पत्रुसकी “मिन, ङ याङ मिन।” सिनी सिक्‍यासुङ। 18 ती पेला नाम टङ्‍गा वोतुप तप्‍की खाङ्‍बी लावातिवा ताङ र्‍हेन्‍दुपतिवा मे तङ्‍नी मेकी गारी गुरीला मे देनी देनोक। तमा पत्रुस साङ तिवी मुला राङ लानी मे देनी देसुङ।

तेरी सिनाङ कोङ्‍यार छ्‍येकी येशूला टिवु

19 तमा तेरी सिनाङ कोङ्‍यार छ्‍ये तीकी येशूला खोकी लोमातिवा ताङ खोकी लापुप येन्‍देनकी कोर्ला टिवा क्‍यासुङ। 20 येशूकी “ङे मी तेरीकी मिङ्‍गाला राङ सिक्यायिन। ङे तेरी यहूदीतिवा जोम्बुप यहूदी छ्‍योखाङतिवा ताङ यहूदी ल्‍हङाङला नरी येन्‍देन लापिन। ङे काङ ताम्‍ङे साङ छ्‍याकला सि माक्‍या वे। 21 ख्‍युरुङ च्‍यिला ङला टिवी? सी ङे सुङ थोवे, तिवाला राङ टि। ङे काङ सिक्‍यावु ति तिवाला तेन्‍तेन छ्‍या वे।” 22 येशूकी तुक सुङ्‍गुप थोसिमा ते चाला वोतुप र्‍हेन्‍दुप मी च्‍यिककी “ख्‍युरुङ च्‍युक क्‍यानी तेरी सिनाङ कोङ्‍यार छ्‍येला तुक सिनी ख लोकिवी?” सियी येशूकी शालला डम्‍ज्‍येक पोप्‍सुङ। 23 तमा येशूकी तीला “दोजो ङे सिक्‍यावु ताम्‍ङेला काङ रे च्‍यिक रे मेटेङ्‍बु वोसिन ती मेटेङ्‍बुकी पङ्‍बु ति ङला छ्‍या तेन। यिने दोजो ङे सिक्‍यावु ति टेङ्‍बु राङ यिन्‍सिन ख्‍युरुङ च्‍यिला ङला बेप्‍किवी?” सिनी सुङ्‍सुङ। 24 ती ज्‍युक्‍ला हन्‍नासकी येशूला टा टावा राङ तेरी सिनाङ कोङ्‍यार छ्‍ये कैयाफाकी चाला टिनी ताङ्‍सुङ।

पत्रुसकी येलुङ येशूला ङो मेशेवी सिक्‍यावु

25 तोजो पेला सेक सिमोन पत्रुस ति मे देयी नोक। तमा ते वोतुप मीतिवी तीला “काङ ख्‍युरुङ साङ ती मी तीकी लोमातिवी पर्ला मिरा च्‍यिक मिन रो?” सिनी टिसुङ। यिने तीकी “मिन, ङ याङ मिन।” सिनी सिक्‍यासुङ। 26 ते तेरी सिनाङ कोङ्‍यार छ्‍येकी लावातिवी पर्ला पत्रुसकी नम्‍ज्‍योक च्‍येतुप तीकी छेङ्‍गा मिरा च्‍यिक नोक। तीकी पत्रुसला “ख्‍युरुङ ती मी तीकी मुला राङ दुम्‍डोकला वोतुप ति ङे थोङ्‍सुङ। ख्‍युरुङ ती राङ मिन रो?” सिनी सिक्‍यासुङ। 27 येलुङ पत्रुसकी “मिन।” सिनी सिक्‍यासुङ। ती पेला राङ शार्क्येक च्‍यवु कुकुरी तेन्‍सुङ।

येशूला पिलातसकी चाला टि गलुप

28 टोपला टेताङ मीतिवी येशूला कैयाफाकी खाङ्‍बा नेसुर रोमी ठिम कितुप मी छ्‍ये पिलातसकी खाङ्‍बाला टिनी गाल्‍सुङ। यहूदी थरुप तुछ्‍येनकी डेन सापला खोप्‍राङ मेचेङ्‍गा मोडोशी सिनी यहूदीतिवा ति ती खाङ्‍बी नाङ्‍ला माशु। 29 तमा पिलातस ति पाङ्‍ला थेन्‍नी तिवी चाला वानी, “दी मीला कङगी कोर्ला ख्‍यिरा क्‍येन बिन्‍दुप यिन?” सिनी टिसुङ। 30 तिवी पिलातसला “दी मी तीकी दुक्‍टा माक्‍यावु यिन्‍सिन ङ्‍यिरा दीला ख्‍योरो ते टिनी मेङ्‍गुप्‍जा।” सिनी सिक्‍यासुङ। 31 ती थोसिमा पिलातसकी तिवाला “तुकै यिन्‍सिन ख्‍यिरा राङ दीला टि गल्‍नी ख्‍यिरा ठिमला काङ नोके, तुकै राङ ठिम तोङ।” सिनी सिक्‍यासुङ। यहूदी गोमा कितुपतिवी पिलातसला “ङ्‍यिराङला याङ मीला सेतुप छ्‍येर्पा ग्‍येलुप ओङ मे।” सिनी सिक्‍यासुङ। 32 तुकै च्‍युङ्‍गुप ति येशूकी गोमाला के खोरुङ चुक क्‍यानी टुङ्‍गिवी सिनी सुङ्‍गुप ति तेरी छेवुला यिन। 33 तमा पिलातस खोरो खाङ्‍बाला लोङ गल्‍नी येशूला खोरो चाला कताङ्‍नी, “ख्‍युरुङ यहूदीतिवी ग्‍येल्‍वु राङ यिन रो?” सिनी टिसुङ। 34 येशूकी पिलातसला “काङ दी ख्‍योरे टिवु ताम्‍ङे ति रङगी नासाम नेमा वावु यिनाङ की, मी यम्‍बी ङे कोर्ला सिक्‍यावु यिन?” सिनी टि नाङ्‍सुङ। 35 पिलातसकी येशूला “ङ यहूदी यिन रो? ख्‍योरो मिरिकतिवा ताङ कोङ्‍यार छ्‍येतिवी ख्‍युरुङला ङे ते टि वानी ङला चेक तेसुङ। ख्‍योरो काङ क्‍यावु?” सिनी सिक्‍यासुङ। 36 तमा येशूकी सुङ्‍सुङ, “ङे ग्‍येल्‍खाप ति दी जम्‍बुलिङकी ति मिन। दोजो ङे ग्‍येल्‍खाप दी जम्‍बुलिङकी ति यिन्‍सिन ङला तिङ योकुपतिवी ङे थोक्‍ला थमु ग्‍यप्‍नी ङला यहूदीतिवी लकला ख्‍येल मिज्‍यिवुजा। यिने ङे ग्‍येल्‍खाप ति दी जम्‍बुलिङकी ति मिन।” 37 तमा पिलातसकी येशूला “तुकै यिन्‍सिन काङ ख्‍युरुङ ग्‍येल्‍वु राङ यिन?” सिनी टिसुङ। तमा येशूकी तीला सुङ्‍सुङ, “ख्‍योरो ङला ग्‍येल्‍वु यिन सिनी सिक्‍यावु ति टेके यिन। ङ टेङ्‍बुकी कोर्ला पङ्‍बु तेरुपला क्‍येवु यिन, तमा तीकी थोक्‍ला दी जम्‍बुलिङला वावु यिन। सु मी टेङ्‍बु नोके, तीकी ङे ताम्‍ङे ङ्‍येन्‍गिवी।” 38 तमा पिलातसकी येशूला “टेङ्‍बु सिरुप ति काङ यिन?” सिनी टिसुङ। तोजोयी सिक्‍यासिमा पिलातस ति येलुङ पाङ्‍ला थेन्‍नी यहूदीतिवी चाला गल्‍नी, “दी मीला याङ ङे काङ साङ क्‍येन तेर गोवु माथोङ। 39 यहूदी थरुप तुछ्‍येनला ले टेङ ङे ख्‍यिरा लुक्‍सुला वोतुप दोके चोन्‍खाङला शोरुप मी मिरा च्‍यिकला पि तोङ्‍यिन वे। ङे यहूदीतिवी ग्‍येल्‍वु तीला ख्‍यिरा थोक्‍ला पि तोङ्‍शी सिरुप ख्‍यिरा नो वे?” सिनी तिवाला टिसुङ। 40 यिने मीतिवी कशेन थोर ग्‍यप्‍नी, “मिन, तीला मिन, बरब्‍बाला पि तोङ।” सिनी सिक्‍यासुङ। ती बरब्‍बा ति च्‍याक्‍पा यिनोक।

यूहन्‍ना 19

येशूला सेतुप ठिम कलुप

1 ती ज्‍युक्‍ला पिलातसकी मक्‍मीतिवाला येशूला टि गल्‍नी पङ्‍शार तोङ सिनी योक कुसुङ। 2 तमा मक्‍मीतिवी छेर्माङ वोतुप येल्‍का कुक्‍नी ग्‍येल्‍वी उशाक दोके जोनी येशूकी गोला कोन्‍नी बिन्‍सुङ, तमा ग्‍येल्‍वुकी कोन्‍दुप च्‍यिन्‍दै छ्‍योवा मुक्‍पु यी खोला कोन्‍नी बिन्‍सुङ। 3 तमा तिवा खोकी चाला वानी, “यहूदीतिवी ग्‍येल्‍वुकी नरी ग्‍येला किशिता!” सिनी मारे तोङ्‍यिन सिरा खोकी शालला डम्‍ज्‍येक पोप्‍सुङ। 4 येलुङ पिलातस पाङ्‍ला थेन्‍नी ते जोम्‍बुप यहूदीतिवाला “ङ्‍येना, ङ तीला ख्‍यिरा चाला राङ टि वुङ्‍गिवी। ङे दी मीला काङ क्‍येन तेर गोवु माथोङ सिरुप ति ख्‍यिरा हाक्‍कोवा किसा।” सिनी सिक्‍यासुङ। 5 तमा येशू छेर्माङ उशाक ताङ छ्‍योवा मुक्‍पु कोन कोन्‍वा राङ पाङ्‍ला फेप्‍सुङ। ती पेला पिलातसकी तिवाला “ल्‍हो ताङ, ती मी ति दे राङ वे।” सिनी सिक्‍यासुङ। 6 तमा कोङ्‍यार छ्‍येतिवा ताङ ल्‍हङाङकी मक्‍मीतिवी खोला थोङ्‍सिमा, “तीला ग्‍यङ्‍शिङला कल्‍नी काँडी दाप्‍नी से! ग्‍यङ्‍शिङला कल्‍नी काँडी दाप्‍नी से!” सिनी च्‍यार ग्‍यप्‍सुङ। तमा पिलातसकी तिवाला “तुकै यिन्‍सिन दी मीला ख्‍यिरा राङ टि गल्‍नी ग्‍यङ्‍शिङला कल्‍नी काँडी दाप्‍नी से। ङे दीला काङ क्‍येन तेर गोवु माथोङ।” सिनी सिक्‍यासुङ। 7 तुक सिक्‍यासिमा यहूदीतिवी “ङ्‍यिरा मुला वोतुप ठिमला ल्‍हासिन दी मी याङ शि राङ गोकिवी, च्‍यिलासिसिन तीकी खुरुङ राङ कोन्‍छ्‍योककी सेवु यिन सिनी सिनोक।” 8 ती ताम्‍ङे थोसिमा पिलातस ति मङ ज्‍यिवा क्‍यासुङ। 9 तमा पिलातस येलुङ खोरो खाङ्‍बी नाङ्‍ला लोक्‍नी गल्‍नी येशूला “ख्‍युरुङ कनी नेसुर वावु?” सिनी टिसुङ। यिने येशूकी तीला काङ टिलेन साङ मासुङ। 10 तुक क्‍यानी पिलातसकी येशूला “च्‍यिला ख्‍युरुङ ङला ताम्‍ङे मलाप? ङला ख्‍युरुङला पि तोङ्‍गुप ओङ साङ वे, ग्‍यङ्‍शिङ लोला ग्‍येल ज्‍यितुप ओङ साङ वोतुप ति ख्‍युरुङला छ्‍या मे?” सिनी सिक्‍यासुङ। 11 तमा येशूकी पिलातसला “दोजो कोन्‍छ्‍योककी दुक कितुप ओङ ख्‍युरुङला मानाङ्‍सुङ सिसिन ख्‍योरो ङला काङ साङ कि मुथुपुप्‍जा। तुक क्‍यानी ङला ख्‍योरो लकला चेक तेतुप मी तीला मङ दिक्‍पाकी क्‍येन फोकिवी।” सिनी सुङ्‍सुङ। 12 ती थोसिमा पिलातसकी येशूला पि तोङ्‍गुप छाल्‍सुङ। यिने यहूदीतिवी “दोजो ख्‍योरो दीला पि ताङ्‍सिन ख्‍युरुङ रोमी ग्‍येल्‍वु छ्‍ये कैसरकी खला ङ्‍येन्‍दुप मी राङ मिन। सी खुरुङ ति ग्‍येल्‍वु यिन सिनी सिवे, ती ति कैसरकी तेन्‍दोकला लङ्‍गुप मी यिन।” सिनी च्‍यार ग्‍यप्‍सुङ। 13 ती थोसिमा पिलातसकी येशूला पाङ्‍ला टिनी वानी खोरुङ ति दे येम्‍ज्‍योक तिङ्‍नी जोवु लेङाङ सिरुप दासाला वोतुप ठिम कितुप ठीला देसुङ। (ती दासाला ति हिब्रू ताम्‍ङेला गब्‍बथा सिनी सिनोक।) 14 ती ङ्‍यिमा ति यहूदी थरुप तुछ्‍येन टडिक कितुप ङ्‍यिमा यिनोक। तोजो पेला ङ्‍यिमी गुङगी छ्‍युजी च्‍यिङ्‍ङी गाल्‍नोक। तमा पिलातसकी यहूदीतिवाला “ल्‍होसा, ख्‍यिरा ग्‍येल्‍वु।” सिनी सिक्‍यासुङ। 15 ती थोनी यहूदीतिवी “तीला से, तीला से, तीला ग्‍यङ्‍शिङला कल्‍नी काँडी दाप्‍नी से।” सिनी च्‍यार ग्‍यप्‍सुङ। येलुङ पिलातसकी तिवाला “वुतुङ के ङ दी ख्‍यिरा ग्‍येल्‍वु तीला ग्‍यङ्‍शिङला कल्‍नी काँडी दाप्‍नी सेतुप?” सिनी टिसुङ। तमा कोङ्‍यार छ्‍येतिवी “ङि्‍यरा ति याङ कैसर मिसिन यम्‍बा ग्‍येल्‍वु सु साङ मे।” सिनी सिक्‍यासुङ। 16 तमा पिलातसकी येशूला ग्‍यङ्‍शिङला कल्‍नी काँडी दाप्‍नी सेतुपला तिवाला चेक तेसुङ।

येशूला ग्‍यङ्‍शिङ लोला कलुप

तमा मक्‍मीतिवी येशूला टिनी गाल्‍सुङ। 17 तमा येशूकी ग्‍यङ्‍शिङ खुर्नी कप्ली सिरुप दासाला फेप्‍सुङ। ती दासाला ति हिब्रू ताम्‍ङेला गलगथा सिवी। 18 ते लेप्‍सिमा मक्‍मीतिवी खोला ग्‍यङ्‍शिङला काँडी दाप्‍नी काल्‍सुङ। तमा यम्‍बा मिरा ङ्‍यीला च्‍यिक ति खोकी यावी थाकाला ताङ च्‍यिक ति खोकी येन्‍बी थाकाला ग्‍यङ्‍शिङला काँडी दाप्‍नी काल्‍सुङ। 19 पिलातसकी यिकी यी पङ्‍लिङ लोला टिनी ग्‍यङ्‍शिङला ग्‍यक च्‍यिसुङ। ती यिकीला “नासरतकी येशू, यहूदीतिवी ग्‍येल्‍वु” सिनी टिनोक। 20 यहूदीतिवा बङीकी ती यिकी ति रासुङ, च्‍यिलासिसिन येशूला ग्‍यङ्‍शिङ लोला कलुप दासा ति ग्‍येसाकी चाला राङ ख्‍येल्‍गिनोक। ती यिकी ति हिब्रू ताङ रोमी ताङ ग्रीककी ताम्‍ङेला टिवु नोक। 21 यहूदी कोङ्‍यार छ्‍येतिवी पिलातसला दुक सिक्‍यासुङ, “ती यिकीला ‘यहूदीतिवी ग्‍येल्‍वु’ सिनी माटिनी ‘दी मी तीकी खुरुङ यहूदीतिवी ग्‍येल्‍वु यिन सिक्‍यासुङ।’ सिनी टि।” 22 पिलातसकी तिवाला “ङे चुकै टिवे, तुकै राङ देशी।” सिनी सिक्‍यासुङ। 23 मक्‍मीतिवी येशूला ग्‍यङ्‍शिङ लोला कल्‍सिमा खोकी नम्‍सा ति छो ज्‍यी जोनी रे रेला गोसुङ। खोकी नुम्‍बुप यम्‍बा नम्‍सा रिङ्‍बु ति यायु नेमा ज्‍युनी मामु सेक माचेम्‍बा क्‍यानी ल्‍हावु नोक। 24 तुक क्‍यानी तिवी “लो, दाक्‍पु दी मज्‍या ति मर्‍हल्‍वा क्‍यानी ग्‍येन ग्‍यप्‍नी सुला थेप्‍किवे, तीकी खुन डोप।” सिनी केवुल क्‍यासुङ। तुकै च्‍युङ्‍गुप ति “तिवी ङे मज्‍या ति तिवी पर्ला गोसुङ, तमा ङे मज्‍या रिङ्‍बु ति ग्‍येन ग्‍यप्‍सुङ।” सिनी कोन्‍छ्‍योककी सुङला टि वोतुप ति तेरी छेवुला यिन। मक्‍मीतिवी तुकै राङ क्‍यासुङ। 25 येशूला कलुप ग्‍यङ्‍शिङकी चाला राङ खोकी आमा ताङ उरु ताङ क्‍लोपासकी पेर्मी मरियम ताङ मरियम मग्‍दलिनी लानी देनोक। 26 तमा येशूकी खोरो आमा ताङ तीकी चाला खुरुङला ङ्‍यिङ्ज्‍ये कितुप लोमा तीला थोङ्‍नी खोकी खोरे आमा तीला “ममो, दी ति ख्‍योरो पुज्‍युङ यिनो।” सिनी सुङ्‍सुङ। 27 तमा ती ज्‍युक्‍ला खोकी ती लोमा तीला “ल्हो, खो याङ ख्‍योरो आमा यिनो।” सिनी सुङ्‍सुङ। ती पे नेज्‍युनी ती लोमा तीकी येशूकी आमाला खोरो खाङ्‍बा टिनी गल्‍नी खोरो आमाला दोके क्‍यानी शब्‍ज्‍यी क्‍यासुङ।

येशू टुङ्‍गुप

28 ती ज्‍युक्‍ला येशूकी खोकी कि गोवु लाका तेरी सिन्‍दुप ति हाक्‍कोनोक। तमा कोन्‍छ्‍योककी सुङला टिवु ति छे ज्‍यितुपला येशूकी “ङला कोम्‍बा लासुङ।” सिनी सुङ्‍सुङ। 29 ती पेला ते नेक्‍योक च्‍यिककी नाङ्‍ला गुन्‍डुम छ्‍याङ क्‍युर्वु क्‍येङ्‍नी ज्‍याक्‍नोक। तमा मक्‍मीतिवी ल्हेन्‍दा ति गुन्‍डुम छ्‍याङ क्‍युर्वुला पासिमा ती ति हिसपकी येल्‍काकी गोला ज्‍याक्‍नी येशूकी खला ज्‍याक्‍सुङ। 30 खोकी ती गुन्‍डुम छ्‍याङ क्‍युर्वु ति चेयी च्‍यिप क्‍यासिमा, “त याङ ङे लाका तेरी सिन्‍सुङ।” सिनी सुङ्‍सुङ। तमा खोकी गो कुक क्‍यानी उ छ्‍येसुङ।

येशूकी याशिङ्‍बी वोक्‍ला दुङ सुरुप

31 ती छेर्मु ति ङासोप ङ्‍यिमा टडिक कितुप ङ्‍यिमा यिनोक। ती सला ति खक्‍छ्‍येवु ङासोप ङ्‍यिमा यिन्‍दुप तप्‍की यहूदीतिवी ती ङासोप ङ्‍यिमाला फुङ्‍बुतिवा ग्‍यङ्‍शिङ लोला मुलुशी नोनी फुङ्‍बुतिवी काङ्‍बातिवा च्‍याक्‍नी खुन डो च्‍यि सिनी पिलातसला गोङ्‍बा शुसुङ। 32 तमा मक्‍मीतिवा गल्‍नी येशूकी मुला ग्‍यङ्‍शिङला कलुपतिवी काङ्‍बातिवा रे ताङ रे क्‍यानी च्‍याक्‍सुङ। 33 ती ज्‍युक्‍ला तिवी येशूकी चाला वानी खो टुङ सिन्‍दुप थोङ्‍नी खोकी काङ्‍बा ति माच्‍याक। 34 यिने मक्‍मीतिवी पर्ला मिरा च्‍यिककी दुङ थ्वोनी येशूकी याशिङ्‍बाला सुर्सुङ, तमा तेसुर शार्क्येक ठक ताङ छ्‍यु थेन्‍सुङ। 35 ती थोङ्‍गुप मी तीकी ती ताम्‍ङेकी कोर्ला पङ्‍बु बिन वे। तुक क्‍यानी तीकी पङ्‍बु ति टेङ्‍बु यिन। तीकी खोरो पङ्‍बु बिन्‍दुप ति वुतुङ के च्‍युङ्‍गुप ताम्‍ङे यिन सिनी छ्‍या वे, तमा ख्‍यिरा साङ ती ताम्‍ङेला तेपा किशी सिनी तीकी ती पङ्‍बु बिन्‍दुप यिन। 36 तुकै च्‍युङ्‍गुप ति “खोकी रुकक च्‍यिक साङ मछ्‍याकिवी।” सिनी कोन्‍छ्‍योककी सुङला टिवु ति तेरी छेवुला यिन। 37 तमा येलुङ कोन्‍छ्‍योककी सुङगी यम्‍बा दासाला साङ “खोरुङला दुङ सुरुप तीला तिवी ल्‍हेवितो।” सिनी टि वे।

येशूकी फुङ्‍बु कल्‍दोक क्‍यावु

38 ती ज्‍युक्‍ला अरिमाथिया नेमा वावु योसेफ सिरुप मी ति पिलातसकी चाला गल्‍नी येशूकी फुङ्‍बु ति खुर्नी डो च्‍यि सिनी गोङ्‍बा शुसुङ। ती योसेफ ति येशूला तेपा कितुप मी यिनोक, यिन्‍सिनाङ यहूदीतिवाला ज्‍यिवा लानी तीकी ती ताम्‍ङे ति छ्‍याकला राङ ज्‍याक्‍नोक। तमा पिलातसकी येशूकी फुङ्‍बु खुर डो च्‍यिसिमा ती ति गल्‍नी येशूकी फुङ्‍बु ति ग्‍यङ्‍शिङ लो नेमा मर पाप्‍सुङ। 39 तमा गोमाला के येशूला ठेतुपला नुपला गलुप निकोदेमस साङ टि जङ्‍बु खाप मुर्रकी फे ताङ एलवाकी फे र्‍हेवु किलो खल ज्‍यिक ताङ च्‍युक्‍सुम चोयी खुर्नी ते वासुङ। 40 तमा तिवा ङ्‍यिकरकी यहूदीतिवी कल्‍दोक कितुप लुक्‍सु दोके क्‍यानी ती र्‍हेवु फे ति येशूकी फुङ्‍बुला कुनी रा नेङेनकी नाङ्‍ला टिल्‍सुङ। 41 ते येशूला ग्‍यङ्‍शिङला कलुप दासाला दुम्‍डोक यी नोक। ती दुम्‍डोकला गोमाला सी रो साङ माज्‍यकुप टककी फुक सम्‍बा यी नोक। 42 ती छेर्मु ति ङासोप ङ्‍यिमा टडिक कितुप ङ्‍यिमा यिनोक, तमा ती शेप मीला ज्‍योकुप टककी फुक ति चाला राङ वोतुप तप्‍की तिवी येशूकी फुङ्‍बु ति ती नाङ्‍ला ज्‍याक्‍सुङ।

यूहन्‍ना 20

येशू टुङ्‍नी ङोसु लावु

1 दिन्‍जाकी ङ्‍यिमा थल्‍माला टोपला टेताङ मरियम मग्‍दलिनी ति येशूकी फुङ्‍बु ज्‍यकुप टककी फुकला गाल। ते गल्‍नी ल्‍हासालेन्‍सिन ती टककी फुककी खला च्‍येनी ज्‍यकुप दो ति तेसुर दोवु ति तीकी थोङ्‍नोक। 2 ती थोङ्‍नी ती ति तेसुर सिमोन पत्रुस ताङ येशूकी ङ्‍यिङ्‍ज्‍ये क्‍या नङ्‍गुप यम्‍बा लोमा तीकी चाला छ्‍योङ्‍बाल ग्‍यम गल्‍नी, “मी ललाइकी चोवोकी फुङ्‍बु याङ टककी फुक नेसुर तेन्‍नी गाल्‍नोक। तमा तिवी ती फुङ्‍बु ति कनी ज्‍यकुप यिन सिनी ङ्‍यिराङला छ्‍या मे।” सिनी सिक्‍यासुङ। 3 तमा पत्रुस ताङ यम्‍बा लोमा ङ्‍यिकर शेप मीला ज्‍योकुप टककी फुक नेवा गाल्‍सुङ। 4 तिवा ङ्‍यिकर मुला राङ छ्‍योङ्‍बाल ग्‍यम डोयी कितुप पेला यम्‍बा लोमा ति पत्रुस सिनाङ गोमा कोर्नी ती टककी फुकला लेप्‍सुङ। 5 ते लेप्‍नी तीकी कुक क्‍यानी ती टककी फुककी नाङ्‍ला ल्‍हासियाङ ते रा नेङेन तिराङ वोतुप थोङ्‍नोक, यिने ती ति टककी फुककी नाङ्‍ला माशु। 6 सिमोन पत्रुस साङ तीकी तिङ्‍ला लेप्सुङ। तमा तीकी टककी फुककी नाङ्‍ला शुनी ल्‍हासालेन्‍सिन ते रा नेङेन वोतुप ताङ 7 येशूकी फुङ्‍बुकी गोला टुम्‍बुप रा ति रा नेङेनकी मुला मेनी कुतुक तप ग्‍यप्‍नी वोतुप थोङ्‍सुङ। 8 ती ज्‍युक्‍ला पत्रुस सिनाङ गोमाला ती टककी फुकला लेपुप लोमा ति साङ ती टककी फुककी नाङ्‍ला शुसुङ। तमा ल्‍हासिमा तीकी येशू टुङ्‍गुप ने ङोसु लावु ति तेपा क्‍यासुङ। 9 तिवी येशू टुङ्‍गुप नेसुर ङोसु लङ गोकिवी सिनी टिवु कोन्‍छ्‍योककी सुङ ति तरोङ साङ हाक्‍माकोनोक। 10 ती ज्‍युक्‍ला ती लोमा ङ्‍यिवु ति खोप्‍रे खाङ्‍बा लोक्‍सुङ।

येशू ङोसु लानी मरियम मग्‍दलिनीकी चाला छ्‍यरुप

11 यिने मरियम ति शेप मीला ज्‍योकुप टककी फुककी फिला देनी ङुयी नोक। तीकी ङुयी कुक क्‍यानी ती फुककी नाङ्‍ला ल्‍हासालेन्‍सिन 12 ते मज्‍या कर्मु कोन्‍दुप देवाच्‍येनकी लेन क्‍योलुप थु मिरा ङ्‍यी देतुप थोङ्‍सुङ। तिवा च्‍यिक ति येशूकी फुङ्‍बी गो ज्‍यकुप थाकाला, यम्‍बा ति येशूकी फुङ्‍बी काङ्‍बा ज्‍यकुप थाकाला देन नोक। 13 तिवी मरियमला “ओ नुमो, ख्‍युरुङ च्‍यिला ङिवी?” सिक्‍यानोक। तमा मरियमकी तिवाला “मी ललाइकी ङे चोवोकी फुङ्‍बु खुन गाल्‍नोक, तीकी ती फुङ्‍बुला कनी ज्‍यकुप यिन ङला छ्‍या मे।” सिनी सिक्‍यासुङ। 14 मरियमकी तुक सियी तिङ्‍ला ग्‍युर्नी ल्‍हासालेन्‍सिन ते येशू लानी ज्‍यु वोतुप थोङ्‍नोक, यिने खो येशू राङ यिन सिनी तीकी ङो माशेनोक। 15 तमा येशूकी तीला “नुमो, ख्‍युरुङ च्‍यिला ङिवी? सुला छोल्‍गिवी?” सिनी टि नाङ्‍सुङ। यिने मरियमकी नासामला खो ति दुम्‍डोक ल्‍हाप मी यिन्‍दे नोनी, “अच्‍यो, अच्‍यी खोकी फुङ्‍बु ति खुन फेवु यिन्‍सिन ती ति कनी ज्‍याङ वे ङला सुङ्‍नी, ङ खोकी फुङ्‍बुला खुर्नी डोयी।” सिनी सिक्‍यासुङ। 16 तमा येशूकी तीला “मरियम!” सिनी सुङ्‍सुङ। तमा मरियमकी खोकी थाकाला ग्‍युर्नी हिब्रू ताम्‍ङेला “रब्‍बोनी।” सिनी सिक्‍यासुङ। (तीकी तेन्‍दोक ति गेकेन सिक्‍यावु यिन।) 17 तमा येशूकी तीला “ङला जिम जिम्‍वा माज्‍योक, च्‍यिलासिसिन ङ तरोङ साङ पपी चाला लोक्‍नी मागल वे। यिने ख्‍युरुङ ङे लोमातिवी चाला गल्‍नी ख्‍यिरा पपा यिन्‍दुप ङे पपा, ख्‍यिरा कोन्‍छ्‍योक यिन्‍दुप ङे कोन्‍छ्‍योककी ते ङ लोक्नी डोयी वे सिनी लोप।” सिनी सुङ्‍सुङ। 18 तमा मरियम मग्‍दलिनी ति येशूकी लोमातिवी चाला गल्‍नी चोवो येशूला खोरो थोङ्‍गुप ताङ खोकी खोरुङला सुङ्‍गुप ताम्‍ङेतिवा तेरी तिवाला लाप्‍सुङ।

येशू लोमातिवी चाला छ्‍यरुप

19 ती जा ङ्‍यिमी गोमु राङ लोमातिवा मुला जोम्‍नी गो च्‍येनी देनोक, च्‍यिलासिसिन तिवा यहूदी गोमा कितुप छ्‍येतिवाला ज्‍यिवा क्‍यासुङ। ती पेला राङ येशू फेप्‍नी तिवी पर्ला शेङ्‍नी, “ख्‍यिराङला लोदिमु वुङ्‍शी।” सिनी सुङ्‍सुङ। 20 तुक सुङ्‍सिमा खोकी तिवाला खोरे छ्‍याकतिवाला काँडी दापुप म ताङ याशिङ्‍बाला दुङ सुरुप म ति छ्‍या तेन्‍सुङ। चोवोला थोङ्‍सिमा लोमातिवा छासे गा क्‍यासुङ। 21 येलुङ येशूकी तिवाला “ख्‍यिराङला लोदिमु वुङ्‍शी। पपी ङला तङ्‍गुप दोके ङ ख्‍यिराङला तोङ्‍यिनो।” सिनी सुङ्‍सुङ। 22 खोकी तुक सुङ्‍सिमा तिवाला उ थ्‍वोनी पुयी सिरा दुक सुङ्‍सुङ, “कोन्‍छ्‍योककी थु चाङ्‍मा लोसा। 23 ख्‍यिरा सी दिक्‍पाला माफ तेर्किवे, कोन्‍छ्‍योककी साङ ती दिक्‍पाला माफ नङ्‍गितो। तमा माफ माबिन्‍सिन ती दिक्‍पा ति तुकै राङ लुकितो।”

येशूकी थोमाला ठेतुप

24 येशूकी लोमा मिरा च्‍यिङ्‍ङीतिवी पर्ला दिदुमस सिरुप थोमा ति येशू फेपुप पेला तिवी मुला मिन्‍दुक। 25 तुक क्‍यानी यम्‍बा लोमातिवी तीला “ङि्‍यरा याङ चोवोला थोङ्‍सुङ।” सिनी सिक्‍यासिनाङ तीकी “ङे खोकी छ्‍याकला काँडी दापुप म ति माथोङ्‍वा सेक ताङ ती मला ङे थेप्‍तोक च्‍यिनी माल्हावा सेक ताङ खोकी याशिङ्‍बाला दुङ सुरुप मला ङे थेप्‍तोक च्‍यिनी माल्हावा सेक्‍ला ङ ती ताम्‍ङेला तेपा मिकिवी।” सिनी सिक्‍यासुङ। 26 दिन्‍जा च्‍यिक तिङ्‍ला येलुङ लोमातिवा खाङ्‍बी नाङ्‍ला जोम्‍नोक, ती पेला थोमा साङ तिवी मुला राङ नोक। तिवा गो च्‍येनी देन्‍नोक, यिने येशू फेप्‍नी तिवी पर्ला शेङ्‍नी तिवाला “ख्‍यिराङला लोदिमु वुङ्‍शी।” सिनी सुङ्‍सुङ। 27 तमा खोकी थोमाला “ख्‍योरो लाक्‍पी थेप्‍तोक ङे लाक्‍पाला ज्‍याक्‍नी ल्हो, तमा ख्‍योरो लाक्‍पा ङे याशिङ्‍बाला ज्योक। यिन्‍दे मिन्‍दे नो माक्‍यानी ङ सेन्‍बु लावु ति तेपा की।” सिनी सुङ्‍सुङ। 28 तमा थोमाकी खोला “ओ ङे चोवो, ओ ङे कोन्‍छ्‍योक।” सिनी सिक्‍यासुङ। 29 तमा येशूकी तीला “ख्‍योरो ङला थोङ्‍गुप तप्‍की तेपा क्‍यावु यिन? ङला माथोङ्‍सिनाङ तेपा कितुपतिवा मोलाम थोपुप यिनो।” सिनी सुङ्‍सुङ।

दी थेप टिकुप तेन्‍दोक

30 दी थेपकी नाङ्‍ला माटिवु यम्‍बा हलेवु ततिवा साङ येशूकी खोरो लोमातिवी थोङ्‍दाङला बङी छ्‍या तेन्‍सुङ। 31 यिने दी थेप टिवु तेन्‍दोक ति येशू ति ख्रीष्‍ट राङ यिन्‍दुप ताङ कोन्‍छ्‍योककी सेवु यिन्‍दुप ति ख्‍यिरा तेपा किशी, तमा खोला तेपा क्‍यानी ख्‍यिराङला नाम्‍साङ मिशिवु मिजी ङ्‍येशी सिनी यिन।

यूहन्‍ना 21

येशू लोमा मिरा दिनकी चिप्‍ला छ्‍यरुप

1 ती ज्‍युक्‍ला येलुङ येशू तिबेरियास ग्‍येम्‍छोकी गारीला लोमातिवी चाला छ्‍यार्सुङ। खो दुकै क्‍यानी छ्‍यरुप यिन। 2 ते सिमोन पत्रुस, दिदुमस सिरुप थोमा, गालीलकी काना ग्‍येसाकी नथानेल, जब्‍दियाकी पुज्‍युङतिवा ताङ यम्‍बा येशूकी लोमा मिरा ङ्‍यी तेरी मुला राङ जोम नोक। 3 सिमोन पत्रुसकी तिवाला “ङ याङ ङ्‍या जिम्‍बुपला डोयी।” सिनी सिक्‍यासिमा तिवी पत्रुसला “ङि्‍यराङ साङ ख्‍योरो मुला राङ डोयी।” सिनी सिक्‍यासुङ। तमा तिवा मुला राङ टुला जेनी गाल्‍सुङ। यिने ती नुपला तिवी ङ्‍या च्‍यिक साङ जिम माथुप। 4 ती सला टोपला नाम लासिमा येशू ग्‍येम्‍छो गारीला लानी ज्‍युनोक, यिने लोमातिवी खो ति येशू राङ यिन सिनी ङो माशे। 5 ती पेला येशूकी तिवाला “आङातिवा, काङ ख्‍यिरा ङ्‍या जिम्‍बुप?” सिनी टि नाङ्‍सुङ। तमा तिवी खोला “मिन, काङ साङ माजिम वे।” सिनी सिक्‍यासुङ। 6 खोकी तिवाला “ख्‍यिरा जाल ति टुकी यावी थाकाला ग्‍योप, तुक क्‍यासिन ङ्‍या जिम्‍गितो।” सिनी सुङ्‍सुङ। तमा तिवी जाल ग्‍यप्‍सिमा ङ्‍या कशेन थोप्‍नी तिवी जाल थेन माथुप्‍नोक। 7 ती पेला येशूकी ङ्‍यिङ्‍ज्‍येवु लोमा तीकी पत्रुसला “खो याङ चोवो के यिनोक।” सिनी सिक्‍यासुङ। खो चोवो यिन सिरुप ताम्‍ङे थोनी पत्रुसकी खोरो पिनी ज्‍यकुप खयिटो टिल्‍नी ग्‍येम्‍छो नाङ्‍ला छ्‍योङ्‍बाल ग्‍यप्‍सुङ। 8 यिने यम्‍बा लोमातिवा टी नाङ्‍ला राङ देनी ङ्‍या क्‍येङ्‍गुप जाल ति थेनिन सिरा ग्‍येम्‍छो गारी नेवा वुङ्‍यिन नोक, च्‍यिलासिसिन तिवा ग्‍येम्‍छो गारी नेसुर थाक्‍रिङ्‍बु मेनी मिटर सयी च्‍यिक चोयी तिराङ फेचेक नोक। 9 तमा तिवा ग्‍येम्‍छो गारीला पाप्‍सिमा ल्‍हासालेन्‍सिन ते मेताक खला ङ्‍या ज्‍यकुप ताङ शुब्‍ज्‍याङ साङ ज्‍यकुप थोङ्‍सुङ। 10 तमा येशूकी तिवाला “ख्‍यिरा तन्‍दा मलोक जिम्‍बुप ङ्‍या चेयी दे खुर शोक।” सिनी सुङ्‍सुङ। 11 ती पेला सिमोन पत्रुस ति येलुङ टुला जेनी ङ्‍या बङी क्‍येङ्‍गुप जाल ति ग्‍येम्‍छो गारीला थेन्‍सुङ। ती जालकी नाङ्‍ला ख्‍येलुप ङ्‍या ति तेरी क्‍यानी सयी च्‍यिक ताङ खाल ङ ताङ सुम चोके नोक। ती जालकी नाङ्‍ला तोजो ङ्‍या मङ्‍मु थोप्‍सिनाङ जाल ति माराल। 12 तमा येशूकी तिवाला “लो, वानी खयुप सो।” सिनी सुङ्‍सुङ। ती पेला लोमातिवी पर्ला सी साङ खोला सु यिन सिनी टेप ङाडेङ माक्‍या, च्‍यिलासिसिन खो चोवो यिन सिरुप ति तिवी ङो शेनोक। 13 तमा येशू फेप्‍नी शुब्‍ज्‍याङ लानी तिवाला नाङ्‍सुङ, तमा तुक राङ क्‍यानी ङ्‍या साङ तिवाला नाङ्‍सुङ। 14 दी ति येशू टुङ्‍नी येलुङ ङोसु लासिमा लोमातिवाला छ्‍यरुप थेङ्‍मा सुम्‍बा यिन।

येशूकी पत्रुसला ताम्‍ङे क्‍या नङ्‍गुप

15 तमा तिवी खयुप सोनी सिन्‍सिमा येशूकी सिमोन पत्रुसला “यूहन्‍नाकी पुज्‍युङ सिमोन, ख्‍योरो ङला दी यम्‍बातिवी सिनाङ मङ ङ्‍यिङ्‍ज्‍ये किवी?” सिनी टिसुङ। तमा पत्रुसकी खोला “लसे चोवो, चोवोला ङे ङ्‍यिङ्‍ज्‍ये क्‍यावु ति चोवोला राङ छ्‍या वे।” सिनी सिक्‍यासुङ। तमा येशूकी तीला “ख्‍युरुङ ङे लुक रुकतिवाला चोसा।” सिनी सुङ्‍सुङ। 16 थेङ्‍मा ङ्‍यिवाला येलुङ येशूकी पत्रुसला “यूहन्‍नाकी पुज्‍युङ सिमोन, ख्‍युरुङ वुतुङ के ङला ङ्‍यिङ्‍ज्‍ये किवी?” सिनी टि नाङ्‍सुङ। तमा पत्रुसकी “लसे चोवो, चोवोला ङे ङि्‍यङ्‍ज्‍ये क्‍यावु ति चोवोला राङ छ्‍या वे।” सिनी सिक्‍यासुङ। तमा खोकी तीला “ख्‍युरुङ ङे लुकतिवाला ल्‍होसा।” सिनी सुङ्‍सुङ। 17 तमा थेङ्‍मा सुम्‍बाला येशूकी पत्रुसला “यूहन्‍नाकी पुज्‍युङ सिमोन, काङ ख्‍युरुङ ङला ङ्‍यिङ्‍ज्‍ये किवी?” सिनी टि नाङ्‍सुङ। खोकी थेङ्‍मा सुम सेक “ख्‍योरो ङला ङ्‍यिङ्‍ज्‍ये किवी?” सिनी टिन नङ्‍सिमा पत्रुसला छासे पप लानी येशूला “चोवो, चोवोला राङ तेरी छ्‍या वे। चोवोला ङे ङ्‍यिङ्‍ज्‍ये क्‍यावु ति चोवोला राङ छ्‍या वे।” सिनी सिक्‍यासुङ। येलुङ येशूकी पत्रुसला सुङ्‍सुङ, “ख्‍योरो ङे लुकतिवाला चोसा। 18 वुतुङ के ङ ख्‍युरुङला सिरिन, ख्‍युरुङ ज्‍येन्‍दा वोतुप पेला याङ ख्‍योरो करा ख्‍योरो राङ च्‍यिनी ख्‍युरुङ कनी डोयी दे लङ्‍गिवे, ते राङ गाल्‍सुङ। यिने ख्‍युरुङ गावा गल्‍सिमा ख्‍योरो लाक्‍पा क्‍योङ्‍गितो, तमा मी यम्‍बी राङ ख्‍योरो करा च्‍यि बिन्‍नी ख्‍युरुङ डोयी मेदेवु दासाला टिनी डितो।” 19 ती ति पत्रुस चुक क्‍यानी शिनी कोन्‍छ्‍योकला मोवा तेर्किवी सिरुप कोर्ला येशूकी सुङ्‍गुप यिन। तुक सुङ्‍सिमा येशूकी पत्रुसला “ङे तिङ्‍ला तिङ्‍यो!” सिनी सुङ्‍सुङ।

येशूकी ङ्‍यिङ्‍ज्‍ये क्‍या नङ्‍गुप लोमा

20 तमा पत्रुसकी तिङ्‍ला ग्‍युर्नी ल्‍हासियाङ येशूकी ङ्‍यिङ्‍ज्‍येवु लोमा ति तिवी तिङ्‍ला वुङ्‍यिन कितुप थोङ्‍सुङ। ती लोमा ति येशूला जिम्‍बुप सिनाङ गोमाला गोमी समा साप पेला येशूकी छेकोकला ङ्‍यिम्‍बुर क्‍यानी, “चोवो, चोवोला जिम तेरुप ति सु यिन?” सिनी टेप ति यिन। 21 तीला थोङ्‍सिमा पत्रुसकी येशूला “चोवो, तीला ति चुकै च्‍युङ्‍गिवी?” सिनी टिसुङ। 22 तमा येशूकी तीला “ङ माङुवा सेक तीला सेन्‍बु देशी सिरुप ङे नो क्‍यासिनाङ ती ताम्‍ङे ति ख्‍युरुङला काङ गोसुङ? ख्‍युरुङ ति ङे तिङ्‍ला तिङ्‍यो।” सिनी सुङ्‍सुङ। 23 येशूकी तुक सुङ्‍गुप ति खोकी ङ्‍यिङ्‍ज्‍येवु लोमा ति मिशिते सिनी खोला तेपा कितुपतिवी पर्ला टाम्‍सुङ। यिने येशूकी ती लोमा ति मिशिवी सिनी सुङ्‍गुप मिन, “ङ माङुवा सेक तीला सेन्‍बु देशी सिरुप ङे नो क्‍यासिनाङ ती ति ख्‍युरुङला काङ गोसुङ?” सिनी सुङ्‍गुप तिराङ यिन। 24 दी तेरी ताम्‍ङेतिवा पङ्‍बु तेरुप ताङ टिकुप ति ती लोमा राङ यिन। तीकी बिन्‍दुप पङ्‍बु ति टेङ्‍बु यिन सिरुप ति ङ्‍यिराङला छ्‍या वे। 25 येशूकी क्‍या नङ्‍गुप यम्‍बा हलेवु लाकातिवा साङ बङी वे। दोजो ती तेरीकी कोर्ला रे ताङ रे क्‍यानी टिवु यिन्‍सिन ती टिवु थेपतिवा दी जम्‍बुलिङला साङ ज्‍योकुपला मोशोङ्‍दे यिन्‍दे।